རྡོ་གྲུབ་མཁན་ཆེན་རྣམ་བཞིའི་ཡ་གྱལ་མགར་བ་མཁན་པོའི་ཡང་སྤྲུལ་འཇིགས་མེད་འོད་གསལ་མཆོག་གི་ཞབས་བརྟན་གསོལ་འདེབས་བཀྲ་ཤིས་གྲུབ་པའི་དབྱངས་སྙན།ཨོཾ་སྭ་སྟི་སིདྡྷི། དགེ་ལེགས་ཡོན་ཏན་བྱེ་བའི་དཔལ་གྱི་མཛོད།། མཐའ་ཡས་ཤེས་བྱའི་ཁམས་ལ་རྟག་ཁྱབ་པ།། དཔག་མེད་ཚེ་ལྷའི་དཀྱིལ་འཁོར་རབ་འབྱམས་ཀྱིས།། དེང་འདིར་བདེན་ཚིག་གྲུབ་པའི་མཐུ་བྱིན་སྩོལ།། བརྟན་གཡོ་འཁོར་འདས་སྲིད་ཞིའི་དྭངས་མའི་བཅུད།། མི་འགྱུར་ཚེ་ཡི་སྙིང་པོར་འདྲིལ་བའི་སྲོག། འཕོ་མེད་རྡོ་རྗེའི་ཆོས་སུ་རྟག་བརྟན་པ།། གཟི་དམར་དབང་གི་ཞགས་པས་དུས་འདིར་སྲུངས།། ཀུན་བརྟགས་འཁྲུལ་བས་བསྐྱེད་པའི་བར་ཆད་བདུད།། གཞན་དབང་མི་མཐུན་རྒུད་པ་ཉེར་ཞི་ནས།། ཡོངས་གྲུབ་བྲི་གང་བྲལ་བ་གཉུག་མའི་ཚེ།། གཞོམ་མེད་འཕོ་འགྱུར་བྲལ་བའི་ཐིག་ལེར་ཟླུམས།། ངེས་འབྱུང་རྩ་བ་བརྟན་པའི་ཡང་དག་ཁྲིམས།། ཚངས་སྤྱོད་ཐར་པའི་རྒྱལ་མཚན་སྲིད་པའི་བླར།། བསྒྲེངས་མཛད་ངོ་མཚར་ལྷ་བརྒྱའི་གཙུག་གི་རྒྱན།། ངུར་སྨྲིག་འཛིན་པའི་མཆོག་ཁྱེད་ཞབས་བརྟན་གསོལ།། དང་པོར་དམ་པའི་བཤེས་གཉེན་སྤྱི་བོར་བསྙེན།། བར་དུ་གདམས་ཟབ་བདུད་རྩི་བཅུད་དུ་བཞེས།། མཐའ་མར་བསམ་བསྒོམ་ཆོ་ག་ཡོངས་རྫོགས་པ།། ཏིང་འཛིན་གཡོ་མེད་གང་ཁྱེད་བསྐལ་བརྒྱར་བརྟན།། མ་ལུས་ཆོས་ཀུན་ངོ་བོ་དེ་བཞིན་ཉིད།། རྒྱལ་རྣམས་ཐུགས་ཀྱི་གསང་བ་ཆེན་པོའི་དབྱིངས།། སོ་སོ་རང་རིག་འཕགས་པའི་དགོངས་སྤྱོད་ལ།། དབང་འབྱོར་ཤེས་རབ་རྫོགས་ཁྱོད་རྟག་བརྟན་ཤོག། འཇིགས་མེད་བདུད་ལས་རྣམ་རྒྱལ་རྡོ་རྗེའི་སྐུ།། མཁའ་མཉམ་ཞིང་རྡུལ་མཉམ་པར་རྟག་བཀོད་དེ།། འོད་གསལ་གསང་ཆེན་ངེས་དོན་སྙིང་པོའི་སྒྲས།། འགྲོ་བློའི་ཡིད་ཀྱི་མུན་པ་མཐར་བྱེད་ཤོག། གང་མཚན་སྐུ་ཡི་བཀོད་པའི་དཀྱིལ་འཁོར་གཟུགས།། ཞབས་པད་རྡོ་རྗེའི་ཁྲི་ལ་རྟག་བརྟན་པའི།། བཀྲ་ཤིས་རེ་ཁ་བསྒྱིངས་བའི་གཡུང་དྲུང་རིས།། ནམ་ཡང་གཡོ་མེད་སྲིད་ཞིའི་དཔལ་དུ་ཤོག། ཅེས་གྲུབ་དགོན་བླ་གྲྭ་སྤྱིའི་ཐུགས་བཞེད་བཞིན་ཁ་དབྱངས་བདེན་ཚིག་ཏུ་སྨོན་པ་ཤོ་ལོ་ཀ་བཀྲ་ཤིས་རྟགས་ཀྱི་གྲངས་ལྡན། དུས་མཐའི་ཆོས་སྨྲ་བ་ཤཱཀྱའི་དགེ་སྦྱོང་ཐུབ་བསྟན་ལུང་རྟོགས་བསྟན་པའི་རྒྱལ་མཚན་ནམ་པདྨ་སྐལ་བཟང་དེས། རབ་རྒྱན་ལྕགས་སྟག་ཆུ་སྟོད་ཟླའི་ཡར་ཚེས་༡༣ཉིན་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་ནས་འཆད་ཉན་ཐུན་གྱི་བར་གསེང་མཚམས་མལ་ནས་བྲིས།། |