རྫོགས་ཆེན་ཕུར་སྒྲུབ་ཆེན་མོའི་སྐབས་ཀྱི་ཚོགས་བཤད་ཁྲག་འཐུང་དགྱེས་པའི་གད་རྒྱང་།

ཨེ་དབྱིངས་མི་འགྱུར་སྟོང་ཆེན་ཐབས་མཆོག་ཁྲག་འཐུང་རྡོ་རྗེ་གཞོན་ནུའི་སྐུ།།

ཝཾ་ཡིག་བདེ་ཆེན་ཤེས་རབ་སྣང་ཆ་སྦྱོར་སྒྲོལ་གསང་བའི་ཡུམ་ཆེན་གཉིས།།

ཟུང་འཇུག་དབྱེར་མེད་སྙིང་རྗེར་ཤར་བ་སྲས་མཆོག་ཀཱི་ལ་རིགས་ལྔ་དང་།།

ཁྲོ་བཅུ་ཕྲ་ཐབས་སྲུང་མར་བཅས་པས་ཤིས་པའི་དགེ་ལེགས་ཆར་དུ་སྙིལ།།

ཀུན་བཟང་གདོད་མའི་མགོན་པོ་ཧེ་རུ་ཀ།

རྒྱལ་སྲས་རིགས་གསུམ་སེམས་དཔའ་དྲ་མ་ལྔ།།

པད་འབྱུང་བཱི་མ་པྲ་ཆེན་ཧསྟི་སོགས།།

བརྒྱུད་གསུམ་བླ་མས་བྱིན་རླབས་མཐུ་ནུས་སྩོལ།།

ཁྱད་པར་ངེས་གསང་ཐེག་རྩེའི་བསྟན་པའི་སྙིང་།།

སྡེ་གསུམ་ཀློང་དགུའི་མན་ངག་གསང་བའི་མཛོད།།

འཛིན་མཛད་མདོ་ཁམས་རྒྱལ་བ་རྫོགས་ཆེན་པ།།

ཡབ་སྲས་བརྒྱུད་པར་བཅས་པས་དེང་འདིར་སྐྱོངས།།

དེ་ལ་འདིར་སྐྱབས་མཆོག་རྒྱལ་ཀུན་འདུས་པའི་རང་གཟུགས། མཚོར་འཁྲུངས་པདྨ་ཀཱ་རའི་རྒྱལ་ཚབ། གསང་ཆེན་བསྟན་པ་འཛིན་པའི་སྒྲོན་མེ། རིས་བྲལ་ཐུབ་བསྟན་སྐྱོང་བའི་མངའ་བདག སྙིགས་དུས་བསྟན་དང་འགྲོ་བའི་དཔུང་གཉེན་ཆེན་པོ་བསམ་བཞིན་སྲིད་པ་བཟུང་བའི་མཆོག་གི་སྤྲུལ་པའི་སྐུ་རྣམས་དང་། ལམ་བསླབ་པ་གསུམ་གྱི་ཉམས་ལེན་དང་། ལུང་སྡེ་སྣོད་གསུམ་གྱི་ཐོས་བསམ། རིམ་གཉིས་ལྟ་སྒོམ་ཟབ་མོའི་གདེང་དང་ལྡན་པའི་སྒྲུབ་མཆོག་ལས་སྐལ་ལྡན་པའི་འཁོར་ཚོགས་འདུས་པ་རྒྱ་མཚོ་དང་བཅས་པའི་ལྷ་གྲལ་འདིར། ཇི་སྐད་དུ། འཇིག་རྟེན་སྐྱེ་བོ་ནོར་གྱིས་མགུ། །དམ་པ་ལེགས་བཤད་གཏམ་གྱིས་དགྱེས། །མཁས་པ་ཚོགས་པའི་ལྷ་གྲལ་ན། །ལེགས་བཤད་འདྲ་བའི་དགའ་སྟོན་མེད། །ཅེས་གསུངས་པ་ལྟར། འདིར་བཞུགས་དམ་པ་ཚོགས་པའི་ལྷ་གྲལ་གྱི་གསེར་སྙན་དུ། སྨྲ་བ་ངག་གིས་ཉེ་བར་མཚོན་པའི་ལེགས་བཤད་གཏམ་གྱི་སྦྱོར་བ་ཅུང་ཟད་ཅིག་མནྜལ་གྱི་ཚུལ་དུ་འབུལ་བ་ལ། དེ་ཡང་ཡས་གཏམ་དམ་པ་ལྷ་ཆོས་དཀར་པོའི་གཏམ་གྱིས་ཁོག་དབུབ། མས་གཏམ་འཇིག་རྟེན་ཡ་རབས་སྲོལ་བཟང་གི་ལོ་རྒྱུས་ཀྱིས་གཞི་བཏིང་། མཛེས་གཏམ་སྒྲ་ཚིག་སྡེབ་སྦྱོར་དག་པའི་ངག་གི་བརྗོད་སྒྲོས་ཀྱིས་ཟུར་བརྒྱན་ཏེ་ཞུ་ན། དེ་ཡང་སྤྱིར་བརྗོད་བྱ་ཚིག་གི་ཡལ་ག་དེ་རྒྱ་ཆེ་བའི་སྟབས་ཀྱིས། རྗོད་བྱེད