ཡུལ་སྐྱོང་ལྕམ་མོ་ཆེན་མོའི་བསང་འདོད་འབྱུང་དབང་གི་གཟི་འོད།ཧྲཱིཿཧཱུྃ། བདག་མདུན་སྐད་ཅིག་མ་ཆགས་པདྨ་ཆེ།། ཁྱོན་ཡངས་ཐབས་ཤེས་ཉི་ཟླའི་གདན་སྟེང་དུ།། བདེ་ཆེན་བདེ་བའི་དབང་ཕྱུག་མཚོ་སྐྱེས་རྗེ།། ཞི་འཛུམ་མཚན་དཔེས་མཛེས་པའི་སྐུར་གསལ་བའི།། ཐུགས་ཀའི་འོད་ཟེར་ལྕགས་ཀྱུ་རྣོན་པོའི་དབྱིབས།། ཛཿདམར་འཕྲོ་དང་བསྡུ་བའི་བྱེད་པ་ཡིས།། ཞིང་སྐྱོང་ཌཱཀྐིའི་རྗེ་མོ་ཝ་ར་ཧི།། ཡུལ་སྐྱོང་སྨན་མོའི་གཙོ་མོ་གཏེར་གྱི་བདག། ལྕམ་མོ་ཆེན་མོ་སྨན་ཕྲན་འབུམ་དང་བཅས།། མ་ལུས་འཁོར་དང་བཅས་པའི་སྲོག་གི་སྙིང་།། དབང་སྒྱུར་རྟགས་ཀྱི་ཕྱག་རྒྱས་བསྒུལ་བ་ལས།། སྐད་ཅིག་གློག་ལས་མྱུར་བའི་རྫུ་འཕྲུལ་གྱིས།། མ་ཐོགས་དམ་ལྡན་བདག་གི་གནས་འདིར་བྱོན།། ཀྱེ། གླིང་མཆོག་འཛམ་གླིང་ཆགས་པའི་དང་རྩེ་རུ།། འབྲུ་ཟླ་གསེར་གཡུའི་འབྲུག་ཆེན་འཁྱིལ་འདྲའི་དབུས།། མཐོང་སྨོན་ས་འཛིན་རི་དབང་ཤེལ་དཀར་གཟུགས།། གཡུ་མདོག་ལྗོན་ཚལ་མཛེས་པའི་མགུལ་རྒྱན་འཆང་།། སྤྲིན་དཀར་ན་བུན་སོ་མའི་གོས་བཟང་གིས།། དེ་ཡི་མཛེས་པ་སྒྲིབ་ལ་ཕྲག་དོག་པའི།། ཉི་གཞོན་འཛུམ་པའི་མདངས་དང་ཟླ་ཟེར་གྱིས།། མེལ་ཚེས་མཛེས་མདངས་སྤུད་ལ་འགྲན་བྱེད་པའི།། ངོ་མཚར་གནས་མཆོག་ཡ་མཚན་སྐྱལ་གྱི་བྲག། དོན་ལ་ས་སྤྱོད་འོག་མིན་ཞིང་གི་ཆར།། རིན་ཆེན་སྐུ་མཁར་གསེར་གཡུའི་ལན་ཀན་ཅན།། འོད་འབར་ལྷ་ཡི་ནོར་བུས་རབ་བརྒྱན་པའི།། གཞལ་མེད་ཁང་བཟང་ཡངས་ཤིང་རྒྱ་ཆེའི་དབུས།། སྨན་བཙུན་ཆེན་མོ་དུང་མདོག་ཟླ་ཞལ་ཅན།། བཅུ་དྲུག་ན་ཚོད་སྒེགས་མཛེས་རི་དྭགས་མིག། ཆགས་འཛུམ་བཞད་པའི་ཟུར་མིག་འཕུར་ལྡིང་ཅན།། མཉེན་ལྕུག་འཁྲིལ་ཞིང་ལྡེམ་པའི་ཚུལ་ཀྱིས་བཞེངས།། ཕྱག་གཡས་རིན་ཆེན་གསེར་གྱི