མཁྱེན་འབྲུག་ཁྲི་སྟོན་གྱི་ལེགས་སྦྱར།ཨོཾ་སྭ་སྟི། སྟོན་མཆོག་ལྷ་མིའི་མཆོད་འོས་ཤཱཀྱའི་ཏོག། འགོག་ལམ་བདེན་པའི་ངོ་བོ་དམ་པའི་ཆོས།། རིག་གྲོལ་ཡོན་ཏན་མཆོག་ལྡན་དགེ་འདུན་ཏེ།། རིན་ཆེན་རྣམ་གསུམ་སྤྱི་བོའི་རྒྱན་དུ་བསྙེན།། མདོ་རྒྱུད་མན་ངག་ཆུ་གཏེར་བྱེ་བའི་མཛོད།། མཁས་དང་གྲུབ་པའི་གདེངས་ཅན་རོལ་བའི་གནས།། མ་དྲོས་ཀླུ་དབང་རྒྱལ་བ་རྫོགས་ཆེན་པ།། ཡབ་སྲས་རིག་འཛིན་བརྒྱུད་པས་དེང་འདིར་སྐྱོངས།། སྙིགས་དུས་རྒུད་པའི་མུན་པ་སྟོབས་ལྡན་ཚེ།། ཤིན་ཏུ་ཉག་ཕྲའི་བསྟན་སྲོག་གཉིས་པའི་དབུགས།། འབྱིན་ལ་སྣང་བ་དམ་པའི་མཐུ་འཆང་བ།། མཆོག་སྤྲུལ་ཟླ་གཞོན་གསར་པ་ཟུང་དེ་རྒྱལ།། སླར་ཡང་སྨྲས་པ། རྣམ་དག་ཚུལ་ཁྲིམས་རྩ་བ་རབ་ཏུ་བརྟན།། མཆོག་ཏུ་མི་གཡོ་ཏིང་འཛིན་ཡལ་ག་རྒྱས།། ཤེས་རབ་ཆེན་པོའི་འབྲས་བུ་ཡོངས་སྨིན་པ།། མཚན་བཟང་སྐུ་ཡི་ལྗོན་པ་རྟག་བརྟན་ཤོག། ཡང་དག་བསྟན་ལ་བྱི་དོར་བྱེད་པའི་ཚེ།། མངོན་ལྐོག་འཚེ་བའི་རིག་སྔགས་མཐུ་བདོ་བར།། གྲུབ་པའི་དྲང་སྲོང་ཚེ་འཛིན་དཔལ་གྱི་ལྷས།། མཆོག་ཁྱེད་རྣམ་གཉིས་ནམ་ཡང་བསྲུང་གྱུར་ཅིག། ཤེས་བྱ་རྣམ་པར་མཁྱེན་པའི་ཤེས་རབ་དང་།། ལེགས་ཉེས་བླང་དོར་འབྱེད་པའི་རྣམ་དཔྱོད་བཅས།། ཆེན་པོའི་དབུས་ན་མི་འཇིགས་སྨྲ་བའི་ཟླ།། སྤོབས་པའི་གཏེར་ཆེན་འཇམ་དཔལ་དཔའ་བོས་བྱིན།། མཁའ་མཉམ་མ་རྒན་འགྲོ་བ་བུ་བཞིན་དུ།། སྙིང་རྗེ་ཆེན་པོའི་ཕྱག་གིས་ལེགས་བསྐྱང་ཞིང་།། དམན་ལ་ལྷག་པར་བྱམས་པའི་ངང་ཚུལ་ཅན།། བརྩེ་ཆེན་ཡེ་ཤེས་མིག་མི་འཛུམ་པས་སྩོལ།། སྙིང་སྟོབས་མཆོག་ཏུ་མི་ཕྱེད་རྡོ་རྗེའི་ཐུགས།། ཟབ་ཡངས་རྩེ་བརྒྱ་གདེངས་པའི་ཟིལ་རྔམས་དང་།། ཞུམ་མེད་བརྟན་པའི་ཤུགས་སྟོབས་བཟོད་དཀའི་ཚུལ།། མཐུ་སྟོབས་ནུས་པ་གསང་བའི་བདག་པོས་བྱིན།། ཧ་ཅང་གདུལ་དཀའི་མི་བསྲུན་ནག་པོའི་སྡེ།། མ་རུང་བདུད་ཀྱི་རུ་མཚོན་ཆེར་གཡོའི་ཚེ།། རྩ་གསུམ་དགྲ་ལྷ་སྲུང་མའི་ཚོགས་བཅས་ཀྱིས།། གཡུལ་རྒྱལ་ཤིས་པའི་བ་དན་ཁྱོད་ལ་སྩོལ།། མཆོག་གམ་དམན་པའི་ཡིད་ཀྱི་རི་མོ་བློ་གྲོས་འཁྱོག་པོའི་ནགས་ཀློང་དུ།། རྣམ་པར་འཕྱན་ཚེ་གཟུ་བོར་གནས་པའི་རྣམ་དཔྱོད་དྲང་པོའི་བརྡ་ཐབས་ཀྱིས།། ལུགས་གཉིས་མཛད་དཀའ་འབུམ་གྱི་མཐར་སོན་ལམ་སྟོན་དམ་པ་བཤེས་ཀྱི་མཆོག། དགོས་འདོད་ཀུན་འབྱུང་ནོར་བུའི་ཟླ་བོར་ཀུན་ལ་སྨན་པའི་མཆོག་ཏུ་ཤོག། ཚེ་འདིར་ལུས་སྲོག་སྐྱེད་པའི་ཕ་དང་མ།། རྟེན་འདིའི་རིན་ཐང་སྦྱིན་པའི་མཁན་སློབ་བཤེས།། ཡང་གཅིག་མ་བརྗེད་ཐུགས་ཀྱི་མེ་ལོང་ལ།། རྣམ་ཀུན་བྱི་དོར་རྗེས་དྲན་མེལ་ཚེ་མཛོད།། དཔལ་གྱི་སེངྒེའི་རིར་གནས་དམར་སེར་ཁྱུ།། ཟླ་གྲོགས་བྲལ་བའི་ངང་མོའི་ཚུལ་བཞིན་དུ།། ཁྱོད་ལ་འཕྲེང་བའི་གདུང་བས་མ་བཟོད་པར།། ཤིས་པའི་མེ་ཏོག་རྒྱང་ནས་ཡུན་དུ་འཐོར།། མཁའ་ན་བཀྲ་ཤིས་བདུད་རྩིའི་ཆུ་འཛིན་དཀྲིགས།། ས་ལ་བཀྲ་ཤིས་འདོད་རྒུ་གཡང་དུ་འཁྱིལ།། བར་ན་བཀྲ་ཤིས་ཕུན་ཚོགས་རྣམ་ལྔ་འཛོམས།། ཕྱོགས་དུས་བཀྲ་ཤིས་དགེ་བས་མཛེས་གྱུར་ཅིག། ཅེས་མདོ་ཁམས་རྒྱལ་བ་རྫོགས་ཆེན་པའི་གཙུག་ལག་ཟུང་གི་ལྟེ་གནས་ཕོ་བྲང་ཁམས་གསུམ་ཟིལ་གནོན་གྱི་ཡང་སྟེང་གཟིམ་སྤྱིལ་འཆི་མེད་གྲུབ་པའི་དགའ་ཚལ་ནས་པདྨ་སྐལ་བཟང་དེས་སྦྱར་པའོ།། |