གུ་ཡངས་བློ་བདེའི་རྒྱང་གླུ།

ཆེན་པོའི་གསོབ་འཆང་རྫུན་གྱི་ཟློས་གར།།
མི་བདེན་མེ་ལོང་གཟུགས་བརྙན་མཐོང་ནས།།
ཟིན་མེད་བྲེལ་དོས་ལོ་ཟླ་ཟད་བྱེད།།
ཨོ་རྫོབ་ཅན་ལ་ཕྱི་ཕྱག་འཚལ་ཡོད།།
གཅེས་པའི་ལུས་ཀྱི་ཟུངས་ཁྲག་དྲོན་པོ།།
ལྷག་བསམ་དག་པའི་རྟ་དང་སྦྱར་ནས།།
བསྟན་སྲོག་འཐུད་པའི་གསོས་སུ་བསྟབས་པའི།།
ལེགས་བྱས་དགའ་བས་ཡིད་སེམས་བདེ་སོང་།།
གྲགས་པའི་དོན་མིན་མི་ལུས་ཕྱེད་པོས།།
ཅུང་ཟད་འབད་པའི་མངོན་སུམ་ལག་རྗེས།།
འབྱུང་འགྱུར་ཕན་དང་བདེ་བའི་ལམ་མཚོན།།
མ་མཐོང་ཕྱི་རབས་སྐལ་བར་བཞག་ཡོད།།
སྐྱིད་ཀྱང་མི་རྟག་སྡུག་གི་བསུ་མ།།
མཐོ་ཡང་མི་བརྟན་དམའ་འབེབས་གཞི་མ།།
རེ་དོགས་མི་ཚེའི་འཕྲང་ལ་བཟུར་ནས།།
གུ་ཡངས་བློ་བདེར་སྐྱིད་ཉལ་བརྒྱག་འགྲོ།།
སྨྱུག་གསར་ཞིག་གིས་གང་བྱུང་དུ་བྲིས་པའོ།།