ཆགས་མེད་བདེ་སྨོན་གྱི་ཚིག་དོན་གོ་སླ་བར་བཀྲལ་བ་ཐར་ལམ་བགྲོད་པའི་ཐེམ་སྐས།

ཆགས་མེད་བདེ་སྨོན་གྱི་ཚིག་དོན་གོ་སླ་བར་བཀྲལ་བ་ཐར་ལམ་བགྲོད་པའི་ཐེམ་སྐས་ཞེས་བྱ་བ་བཞུགས་སོ།།

གང་མཚན་སྙན་པའི་གསང་བའི་སྒྲ་དབྱངས་རྣ་བའི་རྒྱན་དུ་ཆས་པའི་མོད།།

བདེ་ལྡན་ཞིང་མཆོག་དགའ་བའི་གྲོང་གི་དྲི་བྲལ་པདྨའི་མཛའ་བའི་གྲོགས།།

ཟག་མེད་ཡོན་ཏན་བདེ་བ་རབ་རྒྱས་འཕགས་ཆེན་སེམས་དཔའི་སྲས་སུ་བསྐྲུན།།

རྣམ་དག་ཞིང་འཆང་འོད་མཚན་སྟོང་འབར་བདེ་བར་གཤེགས་དེར་གུས་ཕྱག་འཚལ།།

ཡེ་གྲོལ་ཆོས་སྐུའི་དགོངས་ཀློང་འོད་མི་འགྱུར།།

འཁོར་བ་དབྱིངས་སྒྲོལ་ལོངས་སྤྱོད་རྫོགས་པའི་གདངས།།

འགྲོ་འདུལ་སྤྲུལ་པའི་རྣམ་རོལ་པདྨ་འབྱུང་།།

དབྱེར་མེད་དཔལ་ལྡན་བླ་མ་རྒྱལ་གྱུར་ཅིག།

ཕུང་ལྔ་ཁུར་ལྕི་སྲིས་ལམ་དུབ་པའི་འགྲོ།།

ཆོས་མཆོག་རྒྱུ་བཞིའི་འཕྲུལ་སྐས་ལ་བསྙེན་ཏེ།།

རྣམ་དག་བདེ་ལྡན་ཞིང་གི་ཁང་བཟང་དུ།།

བདེ་ལེགས་བགྲོད་པའི་ཐབས་བཀོད་འདི་གོ་རྨད།།

དྲི་མེད་ལུང་རིགས་དག་བྱེད་གཏང་བའི་རྒྱུན།།

གདམས་ཟབ་མན་ངག་སྟོང་གི་ཡན་ལག་ལྡན།།

མཚུངས་མེད་བླ་མའི་ཞལ་གསུང་བདུད་རྩིའི་བཅུད།།

ཉམས་མེད་འགྲེམས་ལ་ལྷ་སྲུང་གནང་བར་སྩོལ།།

དེ་ལ་འདིར་གདོད་མའི་མགོན་པོ་མི་ཡི་ཤ་ཚུགས་སུ་བྱོན་པ་གསང་ཆེན་བསྟན་པའི་མངའ་བདགབདག་ཅག་གི་རིགས་ཀྱི་བདག་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། མཚུངས་མེད་ཆོས་གྱི་རྒྱལ་པོ། ས་གསུམ་གྱི་འདྲེན་པ་ཆེན་པོ། ༧ཐུབ་བསྟན་ལུང་རྟོགས་བསྟན་པའི་རྒྱལ་མཚན་ནམ་ཆོས་རྗེ་པདྨ་སྐལ་བཟང་རིན་པོ་ཆེ་མཆོག་གིས་གདུལ་བྱ་རྗེས་འཛིན་གྱི་ཐུགས་བརྩེ་བ་ཆེན་པོས་ཀུན་ནས་བླངས་ཏེ་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་ཡང་དབེན་ནས། བོད་རབ་བྱུང་བཅུ་བདུན་པའི་གནམ་ལོའི་རྒྱལ་པོ་ས་ཕོ་བྱི་བའི་ལོའི་སྟོན་མགོར། བདེ་ཆེན་ཞིང་ཁྲིད་ཆེན་མོ་ཐེངས་གཉིས་པའི་བཀའ་ཆོས་ཟབ་མོ་གནང་བ་འདི་ཉིད་ཡིག་ཐོག་ཏུ་འགོད་པ་ལ་ལྷ་དང་སྲུང་མས་གནང་བ་བསྩལ་དུ་གསོལ།

ཉིན་དང་པོའི་ཆོས་ཁྲིད།

གཞིས་བྱེས་ཐག་རིང་ཐུང་གཉིས་ཀ་ནས་ཕེབས་པ་ཐམས་ཅད་ལ་བཀྲ་ཤིས་བདེ་ལེགས་ཀྱིས་འཚམས་འདྲི་ཞུ། དེ་ནས་རང་རེས་ཆོས་བཤད་ནས་དེ་ལ་ཉན་དུས་ཚིག་རེ་རེ་བཞིན་གསལ་པོ་ཞིག་གོ་རྒྱུ་གནད་ཆེ། གཙུག་ལག་ཁང་ནང་མའི་ནང་དུ་སྔོན་ལྟར་ཕལ་ཆེར་གསན་ཐུབ་རྒྱུ་རེད། འོན་ཀྱང་གཙུག་ལག་ཁང་ཕྱི་མའི་ནང་དུ་སྒྲ་སྒམ་ཆེན་པོ་བཞག་ན་གྱང་སྐད་བརྒྱབ་ནས་བྲག་ཆ་ལྟ་བུ་ཞིག་འཁོར་གྱིན་འདུག་པས། སྒྲ་ཆེ་ཞིང་ཚིག་མི་གསལ་བ་ཞིག་རེད། སྒྲ་སྒམ་ཆུང་ན་དགའ་སྙམ་སྟེ་ཆུང་ངུ་མང་པོ་བཏགས་ཡོད་མོད། ད་དུང་གྱང་སྐད་ཀྱིས་གསལ་པོ་ཞིག་མ་རེད། ན་ནིང་ཐོག་ཁེབས་མེད་དུས་ཧ་ཅང་གསལ་པོ་རེད། ད་ལོ་ཐོག་ཁེབས་བརྒྱབ་པས་མི་གསལ་བ་ཞིག་ཏུ་གྱུར་འདུག ད་དུང་ཆེད་མཁས་པས་ཞིབ་འཇུག་ལེགས་པོ་ཞིག་མ་བྱས་ཚེ་མགྱོགས་པོར་ཐག་གཅོད་བྱེད་ཐུབ་རྒྱུ་ཞིག་མ་རེད། ཕྱི་ཡི་མདུན་ཐང་གི་སྤང་ཐང་དུ་སྒྲ་སྒམ་ཆེན་པོ་བཙུགས་ཡོད་པས། ཆོས་ཁྲིད་ཀྱི་སྐབས་སུ། འགའ་རེས་དེར་ཉན་ན་ཨེ་དགའ་ལྟོས། གནམ་གཤིས་ཡག་ན་སྤང་ཐོག་གི་རྩྭ་ཐང་སྟེང་ཡང་སྐྱིད་ནི་རེད། གནམ་གཤིས་ངན་ན་དེར་འདུག་ནི་ཚོས་ཆར་གདུགས་རེ་ཕུབ། མདོར་ན་ཆོས་ཁྲིད་བཤད་དུས་ཚིག་རེ་རེ་བཞིན་ཚང་མས་གོ་དགོས་པས། ཚང་མས་གང་དུ་དགའ་རང་གིས་ལྟོས། དེའི་ཚེ་ལ་བཤགས་བསྡུས་ཤིག་ཡིག་བརྒྱ་དང་བསྒྲག་སྟེ་འདོན་ཞོར་བྱེད། ཅེས་གསུངས་ཏེ་གཞི་ཐོག་དང་པོ་ནས་ཡིག་བརྒྱ་ས་ཏྭ་དེ་འདྲ་ཁོ་ནར་བདག་སོགས་འགྱུར་བར་ཤོག་ཅེས་པའི་བར་གསུངས་སོ། །དེའི་མཚམས་སུ། ཚང་མ་རང་རང་སོ་སོ་ངས་གོང་དུ་བཤད་པ་བཞིན། ཉན་བདེ་ས་རེ་ལ་བསྡད་ཡོད་རྒྱུ་རེད། ད་རེས་བོད་རབས་བྱུང་བཅུ་བདུན་པའི་གནམ་ལོའི་རྒྱལ་པོ་ས་ཕོ་བྱི་བའི་ལོ་འདིར། བོད་བསྟན་པ་ཡང་དར་གྱི་བསྟན་པའི་མེ་རོ་ཡར་ལ་གསོ་བའི་དུས་འདིར་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་བདེ་ཆེན་ཞིང་ཁྲིད་ཆེན་མོ་ཐེངས་གཉིས་པ་འཚོགས་རྒྱུའི་སྐབས་ལ་ཁེལ་བས། ཆོས་རྭ་འདིའི་ནང་དུ་ཞུགས་པའི་མི་ཚང་མ་སེར་སྐྱ་ཕོ་མོ་རིགས་རུས་རྒན་གཞོན་གོ་གནས་ཐོབ་ཐང་ལ་སོགས་པའི་གནས་བབས་ལ་མ་ལྟོས་པར་ཐམས་ཅད་ནང་པ་སངས་རྒྱས་པའི་ཆོས་སྒོར་ཞུགས། དཀོན་མཆོག་གསུམ་ལ་སྐྱབས་སུ་བཟུང་། འཇིག་རྟེན་ཡང་དག་གི་ལྟ་བ་ལ་དད་པ་བྱེད་མཁན་འབའ་ཞིག་ཡིན་པའི་དབང་དུ་བཏང་ན། སྤྱིར་སེམས་ཅན་ཡིན་པའི་ཆ་ནས་རིང་བའི་མཆེད། དགོས་སུ་འཇིག་རྟེན་མིའི་སྡེ་རིས་གཅིག་ལ་གཏོགས་པས་ཉེ་བའི་མཆེད། ཁྱད་པར་དུ་སྟོན་པ་གཅིག་གི་བསྟན་པ་ལ་ཞུགས་པས་ཤིན་ཏུ་ཉེ་བའི་མཆེད། ཡང་དགོས་དམིགས་བསལ་གྱི་ཆོས་རྒྱུད་གཅིག་དང་གསང་སྔགས་ཀྱི་དཀྱིལ་འཁོར་གཅིག་ལ་མཉམ་དུ་འཛོམས་པས་ཐུན་མོང་མ་ཡིན་པའི་མཆེད་དང་ལྕམ་དྲལ་ཡིན་པའི་ངོས་ནས་མ་ཤི་ཚེ་རིང་བྱུང་སྟེ། ཚང་མ་དང་མཉམ་དུ་ཐུག་འཕྲད་ཐེངས་གཅིག་བྱུང་བར་དགའ་སྤྲོ་ཡོད། འུ་ཚོ་འཇིག་རྟེན་གྱི་མི་འདི་རྒན་དར་གཞོན་གསུམ་སུ་ཡིན་ཀྱང། དང་པོ་གཟུགས་འགོར་ཆགས་ནས་ཐ་མར་དབུགས་རྔ་མ་བསྡུས་བར་དུ་དལ་ཁོམ་ཉིན་གཅིག་མེད་པར། ཅིག་མི་འདུས། མི་ཟིན། མི་འགྲུབ། མི་ཆོག་འདུག་རྒྱུའི་རང་གཞན་བར་གསུམ་གྱིས་ཐ་མ་འགྲུབ་དགོས་རྒྱུའི་དམིགས་ཡུལ་དེ་གང་ཞེ་ན། བདེ་སྐྱིད་ཅིག་ཨེ་ཐོབ་བསམ་རྒྱུ་དེ་རེད། དོན་ངོ་མ་བཤད་ན་མི་ལ་བདེ་སྡུག་འབྱུང་བའི་གཞི་རྟེན་ལུས་སེམས་གཉིས་ཀ་མ་གཏོགས་མེད། ལུས་སེམས་གཉིས་ཀའི་སྡུག་བསྔལ་ཐམས་ཅད་ཕར་སྤངས་ནས་ལུས་ཀྱི་བདེ་བ་དང་སེམས་ཀྱི་ཡིད་བདེ་སྟེ། ལུས་སེམས་གཉིས་ཀར་བདེ་བ་ཚིམ་པ་ཞིག་ཐོབ་དགོས་ཀྱིན་ཡོད། ལུས་སེམས་ཀྱི་བདེ་བ་དེ་གཉིས་ཀའི་ནང་ནས་ཀྱང་སེམས་ཀྱི་བདེ་བ་དེ་གལ་ཆེ། རྒྱུ་མཚན་ཅིའི་ཕྱིར་ཞེ་ན། སེམས་མི་སྐྱིད་ཅིང་ཡིད་མི་བདེ་བའི་ཟས་ཞིག་རྙེད་ཡོད་པའི་དུས་སུ། ལུས་བདེ་བ་རྒྱལ་པོའི་ཕོ་བྲང་གི་ནང་དུ་འདོད་པའི་ཡོན་ཏན་གྱི་ཕུན་ཚོགས་ལ་རོལ་བཞིན་ཡོད་ཀྱང་སེམས་སྐྱིད་པའི་སྣང་བ་འཐོབ་མི་ཐུབ། མི་ཕྱུག་པོ། གཟུགས་ལང་ཚོ། སྟོབས་འབྱོར་བ། མཚན་སྙན་གྲགས་ཅན་འགའ་རེས་ལུས་སྐྱིད་ཀྱང་སེམས་མི་སྐྱིད་པས་རང་སྲོག་རང་གིས་གཅོད་པ་མང་པོ་དེང་སང་འཛམ་གླིང་ན་ཡོད་པ་ཚོར་ལྟོས་དང་། ཕྱིའི་འབྱོར་བའི་མཐུན་རྐྱེན་འཛོམས་པ་ཙམ་གྱིས། མིའི་བདེ་སྐྱིད་ངོ་མ་དེ་ཐོབ་མི་ཐུབ་པའི་རྟགས་རེད། ནང་སེམས་ཀྱི་བདེ་བ་ཐུན་མོང་མ་ཡིན་པ་ཞིག་རྙེད་པའི་ཉིན་དེར། ཕྱིའི་མཐུན་རྐྱེན་གྱི་འབྱོར་བ་ཚོགས་རུང་མ་ཚོགས་རུང་བདེ་སྐྱིད་ངོ་མ་དེ་ཐོབ་ཐུབ་པ་རེད། དེ་འདྲའི་རིགས་ཀྱི་ནང་སེམས་ཁམས་ཀྱི་བདེ་བ་དེའི་ཟིལ་ཤུགས་ཤིག་གིས། འདོད་ཆགས། ཞེ་སྡང། གཏི་མུག་ང་རྒྱལ། ཕྲག་དོག་ཞེས་བྱ་བ། མི་བདེ་ནད་ཀྱི་གཞི་མ་ཐམས་ཅད་དང་། དེའི་ཁ་ཤུགས་ཀྱི་གཟེར་ན་ཚའི་ཚོར་བ་དེ་ཅུང་ཟད་དམའ་སོང་ན་ཚེ་འདི་ལ་བདེ་ཞིང་། གང་སྣང་གང་ཤར་ཐམས་ཅད་བདེ་བའི་རང་བཞིན་རོལ་བ་ཡིན། ལུས་བདེ་བ་ཅན་དུ་ད་དུང་ཐོན་མེད་ཀྱང་སེམས་བདེ་བ་ཅན་དུ་སྐྱེས་པ་དང་འདྲ་བའི་སེམས་ཞིག་ད་ལྟ་ནས་རང་གིས་རང་ལ་སྒྲུབ་ཆོག ཚེ་ཕྱི་མར་ཡང་བདེ། ཉོན་མོངས་པའི་མགོ་ནོན་སོང་ཕྱིན། དེའི་ལོ་མ་དང་འདྲ་བའི་མི་དགེ་སྡིག་པའི་ལས་ཀྱང་རང་ཤུགས་ཀྱིས་ཇེ་ཉུང་དུ་འགྲོ། དེའི་སྟོབས་ཀྱིས་ཚེ་འདི་ལ་བདེ་བར་མ་ཟད་ཚེ་ཕྱི་མར་ཡང་བདེ་ཞིང་སྐྱིད་པའི་ས་བོན་ཞིག་ད་ལྟ་ནས་ཐེབས་སོང་བས། བདེ་སྐྱིད་དོན་གཉེར་གྱི་མི་ཚེའི་འཚོ་བའི་ཁྲོད་དུ་མེད་དུ་མི་རུང་བ་དེ་གང་ཞེ་ན། དམ་པའི་ལྷ་ཆོས་སྒྲུབ་རྒྱུ་འདི་ཡིན། འདི་མ་བསྒྲུབས་ན་སྐྱབས་དང་སྐྱོབ་པ་མགོན་དང་དཔུང་གཉེན་གཞན་ཞིག་མེད། ཁྱད་པར་དུ་ནད་ན་ཚས་མནར། རྐྱེན་ངན་དྲག་པོ་ཐོག་ཏུ་བབ། ཡང་དགོས་ཤི་ནད་དྲག་པོ་ཐོག་ཏུ་བབ་སྟེ་འཆི་བདག་གཤིན་རྗེ་དང་ཕར་ལྟ་ཚུར་ལྟ་བྱེད་སར་ཐུག་དུས། ཕས་མི་སྐྱོབ། མས་མི་སྐྱོབ། དཔོན་གྱིས་མི་སྐྱོབ། བློན་གྱིས་མི་སྐྱོབ། དེ་དུས་སྐྱབས་རེ་ས་བླ་མ་དཀོན་མཆོག་མ་གཏོགས་མེད། དེ་བས། འུ་ཚོས་དཀའ་ལས་སྡུག་བསྔལ་ཅན་གྱི་འཁོར་བའི་བྱ་བཞག་ཟིན་རྒྱུ་མེད་པ་ཆུའི་གཉེར་མ་ལྟ་བུ། གཅིག་ཚར་དུས་ཡང་གཅིག་སྒྲུབ་དགོས་པ། དེ་རིང་རྒྱབ་ཀྱི་སང་ཉིན། ད་ལོའི་རྒྱབ་ཀྱི་སང་ཕོད། ཚར་རྒྱུ་འགྲུབ་རྒྱུ་གཉིས་ཀ་མེད་ཅིང་། གཞོན་ཁ་དཀར་གྱི་ལང་ཚོ་དེ་སྡུག་གི་གཉེར་མ་དང་སྐྲ་དཀར་གཉིས་ཀྱིས་མནན་ཏེ། མཐར་སྡུག་ཁོ་ནས་མི་ཚེ་རྫོགས་བཞིན་ཡོད། ད་འདིའི་བར་གསེང་འདི་ལ་སྤྲིན་བར་ཉི་མའི་ཟེར་མཐོང་ལྟ་བུའི་ཉིན་བརྒྱད་དགུ་ཞིག་ལ་རང་ཅག་གི་སྡུག་གི་ཁུར་པོ་འདི་རེ་ཞིག་ཕོག་ནས། འཁོར་བ་ཐོག་མེད་ནས་ད་ལྟའི་བར་དུ་སྡུག་བསྔལ་མྱོང་བའི་སེམས་ལ་ངལ་གསོ་ཞིག་དང་། ཚེ་འདི་ཕྱི་གཉིས་ཀར་རང་རོགས་བར་གསུམ་གྱིས་འགྲོ་རྩིས་འདུག་བཀོད། རང་རེས་དོན་གཉེར་འབད་པ་བྱེད་དགོས་པའི་ནང་སེམས་ཀྱི་བདེ་བ། ཚེ་གཅིག་གིས་དུས་གཏན་དུ་ཕྱིར་སྡུག་བསྔལ་གྱི་ནང་དུ་མི་ལྷུང་བ། རང་གཅིག་པུར་མ་ཟད་གཉེན་ཉེ་རིང་། དགའ་མཛའ་མཐུན་གསུམ། ཤི་གསོན་ཚང་མ། དེའི་སྟེང་དུ་བདེ་འདོད་སྡུག་བསྔལ་གྱིས་མནར་བའི་ཕ་མ་སེམས་ཅན་དང་བཅས་པ། ཚེ་རབས་གཏན་གྱི་བདེ་བ་ཞིག་ལ་འགོད་པར་གྲོས་འགོ་འདོན་རྒྱུ། ཆོས་བཤད་དང་ཞུ་ཟེར་ནའང་དེ་འདྲ་ཞིག་གི་དོན་དུ་ཡིན་པ་ལས། དེ་མིན་ཅི་ཡིན་འདི་ཡིན་མ་གོ་བའི་དབང་ཆོས་ཤིག་ཞུས་ཀྱང་དོན་ཉམས་ལ་རན་པའི་ཕན་པ་དེ་ཙམ་མེད། ཆོས་ཐོས་པའི་ཕན་ཡོན་གྱི་ངོས་ནས་བཤད་ན་ཆོས་སྒྲ་རྣ་བས་གོ་བའི་བྱ་དང་རི་དྭགས་ཀྱིས་ཀྱང་བདེ་འགྲོ་ཐོབ་པའི་ལོ་རྒྱུས་ཡོད་མོད། འོན་ཀྱང་ཆོས་ཐོས་པ་རང་རྒྱུད་ལ་སྦྱར་ཏེ་ཆོས་ཀྱི་སྨན་དེས་སྡུག་བསྔལ་རྒྱུ་འབྲས་ཀྱི་ནད་དེ་དྲག་དགོས་པས། ཆོས་ཀྱི་དོན་དེ་གོ་ནས་རང་ཉིད་ཀྱིས་ལག་ལེན་ལ་མ་ཐེབས་ན། ཆུ་མིག་གིས་མཐོང་བས་སྐོམ་མི་སེལ་བ་ལྟར་ཕན་མེད་དུ་འགྱུར་ཉེན་ཡོད། དེའི་ཕྱིར་རང་དོན་གྱི་ལས་ཀ་གང་སྒྲུབ་ན་སྤུས་དག་ཅིང་རང་མགོ་རང་གིས་མ་གཡོགས་པ་ཞིག་བསྒྲུབ་དགོས། འུ་ཅག་འབྲོག་པ་ཡིན་པས་འབྲོག་ཕྱོགས་ཀྱི་ལས་ཀ་ཞིག་ལ་དཔེར་བླངས་ན། འབྲོག་པས་བཞོན་བཞོ་འོ་དཀྲུག་བྱས་ཏེ་མར་ཕྱུར་བ་གསོག་ནའང་། མ་ལས་མེད་མས་སྤུ་ཐལ་བ་གཉིས་དང་ལྷན་དུ་བྱས་ན། དེས་གཞན་མི་མགུ་བར་མ་ཟད་རང་ཡང་མི་མགུ། དེའི་རིགས་དེ་ཟོས་ན་ཡི་གར་མི་ཡོང་ལ་བཙོང་ན་གོང་ཡང་མི་ཁུག མི་སྐྱེས་པ་ཞིག་ལ་མཚོན་ནའང་ཕྱུགས་རྟ་ནོར་ལུག་གསུམ་གྱི་འཚོ་རྫི་དང་། ཚོང་སོ་ནམ་གྱི་ལས་ཀ་གང་བྱེད་ནའང་འདྲ། མགོ་ཚགས་དམ་ཤ་རེ་བ། སྔ་བསམ་ཕྱི་འདང་གི་སྐྱེས་ཕོ་རབ་ཀྱི་མཁྱེན་པ་རབ་ཅིག་མེད་ཀྱང་། མདའ་འདི་ནས་འཕངས་ན་མདེའུ་འདི་ནས་འབུད་སྙམ་པའི་ཆགས་འཇོག་ཡོད་པ། ལས་བྱ་བ་མགོ་རྔ་ཚང་ནི་ཞིག་མ་བྱས་ཚེ། རྫི་བོ་ཞིག་ཡིན་ནའང་རྫི་བོ་ངན་པ་གཉིད་དུ་ཤོར་ནས་ཕྱུགས་ཟོག་སེམས་ཅན་ཁྱི་བཟས་སྤྱང་རྐུན་ལ་ཤོར་བ། ནང་སྔ་ལང་ནུབ་ཉལ་ཕྱི་མ་ཐུབ་པས་ཐ་མར་ཕྱུགས་ཟད་དུ་གྱུར་པ་ཡང་ཡོད། ཞོར་ལས་གཉེར་མཁན་ཞིག་ཡིན་ནའང་དཔེ་དེ་དང་གཅིག་མཚུངས་རེད། ཁྱད་པར་དུ་ཚོང་ལས་མཁན་ཞིག་ཡིན་ན་བློ་རིག་པ་ལྕགས་སྐུད་བཞིན་དུ་བསྒྲིམས་ཏེ། སྤྱི་དང་བྱེ་བྲག་གི་ཚོང་རྭའི་དཔལ་འབྱོར་གྱི་འགྲོ་ལུགས། ཚོང་ལས་ཀྱི་ཤེས་བྱ་རིག་གནས། སོ་སོའི་ནུས་པ་དང་བསྟུན་ནས་འདི་བྱས་ན་འདི་འདྲ་ཞིག་གི་ཚོད་དུ་འགྲོ་འདུག་སྙམ་རྒྱུའི་སྔོན་མཐའ་དང་ཕྱི་མཐའ་མཐོང་བའི་བྱ་བ་ཞིག་བསྒྲུབས་ཚེ། ད་གཟོད་བྱ་བ་གང་སྒྲུབ་སྤུས་དག་པ་རང་མགུ་བར་མ་ཟད་གཞན་གྱིས་སྨོན་པ་ཞིག་ཆེ་ཆུང་མ་གཏོགས་འགྲུབ་རྒྱུ་ཡོད། ཆོས་སྒྲུབ་ནའང་དེ་དང་འདྲ་བར། ཚེ་འདི་ཕྱི་གཉིས་ཀའི་དོན་ཆེན་མཉམ་དུ་འགྲུབ་པ་སྤུས་དག་ཅིང་རང་བློ་བདེ་བ་ཤི་ན་བློ་ལྷག་མེད་པ་ཞིག་ཡོང་རྒྱུ་ཡོད། དེ་ལྟར་མིན་པར་མྱི་ཡང་ལ་སྤུ་སུད། སྟོན་ཁའི་ཁུར་མོང་གི་སྤུ་ལྟ་བུ། ས་འདིའི་ཁ་སྐད་ལ་ཨབ་སྤུ་བྱིའུ་སྤུ་རླུང་གིས་སྤུར་བ་དང་འདྲ་བར་གང་ཡིན་སར་འདུར་རུ་རུ་འདུག་པ་ཞིག་གིས་མི་ཁའི་ཁྲལ་སོད་ཀྱི་སྐད་ཆ་ཞིག་བཤད། སྔ་བསམ་ཕྱི་འདང་མེད་པའི་བྱ་བ་ཞིག་བསྒྲུབས། མནའ་དང་གཏམ་གཉིས་ལ་མི་ཐོགས་པའི་མཐར་འབྲས་ལ། ཚེ་འདི་ཕྱི་གང་ལ་བསམ་བློ་བཏང་ནའང་ལམ་ཡག་པོ་ཞིག་ཡོང་དཀའ། དེའི་ཐོག་ཏུ་ད་རུང་ཆང་ཨ་རག་དང་ཤོ་སྦག་རྒྱན་སྐུགས་སོགས་བྱས་ན། དེའི་རྐྱེན་གྱིས་ཉིན་བཞིན་ནང་འཛིང་ཁྱི་ནག་འཛིང་འཛིང་བྱེད་མཁན་གྱི་རིགས་ཡོད། མི་དེ་འདྲ་ལས་སྐོར་ཁྱི་བཙན་པོ་ཞིག་གིས་བཟང་བ་དང་། ཡང་ན་བེད་སྤྱོད་ལ་དབྱུག་པ་སྲ་མོ་ཞིག་གིས་རིན་ཐང་ཆེ་འདུག་སྙམ་པ་ལྟ་བུའི་ཚོད་ཏུ་ལྷུང་བ། ཕར་བལྟས་ན་མི་ཞིག་ཡིན་ཡང་དོན་ལ་ཁྱི་ལ་རྒྱག་པའི་དབྱུག་པའང་མི་དོ་བ། བྱ་སྤྱོད་ནི་གདོན་འདྲེ་ཞིག་དང་འདྲ་བར་ཡུལ་དེར་མེད་ན་དགའ་བ་དེ་འདྲ་ཡོད། དེ་འདྲའི་རིགས་དེས། གནད་འགག་ལ་ཐུག་དུས། ཚེ་ཕྱི་མ་ཕར་ཞོག ཚེ་འདིའི་དོན་ཀྱང་འགྲུབ་མེད། ཡང་འདི་ལྟར་སྙམ་སྲིད། བླ་མ་གྲྭ་པ་རྒྱགས་ཆེས་པ་དག་གིས་ཅི་མི་ཟེར། མི་སྐྱ་ཕོ་མོ་རྣམས་ལ་གོང་ཚད་འདྲ་ཞིག་རྒྱག་ཀྱང་། ཁོང་རྣམས་ཀྱང་མི་སྐྱའི་ཁྱིམ་ནས་མ་ཡོང་བར་ནམ་མཁའི་འཇའ་འོད་ཀྱི་གུར་ཁང་ནས་ཐོག་བབས་བྱས་པ་ཞིག་ཨེ་ཡིན་ནམ་སྙམ་ན། དེ་ཡང་བདེན་པ་རེད། དེར་མ་ཟད་ད་དུང་ཕྱི་ལ་སྟོན་པ་སངས་རྒྱས་ཀྱི་ན་བཟའ་གྱོན། སྡེ་སྣོད་འཛིན་པ་དགེ་འདུན་པའི་གྲལ་དུ་བསྡད། ཕྱོགས་བཅུའི་དགེ་འདུན་པའི་དཀོར་ལ་སྤྱོད། མ་ཟད་ཁྱིམ་ཕ་མས་དེ་ཡོད་ནང་གི་དེ་དྲག ལུག་མགོའི་ཡ་ཐོད་དང་། ཆུ་དཀར་གྱི་བཀོལ་ཕུད་ཀྱིས་མཆོད་བསྟོད་བྱས་ཀྱང་། ཕྱིའི་ཆ་ལུགས་དང་ནང་གི་སྡོམ་དམ་ཚིག་གཉིས་ཀ་ཆ་མི་འགྲིག་པས། དཀོན་མཆོག་གི་རྐང་འདྲེན། དགེ་འདུན་གྱི་གྲལ་རྫོད་ནི་ཅི་འདྲ་མེད། སངས་རྒྱས་ཀྱིས་ཀྱང་། ང་མིན་ང་འདྲ་རབ་ཏུ་བྱུང་བའི་རྟགས་ཆ་ལུགས་ཅན་འགའ་རེས་བསྟན་པ་ནང་ནས་བཤིགས་འོང་། ཁོང་གི་བསྟན་པ་འདི་ནི་སེང་གེའི་རོ་ལྟ་བུ་ཞིག་ཡིན་པས། ནང་ནས་འབུ་ཞུགས་ཏེ་བརླག་འགྲོ་བ་མ་གཏོགས་ཕྱི་ནས་ཚུར་བཤིག་མི་ཐུབ་གསུངས། ངོ་མ་བསམ་བློ་ཞིག་བཏང་ན། དུས་རབས་སྔོན་མའི་དུས་སྐེད་ཚུན་ཆོད་ནས་རིག་གནས་གསར་རྗེ་སོགས་ཀྱི་དུས་སུ། ཨ་ལ་ལ་མ་བཤིག་བསམ་པ་ཞིག་ཅི་ཡོད་དེ། འོན་ཀྱང་མ་འཇིག་ནས་ད་དུང་ཡོད་པ་འདི་རེད། དེས་ན་རབ་ཏུ་བྱུང་བས་དམ་ཆོས་འདུལ་བའི་བསྟན་པས་རྨང་གཞི་བྱས་ནས་སོར་བྱང་སྔགས་གསུམ་གྱི་སྡོམ་དང་བསླབ་བྱ་དམ་ཚིག་རྣམས་མ་བསྲུངས་ན། ཆུ་མེ་ལ་འབར་ན་ཅི་ཡིས་གསོད། །རྡོ་རླུང་གིས་ཁྱེར་ན་ཅི་ཡིས་གནོན། །ཞེས་པ་ལྟར་ཡིན། དོན་གྱི་བསྟན་པ་བཞུགས་ས་དེ་གང་ཟག་གི་རྒྱུད་ལ་ཡིན་པས་སངས་རྒྱས་ཀྱི་བསྟན་པ་མེད་ན་དཀོན་མཆོག་གི་སྣང་བའང་མེད། སྤྱོད་པ་འདུལ་བ་དང་མ་མཐུན། སྒོམ་པ་མདོ་སྡེ་དང་མ་མཐུན། བཤད་པ་མངོན་པ་དང་མ་མཐུན། དེའི་སྟེང་དུ་གསང་སྔགས་རྒྱུད་སྡེ་དང་ཡང་མ་མཐུན་ན་སྟོན་པའི་དམ་ཆོས་དང་ཡང་མི་མཐུན་པས། ཆོས་དང་མི་མཐུན་པའི་མྱི་ཆོས་གོས་ཅན་མང་ན། ཕྱི་གོས་དམར་དེ་ཚོན་གྱི་རྣམ་གྲངས་ཙམ་ཡིན་པས། དེ་ནི་རྟགས་ཙམ་འཛིན་པའི་བསྟན་པ་ལ་ཐག་ཉེ་བའི་སྔ་ལྟས་རེད། དེའི་ཕྱིར་ཆོས་འཆད་ཉན་བྱ་རྒྱུ་ནི་བླ་མ་སེར་མོ་བ་ཙམ་དུ་མ་ཟད་མི་སྐྱ་ཕོ་མོ་ཡད་ཆད་རང་གཞན་བར་གསུམ་ཀུན་གྱི་ཚེ་འདི་ཕྱིའི་འདུན་གྲོས་ཆེན་མོ། རང་རེ་ཚེ་སྔོན་མའི་ལས་ཤིག་གིས་སྐྱིད་མ་སྡུག་གི་འཇིག་རྟེན་མི་ཡུལ་འདི་འདྲ་ཞིག་ལ་འཕངས་ཡོད་པས། རང་རེའི་མི་ཚེ་འདིའང་གད་པ་ཆུས་ཟོས་ཀྱི་གད་ཁ་ཞིག་ལ་སྐྱེས་པའི་ཤིང་ཕུང་ཞིག་དང་འདྲ་བར་རྟག་བརྟན་མེད་པས་ན། ཚེ་ཕྱི་མའི་བདེ་སྡུག་ཐོད་པའི་རི་མོ་ལ་ད་ནས་གཟབ་རྒྱུ་ཡོད་དམ། ཡོད་ན་གཟབ་ལུགས་ཇི་ལྟར་བྱེད་དགོས་སམ། ཡང་དཔེ་གཞན་ཞིག་ལ་བཞག་ན། ཆུ་ཆེན་ཞིག་གིས་ཁྱེར་སོང་སྟེ་ཆུ་དཀྱིལ་གྱི་བྲག་གདོང་ཞིག་ཏུ་ཤིང་གླ་ཁེའི་ཚེར་ཕུང་ཞིག་ལ་འཐམ་ས་རྙེད་ཡོད་ན། ད་ཡང་ནམ་མཁའ་ནས་སྤྲིན་ནག་འཁྲིགས་ལུགས། བར་སྣང་ནས་གློག་དམར་འཁྱུག་ལུགས་གང་ལ་བལྟས་ཀྱང་། ཡང་ད་དུང་སེར་དྲག་དང་། ཆུ་ལོག་ཆེན་པོ་ཞིག་ཡོང་གྲབས་ཡོད་པས་ན། ཡང་ཆུ་རླབས་ཆེན་པོ་ཞིག་གིས་འདེད་རྒྱུ་ནི། སྔུན་འདི་ན་རིག་རིག་ཁར་ཡིན་པས། ཡུད་ཙམ་ཞིག་ལ་གསོན་དུ་ཡོད་པའི་ཚེ་འདི་ལ་ཐར་བའི་སྲོག་གི་རྒྱུན་ཞིག་མུ་མཐུད་དུ་འཚོ་ཐབས་བྱ་རྒྱུར་འདང་རྒྱག་པ་དང་། དེའི་ཐབས་ལམ་དང་བཀོད་པ་གང་བྱེད་ན་དགའ་མིན་དང་། དེའི་ཐབས་ལམ་ལ་ཉན་རྒྱུ་ལ་སོགས་ཆོས་འཆད་ཉན་བྱེད་སར་འོང་ཟེར་བ་དེ། དེ་འདྲ་ཞིག་གི་དོན་ལ་འོང་ནི་ཡིན་པར་གོ་དགོས། གལ་ཏེ་དོན་ཆེན་ནང་གི་དོན་ཆེན་ཏེ། འདི་ལྟར་ཕ་གཞིས་མེ་ལ་འབར་གྱིན་ཡོད་ནའང་། དེ་གསོད་སར་འགྲོ་བ་ལས། ཆོས་ཚིག་བཞི་གཅིག་གི་ཉམས་ལེན་གྱི་གནད་ཤེས་པར་དོན་གཉེར་བྱ་རྒྱུའི་གནད་ཆེ་བར་ཤེས་དགོས། རྒྱུ་མཚན་ཕ་གཞིས་ཕ་ཁང་གི་འབལ་འབོལ་ལྷབ་ལྷུབ་འདི་དག་ཡོད་ནའང་ཉི་མ་འགའ་རེ་ཙམ་ཡིན་ལ། མེད་ནའང་འདུག་ཐབས་མི་ཆག་ཚེ་ཕྱི་མར་དེས་གནོད་མ་གཏོགས་ཕན་པ་ཆུང་། ཆོས་གདམས་ངག་ཚིག་གཅིག་ཞེ་ལ་འཛིན་རྒྱུ་ཡོད་ན་ཚེ་འདི་ཕྱི་གཉིས་ཀའི་འགྲོ་རྟེན་འདུག་རྟེན་གཉིས་ཀ་དེའི་ཁུངས་ནས་ཡོང་། དེའི་ཕྱིར་བདག་ཅག་གི་སྟོན་པས་ཀྱང་། རྒྱལ་སྲིད་མཆིལ་མའི་ཐལ་བ་བཞིན་དུ་བོར་ཏེ་དམ་པའི་ཆོས་བསྒྲུབས་པར་མ་ཟད་སློབ་པ་ལམ་གྱི་གནས་སྐབས་སུ། སྐུ་སྐྱེ་མང་པོར་དམ་པའི་ཆོས་ཚིག་བཞི་རེའི་དོན་དུ་ཁྲག་གིས་སྣག་ཚ། རུས་པས་སྨྱུ་གུ། པགས་པས་ཤོག་བུ་མཛད་དེ་དམ་ཆོས་ཚོལ་བ་དང་། ཆོས་ཐོས་པའི་དོན་དུ་སྐུ་ལུས་མེ་དོང་དུ་མཆོང་བ། ཆོས་ཀྱི་དོན་དུ་དབུ་བཅད་ནས་སྦྱིན་པ་བཏང་པ་ལ་སོགས་པ་ཅི་འདྲའི་ངོ་མཚར་ཅན་གྱི་སྐྱེས་རབས་རྣམ་ཐར་མང་པོ་འདུག རང་རེ་འདི་ན་བདེ་བདེ་སྐྱིད་སྐྱིད་ཀྱིས་ཆོས་སྒྲུབ་པའི་ཆ་རྐྱེན་རང་སྒོ་ན་འཛོམས་ཡོད་དུས། གྲལ་འདྲ་འདྲའི་ནང་ནས་ཆོས་སྐལ་ཆད་པ་དེ་རང་སྡུག་ཡིན་ནི་རེད། དེའི་ཕྱིར་ཆོས་སྒྲུབ་ན་སྤུས་དག་ཤག་ཤག་ང་ལ་འདི་ཡོད་སྙམ་པའི་སེམས་རྟེན། དགྲ་ལ་ངོམ་རྒྱུ། གཉེན་ལ་བཤམས་རྒྱུ། ཞེས་པ་ལྟར། སྐྱིད་ཀྱི་གོང་ནོན། སྡུག་གི་སྐྱོ་གྲོགས། ཕྱི་མར་བར་དོ་ཆོད་བྱེད་ཀྱི་ལམ་ཡིག ཤི་ནས་ཐར་བ་ཐོབ་བྱེད་ཀྱི་གྲོ་རྟེན། གསོན་ཚེ་འདི་ལའང་། མིའི་ནུས་པ་ལས་བརྒལ་བ་དང། མིའི་ཚོད་དཔག་གི་ཡུལ་ལས་བརྒལ་བའི་བྱ་བར་འཕྲད་ཚེ། ལྷ་དཀོན་མཆོག་ལ་རེ་བ་ཞིག་འཆའ་ན། བཅའ་ལུགས་འདི་ལྟར་བཅའ་དགོས། རང་གཞན་གཉིས་ཀའི་བདེ་སྐྱིད་ཀྱི་དོན་དུ། ཚོགས་གསོག་ལུགས་དང་སྒྲིབ་པ་སྦྱང་ལུགས་འདི་ལྟར་ཡིན་ནོ་སྙམ་པ་ལྟ་བུ་ཞིག་སྟེ། མདོར་ན་ལེགས་ཉེས་བླང་དོར་གྱི་མིག་གསར་བ་ཞིག་རྙེད་པའི་དོན་དུ་ཆོས་རྭར་ཡོང་ནི་ཡིན་པས། རིན་པོ་ཆེའི་གླིང་དུ་ཐོན་དུས་ནོར་བུ་རིན་པོ་ཆེ་དགོས་འདོད་ཀུན་འབྱུང་གསོལ་བ་བཏབ་ན་ཅི་བསམ་འགྲུབ་པའི་ནོར་བུ་མ་ལོན་ཀྱང་། རིན་ཐང་ཡོད་ཤག་ཤག་གི་ནོར་བུ་ཞིག་མ་ལོན་པར། རྡོ་ལོག་ཅིག་རུམ་དུ་བཅུག་ནས་ཕྱིར་ཡུལ་ལ་འཁོར་ཐབས་མེད་པ་ལྟར་དང། དེ་བཞིན་དུ་ཆུ་ལེན་སར་སོང་ནས་ཟོམ་སྟོང་ཁུར་ཏེ་ཕྱིར་ལོག་པ་ལྟར་དུ། དོན་མེད་སྟོང་ལོག་མི་བྱེད་སྙམ་པའི་བསམ་བློ་སྔོན་དུ་བཏང་ནས་ཆོས་ཉན་དགོས། ཆོས་ཉན་དུས་ཉན་ལུགས་ཀྱི་ཀུན་སློང་དང་ཀུན་སྤྱོད་སོགས་ནི། ཆོས་ནམ་བཤད་ལ་ཉིན་བཞིན་བཤད་པ་ཡིན། འོན་ཀྱང་གཙོ་ཆེ་བ་ནི་ཆོས་ཞུ་དུས་ཆོས་ཀྱི་ཚིག་རྣ་བས་ཉན། དེའི་དོན་ཡིད་ལ་བཟུང་། དེ་རང་གི་རྒྱུད་ལ་སྦྱར་ཏེ་ལག་ལེན་ལ་འདེབས་པ་སྟེ། དེའི་གནད་གསུམ་པོ་དེ་དང་མི་འབྲལ་བ་དེ་ཆོས་ཞུ་ལུགས་ཀྱི་མན་ངག་གི་སྙིང་པོ་ཡིན། ངེད་ཚོ་བླ་མ་གྲྭ་པ་དག་དགོན་པ་དང་རི་ཁྲོད་ནས་འདུག་པ་འདིའང་། སྐྱིད་འདོད་སོས་དལ་གྱི་མི་ཚེ་སྐྱེལ་བ་ཙམ་མ་ཡིན། མཐོ་འདོད་གྲགས་འདོད་ཀྱིས་ཐོབ་གོ་སའི་གསེར་ཁྲིར་སྙེག་པའང་མིན། འོ་ན་ཅི་རེད་ཟེར་ན། སྟོན་པ་སངས་རྒྱས་ཀྱི་སློབ་མ་རེད། སངས་རྒྱས་ཀྱི་རྗེས་སུ་ཞུགས་པ་རེད། དེས་ན་སངས་རྒྱས་ཀྱི་མཛད་པ་སྒྲུབ་དགོས་པ་རེད། ཁྲི་གུང་ཐང་ཚང་གིས། སྐུ་སྐྱེ་བསྟན་དོན་དུ་བྱོན་ན། །བཤད་སྒྲུབ་ལག་རྗེས་ཤིག་འཇོག་དགོས། །འཇིག་རྟེན་སོ་ཚིས་ཀྱི་བྱ་གཞག །བཙན་ཕྱུག་བུ་ཕོ་རེས་ལོས་ཆོག །ཅེས་གསུངས་སོ། །དེ་ཇི་ལྟར་ཡིན་ཞེ་ན། སྤྲུལ་སྐུ་ཆེན་པོའི་མཚན་བཟུང་ནས་བསྟན་པའི་དོན་དུ་བྱོན་པ་ཡིན་ན་བྱོན་དོན་གྱི་མཛད་པ་དེ་བསྒྲུབས་ནས། རྒྱལ་བའི་བསྟན་པ་འདི་ལུང་དང་རྟོགས་པའི་བདག་ཉིད་ཅན་ཞིག་ཡིན་པས། དེ་བཤད་སྒྲུབ་གཉིས་ཀས་མ་གཏོགས་འཛིན་ཐབས་མེད་པས། བཤད་དང་སྒྲུབ་པས་བསྟན་པའི་བྱ་བ་བྱས་ཏེ་བསྟན་པར་ལག་རྗེས་ཤིག་འཇོག་དགོས་པར་གསུངས་པ་ཡིན། བཤད་སྒྲུབ་གཉིས་ཀར་ལག་རྗེས་འདི་བཞག་གོ་ཞེས་ཟེར་རྒྱུར་མེད་དུས་མིང་ཆེན་པོ་གང་བཏགས་རུང་། ཐོབ་གོ་ས་གང་གིས་འགྱིང་རུང། བླུན་པོ་ཅི་འདྲ་མང་པོས་བསྐོར་རུང་། སྤྲུལ་སྐུ་རྫུན་མ། བླ་མ་རྫུན་མ། འཇིག་རྟེན་ཆོས་བརྒྱད་ཡིན་པས། འདི་ཆོས་དང་མི་མཐུན་པའི་བྱ་བ་ཡིན། འཇིག་རྟེན་སོ་ཚིས་ཀྱི་བྱ་གཞག་ཟེར་བ་དེ་ཅི་འདྲ་ཞིག་ལ་གསུངས་པ་རེད་ཅེ་ན། ཁྱིམ་སྐྱོང་། ཆུང་མ་འཚགས། བདག་སྟོད། གཞན་སྨོད། སྡིག་ལས་སྡིག་ཚོང་། ལོག་འཚོས་འཚོ་བ་སྐྱེལ་བ་སོགས་ལ་གསུངས། འདིའི་རིགས་སྒྲུབ་པ་ལ། དམ་པ་གོང་མའི་མཚན་གྱི་རིན་པོ་ཆེ་རྡོ་ལ་བརྡར་མ་བསྡད་ཀྱང་། བཙན་ཕྱུག་ཚང་གི་བུ་རེས་སྒྲུབ་ཆོག་ཅེས་གསུངས་ཡིན། སྙིགས་མའི་དུས་འདིར་བསྟན་འཛིན་གྱི་མིང་བཟུང་ནས་བསྟན་བླ་རིན་མེད་དུ་བཙོང་མཁན་ཚོ་ལ་གསུངས་པ་རེད། དེ་དང་འདྲ་བར་དཔལ་སྤྲུལ་ཚང་གིས། བརྗོད་གཞི་མེད་པའི་སྟོང་སྐད་བསྟོད་སྒྲ་གཅིག །ཕན་པ་མེད་པའི་ཆེ་བཀྱག་བཀུར་སྟི་གཉིས། །རྣམ་སྨིན་ལྕི་བའི་དད་རྫས་འབུལ་ནོར་གསུམ། །སྤངས་ནས་ཁྱི་རྒན་ཅི་བཞིན་འཆི་ནུས་ཤོག །ཅེས་སྨོན་ལམ་བཏབ་པ་ཡིན། དེས་ན་སངས་རྒྱས་ཀྱི་སློབ་མ་འམ་སངས་རྒྱས་ཀྱི་རྗེས་སུ་ཞུགས་པ་ཡིན་ཕྱིན། སངས་རྒྱས་ཀྱི་མཛད་པ་སྒྲུབ་པ་ནི་ཁུར་དུ་བབ་པའི་འོས་འགན་ཞིག་ཡིན། སངས་རྒྱས་ཀྱི་རྗེས་འཇུག་ནི་སངས་རྒྱས་ཀྱི་མཛད་པ་ཕྲིན་ལས་རྒྱུན་བསྐྱངས་ནས་རྒྱལ་བ་སྲས་དང་སློབ་མར་གྱུར་པའི་ཐུགས་དགོངས་རྫོགས་ཐབས་བྱེད་པ་པོ་ཡིན། སངས་རྒྱས་སྲས་བཅས་ཀྱི་ཐུགས་དགོངས་རྫོགས་ཐབས་ཇི་ལྟར་བྱ་དགོས་ཤེ་ན། དེ་ནི་དམ་པའི་ཆོས་འཛིན་དགོས་ལ། སངས་རྒྱས་ཀྱི་གསུངས་པའི་དམ་པའི་ཆོས་བཟུང་ནས་དམ་པའི་ཆོས་ཀྱིས་སེམས་ཅན་ལ་ཕན་བདེ་སྒྲུབ་དགོས། རྒྱལ་བའི་མཛད་པ་ཐམས་ཅད་ཚུར་བསྡུས་ན་སེམས་ཅན་ལ་ཕན་བཏགས་རྒྱུ་གཅིག་པུར་འདུས་པ་ཡིན། དེས་ན་འུ་ཚོས་ཀྱང་པདྨ་ཐང་འདིར་ཆོས་ར་ཆེན་པོ་ཞིག་བཀབ་ཅིང་ཆོས་ཀྱི་དུང་ཞིག་འབུད་པ་འདི་དང་། ཁྱད་པར་དུ་ཞིང་ཁྲིད་འཚོགས་པ་འདིའང་། མི་སྐྱ་ཕོ་མོའི་གཙོར་བྱས་པའི་ཤི་གསོན་གྱི་སེམས་ཅན་མང་པོ་ཞིག་ལ་ཕན་ཞིག་ཨེ་ཐོགས་སྙམ་པ་ཡིན། སྙིགས་མ་ལྔ་བདོ་བའི་དུས་གྱི་ཐ་མ་འདིར་རང་རེ་ཆོས་ཀྱི་གྲུ་ཆེན་པོ་ཞིག་ལ་མཉམ་དུ་ཞུགས་པ་ཡིན་ཞིང་། བློ་གྲུ་ནང་མི་དང་རྔོན་པའི་ཡིད། །ལས་བྱ་བ་གཅིག་ལ་རྡོག་པ་གཏོད། །ཅེས་གེ་སར་བདུད་ཡུལ་དུ་བྱོན་ཁར་གླིང་ལ་བསྒོ་བ་མཛད་པ་ལྟར་ཆུའི་ཕ་རོལ་དུ་བགྲོད་དགོས་པའི་གྲུ་བ་དང་། མགྲོན་པོ་ཐམས་ཅད་ཆུའི་ཕ་རོལ་ཏུ་བགྲོད་རྒྱུར་བློ་སེམས་མཉམ་པ་ལྟར་དུ་རང་རེ་ཡང་ཁ་སེམས་བསམ་པ་དང་ལུས་སེམས་གྲིབ་མ་མཉམ་པར་བློ་སེམས་ཕྱོགས་གཅིག་ཏུ་དམ་པའི་ཆོས་ཉན་པའི་ཕྱོགས་སུ་དྲིལ་ཐུབ་ན་ཆོས་ར་རྡོག་པས་བརྫིས་ན་ངན་སོང་ལ་གཞོགས་འཁྲི་མི་དགོས་ཞེས་ཁ་ཕོ་ཆེན་པོ་བསྒྲགས་ནའང་དོན་མེད་པར་མི་འགྱུར། དེ་ལས་གཞན་དུ་དང་པོ་ནས་ཀྱང་ཆོས་དང་བླ་མ་གཉིས་ཀྱི་སྐྱོན་ཞིག་ལ་བསམ་བློ་བཏང་། ང་རྒྱལ་ཕྲག་དོག་གནོད་སེམས་བཅས་ཀྱིས་རྒྱུད་སྦོས་ཏེ་ཆོས་རའི་ནང་དུ་ཇི་ལྟར་བསྡད་ཀྱང་མཁྲིས་ནད་ཅན་གྱི་མིག་ལ་དུང་སེར་སྣང་ལྟར། ཚེ་ཕྱི་མའི་འཇིགས་སྐྲག་གི་ལམ་ཆེན་དུ་ཐོན་དུས། འཕགས་མཆོག་ཐུགས་རྗེ་ཆེན་པོ་དངོས་བྱོན་ཀྱང་གཤིན་རྗེའི་ལས་མཁན་མགོ་དགུ་ཅན་ཞིག་ལས་མཐོང་དཀའ། ཆོས་ཆོས་བཞིན་དུ་མ་བསྒྲུབས་ན་ཆོས་ཀྱི་སླར་ངན་སོང་དུ་འགྲོ་བའི་རྒྱུ་བྱེད་ཅེས་གསུངས་པ་ལྟར་ཡིན། ཆོས་ཞུ་དུས་ཆོས་དང་མཐུན་ཞིང་ལུས་ངག་ཡིད་གསུམ་ཆུན་གཅིག་ཏུ་དྲིལ་ཏེ། ཚེ་གང་དུས་བརྒྱའི་ཟ་མ་ལན་གཅིག་ཟེར་བ་ལྟར་ཉི་མ་བརྒྱའི་ནང་ནས་ལུས་སྲོག་གཉིས་ཀ་འཚོ་བྱེད་ཀྱི་ཟ་མ་ཐེངས་གཅིག་མ་གཏོགས་ལོན་རྒྱུ་མེད་ན། དེ་ཅིས་ཀྱང་སྣང་མེད་དུ་འཇོག་མི་འོས་སོ་སྙམ་པའི་བསམ་བློ་དེ་འདྲ་སྔོན་དུ་བཏང་ནས་ཆོས་ཉན་དགོས། དེ་ནས་ང་ཚོས་ད་ལོའི་བདེ་ཆེན་ཞིང་ཁྲིད་ཀྱི་དབུ་དངོས་སུ་འཛུགས་རྒྱུ་བྱེད། བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བས། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང། །འབྲུག་ལྟར་ཆེར་སྒྲོགས་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་རྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་དཔལ་དབྱངས་ལ་འདུད། །བརྩེ་ལྡན་ཁྱེད་ཀྱི་མཁྱེན་རབ་འོད་ཟེར་གྱིས། །བདག་བློའི་གཏི་མུག་རྨོངས་པ་རབ་བསལ་ནས། །བཀའ་དང་བསྟན་བཅོས་གཞུང་ལུགས་རྟོགས་པ་ཡིས། །བློ་གྲོས་སྤོབས་པའི་སྣང་བ་བསྐྱེད་དུ་གསོལ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདགབཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབས་པར་མཛད་དུ་གསོལ། གང་གི་ཞལ་བཟང་བལྟ་བས་མི་ངོམ་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསར་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས། །བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས། །འཛམ་བུ་གླིང་དུ་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་། །སྐུ་གསུམ་མཛད་པའི་ངོ་བོ་གཅིག་སྟེ་དཔལ་ལྡན་སངས་རྒྱས་པདྨ་སྐྱེས། །གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད། །ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །མཁྱེན་པས་ཤེས་བྱ་ཀུན་ཀྱི་དེ་ཉིད་གཟིགས། །ཐུགས་བརྩེའི་འོད་ཟེར་གདུལ་བྱའི་དཔལ་དུ་ཤར། །ཟབ་ལམ་ཐེག་རྩེའི་བསྟན་པ་གསལ་མཛད་པ། །རིག་འཛིན་འཇིགས་མེད་གླིང་པ་ལ་ཕྱག་འཚལ། །འཕགས་པ་འཇིག་རྟེན་དབང་ཕྱུག་ཐུགས་རྗེའི་འཕྲུལ། །འགྲོ་བ་ཐར་གླིང་བགྲོད་པའི་དེད་དཔོན་མཆོག །འབྲེལ་ཚད་དོན་ལྡན་ཀློང་ཆེན་རྣལ་འབྱོར་བ། །འཇིགས་མེད་རྒྱལ་བའི་མྱུ་གུ་ལ་ཕྱག་འཚལ། །ཕྱི་ལྟར་རྒྱལ་བའི་སྲས་པོ་ཞི་བ་ལྷ། །ནང་ལྟར་གྲུབ་པའི་དབང་ཕྱུག་ཤ་བཱ་རི། །གསང་བ་འཕགས་མཆོག་སྡུག་བསྔལ་རང་གྲོལ་དངོས། །འཇིགས་མེད་ཆོས་ཀྱི་དབང་པོར་གསོལ་བ་འདེབས། །དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །འཇའ་ལུས་རྡོ་རྗེ་སྐུ་བརྙེས་བི་མ་ལ། །དབྱེར་མེད་ཐུགས་རྗེ་གཅིག་བསྡུས་སྤྲུལ་བའི་སྐུ། །མི་འགྱུར་ནམ་མཁའི་རྡོ་རྗེར་གསོལ་བ་འདེབས། །ཨོ་རྒྱན་རིག་འཛིན་ཆེན་པོའི་རིང་ལུགས་ཀྱི། །བཤད་སྒྲུབ་བསྟན་པའི་རྒྱལ་མཚན་འཛིན་མཛད་ཅིང་། །ཡོན་ཏན་ནོར་བུའི་མཛོད་མངའ་ཆོས་ཀྱི་རྗེ། །དཔལ་ལྡན་བླ་མའི་ཞབས་ལ་གསོལ་བ་འདེབས། །འཕགས་ཡུལ་མཁས་པའི་དབང་ཕྱུག་ཟླ་བ་གྲགས། །གངས་ལྗོངས་འཇམ་པའི་དབྱངས་དངོས་ཀུན་མཁྱེན་རྗེ། །དབྱེར་མེད་ཐུགས་རྗེས་ཡས་སྤྲུལ་དགེ་བའི་བཤེས། །གཞན་ཕན་ཆོས་ཀྱི་སྣང་བར་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །ཧྲཱིཿའོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་ཀྱི་ངོ་བོ་ཉིད། །རང་སེམས་ཆོས་སྐུ་མངོན་དུ་སྟོན་མཛད་པའི། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །བསྟན་པ་སྲུང་ཞིང་རྣལ་འབྱོར་སྐྱོང་བ་ཡི། །དམ་ཅན་བཀའ་སྡོད་མ་གཟའ་རྡོར་གསུམ་དང་། །ཚེ་རིང་མཆེད་ལྔ་གནོད་སྦྱིན་ཡང་ལེ་བེར། །རྡོ་རྗེ་དགྲ་འཇོམས་འཛམ་གླིང་སེང་ཆེན་རྒྱལ། །སྡེ་གསུམ་སྲུང་མ་བཀའ་འཁོར་བཅས་པ་ཡིས། །དམ་ལྡན་སྐྱོང་ཞིང་དམ་ཉམས་བསྒྲལ་བ་དང་། །དམ་པ་ཆོས་ཀྱི་རྒྱལ་མཚན་སྒྲེང་བ་ཡི། །གང་བཅོལ་ཕྲིན་ལས་ཐོགས་མེད་ཡུད་ཀྱིས་སྒྲུབས། །གང་ཞིག་གསེར་མཆོག་རང་བཞིན་རི་རབ་ལ་གནས་མནྡཱ་ར་དང་ལྷར་བཅས་གནོད་སྦྱིན་དང་། །གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རིར་ནི་དཔལ་གྱིས་རོལ་ཞིང་རབ་དུ་དགའ་བའི་རིག་པ་འཛིན་པ་གང་ཡིན་པ། །དེ་དག་ཐམས་ཅད་ཐར་བ་དམ་པའི་སྒོར་གྱུར་ཐུབ་པའི་གསུང་ཉན་ཕྱིར་ན་འདིར་གཤེགས་ཤིག །གང་དག་ཕྱོགས་བཅུའི་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མིའམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག །བསྐལ་བ་སྟོང་དུ་ཐོས་པ་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན། །གང་ཞིག་གཏན་གྱི་སྐྱབས་གནས་མཆོག་གྱུར་པ། །དཀོན་མཆོག་གསུམ་གྱི་ཡོན་ཏན་བསམ་མི་ཁྱབ། །དེ་ལ་དེར་ཤེས་རྣམ་སྨིན་ཡང་དེ་བཞིན་ཏེ། །བསྐལ་བ་བྱེ་བ་ཁྲག་ཁྲིག་བགྲངས་ན་ཡང་། །དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་། །རྣམ་པར་གྲོལ་བ་རིན་ཆེན་སྣ་ཚོགས་དང་། །ཟབ་མོ་རྒྱལ་བའི་བཀའ་འདི་གུས་པས་ཉོན། །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་ཀྱི་སྒྲ་རྣམས་ཇི་ཙམ་པ། །ཐམས་ཅད་སྐད་དུ་ཆོས་འདི་འགྱུར་བར་ཤོག །ནམ་མཁའ་དང་མཉམ་པའི་མར་གྱུར་འགྲོ་བ་རིགས་དྲུག་གི་སེམས་ཅན་ཐམས་ཅད། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་དྲངས་ཏེ་གཏན་བདེ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེར་འགོད་པར་བྱ། དེའི་ཆེད་དུ་དམ་པའི་ཆོས་ཐར་བ་དམ་པའི་བདུད་རྩི་ལྟ་བུ་འདི་ཉན་ནས། དེའི་དོན་ཚུལ་བཞིན་དུ་བསྒྲུབ་དགོས་སྙམ་པའི། ཀུན་སློང་བྱང་ཆུབ་ཀྱི་སེམས་དང་ལྡན་པ་དང། ཆོས་ཉན་པའི་ཀུན་སྤྱོད་ནི་དང་བའི་སེམས་དང་གུས་པའི་རྣམ་འགྱུར་གྱིས་ཆོས་ཉན་དགོས། སྤྱིར་ན་ཆོས་ཞེས་བྱ་བ་འདི་ནི་དོན་ངོ་མར་ཅི་ཞིག་ཡིན་ཞེ་ན། སྤངས་རྟོགས་མཐར་ཕྱིན་ཞིང་སྐྱོན་ཀུན་ཟད་ཡོན་ཏན་ཀུན་ལྡན་གྱི་གོ་འཕང་བརྙེས་པའི། རྫོགས་པའི་སངས་རྒྱས་ཀྱི་ཐུགས་རྒྱུད་དུ་བཞུགས་པའི་འགོག་ལམ་གྱིས་བསྡུས་པའི་ཡོན་ཏན་ལ་ཆོས་ཞེས་བྱ། དེའི་རྐྱེན་གྱིས་སངས་རྒྱས་ཀྱི་དགོངས་སྤྱོད་སེམས་ཅན་གྱིས་མ་ཤེས་ན་ཆོས་སྒྲུབ་ཐབས་ཀྱང་མེད་པས། བདག་ཅག་གི་སྟོན་པ་ཤཱཀྱ་སེང་གེས་གདུལ་བྱ་ལ་སྣང་བའི་ཆེད་དུ་བསྟན་པའི་ཆོས་ཀྱི་རྣམ་བཞག་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ཞིང་ཆོས་ཕུང་བརྒྱད་ཁྲི་བཞི་སྟོང་དེ་གསུང་རབ་ཡན་ལག་བཅུ་གཉིས་ཀྱི་སྟེང་ནས་གསུངས་པ་ཡིན། དེ་ཡང་བརྗོད་བྱ་བསླབ་པ་རིན་པོ་ཆེ་རྣམ་པ་གསུམ་དང་། རྗོད་བྱེད་སྡེ་སྣོད་རིན་པོ་ཆེ་རྣམ་པ་གསུམ་གྱི་ཁོངས་སུ་བསྡུས་ཏེ་གསུངས་པའོ། །ཚུལ་ཇི་ལྟར་གསུངས་ཤེ་ན། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་། །དུག་གསུམ་ཆ་སྙོམས་འདུལ་བའི་གཉེན་པོ་རུ། །སྡེ་སྣོད་བཞི་བ་རིག་འཛིན་གྱི་སྡེ་སྣོད་དང་བཅས་པ་ཉི་ཁྲི་ཆིག་སྟོང་གསུངས་ཡོད། དེ་ལྟར་ཆོས་མི་འདྲ་བ་མང་པོ་ཅིའི་ཕྱིར་གསུངས་སྙམ་ན། དེ་ཡང་གདུལ་བྱའི་བློ་རིགས་མི་འདྲ་བར་དགོངས་ཏེ་སྐྱེས་བུ་ཆུང་འབྲིང་ཆེ་གསུམ་གྱི་ལམ་ལ་དྲང་བའི་ཆེད་དུ་ཐེག་པའི་རིམ་པ་སྣ་ཚོགས་པ་ཞིག་གསུངས་སོ། །ཇི་ལྟར་ཞེ་ན། མཐར་ཐུག་གི་འབྲས་བུ་གཅིག་ལ་ལམ་དང་ལམ་ལ་བཀོད་སྟངས་མི་འདྲ་བས་བསྟན་པའོ། །སེམས་ཅན་ཐམས་ཅད་བདེ་བ་འདོད་པའི་ཆ་ནས་འདྲ་བ་ཡིན། དེའི་སྟབས་ཀྱིས་མཐར་ཐུག་གཏན་བདེ་རྫོགས་པའི་སངས་རྒྱས་ཐོབ་པའི་ཆེད་དུ་ལམ་བསྟན་ཏེ་དེའི་ཕྱོགས་ལ་འདྲེན་པ་ལམ་གཅིག་ཡིན་ཞིང་། འོན་ཀྱང་འགའ་ཞིག་ནི་དང་པོ་ནས་རང་དོན་མི་སེམས་པར་གཞན་དོན་ཁོ་ནར་བརྩོན་ཞེས་སྨྲས་ན། དེ་དང་དུ་ལེན་མི་ནུས་པའི་རིགས་ཡིན་ལ། ལ་ལས་ནི་ལྷ་མིའི་ལུས་རྟེན་ཐོབ་རྒྱུར་མ་སེམས། ཐར་བ་ཁོ་ནར་དོན་གཉེར་གྱིས་ཞེས་སྨྲས་ན་དེ་མི་ནུས། ཡང་འགའ་རེར་ཚེ་འདིར་མ་སེམས་ཕྱི་མ་སོམས་ཞེས་བརྗོད་ན་བསམ་མི་ཤེས་པ་དེ་འདྲ་ཡོད་པ་ཡིན། དེའི་དབང་གིས་སངས་རྒྱས་ཀྱིས་གདུལ་བྱའི་བློ་རིགས་དང་བསམ་པ་འདྲ་མིན་ལ་དགོངས་ནས་ཆོས་ཀྱི་རིམ་པ་དང་ཐེག་པའི་རྣམ་གྲངས་ཀྱང་སྣ་ཚོགས་སུ་བསྟན་ཏོ། །ཇི་སྲིད་སེམས་ཀྱི་འཇུག་པ་མ་ཟད་པར། །བསམ་ཡས་ཐེག་པའི་གྲངས་མཐར་ཐུག་པ་མེད། །ཅེས་གསུངས་པ་དེ་སངས་རྒྱས་ཀྱི་གསུང་གི་མཛད་པ་ཕྲིན་ལས་སོ། །ད་དུང་སྒྲ་སྣ་ཚོགས་པའི་སྟེང་ནས། ལྷའི་སྐད། ཀླུའི་སྐད། གནོད་སྦྱིན་གྱི་སྐད། འདྲེ་དང་སྲིན་པོའི་སྐད། འགྲོ་བའི་སྒྲ་སྐད་སྣ་ཚོགས་ཀྱི་སྟེང་ནས་གསུང་དབྱངས་ཡན་ལག་རྒྱ་མཚོའི་སྒྲ་སྐད་ཀྱིས་ཆོས་བསྟན་ཏེ་འཇིག་རྟེན་གྱི་དོན་སྒྲུབ་པར་མཛད་དོ། །མངོན་རྟོགས་རྒྱན་ཀྱི་མཆོད་བརྗོད་དུ། ཉན་ཐོས་ཞི་བ་ཚོལ་རྣམས་ཀུན་ཤེས་ཉིད་ཀྱི་ཉེར་ཞི་ཁྲིད་མཛད་གང་ཡིན་དང་། །འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང་། །གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པ། །ཞེས་གསུངས་པ་ལྟར་དེ་དག་ནི་བདེ་བར་གཤེགས་པའི་གསུང་གི་གསང་བའོ། །འོ་ན་སངས་རྒྱས་ཀྱི་སྐུའི་མཛད་པ་ཇི་ལྟར་ཡིན་ཞེ་ན། སངས་རྒྱས་ཤཱཀྱ་ཐུབ་པ་མི་རྣམས་ཚེ་ལོ་བརྒྱ་བའི་གནས་སྐབས་སུ་རྒྱ་གར་རྡོ་རྗེ་གདན་དུ་སངས་རྒྱས་ཏེ། མཛད་པ་བཅུ་གཉིས་ཀྱིས་གདུལ་བྱ་བསྐྱངས་པར་མ་ཟད་མཐའ་ཡས་སེམས་ཅན་གྱི་ཁམས་སུ་གང་ལ་གང་འདུལ་གྱི་སྤྲུལ་བ་སྣ་ཚོགས་པས་འགྲོ་བའི་དོན་མཛད་པའོ། །སངས་རྒྱས་བྱང་སེམས་ཀྱི་སྤྲུལ་བ་ནི་འདི་རེད་འདི་མ་རེད་ཅེས་སུ་ཞིག་གིས་ཀྱང་ཟེར་མི་ཤེས། བྱ་དང་། རི་དྭགས། རྔོན་པ་ལ་སོགས་པའི་གཟུགས་ཀྱིས་འགྲོ་དོན་མཛད་པའང་ཡོད། གནའ་སྔ་མོ་ཞིག་ལ་ཡུལ་ལུང་ཉམས་དགའ་བའི་རི་སུལ་ཞིག་ན། དྲང་སྲོང་ཆོས་པ་ཞིག་ཆོས་ཕྱོགས་སུ་དཀའ་ཐུབ་རྐྱང་བ་མཛད་ཅིང། རིར་སྐྱེས་པའི་ཤིང་འབྲས་དང་། ལྡུམ་རིགས་ཀྱི་རྩ་བ་དང་། ཆུ་རྣམས་ཀྱིས་འཚོ་རྟེན་བྱས་ནས། ན་བཟའ་ཤིང་གི་ཤུན་པ་དང་། ལོ་མ་སོགས་མནབས་ཏེ་དུས་རྒྱུན་དུ་སྦྱིན་སྲེག་འབའ་ཞིག་མཛད་ཀྱིན་བཞུགས་འདུག་པ་ཞིག་ཡོད། དེ་ལ་གྲོགས་པོ་རི་བོང་མི་སྐད་སྨྲ་ཤེས་པ་ཞིག་ཡོད། རི་བོང་དྲང་སྲོང་གི་མདུན་དུ་ཉིན་རེ་ཐེངས་གསུམ་རེ་ཡོང་ནས་དྲང་སྲོང་དང་གཉིས་ཕན་ཚུན་ཁ་བརྡ་ཐང་ཐུང་རེ་བཤད་ཀྱིན་ཡོད་པ་ཡིན། ལོ་ཞིག་ལ་ས་ཆ་དེར་ཆར་ཆུ་མ་བབ་པས་ཐན་པ་ཆེན་པོ་ཞིག་བྱུང་སྟེ། དྲང་སྲོང་གིས་དཀའ་ཐུབ་བསྟེན་སའི་ས་ཕྱོགས་དེའི་ཆུ་དང་འབྲས་བུ་ཇེ་སྐམ་དུ་སོང་ནས་མཐར་མེད་པར་ཉེ་ཡོང་ཚེ། དྲང་སྲོང་ལ་ཆུ་དང་ལོ་འབྲས་མེད་ན་འཚོ་ཐབས་མེད་པས་ཡུལ་གཞན་ཞིག་ལ་བསོད་སྙོམས་ལ་འགྲོ་དགོས་དགོངས་ནས་དྲང་སྲོང་འགྲོ་གྲབས་བྱས་དུས། རི་བོང་ཡོང་ནས་དྲང་སྲོང་ལ་ཁྱེད་གང་དུ་ཕེབས་པ་ཡིན་ཞེས་ཞུས་པར་དྲང་སྲོང་གིས་ས་འདི་ན་ཆུ་དང་ལོ་མ་ཙམ་ཡང་ཟ་རྒྱུ་རྙེད་མི་འདུག་པས། གྲོང་དུ་སོང་ནས་སློང་མོ་ཞིག་མ་བྱས་ན་འཚོ་ཐབས་དཀའ་འདུག་ཕྱིར། སློང་མོར་འགྲོ་བ་ཡིན་ཞེས་གསུངས་པ་ན། རི་བོང་གིས་དེ་གོ་མ་ཐག་ཏུ་མི་དགའ་བར་གྱུར་ཅིང་། ཕ་དང་བྲལ་སོང་བ་ལྟ་བུས་སེམས་སྡུག་བྱས་ཏེ་དྲང་སྲོང་གི་རྐང་པར་མགོ་གཏུགས་ཤིང་ཕྱག་འཚལ་ཏེ། ཁོ་རང་ཤུལ་ཏུ་མི་སྐྱུར་བར་གསོལ་བ་ཡང་ཡང་བཏབ། །ད་དུང་རི་བོང་གིས་སྨྲས་པ། གཅིག་ན་གྲོང་དང་ཁྱིམ་གྱི་གནས་ནི་ཉེས་པ་དང་སྡུག་བསྔལ་གྱིས་གང་ཡོད། དབེན་པའི་གནས་ནི་ཡོན་ཏན་མང་པོ་དང་ལྡན་ས་ཡིན། གཉིས་ན་གྲོང་ཡུལ་དུ་སོང་ནས་འདི་ཕྱིའི་དོན་ཆེན་འགྲུབ་པ་ཧ་ཅང་ཉུང་། སྟབས་མ་ལེགས་ན་སྡུག་བསྔལ་ཆེན་པོའི་འདམ་དུ་ཚུད་ཉེན་ཡོད་པས། ཁྱེད་རང་ཅིས་ཀྱང་མ་ཕེབས་བཞུགས་རོགས་མཛོད་ཅེས་ལན་མང་ཞུས་ཀྱང་དྲང་སྲོང་ལྡོག་མ་ཐུབ། དེ་ནས་རི་བོང་གིས་ཀྱང་བསམ་བློ་ཞིག་བཏང་སྟེ་གལ་སྲིད་ཁྱེད་གྲོང་ལ་མི་ཕེབས་ཐབས་མེད་ཡིན་ན། དེ་རིང་ཁྱེད་འདིར་བཞུགས་ནས་སང་ཉིན་ཕེབས་ཞེས་ཞུས། དྲང་སྲོང་གི་བསམ་པར་འདིས་དེ་རིང་ང་ངེས་པར་དུ་སྡོད་དུ་འཇུག་ལུགས་ལ་བལྟས་ན། འདིས་དེ་རིང་ང་མགྲོན་དུ་འབོད་གྲབས་རེད་སྙམ་ནས་བསྡད། དེ་ནས་སྔ་དྲོའི་དུས་ཚོད་བརྒལ་ནས་ཉིན་གུང་གུང་ཚིགས་ཀྱི་དུས་སུ་རི་བོང་ཡོང་ནས། དྲང་སྲོང་ལ་སྐོར་བ་ཞིག་བྱས་ཏེ་ངས་ལས་ཉེས་འདྲ་རེད་ཡོད་ན་ཁྱེད་དགོངས་པ་མ་འཚོམས་ཟེར་ནས། ཐེ་ཚོམ་ཙམ་ཡང་མེད་པར་སྦྱིན་བསྲེག་གི་མེའི་ནང་དུ་མཆོངས་སོ། །དྲང་སྲོང་བསྐྲགས་ཏེ་སྤྱན་ནས་མཆི་མ་འབབ་བཞིན་དུ་བུ་གཅེས་པ་མ་ཡིས་བྱམས་པ་ལྟ་བུ་ཞིག་བྱས་ཏེ་མགྱོགས་པར་རི་བོང་མེ་ནང་ནས་ཚུར་བླངས་ཏེ་ཁྱོད་ཀྱིས་ཅི་བྱེད་པ་ཡིན་ཞེས་དྲིས། རི་བོང་གིས་སྨྲས་པ། དྲང་སྲོང་ཆེན་པོ་དབེན་པའི་གནས་འདི་བཟང་བ་ཡིན། ཁྱེད་ཀྱིས་ངའི་ཤ་འདི་ཟོས་ནས་ཞག་མ་གཅིག་གི་འཚོ་ཆས་མཛོད། ནགས་གསེང་དུ་སྐྱེས་པའི་རི་བོང་ང་ལ་ཁྱེད་ཀྱིས་གསོལ་ཆོག་པ་ཞིག་འདི་མ་གཏོགས་འབུལ་རྒྱུ་མེད། ངའི་ལུས་འདི་མེ་ལ་བསྲེགས་ནས་དེ་རིང་གཅིག་པུར་ཁྱེད་དཀའ་ཐུབ་ཀྱི་གནས་འདི་རུ་བཞུགས་རོགས་མཛོད། རི་བོང་རྨས་མ་དེས་སྐད་ཆུང་ངུས་དེ་སྐད་ཞུས་ཚེ། དྲང་སྲོང་གིས་ཚིག་དེ་ཐོས་པས་ཐུགས་འགུལ་ཆེན་པོ་ཞིག་ཐེབས་ནས། གྲོགས་པོ་ཁྱེད་དང་དབེན་པའི་གནས་འདི་བསྐྱུར་བ་ལས་མུ་གེས་ཤི་ཡང་འགྱོད་པ་མེད། ད་མི་འགྲོ་ཁོ་ཐག་ཡིན་གསུངས་པས། རི་བོང་བྱང་ཆུབ་སེམས་དཔའ་དགའ་ནས། དགའ་བའི་འཛུམ་མདངས་རྒྱས་ཏེ་ནམ་མཁའ་ལ་བལྟས་ནས་ང་དབེན་པའི་གནས་ལ་དགའ། དབེན་པའི་གནས་སུ་བསྡད་དེ་དྲང་སྲོང་ཡང་དབེན་པའི་གནས་དེར་བསྐུལ་བའི་བདེན་ཚིག་འདིས། མཁའ་ནས་ཆར་བབ། ས་ལས་རྩི་བཅུད་འཁྲུངས་པར་ཤོག་ཅེས་སྨོན་ལམ་ཞིག་བཏབ། དེས་སྨོན་ལམ་དེ་ལྟར་བཏབ་པ་ན། བྱང་ཆུབ་སེམས་དཔའི་ཐུགས་སྟོབས་ཀྱི་མཐུ་ལས་ནམ་མཁའི་ལྷ་གནས་ཐམས་ཅད་གཡོས་པས་ལྷའི་དབང་པོ་བརྒྱ་བྱིན་གྱིས་དེ་གཡོ་བའི་རྐྱེན་ཅི་ཡིན་བརྟགས་པས། རི་བོང་བྱང་ཆུབ་སེམས་དཔའི་ཐུགས་བསྐྱེད་ཀྱི་མཐུ་ཡིན་པར་ཤེས་ཏེ་ཆར་ཆེན་པོ་ཞིག་ཕབ་བོ། །ནམ་མཁའི་ལྷས་ཆར་ཆེན་པོ་ཕབ་པས་དྲང་སྲོང་དང་རི་བོང་བཞུགས་པའི་ཡུལ་ལྗོངས་དང་རི་སུལ་དེར་རྩི་བཅུད་དང་འབྲས་བུ་ཐམས་ཅད་སླར་རྒྱས་ཏེ་སྔར་བཞིན་དུ་ཉམས་དགའ་བར་གྱུར་ཏོ། །དེ་ནས་བཟུང་དྲང་སྲོང་གིས་ཀྱང་དགེ་བའི་བཤེས་གཉེན་རི་བོང་དེ་ལ་བརྟེན་ཏེ་གནས་དེར་བཞུགས་ནས་མངོན་ཤེས་ལྔ་མངོན་དུ་བྱས་སོ། །ཉིན་ཞིག་དྲང་སྲོང་གིས་དགེ་བའི་བཤེས་གཉེན་རི་བོང་ལ་ཁྱེད་ཀྱིས་འདི་ལྟར་སྙིང་སྟོབབས་ཆེན་པོས་དཀའ་སྤྱད་དང་བརྩོན་འགྲུས་མཛད་པ་འདི་ཅི་ཞིག་བསྒྲུབ་པའི་ཆེད་དུ་ཡིན་ཞེས་དྲིས་པས། རི་བོང་གིས་ངས་འགྲོ་བ་སེམས་ཅན་སྐྱབས་མེད་མགོན་མེད་འདི་དག་འཁོར་བའི་སྡུག་བསྔལ་ལས་བསྒྲལ་ཏེ་སངས་རྒྱས་སུ་བསྒྲུབ་པའི་ཆེད་དུ་ཡིན། དེ་ལས་འདོད་པ་གཞན་ཅི་ཡང་མེད་ཅེས་གསུངས། དྲང་སྲོང་གིས་ཁྱེད་སངས་རྒྱས་པའི་སྐབས་སུ་ང་རྗེས་སུ་འཛིན་རོགས་ཞུས་པས། རི་བོང་གིས་ཀྱང་ཡ་ཞེས་གསུངས་ནས་ལན་བཏབ། དེ་སྐབས་ཀྱི་རི་བོང་ནི་སངས་རྒྱས་བཅོམ་ལྡན་འདས་ཀྱི་སྐུའི་སྐྱེ་བ་སྔ་མ་ཞིག་ཡིན། བྱང་ཆུབ་སེམས་དཔའི་ལམ་ལ་སློབ་པའི་གནས་སྐབས་སུ་ཡང་དེ་འདྲའི་ཐབས་སྣ་ཚོགས་པས་སེམས་ཅན་ཀྱི་དོན་མཛད་ཅིང་སངས་རྒྱས་ཚར་ནས་སྤྲུལ་བས་འགྲོ་དོན་མཛད་པ་སྨོས་ཅི་དགོས་སོ། །ཡང་རྒྱལ་སྲས་དངུལ་ཆུ་ཐོགས་མེད་དངུལ་ཆུའི་རྫོང་ན་བཞུགས་དུས་ཤིག་ལ། ཡུལ་དེ་ན་བླ་མ་དཀོར་ཟན་རྒྱུ་ཆེན་ཞིག་ཡོད། ཉིན་ཞིག་བླ་རྒན་ཤི་སོང་བ་དང་། བླ་རྒན་འཆི་རན་ཁར་ཁ་ཆེམ་བཞག་སྟེ་ཁོང་གི་རྒྱུ་ནོར་གྱི་ཆ་གཅིག་རྒྱལ་སྲས་དངུལ་ཆུ་ཐོགས་མེད་ལ་འབུལ་རོགས་ཞེས་བཅོལ་བས། ཤུལ་མི་རྣམས་ཀྱིས་ཀྱང་ནོར་གྱི་ཆ་གཅིག་རྒྱལ་སྲས་དངུལ་ཆུ་ཐོགས་མེད་ལ་ཕུལ། རྒྱལ་སྲས་ཀྱི་ཉེ་གནས་གྲྭ་པ་དེས་རྒྱུ་ནོར་ཚང་མ་བླངས་ཏེ་བླ་མ་ལ་འབུལ་སྐབས་རྒྱལ་སྲས་ཀྱིས་འདི་ལེན་མ་ཉན། འདི་ལེན་ཕོད་པ་མ་ཡིན། ང་ལ་འདི་འདྲེན་སྐལ་མེད་པར་གསུངས། ཉེ་གནས་ཀྱིས་བླ་མའི་ཁར་མ་ཉན་པར་སྨྲས་པ་དུས་རྒྱུན་དུ་ཁྱེད་ཀྱིས་གཤིན་ཆོག་རེ་ཐོན་ན་དགྱེས་བཞིན་དུ་བསྔོ་སྨོན་མཛད་འདུག དེ་རིང་འདི་འདྲའི་རྒྱུ་ཆེན་པོ་ཡོང་ཡོད་པ་ཡིན། དེ་སྔོན་དེ་འདྲ་འབུལ་བ་ཆེན་པོ་ཡོང་མ་མྱོང་། ངེས་པར་དུ་བསྔོ་སྨོན་མཛད་དགོས་ཞེས་ཨུ་ཚུགས་བརྒྱབ། དེ་ལྟར་ཨུ་ཚུགས་བརྒྱབ་པས་གཉེར་པའི་དབང་དུ་སོང་ནས་བླ་མར་ཐབས་མེད་དེ་བསྔོ་སྨོན་མཛད། འོ་ན་དངོས་པོ་འདི་ཐམས་ཅད་ལྕགས་ཁོ་དང་རྗེས་ཤོག་གསུངས་ཏེ་སྟེའུ་དང་། སྟ་རེ། གཟོང་། ཐོ་བ་ལ་སོགས་པ་ལག་ཆ་མང་པོ་ཞིག་གྲ་སྒྲིག་བྱས་ཏེ་ལོ་ཁ་ཤས་ཤིག་ནས་ཡུལ་དེ་དང་ཐག་མི་རིང་བའི་རི་ཐང་མཚམས་ཤིག་ན་བྲག་ཕ་བོང་ཆེན་པོ་ཞིག་ཡོད་པ་དེའི་ཟུར་དུ་ཕེབས་ནས། བྲག་ཕ་བོང་ལ་མཛུབ་མོ་བཙུགས་ནས་བྲག་འདི་ལ་རྣ་བ་གཏད་དེ་ཁྱེད་ཚོས་གཅིག་ཉོན་དང་གསུངས། འཁོར་རྣམས་ཀྱིས་བྲག་དེ་ལ་རྣ་བ་གཏད་དེ་ཉན་དུས་བྲག་དེའི་ནང་ན་འུར་སྒྲ་ཙིག་སྒྲ་མང་པོ་སྒྲོག་བཞིན་ཡོད་པས། བྲག་འདི་ཁ་ཁོས་ཤིག་ཅེས་གསུངས། མི་མང་གིས་ལག་ཆ་རྣམས་ཀྱིས་བྲག་དེ་བཀས་ཚེ། བྲག་གི་གསེབ་ན་སྡིག་པ་རྭ་ཙ་མཐོ་གང་བ་ཞིག་ལ་སྡིག་པ་རྭ་ཙ་ཆུང་ཆུང་སྟོང་ཕྲག་མང་པོས་བསྐོར་ནས་འདུག བླ་མས་དེ་མཐོང་དུས་སྡིག་པ་རྭ་ཙ་ཆུང་ཆུང་རྣམས་ལ་ལྗགས་ཀྱིས་མཆིལ་མ་བཏབ་ནས་དྲངས་སོང་བ་ཡིན། སྡིག་པ་རྭ་ཙ་ཆེ་བ་དེ་འདྲེན་རྒྱུའི་སྐལ་བ་མེད་པས་གཡག་རྭ་ཞིག་གི་ནང་དུ་བསྡུས་ཏེ་ཁ་བཅིངས་ནས་ཁར་ཐེལ་ཚེ་བརྒྱབ་སྟེ། འདི་གཙང་ཀ་ཎི་སྒོ་བཞིའི་ཁ་འོག་ན་ཤན་པ་འཇིགས་སུ་རུང་བ་གཟུགས་མི་སྡུག་པ་ཞིག་ཡོད་དེའི་ལག་ཏུ་མགྱོགས་པར་འཕྲོད་དགོས། ཤན་པ་དེས་ལུག་ཅིག་བསད་ནས་ཁྲག་རྩ་གཅོད་རན་ཁར་ཕལ་ཆེར་ཐོན་ཐུབ་ཤེས་ཆེ། མྱུར་དུ་དེ་ལ་འཕྲོད་པར་བྱོས་ཞེས་གསུངས་ཏེ་བང་ཆེན་ལ་བསྐུར་དེ་མངགས་པ་ཡིན། བང་ཆེན་པ་སོང་བས་གཙང་ཀ་ཎི་སྒོ་བཞི་ན་བླ་མས་གསུངས་པ་ལྟར་ཤན་པ་འཇིགས་སུ་རུང་བ་ཞིག་གིས་ལུག་ཅིག་བསད་ནས་བསྡད་ཡོད་པར་མཐོང་། བང་ཆེན་པས་ཕར་ལ་ཅི་ཡང་ཟེར་མ་དགོས་པར་ཚུར་ལ་བང་ཆེན་པ་མཐོང་མ་ཐག་སྣ་ཞིག་གཉེར་ནས་འདིར་ཁྱེར་ཤོག་ཅེས་སྨྲས། དེར་ཁྱེར་བས་གཡག་རྭའི་རྒྱ་བཤིག་སྟེ་སྡིག་པ་རྭ་ཙའི་མཇུག་མ་ནས་བཟུང་སྟེ་ལུག་གི་ཁོག་པའི་ནང་དུ་ཡར་བྱུག་ཕྱིར་བྱུག་ཅིག་བྱས་ནས་ཟོས་སོ། དེ་ནས་ལུག་གི་དོན་སྙིང་ལྔ་བོ་རྒྱལ་སྲས་ལ་ཚུར་བསྐུར་ཏེ་ཐབས་སྡུག་ཁྱོད་ཀྱིས་འདི་འདྲ་ཞིག་ཀྱང་འདྲེན་མི་ནུས་སམ་ཞེས་ཤོད་ཟེར། བང་ཆེན་པ་ཕྱིར་མངགས་སོ། །སྡིག་པ་རྭ་ཙ་ཤན་པས་དྲངས། ལུག་གི་འདྲེན་སྐལ་དེ་རྒྱལ་སྲས་ལ་ཡོད་པས་ལུག་རྒྱལ་སྲས་ཀྱིས་དྲངས་པའི་ལོ་རྒྱུས་དེ་འདྲ་ཡོད། དེ་ལྟར་ཐབས་སྣ་ཚོགས་པས་འགྲོ་བ་འདྲེན་བཞིན་ཡོད། སངས་རྒྱས་དང་བྱང་ཆུབ་སེམས་དཔའི་སྐུའི་མཛད་པ་ཕྲིན་ལས་ནི་དེ་འདྲ་ཡིན། སངས་རྒྱས་ཀྱི་ཐུགས་དེ་ཇི་ལྟར་ཡིན་སྙམ་ན། སངས་རྒྱས་ཀྱི་ཐུགས་ནི་ནམ་མཁའ་དང་འདྲ་བའི་མཁྱེན་དང་བརྩེ་བའི་ཡེ་ཤེས་རྒྱ་ཆེན་པོས་སེམས་ཅན་ཀུན་ལ་དུས་རྟག་ཏུ་གཟིགས་ཤིང་དགོངས་པ་ཞིག་ཡིན། །སངས་རྒྱས་ཐམས་ཅད་ཀྱིས་སྐུ་གསུང་ཐུགས་ཀྱི་མཛད་པ་ཐམས་ཅད་ཚུར་བསྡུ་ན། སེམས་ཅན་གྱི་དོན་ལས་མ་འདས་པ་ཡིིན། དེས་ན་རང་རེས་སྐབས་བབ་ཀྱི་བཤད་བྱའམ་འཆད་ཉན་བྱ་རྒྱུའི་ཆོས་གང་ཞིག་སངས་རྒྱས་ཀྱི་གསུང་། དམ་པའི་ཆོས་རྗོད་བྱེད་སྒྲ་ཚིག་གི་རྣམ་པས་སེམས་ཅན་ལ་བསྟན་པ་འདི་ནི། སེམས་ཅན་གྱི་སྡུག་བསྔལ་བསལ་བའི་ཆེད་དུའམ་སེམས་ཅན་ཐམས་ཅད་མཐར་ཐུག་གཏན་གྱི་བདེ་བ་དམ་པ་སངས་རྒྱས་ཀྱི་གོ་འཕང་ཐོབ་ཕྱིར་དུ་གསུངས་པ་ཞིག་ཡིན། སངས་རྒྱས་ཀྱིས་བསྟན་པའི་དམ་པའི་ཆོས་སམ། རང་རེས་ཆོས་སྒྲུབ་ཅེས་བྱ་བ་འདི་ནི་ལུང་དང་རྟོགས་པའི་བདག་ཉིད་ཅན་ཞིག་ཡིན་པས། ལུང་རྟོགས་གཉིས་ཀའི་ཆོས་འདི་བཤད་སྒྲུབ་གཉིས་ཀས་འཛིན་དགོས་པ་ཅན་ཞིག་ཡིན་པས། གྲྭ་པ་དང་དེའི་ནང་གི་བཤད་གྲྭ་བ་དང་སྒྲུབ་གྲྭ་བ་དེ་ཚོས་སྤྱོད་ཡུལ་དུ་གྱུར་པ་ཞིག་དང་། ཡང་ན་མཁས་པ་དང་མི་ཆེན་དག་གིས་བསྒྲུབ་རྒྱུ་ཞིག་ཡིན་པ་ལས། ངེད་ཅག་མི་སྐྱ་ཕོ་མོས་འགྲུབ་རྒྱུ་ཞིག་ཅི་ལ་ཡིན་བསམ་དགོས་པ་མ་ཡིན་ལ། ཚིག་འབྲུ་གཅིག་གི་དོན་ཤེས་ན། །དེ་ཡང་ལུང་གི་བསྟན་པ་ཡིན། །དགེ་སེམས་སྐད་ཅིག་གཅིག་སྐྱེས་ཀྱང་། །དེ་ཡང་རྟོགས་པའི་བསྟན་པ་ཡིན། །ཞེས་གསུངས་པས། དཔེར་ན་སྡིག་པ་སྤང་ཞེས་པ་ལྟ་བུའི་ཚིག་གཅིག་དེ་ཁ་ནས་ཡང་བརྗོད་ཤེས། དེའི་དོན་སྡིག་པ་ཞེས་པ་ནི་འདི་འདྲ་ཞིག་གོ་སྙམ་པའི་འདུན་པ་སྐྱེས་ན། དེ་ཡང་ལུང་གི་བསྟན་པ་ཡིན་པར་གསུངས། དགེ་སེམས་སྐད་ཅིག་མ་ཞིག་སྐྱེས་ནའང་། དེ་ཡང་རྟོགས་པའི་བསྟན་པ་ཡིན། སྡིག་པ་སྤངས་པའི་དགེ་བ་དེ་དགེ་བའི་ལས་ལམ་བཅུ་ལ་སོགས་པ་ཡིན། དེའི་ནང་ནས་ལུས་ཀྱི་མི་དགེ་བ་དང་པོ་ནི། སྲོག་གཅོད་པ་ལ་ཟེར། སྲོག་གཅོད་གོང་ན་སྡིག་གཞན་མེད་ཅེས་གསུངས་པས། སྲོག་གཅོད་སྤངས་པའི་ཕ་རོལ་ནས་སེམས་ཅན་གྱི་སྲོག་སྐྱོབ་ན་ཕན་ཡོན་ཆེ་བ་ཡིན་སྙམ་པ། དེ་འདྲའི་དགེ་སེམས་ཐེངས་གཅིག་སྐྱེས་ན་དེ་ཡང་རྟོགས་པའི་བསྟན་པ་ཡིན་གསུངས། དེ་འདྲ་ཙམ་ཡང་མི་དར་བའི་སྐབས་ལ་ཐོན་དུས། དེ་ནི་སངས་རྒྱས་ཀྱི་བསྟན་པ་ནུབ་པ་ཡིན་ཞེས་གསུངས་ཡོད། དེ་འདྲའི་ཆོས་ཚིག་འབྲུ་རེའི་དོན་དང་དགེ་སེམས་སྐད་ཅིག་མ་ཙམ་རེ་སུ་ཡིན་ཡང་ཤེས་རྒྱུ་དང་བསྒྲུབ་ཐུབ་རྒྱུ་ཞིག་རེད། འདི་ནི་རི་མགོར་སོང་ཡང་བསམ་ཐུབ་རྒྱུ། གོ་ཁར་བསྡད་ཀྱང་བསམ་ཆོག་རྒྱུ་ཞིག་ཡིན། དགེ་འདུན་འདུས་པའི་བཞུགས་གྲལ་དང་། སྒོམ་ཁང་ནང་གི་ཐུན་དང་མཉམ་བཞག་གི་སྐབས་སུ་སྨྲོས་ཅི་དགོས། སྐྱེས་བུ་ཆུང་ངུ་ཚེ་ཕྱི་མར་ལྷ་མིའི་བདེ་འབྲས་དོན་གཉེར་བྱེད་པ། སྐྱེ་བ་ཕྱི་མར་མི་ལུས་ཤིག་ལེན་པར་ཤོག་སྙམ་པ། དག་ཞིང་དང་མི་ལུས་གཉིས་ཀ་གང་དགའ་འདེམས་ཟེར་ན། དག་ཞིང་ཡང་ལོས་སྐྱིད་དེ། འཇིག་རྟེན་མི་ཡུལ་འདིའང་ཤིན་ཏུ་སྐྱིད་པས་ད་དུང་ཡང་ཐེངས་གཅིག་ཚུར་མི་ཡུལ་ལ་སྐྱེ་ན་ཅི་མ་རུང་སེམས་ཁུལ་བྱེད་པ། སྡུག་བསྔལ་རགས་པ་ལུས་སེམས་ཀྱི་སྟེང་དུ་ད་སྔོན་ཆེར་ཡོང་མ་མྱོང་བས་དེ་འདྲ་སེམས་མཁན་ཡོད་སྲིད། དེ་འདྲ་ཟེར་མཁན་དང་ཡང་འཕྲད་མྱོང་། འོན་ཀྱང་དོན་ངོ་མར་བཤད་ན། མི་ལུས་ལ་བདེ་བ་ཨེ་ཡོད་དང་པོ་སྐྱེས་པའི་སྡུག་བསྔལ་ནི་མི་དྲན་པ་ཡིན། རྒས་པ་དང། ན་བ། འཆི་བ་ལ་སོགས་པའི་སྡུག་བསྔལ་ཐམས་ཅད་ཐོག་ཏུ་བབས་ན་ད་གཟོད་ཤེས་རྒྱུ་ཡོད་ལ། གང་ལྟར་ཡང་དེ་འདྲའི་རིགས་ཅན་གྱི་དོན་དུ་སངས་རྒྱས་ཀྱིས་དགེ་བཅུ་བསྒྲུབ་པ་དང་མི་དགེ་བ་བཅུ་སྤང་པ་སོགས་དང་། སྐྱབས་ཀྱི་དྭངས་མ་དཀོན་མཆོག་གསུམ་ལ་བཟུང་ནས། འཇིག་རྟེན་ཡང་དག་གི་ལྟ་བ་ལས་རྒྱུ་འབྲས་ཀྱི་རྣམ་བཞག་ལ་སོགས་པ་གསུངས་ཡོད། །དེ་ལ་ཡིད་ཆེས་བྱས་ཏེ་དད་པ་བྱས་ན་ལས་དཀར་པོ་བསགས་སྟོབས་ཀྱིས་ཕྱི་མར་ངན་འགྲོ་ལ་མི་ལྟུང་ཞིང་ལྷ་མིའི་གོ་འཕང་གང་དགའ་དེ་ཐོབ་བྱེད་ཀྱི་ཆོས་བསྟན་པ་ཡིན། ཡང་འགའ་ཞིག་གིས་དེ་ལ་ཕན་ཐོགས་ཆེན་པོ་མེད། དཔེར་ན་གཟེར་འཇོམ་གྱི་སྨན་འཐུང་བ་ལྟར་གནས་སྐབས་བདེ་ཡང་གཏན་དུ་མི་བདེ་བས་སྙིང་པོ་ཅི་ཡང་མེད། ཡང་འདི་ལྟར་ཆུ་ཁའི་སྤང་ཐང་གི་མེ་ཏོག་སྐྱིད་ས་ཞིག་ནས་སྤྲོ་ཁང་སྐྱིད་པོ་ཞིག་བྱས་ཏེ་བསྡད་ན། དེ་ལ་ཡུན་རིང་པོའི་འཆར་གཞིས་མ་འདང་བ་དང་། ས་གནད་ལྟ་མ་ཤེས་པས། ཁང་རྨང་དང་ཆུ་རྩའི་གད་པ་ཐག་ཉེ་ཆེས་པས་ཆུ་ཡིས་རྨང་བཤིག་འགྲོ་བའི་རང་བཞིན་ཞིག་ཡིན་ན། དེ་ནི་འཕྲལ་ཉམས་དགའ་ཡང་ཕུགས་མི་བརྟན་པར་ཡིན་པར་ཤེས་པ་བཞིན། འཁོར་བ་ལས་གཏན་དུ་ཐར་དགོས་སྙམ་པ་ནི་སྐྱེས་བུ་འབྲིང་གི་ལམ་མམ་ཉན་རང་དགྲ་བཅོམ་ཐོབ་བྱེད་ཀྱི་ལམ་བསྟན་པ་ཡིན། ཡང་སྙིང་སྟོབས་དེ་ལས་ཆེ་ཞིང་རང་གཞན་གཉིས་ཀར་འདང་རྒྱག་མཁན་ཞིག་གིས་བལྟས་ན་དེས་ཀྱང་ཕན་ཐོགས་ཆེ་ཞིག་མི་འདུག རང་ཉིད་སྡུག་བསྔལ་ལས་ཐར་འདོད་ཡོད་པ་དང་འདྲ་བར་གཞན་ལའང་ཡོད་ངེས། དེ་བཞིན་རང་ཉིད་ཀྱི་སྡུག་བསྔལ་མི་འདོད་པ་བཞིན་གཞན་གྱིས་ཀྱང་མི་འདོད་པར་གདོན་མི་ཟ། ཆུ་ཆེ་ཆུང་རང་གི་སྒོ་རྩ་རེད། དཔེ་རང་ལ་བཞག་ན་ཤེས་ནུས། དེ་བས་རང་གཞན་ཐམས་ཅད་ཀྱི་བདེ་ཐབས་ཤིག་མ་འགྲུབ་པར། རང་གཅིག་པུའི་བདེ་བ་ཞིག་འགྲུབ་ཏུ་ཆུག་མོད། རང་མགོ་གར་ཐོན་བྱེད་པ་ནི་སྐྱེས་བུ་ཐ་མའི་བྱ་བ་ཡིན་པས་སྙིང་པོ་མེད་པར་མཐོང་བ་ནི་སྐྱེས་བུ་ཆེན་པོའི་ལམ་བསྟན་པ་ཡིན། རང་རེའི་ཆོས་ནམ་བཤད་དུ་མགོ་རྒྱ་གར་སྐད་ཀྱི་དབུ་བཟུང་དུས་ནས་བླ་མས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཆོས་ཞུ་བ་ཡིན་པར་སོམས་ཤེས་ཅིའི་ཕྱིར་གསུངས་ཅེ་ན། རྒྱུ་མཚན་རང་རེའི་ཆོས་རྒྱུད་འདིའང་ཐེག་པ་ཆེན་པོའི་ཆོས་ཡིན་པས། ཐེག་པ་ཆེ་ཆུང་གི་ཁྱད་པར་འཇོག་བྱེད་སེམས་ཅན་གཞན་དོན་དུ་སེམས་བསྐྱེད་ཡོད་མེད་ཀྱིས་འབྱེད་ཀྱིན་ཡོད་པས། ཐེག་ཆེན་གྱི་ཆོས་འཆད་ཉན་གྱི་སྐབས་སུ་ཐེག་ཆེན་གྱི་བསམ་པ་ཡོད་པའི་ཆེད་དུ་ནམ་ཡིན་ཡང་ཀུན་སློང་བཅོས་པར་དྲན་བསྐུལ་འདི་བཞིན་བྱེད་ཀྱིན་ཡོད་པ་རེད། གལ་ཏེ་དེ་ལྟར་མ་བྱས་ཚེ་ཐེག་ཆེན་གྱི་བསྟན་དོན་དང་འགལ་བ་རེད། གལ་ཏེ་གཞན་དོན་ཡལ་བར་དོར་ན་བྱང་ཆུབ་དམ་པ་བརྙེས་མི་ཐུབ་ལ། དེ་མ་ཐུབ་ན་སེམས་ཅན་འཁོར་བའི་མཚོ་ལས་བསྒྲལ་མི་ནུས། དེ་ལྟ་ཡིན་མོད་འོན་ཀྱང་གང་ཟག་གི་རྒྱུད་ཚོད་དང་སྦྱར་ནས་བཤད་ན་ཐེག་ཆེན་ལྟ་ཅི་ཐེག་དམན། ཐེག་དམན་ལྟ་ཅི་ལྷ་མིའི་གོ་འཕང་ཙམ་ཡང་དོན་གཉེར་བྱེད་མི་ཤེས། དེར་མ་ཟད་ཚེ་སྨད་སྐྱིད་བྱེད་ཙམ་ཡང་ཚེ་སྟོད་སྒྲུབ་མི་ཤེས། སང་ཉིན་ཇི་ལྟར་བྱ་བའི་བསམ་བློ་དེ་རིང་མེད་པའི་མི། གཞན་ལ་མ་བལྟས་རང་ལ་བསམ་བཞག་ནའང་རང་གཞན་རྟ་ཕོ་ཁ་དཀར་ཆོས་པའི་མིང་ཐོགས་ནས་ཆོས་མིན་གྱི་བྱ་བ་སྒྲུབ་ཀྱིན་ཡོད་པས། ཞུ་དག་ཞིབ་ཀྱིས་བྱས་ན་ཞུ་དག་མི་ནུས་པ། རྒྱུགས་རང་གིས་རང་ལའང་མི་འཕྲོད། དཔེར་ན། ཉི་མ་རེ་རེར། ཇ་ཡུན་རེ་རེར། སེམས་ཀྱི་རྣམ་རྟོག་དང་ལུས་ངག་གི་བྱ་སྤྱོད་གང་ཐད་ནས། སྔོན་གྱི་བཀའ་གདམས་པའི་དགེ་བའི་བཤེས་གཉེན་རྣམ་པ་ལྟར། དགེ་སེམས་རེ་ལ་རྡེའུ་དཀར་པོ་རེ། སྡིག་སེམས་རེ་ལ་རྡེའུ་ནག་པོ་རེ་བཞག་ནས་རྡོ་འབུམ་བསོག་པར་བྱས་ན། རྡོ་སྤུངས་དཀར་པོ་ཞིག་ལྟ་ཅི་ཁྲ་བོ་ཙམ་དུ་ཡང་འགྱུར་ཐབས་མེད་པ་འདི་ཅི་ཞིག་གིས་ཡིན་ཞེ་ན། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་གསུངས་པ་ལྟར། ལྟར་སྣང་ལ་སྐོར་བ་བསྐོར། ཕྲེང་བ་བཟུང་། མ་ཎི་སིདྡྷི་བཏོན་པར་མ་ཟད་བསྐྱེད་རྫོགས་ཀྱང་སྒོམ་ཁུལ་བྱེད་སྲིད་མོད། འོན་ཀྱང་སེམས་མ་དགེ་ན་དགེ་གོ་ཆེན་པོ་ཞིག་ཀྱང་མི་ཆོད་པ་ནི། བསམ་པ་དགེ་སེམས་བཟང་པོ་ཞིག་དང་ལྡན་ན་ད་གཟོད་ལུས་ངག་གི་བྱ་བ་གང་བྱས་ཀྱང་དགེ་བར་འགྱུར་བའི་རྒྱུ་མཚན་གྱིས་དེ་འདྲ་ཡིན། སྒོ་གསུམ་དགེ་བའི་ལས་ལམ་དུ་འགྲོ་མ་ཐུབ་ཕྱིན། ལས་གང་བྱས་མི་དགེ་པ་འམ། ཡང་ན་ལུང་མ་བསྟན་ལས་འགྲོ་ས་གཞན་མེད། མི་དགེའི་འབྲས་བུ་ནི་ཡུན་མི་རིང་བར་རང་སྟེང་དུ་སྨིན་ངེས་ཡིན། དེས་ན་འུ་ཅག་གི་བཤད་ཚེ་སྐྱེས་བུ་ཆེན་པོས་ཀུན་སློང་བཤད་དགོས་པ་རེད། རྒྱུ་མཚན་ཐེག་ཆེན་གྱི་ཆོས་སྦྱོང་བཞིན་ཡོད་པས་རེད། ནམ་ཞིག་དེ་ཤེས་ནས་རྒྱུད་ལ་འབྱོར་པ་ཞིག་ཀྱང་བྱ་དགོས་པ་ཡིན་མ་གཏོགས། སེམས་ཅན་གྱི་དོན་ལེགས་པོ་ཞིག་འགྲུབ་དགོས་ཕྱིན་སངས་རྒྱས་མ་ཐོབ་ན་མི་ནུས་ལ། ཐེག་ཆེན་གྱི་ལམ་ལ་མ་ཞུགས་ན་སངས་རྒྱས་ཐོབ་མི་ཐུབ་བོ། །དེ་ལྟར་མོད་འོན་ཀྱང་འུ་ཚོ་ལས་དང་པོ་བས་ནི་ཁ་བཤད་ཙམ་ཡིན། འུ་ཚོ་ཟེར་བ་ནི། ཐམས་ཅད་ལ་ཞུས་པ་མིན། འདིའི་ནང་ན་དམ་པའི་སྐྱེས་བུའི་མཚན་གྱིས་ཟིན་ཞིང་ཐུགས་རྗེས་ཡས་སྤྲུལ་གྱི་སྐྱེས་ཆེན་མཁས་བཙུན་གཉིས་ལྡན་གྱི་སྡེ་སྣོད་འཛིན་པ་ཚོ་ལྟ་ཅི། མི་སྐྱ་ཕོ་མོའི་ནང་ནའང་སངས་རྒྱས་བྱང་སེམས་ཀྱི་སྤྲུལ་བ་མེད་ཅི་ལ་ཟེར་ཤེས། གོང་གི་ཤན་པའི་གཏམ་རྒྱུད་དང་འདྲ་བར། དེ་རིང་མི་ཞིག་ལ་ལམ་ཡག་པོ་ཞིག་བསྟན། བློ་ལེགས་པོ་ཞིག་བཏོན། སེམས་ཅན་ཉམ་ཆུང་ཞིག་གི་འཆི་ཁར་སྲོག་བསྐྱབ་བཞག་ན་དེ་ཡང་སངས་རྒྱས་ཀྱི་ཕྲིན་ལས་ཡིན། དེ་ནི་ཆེ་ཆུང་མ་གཏོགས་པར་གཞན་ཕན་གྱི་བྱ་བའི་སྣེ་གཅིག་ཡིན། གང་ཟག་གི་ཚོད་གང་ཟག་གིས་ག་ལ་ཟིན། ཚང་མ་སོ་སྐྱེས་རེད་ག་ལ་ཟེར་ཤེས། དཔེ་ང་དང་འདྲ་བར་ཐེག་ཆེན་གྱི་ཚོགས་ལམ་ཆུང་ངུ་ལྟ་ཅི་མཐའ་ན་ཐེག་དམན་གྱི་ཚོགས་ལམ་ཆུང་ངུའི་སྣེ་ཙམ་ཡང་མ་ཟིན་པ། མིང་ལ་ཇི་ལྟར་བཏགས་ཀྱང་དོན་ལ་སོ་སྐྱེས་ཀྱིས་རང་གཤིས་ལས་མ་འདས་པའི་གང་ཟག་ཞིག་གིས། སེམས་ཅན་ཐམས་ཅད་མར་ཤེས་པ་དང་། ཐེག་ཆེན་གྱི་ལམ་ཟེར་བ་ཚིག་གི་གོ་བ་ཙམ་ལས་དོན་གྱི་སྟེང་ནས་སེམས་ནང་གི་ཡིད་སྨོན་ཙམ་ཞིག་ཡིན། དེ་ཡིན་མིན་འདི་ལྟར་བརྟག་ན་ཤེས། དཔེར་ན། ཁྱི་རྒན་བཙན་པོ་ཞིག་ཤོར་ཡོང་ནས་ཉྭ་ཤར་འཐམ་སོང་ན། དྲེད་མོས་བླ་མར་མ་བརྩིས་ན། །བླ་མས་དྲེད་མོར་ཅི་ལ་རྩི། །སྙམ་ནས་རྡོ་ལོག་གཅིག་གིས་མ་བརྒྱབ་ན་རབ་ཡིན། དེ་དུས་ཨ་མ་མ་ལོ་དྲིན་ཆེན་མ་ཁྱོད་ང་ལ་ཁོང་ཁྲོ་ན་ངའི་ཉྭ་ཤ་དུམ་གཅིག་ཆོད་སོང་སྙམ་དཀའ། ཁྱི་རྒན་ཚོ་ཆུང་ཆུང་ཡིན། གནོད་བྱེད་ཀྱི་དགྲ། སྡང་བྱེད་ཀྱི་བགེགས་ལ་སོགས་པ། ཐད་ཀྱི་དགྲ་བོ་ཐད་དུ་ལང་པ་ཞིག་བྱུང་ཚེ་དེ་ལ་འདི་དག་རང་གི་ཕ་མ་ཡིན་བསམ་ཐུབ་ན། ད་གཟོད་སེམས་ཅན་ཐམས་ཅད་མར་ཤེས་སོང་བ་ཡིན། དེ་ལྟར་ཤེས་པས་དྲིན་དྲན་པ་དང་དྲིན་ལན་བསབ་འདོད་དག་དེའི་ཞོར་དུ་རང་ཤུགས་ཀྱིས་ཡོང་། དེས་ན་སེམས་ཅན་ཐམས་ཅད་མར་ཤེས་པ་དང་། མ་ཡི་སྡུག་བསྔལ་ཤེས་པ་དང་། མི་བཟོད་པའི་སྙིང་རྗེ་ཆེན་པོ་ཕྱོགས་རིས་མེད་པར་ཚང་མར་འདྲ་མཉམ་ཞིག་སྐྱེ་དགོས། དེ་སྐྱེས་དུས་ད་གཟོད་གཞི་ནས་ཐེག་ཆེན་བྱང་ཆུབ་མཆོག་དུ་སེམས་བསྐྱེད་དེ་ཐེག་ཆེན་པར་འགྱུར་དགོས་པ་ཡིན། དེའི་སྟེང་དུ་སྨོན་འཇུག་ཀུན་རྫོབ་བྱང་ཆུབ་སེམས་ཀྱི་སྡོམ་པ་བླངས་ན། སོ་སྐྱེ་ཡིན་ཡང་སངས་རྒྱས་ཀྱི་རིགས་སུ་སྐྱེས་ཏེ་བྱང་ཆུབ་སེམས་དཔའི་མིང་ཐོབ་ཅིང་ཐེག་ཆེན་ཐར་བའི་ལམ་སྣེ་ཟིན་པ་ཡིན། དེའི་སྟེང་དུ་འཇུག་པ་སེམས་བསྐྱེད་ཀྱི་སྡོམ་པ་བླངས། ཕ་རོལ་ཏུ་ཕྱིན་པ་དྲུག་ལ་བསླབས་ན་དབུགས་ཀྱི་རྒྱུ་འགྲུལ་ཚུན་ཆོད་སེམས་ཅན་གྱི་དོན་དུ་འགྱུར་ཏུ་ཡོད། འོན་ཀྱང་འུ་བུ་ཚད་དེ་དང་གནམ་ས་ལྟ་བུའི་བར་ཐག་རིང་དུ་ཡོད་པས། ད་དུང་བྱང་ཆུབ་སེམས་དཔར་འགྱུར་མེད། སེམས་བསྐྱེད་སྔོན་སོང་ཞིག་ལ་སྡོམ་པ་སྐྱེ་བ་ཡིན་པས། བྱང་ཆུབ་སེམས་སྡོམ་ཡང་ཐོབ་ཡོད་དཀའ་འདུག ཐེག་ཆེན་ལུགས་ཀྱི་ཐར་ལམ་ལེགས་པོ་ཞིག་གི་ལམ་སྣེ་མོ་ཟིན་ཨེ་ཡོད་མི་ཤེས་རྒྱུ་མི་འདུག དེར་མ་ཟད་ཐེག་ཆེན་གྱི་རིགས་ཅན་ཞིག་ཡིན་མིན་ཀྱང་བསམ་བློ་བཏང་ན་ཧ་ཅང་དཀའ་འོ། །དཔལ་ལྡན་ཟླ་བས། སོ་སོའི་སྐྱེ་བོའི་དུས་ན་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང་། །ལུས་ཀྱི་བ་སྤུ་ལྡང་བར་གྱུར་པ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་གསུངས་སོ། །འུ་བུ་སངས་རྒྱས་ནམ་མཁར་འཕུར་ན་དད་པ་མི་ཤེས། སེམས་ཅན་རྒྱུ་མ་དྲུད་ན་སྙིང་རྗེ་མི་ཤེས་པ་ཞིག་ཡིན་པས་ད་རུང་དམྱལ་ཁམས་ཀྱི་ལྕགས་བསྲེག་དམར་ལང་གི་ཁང་པ་དང་། ཡི་དྭགས་ཀྱི་བྱེ་མའི་རྡོ་ཚན། ཟས་ལྟ་ཅི་ཆུའི་མིང་ཙམ་ཡང་མི་གོ་ས། དུད་འགྲོ་རྟ་ཟོག་ར་ལུག་དང་། འབུ་ས་འཇོང་གྲོག་མ་ཡན་ཆོད་ཀྱི་ལུས་བསྐལ་ཆེན་མང་པོར་ལེན་དགོས་པའི་སྔ་ལྟས་ཡིན་སྙམ། དེ་ལྟར་ན་ཐེག་ཆེན་པའི་རིགས་ཤིག་ཏུ་འགྱུར་བར་ད་དུང་དོན་གྱི་སྦྱང་པ་མང་པོ་བྱེད་དགོས་པས། དོན་ངོ་མར་གོང་དུ་བཤད་པའི་ཐེག་དམན་པ་དང། སྐྱེས་བུ་ཆུང་འབྲིང་ཉན་རང་གི་ལམ་ལ་ཡང་སླེབས་ཡོད་དཀའ་བའི་ཚོད་ཡིན། གལ་ཏེ་དེ་ལ་སླེབས་ཡོད་ན་གཞན་དོན་བློས་བཏང་བ་མ་གཏོགས་རང་ཉིད་འཁོར་བའི་སྡུག་བསྔལ་ལས་ཐར་འགྲོ། འུ་བུ་དེ་འདྲའི་ལམ་སྣེ་ཟིན་རྒྱུའི་ཆ་ཚད་དང་གཅིག་བསྡུར་ནའང་ཧ་ཀྱང་དཀའ། ནམ་རྒྱུན་འུ་ཅག་གིས་འདི་ལ་དམན་ལམ་ཞེས་བསྙད་མོད། བྱང་ཆུབ་སེམས་དཔའི་ལམ་དང་བསྡུར་ན་དམན་པ་རེད་མ་གཏོགས། ལམ་འདི་ལ་ཞུགས་ཏེ་འབྲས་བུ་ཐོབ་དགོས་ན་ཐོག་མར་འཁོར་བ་ལ་ངེས་པར་འབྱུང་བའི་བློ་ཞིག་མེད་ཐབས་མེད་པ་ཡིན། ངེས་པར་འབྱུང་བའི་ཀུན་སློང་གིས་སོ་ཐར་རིགས་བདུན་གང་རུང་གི་སྡོམ་པ་བླངས་ནས་རང་ལམ་གྱི་སྡེ་སྣོད་གསུམ་ལ་འཆད་ཉན་དང་། བསླབ་པ་གསུམ་ལ་ཉམས་ལེན་བྱས་ནས། འབྲས་བུ་སྐྱེས་བུ་ཟུང་བཞི་ཡ་བརྒྱད་རིམ་བཞིན་མངོན་དུ་བྱ་དགོས་མོད། འོན་ཀྱང་འུ་བུ་ལ་ངེས་འབྱུང་སྐྱེས་ཡོད་ཅེས་སྨྲས་ན་དམ་བཅའ་ཟིན་དཀའ་བ་ཞིག་ལ་ཐུག་ཡོད་པ་འདྲ། ངེས་འབྱུང་ནི་འཁོར་བའི་སྡུག་བསྔལ་ཤེས་པ་དང་། དེ་ལས་ཐར་འདོད་ཡོད་པ་གཉིས་ཀ་ལ་ཟེར། གལ་ཏེ་དེ་ཡོད་དགོས་ན་འཇིག་རྟེན་ཆོས་བརྒྱད་འདི་དང་གཏན་དུ་བྲལ་ཡོད་དགོས། ཐུབ་པའི་དགོངས་པ་ཆ་ཚང་ཞིག་བླངས། བསྟན་པ་ཐམས་ཅད་འགལ་མེད་དུ་རྟོགས། གཞུང་ལུགས་ཐམས་ཅད་གདམས་པར་ཤར། ཉེས་སྤྱོད་ཆེན་པོའི་གཡང་སར་ལ་བཟུར་དགོས་ན་ཐེག་པའི་མས་རིམ་ནས་འཇུག་སྟེ་བསྟན་པའི་བབ་དང་མི་བསྟུན་ཐབས་མེད་ཡིན་པས། ཐོག་མར་ཆོས་བརྒྱད་སྤོང་བའི་ངེས་འབྱུང་གི་ལམ་དེ་ལས་མི་འཇུག་པར་འགྲོ་སའི་ལམ་གཞན་ཞིག་གམ། འཇུག་སྒོ་གཞན་ཞིག་མེད། དེ་ལྟར་ན་འཇིག་རྟེན་པས་ཚེ་གང་ལ་མི་ཁོམ་པར་རྒྱུ་ནོར་དང་། སྙན་གྲགས་སོགས་འབའ་ཞིག་གི་ཆེད་དུ་རྒྱུག་འདུར་བྱེད་པར་མ་ཟད། འདོད་པ་མི་འགྲུབ་པར་དེའི་དོན་དུ་མཐར་ལུས་སྲོག་འདོར་བ་ཡང་མཐོང་བ་ལྟར། འུ་བུ་ལ་ཡང་མི་ཐམས་ཅད་ལ་དགོས་རྒྱུ་རྣམས་མཁོ། བསྟོད་ན་དགའ། སྨད་ན་མི་དགའ། རྙེད་ན་དགའ། མ་རྙེད་ན་སྡུག སྙན་གྲགས་རྒྱས་ན་དགའ། མ་རྒྱས་ན་སྡུག་པ་ཞིག་ཡིན་ཕྱིན། གང་ལྟར་ཡང་ངེས་འབྱུང་ལ་སོར་གང་གིས་ཡར་སྐྱེད་ཀྱང་མེད། དེ་རིགས་ཀྱིས་དགེ་ཚུལ་ཡན་ཆད་དང་། དགེ་སློང་གི་སྡོམ་པ་མན་ཆད་ཀྱི་སྡོམ་པ་གང་ཞུས་ཡོད་ཟེར་ན་རྣམ་པར་དག་པ་ཞིག་ཐོབ་ཐུབ་དཀའ་མོ་ཡིན། སྤྱིར་འཇིག་རྟེན་ཆོས་བརྒྱད་ལ་དཀར་ནག་ཁྲ་གསུམ་ཡོད་གསུངས། རྙེད་བདེ་གྲགས་བསྟོད་བཞི་འདོད་ཅིང་། དེའི་ལྡོག་ཕྱོགས་བཞི་ནི་མི་འདོད་པས་དེའི་ཆེད་དུ། ཆོས་འཆད་དབང་སྐུར། ལྷ་བསྒོམ། སྔགས་བཟླ། མཆོད་སྦྱིན་སོགས་གང་བྱས་ཀྱང་ཆོས་བརྒྱད་དཀར་པོ་ཞེས་བྱ། །ཡང་ཆོས་བརྒྱད་དོན་གཉེར་གྱི་ཆེད་དུ་སྲོག་གཅོད། རྐུ་འཕྲོག རྫུན་བཤད་པ་ལ་སོགས་པ་མི་དགེ་སྡིག་པའི་ལས་སྒྲུབ་ན་དེ་ནི་ཆོས་བརྒྱད་ནག་པོ་ཞེས་བྱ། ཡང་ཆོས་བརྒྱད་ཀྱི་དོན་དུ་དཔེར་ན་ཆོས་འབྲི། ལྷ་བཞེངས། སྨན་རྩིས་མོ་གསུམ། གཏོ་མདོས་གླུད་གསུམ་འཕེན་པ་སོགས་ལྟར་སྣང་དགེ་བའི་རིགས་དང་། ཁེ་ཚོང་ཞིང་ལས། ཕྱུགས་ཀྱི་འཚོ་སྐྱོངས་ལ་སོགས་པ་དགེ་སྡིག་འདྲེས་མ་བྱས་ན་ཆོས་བརྒྱད་ཁྲ་བོ་ཞེས་བྱའོ། རྒྱལ་དབང་ལྔ་བས། ཆོས་བརྒྱད་དཀར་ནག་ཁྲ་གསུམ་གདོན་ཆེན་པོ། །སྙིང་ལ་ཞུགས་པའི་སྡུག་བསྔལ་བདེ་བ་རུ། །གཟུང་ནས་གཏན་གྱི་འདུན་མ་རླུང་ལ་བསྐུར། །ཞེས་གསུངས། །དོན་ངོ་མར་འཇིག་རྟེན་ཆོས་བརྒྱད་ཀྱི་ཞེན་པ་སྤོང་སྟེ་བཅོས་མིན་ངེས་འབྱུང་གིས་ཚེ་འདིའམ་འཇིག་རྟེན་གྱི་བྱ་བ་ཐམས་ཅད་བློས་གཏོང་ནུས་ན། དེ་ནི་ཚེ་འདིའི་ནད་གདོན་འགོག་པའི་རིམ་གྲོའི་མཆོག་ཀྱང་ཡིན། ཀུན་སྤོང་གྲགས་པ་རྒྱལ་མཚན་ཟེར་བ་ཞིག་ཡོད། ཁོང་ལ་སློབ་མ་དགེ་བཤེས་ཁ་རག་པ་ཟེར་བ་ཞིག་ཡོད། དགེ་བཤེས་ཁ་རག་པ་ནི་ཡོན་ཏན་དང་སྐུ་བསོད་ཅན་ཞིག་ཡིན། འོན་ཀྱང་ཚེ་སྐེད་ནས་ཁོང་ལ་མཛེ་ནད་ཅིག་བྱུང་སྟེ། ཐབས་གང་བྱས་ཀྱང་ཕན་ཐོགས་མ་བྱུང་། ནུབ་གཅིག་ཁོང་གིས་ཐུགས་བསམ་བཞེས་པ། འདི་ལྟར་ད་ཅི་བྱས་ཀྱང་ནད་འདིས་མི་མངག་པར་མི་གྲལ་ནས་ཕུད་འཇོག་པ་འདྲ་བས། འབུད་ན་འབུད་ཤག་ཤག་ཅིག་བྱ་དགོངས་ཏེ་རྒྱུ་ནོར་ལོངས་སྤྱོད་ཡོད་ཚད་དགེ་བའི་ཕྱོགས་སུ་བཏང་། ས་ཆ་དེར་ཆུ་མོ་རྫ་འཕྲང་ཟེར་བའི་ལམ་ངན་སྡུག་པོ་ཞིག་ཡོད་པ་དེའི་ལམ་ཞབས་སུ་བསྡད་དེ། ལྟོ་ལམ་ཟེད་ཀྱི་སློང་མོར་བསྟེན་ཏེ་མ་ཎི་བགྲང་ནས་འདུག་དགོས་དགོངས་ཤིང་དེ་ལྟར་ཐུགས་ཐག་བཅད་པས། དེའི་དགོང་མོར་རྨི་ལམ་གྱི་ནང་དུ་ཁོང་ཉིད་ཆུ་ཆེན་པོ་ཞིག་གིས་ཁུར་འགྲོ་བཞིན་ཡོད་པར་མི་དཀར་པོ་ཞིག་ཡོང་ནས་ཁོང་ཆུ་ནང་གི་ཡར་བླང་ནས་ཆུ་མོ་རྫ་འཕྲང་གི་བྲག་ཞིག་གི་སྟེང་བཞག་དུས་ལུས་སྟེང་ནས་ཆུ་མང་པོ་ཞིག་ཟག་ཁི་ཡོད་པ་རྨིས་ཏེ་གཉིད་སད་པས་ཉལ་ས་ཆུས་གང་སྟེ་མཛེ་ནད་སངས་དྲག་ཏུ་སོང་ཡོད། དེ་ནི་ཚེ་བློས་བཏང་གི་བྱིན་རླབས་ཀྱིས་སྡིག་སྒྲིབ་དག་ནས་ནད་དྲག་སོང་བ་ཡིན། ཞེན་མེད་སྙེམས་བྱེད་ཀྱི་བདུད་དང་བྲལ་ཏེ་ཆགས་ཞེན་གྱི་སྙེམས་ཐག་ཆོད་པ་ནི། རང་རེའི་གཅོད་ཀྱི་བདུད་བཞི་གཅོད་ལུགས་བཟང་པོ་ཡིན་ལ། འོན་ཀྱང་འགྲོ་ཀུན་རྫོགས་བྱང་ལ་འགོད་རྒྱུའི་བསམ་པ་དང་ཀུན་སློང་ཅི་ཡང་མེད་པར། ཚེ་འདིའི་ནད་གདོན་ཞི་བྱེད་རྐྱང་བ་ཞིག་ལ་ཚེ་བློས་གཏོང་བྱེད་དགོས་སྙམ་ན། དེ་ནི་དོན་དུ་བློས་མ་ཐོང་བས་རང་འདོད་སྒྲུབ་ཀྱིན་ཡོད་པས། ཐེག་ཆེན་ཐར་བའི་ཉེ་རྒྱུར་འགྱུར་དཀའ་བ་ཡིན། རང་རེས་གང་ནས་ཆོས་བཤད་ཀྱང། ཐོག་མར་ཚིག་མགོ་ལེན་དུས་ནས་མ་སེམས་ཅན་ཟེར་གྱིན་ཡོད་པ་ཡིན་ཞིང་། འོན་ཀྱང་དང་པོ་གཞན་གཅེས་པའི་རྨང་གཞི་ཞིག་ལྟ་ཅི་རང་ཉིད་ཀྱང་གཅེས་མི་ཤེས་པ་ཞིག་གིས་སེམས་ཅན་གཞན་དོན་བཤད་ན་ཁ་ཟེར་དུ་འགྱུར་འགྲོ་བ་ཡིན། ཆོས་འཇིག་རྟེན་གྱི་བྱ་བ་གང་ཡིན་ཀྱང་མ་བསྒྲུབས་ན་དེར་ཟད། བསྒྲུབ་ཕྱིན་གོང་དུ་བཤད་པ་བཞིན་སྤུས་དག་པ་ངས་འདི་འགྲུབ་ཡོད། ང་ལ་འདི་ཡོད་སྙམ་པ་རང་གིས་རང་ལ་བློ་འཁེལ་བ་ཞིག་བསྒྲུབ་དགོས། དམ་པའི་ཆོས་སྒོར་ཞུགས་དུས་དང་པོར་ངེས་པར་དུ་བློ་སྦྱང་གིས་བློ་བཅོས་དགོས། དེས་བློ་མ་བཅོས་ན་ཆོས་དེ་བརྟན་པོ་ཞིག་མི་ཡོང་། བློ་སྦྱོང་བློ་སྦྱོང་རང་གི་བློ་སྦྱོངས་ཤིག །བློ་ལྡོག་རྣམ་བཞིས་རང་གི་བློ་སྦྱངས་ན། །ལུས་ངག་དགེ་བ་སྣ་གཅིག་མ་འགྲུབ་ཀྱང་། །ཐར་བའི་ལམ་ལས་འགྲོ་ས་གཞན་དུ་མེད། །ཅེས་གསུང་པ་ལྟར་རོ། །རང་རེས་ཐར་ལམ་གྱི་སྒོ་མི་རྙེད་ཅིང་། དེའི་འཇུག་སྒོ་མི་རྙེད་པར་འགྲོ་བཞིན་ཡོད་པས། གལ་ཏེ་ཐར་ལམ་གྱི་སྒོ་ཞིག་རྙེད་ན་དེ་བས་དགའ་ཞིག་ཅི་ཡོད། དེ་མིན་དོན་གཉེར་གཞན་པས་ཅི་ཞིག་བྱ། ས་ལམ་གྱི་རྣམ་གཞག སྤངས་རྟོགས་ཀྱི་མཐོ་དམན། དབུ་མ། ཕར་ཕྱིན། ཚད་མ། འདུལ་མངོན་ལ་སོགས་པ་ཟབ་དང་རྒྱ་ཆེའི་ཆོས་ཤེས་དགོས་མོད། དེ་ཤེས་པར་དང་པོ་བློ་ལྡོག་རྣམ་བཞིས་རང་གི་བློ་བཅོས་པ་འདི། ལམ་ཐམས་ཅད་ཀྱི་རྨང་རྡོ། དཔེར་ན་ཁང་པའི་རྨང་རྡོ་ལྟ་བུ་ཡིན། རྨང་བརྟན་པོ་ཞིག་མེད་ན་ཁང་པ་དེ་ཡུན་རིང་མི་བརྟན་པ་བཞིན། དགུན་ཁའི་དར་སྟེང་དུ་མཁར་བྱས་པ་སོས་ཀའི་དར་ཞུ་བ་དང་ཁང་པ་ཞིག་པ་དུས་མཉམ་ལྟ་བུའོ། །བློ་སྦྱོང་གི་རྩ་བ་མ་བརྟན་པར་ཆོས་སྒྲུབ་ཁུལ་བྱེད་པ་ནི། ཉམས་ལེན་རྒྱུད་ལ་མ་འབྱོར་གོང་ཆོས་རྔ་རླུང་གིས་ཁྱེར་འགྲོ་བ་ཡིན། རྒྱལ་པོ་ཀྲྀ་ཀྲྀའི་རྨི་ལམ་དུ་གླང་གི་མཇུག་མ་དཀར་ཁུང་དུ་ཐོགས་སོང་བ་ལྟ་བུ། ཆོས་རྔ་འཇིག་རྟེན་ལ་ཐོགས་ནས་ཆོས་མཐར་མ་ཕྱིན་པ་ཡིན། དུས་ཕྱིས་བླ་སེར་འགའ་རེའི་ཆོས་འགོ་མི་ཐོན་རྒྱུ་དེ་ཚོ། གཅིག་བྱས་ན་སྔོན་ལས་བཟློག་མེད་ལས་ཀྱི་རླུང་། ཆུ་བོའི་གཞུང་ཡིན་ན་ཅི་ཤེས་ཏེ། གཉིས་བྱས་ན་མི་རྒོད་བདག་མེད་རི་རྒྱག་བྱས་ན། བློ་སྦྱོང་གི་སྨན་མེད་པས་ཉོན་མོངས་ཀྱི་དུག་རོ་འཕར་ལོས་ཡོང་། །བྱ་མིག་བཞིན་དུ་ཡར་ལྟ་ལ་བསླབ་པ་མེད་པས་ཁྱི་མིག་བཞིན་དུ་ཐུར་ལ་བལྟ་མི་ཡོང་ཐབས་མེད་ཡིན། འོན་ཀྱང་རྫོགས་ཆེན་ཚང་གི་གྲྭ་སེར་སྡེ་སྣོད་འཛིན་པ་མང་ཆེ་བར་བལྟས་ན་སྐྱོར་མཁན་གཡོར་མཁན་གཉིས་ཀ་མེད་བཞིན་དུ། བུ་རང་སྐྱེས་ཀྱི་ངོ་བོ་ཆོས་ག་དར་གྱི་བསྟན་པ། གསེར་ཞོ་གང་གིས་རང་ཚུགས་བཟུང་། གསེར་ས་འོག་ཏུ་ཡོད་ཀྱང་འོད་ནམ་མཁའ་ལ་ཁྱབ་པའི་ཡ་རབས་བཟང་པོའི་གཤིས་ཀ་ཅན། ཁྲི་ཁར་ཕུད་ན་འདི་ཚོ་ཕུད་འོས་སོ་སྙམ་པ་ཅི་འདྲའི་མང་བ་ལ། རྟ་མགྱོགས་པ་ལྕག་གིས་བསྐུལ་བ་དང་འདྲ་བར། གལ་ཏེ་དགེ་བའི་བཤེས་གཉེན་རེས་ཟིན་ན་ཁྱད་ཆོས་ཁྱད་འཕགས་ངོམ་ནི་ཅི་འདྲ་མེད། འོན་ཀྱང་། ཆུ་མིག་རང་ཉིད་མ་སྐམ་ན། །ས་ཡིས་མནན་པས་ག་ལ་ཐུབ། །ཅེས་གསུངས་བ་བཞིན་དེ་འདྲ་དེ་འགྱོག་མཁན་མེད་ཀྱང་ཉིན་གཅིག་གཡུ་དྲུག་དཀར་དང་འདྲ་བར་མངོན་ཡོང་ལ། མིས་མ་ཤེས་ནའང་དཀར་ཕྱོགས་སྐྱོང་བའི་ལྷ་དང་སྲུང་མས་མངོན་པར་བསྟོད་ཡོང་བ་ཡིན། ངོ་སོ་ཞིག་བསྟོད། བསྟན་པ་ཡང་དར་གྱི་སྐབས་སུ་བསྟན་པའི་མེ་རོ་གསོ་དུས་སྔོན་ཆད་མཚན་གྱི་གྲགས་པ་མེད་མཁན་གྱི་དམ་པའི་སྐྱེས་བུ་འགའ་རེ་ཅི་འདྲའི་བཀའ་དྲིན་ཆེ་ཐལ། དེ་འདྲ་མ་བསམ་ས་ནས་མངོན་རྒྱུ་ཡོད་པ་ཡིན། དེ་ནི་རྒྱལ་བའི་ཕྲིན་ལས་དང་། སངས་རྒྱས་བྱང་སེམས་ཀྱི་སྤྲུལ་པ། ཐུགས་བསྐྱེད་དུས་ལ་བབ་ཡོང་བ་ཡིན། ངན་པ་ཞིག་ལ་མིང་ཆེ་ཡང་དོན་སྙིང་མེད། ཁྱི་ལ་སྟག་མོ་བཏགས་པ་ལྟ་བུ་ནི་དོན་ལ་སྡར་ལུ་ཡིན་དུས་ཉིན་ཞིག་ལ་རྐུབ་འབུད་འགྲོ་བ་ཡིན། ད་ཡིན་ཟེར་དུས་རྔ་མ་སྒྱིད་ཁུག་ཏུ་དྲང་འགྲོ་ངེས། རྟོག་ངན་དུག་རོ་ཁོང་དུ་ཡོད་ན། །འཆི་ཁ་ཚུན་ཆོད་མི་མངོན་མི་སྲིད། །ཅེས་གསུངས་པ་ལྟར། འདིའི་རིགས་ལ་སྐྱོར་གཡོར་གང་ཡང་བྱ་རྒྱུ་མེད། བྱེ་མ་ལག་ནང་དུ་བཟུང་བ་འདྲ་བར་ཕྱོགས་གང་ནས་མིན་ན་གང་ནས་ཙིར་ཤོར་འགྲོ་བ་ཡིན། ལྷ་བཤོས་བཞིན་དུ་ཡར་ལ་བཞག་ཀྱང་བགེགས་གཏོར་བཞིན་དུ་མར་ལ་འགྲིལ་ཡོང་བ། གསེར་ཁྲི་སུམ་བརྩེགས་ཀྱི་སྟེང་དུ་བཞག་ཀྱང་མགོ་ཐུར་ལ་བསྟན་ནས་འགྲིལ་འགྲོ་བ་ཡིན། དེ་འདྲའི་རིགས་ལ་མགར་བས་མགར་རྒྱུ་དང་བླུག་པས་བླུག་རྒྱུ་མེད་པར། གངས་རི་ཤེལ་དཀར་གྱི་མཆོད་རྟེན་ལ་བལྟས་བལྟས་ནས་མིག་འབྲས་ལོག སུམ་ཅུ་རྩ་གསུམ་གྱི་ལྷ་ཡུལ་ལ་ཞེ་སྨོན་ནས་ཡིད་ཐང་ཆད་པ་ཅི་འདྲ་མེད། དེ་ཚོ་བཤད་ནས་དགོས་པ་མེད། བློ་ལྡོག་རྣམ་བཞིས་བློ་སྦྱོང་དུས་དེ་ཁྲིད་ཀྱི་འགྲོ་ལུགས་ལྟར་དུ་བྱས་ན་དལ་འབྱོར་རྙེད་དཀའ་ནས་མགོ་བཟུང་སྟེ་བཤད་རྒྱུའི་ཕྱག་སྲོལ་ཡོད། འོང་ཀྱང་དེང་སང་གི་དུས་གྱི་སྙིགས་མའི་དམུ་རྒོད་ཀྱི་སྤྱོད་པ་དང་བསྟུན་ཡོང་ན། དང་པོ་རྒྱུ་འབྲས་ཀྱི་འགྲོ་སྟངས་ལེགས་པོ་ཞིག་ངེས་སུ་བཅུག་ནས་འཇིག་རྟེན་ཡང་དག་གི་ལྟ་བའམ་རྒྱུ་འབྲས་ཡིད་ཆེས་ཀྱི་དད་པ་དེ་གཅིག་ཤེས་ན་དེ་ནས་ཆོས་བསྒྲུབ་པར་ཕན་ཐོགས་དང་། ཆོས་ཇི་ལྟར་བསྒྲུབ་རྒྱུའི་བྱེད་ཐབས་སྐོར་གྱི་སྒྲོག་ཁྲོལ་སོང་བ་ཡིན་སྙམ། ང་ཚོས་འདི་ནས་ཆོས་དུང་བུས་ནས་ད་ལོ་ཡིས་མི་ལོ་དྲུག་སོང་། སྲིད་པ་ལས་དང་རྐྱེན་གྱི་དབང་གྱུར་པས། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །འཆི་མཐར་ཐུག་གི་བར་དུ་དམ་ཆོས་གཟུང་། །ཞེས་གསུངས་པ་འདི་ལ་ངེས་ཤེས་བསྐྱེད་དེ་ཟབ་ཆོས་མན་ངག་གི་བརྒྱུད་པ་འདི་དེང་སང་མིང་གི་ལྷག་མར་གྱུར་ཡོད་པས། འདི་གཅིག་གསོ་ཐུབ་ན་ཅི་མ་རུང་སྙམ་པའི་དམ་བཅའ་བརྟན་པོས་རྐྱེན་དབང་ལ་མ་མངག་པར་གཟབ་གཟབ་བྱེད་ཁུལ་བྱས་པ་ཡིན། ལོ་དྲུག་པོ་དེའི་ཚེ་ལ་གཙོ་བོ་རིས་མེད་ཀྱི་དགོན་སྡེ་སོ་སོ་ནས་ཕེབས་ཡོང་བའི་དགེ་འདུན་པ་ཇོ་སེར་རྣམ་པའི་ཐུགས་བཞེད་སྐོང་རྒྱུ་དང་། ཆོས་བརྒྱུད་འདིའི་རྫོགས་པ་ཆེན་པོའི་ཁྲིད་རྒྱུན་མི་ཆད་པའི་ཕྱིར་དུ་བསྟན་པ་ཉམ་དམའ་ཉག་ཕྲའི་བསྟན་སྲོག་གཉིས་པ་ཞིག་མཐུད་རྒྱུའི་ལྷག་བསམ་གྱི་ཀུན་སློང་གཅིག་པུ་ལ་གཞིར་བཟུང་ནས། ཞོར་དུ་ཁྱིམ་པ་ཕོ་མོ་ཞུགས་ཆོག་སའི་ཆོས་ཁྲིད་རེ་ཡང་འདོན་བཞིན་ཡོད་པ་ཡིན། ཁྱད་པར་དུ་ན་ནིང་མེ་ཕག་ལོར་བདེ་ཆེན་ཞིང་ཁྲིད་ཆེན་མོ་ཞིང་མཆོད་སྨོན་ལམ་དང་འབྲེལ་བཐེངས་དང་པོ་འཚོགས་ནས་དེའི་རྗེས་སུ་སྐབས་གཅིག་གི་རིང་ལ་རང་རེ་ཞལ་གྱེས་ཏེ་ད་ལྟའི་བར་དུ་ལོ་འཁོར་གཅིག་སོང་བ་ཡིན། ན་ནིང་གི་ཞིང་མཆོད་གྲོལ་ལ་ཉེ་དུས་འདི་རྒྱུན་འཛུགས་ཀྱི་རེ་བ་བྱེད་མཁན་དང་། མཆོད་པའི་ཐེབས་རྩ་འཇོག་མཁན་མང་པོས་འཚང་ཁ་བྱས། དེ་ཚོ་དགེ་རྩ་ཁྱད་པར་ཅན་གྱི་སེམས་བསྐྱེད་བཟང་པོ་ཡིན། སེམས་བསྐྱེད་པ་ཙམ་གྱིས་དགེ་རྩ་ཐོབ་རྒྱུར་བསྔོ་བས་རྒྱས་འདེབས་དང་སྨོན་ལམ་གྱི་མཚམས་སྦྱར་དང་བཅས་ཏེ་བྱས་པ་ཡིན། ཡིན་ན་ཡང་ལོ་རྗེས་མར་འཚོགས་དང་མི་འཚོགས་ད་དུང་ཤེས་དཀའ་ལ། གཅིག་འདུས་བྱས་ཀྱི་ཆོས་ལ་རྟག་བརྟན་མེད། ངེས་བརྟན་ཅན་གྱི་ཆ་ཚད་སུས་ཀྱང་འཇོག་དཀའ། ན་ནིང་ཆོས་གྲལ་ན་ཡོད་ཀྱང་ད་ལོ་ཕྱི་མའི་ལྔ་ལམ་དུ་སོང་བ་གྲངས་ཀ་ཅན་ཡིན། འདིས་ཀྱང་ཤེས་འདུག གཉིས་ན་ཆོས་བཤད་ན། ཉན་ན། བསྒོམ་ན། གང་བྱས་ཀྱང་ཕན་ཐོགས་ཤིག་ཡོད་དགོས། ཕན་ཐོགས་མེད་ན་མིང་ཡག་བཙོག་ཙམ་ལ་ལྟ་རྒྱུ་མེད། ཕན་པ་མེད་ན་ཆོས་ཡིན་ཡང་གནས་སྐབས་སུ་སྐྱུར་དགོས། དེས་ན་གཙོ་བོ་ས་ཆ་རང་ཉིད་ཀྱི་སྤྱིར་ན་མང་ཚོགས་མང་བ། དེའི་ནང་ནས་ལོ་ཆུང་གསར་སྐྱེས་ཕོ་མོ་དང་། གྲྭ་སར་ན་གཞོན་མ་འོངས་པར་ས་འདིའི་བདག་པོ་རྣམས་ལ་ཕན་ཐོགས་ཤིག་ཡོད་དགོས་པ་ཡིན། སྤྱིར་ཆོས་ཞེས་པ་ཅི་འདྲ་ཞིག་ཡིན་ན། བཤད་ལུགས་གཞན་ཞིག་ཏུ་བསྒྱུར་ཏེ་བཤད་ན་འདི་སེམས་ཁམས་ཀྱི་སྨན་ཞིག་ཡིན། ཚེ་ཕྱི་མར་བདེ་འགྲོ་ཐོབ་བྱེད་དང་། རང་གཞན་གཉིས་ཀར་བདེ་ཐབས་ཀྱི་ཕྱོགས་ལ་བསམ་བློ་མི་གཏོང་བའི་དབང་དུ་བྱས་ནའང། ཚེ་འདིར་མིའི་འཚོ་བའི་ནང་དུ་མེད་དུ་མི་རུང་བ་ཞིག་ཡིན་ལ། འདི་མེད་ན་འཚོ་བའི་དགོས་མཁོའི་གཙོ་བོའི་ཆ་རྐྱེན་གཅིག་མ་ཚང་། དཔེར་ན་འདོད་ཁམས་པ་ཁམ་ཟས་ལ་བརྟེན་པ་ཞིག་ལ་ཆ་བཞག་ན་མི་ཞིག་གི་འཚོ་བའི་ནང་དུ་ཟས་མེད་ན་འཚོ་ཐབས་མེད་པ་དང། དེ་བཞིན་དུ་སྐོམ་མེད་ནའང་ལུས་ཀྱི་འཚོ་བཅུད་ཀྱི་གྲུབ་ཆའི་གཙོ་བོ་མང་ཆེ་བ་ཆུ་ཡིན་པས། དེ་མེད་ན་ཡང་འཚོ་ཐབས་བྲལ་སོང་བ་ཡིན། དེའི་སྟེང་དུ་གཉིད་མེད་ན་ཡང་འཚོ་མི་ཐུབ། གཉིད་ཀྱང་ལུས་རྒྱས་བྱེད་དམ་འཚོ་བྱེད་ཅིག་ཡིན། རང་རེས་ད་སྔ་ཡན་ཆད་དུ་ཟས་གོས་ཡོ་བྱད། གནས་གྲོགས་ལོངས་སྤྱོད་སོགས་ཀྱི་དོན་དུ། མི་དེ་གོམ་ཁ་ཆོས་ནས་ཤི་མ་རན་གྱི་བར་དུ་རྒྱུགས་འདུར་གཉིས་ཀ་བྱས་ལ། འོན་ཀྱང་ལས་ཀྱི་མཇུག་མ་རྫོགས་ཤིང་སེམས་ཀྱི་འདོད་པ་མ་ཚིམ་བཞིན་དུ་ཚེ་ཕ་རོལ་ཏུ་འགྲོ་མཁན་མང་ཆེ་བ་ཡིན། བྱ་སྔ་མ་ཤི་བའི་རོ་ལ་བལྟས་ན། ཕྱི་མ་མི་རྟག་དེ་དང་འདྲ། དེས་ན་ཟ་འཐུང་ཉལ་གསུམ་སོགས་འཇིག་རྟེན་གྱི་འདུག་ཆུས་ཙམ་ནི་དུད་འགྲོས་ཀྱང་འགྲུབ་པ་ཡིན། དུད་འགྲོ་རྣམས་ཀྱིས་ཀྱང་གསོན་ཚེ་ཟ་འཐུང་ཉལ་གསུམ་ཙམ་ཤེས་ལ། ད་དུང་ང་ཚོར་ཡོད་པའི་སྒོ་ཕྱུགས་གཡག་དང་ར་ལུག་རྣམས་ལ་བལྟས་ན་མཚམས་རེར་རྡུང་ཁ་ཚད་ནས་རྡུང་རེས་རྒྱག་རྒྱུ། གཡག་འགའ་རེས་གདང་དཀྲུག་ནས་ནོར་ལྷས་ལ་འདོག་ཏུ་མི་འཇུག་པ། རྟ་ཡི་ནང་ནའང་འཕྲ་ཁ་རྒོད་པོ་ཅན་བདག་པོར་གློ་འཕྲ་བརྒྱབ་ནས་གཅར་དུ་མི་འཇུག་པར་བྱེད་ཤེས་པ་ཡོད་པ་ཡིན་ཞིང་། མིའི་ནང་ནའང་དེ་འདྲའི་སྤྱོད་ངན་ཅན། ཁོག་ན་ཅི་ཡང་མེད་ཀྱང་འགྱིང་ར་ཅན། སྤྲོ་ཐུང་བཟེ་རེ་ཅན་ཚེར་མ་འདྲ་བ་ཡོད། རིགས་དེ་གཉིས་གོས་གྱོན་ནས་སྐེད་རགས་བཅིང་ཤེས་མི་ཤེས་ཀྱི་ཁྱད་པར་ཙམ་མ་གཏོགས་དུད་འགྲོ་དང་ཐུན་མོང་གི་འཚོ་བ་སྐྱེལ་སྟངས་དང་། ཀུན་སྤྱོད། བསམ་ལུགས་ཕལ་ཆེར་འདྲ་མོ་འདུག ཁྱད་པར་དུ་གཞན་དག་གིས་སྲོག་བཅད་དེ་རང་གི་ཁ་ཟས་བྱེད་རྒྱུ་དེ་ཚོ་དུད་འགྲོ་གཏུམ་པོ་སྟག་དང་། སྤྱང་ཀི། ཁྲ་དང་། དུག་སྦྲུལ་དེ་ཚོ་དང་འདྲ་བ་ཡིན། ངའི་རྩོམ་ཡིག་ཅིག་གི་ནང་དུ། བདེན་གཏམ་དར་གྱིས་ལྕིབས་ཀྱང་ལོག་པར་འཛིན། །ངན་གྲོགས་དུག་ཤིང་སྡོང་པོར་རྟག་ཏུ་འཁྲིལ། །གནོད་པའི་ཁ་རླངས་སྟུག་པོའི་གྲིབ་མ་ཅན། །ངན་པའི་རང་གཤིས་མཐོང་ཚེ་ལྷག་པར་སྐྱོ། །ཟེར་རྒྱུ་ཞིག་བྲི་མྱོང་། དུག་ཤིང་ལ་འཁྲིལ་ནས་མི་ལ་གནོད་པ་སྐྱེལ་བ་སྦྲུལ་གྱི་གཟུགས་སུ་བཀོད་དེ། བསྡུས་ཤིང་མ་བསྡུས་པའི་གཟུགས་ཅན་གྱི་རྒྱན་བྱས་ཏེ་ངན་སྤྱོད་མཐོང་ནས་སྐྱོ་བ་སྐྱེས་པའི་ནང་དོན་ཅན་ཞིག་བྲིས་མྱོང་། དེ་ལྟར་དུད་འགྲོའི་ནང་གི་གཅན་གཟན་གཏུམ་སྤྱོད་ཅན་དང་འདྲ་བ་མིའི་ནང་ནའང་ཡོད། དུད་འགྲོའི་ནང་ན་ཡང་དུད་འགྲོ་གཏི་མུག་ཅན། གཉིད་དགའ་ཅན། ཕག་ལྟ་བུ་ཡིན་ན་ཟ་རྐྱང་རྐྱང་དགོས་པ་དང་། ཉལ་དགའ་ཅན། བཟང་ངན་གྱི་གནད་ཆེན་པོ་མི་ཤེས་པ་ཡོད་པ་ཡིན། མིའི་ནང་ན་ཡང་ཕལ་ཆེར་དེ་དང་རིགས་མཚུངས་པ་ཡོད། ད་དུང་དུད་འགྲོ་བཟང་བ་འགའ་རེ་སྙིང་རྗེ་ཅན་རི་དྭགས་ཀྲིཥ་ཎ་ལྟར་གང་ལ་སོང་ཡང་སྣ་ནས་རླུང་སྤུར་ཞོར་དུ་ལམ་དུ་སྲོག་ཆགས་ཕྲ་མོ་རྐང་ལག་གིས་བརྫི་མི་འགྲོ་ཐབས་བྱེད་པ་དེ་འདྲ་ཡོད། དེ་འདྲ་མིའི་ནང་ན་ཡང་དཀོན་པོ་ངོ་མ་ཡིན། འུ་ཚོ་མི་འདིའི་ཟ་ཉལ་འགྲོ་འདུག་དུད་འགྲོ་དང་ཐུན་མོང་གི་ཕྱིའི་འདོད་ཡོན་གྱི་བདེ་སྐྱིད་བསྒྲུབ་པ་འདིས་མི་ཡིན་པའི་ཁྱད་ཆོས་ཡར་ལྷག་པ་ཞིག་ཅུང་ཟད་ཀྱང་མེད། དེས་ན་ངས་གོང་དུ་ཆོས་སྒྲུབ་རྒྱུ་ནི་གཞན་པ་མ་ཟད་ཚེ་འདི་རྐྱང་བའི་མི་འཚོ་ཐབས་སམ་མཐུན་རྐྱེན་གྱི་སྟེང་ནས་ཡིན་ཡང་མེད་དུ་མི་རུང་བ་ཞིག་ཡིན་ཟེར་བའི་རྒྱུ་མཚན་གང་ཞེ་ན། མི་ལ་བདེ་སྡུག་ཡོང་ས་དེ་ལ་ལུས་སེམས་གཉིས་ཡོད། ལུས་སེམས་གཉིས་ཀ་བདེ་ན་ད་གཟོད་བདེ་བ་ཡིན། གཅིག་ཤོས་མ་བདེ་བས་གཉིས་ཀ་མི་བདེ། ཁྱད་པར་དུ་ནང་གི་སེམས་མ་སྐྱིད་དུས་ཕྱིའི་ལུས་པོ་བདེ་མ་བདེ་ཅི་ཡོད། སེམས་ཀྱི་སྡུག་བསྔལ་དབང་ཆེ་སོང་བས་ལུས་ཀྱི་བདེ་བ་ཟིལ་གྱིས་གནོན་འགྲོ་བ་ཡིན། སེམས་ཀྱི་སྡུག་བསྔལ་མང་ཆེ་བ་རྒྱུ་ནོར་ལ་སོགས་པ་འདོད་རྔམ་གྱི་ཁུངས་ནས་ཡོང་བ་ཡིན། དེ་བས་རྒྱུ་ཆེན་དབང་ཆེན་ཚང་མ་སྡུག་བསྔལ་ཆེ་ཤོས་ཡིན། མིང་གྲགས་ཅན་རྣམས་སྡུག་ཆེ་ནས་རང་སྲོག་མེད་པར་བྱེད་དགོས་པ་མང་བ་ཡིན་ཞེས་གོང་ཞིག་ནས་བཤད་ཡོད། མི་དེ་འདྲ་ལ་ཅི་ཞིག་དགོས་ཤེ་ན་ཆོས་དགོས། སེམས་སྐྱིད་བྱེད་ཀྱི་སྨན་དེ་ཆོས་ཡིན་ན། དུད་འགྲོ་ལ་སོགས་པ་ལ་དེ་མེད། མི་བདེ་མི་སྐྱིད་པའི་ཕུགས་དེ་ཉོན་མོངས་དུག་ལྔ་དུག་གསུམ་ལ་ཐུག་ཡོད། དེ་དག་ནི་གནོད་པ་ཅན་དུག་དང་འདྲ་བ་ཡིན་པས་ན་དུག་ལྔ་དང་དུག་གསུམ་ཞེས་བརྗོད། དུག་ཁོག་ན་ཡོད་པས་སེམས་མི་བདེ་བའི་ན་ཚ་སྡུག་བསྔལ་ཞིག་མི་མྱོང་བའི་ཐབས་མེད། ཉོན་མོངས་མེད་ན་ལས་ངན་མི་བསགས་ལས་ངན་མ་བསགས་ན། དེའི་འབྲས་བུ་སྡུག་བསྔལ་ཀྱང་ཡོང་དོན་མེད། ཉོན་མོངས་བག་ཆགས་དང་བཅས་པའི་སྒྲིབ་གཉིས་ཕྲ་ཞིང་ཕྲ་བ་སྤངས་ཟིན་དུས་སངས་རྒྱས་གྱུར་པ་ཡིན། དེ་དུས་སྐྱོན་ཀུན་ཟད་ཡོན་ཏན་ཀུན་ལྡན་གྱུར་ལ། ཉོན་མོངས་ཆགས་སྡང་རྨོངས་གསུམ་གྱི་དབང་འོག་ནས་རང་ཉིད་ལ་རང་དབང་ཅུང་ཟད་ཅིག་ཐོབ་ཏུ་བཅུག ཉོན་མོངས་པ་ཧ་ཅང་མགོར་ཤོར་དུ་མ་བཅུག་ན། དེའི་ཚོད་ཀྱི་བདེ་བ་ཞིག་ཐོབ་རྒྱུ་ཡོད་པ་ཡང་མཐོང་ཆོས་མངོན་གྱུར། མྱོང་བས་གྲུབ་པ་ཡིན། དེས་ན་ཚེ་འདིའི་མིའི་འཚོ་བའི་ནང་ནའང་སེམས་ཁམས་ཀྱི་སྨན་ཆོས་འདི་མེད་ན་སྟོང་ཆ་ཆེན་པོ་ཞིག་ཁ་མ་གང་བ་ཡོད། ཟ་ཉལ་ལ་སོགས་པའི་ཆེད་དུའམ་ཕྱིའི་བདེ་བ་ཙམ་དོན་གཉེར་བྱེད་པ་ནི་དུད་འགྲོ་དང་ཐུན་མོང་གི་བྱ་བ་ཞིག་ཡིན། ནང་སེམས་ཀྱི་བདེ་བ་ཆོས་ལས་རྙེད་ཐབས་བྱེད་པ་ནི་མི་ཡི་ཐུན་མིན་གྱི་ཁྱད་ཆོས་ཡིན་ཞིང་། ཚེ་འདིར་མ་ཟད་ཕྱི་མ། རང་གིས་མི་ཚད་གཞན་ལ་བསམ་བློ་གཏོང་བ་ནི་མཐོ་རིམ་གྱི་མི་ཡི་ཆ་ཚད་ལྡན་པའི་ནང་ནས་ཡ་རབས་ཀྱི་མིའི་ཆ་རྐྱེན་ཡིན། དེས་ན་གོང་དུ་བཤད་པ་བཞིན་སངས་རྒྱས་ཀྱི་མཛད་པ་སེམས་ཅན་བདེ་ཐབས་ལས་ཅི་ཡང་མེད། ངེད་ཚོ་སངས་རྒྱས་བསྟན་པའི་ཆོས་སྒོར་ཞུགས་ནས་ཤཱཀྱའི་དགེ་སྦྱོང་ཞིག་གི་ཚུལ་བྱས་པ་དང། དེའི་དམིགས་ཡུལ་ཡང་གཞན་ལ་ཕན་པའི་དོན་ཞིག་ཨེ་འགྲུབ་བསམ་རྒྱུ་བོ་དེ་ཡིན། ལོ་རེ་བཞིན་ཆོས་དུང་རེ་བུས། ཆོས་ར་རེ་བསྡུས་པ་ལ། གང་ཟག་རེ་རེ་ཡིན་ཡང་བྱང་ཆུབ་ཀྱི་ས་བོན་རེ་ཐེབས་པ་དང་། ཐར་བའི་ལམ་སྣེ་རེ་ཟིན་སོང་ན་བསམ་པ་དེ་དམིགས་ཡུལ་གཙོ་བོ་ཡིན། ཆོས་བརྒྱུད་ཀྱི་རྐང་འཛིན་དང་། དོན་བརྒྱུད་ཀྱི་བསྟན་པ་གཏད་ས་ནི་རེ་གཉིས་ཙམ་ཡིན། དེས་ན་ནིང་གི་ཞིང་ཁྲིད་བཏོན་ནས་ད་ལོའི་བར་ལ་ས་ཆ་འདིའི་སྡེ་སྣོད་འཛིན་པ་རྣམ་པ་ལྟ་ཅི། རྫོགས་ཆེན་ཚང་གི་གྲྭ་པ་གཞོན་རབས་པ་འདི་ཚོའང་གོང་དུ་བཤད་པ་དེའི་རིགས་བསམ་བཞིན་དུ་སྲིད་པ་བཞེས་པ་མིན་དུ་ཆུག་ཀྱང་། བསམ་བཞིན་དུ་སྨོན་ལམ་བཏབ་སྟེ་དཔོན་སློབ་མི་འབྲལ་ལྷན་ཅིག་ཚོགས་པའི་མཚམས་སྦྱོར་ཐེབས་སོང་བའི་ལྷག་བསམ་ཅན་དག་གི་སྐྱེ་བ་ཡིན་ཟེར་ན་ངོ་མ་ཡིན་ས་འདུག་བསམ་པ། ཡང་ལྟ་ཤོར་ས་ཤ་སྟག་མང་ཆེ་བ་ཡིན། དེ་རྣམས་ཕར་ཞོག སྡེ་འདིའི་མང་ཚོགས་རྒན་དར་གཞོན་གསུམ་ཐམས་ཅད་བློ་ཆོས་ཕྱོགས་སུ་ཕྱོགས་ན་ཕྱོགས་པ་དང་མཐུན་པར། སྐོར་བ་བསྐོར་རྒྱུ་དང་། ཁ་ཏོན་བཟླས་བརྗོད་བྱེད་པ་སོགས། སྡེ་ཤོག་ཁག་འདྲ་འདྲའི་ནང་ནས་མི་འདྲ་བ་ནི་བཤད་མི་དགོས་པ་ཞིག་ཡིན། མིའི་ཀུན་སྤྱོད་ཀྱི་སྟེང་ནས་ཡིན་ཡང་རྒྱག་རེས་འཛིང་རྩོད། གསད་རྨས་གཏུབ་གསུམ། རྐུན་མ་ཇག་པའི་བྱ་སྤྱོད་དེ་ཚོ་ཇེ་ཉུང་དང་མེད་པར་གྱུར་པ་དེ་དོན་གྱི་སྟེང་ནས་ཆོས་གོ་ཡོད་པའི་རྟགས་དང། ཆོས་དང་རང་རྒྱུད་གཉིས་ཀ་ཅུང་ཟད་ཅིག་བསྲེ་ཤེས་ཡོད་པའི་རྟགས་ཡིན་པས། སྡེ་འདིའི་ནང་ནའང་ཆོས་ཞུས་དང་མ་ཞུས་པའི་རྐྱེན་གྱིས་མིའི་སྤུས་ཀ་བཟང་ངན་གྱི་དབྱེ་བ་ཡང་རང་ཤུགས་ཀྱིས་ཕྱེ་ཡོད་པ་མཐོང་འདུག་རྒྱུ་འདི་ཡིན། རང་རྒྱུད་ཆོས་དང་འདྲེས་ན་བྱ་སྤྱོད་ཀྱང་ཆོས་དང་འདྲེས་ཡོང་བ་ཡིན། བྱ་སྤྱོད་ཆོས་དང་འདྲེས་ན་རང་གཞན་གཉིས་བདེ། འདི་ཕྱི་གཉིས་སྐྱིད་ཅིག་འགྱུར་རྒྱུ་ཡོད། འཇིག་རྟེན་ཁྱིམ་པ་བ་ཞིག་ཡིན་ཕྱིན་ཁྱིམ་ལ་གནས་པའི་མི་ཡིན། ཁ་ཟས་རྒྱབ་གོས་ཀྱིས་འཚོ་ཐབས་ལོས་བྱེད། ཆོས་པ་ཡིན་ཡང་སྤྲང་པོ་ཡིན་ན་དེ་རིང་ཁ་སང་གི་མིས་གདེང་འཇོག་མི་བྱེད། རྒྱུ་གསོག་ནའང་བསོད་ནམས་དང་ཤེས་རབ་ཀྱི་སྟོབས་ཀྱིས་རྒྱུ་གསོག་རྒྱུ་ཡོད་པ་ཡིན། ཤེས་རབ་ཡོད་ན་བསོད་ནམས་གསོག་ལུགས་ཤེས་ཡོང་ལ། ཆོས་འཇིག་རྟེན་གང་ལ་ཐུག་ན་རྣམ་དཔྱོད་ཀྱི་རིག་པ་དང་སྡུར། ཐབས་མཁས་དང་གཡོ་སྒྱུ་གཉིས་སོ་སོ་ཡིན། འོན་ཀྱང་སོ་སོར་འབྱེད་བྱེད་ནི་ཀུན་སློང་ཡིན་ལ། དེ་ལ་གཞན་ཕན་གྱི་དམིགས་ཡུལ་ཡོད་མེད་ཀྱི་ཁྱད་པར་ཡོད། ས་ཆོས་ཡོད་ཀྱི་མི་དེ་འདྲ་ཡང་ཅི་ལ་འདྲ་སྟེ་འདྲ་མི་འདུག་སྙམ་པ་ལྟ་བུ་ཞིག་མངོན་སུམ་མིག་གི་ལྟ་སར་གསལ་ཚེ་ད་གཟོད་གསལ་བ་རང་ཡིན། ངས་ནམ་རྒྱུན་ས་ཆ་འདི་གཅིག་དང་མི་འདྲ། འདིའི་རྡོ་རིལ་རིལ་ཞིག་ཡིན་ཡང་བཤད་པ་ཡོད་ཅེས་སྨྲས་ཚེ་ལ་ལས་རང་བསྟོད་རེད་སྙམ་སྲིད་མོད། དེ་ནི་རང་བསྟོད་གཅིག་མིན་ཏེ། ང་རང་ཉིད་རྫ་ཆུ་ཁ་པའི་མི་ཞིག་ཡིན་པ་དང་། ལས་སྨོན་ལམ་འདི་ལ་བབ་ཅིང་། བསྐོས་ཐང་ཐོད་པའི་རི་མོ་འདི་ལ་དོད་དེ། མི་རབས་སྔོན་རྗེས་ཚང་མར་སྐྱིད་སྡུག་མཉམ་དུ་གཤིབས་པ་ཙམ་ཞིག་ཡིན། ས་གྲུབ་བརྙེས་ཀྱི་རིག་འཛིན་མང་པོ་འབྱོན་སའི་གདན་ས། བོད་ཤར་ཕྱོགས་མདོ་ཁམས་ཀྱི་སྨད་ལ་དམ་ཆོས་འདུལ་བ་དར་སའི་ལྟེ་བ་ཡང་ཡིན་ཞིང་། གདན་ས་རྩ་ཆེན་དང་། དགོན་པ་ཆོས་ཆེན་རེད། ལོ་རྒྱུས་ཀྱི་རི་མོ་སུ་ཞིག་གིས་སྣོག་ཐབས་སྒྱུར་ཐབས་མེད། འོན་ཀྱང་སྔར་སོང་གི་ལོ་རྒྱུས་ནི་ལོ་རྒྱུས་རང་སྟེ། གནའ་ཤ་བ་ཉལ་ཤུལ་ན། དེང་ཤེའུ་ཉལ་བ་དཀོན་པོ་ཡིན་ལ། ད་ཡོད་མིག་གི་ལྟ་སར་ཅི་ཞིག་ཡོད་ན་དེ་ཡིན། དེས་ན་དམ་པ་ཆོས་ཕྱོགས་ནས་བཤད་ན། རྫོགས་ཆེན་ཚང་གི་མཁན་རབས་ནོར་བུའི་ཕྲེང་བ་ལྟ་བུ་བཞི་བཅུ་ཙམ་ཞིག་བྱོན་པ་མང་ཆེ་བ་སྐུ་ཡུལ་འདི་ནས་ཡིན་ལ། དེ་རྣམ་པའི་སྐུ་ཚ་གདུང་རྒྱུད་ཀྱི་མི་མང་ཞིང་། འཇིག་རྟེན་མི་ལུགས་ནས་ཡིན་ན་བསམ་པ་ལྷ་ལ་དཀར། ཞེ་སེམས་དགྲ་ལ་གནག་ཟེར་བའི་དཔེ་དང་ཕྱོགས་འདྲ་བར། བསྟན་དོན་དུ་བསམ་པ་རྣམ་དག་གིས་ལུས་སྲོག་ཕངས་མེད་བྱས་པ། ལྷག་བསམ་རྣམ་དག་ཅན་རྣམས། ས་ཆ་འདི་ནས་སྐྱེས་པས་མི་རྒྱུད་ཀྱང་འདི་ན་ཡོད་པ་འདི་རྣམས་ཡིན། དེ་ལྟར་ཡིན་ན་དེའི་ཚོད་ཀྱིས་འདི་ཕྱི་རང་གཞན་གཉིས་དོན་གྱི་ཆོས་བྱེད་ཚེ་སྤུས་དག་བྱེད་རྒྱུ་ནི་ཕོ་རབ་ཀྱི་ལས་ཀ་ཡིན་ཞིང་། རྒན་པ་ཐམས་ཅད་བཟང་བས་བུ་དང་ཚ་རྒྱུད་ལམ་ལ་བཞག་པ་ཡིན་པ་ནི་སྨོས་མ་དགོས་ལ། འོན་ཀྱང་གཞོན་པ་ཐམས་ཅད་མ་བཟང་ན་ཆེ་ཁར་ཆུང་ཉན་གྱི་ཡ་རབས་སྤྱོད་བཟང་ཅན་དེང་སང་གང་ལ་སོང་ཡང་ཉིན་མོའི་སྐར་མ་དང་འདྲ། མདོར་ན་ན་ནིང་རང་རེས་ཞིང་ཁྲིད་བཤད། དེའི་སྟེང་དུ་འདི་རྣམ་པའི་བཀའ་ཆོས་ལ་ཉན་ཡོང་ན། ད་ལྟ་མི་ལམ་གྱིས་མི་ཚད་ལྷ་ལམ་ན་ཡོད་པ་ཞིག་རེད་ཡོད་ཟེར་རྒྱུའི་མཚམས་སྦྱོར་ང་ལ་བྱས་པའི་གཏམ་བཟང་དེ་འདྲ་གོ་ནས། ངས་ཀྱང་ཞིང་ཁྲིད་ཐེངས་གཉིས་པ་མཆོད་པ་སྨོན་ལམ་དང་བཅས་པ་འཚོག་རྒྱུ་ཡིན་ཞེས་སྨྲས་ཏེ་སྔོན་ཞིག་ནས་སྔ་ཆ་བརྒྱབ་ཡོད། སྤྱིར་དེང་སང་གི་དུས་ཚོད་འགྱ་མ་འགྱུར་ཡིན་ཞིང་། རང་རེ་བོད་ཁམས་ཀྱི་ས་ཆ་མང་པོ་ཞིག་བདེ་གཟར་རི་ཐང་གཉིས་ཀའི་མཚམས་སུ་ཡོད་པས། རང་རེའི་ཆོས་ཁྲིད་ཆེ་བ་རྣམས་ད་ལོར་ཆད་སོང་བ་རེད། ཡིན་ན་ཡང་རང་རེ་ཆོས་པ་ཡིན་པས། ཆོས་ལ་རྒྱལ་མཚམས་དང་མི་རིགས་ཀྱི་དབྱེ་བ་མེད། སེམས་ཅན་གྱི་རིགས་ཡོད་ཚད་ཕ་མར་གྱུར་བ་ཡིན་པ་དང་། སངས་རྒྱས་ཀྱི་བསྟན་པ་དར། བསྟན་འཛིན་གྱི་སྐྱེས་བུ་གང་ན་སུ་བཞུགས་ཀྱི་སྐུ་ཚེ་བརྟན། ཐུགས་བཞེད་འགྲུབ། སེམས་ཅན་བདེ་ཞིང་སྐྱིད། འཛམ་གླིང་ཞི་བདེ་ཡོང་བའི་སྨོན་ལམ་འདེབས་ཀྱིན་ཡོད་པས། འདི་མིའི་རིགས་རྐྱང་པ་བདེ་ཐབས་སྐྱིད་ཐབས་ཀྱི་སྨོན་ལམ་ཞིག་མིན་ནམ་སྙམ་པ་ཞིག་ཡིན་མོད། འོན་ཀྱང་སེམས་ཅན་གྱི་བདེ་སྐྱིད་སངས་རྒྱས་ཀྱི་བསྟནཔར་ལ་རག་ལས། སངས་རྒྱས་ཀྱི་བསྟན་པ་མི་ཡུལ་ནས་དར་དགོས་ཕྱིར། བསྟན་པ་འཛིན་སྲུང་སྤེལ་བའི་མཛད་པ་དེ་འཁོར་ཡུག་ཞི་བདེ་ཡོང་བ་གནད་ཆེ་ལུགས་ལ་བསམ་བློ་བཏང་ཚེ། འཛམ་གླིང་ཞི་བདེ་འདི་ཚོ་སྨོན་ལམ་གྱི་ནང་དུ་འཇོག་དགོས་རྒྱུ་དང་འཇོག་ཆོག་རྒྱུ་ཅན་ཞིག་ཡིན། དེས་ན་རང་རེའི་ཆོས་འཆད་ཉན་རེའི་མཇུག་ཏུ་སྨོན་ལམ་ལེགས་པོ་རེ་འདེབས་པ་འདི་ཡང་ཆོས་པ་རྣམས་ཀྱི་ལས་འགན་ཞིག་ལོས་ཡིན་སྙམ་ཞིང་། མི་རིགས་དང་ལ་རྒྱའི་ཐད་ནས་བསམས་ནའང་གཙོ་བོ་མི་རིགས་ཆག་འཇིག་གི་རྩ་བ་འདི་ཆོས་དང་རིག་གཞུང་། དེའི་ནང་གི་བོད་ལ་དར་བའི་མདོ་སྔགས་ཟུང་འབྲེལ་གྱི་ཆོས་འདི་འཛམ་གླིང་སྤྱི་དང་འགྲོ་བ་ཡོངས་ལ་ཕན་ཐོགས་ཅན་ཞིག་ཡིན་པ་དང་། འདི་མི་ཉམས་པར་སྲུང་བ་དེ་ཉིད་ལ་རྒྱའི་སྙིང་པོ་ཡིན་པ་འདི་མཆོག་དམན་ཐམས་ཅད་ཀྱི་སེམས་ཀྱི་དམིགས་འདུན་ཡིན་ལ། རང་རེའི་ནུས་པ་དང་བསྟུན་ནས། སོ་སོའི་རྒྱུད་ན་ཡོད་པའི་བསྟན་པ་དེ་ལེགས་པོ་ཞིག་བཤད་སྒྲུབ་གཉིས་ཀས་བསྲུངས་ཚེ། རེ་རེ་ཚོགས་པའི་ཐུན་མོང་གི་བསྟན་པ་འདི། གངས་ལ་ཉི་མ་ཤར་བ་ལྟ་བུ་ཞིག་འགྱུར་བའི་རེ་བ་དང་། སྒོས་ཁུར་དེའང་མ་བགོས་ཐུན་མོང་གི་ཐོག་ནས་འགྲུབ་ཡོང་རྒྱུའི་རེ་འདུན་དེ་ཡིན། ན་ནིང་སྔོན་མའི་སྐབས་ན་བསྟན་པའི་ཉམས་རྒུད་གསོ་བའི་སྐབས་ཡིན་ཞིང་། དོན་ངོ་མར་ལུང་རྟོགས་ཀྱི་བསྟན་པ་དེ་ཆོས་འཆད་ཉན་བཤད་སྒྲུབ་ཀྱིས་གསོ་དགོས། འོན་ཀྱང་རྟེན་གཞི་བཞེངས་བསྐྲུན་དེ་ཚོའང་མེད་ན་ཐབས་མེད་ལྟ་བུ་ཞིག་ཡིན་པས་བླ་སྤྲུལ་རྒན་གཞོན་ཚང་མ་དེ་ལ་དུས་ཚོད་ཤོར། ས་ཆ་འདི་ཚོ་ནས་བསྟན་སེལ་ཉམས་ཆག་གིས་དཀྲུག་རྐྱེན་ངན་པ་བྱུང་ནས། ཆོས་ཞིབ་ཀྱིས་བཤད་རྒྱུ་དེ་ཙམ་ཞིག་གྲུབ་མ་སོང་། ཆོས་གོ་མ་མྱོང་བའི་སྟབས་ཀྱིས་སྐབས་ཤིག་ཏུ་ཆོས་ཉན་ཤེས་མཁན་མེད་ལ། ད་ལྟ་དེའི་ཞད་ཕལ་ཆེར་མེད་ལས་ཆེ་སྙམ་གྱིན་ཡོད། མང་ཆེ་བ་ཞིག་ཆོས་བཤད་ཟེར་དུས་ཉན་སར་མི་འོང། དེ་ལ་ཞེ་སྙིང་ནས་ཆོས་དད་མེད་པ་མིན་མོད། དབང་སྐུར་ཟེར་དུས་སྒོ་སྒྲོག་ནས་ཚང་མ་ཐོན་ཡོང་བ་ཡིན། དབང་ཞུས་ན་ཕན་ཡོན་ཡོད་མོད། བླ་མ་མཚན་ཉིད་དང་ལྡན་པ་ཞིག་གིས་སློབ་མའི་མཐུན་རྐྱེན་ཚང་བ་ཞིག་ལ་དབང་ཞུ་སྐུར་བྱས་ན་སྨིན་པར་བྱེད་པ་དབང་གི་ཆུ་བོ་ཡིན། སྔ་འགྱུར་བཀའ་བབ་ཀྱི་ཆུ་བོ་ཆེན་པོ་བཞིའི་ནང་གི་གཅིག་ཡིན་པས་གལ་ཆེ། འོན་ཀྱང་དབང་ཞུ་མ་ཤེས་ན་དབང་ཐོབ་ཡོང་རྒྱུ་ཞིག་མེད། རིན་ཆེན་གསེར་སྣོད་མིན་ན་སེང་གེའི་འོ་མ་མི་ཚོགས་པ་ལྟར་དབང་ཞུ་ལུགས་དང་དབང་ལ་རབ་དང་རིམ་པ་ཅི་འདྲ་ཡོད། ཅི་འདྲ་བྱས་ནས་བསྐུར་དགོས། ཇི་ལྟར་ཞུ་དགོས། ཐོབ་ལུགས་ཇི་ལྟར་ཡིན། ཐོབ་རྒྱུ་བོ་ཅི་ཞིག་ཡོད། ཕན་ཐོགས་ཅི་ཡོད། དབང་བསྐུར་དང་དབང་ཞུས་པའི་བསྲུང་བྱ་དམ་ཚིག་དང་། ཐོབ་བྱ་འབྲས་བུ་ཐམས་ཅད་དང་པོར་ཤེས་དགོས། མདོར་ན་ཆོས་ཀྱི་ཤེས་བྱ་ཤེས་དགོས་ན། ཆོས་ཉན་དགོས། དེ་ལ་ཐོས་པ་ཟེར། ཉན་ནས་དོན་དེ་ཤེས་དགོས། དེ་ལ་བསམ་པ་ཟེར། བསམ་ནས་དེ་ཉིད་རྒྱུད་ལ་སྦྱར་ཏེ་བེད་སྤྱད་ནས་ཉམས་སུ་ལེན་དགོས། དེ་ལ་སྒོམ་པ་ཟེར། ཐོས་བསམ་སྒོམ་གསུམ་དང་གོང་དུ་བཤད་མ་ཐག་པའི་ལུང་རྟོགས་ཀྱི་བསྟན་པ་དེ་རྣམས་ངེད་ཚོ་ཁྱིམ་པ་བ་འགའ་ཞིག་གིས་ཐུབ་རྒྱུ་ཅན་ཞིག་མ་ཡིན་སྙམ་མི་དགོས། ཤཱཀྱའི་བསྟན་པར་རིགས་མི་གཙོ། རུས་མི་གཙོ་ཞེས་གསུངས་ལ། རྫོགས་ཆེན་ཉམས་ལེན་གྱི་སྐབས་སུ་ཡང་ཕོ་མོ་དང་རྒན་གཞོན་ལ་ཁྱད་པར་མེད་པར་གསུངས་ཡོད། ངས་མི་ཤེས། ངས་མི་འགྲུབ། ངས་མི་ཐོན་སྙམ་པ་དེ་ཉིད་ལ་སྒྱིད་ལུག་བདག་ཉིད་བརྙས་པའི་ལེ་ལོ་ཟེར། ད་སྔོན་ཡན་ཆོད་ཀྱང་འདི་ལྟར་ཁོ་ནར་མགོ་འཁོར་སོང་བ་ཡིན། ངས་ཐོན། ངས་འཇོན་བསམ་དགོས། དོན་ལ་དེ་ལྟརཡིན། རྒྱུ་མཚན་མི་ཡོད་ཚད་ཁ་ལག་སྤྱོད་གསུམ་གཅིག་པ་ཡིན་ཞིང་། རྒྱུ་བདེ་གཤེགས་སྙིང་པོ་ནི་རང་ལ་ཡོད། རྟེན་མི་ལུས་རིན་ཆེན་ནི་ཐོབ་ཡོད་ལུགས་འདྲ། རྐྱེན་དགེ་བའི་བཤེས་གཉེན་ཞིག་གིས་ཟིན་ན། གཅིག་གིས་འགྲུབ་པ་གཅིག་གིས་མི་འགྲུབ་པའི་རྒྱུ་གང་ཡང་མེད། ཐོས་པ་བྱེད་མི་ཤེས་རྒྱུ་ཅི་ཞིག་ཡོད་དེ་གཅིག་གིས་ཁ་ཡིས་བཤད་པ་དེ་ཉིད་གཞན་པ་རྣམས་ཀྱིས་རྣ་བས་ཉན་ནས་དེའི་དོན་ཡིད་ལ་བཟུང་བ་དེ་ཉིད་ལ་ཐོས་པ་ཟེར། དཔེར་མཚོན་ན་དལ་འབྱོར་རྙེད་དཀའ་ཡིན་ཞེས་པ་དེ་གོ་ནས་དེའི་ཚིག་བློར་ཟིན་པ་དེ་ཉིད་ཐོས་པ་ཡིན། དལ་འབྱོར་རྙེད་དཀའི་ནང་དོན་དང་རྒྱུ་མཚན་ཤེས་པ་ནི་བསམ་པ་ཡིན། དེའི་ཚིག་ཤེས་ཤིང་དོན་གོ་བ་རྐྱང་པས་མི་ཕན་པས་རྒྱུད་ལ་སྦྱར་ཏེ་བསྒོམ་དགོས། སྒོམ་ཞེས་བྱ་བ་ནི་དལ་འབྱོར་རྙེད་དཀའ་ཚུལ་དེ་ཚང་མ་དངོས་སུ་རང་གི་ལུས་ཐོག་ཏུ་ཡོང་བ་ལྟ་བུ་ཞིག་ལ་སེམས་གཏོད་ཅིང་དེ་ལས་མི་གཡེངས་པ་དེ་ཉིད་སྒོམ་པ་ཡིན། ཆོས་ཉམས་སུ་ལེན་ཞེས་པ་གཙོ་བོ་བསྒོམ་པ་ཡིན་ལ། བསྒོམ་དགོས་པ་ལས་མ་བསྒོམས་པའི་ཐོས་བསམ་དེ་ལ་ཕན་པ་ཆེར་མེད། དཔེར་ན་གོང་དུ་བཤད་པ་ལྟར་ཆུ་ལག་ཏུ་ལོན་པས་སྐོམ་མི་སེལ་བ་ལྟར་ཡིན། འགའ་རེས་སྒོམ་མི་ཤེས་པས། དེ་བས་ཕྱག་སྐོར་བའི་ཁ་གྲངས་ཤིག་བསགས་ན་དགའ་འདུག འབད་པ་བྱ་ས་ཞིག་ཀྱང་འདུག ཡང་ན་གཟུངས་སྔགས་བྱེ་བ་འགའ་རེ་འདོན་འཇོག་སྙམ་མཁན་དང་ཟེར་མཁན་ཡོད་མོད། ཁ་ཏོན་དགེ་སྦྱོར། ཕྱག་སྐོར་སྒྲིབ་སྦྱོང་བྱས་ན། སེམས་ཀྱི་བསམ་བྱ་ཞིག་གམ་དམིགས་པ་གཏད་ཡུལ་ཞིག ཡང་ན་དམིགས་མེད་མཉམ་པར་འཇོག་རྒྱུ་ཞིག ཐ་ན་ཚིག་རྗེས་དོན་དྲན་ཞིག སྦྱོར་དངོས་རྗེས་གསུམ་ཆ་མཐུན་ཙམ་ཞིག་དང་ཡང་མ་སྦྲགས་ཚེ་ཅི་བྱས་ཀྱང་གོ་ཆེན་པོ་ཞིག་མི་ཆོད། དེས་ན་ཚང་མས་ཆོས་སྦྱོང་ན་སྤུས་དག་ཅིག་བྱ་དགོས། དང་པོ་འགོ་ནས་ཡག་དགོས། སྔོན་མ་ཞིག་ལ་བླ་མ་ཞིག་ཡོན་བདག་ཅིག་གི་ཁྱིམ་ལ་ཕེབས་པས། ཡོན་བདག་ཚང་ལ་བུ་འགའ་ཞིག་ཡོད་པར་གཟིགས་ཏེ། བླ་མས་ཡོན་བདག་ལ་ཁྱེད་ཀྱི་བུ་རྣམས་ཀྱི་མིང་ལ་ཅི་ཟེར་ཞེས་དྲིས་ཚེ། ཡོན་བདག་གིས་བུ་ཆེ་བ་ལ་མཛུབ་མོ་བཙུགས་ནས་འདིའི་མིང་ལ་མགོ་རིལ་ཟེར་ཞེས་ཞུས་དུས། བླ་མ་གཅིག་འཛུམ་ནས་ཡ་ཡ་དེས་ཆོག་འདུག་གཞན་པ་རྣམས་བཤད་མི་དགོས་ཞེས་གསུངས། བུ་ཆེ་བ་ཉིད། གཡག་གདང་མགོ་མ་ལ། མིང་དེ་མ་གཏོགས་མེད་པས་གཞན་པ་རྣམས་ལ་དེ་ལས་ངན་པའི་མིང་འགའ་རེ་འཛིན་ཤས་ཆེ་སྙམ་ནས་ཟེར་མ་བཅུག་པ་ཡིན། དེ་དང་མཚུངས་པར་ལས་བྱ་བ་གང་ཡིན་ཡང་འགོ་ནས་ཡག་དགོས། ཆོས་ཞུས་ན་ཡང་འགོ་ནས་ཉེས་སོང་ན་མི་ལེགས། འགའ་རེས་བསམ་པར་ད་སྔོན་མི་སྐྱ་ཕོ་མོས་སྒོམ་ཞིག་རྒྱག་སྲོལ་ཞིག་མི་འདུག་པས། བླ་རབས་ཅི་ཞིག་འདྲ་ཞིག་དང་བླ་མ་ག་གེ་མོ་ཞིག་གི་སྐུ་རིང་ཡིན་ཡང་ཁྱིམ་པས་སྒོམ་རྒྱག་དགོས་མི་འདུག་ཅེས་རྒན་འཁོགས་མ་གོམས་པ་འགའ་རེས་ཟེར་སྲིད། བླ་རབས་དེ་འདྲ་ཞིག་གི་སྐུ་རིང་ལ་ཆོས་དྲེད་ཆོས་ཀྱིས་མ་ཐུལ། གྱོང་པོ་སྣུམ་གྱིས་མ་ཐུལ་བར་སེ་ཇོ་རེར་རང་རྒྱུད་ཐ་མལ་དུ་ལྷག་བསྡད་ཡོད་པ་དེ་བླ་མས་འདྲེན་སྐལ་ལྕགས་ཀྱུ་ལྟ་བུ་དང་སློབ་མའི་ཆོས་སྐལ་ཨ་ལོང་གཉིས་ཀ་དེ་ལྟར་མ་འཕྲད་པར་ལྷག་སོང་བ་ལོས་ཡིན། མི་རབས་མང་པོའི་མི་ཡིན་པ་ཙམ་གྱིས་ཕན་ཐོགས་མེད་། སངས་རྒྱས་འོད་སྲུང་གི་སྐུ་དུས་ཀྱི་སེར་རྒན་གོ་བོ་ད་དུང་ཡོད་པའི་སྐད་ཆ་ཡོད། རུས་པ་ཁྱུར་མིད་བྱེད་པ་ལ་ད་རུང་ཐེ་མི་ཚོམ་ཟེར་སྲོལ་ཡོད། ཨ་ལ་དེ་ཚོ་ཁ་མཚར་བརྩེས་པ་ཡིན། བྱ་བ་གང་སྒྲུབ་ན་རང་གི་རྣམ་དཔྱོད་ཀྱིས་བརྟག་དགོས། ཚབ་ཚུབ་ངང་ཐུང་ཡིན་ལ། ཚབ་ཚུབ་ངང་ཐུང་བའི་ཉེས་པའི་གཏམ་རྒྱུད་ཅིག་ཡོད། གནའ་ཞིག་ལ་ཝ་མོ་ཞིག་ཟས་ཚོལ་ནས་ཟ་རྒྱུ་ཞིག་ཨེ་རྙེད་བལྟ་ཕྱིར་སྣ་ཉུལ་བྱས་ནས་འགྲོ་སྐབས་རུས་སྦལ་ཞིག་ལ་ཐུག་སོང་ལ། རུས་སྦལ་གྱི་སེམས་སུ་འདིས་བདག་ཟ་བའི་ཉེན་ཁ་འདུག་པས་རྫུན་ཞིག་བཤད་ན་དགའ་སྙམ་ནས། ཝ་མོ་ལ་བདག་མ་གསོད་དང་བདག་གིས་ཁྱེད་ལ་ཕུན་སུམ་ཚོགས་པ་ཞིག་བྱེད་ཅེས་སྨྲས། ཝ་མོས་རུས་སྦལ་མ་བསད་ནས་ཡ་ཁྱེད་ཀྱིས་ཅི་བྱེད་རྒྱུ་ཡིན་ཞེས་སྨྲས། རུས་སྦལ་གྱིས་སེང་གེ་མ་བུ་བརྒྱད་ཉལ་ཡོད་ས་ཞིག་གི་བྲག་ཕུག་བསྟན་ནས་ཕ་གའི་བྲག་ཕུག་ནང་དུ་སོང་དང་གངས་སྦལ་མ་བུ་བརྒྱད་ཉལ་ནས་གཉིད་དུ་ཡུར་ཡོད་པས། དེར་སོང་དང་ཁྱེད་ཀྱིས་དེ་རྣམས་ཟ་ཆོག་ཅེས་རྫུན་སྨྲས། ཝ་མོས་དེ་བདེན་པར་བཟུང་ནས་འགྲམ་ཆུ་ལྡངས་ཏེ་བྲག་ཕུག་གི་ཕྱོགས་སུ་ཁ་གཏད་དེ་སོང་བས་བྲག་ཕུག་གི་སྒོ་རྩར་ཝ་གཞན་པ་ཞིག་འགྲོ་བཞིན་ཡོད་པ་དེས་སྨྲས་པ། ཉིན་པར་གངས་སྦལ་གཉིད་དུ་ཡུར་འདུག་ཟེར་བ་ཞིག་མི་སྲིད། གཅན་གཟན་གདུག་པ་ཅན་ཞིག་ཉལ་ནས་ཡོད་ན་ཐང་། ཁྱེད་རང་ནང་དུ་མ་སོང་ན་དགའ་ཞེས་སྨྲས། འོན་ཀྱང་ཝ་མོས་དེའི་ཁར་མ་ཉན་པར་ད་དུང་དེའི་སྟེང་དུ་རང་ཉིད་སྟོབས་དང་བརྩོན་འགྲུས་ཆེ་རབས། རང་ཉིད་འགྲན་མེད་ཅིག་ཡིན་རབས། གླང་པོ་ཆེ་གྱང་ཐོག་ཏུ་བབ་པ་དང་འདྲ་བར་གངས་སྦལ་མ་བུ་བརྒྱད་བདག་གིས་ཇི་ལྟར་ཟ་ལྟོས་ཞེས་རང་གིས་རང་ལ་ཆེ་བསྟོད་དང་དཔའ་སྐད་བཅས་བྲག་ཕུག་ནང་དུ་འཛུལ་སོང་བ་ཡིན། བྲག་ཕུག་ནང་ན་སེང་གེ་གཅིག་ལ་ཕྲུ་གུ་གཉིས་སྐྱེས་ཏེ་བསྡད་ཡོད་པར་སེང་གེའི་ཕྲུ་གུ་གཉིས་ཀྱིས་ཝ་མོ་བཟུང་ནས་གསོད་རྩིས་བྱས་ཚེ་སེང་གེའི་མ་དེས་བུ་གཉིས་ལ་འདི་མ་གསོད་འདི་གསད་རིན་དང་ཟ་རིན་མེད་པས་ཐོངས་ཤིག་ཅེས་སྨྲས། སེང་གེའི་ཕྲུ་གུ་གཉིས་ཀྱིས་ཀྱང་མས་བཤད་པ་ལྟར་ཝ་མོ་མ་བསད་པར་རྩེད་མོ་རྩེ་བྱེད་བྱས་ནས་གཅིག་གིས་ཝ་མོའི་རྣ་བ་བཅད། གཅིག་གིས་རྔ་མ་བཅད་ནས་ཕྱིར་མངགས་ཡོང་བ་ཡིན། ཝ་མོ་ཕྱི་རོལ་ཏུ་འུ་ཐུག་ཙམ་དུ་ཐོན་ཡོང་བས་ཝ་མོ་གཞན་པ་དེས་ཁྱོད་སྟོབས་དང་བརྩོན་འགྲུས་ཆེ། ཁྱོད་དང་འགྲན་ཡ་ཞིག་མེད་པ་ཡིན་ཞེས་མ་སྨྲས་སམ། དེ་རིང་ཁྱོད་ཅི་ཞིག་གིས་ལན་སོང་ཞེས་ངོ་མཚང་འབྲུ་དུས་ཝ་མོ་དེ་ཅི་ཡང་མི་སྨྲ་བར་ཁ་སྐྱེངས་ཏེ་འདུག་པ་མ་གཏོགས་མེད་སོང་བ་ཡིན། གཞན་ཟེར་གྱི་ཁར་བརྒྱུགས་ན་དེ་འདྲ་ཡིན་པས་གཞན་ཟེར་གྱི་ཁ་ལ་རྒྱུགས་མི་ཉན། མདོར་ན་རང་དོན་རང་གིས་དོན་གཉེར་བྱ་དགོས། སྐྱེས་བུ་གསུམ་གྱི་ལམ་གྱི་རིམ་པ་དེ་རིམ་ཞིན་དུ་སྐས་ཐོག་ནས་ཡར་ཁང་སྟེང་དུ་འགོས་པ་ལྟ་བར་བགྲོད་རྒྱུའི་དབང་དུ་བྱས་ན། དང་པོར་རང་གིས་རང་གཅེས་སུ་ཆུག ངར་འཛིན་ཆེ་བས་ངར་འཛིན་དེ་ཡར་སློང་ཡག་ཅིག་བྱེད། ང་རྒྱུ་ཆེ་བྱེད་སྦྱིན་པ་གཏོང་། མཆོད་པ་ཕུལ། རྟེན་རྩ་ཆེན་ཡོད་ས། དགེ་འདུན་འདུས་པ་མང་ས། གདན་ས་ཆོས་འཁོར་ཆེ་ས་ནས། ཚེས་བཟང་དུས་འགྱུར་ལ་གཏུགས་ནས་མཆོད་འབུལ་ཚོགས་བསགས་གྱིས་དང་དགེ་བ་ལྷག་པར་ཆེ། ང་ཚེ་རིང་ནད་མེད་ཡོང་ཐབས་ལ། དེའི་ཆེད་དུ་སྲོག་གཅོད་སྤོང་། ཚེ་བླུ་ཚེ་ཐར་བྱོས། ང་རྒྱུ་ཆེ་ཐབས་འབྱོར་བ་ཕྱུག་ཐབས་བྱེད། དེའི་ཆེད་དུ་རྐུ་མི་བྱེད། སྦྱིན་པ་ཐོངས། ཚོགས་གསོག ང་བཀྲག་དང་གཟི་མདངས་འབར་དང་། ཚེ་རབས་ཐམས་ཅད་དུ་གཟུགས་མཛེས་པར་སྨོན་ལམ་ཅི་བཏབ་ན་འགྲུབ་པ་ཞིག་དགོས་འདུག་སྙམ་ན་ཚུལ་ཁྲིམས་སྲུངས། ཡང་ང་ཀུན་ཀྱི་ཡིད་དུ་འོང་བ། གཏམ་བཤད་ན་ཚིག་བཙུན་པ། ཐམས་ཅད་ཀྱིས་ཡར་དཔེ་ཞྭ་ལ་འགྲན་རྒྱུ་ཞིག་བྱེད་དགོས་སྙམ་ན་བཟོད་པ་སྒོམ་རྒྱུ་ལ་སོགས་པ་སྟེ། མདོར་ན་མི་དགེ་བཅུ་སྤངས་ནས་དགེ་བ་བཅུ་བསྒྲུབས་ན་ཁ་ལས་ཀླུང་རྟ་དར། ཅི་བསམ་ལམ་དུ་འགྲོ་བ་ཡིན། ཚེ་འདི་ལ་སྐྱིད་པོ་ཨེ་ཡོང་སྙམ་ན་དེ་ལྟར་བྱ་དགོས། ཕྱི་མ་ལྷ་མིའི་གོ་འཕང་ཞིག་ཐོབ་དགོས་འདུག་མ་གཏོགས་ཚེ་འདི་རྐྱང་པ་བདེ་བ་ཙམ་གྱིས་མི་ཕན་སྙམ་ན། ཡང་དགེ་བཅུ་སྒྲུབས། མི་དགེ་བཅུ་སྤོངས། འཇིག་རྟེན་ཡང་དག་གི་ལྟ་བ་རྒྱུ་འབྲས་བསླུ་མེད་ལ་ཡིད་ཆེས་ནས་སྐྱབས་ཀྱི་དམ་པ་དཀོན་མཆོག་གསུམ་ལ་དད་པ་བྱོས། སྨོན་ལམ་རྣམ་པར་དག་པས་མཚམས་སྦྱར་ན་ད་གཟོད་ལྷ་མིའི་ལུས་རྟེན་ཐོབ་པ་ཡིན། སྨོན་ལམ་ལེགས་པོ་ཞིག་བཏབ་ནས་བསམ་པ་བཟང་པོ་ཞིག་བཅངས་ན། ལྷ་དང་མི་ཡི་གོ་འཕང་ལ། །བརྟེན་ན་ཐར་བ་གམ་ན་གནས། །ཞེས་གསུངས་པས་མཐོ་རིས་ཡོན་ཏན་བདུན་ལྡན་ཐོབ་པ་དང་། རྟེན་དེའི་ཐོག་ནས་མཚན་ལྡན་གྱི་བླ་མ་དམ་པ་དང་མཇལ་ན་ཐར་བ་ཡང་ཐོབ་སྲིད། སྐྱེ་བ་རྗེས་མ་ཅི་འགྱུར་ཅི་ཤེས། དེ་དུས་མི་ལུས་ཀྱང་ཨེ་ཐོབ་ཅི་ཤེས། ལོན་ན་དལ་འབྱོར་ཚང་བ་ཞིག་ཨེ་རེད་ཅི་ཤེས། ཕྱི་བཞག་བྱས་ནས་ཅི་བྱ། དེ་བས་ད་ལྟའི་ལུས་རྟེན་དལ་འབྱོར་བཅོ་བརྒྱད་ཚང་པ་འདིའི་ཐོག་དུ་ད་དུང་ཀུན་མཁྱེན་ཆེན་པོས་གསུངས་པའི་དལ་འབྱོར་གྱི་ཆོས་སོ་བཞི་པོ་ཚང་ངེས་ཅན་བྱས་ཏེ་ལུས་རྟེན་འདིའི་སྟེང་ནས་ཐར་བ་ཞིག་ཐོབ་དགོས་འདུག་སྙམ་ནས་ངེས་འབྱུང་སྐྱེར་བཅུག་སྟེ་ངེས་འབྱུང་དང་འབྲེལ་བའི་དགེ་བ་འགའ་རེ་འགྲུབ་ན་ཐེག་དམན་གྱི་ལམ་ནས་ཐར་བ་ཐོབ་སྲིད། ད་དུང་དེ་ཙམ་གྱིས་མི་ཕན་པར། ཕ་མར་གྱུར་བའི་རིགས་དྲུག་གི་སེམས་ཅན་འདི་ཐམས་ཅད་ཀྱི་དོན་ཞིག་འགྲུབ་དགོས་སྙམ་ན། འཁོར་བ་ལས་ངེས་པར་འབྱུང་བའི་བློ་སྟེ་འཁོར་བར་ཞེན་ལོག་གི་བློ་མཁྲིས་ནད་ཅན་ལ་སྣུམ་ཟན་སྟེར་བ་ལྟ་བུ་ཞིག་དང་། ཐེག་ཆེན་ཐར་བ་ཐོབ་འདོད་ཀྱི་བློ་དེ་ལྟོགས་པའི་མདུན་དུ་ཟན་བཞག་པ་ལྟ་བུ་ཞིག་དང་། དེའི་རྒྱུན་བརྟན་པ་ཞིག་བྱུང་ན་དེ་ནི་ངེས་འབྱུང་ཆེན་པོ་ཞེས་བྱ། །དེའི་སྟེང་དུ་སྙིང་རྗེས་དྲངས་པའི་བྱང་ཆུབ་ཀྱི་སེམས་ཏེ། སྙིང་རྗེའི་ཚད་ནི་སེམས་ཅན་མིག་གིས་མཐོང་ན་མིག་ནང་ནས་མཆི་མ་འོང་བ་ཞིག་གྱུར་ན། དེའི་ཐོག་ནས་བྱང་ཆུབ་མཆོག་ཏུ་སེམས་བསྐྱེད་དེ་སྙིང་རྗེས་སེམས་ཅན་ལ་དམིགས་པ་དང་ཤེས་རབ་ཀྱི་རྫོགས་བྱང་ལ་དམིགས་པའི་ཟུར་གཉིས་དང་ལྡན་པའི་སེམས་བསྐྱེད་དེ་དགེ་བའི་བཤེས་གཉེན་ནམ་རྟེན་གྱི་མདུན་ནས་སྨོན་འཇུག་གི་སྡོམ་པ་བླངས་ཤིང། བསླབ་པ་སྲུང་ནུས་ན་དེ་ནི་ཐེག་ཆེན་ཚོགས་ལམ་ཆུང་ངུའི་ལམ་སྣེ་ཟིན་ཏེ་ཐར་ལམ་མ་ནོར་བ་རྙེད་སོང་བ་ཡིན། དེ་རྙེད་པ་ཙམ་གྱིས་བསོད་ནམས་ཆེན་པོ་བསགས། སྡིག་པ་ཆེན་པོ་དག་པ་ཡིན་ཞིང་། རྨང་གཞི་དེའི་ཐོག་ནས་ཐེག་ཆེན་མདོ་སྔགས་ལམ་མྱུར་བུལ་གང་གི་ནང་དུ་ཞུགས་ཀྱང་རང་རང་གི་མོས་པ་དང་ལས་འབྲེལ་ལ་སྒོ་བསྟུན་ནས། བརྩོན་འགྲུས་དང་ལྡན་ན་ཚེ་ལུས་གཅིག་གིས་སངས་རྒྱས་ཐོབ་ཏུ་འཇུག་བསམ་ནའང་རང་ལག་ཡིན། མདོར་ན་སྙིང་རྗེ་ཆེན་པོ་རྒྱུད་ལ་ཨེ་སྐྱེ་བལྟ་རྒྱུ་ནི་གནད་ཆེན་ནང་གི་དོན་ཆེན་ཡིན་པ་སྟེ། བཅོམ་ལྡན་འདས་ཀྱི་མདོ་ལས། བྱང་ཆུབ་སེམས་དཔས་ཆོས་མང་པོ་ལ་བསླབ་པར་མི་བྱ། གཅིག་ལ་བསླབ་པར་བྱ། གཅིག་གང་ཞེ་ན། སྙིང་རྗེ་ཆེན་པོའོ་ཞེས་གསུངས་ལ། མི་ཞིག་ལ་དཔེར་མཚོན་ན་སྙིང་རྗེས་དྲངས་པའི་བྱང་ཆུབ་ཀྱི་སེམས་འདི་ཡན་ལག་གི་དྭངས་མ་མགོ་ལྟ་བུ་ཡིན། བྱང་ཆུབ་ཀྱི་སེམས་མེད་པའི་ཆོས་གང་བསྒྲུབས་ཀྱང་མགོ་མེད་པའི་ལུས་ལྟ་བུ་ཞིག་སྟེ། མགོ་མེད་པའི་ལུས་དེ་ཇི་ལྟར་བཟང་ཡང་རོ་ཡིན་པས་མི་གསོན་པོའི་གོ་མི་ཆོད། དེས་ན་དཔལ་ལྡན་ཟླ་བ་གྲགས་པས། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུ་འདོད་གྱུར་པ། །དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །ཞེས་གསུངས་སོ། །བཅོམ་ལྡན་འདས་ཀྱི་མི་གནས་པའི་མྱ་ངན་ལས་འདས་པའི་གོ་འཕང་མངོན་དུ་མཛད་པའི་རྒྱུ་དེ་སྙིང་རྗེ་ཆེན་པོ་ཡིན་ལ། དེ་དཔེར་བཞག་ན་ལོ་ཏོག་ཅིག་འདེབས་པའི་དབང་དུ་བྱས་ན་ཐོག་མར་ས་བོན་གལ་ཆེ། བར་དུ་ཆུ་གལ་ཆེ། ཐ་མར་སྨིན་པ་གལ་ཆེ་བ་བཞིན་སངས་རྒྱས་ཀྱི་ལོ་ཏོག་ལ་ཡང་ཐོག་མཐའ་བར་གསུམ་དུ་སྙིང་རྗེ་གལ་ཆེ་བར་གསུངས་ཡོད། དེ་ལྟར་བཤད་ན། འུ་ཅག་གིས་དམ་པའི་ཆོས་འདི་ཅི་ཞིག་ལ་ཕན་བྱེད་ཡིན་པ་དང་། ཆོས་སྒྲུབ་པའི་སྔོན་འགྲོའི་ཆ་རྐྱེན་གྱི་ཇི་ལྟར་དགོས། སྐྱེས་བུ་གསུམ་གྱི་ལམ་གྱི་རིམ་པའི་སྐོར་རགས་རིམ་ཕྱོགས་སྟོན་ཙམ་ཞིག་འགོ་ནས་གླེང་སྟེ། སྐབས་སུ་བབ་པ་གང་ཞིག་གསན་པར་བྱ་བའི་ཆོས་ཀྱི་རིམ་པ་ནི། རྣམ་དག་བདེ་ཆེན་ཞིང་གི་སྨོན་ལམ་མཁས་གྲུབ་ར་གཱ་ཨ་སྱས་མཛད་པ་འདི་ཉིད་ཡིན་ཞིང་། འདིའི་གཞུང་གི་བཤད་པ་མ་བྱས་པའི་སྔོན་དུ་ཆོས་རའི་ནང་དུ་ཆོས་ཞུ་ལུགས་ཇི་ལྟར་བྱེད་དགོས་རགས་རིམ་ཞིག་བཤད་ན། ཆོས་ཞུ་དུས་སེམས་ཀྱི་ཀུན་སློང་དང་ལུས་ངག་གི་ཀུན་སྤྱོད་གཉིས་ཀ་བཟང་པོ་ཡིན་ན་དེའི་སྟེང་དུ་མི་མཐུད་དུ་གནས་རྒྱུ་དང་། ཀུན་སློང་ཡག་པོ་མེད་ན་བཟང་པོའི་ཕྱོགས་སུ་བཅོས་དགོས། ཀུན་སློང་བཅོས་ནས་སྣོད་ལེགས་པོ་ཞིག་གི་ནང་དུ་བཅུད་ལེགས་པོ་ཞིག་བླུག་ལ། དང་པོ་ཀུན་སློང་བཅོས་པ་དེ་ཉིད་སྣོད་ངོ་བཀྲུ་བ་ལྟ་བུ་ཞིག་ཡིན། སྣོད་བཙོག་པ་མི་གཙང་བའི་ནང་དུ་བཅུད་ཁ་ཟས་བཟང་པོ་ཇི་ལྟ་བུ་ཞིག་བླུགས་ཀྱང་སྣོད་ཀྱི་སྐྱོན་གྱིས་བརྫད་འགྲོ་བ་དང་མཚུངས། ཀུན་སློང་ངན་པ་དེ་གང་གང་ཡིན་ཟེར་ན། ལེགས་སྨོན་དང་། འཇིགས་སྐྱོབས་ཀྱི་ཀུན་སློང་སྟེ། འདི་ཤིན་ཏུ་བཟང་འདུག་ཆོས་པ་ཞེས་པ་དེ་འདི་རེད་འདུག་ཅེས་གཞན་གྱིས་བསམ་པའི་ཆེད་དུ་ཆོས་ཞུ་ཁུལ་བྱེད་པ་དེ་ཉིད་ལ་ལེགས་སྨོན་ཞེས་བྱ། ཡང་རྒྱལ་པོས་ཆད་པ་ལ་སོགས་པ་ལས་གཟུར་བའི་ཆེད་དུ་ཆོས་པ་མིན་ན་ཡིན་མདོག་བྱེད་པ་དེ་ཉིད་ལ་འཇིགས་སྐྱོབ་ཅེས་བྱ། ཡང་དེ་མིན་ན་ཡང་། རྙེད་བཀུར་གྲགས་འདོད་ཀྱི་ཆེད་དུ་འདི་གཅིག་ཞུས་ཏེ། རྒྱུན་ཞིག་བླངས་ནས་རྗེས་མར་ཕར་ལ་བཤད་ཨེ་ཤེས་ལྟ་དང་། རྒྱུ་ལོན་པ་ལ་མ་ཕན་ནའང་སྙན་གྲགས་སྒྲུབ་བྱེད་ཆོག་འདུག་བསམས་ནས་ཉན་པ་དེ་རྣམས་སྤང་བྱའི་ཀུན་སློང་གི་ཕྱོགས་གཏོགས་ཡིན། དེ་དག་ཐམས་ཅད་སྤངས་ནས་གཞན་ལ་ཕན་པའི་ཀུན་སློང་དང་མི་འབྲལ་བའི་ཐོག་ནས་དམ་པ་གསུམ་གྱི་རྩིས་ཟིན་པ་ཞིག་གིས་ཆོས་ཉན་དགོས། ཐོག་མར་སེམས་བསྐྱེད་ཡིན། ངའི་ཆོས་ཉན་པ་འདི་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ་ཉན་པ་ཡིན་སྙམ་པའི་ཀུན་སློང་དང་མ་བྲལ་བའི་ཐོག་ནས། དངོས་གཞི་དམིགས་མེད་ནི། དབུ་ཕྱག་རྫོགས་གསུམ་གྱི་ལྟ་བས་རྩིས་མ་ཟིན་ཀྱང་ཆོས་ཐམས་ཅད་སྟོང་ཞིང་བདག་མེད་པར་གོ་བའི་ཐོག་ནས་སྒོ་གསུམ་ཆོས་ལ་ཕྱོགས་ནས་ཉན་རྒྱུ། མཇུག་བསྔོ་བ་སྟེ་དགེ་བ་འདི་དང་བཅས་པའི་དུས་གསུམ་བསགས་དང་གསོག་འགྱུར་གྱི་དགེ་རྩ་ཐམས་ཅད་བྱང་ཆེན་རྒྱ་མཚོ་ཆེན་པོར་ཕྱོགས་གཅིག་ཏུ་བསྡོམས་ཏེ་སེམས་ཅན་ཐམས་ཅད་ལ་བསྔོས་པ་ཡིན་སྙམ་པའི་དམ་པ་གསུམ་དེ་དང་མ་བྲལ་བ་ཞིག་དགོས། དམ་པ་གསུམ་པོ་ཚད་ལྡན་ཞིག་ཏུ་འགྱུར་ཐུབ་སོང་ན་ཆོས་ཆེ་ཆུང་གང་བསྒྲུབས་ཀྱང་ཐེག་ཆེན་ཐར་བ་ཆ་མཐུན་གྱི་དགེ་བ་འམ་སངས་རྒྱས་ཐོབ་པའི་རྒྱུར་གྱུར་པ་ཡིན། དམ་པ་གསུམ་གྱིས་རྩིས་མ་ཟིན་ན་ལྟར་སྣང་ལ་ཆེན་པོ་ཞིག་བྱས་ཡོད་བསམས་ན་ཡང་སངས་རྒྱས་ཐོབ་པའི་ཉེ་རྒྱུ་རུ་འགྱུར་མི་ཐུབ། ཀུན་སྤྱོད་ནི་མ་གུས་པའི་རྣམ་འགྱུར་སྤངས་ཏེ་གུས་ཤིང་དང་བས་ཆོས་ཉན་དགོས། དེ་ལྟར་ཆོས་ཞུ་ལུགས་ཤེས་པའི་ཐོག་ནས་རང་རེའི་གང་འཆད་ཉན་བྱེད་པའི་ཆོས་གྱི་རིམ་པ་བདེ་ཆེན་ཞིང་གི་སྨོན་ལམ་ཡིན་ཞིང་། འདི་མཛད་པ་པོ་སུས་མཛད། ལུང་གང་ལས་བཏུས། ཕྱོགས་གང་དུ་གཏོགས། དབུ་ནས་ཞབས་སུ་བསྡུས་པའི་དོན་གང་ཡིན་དང་། དགོས་ཆེད་སུ་ཞིག་གི་དོན་དུ་མཛད། འདིའི་བརྗོད་བྱ། དགོས་པ། ཉིང་དགོས། འབྲེལ་བ་ལ་སོགས་པ་བཤད་ན། མཛད་པ་པོ་སུས་མཛད་ཟེར་ན། མཛད་པ་པོ་ཐོག་མར་ཞལ་བྱང་གི་སྟེང་དུ་འཁོད་ཡོད་པའི་མཁས་གྲུབ་ར་གཱ་ཨ་སྱས་མཛད་པ་ཡིན་ལ། མཁས་གྲུབ་ར་གཱ་ཨ་སྱ་ཞེས་པ་ནི་མཁས་གྲུབ་ཀརྨ་ཆགས་མེད་ཅེས། བཀའ་རྙིང་རིས་སུ་མ་ཆད་པའི་མཁས་ཤིང་གྲུབ་པ་བརྙེས་པའི་བསྟན་འཛིན་གྱི་སྐྱེས་བུ་ཆེན་པོ་ཡོངས་ལ་གྲགས་པ་དེ་ཉིད་ཡིན། སྨོན་ལམ་འདི་ཁུངས་དང་ལུང་གང་ལས་བཏུས་པ་ཡིན་ཞེ་ན། འོད་མདོ་དང་། འཆི་མེད་རྔ་སྒྲ། སྙིང་རྗེ་པདྨ་དཀར་པོའི་མདོ་ལ་སོགས་པ་ལས་བཏུས་ཤིང། མདོ་དེ་དག་ལས་བཏུས་པ་དང་མདོ་རྒྱུད་ཀུན་དང་མཐུན་ཞིང་མདོ་རྒྱུད་དེ་དག་གི་ཕྱོགས་སུ་གཏོགས་པ་པ་ཞིག་ཡིན། འདིའི་ཁྱད་ཆོས་ཐུན་མོང་མ་ཡིན་པ་ཅི་ཞིག་ཡིན་ཞེ་ན། གོ་བདེ་ཞིང་ཚིག་ཟིན་སླ་བ་ཡིན་པར་མ་ཟད་ཐུགས་བསྐྱེད་སྨོན་ལམ་གྱི་དབང་གིས་འགྲོ་དོན་རྒྱ་ཆེན་པོ་ཅན་ཞིག་ཡིན། སྤྱིར་བསྟན་བཅོས་རྩོམ་པ་དང་བཤད་པའི་སྐབས་སུ་ཚིག་གི་སྡེབ་སྦྱོར་སྙན་ཆ་དང་མཛེས་ཆ་གཙོ་བོར་རྩལ་འདོན་བྱས་ནས་གཞུང་མཛེས་པར་བྱེད་པ་ཞིག་དང་། ཕན་ཐོགས་དང་སེམས་འདུལ་བ་གཙོ་བོར་ལྷུར་ལེན་བྱེད་པའི་ཚུལ་ལུགས་རྣམ་པ་གཉིས་ཡོད་པའི་ནང་གི་འདི་ཚིག་གོ་བདེ་ཞིང་དོན་གཟུང་བདེ་བ། ཉམས་ལེན་རང་རྒྱུད་ལ་སྦྱོར་བར་གདུལ་བྱའི་སེམས་རྒྱུད་ལ་ཕན་པ་གཙོ་བོར་བཟུང་ནས་གསུངས་པ་ཞིག་ཡིན། དབུ་ནས་ཞབས་སུ་བསྡུས་པའི་དོན་ནི་བདེ་བ་ཅན་དུ་སྐྱེ་བའི་རྒྱུ་བཞིའི་ཆིངས་ཀྱིས་བཅིངས་པའི་ཡན་ལག་བདུན་དང་འབྲེལ་བའི་ཚོགས་བསགས་སྒྲིབ་སྦྱོང་གི་སྐོར་དང་། རྟེན་དང་བརྟེན་པའི་ཞིང་བཀོད་སྨོན་ལམ་དང་བཅས་པ་རྣམས་ཡིན་ཞིང་། །དེ་ཚོ་བརྗོད་བྱ་ཡང་ཡིན། འདིའི་དགོས་པ་ནི་འདི་དང་འཕྲད་པའི་སོ་སྐྱེས་ཐ་མལ་པ་ཞིག་ཡིན་ཡང་དད་དང་མོས་པས་ཀུན་ནས་བསླངས་ཏེ་སྤང་བླང་གི་གནས་ཐམས་ཅད་ཕྱིན་ཅི་མ་ལོག་པར་འདོར་ལེན་བྱས་ཏེ་བདེ་བ་ཅན་དུ་སྐྱེ་བའི་རྒྱུ་བསྒྲུབས་ནས་བདེ་བ་ཅན་གྱི་ཞིང་ཁམས་སུ་སྐྱེས་ཤིང་ཞིང་ཁམས་དེ་ནས་སངས་རྒྱས་འཁོར་བཅས་ཀྱི་མདུན་ནས་ཆོས་དངོས་སུ་མཉན་ཏེ་སངས་རྒྱས་པ་དེ་ཡིན། འདི་ལ་ཉིང་དགོས་སམ་དགོས་པའི་དགོས་པ་ཅི་ཞིག་ཡོད་ཅེ་ན། མཐར་ཐུག་སེམས་ཅན་ཐམས་ཅད་འཁོར་བའི་དོང་ནས་འདོན་རྒྱུ། ཞིང་སྨོན་རང་གི་ནང་དུ་ཡང་། ཁམས་གསུམ་འཁོར་བ་དོང་ནས་སྤྲུག་པར་ཤོག་ཅེས་གསུངས་པ་ལྟར་ཡིན། འདིའི་ཚིག་དོན་གཉིས་ཀ་འབྲེལ་ནས་བརྗོད་བྱ་བསྟན་པ་དེ་ལ་བརྒྱུད་དེ་མཐར་ཐུག་སེམས་ཅན་སངས་རྒྱས་སུ་སྦྱོར་བ་འབྲེལ་བ་སྟེ། དེ་ལྟ་བུ་དགོས་འབྲེལ་ཡན་ལག་བཞི་དང་ལྡན་པའི་སྨོན་ལམ་གྱི་ཞིང་འཆད་པ་ལ་ཆིངས་ཆེན་པོ་རྣམ་པ་གསུམ་གྱིས་བཅིངས་པའི་བསྟན་བཅོས་འཆད་ཐབས་སྤྱི་ཁྱབ་ཀྱི་ལུགས་ལྟར་དུ་བྱས་ན།

