རྟོགས་ལྡན་བླ་མ་བློ་གྲོས་རྒྱ་མཚོ་རིན་པོ་ཆེའི་ཞབས་བརྟན་གསོལ་འདེབས་བདེན་ཚིག་རྡོ་རྗེའི་མགྲིན་དབྱངས།ཨོཾ་སྭ་སྟི་སིདྡྷི། བསླུ་མེད་མཆོག་གསུམ་རྩ་གསུམ་སྲུང་མ་དང་།། རབ་འབྱམས་ཚེ་ལྷའི་དཀྱིལ་འཁོར་བགྲང་ཡས་ཚོགས།། འཆི་མེད་རིག་འཛིན་གྲུབ་པའི་དྲང་སྲོང་གིས།། དེང་འདིར་བདེན་ཚིག་གྲུབ་པའི་ཤིས་པ་སྩོལ།། རིགས་ལྔའི་མཁའ་འགྲོ་འབུམ་ཕྲག་ཡངས་པའི་འཁོར།། ཞིང་སྔགས་ལྷན་སྐྱེས་ཌཱཀྐིའི་ཚོགས་རྣམས་ཀྱིས།། བསྟན་འཛིན་དམ་པའི་སྐུ་ཚེའི་འཕྲང་སོལ་ལ།། མི་འགྱུར་བརྟན་པའི་གཡུང་དྲུང་རེ་ཁ་བཀོད།། མགོན་ཁྱོད་འཕོ་བྲལ་དྭངས་མའི་ཡེ་ཤེས་སྐུར།། མཐའ་ཡས་ཚེ་ལྷའི་དཀྱིལ་འཁོར་གཙོར་བཞེངས་ཏེ།། མི་ཤིགས་ཁ་སྦྱོར་བདུན་གྱི་བདག་ཉིད་དུ།། ཞབས་པད་བསྐལ་པ་རྒྱ་མཚོར་བརྟན་གྱུར་ཅིག། ཕྲ་རགས་བརྟན་གཡོའི་དྭངས་བཅུད་ཚེ་ཡི་དངོས།། མ་ལུས་བཅུད་དུ་འདྲིལ་བའི་སྙིང་པོའི་སྲོག། མི་ནུབ་ཨེ་ཝཾ་ཟུང་འཇུག་ཕྱག་རྒྱ་ཆེར།། འཕོ་མེད་ཡོངས་གྲུབ་ཆེན་པོར་རྟག་བརྟན་གསོལ།། གདོད་མའི་མགོན་པོ་མི་ཡི་རྫུར་ཞུགས་པ།། ཁྱབ་བདག་འཇིགས་མེད་གུ་ཎ་ན་ཐ་ཡིས།། ཆིག་བརྒྱུད་གདམས་པ་གཏད་པའི་ཐུགས་ཀྱི་སྲས།། ངེས་གསང་བསྟན་པའི་རྒྱན་དུ་མི་འདའ་བཞུགས།། ལས་རླུང་དབྱིངས་སུ་དག་པའི་ཡེ་ཤེས་རྒྱུན།། འཕོ་བྲལ་དབུ་མའི་སྲོག་ཏུ་ཡོངས་ཚུད་པས།། སྐྱེ་འཇིག་བགྲེས་བྲལ་འཆི་མེད་དམ་པའི་མགོན།། མི་འགྱུར་རྡོ་རྗེའི་སྐུ་རུ་རྟག་བཞུགས་གསོལ།། འགྱུར་མེད་སྐུ་ཡི་མཚན་བཟང་རྟག་ཏུ་བརྟན།། ཟབ་གསང་གསུང་གི་སྒྲ་དབྱངས་རྒྱུན་མི་ཆད།། གཡོ་མེད་ཐུགས་ཀྱི་དགོངས་པའི་རྩལ་ཆེན་རྫོགས།། རྟག་པར་ཆོས་འཁོར་དང་བཅས་བཞུགས་པར་སྨོན།། སྡེ་བཞིའི་དཔལ་གྱིས་མངོན་མཐོ་རུ་དམ་ལུང་།། ཆོས་སྲིད་དགའ་བ་ཡར་འཁྱིལ་ལྷའི་མདུན་ས།། འཆི་མེད་མཆོག་གྲུབ་པདྨའི་ཡང་རྫོང་ཆེར།། གཡོ་མེད་ཏིང་འཛིན་བསྒོམ་པས་ཡུན་འཚོ་ཤོག། ཚེ་རིང་ལྷ་ཡི་གནས་མཆོག་རབ་མཛེས་ལྗོངས།། ཞི་བའི་བདུད་རྩི་འཐུང་བའི་མེས་པོའི་ཁྱིམ།། བདག་གིར་བཞེས་ལས་རྩ་རླུང་འཕོ་བའི་ཁམས།། འཕོ་མེད་དྭངས་མའི་ཐིག་ལེར་ཡོངས་བཟླུམ་ཤོག། གདེངས་ཅན་ཆུ་གཏེར་བཞི་ཡི་སྐ་རགས་ཅན།། ས་ཆེན་རལ་བའི་གཙུག་ན་མངོན་མཛེས་པ།། དཔལ་ཀྱི་སེངྒེས་མཚན་པའི་རི་བོའི་སྤོར།། གང་ཁྱེད་གདོང་ལྔའི་རྒྱལ་པོ་རྟག་བརྟན་ཤོག། ཤུགས་དྲག་སྨོན་པས་བསྐུལ་བའི་བདེན་ཚིག་དང་།། མངོན་རྟོགས་ཡིད་ལ་གོམས་པའི་ཏིང་འཛིན་མཐུས།། རིགས་བརྒྱའི་ཁྱབ་བདག་དཔལ་མགོན་བླ་མ་མཆོག། བདག་སོགས་གདུལ་བྱའི་དཔལ་དུ་འཚོ་གཞེས་གསོལ།། ལྷག་བསམ་དད་བརྒྱས་དྲངས་བའི་རེ་སྨོན་འབྲས།། མཆོག་གསུམ་ལྷ་དང་སྲུང་མའི་བདེན་མཐུ་ཡིས།། མ་ལུས་ཡོངས་སུ་འགྲུབ་པའི་ངོ་མཚར་དཔྱིད།། ནུབ་མེད་དགེ་ལེགས་དཔལ་གྱིས་ཤིས་གྱུར་ཅིག། གསང་གསུམ་ཉིན་བྱེད་མཁའ་ལ་རྟག་ཏུ་ཤར།། ཕྲིན་ལས་འོད་ཟེར་བྱེ་བས་གླིང་བཞི་ཁྱབ།། ལས་ཅན་གདུལ་བྱའི་པད་ཚལ་རབ་ཏུ་རྒྱས།། བཀྲ་ཤིས་དགེ་བས་ས་གསུམ་ཡོངས་འགེངས་ཤོག། ཅེས་པ་འདི་ཉིད་ཤྲཱི་སེང་ཆོས་གྲྭ་ཆེན་པོའི་ལྷོ་ལུང་རིགས་བསམ་འཕེལ་གླིང་གི་སྡེ་སྣོད་འཛིན་པ་བསྟན་འཛིན་བཟང་པོ་ལགས་ཀྱིས་བསྐུལ་ངོར། རབ་གནས་ས་སྟག་ཧོར་ཟླ་༧པའི་ཚེས་༥ལ་ཤཱཀྱའི་དགེ་སྦྱོང་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དེས་ཤར་ཐོས་བསམ་ནོར་བུའི་གླིང་གི་ཉེ་ཞོལ་རང་སྤྱིལ་གྱི་དགའ་ཚལ་ནས་རྟེན་འབྱུང་དཀར་པོའི་ལེགས་སྨོན་དུ་བྲིས་པ་སྨོན་དོན་ཇི་བཞིན་འགྲུབ་པའི་རྒྱུར་གྱུར་ཅིག། |