ཡུལ་ལྷ་ཆེན་པོ་དགེ་བསྙེན་དྲག་པོ་རྩལ་གྱི་བསང་མཆོད་འདོད་དགུའི་འབྱུང་གནས།ཧཱུྃ། མི་ཤིགས་བདེ་ཆེན་བདལ་བའི་ཞིང་ཁམས་ནས།། འཁོར་འདས་སྲིད་པའི་སྣང་ཆར་ཤར་བའི་རྩལ།། དག་མཉམ་མཚན་མའི་སྤྲོས་པ་ཉེར་ཞིའི་དབྱིངས།། ནང་གསལ་གསང་བའི་རང་གདངས་འགག་མེད་ལས།། རོལ་བའི་སྒྱུ་འཕྲུལ་སྣང་སྲིད་དབང་སྒྱུར་ལྷ།། དཀར་ཕྱོགས་དགྲ་ལྷའི་རུ་འདྲེན་ལྷ་གཉན་གཙོ།། དགེ་བསྙེན་ཆེན་པོ་རྡོ་རྗེ་དྲག་པོ་རྩལ།། སྐུ་མདོག་སྨུག་ནག་ཁྲོ་འཛུམ་བརྗིད་པའི་ཞལ།། གསེར་ཁྲབ་གསེར་རྨོག་གསོལ་ཞིང་དར་མདུང་བསྣམ།། དགོས་འདོད་ནོར་བུའི་ལྷ་གཡང་ཆར་དུ་འབེབ།། བཙུན་མོ་སྲས་བློན་བྲན་དང་ཕོ་ཉར་བཅས།། མ་ལུས་འཁོར་དང་བཅས་པ་ཐམས་ཅད་ཀུན།། སྐད་ཅིག་མྱུར་བའི་ཤུགས་ཀྱིས་གནས་འདིར་བྱོན།། ཀྱེ། རབ་མཛེས་རིན་ཆེན་སྣོད་མཆོག་ཡངས་བའི་གཞིར།། དཀར་མངར་ཕུད་ཀྱིས་སྦྲན་པའི་གཙང་མའི་བཤོས།། གསེར་དངུལ་དར་ཟབ་སྨན་སྣ་སྤོས་མཆོག་དང་།། འདོད་ཡོན་རྣམ་ལྔ་བཀྲ་ཤིས་རྟགས་ཀྱི་རྫས།། རྐང་བཞིའི་ཕྱུགས་དང་བྱ་རིགས་འདབ་ཆགས་ཚོགས།། མུན་པའི་མདོག་ཅན་མཚལ་དམར་མདངས་བཀྲ་བའི།། ཅང་ཤེས་རྟ་མཆོག་རླུང་གི་གཤོག་ཅན་དང་།། གཡུལ་ལས་རྒྱལ་བའི་མདུང་དམར་བ་དན་ཅན།། གོ་མཚོན་ཡ་ལད་དྲག་པོའི་ཕྱག་མཚན་བཅས།། ཁྱེད་རྣམས་འཁོར་དང་བཅས་ལ་དང་བས་འབུལ།། ཁྱད་པར་གཡུ་ཤུག་འཁན་དཀར་འོམ་བུ་དང་།། ཙནྡན་དཀར་དམར་རྩི་བཅུད་སྨན་སྣའི་ཚོགས།། སྲེག་པའི་དུད་པ་ཡེ་ཤེས་རོལ་བའི་སྤྲིན།། རྣམ་མང་འདོད་ཡོན་རྒྱ་མཚོས་ཡོངས་གང་བ།། ཀུན་ཏུ་བཟང་པོའི་མཆོད་པའི་སྤྲིན་ཚོགས་ཀྱིས།། སྐུ་ཡི་དགྲ་ལྷ་ཆེན་པོ་འཁོར་བཅས་བསང་།། མྱུར་མགྱོགས་རླུང་རྟའི་ལྷ་འཁོར་ཐམས་ཅད་བསང་།། དཔའ་བརྟན་དགྲ་ལྷའི་དཔུང་ཚོགས་འཁོར་བཅས་བསང་།། བུ་ནོར་ལོངས་སྤྱོད་སྤེལ་བའི་ལྷ་སྲུང་བསང་།། ས་མཁར་གཞིས་ཀྱི་འགོ་བའི་ལྷ་ཚོགས་བསང་།། བདག་ཅག་མི་ཤེས་རྨོངས་འཁྲུལ་བག་མེད་པས།། ལྷ་ཁྱོད་ཐུགས་འགལ་འགྲམ་འཁྲུགས་མཐོལ་ལོ་བཤགས།། བཟོད་བཞེས་ཚངས་པའི་ཟླ་ཞལ་མྱུར་དུ་ངོམ།། བདག་ཅག་དཔོན་སློབ་བརྒྱུད་པར་བཅས་ཀུན་གྱིས།། བྱང་ཆུབ་བར་དུ་ལྷ་མཆོག་ཁྱོད་བསྟེན་ན།། སྔོན་ཚེ་དབང་དྲག་པདྨ་དྲག་པོ་དང་།། བར་དུ་གྲུབ་དབང་དྷ་རྨའི་མཚན་ཅན་དང་།། ཐ་མ་སྔགས་འཆང་བདག་གི་བཀའ་བསྒོས་བཞིན།། གཡར་དམ་བཞེས་ལ་གང་བཅོལ་ཕྲིན་ལས་སྒྲུབས།། རྨད་བྱུང་ཐུབ་བསྟན་སྙིང་པོ་ལུང་རྟོགས་ཆོས།། མི་ནུབ་སྤེལ་ཞིང་དེ་འཛིན་འདུས་པའི་སྡེ།། དབྱར་གྱི་མཚོ་བཞིན་འཕེལ་ཞིང་རྒྱས་པ་དང་།། ཐུགས་བཞེད་ལེགས་འགྲུབ་དབུ་འཕངས་དགུང་དུ་བསྟོད།། རྟག་ཏུ་མཆོད་ཅིང་བསྟོད་པའི་རྒྱུ་སྦྱོར་བདག། ཁ་རྗེ་དབང་ཐང་རླུང་རྟ་ཡར་ལ་སྐྱེད།། དགྲ་དང་རྩོད་ན་རྒྱལ་ཁའི་དཔའ་རྟགས་སྤྲོད།། ཕ་རོལ་དཔུང་ཚོགས་མིང་གི་ལྷག་མར་བྱོས།། ཟས་ནོར་ལོངས་སྤྱོད་ཕྱྭ་གཡང་སྤྲིན་བཞིན་བསྡུས།། རྟ་ནོར་ཕྱུགས་ཀྱིས་ར་བ་ཁེངས་བར་མཛོད།། མྱུར་མགྱོགས་འདོ་བའི་བང་རྩལ་རྟ་ལ་སྩོལ།། དཔའ་སྙིང་སྟོབས་ཤུགས་བཙན་པོ་མི་ལ་སྩོལ།། ཀླུ་ནོར་དབྱིག་གི་དངོས་གྲུབ་ཕྱུགས་ལ་སྩོལ།། གཡུལ་རྒྱལ་རྒྱལ་མཚན་མཐོན་པོ་རྟག་ཏུ་བསྒྲེངས།། ཕྱོགས་ལས་རྣམ་རྒྱལ་བཀྲ་ཤིས་བདེ་ལེགས་ཀྱིས།། གཡེལ་མེད་རྟག་ཏུ་སྐྱོང་བའི་བཀྲ་ཤིས་ཤོག། ཅེས་པའང་རྫོགས་ཆེན་པདྨ་སྐལ་བཟང་ངམ་མིང་གཞན་ཤཱཀྱའི་དགེ་སྦྱོང་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དེས་ཤར་མར་བྲིས།། |