ཐོག་མར་དགེ་བ་ཀླད་ཀྱི་དོན་གསུམ་ལས། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ། དང་པོ་ཐོག་མར་དགེ་བ་ཀླད་ཀྱི་དོན་ལ། མཚན་སྨོས་པ། མཚན་དོན་འགྲེལ་པ་གཉིས་ལས།

དང་པོ་མཚན་དོན།

དབུའི་ཞལ་བྱང་ན་འཁོད་ཡོད་པ་འདི་ཉིད་མཛད་པ་པོའི་མཚན་དང་བཅས་པ་སྟེ། ཚང་མས་དབུའི་ཞལ་བྱང་གི་ངོར་ལྟོས་དང་། མཚན་སྨོས་པ། མཁས་གྲུབ་ར་གཱ་ཨ་སྱས་མཛད་པའི་རྣམ་དག་བདེ་ཆེན་ཞིང་གི་སྨོན་ལམ་བཞུགས་སོ། །ཞེས་པའོ། མཚན་དོན་འགྲེལ་བ། གཉིས་པ་མཚན་དོན་འགྲེལ་ན་མཛད་པ་པོའི་མཚན་གོང་ནས་ཞུས་པ་ལྟར་ཡིན་ལ། རྣམ་དག་ཅེས་གསུངས་པའི་དོན་གང་ཡིན་ཞེ་ན། སྤྱིར་དག་དང་མ་དག་ཅེས་པ་དེ་ཉིད་གདུལ་བྱའི་སེམས་ཅན་ལས་དག་དང་མ་དག་གི་སྣང་ངོར་ཤར་ལུགས་ཤིག་ཡིན་ཞིང་། སྟོན་པ་ཤཱཀྱ་ཐུབ་པ་ཞལ་བཞུགས་ཡོད་སྐབས་སུ་ཚངས་པ་རལ་བ་ཅན་གྱིས་ཁྱེད་ཀྱི་ཞིང་དེ་དག་པ་ཡིན་འདུག་ཅེས་ཞུས་པ་དང་། སློབ་མ་གཞན་དག་འགའ་རེས་མ་དག་པ་ཡིན་ཞེས་རྩོད་པར་སངས་རྒྱས་ཀྱིས་ལས་དག་པའི་སྣང་ངོར་དག་པ་ཡིན་ཞེས་གསུངས་ཏེ། ཉི་མ་བདུན་ཙམ་ལ་ཐམས་ཅད་ཀྱི་མཐུན་སྣང་ལ་ཚངས་པ་རལ་བ་ཅན་གྱི་མཐོང་སྣང་ལྟར་དག་པའི་ཞིང་ཁམས། རང་རེས་མཐོང་སྣང་ལ་ཤར་གྱིན་འདུག་པའི་ས་རྡོ། བྱེ་ཐང་། ངམ་གྲོག གཅོང་རོང་། གཡང་ས། ཚེར་མ་ལ་སོགས་པ་འདི་དག་མེད་པའི་དག་པའི་ཞིང་ཁམས་ཤིག་ཏུ་བྱིན་གྱིས་བརླབས་པའི་ལོ་རྒྱུས་ཡོད། དེ་ལྟར་ཡིན་ཕྱིར་འདུལ་བྱེད་སྟོན་པ་གཅིག་གི་གདུལ་བྱའི་ཞིང་ཁམས་བྱེ་བ་ཁྲག་ཁྲིག་བརྒྱ་ལ་སོགས་ལ། སོ་སྐྱེས་ཐ་མལ་བའི་མཐུན་སྣང་ལ་མ་དག་པ་ལྟར་སྣང་བའི་ཞིང་ཁམས་ཡོད་ཀྱང་དེ་འདྲ་ཡང་མ་ཡིན་པར་བདེ་བ་ཅན་གྱི་ཞིང་ཁམས་སུ་སངས་རྒྱས་འོད་དཔག་མེད་པའི་སྔོན་གྱི་ཐུགས་བསྐྱེད་དང་སྨོན་ལམ་ཀྱི་དབང་གིས་སྟོན་འཁོར་གདུལ་བྱ་ཕྲིན་ལས་སྤྱོད་ཡུལ་སྣོད་ཀྱི་ཞིང་ཁམས་དང་བཅས་པ་རྣམ་པར་དག་པ། གཙང་ཞིང་གཙང་མར་གྱུར་པའི་རྣམ་པར་དག་པ་ཡིན་པས་ན་རྣམ་དག་ཅེས་གསུངས། བདེ་ཆེན་ཞིང་ཞེས་པ་ནི། ཞིང་ཁམས་དེ་ལ་སྐྱེ་བ་བླངས་ནས་བཟུང་བདེ་བ་མ་གཏོགས་མེད་ཅིང་། བདེ་བ་དེ་ཡང་ཟག་བཅས་ཀྱི་འགྱུར་བདེ་ཆུང་ཆུང་མ་ཡིན་པར་ཟག་མེད་ནང་གི་བདེ་བ་ཆེན་པོ་ཏིང་ངེ་འཛིན་གྱི་མཐུ་ལས་བྱུང་བའི་དགའ་བདེ་བརྗོད་མི་ཤེས་པ་དང་ལྡན་པའི་བདེ་བ་ཆེན་པོ་ཡིན་པས་ན་བདེ་ཆེན་ཞེས་གསུངས་པ་ཡིན། དེ་ལྟ་བུ་བདེ་བ་བརྙེས་པ་དེ་གང་དུ་ཡོད་ན་ཞིང་ཁམས་དེ་ན་མཆིས་པའི་བྱང་ཆུབ་སེམས་དཔའ་རྣམས་ལ་ལྡན་པས་ན་རྟེན་དང་བརྟེན་པ་འབྲེལ་བ་དང་། རྟེན་སྣོད་ཀྱི་ཞིང་ཁམས་གཙོ་བོར་སྨོས་པའི་ཆ་ནས་ཞིང་ཞེས་གསུངས་པ་ཡིན། གི་ཞེས་པ་ནི་འབྲེལ་སྒྲ་སྟེ། འདིའི་སྨོན་ལམ་འདི་ཅིའི་སྨོན་ལམ་ཡིན་ཟེར་ན་བདེ་ཆེན་ཞིང་གི་སྨོན་ལམ་ཡིན་པ་དེ་ཉིད་གི་ཞེས་པའི་ཡི་གེ་འདིས་བསྟན་ཡོད། སྨོན་ལམ་ཞེས་པ་ནི་སྨོན་པ་ལམ་དུ་བྱས་ནས་སྨོན་བྱའི་དོན་དེ་འགྲུབ་པར་བྱེད་པས་ན་སྨོན་ལམ། བཞུགས་སོ་ཞེས་པ་ནི། དེ་ལྟ་བུའི་སྨོན་ལམ་དེ་འདི་ན་ཡོད་ཅེས་བརྡ་བསྟན་པའམ་མཚན་བྱང་གི་རྟགས་ཀྱིས་མཚོན་པར་བྱེད་པ་ཞིག་ཡིན། མཚན་བཏགས་པ་ལ་དགོས་པ་ཅི་ཡོད་ཅེ་ན། འཕགས་པ་ཀླུ་སྒྲུབ་ཀྱིས། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་མགོན་པོ་ཐམས་མཁས་པས། །ཆོས་རྣམས་མིང་དུ་འདོགས་པར་མཛད། །ཅེས་གསུངས་ཏེ། འཇིག་རྟེན་གྱི་ཁམས་ཀྱི་ཆོས་ཐམས་ཅད་ལ་མིང་ཞིག་གཏན་ནས་མེད་ན་ཕན་ཚུན་ལ་གོ་བརྡ་སྤྲོད་བྱེད་ཅིག་མེད། ཁྱོད་དང་ང་ཟེར་བ་ཞིག་མེད། འགྲོ་འདུག་ཟ་འཐུང་ལ་སོགས་པ་དོན་དང་བྱ་བ་ལ་སོགས་པ་ལ་མིང་གཅིག་ཀྱང་མེད་ན་འཇིག་རྟེན་ཐམས་ཅད་རྨོངས་པ་ཡིན་པ་སྟེ། ལྐུགས་པ་དང་ལྐུགས་པ་ཐུག་སོང་བ་ལྟ་བུ་ཞིག་ལོས་ཡིན། དེ་ལྟ་བས་ན་འཇིག་རྟེན་ལས་འདས་པའི་དོན་དེ་མིང་གི་མཚོན་བརྗོད་ལས་འདས་པ་ཡིན་ཡང་དེ་ཡང་འདས་པ་ཡིན་ཞེས་པའི་ཚིག་ཅིག་གིས་མཚོན་དགོས་པས་མིང་དང་བརྡ་ལ་མ་བརྟེན་པར་བརྗོད་ཐབས་མེད། འཇིག་རྟེན་གྱི་ལེགས་པའི་ཆ་ཐམས་ཅད་ནི་སངས་རྒྱས་ཀྱི་མཐུ་ལས་བྱུང་བ་ཡིན་པས་མིང་ཚིག་ཡི་གེ་བརྡ་ཐམས་ཅད་མགོན་པོ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་མཛད་པ་ཡིན། དེས་ན་སྤྱིར་བསྟན་བཅོས་ཀྱི་མཚན་སྨོས་པ་ལ་དགོས་པ་ཇི་ལྟར་ཡོད་ཅེ་ན། གང་ཟག་དབང་པོ་རབ་འབྲིང་ཐ་གསུམ་དང་སྦྱར་ན། གང་ཟག་དབང་པོ་རབ་ཀྱིས་མཚན་མཐོང་བ་ཙམ་གྱིས་མཚན་དེ་ལྡན་གྱི་གཞུང་དེའི་དབུ་ཞབས་ཀྱི་དོན་ཐམས་ཅད་ཁོང་དུ་ཆུད་པའི་དགོས་པ། དབང་པོ་འབྲིང་གིས་མཚན་མཐོང་ནས་དེའི་ནང་དོན་དང་བརྗོད་བྱ་ཆེ་ལོང་ངམ་རགས་རིམ་ཙམ་ཞིག་ཚོད་དཔག་གིས་ཤེས་པ། མ་མཐའ་ཡང་ཆོས་འདི་ཕྱོགས་གང་དུ་གཏོགས་ཙམ་ཞིག་ཤེས་པ་ཡིན། གང་ཟག་དབང་པོ་ཐ་མ་ཡིན་ཡང་མཚན་མཐོང་བས་གཞན་དང་མི་ནོར་བར་གླེགས་བམ་བཙལ་སླ་བའི་དགོས་པ་ཡན་ཆད་ཡོད། དེས་ན་འདིའི་མཚན་གྱིས་བསྟན་བྱའི་གཙོ་བོ་བདེ་ཆེན་ཞིང་ཡིན་ཞིང་། བདེ་བ་ཅན་གྱི་ཞིང་འདི་ཞིང་ཁམས་གཞན་དང་མི་འདྲ་བའི་བདེ་བ་ཆེ་བའི་རྒྱུ་མཚན་ཅི་ཡིན་ཟེར་ན། འོད་མདོའི་དགོངས་པ་ལྟར་ན་སངས་རྒྱས་འོད་དཔག་མེད་སྔོན་སློབ་པ་ལམ་གྱི་གནས་སྐབས་སུ་དགེ་སློང་ཆོས་ཀྱི་འབྱུང་གནས་ཀྱི་སྐུའི་སྐྱེ་བ་བཞེས་ཚེ་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་རིན་པོ་ཆེས་ཐུགས་རྒྱུད་བསྐུལ་ཏེ། ཞིང་ཁམས་རྨད་དུ་བྱུང་བ་ཞིག་ཡོངས་སུ་གཟུང་བའི་ཆེད་དུ་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོའི་སྤྱན་སྔར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་ཡོན་ཏན་ཐམས་ཅད་ཀྱི་བཀོད་པ་དང་། དེ་སྒྲུབ་བྱེད་ཀྱི་རྒྱུ་དང་བཅས་པ་ལོ་བྱེ་བ་གཅིག་གི་ཡུན་དུ་གསན་ཞིང་། ཁྱད་པར་དུ་འཕགས་པའི་ཞིང་ཁམས་དེ་རྣམས་ཀྱི་རྒྱ་ཁྱོན་དང་། དེའི་རང་བཞིན་འཁོར་ལོངས་སྤྱོད་ཀྱི་བྱེ་བྲག་ཟད་མི་ཤེས་པ་ཐམས་ཅད་ལྡན་པའི་སངས་རྒྱས་ཀྱི་ཞིང་ཁྱད་འཕགས་ཤིག་ལ་ཐུགས་རྩེ་གཅིག་ཏུ་གཏད་དེ་སེམས་ཤིང་བཞུགས་པ་ཡིན། དེ་ལྟར་བསྐལ་བ་བྱེ་བ་ཕྲག་བསམ་གྱིས་མི་ཁྱབ་པ་ཞིག་གི་རིང་ལ་ཐོས་པ་དང་བསམ་པ་མཛད་མཐར་ད་གཟོད་དེ་བཞིན་གཤེགས་པའི་སྤྱན་སྔར་དེ་འདྲའི་ཞིང་ཁམས་ཤིག་བཟུང་རྒྱུའི་སྨོན་ལམ་བཏབ་པ་ཡིན། །སྙིང་རྗེ་པདྨ་དཀར་པོའི་མདོའི་དགོངས་པ་ལྟར་ན། སངས་རྒྱས་འོད་དཔག་མེད་པ་འཁོར་སྒྱུར་གཙུག་གི་མུ་ཁྱུད་ཀྱི་སྐྱེ་བ་བཞེས་པའི་ཚེ་ན་རྒྱལ་པོ་དེས་ལོ་བདུན་ལ་གཡེང་བ་སྤངས་ནས་ནང་དུ་ཡང་དག་པར་འཇོག་པའི་བསམ་གཏན་ལ་གནས་པའི་སྐབས་སུ། བྲམ་ཟེ་རྒྱ་མཚོའི་རྡུལ་གྱི་སྲས་དེ་བཞིན་གཤེགས་པ་རིན་ཆེན་སྙིང་པོའི་མདུན་དུ་ཞིང་ཁམས་གཟུང་བའི་སྨོན་ལམ་རྒྱ་ཆེན་པོ་བཏབ་ལ། སངས་རྒྱས་དེའི་བྱིན་རླབས་ཀྱིས་ཕྱོགས་བཅུའི་ཕྱོགས་རེ་རེ་ཡང་སངས་རྒྱས་ཀྱི་ཞིང་འཇིག་རྟེན་གྱི་ཁམས་བྱེ་བ་ཕྲག་ས་ཡ་སྟོང་གི་རྡུལ་སྙེད་ཡོན་ཏན་བཀོད་པའི་རྒྱན་ཐམས་ཅད་མཐོང་ཞིང་གཟིགས་ནས་རང་ཉིད་གང་དུ་འཚང་རྒྱ་བར་འགྱུར་བའི་སངས་རྒྱས་ཀྱི་ཞིང་དེ་ཡང་ཡོན་ཏན་ཕུན་སུམ་ཚོགས་པར་འགྱུར་བར་སྨོན་ལམ་གྱི་ཚུལ་ལ་མཁས་པར་མཛད་དེ་དེ་བཞིན་གཤེགས་པའི་ཞལ་སྔ་ནས་སྨོན་ལམ་རྒྱ་ཆེར་མཛད་ཚུལ་གསུངས་ཡོད། སངས་རྒྱས་དང་ས་ཆེན་པོ་ལ་གནས་པའི་བྱང་ཆུབ་སེམས་དཔའི་མཛད་པ་དང་སྐྱེས་རབས་ནི་ཐ་མལ་སྐྱེ་བོས་བློ་ཡུལ་ལས་འདས་པ་ཡིན། གང་ལྟར་ཡང་འོད་མདོ་དང་སྙིང་རྗེ་པད་དཀར་གྱི་མདོའི་དགོངས་དོན་ལྟར་བསྐལ་བ་བྱེ་བ་ཕྲག་བསམ་ཡུལ་ལས་འདས་པའི་ཕྱིན་དྲུག་གི་སྤྱོད་པ་ལ་སོགས་པ་རྫོགས་སྨིན་སྦྱངས་པ་རྒྱ་མཚོ་ལྟ་བུ་ཞིག་མཛད། སླར་དེ་ལྟ་བུ་མཛད་པ་དེ་སྙེད་ཀྱང་ཡང་ཞིང་ཁམས་མང་པོའི་རྡུལ་སྙེད་ཀྱི་བསྐལ་བའི་བར་དུ་ཞིང་ཁམས་སོ་སོའི་རྡུལ་གྲངས་དང་མཉམ་པར་བསྐྱེད་རབས་དང་། དེའི་ཐོག་ཏུ་གསན་བསམ་སྦྱོང་བ་མང་པོ་ཞིག་མཛད་དེ། མཐར་ཐུགས་བསྐྱེད་སྨོན་ལམ་རྣམ་པར་དག་པས་ཀུན་ལས་ཀྱང་ཁྱད་པར་དུ་འཕགས་པའི་ཞིང་ཁམས་འདི་ལྟ་བུ་བཟུང་བ་དང་། རྒྱུད་ཀྱི་དགོངས་དོན་ལྟར་ན། ཆོས་སྐུ་སྤྲོས་པ་དང་བྲལ་བའི་ཆོས་དབྱིངས་ཆེན་པོའི་ངང་དེ་ལས་མ་གཡོས་བཞིན་དུ་ཡེ་ཤེས་ལྔ་ཡི་རང་མདངས་རིགས་ལྔའི་སངས་རྒྱས་སུ་ཤར་བ་ལས་སོ་སོར་རྟོག་པའི་ཡེ་ཤེས་ཀྱི་རང་མདངས་ནུབ་སྣང་བ་མཐའ་ཡས་པདྨའི་རིགས་ཀྱི་གཙོ་བོར་ཤར་ཞིང་དེ་ཉིད་གང་འདུལ་གདུལ་བྱའི་སྣང་ངོར་སྤྲུལ་བའི་གཟུགས་སྐུར་ཤར་བ་ལ་སངས་རྒྱས་འོད་དཔག་མེད་ཅེས་བྱ། ཞེས་གསུངས་སོ། མདོར་ན་སངས་རྒྱས་འདི་ཉིད་གཞན་ལས་ཁྱད་པར་དུ་འཕགས་པའི་ཐུགས་བསྐྱེད་དང་སྨོན་ལམ་གྱི་མངའ་བདག་ཡིན་པས་དེས་ཞིང་ཁམས་བཟུང་བའི་སྨོན་ལམ་རྒྱ་ཆེན་པོ་བཏབ་པའི་མཐུ་ཡིས་ཞིང་ཁམས་དེ་གཞན་ལས་ཁྱད་པར་དུ་འཕགས་པ་ཞིག་ཡིན། དེ་ཡན་ཆད་ཀྱིས་ཐོག་མར་དགེ་བ་ཀླད་ཀྱི་དོན་མཚན་སྨོས་པ་དང་མཚན་དོན་འགྲེལ་བ་ལ་སོགས་པ་སོང་ནས། ད་བར་དུ་དགེ་བ་གཞུང་གི་དོན་ཡིན་ལ།

གཉིས་པ་བར་དུ་དགེ་བ་གཞུང་གི་དོན།

གཉིས་པ་བར་དུ་དགེ་བ་གཞུང་གི་དོན་ལ། འཇུག་པའི་ཡན་ལག་དང་། གཞུང་དོན་སྨོན་ལམ་དངོས་གཉིས་ལས། དང་པོ་ལའང་འདི་ཇི་ལྟར་འཆང་ཞིང་ཐུགས་དམ་དུ་བྱ་བ་དང་། འདིའི་ཕན་ཡོན་གདམས་པར་འཛིན་པ་གཉིས་ལས།

དང་པོ་སྨོན་ལམ་འདི་ཉིད་ཇི་ལྟར་འཆང་ཞིང་ཐུགས་དམ་དུ་བྱ་བ།

དང་པོ་སྨོན་ལམ་འདི་ཉིད་ཇི་ལྟར་འཆང་ཞིང་ཐུགས་དམ་དུ་བྱ་བ་ནི། འདིར་ཡིག་ཆུང་ལ་ལྟོས་དང་། འདི་ཉིད་ཆག་མེད་ཐུགས་དམ་མཛོད། །མང་པོ་འགའ་ལ་ཨེ་ཕན་བསམ། །ལག་པ་ན་ཡང་འབད་ནས་བྲིས། །དཔེ་གཅོད་འདོད་མི་གདའ་ན་གཡོར། །ཞེས་གསུངས་ཏེ། འདི་ཉིད་ཆག་མེད་ཐུགས་དམ་མཛོད་ཅེས་སྔོན་སངས་རྒྱས་འོད་དཔག་མེད་ཀྱིས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་ཀྱི་ཡོན་ཏན་བཀོད་པ་ཐམས་ཅད་ཕྱོགས་གཅིག་ཏུ་བསྡོམས་པ་དང། ད་དུང་དེ་ལས་ཀྱང་ཁྱད་པར་འཕགས་པའི་ཞིང་ཁམས་ཤིག་གཟུང་བའི་ཆེད་དུ་བསྐལ་པ་བྱེ་བ་སྟོང་བསམ་གྱིས་མི་ཁྱབ་པའི་དེ་བཞིན་གཤེགས་པ་མང་པོའི་མདུན་དུ་ཞིང་ཁམས་དེ་དག་གི་ཡོན་ཏན་དང་དེ་དག་ཏུ་སྐྱེ་བའི་རྒྱུ་དང་བཅས་པ་གསན་བསམ་དང་ཞིང་སྦྱངས་མཛད་ཅིང་། འུ་ཅག་སྙིགས་མའི་སེམས་ཅན་ཚེ་ཐུང་ནད་མང་ཡིན་ཡང་བདེ་བ་ཅན་གྱི་ཞིང་ཁམས་དེ་ལ་སྐྱེ་བའི་ཆེད་དུ་དགེ་སློང་ཆོས་ཀྱི་འབྱུང་གནས་ཀྱིས་ཞིང་ཁམས་བཟུང་བའི་ཐུགས་སྟོབས་དང་སྨོན་ལམ་གྱི་རྗེས་སུ་མཐུན་པར་ཕྱོགས་མཚུངས་པ་ཞིག་བྱེད་དགོས་པས། དེ་ལྟར་ན་བདེ་བ་ཅན་ལ་སྐྱེ་བའི་སྨོན་ལམ་འདི་ཉིད་ཉིན་མཚན་དུས་དྲུག་ཏུ་མ་ཆག་པར་བྱ་ཐུབ་ན་བཟང་ཤོས་ཡིན། དེ་ཙམ་མ་ཐུབ་ན་ཡང་ཉིན་རེ་བཞིན་དུ་རྒྱུན་ཆད་མེད་པར་ཆག་མེད་ཏུ་ངག་གིས་ཚིག་འདོན་པ་དང་། འདོན་བཞིན་དུ་ཡིད་ཀྱིས་དད་པ་མོས་གུས་དང་བཅས་པ་དང་། ལུས་ཀྱི་གུས་ཕྱག་དང་ཐལ་མོ་སྦྱར་ནས་འོད་དཔག་མེད་འཁོར་དང་བཅས་པ་གསལ་སྣང་ལས་མ་གཡེང་བཞིན་དུ་ཐུགས་ཀྱི་དམ་པ་སྙིང་གི་དཀྱིལ་དུ་ཆོངས་ཤིག དགེ་སྦྱོར་ཐམས་ཅད་ཀྱི་ནང་ནས་གནད་ཆེན་པོ་འདི་མཛོད་ཅིག་ཅེས་གསུངས་པ་ཡིན། ལག་པ་ན་ཡང་འབད་ནས་བྲིས་ཞེས་པ་ནི། སངས་རྒྱས་བཅོམ་ལྡན་འདས་ཀྱིས་ཟབ་མོའི་མདོ་སྡེ་འཆང་བའི་ཕན་ཡོན་གསུངས་སྐབས་མདོ་སྡེ་འདི་འཆང་བའམ། ཀློག་པ་དང་། ཡི་གེ་འདི་འབྲི་བའམ། འབྲིར་འཇུག་པའམ། འདི་ཉིད་ཡུལ་ཕྱོགས་གང་དུ་བཞུགས་པའི་ས་ཆ་ཐམས་ཅད་དགེ་ཞིང་བཀྲ་ཤིས། སེམས་ཅན་ཀྱི་སྡུག་བསྔལ་སེལ་བར་མ་ཟད་འདི་དང་འབྲེལ་བའི་སེམས་ཅན་རིགས་ཀྱི་བུའམ་རིགས་ཀྱི་བུ་མོ་བྲམ་ཟེ་དགེ་སྦྱོང་སུ་ཡིན་ཡང་ཤི་འཕོས་ནས་བདེ་བ་ཅན་དུ་སྐྱེ་བར་འགྱུར་རོ་ཞེས་གསུངས་ལ། དེའི་ཕྱིར་ན་འདི་ཉིད་འཇིག་རྟེན་གྱི་ཁམས་སུ་མི་ནུབ་ཅིང་དར་བའི་ཕྱིར་དང་ཡི་གེ་མང་པོ་སྤེལ་བའི་ཆེད་དུ་ལག་པ་ན་ཡང་འབད་པ་བསྐྱེད་ནས་བྲིས་ཤིག་ཅེས་བདེ་སྨོན་གྱི་དཔེ་ཆ་འདི་ཕྱོགས་ཀུན་དུ་ཁྱབ་གདལ་གྱིས་ཤིག་ཅེས་གསུངས་པ་ཡིན། དེང་དུས་གློག་པར་དང་འཕྲུལ་པར་ལ་སོགས་པ་ཡི་གེ་སྤེལ་བའི་ཐབས་ཤེས་མང་པོ་ཡོད་པས། དེ་ལྟར་རྒྱུ་བཏང་ནས་ཡི་གེ་མང་པོ་སྤེལ་ནའང་ཕན་ཡོན་ཆེ། ཡང་ན་རང་ཉིད་ཀྱི་སྡིག་སྒྲིབ་འདག་པའི་ཆེད་དུ་ཚར་མང་པོ་ཡིག་ནོར་དང་ཆད་ལྷག་ཤོར་དུ་མི་འཇུག་པར་བྲིས་ནའང་ཕན་ཡོན་བསམ་གྱིས་མི་ཁྱབ་པ་ཡོད་པ་དང་། རྡོ་ལ་བརྐོས་ནའང་ཕན་ཡོན་ཆེན་པོ་ཡོད་པ་དེ་རིགས་པས་དཔོག་ཐུབ། མང་པོ་འགའ་ལ་ཨེ་ཕན་བསམ་ཞེས་མང་པོ་ནི་མཐའ་ཡས་པའི་སེམས་ཅན་ནམ་མཁའི་གར་ཁྱབ་ལ་སེམས་ཅན་གྱིས་ཁྱབ་ཡོད་པས་ཕ་མར་གྱུར་བའི་སེམས་ཅན་ཤིན་ཏུ་མང་པོ་དེ་དག་ལ་ཕན་ཐོགས་ནས་སེམས་ཅན་དེ་དག་ཐམས་ཅད་གཅིག་ཀྱང་མ་ལུས་པར་རྫོགས་བྱང་ཐོབ་པའི་རྒྱུ་རུ་འགྱུར་བའི་ཉིང་དགོས་དང་། འགའ་ལ་ཞེས་པ་ནི་ཡང་དེའི་ནང་ནས་བྱེ་བྲག་པ་དལ་འབྱོར་ཚང་བའི་མིའི་ལུས་རྟེན་ཅན་འཛམ་བུ་གླིང་ལས་གྱི་ས་པར་སྐྱེས་ཡོད་པ་འདི་རྣམས་ལ་ཐོག་མར་ཕན་ཞིག་ཨེ་ཐོགས་བསམ་པ་ཡིན་ཞེས་གསུངས་པ་ཡིན་ཞིང་། སྨོན་ལམ་འདི་ཉིད་བརྩམས་པའི་ཉིང་དགོས་དང་དགོས་པ་ཞོར་ལ་བསྟན་པ་ཡིན། དཔེ་གཅོད་འདོད་མི་གདའ་ན་གཡོར་ཞེས་པ་ནི། སྨོན་ལམ་འདི་ཉིད་ཀྱིས་མ་ཁྱབ་པའི་ས་ཆའི་གདུལ་བྱ་ལས་དང་སྨོན་ལམ་མཐུན་པ་ཚོར་ཕན་ཐོགས་པའི་ཆེད་དུ་ས་ཕྱོགས་དེའི་མོས་པ་ཅན་སྨོན་ལམ་འདི་ཉིད་ཡི་གེ་མ་ཕྱི་གཅིག་ནས་མང་པོར་སྤེལ་སྙམ་སྟེ་དཔེ་གཅོད་བྱེད་འདོད་མཁན་གདའ་ནའམ་ཡོད་ན་དཔེ་མཁྱུད་མ་བྱེད་པར་གཡོར་དང་། ཁྱོད་རང་ཉིད་ལ་མདོ་སྡེ་སྤེལ་བའམ་སྤེལ་དུ་བཅུག་པའི་བསོད་ནམས་ཐོབ་པ་ཡིན་ཞེས་གསུངས་པ་ཡིན། འདིའི་ཤུགས་བསྟན་ལ། ཡི་གེའི་གཟུགས་དཔེ་གཅོད་དུ་འཇུག་པར་མ་ཟད་དེའི་དོན་བཤད་ནས་དེའི་ནང་དོན་སེམས་ལ་ངེས་སུ་བཅུག་སྟེ་སེམས་ཅན་མང་པོ་ཞིག་བདེ་བ་ཅན་དུ་སྐྱེ་བའི་རྒྱུ་སྒྲུབ་པའི་ཕྱོགས་ལ་བློ་ཁ་ཕྱོགས་སུ་ཆུག་དང་ཕན་ཡོན་བསམ་གྱིས་མི་ཁྱབ་པ་ཡོད་ཅེས་བསྟན་པ་ཡིན། གཉིས་པ་ཕན་ཡོན་གདམས་པར་མཛད་པ་ནི།

གཉིས་པ་ཕན་ཡོན་གདམས་པར་མཛད་པ།

འདི་ལས་ཕན་ཡོན་ཆེ་བ་མེད། །འདི་ལས་ཟབ་པའི་གདམས་ངག་མེད། །ང་ཡི་ཆོས་ཀྱི་རྩ་བ་ཡིན། །རང་གར་མ་སྐྱུར་ཉམས་ལེན་འབུངས། །ཞེས་གསུངས་ཏེ། འདི་ལས་ཕན་ཡོན་ཆེ་བ་མེད། །ཅེས་སྨོན་ལམ་འདི་ཉིད་ཐེག་ཆེན་མདོ་སྡེའི་དགོངས་དོན་ཐམས་ཅད་ཕྱོགས་གཅིག་ཏུ་བསྡུས་པ། བདེ་བར་གཤེགས་པའི་ཆོས་ཀྱི་ཕུང་པོ་ཐམས་ཅད་ཀྱི་ཉིང་བཅུད་ཀྱང་ཡིན་པས་ན་འདི་ཉིད་འཛིན་སྐྱོང་ཀློག་པ་ལས་ཕན་ཡོན་ཆེ་བ་ཞིག་གཞན་ན་མེད་ལ་བཙལ་ཀྱང་རྙེད་རྒྱུ་མེད་ཅེས་གསུངས་པ་ཡིན། འདི་ལས་ཟབ་པའི་གདམས་ངག་མེད། །ཅེས་པ་ནི་འདི་ལས་ཟབ་པའི་གདམས་ངག་ཞིག་ཀྱང་མི་དགོས། ཅིའི་ཕྱིར་ཞེ་ན། ཆོས་ཟབ་མོ་གདམས་ངག་གནད་ཆེན་གཞན་གང་ཡིན་ཡང་སོ་སོའི་སྐྱེ་བོ་ཐ་མལ་བ་ལམ་ལ་སྦྱོང་བ་ཆེན་པོ་མི་དགོས་པར་དག་པའི་ཞིང་ཁམས་སུ་སྐྱེ་བ་དེ་ཅུང་ཟད་དཀའ་བ་ཡིན། འདིའི་ཁྱད་ཆོས་གང་ཡིན་ཞེ་ན། དུས་ཐ་མའི་སྐྱེ་བོས་ཀྱང་འགྲུབ་ཐུབ་རྒྱུ་ཅན་རྒྱུ་བཞི་བསྒྲུབས་ན་བདེ་བ་ཅན་ལ་སྐྱེས་ངེས་པ་ཅན་ཡིན་པར་མ་ཟད། ཞིང་ཁམས་དེ་ལ་སྐྱེས་ནས་དུས་ངན་བསྐལ་ངན་གྱི་རྒུད་པ་དང་བར་ཆད་ཀྱིས་མི་གོས་པར་ས་ལམ་བགྲོད་དེ་སངས་རྒྱས་པར་འགྱུར་བ་ཡིན་ཞིང་། འདི་ལས་ཟབ་པའི་གདམས་ངག་མེད་པའམ་མི་དགོས་པ་ཤེས་བཞིན་པ་དེ་ཡིན། ང་ཡི་ཆོས་ཀྱི་རྩ་བ་ཡིན། །ཞེས་པ་ནི་འདིའི་སྐབས་སུ་སྨོན་ལམ་མཛད་པ་པོ་གང་ཉིད། གང་བསྟན་བྱའི་ཆོས་སམ་ཞིང་ཁམས་ཀྱི་གཙོ་བོ་མགོན་པོ་འོད་དཔག་མེད་ཀྱི་ཕྲིན་ལས་ཀྱི་ཆ་ཤས། དཀྱིལ་འཁོར་གྱི་གཙོ་བོ་དང་གཉིས་སུ་མ་མཆིས་ཤིང་ཐ་མི་དད་པའི་ངོས་ནས། ནུབ་སྣང་བ་མཐའ་ཡས་གསུང་མ་ཆགས་པདྨའི་རིགས་ཀྱིས་བྱིན་རླབས་དང་དངོས་གྲུབ་ཀྱི་བདག་པོའི་ཚུལ་གྱིས་ང་ཡི་ཆོས་ཀྱི་རྩ་བ། མཆོག་གསུམ། རྩ་གསུམ་ཀུན་འདུས་ཀྱི་ངོ་བོར་དམིགས་ཏེ། བསྐྱེད་དང་རྫོགས་པ་ཟུང་དུ་འབྲེལ་ན་ཐུན་མོང་དང་ཐུན་མིན་གྱི་མཐར་ཐུག་གི་འབྲས་བུ་འདིས་སྦྱིན་པར་བྱེད་པས་ང་ཡི་ཆོས་ཀྱི་རྩ་བ་ཡིན་ཞེས་གསུངས་པ་དེ་སྔགས་དང་སྦྲེལ་ཏེ་འགྲེལ་ན་ཡང་ཆོག རང་གར་མ་སྐྱུར་ཉམས་ལེན་འབུངས་ཞེས་པ་ནི་ཡིད་བཞིན་གྱི་ནོར་བུ་རིན་པོ་ཆེ་འདི་རྙེད་པར་དཀའ་ཞིང་། སྔར་བསགས་བསོད་ནམས་ཀྱི་དབང་གིས་ནོར་བུ་ལག་ཏུ་ལོན་དུས་ནོར་བུའི་ནོར་ཉམས་ཆོད་ནས། ནོར་བུ་རྒྱལ་མཚན་གྱི་རྩེ་མོར་བཏགས་ནས་ཁྲུས་བྱས་ཤིང་དར་གྱིས་བརྒྱན་ཏེ་གསོལ་བ་བཏབ་ན་དགོས་འདོད་ངང་གིས་འབྱུང་པ་ཡིན་ཞིང་། ནོར་བུ་ལག་ཏུ་ཡོད་ཀྱང་དེ་ལ་བེད་སྤྱད་དེ་གསོལ་འདེབས་ཀྱི་སྒོ་ནས་འདོད་དོན་འགྲུབ་ཏུ་མ་བཅུག་ཚེ་འཕྲོ་བརླག་ཡིན་ལ། དེས་ན་འདི་ནི་འདོད་དོན་སྒྲུབ་པ་ལ་ནོར་བུ་ལས་ཀྱང་ལྷག་པ་ཡིན། ནོར་བུས་ཚེ་འདིའི་འདོད་དོན་སྐོང་བ་ཙམ་ཡིན་ཞིང་། འདིས་ཚེ་རབས་གཏན་གྱི་སྡུག་བསྔལ་དང་བྲལ་ཏེ་བདེ་བ་ཅན་དུ་སྐྱེ་བའི་ལམ་སྟོན་པར་བྱེད་པས་ན་རང་གར་མ་སྐྱུར་ཞེས་རང་གར་མ་སྐྱུར་བར་ཉམས་ལེན་གནད་དུ་འཛིན་པ་ལ་འབད་འབུངས་གྱིས་ཤིག་ཅེས་གདམས་ངག་གནང་བ་ཡིན། འདི་ནི་མདོ་ལུགས་ཡིན་པའི་ཕྱིར། །ལུང་མ་ཐོབ་ཀྱང་འདོན་ནི་རུང་། །ཞེས་གསུངས་ཏེ། སྤྱིར་ན་ཆོས་བཤད་པའི་སྐབས་དང་ཆོས་སྒྲུབ་པའི་སྐབས་སུ་ལུང་རིགས་དང་མི་འགལ་བ་ཞིག དྲང་དོན་དང་ངེས་དོན་མ་འཁྲུགས་པ། དགོངས་ལྡེམ་དགོངས་དྲང་པོར་དགོངས་པ་རྣམས་མ་འཆོལ་བ། གང་ཟག་མཆོག་དམན་ལ་གསུངས་པའི་ཆོས་ཀྱི་ཐེག་པའི་རིམ་པ་མ་འཁྲུགས་པ། ཉན་ཐོས་དང་ཐེག་ཆེན་གཉིས་ཀྱི་མཐུན་པ་རྣམས་མི་འགལ་བ། མི་མཐུན་པ་རྣམས་མ་འདྲེས་པ། མདོ་སྔགས་ཀྱི་དབྱེ་བ་འབྱེད་ཤེས་པ་ཞིག་སྟེ། མདོར་བསྡུས་ན་བཤད་པའི་སྣོད་དང་། ཆོས་ཀྱི་དབྱེ་བ། འཆད་པའི་ཚུལ་རྣམས་ཤེས་དགོས། སྨོན་ལམ་འདི་ནི་འོད་དཔག་མེད་ཀྱི་ཞིང་གི་ཡོན་ཏན་བཀོད་པའི་མདོ་དང་། འཆི་མེད་རྔ་སྒྲ། སྙིང་རྗེ་པདྨ་དཀར་པོའི་མདོ། ཚངས་པས་བྱིན་གྱིས་ཞུས་པའི་མདོ། ཡེ་ཤེས་ཕྱག་རྒྱའི་ཏིང་ངེ་འཛིན་གྱི་མདོ། མདོ་སྡོང་པོ་བཀོད་པ་ལ་སོགས་པ་མདོ་སྡེ་མང་པོ་དང་། བསྟན་བཅོས་ནི་མགོན་པོ་བྱམས་པའི་རྒྱུད་བླ་མ་ལ་སོགས་པ་སྟེ། བཀའ་དང་བསྟན་བཅོས་མང་པོ་ཞིག་གི་དགོངས་དོན་ཕྱོགས་གཅིག་ཏུ་བསྡུས་པ་ཡིན་པས་གཙོ་ཆེར་མདོ་ལུགས་ལྟར་ཡིན་པའི་ཕྱིར་ན་དབང་ལུང་ཁྲིད་གསུམ་གྱི་བརྒྱུད་པ་མེད་པའམ་མ་ཐོབ་ཀྱང་འདོན་མི་རུང་བའི་བཀའ་རྒྱ་ཅན་དེ་ལྟ་བུ་མིན། ཟབ་པའི་ཆ་ནས་མདོ་རྒྱུད་ཀྱི་དགོངས་དོན་འདུས་པ། འཆང་བདེ་ཞིང་འཛིན་སླ་བའི་ངོས་ནས་ཐུན་མིན་གྱི་ཁྱད་ཆོས་དང་ལྡན་པ། གོང་དུ་འདི་ལས་ཟབ་པའི་གདམས་ངག་མེད་ཅེས་གསུངས་ཤིང་། དེས་ན་ལུང་མ་ཐོབ་ཀྱང་འདོན་རུང་ཞེས་གསུངས་ལ། འདིའི་འདོན་མི་རུང་བ་མེད་ཅེས་པའི་རྣམ་གཅོད་ཀྱིས་དགག་བྱ་བཀག་པའི་ཤུལ་དུ་ཡོངས་གཅོད་ཀྱི་སྒྲུབ་ཕྱོགས་ཀྱི་དགོས་པ་ཅི་ཞིག་བསྟན་པ་ནི་རྒྱུད་རང་ལུགས་དང་མདོ་སྔགས་ཟུང་འབྲེལ་གྱི་དབང་ལུང་ཁྲིད་གསུམ་ལ་སོགས་པ་ཐོབ་ནས་བསྒྲུབ་ན་ལྷག་པར་དུ་བཟང་ཞིང་ཕུན་སུམ་ཚོགས་པའི་ཡན་ལག་ཏུ་འགྱུར་བ་དེ་བསྟན་པ་ཡིན། དེ་ཡན་ཆོད་ཀྱིས་གཞུང་དོན་དངོས་ལ་འཇུག་པའི་ཡན་ལག་སོང་ནས། ད་བར་དུ་དགེ་བ་གཞུང་གི་དོན་དངོས་འཆད་པའི་སྐབས་ཡིན་ལ། དེ་ཡང་མདོ་དང་བསྟན་བཅོས་གང་བཤད་ཀྱང་མདའ་ལྟར་རྩེ་མོ་ནས་བཟུང་བའི་བཤད་ལུགས་ཤིག་དང་། མདུང་ལྟར་སྐེད་པ་ནས་བཟུང་བའི་བཤད་ལུགས། རལ་གྲི་ལྟར་ཡུ་བ་ནས་བཟུང་བའི་བཤད་ལུགས་ཏེ། གསུམ་ཡོད་མོད། རང་རེས་ཚིག་དོན་ཐམས་ཅད་ཟུང་དུ་སྦྲེལ་ནས་གནད་ལ་ཕུག་པ་མདའ་ལྟར་རྩེ་མོ་ནས་བཟུང་བའི་ཚུགས་ཀ་བྱས། དོན་སྙིང་ཟིན་ཡོད་པས་རྩ་བ་མ་ཤོར་བ་རལ་གྲི་ལྟར་ཡུ་བ་ནས་བཟུང་བའི་བཤད་ལུགས་ཀྱི་རྗེས་སུ་འབྲང་། རྒྱུ་བཞི་བསྒྲུབ་དགོས་པའི་གནད་དག་ཐད་ཀ་ཐད་ཀྱི་བཟུང་ནས་མདུང་ལྟར་སྐེད་པ་ནས་བཟུང་བའི་བཤད་ལུགས་ཀྱི་ཚུལ་བྱས་པས་བཤད་ལུགས་རྣམ་པ་གསུམ་པོར་གཞི་བཟུང་ལ། ཆིངས་ཆེན་པོ་རྣམ་པ་ལྔའམ་གསུམ་གྱིས་བཅིངས་ཏེ་བཤད་ན་མ་འདྲེས། མི་འཛིང་། གོ་སླ་བའི་གནད་ཡོད་པ་ཡིན་པས་འདི་ནས་ཆིངས་གསུམ་གྱི་དབང་དུ་བྱས་ན་དཀྱུས་ཀྱི་ས་གཅོད་པ། ཚིག་གི་འབྲུ་ནོན་པ། སྐབས་ཀྱི་དོན་བསྡུ་བའི་གནད་མ་བོར་བའི་ཐོག་ནས་བཤད་དགོས།

གཉིས་པ་གཞུང་དོན་སྨོན་ལམ་དངོས།

གཉིས་པ་གཞུང་དོན་སྨོན་ལམ་དངོས་ལ་གསུམ། བདེ་བ་ཅན་དུ་སྐྱེ་བའི་རྒྱུ་བཞི་བསྒྲུབ་པ་ལ་སྨོན་པ། མཚན་བཟུང་བའི་བྱིན་རླབས་ཚེ་འདིར་འབྱུང་བའི་གསོལ་བ་འདེབས་པ། སྨོན་ལམ་འགྲུབ་པའི་རྒྱུ་བདེན་ཚིག་གཟུངས་སྔགས་དང་བཅས་པ་བརྗོད་པའོ། །སྤྱིའི་ཆིངས་གསུམ་གྱི་ནང་དུ་སྨོན་ལམ་གྱི་གཞུང་དོན་ཡོངས་སུ་རྫོགས་པ་འདུས་ཡོད།

དང་པོ་བདེ་བ་ཅན་དུ་སྐྱེ་བའི་རྒྱུ་བཞི་ལ་སྨོན་པ།

དང་པོ་བདེ་བ་ཅན་དུ་སྐྱེ་བའི་རྒྱུ་བཞི་ལ་སྨོན་པ་ལ་ནང་གསེས་རྣམ་པ་བཞི་སྟེ། དང་པོ་ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱེད་པ། གཉིས་པ་དགེ་བའི་རྩ་བ་དཔག་ཏུ་མེད་པ་སྒོ་དུ་མ་ནས་བསགས་པ། གསུམ་པ་གྲོགས་བྱང་ཆུབ་མཆོག་དུ་སེམས་བསྐྱེད་པ། བཞི་བ་དགེ་བའི་རྩ་བ་དེ་རྣམས་བདེ་བ་ཅན་དུ་སྐྱེ་བའི་རྒྱུར་བསྔོ་ཞིང་རྐྱེན་སྨོན་ལམ་དག་པས་མཚམས་སྦྱར་བ་དང་བཞི་ཡིས་བསྟན་ཡོད། བདེ་བ་ཅན་ལ་སྐྱེ་བྱེད་ཀྱི་རྒྱུ་ལ་རྣམ་པ་དུ་ཡོད་ཅེ་ན། རྣམ་པ་བཞིར་གྲངས་ངེས་པ་སྟེ། གྲངས་ངེས་པ་དེ་ལ་དགོས་པ་ལ་ལྟོས་ནས་གྲངས་ངེས་པ་ཞིག་དང་། ལོག་རྟོག་ལ་ལྟོས་པའི་གྲངས་ངེས་གཉིས་ཡོད། འདི་དགོས་པ་ལ་ལྟོས་པའི་གྲངས་ངེས་པ་ཡིན་ལ། བདེ་བ་ཅན་དུ་སྐྱེས་པའི་ཐེག་ཆེན་འཕགས་པ་ཞིག་ཡིན་ན་འདིའི་རྒྱུ་བཞི་འདི་མ་ཚང་ན་མི་སྐྱེ། ཚང་ན་སྐྱེ་བས་ན་དེ་ལས་མང་མི་དགོས། དེ་ལས་ཉུང་མི་རུང་བ་ཡིན། ཡང་འདི་རྣམས་རྒྱུ་རྐྱང་པ་ཞིག་ག་ལ་ཡིན་ཏེ་འགའ་རེ་རྐྱེན་འགའ་རེ་གྲོགས་མ་ཡིན་ནམ་སྙམ་ན། གཙོ་ཆེ་བ་རྒྱུ་འབྲས་གཉིས་སུ་ཕྱེ་བའི་དབང་དུ་བཏང་སྟེ་བྱེ་བྲག་གི་སྒྲ་སྤྱི་ལ་འཇུག་པའི་ཚུལ་གྱིས་བསྟན་པ་ཡིན་ཞིང་། བདེ་བ་ཅན་ལ་སྐྱེ་བའི་རྒྱུ་བཞི་བོ་ཞེ་ལ་ངེས་རྒྱུ་དེ་གལ་ཆེ། རྒྱུ་བཞི་པོ་རེ་རེ་བཞིན་དུ་རྒྱས་པར་གསུངས་ཡོང་དུས་གོ་ཐུབ་ཀྱང་། ལས་དང་པོ་བ་རྣམས་ཀྱི་བློ་ལ་འཛིན་བདེ་བའི་ཆེད་དུ་ན་ནིང་ཞིག་ལ་རང་རེས་འདི་ལ་སྡོམ་ཚིག་ཅིག་བྱས་ཡོད། རྟེན་རྒྱུ་གྲོགས་རྐྱེན་བཞི་པོ་ཡིན། དེ་ཡང་བརྗོད་བྱས་ན་དང་པོ་རྟེན་ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱ་པ། གཉིས་པ་རྒྱུ་དགེ་བའི་རྩ་བ་དཔག་དུ་མེད་པ་སྒོ་དུ་མ་ནས་བསགས་པ། གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ། བཞི་པ་རྐྱེན་དགེ་བའི་རྩ་བར་བསྟེན་ནས་བདེ་བ་ཅན་དུ་སྐྱེ་བའི་རྒྱུར་བསྔོ་ཞིང་སྨོན་ལམ་འདེབས་པ་སྟེ་བཞིས་བསྟན་ཡོད།

རྒྱུ་དང་པོ་ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱེད་པ།

ཨེ་མ་ཧོ། འདི་ནས་ཉི་མ་ནུབ་ཀྱི་ཕྱོགས་རོལ་ན། །གྲངས་མེད་འཇིག་རྟེན་མང་པོའི་ཕ་རོལ་ན། །ཅུང་ཟད་སྟེང་དུ་འཕགས་པའི་ཡུལ་ས་ན། །ཞེས་པ་ནས་ཆོས་གོས་རྣམ་གསུམ་གསོལ་ཞིང་སེར་ལྟེམ་མེ། །ཞེས་པའི་བར་གྱིས་རྒྱུ་དང་པོ་བསྟན་པ་ཡིན་པས་ཚིག་དོན་སྦྲེལ་ཏེ་འབྲུ་མནན་ནས་བཤད་ན། ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱ་བ་ལ་གཉིས་ཏེ། རྟེན་ཞིང་ཁམས་ཡིད་ལ་བྱེད་པ་དང་། བརྟེན་པ་ཚོགས་ཞིང་གསལ་འདེབས་པའོ།།

དང་པོ་རྟེན་ཞིང་ཁམས་ཡིད་ལ་བྱ་བ།

ཨེ་མ་ཧོ། ཞེས་པ་ནི་ངོ་མཚར་བའི་ཚིག་སྟེ། ངོ་མཚར་བའི་ཚིག་འདི་དགྱེས་པའི་བཞད་སྒྲ་དང་བཅས་ཏེ་གསུངས་པ་འདིས་ངོ་མཚར་བའི་དོན་ཅི་ཞིག་བསྟན་ཅེ་ན། བདེ་བ་ཅན་དང་འོད་དཔག་མེད་པའི་ཞིང་དང་སྐུ་ཡི་བཀོད་པ་ཡོན་ཏན་ཕྲིན་ལས་བསམ་གྱིས་མི་ཁྱབ་པ་ལ་ངོ་མཚར་བའི་ཚིག་གིས་བརྗོད་པ་ཞིག་ཡིན། །སྐྱེ་རྒ་ན་དང་འཆི་བ་ལ་སོགས་པའི་སྡུག་བསྔལ་མི་བཟད་པས་དུས་རྟག་ཏུ་གདུང་ཞིང་མནར་བའི་སེམས་ཅན་ཐམས་ཅད་ལ་སྙིང་རྗེ་ཆེན་པོས་ཕན་བཏགས་ཏེ་དེ་རྣམས་གཏན་གྱི་བདེ་བ་ལ་བཀོད་དགོས་བསམ་མཁན་ཞིག་གིས། ཁམས་གསུམ་ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་ཀྱི་གོ་འཕང་དོན་གཉེར་བྱེད་ངེས། དེ་ལྟར་ན་སངས་རྒྱས་ཀྱི་གོ་འཕང་སྒྲུབ་བྱེད་ལ་རྒྱུ་གཅིག་མ་གཏོགས་གཉིས་མེད། གཅིག་པོ་དེ་གང་ཞེ་ན། ཟབ་དང་རྒྱ་ཆེའི་ལམ་གྱི་ཕྱོགས་ཡོངས་སུ་འདུས་པ་ནི། བྱང་ཆུབ་ཀྱི་སྤྱོད་པ་ལ་བསླབ་པ་དེ་ཉིད་ཡིན། བྱང་ཆུབ་ཀྱི་སྤྱོད་པ་ལ་བསླབ་པ་དེ་ནི་སྤྱོད་པ་རྒྱ་ཆེན་པོ་མཐའ་ཡས་པ་ཡིན་པས་ན་དང་པོ་སྤྱོད་པ་དེ་ལ་འཇུག་པ་དང་། ཞུགས་ནས་མཐར་ཕྱིན་ཏེ་ཆ་ཚང་བ་བྱེད་པ་གཉིས་ཀ་བྱ་དཀའ་བའི་གནས་ཡིན། དེ་ལྟར་ན་བྱ་དཀའ་བ་དེ་བདེ་བླག་ཏུ་འགྲུབ་པའི་ཆེད་དུ་རྟེན་སའི་སྐྱབས་དང་མགོན་རླབས་པོ་ཆེ་ཁྱད་དུ་འཕགས་པ་ཞིག་ཡོད་དགོས་པས། སངས་རྒྱས་འོད་དཔག་མེད་ཀྱི་ཞལ་མཇལ་བ་དང་། ཕྱག་བྱ་བ། བསྙེན་ཞིང་བཀུར་བ། ཐེ་ཚོམ་གཅོད་པའི་ཡོངས་སུ་དྲི་བ་ཐམས་ཅད་བྱ་བའི་ཆེད་དུ་བྱང་ཆུབ་སེམས་དཔའ་རྣམས་ཀྱིས་ཞིང་ཁམས་བདེ་བ་ཅན་དུ་སྐྱེ་བ་འཛིན་ཅིང་། མ་དག་པའི་ཞིང་ན་སྙིགས་མ་ལྔ་བདོ་བའི་དབང་གིས་དད་པ་དང་། བརྩོན་འགྲུས། ཤེས་རབ་ལ་སོགས་པ་མཐུ་ཆུང་ཞིང། ལོངས་སྤྱོད་ཀྱི་འབྱོར་བ་དམན། དེའི་མཐུན་རྐྱེན་བསྒྲུབ་པའི་ཕྱིར་དུ་སྔ་དྲོ། ཕྱི་དྲོ། ད་ལོ། སང་ཕོད། ཚེ་སྟོད། ཚེ་སྨད་བྱས་ཏེ་བརྒྱུགས་བརྒྱུགས་འདུར་འདུར་གྱིས་ཉི་མ་ཟད། ཅུད་ཟད་ཅིག་སྐྱིད་ན་ཡང་དེས་སེམས་བསླུས་ཏེ་ངེས་འབྱུང་མི་སྐྱེ། ཡང་ནད་ན་ཚ་མྱ་ངན་སྡུག་བསྔལ་ཞིག་གིས་མནར་གྱིན་ཡོད་ཚེ་ཆོས་སྒྲུབ་པའི་ཡི་ག་མེད། གལ་ཏེ་ཐོས་པའི་ཡོན་ཏན་ལྟ་བུ་ཅུང་ཟད་ཅིག་རྒྱུད་ལ་སྐྱེས་ཡོད་ཀྱང་། ཆོས་ལྟར་བཅོས་པའི་གྲོགས་ངན་མང་བའི་ཤུགས་ཀྱིས་སྔར་རྒྱུད་ལ་སྐྱེས་ཡོད་པའི་ཡོན་ཏན་ཆུང་ཆུང་དག་ཉམས་སླ་བ་ཡིན། ཞིང་ཁམས་བདེ་བ་ཅན་ལ་སྐྱེས་སོང་ན་དེ་འདྲའི་ཉེས་པ་མེད་ཅིང་གཙང་བས་ན། རྣམ་པར་དག་པའི་ཞིང་ཁམས་བདེ་བ་ཅན་ཞེས་གསུངས་པས་ཞིང་ཁམས་དེ་ལ་སོང་ནས་ལམ་བསྒྲུབས་ན་ལམ་གྱིས་ཆོད་ཆེ། ཞིང་ཁམས་དེ་ལ་སྐྱེས་ཚད་མངོན་ཤེས་ལྔ་དང་ལྡན་པ་ཁོ་ན་སྟེ། རྫུ་འཕྲུལ་གྱི་མངོན་ཤེས་ཡོད་པས་དེའི་གདུལ་བྱའི་སེམས་ཅན་གང་དུ་ཡོད་ན་དེ་ལ་སོང་ནས་རྒྱལ་བའི་བསྟན་པ་ལ་མི་དད་པ་རྣམས་དད་པར་བྱེད་པ་དང་དད་པ་རྣམས་ལྷག་པར་དད་དུ་འཇུག་པ་དང་། སྔོན་གནས་རྗེས་དྲན་གྱི་མངོན་ཤེས་ཀྱིས་གདུལ་བྱའི་རྒྱུད་ཀྱི་རྒྱུ་སྔོན་སོང་ཇི་ལྟར་ཡིན་པ་ཤེས་ནས། དེར་བྱུང་རབས་ལོ་རྒྱུས་དང་སྔོན་གྱི་སྐྱེ་རབས་སོགས་བསྟན་ནས་དེ་ལ་སྐྱོ་བ་སྐྱེད་ཐུབ་པ་ལ་སོགས་པ་འོག་ནས་འབྱུང་བའི་མངོན་ཤེས་དང་སྤྱན་ལ་སོགས་པར་དབང་འབྱོར་བ་ལྟ་བུ་ཡིན། བདེ་བ་ཅན་གྱི་ཞིང་ཁམས་ལ་སྐྱེས་ཕྱིན་རང་ཉིད་ཞིང་དག་པའི་རྒྱལ་སྲས་རྣམས་དང་སྐལ་བ་མཉམ་པར་གྱུར་སོང་བ་ཡིན་ལ། དེའི་དུས་སུ་མ་དག་པའི་ཞིང་གི་འགྲོ་བ་ལ་ཕན་འདོགས་པའི་ནུས་པ་དང་ལྡན་ཞིང་། སངས་རྒྱས་དངོས་ཀྱི་མདུན་ནས་ཆོས་ཉན་ཏེ་ཞིང་ཁམས་གཞན་དུ་སྐད་ཅིག་གཅིག་གིས་བགྲོད་ཐུབ་པ་ལ་སོགས་པ་མདོར་ན་ཡོན་ཏན་ཚད་མེད་པ་ཡོད། དེས་ན་འགྲོ་བ་སེམས་ཅན་གྱི་དོན་བྱེད་བསམ་པ་ཞིག་གིས་དང་པོ་དེ་ལ་སོང་སྟེ། དེ་ནས་ས་ལམ་བགྲོད་ཞོར་འགྲོ་དོན་རྒྱ་ཆེན་བསྒྲུབ་ཞོར་དུ་རྫོགས་སྨིན་སྦྱངས་པའི་བྱང་སེམས་རྒྱལ་སྲས་ཀྱི་སྤྱོད་པ་ལ་བསླབ་པའི་སྐལ་བ་བཟང་པོ་དང་ལྡན་སོང་བ་ཡིན། དེས་ན་བདེ་བ་ཅན་གྱི་ཞིང་ཁམས་དང་ཞིང་དེའི་གཙོ་བོ་མགོན་པོ་འོད་དཔག་མེད་འཁོར་དང་བཅས་པའི་ཡེ་ཤེས། ཡོན་ཏན། གཟི་བརྗིད། ཕྲིན་ལས་ཚད་མེད་པ་ལ་ངོ་མཚར་བའི་ཚིག་གིས་ཨེ་མ་ཧོ་ཞེས་དང་བ་སྟོན་པའི་ཚིག་དང་བཅས་ཏེ་གསུངས་ལ། དོན་བསྡུས་ཏེ་བཤད་ན་ཨེ་མ་ཧོ་ཞེས་པ་ངོ་མཚར་བའི་ཚིག་ཡིན། དེས་ན་དེ་བཞིན་གཤེགས་པ་མགོན་པོ་འོད་དཔག་མེད་དམ་ཚེ་དཔག་མེད་པའི་རྣམ་པར་ཐར་བ་འདི་ངོ་མཚར་བའི་ཚིག་ཨེ་མ་ཧོ་འདིས་བསྟན་ཞེས་ཟེར་ཆོག་པ་རེད། དེའི་རྣམ་ཐར་དེའང་ངོ་མཚར་ལུགས་གསུམ་དུ་བསྡུས་ནས་བཤད་ཆོག་པ་ཡིན། དེ་གསུམ་པོ་གང་ཡིན་ཞེ་ན། ཐུགས་བསྐྱེད་ངོ་མཚར་བ་་དང་གཅིག བརྩོན་འགྲུས་ཀྱི་འཇུག་པ་ངོ་མཚར་བ་དང་གཉིས། འབྲས་བུའི་ཡོན་ཏན་ངོ་མཚར་བ་དང་གསུམ་གྱི་སྟེང་ནས་བཤད་ཡོད། ཐུགས་བསྐྱེད་ཇི་ལྟར་ངོ་མཚར་ན་སེམས་ཅན་ཚད་མེད་མཁའ་མཉམ་སེམས་ཅན་གྱི་དོན་དུ། དུས་ཚད་མེད་ནམ་མཁའ་ཇི་སྲིད་ཀྱི་བར། དམ་བཅའ་ཚད་མེད་སེམས་ཐམས་ཅད་ཀྱི་སྡུག་བསྔལ་ཡོངས་སུ་རྫོགས་པ་བསལ་ཏེ་མ་སྨིན་པ་སྨིན། སྨིན་པ་གྲོལ་བ་ལ་འགོད་རྒྱུའི་ཐུགས་བསྐྱེད་ངོ་མཚར་བ་ཡིན། བརྩོན་འགྲུས་ཀྱི་འཇུག་པ་ཇི་ལྟར་ངོ་མཚརཞེ་ན། དེ་ལྟ་བུ་ཐུགས་བསྐྱེད་འགྲུབ་པའི་ཆེད་དུ་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་དེ་སྒོ་ཚད་མེད་པ་ཞིག་གི་སྟེང་ནས་ཡོངས་སུ་རྫོགས་པར་མཛད་པ་ཡིན། འབྲས་བུའི་ཡོན་ཏན་དེ་བཞིན་དུ་ངོ་མཚར་བ་སྟེ། ཤིན་ཏུ་རྣམ་པར་དག་པའི་ཞིང་ཁམས་དང་ཡང་དག་པར་ངེས་པའི་འཁོར་ཞིང་ཁམས་མཐའ་ཡས་ཚད་མེད་པ་རྒྱས་པར་ཡོངས་སུ་འགེངས་པའི་གྲགས་པ་དང་ལྡན་པའི་སངས་རྒྱས་ཀྱི་སྐྱེ་བ་མི་ཟད་པའི་འབྲས་བུས་ཁྱད་དུ་འཕགས་ཏེ་ངོ་མཚར་བ་ཡིན། དེ་ལྟ་བུ་ངོ་མཚར་བའི་ཡུལ་དུ་གྱུར་བའི་ཞིང་ཁམས་དེ་ཉིད་དང་། དེ་ན་བཞུགས་པའི་མགོན་པོ་འོད་དཔག་མེད་འཁོར་དང་བཅས་པ་རྟེན་བརྟེན་པའི་ཞིང་ཁམས་གསལ་འདེབས་པའི་ཐོག་མར་གཞན་ལས་ཁྱད་པར་འཕགས་པའི་རྟེན་ཞིང་ཁམས་གསལ་འདེབས་པ་ནི། འདི་ནས་ཉི་མ་ནུབ་ཀྱི་ཕྱོགས་རོལ་ན། །གྲངས་མེད་འཇིག་རྟེན་མང་པོའི་ཕ་རོལ་ན། །ཅུང་ཟད་སྟེང་དུ་འཕགས་པའི་ཡུལ་ས་ན། །རྣམ་པར་དག་པའི་ཞིང་ཁམས་བདེ་བ་ཅན། །ཞེས་གསུངས་ཏེ། འདི་ནས་ཉི་མ་ནུབ་ཀྱི་ཕྱོགས་རོལ་ན་ཞེས་ད་ལྟ་རང་རེ་ཡོད་པའི་ས་ཕྱོགས་འདིའི་སངས་རྒྱས་ཤཱཀྱ་ཐུབ་པའི་ཞིང་ཁམས་སམ་མི་མཇེད་འཇིག་རྟེན་འདི་ནས་ཉི་མ་ནུབ་ཀྱི་ཕྱོགས་རོལ་ནའམ་ནུབ་ཕྱོགས་སུ་ཡོད་ལ། བདེ་བ་ཅན་ན་བཞུགས་པའི་བྱང་ཆུབ་སེམས་དཔའ་རྣམས་ཀྱིས་རང་རེ་ཡོད་སར་ཚུར་གཟིགས་ཡོང་དུས་སངས་རྒྱས་ཤཱཀྱ་ཐུབ་པའི་ཞིང་ཁམས་འཛམ་བུ་གླིང་ཞེས་གསུངས་དར་བ་ཡིན། དེས་ན་རང་རེ་ཡོད་སའི་ཞིང་ཁམས་འདི་ནས་ནུབ་ཀྱི་ཕྱོགས་སུ་ཐག་རིང་ཐུང་གི་ཚད་ཀྱིས་གཞལ་ན། གྲངས་མེད་འཇིག་རྟེན་མང་པོའི་ཕ་རོལ་ན་ཞེས་པ་སྟེ། འདིའི་གྲངས་མེད་འདི་གྲངས་ཀྱིས་བགྲང་བའི་གྲངས་མེད་རྩི་རྒྱུ་ཡོད་པ་དེའི་གྲངས་མེད་ལ་གོ་བ་མི་ལེན་པར་མི་ཕལ་བས་བགྲང་བའི་ཡུལ་ལས་འདས་བའི་གྲངས་མེད་དམ། གཞལ་བྱ་ལས་འདས་པའི་ཕ་རོལ་ན་ཡོད་ཅེས་གསུངས་པ་ཡིན། མདོར་ན་འདི་སོ་སོའི་སྐྱེ་བོའི་བློ་ཡུལ་ལས་འདས་པའི་ས་ན་ཡོད་པས་གྲངས་མེད་ཅེས་གསུངས་ལ། ཐག་རིང་བའི་ལུགས་ཀྱི་ཐད་ཀའི་གོ་བ་བླངས་ན་གྲངས་མེད་འཇིག་རྟེན་གྱི་ཕ་རོལ་ཞིག་ན་ཡོད་ཅེས་གསུངས་ཀྱང་ཐུང་ས་ཞིག་ནས་བཤད་ན་རྡུལ་ཕྲ་རབ་རེ་རེའི་ནུབ་ཕྱོགས་ན་བདེ་བ་ཅན་གྱི་ཞིང་ཁམས་རེ་རེ་ཡོད་ཅིང་། ཕྲ་རབ་རྡུལ་གྱི་རྡུལ་སྙེད་རེ་རེའི་ཁོང་ན་ཡང་ཞིང་ཁམས་བྱེ་བའི་རྡུལ་སྙེད་ཆུད་པ་ཡིན་པས་དེ་སོ་སོའི་སྐྱེ་བོའི་བློ་ཡུལ་ལས་འདས་པ་ཞིག་ཅིའི་ཕྱིར་མིན། དཔེར་ན་སྟོང་གསུམ་གྱི་འཇིག་རྟེན་ཞེས་པ་རྒྱ་ཆེན་པོ་ཞིག་ཡིན་ཡང་དེ་ཡུངས་དཀར་གཅིག་གི་ནང་དུ་ཆུད་པ་སྟེ། སྟོང་གསུམ་ཇེ་ཆུང་དུ་མ་སོང་། ཡུངས་དཀར་ཇེ་ཆེ་རུ་མ་སོང་བར་དེའི་ནང་དུ་ཆུད་པ་ལྟར་རྡུལ་གཅིག་གི་སྟེང་ན་རྡུལ་སྙེད་ཀྱི་ཞིང་ཁམས་ཡོད་པ་དེ་དག་སངས་རྒྱས་ཀྱི་གཟིགས་ཚུལ་ཁོ་ན་ཡིན། མ་དག་པ་སེམས་ཅན་གྱི་སྣང་བ། རིགས་དྲུག་སོ་སོའི་ལས་སྣང་ལྟར་སྡུག་བསྔལ་ཅན་ཞིག་ལ་སྣང་ཞིང་། ལས་སྣ་ཚོགས་ཀྱི་དབང་གིས་སྣང་ཚུལ་ཡང་སྣ་ཚོགས་པ་སྟེ། སེམས་ཅན་ལ་ལས་ནམ་མཁའ་ས་གཞི་རུ་མཐོང་ལ། ལ་ལས་ས་གཞི་ནམ་མཁའ་རུ་མཐོང་། འགའ་རེའི་སྟེང་ཡིན་སྙམ་པ་དེ་ཉིད་འགའ་རེའི་འོག འགའ་རེའི་འོག་ཡིན་སྙམ་པ་དེ་ཉིད་འགའ་རེའི་སྟེང་ཡིན། སེམས་ཅན་ལ་ལ་མེ་དང་ཐུག་ན་ཚིག་ནས་འཆི་བར་འགྱུར་ལ། ཡང་ལ་ལ་མེ་དང་བྲལ་ན་ཤི་འགྲོ་བ་མེའི་སྲིན་བུ་ལ་སོགས་པ་དང་། ཆུ་ལ་སོགས་པ་ཐམས་ཅད་ཀྱང་དེ་ལྟར་ཡིན། རང་གི་སྒྲིབ་པ་སྲབ་ཅིང་མཐོང་བ་དག་ན་བདེ་བ་ཅན་གྱི་ཞིང་ཁམས་ཀྱང་ཐག་རིང་མ་ཡིན། བདེ་བ་ཅན་གྱི་ཞིང་ཁམས་དེའི་ཆགས་དབྱིབས་ཅི་འདྲ་ཡིན། སྟེང་འོག་གི་ཆ་གང་ན་ཆགས་ཡོད་ཅེ་ན། ཅུང་ཟད་སྟེང་དུ་འཕགས་པའི་ཡུལ་ས་ན་ཞེས་ཞིང་ཁམས་འདི་དང་བསྡུར་ན་བདེ་བ་ཅན་གྱི་ཞིང་ཁམས་དེ་ཅུང་ཟད་ཅིག་སྟེང་དུ་འཕགས་ཤིང་མཐོ་བའི་ས་ཆ་ན་ཆགས་ཡོད་ཅེས་གསུངས་པ་ཡིན། འདིའི་དངོས་བསྟན་སྒྲ་ཇི་བཞིན་པར་བསམས་ན་ཁོད་སྙོམས་པའི་གཞི་གཅིག་གི་སྟེང་ནས་འཇལ་ན་ཅུང་ཟད་སྟེང་དུ་འཕགས་པའི་ས་ན་ཡོད་ཅེས་གསུངས་ཀྱང་། དོན་དུ་འཇིག་རྟེན་ལས་འདས་ཤིང་འཕགས་པའི་འཕགས་པ་གནས་པའི་ཞིང་ཁམས་ཡིན་པར་མཚོན་པ་ཡིན་ལ། དེ་ལྟར་ཅུང་ཟད་སྟེང་དུ་འཕགས་པའི་ཡུལ་ས་ན་གང་ཆགས་ཡོད་པ་ཡིན་ཞེ་ན། རྣམ་པར་དག་པའི་ཞིང་ཁམས་བདེ་བ་ཅན་ཞེས་སྐྱོན་དང་ཉེས་པ་མ་དག་པའི་ཆ་མེད་པས་རྣམ་པར་དག་པའི་ཞིང་ཁམས་བདེ་བ་ཅན་ཆགས་ཡོད་པར་བསྟན་པ་ཡིན་ཞིང་། རྣམ་པར་དག་པ་ཇི་ལྟར་ཡིན་ཞེ་ན། བདེ་བ་ཅན་གྱི་ཞིང་ཁམས་དེ་སྣོད་རྣམ་པར་དག་པ། ས་རྡོ། གསེག་མ། མཐོ་དམའ། འབར་འབུར། གཡང་ས། ངམ་གྲོགའབྱུང་བཞིའི་གནོད་པ་ལ་སོགས་པ་གཅིག་ཀྱང་མེད་པ། ས་གཞི་ཁོད་སྙོམས་པ། དག་གཙང་མེ་ལོང་གི་ངོས་ལྟ་བུ། ཤིན་ཏུ་མཛེས་པའི་འོད་ཟེར་སྟོང་གི་རི་མོ་ཅན། ས་གཞི་འཇམ་ཞིང་བདེ་བ། འབབ་སྟེགས་བདེ་བའི་སྤོས་ཆུའི་ཆུ་ཀླུང་ཡན་ལག་བརྒྱད་ལྡན་གྱི་གསེར་གྱི་བྱེ་མ་འདྲེན་གྱིན་ཡོད་པ། དཔག་བསམ་གྱི་ཤིང་དང་པདྨས་བརྒྱན་པ། ཞིང་ཁམས་ཀྱི་བཀོད་པ་དེ་རྣམས་འོག་ནས་འབྱུང་འགྱུར་ལྟར་སྣོད་རྣམ་པར་དག་པ་ཡིན། བཅུད་རྣམ་པར་དག་པ་ནི། མགོན་པོ་འོད་དཔག་མེད་འཁོར་དང་བཅས་པ། བསོད་ནམས་དང་ཡེ་ཤེས་ཀྱི་ཕུང་པོ་ཆེན་པོའི་མཐུ་ལས་གྲུབ་པ། མཚན་དང་དཔེ་བྱེད་ཀྱིས་བརྒྱན་པ། ཡོན་ཏན་ཡེ་ཤེས་ཚད་མེད་པ་མངའ་བ་ཤ་སྟག་བཞུགས་པས་ན་རྣམ་པར་དག་པའི་ཞིང་ཁམས་བདེ་བ་ཅན་ཞེས་གསུངས་སོ། །བདག་གི་ཆུ་བུར་མིག་གིས་མ་མཐོང་ཡང་། །རང་སེམས་གསལ་བའི་ཡིད་ལ་ལྷམ་མེར་གསལ། །ཞེས་གསུངས་ཏེ། བདག་གི་ཆུ་བུར་མིག་གིས་མ་མཐོང་ཡང་ཞེས་རང་རེ་སོ་སོའི་སྐྱེ་བོར་ཡོད་པའི་ཆུ་བུར་ལྟ་བུའི་མིག་ཐབས་སྡུག་འདིས་ཆེན་པོ་ཞིག་མི་མཐོང་། རང་རེའི་མིག་གིས་རྒྱང་ཐག་དཔག་ཚད་གཅིག་གཉིས་ཤིག་གི་ཕན་ལ་མི་མཐོང་ཞིང་རི་དང་ཁང་ཁྱིམ་གྱིས་བར་དུ་ཆོད་པའི་གཟུགས་ཡིན་ན་ཐག་ཉེ་ཡང་མི་མཐོང་། རི་མཐོན་པོ་ཞིག་གི་མགོར་བུད་ནས་རྒྱང་ཤེལ་བཟང་པོ་ཞིག་གིས་ཐག་རིང་ཞིག་ལ་ལྟ་ཁུལ་བྱས་ཀྱང་ཆེན་པོ་ཞིག་མཐོང་མི་ཐུབ་པ་རེད། དེས་ན་ཐེ་ཚོམ་ཅན་རྣམས་ཀྱིས་མ་རིག་ན་མེད་པ་མ་ཡིན་ནམ་སྙམ་ན། མ་མཐོང་ཕྱིར་ན་མེད་པ་མིན་ཞེས་གསུངས་པས་བྱང་གི་སྒྲ་མི་སྙན་མི་རིག་ཀྱང་ཡོད་པ་ཡིན། དེ་ལྟར་ན་ཡང་གླིང་བཞིའི་ཆགས་ཚུལ་དེ་ཅི་ཡིན་ཤེས་མི་འདུག་སྙམ་ན། གཞན་པ་མི་བཤད་རྒྱ་གར་རྡོ་རྗེ་གདན་ཀྱང་གནས་འདི་ནས་ད་ལྟ་མི་མཐོང་ཀྱང་ཡོད་པ་བཞིན། དེས་རིགས་འདྲ་སྦྱར་ན་ཤེས་ཐུབ། དེ་ལྟར་ནང་རྒྱ་གར་རྡོ་རྗེ་གདན་ནི་མི་སོང་ནས་ཕྱིར་ཐོན་ཡོང་ས་ཞིག་ཀྱང་ཡིན་ལ་ཐག་ཉེ་ཞིག་ཀྱང་ཡིན་པས་དེ་དང་མི་འདྲ་སྙམ་ན། བདེ་བ་ཅན་དུ་རང་རེ་ལས་མ་དག་པ་སངས་རྒྱས་གཅིག་གིས་ཀྱང་མ་ཐུལ་ཏེ་ལུས་སོང་བ་རྣམས་མ་གཏོགས་བདེ་བ་ཅན་མཐོང་གིན་ཡོད་པ་དང་། དེར་སོང་སྟེ་སྤྲུལ་བ་སྣ་ཚོགས་ཀྱི་ཚུལ་གྱིས་ཚུར་ལ་ཡོང་བཞིན་ཡོད་པ་ཡིན་ཞིང་། ཐག་ཉེ་རིང་གི་ཐད་ནས་རྣལ་འབྱོར་བ་གང་དུ་ལུས་རྒྱ་བྲལ་བའི་རང་སྣང་བདེ་བ་ཅན་ཡིན། སྔོན་མ་ཞིག་ལ་སངས་རྒྱས་ཞལ་བཞུགས་སྐབས་སངས་རྒྱས་བཅོམ་ལྡན་འདས་ཀྱི་ཉེ་གནས་ཀུན་དགའ་བོས་འཇིག་རྟེན་གྱི་ཁམས་བདེ་བ་ཅན་གྱི་ཞིང་དེ་གཅིག་ལྟར་འདོད་ཅེས་ཞུས་ཚེ། བཅོམ་ལྡན་འདས་ཀྱིས་ཀུན་དགའ་བོ་ལ་ཁྱོད་ཀྱིས་ཐལ་མོ་སྦྱར་ནས་ཕྱག་འཚོལ་ལ་མེ་ཏོག་གཏོར་ལྟོས་ཤིག་དངཞེས་གསུངས་པ་དང་། ཀུན་དགའ་བོས་གཅིག་བལྟས་པས་བདེ་བ་ཅན་གྱི་ཞིང་ཁམས་རྟེན་བརྟེན་པ་དང་བཅས་པ་མཇལ་ཞིང་། དེ་སངས་རྒྱས་ཀྱི་སྐུའི་འོད་ཟེར་གྱིས་སྒྲིབ་བྱེད་ཐམས་ཅད་མི་སྣང་བར་མཛད། དེའི་སྟོབས་ཀྱིས་ཀུན་དགའ་བོས་མཇལ་བ་ཡིན། དེའི་ཚུལ་ཀུན་མཁྱེན་འཇིགས་གླིང་གི་བདེ་སྨོན་ལས། བུ་རམ་ཤིང་བའི་ཞལ་ནས་ཀུན་དགའ་བོ། །ཁྱོད་ལངས་ནུབ་ཀྱི་ཕྱོགས་སུ་ཁ་གཏོད་ལ། །མེ་ཏོག་གཏོར་ནས་ཐལ་མོ་སྦྱར་བྱས་ཏེ། །རྫོགས་པའི་སངས་རྒྱས་འོད་སྣང་དཔག་ཏུ་མེད། །རྡུལ་བྲལ་ཤིན་ཏུ་རྣམ་པར་དག་པ་ལ། །ཕྱག་འཚོལ་དེ་མཚན་སྒྲིབ་པ་མེད་པ་ན། །ཕྱོགས་བཅུར་གྲགས་ནས་རྒྱལ་བ་དེ་རྣམས་ཀྱང་། །བསྔགས་པ་བརྗོད་པར་གསུངས་ན་བདག་ཅག་གིས། །ལུས་དང་ལོངས་སྤྱོད་ལྟོས་པ་མེད་པ་འབུལ། །ཞེས་གསུངས་པ་ལྟ་བུ་ཡིན་ལ། རྒྱལ་བ་རྫོགས་བའི་སངས་རྒྱས་ཀྱི་བཀའ་ཚད་མ་དང་། རྗེས་འཇུག་དམ་པའི་སྐྱེས་བུའི་ལུང་ཚད་མ། རང་གི་རྗེས་སུ་དཔག་པའི་བློ་ཚད་མ་རྣམས་ལ་ཡིད་ཆེས་བྱས་ཏེ། མ་དག་ཆུ་བུར་མིག་འདིས་མ་མཐོང་ན་ཡང་། རང་སེམས་གསལ་བའི་ཡིད་ལ་ལྷམ་མེར་གསལ་ཞེས་སེམས་ཀྱི་ནུས་པ་འདི་ཚད་མེད་པ་གང་དུ་ཡིན་ཡང་ཐོན་ཐུབ་པ་ཞིག་ཡིན་ཞིང་། མིག་གིས་མི་མཐོང་ས་ཡང་སེམས་ཀྱིས་མཐོང་ལ། སེམས་ཀྱིས་མཐོང་སར་མིག་གིས་མི་མཐོང་། སེམས་ཀུན་ཏུ་ཐོགས་མེད་གླིང་བཞི་སྐད་ཅིག་གཅིག་ལ་སྐོར་ཐུབ་པ་ཞིག་ཡིན་པ་དང་། ཏིང་ངེ་འཛིན་གྱི་ནུས་པ་ནི་དེ་བས་ཀྱང་རྒྱ་ཆེ་བ་ཡིན། དེས་ན་རང་གི་སེམས་གསལ་ཞིང་དང་བའམ། མོས་གུས་དང་ལྡན་པའི་ཡིད་ཀྱི་གསལ་སྣང་གིས་རྒྱལ་བ་འོད་དཔག་མེད་མངོན་སུམ་བཞིན་དུ་བཞུགས་ཡོད་པར་གསལ་ཆོག་མོད། འོན་ཀྱང་བདེ་བ་ཅན་གྱི་བཀོད་པ་རྒྱ་ཆེན་པོ་ཆ་ཚང་བ་ཞིག་ནི་རང་རེ་ལྟ་ཅི་ས་ཐོབ་ཀྱི་སེམས་དཔའི་ངག་གིས་ཀྱང་རྗོད་མི་ནུས་པས་རང་རེས་དམིགས་པ་ཇི་མ་ཇི་བཞིན་ཞིག་ཟིན་ཐབས་མེད་ཀྱང་ས་ཆ་འདི་དང་མི་འདྲ་བར་བདེ་སྐྱིད་ཕུན་སུམ་ཚོགས་པ་དང་ལྡན་པའི་ཞིང་ཁམས། རང་གི་བློས་དཔོག་ཚོད་ཅིག་ནུབ་ཕྱོགས་ན་ཡོད་སྙམ་ནས་དེ་ལ་སེམས་གཏད་དེ་དགེ་བ་ཕྲན་བུ་ཙམ་ཞིག་ཅི་བྱས་ཚུན་ཆད་སེམས་ཅན་ཐམས་ཅད་བདེ་བ་ཅན་དུ་སྐྱེ་བའི་ཆེད་དུ་བསྔོས་ན། ཞིང་ཁམས་གསལ་བདེབས་དང་ཞིང་སྦྱོང་གི་སྨོན་ལམ་གཉིས་ཀར་འགྱུར་ཐུབ། འདི་ཡན་ཆད་རྟེན་ཞིང་ཁམས་ཀྱི་བཀོད་པ་གསལ་འདེབས་བཤད་པ་ཡིན། ཞིང་ཁམས་ཀྱི་རྒྱན་དང་བཀོད་པ་རྒྱས་པ་འོག་ནས་འབྱུང་ཡང་སྨོན་ལམ་འགྲུབ་པའི་རྒྱུའི་ཐོག་མར་དད་པ་བརྟན་པོ་དང་ཞིང་ཁམས་དེ་ལ་སྐྱེ་བའི་འདུན་པ་ཤུགས་དྲག་པོ་ཡོད་པ་གནད་ཆེ་ཞིང་དད་པ་དང་འདུན་པ་སྐྱེ་བ་ལའང་ཞིང་གི་ཡོན་ཏན་ཤེས་པ་གལ་ཆེ། ཚོགས་ཞིང་དཔང་པོར་བཞག་སྟེ་ཚོགས་བསགས་སྨོན་ལམ་བྱེད་དགོས་ཕྱིར་ཞིང་གི་ཡོན་ཏན་ཤེས་པ་དང་མཉམ་དུ་གྲུབ་ན་འཇུག་པ་བདེ་བས་རྒྱུན་གྱི་ཉམས་ལེན་གྱི་སྐབས་སུ་འོག་ནས་འབྱུང་བའི་ཞིང་ཁམས་ཀྱི་རྒྱན་དང་བཀོད་པ་ཐམས་ཅད་འདི་ནས་ཀྱང་དྲན་པར་བྱས་ནས་མངོན་སུམ་མིག་གི་ལམ་དུ་གསལ་སྣང་བརྟན་པོ་ཞིག་བྱེད་དགོས།

གཉིས་པ་བརྟེན་པ་ཚོགས་ཞིང་གསལ་འདེབས་པ།

དེ་ལ་གསུམ་སྟེ། སངས་རྒྱས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་སྒོམ་པ་གཙོ་བོར་བྱེད་པའི་གདམས་ངག སངས་རྒྱས་འོད་དཔག་མེད་སྲས་དང་བཅས་པའི་སྐུའི་རྣམ་པ་ལ་བརྟེན་ནས་ཡང་དང་ཡང་དུ་ཡིད་ལ་བྱས་ཏེ་གུས་པ་བྱེད་པའོ།།

དང་པོ་སངས་རྒྱས་རྗེས་སུ་དྲན་པ།

དེ་ན་བཅོམ་ལྡན་རྒྱལ་བ་འོད་དཔག་མེད། །པདྨ་རཱ་གའི་མདོག་ཅན་གཟི་བརྗིད་འབར། །དབུ་ལ་གཙུག་ཏོར་ཞབས་ལ་འཁོར་ལོ་སོགས། །མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས། །ཞལ་གཅིག་ཕྱག་གཉིས་མཉམ་བཞག་ལྷུང་བཟེད་འཛིན། །ཆོས་གོས་རྣམ་གསུམ་གསོལ་ཞིང་སྐྱིལ་ཀྲུང་གིས། །པདྨ་སྟོང་ལྡན་ཟླ་བའི་གདན་སྟེང་དུ། །བྱང་ཆུབ་ཤིང་ལ་སྐུ་རྒྱབ་བརྟེན་མཛད་དེ། །ཐུགས་རྗེའི་སྤྱན་གྱིས་རྒྱང་ནས་བདག་ལ་གཟིགས། །ཞེས་གསུངས་ཏེ། དེ་ན་བཅོམ་ལྡན་རྒྱལ་བ་འོད་དཔག་མེད་ཅེས་པ་ནི། བཅོམ་ལྡན་ནི་བདུད་བཞིའི་དགྲ་ཐམས་ཅད་བཅོམ་ཞིང་ལེགས་པའི་ཡོན་ཏན་དྲུག་དང་ལྡན་པས་ན་བཅོམ་ལྡན་ནོ། །རྒྱལ་བ་ནི་སེམས་ཅན་ཐམས་ཅད་འཁོར་བའི་གནས་སུ་འཆིང་བར་བྱེད་པའི་བདུད་བཞིའི་དགྲ་ལས་རྒྱལ་བས་ན་རྒྱལ་བའོ། །འདི་ལྟར་འགྲེལ་བ་ནི་བྱིས་པ་དག་གིས་མཚན་དོན་འདོན་པ་ལྟ་བུ་ཞིག་ཏུ་གྱུར་སོང་མོད་མི་སྐྱ་ཕོ་མོས་ཤེས་བདེ་བའི་ཆེད་ཡིན། འོད་དཔག་མེད་ཅེས་པ་ནི་ཐུགས་རྗེས་འོད་ཟེར་མཐའ་ཡས་པ་མུ་མེད་པར་སྤྲོ་བས་འོད་དཔག་མེད་ཅེས་གསུངས་པ་ཡིན་ནོ། །དེ་ན་ཞེས་པ་ནི། རྗེ་ཙོང་ཁ་བས། ཡིད་ཀྱི་རེ་བ་རྫོགས་ཤིང་སྤྱོད་པ་རྫོགས། །ཕུན་ཚོགས་འབྱོར་བས་ས་དང་བར་སྣང་ཀུན། །མི་མཉམ་མེད་པ་ཡོངས་སུ་གྲུབ་པ་ནི། །གསེར་གྱི་གཞི་ལ་ཆུ་གཏེར་ཆེན་པོ་བཞིན། །ཞེས་གསུངས་པ་དང་། ཀུན་མཁྱེན་འཇིགས་གླིང་གིས། ལྟ་ན་སྡུག་པའི་སྐྱེད་ཚལ་ལྗོན་པ་ལས། །འདོད་པའི་ཡོན་ཏན་བརྒྱ་ཕྲག་མོད་ལ་འབྱུང་། །བར་སྣང་ལ་སྤྲུལ་གཞལ་མེད་ཁང་ལ་སོགས། །གཞན་འཕྲུལ་དབང་བྱེད་ཀྱིས་ཀྱང་དོ་ཟླ་མིན། །བདེ་བ་ཅན་གྱི་ཞིང་དུ་སྐྱེ་བར་ཤོག །ཅེས་གསུངས་པ་ལྟ་བུའི་བདེ་བ་ཅན་གྱི་ཞིང་ཁམས་དེར་མཚན་མོའི་ནམ་མཁའ་གཡའ་དག་པའི་སྐབས་སུ་ཚེས་བཅོ་ལྔའི་དགོང་མོར་རྒྱུ་སྐར་བྱེ་བའི་དབུས་ན་ཉ་གང་ཟླ་བ་ཤར་བ་ལྟ་བུ་དང་། གསེར་རི་རོལ་མཚོའི་དབུས་སུ་རི་རྒྱལ་མངོན་པར་མཐོ་བ་ལྟར་འཁོར་ཚོགས་རྒྱ་མཚོའི་དབུས་སུ་བཅོམ་ལྡན་འདས་རྒྱལ་བ་འོད་དཔག་ཏུ་མེད་པ་དེ་ཉིན་བྱེད་ཉི་མའི་དཀྱིལ་འཁོར་མཁའ་ན་ཤར་བ་བཞིན་དུ་འོད་དང་འོད་ཟེར་གྱི་ཕུང་པོ་མཐའ་ཡས་པ་འཕྲོ་བཞིན་དུ་ལྷམ་མེར་ལྷང་ངེ་ལྷན་ནེ། གང་ནས་མཇལ་ན་དེ་རུ་ཞལ་ཕྱོགས་ཏེ་ཕྱོགས་ཀུན་ཏུ་གསལ་བ། རི་དྭགས་ཀྱི་རྒྱལ་པོ་སེང་གེ་རི་དྭགས་མང་པོའི་འཁོར་གྱི་དབུས་ན་ཕས་རྒོལ་གྱི་འཇིགས་པ་ཐམས་ཅད་དང་བྲལ་ཏེ་བག་ཚ་བ་མེད་པར་ང་རོ་སྒྲོག་པ་ལྟར་སངས་རྒྱས་འོད་དཔག་མེད་པ་ཡང་། གྲངས་མེད་འཁོར་གྱི་དབུས་ན་ཟབ་དང་རྒྱ་ཆེའི་ཆོས་ཀྱི་སྒྲ་ཆེན་པོ་རྒྱུན་མི་ཆད་པར་གསུངས་ཏེ་བཞུགས་ཡོད། དེས་འོད་དཔག་མེད་ཀྱི་སྐུའི་རྣམ་པ་སྤྱི་རྣམ་ཙམ་ཞིག་ཡིད་ལ་བྱས་ཏེ་བྱེ་བྲག་མཚན་དཔེའི་ཡོན་ཏན་གསལ་འདེབས་པ་ནི། པདྨ་རཱ་གའི་མདོག་ཅན་གཟི་བརྗིད་འབར་ཞེས་པ་ནི། པདྨ་རཱ་གའི་མདོག་དམར་པོ་ཡིན་པ་ལྟར་སངས་རྒྱས་འོད་དཔག་མེད་ཀྱི་སྐུ་མདོག་ཀྱང་དམར་པོ་ཡིན་ལ། རྒྱུ་མཚན་གང་ཞེ་ན། ཡེ་ཤེས་ལྔའི་ནང་ནས་སོ་སོར་རྟོག་པའི་ཡེ་ཤེས་ཀྱི་རང་མདངས་ཏེ་འོད་ཟེར་དམར་པོ་གསུང་པདྨའི་རིགས་ཀྱི་ཁ་དོག ཐུགས་རྗེས་འགྲོ་ལ་རྗེས་སུ་ཆགས་པའི་མཚོན་ཚུལ་ཅན། པདྨ་རཱ་གའི་ཕུང་པོ་ལ་ཉི་མ་བྱེ་བའི་འོད་ཟེར་གྱིས་དུས་གཅིག་ལ་ཕོག་པ་ལྟ་བུ་འོད་དང་འོད་ཟེར་འཕྲོ་བའི་གཟི་བྱིན་ཅན་ཡིན་པའི་དོན་ཏོ། །དབུ་ལ་གཙུག་ཏོར་ཞབས་ལ་འཁོར་ལོ་སོགས། །མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས། །ཞེས་པ་ནི། དབུའི་གཙུག་ཏོར་ལྟར་མི་མངོན་པ། མཛོད་སྤུ་གཡས་སུ་འཁྱིལ་བ། སྐུ་ཆུ་ཞེང་གབ་པ། སྐུ་ཆེ་ཞིང་དྲང་བ། སྤྱན་མཐོན་མཐིང་ཅན། སྤྱན་གྱི་རྫི་མ་ཁྱུ་མཆོག་གི་རྫི་མ་ལྟ་བུ། ཚེམས་དཀར་བ། ཚེམས་མཉམ་པ། ཚེམས་ཐགས་བཟང་བ། ཚེམས་བཞི་བཅུ་ཚང་བ། ཕྱག་ཞབས་བཞི་འཇམ་པ། སྐུ་ཡི་གནས་བདུན་མཐོ་བ། པགས་པ་གསེར་མདོག ཕྱག་ཞབས་འཁོར་ལོའི་མཚན་པ་ལ་སོགས་པ། རྒྱས་པ་མངོན་རྟོགས་རྒྱན་ལས། ཕྱག་ཞབས་འཁོར་ལོའི་མཚན་དང་རུས་སྦལ་ཞབས་ལ་སོགས་པ་དང་། མི་ཕམ་རིན་པོ་ཆེའི་མཁས་འཇུག་སྡོམ་བྱང་ལས། ཕྱག་ཞབས་འཁོར་ལོའི་མཚན་དང་ཞབས་མཐིལ་མཉམ། །རྟིང་བ་འཕགས་པའི་ཞབས་ཡང་འབུར་མི་མངོན། །ལ་སོགས་པ་མཚན་བཟང་སོ་གཉིས་དང་། དེའི་སྟེང་དུ་དཔེ་བྱད་བརྒྱད་ཅུ་ནི། ཐུབ་པའི་སེན་མོ་ཟངས་མདོག་དང་། །མདོག་སྣུམ་མཐོ་དང་སོར་མོ་རྣམས། །སོགས་དང་། མཁས་འཇུག་སྡོམ་བྱང་ལས། སེན་མོ་ཟངས་མདོག་མདོག་སྣུམ་མཐོ་བ་དང་། །སོར་མོ་ཟླུམ་ལ་རྒྱས་ཤིང་བྱིན་གྱིས་ཕྲ། །རྩ་རྣམས་མི་མངོན་རྩ་ཡི་མདུད་པ་མེད། །ལ་སོགས་པ་གསུངས་པ་དང་དེ་དག་གི་རྒྱུ་ཡང་གཞུང་སོ་སོ་ནས་བཤད་པ་ལྟར་རོ། །དེ་ལྟ་བུ་མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས་པ་དང་། ཞལ་གཅིག་ཕྱག་གཉིས་མཉམ་བཞག་ལྷུང་བཟེད་འཛིན་ཞེས་པ་ནི། སྤྱིར་ཞིང་ཁམས་འདིའི་གདུལ་བྱ་ཞིང་འདི་ལ་སྐྱེས་པའི་ཉན་རང་བྱང་སེམས་ཐམས་ཅད་ལྷ་མིའི་རྣམ་པ་ཅན་ཁོ་ན་ཡིན། དེ་ནི་གང་ལ་གང་གིས་འདུལ་བ་དེ་དང་དེའི་རྣམ་པ་དང་མཐུན་པར་ཞལ་ཕྱག་དང་ཆས་གོས་ཀྱི་སྣང་ཆར་ཤར་བའི་གཟུགས་སྐུའི་བཀོད་པ་སྟོན་པར་མཛད་པ་ཡིན་ལ། དེ་ཡང་བརྡ་དོན་རྟགས་གསུམ་དང་སྦྱར་ན། ཞལ་གཅིག་ཡིན་པ་འདི་ཆོས་སྐུ་སྤྲོས་བྲལ་ཐིག་ལེ་ཉག་གཅིག་གི་མཚོན་རྟགས་སོ། །ཕྱག་གཉིས་ཡོད་པ་ནི་ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཀྱི་མཚོན་བྱེད་དོ། །ཕྱག་གཉིས་ཀ་མཉམ་བཞག་མཛད་ཡོད་པ་ནི་ཐབས་ཤེས་དབྱེར་མེད་ཀྱི་ཕྱག་རྒྱའོ། ཕྱག་ན་ལྷུང་བཟེད་བདུད་རྩིས་གང་བ་འཛིན་པ་ནི་འགྲོ་བ་སེམས་ཅན་ཐམས་ཅད་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩིས་ཚིམ་པར་མཛད་པའི་རྟགས་སོ། །ཆོས་གོས་རྣམ་གསུམ་གསོལ་ཞིང་སྐྱིལ་ཀྲུང་གིས་ཞེས་པ་ནིའགྲོ་བ་སེམས་ཅན་རྣམས་སངས་རྒྱས་བསྟན་པའི་གཞི་མ་དམ་ཆོས་འདུལ་བའི་བསྟན་པ་ལ་འགོད་པའི་རྟགས་སུ་ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་གྱུར་པ་རབ་ཏུ་བྱུང་བའི་ཆས་གོས་ཏེ། སྐུ་སྟོད་ལ་མནབ་པའི་ཆོས་གོས་བླ་གོས་ཞེས་པ་ནི་རང་རེས་ཆོས་གོས་ཟེར་གྱིན་འདུག་པའི་ཆོས་གོས་བླ་གོས་སྔོན་པོ་དང་། བསྙེན་པར་རྫོགས་པ་དགེ་སློང་གི་ན་བཟའ་སྐུ་སྟོད་དུ་མནབས་པའི་ཆོས་གོས་སྣམ་སྦྱར་དམར་པོ། སྨད་གཅེར་བུ་ལས་སྐྱོབ་ཅིང་ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་འཕགས་པ་ཆོས་གོས་མཐང་གོས་རང་རེས་ཤམ་ཐབས་ཟེར་གྱིན་འདུག་པའི་ཆོས་གོས་མཐང་གོས་དམར་སེར་སྐུ་སྨད་ལ་མནབས་པ་འདིའོ། །ཞབས་རྡོ་རྗེ་སྐྱིལ་ཀྲུང་གིས་བཞུགས་པ་འཁོར་འདས་མཉམ་ཉིད་ལས་མི་གཡོ་བའི་རྟགས་ཡིན་ཞེས་གསུངས་ཡོད། བཞུགས་སའི་གདན་ཁྲི་ཇི་ལྟར་ཡིན་ཞེ་ན། པདྨ་སྟོང་ལྡན་ཟླ་བའི་གདན་སྟེང་དུ་ཞེས་པ་ནི། སྤྱིར་རིགས་ལྔའི་སངས་རྒྱས་ཀྱི་བཞུགས་ཁྲི་ལ་སྟོབས་གླང་པོ་ཆེ་ཡི་ཁྲི། རྫུ་འཕྲུལ་རྟའི་ཁྲི། དབང་རྨ་བྱའི་ཁྲི། ཐོགས་པ་མེད་པ་ནམ་མཁའ་ལྡིང་གི་ཁྲི་ལ་སོགས་པ་ཡོད་ཅིང་། དེའི་ནང་ནས་ནུབ་ཕྱོགས་ཀྱི་སངས་རྒྱས་གསུང་པདྨ་དབང་གི་ཕྲིན་ལས་ལ་མངའ་བརྙེས་པའི་རྟགས་ལ་རིན་པོ་ཆེའི་ཁྲི་རྨ་བྱ་ཆེན་པོ་བརྒྱད་ཀྱིས་བཏེགས་པའི་ཐོག་ན་པདྨ་འདབ་མ་སྟོང་དང་ལྡན་པ་ཤིན་ཏུ་རྒྱ་ཆེ་ཞིང་ཡངས་པའི་སྟེང་ན་ཟླ་བའི་གདན་གྱི་སྟེང་དུ་བཞུགས་ཡོད། འཁོར་བའི་སྐྱོན་གྱིས་མ་གོས་པའི་པདྨ་དང་། རང་བཞིན་ཡེ་ནས་དག་པའི་ཟླ་བ་སྟེ་པདྨ་སྟོང་ལྡན་དང་ཟླ་བའི་གདན་གྱི་སྟེང་དུ། བཞུགས་ལུགས་ཇི་ལྟར་བཞུགས་ཡོད་ཅེ་ན། ཞབས་གཉིས་སྐྱིལ་མོ་ཀྲུང་གིས་བཞུགས་ཡོད་པ་སྟེ། སྐྱིལ་མོ་ཀྲུང་གིས་བཞུགས་པ་དེ་འཁོར་འདས་མཉམ་ཉིད་ཀྱི་དོན་ལས་མི་གཡོ་བའི་རྟགས་ཡིན། བྱང་ཆུབ་ཤིང་ལ་སྐུ་རྒྱབ་བརྟེན་མཛད་དེ་ཞེས་སྣོད་དང་བཅུད་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པའི་ཞིང་ཁམས་ཀྱི་མཆོག་དེའི་ས་གཞིའི་དབུས་སུ་བྱང་ཆུབ་ཀྱི་ལྗོན་ཤིང་ཆེན་པོ་མཐོ་ཚད་ལ་དཔག་ཚད་སྟོང་ཕྲག་དྲུག ཡལ་ག་དང་། ལོ་མ། འདབ་མ་ཐམས་ཅད་དཔག་ཚད་བརྒྱད་བརྒྱ་ཚུན་ཆད་དུ་འཕྱང་བ། ལྗོན་ཤིང་གི་རྩེ་མོའི་སྦོམ་ཕྲ་ལ་དཔག་ཚད་བརྒྱད་བརྒྱ་ཡོད་པ། དེ་དག་གི་ཆ་ཚད་མདོ་ལས་ཇི་སྐད་གསུངས་པ་དེ་ནི་ངེས་པ་ཅན་མ་ཡིན་པ་སྟེ་མདོ་སོ་སོའི་དགོངས་པ་གང་ཟག་སོ་སོའི་བློ་རིམ་དང་མཐུན་པའི་ཐུན་མིན་གྱི་ཁྱད་ཆོས་སོ་སོ་ཡོད་པས་སོ། །མེ་ཏོག་དང་འབྲས་བུ་ལ་སོགས་པ་རྒྱུན་དུ་ཡོད་པ། ནམ་མཁའི་ཟླ་བ་ལྟར་རང་འོད་ཀྱིས་གསལ་བའི་ནོར་བུ་རིན་པོ་ཆེ་མང་པོས་བརྒྱན་ཅིང་འོད་དུ་འཚེར་བ། ནོར་བུ་རིན་པོ་ཆེ་ཡང་སྣ་ཚོགས་པ། བརྒྱ་བྱིན་གྱིས་ཐོགས་པའི་ནོར་བུ་རིན་པོ་ཆེ་ལྟ་བུ། ཡིད་བཞིན་གྱི་ནོར་བུ་རིན་པོ་ཆེ་ལྟ་བུ། རྒྱ་མཚོའི་ནོར་བུ་རིན་པོ་ཆེ་མཆོག་ཅེས་པ་ལྟ་བུ་རྣམས་ཀྱིས་བརྒྱན་ཡོད་པ། གསེར་གྱི་སྐུད་པ་དང་། སེ་མོ་དོ། རིན་པོ་ཆེའི་ཆུན་འཕྱང་། དོ་ཤལ་སེ་མོའི་རྒྱན་དང་། དྲིལ་བུ། གཡེར་ཁ། རྔ་ཡབ་ནོར་བུས་མཚན་པ། ད་རུང་མུ་ཏིག་དཀར་དམར། མུ་མེན་ལ་སོགས་པ་ལྷ་དང་མིའི་རིན་པོ་ཆེ་མང་པོ་བསམ་པའི་རྣམ་རིག་ཇི་ལྟ་བ་བཞིན་དུ་བརྒྱན་པ། དེ་ལྟ་བུ་བྱང་ཆུབ་ཀྱི་ཤིང་དེའི་ལོ་མ་དང་ཡལ་ག་སོགས་རླུང་གིས་བསྐྱོད་ཚེ་ཆོས་ཀྱི་སྒྲ་དབྱངས་སྙན་ཞིང་འཇེབས་པ་གྲགས་ཏེ་ཕྱོགས་ཀུན་ལ་ཁྱབ་པ། ཤིང་དེའི་དྲི་ཞིམ་པོའི་བསུང་གིས་དཔག་ཚད་བརྒྱ་སྟོང་མང་པོར་ཁྱབ་པ། བྱང་ཆུབ་ཀྱི་ཤིང་དེ་མཐོང་ཐོས་དྲན་རེག་གི་འགྲོ་བ་ཐམས་ཅད་དབང་པོ་གསལ་ཞིང་བྱང་ཆུབ་མ་ཐོབ་ཀྱི་བར་དུ་སེམས་མི་གཡེང་བར་ཏིང་ངེ་འཛིན་ལ་རང་བཞིན་གྱིས་གནས་པ་དེ་ལྟར་ཡིན་པར་གསུངས་སོ། །བྱང་ཆུབ་ཀྱི་ཤིང་གི་དབང་པོ་དེའི་དྲུང་ན་བཅོམ་ལྡན་རྒྱལ་བ་འོད་དཔག་ཏུ་མེད་པ་དེ་རྡུལ་མེད་རྡུལ་བྲལ། དྲི་མ་དང་བྲལ་ཞིང་། རྣམ་པར་དག་ཅིང་བཞུགས་པ་དེ་ཉིད་འཁོར་ཚོགས་རྒྱ་མཚོའི་དབུས་ན་ཆོས་བསྟན་ཏེ་འཚོ་ཞིང་གཞེས་པ་ཡིན་ལ། དེ་ལྟར་དངོས་སུ་ཞལ་མཇལ་བ་ལྟ་བུ་གསལ་འདེབས་པ་དེ་སྐུའི་རྣམ་པ་ཡིད་ལ་བྱེད་པ་ཡིན། ཐུགས་མཁྱེན་བརྩེའི་རྣམ་པ་ཡིད་ལ་བྱེད་པ་ཇི་ལྟར་བསྟན་ཚུལ་ནི། ཐུགས་རྗེའི་སྤྱན་གྱིས་རྒྱང་ནས་བདག་ལ་གཟིགས། །ཞེས་པ་དེས་བསྟན་པ་སྟེ། འོད་དཔག་མེད་ཀྱི་ཐུགས་ཡེ་ཤེས་ཆེན་པོའི་སྤྱན་དུས་གསུམ་ལ་ཆག་ཐོགས་མེད་པར་གཟིགས་པའི་སངས་རྒྱས་ཀྱི་སྤྱན་དེས་རྒྱང་རིང་པོ་བདེ་བ་ཅན་གྱི་ཞིང་འདི་ནས་འཇལ་ཡོང་ན་གྲངས་མེད་འཇིག་རྟེན་མང་པོའི་ཕ་རོལ་ལམ་ཡང་མིན་ན་མིའི་སྤྱོད་ཡུལ་ལས་རིང་དུ་འདས་ཤིང་སྲིད་ཞི་གཉིས་ཀྱི་མཐའ་ལས་འདས་པའི་ས་ནས། བདག་སོགས་དད་ཅིང་མོས་པས་འདུན་པའི་གང་ཟག་ལ་བརྩེ་བའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས། དགྱེས་པའི་ཐུགས་ཀྱིས་དགོངས་ཏེ། འདྲེན་པའི་དེད་དཔོན་ཆེན་པོར་བཞུགས་ཡོད་པར་མོས་པས་ཡིད་ལ་བྱེད་པ་དེ་ཐུགས་ཀྱི་རྣམ་པ་ཡིད་ལ་བྱེད་པ་ཡིན། སྤྱིར་རྫོགས་པའི་སངས་རྒྱས་ལ་རྟག་པ་རྒྱུན་གྱི་ཐུགས་རྗེ་ཡོད་པས་གསོལ་བ་བཏབ་རུང་མ་བཏབ་རུང་ཐུགས་རྗེའི་གཟིགས་པས་མི་ཁྱབ་པ་ཞིག་ག་ལ་ཡོད་མོད། དེ་ལྟར་ན་ཡང་གདུལ་བྱ་རྐྱེན་དང་འཕྲད་པའི་ཐུགས་རྗེ་དེ་ཚོགས་བསགས་སྒྲིབ་སྦྱང་དང་དད་དང་མོས་གུས་གསོལ་འདེབས་སྨོན་ལམ་གྱིས་རྒྱུད་དག་པར་མ་བྱས་ཚེ་སངས་རྒྱས་འོད་དཔག་མེད་ཚེ་འདི་ལ་དངོས་སུ་མཇལ་བ་དང་། ཕྱི་མ་བདེ་བ་ཅན་དུ་ལམ་སྣ་འདྲེན་པ། སངས་རྒྱས་ཀྱི་བྱིན་རླབས་སེམས་ཅན་གྱི་རྒྱུད་ལ་འཇུག་པ་དེ་ཅུང་ཟད་དཀའ་བ་ཡིན་ལ། དཔེར་ན་ཉི་མ་ནམ་མཁར་ཉིན་རེ་བཞིན་དུ་ཤར་ཞིང་ཉི་ཟེར་ས་སྟེང་དུ་ཉིན་རེ་བཞིན་དུ་འཕྲོ་བཞིན་ཡོད་ཀྱང་སྒོ་དཀར་ཁུང་མེད་པའི་ཁང་པའི་ནང་དུ་ཉི་འོད་མི་ཕོག་པ་ལྟ་བུ་ཡིན། དེ་ཡན་གྱིས་གཙོ་བོ་འོད་དཔག་མེད་མགོན་གྱི་སྐུ་གསུང་ཐུགས་ཀྱི་སྤྱི་རྣམ་ཙམ་ཞིག་བསྟན་ཏེ་སངས་རྒྱས་རྗེས་སུ་དྲན་པ་བཤད་ཟིན་ལ།

གཉིས་པ་དགེ་འདུན་རྗེས་སུ་དྲན་པ་སྒོམ་པ་གཙོ་བོར་བྱེད་པའི་གདམས་ངག

གཡས་སུ་བྱང་ཆུབ་སེམས་དཔའ་སྤྱན་རས་གཟིགས། །སྐུ་མདོག་དཀར་པོ་ཕྱག་གཡོན་པད་དཀར་འཛིན། །གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ། །སྔོན་པོ་རྡོ་རྗེས་མཚན་པའི་པདྨ་གཡོན། །གཡས་གཉིས་སྐྱབས་སྦྱིན་ཕྱག་རྒྱ་བདག་ལ་བསྟན། །ཞེས་གསུངས་ཏེ། གཡས་སུ་བྱང་ཆུབ་སེམས་དཔའ་སྤྱན་རས་གཟིགས་ཞེས་པ་ནི། སྤྱིར་སངས་རྒྱས་འོད་དཔག་མེད་ཀྱི་འཁོར་འདུས་པའི་ཚོགས་དེ་མངོན་རྟོགས་ཀྱི་སྟེང་ནས་ཕྱེས་ན་ཉན་རང་གི་འཁོར་དང་བྱང་ཆུབ་སེམས་དཔའི་འཁོར་གཉིས། སྡེ་རིས་ཀྱི་སྟེང་ནས་དབྱེ་ན་ལྷ་དང་མི་ཡི་རྣམ་པ་ཅན། དབང་པོའི་སྒོ་ནས་དབྱེ་ན་ཀུན་ཀྱང་དབང་རྣོན་བཟོད་པ་ཐོབ་པ་ཤ་སྟག་ཡིན། འཁོར་ཕལ་བའི་སྐོར་འོག་ནས་འབྱུང་བ་ཡིན་ལ། འདི་ནས་འཁོར་གཙོ་བོ་རྒྱལ་སྲས་ཐུ་བོ་རྣམ་པ་གཉིས་གསལ་འདེབས་པ་བཤད་པའི་སྐབས་ཡིན། གཙོ་བོ་འོད་དཔག་མེད་པ་སྐུ་གཟི་བྱིན་ལམ་སེ། གསུང་ཆོས་སྒྲ་དི་རེ། ཐུགས་གཡོ་མེད་ཆོས་དབྱིངས་ཀྱི་ངང་ལ་བཞུགས་ཏེ་འོད་དང་འོད་ཟེར་མུ་མེད་པ་ཕྱོགས་བཅུར་སྤྲོ་བའི་གཡས་ཕྱོགས་སུ་རྒྱལ་བ་ཐམས་ཅད་ཀྱི་ཐུགས་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དཀར་པོ་ཕྱག་གཡོན་པད་དཀར་འཛིན། །གསུངས་ཏེ། དྲི་མ་མེད་པ་སྐྱོན་གྱིས་མ་གོས་པའི་བརྡར་སྐུ་མདོག་དཀར་པོ་གངས་རི་ལ་ཉི་འོད་ཕོག་པ་ལྟ་བུ་དང་། ཞལ་གཅིག་ཕྱག་གཉིས་རིན་པོ་ཆེའི་རྒྱན་དང་དར་གྱི་ཆས་གོས་ཀྱིས་བརྒྱན་པའི་ལོངས་སྐུའི་ཆས་ཅན། ཕྱག་གཡས་པ་སྐུའི་སྟ་ཟུར་ནས་སྐྱབས་སྦྱིན་གྱི་ཕྱག་རྒྱ་མཛད། ཕྱག་གཡོན་པས་དཀོན་མཆོག་གསུམ་མཚོན་གྱི་ཕྱག་རྒྱས་སྙིང་རྗེས་འགྲོ་ལ་རྗེས་སུ་བརྩེ་བའི་རྟགས་སུ་འདབ་དྲུག་པདྨ་དཀར་པོའི་ཡུ་བ་ཐུགས་ཀའི་ཐད་དུ་འཛིན་པ། མཁྱེན་བརྩེ་ནུས་པ་རྒྱས་པའི་རྟགས་སུ་པད་དཀར་སྙིང་གི་ཐད་ནས་ཁ་ཕྱེ་བའོ། །གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ། །གསུངས་ཏེ། སངས་རྒྱས་འོད་དཔག་མེད་པའི་སྐུའི་གཡོན་ཕྱོགས་སུ་རྒྱལ་བ་ཐམས་ཅད་ཀྱི་མཐུ་སྟོབས་ནུས་པའི་རང་གཟུགས་བྱང་ཆུབ་སེམས་དཔའ་མཐུ་ཆེན་ཐོབ་བམ་ཕྱག་ན་རྡོ་རྗེ་ཉིད། སྔོན་པོ་རྡོ་རྗེས་མཚན་པའི་པདྨ་གཡོན། །ཞེས་པ་ནི། ཆོས་ཉིད་མི་འགྱུར་བ་མཚན་མས་མི་ཤིགས་པའི་རྟགས་སུ་སྐུ་མདོག་སྔོན་པོ། བེེཌཱུརྱའི་རི་བོར་ཉི་འོད་སྟོང་གིས་འཁྱུད་པ་ལྟ་བུ། ཡང་ཞལ་གཅིག་ཕྱག་གཉིས་ལོངས་སྐུའི་ཆས་ཅན། ཕྱག་གཡས་པ་སྐྱབས་སྦྱིན་གྱི་ཕྱག་རྒྱ་དང་གཡོན་པས་དཀོན་མཆོག་གསུམ་མཚོན་གྱི་ཕྱག་རྒྱས་རྒྱལ་བ་ཐམས་ཅན་གྱི་གསང་བ་གསུམ་གྱི་མཐུ་བྱིན་ནུས་པ་ཐོབ་ཡོད་པའི་རྟགས་སུ། དབང་རྟགས་སུ་གསེར་གྱི་རྡོ་རྗེས་མཚན་པའི་པདྨའི་ཡུ་བ་ཐུགས་ཀར་འཛིན་པ་ཞིག་གསལ་འདེབས་དགོས་སོ། །གཡས་གཉིས་སྐྱབས་སྦྱིན་ཕྱག་རྒྱ་བདག་ལ་བསྟན། ཞེས་པ་ནི། གོང་དུ་བཤད་པའི་ཕྱག་གཡས་པ་གཉིས་ཀ་སྐུའི་སྟ་ཟུར་ནས་སྐྱབས་སྦྱིན་གྱི་ཕྱག་རྒྱ་མཛད་དེ་བདག་སོགས་སེམས་ཅན་ཐམས་ཅད་ལ་སྐྱབས་སྦྱིན་གྱི་ཕྱག་རྒྱ་བསྟན་ནས་སྐྱབས་ཀྱི་འོག་ཏུ་ཤོག་དང་སྲིད་དང་ཞི་བའི་འཇིགས་པ་དང་སྡུག་བསྔལ་ཀུན་ལས་སྐྱབས་ཆོག་ཅེས་པའི་བརྡ་མཛད་པའོ། །འདིའི་སྐབས་སུ་སྐྱབས་སྦྱིན་གྱི་ཕྱག་རྒྱར་སྐུའི་སྟ་ཟུར་ཟེར་ལ། ཞེ་ས་མ་ཞུས་ན་སྐུའི་ཞོག་གཡས་པའི་དཔྱི་འགོའི་མཚམས་ནས་ཕྱག་བརྐྱངས་ཏེ་ཕྱག་དབང་འཇོག་གིན་ཡོད་པ་ཞིག་གི་རྣམ་པ་རེད། ཕྱག་གཡོན་པ་དཀོན་མཆོག་གསུམ་མཚོན་གྱི་ཕྱག་རྒྱ་མཐེབ་མཛུབ་གཉིས་ཀ་རྩེ་སྦྱར་ཏེ་པདྨའི་ཡུ་བར་བཟུང་ནས་སོར་མོ་གཞན་པ་གསུམ་པོ་གྱེན་ལ་སྒྲེང་བ་ནི་དཀོན་མཆོག་གསུམ་མཚོན་གྱི་ཕྱག་རྒྱའོ། །བྱང་ཆུབ་སེམས་དཔའ་དེ་རྣམ་པ་གཉིས་ཀ་བཞེངས་ནས་བཞུགས་ཡོད་པ་དེ། འགྲོ་བའི་དོན་ལ་སྐད་ཅིག་ཙམ་ཡང་གཡེང་བ་མེད་པར་ཐུགས་རྗེས་སེམས་ཅན་ལ་དགོངས་ཏེ་སྤྲུལ་བས་གཞན་དོན་མཛད་པ་རྒྱུན་མི་ཆད་པ་དང་། འགྲོ་དོན་ལ་སྐྱོ་དུབ་མེད་པ་ལམ་ཞུགས་ཀྱི་ཚུལ་བསྟན་པའོ། །