་ལྡེའུ་མིག་དང་།། གཡོན་པས་ཡིད་བཞིན་གཏེར་གྱི་སྒྲོམ་བུ་བསྣམས།། རེས་འགར་ཡིད་འཕྲོག་དངུལ་དཀར་མེ་ལོང་དང་།། འཛད་མེད་གཏེར་བཅུད་ནོར་བུའི་གཞོང་པ་འཛིན།། སྐུ་ལ་དར་ཟབ་ན་བཟའ་བརྩེགས་མར་གསོལ།། རིན་ཆེན་རྒྱན་འཕྲེང་སིལ་ཁྲོལ་གདུ་བུས་མཛེས།། རཏྣའི་སྲོག་ཞུ་མེ་ཏོག་ཐོད་ཆིངས་དང་།། ཚངས་སྐུད་སེ་མོ་དོ་དང་དོ་ཤལ་འཆང་།། འཁོར་དུ་མཛེས་སྡུག་སྨན་ཕྲན་ཡང་འཁོར་འབུམ།། ཀུན་ཀྱང་རང་རང་སྒྱུ་འཕྲུལ་སྣ་ཚོགས་སྟོན།། སྙན་འགྱུར་གླུ་དང་སྣ་ཚོགས་རོལ་མོའི་སྒྲ།། འཕྲུལ་དགའི་ལྷ་ཡི་དཔལ་ལ་རྣམ་པར་རོལ།། དྲལ་པོ་ཆེན་པོ་ཚངས་པ་ལྷ་ཡི་བུ།། མི་དཀར་གསེར་གྱི་ཡ་ལད་གོ་ཞུབ་ཅན།། སྟག་ཆས་དཔའ་བོ་སྟོང་གི་རུ་སྣ་འདྲེན།། དྲག་པོའི་ཀི་ལ་དགྱེས་ཤིང་བསྭོ་ལ་འདུ།། མགྱོགས་པའི་བང་དང་རྣོན་པོའི་སོ་ལ་འཁོར།། དབུ་འཕང་དགུང་དུ་འདེག་པའི་དགྲ་ལྷར་ཆེ།། ཡུལ་ལྷ་ཟོ་དོར་ལྕམ་དྲལ་མཐུ་བོ་ཆེ།། སྔོན་རྒྱུག་གཉེན་གྱི་སོ་པ་རླུང་ལྟར་འཚུབ།། རུ་འདྲེན་ཀླུ་ཡི་ཕོ་ཉ་གློག་ལྟར་མྱུར།། སྡོང་ཟླ་བཙན་གྱི་དམག་དཔོན་ཐོག་ལྟར་འབེབ།། རྗེས་བསྐྱོད་དམུ་བདུད་མ་མོ་བྲན་ལྟར་འབྲངས།། ལས་བཞི་ལྷུན་གྲུབ་བཀའ་འཁོར་བཅས་པ་ལ།། རྣམ་མང་སྲིད་དང་ཞི་བའི་ཕུན་ཚོགས་དཔལ།། ངོ་མཚར་ཏིང་འཛིན་སྤྲུལ་བའི་ཟག་མེད་སྤྲིན།། མཐའ་ཡས་ཞིང་ཀུན་འགེང་བས་རྟག་ཏུ་མཆོད།། ཁྱད་པར་གཡུ་ཤུག་སྔོན་པོ་སྤྲིན་བཅུད་ཅན།། འཁན་དཀར་གསེར་གྱི་ལ་ཐོད་ག་བུར་འཛིན།། བ་ལུ་འོམ་བུ་བདུད་རྩིའི་རོ་བཅུད་ལྡན།། བཟང་དྲུག་སྨན་གྱི་ཕྱེ་མ་དཀར་གསུམ་ཕུད།། མངར་གསུམ་བཏུང་བ་དགུན་ཆང་འབྲས་བུའི་བཅུད།། དར་ཟབ་འབྲུ་སྣ་གཏོར་ཚོགས་ལ་སོགས་པ།། གཙང་ཞིང་གཙང་མར་སྦྱར་བའི་མཆོད་རྫས་ལ།། མེ་རླུང་ཆུ་ཡིས་སྦྱང་གཏོར་བཀྲུས་པ་དང་།། འབྲུ་གསུམ་ཡི་གེས་སྦྱང་སྤེལ་སྒྱུར་བ་ཡི།། གོས་དཀར་མེ་ལ་མ་ཀིའི་ཆུས་བྲན་པའི།། བསྲེག་རྫས་མ་ཚོགས་མེད་པའི་དུད་སྤྲིན་ཆེ།། ཀུན་བཟང་མཆོད་པའི་སྤྲིན་གྱི་ཕུང་པོ་རུ།། ནམ་མཁའ་མཛོད་ཀྱི་བསམ་ཡས་རོལ་གར་ལས།། རིན་ཆེན་ས་གཞི་སྨན་སྤོས་ལྗོན་ཤིང་མཛེས།། གཞལ་མེད་ཁང་བཟང་ནོར་བུའི་རྒྱན་གྱིས་སྤྲས།། རང་བྱུང་འོད་ཀྱི་སྣང་བས་ཉིན་མཚན་གསལ།། བདུད་རྩིའི་ཆར་ཟིམ་འཇའ་ཚོན་དྲ་བར་འབྲེལ།། ཅང་ཤེས་ཤུགས་ལྡན་རྟ་མཆོག་གངས་རིའི་མདོག། སྨུག་ཆུང་དྲེའུ་གསེར་མདངས་རླུང་ཤུགས་ཅན།། གླང་ཆེན་ཐལ་དཀར་ཤྭ་རྐྱང་དགོ་བ་གཙོད།། སྤུ་སྡུག་སྒྲོ་གཤོག་བཀྲ་བའི་རྨ་བྱ་དང་།། ཁྲུང་ཁྲུང་ཀ་ལ་པིངྐ་མཁའ་ལྡིང་དབང་།། སྟག་གཟིག་གྲུས་མ་ཐུགས་དཀར་དོམ་བུ་དང་།། འབྲོང་གཡག་དར་མ་གནག་ཕྱུགས་དཀར་ནག་ཁྱུ།། རིན་ཆེན་ནོར་བུའི་མཛོད་བརྒྱ་དཔག་བསམ་ཤིང་།། འདོད་འཇོའི་གཏེར་གྱི་བུམ་པ་ཡིད་བཞིན་དབང་།། བཞུ་ཁམས་ལས་བྱུང་གསེར་དངུལ་ཟངས་ལྕགས་རིགས།། དར་ཟབ་འབྲུ་སྣ་གཟི་བྱུར་གཡུ་ཡི་ཕྲེང་།། མུ་ཏིག་མུ་མེན་པད་རག་ཨིནྡྲ་རྙིལ།། གོ་མཚོན་སྣ་ཚོགས་ནམ་མཁའ་བལ་ཚོན་དང་།། མདའ་མདུང་འཕང་རིས་དུང་ཤོ་འགྲོན་བུ་དཀར།། དཀར་དམར་བཤོས་བུ་བརྗིད་ལྡན་མདོས་ཀྱི་གཏོར།། དར་གོས་རེག་འཇམ་ལྷ་ཡི་ན་བཟའ་དང་།། འཕན་འཕུར་ལྡ་ལྡི་རྔ་དུང་པི་ཝང་སོགས།། སྙན་འཇེབས་སྒྲ་ཡི་རྣམ་གྲངས་ཇི་སྙེད་དང་།། གླུ་གར་འདུ་འཕྲོ་དྲི་ཞིམ་སྤོས་ཀྱི་ངད།། ཞལ་ཟས་རོ་བདའ་ཇ་ཆང་བཏུང་བའི་རིགས།། ཐུན་མོང་ཐུན་མིན་མཐུན་རྫས་མཆོད་པའི་སྤྲིན།། མ་ཚང་མེད་པའི་དངོས་འབྱོར་ཡིད་སྤྲུལ་གྱིས།། ལྷ་ཁྱེད་འཁོར་དང་བཅས་པའི་དགྱེས་པ་བསྐང་།། ཐུགས་འགལ་འཁྲུགས་པ་མཆིས་ན་དབྱིངས་སུ་སོལ།། ཁྱད་པར་ཟག་མེད་ནང་གི་བདེ་བ་ཆེ།། དོན་དམ་བདེ་ཆེན་ཞུ་བདེའི་ཡེ་ཤེས་དཔྱིད།། གཉིས་མེད་ཁ་སྦྱོར་ཉི་ཟླའི་དྭངས་མའི་ཁམས།། འཕོ་བྲལ་སྲོག་གི་ཐིག་ལེར་རྟག་ཏུ་མཆོད།། ཨེ་དབྱིངས་སྟོང་ཆེན་འདུས་མ་བྱས་པའི་མཁར།། ཝཾ་ཡིག་བདེ་ཆེན་རྡོ་རྗེའི་གར་སྒྱུར་བའི།། མི་ཤིགས་གཉུག་མ་དོན་གྱི་ཡེ་ཤེས་ཀྱི།། དགྱེས་མཉམ་ལྷན་སྐྱེས་དགའ་བར་རྟག་ཏུ་རོལ།། ཁྱད་པར་བདུད་རྩིའི་ཁྲུས་དང་ལྷ་སྲུང་གིས།། ཌཱཀི་སྨན་བཙུན་ཆེན་མོའི་གསང་གསུམ་ལ།། བདག་ཅག་དམ་ཚིག་འགལ་ཉམས་འདས་རལ་གྱི།། མི་གཙང་གྲིབ་ཀྱིས་ཕོགས་པ་ཐམས་ཅད་བསང་།། དཔའ་སྐྱེམས་ཆང་རྒོད་གཙང་མའི་ཕུད་མཆོད་ཀྱིས།། དྲལ་པོ་ལྷ་ཡི་དམག་དཔོན་ཆེན་པོ་བསང་།། ལྗོན་ཚལ་མེ་ཏོག་ཡིད་འོང་ཆབ་རྒྱུན་གྱིས།། ཤར་གྱི་ལྷ་བཙུན་ས་ལེ་ཁྲི་སྨན་བསང་།། དཀར་གསུམ་སྨན་སྣ་ཤིང་ཏོག་འབྲུ་བཅུད་ཀྱིས།། ལྷོ་ཡི་ཀླུ་མོ་ནོར་རྒྱས་ཕྱུག་མོ་བསང་།། རིན་ཆེན་གསེར་གཡུ་དར་གོས་ལིང་ཚེ་ཡིས།། ནུབ་ཀྱི་གཉེན་མོ་གནོད་སྦྱིན་གཟི་འབར་བསང་།། གཞན་ཡང་མཆོད་རྫས་ཡོ་བྱད་ཇི་སྙེད་པས།། སྤྲུལ་དང་ཡང་སྤྲུལ་འཁོར་དང་བཅས་པ་བསང་།། སྔོན་ཚེ་པདྨ་འབྱུང་གནས་གྲོ་བོ་ལོད།། ཡེ་ཤེས་རྫུ་འཕྲུལ་ནམ་མཁའི་ཕྱག་རྒྱ་ཡིས།། རུ་དམ་ལུང་པ་ནག་པོའི་མ་ཡམ་ཚོགས།། སྲོག་སྙིང་ཐེངས་དགུར་གཟིར་ཞིང་དམ་ལ་བཏགས།། ལྷོ་ཕྱོགས་པདྨའི་ཚལ་ན་དར་དཀར་གྱི།། ལྭ་བ་དཀར་པོའི་གུར་གྱི་ནང་ཤེད་ནས།། རྟགས་ཀྱི་ཕྱག་རྒྱར་བཞེངས་པའི་དཀྱིལ་འཁོར་གཙོ།། པདྨ་འབྱུང་གནས་དྲང་སྲོང་སྨན་གྱི་བླས།། བདུད་རྩི་ཡོན་ཏན་དཀྱིལ་འཁོར་ཞལ་ཕྱེས་ཏེ།། རྩ་བརྒྱད་སྟོང་ལ་སྦྱར་བའི་ཨ་མྲྀ་ཏ།། བདེ་མཆོག