ཡུལ་དགེ་རྒྱལ་ནག་ཚང་ཕྱོགས་ཀྱི་གནས་བདག་མཚོ་སྨན་ཆེན་མོའི་བསང་བསྡུས་ཡིད་བཞིན་འདོད་འབྱུང་།ཧྲཱིཿམདུན་མཁར་འཇའ་སྤྲིན་སྣ་ཚོགས་འཁྲིགས་པའི་དབུས། རྣམ་མང་རིག་འཛིན་བྱེ་བའི་གཙུག་གི་རྒྱན།། མཚོ་སྐྱེས་རྒྱལ་བའི་དབང་པོ་པདྨ་འབྱུང་།། སྣང་སྲིད་ཟིལ་གྱིས་གནོན་མཛད་ཧེ་རུ་ཀ། གནས་གསུམ་དཔའ་བོ་ཌཱཀྐིའི་ཚོགས་དང་བཅས།། དམ་ཡེ་བདག་མདུན་དབྱེར་མེད་རོ་གཅིག་བཞུགས།། ཀྱཻ། བྱང་ཕྱོགས་ཕྱི་སྣོད་རིན་ཆེན་འདོད་དགུའི་རི།། ཤེལ་བྲག་ནོར་བུའི་བ་གམ་ལྷུན་སྟུག་རྩེ།། གནམ་སྔོན་བཻཌཱུར་མདངས་ཀྱིས་རབ་སྤུད་པའི།། སྤྲིན་དཀར་མགུལ་རྒྱན་མཛེས་པའི་ས་འཛིན་ཆེ།། ནང་ལྟར་གཞལ་མེད་ཁང་བཟང་གཏེར་གྱི་མཛོད།། སྣ་ཚོགས་རིན་པོ་ཆེ་ལས་གྲུབ་པ་ཡི།། ལྷ་ཀླུ་བྱེ་བས་མཆོད་པའི་སྐུ་མཁར་ཆེ།། ལྕོག་དང་ཐེམ་སྐས་སྟོང་གིས་མཛེས་ཤིང་བརྗིད།། གསང་བ་ཡོངས་གྲུབ་དག་མཉམ་ཆེན་པོའི་གཞིར།། འཁོར་འདས་རོ་གཅིག་ལྷུན་མཉམ་བདལ་བ་ཆེ།། མ་བཅོས་ལྷན་སྐྱེས་གཉུག་མའི་བདེ་ཆེན་རྩལ།། རྣམ་པ་ཡིད་འཕྲོག་ཀླུ་སྨན་འོད་ལྡན་མ།། སྐུ་མདོག་དཀར་མཛེས་གཡུ་ཡི་ལན་ཕྲན་ཅན།། ཨིནྡྲ་ནི་ལའི་རྒྱན་མཆོག་གཙུག་ན་བརྗིད།། རཏྣའི་སྲོག་ཞུ་དར་གྱི་གདེངས་ཐོད་མཛེས།། ཕྱག་ན་འདོད་འབྱུང་ཡིད་བཞིན་ནོར་བུ་བསྣམས།། ལྷ་ཕྲན་བྱེ་བའི་དབུས་ན་འགྱིང་ཞིང་བཞུགས།། སྟེང་ཕྱོགས་ལྷ་གཡང་དངོས་གྲུབ་ཆར་ལྟར་འབེབ།། རེས་འགའ་དར་དཀར་རལ་གུ་སྐུ་ལ་གསོལ།། ཕྱག་གཡས་མདའ་དར་དུང་ཤོ་དཀར་མོ་དང་།། གཡོན་པས་གསལ་བྱེད་འཕྲུལ་གྱི་མེ་ལོང་བསྣམས།། ཆིབས་སུ་གསེར་མདོག་ཤྭ་བ་ཡུ་མོ་བཅིབས།། གཉན་ཕྲན་བྱེ་བ་འབུམ་སྡེའི་རྗེ་མོའི་ཚུལ།། བར་སྣང་གཉན་གྱི་རྩལ་ཤུགས་རླུང་ལས་མྱུར།། རེས་འགའ་ཆུ་དར་སྔོན་མོའི་སྟོད་གཡོག་ཅན།། ཀླུ་ཆེན་བརྒྱད་གྱི་གདེངས་ཀ་དབུ་ལ་མཛེས།། སྐུ་སྨད་སྦྲུལ་མཇུག་གཡུ་ཡི་མཚོ་མོར་གཡེངས།། ཕྱག་ན་རིན་ཆེན་ནོར་བུའི་གཞོང་བ་བསྣམས།། ཀླུ་ཕྲན་འབུམ་སྡེའི་དབུས་ན་ལྷམ་མེར་འབར།། ཀླུ་ནོར་ཟད་མེད་དངོས་གྲུབ་ཆུ་བཞིན་བརྡོལ།། སྔོན་དུས་རྒྱལ་དབང་པདྨ་ཀཱ་ར་ཡིས།། བདེ་སྟོང་གསང་བའི་དཀྱིལ་འཁོར་ཆེར་བཀོད་པའི།། ཀླུ་སྨན་ཆེན་མོ་འཁོར་དང་ཡང་འཁོར་དང་།། སྤྲུལ་པ་ཡང་སྤྲུལ་ཚོགས་དང་བཅས་པ་ཀུན།། དེང་དུས་སྔགས་འཆང་རྣལ་འབྱོར་བདག་ཅག་གིས།། རྩེ་གཅིག་གདུང་བའི་དབྱངས་ཀྱིས་ཉེར་འབོད་ཅིང་།། སྣ་ཚོགས་རོལ་མོའི་སྒྲ་ཡིས་རབ་བསྐུལ་ན།། ཐོགས་མེད་སྐད་ཅིག་ཡུད་ཀྱིས་གནས་འདིར་བྱོན།། བཛྲ་ས་མ་ཡ་ཛཿཛཿ ཀྱཻ། གཞི་དབྱིངས་ཀ་དག་སྟོང་པའི་ངང་ཉིད་ལས།། ལྷུན་གྲུབ་རང་ཤར་སྣང་བའི་འདོད་ཡོན་ཚོགས།། འགག་མེད་རོལ་བའི་རྒྱན་གྱི་དམ་ཚིག་རྫས།། ཕྱི་ནང་གསང་བའི་མཆོད་སྤྲིན་དཔག་མེད་འབུལ།། རང་བྱུང་འབྱུང་ལྔའི་དྭངས་མའི་རྩི་བཅུད་འབྲས།། ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི།། སྦྱོང་བཀྲུས་བསྲེགས་ཤིང་བསྒྱུར་བའི་དུད་པའི་སྤྲིན།། མཁའ་ལམ་ཁྱོན་ཀུན་ཁེངས་པའི་ངོ་མཚར་དཔལ།། རྨད་བྱུང་བདུད་རྩིའི་ཆབ་ཀྱིས་བྲན་པ་འདིས།། མཆོག་གསུམ་སྐུ་གསུམ་རྩ་གསུམ་ལྷ་ཚོགས་བསང་།། ཡེ་ཤེས་འཇིག་རྟེན་སྲུང་མའི་ཚོགས་ཀུན་དང་།། ཡུལ་ལྷ་གཞི་བདག་གནས་གཏེར་སྲུང་མ་བསང་།། ཁྱད་པར་གཡུ་ཤུག་མཁན་དཀར་བ་ལུ་དང་།། ཙན་དན་ཨ་གར་གཙང་མའི་ཤིང་སྣ་ལ།། དཀར་མངར་ཕུད་ཀྱིས་སྦྲུས་པའི་རིན་ཆེན་ཕྱེ།། མེ་རླུང་སྟོབས་ཀྱིས་བསྐུལ་བའི་དུད་སྤྲིན་གྱིས།། བདག་གི་ཕ་མེས་རིགས་ཀྱི་འགོ་བའི་ལྷ།། མཚོ་སྨན་ཆེན་མོ་འོད་ལྡན་འཁོར་བཅས་བསང་།། ཟག་མེད་དབྱིག་གི་མཛོད་ལ་མངའ་བརྙེས་པ།། གཡས་ཀྱི་ལྷ་ཕྲུག་བྱེ་བ་དུང་ཕྱུར་བསང་།། འབྲུ་ནོར་ལོངས་སྤྱོད་དངོས་གྲུབ་ཆར་འབེབ་པ།། གཡོན་གྱི་ཀླུ་གཉན་བྱེ་བ་དུང་ཕྱུར་བསང་།། རྐང་འགྲོས་ཕྱུགས་རིགས་དཀར་ནག་མཚོ་བརྡོལ་བ།། མདུན་གྱི་ཀླུ་ཕྲུག་བྱེ་བ་དུང་ཕྱུར་བསང་།། དགོས་འདོད་ནོར་བུའི་གཏེར་གྱི་བདག་པོ་ཆེ།། རྒྱབ་ཀྱི་གནོད་སྦྱིན་བྱེ་བ་དུང་ཕྱུར་བསང་།། ལྷ་ཞལ་དུང་ཟླ་དཀར་པོ་མཁའ་ལ་བསྟོད།། དབུ་འཕང་རི་དབང་ལྷུན་པོའི་རྩེ་མོར་འགྲན།། ལྷ་མི་མི་འབྲལ་ཉི་ཟླའི་མཆེད་པོར་བརྟན།། ཆུ་གཙང་འོ་མ་ཅན་གྱི་ཁྲུས་ཆབ་ཀྱིས།། ལྷ་སྲུང་མནོལ་དང་འཁོན་དང་གྲིབ་ཀྱི་རིགས།། མི་གཙང་ཉེས་པའི་སྐྱོན་ཀུན་རབ་བཀྲུས་པས།། རྡུལ་བྲལ་ཤེལ་གོང་ཇི་བཞིན་དག་གྱུར་ཅིག། ཁྱད་པར་ཀླུ་རིགས་དཀར་ནག་ཁྲ་བོའི་སྡེ།། རྗེ་རྒྱལ་འབངས་བློན་འཁོར་དང་བཅས་པ་ལ།། དཀར་གསུམ་མངར་གསུམ་ཀླུ་སྨན་བཟང་པོའི་དྲི།། ཕྱེ་མར་འབྲས་དཀར་འོ་ཕུད་སྐྱེམས་ཀྱི་མཆོག། བྱ་རྐྱང་འབྲོང་གཡག་ཤྭ་བ་རྭ་རྒྱས་དང་།། ནེ་ཙོ་བཞད་དང་ངང་ངུར་དུལ་བའི་ཚོགས།། ཆུ་ཕྲན་ལྟེང་ཁ་རྫིང་བུ་དལ་འབབ་རྒྱུན།། ནེའུ་སེང་སྤང་ལྗོངས་ལྗོན་ཤིང་མེ་ཏོག་ཚལ།། འབྲས་ལྡན་ཤིང་སྣའི་ར་བ་རྐང་འགྲོས་ཁྱུ།། དར་ཟབ་རྒྱན་ཕྲེང་སྲིད་པའི་བདོག་དགུའི་རིགས།། མ་ཚང་མེད་པ་ཀུན་བཟང་མཆོད་པའི་སྤྲིན།། མི་ཟད་ནམ་མཁའ་མཛོད་དུ་འབུལ་ལགས་ན།། དགྱེས་བཞེས་ཐུགས་དམ་གཉེན་པོ་བསྐང་གྱུར་ནས།། བདག་ཅག་དཔོན་སློབ་འཁོར་འབངས་བཅས་པ་ལ།། འབྲལ་མེད་ལུས་དང་གྲིབ་མ་བཞིན་དུ་འགྲོག། གཞན་ཕན་ཐུགས་བསྐྱེད་དམ་བཅའི་ཁུར་བཞེས་པའི།། བསྟན་འཛིན་སྐྱེས་བུའི་སྐུ་ཚེ་བརྟན་པ་དང་།། བཤད་སྒྲུབ་ཐོས་བསམ་སྒོམ་པའི་སྙིང་པོ་ཅན།། རྒྱལ་བསྟན་དྲི་མེད་དར་བའི་ཕྲིན་ལས་མཛོད།། ཁྱད་པར་གྲུབ་པའི་དབང་ཕྱུག་རྫོགས་ཆེན་པའི།། བསྟན་སྲིད་ཉི་ཟླས་སྣང་བའི་ཁྱོན་དུ་སྤེལ།། བརྒྱུད་འཛིན་བུ་སློབ་ཡོན་བདག་འཁོར་བཅས་ཀྱི།། མངའ་ཐང་ལོངས་སྤྱོད་ནམ་མཁར་མཉམ་པ་དང་།། སྙན་པའི་གྲགས་པས་ས་སྟེང་ཁྱབ་པར་མཛོད།། ཕུན་ཚོགས་ལས་ཀླུང་སྟོབས་ཀྱི་དབུ་རྨོག་བཙན།། ཕྱྭ་གཡང་འདོད་རྒུའི་དངོས་གྲུབ་ཆར་བཞིན་ཕོབས།། ཕ་རོལ་དགྲ་ཟླ་མིང་གི་ལྷག་མར་ཐོངས།། དཔའ་ཡ་དཔུང་རོགས་ཁ་འཛིན་མ་གཡེལ་ཞིག། ལྷ་གཞི་རྟེན་དང་སྣ་ལྔའི་མདའ་དར་ལ།། མི་འབྲལ་བླ་ཡིད་འཁོར་བའི་རྟེན་ཆོས་ལ།། རྟ་ལུག་ནོར་གྱིས་རི་ཀླུང་ཁེངས་པ་དང་།། དཀར་མོ་འོ་མས་རྒྱ་ཟངས་འགེང་བར་མཛོད།། མདོར་ན་སྲིད་དང་ཞི་བའི་དགེ་མཚན་དང་།། བཀྲ་ཤིས་ལེགས་ཚོགས་མ་ལུས་གཡང་དུ་འདུས།། སྡེ་བཞི་དགེ་བཅུའི་དཔལ་གྱིས་ཀུན་ནས་འབྱོར།། བསམ་དགུའི་རེ་བ་བསྐང་བའི་མཆོག་སྩོལ་ཅིག། ཅེས་པའང་རྒྱལ་བླ་རིན་པོ་ཆེས་བཀས་བསྐུལ་བཞིན་རུ་དམ་རྫོགས་ཆེན་པདྨ་བཛྲའི་སྐྱེ་ཕྲེང་གསུམ་པར་སྒྲོ་བཏགས་པ་པདྨ་སྐལ་བཟང་དེས་རབ་རྒྱན་ཆུ་སྤྲེལ་ཧོར་ཟླ་༥བའི་ཚེས་༨ལ་འཕྲལ་བྲིས།། |