བཀྲ་རི་དགྲ་འདུལ་འཆོང་རྩེའི་བསང་གསོལ་སྦྲགས་མ་འདོད་འབྱུང་དགའ་བ་གཡང་འཁྱིལ།བྷྲཱུྃ་ཧཱུྃ། སྟོང་གསལ་རང་རིག་འདུས་མ་བྱས་དབྱིངས་ལས།། འགག་མེད་སྣང་སྟོང་རྩལ་ལས་རོལ་བའི་ཚུལ།། ངོ་མཚར་རྒྱན་གྱི་འཇའ་ཚོན་རྣམ་བཀྲ་བའི།། ཡིད་འཕྲོག་ནོར་བུའི་གཞལ་མེད་ཁང་ཆེན་པོར།། དབང་དང་རྒྱས་པའི་ལས་མཛད་ཐོད་ཕྲེང་རྩལ།། ཨོ་རྒྱན་མཁའ་འགྲོ་ནོར་ལྷའི་སྐུར་བཞེངས་པ།། རབ་འབྱམས་དབང་གི་ལྷ་ཚོགས་འབུམ་དང་བཅས།། ཟིལ་གནོན་རིགས་ཀྱི་བདག་པོར་རབ་ཏུ་བརྗིད།། དེ་འོག་སྐུ་མཁར་སྨུག་པོ་སྦྲུལ་དཀྲིས་ཅན།། འཆོང་སྨུག་ཨིནྡྲ་ནཱི་ལའི་ཁ་བད་མཛེས།། སྣ་ཚོགས་ནོར་བུའི་གཏེར་དང་ཟས་ནོར་མཛོད།། འབུམ་ཕྲག་འབུམ་གྱིས་གཏམས་པའི་སྐུ་མཁར་དབུས།། ཀླུ་བཙན་བཤོས་པའི་སྲས་མཆོག་དགྲ་འདུལ་རྩལ།། མི་སྔོན་གཡུ་ཡི་སྨིན་མ་འཕུར་ལྡིང་ཅན།། ཚེམས་དཀར་དུང་ཕྲེང་དགོད་འཛུམ་བཞད་ཉམས་རྒྱས།། རབ་མཛེས་འཁོར་གསུམ་ཡ་ལད་དར་མདུང་ཅན།། ཀླུ་རིགས་བདུན་གྱི་གདེངས་ཀ་མཁའ་ལ་འཕྱོ།། ཕྱག་གཡས་ཆུ་གྲི་གློག་ལྕེ་དགྲ་ལ་གཟས།། གཡོན་པས་དོན་ཡོད་ནོར་བུའི་འཕྲུལ་ཞགས་བསྣམ།། སྣ་ཚོགས་རིན་ཆེན་རྒྱན་གྱི་འཕྱང་འཕྲུལ་གཡོ།། རྟ་མཆོག་འབྲུག་སྔོན་མཁའ་ལ་འཁྱུག་འདྲ་བཅིབས།། རོལ་དུ་རྐྱང་སྨུག་གྭ་བ་གཡུ་རྔོག་ཁྲིད།། ལྷ་སྲིན་ཀླུ་བཙན་བྱེ་བའི་འཁོར་དང་བཅས།། དུག་རླངས་ན་བུན་འཚུབ་མར་རླུང་ལྟར་རྒྱུ།། ཀླད་ན་ལྕགས་ཀྱི་བྱ་ཁྲ་སྤུན་གསུམ་ལྡིང་།། མདུན་དུ་རྒྱ་སྟག་གྲུས་མ་རྔམ་སྟབས་མཆོངས།། སྡོང་ཟླ་དགྱེས་སྡེ་ཕོ་ཉ་ཡང་འཁོར་བཅས།། སྐད་ཅིག་གློག་ལྟར་མྱུར་བས་གནས་འདིར་སྤྱོན།། ཧཱུྃ་ཧྲཱིཿ ཀླུ་བཙན་ཆེན་པོ་སྲས་མཆོག་དགྲ་འདུལ་རྩལ།། འབར་བ་མཆེད་གསུམ་བཀའ་འཁོར་སྤྲུལ་པར་བཅས།། འདིར་གཤེགས་དགྱེས་པའི་གདན་ལ་རྟག་བཞུགས་ནས།། མི་འབྲལ་དམ་ཚིག་གཉན་པོ་གཅིག་ཏུ་བསྲེས།། ཁྱེད་ལ་མཆོད་པའི་ཡོ་བྱད་འདོད་ཡོན་ལྔ།། སྲིད་འབྱོར་གཅིག་ཏུ་རྫོགས་པའི་མཉེས་རྫས་ཚོགས།། མ་ཚང་མེད་པ་ལྷ་མིའི་ཕུན་ཚོགས་འབུམ།། ཟད་མེད་རྟག་པ་རྒྱུན་གྱི་འཁོར་ལོར་འབུལ།། ཁྱད་པར་གཡུ་ཤུག་འཁན་དཀར་བ་ལུ་དང་།། སྣ་ཚོགས་ཀླུ་སྨན་བསྲེགས་པའི་དུད་སྤྲིན་ལ།། སྦྱང་སྤེལ་སྒྱུར་བརླབས་ཏིང་འཛིན་རོལ་མོའི་སྤྲིན།། ནམ་མཁའ་མཛོད་ཀྱི་སྒྱུ་འཕྲུལ་འབྱམས་ཀླས་པས།། ལྷ་ཁྱོད་འཁོར་དང་བཅས་པ་རྟག་མཆོད་ན།། འཁོན་འགྲས་འགྲམ་འཁྲུགས་འཁུ་ཞིང་ལྡོག་པའི་རིགས།། ཀུན་ནས་ཞི་ཞིང་བྱམས་པའི་ངང་ཚུལ་གྱིས།། འབྲལ་མེད་ཁ་མགོན་མ་གཡེལ་མེལ་ཚེ་མཛོད།། ཡ་ཐོག་སྲིད་པ་ཁྱུང་གི་དུང་སྒོང་ལས།། གཉན་བཙན་འོད་འབུམ་གཡུ་ཡི་ལྡེམ་འཕྲུ་ཅན།། རཏྣའི་དཀྱིལ་འཁོར་ཆེན་པོའི་དལ་ཞུགས་ཚེ།། རིགས་རྒྱུད་འཁོར་དང་བཅས་པས་བྲན་ཁས་བླངས།། བར་དུ་སུམ་ལྡན་དུས་ཀྱི་ཐོག་མ་ལ།། ཆེ་མཆོག་དབང་དྲག་རོལ་བའི་བཀའ་འཁོར་དུ།། དམ་མནོས་ཀླུ་སྨན་ནོར་འཛིན་སྲས་འཁོར་བཅས།། བཀའ་རྟགས་ཕྱག་རྒྱ་མ་ཉམས་གཙུག་ཏུ་བརྗིད།། ཐ་མ་རྩོད་ལྡན་སྙིགས་མའི་དུས་འདི་རུ།། པདྨའི་མཚན་འཆང་རིག་འཛིན་རྣལ་འབྱོར་པས།། དབང་མཛད་ཕྱག་རྒྱས་བཅིངས་པའི་སྲས་མཆོག་ཁྱོད།། འདའ་དཀའ་རྡོ་རྗེའི་དམ་ལས་མ་གཡེལ་ཤིག། འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པའི།། བསྟན་པའི་སྙིང་པོ་ལུང་རྟོགས་བཤད་སྒྲུབ་སྡེ།། འཕེལ་ཞིང་རྒྱས་པའི་མངའ་ཐང་ས་གཞིའི་ཁྱོན།། ཉི་ཟླའི་སྣང་བའི་དཔལ་དང་རྟག་འགྲོག་མཛོད།། བསྟན་འཛིན་མཁས་གྲུབ་བྱེ་བའི་འཕྲིན་ལས་རྒྱུན།། ནམ་མཁའི་ཕ་མཐར་བདལ་བའི་དབུ་འཕང་གི། རྒྱལ་མཚན་སྲིད་པའི་རྩེ་མོར་རབ་བསྒྲེངས་བའི།། སྙན་པའི་གྲགས་པས་གླིང་བཞི་འགེངས་བར་གྱིས།། འཛུམ་དཀར་མཛེས་པའི་མདངས་ལྡན་ལྷ་ཕྲུག་བརྒྱས།། འཆི་སོས་བདུད་རྩི་སྨན་གྱི་བཅུད་ཐོགས་ཏེ།། རྒས་མེད་ལང་ཚོ་དར་བའི་བཀྲག་བསྐྱེད་ནས།། ནད་གདོན་ཞི་བའི་ལས་ཀུན་ཐོགས་མེད་སྒྲུབས།། དགྱེས་བཞད་ཚིམས་པའི་ཉམས་ལྡན་ཀླུ་ཕྲུག་བརྒྱས།། བརྟན་གཡོའི་དྭངས་བཅུད་འདྲིལ་བ་སྲོག་གི་ཁམས།། མི་གཡོ་འཕེལ་ཞིང་རྒྱས་པའི་དཔལ་བསྐྱེད་དེ།། ཚེ་བསོད་རྒྱས་པའི་ལས་རྣམས་ཀུན་འགྲུབ་མཛོད།། སྒེགས་ལྡན་འཕྲུལ་གྱི་ཤུགས་འཆང་གནོད་སྦྱིན་བརྒྱས།། རབ་དམར་དབང་གི་གཟི་བྱིན་ཉེར་བསྐུལ་ཏེ།། འགུག་འཆིང་ནོར་བུའི་ལྕགས་ཀྱུ་ཞགས་པ་ཡིས།། དབང་སྡུད་དབང་གི་ལས་རྣམས་འཆོར་མེད་སྒྲུབས།། ཤིན་ཏུ་དྲག་ཁྲོས་བཙན་གྱི་དམག་དཔོན་བརྒྱས།། རྣོན་པོ་མཚོན་གྱི་སོ་ཁ་མྱུར་ཕྱུངས་ལ།། སྡང་བྱེད་དགྲ་བོའི་སྲོག་རྩ་འཕྲལ་གཅོད་པའི།། དྲག་པོ་སྒྲོལ་བའི་ལས་ལ་ད་རེམ་ཅིག། སྨན་མོ་གཉན་བཙན་ཀླུ་བཟའ་ཁྲི་ལྕམ་བརྒྱས།། དཀར་ནག་ཕྱུགས་ཀྱི་འཕེལ་ཁ་དར་བ་དང་།། སྲིད་ཞིའི་ཕྱྭ་གཡང་ནོར་སྣ་ཀུན་བསྡུས་ཏེ།། བང་མཛོད་གཡང་གི་ར་བ་སྤེལ་ཞིང་སྲུངས།། མདོར་ན་ཡུལ་ལྷ་གཉན་པོ་འཁོར་བཅས་ཀྱིས།། རྣལ་འབྱོར་བདག་ཅག་བུ་སློབ་ཡོན་བདག་བཅས།། མི་འབྲལ་སྲུང་ཞིང་སྐྱོབ་པའི་སྡོང་གྲོགས་ཀྱིས།། དགོས་འདོད་ཆར་བཞིན་འབེབས་པའི་དངོས་གྲུབ་བྱིན།། གནས་སྐབས་ཉེར་འཚེའི་རིགས་ཀུན་ཞི་བ་དང་།། བྱང་ཆུབ་ལམ་གྱི་བར་ཆད་ཀུན་བསལ་ཏེ།། མཐར་ཐུག་སྲིད་ཞིར་མི་གནས་ཆོས་ཀྱི་སྐུའི།། རྒྱལ་སྲིད་མཆོག་ལ་སྦྱོར་བའི་བཀྲ་ཤིས་སྩོལ།། |