དུས་དེབ་ཅིག་གི་མགོ་བརྗོད།

ལམ་མིན་གྱི་ནའི་མུན་པར་འཕྱན་པའི་སྙིང་རྗེའི་ཡུལ་གྱུར་སྙིགས་དུས་འགྲོ།།
རྒུད་པའི་གཡང་ལ་ཉེ་བར་ཕྱོགས་པའི་ལ་བརྒྱའི་འཁུན་སྒྲ་མ་བཟོད་ནས།།
ངལ་འཚོའི་དབུགས་འབྱིན་ལ༵མ་སྟོ༵ན་སྒྲོ༵ན་མེ༵་གཟི་མདངས་གསར་པའི་འོད་དཀར་ཅན།།
འདི་ན་འགྲེམ་པའི་ལེགས་སྐྱེས་མཆོག་འདི་སྔོན་མེད་དཔྱིད་ཀྱི་རྒྱལ་མོའི་དབྱངས།།
ཉེས་སྤྱོད་སྟུག་པོའི་སྤྲིན་གྱི་རུམ་ནས་ཉེར་ཐོན་ངོ་མཚར་ཟླ་གཞོན་གཟུགས།།
རྣམ་དཔྱོད་རི་བོང་མཚན་མས་རབ་མཛེས་སྐྱེ་དགུའི་མཁའ་ན་རྟག་བརྗིད་པའི།།
ཚེས་གསུམ་སྣང་བའི་ཡོན་ཏན་ཡར་འཕེལ་ཆ་གང་བཅུ་དྲུག་ལུས་རྫོགས་པས།།
འགྲོ་འདི་རྫོགས་ལྡན་དཔལ་ལ་འགོད་པའི་དགེ་མཚན་བྱེ་བས་ཤིས་གྱུར་ཅིག།
རྫོགས་ཆེན་པདྨ་སྐལ་བཟང་དེས་སོ།།