གཡུ་ཁོག་བྱ་བྲལ་གྱི་ཡང་སྤྲུལ་དམ་པ་མཉམ་མེད་རང་བྱུང་རྡོ་རྗེའི་ཞབས་བརྟན་གསོལ་སྨོན་འཆི་མེད་གྲུབ་པའི་རྔ་སྒྲ།ཨོཾ་སྭ་སྟི། བསླུ་མེད་མཆོག་གསུམ་རྩ་གསུམ་རྒྱ་མཚོ་དང་།། མཐའ་ཡས་རབ་འབྱམས་ཚེ་ལྷའི་དཀྱིལ་འཁོར་གཙོ།། ཕོ་ཉ་མགྱོགས་མ་གྲུབ་པའི་དྲང་སྲོང་གིས།། དེང་འདིར་བདེན་ཚིག་གྲུབ་པའི་དགེ་ལེགས་སྩོལ།། མཆོག་ཏུ་མི་འགྱུར་བདེ་ཆེན་རྡོ་རྗེའི་ཁམས།། སྟོང་ཆེན་དབྱིངས་ཀྱི་ངོ་བོར་རྟག་བརྟན་པ།། ཟུང་འཇུག་ཁ་སྦྱོར་ཡན་ལག་བདུན་གྱི་དངོས།། འཕོ་བྲལ་དྭངས་མའི་སྲོག་ཏུ་རྟག་བརྟན་ཤོག། སྣ་ཚོགས་བརྟན་དང་གཡོ་བའི་ཆོས་ཁམས་བཅུད།། མི་ཤིགས་ཚེ་ཡི་གོང་བུར་དྲིལ་བའི་གཟུགས།། ཇི་སྲིད་ནམ་མཁའ་གནས་གྱུར་དེ་སྲིད་དུ།། གྲགས་པའི་དཔལ་གྱིས་ཀུན་ནས་བསྲུང་གྱུར་ཅིག། བཱི་མའི་སྒྱུ་འཕྲུལ་འཇིགས་མེད་སྐལ་བཟང་མཚན།། མཁས་པའི་ཁྱུ་མཆོག་ཡེ་ཤེས་སེངྒེའི་ཞབས།། གྲུབ་བརྙེས་བྱ་བྲལ་ཆོས་དབྱིངས་རང་གྲོལ་དུ།། སྐྱེ་བའི་ཕྲེང་བ་འཛིན་གང་ཞབས་བརྟན་གསོལ།། ཟླ་བྲལ་མཉམ་མེད་མཁྱེན་པའི་ཀློང་ཆེན་པོར།། མ་བཅོས་རང་བྱུང་དོན་གྱི་ཡེ་ཤེས་བརྙེས།། རིགས་བརྒྱའི་ཁྱབ་བདག་རྡོ་རྗེ་འཛིན་པ་མཆོག། མི་འགྱུར་རྡོ་རྗེའི་ཁྲི་ལ་རྟག་བཞུགས་ཤོག། ཟབ་རྒྱས་ཆོས་ཀྱི་འཁོར་ལོ་རྟག་ཏུ་བསྐོར།། རིམ་གཉིས་གདམས་པས་སྐལ་ལྡན་སྨིན་ཅིང་གྲོལ།། རྨད་བྱུང་ཐུགས་བསྐྱེད་གེགས་མེད་ངང་གིས་འགྲུབ།། གསང་གསུམ་མཛད་པ་མཐར་ཕྱིན་བཀྲ་ཤིས་སྩོལ།། ཨེ་དབྱིངས་བདེ་ཆེན་ཡེ་ཤེས་སྒྱུ་མའི་གར།། ཝཾ་ཡིག་སྟོང་པའི་དབྱིངས་སུ་བསྡོམས་པ་ལས།། གཉིས་མེད་ཐབས་ཤེས་བདེ་མཆོག་རོལ་བའི་རྒྱུན།། མ་འགག་ལྷུན་གྲུབ་སྲིད་པའི་རྒྱན་དུ་བརྟན།། མདོ་ཁམས་ས་ཡི་ལྟེ་བ་གཡུ་ཡི་མཁར།། ཐེག་ཆེན་ཆོས་འཁོར་པདྨའི་དགའ་ཚལ་གྱི།། ལུང་དང་རྟོགས་པའི་བདག་ཉིད་རྒྱལ་བའི་བསྟན།། བཤད་དང་སྒྲུབ་པས་སྤེལ་ལ་བསྙེམ་བྲལ་ཤོག། འཇིགས་བྲལ་གྲུབ་པའི་དབང་ཕྱུག་རྫོགས་ཆེན་པའི།། རིང་ལུགས་འཁོར་ལོ་གསུམ་གྱིས་འཛིན་པ་ཡི།། མཛད་བཟང་མཁའ་མཐར་ཁྱབ་པའི་རྟེན་འབྲེལ་མཐུ།། འགྲུབ་ལ་སྲས་བཅས་རྒྱལ་བས་མཐུན་འགྱུར་མཛོད།། ཚོགས་གཉིས་བསོད་ནམས་སྤུངས་པའི་ཤེ་མོང་རྒྱས།། བསླབ་གསུམ་ནོར་བུའི་རྒྱན་གྱིས་དུས་ཀུན་ཕྱུག། སྡེ་བཞིའི་འབྱོར་བའི་དཔལ་གྱིས་མངོན་པར་མཐོ།། ཕུན་ཚོགས་ལྔ་དང་རྟག་ཏུ་འབྲལ་མ་གྱུར།། བཀྲ་ཤིས་རེ་སྨོན་དག་པའི་ཡར་གྱི་ཟླ།། བཀྲ་ཤིས་བསམ་དོན་ཀུན་འགྲུབ་ཉ་གང་བའི།། བཀྲ་ཤིས་རྟག་པ་དམ་པའི་དགེ་མཚན་གྱི།། བཀྲ་ཤིས་སྣང་བས་ས་གསུམ་ཡོངས་ཁྱབ་ཤོག། ཅེས་པའང་མཆོག་སྤྲུལ་རིག་འཛིན་ཟླ་འོད་དང་། སྐུ་ཞབས་དཔལ་ལྡན་རྡོ་རྗེ་ལགས་ལྷན་རྒྱས་ནས་བསྐུལ་ངོར་རབ་གནས་མེ་གླང་ཧོར་ཟླ་༥པའི་ཚེས་ལ་རྫོགས་ཆེན་པདྨ་སྐལ་བཟང་ངམ་ཤཱཀྱའི་དགེ་སྦྱོང་ཐུབ་བསྟན་ལུང་རྟོགས་བསྟན་པའི་རྒྱལ་མཚན་གྱིས་གནས་དེ་ཉིད་དུ་འདུས་མདོའི་སྨིན་དབང་ཕུལ་བའི་བར་གསེང་ཞིག་ལ་བྲིས་པའོ།། སྔོན་དུས་བཱི་མའི་སྒྱུ་འཕྲུལ་འཇིགས་མེད་མཚན།། བར་དུ་ཡེ་ཤེས་སེངྒེ་ཕྱི་མའི་དུས།། བྱ་བྲལ་འཁྲུལ་ཞིག་ཆོས་དབྱིངས་རང་གྲོལ་ཏེ།། མཉམ་མེད་རང་བྱུང་རྡོ་རྗེར་གསོལ་བ་འདེབས།། |