་གཏམ་གྱི་ལོ་མ་དེ་གྲངས་མང་བ་དང་སྒོ་བསྟུན་ན། བརྗོད་དོན་འབྲས་བུའི་མེ་ཏོག་མདངས་མཚར་བ་ཞིག་འབྱུང་བ་དེ། འཇིག་རྟེན་སྲིད་པའི་དཔེ་ལ་གྲགས་པ་ལྟར་ལགས་མོད། འཇམ་མགོན་མི་ཕམ་པས། རེས་འགའ་མ་སྨྲས་དོན་མི་འགྲུབ། །རེས་འགའ་མི་སྨྲ་དོན་དག་སྒྲུབ། །སྨྲ་དང་མི་སྨྲ་མ་ཤེས་ན། །སྨྲ་འཆལ་འགྱུར་ཏེ་ཉེས་པ་མང་། །ཞེས་གསུངས་པ་ལྟར། སྐབས་སུ་བབས་པའི་གཏམ་དེ། དུས་སུ་སྨིན་པའི་ཆར་དང་མཚུངས་པར་འོས་ཤིང་འཚམས་ལ་སྐབས་ཐོབ་ཀྱི་དོན་དང་ལྡན་པར་ཞུ་དགོས་པ་ལས། ད་ལམ་འདིར་གྲུབ་པའི་རིག་འཛིན་རྒྱ་མཚོའི་དགོངས་བཅུད། གནས་གསུམ་མ་དང་མཁའ་འགྲོའི་ཐུགས་ཐིག མདོ་རྒྱུད་མན་ངག་དུ་མའི་ཟབ་གནད། བྱིན་རླབས་དངོས་གྲུབ་ཟབ་མོའི་ཉེ་ལམ། རྩོད་བྲལ་སྤྲུལ་པའི་གཏེར་ཆེན་རང་བྱུང་རྡོ་རྗེ་འཇིགས་བྲལ་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཆེན་པོའི་ནང་ཚན། བཀའ་མའི་རྒྱུད་གཞུང་གིས་ཁོག་ཕུབ་པར། གཏེར་མའི་མན་ངག་གིས་ཟུར་བརྒྱན་པ། བཀའ་གཏེར་ཆུ་བོ་གཅིག་འདྲེས་སུ་གྲགས་པའི་རྡོ་རྗེ་ཕུར་པ་རྒྱུད་ལུགས་ཀྱི་ཚོམ་བུ་ཚོགས་སྒྲུབ་ཆེན་པོའི་སྐབས་འདིའི་སྒྲུབ་ཕྲིན་འདི་ཉིད་ཀྱི་ལོ་རྒྱུས་རགས་བསྡུས་ཙམ་ཞུ་བའི་དབང་དུ་བྱས་ན། ཇི་སྐད་དུ། ཡིད་ཆེས་ངེས་པ་སྦྱིན་པའི་ཕྱིར། །ཐོག་མར་བརྒྱུད་པའི་ལོ་རྒྱུས་བཤད། །ཉམས་ལེན་སྲང་དུ་འཛུད་པའི་ཕྱིར། །སྟོང་ཐུན་སྙིང་པོར་དྲིལ་ཏེ་བཤད། །བསྙེན་སྒྲུབ་མཐའ་རུ་ཕྱིན་པའི་ཕྱིར། །རྒྱུན་གྱི་བསླབ་སྤྱོད་བསྡུས་ཏེ་བཤད། །ཅེས་གསུངས་པ་ལྟར་ཐོག་མར་གང་ལས་བྱུང་བའི་བརྒྱུད་པའི་ལོ་རྒྱུས་ནི། ཇི་སྐད་དུ། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །གང་ལ་ཐུག་གི་བར་དུའོ། །ཞེས་པ་ལྟར་བརྒྱུད་པའི་བབ་སྲོལ་ཆེན་པོ་གསུམ་ཡོད་པ་ལས། དང་པོ་རྒྱལ་བ་དགོངས་པའི་བརྒྱུད་པ་ནི། རིགས་དང་དཀྱིལ་འཁོར་ཐམས་ཅད་ཀྱི་འཆར་གཞི་སྟོན་པ་གདོད་མའི་མགོན་པོ་འོད་མི་འགྱུར་བ་ཀུན་བཟང་ཆེ་མཆོག་ཧེ་རུ་ཀས། འཁོར་ཉིད་ལས་མི་གཞན་པ་ཡེ་ཤེས་ཀློང་དགུའི་རྩལ་སྣང་དག་པ་རབ་འབྱམས་སུ་ཤར་བའི་ཞི་ཁྲོ་རབ་འབྱམས་ཀྱི་ཚོགས་རྣམས་ལ། ཆོས་བརྡ་ཚིག་གིས་མཚོན་དུ་མེད་པ་གདོད་ནས་འོད་གསལ་བའི་དགོངས་པ་དེ་ཉིད་བྱིན