བླ་མ་རྒྱང་འབོད་བྱིན་རླབས་མྱུར་འཇུག་ཅེས་བྱ་བ།
གཞི་དབྱིངས་འགྱུར་མེད་ཀ་དག་ཆོས་སྐུ་ཡི་བླ་མ།།
གཞི་སྣང་ལྷུན་གྲུབ་ཁ་སྦྱོར་བདུན་ལྡན་གྱི་ངོ་བོ།།
མ་འགག་རོལ་རྩལ་གང་འདུལ་ཐུགས་རྗེ་ཡི་བདག་ཉིད།།
སྐུ་གསུམ་འདུས་ཞལ་དྲིན་ཆེན་བླ་མ་དེ་མཁྱེན་ནོ།།
ཆོས་ཟད་ཆོས་སྐུའི་བླ་མ་ཀློང་ཆེན་གྱི་རབ་འབྱམས།།
བརྒྱུད་གསུམ་འདུས་པའི་ཤིང་རྟ་འཇིགས་བྲལ་དེ་གླིང་པ།།
གཞི་གྲོལ་གདོད་མའི་སར་ཕྱིན་ཡོན་ཏན་གྱི་མགོན་པོ།།
གཉིས་མེད་བླ་མ་མ་ཏི་ས་ར་དེ་མཁྱེན་ནོ།།
གདོད་ནས་འཁྲུལ་མ་མྱོང་བའི་རང་རིག་གི་ངོ་བོ།།
ཡེ་སྟོང་བྲི་གང་བྲལ་བ་སངས་རྒྱས་ཀྱི་དགོངས་པ།།
མངོན་སུམ་རང་ངོ་སྤྲད་པའི་དྲིན་ལྡན་གྱི་བླ་མ།།
མི་འབྲལ་སྙིང་དབུས་ཙིཏྟའི་པདྨོ་རུ་རྟག་རོལ།།
ཚེས་ཆེན་བཅོ་ལྔའི་དུང་ཟླ་མཁའ་ལམ་ལ་ཤར་ཚེ།།
གང་སྐུའི་མཚན་དཔེའི་དཀྱིལ་འཁོར་མིག་ལམ་དུ་ཤར་བྱུང་།།
རིག་སྟོང་བདེན་འཛིན་བྲལ་བའི་རང་གཤིས་སུ་བཞག་དུས།།
འགྱུར་མེད་སྐུ་ཡི་བྱིན་རླབས་ལུས་འདི་ལ་སྩོལ་ཅིག།
དབྱར་གསུམ་ཁུ་བྱུག་སྙན་པའི་མགྲིན་གླུ་ཞིག་སྒྲོག་ཚེ།།
གང་གསུང་དམ་པའི་ཆོས་ཀྱི་རང་སྒྲ་དེ་དྲན་བྱུང་།།
གྲག་སྟོང་སྐྱེ་འགག་བྲལ་བའི་ངོ་བོ་ལ་བཞག་ཚེ།།
འགག་མེད་གསུང་གི་བྱིན་རླབས་མགྲིན་པ་རུ་ཞུགས་མཛོད།།
སྤྲིན་བྲལ་སྟོན་ཟླའི་ནམ་མཁའ་ལྷོང་རྐྱེན་དང་བྲལ་ཚེ།།
གང་ཐུགས་གཡོ་བ་མེད་པའི་དགོངས་སྤྱོད་དེ་དྲན་བྱུང་།།
འགྱུ་དྲན་བསལ་བཞག་བྲལ་བའི་རང་ངོ་ལ་གློད་སྐབས།།
འཁྲུལ་མེད་ཐུགས་ཀྱི་བྱིན་རླབས་སྙིང་དབུས་སུ་སྩོལ་ཤོག།
ཉིན་དྲན་མཚན་དྲན་ཉིན་མཚན་འགོར་མེད་དུ་ཁྱེད་དྲན།།
དྲན་པའི་གདུང་ཡུས་སྙིང་གི་མུན་པ་རུ་འཁྱིལ་ཚེ།།
གང་ཐུགས་ཟེར་སྟོང་འབར་བའི་འོད་གསལ་གྱི་ཐིག་ལེས།།
ནང་གི་ཉིན་བྱེད་རྣལ་འབྱོར་སྙིང་དབུས་སུ་སྐྱོལ་མཛོད།།
བླ་མ་ཕྱི་རུ་མི་བཞུགས་རང་སེམས་ཀྱི་ངོ་བོ།།
སྐྱེ་འགག་འཕོ་འགྱུར་བྲལ་བའི་གནས་ལུགས་དེ་བསྒོམས་པས།།
སྒྲིབ་གཉིས་གཟུང་འཛིན་འཆིང་བ་རང་ས་རུ་ཞི་བའི།།
དགོངས་བརྒྱུད་འཕོ་བ་ཐོབ་པའི་དངོས་གྲུབ་ཅིག་སྩོལ་ཤོག།
ཅེས་རྗེ་བླ་མ་དམ་པ་བློ་གྲོས་རྒྱ་མཚོ་ཞི་བར་གཤེགས་པའི་གསོལ་དགོངས་ནང་བྱ་བྲལ་ཀུ་སཱ་ལི་པ་རྫོགས་ཆེན་འབུམ་སྐྱབས་ལགས་དང་ནུ་མོ་དོན་འགྲུབ་སྒྲོལ་མ་རྣམ་གཉིས་ཀྱི་ངོར་པདྨ་སྐལ་བཟང་དེས་བྲིས་པའོ།།