བསྙེལ་གསོའི་འཕྲིན་ཐུང་།
མ་བཅོས་ཟང་ཐལ་རིག་པའི་ཀློང་ཡངས་ལས།།
གང་ཤར་འགག་མེད་རོལ་རྩལ་སྣང་བའི་ཆ།།
ངོ་མཚར་སྒྱུ་མ་གློག་གི་མིག་འཕྲུལ་གྱིས།།
ཡ་མཚན་སྙིང་གི་དགའ་སྟོན་ཅིར་ཡང་བྱིན།།
གཞན་ཕན་ཟླ་བ་དམ་པའི་བཅུ་དྲུག་ཆ།།
སྟོང་ཆེན་དབྱིངས་ཀྱི་གཞི་ལས་མ་གཡོས་བཞིན།།
འགག་མེད་ཚེས་གསུམ་སྣང་བའི་འོད་དཀར་ཅན།།
ཉ་གང་གསུང་གི་རང་མདངས་འགྱུར་བ་མེད།།
མཁའ་ལ་ཆུ་འཛིན་ཕུང་པོ་རབ་དཀྲིགས་པ།།
ས་དང་ཆུ་མཚོའི་དྲོད་ཀྱི་རླངས་ལས་ཏེ།།
དུས་ཀྱིས་བསྐུལ་བའི་ལས་སྟོབས་རླུང་གི་ཤུགས།།
དུས་ལ་བབས་པའི་ངག་གིས་ཉེ་བར་སྦྲན།།
མ་བརྟག་མུ་ཅོར་སྨྲ་བའི་ཐོ་ཅོ་དང་།།
གྱ་གྱུའི་འཁྱོག་ལ་འཆང་བའི་ངན་རྟོག་དག།
ཚེ་རབས་སྔ་མའི་སྐབས་སུའང་སྤངས་སྲིད་ན།།
ཟོལ་མེད་བདེན་པའི་ངག་ལ་སུ་མི་མགུ།།
རང་ཡུལ་ཕྱོགས་འཛིན་འཚུབ་མས་ཉེར་བདས་པའི།།
གློ་བུར་འགལ་རྐྱེན་སྤྲིན་ལས་རིང་བྱོལ་ན།།
འཆི་མེད་ལྷ་ལམ་དབེན་པའི་ཚལ་ཡངས་སུ།།
ཉམས་དགའ་རིག་པའི་གྲོགས་བཅས་བག་ཡངས་རྒྱུ།།
དཔལ་གྱི་སེངྒེས་མཚན་པའི་རི་བོའི་ལྗོངས།།
གྲགས་པའི་མཚན་སྙན་གཡོ་བའི་དོ་ར་རུ།།
ལུང་རིགས་རྩལ་གསུམ་ནང་ནས་རབ་རྫོགས་པ།།
གངས་གཞོན་སེང་ཕྲུག་ཁྱུ་ན་ཁྱེད་རབ་མཛེས།།
འདི་འོག་ལྷུག་བཀོད་ཀྱི་འཕྲིན་ཡིག་མ་དཔེ་མ་ཚང་བས་མཚམས་འདིར་བཞག་ཅེས་སྒྲིག་པ་པོས།།