ཡིག་དྲུག་བཟླས་བསྐུལ་གྱི་བསྐྱེད་ཆོག་ཁྱེར་བདེ་བཞུགས།སངས་རྒྱས་ཆོས་དང་སོགས་དང་། སེམས་ཅན་ཐམས་ཅད་སོགས་སྐྱབས་སེམས་སྔོན་དུ་འགྲོ་བས། ཨོཾ་སྭཱ་བྷ་ཝ་སོགས་མཐར། ཧྲཱིཿ སྟོང་པའི་ངང་ལས་རང་སྣང་རྣམ་དག་པ།། ངོ་མཚར་བདེ་བ་ཆེན་པོའི་ཞིང་ཁམས་དབུས།། མདུན་མཁར་པད་དཀར་ཟླ་བའི་གདན་གྱི་སྟེང་།། འཕགས་མཆོག་འཇིག་རྟེན་དབང་ཕྱུག་སྟོན་ཟླའི་མདོག། ཞལ་གཅིག་ཕྱག་བཞི་ཞབས་གཉིས་སྐྱིལ་ཀྲུང་བཞུགས།། རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར།། འོག་མའི་ཕྱག་གཡས་ཤེལ་དཀར་བགྲང་ཕྲེང་དང་།། གཡོན་པས་འདབ་དྲུག་པདྨ་དཀར་པོ་བསྣམ།། སྣ་ཚོགས་དར་དང་རིན་ཆེན་རྒྱན་གྱིས་མཛེས།། དབུ་གཙུག་རིགས་བདག་འོད་དཔག་མེད་པས་མཚན།། མཆོག་གསུམ་རྩ་གསུམ་ཀུན་འདུས་ཐུགས་རྗེའི་ལྷ།། མ་ལུས་རྒྱལ་ཀུན་འདུས་པའི་ངོ་བོར་གསལ།། ཕ་མས་གཙོ་བྱས་བདག་སོགས་སེམས་ཅན་གྱིས།། རྡུལ་སྙེད་ལུས་ཀྱིས་གུས་པས་ཕྱག་འཚལ་ཞིང་།། དངོས་འབྱོར་ཡིད་ལས་བྱུང་བའི་མཆོད་པ་འབུལ།། ཐོག་མེད་ནས་བསགས་སྡིག་ལྟུང་མཐོལ་ཞིང་བཤགས།། ཟག་བཅས་ཟག་མེད་དགེ་ལ་རྗེས་ཡི་རང་།། ཟབ་རྒྱས་ཆོས་ཀྱི་འཁོར་ལོ་བསྐོར་བར་བསྐུལ།། མྱ་ངན་མི་འདའ་རྟག་ཏུ་བཞུགས་པར་གསོལ།། དགེ་ཚོགས་བྱང་ཆེན་རྒྱ་མཚོར་ཡོངས་བསྔོས་ཏེ།། ཐལ་སྦྱར་སྙིང་ཁར་ཟུམ་པའི་བརྟུལ་ཞུགས་ཀྱིས།། རིག་སྔགས་མགྲིན་པའི་དབྱངས་ལ་ཉེར་བཀོད་ནས།། རྩེ་གཅིག་དད་པས་ཁྱེད་ལ་གསོལ་འདེབས་ན།། ཐུགས་རྗེའི་སྤྱན་གྱིས་མགོན་མེད་འགྲོ་ལ་གཟིགས།། ཉམ་ཐག་བདག་སོགས་འཁོར་བའི་དུཿཁ་ལས།། དྲངས་ཏེ་འཕགས་མཆོག་སྙིང་རྗེའི་གཏེར་ཆེན་པོའི།། དགོངས་ཀློང་མི་ཟད་ཆོས་དབྱིངས་མཉམ་པ་ཆེར།། རོ་གཅིག་དབྱེར་མི་ཕྱེད་པའི་མཆོག་སྩོལ་ཅིག ཨོཾ། ལྷ་ཡི་ཐུབ་པ་སྐུ་མདོག་དཀར།། འཆི་འཕོ་ལྟུང་བའི་སྡུག་བསྔལ་སྦྱོང་།། མ། མི་ཡི་ཐུབ་པ་གསེར་མདོག་ཅན།། སྐྱེ་རྒ་ན་འཆིའི་རྒུད་པ་སོལ།། ཎི། ལྷ་མིན་ཐུབ་པ་སྐུ་མདོག་ལྗང་།། ཕྲག་དོག་གདུག་རྩུབ་ཞི་བར་མཛོད།། པད། བྱོལ་སོང་ཐུབ་པ་སྐུ་མདོག་མཐིང་།། རྨོངས་པའི་སྡུག་བསྔལ་རྩད་ནས་གཞོམས།། མེ། ཡི་དྭགས་ཐུབ་པ་སྐུ་མདོག་དམར།། བཀྲེས་སྐོམ་དབུལ་བའི་སྡུག་བསྔལ་སོལ།། ཧཱུྃ། དམྱལ་བའི་ཐུབ་པ་སྐུ་མདོག་ནག། ཚ་གྲང་སྡུག་བསྔལ་འཇོམས་པར་མཛོད།། ཧྲཱིཿ ཀུན་འདུས་འཕགས་མཆོག་སྤྱན་རས་གཟིགས།། བརྩེ་ཆེན་ཐུགས་རྗེའི་བདག་ཉིད་ཆེས།། འགྲོ་དྲུག་སྡུག་བསྔལ་སྦྱང་དུ་གསོལ།། འཁོར་བ་དོང་ནས་སྤྲུག་ཏུ་གསོལ།། ཞེས་དམིགས་གནད་དང་མ་བྲལ་ཞིང་སྙིང་རྗེའི་ངང་ནས་ཡིག་དྲུག་དབྱངས་སུ་ལེན་ཅིང་། མཚམས་སུ་བཟླས་བསྐུལ་གྱེར་འདོན་བྱ། ཐུན་མཐར། ཀྱེ་མ་ཀྱེ་ཧུད་རྒྱལ་སྲས་ཐུགས་རྗེ་ཅན།། རྒྱལ་ཀུན་སྙིང་རྗེའི་རང་གཟུགས་མིག་མི་འཛུམ།། ཁྱེད་སྐུ་ཡིད་ལ་གོམས་པའི་མངོན་རྟོགས་དང་།། རིག་སྔགས་དབྱངས་ལ་གྱེར་བའི་ན་དཱའི་སྒྲ།། མི་ཤིགས་ཐུགས་ཀྱི་རྡོ་རྗེར་རྟག་གཞོལ་བའི།། ཆོ་ག་མཆོག་ལ་རྟག་ཏུ་བརྩོན་བྱས་པས།། འདི་ནས་ཚེ་འཕོས་དག་པའི་ཞིང་ཁམས་ཆེར།། པདྨའི་སྙིང་པོར་བརྫུས་ཏེ་སྐྱེས་ནས་ཀྱང་།། གང་ཞལ་མཇལ་བའི་དགའ་སྟོན་མྱོང་བ་དང་།། གསུང་གི་བདུད་རྩི་དམ་པར་རྟག་རོལ་ནས།། སྟོབས་བཅུ་རྫོགས་པའི་མཆོག་ཏུ་སངས་རྒྱས་ཤོག། ཡེ་ཤེས་རྒྱ་མཚོའི་ཕ་མཐར་རབ་སོན་པས།། རྨོངས་ཆེན་མུན་པའི་གདོན་གྱིས་རྟག་གཟིར་བའི།། འགྲོ་ཀུན་ཕན་བདེའི་དཔལ་ལ་འགོད་པ་ཡི།། ཞུམ་མེད་སྙེམ་པ་བྲལ་བའི་སྨོན་ལམ་མཐུ།། ཁྱེད་ཀྱི་རྣམ་ཐར་བཟང་པོའི་རྗེས་འགྲོ་ཤོག། དྲི་མེད་སྟོན་ཟླ་དཀར་པོའི་མདངས་འཛིན་འཕགས་མཆོག་མགོན་པོ་སྤྱན་རས་གཟིགས།། དགྱེས་འཛུམ་པད་དཀར་གྲོལ་བའི་སྤྱན་ཟུང་བདག་ལ་གཡོ་བའི་ངང་ཚུལ་གྱིས།། སྐད་ཅིག་དབྱེར་མེད་རང་ལ་ཐིམ་སྟེ་སྙིང་དབུས་པད་མཚོར་རྟག་རོལ་བས།། རང་བྱུང་འཕགས་པའི་གསང་གསུམ་དབྱེར་མེད་མ་བཅོས་རིག་སྟོང་རྗེན་པར་ཨཱཿ ཞེས་མཉམ་པར་བཞག་པའི་རྗེས་ལ། དགེ་བ་འདི་ཡིས་མྱུར་དུ་བདག སྤྱན་རས་གཟིགས་དབང་འགྲུབ་གྱུར་ནས་སོགས་དང་། སྤྱན་རས་གཟིགས་དབང་ཁྱེད་སྐུ་ཅི་འདྲ་སོགས་དང་། གང་གིས་བདག་ལས་ལེགས་བཤད་ཐོས་པའམ།། མཐོང་ཐོས་དྲན་རེག་གཏམ་གྱིས་འབྲེལ་པ་ཚུན།། མཚམས་མེད་ལས་བྱང་ངན་སོང་སྒོ་ཁེགས་ནས།། ཞིང་མཆོག་པོ་ཏ་ལ་རུ་སྐྱེ་བར་ཤོག་སོགས་བསྔོ་སྨོན་ཅི་རིགས་པས་མཐའ་བརྒྱན་པར་བྱའོ།། ཞེས་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་ནས་ཞིང་མཆོད་ཆེན་མོ་དང་འབྲེལ་བའི་ས་བྱི་ལོའི་ཞིང་ཁྲིད་སྐབས་ཀྱི་ཉེར་མཁོར། པདྨ་སྐལ་བཟང་གིས་ཐུན་བར་ཞིག་ལ་བྲིས་པ་དགེ།། |