བྱ་བཏང་ཀུ་ས་ལི་པ་མི་ཉག་རྒྱལ་སྒོའི་བླ་མ་སངས་རྒྱས་ཚེ་འཕེལ་གྱི་ཞབས་བརྟན་གསོལ་འདེབས་བདེན་ཚིག་གྲུབ་པའི་དབྱངས་སྙན།
རིག་སྟོང་ཟུང་འཇུག་མི་ཕྱེད་གཉུག་མའི་ལྷ།།
འཕོ་བྲལ་འཆི་མེད་གཡུང་དྲུང་དམ་པའི་མགོན།།
རྩ་གསུམ་ལྷ་དང་སྲུང་མ་རྒྱ་མཚོའི་ཚོགས།།
རྡོ་རྗེའི་བདེན་ཚིག་ཆེན་པོས་ཉེར་དགོངས་ཤིག།
ཕུལ་བྱུང་ཐུགས་བསྐྱེད་ཟླ་བའི་དཀྱིལ་འཁོར་ལ།།
ཡ་མཚན་མཛད་བཟང་རི་དྭགས་གཟུགས་བཀྲ་བ།།
དགེ་བའི་བཤེས་མཆོག་བསྟན་འཛིན་འགྲོ་བའི་མིག།
ཐུབ་བསྟན་སྙིང་པོའི་སྲོག་ཏུ་འཚོ་གཞེས་གསོལ།།
སངས་རྒྱས་བྱང་སེམས་རིག་པ་འཛིན་པའི་གཙོ།།
ཚེ་ཡི་དྲང་སྲོང་ལྷ་དང་གྲུབ་པའི་ཚོགས།།
འཕེལ་བྱེད་མགྱོགས་མ་མཐུ་ལྡན་བདེན་སྟོབས་ཀྱིས།།
བསྟན་འཛིན་མཆོག་གི་སྐུ་ཚེ་བརྟན་གྱུར་ཅིག།
སྔ་འགྱུར་ཟབ་གསང་གདེང་ཅན་རོལ་བའི་གནས།།
སྡེ་གསུམ་ཀློང་དགུའི་མ་དྲོས་འཁྱིལ་བའི་མཚོར།།
བྱར་མེད་རྒྱལ་པོ་ཀླུ་དབང་སྙེམ་བྲལ་བ།།
འཁྲུལ་ཞིག་འགྲོ་བའི་མགོན་པོ་བསྐལ་བརྒྱར་བཞུགས།།
ཨེ་ཝཾ་ཟུང་འཇུག་འགྱུར་མེད་བདེ་ཆེན་གཤིས།།
མཐའ་བྲལ་ནཱ་དའི་སྲོག་གི་སྙིང་པོ་རུ།།
གཞོམ་བྲལ་ལྷན་སྐྱེས་སྲིད་ཞིའི་བཅུད་འབར་བ།།
མི་འགྱུར་འདུས་མ་བྱས་པར་བཞུགས་གསོལ་འདེབས།།
རྣམ་པ་ཀུན་གྱི་མཆོག་ལྡན་སྟོང་ཉིད་དབྱིངས།།
མི་ཤིགས་ཁ་སྦྱོར་ཡན་ལག་བདུན་གྱི་དངོས།།
འགྱུར་མེད་དྭངས་མའི་ངོ་བོར་རྟག་བརྟན་པའི།།
བསླུ་མེད་བདེན་པའི་དགེ་ལེགས་འབར་གྱུར་ཅིག།
བཀྲ་ཤིས་ཀུན་གྱི་བཅུད་བསྡུས་བརྟན་གཡོའི་དཔལ།།
བཀྲ་ཤིས་འཁོར་འདས་ལེགས་ཚོགས་འཁྱིལ་བའི་བཅུད།།
བཀྲ་ཤིས་སྨོན་པའི་ཐིག་ལེར་ཡོངས་བཟླུམས་པ།།
བཀྲ་ཤིས་བདེན་ཚིག་དག་པས་འགྲུབ་གྱུར་ཅིག།
ཅེས་པའང་ཤར་མེ་ཉག་པ་ཆོས་དར་ལགས་ཀྱིས་བསྐུལ་ངོར་སྙོམ་ལས་པ་པདྨ་སྐལ་བཟང་དེས་ཕྱིས་ཞིག་མཚོ་སྔོན་ཁྲི་ཤོར་རྒྱལ་མོའི་ཉེ་འགྲམ་ནས་ལས་ཞོར་ཞིག་ལ་བྲིས་ཏེ་བསྲིངས་བ་དགེ།