ཟླ་ཡི་དུང་རི་ལུག་ཕྱུག་གི་བསང་གསོལ་འདོད་རྒུའི་ཆར་འབེབ།ཧྲཱིཿ ཀ་དག་སྟོང་ཆེན་འདུས་མ་བྱས་དབྱིངས་ལས།། མ་འགག་རྩལ་སྣང་སྣ་ཚོགས་རོལ་བའི་འཕྲུལ།། ལྷུན་གྲུབ་བདེ་ཆེན་གར་གྱི་ཕྱག་རྒྱ་རུ།། རབ་འབྱམས་དཀྱིལ་འཁོར་འཁོར་ལོ་རྣམ་པར་བཀྲ།། མི་ཤིགས་འབྱུང་ལྔའི་དྭངས་མ་བརྟན་གཡོའི་བཅུད།། ཚེ་དང་གཡང་དུ་འདྲིལ་བའི་ཌཱཀྐིའི་གཙོ།། གཏལ་དཀར་འགྲོ་བཟང་ལས་ཀྱི་རྗེ་མོ་ཡི།། བཀའ་འཁོར་ཡང་སྤྲུལ་ཚོགས་བཅས་གནས་འདིར་སྤྱོན།། ཁྱད་པར་གངས་ཅན་ཤར་ལྷོའི་ཆོས་ཀྱི་ཞིང་།། ཟབ་གསང་སྙིང་པོའི་བསྟན་པ་དར་བའི་ལྗོངས།། སྐྱོང་མཛད་དཀར་ཕྱོགས་ཟོ་དོར་དགྲ་ལྷ་ཆེ།། འཁོར་དང་བཅས་པ་མ་ལུས་འདིར་གཤེགས་བཞུགས།། ཟླ་ཡི་དུང་རི་ལྷུན་སྟུག་རྩེ་རྒྱས་ཀྱི།། རིན་ཆེན་དངུལ་གྱི་ལྷ་མཁར་ཕོ་བྲང་ཆེར།། གཡང་དཀར་ལུག་ལ་འགོ་བའི་ཕྱུགས་ཀྱི་ལྷ།། གནས་བདག་ལྷ་གཉན་གནོད་སྦྱིན་མཐུ་བོ་ཆེ།། ཁྱོད་ཀྱི་སྤྲུལ་སྒྱུར་སྣ་ཚོགས་གྲངས་མེད་ཀྱང་།། རེས་འགའ་རབ་མཛེས་ཟླ་ཞལ་དཀར་པོའི་མདངས།། འཛུམ་ཞིང་བཞད་པས་ཁམས་གསུམ་ཡིད་འགུགས་ཅིང་།། ཕོ་རྒྱུད་དཔའ་བོའི་བླ་ཚེ་གསོ་བར་བྱེད།། རེས་འགའ་མདུང་དམར་བ་དན་མཁའ་ལ་འཕྱོ།། དར་འཕྲུ་རྒོད་འཕྲུའི་རྩེ་སྒྲོ་དགུང་ལ་ངོམ།། མྱུར་མགྱོགས་རྟ་ཕོས་ཁམས་གསུམ་ཡུད་ཀྱིས་བསྐོར།། ཕ་རོལ་དགྲ་སྡེའི་གཡུལ་ལས་རྒྱལ་བར་བྱེད།། རེས་འགའ་སྣ་ཚོགས་དར་གྱི་གཡབ་མོ་དང་།། དོན་ཡོད་ནོར་བུའི་འཕྲུལ་གྱི་ཞགས་པ་ཡིས།། སྲིད་ཞིའི་ཕུན་ཚོགས་གཡང་དུ་འགུགས་བྱེད་ཅིང་།། རྐང་བཞི་ཕྱུགས་ཀྱི་ར་བ་སྤེལ་བར་བྱེད།། ཁྱེད་དང་མཐུན་པའི་དམ་རྫས་དཀར་གསུམ་ལ།། མངར་གྱི་ཁ་ཚར་བཏབ་པའི་རོ་མཆོག་དང་།། ཇ་ཆང་སྐྱེམས་ཕུད་སྨན་གཏོར་རཀྟའི་ཚོགས།། མི་ཟད་ནམ་མཁའ་མཛོད་ཀྱི་སྤྲིན་དུ་འབུལ།། གཡུ་རྔོག་ཤུགས་ལྡན་རྟ་དང་ཟལ་དཀར་འབྲི།། སྨྲ་མཁས་ནེ་ཙོ་གོ་མཚོན་ཡ་ལད་རིགས།། གསེར་དངུལ་མཆོང་དང་མརྒད་པུ་ཤེལ་ཙི།། ལྷ་མིའི་ནོར་སྣ་སྲིད་འབྱོར་ཀུན་གྱིས་མཆོད།། སྨན་ཤིང་མེ་ཏོག་ལྷན་སྐྱེས་སྦྱར་བྱུང་སྤོས།། བདུད་རྩིའི་ཆབ་གཙང་འོ་ཕུད་ཀྱིས་བྲན་པ།། དམར་པོའི་མེ་ལ་སྦྱངས་བའི་དུད་སྤྲིན་གྱིས།། ལྷ་སྲུང་མནོལ་དང་བཙོག་པའི་གྲིབ་རིགས་བསང་།། མ་རིག་འཁྲུལ་བས་ནོན་པའི་གཞན་དབང་གིས།། ཐུགས་འགལ་ཉེས་པའི་འཁོན་རྣམས་བྱང་གྱུར་ཏེ།། ལྷ་ཞལ་ཟླ་བ་དཀར་པོས་དུས་ཀུན་ཏུ།། འབྲལ་མེད་སྐྱོང་བའི་ཕྲིན་ལས་མ་གཡེལ་ཤིག། སྔོན་ཚེ་དཔལ་ཆེན་གདོད་མའི་ཧེ་རུ་ཀ། པདྨ་དྲག་པོར་ཁྲོས་པའི་ཕྱག་རྒྱའི་གར།། སྤྱི་བོར་བླངས་བའི་ཐ་ཚིག་ཉེར་དགོངས་ཏེ།། མི་འདའ་རྡོ་རྗེའི་དམ་ལ་གནས་པར་མཛོད།། སྒྲུབ་མཆོག་རྣལ་འབྱོར་བདག་ཅག་འཁོར་བཅས་ཀྱི།། ནད་གདོན་ཞི་ཞིང་ཚེ་དཔལ་འབྱོར་བ་རྒྱས།། སྣང་སྲིད་དབང་འདུས་ལོག་འདྲེན་ཚར་གཅོད་པའི།། རྣམ་བཞིའི་ཕྲིན་ལས་མ་ཐོགས་མྱུར་སྒྲུབས་ཤིག། རྒྱལ་བསྟན་ལུང་དང་རྟོགས་པའི་བདག་ཉིད་ཆེ།། བཤད་དང་སྒྲུབ་པས་སྤེལ་བའི་ཆོས་ཀྱི་སྡེ།། འཁོར་ལོ་གསུམ་གྱི་མཛད་པས་རབ་འཕེལ་བའི།། སྡོང་གྲོགས་དུས་ཀུན་མ་གཡེལ་མེལ་ཚེ་གྱིས།། མ་རབས་སྡིག་སྤྱོད་དམ་ཉམས་སྙིང་རྗེའི་ཡུལ།། མངོན་སྤྱོད་དྲག་པོའི་མཚོན་གྱིས་གཏུབས་བྱས་ཏེ།། ངན་འབྲེལ་འཁོར་བའི་གཡང་ལས་སྐྱོབ་པ་ཡི།། རིག་སྔགས་སྤུ་གྲི་འབར་བའི་སྣ་དྲོངས་ཤིག། མདོར་ན་གཞི་ལམ་བྱེས་གསུམ་དུས་ཀུན་དུ།། ལྷ་ཁྱོད་འབྲལ་མེད་གྲིབ་བཞིན་འགྲོག་གྱུར་ནས།། ལེགས་ཚོགས་ཡོན་ཏན་ཡར་གྱི་ཟླ་བཞིན་རྒྱས།། བདེ་སྐྱིད་དཔལ་ལ་རོལ་བའི་བཀྲ་ཤིས་ཤོག། ཅེས་པ་འདི་ཤྲཱི་སེང་ཆོས་གྲྭའི་ཤར་ཐོས་བསམ་ནོར་བུའི་གླིང་གི་སྡེ་སྣོད་འཛིན་པ་ལ་ཐོག་སྟོབས་རྒྱལ་གྱི་བཞེད་སྐོང་དུ་རབ་གནས་ས་ཡོས་ཧོར་ཟླ་༨པའི་ཚེས་༡༠ཡི་ཉི་ཤར་ལ་རྫོགས་ཆེན་པདྨ་སྐལ་བཟང་དེས་བྲིས་པའོ།། |