གསུམ་པ་སངས་རྒྱས་འོད་དཔག་མེད་སྲས་དང་བཅས་པའི་སྐུའི་རྣམ་པ་ལ་བརྟེན་ནས་ཡང་དང་ཡང་དུ་ཡིད་ལ་བྱས་ཏེ་གུས་པ་བྱེད་པ།

གཙོ་བོ་གསུམ་པོ་རི་རྒྱལ་ལྷུན་པོ་བཞིན། །ལྷང་ངེ་ལྷན་ནེ་ལྷམ་མེར་བཞུགས་པའི་འཁོར། །ཞེས་གསུངས་ཏེ། །གཙོ་བོ་གསུམ་པོ་རི་རྒྱལ་ལྷུན་པོ་བཞིན། །ཞེས་པ་ནི། རྗེ་བདག་ཉིད་ཆེན་པོས། ཕོངས་པའི་གཉེན་གཅིག་འདྲེན་པ་འོད་དཔག་མེད། །སྤྱན་རས་གཟིགས་དབང་རྒྱལ་སྲས་མཐུ་ཆེན་ཐོབ། །འཁོར་དང་བཅས་ལ་གུས་པས་གསོལ་འདེབས་ན། །དཔག་མེད་བསྐལ་བར་བདག་ཅག་རྣམས་ཀྱི་ཕྱིར། །ཐུགས་མཆོག་བསྐྱེད་པའི་དམ་བཅའ་མ་གཡེལ་བར། །འདབ་བཟང་གཙོ་བོ་ལྷ་ཡི་ལམ་ལ་བཞིན། །རྫུ་འཕྲུལ་སྟོབས་ཀྱིས་བརྩེ་བས་འདིར་གཤེགས་ཤིག །ཅེས་གསུངས་པ་ལྟར། རྒྱལ་བ་འོད་དཔག་མེད་ལ་འཁོར་གྱི་སྲས་ཐུ་བོ་རྣམ་གཉིས་ཏེ་བདེ་ཆེན་ཞིང་གི་གཙོ་བོ་གསུམ་པོ་ཡི། སྐུ་མདོག་ནི་དཔེར་ན་རིའི་རྒྱལ་པོ་རི་རབ་གསེར་རི་རོལ་མཚོ་ལས་འཕགས་ཤིང་རི་ཕྲན་གྱི་དབུས་ན་ཁྱད་པར་དུ་གྱུར་པ་བཞིན་དུ། གཙོ་བོ་གསུམ་གྱི་སྐུ་མཚན་དཔེའི་ཡོན་ཏན་གཞན་ལས་ཁྱད་པར་དུ་འཕགས་པ། མགོན་པོ་འོད་དཔག་མེད་སྐུ་མདོག་དམར་པོ་བྱི་རུ་སྣུམ་གྱིས་བསྐུས་པའམ། པདྨ་རཱ་གའི་ལྷུན་པོ་ལྟ་བུ་དམར་སེར་གཟི་འོད་འབར་བ། སྤྱན་རས་གཟིགས་དེ་གངས་རིའི་སྟེང་དུ་ཉི་མ་ཕོག་པ་ལྟ་བུ་དཀར་གསལ་འཚེར་བ། མཐུ་ཆེན་ཐོབ་དེ་མཐིང་ཆེན་སྔོན་པོའི་གུར་ཁང་ཕུབ་པ་ལྟ་བུའམ་བེེཌཱུརྱ་ཞུན་མའི་ལྷུན་པོར་ཉི་འོད་ཕོག་པ་ལྟ་བུ་མཐིང་གསལ་འཚེར་བ་ཞིག་གོ། །ལྷང་ངེ་ལྷན་ནེ་ལྷམ་མེར་བཞུགས་པའི་འཁོར། །ཞེས་པ་ནི། ཚངས་དབྱངས་ཡན་ལག་དྲུག་ཅུའི་ཆོས་སྒྲ་ལྷང་ངེ། སྐུ་མཚན་དཔེ་གསལ་རྫོགས་ཀྱི་ངོ་བོ་ལྷན་ནེ། ཐུགས་མཁྱེན་བརྩེ་ཡེ་ཤེས་ཀྱི་དཀྱིལ་འཁོར་ལྷམ་མེར་བཞུགས་ཏེ། བཟང་སྤྱོད་སྨོན་ལམ་ལས། ནམ་མཁའི་མཐར་ཐུག་གྱུར་པ་ཅི་ཙམ་པ། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཅི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་པ་ལྟར། ཇི་སྲིད་འཁོར་བ་མ་སྟོངས་ཀྱི་བར་དུ་ཐུགས་བསྐྱེད་ཀྱི་དམ་བཅའ་མི་ལྡང་། འགྲོ་དོན་གྱི་སྤྱོད་པ་ལས་མི་འདའ་བར་བཞུགས་ཡོད་པར་གསལ་འདེབས་དགོས་སོ། །བྱང་ཆུབ་སེམས་དཔའི་དགེ་སློང་བྱེ་བ་འབུམ། །ཀུན་ཀྱང་གསེར་མདོག་མཚན་དང་དཔེ་བྱད་བརྒྱན། །ཆོས་གོས་རྣམ་གསུམ་གསོལ་ཞིང་སེར་ལྟེམ་མེ། །ཞེས་པ་ནི། གཙོ་བོ་གསུམ་པོ་གོང་ནས་བཤད་པ་ལྟར་མཁའ་ལ་ཉི་ཟླ་སྐར་གསུམ་འཛོམས་པ་བཞིན་བཞུགས་ཡོད་པ་དེའི་མཐའ་སྐོར་དུ་བྱང་ཆུབ་སེམས་དཔའི་དགེ་སློང་བྱེ་བ་འབུམ་དང་བྱང་ཆུབ་ཆེན་པོར་འགྱུར་བའི་ཉན་རང་དགྲ་བཅོམ་པའི་འཁོར་གྲངས་མེད་པས་སྐོར་བ་པོ། བྱང་ཆུབ་སེམས་དཔའི་དགེ་སློང་བྱེ་བ་འབུམ་གསུངས་པ་ནི་ཤིན་ཏུ་མང་བའི་དོན་ཡིན་གྱི་བྱེ་བ་འབུམ་ལས་མེད་ཅེས་པའི་དོན་མ་ཡིན་ནོ། །བྱང་ཆུབ་སེམས་དཔའི་འཁོར་དེ་རྣམས་གྲངས་དཔག་དུ་མེད་ཅིང་ཡོན་ཏན་མཐའ་མེད་པའམ་མཐའ་ཡས་མུ་མེད་དང་ལྡན་ཞིང་། སེམས་ཅན་ཐམས་ཅད་ལ་འདྲ་མཉམ་གྱི་ཕན་སེམས་དང་བྱམས་པའི་སེམས་དང་ལྡན་པ། ཤེས་རབ་མཐའ་མེད་པ་རྒྱ་མཚོ་ཆེན་པོ་ལྟ་བུ། ཏིང་ངེ་འཛིན་རི་རབ་དང་མཚུངས་པ། ཡོན་ཏན་ཟད་མི་ཤེས་པ་ཆུ་བོ་ཆེན་པོ་ལྟ་བུ། བཟོད་པའི་གོ་ཆ་བགོས་པ་བཟང་ངན་ཐམས་ཅད་ཐེག་པའི་ས་འདྲ་བ། ཉོན་མོངས་པའི་དྲི་མ་འཁྲུད་པའི་ཆུ་ལྟ་བུ། ཉོན་མོངས་དང་རྣམ་རྟོག་སྲེག་པར་བྱེད་པས་མེ་ལྟ་བུ། ད་དུང་མ་ཆགས་པ་རླུང་འདྲ་བ། མི་དམིགས་པ་ནམ་མཁའ་ལྟ་བུ། འཇིག་རྟེན་གྱི་སྐྱོན་ཐམས་ཅད་ཀྱིས་མ་གོས་པ་མེ་ཏོག་པདྨ་འདྲ་བ་ལ་སོགས་པ་ཡོན་ཏན་རྒྱ་མཚོ་ལྟ་བུ་བརྗོད་ཀྱིས་མི་ལང་བ། རྒྱལ་བའི་གདུང་འཚོབ་གྲགས་ལྡན་དཔའ་བོ་ཆེ། །དག་པའི་ཞིང་གི་རྒྱལ་སྲས་རྣམས་ཡིན་ནོ། །ཞེས་གསུངས་སོ། །དེ་བཞིན་དུ་རྒྱལ་བའི་ཉན་རང་གི་འཁོར་གྲངས་མེད་པ་ཞིག་ཡོད། མདོ་ལས། ཉན་ཐོས་ཀྱི་འཁོར་འདུས་པ་དང་པོའི་དབང་དུ་བྱས་ན། རྫུ་འཕྲུལ་ཅན་གྱི་མཆོག་མོའུ་འགལ་གྱི་བུ་ལྟ་བུ་འདོད་ན་སྟོང་གསུམ་འཇིག་རྟེན་གྱི་ནམ་མཁའི་སྐར་མ་ཐམས་ཅད་ཉིན་ཞག་གཅིག་གིས་རྩི་ཐུབ་པའི་བྱེ་བ་ཕྲག་བརྒྱ་སྟོང་གིས། ལོ་བྱེ་བ་ཁྲག་ཁྲིག་བརྒྱ་སྟོང་ལ་གཞན་བྱ་བ་གཅིག་ཀྱང་མི་བྱེད་པར་འདུས་པ་དང་པོ་ཉན་ཐོས་ཀྱི་འཁོར་རྐྱང་པ་བརྩིས་ཀྱང་བརྩི་མི་ནུས་པར་གསུངས་བས་ན། འདུས་པ་དང་པོར་དེ་འདྲ་ཞིག་མང་ན་འདུས་པ་གཉིས་པ་དང་གསུམ་པ་ལ་དེ་ལས་འབུམ་འགྱུར་མང་པོའི་མང་བས་བརྩི་ཚོད་མེད་པ་ཞིག་ཡིན་པར་སྨོས་མ་དགོས་པ་ཡིན་ཞེས་གསུངས་སོ། །ཉན་ཐོས་དེ་ཚོ་དགྲ་བཅོམ་པ། ཟག་པ་ཟད་པ། འོད་འདོམ་གང་གིས་བརྒྱན་པ་ཤ་སྟག་གོ། །ཀུན་ཀྱང་གསེར་མདོག་མཚན་དང་དཔེ་བྱད་བརྒྱན། །ཞེས་པ་ནི། འཁོར་དེ་དག་ཐམས་ཅད་གཟུགས་ལ་བཟང་ངན་དང་སྐྱེ་ལ་ཡག་བཙོག་མེད་པར་ཐམས་ཅད་མཚན་དཔེས་མཛེས་པ་སྐུ་མདོག་དྭངས་མ་གསེར་གྱི་མདོག་ལྟར་དྲི་མས་མ་གོས་པའོ། །ཆོས་གོས་རྣམ་གསུམ་གསོལ་ཞིང་སེར་ལྟེམ་མེ། །ཞེས་པ་ནི། ཐམས་ཅད་ཀྱི་སྐུ་ལ་ཆོས་གོས་རྣམ་གསུམ་གསོལ་ཞིང་མེ་ཏོག་སེར་ཆེན་གྱི་རྒྱ་མཚོ་འཁྱིལ་སོང་བ་ལྟ་བུ། ནང་སྔ་མོའི་མཚོ་སྟེང་དུ་གཞོག་པའི་མཚམས་སྤྲིན་གྱི་འོད་ཀྱིས་ཁྱབ་པ་དང་འདྲ་བར་སེར་ལྟེམ་མེ་མཛེས་པ། དེ་ལྟར་སྐུ་གཟི་བྱིན་ཉི་མ་འབུམ་ཕྲག་དུས་གཅིག་ལ་ཤར་བ་དང་འདྲ་བ། གསུང་ཚངས་དབྱངས་ཞི་བའི་འབྲུག་སྒྲ་འཇམ་མཉེན་གྱིས་གྲགས་པ་དང་འདྲ་བ། ཐུགས་གཡོ་མེད་རྟག་འཛིན་ནམ་མཁའ་ལྟ་བུ་ལས་མི་གཡོ་བར་བཞུགས་ཡོད་པ་གསལ་བཏབ་སྟེ། ཚེ་འདིའི་ཕ་མ་གཉིས་ཀའི་གཙོར་བྱས་པའི་རང་གཞན་ཤི་གསོན་གྱི་སེམས་ཅན་ཐམས་ཅད། དུས་ནམ་ཞིག་བྱང་ཆུབ་སྙིང་པོའི་བར་དུ་སྐྱབས་དང་སྐྱོབས་པ་མགོན་དང་དཔུང་གཉེན་ཁྱེད་རྣམས་ཡིན། སྐྱིད་སྡུག་ལེགས་ཉེས་བཟང་ངན་མཐོ་དམན་གང་བྱུང་ཡང་ཁྱེད་རྣམས་ཀྱིས་མཁྱེན། ཁྱེད་རྣམས་ལས་རེ་ས་སྐྱབས་གནས་ཤིག་མེད་བསམ་སྟེ། སེམས་ཀྱིས་དེ་ལྟརབསམ་ཞིང་ངག་ནས་ཀྱང་དེ་ལྟར་བརྗོད། ཡིད་ཁྱེད་ཤེས་ཀྱི་དད་པ་བཅོས་མིན་ཞིག་ཡོད་པ་ནི་གལ་ཆེ་བ་རེད། གུ་རུ་རིན་པོ་ཆེས། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག །བློ་ཐེ་ཚོམ་དང་བྲལ་ན་ཅི་བསམ་འགྲུབ། །ཅེས་གསུངས་སོ། །དེའི་ཡན་ཆད་རྩ་བའི་ས་བཅད་དང་པོ་བདེ་བ་ཅན་དུ་སྐྱེ་བའི་རྒྱུ་བཞིའི་ནང་གི་རྟེན་ཚོགས་ཞིང་གསལ་འདེབས་པ་སོང་བ་ཡིན། དེ་རིང་གི་ཉིན་དང་པོའི་ཆོས་མཚམས་འདི་ནས་འཇོག དུས་ཚོད་ཀྱང་མང་པོ་ཞིག་སོང་འདུག སང་ཉིན་མོས་གུས་ཕྱག་ལ་ཉེ་རིང་ཁྱད་མེད་ཕྱིར་གསུངས་ས་ནས་དབུ་བཙུག་ནས་བཤད་རྒྱུ་བྱེད། བདེ་སྨོན་གྱི་ཚིག་མང་ཆེ་བས་བློ་ལ་འགྲོ་བ་ཡིན། དེ་སྔོན་རྒྱུན་དུ་འདོན་དུས་མཚམས་རེ་དོན་དྲན་ཞོར་དུ་དང་བའི་དད་པ་རེ་བྱེད་ཀྱིན་ལོས་ཡོད། ད་ཕན་ཆད་ཡིན་ཡང་འདིས་ནང་དོན་གང་བསྟན་ན་དེའི་ནང་དོན་གྱི་གཙོ་བོ་ཐམས་ཅད་དང་། ཡན་ལག་བདུན་པ་ལ་སོགས་པ་བསགས་སྦྱང་གི་གནད་ཐམས་ཅད་འདི་ནི་འདིའོ། །དེ་ནི་དེའོ་སྙམ་པའི་གནད་ཁྲོལ་བར་བྱས་ཏེ་འདོན་དགོས། ཆོས་ཁྲིད་ཀྱི་ནང་དུ་བཤད་པ་ལྟར་དུ་འདིའི་ས་བཅད་ཀྱི་ཆིངས། དོན་དུའི་ཐོག་ནས་བཤད་ཡོད། དེའི་དོན་དེ་དང་འབྲེལ་བའི་ཚིག་ངག་ཐོག་ནས་འདོན་དུས་སེམས་ནས་གསལ་ཅི་ཞིག་འདེབས་དགོས་པའི་སྐོར་དེ་ཚོ་ཤེས་རྒྱུ་གནད་ཆེ། དོན་གྱི་གོ་བ་མ་བླང་པར་སེམས་ནས་གཞན་པ་ཞིག་དྲན་ཞོར་དུ་ཁ་ནས་སྒྲ་ཚིག་ཙམ་ཞིག་བརྗོད་ན་ཕན་ཡོན་ཆུང་། ནེ་ཙོའི་འདོན་པ་ཙམ་ཞིག་རེད། སྒྲ་ཙམ་ཞིག་བྲག་ཅ་དང་སྒྲ་འཁོར་ཚོའི་ནང་ནས་ཀྱང་གྲག་བཞིན་ཡོད། རང་རེས་དེ་རིང་གི་ཆོས་ཁྲིད་ལ་ཐོག་མར་དགེ་བ་ཀླད་ཀྱི་དོན་བདེ་སྨོན་གྱི་མཚན་དོན་འགྲེལ། དེ་ནས་བར་དུ་དགེ་བ་གཞུང་དོན་དང་། དེ་ལ་ས་བཅད་རྣམ་པ་གསུམ་ཡོད་པརསྨྲས་པ་ཡིན། ས་བཅད་ཟེར་ན་དོན་ཚན་སོ་སོར་བགོས་ནས་བཤད་པ་ལ་ཟེར། ས་བཅད་དང་པོ་བདེ་བ་ཅན་དུ་སྐྱེ་བའི་རྒྱུ་བཞི་ལ་སྨོན་པ། ས་བཅད་གཉིས་པ་མཚན་བཟུང་བའི་བྱིན་རླབ་ཚེ་འདིར་འབྱུང་བར་གསོལ་བ་འདེབས་པ། ས་བཅད་གསུམ་པ་སྨོན་ལམ་འགྲུབ་པའི་རྒྱུ་བདེན་ཚིག་གཟུངས་སྔགས་དང་བཅས་པ་བརྗོད་པ་དང་གསུམ་ཡིན། ས་བཅད་དེ་གསུམ་པོའི་ནང་དུ་སྨོན་ལམ་འདིའི་གཞུང་དོན་ཡོངས་སུ་རྫོགས་པ་འདུས་ཡོད་རེད། དེའི་ནང་གི་གནད་ཆེ་ས་དང་སྨོན་ལམ་འདིའི་མང་ཆེ་ས་ས་བཅད་དང་པོའི་དོན་བཤད་ཡོད། ས་བཅད་དང་པོ་དེ་བདེ་བ་ཅན་དུ་སྐྱེ་བའི་རྒྱུ་བཞི་བཤད་པ་ཡིན་པས། དེ་ལ་ནང་གསེས་ཀྱི་དབྱེ་བ་དོན་རྣམ་པ་བཞིས་བཤད་ཡོད། དང་པོ་རྟེན་ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱེད་པ་ནི། ནུབ་ཕྱོགས་བདེ་བ་ཅན་གྱི་ཞིང་ཁམས་དང་དེར་བཞུགས་པའི་མགོན་པོ་འོད་དཔག་མེད་འཁོར་དང་བཅས་པ་དད་མོས་དྲག་པོས་དུས་རྒྱུན་དུ་མི་བརྗེད་པ་དེ་རེད། གཉིས་པ་རྒྱུ་དགེ་བའི་རྩ་བ་དཔག་ཏུ་མེད་པ་སྒོ་དུ་མ་ནས་བསག་པ་ནི། རྒྱུ་མེད་རྐྱེན་མེད་དུ་བདེ་བ་ཅན་ལ་སྐྱེ་མི་ཐུབ་མོད། འོན་ཀྱང་འུ་ཚོ་སོ་སོའི་སྐྱེ་བོ་དེའི་ནང་གི་ཁྱིམ་པ་བ་ཞིག་ཡིན་ཡང་འགྲུབ་ཐུབ་རྒྱུའི་རྒྱུ་དགེ་བའི་རྩ་བ་ཞིག་བསགས་ན་སྐྱེ་ཐུབ་པ་རེད། ཅི་ཕྱིར་འདི་ཞིང་ཁམས་གཞན་དང་མི་འདྲ་བར་དེ་འདྲ་སྐྱེ་སླ་བ་ཡིན་ཞེ་ན། མགོན་པོ་འོད་དཔག་མེད་ཀྱིས་དང་པོ་བྱང་ཆུབ་མཆོག་ཏུ་ཐུགས་བསྐྱེད་ནས་ཞིང་ཁམས་བཟུང་དུས་སྨོན་ལམ་ཁྱད་པར་ཅན་བཏབ་པའི་སྟོབས་ཀྱིས་ཡིན། མགོན་པོ་འོད་དཔག་མེད་ཀྱིས་སྨོན་ལམ་དེ་འགྲུབ་པའི་ཆེད་དུ་བསྐལ་བ་གང་གའི་ཀླུང་གི་བྱེ་མ་སྙེད་གཉིས་ཀྱི་བར་དུ་བྱང་ཆུབ་སེམས་དཔའི་བྱ་དཀའ་བའི་སྤྱོད་པ་དང་མཛད་པ་རླབས་པོ་ཆེ་ལ་སྐྱོ་སེམས་མེད་པར་བསླབས་པར་མཛད་ནས་མཇུག་མཐར་སྨོན་ལམ་གྱི་མཐུ་གྲུབ་པའོ། །གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་རེད། བཞི་བ་རྐྱེན་དགེ་བ་སེམས་ཅན་ཐམས་ཅད་རྫོགས་བྱང་ཐོབ་པའི་རྒྱུར་བསྔོ་བ་དང་སྨོན་ལམ་འདེབས་པ་ནི། དགེ་རྩ་བསགས་ཚད་བདེ་བ་ཅན་དུ་སྐྱེ་བའི་རྒྱུར་བསྔོ་ཞིང་སྨོན་ལམ་འདེབས་དགོས། མ་བསྔོས་ན་ཅི་ཡིན་འདི་ཡིན་མེད་པར་འཕྲོ་བརླག་ཏུ་འགྱུར་འགྲོ་བ་ཡིན། ས་ཆ་འདིའི་སྐད་ཀྱི་དབང་དུ་བཏང་ན། བར་ཁ་ས་ཁ་རུ་འགྱུར་འགྲོ་བ་ལས་གོ་མི་ཆོད། བདེ་བ་ཅན་ལ་སྐྱེ་བའི་རྒྱུ་བཞིའི་ནང་གི་དེ་རིང་རྒྱུ་དང་པོ་རྟེན་ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱེད་པའི་སྤྱི་རྣམ་ཙམ་ཞིག་དང་། བརྟེན་པ་སངས་རྒྱས་འོད་དཔག་མེད་འཁོར་དང་བཅས་པའི་སྐུའི་རྣམ་པ་ཡིད་ལ་བྱེད་ལུགས་བཤད་ཟིན་ལ། སྨོན་ལམ་གྱི་ཚིག་གི་ཐོག་ནས་འདི་ནས་འདིའི་བར་དུ་འདི་བསྟན་རེད། དེ་ནས་དེའི་བར་དུ་དེ་བསྟན་རེད་སྙམ་པ་ལྟ་བུ་ཞིག་ངེས་པར་གྱིས། གཅིག་གིས་གཅིག་ལ་ཤོད། མ་ཤེས་པ་རྣམས་བླ་སེར་ཚོར་དྲིས། དུས་རྒྱུན་དུ་ཁ་བརྡ་བྱ་ནའང་ཡ་རབས་ཀྱི་གླེང་མོལ་དང་ཆོས་ཕྱོགས་ཀྱི་སྐད་ཆ་བྱས་ན་ནང་དོན་ཡོད་པ་ཡིན་ཞིང་། ཕན་སྒོ་ཡོང་སྒོ་རང་ཉིད་ལ་ཆེ་བ་ཡིན། མཇུག་ཏུ་འུ་ཅག་གིས་ཐེངས་གཅིག་ལ་ཆོས་འཆད་ཉན་བྱས་པའི་དགེ་རྩ་བ་རྫོགས་བྱང་དུ་བསྔོ་དགོས་སོ། །

ཉིན་གཉིས་པའི་ཆོས་ཁྲིད།

མཚམས་སྦྱོར་གྱི་གདམས་ངག

ད་ལྟའི་སྐབས་སུ་སངས་རྒྱས་འཇིག་རྟེན་དུ་བྱོན་ཏེ་ཆོས་གསུངས། དེའི་བསྟན་པ་དམ་ཆོས་མ་ནུབ་པར་འཆད་ཉན་དར། བསྟན་པ་དེའི་སྒོར་ཞུགས། དམ་ཆོས་ཚུལ་བཞིན་དུ་སྒྲུབ་ཤེས། སྒྲུབ་ལོང་ཡོད། སྒྲུབ་པའི་ཆ་རྐྱེན་དང་ལྡན། སྒྲུབ་འདོད་རང་ལ་ཡོད་པ་འདི་སྤྱི་དང་བྱེ་བྲག་གཉིས་ཀའི་ངོས་ནས་སྒྲོན་མེའི་བསྐལ་བ་མ་ནུབ་པར། དཔེར་ན་ཉི་མས་འཛམ་གླིང་ལ་གཡས་སྐོར་བརྒྱབ་ན་རང་ངོས་ནས་ཀྱང་དེར་ལྡེ་བའི་སྐལ་བ་དང་ལྡན་སོང་བ་ལྟ་བུའོ། །འོན་ཀྱང་སྤྱི་ཁྱབ་ཀྱི་ངོས་ནས་འཇིན་རྟེན་གྱི་ཁམས་ལ་སངས་རྒྱས་ཀྱི་བསྟན་པ་དར་ཞིང་སྒྲོན་མེའི་བསྐལ་བ་ཤར་ཏེ་སྐལ་ལྡན་ལས་འཕྲོ་ཅན་ཚོགས་བསགས་སྨོན་ལམ་སྔོན་ལ་སོང་ཡོད་པ་ཐམས་ཅད་ཀྱི་མགོར་ཉི་མ་ཤར་ཡོད་མོད། འོན་ཀྱང་བྱ་བརྒྱའི་ཁ་ཤར་ལ་འཁོར་ཡང་ཕ་ཝང་སྐྱ་ལེབ་ཀྱི་ཁ་ནུབ་ལ་འཁོར་བ་ལྟར་རང་ཉིད་ལ་དེའི་མོས་པ་མེད་ན། ཉི་མ་འཛམ་གླིང་ལ་ཤར་ཀྱང་ཁ་བྱང་བསྟན་གྱི་བྲག་ཕུག་ལ་ཉི་མ་ཤར་ཐབས་མེད་པ་ལྟར་རེད། དེ་ལྟར་ན་འཇིག་རྟེན་དུ་སྒྲོན་མེའི་བསྐལ་བ་ཤར་ཡོད་ཀྱང་རང་མགོར་མུན་པ་འཁྲིགས་ན་མི་སྒེར་གྱི་སྟེང་དུ་མུན་པའི་བསྐལ་བ་ཚེས་པ་ལྟ་བུ་ཡིན། སྒྲོན་བསྐལ་མུན་བསྐལ་གང་བཤད་ཀྱང་། ཆོས་ཡོད་མེད་གང་ཡིན་ཀྱང་ཕྱི་མར་སྡུག་བསྔལ་མི་མྱོང་བའི་གདེང་ཚོད་རེ་ཡོད་ན་འགྲིག་ཡོད་ཀྱང་འཆི་ཁ་ཆོས་མེད་ལག་སྟོང་དུ་ལྷུང་དུས་ད་གཟོད་སྔར་བྱས་ཀྱི་ལས་ལ་འགྱོད་པ་ཇི་ལྟར་ཆེ་རུང་གློ་བུར་དུ་བཅའ་ལོང་སྐོར་ལོང་ཞིག་སྟེར་ནི་མ་རེད། ཤི་ཁ་གཟེར་ཁ་ཞིག་ལ་ད་གཟོད་ཤྭ་བ་རིག་དུས་མདའ་སྒྲོན་ཁུལ་བྱེད་མོད། འོན་ཀྱང་ཅུང་འཕྱིས་ཚར་བ་རེད། དེས་ན་རང་རེས་ནམ་རྒྱུན་ཁ་བརྡ་བཤད་དུས་འཇིག་རྟེན་གཏམ་གྱི་དཔེ་ལ། སྐྱེས་ཕོ་ཁོག་རེ་ལ་ཕོ་སེམས་རེ། མདའ་ཉག་ཕྲན་རེ་ལ་འགྲིམ་ལམ་རེ་ཡོད་ཟེར་བ་རེད། ཡ་ཆུང་ནང་ན་སྙིང་ཞིག་ཡོད་པ་དེ། འདང་རྒྱག་བྱེད་དང་། ཐོད་པའི་ངོ་ན་མིག་ཞིག་ཡོད་པ་དེ། རྡོག་ལམ་ལྟ་བྱེད་ཡིན། ཐག་རིང་རྒྱང་གི་ས་ཆ་དང་ཡུན་རིང་བསྐལ་བའི་ཆགས་འཇིག་རྣམས་ལ་ཅི་ཡང་ལྟ་མི་དགོས། རང་ཡོད་སའི་གཡས་རྩ་གཡོན་ཟུར་ལ་བལྟས་ན། ན་ནིང་ཡོད་པའི་མི་ད་ལོ་མེད་པ། དེའི་ནང་གི་ལ་ལ་ཆོས་ར་གཅིག་གི་ནང་ནས་ཆོས་མཉམ་དུ་ཞུས་ཤིང། ཚེ་མི་རྟག་པ་རྒྱུད་ལ་སྐྱེས་མ་མྱོང་བ་ཞིག་ཀྱང་མིན་པར་ཆོས་ལམ་རེར་ཞུགས་ཁུལ་བྱས་མོད། དེ་འདྲ་སླ་མོ་ཞིག་གིས་ཕྱི་མའི་ཡུལ་ལ་གློ་བུར་དུ་འགྲོ་ཆགས་རང་རོགས་གཉིས་ཀས་མ་བྱས་ཀྱང་བུད་སོང་བསམ་རྒྱུ། ལོ་ན་ཅུང་བགྲེས་པ་ཚོས་ཁ་ཡ་ན་ཟླ་ཅི་ཙམ་སོང་ཟིན། ད་ཅི་ཙམ་ལྷག་ཡོད་ལྟོས་དང་ཤེས་རྒྱུ་ཞིག་ཡོད། རང་ཅག་ཁོམ་པའི་དུས་ཚོད་ཞིག་མེད་པར། ལོ་རེའི་ནང་དུ་ཆོས་ཁྲིད་ལན་རེར་ཉན་པར་ཁོམ་ན་ད་དུང་སྐྱོན་མེད་མོད། མི་ཚེའི་ནང་དུ་ཆོས་ལན་རེ་ལན་གཉིས་མ་གཏོགས་ཉན་པར་མ་ཁོམ་ན་དལ་བ་བརྒྱད་ཀྱི་ཆ་རྐྱེན་ཚང་བའི་མི་ལུས་མིན་པའི་རྟགས་ཚང་བར་ཉེ་བ་རེད། དམྱལ་བ་ཡི་དྭགས་ཙམ་ཞིག་མིན་མོད་ཀླ་ཀློའི་ཕྱོགས་གཏོགས་དང་དུད་འགྲོ་ཚོ་དང་ཕལ་ཆེར་འདྲ། དུད་འགྲོ་བཟང་པོ་རིན་ཐང་ཅན་ལ་བརྩི་བ་དག་གི་སྐྱིད་དགའ་འདྲ་ཞིག་ད་དུང་ཨེ་ཡོད་མི་ཤེས། དེ་ལྟ་ན་ཁ་སང་ལ་ཕྱི་བལྟས་ཀྱི་འདས་པའི་བསམ་བློ་ཞིག་བཏང་། ད་ལྟ་ཇི་ལྟར་བྱེད་ཀྱིན་འདུག་རང་ཉིད་ཐད་ལ་བཞག་སྟེ་ལན་བལྟས་བརྒྱབ་ནས་ཁ་རང་ཐོག་ལ་ཚུར་སྐོར་དང། འདིའི་མ་འོངས་པའི་འདུན་སྣེ་རྒྱ་ལམ་གྱི་ཐག་རིང་ཐུང་འགྲོ་ལམ་བཟང་ངན་འགྲོ་སའི་དམིགས་ཡུལ་ལ་འདང་བསམ་བློ་སྐོར་མ་མྱོང་བས་སམ། འདང་རྒྱག་མ་ཤེས་ན་བློ་ཉེས་ཆེན་པོ་ཞིག་ཁུར་བ་ཡིན། རང་ཉིད་འཁོར་བ་ལ་ངེས་འབྱུང་མེད་ན་ཐར་བའི་ལམ་སྣེ་ཟིན་ཐབས་མེད་པས། ཕྱིན་ཆད་འཁོར་བར་མི་འཁྱམ་པའི་རྒྱུ་མེད་པ་རེད། དེས་ན་ཕྱི་མར་ངན་སོང་ལ་མི་ལྷུང་བའི་ཐབས་ཤེས་ཇི་ལྟར་ཡིན་བསམ་ནས་རང་གིས་རང་ལ་གྲོས་འདེབས་ཤིག་གམ་བསམ་བློ་ཞིག་བཏང་ན། རྨ་ཆུ་གཅོད་བྱེད་ཀྱི་རྟ། རྨ་ལ་འགྲོ་བྱེད་ཀྱི་གྲོ། རང་ལ་ཅི་ཡོད་བསམ་བློ་ནང་དུ་བསྐོར་དང་། ཚེ་ཕྱི་མར་འགྲོ་བྱེད་ཀྱི་འགྲོ་རྟེན། མཐོ་རིས་ལྷ་མིའི་སྐྱེ་བ་ལེན་བྱེད། དགེ་བ་བཅུ་སྒྲུབ་མི་དགེ་བཅུ་སྤོང་། དེའི་སྟེང་དུ་བསོད་ནམས་ཆ་མཐུན་གྱི་ལས་གསོག་དགོས་པ་ཡིན། གཟུགས་མེད་དང་བསམ་གཏན་གོང་མའི་ལྷ་གནས་གོང་མར་སྐྱེ་དགོས་ན་མི་གཡོ་བའི་ཏིང་ངེ་འཛིན་བསྒོམས་ཤིང་མི་གཡོ་བའི་ལས་གསོག་དགོས། དེ་ཚོར་བསམ་བློ་བཏང་ན། མི་རང་ཉིད་ཀྱིས་ཚེ་གང་བོར་སྲོག་རང་གིས་བཅད་པ། གཞན་ལ་གཅད་དུ་བཅུག་པ། གཞན་གྱིས་བཅད་པ་ལ་རྗེས་སུ་ཡི་རང་བྱས་པ་ལ་སོགས་པ་སྲོག་གཅོད་དང་འབྲེལ་བའི་ལས་དང། མ་བྱིན་ལེན་པ་ཡང། དངོས་སུ་འཇབ་ནས་གཞན་གྱི་རྒྱུ་རྫས་ཁྱེར་མ་མྱོང་ཡང་དབང་དང་མཐུ་གཡོ་ཐབས་ལ་སོགས་པས་མི་མགོ་བསྐོར་ཏེ་ལེན་པ། དེའི་ཐོག་ནས་མི་དགེ་བ་གཞན་དག་སྣ་ཚོགས་པ་རང་གིས་ལས་བསགས་པ་ལ་འདང་ཞིག་བརྒྱབ་ན་ཚེ་ཕྱི་མ་ལྟ་ཅི་ཚེ་སྨད་སྐྱིད་ཐབས་ཙམ་ཞིག་ཀྱང་སྒྲུབ་ཤེས་མེད། ལྷ་ཚེ་རིང་པོ་ཟེར་བ་རེད་མ་གཏོགས་ཁམས་གོང་མར་སྐྱེ་དགོས་ན་ཡང་བསམ་གཏན་དང་གཟུགས་མེད་ཀྱི་ཏིང་ངེ་འཛིན་བསྒོམ་དགོས། བསམ་གཟུགས་ཀྱི་ཏིང་ངེ་འཛིན་ཞིག་ལྟ་ཅི་འདོད་སེམས་རྩེ་གཅིག་པ་ཞིག་ཀྱང་སྒོམ་མི་ཤེས་ཤིང་སྒོམ་མ་མྱོང་བས། མདོར་ན་ཡར་གྱི་ཤྭ་རྗེས་མ་ཆོད་མར་གྱི་ཤེའུ་རྗེས་མ་ཆོད་སྨུག་པའི་ནང་ནས་ས་བྱང་སར་མགོ་འཁོར་ཏེ་ལམ་ལོག་ཏུ་སོང་བ་ལྟ་བུ། ཕྱོགས་ཤར་ལྷོ་ནུབ་བྱང་གོ་ནོར་ཏེ་གར་འགྲོ་ངོས་མ་ཟིན་པར་འཁྱམ་གྱིན་ཡོད་པ་ལྟ་བུ་ཞིག་ཡིན་པ་རེད། དེ་འདྲའི་བསོད་ནམས་མེད་པར་འཁོར་བའི་ནང་དུ་འདི་ལྟར་འཁྱམ་གྱིན་ཡོད་ན། མེད་པའི་ནང་ནས་ཅུང་ཡོད་པ་སྟེ། ལྷུང་ལུགས་ངན་པ་ཁ་སྦུབ་དུ་ལྷུང་ཡང་། ལྷུང་ས་བཟང་པོ་བྱེ་མའི་ནང་། ཟེར་བ་ནང་བཞིན། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐེངས་འགའ་འབྱུང་། །ཞེས་གསུངས་པ་ལྟར། ད་རེས་སངས་རྒྱས་ཀྱི་བསྟན་པ་དང་མཇལ། ལམ་སྟོན་དགེ་བའི་བཤེས་གཉེན་དང་འཕྲད་པའི་སྐབས་འདིར་ལམ་མ་ནོར་པའི་སྣེ་མོ་ཞིག་མ་ཟིན་ན། གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་བར་ག་ལ་འགྱུར། །ཞེས་གསུངས་པ་ལྟར། ནམ་ཡིན་ན་འདི་འདྲའི་གོ་སྐབས་བཟང་པོ་རྙེད་དཀའ། རང་རེས་ཆེ་ས་མཐོ་ས་ནས་བཤད་དགོས། ཐེག་ཆེན་མདོ་སྔགས་ཀྱི་ཆོས་ལམ་ལ་ཞུགས་ན་སྐྱེ་བ་ཚེ་རབས་མང་པོ་མི་འགོར་བར་སངས་རྒྱས་ཐུབ་པའི་ཆོས་དང་འཕྲད། དེའི་བསྟན་པའི་ལྷག་ཞབས་སུ་སྐྱེས། ཉམས་ལེན་བརྒྱུད་པའི་བྱིན་རླབས་མ་ཉམས་པར་ཕོ་རང་གིས་ཐུབ་ན་ཆོས་དང་གདམས་པས་ལག་མི་འཐོག་པའི་ཆོས་སྒོར་ཞུགས་ཡོད་པ་ཡིན། འོན་ཀྱང་སྦྱོང་རྒྱུ་དམའ་ས་ནས་སྦྱང་དགོས། རྒྱུགས་ལུགས་མ་ཤེས་གོང་། འགྲོ་ལུགས་ཤིག་མ་བསླབ་ན། བྱིས་པ་ཉྭ་མ་ཁྱོག་པ་ཞིག་གིས་དང་པོ་ཉིད་ནས་རྒྱུག་ཁུལ་བྱས་ཀྱང་གོམ་པ་སྤོས་མ་ཐག་ཏུ་ལོག་ལོས་འགྲོ། དཔེར་ན་ཞག་མ་བརྒྱ་འགོར་སའི་ལམ་ཐག་རིང་པོ་ཞིག་ལ་འགྲོ་དགོས་ན། བརྒྱ་ཐམ་པ་ཐོན་ལ་ཉེ་བའི་ས་ཆ་དང་ལམ་གྱི་རྒྱུགས་ཕྱོགས་ད་ནས་བཤད་འདུག་པ་ལས་ཐོག་མར་དེ་རིང་གི་ལམ་ལ་འགྲོ་ལུགས་ཤེས་པ་གལ་ཆེ་བ་ལྟར། སངས་རྒྱས་ཀྱི་ས་ཡི་སྟོབས་བཅུ་དང་མི་འཇིགས་པ་བཞི་ལ་སོགས་པ་ཐོས་བསམ་གྱི་ཤེས་རབ་བསྐྱེད་པའི་ཆེད་དུ་ཤེས་ལོས་དགོས་མོད། འོན་ཀྱང་དང་པོར་ཉམས་ལ་རན་ཤག་ཤག་འདིའི་རྡོ་འཕྲང་ནས་མར་ལ་བུད་ནས་རོག་ཆུ་ཟམ་པ་བརྒྱུད་དེ་སྨུག་རིང་ཁོག་ནས་ཡར་ལྷ་སའི་ཕྱོགས་ལ་འགྲོ་རྒྱུ་ཡིན་ན། དང་པོ་སྨུག་རིང་ལ་ཁའི་ཁ་བ་དང་འདམ་བག་ཇི་ལྟར་གཅད་རྒྱུའི་ཕྱོགས་ལ་འདང་རྒྱག་རྒྱུ་གལ་ཆེ། རང་གཞན་སུ་ཡིན་ཡང་ཆོས་མི་འགྲུབ་པའི་རྩ་བ་ནི་ཚེ་འདི་སྤོང་མ་ཐུབ་པས་ཡིན། དང་པོ་ཞིག་ནས་ས་ལམ་མཐོན་པོའི་སྤངས་རྟོགས་དང་ལྟ་སྒོམ་མཐོན་པོའི་ཉམས་ལེན་ཁོ་ན་ལ་ཁ་དཀྱོག་ནས་བཤད་པ་ཞིག་གིས་ཉམས་ལ་མ་རན་པས་ཕན་ཐོགས་མི་འབྱུང་། དེ་རིང་ཁ་རྩང་རྒྱལ་ཕྱི་ནང་མགོ་སེར་ནག་གཉིས་ཀའི་ནང་ན་དབུ་རྫོགས་ཕྱག་གསུམ་སྒོམ་པ་ཡིན་ཟེར་མཁན་མང་བ་རེད། འོན་ཀྱང་ངོ་མ་བཤད་ན་རྒྱུད་ཉོན་མོངས་དུག་ལྔའི་ཁ་ཞིག་མ་བྲི། སྙིང་རྗེ་བྱང་སེམས་ཀྱི་དྲི་ཞིག་མི་བྲོ་བ་དེ་ཆོས་ཀྱི་རྨང་གཞི་མ་ཞོག་པའི་རྐྱེན་གྱིས་རེད། དཔེར་ན་མུ་གེས་འཆི་ལ་ཉེ་བའི་མི་ཞིག་ཟས་སྐོམ་གྱིས་ཕོངས་ཏེ་གཟུགས་མགོར་ཀྱང་མི་ཁྱག་པ་ཞིག གལ་ཏེ་ཕྱུག་པོའི་བང་མཛོད་ནང་ནས་ཅི་དགོས་གང་འདོད་འདེམ་ཆོག་པ་ཞིག་བྱུང་ན། དང་པོ་ཟ་བཏུང་གི་རིགས་ཤིག་བདམ་ནས་ལྟོགས་མུག་གིས་མི་འཆི་བར་གཟུགས་མགོར་ཁྱག་ཐུབ་པ་ཞིག་བྱས་ཏེ་ད་གཟོད་རྒྱུ་ནོར་བདམ་པའི་ཕྱོགས་ལ་བསམ་བློ་གཏོང་དགོས་པ་ལས། དང་པོ་ནས་རྒྱུ་ནོར་ཆེན་པོ་ཞིག་བདམས་ཀྱང་སྲོག་མ་འཚམས་ན་རྒྱུ་ནོར་ཆེན་པོས་ཅི་བྱ། དེ་བཞིན་འཕྲལ་དུ་ཕན་ཐོགས་ཡོད་པའི་ཆོས་དེ་དང་པོ་སྒྲུབ་དགོས། དཔེ་གཞན་ཞིག་བཞག་ན། དམག་སར་དགྲ་འཛིང་བཞིན་ཡོད་ས་ཞིག་ནས་གཞུ་འཐེན་ཏེ་མདའ་འཕེན་གྱིན་ཡོད་ན་རྨོག་གི་འདབ་རས་མདའ་འཕེན་པར་མ་བདེ་ན་རྨོག་ཕུད་དགོས་ཀྱི་ལྷམ་ཕུད་པས་ཕན་ཐོགས་མེད། དོར་མ་ཕུད་པས་ཀྱང་ཕན་ཐོགས་མེད། མདུན་ན་ཡོད་པའི་ཆོས་མི་འགྲུབ་པའི་དཀའ་ཁག་ངན་པ་དེ་གང་ཡིན་ཟེར་ན། ཚེ་འདི་བློས་གཏོང་མི་ཐུབ་པས་འཇིག་རྟེན་ཆོས་བརྒྱད་ལ་ཞེན་པ་དེ་ཡིན། དེ་ངོས་བཟུང་ནས་གནད་ལ་སྨིན་ཏེ་ཆོས་ཤིག་བསྒྲུབ་དགོས། རང་རོགས་སྐྱ་སེར་གཉིས་ཀའི་འགག་སྒོ་མི་ཁྲོལ་ས་ངོ་མ་དེ་འདི་ཡིན། དེའི་གནད་མ་ཁྲོལ་ན་གང་བསྒྲུབས་ཀྱང་འབེན་ཐག་ཉེར་བཞག་ནས་མདའ་ཐག་རིང་དུ་འཕངས་པ་ལྟ་བུ་དང་། རྐུན་མ་ནགས་ནང་སོང་ན་རྐང་རྗེས་སྤང་ལ་གཅད་པ། འདྲེ་ཤར་སྒོར་བཞག་ནས་གླུད་ནུབ་སྒོར་འཕངས་པ་ལྟ་བུ་ཞིག་ལས་དོན་གནད་ཐོག་ཏུ་ཁེལ་མི་ཐུབ། ཆོས་པ་བྱེད་པར་དང་པོ་ནས་བློ་སྦྱོང་གིས་བློ་སྦྱངས་ཏེ། འདི་སྣང་ཚེ་འདིའི་ཞེན་པ་ཆུང་ཐབས་བྱ་དགོས། འོན་ཀྱང་ཁ་ཡིས་དེ་ལྟར་བཤད་པ་ཅུང་སླ་མོད། དོན་རྒྱུད་ལ་སྦྱར་ན་ང་དང་ཁོ། ཁེ་དང་ཕམ་ཞེས་བཤད་སར་ཐུག་དུས་ཡིག་ཐོག་གི་རི་མོ་དང་ཁ་ཐོག་གི་ཚིག་གར་སོང་ཡོད་མེད་ཀྱི་ཐད་ནས་རང་གཞན་སུ་ཡིན་ཡང་ཅུང་དཀའ་བས་འཁོར་བའི་རྒྱུན་ཐག་འདི་མི་ཆད་པར་འཆིང་བྱེད་ཀྱི་ཐག་པ་འདི་སྲ་བ་དང་དམ་པ་ཡིན་ཞེས་པའི་དོན་ཡང་དེ་ཡིན། རྒྱལ་བ་རྫོགས་པའི་སངས་རྒྱས་ཀྱིས་ཆོས་ཀྱི་སྒོ་མོ་མང་པོ་གསུངས་པ་འདི་དག་གཙོ་བོ་བདག་འཛིན་གྱི་འགོང་བོ་འདི་འཇོམ་ཆེད་ཡིན་ཞིང་། དེའི་སྨན་ཡིན་ལ། ཕན་ཐོགས་ཡོད་མེད་གང་ཡིན་ཀྱང་སྨན་བཏུང་དགོས་ཀྱི། སྨན་བླངས་ནས་སྨན་ལ་ཚོད་ལྟ་ཙམ་ཡང་མ་བྱས་ན་ནད་རང་དྲག་ཏུ་ག་ལ་འགྲོ། སྨན་སྒྲོ་བ་གང་ཡོད་ཀྱང་ཐུམ་གཅིག་ཀྱང་མ་འཐུང་ཚེ་སྨན་ལ་ལེ་བདའ་བྱ་རྒྱུ་ཡོད་པ་མ་ཡིན། དེས་ན་དལ་འབྱོར་རྙེད་དཀའ་ནས་འགོ་བཟུང་སྟེ་བློ་སྦྱོང་གི་ཆོས་ཐམས་ཅད་རང་གིས་ཉམས་སུ་ལེན། རང་སེམས་གྱོང་པོ་འདི་ལ་ནེམ་ཞིག་ཕོག་ན་རང་ལ་ཤི་དུས་གསོན་དུས་གཉིས་ཀར་ཕན་ཐོགས་ཤིང་། བདེ་བ་ཞིག་ཐོབ་ཡོང་བ་ཡིན། དཔེར་ན་འདོད་པ་ཆེ་དྲག་ཏེ་ཡོད་ཚད་ང་ལ་དགོས་བསམ་སྟེ་མི་དགོས་པ་གཅིག་ཀྱང་མེད་པའི་སེམས་ཀྱི་རྣམ་རྟོག་དེའི་རྗེས་སུ་ལུས་ངག་གཉིས་ཀས་མ་ཆོད་པར་དཀའ་ལས་སྡུག་བསྔལ་ཐམས་ཅད་རང་སྟེང་དུ་བླང་པ་ལྟ་བུ་ཞིག་ཐོན་ཡོང་པ་དང་། ཚེ་ཕྱི་མ་དེ་ལས་ཀྱང་སྡུག་ཅིག་ད་དུང་རྗེས་ན་ཡོད། གལ་ཏེ་འདོད་པ་དེ་འདྲ་ཞིག་མི་ཆེ་ཞིང། འདོད་ཆུང་ཆོག་ཤེས་ཀྱི་སྨན་ནོར་བུ་འདྲ་བ་དེ་རང་ལག་ཏུ་ཡོད་ན་འཛམ་གླིང་གི་རྒྱུ་ནོར་ཡོད་པ་ལས་སྐྱིད་ཅིང་བདེ། ཕྱི་མ་དེ་བཞིན་དུ་བདེ། དེ་ལྟར་དུ་བཟེ་རེ་ཁོང་ཁྲོ་མ་ཆེ་ན་ཐམས་ཅད་གྲོགས་ཡིན། གནོད་སེམས་ཁོང་ཁྲོ་ཁོ་ན་བྱས་ན་བར་སྐབས་ཤིག་ལ་སྣང་བ་དགྲ་རུ་ལོག་སྟེ། ཐད་དེ་ནས་ཚག་སྒྲ་ཆེན་པོ་ཞིག་གྲག་ནའང་དེ་ལ་ཁོང་ཁྲོ་དགོས་ཐུག་པ་ཡིན། རང་གི་སེམས་རྒྱུད་ཆོས་དང་འདྲེས་པའི་ཆེད་དུ་ཕྱོགས་གཅིག་ནས་ཚོགས་བསགས་སྒྲིབ་སྦྱོང་རེ་བྱས་ན་ཕན་ཐོགས་ཆེན་པོ་ཡོད། མེ་ཏོག་རྐང་གཅིག་དང་བའི་སེམས་ཀྱིས་དཀོན་མཆོག་ལ་ཕུལ་བཞག་ན་དེ་ཡང་ཚོགས་བསགས་ཡིན། ལྷ་ཁང་ནང་གི་ཐལ་བ་ཞིག་ཕྱགས་ན་སྒྲིབ་སྦྱང་ཡིན་ཞིང་། དགེ་སྡིག་ཟེར་བ་དེ་གཙོ་བོ་སེམས་ཀྱི་བྱེ་བྲག་ཡིན་ཏེ། ལྟར་སྣང་ལ་ཆེན་པོ་ཞིག་བྱས་དང་མ་བྱས་ཅི་ཡོད། དེ་མིན་སཱཙྪའི་སྟེང་དུ་ལྷམ་ཐེད་བཀབ་ན་ཉེས་པ་ལོས་ཡོད་མོད་འོན་ཀྱང་བསམ་པ་བཟང་པོས་དགེ་བར་འགྱུར་སོང་པ་ལྟ་བུ་རེད། དེས་ན་ཚོགས་བསགས་སྒྲིབ་སྦྱོང་དཀའ་མོ་དང་། ཐུབ་པ་མ་ཡིན་འབའ་ཞིག་མ་བསམ་མ་གཏོགས། ཆོས་ཆེན་པོ་སྒྲུབ་མ་ཐུབ། ཆོས་ཆུང་ཆུང་ལ་བློ་མ་ཁེལ་ནས། ཐ་མ་ཆོས་གོས་ཞབས་ནས་ཆོས་མེད་དུ་ལུས་རྒྱུ་དང་ཆོས་པའི་མིང་ཐོག་ནས་ལག་སྟོང་ལ་ལྷུང་བའི་ཉེན་ཁ་ཡོད། དེས་ན་ཆེ་ཐུབ་ཆུང་ཐུབ་ཀྱིས་ཚོགས་བསགས་སྒྲིབ་སྦྱོང་རེ་བྱེད་དགོས། ཆུ་ཐིག་བསགས་པས་རྒྱ་མཚོ་ལྟར་བསགས་ན་སོག་ཡོང་རྒྱུ་ཞིག་ཡོད་རེད་མ་གཏོགས་མ་བསོག་ན་སོག་ཡོང་རྒྱུ་ཞིག་མེད། ཚོགས་བསགས་ན་སྒྲིབ་པ་དག་སྒྲིབ་པ་དག་ན་ཚོགས་རང་ཤུགས་ཀྱིས་སོག་འགྲོ་བ་ཡིན། དེ་ལོས་ཡིན་སྒྲིབ་སྦྱང་ཐམས་ཅད་ཀྱི་མཆོག་བྱང་ཆུབ་ཀྱི་སེམས་བསྒོམ་པ་དེ་ཡིན་ཞིང་། བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་ན་ཚོགས་གཉིས་རང་ཤུགས་ཀྱིས་རྫོགས་པ་ཡིན། ཐམས་ཅད་ཀྱི་རྩ་བ་བསམ་པ་བཟང་པོ་བྱ་རྒྱུ་དེ་ཡིན་པས་དེ་ལུགས་ཀྱིས་རང་རྒྱུད་ལ་ནམ་ཡིན་ན་ལྟ་རྒྱུ་ནི་མན་ངག་དང་། ཞལ་གདམས། སྙིང་གཏམ་ཡིན། རང་སེམས་རང་ལ་དཀར་བའི་ཁ་ཡོད་ལག་ཡོད་ཀྱི་ཕན་དགོས་དེའི་ནང་ན་ཡོད་པ་རེད། ཕྱི་ལ་མ་ལྟ་ནང་ལ་ལྟོས་ཕྱིའི་འཁོར་བའི་འཁྲུལ་སྣང་ལ་མ་དག་པ་ལོས་མང་། དེ་ལ་བགྲང་ཚོད་ཅིག་ག་ལ་ཡོད། ནང་རང་གི་སེམས་དེ་ཐུལ་ནས་རང་རྒྱུད་འགྱུར་དུས་སྡུག་བསྔལ་གྱི་རྩ་བ་ཆོད་སོང་ལ། སྔོན་ནས་ད་ལྟའི་བར་དུ་ཐོས་མ་མྱོང་བའི་དོན་ཆེན། ཚིག་ཙམ་རེ་ཐོས་མྱོང་ནའང་དོན་ལ་བསམ་བློ་འཁོར་མ་མྱོང་བ་འམ་ཤེས་མ་མྱོང་བའི་དོན་ཆེན་དེ་ཆོས་ཉན་པའམ་ཐོས་པ་བཙལ་ན་ཤེས་རྒྱུ་གོ་རྒྱུ་ཞིག་ཡོད་པ་ཡིན། རང་ཉིད་བཟང་ན་བརྒྱན་ན་བདེ་ན་སྐྱིད་ན་བསམ་མཁན་ཞིག་མ་གཏོགས་ང་མ་བདེ་ན་མ་སྐྱིད་ན་བསམ་མཁན་ཞིག་སུ་གཅིག་མེད། འོན་ཀྱང་བདེ་ཐབས་སྐྱིད་ཐབས་ཀྱི་ཐབས་དེ་མ་ཤེས་པས་མགོ་འཁོར། མགོ་འཁོར་མཁན་ཤ་སྟག་ལྷན་དུ་བསྡད་པས་རིག་རྒྱུ་གོ་རྒྱུ་ཚང་མ་མ་རབས་ཀྱི་སྤྱོད་ངན་དང་བསམ་ངན་འབའ་ཞིག་ཡིན་པས། དུས་ངན་གྱི་བྱ་སྤྱོད་དང་གྲོགས་ངན་གྱི་ཕྱོགས་སུ་མི་ཤོར་བའི་ཐབས་ཤིག་ག་ལ་ཡོད། དེས་ན་གྲོགས་ངན་དང་འགྲོགས་པས་བཟང་ཞིག་ལོབ་རྒྱུ་མེད་ལ། བློ་ཡག་པ་ཞིག་དེའི་ཁྲོད་དུ་རྙེད་རྒྱུ་ཡོད་པ་མ་རེད། སྔོན་ཞིག་ལ་ཐ་ག་པ་ཞིག་ཡོད། དེ་ཉིན་གཅིག་ནགས་ནང་དུ་ཤིང་གཅད་སར་སོང། ཁོ་རང་སེམས་རྒྱུད་དྲང་མོ་ཞིག་ཡིན་པས། ལྗོན་ཤིང་གསར་བ་རྣམས་གཅོད་མ་བྲ་ནས་རེ་རེ་བལྟས་དུས་རེ་རེ་གཅོད་མ་བྲ་རེ་རེ་བལྟས་དུས་རེ་རེ་གཅོད་མ་བྲ་བར་མཐར་ནགས་འདབས་ལ་ཐོན་སོང་། དེར་ནགས་ཀྱི་ལྷ་མོས་མི་བསམ་བཟང་ཞིག་ཡིན་པར་ཤེས་ནས། དེ་ལ་དངོས་གྲུབ་གནང་བའི་ཆེད་དུ་རང་གཟུགས་བསྟན་ཏེ་ཁྱོད་ལ་དངོས་གྲུབ་ཅི་དགོས་ཅེས་སྨྲས་པར། ཁོ་རང་ལ་འགྲོ་རོགས་ཞིག་ཡོད་པ་དེར་ངས་ཅི་ཟེར་ཞེས་བློ་དྲིས་པར། འགྲོ་རོགས་དེས་ཁྱོད་ཀྱིས་མདུན་ཕྱོགས་ཀྱི་རྐང་ལག་གཉིས་ཀས་ཅི་འདྲའི་ལས་ཐུབ་ཀྱིན་འདུག གལ་ཏེ་རྒྱབ་ཕྱོགས་ནའང་རྐང་ལག་ཆ་གཉིས་ཡོད་ན་བདུན་རྒྱབ་གཉིས་ཀས་ཐག་འཐག་ན་ཅི་འདྲ་ལས་ཀ་མང་པོ་མི་ཐུབ་བམ། དེ་བས་དངོས་གྲུབ་འདི་ཞུས་ན་ལེགས་ཤེས་སྨྲས་པ་དང་། ཐ་ག་པ་ཡང་བློ་འགྱུར་སླ་བས་བདེན་པར་བསམས་ནས་ང་ལ་རྒྱབ་ཏུ་རྐང་ལག་བཞི་ཡོད་ཐབས་ཞིག་བྱ་རོགས་ཤེས་སྨྲས་པས། དེ་མ་ཐག་རྒྱབ་ཏུ་རྐང་ལག་བཞི་ཡོད་པར་གྱུར་ཅིང་། ད་ཐག་འཐག་དགོས་བསམ་ནས་ཁོ་རང་གཉིས་ཀ་གྲོང་ཁྱེར་གྱི་ནང་དུ་སོང་ནས་ཐག་འཐག་རྒྱུ་ཨེ་ཡོད་ཟེར་བཞིན་སྒོ་དུ་ཡོད་ལ་དྲིས། ཚང་མས་དེ་འདྲ་ལྟས་ངན་ཟེར་ནས་རྡོ་རྡུང་བྱས་ཏེ་དེད། དེའི་སྐབས་སུ་ནམ་མཁའི་ལྷ་ཞིག་གིས། རང་ཡང་མཁས་པར་མ་གྱུར་ལ། །གྲོགས་ཀྱང་བློ་དང་མི་ལྡན་པས། །དེ་དག་མྱུར་དུ་བརླག་འགྱུར་ཏེ། །ནགས་ཀྱི་ཐ་ག་པ་བཞིན་ནོ། །ཞེས་གསུངས་པ་རེད། གྲོགས་བཟང་པོའི་བསླབ་བྱ་མ་གཏོགས་ངན་པའི་ཁ་ལ་ཉན་མི་རུང་། ཆགས་སྡང་ཆེ་བའི་ངག་འཁྱལ་མིན་ནའང་བྱ་རོག་སོ་རྟོག་གི་བསྟན་བཅོས་ལྟ་བུ་འདི་ཕྱིའི་དོན་ཆེན་བསྒྲུབ་པའི་ཡན་ལག་ཏུ་མ་གྱུར་པ་དོན་མེད་དུས་ཚོད་འགྲོ་བའི་བསྟན་བཅོས་དང་རྩོམ་ཡིག་དེ་ཚོར་བལྟ་མི་རུང་ངོ་། །དང་པོ་ཉིད་ནས་ངས་ཚེ་ཕྱི་མའི་དོན་ཆེན་ཞིག་གམ། ཡང་ན་ད་རེས་ཐེངས་གཅིག་ལ་ལམ་ཡག་པོ་ཞིག་རྙེད་པས་རང་གཞན་གཉིས་དོན་དུ་སངས་རྒྱས་ཀྱི་གོ་འཕང་ཐོབ་པ་ཞིག་ཅི་ནས་ཀྱང་སྒྲུབ་དགོས་ལྷག་ཏུ་མ་བསམ་ནའང། རང་བློ་རང་ལ་མི་དཀར་བ་མི་སྲིད་པས་ཚེ་འདིར་བདེ་ཐབས་སྐྱིད་ཐབས་དང་། ཚེ་འདིར་རང་ཉིད་མིའི་ནང་ནས་མི་རབ་སྟེ། ཨང་དང་འབྲིང་བཀར་ན་དང་པོ་རེད་ཐབས་ལ་བསམ་བློ་གཏོང་ལོས་དགོས། དེས་ན་མི་ཞིག་ཇི་ལྟར་བྱེད་ཚུལ་ནི་ཐོས་པ་ཚོལ་དང་ཤེས་རྒྱུ་ཡོད་པ་རེད། ཐོས་པ་ཆོས་ཕྱོགས་སུ་བསྐོར་ཏེ་རང་གཞན་ཐར་ལམ་ལ་བཀོད་པའི་ཆོས་ཞུ་ཆོག་རེད། དེའི་རིགས་བློ་ལ་མ་ཤོང་ཞིང་ཡིད་ལ་མ་བབ་ན། ཚེ་འདི་ལ་ཡང་མིས་མི་གོ་ཆོད་བྱེད་ཀྱི་ཤེས་བྱ་མང་པོ་ཞིག་ཐོས་པ་ཚོལ་ནས་ཤེས་རྒྱུ་ཡོད། མི་འགའ་རེ་ཆོས་སྦྱོང་མ་མྱོང་བླ་མ་བསྟེན་མ་མྱོང་ན་ཡང་བསམ་པ་བཟང་པོ་ཅན་། སྙིང་རྗེ་ཡོད་པ། ངང་རྒྱུད་འཇམ་པོ། སྡུག་བསྔལ་ཅན་དག་སྐྱོབས་ཐབས་བྱེད་པ། མི་གཞན་ལ་ཕན་ཐོགས་པའི་ལས་ཀར་སྤྱོད་བཟང་རུ་བརྩི་བ། ཕར་ལ་ཐོ་བཙམས་ཀྱང་ཚུར་ལ་གུས་ཞབས་བྱེད་མཁན། དེ་འདྲའི་ཁོག་ཡངས་བློ་རྒྱ་ཆེན་པོ་ཅན་ཡོད་པ་དེ་ཚོ་མང་ཆེ་བས་ཡ་རབས་སྤྱོད་བཟང་གི་སྐོར་གྱི་ཐོས་པ་རེ་བཙལ་ཏེ་དེའི་དོན་ཤེས་ཤིང་། དེ་དགོས་པ་རྟོགས་ནས་རང་རྒྱུད་ལ་དེའི་གཤིས་ཀ་ཆགས་སུ་བཅུག །རང་ཉིད་མི་གྲལ་དུ་སོང་ཚེ་ངོ་མི་ཚ་བ་ཞིག་བྱ་བསམ་ནས་སྦྱོང་བ་ལག་ལེན་ལ་གཏུག་ཏེ་གོམ་སོང་ན། བར་སྐབས་ཤིག་ལ་ཡ་རབས་ཀྱི་མི་ལུགས་འབའ་ཞིག་ལ་སློབ་ཅིང་མ་རབས་ཀྱི་སྤྱོད་ངན་ལ་གཙོག་ལྟ་བ་དེ་འདྲ་ཞིག་ཏུ་འགྱུར་རྒྱུ་ཡོད་པ་ཡིན། དེའི་ཕྱིར་ན་ཡང་ཐོས་པ་ཚོལ་དགོས། འཇིག་རྟེན་གྱི་བདེ་བའི་དངོས་པོ་ཐམས་ཅད་དཀའ་སྤྱད་འབད་བརྩོན་གྱིས་བསྒྲུབས་ཡོང་བ་ཤ་གཏགས་ཡིན། དེ་ལས་ཀྱང་ཆེ་བའི་ཕྱི་མའི་བདེ་བ་ཞིག་སྒྲུབ་དགོས་ན་དཀའ་ལས་ཅུང་ཟད་ཅིག་མྱོང་ལོས་དགོས། འགའ་ཞིག་ཚེ་འདིར་དཀའ་ལས་ཆེན་པོར་རྒྱག་མི་དགོས་པར་ཕུན་སུམ་ཚོགས་འདུག་པ་འདི་ཚོ་ཅི་རེད་ཅེ་ན། དེ་ནི་སྐྱེ་བ་སྔོན་མར་ཚོགས་བསགས་པའི་འབྲས་བུ་ཚེ་འདིར་སྨིན་པ་རེད། རང་རེ་སོ་སྐྱེ་ཞིག་གིས་འགྲུབ་ཐུབ་རྒྱུ་ཞིག་ལ་ཅི་བཤད་ཀྱང་ཆུང་ངུ་ཞིག་ལས་མི་འགྲུབ་པས། ཚེ་འདིར་བདེ་བ་ཅན་ལ་སྐྱེ་བྱེད་ཀྱི་རྒྱུ་ཆུང་ངུ་ཞིག་བསྒྲུབས་ནས་བདེ་བ་ཅན་གྱི་བདེ་སྐྱིད་ཆེན་པོ་དེ་འདྲ་མྱོང་ཆོག་པ་འདི་སུས་དཀའ་ལས་བརྒྱབ་ནས་བསྒྲུབས་པ་རེད་ཅེ་ན། སངས་རྒྱས་འོད་དཔག་མེད་ཀྱི་སྔོན་སློབ་པ་ལམ་གྱི་གནས་སྐབས་སུ། སངས་རྒྱས་འཇིག་རྟེན་དབང་ཕྱུག་རྒྱལ་པོའི་མདུན་དུ་བྱང་ཆུབ་མཆོག་ཏུ་ཐུགས་བསྐྱེད་དེ་མི་ལོ་བྱེ་བ་གཅིག་གི་བར་དུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཡོན་ཏན་དང་། དེའི་ཞིང་ཁམས་ཀྱི་རྒྱན་བཀོད་ཐམས་ཅད། རྒྱུ་ཅི་ལས་བྱུང་། རྐྱེན་གང་ལ་བརྟེན། གྲོགས་ཅི་ཞིག་དགོས། གཞི་གང་ལས་བྱུང་ལ་སོགས་པ་ཐོས་པ་བསགས། ཐོས་དོན་བསམ། སངས་རྒྱས་དེ་ཐམས་ཅད་ཀྱི་ཡོན་ཏན་དང་། ཞིང་ཁམས་དེ་ཐམས་ཅད་ཀྱི་བཀོད་པ་དང་རྒྱན་ཐམས་ཅད་ཕྱོགས་གཅིག་ལ་བསྡོམས་པའི་ཞིང་ཁམས་ཤིག་གཟུང་དགོས་པར། ཞིང་ཁམས་གཞན་དུ་སྐྱེས་པ་ལ་དགེ་རྩ་རྒྱ་ཆེན་པོ་མ་བསགས་ན་མི་སྐྱེ་བས། ཞིང་ཁམས་ལ་སོ་སོའི་སྐྱེ་བོ་རྒྱུ་བཞི་པོ་ཚོགས་ཙམ་གྱིས་སྐྱེ་ཐུབ་པའི་ཞིང་ཁམས་ཤིག་བཟུང་དགོས་དགོངས་ནས་དེ་བཞིན་དུ་སྨོན་ལམ་བཏབ། དགེ་སློང་ཆོས་ཀྱི་འབྱུང་གནས་དྲན་པ་དང་བློ་གྲོས་ཤེས་རབ་དང་བརྩོན་འགྲུས་ལྡན་པ་དེ་ལ་སངས་རྒྱས་ཀྱིས་ལུང་བསྟན་ཐོབ་སྟེ་མ་འོངས་པའི་དུས་སྐལ་བ་གྲངས་མེད་གང་གཱའི་ཀླུང་གི་བྱེ་མ་རྙེད་འདས་པའི་དུས་ན། ཞིང་ཁམས་བདེ་བ་ཅན་ཞེས་བྱ་བ་འགྲུབ་སྟེ་དེ་བཞིན་གཤེགས་པ་ཚེ་དཔག་ཏུ་མེད་པ་ཞེས་བྱ་བར་འགྱུར་ཞེས་དབུགས་དབྱུང་ལུང་བསྟན་ཐོབ། དགེ་སློང་ཆོས་ཀྱི་འབྱུང་གནས་དེའི་སྐབས་སུ་ས་བརྒྱད་པ་ལ་གནས་པའི་བྱང་ཆུབ་སེམས་དཔའ་ཞིག་ཡིན་ཞིང་། བསྐལ་བ་དེ་འདྲ་མང་པོ་ཞིག་གི་ཚེ་ས་ལ་གནས་པའི་བྱང་ཆུབ་སེམས་དཔའ་ཞིག་གི་ཚུལ་གྱིས་རླབས་ཆེན་བྱ་དཀའ་བའི་སྤྱོད་པ་སེམས་ཅན་རེ་རེའི་དོན་དུ་དབུ་དང་ཡན་ལག་གི་སྦྱིན་པ་མང་པོ་བཏང་། སྲོག་དང་བརྗེས་ཏེ་ཚུལ་ཁྲིམས་སྲུང་བ་ལ་སོགས་པ་དང་། ཆོས་ཚིག་བཞི་རེའི་དོན་དུ་མེ་ནང་ལ་མཆོངས་བ། སྤུ་གྲིའི་ཐང་བརྒལ་བ། ཆོས་ཚིག་རེའི་དོན་དུ་ཤའི་ཀོང་བུ་ལ་མར་མེ་སྟོང་ཚོ་སྦར། ཁྲག་གི་སྣག་ཚ། རུས་པའི་སྨྱུ་གུ། པགས་པའི་ཤོག་གུ་བྱས་ཏེ་དམ་པའི་ཆོས་བཙལ། དམ་པའི་ཆོས་དེའི་དོན་ལ་ཐོས་བསམ་སྒོམ་གསུམ་དུས་བསྐལ་ཆེན་མང་པོར་མཛད་ནས། ཆོས་ཀྱི་རྔ་ཆེན་པོ་བརྡུང་། ཆོས་ཀྱི་དུང་ཆེན་པོ་བུས། ཆོས་ཀྱི་རྒྱལ་མཚན་ཆེན་པོ་བསྒྲེངས། དེའི་སྟེང་ནས་ཆོས་ཀྱི་སྒྲོན་མེ་ཆེན་པོ་སྦར་ཏེ་འཇིག་རྟེན་གྱི་མུན་པ་སེལ་བར་མཛད། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་བསྙེན་བཀུར་མཛད་དེ་མཐར་སྨོན་ལམ་མངོན་དུ་གྱུར། སྨོན་ལམ་མངོན་དུ་གྱུར་བའི་གནས་སྐབས་སུ་གཞི་ནས་སངས་རྒྱས་ཏེ་ད་ལྟའི་སྐབས་ན་བདེ་བ་ཅན་གྱི་ཞག་མ་བཅུ་སོང་བ་རེད། བདེ་བ་ཅན་གྱི་ཞག་མ་རེ་ལ་རང་རེའི་བསྐལ་བ་གཅིག་རེད་གསུངས་ཡོད་པ་རེད། སངས་རྒྱས་འོད་དཔག་མེད་པའི་ཐུགས་བསྐྱེད་རྒྱ་ཆེན་པོ་དེའི་མཐུ་ལ་བརྟེན་ནས་རང་རེས་དཀའ་ཚེགས་ཆུང་ངུ་ཞིག་བརྒྱབ་ནའང་བདེ་བ་ཅན་གྱི་བདེ་སྐྱིད་ལོངས་སྤྱོད་དང་དམ་པའི་ཆོས་ལ་སྤྱོད་ཆོག་པ་འདི་འོད་དཔག་མེད་པའི་བཀའ་དྲིན་རེད། སྤྱིར་སངས་རྒྱས་ཀྱི་མཛད་པ་སེམས་ཅན་གྱི་དོན་ལས་གཞན་དུ་མེད། དགོས་རང་རེའི་སྐྱེ་བ་སྔོན་མར་བསོད་ནམས་མང་པོ་ཞིག་བསགས་ཏེ་ད་ལྟ་བདེ་བ་ཅན་ལ་སྐྱེ་བའི་རྒྱུ་བཞི་སྒྲུབ་ཐུབ་པའི་ལུས་རྟེན་ཞིག་བླངས། བདེ་བ་ཅན་ལ་སྐྱེ་བའི་རྒྱུ་བཞི་ཤེས་པའི་གོ་སྐབས་ཤིག་རྙེད་པ་འདི་དབུལ་བོའི་ཁྱིམ་དུ་གསེར་རྡོལ་དང་འདྲ་བའོ། །ནོར་བུ་རང་ལག་ཏུ་ཐོབ་དུས་བེད་གཅད་མ་ཤེས་ན་རྗེས་ནས་འགྱོད་དུས་གྱོང་ཆེ་བ་རེད། དེས་ན་ཚེ་ཕྱི་མར་བསམ་པའི་མི་དང་། རང་གཞན་འཁོར་བའི་མཚོ་ལས་ཐར་འདོད་ཡོད་མཁན་གང་ཟག་སེམས་ཡོད་ཅིག་ཡིན་ན་སྨྲོས་ཅི་དགོས། ད་དུང་དེ་འདྲའི་བློ་སྣ་ནང་དུ་ཁུག་མེད་པའི་མི་ཡིན་ནའང་ཚེ་འདིར་མི་གྲལ་ལ་འགྲོ་ལུགས་ཤེས་རྒྱུ་ཡོད། དེ་ཐོས་པ་ཚོལ་ན་ཤེས་རྒྱུ་ཡོད། ཐོས་པ་ཚོལ་བ་ནི་སྔར་མེད་ཀྱི་མིག་གསར་བ་ཞིག་སྒྲུབ་པ་དང་མཚུངས་ཞེས་ནམ་རྒྱུན་བཤད་ཀྱིན་ཡོད་པ་དེ་རེད། མིག་མེད་མཁན་ཞིག་ལ་མིག་གསར་བ་ཞིག་སྤྲད་བཞག་ན་སྣང་བའི་གོ་སྐབས་གསར་བ་ཞིག་ལ་ལོངས་སྤྱོད་རྒྱུ་ཡོད་པ་རེད། སྔར་མིག་མེད་པའི་དུས་དང་བསྡུར་ན་མི་ལུས་གསར་པ་ཁྱད་འཕགས་ཤིག་ཐོབ་བཞག་པ་དང་གཅིག་མཚུངས་ཡིན། དེ་ལྟར་དུ་ཆོས་འཇིག་རྟེན་གཉིས་ཀའི་སྔར་བསམ་ཕྱི་འདང་སྔ་བལྟས་ཕྱི་བལྟས་ཤེས་བྱེད་ཀྱི་མིག་དེ་ཐོས་པ་ཚོལ་ནས་ཡོང་དགོས། དེ་ཡང་དགོས་པས་ཉན་དགོས། ཆོས་ཉན་ཟེར་དུས། ཆང་མ་འཐུང་། དུ་བ་མ་འཐེན། རྒྱན་སྐུགས་མ་འཇོག དེ་དག་ཁས་ལེན་གྱིས་ཟེར་ཡོང་ཆས་ལོས་ཡིན། བན་རྒན་དང་རྒས་རྒན་དག་གིས་ཅི་མི་ཟེར། གལ་ཏེ་དེ་དག་གི་ངག་ལ་ཉན་ན། ཉན་རྒྱུ་ཆོག་རྒྱུ་གཅིག་ཀྱང་ཡོད་པ་མ་ཡིན་བསམས་ནས་ཞེན་པ་མ་ལོག་དང་། རང་འདང་རང་ལ་བརྒྱབ་ན་ད་སྔོན་ཡན་ཆད་དུ་བརྒྱུགས་བརྒྱུགས་འདུར་འདུར་བསྣོགས་བསྣོགས་པས་ཅི་ཞིག་འགྲུབ་ཡོད། ཚེ་འདིར་དགོས་པའི་རྒྱུ་ལོན་མེད་ལ། ཚེ་ཕྱི་མར་ཕན་པའི་ཆོས་འགྲུབ་མེད། མནའ་ཟོས། རྫུན་བཤད། མགོ་བསྐོར། ཚོགས་ངན་བསགས། མི་སེམས་དཀྲུག་པས་སྡིག་པའི་ཁུར་བོ་རི་རབ་ཙམ་ཞིག་སོག་པ་ལས་ཅི་ཡང་འགྲུབ་མེད། དེ་ཅི་ཞིག་གིས་ལན་པ་རེད་ཅེ་ན། ཆོས་སྒྲུབ་སྟངས་མ་ཤེས་པར་མ་ཟད་འཇིག་རྟེན་སྒྲུབ་སྟངས་མ་ཤེས་པས་རེད། ཕུགས་དེད་ན་ཤེས་རབ་མེད་པས་རེད། ཤེས་རབ་ཀྱི་མིག་མེད་པས་ཅི་ཞིག་བྱས་ཀྱང་ལོང་བས་ལོང་འགྲོའི་བྱེད་པ་དང་འདྲ་བར་མིག་ཡོད་ཅིག་གིས་བལྟས་ཚེ་གད་མོའི་གནས་སུ་འགྱུར་འགྲོ། ཆོས་མ་སྦྱོང་བའི་སྔོན་དུ་མི་བྱེད་ལུགས་སྦྱོང་དགོས། དང་པོ་མི་ཞིག་བྱེད་དགོས། མི་ངོ་མ་ཡོན་ཏན་ཆ་ཚང་ཡོད་པ་ཞིག་བྱེད། དེ་ནས་ཆོས་པ་བྱེད་དགོས། ཆོས་པ་རབ་འབྲིང་ཐ་གསུམ་གྱི་ནང་ནས་གང་གི་གྲལ་དུ་འགྲོ་དགོས་ད་གཟོད་ལྟ་རྒྱུ་ཅན་ཞིག་ཡིན། ད་ལྟའི་མི་ལུས་འདིས་དུད་འགྲོའི་གོ་ཞིག་མ་གཏོགས་མ་ཆོད། དུད་འགྲོ་རིན་ཐང་ཅན་ཞིག་གི་གོ་ཡང་མ་ཆོད་པ་ལྟར་རེད། མི་ངོ་མ་ཞིག་ཏུ་འགྱུར་དགོས་ན་རང་ཉིད་ཀྱི་སྤྱོད་ལམ་ངན་པ་དེ་བཅོས་དགོས། སྤྱོད་ལམ་ངན་པ་དེའི་ཕུགས་གང་ལ་ཐུག་ཡོད་ཅེ་ན་བསམ་པ་ངན་པ་ལ་ཐུག་ཡོད། བསམ་ངན་དེ་གང་ལས་བྱུང་ཞེ་ན་རང་འདོད་དང་ཆགས་ཞེན་ཇེ་ཆེར་སོང་བ་ལས་བྱུང་བ་རེད། དེའི་ཕུགས་ངར་འཛིན་ལ་ཐུག ང་མེད་ལ་ང་བདག་མེད་ལ་བདག་ཏུ་བཟུང་ནས་སྡུག་བསྔལ་ཐམས་ཅད་འདྲེན་ཡོང་བ་ཡིན། དེས་ན་ནད་གཞི་ཆེན་བཅོས་རྒྱུ་ལ་སྨན་རིམ་གྱིས་བསྟེན་དགོས། དཔེར་ན་དང་པོ་ཆེས་ཟུག་གཟེར་རྒོད་པའི་ན་ཚ་ཚབ་ཆེན་དག་གི་མགོ་གནོན་ཐབས་བྱ་དགོས། དེ་ཅུང་ཙམ་ནོན་དུས་དེ་ནས་རིམ་གྱིས་ནད་ཐོག་གི་སྨན་བཏང་ནས་ནད་ཀྱི་རྩ་བ་བཅད་དེ་ནད་རྙིང་ཤུལ་དུ་མི་ལུས་པར་བྱེད་པ་ལྟར། སྡུག་བསྔལ་གྱི་རྩ་བ་དྲུང་ནས་ཕྱུང་བྱེད་གཏིང་འདོན་གྱི་སྨན་ལ་བསམ་བློ་གཞི་ནས་གཏོང་དགོས། དང་པོ་འདོད་ཆགས་ཞེ་སྡང་གཏི་མུག་གསུམ་ནི་ནད་ཀྱི་སྡོང་པོ་གསུམ་རེད། སོ་སོའི་སྐྱེ་བོ་ཞིག་ལ་དེ་གསུམ་ལྷན་སྐྱེས་ཀྱི་ནད་ཡིན་མོད། དེ་གསུམ་ཤུགས་ཆུང་ཐབས་ཤིག་ཐོན་ན་སྡུག་བསྔལ་གྱི་ཚོར་བ་མི་བཟོད་པ་དེ་ཚོ་མགོ་ཅུང་ཟད་ཅིག་ནོན་འགྲོ་བ་ཡིན། མི་ནོར་ཟས་གསུམ་ཡིད་འོང་གི་དངོས་པོ་ལ་ཞེན་པ་འདི། མིག་གཟུགས་ལ་ཆགས་ནས་ཕྱེ་ལེབ་མར་མེའི་འོད་ཀྱིས་ཚིག་པ་དང་། རྣ་བ་སྒྲ་ལ་ཆགས་ནས་རི་དྭགས་རྔོན་པའི་པི་ཝང་གིས་བསླུས་ཏེ་བསད་པ་ལ་སོགས་ལ་བསམ་བློ་བཏང་སྟེ་འདོད་ཆུང་ཆོག་ཤེས་རེ་བསྟེན་ཨེ་ཐུབ་བལྟས་ན། རང་ཉིད་སྐྱིད་ཐབས་དང་སྡུག་བསྔལ་ཆུང་ཐབས་ལ་ཕན་ཐོགས་ཆེན་པོ་ཡོད། ཞེ་སྡང་ནི་དང་པོ་ནས་ཁོང་ཁྲོ་རྩ་བ་ནས་སྤང་ཐབས་ད་དུང་མེད་མོད། བྱམས་སྙིང་རྗེ་བཟོད་པའི་གོ་ཆ་རེ་བགོས་དང། ཁྱེད་ཀྱིས་དང་པོ་ཅི་བསམ་འདི་དྲན་མེད་པར་ཞེ་སྡང་གི་དབང་དུ་ཤོར་ནས་ལས་ཉེས་མ་བྱས་ན། ཞེ་སྡང་མར་ཞི་དུས་རེད་མ་སོང་སྙམ་པའི་འགྱོད་པ་མི་དགོས། ཞེ་སྡང་གི་དབང་གིས་གཞན་ལ་གནོད་པ་བསྐྱལ་བའི་ཚེ་འདི་ཕྱི་གཉིས་ཀའི་རྗེས་འབྲས་ངན་པ་མྱོང་མི་དགོས། ལུས་ངག་གི་གཞན་ལ་གནོད་པ་བསྐྱལ་མེད་རུང་སེམས་ཀྱི་ཀུན་ནས་མནར་སེམས་པ་དེ་ཡང་སྡིག་པ་ཆེ། དེ་བས་སྙིང་རྗེ་དང་བྱམས་པ་སྒོམ་དང་རང་བདེ་གཞན་སྐྱིད་ཀྱི་རྣམ་སྨིན་བཟང་བ་རེད། གཏི་མུག་ནི། དེ་རྣམས་མི་ཤེས་པར་ནག་ཐུམ་མེར་ལྗིད་ཡོར་རེར་ཅིག་གིས་མནན་བསྡད་ཡོད་པ་འདྲ་བའི་མ་འོངས་པའི་ཕྱི་འདང་ཞིག་ཀྱང་རྒྱག་མི་ཤེས་ཤིང། ཐར་ལམ་བཟང་པོ་ཞིག་ཀྱང་ཚོལ་མི་ཤེས་པར་ནག་དུབ་བེ་འདྲ་ཞིག་ཡོད་པ་འདི་ལ་གཏི་མུག་ཅེས་བྱ། གཏི་མུག་གི་མུན་པ་སེལ་དགོས་ན་ཤེས་རབ་ཀྱི་སྒྲོན་མེར་བསྟེན་དགོས་པས། ཡང་རྒྱལ་བའི་བཀའ། མཁས་པའི་གཞུང་ལུགས། དམ་པའི་ལེགས་བཤད། དེ་དག་ལ་རང་གི་རྒྱུད་འདྲིས་སུ་འཇུག་དགོས། རང་བློ་ཤེས་བྱའི་གནས་ལ་མ་སྦྱང་ན། །ཐམས་ཅད་མཁྱེན་པ་ནམ་མཁའི་མཐའ་ལྟར་རིང་། །ཞེས་གསུངས། དེ་ལྟར་མ་མཐའི་ཤེས་བྱ་རུ་ཤེས་དགོས་པའི་དོན་དག་ཤེས་པའི་ཐོག་ནས་ཆོས་ཆོས་བཞིན་དུ་ཉན་མཁན་ཞིག་ཡིན་ན། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་སྟེ། སེམས་ཅན་སྡུག་བསྔལ་ཅན་དག་ལ་སྙིང་རྗེ་འམ། ཡང་ན་སྙིང་རྗེས་སེམས་ཅན་ལ་དམིགས་པའི་ཟུར་དང་། སྙིང་རྗེ་བ་ཙམ་གྱིས་མི་ཕན་པས་འདི་དག་གཏན་གྱི་བདེ་བ། སངས་རྒྱས་ཀྱི་གོ་འཕང་ལ་འགོད་ཐུབ་པ་ཞིག་ཅི་ནས་ཀྱང་བྱ་དགོས་སྙམ་པའི་ཤེས་རབ་ཀྱིས་རྫོགས་བྱང་ལ་དམིགས་པ་སྟེ་ཟུར་གཉིས་དང་ལྡན་པའི་སེམས་བསྐྱེད་ཀྱིས། ཐོག་མར་རང་ཉིད་སེམས་ཅན་ཐམས་ཅད་གཏན་གྱི་བདེ་བར་འགོད་པའི་ནུས་པ་ཅན་གྱི་སངས་རྒྱས་སུ་བསྒྲུབ་པར་བྱ། དེའི་ཆེད་དུ་ཆོས་ཞུ་བར་བྱ་སྙམ་པའི་ཀུན་སློང་ནི་སྦྱོར་བ་སེམས་བསྐྱེད་དམ་པ་རེད། འདུན་པ་དེའི་ཐོག་ནས་ཆོས་ཉན་པའི་སྐབས་སུ་ཁ་གཡེང་མིག་གཡེང་དང་ལུས་ཆོས་གྲལ་ན་ཡོད་ཀྱང་སེམས་སྔོན་གོམས་བག་ཆགས་ཀྱི་རྗེས་དེད་དེ། འཇིག་རྟེན་ཁྱིམ་ལས་དང་ཚོགས་ངན་ཁོང་ཁྲོའི་རྗེས་འདེད་མི་འགྲོ་བར། རབ་ཡིན་ན་ཆོས་གསུང་མཁན་གྱི་བླ་མ་དེ་མགོན་པོ་འོད་དཔག་མེད་ཏུ་སྒོམ། ཆོས་གསུང་སའི་འཁོར་ཡུག་དེ་བདེ་བ་ཅན་གྱི་ཞིང་ཁམས་ལ་སྒོམ། ཆོས་ཞུ་བའི་མཆེད་གྲོགས་ཚང་མ་བྱང་ཆུབ་སེམས་དཔའི་དགེ་སློང་གི་དགེ་འདུན་ལྷ་དང་ལྷ་མོ་དཔའ་བོ་མཁའ་འགྲོ་ཡིན་པར་བསྒོམས་ཏེ་དག་སྣང་སྦྱངས་ནས་ཡིད་ཀྱིས་གསལ་འདེབས་བྱས་ན་ཕན་ཡོན་ཆེ་བར་མ་ཟད། དེ་ལ་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ཡང་ཡིན། །ད་ནི་སྐབས་སུ་བབས་པ་གང་ཞིག་གསན་པར་བྱ་བའི་ཆོས་ནི་བདེ་བ་ཅན་གྱི་ཞིང་གི་སྨོན་ལམ་འདི་ཉིད་འཆད་པའི་སྐབས་ཡིན་ཞིང་། འདི་ལ་ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། མཐའ་མར་དགེ་བ་མཇུག་གི་དོན་དང་གསུམ་ལས་ཐོག་མར་དགེ་བ་ཀླད་ཀྱི་དོན་སོང་ནས་བར་དུ་དགེ་བ་གཞུང་དོན་ལས་ཀྱང་ས་བཅད་དང་པོ་བདེ་བ་ཅན་དུ་སྐྱེ་བའི་རྒྱུ་བཞི་ཁ་རྩང་འུ་ཅག་གིས་སྡོམ་ཚིག་བྱས་པའི་རྟེན་རྒྱུ་གྲོགས་རྐྱེན་ཞེས་པ་ལས་ཁ་རྩང་རྒྱུ་དང་པོ་རྟེན་ཚོགས་ཞིང་གསལ་འདེབས་པ་དེ་བཤད་ནས།

རྒྱུ་གཉིས་པ་དགེ་བའི་རྩ་བ་དཔག་དུ་མེད་པ་སྒོ་དུ་མ་ནས་བསགས་པ།

དེ་རིང་བདེ་བ་ཅན་དུ་སྐྱེ་བའི་རྒྱུ་གཉིས་པ་ཚོགས་བསགས་སྒྲིབ་སྦྱོང་བཤད་པའི་སྐབས་ཡིན། རྒྱུ་གཉིས་པ་ཚོགས་བསགས་སྒྲིབ་སྦྱོང་འདི་ནི་རྒྱུ་གསུམ་པ་སྨོན་འཇུག་གི་སེམས་བསྐྱེད་རྒྱུད་ལ་སྐྱེ་བའི་ཐབས་དང་། རྒྱུ་བཞི་བ་སྨོན་ལམ་འགྲུབ་རྒྱུ་གཉིས་ཀའི་སྔོན་དུ་འགྲོ་དགོས་པ་གལ་ཆེན་ཞིག་ཡིན་པ་རེད། དེས་ན་འདི་ནས་ཚོགས་གསོག་རྒྱུའི་སྒོ་ཐམས་ཅད་ཡན་ལག་བདུན་དུ་བསྡུས་ཏེ་གསུངས་པ་ནི། ཕྱག་འཚལ་བ། མཆོད་པ་འབུལ་བ། སྡིག་པ་བཤགས་པ། རྗེས་སུ་ཡི་རང་བ། ཆོས་འཁོར་སྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་འདེབས་པ། བསྔོ་བ་སྟེ་བདུན་ནོ། །དེའི་ནང་གི་དང་པོ་དྲུག་དེ་རྒྱུ་གཉིས་པ་ཚོགས་གསོག་སྒྲིབ་སྦྱོང་གི་བཤད་བྱ་ཡིན་པ་རེད། དེ་ལ་དང་པོ་ཕྱག་འཚལ་བའི་ཡན་ལག་རེད། དེ་ལ་མདོར་བསྟན་ཀུན་སློང་གི་ཁྱད་པར་དང་། མཚན་གྱི་རྣམ་གྲངས་ཀྱི་སྒོ་ནས་ཕྱག་འཚལ་བ་དང་། མཚན་ཐོས་པའི་ཕན་ཡོན་གྱི་སྒོ་ནས་ཕྱག་འཚལ་བ་དང་གསུམ་ལས།

དང་པོ་མདོར་བསྟན་པའམ་ཀུན་སློང་གི་ཁྱད་པར་གྱི་སྒོ་ནས་ཕྱག་འཚལ་བ།

མོས་གུས་ཕྱག་ལ་ཉེ་རིང་ཁྱད་མེད་ཕྱིར། །བདག་གི་སྒོ་གསུམ་གུས་པས་ཕྱག་འཚལ་ལོ། །ཞེས་པས་མོས་གུས་ནི་བྱིན་རླབས་འདྲེན་བྱེད་ཡིན་ལ། མོས་གུས་ཀྱི་མི་མཐུན་ཕྱོགས་ནི་ང་རྒྱལ་རེད། རྒྱལ་སྲས་ཞི་བ་ལྷས། ཉོན་མོངས་ང་རྒྱལ་གྱིས་ཁེངས་ཏེ། ངན་འགྲོར་ང་རྒྱལ་གྱིས་ཁྲིད་དོ། །ཞེས་སོ། །ང་རྒྱལ་ཅན་བདེ་བ་ཅན་ལ་སྐྱེ་མི་ཐུབ། བདེ་བ་ཅན་ལ་མི་སྐྱེ་བར་མ་ཟད་ང་རྒྱལ་གྱིས་དབང་གིས་ཆགས་སོགས་ཉོན་མོངས་པའི་ལས་གཞན་དག་ཀྱང་རང་ཤུགས་ཀྱིས་འཕེལ་ནས་ངན་སོང་དུ་འགྲོ་བའོ། །དེས་ན་ང་རྒྱལ་མེད་པའི་སྒོ་ནས། མོས་གུས་ཕྱག་ལ་ཉེ་རིང་ཁྱད་མེད་ཕྱིར། །ཞེས་གསུངས་ཏེ། མོས་གུས་དང་དད་པས་ཕྱག་བྱས་ན་ཕྱག་འཚལ་ས་ལ་ཉེ་རིང་ཡོད་པ་མ་རེད། དད་པ་དང་མོས་གུས་ཡོད་ན་ཕྱག་རྒྱང་ནས་འཚལ་ཡང་བྱིན་རླབས་ཐག་ཉེ་རུ་ཡོད་པ་དང་ཁྱད་མེད་དུ་འཇུག དད་པ་དང་མོས་གུས་མེད་ན་ཕྱག་ཉེ་ས་ནས་འཚལ་ཡང་བྱིན་རླབས་ཐག་རིང་ལ་རྒྱང་བཀྱེད་སོང་བ་ལྟར་བྱིན་རླབས་འཇུག་མི་ཐུབ། རྒྱུ་མཚན་དེས་ན། བདག་གི་སྒོ་གསུམ་གུས་པས་ཕྱག་འཚལ་ལོ། །ཞེས་པ་ནི། སྒོ་གསུམ་ནི་ལུས་ངག་ཡིད་གསུམ་ལའོ། ཅིའི་ཕྱིར་ཞེ་ན། དགེ་མི་དགེ་ཐམས་ཅད་འབྱུང་བའི་སྒོ་ཡིན་པས་ན་སྒོའོ། །སྒོ་གསུམ་གུས་པས་ཕྱག་ཇི་ལྟར་འཚལ་ཞེ་ན། དང་པོ་ལུས་གུས་པས་ཕྱག་འཚལ་ལུགས་ནི། ཕྱག་འཚལ་ཡུལ་གྱི་མདུན་ནས་ཡར་ལངས་ཏེ་ལུས་ཧ་ཅང་མི་དགྱེ་མི་སྒུར་བར་རྐང་པའི་ལོང་བུ་གཉིས་ཀ་དང་། ལོང་མོའི་རྒྱ་ཚིགས་གཉིས་ཀ་གཤིབ་གཤིབ་བྱས་ཏེ་དྲང་པོར་ལང་། དེ་ནས་ཕྱག་འཚལ་ཞོར་དུ་གཡས་ལྟ་གཡོན་ལྟ་བྱེད་རྒྱུ་ལྟ་བུ། ཐལ་མོ་འགྲམ་སྟེང་སྦྱར་ཞོར་དུ་ཕྱག་འཚལ་བ་སོགས་ནི་མི་རུང་བས་སྤོངས་དགོས། ཕྱག་རྐྱང་བར་མ་ཟད་ཁ་འདོན་བཟླས་བརྗོད་བསྐྱེད་རྫོགས་བསྒོམ་བསྒྲུབ་ལ་སོགས་པ་གང་གི་སྐབས་ཡིན་ནའང། སྨྲ་བརྗོད་དང་གཡེང་བ་ལག་གི་ལས་ཀ་ཕྲན་ཚེགས་དེ་དག་སྤོང་དགོས། ཆོས་ཉན་དུས་དང་ཚོགས་པ་འཚོགས་དུས་བསྐྱེད་རྫོགས་སྒོམ་བཟླས་སོགས་པའི་སྐབས་སུ་ལག་པས་འཁོར་ལོ་མ་བསྐོར་ན་ཡང་ཆོག་ནི་རེད། སྒོ་གསུམ་གྱི་དགེ་བ་གང་སྒྲུབ་ཀྱང་སྒོ་གསུམ་མཉམ་དུ་དྲིལ་ནས་ཆོས་ཐམས་ཅད་སྒྱུ་མ་དང་རྨི་ལམ་ལྟ་བུའི་འདུ་ཤེས་དང་མ་བྲལ་ན། དེ་ནི་ལས་དང་པོ་བ་ཞིག་ལ་དངོས་གཞི་དམིགས་མེད་རྗེས་མཐུན་པ་ཞིག་ཟེར་ཆོག་ཅེས་གསུངས་པ་ཡིན། གཞན་གྱིས་དགེ་སྦྱོར་སྒྲུབ་ཀྱིན་ཡོད་པ་མཐོང་ཚེ། རང་གིས་དེ་ལ་བར་ཆད་བྱ་མི་རུང། བར་ཆད་བྱས་ན་ཉེས་པ་འབྱུང་བ་རེད། ཁྱད་པར་དུ་བླ་སེར་ཚོས་འཚོགས་སུ་ཞལ་འདོན་གནང་སྐབས་ཁ་གཡེང་མིག་གཡེང་བྱ་མི་རུང་བ་ལྟ་ཅི་སྨྲོས། ལྷག་ཏུ་གསང་སྔགས་ཀྱི་དཀྱིལ་འཁོར་ཞལ་ཕྱེས་ནས་བསྙེན་དམིགས་ལ་ཁེལ་དུས་སྲོག་སྡོམ་གཟེར་བཞིའི་མན་ངག་གནད་དུ་བསྣུན་པའི་ཐུགས་དམིགས་གནང་རན་ཏེ། ཆེས་གནད་འགག་གི་སྐབས་སུ། ཡོན་བདག་ཚོ་དབུ་མཛད་ཀྱི་མདུན་དུ་བརྒྱུགས་ཏེ་གཅིག་འདྲི་འདུག་མི་རུང་། གསོལ་ཇ་ནམ་འདྲེན་སོགས་སྔོན་ནས་ཤེས་པར་བྱ་དགོས་པ་རེད། ཕྱག་འཚལ་བའི་སྐབས་སུ་ལུས་ཀྱི་རྣམ་འགྱུར་དང་བཅས་ཏེ་ཕྱག་འཚལ་དགོས། ཕྱག་འཚལ་ལུགས་རྒྱུན་དུ་བཤད་མྱོང་ཡང་ཆོས་རྒྱུད་རང་རང་ལ་ཕྱག་འཚལ་སྲོལ་ཡང་མ་འདྲ་བ་རེ་ཡོད། ཆོས་རྒྱུད་འདིའི་ཕྱག་འཚལ་ལུགས་ནི། དང་པོ་སྙིང་ཁར་ཐལ་མོ་སྦྱར། སྐབས་འདི་དང་བསྟུན་ན། དེའི་དུས་སུ་རང་ཉིད་ཀྱི་མདུན་གྱི་ནམ་མཁར་མགོན་པོ་འོད་དཔག་མེད་གཙོ་འཁོར་ཐམས་ཅད་དང་བདེ་བ་ཅན་གྱི་ཞིང་ཁམས་རྟེན་བརྟེན་པ་དང་བཅས་པ་བཀྲ་ལམ་མེར་གསལ་གདབ་སྟེ། སངས་རྒྱས་འོད་དཔག་མེད་འཁོར་དང་བཅས་པ་ལྷང་ངེ་ལྷན་ནེ་ལྷམ་མེར་ཆོས་གོས་རྣམ་གསུམ་གསོལ་ཞིང་སེར་ལྟེམ་མེ་བཞུགས་ཏེ། དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་བདག་ལ་གཟིགས། བརྩེ་བའི་ཐུགས་ཀྱིས་བདག་སོགས་སེམས་ཅན་ཐམས་ཅད་ལ་དགོངས་ཡོད་པར་བསམ་སྟེ། ཐལ་མོ་སྙིང་ཁར་སྦྱར་བ་དང་བཅས་ཏེ་མགོན་པོ་འོད་དཔག་མེད་འཁོར་དང་བཅས་པའི་གསང་བ་གསུམ་གྱི་ཡོན་ཏན་ཐམས་ཅད་དྲན་པར་བྱས་ནས། དེ་དང་མཉམ་དུ་རང་ཉིད་ཀྱི་ལུས་གཅིག་རྐྱང་པ་མ་ཡིན་པར་གྲངས་མང་པོ་ས་ཆེན་པོའི་རྡུལ་གྱི་གྲངས་དང་མཉམ་པར་སྤྲུལ་ཏེ་ཕ་མ་གཉིས་དང་དགྲ་བགེགས་གཉིས་ཀྱི་གཙོས་རིགས་དྲུག་གི་སེམས་ཅན་ཐམས་ཅད་དང་བཅས་པས་ཕྱག་འཚལ་གྱིན་ཡོད་པའི་འདུན་པས། ལག་པ་གཉིས་ཀས་ཐལ་མོ་སྤྱི་བོ་མགྲིནཔ་སྙིང་ག་གསུམ་ལ་རིམ་པ་བཞིན་དུ་སྦྱར་ཡོང་དུས། རྒྱལ་བ་སྲས་བཅས་ཀྱི་སྐུ་གསུང་ཐུགས་ལ་ཕྱག་འཚལ་གྱིན་ཡོད་སྙམ་པའི་འདུན་པས། རང་ཉིད་དང་སེམས་ཅན་ཐམས་ཅད་ཀྱི་སྒོ་ལུས་ངག་ཡིད་གསུམ་གྱི་སྒྲིབ་པ་དག་ཀྱིན་ཡོད་པ། སྐུ་གསུང་ཐུགས་ཀྱི་བྱིན་རླབས་ཐོབ་པ་ལ་སོགས་པ་དེ་འདྲའི་འདུན་པ་བྱེད་དགོས་སོ། །མ་ལྔ་ས་ལ་གཏུགས་དུས་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པར་ཕྱག་འཚལ་བས། བདག་དང་སེམས་ཅན་གྱི་ཉོན་མོངས་དུག་ལྔ་སྒོ་གསུམ་ཆ་སྙོམས་དང་བཅས་པའི་སྒྲིབ་པ་དག མཐར་སྐུ་ལྔ་ཡེ་ཤེས་ལྔ་ལ་དབང་འབྱོར་བའི་ནུས་པ་དང་བྱིན་རླབས་ཐམས་ཅད་ཐོབ་པར་ཤོག་ཅིག་བསམ་མོ། མ་ལྔ་ནི་ལག་མཐིལ་གཉིས་དང་པུས་མོ་གཉིས་དང་དཔྲལ་བ་སྟེ་ལྔ་འོ། ཡང་སྔར་ལྟར་ཡར་ལངས་ཏེ་དཀོན་མཆོག་གི་ཡོན་ཏན་དྲན་པ་ནས་འགོ་བརྩམས་ཏེ་ལུས་ཀྱིས་ཕྱག་འཚལ། ངག་གིས་བདེ་བ་ཅན་གྱི་ཞིང་ཁམས་ལ་སྐྱེ་བའི་སྨོན་ལམ་གདབ། ཡིད་ཀྱིས་དད་གུས་དཔག་མེད་དང་ལྡན་པས་སྒོ་གསུམ་ཆིག་འདྲིལ་བྱེད། མ་ལྔ་ས་ལ་གཏུགས་ནས་ཡར་ལང་དུས་ལག་མཐིལ་ས་ལ་ལེབ་སེ་བཞག་ཡོད་པའི་སྟེང་དུ་ཤུགས་བཀལ་ནས་ཡར་ལང་། ལག་པའི་མཛུབ་ཚིགས་དང་ཁུ་ཚུར་ལ་བརྟེན་མི་རུང་། ཆོས་ཅི་ཞིག་བསྒྲུབས་ཀྱང་སྤུས་དག་ཚད་ལྡན། མཐའ་ན་ཕྱག་གཅིག་མ་གཏོགས་མ་འཚལ་ནའང་རང་བློ་བདེ་བ་ཞིག་བྱེད་དགོས། བརྐྱངས་ཕྱག་སྔགས་ཀྱི་ལུགས་ཡིན། ཐོད་པ་ས་ལ་གཏུག་ཡོད་དུས་ལག་པ་གཉིས་ཀའི་ཐལ་སྦྱར་སྤྱི་བོའི་གཙུག་ལ་ཐོད་པ་ས་ལ་གཏུག་བཞིན་དུ་བྱེད་དགོས། ཡང་ཡར་ལངས་ཏེ་ལག་པ་གཉིས་ཀས་ཐལ་མོ་སྙིང་ཀར་སྦྱར་བ་ལ་སོགས་པ་དམིགས་པ་སྔར་བཞིན་ནོ། །འདིའི་ཡན་ཆད་མོས་གུས་ཕྱག་ལ་ཉེ་རིང་ཁྱད་མེད་ཕྱིར། །བདག་གི་སྒོ་གསུམ་གུས་པས་ཕྱག་འཚལ་ལོ། །ཞེས་གསུངས་པའི་ཚིག་རྐང་གཉིས་འདིས་ཀུན་སློང་གི་ཁྱད་པར་རམ་ཕྱག་འཚལ་བའི་ཡན་ལག་མདོར་བསྟན་ནས་འདི་མན་ཆད་ནས་མདོར་བསྟན་གྱི་དོན་རྒྱས་པར་བཤད་པའོ། །

གཉིས་པ་མཚན་གྱི་རྣམ་གྲངས་ཀྱི་སྒོ་ནས་ཕྱག་འཚལ་བར་བསྟན་པ།

འདི་ལ་ནང་གསེས་མཚན་གྱི་དབྱེ་བ་བཞིའི་སྟེང་ནས་བཤད་ན། ཆོས་སྐུ་འོད་དཔག་མེད་པ། ཀུན་མཁྱེན་འོད་དཔག་མེད་པ། འདྲེན་པ་འོད་དཔག་མེད་པ། རྒྱལ་བ་ཚེ་དཔག་མེད་པ་དང་བཞི་ཡོད་དོ། སྐུ་གསུང་ཐུགས་སོགས་ཀྱི་ཡོན་ཏན་དང་སྦྱར་བ་ནི། སྐུ་རྫུ་འཕྲུལ་གྱི་ཡོན་ཏན་དྲན་ཏེ་ཕྱག་འཚལ་བ། ཐུགས་མཁྱེན་བརྩེའི་ཡོན་ཏན་དྲན་ཏེ་ཕྱག་འཚལ་བ། སྟོབས་ནུས་པའི་ཡོན་ཏན་དྲན་ཏེ་ཕྱག་འཚལ་བ། ཚེ་སྲིང་སྲོག་སྐྱོབ་ཀྱི་ཡོན་ཏན་དྲན་ཏེ་ཕྱག་འཚལ་བ་སྟེ་དབྱེ་བ་བཞིའོ།།

དང་པོ་སྐུ་རྫུ་འཕྲུལ་གྱི་ཡོན་ཏན་དྲན་ཏེ་ཆོས་སྐུ་འོད་དཔག་མེད་ལ་ཕྱག་འཚལ་བ།

ཆོས་སྐུ་སྣང་བ་མཐའ་ཡས་རིགས་ཀྱི་བདག །ཕྱག་གཡས་འོད་ཟེར་ལས་སྤྲུལ་སྤྱན་རས་གཟིགས། །ཡང་སྤྲུལ་སྤྱན་རས་གཟིགས་དབང་བྱེ་བ་བརྒྱ། །ཕྱག་གཡོན་འོད་ཟེར་ལས་སྤྲུལ་སྒྲོལ་མ་སྟེ། །ཡང་སྤྲུལ་སྒྲོལ་མ་བྱེ་བ་ཕྲག་བརྒྱ་སྟེ། །ཐུགས་ཀྱི་འོད་ཟེར་ལས་སྤྲུལ་པདྨ་འབྱུང་། །ཡང་སྤྲུལ་ཨོ་རྒྱན་བྱེ་བ་ཕྲག་བརྒྱ་འགྱེད། །ཆོས་སྐུ་འོད་དཔག་མེད་ལ་ཕྱག་འཚལ་ལོ། །ཞེས་གསུངས་ཏེ། །ཆོས་སྐུ་སྣང་བ་མཐའ་ཡས་རིགས་ཀྱི་བདག །ཅེས་པ་ནི། ཆོས་ཐམས་ཅད་ཀྱི་ཆོས་ཉིད་ཆོས་ཀྱི་དབྱིངས་ནི་སྤྲོས་པ་ཐམས་ཅད་དང་བྲལ་བ་དེ་བཞིན་གཤེགས་པ་ཐམས་ཅད་ཀྱི་ཐུགས་དང་དབྱེར་མ་མཆིས་པ་ཞིག་ཡིན། འོད་དཔག་མེད་པའི་ཐུགས་ཆོས་ཀྱི་སྐུ་དེ་ནི་རྒྱལ་བ་ཐམས་ཅད་ཀྱི་སྤྲུལ་གཞི་ཡིན་ཞིང་། དེ་ལྟར་ཆོས་སྐུ་ལས་གཟུགས་སྐུར་སྣང་བ་རིགས་ལྔའི་རྒྱལ་བའི་ནང་ནས་ནུབ་སྣང་བ་མཐའ་ཡས་མ་ཆགས་པདྨའི་རིགས་ཀྱི་རིགས་མཆོག་གི་གཙོ་བོའོ། །འདིར་ཆོས་སྐུ་ཞེས་པ་ནི་སྤྱིར་ཆོས་སྐུ་ལ་འབྲས་བུ་ཆོས་སྐུ་ཞིག་དང་ཡེ་ཤེས་ཆོས་སྐུ་སྟེ་དབྱེ་བ་གཉིས་ཡོད་པ་ནི་སྤྱི་དང་བྱེ་བྲག་གི་ཁྱད་པར་ཡིན་ལ། སྐབས་འདིར་ནི་འབྲས་བུ་ཆོས་སྐུ་ལ་གོ་དགོས་སོ། །འབྲས་བུ་ཆོས་སྐུ་ལ་དབྱེ་ན་སྐུ་བཞི་ཡོད། དེའི་ནང་ནས་འདི་སྤྲུལ་སྐུ་ལ་གོ་དགོས། ཅིའི་ཕྱིར་ཞེ་ན། འདི་ནིགཟུགས་སྐུ་ཡིན་པ་ལ་ངེས་པ་ལྔ་ལྡན་མ་ཡིན་པས་ན་སྤྲུལ་སྐུར་འཇོག་པ་ལས་འོས་མེད། ཅིའི་ཕྱིར་ཞེ་ན། དུས་ངེས་པ་འཁོར་བ་ཇི་སྲིད་དུ་བཞུགས་པའི་སྐུ་མིན་ཏེ་སྐུ་ཚེའི་ཚད་སྨོན་ལམ་འདི་ཉིད་ནས་འབྱུང་བའི་ཕྱིར་རོ། འདིའི་འོག་ནས་འབྱུང་མ་རག་པའོ། །དེ་ལྟ་བུ་ཆོས་སྐུ་འོད་དཔག་མེད་དཀྱིལ་འཁོར་ཀུན་ཀྱི་རིགས་བདག་གང་ཡིན་པ་དེ་ཉིད་ཀྱི། ཕྱག་གཡས་འོད་ཟེར་ལས་སྤྲུལ་སྤྱན་རས་གཟིགས། །ཞེས་པ་ནི། ཇི་ལྟར་བེེཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོ་སྐུ་ཡི་གཟུགས་བརྙན་འཆར། །ཞེས་གསུངས་པ་ལྟར། ཆོས་སྐུ་རྒྱལ་བ་འོད་དཔག་མེད་གཟུགས་སྐུར་ཤར་བ་དེའི་ཕྱག་གཡས་པ་ནས་འོད་དཀར་པོ་ཞིག་འཕྲོས་ཏེ། འཕགས་པ་སྤྱན་རས་གཟིགས་དབང་ཕྱུག་ལ་སྤྲུལ་ནས། ཡང་སྤྲུལ་སྤྱན་རས་གཟིགས་བྱེ་བ་ཕྲག་བརྒྱ་འགྱེད་གསུངས་པ་རེད། འཕགས་པ་སྤྱན་རས་གཟིགས་དེ་མགོན་པོ་འོད་དཔག་མེད་ཀྱི་འཁོར་དུ་བྱེད་རྒྱུ་ཞིག་དང་སྤྲུལ་བར་བྱེད་རྒྱུ་ཞིག་བཤད་ཚུལ་མང་པོ་ཡོད་ཀྱང་དོན་ལ་འགལ་བ་མེད་པའོ། །འདི་ན་བྱེ་བ་ཕྲག་བརྒྱ་གསུངས་པ་འདི་ཅི་ཞེ་ན། མཆོག་གི་སྤྲུལ་སྐུ་གཅིག་གི་གདུལ་ཞིང་ལ་ཞིང་ཁམས་བྱེ་བ་ཕྲག་བརྒྱ་ཡོད་པའི་དབང་དུ་བྱས་ནས་སྤྲུལ་སྐུ་གཅིག་གི་མཛད་པའི་ངོས་ནས་གསུངས་ཀྱི་དོན་ལ། ཡང་སྤྲུལ་བྱེ་བ་ཕྲག་བརྒྱ་གཅིག་ལས་སྤྲུལ་བ་མི་སྣང་བ་ནི་མ་ཡིན་ནོ། །ཞིང་ཁམས་རྒྱ་མཚོའི་རྡུལ་གཅིག་གི་གོ་ས་ན་རྡུལ་རྙེད་ཀྱི་ཞིང་ཁམས་སྣང་བ་ཡིན་པས། དེ་ཐམས་ཅད་ལ་སྤྲུལ་བས་མ་ཁྱབ་པ་མེད་པས་གྲངས་ཀྱིས་ཚད་བཟུང་རིས་སུ་གཞལ་དུ་མེད། སྤྱན་རས་གཟིགས་ཀྱི་སྤྲུལ་བ་དེ་ཚོ་ཡང་མཐའ་གཅིག་ཏུ་བཅུ་གཅིག་ཞལ་གྱི་རྣམ་པ་ལ་སོགས་པར་སྣང་བའི་ངེས་པ་མེད། དགེ་བའི་བཤེས་གཉེན་དང་བཙུན་པ་ཕོ་མོ་ཁྱིམ་ན་གནས་པའི་ཆ་བྱེད་ཅན་རྒྱལ་བློན་དྲ་མའི་ཚུལ། ཐ་ན་བྱ་དང་རི་དྭགས་བེམ་པོའི་གཟུགས་སུ་ཡང་སྤྲུལ་ནས་འགྲོ་དོན་མཛད་ཀྱིན་ཡོད། འུ་ཚོ་བོད་ཀྱི་ས་ཆར་ཡང་སྤྱིར་རིགས་གསུམ་གྱི་སྤྲུལ་བ། ཁྱད་པར་དུ་སྤྱན་རས་གཟིགས་ཀྱི་ཡང་སྤྲུལ་དགེ་བའི་བཤེས་གཉེན་གྱི་རྣམ་པར་བྱོན་པར་མ་ཟད་འབྲེལ་ཚད་དགེ་ལ་སྦྱོར་བའི་མཛད་པ་རྣམ་ཐར་ཅི་འདྲ་འདྲའི་མང་པོ་ཡོད་པ་ནི། རང་གཞན་ཚང་མས་ཤེས་གསལ་ལྟར། །དུས་མཉམ་དུ་སྤྱན་རས་གཟིགས་ཀྱི་སྤྲུལ་བ་མང་པོ་བྱོན་གྱིན་ཡོད་པ་རེད། ཕྱག་གཡོན་འོད་ཟེར་ལས་སྤྲུལ་སྒྲོལ་མ་སྟེ། །ཞེས་པ་ནི། འོད་དཔག་མེད་ཀྱི་ཕྱག་གཡོན་པ་ནས་འོད་ཟེར་སྤྲོས་ཏེ་རྗེ་བཙུན་འཕགས་མ་སྒྲོལ་མ་སྤྲུལ་ཞིང། དེས་ཀྱང་ཡང་སྤྲུལ་སྒྲོལ་མ་བྱེ་བ་ཕྲག་བརྒྱ་འགྱེད། །ཅེས་གསུངས་ཏེ། འོད་དཔག་མེད་ཀྱི་ཕྱག་གཡོན་པ་ལས་འོད་ཟེར་འཕྲོས་ཏེ་རྗེ་བཙུན་སྒྲོལ་མ་སྤྲུལ་བ་ནི། རྗེ་བཙུན་སྒྲོལ་མས་སེམས་ཅན་གྱི་འཇིགས་པ་ཆེན་པོ་བརྒྱད་ལ་སོགས་པ་ཞི་བ་དང་། དེ་ལས་སྐྱོབས་པའི་ཕྱིར་དུ་སྒྲོལ་མ་ཉེར་གཅིག་གི་རྣམ་སྤྲུལ་དང་ཡང་སྤྲུལ་ཞིང་ཁམས་བྱེ་བ་ཕྲག་བརྒྱ། དེ་ལས་ཀྱང་མང་ཞིང་གྲངས་ཀྱིས་མི་ལང་བ་ལ་སྤྲུལ་བ་རྒྱུན་མི་ཆད་པར་འབྱུང་བའོ། །ཐུགས་ཀྱི་འོད་ཟེར་ལས་སྤྲུལ་པདྨ་འབྱུང་། །ཞེས་པ་ནི། ཆོས་སྐུ་འོད་དཔག་མེད་པའི་ཐུགས་ཆོས་ཀྱི་དབྱིངས་ཁྱབ་རྡལ་ཆེན་པོའི་ངང་ལས། སོ་སོ་མ་ཡིན་ཞིང་ཐ་མི་དད་པ་ཤར་བ་དེ་སོར་རྟོགས་ཡེ་ཤེས་ཀྱི་རང་མདངས་གཟུགས་སྐུ་ཁ་སྦྱོར་ཡན་ལག་བདུན་ལྡན་གྱི་བདག་ཉིད་སྣང་བ་མཐའ་ཡས་ཀྱི་ཐུགས་ཀ་ནས་ཧྲི་ཡིག་ཁ་ཏོག་ལྔ་ལྡན་ལྷོ་ནུབ་འོ་མ་ཅན་གྱི་རྒྱ་མཚོར་འཕྲོས་ཏེ། བདག་ཅག་གི་སྟོན་པ་རྒྱལ་བ་ཤཱཀྱ་སེང་གེས་གཟིགས་པ་རྣམ་པ་ལྔ་ལ་གཟིགས་ཏེ་ཤཱཀྱའི་རིགས་ལ་རིགས་སུ་སྐྱེ་བ་བཞེས་པ་ལྟར། གུ་རུ་རིན་པོ་ཆེས་ཀྱང་གཟིགས་སྟངས་རྣམ་པ་གསུམ་ལ་གཟིགས། གཟིགས་སྟངས་དང་པོ་འགྲོ་བ་རིགས་དྲུག་ལ་གཟིགས་པའི་ནང་ནས་མི་རྣམས་ལ་རྒྱུ་འབྲས་ཡིད་ཆེས་སྐྱེས་པའི་ཕྱིར་དུ་ཨིནྡྲ་བོ་དྷི་བུ་མེད་པ་ལ་གཟིགས། གཟིགས་སྟངས་གཉིས་པ་རྒྱལ་མེད་རྩུབ་འགྱུར་ཅན་གྱི་ལྷ་འདྲེ་ཤིན་ཏུ་ཐུ་བ་འདུལ་བ་ལ་རྫུས་སྐྱེས་མ་གཏོགས་མངལ་སྐྱེས་ཀྱིས་མི་ཐུལ་བར་དགོངས་ཏེ་དྲི་མེད་མདངས་ལྡན་གཡུ་ཡི་མཚོ་མོར་གཟིགས། གཟིགས་སྟངས་གསུམ་པ་བོད་ཀྱི་རྒྱལ་ཁམས་ལྷ་སྲིན་འཁྲུག་པའི་ཡུལ་དུ་མུན་པར་ཆོས་ཀྱི་སྒྲོན་མེ་གསལ་བར་བྱེད་པ་ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་ལ་གཟིགས་ཏེ། དྲི་མེད་མདངས་ལྡན་གྱི་མཚོ་རུ་སློབ་དཔོན་པདྨ་འབྱུང་གནས་མེ་ཏོག་པདྨའི་སྦུབས་ནས་རྫུས་ཏེ་འཁྲུངས་པའོ། །ཡང་སྤྲུལ་ཨོ་རྒྱན་བྱེ་བ་ཕྲག་བརྒྱ་འགྱེད། །ཅེས་པ་ནི། །སྤྱིར་ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་ལྟ་བུ་དང་། ཁྱད་པར་དུ་སློབ་དཔོན་ཉིད་ཀྱི་གདུལ་ཞིང་ཁྱད་པར་ཅན་རི་ཁ་བ་ཅན་གྱི་ས་ཆ་གདོང་དམར་བོད་ཀྱི་རྒྱལ་ཁམས་སུ་སྤྲུལ་བ་རྒྱུན་ཆད་མེད་པར་འབྱུང་བར་གུ་རུ་རིན་པོ་ཆེ་ཉིད་ཀྱིས་ཞལ་ནས། དད་ལྡན་མི་རེའི་མདུན་ན་པད་འབྱུང་རེ། །ཞེས་གསུངས་སོ། །གུ་རུ་རིན་པོ་ཆེ་འདི་བོད་གངས་ཅན་གྱི་ལྗོངས་སུ་ས་དགེ་བཀའ་རྙིང་ལ་མ་ལྟོས་པར་སངས་རྒྱས་ཀྱི་བསྟན་པ་ཞིག་ཡོད་པ་འདི་ཨོ་རྒྱན་ཆེན་པོའི་བཀའ་དྲིན་ལས་བྱུང་བ་ཞིག་ཐོག་མཐའ་བར་གསུམ་དུ་ཡིན་པ་རེད། དེ་ནི་ཚད་མའི་ལུང་གིས་གྲུབ་ཅིང། ལོ་རྒྱུས་དང་ར་འཕྲོད་པ་ནི་ཚང་མས་ཤེས་གསལ་ལྟར། དང་པོ་ཆོས་རྒྱལ་ཁྲི་སྲོང་ལྡེའུ་བཙན་གྱིས་མཁན་ཆེན་ཞི་བ་འཚོ་གདན་དྲངས་ཏེ་རྒྱུ་འབྲས་བླང་དོར་གྱི་ཆོས་བསྟན་པས་བོད་ཡུལ་གྱི་ལྷ་སྲིན་སྡེ་བརྒྱད་ཐམས་ཅད་མ་དགའ་བར་རྟགས་དང་ཆོ་འཕྲུལ་བསྟན། ཉེར་འཚེ་སྣ་ཚོགས་བརྩམས་པས་བསྟན་པ་བཙུགས་མ་ཐུབ་པ་རེད། དེའི་འཚམས་སུ་ཨོ་རྒྱན་རིན་པོ་ཆེ་གདན་དྲངས་ཏེ་བོད་ཡུལ་གྱི་ལྷ་སྲིན་སྡེ་བརྒྱད་ཐམས་ཅད་དམ་ལ་བཏགས་སྲོག་གི་སྙིང་པོ་བླངས། བསྟན་པའི་གཉེར་གཏད་གཏེར་གྱི་སྲུང་མར་བཀོས་ནས་དང་པོ་བསྟན་པའི་དབུ་བརྙེས་པར་བྱེད་པ་པོ་ཨོ་རྒྱན་རིན་པོ་ཆེ་ཡིན། རྗེ་རིན་པོ་ཆེའི་ལམ་རིམ་ལས། བསྟན་པ་སྔ་དར་གྱི་སྐབས་སུ་མཁན་སློབ་ཆོས་གསུམ་གྱིས་བསྟན་པའི་སྲོག་བཙུགས་གསུངས་པ་ལྟར་ཡོངས་སུ་གྲགས་སོ། །དེའི་རྗེས་སུ་ཡུན་རིང་པོ་སོང་བའི་མཚམས་སུ་རྒྱལ་བོ་གླང་དར་མས་བསྟན་པ་བསྣུབས་ཏེ་མི་ལོ་བཅུ་ཕྲག་མང་པོ་ཞིག་ལ་བོད་ཡུལ་མུན་པའི་གླིང་དུ་བསྒྱུར་ཏེ་འདུལ་བསྟན་ཉམས་སོ། །ལ་ལུང་ཕ་ཕུགས་ན་ཡོད་པའི་སྔགས་པ་ཐམས་ཅད་ཀྱིས་གསང་སྔགས་ཀྱི་ཆོས་ཉམས་ལེན་གྱི་རྒྱུན་མ་ཆད་པ་རེད། འདུལ་བསྟན་ཉམ་དམའ་ལུགས་ལ་བསམ་བློ་བཏང་ན་དེ་དུས་ཁྱིམ་པ་ཚོས་དབྱར་གནས་ལ་འདུག་པ་ཡིན་ཞེས་ཟེར་ནས་དགེ་བསྙེན་གྱི་ཁྲིམས་ལྔ་པོ་བསྲུངས་ཏེ་ཟླ་བ་གསུམ་པོར་མཉམ་དུ་བསྡད། ཟླ་བ་གསུམ་པོ་ཚང་དུས་དགག་དབྱེ་བྱེད་པ་ཡིན་ཞེས་མར་གྲོང་ནང་དུ་སོང་སྟེ་ཁྱིམ་ཐབ་བཟུང་ནས་འདུག་པ་མ་གཏོགས་མེད་པར་གྱུར། དེའི་རྗེས་སུ་ཇོ་བོ་རྗེ་བོད་དུ་བྱོན་ནས་ལྷ་བླ་མ་ཡེ་ཤེས་འོད་ལ་སོགས་པའི་བདག་རྐྱེན་ལས་བོད་ལ་བསྟན་པ་དར། དེས་ན་བར་དུ་བོད་ལ་བསྟན་པ་དར་བར་བྱེད་པ་པོ་ཇོ་བོ་རྗེ་ཡིན་པ་རྩོད་མེད་ཡོངས་གྲགས་རེད། དེ་ཡང་ཨོ་རྒྱན་རིན་པོ་ཆེའི་སྤྲུལ་པ་ཡིན་པར་ཇོ་བོ་རྗེ་རང་གིས་གསུང་བའི་བཀའ་གདམས་ཕ་ཆོས་ཀྱི་ནང་དུ་གསལ་པོ་གསུངས་སོ། །དེའི་རྗེས་སུ་ཡུན་རིང་སོང་ནས་འདུལ་བའི་བསྟན་པ་ཉམ་དམའ་བའི་སྐབས་ལ་ཁེལ་དུས་རྗེ་བདག་ཉིད་ཆེན་པོ་བྱོན་པས་བོད་ཁམས་མཐའ་དབུས་ཡོངས་རྫོགས་ལ་འདུལ་འཛིན་པས་གང་བ་ཞིག་མཛད་དོ། །དེ་ཡང་ཨོ་རྒྱན་རིན་པོ་ཆེའི་སྤྲུལ་བ་ཡིན་པ་འཁྲུལ་མེད་བདེན་པའི་བཀའ་ལུང་གིས་གྲུབ་ཅིང་། དེ་ཡང་དགེ་ལུགས་རྙིང་མ་ལ་སོགས་པས་ཁས་ལེན་པ་ཞིག་རེད། རྒྱལ་བ་དགེ་འདུན་རྒྱ་མཚོས། རིགས་འཛིན་གྲུབ་པའི་དབང་ཕྱུག་པདྨ་འབྱུང་། །ལྔ་བརྒྱའི་གཙུག་རྒྱན་དཔལ་ལྡན་མར་མེད་མཛད། །རྡོ་རྗེ་འཆང་དངོས་བློ་བཟང་གྲགས་པའི་དཔལ། །སྣ་ཚོགས་སྤྲུལ་བའི་གར་མཛད་དེ་ལ་འདུད། །ཅེས་དང་། ཨོ་རྒྱན་གླིང་པའི་བསམ་ཡས་མཆིམས་ཕུ་ནས་གདན་དྲངས་ཡོང་པའི་བཀའ་ཐང་བསྡུས་པ་ལས། ཐུབ་པའི་ལུང་བསྟན་མདོ་ཁམས་སྨད་ཅིག་ཏུ། །ཨ་ཏི་ཤ་ཡི་སྤྲུལ་བ་བློ་བཟང་གྲགས། །སྐྱེས་བུ་དེ་བྱོན་བོད་ལ་བདེ་སྐྱིད་འོང་། །ཞེས་དང་། འབྲི་གོང་སྐྱོབ་པ་རིན་པོ་ཆེས། གྲུབ་པའི་དབང་ཕྱུག་པདྨ་འབྱུང་གནས་དང་། །དེ་ཡི་རྣམ་སྤྲུལ་རྒྱལ་བ་ཙོང་ཁ་བ། །ཞེས་གསུངས་པ་ལྟར་དུས་གསུམ་སངས་རྒྱས་ཐམས་ཅད་ཀྱི་ཐུགས་སྤྲུལ་དེ་ཨོ་རྒྱན་རིན་པོ་ཆེ། དེ་མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤ་ལ་སྤྲུལ། དེ་ཀུན་མཁྱེན་བློ་བཟང་གྲགས་པའི་སྐུ་ལ་སྤྲུལ་ཏེ་བསྟན་པའི་དོན་མཛད་པ་དེ་འདྲ་ཡིན། ཁྲི་གུང་ཐང་ཚང་གིས། གངས་ཅན་བསྟན་པའི་སྲོལ་འབྱེད་པདྨ་འབྱུང་། །དེ་དོན་རྒྱུད་ལ་སྦྱོར་བ་ཨ་ཏི་ཤ། །དེ་ལ་འཁྲུལ་བ་སེལ་མཛད་བློ་བཟང་གྲགས། །རྣམ་གསུམ་དབྱེར་མེད་ཚད་མའི་ལུང་གིས་གྲུབ། །ཅེས་གསུངས་སོ། །དུས་སྙིགས་མའི་སྐབས་ལ་ཐུགས་རྗེ་དང་ཕྲིན་ལས་ལྷག་པར་མྱུར་བའི་སྤྱན་རས་གཟིགས་དང་རྗེ་བཙུན་སྒྲོལ་མ་གུ་རུ་པདྨ་འབྱུང་གནས་གསུམ་རེད། ལྷ་གཞན་ལ་ཐུགས་རྗེ་མེད་ནི་མ་རེད། བྱིན་རླབས་མི་འཇུག་ནི་མ་རེད། སྔོན་གྱི་ཐུགས་བསྐྱེད་ཀྱི་དབང་གིས་འདི་གསུམ་གྱི་ཐུགས་རྗེ་གཞན་ལས་ཀྱང་མྱུར་བའོ། །འདི་གསུམ་འོད་དཔག་མེད་ཀྱི་སྤྲུལ་བ་ཡིན་པས་འོད་དཔག་མེད་གཅིག་ལ་གསོལ་བ་བཏབ་ན་དེའི་ནང་དུ་འདུས་པར་མ་ཟད་བླ་མ་ཡིད་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཡིད་དམ་ཞི་ཁྲོའི་དཀྱིལ་འཁོར་ཐམས་ཅད་དོན་དུ་འོད་དཔག་མེད་གཅིག་ལ་འདུས། འུ་ཚོས་གཏམ་དཔེ་ལ་རྒྱ་གར་མི་གཅིག་ལྷ་གཅིག །བསམ་པ་ལ་གཅིག་ཐུར་གཅིག་ཟེར་བ་བཞིན། རྒྱ་གར་པ་ལྷ་གཅིག་གིས་འཚེངས། བོད་ལྷ་བརྒྱས་ཕུངས། །ཞེས་གསུངས་པ་ལྟར། སྔོན་རྒྱ་གར་འཕགས་པའི་ཡུལ་དུ་སྟོན་པའི་མདོ་སྔགས་ཀྱི་དམ་ཆོས་དར་དུས་རྒྱ་གར་པས་བསམ་པ་གཏད་ས་གཅིག་བྱས་ཏེ་ལྷ་གཅིག་བསྒྲུབས་ཏེ་ལྷ་ཐམས་ཅད་འགྲུབ་པའི་ཐབས་མཁས་དང་ལྡན། བོད་ཀྱི་མི་འདི་དྲན་རྒྱུ་མང་བ་ཐེ་ཚོམ་གྱི་དབང་གིས་ལྷ་བརྒྱ་བསྒྲུབས་ཀྱང་གཅིག་མི་འགྲུབ་པ་ཐེ་ཚོམ་ཆེ་ཞིང་དྲན་རྒྱུ་མང་བས་མི་འགྲུབ་པ་ཡིན་ཞེས་བླ་མ་རྣམ་པས་གསུངས་ཡོད། །དེས་ན་མགོན་པོ་འོད་དཔག་མེད་སྐྱབས་གནས་ཀུན་འདུས་ཀྱི་འདུ་ཤེས་ཀྱིས་བསྒྲུབས་ཏེ་ཐེ་ཚོམ་མེད་པའི་དད་པ་བརྟན་པོ་བྱས་ན་འགྲུབ། རྒྱལ་བ་གཅིག་གྲུབ་མ་བསྒྲུབས་ཐམས་ཅད་འགྲུབ། ཅེས་གསུངས་པས་འོད་དཔག་མེད་འགྲུབ་དུས་ཐམས་ཅད་འགྲུབ་བོ། །ཆོས་སྐུ་འོད་དཔག་མེད་ལ་ཕྱག་འཚལ་ལོ། །ཞེས་པ་ནི། གང་ལ་གང་འདུལ་གྱིས་སྤྲུལ་བ་སྣ་ཚོགས་པས་འགྲོ་ཁམས་རྒྱ་མཚོ་མ་སྟོངས་ཀྱི་བར་དུ་ཕྲིན་ལས་འགྲོ་དོན་གྱི་མཛད་པ་རྒྱུན་མི་ཆད་པ། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཅི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་པ་ལྟར། འགྲོ་བའི་འདོད་དགུ་ཡིད་བཞིན་འབད་མེད་ལྷུན་གྲུབ་ཏུ་འབྱུང་བའི་གཞི་ཆོས་དབྱིངས་ཀུན་ཁྱབ་ཕྱོགས་དུས་མུ་མཐའ་མེད་པའི་བདག་ཉིད་ཆོས་སྐུ་འོད་དཔག་མེད་པ་གནས་ལུགས་ཇི་བཞིན་པ་ལ་ངེས་ཤེས་ཀྱིས་ཕྱག་འཚལ་ལོ། །འདི་ཡན་ཆད་སྐུ་རྫུ་འཕྲུལ་གྱི་ཡོན་ཏན་དང་ཕྲིན་ལས་བསམ་མི་ཁྱབ་པར་བསམ་ནས་ཆོས་སྐུ་འོད་དཔག་མེད་ལ་ཕྱག་འཚལ་བ་བསྟན་ཏོ།།

གཉིས་པ་ཐུགས་མཁྱེན་བརྩེའི་ཡོན་ཏན་དྲན་ཏེ་ཀུན་མཁྱེན་འོད་དཔག་མེད་ལ་ཕྱག་འཚལ་བ།

སངས་རྒྱས་སྤྱན་གྱིས་ཉིན་མཚན་དུས་དྲུག་ཏུ། །སེམས་ཅན་ཀུན་ལ་རྟག་ཏུ་བརྩེ་བས་གཟིགས། །སེམས་ཅན་ཀུན་ཀྱི་ཡིད་ལ་གང་དྲན་པའི། །རྣམ་རྟོག་གང་འགྱུ་རྟག་ཏུ་ཐུགས་ཀྱིས་མཁྱེན། །སེམས་ཅན་ཀུན་ཀྱི་ངག་ཏུ་གང་སྨྲས་ཚིག །རྟག་ཏུ་མ་འདྲེས་སོ་སོར་སྙན་ལ་གསན། །ཀུན་མཁྱེན་འོད་དཔག་མེད་ལ་ཕྱག་འཚལ་ལོ། །ཞེས་གསུངས་ཏེ། །སངས་རྒྱས་སྤྱན་གྱིས་ཉིན་མཚན་དུས་དྲུག་ཏུ། །ཞེས་པ་ནི། ལས་དང་པོ་བ་རྣམས་ལ་སངས་རྒྱས་འགྲེལ་ཚུལ་མདོ་ལྟར་དུ་བྱས་ན། མ་རིག་པའི་གཉིད་ལས་སངས་ཤིང་ཤེས་བྱ་ལ་བློ་རྒྱས་པས་ན་སངས་རྒྱས། ཐུན་མིན་སྔགས་ལྟར་དུ་བྱས་ན་ལྟ་བ་ངན་པ་ཐམས་ཅད་སངས་ནས་རང་བྱུང་གི་ཡེ་ཤེས་དར་ཞིང་རྒྱས་པས་ན་སངས་རྒྱས་སོ། །ཡང་ན་ཉོན་མོངས་པ་སངས་ཤིང་ཐམས་ཅད་མཁྱེན་པའི་ཡེ་ཤེས་རྒྱས་པས་ན་སངས་རྒྱས། དེ་ལྟར་སངས་རྒྱས་ཀྱི་ཡེ་ཤེས་ཀྱི་སྤྱན་གྱིས་ཤེས་བྱ་མཁྱེན་ཅིང་གཟིགས་པའི་ཚུལ་དུ་ཇི་ལྟ་མཁྱེན་པའི་ཡེ་ཤེས་ཟབ་ཞི་སྤྲོས་པ་དང་བྲལ་བས་མཚན་མར་འཛིན་པའི་སྒྲོ་འདོགས་ཐམས་ཅད་ལས་གྲོལ་བའི་སོ་སོ་རང་རིག་པའི་ཡེ་ཤེས་ཀྱིས་ཆོས་ཉིད་མངོན་སུམ་དུ་གཟིགས་ཤིང་ཐུགས་སུ་ཆུད་པའོ། །ཇི་སྙེད་མཁྱེན་པའི་ཡེ་ཤེས་ཀྱིས་མཉམ་བཞག་ལས་གཡོ་བ་མེད་བཞིན་དུ་དམིགས་པ་མེད་པའི་ཤེས་རབ་ཀྱིས་ཤེས་བྱ་མཐའ་དག་ཕྲ་ཞིང་ཞིབ་པར་མ་འདྲེས་པར་མངོན་སུམ་དུ་མཁྱེན་པའོ། ཇི་ལྟར་མཁྱེན་ཞེ་ན། མདོ་སྡེ་རྒྱན་ལས། ཉི་མའི་འོད་ཟེར་གཅིག་བཏང་བས། །འགྲོ་བ་སྣང་བར་བྱེད་པ་ལྟར། །དེ་བཞིན་ཤེས་བྱ་ཐམས་ཅད་ལ། །སངས་རྒྱས་ཡེ་ཤེས་ཅིག་ཆར་འཇུག །ཅེས་པ་ལྟར། །དུས་གསུམ་གྱི་ཤེས་བྱ་ཐམས་ཅད་འུ་ཚོ་སོ་སོའི་སྐྱེ་བོའི་བློ་ལྟར་ཀུན་རྟོག་གི་རྗེས་སུ་འགྲོ་བའི་རིམ་པ་ཅན་མ་ཡིན་པར་དུས་སྔ་ཕྱི་མེད་པར་ཅིག་ཆར་དུ་མཁྱེན་པའོ། །དེས་ན་མགོན་པོ་འོད་དཔག་མེད་པའི་སྒྲིབ་མེད་ཡེ་ཤེས་ཀྱི་སྤྱན་གྱིས་ཉིན་མཚན་དུས་དྲུག་གམ་དུས་རྟག་ཏུ་གཡེལ་བ་མེད་པར་འཇིག་རྟེན་གྱི་ཁམས་གང་ན། སེམས་ཅན་སུ་ཞིག་དར། སུ་ཞིག་རྒུད། སུ་ཞིག་ངན་སོང་ནས་མཐོ་རིས་ལ་འགྲོ། སུ་ཞིག་མཐོ་རིས་ནས་ངན་སོང་ལ་འགྲོ། ཐ་ན་སྲོག་ཆག་ཕྲ་མོ་ཡན་ཆད་ཀྱི་གནས་ཚུལ་ཡོད་ཚད་ལག་མཐིལ་དུ་དངོས་པོ་རགས་པ་བཞག་ན་མིག་ལྡན་ཞིག་གིས་མི་མཐོང་བ་མེད་པ་ལྟར་གཟིགས་པས་ན། སེམས་ཅན་ཀུན་ལ་བརྩེ་བས་རྟག་ཏུ་གཟིགས། །ཞེས་པ་ནི། ཁམས་གསུམ་གྱི་སེམས་ཅན་ཐམས་ཅད་ལ་མ་གཅིག་གིས་བུ་ལ་བརྩེ་བ་ལྟར་དུས་རྟག་ཏུ་གཟིགས་པ་འགག་པ་མེད་པས་གཟིགས་པའོ། །གྲུབ་མཐས་བློ་བསྒྱུར་བ་ཐ་སྙད་ལ་དཔྱད་པ་ཞུགས་མྱོང་བ་ཚོས་སངས་རྒྱས་ཀྱིས་མ་དག་པ་གཟིགས་པ་ཨེ་ཡིན་ཞེ་ན། ཡུལ་དང་ཡུལ་ཅན་སོ་སོར་འཛིན་པ་དབང་ཤེས་འབྲེལ་བ་ལྟ་བུའི་མཁྱེན་པའམ་གཟིགས་པ་མེད་པ། གཟིགས་པའི་ཚུལ་ཡུལ་མ་དག་རང་མཚན་པ་མི་སྲིད། འོན་ཀྱང་བདེན་པ་མེད་ཅིང་རྫུན་པ་ཡོད་པ་ཤེས་བྱ་ཡིན་པའམ་ཤེས་བྱ་ལ་སྲིད་པས་ན་ཤེས་བྱ་མ་མཁྱེན་ན་ཐམས་ཅད་མཁྱེན་པ་མིན་པར་འགྱུར་རོ། །དེས་ན་བླ་ན་མེད་པའི་ཡེ་ཤེས་དང་རྫས་གཅིག་པའི་ཤེས་པས་སྐད་ཅིག་གཅིག་ལ་མཁྱེན་པའོ། །མདོ་ཕལ་པོ་ཆེ་ལས། སྐད་ཅིག་གཅིག་གིས་དོན་ཀུན་རིག །ཅེས་སོ། །མ་དག་པའི་སྣང་བ་དེ་སངས་རྒྱས་ཀྱི་ཡེ་ཤེས་ཀྱི་ངོར་མ་དག་པ་མ་ཡིན་ཡང་སེམས་ཅན་གྱི་མ་དག་པའི་འཁྲུལ་སྣང་དེ་སངས་རྒྱས་ཀྱི་ཤེས་བྱ་ཐམས་ཅད་མཁྱེན་པའི་ཡེ་ཤེས་ལ་སྣང་ཞིང་གཟིགས་པའོ། །དཔེར་ན་ཆུ་གཅིག་ལ་རིགས་དྲུག་གི་འཁྲུལ་སྣང་དྲུག་སོ་སོར་སྣང་བ་དེ་སྣང་བ་ལྟར་དུ་ཡང་གཟིགས་ཤིང་དེ་རྣམས་མ་དག་འཁྲུལ་བའི་སྣང་བ་ཡིན་པ་ཡང་གཟིགས་ལ། སྣང་བ་ལྟར་དུ་དོན་ལ་མ་གྲུབ་པ་ཡང་གཟིགས། མདོར་ན་སོ་སོའི་སྐྱེ་བོས་མ་དག་པའི་སྣང་བ་དང་འཕགས་པ་རྣམས་ཀྱི་མ་དག་དག་པ་གཉིས་ཀ་ལྡན་པའི་སྣང་བ། སངས་རྒྱས་ཀྱི་ཤིན་ཏུ་རྣམ་པར་དག་པའི་སྣང་བ་ཐམས་ཅད་སོ་སོར་མཁྱེན་ཅིང་གཟིགས་པས་ཐམས་ཅད་མཁྱེན་པའམ་ཐམས་ཅད་གཟིགས་པ་ཡིན་གྱི། མ་དག་པ་གཏན་ནས་མ་སྣང་ན་ཇི་ལྟར་གཟིགས། མ་གཟིགས་ན་མཁྱེན་ལུགས་ཅི་ལ་ཡོད། དག་པའི་སྣང་བ་ཁོ་ན་མཁྱེན་ཅིང་གཟིགས་པ་ཞིག་ལ་ཤེས་བྱ་ཐམས་ཅད་མཁྱེན་ཅིང་གཟིགས་པའི་སྒྲ་མི་འཇུག་གོ། གལ་ཏེ་མ་དག་པ་ཐམས་ཅད་སངས་རྒྱས་ལ་མི་སྣང་ཞིང་མི་གཟིགས་པ་ཞིག་ཡིན་ན་གདུལ་བར་བྱ་བའི་སེམས་ཅན་ཡང་མི་སྣང་ཞིང་གཟིགས་པར་མི་འགྱུར་ལ། དེ་འདུལ་བར་བྱེད་པའི་ཆོས་སྟོན་པ་དེ་ཡང་མི་སྣང་ཞིང་མི་གཟིགས་པར་འགྱུར་རོ། །གདུལ་བྱ་གཞན་སྣང་ལ་སངས་རྒྱས་མ་སྣང་ན་གཟུགས་སྐུ་གཉིས་དང་དེའི་ཞིང་ཁམས་སོགས་ཀྱང་གདུལ་བྱའི་སྣང་བ་ཡིན་པས་གཟུགས་སྐུ་གཉིས་དང་མཛད་པ་ཕྲིན་ལས་དང་བཅས་པ་སངས་རྒྱས་ལ་མི་སྣང་ཞིང་མི་གཟིགས་པར་འདོད་དགོས་པར་འགྱུར་རོ། །དེ་མིན་ན་སངས་རྒྱས་ལ་རང་སྣང་ཁོ་ན་མ་གཏོགས་གཞན་སྣང་གཅིག་ཀྱང་མི་སྣང་ནས་མི་གཟིགས་མི་མཁྱེན་པ་ཞིག་དང་། དེར་མ་ཟད་གནས་དང་གནས་མ་ཡིན་པ་སོགས་ཀྱང་སྣང་བ་མེད་པར་མཁྱེན་པར་ཐལ་བར་འགྱུར་བ་ལ་སོགས་པའི་སྐྱོན་འཇུག་གོ། འོ་ན་སངས་རྒྱས་ལ་མ་དག་པ་སྣང་ན་སངས་རྒྱས་ལ་འཁྲུལ་སྣང་ཡོད་པའི་སྐྱོན་འཇུག་སྙམ་ན། དེ་འདྲའི་དོག་པ་མི་དགོས་ཏེ་སངས་རྒྱས་ཀྱི་ཤེས་བྱ་ཐམས་ཅད་གཟིགས་པའི་ཡེ་ཤེས་ཀྱིས་སེམས་ཅན་གྱི་འཁྲུལ་སྣང་ལ་ཅི་ཞིག་སྣང་བ་དང་ཇི་ལྟར་འཁྲུལ་བ་ཡིན། དེའི་འཁྲུལ་བ་སེལ་ཐབས་ཚང་མ་སྒྲིབ་མེད་དུ་གཟིགས་པ་དེ་འཁྲུལ་མེད་ཐམས་ཅད་གཟིགས་པའི་ཡེ་ཤེས་གྱི་སྤྱན་ཞིག་འབད་པས་བསྒྲུབས་པ་དེའི་སྤྱན་གྱིས་གཟིགས་ཤིང་དེ་ལ་སྣང་བ་ཡིན་གྱི་འཁྲུལ་ཏེ་སྣང་བ་མིན་ནོ། །སེམས་ཅན་ཀུན་ཀྱིས་ཡིད་ལ་གང་དྲན་པའི། །རྣམ་རྟོག་གང་འགྱུ་རྟག་ཏུ་ཐུགས་ཀྱིས་མཁྱེན། །ཞེས་པ་ནི། སངས་རྒྱས་ཀྱི་ཐུགས་རྣམ་མཁྱེན་གྱི་ཡེ་ཤེས་དེས་གདུལ་བྱའི་སེམས་ཅན་གྱིས་ཡིད་ལ་དྲན་པའི་རྣམ་རྟོག་གང་ཤར་ཐམས་ཅད་སྒྲིབ་པ་དང་ཐོགས་པ་མེད་པར་མཁྱེན་པའོ། །སེམས་ཅན་ཀུན་ཀྱིས་ངག་ཏུ་གང་སྨྲས་ཚིག །རྟག་ཏུ་མ་འདྲེས་སོ་སོར་སྙན་ལ་གསན། །ཞེས་པ་ནི། སེམས་ཅན་རིགས་ཆེ་ཆུང་ཕྲ་རགས་ཐམས་ཅད་ཀྱིས་ངག་ནས་གང་སྨྲས་པའི་ཚིག་བཟང་ངན་ཡག་བཙོག་ཐམས་ཅད་ཀྱང་དུས་རྟག་ཏུ་མ་ནོར་མ་འདྲེས་མ་འཁྲུག་པར་ཐམས་ཅད་སངས་རྒྱས་ཀྱི་སྙན་གྱི་དབང་པོས་གསན། དཔེར་ན་མེ་ལོང་གསལ་བ་ཤེལ་སྒོ་འདྲ་བ་ཞིག་ཁྱིམ་དུ་བཞག་ན་ཁྱིམ་གྱི་དངོས་པོ་རྣམས་མེ་ལོང་གི་གདོང་དུ་ཡོད་ཚད་ཐམས་ཅད་མེ་ལོང་གི་ངོར་འཆར་ཞིང་། དེ་ཡང་མ་ནོར་མ་འདྲེས་པར་ཇི་བཞིན་དུ་འཆར་བ་ལྟར་དུས་གསུམ་གྱི་ཤེས་བྱ་ཐམས་ཅད་མ་འདྲེས་པར་མཁྱེན་པས་ན། ཀུན་མཁྱེན་འོད་དཔག་མེད་ལ་ཕྱག་འཚལ་ལོ། །ཞེས་གསུངས་སོ། །དེ་ལྟ་བུའི་ཀུན་མཁྱེན་འོད་དཔག་མེད་པའི་ཐུགས་མཁྱེན་བརྩེའི་ཡོན་ཏན་ལ་བསམ་སྟེ་དད་པ་དང་དང་བའི་སྒོ་ནས་ཕྱག་འཚལ་དགོས། དེ་ལྟར་ངག་གིས་ཀྱང་བདེ་སྨོན་འདོན། སེམས་ཀྱིས་ཀྱང་བདེ་བ་ཅན་གྱི་ཞིང་ཁམས་དང་སངས་རྒྱས་འོད་དཔག་མེད་འཁོར་དགྲ་བཅོམ་པའི་ཚོགས་དང་བཅས་པར་ཕྱག་འཚལ་བའི་ཡུལ་དུ་བསམ་སྟེ་རྩེ་གཅིག་པས་དད་པས་ཚིག་རྗེས་སུ་དོན་དྲན་དགོས་ཀྱི་ཐེ་ཚོམ་དང་ལོག་ལྟ་འདྲེས་མི་རུང་ངོ། །སེམས་ཅན་ཆེ་ཕྲ་ཐམས་ཅད་ཀྱིས་སེམས་ཀྱིས་ཅི་དྲན་ངག་གིས་ཅི་བརྗོད། ལས་དང་ལས་ཀྱི་སྒྲིབ་པ་བག་ལ་ཉལ་བ་སོགས་ཕྲ་བ་ནས་མཁྱེན་གྱིན་ཡོད། དད་པ་ཅན་གྱིས་མོས་གུས་ཀྱིས་གསོལ་བ་འདེབས་བཞིན་ཡོད་པ་མཁྱེན་དང་མི་མཁྱེན་ཐེ་ཚོམ་ཞིག་ཅི་དགོས། ཟུར་ན་མི་ཞིག་གིས་བལྟས་ནས་བསྡད་ཡོད་པ་ལས་གསལ་ཞིག་མཁྱེན། འདི་ཡན་ཆད་ཀྱིས་ཐུགས་མཁྱེན་བརྩེའི་ཡོན་ཏན་དྲན་ཏེ་ཀུན་མཁྱེན་འོད་དཔག་མེད་ལ་ཕྱག་འཚལ་བ་བསྟན་ཟིན་ནས། ད་ནི།

གསུམ་པ་སྟོབས་ནུས་པའི་ཡོན་ཏན་དྲན་ཏེ་འདྲེན་པ་འོད་དཔག་མེད་ལ་ཕྱག་འཚལ་བ།

ཆོས་སྤངས་མཚམས་མེད་བྱས་པ་མ་གཏོགས་པ། །ཁྱེ་ལ་དད་ཅིང་སྨོན་ལམ་བཏབ་ཚད་ཀུན། །བདེ་བ་ཅན་དེར་སྐྱེ་བའི་སྨོན་ལམ་འགྲུབ། །བར་དོར་བྱོན་ནས་ཞིང་དེར་འདྲེན་པར་གསུངས། །འདྲེན་པ་འོད་དཔག་མེད་ལ་ཕྱག་འཚལ་ལོ། །ཞེས་གསུངས་སྟེ། །ཆོས་སྤངས་མཚམས་མེད་བྱས་པ་མ་གཏོགས་པ། །ཞེས་པ་ནི། ཆོས་སྤང་ནིི་དམ་པའི་ཆོས་ལ་ལོག་ལྟ་སྐྱེས་ཏེ་སྤངས་བཞག་པ་ལ་ཟེར། འོད་མདོ་ལས། ཆོས་སྤངས་བྱས་པ་དང་མཚམས་མེད་ལྔའི་ལས་བསགས་པ་གཉིས་བདེ་བ་ཅན་དུ་མི་སྐྱེ་གསུངས་ཡོད། འོན་ཀྱང་མདོའི་དགོངས་པ་ཚུལ་བཞིན་དུ་བླང་ན་དེ་གཉིས་ཀའང་ཐུགས་རྗེས་དོར་བཞག་པ་མིན་སྟེ། མཐར་ཐུགས་དེ་གཉིས་ཀས་ཀྱང་སྨོན་ལམ་འགྲུབ་རྒྱུ་ཡོད་པ་རེད། རིགས་གཏན་ཆད་རེད་སོང་བ་ཞིག་མ་རེད་མོད། འོན་ཀྱང་ཡུན་རིང་པོ་མི་སྐྱེ་བར་ལས་ཀྱི་རྣམ་སྨིན་མྱོང་དགོས་པར་དགོངས་ཏེ་དམན་ལ་དགག་སྒྲ་སྦྱར་ཏེ་གསུངས་པ་རེད། ཆོས་དང་སྐྱབས་ཡུལ་ལ་ལོག་ལྟ་བྱས་ན་ཆོས་སྤངས་ལ་ལོག་ཉེན་ཆེ། མི་འགའ་རེས་ལྷ་མེད། འདྲེ་མེད། ལས་རྒྱུ་འབྲས་མེད། དཀོན་མཆོག་ཟེར་བ་ཞིག་མེད། ཚེ་ཕྱི་མ་མེད། བསོད་ནམས་བསགས་ན་འབྲས་བུ་མི་འབྱུང་། མི་ཚེ་ཆོས་ལ་བསྐྱལ་ན་དགོས་པ་མེད་རབས་ཀྱི་འདུ་ཤེས་དེ་འདྲ་བཟུང་ནས་དམ་པའི་ཆོས་ལ་རྒྱབ་ཕྱོགས་པ་ནི་ཆོས་སྤང་རེད། བློ་ཆུང་ཤེས་རབ་ཞན་པ་དང། རྣམ་དཔྱོད་མེད་པའི་སྐྱོན་གྱིས་ཐོས་པ་ཅུང་ཟད་རེ་བྱས་པ་དེ་ཁ་ཕྱི་རུ་སོང་པས་རང་སྐྱོན་ངོས་བཟུང་ནས་རང་སྐྱོན་འདུལ་བྱེད་དུ་མ་སོང་ཞིང་གཞན་སྐྱོན་ལྟ་བྱེད་དུ་གྱུར་ཏེ་བསྟན་པ་འགལ་འདུ་ཅན་དུ་བཟུང་། རང་ཕྱོགས་དང་གཞན་ཕྱོགས་རིས་སུ་བཅད་དེ་ཕྲག་དོག་འདོད་ཞེན་ལ་སོགས་པའི་ཕྱོགས་སུ་ཤོར་ཏེ། ཡང་དག་པའི་ཆོས་ལ་སྐུར་བ་བཏབ། ཆོས་མིན་ལ་ཆོས་སུ་སྒྲོ་བཏགས། མི་གཞན་ཡང་ལམ་དེར་ཁྲིད་དེ་རང་གཞན་གཉིས་ཀ་ངན་འགྲོའི་གཡང་སར་འཕེན་པར་གྱུར་སོང་བ་ཡིན། རང་གི་ལྟ་ལ་ཆགས་དང་དེ་བཞིན་དུ། །གཞན་གྱི་ལྟ་ལ་ཁྲོ་གང་རྟོག་པ་ཉིད། །ཅེས་པ་ལྟར། རང་ཕྱོགས་ལ་བསྟོད་པར་བྱེད། གཞན་ཕྱོགས་ལ་སྨད་པར་བྱེད། ཆོས་ལ་ལ་བཟང་བར་འདུ་ཤེས། ལ་ལར་ངན་པར་འདུ་ཤེས་ཏེ་ཆོས་སྤང་གི་ལས་བསགས་འགྲོ། དེའི་རིགས་ཀྱིས་གང་ཟག་ལ་སྨོད་པའི་ཞོར་ལ་ཆོས་སྤང་ཡང་བསག་འགྲོ་བཞིན་ཡོད། སྨད་བྱའི་གང་ཟག་དེའི་རྒྱུད་ན་ཆོས་ཚིག་བཞི་རེ་ཤེས་པའི་ལུང་གི་ཆོས་དང་། དགེ་སེམས་སྐད་ཅིག་མ་ཙམ་གྱི་རྟོགས་པའི་ཆོས་ཞིག་བཞུགས་ན་དེ་ལ་སྨད་པ་བྱས་པས་གང་ཟག་ལ་དངོས་སུ་སྨོད་པས་ཆོས་ལ་ཤུགས་ཀྱིས་སྨད་པར་འགྱུར། དབང་རྣོན་གྱི་སྐྱེ་བོ་བློ་གྲོས་མཆོག་ཏུ་གྱུར་པ་དག་ནི་ཅི་འདྲ་ཞིག་ཡིན་ནའང་། ཆོས་ཉིད་ཀྱི་རིགས་པས་ངེས་པ་དྲངས་ཏེ་ཆོས་ཀྱི་རྗེས་སུ་འབྲང་བའི་དད་པ་ཕྱིར་མི་ལྡོག་པ་ཞིག་ཡོད་པས། དེ་ལ་བྱིན་རླབས་དང་དངོས་གྲུབ་ཐོབ་པའང་མྱུར། དེ་མིན་སྦྱོང་སྟོབས་ཀྱི་ཐོས་པ་ཕྱོགས་རེ་བ་བསྟེན་མྱོང་བ། རང་ཉིད་ཀྱིས་རང་ཉིད་དབང་རྣོན་ལ་རློམ་པ། རིག་ལམ་ལྟར་སྣང་བ་རེའི་འགྲོས་ཤེས་ཀྱང་དོན་དུ་མ་སྨིན་པ། རྟོག་གེའི་རིག་པ་ལྟར་སྣང་བ་རེར་གཡེངས་ནས་ཟབ་མོའི་ཆོས་ལ་ཡིད་མི་ཆེས་པ་དེའི་རིགས་ཀྱི་མིང་ལ་སྤོབས་པ་མྱུར་བའི་སྦྱོར་སྐྱོན་ཅན་ཞེས་བྱ། ཤེས་རབ་འཆལ་བྱེད་དང་དངོས་གྲུབ་ཐོབ་པའི་གེགས་ངོ་མ་དེ་ཡིན། དེ་བས་དབང་པོ་རྟུལ་བོའི་རིགས་ཡིན་ཀྱང་ཡིད་ཆེས་པའི་ལུང་གི་རྗེས་སུ་འབྲང་རྐྱང་གི་དད་པ་ལྡོག་མེད་ཅན་དེ་ལའང་དངོས་གྲུབ་ཐོབ་པ་མྱུར། ས་ཆ་འགའ་རེར་བླ་རྒན་འགའ་རེས་གྲྭ་སར་རྣམས་ལ་དཔེ་ཆ་བལྟར་འཇུག་མི་རུང་། ཐམས་ཅད་ངན་ཕྱོགས་སུ་འགྱུར་འགྲོ་བཞིན་འདུག་ཅེས་གསུངས་མཁན་མང་ལ། དེ་རྒྱུ་མཚན་མེད་པའང་མ་ཡིན། དེ་ཅི་ཞེ་ན། དེ་དཔེ་ཆ་བལྟས་བཞག་པས་མ་རེད་མོད་དཔེ་ཆ་ཚང་མ་མ་བལྟས་པས་རེད་གསུངས་པ་རེད། དཔེར་ན་ཆུ་ཟོམ་ཕྱེད་ཅིག་ཁུར་བ་ལྟ་བུ། ཁུར་ན་མི་བདེ་ཞིང་། གཡུག་ནས་སྒྲ་གྲག་པ་ཡིན། ནང་ན་མང་པོ་མེད་པར་བླངས་པས་ལེན་གོ་མ་ཆོད་པ་ལ་གསུངས་པ་རེད། ཐོས་ཆུང་ནི་ང་རྒྱལ་ཆེ་ནི་རེད། ཐོས་པས་ཅི་ཙམ་རྒྱུད་ཕྱུག་ཅིང་ཐོས་དོན་རྒྱུད་ལ་ཅི་ཙམ་སྦྱར་ཐུབ་ན་དེ་ཙམ་གྱིས་རྒྱུད་རང་ཤུགས་ཀྱིས་ཐུལ་ཡོང་བ་རེད། དེས་ན་དཔེ་ཆ་གཏན་ནས་བལྟར་མ་བཅུག་སྟེ་ནང་དོན་རིག་པ་སྡེ་སྣོད་གསུམ་ལ་སྦྱོང་བ་བྱེད་པའི་མི་ས་སྟེང་ན་མེད་ན། དེའི་བརྗོད་བྱ་བསླབ་པ་གསུམ་ལ་ཉམས་ལེན་བྱེད་ཤེས་མཁན་ཞིག་ཡོད་དོན་མེད། དེ་མེད་པས་སངས་རྒྱས་ཀྱི་བསྟན་པ་མེད། དཀོན་མཆོག་གི་སྣང་བ་མེད་དུས་འགྲོ་བའི་བདེ་སྐྱིད་ཀྱི་སྒོ་འཕར་རྒྱག་དགོས་ཟེར་པ་ཞིག་གི་དོན་རང་ཤུགས་ཀྱིས་གྲུབ་ཡོང་བ་ཡིན། འོན་ཀྱང་དཔེ་ཆར་བལྟས་ན་མི་བཟང་ཞེས་པའི་དོན་མིན། དཔེ་ཆ་ཆ་ཚང་ཞིག་མ་བལྟས་ན་མི་བཟང་ཞེས་པའི་དོན་ཡིན། ཁྱད་པར་དུ་རྒྱུད་ལ་མ་སྦྱར་ན་མི་བཟང་ཞེས་གསུངས་ལ། ཐོས་པ་ཆུང་བའི་རིགས་ལ་དེ་འདྲ་གསུངས་ཀྱིན་ཡོད་པས། དགོངས་པ་ལེན་ལུགས་ལེགས་པོ་བྱས་ནས་འགྲེལ་བཤད་རྒྱག་དགོས། དོན་ངོ་མ་ཅི་ཞིག་བཤད་ཀྱིན་ཡོད་ཅེ་ན། ཆོས་ཉིད་བསམ་གྱིས་མི་ཁྱབ་པའི་དོན་ལ་ཐེ་ཚོམ་མེད་པའི་མཁས་པ་ལ་ནི་དངོས་གྲུབ་མྱུར་བ་སྨོས་ཅི་དགོས། ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །ཞེས་གསུངས། རྟོག་ཅིང་དཔྱོད་པའི་རྟོག་གེ་བ། །དེ་ལ་སྦྱོར་བའི་དངོས་གྲུབ་རིང། །ཞེས་རྒྱུད་བརྟག་པ་གསུམ་གྱི་ནང་དུ་སངས་རྒྱས་ཀྱིས་གསུངས་པ་ཡིན། དེའི་གནད་མ་ཤེས་པར་དེང་སང་དགོན་པ་དང་དགོན་པའི་བར་བླ་མ་དང་བླ་མའི་བར་གྲྭ་ཚང་དང་གྲྭ་ཚང་གི་བར་ལ་སྨད་པ་བྱེད་པ་འདི་ནི་དོན་ལ་རང་གི་ཆོས་སྤང་བསགས་འགྲོ་བ་ཡིན། དེ་ལྟར་ཆོས་སྤོང་གི་ལས་དང་། མཚམས་མེད་པའི་ལས་ལྔ་སྟེ། ཕ་བསད་པ། མ་བསད་པ། དགྲ་བཅོམ་པ་བསད་པ། དགེ་འདུན་འཁོར་ལོའི་དབྱེན་བྱེད་པ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པའོ། །དགྲ་བཅོམ་བསད་པ་དང་དགེ་འདུན་འཁོར་ལོའི་དབྱེན་གཉིས་ཀ་དེ་རིང་ཁ་རྩང་འབྱུང་བ་མི་སྲིད་ཀྱང་དེ་དང་ཆ་འདྲ་བ་འབྱུང་རྒྱུ་ཡོད། རྡོ་རྗེ་སློབ་དཔོན་ལ་མངོན་ལྐོག་བརྒྱུད་གསུམ་ནས་སྨོད་པ་དང། བྱང་ཆུབ་སེམས་དཔའི་རིགས་ཅན་ལ་སྐུར་བ་འདེབས་པ་དེ་ཚོ་མདོ་ལུགས་ཀྱི་མཚམས་མེད་པ་དང་ཆ་འདྲ་བ་ཡིན། ད་དུང་དེ་ལས་ཀྱང་ཚབ་ཆེ་བ་སྔགས་ལུགས་ཀྱི་དམ་ཚིག་ཉམས་པ་ཡིན་ཏེ་བསྐལ་ཆེན་མང་པོར་མནར་མེད་པའི་དམྱལ་བའམ་རྡོ་རྗེའི་དམྱལ་བ་ལ་སྐྱེ་བྱེད་ཀྱི་ལས་ཡིན། དེ་འདྲའི་ཆོས་སྤོང་དང་མཚམས་མེད་བྱས་པ་མ་གཏོགས་པ། ཁྱེད་ལ་དད་ཅིང་སྨོན་ལམ་བཏབ་ཚད་ཀུན། །བདེ་བ་ཅན་དེར་སྐྱེ་བའི་སྨོན་ལམ་འགྲུབ། །ཅེས་གསུངས་ཏེ། འོད་དཔག་མེད་ཁྱེད་ལ་དད་ཅིང་གུས་པ་ཆེན་པོས་ཕྱག་འཚལ་མཆོད་པ་ཕུལ། གསོལ་བ་དང་སྨོན་ལམ་བཏབ་ཚད་ཀྱི་སེམས་ཅན་ཐམས་ཅད་བདེ་བ་ཅན་ལ་སྐྱེ་བར་འགྱུར་ཞེས་པའི་དོན་ཏོ། ཅིའི་ཕྱིར་ཞེ་ན། འོད་དཔག་མེད་པའི་སྔར་སྨོན་ལམ་བཏབ་ཚད་འགྲུབ་ཡོད་པས་དེ་ལ་དད་པས་གསོལ་བ་བཏབ་ནས་རྒྱུ་བསྒྲུབས་ཚད་བདེ་ཅན་ལ་སྐྱེ་བ་དེ། སངས་རྒྱས་འོད་དཔག་མེད་པའི་སྨོན་ལམ་གྱི་མཐུ་གྲུབ་པ་ཡིན་པས་དད་མོས་དྲག་པོས་གསོལ་བ་བཏབ་སྟེ་བདེ་བ་ཅན་ལ་སྐྱེ་བའི་སྨོན་ལམ་བཏབ་ན་དེ་ལྟར་འགྲུབ་པར་ཐེ་ཚོམ་མ་དགོས། བར་དོར་བྱོན་ནས་ཞིང་དེར་འདྲེན་པར་གསུངས། །ཞེས་གསུངསཏེ། དེ་ལྟར་གསོལ་བ་འདེབས་པ་པོ་དེ་བདེ་བ་ཅན་གྱི་ཞིང་དེར་འདྲེན་པར་བར་དོར་བྱོན་ནས་བདེ་བ་ཅན་གྱི་ཞིང་དེར་འདྲེན་པ་སངས་རྒྱས་འོད་དཔག་མེད་པས་ཐུགས་བསྐྱེད་དང་དམ་བཅའ་མཛད་ཅིང་ཞལ་བཞེས་གནང་མྱོང་བ་ཡིན། དམ་བཅའདང་སྨོན་ལམ་ཇི་ལྟར་མཛད་པ་རེད་ཅེ་ན། འོད་མདོ་ལས་འདི་ལྟར་གསུངས་ཡོད། བྱང་ཆུབ་སེམས་དཔའ་ཆོས་ཀྱི་འབྱུང་གནས་གྱིས་བཅོམ་ལྡན་འདས་ལ་བཅོམ་ལྡན་འདས་ཞེས་མཚན་ནས་བོས་ཏེ། བདག་བྱང་ཆུབ་ཐོབ་པའི་ཚེ་འཇིག་རྟེན་གྱི་ཞིང་ཁམས་གཞན་དག་གི་ནང་ནས་བླ་ན་མེད་པའི་བྱང་ཆུབ་དུ་སེམས་བསྐྱེད་དེ་བདག་གི་མཚན་ཙམ་ཐོས་ནས་སེམས་བདག་ལ་དད་པ་དང་བདག་དྲན་པ་རྣམས་ཤི་པའི་དུས་སུ་བདག་དགེ་སློང་གི་དགེ་འདུན་གྱིས་བསྐོར་ཏེ་དེའི་ལམ་སྣ་འདྲེན་ཐུབ་པ་ཞིག་མ་བྱུང་བར་དུ་བདག་མངོན་པར་རྫོགས་པར་འཚང་མི་རྒྱ་ཞེས་དམ་བཅའ་མཛད་པ་ཡིན། དམ་བཅའ་དེ་དང་ཐུགས་བསྐྱེད་འགྲུབ་པའི་ཕྱིར་དུ་འོད་དཔག་མེད་པས་བསྐལ་བ་གྲངས་མེད་མང་པོར་སངས་རྒྱས་གཞན་ལས་ཀྱང་ཚོགས་བསགས་ཡུན་རིང་ཞིང་རྒྱ་ཆེ་བ་མཛད་དེ་ཞིང་ཁམས་གཞན་ལས་ཀྱང་ཁྱད་དུ་འཕགས་པ་ཞིག་བཟུང་བར་མཛད་ལ། སངས་རྒྱས་འོད་དཔག་མེད་ཀྱིས་དམ་བཅའ་ལྟར་མ་འགྲུབ་བར་དུ་སངས་མ་རྒྱས་པར་ཚོགས་བསགས་རྒྱ་ཆེན་མཛད་དེ་མཐར་སྨོན་ལམ་ཐམས་ཅད་ཡོངས་སུ་འགྲུབ་ཡོད་པས། སངས་རྒྱས་འོད་དཔག་མེད་ཀྱི་ཐུགས་རྗེའི་ནུས་པ་དང་རང་གི་དད་པ་དང་འདུན་པ་རྣམས་མཉམ་དུ་འཛོམས་ཚེ་བདེ་བ་ཅན་ལ་སྐྱེ་ཐུབ་པ་ཡིན། ཀུན་མཁྱེན་འཇིགས་གླིང་གིས། མདོར་ན་གང་གི་མཚན་དང་སྒྲ་དང་ནི། །ལྟ་བ་ཡིད་ལ་གོམ་པར་བྱེད་པ་ཡང་། །ཞིང་ཁམས་བདེ་བ་ཅན་དུ་དབུག་འབྱིན་པའི། །ཐུགས་བསྐྱེད་དམ་བཅའ་བསླུ་བ་མེད་པའི་ཕྱིར། །གསུངས་པ་ལྟར། ཚེ་འདིའི་སྟེང་ནས་བདེ་བ་ཅན་དུ་སྐྱེ་བའི་རྒྱུ་བཞི་ལེགས་པོ་ཞིག་འགྲུབ་ཡོད་ན་འཆི་ཁར་གསོལ་འདེབས་རེ་བྱེད་ཐུབ་ན་ཅི་བཤད། གལ་ཏེ་མ་ཐུབ་ན་ཡང་ཡིད་ལ་དྲན་པ་ཙམ་གྱིས་ཀྱང་སངས་རྒྱས་འོད་དཔག་མེད་འཁོར་དགེ་སློང་གི་དགེ་འདུན་འཁོར་དང་བཅས་པ་ལམ་སྣ་འདྲེན་པར་བྱོན་ཡོང་བ་ཡིན། ཡང་འཆི་བའི་རྐྱེན་འདྲ་མིན་སྣ་ཚོགས་ཡོད་པ་ཡིན་པས། གློ་བུར་ཡེ་འདྲོག་གི་འཇིགས་པ། གྲི་ཁ་མཚོན་ཁ་ནས་ཤི་བ། གཡང་ས་གྲོག་རོང་ནས་ཤི་བ། མེ་ཆུ་གཅན་གཟན་གྱི་འཇིག་པས་ཤི་བ་སོགས་ཀྱིས་ནི། འཆི་ཁར་དྲན་ལོང་མེད་ནའང་ཤི་ནས་བར་དོའི་སྣང་བ་ཤར་ཏེ་སྒྲ་འོད་ཟེར་གསུམ་གྱི་འཇིགས་སྐྲག་ཤར་དུས་མགོན་པོ་འོད་དཔག་མེད་དྲན་ཡོང་བ་རེད། འུ་ཚོས་ད་ལྟའི་སྐབས་སུ་འཇིགས་སྐྲག་ཆེན་པོ་ཞིག་ལྟ་ཅི་རྐང་པ་རྡོ་ལ་ཐོགས་ན་ཡང་བླ་མར་འབོད་པ་དང་རང་གང་ལ་མོས་པའི་ལྷག་པའི་ལྷ་ལ་འབོད་པ་རང་ཤུགས་ཀྱིས་དྲན་ནས་ངག་ལ་ཡང་ཐོན་ཡོང་བ་ཞིག་མ་རེད་དམ། དེ་བཞིན་དུ་ད་ལྟའི་སྐབས་སུ་མགོན་པོ་འོད་དཔག་མེད་པར་བློ་ཁྱེད་ཤེས་ཀྱི་དད་པ་ཡོད་མཁན་ཚོར་ཉིན་པར་དེའི་གསལ་སྣང་ཡོད་པར་མ་ཟད་མཚན་རྨི་ལམ་དུ་ཡང་རྨིས་ཐུབ་པ་ཞིག་བྱུང་ན། དེ་ཚེ་བར་དོའི་འཇིགས་སྐྲག་གི་སྐབས་སུ་དྲན་ཐུབ་པ་ཞིག་འབྱུང་བ་ཡིན། དྲན་མ་ཐག་ཏུ་དེས་སྐྱོབ་འགྲོ་ལ། འཇིགས་སྐྲག་གིས་རྐྱེན་བྱས་ཏེ། དྲན་བཞག་དུས་གྲོལ་དེ་བདེ་བ་ཅན་གྱི་ཞིངས་ཁམས་སུ་སངས་རྒྱས་ཀྱི་ཐུགས་རྗེས་དྲང་སླ་བ་ཡིན། བར་དོའི་ཤེས་པ་དེ་བེམ་པོ་དང་བྲལ་ཚར་བས་ཆུའི་ཁར་གཡེང་བའི་དངོས་པོ་ལྟར་ཁ་སྒྱུར་སླ་བ་ཡིན་ཞེས་གསུངས། བར་དོར་བྱོན་ནས་ཞིང་དེར་འདྲེན་པར་གསུངས། །ཞེས་དེའི་དུས་སུ་མགོན་པོ་འོད་དཔག་མེད་འཁོར་དང་བཅས་པ་བར་དོར་བྱོན་ཏེ་ཞིང་ཁམས་བདེ་བ་ཅན་དེར་སྐད་ཅིག་གིས་འདྲེན་པར་གསུངས་པ་ཡིན། སུས་གསུངས་ཤེ་ན། སངས་རྒྱས་ཤཱཀྱ་ཐུབ་པས་མདོ་རྒྱུད་དུ་མ་ལས་གསུངས་ཡོད། ད་ལྟའི་སྐབས་སུ་སངས་རྒྱས་འོད་དཔག་མེད་པའི་སྐུ་མདོག་ཕྱག་མཚན་ལ་གོམ་འདྲེས་བྱས་ཏེ་མིག་བཙུམ་ན་ཡང་མིག་ལམ་དུ་ཤར་འདུག་པའི་གསལ་སྣང་བརྟན་པོ། ཆེད་དུ་སྒོམ་མི་དགོས་པར་འགྲོ་འདུག་གང་གི་སྐབས་ཡིན་ཡང་བཀྲ་ས་ལེར་ཡིད་མཁར་ཤར་ཐུབ་ན་བར་དོའི་གནས་སྐབས་ཀྱི་ཉེན་ཁ་ཅན་གྱི་འགག་རྩའི་དུས་ཚོད་ལ་ཐོན་དུས་སྔར་འདྲེས་ཀྱི་མི་དང་འཕྲད་པ་ལྟར་ངོ་ཤེས་ཤིང་དེས་ལམ་སྣ་འདྲེན་པར་མ་ཟད་ལྟ་བ་ཡང་རབ་ཅན་ཞིག་ཡིན་ན་མ་པང་བུ་འཇུག་ལྟ་བུ་དགོངས་ཀློང་དབྱེར་མེད་དུ་གྲོལ་ཐུབ་པ་རེད། དེས་ན་སེམས་ཅན་ངན་འགྲོའི་གཡང་ལས་ཐར་བའི་གནས་མཆོག་ཏུ་འདྲེན་པར་མཛད་པའི་འདྲེན་པ་འོད་དཔག་མེད་ལ་ཕྱག་འཚལ་ལོ་ཞེས་སྟོབས་ནུས་པའི་ཡོན་ཏན་དྲན་ཏེ་འདྲེན་པ་འོད་དཔག་མེད་ལ་ཕྱག་འཚལ་བ་སོང་ནི་རེད།

བཞི་པ་ཚེ་སྲུང་སྲོག་སྐྱོབ་ཀྱི་ཡོན་ཏན་དྲན་ཏེ་རྒྱལ་བ་ཚེ་དཔག་མེད་ལ་ཕྱག་འཚལ་བ།

ཁྱེད་ཀྱི་སྐུ་ཚེ་བསྐལ་བ་གྲངས་མེད་དུ། །མྱ་ངན་མི་འདའ་ད་ལྟ་མངོན་སུམ་བཞུགས། །ཁྱེད་ལ་རྩེ་གཅིག་གུས་པས་གསོལ་བཏབ་ན། །ལས་ཀྱི་རྣམ་པར་སྨིན་པ་མ་གཏོགས་པ། །ཚེ་ཟད་པ་ཡང་ལོ་བརྒྱ་ཐུབ་པ་དང་། །དུས་མིན་འཆི་བ་མ་ལུས་བཟློག་པར་གསུངས། །མགོན་པོ་ཚེ་དཔག་མེད་ལ་ཕྱག་འཚལ་ལོ། །ཞེས་གསུངས་ཏེ། །ཁྱེད་ཀྱི་སྐུ་ཚེ་བསྐལ་བ་གྲངས་མེད་དུ། །ཞེས་པ་ནི། མགོན་པོ་འོད་དཔག་མེད་ཀྱི་སྐུ་ཚེའི་ཚད་ནི་བསྐལ་བ་གྲངས་ཀྱིས་མི་ཆོད་པ་རྩིས་ལས་འདས་པ་ཞིག་ཡིན། མྱ་ངན་མི་འདའ་ད་ལྟ་མངོན་སུམ་བཞུགས། །ཞེས་པ་ནི། སྐུ་མྱ་ངན་ལས་མི་འདའ་བར་ད་ལྟ་ཡང་བདེ་བ་ཅན་ན་གཟུགས་སྐུ་མངོན་སུམ་དུ་བཞུགས་ཡོད། ཁྱེད་ནི་སྐུ་ཚེའི་ཚད་ལ་རང་དབང་འབྱོར་བའི་སངས་རྒྱས་ཚེ་ལ་དབང་བའི་ཐུགས་བསྐྱེད་ལྷག་པར་རྒྱ་ཆེ་བའི་མཐུ་གྲུབ་པ་ཞིག་ཡིན་པས། ཁྱེད་ལ་རྩེ་གཅིག་གུས་པས་གསོལ་བཏབ་ན། །ཞེས་པ་ནི། བློ་གཅིག་ལས་གཉིས་པ་མེད་པ་ཞིག་གིས་བློ་ཁེལ་ཡིད་ཆེས་བྱས་ཤིང་། སེམས་རྩེ་གཅིག་པའི་སྒོ་ནས་མཐོ་དམན་སྐྱིད་སྡུག་བཟང་ངན་གང་བྱུང་རུང་ཁྱེད་ལས་རེ་ས་མེད་སྙམ་པའི་འདུན་པ་སྐྱེད་ཐུབ་ན་བྱིན་རླབས་ལྷག་པར་དུ་འཇུག་སླ་བའོ། །ལས་ཀྱི་རྣམ་པར་སྨིན་པ་མ་གཏོགས་པ། །ཞེས་པ་ནི། ལས་ཀྱི་རྣམ་པར་སྨིན་པ་སྟེ། དཔེར་ན་སྔོན་བསོད་ནམས་བསགས་པའི་འབྲས་བུ་ཟད། ལས་ཀྱིས་འཕངས་བའི་ཚད་རྫོགས། སྲོག་དང་ཚེ་ཡི་འཇུ་ཐག་ཟད་དེ་ཟད་པ་གསུམ་གྱི་མཐའ་ལ་ཐུག་ཅིང་ལས་ཀྱི་རྣམ་སྨིན་བཟློག་རྒྱུ་གཏན་ནས་མེད་པ་ཡིན་ན་མ་གཏོགས། ཚེ་ཟད་པ་ཡང་ལོ་བརྒྱ་ཐུབ་པ་དང་། །ཞེས་པ་ནི། འཕྲལ་གྱི་རྐྱེན་དབང་གིས་ཚེའི་འཕྲོ་ཆད་པ་དེ་འདྲའི་རིགས་དེ་ཡིན་ན། དུས་མིན་འཆི་བ་མ་ལུས་བཟློག་པར་གསུངས། །ཞེས་པ་ནི། དུས་མིན་གྱི་འཆི་བ་བཟློག་སྟེ་འཆི་རན་ཁར་ཡང་ལོ་བརྒྱ་འཚོ་ཞིང་སྟོན་བརྒྱ་མཐོང་བའི་དཔལ་ལ་འགོད་ཐུབ་པར་གསུངས་པ་རེད། འཆི་མ་རན་ན་ཤི་འགྲོ་དོན་མེད་དོ་སྙམ་ན་ཡོད་དེ། དུས་ཐོག་ཏུ་ཤི་བ་ནི་གོང་དུ་བཤད་པ་ལྟར་ཟད་པ་གསུམ་གྱི་མཐར་ཐུག་དུས་སྨན་པའི་རྒྱལ་པོ་དངོས་སུ་བྱོན་ཡང་ཕན་པ་མེད། གུ་རུ་རིན་པོ་ཆེས། གོས་ཟད་སྟུག་པོ་གསར་བར་མི་འགྲོ་བཞིན། །ཞེས་གསུངས་པ་ལྟར་གོས་རྙིང་པ་གསར་པ་འགྱུར་མི་ཐུབ་པ་བཞིན་དུ་ཚེའི་ཚད་ཐོག་ལ་ཐོན་དུས་ཕན་པ་མེད། ཚེའི་ཚད་ཐོག་ལ་ཐོན་བྱ་བ་ལས་ཐོག་ལ་བབ་ན་བཟློག་རྒྱུ་མེད་ཅེས་གསུངས་པ་ལྟར་ཡིན། དེ་མིན་ཚེ་ཟད་མེད་ཀྱང་རྐྱེན་དང་བར་ཆད་ཀྱི་དབང་དུ་ཤོར་བ་ནི། ཐོག་གིས་བསད་པ། ཆུས་ཁྱེར་བ། ལྷ་འདྲེས་བླ་ཚེ་རྐུ་ཤོར་བ། མཐུ་ཞབས་བྱད་ཞབས་སུ་སོང་བ། བླ་ཚེ་ཉམས་པ་ལ་སོགས་པ་འཆི་རྐྱེན་མང་བ་ཡིན། ཚེ་ཐུང་ནད་མང་གི་རིགས་ལ་ཚེ་ཐར་སྲོག་བླུ་བྱས་ན་ཕན་པ་ཡོད་པ་ནི་དེ་ཚོ་རིམ་གྲོའི་སྟོབས་ཀྱིས་དུས་མིན་གྱི་འཆི་བ་བཟློག་རྒྱུ་ཡོད་པའི་རྟགས་བསྟན་པ་ཡིན། འགའ་ཞིག་ལ་གཏོ་སྐུ་རིམ་སྨན་ལྷ་རྗེ་གང་བྱས་ཀྱང་ཕན་ཐོགས་མེད་པ་ནི། དུས་ཐོག་ལ་ཁེལ་ན་སངས་རྒྱས་བྱོན་ཀྱང་མཐུ་རྡུགས་ཅེས་པ་ལྟར་ཡིན། ཚེ་རིང་ཐབས་ཤིག་ལ་བསམ་ན་མགོན་པོ་འོད་དཔག་མེད་ལ་གསོལ་བ་འདེབས་དགོས། མགོན་པོ་འོད་དཔག་མེད་པ་ནི་རྒྱལ་བ་ཚེ་དཔག་མེད་ཡིན་ལ། དེ་ནི་ཚེ་ཡི་དངོས་གྲུབ་དང་བྱིན་རླབས་ཐམས་ཅད་ཀྱི་བདག་པོ་ཡིན། ཚེ་དབང་དང་ཚེ་ཆོག་སོགས་གཞན་དག་འདོན་ན་ལོས་བཟང་མོད། རྒྱལ་བ་ཚེ་དཔག་མེད་པ་ལས་ལྷག་པའི་ཚེ་ཡི་ལྷ་ཞིག་དང་གྲུབ་པའི་རིག་འཛིན་ཞིག་རྙེད་རྒྱུ་ཡོད་མི་སྲིད། དེས་ན་ཚེ་རིང་ཐབས། ནད་མེད་ཐབས། ཚེ་འདི་ལ་སྐྱིད་ཐབས། ཕྱི་མ་བདེ་བ་ཅན་དུ་ཚེ་ལོ་དཔག་ཏུ་མེད་པ་ལ་ཟག་མེད་ཀྱི་བདེ་བ་ལ་རོལ་བཞིན་རྒྱལ་བའི་མདུན་ནས་ཆོས་ཞུས་ཏེ་ས་ལམ་རིམ་བགྲོད་ཀྱི་ཐོག་ནས་སེམས་ཅན་ཐམས་ཅད་ལ་ཕན་བཏགས་བསམ་པའམ། ཡང་ན་ཉན་རང་གི་ལམ་རང་དོན་ཞི་བ་གཙོ་བོ་བྱེད་བསམ་ན་ཡང་སངས་རྒྱས་འོད་དཔག་མེད་ལ་གསོལ་བ་བཏབ་ནས་བདེ་བ་ཅན་ལ་དང་པོ་འགྲོ་དགོས་པ་རེད། རང་ཉིད་ཀྱིས་དད་པ་མ་འཆུག་ན་སངས་རྒྱས་བཅོམ་ལྡན་འདས་ཀྱི་ཐུགས་རྗེ་འཆུག་པ་མི་སྲིད། གཞན་འཇིག་རྟེན་གྱི་ལྷ་འདྲེ་མཐུ་བོ་ཆེ་དང་དེ་རྣམས་ཀྱིས་ཁ་མགོན་བྱེད་སའི་བླ་གཟུགས་རྒྱལ་འགོང་འཁྲི་ས་དང་འཕྲལ་དུ་ཕན་བཏགས་ཀྱང་ཕུགས་སུ་གནོད་བསྐྱལ་བ། མཐུ་ནུས་ལྟར་སྣང་ཅན་རེའི་མདུན་ནས་ཚེ་དབང་ཚེ་འགུགས་སྲུང་བ་ཕྱག་མདུད་བརྒྱ་ཐམ་པ་ལེན་པ་བས་སངས་རྒྱས་འཁོར་བཅས་ལ་དད་པའི་ལྷ་ཕྱག་རྡོག་མ་གསུམ་འཚལ་ན་དེའི་བཟང་བ་ཡིན། གནའ་བདག་ཅག་གི་སྟོན་པ་རྒྱལ་བྱེད་ཚལ་ན་བཞུགས་ཡོད་དུས་ཞིག་ལ་ཡུལ་མཉན་ཡོད་ཀྱི་ཚོང་བ་གཉིས་ཡོད། གཅིག་གིས་མུ་སྟེགས་པའི་སྟོན་པ་འོད་སྲུང་རྫོགས་བྱེད་ལ་སོགས་པར་དད་པ་བྱས། གཅིག་གིས་སངས་རྒྱས་བཅོམ་ལྡན་འདས་ལ་དད་པ་བྱས་པ་ཡིན། གཉིས་ཀ་ལྟ་བ་མ་མཐུན་པར་གཉིས་ཀས་རང་རང་གི་འདོད་ཕྱོགས་ཀྱི་ཆེ་བརྗོད་བྱས་ཏེ། གཉིས་ཀའི་གཅིག་གིས་གཅིག་གི་སྟོན་པ་ཁས་མ་བླངས་ནས་རྒྱུ་ནོར་འབྱོར་བ་ཡོད་ཚད། ཕུགས་ཀྱི་གཡང་ར་མན་ཆད་དང་། སྒོ་ཁྱིའི་ལྕགས་ཐག་ཡན་ཆད། ཐམས་ཅད་རྒྱན་ལ་བཞག་ནས་སུའི་སྟོན་པ་སྟོབས་དང་ནུས་པ་ཡོན་ཏན་དང་ལྡན་ན་དེ་ལ་འབྱོར་བ་ཡོད་ཚད་སྦྱིན་རྒྱུ་བྱས་ནས་ཁོང་གཉིས་ཀའི་ཡིག་འགོར་འབའ་བཞག་ཡིག་རྔ་ཐེའུ་ཡིས་མནན་པ་ཡིན། ལོ་རྒྱུས་དེ་རྒྱལ་བོ་གསལ་རྒྱལ་གྱིས་གོ་ནས་བློན་པོ་བཟང་ཤོས་གཉིས་ལ་དྲིལ་བསྒྲགས་བྱེད་དུ་བཅུག་ནས་མི་འབུམ་ཕྲག་མང་པོ་ལྟད་མོར་འདུས། དེ་བཞིན་དུ་ནམ་མཁའ་ནས་ལྷ་འབུམ་ཕྲག་མང་པོ་འདུས་ནས་ཡོང་། གནམ་ས་གཉིས་སུ་ལྷ་དང་མིའི་ལྟད་མོ་བ་མང་པོ་འདུས་ཡོད་པའི་དབུས་སུ་ཚོང་བ་གཉིས་ཀས་རང་རང་གི་སྟོན་པར་མཆོད་པའི་དཀྱིལ་འཁོར་བཤམ་སྟེ་སྤོས་དང་མེ་ཏོག་ལ་སོགས་པ་མཆོད་རྫས་ཐམས་ཅད་གྲ་སྒྲིག་བྱས། དེ་ནས་དང་པོ་མུ་སྟེགས་པའི་སྟོན་པ་ལ་དད་མཁན་གྱི་དགེ་བསྙེན་ཡར་ལངས་ནས་རྫོགས་བྱེད་ལ་སོགས་པའི་སྟོན་པ་དྲུག་མཆོག་ཡིན་པའི་བདེན་པ་དང་དེའི་བདེན་པའི་ཚིག་གང་གིས་མེ་ཏོག་དང་བདུག་སྤོས་ཡོན་ཆབ་འབུལ་བ་དག་སྟོན་པ་དེ་རྣམས་ཀྱི་ཐད་དུ་སོང་ཞིག་ཅེས་བདེན་ཚིག་བརྗོད་པས་མེ་ཏོག་ལ་སོགས་པའི་མཆོད་རྫས་ནམ་མཁའ་ལ་གཏོར་བ་དག་མར་ས་ཐོག་ཏུ་ལྷུང་། མཆོད་ཆུ་གནམ་ལ་མཆོད་ཀྱང་ས་སྟེང་དུ་ཕོས། མར་མེ་གཟིམས་ཡོན་ཆབ་ཀྱི་ཆུ་ཡང་ས་ལ་ཐིམ་ནས་མཆོད་པ་བདག་གིར་བཞེས་མཁན་ཞིག་མ་རྙེད། དེ་དུས་མི་རྣམས་ཀྱིས་འུར་བརྒྱབ་ཅིང་འཕྱ་སྨོད་བྱས་པས་མུ་སྟེགས་པའི་དགེ་བསྙེན་སྤོབས་པ་ཉམས། དེ་ནས་ནང་བའི་དགེ་བསྙེན་ཡར་ལངས་ཏེ་སངས་རྒྱས་བཅོམ་ལྡན་འདས་རྐང་གཉིས་རྣམས་ཀྱི་མཆོག གདུལ་བྱ་འདུལ་བ་རྣམས་ཀྱི་གཙོ་བོ། ཁ་ལོ་སྒྱུར་བ་ལྷ་དང་མིའི་གཙོས་པའི་འགྲོ་བ་ཡོངས་ཀྱི་མགོན་དུ་གྱུར་བ་དེ་ཉིད་ཀྱིས་བདེན་པ་དང་བདེན་པའི་སྟོབས་ཀྱིས་མཆོད་རྫས་འདི་དག་བཅོམ་ལྡན་འདས་ཀྱི་ཐད་དུ་སོང་ཞིག་ཅེས་མཆོད་པ་ཕུལ་བས། མེ་ཏོག་དག་བྱ་ངང་པའི་རྒྱལ་བོ་འཕུར་བ་ལྟར་ནམ་མཁའ་ལ་འཕགས་ནས་སངས་རྒྱས་བཅོམ་ལྡན་འདས་བཞུགས་ཡོད་སའི་རྒྱལ་བྱེད་ཚལ་གྱི་ཕྱོགས་སུ་སོང་ངོ་། །སྤོས་ཀྱི་དུ་བ་སྤྲིན་གྱི་ཕུང་པོ་དུམ་བུ་དུམ་བུ་དང་། ཆུ་ཕུལ་བ་ནི་བེེཌཱུརྱའི་སྡོང་པོ་ལྟ་བུར་གྱུར་ཏེ་བཅོམ་ལྡན་འདས་ཀྱི་ཕྱོགས་སུ་ལྷ་མི་ཐམས་ཅད་ཀྱི་མཐོང་ས་ནས་སོང་པས། ཐམས་ཅད་ཡ་མཚན་གྱི་གནས་སུ་གྱུར་ཏེ་མཆོད་རྫས་ཀྱི་རྗེས་སུ་དེད་དེ་སོང་བས། མེ་ཏོག་ཕུལ་བ་ནི་སངས་རྒྱས་བཅོམ་ལྡན་འདས་ཀྱི་དབུའི་སྟེང་དུ་ཡོད་ལ། སྤོས་ཀྱི་དུ་བ་སྤྲིན་ལྟ་བུ་དང་ཡོན་ཆབ་བེེཌཱུརྱའི་སྡོང་པོ་ལྟ་བུ་ནི་སྤྱན་སྔ་ན་ཡོད། དེ་དག་མཇལ་བས་ལྷ་མི་ཐམས་ཅད་དགའ་ཞིང་དང་བས་དད་པ་སྐྱེས་ཏེ་ཐམས་ཅད་ཀྱིས་སངས་རྒྱས་ཀྱི་ཞབས་ལ་ཕྱག་འཚལ། སྒོ་གསུམ་གུས་པ་ཆེན་པོས་འདུད་དེ་ཆོས་ཉན་པའི་དོན་དུ་སངས་རྒྱས་ཀྱི་སྤྱན་སྔར་ཐམས་ཅད་བསྡད། དེ་ནས་སངས་རྒྱས་བཅོམ་ལྡན་འདས་ཀྱིས་གསུང་ཚངས་པའི་དབྱངས་ཀྱིས་བཀའ་སྩལ་ཏེ་སངས་རྒྱས་དང་ཆོས་དང་དགེ་འདུན་གསུམ་ལ་མཆོག་དུ་འཛིན་ཅིང་དགའ་བར་བྱེད་པ་ཐམས་ཅད། རྣམ་སྨིན་གྱི་འབྲས་བུ་ལྷ་དང་མིའི་མཆོག་ཏུ་གྱུར་པ་ལ་སོགས་པ་ཆོས་ཀྱི་རྣམ་གྲངས་མང་པོ་བསྟན་པས། དེ་ན་ཡོད་པའི་སྐྱེ་བོ་ཐམས་ཅད་ཀྱིས་ཆོས་ལ་དད་པ་རྙེད་དེ་འགའ་རེའི་སྐྱབས་འགྲོ་ལ་སོགས་པའི་བསླབ་པའི་གཞི་བླང་། འགའ་རེས་དེ་ཉིད་དུ་དགྲ་བཅོམ་པའི་འབྲས་བུ་མངོན་དུ་བྱས་པ་ཡིན། དེའི་སྐབས་སུ་མུ་སྟེགས་པའི་བསྟན་པར་ཞུགས་པའི་དགེ་བསྙེན་དེས་ཀྱང་སངས་རྒྱས་ལ་ལྷག་པར་དད་པར་གྱུར་ཏེ་སངས་རྒྱས་ལ་ཕྱག་འཚལ་ནས་བླ་ན་མེད་པའི་བྱང་ཆུབ་ཏུ་སྨོན་ལམ་རྒྱ་ཆེན་པོ་ཞིག་བཏབ། བཅོམ་ལྡན་འདས་ཀྱིས་ཁྱོད་མ་འོངས་པ་ན་རྫོགས་པའི་སངས་རྒྱས་མི་གཡོ་པ་ཞེས་བྱ་བར་སངས་རྒྱས་པར་འགྱུར་ཞེས་དབུགས་འབྱིན་དང་ལུང་བསྟན་མཛད་པ་ཡིན། དགེ་བསྙེན་སྙིང་སྟོབས་ཅན་དེས་མུ་སྟེགས་སྟོན་པ་སྡེ་དྲུག་ལ་བསྟེན་ཞིང་། དེའི་རྗེས་སུ་ཅི་འདྲ་ཞིག་བསླབས་ཀྱང་ཡོན་ཏན་ཏིལ་འབྲུ་ཙམ་ཡང་ཐོབ་རྒྱུ་མེད། སྟོན་པ་བཅོམ་ལྡན་འདས་ལ་སྙིང་ནས་དད་པས་ཕྱག་འཚལ་ཏེ་བློ་བརྟན་ཞིང་འགྱུར་བ་མེད་པའི་སྙིང་སྟོབས་བཟུང་ནས་འགྲོ་ལ་ཕན་པའི་བྱ་དཀའ་བའི་སྤྱོད་པ་རླབས་ཆེན་ལ་སློབ་སྟེ་སེམས་ཅན་སངས་རྒྱས་ཀྱི་ས་ལ་འགོད་པར་དམ་བཅས་པའི་ཐོག་མ་ཉིད་ནས་དབུགས་འབྱིན་ཆེན་པོ་དེ་འདྲ་ཐོབ་པ་ཡིན། བྱ་བ་གང་ཡིན་ན་རྣམ་དཔྱོད་ཀྱིས་དཔྱད་དེ་ཐབས་ཁྱད་པར་ཅན་ཡོད་ན་བྱ་བ་གང་ཡིན་ཡང་འགྲུབ་རྒྱུ་ཞིག་ཡིན། ཐེངས་རེ་གཉིས་ཅི་འདྲ་ཉམས་ཉེས་དང་ཕམ་ཁ་ཆེན་པོ་བྱུང་ཡང་སེམས་མ་ཤི་བར་ཡུལ་དམ་པར་ཐབས་མཆོག་གིས་བསྟེན་ཐུབ་ན་ཕམ་པའི་རྗེས་ན་རྒྱལ་ཁ་ཡོད་འདི་ཆོས་ཉིད་ཡིན། ཡང་གཏམ་རྒྱུད་གཞན་པ་ཞིག་བཤད་ན། བདག་ཅག་གི་སྟོན་པ་བཅོམ་ལྡན་འདས་རྒྱལ་བའི་རྒྱལ་བྱེད་ཀྱི་ཚལ་ན་བཞུགས་དུས་ཞིག་ལ་རྒྱལ་པོ་མ་སྐྱེས་དགྲའི་དམགས་དཔུང་གིས་དམག་བརྒྱབ་ནས་རྒྱལ་པོ་གསལ་རྒྱལ་ཐེངས་མ་གསུམ་གྱི་བར་དུ་ཕམ་ཁ་ཆེན་པོ་ཁུར་ཏེ་དམག་ཉེས་ངན་པ་བྱུང་། རྒྱལ་པོ་གསལ་རྒྱལ་ལ་ཕམ་ཉེས་ཆེན་པོ་བྱུང་སྟེ་མྱ་ངན་གྱིས་སྡུག་བསགས་ནས་བསྡད་ཡོད་དུས་ཞིག་ལ། ཡུལ་དེ་ན་ཁོ་རང་གི་མངའ་འོག་ཡིན་པའི་ཁྱིམ་ཚང་ཕྱུག་པོ་རྒྱུ་ནོར་ལོངས་སྤྱོད་རྣམ་ཐོས་སྲས་ཀྱི་བང་མཛོད་ལ་འགྲན་བཟོད་པ་ཞིག་ཡོད། དེ་ཚང་གིས་གསེར་མང་པོ་ཁྱེར་ཡོང་ནས་གསེར་ཁྱེར་ཡོང་བ་རྣམས་བརྩིགས་བཞག་པ་མི་ཡར་ལངས་ན་ཕར་རྒྱབ་ནས་མི་མཐོང་བ་ལྟ་བུ་ཞིག་རྒྱལ་པོའི་མདུན་དུ་སྤུངས་ཤིང་རྒྱལ་པོར་བྱིན་ནས་རྒྱལ་པོར་སེམས་གསོ་བྱས། རྒྱལ་པོས་བསམ་བློ་ཞིག་བཏང་ནས་རིགས་ཞིག་སད་དེ་བློ་ཞིག་དྲན་ནས་ང་རང་ཐེངས་མ་གསུམ་ལ་ཕམ་འགྲོ་བ་འདི་དགྲ་ཐབས་ཀྱི་སྟེང་ནས་མ་ཐོན་པ་ཡིན་ངེས། ཐབས་བློ་མི་འདྲ་བ་རེ་རྙེད་རྒྱུ་ཡོད་ན་རྒྱལ་ཁ་ཐོབ་སྲིད། གཏམ་ཉུལ་བ་ནང་མི་ངོ་མ་འགའ་རེ་མངགས་ནས་ཐབས་ཤིག་བཙལ་དགོས་སྙམ་སྟེ་ཉན་རྣ་བ་འགའ་ཞིག་གཏམ་ཉུལ་དུ་མངགས། ཉན་རྣ་བ་རྣམས་ཀྱིས་སྐད་ཆ་སྣ་ཚོགས་ཉན་ནས་འགྲོ་བཞིན་ཡོད་པས་ཉིན་གཅིག་རྒན་པ་བློ་གྲོས་ཅན་གཉིས་ཀྱིས་སྐད་ཆ་བཤད་ཀྱིན་ཡོད་པ་ཐོས་ནས་དེ་རྒྱལ་པོ་ལ་ཡར་ཞུ་བྱས་པ་ཡིན། རྒན་པ་གཉིས་ཀས་ཅི་ཞིག་བཤད་ཀྱིན་ཡོད་ཅེ་ན། རྒན་པ་གཅིག་གིས་རྒྱལ་པོ་གསལ་རྒྱལ་ཕམ་ཐལ་མོད་། དེ་འདྲའི་ཕམ་པ་ཞིག་གིས་སེམས་མ་ཤི་བར་སེམས་ཡར་ལ་གཏོད་དེ་ད་དུང་དམག་འཐབ་བྱས་ན་རྒྱལ་ཁ་ལེན་ཐུབ་ནི་རེད་ཅེས་སྨྲས། གཅིག་ཤོས་ཀྱིས་ཅི་འདྲ་བྱེད་དགོས་ཞེས་དྲིས་ཚེ། ད་པདྨའི་ཟེ་བ་ཞེས་པའི་དམག་འཐབ་ལུགས་ཤིག་ཡོད། དེ་བྱས་ན་རྒྱལ་ཁ་རང་ལག་ཡིན་ནི་རེད་ཅེས་སྨྲས་པ་ན། ཡང་གཅིག་པོས་པདྨའི་ཟེ་བ་ཞེས་པའི་དགྲ་འཐབ་ཇི་ལྟར་བྱེད་དགོས་ཞེས་དྲིས་ཚེ། དམག་མི་སྡར་མ་ཐམས་ཅད་སྔོན་ལ་བཞག འབྲིང་བ་རྣམས་བར་དུ་བཞག དཔའ་བོ་ཐམས་ཅད་རྒྱབ་ཏུ་བསྡད་ནས་འཐབ་ན་ཐུབ་ཅེས་སྨྲ་ཡི་འདུག་གོ་ཞེས་རྒྱལ་པོར་ཞུས་པ་ན། རྒྱལ་པོས་དེ་གསན་ནས་དེ་ཡག་ཁི་བསམ་ནས་དམག་བཀོད་དེ་འདྲ་བྱས་ཏེ་ཐེངས་གཅིག་འཐབ་དུས་དེའི་ཐོག་ནས་མ་སྐྱེས་དགྲ་ཕམ་སོང་པ་ཡིན། རྒྱལ་པོ་མ་སྐྱེས་དགྲ་ཁོ་རང་གསོན་པོར་བཟུང་། དེ་དུས་རྒྱལ་པོ་གསལ་རྒྱལ་གྱིས་བསམ་བློ་བཏང་སྟེ་ཐེངས་འདིའི་རྒྱལ་ཁ་ང་ལ་ཡོད་མོད། དགྲ་གྲོགས་ལ་བསྒྱུར་ན་དེ་བས་རྒྱལ་ཁ་ཡིན་སྙམ་ནས། རྒྱལ་པོ་མ་སྐྱེས་དགྲ་ཤིང་རྟའི་ནང་དུ་ཁྱེར་ནས་སངས་རྒྱས་བཅོམ་ལྡན་འདས་ཀྱི་སྐུ་མདུན་དུ་ཁྲིད་དེ། རྒྱལ་པོ་གསལ་རྒྱལ་གྱིས་སངས་རྒྱས་ལ་འདི་ལྟར་ཞུས། མ་སྐྱེས་དགྲ་འདིས་ཡུན་རིང་མོ་ཞིག་ནས་ང་ལ་འཁོན་མེད་སར་འཁོན། དགྲ་མེད་སར་དགྲ་བྱས་པ་ཡིན་མོད། ད་ཕྱིན་ཆད་གྲོགས་ཤིག་ལ་སྒྱུར་རྒྱུའི་ཆེད་དུ་འདི་མ་བསད་པར་ཁྱེད་ཀྱི་མདུན་ལ་ཁྲིད་ཡོང་བ་ཡིན་པས་འདི་ལ་སྲོག་གི་སྦྱིན་པ་ཞིག་བྱ་སྙམ་ཞུས་པས། བཅོམ་ལྡན་འདས་ཀྱིས་བཀའ་སྩལ་ཏེ་རྒྱལ་པོ་ཆེན་པོ་འདི་ཐོངས་དང་ལེགས་སོ་ཞེས་གསུངས་པ་ཡིན། རྒྱལ་བར་གྱུར་ན་འཁོན་པ་མང་། །ཕམ་པར་གྱུར་ན་སྡུག་བསྔལ་གནས། །རྒྱལ་དང་ཕམ་པ་སྤོང་ན་ནི། །ཉེ་བར་ཞི་སྟེ་བདེ་བར་གནས། །ཞེས་གསུངས། རྒྱལ་ཁ་ཐོབ་ན་མི་དགའ་བའི་དགྲ་ཇེ་མང་ཡིན། ཕམ་ན་ནི་སྡུག་བསྔལ་དེ་བས་ཆེ་བས། རྒྱལ་ཕམ་གཉིས་ཀ་མེད་པ་ཞིག་བྱས་ན་ད་གཟོད་སྡུག་བསྔལ་ཞི་ནས་བདེ་བར་གནས་ཐུབ་ཅེས་གསུངས་པས། རྒྱལ་པོ་མ་སྐྱེས་དགྲ་ཡང་ཕྱིར་བདེ་བར་བཏང་ངོ། །དེ་ནས་རྒྱལ་པོ་གསལ་རྒྱལ་གྱིས་སྨྲས་པ་ངའི་རྒྱལ་སྲིད་ཕྱིར་ལག་ཏུ་ཐོབ་པ་འདི་ཚོང་དཔོན་འདིའི་སྐུ་དྲིན་ཡིན་པས་འདི་ལ་ཅི་འདོད་པའི་བྱ་དགའ་ཞིག་སྦྱིན་དགོས་ཅེས་སྨྲས་པས། ཚོང་དཔོན་གྱིས་རེ་བ་གཅིག་པུ་ཞིག་ཡོད་ཚུལ་སྨྲས་པས། གང་ཡིན་ཞེས་དྲིས་པར། ཞག་བདུན་གྱི་བར་དུ་ཁོ་རང་གིས་ཅི་བསམ་བྱ་ཆོག་པའི་གནང་བ་ཞུས་པར། རྒྱལ་པོས་ཀྱང་གནང་བ་ཐོབ། དེ་ནས་ཚོང་དཔོན་གྱིས་སྨྲས་པ་ཁོ་བོས་ཞག་བདུན་གྱི་རིང་ལ་རྒྱལ་པོའི་རྒྱལ་སྲིད་ཀྱི་ཆབ་སྲིད་ཚང་མ་བསྐྱར་གསོ་བྱེད་རྒྱུ་ཡིན་ཞེས་སྨྲས་ཏེ། རྒྱལ་སྲིད་ཀྱི་འབྱོར་བ་སྔར་བས་ཀྱང་རྒྱས་པར་བྱས་ཤིང་ཉིན་བདུན་དེའི་རིང་ལ་སངས་རྒྱས་འཁོར་དང་བཅས་པ་དང་། རྒྱལ་པོ་གསལ་རྒྱལ་འཁོར་དང་བཅས་པ་སྤྱན་དྲངས། དེའི་སྟེང་དུ་ཡུལ་ཀ་ཤི་ཀ་དང་ཀོ་ས་ལའི་ཡུལ་གྱི་མི་རྣམས་དང་བཅས་པ་བསྡུས་ནས་ཞག་བདུན་གྱི་རིང་ལ་ཚོང་དཔོན་ངས་མགྲོན་སྟོན་བྱེད་པ་ཡིན་པས་སྡེ་འབངས་ཐམས་ཅད་ཀྱིས་འཕྲལ་དུ་ལས་ཀ་གཞན་དག་གི་སེམས་ཁྲལ་གཅིག་ཀྱང་བྱ་མི་དགོས། འདིར་འོང་ནས་ཉིན་བདུན་གྱི་རིང་ལ་དཀོན་མཆོག་གསུམ་ལ་སྐྱབས་འགྲོ་བྱོས། ངའི་སྟོན་མོར་ཅི་དགའ་རུ་ལོངས་སྤྱོད་ཅིག དེ་བཞིན་གཤེགས་པ་འཁོར་བཅས་ལ་བསྙེན་བཀུར་བྱོས་ཤིག་ཅེས་དྲིལ་བསྒྲགས་ནས། དེའི་ཞག་མ་བདུན་གྱི་བར་དུ་སངས་རྒྱས་འཁོར་བཅས་ལ་བཀུར་སྟི་ཆེན་པོ་མཛད་ཅིང་མི་འབུམ་ཕྲག་མང་པོ་ལ་ལུས་སེམས་གཉིས་ཀར་བདེ་བ་ཐོབ་ནི་ཞིག་བྱས། ཚོང་དཔོན་རང་གིས་ཀྱང་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ་བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད། དེ་དུས་བཅོམ་ལྡན་འདས་ཀྱི་ཞལ་འཛུམ་པ་དང་བཅས་ཏེ་ཚོང་དཔོན་འདི་མ་འོངས་པར་ཡང་དག་པར་རྫོགས་པའི་སངས་རྒྱས་མི་འཇིགས་སྦྱིན་ཞེས་པར་འགྱུར་རོ་ཞེས་ཡང་དབུགས་འབྱིན་ལུང་བསྟན་ཐོབ། ཡུལ་ཁྱད་པར་ཅན་དང་འབྲེལ་ན་དེ་འདྲའི་བསོད་ནམས་རླབས་ཆེན་སོག་པ་དང་བྱང་ཆུབ་མཆོག་ཏུ་སེམས་བསྐྱེད་ན་འབྲས་བུ་ཆེན་པོ་དེ་འདྲ་ཐོབ་རྒྱུ་ཡོད་པ་རེད། མགོན་པོ་འོད་དཔག་མེད་ཚེ་དང་ཡེ་ཤེས་དཔག་ཏུ་མེད་པའི་བཅོམ་ལྡན་འདས་སངས་རྒྱས་གང་གཱའི་ཀླུང་གི་བྱེ་མ་རྙེད་མང་པོའི་སྐུ་གསུང་ཐུགས་ཡོན་ཏན་ཕྲིན་ལས་མཛད་པ་ཐམས་ཅད་གཅིག་ཏུ་བསྡམ་པ་འདི་ཉིད་། ད་ལྟ་གཟུགས་སྐུ་མངོན་སུམ་དུ་བཞུགས་ཤིང་། དེ་ལ་གསོལ་བ་བཏབ་ན་སྐྱེ་བ་མང་པོའི་སྡིག་སྒྲིབ་དག་པ་ཡིན་པས། ཚེ་འདིར་ཚེ་རིང་བ་ལ་སོགས་པ་འདོད་དོན་ཆུང་ངུ་དག་ཞོར་ལ་འབྱུང་བ་ཡིན། དེས་ན་མགོན་པོ་ཚེ་དཔག་མེད་ལ་ཕྱག་འཚལ་ལོ། །ཞེས་གསུངས་ཏེ། འདི་ཡན་ཆད་ཀྱི་ཚེ་སྲུང་སྲོག་སྐྱོབ་ཀྱི་ཡོན་ཏན་དྲན་ཏེ་རྒྱལ་བ་ཚེ་དཔག་མེད་ལ་ཕྱག་འཚལ་བ་སོང་བའོ། །

གསུམ་པ་མཚན་ཐོས་པའི་ཕན་ཡོན་གྱི་སྒོ་ནས་ཕྱག་འཚལ་བ།

དེ་ལ་གསུམ། སངས་རྒྱས་འོད་དཔག་མེད་ལ་དད་པས་ཐལ་མོ་སྦྱར་ན་བསོད་ནམས་ཆེ་བ། སྙིང་ཁུང་རུས་པའི་གཏིང་ནས་དད་པ་སྐྱེས་ན་བྱང་ཆུབ་ཀྱི་ལམ་ལས་ཕྱིར་མི་ལྡོག་པ། སངས་རྒྱས་འོད་དཔག་མེད་པའི་མཚན་ཙམ་ཐོས་པས་ཚུལ་ཁྲིམས་རྣམ་དག་ཏུ་འགྱུར་བའོ།།

དང་པོ་སངས་རྒྱས་འོད་དཔག་མེད་ལ་དད་པས་ཐལ་མོ་སྦྱར་ན་བསོད་ནམས་ཆེ་བར་བསྟན་པ།

སྟོང་གསུམ་འཇིག་རྟེན་རབ་འབྱམས་གྲངས་མེད་པ། །རིན་ཆེན་གྱིས་བཀང་སྦྱིན་པ་བྱིན་པ་བས། །འོད་དཔག་མེད་པའི་མཚན་དང་བདེ་བ་ཅན། །ཐོས་ནས་དད་པས་ཐལ་མོ་སྦྱར་བྱས་ན། །དེ་ནི་དེ་བས་བསོད་ནམས་ཆེ་བར་གསུངས། །དེ་ཕྱིར་འོད་དཔག་མེད་ལ་གུས་ཕྱག་འཚལ། །ཞེས་གསུངས་ཏེ། སྟོང་གསུམ་འཇིག་རྟེན་རབ་འབྱམས་གྲངས་མེད་པ། །ཞེས་པ་ནི། མི་སྣང་གཟུགས་མེད་ཀྱི་ཁམས། ཕྱི་སྣང་གཟུགས་ཀྱི་ཁམས། སྣང་བ་འདོད་པའི་ཁམས་ཏེ་ཁམས་གསུམ་རྟེན་བརྟེན་པ་དང་བཅས་པ་གཅིག་ལ་བརྩིས་པའི་སྟོང་གཅིག་ལ་སྟོང་དང་པོ། དེའི་སྟོང་དེ་གཅིག་ལ་བརྩིས་པའི་སྟོང་གཅིག་ལ་སྟོང་གཉིས་པ། དེ་གཅིག་ལ་བརྩིས་པའི་སྟོང་གཅིག་ལ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཟེར། དེ་རྣམས་སོ་སོར་བགྲང་ན་བྱེ་བ་ཕྲག་བརྒྱ་ཡིན། འདིའི་བྱེ་བ་འདི་ས་ཡ་བྱེ་བ་ཞེས་པའི་ས་ཡ་སྔོན་དུ་རྩི་ལུགས་ཅན་འདི་ཡིན་ཞིང་། དེ་ལྟ་བུའི་ཞིང་ཁམས་བྱེ་བ་ཕྲག་བརྒྱ་དེ་སྤྲུལ་སྐུའི་སྟོན་པ་གཅིག་གི་གདུལ་ཞིང་ཡིན། ད་ལྟ་རང་རེ་ཡོད་ས་འདི་ནི་སངས་རྒྱས་ཤཱཀྱ་ཐུབ་པའི་གདུལ་ཞིང་ཡིན་ལ། འདིའི་ཞིང་ཁམས་བྱེ་བ་ཕྲག་བརྒྱ་ལ་མི་མཇེད་འཇིག་རྟེན་གྱི་ཁམས་ཟེར་བ་ཡིན། རྒྱུད་ཉོན་མོངས་དང་སོ་སོར་མི་མཇེད་པས་ན་མི་མཇེད་ཅེས་གསུངས། རབ་འབྱམས་ནི་མང་པོའི་དོན་ཏོ། མཁས་པ་དག་གི་མཚན་ཐོབ་ཀྱི་ནང་དུ་མདོ་རབ་འབྱམས་པ། སྔགས་རབ་འབྱམས་པ། མདོ་སྔགས་རབ་འབྱམས་པ་ཞེས་གང་ལ་མཁས་ན་དེའི་རབ་འབྱམས་པ་ཟེར་སྲོལ་ཡོད། གང་ལ་ཡང་ཐོགས་པ་མེད་ཅིང་འབྱམས་ཀླས་པ་འམ། ཁྱབ་ཆེ་བ་འམ་མང་པོའི་དོན་ཡང་ཡིན། ཤེས་བྱའི་རིགས་སྣ་མང་ལ་མཁས་ན་འབུམ་རམ་པ་ཞེས་པ་ལྟ་བུ། རབ་འབྱམས་ཀྱི་ཚིག་བསྡུས་ཏེ་རམས་རྐྱང་བས་གོ་ཐུབ་རྒྱུ་བྱས་པ་དཔེར་ན་མདོ་རམས་དང་སྔགས་རམས་སོགས་ཟེར་སྲོལ་ཡོད། འདིར་སྟོང་གསུམ་རབ་འབྱམས་གསུངས་པ་ནི། ཞིང་ཁམས་བྱེ་བ་ཕྲག་བརྒྱ་ཡོད་པས་སྟོང་གསུམ་བགྲང་དུ་མི་ཐུབ་པའི་མང་པོ་ཞིག་གི་དོན་ཏོ། རིན་ཆེན་གྱིས་བཀང་སྦྱིན་པ་བྱིན་པ་བས། །ཞེས་པ་ནི། དེ་འདྲའི་ཞིང་ཁམས་མང་པོ་ཞིག་རིན་པོ་ཆེ་སྣ་ཚོགས་པ་དག་གིས་བཀང་སྟེ་ཕྱོགས་བཅུའི་འཇིག་རྟེན་རབ་འབྱམས་ཀྱི་སེམས་ཅན་ཐམས་ཅད་ལ་སྦྱིན་པ་བྱིན་པའི་དགེ་བ་བས་ཀྱང་། འོད་དཔག་མེད་པའི་མཚན་དང་བདེ་བ་ཅན། །ཐོས་ནས་དད་པས་ཐལ་མོ་སྦྱར་བྱས་ན། །དེ་ནི་དེ་བས་བསོད་ནམས་ཆེ་བར་གསུངས། །ཞེས་པ་ནི། དེ་ལྟར་སྦྱིན་པ་བྱིན་ཏེ་བསོད་ནམས་ཆེན་པོ་ཞིག་བསགས་པ་བས་ཀྱང་སངས་རྒྱས་འོད་དཔག་མེད་པའི་མཚན་དང་ཞིང་ཁམས་བདེ་བ་ཅན་གྱི་མཚན་ཙམ་ཞིག་ཐོས་ཏེ་དད་པའི་དབང་གིས་ཐལ་མོ་ལག་པ་ཡ་གཅིག་གི་སྦྱར་ན། བསོད་ནམས་དེ་ནི་སྔར་སྟོང་གསུམ་རབ་འབྱམས་ལ་རིན་པོ་ཆེས་བཀང་སྟེ་སྦྱིན་པ་བྱིན་པའི་བསོད་ནམས་བས་ཀྱང་འདིའི་བསོད་ནམས་ཆེ་བ་ཡིན་ཞེས་གསུངས་པ་ཡིན། གང་ནས་གསུངས་པ་དང་། འདིའི་རྒྱབ་རྟེན་གྱི་ལུང་གང་ཡིན་ཞེ་ན། འོད་མདོ་ལས། གང་ཞིག་ཕྲ་རབ་རྡུལ་རྙེད་འཇིག་རྟེན་ཁམས། །ལ་སོགས་པ་ཚིགས་བཅད་འགས་བསྟན་པ་ཡིན། དོན་ནི་ཞིང་ཁམས་རབ་འབྱམས་ཀྱི་རྡུལ་རྙེད་ཀྱི་གྲངས་དང་མཉམ་པའི་འཇིག་རྟེན་ཁམས་ཐམས་ཅད་བཤིགས་ཏེ་རྡུལ་ཕྲན་དུ་བྱས་པའི་གྲངས་ཀ་བས་མང་བའི་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱིས་བཀང་སྟེ་སྦྱིན་པ་བྱིན་པ་བས་ཀྱང་། གང་ཟག་གང་ཞིག་གིས་འོད་དཔག་ཏུ་མེད་པའི་མཚན་དང་བདེ་བ་ཅན་གྱི་ཞིང་ཁམས་ཀྱི་ཡོན་ཏན་ཁྱད་འཕགས་ཐམས་ཅད་ཐོས་ནས་དགའ་བའི་དད་པས་ཐལ་མོ་གཅིག་སྦྱར་ན་དེ་བས་བསོད་ནམས་ཆེ་གསུངས་ཡོད། དེ་ཕྱིར་འོད་དཔག་མེད་ལ་གུས་ཕྱག་འཚལ། །ཞེས་པ་ནི། དེ་ལྟར་མཚན་ཙམ་བརྗོད་པའི་བསོད་ནམས་ཀྱང་བསམ་གྱིས་མི་ཁྱབ་པ་ཡིན་པས་མགོན་པོ་འོད་དཔག་མེད་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ་ཞེས་གསུངས་པ་ཡིན། མགོན་པོ་འོད་དཔག་མེད་པའི་མཚན་ཙམ་ཐོས་པ་ལ་ཡང་དེ་འདྲའི་བསོད་ནམས་ཆེན་པོ་འབྱུང་བའི་རྒྱུ་མཚན་གང་ཞེ་ན། ཕྱོགས་གཅིག་ནས་མཚན་དེ་ཉིད་དེ་བཞིན་གཤེགས་པའི་སྨོན་ལམ་དང་ཚུལ་ཁྲིམས་ཏིང་ངེ་འཛིན་མངོན་ཤེས་ཀྱིས་བྱིན་གྱིས་བརླབས་པས་མཐུ་ཁྱད་པར་དུ་གྱུར་བའི་ཕྱིར་དང་། ཕྱོགས་གཞན་ཞིག་ནས་མཚན་ཉན་པ་པོ་དད་པའི་བློ་དང་ལྡན་པའི་སྟེང་ནས་ཉན་ན་ངོ་བོ་ཉིད་ཀྱི་དགེ་བ་དང་ཀུན་སློང་གི་དགེ་བ་མཚུངས་ལྡན་གྱི་དགེ་བ་གསུམ་པོར་ཡང་འགྱུར་ཐུབ་པ། གལ་ཏེ་དེ་བྱང་ཆུབ་ཀྱི་སེམས་ཀྱིས་ཟིན་ན་ཉན་རང་གི་དགེ་བ་ཐམས་ཅད་ཟིལ་གྱིས་གནོན་ཐུབ་པའོ།།

གཉིས་པ་སྙིང་ཁོང་རུས་པའི་གཏིང་ནས་དད་པ་སྐྱེས་ན་བྱང་ཆུབ་ཀྱི་ལམ་ལས་ཕྱིར་མི་ལྡོག་པ་བསྟན་པ།

གང་ཞིག་འོད་དཔག་མེད་པའི་མཚན་ཐོས་ནས། །ཁ་ཞེ་མེད་པར་སྙིང་ཁོང་རུས་པའི་གཏིང་། །ལན་གཅིག་ཙམ་ཞིག་དད་པ་སྐྱེས་པ་ན། །དེ་ནི་བྱང་ཆུབ་ལམ་ལས་ཕྱིར་མི་ལྡོག །མགོན་པོ་འོད་དཔག་མེད་ལ་ཕྱག་འཚལ་ལོ། །ཞེས་གསུངས་ཏེ། །གང་ཞིག་འོད་དཔག་མེད་པའི་མཚན་ཐོས་ནས། །ཞེས་པ་ནི། གང་ཟག་གང་ཞིག་གིས་མགོན་པོ་འོད་དཔག་མེད་པའི་མཚན་རྣ་ལམ་དུ་ཐོས་པའམ་ཡིད་ལ་དྲན་པ་ཙམ་གྱིས་ཁ་མིད་པ་ཡན་ཆད་ཀྱི་སྐད་ཆ་དང་། ལག་གྲུ་མོ་ཡན་ཆད་ཀྱི་འབོད་པ་ཞེས་པ་ལྟར་མ་དད་ན་ཡང་དད་པའི་ཟོལ་ལྟ་བུ་མ་ཡིན་པར། ཁ་ཞེ་མེད་པར་སྙིང་ཁོང་རུས་པའི་གཏིང་། །ཞེས་པ་ནི། ཁ་ཞེ་མཚུངས་པར་སྙིང་ཁོང་རུས་པའི་གཏིང་ནས་ལན་གཅིག་ཙམ་ཞིག་ལ་དད་པ་སྐྱེས་ན་གང་ཟག་དེ་དུས་དེ་ནས་བཟུང་སྟེ་བྱང་ཆུབ་སྒྲུབ་པའི་ས་བོན་རིམ་འཕེལ་གྱི་ཐོག་ནས་ནམ་ཞིག་བྱང་ཆུབ་ཆེན་པོའི་ལམ་ལས་ཕྱིར་མི་ལྡོག་པ་ཡིན་པ་རེད། འུ་ཚོ་དལ་འབྱོར་གྱི་མི་ལུས་ཐོབ་པས་འོད་དཔག་མེད་པའི་མཚན་ཐོས། འོད་དཔག་མེད་པའི་སྐུ་བརྙན་བྲིས་འབུར་བླུགས་མ་ཐང་ག་སྐུ་འདྲ་ཚང་མ་མཇལ། ཞིང་མདོ་དང་བདེ་བ་ཅན་གྱི་སྨོན་ལམ་ལ་སོགས་པ་དཔེ་ཆའི་སྟེང་ནས་མཇལ་ཐུབ། ཆོས་ཀྱི་ཚིག་དང་འོད་མཚན་དང་གཟུངས་སྔགས་དེ་དག་རྣ་བས་ཐོས། སེམས་ཀྱིས་དེའི་དོན་དྲན། ལག་པས་བདེ་སྨོན་ཡི་གེ་འབྲི་བ། དད་པས་ཐལ་མོ་སྦྱར་བ། ལུས་ཀྱིས་ཕྱག་འཚལ་ཐུབ་པ། དེ་དག་དལ་འབྱོར་གྱི་མི་ལུས་ཐོབ་པས་ཡིན་གྱི་གལ་ཏེ་དབང་པོ་མ་ཚང་པ་ཞིག་ཡིན་ན་ནི་འདི་དག་མཇལ་བ་དང་ཐོས་པའི་སྐལ་བ་ཐོབ་མི་ཐུབ། ད་དུང་ཀླ་ཀློ་དང་ཀླ་ཀློ་མིན་ཡང་ཀླ་ཀློ་དང་འདྲ་བར་དགེ་ངོ་སྡིག་ངོ་མི་ཤེས་ཤིང་སངས་རྒྱས་ཀྱི་ཡོན་ཏན་དང་དག་པའི་ཞིང་གི་འབྱོར་བ་ཅི་ཙམ་བཤད་ཀྱང་ཡ་མཚན་རྒྱུ་མེད་པར་དགའ་བའི་འཛུམ་མདངས་ཤིག་དང་དད་པའི་ཐལ་མོ་ཞིག་ཀྱང་སྦྱར་མི་ཤེས་པར་ནག་འཐོམ་མེ་གཡག་རྒན་རྩྭ་ཟན་ཞིག་དང་འདྲ་བར་མི་སྐད་རྣ་བས་ཀྱང་ཐོས་ཀྱིན་འདུག་གམ་སྙམ་པ་ལྟ་བུ་དང། ཤིང་མདའ་སྒྲོ་མེད་ནགས་ལ་འཕངས་པ་དང་འདྲ་བར་ཇི་ལྟར་བཤད་ཀྱང་གར་སོང་འདིར་བརྒྱབ་མེད་པ། ས་ཆ་ག་ཤེད་ཅིག་ནས་མི་ག་གེ་མོ་ཞིག་གིས་རྒྱུ་ཆེན་པོ་ཞིག་ལོན་ཡོད་པར་ཐོས་ན་དེ་ལ་འདོད་རྔམས་སྐྱེས་ཏེ་མིག་རིལ་རིལ་དང་མགོ་སྒྲིལ་སྒྲིལ་བྱེད་པ་དང། ཅིག་ཟོས་རབས་གཉིས་བྱེད་རབས་བཤད་དུས། ཁ་ལྕེ་དྲོས་ཏེ་སྐད་མགོ་འབྲུག་གིས་ཀྱང་མི་ནོན་པར་གྱུར། དེ་འདྲའི་རིགས་དེ་ནི་བླུན་པོའི་དབུས་ན་དགའ་ཞིང་བརྩེ། །མཁས་པའི་མདུན་ན་ཞུམ་ཞིང་འཛུར། །ནོག་དང་ལྐོག་ཤལ་མེད་ན་ཡང་། །ཡ་སོ་ཅན་གྱི་བ་ལང་ཡིན། །གསུངས་པ་ལྟར་ཡིན། ཡང་ག་ཤེད་ནས་མི་བསད་རབས། རྟ་བགྲིལ་རབས། མི་ཞིག་ལ་མི་འདོད་པ་ཞིག་ཡོད་ཚུལ་གླེང་ན་དགའ་སྣང་ཤར་མཁན་དེ་དག་ནི། ཕན་དང་མི་ཕན་མི་བྱེད་ཅིང་། །བློ་དང་ཐོས་པ་མི་སྒྲུབ་པར། །ལྟོ་འགྲེང་འབའ་ཞིག་དོན་གཉེར་བ། །སྤུ་མེད་པ་ཡི་ཕག་པ་ཡིན། །ཞེས་གསུངས་པ་དང་ཉེ་ཡོང་བ་ཡིན། དེ་མིན་རྒྱ་ཆེན་རྒྱང་རིང་མ་ཤེས་ན་ཡང་ཁ་ཞེ་གཉིས་མེད་ཀྱི་དད་པ་རྣམ་དག་གིས་འོད་དཔག་མེད་ཀྱི་མཚན་བརྗོད་པ་དང་སྨོན་ལམ་འདེབས་ཙམ་རེ་བྱས་ན་ཐར་བའི་ལམ་སྣ་རང་ཤུགས་ཀྱིས་ཟིན་ཡོང་བ་རེད། འདི་ནས་མགོན་པོ་འོད་དཔག་མེད་ལ་དད་པ་ལན་གཅིག་སྐྱེས་ན་དེ་བྱང་ཆུབ་ཀྱི་ལམ་ལས་ཕྱིར་མི་ལྡོག་པར་གསུངས་པ་དང་། གཞན་ནས་མཚན་ལན་གཅིག་བརྗོད་ན་བདེ་བ་ཅན་དུ་སྐྱེ་བར་གསུངས་པ་དེ་དག་བསླུ་བ་མེད་པའི་གསུང་ཡིན། ཐམས་ཅད་ཚེ་འདི་འཕོས་མ་ཐག་ཏུ་སྐྱེ་ངེས་པ་མིན་ནའང་ནམ་ཞིག་སྐྱེ་ངེས་པ་ལ་དགོངས་ཏེ་གསུངས་པ་ཡིན། དད་པ་ལ་སོགས་སྟོབས་སུ་གྱུར་ན་འགའ་རེ་ཚེ་འཕོས་མ་ཐག་ཏུ་དད་དང་སྨོན་ལམ་སོགས་རྐྱང་བའི་སྟོབས་ཀྱིས་སྐྱེ་ཐུབ་ལ། སངས་རྒྱས་ཀྱི་སྨོན་ལམ་དང་ཡེ་ཤེས་ཀྱི་སྟོབས་ཀྱིས་མཚན་ཙམ་ཐོས་ཤིང་དེའི་ཕྱོགས་ལ་འདུན་པ་ཡང་དག་པ་ཞིག་སྐྱེད་ཐུབ་ན་རྒྱུ་དེ་དག་གི་སྟོབས་ཀྱིས་ཤི་དུས་བདེ་བར་གཤེགས་པའི་སྤྲུལ་པ་མིག་གི་ལམ་དུ་བྱོན་ཞིང། དད་པས་དེ་ལ་དམིགས་པ་གཏད་པས་མི་བརྗེད་པའི་དྲན་པ་ལ་སོགས་པ་དབང་པོ་ལྔ་སྟོབས་སུ་གྱུར་ཏེ་དུས་ཐུང་ངུ་ལ་འཕགས་ལམ་གྱི་རྟོགས་པ་སྐྱེ་ངེས་སུ་འགྱུར་ཆོག་པ་ཡིན། དེ་མིན་སོ་སྐྱེས་ཀྱིས་སྨོན་ལམ་བཏབ་སྟེ་དང་པོ་འཕགས་ས་ཐོབ། ད་གཟོད་མ་གཏོགས་བདེ་བ་ཅན་ལ་མི་སྐྱེ་བ་ཞིག་ཡིན་ན་མདོའི་ནང་དུ་དད་འདུན་གྱི་སྟོབས་རྐྱང་པས་ཐོབ་གསུངས་དོན་མེད། སྔགས་ཀྱིས་བཏབ་པའི་ས་བོན་མྱུར་དུ་སྨིན་པ་དང་འདྲ་བར་དུས་ཐུང་ཞིང་ཚེགས་ཆུང་ངུས་ས་ལམ་གྱི་རྟོགས་པ་ཐོད་རྒལ་ལ་འདྲེན་པ་སྲིད་པ་ཡིན། གསང་སྔགས་ཀྱི་ཐབས་ཟབ་མོ་དང་། རིག་སྔགས་ཀྱི་ཡོན་ཏན་ཟབ་མོ། བདེ་བར་གཤེགས་པའི་རྣམ་སྤྲུལ་ཟབ་མོ་དེ་དག་སོ་སྐྱེ་ཉི་ཚེ་བའི་བློས་གཡག་སྣ་ཁུ་ཚུར་བྱེད་སར་མི་འགྲོ་བ་ཞིག་པ་ཡིན། སངས་རྒྱས་དང་བྱང་ཆུབ་སེམས་དཔའ་དག་གིས་ཕྱག་མགོ་ཐོག་ཏུ་བཞག་པ་ཙམ་གྱིས། སྤྱིར་ཡིན་ན་བསྐལ་བ་མང་པོར་ཚོགས་བསགས་ཀྱང་འགྲུབ་པར་དཀའ་བའི་ཡོན་ཏན་ཁྱད་པར་ཅན་སྐད་ཅིག་གིས་ཐོབ་ཐུབ་པ་ཡོད། བློ་དང་བསམ་པའི་སྟོབས་ཁྱད་པར་ཅན་གྱིས་དེ་དང་འདྲ་བར་འབྲས་བུ་ཡང་སྐྱེད་ཐུབ་པ་ཡིན། ཆུ་བོ་གང་གཱ་དང་ཡ་མུ་ན་གཉིས་ཀའི་འདུས་མཚམས་ནས་མ་བུ་གཉིས་ཆུས་ཁྱེར་ནས་ཤི་འགྲོ་དུས་དེ་གཉིས་ཀས་རྒྱུ་སྙོམས་འཇུག་གི་སྒྲུབ་པ་སྔོན་དུ་སོང་ཡོད་པ་མ་ཡིན་ཞིང་། སྙོམས་འཇུག་སྒྲུབ་མ་མྱོང་ཡང་དེ་གཉིས་ཀས་གཅིག་སེམས་གཅིག་ལ་བརྩེ་བའི་བསམ་པ་ཤུགས་དྲག་པའི་སྟོབས་ཀྱིས། དགེ་བ་དེའི་མཐུ་ཡིས་དུས་དེ་ཉིད་དུ་བསམ་གཏན་གྲུབ་ནས་གཟུགས་ཁམས་ཀྱི་ལྷར་སྐྱེས་པའི་ལོ་རྒྱུས་ལྟ་བུའོ། །སྤྱིར་ན་སྨོན་ལམ་འགྲུབ་པའི་རྒྱུར་ཚོགས་བསགས་ཡིན་ལ། ཚོགས་བསགས་ཡོད་མེད་ལ་སོགས་པའི་ལས་དང་། དབང་པོ་དང་བསམ་པའི་ཁྱད་པར་གྱིས་ཚེ་འདིའི་རྗེས་སུ་དང་ཚེ་རབས་གཞན་དང་གཞན་ཅི་རིགས་པར་བདེ་བ་ཅན་གྱི་ཞིང་ཁམས་སུ་སྐྱེ་བར་གདོན་མི་ཟ། གལ་ཏེ་དད་འདུན་དྲག་པོ་དང་ལྡན་ན་གཞན་གང་ལ་རག་མ་ལས་པར་ཚོགས་རླབས་པོ་ཆེ་རྒྱུ་དེ་ཉིད་ཀྱིས་འདུམ་འགྲོ་བ་ཡིན། ངོ་མ་བཤད་ན་བདེ་བ་ཅན་དང་འོད་དཔག་མེད་པའི་མཚན་ཐོས་པ་ཙམ་ཡང་སྐྱེ་བ་སྔོན་མར་ཚོགས་རྒྱ་ཆེན་པོ་བསགས་པ་ཡིན་པར་མདོ་ལས་སངས་རྒྱས་བཅོམ་ལྡན་འདས་ཀྱིས་གསུངས་ཡོད་པ་ཡིན། དེས་ན་སངས་རྒྱས་འོད་དཔག་མེད་པའི་མཚན་ཐོས་ཚེ་དད་པ་སྐྱེས་པ་ནི་སྔོན་ཚོགས་རླབས་ཆེན་ཞིག་བསགས་ཡོད་པའི་རྟགས་ཡིན། ཚོགས་རླབས་ཆེན་བསགས་པས་འོད་དཔག་མེད་པའི་མཚན་ཐོས་པ་ཡིན་གྱི་མ་བསགས་ན་མཚན་མི་ཐོས། ཐོས་ཀྱང་དད་པ་མི་སྐྱེ། དེས་ན་ཚོགས་བསགས་སྔོན་ལ་སོང་བའི་དད་པ་ཅན་དེས་སྨོན་ལམ་རྣམ་པར་དག་པ་ཐོབ་དང་ཤི་མ་ཐག་ཏུ་བདེ་བ་ཅན་དུ་སྐྱེ་བར་ལུང་རིགས་གཉིས་ཀྱིས་གྲུབ་པ་ཡིན། དེས་ན་མཚན་ཙམ་ཐོས་པས་ཐར་བའི་ལམ་སྣ་ཟིན་པའི་དོན་ཆེན་པོ་འགྲུབ་པའི་མགོན་པོ་འོད་དཔག་མེད་ལ་སྙིང་ཁོང་རུས་པའི་གཏིང་ནས་དད་པས་ཕྱག་འཚལ་ལོ་ཞེས་གསུངས་པའོ།།

གསུམ་པ་སངས་རྒྱས་འོད་དཔག་པའི་མཚན་ཙམ་ཐོས་པས་ཚུལ་ཁྲིམས་རྣམ་དག་ཏུ་འགྱུར་བར་བསྟན་པ།

སངས་རྒྱས་འོད་དཔག་མེད་པའི་མཚན་ཐོས་ནས། །དེ་ནི་བྱང་ཆུང་སྙིང་པོ་མ་ཐོབ་བར། །བུད་མེད་མི་སྐྱེ་རིགས་ནི་བཟང་པོར་སྐྱེ། །ཚེ་རབས་ཀུན་ཏུ་ཚུལ་ཁྲིམས་རྣམ་དག་འགྱུར། །བདེ་གཤེགས་འོད་དཔག་མེད་ལ་ཕྱག་འཚལ་ལོ། །ཞེས་གསུངས་ཏེ། སངས་རྒྱས་འོད་དཔག་མེད་པའི་མཚན་ཐོས་ནས། །ཞེས་པ་ནི། གང་ཟག་གང་ཞིག་གིས་སངས་རྒྱས་འོད་དཔག་མེད་པའི་མཚན་ལན་གཅིག་རྣ་བར་ཐོས་པའི་གང་ཟག་དེ་དུས་དེ་ནས་བཟུང་སྟེ། དེ་ནི་བྱང་ཆུབ་སྙིང་པོ་མ་ཐོབ་པར། །བུད་མེད་མི་སྐྱེ་རིགས་ནི་བཟང་པོར་སྐྱེ། །ཞེས་པ་ནི། མཐར་ཐུག་རྫོགས་པའི་སངས་རྒྱས་མ་ཐོབ་ཀྱི་བར་དུ་བུད་མེད་ཀྱི་ལུས་སུ་ནམ་ཡང་མི་སྐྱེ་བར་གསུངས་པ་ཡིན། བུད་མེད་ནི་རྟེན་དམན་པ་ཡིན་པས་རྫོགས་པའི་སངས་རྒྱས་སྟོང་སྐྱེས་པའི་རྟེན་ལ་སངས་རྒྱས་ཤིང་རྒྱ་འགྱུར་ཡིན་པ་དང་། སྤྱིར་ན་བུད་མེད་སྐྱེས་པ་ལས་ཉོན་མོངས་མང་ཞིང་སྟོབས་དམན་པ། ཆོས་སྒྲུབ་པའི་རང་དབང་ཆུང་བ། ལུས་ཀྱི་ཁམས་གྲུབ་ལུགས་ཀྱི་སྟེང་ནས་ནད་སྣ་མང་བ་དེ་འདྲ་ཡིན་གསུངས་པ་རེད། ཨོ་རྒྱན་ཆེན་པོས། བཙུན་པ་འདུལ་ཁྲིམས་མེད་པའི་འཆལ་བོ་གཅིག །སྔགས་པ་དམ་ཚིག་མེད་པའི་གླེན་པ་གཉིས། །བུད་མེད་ཀླད་པ་མེད་པའི་དྲག་མོ་གསུམ། །ཞེས་གསུངས་པས་ཁྱད་པར་དུ་བུད་མེད་གཏུམ་མོ་དད་པ་དང་ངོ་ཚ་མེད་པ་ཁ་ཅིག་ཉེས་པ་ཀུན་ཀྱི་རྩ་བ་དང། བསྟན་ལ་གནོད་པའི་དགྲ་བོ་ཡིན་པར་གསུངས་ལ། ཡང་དད་དང་ངོ་ཚ་ཤེས་པ་འགའ་རེ་ནི། མ་སྐྱེ་བ་དམན་ཡང་དགོངས་པ་མཐོ། །ཞེས་སྐྱེས་པ་ཕལ་བ་བརྒྱ་ཡིས་མི་ཐུབ་པ་ཡང་ཡོད་ཅེས་གསུངས་པ་ཡིན། སྔགས་ཀྱི་སྐབས་སུ་ནི། བུད་མེད་ཤེས་རབ་རང་བཞིན་ལ། །བརྙས་དང་ལོག་ལྟ་བགྱིས་པ་བཤགས། །ཞེས་གསུངས་པ་དང་། འདི་ནས་བུད་མེད་མི་སྐྱེ་རིགས་ནི་བཟང་པོར་སྐྱེ། །ཞེས་གསུངས་པ་ནི། བུད་མེད་ཀྱི་ལུས་རྟེན་དང་རིགས་ངན་པར་མི་སྐྱེ་བར་བཟང་པོར་སྐྱེ་བར་གསུངས། རིགས་ལ་སྔོན་རྒྱ་གར་དུ་རྒྱལ་རིགས། རྗེ་རིགས། དམངས་རིགས། བྲམ་ཟེའི་རིགས། གདོལ་བའི་རིགས་དང་ལྔ་རུ་བྱས་ཏེ་རིགས་འཆོལ་མི་ཉན་པ་དང་རིགས་མཐོ་དམན་གྱི་ཁྱད་པར་ཡང་ཆེ། བོད་དུ་ཡིན་ན་དེ་དང་ཕྱོགས་མཚུངས་སུ་རིགས་རྒྱུད་དེད་རྒྱུ་དང་། གནས་སྐབས་ཀྱི་དབང་འབྱོར་ལ་བརྟེན་ནས་ཐོབ་གོ་ས་རེ་བླངས་སོང་དུས་རིགས་མཐོན་པོར་རྩི་རྒྱུ་དང། བོད་མིན་ཡང་འཛམ་གླིང་གི་ཡུལ་གྲུ་མང་པོར་སྔ་རབས་དེ་འདྲ་བྱེད་སྲོལ་མེད་དམ་སྙམ། སངས་རྒྱས་ཤཱཀྱ་ཐུབ་པའི་བསྟན་པར་རིགས་མི་གཙོ་རུས་མི་གཙོ་གསུངས་པ་རེད་མོད། འོན་ཀྱང་རྔོན་པ་དང་ཤན་པ་ཆང་འཚོང་མ་ལ་སོགས་པ་ནི་ཆོས་ཀྱིས་ཕོང་བའི་རིགས་ངན་པ་ཡིན་པས་དེ་འདྲར་མི་སྐྱེ་ཞིང། ཆོས་ཐོབ་པའི་ལུས་རྟེན་ལ་སྐྱེས་ན་དེ་ནི་རིགས་བཟང་པོར་བརྩི་དགོས། འཇིག་རྟེན་གྱི་རྒྱལ་པོ་དང་བློན་པོ་གནའ་དེང་གི་དཔོན་པོ་དང་རྒྱུ་ཆེན་པོ་དེ་དག་ནི་སྔར་བསགས་ཀྱི་བསོད་ནམས་སམ་འཕེན་བྱེད་དགེ་བས་འཕང་འབྲས་ཡིན་མོད། འོན་ཀྱང་རིགས་བཟང་པོ་ཡིན་པའི་ངེས་པ་མེད། དེ་རྣམས་ཀྱི་ནང་ན་གདོལ་སྤྱོད་མཁན་མང་པ་ཡིན། དེས་ན་ལྷ་བས་ལྷག་པའི་ལུས་དེ་དལ་འབྱོར་ཚང་པའི་ལུས་ཡིན་པས། འོད་དཔག་མེད་པའི་མཚན་ཐོས་པ་ཙམ་གྱིས་ཕྱི་མ་རིགས་བཟང་པོར་སྐྱེས་ཏེ། ཚེ་རབས་ཀུན་ཏུ་ཚུལ་ཁྲིམས་རྣམ་དག་འགྱུར། །ཞེས་པ་ནི། རིགས་བཟང་པོ་ཆོས་ལྡན་གྱི་ལུས་ལ་སྐྱེས་པར་མ་ཟད་སྐྱེས་མ་ཐག་ཏུ་ཆོས་དང་འཕྲད་ཅིང་རབ་ཏུ་བྱུང་སྟེ་ཚུལ་ཁྲིམས་རྣམ་པར་དག་པར་འགྱུར། ཚུལ་ཁྲིམས་རྣམ་པར་དག་པ་ནི་ཇི་ལྟ་བུ་ཞིག་ཡིན་ཞེ་ན། ཚུལ་ཁྲིམས་ནི་ཐར་བའི་ལམ། ཡོན་ཏན་གྱི་ཞིང་། སངས་རྒྱས་ཀྱི་རྒྱུ་ཡིན་པ་རེད། སོ་སོར་ཐར་བའི་མདོ་ལས། ཚུལ་ཁྲིམས་ལྡན་པ་མཐོ་རིས་འགྲོ་བའི་རྒྱུ། །ཚུལ་ཁྲིམས་སྲུང་བས་མྱ་ངན་འདའ་ཐོབ་འགྱུར། །ཇི་ལྟར་མིག་མེད་གཟུགས་མཐོང་མི་འགྱུར་ལྟར། །དེ་བཞིན་ཚུལ་ཁྲིམས་མེད་ན་ཆོས་མི་མཐོང་། །ཞེས་དང་། ཇི་ལྟར་རྐང་མེད་ལམ་འཇུག་ག་ལ་ནུས། །དེ་བཞིན་ཚུལ་ཁྲིམས་མེད་ན་ཐར་མི་འགྱུར། །ཞེས་གསུངས་སོ། །རབ་ཏུ་བྱུང་ནས་དགེ་སློང་དང་དགེ་ཚུལ་གྱི་སྡོམ་པ་བསྲུངས་ན་ཚུལ་ཁྲིམས་བསྲུངས་པའི་ཕན་ཡོན་ཆེ་བར་མ་ཟད་དམ་ཆོས་འདུལ་བ་འདི་སྟོན་པ་དང་བསྟན་པ་གཉིས་ཀའི་རང་བཞིན་ཡིན་པས་དུས་མཐར་བསྟན་པ་སྲུང་བའི་ཕན་ཡོན་དེ་ལྟར་ཆེ་བ་ཡིན། སངས་རྒྱས་ཀྱི་བསྟན་པ་གང་ཟག་གི་རྒྱུད་ལ་བཞུགས་ལ། གང་ཟག་གི་རྒྱུད་ཀྱི་བསྟན་པ་མེད་སོང་དུས་ཕྱིའི་ས་རྡོར་བསྟན་པའི་མིང་མེད། གལ་ཏེ་རབ་ཏུ་བྱུང་མི་ནུས་པའི་ཁྱིམ་པ་ཕོ་མོ་ཡིན་ནའང་ཚུལ་ཁྲིམས་སྲུང་རྒྱུ་ཡོད་པ་ཡིན། དགེ་བསྙེན་གྱི་བསླབ་ཁྲིམས་ལྔ་པོའི་ནང་གི་ཅི་རིགས་པའི་གཏན་ཁྲིམས་ཤིག་བསྲུངས་ན། ཡང་ན་སྟོན་པའི་དུས་ཆེན་བཞི་སྟེ་ཉ་སྟོང་ཚེས་བརྒྱད་ལ་སོགས་པར་བསྙེན་གནས་ཡན་ལག་བརྒྱད་པ་ཉིན་ཞག་གི་མཐའ་ཅན་སྲུང་བ་དེ་ཕན་ཡོན་དང་དགོས་འབྲེལ་ཆེན་པོ་ཅན་ཞིག་ཡིན། དེས་ན་འོད་དཔག་མེད་པའི་མཚན་བཟུང་བས་ཚེ་རབས་ཀུན་ཏུ་སྐྱེས་པའི་ལུས་རྟེན་གྱིས་རབ་བྱུང་གི་རྟེན་ཁྱད་པར་ཅན་ཐོབ་ཅིང་ཚངས་སྤྱོད་ཀྱི་སྡོམ་པ་དེ་ཉིད་ཉེས་ལྟུང་ཕྲ་མོས་ཀྱང་མ་གོས་པར་མེ་ཏོག་པདྨ་འདམ་ལས་སྐྱེས་ཀྱང་འདམ་གྱི་དྲི་མས་མ་གོས་པ་ལྟ་བུ་ཐོབ་པར་འགྱུར་རོ། །བདེ་གཤེགས་འོད་དཔག་མེད་ལ་ཕྱག་འཚལ་ལོ། །ཞེས་པ་ནི། དེ་ལྟ་བུའི་མཚན་ཙམ་ཐོས་པས་ཀྱང་རིགས་བཟང་པོར་སྐྱེ་ཞིང་ཚུལ་ཁྲིམས་རྣམ་པར་དག་པར་འགྱུར་བའི་བདེ་གཤེགས་འོད་དཔག་མེད་ལ་ཕྱག་འཚལ་ལོ་ཞེས་གསུངས་ཏེ། ཚུལ་ཁྲིམས་རྣམ་པར་དག་པའི་ཆེད་དུ་སངས་རྒྱས་འོད་དཔག་མེད་ལ་གསོལ་བ་བཏབ་ན་ཇི་བཞིན་དུ་འགྲུབ་པ་རེད། བཟང་སྤྱོད་ལས། ཚུལ་ཁྲིམས་སྤྱོད་པ་དྲི་མེད་ཡང་དག་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །ཅེས་དང་། བདེ་སྨོན་དང་འབྲེལ་ཏེ་ཚུལ་ཁྲིམས་རྣམ་དག་གི་གཟུངས། ཨོཾ་ཨཱ་མོ་གྷ་ཤཱི་ལ། སཾ་བྷ་ར་སཾ་བྷ་ར། བྷ་ར་བྷ་ར་མ་ཧཱ་ཤུདྡྷ་སཏྭ་པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར། ས་མནྟ། ཨ་ཝ་ལོ་ཀི་ཏེ་ཧཱུཾ་ཕཊ་སྭཱ་ཧཱ། འདི་ཚོ་རྒྱུན་གྱིས་བཏོན་ན་ཚུལ་ཁྲིམས་དག་པར་འགྱུར་བ་རེད། རབ་ཏུ་བྱུང་མི་ཐུབ་པ་འདི་ནི། གཅིག་གང་ཟག་རང་གི་མོས་པ་དང་། གཉིས་བརྟུལ་ཞུགས་བརྟན་མི་བརྟན་ལ་ཐུག་པ་རེད། སངས་རྒྱས་བཅོམ་ལྡན་འདས་ཀྱིས་རྒྱལ་སྲིད་ཀྱང་སྤངས་ནས་རབ་ཏུ་བྱུང་བ་རེད། སྤྱིར་ཕལ་བའི་དབང་དུ་བྱས་ན་ཧ་ཅང་འབྱོར་ཆེས་པ་དང་ཧ་ཅང་དབུལ་ཆེས་པ་གཉིས་ཀ་བར་ཆད་ཡིན་པ་རེད། སྔོན་ཞིག་ལ་རྒྱལ་པོ་ཆོས་མེད་པ་ཞིག་ལ་བུ་ཆོས་ལ་དགའ་བ་ཞིག་སྐྱེས། བུ་དེས་ཕ་ཡིས་ཆོས་མིན་གྱིས་རྒྱལ་སྲིད་སྐྱོང་གིན་ཡོད་པར་མཐོང་སྟེ། བུ་དེས་བསམ་པར་ཕ་ཤི་རྗེས་ངས་ཀྱང་འདི་ལྟར་ཆོས་མིན་གྱིས་རྒྱལ་སྲིད་སྐྱོང་དགོས་འདུག་ན་དེ་བས་རབ་ཏུ་བྱུང་ན་དགའ་སྙམ་སྟེ། ཡབ་ལ་རབ་ཏུ་བྱུང་བར་གནང་བ་ཞུས་པས་གནང་བ་མ་བྱིན་ནོ། ཉིན་གཅིག་མི་དབུལ་པོ་དབྱུག་པ་ཞིག་དང་ཕོར་པ་ཞིག་ལས་ཅི་ཡང་མེད་པ་ཞིག་སློང་མོར་འགྲོ་གིན་ཡོད་པ་མཐོང་སྟེ། རྒྱལ་པོའི་བུས་སྨྲས་པ། ང་ནི་ཕྱུག་པོའི་ཁྱིམ་དུ་སྐྱེས་པས་རབ་ཏུ་བྱུང་བའི་ཆ་རྐྱེན་མ་ལྡན་ལ། ཁྱོད་ཀྱིས་རབ་ཏུ་མི་བྱུང་བ་ཅི་ཡིན་ཞེས་དྲིས་པར། སྤྲང་པོས་ཁོ་བོར་ཆོས་གོས་དང་ལྷུང་བཟེད་ལ་སོགས་པའི་རབ་བྱུང་གི་འཚོ་བའི་ཡོ་བྱད་ཐམས་ཅད་མི་འཛོམས་པས་རབ་ཏུ་བྱུང་བའི་ཆ་རྐྱེན་མ་ལྡན་ཞེས་སྨྲས་ཚེ། དེ་ནས་རྒྱལ་པོའི་བུས་སྤྲང་པོ་ལ་སྨྲས་པ། ཡོ་བྱད་ཐམས་ཅད་ངེད་ཀྱིས་ཁྱོད་ལ་སྦྱིན་ཆོག་པས། ཁྱོད་རང་དྲང་སྲོང་ཞིག་གི་མདུན་དུ་རབ་ཏུ་བྱུང་ཤིག་ཅེས་སྨྲས་ནས། དྲང་སྲོང་ཞིག་གི་མདུན་དུ་རབ་ཏུ་བྱུང་བར་བཅུག་པ་ཡིན། རྒྱལ་པོའི་བུས་སྨྲས་པ། ཁྱོད་རབ་ཏུ་བྱུང་ནས་ཡོན་ཏན་ཐོབ་དུས་བདག་ལ་སྨོས་ཤོག་ཅེས་སྨྲས་སོ། །སྤྲང་པོ་རབ་ཏུ་བྱུང་ཞིང་དབེན་པའི་གནས་སུ་སོང་སྟེ་བསྒོམས་ནས་རང་རྒྱལ་དགྲ་བཅོམ་ཐོབ་སོང་བ་ཡིན། དེ་མ་ཐག་ཏུ་བྱ་ངང་བའི་རྒྱལ་པོ་ནམ་མཁའ་ནས་འཕུར་བ་ལྟར་འཕུར་ནས་རྒྱལ་པོའི་ཐད་དུ་ཐོན་ཏེ་རྫུ་འཕྲུལ་སྣ་ཚོགས་པ་བསྟན་ནོ། །དེའི་དུས་སུ་རྒྱལ་པོས་དགྲ་བཅོམ་པ་དེའི་ཞབས་ལ་མགོ་བོ་གཏུགས་ཏེ་རྗེས་སུ་ཡི་རང་བྱས། མཆོད་པ་ཕུལ། རྒྱལ་པོས་བསམས་ཏེ་འདི་སྔོན་རབ་ཏུ་བྱུང་བའི་མཐུན་རྐྱེན་མི་ཐོབ་པ་ནི་དབུལ་བས་ཡིན། བདག་རབ་ཏུ་བྱུང་བའི་མཐུན་རྐྱེན་མི་ཐོབ་པ་ནི་ཕྱུག་ཆེ་བས་ཡིན། དེས་ན་ངས་འདི་རབ་ཏུ་བྱུང་བར་བཅུག་པའི་དགེ་བའི་རྩ་བ་འདིས། ཧ་ཅང་ཕྱུག་པོའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་ཞིང་། །བར་མའི་ཁྱིམ་དུ་སྐྱེས་ནས་ཀྱང་། །རྟག་ཏུ་རབ་བྱུང་ཐོབ་པར་ཤོག །ཅེས་སྨོན་ལམ་བཏབ་བོ། །དེ་དུས་སུ་སྨོན་ལམ་འདེབས་མཁན་གྱི་རྒྱལ་པོའི་བུ་དེ་ཕྱིས་སུ་འཕགས་པ་ཤཱ་རིའི་བུ་ཡིན། སྐྱེ་བ་སྔོན་མ་སྨོན་ལམ་བཏབ་པ་དེ་ལྟར་གྲུབ་སོང་བ་ཡིན། ཁྱིམ་པ་ཕོ་མོ་ཡིན་ཡང་སྐྱེ་བ་ཕྱི་མར་རབ་བྱུང་གི་ལུས་རྟེན་ཐོབ་པར་སྨོན་ལམ་ཐོབ་དང་འགྲུབ་ཐུབ་པ་ཡིན། སྨོན་ལམ་འགྲུབ་པ་ལ་འགྲུབ་བྱེད་ཀྱི་རྒྱུ་དགོས་ཤིང་། རྒྱུ་ཚོགས་གསོག་པ་ཡིན། སངས་རྒྱས་འོད་དཔག་མེད་ལ་གསོལ་བ་ཐོབ། མཆོད་པ་ཕུལ། ཡན་ལག་བདུན་དང་འབྲེལ་བའི་བསགས་སྦྱང་བྱོས་དང་དེས་ཚོགས་བསགས་སྒྲིབ་སྦྱང་གི་གོ་ཆོད་པ་ཡིན། ཁྱིམ་པ་ཕོ་མོ་རྒས་པ་ཚོས་ཀྱང་རང་ཉིད་རྒན་ཞུགས་བྱས་ཏེ་གྲྭ་ཆས་གྱོན་ནས་རབ་བྱུང་བྱས་ན་ཕན་ཡོན་བསམ་གྱིས་མི་ཁྱབ་པ་ཡོད། དེར་མ་ཟད་ཆོས་མཐར་ཕྱིན་ཏེ་སངས་རྒྱས་ཀྱི་གནང་བའི་ན་བཟའ་ཆོས་གོས་ཀྱི་ཞབས་ནས་ཤི་ཐུབ་པ་ཡིན། བཅོམ་ལྡན་འདས་ཀྱིས། རྒས་ཁར་ཚུལ་ཁྲིམས་ལྡན་པ་བདེ། །ཞེས་གསུངས་སོ། །དེ་བཞིན་དུ་བུ་རྒྱུད་དག་གིས་ཀྱང་སོ་སོའི་མོས་པ་དང་བསྟུན་ཏེ་རབ་བྱུང་བསྒྲུབས་ན་རང་གི་མི་ཚེའི་སྡུག་བསྔལ་ཆུང་རུ་འགྲོ་བར་མ་ཟད་ཕྱི་མ་བདེ་ནས་བདེ་བར་འགྲོ་བ་ཡིན། མདོ་ལས། ཁྱིམ་པ་རྣམས་ནི་མེའི་འོབས་ན་གནས་པ་ལྟ་བུ་ཞིག་ཡིན་ལ་རབ་ཏུ་བྱུང་བ་རྣམས་ནི་བསིལ་ཁང་ན་གནས་པ་ལྟ་བུའོ་ཞེས་གསུངས་པས་བསིལ་ཁང་ནས་མི་འདུག་པར་མེའི་འོབས་སུ་ལྕེབ་ན་མེས་ཚིག་སྟེ་བསྲེགས་པའི་སྡུག་བསྔལ་མྱོང་ངེས་པ་ཡིན། འདི་དང་འབྲེལ་བའི་གཏམ་རྒྱུད་ཅིག་བཤད་ན། འདི་ཡང་རྒྱ་གར་གྱི་བྱུང་བ་ཞིག་ཡིན། སངས་རྒྱས་བཅོམ་ལྡན་འདས་རྒྱ་གར་དུ་འཁྲུངས་ཤིང་སངས་རྒྱས། ཆོས་ཀྱི་འཁོར་ལོ་རྒྱ་གར་རྡོ་རྗེ་གདན་ལ་སོགས་པར་བསྐོར་བས། རང་རེས་གཏམ་རྒྱུད་ཅིག་བཤད་ན་ཡང་དེ་དང་འབྲེལ་བ་ནི། ངག་འཁྱལ་གྱི་ཉེས་པ་མི་འབྱུང་བའི་སྟེང་དུ་སྟོན་པའི་སྐྱེས་རབས་སྒྲོགས་པའི་བསོད་ནམས་ཀྱང་ཐོབ་པ་ཡིན། སྔོན་རྒྱ་གར་གྱི་ཡུལ་ཞིག་ན་བྲམ་ཟེ་རྒན་པོ་ཞིག་ལ་ཆུང་མ་ངན་པ་འདྲེ་མོ་ལྟ་བུ་ཞིག་ཡོད་དོ། །བྲམ་ཟེ་བཟའ་མི་གཉིས་ལ་བུ་གཅིག་ཀྱང་མེད་ཅིང་བུ་མོ་བདུན་ཡོད། བུ་མོ་རྣམས་ཀྱིས་ཁྱིམ་རེ་རེ་བཟུང་ནས་མག་པ་རྣམས་དང་ཐམས་ཅད་ཚུར་ཁྱིམ་ལ་རེ་ཡོང་དུས། བྲམ་ཟེའི་ཆུང་མ་གདུག་རྩུབ་ཅན་ཞིག་ཡིན་པས་དེ་དག་ལ་ཁྲོ་མི་དགོས་ས་དང་འཛིང་མི་དགོས་ས་ཞིག་མེད་དོ། །དེ་རྣམས་ཀྱིས་ཀྱང་སྐབས་ཤིག་ནས་ཕ་མ་གཉིས་ཀ་གླེང་ཡོང་དུས་དགྲ་མཐོང་བ་ལྟར་བྱེད། །བྲམ་ཟེའི་ཆུང་མ་ཡང་བྲམ་ཟེ་རྒན་པོ་ལ་ཤིན་ཏུ་མི་བཟང་བར་གྱུར་ཏེ་བྲམ་ཟེ་རྒན་པོ་དུས་རྒྱུན་དེ་འདྲ་མནར་རོ། །ནང་ཆུ་ཁྲག་དང་ནུབ་ཆུ་རྣག་བྱས་ཏེ་སྡུག་གི་ཉི་མ་སྐྱེལ་བས། སྐབས་ཤིག་ལ་ཞིང་གི་ལོ་ཏོག་བརྔ་རན་པའི་དུས་ཚིགས་ལ་ཐོན་དུས་སྤྲང་པོ་ཡིན་པས་ལོ་བཀལ་ས་མེད་པས། རྒན་པོས་ཁྱིམ་མཚེས་ཀྱི་རྩར་སོང་ནས་གླང་རྒན་ཞིག་གཡར་ཏེ་ཞིང་ནང་དུ་སོང་ནས་ལོ་ལེན་ཁུལ་བྱས་ཚེ། རྒན་པོས་གླང་རྒན་བོར་སོང་བ་ཡིན། བྲམ་ཟེ་རྒན་པོ་དཀའ་སྟེ་ཐང་ཆད་པའི་ཁར་གླང་རྒན་ཡང་བོར་ཤོར་སོང་བས། བསམ་བློ་གང་ལྟར་བཏང་ཀྱང་ཡི་མུག་སྟེ་འདི་ལྟར་རང་གིས་རང་ལ་ཁེར་ལབ་བྱས་པ། ང་འདི་ཅི་འདྲའི་ལས་ངན་ཞིག་རེད། ཁྱིམ་དུ་སོང་ཚེ་ཆུང་མ་འདྲེ་མོ་འདྲ་བ་དེས་མནར། བུ་མོ་མག་པ་ཐམས་ཅད་ཀྱིས་དེ་བཞིན་དུ་མནར། དེ་རིང་ཡང་གླང་རྒན་ཞིག་གཡར་བ་དེ་བོར་ཤོར་སོང་བས་ད་ཅི་དགའ་བསམ་ནས། སྤྱིར་མདོག་སྡུག་ཀྱང་ལྷག་ཏུ་ཉིན་དེར་སྡུག་པས་ཡིད་ཆད་དེ་བསྡད་པར། རྒན་པོའི་མིག་གི་ཐད་ཀར་མིག་རྒྱང་གང་གི་ས་མཚམས་ན་ལྗོན་ཤིང་མྱ་ངན་མེད་པ་ཞིག་གི་དྲུང་ན་སངས་རྒྱས་བཅོམ་ལྡན་འདས་རབ་བྱུང་ཞི་བའི་ཆ་ལུགས་ཅན་ཞི་ཞིང་དུལ་བར་བཞུགས་ཡོད་པར་མཇལ། བྲམ་ཟེ་རྒན་པོས་དེ་མཇལ་མ་ཐག་ཏུ་དེའི་ཐད་ཀར་བརྒྱུགས་ཏེ་དབྱུག་པ་དེ་མ་ནེའི་འོག་ཏུ་ལག་པ་གཉིས་ཀས་དབྱུག་སྣེ་བཟུང་ཞིང་ས་ལ་རྟེན་ཏེ་གྱེན་དུ་འགྲེང་བཞིན་སེམས་ལ་འདི་འདྲ་ཞིག་འཁོར། དགེ་སྦྱོང་འདི་ཅི་འདྲའི་བདེ་ཨང་། ཆུང་མ་ངན་པ་མནར་ནི་མི་འདུག །བུ་མོ་མག་པ་རྡུང་ནི་མི་འདུག ཞིང་བརྔ་དུས་གླང་བུ་གཡར་མི་དགོས་པས། གླང་རྒན་བོར་བའི་སྡུག་བསྔལ་མི་འདུག མྱ་ངན་དང་སྡུག་བསྔལ་གང་ཡང་མེད་པའི་ཅི་འདྲའི་མི་སྐྱིད་པོ་ཞིག་འདུག་ཨང་བསམ་ཚེ། བཅོམ་ལྡན་འདས་ཀྱིས་དེ་མཁྱེན་ནས་བྲམ་ཟེ་རྒན་པོའི་ཐད་དུ་བྱོན་ཏེ། ངེད་ལ་སྐྱོན་གང་ཡང་མེད། ཆུང་མ་ངན་པ་མེད། བུ་མོ་བདུན་གྱིས་འཚེ་བ་མེད། མག་པ་བདུན་གྱིས་གནོད་པ་མེད། ཞིང་བརྔ་རྒྱུ་མེད། གླང་བོར་རྒྱུ་མེད། བོར་བའི་མྱ་ངན་མེད། བྲམ་ཟེ་ཁྱེད་ཀྱང་རང་རབ་ཏུ་བྱུང་ན་མི་དགའ་འམ་ཞེས་གསུངས་པས། བྲམ་ཟེ་ཡིས་སྨྲས་པ། བདག་ལ་ཁྱིམ་ཟེར་ན་དུར་ཁྲོད་ལས་ཀྱང་བཙོག་ཅིག་ཡོད། ཆུང་མ་ཟེར་ན་དགྲ་ཞིག་གི་སྣང་བ་ཡོད། བདག་ལ་བློས་གཏོང་མི་བྲ་རྒྱུ་དང་ཤུལ་ཏུ་སྐྱུར་མི་ཐུབ་རྒྱུ་ཅི་ཡང་མེད། གལ་ཏེ་ཁྱེད་ཀྱིས་རྗེས་སུ་བཟུང་ཞིང་རབ་ཏུ་བྱུང་བ་ཞིག་མཛད་ན། ཁོ་བོས་ཅིའི་ཕྱིར་ན་རབ་ཏུ་མི་བྱུང་ཞུས་པས། བཅོམ་ལྡན་འདས་ཀྱིས་ཀྱང་བྲམ་ཟེ་རྒན་པོ་རབ་ཏུ་བྱུང་ནས་མཐར་ཚེ་དེའི་སྟེང་དུ་དགྲ་བཅོམ་ཐོབ་སོང་བ་ཡིན་ལ། དེས་ན་དམ་ཆོས་འདུལ་བའི་བསྟན་པ་མ་ནུབ་པའི་དུས་འདིར་རབ་ཏུ་བྱུང་ནས་བསླབ་པ་སྣ་རེ་སྲུང་ཞིང་འདུལ་བའི་བསྟན་པར་བག་ཆགས་རེ་འཇོག་ཐུབ་ན་སྐལ་བ་བཟང་བ་ཡིན། ཕྱག་འཚལ་བའི་ཡན་ལག་འདི་དང་སྦྲགས་ནས། བཅོན་ལྡན་འདས་དེ་བཞིན་གཤེགས་པ་དགྲ་མཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་དུ་མེད་པ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཞེས་པའི་བར་གྱི་ངག་འདོན་དང་། བདེ་གཤེགས་སྨན་ལྷ་མཆེད་བརྒྱད། བྱང་ཆུབ་སེམས་དཔའ་ཉེ་བའི་སྲས་ཆེན་བརྒྱད། འདས་དང་ད་ལྟ་སླད་ནས་འབྱོན་འགྱུར་གྱི་རྒྱལ་བ་སྲས་བཅས་ལ་ཕྱག་འཚལ་བའི་ངག་འདོན་དེ་ཚོ་རྩེ་གཅིག་དད་པས་སམ་མོས་གུས་ཀྱིས་ཐོན་དང་བྱིན་རླབས་ཞུགས་ཏེ་ཚེ་འདིར་བགེགས་དང་བར་ཆད་སེལ། ནད་དང་གནོད་པ་ཞི། ཕྱི་མ་བདེ་བ་ཅན་གྱི་ཞིང་ཁམས་སུ་སྐྱེ་བ་ནི་གོང་ནས་སྨོས་པ་བཞིན་ནོ། །ཞིང་ཁྲིད་འདིའི་ནང་དུ་ཞུགས་ཚད་ཚང་མས་འོད་མཚན་བྱེ་བ་རེ་ངེས་པར་དུ་འདོན་ཐུབ་དགོས་ཞེས་ན་ནིང་བཤད་མྱོང་། ལོ་རེ་བཞིན་དགོས་ཟེར་བ་མིན་མོད། འོན་ཀྱང་བྱེ་བ་འགའ་རེ་སོག་སོང་ན་རྟ་མཐོ་ཐོག་ཏུ་སྒ་ཡིན་པས་ཅི་འདྲའི་བསོད་ནམས་མི་ཆེའམ། ད་དུང་དད་གུས་དྲག་པོས་དང་སེམས་མ་གཡེངས་པའི་སྒོ་ནས་སྤུས་དག་པར་བཏོན་ན་བྱེ་བ་གཅིག་དེ་བྱེ་བ་བརྒྱ་དང་འདྲ་བའི་ཕན་ཡོན་ཆེ་བ་ཡིན། འདི་ནས་བྱེ་བ་ཞེས་པ་ནི་བྱེ་ཆེན་བྱེ་ཆུང་གི་ནང་ནས་བྱེ་ཆུང་ཡིན་ལ། ཁྱིམ་པ་ཕོ་མོ་ཚོས་བདེ་སྨོན་དང་སྦྲགས་ནས་ཕྱག་འཚལ་ན་ཡག་པོ་ཡིན་ཞིང་། འོད་མཚན་དང་སྦྲག་ཀྱང་འགལ་བ་ཅི་ཡོད། ཕྱག་འཚལ་བའི་ཕན་ཡོན་གྱི་ནང་དུ་དད་དང་མོས་གུས་ཀྱིས་ཕྱག་རྣམ་དག་ཅིག་འཚལ་ན་རང་གི་ལུས་ཀྱི་འོག་གི་དབང་ཆེན་གསེར་གྱི་ས་གཞིའི་རྡུལ་གྲངས་དང་མཉམ་པའི་འཁོར་ལོ་སྒྱུར་བའི་རྒྱལ་པོ་ཐོབ་ཅེས་གསུངས་པ་ཡིན། མི་སྐྱ་ཕོ་མོ་གྲོང་ན་ཡོད་པ་ཚོས་རང་རང་གི་མཆོད་ཁང་ནང་གི་རྟེན་གསུམ་གྱི་མདུན་དུ་ཕྱག་འཚོལ། ཁང་པ་ཡོད་ནི་ཚོས་མཆོད་ཁང་རེ་བྱོས། མཆོད་པ་གཙང་མ་ཞིག་ཤོམས། ཉལ་ཁང་དང་མཆོད་ཁང་ཇ་ཁང་སོགས་ཁང་པའི་ཆ་རྐྱེན་གྱི་འདང་ཚེ་སོ་སོར་བྱས་ན་ལེགས་པ་ཡིན། འབྲོག་པར་བཟུང་སྟེ་རུ་བསྐྱལ་བཀལ་འགེལ་བྱེད་དགོས་པ་དག་གིས་ཁྱིམ་དུ་མི་བདེ་ན། ཐང་ཐོག་ཏུ་ཁ་ནུབ་ཕྱོགས་སུ་འཁོར་ཏེ་གཞན་དམིགས་པ་མང་པོ་ཞིག་མ་ཤེས་ཀྱང་མགོན་པོ་འོད་དཔག་མེད་པས་མཁྱེན། ཁྱེད་ལ་ཕྱག་འཚལ་བ་ཡིན་པས། བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་ཐམས་ཅད་དག་སྟེ་ནུབ་ཕྱོགས་བདེ་བ་ཅན་ལ་སྐྱེ་བར་ཤོག་ཅིག་བསམས་ནས་དད་པ་དང་མོས་གུས་བྱས་ན་འགྲིག་ཡོད། རང་རང་གི་ཚོད་དང་བསྟུན་པའི་སྦྱོར་དངོས་རྗེས་གསུམ་ཚང་བར་བྱས། མཇུག་ཏུ་འགྱུར་སྔགས་རེ་བཟླས་ན་དགེ་སྦྱོར་ལེགས་པོ་ཞིག་གི་གྲལ་དུ་འགྲོ་ཐུབ་པ་རེད། འབྲོག་བཟུང་སྟེ་རུ་ནང་དུ་ཡོད་མཁན་ཚོས་མཆོད་བཤམ་སྟབས་བདེ་རེ་ཡོད་པར་གྱིས་དང་ལེགས་པ་དང་། སངས་རྒྱས་བྱང་སེམས་ཀྱི་སྐུ་གཟུགས་རེ་ཤོམས། མི་འདྲ་མིན་གྱི་པར་མ་གཤོམ་དང་ལེགས། འདི་ཡན་ཆད་ཚོགས་བསགས་པའི་སྒོ་ཐམས་ཅད་ཡན་ལག་བདུན་གྱི་ནང་དུ་བསྡུས་པའི་ནང་གི་ཕྱག་འཚལ་བའི་ཡན་ལག་ནང་གསེས་གྱི་དབྱེ་བ་དང་བཅས་པ་སོང་བ་ཡིན། གཉིས་པ་མཆོད་པ་འབུལ་བའི་ཡན་ལག་ཡིན། བདག་གི་ལུས་དང་ལོངས་སྤྱོད་དགེ་རྩར་བཅས་ཞེས་པ་ནས་སང་ཉིན་བཤད་རྒྱུ་བྱེད། རང་རེས་ཁ་རྩང་དང་དེ་རིང་གི་ཆོས་ཁྲིད་ཐུན་གཉིས་བཤད་པ་ཡིན། བདེ་སྨོན་གྱི་ཚིག་དོན་གཉིས་ཀ་སྦྲེལ་ནས་བཤད་པ་ཡིན་པས། གཙོ་ཆེ་བ་ནི་འདིའི་གོ་དོན་སོ་སོའི་ནམ་རྒྱུན་གྱི་དགེ་སྦྱོར་ཚོགས་བསགས་ཀྱི་སྐབས་དང། དེ་བཞིན་འགྲོ་འདུག་སྤྱོད་ལམ་གྱི་སྐབས། སྐྱིད་སྡུག་གི་འགྱུར་བ་ཡོང་བའི་སྐབས། ཆགས་སྡང་ཉོན་མོངས་ཀྱི་ཕྱོགས་སུ་ཤོར་ལ་ཉེ་བའི་སྐབས་སུ་ཚང་མ་ལ་བེད་ཆོད་པ་ཞིག་དང་། གནད་གཅིག་གིས་ཁོག་བརྒྱ་ཐམས་ཅད་ཁྲོལ་ཐུབ་པ། ཚིག་གོ་ཞིང་དོན་ཤེས། དེའི་དོན་ཡིད་ལ་བཟུང་སྟེ། ལག་ལེན་ལ་བསྟར་ཐུབ་པ་ཞིག་བྱ་བ་ནི། ཐམས་ཅད་ཀྱི་ཆོས་ཞུས་པའི་དོན་སྒོའམ་ཡོང་སྒོ་དེ་ཡིན། དོན་ཞིག་ཨེ་འགྲུབ་སྙམ་ནས་ལས་ཤིག་བྱས་ཀྱང་། དོན་དེ་མ་འགྲུབ་པ་ལ་སྟོང་ལོག་ཟེར་བ་རེད། ཆོས་སྒྲ་རྣ་བས་གོ་ན་ཕན་ཡོན་ཡོད་ལ། བྱ་དང་རི་དྭགས་ཁྱི་སོགས་ཀྱིས་ཐོས་ནའང་ཕན་ཡོན་ཡོད། མི་ནི་དུད་འགྲོ་ལས་བཟང་བའི་མཐོ་རིམ་གྱི་སྲོག་ཆགས་ཡིན་ཞེས་ཚན་རིག་པ་རྣམས་ཀྱིས་གླེང་གིན་ཡོད་ཅིང་། དེས་ན་དེ་སྔོན་མི་ཚེ་ཕྱེད་ཀྱི་རིང་ལ་རྣམ་གཡེང་ཆགས་སྡང་རྨོངས་གསུམ་གྱིས་མི་ཚེ་དོན་མེད་དུ་ཟད་པས། རང་ཉིད་བདེ་ཐབས་དང་། ཡང་ན་ནང་སེམས་ཁམས་ཀྱི་སྨན་ཞིག་གམ་རང་གཞན་གཉིས་དོན་གྱི་དམ་པའི་ལྷ་ཆོས་ཤིག་མ་འགྲུབ་པར་། གོང་གི་བྲམ་ཟེ་རྒན་པོའི་བཟའ་ངན་གྱི་ལོ་རྒྱུས་བཤད་པ་དང་གཅིག་མཚུངས་རེད་སྙམ་པ་ལྟ་བུ་དང་། སྐྱིད་སྡུག་གོ་མ་ནོར་བའི་ངེས་ཤེས་ཐག་ཆོད་པ་ཞིག་ད་ནང་ཁྱིམ་ནས་ཡོང་དུས་ནས་ཡོད་ན་ནི་ལྟ་ཅི་སྨྲོས་དང། ད་ལྟ་ཆོས་རའི་སྒོ་ལ་བུད་དུས་སྔོན་དང་མི་འདྲ་བའི་བསམ་པའི་བློ་སྒོ་གསར་པ་ཞིག་འབྱེད་ཐུབ་ཡོད་དགོས། ཆོས་བཤད་ཅེས་པ་ནི་རང་གཞན་གཉིས་ཀའི་འདི་ཕྱིའི་དོན་ཆེན་ཇི་ལྟར་བསྒྲུབ་པའི་ཕྱོགས་ལ་གྲོས་འགོ་ཞིག་འདོན་པ་ཡིན། ཆོས་ཞུ་ཞེས་པ་ནི། སྔར་མེད་ཀྱི་ཕན་པའི་བསླབ་བྱ་ཞིག་ལེན་པ་སྟེ། དཔེར་ན། སྡུག་གི་ཡིད་ཐང་ཆད་དེ་གནས་ཡོད་སྐབས། ངལ་ཞིག་གསོ་ས་དང་། བློ་འདྲི་ས་དང་། སེམས་གཏད་ས། ད་ཕན་ཆད་ཀྱི་འདི་ཕྱིའི་འགྲོ་ལམ་རིང་མོའི་ལམ་རྒྱུས་ཤིག་ལེན་པའམ། ཚེ་འདི་ཕྱི་གཉིས་ཀའི་བྲོ་ཞིག་མཛད་རྒྱུའི་བློ་ཞིག་ཨེ་རྙེད་ལྟ་སར་ཡོང་བ་ཡིན་པས། ཆོས་རའི་ནང་དུ་བསྡད་ཅིང་ཆོས་ཞུས་པའི་དོན་གོ་ཆོད་པ་ཞིག་རང་གིས་འབད་པས་བྱེད་དགོས། ཆུ་ལེན་དུ་སོང་ན་ཟོམ་སྟོངས་ཁྱིམ་ལ་ཁུར་ནས་འགྲོ་མི་དགོས་ཞིག་བྱེད་དགོས་པ་ལྟར། ཆོས་པ་ཞེས་པ་ནི་ཕན་སེམས་དང་ཀུན་སྤྱོད་སོགས་གང་ཐད་ནས་མི་ཕལ་བ་ལས་འདས་པའི་ཡ་རབས་ཀྱི་མིག་ལྟོས་བྱ་ས་ཞིག་དགོས་པ་ཡིན། འུ་ཚོ་ཐེག་པ་ཆེན་པོའི་ཆོས་སྒོ་ལ་ཞུགས་ཤིང་གཞན་ཕན་བྱང་ཆུབ་སེམས་ཀྱི་ཀུན་སློང་ཞིག་འཛིན་ཁུལ་བྱས་པས། དོན་གཉེར་གྱི་འདུན་པ་གཏད་ཡུལ་གཙོ་བོ་སངས་རྒྱས་ཀྱི་གོ་འཕང་འཐོབ་པ་དེ་ཡིན། དེ་མ་ཐོབ་ཀྱི་བར་དུ་སྐྱོན་ཀུན་ཟད་ཡོན་ཏན་ཀུན་ལྡན་སྤངས་རྟོགས་མཐར་ཕྱིན་པ་ཞིག་འགྱུར་མི་ཐུབ། རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱེད་པ་ལ་ལམ་གྱི་སྦྱོང་བ་མཐར་ཕྱིན་དགོས། འུ་ཅག་དུས་སྙིགས་མའི་སེམས་ཅན་ནི་བློ་ཆུང་བ་སྟེ། དེ་རིང་གཅིག་གིས་ཡག་ལ་ལ་ཞིག་བཤད་དེ་ཤི་སར་ཁྲིད་སོང་ཡང་དེའི་རྗེས་སུ་འགྲོ་མཁན། ཡང་སང་ཉིན་གཅིག་གིས་དེ་མ་རེད་འདི་རེད། འདིར་ཉོན་དང་ཁེ་ཁ་ཆེན་པོ་འདིར་ཡོད་ཅེས་འུར་སྒྲོག་བྱས་ཚེ་ཡང་དེར་ཡིད་ཆེས་པ། ཐེངས་རེར་རང་བཤའ། རྔ་རྡུང་། དུད་འཐེན། ཆང་འཐུང་དག་ལའང་དད་པ་འཇོག་གིན་ཡོད་པ་འདྲ་བ་དང། ཡང་མཚམས་རེར་དགེ་སློང་གི་དགེ་འདུན་འདུལ་བ་གཞི་གསུམ་གྱི་ཕྱག་བཞེས་མ་ཉམས་པར་སྐྱོང་གིན་ཡོད་པ་ཚོ་དང་། སྒྲུབ་པ་ཉམས་ལེན་གྱིས་མི་ཚེ་རི་ལ་སྐྱེལ་མཁན་དག་མཇལ་ཚེ་ཡང་ལྷག་ཏུ་དད་པ་མི་ཤེས་པ་དང། ཡང་གྲགས་པའི་རྗེས་འབྲང་འགའ་ཞིག་གིས་མི་འདྲ་བ་ཞིག་གམ། ཆེ་གེ་མོ་ཞིག་ཡིན་རབས་གླེང་ཡོང་ཚེ། དེ་ལོས་ཡིན་སྙམ་པ་མ་གཏོགས་རང་གི་རྣམ་དཔྱོད་ཀྱིས་ཅི་ཡང་བརྟག་པའི་ནུས་པ་མེད་པ། དོན་གྱི་ཆོས་ཉམས་ལེན་གྱི་གནད་འགག་ཕྱོམས་ཙམ་རེ་ཤེས་ནའང། དེའི་བག་ཆགས་དང་གོམས་འདྲིས་བསོད་ནམས་སོགས་ཞན་པས་ཆོས་འགོ་རྔ་ཚང་པ་ཞིག་སྒྲུབ་མི་ཤེས། ལས་ངན་གྱི་རླུང་ཞིག་རང་གི་ཁོག་ནས་དྲང་ཡོང་བའམ། རྐྱེན་ངན་གྱི་ལམ་སྟོན་ཞིག་ཟུར་ནས་ཐོན་པ་སྟེ། མདོར་ན་ཆོས་སྒྲུབ་པར་རྐྱེན་ངན་གྱི་བར་ཆད་ཅིག་ཐོན་འཇོག་པ། དེ་འདྲ་ནི་རང་རོགས་སུ་ལ་ཡང་ཡོད། དེས་ན་ཚེ་འདིར་རང་རྒྱུད་རང་ལ་ལས་སུ་མ་རུང་བ་དེ་འདྲ་ཞིག་ཡིན་ན། ཚེ་ཕྱི་མར་སྐྱེ་བའི་ཕྲེང་བ་མང་པོ་ཞིག་ཏུ་ལམ་རིམ་བགྲོད་བྱེད་ཟེར་ན་དཀའ་བ་ཡིན། བ་དེའི་རྗེས་སུ་བེའུ་མ་ཤི་བ་ཞིག་ཡོད་ཟེར་ན་དེ་ནི་དཀའ་བའི་གནས་རེད། ཚེགས་ཆུང་ངུ་ཞིག་གིས་དོན་ཆེན་པོ་བདེ་བླག་ཏུ་འགྲུབ་ཐུབ་པ་ནི། འོད་དཔག་མེད་ལ་གསོལ་བ་བཏབ་ནས་བདེ་བ་ཅན་དུ་སྐྱེ་ཐབས་བྱ་རྒྱུ་འདི་ཁོ་ན་ཡིན། གསང་སྔགས་ཀྱི་སྔགས་རྫོགས་དག་ཉམས་ལེན་བྱས་ན་དབང་རབ་ཚེ་འདིར་སངས་རྒྱས། དབང་འབྲིང་བར་དོར་གྲོལ་བ་ཐོབ། ཐ་མ་ཡིན་ཡང་སྲིད་པ་བར་དོའི་གནས་སྐབས་སུ་རྣམ་གྲོལ་དབུགས་ཆེན་འབྱིན་པའི་ཞིང་ཁམས་ལ་བགྲོད་ཐུབ་ཅེས་གསུངས་ཡོད། ཤིན་ཏུ་དབང་རབ་ཡིན་ན་མི་ཚེ་གཅིག་གི་དུས་རིང་མི་དགོས་པར་ལོ་དང་ཟླ་བས་གྲོལ་བ་ཐོབ་པ་ཡོད་མོད། འོན་ཀྱང་དེ་ལ་ནི་ཉམས་ལེན་གྱི་གནད་ཁྱད་པར་ཅན་ཞིག་དང་མ་ལྡན་ན་དཀའ་བ་ཡིན། འདི་འདྲ་ཡིན་ན་དབང་ལུང་ཁྲིད་ཀྱི་རྒྱུན་མང་པོ་ཞིག་མེད་རུང་ཐོས་པ་སློབ་གཉེར་ལ་མི་ཚེ་མ་བསྐྱལ་རུང་། གཙོ་བོ་དད་འདུན་གྱིས་སངས་རྒྱས་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ་སྟེ་བདེ་བ་ཅན་ལ་སྐྱེ་བའི་རྒྱུ་བཞིའི་གནད་དང་མ་བྲལ་ན། ཕྱི་མ་བདེ་བ་ཅན་ལ་སྐྱེ་ཐུབ་བམ་མི་ཐུབ་སྙམ་པའི་སངས་རྒྱས་ཀྱི་གསུང་ལ་ཐེ་ཚོམ་མི་དགོས་པར། བདེ་བ་ཅན་ལ་སྐྱེ་བ་ཙམ་ལ་རྒྱུ་བཞིའི་ནང་གི་གསུམ་མ་གཏོགས་མ་ཚང་ན་ཡང་སྐྱེ་ཐུབ་པ་ཡིན། འདི་ནས་རྒྱུ་གསུམ་པ་བྱང་ཆུབ་མཆོག་ཏུ་སེམས་བསྐྱེད་པ་ནི་བདེ་བ་ཅན་ལ་སྐྱེ་བའི་དགེ་སློང་གི་དགེ་འདུན་ལ་ཐེག་པ་ཆེ་ཆུང་གི་རིགས་གཉིས་ལས་ཐེག་ཆེན་གྱི་རིགས་ལ་སྐྱེ་བ་འཛིན་པའི་དབང་དུ་མཛད་ནས་གསུངས་ཀྱི། ཐུན་མོང་དུ་ནི་རྒྱུ་གཞན་པ་གསུམ་པོས་ཀྱང་བདེ་བ་ཅན་ལ་སྐྱེ་ཐུབ། སངས་རྒྱས་འོད་དཔག་མེད་དང་ཞིང་ཁམས་བདེ་བ་ཅན་ཡིད་ལ་བྱེད་པ་དང། དགེ་བའི་རྩ་བ་བསགས་པ་དང། དགེ་རྩ་ཞིང་ཁམས་དེ་ལ་སྐྱེ་བའི་དོན་དུ་བསྔོས་པ་འམ་སྨོན་ལམ་འདེབས་པ་དང་གསུམ་གྱིས་ནི་བདེ་བ་ཅན་ལ་འགྲོ་པའི་མཐུན་རྐྱེན་ཆ་ཚང་པ་ཞིག་འཛོམས་སོང་བ་ཡིན། དེ་ཙམ་ཞིག་འཛོམས་ལོས་དགོས་ཏེ། ཉིན་ལམ་གསུམ་ལ་སོང་ནའང་། དེ་ལ་འགྲོ་ཆས་ལ་སོགས་པའི་མཐུན་རྐྱེན་ཅུང་ཙམ་འཛོམས་དགོས། དེ་མིན་རྒྱལ་ཁབ་གཉིས་ཀྱི་ས་མཚམས་བརྒལ་ཏེ་འགྲོ་དགོས་ནའང་འགྲོ་བྱེད་ཀྱི་ལག་ཁྱེར་ལ་སོགས་པ་མཐུན་རྐྱེན་ཞིག་ཚོགས་དགོས་ན། སེམས་ཅན་རང་ག་བ་ཞིག་གིས་ཕྱིན་ཆད་འཁོར་བའི་སྡུག་བསྔལ་མྱོང་མི་དགོས་པར་བདེ་བ་ཅན་གྱི་ཞིང་ཁམས་སུ་སྐྱེས་ཏེ་ཞིང་ཁམས་གཞན་པ་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་བདེ་སྐྱིད་ལོངས་སྤྱོད་མཉམ་དུ་བསྡམས་པ་དང་འདྲ་བའི་བདེ་སྐྱིད་མྱང་བཞིན་མཐར་སངས་རྒྱས་ཐོབ་པའི་དོན་ཆེན་དེ་ལྟ་བུའི་ལམ་སྣེ་ཟིན་པའི་མཐུན་རྐྱེན་ལ་སྲོག་དམར་པོ་ཡིན་ཡང་གཏོང་བར་འོས་པ་སྨྲོས་ཅི་དགོས། དེ་སྔོན་ཚེ་རབས་ཐོག་མེད་ནས་ད་ལྟའི་བར་ལ་སྐྱེ་བའི་ཕྲེང་བ་གྲངས་མེད་པ་ཞིག་ཏུ་སྐྱེ་ཤིའི་ཕྲེང་བ་ཅི་འདྲའི་མང་པོ་ཞིག་མ་བརྒྱུད་དམ། མཚམས་རེར་རྩྭ་གསེང་གི་འབུ་ལ་སྐྱེས་ཏེ་མི་དང་དུད་འགྲོས་བརྫུས་ཏེ་སྲོག་ཤོར་བའི་གྲངས་ཀ་རྐྱང་པ་ཡང་རྩི་ཚོད་མེད་པ་ཞིག་ཡིན། ཚེ་འདིར་དོན་ཆུང་རེའི་ཆེད་དུ་སྲོག་ཤོར་བར་མཐོང་བ་ཡང་ཅི་འདྲའི་མང་ཨང་། ཡང་གཅིག་བཤད་ན་དོན་ཆེན་ལྟ་ཅི་དོན་ཆུང་ཙམ་ཡང་མ་འགྲུབ་པར་དོན་མེད་དུ་ཤི་བ་ཅི་འདྲའི་མང་། དེས་ན་ད་རེས་སྤྱིར་ཆོས་དང་འཕྲད་དེའི་ནང་གི་བདེ་བ་ཅན་ལ་འགྲོ་ཆོག་པའི་ལམ་སྣེ་ཟིན་དུས་ད་དུང་དེར་འབད་པ་མི་བྱེད་ན་བླུན་པོ་མདོ་མེད་ངོ་མ་ཡིན། སུག་བཞི་ས་ལ་མི་བཙུགས་པའི་བྱོལ་སོང་མི་ཟས་ཟ་མཁན་ཙམ་ཞིག་ཡིན། བདེ་བ་ཅན་གྱི་ཞིང་ཁམས་དང་སངས་རྒྱས་འོད་དཔག་མེད་པའི་ཡོན་ཏན་གྱི་ཁྱད་པར་དེ་དག་མ་རྟོགས་ན། བླུན་པོ་ཟོག་དང་འདྲ་བ་ཞིག་གི་ལག་ཏུ་ནོར་བུ་དགོས་འདོད་ཀུན་འབྱུང་ཞིག་ཡོད་ཀྱང་། ཁོ་རང་བླུན་ཆེས་པས་ནོར་བུའི་ཡོན་ཏན་མི་ཤེས་པར་མ་ཟད། མི་གཞན་ལ་འདྲི་བ་ཙམ་ཡང་མི་བྱེད་པ་དེ་འདྲར་འགྱུར་མི་ཤོར་བར་འདི་འདྲའི་ཁྲིད་བཤད་སྐབས་ཞིབ་ཀྱིས་ཉན། དེའི་དོན་བསམས། དེ་དང་མཐུན་པའི་དགེ་རྩ་བསགས། སྨོན་ལམ་དང་བསྔོ་བ་རྣམ་དག་གིས་མཚམས་སྦྱར་ཏེ་རང་གཞན་གྱི་དོན་སྒྲུབ་འདོད་ནའང་འགྲུབ་ངེས་ཡིན། བདེ་བ་ཅན་གྱི་ཞིང་ཁམས་ལ་རང་མི་རང་ཁྱིམ་ལ་ལོག་པ་ལྟར་འགྲོ་བའི་འདུན་པ་བསྐྱེད་ཆོག་པ་ཡིན། དེ་འདྲ་ལས་སླ་མོ་ཞིག་ཡིན་ནམ་བསམ་དགོས་པ་མ་རེད། འདི་འདྲ་སླ་བའི་རྒྱུ་མཚན་ནི་སངས་རྒྱས་འོད་དཔག་མེད་པས་ལམ་སྦྱངས་པའི་གནས་སྐབས་སུ། གཞན་དང་མི་མཚུངས་བའི་ཚོགས་ཆེན་བསགས། དཀའ་བ་རྒྱ་ཆེན་སྤྱད། སྨོན་ལམ་རྒྱ་ཆེན་བཏབ་པའི་སྟོབས་ཀྱིས་རེད། སྨོན་ལམ་བཏབ་ཀྱང་འགྲུབ་མེད་ན་རང་རེ་འདྲེན་པའི་ནུས་པ་མེད་མོད། འོན་ཀྱང་བྱང་ཆུབ་སེམས་དཔའ་ཆོས་ཀྱི་འབྱུང་གནས་ཀྱིས་སྨོན་ལམ་ཐམས་ཅད་འགྲུབ་ནས་སངས་རྒྱས་འོད་དཔག་མེད་དུ་སངས་རྒྱས་ཏེ་ཞིང་ཁམས་གྲུབ་ཟིན་པ་ཡིན། དེའི་སྨོན་ལམ་གྱི་གཙོ་བོ་ནི། ཞིང་དེར་སོ་སོའི་སྐྱེ་བོ་ཡིན་ཡང་དད་དང་མོས་པའི་བསོད་ནམས་ཅན་ཆོས་སྤང་དང་མཚམས་མེད་བསགས་པ་མ་གཏོགས་པ་སྐྱེ་བར་ཤོག་ཅེས་གསུང་ས་ན། དེ་ལྟར་ན་འོད་དཔག་མེད་པའི་ཐུགས་བསྐྱེད་ཀྱི་ཕྱེད་ཀ་འགྲུབ་ལ་ཕྱེད་ཀ་མི་འགྲུབ་པ་དེ་འདྲ་ཞིག་མི་སྲིད་པས། གོང་དུ་བཤད་པ་ལྟར་ད་ལྟའི་སྐྱེ་བ་འདིར་ཆོས་སྒྲ་རྣ་བས་ཐོས་པར་མ་ཟད་ཆོས་ར་འདིའི་ནང་དུ་ཐོན་པས། སངས་རྒྱས་འོད་དཔག་མེད་པའི་མཚན་དང་ཞིང་ཁམས་ཀྱི་ཡོན་ཏན་དེ་ལ་སྐྱེ་ཐབས་ཀྱི་དགེ་རྩ་ཇི་ལྟར་སྒྲུབ་སོགས་ཐོས་པ་དེ་ནི། སྔོན་མར་རང་གིས་ཚོགས་བསགས་པའི་འབྲས་བུ་སྨིན་པ་ཡིན། དེས་ན་ང་ནི་བསོད་ནམས་ཆེ་འོ་སྙམ་ནས་དགའ་སྤྲོ་བྱེད་འོས་ལ། གཞན་ད་དུང་མགོ་འཁོར་ཏེ་འཁྲུལ་བའི་ལས་སྣང་ལ་སྤྱོད་པ་ཅི་འདྲའི་མང་བསམ་ནས་སྙིང་རྗེ་སྒོམ་ཞོར་དུ་ངོ་ཤེས་ས། སྙིང་བརྩེ་ས། འདྲིས་ཆེ་ས། ཡག་དགའ་ཉེས་སྡུག་ཡོད་ས་ཚང་མ་ལ་ཆོས་ཕྱོགས་ཀྱི་འགྲོ་ལམ་རེ་བཙལ་རྒྱུའི་ཕན་ཐོགས་ན་ཕན་ཐོགས་ཀྱི་ནང་ནས་ཆེ་ཤོས་དེ་ཡིན། ཚེ་འདིར་མ་ཟད་ཕྱི་མར་ཡང་ཕན་ཐོགས་སོང་ལ། དེས་ན་འབྲེལ་ཚད་དོན་ལྡན་རེ་ཨེ་ཡོང་བསམས་ནས་བསམ་པ་བཟང་པོ་བསྐྱེད་པ་དེ་ནོར་བུའི་ནང་གི་ནོར་མཆོག་ཡིན་པས། རིན་མི་དགོས་པའི་ནོར་མཆོག་རང་ལ་ཡོད་པ་དང་རང་གི་བྱི་དོར་བྱ་རྒྱུའི་ཐབས་ལམ་ཤེས་ན་དེ་ཚོ་བརྗེད་དུ་མི་བཅུག་པར། མཐའ་ན་ཚིག་རེ་ཡིན་ཡང་རྒྱུད་ལ་སྦྱར་ཏེ་ལག་ལེན་ལ་འདེབས་པར་གོམས་དང། གོམ་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་གསུངས་པ་ཡིན། རིམ་གྱིས་ཡང་དག་པའི་ལམ་ལ་གོམས་ཡོང་བ་ཡིན། བསླབ་ན་དུད་འགྲོས་ཀྱང་མི་སྐད་གོ་བས། མི་རང་གིས་སྦྱོང་ན་ཅིའི་ཕྱིར་ཁྱད་པར་འཕགས་པའི་ཡོན་ཏན་མི་ཐོབ། མ་སྦྱངས་ན་ཉི་མ་བརྒྱ་ལྟ་ཅི་ལོ་བརྒྱ་སོང་ཡང་ཡར་རྒྱས་མེད། མ་སློབ་ཁ་རོགས་བསྡད་པ་ལ། །ལོ་བརྒྱར་སོང་ཡང་བཟང་སྐྱེད་མེད། །ཅེས་གསུངས་པ་ཡིན། བདེ་བ་ཅན་དུ་བཞུགས་པའི་བྱང་ཆུབ་སེམས་དཔའ་འཕགས་པ་དེ་དག་སྔོན་སོང་བསོད་ནམས་ཁྱད་པར་ཅན་བསགས་པ་ཤ་སྟགས་ཡིན། འུ་བུ་ཚོ་སོ་སོའི་སྐྱེ་བོ་ཐ་མལ་པ་སྐྱེ་བ་བརྗེས་མ་ཐག་ཏུ་དེ་རྣམ་པ་དང་བསྐལ་བ་མཉམ་ནས་ད་ལྟ་འུ་བུ་ཚོ་བླ་གྲྭ་དགེ་འདུན་པ་དང་མཉམ་དུ་ལྷ་ཁང་གཅིག་གི་ནང་དུ་འཚོགས་པ་དང་འདྲ་བར། ས་ཐོབ་ཀྱི་སེམས་དཔའ་རྣམས་དང་འདྲ་བར་སངས་རྒྱས་འོད་དཔག་མེད་པའི་མདུན་དུ་ཆོས་ཉན། ཞིང་ཁམས་གཞན་ལ་མཉམ་དུ་རྫུ་འཕྲུལ་གྱིས་བགྲོད་ཆོག་པ་དེ་འོད་དཔག་མེད་པའི་སྔོན་གྱི་ཐུགས་བསྐྱེད་དང་སྨོན་ལམ་གྲུབ་པས། བསམ་གྱིས་མི་ཁྱབ་པའི་ཡེ་ཤེས་དང་ཡོན་ཏན་ཐུགས་རྗེ་ཆེན་པོས་སྟོབས་ཀྱིས་སྐྲ་ཡི་བཟུང་སྟེ་ཞིང་ཁམས་དེ་ལ་འཐེན་སོང་བ་འདྲ་ཞིག་ཡིན། དེ་འདྲའི་འཕགས་ཆེན་བསོད་ནམས་ཆེན་པོ་ཅན་རྣམས་དང་སྐལ་བ་མཉམ་སོང་པ་འདི་ནི། དཔེར་ན་མི་གཉིས་ཀྱི་གཅིག་གིས་མི་ཚེ་གཅིག་ལ་འབད་པས་ཕྱུག་པོར་གྱུར་པ་དང། གཅིག་ཤོས་ཀྱིས་ནོར་བུ་རིན་ཐང་ཅན་ཞིག་རྙེད་ནས་གློ་བུར་དུ་ཕྱུག་པོར་གྱུར་པས་གཉིས་ཀ་ཕྱུག་པོ་ཡིན་པ་འདྲ་སོང་བ་ལྟ་བུ་ཡིན། སེམས་ཅན་གྱི་སྐལ་བ་དང་སངས་རྒྱས་ཀྱི་ཡེ་ཤེས་བསམ་གྱིས་མི་ཁྱབ་པ་ཡིན་པས། དེ་གཉིས་ཕན་ཚུན་རྟེན་ཅིང་འབྲེལ་བར་འབྱུང་བའི་མཐུ་གྲུབ་སོང་ཚེ། དཀའ་ལས་ཆེན་པོ་མེད་པར་མི་འགྲུབ་རྒྱུའི་དོན་དེ་ལས་སླ་མོས་འགྲུབ་ཡོང་བ་ཡིན། དཔེར་ན་འགྲོ་དགོས་སའི་དམིགས་འབེན་གྱི་ས་ཆ་ཞིག་ལ་འཛོམས་དགོས་ན། འགའ་རེ་རྐང་ཐང་གིས་སོང་བ་དང་། འགའ་རེ་རྟ་ཁལ་ལ་བརྟེན་ཏེ་སོང་བ། འགའ་རེ་ས་སྟེང་གི་འཕྲུལ་རིགས་ལ་བརྟེན་ཏེ་སོང་བ། འགའ་རེ་ནམ་མཁའ་ནས་འཕུར་གྲུའི་རིགས་ལ་བརྟེན་པ་སོགས་ཀྱིས་དབང་གིས། འགྲོ་སྟབས་དང་ལམ་ཉེ་རིང་གི་བདེ་གཟར་མི་འདྲ་བའི་ཁྱད་པར་ཤོར་འགྲོ་བ་ལྟ་བུ་ཡིན། དོན་ཆེན་དཀའ་བ་ཆུང་ངུས་འགྲུབ་ཐུབ་པ་འདི་ནི་བདེ་བར་གཤེགས་པའི་ཡེ་ཤེས་ཀྱི་རྣམ་འཕྲུལ་ཚད་མེད་པ་དེ་འདི་ལ་དངོས་པོ་སྟོབས་ཞུགས་སུ་སོང་བ་དང། དེའི་སྒྲུབ་བྱེད་ཀྱི་ལུང་ཡང་དག་པ་དེ་འདི་ལ་ཚད་མར་སོང་བ་ཡིན། དེས་ན་ཞིང་གི་ཡོན་ཏན་དང་རྒྱལ་བའི་ཡེ་ཤེས་ཚད་མེད་པ་དང་། ཞིང་ཁམས་དེ་ལ་སྐྱེ་སླ་ཚུལ་འདི་དག་ནི་ཐབས་ལམ་ཟབ་མོའི་ནང་གི་ཟབ་མོ་ཡིན། དུས་ཚོད་སྐར་ཆ་ཡིན་ཀྱང་འཕྲོ་བརླག་ཏུ་མ་ཤོར་བར། འཆི་བ་མི་རྟག་པའི་འདུ་ཤེས་མ་འབོར་དང་ཚེ་འདི་ཕྱི་གཉིས་ཀའི་འཆར་གཞི་འཆུག་པ་མ་ཡིན། སྔོན་ཞིག་ལ་སྐུ་དྲག་ཅིག་ལ་མི་མ་ཡིན་གྱི་གྲོགས་པོ་ཞིག་ཡོད་ལ། མི་མ་ཡིན་དེ་མ་འོངས་པར་ལེགས་ཉེས་ཅི་ཡོང་ཤེས་མཁན་ཞིག་ཡིན་པ་དང་། སྐུ་དྲག་དེས་མི་མ་ཡིན་ལ་ཁྱོད་ཀྱིས་མི་ནམ་འཆི་ཤེས་སམ་ཞེས་དྲིས་པར། མི་མ་ཡིན་དེས་ཤེས་ཞེས་སྨྲས། སྐུ་དྲག་གིས་ཁོ་ཤི་རན་དུས་བརྡ་ཞིག་ཐོང་ཞེས་སྨྲས། མི་མ་ཡིན་པས་ཀྱང་དེ་ལྟར་ཁས་བླངས། ལོ་འགའི་རྗེས་སུ་གྲོགས་པོ་སྐུ་དྲག་དེའི་ཕྱིར་ལོ་ཤི་རྒྱུ་ཡིན་པ་དེ་མི་མ་ཡིན་པས་ཤེས་ཏེ། ཉིན་ཞིག་ལ་ཡོང་ནས་གྲོགས་པོ་ཡ་གི་ན་མི་ཞིག་ཤི་སོང་ཞེས་སྨྲས་པས་སྐུ་དྲག་གིས་དེ་བརྡ་ཡིན་པར་མ་ཤེས་པར་རང་གར་བསྡད། ཡང་ཉིན་ཞིག་ལ་མི་མ་ཡིན་གྱིས་གྲོགས་པོ་མ་གི་ན་ཡང་མི་ཞིག་ཤི་སོང་ཞེས་སྨྲས་པར་ཡང་ཉམས་ལ་མ་བཞག་པར་ཡུན་རིང་པོར་འདུག་འདང་བྱས་ནས་བསྡད་པ་ཡིན། དེ་ནས་ཉིན་ཞིག་ལ་སྐུ་དྲག་ཚབ་ཆེན་ཞིག་ན་བ་རེད། མི་མ་ཡིན་ལྟ་སར་ཡོང་དུས་སྐུ་དྲག་གིས་སྨྲས་པ། བདག་ད་ཐེངས་མི་ཤི་འམ་ཞེས་སྨྲས་པར། ཤི་འོ་ཞེས་སྨྲས། འོ་ན་ཁྱེད་ཀྱིས་དེའི་སྔོན་དུ་བརྡ་ཞིག་མི་རྒྱག་པ་ཅི་ཡིན། འུ་བུ་གཉིས་ཁ་ཆད་བྱས་མེད་དམ་ཞེས་སྨྲས་པར། མི་མ་ཡིན་པ་ན་རེ། ཁོས་ཁྱོད་ལ་བརྡ་བརྒྱབ་ཡོད་དེ། འདི་ལྟར་ཡ་གི་ན་མི་གཅིག་ཤི་སོང་བ་དང་། མ་གི་ན་མི་གཅིག་ཤི་ཡོད་པར་མ་སྨྲས་སམ། ད་ལྟར་ཁྱོད་ཀྱི་སྟེང་ལ་བབས་པ་ཡིན། ངས་སྔ་ཆ་ཐེངས་མ་གཉིས་ལ་བརྒྱབ་པ་ཡིན་མོད་ཁྱེད་རང་གིས་མ་གོ་བ་རེད་ཅེས་སྨྲས་པ་ལྟར། གདམས་ངག་གི་དམར་ཁྲིད་ངོ་མ་ནི་མི་གཞན་ཟུར་ནས་ཤི་བ་འདི་ཡིན། གན་ལ་དེ་འདྲ་བྱུང་ཐལ་ཁྱོད་ལ་ཡང་དེ་མ་གཏོགས་མཐའ་རྒྱུ་ཡོད་པ་མ་རེད་ཅེས་པའི་བརྡ་སྟོན་མངོན་སུམ་དུ་བྱུང་གིན་ཡོད། དེ་ལ་བསམ་བློ་བཏང་ནས་ད་ལོ་སང་ཕོད་གཉིས་ཀའི་ནང་ནས་ད་ལོ། ཟླ་བ་སྔ་མ་ཕྱི་མ་གཉིས་ཀའི་ནང་ནས་སྔ་མ། དེ་རིང་སང་ཉིན་གཉིས་ཀའི་ནང་ནས་དེ་རིང་། སྔ་དྲོ་ཕྱི་དྲོ་གཉིས་ཀའི་ནང་ནས་སྔ་དྲོ་འཆི་རྒྱུའི་འདང་མ་བྱས་ན་འཆི་བ་ཐོག་ཏུ་བབ་ཚེ་ཆོས་མ་གཏོགས་རེ་ས་མེད། ཆོས་ཕྱི་གཤོལ་དང་ལེ་ལོ་རྟག་འཛིན་སོགས་ཀྱིས་དབང་དུ་ཤོར་ཏེ་འགྲུབ་མེད་ན་དེ་དུས་ཞེ་ཕམ་པ་དང་ཡི་མུག་པ་ཡིད་འགྱོད་པ་ཚང་མ་མཉམ་གཅིག་ཏུ་ཡོང་བ་ཡིན། འཆི་བ་ཐོག་ལ་བབ་དུས་བཟློག་རྒྱུ་མེད། ལྷོ་བྲག་མར་བ་ལོ་ཙཱའི་སྲས་དར་མ་མདོ་སྡེ་རྟས་དྲུད་དེ་དབུ་དུམ་བུ་བརྒྱད་ལ་ཆག་ཡོད་པའི་སྐུ་གདུང་དེ་མར་བའི་སྐུ་པང་ལ་བཞག་ཡོང་དུས། དབུ་རུས་ཁྲ་ཉི་ལེ་ཡོད་པ་ཡུམ་བདག་མེད་མས་གཟིགས་པས་དྲན་མེད་དུ་བརྒྱལ་སོང་བ་ཡིན། དྲན་པ་སོས་དུས་ཡུམ་གྱིས་གསུངས་ཏེ་སྨན་ཡན་ལག་བརྒྱད་པ་ཞིག་ལ་བོད་ན་ཁྱེད་ཀྱི་མཁས་ཤིག་མེད་པས་གསོན་ཐབས་ཤིག་མི་འདུག་གམ་ཞུས་པས། ཆུ་ཟངས་བ་གང་གི་ནང་དུ་ཞག་ཉ་མིག་འདྲ་ཞིག་ཡོད་པ་དེ་རྩིག་ངོར་གཏོར་ཚར་བས་རོ་མགོ་མེད་ལ་གསོ་ཐབས་མེད་ཅེས་གསུངས་པ་ཡིན། སེམས་ཅན་གྱི་ལས་ཐོག་ཏུ་བབ་དུས་སངས་རྒྱས་ལ་ཡང་མཐུ་རྡུག་ཅེས་པ་ལྟར་ཡིན་པས་བཅོས་ཐབས་མེད་ཅེས་གསུངས། དེ་ལྟར་ན་གང་ལྟར་ཐམས་ཅད་འཆི་རྒྱུ་ཡིན་པས་ཆོས་ཤེས་དང་མ་ཤེས་འདྲའོ་སྙམ་ན། ཐམས་ཅད་འཆི་རྒྱུ་ཡིན་པར་འདྲ་མོད་འོན་ཀྱང་འཆི་ལུགས་འདྲ་བ་མ་ཡིན། ཆོས་པ་རབ་འཆི་བ་ལ་དགའ་བ་སྟེ། སྐྱེ་བ་སྐྱེད་མོའི་ཚལ་དུ་སོང་བ་ལྟ་བུ་ཡིན། ཆོས་པ་འབྲིང་འཆི་བར་མ་འཚེར་ལ། མི་འཚེར་བའི་གདེང་ཞིག་ཁོ་རང་ལ་ཡོད། ཆོས་པ་ཐ་མ་ཞིག་ཡིན་ཡང་འགྱོད་པ་མེད། འཆི་བ་མི་རྟག་པ་ལུས་ཅན་ཐམས་ཅད་ཀྱི་སྟེང་དུ་ཡོང་བ་སྔར་ནས་ཤེས་ཏེ་མི་འགྱོད་པར་བྱས་ནས་བསྡད་ཡོད། གླང་ཐང་པ་སྐུ་འདས་ཁར་ཁོང་གིས་དམྱལ་བ་སྐྱེ་དགོས་བསམས་ནས་སྨོན་ལམ་བཏབ་མོད་འོན་ཀྱང་འགྲུབ་མ་སོང་། དག་པའི་སྣང་བ་ཤར་བྱུང། ད་དག་ཞིང་ལ་འགྲོ་དགོས་ཐུག་འདུག དམྱལ་བར་འགྲོ་རྒྱུ་གྲུབ་མ་སོང་ཞེས་གསུངས་པ་ལྟ་བུ་ཡིན། དེས་ན་ཚང་མས་འཆི་ཁ་མི་འགྱོད་ཐབས་ད་ལྟ་བསམ་ལོང་དྲན་ལོང་ཡོད་དུས་ནས་འཆི་བ་མི་རྟག་པ་དྲན་ན་ལས་བྱ་བ་ཐམས་ཅད་ཀྱི་རྒྱལ་པོ་དེ་གྲུབ་སོང་བ་ཡིན། མདོར་ན་དུས་རྒྱུན་དུ་འཆི་བ་མི་རྟག་པ་ཡང་ཡང་དྲན་རྒྱུ་དེ་གནད་ཆེ་ཡང་འཆུག་མི་ཉན།

