མདོ་སྨད་ཀྱི་ཙོང་ཁའི་རི་བོའི་དུས་དེབ་གསར་འདོན་ལ་བྲིས་པའི་ཤིས་ཚིག

བརྟུལ་ཞུགས་མཆོག་གྲུབ་འཆི་མེད་སྐུ་བརྙེས་མཚོ་སྐྱེས་པདྨས་བྱིན་གྱིས་རླབས།།
མཁྱེན་པའི་གཏེར་མངའ་འཇམ་མགོན་བླ་མ་བློ་བཟང་རྒྱལ་བའི་གཟུགས་སྐུ་ངོམ།།
རླབས་ཆེན་མེས་པོའི་མཁས་མཛངས་ཕྱག་རྗེས་ངོ་མཚར་བྱེ་བས་རབ་མཛེས་པའི།།
གངས་ལྗོངས་མདོ་སྨད་ཙོང་ཁའི་རི་བོའི་གྲགས་སྙན་སྲིད་པའི་ཁྱོན་ན་འབར།།
དགེ་མཚན་འབུམ་ཕྲག་དུས་གཅིག་འཁྱིལ་བའི་ངོ་མཚར་གཏམ་གྱི་རོལ་མཚོ་ལ།།
རྗེས་སུ་ཆགས་པའི་རྣམ་དཔྱོད་ཆུ་རླུང་ཕྱོགས་ནས་སྡུད་པའི་རྨད་བྱུང་གཟུགས།།
དུས་ཀྱིས་བསྐུལ་བའི་མཚར་སྡུག་སྣང་བརྙན་རི་མོའི་ཟོལ་གྱི་བྱ་མ་རྟ།།
གངས་རིའི་གཟི་མདངས་ཕྱོགས་སུ་སྦྲན་པའི་འགྱུར་མེད་རང་གཤིས་འདི་ན་བཀྲ།།