མདོ་མང་བླ་མ་རིག་འཛིན་དཔལ་ལྡན་གྱི་ཞབས་བརྟན་གསོལ་འདེབས་དགེ་ལེགས་དཔལ་འཕེལ།
རྒྱལ་བ་དགྲ་རྒྱལ་དྲང་སྲོང་གྲུབ་པའི་གཙོ།།
མཆོག་གསུམ་ལྷ་དང་སྲུང་མ་མཐུ་རྩལ་ཅན།།
མ་ལུས་དཀར་ཕྱོགས་སྐྱོང་བའི་ཚོགས་ཀུན་གྱིས།།
ངག་ལ་བདེན་ཚིག་གྲུབ་པའི་མཆོག་སྩོལ་ཅིག།
ཕུན་ཚོགས་བརྟན་དང་གཡོ་བའི་དགེ་མཚན་བཅུད།།
གཅིག་ཏུ་འདྲིལ་བའི་སྲོག་རྟེན་དྭངས་མའི་རྫས།།
མི་ཤིགས་ཁ་སྦྱོར་བདུན་གྱི་གོང་བུ་རུ།།
ཨེ་ཝཾ་གཉིས་མེད་ཟུང་འཇུག་ངོ་བོར་སྐྱིལ།།
ཕུལ་བྱུང་གྲུབ་རིག་འཛིན་པ་འཁོར་ལོའི་མགོན།།
ཁྱབ་བདག་མཚུངས་མེད་དཔལ་ལྡན་བླ་མ་རྗེ།།
འཕོ་བྲལ་རྡོ་རྗེའི་ཁམས་སུ་རྟག་བརྟན་པའི།།
འཆི་མེད་ཚེ་ལྷའི་ངོ་བོར་ཞབས་བརྟན་གསོལ།།
གང་ཐུགས་རྙོག་མེད་སྒྲིབ་བྲལ་ཞི་བའི་ཁམས།།
རྩེ་གཅིག་མཉམ་པར་བཞག་པའི་ཏིང་འཛིན་རྒྱུན།།
བསྐྱེད་རྫོགས་དབྱེར་མེད་རིམ་གཉིས་རྣལ་འབྱོར་ལ།།
གོམས་པའི་རྣམ་ཐར་སྲིད་པའི་རྒྱན་གྱུར་ཅིག།
བདག་སོགས་དེང་ནས་འཁོར་བ་ཇི་སྲིད་དུ།།
དུས་ཀུན་འབྲལ་མེད་རྗེས་སུ་བཟུང་གྱུར་ཏེ།།
ནམ་མཁའ་ཇི་སྲིད་འགྲོ་ལ་དཔལ་སྟེར་བ།།
དམ་པ་ཁྱེད་དང་དགོངས་པ་མཉམ་པར་ཤོག།
ཅེས་པའང་རབ་གནས་ས་ཡོས་ལོར་སྟག་རོང་སྐལ་བཟང་གིས་བསྐུལ་ངོར་རྫོགས་ཆེན་པ་པདྨའི་མིང་ཅན་གྱིས་ཞོགས་ཐུན་ཞིག་གི་སྔ་རོལ་དུ་ཤྲཱི་སེང་ཆོས་གྲྭ་ནས་བྲིས་པའོ།།