་དཔའ་བོའིབཅུད་ཆེན་བསྐྱིལ་བའི་ཚེ།། གཏེར་གྱི་སྲུང་མར་བསྐོས་པའི་གཡར་དམ་བླངས།། གངས་ལྡན་ར་བའི་མཆོག་གྱུར་སྦས་པའི་ལུང་།། རྡོ་རྗེའི་གར་གྱིས་བྱིན་རླབས་སྨན་ཆར་ཕབས།། ས་སྤྱོད་དཔལ་གྱི་ཞིང་ཁམས་སྒོ་ཕྱེས་ཚེ།། ཡོན་ཏན་གནས་འདིའི་སྲུང་མར་བྲན་ཁས་བླངས།། བར་དུ་རིག་སྔགས་འཛིན་པ་སྐྱལ་བྲག་པ།། རྣལ་འབྱོར་ཡབ་སྲས་གུ་ཎ་ན་ཐ་ཡི།། ཆོས་དང་རིགས་ལ་འགོ་བའི་ཐ་ཚིག་འཆང་།། ཡང་ཟབ་དབང་དྲག་ཆོས་ཀྱི་གཉེར་འཛིན་མཛད།། ཆེར་སྙིགས་ལྔ་བདོའི་ཕྱི་མའི་དུས་འདི་རུ།། ལྗོངས་འདིར་པདྨའི་རིང་ལུགས་འཛིན་མཛད་པ།། པད་འབྱུང་བི་མའི་རྣམ་རོལ་རྫོགས་ཆེན་པས།། བཀའ་བསྒོའི་འཕྲིན་ལས་མ་གཡེལ་དང་དུ་ལོངས།། སྲིད་ཞིའི་དགེ་མཚན་བྱེ་བའི་འབྱུང་གནས་ཆེ།། ཐུབ་བསྟན་སྙིང་པོ་ལུང་དང་རྟོགས་པ་སྟེ།། དེ་འཛིན་བཤད་དང་སྒྲུབ་པའི་སྡེ་རྒྱས་པའི།། ལྗོངས་འདིའི་མངའ་ཐང་གླིང་བཞིའི་རྩེ་མོར་ངོམ།། ཡོངས་རྫོགས་རྒྱལ་བསྟན་ཕྱི་མོ་སྔ་འགྱུར་པ།། དེ་ཡི་བཤད་སྒྲུབ་བསྟན་པའི་འབྱུང་གནས་ཆེ།། རྫོགས་ཆེན་པ་ཞེས་གྲགས་པའི་གདུགས་དཀར་ཁྱོན།། སྣང་བྱེད་ཉི་ཟླའི་དཔལ་དང་འགྲོག་པར་མཛོད།། ཀུན་བརྟགས་འཁྲུལ་བའི་བག་ཆགས་གཞི་ལ་དག། གཞན་དབང་འཕྲལ་སྣང་གདོན་ཚོགས་དབྱིངས་སུ་ཞི།། ཡོངས་གྲུབ་འཕོ་བྲལ་གཉུག་མའི་ཡེ་ཤེས་ཁམས།། འཆི་མེད་རྡོ་རྗེའི་སྲོག་གི་རྟེན་མཁར་ཚུགས།། རྗེས་ཆགས་ཉམས་བརྒྱ་འབར་བའི་འཛུམ་དཀར་གྱིས།། ཆེ་དགུའི་ཡིད་ཀྱི་བརྟན་པ་འཕྲོག་དང་ལྷན།། བརྟན་གཡོ་སྲིད་ཞིའི་ཕུན་ཚོགས་ཇི་སྙེད་པ།། འོད་དམར་ཀྱོ་བས་དབང་མེད་མགྲོན་དུ་ཁུག། རྨོངས་ཆེན་གདོན་གྱིས་ཟིན་གྱུར་སྡིག་ཅན་འགྲོ།། མ་རུངས་ལོག་པར་སྤྱོད་པའི་སྙིང་ཁམས་ཅན།། རེ་ཞིག་ཞི