གསང་ཆེན་བསྟན་པའི་སྒྲོན་མེ་གྲུབ་པའི་དབང་ཕྱུག་ལུང་རྟོགས་བསྟན་པའི་རྒྱལ་མཚན་གྱི་ཞབས་བརྟན་གསོལ་འདེབས་རྟག་བརྟན་ཚངས་པའི་སྒྲ་དབྱངས།ཀུན་ཁྱབ་གདོད་ནས་འགྱུར་མེད་འཕོ་བྲལ་གཤིས།། ཟུང་འཇུག་ཁ་སྦྱོར་བདེ་ཆེན་རྡོ་རྗེའི་སྐུ།། རབ་འབྱམས་ཚེ་ལྷའི་ངོ་བོར་རྟག་བཞུགས་པའི།། བདེན་ཚིག་གསུང་གི་མཐུ་བྱིན་རྒྱལ་རྣམས་སྩོལ།། ཐུབ་པའི་ལུང་རྟོགས་བསྟན་པའི་སྙིང་པོའི་བཅུད།། གསང་ཆེན་སྙིང་པོའི་རྒྱལ་མཚན་སྲིད་པའི་རྩེར།། སྒྲེང་མཛད་གྲུབ་པའི་དབང་ཕྱུག་འཁོར་ལོའི་མགོན།། ཞབས་པད་བསྐལ་བ་རྒྱ་མཚོར་བརྟན་གྱུར་ཅིག། ཀུན་བརྟགས་མཚན་མའི་གདོན་ཚོགས་དབྱིངས་སུ་ཞི།། གཞན་དབང་འཁྲུལ་བ་ལས་གྲོལ་གཉུག་མའི་གཤིས།། ཡོངས་གྲུབ་ཚེ་ལྷའི་ངོ་བོར་རྟག་བརྟན་པའི།། ངོ་མཚར་ཆོ་གས་སྲིད་པ་མཛེས་གྱུར་ཅིག། རྣམ་པ་ཀུན་གྱི་མཆོག་ལྡན་སྟོང་ཉིད་དབྱིངས།། མ་འགགས་དྭངས་མ་བདེ་ཆེན་ཡེ་ཤེས་གཟུགས།། ལྷུན་གྲུབ་མཚན་དཔེར་རྫོགས་པའི་ངོ་མཚར་དཔལ།། མི་འགྱུར་རྡོ་རྗེའི་ཁམས་སུ་རྟག་བརྟན་ཤོག། དག་ཆེན་ཡེ་ཤེས་སྒྱུ་མའི་རོལ་གར་གྱི།། གཟུགས་སྐུའི་དཀྱིལ་འཁོར་རྡོ་རྗེའི་ཕུང་ཁམས་ཆེར།། ཡ་མཚན་རྟགས་ཀྱི་ཕྱག་རྒྱ་མངོན་གྱུར་པ།། གྲུབ་གཉིས་འདོད་དགུའི་གཏེར་དུ་འཚོ་གཞེས་གསོལ།། བརྒྱུད་ལྡན་བླ་མའི་གདམས་ཟབ་བདུད་རྩིའི་བཅུད།། ངོམས་མེད་རོལ་པའི་བརྟུལ་ཞུགས་རྩལ་རྫོགས་པས།། གཞི་གྲོལ་གཉུག་མ་དོན་གྱི་རྒྱལ་ཐབ་ཆེར།། དབང་སྒྱུར་ཆོས་ཀྱི་རྒྱལ་པོར་ཡུན་བཞུགས་ཤོག། གཟོད་ནས་མི་འགྱུར་རྣམ་དག་ཐིག་ལེའི་སྐུ།། སྣང་སྟོང་དབྱེར་མེད་རྡོ་རྗེ་ནམ་མཁའི་གཟུགས།། འཁོར་འདས་མཉམ་ཉིད་སྲིད་ཞིའི་དྭངས་མའི་ཁམས།། འཕོ་མེད་དབུ་མའི་སྲོག་ཏུ་གཏན་འཁྱིལ་ཤོག། གསང་ཆེན་རྒྱུད་རྣམས་ཀུན་གྱི་གསང་བའི་མཛོད།། མན་ངག་སྙིང་ཐིག་འོད་གསལ་རྫོགས་ཆེན་གྱི།། ཐུན་མིན་རིག་འཛིན་རྣམ་བཞིའི་གསང་ལམ་ཆེའི།། གསང་འཛིན་ཆོས་ཀྱི་ཁྲི་ལ་རྟག་བཞུགས་གསོལ།། ཀ་དག་ཁྲེགས་ཆོད་ལྟ་བ་མངོན་གྱུར་ཅིང་།། ལྷུན་གྲུབ་སྣང་བཞིའི་སྒོམ་པར་རྩལ་འབྱོངས་པས།། སྣ་ཚོགས་འཕྲིན་ལས་སྤྱོད་པ་མཐར་ཕྱིན་པའི།། འབྲས་སྣང་རྟག་ཁྱབ་དམ་པར་གཡོ་མེད་ཤོག། ཕུན་ཚོགས་རྟག་པ་དམ་པའི་དགེ་ལེགས་མཐུ།། རྡུལ་བྲལ་སྒྱུ་མའི་འཁོར་ལོར་ཡོངས་ཤར་བའི།། བཀྲ་ཤིས་སྣང་བ་བྱེ་བའི་དཔལ་ཡོན་གྱིས།། མཁའ་མཉམ་སྲིད་པའི་ཁྱོན་ཀུན་ཁྱབ་གྱུར་ཅིག། གངས་ལྡན་ཤར་གྱི་རི་བོའི་འཕགས་པའི་ཞིང་།། ས་ལ་སྤྱོད་པའི་འོག་མིན་པདྨའི་ལྗོངས།། ཡ་ཆེན་ཨོ་རྒྱན་བསམ་གཏན་ཆོས་ཀྱི་གླིང་།། ནུབ་མེད་སྲིད་མཐར་རྒྱས་པའི་བཀྲ་ཤིས་ཤོག། ཅེས་པའང་རང་སློབ་བསོད་ནམས་རྒྱ་མཚོའི་ངོར་རྫོགས་ཆེན་པདྨ་སྐལ་བཟང་དེས། རུ་དམ་ཡང་དབེན་པདྨ་ཐང་ལུང་རྟོགས་པདྨའི་དགའ་ཚལ་ནས་ཆོས་མཚམས་ཐུན་གསེང་ཞིག་ལ་འཕྲལ་མར་བྲིས་ཕུལ།། |