ཉིན་གསུམ་པའི་ཆོས་ཁྲིད།

དེ་ཡང་ཇི་སྐད་དུ་ཀུན་མཁྱེན་རྒྱལ་བ་ཀློང་ཆེན་པས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་ཡོངས་སུ་བསྔོ་བས་ཟིན་པ་དེ། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར། ཐེག་པ་ཆེན་པོའི་ཆོས་སྒྲུབ་པ་ལ་ཐོག་མ་ཉིད་ནས་མེད་ཐབས་མེད་པའི་ཆོས་དགེ་རྩ་ཐབས་ཀྱིས་ཟིན་པ་སྦྱོར་བ་སེམས་བསྐྱེད་དམ་པ་རྒྱུད་ལ་སྐྱེ་དགོས། ཐབས་དང་ལྡན་ན་བྱ་བ་གང་ཡིན་ཡང་འགྲུབ་སླ་ལ། ཐབས་དང་མ་ལྡན་ན་དོན་ཆུང་འབད་པ་ཆེན་པོས་བསྒྲུབས་ཀྱང་འགྲུབ་དཀའ་བ་ཡིན། དེས་ན་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། ངས་ཐར་བའི་ལམ་སྣེ་ཞིག་ཟིན་པར་བྱས་ཏེ་རྫོགས་པའི་བྱང་ཆུབ་སྒྲུབ་པ་ཡིན། དེའི་ཆེད་དུ་དམ་པའི་ཆོས་ཉན་པ་ཡིན་སྙམ་པའི་བསམ་པ་བཅོས་མ་མ་ཡིན་པ་ཞིག་སྐྱེ་དགོས། དེ་སྐྱེ་བར་བྱེད་པ་ལ་བློ་སྦྱོང་བ་གལ་ཆེ། བློ་ཇི་ལྟར་སྦྱང་དགོས་སྙམ་ན། དེ་སྔོན་ཡན་ཆད་དུ་བློ་འདི་ངན་གོམས་ལ་སོང་ནས་རང་དོན་ཅོལ་ཆུང་ཞིག་མ་གཏོགས་འདང་བརྒྱབ་མ་མྱོང་། རང་དོན་ཅོལ་ཆུང་དེ་ཡང་མ་འགྲུབ་པས། ད་ནི་དེ་སྔོན་གྱི་བསམ་བློ་ཐམས་ཅད་ནོར་བ་ཡིན་པར་ཤེས་ཏེ། འཁོར་བའི་ཆོས་སྡུག་བསྔལ་གྱི་རང་བཞིན་ཡིན་པར་ཤེས། དེ་ལས་ཐར་འདོད་ཀྱི་བསམ་པ་དང་སེམས་ཅན་ཐམས་ཅད་དེ་ལས་སྐྱོབས་འདོད་ཀྱི་བློ་ཞིག་སྐྱེས་པས། ཐར་བའི་ལམ་ཇི་ལྟར་ཚོལ་དགོས་པ་དང་། སྐྱབས་གང་ལ་བསྟེན་ན་ད་གཟོད་བཙལ་ཤེས་པ་དང་། སྤྱིར་ང་ཟེར་སའི་ལུས་འདི་ལ་རྟག་པ་དང་ངེས་པ་མེད་པར་ཤེས་ཡོང་དུས་བློ་འཁོར་བའི་ཆོས་ལས་རང་ཤུགས་ཀྱིས་ལྡོག་ཡོང་བ་རེད། དེ་ལྡོག་ནས་གཉིས་ལ་མི་གནས་པའི་བྱང་ཆུབ་ཞི་བ་ཆེན་པོའི་གོ་འཕང་ཞིག་བསྒྲུབས་ནས་སེམས་ཅན་ཐམས་ཅད་སྡུག་བསྔལ་མེད་པའི་གཏན་བདེ་ལ་འགོད་པར་བགྱི་སྙམ་པ་ནི་སྦྱོར་བ་སེམས་བསྐྱེད་དམ་པའོ། །དེ་ནི་དམིགས་པ་སེམས་ཅན་ཐམས་ཅད་ལ་དམིགས་ཤིང་བསམ་པ་རྫོགས་པའི་བྱང་ཆུབ་ལ་འགོད་འདོད་ཅན་གྱི་དོན་གཉིས་ལྡན་པའི་སེམས་བསྐྱེད་ཅིག་ཡིན། སེམས་བསྐྱེད་དེ་དང་ལྡན་པའི་ཐོག་ནས་བྱང་ཆུབ་སེམས་ཀྱི་སྡོམ་པ་བླངས། དེའི་བསླབ་བྱ་མི་ཉམས་པར་བསྲུང་ན་དགེ་རྩ་ཐབས་ཀྱིས་ཟིན་པ་ཡིན། ཇི་ལྟར་ཟིན་ཞེ་ན། ཅི་བྱས་དགེ་བར་འགྱུར་བའི་གསེར་འགྱུར་གྱི་རྩི་ཡིས་བྱ་གཞག་རང་ག་བ་ལྕགས་ལྟ་བུ་དེ་གཞན་དོན་རླབས་ཆེན་གསེར་ལྟར་བསྒྱུར་བས་ན་དགེ་རྩ་ཐབས་ཀྱིས་ཟིན་པ་ཐོག་མ་ཉིད་ནས་མེད་དུ་མི་རུང་བ་སྦྱོར་བ་སེམས་བསྐྱེད་དམ་པའོ། དེ་ལྟ་བུའི་དགེ་རྩ་ཐབས་ཀྱིས་ཟིན་པ་སྦྱོར་བ་སེམས་བསྐྱེད་དམ་པ་ཡོད་པའི་སྟེང་དུ་དགེ་བ་རྐྱེན་གྱིས་མི་ཤིགས་པར་བྱེད་པ་དངོས་གཞི་དམིགས་མེད་དམ་པ་ལ་འཇུག་དགོས། དམིགས་མེད་ཀྱི་ལྟ་བས་ཆོས་ཅན་སྣང་བར་ཤར་བའི་ཆོས་འདི་ཐམས་ཅད་ཆོས་ཉིད་སྟོང་པ་ཆེན་པོའི་ངང་དུ་རོ་མཉམ་པ། ཆོས་དབྱིངས་སྨྲ་བསམ་བརྗོད་པ་དང་བྲལ་བའི་གནས་ལུགས་དང་དབུ་ཕྱག་རྫོགས་གསུམ་གྱི་ཟབ་དོན་སོ་སོའི་ཁོག་ཁྲོལ་ཏེ་གནད་གཅིག་ལ་འབབ་པའི་རྣལ་འབྱོར་རྟོགས་པའི་གདེང་ཡོད་ན་དེ་དང་མི་འབྲལ་བའི་སྣང་སྤྱོད་ཀྱིས། དགེ་རྩ་གང་སྒྲུབ་ན་དེས་རྩིས་ཟིན་པ་གལ་ཆེ། འོན་ཀྱང་ལས་དང་པོ་པས་ནི་རྒྱང་རིང་གི་ཕར་རྒྱབ་གླེང་མི་འདུག་པར་མདུན་ན་ཡོད་པའི་རང་ཉིད་ཀྱི་སྤྱོད་ཡུལ་དང་བསྟུན་ཏེ་དགེ་རྩ་རྣམ་པར་དག་པ་ཞིག་བྱེད་པ་ལ། རྒྱུ་རྐྱེན་རྟེན་འབྲེལ་གྱི་དབང་གིས་སྣང་བའི་ཆོས་འདི་ཐམས་ཅད་བདེན་པར་གྲུབ་པ་གཅིག་ཀྱང་ཡོད་པ་མ་ཡིན་པ་སྟེ། མི་ཕམ་རིན་པོ་ཆེས། ཤེས་བྱའི་ཁམས་ན་བདེན་གྲུབ་གཅིག་ཡོད་ན། །ཤེས་བྱ་འདི་ཀུན་གཏན་དུ་སྣང་མི་འགྱུར། །ཤེས་བྱ་འདི་ཀུན་བདེན་པར་མ་གྲུབ་པས། མཐའ་མེད་ཤེས་བྱའི་ཆོས་ཚུལ་རྣམ་པར་བཀྲ། །ཞེས་གསུངས་སོ། །དེ་ལྟ་བུ་བདེན་པར་མ་གྲུབ་པའི་དབང་གིས་མེད་ལ་སྣང་བའི་རྫུན་རིས་ཆུ་ཟླའི་རི་མོ་ལྟ་བུ་འདི་སྟོང་བཞིན་དུ་སྣང་ལ་སྣང་བཞིན་དུ་སྟོང་པའི་རྟེན་འབྲེལ་གྱི་གཤིས་ཡིན་པར་ཤེས་ཏེ། ཇི་སྲིད་གཉིས་འཛིན་གྱི་སྣང་བ་སྒྱུ་མའི་ལྟད་མོ་ལྟ་བུ་འདི་ཡོད་པའི་རིང་ལ། སྒྱུ་མ་ལྟ་བུའི་ཚོགས་གཉིས་མས་རིམ་གྱིས་གསོག་པ་ལ། མ་དག་འཁོར་བའི་སྒོ་གསུམ་གྱི་ལས་ཐོག་མེད་ནས་ད་ལྟའི་བར་དུ་མི་དགེ་སྡིག་ལས་ཁོ་ན་བསགས་པས། ད་ནི་སྒོ་གསུམ་དགེ་བའི་ལས་ལམ་ལ་ཆུན་གཅིག་ཏུ་དྲིལ་ནས། ཐོས་པ་སློབ་གཉེར་ལ་མ་གོམས་པའི་ཁྱིམ་པ་ཕོ་མོས་རྒྱ་ཆེན་པོ་ཞིག་མ་ཤེས་ཀྱང་རང་ཉིད་ཀྱི་ཉམས་ལེན་གྱི་གནད་ཙམ་རེ་མ་ཤེས་ཐབས་མེད། རྒྱང་མིག་གིས་ཐག་རིང་པོ་མ་མཐོང་ན་ཡང་རྡོག་ལམ་མཐོང་པའི་ཤེས་རབ་གསལ་བའི་མིག་རེ་བསྒྲུབས་ནས་དངོས་གཞི་ལྟ་སྒོམ་གྱི་གནད་ལ་འཇུག་ཐབས་བྱེད་པ་ནི་དངོས་གཞི་དམིགས་མེད་དང་རྗེས་སུ་མཐུན་པ་ཞིག་ཏུ་འགྱུར་རྒྱུའི་མགོ་བཙུགས་ནས་དགེ་བ་གོང་ནས་གོང་དུ་འཕེལ་བ་ཡིན། རིན་ཆེན་ཕྲེང་བ་ལས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལས་སྒོམ་པ་ཡང་ནི་རབ་ཏུ་གཅེས། །དེ་ལས་དངོས་གྲུབ་བླ་ན་མེད་པ་ཐོབ། །ཅེས་གསུངས་སོ། །དགེ་རྩ་གོང་ནས་གོང་དུ་འཕེལ་བར་བྱེད་པ་དེ་མཇུག་བསྔོ་བ་དམ་པ་ཡིན་པ་རེད། དགེ་རྩ་སེམས་ཅན་ཐམས་ཅད་ལ་མ་བསྔོས་པ་དང་གཅིག ཕྱིན་ཅི་ལོག་ཏུ་བསྔོས་པ་དང་གཉིས། དགེ་རྩ་ངོམ་ཆོས་བྱས་ཏེ་གཞན་ལ་བསྒྲག་པ་དང་གསུམ། དགེ་རྩའི་རྗེས་སུ་འགྱོད་པ་སྐྱེས་པ་དང་བཞི་ནི་དགེ་རྩ་འཛད་པའི་རྒྱུ་བཞི་ཡིན་པ་སྟེ། མ་བསྔོས་པ་དང་ལོག་པར་བསྔོས། །གཞན་ལ་སྒྲོག་དང་འགྱོད་པ་སྐྱེད། །དགེ་རྩ་འཛད་པའི་རྒྱུ་བཞིའོ། །ཞེས་གསུངས་སོ། །དེ་ལྟར་མ་ཡིན་པར་དགེ་རྩ་བསྔོ་དགོས། བསྔོ་ཚུལ་ནི་བདེ་བ་ཆུང་ཆུང་ལྷ་མིའི་གོ་འཕང་ཐོབ་བྱེད་དུ་བསྔོ་བ་ནི་མཐའ་མི་བརྟན་པས་མི་རུང་ངོ་། །བསྔོ་བ་འབྲིང་ཉན་ཐོས་རང་རྒྱལ་དང་རང་གཅིག་པུ་སྐྱིད་ཐབས་བདེ་ཐབས་ཀྱི་དོན་དུ་ཡང་བསྔོ་མི་རུང་སྟེ། རང་དོན་མ་གཏོགས་གཞན་དོན་རྒྱུན་ཆད་སོང་དུས་གོང་དུ་སེམས་བསྐྱེད་ཁས་བླངས་པ་དེ་རྫུན་པར་འགྱུར་འགྲོ། འོ་ན་གང་ལ་ཇི་ལྟར་བསྔོ་དགོས་པ་ཡིན་ཞེ་ན། བདག་གི་དགེ་བ་ཆུང་ངུ་ཆུ་ཐིགས་འདྲ་བ་འདི་དུས་གསུམ་རྒྱལ་བ་སྲས་བཅས་ཀྱི་དགེ་རྩ་རླབས་ཆེན་རྒྱ་མཚོ་ལྟ་བུ་དང་བསྲེས་ཏེ། སེམས་ཅན་ཐམས་ཅད་ནུབ་ཕྱོགས་བདེ་བ་ཅན་ལ་སྐྱེས་ཏེ་མགོན་པོ་འོད་དཔག་མེད་པའི་ཐུགས་སྲས་སུ་གྱུར་ནས། ཁམས་གསུམ་འཁོར་བ་དོང་ནས་སྤྲུག་ཅིང་གཏིང་ནས་འདོན་པའི་རྒྱུར་འགྱུར་བར་ཤོག་ཅིག་སྙམ་པའི་སྨོན་ལམ་གྱིས་རྒྱས་འདེབས་བྱེད་དགོས། མདོར་ན་དང་པོ་ཆོས་གྲལ་དུ་འདུག་དུས་སེམས་ཅན་ཐམས་ཅད་ཀྱི་དོན་དུ་ཆོས་ཞུ་འོ་ཡིན་བསམ། བར་དུ་ཆོས་ཞུ་དུས་མི་གཡེང་བར་ཐ་མ་ཆོས་ཞུས་པའི་དགེ་རྩ་མཁའ་ཁྱབ་ཀྱི་སེམས་ཅན་ཐམས་ཅད་ཀྱི་དོན་དུ་བསྔོས་ན་དམ་པ་གསུམ་གྱིས་རྩིས་ཟིན་ཟེར་དགོས་ལ། མགོ་དང་པོ་ཞིག་ནས་ཁྱད་པར་ཐེག་ཆེན་དགེ་བ་རླབ་པོ་ཆེ་ཞེས་གསུངས་པས། གལ་ཏེ་ཐེག་ཆེན་གྱི་དགེ་བར་མ་གྱུར་ན་ཐེག་དམན་གྱི་དགེ་རྩའམ་ཡང་ན་སྲིད་པ་འགྲུབ་པའི་ལས་ཤིག་ལས་འགྲོ་ས་གཞན་མེད། རིགས་དེ་གཉིས་ནི་རླབས་ཆེན་གྱི་དགེ་རྩ་མིན་པས། རང་གཞན་གྱི་དོན་ཆེན་འགྲུབ་པ་མིན། དམ་པ་གསུམ་གྱིས་མ་ཟིན་ཚེ་དགེ་རྩ་ཅི་ཞིག་བསྒྲུབས་ཀྱང་ཐེག་ཆེན་གྱི་ལམ་དུ་མི་འགྲོ། དམ་པ་གསུམ་ནམ་རྒྱུན་བཤད་ཀྱིན་ཡོད་པས་ཚང་མས་ཚིག་ཁ་ཡིས་བགྲང་ཤེས་པས་མི་ཚད་དོན་ཤེས་པ་ཞིག་དགོས། ཚང་མས་དུས་རྒྱུན་དུ་ཀུན་བཟང་བླ་མའི་ཞལ་ལུང་སོགས་ཡང་ནས་ཡང་དུ་ལྟོས། ཡི་གེ་ཤེས་ནི་ཚོས་ཚར་བཅུ་ཉི་ཤུ་ཚར་བརྒྱ་རེ་ལྟ་ཐུབ་མཁན་ཡོད་ན་བཟང་། ཚར་རེ་རེའི་ནང་ན་ཡང་ཡོང་སྒོ་མི་ཉུང་བ་རེ་ཐོབ་རྒྱུ་ཡོད། ཚར་རེ་བཞིན་ཞིབ་ཀྱིས་ལྟོས་མི་གོ་བ་ཡོད་ན་བླ་སེར་ཚོར་དྲིས་དང་། སྒོར་མོ་འབུམ་ཐེར་མང་པོ་བྱིན་ན་མི་ཁུག་པའི་རིན་ཐང་ཅན་གྱི་ཡོང་སྒོ་རང་གི་སེམས་རྒྱུད་ལ་ཐོན་ཡོང་བ་ཡིན། ཐ་ན་རྒྱ་རྒྱ་མོ་ཐམས་ཅད་དེ་རིང་ཁ་རྩང་ངས་ངོ་ཤེས་པའི་ནང་ན་ཡང་ཀུན་བཟང་བླ་མའི་ཞལ་ལུང་ཚར་ཉི་ཤུ་རྩ་ལྔ་ཙམ་བལྟས་ཚར་པ་མང་པོ་ཡོད། བརྒྱ་རེ་ཁས་ལེན་ནི་ཡང་མང་པོ་ཡོད། རྒྱ་ཞིག་ཟེར་དུས་རང་རེས་ཕལ་ཆེར་ཟོག་ཅིག་དང་འདྲ་བ་རྩི་བ་མ་རེད་དམ། བོད་ཆོས་ལྡན་གྱི་ཡུལ་གྲུ་ལ་སྐྱེས་པའི་མི་ཞིག་ཡིན་ཕྱིན་དེའི་ཡན་ཞིག་ཡིན་དགོས། ཀུན་བཟང་ཞལ་ལུང་འདི་ནི་ཆོས་བརྒྱུད་མ་འཆུག་པ་རྫོགས་ཆེན་དཔལ་སྤྲུལ་ཚང་གིས་གསུངས་པ་ཡིན། ངས་བཤད་པའི་སྒྲ་ཐག་ཡོད་རྒྱུ་རེད། དེ་ཚོ་ཡང་མཚམས་རེར་ཉོན་དང་ཕན་ཐོགས་ཅུང་ཟད་རེ་ཡོད་སྲིད། འོན་ཀྱང་ངས་ཚིག་གཞན་པ་བར་དུ་མ་བཙུད་པར་ཤར་འདོན་བྱས་བཞག་པའི་སྒྲ་འཁོར་ཡོད། དེ་བསམ་བཞིན་དུ་ཡིག་ངོ་མི་ཆོད་པ་དང་མིག་མི་གསལ་བ་རྣམས་ལ་ཕན་ཐོགས་པའི་ཆེད་དུ་རྫོགས་ཆེན་གྱི་ས་ཆ་རང་གི་སྐད་བྱས་ཏེ་སྒྲ་བླངས་པ་ཡིན། དེ་ཚོ་ཉོན་དང་རང་གིས་བཏོན་པ་དང་གཅིག་པ་ཡིན། ད་དུང་འདོན་ལུགས་གཅད་སྟངས་ཀྱི་ཚིག་གི་འགྲོས་དང་། བརྡ་ལ་མ་བྱང་བའི་མི་ཞིག་གིས་རང་གི་འདོན་པ་བས་ཀྱང་ད་དུང་གཞན་གྱི་འདོན་པར་ཉན་ན་གོ་ཆེ་བ་ཡིན། ད་ལོ་རང་རེའི་ཁས་ལེན་གྱི་གཙོ་བོ་ཀུན་བཟང་བླ་མའི་ཞལ་ལུང་ཚར་དེ་འདྲ་རེ་ལྟ་ནི་ཡིན་དེ་འདྲ་རེ་ཉན་ནི་ཡིན་ཟེར་རྒྱུའི་ཁས་ལེན་བྱེད་རྒྱུ་བྱེད། དེ་ལྟར་དུ་ཁས་ལེན་ཚང་མ་ཡི་གེར་རྒྱོབ་ཤོག ཀུན་བཟང་ཞལ་ལུང་གི་སྒྲ་ཐག་ཁྱིམ་ནས་སྒྲོགས་དང་སྤྱན་རིས་གཟིགས་དབང་བཤེས་གཉེན་གྱི་ཤ་ཚུགས་སུ་བྱོན་པ་རྫ་དཔལ་དགེ་སྤྲུལ་སྐུ་འཇིགས་མེད་ཆོས་ཀྱི་དབང་པོའི་ཐུགས་སྙིང་རྗེ་ཆེན་པོས་སྨོན་ལམ་དང་བྱིན་རླབས་ཀྱི་མཐུས་ནད་གདོན་བར་ཆད་ཞི། ཚེ་བསོད་དབང་ཐང་དར། ཆོ་ག་འགོ་མེད་རྔ་མེད་ཞིག་མི་རྒོད་བླ་རྒོད་འགའ་ཞིག་བརྒྱག་རྩེད་རྩེ་ཞོར་དུ་འདོན་པ་བས་དེའི་ནུས་པ་ཆེ་ན་མི་ཤེས། ཁྱད་པར་དུ་བཞོན་དཀར་པོ། མི་ཟོག་གི་ཉེར་འཚེ། བྱ་བའི་ལམ་འགྲོ་ཐམས་ཅད་ལ་གོ་གཅིག་ཆོད་ཀྱི་སྐུ་རིམ་དུ་འགྱུར་བར་ཐེ་ཚོམ་མི་དགོས། ད་ཐེངས་ཆོས་ར་འདིར་ཡོད་མེད་ལ་མ་ལྟོས་པར་སྡེ་དགོན་འདིའི་འདི་ཕྱི་སྐྱིད་སྡུག་གི་རེ་ལྟོས་ཀྱི་འོག་ཏུ་ཡོད་པའི་ཆོས་དད་པ་ཞིག་ཡིན་ཕྱིན་ད་ལོའི་ལོ་འདིའི་ནང་དུ་མི་རེས་ཀུན་བཟང་ཞལ་ལུང་ཚར་གསུམ་རེ་མ་མཐར་ཡང་བལྟ་རྒྱུ་ཉན་རྒྱུ་གང་བདེ་ཁས་ལེན་བྱེད་ཐུབ་ན་ཧ་ཅང་བཟང་ངོ་སྙམ། ངས་བཤད་པ་དེ་ཟེར་བ་མིན། དཔལ་སྤྲུལ་ཚང་གིས་གཤིན་རྗེ་སྒྲུབ་ཕུག་ནས་གསུངས་བཞག་པ་དེ་ཟེར་བ་ཡིན། གསོན་འདི་གང་གི་སྐུ་རིམ་དང་མ་ཤི་གོང་གི་སྐྱེ་རྟགས་གཉིས་ཀའི་གོ་ཆོད་པ་ཡིན། འདི་མ་བལྟས་མ་ཉན་ཕྱིན། མཐའ་གྱེན་ལ་མ་སོང་ན་སྡུག་གྱོང་རེད་ཅེས་སེམས་ཅན་བློས་གཏོང་རྒྱུ་ག་ལ་ཡོད། འོན་ཀྱང་མཐར་དགེ་རྩའི་ས་བོན་རེ་དེའི་རྒྱུད་ལ་མི་ཉམས་པར་ཤོག་ཅེས་སེམས་ཅན་ཐམས་ཅད་དང་མཉམ་དུ་སྙིང་རྗེ་སྒོམ་པ་མ་གཏོགས་གཞན་མེད་པ་ཡིན། ཚར་ཉི་ཤུ་རྩ་ལྔ་ཡན་ཆད་ལྟ་བར་ཁས་ལེན་བྱེད་མཁན་གྱི་མི་ལ་དཔའ་དར་གཟེངས་བསྟོད་དང་དགེ་འདུན་འདུས་པའི་དྲུང་དུ་བསྔོ་བ་དང་ཡི་རང་བྱེད་པ་ཡིན། འགའ་རེས་གསལ་པོ་ཞིག་ཐོས་མེད་པའང་ཡོད་སྲིད། ཡང་འགའ་ཞིག་གིས་ཚར་གསུམ་རེ་ཡན་ཆད་ངེས་པར་བལྟོས་གསུངས་པ་དེ་གང་ཡིན་ནམ་སྙམ་པ་དང་། ཡང་ཚར་ཉི་ཤུ་རྩ་ལྔ་བལྟ་དགོས་པ་དེ་གང་ཡིནནམ། ཅི་ཞིག་ལ་བལྟས་ན་དཔའ་དར་ཡོད་ཅེས་ཟེར་གྱིན་འདུག་གམ་སྙམ་མཁན་ཡོད་ན་མི་ཤེས། འགའ་རེས་ཤེས་པར་མ་ཟད་ཐོབ་ཚར་སྟེ་འབུམ་ལྔ་གསོག་བཞིན་ཡོད་པ་མི་ཉུང་བ་རྫོགས་ཆེན་གྱི་མི་སྐྱ་ཕོ་མོའི་ནང་ན་ཡོད། ལྟོས་དང་ཁྱོད་རང་ལ་ཕན་ཐོགས་ཆེན་པོ་ཞིག་ཡོད་ཟེར་བ་དེ་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་ཡིན། མི་ཞིག་གི་མིང་དང་འདྲ་བར་ཀུན་བཟང་བླ་མ་ཞེས་མ་འབོད། ཀུན་བཟང་བླ་མའི་ཞལ་ལུང་ངམ། ཡང་ན་ཀུན་བཟང་ཞལ་ལུང་ཞེས་སྨོས། མཚན་ཆ་ཚང་སྨྲ་དགོས་པ་ཡིན། མི་གཞན་དག་ཞིག་གིས་བལྟས་ན་རྒྱུ་མཚན་ཤེས་པ་ཆོས་ལ་དད་གུས་ཡོད་པ་ཞིག་རེད་སྙམ་ནས་མིག་ལྟོས་ལེགས་པོ་ཞིག་ཏུ་འགྱུར་འགྲོ་བ་ཡིན། རོང་པ་འགའ་རེས་ཁོང་ཚོའི་ཡུལ་གྱི་བླ་མ་འགའ་རེར་ཡ་གི་རིན་པོ། མ་གིའི་རིན་པོ། ཞེས་སྨྲ་མོད། རིན་པོ་ཆེ་ཟེར་གྱིན་ཡོད་དང་། རིན་པོ་ཆུང་ཟེར་གྱིན་ཡོད་ཤེས་ཀྱང་མི་ཤེས། རིན་པོ་ཟེར་བ་ལས་རིན་པོ་ཆེ་ཞེས་སྨྲས་ན་ཚིག་གཅིག་གི་མང་ཉུང་ཅི་ཡོད། བརྡ་གོ་ངེས་པ་རེད། ཀུན་བཟང་ཞལ་ལུང་ལྡེབ་རིང་ལ་ལྟ་རྒྱུར་བདེ་རྒྱུ་མ་རེད། དེ་བས་དེབ་ཅན་སྟབས་བདེ་ཞིང་ཁུར་བདེ་བ་རེད། ཕྱུགས་རྫིར་སོང་ན་རུམ་དུ་བཅུག་ནས་འགྲོ་ཆོག་པ་ཡིན། ལོ་རྒན་གཞོན་ཚང་མས་ཡི་གེ་ཨེ་ཤེས་ལྟོས། ཡི་གེ་སྦྱོང་རྒྱུ་ལ་ངོ་ཚ་དགོས་པ་མ་རེད། དམ་པའི་སྐྱེ་སྤྲུལ་བསམ་བཞིན་དུ་སྲིད་པ་བཟུང་བ་ཐམས་ཅད་ཀྱིས་ཀ་ཁ་ད་གཟོད་སྦྱོང་དགོས་ན། རང་རེ་སོ་སོའི་སྐྱེ་བོས་སྦྱོང་ལོས་དགོས། སྦྱོང་རྒྱུར་ངོ་ཚ་མ་དགོས། མ་སྦྱངས་ན་ངོ་ཚ་བ་ཡིན། ཡིག་རྨོངས་པ་ནི་ས་ཆ་ཡར་ཐོན་ཅན་ཞིག་ལ་མཚོན་ན་ལོ་ལྔ་བཅུ་དྲུག་ཅུ་ཡན་ཆད་ཀྱི་སྐད་ཆ་རེད། རྒ་རྒས་ལོ་ལྔ་བཅུ་དྲུག་ཅུ་ཅན་དང་ལོ་བདུན་བཅུའི་ནང་ན་ཡོད་པ་ཚོས་ཀྱང་ཡི་གེ་སྦྱོངས་དང་ཕྱི་མ་དུད་འགྲོའི་ལུས་ལེན་མི་དགོས་པར་ཕན་པ་ཡིན། སྦྱོང་བ་བྱས་ན་མི་ཤེས་རྒྱུ་ཞིག་ཡོད་པ་མ་ཡིན། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་གསུངས་པ་དང་། མ་བཅུས་བཀོད་མའི་ཆུ་ཡང་ཉམས་འགྱུར་ཞིང་། །བུས་ན་མེ་སྟག་ཕྲ་མོའང་མཆེད་འགྱུར་ལྟར། །བསླབ་ན་སྐད་ཅིག་རེའི་ཡང་བཟང་གོམས་འཕེལ། །བསྐྱུར་ན་སྔོན་གོམས་རྣམས་ཀྱང་བརྗེད་ནས་འགྲོ། །ཞེས་གསུངས་སོ། །དེས་ན་ཀུན་བཟང་ཞལ་ལུང་ཚར་ཅི་ཙམ་རེ་ལྟ་རྒྱུ་ཡིན་པ་ཐམས་ཅད་ཀྱིས་ཁས་ལེན་ཡི་གེ་རེ་གཞུང་ལས་ཁང་དུ་རྒྱོབ་ཤོག དེ་བཞིན་དུ་སྒོ་བཤས་སྤངས་པ་དང་སྒོ་ཟོག་ཚང་མ་ཚེ་ཐར་བྱེད་པ་ཚོས་ཡི་གེ་རྒྱོབ་ཤོག་དང་ཆོས་ར་ཆེན་པོའི་ཚོགས་མང་གིས་ཡི་རང་དང་བསྔོ་སྨོན་གྱིས་རྒྱས་འདེབས་བྱས་ན་དགེ་རྩ་འགྱུར་སྟོབས་ཆེ་བ་ཡིན། ད་ལྟའི་ས་འདི་ད་ལྟའི་མི་ཡིས་བཟུང་ཡོད་པས་རང་ས་ཨེ་བདེ་ཨེ་སྐྱིད་རང་གི་ལག་ན་ཡོད། མི་རང་གིས་བྱས་པས་གནོད་འཚེ་རང་གིས་སྔོན་འགོག་བྱ་དགོས། ཕྱི་འབྱུང་བཞིས་གནོད་འཚེ་དཀོན་མཆོག་གི་ནུས་པས་བཟློག་ཐུབ། ནང་རང་སེམས་འཁྲུལ་བའི་སྤྱོད་ངན་ཆོས་ཀྱིས་བཅོས་ལོས་ཐུབ། རྒ་རྒས་ཐམས་ཅད་ལོ་རྒྱུས་ཀྱི་འཕེལ་འགྲིབ་དང་སྤྱི་ཚོགས་ཀྱི་དར་རྒུད་མང་པོ་ཞིག་གི་ཉམས་སད་ཀྱི་ནང་ནས་མེ་རབ་ཆུ་རབ་བརྒལ་ནས་ཡོང་བ་ཤ་སྟག་ཡིན། ཤེས་པ་རྒྱ་མ་ཆེ་ནའང་མྱོང་བ་གྲངས་མང་བ་ཡིན། ཚེ་ཕྱི་མའི་རི་མགོར་རྒྱང་ལྟ་བྱེད་པ་རྐྱང་རྐྱང་གིས་སྤྱོད་ངན་ཞིག་བུ་ཚ་བོ་ལ་ག་ལ་སློབ། ལོ་ཉུང་རྣམས་ཀྱིས་ཀྱང་འདང་རེ་བརྒྱབ་ན་དགོན་པ་མ་བདེ་ན་སྡེ་བ་མི་བདེ། ཡུལ་དགོན་གད་པ་ལྟག་འོག །བེའུ་ལུག་དཔུང་ཤ་མགོ་འབྲེལ། །ཟེར་བ་ཡིན་ཞིང་། དེ་བཞིན་དུ་སྡེ་པ་སྤྱི་ཁྱབ་མ་བདེ་ན་གང་ཟག་སྒེར་བ་བདེ་རྒྱུ་ཡོད་པ་མ་ཡིན། མཚོ་མ་བདེ་ན་ཉ་སྲམ་ཇི་ལྟར་བདེ། གཞིས་ཕ་ཁྱིམ་མ་བདེ་ན་པང་བུ་རྒྱུད་བདེ་བ་མ་ཡིན། དེས་ན་སྡེ་དགོན་ཡུལ་གང་ཡིན་ཡང་རེ་རེ་མཉམ་དུ་ཚོགས་པའི་ཚོགས་པ་ཞིག་རེད། རང་ཡག་ན་བཟང་ན་བསམ་ནི་ཞིག་མ་གཏོགས་སྡུག་ན་མཐའ་ན་བསམ་པ་ཞིག་སུ་ཡོད། ཡག་ན་བསམ་ན་ཡ་རབས་བཟང་པོ་ལ་སློབས། རྐུ་མ་བྱེད། རྫུན་མ་བཤད། རྒྱུ་འབྲས་དྲང་པོའི་ལམ་ལོངས། གཞན་ལ་ཕན་སེམས་གྱིས། སྐད་ཆ་འཇམ་པོ་ཤོད། མི་གཤིས་ངན་དང་ཐུག་ན་ཁོ་རང་གི་ནང་ཆ་ཕྱིར་དྲུད་ནས་འགྲོ་བཞིན་ཡོད་པས། ཁྱོད་ཀྱིས་དེའི་ངན་པའི་ཁ་མ་སློགས། ངན་པ་འདྲ་འདྲ་ཐུག་དུས། བོང་བུས་འཕྲ་རྡུང་བཀྱེ་ལེ་འདྲ། །ན་ལེ་ཚ་ལེ་གཉིས་ཀ་ཡིན། །གཟེར་ལེ་སྡུག་ལེ་གསུམ་ཁ་ཡིན། ཞེས་པ་ལྟར་རེད། སྐྱེས་པ་ཕོ་ཞིག་ཡིན་ན་ཕོ་ཁོག་དེ་རྨ་ཁོག་འདྲ་ཞིག་དགོས། བརྒྱ་ཤོང་སྟོང་ཤོང་ཞིག ཕོ་སེམས་དེ་རྨ་རྒྱལ་འདྲ་ཞིག་དགོས། བསྒུལ་རྒྱུ་དཀྱོག་རྒྱུ་མེད་པ་ཞིག ཁ་རྐུབ་གཉིས་ཀར་ཐུག་སོང་བ་སྤྲང་པོའི་རྫ་ལུ་དང་འདྲ་བ་ཡིན། ཁ་དང་མཐིལ་ཞེས་པ་ཞིག་མེད་པར་ཤར་སེ་བུད་འགྲོ་བ་ལྕུམ་སྡོང་གི་རང་བཞིན་ལྟ་བུ་ཞིག་མི་རུང་ངོ་། །དེས་ན། མི་ལ་གཏམ་ཡོད་པ། གཏམ་ལ་མནའ་ཡོད་པ། བསམ་ན་སྤྱི་སེམས་མ་གཏོགས་མི་བསམ་པ། སྒྲུབ་ན་སྤྱི་ལས་མ་གཏོགས་མི་སྒྲུབ་པ། མི་ལྷག་བསམ་རྣམ་དག་ཅན་ཞིག་བྱེད་དགོས། མི་དེའི་རིགས་ནི་བྱ་བརྒྱ་འཁོར་སའི་བྲག་དཀར། བྱིའུ་བརྒྱ་འཁོར་སའི་ཚེར་ཕུང་ཟེར་བ་ལྟར་ཡིན། ཚེ་འདིར་བདེ། ཕྱི་མར་སྐྱིད། རང་བདེ་གཞན་སྨོན་ཡིན། ཅི་འདྲ་ཞིག་བྱེད་པར་རང་ལག་ཏུ་ཡོད་པས། བྱ་བ་འཆུག་མི་རུང་། འཇིག་རྟེན་གྱི་བྱ་བ་སྒོར་རྡོག་འགའ་རེས་དོན་དུ་ཅི་ལྟ་བུའི་དཀའ་ལས་ཤིག་རྒྱག་དགོས། ཚེ་འདི་ཕྱི། རང་གཞན་གཉིས་དོན། དམ་པའི་ལྷ་ཆོས་སྒྲུབ་པར་སྙིང་རུས་ཅུང་ཟད་ཅིག་བྱེད་ལོས་དགོས། ཕ་དམ་པ་སངས་རྒྱས་ཀྱིས། སྙིང་རུས་མེད་པའི་མི་ལ་སངས་རྒྱས་དཀོན། །དཀའ་བ་དང་དུ་ལོངས་ཤིག་དིང་རི་བ། །ཞེས་གསུངས་སོ། །ཕོ་ཐ་མས་ཆོས་ཀྱང་མི་འགྲུབ་ལ་འཇིག་རྟེན་ཡང་མི་འགྲུབ། འགྲུབ་མཁན་དེས་ཆོས་འཇིག་རྟེན་གཉིས་ཀ་འགྲུབ། དེས་ན་རང་གི་རང་ལ་འདང་ཞིག་བརྒྱབ་ན་ཚེ་མཇུག་ཐུང་ཐུང་ལུག་གི་རྔ་མ་ཙམ་པོ་དེ་ཇི་ལྟར་བྱས་ཀྱང་ཅིག་རེད་འགྲོ་བ་རེད། ཤིང་མགོའི་བྱ་དང་ས་འོག་གི་བྱི་ལོང་ཚོས་ཀྱང་ཁ་སོས་ནས་འགྲོ་བཞིན་ཡོད་པ་ཡིན། ཐག་རིང་རྒྱུས་མེད་འཇིག་རྟེན་ཕྱི་མའི་ལམ་དུ་གཅིག་པར་འགྲོ་དུས་ཅི་ཞིག་གིས་དགའ་འདུག་ཟེར་ས་ཙམ་ཡང་མེད། དེའི་འདང་ད་ནས་ཕོག་དགོས། ཚེ་འདི་ཕྱི་གང་ལ་བསམ་བློ་བཏང་ན་ཅི་དཀའ་གང་དཀའ་རེད་རྐྱང་རྐྱང་སྙམ་སྟེ་སེམས་བསམ་པའི་མུན་མགོ་རུབ་ཀྱིན་བསྡད་པ་ཙམ་གྱིས་དེའི་ངང་དུ་ཅི་ཡང་མི་འགྲུབ་པར་ཤི་འགྲོ་བ་ཡིན། དེ་བས་ད་ནས་དགེ་སྡིག་བླང་དོར་རེ་འཛེམ། ཡ་རབས་ཀྱི་མི་ལུགས་དང་དམ་པའི་ལྷ་ལུགས་ལ་སེམས་ཁ་ཕྱོགས་ཏེ་འབད་པ་རེ་བྱས་ན། དགེ་བ་སྣ་རེ་ཡིན་ཀྱང་སོགས་ནས་ཤེས་རྒྱུད་ཆོས་ཀྱིས་གང་སྟེ་ཕྱི་མར་སྐྲག་མི་དགོས་པ་ཞིག་འགྱུར་རྒྱུ་བྱེད་རྒྱུ་གཉིས་ཀ་ཡོད། དེའི་རིག་ལ་ས་ཆ་འདིའི་ཁ་སྐད་བྱས་ན་ཤི་སྐྲག་གསོན་སྐྲག་ཟེར་བ་ཡིན། གནའ་སྔོན་མ་རྫོགས་ཆེན་པའི་མི་བཟང་པོ་འཇིག་རྟེན་བསྒྲུབས་ནས་གྲགས་པ་ཐོབ་མཁན་ཚོ་མང་ཆེ་བ་ལོ་ཚོད་གང་འཚམས་ལ་ཐོན་དུས་འཇིག་རྟེན་བློས་བཏང་སྟེ་རི་ཁྲོད་དུ་སོང་ནས་ཆོས་པ་རྣམ་དག་བྱེད་འགྲོ་བ་མང་པོ་ཡོད་པ་ཡིན། ལོ་ན་རྒན་གཞོན་མི་རབས་སྔོན་རྗེས་ཀྱི་སྟེང་ནས་ངེད་ཚོ་གནའ་མྱི་འགྱུར་བཞིན་ཡོད། ཁྱད་པར་དུ་རྫོགས་ཆེན་ཚང་གི་བསྟན་པའི་ངོས་ནས་མ་ཡིག་གསོན་པོ་ཞིག་ཡིན་ལ། དེ་ལོ་འབྲོག་རུའི་ས་གྱོད་ཐུག་པའི་སྐབས་སུ་ཐེངས་མང་པོར་མི་རྡུང་ཁྱི་རྡུང་བྱེད་ཀྱིན་ཡོད་དུས་ང་ཤྲཱི་སེང་དུ་མཚམས་ལ་བསྡད་ཡོད་སྐབས་ཤིག་ཡིན། ཉིན་ཞིག་ལ་རང་སྐྱོང་ཁུལ་གྱིས་ཛ་དྲག་གི་བརྡ་ཡིག་ཅེས་པ་ཞིག་ཐོན་ནས་གནངས་ཉིན་དར་རྩེ་མདོ་ལ་ཐོན་པར་གྱིས་ཤེས་སྨྲས་སོང་། གནངས་ཉིན་ལ་ཐོན་མ་སོང་། རྗེས་སུ་མཚམས་སྔ་གྲོལ་བྱས་ཏེ་སོང་བ་ཡིན། སོང་དུས་ཁྲིམས་སྲིད་ཀྱི་སྐད་ཆ་ལྗིད་མོས་གནོན་ཤུགས་སྤྲད་འདུག ངས་སྨྲས་ཏེ་རྫོགས་ཆེན་ནས་ལྡིར་སྒྲ་ཆེན་པོ་ཞིག་གྲག་ན་ང་ཡིན་སྣང་ཤར་གྱིན་མ་འདུག་མ་གཏོགས་ང་མ་ཆགས་གོང་ནས་རྫོགས་ཆེན་ཆགས་ཡོད། ཅེས་བཤད་པ་ཡིན། དེ་སྨྲས་པ་ལྟ་བུ་ས་འདིའི་ཐོག་གི་གནས་ཚུལ་ཚང་མའི་འཇིག་རྟེན་བྱེད་པོ་ང་མ་ཡིན་མོད། བླ་རབས་གཉིས་ཀྱི་བསྟན་སྲིད་ཀྱི་མ་ཡིག་ངོ་མ་ཡིན་ལ། དེ་ཟེར་དུས་མིའི་སྐད་ཆ་ཞིག་བཤད་ཚད་པོ་རང་བསྟོད་གཞན་སྨོད་ཁོ་ན་ཡིན་ཞིང་། ཕོ་བྱས་རབས་བཅོ་བརྒྱད་བཀད་རབས་ལོས་ཡིན་བསམས་ན་མ་ཡིན། སོ་སོའི་སྐྱེ་བོའི་ལས་ཀ་ཚང་མ་ལོང་རྙབ་ཡིན་པ་རེད། ནོར་བ་ཅི་འདྲའི་མི་མང་། གཞན་དབང་ལ་སོང་། རྐྱེན་དབང་དུ་ཤོར་བ་དེ་བས་ཡོད་པ་ཡིན། ཡིན་ནའང་དམ་པ་གོང་མའི་ཐུགས་བསྐྱེད་སྨོན་ལམ་དང་རྫོགས་ཆེན་ཚང་གི་ལྷ་དང་ཆོས་སྐྱོང་ཁ་དང་ལག་པར་འབྲལ་མ་མྱོང་ཟེར་ན་ཆོག མཚམས་རེར་མིའི་ལས་ཉེས་ལ་ལྷ་ཡིས་བཀའ་བཀྱོན་དང་ཉེས་རྡུང་ལུས་ཐོག་ཏུ་རིག་རིག་བལྟས་བལྟས་ལ་ཡོང་མྱོང་། ཡིན་ནའང་ལྷག་བསམ་གྱི་ཐད་ནས་ཕྱི་བཀྱེད་བྱས་མེད་བསམ་རྒྱུ་དེ་དམ་པ་གོང་མ་ཚོ་དང་ཞལ་མཇལ་ཕོད་རྒྱུ་དེ་ཉིད་སེམས་གཏིང་ཞེ་ན་ཡོད་པ་གཅིག་པུ་དེ་རེད། དེ་འདྲ་བྱས་ནས་བཤད་ཡོང་དུས་བསྟན་སྲིད་ཆགས་འཇིག་དང་ལོ་རྒྱུས་ཀྱི་གནས་ཚུལ་རྒས་པ་ལོ་ལོན་ཚང་མས་ལོས་ཤེས་སྙམ་ན། དེ་ལ་ཕྱི་ནང་གསང་གསུམ་མང་པོ་ཡོད། ནང་དང་གསང་བའི་གནས་ཚུལ་ང་མ་གཏོགས་མི་ཤེས་པ་མང་པོ་ཡོད། འགའ་རེ་ཁྱེད་རྣམས་ཀྱིས་གོ་ན་ཧ་ལས་ཤིང་བསམ་ཡུལ་ལས་འདས་པ་ཡང་ཡོད་སྲིད། གང་ལྟར་ཡང་མདོར་ན་བུ་བཟང་ན་མི་ཚེ་ཆོས་ཀྱིས་སྐྱེལ་དགོས་པ་ཡིན། གྲོགས་དམ་པའི་ལེགས་བཤད་ཀྱི་བཟང་ཞིག་དང་མཐར་ཐུག་ཐོན་ས་ཐར་བའི་གྲོང་ཁྱེར་གྱི་དགའ་ཞིག་མེད་པས་དེ་ལ་བསྙེག་དགོས། དེ་མིན་ཅི་ལས་གང་བསྒྲུབས་ཐམས་ཅད་འཁྲུལ་བ་ཡིན། འཁྲུལ་བ་ཤ་སྟག་གི་ནང་དུ་འཁྲུལ་འགྲོ་བཞིན་ཡོད། འཁྲུལ་དེའི་ནང་དུ་ད་འཁྱམ་མི་རུང་། རང་རེའི་ལུང་བ་ལྷ་ལུང་བྱེད་དགོས། མི་ལྷ་མྱི་བྱེད་དགོས། ཕོ་ཐམས་ཅད་འཕགས་པའི་དགེ་བསྙེན་དང་མོ་ཐམས་ཅད་ཆོས་ཀྱི་ལྷ་མོ་རང་གིས་བྱེད་ཆོག མི་ཐམས་ཅད་ཆོས་པར་འགྱུར། འཇིག་རྟེན་ཡང་དག་གི་ལྟ་བ་ལ་དད། ཡ་རབས་སྤྱོད་བཟང་གི་རང་རྒྱུད་དུལ་ཡོང་དུས། ཁ་ལས་ཀླུང་རྟ་བྱ་བ་ལམ་འགྲོ་རང་ཤུགས་ཀྱིས་ཐོན་ཡོང་བ་ཡིན། དེའི་སྐབས་སུ་སྲུང་མ་ལྷག་ཏུ་མ་མཆོད་ནའང་དཀར་ཕྱོགས་སྐྱོང་བའི་ལྷ་སྲུང་གིས་ཁ་མགོན་སྡོང་གྲོགས་རང་ཤུགས་ཀྱིས་མཛད་ཡོང་བ་ཡིན། དེ་ལས་གཞན་བྱ་བ་སྡུག་རིགས་སྡུག་ཚད་དང་རྒྱུ་འབྲས་ཉི་མ་རེ་རེ་བཞིན་སྣོག་བཞིན་སྡོད་དང་སྲུང་མ་གཤེད་དུ་བབས་ནས་མི་འདོད་སྣ་དགུ་ཉོས་བསྡད་པ་འདྲ་ཞིག་ཐོག་ཏུ་ཐོན་ཡོང་བ་ཡིན། དེའི་སྐབས་སུ་རྒྱབ་ཆོག་ཅིག་གློ་བུར་དུ་བརྒྱབ། འུ་ཐུག་དུས་གཞན་ལ་དྲིས། ཤི་རན་དུས་གཟེར་བརྩེགས་པ་ཞིག་གིས་ཕན་ཐོགས་ཆུང་བ་ཡིན། ཆོས་ཉན་དུས་ཉན་ལུགས་ཤེས་དགོས། དད་དང་གུས་པས་ཉན། རང་ལ་ནད་པ། ཆོས་ལ་སྨན། བླ་མར་སྨན་པ། ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་ལ་སོགས་པ་མདོ་སྡོང་པོ་བཀོད་པའི་ལུང་དོན་ལྟར་དུ་བྱས་ན། རིན་པོ་ཆེའི་གཏེར་ཁ་ཆེན་པོ་ཞིག་གི་སྒོ་ཕྱེས་ནས་བསྡད་ཡོད་ས་ཞིག་ལ་ཐོན་སོང་བ་འདྲ་ཞིག་ཡིན། ཆེ་ཐུབ་ཆེ་ཡིས་འཚེངས། ཆུང་ཐུབ་ཆུང་གིས་འཚེངས། མདོར་ཆེ་ཆུང་མ་གཏོགས་ལག་སྟོང་དུ་འགྲོ་དགོས་པ་མ་རེད། ཆོས་ཞུ་ལུགས་མ་ཤེས་ན་སྨན་དུ་མ་སོང་དུག་ཏུ་སོང་ནས་ཆོས་ཀྱིས་སླར་ངན་སོང་དུ་འགྲོ་བའི་རྒྱུ་བྱེད་པ་འང་ཡོད། དེས་ན་འགོ་ནས་བཤད་པའི་ཀུན་སློང་བྱང་ཆུབ་ཀྱི་སེམས་ཀྱིས་ཟིན་པ་སྤྱི་དང་། ཁྱད་པར་དུ་ལེགས་སྨོན་དང་འཇིགས་སྐྱོབས་སོགས་མ་ཡིན་པ་ཞིག་གིས་སྙིང་ནས་ཐར་བ་དོན་གཉེར་གྱི་བློ་དང་ཀུན་སྤྱོད་བཟང་པོ་ཕ་རོལ་ཏུ་ཕྱིན་པ་དྲུག་ཚང་བ་ཞིག་བྱས་ཏེ་ཉན་དགོས། དེ་ལ་གང་ཞིག་གསན་པར་བྱ་བ་རྣམ་དག་བདེ་ཆེན་ཞིང་གི་སྨོན་ལམ་ཡིན། འདི་ལ་ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་འཇུག་གི་དོན་དང་གསུམ་ལས་ཀླད་ཀྱི་དོན་སོང་ནས་གཞུང་དོན་ཡིན། གཞུང་དོན་དེ་ལ་ཡང་ས་བཅད་ཆེན་པོ་གསུམ་གྱིས་ཆིངས་ཀྱི་བཅིངས་པའི་ནང་ནས་དང་པོ་བདེ་བ་ཅན་དུ་སྐྱེ་བའི་རྒྱུ་བཞི་འུ་ཚོས་སྡོམ་ཚིག་བྱས་ན། རྟེན་རྒྱུ་གྲོགས་རྐྱེན་བྱས་ནས་གོ་བརྡ་འཕྲོད་བྱེད་དུ་བཤད་བཞིན་ཡོད། དེའི་ནང་ནས་རྟེན་ཚོགས་ཞིང་གསལ་འདེབས་པ་སོང་ནས། གཉིས་པ་རྒྱུ་དགེ་རྩ་དཔག་དུ་མེད་པ་སྒོ་དུ་མ་ནས་གསོག་པ་འཆད་པའི་སྐབས་སུ་རེད། དེ་ལ་ཡང་ནང་གསེས་ཀྱི་དབྱེ་བ་དྲུག་ཡོད། དྲུག་པོ་དེ་གང་ཡིན་ཞེ་ན། ཡན་ལག་བདུན་པའི་ནང་གི་བསྔོ་བ་མ་གཏོགས་པ་དེའི་སྔོན་གྱི་ཡན་ལག་དྲུག་པོ་དེ་ཡིན། བསྔོ་བ་ས་བཅད་སོ་སོར་བྱས་ནས་བདེ་བ་ཅན་དུ་སྐྱེ་བའི་རྒྱུ་བཞིའི་བཞི་བ་དེ་ཡིན་ལ། དེའི་རྐྱེན་གྱིས་ཟུར་དུ་བཤད་པ་ཡིན། དེ་ལྟར་ཡན་ལག་དྲུག་གི་ནང་ནས་ཁ་སང་ཡན་ཆད་ངེད་ཚོས་ཕྱག་འཚལ་བ་སོང་ནས། དེ་རིང་མཆོད་པ་འབུལ་བའི་ཡན་ལག་ཡིན།

གཉིས་པ་མཆོད་པ་འབུལ་བའི་ཡན་ལག

བདག་གི་ལུས་དང་ལོངས་སྤྱོད་དགེ་རྩར་བཅས། །དངོས་སུ་འབྱོར་བའི་མཆོད་པ་ཅི་མཆིས་པ། །ཡིད་སྤྲུལ་བཀྲ་ཤིས་རྫས་རྟགས་རིན་ཆེན་བདུན། །གདོད་ནས་གྲུབ་པ་སྟོང་གསུམ་འཇིག་གྱི། །གླིང་བཞི་རི་རབ་ཉི་ཟླ་བྱེ་བ་བརྒྱ། །ལྷ་ཀླུ་མི་ཡི་ལོངས་སྤྱོད་ཐམས་ཅད་ཀུན། །བློ་ཡིས་བླངས་ཏེ་འོད་དཔག་མེད་ལ་འབུལ། །བདག་ལ་ཕན་ཕྱིར་ཐུགས་རྗེའི་སྟོབས་ཀྱིས་བཞེས། །ཞེས་གསུངས་ཏེ། མཆོད་པ་འབུལ་བའི་ཡན་ལག་ཚིག་དེ་དག་གིས་བསྟན་ལ། འདི་ལ་དབྱེ་ན། དངོས་སུ་འབྱོར་བའི་མཆོད་པ་། ཡིད་ཀྱིས་སྤྲུལ་བའི་མཆོད་པ། གདོད་ནས་གྲུབ་པའི་མཆོད་པ་དང་གསུམ་གྱི་ཐོག་ནས་གསུངས་བཞིན་ཡོད་པ་ཡིན། དེའི་ནང་ནས་དང་པོ་དངོས་སུ་འབྱོར་བའི་མཆོད་པ་སྟེ། བདག་གི་ལུས་དང་ལོངས་སྤྱོད་དགེ་རྩར་བཅས། །དངོས་སུ་འབྱོར་བའི་མཆོད་པ་ཅི་མཆིས་པ། གསུངས་པའི་ཚིག་རྐང་གཉིས་ཀྱིས་བསྟན། མི་སྐྱ་ཕོ་མོ་རྣམས་ཀྱིས་ཚིག་རྐང་དང་ཤོ་ལོ་ཀ་ཟེར་རྒྱུ་དེ་ཚོ་ཅི་ཞིག་ལ་ཟེར་བ་ཡིན་མི་ཤེས་སྙམ་ན་མི་ཤེས་མོད། བདག་གི་ལུས་དང་ལོངས་སྤྱོད་དགེ་རྩར་བཅས་གསུངས་པ་ལྟ་བུའི་ཚིག་ལྷུ་རེ་ནི་རྐང་པ་རེ་འོ། །དེ་འདྲ་བཞི་ཚང་པ་ནི་ཤོ་ལོ་ཀའོ། །ཚིག་བཞི་བའི་ཚིགས་སུ་བཅད་པ་གཅིག་ཅེས་ཀྱང་བརྗོད་ཆོག དེ་འདྲ་མང་པོ་ཕྱོགས་སྡོམ་བྱས་པ་ལ་བམ་པོ་དང་ལེའུ་ལ་སོགས་པའི་ཆོས་ཚན་དུ་ཕྱེ་བཞིན་ཡོད་པ་ཡིན། བདག་གི་ལུས་དང་ལོངས་སྤྱོད་དགེ་རྩ་གསུམ་པོ་འདི་ལ་ཡོངས་སུ་བཟུང་བའི་གཞི་གསུམ་ཞེས་བྱ། ཡོངས་སུ་བཟུང་བའི་གཞི་གསུམ་ཞེས་པའི་དོན་ཞེ་ན། བདག་གིར་འཛིན་བྱ་དཔེར་ན་ངའི་ཡིན་ཞེས་བརྗོད་ཚེ་དངོས་པོ་ཐམས་ཅད་ཀྱི་འགོར་ངའི་ཞེས་པའི་ཚིག་ཅིག་གམ་བདག་ཅེས་པའི་ཚིག་སྦྱར་ཏེ་ཚིག་གི་འགོ་གླེང་དུས་ནས་དམ་ཤར་རེ་བ། དེ་ཁྱོད་ཀྱི་རེད། འདི་ངའི་རེད་ཅེས། ངའི་ཞེས་པའི་ཚིག་གིས་གསལ་ཤག་ཤག་བྱས་ཡོད། བདག་གི་ལུས་པོ་འདི་ཡི་གཅེས་ཤིག་དང་དམར་ཞིག་མེད། འདི་ཁོ་ནའི་དོན་དུ་བདེ་ཐབས་སྐྱིད་ཐབས་གཉིས་ཀ་མི་ཐོན་པས། ལུས་བེམ་པོ་ཞིག་ཡིན་ཡང་སེམས་ཀྱིས་དེ་ལ་བདག་བཟུང་བྱས་པས་བེམ་ཤེས་འབྲེལ་ནས་ཤ་ཁྲག་དྲོད་དབུགས་ཀྱི་བདག་ཉིད་ཅན་དུ་གྲུབ་ཡོང་བ་ཡིན་པས། འདིར་འདང་ཆེན་བྱེད་པའི་གཙོ་བོ་ལྟ་བུ་ནི་ལུས་འདི་ཡིན། དེ་ལ་དགོས་པའི་མཁར་ཁང་པ། རྒྱན་ཅ་ལག ཆས་གོས་ཡོ་བྱད། རྟ་ནོར་ལུག་གསུམ། གསེར་དངུལ་ལ་སོགས་པ་རིན་ཆེན་གྱི་རིགས་གང་ཡོད་ཀྱང་མི་མཁོ་རྒྱུ་ཞིག་ཡོད་པ་མ་ཡིན། མི་འདོད་ཆེན་ཞིག་གིས་གཞན་གྱི་ལག་ན་རྡོ་རིལ་རིལ་ལེགས་པོ་ཞིག་ཡོད་ཀྱང་དེ་དེའི་ལག་ནས་ཨེ་ལོན་བལྟས་ཏེ་བེད་སྤྱོད་ཅི་ཡང་མེད་ཀྱང་ཉར་ཚགས་བྱེད་འདུག་པ་ཡོད། ཡོད་པོའི་གསེར་དངུལ་རྟ་ཟོག མེད་པོའི་རས་ཁ་དར་མཆུ། ཅི་ཡང་མེད་ཀྱང་དྲ་རས་སྐུད་པ་ཡན་ཆོད་བསྡུས་ནས་ཙིག་ཚང་གསོག་གསོག་བྱེད་པ། བདག་འཛིན་གྱིས་མི་གཏོང་བའི་ལོངས་སྤྱོད། བདག་འཛིན་གྱིས་ང་དང་ངའི་ཟེར་འདུག་ཡུལ་དེ་ནི། ལུས་དང་ལོངས་སྤྱོད་གཉིས་ཀ་ཡིན། དེའི་སྟེང་དུ་ཅུང་ཙམ་རིན་ཐང་ཅན་ཞིག་ཡོད་པ་དེ་གང་ཞེ་ན། དུས་གསུམ་དུ་བསགས་པའི་དགེ་ཚོགས་དགེ་བའི་དངོས་པོ་སྟེ། ཆེ་ས་ནས་བྱང་ཆུབ་མཆོག་ཏུ་སེམས་བསྐྱེད་དེ་རྫོགས་སྨིན་སྦྱོང་གསུམ་བྱས་པ། བསྐྱེད་རྫོགས་བཟླས་བརྗོད། དཀོན་མཆོག་ལ་མཆོད་པ། སེམས་ཅན་ལ་སྦྱིན་པ་རླབས་ཆེན་བཏང་བ། འབྲིང་ས་ནས་སྲོག་བསྐྱབས་པ། ཚུལ་ཁྲིམས་སྣ་རེ་ཡན་ཆད་བསྲུངས་བ། གཞན་དགེ་བར་བསྐུལ་བ་ལ་སོགས་པ་དང་། ཆུང་ས་ནས་བསམ་པ་བཟང་པོ་ཙམ་དང་། དགེ་སེམས་སྐད་ཅིག་མ་རེ་སྐྱེས་པ་ཡན་ཆད་ཀྱི་དགེ་ཚོགས། མདོར་ན་ཡོངས་སུ་བཟུང་བའི་གཞི་གསུམ་པོ་དེ་དང་། ད་དུང་དངོས་འབྱོར་གྱི་མཆོད་པ་སྟེ། མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་ཕྱི་ནང་གསང་བའི་རིགས་སུ་གྱུར་བའི་དངོས་པོ་རང་ཉིད་ཀྱིས་འཛོམས་ཚོད་ནུས་ཚོད་ཀྱིས་མཆོད་པ་འབུལ་དགོས། ཁ་ལག་གཙང་མས་མཆོད་པ། །ཁ་སེམས་དཀར་པོས་རྒྱས་འདེབས། །ཟེར་བ་རེད་མོད། འབྱོར་འཁོའི་ཆེ་ཆུང་དང་རྒྱུ་ཤེད་ཆེ་ཆུང་ཞིག་མ་རེད། བསམ་པ་རྣམ་པར་དག་ན་མཆོད་པ་རྣམ་པར་དག་པ་ཡིན། བསམ་པ་རྣམ་པར་མ་དག་ན་མཆོད་པ་རྣམ་པར་མ་དག་པ་ཡིན། མཆོད་པ་འབུལ་བ་ནི་སེར་སྣའི་གཉེན་པོ་ཡིན། མཆོད་པ་རྣམ་པར་དག་མ་དག་ནི། གཙོ་བོ་སེར་སྣ་ཡོད་མེད་ལ་ཐུག རྒྱལ་བ་སྲས་བཅས་ལ་ངེད་ཚོའི་ལུས་མི་གཙང་བའི་རྫས་སོ་དྲུག་གི་རྐྱལ་བ་འདི་དང་། ལོངས་སྤྱོད་འབའ་འབུལ་ལྷག་ལྷོག་འདི་དག་ནི་རྒྱལ་བ་སྲས་བཅས་ལྟ་ཅི་མི་གཙང་སྦྲ་ཅན་ཞིག་གིས་ཀྱང་ཕྱི་ལྟས་བྱེད་ས་མི་འདུག་བསམ་པ་འདྲ་ཞིག་དང་། དགེ་ཚོགས་རྣམ་དག་ནི་ཉིན་མོའི་སྐར་མ་ལྟ་བུ་དང་། དེའི་སྟེང་དུ་མཆོད་བཤམ་བྱིས་པའི་རྩེད་མོ་རྩེ་བྱེད་འདྲ་བ་ཞིག་ཡོད་པ་འདི་ལྟ་ཅི། སྟོང་གསུམ་རི་རབ་གླིང་བཞིའི་ལྷ་མིའི་ལོངས་སྤྱོད་ཕུལ་ནའང་། གསེར་དང་བོང་བ་མཉམ་པའི་འཕགས་མཆོག་ལ། །གླིང་བཞིའི་ཕུན་ཚོགས་བསྟབས་ཀྱང་ཅི་བགྱི་སྟེ། །གསུངས་པ་ལྟར། ཆགས་བྲལ་འཛིན་པ་དང་བྲལ་བའི་སྟབས་ཀྱིས་རྒྱལ་བ་སྲས་བཅས་ལ་མཁོ་ཉག་ཡོད་པ་མ་ཡིན། རང་གི་བསོད་ནམས་གསོག་པའི་ཆེད་དུ་རང་ཉིད་གང་ལ་དགའ་བའི་དངོས་པོ་ཡོངས་སུ་གཟུང་བའི་གཞི་གསུམ་གྱི་གཞི་བྱས་ཏེ་འབུལ་གྱིན་ཡོད་པ་ཡིན། གུ་རུ་རིན་པོ་ཆེ་བོད་ཡུལ་དུ་འབྱོན་རྩིས་བྱེད་དུས་བོད་ཀྱི་བློན་པོ་ཚོས་གསེར་ཕུལ་ཚེ། གུ་རུ་རིན་པོ་ཆེས་གནམ་ལ་གཏོར་དུས་བོད་ཀྱི་བློན་པོ་རྣམས་ཀྱིས་སེར་སྣ་ཤོར་བ་ཡིན། སེར་སྣ་ཤོར་བཞིན་ཡོད་པ་མཁྱེན་ནས་ཐུ་བ་བཟེད་གསུངས་ཏེ་ཟུར་ནས་ས་རྡོ་ཕྱག་སྤར་གང་རེ་བླང་སྟེ་གནང་ཡོང་བ་ཚུར་ཡོང་ནས་བལྟས་པས་གསེར་དུ་གྱུར་ནས་ཡོད། མེད་པོས་མེད་ཟེར་ནས་བལྟས་འདུག་རྒྱུ་ཡོད་པ་མ་ཡིན། དེ་སྔོན་མཆོད་སྦྱིན་མ་ཐུབ་པའི་དབུལ་པོའི་ལུས་བླངས་པས་ད་དུང་བསོད་ནམས་མ་བསག་ན་རྗེས་སུ་དེས་ཀྱང་སྡུག་ཅིག་འགྱུར་ངེས་པ་ཡིན། མཆོད་པའི་ཡོ་བྱད་རྒྱ་ཆེན་པོ་མེད་ནའང་སེམས་དག་པ་ཞིག་ཡོད་ན་ཆུ་གཙང་མ་ཡན་ཆད་འབུལ་ཆོག་པ་ཡིན། གནའ་ཡུལ་ཞིག་ན་ཁྱིམ་བདག་ཕྱུག་པོ་ལོངས་སྤྱོད་ཆེན་པོ་ཅན་ཞིག་ལ་གཡོག་མོ་རྒ་རྒས་ཞིག་ཡོད། ཁྱིམ་ཚང་རྒྱུ་ཆེ་ལ་སྙིང་རྗེ་མེད་ཅིང་སེར་སྣ་ཆེ་བ་ཞིག་ཡིན། གཡོག་མོས་ལས་ཀ་ལྕོགས་ཚོད་ནུས་ཚོད་ཀྱིས་ལས་བཞིན་ཡོད་ཀྱང་ཟས་ཟ་མ་ཡག་པོ་མི་སྦྱིན། གོས་གྱོན་རྒྱུ་ལེགས་པོ་མི་སྐོན། ད་དུང་དེའི་སྟེང་དུ་རྡུང་ངན་རྒྱག་བཙོག་ཁོ་ན་བྱས་ནས་སྡུག་བཀོལ་གྱིན་ཡོད། ཉིན་ཞིག་རྒན་མོས་སྡུག་བསྔལ་མ་བཟོད་པར་རང་སྲོག་གཅོད་དགོས་སྙམ་ནས་ཆུ་ལེན་སྣོད་ཀྱི་བུམ་པ་ཁྱེར་ཏེ་ཆུ་ལེན་དུ་སོང་བ་རེད། ཆུ་ཁར་ཐོན་ཏེ་ངུས་ནས་བསྡད་པར་འཕགས་པ་ཀ་ཏ་ཡ་ན་དེར་བྱོན་ནས་ཁྱོད་ཅིའི་ཕྱིར་ངུ་ཞེས་གསུངས་པས། མོ་རང་གིས་ལོ་རྒྱུས་ཐམས་ཅད་ཞུས་པས་འཕགས་པས་རྒན་མོ་ལ་ཁྱོད་ཀྱི་དབུལ་བའི་སྡུག་བསྔལ་རྣམས་བཙོང་མི་འཇོག་པར་ཅི་བྱེད་པ་ཡིན་གསུངས་དུས་རྒན་མོས་སུས་ཉོ་རྒྱུ་ཡིན། ཇི་ལྟར་བཙོང་དགོས་པ་རེད་ཞུས་ཏེ་ཡང་ངུ་བཞིན་བསྡད་པར། འཕགས་པས་གསུངས་པ། དབུལ་བ་ད་ལྟ་ད་ལྟ་བཙོང་ཆོག་པ་རེད། ཁྱོད་རང་གིས་ཁ་ལག་གཙང་མའི་ཁྲུས་ཞིག་བྱས་ནས་སྦྱིན་པ་ཐོང་གསུངས། རྒན་མོས་མོ་ལ་སྦྱིན་པ་གཏོང་ཡོང་རྒྱུའི་རྒྱུ་ལྷན་པ་མཁྲང་པོ་ཞིག་ཀྱང་མེད། ཆུ་ཁུར་སྣོད་ཀྱི་བུམ་པ་འདི་ནི་བདག་པོ་ཚང་གི་རེད་ཞུས་ཚེ། འཕགས་པས་ཁྱོད་ཀྱིས་ལྷུང་བཟེད་འདིར་ཆུ་གཙང་མ་ཞིག་བཅུས་ནས་ང་ལ་ཕུལ་དང་ཁོང་གིས་སྦྱིན་པའི་ཚིགས་སུ་བཅད་པ་ཞལ་འདོན་མཛད་གསུངས། རྒན་མོས་འཕགས་པས་གསུངས་པ་ལྟར་ཆུ་ཕུལ་བས། འཕགས་པས་སྦྱིན་པའི་ཚིགས་བཅད་གསུངས་ནས་ད་དུང་དེའི་སྟེང་དུ་བསླབ་ཚིག་གི་ཐོག་ནས་བསླབ་པ་གནང་སྟེ་སངས་རྒྱས་ཀྱི་མཚན་བསླབས་ཏེ་མཚན་བརྗོད་དུ་བཅུག སངས་རྒྱས་ཀྱི་མཚན་བཏོན་པའི་ཡོན་ཏན་དང་བསྔགས་བརྗོད་མཛད་དེ་རྒན་མོ་ཁྱོད་འདུག་སའི་ཁང་པ་ཅི་འདྲ་ཡོད་གསུངས་ཚེ། རྒན་མོས་མོ་ལ་འདུག་ས་ཞིག་ཡོད་པ་མ་ཡིན། ཁུག་ཀྱོག་གང་ན་ཡོད་ན་དེ་ན་ཉལ་འདུག་གི་ཡོད། མཚམས་མཚམས་ལ་ལུད་ཕུང་དེ་འདྲའི་སྟེང་དུ་ཉལ་འདུག་གི་ཡོད་ཞུས་པ་ཡིན། འཕགས་པས་ཁྱོད་རང་ཕྱིར་ལ་སོང་། སྔར་བཞིན་དུ་ལས་ཀ་ལས། མི་དགའ་བའི་སྣང་བ་མ་བྱེད། བདག་མོ་ཉལ་ཚར་དུས་ག་ལེར་སྒོ་ཕྱེས་ཏེ་དོ་དགོང་ཁྱོད་བདག་མོའི་ཁང་པའི་སྒོའི་ཕག་ཏུ་རྩྭ་གཙང་མ་ཞིག་བཏིང་ནས་དེར་གཞན་ཅི་ཡང་མ་དྲན་པར་སངས་རྒྱས་ཡིད་ལ་དྲན་བཞིན་དུ་ཉོལ་ཞིག་ཅེས་གསུངས། རྒན་མོས་འཕགས་པས་གསུངས་པ་ལྟར་བདག་མོ་ཉལ་ཚར་དུས་ག་ལེར་འཇབ་ནས་སྒོ་ཕྱེས་ཏེ་སྒོ་ཕག་ཏུ་རྩྭ་གཙང་མ་ཞིག་བཏིང་སྟེ་དེའི་སྟེང་དུ་སངས་རྒྱས་ཡིད་ལ་བྱས་ཏེ་ཉལ་བསྡད་པ་ཡིན། དེའི་དགོང་མོར་རྒན་མོ་ཚེ་འཕོས་ཏེ་སུམ་ཅུ་རྩ་གསུམ་གྱི་ལྷ་ཡུལ་དུ་ལྷས་སྲས་མོ་ཞིག་ཏུ་སྐྱེ་བ་བླངས། ཕྱི་ཉིན་བདག་མོ་ཡར་ལང་དུས་གཡོག་མོ་རྒན་མོ་ཁོ་རང་གི་ཁང་པའི་ནང་དུ་ཤི་ཡོད་པ་མཐོང་བས། ཁོང་ཁྲོ་བཞིན་སྡིགས་མོ་བྱེད་ཞོར་དུ་རྐང་པར་ཐག་པ་བཏགས་ནས་དུར་ཁྲོད་ཀྱི་ནང་དུ་དྲུད་འགྲོ་དགོས་ཐུག་སོང་པ་ཡིན། སྤྱིར་ལྷ་ཡུལ་དུ་སྐྱེས་པའི་དབང་པོ་རྣོན་པོ་རྣམས་ཀྱིས་ནི་རྐྱེན་ཅི་ཞིག་གིས་ལྷ་ཡུལ་དུ་སྐྱེས་པ་ཡིན་ཤེས་པ་ཡིན། དབང་པོ་རྟུལ་པོ་རྣམས་ཀྱིས་ནི་མི་ཤེས་སོ། རྒན་མོ་ལྷ་ཡུལ་དུ་སྐྱེས་ཀྱང་དབང་པོ་རྟུལ་པོ་ཡིན་པས་ལྷའི་བདེ་བར་ཆགས་ནས་འདུག་པ་མ་གཏོགས་རྒྱུ་རྐྱེན་ཅི་ཞིག་གིས་ལྷ་ཡུལ་དུ་སྐྱེས་པ་ཡིན་མ་ཤེས། དེའི་སྐབས་སུ་ཤཱ་རིའི་བུ་སུམ་ཅུ་རྩ་གསུམ་གྱི་ལྷ་ཡུལ་དུ་བཞུགས་ཡོད་པས། ཁོང་གིས་སྤྲང་པོ་རྒན་མོའི་སྐྱེ་བ་ལྷའི་སྲས་མོ་ལ་སྔོན་གྱི་སྐྱེ་བ་ཤེས་ཕྱིར་དུ་བྱིན་རླབས་མཛད་པས་དེས་སྐྱེ་བ་སྔོན་མ་དྲན་ཡོང་བ་ཡིན། གྲོགས་ལྷའི་བུ་མོ་ལྔ་བརྒྱ་དང་བཅས་པ་དུར་ཁྲོད་དེ་ལ་སོང་ནས་རྒན་མོའི་རུས་པ་ལ་མཆོད་པ་ཕུལ་བས་ལྷའི་འོད་ཀྱིས་གྲོང་ཁྱེར་ཐམས་ཅད་ཁྱབ་ནས་ཚང་མས་ཤེས་པ་ཞིག་ཏུ་གྱུར། དེ་ནས་འཕགས་པ་ཀ་ཏ་ཡ་ནས་ཆོས་གསུངས་དེ་ཉན་ནས་རྒན་མོའི་སྐྱེ་བ་ལྷའི་སྲས་མོ་རྒྱུན་ཞུགས་ཀྱི་འབྲས་བུ་ཐོབ་སྟེ་ཕྱིར་ལྷ་ཡུལ་དུ་སོང་། དེ་དག་མཐོང་ནས་སྔར་གྱི་རྒན་མོའི་གཡོག་བྱེད་སའི་བདག་མོ་ལ་སོགས་པ་སྐྱེ་བོ་མང་པོ་ཞིག་ངོ་མཚར་སྐྱེས་ཏེ་འཕགས་པའི་མདུན་ནས་ཆོས་ཉན་ཏེ་འཁོར་མང་པོ་ཞིག་ལ་གྲོལ་བ་ཐོབ་སོང་བ་ཡིན། སེམས་རྣམ་པར་དག་ན་དངོས་པོའི་འབྱོར་བ་ཆེ་ཆུང་ལ་ཐུག་པ་མ་ཡིན། མེད་པོས་མེད་ཚོད་དང་བསྟུན་ཏེ་བསོད་ནམས་དེ་ལྟར་གསོག་དགོས། གསོག་ཆོག་ལ། ཡོད་པོས་ཡོད་ཚོད་དང་བསྟུན་ཏེ་བསོད་ནམས་གསོག་དགོས། སྔར་བསོད་ནམས་བསགས་ནས་ད་ལྟར་ལོངས་སྤྱོད་ཀྱི་འབྱོར་བས་མ་དབུལ་པར་གྱུར་ཀྱང་། ད་ལྟའི་སྐྱེ་བ་འདི་ལ་མཆོད་པ་མ་ཕུལ། སྦྱིན་པ་མ་བཏང་ན་སྔར་བསགས་ཀྱི་བསོད་ནམས་ཕྲན་བུ་དེ་ཟད་ཚེ་ལོངས་སྤྱོད་ཀྱི་འབྱུང་ཁུངས་ཡོད་པ་མ་ཡིན། ཡང་སངས་རྒྱས་བཅོམ་ལྡན་འདས་རྒྱ་གར་འོད་མའི་ཚལ་ན་བཞུགས་ཡོད་དུས་ཤིག་ལ། རྒྱལ་པོའི་ཁབ་དང་འོད་མའི་ཚལ་གྱི་བར་ཞིག་ན་ཡི་དྭགས་མོ་ཉམ་ཐག་པ་ལྔ་བརྒྱ་ཙམ་ཞིག་ཉམ་ཐག་གིས་འོ་དོད་འབོད་ཀྱིན་ནམ་མཁའི་ཁམས་ལ་འཁོར་ནས་འདུག་སའི་གནས་མ་རྙེད་པར་ཡོད་པ་འཕགས་པ་མོའུ་འགལ་གྱི་བུས་གཟིགས་ཏེ། འཕགས་པ་མོའུ་འགལ་གྱི་བུ་དེ་རྣམས་ཀྱི་ཐད་དུ་བྱོན། ཡི་དྭགས་རྣམས་འཕགས་པའི་མདུན་དུ་ཡོང་སྟེ་ཚིག་མཐུན་པས་འདི་ལྟར་སྨྲས། ངེད་རྣམས་རྒྱལ་པོའི་ཁབ་ཀྱི་ཚོང་དཔོན་ལྔ་བརྒྱ་ཡིན། རྒྱུ་ལ་བདག་འཛིན་དང་སེར་སྣ་ཆེ་བས་མཆོད་པ་དང་སྦྱིན་པ་གང་ཡང་མ་བྱས། གཞན་ལ་སྦྱིན་དུ་མ་བཅུག སྦྱིན་པ་གཏོང་ས་རེར་ཐོན་དུས་བྱིན་པ་མེད་པའི་ཐོག་ཏུ་འདི་རྣམས་ཡི་དྭགས་ཞིག་དང་འདྲ་བར་གང་སར་ཐོན་མེད་ས་ཞིག་མི་འདུག་ཟེར་ནས་ངན་སྨྲས་བྱས། བཙུན་པ་ཆེན་པོ་ཁྱེད་ཀྱིས་ངེད་ཚོའི་ཉེ་འབྲེལ་རྒྱལ་པོའི་ཁབ་ན་ཡོད་པ་དེ་ཚོར་ངེད་རྣམས་ཡི་དྭགས་ལ་སྐྱེས་ཏེ་སྡུག་བསྔལ་མྱོང་གིན་ཡོད་པའི་ལས་རྣམ་སྨིན་དང་བཅས་པ་གསུངས་ཏེ། དེ་དག་རྒྱུ་འབྲས་ལ་ཡིད་ཆེས་ཀྱི་དད་པའི་གནས་ལ་བཀོད་ནས་སངས་རྒྱས་དང་དགེ་འདུན་ལ་གུང་ཚིགས་ཕུལ་ཏེ། ངེད་རྣམས་ཀྱི་ཆེད་དུ་ཡོན་བསྔོས་ཤིག་ཅེས་ཞུ་རོགས་གྱིས་དང་ངེད་རྣམས་ཡི་དྭགས་ཀྱི་སྐྱེ་གནས་ལས་གཅིག་ཐར་ཐུབ་ན་ཅི་ཤེས། མོའུ་འགལ་གྱི་བུས་དེ་རྣམས་ཀྱི་ཉེ་འབྲེལ་དག་ལ་སྐད་བསྐུར་ཏེ་ཚང་མ་གསུངས་པ་ཡིན། ཉེ་བ་རྣམས་ཀྱིས་ཀྱང་དང་ལེན་བྱས་ནས། སང་ཉིན་སངས་རྒྱས་འཁོར་བཅས་སྤྱན་འདྲེན་རྒྱུ་ཡིན་པས། མོའུ་འགལ་གྱི་བུ་རྫུ་འཕྲུལ་དང་ལྡན་པ་ཡིན་པས་ཡི་དྭགས་རྣམས་ཀྱི་དྲུང་དུ་བྱོན་ནས། སང་ཉིན་བཅོམ་ལྡན་འདས་འཁོར་དང་བཅས་པ་སྤྱན་འདྲེན་རྒྱུ་ཡིན་པས། ཁྱེད་རྣམས་སང་ཉིན་ཤོག་ཅིག་ཅེས་གསུངས་པ་དང་། ཡི་དྭགས་སུ་སྐྱེས་པ་དེ་དག་ལ་དེ་དུས་ཤོག་དང་མཐོང་ཐུབ་པ་རེད་ཅེས་གསུངས། ཉེ་བ་རྣམས་ལ་ཡང་དེ་ལྟར་གསུངས། ཕྱི་ཉིན་གྱི་གདུགས་ཚོད་ལ་བབ་དུས་སངས་རྒྱས་འཁོར་བཅས་བྱོན། དེའི་ཉིན་པར་ཞལ་ཏ་བ་མོའུ་འགལ་གྱི་བུས་མཛད་ནས་གཟིགས་པས། ཡི་དྭགས་རྣམས་ཡོང་རྒྱུ་མེད་འདུགམོའུ་འགལ་གྱི་བུས་མངོན་ཤེས་ཀྱི་རྩལ་ཅིི་ཡོད་ཀྱིས་གཟིགས་ཀྱང་ཡི་དྭགས་རྣམས་གར་ཡོད་གཟིགས་མ་ཐུབ། དེའི་ལོ་རྒྱུས་བཅོམ་ལྡན་འདས་ལ་ཞུས་པས་བཅོམ་ལྡན་འདས་ཀྱིས་གསུངས་ཏེ། ཉན་ཐོས་དང་རང་སངས་རྒྱས་ཀྱི་ས་ལས་འདས་པའི་འཇིག་རྟེན་གྱི་ཁམས་མང་པོ་ཡོད་པ་རེད། དེ་འདྲ་ཞིག་ལ་ཡི་དྭགས་རྣམས་ལས་ཀྱི་རླུང་གིས་དེད་སོང་བ་རེད། འོན་ཀྱང་དེ་བཞིན་གཤེགས་པའི་སྟོབས་ཀྱི་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་ཆོག་པ་རེད། དེ་བཞིན་གཤེགས་པའི་རྫུ་འཕྲུལ་གྱི་རྣམ་པར་འཕྲུལ་བ་སྟོན་ཆོགཁྱེད་རང་གིས་དགེ་འདུན་བསྡུ་བའི་གཎྜི་རྡུང་ཤོག་ཅེས་གསུངས་པ་རེད། གཎྜི་བརྡུངས་ཏེ་དགེ་སློང་གི་དགེ་འདུན་ཐམས་ཅད་འདུས། དེ་བཞིན་དུ་ཡི་དྭགས་ཀྱི་ཉེ་བ་རྣམས་དང་ཡི་དྭགས་ལ་ལྟ་བསམ་པའི་མི་གཞན་དག་དང་བཅས་པ་ལྟད་མོ་ལ་འདུས། དེ་ནས་བཅོམ་ལྡན་འདས་ཀྱི་རྫུ་འཕྲུལ་ཆེན་པོས་ཆོ་འཕྲུལ་གྱིས་ཡི་དྭགས་རྣམས་ཀྱིས་སངས་རྒྱས་འཁོར་བཅས་ཀྱིས་མཆོད་པ་བཞེས་བཞིན་ཡོད་པར་མཐོང་། ཁོང་རྣམས་ཀྱི་དོན་དུ་ཉེ་བ་རྣམས་ཀྱིས་སངས་རྒྱས་འཁོར་བཅས་ལ་བསྙེན་བཀུར་བྱེད་བཞིན་ཡོད་པ་ཤེས་པར་མཛད། དེ་འདྲའི་རྫུ་འཕྲུལ་བསྟན། དེ་ནས་ཡི་དྭགས་རྣམས་དེའི་ལྷན་དུ་ཐོན་ཡོང་བ་རེད། དེའི་གྲལ་ནས་སངས་རྒྱས་ཀྱིས་ཆོས་གསུངས་ཡོན་བསྔོ་མཛད་པ་རེད། སྦྱིན་པ་འདི་ཡི་བསོད་ནམས་གང་། །དེ་དག་ཡི་དྭགས་རྗེས་སུ་སོང་། །ཡི་དྭགས་འཇིག་རྟེན་རབ་འཇིགས་ལས། །དེ་དག་མྱུར་དུ་ཐར་གྱུར་ཅིག །ཅེས་གསུངས་ནས་དགེ་བསྔོ་མཛད། གཞི་དེ་ལ་བསྟེན་ཏེ་དེ་དང་མཐུན་པའི་ཆོས་གསུངས་ནས་སེམས་ཅན་འབུམ་ཕྲག་མང་པོའི་སེར་སྣའི་དྲི་མ་སྤངས་ཏེ་བདེན་པ་མཐོང་། ཡི་དྭགས་ལྔ་བརྒྱ་བོ་སངས་རྒྱས་བཅོམ་ལྡན་འདས་ལ་སེམས་དགའ་སྟེ་དེ་མ་ཐག་ཏུ་ལུས་ངན་བརྗེས་ཏེ་སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས། སྐྱེས་པ་དང་ལྷའི་མངོན་ཤེས་ཀྱིས་སྔོན་རྗེས་ད་ལྟའི་གནས་གསུམ་ལ་བརྟགས་ཏེ་མི་ཡུལ་ནས་ཞག་གཅིག་མ་ལོན་གོང་ནས་བཅོམ་ལྡན་འདས་ཀྱི་སྤྱན་སྔར་དུ་ཡོང་ནས། ཆོས་ཉན་ཏེ་བདེན་པ་མཐོང་ནས་ཡང་ཕྱིར་ལྷ་ཡུལ་དུ་སོང་། དེའི་ཕྱི་ཉིན་བཅོམ་ལྡན་འདས་ཀྱིས་མོའུ་འགལ་གྱི་བུ་ལ་གསུངས་ཏེ། ཁྱོད་ཀྱིས་ཡི་དྭགས་མང་པོ་ལྷའི་གནས་ལ་བཀོད་པ་དེ་དག་མདང་དགོང་ངའི་གནས་སུ་ཐོན་ཏེ། ངས་ཆོས་བསྟན་ནས་དེ་རྣམས་ལ་འབྲས་བུ་ཐོབ་ནས་ཕྱིར་ལྷ་ཡུལ་ལ་སོང་ངོ་། ཁྱོད་ཀྱིས་ཞལ་ཏ་བ་བྱས་པ་དེ་ནི་དོན་ཆེན་པོ་དང་ལྟན་ནོ། ལེགས་སོ་ལེགས་སོ་ཞེས་གཟེངས་སྟོད་མཛད། མོའུ་འགལ་གྱི་བུས་ཡི་དྭགས་ཐམས་ཅད་ཀྱི་ཉེ་བ་དག་ལ་དེ་བཞིན་དུ་གོ་བར་མཛད། དེ་རྣམས་ཡ་མཚན་སྐྱེས་ཏེ་བཅོམ་ལྡན་འདས་འཁོར་དང་བཅས་པ་ལ་བཀུར་སྟི་བྱས། དེ་རྣམས་ཀྱིས་རང་རང་གིས་བསོད་ནམས་ཀྱི་ས་བོན་བཏབ། དེས་ན་མགོན་པོ་འོད་དཔག་མེད་འཁོར་དང་བཅས་པ་ལ་ལུས་ལོངས་སྤྱོད་དགེ་ཚོགས་དང་བཅས་པ་བསམ་པ་རྣམ་པར་དག་པས་འབུལ། དངོས་འབྱོར་གྱི་མཆོད་པའི་ཡོ་བྱད་ཅི་འབྱོར་བས་མཆོད། དུས་གསུམ་དུ་བསགས་པའི་དགེ་རྩ་དང་ཁྱད་པར་དུ་ད་ལྟའི་དགེ་རྩ་ཅུང་ཟད་རེ་འགྲུབ་པ་དེ། དགེ་རྩ་འཛད་པའི་རྒྱུ་བཞིས་དགེ་རྩ་འཇོམས་མ་སོང་གོང་ཡར་འབུལ་དགོས་པ་རེད། ཕུལ་ན་བཟང་བ་རེད། དེ་ཆུད་ཟོས་སུ་མི་འགྲོ་བར་མ་ཟད། དགེ་རྩ་གོང་འཕེལ་དུའང་འགྲོ་བ་རེད། དངོས་འབྱོར་གྱི་མཆོད་པ་ཞིག་ཕུལ་བ་ཁྲལ་སོད་མ། མཆོད་པ་ཡིན་པས་དྲག་སྙམ་ཏེ་ཐུད་ཀྱི་སྔོ་ས་དང་མར་གྱི་ཁ་ས་ལྟ་བུ་གཙོག་ས་སྡུག་ས་ནས་འབུལ་མི་རུང་། ཡག་ས་བཟང་སའི་ཕུད་འགོ་མ་དེ་དཀོན་མཆོག་གི་མཆོད་པ་ལ་འཇོག་དགོས། ང་ཚོས་ཆུ་ལེན་དུས་མཆོད་ཁ་གསུམ་རེ་འཕེན་སྲོལ་ཡོད་པ་དེ་རྒྱུན་སྲོལ་ཡག་པ་རེད། བསམ་པ་དག་ན་དེ་ཚོ་མ་གཏོགས་དགོས་པ་མ་རེད། གོང་གི་གཏམ་རྒྱུད་དང་འདྲ་བ་རེད། དུས་རྒྱུན་དུ་མཆོད་པ་འབུལ་རྒྱུ་འདི་གལ་ཆེ་བ་རེད། ས་སྙིང་འཁོར་ལོ་བཅུ་བའི་མདོའི་ནང་དུ། འཇིག་རྟེན་གྱི་ཁམས་ན་བདེ་སྐྱིད་བདེ་བའི་དངོས་པོ་ཡོད་ཚད་དཀོན་མཆོག་མཆོད་པའི་བསོད་ནམས་ལས་བྱུང་། བདེ་ཞིང་སྐྱིད་པར་འདོད་པས་ན་དཀོན་མཆོག་མཆོད་དགོས་གསུངས་པ་རེད། མཆོད་པ་འབུལ་བ་འདི་ལ་བཀའ་གདམས་པ་གོང་མ་རྣམ་པས་དངོས་པོར་མི་ཐོགས་དད་པ་གལ་ཆེ། དད་པ་ཡོད་ན་ཆུ་གཙང་མ་ཞིག་དང་མཎྜལ་ཞིག་གི་ཆོག་གསུངས་སོ། །མཆོད་པ་འབུལ་དུས་རང་གི་དབང་པོའི་མངོན་སུམ་གྱི་སྤྱོད་ཡུལ་དུ་གྱུར་བའི་སྐུ་གཟུགས་མཆོད་རྟེན་གསུང་རབ་འདི་དག་ལ་མཆོད་ཚེ། དེ་དང་མཉམ་དུ་མངོན་སུམ་གྱི་སྤྱོད་ཡུལ་དུ་མ་གྱུར་བའི་སྐུ་གསུང་ཐུགས་རྟེན་དང་། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་སྐྱབས་གནས་དཀོན་མཆོག་གསུམ་པོ་ཐམས་ཅད་ལ་དམིགས་ཏེ། དེ་ཐམས་ཅད་ལ་མཆོད་པ་འབུལ་བའི་སེམས་ཀྱིས་འཕེན་པ་གཏོང་དགོས། རྒྱལ་བ་སྲས་དང་བཅས་པ་དེ་ཚོགས་གསོག་པའི་ཞིང་དང་བསོད་ནམས་ཀྱི་ཞིང་བླ་ན་མེད་པ་རེད། མཆོད་པ་འབུལ་བའི་གོ་སྐབས་བྱུང་བ་འདི་བསོད་ནམས་ཆེན་པོ་རེད་བསམ་ནས་སེམས་སྤྲོ་བ་དང་བཅས་པས་མཆོད་པ་འབུལ་དགོས། ཡོན་ཆབ་ཅིག་བཤམས་ནའང་བདུན་ཚར་གཙང་མ་ཕྱིས། བདུན་ཚར་ལ་མཛུབ་རྗེས་འབབ་ཏུ་མི་བཅུགསྒྲིག་དུས་ཀྱང་ཕར་ཚུར་ཡོ་བ་དང་འཁྱོག་པ་ཆུ་བར་དུ་འབོ་ཡོད་པ་ལྟ་བུ་མིན་པར། ཆུ་གཙང་གི་ཡོན་ཆབ་གྲལ་འགྲིག་མོ་བྱས་ནས་བཤམས། བདུན་ཚར་ནང་གི་ཆུ་ཉི་མ་མང་པོར་མ་བརྗེས་པར་ཁ་དམའ་ནས་ཁར་ཐལ་བ་ཆགས་ནས་ཡོད་པ་དེ་འདྲ་མི་རུང་ངོ་། །དེའི་ཐོག་ཏུ་མཆོད་པ་འབུལ་སྐབས་མཆོད་སྤྲིན་གྱི་གཟུངས་དང་ཡན་ལག་བདུན་པ་ཚོ་དང་བསྒྲག་ན་ལེགས། མཆོད་པ་གཙང་མ་ཞིག་ཕུལ། སྤོས་དྲི་ཞིམ་ཅན་ཞིག་རྟེན་གྱི་མདུན་དུ་སྒྲོན། ཕྱག་གསུམ་འཚལ་ཏེ། ཉིན་བཞིན་བྱང་སྡོམ་ཐེངས་རེ་ལེན་ཐུབ་ན་ཅི་འདྲའི་མི་བཟང་ངམ། མར་མེ་ཕུལ་དུས། ཨོཾ་ཨཱཿཧཱུཾ། ནམ་མཁའི་མཐར་ཐུག་ཞིང་ཁམས་རབ་འབྱམས་ན། དཀོན་མཆོག་རིན་ཆེན་རྣམ་གསུམ་རྟེན་དང་བཅས། །བསོད་ནམས་བསགས་པའི་ཞིང་མཆོག་བཞུགས་གསོལ་འཚལ། །མ་ལུས་དེ་དག་ཀུན་ཀྱི་སྤྱན་ལམ་དུ། །སྣང་གསལ་མར་མེ་མཆོད་པ་འདི་འབུལ་བས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །མ་རིག་གཏི་མུག་རྨོངས་པ་ཀུན་བསལ་ནས། །ཀུན་མཁྱེན་ཡེ་ཤེས་སྣང་བ་ཐོབ་པར་ཤོག །ཅེས་དང་། དེའི་སྟེང་དུ་བུདྡྷ་ཀ་ལ་ཨ་ཛྭ་ཏེ༔མར་མེ་འབུམ་དུ་འགྱུར་བར་ཤོག༔ཅེས་སྨོན་ལམ་སྔགས་དང་བཅས་པ་ཚར་བདུན་རེ་ཡན་ཆད་ཐོན་དང་འགྱུར་སྟོབས་ཆེ་བ་རེད། དགེ་སྦྱོར་གང་བྱས་ན་མཇུག་ཏུ་བསྔོ་བ་ཡོད་དགོས་པ་དེ་སྨྲོས་ཅི་དགོས། མཆོད་པ་ཕུལ་བའི་ཕན་ཡོན་ལ་བསམ་བློ་བཏང་ན། གནའ་སྔོན་མ་ཞིག་ལ་ཁྱིམ་བདག་ཞིག་གིས། སངས་རྒྱས་རྣམ་གཟིགས་ཀྱི་མཆོད་རྟེན་ཞིག་ལ་མེ་ལོང་དང་སྤོས་མེ་ཏོག་བཅས་ཀྱིས་མཆོད་པ་ཕུལ་ཞིང་ཕྱག་འཚལ་ཏེ་སྨོན་ལམ་བཏབ་པ་རེད། སངས་རྒྱས་ཤཱཀྱ་ཐུབ་པའི་དུས་སུ་གྲོང་ཁྱེར་སེར་སྐྱའི་གནས་སུ་ཁྱེའུ་གསེར་འོད་ཅེས་བྱ་བར་སྐྱེ་བ་བླངས། དེ་མའི་པང་དུ་སྐྱེས་མ་ཐག་ཏུ་འོད་ཀྱིས་གྲོང་ཁྱེར་གང་འདུག་པ་དེ་འདྲའི་གཟུགས་བྱད་ལྟ་བས་ཆོག་མི་ཤེས་པར་མཛེས་ཤིང་ལོངས་སྤྱོད་ཕུན་སུམ་ཚོགས་པ་ཞིག་གི་ལུས་བླངས། རྗེས་སུ་སངས་རྒྱས་ཀྱི་བསྟན་པ་དང་མཇལ་ནས་དགྲ་བཅོམ་ཐོབ། མཆོད་པ་འབུལ་དུས་གཡོ་རྒྱུ་མེད་པའི་མཆོད་པ། སྲོག་གཅོད་ལ་སོགས་པ་སྡིག་དང་མ་འདྲེས་པའི་མཆོད་པ་ཕུལ་ན་ཕན་ཡོན་ལྷག་པར་ཆེ་ཞིང་། མཆོད་པ་འབུལ་བྱའི་དངོས་པོ་ནི། གཟུགས་མཛེས། སྒྲ་སྙན། དྲི་ཞིམ། རོ་མངར། རེག་བྱ་འཇམ་པ། མདོར་ན་ཡིད་དུ་འོང་བའི་དངོས་པོ་གང་ཕུལ་ན་ཕན་ཡོན་ཆེ་བ་རེད། སངས་རྒྱས་རྣམ་གཟིགས་འཇིག་རྟེན་དུ་བྱོན་དུས་ཞིག་ལ། ཁྱོ་ཤུག་ཉམས་ཆུང་གཉིས་ཀྱིས་རྒྱུ་ཆེན་པོ་མེད་པར་སའི་རྫ་བུམ་གསར་བ་ཞིག་ཉོས་ནས། ཆུ་གཙང་མ་གང་བླུགས། གསེར་གྱི་དུང་ཙེ་གཅིག་ཡོད་པ་དེའི་ནང་དུ་འཕང་སྟེ། མེ་ལོང་གཙང་མ་ཞིག་གིས་དེའི་ཁ་བཀབ་ནས་དགེ་འདུན་པ་ལ་ཕུལ། དགེ་འདུན་པ་འགའ་རེས་ཆུ་གསོལ། འགའ་རེས་ཁ་བཤལ། འགའ་རེས་ལྷུང་བཟེད་འཁྲུད་བྱེད་བྱས། དེའི་བསོད་ནམས་ཀྱི་སྟོབས་ཀྱིས་ཚེ་ཕྱི་མར་སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས་ཏེ་ལྷའི་བདུད་རྩི་ལ་ལོངས་སྤྱོད་པར་གྱུར་སོང་བ་རེད། ཡང་ཁྱེའུ་ཞིག་གིས་དེ་བཞིན་གཤེགས་པ་བསོད་སྐྱབས་གྲོང་དུ་བསོད་སྙོམས་ལ་འབྱོན་བཞིན་ཡོད་པ་མཇལ་ནས་དད་པ་སྐྱེས་ཏེ་ལག་ན་སྲན་མ་སྤར་གང་ཡོད་པ་དེ་སངས་རྒྱས་ལ་གཏོར་ཏེ་དང་བ་བྱས་པས། སྲན་རྡོག་བཞི་ལྷུང་བཟེད་ཀྱི་ནང་དུ་ལྷུང་། གཉིས་ཐུགས་ཀར་ཕོག་སོང་བའི་བསོད་ནམས་དེ་ལ་བརྟེན་ནས། ཁྱེའུ་དེའི་སྐྱེ་བ་རྗེས་མར་རྒྱལ་པོ་སྤྱི་བོ་སྐྱེས་ཅེས་བྱ་བའི་མི་ཡུལ་གླིང་བཞིའི་བདག་པོ་ལོ་བརྒྱད་ཁྲིར་བྱས། བརྒྱ་བྱིན་སུམ་ཅུ་སོ་བདུན་བརྗེས་པའི་བར་ལ་ལྷ་ཡུལ་སུམ་ཅུ་རྩ་གསུམ་གྱི་རྒྱལ་སྲིད་ཕྱེད་ལ་དབང་བ་ཞིག་ཏུ་གྱུར། ཡང་སངས་རྒྱས་ཤཱཀྱ་ཐུབ་པ་ལ་ཁྱེའུ་ཞིག་གིས་དགའ་ཞིང་དང་བའི་སེམས་ཀྱིས་ས་སྙིམ་པ་གང་ཕུལ་བས་སངས་རྒྱས་ཀྱིས་གསུངས་པ་ཁྱེའུ་འདི་བསོད་ནམས་འདི་ལ་བརྟེན་ནས་མ་འོངས་པར་འཛམ་བུའི་གླིང་དུ་དབང་སྒྱུར་བའི་རྒྱལ་པོ་ཞིག་ཏུ་འགྱུར། དེའི་དུས་སུ་དེ་བཞིན་གཤེགས་པའི་སྐུ་གདུང་གི་མཆོད་རྟེན་བྱེ་བ་ཞིག་བཞེངས་ཞེས་ལུང་བསྟན་པ་རེད། ཁྱེའུ་དེ་ཆོས་རྒྱལ་མྱ་ངན་མེད་ཡིན་པ་རེད། དགོང་མ་གཅིག་ལ་འཛམ་གླིང་ས་གནད་བྱེ་བ་ལ་མཆོད་རྟེན་བྱེ་བ་བཞེངས་མཁན་དེར་གྱུར་སོང་བ་རེད། སྔོན་བསགས་ཀྱི་བསོད་ནམས་མེད་ན་དམ་པའི་སྐྱེས་བུ་ཡིན་ནའང་སྐུ་བསོད་ཆེ་ཆུང་ཡང་ཡོད་འདུག །གྲུབ་ཆེན་མེ་ལོང་རྡོ་རྗེས་སྒྲུབ་པ་མཛད་དུས་འཚོ་བ་གཏན་ནས་འབྱོར་ཐབས་མ་ཐོན་པར་འཛམ་པ་ལྷ་བསྒྲུབས། བསྒྲུབས་ནས་འགྲུབ། འགྲུབ་ནས་ཞལ་བསྟན་ཡང་དངོས་གྲུབ་མ་གནང་། ནམ་མཁའ་ལ་འཕུར་ཏེ་རྫུ་འཕྲུལ་བསྟན་ཡང་ཡུལ་མི་དད་པ་མ་སྐྱེས། ཉིན་ཞིག་འཕུར་ཏེ་ཀོང་པོ་ཁོག་ཅིག་ལ་ཕེབས་ཡོང་དུས། གནའ་སྔོན་མ་ཕྱུགས་ཀྱི་རྫི་བོའི་སྐྱེ་བ་བླང་དུས་ཤིག་ལ་གྲོག་ཚང་ཞིག་གི་ནང་དུ་རྩམ་བྱེ་གཏོར་མྱོང་བའི་སྦྱིན་འབྲས་ཀྱིས་སྐྱེ་བོ་ཕོ་མོ་མང་པོ་ཞིག་གིས་དད་པ་བྱས་ཏེ་འཚོ་བ་སྦྱོར་མཁན་ཞིག་ད་གཟོད་ཡོང་བ་རེད། སངས་རྒྱས་བཅོམ་ལྡན་འདས་ཞལ་བཞུགས་དུས་ཤིག་ལ་དགྲ་བཅོམ་པ་སྒུར་ཆུང་ཟེར་བ་ཞིག་ཡོད་པ་རེད། སྒུར་ཆུང་དགྲ་བཅོམ་པ་ཐོབ་སོང་བ་རེད་དེ་ལས་ཀྱི་དབང་གིས་གཟུར་རྒྱུ་གཏན་ནས་མ་ཡོད་པར། ཐབས་གང་བྱས་ཀྱང་གསོལ་བཅའ་མ་རག་པར་མུ་གེས་འདས་དགོས་ཐུག་སོང་བ་རེད། དེས་ན་རང་གི་འབྱོར་འཁོས་དང་བསྟུན་པའི་མཆོད་པ་དེ་དང་བའི་སེམས་ཀྱིས་འབུལ་རྒྱུ་དེ་གལ་ཆེ་བ་རེད། དེས་ན་མཆོད་པ་འབུལ་བ་འདི་གལ་ཆེན་ནང་གི་དོན་ཆེན་རེད། དེའི་དངོས་སུ་འབྱོར་བའི་མཆོད་པ་བསྟན་ཏོ། །གཉིས་པ་ཡིད་ཀྱིས་སྤྲུལ་པའི་མཆོད་པ་ནི། ཡིད་སྤྲུལ་བཀྲ་ཤིས་རྫས་རྟགས་རིན་ཆེན་བདུན། །ཞེས་པའི་ཚིག་འདིས་བསྟན་པ་རེད། རྫས་བརྒྱད་སྣ་བདུན་དེདག་ཡིད་ཀྱིས་སྤྲུལ་ཙམ་མ་ཡིན་ཀྱང་རྒྱལ་སྲིད་སྣ་བདུན་དངོས་སུ་ཅུང་ཟད་དཀའ་ས་ཨེ་འདུག་མ་གཏོགས་རྫས་བརྒྱད་དང་རྟགས་བརྒྱད་དེ་དག་མགར་དུ་བཅུག་ན། ཡང་ན་ངོ་མ་དེ་ཁྱེར་ཡོང་ནས་དངོས་འབྱོར་བྱེད་ཆོག་བསམ་ན་ལོན་པ་མ་རེད། འདི་ཚོ་ངོ་མ་དེ་སངས་རྒྱས་དང་བྱང་སེམས་བསོད་ནམས་ཆེན་པོ་ཅན་གྱི་སྤྱོད་ཡུལ་དུ་གྱུར་པ་མ་གཏོགས་རང་དགར་འབྱོར་རྒྱུ་ཞིག་ཡིན་པ་མ་རེད། མགར་བ་བཅས་པ་བྲིས་པ་འདི་ཚོ་ཚང་མ་དམིགས་རྟེན་ཙམ་ཞིག་རེད། ངེད་ཚོས་མཎྜལ་འབུལ་རྒྱུའི་མཎྜལ་གྱི་ཕོ་བྲང་དང་ལྕགས་རི་ཆུང་ཆུང་འདི་སྟོང་གསུམ་འཇིན་རྟེན་བྱེ་བ་ཕྲག་བརྒྱ། དེའི་རྡུལ་གྲངས་ཀྱི་ཞིང་ཁམས་ལ་དམིགས་པ་དང་། ཆོས་ལོངས་སྤྲུལ་སྐུའི་ཞིང་ཁམས་མཎྜལ་དུ་འབུལ་བའི་དམིགས་རྟེན་ཙམ་ཞིག་རེད། དེ་དང་གཅིག་པ་རེད། བཀྲ་ཤིས་པའི་རྫས་བརྒྱད་ལ་མཚོན་ན་མེ་ལོང་ལི་ཁྲི་དུར་བ་ལ་སོགས་པ། སྔོན་སངས་རྒྱས་བཅོམ་ལྡན་འདས་ཀྱིས་བཀྲ་ཤིས་པའི་རྫས་སུ་བྱིན་གྱིས་བརླབས། དེའི་མཚོན་བྱེད་བསོད་ནམས་གསོག་པའི་ཆེད་དུ་རང་རེས་འཚབ་བྱེད་ཀྱིན་ཡོད་པ་རེད། སངས་རྒྱས་བཅོམ་ལྡན་འདས་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕུལ་བ་དེ་སངས་རྒྱས་ཀྱིས་བཀྲ་ཤིས་པའི་རྫས་སུ་བྱིན་གྱིས་བརླབས་པ་ལྟར། རང་རེས་ཀྱང་དངུལ་དཀར་གྱི་མེ་ལོང་དྭངས་ཤིང་གསལ་བ་ལ་དམིགས་རྟེན་བྱས་ཏེ་མེ་ལོང་ཕུལ་ན། རང་གཞན་སེམས་ཅན་ཐམས་ཅད་ལ་བསོད་ནམས་ཆེན་པོ་ཐོབ་ནས་དེའི་འབྲས་བུ་དམ་པའི་ཆོས་ཀྱི་དོན་མ་འདྲེས་པ་གསལ་བར་ཐོབ་པ། དེ་ལྟར་དུ་གྲོང་བའི་བུ་མོ་ལེགས་སྐྱེས་མས་འོ་མ་ཕུལ་བ་ལྟར། རང་རེས་ཀྱང་ཞོ་འོ་མའི་མཆོད་པ་ཕུལ་བས་ཏིང་ངེ་འཛིན་གྱི་ཟས་ཐོབ་པ་དང་། གླང་ཆེན་ས་སྲུང་གི་བུས་གྷི་ཝང་ཕུལ་བ་ལྟར་དུ་གྷི་ཝང་ཕུལ་བས་ཉོན་མོངས་པའི་ནད་སེལ། བྲམ་ཟེ་ཁྱེའུ་རྩྭ་འཚོང་གིས་རྩྭ་དུར་བ་ཕུལ་བ་ལྟར་དུར་བ་ཕུལ་བས་སྐྱེ་འཆི་བགྲེས་རྒུད་མེད་པའི་སྐུ་ཐོབ། དེ་ནས་མེ་ལོང་ཞོ་དུར་བ་རེད། དེ་ནས་བུལ་བ་རེད། ཤིང་གི་ལྷ་མོས་ཤིང་ཏོག་བིལ་བ་ཕུལ་བ་ལྟར་བིལ་བ་ཕུལ་བས་རྟེན་འབྲེལ་བཅུ་གཉིས་ལུགས་ལྡོག་ཏུ་དག་སྟེ་མྱ་ངན་ལས་འདས་པ་ཐོབ། ལྷའི་དབང་པོ་བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་ཕུལ་བ་ལྟར་དུང་ཕུལ་བས་ཆོས་ཀྱི་སྒྲ་དབྱངས་སྒྲོག་ནུས་པ། དུང་གི་རྗེས་སུ་ཡུངས་ཀར་རེད། ཕྱག་ན་རྡོ་རྗེས་ཡུངས་ཀར་ཕུལ་བས་མཐུ་སྟོབས་ནུས་པ་ཕུན་སུམ་ཚོགས་པ་དང་། དེ་ནས་མེ་ལོང་ཞོ་གྷི་ཝང་དུར་བ་བིལ་བ་ཡོངས་ཀར་དྲུག་རེད་འདུགད་དུང་ཀུ་ཤ་དང་ལི་ཁྲི་གཉིས་ཀ་ཡོད། ཀུ་ཤ་རྩྭ་འཚོང་བཀྲ་ཤིས་ཁྱེའུས་ཕུལ་ནས་བཞུགས་གདན་མཛད་པ་རེད། ལི་ཁྲི་ཕུལ་བ་བྲམ་ཟེ་སྐལ་རྒྱལ་ཡིན་པ་རེད། ལི་ཁྲི་དབང་གི་རྫས་རེད། དེ་ཚོ་ཕུལ་ནས་དེ་དང་དེའི་ནུས་པ་དང་བྱིན་རླབས་འབྱུང་བར་ཤོག་བསམ་ནས་མཆོད་དགོས་པ་རེད། ལྷག་པར་དུ་དམིགས་རྟེན་གྱི་གཟུགས་བརྙན་འདི་ཚོ་གཞི་བྱས་ཏེ་ཏིང་ངེ་འཛིན་གྱིས་བསམ་གྱིས་མི་ཁྱབ་པར་སྤྲུལ་ནས་ཕུལ་ན། རྒྱུ་དང་འཚམ་པའི་འབྲས་བུ་གནས་སྐབས་སུ་མེ་ལོང་ཕུལ་བས་གཟུགས་བཟང་ཞིང་བློ་གསལ་བ་དང་། ཞོ་ཕུལ་བས་ཏིང་འཛིན་གྱི་འཚོ་བཅུད་ཐོབ་པ་ལ་སོགས་པའི་འབྲས་བུ་འབྱུང་བར་མ་ཟད། མཐར་ཐུག་མྱ་ངན་ལས་འདས་པའི་གོ་འཕང་འཐོབ་པའི་རྒྱུ་བྱེད་པའོ། །དེ་བཞིན་དུ་བཀྲ་ཤིས་རྟགས་བརྒྱད་ལ་ནི། གདུགས་དང་གསེར་ཉ་ཟེར་བ་རེད། གདུགས་དཀར་པོ་གསེར་གྱི་ཡུ་བ་ཅན་དར་སྣ་ཚོགས་ཀྱི་འཕུར་ལྡིང་གཡོ་བ། རིན་པོ་ཆེའི་ཏོག་གིས་མཛེས་པ། གསེར་ཉ་གཡུའི་གཤོག་པ་ཅན་མཉེན་ལྕུག་གི་མཚོ་ནང་དུ་འཕྱོ་བཞིན་ཡོད་པ། མེ་ཏོག་པདྨ་འདབ་མ་སྟོང་དང་ལྡན་པ་མཛེས་ཤིང་དྲི་བསུང་འཐུལ་བ། གདུགས་དང་གསེར་ཉ་དེའི་བར་དུ་ད་དུང་བུམ་པ་ཡོད་པ་རེད། འཆི་མེད་བདུད་རྩིའི་བཀང་བའི་གཏེར་གྱི་བུམ་པ་དཔག་བསམ་ཤིང་གི་ཁ་རྒྱན་ཅན། བྱང་ཆུབ་སེམས་དཔའ་གཞན་དོན་དུ་སྐྱེ་བ་བཞེས་པའི་ཆོས་དུང་གཡས་འཁྱིལ། སངས་རྒྱས་ཀྱི་ཐུགས་མཁྱེན་པའི་ཡེ་ཤེས་གཏིང་མཐའ་མེད་པ་མཚོན་བྱེད་རིན་ཆེན་དཔལ་གྱི་བེའུ་འཇའ་འོད་ཀྱི་རང་བཞིན་ཅན། གདུགས་དང་གསེར་ཉ་བུམ་པ་པད་མ་དུང་དཀར་དཔལ་བེའུ་རྒྱལ་མཚན་རེད། མི་ནུབ་སྲིད་པའི་རྒྱན་དུ་སྐུ་དབུ་འཕང་དགུང་ལས་མཐོ་བའི་མི་ནུབ་པའི་རྒྱལ་མཚན། དེའི་སྟེང་དུ་འཁོར་ལོ་རེད། འཁོར་ལོ་འདི་སྣ་བདུན་གྱི་འཁོར་ལོ་དང་རྟགས་བརྒྱད་ཀྱི་ནང་གི་འཁོར་ལོ་གཉིས་ལ་བྱེད་ནུས་ཀྱི་སྟེང་ནས་ཁྱད་པར་ཡོད་པ་རེད་བསམ། འདིའི་དབྱེ་འབྱེད་ཀྱི་རྒྱུ་མཚན་ཁུངས་མཇལ་མ་མྱོང་ཡང་། རྟགས་བརྒྱད་ཀྱི་ནང་གི་འཁོར་ལོ་དེ་ཕས་རྒོལ་ཟིལ་གྱིས་མནན་ཏེ་གདུལ་བྱའི་རྒྱུད་འདུལ་བའི་རྩུབ་གནོན་ཅན། ཐེག་གསུམ་ཆོས་ཀྱི་འཁོར་ལོ་རྒྱུན་མི་ཆད་པར་སྐོར་བའི་བརྡ་རྟགས་ཤིག་དང་། དེ་ཕུལ་བས་རང་གཞན་སེམས་ཅན་ཐམས་ཅད་བཀྲ་ཤིས་ཟད་པ་མེད་པའི་དཔལ་ལ་ལོངས་སྤྱོད་ཆོས་ཀྱི་འཁོར་ལོ་བསྒྱུར་བའི་མངའ་ཐང་ཐོབ་པའི་དབང་རྟགས་ཤིག་རེད། སྣ་བདུན་གྱི་ནང་གི་འཁོར་ལོ་དེ་འཁོར་ལོ་སྒྱུར་བའི་རྒྱལ་པོ་དེ་ཚོས་བསོད་ནམས་ཀྱི་སྟོབས་ཀྱིས་གྲུབ་ཡོང་བ་རྒྱལ་པོ་གང་དུ་འགྲོ་འདོད་པའི་ས་དེར་འཁོར་ལོས་སྣ་དྲངས་ཏེ་སོང་བས། རྒྱལ་སྲིད་གཞན་པ་རྣམས་མཉམ་དུ་འབྱོར་ཡོང་བ། འཁོར་ལོའི་རྒྱུ་དེ་གསེར་དང་དངུལ་ཟངས་དང་ལྕགས་ཀྱི་ཁྱད་པར་གྱིས་གླིང་གཅིག་དང་གཉིས་དང་གསུམ་དང་བཞི་ལ་དབང་སྒྱུར་བའི་རྒྱལ་པོ་ལ་ཁྱད་པར་ཡོད། འཁོར་སྒྱུར་གྱི་ཁྱད་པར་དེ་འདྲའི་ཕྱེ་ཀྱིན་ཡོད་པ་རེད། མདོར་ན་དེའི་འཁོར་ལོ་དེ་བསོད་ནམས་ཆེན་པོའི་མཐུས་སྟོབས་ཀྱིས་དབང་བསྒྱུར་བའི་མདུན་སྣ་འདྲེན་བྱེད་པ་རེད་སྙམ། རྒྱལ་སྲིད་སྣ་བདུན་ནི། འཁོར་ལོ་རིན་ཆེན་དང་ནོར་བུ་རིན་ཆེན་དགོས་འདོད་ཀུན་འབྱུང་། བཙུན་མོ་རིན་པོ་ཆེ་མཛེས་ཤིང་ལྟ་ན་སྡུག་པ་བུད་མེད་ཀྱི་སྐྱོན་བརྒྱད་དང་བྲལ་བ། བློན་པོ་རིན་པོ་ཆེ་ལོངས་སྤྱོད་དང་འབྱོར་བ་ཕུན་སུམ་ཚོགས་པ། གླང་པོ་རིན་པོ་ཆེ་གླང་ཆེན་ཕལ་བ་སྟོང་གི་སྟོབས་དང་ལྡན་པ། རྟ་མཆོག་རིན་ཆེན་ཅང་ཤེས་པ་སྟོང་གསུམ་ཡུད་ཀྱིས་སྐོར་བ། དམག་དཔོན་རིན་ཆེན་སྙིང་སྟོབས་སྒྱུ་རྩལ་དང་ལྡན་པ་དཔུང་ཚོགས་ཡན་ལག་བཞིས་བསྐོར་བ། དེ་ལྟ་བུ་འཁོར་ལོ་སྒྱུར་བའི་རྒྱལ་པོ་ལ་དབང་བའི་རྒྱལ་སྲིད་རིན་ཆེན་བདུན་དང་ཉེ་བའི་རིན་ཆེན་བདུན་ལ་སོགས་པ་དེ་ཚོ་དམིགས་རྟེན་རེ་ཡོད་ན་དེ་ལ་གཞི་གཟུང་། མེད་ན་ཡིད་ཀྱིས་དཔག་ཏུ་མེད་པ་སྤྲུལ་ཏེ་ཕུལ་ན་བསོད་ནམས་དཔག་མེད་ཐོབ་པ་རེད། འཕགས་པ་ཀུན་ཏུ་བཟང་པོའི་བློས་དཔག་ཏུ་མེད་པའི་མཆོད་རྫས་སྤྲུལ། དེའི་མཆོད་རྫས་སྣ་རེ་རེའི་རྩེ་ནས་ཡང་འོད་ཟེར་མང་པོ་འཕྲོས་ཏེ་དེའི་འོད་ཟེར་རེ་རེའི་སྣེ་མོ་ནས་ཡང་ཀུན་ཏུ་བཟང་པོ་རེ་རེ་སྤྲུལ། དེ་ཡང་དཔག་ཏུ་མེད་པའི་མཆོད་སྤྲིན་ཟད་པ་མེད་པ་ཕུལ་བ་ལྟར། དེ་དང་རྗེས་སུ་མཐུན་པར་འབུལ་དགོས། བཀྲ་ཤིས་པའི་རྟགས་རྫས་ཀྱི་མཚོན་ཏེ་ཡིད་སྤྲུལ་གྱི་མཆོད་པ་ལྷ་མིའི་འཇིག་རྟེན་གྱི་ཁམས་སུ་ཡོད་ཚད་དེ་དག་ཀྱང་། རྡུལ་རྙེད་ཀྱི་གྲངས་ལྷ་མའི་སྤྱོད་ཡུལ་ལས་འདས་པའི་ཞིང་ཁམས་དག་པའི་འབྱོར་བ་ཐམས་ཅད་ཀྱང་བློས་སྤྲུལ་པའམ་བློས་བླངས་ནས། སངས་རྒྱས་འོད་དཔག་མེད་འཁོར་དང་བཅས་པ་ལ་ཕུལ་ན་སེམས་ཀྱི་སྟོབས་ལ་ཚད་མེད་པས་བསམ་བློ་ཆུང་ཆུང་འཁོབ་འདུག་དགོས་པ་མ་རེད། རྒྱུ་ཐོག་སེམས་ཐོག་གཉིས་ཀ་ནས་འཁོབ་ཀྱིན་བསྡད་ན་འཁོབ་ལ་དྲོས་རྒྱུ་དང་འདུས་ལ་ཞིག་རྒྱུ་ཞིག་མེད་རྟགས་རེད། དེས་ན་ལུས་ངག་གི་འབྱོར་བའི་དངོས་འབྱོར་ཆུང་ཆུང་ལས། ཡིད་སྤྲུལ་བསམ་གྱིས་མི་ཁྱབ་པའི་མཆོད་སྤྲིན་སྤྲོས་དང་ཅི་བསམ་ན་དེ་རེད། དེ་སེར་སྣའི་འཆིང་ཞགས་ཀྱིས་བཅིང་དགོས་པ་མ་རེད། རང་འདོད་མེད་པར་དམིགས་མེད་ཀྱིས་ཟིན་ན་མཆོད་པ་རྣམ་དག་ཏུ་འགྱུར་བ་རེད། དེ་ཡིས་དངོས་འབྱོར་ཡིད་སྤྲུལ་གྱི་མཆོད་པ་གཉིས་ཀ་སོང་སྟེ། གསུམ་པ་གདོད་ནས་གྲུབ་པའི་མཆོད་པ་ནི། གདོད་ནས་གྲུབ་པ་སྟོང་གསུམ་འཇིག་རྟེན་གྱི། །གླིང་བཞི་རི་རབ་ཉི་ཟླ་བྱེ་བ་བརྒྱ། །ལྷ་ཀླུ་མི་ཡི་ལོངས་སྤྱོད་ཐམས་ཅད་ཀུན། །བློ་ཡིས་བླངས་ཏེ་འོད་དཔག་མེད་ལ་འབུལ། །བདག་ལ་ཕན་ཕྱིར་ཐུགས་རྗེའི་སྟོབས་ཀྱིས་བཞེས། །ཞེས་གསུངས་ཏེ། གདོད་ནས་གསུངས་པ་ནི་གདོད་མ་འདི་སྔགས་ཀྱི་སྐབས་ནས་གསུངས་པའི་གདོད་མའི་གནས་ལུགས་དེ་མ་རེད། འདིའི་གདོད་མ་འདི་འཇིག་རྟེན་ཆགས་པའི་ཐོག་མའི་ཐོག་མ་སྟེ། སྔར་འཇིག་རྟེན་ཆགས་དུས་ནས་ཡོད་རྒྱུ་ཞིག་ལ་གོ་རྒྱུ་རེད། གདོད་ནས་སམ་འཇིག་རྟེན་ཆགས་པའི་དང་པོ། ཆགས་པའི་བསྐལ་བ་རྫོགས་ནས་བཟུང་སྟེ་ཡོད་པའི་སྟོང་གསུམ་འཇིག་རྟེན། སྟོང་གསུམ་ནི་གོང་དུ་བཤད་པ་ལྟར་གླིང་བཞི་རི་རབ་ཉི་ཟླ་དང་བཅས་པ་བྱེ་བ་ཕྲག་བརྒྱ་ལའོ། སྤྱིར་འཇིག་རྟེན་གྱི་ཆགས་དབྱིབས་སྣ་ཚོགས་གསུངས་ཡོད་ཀྱང་། དེ་དག་ནི་གདུལ་བྱའི་བློ་དང་འཚམ་པར་གསུངས་པ་རེད། དོན་ལ་གཅིག་པའི་ངེས་པ་ཡོད་པ་མ་རེད། ཚངས་པ་རལ་བ་ཅན་དང་ངེད་ཅག་གི་ལྟ་ཕྱོགས་མ་གཅིག་པ་ལྟ་བུ། གཅིག་ན་དག་པའི་སྣང་བ་དང་མ་དག་པའི་སྣང་བ། གཉིས་ན་འཁྲུལ་མ་འཁྲུལ་གྱི་ཁྱད་པར་ལ་སོགས་པས་འདི་རེད་ཅེས་ཁ་ཚོན་གཅིག་གི་སྟེང་དུ་ཆོད་པ་མ་རེད། དེང་སང་གི་ཚན་རིག་པས་ཐ་མལ་མིག་གི་སྤྱོད་ཆས་སྤྱད་དེ་བལྟས་དུས་འུ་ཅག་གནས་པའི་ས་གཞི་འདི་རིལ་མོ་ཞིག་ཏུ་མཐོང་པ་རེད། སོང་དུས་ཀྱང་དངོས་སུ་རིལ་མོ་དེ་སྐོར་ཆོག་པ་རེད། དེ་དེའི་ངོར་བདེན་པ་རེད། ཀུན་རྫོབ་བདེན་པའི་ཆ་ཤས་ལོས་ཡིན་རེད། འཛམ་གླིང་གི་ས་སྒང་འདི་ཆུ་དང་སྐམ་ས་གཉིས་ལས་ཆུ་ཡིས་མང་པ་རེད། ནམ་མཁར་རླུང་ལ་བརྟེན་ནས་འཁོར་གྱིན་ཡོད་པ་ཞིག་རེད། སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །གསུངས་པ་དེ་དང་ཆ་འཕྲོད་ཡོང་བ་རེད། དུས་འཁོར་དང་མངོན་པ་གཉིས་ཀའི་འཇིག་རྟེན་ཆགས་དབྱིབས་ཉི་ཟླའི་འཁོར་འགྲོས་མི་འདྲ་བ་དེ་ཚོ། སེམས་ཅན་གྱི་ལས་སྣང་དང་དབང་པོའི་ཁྱད་པར་ཐེག་པའི་རིམ་པ་ཐུན་མོང་དང་ཐུན་མིན་གྱི་དབྱེ་སྒོ་མང་པོ་ཞིག་ཡོད་པས། གཅིག་ལ་ངེས་པར་བཟུང་རྒྱུ་ཡོད་པ་མ་རེད། སེམས་ཅན་གྱི་ཁམས་ཚད་མེད་པ་ལྟར་འགྲོ་བའི་སྣང་ཚུལ་ཡང་ཚད་མེད་པས། འདུལ་བྱེད་ཀྱི་མཛད་པའང་ཚད་མ་མཆིས་པ་ཞིག་ཡིན། །སྤྱིར་བཏང་མདོ་རྒྱུད་ཐུན་མོང་བའི་ལུགས་ཀྱི་འཇིག་རྟེན་ཆགས་ཚུལ་ནི། ཕྱོགས་བཅུ་ནམ་མཁའི་མཐས་ཁྱབ་པའི་འདས་མ་འོངས་ད་ལྟའི་སངས་རྒྱས་ཀྱིས་ཁྱབ་ཅིང་འགྲོ་བའི་དོན་མཛད་ཀྱིན་ཡོད་པ་རེད། རང་རེས་བཤད་ཀྱིན་ཡོད་པ་ནི་སྟོང་གསུམ་མི་མཇེད་ཀྱི་ཞིང་ཁམས་བྱེ་བ་ཕྲག་བརྒྱ་ཞེས་པ་འདི། དེའི་ནང་གི་ཆ་ཤས་ཆུང་ཆུང་ཆེ་ཆུང་གིས་གཞལ་ན་སྐྲ་རྩེ་ཙམ་མམ་ཡུངས་འབྲུའི་རྒྱ་ཁྱོན་ཙམ་ཞིག་ཡིན་པ་རེད། དེ་ཅི་འདྲ་ཞིག་ཡིན་ཞེ་ན། ཆོས་སྐུའི་དབྱིངས་ནམ་མཁའ་ལྟ་བུ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་དེ་ལས། ཉིད་ལ་ཉིད་ལོངས་སྤྱོད་པའི་རིགས་ལྔ་ཡེ་ཤེས་ལྔ་རང་སྣང་བ་ཡིན་ལ། དེ་ལས་ཕྱི་གསལ་འོད་ཟེར་བསམ་གྱིས་མི་ཁྱབ་པ་ཞིག་སྤྲོས་ཏེ་ལོངས་སྐུའི་ཞིང་དང་སངས་རྒྱས་དཔག་མེད་དུ་སྤྲུལ། དེ་དག་རེ་རེས་ཀྱང་བྱང་སེམས་ས་གནས་དཔག་མེད་ཀྱི་དོན་མཛད། ལོངས་སྐུ་དེ་དག་རེ་རེའི་ཐུགས་ཀ་ནས་སྤྲུལ་སྐུའི་ཞིང་ཁམས་བསམ་གྱིས་མི་ཁྱབ་པ་སྤྲོས་ཏེ། སྤྲུལ་སྐུ་སངས་རྒྱས་དཔག་མེད་དུ་སྤྲུལ་ཏེ་སེམས་ཅན་གྲངས་མེད་བསམ་གྱིས་མི་ཁྱབ་པའི་དོན་མཛད། དེའི་ནང་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཞིང་ཁམས་བཀོད་དེ་འགྲོ་དོན་མཛད་ཚུལ། དེ་རྐྱང་པ་ལ་བསམ་བློ་བཏང་ན་ཅི་འདྲ་ཞིག་ཡིན་ཞེ་ན། གོང་དུ་བཤད་མ་ཐག་པའི་ཆོས་སྐུའི་དབྱིངས་རང་སྣང་སྟུག་པོ་བཀོད་པ་ནས། ཡེ་ཤེས་རང་སྣང་བའི་རིགས་ལྔའི་ནང་གི་རྣམ་སྣང་གི་ཐུགས་ཀ་ནས་འོད་ཟེར་སྤྲོས་ཏེ། གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས། རྒྱ་ཆེ་ཆུང་གི་ཚད་འཇིག་རྟེན་གྱི་ཁམས་འབུམ་ཕྲག་དྲུག་ཅུའི་རྡུལ་ཕྲ་རབ་ཀྱི་གྲངས་དང་མཉམ་པའི་ཞིང་ཁམས་རྣམ་པར་བཀོད་པར་མཛད་པ་རེད། དེ་ལྟར་པདྨ་ཆེན་པོ་དེའི་སྟེང་ན་རྣམ་སྣང་གངས་ཆེན་མཚོའི་སྐུ་སྐྱིལ་ཀྲུང་གཅིག་གིས་པད་སྡོང་ཁེབ་པར་བཞུགས་ནས་སྐུ་ཆེ་བའི་བཀོད་པ་མི་གཡོ་ལྷུན་གྲུབ་ཀྱི་ཚུལ་དུ་བཞུགས་ཤིང། སྐུའི་བ་སྤུའི་ཁུང་བུ་རེ་རེ་ནས་ཀྱང་སྤོས་ཆུའི་རྒྱུན་རྣམས་གངས་ཆེན་མཚོར་བབ། དེ་ཐམས་ཅད་ལ་སངས་རྒྱས་ཀྱི་ཞིང་ཁམས་གངས་ཆེན་མཚོ་གྲངས་མེད་བསམ་གྱིས་མི་ཁྱབ་པའི་རྒྱན། དེའི་གྲངས་ཀྱིས་སངས་རྒྱས་དང་སེམས་ཅན་གྱི་སྣང་བས་དོན་མཛད། དེ་ལས་ཀྱང་ཁྱད་པར་དུ་ཕྱག་མཉམ་བཞག་གི་སྟེང་གི་ཕྱག་མཐིལ་དུ་སྤོས་ཆུའི་རྒྱ་མཚོ་འཁྱིལ་བའི་ནང་དུ་པདྨའི་སྡོང་པོ་སྐྱེས་ནས། དེའི་པདྨའི་ཟེའུ་འབྲུ་དབུས་མའི་སྟེང་དུ་ཞིང་ཁམས་ཉི་ཤུ་རྩ་ལྔ་བརྩེགས་མར་གནས་པའི་བཅུ་གསུམ་པ། སྐུ་གསུང་ཐུགས་ཡོན་ཏན་ཕྲིན་ལས་ལྔའི་ནང་གི་ཐུགས་རྗེའི་ཐུགས་ཀྱི་ཞིང་ཁམས། རང་རེ་ཡོད་ས་མི་མཇེད་ཀྱི་ཞིང་འདི་ཁྱད་པར་ཆེན་པོའི་ཞིང་ཡིན་པས་གསང་སྔགས་རྡོ་རྗེ་ཐེག་པ་ཚེ་གཅིག་གི་གྲོལ་བའི་ཆོས་དེ་ལ་ལོངས་སྤྱོད་དུ་ཡོད་པ་དེ་འདྲ་ཡིན་པ་རེད། ད་ཐེངས་གོང་དུ་བཤད་པ་ལྟར་འཇིན་རྟེན་ཁམས་ཀྱི་ཚད་འདི་རེད་དབྱིབས་འདི་རེད་ཅེས་ཐག་གཅོད་ཐུབ་པ་ཞིག་ཡིན་པ་མ་རེད། བཤད་མ་ཐག་པ་ལྟར་བཅོམ་ལྡན་འདས་ལོངས་སྤྱོད་ཆེན་པོ་དང་ལྡན་པའི་ཞིང་ཁམས་ཀྱིས། ནམ་མཁའི་དབྱིངས་ལྟར་དུ་གང་དུ་ཡང་མ་ཁྱབ་པ་དང་མེད་ས་ཡོད་པ་མ་རེད། མདོར་ན་ནམ་མཁའ་མ་ཟད་བར་དུ་འཇིག་རྟེན་མི་ཟད། དེའི་ཁོངས་སུ་ཆུད་པའི་དུམ་བུའི་འཇིག་རྟེན་ཞིག་ལ་མི་མཇེད་འཇིག་རྟེན་གྱི་ཁམས་ཞེས་བརྗོད། སྟོང་གསུམ་བྱེ་བ་ཕྲག་བརྒྱ་རེད། འདིའི་སྣོད་བཅུད་ཀྱི་ཆགས་ལུགས་ཇི་ལྟར་ཡིན་ཞེ་ན། སྣོད་དེ་མས་ནས་ཡར་ལ་ཆགས་ཤིང་། བཅུད་ཡས་ནས་མར་ལ་ཆགས། ནམ་མཁའ་ལ་བརྟེན་པའི་ལྷ་གནས་ཀྱི་གཞལ་མེད་ཁང་རྣམས་གོང་ནས་མར་ལ་རིམ་བཞིན་ཆགས་པ་ཡིན་གསུངས་ཀྱིན་ཡོད། འདིའི་སྣོད་བཅུད་ཀྱི་འཇིག་རྟེན་ཆགས་ལུགས་འདི་རྟེན་གཞི་དང་བརྟེན་པ་གསུམ་གྱི་སྟེང་ནས་བཤད་པ་ཡིན། དེའི་ནང་ནས་དང་པོ་རྟེན་གཞི་འབྱུང་བ་རྣམས་ལ་གསུངས་པ་རེད། རྟེན་རི་ལ་སོགས་པ་དང་བརྟེན་པ་སེམས་ཅན་ལ་བཤད་ཀྱིན་ཡོད་པ་རེད། གོང་དུ་ལུང་དྲངས་པ་ལྟར། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །གསུངས་པ་ལྟར། བསྐལ་བ་ཆགས་གནས་འཇིག་སྟོངས་བཞིའི་ནང་གི་སྟོངས་པའི་བསྐལ་བ་བར་བསྐལ་ཉི་ཤུ་རྫོགས་པའི་མཚམས་སུ། དང་པོ་ཡུལ་མཁའ་རྣམ་པར་དག་པ་མདོག་དཀར་པོ་འོད་དང་ལྡན་པ་ཞིག་ཆགས། དེའི་སྟེང་དུ་རླུང་གི་དཀྱིལ་འཁོར་རྒྱ་གྲམ་མུ་ཁྱུད་ཟླུམ་པོ་ཅན་ཞིག་ཆགས། དེའི་སྟེང་དུ་ཆུའི་དཀྱིལ་འཁོར་ཞི་བ་གསལ་དག་གི་རྒྱ་མཚོ་ཆགས། དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །ཞེས་གསུངས་པ་ལྟར། དེའི་སྟེང་དུ་དབང་ཆེན་གསེར་གྱི་ས་གཞི་ཆགས། རི་རབ་རི་བདུན་མཚོ་བདུན་གསེར་རི་རོལ་མཚོ་དང་བཅས་པ་ཆགས། གླིངབཞི་གླིང་ཕྲན་བརྒྱད་དང་བཅས་པ་ཆགས་པ་དེ་ལ་རྟེན་ཕྱི་སྣོད་ཀྱི་འཇིག་རྟེན་ཞེས་བྱ། བརྟེན་པ་ནང་བཅུད་ཀྱི་སེམས་ཅན་ངན་འགྲོའི་གནས་གསུམ་བཤད་མི་དགོས། རྒྱུ་མཚན་རང་རེས་འདི་ནས་མཆོད་པ་བཤད་པའི་སྐབས་རེད། ལྷ་ཀླུ་མི་ཡི་ལོངས་སྤྱོད་འགྲེལ་བཞིན་ཡོད་པ་རེད། དེས་ན་མཐོ་རིས་ཀྱི་དང་པོ་མིའི་འཇིག་རྟེན་རེད། གླིང་བཞི་དང་རྔ་ཡབ་སྲིན་པོ་གནས་པའི་གླིང་མ་བརྩིས་ན་མི་གནས་ས་གླིང་བཞི་དང་གླིང་ཕྲན་བདུན་དང་བཅུ་གཅིག་པོ་མིའི་གནས་ཡིན། མཐོ་རིས་ཀྱི་གནས་གཉིས་པ་འདོད་གཟུགས་ཀྱི་ལྷའི་གནས་རེད། དེ་ན་འདོད་པའི་ལྷ་འདོད་ལྷ་རིགས་དྲུག་དང་གཟུགས་ཀྱི་ལྷ་གཟུགས་ཁམས་གནས་རིས་བཅུ་བདུན། འདོད་ལྷའི་ནང་ནས་དང་པོ་རྒྱལ་ཆེན་རིགས་བཞིའི་ལྷ་ཡིན་པ་རེད། དེ་རྣམས་གང་དུ་ཆགས་ཡོད་ཅེ་ན། རི་རབ་ཀྱི་བང་རིམ་བཞི་ཉི་ཟླ་གཟའ་སྐར་གྱི་སྟེང་ན་ཆགས་ཡོད། འདོད་ལྷའི་གནས་གཉིས་པ་རི་རབ་ཀྱི་རྩེ་མོ་ན་ཡོད་པའི་སུམ་ཅུ་རྩ་གསུམ་གྱི་ལྷ་གནས་ཡིན་པ་རེད། ཉེ་དབང་སུམ་ཅུ་སོ་གཉིས་དབང་པོ་བརྒྱ་བྱིན་དང་སུམ་ཅུ་རྩ་གསུམ་གྱི་གནས་ཐམས་ཅད་མ་འདྲེས་པར་ཆགས་ཡོད། འདིའི་མན་ཆད་ས་གཞི་ལ་བརྟེན་པའི་འདོད་ལྷ་ཟེར། ལོངས་སྤྱོད་འབྱོར་བ་ཕུན་སུམ་ཚོགས་པ་ཡིན་པ་རེད། དེའི་སྟེང་དུ་ནམ་མཁའ་ལ་བརྟེན་པའི་འདོད་ལྷ་བཞི། གང་རེད་ཟེར་ན། མཚེ་མ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་རྣམས་སོ། །མཚེ་མ་ཞེས་པ་ནི་མཐའ་བྲལ་རེད། དགའ་ལྡན་ཞེས་པ་ནི་བྱམས་པ་མགོན་པོ་བཞུགས་ས་དེ་རེད། དེ་ནས་འཕྲུལ་དགའ་དང་གཞན་འཕྲུལ་དབང་བྱེད་རེད། མཁའ་ལ་བརྟེན་པ་བཞི་ས་ལ་བརྟེན་པ་གཉིས་ཏེ་མཁའ་དང་ས་ལ་བརྟེན་པའི་འདོད་ལྷ་རིགས་དྲུག་ཅེས་བརྗོད། དེའི་སྟེང་དུ་ནམ་མཁའ་ནས་ཡར་གཟུགས་ཁམས་གནས་རིས་བཅུ་བདུན་ཆགས་ཡོད་པ་རེད། མཁས་འཇུག་སྡོམ་བྱང་ལས། དང་པོར་ཚངས་རིས་མདུན་འདོན་ཚངས་ཆེན་གསུམ། །གསུངས་པ་ལྟར། བསམ་གཏན་དང་པོས་བསྡུས་པའི་ལྷ་གནས་གསུམ་ནི། ཚངས་རིས་དང་། ཚངས་པ་མདུན་ན་འདོན། ཚངས་ཆེན་དང་གསུམ་མོ། །དེའི་ཐོག་ཏུ་གཉིས་པར་འོད་ཆུང་ཚད་མེད་འོད་འོད་གསལ། །གསུངས་པ་ལྟར། བསམ་གཏན་གཉིས་པར། འོད་ཆུང་། ཚད་མེད་འོད་། འོད་གསལ་གསུམ། གསུམ་པར་དགེ་ཆུང་ཚད་མེད་དགེ་དགེ་རྒྱས། །གསུངས་ཏེ། བསམ་གཏན་གསུམ་པའི་ལྷ་གནས་ལ། དགེ་ཆུང་། ཚད་མེད་དགེ། དགེ་རྒྱས་གསུམ་རེད། བཞི་པར་སྤྲིན་མེད་འོད་དང་བསོད་ནམས་སྐྱེས། །འབྲས་བུ་ཆེ་གསུམ་དེ་སྟེང་གནས་གཙང་ལྔ། །མི་ཆེ་མི་གདུང་ཤིན་ཏུ་མཐོང་བ་དང་། །གྱ་ནོམ་སྣང་དང་འོག་མིན་དང་བཅས་པ། །བསམ་གཏན་བཞི་པའི་གནས་རིས་བརྒྱད་ཡིན་ནོ། །ཞེས་གསུངས་པ་ལྟར། བསམ་གཏན་བཞི་པར་སྤྲིན་མེད་འོད། བསོད་ནམས་སྐྱེས། འབྲས་བུ་ཆེ་དང་གསུམ། དེའི་སྟེང་དུ་འཕགས་པའི་གནས་གཙང་ལྔ་སྟེ་མི་ཆེ་བ། མི་གདུང་བ། ཤིན་ཏུ་མཐོང་། གྱ་ནོམ་སྣང་། འོག་མིན་ཏེ་བརྒྱད་དོ། །བསམ་གཏན་འོག་མ་གསུམ་དང་བཞི་གསུམ་བཅུ་གཉིས། དེའི་སྟེང་དུ་འཕགས་པའི་གནས་གཙང་ལྔ་སྟེ་གཟུགས་ཁམས་གནས་རིགས་བཅུ་བདུན་ནོ། །དེའི་སྟེང་དུ་གཟུགས་མེད་སྐྱེ་མཆེད་མུ་བཞི་ཆགས་ཡོད་པ་རེད། གང་རེད་ཅེ་ན། ནམ་མཁའ་མཐའ་ཡས་རྣམ་ཤེས་མཐའ་ཡས་དང་། །ཅི་ཡང་མེད་དང་ཡོད་མིན་མེད་མིན་བཞི། །གཟུགས་མེད་སྐྱེ་མཆེད་མུ་བཞི་ཞེས་བྱ་སྟེ། །དེ་ལྟར་ཁམས་གསུམ་སྲིད་པ་རྣམ་པར་བཞག །ཅེས་གསུངས་པ་ལྟར། ནམ་མཁའ་མཐའ་ཡས་ཀྱི་སྐྱེ་མཆེད། རྣམ་ཤེས་མཐའ་ཡས་ཀྱི་སྐྱེ་མཆེད། ཅི་ཡང་མེད་པའི་སྐྱེ་མཆེད། ཡོད་མིན་མེད་མིན་གྱི་སྐྱེ་མཆེད་དང་བཞི་པོ་ནི་གཟུགས་མེད་སྐྱེ་མཆེད་མུ་བཞི་རེད། ནང་བཅུད་ཀྱི་སེམས་ཅན་ཐམས་ཅད་པོ་ཚུར་བསྡུས་ན། གཟུགས་མེད་གཟུགས་དང་འདོད་པའི་ཁམས་གསུམ་གྱི་ནང་དུ་འདུས་པ་རེད། སྣང་དང་མི་སྣང་ཕྱེད་སྣང་གི་ཁམས་གསུམ་ཟེར་ན་ཆོག་པ་རེད། འོ་ན་འདོད་ཁམས་པ་ལ་གཟུགས་ཡོད་པ་རེད། རང་རེ་ལྟ་བུ་ཡིན་ན་གཟུགས་ཡོད་པས་གཟུགས་ཁམས་ལ་མི་བགྲང་བ་ཅིའི་ཕྱིར་སྙམ་ན། དགེ་བ་ཟག་བཅས་ཀྱིས་འབྲས་བུ་ཐོབ་པའི་གཟུགས་ཀྱི་མཆོག་བསམ་གཏན་གྱི་གཟུགས་འོད་གསལ་དྭངས་བ་དེ་ཡིན་པས། དམན་ལ་དགག་པའི་སྒྲ་སྦྱར་ཏེ་འདོད་ཁམས་པ་ལ་གཟུགས་ཀྱི་སྒྲ་མ་སྦྱར་པ་རེད། །དེ་ལྟ་བུ་སྟོང་གསུམ་འཇིག་རྟེན་གྱི་ལྷ་ཀླུ་མི་ཡི་ལོངས་སྤྱོད་བྱེ་བ་བརྒྱ་གསུངས་ཏེ། སྟེང་ལྷ་ཡི་འདོད་ཡོན། འོག་ཀླུ་ཡི་འབྱོར་བ། བར་མི་ཡི་ལོངས་སྤྱོད། སྟོང་གསུམ་འཇིག་རྟེན་གྱི་ཁམས་ཀྱི་གླིང་བཞི་བྱེ་བ་ཕྲག་བརྒྱ། རི་རབ་ཉི་ཟླ་སོགས་ཀྱང་དེ་འདྲ་བའི་བྱེ་བ་ཕྲག་བརྒྱ། དེའི་རྡུལ་སྙེད་ཀྱི་འཇིག་རྟེན་གྱི་ཁམས་ཟད་པ་མེད་པ། དེའི་ལྷ་ཀླུ་མི་ཡི་ལོངས་སྤྱོད་མི་ཟད་ནམ་མཁའ་མཛོད་ཀྱི་འཁོར་ལོ་ཀུན་ཏུ་བཟང་པོའི་མཆོད་པའི་སྤྲིན་དུ། མགོན་པོ་འོད་དཔག་མེད་འཁོར་དང་བཅས་པ་ལ་འབུལ་བ་ཡིན་པས། བདག་ལ་ཕན་ཕྱིར་ཐུགས་རྗེའི་སྟོབས་ཀྱིས་བཞེས། །ཞེས་གསུངས་ཏེ། བདག་གཞན་སེམས་ཅན་ཐམས་ཅད་མཐར་ཐུགས་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཞིང་ཁམས་བདེ་བ་ཅན་ལ་སྐྱེས་ཏེ། དེ་ནས་ཆོས་ཉན་ལམ་སྦྱོང་བའི་ཕན་ཐོགས་ཀྱི་ཆེད་དུ་ཁྱེད་རྒྱལ་བ་སྲས་བཅས་ལ་འཛིན་ཞེན་གྱི་ཉེར་ལེན་མེད་ཀྱང་། སེམས་ཅན་གྱིས་ཚོགས་མ་བསགས་སྒྲིབ་པ་མ་སྦྱང་ན་ཐར་བའི་གོ་སྐབས་མི་རྙེད་པ་དང་། རྒྱལ་བ་སྲས་བཅས་ཀྱི་མཛད་པ་ཕྲིན་ལས་དེ་སེམས་ཅན་གྱི་གཞན་དོན་ལས་མ་འདས་པ་ཞིག་ཡིན་པའི་ཕྱིར་ན། བདག་ཅག་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོས་དགོངས་ཏེ། བདག་ཅག་གི་ཚོགས་རྫོགས་པའི་ཕྱིར་དུ་བཞེས་རོགས་གྱིས་ཤིག་ཅེས་བསམ་ནས། མཆོད་པའི་རྫས་ཐམས་ཅད་ངེས་པར་དུ་དག་པ་ཤ་སྟག་རེད་ཅེས་བརྗོད་མི་ཐུབ་ཀྱང་། སེམས་ཀྱི་བློས་བསྒྱུར་ཏེ་ཀུན་རྫོབ་རྟེན་འབྲེལ་གྱི་རོལ་བ་ཙམ་ལས་དོན་ལ་གྲུབ་པའི་བདེན་ཞེན་སྤངས་ནས། དམིགས་མེད་འཛིན་པ་དང་བྲལ་བའི་ངང་དུ་འབུལ་བ་དེ་མཆོད་པ་ཐམས་ཅད་ཀྱི་མཆོག་ཡིན་པ་རེད། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་གསུངས་སོ། །འོན་ཀྱང་ཁྱིམ་པ་ཕོ་མོ་ཐམས་ཅད་ཀྱིས་མང་པོ་མ་ཤེས་ནའང་དད་པ་དང་གུས་པ་ཆེན་པོས་མཆོད་ཆོག་པ་རེད། དེ་ལ་འགལ་བ་ཡོད་པ་མ་རེད། རང་གི་མིག་ལམ་དུ་ཡིད་དུ་འོང་བའི་དངོས་པོ་ཅི་ཞིག་མཐོང་ན་དད་པ་དང་གུས་པས་མཆོད་ཆོག་པ་རེད། ཆུ་གཙང་མ་ཞིག་དང་ས་ཕྱོགས་ཡིད་དུ་འོང་བ་ཞིགམི་ཡག་པ་ཞིགརྟ་གོམ་འགྲོས་ཅན་ཞིགཟོག་སྤུ་རྟགས་ཅན་ཞིགགླུ་སྙན་མོ་ལེན་གྱིན་ཡོད་པ། སྒྲ་སྙན་སྙན་མོ་སྒྲོག་གི་ཡོད་པ། དྲི་ཞིམ་པོ། ཟས་ཞིམ་མངར་ཅན། གོས་ཡག་པ། སྐྱེད་མོའི་ཚལ་ན་རྒྱུ་བའི་སྐྱེ་བོ་འབྱོར་བས་བརྒྱན་པ། ནེའུ་གསིང་ལྗོན་ཚལ་ན་རྒྱུ་བའི་བྱ་རི་དྭགས་ཀྱི་སྐད་སྙན། ནམ་མཁའ་སྤྲིན་དཀར་གྱི་དྲ་བ་ཅན། འཇའ་ཚོན་འོད་མདངས་འཕྲོ་བ། དེ་ཚོ་ཚང་མ་མདོར་ན་ཡིད་དུ་འོང་བའི་དངོས་པོ་ཐམས་ཅད་འབུལ་ཆོག་པ་རེད། ཁྱད་པར་དུ་མེ་ཏོག་འདི་ཚོ་མཆོད་རྒྱུ་ཡག་པ་རེད། རང་རེའི་དབྱར་ཁའི་སེམས་བསྐྱེད་འབུམ་མཆོད་ཆེན་མོ་འཚོགས་པ་འདི་ཚོར་མེ་ཏོག་མཆོད་པ་ཟེར་ན་ཆོག་པ་རེད། མིང་དོན་གཉིས་ཀ་མཚུངས་པ་རེད། གནའ་རྫོགས་ཆེན་དཔལ་དགེ་སྤྲུལ་སྐུ་ཚང་གིས་ལུང་པ་འདིའི་ནང་གི་སྤྱོད་འཇུག་ཚར་ཉི་ཤུ་ཙམ་ཞིག་གསུངས་ཤིང་། ལོ་རེའི་སྤྱོད་འཇུག་གི་སེམས་བསྐྱེད་མཆོད་པའི་སྐབས་སུ། མེ་ཏོག་སེར་ཆེན་འདབ་མ་ལྔ་བཅུ་ནས་བརྒྱ་མན་ཆད་ཅན་མང་པོ་སྐྱེས་མྱོང་བ་རེད། དེའི་སྔོན་དུ་ཡོད་པ་མ་རེད་ཟེར་བ་རེད། དེ་རིང་ཁ་སང་ཡང་དེའི་བྱིན་རླབས་ཀྱིས་འདིར་ས་གཞན་དང་མི་འདྲ་བའི་སེར་ཆེན་འདབ་ལོ་མང་པོ་ཅན་སྐྱེ་རྒྱུ་ཡོད་པ་རེད། ལྷ་ཡུལ་ནས་ལྷ་རྣམས་ཀྱིས་མེ་ཏོག་མནྡ་ར་ཕུལ་བ་དང་། རང་རེས་མི་ཡུལ་ནས་མེ་ཏོག་སེར་ཆེན་ཕུལ་བ་གཉིས་ཀ་འདྲ་གསུངས་ཡོད་པ་རེད། ཇོ་བོ་རྗེ་དཔལ་ལྡན་ཨ་ཏི་ཤས་བོད་ན་ཡོད་པའི་མེ་ཏོག་ཤང་དྲིལ་རང་རེའི་ཁ་སྐད་ལ་ཡི་གེ་ཟུར་ཆག་ནས་ཤང་འགྲིམ་ཟེར་བ་འདི་རྒྱ་གར་ན་ཡོད་པ་མ་རེད་གལ་སྲིད་རྒྱ་གར་དུ་ཡོད་ན་ཁོང་གིས་དེའི་རིན་གསེར་སྤྲད་ནས་ཉོ་ཐུབ་གསུངས་པ་རེད། དབྱར་གྱི་དུས་སུ་རང་རེ་བོད་ཀྱི་ས་ཆ་ན་ས་ཆེན་པོ་འདི་མེ་ཏོག་གིས་བཀབ་སྟེ་ཡོད་པས། དེ་ལ་སེར་སྣ་དང་འཇུར་གེགས་དགོས་པ་མ་རེད། ཕོངས་སེམས་མི་དགོས་པར་སུས་ཀྱང་འབུལ་རྒྱུ་རྙེད་པ་རེད། ལྷ་ཡུལ་དང་དག་པའི་ཞིང་ཁམས་ཡིན་ཡང་མཆོད་རྫས་ཀྱི་དང་པོ་མེ་ཏོག་བྱེད་ཀྱི་ཡོད་པ་རེད། མེ་ཏོག་འདི་དངོས་པོ་གཙང་མ་ཡིན་པ་རེད། དབྱིབས་དང་ཁ་ཏོག་དྲི་བསུང་དང་རེག་བྱ་གང་གི་ངོས་ནས་ཀྱང་ཡོན་ཏན་ཕུན་སུམ་ཚོགས་པ། འཇིག་རྟེན་གྱི་དགའ་བ་བསྐྱེད་པའི་ཡོ་བྱད་མཆོག་ཡིན་པ་རེད། འདི་རྒྱལ་པོ་ཆེན་པོ་ཞིག་གིས་ལག་ནས་ཕུལ་ཀྱང་མི་འཚམ་པ་ཡོད་པ་མ་རེད། འཕགས་པ་རྟག་ཏུ་ངུའི་ཆོས་འཕགས་མཇལ་དུས་དང་ནོར་བཟང་གིས་རྗེ་བཙུན་བྱམས་མགོན་མཇལ་དུས་དང་པོ་མེ་ཏོག་གཏོར་ཏེ་མཆོད་པ་བྱས་རབས་ཡོད་པ་རེད། ཞིང་ཁམས་ཐ་དད་པའི་རྒྱལ་བ་རྣམས་ཀྱིས་གཅིག་གིས་གཅིག་ལ་མཆོད་པའི་སྐྱེས་ཕུལ་དུས་ཀྱང་མེ་ཏོག་འབུལ་བར་མཛད་པ་རེད་ཅེས་མདོའི་ལས་དེ་ལྟར་གསུངས་ཡོད་འདུགམེ་ཏོག་འབུལ་དུས་མེ་ཏོག་སིལ་མ་དང་། མེ་ཏོག་གི་ཆུན་པོ། མེ་ཏོག་གི་ཕྲེང་བ། མེ་ཏོག་གི་ཆུན་འཕྱང་བྱས་ཏེ་འབུལ་ན་ཆོག་པ་རེད། མེ་ཏོག་འབུལ་དུས་ཕྱོགས་བཅུའི་ཞིང་ན་བཞུགས་པའི་དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་ལ། ལྷ་རྫས་ཀྱི་མེ་ཏོག་བཀོད་པའི་བླ་བྲེ་དང་ཁང་བརྩེགས་ཆུན་འཕྱང་ལ་སོགས་པར་གྱུར་ཏེ། དེ་དག་རེ་རེ་ལས་ཀྱང་རིན་པོ་ཆེའི་མེ་ཏོག་ལ་སོགས་པའི་ཆར་གྱིས། ནམ་མཁའི་ཁམས་ཐམས་ཅད་གང་བའི་འོད་ཟེར་གྱི་སྤྲིན་ཟད་པ་མེད་པ་འཁྲིགས་ཏེ་དེ་འདྲ་ཡུན་རིང་དུ་གནས་པར་གྱུར་ཅིག་ཅེས་བསམ་དགོས། བཅོམ་ལྡན་འདས་ཀྱིས་ཀུན་དགའ་བོ་ལ། ཁྱོད་ལོངས་ནུབ་ཀྱི་ཕྱོགས་སུ་ཁ་འཁོར་ནས་མེ་ཏོག་གཏོར་ཐལ་མོ་སྦྱོར་གསུངས་པ་བཞིན་ནོ། །རང་རེས་ཀྱང་ལུས་རྟེན་འདིའི་ཐོག་ནས་བསོད་ནམས་གསོག་པའི་ཞིང་ས་ཁྱད་པར་ཅན་རེ་རྙེད་པའི་སྐབས་འདིར། བསོད་ནམས་ཀྱི་ས་བོན་ཞིག་བཏབ་ནས་རང་ལུས་ཡན་ཆད་ཤུལ་དུ་བསྐྱུར་ཏེ་གཅིག་པུར་འགྲོ་ཉིན་ཁྱེར་རྒྱུའི་བྲོ་ཁ་ཞིག་ད་ནས་གསོག་དགོས་པ་རེད། དེས་ན་མེ་ཏོག་མཛེས་པ་རྐང་གཅིག་ཡན་ཆད་ཐམས་ཅད་སངས་རྒྱས་འོད་དཔག་མེད་ལ་མཆོད། བདག་གཞན་སེམས་ཅན་ཐམས་ཅད་འཁོར་བའི་སྡུག་བསྔལ་འདི་དང་བྲལ་ཏེ་བདེ་བ་ཅན་ལ་སྐྱེ་བར་ཤོགངས་ཚོགས་བསགས་པ་འདི། བདག་ནི་བསོད་ནམས་མི་ལྡན་བཀྲེན་ཆེན་དེ། །མཆོད་པའི་ནོར་གཞན་བདག་ལ་ཅང་མ་མཆིས། །གསུངས་པ་རེད། དངོས་པོ་རྒྱ་མ་ཆེ་ཡང་རྒྱལ་བ་སྲས་བཅས་ལ་དད་པ་དང་སེམས་ཅན་ལ་སྙིང་རྗེའི་བློ་རྣམ་པར་དག་པས་འཛིན་པ་དང་བྲལ་བས་འབུལ་བ་ཡིན། དེས་ན་གཞན་དོན་དགོངས་པའི་མགོན་གྱིས་ནི། །བདག་གི་དོན་སླད་ཉིད་ཀྱིས་མཐུས་བཞེས་ཤིག །གསུངས་པ་ལྟར། བདག་གཞན་སེམས་ཅན་གྱི་དོན་དུ་ཁྱེད་མགོན་པོ་འོད་དཔག་མེད་སོགས་རྒྱལ་བ་སྲས་བཅས་ཀྱིས་བཞེས་ཏེ། འདི་བདག་གཞན་སེམས་ཅན་ཐམས་ཅད་བདེ་བ་ཅན་ལ་སྐྱེ་བའི་རྒྱུར་འགྱུར་བར་ཤོག་ཅིག་ཅེས་བསམ་དགོས། རང་ཉིད་ལ་འབུལ་བའི་སྙིང་སྟོབས་ཡོད་ན་རྒྱལ་བ་སྲས་བཅས་ལ་བཞེས་པའི་ནུས་པ་ཡོད་པ་རེད། མདོར་ན་གོང་དུ་བཤད་པ་ལྟར་དུས་རྟག་ཏུ་ཆེ་ས་ནས་གནས་ལུས་ལོངས་སྤྱོད་དགེ་ཚོགས་དང་བཅས་པ་དང། ཆུང་ས་ནས་ཟས་ཁམ་གང་ཟ་བའི་ཕུད་ཚུན་ཆད་རྒྱལ་བ་སྲས་བཅས་ལ་མཆོད་པ་འབུལ་བ་ཡིན་སྙམ་པའི་གོམས་གཤིས་ཆགས་སུ་འཇུག་དགོས། མཆོད་པ་དང་སྦྱིན་པའི་དངོས་པོ་ལ་སེར་སྣ་ཤོར་མི་རུང། དེས་ན་སྐྱེ་བོ་བློ་ཆུང་ཆགས་ཞེན་གྱི་མདུད་པས་བཅིངས། ཚེ་སྔོན་བཅིངས་བས་ད་ལྟ་རྒྱུ་མེད། ད་ལྟར་ཆགས་ཞེན་གྱིས་བཅིང་ཡོང་ས་ཆེན་པོ་ཞིག་མེད་མོད་སྤྲང་པོ་དབྱུག་པ་ལ་ཞེ་ཆགས་ཤེས་པ་ལྟར་ལྟར་ཤི་སྤར་འཐམ་ནས། མཆོད་སྦྱིན་ལ་གཏོང་ཞིག་ཅེས་སྐུལ་དུས་ཤ་ནས་དུམ་ཞིག་གཅོད་ཀྱིན་ཡོད་པ་ལྟར་འཛིན་ཞེན་གྱིས་བཅིངས་ཚེ་ཕྱི་མ་ཡི་དྭགས་ལ་མ་སྐྱེས་ནའང་སྤྲང་པོ་ཞིག་ལ་སྐྱེ་ངེས་པ་ཡིན་པ་རེད། དེ་ལྟར་བསམ་བློ་བཏང་ན་ཡུན་རིང་ན་ང་ཟེར་སའི་ལུས་པོ་འདིར་ཅི་ཡང་དོན་སྙིང་མེད། རྒྱུ་དངོས་པོ་ཆ་བེ་ཆོ་བེ་དག་དང་རྟ་ཟོག་རྒྱན་ཆ་སྒོར་རྡོག་དག་གིས་དེ་བས་ཡུན་རིང་དུ་བེད་ཆོད་པ་མ་རེད། འཚོ་བའི་འདུ་ཤེས་གཏོང་རན་པ་ཞིག་གིས་འཚོ་ཆས་ཡོ་བྱད་མང་པོ་ཞིག་བསགས་ནས་ཅི་ཡང་དགོས་པ་མེད། མིག་བཙུམ་ཚར་དུས་ཅི་ཡང་ཡོད་པ་མ་རེད། བསོད་ནམས་གསོག་པ་འདི་ཚེ་འདི་ཕྱི་གཉིས་ཀའི་ལོངས་སྤྱོད་ཀྱི་མ་རྩ་རེད། མ་རྩ་མེད་ན་ཚོང་སྐྱེད་མི་ཡོང་། དེ་ལྟར་བསོད་ནམས་ཀྱི་མ་རྩ་མེད་ན་ལོངས་སྤྱོད་ཀྱི་སྐྱེད་ཁེ་ཅིག་ཐོབ་ཡོང་རྒྱུ་ཡོད་པ་མ་རེད། འུ་ཅག་ཚོ་སོ་སྐྱེས་ཅོལ་ཆུང་བློ་སྣ་ཐུང་ཐུང་ཡིན་པ་རེད། མཆོད་པ་འབུལ་ས་ནས་ཀྱང་ཡིན་ནི་རེད། དགེ་སྒྲུབ་སྡིག་སྤོང་གཞན་དག་བྱེད་ས་ནས་ཀྱང་ཡིན་ནི་རེད། ཆེན་པོ་ཞིག་ནི་མི་འགྲུབ། ཆུང་ཆུང་ཞིག་ནི་མི་བྱེད། དེའི་བར་ནས་ལག་སྟོང་དུ་ལྷུང་འགྲོ་བ་རེད། བསམ་བློ་དེ་འདྲ་བཏང་ན། དེ་བས་ཆུང་ས་ནས་གསོག་སྟེ་རིམ་གྱིས་བློ་སྟོབས་ཇེ་ཆེར་གཏོང་དགོས། མཆོད་པ་ཞེས་པ་འདི་ངོ་བོ་མ་ཆགས་པ། ཀུན་སློང་སེམས་པ་དང་མཚུམས་པར་ལྡན་པ། ལུས་ངག་གི་རྣམ་རིག་དང་བཅས་པ་ཞིག་རེད། མ་ཆགས་པའི་བསམ་པ་དགེ་བ་མེད་པར་ནོར་བུ་བཟང་པོ་དེ་རང་གིས་བཟུང་། ངན་པས་དཀོན་མཆོག་གསུམ་ལ་ཁྲལ་འཇལ་གྱིན་ཡོད་པ་འདྲ་ཞིག་གིས་མི་རུང་ངོ་། པོ་ཏོ་བ་ཞེས་པའི་བཀའ་གདམས་པའི་དགེ་བའི་བཤེས་གཉེན་ཞིག་ཡོད་པ་རེད། དེས་གསུངས་ཏེ། སྤང་སྤོས་སྣ་ཡང་ཚ་འདུག་པ་ཞིག་ཐབ་ལ་བཏབ་ནས་ཙནྡན་དུ་རུ་ཀ་དང་ཨ་ག་རུ་ཟེར་ནས་ལོང་བས་མིག་ཡོད་ལ་རྫུན་བཤད་པ་འདྲ་ཞིག་གིས་མི་རུང་ངོ་ཞེས་གསུངས་བ་རེད། མཆོད་པའི་དངོས་པོ་ཆུང་ཡང་མཆོད་པ་འབུལ་བའི་བསམ་པ་རྣམ་པར་དག་ན་ཚོགས་ཆེན་པོ་རྫོགས་པ་རེད། སངས་རྒྱས་བཅོམ་ལྡན་འདས་རྒྱལ་བའི་རྒྱལ་བྱེད་ཀྱི་ཚལ་ན་བཞུགས་ཡོད་དུས་ཤིག་ལ། ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་བཅོམ་ལྡན་འདས་འཁོར་དང་བཅས་པ་ལ། རྒྱལ་བྱེད་ཀྱི་ཚལ་ཞེས་པའི་སྐྱེད་མོའི་ཚལ་འཁོར་ཡུག་གཙུག་ལག་ཁང་དང་བཅས་པ། གསེར་སྲང་བྱེ་བ་བརྒྱ་ཕྲག་མང་པོ་ཕུལ་བའི་སྐབས་དེར་རྒྱལ་བའི་བསམ་བློ་ཞིག་བཏང་ནས་ང་གཅིག་པུས་བསོད་ནམས་བསགས་པ་དེ་ངོ་མཚར་ཆེ་རྒྱུ་མི་འདུགངས་སྐྱེ་བོ་མང་པོ་ཞིག་ལ་ཕན་བཏགས་ནས་དེ་རྣམས་ཀྱིས་ཀྱང་བསོད་ནམས་ཆེན་པོ་སྐྱེད་ཐབས་བྱེད་དགོས་སྙམ་སྟེ། ཡུལ་མཉན་ཡོད་ཀྱི་ས་ཆ་ན་ཡོད་པའི་མི་ཐམས་ཅད་ཀྱིས་བསོད་ནམས་ཤིག་གསོག་རྒྱུའི་ཐབས་ལ། ས་དེའི་རྒྱལ་པོ་ལ་སྨྲས། དེའི་རྒྱལ་པོ་དེས་ཀྱང་དྲིལ་བསྒྲགས་བྱེད་རོགས་བྱས་ཏེ་ཉིན་བདུན་གྱི་མཚམས་ནས་ཁྱིམ་བདག་མགོན་མེད་ཟས་སྦྱིན་གྱིས། དེ་བཞིན་གཤེགས་པ་དང་འཁོར་ཉན་ཐོས་རྣམས་ལ་མཆོད་པ་ཆེན་པོ་ཞིག་འབུལ་བའི་ཆེད་དུ་གླང་པོ་ཆེ་ལ་ཞོན་ནས་དད་པའི་འབུལ་ནོར་བསྡུ་སར་ཡོང་བ་རེད། ཚང་མས་རང་རང་རང་གི་འབྱོར་འཁོས་དང་བསྟུན་ཏེ་གོས་རྒྱན་གསེར་དངུལ་ལ་སོགས་པའི་མཆོད་འབུལ་ཆེ་ཡོད་ཆུང་ཡོད་གྱིས། ཁོང་རྣམ་པས་གཞན་ལ་ཕན་བཏགས་པའི་ཆེད་དུ་ལེན་མཛད་པ་རེད་ཅེས་དྲིལ་བསྒྲགས་བྱས། ཁྱིམ་བདག་མགོན་མེད་ཟས་སྦྱིན་གཡོག་འཁོར་མང་པོས་བསྐོར་ཏེ་གླང་ཆེན་མང་པོ་ཞོན་ནས་དད་པའི་འབུལ་ནོར་མང་པོ་བསྡུས། དེའི་སྐབས་སུ་བུད་མེད་ཤིན་ཏུ་དབུལ་མོ་ཞིག་གིས་ཟླ་བ་གསུམ་ཙམ་གྱི་བར་ལ་འབད་པ་ཆེན་པོས་དཀའ་ལས་བརྒྱབ་པའི་ལས་ཀའི་གླ་ཆའི་རིན་རས་ཡུག་གཅིག་ཡོད། དེ་མ་གཏོགས་ཅི་ཡང་མེད། བུད་མེད་དབུལ་མོ་དེས་ཁྱིམ་བདག་མགོན་མེད་ཟས་སྦྱིན་གྱིས་འབུལ་བ་བསྡུ་བཞིན་ཡོད་པ་མཐོང་ནས། དགེ་བསྙེན་གཞན་པ་ཞིག་ལ་དྲིས་ཏེ་ཁྱིམ་བདག་མགོན་མེད་ཟས་སྦྱིན་ལྟ་བུའི་ཕྱུག་པོ་ཞིག་གིས་འབུལ་བ་བསྡུས་ནས་ཅི་དགོས་པ་རེད་ཅེས་དྲིས་པས། དགེ་བསྙེན་གྱིས་གཞན་ལ་ཕན་པའི་ཆེད་དུ་བསོད་ནམས་གསོག་ཏུ་འཇུག་པ་རེད་ཅེས་སྨྲས། དབུལ་མོས་བསམ་བློ་ཞིག་བཏང་སྟེ། ངས་དེ་སྔོན་བསོད་ནམས་མ་བསགས་པས་ད་ལྟའི་སྐྱེ་བ་འདི་ལ་འདི་འདྲའི་དབུལ་པོ་ཞིག་གི་ལུས་བླངས་སོང་བ་རེད། ང་གཅིགཔུ་ལ་ནིསངས་རྒྱས་འཁོར་བཅས་ལ་གསོལ་བ་ཞིག་དྲང་པའི་ནུས་པ་ནི་མི་འདུགདེ་བས་འདིའི་ནང་དུ་ཞལ་འདེབས་ཤིག་ངེས་པར་བྱ་དགོས་སྙམ་ནས་རང་ལ་གཅིག་བལྟས་པས། ལུས་དེ་ན་ཡོད་པ་ནི་སྔར་གྱི་ལས་ཀའི་གླ་ཆའི་རིན། རས་ཡུག་མ་གཏོགས་ཕུལ་ཡོང་རྒྱུ་ཁབ་སྐུད་པ་ཞིག་ཀྱང་མེད། བསམ་བློ་ཞིག་བཏང་ནས་རས་ཡུག་དེ་ཕུལ་བ་རེད། ཁྱིམ་བདག་མགོན་མེད་ཟས་སྦྱིན་དབུལ་མོའི་གཏོང་ཕོད་ལ་ངོ་མཚར་ཏེ་དབུལ་མོར་གོས་དང་རྒྱན་ཆ་མང་པོ་བྱིན། དེ་ནས་ཡུན་རིང་མ་འགོར་བར་དབུལ་མོ་ཚེ་འཕོས་ཏེ་སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས། སྐྱེས་པ་དང་གོས་ཀྱི་མཆོག་ལྷའི་བུ་མོ་གཞན་དག་ལ་མེད་པ་རང་ཤུགས་ཀྱིས་ཐོན་ཡོང་བས། ལྷའི་མངོན་ཤེས་ཀྱིས་སྔོན་གྱི་བྱུང་བ་ཤེས་ཏེ་བཅོན་ལྡན་འདས་ཀྱི་སྤྱན་སྔར་ཡོང་། དེའི་འོད་ཀྱིས་རྒྱལ་བྱེད་ཀྱི་ཚལ་ཐམས་ཅད་ཁྱབ་སོང་བ་རེད། བཅོམ་ལྡན་འདས་ཀྱིས་དེའི་ཁམས་དང་མཐུན་པའི་ཆོས་བསྟན་ཏེ་ལྷའི་བུ་མོར་རྒྱུན་ཞུགས་ཀྱི་འབྲས་བུ་ཐོབ་ནས་ཕྱིར་ལྷ་ཡུལ་དུ་སོང་། བསམ་པ་དག་པས་མཆོད་པ་ཕུལ་ན་རྒྱུ་ཆེ་ཆུང་དང་དངོས་པོ་མང་ཉུང་མིན། དེ་འདྲའི་བསོད་ནམས་ཆེན་པོ་རྒྱུ་རྩ་ཆུང་ཆུང་གིས་ཐོབ་པ་རེད། ད་ལྟའི་སྐབས་ལ་སངས་རྒྱས་སྐུ་དངོས་མཇལ་རྒྱུ་མེད་ཀྱང་དེའི་མཁྱེན་པའི་ཡེ་ཤེས་ཐོགས་མེད་ཡིན་པ་རེད། སུས་མེ་ཏོག་རྐང་གཅིག་མར་མེ་མཆོད་ཀོང་གང་ཕུལ་ན་དེའི་མདུན་ན་སངས་རྒྱས་འཁོར་བཅས་བཞུགས་ཡོད་པ་རེད། གང་ཞིག་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །ཞེས་གསུངས་སོ། །སངས་རྒྱས་ཀྱིས་མས་བུ་ལ་བརྩེ་བའི་ཚུལ་གྱིས་ཉིན་མཚན་བཞིན་དུ་སེམས་ཅན་ལ་གཟིགས་ཡོད་པས། སེམས་ཅན་གྱི་རྒྱུད་དག་པ་དང་ཚོགས་རྫོགས་པའི་སླད་དུ་མཆོད་པ་དེ་བརྩེ་བའི་ཐུགས་ཀྱིས་བཞེས་པ་རེད། ཁྱད་པར་དུ་ཞིང་ཁྲིད་འདི་ལྟ་བུའི་ཆོས་འཆད་ཉན་ལ་འདུས་པ་ཁྲི་སྟོང་མང་པོ་འཇོམས་ཡོད་པས། རྟེན་ཁྱད་པར་ཅན་གྱི་མདུན་དུ་གཞན་ཅི་ཡང་མེད་ནའང་ཆུ་གཙང་མེད་པ་མི་སྲིད་པས། ཆུ་གཙང་མ་བདུན་ཚར་གང་ཙམ་ཕུལ་ནའང་བསོད་ནམས་སོགས་འགྲོ་བ་རེད། དགེ་འདུན་འདུ་བའི་གཙུག་ལག་ཁང་དང་རྟེན་གསུམ་བཞུགས་སའི་ལྷ་ཁང་ནང་དུ་གཙང་སྦྲ་རྡུལ་ཕྱགས་རེ་གྱིས་དང་དེས་ཀྱང་བསོད་ནམས་སོགས་འགྲོ་བ་རེད། མདོ་སྡེ་ལས་རྣམ་འབྱེད་ལས། ཕྱག་བདར་བྱས་པའི་ཕན་ཡོན་བཅུ་གསུངས་ཡོད་པ་རེད། གཟུགས་བཟང་བ། ལྟ་ན་སྡུག་པ། མཛེས་པ། སྐད་སྙན་པ། དེའི་རྒྱུད་ཀྱི་ཆགས་སྡང་གཏི་མུག་ལ་སོགས་པའི་རྟོག་པ་སྲབ་པར་འགྱུར་བ་ལ་སོགས་པ་གསུངས་བ་རེད། གནའ་སྔོན་མ་ཞིག་ལ་མི་དབུལ་པོ་ཞིག་གིས་སངས་རྒྱས་རྣམ་གཟིགས་ཀྱི་མཆོད་རྟེན་ཞིག་ལ་རྡུལ་དང་མེ་ཏོག་རྙིང་པ་མང་པོས་གོས་ཡོད་པ་རྣམས་ཕྱགས་ཏེ་འཁོར་ཡུག་གི་ས་གཙང་མ་བྱས་ཤིང་སྨོན་ལམ་བཏབ་པས། ཕྱིས་སུ་སངས་རྒྱས་ཤཱཀྱ་ཐུབ་པའི་དུས་སུ་ཕྱུག་པོ་ཚང་ཞིག་གི་བུ་རུ་སྐྱེ་བ་བླངས་ཏེ། གཟུགས་མཛེས་ཤིང་ལྟ་ན་སྡུག་པ། ས་ཕྱོགས་གང་དུ་སོང་ཡང་མི་གཙང་བ་མེད་ས་ལ་ཐོན་འགྲོ་བ། ལོངས་སྤྱོད་འབྱོར་བ་ཕུན་སུམ་ཚོགས་པ་ཅན་ཞིག་ལ་སྐྱེ་སོང་བ་རེད། དུས་ནམ་ཞིག་ན་སངས་རྒྱས་བཅོམ་ལྡན་འདས་དང་མཇལ། མཇལ་བས་མ་ཚད་དེའི་བསྟན་པ་ལ་ཞུགས། ཞུགས་མ་ཐག་ཏུ་རྒྱུན་ཞུགས་ཐོབ། ཡུན་རིང་མ་འགོར་བར་དགྲ་བཅོམ་ཡང་ཐོབ་སོང་བ་རེད། དེས་ན་མཆོད་པ་ཕུལ་བ་འདི་བསོད་ནམས་ལྷག་པར་ཆེ་བ་རེད། འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་རང་གི་འགལ་རྐྱེན་ནམ་ཟད་ན་དེ་དུས་ཡོན་ཏན་རྣམས་མངོན་དུ་གྱུར་བ་ཆོས་ཉིད་ཡིན་པ་རེད། འཇིག་རྟེན་དང་འཇིན་རྟེན་ལས་འདས་པའི་ཡོན་ཏན་ཕུན་སུམ་ཚོགས་པ་ཞིག་ཐོབ་དགོས་ཕྱིན། ཚོགས་བསགས་སྒྲིབ་སྦྱོང་ལ་མ་བསྟེན་པར་རྒྱུ་མེད་ཀྱི་འབྲས་བུ་འབྱུང་མི་སྲིད། ཁ་གནམ་གདངས་ལ་གྲོག་གནམ་བབ་དཀའ་བ་རེད། ཡིན་ཡང་སྒྲིབ་སྦྱོང་ལ་སྟོབས་བཞིའི་བཤགས་པ་ལ་སོགས་པ་ཕུང་པོ་གསུམ་གྱི་དགེ་ཚོགས་རླབས་ཆེན་ཞིག་བྱེད་གོས། དེའི་གནད་རྒྱུ་མཚན་བྱེད་ཐབས་ཚང་མ་ཤེས་པ་དེ་ཡང་ཅུང་ཟད་མཁས་མཛངས་ཅན་ཞིག་ཡིན་དགོས་པ་རེད། ཚོགས་གསོག་ནི་དངོས་འབྱོར་གྱི་མཆོད་པ་བྱེད་དགོས་ན་ཅུང་ཟད་འབྱོར་བ་ལོངས་སྤྱོད་ཀྱིས་དཀའ་བ་རེད། ལོག་འཚོ་དང་སེར་སྣ་མ་འདྲེས་པ་དེ་བས་ཀྱང་དཀོན། ཡིད་སྤྲུལ་གྱི་མཆོད་པ་ཡང་བློ་གྲོས་རྟུལ་བའི་རིགས་ཅན་གྱིས་ཡིད་ཡུལ་དུ་འཆར་དཀའ་བ་ཡིན་པས། བཅོམ་ལྡན་འདས་ཀྱིས། ལམ་ཆུང་པ་ལ་དགེ་འདུན་པའི་མཆིལ་ལྷམ་ཕྱི་རུ་བཅུག་པ་རེད། ལམ་ཆུང་བས་དང་པོ་ཨོཾ་བྷི་ཞེས་པའི་ཡིག་འབྲུ་གཉིས་ཙམ་ཡང་དག་མོ་ཞིག་ཤེས་པ་མ་རེད། དེའི་རྗེས་སུ་བཅོམ་ལྡན་འདས་ཀྱིས་དེ་ལ་མཆིལ་ལྷམ་ཕྱི་ཞོར་དུ་རྡུལ་སྤོང་དྲི་མ་བྲལ་ཞེས་པ་ཞིག་བསླབས་པ་རེད། དབྱར་ཟླ་གསུམ་ལ་སྦྱོང་བསྡད་དུས་སྐབས་ཞིག་མཆིལ་ལྷམ་ཕྱིས་པའི་སྟོབས་ཀྱིས་སྒྲིབ་པ་དག་ནས་རྡུལ་སྤོང་དྲི་མ་བྲལ་ཞེས་པ་དེ་ཚིག་ཤེས་པར་མ་ཟད་དོན་ཀྱང་ཤེས་ཏེ། རྡུལ་འདི་ས་རྡུལ་མིན་ཏེ་འདོད་ཆགས་རྡུལ། །ལ་སོགས་པ་ཆེད་དུ་བརྗོད་པ་ཡང་རྩོམ་ཤེས་པ་དེ་འདྲའི་མཁས་པར་གྱུར་སོང་བ་རེད། འཕགས་པའི་ལམ་གྱིས་རྒྱུད་གྲོལ་ཏེ་དགྲ་བཅོམ་པ་ཐོབ་སོང་བ་རེད། དེས་ན་དགེ་འདུན་འདུ་བའི་གཙུག་ལག་ཁང་དང་རྟེན་རྩ་ཆེན་བཞུགས་སའི་གན་ངྷོ་ལ། སྐུ་གཟུགས་མཆོད་རྟེན་ལ་སོགས་པ་གར་བཞུགས་ལ་རྡུལ་ཕྱགས་གཙང་མ་ཞིག་བརྒྱབ་ན་ཕན་ཡོན་ཆེ་བ་རེད། རྒྱུ་ཚེགས་གཉིས་ཀའི་ངོས་ནས་མི་ཐུབ་པ་ཆེན་པོ་ཞིག་བྱུང་མ་དགོས་པས་བསམ་པ་དག་ན་རྣམ་པར་དག་པ་ཞིག་ཡོང་བ་རེད། སྤྱིར་ན་དཀོན་མཆོག་གི་བྱིན་རླབས་རང་རྒྱུད་ལ་འཇུག་དང་མི་འཇུག་ཕྱིའི་རྐྱེན་སངས་རྒྱས་ལ་སོགས་པ་ཡོད་མེད་ལ་ཐུག་པ་མ་རེད། ནང་གི་རྐྱེན་རང་གི་དགེ་ཚོགས་རང་གིས་བསྒྲུབས་ཏེ་ཡུལ་ཁྱད་པར་ཅན་ལ་བྱ་བ་བྱས་ཡོད་མེད་ལ་ཐུག་པ་རེད། དེས་ན་ཚེས་བཟང་དུས་བཟང་ནམ་ཚེས་ལ་ས་ཆ་འདིའི་མི་ཐམས་ཅད་ཀྱིས། འདིའི་ལུང་པའི་སྟོད་སྨད་བར་གསུམ་ན་གཙུག་ལག་ཁང་དང་ལྷ་ཁང་ཅི་འདྲ་མང་པོ་འདུགགླིང་སྐོར་རེ་བྱེད་ཞོར་དུ་ནམ་ཡིན་ན་མཇོལ། མཆོད་ཐིགས་རེ་རྒྱག་ལོབ་གྱིས། ཁ་སྟོང་ལག་སྟོང་གིས་མ་མཇལ། ཐེངས་ཅིག་མཇལ་བས་ཆོག་པ་མ་རེད། ནམ་ཡིན་ཡང་མཇལ་དགོས་པ་རེད། སྨོན་ལམ་ཅི་ཞིག་རྒྱག་རྒྱུ་ཡོད་ན་རྟེན་གྱི་མདུན་ནས་ནམ་རྒྱུན་སྨོན་ལམ་ཐོབ་དང་བསམ་པ་རྣམ་པར་དག་ན་འགྲུབ་པ་རེད། ལྷ་གཉེར་ཐམས་ཅད་ཀྱིས་མཆོད་འབུལ་གྱི་ཞལ་འདོན་གསུང་ཞོར་དུ་གཟུངས་ཆུ་རེ་གནང་ན་ཅི་འདྲའི་མི་བཟང་ངམ། རྒྱུ་སོགས་དགོས་བསམ་ན་བསོད་ནམས་བསགས་དགོས་པ་རེད། ཕྱི་མ་བདེ་བ་ཅན་ལ་སྐྱེ་དགོས་བསམ་ན་ཡང་བསོད་ནམས་གསོག་དགོས་པ་རེད། ཚེ་འདིའི་བདེ་སྐྱིད་སྙན་གྲགས་ཐོབ་དགོས་བསམ་ན་ཡང་བསོད་ནམས་གསོག་དགོས་པ་རེད། ཕྱི་མར་རང་གཞན་གཉིས་ཕན་གྱི་ཐར་བའི་ལམ་སྣེ་ཞིག་ཟིན་དགོས་བསམ་ནའང་བསོད་ནམས་གསོག་དགོས་པ་རེད། རྫོགས་ཆེན་དཔལ་སྤྲུལ་ཚང་གིས་ཞིང་སྒྲུབ་འཚོགས་དུས་སྤྲང་པོ་ཐམས་ཅད་ལ་སྤྲང་ཟས་ཁྱེར་ཤོག་གསུངས་ནས་མཆོད་པ་འབུལ་དུ་འཇུག་དར་བ་རེད། ཁོང་ལ་མཆོད་རྫས་ཐབས་ཆག་པ་མ་རེད་དེ་སྤྲང་པོ་རྣམས་ཀྱིས་ཚོགས་བསགས་རེ་བྱས་སོང་ན་དགོངས་ཏེ་སྙིང་རྗེས་གཟིགས་པ་རེད། རང་རེས་ཀྱང་ཡུལ་ལུང་གཅིག་གི་མི་ལ་བལྟས་ན་ཕྱུག་པོའི་རྒྱུ་ནོར་གནམ་ནས་བབ་ཡོང་བ་མ་རེད། དབུལ་པོའི་རྒྱུ་ནོར་གཅིག་གིས་བཅོམ་སོང་བ་མ་རེད། སྔར་གྱི་ཚོགས་བསགས་ཡོད་མེད་ལ་ཐུག་པ་རེད། ཁྱིམ་ཕ་མ་གཅིག་གི་བུ་རྒྱུད་ཡིན་ཀྱང་ཁྱད་པར་ཤོར་འགྲོ་བ་དེ་སྔོན་བསགས་ཀྱིས་སྟོབས་རེད། འོན་ཀྱང་སྔོན་ལས་ཐོད་པའི་རི་མོ་རེད་བསམ་ནས་བལྟས་འདུག་པ་དེ་གླེན་ལས་རེད། ལས་ཟེར་པ་དེ་ལས་ཏེ་འདུ་བྱས་ཡོང་བ་ཞིག་རེད། ད་སྔོན་ལས་བཟང་པོ་མེད་ན་ད་ནས་བཟུང་བསོད་ནམས་གསོག་དང་འཛམ་གླིང་ལས་ཀྱི་ས་བར་སྐྱེས་པ་རེད། བསོད་ནམས་ཨེ་བསག་རང་ལག་རེད། བསོད་ནམས་ཅན་རང་གིས་བྱས་དང་ཆོག་པ་རེད། བྱེད་དགོས་པའང་རེད། དེ་རིང་ཚེས་བཞི་རེད། ཚེས་པ་བཅུའི་ཉིན་ཐམས་ཅད་ཀྱིས་བསོད་ནམས་ཤིག་གསོག་པའི་ཆེད་དུ་ཚོགས་འཁོར་ཞིག་འཚོགས་རྒྱུ་བྱེད། རང་རང་གིས་རྩམ་ཆུར་འདྲེས་མ་ཅུང་ཟད་རེ་དང་མར་སྲང་ཆ་རེ་ཁྱེར་ཤོགབསོད་ནམས་ནང་ནས་ཚོགས་འཁོར་མཆོག་གསུངས་བ་རེད། ད་ཐེངས་ཀྱི་ཚོགས་འཁོར་འདི་འབྱོར་བ་ཅན་རྣམས་ལ་སྒེར་བདག་བྱེད་དུ་མི་བཅུག་པར་ཚང་མས་བསོད་ནམས་ཤིག་མཉམ་དུ་བསགས། ཚེས་པ་དགུའི་ཉིན་འདིའི་རེའུ་མིག་གི་ནང་དུ་འཁོད་པ་ལྟར་གསུར་ཆེན་ཞིག་ཀྱང་ཕུད། གསུར་རྩམ་གཙང་མ་རེ་ཁྱེར་ཤོགམང་དུ་མ་འཇུགསྡེ་ཆེ་བ་རེད། མང་ཆེ་ན་འཚིག་མི་ཐུབ། ཡང་སྔར་ཞིག་ལ་དེད་དཔོན་སྦྱིན་པ་ཆེན་པོ་ཟེར་རྒྱུ་ཞིག་རྒྱ་མཚོ་ཆེན་པོའི་ནང་དུ་ནོར་བུ་རིན་པོ་ཆེའི་རིགས་ལེན་སར་འགྲོ་བའི་ཆེད་དུ། མཉན་ཡོད་ཀྱི་ཕྱི་སྒོ་ཆེན་པོ་ནས་བུད་དེ་གྲོང་ཁྱེར་གྱི་ལམ་ཆེན་བརྒྱུད་ནས་འགྲོ་བཞིན་ཡོད་དུས། དེད་དཔོན་སྦྱིན་པ་ཆེན་པོས་བསམ་སྟེ་ངས་རྒྱ་མཚོ་ནས་ནོར་བུ་བླངས་ཏེ་ཕྱིར་ལ་འགོ་ཐོན་འཚམས་པོར་འཁོར་དུས་ངས་སྒོ་དང་ལམ་གྱི་ལྷ་འདི་ཚོ་ལ་དུས་སྟོན་ཆེན་པོ་ཞིག་བྱེད་དགོས་བསམ་ནས་བུད་སོང་བ་རེད། དེད་དཔོན་སྦྱིན་པ་ཆེན་པོས་རྒྱ་མཚོའི་གླིང་ནས་རིན་པོ་ཆེ་མང་པོ་བླངས་ཏེ་ཕྱིར་འགོ་ཐོན་འཚམས་པོར་འཁོར་ཡོང་བ་རེད། འཁོར་ཡོང་དུས་གྲོང་ཁྱེར་གྱི་ལམ་དང་སྒོའི་ལྷ་ལ་མཆོད་པ་ཆེན་པོ་འབུལ་བར་གྲ་སྒྲིག་བྱས། མཆོད་པ་དང་སྦྱིན་པ་བྱེད་པའི་ཆེད་དུ་རིན་པོ་ཆེའི་ཕུང་པོ་ཆེན་པོ་ཞིག་སྤུངས་ཏེ། དགེ་སྦྱོང་དང་བྲམ་ཟེ་ཀུན་ཏུ་རྒྱུ་དབུལ་ཕོངས་ཅན་ལ་སོགས་པ་སུ་མཐོང་ལ་མཆོད་སྦྱིན་བྱེད་བཞིན་ཡོད་པས། སངས་རྒྱས་བཅོམ་ལྡན་འདས་ཀྱིས་དེད་དཔོན་དེ་བླ་ན་མེད་པའི་བྱང་ཆུབ་ཏུ་བཙུད་དགོས་པར་དགོངས་ཏེ། སངས་རྒྱས་འཁོར་བཅས་སྒོ་ཆེན་དེ་བརྒྱུད་ནས་གྲོང་ཁྱེར་མཉན་ཡོད་ལ་ཕེབས་སའི་ཕྱོགས་སུ་ཕེབས་ཡོང་བས། དེད་དཔོན་གྱིས་དེ་དག་མཇལ་ནས་དགའ་སྤྲོ་ཆེན་པོ་ཞིག་སྐྱེས་ཏེ་རིན་པོ་ཆེ་མང་པོ་སངས་རྒྱས་འཁོར་བཅས་ཀྱི་ཕྱོགས་སུ་གཏོར་ཚེ། རིན་པོ་ཆེ་གཏོར་ཚད་སངས་རྒྱས་ཀྱི་སྐུའི་སྟེང་དུ་ལྡིང་ཁང་ཞིག་ཏུ་གྱུར་ཏེ། སངས་རྒྱས་བྱོན་ན་མཉམ་དུ་བུད་འགྲོ་བ་སངས་རྒྱས་བཞུགས་ན་མཉམ་དུ་འདུག་པ་ཞིག་ཏུ་གྱུར། དེ་མཇལ་བས་དེད་དཔོན་ལྷག་ཏུ་དགའ་སྤྲོ་དང་དད་པ་སྐྱེས་ཏེ་སངས་རྒྱས་འཁོར་དང་བཅས་པ་ཟླ་བ་གསུམ་གྱི་རིང་ལ་སྤྱན་དྲངས་ཏེ་ཡོ་བྱད་ཐམས་ཅད་ཀྱིས་བསྙེན་བཀུར་བྱས། ཉིན་ཐ་མ་དེར་ཞལ་ཟས་རོ་བརྒྱ་དང་ལྡན་པ། ན་བཟའ་གསེར་སྲང་འབུམ་རི་བ་ལ་སོགས་པ་ཕུལ་ཏེ་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ། དེའི་སྐབས་སུ་སངས་རྒྱས་བཅོམ་ལྡན་འདས་ཀྱིས་དེད་དཔོན་དེ་ལ་ལེགས་སོ་གསུངས་ཏེ། ཁྱོད་མ་འོངས་པ་ན་ཡང་དག་པར་རྫོགས་པའི་སངས་རྒྱས་མཚན་དང་བཅས་པ་གསུངས་ནས་སངས་རྒྱས་པར་འགྱུར་ཞེས་ལུང་བསྟན། སྤྱིར་བསོད་ནམས་གང་བསགས་ཀྱང་ཕན་ཡོན་ཆེ་བ་རེད་མོད་ཁྱད་པར་དུ་མར་མེའི་མཆོད་པ་དེ་དག་བསོད་ནམས་ཆེ་བ་རེད། བསྙེན་དགའ་མོ་ཞེས་པའི་དབུལ་མོ་ཞིག་གིས་སངས་རྒྱས་ཀྱི་མདུན་དུ་མར་མེ་ཞིག་ཕུལ་ཏེ་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་སངས་རྒྱས་མར་མེ་མཛད་དུ་ལུང་བསྟན་པ་རེད། རྗེས་ནས་སངས་རྒྱས་མར་མེ་མཛད་དུ་སངས་རྒྱས་སོང་བ་རེད། ཤི་གསོན་གཉིས་ཀའི་ཆེད་དུ་བསོད་ནམས་གསོག་བསམ་ན་མར་མེ་ཕུལ། གཡང་སྒྲུབ་འགོང་བཀར་ཅི་བྱེད་པ་བས་རིམ་གྲོ་ཚོགས་བསགས་ཐམས་ཅད་ལ་དེ་བས་དགའ་ཡོད་པ་མ་རེད། ཁྱིམ་ཚང་ཚང་མས་རང་རང་རང་གིས་མཆོད་བཤམས་རེ་ཡོད་པར་བྱོས། ཤོག་ཕོར་རེ་མ་གཏོགས་མེད་ཀྱང་སངས་རྒྱས་བྱང་སེམས་ཀྱི་སྣང་བརྙན་རེ་ཤོམས། དེ་ལ་རབ་གནས་བྱོས། དགེ་འདུན་འདུ་ཚོགས་འདི་འདྲའི་སྐབས་དང་རྟེན་གསུམ་ཁྱད་པར་ཅན་གྱི་མདུན་དུ་ཁྱེར་ཤོགབྱིན་རླབས་བྱོས་དང་སངས་རྒྱས་སྐུ་དངོས་སུ་བཞུགས་ཡོད་སྙམ་པའི་འདུན་པ་བྱེད་ཆོག་པ་རེད། བྱིན་རླབས་ཞུགས་འགྲོ་བ་རེད། སངས་རྒྱས་རང་གི་ཁྱིམ་ན་བཞུགས་ཡོད་པ་དང་འདྲ་བ་ཡིན་པ་རེད། དོན་མེད་མིའི་པར་མང་པོ་ཞིག་བཤམ་མ་འདུགཞྭ་འདྲ་མིན་ཉོས་ཏེ་སྟོད་འབོག་སེར་པོ་གྱོན་པ་མང་བ་རེད། མཐོང་ཚད་མཆོད་པའི་ནང་དུ་མ་འཇོག་མ་གཏོགས་དེ་རྣམས་ཀྱི་བསོད་ནམས་ཉམས་འགྲོ་བ་རེད། དེ་རྣམས་ལ་གནོད་པ་ཡོད་པ་རེད། ཁྱོད་རང་ལ་ཕན་ཐོགས་ཡོད་པ་མ་རེད། དེའི་ནང་ན་འགའ་རེ་རྒྱལ་འགོང་མཆོད་མཁན་ཡང་ཡོད་སྲིད། དེ་ཡོད་ན་ལྟོགས་འགོང་བསེ་རག་འཁྲི་བར་མ་ཟད། ན་ཤི་རྒྱུན་ཆད་མེད་པར་ཡོང་ངེས། མཆོད་པ་བཤམ་དུས་མཆོད་སྤྲིན་གྱི་གཟུངས་འདོན་ཞོར་དུ་ཤོམས། མཆོད་གཤོམ་ཚར་དུས་ཕྱག་གསུམ་འཚོལ། རྟེན་གསུམ་གྱི་མདུན་ནས་ཉིན་རྒྱུན་བྱང་ཆུབ་སེམས་སྡོམ་རེ་ལོངས། ཁ་ཏོན་ཡོད་ན་རྟེན་གྱི་མདུན་ནས་ཐོན། འབུམ་ལྔ་གསོག་མཁན་ཚོས་དེ་བས་ཀྱང་མཆོད་གཤོམ་གཙང་མ་རེ་བྱེད་པ་གལ་ཆེ་བ་རེད། ཡང་དགོས་མཎྜལ་གསོག་དུས་རབ་ཡིན་ན་དགོན་པའི་ནང་ནས་རྟེན་གསུམ་ཁྱད་པར་ཅན་གྱི་མདུན་དུ་བསོག་དགོས་པ་རེད། དབྱར་དགུན་ནམ་ཡིན་ཡང་འདིའི་གཙུག་ལག་ཁང་གི་ནང་ནས་གསོག་ཆོགའདིའི་ལྷ་ཁང་རྒྱ་བསྐྱེད་ལ་གཏོང་བ་དེ་མི་མང་པོ་ཞིག་གིས་ཚོགས་གསོག་རེ་བྱེད་པའི་ཆ་རྐྱེན་ལ་བསམ་པ་རེད། འཇིག་རྟེན་ན་མཇལ་བར་དཀོན་པའི་རྟེན་གསུམ་རྩ་ཆེན་རིན་ཐང་གཞལ་མེད་རྟ་རྨིག་ལྕགས་ཀྱིས་བཏུམས་ནས་འཛམ་གླིང་གཡས་སྐོར་བརྒྱབ་ན་འདིའི་རྟེན་རྩ་ཆེན་འདི་ཚོ་འདྲ་བའི་གཉིས་པ་ཞིག་ཁྱེར་ཡོང་རྒྱུ་མེད་པའི་རྟེན་རྩ་ཆེན་དག་བཞུགས་པ་རེད། སེམས་ཅན་གྱི་བསོད་ནམས་བསགས་པའི་བགོས་སྐལ་དུ་རྟེན་རྩ་ཆེན་འདི་དག་བཞུགས་ས། རྫོགས་པ་ཆེན་པོའི་ཆོས་རྒྱུན་དང་ཁྲིད་རྒྱུན་འཇིག་རྟེན་གྱི་ཁམས་སུ་མི་ནུབ་པའི་ཆེད་དུ་བསམ་པ་རེད། སྐྱེ་དགུའི་བདེ་སྐྱིད་ཀྱི་གཞི་རྩ་རྒྱལ་བསྟན་སེལ་མེད་རེ་སྤེལ་སའི་རྟེན་གཞི་ཞིག་རེད་སོང་ན་སྙམ་པ་ཡིན། མདོར་ན་སེམས་ཅན་གྱི་བདེ་སྐྱིད་ཀྱི་ཆེད་དུ་བསམས་ནས་དཀའ་ལས་བརྒྱབ་པ་ཡིན་པས། འདིའི་གཙུག་ལག་ཁང་འདི་སེམས་ཅན་ཐམས་ཅད་ལ་ཆོས་ཀྱི་སྦྱིན་པ་བྱེད་ས། ཆོས་ཀྱི་མགྲོན་སྟོན་བྱེད་སར་དམིགས་ཏེ་བྱས་པ་ཡིན་པས། ཆོས་པ་ཐམས་ཅད་ཀྱིས་རང་ཁྱིམ་བྱེད་ཆོག་པ་རེད། སྤྱིར་མཆོད་པ་འདི་ལ་བླ་ན་ཡོད་པའི་མཆོད་པ་དང་། བླ་ན་མེད་པའི་མཆོད་པ་གཉིས་ཀྱི་དབྱེ་བ་ཡོད་པ་རེད། བླ་ན་ཡོད་པའི་མཆོད་པ་དེ་ལ་ནང་གསེས་ཀྱི་དབྱེ་ན། ཟང་ཟིང་གི་མཆོད་པ་དང་། སྒྲུབ་པའི་མཆོད་པ་གཉིས། དང་པོ་ཟང་ཟིང་གི་མཆོད་པ་ལའང་ཕྱག་དང་བསྟོད་པ་རྫས་གྱི་རིམ་པ་བཤམས་ཏེ་འབུལ་བ། བདག་པོས་ཡོངས་སུ་མ་བཟུང་བའི་རྫས་འབུལ་བ། ཡིད་སྤྲུལ་བློའི་མཆོད་པ། ལུས་འབུལ་བ་དེ་དག་ཡིན་པ་རེད། གཉིས་པ་སྒྲུབ་པའི་མཆོད་པ་ལ་ལྷའི་སྐུ་བསྒོམ་པ་དང། བྱང་ཆུབ་སེམས་དཔའ་དག་གིས་ཏིང་ངེ་འཛིན་ལས་བྱུང་བའི་བཀོད་པས་མཆོད་པ་དེ་དག་རེད། བླ་ན་མེད་པའི་མཆོད་པར་དམིགས་བཅས་དམིགས་མེད་གཉིས་སུ་ཕྱེས་ཡོང་ན། དམིགས་པ་དང་བཅས་པ་ཀུན་རྫོབ་བྱང་ཆུབ་ཀྱི་སེམས་བསྒོམ་པ་དེ་རེད། མཁས་པས་བྱང་ཆུབ་སེམས་བསྒོམ་ན། །རྒྱལ་བ་སྲས་དང་བཅས་རྣམས་ལ། །མཆོད་པ་དེ་ནི་དམ་པ་སྟེ། །ཞེས་གསུངས་ཏེ། །ཁྱད་པར་དུ་འཕགས་པའི་མཆོད་པ་ཡིན། དམིགས་མེད་ཀྱི་མཆོད་པ་བདག་མེད་ཀྱི་དོན་བསྒོམ་པ། དབུ་ཕྱག་རྫོགས་གསུམ་གྱི་ལྟ་བ་ངོ་འཕྲོད་དེ་སྒོམ་པས་ངང་སྐྱོང་པ་དེ་མཆོད་པ་ཚོགས་བསགས་ཐམས་ཅད་ཀྱི་ནང་ནས་རྒྱལ་པོ་ཡིན་པ་རེད། འུ་ཅག་ཚོས་འཇིག་རྟེན་གྱི་རྒྱལ་པོ་བློན་པོ་དཔོན་ཆེན་ཞིག་གདན་འདྲེན་ཞུ་དུས་ཅི་འདྲའི་སྣེ་ལེན་དང་གྲ་སྒྲིག་ཅིག་དགོས་འདུགདེར་མ་ཟད་མགྲོན་པོ་གལ་ཆེན་ཞིག་ཡིན་ཀྱང་གཟབ་གཟབ་བྱེད་ཁུལ་བྱེད་པ་རེད། སངས་རྒྱས་ཆོས་ཀྱི་རྒྱལ་པོ་ས་གསུམ་གྱི་འདྲེན་པ་འཇིག་རྟེན་གྱི་མིག་ལྟ་བུ། ཨུ་དུམ་ཝ་རའི་མེ་ཏོག་ལྟ་བུ་མཚན་ཙམ་ཐོས་པར་དཀའ་བ་དེ། འཁོར་དང་བཅས་པ་སྤྱན་འདྲེན་པ་ལ་མཆོད་བཤམས་གཙང་མ་ཞིག་མ་འབྱོར་བར། ཞིང་ས་ཁྱད་པར་ཅན་དེ་འདྲ་ཡོད་བཞིན་དུ་བསོད་ནམས་གསོག་མ་ཤེས་ན་དུད་འགྲོ་རྩྭ་ཟན་ཞིག་དང་འདྲ་བ་རེད། དེས་ན་མཆོད་པ་འདིར་རྣམ་གྲངས་མང་པོ་ཞིག་བཤད་པ་རེད། དངོས་སུ་འབྱོར་བའི་མཆོད་པ། ཡིད་ཀྱིས་སྤྲུལ་བའི་མཆོད་པ། གདོད་ནས་གྲུབ་པའི་མཆོད་པ་ལ་སོགས་པ་བཤད་པ་རེད། དེའི་ཡན་ཆད་ཀྱིས་ཚོགས་བསག་པའི་སྒོ་ཡན་ལག་བདུན་གྱི་ནང་ནས་མཆོད་པའི་ཡན་ལག་བཤད་པའི་རིམ་པ་སོང་ནས།

ཡན་ལག་གསུམ་པ་བཤགས་པའི་ཡན་ལག

འདི་ལ་གཉེན་པོ་སྟོབས་བཞིའི་སྒོ་ནས་བཤགས་པ་ལ་གཉེན་པོ་སྟོབས་བཞི་གང་ཡིན་ཞེ་ན། གཉེན་པོའི་སྟོབས་དང་གཅིག རྣམ་པར་སུན་འབྱིན་པའི་སྟོབས་དང་གཉིས། སོར་ཆུད་པའི་སྟོབས་དང་གསུམ། རྟེན་གྱི་སྟོབས་དང་བཞི་ཡོད་པ་ལས།

དང་པོ་གཉེན་པོའི་སྟོབས།

གཉེན་པོའི་སྟོབས་ཞེས་པ་ནི་ཉེས་པའི་རྣམ་གྲངས་བརྗོད་ནས་བཤགས་པ་བྱེད་པ་ཡིན་པས་དེ་ལ་ཀུན་སློང་དང་དུས་ཀྱི་ཁྱད་པར་དང་། རྣམ་གྲངས་བརྗོད་པ་དངོས་དང་གཉིས་ཀྱིས་བཤད་པ་རེད།

དང་པོ་ཀུན་སློང་དང་དུས་ཀྱི་ཁྱད་པར་གྱིས་སྒོ་ནས་བཤད་པ།

ཕ་མས་ཐོག་དྲངས་བདག་སོགས་འགྲོ་ཀུན་ཀྱི། །ཐོག་མ་མེད་པའི་དུས་ནས་ད་ལྟའི་བར། །ཞེས་པས་ཚིགས་རྐང་གཉིས་ཀྱིས་བསྟན། དང་པོ་བཤགས་བྱ་དེ་གང་ཡིན་ཞེ་ན། སྡིག་པ་མི་དགེ་བའི་ཚོགས་འདུ་བྱས་པ་དེ་ཡིན། དེ་མ་བཤགས་ན་དེས་འཁོར་བའི་སྡུག་བསྔལ་གྱི་རྒྱུ་བྱེད། འོ་ན་བདེ་བ་འདོད་བཞིན་དུ་སྡུག་བསྔལ་གྱི་རྒྱུ་སྒྲུབ་པ་འདི་ཅིའི་ཕྱིར་ཡིན་སྙམ་ན། མི་ཤེས་གཏི་མུག་གི་གཞན་དབང་དུ་སོང་བས་རེད། དེས་ན་བཤགས་པ་འདི་གཏི་མུག་གི་གཉེན་པོ་ཡིན་ཞིང་། སྦྱོང་བྱེད་གཉེན་པོ་སྟོབས་བཞི་དེས་སྦྱང་བྱ་སྡིག་པའི་སྒོ་དྲུག་སྦྱོང་དགོས་པ་ཡིན་པས། འདི་ནས་དང་པོ་དུས་དང་ཀུན་སློང་གི་སྒོ་གཉིས་ཀ་བཤད་པ་རེད། །ཕ་མས་ཐོག་དྲངས་བདག་སོགས་འགྲོ་ཀུན་ཀྱི། །ཞེས་གསུངས་ཏེ། སྤྱིར་སེམས་ཅན་ཐམས་ཅད་ཕ་མ་ཡིན་པ་རེད། ཕ་མ་བྱས་མ་མྱོང་བ་གཅིག་ཀྱང་མེད། ཕ་མ་བྱས་ཚད་དྲིན་ཆེ་ཆུང་འདྲ་འདྲ་ཡིན་པ་རེད། འོན་ཀྱང་སྙིང་རྗེའི་བློ་དེ་འདྲ་མ་འབྱོངས་བ་ཞིག་གིས་ཕ་མ་སེམས་ཅན་སྨྲས་ཀྱང་། དོན་གྱིས་ད་ལྟའི་ཕ་མ་དང་སེམས་ཅན་ཐམས་ཅད་འདྲ་བ་དེ་དཀའ་བས་ན། ད་ལྟའི་ཕ་མའི་མིང་གི་འགོ་བཟུང་ནས་སེམས་ཅན་ཐམས་ཅད་སྨོས་ན་སྙིང་རྗེ་སྐྱེ་སླ་བ་དང་གོམས་སླ་བར་ཕན་ཐོགས་ཡོད་པས་གསུངས་པ་རེད། དེས་ན་ད་ལྟའི་ཕ་མ་གཉིས་ཀྱི་ཐོག་དྲངས་བའི་བདག་ལ་སོགས་པའི་འགྲོ་བ་སེམས་ཅན་ཀུན་ཀྱི། ཐོག་མ་མེད་པའི་དུས་ནས་ད་ལྟའི་བར། །ཞེས་གསུངས་ཏེ། འཁོར་བ་ལ་ཐོག་མ་འདི་རེད་ཅེས་པ་ཞིག་ཡོད་པ་མ་རེད། དེ་བཞིན་དུ་ཐ་མ་ཡང་འདི་རེད་ཅེས་པ་ཞིག་ཡོད་པ་མ་རེད། དུས་འདས་པ་དང་མ་འོངས་པ་ལ་མཐའ་ཡོད་པ་མ་རེད། ཡོད་ས་ཨེ་འདུག་ཁ་སང་ལ་ཁ་སང་ཡོད་པ་རེད། དེ་ལ་ཡང་ཁ་སང་ཡོད་པ་རེད། ཁ་སང་རྐྱང་བར་ཡང་ཟད་འགྲོ་བ་ཞིག་ཡོད་པ་མ་རེད། ངའི་ཁ་རྩང་ང་སྐྱེས་ནས་ཉིན་པར་ཟད་འགྲོ་བ་ཡིན་དུ་ཆུག་ཀྱང་། གང་ཟག་གཞན་གྱི་ཁ་རྩང་དེའི་ཕན་དུ་ཡོད་པ་དང་། དེའི་གང་ཟག་དེའི་ཁ་རྩང་ཟད་ཀྱང་དེ་མིན་པའི་གང་ཟག་གི་ཁ་རྩང་དེའི་སྔོན་དུ་ཡོད་པ་ཡིན་པས། དེ་འདྲའི་ཕར་ལ་དེད་སོང་ན་ས་འདི་ཆགས་པའི་ཉིན་ལ་ཐུག་འགྲོ་བ་དང་སྣོད་བཅུད་གཉིས་ལས་སྣོད་ཀྱི་འཇིག་རྟེན་སྔོན་ལ་ཆགས་པ་མ་ཡིན་ནམ་སྙམ་ན་ཡང་དེའི་སྔོན་དུ་འཇིག་རྟེན་གཞན་གྱི་ཁ་རྩང་ཡོད་པ་དང་། ཆགས་གནས་འཇིག་སྟོངས་ཀྱི་བསྐལ་བ་ལ་ཆགས་པ་སྔོན་མ་ཡིན་དང་འཇིག་པ་སྔོན་མ་ཡིན་ཤེས་ཀྱང་མི་ཤེས་པ་དེ་ཡང་། བྱ་དང་སྒོ་ང་གཉིས་ཀ་སྔོན་མ་གང་ཡིན་སྨྲས་པ་དང་གཅིག་མཚུངས་ཡིན། དེ་འདྲའི་ཐོག་མེད་ཀྱི་དུས་ནས་ད་ལྟའི་བར་དུ་བདག་སོགས་སེམས་ཅན་ཐམས་ཅད་ཀྱི་སྡིག་པ་མི་དགེ་བའི་ལས་བསགས་ཚད་ཀུན་སློང་མ་དག་པའི་དབང་གིས་བྱས་པ་ཞིག་མ་གཏོགས་མེད་པས། ད་འདི་ནས་དུས་བསྟན་པའི་ཞོར་དུ་ཀུན་སློང་ཤུགས་ལ་བསྟན་པ་ཡིན་ཞིང་། འདིའི་མཚམས་སུ་གསུམ་པ་རྣམ་གྲངས་བརྗོད་པ་དངོས་བཤད་པ་ཡིན་ལ།

གཉིས་པ་རྣམ་གྲངས་བརྗོད་པ་དངོས་བཤད་པ།

དེ་ལ་ངོ་ཤེས་པ་དང་མི་ཤེས་པའི་ཁ་ན་མ་ཐོ་བ་གཉིས། དེ་རེ་རེ་ལ་ཡང་རང་བཞིན་དང་བཅས་པ་གཉིས་རེ་སྟེ་བཞིའོ། །

དང་པོ་རང་བཞིན་གྱི་ཉེས་པ་ངོ་ཤེས་པ་རྣམས་བཤགས་པ།

དེ་ལ་གཉིས་ཏེ། མི་དགེ་བ་བཅུ་སྤྱིར་བཤགས་པ་དང་། ཉེས་པ་ལྕི་བ་རྣམས་བྱེ་བྲག་ཏུ་བཤགས་པའོ།།

དང་པོ་མི་དགེ་བ་བཅུ་སྤྱིར་བཤགས་པ།

དེ་ལ་ལུས་ངག་ཡིད་གསུམ་གྱི་སྒོ་ནས་བསགས་པའི་དབྱེ་བ་ཡོད་པའི་ནང་ནས།

དང་པོ་ལུས་ཀྱི་མི་དགེ་བ་གསུམ་བཤགས་པ།

སྲོག་གཅོད་མ་བྱིན་ལེན་དང་མི་ཚངས་སྤྱོད། །ལུས་ཀྱི་མི་དགེ་གསུམ་པོ་མཐོལ་ལོ་བཤགས། །ཞེས་གསུངས་ཏེ། སྲོག་གཅོད་པ་འདི་སྐབས་འདིར་རང་བཞིན་གྱི་ཉེས་པར་བཤད་པ་ཡིན་ལ། བསམ་བཞིན་དུ་མཚོན་དང་དུག་དང་ངན་སྔགས་ལ་སོགས་པ་གསད་ཐབས་སྣ་ཚོགས་ཀྱིས། གསད་བྱའི་སེམས་ཅན་གྱི་སྲོག་གི་དབང་པོ་འགག་པར་བྱས་པའོ། །འདི་ལ་གཞི་བསམ་སྦྱོར་བ་མཐར་ཐུག་ཐམས་ཅད་ཚང་བ་ལ་སྲོག་གཅོད་གསུངས་བ་དང་། གཞི་བསམ་སྦྱོར་བ་མཐར་ཐུག་ཅེས་པ། གཞི་གསད་བྱ་སེམས་ཅན་ཡིན་པ། བསམ་པ་གསད་བྱ་དེ་ལ་འདུ་ཤེས་པས་ཀུན་སློང་གསོད་སེམས་རྒྱུན་མ་ཆད་པ། སྦྱོར་བ་མཚོན་ཆ་ལ་སོགས་པས་བསྣུན་ཏེ་བརྩམས་པ་མ་ལྡོག་པ། མཐར་ཐུག་དེའི་སྐབས་སམ་དེ་མིན་དུ་གསོད་པ་པོ་རང་ཉིད་མ་ཤི་བའི་སྔ་རོལ་དུ་གསད་བྱའི་སྲོག་འགགས་པའི་དོན་གྱི་ཆ་རྣམས་ཚང་བའོ། །གཞི་བསམ་སྦྱོར་བ་མཐར་ཐུག་ཐམས་ཅད་ཚང་དུས་སྲོག་གཅོད་ཀྱི་ཉེས་པ་འབྱུང་ཞིང་། དེའི་ནང་ནས་གོ་བ་གནད་ཆེན་ཞིག་ལ། རང་གིས་ལག་བསྟར་ཏེ་བསད་ན་ལྟ་ཅི་སྨྲོས་མོད་གཞན་ལ་གསོད་དུ་འཇུག་པ་དང་གསད་པ་ལ་བསྔགས་བརྗོད་ལ་སོགས་པས་རྐྱེན་བྱས་ཏེ་ཤི་ཡང་སྲོག་གཅོད་ཀྱི་ཉེས་པ་འབྱུང་བར་འདྲ་སྟེ། མངོན་པ་མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་གསུངས་སོ། །སྲོག་གཅོད་འདི་ལ་གང་གསད་བྱའི་ངོས་ནས་དབྱེ་ན། ཕ་མ་དགྲ་བཅོམ་བསད་པ་ལྟ་བུ་ཆེན་པོ། སྤྱིར་བཏང་མི་བསད་པ་ལྟ་བུ་འབྲིང་། དུད་འགྲོ་བསད་པ་ལྟ་བུ་ཆུང་ངུ་དང་། ཡང་ཀུན་སློང་གི་སྒོ་ནས་དབྱེ་ན། ཞེ་སྡང་གིས་གསད་པ་སྡང་སེམས་དང་འཁོན་སེམས་ཀྱིས་དང་། གཏི་མུག་གིས་གསད་པ་འཚེ་བ་ཆོས་སུ་སྨྲ་བས། དཔའ་བོ་གཡུལ་དུ་བསད་ན་ལྷ་ཡུལ་དུ་སྐྱེ་བར་འཛིན་པ་དང་། ལོག་པའི་ཆོས་ལུགས་སྤེལ་ཐབས་ལས་གཞན་སྲོག་གཅོད་པ་ལ་སོགས་པ་གཏི་མུག་གི་དབང་གིས་བསད་པ། འདོད་ཆགས་ཀྱི་སྒོ་ནས་ནོར་ལ་རྔམས་པ་དང་འདོད་སྲེད་ཀྱི་དབང་དུ་ཤོར་ནས་དེའི་དོན་དུ་གཞན་གྱི་སྲོག་གཅོད་པ་སྟེ་དེ་ལྟ་བུའི་དུག་གསུམ་དང་འབྲེལ་བའི་ཁྱད་པར་ཡོད་ཅིང་། སྲོག་གཅོད་འདི་རབ་བྱུང་བ་ཞིག་ལ་བྱུང་བ་ཡིན་ན་བཅས་དང་རང་བཞིན་གྱི་ཁ་ན་མ་ཐོ་བ་གཉིས་ཀ་མཉམ་དུ་འབྱུང་ལ། ད་དུང་སྲོག་གཅོད་དང་འབྲེལ་བའི་ཉེས་དམིགས་འབྱུང་རྐྱེན་གྲི་དང་མེ་མདའ་དུག་རྫས། དེ་མིན་སྲོག་གཅོད་བྱེད་ཀྱི་ལག་ཆ་ཉར་ཚགས་བྱས་ན་རྫས་དེ་དག་ལ་བརྟེན་ཏེ་སྡིག་པ་སྐད་ཅིག་རེ་ལ་ཡར་འཕེལ་ཏེ་འཆང་བ་པོས་རྣམ་སྨིན་མྱོང་དགོས། སྲོག་གཅོད་ཀྱི་རྣམ་སྨིན་ལ་བསམ་ན། སྲོག་བཅད་པའི་རྣམ་སྨིན་གྱི་འབྲས་བུ་ངན་སོང་གསུམ་གང་རུང་ལ་སྐྱེས་ཏེ་མི་ལོ་ཐེར་འབུམ་མང་པོ་ལ་སྡུག་བསྔལ་མྱོང་དགོས་པ་དང་། མྱོང་བ་རྒྱུ་མཐུན་གྱིས་ངན་སོང་ལས་གལ་ཏེ་ཐར་ནའང་སྲོག་ལན་ལྔ་བརྒྱ་འཇལ་དགོས་པ་དང་ཚེ་ཐུང་ནད་མང་གི་སྡུག་བསྔལ་མྱོང་དགོས། བྱེད་པ་རྒྱུ་མཐུན་གྱིས་འབྲས་བུ་ཁྲ་དང་སྤྱང་ཀི་ལ་སོགས་པ་དུད་འགྲོ་ཤན་པའི་རིགས་སུ་སྐྱེ་བ་ལེན་པ་དང་། གལ་ཏེ་མི་ལུས་ཐོབ་ཀྱང་སྲོག་གཅོད་ལ་དགའ་བའི་ཤན་པ་ལ་སོགས་པའི་ལུས་ལེན་ཞིང་། དབང་གི་འབྲས་བུ་ས་ཕྱོགས་གང་དུ་སྐྱེས་ཀྱང་མདངས་དང་གཟི་བརྗིད་མེད་པ། ས་བཅུད་ཡུལ་བཅུད་མེད་ས། དགྲ་ཇག་རྐུན་མ་རྒོད་ཅིང་། སྲོག་གི་འཇིགས་པ་ཆེ་བ་ལྷ་མ་ཡིན་གྱི་ཡུལ་ལྟ་བུ་ལ་སྐྱེ། སྐྱེས་བུའི་བྱེད་བྲས་ལ་ས་བོན་ཕར་ལ་བཏབ་ན་མྱུ་གུ་ཚུར་ལ་འཁྲུངས་བ་ལྟར་ལས་ཀྱི་འབྲས་བུ་ཆུད་མི་ཟ་བར་བྱེད་པ་པོ་རང་གི་སྟེང་ལ་སྨིན་ངེས་ཅན་ཡིན་པ་དང་། འཕགས་པ་མོའུ་འགལ་གྱི་བུ་དམྱལ་བ་ལ་སོགས་པ་འགྲོ་བ་རིགས་དྲུག་གི་གནས་སུ་ཕེབས་ནས་མི་རྣམས་ལ་སེམས་ཅན་གྱི་སྡུག་བསྔལ་སྣ་ཚོགས་མྱོང་བཞིན་ཡོད་པ་གསུངས་ཏེ་སྐྱོ་བ་མཛད་ཀྱིན་ཡོད་པར། ཉིན་གཅིག་དུད་འགྲོའི་འགྲོ་བ་ལ་གཟིགས་ཕྱིར་རྒྱ་མཚོའི་འགྲམ་དུ་བྱོན། རྒྱ་མཚོའི་འགྲམ་ན་ཆུ་སྲིན་ཆེན་པོ་རྣམ་པ་སྣ་ཚོགས་ཡོད་པ་ལས། ཉ་མིད་ཟེར་བའི་ཆུ་སྲིན་ཆེན་པོ་ཞིག་ལ་ལུས་ཀྱི་རིང་ཐུང་གི་ཚད་ལ་དཔག་ཚད་ཉིས་སྟོང་ལྷག་ཅིག་ཡོད་པ། ལུས་ལ་ཆུ་སྲིན་ཆུང་ཆུང་མང་པོ་འཐམ་སྟེ་ལུས་ཀྱི་ཤ་རྒྱང་གྲགས་གཅིག་ནས་དཔག་ཚད་བརྒྱ་རེའི་བར་དུ་དུམ་བུ་མང་པོ་བཅད་དེ་ཟ་བཞིན་ཡོད་པས། ཆུ་སྲིན་ཆེན་པོ་དེའི་ན་ཚ་མ་བཟོད་པར་མཚོ་ནང་ནས་ཐང་ལ་རེ་རེ་བུད་དུས། ཁོ་རང་གི་ལས་ལས་སྐྱེས་པའི་གནོད་སྦྱིན་ལྔ་བརྒྱ་ཐོན་ནས་ཞག་མ་མང་པོ་རེར་སྟ་རེ་ལྔ་བརྒྱས་རྩིབ་མ་བཞི་བཅུ་ཞེ་གཅིག་པོ་བྲག་བཞིན་ཡོད་པས། ཡང་དེའི་ན་ཚ་མ་བཟོད་པར་རྒྱ་མཚོའི་ནང་དུ་ཕྱིར་མཆོང་ནས་འགྲེ་ལྡོག་རེ་བརྒྱབ་དུས་རྒྱ་མཚོ་ཆེན་པོ་འཁྲུགས་ནས་ཁྲག་མདོག་ཏུ་འགྱུར་བཞིན་ཡོད་ལ། ཡང་རྒྱ་མཚོའི་ནང་གི་སྲོག་ཆགས་ཐམས་ཅད་ཡོང་ནས་སྔར་བཞིན་དུ་ཟ་ཞིང་བཅད་དེ་སྡུག་བསྔལ་དེ་འདྲ་ཤ་སྟག་གིས་ཉམ་ཐག་པའི་སེམས་ཅན་ཞིག་ཡོད་པར་གཟིགས་ནས། སེམས་ཅན་དེའི་ལས་ཅི་ཞིག་བསགས་གང་ནས་འཕོས་ཡོང་མངོན་ཤེས་ཀྱིས་རྩལ་ཡོད་དགུས་བརྟགས་ཏེ་གཟིགས་ཀྱང་། དུད་འགྲོ་ནས་དུད་འགྲོ་རྐྱང་རྐྱང་གི་སྐྱེ་བ་བླང་བ་ཧ་ཅང་མང་བའི་སྟབས་ཀྱིས་དེ་རྐྱང་རྐྱང་མ་གཏོགས་དང་པོ་ལས་བསགས་སའི་ཡ་མཐའ་གཏན་ནས་གཟིགས་ཐབས་མ་ཐུབ་སྟེ། དེ་ནས་བཅོམ་ལྡན་འདས་ལ་ཞུ་དགོས་དགོངས་ཏེ་རྒྱ་མཚོའི་འགྲམ་དེ་ནས་རྫུ་འཕྲུལ་གྱིས་མི་སྣང་བར་མཛད་དེ། ཡུལ་མཉན་ཡོད་དུ་བཅོམ་ལྡན་འདས་བཞུགས་ཡོད་སར་ཕེབས་ཏེ་བཅོམ་ལྡན་འདས་ཀྱིས་འཁོར་མང་པོ་ལ་ཆོས་སྟོན་བཞིན་ཡོད་པའི་སྤྱན་སྔར་སོང་ནས། སེམས་ཅན་དེའི་ལས་ངན་གྱི་རྒྱུ་ཅི་རེད་ཅེས་དྲིས་ཚེ། བཅོམ་ལྡན་འདས་ཀྱིས་གསུངས་ཏེ། སྔོན་བྱུང་བ་འདས་པའི་དུས་ཀྱི་འདས་པའི་དུས་རིང་མོ་ཞིག་གི་སྔོན་ལ་རྫོགས་པའི་སངས་རྒྱས་རི་བོ་ཞེས་བྱ་བ་འཇིག་རྟེན་དུ་བྱོན་པ་དང་། དེ་དུས་ཁྱིམ་བདག་ཞིག་གིས་དད་པ་སྐྱེས་དེ་ཆོས་ཉན་ནས་ཕྱིར་མི་འོང་གི་འབྲས་བུ་ཐོབ་པ་དང་། དེའི་ཚེ་ཁྱིམ་གྱི་ཆུང་མ་ལ་ཁྱིམ་བདག་གིས་སྨྲས་ཏེ་ཁོ་བོས་བཅོམ་ལྡན་འདས་ཀྱི་མདུན་ནས་ཚངས་སྤྱོད་ཀྱི་བསླབ་པའི་གཞི་ལྔའི་སྡོམ་པ་བླངས་ཚར་བ་ཡིན། ཁྱོད་རང་ཁྱིམ་ནས་བསྡད་ན་ཟས་གོས་གཉིས་ཀ་ཁྱོད་ལ་སྦྱིན། ཁྱིམ་ཐབས་ཟུར་ནས་འཛིན་ནའང་ཁྱོད་རང་ཅི་དགའ་གྱིས། ཁྱོད་ལ་ཅི་དགོས་པའི་ལོངས་སྤྱོད་སྦྱིན་ཆོག་ཅེས་སྨྲས་པས། ཆུང་མས་དགེ་བསྙེན་ཁྱེད་ལ་བསྙེན་བཀུར་དང་ཞབས་ཕྱི་བྱེད་པ་ལས་ཁྱིམ་ཐབས་འཛིན་པ་མིན་ཞེས་སྨྲས། ཁྱིམ་བདག་གི་ཤུལ་ན་ནོར་རྫས་ལོངས་སྤྱོད་ཆེན་པོ་ཡོད་པས་མི་མང་པོ་ཞིག་གིས་རློམ་སེམས་བྱེད་བཞིན་ཡོད་པ་རེད། ནམ་ཞིག་ན་རྒྱལ་པོའི་བློན་པོ་ཞིག་གིས་བསམ་ངན་ཞིག་བཟུང་སྟེ། ཁྱིམ་བདག་འདི་མེད་པར་བྱས་ཏེ་འདིའི་ཁྱིམ་གྱི་མི་ནོར་འཁོར་དང་བཅས་པ་འཕྲོག་ནས་བདག་པོ་བྱེད་དགོས་སྙམ་ནས། བློན་པོས་གསེར་དངུལ་མང་པོ་ཞིག་ཁྱེར་ཡོང་ནས་དཔང་པོ་བདེན་རྟགས་ཀྱི་མི་འགའ་རེ་ཡང་མཉམ་དུ་ཁྲིད་དེ་ཁྱིམ་བདག་དགེ་བསྙེན་དེ་ལ་གསེར་དངུལ་རྣམས་བཅོལ་པ་དང་། ཉིན་གཅིག་རོགས་གཅིག་ཀྱང་མེད་པར་ཡོང་ནས་གསེར་དངུལ་ཐམས་ཅད་ཕྱིར་བླངས། བློན་པོའི་བློ་ངན་གྱི་འཆར་གཞི་ལག་ལེན་ལ་རིམ་གྱིས་བསྟར་ཏེ། ཉིན་གཅིག་སྔར་གྱི་དཔང་པོ་དང་དན་རྟགས་ཀྱི་མི་རྣམས་མཉམ་དུ་ཁྲིད་ནས་རྒྱལ་པོ་ཚང་གི་དཀོར་མཛོད་ཀྱི་རྒྱུ་ནོར་ཁྱོད་ལ་བཅོལ་རྣམས་ཁྱེར་ཤོག་ཅེས་སྨྲས། དགེ་བསྙེན་གྱིས་སྔར་ཀྱི་ཉིན་ཞིག་ལ་ཁྱོད་ཀྱིས་ཁྱེར་སོང་ཞེས་སྨྲས་ཀྱང་། དཔང་པོ་དང་དན་རྟགས་མེད་པས་ཁྲིམས་ཀྱི་སྟེང་ནས་ཕམ་སྟེ། དེ་ནས་དགེ་བསྙེན་རྒྱལ་པོའི་ཕོ་བྲང་གི་བཙོན་ཁང་ནང་དུ་བཅུག་ནས་འབྲེང་བ་རློན་པ་ཤ་སྟག་གི་ལྕག་གིས་བྲབས་པས་མ་ཤི་གོང་ནས་གསོན་དམྱལ་ཞིག་རིག་སྟེ་ཤི་སོང་བ་དང་། དགེ་བསྙེན་ལ་བུ་མེད་པས་ཆུང་མ་རྒྱུ་ནོར་དང་བཅས་པ་བློན་པོས་ཁོ་ལ་དབང་བ་རེད་ཅེས་སྨྲས། ཆུང་མས་སྨྲས་ཏེ་དང་པོ་དགེ་བསྙེན་གྱི་རུས་པ་སྦྱིན་བསྲེག་ཅིག་བྱེད་དུ་འཇུག་དང་དེ་ནས་མི་ནོར་འཁོར་དང་བཅས་པ་སུ་ལ་དབང་བ་ལྟ་སྨྲས་པས། བློན་པོས་དེ་ཁས་ལེན་མཛད་དེ་བློན་པོས་དགེ་བསྙེན་གྱི་རུས་པ་ཁྱེར་ནས་དུར་ཁྲོད་ནང་དུ་མེ་ཕུང་ཆེན་པོ་ཞིག་སྦར་ཏེ་རུས་པ་བསྲེག་བཞིན་ཡོད་པར། བུད་མེད་དེ་ཡང་ཐེ་ཚོམ་མེད་པར་བརྒྱུགས་ནས་མེ་ནང་དུ་མཆོང་སྟེ་ཤི་སོང་བ་དང་། དེ་ལྟར་ལས་ངན་པ་བསགས་པའི་བློན་པོ་ཆུ་སྲིན་འདི་ལ་སྐྱེས་ཤིང་། ལས་དེའི་རྣམ་སྨིན་གྱི་ཕུགས་དེ་རེད་ཅེས་བཅོམ་ལྡན་འདས་ཀྱིས་གསུངས་སོ། །ལས་དེའི་རྣམ་སྨིན་གྱིས་སེམས་ཅན་དམྱལ་བ་ཆེན་པོར་སྡུག་བསྔལ་ལོ་སྟོང་ཕྲག་མང་པོར་མྱོང་། དེ་ནས་དུད་འགྲོའི་ནང་དུ་ཐེངས་མང་པོ་སྐྱེས་ནས་སྡུག་བསྔལ་འདི་འདྲ་ཤ་སྟག་མྱོང་ཡང་ད་དུང་ཡང་ལས་ཟད་མེད་པར། འདིའི་སྡུག་བསྔལ་འདི་སྐྱེ་བ་མང་པོ་ཞིག་ལ་མྱོང་ནས་མཐའ་མཇུག་མཐའ་མཇུག་ཅིག་ལ་རྫོགས་པའི་སངས་རྒྱས་ཡིད་བཟང་ཞུ་བ་ཞིག་འཇིག་རྟེན་དུ་བྱོན་དུས། དེའི་ཚེ་འདིའི་ལས་ད་གཟོད་ཟད་ནས་མི་ལུས་ཅིག་བླངས་ཏེ་རབ་ཏུ་བྱུང་ནས་འབྲས་བུ་ཞིག་ཐོབ་རྒྱུ་ཡོད་པ་ཡིན་གསུངས་པས། མི་མང་པོ་ཞིག་འཁོར་བའི་གནས་ལ་སྐྱོ་བ་སྐྱེས་ཏེ་སེམས་ཅན་མང་པོ་ཞིག་སྨིན་ཅིང་གྲོལ་བར་མཛད་པ་རེད། སྲོག་གཅོད་པ་དེ་འདྲའི་ཉེས་པ་ཆེ་ཞིང་མི་བསད་པ་མིན་ཡང་ལ་ཁའི་རི་དྭགས་སྒོ་ཕྱུགས་ཟོག་ལུག་གང་བསད་ནའང་རང་བཞིན་གྱི་ཉེས་པའི་ཆ་ནས་སྲོག་གཅོད་ཀྱི་རྣམ་སྨིན་འདྲ་བར་མྱོང་དགོས། རང་རེ་དགོན་ཡུལ་སྡེ་གསུམ་གྱིས་ནུས་པ་མཉམ་དུ་ཕྱུང་ནས་རི་རྒྱ་རྔོན་ཁྲིམས་འཇོག་བཞིན་ཡོད་པར་ང་ཚོའི་ངོས་ནས་མི་འཇིགས་པ་སྐྱབས་ཀྱི་སྦྱིན་པ་ཡིན་ལ། རི་དྭགས་དུད་འགྲོ་ཡིན་ཡང་སྲོག་ལ་དམར་ལུགས་ང་ཚོ་དང་གཅིག་པ་ཡིན། ཕ་མ་བསད་དེ་དྭ་ཕྲུག་བདག་མེད་དུ་ལུས་ན་ཉམ་ཐག་སྡུག་བསྔལ་ཆེ་བ་ཡང་ང་ཚོ་དང་གཅིག་མཚུངས་རེད་སྙམ་ནས་སྲོག་སྐྱབས་དགོས་པར་མ་ཟད་སྐྱབས་ཀྱིན་ཡང་ཡོད་པ་རེད། སྲོག་གཅོད་སྤངས་ནས་སྲོག་བསྐྱབས་ན་དགེ་བའི་ལས་ལམ་ཆེན་པོ་ཞིག་ཡིན་པ་དང་། སེམས་ཅན་ཕ་མ་ཡིན་པའི་སྙིང་རྗེ་དང་འབྲེལ་ན་དེ་བས་བསོད་ནམས་ཆེན་པོ་ཐོབ། དེའི་ཞོར་ལ་དགེ་ངོ་སྡིག་ངོ་མི་ཤེས་པའི་རྔོན་པ་རྣམས་ལ་ཕན་ཆེན་པོ་ཞིག་ཐོགས་སོང་བ་ཡིན། དམྱལ་བའི་ནང་དུ་ལན་གཅིག་ལ་མི་འགྲོ་བའི་ཐབས་ཤིག་ཐོན་ན་དེ་རྣམས་ལ་ཕན་ཐོགས་ཆེན་པོ་ཞིག་དང་། དེའི་སེམས་ཅན་རྔོན་པ་དེ་ཡང་ཕ་མ་ཡིན་པའི་ཆ་ནས་བྲག་མགོ་མཐོན་པོའི་གཡང་ས་ཞིག་ནས་མཆོང་གྲབས་བྱེད་ཀྱིན་ཡོད་ཚེ་མཆོང་དུ་མ་བཅུག་པ་དང་འདྲ་བར་ཕན་ཐོགས་ཆེ་བ་ཡིན་པས། ཆེ་ཆུང་ཕོ་མོ་ཚང་མས་རང་སའི་སྟེང་ནས་རི་དྭགས་གསད་དུ་མ་བཅུགབྱ་དང་ཉ་ཚོ་དེ་བཞིན་མཚུངས་པ་རེད། རྩ་ཆེའི་རི་དྭགས་སྲུང་སྐྱོབས་བྱེད་པ་འདི་འཛམ་བུ་གླིང་གི་འཁོར་ཡུག་སྲུང་སྐྱོབས་ཀྱི་སྒྲིག་ལམ་དང་མཐུན་པ་དང་། ངོ་མ་བཤད་ན་འདིའི་འབྲེལ་ཡོད་ཀྱི་ལས་ཀའི་འགན་ཡོད་པ་དབང་ཆ་གོ་གནས་ཅན་ཚོས་ལྟ་དགོས་ཀྱང་། ཉམ་ཆུང་རི་དྭགས་ཀྱི་བདེ་སྡུག་མཐོང་མཁན་དེང་སང་ཉུང་ཉུང་ཡིན། སྲོག་གཅོད་འདི་ཤ་ཁྲག་གི་ཁ་ཟས་ཟ་བ་འདིའི་ཁུངས་ནས་མང་པོ་ཞིག་འབྱུང་བཞིན་ཡོད་པས། འུ་ཚོར་ཤ་ཁྲག་གི་ཁ་ཟས་འདི་མི་རབས་མི་རབས་བྱས་ཏེ་ཟ་རྒྱུའི་གོམས་སྲོལ་ངན་པ་ཞིག་སེར་སྐྱ་ཕོ་མོ་མེད་པར་ཚང་མ་ལ་ཆགས་ཡོད་པས། སྒོ་བཤས་སྤང་ན་ཡག་པར་མ་ཟད་ཤ་མ་ཟོས་ན་དེ་བས་ཡག །ཤ་ཟ་མཁན་མེད་ན་འཚོང་མཁན་ཡོད་དོན་མེད་ལ། ཤ་བཙོང་ས་མེད་ན་ཚོང་གི་དོན་དུ་བཤའ་མཁན་ཡོད་དོན་མེད་པས། ངོ་མ་བཤད་ན་སྒོ་བཤས་སྤོང་བ་དང་། སྒོ་ཟོག་ཚེ་ཐར་བྱེད་པ་དེ། སྡེ་མང་ཚོགས་ནས་འགོ་བཙུག་བབ་འོས་ཡོད་ཀྱང་། ཤ་མི་ཟ་བ་དེ་དགོན་པའི་བླ་སེར་ནས་དང་པོ་འགོ་བཙུག་ན་འོས་པ་ཡིན། བླ་གྲྭ་ཚང་མས་སེམས་ཐག་མཉམ་དུ་བཅད་དེ་བུ་སུ་བཟང་བལྟས་ན་མཚར་ས་ཡོད་གི་སྙམ་འདུགསངས་རྒྱས་བཅོམ་ལྡན་འདས་ཀྱི་མདོའི་ནང་དུ་བློ་གྲོས་ཆེན་པོ་ངས་ཤའི་ཟས་ནི་སུ་ལ་ཡང་མ་གནང་མི་གནང་གནང་བར་མི་འགྱུར། རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་ངས་བཤད་དོ་ཅེས་གསུངས་སོ། །ཁས་བཤད་པ་སླ་ཡང་ལག་ལེན་ལ་དེ་འདྲ་འདེབས་སླ་བ་མིན་སྟེ། ལུས་ཀྱི་འཚོ་བཅུད་ཀྱིས་མི་འདང་བ་ཟེར་བ་སོགས་ཁ་གཡར་ས་མང་པོ་ཞིག་རྙེད་ཡོང་བས་སོ། །དཀར་ཟས་ཚོད་མའི་རིགས་སྣ་ཁ་མང་པོ་ཡོད་ཡོང་ན་ལྷག་ཏུ་ཤ་མི་དྲན་པ་རེད་ཡོང་བ་དང་། མང་པོས་མ་ཟོས་ན་ཟ་མཁན་ཉུང་ན་ཆོད་སླ་ཞིང་། མང་ཆེ་བས་ཟོས་ཚེ་ཉུང་ཉུང་གིས་མཚམས་རེ་གཅད་ཀྱང་། མཚམས་རེར་མི་ཆོད། མ་ཟོས་མ་ཟོས་པར་སླར་ཟོས་ཚེ་སྲེད་པ་ཇེ་ཆེར་སོང་ནས་མི་ཆོད་པར་ཇེ་སྡུག་ལ་འགྲོ་བ་སོགས། མདོར་ན་དམར་ཟས་ཤ་འདི་ཟོས་ན་ཉེས་པ་ཆེ་བར་མ་ཟད་ནད་རིགས་མང་པོ་ཞིག་འདིས་བསྐྱེད་ཀྱིན་ཡོད་པ་ཡིན། མི་མང་པོས་བཅད་ན་ཉུང་ཉུང་གིས་ཆོད་སླ་བས་ས་ཆ་དེའི་མི་ཡིས་ཤ་ཟ་ནི་མ་རེད་ཟེར་བ་ཞིག་ཏུ་གྱུར་ན་དགེ་བསྐུལ་དང་མིག་ལྟོས་མི་སྲིད་པ་ཞིག་ཏུ་གྱུར་བར་མ་ཟད་དགེ་བ་རླབས་ཆེན་ངོ་མ་ཞིག་ཡིན་ལ། མདོར་ན་བཅོམ་ལྡན་འདས་ཀྱིས། རང་གི་ལུས་ལ་དཔེ་བླངས་ནས། །གཞན་ལ་གནོད་པ་མ་བྱེད་ཅིག །ཅེས་གསུངས་བས། །འཇིག་རྟེན་འདིའི་སྲོག་ཆགས་ཡོད་ཚད་ཀྱིས་གཅེས་པ་རང་སྲོག་ཡིན་པ་དང་། རང་གི་ལུས་ལ་ཐ་ན་ཚེར་མ་ཞིག་ཟུག་ནའང་ཅི་འདྲའི་ན་ཟུག་ཡོད། སེམས་ཅན་གཞན་གྱི་སྲོག་ལ་གྲི་བཞག་ན་སེམས་ཅན་ཕ་རོལ་པོ་ལ་སྡུག་བསྔལ་ཅི་ཙམ་ཞིག་ཆེ་བ་རང་གི་ལུས་ལ་དཔེར་བླང་སྟེ་དཔོག་ནས། རང་གཅེས་པ་རྒྱུ་མཚན་དུ་བྱས་ཏེ་གཞན་ལ་གནོད་པ་སྐྱེལ་མི་རུང་པ་ཡིན། རང་གི་མཆུ་ལག་པས་བསུམ་སྟེ་དབུགས་འགྲོ་འོང་གཉིས་གསུམ་ཞིག་གི་ཚེ་ལ་སྡོད་དང་ཅི་འདྲའི་སྔངས་སྐྲག་ཞིག་ཡོད། གྲི་དང་མེ་མདས་བསད་ནའང་དེ་འདྲའི་ཤི་མི་ཐུབ་པའི་སྡུག་བསྔལ་ཅི་ཙམ་མྱོང་ས་རེད། ཤྭ་བ་ཨ་ཕ་ཡིན་ཟེར་སྔོན་ལ་བུད་ཐལ། ཡུ་མོ་ཨ་མ་ཡིན་ཟེར་རྗེས་ནས་ཡོང་གི། ཤེའུ་ཕྲུག་བུ་ཕྲུག་ཡིན་ཟེར་དཀྱིལ་དུ་འཇོག་གི། ངའི་ཕ་མ་མ་འོངས་ཕྱི་མའི་ལམ་ལ་དགྲ་ནག་པོ་ཞིག་གིས་སྙིང་མདའ་སྤྲད་སོང་ཟེར་བ་དེ་འདྲའི་ལོ་རྒྱུས་དང་གཏམ་རྒྱུད་ཀྱི་ནང་དུ་བྲིས་འདུག་པ། དེ་ཚོ་དང་གཅིག་པ་ཡིན་པས་མིས་རི་དྭགས་ཀྱི་ཕ་མ་བསད་ནས་ཕྲུ་གུ་དྭ་ཕྲུག་ཏུ་ལུས་ན་མི་རང་ཉིད་ཀྱི་ལུས་ཐོག་ལ་ཡོང་བ་དང་སྡུག་བསྔལ་གཅིག་མཚུངས་ཡིན། དཔེར་ན་མ་བཟང་མོ་ཞིག་གིས་རང་གི་བུ་དང་བུ་མོའི་ཤ་ཟ་འདོད་མི་སྐྱེ་བ་དང་། དེ་ལྟར་དུ་བུ་རྒྱུད་བཟང་པོ་ཞིག་གིས་ཕ་མའི་ཤ་མི་ཟ་བ་ལྟར། ཕ་མ་སེམས་ཅན་གྱི་རིགས་སུ་གྱུར་བའི་ཤ་ཞིག་གཏན་ནས་ཟ་འདོད་མི་སྐྱེ་བ་ཞིག་ཡོང་ན་བྱམས་སྙིང་རྗེ་བྱང་ཆུབ་ཀྱི་སེམས་རྒྱུད་ལ་ཡོད་པའི་རྟགས་དང་། དེ་མིན་གང་ལྟར་ཡང་གཅིག་དཀའ་བ་ཡིན། དེ་བཞིན་དུ་བེའུ་རྟོ་ལེ་མུག་གསོད་བྱས་པ་ཡང་དབང་ཡོད་མེད་ཀྱིས་དབང་ཆེ་ཆུང་ཁེ་གྲགས་གཞན་ལ་གཏུག་ནས། འུ་ཚོ་མི་ཞིག་གིས་གཅིག་ཚང་གི་ཕ་མ་འགོ་འཛོམས་ཀྱི་བུ་ཕྲུག་འཕྲོག་ནས་མུག་གསོད་བྱས་ཏེ་དེའི་ཟ་སྐལ་ཀུན་ཀྱང་འཕྲོག་ན་སྡུག་བསྔལ་ཅི་ཙམ་ཡོད་པ་ལ་ལྟོས། སྒོ་ཁྱི་བཙོན་པ་ཉིན་མཚན་གཉིས་ཀར་སྐེ་ལ་ལྕགས་ཐག་བསྐོན་ནས་བཏགས་ཀྱང་ལྟོ་ཟ་རྒྱུའི་ཟས་སྐལ་བཅད་ན་དཔེ་རང་ཐོག་ལ་བསྐོར་ན་སྡུག་བསྔལ་ཅི་ཙམ་ཡོད། མི་བསད་ན་སྲོག་གཅོད་ཀྱི་ནང་ནས་ཉེས་པ་ཆེ་ཤོས་ཡིན་པ། གོང་གི་གཏམ་རྒྱུད་དེ་དང་། དེ་ཚོ་འདོད་རྔམས་དང་འདོད་ཆགས་ཀྱི་དབང་གིས་བསད་པ་དང་། ཞེ་སྡང་དང་གཏི་མུག་གི་དབང་གིས་བསད་ན་དེ་བཞིན་དུ་རྣམ་སྨིན་སྦྱང་བར་དཀའ་བ་མྱོང་དགོས། ཕ་མ་དགྲ་བཅོམ་བསད་ན་ལྟ་ཅི་སྨོས་གྲྭ་པ་སངས་རྒྱས་ཀྱི་ན་བཟའ་སྐུ་ལ་བཞེས་ཡོད་པ་ཞིག་བསད་ན། སྲོག་གཅོད་ཀྱི་ཉེས་པས་མི་ཚད་པར་སྐྱབས་འགྲོའི་བསླབ་བྱ་ཉམས་ཏེ་དཀོན་མཆོག་གསུམ་གྱི་སྐྱབས་འོག་ནས་བུད་འགྲོ་བ་རེད། གྲྭ་ཆས་ཅན་གྱིས་ཕར་ལ་མི་བསད་ན་སངས་རྒྱས་བསྟན་པའི་རྨ་འབེབས། བསྟན་བླ་འཚོང་མཁན་སོ་བྱང་སྔགས་གསུམ་གྱི་སྡོམ་དམ་ཚིག་ལས་ཉམས་སོང་བ་ཡིན། རབ་ཏུ་བྱུང་བ་ཞིག་གིས་དགེ་སྦྱོང་གི་ཆོས་བཞི་ལས་འདའ་མི་ཉན་ཞིང་། དགེ་སྦྱོང་གི་ཆོས་བཞི་པོ་གང་ཡིན་ཞེ་ན། གཤེ་བ་ལ་སླར་མི་གཤེ་བ་དང་། ཁྲོས་པ་ལ་སླར་མི་ཁྲོ་བ། བརྡེགས་པ་ལ་སླར་མི་རྡེག་པ། མཚང་བྲུས་པ་ལ་སླར་མཚང་མི་འབྲུ་བའོ། །མདོ་ལས། རབ་ཏུ་བྱུང་བས་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་གསུངས་སོ། །ལར་མ་རྩ་དཔེ་རང་ཐོག་ཏུ་བླང་ན་རང་གི་བུ་ཚ་བོ་མི་ཞིག་གིས་བསད་སོང་བའི་སྡུག་སེམས་ནད་ཕ་རོལ་པོའི་ཕ་མ་ཉེ་འབྲེལ་ལ་ཡང་ཡོད་ཅིང་། རིགས་རུས་གཅིག་གི་མི་ཤ་ཁྲག་ཆད་ས་གཅིག་ལས་ཆད་པ་སྟོན་པ་གཅིག་ལ་སྐྱབས་སུ་སོང་བའི་ཆོས་དད་པ། ཡུལ་སྡེ་གཅིག་གི་ནང་མཉམ་དུ་མི་ཐོག་མི་རྒྱུད་དུ་འཚོ་བ་མཉམ་སྐྱེལ་བྱས་པ་ཡིན་པས་དོན་དག་ཆུང་ངུ་ཞིག་གི་ཆེད་དུ་སྲོག་ལ་ལག་འཇོག་པ་ནི་དཔའ་རྟགས་མ་རེད་སྡར་རྟགས་རེད། ཤེས་མེད་སྤྲོ་ཐུང་ཁྱི་ངན་ཉྭ་འཐམ་བྱེད་ཀྱིན་འདུག་པ་དང་གཅིག་མཚུངས་རེད། མི་བསད་པའི་སྡིག་རྒན་གྲིབ་ཆེ་བས་དེ་ལྟའི་སྡིག་པ་ཚེ་འདིར་མེད་ཀྱང་ཚེ་རབས་ཐོག་མེད་ནས་བསགས་པའི་སྲོག་བཅད་ཀྱི་སྡིག་པ་དེ་ཚོ་སེམས་ཐོག་ལ་ལོངས། རང་གིས་སེམས་ཅན་གྱི་སྲོག་མི་གཅད་པའི་སྟེང་དུ་གཞན་ལ་སྲོག་གཅོད་ཀྱི་ཉེས་དམིགས་དང་སྲོག་གཅོད་སྤོང་བའི་ཕན་ཡོན་བསྒྲག་ན་བསོད་ནམས་ལྷག་པར་ཆེ་ལ། སྲོག་གཅོད་སྤངས་ན་བྱམས་དང་སྙིང་རྗེ་རང་ཤུགས་ཀྱིས་སྐྱེ་ཞིང་། དཀར་ཕྱོགས་ཀྱི་ལྷས་སྡོང་གྲོགས་མཛད། ཚེ་རིང་། ནད་མེད། བསམ་དོན་ངང་གིས་འགྲུབ། འདྲེས་བར་ཆད་ཀྱིས་མི་ཚུགས། ལྷ་དང་སྲུང་མ་རང་འཁོར་འོང་། སྲོག་ཆགས་ཐམས་ཅད་ཀྱིས་གཉེན་དུ་བརྩི་བས་དགའ་བ་དང་། སྲོག་གཅོད་སྤོང་བའི་གང་ཟག་གིས་སྨོན་ལམ་ཅི་བཏབ་ཡིད་བཞིན་དུ་འགྲུབ་གསུངས་སོ་། །དེས་ལུས་ཀྱི་མི་དགེ་བ་དང་པོ་སྲོག་གཅོད་ཀྱི་སྐོར་བཤད་ནས། གཉིས་པ་མ་བྱིན་ལེན་འདི་ཡང་དུག་གསུམ་གང་རུང་གིས་ཀུན་ནས་བསླངས་པའི་ཀུན་སློང་གིས་བསྐུལ་ཏེ་བླང་བ་ལས་གཙོ་བོ་འདོད་པའི་ཀུན་སློང་གིས་མ་བྱིན་པ་བླང་བ་ཤས་ཆེ་ཞིང་། དེའི་ནང་གི་ཉེས་དམིགས་ཆེ་ཤོས་ནིི་རྟེན་གསུམ་གྱི་ཆ་རྐྱེན། དཀོན་མཆོག་མཆོད་པའི་རྫས། དགེ་འདུན་ཐུན་མོང་གི་དཀོར། ཕ་མའི་ཟས་ནོར་རྐུ་བ་དེ་ཚོ་ཉེས་དམིགས་ཆེ་བ་དང་། མཆོད་པ་དང་ཞབས་ཏོག་བསྙེན་བཀུར་བྱས་ཚེ་དེ་དག་ཡུལ་གཉན་པོ་ཡིན་པ་ལྟར། མ་རུང་བའི་སེམས་ཀྱིས་ཀུན་ནས་བསླངས་ཏེ་ལོག་སྒྲུབ་བྱས་ནའང་དེ་ལྟར་ཉེས་པ་ཆེ་བ་ཡིན། འབྲིང་པོ་ནི། ཕལ་བའི་རྒྱུ་རྫས་མ་བྱིན་པར་ལེན་པ། སྤྱིར་རྐུ་བྱས་ན་མ་བྱིན་པ་ཡིན་ཡང་རྐུ་ཞེས་པ་ནི་ལྐོག་ནས་ཁྱེར་བ་ཁོ་ནར་བཟུང་ན་ཁྱབ་ཆུང་ངོ་། མ་བྱིན་ལེན་ཞེས་པ་ནི། དབང་གིས་ལེན་པ། མཐུས་ལེན་པ། གཡོ་སྒྱུས་ལེན་པ་ལ་སོགས་པ་ལེན་ཚུལ་མང་པོ་ཡོད་པ་ཡིན་པས། རྐུ་འཕྲོག་བཅོམ་གསུམ་ཚོང་ཁེ་སོགས་སྲོལ་ལམ་ལུགས་དང་མ་མཐུན་པ་དང་སྲང་རྒྱ་མ་དྲང་བར་བྱེད་པ་དང་། གཞན་དོན་ལྟ་བུའི་ཚུལ་གྱིས་རང་དོན་ཆེན་པོ་མ་འདྲེས་པའི་མ་བྱིན་ལེན་ཆུང་གྲལ་ལྟ་བུ་དང་། དགེ་ཚུལ་སློང་གི་སྡོམ་པ་བླང་བ་ཞིག་གིས་མ་བྱིན་པ་བླང་ན་ཕམ་ལྟུང་འབྱུང་ཞིང་། སྡོམ་པ་རྩ་བ་ནས་འཇོམས་འགྲོ་བ་ཡིན། རྐུ་བའི་གཞི་ནི་མི་གཞན་ནོར་ཡིན་པ། །བསམ་པ་རང་ཉིད་འཚོ་ཕྱིར་རྐུ་སེམས་ཀྱིས། །ཡུལ་དུས་རིན་ཐང་ཚང་བ་སྦྱོར་བས་བརྐུས། །མཐར་ཐུག་བརྐུས་སམ་རྐུར་བཅུག་རྩད་ནས་ཐོབ། ཅེས་གསུངས་པ་ལྟར། འདི་ལ་གཞི་བསམ་སྦྱོར་བ་མཐར་ཐུག་ཚང་དགོས། གཞི་རང་གི་ནོར་མ་ཡིན་པ་གཞན་གྱིས་བདག་ཏུ་བཟུང་བའི་དངོས་པོ། ཡུལ་དུས་དེར་རྐུ་ས་རྐུ་མཁན་གཉིས་ཀའི་ངོས་ནས་རིན་ཐང་ཚང་བ། རིན་ཐང་ཅི་ཞིག་ཚང་དགོས་ཤེ་ན། ཀཱརྵཱ་པ་ན་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །བསམ་པ་རང་ཉིད་འཚོ་ཕྱིར་དུ་རྐུ་སེམས་རྒྱུན་མ་ཆད་པ། སྦྱོར་བ་ལུས་ངག་གི་རིག་བྱེད་དུ་གྲུབ་སྟེ་རྐུ་བར་བརྩམ་པ། མཐར་ཐུག་རང་གི་བརྐུས་སམ་གཞན་ལ་རྐུ་བཅུག་པསོགས་གང་ལྟར་ཡང་རྐུ་བའི་རྫས་སམ་དངོས་པོ་དེ་བདག་པོ་དང་ཁ་བྲལ་ཏེ་ཐོབ་བློ་སྐྱེས་པའི་བར་དེར་གཞི་བསམ་སྦྱོར་བ་མཐར་ཐུག་ཐམས་ཅད་ཚང་བ་ཡིན། ཚུལ་ཁྲིམས་དང་ཐོས་པ་མེད་པའི་གང་ཟག་གིས་ཁ་གསག་དང་ཚུལ་འཆོས་ལ་སོགས་པས་རྙེད་པ་རང་དོན་ལ་བསྒྲུབས་ན་དེ་ཡང་མ་བྱིན་པ་བླང་བ་ཞིག་གི་ནང་དུ་གཏོགས་ཤིང་། གྲྭ་པ་སེར་མོ་ཞིག་གིས་ཕམ་བཞིའི་ནང་གི་གཟབ་དགོས་ས་རྙོག་འཛིང་ཆེ་ས་ངོ་མ་ཞིག་འདི་ཡིན། དགེ་སློང་ནོར་ཅན་གྱིས་རང་གི་ཁང་པ་རྩིག་པའི་ཆེད་དུ་རྒྱལ་པོ་མ་སྐྱེས་དགྲའི་ཤིང་ཆ་བརྐུས་པ་ལ་སྟོན་པས་མ་བྱིན་ལེན་གྱི་ཕམ་ལྟུང་དང་བཅས་པ་མཛད་པ་དང་། འདིི་ལ་སོགས་པ་རྩ་བ་བཞི་པོ་གང་བྱུང་ན་བསླབ་པ་རྩ་བ་ནས་ཉམས་པ་ཡིན། ཤིང་ཏ་ལའི་མགོ་བོ་བཅད་པ་བཞིན་དུ་གསོ་མི་རུང་བར་གསུངས་ཡོད། འདིའི་ཐད་ནས་སེར་སྐྱ་ཕོ་མོ་ཐམས་ཅད་ཀྱིས་གཟབ་དགོས་ས་ཞིག་དང་། སྤྱིར་མི་ཕལ་བ་ཞིག་ཡིན་ཀྱང་མི་རྐུན་ཁྱི་རྐུན་གཉིས་ཀ་མཐོང་ཡོང་དུས་ཁྱིམ་ལ་འང་ཡོང་དུ་མི་བཅུག །རྐུན་མ་ནི་མི་ངོ་མ་ཞིག་མིན་ཟེར་ན་ཆོག་སྟེ། མི་ཞིག་ལ་མི་ཞིག་གི་སྤྱོད་བཟང་ཡོད་ཅིང་མིའི་གྲལ་དུ་སྐེད་རག་ཐད་དུ་བཅིང་སྟེ་འགྲོ་དུས། ཆ་རྐྱེན་དང་པོ་རྐུ་ལག་ལ་བཞག་ན་མི་གནས། རྫུན་ཁ་ལ་བཞག་ན་མི་བཤད་པ་ཞིག་ཡིན་དགོས་ན། རྐུ་རྫུན་གཉིས་ཀ་མི་གནས་པ་ནི། མི་བྱེད་པའི་རྨང་གཞིའི་ཡོན་ཏན་ངོ་མ་བོ་དང་། དེ་གཉིས་ཀ་གནས་ཕྱིན། རིགས་མཐོན་པོ་དང་ཆེན་པོ། རྒྱུ་ཡོད་དབང་འབྱོར་ཅན་ཅི་འདྲ་ཞིག་ཡིན་ཀྱང་། ད་དུང་གཟུགས་ལང་ཚོ་འཇོན་ཐང་ཡིག་རྩིས་ཅི་ལྟར་མཁས་ཀྱང་འབྱོར་ཡང་རྩ་བ་རུལ་བའི་ཤིང་སྡོང་ལྟར་ཅི་ཡང་མི་རུང་ངོ་། །ད་ལྟའི་སྐབས་ལ་རྒྱུ་ནོར་ལོངས་སྤྱོད་ཀྱིས་དབུལ། གཅིག་ཡོད་པ་དེས་བེད་མི་ཆོད་པ་འདི་བསོད་ནམས་མ་བསགས་པ་དང་མ་བྱིན་ལེན་གྱི་རྣམ་སྨིན་ཡིན་ལ། ཡི་དྭགས་ལ་སྐྱེ་བའི་ལས་སེར་སྣ་དང་འདོད་ཞེན་གྱི་དབང་གིས་གཞན་གྱི་རྒྱུ་ནོར་མ་བྱིན་པ་བླང་བའི་རྣམ་སྨིན་ཡིན། ཡང་མོའུ་འགལ་གྱི་བུ་དང་དགེ་སློང་དཔལ་སྐྱེས་གཉིས་ཀ་རྒྱ་མཚོའི་འགྲམ་དུ་བྱོན་གྱིན་ཡོད་ཚེ། སེམས་ཅན་ཞིག་ལ་ལུས་ཤིང་སྡོང་ཆེན་པོ་འདྲ་བ་ཞིག་ལ་སྲིན་བུ་མང་པོས་ཟ་ཞིང་མི་སྙན་པའི་སྒྲ་ཆེན་པོ་གྲག་བཞིན་ཡོད་པ་ཞིག་དང་ཐུགའདི་ཅི་རེད་ཅེས་དྲིས་དུས་འདི་སྔོན་ཆད་དགེ་སློང་དགེ་འདུན་གྱི་ལས་བྱེད་མཁན་ཞིག་ཡིན། འདིའི་དགེ་འདུན་གྱི་རྒྱུ་རྫས་ལ་རང་གིས་ལོངས་སྤྱད་དེ་སྡོང་པོ་འདི་ལ་སྐྱེ་བ་བླངས་སོང་བ་དང་། ད་དུང་རང་གིས་དགེ་འདུན་པའི་སྤྱི་རྫས་ཁྱིམ་པ་ལ་སོགས་པར་བྱིན་པ་དེ་རྣམས་སྲིན་བུ་འདི་དག་ལ་སྐྱེས་ཏེ་རང་ཉིད་ཟ་བཞིན་ཡོད་པ་འདི་རེད། ད་འདི་ནས་ཚེ་འཕོས་དེ་དམྱལ་བ་ཆེན་པོའི་ནང་དུ་ད་གཟོད་འགྲོ་དགོས་པ་ཡིན་གསུངས། ད་དུང་ཡི་དྭགས་སྟོད་གཉིས་པའི་གཏམ་རྒྱུད་ཅེས་པ་ཞིག་ཡོད། ཡི་དྭགས་ལུས་པོ་ཆེན་པོ་ཅན་ཁོག་སྨད་སྤྱིར་བཏང་བ་ཡིན་ལ་སྐེད་པ་ཡན་ཆོད་གཉིས་སུ་སོང་ཞིང་། ཁོག་སྟོད་ནས་མེ་འབར་གྱིན་ཡོད་པ། བསྡད་ན་ལུས་ནས་མེ་འབར་བ། སོང་ན་ལས་ལས་སྐྱེས་པའི་སེང་གེ་དང་སྟག་གཟིག་དོམ་དྲེད་ལ་སོགས་པ་ལྕགས་ཀྱི་མཆེ་བ་ཅན་མང་པོ་ཡོང་ནས་དེའི་ཤ་བཅད་དེ་ཟ་བཞིན་ཡོད་པ། མཚམས་རེར་ཡང་མིའི་གཟུགས་ཅན་འཇིགས་སུ་རུང་བ་མང་པོ་ཡོང་ནས་རལ་གྲི་རྣོན་པོ་བཟུང་སྟེ་དེའི་ལུས་ཀྱི་ཁོག་སྟོད་བཅད་འགྲོ་བ། གཅིག་ཤོས་བཅད་དུས་གཅིག་ཤོས་ཡར་ལ་སོས་ཡོང་བ། དེ་འདྲ་ཁོ་ནས་སྡུག་བསྔལ་མྱོང་སྟེ་སྡུག་སྐད་འབྱིན་ནས་ངུ་བཞིན་ཡོད་པ་ཞིག་འཕགས་པ་མོའུ་འགལ་གྱི་བུས་གཟིགས་ཏེ། དེའི་ལས་ཀྱི་རྒྱུ་བརྟགས་པས་རང་གི་མངོན་ཤེས་ཀྱིས་མཁྱེན་ཀྱང་སེམས་ཅན་མང་པོར་ཕན་པའི་ཆེད་དུ་བཅོམ་ལྡན་འདས་ཀྱི་སྤྱན་སྔར་ཕེབས་ནས་དེའི་ལས་ཀྱི་རྒྱུ་ཞུས་ཚེ། བཅོམ་ལྡན་འདས་ཀྱིས་གསུངས་ཏེ། སྔོན་སངས་རྒྱས་འོད་སྲུང་དུས་སུ་འདི་རབ་ཏུ་བྱུང་ནས་ཞལ་ཏ་བ་བྱེད་མྱོང་བ་དང་། འདི་ཞལ་ཏ་བ་བྱེད་སྐབས་འདིས་དགེ་སློང་གི་དགེ་འདུན་དབྱར་གནས་པ་རྣམས་ཀྱི་གོས་དང་རྙེད་པ་བཅད་དེ་དགུན་གནས་པ་རྣམས་ལ་ཕུལ། དགུན་ཁ་བཞུགས་ཏེ་གནས་བཅའ་བ་རྣམས་ཀྱི་གོས་དང་རྙེད་པ་བཅད་དེ་དབྱར་གནས་པ་རྣམས་ལ་སྦྱིན་གྱིན་བསྡད་པ་དང་། དེ་གཉིས་ཀའི་རྙེད་པའི་ནང་ནས་བཅད་དེ་རང་གིས་བེད་སྤྱོད་བཏང་གཞན་ལ་བྱིན། དེ་འདྲ་བྱས་པའི་རྣམ་སྨིན་གྱིས་འདིའི་སྡུག་བསྔལ་འདི་ཡུན་རིང་པོ་ཞིག་ལ་མྱོང་བ་ཡིན། མ་འོངས་པ་ན་སངས་རྒྱས་གཞན་གྱིས་མི་ཐུབ་པ་ཞུ་བ་ཞིག་འཇིག་རྟེན་དུ་བྱོན་ཚེ་ལས་འདི་ད་གདོད་ཟད་དེ་སྡུག་བསྔལ་ལས་ཐར་བར་འགྱུར་བ་ཡིན་ཞེས་གསུངས། སློབ་དཔོན་ཀླུ་སྒྲུབ་ཀྱིས། དགེ་སྐོས་གཙང་སྦྱོར་པ་དང་དམ་བཞག་པ། །གང་ཟག་ལས་བྱེད་རྣམས་སུ་བདག་མ་སྐྱེ། །གསུངས་བ་ཡང་། དེ་འདྲ་བྱེད་ཀྱིན་འདུག་མཁན་ལ་མ་སྐྱེ་བར་ཤོག་གསུངས་པ་ལས། དེ་མིན་དགེ་འདུན་ལས་བྱེད་པ་ལ་མ་སྐྱེ་བར་ཤོག་གསུངས་བ་མིན་ཏེ། དེ་དགེ་འདུན་གྱི་ཞལ་ཚབ་པ་སྨོན་པའི་ཡུལ་དུ་གྱུར་བ་དེ་འདྲའི་སྐྱེ་བ་ལེན་པར་ཤོག་ཟེར་དགོས་པས་སོ། ང་ཚོས་དགེ་འདུན་པའི་སྤྱིའི་ལས་ཀ་བྱེད་སྐབས་སྤྱི་རྫས་རང་གི་ཁོངས་ལ་འགྲོ་མ་ཤོར་ན། ཡར་ནས་བཅད་དེ་མར་ལ་གླན་པ་དང་། མར་ནས་ཁྱེར་ཡོང་ནས་ཡར་ལ་རྒྱག་བཞིན་ཡོད་པ་དེ་འདྲ་ཤོར་བ་དང་། ཐེངས་རེར་མགྲོན་སྣེ་ལེན་བྱེད་པ་ལ་སོགས་པ་བཀོད་སྒྲིག་མང་པོ་ཞིག་ཀྱང་མ་བྱེད་ཐབས་མེད་དུ་ཐུག་རྒྱུ་གང་མང་ཡོད་པ་ཡིན་ཡང་ཀུན་སློང་གཙོ་ཆེ་སྟེ། དོན་ཆེན་ལྡན་ན་ལུས་ངག་གི་བདུན་པོ་གནང་བའི་སྐབས་ཀྱང་ཡོད་པ་ཡིན་མོད། གང་ལྟར་རྒྱུ་འབྲས་ཕྲ་ཞིབ་བྱེད་པ་ནི་གལ་ཆེ་བ་ཡིན། གནའ་ང་ཚོ་ཆུང་དུས་ལྕང་མའི་མཁན་པོ་ཐུབ་དགའ་ཟེར་བ་ཞིག་བཞུགས་ཡོད་པ་ལ། དངོས་པོ་ཞིག་ཕྱེད་ཀ་ཁྱེད་ལ་འབུལ་བ་ཡིན་ཕྱེད་ཀ་དགེ་འདུན་པ་ལ་འབུལ་བ་ཡིན་ཟེར་བ་ཞིག་ཐོན་ཚེ་དེའི་ཅ་ལག་འདྲ་གཉིས་ཡོ་རིང་མེད་པ་ཞིག་བྱེད་པར་མ་ཟད་དཀྲི་བྱེད་ཀྱི་རས་ཐ་ན་ཤོག་བུ་ཞིག་ཡིན་ཡང་འདྲ་གཉིས་མཛད་རྒྱུ་དེ་འདྲ་ཐུགས་ཞིབ་དར། ངས་ཀློག་སློབ་ས་ལྕང་མ་སྒར་ནས་ཡིན་པས་ང་ཆུང་དུས་ལྕང་མ་ནས་ལོ་གཉིས་འདུག་མྱོང་། དེ་དྲག་གང་དྲག་གི་སློབ་ཆེན་རྣམ་པ་གཞུགས་ཡོད་ཅིང་། འདུལ་འཛིན་སྦྱང་ཡོན་ལ་གནས་པ་ཤ་སྟག་བཞུགས་པ་རེད། བཞུགས་ས་ས་དོང་བརྐོས་ཏེ་ཀླད་ནགས་ཀྱི་ལོ་འདབ་རེ་བཀབ་ནས་བཞུགས་ཡོད་པ་དང་། རྫོགས་ཆེན་གྱི་མཁན་པོ་རྣམ་པ་སློབ་ཚོགས་དང་བཅས་པའང་དེ་འདྲ་རེད། སེར་སྐྱ་སུ་ཡིན་ན་རྒྱུ་འབྲས་ཕྲ་ཞིབ་ནས་སྲུང་བ་དང་། གཞན་ནོར་ཧམ་པས་མི་ལེན་པ། ཁྱད་པར་དུ་དཀོན་མཆོག་གི་དཀོར་རྟེན་རྩ་ཐེབས་རྩ་རུ་ཕུལ་ཡོང་བ་དེ་དག་སྐྱེ་བོ་མི་ནག་པའི་ཁ་རྒྱབ་ལ་མ་ཤོར་མ་གཏོགས་ཞེ་ནག་དེའི་ཆེ་མེད་པར་འགྱུར་བ་ཡིན། ཁྲོ་ཆུ་ཁོལ་མ་ཞིག་ཁ་ནང་དུ་བླུད་ན་ཁ་ལྕེ་མིད་པ་ཐམས་ཅད་ཚིག་ནས་ཤི་འགྲོ་ཡང་དེ་ཐེངས་གཅིག་གི་སྡུག་བསྔལ་དང་། དཀོར་དེ་རྣམས་ལ་བྱིན་ན་བསྐལ་ཆེན་མང་པོ་ལ་ཁྲོ་ཆུ་ཁོལ་མ་ཁ་ནང་དུ་བླུད་ཀྱིན་ཡོད་པ་དང་འདྲ་བ་ཡིན་པས། ཆོས་ཞུས་པའི་དོན་སྒོ་དང་པོར་དེ་ཚོ་ཤེས་དགོས། གནའ་འབྲུག་པདྨ་དཀར་པོ་དབུས་ཕྱོགས་སུ་ཕེབས་དུས་ནུབ་གཅིག་གཟིམས་ལམ་དུ་དཔོན་གཡོག་འཁོར་དང་བཅས་པའི་ཁ་ནང་ནས་མེ་འབར་ཀྱིན་ཡོད་པ་ཞིག་རྨིས། ཕྱི་ཉིན་གྲྭ་པ་རྣམས་ལ་གསུངས་ཏེ་འུ་ཚོས་ལས་ཉེས་ཤིག་བྱས་འདུག་ཁྱེད་རྣམས་ཀྱིས་ཅི་ཞིག་བྱས་གསུངས། ཁོང་རྣམས་ཀྱིས་ཅི་ཡང་མ་བྱས་ཞུས། ཞིབ་ཀྱིས་བརྟགས་པས་མཆོད་མེའི་རྒྱུ་མར་ཞིག་ཡོད་པ་དེ་གསར་རྙིང་ཡག་བཙོག་བརྗེས་པས་ཡིན་འདུག །དམ་པའི་སྐྱེས་བུ་དེ་ཚོས་ལས་དང་ལས་ཀྱི་སྒྲིབ་པ་ཕྲ་མོ་ཙམ་ལ་གནད་ཆུང་དང་སྣང་མེད་མི་མཛད་པ་ཡིན་ན། འུ་ཚོས་ཧོབ་ལས་ཆོབ་ལས་རྒྱུ་འབྲས་ལ་མི་མཐུན་པ། ཁྱད་པར་དུ་གོང་དུ་བཤད་པའི་དཀོན་མཆོག་གི་དཀོར། བླ་མའི་ནོར། ཕ་མའི་རྒྱུ་རྫས་རྣམས་ལས་ཁབ་ཙམ་ཞིག་མ་བྱིན་པ་བླང་ན་ཡང་དམྱལ་བར་སྐྱེས་གསུངས་པའང་། དེ་རྣམས་ཡུལ་དང་ཞིང་ས་ཁྱད་པར་ཅན་ཡིན་པས་སོ། །འབྲུག་པདྨ་དཀར་པོ་ལ་གཟིམས་ལམ་ཡོང་བ་འདྲ་བར། དཀོར་གྱི་སྒྲིབ་པས་ལེགས་པའི་ཡོན་ཏན་གསར་དུ་མི་འཐོབ་རྐྱེན་བྱེད་པ་ཡང་། གནའ་སྟོད་ཀྱི་གྲྭ་ས་ཞིག་ན་དགེ་བཤེས་མཁས་པ་འཇམ་དཔལ་དབྱངས་ལ་མི་དང་མི་ལབ་པ་བཞིན་བྱེད་ཆོག་པ་ཞིག་ཡོད་པ་ལས། སྐབས་གཅིག་འཇམ་དཔལ་དབྱངས་མཇལ་རྒྱུ་མེད་སོང་བ་དང་། སྔར་གྱི་ཐོས་པ་ཐམས་ཅད་བརྗེད་ནས་མི་མཁས་པ་ཞིག་ཏུ་གྱུར་སོང་བས། ཁོང་རང་གི་བླ་མ་ལ་དེ་ཅི་ཡིན་ཅེས་ལུང་བསྟན་ཞུས་ཚེ། ཁྱོད་ལ་དེང་སང་རྙེད་པ་བཀུར་སྟི་མང་པོ་ཡོང་བཞིན་འདུག་སྔོན་མ་དེ་འདྲ་ཨེ་ཡོད་གསུངས་པ་དང་། སྔོན་མ་མེད་གསར་དུ་རྙེད་པ་ཡིན་ཞུས་པས། ཁྱོད་རང་གིས་དཀོར་མ་ཟ་བར་ཅི་འདྲ་ཡིན་གཅིག་ལྟོས་དང་གསུངས། དཀོར་མ་ཟོས་བས་འཇམ་དཔལ་དབྱངས་ཀྱི་ཞལ་གཟིགས་པ་དང་རྣམ་དཔྱོད་ཀྱི་ཤེས་རབ་མྱུར་མོ་ཡོད་པ་ཞིག་ཚུར་ལ་འགྱུར་བའི་ལོ་རྒྱུས་ཡོད་པ་ཡིན། རབ་བྱུང་ཚུལ་འཆོས་ཅན་ཞིག་བས་སྤྱིར་ཁྱིམ་པ་བསམ་བཟང་ཞིག་གི་ཉེས་པ་ཆུང་བ་དང་། ལྡན་གྲོལ་གྱི་ཡོན་ཏན་གཉིས་དང་ལྡན་པ་ཞིག་མིན་ན་དད་ཟས་ཁམ་གང་ཟོས་ན་རྣམ་སྨིན་སྟོང་འགྱུར་དུ་མྱོང་དགོས་པར་གསུངས་ཡོད་པ་ཡིན། བཅོམ་ལྡན་འདས་ཀྱིས། སྐྱེ་བོ་ཞིག་གིས་ལོ་བརྒྱའི་བར་དུ་སྡིག་པ་སྣ་ཚོགས་ཤིག་བྱེད་པ་བས་ཚུལ་ཁྲིམས་འཆལ་བའི་གང་ཟག་ཞིག་གིས་དད་ཟས་དང་གཤིན་ཟས་ཁམ་གང་ཟོས་པས་ངན་གསུངས་ཡོད་པས། དེ་རིང་ཁ་རྩང་ཉིས་བརྒྱ་ང་བཅུ་རྩ་གསུམ་གྱི་འདུལ་ཁྲིམས་སྲུང་མཁན་ཕར་ཞོག་མི་དགེ་བཅུ་སྤོང་གི་ཁྱིམ་པའི་ཁྲིམས་ཙམ་སྲུང་དཀའ་བ་ཡིན་པས། དཀོར་ཟས་ཀྱིས་ཁྱིམ་པ་གསོས་ཚེ་ཕན་མ་དགོས་གནོད་པ་ཆེན་པོ་ཞིག་བསྐྱལ་བ་ཡིན། གནའ་བཀའ་གདམས་པའི་བླ་མ་ཞིག་གིས་ཆོས་གསུངས་ནས་བཞུགས་ཡོད་སྐབས་ཤིག་ལ། བླ་མའི་ཐོག་ནས་བྱེའུ་ཞིག་འཕུར་ཡོང་བ་དང་། བྱེའུའི་གྲིབ་མ་ཕོག་ཡོང་གི་དགོངས་ནས་བླ་མས་ལུས་བཟུར་བཞག་པ་དང་། སློབ་མ་ཚང་མས་བྱེའུ་འཕུར་ཡོང་དུས་ཁྱེད་ཀྱི་སྐུ་ལུས་བཟུར་དགོས་པའི་རྒྱུ་ཅི་ཡིན་དྲིས་པས། དགེ་འདུན་མང་པོའི་སྤྱི་རྫས་འབྲུ་རིགས་ཐང་ལ་བརྡལ་ཡོད་པ་ལས་བྱེའུས་ཁམ་གང་ཁྱེར་ཡོད་པས་དེའི་གྲིབ་མ་ཕོག་ན་དཀོར་སྒྲིབ་ཕོག་རྒྱུའི་ཉེན་ཁ་ཡོད་པ་རེད་ཁོང་དེ་ཡིས་བཟུར་བ་ཡིན་གསུངས། སྡེ་བའི་རྒྱུ་ཟ་འདུག་པའི་དཔོན་པོ་ཚོས་དབང་གིས་མ་བྱིན་པ་བླང་བའི་ཉེས་དམིགས་ཀྱིས་ཡི་དྭགས་ཀྱི་ནང་དུ་སྐྱེ་བ་མང་པ་སོགས། དེ་ལྟར་མ་བྱིན་ལེན་གྱི་ཉེས་དམིགས་ཤེས་ནས་སྲོག་ལ་བབ་ཀྱང་མ་བྱིན་ལེན་སྤངས་ན། མཐོ་རིས་སུ་སྐྱེས་ཏེ་ལོངས་སྤྱོད་ཆེན་པོ་ཐོབ། ལོངས་སྤྱོད་ལ་སུས་ཀྱང་གནོད་པ་མེད་པར་རང་དབང་དུ་སྤྱོད་ཆོག་པ་ལ་སོགས་པ་ཕན་ཡོན་མང་ངོ། །ད་ནི་གསུམ་པ་སྲོག་གཅོད་མ་བྱིན་ལེན་དང་མི་ཚངས་སྤྱོད་གསུངས་བའི་ལུས་ཀྱི་མི་དགེ་བ་གསུམ་པ་མི་ཚངས་སྤྱོད་ཡིན། མི་ཚངས་སྤྱོད་ཟེར་ན་ཚངས་པ་མ་ཡིན་པར་སྤྱོད་པའི་ལས་ཀྱི་ལམ་འདི་རབ་ཏུ་བྱུང་བའི་སྡོམ་ཁྲིམས་ཕམ་བཞིའི་ནང་གི་དང་པོ་དང་། འདི་དགེ་སློང་བཟང་སྦྱིན་ཟེར་བ་དེས་སྔར་གྱི་ཁྱིམ་ཐབ་དེ་ལ་རིགས་རྒྱུད་འཇོག་པའི་ཁུངས་ནས་བཅའ་བ་མཛད་པ་དང་། སྡོམ་པའི་རྩ་བ་ཕམ་པ་བཞི་པོ་གང་རུང་བྱུང་བའི་དུས་དེ་ནས་སྐད་ཅིག་མ་གཅིག་ལ་འཆབ་ནས་གསང་ན་སྡོམ་པ་ལྷག་མ་མེད་པར་གཅོད་པར་བྱེད་པས་ན་རྩ་བའི་ལྟུང་བ་བཞི་གསུངས། མི་མཐུན་ཕྱོགས་ཀྱི་གཉེན་པོར་མཐུ་མེད་པར་བཅོམ་པས་ཕྱིར་ན་ཕམ་པ་བཞི་གསུངས་པ་དང་། ཕམ་པར་གྱུར་བ་གང་ཞིག་རྟེན་དེ་ལ་རྒྱུད་གསོ་རུང་དུ་བྱས་པ་འཆབ་མེད་དང་། སོར་ཆུད་པ་མི་སྲིད་པ་འཆབ་བཅས་ཀྱི་མཚན་ཉིདདོ། དེ་ཡང་འདིའི་སྐབས་སུ་ཐུན་མོང་གི་མི་དགེ་བཅུ་གསུངས་པའི་སྐབས་སུ་ལུས་ཀྱི་མི་དགེ་གསུམ་པ་ལོག་གཡེམ་ཡིན་ལ། འདི་ནས་མི་ཚངས་སྤྱོད་ཀྱི་མིང་གིས་གསུངས་པ་ནི་ཡོངས་རྫོགས་དགེ་བསྙེན་ནམ་ཚངས་སྤྱོད་དགེ་བསྙེན་གྱི་དབང་དུ་བྱས་ཏེ་བརྗོད་བདེའི་ཚུལ་གྱིས་གསུངས་པ་ཡིན། ལོག་གཡེམ་སྤོང་བ་ཁྱིམ་པའི་ཁྲིམས་དང་། འདི་ལ་ཡང་དུག་གསུམ་གང་རུང་གིས་ཀུན་ནས་བསླངས་པའི་ལས་ཡོད་པར་གསུངས་བས། འདིའི་ཉེས་པ་ཆེ་ཤོས་གྲྭ་པ་བཙུན་མ་སྡོམ་ཁྲིམས་ལས་ཉམས་པར་བྱེད་པ་དེ་དང་། འདི་ལ་ནང་གསེས་ཀྱི་དབྱེ་བ་བྱས་ན་རིགས་ཀྱིས་སྲུང་བ་དང་། ཆོས་ཀྱིས་སྲུང་བ་ལ་སོགས་པ་དབྱེ་བ་མང་པོ་ཡོད་ལ། ལོག་གཡེམ་གྱི་འབྲས་བུ་ངན་སོང་གསུམ་དུ་ལྕི་ཡང་དང་བསྟུན་ཏེ་ཡུན་རིང་དུ་སྡུག་བསྔལ་གྱིས་མནར། ལོག་གཡེམ་སྤངས་ན་ཚེ་འདི་ལ་ཀུན་ཀྱིས་བསྔགས་བརྗོད་ཐོབ། ཡ་རབ་དམ་པའི་ལུགས་སུ་འགྲོ། ཚེ་རབས་ཐམས་ཅད་དུ་ཚུལ་ཁྲིམས་སྲུང་བར་དགའ། གནས་སྐབས་སུ་ལྷ་ཡུལ་དུ་སྐྱེ་བ་ལ་སོགས་པ་ཕན་ཡོན་བསམ་གྱིས་མི་ཁྱབ། གནའ་ཞིག་ལ་བྲམ་ཟེ་ཕ་བུ་གཉིས་ཡོད་པ་ལས། ཕ་དེས་རྗེས་ནས་དཀོན་མཆོག་གསུམ་ལ་དད་པ་སྐྱེས་ཏེ་སྐྱབས་འགྲོའི་སྡོམ་པ་དང་བསླབ་པའི་གཞི་ལྔ་བླངས་ཏེ་སངས་རྒྱས་ཀྱི་མདུན་ནས་ཆོས་ཉན། སངས་རྒྱས་འཁོར་བཅས་ལ་བསྙེན་བཀུར་བྱས་བསླབ་པ་ཡང་དག་པ་བསྲུངས་པའི་ཕན་ཡོན་དང་བསོད་ནམས་ཀྱིས་ཚེ་འཕོས་པ་དང་ལྷ་ཡུལ་དུ་སྐྱེས། ལྷ་རྣམས་མང་ཆེ་བ་ལ་མངོན་ཤེས་ཡོད་པས། ཁོ་རང་ལྷ་ཡུལ་ལ་སྐྱེས་པ་དང་སྔོན་གང་ནས་འཕོས་པ་ལ་སོགས་གནས་གསུམ་ལ་བརྟགས་པས་མི་ཡུལ་ནས་སངས་རྒྱས་འཁོར་བཅས་མཆོད། སྐྱབས་འགྲོ་དང་བསླབ་པའི་གཞི་ལྔ་བླངས། བླངས་བར་མ་ཟད་ཚུལ་ཁྲིམས་ཡང་དག་པ་སྲུང་པའི་འབྲས་བུ་མི་ཡུལ་ནས་འཕོས་ཏེ་ལྷ་ཡུལ་དུ་སྐྱེས་པ་དེའི་རྒྱུ་ཐམས་ཅད་མངོན་ཤེས་ཀྱིས་ཤེས་ཏེ། ལྷའི་རྫུ་འཕྲུལ་བསྟན་ཏེ་བཅོམ་ལྡན་འདས་བཞུགས་ཡོད་སར་ཡོང་ནས། བཅོམ་ལྡན་འདས་ཀྱི་སྤྱན་སྔ་ནས་ཆོས་ཉན་ཏེ་བསྒོམས་པས་རྒྱུན་ཞུགས་ཀྱི་འབྲས་བུ་ཐོབ་སོང་། དེའི་སྐབས་སུ་བུ་དེས་ཕ་རྒན་གྱི་ཕུང་པོ་གནས་བྱ་རྒོད་ཕུང་པོའི་རི་བོ་དང་ཐག་མི་རིང་ས་ཞིག་ནས་བསྲེགས་ཏེ་དུར་ཁྲོད་དེའི་ནང་དུ་ངུ་བཞིན་ཡོད་པ་ལ། ཕ་རྒན་ལྷ་ལུས་བླང་ཡོད་པ་དེས་མངོན་ཤེས་ཀྱིས་དེ་མཐོང་ནས་དེའི་རྩར་སོང་སྟེ་ཁྱོད་སྡུག་མི་དགོས་ང་ཁྱོད་ཀྱི་ཕ་ཡིན། བསོད་ནམས་བསགས་པའི་དབང་གིས་ལྷ་ཡུལ་དུ་སྐྱེས་པ་འདི་རེད། ངའི་དོན་དུ་ཁྱོད་ཀྱིས་སྡུག་བསགས་མི་དགོས་ཁྱོད་རང་སོང་ནས་སངས་རྒྱས་བཅོམ་ལྡན་འདས་ལ་སྐྱབས་སུ་སོང་དང་ཁྱོད་ལ་རྗེས་ནས་ཡག་པ་ཤ་སྟག་ཡོང་རྒྱུ་ཡོད་པ་ཡིན་ཞེས་སྨྲས་ཏེ་ཕྱིར་ལྷ་ཡུལ་དུ་འཕུར་སོང་བ་དང་། བུས་ཀྱང་ཕ་རྒན་གྱི་ཁ་ལ་ཉན་ཏེ་བཅོམ་ལྡན་འདས་ཀྱི་མདུན་དུ་སོང་ནས་སེམས་དགའ་བས་ཆོས་ཉན་ཏེ་བདེན་པ་ཐོབ་སོང་བ་དང་། དེ་ནས་བཅོམ་ལྡན་འདས་ཀྱིས་ཚུར་ཤོག་གི་བསྙེན་པར་རྫོགས་ཏེ་བརྩོན་འགྲུས་བརྩམས་ནས་མཐར་དགྲ་བཅོམ་པ་ཐོབ། བཅོམ་ལྡན་འདས་ཀྱི་འཁོར་དགེ་སློང་ཐམས་ཅད་ངོ་མཚར་སྐྱེས་ཏེ་ཕ་བུ་གཉིས་ཀའི་ལོ་རྒྱུས་རྒྱུ་མཚན་དྲིས་པས། འདི་གཉིས་ད་ལྟར་མ་ཟད་འདས་པའི་དུས་ནའང་བྲམ་ཟེ་ཁྱེའུ་འདི་བསྟན་པ་ལ་མ་དད་པར་ཕ་ཡིས་དད་པ་ཕུན་སུམ་ཚོགས་པའི་ལམ་ལ་བཞག་པ་ཡིན། སངས་རྒྱས་འོད་སྲུང་གི་དུས་སུ་འདི་གཉིས་ཀ་ཡང་ཕ་བུ་ཡིན་ལ། ཕ་དེ་སངས་རྒྱས་ལ་དད་ནས་སྐྱབས་འགྲོ་དང་བསླབ་པའི་གཞི་ལྔ་བླངས་པའི་འབྲས་བུ་ལྷ་ཡུལ་དུ་སྐྱེས། དེ་དུས་ཡང་བུ་མྱ་ངན་གྱིས་ངུ་འབོད་བྱེད་བཞིན་ཡོད་པ་ཕས་མཐོང་ནས་བུ་ཆོས་ལ་བསྐུལ། བུས་ཕ་ཡི་ངག་ལ་ཉན་ནས་སངས་རྒྱས་འོད་སྲུང་གི་བསྟན་པར་རབ་ཏུ་བྱུང་ཞིང་ཚངས་པར་སྤྱད་དེ་འཆི་ཁར་སྨོན་ལམ་བཏབ་པས་ད་ལྟར་དགྲ་བཅོམ་ཐོབ་པ་ཡིན་ཞེས་གསུངས། སྐྱབས་འགྲོའི་སྡོམ་པ་དང་བསླབ་པའི་གཞི་ལྔ་བསླང་ནས་མ་ཉམས་པར་སྲུང་ཐུབ་ན་དེ་ལྟར་ཕན་ཡོན་ཆེ་བ་དང་། སྐྱབས་འགྲོའི་སྡོམ་པ་འདི་ནང་བ་སངས་རྒྱས་པའི་ཆོས་སྒོར་ཞུགས་པ་ཞིག་ཡིན་ཚེ་ལོས་ལེན། སྐྱབས་སྡོམ་བླང་བ་ཙམ་གྱིས་བསོད་ནམས་དཔག་དུ་མེད་པ་ཐོབ་པ་ཡིན། བསླབ་པའི་གཞི་ལྔ་བོ་ཇི་སྲིད་འཚོའི་བར་དུ་ལེན་མི་ཐུབ་པ་ཞིག་ཡིན་ནའང་སྣ་གཅིག་སྤྱོད་པ་ལ་སོགས་པ་སྡོམ་པ་རང་ཉིད་ཀྱི་ཁམས་དང་བསྟུན་ཏེ་ལེན་ཆོག་པ་དང་། དེ་མིན་ཡང་བསྙེན་གནས་ཡན་ལག་བརྒྱད་པའི་དུས་ཁྲིམས་ཉིན་ཞག་གི་མཐའ་ཅན་གྱི་སྡོམ་པ་རེ་སྲུང་ཐུབ་ནའང་ཕན་ཡོན་ཆེན་པོ་ཡོད་པ་ཡིན། དེ་དང་འབྲེལ་བའི་གཏམ་རྒྱུད་ཅིག་བཤད། སྐབས་ཤིག་ལ་སངས་རྒྱས་བཅོམ་ལྡན་འདས་མཉན་ཡོད་གྱི་གྲོང་ཁྱེར་ན་བཞུགས། ནམ་སྟོད་ཅིག་ལ་ལྷ་གཉིས་ཆོས་ཉན་སར་ཡོང་བ་དང་། ལྷ་དེ་གཉིས་ཀྱིས་ལུས་ཀྱི་འོད་ཟེར་གྱིས་རྒྱལ་བའི་རྒྱལ་བྱེད་ཀྱི་ཚལ་སངས་རྒྱས་བཅོམ་ལྡན་འདས་བཞུགས་པའི་འཁོར་ཡུག་ཐམས་ཅད་སྣང་བར་བྱས་པ་དང་། ལྷ་དེ་གཉིས་ཀ་ལ་སངས་རྒྱས་བཅོམ་ལྡན་འདས་ཀྱིས་ཆོས་བསྟན་ནས་དེ་གཉིས་ཀྱི་སེམས་རྣམ་པར་གྲོལ་ཏེ་བྱང་ཆུབ་ཀྱི་འབྲས་བུ་ཐོབ་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱིར་ལྷ་ཡུལ་དུ་སོང་། དེའི་ཕྱི་ཉིན་བཅོམ་ལྡན་འདས་ཀྱི་སྐུའི་ཉེ་གནས་ཀུན་དགའ་བོས་ལྷ་དེ་གཉིས་ཀའི་སྔོན་ཆད་ལས་ཅི་ཞིག་བསགས་ཏེ་ད་ལྟ་འབྲས་བུ་དེ་འདྲ་སླ་མོ་ཞིག་གིས་ཐོབ་སོང་བ་རེད་ཞུས་ཚེ། བཅོམ་ལྡན་འདས་ཀྱིས། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་ནས་སྐུ་མྱ་ངན་ལས་འདས་པའི་རྗེས་དམ་པའི་ཆོས་ནུབ་ལ་ཉེ་བཞིན་ཡོད་དུས་ཤིག་ལ། བྲམ་ཟེ་གཉིས་ཀྱིས་ཉིན་ཞག་གཅིག་ལ་བསྙེན་གནས་ཡན་ལག་བརྒྱད་པའི་དུས་ཁྲིམས་ཞིག་བླངས་ཏེ། གཅིག་གིས་ལྷ་ཡུལ་དང་གཅིག་གིས་རྒྱལ་པོ་ཞིག་ཏུ་སྐྱེ་བར་ཤོག་ཟེར་ནས་གཉིས་ཀས་རང་རང་གིས་སྨོན་ལམ་རེ་བཏབ་པ་དང་། རྒྱལ་པོ་ཞིག་ཏུ་སྐྱེ་བར་ཤོག་ཟེར་མཁན་དེས་ཚུལ་ཁྲིམས་ལེགས་པོ་བསྲུངས་པས་འབྲས་བུ་རྒྱལ་པོར་སྐྱེ་བ་བླང་། ལྷ་ཡུལ་དུ་སྐྱེ་བར་སྨོན་ལམ་འདེབས་མཁན་དེ་ཁྱིམ་ལ་སོང་ནས་ངས་དེ་རིང་ནང་བའི་དགེ་འདུན་གྱི་མདུན་དུ་སོང་ནས་བསྙེན་གནས་ཀྱི་སྡོམ་པ་བླང་སྟེ་ཕྱི་དྲོའི་ཁ་ཟས་མི་ཟ་བར་ཁས་བླང་པས་དོ་དགོང་ཟས་ཟ་མི་རུང་ཞེས་བཤད་པས། ཆུང་མས་སྨྲས་ཏེ་ཁྱོད་ཀྱིས་གལ་ཏེ་མོ་དང་ཟ་མ་ལྷན་དུ་མ་ཟོས་ཚེ་ཀུན་ཏུ་རྒྱུ་གཞན་དག་ཚོ་ལ་སྨྲས་ཏེ་ཁྱོད་མི་སྟེགས་པའི་གྲལ་ནས་ཕུད་ཐུབ་པ་ཞིག་བྱེད་པ་ཡིན་ཟེར་ནས་སྐྲག་ཕུད་པ་ན། ཁོ་རང་སྐྲག་ནས་ཟས་ཟོས་པས་ཚུལ་ཁྲིམས་ཞིག་སྟེ་ལྷ་ཡུལ་ལ་མ་སྐྱེས་པར་ཀླུ་ཡུལ་དུ་སྐྱེས་སོང་བ་དང་། དེའི་སྐབས་སུ་རྒྱལ་པོར་སྐྱེས་པ་དེ་མི་ཡུལ་ན་རྒྱལ་སྲིད་བཟུང་སྟེ་ཡོད་པར། རྒྱལ་པོར་བཟའ་ཤིང་གི་ར་བ་ཤིང་ཏོག་སྣ་ཚོགས་སྐྱེས་ཡོད་པའི་གླིང་ག་ཆེན་པོ་ཞིག་ཡོད་པར། ར་སྲུང་བས་ཉིན་རེ་བཞིན་དུ་རྒྱལ་པོ་ལ་ཤིང་ཏོག་སྣ་ཚོགས་གང་ཡག་ཡག་ཕུལ་དགོས་པ་དང་། ཉིན་ཞིག་ཆུ་འགོ་ཞིག་གི་ནང་དུ་ཤིང་ཏོག་ཀུ་ཤུ་ཁ་ཏོག་དྲི་རོ་གང་ཐད་ནས་མི་ཡུལ་གྱི་ཤིང་ཏོག་གཅིག་དང་མ་འདྲ་ཞིང་ཁྱད་དུ་འཕགས་པ་ཞིག་ལྡུམ་ར་སྲུང་བ་པོས་རྙེད་པ། ལྡུམ་ར་སྲུང་བ་པོས་ཕོ་བྲང་གི་སྒོ་སྲུང་ལ་བྱིན། སྒོ་སྲུང་གིས་རྒྱལ་པོའི་བཙུན་མོའི་ཞབས་ཕྱི་བ་ཞིག་ལ་བྱིན། དེས་བཙུན་མོ་ལ་ཕུལ། བཙུན་མོས་རྒྱལ་པོ་ལ་ཕུལ་ཚེ། རྒྱལ་པོས་དེ་གང་ནས་ཁྱེར་ཡོང་བ་ཡིན་ཟེར་ནས་རྩད་བཅད་པས་མཐར་ལྡུམ་ར་སྲུང་མཁན་ལ་ཐུག་སོང་བ་དང་། ར་སྲུང་བ་རྒྱལ་པོའི་མདུན་དུ་བོས་ནས་ངའི་བཟའ་ཤིང་གི་ར་བའི་ནང་ན་འདི་འདྲའི་ཤིང་ཏོག་ལེགས་པོ་ཡོད་བཞིན་དུ་ང་ལ་མི་འབུལ་བ་ཅི་ཡིན་ཞེས་ངར་དུས། ར་སྲུང་བས་ལོ་རྒྱུས་རྣམས་བཤད་ཀྱང་གོ་མ་ཆོད་པར། ཉི་མ་དེ་རིང་ཕན་ཆོད་ཁྱོད་ཀྱིས་ཤིང་ཏོག་དེ་འདྲ་རྐྱང་རྐྱང་ཁྱེར་མ་ཡོང་ཚེ་ཁྱོད་གསོན་པོར་འདུག་འདོད་མ་བྱེད། ལུས་དུམ་བུ་དུམ་བུར་བྱས་ཏེ་གསད་མི་འཇོག་རེ་ཟེར་ནས་བསྡིག་པ་ན། ར་སྲུང་བ་སྐྲག་པ་དང་སྡུག་པ་གཉིས་ཀས་ཕྱིར་ཁོ་རང་གི་འདུག་སར་སོང་ནས་སྨྲེ་སྔགས་དང་ངུ་འབོད་བྱས། དེའི་ངུ་སྒྲ་དེ་ཀླུས་གོ་སོང་བ་དང་། ཀླུ་དེ་མི་ཞིག་ལ་སྤྲུལ་ནས་དེར་འོང་སྟེ་ཁྱོད་ཅི་ལ་ངུ་བ་ཡིན་ཞེས་དྲིས་པ་དང་། ཁོ་རང་གིས་ལོ་རྒྱུས་ཞིབ་མོར་བཤད་པ་ན། ཀླུའི་སྤྲུལ་བ་དེ་དེའི་མཚམས་སུ་མི་སྣང་བར་གྱུར། ཡང་མཚམས་ཤིག་ནས་ཐོན་ཡོང་སྟེ། གསེར་གྱི་གཞོང་པ་ཞིག་གི་ནང་དུ་ཤིང་ཏོག་ལེགས་པོ་ཤ་སྟག་གིས་བཀང་ནས་མི་དེ་ལ་སྤྲད་དེ། ཀླུས་སྨྲས་པ། ཁྱོད་ཀྱིས་ཤིང་ཏོག་འདི་ཁྱེར་ཏེ་རྒྱལ་པོ་ལ་ཕུལ་ནས་ཁོའི་གཏམ་འདི་རྒྱལ་པོ་ལ་ཤོད་ཅེས་སྨྲས་པ་དང་། གཏམ་ཅི་ཞིག་བསྐུར་བ་རེད་ཅེ་ན། རྒྱལ་པོ་ཁྱོད་དང་འུ་གཉིས་འདྲེས་ཆེ་ས་ཡིན་ཞིང་། སྔོན་འུ་གཉིས་ཀུན་ཏུ་རྒྱུ་ཡིན་དུས་ནང་བ་སངས་རྒྱས་པའི་དགེ་འདུན་གྱི་མདུན་དུ་བསྙེན་གནས་ཡན་ལག་བརྒྱད་པའི་དུས་ཁྲིམས་མཉམ་དུ་བླངས་བ་དང་། ཁྱོད་ཀྱིས་ཚུལ་ཁྲིམས་ལེགས་པར་སྲུང་བས་ཁྱོད་རང་གི་སྨོན་ལམ་བཏབ་པ་ལྟར་རྒྱལ་པོར་སྐྱེས་པ་དང་། ངས་ཚུལ་ཁྲིམས་ལེགས་པར་མ་སྲུང་བས་ཀླུ་ཡུལ་དུ་སྐྱེས་སོ་། །ངས་ཀྱང་ཚུལ་ཁྲིམས་བསྲུང་ནས་ལུས་འདི་ལས་ཐར་བར་རེ་པས། ཁྱོད་ཀྱིས་ཉིན་ཞག་གཅིག་གི་ཁྲིམས་བརྒྱད་ཀྱི་ཆོ་ག་ཞིག་ངེས་པར་དུ་ང་ལ་སྦྱིན་དུ་གསོལ། གལ་ཏེ་ཁྱོད་ཀྱིས་བསྙེན་གནས་ཡན་ལག་བརྒྱད་པའི་ཆོ་གའི་ཡི་གེ་དེ་མ་བྱིན་ཚེ་ངས་ཁྱོད་ཀྱི་རྒྱལ་ཁབ་ཚང་མ་ཆུ་ལ་སྐུར་རྒྱུ་ཡིན་ཞེས་པའི་གཏམ་དེ་བསྐུར་བ་དང་། ར་སྲུང་བས་ལོ་རྒྱུས་ཆ་ཚང་དང་ཤིང་ཏོག་གསེར་གྱི་གཞོང་པ་དང་བཅས་པ་རྒྱལ་པོའི་ཕོ་བྲང་དུ་ཁྱེར་ནས་རྒྱལ་པོ་ལ་བཤད་པ་ན། རྒྱལ་པོས་བསམ་བློ་ཞིག་བཏང་ནས་སངས་རྒྱས་འཇིག་རྟེན་དུ་མི་བཞུགས་ཤིང་། དམ་པའི་ཆོས་ཀྱང་ནུབ་ཚར་བས་དེ་འདྲ་ཞིག་གང་ནས་ལོན། མ་ལོན་ན་ཀླུ་དེས་ཡུལ་ཁམས་བརླག་འགྲོ་བས་ཅི་བྱེད་བསམ་ནས་སེམས་མ་བདེ་ཞིང་སྡུག་ཐུག་སྟེ་བློན་པོ་ཆེན་པོ་མདུན་དུ་བོས་ཏེ། ཀླུ་ཞིག་གིས་ཁོ་བོར་བསྙེན་གནས་ཀྱི་དཔེ་ཆ་ཞིག་སློང་གི། དེ་གནད་ཆེ་བ་ནི་རྒྱལ་པོའི་རྒྱལ་སྲིད་ཆགས་འཇིག་ལ་ཐུག་པའི་དོན་ཆེན་ཞིག་ཡིན། ཁྱོད་ཀྱིས་གལ་ཏེ་དེ་མ་ལོན་ན་ཁྱོད་གསད་པ་ཡིན་ཟེར་ནས་བཀའ་བཙན་པོ་ཞིག་བསྩལ་བས། བློན་པོ་སེམས་མི་བདེ་བཞིན་དུ་ཁྱིམ་ལ་སོང་ཚེ། བློན་པོ་དེ་ལ་ཕ་རྒན་རྒས་པ་ཞིག་ཡོད་པ་དེས་སྔོན་ཆད་བུ་ཁྱིམ་ལ་ཡོང་དུས་འཛུམ་མུལ་ལེ་གཏམ་བཤད་དུས་སྤྲོ་ཡ་ལེ་ཡོད་ཀྱང་། ད་རིང་ངོ་འཛུམ་གནག་འདུག་པ་ཅི་ཡིན་ཞེས་དྲིས་པས། བུས་སྐད་ཆ་ཆ་ཚང་བཤད་ཚེ། ཕ་རྒན་གྱིས་སྨྲས་པ། ཁོ་ཡོད་སའི་ཀ་བ་ཞིག་གི་རྩེ་ན་འོད་མི་འདྲ་བ་ཞིག་འཕྲོ་བཞིན་འདུག་དེ་ཅི་ཡིན་ནམ་ཞེས་སྨྲས། ཚང་མས་དེ་ཡ་མཚན་ཅན་ཞིག་རེད་དེ་དེ་ཅི་ཡིན་མི་ཤེས་ཞེས་ཀ་བ་གཤག་སྟེ་བལྟས་ཚེ། བསྙེན་གནས་ཡན་ལག་བརྒྱད་པའི་ཡི་གེ་ཞིག་རྙེད་པས། བློན་པོས་རྒྱལ་པོ་ལ་ཡར་ཕུལ་བས་རྒྱལ་པོས་གསེར་གྱི་སྒྲོམ་ཞིག་གི་ནང་དུ་བསྡུས་ཏེ་ཀླུ་ལ་བསྐུར་བ་ན། ཀླུས་དྲིན་ལན་དུ་རིན་པོ་ཆེ་མང་པོ་ཕུལ་ཏེ་ཀླུ་དང་རྒྱལ་པོ་གཉིས་ཀ་མཐའ་མཇུག་ཅིག་ལ་ཐུག་རྒྱུ་བྱས། གཉིས་ཀས་བསྙེན་གནས་ཀྱི་ཁྲིམས་བརྒྱད་པོ་བསྲུངས་ནས་གཉིས་ཀ་ཚེ་འཕོས་ཏེ་ལྷ་ཡུལ་ལ་ལྷན་གཅིག་ཏུ་སྐྱེས་ཞིང། དེ་གཉིས་ཀ་མདང་ནམ་གྱི་ཆ་སྟོད་དུ་སངས་རྒྱས་བཅོམ་ལྡན་འདས་ཀྱི་ཁོང་གི་སྤྱན་སྔར་ཡོང་ནས་ཆོས་ཞུས་པས་གཉིས་ཀར་རྒྱུན་ཞུགས་ཀྱི་འབྲས་བུ་ཐོབ་ནས་ངན་སོང་གསུམ་དང་ཡོངས་སུ་བྲལ་ཏེ། ལྷ་དང་མིའི་ལོངས་སྤྱོད་ཉམས་སུ་མྱོང་ནས་མཐར་མྱ་ངན་ལས་འདའ་བར་འགྱུར་པ་རེད་གསུངས། བསྙེན་གནས་ཡན་ལག་བརྒྱད་པ་བསྲུང་ན་དེ་འདྲའི་ཕན་ཡོན་ཆེ་ན་མི་ཚེ་གཅིག་ལ་ཚུལ་ཁྲིམས་བསྲུང་བའི་ཕན་ཡོན་ནི་བརྗོད་ཀྱིས་མི་ལང་བ་ཞིག་ཡིན། བདེ་བ་ཅན་ལ་སྐྱེ་དགོས་ཚེ་སྐྱེ་བྱེད་ཀྱི་རྒྱུ་བཞི་ལ་བསྟེན་དགོས་ཤིང་། དེའི་ནང་གི་ཨེ་སྐྱེ་མི་སྐྱེ་སྨོན་ལམ་གྱི་མཚམས་སྦྱར་ལ་རག་ལས་པ་ཡིན་ལ། སྨོན་ལམ་ཨེ་འགྲུབ་མི་འགྲུབ་ཚུལ་ཁྲིམས་སྲུང་མི་སྲུང་ལ་རག་ལས་པས། ཁྱིམ་པ་ནས་རབ་བྱུང་བསྙེན་རྫོགས་གཉིས་ཀའི་བར་གྱི་སྡོམ་པ་གང་བླང་ན་སྲུང་བ་ནི་ཤིན་ཏུ་གལ་ཆེ་བ་ཡིན། ཁྱད་པར་དུ་བསྟན་པ་ཉམ་དམའ་ཉག་ཕྲ་སྙིགས་མའི་སྐབས་སུ་སྡོམ་པ་བསྲུང་ན་ཕན་ཡོན་ཆེན་པོ་ཡོད་པ་ཡིན། སྲོག་གཅོད་མ་བྱིན་ལེན་དང་མི་ཚངས་སྤྱོད། །ལུས་ཀྱི་མི་དགེ་གསུམ་པོ་མཐོལ་ལོ་བཤགས། །གསུངས་ཏེ། དེ་ལྟ་བུ་ལུས་ཀྱི་མི་དགེ་བ་སྲོག་གཅོད་མ་བྱིན་ལེན་དང་མི་ཚངས་སྤྱོད་གསུམ་པོ་ཚེ་རབས་ཐོག་མ་མེད་པ་ནས་ད་ལྟའི་བར་དུ། སྦྱང་བྱ་སྡིག་པའི་སྒོ་དྲུག་དང་འབྲེལ་བ་རང་གིས་བསགས་པ་གཞན་ལ་བསག་ཏུ་བཅུག་པ་ཐམས་ཅད། སངས་རྒྱས་འོད་དཔག་མེད་འཁོར་དང་བཅས་པའི་སྤྱན་སྔར་གནོང་ཞིང་འགྱོད་པ་དྲག་པོས། མཐོལ་ལོ་བཤགས་ཤེས་སྡིག་པ་མི་གསང་བས་ན་མཐོལ་ལོ། སྡིག་པ་རང་རྒྱུད་དང་མི་འདྲེས་པར་བཤགས་སོ་གསུངས། དེ་ཡན་ཆད་ལུས་ཀྱི་མི་དགེ་གསུམ་བཤགས་ཚུལ་བཤད་པ་ཡིན།

ཉིན་བཞི་བའི་ཆོས་ཁྲིད།

མཚམས་སྦྱོར་གྱི་གདམས་ངག

དམ་པའི་ཆོས་ཉོན་མོངས་ཀྱི་ནད་ཞི་བར་བྱེད་པའི་བདུད་རྩི། ཐར་བའི་ལམ་ལ་འགྲོ་བའི་ལམ་སྟོན། མུན་པའི་སྒྲོན་མེ་འདི་དང་ལན་གཅིག་འཕྲད་ཡོད་དུསདམ་པའི་ཆོས་དང་རང་རྒྱུད་འདྲེས་པའི་བརྩོན་པ་ཞིག་རང་ངོས་ནས་བྱ་ཐུབ་ན། ཚེ་འདིར་འཁོར་བ་ལས་དུས་གཏན་དུ་ཐར་བའམ། ཐར་བའི་ལམ་སྣེ་ཟིན་པ་ཞིག་ངེས་པར་རེད་ཐུབ་ཅེས་གསུངས། ཐར་ལམ་དེ་གཅིག་ཟིན་སོང་ན། དེ་ནས་བདེ་ནས་བདེ་བའི་ཕྱོགས་སུ་འགྲོ་ཞིང་། མཐར་ཐུག་གི་བསྒྲུབ་བྱ་རྫོགས་པའི་སངས་རྒྱས་ཀྱི་གོ་འཕང་གི་སྦྱོར་བ་དམ་པ་དེ་ཡང་རང་གི་ལག་ཏུ་ཡོད་པ་ཡིན་གསུངས་པ་དང་། ཀློང་ཆེན་པས། པདྨོ་ཅན་སོགས་དག་པའི་འཇིག་རྟེན་དུ། །པདྨོ་ལས་སྐྱེས་སེམས་གཙང་རྙོག་པ་མེད། །པདྨོ་ལྟར་མཛེས་ཡོན་ཏན་ཚོགས་མང་ཞིང་། །པདྨོའི་དཔལ་སོགས་རྒྱལ་བ་མཐོང་བར་འགྱུར། །ཞེས་གསུངས་ཏེ། །གོང་དུ་གསུངས་པ་ལྟར་ཐར་བའི་ལམ་སྣེ་ཞིག་ཟིན་ནས་བྱང་ཆུབ་བདེ་ལེགས་ཀྱི་འབྱོར་བ་དམ་པའི་ལམ་སྣེ་ལ་གཅིག་ཐོན་དུས། དེའི་ལེགས་བྱས་ཀྱི་འབྱོར་བའི་མཐུས་ངན་འགྲོའི་གནས་སུ་འགྲོ་མི་དགོས་ཤིང་། གལ་ཏེ་ལས་དབང་ཟློག་མེད་ཀྱིས་འགྲོ་ཙམ་རེ་དགོས་ནའང་ཐར་བའི་ལམ་སྣེ་ཟིན་ཡོད་པའི་སྟོབས་ཀྱིས་ཐར་སླ་ཞིང་། བདེ་འགྲོ་མཐོ་རིས་ཀྱི་འཇིག་རྟེན་ཏུ་ལྷ་དང་མིའི་ལུས་ཤ་སྟག་བླངས་ཏེ། རྟེན་དེའི་ཐོག་ནས་དགེ་བའི་བྱ་བ་ལ་བརྩོན་ཏེ་མངོན་མཐོ་དང་ངེས་ལེགས་ཀྱི་དགའ་སྟོན་བཟང་པོ་དུས་རྟག་ཏུ་མྱོང་བའོ། །པད་མོ་ཅན་ཞེས་པ་ནི་བདེ་བ་ཅན་ནོ། བདེ་བ་ཅན་གྱི་ཞིང་ནས་མེ་ཏོག་པདྨ་ལས་སྐྱེས་ཏེ། པདྨོ་ལས་སྐྱེས་སེམས་གཙང་རྙོག་པ་མེད་ཅེས་པ་ནི། ལྷག་པའི་བསམ་པ་རྣམ་པར་དག་པས་སེམས་གཙང་བ་དང་བཅས་པས། པདྨོ་ལྟར་མཛེས་ཡོན་ཏན་ཚོགས་མང་ཞིང་། ཞེས་པ་ནི། པདྨོ་འདམ་ལས་སྐྱེས་ཀྱང་འདམ་གྱི་དྲི་མས་མ་གོས་པ་ལྟར། འཁོར་བའི་དྲི་མས་མ་གོས་ཤིང་ཡོན་ཏན་གྱི་ཚོགས་རབ་ཏུ་མང་པོ་དང་ལྡན་པའོ། །པདྨོའི་དཔལ་སོགས་རྒྱལ་བ་མཐོང་བར་འགྱུར། ཞེས་པ་ནི། པདྨོའི་དཔལ་རྒྱལ་བ་འོད་དཔག་མེད་མགོན་ལ་ཞུ་བ་དང་། བཅོམ་ལྡན་རྒྱལ་བ་འོད་དཔག་མེད་ལ་སོགས་པ་ཕྱོགས་བཅུའི་སངས་རྒྱས་ཀྱི་ཞལ་མཇལ། སངས་རྒྱས་དངོས་ཀྱི་མདུན་ནས་ཆོས་ཉན་ཏེ་ས་ལམ་རིམ་བགྲོད་ཀྱི་སྟེང་ནས་རྣམ་མཁྱེན་སངས་རྒྱས་ཀྱི་གོ་འཕང་ཐོབ་སྟེ། རང་གཞན་དོན་གཉིས་ལྷུན་གྱིས་གྲུབ་ཅེས་གསུངས་པ་རེད། དེས་ན་ཐར་བའི་ལམ་སྣེ་ངོ་མ་ཞིག་ཟིན་དགོས་ཕྱིན་དང་པོ་ཐེག་ཆེན་ཚོགས་ལམ་ཆུང་ངུའི་ལམ་ནས་ཞུགས་དགོས། དེ་ལ་མ་ཞུགས་པའམ་ཐེག་ཆེན་ཚོགས་ལམ་ཆུང་ངུའི་ལམ་སྣེ་མ་ཟིན་ན་ཐར་བའི་ལམ་སྣེ་ལེགས་པོ་ཞིག་མ་ཟིན་པ་ཡིན། དེ་དགོས་ན་སྦྱིན་པ་ལ་སོགས་པ་བསོད་ནམས་དང་ཡེ་ཤེས་ཀྱི་ཚོགས་མཐའ་དག་བསྒྲུབ་པ་ལ་འཇུག་པ་ཚོགས་ལམ་དང་། དེ་ལ་འཇུག་པར་བྱེད་པ་ལ་ཐེག་ཆེན་བྱང་ཆུབ་མཆོག་ཏུ་སེམས་མ་བསྐྱེད་ཐབས་མེད་ཡིནཔས། ཐེག་ཆེན་སེམས་བསྐྱེད་གསར་དུ་སྐྱེས་པའི་རྟེན་གང་ཡིན་པ་དེས། ཐེག་ཆེན་སེམས་བསྐྱེད་དང་པོ་ཐོབ་ནས་ཚོགས་ལམ་ཆུང་ངུ་ལ་འཇུག་ནུས་ཀྱི་ཡོད། ཡིན་ཡང་སེམས་མཆོག་བསྐྱེད་པ་མི་གཙོ་སྐྱེས་པ་གཙོ་གསུངས་པ་ཡིན་པས་བྱང་ཆུབ་སེམས་སྡོམ་ཐོབ་ལ་མ་ཉམས་པ་དེའི་ཐོག་ནས། ཚོགས་ལམ་ཆུང་ངུའི་ལུས་ཚོར་སེམས་ཆོས་དྲན་པ་ཉེ་བར་བཞག་པ་བཞི་གཙོ་བོར་བསྒོམས་ཏེ། མཉམ་བཞག་ནམ་མཁའ་ལྟ་བུ་དང་། རྗེས་ཐོབ་སྒྱུ་མ་ལྟ་བུ་ཞིག་གི་ཚད་ལ་ཐོན་ཏེ། སྦྱོར་ལམ་རང་རྒྱུད་ལ་སྐྱེས་པའི་དུས་ད་དུང་མ་ངེས་པ་དེ་ནི་ཚོགས་ལམ་ཆུང་ངུ། དེའི་སྟེང་དུ་ཡང་དག་སྤོང་བཞི་བསྒོམས་ཏེ་མི་དགེ་བའི་ཆོས་ཀྱི་དངོས་པོ་དང་དགེ་བ་ལ་བར་དུ་གཅོད་པའི་ཆ་སྤོང་བ་ལ་སྤང་བཞི་ཟེར་བ་ཡིན། སྐྱེ་བ་ཕྱི་མར་སྦྱོར་ལམ་རང་རྒྱུད་ལ་སྐྱེ་ངེས་པ་ཚོགས་ལམ་འབྲིང་། དེའི་སྟེང་དུ་འདུན་བརྩོན་སེམས་པ་སྤྱོད་པའི་རྫུ་འཕྲུལ་གྱི་རྐང་པ་བཞི་བསྒོམས་ཏེ་ཏིང་ངེ་འཛིན་གྱི་རྩལ་དང་རྣམ་པ་མང་པོ་རང་རྒྱུད་ལ་ཐོབ་པ་ཚེ་དེ་ལ་སྦྱོར་ལམ་རང་རྒྱུད་ལ་སྐྱེ་ངེས་ཡིན་པ་དེ་ཚོགས་ལམ་ཆེན་པོ། དེ་ནས་སྦྱོར་ལམ་དྲོད་རྩེ་བཟོད་ཆོས་མཆོག་གི་ངེས་འབྱེད་ཆ་བཞི་པོ་བརྒྱུད་དེ་མཐོང་ལམ་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་དགོས། དོན་དམ་བྱང་ཆུབ་ཀྱི་སེམས་རྒྱུད་ལ་སྐྱེ་བ་ལ་ཀུན་རྫོབ་བྱང་ཆུབ་ཀྱི་སེམས་དང་པོ་བསྐྱེད་དགོས། ཚོགས་སྦྱོར་གཉིས་ཀ་མཐོང་ལམ་རྣམ་པར་མི་རྟོག་པའི་ཡེ་ཤེས་དོན་དམ་བྱང་ཆུབ་ཀྱི་སེམས་ལ་མོས་པ་ལམ་དུ་བྱེད་པའི་ས་ཡིན་པས་ན། ཐར་བའི་ལམ་སྣེ་ཞིག་ཟིན་པ་ལ་ཚོགས་ལམ་ཆུང་ངུ་ནས་ངེས་པར་དུ་འཇུག་དགོས། དྲན་པ་ཉེ་བར་བཞག་པ་བཞིའི་སྤྱི་རྣམ་ཙམ་ལ་ཡང་རྟོག་དཔྱོད་ཞིག་ཞུགས་མ་མྱོང་བ་ཞིག་གིས་ཐར་ལམ་གྱི་ཕྱོགས་གར་ཡོད་ཙམ་ཡང་མི་ཤེས་པར་མོས་དགེ་རྣམ་པར་དག་སྟེ་ཡང་དག་པའི་ལམ་ལ་མོས་པ་མི་ལྷོད་པ་ཞིག་ཡིན་པས་ཚོགས་སྦྱོར་མཐོང་སྒོམ་མི་སློབ་པའི་ལམ་རིམ་བརྒྱུད་བྱེད་དགོས་ཀྱི་ཡོད། དེ་ལྟ་བུའི་ལམ་སྦྱོང་བ་ལ། ཐེགས་ཆེན་མདོ་དང་སྔགས་ཀྱི་ཐུན་མོང་དང་ཐུན་མིན་གྱི་ལམ་མྱུར་ཞན་གདམས་པའི་ཟབ་ཁྱད་ཀྱི་ཁྱད་པར་ཡོད་པ་དང་། དེའི་ལམ་གང་ལ་ཞུགས་མོས་ན་དེ་ལ་འཇུག་ཆོག་པའི་གདམ་ཁ་རང་ལག་ཏུ་ཡོད། ཡང་ཀུན་མཁྱེན་ཆེན་པོས། དེ་ཕྱིར་བློ་དང་ལྡན་པའི་སྐྱེ་བོ་རྣམས། །དེ་རིང་ཉིད་ནས་བརྩོན་པའི་གོ་བགོས་ཏེ། །དགེ་གོམས་ཡིད་ལ་བྱེད་པ་འབའ་ཞིག་གིས། །ཐར་ལམ་འཛེག་ལ་བརྩོན་པ་བརྒྱ་འགྱུར་རིག །ཅེས་གསུངས་པས། །འཁོར་བའི་སྡུག་བསྔལ་ལས་ཐར་བའི་ཐར་བ་ཨེ་སྒྲུབ་མི་སྒྲུབ་རང་ལ་རག་ལས་པས། བློ་དང་ལྡན་པ་བྱང་ཁོག་ནང་ན་སེམས་ཡོད་པ་ཞིག་ཡིན་ཕྱིན་དེ་རིང་ཉིད་ནས་བརྩོན་འགྲུས་ཀྱི་གོ་ཆ་བགོས་ཏེ། གོ་ཆ་ཟེར་བ་ཕ་རོལ་གྱི་དགྲ་བོས་མཚོན་ཆས་བརྒྱབ་ན་མི་ཆོད་ཐབས་ལུས་སྲུང་བྱེད་ཀྱི་ཁྲབ་གོས་ལྟ་བུ་ཞིག་ལ་གསུངས་པ་དང་། དགེ་བ་མ་བསྒྲུབས་ན་ཐར་ལམ་མི་ཟིན་བདེ་བ་མི་ཐོབ་། དགེ་བ་བསྒྲུབ་པ་ལ་བསྒྲུབས་ཏེ་འགྲུབ་དགོས། འགྲུབ་པ་ལ་བརྩོན་འགྲུས་བྱེད་དགོས། བརྩོན་འགྲུས་ཀྱི་དགྲ་དེ་གང་ཡིན་ཞེ་ན། ཕྱི་བཤོལ་དང་ལེ་ལོ་ཡིན་ལ། ལེ་ལོ་ཡི་དགྲ་དེའི་མཚོན་ཆས་མི་ཆོད་པའི་བརྩོན་འགྲུས་ཀྱི་གོ་ཆ་སྲ་མོ་ཞིག་གྱོན་ནས། དགེ་གོམས་ཡིད་ལ་བྱེད་པ་འབའ་ཞིག་གིས་གསུངས་པ་ནི། དགེ་བ་བསྒྲུབ་པ་དེ་ལྟར་སྣང་ཙམ་དང་ཁྲལ་གསོད་ཙམ་ཞིག་མ་ཡིན་པར། དགེ་བ་ཡིད་ལ་གོམས། ལུས་ངག་ལ་འདྲིས་ཏེ་ཅི་བྱེད་དགེ་བ་མ་གཏོགས་མེད་པ་ཞིག་བྱས་ཏེ། ཐར་ལམ་རིམ་བགྲོད་ཀྱིས་བྱང་ཆུབ་མཆོག་གི་གོ་འཕང་ལ་འགོད་རྒྱུའི་བརྩོན་པའམ་དེའི་སེམས་ཤུགས་དེ་གནད་མ་ཤེས་གོང་བརྒྱ་འགྱུར་ཞིག་བསྐྱེད་རན་པ་རེད་ཅེས་གསུངས་པ་རེད། ད་གང་བཤད་ཀྱང་རང་རེ་རྣམས་ནི་དམྱལ་བར་སྐྱེ་བ་ལ་སྐྲག་པ་དང་། ཡི་དྭགས་དང་དུད་འགྲོ་གཉིས་ལ་སྐྱེ་བ་ཡང་དེ་བཞིན་དུ་སྐྲག་པ་ཡིན། མིའི་ལུས་རྟེན་ལ་ཆགས་ཞེན་ཞིག་ཡོད་པ་ཡིན་ཡང་སྐྱེ་རྒ་ན་འཆིའི་སྡུག་བསྔལ་མི་འདོད་པས། རྒྱུ་མེད་པ་དགྲ་མང་བ་བསམ་པ་མི་འགྲུབ་པ་ལྟོགས་སྐོམ་ཚ་གྲང་ལ་སོགས་པའི་སྡུག་བསྔལ་ཐམས་ཅད་མེད་ན་དགའ་མོད། འོན་ཀྱང་འགྲོ་བ་མིའི་ལུས་རྟེན་ཞིག་ཡིན་ཕྱིན་དེ་དག་འབྲལ་ཐབས་མེད་པ། དཔེར་ན་མེ་ཡིན་ན་ཚ་བའི་རང་བཞིན་ཅན་ཞིག་དང་ཆུ་ཡིན་ན་རླན་པའི་རང་བཞིན་ཅན་ཞིག་ཡིན་པ་རང་གི་ཆོས་ཉིད་ཡིན། སྡུག་བསྔལ་མེད་པའི་མི་ལུས་ཤིག་ལེན་དགོས་ཚེ། མེ་གྲང་བ་ཞིག་དང་ཆུ་སྐམ་པོ་ཞིག་ལོན་དགོས་ཟེར་བ་ལྟ་བུ་ཞིག་ཡིན་པས། དེ་ལོན་ཐབས་མེད་པ་ཡིན། ས་འདི་ཆགས་ནས་ད་ལྟའི་བར་དུ་མི་མང་པོ་ཞིག་གིས། འབད་པ་བྱས་བྱས་ཏེ་འཁོར་བ་བསྒྲུབས་ནས་བདེ་བ་མ་འགྲུབ་ན། འུ་ཅག་ལས་ལྷག་པའི་མི་སྐྱེས་མྱོང་ཡོད་པ་དེ་ཚོས་མ་འགྲུབ་པ་ཞིག་འུ་ཚོས་འགྲུབ་ཐབས་ཡོད་པ་མིན་ལ། དེ་མ་འགྲུབ་པ་ཞིག་ཀྱང་མིན་པར་སྒྲུབ་ཐབས་མེད་པ་འཁོར་བ་སྡུག་བསྔལ་གྱི་ཕུང་པོ་ཅན་ཡིན་པས་སོ། །ངན་སོང་གསུམ་དང་མིའི་འཇིག་རྟེན་ཏེ་བཞི་པོར་ནི་བདེ་བ་མེད་པར་ཤེས་སླ་བ་དེ་འདྲ་ཞིག་རེད། ལྷ་ཡུལ་དུ་ལུས་རྟེན་འདིའི་སྟེང་ནས་ཐོན་མ་མྱོང་ལ། སྐྱེ་བ་སྔོན་མར་ཐེངས་མང་པོར་ཐོན་མྱོང་ཡོད་ཀྱང་མི་དྲན་པས། དེས་ན་ལྷའི་བདེ་བ་འདི་འདྲ་ཞིག་རེད་ཟེར་མི་ཤེས་ཀྱང་། དེ་ཡང་བདེ་བར་གཤེགས་པའི་གསུང་རབས་ལ་བལྟས་ན་ལྷའི་སྡུག་བསྔལ་ཡང་ཧ་ལམ་ཤེས་ཐུབ་སྟེ། གཙོ་ཆེ་བ་འཕོ་ལྟུང་གི་སྡུག་བསྔལ་རེད། མ་ཤི་གོང་གི་ཉི་མ་བདུན་ལ་འཆི་ལྟས་ཚང་། ཤི་ནས་ངན་སོང་དུ་ལྷུང་ས་རང་གིས་ཤེས་པ་ཡིན་ན། ལྷའི་ཡུལ་གྱི་ཉི་མ་བདུན་ནི་མིའི་ལོ་གྲངས་བརྒྱ་ཚོ་མང་པོ་ཡིན་པས། ལྷུང་གྲབས་བྱེད་པའི་སྡུག་བསྔལ་རྐྱང་བ་ཡང་བརྗོད་ལས་འདས། དེར་ན་མི་ཞིག་རྒྱལ་པོའི་ཁྲིམས་ལ་ཐོགས་ཏེ་ཁྱོད་ཉི་མ་བདུན་གྱི་སྐེ་གཅོད་རྒྱུ་ཡིན་ཞེས་བསྒྲགས་ན། ཉིན་བདུན་པོ་དེར་མི་དེའི་སེམས་ལ་སྐྱིད་ཅིག་ཡོད་མི་སྲིད། ད་དུང་སྐེ་བཅད་པ་ནི་ཐེངས་གཅིག་ཤི་བ་ཙམ་ལས་དམྱལ་བར་ལྷུང་བའི་ངེས་པ་མེད་མོད། འོན་ཀྱང་ལྷས་ནི་ཕྱི་མར་དམྱལ་བ་ལ་ལྷུང་བ་ཤེས་ཤིང་མང་ཆེ་བ་དམྱལ་བར་ལྷུང་བའང་ཡིན། དེ་ལྟར་འགྲོ་བ་རིགས་དྲུག་མཐོ་དམན་གང་དུ་སྐྱེས་ཀྱང་སྡུག་བསྔལ་ཞིག་ལས་མེད་པའི་གོ་བ་ངེས་ཤེས་གཏིང་ནས་ཡོད་དགོས། དེ་ཡང་ཁ་ཟེར་ཙམ་མ་ཡིན་པ་ཞིག་དགོས། འཁོར་བ་སྡུག་བསྔལ་ཡིན་པར་ཁ་ཟེར་ཙམ་ལས་མ་ཤེས་ཚེ་དེས་ཆོས་སྒྲུབ་པ་དེ་ཡང་ཁ་ཆོས་ཡིན་ཞིང་། ཁ་ཆོས་དོན་ལ་མེད་པས། ཆོས་པ་རྫུན་མ་ལྟར་སྣང་བ་ཞིག་ཡིན། ཆོས་པ་རྫུན་མས་ཕྱི་མའི་ལམ་གོ་མི་ཆོད། སྒོར་མོ་རྫུན་མས་ཅ་ལག་ཉོ་མི་ཐུབ་པ་དང་། ཤོག་བུས་བྱས་པའི་གྲུ་གཟིངས་ཞིག་གིས་ཆུ་ལ་འབུད་བྱེད་བྱས་ན་གོ་མི་ཆོད་པ་དང་འདྲ་འོ། །དེ་ལྟར་རྒྱུ་མཚན་ཤེས་ཏེ་འཁོར་བའི་ནང་ནས་ཐར་འདོད་ཀྱི་བློ་ཞིག་སྐྱེས་པ་དེའི་མིང་ལ་ངེས་འབྱུང་ཞེས་བྱ། ངེས་འབྱུང་དང་། བྱང་ཆུབ་ཀྱི་སེམས་དང་། ཡང་དག་པའི་ལྟ་བ་དང་གསུམ་ནི་ཐར་ལམ་བྱང་ཆུབ་སྒྲུབ་པའི་ལམ་གྱི་གཙོ་བོ་རྣམ་གསུམ་ཡིན། འཁོར་བ་གང་དུ་སྐྱེས་ན་སྡུག་བསྔལ་གྱི་རང་བཞིན་ཡིན་པ་ཤེས་ཤིང་། དེ་ལས་ཐར་འདོད་ཀྱི་བློ་ངེས་འབྱུང་བཅོས་མིན་ཞིག་ཡོད་ཀྱང་བྱང་ཆུབ་ཀྱི་སེམས་རྒྱུད་ལ་མ་སྐྱེས་ན་ཐེག་ཆེན་ཚོགས་ལམ་ཆུང་ངུའི་སྣེ་ཙམ་ཡང་ཟིན་མེད། དེ་མ་ཟིན་ཕྱིན་གོང་དུ་བཤད་པའི་ཐར་ལམ་གྱི་སྣེ་མོ་མ་ཟིན་པར་ལམ་ལོག་ཏུ་མགོ་འཁོར་ནས་འགྲོ་བཞིན་ཡོད་པ་ཡིན། ཆོས་ཉན་ནས་ཅུང་ཟད་གོ་བཞིན་ཡོད་པ། དཔེར་ན་འུ་ཅག་འདིར་སྡུག་བསྔལ་ཞིག་གི་ནང་དུ་འཁྱམ་ནས་འགྲོ་བཞིན་ཡོད་པ་དང་། སྡུག་བསྔལ་ཡང་ཆེ་བ་དང་། སྡུག་བསྔལ་འདིའི་ནང་ནས་ཐར་ས་ཞིག་ཡོད་པ་ལྟ་བུ་མཚམས་རེར་གོ་ཡང་། ལམ་གང་གི་ནང་དུ་ཕྱོགས་གང་ལ་འཁོར་ཏེ་ཐབས་ཇི་འདྲ་བྱས་ནས་འགྲོ་དགོས་པའི་གནད་དེ་གོ་མེད་ཚེ། གནད་འགག་དང་འཕྲད་དུས་རང་ཉིད་ལ་ཕན་ཐོགས་ཡོད་པའི་དངོས་པོ་དེ་ལོན་མེད། ལག་ཆ་ཞིག་ལ་དཔེར་བཞག་ན་གྲི་ཤུབས་ལོན་ཀྱང་གྲི་ལོན་མེད་པ་དང་། སྨག་ནག་ཏུ་འགྲོ་སྐབས་གློག་སྒྲོན་དགོས་ཚེ་གློག་ཤུབས་ལོན་ཀྱང་ནང་གློག་རྫས་ལོན་མེད་པ་ལྟ་བུ་རེད། མདོར་ན་མུན་ནག་ཏུ་གསལ་སྒྲོན་མེད་པ་དང་ལམ་མི་མཐོང་བ་སྔོན་མ་དང་འདྲ་བ་རེད། དེ་དང་འདྲ་བར་འཁོར་བར་ངེས་འབྱུང་གི་བློ་ཡོད་དགོས་ཀྱང་། བྱང་ཆུབ་ཀྱི་སེམས་མེད་ན་ཐར་བའི་ལམ་སྣེ་ཟིན་མེད་པས། བྱང་ཆུབ་ཀྱི་སེམས་རྒྱུད་ལ་སྐྱེ་ཐབས་སུ་བརྩོན་པ་དྲག་དུ་བྱ་དགོས། བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་བ་ལ་སྙིང་རྗེ་ཡོད་དགོས། ཐེག་པ་ཆེན་པོའི་ལམ་སྒྲུབ་པ་ལ་ཐོག་མཐའ་བར་གསུམ་དུ་སྙིང་རྗེ་མེད་ན་མི་རུང་། དེས་ན་མཐའ་ཡས་པའི་སེམས་ཅན་ཐམས་ཅད་ཐོག་མ་མེད་པའི་དུས་ནས་ད་ལྟའི་བར་དུ་ཕ་མར་བྱས་པའི་གྲངས་ཀ་ས་ཆེན་པོའི་རྡུལ་གྲངས་ལས་ཀྱང་མང་བ་ཤེས་པ་དང་། ཕ་མར་གྱུར་བའི་གནས་སྐབས་སུ་དྲིན་གྱིས་བསྐྱངས་པའི་དྲིན་ཆེན་གྱི་ཕ་མ་ཤ་སྟག་ཡིན་པ་ཡང་ཤེས་ཏེ། མར་ཤེས་དྲིན་དྲན་དྲིན་ལན་གསབ་འདོད་ཀྱི་བློ་བཅོས་མིན་ཞིག་རྒྱུད་ནས་འབྲལ་བ་མེད་པ་ཞིག་ཏུ་གྱུར་ཚེ། ད་གཟོད་ཆོས་པ་ཞིག་ཏུ་འགྱུར་ལ་ཉེ་ཞིང་། དེས་ཐར་ལམ་གྱི་སྣེ་ཞིག་རྙེད་ནའང་ཐང་། སྙིང་རྗེ་རྒྱུད་ལ་མེད་ཕྱིན་གྲྭ་པ་མ་ཟད་བླ་མ། བླ་མ་མ་ཟད་ཁྲི་སུམ་བརྩེགས་ཀྱི་ཐོག་དང་གདུགས་དགུ་བརྩེག་གི་འོག་ན་འདུག་མཁན་ཞིག་ཡིན་ཀྱང་སྙིང་པོ་ཅི་ཡང་མེད། རང་གིས་ཐར་ལམ་མ་ཟིན་གོང་གཞན་ལ་ལམ་སྟོན་བྱེད་པ་ནི་ལོང་བས་ལོང་བར་ལམ་ཁྲིད། ཐ་མ་རང་གཞན་གཉིས་ཀ་མཐའ་འགོ་ནས་ལྷུང་བྱེད་ཡིན་། དེ་ཡང་མངོན་པར་རྫོགས་པར་འཚང་རྒྱ་བ་ལ་སྙིང་རྗེ་གཞུ་ལྟ་བུ། ཤེས་རབ་མདའ་ལྟ་བུ། ཐབས་ལ་མཁས་པ་སྐྱེས་བུ་འཕོང་སྐྱེན་པ་མདའ་རྩལ་ལ་མཁས་པ་ལྟ་བུ་གསུམ་ཚོགས་དགོས་པ་ཡིན། རང་རེ་དམ་པའི་ཆོས་ལམ་དུ་ཞུགས། ཆོས་ངོ་མ་ཞིག་ཨེ་འགྲུབ་ལ་རེ་མཁན་ཤ་སྟག་ཡིན་པའི་དབང་དུ་བཏང་ན། འུ་བུ་ཚོས་གཅིག་གིས་གཅིག་ལ་མེད་ན་ཡོད་མདོག་བསྟན་པས་མི་ཕན། ཡིན་མདོག་བྱས་པཙམ་གྱིས་གོ་མི་ཆོད། མདོར་བསྡུས་ན། ལམ་ཨེ་བརྟན་དགེ་བའི་བཤེས་གཉེན་དང་། མཁས་པའི་གཞུང་ལུགས། གདམས་པའི་བདུད་རྩི་ལ་ཐུག་པ་ཡིན་ལ། ལམ་དེའི་ནང་དུ་ཨེ་འགྲོ་ནི་རང་ཉིད་རག་ལས་པ་ཡིན། ཆུ་ཨེ་ཆོད་འདོ་བ་རྟ་རེད། །འབུད་ཨེ་སྤོབ་བདག་པོ་རང་ཡིན། མདོར་ན་ཆོས་ཀྱི་སྙིང་དོན་དང་སྒྲུབ་ལུགས་ངོ་མ་ཞིག་ཤེས་རྒྱུ་དེ་རྣམ་པ་ཀུན་ཏུ་གལ་ཆེན་ཡིན། ཁ་སང་ལུས་ཀྱི་མི་དགེ་བ་གསུམ་སོང་ནས།