་གྱིས་བརླབས་པའི་ཚུལ་གྱིས། དུས་བཞི་རྫོགས་མཉམ་ཉིད་ཆེན་པོ་འཕོ་འགྱུར་བྲི་གང་དང་བྲལ་བའི་དུས་སུ་གསུངས་པ་ནི་རྒྱལ་བ་དགོངས་པའི་བརྒྱུད་པ། སྟོན་པ་འོད་མི་འགྱུར་བ་ཉིད་རྒྱལ་སྲས་རིགས་གསུམ་སེམས་དཔའི་རྣམ་པར་སྣང་བར་མཛད་དེ། ལྷ་ཀླུ་གནོད་སྦྱིན་གྱི་གནས་རྣམས་སུ། ཆོས་གང་འདུལ་བསམ་གྱིས་མི་ཁྱབ་པའི་དགོངས་པ་མི་མ་ཡིན་པའི་འཁོར་ཚོགས་ལ་གསུངས་པས། དེ་དག་ཐམས་ཅད་ཚོམ་བུ་འབུམ་དང་བཅས་ཏེ་རིག་འཛིན་གྱི་ས་ལ་རེག་པར་གྱུར་པ་དང་། རི་བོ་མ་ལ་ཡའི་རྩེ་མོར་གསང་བའི་བདག་པོ་དངོས་སུ་བྱོན་ནས་དམ་པའི་རིགས་ཅན་དྲ་མ་ལྔ་ལ་གསང་སྔགས་རྡོ་རྗེ་ཐེག་པའི་ཆོས་འཁོར་བསྐོར་ནས་སྨིན་པར་མཛད་ཅིང་། སྲིན་པོ་བློ་གྲོས་ཐབས་ལྡན་གྱིས་གསང་སྔགས་ཀྱི་རྒྱུད་རྣམས་ཚིག་དང་ཡི་གེར་བྱིན་གྱིས་བརླབས་ནས་གསེར་གྱི་གླེགས་བམ་ལ་བཻཌཱུརྱ་ཞུན་མས་བྲིས་པ་གསང་བའི་བདག་པོས་དགོངས་པའི་རྩལ་བདུན་གྱིས་རྒྱས་བཏབ་པ། ལས་ཅན་ཆོས་ཀྱི་བདག་པོ་རྒྱལ་པོ་ཛཱའི་ཁང་སྟེང་དུ་བབས། ཕྱག་ན་རྡོ་རྗེས་དབང་བསྐུར་ནས་དོན་བརྒྱུད་ཀྱི་དགོངས་པ་གཏད་པས་རྒྱལ་པོ་ཛཱས་རྒྱུད་དོན་ཇི་ལྟ་བ་བཞིན་རྟོགས་ནས་ཀུ་ཀུ་ར་ཛཱ་དང་། སྲས་མོ་གོ་མ་དེ་ཝའི་བར་བརྒྱུད་ནས་འཁོར་ཚོམ་བུ་འབུམ་དང་བཅས་པ་རིག་འཛིན་གྱི་སར་འཁོད་པ་ནི་རིག་འཛིན་རིག་པའི་བརྒྱུད་པ། སློབ་དཔོན་སངས་རྒྱས་གསང་བ་དང་། པཎ་ཆེན་བི་མ་མི་ཏྲ། ཨོ་རྒྱན་སངས་རྒྱས་གཉིས་པ་སོགས་ནས་ད་ལྟའི་བར་དར་ཞིང་བརྒྱུད་པ་ཕུར་པ་རྒྱལ་པོ་ལུགས་དང་། ཇོ་མོ་ལུགས། ལྕམ་ལུགས་བཅས་གསུམ་དང་། དེ་དག་ལས་གྱེས་པ་སྣ་ནམ། ཁྱུང་པོ། འགོས། སོ་ཟུར་གནུབས་གསུམ། རོང་ལུགས་རོག་ལུགས་ལ་སོགས་པ་མང་ཞིག་མཆིས་པ་དེ་དག་གང་ཟག་སྙན་ཁུང་གི་བརྒྱུད་པ་སྟེ། སྐབས་འདིའི་དགོས་ཆོས་ཕྲིན་ལས་རྡོ་རྗེ་ཕུར་པའི་རྒྱུད་འགྲེལ་ཊིཀ་སྟོང་ཐུན་མན་ངག་ལག་ལེན་དང་བཅས་པ་རྣམས་རིག་འཛིན་པྲ་བྷ་ཧསྟི་ལ་བཀའ་བབས། པཎ་ཆེན་བི་མ་མི་ཏྲ། བལ་པོ་མཉྫུ་ཤི་ལ། མཁའ་འགྲོ་ཡེ་ཤེས་མཚོ་རྒྱལ། མེ་ནུ་རྒྱལ་བའི་སྙིང་པོ། གཉག་ཆེན་ཛྙ་ན་ཀུ་མ། གྲུབ་ཆེན་འདའ་འཕྱར་བ་ལ་སོགས་པ་དཔལ་ཆེན་ཕུར་པ་གྲུབ་པའི་གྲུབ་ཐོབ་ཆེན་པོ་སྣང་སེམས་ལ་རང་དབང་དུ་བསྒྱུར་བ། མཐུ་སྟོབས་ཀྱིས་གནམ་ས་གཡོ་འགུལ་བཏང་བའི་ནུས་པ་དང་ལྡན་པ་གྲུབ་རྟགས་ཡ་མ་ཟུང་དུ་བསྟན་པ་མང་རབ་ཅིག་བྱོན། དེ་ལས་ཀྱང་ཁྱད་པར་དུ་གྱུར་པ། དགོངས་པ་འདུས་པའི་གཏེར་ལུང་བཀའ་རྒྱ་མར། ལྷོ་ཕྱོགས་འོད་ཟེར་མིང་ཅན་སྤྲུལ་པའི་སྐུ། །ཟབ་དོན་སྙིང་ཐིག་ཆོས་ཀྱིས་འགྲོ་བ་འདྲེན། །འབྲེལ་ཚད་རིག་འཛིན་ཞིང་དུ་འཕེན་པ་འབྱུང་། །ཞེས་རྒྱལ་དབང་པདྨ་ཀཱ་རའི་ལུང་དོན་ལྟར་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཆེན་པོ་ལ་མངའ་དབང་དུ་བསྒྱུར་བ་ཀློང་ཆེན་ནམ་མཁའི་རྣལ་འབྱོར་ཀུན་མཁྱེན་འཇིགས་མེད་གླིང་པ་ཞེས་དགོངས་བརྡ་སྙན་ཁུང་གི་བརྒྱུད་པ་ཐམས་ཅད་རིག་འཛིན་གཅིག་ལ་རྫོགས་པ་དེ་ཉིད་ཆོས་འདིའི་མངའ་བདག་ཏུ་གྱུར་ནས། ཕྲིན་ལས་ཕུར་པའི་རྒྱུད་སྡེ་རྒྱ་མཚོ་ལྟ་བུའི་སྙིང་པོའི་ཡང་ཞུན་བཅུད་དུ་དྲིལ་ཏེ། འཁྲུགས་པ་བསྡབས། གབ་པ་ཕྱུང་སྟེ། རྒྱུད་སྒྲུབ་ཐབས་དང་འབྲེལ། སྒྲུབ་ཐབས་མན་ངག་དང་འབྲེལ། མན་ངག་ཆོག་ཁྲིགས་དང་འབྲེལ། ཆོག་ཁྲིགས་ཕྱག་ལེན་དང་འབྲེལ་བ་སྟེ་འབྲེལ་བ་བཞི་ལྡན་གྱིས་གཏན་ལ་ཕབ་པར་མཛད་པ་ལས། སླར་ཡང་སྙིགས་དུས་མཐའ་དམག་དམ་སྲིའི་རུ་མཚོན་གཟིངས་ཤིང་། ནད་མུག་མཚོན་གྱི་སྐལ་ངན་ཤར་བའི་དུས་འདིར། དུས་ངན་གྱི་རྒུད་པ་ཞི་ཞིང་། སྣོད་བཅུད་ཀྱི་དཔལ་གཡང་འཕེལ་བ་སོགས་དགོས་གནད་ཁྱད་པར་ཅན་ལ་གཟིགས་ནས་བདེ་གཤེགས་རིན་ཆེན་གཙུག་གཏོར་ཅན་མངོན་སུམ་མིའི་རྣམ་རོལ་དུ་ཕེབས་པ་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ་ནས་ཐུགས་དམ་གསང་བའི་ལྷ་མཆོག་ཏུ་བསྟེན་ཅིང་སྒྲུབ་ཆེན་གྱི་ཕྱག་སྲོལ་བཏབ་སྟེ། བཅའ་གཞི་བཤམས་བཀོད། གདངས་དབྱངས་འདོན་རྟ། རྔ་རོལ་དྲིལ་སྟབས། ཕུར་འཆམ་ཆེན་པོ་སོགས་ཕྱག་ལེན་ཕྲ་ཞིབ་ནས་གཏན་ལ་ཕབ་པ་འདི་ཉིད། སྟེང་ན་རིག་འཛིན་བརྒྱུད་པའི་གྲལ་མ་ཞིག །ས་ལ་དཀྱིལ་འཁོར་གྲུ་བཞིའི་བཀྲག་མ་ཡལ། །དམ་རྫས་སྨན་རཀ་བདུད་རྩིའི་མཚོ་མ་སྐམ། །སྨིན་བྱེད་དབང་དང་བརྒྱུད་པའི་ཟམ་མ་ཆད། །གྲོལ་བྱེད་བསྐྱེད་རྫོགས་ཟབ་མོའི་གནད་མ་འཕྱུག། ཕྲིན་སྒྲུབ་ཆོ་གའི་ཕྱག་བཞེས་ཀྱི་སྲོལ་མ་ཉམས་པར་ཞལ་ནས་སྙན་དུ་རིམ་པར་བརྒྱུད་དེ་བདག་ཅག་གི་ཆོས་སྐལ་དུ་བཞུགས་པའི་བར་ནི། གང་ལས་བརྒྱུད་པ་ལོ་རྒྱུས་ཀྱི་ཆེ་བ་ལགས། དེ་ནས་ལོ་རྒྱུས་དེ་ལྡན་གྱི་ཆོས་སྐལ་ཟབ་མོ་འདི་ཉིད་ཀྱི་དངོས་གཞིའི་སྟོང་ཐུན་གྱི་སྐོར་ནས་ཞུས་ན། སྤྱིར་ཕུར་པ་ཞེས་པའི་སྒྲ་དོན་ནི། ཕུར་ནི་ཐམས་ཅད་བྱང་ཆུབ་སེམས། །པ་ནི་ཐམས་ཅད་ཀུན་ལ་ཁྱབ། །ཕུར་ནི་ཐམས་ཅད་གཙོ་བོ་མཆོག། པ་ནི་ཐམས་ཅད་འཁོར་གྱི་ཚུལ། །ཕུར་ནི་ཐམས་ཅད་སྐྱེ་བ་མེད། །པ་ནི་རོལ་བ་འགག་པ་མེད། །ཕུར་ནི་ཐམས་ཅད་བྱང་ཆུབ་སེམས། །པ་ནི་ཐམས་ཅད་དེ་རུ་སྒྲུབ། །ཞེས་གསུངས། རང་རིག་ཡེ་ཤེས་ཀྱི་ཕུར་པ་གདབ་ཡུལ་ཆོས་ཀྱི་དབྱིངས། མཚན་མ་རྫས་ཀྱི་ཕུར་པ་གདབ་ཡུལ་ཉམས་པ་བདུན་ལྡན། ཆོས་ཉིད་དོན་གྱི་ཕུར་པ་གདབ་ཡུལ་ཁམས་གསུམ་སེམས་ཅན་ཡིན་ཞིང་། ཕུར་པ་བསྒྲུབ་པ་དེ་ཡང་བསྙེན་སྒྲུབ་ཡན་ལག་བཞིར་འདུས་ཏེ། དེ་ཡང་སྟོད་ལས་བྱང་ཆུབ་སྒྲུབ་པ་དང་། སྨད་ལས་དགྲ་བགེགས་བསྒྲལ་བ་གཉིས་ལ་མ་འདུས་པ་མེད། དེ་ཉིད་ཀྱང་བསྐྱེད་རྫོགས་ཟུང་དུ་འབྲེལ་བ་ཞིག་དགོས། བསྐྱེད་རྫོགས་ཟུང་དུ་མ་འབྲེལ་ན་གསང་སྔགས་གཟུགས་བརྙན་དུ་གོལ་བའི་རྣམ་སྨིན་གྱིས་རུ་ཏྲ་དང་གདོན་གྱི་ལུས་རྟེན་འགྲུབ་པར་འགྱུར་ཏེ། ཁྲོ་བོ་རང་རྒྱུད་རུ་ཏྲ་དང་། །རུ་ཏྲ་རང་རྒྱུད་ཁམས་གསུམ་འཁོར། །ཞེས་པ་ལྟར་ལགས་པས། གཞི་སྟོང་ཉིད་སྙིང་རྗེ་ཆེན་པོ། ལམ་བསྐྱེད་རྫོགས་ཟུང་དུ་འབྲེལ་བ། འབྲས་བུ་སྐུ་གཉིས་ཟུང་དུ་འཇུག་པའི་བསྐྱེད་རིམ་གྱི་རྣམ་པ་དང་ལྡན་པའི་ལྟ་སྒོམ་སྤྱོད་གསུམ་དང་མ་བྲལ་བའི་ངང་ནས་ཏིང་འཛིན་རྣམ་པ་གསུམ་གྱིས་བསྐྱེད་གཞིའི་ཁོག་ཕུབ་སྟེ་རྟེན་འོག་མིན་སྤྲུལ་པའི་ཞིང་ཁམས་སུ་བྱིན་གྱིས་བརླབས། བརྟེན་པ་རྡོ་རྗེའི་ཆོ་ག་གསུམ་དང་མངོན་བྱང་ལྔ་ཡིས་བསྐྱེད་དེ། འཁོར་བ་དང་རྣམ་པ་མཐུན་པས་སྲིད་པ་སྦྱོང་ཞིང་དག མྱང་འདས་དང་བཞུགས་ཚུལ་མཐུན་པས་འབྲས་བུ་གཞི་ལ་རྫོགས། གཉིས་ཀ་རྫོགས་རིམ་སྨིན་བྱེད་ཀྱི་གནད་དུ་འགྲོ་བས་སྨིན་པ་སྟེ་དག་རྫོགས་སྨིན་གསུམ་གྱི་གནད་དང་མ་བྲལ་བར། ཏིང་འཛིན་གནད་ཀྱི་གཟེར། སྙིང་པོ་སྔགས་ཀྱི་གཟེར། དགོངས་པ་མི་འགྱུར་བའི་གཟེར། འཕྲོ་འདུ་ཕྲིན་ལས་ཀྱི་གཟེར་ཏེ་གཟེར་བཞིའི་མན་ངག་གནད་དུ་ཆུད་པས་བདེ་གཤེགས་ཞི་ཁྲོའི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་གཅིག་ཏུ་འདྲེས་པས་འཁོར་འདས་ཀུན་ལ་སྟོང་སྲོག་ཐོབ་པས་ཡེ་ཤེས་ཀྱི་རྩལ་འབྱོངས་ཤིང་སྣ་ཚོགས་ཕྲིན་ལས་ལ་དབང་བསྒྱུར་བ་ཡིན་ཏེ། བདག་ཉིད་རྩ་བའི་དཀྱིལ་འཁོར། སྲས་མཆོག་རྫས་ཀྱི་དཀྱིལ་འཁོར། ཕྱོགས་བཅུ་ཁྲོ་བོའི་དཀྱིལ་འཁོར་ཏེ་དཀྱིལ་འཁོར་གསུམ་ལྡན་གྱིས་དམ་ཚིག་གི་འཁོར་ལོ་ལས་ཡེ་ཤེས་ཀྱི་དཀྱིལ་འཁོར་ལོགས་སུ་ཕྱེ་ནས། སེམས་དཔའ་སུམ་བརྩེགས་སུ་གསལ་བའི་སྲོག་གི་སྙིང་པོ་ལ་སྔགས་ཀྱི་ཕྲིན་ལས་ཀྱིས་བསྐོར་བར་བཟླས་པས། ཆོས་ཉིད་དང་སྦྱར་བ་བསྙེན་པ། ལྷ་དང་སྦྱར་བ་ཉེ་བསྙེན། ཤམ་བུར་སྦྱར་བ་སྒྲུབ་པ། ཕྲིན་ལས་ཀྱི་འཕྲོ་འདུར་དམིགས་པ་སྒྲུབ་པ་ཆེན་པོ་སྟེ་བསྙེན་སྒྲུབ་ཡན་ལག་བཞིའི་གཞུང་བསྲང་ནས་འབྲས་བུ་རིག་འཛིན་རྣམ་པ་བཞིའི་སྐུ་འགྲུབ་པར་བྱེད་པའི་སྟོད་ལས་བྱང་ཆུབ་སྒྲུབ་པ་དང་། དམ་ཅན་ཉེ་བར་བསྙེན་པ་དང་ངན་སྔགས་ཉེ་བར་བསྙེན་པ་སོགས་ལ་བརྟེན་ཏེ་གདབ་པ་དྲུག་གི་ལས་སྦྱོར་དྲག་ལས་ཀྱིས་སྨད་ལས་དགྲ་བགེགས་བསྒྲལ་བའི་རིམ་པ་དང་། རྟེན་དང་བརྟེན་པར་བཅས་པ་རིམ་ཡལ་གདོད་མའི་དབྱིངས་སུ་མཉམ་པར་བཞག་པའི་རྗེས་ཐོབ་སྤྱོད་ལམ་གྱི་རིམ་པ་སྣོད་བཅུད་ལྷ་དང་གཞལ་ཡས་སུ་ཤར་བའི་ལྟ་དགོངས་དང་མི་འབྲལ་བར་ཉམས་བཞེས་གནང་ན་སྒྲུབ་ཆེན་འདིའི་ཕན་ཡོན་ཀྱང་དག་སྣང་ཌཱཀྐིའི་གསང་གཏམ་ལས། ཕྱིར་སྣང་གཟུགས་སྐུའི་རྣམ་འགྱུར་མཐོང་ཚད་ཀྱིས། །སྐྱེ་བ་བདུན་ནས་མ་སྒོམ་སངས་རྒྱས་འགྱུར། །ཞེས་དང་། ཕྲིན་ལས་རྩོལ་མེད་སྒྲུབ་པའི་ཡ་མཚན་ཅན། །མ་རུང་རྩོད་ལྡན་སྐལ་ངན་ལན་ལྔ་བཟློག །ཅེས་དང་། རྡོ་རྗེ་ཁྲོས་པའི་རྩ་བཤད་ལས། །འདི་ཉིད་བསྟེན་པའི་གང་ཟག་རྣམས། །ཐམས་ཅད་གྲོལ་འགྱུར་ཐེ་ཚོམ་མེད། །རྡོ་རྗེ་ཁྲག་འཐུང་ང་ཉིད་ཀྱི། །ཡི་གེ་ཉུང་ཙམ་བཟླས་པས་ཀྱང་། །བར་ཆད་བདུད་ཀྱིས་མི་ཚུགས་ཤིང་། །མཚན་མ་འགྲུབ་པ་ཐེ་ཚོམ་མེད། །ཅེས་སོགས་འཁྲུལ་མེད་རྡོ་རྗེའི་ལུང་དོན་ཐུགས་ལ་བཞག་ནས་སྤྲོ་བ་བསྐྱེད་པར་འོས་པ་བཅས་དངོས་གཞིའི་སྟོང་ཐུན་གྱི་ས་ཁོངས་འཛིན་བྱེད་ཙམ་གྱི་ཞུ་བ་དང་། བྱིན་རླབས་དེ་ལྡན་གྱི་དགོས་འགྲེལ་རྒྱུན་གྱི་བསླབ་སྤྱོད་མདོར་བསྡུས་ཏེ་ཞུ་ན། སྤྱིར་བདག་ཅག་གི་སྟོན་པ་མཉམ་མེད་ཐུབ་པའི་དབང་པོའི་རྗེས་སུ་ཞུགས་པའི་རབ་ཏུ་བྱུང་བ་གོས་ངུར་སྨྲིག་གི་རྒྱལ་མཚན་བཞེས་པ་ཞིག་ཡིན་ཕྱིན་སོ་ཐར་འདུལ་བ་རང་གཞུང་གི་བཅས་ཁྲིམས་སྲུང་ནས་བསླབ་གསུམ་གྱི་ཉམས་བཞེས་ལ་ཕྱག་ལེན་གྱི་སྙིང་པོ་དྲིལ་དགོས་པ་མ་ཟད། ཐེག་ཆེན་བྱང་ཆུབ་སེམས་དཔའི་བསླབ་བྱ་སྤྱི་དང་བྱེ་བྲག་གསང་སྔགས་རྡོ་རྗེ་ཐེག་པའི་དངོས་གྲུབ་ཀྱི་རྩ་བ་དམ་ཚིག་ཚུལ་བཞིན་དུ་སྲུང་དགོས་པ་དང་། ཁྱད་པར་དུ་ཚོམ་བུ་ཚོགས་སྒྲུབ་འདིའི་དབུ་བཙུགས་ནས་མཇུག་མ་གྲོལ་གྱི་བར་དུ་དཀྱིལ་འཁོར་སྒྲུབ་པའི་ཆོ་གའི་སྙིང་པོ་བསྐྱེད་རྫོགས་དང་བཟླས་པ་ཡིན་པས། ལེ་ལོ་དང་རྣམ་གཡེང་སྤངས་ནས་སྒོ་གསུམ་དཀྱིལ་འཁོར་གསུམ་དུ་ཤེས་པའི་འཁྱེར་སོ་དང་མ་བྲལ་བར་མཛད་པ་ཤིན་ཏུ་གལ་ཆེ། དེ་ལྟ་བུའི་བསྐྱེད་རྫོགས་ཀྱི་གདེང་ཆེན་པོ་མི་ལྡན་པའི་མོས་པས་སྤྱོད་པའི་ལམ་ཞུགས་ལས་དང་པོ་པ་དང་ཕལ་བ་རྣམས་ཀྱིས་ཀྱང་དོན་མེད་ངག་འཆལ་གྱི་གཏེར་སྒོ་འབྱེད་པ་དང་། ཀུ་ཅོ་ཧ་བགད་སོགས་བག་མེད་ཀྱི་བྱ་སྤྱོད། ཤགས་འགྱེད་ཚིག་རྩུབ་སོགས་འཁོན་འཛིང་གི་རྣམ་གྲངས་བཅས་སྤངས་ནས། མགོ་ཞྭ་འགྲིག རྒྱབ་གོས་འགྲིག རྐང་ལྷམ་འགྲིག རྩེ་ཞྭ་རྡོར་དྲིལ། གདངས་དབྱངས་འདོན་རྟ།(དམིགས་བསལ་སྐབས་བབས་ཀྱི་ཞུ་བ་དག་འདིར་འཛུད) མདོར་ན་ཆུང་ས་ནས་བྱོན་ལུགས་བཞུགས་སྟངས། ཆེ་ས་ནས་སྡོམ་དང་དམ་ཚིག དུས་རྒྱུན་གྱི་ཆོས་མཐུན་གྱི་བྱ་བ་གང་ཐད་ནས་དམ་པ་གོང་མའི་ཕྱག་བཞེས་ལྟར། འདིར་བཞུགས་བླ་དབུ་རྒན་གསུམ་གྱི་མཛད་སྤྱོད་བཟང་པོར་ཁ་མིག་ཡར་ལྟོས་ཀྱི་ལུགས་ཀས། སྤྱིར་རྒྱལ་བའི་བསྟན་པ། སྒོས་གསང་སྔགས་རྙིང་མ། ཡང་སྒོས་སྔ་འགྱུར་རྒྱལ་བ་རྫོགས་ཆེན་པའི་བསྟན་པའི་མིག་རྒྱན། དབྱིངས་ན་བཞུགས་པའི་མཆོག་གསུམ་རྒྱལ་བ་སྲས་བཅས་གྲུབ་དབང་གོང་མ་ཡབ་སྲས་ཐུགས་མཉེས་པའི་མཆོད་སྤྲིན་དུ་འགྱུར་བའི་མཛད་པ་མི་དམན་པ་དང་། ཁྱད་པར་དེང་དུས་སྙིགས་མའི་ཡང་མཐར་གྱུར་བའི་སྐབས་འདིར་རང་བསྟན་རང་གིས་གསོ་བའི་སྙིང་སྟོབས་ཀྱི་ཐུགས་བསྐྱེད་རྒྱ་མི་ཆུང་བར། རང་རྒྱུད་ལ་བཞུགས་པའི་བསྟན་པ་ཆ་ཚང་རང་ངོས་ནས་ཐོག་མར་གསོ་བ་དང་ཆབས་ཅིག དད་ལྡན་དང་བ་འདྲེན་པའི་མིག་རྒྱན། འབྱོར་ལྡན་བསོད་ནམས་བསག་པའི་ཞིང་ས། སྐལ་བཟང་ཐར་ལམ་སྟོན་པའི་དེད་དཔོན་ཞེས་གྲགས་པའི་གཏམ་ཚིག་དང་དོན་མཐུན་པའི་བཀའ་དྲིན་མི་ཆུང་བར་ཞུ།

ཕྱི་ཡུལ་གཟུང་འཛིན་དགྲ་བགེགས་ཕུར་པས་བསྒྲལ།།

ནང་དུ་རང་རྒྱུད་ཉོན་མོངས་དབྱིངས་སུ་གྲོལ།།

གསང་བ་སྣང་སྲིད་འཁོར་འདས་ཡེ་དག་ཀློང་།།

རིག་འཛིན་རྣམ་བཞིའི་གོ་འཕང་མྱུར་འགྲུབ་ཤོག།

དག་ཆེན་སྙིང་རྗེ་ཁྲོས་པའི་སྤྱི་དཔལ་གྱི།།

བསྐྱེད་རྫོགས་ནཱ་དའི་དབྱངས་ལ་རབ་གོམས་པས།།

སྟོང་ཆེན་སྒྱུ་མའི་སྲོག་ལ་དབང་འབྱོར་ནས།།

རྣམ་བཞིའི་ཕྲིན་ལས་དོན་ཡོད་དཔལ་ཐོབ་ཤོག།

ཅེས་པའང་རབ་རྒྱན་མེ་བྱི་ལོར་སྐུ་ཞབས་དགེ་སར་གུ་རུ་རྡོ་རྗེའི་བཞེད་སྐོང་དུ་པདྨ་སྐལ་བཟང་གིས་ལས་ཞོར་དུ་བྲིས་པའོ།།