་བས་འདུལ་བའི་སྐལ་མེད་ལ།། སྲོག་གཅོད་དུག་གི་མདའ་མོ་ཁྱོད་ཀྱིས་གྱིས།། དྲིན་ལན་ངན་གྱིས་གཞལ་བའི་བློ་ལོག་མཁན།། ཁ་དཀར་སྙིང་གནག་སྒྱུ་མའི་རིག་སྔགས་ཅན།། མ་ལུས་སྡེར་བཅས་རྩད་ནས་གཅོད་པ་ཡི།། དྲང་སྲོང་དམོད་པའི་རལ་གྲི་ཁྱེད་ཉིད་རྦད།། བློ་ཡིད་ལས་སུ་མ་རུང་སྐྱེ་བོ་ཡི།། སྙིང་ལ་ཞུགས་པའི་རྒྱལ་འགོང་དམ་སྲིའི་རིགས།། ཕུང་བྱེད་ཕྱེ་མར་བརླག་པའི་མེ་ཞུན་གྱི།། གནམ་ལྕགས་ཐོག་ཟེར་ངར་མ་ཁྱོད་ཀྱིས་དྲོངས།། ཡང་ཟབ་ཐུགས་ཀྱི་བསྟན་པའི་བསྐྱེད་རྫོགས་ལམ།། སྨིན་གྲོལ་གདམས་ཟབ་བཅུད་འཆང་བསྟན་འཛིན་གྱི།། ཞབས་པད་གཡུང་དྲུང་རེ་ཁ་རྟག་བརྟན་པའི།། ངོ་མཚར་ཆོ་གའི་མེལ་ཚེ་ཁྱེད་ཀྱིས་མཛོད།། འདའ་དཀའ་སྲོག་གིས་བསྲུང་བའི་དམ་ཚིག་ལ།། གཅིག་ཏུ་སྦྲེལ་བའི་མཆེད་ལྕམ་རྡོ་རྗེའི་སྤུན།། མི་འབྲལ་བྱང་ཆུབ་སྙིང་པོར་འཚང་རྒྱ་བའི།། སྨོན་དོན་དམ་བཅའི་རི་མོ་ཁྱེད་ཀྱིས་སྲུངས།། མདོར་ན་བདག་ཅག་འཁོར་དང་བཅས་པ་ཡི།། མི་མཐུན་ཉེས་པའི་ཚོགས་རྣམས་ཞི་བ་དང་།། མཐུན་རྐྱེན་ལེགས་པའི་དཔལ་ཡོན་རབ་རྒྱས་པའི།། རྣམས་གཉིས་དངོས་གྲུབ་འབྲལ་མེད་ཆར་བཞིན་ཕོབས།། བཀྲ་ཤིས་ཉི་མའི་འོད་ཟེར་རྟག་ཏུ་འབར།། བདེ་ལེགས་དུང་གི་ཟླ་བ་རྒྱུན་དུ་ཚེས།། ཕུན་ཚོགས་རྒྱུ་སྐར་བྱེ་བའི་བཀྲག་མདངས་གསལ།། བདེ་སྐྱིད་བཀྲ་ཤིས་ས་གསུམ་ཀུན་ཁྱབ་ཤོག། ཅེས་པ་འདི་རྗེ་དམ་པ་མང་པོའི་སྐུའི་རིགས་དབོན་དུ་གྱུར་པའི་ཁྱིམ་སྔགས་པ་དམ་ལྡན་ལྷག་བསམ་ཅན་བསོད་ནམས་སྟོབས་ལྡན་གྱིས་བསྐུལ་ངོར། རབ་གནས་ཆུ་ལུག་ཧོར་ཟླ་བརྒྱད་པའི་ཚེས་བཅུ་ལ་པདྨ་ཐང་ཡང་དབེན་ནས་པདྨའི་མིང་ཅན་དེས་བྲིས་པ་འདིས་ཀྱང་བསྟན་པ་དར་ཞིང་བསྟན་སེལ་ཞི་བའི་རྒྱུ་བྱེད་པར་གྱུར་ཅིག། |