གཉིས་པ་ངག་གི་མི་དགེ་བ་བཞི་བཤགས་པ།

རྫུན་དང་ཕྲ་མ་ཚིག་རྩུབ་ངག་འཆལ་པ། །ངག་གི་མི་དགེ་བཞི་པོ་མཐོལ་ལོ་བཤགས། །ཤེས་གསུངས་ཏེ། རྫུན་ནི་བཅས་རང་གཉིས་ཀའི་ཆ་ནས་བཤད་ན། རབ་ཏུ་བྱུང་བ་ཞིག་གིས་ས་མ་ཐོབ་འཞིན་དུ་ས་ཐོབ་པ་དང་། གྲུབ་པ་མ་ཐོབ་བཞིན་དུ་གྲུབ་པ་ཐོབ་པ། གཏེར་བླངས་ཡོད། དགོངས་གཏེར་ཕབ་ཡོད། ཤི་བོའི་རྣམ་ཤེས་གནས་གང་དང་གང་ཞིག་ལ་བུད་སོང་ཞེས་མ་ཤེས་ཤེས་མདོག་བྱས་ཏེ་རྫུན་བཤད་ན། མི་ཆོས་བླ་མའི་རྫུན་ཕམ་བཞིའི་ནང་གི་གཅིག་དང་། རྫུན་གྱི་གཞི་ནི་སྨྲ་ཤེས་དོན་གོ་མིར། །བསམ་པ་འདུ་ཤེས་བསྒྱུར་ནས་བརྗོད་བློ་སྐྱེས། །སྦྱོར་བ་མངོན་ཤེས་ལ་སོགས་ཡོན་ཏན་ཚོགས། །མེད་ཀྱང་ཡོད་ཅེས་བླ་མས་རྫུན་སྨྲས་པ། །མཐར་ཐུག་གཞན་གྱིས་རྫུན་ཏེ་གོ་ན་ཉམས། །ཞེས་གསུངས་སོ། །འདིའི་གླེང་གཞི་གང་ལ་བརྟེན་ནས་ཐོག་མར་སྟོན་པས་བཅའ་བ་ཇི་ལྟར་མཛད་ཅེ་ན། ཡུལ་ཡངས་པ་ཅན་ནས་ཉ་བ་ལྔ་བརྒྱ་རབ་ཏུ་བྱུང་བའི་དགེ་སློང་ལྔ་བརྒྱས་མི་ཆོས་བླ་མའི་རྫུན་སྨྲས་པ་དེ་ལ་བརྟེན་ཏེ་བཅས་པའོ། །འདིའི་གཞི་བསམ་སྦྱོར་བ་མཐར་ཐུག་སྡོམ་གསུམ་གྱི་ལུང་གོང་དུ་དྲངས་པ་དེ་ལྟར་དང་། ཁྱིམ་པ་ཡིན་ན་ཕམ་པའི་ལྟུང་བ་ཞེས་པ་ཞིག་མེད་ཀྱང་རང་བཞིན་གྱི་ཉེས་པ་དང་སྡིག་པ་ཆེན་པོས་གོས་འགྲོ་བས། ཁྱིམ་པས་གྲུབ་ཐོབ་དང་མཁའ་འགྲོ་མ་ཡིན་ཟེར་བ་དང་མངོན་ཤེས་ཡོན་ཏན་མེད་ཀྱང་ཡོད་ཅེས་མི་མགོ་བསྐོར་ན་རྫུན་ཆེན་པོ་ཡིན་ལ། ད་དུང་ཆོས་དང་བླ་སེར་ལ་སྐུར་འདེབས་ངན་འདོགས་ཕ་མ་བླ་མ་ཚོ་སླུ་བྱེད་ཀྱི་རྫུན་བཤད་ན་རྫུན་ཆེན་པོའི་གྲལ་དུ་འགྲོ་ཞིང་། ཕྱི་མ་མནར་མེད་དུ་འགྲོ་བྱེད་འདི་དག་ཡིན་ལ། ཁྱད་པར་དུ་གང་ཟག་གི་ཚོད་གང་ཟག་གིས་མི་ཟིན་པས། བླ་སེར་ལ་སྐུར་བ་མ་འདེབས། སྤྱིར་ལྐོག་འཕྱ་ཡིས་མི་ཐུབ། ཕ་རོལ་པོ་ཐུབ་དགོས་སྙམ་ནས་གཞི་མེད་སྐུར་འདེབས་ཀྱིས་ངན་སྨོད་ཅིག་བྱས་ཀྱང་། ཕ་རོལ་པོ་མི་ཐུབ་པར་མ་ཟད་ང་རྒྱལ་དང་མགོ་འཕང་སྤོབས་པ་ཇེ་ཆེར་འགྲོ་རྐྱེན་དུ་མི་འགྱུར་བའི་ངེས་པ་མེད་པས། ཝ་མགྱོག་པ་ཁྱིས་མ་ཆོད་པས་རྗེས་ནས་ངུ་ཟུག་བྱེད་པ་ཆོས་ཉིད་ཡིན། རྫུན་འབྲིང་ནི་མི་མགོ་སྐོར་བའི་ནུས་པ་མེད་ཀྱང་ཁོ་རང་གི་བསམ་པར་མགོ་གཡོགས་ཐུབ་སྣང་ཤར་ནས་བཤད་པ་དང་། དེང་སང་འགའ་ཞིག་གིས་རླབ་རྒྱག་ཅེས་པ་ཡང་དོན་ལ་རྫུན་བཤད་ཅེས་པ་ཡིན། ཁོ་ཆེ་རབས་། བཟང་རབས། ཁོས་སྟག་ལ་ཁ་ནས་ཇི་ལྟར་བསད་རབས། དེ་ལ་ཉན་ན་ཁོ་མེད་ན་འཇིག་རྟེན་ཆགས་ལུགས་ཡོད་ས་ཨེ་ཡོད་ན་བསམ་རྒྱུའི་སྐད་ཆ། དབུས་པ་ཚོས་ཟེར་ན་བོ་རྫུན་བཤད་ཟེར་བ་གཅིག་མཚུངས་རེད། དེ་ཀུན་སློང་ཆགས་སྡང་རྨོངས་གསུམ་གང་གིས་ཀུན་ནས་བསླངས་ཏེ་བཤད་ན་རྫུན་རེད། བར་སྐབས་གཅིག་ལ་རྫུན་ངག་ལ་ལོབ་ནས་ཡར་ལ་འགྲོ་ནའང་མར་ལ་འགྲོ་བ་ཡིན་ཟེར་བ་ལ་སོགས་པ་རྫུན་འབྲིང་པོ། རྫུན་ཆུང་བ་ཁ་རྫུན་སྣ་རྫུན་ཁ་མཚར་རྩེ་མོའི་ཚུལ་ལ་སོགས་པ་རང་གིས་བཤད་པ་དང། གཞན་ལ་བཤད་དུ་འཇུག་པ་གཉིས་ཀ་ཉེས་པ་འདྲ་མཚུངས་ཡོད་པ་ཡིན། གནའ་ཁྱིམ་བདག་ཕྱུག་པོ་ཞིག་ལ། བུ་མིག་མེད་པ། དེ་བཞིན་དུ་རྣ་བ་སྣ་ལྕེ་རྐང་ལག་ལ་སོགས་པ་ཡན་ལག་ཐམས་ཅད་མེད་པ་ཞིག་སྐྱེས། ཁྱིམ་ཚང་ཕྱུག་པོ་དེ་ཚང་ལ་བུ་དེ་མ་གཏོགས་མེད་པས། ཕྱིན་ཆད་ཁྱིམ་གྱི་བདག་པོ་ཡང་དེ་ཡིན། དེ་དུས་སངས་རྒྱས་བཅོམ་ལྡན་འདས་འཇིག་རྟེན་གྱི་ཁམས་ན་བཞུགས་ཡོད་པས། བཅོམ་ལྡན་འདས་ལ་དེའི་རྒྱུ་ཞུས་པས། བཅོམ་ལྡན་འདས་ཀྱིས་དེའི་ལས་ཀྱི་རྒྱུ་འདི་ལྟར་གསུངས་པ་ཡིན། སྔར་ཁྱིམ་ཚང་ཞིག་ལ་བུ་གཉིས་ཡོད་ཅིང་། བུ་གཅིག་གི་མིང་ལ་སྦྱིན་པ། བུ་གཅིག་གི་མིང་ལ་ཚུལ་ཁྲིམས་ཟེར་བ་དང་། ཁྱེའུ་སྤུན་དེ་གཉིས་ཆུང་དུས་ནས་ངོ་ཚ་ཁྲེལ་ཡོད་དང་ལྡན་པ། བདེན་པར་སྨྲ་བ་རྫུན་མི་བཤད་པ། སྦྱིན་པ་གཏོང་བ་ལ་དགའ་བ། དབུལ་ཕོངས་མགོན་མེད་ལ་རོགས་བྱེད་པ། བདེན་དྲང་རྒྱུ་འབྲས་ཀྱིས་འགྲོ་བའི་བུ་གཉིས་ཡིན་པས། དེ་གཉིས་ཀ་ལང་ཚོ་སྨིན་ཏེ་རིག་གནས་ཡོན་ཏན་ལ་སྦྱངས་བའི་རྗེས་སུ། ཡུལ་དེའི་རྒྱལ་པོས་དེ་གཉིས་ཀ་ཁྲིམས་དཔོན་ལ་བསྐོས། དེའི་སྐབས་ཀྱི་རྒྱལ་པོའི་ཡུལ་ཁྲིམས་ཀྱི་ནང་ན་ཡུལ་མི་སུ་དང་སུ་ཞིག་ཡིན་ཡང་རྒྱུ་དངོས་པོ་གཅིག་གིས་གཅིག་ལ་སྐྱི་རྒྱུ་གཡར་རྒྱུ་བྱེད་སྐབས། ཞལ་ལྕེ་བའམ་ཁྲིམས་དཔོན་གྱི་མདུན་དུ་སོང་ནས། ཁྲིམས་པས་དན་རྟགས་ཀྱིས་དཔང་པོ་མ་བྱས་ན་དན་རྟགས་གཞན་གྱིས་མི་ཆོག་པའི་ཁྲིམས་ཡོད་ཅིང་། སྐབས་ཤིག་ལ་ཚོང་བ་ཞིག་རྒྱ་མཚོའི་ནང་དུ་ནོར་བུ་ལེན་དུ་འགྲོ་བར་བརྩམས་ཏེ། ཚོང་པ་དེས་ཞལ་ལྕེ་བ་ནུ་བོ་ཚུལ་ཁྲིམས་ཀྱི་ལག་ནས་ནོར་མང་པོ་ཞིག་བསྐྱིས་ཏེ་ཕུ་བོ་ཞལ་ལྕེ་བ་སྦྱིན་པ་དཔང་པོ་བཞག་ནས། ཚོང་པ་རྒྱ་མཚོ་ནང་ནས་ཕྱིར་ལ་འཁོར་དུས་སྦྱིན་རྒྱུ་བྱས། ཚུལ་ཁྲིམས་ཀྱིས་སྨྲས་པ་གལ་སྲིད་ཁོ་བོ་ཤི་སོང་ན། ཁོས་རྒྱུ་ནོར་གྱི་དོམ་དེ་ཚུར་ལ་སྤྲད་སྐབས་བུ་ཆུང་འདི་ལ་སྤྲད་ཅིག་ཅེས་ཕུ་བོ་སྦྱིན་པ་ལ་བརྡ་བགོས་བྱས། ཕུ་བོས་ཀྱང་དེ་ལྟར་ཁས་བླངས། དེ་ནས་ཡུན་རིང་མ་འགོར་བར་ཁྲིམས་པ་ཚུལ་ཁྲིམས་ཤི་སོང་བ་དང་། ཚོང་པ་རྒྱ་མཚོ་ནས་གྲུ་གཟིངས་ཞིག་སྟེ་ཁོ་རང་ཤིང་ལེབ་ཞིག་ལ་བཟུང་ནས་སྲོག་འགོ་ཐོན་ཙམ་ཞིག་བྱས་ནས་ཕྱིར་ལ་ཐོན་ཞིང་། ཁྱིམ་བདག་ཤི་བའི་ཤུལ་གྱི་བུ་ཆུང་དེས་ཁོང་ཚང་གིས་དེ་ལ་ནོར་རྫས་འདི་དང་འདི་འདྲ་བསྐྱིས་པ་ཡིན་ཡང་། འདི་ལ་ད་ཐེང་སྤྲད་རྒྱུ་ཅི་ཡང་མི་འདུག་སྙམ་ནས་ཐེངས་དེར་མ་བསྙགས་ཤིང་། ཡང་ཚོང་པ་དེས་མི་གཞན་པ་ཞིག་གི་ལག་ནས་དོམ་མང་པོ་ཞིག་བླང་སྟེ་ཡང་རྒྱ་མཚོའི་ནང་དུ་ནོར་བུ་ལེན་དུ་སོང་ཞིང་། ཐེངས་དེར་ནོར་བུའི་རིགས་མང་པོ་ལོན་ནས་མགོ་ཐོན་འཚམས་པོར་ཕྱིར་ལ་འཁོར་ཡོང་བ་ན། ཁོས་བསམ་པར་སྔོན་ཆད་དོམ་དགོས་པ་དེ་བུ་འདིས་གཏན་ནས་མི་བསྙགས་པས་འདི་དེ་དུས་ཆུང་བས་བརྗེད་སོང་བ་མ་ཡིན་ནམ་སྙམ་ནས་ཉམས་ཚད་ཅིག་བླང་བས་བརྗེད་མེད་པར་ཤེས་ཏེ། ཁོས་དོམ་དེ་ཕྱིར་ལ་སྦྱིན་མི་དགོས་བའི་ཐབས་ཤིག་བྱེད་དགོས་སྙམ་སྟེ། ཉིན་གཅིག་ཞལ་ལྕེ་བ་སྦྱིན་པའི་ཆུང་མའི་གམ་དུ་ཕྱིན་ནས་དེ་ལ་རྒྱུ་ནོར་མང་པོ་བྱིན་ཏེ། ཁོས་གྱོད་དོན་ཞིག་གིས་ཞལ་ལྕེ་བར་ཐུག་དུས། ཞལ་ལྕེ་བས་དེ་མི་ཤེས་ཟེར་ཐབས་ཤིག་བྱེད་རོགས་གྱིས་སྨྲས། དེའི་ཆུང་མས་ཀྱང་ཁས་བླངས། ཆུང་མས་རང་གི་ཁྱིམ་ཐབས་ཁྲིམས་དཔོན་སྦྱིན་པ་ལ་ཁྱོད་ཀྱིས་ཁྲིམས་རའི་ནང་ནས་དེ་འདྲ་ཞིག་མི་ཤེས་ཞེས་སྨྲ་དགོས་ཞེས་བསྐུལ་ཚེ། ཁྲིམས་དཔོན་གྱིས་སྨྲས་པ། ཁོ་བོས་དེ་ལྟར་རྫུན་བཤད་མི་རུང་ངོ་། དེ་ལྟར་མི་འོས་ཅེས་སྨྲས་པས། ཆུང་མ་ཁོང་ཁྲོས་ཏེ་གལ་ཏེ་ཁྱོད་ཀྱིས་དེ་ལྟར་མ་བཤད་ཚེ་དང་པོ་ཁྱོད་ཀྱི་བུ་དེ་བསད་དེའི་རྗེས་སུ་མོ་རང་ཉིད་ལྕེབས་རྒྱུ་ཡིན་ཅེས་བཤད་བཤད་སྡིགས་སྡིགས་ཀྱིས་ཐ་མར་ཁྲིམས་དཔོན་སྦྱིན་པས་ཀྱང་ཁས་ལེན་དགོས་ཐུག་པ་རེད། དེ་ནས་ཁྱིམ་བདག་གི་བུ་དང་ཚོང་པ་གཉིས་ཀ་དོམ་གྱི་སྟེང་ནས་གྱོད་ལ་ཐུག་སྟེ་ཞལ་ལྕེ་བའི་ཁྲིམས་དང་ཐུག་སོང་བས། བུ་ཡིས་སྨྲས་པ་ཚོང་པ་འདིས་ཁོའི་ཕ་ཡོད་དུས་རྒྱུ་ནོར་དེ་འདྲ་དེ་འདྲ་བསྐྱིས་སོང་བ་དང་། ཁོ་རང་རྒྱ་མཚོ་ནང་དུ་སོང་ནས་འགོ་མ་ཐོན་པའི་ལོར་ཁོས་མ་བསྙགས་པ་ཡིན། ད་ལྟ་འདི་ལ་སྤྲད་རྒྱུ་ཡོད་ཀྱང་ཁོ་ཁྱེར་མ་མྱོང་ཞེས་མངོན་སུམ་བསྙོན་འདེང་བཞིན་ཡོད་པ་འདི་རེད། བུ་ལོན་དགོས་མིན་དེ་ཨ་ཁུ་ཁྱོད་ཀྱིས་ཤེས་པ་ཡིན་པས། དེ་ལུགས་ཀྱི་བདེན་དྲང་གི་ཐོག་ནས་ཐག་གཅོད་ཅིག་བྱེད་རོགས་གྱིས་ཤེས་སྨྲས་པས། ཨ་ཁུ་ཁྲིམས་དཔོན་གྱིས་ཁོས་མི་ཤེས་སྨྲས་པས། ཚ་བོ་དེ་ཡིས་རེ་ཐག་ཆད་དེ་གྱོད་ཕམ་ཞིང་རྒྱུ་ཤོར་སོང་བ་ཡིན། ཁྱིམ་བདག་ཕྱུག་པོ་ཚང་གི་བུ་དབང་པོ་རྣམ་ལྔ་མི་ཚང་བའི་ཤ་ཐོ་ཐོ་ཞིག་ཡོད་པ་འདི་དེའི་སྐབས་ཀྱི་རྫུན་བཤད་མཁན་ཁྲིམས་དཔོན་དེའི་སྐྱེ་བ་རེད་གསུངས་པ་དང་། དེའི་སྐབས་ཀྱི་རྫུན་གཅིག་པོ་དེས་སེམས་ཅན་དམྱལ་བའི་གནས་སུ་སྐྱེས་ཏེ་སྡུག་བསྔལ་སྣ་ཚོགས་མྱོང་ཞིང། དམྱལ་བའི་ནང་གི་ལས་མྱོང་སྟོབས་ཀྱིས་ཟད་དེ་མི་ལུས་བླང་བ་ཡིན་ན་ཡང་། སྐྱེ་བ་ལྔ་བརྒྱའི་བར་དུ་འདི་འདྲའི་ཤ་ཐོ་ཐོ་རྐྱང་པའི་སྐྱེ་བ་བླང་བ་དང་། དེའི་སྐབས་སུ་སྦྱིན་པ་གཏོང་བ་ལ་དགའ་བའི་འབྲས་བུ་ནམ་ཡིན་ཡང་ཕྱུག་པོའི་ཁྱིམ་དུ་སྐྱེས་ཏེ་རྒྱུ་ནོར་གྱི་བདག་པོར་གྱུར་བ་ཡིན། ལས་དགེ་སྡིག་ནི་དུས་ཚོད་རིང་པོ་ཇི་ལྟར་སོང་ཡང་མེད་གྲོ་རྒྱུ་མེད་པ་དང་། དེས་ན་ཁྱེད་ཚོས་ལུས་ངག་གི་མི་དགེ་བའི་ལས་མི་བསགས་པ་དང་ཁྱད་པར་དུ་རྫུན་ཚིག་བཤད་མི་རུང་ངོ་ཞེས་གསུངས་སོ། དེ་ལྟར་རྫུན་ནི་ཉེས་པ་ཆེན་པོ་ཡིན་པས། རབ་ཏུ་བྱུང་བ་ཞིག་གིས་མི་ཆོས་བླ་མའི་རྫུན་བཤད་ན་སྡོམ་པ་ཞིག་སྟེ་སླར་གསོ་མི་རུང་བའི་ཚད་དུ་ལྷུང་ཞིང་། ཁྱིམ་པ་ཡིན་ཡང་དེ་འདྲའི་ཉེས་པ་ཆེན་པོ་ཚེ་ཕྱི་མ་དམྱལ་བའི་རྒྱུ་ཡིན་པར་མ་ཟད་ཚེ་འདི་ལའང་ཐམས་ཅད་ཀྱིས་བརྙས་བཅོས་བྱེད་ས། བཤད་པའི་གཏམ་དང་བསྐྱལ་བའི་མནའ་མེད་པ། བཟུང་སའི་ལུང་དང་བླུག་སའི་མཆུ་མེད་པའི་མི་ངན་དེ་ལ་ཁ་མ་གྲག་ཅེས་གྲགས་པ་ངན་པས་ས་སྟེང་ཁྱབ་ཅིང་། མ་ཤི་གོང་ནས་མི་གྲལ་ནས་བུད་འགྲོ་བ་ཞིག་ཡིན། གནའ་སྔོན་མ་ཞིག་ལ་རྫུན་ཕམ་ཟེར་བ་ཞིག་དང་རབ་འཇིགས་ཟེར་བའི་མི་གཉིས་ཡོད་ལ། གཉིས་ཀ་མི་རྫུན་རྐྱལ་གཉིས་ཡིན་པ་དང་། གཉིས་ཀར་ཐུན་མོང་དུ་གསེར་བུམ་པ་གང་ཡོད་ཅིང་། རྫུན་ཕམ་གྱིས་གསེར་བུམ་པ་གང་བོ་ཤིང་བྱེ་བུམ་པ་གང་དུ་གྱུར་འདུག་ཅེས་རྫུན་བཤད་པ་རེད། དེའི་རྣམ་སྨིན་གྱིས་སྐྱེ་བ་ལྔ་བརྒྱར་ཤིང་བྱེའི་ནང་གི་སྲིན་བུའི་ལུས་བླངས་སོང་བ་དང་། རབ་འཇིགས་ཀྱིས་རྫུན་ཕམ་གྱི་བུ་གཉིས་ཀ་སྤྲེའུ་ལ་གྱུར་འདུག་ཅེས་རྫུན་བཤད་པས། དེའི་རྣམ་སྨིན་གྱིས་སྤྲེའུའི་སྐྱེ་བ་ལྔ་བརྒྱ་ལེན་དགོས་ཐུག་སོང་བ་ཡིན། རྫུན་ནི་དེ་འདྲ་ཉེས་པ་ཆེ་ཞིང་། དྲང་སྲོང་བདེན་ཚིག་གྲུབ་པ་ཡིན་ཡང་རྫུན་ཅུང་ཙམ་བཤད་པས་ལུས་ཀྱི་འོད་ཉམས་སོང་བའི་ལོ་རྒྱུས་ཡོད་པ་དང་། ཡང་གནའ་ཞིག་ལ་རིགས་ངན་རྫུན་པོ་ཆེ་ཟེར་བ་ཞིག་དང་བྲམ་ཟེ་རྫུན་མེད་ཟེར་བ་གཉིས་ཀྱིས་རྒྱལ་པོ་ཚང་གི་མ་ཧེ་སྟོང་ཁྱུ་ཞིག་འཚོས་ཡོད། མ་ཧེ་ཁྱུ་ཡི་ནང་གི་ཁྱུ་མཆོགཁྱུ་མཆོག་ཏ་རི་ཟེར་བ་ཞིག །རྩྭའི་ཕུད་ཟ་བ། ཆུའི་དྭངས་མ་འཐུང་བ། སོང་ན་མ་ཧེ་ཁྱུ་ཡི་སྣ་འདྲེན་བྱེད་ཅིང་། བསྡད་ན་ཐམས་ཅད་ཀྱི་མཇུག་བསྡུ་བ། ས་མཐོ་སར་ལངས་ནས་དགྲ་དང་གཅན་གཟན་ཚོར་སོ་བརྒྱབ་སྟེ་ཚང་མའི་ཉེན་ཁ་འགོག་མཁན་དེ་འདྲ་ཞིག་ཡོད། ཉིན་གཅིག་རིགས་ངན་གྱིས་སྨྲས་པ་ངེད་གཉིས་ཀྱིས་མ་ཧེ་ཁྱུ་མཆོག་བསད་ནས་ཟ་དགོས་ཞེས་བཤད་པ་དེའི་དབང་ཤུགས་སུ་ཤོར་ཏེ་གཉིས་ཀས་མ་ཧེ་ཁྱུ་མཆོག་བསད་ནས་ཤ་ཟོས་པ་རེད། ཡང་རིགས་ངན་གྱིས་སྨྲས་ཏེ་འུ་གཉིས་ཀས་ཁྱུ་མཆོག་བསད་པ་རྒྱལ་པོའི་ཤེས་ཚེ་ཆད་པ་ཆེན་པོ་ཞིག་གཅད་ཁོ་ཐག་ཡིན་པས། འུ་གཉིས་ཀས་རྫུན་བཤད་དེ་ཁྱུ་མཆོག་གཡང་ས་ནས་ལྷུང་སྟེ་ཤི་ཐལ་ཞེས་བཤད་དགོས་པ་རེད་སྨྲས། བྲམ་ཟེས་ཀྱིས་སྨྲས་པ། ང་སྐྱེས་ནས་ད་བར་དུ་རྫུན་ཞིག་བཤད་མ་མྱོང་ཞིང་བཤད་ཤེས་ཀྱང་མི་ཤེས་ཞེས་སྨྲས། ཉིན་གཅིག་རྫི་བོ་གཉིས་ཀ་རྒྱལ་པོའི་མདུན་དུ་ཐོན་པས། རྒྱལ་པོས་མ་ཧེའི་ཁྱུ་བདེའམ་ཁྱུ་མཆོག་ད་ལྟ་འཚོའམ་ཞེས་དྲིས་ཚེ། རིགས་ངན་གྱིས་གཡང་ལ་ལྷུང་སྟེ་ཤི་སོང་ཞེས་སྨྲས་པ་དང་། བྲམ་ཟེས་ཀྱིས་ཁྱུ་མཆོག་ངེད་གཉིས་ཀྱིས་བསད་དེ་ཟོས་པ་ཡིན་ཞེས་སྨྲས་པ་ན། རྒྱལ་པོས་རིགས་ངན་ཀྱིས་རྫུན་ཡིན་པ་ཤེས་ཏེ་དེ་མ་ཐག་ཁྲིམས་བཅད་དེ་ལྕེ་བཅད་པ་དང་། བྲམ་ཟེ་རྫུན་མེད་ཀྱིས་དེ་འདྲའི་གལ་འགག་ལ་ཐུག་ཀྱང་རྫུན་མ་བཤད་པས་དཔའ་དར་བཏགས་པས། ལྷ་དབང་ཕྱུག་ཆེན་པོ་དེ་ལ་ཡ་མཚན་སྐྱེས་ཏེ། རྫུན་གྱི་ལྡོག་ནས་བདེན་པར་སྨྲས། །བྲམ་ཟེ་བྱ་དགའ་མཐོ་རིས་འཐོབ། །རིགས་ངན་ལྕེ་བཅད་ངན་སོང་ལྷུང་། །དེ་བས་རྫུན་སྤོངས་བདེན་པར་སྨྲོས། །ཤེས་པའི་ཚིག་དེ་བྱུང་བ་ཡིན། རྫུན་བཤད་ན་དེ་འདྲའི་ཉེས་པ་ཆེ་བ་དང་མི་འདོད་པ་ཡོང་རྒྱུ་མང་པ་ཡིན། རྒྱུ་མེད་ཅིང་སྡུག་ཐུག་པར་མ་ཟད་འཆི་བ་སྲོག་ལ་བབ་ཀྱང་རྐུ་རྫུན་གཉིས་ཀ་མི་བྱེད་པའི་མི་ཞིག་ཡིན་ན། མི་དེར་ཤི་ན་བདེ་འགྲོ་ཐོབ་པ་དང་། གསོན་ན་བདེ་སྐྱིད་ཐོབ་པ་དེ་རྒྱུ་འབྲས་བསླུ་མེད་ཀྱིས་མི་བསླུ་བ་ཡིན། དུས་སྙིགས་མའི་སྐབས་སུ་མཚམས་རེར་མགོ་བདེ་རྫུན་རྐྱལ་ཁ་མཁས་རྣམས་ཀྱིས་ཉི་མ་འགའ་ཞིག་ལ་ལམ་རེ་ལོན་པ་དང་། འཇིག་རྟེན་འདིའི་ཐོག་ན་བདེན་པ་འགྲོ་སའི་ལམ་དེ་དོག་འདུག་སྙམ་པ་ཡོང་བ་ཡོད་ཀྱང་། གནས་སྐབས་ཀྱི་སྣང་ཚུལ་ཙམ་དང་། ཁོ་ཚོས་སྔོན་མ་ལས་དཀར་པོ་རེ་བསགས་མྱོང་བ་དེ་མ་ཟད་པར། དེའི་བསོད་ནམས་མྱུར་དུ་སྔོན་ལ་སྨིན་ནས་ཚར་བར་བྱེད་པ་ཡིན་གྱི། ལས་འབྲས་གོ་ལྡོག་ནས་རྫུན་ཨ་བྲ་གཉིས་ཀ་རྔ་མ་རིང་། བདེན་ལུང་པ་གཉིས་ཀ་ཕུ་ཐག་ཐུང་བ་དང། དབྱར་དགུན་གོ་ལོག་ཉི་མ་ནུབ་ནས་ཤར། །ས་གཞི་གོ་ལོག་རྩི་ཤིང་རྡོ་ལས་སྐྱེས་ཏེ་གནམ་ས་འགྱུར་འགྲོ་བ་ཞིག་གཏན་ནས་མི་སྲིད་པ་ཡིན། རྫུན་མི་བཤད་མཁན་དེ་གནས་སྐབས་སུ་ཡང་ཐམས་ཅད་ཀྱིས་ཡིད་ཆེས་ས་མི་གསེར་འདྲ་བ། ཀུན་ཀྱིས་ཡིད་དུ་འོང་ཞིང་བྱམས་ས། རྩི་འཇོག་བྱེད་ས་ཞིག་ཏུ་འགྱུར་འགྲོ་བར་མ་ཟད་མཐོ་རིས་བདེ་བའི་གནས་ལ་སོང་ནས་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ཐོབ་དུས། བདེན་པར་གསུངས་པའི་ལྗགས་ཀྱི་མཚན་བཟང་ཐོབ། བཅོམ་ལྡན་འདས་ཀྱིས་མདོ་ལས། རིན་པོ་ཆེ་ཐམས་ཅད་ཀྱི་ནང་ནས་བདེན་པའི་རིན་པོ་ཆེ་མཆོག་ཡིན། སྒྲོན་མ་ཐམས་ཅད་ཀྱི་ནང་ནས་བདེན་པའི་སྒྲོན་མ་མཆོག་ཡིན་གསུངས་པ་རེད། གནའ་ཞིག་ལ་མི་གླེན་པ་ཞིག་གིས་ས་སྟོངས་ཞིག་ནས་གསེར་བུམ་པ་གང་རྙེད་པ་རེད། མི་གླེན་པ་ཡིན་པས་རྒྱུ་ངོ་དེ་ཙམ་མ་ཤེས་པས། དེའི་ནང་ནས་གསེར་ཉུང་ངུ་ཞིག་ཁོ་རང་གི་སྤར་མོའི་ནང་དུ་ཁྱེར་ནས་གྲོགས་པོ་བློ་རིག་ཅན་ཞིག་ཡོད་པ་དེ་ལ་བསྟན་ཏེ་འདི་ཅི་ཞིག་རེད་ཅེས་དྲིས་པས། འདི་གསེར་རེད་ཅེས་སྨྲས། འོ་ན་ད་དུང་ང་ལ་མང་པོ་ཡོད་ཅེས་སྨྲས་པས། གྲོགས་པོ་སྤྱང་པོ་དེས་སྨྲས་པ། འོ་ནབཟང་གི་ང་རང་གཉིས་ཀས་གསེར་འདི་ཐུན་མོང་བྱེད་འཇོག་ཨེ་རེད་ཟེར་དུས། གླེན་པ་མི་ཡ་རབ་ཡིན་པས་དེ་ལོས་ཆོག་ཅེས་སྨྲས། གཉིས་ཀས་གསེར་བུམ་པ་གང་བོ་བླངས་ནས་ཤིང་སྡོང་ཆེན་པོ་ཞིག་གི་རྩར་བསྐུངས་ཏེ། ནམ་དགོས་ན་གཉིས་ཀས་ལེན་རྒྱུ་བྱེད་ཅེས་སྨྲས། གྲོགས་པོ་སྤྱང་པོ་དེས་བླུན་པོ་བསླུས་ཏེ་མགོ་སྐོར་དགོས་སྙམ་སྟེ། གསེར་བུམ་པ་གང་བོ་བླངས་ནས་ས་གཞན་དག་ཅིག་ལ་བསྐུངས་ཏེ། གྲོགས་པོ་བླུན་པོ་ལ་ཁྱོས་གསེར་བརྐུས་སོང་ཞེས་བསྙོན་འདེང་པ་རེད། བླུན་པོས་མ་བརྐུས་ཤེས་སྨྲས་ཀྱང་མ་ཉན་པར་ཁྱོས་བརྐུས་སོང་ཞེས་རྒྱལ་པོའི་ཁྲིམས་ལ་གཏུགད་དུང་རྒྱལ་པོ་ལ་འདི་ལ་ཆད་པ་དྲག་པོ་གཅད་དགོས་ཞེས་ཡར་ཞུ་བྱས་པ་ན། རྒྱལ་པོས་ད་དུང་བརྟག་དཔྱད་གཏོང་ཡག་བྱེད་དགོས་སྨྲས། མི་སྤྱང་པོས་གསེར་བཅོས་སའི་ཤིང་གི་ལྷ་ལ་དྲིས་ན་ཤེས་ཞེས་སྨྲས། རྒྱལ་པོས་དེ་ཆོག་འདུག་ཅེས་སྨྲས་ནས་ཤིང་གི་ལྷ་ལ་འདྲི་བར་དུས་ཆད་བྱས། མི་སྤྱང་པོ་དེས་ཁོ་རང་ལ་ཕ་རྒན་རྒན་གོག་ཞིག་ཡོད་པ་དེ་ལ་བསླབས་ཏེ། ཤིང་སྡོང་ཁོག་རུལ་བ་དེ་ཁོག་སྟོངས་བྱས་ཡོད་པས། ཁྱོད་དེའི་ནང་དུ་འཛུལ་ནས་སྐབས་སུ་བབ་དུས་ཁྱོད་ཀྱིས་གསེར་གླེན་པས་བརྐུས་སོང་བར་སྨྲ་དགོས་ཞེས་བསྐུལ་བ་དང་། དེ་ནས་དུས་ཚོད་ཀྱི་སྟེང་དུ་ཐོན་ནས་ཡུལ་དེའི་མི་མང་པོ་འདུས་ཏེ་རྒྱལ་པོ་འཁོར་དང་བཅས་པས་ལྷ་མཆོད་བདེན་པ་བདར་ནས་རྒྱུ་མཚན་རྒྱས་པ་བཤད་དེ་ལྷ་ལ་དྲིས་པ་ན། སྡོང་པོའི་ནང་ན་མི་རྒན་སྔར་ནས་སྦས་ཡོད་པ་དེས། སྐད་ལྡིར་ཕབ་ཏེ་མིད་པའི་གདངས་ཞིག་ནས་ཁ་གྲག་འདུག་པར་བྱས་ཏེ་གསེར་བུམ་གླེན་པས་བརྐུས་སོ་ཞེས་བཤད་པས། མི་སྤྱང་པོས་འདིར་ལྟོས་དང་ཚང་མས་གོ་རྒྱུ་འདི་རེད་ཅེས་སྨྲས་པ་ན། རྒྱལ་པོས་ཀྱང་དེ་བདེན་པ་རེད་ཅེས་དེའི་བརྒྱབ་འཚོས། རྫུན་བཤད་དེ་མི་བསླུས་པའི་ནག་ཆེན་དག་ནི་གསད་པའི་ཁྲིམས་སྲོལ་ཡོད་པས། བླུན་པོས་སྨྲས་པ། ཁྱེད་རྣམས་བདེན་ན་ཐང་མོད་ང་ཡང་བདེན། སུ་མི་བདེན་ན་ཤིང་གི་ལྷ་འདི་མི་བདེན་པས་དང་པོ་ངས་ཤིང་གི་ལྷ་འདི་མེ་ལ་བསྲེགདེ་ནས་ཁྱོད་ཚོས་ཁོ་ལ་ཅི་ཞིག་བྱེད་དགོས་ན་དེ་གྱིས་ཤེས་སྨྲས་ཚེ། སྤྱང་པོས་སྨྲས་པ། འདི་ལྷ་ཡིན་པས་ལྷ་མེ་ལ་བསྲེག་ན་ཁྱོད་རང་ལ་མི་རུང་ཞེས་བཤད། གླེན་པས་སྨྲས་པ། ་ད་གསད་རན་བསྡད་ཡོད་པའི་མི་ཞིག་ལ་དེའི་ཚབ་ཆེ་བའི་རུང་རྒྱུ་དང་མི་རུང་རྒྱུ་ཞིག་གང་ན་ཡོད་སྨྲས་ནས། ཤིང་ཕུང་མང་པོ་སྤུང་སྟེ་སྡོང་རྩ་ནས་མེ་ལ་བརྒྱབ་ཚེ། ཕ་རྒན་དུ་བས་འཚུབ་སྟེ་ས་ཐོག་ཏུ་ལྷུང་། འགའ་ཞིག་གིས་ལྷ་དེ་རེད་ཅེས་སྨྲས། འགའ་ཞིག་གིས་ལྷ་མ་རེད་མི་རྒན་ཞིག་རེད་ཅེས་བཤད། གླེན་པས་སྐད་ཆེན་པོས་ཐམས་ཅད་ཀྱིས་སྤྱང་པོའི་ཕ་རྒན་འདི་ལ་ལྟོས་ཤེས་པས། ཐམས་ཅད་ཧ་རྒོད་ཉི་ལེ་སོང་། དེ་དུས་ནམ་མཁའ་ནས་ལྷ་ཞིག་གིས་ཚིགས་བཅད་བརྗོད་པ། ཧ་ཅང་གླེན་པ་གླེན་པ་མིན། །ཧ་ཅང་མཁས་པ་མཁས་པ་མིན། །ཧ་ཅང་མཁས་པ་མཁས་ཡིན་ན། །ཕ་རྒན་དུ་བས་གསོད་ལ་ལྟོས། །ཤེས་སྨྲས་པ་ཡིན། དེ་ནས་རྒྱལ་པོས་མི་གཡོ་རྒྱུ་ཅན་དེ་བསད། ཕ་རྒན་གཞན་དབང་ཅན་དེར་ཉེས་པ་དེ་འདྲ་མི་ཆེ་ཞེས་མངགགསེར་བུམ་པ་གང་དེ་བླུན་པོ་ལ་སྤྲད་ནས་དོན་དེ་མཇུག་གྲོལ་སོང་བ་ཡིན། དེས་ན་རྫུན་བཤད་ན་ཡུན་རིང་པོར་མཐའ་སུམས་པའི་སྐད་ཆ་དང་ཡུན་རིང་པོར་མཐའ་སུམས་པའི་དོན་དག་ཞིག་མིན་པས། རྫུན་སྤོང་བ་འདི་གལ་ཆེ། ཚང་མས་རྫུན་འདི་ཡག་པ་ཞིག་མིན་པར་ཤེས་དགོས། ༈ ངག་གི་མི་དགེ་བ་གཉིས་པ་ཕྲ་མ་ཞེས་པ་ནི། མཐུན་པ་གཉིས་ཀྱི་བར་དུ་དཀྲུག་ཤིང་བྱས་ཏེ་དེ་གཉིས་དབྱེ་འཇོག་པ་ལ་ཕྲ་མ་གསུངས་པ་ཡིན། འདི་ལ་ཆེ་འབྲིང་ཆུང་གསུམ་གྱི་དབྱེ་བ་ཡོད་པ་ལས། ཆེ་ས་ནས་སངས་རྒྱས་བསྟན་པ་བཤིག་བྱེད་ཀྱི་ཕྲ་མ་ཆེན་པོ། དགོན་པ་དང་དགོན་པ་མི་མཐུན་པར་བྱེད། བླ་མ་དང་བླ་མ་མི་མཐུན་པར་བྱེད། བླ་མ་དང་སློབ་མ་མི་མཐུན་པར་བྱེད་པའི་ཕྲ་མ། ཁྱད་པར་དུ་སྔགས་ཀྱི་དམ་ཚིག་དང་འབྲེལ་པའི་འགལ་གཞི་ཆེན་པོ་ནི་ཕྲ་མ་ཆེན་པོ། ཡང་མི་ཤ་རྟ་གྱོད་ལ་ཐུག་བྱེད། སྡེ་གཉིས་ཐོད་པ་ཐུག་བྱེད། གནོད་འགོ་འཁོན་འགོ་བྱེད་པ་དེ་དག་ནི་ཕྲ་མ་འབྲིང་། གནའ་ཞིག་ལ་མི་མང་ཞིག་ཁྲོམ་འདུས་ས་ཆེན་པོ་ཞིག་ཏུ་འཛོམས་ཡོད་པ་ལ་མིག་མཐོང་བ་ལྷ་འདྲེ་མི་མ་ཡིན་མཐོང་མཁན་ཞིག་གིས་བལྟས་པས། འདྲེ་ཞིག་གིས་ཡ་གའི་གམ་ལ་སོང་ནས་རྣ་བའི་ཁར་ལྐོག་གཏམ་བྱས། མར་ཀྱི་རྣ་བའི་ཁར་སོང་ནས་ལྐོག་གཏམ་བྱས་ནས་བཤད་རྐྱང་བྱེད་འདུག་པས། ཕྱི་དྲོ་བར་སྐབས་ཤིག་ལ་ཚང་མ་གྲི་ཁ་འགྲན་རེས་བྱས་ཏེ་མི་རོའི་ལུང་བ་གང་བཞག་ཐལ་ཟེར་བའི་ལོ་རྒྱུས་ངོ་མ་ཡོད་པ་ཡིན། དུས་ངན་གྱི་སྐབས་ལ་མིའི་བསོད་ནམས་དམན། འཕྲག་ལྷ་ལུས་ལྷ་ཉམས་ཞིང་། མགོ་བའི་ལྷ་སྲུང་གི་སྟོབས་ཞན་ཏེ་འདྲེ་འབྱུང་པོས་རྒྱུད་རློམ། མི་སེམས་ལ་དེ་འདྲའི་འདྲེ་ཞུགས་ནས། མི་ཐབས་ཆག་མངོན་དུ་བུད་དེ་ཐོད་གཏུག་པའི་ཕོ་ཚོད་མེད་ནའང། ལྐོག་ནས་འདྲེ་དང་སྡོང་སྟེ་དཀྲུག་ཡོང་བ་ཡོད་པ་ཡིན། དེ་འདྲའི་བསམ་ངན་རྒྱུ་བའི་སྐད་ཆ་གོ་ཡོང་དུས། བཤད་མཁན་དྲིན་ཕ་མ་ཡིན་ཡང་ཆེ་རྒྱུ་མེད་དེ། ཁ་སེམས་འདྲེ་ཡིས་བསྒུལ་ཡོང་བཞིན་ཡོད་པའི་རྟགས་ཡིན་པ་དང་། དགའ་རབ་དབང་ཕྱུག་དང་དམ་སྲི་འདྲེ་བདུན་ལ་དེའི་སྟོབས་ཤུགས་མེད་ཟེར་རྒྱུ་ག་ལ་ཡོད། དུས་ངན་ལ་བདུད་སྟོབས་ལྷག་པར་ཆེ་བས། དེས་ན་ཚང་མས་དབྱེན་ཁ་མཆུ་འདི་ལ་གཟབ་དགོས། ལུས་ངག་ཡིད་གསུམ་གྱི་ཉེས་པ་མང་པོ་ཞིག་འདིས་བསྐྱེད་ཅིང་། ཁྱད་པར་དུ་དགེ་འདུན་གྱི་སྡེ་དཀྲུགས་ཏེ་འཁྲུག་པ་ཡིན་ན། ས་ཚིག་པོའི་སྟེང་དུ་མྱུ་གུ་མི་འཁྲུང་བ་ལྟར། སྡེ་འཁྲུག་གི་གནས་དེ་ནས་དཔག་ཚད་མང་པོའི་འཁོར་ཡུག་གི་ཚུན་ཆད་དུ་སྒྲུབ་པའི་འབྲས་བུ་མི་འབྱིན་པར་གསུངས་ཡོད་པ་ཡིན། སེང་གེའི་ཕྲུ་གུ་དང་ཁྱུ་མཆོག་གི་ཕྲུ་གུ་གཉིས་ཀ་མ་གཅིག་གི་ནུ་མས་གསོས། ཚང་གཅིག་གི་ནང་ནས་ལག་ཆགས་ན་ཡང་། ཝ་རྒན་ཁྲམ་པ་གཡོ་རྒྱུ་ཅན་ཞིག་གིས་ཁོ་རང་གི་ཟ་ཁ་འཐུང་སྙིག་ཆུང་ངུ་ཞིག་ལ་བལྟས་ཏེ། དེའི་བར་ལ་ཕྲ་མ་བྱས་ནས་གསད་རེས་བྱེད་དུ་བཅུག་པ་ཡིན། བརྟན་པོ་ངོ་མ་ལེགས་ཉེས་ཀྱི་དབྱེ་བ་འབྱེད་ཤེས་ནི། འཕྲལ་ཕུགས་ཀྱི་རྒྱང་ཐག་མཐོང་ནི་ཞིག་མིན་ན། རྒྱལ་ཁ་བློན་དང་མཚོན་ཁ་ཉི་མས་བསྒྱུར་ཏེ་ཡག་ཉེས་ཆེན་པོ་གཏུགས་རབས་མང་པོ་ཡོད་པ་རེད། མི་མཐུན་པར་དབྱེ་བྱེད་ཚིག་རེད། བ་ཡར་མ་སྐམ་བྱེད་འགོང་པོ་རེད། བུ་རབ་འདྲ་གཉིས་ཐུག་དུས་དབྱེན་གྱིས་གཏོར་ཏེ་དབྱེ་ཐུབ་པ་མ་རེད། སྟག་ཕྲུག་དཔུང་བཟང་དང་སེང་ཕྲུག་མཆེ་བཟང་གཉིས་ཀ་སྐྱིད་སྡུག་མཉམ་དུ་གཤིབས་པའི་གྲོགས་པོ་ཡིན་པར། ཡང་ཝ་རྒན་མགོ་གཉིས་མ་ཞིག་གིས་ཕྲ་མས་འབྱེད་ས་ནས། སེང་གེས་སྦར་ལྕག་གཅིག་གིས་ཝ་རྒན་ཕྱི་མའི་ལམ་དུ་མངག་པ་ལྟ་བུ་རེད། ཕྲ་མ་ཆུང་ངུ་ནི། མི་ཞིག་ཁ་ཕར་ལ་འཁོར་མ་ཐག་ཏུ་དེའི་བླ་བཙག་ཞོར་དེས་ཁྱོད་ལ་ཅིག་ཅིག་འདྲ་ཞིག་ཟེར། ངས་དེ་ལ་མུག་མུག་འདྲ་ཞིག་བཤད་ཡོད་ཅེས། མདོར་ན་ཕྲ་མ་མངོན་ལྐོག་གཉིས་ཀ་ནས་བྱེད་པ་དེ་སྤོང་དགོས་པ་རེད། ཕྲ་མའི་རིགས་ཐམས་ཅད་སྤོང་རྒྱུ་གལ་ཆེན་པོ་རེད། དེས་མི་འདོད་པ་ཐམས་ཅད་ཀྱི་སྣ་འདྲེན་བྱེད་པ་རེད། དགའ་བྱེད་ཟེར་བའི་མི་ཕྲ་མ་བྱེད་རྒྱུ་ལ་དགའ་བ་ཞིག་ཡོད་པ་དེས། འབའ་རོ་ཡོ་ཧོ་ཟེར་རྒྱུའི་དཔོན་ཆུང་ཞིག་ཡོད་པ་དེ་དང་ཡུལ་གྱི་རྒྱལ་པོ་གཉིས་ཀའི་བར་ལ་དབྱེན་ཁ་མཆུ་གཏུག་ནས། རྒྱལ་པོའི་མདུན་དུ་སོང་ནས་འབའ་རོས་རྒྱལ་པོ་ལས་ཁོ་རྒྱུ་ཆེ། ཁོ་འཁོར་མང་། ཁོ་བུ་བཟང་། མིང་ཆེ་བ་མ་གཏོགས་རྒྱལ་པོས་ཁོང་ན་ཅི་ཡང་མེད། ངོ་མ་བཤད་ན་ཁོས་རྒྱལ་པོ་ལ་ངོ་ལོག་བརྒྱབ་ན་ཐུབ་ཟེར་གྱིན་འདུག་ཅེས་སྨྲས་པ་རེད། རྒྱལ་པོ་སྤྲོ་ལངས་ནས་རྒྱལ་པོ་དང་འབའ་རོ་གཉིས་ཀའི་བར་ལ་འཁྲུག་པ་ཆེན་པོ་ཞིག་བྱུང་དུས། ཡུལ་དེར་བྲམ་ཟེ་མཛའ་བོ་ཟེར་བའི་ཐམས་ཅད་ཀྱི་འཁོན་པ་སྡུམ་གྱིན་འདུག་པ་ཞིག་ཡོད་པ་དེ། བར་ལ་བུད་ནས་རྒྱལ་པོ་འབའ་རོ་གཉིས་ཀ་འགྲིག་ཐབས་བྱས་པ་རེད། དེ་དུས་ཆུ་སྐམ་ས་ནས་གྲམ་པ་ལྷང་ལ་བུད་ཅེས་པའི་དཔེ་ལྟར། ཕྲ་མ་མཁན་དགའ་བྱེད་ཀྱིས་དབྱེན་དཀྲུགས་བྱས་པར་ཤེས་ནས། ཕྲ་མ་མཁན་དགའ་བྱེད་ལ་ཁྲིམས་ཆད་ཕོག་སྟེ་ལྕེ་བཅད་པ་རེད། བྲམ་ཟེ་ལ་རྒྱལ་པོ་དང་འབའ་རོ་གཉིས་ཀས་གསེར་སྲང་བརྒྱ་རེའི་དཔའ་དར་བཏགས་པ་རེད། ཕྲ་མ་གཞན་འགྱེད་རྣམ་སྨིན་སྐྱེས། །ལྕེ་བཅད་ངན་སོང་གནས་སུ་ལྷུང་། །བྲམ་ཟེ་རྫུན་པོ་སྡུམ་མཁན་དེར། །གསེར་སྲང་ཉིས་བརྒྱའི་བྱ་དགའ་ཐོབ། །རྣམ་སྨིན་འཕྲལ་བྱུང་ངོ་མཚར་སྐྱེ། །ཕྲ་མ་སྤོངས་ལ་འཐབ་རྩོད་སྡུམས། །ཤེས་པའི་ཚིག་དེ་དུས་བྱུང་བ་རེད། ཕྲ་མ་སྤངས་ན་ཚེ་རབས་ཀུན་ཏུ་གྲོགས་བཟང་པོ་དང་འཕྲད་ཅིང་བྱང་ཆུབ་མ་ཐོབ་ཀྱི་བར་དུ་ལམ་གྱི་འགལ་རྐྱེན་ཉུང་བའོ། །ངག་གི་མི་དགེ་བ་གསུམ་པ་ནི་ཚིག་རྩུབ་རེད། ཚིག་རྩུབ་ཅེས་པ་ནི་ངག་འཇམ་པོས་མ་ཡིན་པར། ཚིག་རྩུབ་མོ་ཐོས་པ་དང་མི་སེམས་འཁྲུག་འགྲོ་བ་ཞིག་བཤད་པ་དེར་ཚིག་རྩུབ་ཅེས་བྱ། བླ་མས་ཆོས་གདམས་ངག་བསྟན་ཏེ་སློབ་མའི་རྒྱུད་བཅོས་ཚེ་ཆོས་ཀྱི་མཆོག་མཚང་ལ་རྒོལ་བ་ཡིན། གདམས་ངག་གི་མཆོག་མཚང་ཐོག་ཏུ་ཕོག་པ་ཡིན་ཞེས་གསུངས། སྙིང་བརྩེའི་ཕྱིར་ན་མི་དགེ་མེད། །ཅེས་གསུངས་ཀྱི་དེ་མིན་སྐྱོན་བརྗོད་དེ་ཕ་རོལ་པོའི་མཚང་ལ་ཕོག་པ་བཤད་མི་རུང་ངོ་། མཚང་ལ་རིགས་ཀྱི་མཚང་། རུས་ཀྱི་མཚང་། ཡོན་ཏན་གྱི་མཚང་། ལུས་ཀྱི་སྐྱོན་ལ་སོགས་པ་མི་དེ་ལ་གནོད་བྱེད་དང་སེམས་འཁྲུག་བྱེད་ཀྱི་ཚིག་དག་ལ་ཚིག་རྩུབ་ཅེས་བྱ། ཚིག་རྩུབ་ཆེན་པོ་སངས་རྒྱས་ཀྱི་སྐུ་གཟུགས། དཀོན་མཆོག་གི་རྟེན། དགེ་ཚུལ་སློང་ཁྲིམས་ལྡན། བླ་མ། ཕ་མ་སོགས་ལ་ཚིག་རྩུབ་བརྗོད་ན་ཉེས་པ་བསམ་གྱིས་མི་ཁྱབ། ཁྱད་པར་དུ་རྒ་རྒས་ཚོ་ལ་ཁ་དྲི་ཚིག་འཇམ་དགོས་པ་རེད། རྒས་པ་སེམས་ཆུང་བ་རེད། མི་རྒས་པ་སེམས་ཤེད་ཉམས་ནི་རེད། །མཛོ་རྒས་པ་ཝ་ཤེད་ཆུང་ནི་རེད། །ཅེས་པ་ལྟར་རེད། ཕ་མ་རྒས་ཁོག་ལ་བརྩི་བཀུར་དང་གཅེས་སྤྲས་མེད་པའི་བུ་རྒྱུད་ནི་མཐའ་གྱེན་ལ་འགྲོ་བ་མ་རེད། ཚིག་རྩུབ་འབྲིང་ནི། སྐྱེ་བོ་ཕོ་མོ་སུ་ཡིན་ཡང་ཉན་པར་མི་འདོད་པའི་ཚིག་རྩུབ་མོ་བཤད་པ། ཐ་ན་དུད་འགྲོ་ཞིག་ཡིན་ཀྱང་མིང་འདོགས་དང་ངན་སྨྲས་ཀྱི་ཚིག་རྩུབ་བཤད་རུང་བ་མ་རེད། ཚིག་རྩུབ་ཁ་ཡིས་མ་བཤད་ཀྱང་ཡིག་ཐོག་ནས་བྲིས་ན་དེ་བས་ཚབ་ཆེ་བ་རེད། དེ་རིང་ཁ་རྩང་མི་འགའ་རེས་ཚིག་ལྷུ་རེ་ཟུང་ཡར་མཐུད་མར་མཐུད་བྱས་ཏེ་སྒྲིག་ཤེས་ཤིང་བྲི་ཤེས་དུས། རྫོགས་པའི་སངས་རྒྱས་མན་ཆད་ལ་དཔྱད་པ་གཏོང་བའི་ཟོལ་བྱས་ཏེ་ཤོག་ལྡེབ་རྫོགས་མེད་ཅིག་མིག་རྫོད་བྱེད་དུ་བྲིས་འདུག་པ་འདི་ཚོ་ཡང། རྫུན་ཕྲ་མ་ཚིག་རྩུབ་ངག་འཁྱལ་ཐམས་ཅད་ཚང་སོང་བ་ཞིག་རེད། དེ་ལས་རྒན་མོ་བསམ་བཟང་ཞིག་གི་ཁེ་ཆེ་ཁི་བསམ་རྒྱུ་ཡོད་ནི་རེད། ཡང་འགའ་རེས་དེ་ཙམ་མིན་ཀྱང་ཟུར་ཟ་དང་ཕྲག་དོག་གིས་ཀུན་ནས་བསླངས་ཏེ། རང་གི་ཆེ་བ་འདོན་བྱེད་དུ་བྲིས་ན་ཚིག་རྩུབ་མིན་ཡང་འདིའི་འོག་གི་ངག་འཁྱལ་གྱི་ནང་དུ་འགྲོ་ངེས་པ་ཡིན། དོན་མེད་དོན་ལོག་གི་བསྟན་བཅོས་འཆོས་སྐྱོབས་ཀྱི་ཡོན་ཏན་གྱི་ལྡོག་ཕྱོགས་ཅན་ཡང་མང་པོ་རེད། ཆོས་ཀྱི་གྲགས་པས། ལོག་པའི་ལམ་ལ་མཐའ་མེད་ཕྱིར། །དེ་དག་དེ་ནི་སྤྲོ་བྱ་མིན། །ཞེས་གསུངས་པ་ལྟར། ངན་པའི་རིགས་བགྲང་ཚོད་མེད་པ་ཞིག་ཡོད། གནའ་སྔོན་མ་ཞིག་ལ་རྒྱ་ནག་ཕྱོགས་ཀྱི་མཁས་པ་ཆེན་པོ་ཞིག་གིས། དགེ་འདུན་རྣམས་ནི་སྦྲུལ་དང་འདྲ་ཞེས་པའི་བསྟན་བཅོས་ཤིག་བརྩམ་མྱོང་བ་རེད། སྔོན་ཞིག་ལ་མི་དེ་དགེ་འདུན་པ་མང་པོ་དང་མཉམ་དུ་འགྲོ་བཞིན་ཡོད་པས། ཁོ་རང་གི་ཚོར་སྣང་ཞིག་རོགས་པ་རྣམས་ལ་སྨྲས་པ། ཁྱེད་རང་ཚོ་མྱུར་མོར་བྲོས་མ་གཏོགས་ཁོས་ལས་བསགས་པའི་རྣམ་སྨིན་ཉམས་སུ་མྱོང་རན་གྱིན་ཡོད་པ་འདྲ་ཞེས་སྨྲས་པ་དང་། དེ་ནས་ལག་པ་གཉིས་ཀ་མགོ་ལ་འབྱར་ཏེ་སྦྲུལ་མགོ་རེད། རྐང་པ་གཉིས་ཀ་མཉམ་དུ་འབྱར་ཏེ་སྦྲུལ་མཇུག་རེད། དུག་སྦྲུལ་ནག་པོ་ཞིག་ཏུ་གྱུར་ཏེ་ནག་འཁྱིག་སེ་ནགས་གསེབ་གཅིག་ཏུ་བརྒྱུགས་སོང་བ་རེད། ལས་ཚབ་ཆེན་བསགས་པས་མཐོང་ཆོས་མྱོང་འགྱུར་དེ་མ་ཐག་ཏུ་དེ་འདྲའི་སྨིན་ཡོང་བ་རེད། དེ་རིང་ཁ་རྩང་སྙིགས་མའི་དུས་རེད་སྤྱིར་ཉོན་མོངས་པའི་སྙིགས་མ། དེའི་ནང་ནས་ཀྱང་ཞེ་སྡང་གི་སྙིགས་མ་ལ་ཁེལ་ནས། བླ་སེར་མན་ཆད། ཁྱིམ་པ་ཕོ་མོ་ཡན་ཆད། ཕྱོགས་རིས་ཆགས་སྡང་གིས་དམྱལ་བའི་གནས་ལ་འཕེན་པ་མང་བ་རེད། ཚོར་འདུ་གཉིས་ཀ་རྩོད་པའི་རྩ་བ་དང་འཁོར་བའི་རྒྱུ་ཡིན་གསུངས་ཡོད་པ་རེད། ཁྱིམ་པ་ཐམས་ཅད་གཙོ་བོ་ཚོར་པའི་དོན་ལ་རྩོད། རབ་བྱུང་ཐམས་ཅད་གཙོ་བོ་འདུ་ཤེས་ཀྱི་དོན་ལ་རྩོད་པས། འཇིག་རྟེན་འཁོར་བའི་དོན་ལ་ཚིག་རྩུབ་བཤད་ན་འདྲ། ཆོས་ལ་བརྟེན་ཏེ་ཚིག་རྩུབ་བཤད་ན་འདྲ། མདོར་ཚིག་རྩུབ་ནི་ཁོང་ཁྲོ་དང་འཁྲུག་ལོང་གི་རྩ་བ་ཡིན་པ་རེད། ཆོས་ལུགས་གྲུབ་མཐའ་ཡི་གྲྭ་ས་ཆགས་སྡང་གི་ཡིན་ན་འདྲ། ཐོབ་མངའ་ཐང་རྒྱུ་ནོར་ལོངས་སྤྱོད་ཀྱི་འགྲན་རྩོད་ཡིན་ན་འདྲ། དང་པོ་དོན་མེད་ས་དང་དོན་ཆུང་ས་ཞིག་ནས། བསམ་ངན་གྱི་དུག་རོ་རེ་ཞེ་ལ་བཞག་དུས། ཚིག་ངན་དུག་མདའ་ལྟ་བུ་རེ་འཕེན་རེས་བྱས་ཏེ། དེའི་རྐྱེན་གྱིས་དམེ་འཁྲུག་གྱོད་ཁ་ཆེན་པོ་སློང་ཡོང་བ་རེད། དེའི་སྟོབས་ཀྱིས་རྒྱལ་ཁམས་རེ་ཕོངས་ཏེ་འབྲེལ་ཚད་དམྱལ་ཁམས་ལ་འགྲོ་བ་ཞིག་ཚིག་རྩུབ་འདིའི་ཁུངས་ནས་ཡོང་ནི་རེད། ཕ་མ་སློབ་དཔོན་ལ་ཚིག་རྩུབ་སྨྲས་ན་ཉེས་པ་ལྷག་པར་ཆེ་བ་རེད། གནའ་སྔོན་མ་ཞིག་ལ་ཁྱིམ་ཚང་ཞིག་ལ་བུ་ཞིག་ཡོད། བུ་དེའི་མིང་ལ་གྲོ་སྦྱིན་སྐྱེས་ཟེར། ཁོ་རང་ན་ཚོད་ལ་ཐོན་དུས་རྒྱ་མཚོའི་ནང་དུ་ཚོང་ལ་འགྲོ་གྲབས་བྱས་པར། མ་རྒན་གྱིས་ཁྱོད་མ་འགྲོ་ཞེས་སྨྲས་ཀྱང་ཁར་མ་ཉན། མ་རྒན་གྱིས་བུ་མངག་མ་ཕོད་རས་ངུས་ཤིང་ཁྱོད་མ་འགྲོ་ཞེས་ཡང་ཡང་སྨྲས་པས། བུ་ཁོང་ཁྲོས་ཏེ་ང་ཚོང་དུ་འགྲོ་བ་ལ་ཁྱོད་ཀྱིས་བཀྲ་མི་ཤིས་པའི་ངུ་འབོད་བྱེད་པ་ཅི་ཡིན། ཁྱོད་དམྱལ་བ་སྐྱེས་ཟེར་ནས་དམྱལ་སྨོད་ཅིག་བྱས་པ་རེད། ཁོ་རང་ལ་ཚོང་རོགས་མང་པོ་ཡོད་པ་རྣམས་དང་ལྷན་དུ་ཚོང་ལ་ཤོར་སོང་ནས། ཚིགས་ལམ་མང་པོ་སོང་སོང་སྟེ་ཉིན་གཅིག་སྒར་རྒྱག་ས་ཞིག་ནས་གྲོ་སྦྱིན་སྐྱེས་གཉིད་མཐུག་པོ་ཞིག་གིས་བཟི་སོང་བ་ལྟ་བུར་གཉིད་སོང་། གཉིད་སད་དེ་གཅིག་བལྟས་པས་ནམ་ལངས་ཏེ་ཉི་མ་ཤར། མགྲོན་པོ་རོགས་པ་ཐམས་ཅད་གནའ་འགྲོ་ད་འགྲོ་བྱས་ནས་སོང་ཚར་ཡོད་འདུགཚོང་པ་རྣམས་ཀྱིས་རང་རང་གིས་ཁལ་བཀལ་ཏེ་ནམ་འོག་ནས་ལམ་ལ་ཆེས་སོང་བས། དེ་ལས་ཀྱི་དབང་གིས་སུ་གཅིག་གིས་ཀྱང་མ་མཐོང་། གཉིད་སད་དེ་ཡར་ལྟ་མར་ལྟ་ཞིག་བྱས་པས་གམ་ན་བོང་བུ་གཉིས་ཀ་མ་གཏོགས་ཅི་ཡང་ལྷག་མེད་པ་རེད། དེ་ནས་སྐྲག་དངངས་འཇིགས་གསུམ་གྱིས་བོང་བུ་གཉིས་ཀ་སྦྲེལ་ནས་དེད་དེ་སོང་མོད། སྐབས་ཤིག་ལ་རླུང་ཆེན་པོ་ཞིག་གཡོས་ནས་ལམ་ཚང་མ་བྱེ་མས་བཀབ་སྟེ། གར་འགྲོ་འདིར་འགྲོ་ངོ་མ་ཤེས་པར་ཤར་ལྷོ་ནུབ་བྱང་གི་ཕྱོགས་ཚང་མ་ནོར་འདུག་པ་ཞིག་ཏུ་སོང་། དང་པོ་མིས་ལམ་མ་ཤེས་ཀྱང་བོང་བུ་གཉིས་ཀས་སྔོན་དུ་རྫི་སྣོམ་ཞོར་བྱས་པས་ལམ་གྱི་ཕྱོགས་ཧ་ལམ་ཞིག་རྙེད་མོད། དངངས་ཚབ་ལངས་ཏེ་བོང་བུ་གཉིས་ཀ་ལྕག་གིས་བྲབ་ནས་འདེད་ཆེ་སོང་བས། བར་སྐབས་ཤིག་ཏུ་བོང་བུ་གཉིས་ཀ་རྒྱུག་རྒྱུག་གི་དྲན་པ་རྨོངས་ཏེ་རྫི་སྣོམ་པའི་ནུས་མཐུ་མེད་པ་དང་། དེ་ནས་བོང་བུ་གཉིས་ཀའང་ཆད་དེ་ལྷག་སོང་། དེ་ནས་ཁོ་རང་ཁེར་རྐྱང་དུ་འཁྱམ་ནས། ཡི་དྭགས་ཀྱི་ཡུལ་དུ་མངོན་སུམ་དུ་ཐོན་སྟེ། མི་ལོ་བཅུ་གཉིས་ཀྱི་བར་དུ་ཡི་དྭགས་དང་དམྱལ་བའི་སྡུག་བསྔལ་མངོན་སུམ་དུ་མྱོང་དགོས་བྱུང་། ཕ་མ་དྲིན་ཆེན་ཡིན་པས་ཡུལ་གཉན་པ་རེད། མི་འགའ་རེ་ཕ་མ་ལ་ཁ་དྲི་ཚིག་འཇམ་ཨ་མ་མ་ལོ་ཁྱོས་ཟོས། ཨ་ཕ་ཕ་ལོ་ཁྱོས་གྱོན་ཟེར་བ་བསྐྱུར་ཏེ་ཕ་མའི་ཁ་ལ་མི་ཉན། ཕ་མ་ལ་དྲིན་ལན་མི་དྲན་པ་ཚོ་ལས་ལམ་ལ་མཐའ་གྱེན་ལ་འགྲོ་བ་མ་རེད། བླ་མ་ཡང་དེ་ལྟར་དུ་ཡུལ་གཉན་པ་རེད། གནའ་ཨ་མདོ་དགེ་བཤེས་ཟེར་བའི་མཁས་པ་ཆེན་པོ་ཞིག་ཡོད། གྲྭ་ས་ནས་ཡོང་བའི་གྲྭ་ཆུང་བསྡུས་གྲྭ་སྦྱངས་བཞག་པ་ཞིག་གིས་རྩོད་པ་བྱས་ཏེ། དགེ་བཤེས་ཀྱི་ཐུགས་ཅུང་ཟད་ཡེང་སྟེ་ཚིག་སྣེ་ཅུང་ཟད་ཅིག་ཐུགས་ཉམས་ལ་མ་བཞག་པར་འགལ་བ་ཆུང་ཆུང་ཞིག་ལ་ཐུག་པས། གྲྭ་ཆུང་ང་རྒྱལ་སྐྱེས་ཏེ་འདི་ལས་ང་མཁས་འདུག་བསམ་ནས། ཁྱོས་ཅི་ཡང་མི་ཤེས་ཁི་ཟེར་ནས་ངན་སྨོད་ཅིག་དང་མཉམ་དུ་འཁོར་གསུམ་ཞིག་ཞུས་ཡོང་བས། གྲྭ་ཆུང་དེའི་ཐོག་ནས་ལྕེ་སྟེང་ལ་རྨ་ཞིག་བུད་ནས་ལྕེ་རྩ་བ་ནས་རུལ་ཏེ་ཆད་སོང་བའི་ལོ་རྒྱུས་ཡོད་པ་རེད། དེ་ད་དུང་མཚན་ཉིད་ཀྱི་ཆོས་རྩོད་རྒྱག་ས་ནས་རེད། སྔགས་ཀྱི་དབང་ཞུས་ཏེ་རྡོ་རྗེ་སློབ་དཔོན་དང་རྡོ་རྗེ་མཆེད་ལྕམ་ལ་ཚིག་རྩུབ་ཤོར་ན་བསྐལ་བ་མང་པོ་ལ་ཡར་ཐར་ཡོད་པ་མ་རེད། ཚིག་རྩུབ་སྤོང་ན་ངན་སོང་ལ་མི་སྐྱེ། ཚེ་འདི་ཕྱི་གཉིས་ཀར་བདེ་སྐྱིད་འབྱུང་པ་རེད། ངག་གི་མི་དགེ་བཞི་པ་ནི་ངག་འཁྱལ་རེད། འབྲེལ་མེད་ཀྱི་གཏམ་མ་བརྟགས་བྱུང་རྒྱལ་དུ་སྨྲ་བ་དེ་ལ་ངག་འཁྱལ་ཞེས་བྱ། ངག་འཁྱལ་གྱི་ཉེས་པ་ཆེ་ཤོས་གང་རེད་ཅེ་ན། ཆོས་ཉན་སྐབས་དང་དཀྱིལ་འཁོར་གཉན་པོ་ཞལ་ཕྱེ་སྟེ་ཆོ་ག་ཞལ་འདོན་མཛད་སྐབས་ལ་ངག་འཁྱལ་ལ་སོགས་པའི་གཏམ་བཤད་ན་ཉེས་པ་ཆེ་བ་རེད། ཁྱད་པར་དུ་ཆོས་ཁྲིད་ཀྱི་སྐབས་སུ་སྐད་ཆ་བཤད་མི་རུང། གཅིག་ན་མ་གུས་པའི་རྣམ་འགྱུར་དུ་འགྱུར་འགྲོ་བ་རེད། གཉིས་ན་རང་གིས་མི་ཉན་པར་མ་ཟད་ཕ་རོལ་པོ་གཞན་དག་གི་ཉན་པར་བར་ཆད་དུ་འགྱུར་འགྲོ་བ་རེད། དེ་ལྟར་ན་ཆོས་ཉན་པ་ལ་ཕན་ཡོན་དང་། ཆོས་རང་གིས་མ་ཉན་པ་དང་གཞན་ལ་ཉན་དུ་མ་བཅུག་པའི་ཉེས་པ་གཉིས་མཉམ་དུ་འབྱུང་བ་རེད། ངག་འཁྱལ་བཤད་མཁན་གྱི་མི་དེ། མི་གང་འདྲའི་རིགས་ཅན་ཡིན་ཞེ་ན། ངོ་ཚ་མེད་པ་དང་གཅིགལེ་ལོ་ཅན་དང་གཉིས། བག་མེད་ཆགས་སྡང་ཆེ་བ་དང་གསུམ། བྱ་ནེ་ཙོ་འདྲ་བའི་བཤད་དགའ་ཅན་དང་བཞི། ངག་དང་སེམས་ལས་སུ་མ་རུང་བ་དང་ལྔ་པོས་ངག་འཁྱལ་བཤད་པ་རེད། ཁ་བདག་མེད་མི་དགེའི་བང་མཛོད། །གཏམ་བྱུང་རྒྱལ་གྱོད་ཀྱི་རྩ་བ། །ཟེར་བ་ལྟར། དེ་ལ་བརྟེན་ཏེ་ཆགས་སྡང་གི་རྣམ་རྟོག་ཡར་ལ་འཕེལ་ཏེ། རང་གཞན་གཉིས་ཀའི་ཁ་འདོན་དགེ་སྦྱོར་ཆག་འགྲོ་བ་རེད། ངག་འཁྱལ་གྱི་ནང་དོན་མང་ཆེ་བ་བདག་བསྟོད་གཞན་སྨོད་ཁོ་ན་ཡིན་པ་རེད། མཚར་མཚར་ཡག་ཡག་འདྲ་ཡང་གཞན་སྐྱོན་རྗེས་ཟློས། །གསུངས་པ་ལྟར། ངག་འཁྱལ་འདི་ཆགས་སྡང་རྨོངས་གསུམ་གྱི་ཁུངས་ནས་མ་ཡོང་བ་ཞིག་ཡོད་པ་མ་རེད། དེས་ན་རྣམ་སྨིན་ངན་སོང་གསུམ་གང་རུང་དུ་སྐྱེས། ངག་འཁྱལ་དང་བསྲེས་ཏེ་ཁྱིམ་པ་ཕོ་མོ་ཚོས་མ་ཎི་བཏོན་ན་ཕན་ཡོན་ཆུང་བ་རེད། རྒ་རྒས་ཚོས་ཉི་མ་མཉམ་དུ་ལྡེ་ལོ་ལོན་ན་ཚོད་གཅིག་པ་སྐད་ཆ་ཁ་བརྡ་རེ་མཉམ་དུ་བཤད་ལོས་བསམ་སྟེ། འོན་ཀྱང་སྐབས་ཤིག་ལ་ངག་འཁྱལ་གྱི་གཏེར་སྒོ་ཕྱེས། དེའི་སྟེང་དུ་ཆགས་སྡང་གི་ཁ་རྩོད་ཤོར། འཇའ་ཐང་དཔལ་ཐང་བརྩད། དོན་མེད་དབྱུག་ཁ་བཀྱེ་ལ་ཁད་ཡོང་རྒྱུ་ཡོད་པ་རེད། དེ་བས་རིན་ཐང་ཅན་གྱི་ཚེ་མཇུག་གི་ནམ་ཟླ་རང་རང་གི་མཆོད་ཁང་ནང་ནས་བསྐྱལ་ན། དུང་འཁོར་སྐོར་ས་དང་ཆོས་ཞུ་སར་སོང་ན་ངག་བཅད་བྱས་ན་བཟང་བ་རེད། ལོ་ཉུང་རྣམས་ཀྱིས་དང་པོ་ཁ་བརྒྱག་བཤད་ཁུལ་བྱེད། ཁ་མཚར་རྩེ་མོ་བཤད་ཁུལ་བྱས། སྐབས་ལ་རྩེ་རྔ་འཁྱོག་སྟེ་ཚིག་ངན་གྱིས་རྒྱག་རེས་བྱེད། ངག་འཁྱལ་ཚིག་རྩུབ་ལ་ལོགཚིག་རྩུབ་ཁོང་ཁྲོ་ལ་ལོགཁོང་ཁྲོ་ཞེ་སྡང་ལ་འགྱུར་དུས། སྐབས་ཤིག་ལ་སྤྲོ་ལོས་སྤྲོ་ལོ་བརྩེང་། སྤྲོ་ལོ་གེགས་ལ་ལངས། མཐར་དོན་མེད་ཀྱི་གྱོད་ཆེན་ཉོ་རྒྱུ། དེར་མ་ཟད་ཕྱི་མ་དམྱལ་བར་འགྲོ་བྱེད་ཀྱི་ལས་དང་བྱ་བ་མང་པོ་ཞིག་ངག་འཁྱལ་གྱི་ཁུངས་ནས་ཡོང་གིན་ཡོད་པ་རེད། ཕོ་སར་རྣམས་དང་མོ་སར་མ་རྣམས། ཉིན་བཞིན་དོན་མེད་དུ་འཁྱམ་ཁི་མ་འདུགཁྱིམ་འཁོར་བའི་བདག་པོ། གཞིས་ད་འཛིན་ཐམས་ཅད། འཁྱར་ཏེ་འཁྱར་ལོབ་ན། སྐབས་ཤིག་ལ་ཁྱིམ་ནས་མི་ཆགས་པར་འཁྱར་རྒྱུ་ལ་ངན་ལོབ་ནས་འཁྱམ་པོ་འཁྱམ་མོ་རང་རེད་འགྲོ་བ་རེད། ཁྱིམ་དུ་ལས་ཀ་ལས། ལས་ཀ་མེད་ན་རིག་གནས་སྦྱོངས། ཁ་ཡིས་འདོན་པ་ཐོན། ལག་གིས་ཕྲེང་བ་ཟུངས་། ཡ་རབས་ཀྱི་བྱ་བར་ཁ་མིག་ཡར་ལྟ་བྱེད་དགོས་པ་རེད། མི་ཡ་རབས་ཀྱི་གཤིས་ཀ་དེ་འཇམ་པོ་ཞིག་ཡིན་པ་རེད། ཡོན་ཏན་ཅི་འདྲའི་ཡོད་ན་དེ་འདྲའི་ངང་རྒྱུད་འཇམ་པོ་དང། ཕན་སེམས་ཆེན་པོ་ཅན་ཡིན་པ་རེད། མི་ཁོ་རང་གི་ཁོག་ན་ཤེས་ཡོན་མེད་ཚེ། སྔོ་ནེ་རྡོ་བྱུར་གྱིས་ཡག་བྱེད་ས་ཡོད་པ་མ་རེད། གཟི་སྟག་ལོག་གིས་སྐེ་ལ་འཁོར་གི་འདུག་ནའང་དེ་ལ་ཡོན་ཏན་ཞིག་དང་མིའི་གཤིས་བཟང་ཞིག་མེད་ཚེ་དེའི་གམ་ལ་གཅར་རྒྱུ་ཡོད་མ་རེད་སྙམ་ནས་བཟུར་ཁི་འདུག་དགོས་ས་ཞིག་ཏུ་ཡོང་བ་རེད། ཡོན་ཏན་ཟེར་བ་དེ་མཐའ་གཅིག་ཏུ་སློབ་གྲྭའི་ནང་ནས་སྦྱོང་བའི་ཡིག་རྩིས་ཤིག་རྐྱང་པ་ལ་ཟེར་བ་མ་རེད། སྐྱེས་ཐོབ་ཀྱི་ཡོན་ཏན་དང་སྦྱང་སྟོབས་ཀྱི་ཡོན་ཏན་སྟེ་གཉིས་ཡོད་པ་རེད། དེ་ལས་སྐྱེས་ཐོབ་ཀྱི་ཡོན་ཏན་ཙནྡན་དང་དྲི་མ་ཞིམ་པོ་གཉིས་ཀ་མཉམ་གཅིག་ཏུ་ཡོད་པ་ལྟར། ལྷན་སྐྱེས་ཀྱི་ཐོག་ནས་མ་ཨ་མའི་པང་ནས་སྐྱེས་དུས་ནས་རྒྱུ་དག་ཡག་པ། ཕན་སེམས་མ་གཏོགས་གནོད་སེམས་མེད་ཅིང་། རྣམ་དཔྱོད་ཀྱི་ཤེས་རབ་ཡོད་པ། བྱ་བ་ཐམས་ཅད་ལ་སྔོན་མཐའ་ཕྱི་མཐའ་མཐོང་ཞིང་། བརྟག་དཔྱད་མཁས་པ། བརྟག་དཔྱད་སྔོན་ལ་མ་སོང་བར་ལས་ཀ་མི་བྱེད་པ། ཡུལ་དེ་ན་ཡོད་ན་དཀྱིལ་ཀྱི་བཅུད། ཟུར་གྱི་རྒྱན། ལས་བྱ་བ་གང་བྱས་ཀྱང་ཐམས་ཅད་སྤྱི་ཁྱབ་ལ་ཕན་བྱེད་ཡིན་པ། ཀུན་ལ་ཕན་ཐོགས་ཅན་ཞིག་མ་གཏོགས་མི་བྱེད་པ་དེ་ནི་མི་ཡ་རབས་ཡིན་པ་རེད། སྐྱེས་ཐོབ་ཀྱི་ཤེས་རབ་བམ་སྐྱེས་ཐོབ་ཀྱི་ཡོན་ཏན་ཅན་ཐམས་ཅད་མི་རིན་ཐང་ཅན་ཡིན་པ་རེད། སྦྱང་སྟོབས་ཀྱི་ཡོན་ཏན་ཞིག་ཡོད་ཀྱང་ལྷན་སྐྱེས་ཀྱི་མི་གཤིས་བཟང་པོ་ཞིག་མེད་ན། ལྷག་བསམ་དང་དྲང་བདེན་གྱི་ནུས་པས་མ་འདང་བའི་སྟོབས་ཀྱིས། ཕན་ཐོགས་མེད་པའི་སྟེང་དུ་གནོད་ལ་ལོག་རྒྱུ་ཡང་མང་བ་རེད། དཔེར་ན་དེ་རིང་མི་མང་ཞིག་གིས་འཚང་ཁ་བརྒྱབ་སྟེ་སུས་ལོན་གང་ལོན་བྱེད་ས་ཞིག་ལ་ཐུག་ན། ཁྱོད་སྔོན་ལ་སོང་ང་རྗེས་ལ་འདུག་ཟེར་མཁན་ཞིག་ཡིན་དགོས་པ་རེད། གཅིག་ལ་དགོས་རྒྱུ་དེ་ཐམས་ཅད་ལ་དགོས་པས། མི་ཐམས་ཅད་ཀྱིས་ང་སྔོན་མ་བྱ་དགོས་བསམ་ཚེ་རྗེས་ལ་འདུག་མཁན་མི་གཅིག་ཀྱང་ཡོད་པ་མ་རེད། རིམ་པ་བརྒྱུད་དགོས་ས་ཞིག་ཏུ་ཇི་ལྟར་བྱ། རང་འདོད་ཆེན་པོ་ཅན་ཞིག་གིས་ཅི་བསམ་བྱེད་དགོས་ཚེ་འཇིག་རྟེན་གྱི་ཁམས་ན་ཁོ་རང་གཅིག་པུ་མ་གཏོགས་སུ་གཅིག་ཀྱང་ཤོང་ས་མེད། དེ་ལྟར་བྱས་ན་འགྲིག་གམ། མི་འགའ་རེར་སེམས་ནད་ཆེན་པོ་ཡོད་པའང་ཡོད་སྲིད། མི་འགའ་རེ་སྙིང་ཁམས་མི་བདེ་བའི་ནད་པ་ཡང་ཡོད་པ་རེད། མི་ཚང་མ་ལོ་ཚོད་ངེས་ཅན་ཞིག་ལ་ཐོན་དུས་ཁོག་རྒྱ་ཇེ་ཆུང་དང་སྤྲོ་ཇེ་ཐུང་ལ་འགྲོ་སྲིད་པ་རེད། དེ་འདྲའི་ལོ་ཚོད་ཀྱི་ཚོད་ཞིག་ལ་ཐོན་རྒྱུ་ཡོད་པ་རེད། མཐའ་གཅིག་ཏུ་དེས་ང་ལ་རྣམ་འགྱུར་ཡག་པ་བསྟན་མ་ཐལ་ཟེར་ནས་ཕར་ལ་ཁྲོ་བ་སྟོན་མི་རུང། ཚུར་རྣ་རྩ་ལ་འགའ་ཞིག་རྒྱབ་ནའང་སྙིང་ཉེ་ལགས་ཁྱོད་ང་ལ་ཁོང་ཁྲོ་འམ། ཁྱེད་རང་ཁོང་མི་ཁྲོ་བར་ཞུ་ཞེས་ཞུ་བ་བྱ་དགོས་པ་རེད། དེ་འདྲའི་རིགས་དེ་ཆེས་གནད་འགག་ལ་འཕྲད་དུས་ཕྱུང་རྒྱུ་ཡོད་རྟགས་ཡིན་པ་རེད། ཐུག་དགའ་ཅན་རྣམས་ཀྱིས་དེ་འདྲ་དེ་ལ་སྣེ་མ་འཐོགས་མ་གཏོགས་འགྱོད་པ་ངོ་ཚ་གཉིས་ཀ་མཉམ་དུ་ཉོ་ཡོང་། ཟེར་ལོང་གཏམ་ལོང་གཉིས་ཀ་མེད་པར་སྤུད་སེ་བུད་འགྲོ་བའི་རིགས་དེ་ལ་གནད་འགག་ལ་འཕྲད་དུས་ཕུགས་ཡོད་པ་མ་རེད། དེས་ཁོ་ལ་ཕུགས་མེད་པའི་ཁོག་བསྟན་ཚར་ཡོད་པ་རེད། དེ་འདྲའི་རིགས་ལ་གཏུག་རིན་ཡོད་པ་མ་རེད། གལ་ཏེ་དེ་འདྲའི་རིགས་དེ་ཐུབ་ནའང་དཔའ་མྱིང་ཅི་ཡང་མེད། མདོར་ན་ལོ་ཆུང་ཚོ་ཁྱེད་རྣམ་པ་ཡུལ་འདིའི་མ་འོངས་པའི་བདག་པོ་ཡིན་ནི་རེད། རིགས་རུས་གཅིག་ལས་ཆད་པའི་ན་གཞོན་གྱི་བོད་ཕྲུག་རྣམ་པ། ཁྱེད་རྣམས་མ་འོངས་གངས་ལྗོངས་ཀྱི་བདག་པོ་ཡིན་པ་རེད། ཁྱེད་རྣམས་ཀྱི་སྤྱོད་ལམ་ལ་བལྟས་ཏེ་ས་ཆ་ཡག་བཙོགསྡེ་བ་བཟང་ངན། མི་རིགས་བཟང་ངན་ཕྱེ་འགྲོ་ཁི་ཡོད་པ་རེད། ཕྱི་ཁ་ཆེན་པོ་ཞིག་མ་ཆོད་ནའང་། ནང་ཁ་ཟེར་བརྗོད་རང་ཁོང་ནས་མི་འབུད་པའི། ཡ་རབས་སྤྱོད་བཟང་ཆོས་དང་མཐུན་པ། དཔལ་སྤྲུལ་ཚང་གིས་གསུངས་པ་ལྟར། བཤད་ན་གཏམ་ཡོད་པ། བསྐོར་ན་བློ་ཡོད་པ། ཁོང་ཡངས་ཤེས་རྒྱ་ཆེ་བ་ཞིག་དགོས་པ་རེད་མ་གཏོགས། ནམ་ཡིན་ན་ཁྱི་ལག་ཐུག་ཐུག་བྱས་ཏེ་ནང་འཛིང་བྱེད་འདུག་པ་དེའི་རིགས་ནི་སུའི་གཅེས་ཕྲུག་ཡིན་ཡང་མི་ངན་རེད། ཡུལ་རྫོད་རེད། མེད་སོང་ན་བསམ་རྒྱུ་ཅན་ཡིན་ནི་རེད། དཔལ་སྤྲུལ་ཚང་གི་གཞོན་ནུ་བློ་ལྡན་གྱི་དྲིས་ལན་ལས། ལར་ཤེས་དགོས་རྒྱུ་ཞིག་ལ་མི་འདིའི་ཐུ་མེད། མི་རབ་རེ་རེས་ཡུལ་ཁམས་མང་པོ་བདེ་ལ་བཀོད། མི་ངན་རེ་རེས་ཡུལ་སྡེ་མང་པོ་དཀྲུག་ཤིང་བྱེད་པ་ཚོ་ཡོད་གསུངས་པ་རེད། ད་དུང་ཁོང་གིས། ལར་གྲོགས་བཟང་པོ་དང་འགྲོག་ན་བཟང་འགོས། གྲོགས་ངན་པ་དང་འགྲོག་ན་ངན་འགོས་པས་གྲོགས་འདི་གལ་ཆེ་གསུངས། བླ་མ་དམ་པ་ལ་བསྟེན། དགེ་བའི་གྲོགས་པོ་དང་འགྲོགལས་འབྲས་སླུ་མེད་ལ་ཡིད་ཆེས་བྱེད་པ་ཡ་རབས་སྤྱོད་བཟང་ཆོས་མཐུན་གྱི་མི་ཚེ། ཚེ་འདི་ཕྱི་གཉིས་ཀ་ལ་ཇེ་ཡག་ཇེ་བཟང་མཐའ་གྱེན་ལ་བུད་འགྲོ་བ་ཅན་ཡིན་པ་རེད། གྲོགས་པོ་ངན་པ་དང་མི་གཡོ་རྒྱུ་ཅན་གྱིས་འདྲ་ལ་ལ་ཞིག་བཤད་པ་དེ་ཉན་རྒྱུ་ཡོད་པ་མ་རེད། བྱི་ལ་ཞིག་གིས་རྐུ་ཁོ་ན་བྱེད་ཀྱིན་ཡོད་པ་རེད། ཉིན་ཞིག་མི་ཞིག་གིས་བཟུང་ནས་རྣ་བ་གཉིས་ཀ་བཅད་དེ་མངག་ཡོང་བ་རེད། ཡང་རྐུ་བྱས་པ་རེད། ཡང་མི་གཞན་པ་ཞིག་གིས་བཟུང་ནས་རྔ་མ་བཅད་དེ་མངག་ཡོང་བ་རེད། ད་དུང་རྐུ་མཚམས་མ་བཞག་པར་མི་མཐུད་དུ་རྐུས། ཉིན་གཅིག་དགེ་སློང་ཞིག་གི་སར་རྐུ་སར་འཇབ་སོང་བས། དགེ་སློང་གིས་མཐོང་བས་ཕྲེང་བ་འཕང་ཡོང་བ་རེད། ཕྲེང་བ་སྐེ་ལ་གྱོན་སོང་། སྐེ་ལ་གྱོན་གྱིན་བྲོས་བཞག་པ་རེད། དེ་ནས་ཉི་མ་མང་པོའི་བར་དུ་རྐུ་རྒྱུ་གསད་རྒྱུ་གཉིས་ཀ་མ་ལོན་པར་ལུས་ཀྱི་ཤ་ཡང་ཇེ་ངན་དུ་གྱུར་སོང་། ཉིན་ཞིག་བྱི་བ་ཞིག་དང་འཕྲད། བྱི་བ་ལ་གནོད་མ་བསྐྱལ་ཏེ་སྐད་འགོ་ཚོ་སྙོམ་སྙོམ་བྱས་ནས་འདུག་ཁུལ་བྱས་པས་བྱི་བ་ཆེན་པོ་མ་སྐྲག་པ་རེད། བར་སྐབས་ཤིག་ལ་འགྲོ་འདུག་ཚང་མ་ཞི་དུལ་ལྷོད་གསུམ་གྱིས་ཟོལ་བྱས་ཏེ་གཡོ་རྒྱུས་ཚུལ་འཆོས་བྱེད་ཀྱིན་བསྡད་པས་བྱི་བ་མ་སྐྲག་པར། བྱི་བས་ཁྱོད་སུ་ཡིན་ཞེས་དྲིས་ཚེ། ང་བྱི་ལའི་དགེ་བསྙེན་ཟེར་བ་དེ་ཡིན། ངས་སྔོན་ཆད་སྲོག་བཅད་བྱས་པ་དེར་འགྱོད་ནས་དགེ་སློང་ཞིག་གི་མདུན་དུ་སོང་ནས་ཕྱིན་ཆད་སྡིག་པ་མི་བྱེད་པའི་སྡོམ་པ་བླངས་པ་ཡིན། སྐྲ་གཅོད་པའི་འཚབས་སུ་རྔ་མ་དང་རྣ་བ་གཉིས་ཀ་བཅད་པ་ཡིན། དགེ་སློང་ཐུགས་དགྱེས་ཏེ་ཁོང་གི་ཕྱག་ཕྲེང་ང་ལ་དད་རྟེན་ལ་གནང་བ་ཡིན་ཞེས་མགོ་སྐོར་གྱི་ཚིག་དེ་ཚོ་བཤད་པ་རེད། འོ་ན་ཁྱོད་ཀྱི་ལུས་ཀྱི་ཤ་སྐམ་པ་དེ་འདྲ་ངན་ཅི་ཞིག་གིས་རྐྱེན་གྱིསརེད་ཅེས་དྲིས་ཚེ། ངས་ཤ་སྤངས་ཏེ་དཀའ་བ་སྤྱད་པས་རེད་ཅེས་སྨྲས། འོ་ན་ཁྱོད་ཀྱིས་ཟ་མ་ཅི་ཞིག་ཟ་བཞིན་ཡོད་ཅེས་དྲིས་པས། ་ཤིང་ཏོག་ཟ་ཞིན་ཡོད་ཅེས་སྨྲས། བྱི་བས་དེ་བདེན་པར་བཟུང་ནས་བྱི་ལ་གཡོ་རྒྱུ་ཅན་རང་གི་ཡུལ་ལ་ཁྲིད་ཅིང་བྱི་བ་ཐམས་ཅད་ཀྱིས་བཀུར་སྟི་དང་ཤིང་ཏོག་ཕུལ། ཤིང་ཏོག་མང་པོ་མ་ཟོས་པས་ཤུལ་དུ་ལྷག་གི་ཡོད། བྱི་ལས་སྨྲས་པ། ཁྱེད་རྣམས་ཀྱིས་ཉིན་བཞིན་ང་ལ་སྐོར་བ་རྒྱོབ། གཞན་པ་ཞབས་ཏོག་དང་ཞབས་ཞུ་ཇི་ཡང་མི་དགོས་ཅེས་སྨྲས། བླ་མ་བྱི་ལས་སློབ་མ་བྱི་བ་རྣམས་ལ་སྐོར་བ་བྱེད་དུ་བཅུག་སྟེ་ལྐོག་ནས་ཉིན་བཞིན་བྱི་བ་རེ་ཟ་བཞིན་ཡོད། མི་གཙང་བ་ས་འོག་ཏུ་སྦས་ཏེ་ཅི་མི་སྙམ་པར་བསྡད། བྱི་བ་ཇེ་ཉུང་ཇེ་ཉུང་བྱི་ལ་ཇེ་ཚོ་ཇེ་ཚོ་རེད་བཞིན་པའི་སྐབས། ཉིན་ཞིག་ལ་བྱི་བ་ཐམས་ཅད་ཚུར་བསྡུས་ཏེ། བྱི་བའི་རྒྱལ་པོས་སྨྲས་པ། ང་ཡི་འཁོར་རྣམས་ཇེ་ཉུང་རེད། །དགེ་བསྙེན་སྐུ་བརྗིད་ཇེ་ཆེ་རེད། །ཅེས་མི་ལེགས་པའི་བརྡ་བསྟན་ཏེ་བྱི་ལའི་བྲུན་བཙལ་བས་རྙེད་དེ་གཅིག་བལྟས་པས་བྱི་སྐྱག་ནང་ན་སྤུ་ཡོད་པས། བྱི་བས་རྒྱལ་པོས། ཟས་སུ་ཤིང་ཏོག་ཟ་བ་ལ། །བྲུན་རྔ་སྤུ་ཅན་གང་ནས་འོང་། །ཞེས་ཐམས་ཅད་ཀྱིས་ཐབས་ཤིག་བརྙེད་པ་ནི། བྱི་ལའི་སྐེ་ལ་དྲིལ་བུ་ཞིག་བཏགས་ཐབས་བྱས། དེ་ནས་སྐོར་བ་བྱས་པས། བྱི་བ་རྗེས་མའི་ཐད་དུ་དྲིལ་བུ་སིང་སེ་གྲག་པས་ཚང་མས་གཅིག་བལྟས་ཚེ་བྱི་བ་གཅིག་བཟུང་ནས་ཟ་བར་མཐོང་བས། དེ་ནས་བྱི་བ་ཡོད་ཚད་པོ་བྲོས་སོང་བ་རེད། དེ་ལྟར་གཡོ་རྒྱུ་ཅན་གྱི་གྲོགས་པོ་ངན་པ་དང་རྗེ་དཔོན་ངན་པ་ལ་བསྟེན་ན་ཕོངས་ནི་རེད། ཚིག་འཇམ་པོ་དང་སྐད་ཆ་ཡག་པ་ལ་ལྟ་རྒྱུ་ཡོད་པ་མ་རེད། གྲོགས་དང་རྗེ་དཔོན་བརྟགས་པར་གལ་ཆེ། དཔལ་སྤྲུལ་ཚང་གིས། རྒན་རྒོན་ཐམས་ཅད་ཁ་ཉུང་། གཤིས་འཇམ། ལུས་བདེ། སེམས་བདེ། འཆི་ཆོས་མ་ཎི་རྡོག་རེར་འབད་ཐུབ་པ་ཞིག་ཡིན་དགོས་གསུངས་ཡོད་པ་རེད། རྒས་ཚེ་མཇུག་ལ་ཐོན་དུས་རིན་ཐང་ཅན་གྱི་ཚེ་མཇུག་གི་ནམ་ཟླ་དེ་ཆོས་ཀྱིས་ཟད་དུ་འཇུག་དགོས་པ་རེད། ལོ་ན་ཚོད་གཞོན་ཚེ་འཁོར་བའི་བྱ་གཞག་སྒྲུབ་པ་རེད། མི་རབས་འདིའི་ལོ་ལོན་རྣམས་ཀྱི་ཚེ་སྟོད་དུས་ངན་གྱི་སྐབས་ནས་ཟད་པ་རེད། དེ་རིང་ཁ་རྩང་འདྲ་བའི་སྐྱིད་དགའ་ལོངས་སྤྱོད་མེད་དུས་རེད། སྡུག་དཀའ་ལས་ཀྱིས་མི་རབས་རྗེས་མའི་ཉྭ་མཇུག་བསྐྱངས་མཁན་རེད། རིག་གནས་སྦྱོང་བའི་གོ་སྐབས་མ་ཐོབ་པ་རེད། འོན་ཀྱང་མང་ཆེ་བས་རང་རང་གིས་མི་ཚུགས་རེ་བཟུང་ནས་ལྷག་བསམ་རྣམ་དག་གི་ཁ་དོག་མ་འགྱུར་བ་མང་ཆེ་བ་ཡིན་ནི་རེད། ལྕི་ཡང་རྒྱ་མ་བཀྱགས་མང་ཉུང་བྲེ་ལ་འཇལ་ཚར་སོང་བ་རེད། རྒན་རྒོན་གནའ་མྱི་དག་ཅེས་ཁྲེལ་རྗོད་བྱེད་རྒྱུ་ཡོད་པ་མ་རེད། ད་ཡང་རིགས་གནས་གསར་རྗེ་ཞིག་ཡང་ཚེས་བྱས་ན། འགའ་རེ་སྨྱོས་ནས་རང་ཤ་རང་གིས་ཟ་བ་ལས་གཞན་ཐམས་ཅད་བྱེད་རྒྱུའི་སྔོན་རྟགས་མཐོང་འདུག་པ་འདི་རེད། དེ་ས་ཆ་གཅིག་གི་གནས་ཚུལ་རྐྱང་བ་མ་རེད། དེས་ལོ་ལོན་གྱི་ཆོས་སྒྲུབ། བུ་ཚ་བོ་ལ་ཁ་ཏ་སློབ་གསོ་བྱེད། གཞོན་པས་རྒན་པ་ལ་རྩི་རྒྱུ་ཡ་རབས་ཆོས་མཐུན་གྱི་སྤྱོད་པ་བྱེད་ན་རང་གཞན་འདི་ཕྱི་ཚང་མ་བདེ་བ་རེད། མདོར་ན་ངག་འཁྱལ་འདིའི་ཁུངས་ནས་མི་དགེ་སྡིག་ལས་མང་པོ་ཞིག་རང་ཤུགས་ཀྱིས་འདྲེན་ཡོང་གིན་ཡོད་ནི་རེད། ངག་འཁྱལ་སྤངས་ན་ཚེ་རབས་ཐམས་ཅད་དུ་རིགས་བཙུན་པར་སྐྱེ་བ་ལེན་པ་དང། ཀུན་ཀྱིས་བཀུར་སྤྲོ་ཐོབ། ཆོས་དང་མཐུན་པའི་གཏམ་སྨྲ་བ་ལ་མཁས་པའོ། །རྫུན་དང་ཕྲ་མ་ཚིག་རྩུབ་ངག་འཆལ་པ། །ངག་གི་མི་དགེ་བཞི་པོ་མཐོལ་ལོ་བཤགས། །ཞེས་གསུངས་ཏེ། ཚེ་རབས་ཀུན་ཏུ་ངག་གི་སྒོ་ནས་བསགས་པའི་སྡིག་སྒྲིབ་དེ་དག་ཐམས་ཅད་མཐོལ་ཞིང་བཤགས་པ་ཡིན་ཞེས་སྙིང་ཐག་པ་ནས་འགྱོད་པ་དང་བཅས་པས་བཤགས་དགོས། དེའི་ཡན་ཆད་ཀྱིས་ངག་གི་མི་དགེ་བ་བཞི་བཤད་པའོ། །

གསུམ་པ་ཡིད་ཀྱི་མི་དགེ་བ་གསུམ་བཤགས་པ།

བརྣབ་སེམས་གནོད་སེམས་ལོག་པར་ལྟ་བ་སྟེ། །ཡིད་ཀྱི་མི་དགེ་གསུམ་པོ་མཐོལ་ལོ་བཤགས། །ཞེས་གསུངས་ཏེ། དང་པོ་བརྣབ་སེམས་ནི། གཞན་ལ་ཡག་ས་བཟང་ས་ཞིག་ཡོད་ཚད་ང་ལ་ཡོད་ན་ཅི་མ་རུང་སྙམ་ནས་ཧབ་པ་ལངས་ཏེ། རྒྱུ་དངོས་པོ་ཞིག་ཡིན་ན་དེ་ངས་ལོན་ཐབས་ཤིག་ཅི་དགའ་སྙམ། ཐོབ་གོ་ས་ཞིག་ཡིན་ནའང་གཞན་ལ་མེད་ཐབས་དང་། རང་ལ་ཐོབ་ཐབས་ཤིག་ཅིས་དགའ་སྙམ་པ་དང་། དེ་བཞིན་གཤེགས་པའི་ཡོན་ཏན་བརྗོད་ན་བ་སྤུའི་འཁྲི་ཤིང་ཙམ་ཡང་མི་ལྡང་། བཙན་ཕྱུག་གི་སྐད་ཆ་གོ་ན་རློམ་སེམས་ཀྱི་འགྲམ་ཆུ་ལྡང་གི་འདུག་པ་དེ་ལ་བརྣབ་སེམས་ཟེར་ནི་རེད། བརྣབ་སེམས་ལ་བརྟེན་ནས་གནོད་སེམས་སྐྱེས་པ་རེད། གནོད་སེམས་ཀྱི་དབང་གིས་སྡིག་པ་མི་དགེ་བ་གཞན་དག་ཚང་མ་འདྲེན་ཡོང་བ་རེད། བརྣབ་སེམས་འདི་སྤྱིར་འདོད་ཅིང་ཞེན་པའི་རིགས་ཤིག་རེད། དགྲའི་རྒྱུ་ནོར་ལ་བརྣབ་སེམས་ལྟ་བུ་ཞེ་སྡང་དང་འབྲེལ་བ། ཆ་སྙོམ་པ་གཏི་མུགམང་ཆེ་བ་འདོད་པ་ཆེ་བའི་སྟོབས་ཀྱིས་འདྲེན་གྱི་ཡོད་པ་རེད། འདོད་པ་ཆེ་ཆོག་ཤེས་མེད་ཕྱིན་མི་དགོས་རྒྱུ་ཞིག་ཡོད་པ་མ་རེད། མིག་གི་མཐོང་ཚད་དགོས་སྣང་ཤར་ཡོང་བ་རེད། མིག་བསོད་ཆེན་པོས་ཅི་ཞིག་ཡིན་ཀྱང་མཐོང་ཡོང་བས། སེམས་འགོང་པོ་འདྲ་བོས་དེ་ལ་རློམ་སེམས་ཤིག་བྱས་དུས། ལག་བསོད་ཟད་ཀྱི་ནང་དུ་སྨིན་རྒྱུ་ཐོབ་རྒྱུ་ཞིག་ཡོད་པ་མ་རེད་ཅེས་གསུངས་འདུགའདོད་ཆུང་ཆོག་ཤེས་ཅན་གྱི་མི་ལུས་སྤྲང་པོ་ཡིན་ཡང་སེམས་ཕྱུག་པོ་ཡིན། འདོད་ཆེན་ཆོག་ཤེས་མེད་པར་བརྣབ་སེམས་ཅན་ཀྱི་མི་ལུས་ཕྱུག་པོ་ཡིན་ཡང་སེམས་སྤྲང་པོ་ཡིན། ད་ལྟ་མེད་སྣང་ཤར་ཏེ་ལག་བདར་ནས་བརྣབ་སེམས་ཕངས་སེམས་བྱེད་ཀྱིན་བསྡད་ན། ཤི་ནས་མིག་བཙུམ་པ་དང་མཉམ་དུ་དབོས་སུ་ཡི་དྭགས་རང་འགྲུབ་ཏུ་འགྱུར་འགྲོ་བ་རེད། བརྣབ་སེམས་ཁོ་ན་བྱེད་ན་རེ་བས་ཡོང་བ་བཀག་སྟེ་ཁ་གདངས་བ་དེ་སྟོངས་པ་རེད་གྲངས་མང་བ་རེད། རབ་དུ་བྱུང་བས་ཆོག་ཤེས་བརྟེན་དགོས་པ་ལྟ་ཅི། ཁྱིམ་པ་ཕོ་མོའི་ཡིན་ཡང་ཆོག་ཤེས་བརྟེན་ན་ནོར་གྱི་མཆོག་ཡིན། བརྣབ་སེམས་རྐྱང་བ་བྱེད་ཆེ་དུས་ཕྱི་མ་མ་ལོན་གོང་སྔ་མ་ཤོར་བའི་དཔེ། ཝ་མོས་ཁ་ནང་གི་ཤ་དང་ཆུ་ནང་གི་ཉ་ཤ་གཉིས་ཀ་ཤོར་རབས་ཀྱི་གནའ་དཔེ་ཡོད་པ་དེ་འདྲ་རེད། ཡང་གནའ་ཞིག་ལ་ཡུལ་ཝཱ་རཱ་ཎ་སཱིའི་བྲམ་ཟེ་ཁྱིམ་ཚང་ཞིག་ལ་བུ་སྔོན་རྗེས་གཉིས་སྐྱེས་པ་རེད། བུ་སྔོན་མ་དེ་མ་ཁོག་ན་ཡོད་དུས་མ་རྒྱུད་འཇམ་ཞིང་དེས་པ་ཞིག་ཡིན་པས། བུ་དེའི་མིང་ལ་ལེགས་ཚོར་བཏགས། བུ་རྗེས་མ་ལུས་ན་ཡོད་དུས་རྒྱུད་ཁྲོ་ཞིང་གཏུམ་པོ་ཞིག་ཏུ་གྱུར་སོང་བས། བུ་དེའི་མིང་ལ་ཉེས་ཚོར་བཏགས། བུ་གཉིས་ཀ་ནར་སོན་ཏེ་རྒྱ་མཚོའི་ནང་དུ་ནོར་བུ་ལེན་དུ་འགྲོ་བའི་ཆེད་དུ་བུ་གཉིས་ཀ་རེ་རེ་ལ་འཁོར་ལྔ་བརྒྱ་རེ་ཡོད་པར་བྱས་ཏེ་བུད་སོང་བ་རེད། རྒྱ་མཚོའི་འགྲམ་དུ་ལམ་ཐག་རིང་ཞིང་མི་མང་བའི་སྟབས་ཀྱིས་སོང་སོང་མཐར་ཉིན་ཞིག་གྲོ་ཆད་བྱུང་། མི་ཐམས་ཅད་ཀྱིས་ཟ་བཏུང་གཉིས་ཀ་མ་ལོན་པར་འཆི་ལ་ཉེ་སྐབས། ལེགས་ཚོར་གྱིས་ལྷ་ལ་གསོལ་བ་བཏབ་པས། ས་སྟོངས་བྱེ་ཐང་དམར་པོ་དེའི་ཐག་རིང་ས་ཞིག་ན་ཤིང་སྡོང་ཁེར་སྐྱེས་ཤིག་ཡོད་པ་མཐོང་བས་ཤིང་དེའི་གམ་དུ་སོང་། ལྗོན་ཤིང་བཟང་པོ་དེའི་རྩ་བ་ན་ཆུ་མིག་ཆུང་ཆུང་ཞིག་ཀྱང་ཡོད་པས། ཆུ་དེ་འཐུང་ཞིང་ཁྲུས་བྱས་པ་ན་ལྷ་ཡིས་མངོན་སུམ་དུ་ལྗོན་ཤིང་འདིའི་ཡལ་ག་ཆོགས་ཤིག་དང་གང་འདོད་པ་ཐམས་ཅད་འབྱུང་ངོ་ཞེས་ལུང་བསྟན་པས། ལེགས་ཚོར་གྱིས་དེ་ལྟར་དུ་ཡལ་ག་གཅིག་བཅད་པས་བཏུང་བ་ཞིམ་པོ་བདུད་རྩི་ལྟ་བུ་བྱུང་། ཡང་ཡལ་ག་གཅིག་བཅད་པས་ཁ་ཟས་རོ་བརྒྱ་དང་ལྡན་པ་མང་པོ་ཅི་འདོད་དུ་བྱུང་ཞིང་། དེ་བཞིན་དུ་གོས་དང་རིན་པོ་ཆེ་སྣ་ཚོགས་པ་བྱུང་ནས་ལེགས་ཚོར་འཁོར་དང་བཅས་པའི་ཡིད་ཚིམ། དེ་ནས་ཉེས་ཚོར་ཐོན་ཏེ། ཤིང་འདིའི་ཡལ་ག་རེ་རེ་བཅད་དུས་ཕུ་བོས་འདི་འདྲའི་ཅི་བསམ་གང་འདོད་ཅིག་རྙེད་ཡོད་ན། ངས་ཀྱང་ཤིང་འདི་རྩ་བ་ནས་བཅད་ན་དེ་བས་ལྷག་པ་ཞིག་རྙེད་པ་འདྲ་སྙམ་ནས་ཧབ་པ་ལངས་ཏེ་ཤིང་སྡོང་དྲུང་ནས་གཅོད་པར་བརྩམ་པ་ན། ལེགས་ཚོར་གྱིས་སྨྲས་པ། རང་རེ་རྣམས་ལྟོགས་སྐོམ་གྱིས་མནར་ཏེ་ཤི་ཆས་བྱེད་ཀྱིན་ཡོད་སྐབས་སྲོག་དང་མ་བྲལ་ཞིང་ལྟོགས་སྐོམ་གཉིས་ཀ་འདིས་བླང་སྟེ་གསོན་པོ་འཚོ་ཐུབ་པ་ཤིང་འདིའི་དྲིན་རེད་འཚོ་བ་ཟས་གོས་ཅི་དགོས་ན་ལེན་རྒྱུ་ཡོད་པས་མ་གཅོད་ཅེས་སྨྲས་ཀྱང། ཁར་མ་ཉན་པར་གཅད་གྲབ་བྱས་པས། ལེགས་ཚོར་གྱིས་ཤིང་དྲིན་ཆེན་གཅད་སར་ལྟ་མི་འདོད་དོ་ཞེས་སྨྲས་ཏེ་ལེགས་ཚོར་དཔོན་གཡོག་ཐམས་ཅད་སྔོན་ལ་སོང་བའི་འོག་ཏུ། ཉེས་ཚོར་གྱིས་དེའི་ཤུལ་ནས་ཤིང་སྡོང་དྲུང་ནས་ནས་བཅད་པས། ཤིང་སྡོང་གི་རྩ་བ་ནས་རྒྱུ་ཟས་ནོར་འབྱུང་བ་ལྟ་ཅི་སྲིན་པོ་འཇིགས་སུ་རུང་བ་ལྔ་བརྒྱ་བུད་ནས་ཉེས་ཚོར་འཁོར་དང་བཅས་པ་ཟོས་སོང་བ་རེད། འདོད་པ་ཆེ་དྲག་ནས་ཚང་མ་རང་ལ་ཐོབ་ཏུ་འཇུག་དགོས་སྣང་ཤར་ཚེ་དེ་འདྲ་མི་འདོད་པ་འབྱུང་རྒྱུ་ཡོད་སྲིད་པ་རེད། བརྣབ་སེམས་སྤངས་ན་སྐྱེ་བ་ཕྱི་མ་མི་ལུས་བླང་ན་རྒྱུ་ཆེན་དུ་སྐྱེ་བ་རེད། ལྷ་ཡུལ་དུ་སྐྱེ་ན་ལྷ་གཞན་ལས་ཁྱད་དུ་འཕགས་པའི་འབྱོར་བ་ཅན་ལ་སྐྱེ་རྒྱུ་ལ་སོགས་པ་ཕན་ཡོན་མང་བ་རེད། ཡིད་ཀྱི་མི་དགེ་བ་གཉིས་པ་གནོད་སེམས་རེད། གནོད་སེམས་འདི་རང་སེམས་རང་གིས་སྲེག་བྱེད་ཀྱི་མེ་ཆེན་པོ་ཞིག་དང་འདྲ་བ་རེད། དམྱལ་བའི་ལྕགས་བསྲེག་གི་ས་གཞི་ཡན་ཆད་རྒྱུ་ཅི་ལས་བྱུང་ཞེ་ན་གནོད་སེམས་ལས་བྱུང་། དེ་ཡང་ཉོན་མོངས་དུག་གསུམ་དང་ཕྲག་དོག་གི་ཀུན་ནས་སློང་བ་ཤས་ཆེ་བ་རེད། ཉོན་མོངས་ཕྲག་དོག་གི་རྒྱུད་གང་སོང་བའི་མི་དེའི་མིག་སྔར་མི་གཞན་ཞིག་ལ་མི་འདོད་པ་ཡོང་བ་ནི་དེ་རང་གི་བདེ་སྐྱིད་ཡིན་པར་མ་ཟད། ལྟད་མོའང་ཡིནཔ་རེད། ཕ་རོལ་པོ་དེ་ཁོ་རང་ལ་གནོད་བསྐྱལ་མྱོང་བའི་དགྲ་བོ་ཡིན་དགོས་པ་མ་རེད། སུ་ལ་མི་འདོད་པ་བྱུང་ན་དགའ་བ་རེད། ལྷག་པར་དུ་ཐོབ་གོ་ས་རྒྱུ་འབྱོར་བ་མཚན་སྙན་གྲགས་ཅན་ཞིག་ལ་མི་འདོད་པ་ཞིག་བྱུང་བ་གོ་དུས་སྐྱིད་སོང་བ་རེད། འདྲེ་ངན་གདུག་རྩུབ་ཅན་ཞིག་དང་གཉིས་ཀ་དྲན་ལུགས་འདྲ་བ་རེད། རྩེད་མོ་ཞིག་བརྩེས་ནའང་མི་ལ་གནོད་བསྐྱལ་ནས་དེས་རང་མཚར་ཁ་འཇོག་པ་དང་། མི་ལ་སྡུག་པོ་ཡོང་བར་གོ་ན་དགོད་ཁ་ཤོར། མི་ག་གེ་མོ་ཞིག་ལ་མངའ་ཐང་ལོངས་སྤྱོད་དབང་ཐང་འབྱོར་བ་རྒྱས་འདུག་པར་གོ་ན་ངོ་ནག་པོར་འགྱུར་འགྲོ་བའི་མི་གནོད་སེམས་ཅན་དེ་ལ་འདི་ཕྱི་གཉིས་ཀར་ཡག་པ་ཡོང་ནི་མ་རེད། གནོད་སེམས་འཆང་སའི་ཡུལ་གཉན་ཤོས་གང་ཞེ་ན། སངས་རྒྱས་བྱང་སེམས། བླ་མ་སློབ་དཔོན། ཕ་མ་དགྲ་བཅོམ་སོགས་ལ་ཞེ་ནག་འཆང་ན་ཉེས་པ་ལྷག་པར་ཆེ་བ་རེད། སྤྱོད་འཇུག་ལས། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་སྐྱེད་པར་བྱེད་པ་དེ། །ངན་སེམས་བསྐྱེད་པའི་གྲངས་བཞིན་བསྐལ་བར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །ཞིང་བཅུ་ཚང་བའི་དགྲ་བོ་ཡིན་ཡང་སྙིང་རྗེའི་སེམས་ཀྱིས་མངོན་སྤྱོད་ཀྱི་ལས་སྦྱོར་བྱེད་རྒྱུ་མ་གཏོགས་གནོད་སེམས་འཆང་ན་ལས་མི་འགྲུབ། སེམས་ནག་ཁོ་ན་འཆང་པ་ཞིག་གིས་དགྲ་ཐུབ་པ་མ་རེད། དགྲ་མ་ཐུབ་སྔོན་ནས་རང་ཐུབ་ཡོད་པ་རེད། ཤི་ནས་དམྱལ་བ་མ་གཏོགས་འགྲོ་ས་མེད་པ་ཞིག་རང་གིས་བྱས་པ་རེད། དགྲ་ཅི་ལྟར་སྟོབས་ཆེ་ནའང་དམྱལ་བ་ལ་འཕེན་ཐུབ་པ་མ་རེད། ཞི་བ་ལྷས། ལྕགས་བསྲེག་ས་གཞི་སུ་ཡིས་བྱས། །མེ་ཚོགས་དེ་དག་གང་ལས་བྱུང་། །དེ་འདྲ་དེ་དག་ཐམས་ཅད་ནི། །སྡིག་སེམས་ཡིན་པར་ཐུབ་པས་གསུངས། །ཞེས་གསུངས་པ་ལྟར། རྒྱལ་པོའི་བུ་ཐང་ལ་འཁྱམ་སྟེ་སྤྲང་ཕྲུག་རེད་སོང་བ་ཞིག་དང་། བྲམ་ཟེའི་བུ་སྤྲང་ཕྲུག་ངོ་མ་ཞིག་དང་གཉིས་མཉམ་དུ་འཁྱམས་པས། ཉིན་ཞིག་ཁྱིམ་བདག་ཕྱུག་པོ་ཚང་ཞིག་གིས་དགེ་འདུན་པ་ལ་བསྙེན་བཀུར་བྱེད་ཀྱིན་ཡོད་པ་ཞིག་ལ་ཐོན། བྲམ་ཟེ་བུས་དགེ་འདུན་པ་ལ་གསོལ་ཇ་མ་དྲངས་སྔོན་ནས་ཟས་སློང་བས་ཅི་ཡང་མ་ལོན། རྒྱལ་པོ་བུས་དགེ་འདུན་པ་ལ་དྲངས་ཚར་རྗེས་སུ་བསླངས་བས་ཟས་མང་པོ་རྙེད། དེ་ནས་གཉིས་ཀ་ཐུག་ཡོང་དུས་རྒྱལ་པོའི་བུས་བྲམ་ཟེ་བུ་ལ་ཁྱོད་ཀྱིས་ཟས་ལོན་ནམ་ཞེས་དྲིས་པས། དེས་མ་ལོན་པས་ཁོང་ཁྲོས་ཏེ་དེས་སྨྲས་པ། གལ་ཏེ་ཁོ་བོ་ལ་དབང་ཞིག་ཡོད་ན་དགེ་སློང་དག་གི་མགོ་བོ་དྲུང་ནས་གཅད་དོ་ཞེས་ངན་སེམས་འཆང་། རྒྱལ་པོའི་བུས་སྨྲས་པ། གལ་ཏེ་བདག་ལ་དབང་ཞིག་ཡོད་ན་ཉིན་རེ་བཞིན་དུ་སངས་རྒྱས་འཁོར་དང་བཅས་པ་ལ་ཞལ་ཟས་རོ་བརྒྱ་དང་ལྡན་པའི་བསོད་སྙོམས་འབུལ་ཞེས་དགེ་སེམས་སྐྱེས། དེ་ནས་སློང་ཟས་དེ་བགོས་ཏེ་ཟོས་ནས། གཉིས་ཀ་ཕན་ཚུན་ཤིང་དྲུང་རེར་སོང་ནས་གཉིད་ཡུར། གཉིས་ཀ་གཉིད་དུ་ཡུར་བའི་སྐབས་ཤིག་ལ། ག་ཤེད་ནས་ཤིང་རྟ་བདག་མེད་ཅིག་འདྲིལ་ཡོང་ནས་ཤིང་རྟའི་འཁོར་ལོ་བྲམ་ཟེ་ཁྱེའུའི་སྐེ་ལ་ཕོག་སྟེ་མགོ་དྲུང་ནས་བཅད་དེ་གནོད་སེམས་ཀྱི་འབྲས་བུ་འཕྲལ་དུ་སྨིན་པ་རེད། དེའི་སྐབས་སུ་མཉན་ཡོད་ཀྱི་ཚོང་དཔོན་ཞིག་ཤི་ནས་དེ་ལ་བུ་མེད་པས། བསོད་ནམས་ཆེན་པོ་ཅན་ཞིག་དེའི་བུ་འཚབ་ཏུ་བཙལ་ནས་དེའི་རྒྱུད་འཛིན་དུ་འཇོག་དགོས་ཤེས་བཙལ་བཞིན་ཡོད་དུས་ཤིག་ལ། རྒྱལ་བུ་སྤྲང་ཕྲུག་ཤིང་སྡོང་ཞིག་གི་དྲུང་དུ་ཉལ་ཡོད་པ་དེ་ཉི་མ་ཕྱི་དྲོ་རེད་ཡོང་གི་ཡོད་ཀྱང་། ཤིང་གི་གྲིབ་མས་ད་དུང་རྒྱལ་བུ་མ་བཏང་བར་ཉིན་གུང་གི་གྲིབ་མ་རྒྱལ་བུའི་ལུས་ཐོག་ཏུ་གྲིབ་བསིལ་གཡོས་ཏེ་བསྡད་ཡོད་པ་མཐོང་ནས། འདི་བསོད་ནམས་ཆེན་པོ་ཅན་ཞིག་རེད་འདུག་ཅེས་ཚོང་དཔོན་ཕྱུག་པོ་ཚང་གི་མངའ་ཐང་འབྱོར་བ་དེ་ལ་དབང་སོང་བ་རེད། དེས་བྲམ་ཟེའི་སྤྲང་ཕྲུག་ལ་བཤད་པ་ལྟར་སངས་རྒྱས་འཁོར་དང་བཅས་པ་ལ་བསོད་སྙོམས་ཕུལ་ཆོས་ཞུས་ཏེ་ཐར་བ་ཐོབ་སོང་བའི་ལོ་རྒྱུས་ཡོད་རེད། དེས་ན་དགེ་མི་དགེ་ཐམས་ཅད་ལ་སེམས་འདི་གཙོ་ཆེ་བ་རེད། བདེ་བ་ཅན་ལ་སྐྱེ་བར་འདོད་པ་ཞིག་ཡིན་ཕྱིན་གནོད་སེམས་ཡོད་མི་རུང། གནོད་སེམས་ཞེ་ན་ཡོད་ན་བདེ་བ་ཅན་དུ་ལྟ་ཅི་མཐོ་རིས་ལྷ་མིའི་ལུས་རྟེན་ཙམ་ཡང་དཀའ་བ་རེད། གནོད་སེམས་མེད་ཅིང་ཕན་སེམས་འཆང་ན་གྲོགས་བཟང་པོ་དང་ཐུག་ཏེ་ཕར་ལ་ཕན་བཏགས་ན་ཚུར་ལའང་ཕན་བཏགས་པ་རེད། ཕན་སེམས་གྲོས་མཐུན་གྱི་སྟེང་ནས་བྱ་བ་གང་ཡིན་ཡང་ཡག་པོ་ཞིག་འགྲུབ་པ་རེད། བྱི་བ་དབྱིག་ལྡན་ཟེར་བ་ཞིག་དང་། ཕུག་རོན་རི་མོའི་མགྲིན་པ་ཅན་དང་། གསང་བར་རྒྱུ་བའི་བྱ་རོག་དང་། རི་དྭགས་རི་མོའི་ལུས་ཅན་དང་། རུས་སྦལ་དལ་གྱིས་འགྲོ་སྟེ་རིགས་མི་འདྲ་བའི་སྲོག་ཆགས་ལྔ་སེམས་མཐུན་པའི་གྲོགས་པོར་བྱས། གཅིག་གིས་གཅིག་ལ་ཕན་མ་གཏོགས་གནོད་མི་བསྐྱལ་བའི་མནའ་བཞག །ཚང་མ་མནའ་ཡ་ཡིན་ཞིང་། ཉིན་གཅིག་ཕུག་རོན་རི་མོའི་མགྲིན་པ་ཅན་འཁོར་དང་བཅས་པ་བྱ་རྒྱ་ཡིསབཟུང་། འཁོར་འགའ་རེ་འཕུར་གྲབ་བྱེད་དུས་ཕུག་རོན་རི་མོའི་མགྲིན་པ་ཅན་དེ་དཔོན་པོ་ཡིན་པས། ཁྱེད་རྣམས་དེ་ལྟར་མ་བྱེད་ཅིག །དེ་ལྟར་བྱས་ནས་ཐར་མི་སྲིད། དེ་བས་ཁོ་བོས་ཇི་ལྟར་བྱས་ན་ཁྱེད་རྣམས་ཀྱིས་དེ་ལྟར་གྱིས་ཤེས་བློ་ཕུད། ཁོ་རང་དུབ་སེ་བསྡད་འདུག་ཁུལ་བྱས། བྱ་གཞན་པ་ཐམས་ཅད་ཀྱང་དེ་ལྟར་དུ་ལེབ་སེ་བསྡད་འདུག་ཁུལ་བྱས་པས། བྱ་འཛིན་མཁན་གྱི་མི་རྒན་དེས་བྱ་རྣམས་བཟུང་ཚར་ཐལ། ད་དྲག་ནི་རེད་སྙམ་ནས་བྱ་རྒྱའི་སྣེ་མོ་མངག་སྟེ་སེམས་ལྷོད་ལ་བབ་ནས་བསྡད་པའི་སྐབས་དེར་རི་མོའི་མགྲིན་པ་ཅན་འཕུར་དུས་བྱ་ཚང་མ་མཉམ་དུ་འཕུར་ནས་རྒན་པོའི་ལག་གི་བྱ་ཚང་མ་ཐར་སོང་བ་རེད། བྱ་རྣམས་འཕུར་ནས་གྲོགས་པོ་བྱི་བ་དབྱིག་ལྡན་གྱི་སྒོ་ཁར་བབ། གྲོགས་པོ་བྱི་བ་དབྱིག་ལྡན་ལ་བོས། བྱི་བ་དབྱིག་ལྡན་ཐོན་ཏེ་ཁྱེད་རྣམས་ཅི་རེད་ཐལ་ཞེས་དྲིས། ངེད་རྣམས་བྱ་རྒྱའི་ནང་དུ་བཙུད་ཐལ། ངེད་རྣམས་མཉམ་དུ་བྲོས་པས་ཐར་ཐལ་ཁྱེད་ཀྱིས་བྱ་རྒྱས་བཅིང་ཡོད་པ་འདི་གཅད་རོགས་ཤེས་སྨྲས། གྲོགས་པོ་དབྱིག་ལྡན་གྱིས་བྱ་གཟུང་བྱེད་ཀྱི་སྐུད་པ་རྣམས་གཅད་རོགས་བྱས་ཏེ་ཕན་བཏགས། དེ་ལྟར་གྲོགས་པོ་ཐམས་ཅད་མཉམ་དུ་བསྡད་ཡོད་པའི་ཉིན་ཞིག་ལ་རུས་སྦལ་དལ་གྱིས་འགྲོ་ག་ཤེད་ཅིག་ཏུ་འགྲོ་དུས་བྱི་ལ་ཞིག་གིས་ཁྱེར་སོང་། དེས་སྐད་ཆེན་པོས་གྲོགས་པོ་རྣམས་ལ་སྲོག་སྐྱོབས་རོགས་ཞེས་བོས། ཕུག་རོན་གྱིས་གོ་ནས་རི་དྭགས་དང་གཉིས་ཀ་བྱི་བ་དབྱིག་ལྡན་སར་གྲོས་བྱེད་དུ་སོང་། བྱི་བ་དབྱིག་ལྡན་གྱིས་སྨྲས་ཏེ། རི་དྭགས་ཁྱོད་སོང་ནས་བྱི་ལ་རྒན་པོའི་སྔུན་ནས་ཤི་ཁ་བྱོས། དེ་དུས་བྱི་ལ་རྒན་པོས་རུས་སྦལ་བཞག་ནས་ལྟ་རུ་ཐོན་ཡོང་ཚེ་ཕུག་རོན་ཁྱོད་སོང་ནས་རུས་སྦལ་གྱི་སྒྱིད་པ་ནས་བཟུང་སྟེ་འཕུར་ཤོག དེ་ནས་རི་དྭགས་ཡར་ལངས་ཏེ་བྲོས་ཤོག་ཅེས་གྲོས་བྱས། རི་དྭགས་རི་མོའི་ལུས་ཅན་སོང་ནས་བྱི་ལ་རྒན་པོའི་མཐོང་ས་ཞིག་ཏུ་སོང་ནས་ཤི་ཁུལ་བྱས། བྱི་ལ་རྒན་པོ་ཧམ་པ་དེ་བས་ཆེ་ཞིག་ལངས་ཤིང་རུས་སྦལ་བསྐྱུར་ཏེ་རི་དྭགས་ཤི་ཡོད་སར་ལྟ་རུ་ཐོན་ཡོང་སྐབས། དེའི་ཤུལ་ནས་ཕུག་རོན་རི་མོའི་མགྲིན་པ་ཅན་གྱིས་རུས་སྦལ་གྱི་སྒྱིད་པ་ནས་བཟུང་སྟེ་ནམ་མཁའི་ཁམས་ལ་འཕུར་ནས་ཁྱེར། བྱི་ལ་རྒན་པོ་རི་དྭགས་ཀྱི་གམ་ལ་ཐོན་མ་ཐོན་གྱི་སྐབས་སུ་རི་དྭགས་རི་མོའི་ལུས་ཅན་ཡར་ལངས་ཏེ་མཆོང་ལྡིང་འགའ་ཞིག་བྱས་ནས་དགུང་ལ་ཤོར། དེ་ལྟར་གྲོགས་པོ་སྤུན་ལྔ་གྲོས་མཐུན་བྱས་པའི་སྟབས་ཀྱིས་རུས་སྦལ་བྱི་ལ་རྒན་པོའི་ཁ་ནས་ཐར་སོང་བ་རེད། དཔེ་དེ་བཞིན་དུ་གྲོགས་བཟང་པོར་བསྟེན་ན་སྡུག་བསྔལ་ལས་ཐར་བ་དང་། བདེ་བ་དང་འཕྲད་ཐུབ། །གྲོས་མཐུན་གྱི་སྟེང་ནས་བསྒྲུབ་ན་བྱ་བ་ཅི་ཞིག་ཡིན་ཡང་འགྲུབ་ཐུབ། གལ་ཏེ་མ་འགྲུབ་ཀྱང་མཛེས་པ་རེད། བྱ་བ་ཐམས་ཅད་གྲོས་ཀྱིས་བསྒྲུབ། །མ་འགྲུབ་ན་ཡང་མཛེས་པའི་རྒྱུ། །ཞེས་གསུངས་སོ། །གཞན་གྱིས་འཕྱ་སྨོད་མི་ཡོང་། རྗེས་ནས་འགྱོད་པ་མི་སྐྱེ། གྲོགས་བཟང་པོ་བཙལ་ནས་གྲོས་མཐུན་པོ་བྱས་ན་ཐམས་ཅན་ལ་ཕན་ཐོགས་དང་ལྡན་པའོ། །གསུམ་པ་ལོག་ལྟ་ནི། ལོག་པར་ལྟ་བ་ནི་ཡང་དག་པ་ཕྱིན་ཅི་མ་ལོག་པ་ལ་ཕྱིན་ཅི་ལོག་ཏུ་བལྟ་པ་ལ་ལོག་ལྟ་ཞེས་བྱ། འདི་དུག་གསུམ་གང་གི་ཀུན་སློང་གིས་བྱས་པ་ཡིན་ཞེ་ན་གཏི་མུག་སྟོབས་ཆེ་བའི་དབང་གིས་བྱུང་། ལོག་ལྟ་ཆེ་འབྲིང་ཆུང་གསུམ་དུ་དབྱེ་བ་ལས། ལོག་ལྟ་ཆེན་པོ་ནི། ལས་རྒྱུ་འབྲས་ཚེ་སྔ་ཕྱི་ཞེས་པ་ཞིག་མེད། དཀོན་མཆོག་གསུམ་མེད། དེ་ལ་བདེན་མཐུ་མེད། ཕ་མའི་དགེ་རྩ་གཅོད་པ། རྒྱུ་འབྲས་ལོག་པར་བཟུང་ནས་འཚེ་བ་ཆོས་སུ་སྨྲ་བ། དཀོན་མཆོག་གི་དབུ་འཕང་སྨད་པ། ཁྱད་པར་དུ་གསང་སྔགས་སྟོན་པའི་སློབ་དཔོན་ལ་གཤེ་ཞིང་སྐུར་བ་འདེབས་པ། མཚན་གཞི་ནི་རུ་ཏྲ་ཐར་བ་ནག་པོ་ལྟ་བུའོ། །འབྲིང་ནི། མཆེད་གྲོགས། ཐ་མ་ནི། སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་ཡིན་པ་ལ་དེ་ལྟར་མ་ཤེས་པ་ལ་སོགས་པ་རྣམ་གྲངས་མང་པ་རེད། མི་དགེ་བཅུ་ལས་ལོག་ལྟ་ལྕི་ཞེས་གསུངས་བ་ལྟར། རྒྱུ་འབྲས་ལ་ཡིད་ཆེས་མེད་པའི་ལོག་ལྟ་འདི་ཡོད་ཕྱིན། ཡང་དག་པའི་ལྟ་བ་རྒྱུ་འབྲས་ཡིད་ཆེས་མ་སྐྱེས་ཀྱི་བར་དུ་དགེ་རྩ་སྔར་ཡོད་ཐམས་ཅད་ཆད་དེ་རྒྱུད་གསོར་མི་རུང་བ་ཉིད་དུ་འགྱུར། འདི་ཡང་གྲོགས་ངན་ལ་བརྟེན་ནས་སྐྱེས་པ་མང་ཆེ་ཞིང་། དད་པའི་རྩ་བ་མི་བརྟན་པའི་མི་དང་ཐེ་ཚོམ་རྒྱུད་ལྡན་གྱི་མི་ལ་ལོག་ལྟ་སྐྱེ་སླ་བ་ཡིན། སྡིག་པའི་གྲོགས་པོ་ངན་པ་ལས་འབྲས་ལ་ཆེར་མི་རྩི་བ། བརྩིས་ཀྱང་ལས་འབྲས་ཀྱི་ཆོས་མི་ཤེས་པའི་གང་ཟག་དང་འགྲོགས་ན། དེ་དང་འགྲོགས་ནས་ཡུན་རིང་སོང་བས་དེའི་ལོག་ལྟ་ལ་སོགས་པའི་སྐྱོན་རང་ཉིད་ལ་འགོས་ཡོང་བ་ཡིན། ཡང་ཆོས་སྒྲུབ་པའི་དམིགས་ཡུལ་དངོས་མ་གོ་བར་ཆོས་ཅི་ཙམ་ཞུས་ཀྱང་མི་འདོད་པ་ཡོང་རྒྱུ་ཇེ་མང་རེད་སྙམ་ནས་བསོད་ནམས་ཟད་ཁ་ལྷ་ལ་ཡིད་ཆད་ཆོས་ལ་ཡིད་ཆད་བྱེད་པ་དེ་ཚོ་ལོག་ལྟས་བསླད་པ་ཡིན། འགའ་རེས་གདམས་ངག་ཅི་འདྲ་ཞིག་ཞུས་སྒོམ་ཇི་ཙམ་ཞིག་བརྒྱབ་ཀྱང་ཡོང་རྒྱུ་འབྱུང་རྒྱུ་གཉིས་ཀ་མི་འདུག་སྙམ་ནས། བར་སྐགས་ཤིག་ཏུ་ཆོས་ལ་ལོག་ལྟ་དང་བླ་མ་ལ་ལོག་ལྟ་བྱེད་མཁན་ཡོད་པ་རེད། དེ་ཚོ་ཆོས་དང་བླ་མའི་སྐྱོན་ཅི་ལ་ཡིན། མོས་གུས་མེད་བཞིན་དུ་སྒོམ་བྱས་པ་ཞིག་གིས་བྱིན་རླབས་ཀྱི་ཕ་ཕོག་ཅིག་གང་ནས་ཐོབ་ཡོང་། མོས་གུས་སྒོམ་དུ་མ་ཤར་བའི་གང་ཟག་དེས་གདམས་ངག་གི་གནད་ཡག་པོ་ཞིག་གོ་བ་མེད་པས་སྒོམ་སྐྱོན་མེད་ཞིག་ཡོང་དོན་ག་ལ་ཡོད། མཐར་རྣམ་གཡེང་ལེ་ལོའི་དབང་དུ་ཤོར་ནས་ཆོས་དྲེད་དུ་འགྱུར་པའི་ཉེན་ཁ་ཡོད་པ་རེད། ཁྱིམ་པ་ཕོ་མོ་ལ་མཚོན་ནའང། གཏོ་དགེ་སྐུ་རིམ། ཕྱག་སྐོར་སྒྲིབ་སྦྱོང་། འདི་མ་བྱས་བསམ་པ་ཞིག་མེད་མོད་མི་འདོད་སྣ་དགུ་མི་ཡོང་བ་ཞིག་མི་འདུག་སྙམ་ནས་དད་ལོག་བྱ་མི་རུང་། རྒྱུ་འབྲས་བདེན་པས་སྔོན་གྱི་ལས་ངན་ཚེ་འདིར་ཟད་ཐབས་བྱ་རྒྱུ་ཡོད་པ་རེད། སྡིག་ཅན་དམྱལ་བར་སྐྱེ་ཁར་བསོད་ནམས་ཆར་པ་འབབ་འབབ་བྱེད་རྒྱུ་ཡོད་པ་རེད། དེ་སྔོན་བསགས་ཀྱི་བསོད་ནམས་ཕྲན་བུ་ཞིག་ཡོད་པ་དེ་མཇུག་རྫོགས་རན་རེད། སྔོན་གྲོང་ཁྱེར་སྒྲ་སྒྲོགས་ཀྱི་རྒྱལ་པོ་ཨུ་ཏྲ་ཡ་ནའི་བུ་གཙུག་ཕུད་ཅན་རྒྱལ་སར་བཞག་དུས་བློན་པོ་མ་རུངས་པ་གཉིས་ནང་དུ་བཙུད། དེ་གཉིས་ཀ་ལ་དབང་ཆེན་པོ་སྤྲད། བློན་པོ་བཟང་བོ་ཆོས་བློན་གཉིས་ཡོད་པ་ཕྱིར་ཕུད། བློན་པོ་བཟང་ངན་གོ་ནོར་བའི་སྟབས་ཀྱིས་རྒྱལ་ཁམས་ལོག་ལམ་དུ་བསྒྱུར། སངས་རྒྱས་ཀྱི་མདུན་ནས་ཆོས་ཞུས་ཏེ་དགྲ་བཅོམ་ཐོབ་ཡོད་པའི་ཡབ་རྒྱལ་པོ་ཨུ་ཏྲ་ཡ་ནས་བུ་ལོག་ལམ་ནས་བཟློག་དགོས་བསམ་སྟེ་དེར་བྱོན་པས་བུ་དེས་ཡབ་རྒྱལ་པོ་བསད་དེ་ཕ་དགྲ་བཅོམ་བསད་པས་མཚམས་མེད་གཉིས་མཉམ་དུ་བསགས་པ་རེད། དེ་ནས་འཕགས་པ་ཀཱ་ཏྱཱ་ནས་ལུང་བསྟན་པ་ལྟར་ཞག་བདུན་ལ་ས་འོག་ཏུ་མནན་སོང་བ་རེད། ཁོ་རང་གི་སྔོན་བསོད་ནམས་བསགས་པ་དེ་གློ་བུར་དུ་སྨིན་ཏེ། ཉིན་བདུན་གྱི་དང་པོ་རླུང་བྱུང་ནས་མི་གཙང་བའི་རྡུལ་ལ་སོགས་པ་ཐམས་ཅད་ཕྱགས། གཉིས་པ་ལ་མེ་ཏོག་གི་ཆར་བབ། གསུམ་པ་ལ་གོས་ཀྱི་ཆར་བབ། བཞི་པ་ལ་དངུལ་གྱི་ཆར་བབ། ལྔ་པ་ལ་གསེར་གྱི་ཆར་བབ། དྲུག་པ་ལ་རིན་པོ་ཆེ་སྣ་ཚོགས་ཀྱི་ཆར་བབ། ད་དུང་དགོས་འདོད་ཀྱི་ཆར་དེ་འདྲ་ཤ་སྟག་འབབ་རྒྱུ་ཡོད་སྣང་ཤར་ཏེ་བལྟས་བསྡད་པས། ཉི་མ་བདུན་པ་ལ་སའི་ཆར་བབ་སྟེ་རྒྱལ་པོ་དང་བདུད་བློན་ཐམས་ཅད་འབྲོས་པར་བྱས་ཀྱང་མི་མ་ཡིན་གྱིས་མཁར་གྱི་སྒོ་བརྒྱབ་ནས་འབྲོ་ས་མ་རྙེད་པར་ས་འོག་ཏུ་མནན་སོང་བ་རེད། ཆོས་བློན་གཉིས་ལ་སོགས་པས་ཀཱ་ཏྱཱ་ནའི་ལུང་བསྟན་ལ་ཉན་ནས་ཚོད་ཚོད་ཅིག་གི་མཚམས་ནས་ཟས་གོས་དང་རིན་པོ་ཆེ་ཁྱེར་ནས་བྲོས་ས་ལོན་སོང་བ་རེད། དེས་ན་ལོག་ལྟའི་ཉེས་དམིགས་ལ་བསམ་སྟེ་ལོག་ལྟ་སྤངས་ནས་ཁྱིམ་པ་ཕོ་མོ་ཚོས་རྒྱུ་འབྲས་ཡང་དག་གི་ལྟ་བ་བརྟན་ཞིང་ངེས་ཤེས་འདྲོངས་བ་ཞིག་རང་རྒྱུད་ལ་ཡོད་པ་དེ། ཆོས་པ་ངོ་མ་ཞིག་ཡིན་མིན་དང་ནང་བ་སངས་རྒྱས་ཡིན་མིན། དཀོན་མཆོག་གསུམ་གྱི་སྐྱབས་འོག་ཏུ་ཚུད་ཡོད་མེད་ལྟ་བྱེད་དང་བལྟ་ས་ངོ་མ་དེ་ཡིན། ཚོམས་ལས། འཇིག་རྟེན་པ་ཡི་ཡང་དག་ལྟ། །ཆེན་པོ་སུ་ལ་ཡོད་གྱུར་པ། །དེ་ནི་བསྐལ་པ་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་གསུངས་སོ། །མདོ་ལས་སངས་རྒྱས་བཅོམ་ལྡན་འདས་ཀྱིས། ཡང་དག་ལྟ་བ་ཡང་དག་འཛིན། །སྐྱེ་བོ་དེ་དག་མཐོ་རིས་འགྲོ། །ཞེས་གསུངས་པ་ལྟར། བདེ་བ་ཅན་དུ་སྐྱེ་བ་ལ་རྒྱུ་འབྲས་ཡིད་ཆེས་ཀྱི་ཡང་དག་པའི་ལྟ་བ་ནི་མེད་ཐབས་མེད་པ་ཞིག་ཡིན་པ་རེད། བདེ་བ་ཅན་ལ་མཚམས་མེད་བྱས་པ་དང་། ཆོས་སྤོང་བྱས་པ་གཉིས་མ་གཏོགས་གཞན་ཐམས་ཅད་སྐྱེ་བ་རེད། དེ་གཉིས་ཀ་གསོག་རྐྱེན་ངོ་མ་གང་ཡིན་ཞེ་ན་ལོག་ལྟ་ལ་རྩ་བ་ཐུག་ཡོད་པ་རེད། དེའི་ཡན་ཆད་ཀྱིས་སྒོ་གསུམ་གྱི་མི་དགེ་བའི་ལས་ལམ་བཅུ་པོ་བསྟན་ནས། དེ་ཉིད་གནོང་འགྱོད་ཀྱི་སྒོ་ནས་བཤགས་ཚུལ་དང་བཅས་པ་བསྟན། དེའི་ཡན་གྱིས་མི་དགེ་བ་བཅུ་སྤྱིར་བཤགས་པ་སོང་ནས།

གཉིས་པ་ཉེས་པ་ལྕི་བ་བྱེ་བྲག་ཏུ་བཤགས་པ།

ལ་ནང་གསེས་ལྔ་སྟེ། མཚམས་མེད་ལྔ། དེ་དང་ཉེ་བ་ལྔ། ཆོས་སྤོང་། བྱང་སེམས་ལ་སྐུར་བ་འདེབས་པ། ལོག་ལྟ་བྱེ་བྲག་ཏུ་བཤགས་པའོ།།

དང་པོ་ཉེས་དམིགས་ཤིན་ཏུ་ཆེ་བ་མཚམས་མེད་ལྔའི་ལས་བྱས་པའི་སྡིག་པ་བཤགས་པ།

ཕ་མ་སློབ་དཔོན་དགྲ་བཅོམ་བསད་པ་དང་། །རྒྱལ་བའི་སྐུ་ལ་ངན་སེམས་སྐྱེས་པ་སོགས། །མཚམས་མེད་ལྔ་ཡི་ལས་བསགས་མཐོལ་ལོ་བཤགས། །ཞེས་གསུངས་ཏེ། སྐྱེ་བ་འདིའི་ཕ་མ་གཉིས་ཀ་རྟེན་འདིའི་ལུས་སྲོག་སྟེར་བའི་དྲིན་ཆེན་ཡིན་ཏེ། འཇིག་རྟེན་བསྟན་པའི་དྲིན་ཆེན། དམ་ཆོས་དང་སྤྲད་པའི་དྲིན་ལ་སོགས་པའི་དྲིན་ཆེན་ཡིན་པས། ཕ་མ་བསད་ན་བར་མཚམས་མེད་པར་དུས་རིང་ལ་དམྱལ་བའི་སྡུག་བསྔལ་མྱོང་དགོས་པས་ན་མཚམས་མེད་ཀྱི་ལས་ཞེས་བྱ། སོར་བྱང་སྔགས་གསུམ་གྱི་མཁན་སློབ་དང་བླ་མ་ནི་རང་ངོས་ནས་སངས་རྒྱས་དངོས་ལས་ཀྱང་ལྷག་པའི་བཀའ་དྲིན་ཅན་ཡིན་པས་གསད་པ་ལྟ་ཅི་མ་གུས་པའི་ལས་ཙམ་ཞིག་བྱས་ཀྱང་དམྱལ་བར་སྐྱེ་བ་ཡིན་པས་ན་སློབ་དཔོན་བསད་པའི་མཚམས་མེད་ཀྱི་ལས། དགྲ་བཅོམ་པ་ནི། ཁམས་གསུམ་གྱི་ཉོན་མོངས་པ་ཐམས་ཅད་སྤངས་པ། ཟག་པ་ཟད་པ། བྱ་བ་བྱས་པ། ཁུར་བོར་བ། འཇིག་རྟེན་གྱི་ཆོས་ལས་རིང་དུ་འདས་པ་ཡིན་པས་ན་འཕགས་པའི་གང་ཟག་བསད་པའི་མཚམས་མེད་ཀྱི་ལས། ཡི་གེ་མང་ཆེ་པའི་ནང་དུ་རྒྱལ་བའི་སྐུ་ལ་ངན་སེམས་སྐྱེས་པ་དང་ཞེས་བྲིས་ཡོད་པ་རེད། འདི་བཅོས་དགོས་འདུག་བསམ་ནི་རེད། སྤྱིར་འདོན་ཆོག་ཚོའི་ནང་དུ་བཅོས་འཇོག་དགོས་ས་འདུག་སྙམ་རྒྱུ་མང་པོ་ཡོད་མོད། འོན་ཀྱང་དེ་ལྟར་ལྷག་འགྲོ་བ་རེད། ང་མིན་ནའང་ཚང་མའི་འགན་སྒེར་ཐོག་འདྲ་ཞིག་ལ་མི་འབབ་པས་ལྷག་འགྲོ་བ་ཨེ་ཡིན་སྙམ། རྒྱལ་བའི་སྐུ་ལ་ངན་སེམས་སྐྱེས་པ་གསུངས་པ་ནི་ལྷས་བྱིན་གྱིས་སྒྱོགས་རྡོ་འཕང་ནས་རྒྱལ་བ་རྫོགས་པའི་སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་འབྱིན་མྱོང་བ་རེད། དེ་ལྟ་བུ་ལྷས་བྱིན་གསོན་གསོན་ཁར་ས་གས་ཏེ་དམྱལ་བའི་མེ་ནང་དུ་འཐེན་སོང་བ་ལྟར་རྒྱལ་བའི་སྐུ་ལ་ངན་སེམས་ཀྱིས་ཁྲག་འབྱིན་པར་བྱེད་པའི་མཚམས་མེད། འདིའི་སྨོན་ལམ་གྱི་ཚིག་ཟིན་དངོས་ལ་མཚམས་མེད་བཞི་རྩི་རྒྱུ་ཡོད་བ་འདི་རེད། རྒྱལ་བའི་སྐུ་ལ་ངན་སེམས་སྐྱེས་པ་དང་གསུངས་བས་དང་སྒྲའི་མཚམས་མེད་ལྔ་པ་དགེ་འདུན་འཁོར་ལོའི་ཚིག་རྐང་ཞིག་འདྲེན་རྒྱུ་ཡོད་པ་ཞིག་ལ་འདྲ་མོད། འདིའི་འོག་མ་ཚོའི་བབ་ལ་བལྟས་ན་ཆད་སོང་བ་ཞིག་དང་ཅུང་མི་འདྲ། རྒྱལ་བའི་སྐུ་ལ་ངན་སེམས་སྐྱེས་པ་སྟེ། །མཚམས་མེད་ལྔ་ཡི་ཞེས་པ་ཞིག་གི་གོ་བ་བྱས་དུས་དགེ་འདུན་འཁོར་ལོའི་དབྱེན་ཤུགས་བསྟན་གྱི་གཞི་འཛིན་སའི་ས་ཚད་ཅིག་ལས་འཛིན་ས་མེད། ཡང་ན་སྟེ་ཞེས་བཅོས་དགོས། ཡང་ན་སོགས་ཞེས་བཅོས་དགོས་པ་འདྲ། སོགས་སྒྲའི་ཅི་ཞིག་བསྟན་པ་ཡིན་ཞེ་ན་གོང་གི་མཚམས་མེད་བཞི་དང་དགེ་འདུན་འཁོར་ལོ་སོགས་སྒྲའི་ནང་དུ་བསྡུས་ནའང་འགྲིག་ཡོད་འདུག་པ་འདྲ། དེས་ན་རང་རེས་སྟེ་ཞེས་བཅོས་པ་ལས་སོགས་ཞེས་བཅོས་ན་མི་ལེགས་སམ་སྙམ། རྒྱལ་བའི་སྐུ་ལ་ངན་སེམས་སྐྱེས་པ་སོགས། །མཚམས་མེད་ལྔ་ཡི་ལས་བསགས་མཐོལ་ལོ་བཤགས། །ཞེས་གསུངས་ཏེ། དེ་ལྟ་བུ་ལས་ངན་ཚབ་ཆེན་བསགས་ན་བར་མཚམས་མེད་པར་ཡུན་རིང་པོར་དམྱལ་མེས་འཚོད་པའི་ལས་ཐོག་མེད་ནས་ད་ལྟའི་བར་དུ་རང་གིས་བྱས་པ་དང་། གཞན་ལ་བྱེད་དུ་བཅུག་པ། གཞན་གྱིས་བྱས་པ་ལ་རྗེས་སུ་ཡི་རང་བྱས་པ་ཐམས་ཅད་གནོང་ཞིང་འགྱོད་པ་དྲག་པོས་མགོན་པོ་འོད་དཔག་མེད་དང་སྲས་བཅས་རྒྱལ་བའི་སྤྱན་སྔར་མཐོལ་ལོ་བཤགས་སོ། །མཚམས་མེད་ཕྱི་མ་གསུམ་སྟེ། དགྲ་བཅོམ་བསད་པ་དང་། རྒྱལ་བའི་སྐུ་ལ་ངན་སེམས་ཀྱིས་ཁྲག་འབྱིན་པ། དགེ་འདུན་འཁོར་ལོའི་དབྱེན་གསུམ་པོ་སངས་རྒྱས་སྐུ་དངོས་སུ་བཞུགས་མེད་པའི་ད་ལྟའི་སྐབས་སུ་མི་འབྱུང་ན་ཡང་། བདག་གིས་ཐོག་མེད་ནས་བྱས་པ་དང་སེམས་ཅན་གཞན་གྱིས་བྱས་པ་ཐམས་ཅད་ཀྱང་བདག་གིས་ཁུར་བླང་ན་ཕན་ཡོན་ཡོད་པ་རེད། དུས་སྙིགས་མའི་སྐབས་ལ་ཕ་མ་གསོད་མཁན་ཡོད་སྲིད། ཕ་མའི་ལུས་མ་བསད་ནའང་སེམས་བསད་དེ་ཕ་མ་ལས་ངན་འགའ་རེ་རང་སྲོག་རང་གིས་གཅོད་ལ་ཉེ་བ་དེ་མཚམས་མེད་ཀྱི་ལས་རེད་སྙམ། གལ་ཏེ་འཇིག་རྟེན་འདིར་རྒྱུ་ཟས་ཞིག་དང་ལས་ཀ་ཞིག་གིས་ཕ་མའི་དྲིན་ལན་གསད་དགོས་པའི་དབང་དུ་བྱས་ན་བུ་དེའི་ཕྲག་པ་གཅིག་ལ་ཕ་ཁུར་ཕྲག་པ་གཅིག་ལ་མ་ཁུར་ཏེ་ལོ་བརྒྱ་ཡི་བར་དུ་གླིང་བཞི་ལ་སྐོར་བ་བྱས་ཀྱང་ཕ་མའི་དྲིན་ལན་མི་སོད། ས་ཆེན་པོ་འདི་རིན་པོ་ཆེ་སྣ་ཚོགས་པས་བཀང་སྟེ་ཕ་མར་བྱིན་ནའང་དེའི་དྲིན་ལན་མི་སོད། རྔོན་ཟས་དང་རྐུ་ཟས་རྐུ་རྒྱུ་དཀོར་ཟས་ངན་པ་དེ་རྣམས་ཀྱིས་དྲིན་ལན་མི་སོད་པར་མ་ཟད་དྲིན་ལན་ལོག་འཇལ་བྱས་ཏེ་ངན་སོང་དུ་འཕེན་འཇོག་པ་རེད། འོ་ན་ཅི་བྱས་ན་དྲིན་ལན་སོད་པ་རེད་ཟེར་ན། ཕ་མ་ཆོས་སྒོར་བཙུད་ཐུབ་ན་དྲིན་ལན་སོད་པ་རེད། ཡང་ཕ་མ་ལ་ཆོས་བསླབས་བཞག་ཡོད་ཆོས་སྒོར་བཙུད་བཞག་ཡོད། ང་ནི་བླ་མ་མཁན་པོ་སྤྲུལ་སྐུ་ཆེ་གེ་མོ་ཞིག་ཡིན། ཕ་མས་ང་ལ་བརྩི་བཀུར་བྱེད་ན་དྲག་ས་ཡོད་བསམ་རྒྱུ་ཡོད་མི་རུང། གནའ་ཁྱིམ་བདག་ཞིག་ལ་བུ་མཁས་པ་སྡེ་སྣོད་གསུམ་ལ་བྱང་ཆུབ་པ་ཞིག་ཡོད། སྐབས་ཤིག་ལ་ཕ་རྒན་ཁྱིམ་བདག་རབ་ཏུ་བྱུང་སྟེ་ཕ་བུ་གཉིས་ཀ་རབ་བྱུང་རེད་སོང་། ཕ་རྒན་གྱིས་དགེ་འདུན་པའི་ལས་བྱས་ཏེ་ཉིན་གཅིག་དཀའ་ནས་བུ་ལ་ཁྱོད་ཀྱིས་ང་ལ་བསྙེན་བཀུར་ཞིག་གྱིས་དང་ཞེས་སྨྲས་པ། བུས་སྨྲས་པ། སྟོན་པས་སེང་གེ་ལྟ་བུས་ཝ་ལྟ་བུ་ལ་བསྙེན་བཀུར་མི་བྱའོ་གསུངས་པས་མི་རུང་ངོ་ཞེས་སོ། །ཕས་སྨྲས་པ། སེང་གེ་ལྟ་བུ་སུ། ཝ་ལྟ་བུ་སུ་ཞེས་དྲིས་པས། དགེ་སློང་གིས་སྨྲས་པ། ང་བུ་ཡིན་ཡང་ཚུལ་ཁྲིམས་དང་ལྡན་པས་སེང་གེ་ལྟ་བུའོ། །ཁྱོད་ཕ་ཡིན་ཡང་ཚུལ་ཁྲིམས་འཆལ་བས་ཝ་ལྟ་བུའོ་ཞེས་སྨྲས་སོ། །ཕ་རྒན་མ་དགའ་བར་ཕ་ངན་པ་ཝ་འདྲ་བ་ང་ལྟ་བུ་ལ། བུ་བཟང་པོ་སེང་གེ་འདྲ་བ་ཁྱོད་ལྟ་བུ་སྐྱེས་སམ་ཞེས་སྨྲས། བཅོམ་ལྡན་འདས་ཀྱིས་དེ་གསན་ནས། ཕ་མ་ཇི་ལྟར་ངན་ཡང་མཆོད་པར་བྱེད། མགུ་བར་བྱེད། བཀུར་སྟི་བྱ་དགོས་ཤེས་གསུངས། བླ་མ་གལ་ཆེ་བ་ནི་མདོ་སྔགས་གཉིས་ཀའི་ལུང་ཡིན་པ་རེད། ཁྱད་པར་དུ་མཁན་སློབ་བླ་མའི་སྐུ་ལ་བདོ་བ་ཉེ་བའི་དུས་རབས་འདི་ཚོས་ནང་དུ་ཡོད་མྱོང་བ་ཞིག་རེད། དེ་ལྟ་བུའི་ལས་ངན་དེ་ཚོ་ཞེ་ཐོག་ཏུ་བླང་སྟེ་རང་ཉིད་ཀྱིས་ཀྱང་སྔོན་མའི་སྐྱེ་བ་དེ་ཚོར་བྱས་ཡོད་སྲིད་པ་རེད་སྙམ་ནས་བཤགས་པ་བྱ། བླ་མ་བསད་པ་ཕར་ཞོག་བརྙས་བཅོས་དང་ལོག་ལྟ་ངན་སེམས་སོགས་སྐད་ཅིག་མ་ཙམ་སྐྱེས་ཀྱང་ངན་སོང་དུ་སྐྱེ་བ་ཡིན། གཉགས་ཛྙཱ་ན་ཀུ་མཱ་རས་ཁོང་གི་བླ་མ་ལས་བདག་མཁས་སོ་སྙམ་པ་ཙམ་གྱིས་ཁོང་གི་སྐུ་ཚེ་དེར་སྐུ་སྲོག་ལ་ཉེ་བའི་དགྲ་ལན་མ་བདུན་དུ་འཕྲད་པ་རེད། ཡང་བླ་མ་བྱ་བཏང་བ་ཞིག་ལ་སློབ་མ་ཞིག་ཡོད་པ་དེ་ཕྱི་རོལ་ཏུ་སོང་ནས་ཁྲོམ་མང་པོ་འདུས་ཏེ་ཁྲི་མཐོན་པོ་ཞིག་གི་སྟེང་དུ་བསྡད་ནས་ཆོས་བཤད་ཀྱིན་ཡོད་པའི་སྐབས་ཤིག་ལ། བླ་མ་བྱ་བཏང་བ་ཨ་ཅོའི་ཚུལ་ཅན་ཞིག་ཡིན་པས། དེའི་ཁྲོམ་གྱི་མཐའ་དེར་བྱོན་ནས་ཕྱག་ཅིག་མཛད། སློབ་མ་ཁྲི་སྟེང་གི་གདུགས་ཞབས་ན་ཡོད་པས་བླ་མས་ཕྱག་མཛད་པ་མཐོང་ཡང་ཁོ་བོ་ལང་བཞག་ན་མི་མང་པོའི་ནང་ནས་ཁོའི་ཆེ་བ་ཉམས་འགྲོ་བར་སེམས་ཏེ་མ་མཐོང་པའི་ཚུལ་བྱས། ཁྲོམ་ཚང་མ་གྲོལ་ཚར་དུས་བླ་མ་བསུས་ནས་ཕྱག་བྱས་པ་ན། བླ་མས་གསུངས་ཏེ། སྔར་བདག་གིས་ཕྱག་བྱེད་དུས་ཁྱོད་ཡར་ལང་བ་ཙམ་ཡང་མི་བྱེད་ན། ད་ཕྱག་འཚལ་ནས་ཅི་བྱེད་ཅེས་དྲིས་པས། སློབ་མ་སྐྲག་ནས་སྔར་ཁོས་མ་མཇལ་ལགས་ཞེས་རྗུན་ཞུས་པས། དེ་མ་ཐག་ཏུ་མིག་གཉིས་ཀ་ས་ལ་ལྷུང་བ་སོགས་ཀྱི་ལོ་རྒྱུས་ཡོད། གསང་སྔགས་ཀྱི་དབང་ལུང་ཁྲིད་གསུམ་མང་པོ་ཐོབ་པའི་བླ་མ་མ་ཟད་ཐ་ན་ཀློག་སློབ་པའི་སློབ་དཔོན་དང་ལུང་ཚིག་བཞི་ཞིག་ཐོབ་མྱོང་བ་ཡན་ཆད་ལ་གུས་པ་བྱ་དགོས། གུས་པ་མ་བྱས་ན་ཉེས་པ་ཆེ་སྟེ། རྒྱུད་ལས། གང་གིས་ཚིགས་བཅད་གཅིག་ཉན་པ། །དེ་ཡང་བླ་མར་མ་བཟུང་ན། །ཁྱི་ཡི་སྐྱེ་བ་བརྒྱ་བླངས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས་སོ། །ཕ་མ་དང་བླ་མའི་དྲིན་ལ་མི་བསམ་པའི་གང་ཟག་ལ་ལྷ་དང་སྲུང་མའང་བདུད་དུ་འགྱུར་བ་ཡིན། ཨོ་རྒྱན་ཆེན་པོས། ཕ་མ་བླ་མའི་དྲིན་ལ་མི་བརྩི་དུས། །ལྷ་དང་སྲུང་མ་བདུད་དུ་འབབ་པ་འབྱུང་། །ཞེས་སོ། །རང་རེས་ཆོས་ཁྲིད་འདི་རིང་ཆེ་འགྲོ་བས་དུས་ཚོད་གཅིག་གི་རིང་ལ་བཤད་ན་ཡག་པོ་ཡིན་རྒྱུ་རེད། དུས་ཚོད་གཉིས་འདྲ་ཞིག་འགོར་སོང་དུས་རིང་ཆེ་སོང་བ་རེད་མོད་ཞིང་ཁྲིད་འདི་ད་ལོ་ཐེངས་གཉིས་པ་རེད། ད་ལོ་མ་གཏོགས་ཕྱིན་ཆད་བཤད་རྒྱུ་མིན་པས་རྒྱས་རྒྱས་འདྲ་ཞིག་མ་བཤད་ན་མི་སྐྱ་ཕོ་མོའི་གོ་མི་ཐུབ་གི་བསམ་པ་ཡིན། ཉི་མ་མང་པོ་ཞིག་ལ་བཤད་ན་ཡང་ཁོམ་པ་ཡོད་རྒྱུ་མ་རེད། ཚང་མས་སྡུག་རུས་བྱས་ཏེ་ཉོན་དང་ཅུང་ཟད་ཅིག་འདོན། དེའི་ཡན་ཆད་ཉེས་པ་ལྕི་བ་བྱེ་བྲག་ཏུ་བཤགས་པའི་ནང་གི་མཚམས་མེད་ལྔའི་ལས་བཤགས་པ་སོང་ནས།

གཉིས་པ་ཉེ་བའི་མཚམས་མེད་ལྔའི་ལས་བྱས་པའི་སྡིག་པ་བཤགས་པ།

དགེ་སློང་དགེ་ཚུལ་བསད་དང་བཙུན་མ་ཕབ། །སྐུ་གཟུགས་མཆོད་རྟེན་ལྷ་ཁང་བཤིགས་ལ་སོགས། །ཉེ་བའི་མཚམས་མེད་སྡིག་བྱས་མཐོལ་ལོ་བཤགས། །ཞེས་གསུངས་ཏེ། དགེ་སློང་ཟེར་བ་འདི་ངེས་པར་འབྱུང་བའི་ཀུན་ནས་བསླངས་ཏེ་འགལ་རྐྱེན་ངེས་པ་ལྔ་བྲལ་གྱི་སྟེང་ནས་མཐུན་རྐྱེན་དད་པའི་དགེ་འདུན་གྲངས་ཚང་བའི་མདུན་ནས། ཚིགས་གསུམ་རིམ་ནོད་ཀྱི་ཉིས་བརྒྱ་ལྔ་བཅུའི་འདུལ་ཁྲིམས་ཚུལ་བཞིན་སྲུང་བར་ཁས་བླངས་ཏེ་བསྙེན་པར་རྫོགས་པ་དགེ་སློང་གི་དངོས་པོ་ཐོབ་ལ་མ་ཉམས་པའི་གང་ཟག་དེ་ལ་དགེ་སློང་ཞེས་བྱ། དགེ་ཚུལ་ཞེས་པ་ནི་ཚིགས་སྔ་མ་དགེ་བསྙེན་གྱི་སྡོམ་པའི་རྨང་གཞིའི་སྟེང་དུ་སྦྱོར་བ་བར་མ་རབ་བྱུང་སྒྲུབ་པའི་ཐོག་ཏུ་དངོས་གཞི་འགལ་རྐྱེན་བར་ཆད་ཀྱི་ཆོས་བཞི་དང་བྲལ་ཞིང་མཐུན་རྐྱེན་ལྔ་ཚང་བའི་སྒོ་ནས་སྐྱབས་འགྲོ་རྩོམ་བྱེད་དུ་བྱས་ཏེ་དགེ་ཚུལ་གྱི་བསླབ་པ་གཞི་བཅུ་ཁས་བླངས་པའི་སྡོམ་ལྡན་དགེ་ཚུལ་ཞེས་བརྗོད། དེ་ལྟར་དགེ་སློང་དགེ་ཚུལ་བསད་པ་དང་། བཙུན་མ་ཕབ་པ་འདི་བོད་ལ་བསམ་བློ་བཏང་ན་དགེ་ཚུལ་མ་སྡོམ་ལྡན་བསླབ་པ་མ་ཕུལ་མ་ཉམས་པ་བསླབ་པའི་གནས་ལས་ཉམས་པར་བྱེད་པའོ། །འདིའི་ཤུགས་བསྟན་ལ་བཙུན་པ་བསླབ་པ་ལས་ཉམས་པར་བྱེད་པའང་དེ་བཞིན་དུ་ཉེ་བའི་མཚམས་མེད་ཀྱི་ལས་སོ། །དགེ་ཚུལ་སློང་རྣམ་པར་དག་པ་ནི་སངས་རྒྱས་བསྟན་པའི་རྩ་བ་ཡིན་པས། དགེ་ཚུལ་སློང་བསད་ན་ཆོས་དང་དགེ་འདུན་གཉིས་ཀ་བཤིག་པའི་ཉེས་པ་ཡོད་ཅིང་། སྡོམ་ཁྲིམས་ལས་ཕབ་ན་དེ་ལྟར་དུ་ཉེས་པ་འབྱུང་ངོ། །སངས་རྒྱས་ཀྱི་ན་བཟའ་ངུར་སྨྲིག་གི་རྒྱལ་མཚན་འཆང་བ་ཞིག་བསད་ན་གསོད་པ་པོ་དཀོན་མཆོག་གསུམ་གྱི་སྐུ་དགྲ་རེད་འགྲོ་བ་རེད། གྲྭ་པ་གྲྭ་ཆས་མནབས་ཡོད་པ་ཞིག་ལ་ཞེ་ས་ཙམ་ཡང་མ་ཞུས་པར་ང་དང་ཁྱོད་ཅེས་སྨྲས་ན་ཉེས་པ་ཆེ་བ་རེད། བུ་ཚ་བོ་ཡིན་མ་ཡིན་ཡོད་པ་མ་རེད་གྲྭ་པ་དང་བཙུན་མ་ལ་ཁྱིམ་པས་ཞེ་ས་ཞུ་དགོས་པར་མ་ཟད། དེ་བཞིན་དུ་གྲྭ་པ་བཙུན་མ་ནང་ཕན་ཚུན་ལའང་ཞེ་ས་ཞུ་དགོས་པ་རེད། དེ་ནི་ཆོས་དང་བསླབ་པའི་ཆེ་བ་འདོན་བྱེད་རེད། དེས་ན་དགེ་འདུན་པ་ལ་གུས་པ་དང་དད་པ་བྱེད་པ་མ་གཏོགས་གནོད་པ་དང་ངན་སེམས་འཆང་མི་རུང་། ཞེ་ས་མ་ཞུས་ནའང་དགེ་འདུན་པ་ལ་ཅི་ཡང་ཐུབ་པ་མ་རེད་མོད་རང་ཉིད་ཀྱིས་དཀོན་མཆོག་གསུམ་ལ་མ་གུས་པའི་ཉེས་པ་བསགས་པ་ཡིན་ཏེ། མདོ་ལས། སེམས་ཅན་གང་ཞིག་དགེ་སློང་གོས་ངུར་སྨྲིག་གྱོན་པ་ལ་ངན་སེམས་བསྐྱེད་ན་མི་དེ་ནི་དུས་གསུམ་གྱི་སངས་རྒྱས་དང་རང་སངས་རྒྱས་དང་དགྲ་བཅོམ་པ་ལ་ངན་སེམས་བསྐྱེད་དེ། དུས་གསུམ་གྱི་འཕགས་པ་ལ་ངན་སེམས་བསྐྱེད་པས་སྡིག་པའི་ལས་ཁ་ན་མ་ཐོ་བའི་འབྲས་བུ་ཚད་མེད་པ་སྨིན་པར་འགྱུར་རོ། །ཞེས་གསུངས་སོ། །དགེ་སློང་དགེ་ཚུལ་བསད་དང་བཙུན་མ་ཕབ་ཟེར་བ་འདི་གོ་བ་ཞིབ་ཕྲ་བྱས་ཏེ་བླངས་ན། དགེ་ཚུལ་སློང་འདི་བྱང་སེམས་ངེས་གནས་དང་ཐེག་དམན་སློབ་པའི་འཕགས་པ་གང་རུང་ལ་གོ་རྒྱུ་དང་། དགེ་ཚུལ་སློང་མིན་ན་བྱང་སེམས་ངེས་གནས་དང་ཐེག་དམན་སློབ་པའི་འཕགས་པ་གང་རུང་ཡིན་ན་རབ་བྱུང་མིན་ཡང་འདིའི་གྲངས་སུ་བསྡུ་རྒྱུ་དང་། བཙུན་མ་ཡང་མ་དགྲ་བཅོམ་མ་སུན་ཕྱུང་བར་གོ་རྒྱུ་དེ་འདྲ་ཞིབ་ཕྲ་བྱས་ན་གོ་རྒྱུ་ཡོད་པ་རེད། སངས་རྒྱས་ཀྱི་སྐུ་གཟུགས་རས་སུ་བྲིས་པ་འབུར་དུ་དོད་པ་ལུགས་སུ་བླུགས་པ་ལ་སོགས་པ་སྐུའི་རྟེན། བདེ་བར་གཤེགས་པའི་མཆོད་རྟེན་ཡང་རས་སུ་བྲིས་པ་འབུར་དུ་དོད་པ་ལུགས་སུ་བླུགས་པ་ལ་སོགས་པ་ཐུགས་ཀྱི་རྟེན། སྐུ་གསུང་ཐུགས་རྟེན་བཞུགས་སུ་གསོལ་ས་དགེ་འདུན་འདུ་བའི་ལྷ་ཁང་དང་ཀུན་དགའ་ར་བ་ལ་སོགས་པ་གསུངས་པས། འདིའི་སོགས་ཁོང་གི་ནང་དུ་གསུང་རབ་གླེགས་བམ་ཆོས་ཀྱི་ཕུང་པོ་བཤིག་ན་ཉེས་པ་ཆེ་བ་རེད། འདུས་བྱས་ཀྱི་དགེ་རྩ་རྣམས་ལས་རྟེན་གསུམ་བཞེངས་རྒྱུ་འདི་ཕན་ཡོན་ཆེ་བ་ཡིན་པས། དེ་བཤིག་ན་ཉེས་དམིགས་ཀྱང་དེ་ལྟར་དུ་ཆེ་བ་མདོ་རྒྱུད་དུ་མ་ལས་གསུངས་སོ། །གསུང་རབ་ཡི་གེའི་གཟུགས་སུ་སྣང་བ་འདི་ཚོ་སངས་རྒྱས་ཀྱི་གཟུགས་སྐུ་ཆོས་སྐུ་རིང་བསྲེལ་གྱི་ཕུང་པོ་ཡིན། བཙོང་ནས་རིན་པ་རང་འདོད་གྱིས་ཟོས་ན་ཉེས་པ་ཆེ་བ་རེད། སངས་རྒྱས་བྱང་སེམས་ཀྱི་སྐུ་བརྙན་འདི་དག་ཀྱང་བཟོ་སྤྲུལ་སྐུའི་ཕྲིན་ལས་སུ་ཤར་བ། ཚོགས་ལམ་ཆོས་རྒྱུན་ཐོབ་པའི་གནས་སྐབས་ན་སྐུ་བརྙན་འདི་ཚོ་མཆོག་གི་སྤྲུལ་སྐུ་དངོས་སུ་མཐོང་བ་ཡིན་པ་རེད། དེས་ན་སངས་རྒྱས་ཀྱི་ཡོན་ཏན་ལ་བསམ་ནས་སྐུ་གཟུགས་ཀྱི་རྒྱུ་བཟང་ངན་ཅི་འདྲ་ཡིན་ཡང་དེའི་རིན་ཐང་གི་ཐོག་ནས་རྒྱུ་ནོར་གྱི་འདུ་ཤེས་མི་འཇོག་པར། སངས་རྒྱས་དངོས་ཀྱི་འདུ་ཤེས་འཇོག་དགོས། མཆོད་རྟེན་དང་སྐུ་འདྲ་གསར་བཞེངས་དང་རྙིང་པ་ཞིག་གསོ་བྱེད་ན་ཕན་ཡོན་ཆེ་སྟེ། སཱཙྪ་གཅིག་གིས་མི་གསུམ་སངས་རྒྱས་པའི་ལོ་རྒྱུས་ལྟར་རོ། །ཡང་གཏམ་རྒྱུད་ཅིག་བཤད་ན་སྟོན་པ་སངས་རྒྱས་མཉན་ཡོད་ན་བཞུགས་སྐབས་ཤིག་ལ། ཡུལ་མ་གཱ་དྷའི་ཁྱིམ་ཚང་ཞིག་ལ་བུ་ཁྱེའུ་ལྟ་ན་སྡུག་པ་ཞིག་སྐྱེས། བྱིས་པ་དེ་སྐྱེས་པ་དང་དེ་ཚང་གི་བང་མཛོད་ནང་ནས་གསེར་གྱི་གླང་པོ་ཆེའི་ཕྲུ་གུ་ཞིག་བྱུང་བས། བུའི་མིང་ལ་གླང་པོ་སྐྱོང་བཏགས། གླང་པོ་ཆེའི་རྟུག་པ་ཐམས་ཅད་གསེར་ཡིན་པ་རེད། བར་སྐབས་ཤིག་ལ་བུ་དང་གླང་པོ་ཆེ་གཉིས་ཀ་ནར་སོན། དེའི་སྐད་ཆ་དེ་རྒྱལ་པོ་མ་སྐྱེས་དགྲས་ཐོས་ནས། བདག་རྒྱལ་པོར་ནམ་གྱུར་པ་ན་དེ་དུས་གླང་པོ་ཆེ་འདི་འཕྲོག་པར་བྱའོ་སྙམ་སྟེ། རྒྱལ་བུ་མ་སྐྱེས་དགྲས་ལྷས་བྱིན་དང་གཉིས་ཀ་ཁ་བརྡུངས་ཏེ་ཕ་བསད་པས་མཚམས་མེད་ཀྱི་ལས་བྱས། ཕ་རྒྱལ་པོ་ཡིན་པ་དེ་བསད་ནས་ཁོ་རང་དེའི་རྒྱལ་སར་འབྱོར་ཏེ་ཉིན་ཞིག་གླང་པོ་སྐྱོང་མདུན་དུ་ཤོག་ཅེས་བརྡ་རྒྱབ་པ་རེད། གླང་པོ་སྐྱོང་དེའི་མདུན་དུ་སོང་བས་ཁྱོད་ཀྱི་གླང་པོ་ཆེ་འདིར་ཕུལ་ལ་སོངས་ཤིག་ཅེས་སྨྲས། གླང་པོ་སྐྱོང་གིས་རྒྱལ་པོའི་བཀའ་བཞིན་དུ་གླང་པོ་ཆེ་རྒྱལ་པོའི་ཕོ་བྲང་གི་ནང་དུ་ཕུལ་ནས་ཕྱིར་སོང་བ་དང་། དུས་ཡུན་རིང་པོར་མ་འགོར་བར་གླང་པོ་ཆེ་ས་འོག་ཏུ་ནུབ་ནས་གླང་པོ་སྐྱོང་ཡོད་སའི་ས་སྟེང་དུ་བུད་དེ་གཉིས་ཀ་མཉམ་དུ་ཁྱིམ་ལ་ཕྱིན་པ་ན། གླང་པོ་སྐྱོང་གིས་བསམ་བློ་ཞིག་བཏང་ནས་རྒྱལ་པོ་མ་སྐྱེས་དགྲ་རྒྱལ་སྲིད་ཆོས་བཞིན་སྐྱོང་བའི་རྒྱལ་པོ་ཞིག་མ་ཡིན་གྱི་རང་གི་ཕ་ཡང་གསོད་པར་བྱེད་ན་གཞན་ལྟ་ཅི་སྨོས། དེས་ན་གླང་པོ་ཆེ་འདིའི་དོན་དུ་སྲོག་ཤོར་བའི་ཉེན་ཁ་ཡོད་རྒྱུ་རེད། དེ་བས་སངས་རྒྱས་བཅོམ་ལྡན་འདས་ལ་སྐྱབས་སུ་འགྲོ་བར་བྱའོ་སྙམ་ནས། ཁྱེའུས་ཕ་མར་གནང་བ་ཞུས་ཏེ་གླང་པོ་ཆེ་ཉིད་ལ་ཞོན་ནས་རྒྱལ་བའི་རྒྱལ་བྱེད་ཀྱི་ཚལ་དུ་སངས་རྒྱས་བཅོམ་ལྡན་འདས་ཀྱི་སྐུ་མདུན་ལ་སོང་ངོ་། བཅོམ་ལྡན་འདས་ལ་རབ་ཏུ་བྱུང་བར་ཞུས་པས། ཁོ་རང་ལ་ངེས་འབྱུང་ཡང་ཡོད་པས། སྟོན་པས་ཚུར་ཤོག་གིས་བསྙེན་པར་རྫོགས་ཏེ་ཆོས་བསྟན་ནས་དགྲ་བཅོམ་པའི་གོ་འཕང་ཐོབ། གསེར་གྱི་གླང་པོ་ཆེ་དེ་ཡང་རྒྱུན་དུ་དྲུང་ན་ཡོད་པས་མཉན་ཡོད་པ་ཐམས་ཅད་གསེར་གྱི་གླང་པོ་ཆེ་དེ་ལ་བལྟ་བའི་ཕྱིར་འདུས་ཏེ་འདུ་འཛི་མང་བར་གྱུར་པ་ན། བཅོམ་ལྡན་འདས་ཀྱིས་དགེ་སློང་གླང་པོ་སྐྱོང་ལ་ཁྱོད་རང་གིས་གླང་པོ་ཆེ་མྱུར་དུ་སྤོངས་ཤིག་ཅེས་བཀའ་སྩལ་པས། དགེ་སློང་གིས་སྨྲས་པ། བདག་གིས་སྔ་མོ་ནས་འདི་སྤོང་བསམ་ཀྱང་། འདི་ཡུལ་གཞན་དུ་འགྲོ་རོགས་བྱེད་མཁན་ཞིག་མ་རེད་ཅེས་ཞུས་ཚེ། ཁྱོད་རང་གིས་གླང་པོ་ཆེ་ལ་ང་ཕྱིན་ཆད་སྐྱེ་བ་མི་ལེན་པས་ཕྱིན་ཆད་ཁྱོད་མི་དགོས་ཞེས་ལན་གསུམ་སྨོས་ཤིག་དང་མེད་པར་འགྱུར་རོ་ཞེས་གསུངས་པས། དགེ་སློང་གིས་ཀྱང་དེ་ལྟར་སྨྲས་པས་གླང་པོ་ཆེ་ས་འོག་ཏུ་ནུབ་བོ། །དེར་དགེ་སློང་ཐམས་ཅད་ངོ་མཚར་དུ་གྱུར་ནས་བཅོམ་ལྡན་འདས་ལ་དེའི་ལས་ཀྱི་རྒྱུ་དྲིས་ཚེ། བཅོམ་ལྡན་འདས་ཀྱིས་སྔོན་སྐྱེ་དགུ་རྣམས་ཚེ་ལོ་ཉི་ཁྲི་ཐུབ་པའི་སྐབས་ཤིག་ལ་སངས་རྒྱས་འོད་སྲུང་འཇིག་རྟེན་གྱི་ཁམས་སུ་བྱོན་ནས། དེ་མྱ་ངན་ལས་འདས་པའི་འོག་ཏུ་རིང་བསྲེལ་གྱི་མཆོད་རྟེན་མང་དུ་བྱས་པ་ལས། མཆོད་རྟེན་གཅིག་གི་ནང་དུ་བྱང་ཆུབ་སེམས་དཔའ་ཐོག་མར་དགའ་ལྡན་གྱི་གནས་ནས་ཡུམ་གྱི་ལྷུམས་སུ་གཤེགས་དུས་ཀྱི་གླང་པོ་ཆེའི་གཟུགས་ཤིག་ཡོད་པ་དེ་ཕྱིས་སུ་ཅུང་ཟད་ཅིག་ཞིག་པར་གྱུར་བ་དང་། སྐྱེ་བོ་དད་པ་ཅན་ཞིག་གིས་མཐོང་ནས་འཇིམ་པས་སླར་གསོས་ཏེ་ལྡོང་རོས་ཀྱིས་བྱུགས་ནས་བདག་མ་འོངས་པའི་དུས་སུ་རྟག་ཏུ་ཆོ་རིགས་བཙུན་ཞིང་ལོངས་སྤྱོད་ཟད་མི་ཤེས་པ་དང་ལྡན་པར་ཤོག་ཅིག་ཟེར་ནས་སྨོན་ལམ་བཏབ་བོ། །མི་དེ་ཚེ་འཕོས་ནས་མཐོ་རིས་ཀྱི་ལྷར་སྐྱེས་ཤིང་། དེ་ནས་མིའི་འཇིག་རྟེན་དུ་སྐྱེས་ཤིང། གང་དུ་སྐྱེས་ཀྱང་ཆོ་རིགས་བཙུན་ཞིང་ལོངས་སྤྱོད་དང་ལྡན་པར་མ་ཟད། གཟུགས་མཛེས་ཤིང་ཁྱད་དུ་འཕགས་པ་གསེར་གྱི་གླང་པོ་ཆེ་ཞིག་གིས་འབྲལ་མེད་དུ་སྲུང་བར་གྱུར་ཏོ། །དེའི་སྐྱེ་བ་རྗེས་མ་གླང་པོ་སྐྱོང་འདི་ཡིན་ཏེ། དེའི་ཚུན་ཆད་དུ་ལྷ་མི་གང་དུ་སྐྱེས་ཀྱང་ལོངས་སྤྱོད་ཆེན་པོ་དང་ལྡན་པར་གྱུར་ཅིང་། དཀོན་མཆོག་གསུམ་ལ་གུས་ཤིང་བསྟི་བསྟང་བྱས་བའི་འབྲས་བུ་ད་ལྟ་ང་དང་འཕྲད་དེ་ངའི་བསྟན་པ་ལ་རབ་ཏུ་བྱུང་ནས་དགྲ་བཅོམ་ཐོབ་སོང་བ་རེད་གསུངས་སོ། །སྐུ་གཟུགས་མཆོད་རྟེན་ལ་བསམ་པ་རྣམ་དག་གིས་ཞབས་ཞུ་བསྒྲུབ་ན་དེ་ལྟར་ཕན་ཡོན་ཆེ་ཞིང་། དེ་ལྟར་བཤིག་ནའང་ཉེས་པ་ཆེ་བས། དེ་ལྟ་བུ་ཉེ་བའི་མཚམས་མེད་ཀྱི་ལས་ཐོག་མེད་ནས་རང་གཞན་སེམས་ཅན་ཐམས་ཅད་ཀྱིས་བསགས་པ་ཐམས་ཅད་མཐོལ་ལོ་བཤགས་གསུངས་སོ།།

གསུམ་པ་ཆོས་སྤོང་གི་ལས་བསགས་པའི་སྡིག་པ་བཤགས་པ།

དཀོན་མཆོག་ལྷ་ཁང་གསུང་རབ་རྟེན་གསུམ་སོགས། །དཔང་ཞེས་ཚད་བཙུགས་མནའ་ཟོས་ལ་སོགས་པ། །ཆོས་སྤངས་ལས་ངན་བསགས་པ་མཐོལ་ལོ་བཤགས། །ཞེས་གསུངས་ཏེ། སྐྱབས་ཀྱི་མཆོག་སངས་རྒྱས་ཆོས་དང་དགེ་འདུན་ཏེ་དཀོན་མཆོག་རིན་པོ་ཆེ་རྣམ་པ་གསུམ་གྱི་རྟེན་གསུམ། ཁྱད་པར་དུ་སྐྱེ་དགུའི་བསོད་ནམས་ཀྱི་ཞིང་ས་ལ་བཞུགས་སུ་གསོལ་བའི་ལྷ་ཁང་དང་གདན་ས་ཁྱད་པར་ཅན། གསུང་རབ་རྒྱལ་བའི་བཀའ་འགྱུར་དང་བསྟན་འགྱུར་ཆེན་པོ་ལ་སོགས་པ་གསུངས་བས། སོགས་ཁོངས་ན་ཡུལ་གཉན་པོ་བླ་མ་དགེ་བའི་བཤེས་གཉེན་དམ་པ་དེ་ལ་ཚད་བཙུགས་ཏེ་མནའ་བསྐྱལ་བ་དང་། ཁྱབ་སའི་ཐད་ནས་ཉི་ཟླ་འཛམ་གླིང་ལ་ཤར་བའི་ཁྱོན་དང་གནམ་སྔོན་པོའི་ཁ་འོག་ཟེར་བ་འདྲ་བ། སྡིག་པ་ཆེ་སའི་ངོས་ནས་བཤས་ར་ཁྲིམས་ར་ལ་ཚད་ལེན་རྒྱུ་དེ་ཚོ་ཡིན་པ་རེད། དཀོན་མཆོག་གསུང་རབ་རྟེན་གསུམ་དེ་ཚོ་དཔང་ལ་འཇོག་པ། ཡུལ་གཉན་པོ་ཚད་ལ་འཇོག་པ། དཔང་པོ་དང་ཚད་ལ་བཞག་པ་ཙམ་ཏུ་མ་ཟད་དཔང་པོ་བཞག་པའི་གཏམ་ཐོག་ལ་མི་གནས་པར་མནའ་ཟོས་ཏེ་བསླུས་པ་དང་། དཔང་ཞེས་ཚད་བཙུགས་མནའ་ཟོས་ལ་སོགས་པ་གསུངས་པའི་སོགས་ཁོངས་ཀྱི་ནང་དུ་རྒྱལ་བའི་བསྟན་པ་ཆགས་སྡང་རང་འགའ་བས་དཀྲུག་སྟེ་ཁ་ཕྱི་ལྟའི་ཐོས་པ་ཕྱོགས་རེ་བ་ཞིག་གིས་ཡས་མི་འཐད་མས་མི་འཐད་ཅེས་ཐམས་ཅད་ལ་འགལ་འདུ་ཅན་ཁོ་ནར་བཟུང་ནས་ལོང་བས་གཟུགས་ལ་སྦྱར་བ་ལྟ་བུར་རང་གི་ཕྱོགས་ལ་བསྟོད། གཞན་གྱི་ཕྱོགས་ལ་སྨད། གཞུང་ལུགས་ཐམས་ཅད་འགལ་འདུ་ཁོ་ནར་མཐོང་། །ཆགས་སྡང་གི་དབང་གིས་རང་གཞན་ཕྱོགས་སུ་རྩོད། །ཁྱད་ཆོས་དཔྱོད་ལྡན་ཆོས་སྤོང་ལས་ངན་བསགས། ཐ་སྙད་དོན་ལ་རྩོད་པ་རྣམ་པར་འཕེལ། །ཞེས་གསུངས་པ་ལྟར། འཆལ་བའི་ཤེས་རབ་ཀྱིས་ཡང་དག་གཞལ་བ་བྱེད་པར་རློམ་ཀྱང་ལོག་པའི་ལམ་ལ་འབྲེལ་ཏེ་ཆོས་ལ་བསྟེན་ནས་ཆོས་མིན་འཕེལ་བར་བྱེད་པ་ཡོད་པ་རེད། དཔལ་སྤྲུལ་རིན་པོ་ཆེས། ལྔ་རིག་སྣང་བའི་ཉིན་བྱེད་ས་པན་རྗེ། །མདོ་སྔགས་ལེགས་བཤད་འབྱུང་གནས་ཙོང་ཁ་བ། །ཡོངས་རྫོགས་བསྟན་པའི་མངའ་བདག་ཀློང་ཆེན་ཞབས། །གངས་ལྗོངས་འཇམ་པའི་དབྱངས་དངོས་རྣམ་གསུམ་ཡིན། །ཞེས་སོ། །ཕྱོགས་ལྷུང་གདོན་གྱི་དབང་དུ་མ་གྱུར་པའི། །རྣམ་གསུམ་མཁས་པའི་གཞུང་ལ་ལེགས་སྦྱོང་ན། །ཡོངས་རྫོགས་རྒྱལ་བའི་བསྟན་པ་རིན་པོ་ཆེ། །ཇི་སྙེད་གཟུངས་དང་སྤོབས་པའི་ཡུལ་དུ་འགྱུར། །ཞེས་གསུངས་པ་ལྟར་བྱས་ན་གཞུང་ལུགས་ཐམས་ཅད་གདམས་པར་ཤར་ཐུབ་པ་རེད། ཡང་འགའ་རེས་ནང་པ་སངས་རྒྱས་པའི་ཐེག་གསུམ་དམ་པའི་ཆོས་ཀྱི་ནང་དོན་ཕྱོགས་ཙམ་ཡང་མ་གོ་ཞིང་ནང་རིག་པའི་སྒོ་ནང་དུ་གཏན་ནས་འཛུལ་མ་མྱོང་བ་ཞིག་གིས་ཞིབ་འཇུག་གི་ཚུལ་བྱས་ཏེ་མི་ཁར་བརྒྱུགས་ནས་ལོག་པར་ལྟ་བའི་ཕྱོགས་བཟུང་བ་དེ་ཚོ་ལ་གསུངས་པ་རེད། དེ་ལྟ་བུའི་ལས་དེ་ནི་ཆོས་སྤོང་བའི་ལས་ཡིན། ལས་དེའི་ངན་སོང་དམྱལ་བའི་སྡུག་བསྔལ་མུ་མཐའ་མེད་པ་མྱོང་དགོས་པས་ན། བདག་སོགས་སེམས་ཅན་ཐམས་ཅད་ཀྱི་དུས་ཐོག་མེད་ནས་ད་ལ་ཐུག་གི་བར་དུ་དེ་ལྟ་བུའི་ལས་བསགས་ཚད་བཤགས་པ་ཡིན་ཞེས་གསུངས་པ་རེད། དེའི་སྟེང་དུ་མནའ་བསྐྱལ་ན་ཉེས་པ་ཆེ་ཞིང་། མནའ་ཟ་བ་དེ་བས་ཀྱང་ཉེས་པ་ཆེ་བ་རེད། གང་ལ་ཚད་བཙུགས་ན་དེ་སྤོང་བ་ཡིན་ཞེས་པའི་དོན་རེད། དཔེར་ན་དཀོན་མཆོག་གསུམ་ལྟ་བུ་ཞིག་ལ་ཚད་བཙུགས་ན་དཀོན་མཆོག་གསུམ་སྤངས་ཚར་བ་རེད། དཀོན་མཆོག་གསུམ་གྱིས་ཁྱོད་སྤོང་བ་མ་རེད་མོད། ཁྱོད་རང་གིས་དཀོན་མཆོག་སྤོང་བཞག་པ་རེད། དེའི་སྟེང་ནས་ཁྱོད་དཀོན་མཆོག་གསུམ་གྱི་སྐྱབས་འོག་ནས་བུད་སོང་བ་རེད། དོན་ངོ་མ་བཤད་ན་དེའི་ཐོག་ནས་ཆོས་པ་ངོ་མ་ཞིག་གིས་སྟོན་པ་གཅིག་གི་སྐྱབས་འོག་ལས་འདས་སོང་བ་ཞིག་དང་མཆོག་གསུམ་དཔང་ལ་འཇོག་མཁན་ཞིག་དང་འགྲོག་ན་སྐྱབས་འགྲོའི་བསླབ་བྱ་ལས་ཉམས་འགྲོ་བ་རེད། མི་འགའ་རེས་དེ་མི་ཤེས་པར་མནའ་ཞེས་པ་ནི་གནད་ཆེན་ཞིག་ཡིན་མིན་དང་མནའ་ཡི་ནང་དོན་ཅི་ཡིན་ཙམ་ཡང་ཤེས་པ་མ་རེད། རང་གི་ཁ་ནང་ནས་མནའ་བསྐྱལཨེ་ཡོད་ཀྱང་གོ་ཁི་ཡོད་པ་མ་རེད། མ་རབས་མང་སའི་ས་ཆ་ནས་མནའ་དང་སྐད་ཆ་གཉིས་ཀ་གཅིག་དུ་འདྲེས་ཤོར་ཏེ་མནའ་མེད་ན་གོ་བརྡ་འཕྲོད་བྱེད་ཀྱི་སྐད་ཆ་བཤད་མི་ཤེས་པ་དེ་འདྲའི་ཐབས་སྡུག་གི་ཚད་ལ་ལྷུང་གི་ཡོད་པ་རེད། བཀའ་བསྟན་འགྱུར་ལ་ཚད་བཙུགས་མཁན་ཚོས། བཀའ་བསྟན་འགྱུར་ཞལ་ཕྱེ་ཙམ་ཡང་མ་མྱོང་བའི་སྟེང་དུ་དེ་དཔང་པོར་བཞག་ན་དེ་བསླུས་ཏེ་སྤོང་མཁན་ཚོ། མ་སྤོང་ན་ཡང་སྤོང་བཞག་པ་འདྲ་ཞིག་ཡིན་པའི་ཐོག་ལ་སྤོང་ཞེས་དམྱལ་བར་རིམ་པ་བཞིན་སྐྱེ་བ་ལ་དེ་འདྲའི་སྔ་ཕྱི་ཅི་ཡོད། འབུམ་དུམ་པ་དང་ཡུམ་དུམ་པ་འགའ་རེས་གསེར་ཡུམ་ཞེས་བསྐྱལ་བ་ལས། ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་པ་ཤེར་ཕྱིན་ཡུམ་སྲས་བཅུ་བདུན་གྱི་དགོངས་དོན་རྟོགས་པར་ཤོག་ཟེར་ནས་སྨོན་ལམ་འདེབས་པས་དགའ་བ་རེད་འདེང་ཞིག་རྒྱོབ་དང་དེ་སྤངས་ནས་ཚུར་ལ་ལོན་རྒྱུ་དེ་ཅི་ཞིག་རེད། ཁྲེལ་མེད་སྡིག་ལས་སེམས་ཅན་ལ་གནོད་པ་སྐྱེལ་བྱེད་ཀྱི་ལས་ཀྱི་ཕན་ལ་འགྲོ་ས་ཡོད་པ་མ་རེད། ཤར་ཉི་ཟླ། ནམ་མཁའ་སྔོན་པོ། བླ་མའི་སྐུ་སྲོག་དགོན་པ་གང་ཆེ། བཤས་ར་གང་སྡུག་དེ་ཚོ་ཐམས་ཅད་ཚད་ལ་བཞག་ནས་དེ་རྣམས་ཀྱི་སྡིག་པ་ཁུར་ཟེར་དུས། ལར་རང་གི་སྡིག་པ་མི་ཁྱག་པར་དམྱལ་བ་ལ་སང་འགྲོ་གནངས་འགྲོ་ཞིག་ཡིན་ན། རྣམ་ཤེས་སྟེང་གི་ས་སྤུང་ཁམས་གསུམ་སེམས་ཅན་གྱི་སྡིག་པ་ཁྱག་རྒྱུ་ཨེ་རེད། མནའ་ཟོས་ན་སྡིག་པ་ཆེ་བར་མ་ཟད་མནའ་བསྐྱལ་ནའང་སྡིག་པ་ཆེ་བ་རེད། མཆོད་འོས་དམ་པའི་མཚན་དད་དང་གུས་པའི་སྟེང་ནས་གསོལ་བདེབས་སྨོན་ལམ་གྱི་ཚིག་དང་སྦྲགས་རྒྱུ་ཞིག་རེད་མ་གཏོགས། བཤས་ར་བཙོན་ཁང་ཆང་ཁང་སྦག་ཁང་ཁ་ཤགས་ཚོང་གཏམ་བྱེད་ས་སྡུག་རིགས་སྡུག་ཚད་ལས་ས་ནས་སྒྲོག་རྒྱུ་ཞིག་མ་རེད། ཁྱད་པར་དུ་གྲྭ་པ་དང་བུད་མེད་ཀྱིས་མནའ་བསྐྱལ་བས་གཙོག་ཅིག་ཅི་ཡོད། སྐྱེས་པ་དགེ་བསྙེན་གྱིས་ཀྱང་མནའ་སྐྱལ་མི་རུང། ཕོ་སར་དགེ་སྡིག་གཉིས་ཀ་ངོ་མི་ཤེས་བ་ཚོའི་མནའ་མ་སྐྱེལ། གཏམ་གྱི་གོ་མི་ཆོད་ས་ནས་མནའ་ཡིས་གོ་ཆོད་པ་མ་རེད། རྫུན་རྐྱལ་མནའ་ཟན་མིན་པ་ཞིག་དཀོན་པ་རེད། དེས་ན་རང་ལེགས་སུ་འདོད་མཁན་ཞིག་ཡིན་ཕྱིན་རང་རྒྱུད་ལ་བྱི་དོར་བརྟགས་དཔྱད་བྱས་ཏེ་ཆོས་སྤོང་གི་ཕྱོགས་སུ་གཏོགས་པའི་ལས་དེ་ཚོ་སྤོང་ན་གནས་སྐབས་དང་མཐར་ཐུག་ལ་བདེ་ནས་བདེ་བའི་ལམ་དུ་འགྲོ་བའོ།།

བཞི་པ་བྱང་སེམས་ལ་སྐུར་འདེབས་ཀྱི་སྡིག་པ་བཤགས་པ།

ཁམས་གསུམ་སེམས་ཅན་བསད་ལས་སྡིག་ཆེ་བ། །བྱང་ཆུབ་སེམས་དཔའ་རྣམས་ལ་སྐུར་བ་བཏབ། །དོན་མེད་སྡིག་ཆེན་བསགས་པ་མཐོལ་ལོ་བཤགས། །ཞེས་གསུངས་ཏེ། སེམས་ཅན་གཅིག་གི་སྲོག་བཅད་ན་སྡིག་པ་ཆེ་བ་ནི་གོང་གི་སྲོག་གཅོད་ཀྱི་སྐབས་ནས་བཤད་པ་ལྟར་རོ། །ཁམས་གསུམ་ན་སེམས་ཅན་ཅི་འདྲའི་མང་རྒྱུ་རེད། དེ་ཐམས་ཅད་ཀྱི་སྲོག་བཅད་ན་སྡིག་པ་ལ་གཞལ་ཐབས་ཤིག་ཡོད་ས་མ་རེད་མོད། དེ་བས་ཀྱང་སྡིག་པ་ཆེ་བ་དེ་གང་ཡིན་ཞེ་ན། ཁམས་གསུམ་གྱི་སེམས་ཅན་བསད་པ་བས་བྱང་ཆུབ་སེམས་དཔའ་གཅིག་ལ་ཁས་སྐུར་བ་ཞིག་བཏབ་ན་ཉེས་པ་ཆེ་ཞེས་གསུངས་ཏེ། མདོ་ལས། བྱང་ཆུབ་སེམས་དཔའ་ལྟ་ཅི་ཐེག་པ་ཆེན་པོར་མོས་པ་ལ་ཁོང་ཁྲོ་བའི་སེམས་སྐྱེས་དེ་གཤེ་བ་དང་། མི་སྙན་པར་སྨྲས་ན་མཆོད་རྟེན་གང་གཱའི་ཀླུང་གི་བྱེ་མ་སྙེད་བཤིག་པ་ལས་སྡིག་པ་ཆེ་བར་གསུངས་སོ། །བྱང་ཆུབ་སེམས་དཔའ་དང་བྱང་ཆུབ་སེམས་དཔའི་སྤྲུལ་བ་གང་ན་བཞུགས་ཡོད་ཅི་ཤེས། དེ་འདྲ་མི་ཤེས་བ་ཞིག་གིས་སྣང་ཚུལ་ལ་བལྟས་ཏེ་སྐུར་བ་འདེབས་མི་རུང་། བྱང་ཆུབ་སེམས་དཔའ་འགྲོ་བའི་དོན་ལ་ངེས་མ་ངེས་སྣ་ཚོགས་ཀྱི་སྐྱེ་བ་བཞེས་ཏེ་འགྲོ་དོན་མཛད་ཀྱིན་ཡོད་པ་རེད། བྱ་དང་རི་དྭགས་གྲོང་ཁྱེར་སློང་མོ་བ་ཏིལ་རྡུང་ཆང་འཚོང་ལ་སོགས་པའི་ཚུལ་མཛད་པའང་ཡོད། བླ་སེར་གྱི་ནང་ན་དེ་བས་མང་པོ་ཡོད་ངེས་པ་ཡིན་ལ། ཁྱད་པར་དུ་ང་ཚོ་བོད་གངས་ཅན་དུ་ཐེག་ཆེན་མདོ་སྔགས་ཀྱི་ཆོས་དར་ས་ཡིན་པས་མང་ཆེ་བ་ཐེག་ཆེན་ལ་མོས་པའི་རིགས་ཅན་ཡིན་པས་སུ་ཡིན་ཡང་སྨད་ཅིང་སྐུར་བ་བཏབ་ན་ཉེས་པ་འབྱུང་བ་དང་། དགེ་བསྙེན་ཡན་ཆད་དུ་བྱང་ཆུབ་སེམས་སྡོམ་མ་བླངས་བ་མེད་པས་སུ་ཡིན་ན་སྐུར་བ་འདེབས་མི་རུང་བར་མ་ཟད་དད་པ་བཞག་ན་བྱིན་རླབས་འབྱུང་ངེས་ཅན་ཡིན་པ་རེད། ངན་པ་ཁོ་ན་ལ་བསམ་བློ་བཏང་ན་སྣང་བ་ངན་པར་ཤར་ནས་བར་གཅིག་སངས་རྒྱས་ཚོ་སྐྱོན་ཅན་དུ་མཐོང་བ་རེད། དག་སྣང་སྦྱངས་ནས་བཟང་པོ་ཁོ་ན་ལ་བསམ་བློ་བཏང་ན་ཐམས་ཅད་དག་པ་ཤ་སྟག་ལ་ཤར་ཏེ་རྒན་མོའི་ཁྱི་སོ་ལ་རིང་བསྲེལ་འཁྲུངས་པ་ལྟ་བུ་ཕན་པ་བྱིན་རླབས་རང་ཉིད་ལ་འབྱུང་། དང་པོ་དད་པ་བཞག་སྟེ་བླ་མ་ལ་བསྟེན་ཚར་ཕྱིན་ཕྱིས་སུ་སྐྱོན་སྣ་རེ་མཐོང་ན་ཡང་སྐུར་བ་འདེབས་མི་རུང། སྔར་གྱི་རྒྱུ་འབྲས་ཆུད་ཟར་འགྲོ་བ་རེད། ལར་སུ་ལ་ཡིན་ན་སྐུར་བ་མ་འདེབས་སྐྱུར་ཞོག་དང་རང་ཉིད་ལ་གནོད་པ་ཡོད་པ་མ་རེད། ཇོ་བོ་རྗེས། ཀུན་ལ་སྐུར་བ་མི་གདབ་སྟེ། །གང་མོས་དེ་ལ་འདུན་པར་བྱ། །ཞེས་གསུངས་ཏེ། །ཐམས་ཅད་ལ་སྐུར་བ་མ་འདེབས་རང་གང་ལ་མོས་ན་དེ་ལ་དད་པ་གྱིས་དང་རེད་ཡོད་གསུངས་པ་རེད། དཔལ་སྤྲུལ་ཚང་གིས། བསྟོད་སྨད་གཉིས་ཀ་མི་ཉན་པ་གསུམ་ཡོད་དེ་གསུངས་པ་ལྟ་བུ་རེད། དེ་ལྟར་དུ་དགེ་འདུན་པ་ལ་སྐུར་བ་འདེབས་ཉན་པ་མ་རེད། ཁྱད་པར་དུ་དགེ་འདུན་པ་སྤྱི་ལ་འདིའི་གྲྭ་པ་འདི་ཚོས་ཁོང་ན་མེད་རབས། དགོན་པ་ག་གེ་མོ་ཞིག་གི་གྲྭ་པའི་ཁོང་ན་མེད་རབས་དེ་འདྲ་བཤད་མི་རུང། གང་ཟག་རེ་རེ་གཉིས་རེའི་སྤྱོད་ངན་དགེ་འདུན་པ་སྤྱི་ཁྱབ་ལ་བཀལ་ན་ཉེས་པ་ལྷག་པར་ཆེ་བ་རེད། མོའུ་འགལ་གྱི་བུ་དམྱལ་བའི་ཡུལ་དུ་བྱོན་སྐབས་ཤིག་ལ། མི་ཞིག་གི་ལུས་པོ་དཔག་ཚད་གཅིག་ཙམ་ཡོད་པ་ཞིག་གི་ལྕེ་དཔག་ཚད་གཅིག་ཙམ་ཞིག་བརྒྱངས་ཏེ། དེའི་སྟེང་དུ་ཐོང་གཤོལ་མང་པོས་རྨོས་རྨོད་ཀྱིན་ཡོད་པ་གཟིགས་ཏེ། དེ་ལས་ཅི་ཡིན་བརྟགས་པས་སྐྱེ་བ་མང་པོ་ནས་མང་པོ་ཞིག་ལ་དམྱལ་བ་ཤ་སྟག་བརྒྱུད་ཀྱིན་བསྡད་པ་མ་གཏོགས་ཡར་གྱི་ཕུགས་གང་ཡིན་མ་གཟིགས་པས། དེ་སངས་རྒྱས་བཅོམ་ལྡན་འདས་ལ་ཞུས་པས། དེ་སངས་རྒྱས་འོད་སྲུང་གི་དགེ་འདུན་ལ་མི་འདིས་ཚུལ་ཁྲིམས་འཆལ་བ་འདི་རྣམས་ཟེར་བ་ལ་སོགས་པ་དགེ་འདུན་སྤྱི་ཁྱབ་ལ་བསྐུར་བ་བཏབ་པའི་ལས་ཡིན་པ་རེད། འདི་སྐྱེ་བ་ལྔ་བརྒྱའི་ཐ་མ་རེད་ད་དུང་སངས་རྒྱས་མང་པོའི་སྐུ་ཚེ་ལ་ཐར་རྒྱུ་ཡོད་པ་མ་རེད་ཅེས་གསུངས་པ་ལྟར་རེད། ཁྱད་པར་དུ་དོན་དག་ཆེན་པོ་མེད་ས་ནས་མི་ཁར་རྒྱུགས་པ་ལ་སོགས་པའི་རྐྱེན་གྱིས་སྐུར་བ་བཏབ་ནས། སྐྱེ་བ་ནས་ཚེ་རབས་རྣམས་སུ་རང་གཞན་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་དང་འཕགས་པའི་དགེ་འདུན་རྣམས་ལ་དོན་མེད་སྐུར་འདེབས་བྱས་པའི་སྡིག་པ་དང་སྒྲིབ་པ་ཐམས་ཅད་མཐོལ་ལོ་བཤགས་སོ་གསུངས། ཁམས་གསུམ་སེམས་ཅན་བསད་ལས་སྡིག་ཆེ་བ། །ཞེས་པའི་གོ་དོན་ཞིབ་ཕྲའི་ཐོག་ནས་བཤད་ན། བྱང་ཆུབ་སེམས་དཔའ་ཞིག་གིས་ཁམས་གསུམ་གྱི་སེམས་ཅན་ལམ་ལ་མ་ཞུགས་པ་ཐམས་ཅད་བསད་པ་ལས་སྔར་བྱང་ཆུབ་ཀྱི་སེམས་ཤིག་སྐྱེས་པའི་སྟོབས་ཀྱིས་དེའི་རྒྱུད་ཀྱི་དགེ་རྩ་ཆད་པ་མ་རེད། གོ་ཆ་གཞི་ནས་བགོ་དགོས་པ་མ་རེད། བྱང་ཆུབ་སེམས་པ་ཞིག་ལ་ཁྲོས་ཏེ་ཚིག་རྩུབ་མོ་ཞིག་བརྗོད་ན། བྱང་ཆུབ་ཀྱི་སེམས་དང་བསྔོ་བས་ཟིན་ཀྱང་རུང་མ་ཟིན་ཀྱང་རུང་དགེ་རྩ་སྔར་བསགས་ཐམས་ཅད་འཇོམ་ཞིང་། ཁྱད་པར་དུ་ཁྲོ་བའི་ཡུལ་ལུང་བསྟན་ཐོབ་པ་ཞིག་ཡིན་ན་ཁྲོ་བ་པོའི་གོ་ཆ་གཞི་ནས་བགོ་དགོས་པ་རེད། དེ་ཚོ་ཞིབ་ཕྲའི་གོ་བ་རེད།

ལྔ་པ་ལོག་ལྟའམ་སྡིག་ལྟ་ངན་པ་བྱེ་བྲག་ཏུ་བཤགས་པ།

དགེ་བའི་ཕན་ཡོན་སྡིག་པའི་ཉེས་དམིགས་དང་། །དམྱལ་བའི་སྡུག་བསྔལ་ཚེ་ཚད་ལ་སོགས་པ། །ཐོས་ཀྱང་མི་བདེན་བཤད་ཚོད་ཡིན་བསམ་པ། །མཚམས་མེད་ལྔ་བས་ཐུ་བའི་ལས་ངན་པ། །ཐར་མེད་ལས་ངན་བསགས་པ་མཐོལ་ལོ་བཤགས། །ཞེས་གསུངས་ཏེ། ཟག་བཅས་དང་ཟག་མེད་ཀྱིས་བསྡུས་པའི་རྣམ་དཀར་དགེ་བའི་ལས་དང། བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་པའི་ཕན་ཡོན་དང་། མི་དགེ་སྡིག་པའི་ལས་བཅས་དང་རང་བཞིན་གྱི་ཁ་ན་མ་ཐོ་བ་བྱས་ན་ཉེས་དམིགས་ཡོད་རབས་དང་། དམྱལ་བའི་སྡུག་བསྔལ་ལ་མཚོན་ན་ཚ་དམྱལ་དང་གྲང་དམྱལ་གྱི་སོ་སོའི་སྡུག་བསྔལ་གང་ཡིན་ཀྱང་ཚིག་གིས་མཚོན་མི་ཐུབ་པའི་སྡུག་བསྔལ་ཡོད་པ་རེད། ཚ་དམྱལ་ལྟ་བུར་མཚོན་ན་ཚ་དམྱལ་བརྒྱད་ཀྱི་ནང་གི་སྡུག་བསྔལ་ཆུང་བ་ཡང་སོས་ཀྱི་སྡུག་བསྔལ་རེད། འུ་ཚོའི་འཇིག་རྟེན་གྱི་ཁམས་ཀྱི་དེའི་སྡུག་མེད་པའི་སྡུག་བསྔལ་གྱིས་མི་ཚེ་གཅིག་ལ་མནར་བ་དེས་དེ་ཚང་གི་སྡུག་བསྔལ་དུས་ཚོད་སྐར་ཆ་ཙམ་གྱི་སྡུག་བསྔལ་གྱི་ཕྱེད་ཀ་ཡོང་བ་མ་རེད། ཚེ་ཚད་ཀྱང་མི་ལོ་ལྔ་བཅུ་ལ་ལྷ་རྒྱལ་ཆེན་རིགས་བཞིའི་ཞག་གཅིག་ཏུ་བརྩིས་པའི་རང་ལོ་ལྔ་བརྒྱ་དེ་དམྱལ་བ་ཡང་སོས་ཀྱི་ཞག་གཅིག་ཡིན་པ་རེད། དེ་ལྟར་བརྩིས་ན་རྒྱལ་ཆེན་རིགས་བཞིའི་ལོ་གཅིག་ཞག་པོ་སུམ་བརྒྱ་དྲུག་ཅུ་ནི་རང་རེའི་ལོ་ཁྲི་གཅིག་དང་རབ་ཅིག་རེད་ཡོད་པ་རེད། དེ་འདྲ་ལྔ་བརྒྱ་དམྱལ་བ་ཡང་སོས་ཀྱི་ཞག་གཅིག་ཡིན་པ་རེད། དམྱལ་བ་ཡང་སོས་ཀྱི་ཞག་གཅིག་འུ་བུ་ཚོའི་མི་ལོ་ཁྲི་དགུ་བརྒྱ་དང་འབུམ་དགུའོ། །དམྱལ་བའི་སྡུག་བསྔལ་དང་ཚེ་ཚད་དེ་དག་ཐོས་ཚེ་དེ་འདྲ་ཡིན་ནམ་མིན་བདེན་ནམ་མི་བདེན་སྙམ་པ་དང་། རང་བཞིན་གྱི་བཤད་ཚོད་ཙམ་ཞིག་ཡིན་པ་རེད་སྙམ་པ་ལ་སོགས་པ་རྒྱུ་འབྲས་ལ་ལོག་ལྟ་བྱས་པ་དང། མཚམས་མེད་པའི་ལས་ཕ་མ་དགྲ་བཅོམ་བསད་པ་ལས་ཀྱང་ཉེས་པ་ཆེ་བའི་ལས་ཤིག་བསགས་རྒྱུ་མེད་མོད། ད་དུང་དེ་བས་ཀྱང་ཐུ་བའི་ལས་ངན་ཡིན་གསུངས་པ་རེད། འདི་མཚམས་མེད་ལས་ཐུ་བའི་ལས་ངན་ཡིན་གསུངས་པ་ནི་དགེ་རྩ་ཆད་པའི་ཐད་ནས་གསུངས་པ་རེད། རྣམ་སྨིན་གྱི་ངོས་ནས་མཚམས་མེད་པའི་ཐུ་རེད་ཟེར་རྒྱུ་ཡོད་པ་མ་རེད། དགེ་རྩ་ཆད་ནས་བསྐལ་ཆེན་མང་པོར་ཐར་བ་མེད་པའི་ངན་སོང་ནས་ངན་སོང་དུ་བརྒྱུད་དེ་སྡུག་བསྔལ་མྱོང་དགོས་པའི་ལས་ངན་བསགས་པ་ཐམས་ཅད་མཐོལ་ལོ་བཤགས་སོ་གསུངས། འདི་དམན་ལ་དགག་སྒྲ་སྦྱར་ཏེ་ཡུན་རིང་དུ་མི་ཐར་པ་ལ་གསུངས་པ་ཡིན་གྱི་རིགས་ཆད་སོང་བའི་དོན་མིན་ནོ། རྒྱུ་འབྲས་ཡིད་ཆེས་ཀྱི་ཡང་དག་པའི་ལྟ་བ་ལས་བཟློག་སྟེ་ལོག་རྟོག་གི་མུན་པར་འཁྱམ་པ་ལ་རིགས་གཉིས་ཕྱེ་ཆོག་པ་རེད། མུ་སྟེགས་པ་དང་མཐའ་འཁོབ་ལ་སྐྱེས་པའི་མི། དེ་དང་ཕྱོགས་གཏོགས་ཀྱི་མི་སྡིག་ལྟ་ཅན་འདི་ཕྱི་མེད། ལྷ་མེད་འདྲེ་མེད་རྒྱུ་འབྲས་མེད་ཅེས་སྐུར་བ་འདེབས་པའི་རིགས་བདུད་རིགས་ཀླ་ཀློའི་ལྟ་བ་ཅན་དང་། ཡང་ཆོས་དྲེད་པ་འགའ་རེ་ལྟ་ཕྱོགས་སུ་སྤྱོད་པ་ཤོར་ནས་ནག་པོ་ཁ་འབྱམས་དགེ་མེད་སྡིག་མེད་རུ་ཏྲ་ཐར་བ་ནག་པོ་ལྟ་བུ་ཡང་ཡོད་པ་རེད། དེས་ན་སངས་རྒྱས་ལ་དད་པ་ཡོད་ཅིང་ནང་བའི་ཆོས་པ་ཞིག་ཡིན་ཕྱིན་སངས་རྒྱས་ཀྱི་ཡེ་ཤེས་ལ་ཐེ་ཚོམ་བྱེད་མི་རུང་། སངས་རྒྱས་ཀྱི་ཡེ་ཤེས་ལ་ཐེ་ཚོམ་མེད་ཕྱིན་སངས་རྒྱས་ཀྱི་གསུང་ལ་རྩི་དགོས། སངས་རྒྱས་ཀྱི་གསུང་རྒྱལ་བའི་བཀའ་ཐམས་ཅད་ཀྱི་རྩ་བ་ལས་རྒྱུ་འབྲས་སྤོང་བླང་འདོར་ལེན་གྱི་ནང་དུ་མ་འདུས་པ་ཞིག་དང་དེ་ལས་ལྷག་པའི་ཉམས་སུ་ལེན་བྱ་ཞིག་ཡོད་པ་མ་ཡིན། རྒྱལ་བའི་བཀའ་ལྟར་དུ་རང་གིས་ལག་ལེན་བྱས་ཏེ་ཉམས་སུ་ལེན་རྒྱུ་ཞིག་ལས་ཐར་བའི་ལམ་ལ་འདྲེན་ཐབས་ཤིག་རྒྱལ་བ་ཉིད་ལ་ཡོད་པ་མ་ཡིན། མདོ་ལས། ངས་ནི་ཁྱོད་ལ་ཐར་བའི་ཐབས་བསྟན་གྱིས། །ཐར་བ་རང་ལ་རག་ལས་བརྩོན་པར་མཛོད། །ཅེས་གསུངས་སོ། །དད་པའི་སྟོབས་ཞེས་པ་ནི་ལས་དང་ལས་ཀྱི་རྣམ་པར་སྨིན་པ་ལ་མངོན་པར་བསྟོད་པ་དེ་ཡིན། རྒྱུ་འབྲས་ལ་ཡིད་ཆེས་མེད་ན་སངས་རྒྱས་དང་སངས་རྒྱས་ཀྱི་བཀའ་ལ་ཡིད་ཆེས་པ་མ་རེད། ཡིད་མ་ཆེས་ན་དེ་བས་ཐུ་བའི་སྡིག་པ་ཞིག་འཇིག་རྟེན་ན་མི་སྲིད་། བདེ་བ་ཅན་ལ་ཨེ་སྐྱེ་བསམ་མཁན་ཞིག་ཡིན་ཕྱིན། རྒྱུ་འབྲས་ལ་ཡིད་ཆེས་ཀྱི་དད་པ་འཇིག་རྟེན་ཡང་དག་གི་ལྟ་བ་དང་པོ་ཡོད་པ་གནད་ཆེ་བ་ཡིན། འདི་ཡན་ཆད་རང་བཞིན་གྱི་སྡིག་པ་བཤད་ཚར་ནས། འདིས་མཚམས་སུ་བཅས་པའི་ལྟུང་བ་བྱུང་བའི་སྡིག་པ་བཤགས་པ་ཡིན།

གཉིས་པ་བཅས་ལྟུང་གི་སྡིག་པ་ངོ་ཤེས་པ་བཤགས་པ།

དེ་ལ་གསུམ་སྟེ། སོ་ཐར་གྱི་བཅས་ལྟུང་བཤགས་པ། བྱང་སེམས་ཀྱི་ལྟུང་བ་བཤགས་པ། སྔགས་ཀྱི་བསླབ་པ་དང་འགལ་བ་བཤགས་པའོ།།

དང་པོ་སོ་ཐར་གྱི་བཅས་ལྟུང་བཤགས་པ།

ཕམ་པ་བཞི་དང་ལྷག་མ་བཅུ་གསུམ་དང་། །སྤངས་ལྟུང་སོར་བཤགས་ཉེས་བྱས་སྡེ་ཚན་ལྔ། །སོ་ཐར་ཚུལ་ཁྲིམས་འཆལ་བ་མཐོལ་ལོ་བཤགས། །ཞེས་གསུངས་ཏེ། །ཕམ་པ་བཞི་དང་ལྷག་མ་བཅུ་གསུམ་དང་། །སྤངས་ལྟུང་སོར་བཤགས་ཉེས་བྱས་སྡེ་ཚན་ལྔ། །ཞེས་སོ་སོར་ཐར་བའི་འདུལ་ཁྲིམས་སྲུང་བར་ཁས་བླངས་པའི་བསྙེན་པར་རྫོགས་པ་དགེ་སློང་གི་དངོས་པོ་ཐོབ་རྗེས་ཉིས་བརྒྱ་ལྔ་བཅུ་རྩ་གསུམ་གྱི་འདུལ་ཁྲིམས་སྲུང་དགོས། ཉིས་བརྒྱ་ལྔ་བཅུ་རྩ་གསུམ་པོ་གང་དག་ཅེ་ན། སྡོམ་པའི་རྩ་བ་ཕམ་པ་བཞི། སྲོག་གཅོད། མ་བྱིན་ལེན། མི་ཚངས་སྤྱོད། མི་ཆོས་བླ་མའི་རྫུན་དང་བཞི། དགེ་འདུན་ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས། དེ་ཐམས་ཅད་སྡེ་ཚན་གྱིས་ཕྱེ་ན་ལྟུང་བ་སྡེ་ལྔའི་ནང་དུ་འདུས། ཕམ་པ། ལྷག་མ། ལྟུང་བྱེད། སོར་བཤགས། ཉེས་བྱས་དང་ལྔའོ། །ལྟུང་བྱེད་ལ་རིགས་གཉིས་བྱེད་ན་སྤངས་ནས་བཤགས་དགོས་པ་སྤང་ལྟུང་དང་། ཆད་ལས་ལ་ལྟོས་མི་དགོས་པ་ལ་ནི་ལྟུང་བྱེད་འབའ་ཞིག་པ་ཞེས་བྱ། ཕམ་ལྷག་གཉིས་ཀ་ལ་སྦོམ་པོ་དང་སྦྱོར་བའི་ཉེས་བྱས་གསུངས་པ་དེ་རྣམས་རང་རང་གི་སྡེ་ཚན་ལ་གཏོགས་པ་ཡིན། དེ་ལྟར་དགེ་སློང་གི་ཁྲིམས་ཉེས་བརྒྱ་ལྔ་བཅུ་རྩ་གསུམ་གྱི་ནང་ནས། སྡོམ་ལྡན་བསླབ་པ་སྲུང་བའི་དགེ་སློང་གིས་སྣེ་རེ་ཉམས་ཀྱང་མ་བཤགས་ན་ཉེས་པར་འགྱུར། དེའི་ཤུགས་བསྟན་ལ་དགེ་སློང་མའི་ཁྲིམས་སུམ་བརྒྱ་དྲུག་ཅུ་རྩ་བཞི། དེ་བཞིན་དུ་དགེ་སློབ་མ་དང་དགེ་ཚུལ་མའི་ཁྲིམས། དགེ་ཚུལ་གྱི་ཁྲིམས་རགས་པ་བཅུ། བླངས་འདས་སོ་གསུམ། དགེ་བསྙེན་གྱི་གསོད་རྐུ་རྫུན་སྨྲ་འདོད་ལོག་སྨྱོས་འགྱུར་ཆང་དང་བཅས་སྤང་བ་ལ་སོགས་པ་བསྡུས་ཡོད་པ་ཡིན། སོ་ཐར་ཚུལ་ཁྲིམས་འཆལ་བ་མཐོལ་ལོ་བཤགས། །ཞེས་གསུངས། དེ་ལྟར་སོ་ཐར་གྱི་འདུལ་ཁྲིམས་དང་འགལ་བའི་ཉེས་པ་ཐོག་མེད་ནས་ད་ལྟའི་བར་དུ་བསགས་པ་མཐོལ་ལོ་བཤགས་གསུངས། ཚུལ་ཁྲིམས་མ་བསྲུང་བའི་ཉེས་དམིགས་དང་བསླབ་གཞི་འགའ་རེ་བསྲུངས་བ་དང་དེའི་སྟེང་དུ་སངས་རྒྱས་ལ་དད་པའི་ཕན་ཡོན་གྱི་གཏམ་རྒྱུད་ཅིག་བཤད་ན། སངས་རྒྱས་བཅོམ་ལྡན་འདས་ག་ཤེད་ལ་བྱོན་བཞིན་ཡོད་པའི་ལམ་ཁ་ཞིག་ན་ས་སྟོང་གི་གླང་པོ་ཆེ། གླང་པོ་ཆེ་རི་དྭགས་ཀྱི་ཁྱུ་ན་ཡོད་པའི་རི་དྭགས་ཚོ་གཅིག་ཡོད་འདུག དེའི་རི་དྭགས་ཚོ་གཅིག་དེ་སེང་གེ་ལ་སྐྲག་ནས་རང་གི་ཁྱུ་བསྲུངས་ཏེ་རིའི་རྩེ་མོ་ཞིག་ན་ཚང་མ་མཉམ་དུ་ཡོད་པའི་དུས་ཤིག་ལ། དེའི་ནང་ནས་གླང་པོ་ཆེ་གཙོ་བོ་དེས་སངས་རྒྱས་བཅོམ་ལྡན་འདས་བྱོན་གྱིན་ཡོད་པ་རྒྱང་ནས་མཇལ་ཏེ་ཁོ་རང་ལ་དགའ་བའི་སེམས་སྐྱེས་ཏེ་གཅིག་པུར་རི་མགོ་ནས་མར་བབ་སྟེ་སངས་རྒྱས་བཅོམ་ལྡན་འདས་ལ་སྐོར་བ་བྱས། ཤིང་ནྱ་གྲོ་ཏའི་ཡལ་ག་ཞིག་སྣ་ལྗག་གིས་བཟུང་ནས་སངས་རྒྱས་བཅོམ་ལྡན་འདས་ཀྱི་སྐུ་ལུས་ལ་ཉི་མས་མི་གདུང་པའི་ཕྱིར་དུ་དབུའི་སྟེང་དུ་བཟུང་སྟེ། བཅོམ་ལྡན་འདས་ཀྱི་ཕྱི་བཞིན་དུ་འབྲང་ནས་གྲོང་གཞན་ཞིག་ལ་མ་སླེབ་ཀྱི་བར་དུ་བསྐྱལ་ཏེ་ཕྱིར་ལ་སོང་བ་རེད། གླང་པོ་ཆེ་ཕྱིར་ཡོང་སའི་ལམ་བར་ནས་སེང་གེ་དང་འཕྲད་དེ་བསད། ཚེ་འཕོས་པ་དང་ལྷ་ཡུལ་དུ་སྐྱེས། དེས་གནས་གསུམ་ལ་བརྟགས་པས་སྔོན་གྱི་གནས་ཤེས་ཏེ་ལྷའི་རྫུ་འཕྲུལ་གྱིས་དེ་མ་ཐག་ཏུ་སངས་རྒྱས་བཅོམ་ལྡན་འདས་ཀྱི་མདུན་དུ་ཡོང་ནས། བཅོམ་ལྡན་འདས་ལ་ལྷའི་མེ་ཏོག་སྣ་ཚོགས་པས་མཆོད་དེ་ཆོས་ཉན་ནས་རྒྱུན་དུ་ཞུགས་པའི་འབྲས་བུ་ཐོབ་བོ། གླང་པོ་ཆེའི་སྐྱེ་བ་ལྷ་དེས་དགའ་བའི་མདངས་དང་བཅས་ཏེ་བཅོམ་ལྡན་འདས་ལ། ཁྱེད་ཀྱི་བཀའ་དྲིན་འདི་ལྟ་བུ་ཕས་མ་བསྐྱངས་མས་མ་བསྐྱངས་ལྷ་དང་རྒྱལ་པོས་ཀྱང་བསྐྱངས་མྱོང་བ་མ་ཡིན། བཅོམ་ལྡན་འདས་ཁྱེད་ཀྱིས་ང་འཁོར་བའི་རྒྱ་མཚོའི་ཕ་མཐར་བསྐྱལ་བཞག་པ། ཐུབ་པ་ཁྱེད་ཀྱི་ཞལ་ལན་གཅིག་མཐོང་བས་འདི་འདྲའི་འཕགས་པ་རྒྱས་པའི་ཞི་བའི་གོ་འཕང་ཞིག་ཐོབ་པ་ཡིན་ཞེས་བསྔགས་བརྗོད་བྱས། ཞབས་ལ་ཕྱག་འཚལ་ཏེ་ཕྱིར་ལྷ་ཡུལ་དུ་ཕེབས། དེའི་ཕྱི་ཉིན་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པས། བཅོམ་ལྡན་འདས་ཀྱིས་འདི་ལ་འདས་པའི་ལས་ཀྱི་རྒྱུ་ཡང་ཡོད་ལ་ད་ལྟར་བྱུང་བའི་ལས་ཀྱི་རྒྱུ་ཡང་ཡོད་པ་རེད་གསུངས། འདས་པའི་ལས་ཀྱི་རྒྱུ་ཅི་ཞིག་ཡོད་ཅེ་ན། སྔོན་སངས་རྒྱས་འོད་སྲུང་གི་བསྟན་པ་ལ་ཞུགས་ཏེ་སོ་ཐར་གྱི་སྡོམ་པ་བླངས། དེ་དུས་བསླབ་གཞི་ཆེ་ཕྲ་འགའ་རེ་ཉམས་ཏེ་དུད་འགྲོར་སྐྱེ་བ་བླངས། ཡང་བསླབ་གཞི་འགའ་རེ་ལེགས་པར་བསྲུངས་ནས་སྨོན་ལམ་བཏབ་པའི་སྟོབས་ཀྱིས་ད་ལྟར་ཆོས་ཐོས་པར་མ་ཟད་བདེན་པ་མཐོང་། ད་ལྟའི་སྐབས་སུ་བྱས་པའི་ལས་ནི་གླང་པོ་ཆེའི་ལུས་ལེན་སྐབས་ཁོང་ལ་བསྙེན་བཀུར་བྱས་ཏེ་སེམས་དགའ་བའི་སྟོབས་ཀྱིས་ལྷ་ཡུལ་དུ་སྐྱེས་པ་རེད་ཅེས་གསུངས། བསླབ་གཞི་ཆེ་ཕྲ་ཆུང་གསུམ་ཐམས་ཅད་བསྲུང་ན་གནས་སྐབས་མངོན་མཐོ་ནས་མཐར་ཐུག་ངེས་པར་ལེགས་པའི་ས་ལ་བགྲོད་ཐུབ་པའོ།།

གཉིས་པ་བྱང་སེམས་ཀྱི་ལྟུང་བ་བཤགས་པ།

ནག་པོ་ཆོས་བཞི་ལྟུང་བ་ལྔ་ལྔ་བརྒྱད། །བྱང་སེམས་བསླབ་པ་ཉམས་པ་མཐོལ་ལོ་བཤགས། །ཞེས་གསུངས་སྟེ། བྱང་ཆུབ་མཆོག་ཏུ་སེམས་བསྐྱེད་པ་སྤྱིའི་མཚན་ཉིད། གཞན་དོན་དུ་རྫོགས་བྱང་གི་སྒྲུབ་པ་ཁྱད་པར་ཅན་གྱི་མཁྱེན་པ་གང་ཞིག་སྒོ་གསུམ་གྱི་ཉེས་པ་མ་ལུས་པ་སྤོང་བའི་སེམས་པ་བྱང་སྡོམ་གྱི་ངོ་བོ། དེ་ལ་རགས་པ་བརྡ་ལས་བྱུང་བ་ཞིག་དང་ཕྲ་བ་ཆོས་ཉིད་ལས་ཐོབ་པའི་ཁྱད་པར་ལས། ཀུན་རྫོབ་དང་དོན་དམ་གྱི་སེམས་བསྐྱེད་རྣམ་པ་གཉིས་ལ་འཇོག་པ་ཡིན་པས། ཀུན་རྫོབ་སེམས་བསྐྱེད་སྨོན་འཇུག་གི་བདག་ཉིད་ཆོ་ག་ལས་ཐོབ་པ་དང་། དོན་དམ་སེམས་བསྐྱེད་ཆོ་ག་ལ་མི་ལྟོས་པ་རྣམ་པར་མི་རྟོག་པའི་ཡེ་ཤེས་ལས་སྐྱེ་བའོ། །ཀུན་རྫོབ་སེམས་བསྐྱེད་སྨོན་འཇུག་གི་བདག་ཉིད་ཅན་སྲོལ་གཉིས་གང་རུང་གིས་བླངས་ཏེ་དེའི་བསླབ་པའི་གཞི་མཐའ་དག་ལ་ཚུལ་བཞིན་དུ་བསླབ་དགོས་པ་ཡིན་པས། མཆོད་འོས་བསླུ་དང་འགྱོད་མེད་འགྱོད་པ་བསྐྱེད། །དམ་པར་སྐུར་འདེབས་འགྲོ་ལ་གཡོ་སྒྱུ་སྤྱོད། །ནག་པོའི་ཆོས་བཞི་སྤངས་ཤིང་ཟློག་པ་ནི། །དཀར་པོ་ཆོས་བཞི་ཡིན་པས་ཀུན་ཏུ་སྤྱད། ཅེས་གསུངས་པ་ལྟར། རྫུན་གྱིས་བླ་མ་དང་མཁན་སློབ་ཀྱི་དབུ་བསྐོར་ཏེ་མཆོད་འོས་བསླུ་བ། གཞན་འགྱོད་པའི་གནས་མ་ཡིན་པ་ལ་འགྱོད་པ་བསྐྱེད་དུ་བཅུག་པ། བྱང་ཆུབ་སེམས་དཔའ་ལ་སྐུར་བ་འདེབས་པ། འདིར་བྱང་ཆུབ་སེམས་དཔའ་གསུངས་པ་འདི་སེམས་བསྐྱེད་ནས་བཟུང་སྟེ་བྱང་ཆུབ་སེམས་དཔའི་སྒྲ་འཇུག་པ་ཡིན། སེམས་ཅན་ལ་གཡོ་སྒྱུའི་ཚིག་གིས་མགོ་རྨོངས་པར་བྱེད་པ་འདི་བཞི་ནག་པོའི་ཆོས་བཞི་ཡིན། དེ་ལས་ཟློག་པ་དཀར་པོའི་ཆོས་བཞིའོ། །ལྟུང་བ་ལྔ་ལྔ་བརྒྱད་གསུངས་པ་ནི་བྱང་སེམས་རྒྱལ་པོ་ལ་འབྱུང་ཉེ་བ་ལྔ། དཀོན་མཆོག་གི་དཀོར་འཕྲོགས་པ། ཆོས་སྤོང་བྱེད་པ། དགེ་ཚུལ་སློང་བརྡུང་ཕྲོག་བྱེད་པ། མཚམས་མེད་ལྔ་བྱེད་པ། ལོག་ལྟ་བྱེད་པའོ། །བྱང་སེམས་བློན་པོ་ལ་འབྱུང་ཉེ་བ་ལྔ་ནི། གྲོང་ལྗོངས་གྲོང་ཁྱེར་གྲོང་བརྡལ་ཡུལ་འཁོར་རྣམས། །འཇོམ་པར་བྱེད་པའང་བློན་པོར་ངེས་པ་ལྔ། །ཞེས་གསུངས་ཏེ། རྒྱལ་པོ་ལ་འབྱུང་ཉེ་བ་དང་པོ་བཞིའི་སྟེང་དུ་གྲོང་ལྗོངས་གྲོང་ཁྱེར་གྲོང་རྡལ་ཡུལ་འཁོར་བཅོམ་པ་སྟེ་ལྔ་པོ་གཅིག་ཏུ་བརྩིས་པས་ལྔའོ། །ཕལ་བ་ལ་འབྱུང་ཉེ་བ་བརྒྱད་ཀྱིས་ལྔ་ལྔ་བརྒྱད་རེད། ཕལ་བ་ལ་འབྱུང་ཉེ་བ་བརྒྱད་ནི། མ་སྦྱང་སྟོང་ཉིད་བརྗོད་སྔས་ཉན་ཐོས་སྨོན། །རྫོགས་བྱང་ཕྱིར་ཟློག་ཐེག་དམན་སེམས་བསྐྱེད་དང་། །སོ་ཐར་སྤངས་ནས་ཐེག་ཆེན་སློབ་པ་དང་། །ཉན་ཐོས་ཐེག་པས་ཆགས་སོགས་མི་བཟློག་པས། །དེ་བཟློག་དེ་ཡི་འབྲས་བུ་མེད་པར་བྱས། །ཕྲག་དོག་དབང་གིས་བདག་བསྟོད་གཞན་སྨོད་དང་། །རྙེད་དང་བཀུར་སྟིའི་ཆེད་དུ་བདག་འཚོང་དང་། །དགེ་སློང་ཆད་པས་གཅོད་འཇུག་སུག་འབུལ་དང་། །སྤོང་བའི་ལོངས་སྤྱོད་ཁ་ཏོན་པ་ལ་སྦྱིན། །ཞི་གནས་འདོར་བཅུག་ཕལ་ལ་འབྱུང་ངེས་བརྒྱད། །དེ་ལྟར་བྱང་ཆུབ་སེམས་ཀྱི་བསླབ་པ་ཉམས་ཤིང་དེ་ལས་འགལ་བར་གྱུར་བའི་ལས་གང་བགྱིས་པ་ཐམས་ཅད་མཐོལ་ལོ་བཤགས་སོ་གསུངས། སྤྱོད་འཇུག་ལས། དེ་ལྟར་ཇི་ལྟར་དམ་བཅས་བཞིན། །བདག་གིས་གུས་པར་བསྒྲུབ་པར་བྱ། །དེང་ནས་བརྩོན་པར་མ་བྱེད་ན། །འོག་ནས་འོག་ཏུ་འགྲོ་བར་འགྱུར། །ཞེས་གསུངས་པ་ལྟར། བྱང་ཆུབ་དུ་སེམས་བསྐྱེད་ནས་བསླབ་བྱ་མི་ཉམས་པར་མ་བསྲུང་ན་འོག་ནས་འོག་ཏུ་འགྲོ་བ་ཡིན་པས་ན་བསྲུངས་ཤིང་བཤགས་པ་ལ་བརྩོན་དགོས། བྱང་ཆུབ་སེམས་དཔས་གཞན་ལ་ཕན་པ་འབའ་ཞིག་ལ་བརྩོན་པའི་གཏམ་རྒྱུད་ཅིག་བཤད་ན། སྔར་འདས་པའི་དུས་སུ་ཡུལ་ཝཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཚངས་པས་བྱིན་ཞེས་པས་རྒྱལ་སྲིད་སྐྱོང་བའི་སྐབས་ཤིག་ལ། ཡུལ་དེ་ན་དེད་དཔོན་དབྱིག་ཅེས་པ་ཞིག་ཡོད་པ་དེར་བུ་དབྱིག་དགའ་ཞེས་བྱ་བ་དེས་རང་གི་ཕ་ཤི་རྗེས་སུ་བསོད་ནམས་བསགས་ཏེ་རྒྱ་མཚོ་ཆེན་པོའི་ནང་དུ་ཐེངས་མ་དྲུག་གི་བར་དུ་ནོར་བུའི་རིགས་ལེན་སར་སོང་ནས་ཉེར་འཚེ་མེད་པར་ཕྱིར་ལ་འགོ་ཐོན་འཚམས་པོར་འཁོར་ནས་བསོད་ནམས་སྙན་གྲགས་ཅན་ཞིག་རེད། སྐབས་དེར་གྲོང་ཁྱེར་གཞན་པ་ལྔའི་དེད་དཔོན་ཆེ་བ་ལྔ་ཡོད་པ་དེ་ལྔ་ཡོང་ནས། དེ་རྣམས་ཀྱིས་སྔོན་མ་གྲུ་གཟིངས་མགོ་མ་ཐོན་པས་ཐེངས་དེར་དེད་དཔོན་དབྱིག་དགའི་གམ་དུ་ཡོང་ནས་ངེས་པར་ད་ཐེངས་ཁྱོད་ཀྱིས་དེད་དཔོན་བྱས་ཏེ་ཐེངས་གཅིག་འགྲོ་དགོས་ཤེས་ཞུ་བ་བྱས་པས། དེད་དཔོན་དབྱིག་དགས་སྨྲས་པ་ཐེངས་མ་བདུན་ལ་རྒྱ་མཚོའི་ནང་ནས་དོན་འགྲུབ་མཁན་ཞིག་ཡོད་མ་མྱོང་བས་མགོ་ཐོན་དཀའ་རྒྱུ་རེད། འོན་ཀྱང་ཁྱེད་རྣམས་ཀྱི་བསམ་པ་རྫོགས་ཆེད་དུ་ཁྱེད་རྣམས་ཀྱི་འདོད་པ་བཞིན་དུ་བསྒྲུབ་ཆོག་ཁྱེད་རྣམས་ཀྱི་ངོ་བཟློག་མི་ཐུབ་ཅེས་བཤད་དེ། དེད་དཔོན་དབྱིག་དགས་གཞན་པ་ལྔ་པོ་ཁྲིད་དེ་གཟིངས་ལ་ཞུགས་ནས་རྒྱ་མཚོའི་ནང་དུ་ནོར་བུ་ལེན་དུ་སོང་། ཕར་ལམ་འཚམས་པོར་ཐོན་ནས་རིན་པོ་ཆེ་གྲུ་གང་བླངས་ཏེ་ཕྱིར་ཡོང་བཞིན་ཡོད་སྐབས་དེར། ཕྱིར་ལ་ཡོངས་སྐབས་མགོ་ཐོན་འཚམས་པོར་ཐོན་པའི་རྟགས་དང་མཚན་མ་གང་ཡང་མེད་པས། དེད་དཔོན་དབྱིག་དགས་རིན་པོ་ཆེ་རིན་ཐང་གང་གི་ཆེ་བ་འགའ་ཞིག་རས་སྒྱེའི་ནང་དུ་བླུགས་ཏེ་རང་གི་སྐེད་པ་ལ་དཀྲིས་ནས། གཞན་པ་རྣམས་ལ་སྨྲས་པ་གལ་སྲིད་གྲུ་འདི་ཞིག་འདྲ་སོང་ནས་དགྲས་གནོད་པ་འདྲ་ཡོང་ན་ངའི་ལུས་ལ་འཐམ་ནས་ང་མ་མངག་ཅེས་སྨྲས། དེ་ནས་སོང་སོང་མཐར་བར་མཚམས་ཤིག་ནས་ཆུ་གནས་གདུག་པ་ཅན་འགའ་ཞིག་དང་འཕྲད་དེ་གྲུ་གཟིངས་གཏོར་ཤོར། དེད་དཔོན་ལྔ་པོ་སྐྲག་ནས་དབྱིག་དགའི་ལུས་པོར་འཐམ་འདུག དབྱིག་དགས་སྙམ་པ་ངས་འདི་རྣམས་རང་ཉིད་གསོན་བཞིན་དུ་རྒྱ་མཚོའི་ཕ་རོལ་དུ་བསྐྱལ་ཐུབ་རྒྱུ་མ་རེད། རྒྱ་མཚོ་ཆེན་པོ་རོ་དང་ལྷན་ཅིག་མི་གནས་པས་ང་ཤི་ན་རྒྱལ་མཚོ་ཆེན་པོ་ལས་འདི་རྣམས་ཐར་འགྲོ་བ་རེད་སྙམ་ནས་དེ་དག་ལ། ཁྱེད་རྣམས་མ་སྐྲག་ཅིག་སེམས་བརྟན་པོ་གྱིས་དང་ངས་རྒྱ་མཚོའི་ཕ་རོལ་ཏུ་ཁྱེད་རྣམས་བདེ་མོར་བསྐྱལ་ཆོག རྒྱ་མཚོའི་ཕ་རོལ་ཏུ་ཕྱིན་སྐབས་ངའི་ལུས་འདི་དོར་མ་འཇོག་དང་ངའི་སྐེད་པ་ན་བཅང་ཡོད་པའི་རིན་པོ་ཆེ་རིན་ཐང་ཅན་མང་པོ་ཡོད་པ་ཡིན། དེ་རྣམས་ཁྱོད་ཚོས་བགོས་ནས་ལོངས་སྤྱོད་དང་ཁྱེད་རྣམས་ཀྱི་མི་རབས་བདུན་བརྒྱད་ཚུན་ཆད་དུ་འདང་འགྲོ་བ་ཡིན་ཞེས་སྨྲས། དེ་ནས་དེད་དཔོན་དབྱིག་དགས་སེམས་ཅན་གྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་སྨོན་ལམ་བཏབ་སྟེ་མཚོན་རྣོན་པོ་སྐེད་པ་ནས་ཤབས་ཏེ་རང་གི་སྐེ་བཅད་དོ། །རྒྱ་མཚོའི་ཀླུ་གཙང་སྦྲ་ཅན་རྣམས་ཀྱིས་རོ་རྒྱ་མཚོའི་འགྲམ་གྱི་ཐང་ཞིག་ལ་འཕང་བཞག་པ་རེད། དེ་ནས་དེད་དཔོན་ལྔ་པོའི་སྲོག་མགོ་ཐོན་དེད་དཔོན་དབྱིག་དགའི་སྐེད་པའི་རིན་པོ་ཆེ་ཚང་མ་བགོས། དེད་དཔོན་དབྱིག་དགའི་གདུང་ལ་མཆོད་འབུལ་བྱས། དེ་དཔོན་དབྱིག་དགའ་དེ་བདག་ཅག་གི་སྟོན་པ་སློབ་པ་ལམ་ན་ཡོད་དུས་ཀྱི་སྐྱེས་རབས་ཤིག་ཡིན་པ་རེད། དེ་ལྟར་བྱང་ཆུབ་མཆོག་ཏུ་སེམས་བསྐྱེད་དེ་སྲོག་གི་ཕྱིར་ཡང་གཞན་བློས་མི་འདོར་དེ་བདེ་བ་ཅན་ལ་སྐྱེས་ནས། བྱང་ཆུབ་སེམས་དཔའི་གཙོ་བོ་རྒྱལ་བའི་གདུང་འཚོབ་ཏེ་མགོན་པོ་འོད་དཔག་མེད་ཀྱི་རྒྱལ་ཚབ་དུ་གྱུར་ནས་བསྐལ་བའི་ཕྱི་མཐར་མ་ཐུག་གི་བར་དུ་སེམས་ཅན་གྱི་འགྲོ་དོན་བྱེད་པའི་རྒྱུར་གྱུར་ཏེ། བྱང་ཆུབ་མཆོག་ཏུ་སེམས་བསྐྱེད་པ་ཙམ་དུ་མ་ཟད་བྱང་ཆུབ་ཀྱི་སེམས་སྐྱེས་པའི་ཐོག་ཏུ་བསླབ་པ་མི་ཉམས་པར་སྲུང་བ་དེ་གནད་ཆེའོ། །དེ་རིང་གི་ཆོས་མཚམས་བྱང་སེམས་བསླབ་པ་ཉམས་པ་མཐོལ་ལོ་བཤགས་གསུངས་སའི་མཚམས་འདི་ནས་འཇོག ཐམས་ཅད་ཀྱིས་ཐུན་གྱི་ནང་ཡིན་ན་འདྲ། ཆོས་ཁྲིད་དང་འཚོགས་པ་འཚོགས་པའི་སྐབས་ཡིན་ན་འདྲ། ཐུན་མཚམས་ཀྱི་སྐབས་བར་གསེང་གི་ཕྱག་སྐོར་བ་བྱེད་དུས་དང་ཟ་འཐུང་འགྲོ་འདུག་གི་སྤྱོད་ལམ་ཐམས་ཅད་ཀྱི་སྐབས་སུ་སེམས་ཀྱིས་ཅི་ཞིག་བསམ་དགོས་པ་རེད་ཅེ་ན། འདིར་སྣང་མི་རྟག་སྒྱུ་མ་མདང་གི་རྨི་ལམ་ལྟ་བུ། མི་ལུས་ཐོབ། དམ་ཆོས་ཐོས། རང་དབང་ཡོད་པའི་གནས་སྐབས་འདིར། དལ་འབྱོར་དོན་ལྡན་ཞིག་བྱེད་དགོས་སྙམ་པའི་བསམ་པ་དང་སྤྱོད་པ་གཉིས་ཀ་དང་འབྲལ་མི་རུང། རྒན་རྒོན་ཡིན་པས་སྔོན་དུ་འཆི་རྒྱུ་ཞིག་དང་ལོ་ཉུང་ཡིན་པས་མི་འཆི་བའི་ངེས་པ་ཡོད་པ་མ་ཡིན། རྫ་མ་ཆག་དང་རྫ་ལུང་ཆད་སུས་ཤེས། ཕ་མ་སྔོན་ལ་ཤི་དང་བུ་རྒྱུད་སྔོན་ལ་ཤི་སུས་ཀྱང་ཤེས་པ་མ་ཡིན། གལ་སྲིད་ཕ་མའི་སྔོན་ལ་རང་ཉིད་ཤི་ན་རང་ཉིད་ལ་ཆོས་མེད་ཕ་མ་ལ་བུ་མེད་ཕྱིན་ཆད་མཉམ་དུ་འཛོམས་རྒྱུ་མེད་པའི་མེད་གསུམ་འཛོམས་པ་ཞིག་ཏུ་འགྱུར་རྒྱུ་རེད། དེ་བས་བུ་རྒྱུད་ཡིན་ན་ཆོས་བྱེད་སར་སོང་དང་རང་ཉིད་ལ་ཆོས་ཡོད་ཕ་མ་ལ་བུ་ཡོད་ཕྱིར་ཁྱིམ་ལ་སོང་ན་ཐུག་རྒྱུ་ཡོད་པ་ཞིག་ཏུ་གྱུར་ཏེ་ཡོད་གསུམ་མཉམ་དུ་འཛོམས་པ་ཞིག་ཡོང་པ་ཡིན། གནའ་རྒྱ་གར་གྱི་རྒྱལ་པོ་ཞིག་གི་སྲས་ཀྱིས་མ་ལ། ཨ་མ་ཁྱེད་ཀྱིས་ཚེ་རབས་གཏན་གྱི་མ་བུ་འབྲལ་མེད་ཅིག་བསམ་མམ་ཚེ་འདིའི་ཡུད་ཙམ་གྱི་མ་བུ་ཞིག་བྱེད་བསམ་འདུག་ཅེས་དྲིས་པས། ཨ་མས་ཚེ་རབས་གཏན་གྱི་མ་བུ་འབྲལ་མེད་ཅིག་ལོས་བསམ་ཞེས་སྨྲས། དེས་ན་ཚེ་འདིར་གནས་སྐབས་ཀྱི་རིང་ལ་འབྲལ་དགོས་པ་རེད་ཅེས་ཡབ་ཡུམ་རྒྱལ་སྲིད་དང་བཅས་པ་སྤངས་ནས་ས་ཆ་ཐག་རིང་ཞིག་ལ་བླ་མ་ཞིག་གི་མདུན་དུ་སོང་ནས་ཆོས་ཉན་པ་རེད། དེ་འདྲའི་བུ་རྒྱུད་ཆོས་ལ་མོས་པ་ཅན་ཡོད་ན་ཕ་མས་བཀག་མིི་རུང། ཕ་མ་ཡོད་པ་ཞིག་ཡིན་ན་ནམ་ཞིག་ཕ་མ་དང་མི་འབྲལ་བར་འདུག་ས་ཞིག་སུ་ལ་ཡང་ཡོད་པ་མ་ཡིན། དེ་དུས་ཕ་མ་བུ་གསུམ་ལ་ཆོས་མེད། ཚེ་འདི་མེད་ཕྱི་མེད་རང་གཞན་གཉིས་ཀའི་དོན་མ་འགྲུབ་པར་མེད་གསུམ་མཉམ་དུ་འཛོམས་པ་ཞིག་རེད་པ་བས། ད་ལྟ་ཆོས་ཀྱི་དོན་ལ་དགོན་པ་རི་ཁྲོད། ཡང་ན་ཆོས་དང་བླ་མ་ཡོད་ས་ཞིག་ལ་སོང་ནས་གནས་སྐབས་གསོན་བྲལ་ཞིག་བྱེད་དགོས་ཐུག་ཀྱང་ཕ་མ་བུ་གསུམ་འདི་བདེ། ཕྱི་མ་བདེ། བདེ་སྐྱིད་སྙན་གསུམ་འཛོམས་པ་ཞིག་ཡོང་བ་ཡིན། ན་ཚོད་གཞོན་པའི་སྐབས་སུ་ཆོས་རེ་བྱེད་མ་ཐུབ་ན་རྒས་པའམ་རྒུད་པ་ཐོག་ལ་བབ་ཚེ་ལུས་ཀྱི་སྟོབས་ཟད། སེམས་ཀྱི་བླ་ཤེད་ཆག་དུས་ཆོས་བྱེད་འདོད་ཞེ་ན་ཡོད་ཀྱང་འགྲུབ་རྒྱུའི་ལག་འབབ་འདྲ་བོ་ཞན་ཡོང་བ་ཡིན། དེས་ན་ལས་བྱ་བ་གང་སྒྲུབ་ཀྱང་རྗེས་ནས་འགྱོད་པ་མེད་པ་ཞིག་བྱེད་དགོས། ཆོས་འཇིག་རྟེན་གཉིས་དང་མཐུན་པ་ཡ་རབས་དམ་པའི་རྗེས་སུ་འཇུག་ཐབས་ཀྱི་གདམས་ངག་ཡིན། ཧ་ཅང་འདོད་པ་ཆེ་མི་ཉན། རྒྱུ་ལོངས་སྤྱོད་ཀྱིས་སེམས་ཁ་གང་རྒྱུ་མེད། ལོངས་སྤྱོད་ཀྱི་འབྱོར་བ་ཅི་འདྲ་རྒྱས་ཀྱང་དེ་འདྲ་སྡུག་ཆེ་བ་རེད། སྐྱིད་རེའི་རྩ་ན་སྡུག་རེ་ཡོད། ཁེ་རེའི་རྩ་ན་ཕམ་རེ་ཡོད། བདེ་སྐྱིད་སྙན་གསུམ་འཛོམས་པ་ཞིག་ལ་སྡིག་སྡུག་གཏམ་ངན་ཡང་མཉམ་དུ་འོང་། འཁོར་བའི་ཕུན་ཚོགས་བློས་གཏོང་མ་ཐུབ་ན་འདི་ལ་བརྟེན་ཏེ་མི་འདོད་པ་མང་པོ་ཡོང་བ་རེད། གནའ་སྔ་མོ་ཁྱིམ་ཚང་ཞིག་གི་སྒོ་ཁར་ནང་སྔ་མོ་ཞིག་ནས་བུ་མོ་གཟུགས་མཛེས་པ་ཞིག་ཐོན་ཡོང་པ་རེད། ཁྱོད་ཀྱི་མིང་ལ་ཅི་ཟེར་ཁྱོད་ལ་ཡོན་ཏན་ཅི་ཡོད་ཅེས་དྲིས་པས། ངའི་མིང་ལ་བཀྲ་ཤིས་ལྷ་མོ་ཟེར། འདོད་དགུ་ལོངས་སྤྱོད་ཐམས་ཅད་སྦྱིན་ཞིང་གར་སོང་ལ་བཀྲ་ཤིས་པར་བྱེད་ཅེས་སྨྲས། ཁྱོད་ཁྱིམ་ལ་ཤོག་དང་ཁྱོད་ནི་ཡག་པ་ཡིན་འདུག་ཅེས་ཁྱིམ་དུ་བོས་པས། ཕྱི་དྲོ་ཞིག་ལ་ཡང་བུད་མེད་མདོག་ངན་ཞིག་ཐོན་ཡོང་བས། དེ་ཚང་གི་ཡང་ཁྱོད་ཀྱིས་མིང་ལ་ཅི་ཟེར་ཁྱོད་ལ་ཡོན་ཏན་ཅི་ཞིག་ཡོད་ཅེས་དྲིས་པས། ངའི་མིང་ལ་བྱིར་སྣ་ནག་མོ་ཟེར། ཡོན་ཏན་ཅི་ཡང་མེད་གར་བསྡད་ས་ལ་མི་འདོད་སྣ་དགུ་ཡོང་ཞིང་བཀྲ་མི་ཤིས་པར་བྱེད་མཁན་ཞིག་ཡིན་ཞེས་སྨྲས། ཁྱོད་མ་འདུག་སོང་ཞིག་ངེད་ཀྱི་ཁྱིམ་ན་བཀྲ་ཤིས་ལྷ་མོ་ཡོད་པས་དེ་ལ་གནོད་ན་མི་ཤེས་ཞེས་སྨྲས་པས། ཧེ་ཧེ་བཀྲ་ཤིས་ལྷ་མོ་ངེད་གཉིས་སྤུན་ཡིན་དེ་འདུག་དགོས་ན་ང་ཡང་འདུག་དགོས་པ་རེད་ང་འགྲོ་དགོས་ན་དེ་ཡང་འགྲོ་དགོས་པ་རེད་ཅེས་སྨྲས། དེ་ནས་བཀྲ་ཤིས་ལྷ་མོ་ལ་དྲིས་པས་དེ་བདེན་པ་རེད་ཅེས་སྨྲས། འོ་ན་གཉིས་ཀ་འདུག་མི་དགོས་ཞེས་ཕྱིའི་ཉིན་གཉིས་ཀ་ཕུད་བཞག་པ་རེད། དེའི་ཕྱིན་ཆད་ཁྱིམ་ཚང་དེ་ཚང་ལ་བཟང་ངན་གཉིས་ཀའི་མཐའ་ལ་མ་ལྷུང་བར་སྐྱིད་པོ་ཞིག་རེད་སོང་བ་རེད། ཡང་དེ་མིན་ཁྱིམ་ཚང་གཞན་ཞིག་གིས་དེ་གཉིས་ཀ་བཞག་ནས་སྔ་དྲོ་བཀྲ་ཤིས་ལྷ་མོས་མི་ནོར་ཟས་གསུམ་འཛོམས་པའི་བཀྲ་ཤིས་པ་ཞིག་བྱས་ཀྱང་། ཕྱི་དྲོ་བྱིར་སྣ་ནག་མོས་ན་ཚ་ཤི་རྐྱེན་ལ་སོགས་པ་མི་འདོད་རྣ་དགུ་བཏང་ནས་དེ་ཚང་ལ་བདེ་བདེ་ཉིན་གཅིག་ཀྱང་ཡོང་མ་ཐུབ། དེས་ན་འདོད་ཆུང་ཆོག་ཤེས་ཀྱི་འཕགས་པའི་ནོར་ནི་སོ་སོའི་སྐྱེ་བོའི་སྒྱུ་མའི་ནོར་རྫས་ལས་ཁྱད་དུ་འཕགས་པ་ཞིག་ཡིན་པ་རེད། དེ་ལ་བསྟེན་ནས་དམ་པའི་ལྷ་ཆོས་ལ་འབད། དེའི་རྩ་བ་ཐོས་བསམ་སྒོམ་པའི་ཤེས་རབ་རང་གི་ནུས་ཚོད་རེ་གསོག་ཐུབ་ན་ཚེ་འདི་ཕྱི་རང་གཞན་གཉིས་ཀར་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ནི་དེ་ཡིན།།

ཉིན་ལྔ་བའི་ཆོས་ཁྲིད།

མཚམས་སྦྱོར་གྱི་གདམས་ངག

ཇི་སྐད་དུ་རྫ་དཔལ་སྤྲུལ་རིན་པོ་ཆེས། ཡིད་མཐུན་མི་ཡུལ་ལྗོངས་ན་ལས་དབང་གིས་འདུས་ནས། །བརྩེ་གདུང་ཉམས་དགའ་བཅང་བའི་དགའ་སྟོན་ལ་རོལ་ཀྱང་། །ཟློག་མེད་སྔོན་ལས་དྲག་པོས་བསུ་མ་ཞིག་སླེབ་ཚེ། །དབང་མེད་ཤི་གསོན་སྣང་བ་སོ་སོ་རུ་བྲལ་སོང་། །ཞེས་གསུངས་པ་ལྟར། ལས་གཅིག་གིས་བསྐོས་པའི་མི་དག་འཇིག་རྟེན་མི་ཡུལ་འདིར་མཉམ་དུ་འདུས་ཏེ། ཕ་མ་མིང་སྲིང་། སྤུན་དང་ཤ་ཉེ། བུ་དང་ཚ་བོ་སོགས་ལ་འབྲེལ། ཕན་ཚུན་གཅིག་གིས་གཅིག་ལ་བརྩེ་དུང་དང་དགའ་ཞེན། ཟས་ཞིམ་པོ་ཞིག་ཡོད་ན་དེའི་ཁ་ལ་འགྲོ་དགོས། གོས་ཡག་པ་ཡོད་ན་དེ་ལ་སྐོན་དགོས། གཏམ་སྙན་མོ་ཞིག་གོ་ན་དེ་ལ་བཤད་དགོས་བསམ་ནས། འདང་དང་འདུན་པ། ཉིན་ལམ་ཟླ་ལམ་ཞིག་ལ་སོང་ན་འགྲོ་བ་པོས་ཤུལ་མི་ལ་སེམས་འཁྲེང་། ཤུལ་མ་རྣམས་ཀྱིས་འགྲོ་བ་པོ་ཕྱིར་ཁྱིམ་ལ་མ་འཁོར་གྱི་བར་དུ་ཕན་ཚུན་གཅིག་གིས་གཅིག་ལ་སེམས་འཁྲེང་ཞིང་། ལོ་བརྒྱ་ལ་མཉམ་དུ་བསྡད་ཀྱང་ད་དུང་འབྲལ་མི་ཕོད་པའི་བརྩེ་གདུང་དང་དགའ་ཞེན་འཁོར་བའི་འཆིང་ཐག་གིས་བཅངས་ཡོད། འོན་ཀྱང་ཟློག་མེད་སྔོན་ལས་དྲག་པོ་བྲག་གཟར་མོའི་རྦབ་ཆུ་ཐུར་ལ་བརྒྱུགས་ན་གྱེན་ལ་ལྡོག་མི་ཐུབ་པ་ལྟར་དང་། དགོང་ཕྱི་དྲོའི་ཉི་མ་ནུབ་ཏུ་སོང་ན་ཕྱིར་འཐེན་མི་ཐུབ་པ་ལྟར། འཆི་བདག་གཤིན་རྗེའི་བསུ་མ་སྙིང་རྗེ་མེད་པ་དེ་སྔོན་དུ་བསླེབ་དུས། ངའི་དྲིན་ཆེ་བའི་ཕ་ལོ་ལ་སྐད་ཆ་ཚིག་གཅིགལན་རིང་བའི་མ་ལོ་ལ་སྙིང་གཏམ་ལན་གཅིག ཤ་ཕུ་ནུ་བཟའ་ཟླ་ཚོང་རོགས་ལ་མཇུག་མཐའི་གཏམ་ཚིག་གཅིག་བཤད་དགོས་རུང་བཤད་ས་མེད་པར་དབང་མེད་གཤིན་རྗེའི་ཞགས་ནག་སྐེ་ལ་བསྐོན་ནས་ཤི་གསོན་སྣང་བ་ཁ་ཁ་ཕྱེས་ཏེ་འབྲལ་རྒྱུ་འདི་ཡིད་རེ་སྐྱོ་གསུངས་པ་རེད། ད་དུང་ཁོང་གིས་གསུངས་པ། སྔར་ཞིག་ཡུན་རིང་འགྲོག་པའི་ཕ་མ་དང་གཉེན་བཤེས། །བརྩེ་གདུང་སྙིང་ལ་བཅགས་པ་དུ་མ་ཞིག་ཡོད་ཀྱང་། །ད་ཙམ་གར་ཡོད་འདིར་ཡོད་ཕྱོགས་མགོ་རང་མི་ཤེས། །སྐྱིད་སྡུག་ཅི་རང་ཡོད་སྙམ་སེམས་པ་རང་སྐྱོའོ། །ཞེས་གསུངས། སྔར་འཇིག་རྟེན་ཁམས་ཀྱི་ས་ཆ་སྐྱིད་ཟེར་ན་དབང་མེད་འཁོར་བའི་སེམས་ཅན་མོད། འོན་ཀྱང་སྡུག་ཟེར་ནའང་མཐོ་རིས་མིའི་ལུས་རྟེན། སྐྱིད་ལ་སྡུག་པ་དགའ་སྡུག་འདྲེས་མའི་འཇིག་རྟེན་འདི་ནས། ཕ་དང་མ་ལ་འབྲེལ། བུ་དང་ཚ་བོར་འབྲེལ། སྤུན་དང་མིང་སྲིང་གི་འདུ་ཤེས་རེ་ཡོད་སོང་པས་ཞག་རེ་སོང་ན་འབྲལ་མི་ཕོད། སེམས་བསམ་པ་འཁྲེང་ས། ཤིན་ཏུ་གཅེས་པའི་མི་དེ་ཚོ་གློ་བུར་དབང་མེད་དུ་དུས་ཀྱི་ཕོ་ཉས་ཕྱི་མའི་ལམ་ཆེན་ལ་ཁྲིད་ཤོར་བ་ཡིན་པས། དེ་ཚོ་ད་སྐབས་གང་ཞིག་ཏུ་ཡོད་པ་ཡིན། ཤི་བར་དོའི་སྐབས་སུ་སྐྲག་དངངས་ཅི་འདྲ་ཞིག་མཐོང་ཡོད། ཤི་གསོན་དབུགས་ཀྱི་འགྲོ་འོང་མིད་པ་དཀར་ནག་གི་མཚམས་ནས་ཆད་དུས། གནད་གཅོད་ཀྱི་སྡུག་བསྔལ་གནམ་ས་རི་ལོག་གི་སྣང་བ་ཅི་འདྲ་འདྲ་ཞིག་ཤར་ཡོད། དབུགས་འདོམ་གང་ཕྱིར་འཕངས་ཏེ་དཀར་དམར་སྙིང་ཁ་ནས་འཕྲད་པའི་བར་ལ་རྣམ་ཤེས་བརྒྱལ་དུས། ཆོས་ཉིད་རང་ངོ་ཤེས་པའི་གདམས་པ་ནི་དེ་ལ་མེད། འཇིགས་པའི་སྒྲ་བཞི། ཡ་ང་བའི་གཡང་ས་གསུམ་ལ་བསླེབས་དུས། ལྷ་དང་བླ་མ་དཀོན་མཆོག་གིས་སྐྱབས་མགོན་སྐྱོར་མ་རེ་གནང་ཡོད་དམ། ཆོས་ཉིད་ཀྱི་རང་སྒྲ། འཇའ་འོད་ཀྱི་ཟེར་ཐགརྒྱལ་བ་ཞི་ཁྲོའི་སྐུའི་སྣང་བ་ཤར་དུས། སྐུའི་སྣང་བས་སྐྲག་ཟེར་གྱི་འོད་ཀྱིས་དངངས་སོང་ཨེ་ཡོད། ཚེ་འདིར་གདམས་ངག་ཉམས་ལེན་གྱི་གནད་ནི་མེད་པས་ཅི་ཡིན་འདི་ཡིན་མེད་པའི་སྐྲག་དངངས་འདར་གསུམ་གྱི་ངང་ནས་སྲིད་པ་བར་དོར་ཁ་འཁྱམས་སོང་ལོས་ཡོད། དེ་དུས་ཤུལ་མི་བདག་པོས་སྡུག་མཆི་མ་གཉིས་ཀ་དང་བསྒྲགས་ཏེ་ངུ་འབོད་བྱས་ཀྱང་དེའི་ཉམ་ཐག་གི་སེམས་ལ་ཇེ་སྐྱོ་ཇེ་སྡུག སླར་ཡང་སྲོག་ཐེངས་གཅིག་ཆད་པའི་སྡུག་བསྔལ། གསོན་མི་ཡུལ་གྱི་སྐྱིད་པའི་ས་ཆ་དང་ད་དུང་ཡིད་དང་མཐུན་པའི་མཛའ་བཤེས་དང་ཡུན་ཐུང་ཞིག་ཏུ་འགྲོག་ལོང་མ་བྱུང་སྙམ་པ། བསམས་ཤིང་བསམ་ན་སེམས་ཇེ་སྐྱོ་ཡི་ཐོག་ནས། སྔོན་ལས་ཟློག་མེད་ཀྱིས་ཕྱོགས་གང་ས་ཞིག་ལ་དེད་སོང་བ་དང་། བཞི་བཅུ་ཞེ་དགུའི་ཚེ་ཚད་རྫོགས་མཚམས་ནས་མཐོ་དམན་རིགས་དྲུག་ཅི་འདྲ་ཞིག་ལ་རྣམ་ཤེས་འཁྱམས་སོང་ཡོད་ན། ཤུལ་མི་རྣམས་ཀྱིས་དགེ་བའི་ར་མདའ་ཤུགས་དང་ནུས་པ་ཅི་ཡོད་ཕུད་ཁུལ་བྱས་ཀྱང་། དེ་ལས་དཔའ་བོའི་དཔུང་གིས་བསྡུར་ས། མགྱོག་པའི་བང་གིས་འདེད་ས་མ་རྙེད་པར། རང་ཉིད་ཀྱང་གར་འགྲོ་དབང་མེད་ནམ་འཆི་ཆ་མེད་ཤི་གསོན་གཅིག་བས་གཅིག་སྡུག་མོད། འོན་ཀྱང་གསོན་འདི་ནས་ཇི་ཙམ་སྡུག་ཀྱང་མི་ཡུལ་ཡིན་པ་རེད། ཤི་ཕར་རྒྱབ་ལ་སོང་མཁན་དག་ད་ལྟ་གང་ཞིག་ཏུ་ཡོད་མི་ཤེས་པས་དེའི་སྐྱིད་སྡུག་ཅི་འདྲ་མྱོང་གིན་ཡོད་སྙམ་དུས་སེམས་རེ་སྐྱོ་འདུག་གསུངས་པ་རེད། ད་དུང་དཔལ་སྤྲུལ་ཚང་གིས། འཇམ་ལེགས་དར་གྱིས་གཡོགས་ཤིང་ནོར་བུ་ཡི་རྒྱན་སྤྲས། །ལྷ་ཡུལ་ལྷ་ལ་འགྲན་པའི་མཛེས་སྡུག་གི་རི་མོ། །འཆི་བདག་ཆུ་རིས་གསལ་བའི་རླན་གཤེར་གྱིས་བསིལ་ཚེ། །ཁྭ་དང་བྱ་རྒོད་ཁོ་ནས་ཁ་ཟས་སུ་བརྒྱུད་སོང་། །ཞེས་གསུངས་ཏེ། གསོན་འཇིག་རྟེན་མི་ཡུལ་ན་ཡོད་དུས་དྲིན་ཕ་མའི་གཅེས་ཕྲུག ཤ་ཕུ་ནུའི་སྙིང་བཅུད། གོས་མཛའ་མོ་གྱོན། རྒྱན་མཛེས་མོ་བཏགས་ཤིང་། ལང་ཚོ་དར་ལ་བབ་པའི་ལུས་མཛེས་སྡུག་གི་རི་མོ་ལྷ་ཡུལ་གྱི་ལྷ་ལ་འགྲན་པ་ལྟ་བུ་དེ། འཆི་བདག་གི་མདུན་དུ་བསླེབས་ཏེ་སྡུག་སྙིང་འགྱོད་ཀྱི་མཆི་མའི་རླན་གཤེར་དང་མཉམ་དུ་ཞག་གསུམ་བདུན་ཚིག་དང་པོའི་མཚམས་ཤིག་ཏུ་དུར་ཁྲོད་ས་འཁྱག་གི་སྟེང་དུ་བྱ་ཁྭ་ཏ་དང་བྱ་རྒོད་ཀྱི་ཁ་ཟས་སུ་གྱུར་བས། ཉི་མ་དེ་ཡི་ཕྱི་ཉིན་ནས་ཚེ་གཅིག་ལ་གཏན་བྲལ་རེད་སོང་བ་འདི་ལ་བསམ་ན་མདང་གི་རྨི་ལམ་ལྟ་བུ་ཞིག་རེད་གསུངས་པའོ། །དེ་ལྟར་བསམ་ན། ཚེ་མི་རྟག་ནམ་མཁའི་འཇའ་ཚོན་འདྲ། །ནོར་མི་རྟག་རྩྭ་རྩེའི་ཟིལ་པ་བཞིན། །གསུངས་པ་འདི་ཐག་རིང་རྒྱང་གི་སྐད་ཆ་ཞིག་ཡིན་པ་མ་རེད། རང་རང་སོ་སོའི་རང་རྩིབ་ནས་མི་ཚེའི་ལོ་རྒྱུས་ལ་ཕྱི་བལྟས་རེ་བྱས་ན། ཐམས་ཅད་པོ་རྨི་ལམ་སྒྱུ་མ་མི་རྟག་འཁྲུལ་བའི་སྣང་བ་ཡིན་པ་ངོ་རང་ཐོག་ནས་འཕྲོད་བསྡད་ཡོད་ཀྱང་། ལུས་འབྱུང་བཞི་ཤ་ཁྲག་གི་ཕུང་པོ་གདོས་བཅས་གནོད་པ་མང་བ་འདི་ལ་སེམས་ཀྱི་རྒྱུན་དེ་བརྟེན་ནས། དེ་ལྟར་གནས་པའི་ཡུན་ལ་བྲོས་ཟེར་ན་འཆི་མེད་རྒས་མེད་ཀྱི་ལམ་ཞིག་ལ་བྲོས་ས་མི་བརྙེད། སྐྱོབས་ཟེར་ན་རང་གཞན་མཐོ་དམན་བར་གསུམ་ས་འདིའི་སྟེང་དུ་རྒྱུ་བཞིན་ཡོད་ཚད་དབང་མེད་བར་དོའི་སེམས་ཅན་ཉམ་ཐག་པ་ནི་ང་མིན་ང་འདྲ་ཤ་སྟག་རེད། རྨ་ཆུ་ལེབ་མོའི་ཁུག་སོ་ན། །གཅེར་བུ་གཅིག་སྟོང་དགུ་བརྒྱ་ཡོད། །རེ་རེར་བལྟས་ན་རེ་རེའི་སྡུག་ཅེས་པ་ལྟར། ང་བས་ད་དུང་དེ་སྡུག་གམ་སྙམ་པ་ལྟ་བུ། འཆི་བ་སྙིང་ནས་མི་དྲན། དོན་མེད་རྣམ་གཡེང་གི་འཁོར་ལོ། ཆགས་སྡང་དགའ་སྡུག་གི་བྲེལ་ཟིང་གིས་ཚེ་ཉི་མ་ཟད་པར་མ་ཟད། ལས་ཚད་སྡིག་པའི་ཁུར་བོ། བྱས་ཚད་སྡུག་བསྔལ་གྱི་ཁ་སྣོན་རེད་སྙམ་པ། ཁོག་པའི་ནང་ན་སེམས་ཤིག་ཡོད་ཕྱིན་བསམ་བློ་ཞིག་མི་འཁོར་ཐབས་མེད་པ་རེད། གཉིད་ཐུན་གཅིག་གི་རྨི་ལམ་འཁྲུགས་དེ་སད་བཞག་ཚེ། ཨོ་བདེན་མི་འདུག་རྨི་ལམ་ཡིན་འདུག་སྙམ་པའི་དགའ་སྣང་ཡོད་པ་ལྟ་བུ། འཁྲུལ་སྣང་གི་རྨི་ལམ་འདི་སད་ཐབས་ཤིག་དང་། དགའ་སྡུག་སྒྱུ་མའི་རྩེད་མོ་འདྲ་བ་འདི་ཟད་ཐབས་ཤིག་ཅིས་དགའམ་སྙམ་པའི་བསམ་བློ་ཞིག་འཁོར་ན། འཁོར་བའི་སྡུག་བསྔལ་ལ་ཕྱི་ཕྱག་འཚལ་བའི་འགོ་དང་པོ་འདྲ་བོ་དེ་ནས་བཙུགས་པ་རེད། འཇིག་རྟེན་འཁོར་བའི་སྐྱིད་སྡུག་འདི་ལ་ཞེ་སུན་པ་རྐྱང་པ་ཞིག་གིས་ཕན་ཐོགས་མེད། མཛའ་བཤེས་གཉེན་ཉེ་དུས་ཀྱི་ཆོས་ཉིད་དུ་གྱུར་ཏེ་གསོན་བྲལ་རེད་སོང་བ་རྣམས་ཀྱི་དོན་དུ། སྡུག་བསོག་ནས་སྐྱོ་གདུང་གི་མཆི་མ་ཤ་སྟག་བཏོན་པ་ཞིག་གིས་དེ་རྣམས་ལ་ཕན་ཐོགས་ཡོད་པ་ལྟ་ཅི་གནོད་ཀྱི་གཞི་མ་ཞིག་རེད་འགྲོ། སྐྱོ་སྡུག་གིས་ནམ་ཟླ་ཕུད་པ་དང་། ཁྲེལ་མེད་ཀྱིས་འདེང་ཞིག་མི་རྒྱག་པ་གཉིས་ཀ་རེད་མི་འདུག དེ་བས་རང་གཞན་གཉིས་ཕན་ཞིག། རབ་ཡིན་ན་ཕྱི་མ་བདེ་བ་ཅན་གྱི་ཞིང་ཁམས་སུ་མཉམ་དུ་སྐྱེས་ཏེ་མེ་ཏོག་པདྨའི་ནང་དུ་མཉམ་དུ་འཁྲུངས་བ་ཞིག་བྱུང་ན་དེའི་དུས་སུ་ནད་དང་ན་ཚའི་སྡུག་བསྔལ། ཤི་གསོན་ཁ་བྲལ་བའི་སེམས་ནད་མི་དགོས་པའི་སྟེང་དུ་ཚེ་ལོ་དཔག་མེད་ཀྱི་རིང་ལ་སངས་རྒྱས་འོད་དཔག་མེད་པའི་མདུན་ནས་ཆོས་མཉམ་དུ་ཞུས། མཚམས་རེ་རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཞིང་ཁམས་འདིར་ཡོང་ནས་འདིའི་ས་ཆ་ཡུལ་རིས་དགའ་གཉེན་མཐུན་གསུམ་ལ་ལམ་སྟོན་རེ་བྱེད་ཆོག་གི་སྙམ་ནས་ཚང་མས་སེམས་དཔངས་ཡར་ལ་བསྟོད་དང་། རང་རེ་སྐྱེ་ས་བཟང་པོ་ལྷོ་འཛམ་གླིང་ལས་ཀྱི་ས་པ། སྟོན་པ་ཤཱཀྱའི་རྒྱལ་པོས་ཆོས་གསུངས། དེའི་བསྟན་པ་མ་ནུབ། སློབ་དཔོན་པདྨ་འབྱུང་གནས་དང་པཎ་ཆེན་བི་མ་ལ་མི་ཏྲ་སོགས་ཀྱིས་གསང་སྔགས་ཟབ་མོའི་ཆོས་འཁོར་བསྐོར། དེར་མ་ཟད་ས་སྐྱའི་གོང་མ་རྣམ་ལྔ། བཀའ་བརྒྱུད་མར་མི་དག་གསུམ། ཇོ་བོ་རྗེ་དཔལ་ལྡན་ཨ་ཏི་ཤ། བཀའ་གདམས་གསར་རྙིང་གི་དགེ་བའི་བཤེས་གཉེན། རྗེ་བཙུན་ཙོང་ཁ་བ་ཡབ་སྲས། ཁྱད་པར་དུ་ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་ཀློང་ཆེན་པ་ཡབ་སྲས་བཅས་པ་བྱོན་སའི་བསྟན་ཞབས་སུ་སྐྱེས། ཆོས་རང་སྐལ་ལ་བབ་པའི་མན་ངག་གི་བདུད་རྩི་འདི་འདྲ་ཞུ་རྒྱུ་ཡོད་པའི་སྐབས་ལ་ཁེལ་བས། ཆོས་བདག་མེད་ལ་སྙིང་རུས་སུ་ཆེ་ཞེས་པ་ལྟར་ཡིན་པས། ད་སྔ་ཉི་མ་ཡན་ཆད་ས་འདིའི་ཐོག་ན་འཇིག་རྟེན་ཚེ་འདིའི་བྱ་བ་ལ་འབད་བརྩོན་བྱེད་མཁན་མང་འདུག་མོད། སྒྲུབ་མཁན་མང་ཡང་འགྲུབ་མཁན་མི་འདུག འདི་འགྲུབ་ནས་འདི་ཐོན་ཐལ་ཞེས་པ་ཞིག་ཡོད་སྲིད་པ་མ་རེད། འགྲུབ་ངེས་པ་ནི་ངན་སོང་གི་སྣ་འདྲེན་རེད་སྙམ་ནས། རྟ་བརྒྱུགས་བརྒྱུགས་ཀྱིས་བརྙོགས་པ་ཞིག་མེད་པར། མགོ་བཅག་བཅག་གིས་དམུས་པ་ཡིན་སྙམ་སྟེ་འཁོར་བའི་བྱ་གཞག་གླེང་ཚེ་ཞེན་པ་གཏིང་ནས་ལོག་པ་ཞིག་ཡོང་ན་ངན་སོང་ལ་མི་སྐྱེ་བའི་སྔ་ལྟས་འཁོར་བའི་སྡུག་བསྔལ་ལ་ཕྱི་ཕྱག་འཚལ་བའི་གོམ་ཁ་གྱེན་ལ་ཕྱོགས་སོང་བ་རེད། འོན་ཀྱང་འཁོར་བར་ཞེན་ལོག་ཙམ་གྱིས་ཡོང་བ་མིན། དེ་ལས་ཐར་བའི་ཐབས་ཤིག་བཙལ་དགོས། དེ་དགོས་ན་རྒྱལ་བའི་བཀའ་དང་མཁས་པའི་གསུང་དམ་པའི་གདམས་ངག་གི་རྒྱུན་ཡོད་ས་ལ་སྐྱེས་པའི་དོན། ས་འདི་ན་ཆོས་ཡོད་ཀྱང་རང་ཆོས་མེད་དུ་ལྷག་ན་འགྲིག་མི་འདུག ཆོས་ཀྱི་བཅུད་རང་ཉིད་ཀྱིས་ལོན་པར་བྱས་ཏེ་ཚེ་འདི་ཕྱི་རང་གཞན་གཉིས་ཕན་གྱི་དོན་ཆེན་འགྲུབ་པ་ཞིག་རང་བྱ་དགོས། དེས་ན། ཡང་དག་ཐོས་པའི་ཆོས་ཀྱི་མིག་བཙལ་ནས། །གང་ཐོས་ཆོས་དེ་རང་གི་རྒྱུད་དང་བསྲེ། །ཞེས་གསུངས། །སྔོན་འཁོར་བར་འཁྱམས་པའི་སྐྱེ་བ་རེ་རེའི་སྡུག་བསྔལ་ལ་བསམ་བློ་ཞིག་བཏང་ན་རིའི་རྒྱལ་པོ་རི་རབ་ལ་བཀལ་ན་མི་ཁྱག་རྒྱུ་ཞིག་ཡིན་པ་རེད། འོན་ཀྱང་མི་འདོད་བཞིན་དུ་ལན་གྲངས་ཟད་མཐའ་མེད་པར་སྡུག་བསྔལ་མྱོང་གིན་འདུག་པ་འདི། ཤེས་རབ་ཀྱི་མིག་མེད་པས་ཐར་བའི་ལམ་སྣ་མ་ཟིན་པས་འདི་ལྟར་མཐའ་སོང་བ་རེད། དེས་ན་ད་ཐེངས་ཡང་དག་ཐོས་པའི་མིག་ཅིག་བླ་མ་དགེ་བའི་བཤེས་གཉེན་ལས་བཙལ་ཏེ། གང་ཐོས་པའི་ཆོས་དེ་རང་གི་རྒྱུད་དང་བསྲེས་ནས་ཐར་བའི་སྲོག་ཅིག་རང་རྒྱུད་ནས་བཙུགས་ཐུབ་ན། སྙིང་ཉེ་བའི་མཛའ་བཤེས་སྙིང་དམར་ཅན་ཚེ་འདིའི་སྟེང་གི་ཕ་མ་སྤུན་སྲིང་དང་འདྲ་བར་སྐྱེ་བ་རེ་ལ་ཕ་མ་རེ། དེ་བཞིན་དུ་གཉེན་ཉེ་མཛའ་བཤེས་མཐའ་མེད་པ་ཞིག་ཡོད་པས་ཐམས་ཅད་བདེ་འདོད་སྡུག་བསྔལ་གྱིས་མནར་གྱིན་ཡོད་པ་ཤ་སྟག་རེད། དེས་ན་སེམས་ཅན་ལ་དགྲ་གཉེན་དང་ཕྱོགས་རིས་ཀྱི་དབྱེ་བ་ཕྱེ་ཡོང་ས་ཞིག་མི་འདུག་སྙམ་སྟེ། ཀུན་ལ་སྙོམས་པའི་བཏང་སྙོམས་ཚད་མེད་ཀྱིས་མ་སེམས་ཅན་ཐམས་ཅད་ཀྱི་སྡུག་བསྔལ་ལ་སྙིང་རྗེ་ཤས་མི་བཟོད་པ་ཞིག་སྐྱེས་ཚེ། ཚད་མེད་བཞི་དང་འབྲེལ་བའི་བྱང་ཆུབ་ཐོབ་པ་ལ་དོན་གཉེར་གྱི་འདུན་པ་ཞིག་བསྐྱེད་ན་འགྲུབ་པའི་མཐའ་ཡོད་པའི་སྔོན་རྟགས་རེད་སྙམ་སྟེ། སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་ཤིང་། བྱམས་པའི་ལུས་ངག་གི་ལས་དང་མི་འབྲལ་བའི་སྟེང་ནས། སངས་རྒྱས་སྲས་དང་བཅས་པས་ཕྱིན་དྲུག་གི་སྤྱོད་པ་རླབས་ཆེན་ལ་རིམ་གྱིས་ཇི་ལྟར་བསླབ་པ་བཞིན་དུ་རང་གིས་ཀྱང་སྐྱོ་ངལ་མེད་པས་ལམ་ལ་བསླབ་དགོས། སྤྱིར་ཚད་མེད་རྣམ་པ་བཞི་པོ་གང་ཡིན་ཞེ་ན། བྱམས་པ་དང་སྙིང་རྗེ་དགའ་བ་བཏང་སྙོམས་ཏེ་བཞིའོ། །གལ་ཏེ་དེ་བཞི་པོ་ཚད་མེད་པ་ཞིག་མིན་པར་སྤྱིར་བཏང་བ་ཞིག་ཡིན་ན་དེ་ལ་ཚངས་པའི་གནས་པ་བཞི་ཞེས་བྱ། ཚངས་རིས་ཀྱི་ལྷ་ཡུལ་དུ་སྐྱེ་བྱེད་ཀྱི་རྒྱུའོ། །དེ་བཞི་ཚད་མེད་པ་ཞིག་རྒྱུད་ལ་སྐྱེས་ན་ད་གཟོད་ཐར་བ་དང་མྱ་ངན་ལས་འདས་པ་ཐོབ་པའི་བྱང་ཆུབ་སེམས་ཀྱི་རྒྱུ་ཚད་མེད་བཞི་ཞེས་བྱ། བརྩེ་བས་སེམས་ཅན་ལ་ཕན་པ་བྱམས་པ། སྡུག་བསྔལ་དང་བྲལ་བར་འདོད་པ་སྙིང་རྗེ། དེ་གཉིས་ཀ་དང་མི་འབྲལ་བར་འདོད་པ་དགའ་བ། དགྲ་གཉེན་ཆགས་སྡང་ལ་སོགས་པ་ཆོས་བརྒྱད་སྙོམས་པར་འདོད་པ་བཏང་སྙོམས། ཚད་མེད་བཞི་ཉམས་སུ་ལེན་སྐབས་བཞི་པོ་བྱམས་པ་དང་སྙིང་རྗེ་གཉིས་ཀའི་ནང་དུ་བསྡུས་ཏེ་ཉམས་སུ་བླང་ན་ཆོག་པ་རེད། དེ་གཉིས་ཀའི་ནང་དུ་འདུས་ཏེ། ཚད་མེད་བཞིའི་ནང་གི་སྔ་མ་གསུམ་པོ་བདེ་བའི་དགོངས་པ། ཕྱི་མ་ཕན་པའི་དགོངས་པ། མདོར་ན་ཕན་དང་བདེ་བའི་དགོངས་པ་ལས་མ་འདས་པ་ཞིག་ཡིན། སྔོན་དུ་ཚད་མེད་བཞི་བསྒོམ་ན་བྱང་ཆུབ་ཀྱི་སེམས་གོམས་སླ། དེས་ན་ཐོག་མར་ཐམས་ཅད་ཀྱི་སྔོན་དུ་གོང་དུ་ཞུས་པ་བཞིན་བློ་ལྡོག་རྣམ་བཞིས་རང་རྒྱུད་སྦྱངས་བར་བྱས་ཏེ་ཐར་བའི་ལམ་སྣེ་ཟིན་དགོས་པ་ཡིན་པས། འཁོར་བ་འདི་ལ་སྙིང་པོ་མེད་པ་དང་སྡུག་བསྔལ་ཆེ་བ། ཟད་མཐའ་མེད་པའི་སྡུག་མཐའ་རིང་ཞིག་ཤེས་པའི་བློ་དེའི་སྟེང་དུ། སྐྱེ་བ་འདིར་འཕྲལ་དུ་ཕྱི་བཞག་མེད་པར་བདེ་བ་ཅན་ལ་སྐྱེ་བའི་རྒྱུ་བཞི་པོ་སྒྲུབ་དགོས་སྙམ་པའི་ཆོད་སེམས་བརྟན་པོ་སུས་ཀྱང་བཟློག་ཏུ་མེད་པ་ཞིག་གིས་དམ་པའི་ཆོས་ཉན་དགོས། གང་ཞིག་གསན་པར་བྱ་བ་ནི་རྣམ་དག་བདེ་ཆེན་ཞིང་གི་སྨོན་ལམ་འདི་ཉིད་འཆད་པའི་སྐབས་རེད། འདི་ལ་ཐོག་མཐའ་བར་དུ་དགེ་བའི་ཆིངས་གསུམ་གྱིས་བཤད་པ་ལས། བར་དུ་དགེ་བར་བདེ་བ་ཅན་དུ་སྐྱེ་བའི་རྒྱུ་བཞི་བཤད་པ་ལས། དེ་ལས་དང་པོ་སོང་ནས་གཉིས་པ་བཤད་པ། དེ་ལ་ཡང་ཚོགས་བསགས་ཐམས་ཅད་ཀྱི་སྒོ་ཡན་ལག་བདུན་དུ་བསྡུས་ནས་བཤད་པ་ལས་ཕྱག་འཚལ་བ་དང་མཆོད་པ་གཉིས་ཀ་སོང་ནས་བཤགས་པའི་སྐབས་ཡིན། དེ་ལ་ཡང་རང་བཞིན་དང་བཅས་པའི་ཁ་ན་མ་ཐོ་བ་གཉིས་བཤད་པ་ལས། དེ་ལས་རང་བཞིན་གྱི་སྡིག་པའི་རིགས་ཐམས་ཅད་བཤད་ནས་བཅས་པའི་ཁ་ན་མ་ཐོ་བ་བཤད་པ། དེ་ལ་ཡང་སོར་བྱང་སྔགས་གསུམ་གྱི་རིམ་པ་ཕྱེས་ནས་གསུངས་བས་སོར་བྱང་གཉིས་སོང་ནས།

གསུམ་པ་གསང་བ་རིག་འཛིན་སྔགས་ཀྱི་དམ་ཚིག་དང་འགལ་བ་བཤགས་པ་བཤད་པ།

རྩ་ལྟུང་བཅུ་བཞི་ཡན་ལག་སྦོམ་པོ་བརྒྱད། །གསང་སྔགས་དམ་ཚིག་ཉམས་པ་མཐོལ་ལོ་བཤགས། །ཞེས་གསུངས་ཏེ། །ཐེག་ཆེན་གསང་སྔགས་ཀྱི་ལམ་དུ་ཞུགས་པ་ནི་ལམ་མྱུར་ཞིང་ཐབས་མང་བའོ། །འོན་ཀྱང་དེ་ལྟར་ཉེན་ཁ་ཡང་ཡོད་པ་ཞིག་ཡིན། རྒྱུད་ལས། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །ཅེས་སོ། །སྦྲུལ་སྨྱུག་དུང་དུ་བཙུད་པ་ལྟར་ཡང་ན་ཡར་ཡང་ན་མར་ལས་འགྲོ་ས་གསུམ་པ་མེད་པའོ། །གསང་སྔགས་ཞུ་བ་པོ་དེ་ཡང་གང་བྱུང་ཅི་བྱུང་ཞིག་གིས་མི་ཆོག་སྟེ། གསང་སྔགས་སེང་གེའི་འོ་མ་འདྲ། །རིན་ཆེན་གསེར་སྣོད་མ་ལགས་པས། །སྣོད་གཞན་ཕལ་བར་བླུག་གྱུར་ན། །སྣོད་ཀྱང་ཆགས་ལ་བཅུད་ཀྱང་འཛག །ཅེས་གསུངས་པས་སོ། །གསང་སྔགས་ཀྱི་སྡོམ་པ་ནི་དབང་གི་སྐབས་ནས་ཐོབ་ཀྱི་ཡོད་པ་ཡིན། སྡོམ་པའི་སྲོག་འཛིན་བྱེད་པ་དམ་ཚིག་ཡིན། རྩ་ལྟུང་བཅུ་བཞི་ཡན་ལག་སྦོམ་པོ་བརྒྱད། །ཅེས་གསུངས་ཏེ། གསང་སྔགས་བླ་མེད་ཀྱི་ཐུན་མོང་གི་རྩ་ལྟུང་བཅུ་བཞི། གང་ཞེ་ན། བླ་མ་རྡོ་རྗེ་སློབ་དཔོན་སྨོད་པ་དང་། སངས་རྒྱས་ཀྱི་བཀའ་ལས་འདས་པ། རྡོ་རྗེ་མཆེད་གྲོགས་ལ་འཚེ་བ། བྱམས་སེམས་བཏང་བ། བསམ་བཞིན་དུ་ཁུ་བ་འབྱིན་པ། གཞན་གྱི་གྲུབ་མཐའ་ལ་སྨོད་པ། སྐལ་མེད་ལ་གསང་བ་སྒྲོགས་པ། ཕུང་པོ་ལྔ་སྡུག་བསྔལ་དུ་ལྟ་བ། རང་བཞིན་གྱིས་དག་པའི་ཆོས་ལ་ཐེ་ཚོམ་ཟ་བ། ཞིང་བཅུ་ཚང་བའི་དགྲ་བོ་སྒྲོལ་ནུས་བཞིན་མི་སྒྲོལ་བ། སྤྲོས་པ་དང་བྲལ་བ་ལ་རྟོག་གེའི་བློས་མཚན་མར་ལྟ་བ། སྣོད་ལྡན་གྱི་སློབ་མ་ཡལ་བར་དོར་བ། དུས་ལ་བབ་ཀྱང་དམ་རྫས་མི་བསྟེན་པ། ཤེས་རབ་ཀྱི་རང་བཞིན་བུད་མེད་སྤོང་བ་སྟེ་བཅུ་བཞི་དང་། ཡན་ལག་སྦོམ་པོ་བརྒྱད། སྣོད་མིན་ལ་གསང་སྔགས་བཤད་པ། རྟོགས་པའི་ཡེ་ཤེས་མེད་བཞིན་དུ་སྔགས་པར་རློམ་པ། སྔགས་ལ་མི་དད་པའི་ནང་དུ་ཞག་བདུན་འདུག་པ། མི་འོས་པའི་རིག་མ་བསྟེན་པ། རྒྱུད་དང་མི་མཐུན་པའི་རིག་མ་ལས་རང་སྟོབས་ཀྱིས་བདུད་རྩི་ལེན་པ། ཚོགས་འཁོར་དུས་སུ་རྩོད་ཤག་བྱེད་པ། སྣོད་ལྡན་ལ་གསང་སྔགས་མི་སྟོན་པ། དད་པས་ཆོས་འདྲི་བ་ལ་ཆོས་གཞན་སྟོན་པ་སྟེ་སྦོམ་པོ་བརྒྱད་དོ། །དེ་ལྟ་བུ་རྩ་ལྟུང་བཅུ་བཞི་དང་ཡན་ལག་སྦོམ་པོ་བརྒྱད་ལ་སོགས་པ་རྒྱུད་སྡེ་སོ་སོའི་སྐབས་ནས་འབྱུང་བའི་གསང་བ་སྔགས་ཀྱི་དམ་ཚིག་ལས་ཉམས་ཤིང་འགལ་བ་ཐམས་ཅད་མཐོལ་ཞིང་བཤགས་སོ། །གསང་སྔགས་ཀྱི་དམ་ཚིག་མ་ཉམས་ཤིང་བསྲུང་ན་ཕན་ཡོན་ཅི་འདྲ་ཞིག་ཡོད་ཅེ་ན། མ་ཉམས་རིང་མཐའ་སྐྱེ་བ་བཅུ་དྲུག་གམ། །མྱུར་ན་ཚེ་འདིའམ་འཆི་ཁ་བར་དོ་རུ། །ཐུན་མོང་གྲུབ་པ་བརྒྱད་དང་དབང་ཕྱུག་བརྒྱད། །མཆོག་གི་དངོས་གྲུབ་ཁ་སྦྱོར་བདུན་ལྡན་ཐོབ། །དེ་ཕྱིར་རང་གཞན་དོན་གཉིས་ལྷུན་གྱིས་གྲུབ། །ཅེས་གསུངས་པ་ལྟར། མཆོག་དང་ཐུན་མོང་གི་དངོས་གྲུབ་ཐོབ་པ་དང་། ཁྱད་པར་དུ་གནས་སྐབས་སུ་བསམ་པའི་དོན་འགྲུབ། ཐམས་ཅད་ཀྱིས་ཡིད་དུ་འོང་། འཇིག་རྟེན་སྐྱོང་བའི་ལྷ་ཆེན་པོ་ཐམས་ཅད་ཀྱིས་ཀྱང་གུས་ཤིང་བཀུར། སངས་རྒྱས་བྱང་སེམས་དཔའ་བོ་རྣལ་འབྱོར་མ་ཐམས་ཅད་ཀྱིས་སྲས་དང་སྤུན་དུ་དགོངས་ཏེ་བྱིན་གྱིས་བརླབ་པར་མཛད་པའོ། །དམ་ཚིག་ཉམས་ན་རྡོ་རྗེ་ཁྲག་འཐུང་གིས་མ་རུང་བ་བྱས་ཏེ་དམྱལ་བ་མནར་མེད་མ་གཏོགས་འགྲོ་ས་མེད་པ་ཞིག་བྱེད་པ་ཡིན། འོན་ཀྱང་དབང་དངོས་དེ་སྐུར་ཐོབ་གཉིས་ཀ་མཚན་ཉིད་དང་ལྡན་པ་ཞིག་དགོས་ན། མཚན་ཉིད་དང་ལྡན་པའི་རྡོ་རྗེ་སློབ་དཔོན་རང་ཉིད་ཀྱི་རྒྱུད་སྨིན་ཅིང་གྲོལ་བ་དབང་བཞིའི་ཆུ་བོའི་བརྒྱུད་པ་མ་ཉམས་པ། མན་ངག་ཉམས་ལེན་གྱི་ཕྱག་བཞེས་ཐམས་ཅད་དང་འབྲེལ་བ། གཞན་ལ་དབང་བསྐུར་ན་ཕ་རོལ་པོའི་རྒྱུད་སྨིན་པར་མ་ཟད་རང་ཉིད་ཀྱི་ནུས་སྟོབས་ཡོན་ཏན་ཟད་པ་མེད་པ་ཞིག་དགོས། ཞུ་བའི་སློབ་མ་དེ་ཡང་མཚན་ཉིད་དང་ལྡན་པ་ཞིག་ཡིན་ན་དབང་དུས་སུ་ཡེ་ཤེས་ངོ་འཕྲོད་དེ་རྟོགས་གྲོལ་ཅིག་ཆར་དུ་འགྱུར་རྒྱུ་ཡོད་པ་དང། ཡང་ན་བླ་མ་སངས་རྒྱས་དངོས་མཐོང་གི་དད་པ་ཡོད་ཅིང་སྲོག་ལ་བབ་ཀྱང་དམ་ཚིག་མི་གཏོང་བ་ཞིག་ཡིན་ཕྱིན་དབང་གི་བྱིན་རླབས་འཇུག་ཅིང་། དེ་ལྟར་རིམ་གཉིས་ཀྱི་ལམ་མཐར་ཕྱིན་ཏེ་ཟུང་འཇུག་གི་གོ་འཕང་མངོན་དུ་བྱེད་ཐུབ་པའོ། །དེ་མིན། གདམས་ངག་སྒྲོན་མེ་ལག་བརྒྱུད་ཟེར་བ་ཡིན་མོད། སྒྲོན་མེ་གཅིག་པུ་ཞིག་ལག་གིས་བཟུང་ནས་དེ་གཅིག་ཤོས་ཀྱི་ལག་ཏུ་བཞག་ཚེ་གཅིག་ཤོས་ཀྱིས་དེ་ཁྱེར་སོང་ཚེ་ཤུལ་ན་ལྷག་ཏུ་མེད་པ་རེད། བྱིན་རླབས་བུམ་པ་གང་བྱོས། བུམ་པ་གང་ཡོད་པ་དེ་བྱོས་བཞག་པས་ཤུལ་ན་ལྷག་ཏུ་མེད་པའི་རིགས། མི་ལ་སྟེར་བཞག་ན་རང་ལ་མེད་འགྲོ་བ་ཞིག་ད་དུང་དབང་སྐུར་བའི་ས་ཚོད་ལ་ཐོན་ཡོད་པ་མ་རེད། དེ་མིན་ཡང་དབང་སྐུར་བའི་བླ་མའི་རྒྱུད་ལ་དབང་དོན་གྱི་ཡེ་ཤེས་ལྟ་ཅི་སྙིང་རྗེ་ཕན་སེམས་ཀྱི་བསམ་པ་བཟང་པོ་ཙམ་ཡང་མེད་པར་མ་ཟད། ཆོ་ག་ཕྱག་ལེན་ཙམ་ཡང་ཆ་མི་ཚང་ཞིང་ཐ་ན་དབང་ཚིག་གི་སྒྲ་ཙམ་ཡང་བརྡ་མི་ཁྲོལ་བ་ཞིག་གིས་སློབ་མ་དད་མེད་འགའ་ཞིག་གི་མགོ་ཐོག་ཏུ་ཆུ་བླུག་པ་ཙམ་གྱིས་དམ་ཚིག་མི་ཚིག་གཉིས་ཀ་ཡོད་རྒྱུ་མ་རེད་བསམ་འདུག ཡོད་ངེས་པ་ཅི་ཞིག་ཡོད་པ་རེད་ཅེ་ན། ཆོས་ལ་དབང་ཟ་བ་དང་གསང་སྔགས་ཁྲོམས་བསྒྲག་གི་ཉེས་ལྟུང་ཆོས་ཀྱིས་ཆོས་བརྒྱད་འཚོལ་བའི་ཆོས་སྤོང་གི་ལས་འབྱུང་བར་ཉེ་བ་ཡིན་ནམ་སྙམ། གང་ལྟར་ཀུན་སློང་དང་རྒྱུད་ཚོད་ལ་རག་ལས་པ་རེད། གང་ཟག་གི་ཚོད་སུས་ཀྱང་ཁ་ཚོན་ཆོད་དཀའ་བ་རེད། མདོར་ན་ཆོས་རྒྱུད་འདི་ལ་ཞུགས་ཕྱིན། སོར་བྱང་སྔགས་གསུམ་ཀྱི་སྡོམ་པ་མ་བླངས་པ་ཞིག་མེད་པས། སྡོམ་གསུམ་འགལ་མེད་གནས་འགྱུར་ངོ་བོ་གཅིག་ལ་ལྡོག་པ་ཐ་དད་དུ་བཞེད་པའི་རིང་ལུགས་ལྟར་དུ། སྡོམ་གསུམ་སོ་སོའི་བསྲུང་བྱ་མ་ཉམས་པར་བསྲུངས་ཏེ། འགལ་ཉམས་བྱུང་ན་དུས་ཐོག་དུ་བཤགས་ཏེ་མདོ་སྔགས་ཟུང་འབྲེལ་གྱི་ལམ་ནས་ཚོགས་བསགས་སྒྲིབ་སྦྱོང་གིས་རྣམ་དག་བདེ་ཆེན་གྱི་ཞིང་གི་མགོན་པོ་འོད་དཔག་མེད་པའི་ཐུགས་དང་དབྱེར་མེད་དུ་འདྲེས་པའམ། ཞིང་དེ་ལ་སྐྱེས་ཏེ་ལམ་རིམ་བགྲོད་ཀྱིས་བྱང་ཆུབ་ཐོབ་དགོས་པ་དེ་སྐབས་འདིའི་གོ་དོན་རེད།

གསུམ་པ་ངོ་མ་ཤེས་པའི་རང་བཞིན་གྱི་སྡིག་ལྟུང་བཤགས་པ།

སྡོམ་པ་མ་ཞུས་མི་དགེའི་ལས་བྱས་པ། །མི་ཚངས་སྤྱོད་དང་ཆང་འཐུང་ལ་སོགས་པ། །རང་བཞིན་ཁ་ན་མ་ཐོ་སྡིག་པ་སྟེ། །སྡིག་པ་སྡིག་ཏུ་མ་ཤེས་མཐོལ་ལོ་བཤགས། །ཞེས་གསུངས་ཏེ། །སྡོམ་པ་མ་ཞུས་མི་དགེའི་ལས་བྱས་པ། །ཞེས་པ་ན། རབ་བྱུང་གི་སྡོམ་པ་མ་ཞུས་པའི་ཁྱིམ་པ་ཕོ་མོ་ལ་ཉིས་བརྒྱ་ལྔ་བཅུ་རྩ་གསུམ་གྱི་འདུལ་ཁྲིམས་སྲུང་རྒྱུ་ལ་སོགས་པའི་བཅས་པའི་ཁ་ན་མ་ཐོ་བའི་སྡིག་པ་མེད་ན་ཡང་། མི་ཚངས་སྤྱོད་དང་ཆང་འཐུང་ལ་སོགས་པ། །ཞེས་པ་ནི། མི་ཚངས་སྤྱོད་དང་ཕྱོགས་མཚུངས་པའི་འདོད་པས་ལོག་པར་གཡེམ་པ་དང་། མྱོས་འགྱུར་གྱི་ཆང་འཐུང་བ། ཆང་འདི་སྤྱིར་ཉེས་པ་ཆེ་བས། མྱོས་འགྱུར་ཉེས་པ་འཕེལ་འགྱུར་བ། །རྩྭ་མཆོག་གིས་ཀྱང་མི་བཏུང་ངོ་། །ཞེས་གསུངས་བས། རབ་ཏུ་བྱུང་བ་ལ་བཀག་ཡོད་མོད། རབ་ཏུ་བྱུང་བ་མིན་ཀྱང་ཆང་འདི་ཉེས་དམིགས་ཆེ་བ་རེད། ཆང་གི་ཉེས་དམིགས་ནི་ཅི་འདྲ་ཞིག་ཡིན་ཞེ་ན། སྡིག་པ་ཐམས་ཅད་ཀྱི་འབྱུང་ཁུངས། སྡུག་བསྔལ་ཐམས་ཅད་ཀྱི་གཞི་དང་རྩ་བ་ཡིན། གཏམ་ངན་དང་མི་འདོད་པ་ཡོད་ཚད་པ་འདིས་འདྲེན་པར་བྱེད། སྤྱོད་ངན་འབོད་པའི་ལག་གཡོབ་བྱེད་པ་རེད། འཐབ་རྩོད་ཀྱི་ལམ་དང་སྙིང་གི་མུན་པ་མི་ཟད་པ་ཞིག་འདི་ཡིན་པ་རེད། གནའ་སྔོན་མ་ཞིག་ལ་ས་ཆ་ཞིག་ཏུ་ཡུལ་ཁམས་སྡེ་འབངས་དང་བཅས་པ་ཆང་ཁོ་ནས་ཕུང་འགྲོ་བའི་ས་ཆ་ཞིག་ཡོད་། ལྷའི་དབང་པོ་བརྒྱ་བྱིན་གྱིས་དེ་མཐོང་ནས་སྤྲུལ་བ་ཞིག་བྱས་པ་སྟེ། སྤྲུལ་བའི་མི་དེའི་ལག་ཏུ་ཆང་བུམ་པ་གང་བཟུང་ནས་རྒྱལ་བློན་ཐམས་ཅད་ཀྱི་མདུན་གྱི་ནམ་མཁར་སོང་སྟེ། ཆང་གི་བུམ་པ་བསྟན་ཏེ་འདི་ཉོ་འམ་ཞེས་བསྒྲགས་པ་རེད། རྒྱལ་བློན་རྣམས་ཀྱིས་དེའི་ནང་དུ་ཅི་ཞིག་ཡོད་ཅེས་དྲིས་པས། སྤྲུལ་བ་དེས་སྨྲས་པ་འདིའི་ནང་དུ་དོན་ཡལ། དོན་ཉམས། སྨྱོ་ཆུ། ཕུང་ཆུ། འདི་དང་འཕྲད་ན་ནོར་ཟད་པར་བྱེད་ཅིང་རང་གཞན་ཐམས་ཅད་ཕུང་བར་བྱེད་པའི་སྨྱོ་ཆུ་དུག་ཆུ་ངར་མ། མིང་ལ་མྱོས་འགྱུར་གྱི་ཆང་ཟེར་བ་དེ་ཡོད་ཅེས་སྨྲས། རྒྱལ་བློན་སྡེ་འབངས་དང་བཅས་པས་ཆང་འདི་དེ་འདྲ་ཉེས་དམིགས་ཆེ་ཞིང་སྐྱོན་ཆ་ཆེན་པོ་ཅན་ཞིག་ཡིན་ནོ་སྙམ་ནས་དེར་ཤེས། དེའི་ཕྱིས་སུ་ཆང་དུག་བཞིན་དུ་སྤངས་ཏེ་རྒྱལ་ཁམས་ཐམས་ཅད་བདེ་བར་གྱུར། ཆང་འདི་འཐུང་ན་རང་ལུས་རང་གིས་བདག་མི་ཐུབ་པར་འགྱུར་ཏེ། ཡང་སྔོན་ཞིག་ལ་རྐུན་མ་གཉིས་ཀྱིས་ཁྱིམ་ཚང་ཞིག་གི་ཁྱིམ་ཕུགས་ལེན་དགོས་སྙམ་སྟེ། ཐོག་མར་ཁྱིམ་ཚང་དེ་ལ་དངོས་པོ་འགངས་ཆེན་ཅི་ཞིག་ཁྱེར་རྒྱུ་ཡོད་བལྟ་དགོས་སྙམ་སྟེ་རྐང་འཇབ་ལག་འཇབ་ཀྱིས་སྨག་ནག་ནང་ནས་བཙལ། །སྐབས་ཤིག་ལ་ཆང་བསྙལ་ཡོད་སའི་རྫ་མ་ཆེན་པོ་ཞིག་དང་འཕྲད། ཆང་གི་གམ་ལ་སོང་ཚེ་ཆང་སྦངས་ནས་བཙག་རན་ལ་ཉེ། གཉིས་ཀས་ཕན་ཚུན་ལ་ལྐོགས་གཏམ་གྱིས་བཤད་པ་འདི་ཆང་རེད་འདུག་ཞིམ་པ་རེད་འཐུང་ངམ་ཞེས་སྨྲས། གཉིས་ཀས་འཐུང་གྲབ་བྱས། ཡིན་པ་ནི་ཆང་དེ་ཞབས་ནས་མར་ལ་བཙག་དགོས་པ་ཞིག་ཡིན་མོད། གལ་ཏེ་ཞབས་ནས་མར་ལ་བཙག་ན་བདག་པོས་གོ་འགྲོ་བའི་ཉེན་ཁ་ཡོད་པས། ཁ་ནས་ཡར་བཅུས་ཏེ་འཐུང་། བར་སྐབས་ཤིག་ལ་འཐུང་ཚོད་མ་ཟིན་པར་བཟི་ནས། གཅིག་ཤོས་ཀྱིས་སྨྲས་པ་ཁོས་གླུ་ལེན་བསམ་ཞེས་སྨྲས། གཅིག་ཤོས་ཀྱིས་སྨྲས་པ་ཁྱོད་སྨྱོ་བ་ཡིན་ནམ་བདག་པོ་ཚང་གིས་གོ་ན་གསད་ཡོང་། ཁ་རོག་སྡོད་ཅིག་ཅེས་སྨྲས། གཅིག་ཤོས་དེས་ད་དུང་ཆང་འཐུང་གིན་བསྡད། སྐབས་ཤིག་ལ་བསྲན་མ་ཐུབ་པར་གླུ་བླངས། ཆང་ཁ་ནས་བཙག་དུས་འདི་འདྲ་ན། །ཞབས་ནས་བཙག་ན་ཅི་འདྲ་ཞིམ། །ཞེས་གླུ་བླངས་བར་མ་ཟད་བྲོ་འཁྲབ་པས་བདག་པོ་ཚང་གིས་གོ་སོང་བ་རེད། ཁྱིམ་བདག་མི་གཤིས་བཟང་ཞིང་རྒྱུད་འཇམ་ཞིག་ཡིན་པས་རྐུན་མ་གཉིས་ཀ་མ་བརྡུངས་པར་མ་ཟད་ཆང་བརྒྱག་གཅིག་བླུད་ནས་ཕྱིན་ཆད་རྐུ་མ་བྱེད་ཅིག་མ་གཏོགས་སྲོག་འཚམ་པ་མ་རེད་ཅེས་སྨྲས་ཏེ་མངག་ཡོང་བ་རེད། གལ་ཏེ་ཁྱིམ་བདག་རྒྱུད་ངན་ཞིག་ཡིན་ཕྱིན་རྐུན་མ་གཉིས་ཀ་ཆང་གིས་བཟི་ཡོད་པས་དགོང་མོ་དེར་ཆག་སྒོ་རང་གིས་ཉོ་ངེས་ཅན་རེད། ཆང་འདི་ཚེ་འདིར་ཕུང་བྱེད་ཡིན་པར་མ་ཟད་ཕྱི་མར་དམྱལ་བ་ངུ་འབོད་དུ་སྐྱེ་བ་དང་། ཁྱི་དང་སྨྱོན་པའི་ལུས་ལེན། ཉེས་པ་ཀུན་ཀྱི་རྩ་བ་ཡིན་པས་ན་རྩྭ་རྩེའི་ཟིལ་བ་ཙམ་ཡང་བཏུང་མི་རུང། སངས་རྒྱས་བཅོམ་ལྡན་འདས་ཀྱིས་ཆང་འཐུང་ང་ཡི་རྗེས་འཇུག་མིན་ཞེས་གསུངས། སངས་རྒྱས་ཀྱི་རྗེས་འཇུག་གྲྭ་པ་རྣམས་ཀྱིས་འཐུང་ག་ལ་རུང་མོད་མི་སྐྱ་ཕོ་མོ་ཡིན་ཡང་མི་རུང་བའི་ཉེས་པ་དང་སྐྱོན་ཆ་གོང་དུ་བཤད་པ་ལྟར་རོ། །འདིར་མི་ཚངས་སྤྱོད་དང་ཆང་འཐུང་ལ་སོགས་པ་གསུངས་པའི། སོགས་ཁོངས་ནང་དུ་སྲོག་གཅོད་པ། རྐུ་བྱེད་པ། བཅོམ་འཕྲོག་རྡུང་གསུམ། ཁ་དུད་སྣ་དུད། ཤོ་སྦག་བརྒྱབ་ནས་རྒྱན་པོ་འགྱེད་པ། བག་མེད་ཀྱི་སྐྱོན་ཆ་གཞན་དག་མདོར་ན་ཀུན་སློང་ཉོན་མོངས་ཅན་གྱིས་བསྐྱེད་ཚད་ཐམས་ཅད་སྟོན་པ་སངས་རྒྱས་ཀྱིས་ཁྱིམ་པས་འདི་མི་ཆོག་ཅེས་བཅས་པ་མཛད་མེད་ནའང་། རང་བཞིན་གྱི་ཁ་ན་མ་ཐོ་བའི་སྡིག་པ་སྟེ། །ཞེས་གསུངས་ཏེ། མ་བཅས་ན་ཡང་སྡིག་པ་ཆེན་པོ་ཅན་ཡིན་པས་ན་རང་བཞིན་གྱི་སྡིག་པ་ཡིན། དེས་ན་དེ་དག་ཐམས་ཅད་ཁྱིམ་པ་རབ་བྱུང་སུས་ཀྱང་བྱེད་མི་རུང་། བྱས་ན་རྣམ་སྨིན་སྡུག་བསྔལ་མྱོང་བའི་གནད་མ་ཤེས་པས། སྡིག་པ་སྡིག་ཏུ་མ་ཤེས་མཐོལ་ལོ་བཤགས། །ཞེས་གསུངས་ཏེ། སྡིག་པ་ཡིན་པ་ལ་སྡིག་པ་ཡིན་པར་མ་ཤེས་ཏེ་བྱས་པ་ཐམས་ཅད་མཐོལ་ཞིང་བཤགས་གསུངས། སྤྱིར་ན་སྡིག་དང་ཉེས་པ་ཐམས་ཅད་ལྟུང་བ་འབྱུང་བའི་སྒོ་བཞི་སྟེ། མི་ཤེས་པ་དང་། མ་གུས་པ། བག་མེད་པ། ཉོན་མོངས་པ་མང་བ་སྟེ་དེ་རྣམས་ལས་བྱུང་བ་ཡིན་ཡང་། འདི་ནས་གཙོ་ཆེར་མི་ཤེས་པའི་དབང་གིས་སྡིག་ལྟུང་བྱས་པ་མཐོལ་ལོ་བཤགས་གསུངས་སོ། འདིའི་སྐབས་སུ་མི་ཚངས་སྤྱོད་ཀྱི་སྒྲས་ལོག་གཡེམ་བཀག་པ། འདོད་པའི་ཕྱིར་མ་བསད་པའི་མཚམས་མེད་ཀྱི་ལས་བསགས་པའི་ལོ་རྒྱུས་ཡོད་པ་རེད། དེ་བཞིན་དུ་ཆང་ནི་ཉེས་པ་ཐམས་ཅད་ཀྱི་འབྱུང་ཁུངས་ཡིན་པ་གོང་དུ་བཤད་པ་བཞིན་ནོ། སངས་རྒྱས་བཅོམ་ལྡན་འདས་ཀྱིས། ང་ལ་སྟོན་པར་ཁས་ལེན་པ་རྣམས་ཀྱིས་ཆང་རྩྭ་རྩེས་ཀྱང་བཏུང་བར་མི་བྱ་ཞེས་གསུངས་སོ། །གཞན་ལ་ཟས་ནོར་གྱི་སྦྱིན་པ་གཏང་ནའང་ཆང་གི་སྦྱིན་པ་གཏོང་མི་རུང་། དུ་བ་སྣ་ཐ་དེ་ཚོ་ཉེས་དམིགས་ཆེ་བར་གཏེར་ལུང་མང་པོ་ལས་གསུངས་པས། གཞན་མ་བསམ་ནའང་རང་གི་སྲོག་རང་གིས་ལོས་གཅེས། གློ་བའི་རྩ་སྦུག་འདིས་འགག་འགྲོ་བ་རེད། ཁྲག་གི་རྒྱུ་བ་དལ་མོ་དང་ཁྲག་ནུར་པོར་གྱུར་ནས་ཁྲག་རྒྱུ་ལམ་དུ་རྒྱུ་མི་ཐུབ་པར་འགྱུར། དེ་ནས་དབུགས་འཚང་པ། ཁྲག་རྩ་ཀླད་པའི་ནང་ནས་འགད་དེ་ཀླད་ཁྲག་འདྲེས་ནས་ཤི་འགྲོ་བ་དེ་ཚོ་ཚང་མ་མང་ཆེ་བ་ནི་དུ་བ་འཐེན་པའི་ཁུངས་ནས་ཡོང་བ་མང་པ་རེད། དུ་བ་འཐེན་པའི་མི་ལ་འཕོ་བ་མི་ཐེབ་གསུངས་པར་མ་ཟད། དུ་འཐེན་གཅིག་ཡོད་ན་དེའི་ཆོས་ར་དེའི་ནང་ན་ཡོད་ཚད་ལ་གནོད་པའི་ཤུགས་རྐྱེན་ཐེབས་འགྲོ་བ་དེ་འདྲའི་རྫས་ངན་བཙོག་པ་ཞིག་ཡིིན། རང་ཐང་གི་བཙོག་མི་བཙོག་གི་ངོས་ནས་བཤད་ན་ཡང། དུ་འཐེན་ཞིག་གི་ཁ་རྩ་ནས་འདུག་པ་ལས་གྲོང་པ་དགུ་ཡི་ཉོབ་ལུད་འཕོ་ས་རུ་གཙང་བ་མིན་ནམ་སྙམ་པ་ལྟ་བུ་ཞིག་ཡིན། གང་སྡུག་རྣམས་ཀྱིས་དུ་བ་འཐེན། ཆང་འཐུང་། མནའ་སྐྱེལ། དེ་དག་བྱེད་པའི་ཁྱིམ་ཚང་ཞིག་ལ་སྐྱིད་ཅིག་མཐོང་རྒྱུ་མེད་པ་ཕར་བལྟས་ཚུར་གསལ་ཡིན། ཚེ་ཕྱི་མའི་སྡུག་བསྔལ་དང་རྣམ་སྨིན་དེ་བས་ལྕི་བ་རེད། དེས་ན་སྐྱེས་པ་ཚང་མས་དུ་བ་སྣ་དུད། ཆང་ཨ་རག ཤོ་སྦག་རྒྱལ་སྐུགས་འཇོག་རྒྱུ་དེ་ཚོ་གཅད་དགོས། ཆོས་རའི་ནང་དུ་འགྲོ་རྒྱུ་མི་འདུག་མ་གཏོགས་ཁས་ལེན་བྱེད་འཇུག་ཡོང་ཁི་སྙམ་ནས་བྲོས་མི་དགོས་དང་བཙན་མི་བཙུགས་མོད། འོན་ཀྱང་རང་མོས་ཀྱིས་རིམ་གྱིས་སྤོང་དགོས། ཚ་བཅད་བྱེད་པས་འཚམས་མི་ཆོད། ཁས་ལེན་འགལ་ན་ཉེས་པ་དེ་བས་ཆེ་བས་ཉེས་པ་ཉིས་བརྩེགས་སུ་འགྱུར་མོད། འོན་ཀྱང་ཆོད་དུས་འདི་རེད་ཅེས་པ་ཞིག་ཤར་རྒྱུ་མེད། སྡིག་པའི་ལས་དེ་མགྱོག་པར་མ་བཤགས་ན་ཡར་ལ་འཕེལ་ཡོང་གི་ཡོད་པ་ཡིན། ཉིན་རེ་གཅད་སྔ་ན་དེའི་ཚོད་ཀྱི་དགེ་བ་ཡང་འཕེལ་རྒྱུ་ཡོད། སེམས་ཐག་ཆོད་རྒྱུ་རེད། བྱ་བ་གང་སྒྲུབ་ན་དེ་རེད། ཨ་མའི་བུ་ཞིག་མིན་དུས་གང་ལ་ཐུག་ན་དཔའ་འཁུམ་ནས་བསྡད་ཡོད། དུ་བ་འདི་རྫས་ངན་རེད། ཡིན་རྒྱུ་ས་སྟེང་ནས་སྐྱེས་པའི་ལྡུམ་རིགས་ཤིག་ཡིན་མོད་། ལྡུམ་རིགས་ཀྱི་ནང་དུ་ཟོས་ན་སྲོག་གཅོད་བྱེད་ཀྱི་ལྡུམ་རིགས་ཀྱང་ཡོད་ལ། ལྡུམ་རིགས་དང་ཤིང་ལོ་འགའ་རེ་ཁར་སོང་ན་སྨྱོ་འགྲོ་བྱེད་ཀྱང་ཡོད། སངས་རྒྱས་སྨན་གྱི་བླ་མའི་བྱིན་རླབས་དང་ཕྲིན་ལས་ཀྱིས་སྨན་དུ་གྱུར་ནས་ནད་རིགས་འཇོམ་བྱེད་ཀྱང་ཡོད། སྔོན་རུ་ཏྲ་བསྒྲལ་བའི་གནས་སྐབས་ན་གསང་སྔགས་ཀྱི་རྫས་སུ་བྱིན་གྱིས་བརླབས་ནས་རྩ་བརྒྱད་སྟོང་ལ་སྦྱར་བའི་བདུད་རྩིའི་སྨན་རིགས་ཀྱང་ཡོད། དེའི་ནང་ནས་དུ་བ་འདི་བདུད་ཀྱི་བུ་མོས་སྨོན་ལམ་ལོག་འདེབས་བྱས་ཏེ་མི་གཙང་བའི་རྫས་ཀྱི་ས་བོན་བཏབ་ནས་སྐྱེས་ཡོང་བ་ཞིག་ཡིན། འདི་འཐེན་པ་ལྟ་ཅི་ཁྱིམ་དུ་བཞག་ན་ཕུགས་ཀྱི་ལྷ་ཉམས། རྒྱུ་ནོར་ཟས་གསུམ་ལ་འགོང་པོ་འཁྲི། སྐྱེས་པ་ཕོ་ཡི་དགྲ་ལྷ་འཕྲག་ལྷ་ཐམས་ཅད་ཉམས་འགྲོ། ལྷ་སྲུང་མ་ཞིག་ཡོད་ན་ཕྱོགས་ལ་གཅར་བ་མ་རེད། དེས་ན་དུ་བ་འཐེན་རྒྱུ་ལ་སོགས་པའི་སྤྱོད་ངན་ཐམས་ཅད་འཛེམ་དགོས། དུད་འཐེན་གྱིས་དུ་བ་མ་བཅད་ན་བདེ་བ་ཅན་ལ་མི་སྐྱེས་སེམས་ཐག་ཡིན། འཕོ་བ་ཐེབ་ན་འོད་དཔག་མེད་པའི་ཞིང་ཁམས་དང་འོད་དཔག་མེད་པའི་ཐུགས་དང་དབྱེར་མེད་དུ་འདྲེས་ཏེ་བཙན་ཐབས་ཀྱིས་དྲང་རྒྱུ་ཡིན་མོད། འཕོ་བ་མི་ཐེབ་རྒྱུ་དུད་འཐེན་དེ་བདེ་བ་ཅན་གྱི་ནང་དུ་ལས་འབྲེལ་མེད་པའི་རྟགས་ཡིན། དེའི་ཕྱིར་དུད་འཐེན་ཡོད་ན་དུ་བ་ཆོད་ནས་བཤགས་པ་གྱིས་དང་། བཤགས་ན་དག་པ་སྡིག་པའི་ཡོན་ཏན་རེད།

བཞི་པ་ངོ་མ་ཤེས་པའི་བཅས་ལྟུང་བཤགས་པ།

སྐྱབས་སྡོམ་དབང་སྐུར་ལ་སོགས་ཐོབ་ན་ཡང་། །དེ་ཡི་སྡོམ་པ་དམ་ཚིག་སྲུང་མ་ཤེས། །བཅས་པའི་ལྟུང་བ་ཕོག་པ་མཐོལ་ལོ་བཤགས། །ཞེས་གསུངས་ཏེ། །སྐྱབས་སྡོམ་དབང་བསྐུར་ལ་སོགས་ཐོབ་ན་ཡང་། །ཞེས་པ་ནི། ཕྱི་བ་ནང་བ་སྐྱབས་འགྲོའི་ཁྱད་ཅེས་གསུངས་པ་ལྟར། ནང་པ་སངས་རྒྱས་པའི་ཆོས་སྒོར་ཞུགས། དཀོན་མཆོག་གསུམ་ལ་སྐྱབས་སུ་སོང་སྟེ་སྐྱབས་གཞན་ཟུར་ནས་མི་བཙལ། སྐྱབས་འགྲོའི་དགག་སྒྲུབ་ཆ་མཐུན་དང་བཅས་པའི་བསླབ་བྱ་སྲུང་རྒྱུ་ཡིན་ཞེས་ཁས་བླངས་ཏེ་སྐྱབས་འགྲོའི་སྡོམ་པ་ཞུས། སྔགས་ཀྱི་དབང་བསྐུར་ཐོབ། དབང་གོང་མ་གསུམ་དང་བཅས་པ་ཞུས། དབང་དུས་ཀྱི་དམ་ཚིག་གཙོ་བོས་ཇི་ལྟར་གསུངས་པ་བཞིན་ཞེས་ཁས་བླངས། དེ་བཞིན་དུ་སྐྱབས་སྡོམ་དབང་བསྐུར་ལ་སོགས་ཅེས་པའི་སོགས་སྒྲའི་ནང་དུ་བྱང་ཆུབ་སེམས་སྡོམ་བླངས་ཏེ། དེང་ནས་བྱང་ཆུང་སྙིང་པོའི་བར་དུ་སེམས་ཅན་གྱི་དོན་བྱས་ཏེ་གཞན་དོན་སྒྲུབ་པ་ཡིན། གཞན་གནོད་གཞི་དང་བཅས་པ་སྤོང་གཞན་ཕན་གཞི་དང་བཅས་པ་སྒྲུབ་པ་ཡིན་ཞེས་ཁས་བླངས་པ་ཡིན་ཀྱང། དེ་ཡི་སྡོམ་པ་དམ་ཚིག་སྲུང་མ་ཤེས། །ཞེས་གསུངས་ཏེ། སོར་བྱང་སྔགས་གསུམ་གྱི་སྡོམ་པ་མ་ཞུས་པ་གཅིག་ཀྱང་མེད་མོད། ཞུས་ནས་སྲུང་བྱ་གཅིག་ཀྱང་མི་ཤེས་པའི་དབང་གིས། བཅས་པའི་ལྟུང་བ་ཕོག་པ་མཐོལ་ལོ་བཤགས། །ཞེས་གསུངས་ཏེ། སོར་བྱང་སྔགས་གསུམ་གྱི་སོ་སོའི་སྐབས་ནས་བཅས་ལྟུང་གི་ཉེས་འགལ་བྱུང་བ་ཐམས་ཅད་མཐོལ་ལོ་བཤགས་གསུངས་སོ། །སོར་བྱང་སྔགས་གསུམ་གྱི་སྡོམ་པ་ལེན་པའི་གྲལ་དུ་འདུག་རྒྱུ་སླ་མོད། དེ་ལུག་ཚེ་ཐར་བྱས་པ་དང་འདྲ་བར་སྒུར་རེ་དེའི་གྲལ་དུ་གཅིག་སོང་བ་ཙམ་དང་། རྣ་རྟགས་བླང་བ་དང་འདྲ་བར་བུམ་རིས་ཤིག་མགོ་ལ་བཞག་ཅིང་ཆུ་ཐིག་གཅིག་འཐུང་བས་ཚར་སོང་བ་ཞིག་མ་ཡིན། བསྲུང་བྱ་དམ་ཚིག་བསྲུངས་ནས་ཐོབ་བྱ་འབྲས་བུ་སྨིན་དགོས་པ་རེད། དབང་ཞུ་གྲངས་མང་ཀྱང། དམ་ཚིག་སྲུང་གྲངས་ཉུང་བ། རྒྱུད་སྡེ་དྲུག་པོ་གང་གི་དབང་ཡིན་ཡང་ཕྱག་དབང་ཞིག་ཞུ་བའི་འདེང་མ་གཏོགས་མེད་པ། འགའ་རེ་ཨ་མཚར་དུ་དབང་གྲལ་དུ་འདུག་པ་འདི་རྟོགས་པའི་བསྟན་པ་ནུབ་པའི་རྟགས་ཡིན་གསུངས་པ་རེད། ལུང་རྟོགས་གཉིས་ཀའི་བསྟན་པ་ནུབ་དུས་སངས་རྒྱས་ཀྱི་བསྟན་པ་ནུབ་པ་ཡིན། དེ་འདྲའི་ས་ན་བསྟན་པ་ཡོད་བསམ་ཡང་རྟགས་ཙམ་འཛིན་པའི་བསྟན་པ་རེད་ཟེར་ཆོག་པ་རེད། མི་སྐྱ་ཕོ་མོ་རྣམས་ཀྱིས་དང་པོ་ཆོས་ཁྲིད་ཉོན། ཆོས་ཁྲིད་སུས་གསུངས་ན་ལས་རྒྱུ་འབྲས་སྤོང་བླང་འདོར་ལེན་གྱི་གནད་ཤེས་ཐབས། ཤེས་རབ་ཀྱི་མིག་གསར་བ་ཞིག་སྦྱིན་པའི་ཆེད་རེད། ཆོས་ཁྲིད་ཀྱི་སྐབས་སུ་དགེ་ངོ་སྡིག་ངོ་ཤེས། སོར་བྱང་སྔགས་གསུམ་གྱི་སྡོམ་དམ་ཚིག་གི་གནད་དང་འགྲོ་ལུགས་ཤིག་ཤེས་ན། ད་གཟོད་དབང་ཞིག་ཞུས་ན་ཞུ་ཤེས་པ་རེད། ཤེས་ཏེ་ཞུས་པ་དེ་ལ་ཐོབ་སྒོ་ཡོང་སྒོ་ཞིག་ཀྱང་ཡོད་པ་རེད། རྫོགས་སངས་རྒྱས་ཀྱི་བསླབ་པ་ལ། །འབད་པ་མེད་ན་ངན་འགྲོར་འགྲོ། །ཞེས་སོ། །སྐྱ་སེར་ཕོ་མོ་སུ་ཡིན་ཡང་དང་པོ་བསྲུང་བྱ་ཤེས་པར་བྱས་ཏེ། ད་གདོད་སྲུང་བ་ལ་འབད་དགོས། དེས་ན་རང་གཞན་སེམས་ཅན་ཐམས་ཅད་ཀྱིས་ཐོག་མེད་ནས་བསགས་པའི་སྡིག་ལྟུང་ངོས་ཟིན་པར་བྱས་ཏེ། ཆོས་ཉིད་ཀྱི་དོན་ལ་བཤགས་བྱ་དང་བཤགས་བྱེད་མེད་ཀྱང་། ཀུན་རྫོབ་སྒྱུ་མ་ཙམ་དུ་བཤགས་ནས་གནས་སྐབས་བདེ་བ་ཅན་དུ་སྐྱེས་ཤིང་མཐར་ཐུག་སངས་རྒྱས་ཐོབ་འདོད་ཀྱི་བྱང་ཆུབ་ཀྱི་སེམས་དེ། གཉེན་པོ་ཀུན་ཏུ་སྤྱོད་པའི་སྟོབས་མཆོག་ཏུ་གྱུར་པའོ། །འདི་ཡན་ཆད་བཤགས་པའི་ཡན་ལག་གི་ནང་ནས་དང་པོ་གཉེན་པོ་ཀུན་ཏུ་སྤྱོད་པའི་སྟོབས་སོང་ནས།

གཉིས་པ་རྣམ་པར་སུན་འབྱིན་པའི་སྟོབས།

འགྱོད་པ་མེད་ན་བཤགས་པས་མི་འདག་པས། །སྔར་བྱས་སྡིག་པ་ཁོང་དུ་དུག་སོང་ལྟར། །ངོ་ཚ་འཇིགས་སྐྲག་འགྱོད་པ་ཆེན་པོས་བཤགས། །ཞེས་གསུངས་སོ། །འགྱོད་པ་མེད་ན་བཤགས་པས་མི་འདག་པས། །ཞེས་གསུངས་ཏེ། སྤྱིར་སྔར་བྱས་ཀྱི་ལས་ལ་ལས་ཉེས་རེད་བསམ་པའི་འགྱོད་པ་དྲག་པོ་ཡོད་དགོས། འགྱོད་པ་ལོས་ཡོད་སྔར་བསོད་ནམས་ཆེན་པོ་ཞིག་བསགས། སྨོན་ལམ་མང་པོ་ཞིག་བཏབ་པའི་འབྲས་བུ། ད་ལྟ་ཆོས་ལྡན་གྱི་མི་ལུས་རྙེད་དཀའ་རིན་ཐང་ཅན་ཞིག་ཐོབ་པ་ཡིན་ཡང། རིན་ཐང་ཅན་གྱི་གསེར་གྱི་སྣོད་ལྟ་བུ་འདིའི་ནང་དུ་མི་གཙང་པ་བླུག་པ་ལྟ་བུའི་སྡིག་པ་མི་དགེ་བའི་ལས། འབྲས་བུ་ངན་པ་ཅན་གྱི་སྤྱོད་ངན་ཞིག་དལ་རྟེན་རིན་ཐང་ཅན་འདིས་བྱས་སོང་བས་འགྱོད་པ་མེད་ཐབས་མེད། འགྱོད་པ་མེད་ན་བཤགས་པ་བྱས་ཀྱང་མི་འདག །དེ་ལྟར་འགྱོད་པ་མེད་ན་བཤགས་པས་མི་འདག་པ་ཡིན་པས་ན། སྔར་བྱས་སྡིག་པ་ཁོང་དུ་དུག་སོང་ལྟར། །ཞེས་གསུངས་ཏེ། སྔར་བྱས་ཀྱི་སྡིག་པའི་ཚོགས་མ་ཤེས་ཏེ་ཁོག་པའི་ནང་དུ་མ་ཤེས་པར་དུག་འཐུང་ན་ཤེས་དུས་འཐུང་ཉེས་བྱས་འདུག་མི་བསམ་ཐབས་མེད་ཡིན་པ་ལྟར། ངོ་ཚ་འཇིགས་སྐྲག་འགྱོད་པ་ཆེན་པོས་བཤགས། །ཞེས་གསུངས་ཏེ། སྐྱེས་རབས་ལས། མ་མཐོང་བཞིན་དུ་སྡིག་པ་བྱས་ན་ཡང་། །དུག་ཟོས་བཞིན་དུ་བདེ་བ་ག་ལ་འགྱུར། །ལྷ་དང་རྣལ་འབྱོར་ཅན་གྱི་མི་དག་གི། །རྣམ་དག་མིག་གིས་མི་མཐོང་མི་སྲིད་དོ། །ཞེས་གསུངས་སོ། །ངོ་ཚ་འཇིགས་སྐྲག་འགྱོད་པ་ཆེན་པོས་བཤགས་ཞེས་པའི་ངོ་ཚ་འདི་བདག་གམ་ཆོས་ཀྱི་དབང་དུ་བྱས་པའི་སྡིག་པ་ལ་འཛེམ་པ་དང་། འཇིགས་སྐྲག་འདི་འཇིག་རྟེན་གྱི་དབང་དུ་བྱས་ནས་ཁྲེལ་ཡོད་པ་སྟེ། སྐྱེས་རབས་ཀྱི་ལུང་གོང་དུ་དྲངས་པ་ལྟར། མ་མཐོང་བཞིན་དུ་སྡིག་པ་བྱས་ན་ཡང་། །དུག་ཟོས་བཞིན་དུ་བདེ་བ་ག་ལ་འགྱུར། །ལྷ་དང་རྣལ་འབྱོར་ཅན་གྱི་མི་དག་གི། །རྣམ་དག་མིག་གིས་མི་མཐོང་མི་སྲིད་དོ། །ཞེས་གསུངས་བ་ལྟར། ལྷ་དང་འཕགས་པ་རྣམས་ཀྱིས་མི་གཟིགས་པ་ཞིག་མི་སྲིད་པ་པས། ངས་སྡིག་པ་བྱས་པ་སུ་གཅིག་གིས་ཀྱང་མཐོང་ཡོད་ས་མེད་སྙམ་ནས་འདུག་འདུག་རྒྱུ་ཡོད་པ་མ་ཡིན། དུག་མི་མཐོང་ས་ནས་ཟོས་ཀྱང་ཕན་ཐོགས་ཡོད་པ་མ་རེད། དུག་ཟོས་པའི་མི་ལ་བདེ་བ་ཞིག་ཡོད་པ་མ་རེད། གཞན་དག་གིས་མཐོང་མེད་ཤེས་མེད་སྙམ་ན། ལྷ་དང་རྣལ་འབྱོར་ཅན་རྣམས་ཀྱི་རྣམ་དག་གི་མིག་གིས་མི་མཐོང་བ་ཞིག་ཡོད་པ་མ་ཡིན། སྡུག་བསྔལ་གྱི་འབྲས་བུ་རང་ལ་སྨིན་ཡོང་བ་ཡིན།

གསུམ་པ་སོར་ཆུད་པའི་སྟོབས།

ཕྱིན་ཆད་སྡོམ་སེམས་མེད་ན་མི་འདག་པས། །ཕྱིན་ཆད་སྲོག་ལ་བབ་ཀྱང་མི་དགེའི་ལས། །ད་ནས་མི་བགྱིད་སེམས་ལ་དམ་བཅའ་བཟུང་། །ཞེས་གསུངས་སོ། །ཕྱིན་ཆད་སྡོམ་སེམས་མེད་ན་མི་འདག་པས། །ཕྱིན་ཆད་སྲོག་ལ་བབ་ཀྱང་མི་དགེའི་ལས། །ཞེས་གསུངས་ཏེ། དེ་སྔོན་བྱས་པ་དང་བསགས་པ་ལ་འགྱོད་པའི་སྒོ་ནས་བཤགས་པ་བྱས་ན་ཡང་། ད་ཕྱིན་ཆད་དེ་འདྲ་མི་བྱེད་སྙམ་པའི་སྡོམ་སེམས་བརྟན་པོ་ཞིག་མེད་ན་སྡིག་པ་མི་འདག་པས། སྡིག་པ་རེ་རེ་བསགས་ནས་རེ་རེ་བཤགས་འཇོག་སྙམ་ན་འདག་ཐབས་མེད། མི་འདག་པར་མ་ཟད་སྡིག་པ་ད་དུང་ལྷག་པར་ལྕི་བ་རེད། ཅིའི་ཕྱིར་ཞེ་ན། དགེ་འམ་འོན་ཏེ་མི་དགེ་བ། །ལས་ནི་སེམས་ཀྱིས་བསགས་པ་ཡིན། །ཞེས་གསུངས། སྡིག་པ་ལ་ཕྱིན་ཆད་སྡོམ་སེམས་བརྟན་པོ་ཞིག་མེད་ན་ལུས་ཀྱིས་མ་བྱས་ཀྱང་སེམས་ཀྱིས་ལས་ཆེན་པོ་ཞིག་བསགས་འགྲོ་བ་ཡིན། དེ་སྔོན་བྱས་ཚར་བ་ཐམས་ཅད་ཚར་སོང། མི་ཤེས་པ་དང་། མི་མཁས་པ། བག་མེད་པ། ཉོན་མོངས་མང་བ་དེ་དག་གི་དབང་གིས་ཉེས་པ་ཤོར་ཡང་། ཐེངས་འདི་ལ་བཤགས་ཚར་རྗེས། དུག་ཤེས་བཞིན་དུ་སླར་མི་འཐུང་བ་ལྟར། ཕྱིན་ཆད་འཆི་བ་སྲོག་ལ་བབ་ཀྱང་སྡིག་པའི་ལས་དེ་དང་དེ་དག་མི་བྱེད་པ། ད་ནས་མི་བགྱིད་སེམས་ལ་དམ་བཅའ་བཟུང་། །ཞེས་གསུངས་ཏེ། སྤོང་སེམས་ཐོབ་པ་ཚུལ་ཁྲིམས་ཀྱི་མཆོག་ཡིན། དེ་ཡིས་སོར་ཆུད་པའི་སྟོབས་བཤད་ནས།

བཞི་པ་རྟེན་གྱི་སྟོབས།

བདེ་གཤེགས་འོད་དཔག་མེད་པ་སྲས་བཅས་ཀྱིས། །བདག་རྒྱུད་ཡོངས་སུ་དག་པར་བྱིན་གྱིས་རློབས། །ཞེས་གསུངས་ཏེ། གཉེན་པོའི་སྟོབས་ལ་བརྟེན་ནས་རང་ངོས་ནས་འགྱོད་པ་དང་བཅས་ཏེ་དེ་ལྟར་བཤགས་ན། བདེ་བར་གཤེགས་པ་རྒྱལ་བ་འོད་དཔག་མེད་སྲས་དང་བཅས་པ་ཐམས་ཅད་ཀྱིས་ཀྱང་། བདག་གཞན་སེམས་ཅན་ཐམས་ཅད་ཀྱི་རྒྱུད། ཟླ་བ་གཟའ་ལས་གྲོལ་བ་བཞིན་དུ་ཡོངས་སུ་དག་ཅིང་གཙང་བར་བྱིན་གྱིས་བརླབ་ཏུ་གསོལ་ཞེས། མགོན་པོ་འོད་དཔག་མེད་འཁོར་དང་བཅས་པ་བཤགས་ཡུལ་རྟེན་གྱི་སྟོབས་སུ་བཟུང་ནས་བཤགས་དགོས། དེ་ལྟར་གཉེན་པོ་སྟོབས་བཞིའི་སྒོ་ནས་བཤགས་པ་བྱས་ན་སྡིག་པ་ཇི་ལྟར་ཆེ་ཡང་འདག་སྟེ། གསེར་འོད་ཀྱི་མདོ་ལས། གང་གིས་བསྐལ་བ་སྟོང་རྣམས་སུ། །སྡིག་པ་ཤིན་ཏུ་མི་བཟད་བགྱིས། །ལན་ཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །ཞེས་གསུངས་པ་ལྟར། དུས་རིང་པོ་བསྐལ་བ་སྟོང་ཕྲག་མང་པོར་བསགས་པའི་སྡིག་པ་མི་བཟད་པ་ཇི་འདྲ་ཞིག་ཡོད་ཀྱང་། ལན་གཅིག་ལ་སྟོབས་བཞི་ཚང་བའི་སྒོ་ནས་བཤགས་ན་དེའི་སྡིག་པ་ཐམས་ཅད་བྱང་སྟེ་འདག་པར་གསུངས། བསྐལ་བ་སྟོང་གི་མུན་ནག་ཡིན་ཡང་མར་མེའི་འོད་གཅིག་གིས་སེལ་ཐུབ་པ་ལྟར་སྡིག་པ་འདག་རྒྱུ་ཡོད། ལན་གཅིག་ལ་སྟོབས་བཞི་ཚང་བའི་སྒོ་ནས་བཤགས་ན་དེས་སྡིག་པ་ཐམས་ཅད་བྱང་སྟེ་དག་རྒྱུ་ཡོད་ཅེས་གསུངས། ང་སྡིག་རྒན་ཡིན་པས་གང་བྱས་ཀྱང་དཀའ་འདུག་སྙམ་ནས་སེམས་ཤི་དགོས་པ་མ་ཡིན། ཁྲ་སྡིག་ཅན་དམྱལ་བ་འགྲོ་ཁ་རུ། །བྱེའུ་རྫུབ་མ་རེ་རེའི་མང་ཉུང་མེད། །སྙམ་ནས་སྡིག་པའི་སྟེང་དུ་སྡིག་པ་སྣོན་མི་རུང། སྡིག་པ་བྱེད་དུས་སླ་ཡང་རྣམ་སྨིན་མྱོང་དུས་དཀའ། རྣམ་སྨིན་སྡིག་པ་སྣ་རེ་ཡིན་ཀྱང་བསམ་གྱིས་མི་ཁྱབ་པ་མྱོང་དགོས་པ་རེད། གནའ་སྔོན་མ་མི་ཐུང་སོར་མོའི་ཕྲེང་བ་ཅན་གྱིས་མི་དགུ་བརྒྱ་དགུ་བཅུ་རྩ་དགུ་བསད་ཀྱང་། རྣམ་པར་སུན་འབྱིན་པའི་སྟོབས་ཉམས་སུ་བླངས་ཏེ་སྡིག་པ་དག་ནས་དགྲ་བཅོམ་པའི་གོ་འཕང་ཐོབ། ཁྱེའུ་བདེ་བྱེད་མ་བསད་པའི་སྡིག་ཅན་ཡིན་ཡང་། གཉེན་པོ་ཀུན་ཏུ་སྤྱོད་པའི་སྟོབས་ཉམས་སུ་བླངས་ཏེ་སྡིག་པ་དག་ནས་ལྷ་ཡུལ་དུ་སྐྱེས་པར་མ་ཟད་འཕགས་པ་རྒྱུན་ཞུགས་ཀྱི་འབྲས་བུ་ཐོབ། གཅུང་དགའ་བོ་བུད་མེད་ལ་ཆགས་པའི་སྡིག་ཅན་ཞིག་ཡིན་ཡང་ཉེས་པ་ལས་བཟློག་སྟེ་སོར་ཆུད་པའི་སྟོབས་ཉམས་སུ་བླངས་ནས་སྡིག་པ་དག་སྟེ་དགྲ་བཅོམ་པའི་འབྲས་བུ་ཐོབ། རྒྱལ་པོ་མཐོང་ལྡན་ཕ་བསད་པའི་སྡིག་ཅན་ཞིག་ཡིན་ཡང་རྟེན་གྱི་སྟོབས་ཉམས་སུ་བླངས་ཏེ་སྡིག་པ་དག་ནས་བྱང་ཆུབ་སེམས་དཔའ་གྱུར། གང་ཞིག་སྔོན་ཆད་བག་མེད་གྱུར་བ་ལས། །ཕྱི་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུ་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་སོ། །དེ་རྣམས་དང་དཔེ་བླང་སྟེ་སྡིག་པ་དག་པ་གོང་དུ་བཤད་པ་ལྟར་སྡིག་པ་འདག་རྒྱུ་ཡོད་པ་རེད། ཇི་ལྟར་དག་ཞེ་ན་ཟླ་བ་སྤྲིན་དང་བྲལ་བ་ལྟ་བུ་ཡིན་གསུངས། སྡིག་པ་སྤྲིན་ལྟ་བུས་ཟླ་བ་བསྒྲིབས་ཏེ་མི་མཛེས་པར་བྱས་པ་ཡིན་ཡང་། སྡིག་པ་བཤགས་ན་དག་སྟེ་སྤྲིན་དྭངས་སོང་ཚེ་ཟླ་བ་སྤྲིན་ལས་གྲོལ་བ་ལྟར་ལྷག་པར་མཛེས་པ། སྔོན་སྤྲིན་གྱིས་མ་བསྒྲིབས་པའི་གནས་སྐབས་དང་འདྲ་བར་འགྱུར་དུ་ཡོད་ཅེས་གསུངས། ཁྱད་པར་དུ་བྱང་ཆུབ་ཀྱི་སེམས་ཀྱིས་ཟིན་ན་སྡིག་པ་འདག་པ་སྟོབས་ལྷག་པར་ཆེ་སྟེ། རྒྱལ་སྲས་ཞི་བ་ལྷས། དེ་ལྟས་དགེ་བ་ཉམ་ཆུང་ཉིད་ལ་རྟག །སྡིག་པ་སྟོབས་ཆེན་ཤིན་ཏུ་མི་བཟད་པ། །དེ་ནི་རྫོགས་པའི་བྱང་ཆུབ་སེམས་མིན་པ། །དགེ་གཞན་གང་གིས་ཟིལ་གྱིས་གནོན་པར་འགྱུར། །ཞེས་སོ། །སྡིག་པ་མི་བྱེད་པ་དང་། བྱས་ཀྱང་བཤགས་པ་བྱེད་པ་གཉིས་ཀ་སྐྱེས་བུ་དམ་པ་ཡིན་གསུངས་པ་རེད། དུས་རྒྱུན་དུ་ལྟུང་བ་བཤགས་པའི་མདོ་དང་། བདེ་གཤེགས་སྤྱི་བཤགས། བཤགས་རྒྱུད་ཆོས་དབྱིངས་རབ་འབྱམས་མ་དེ་རྣམས་དང་བསྒྲག་སྟེ་ཡི་གེ་བརྒྱ་བ་བཏོན་ནས་སྟོབས་བཞིའི་དམིགས་རྣམ་དང་བསྒྲག་དགོས། སྙིང་ཐིག་གི་སྔོན་འགྲོ་རྒྱུན་འདོན་བྱེད་པ་ཚོས་རྡོར་སེམས་སྒོམ་བཟླས་དང་སྦྲེལ་ཏེ་བཤགས་པ་ཡིག་བརྒྱ་འབུམ་ཐེར་རེ་བཟླས་ན་བཤགས་པ་དེའི་ཡན་ལ་ཅི་དགོས། སྐབས་འདི་དང་བསྟུན་ན་བདེ་སྨོན་གྱི་བཤགས་པ་འདི་དང་འབྲེལ་བའི་ཚོགས་ཞིང་གི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་འཕྲོས་ཏེ་བདག་སོགས་སེམས་ཅན་ཐམས་ཅད་ལ་ཕོག སྡིག་སྒྲིབ་ཐམས་ཅད་ཉི་མས་བ་མོ་ཞུ་བ་ལྟར་དག་པར་བསམ་ནས་བསྔོ་བ་སྨོན་ལམ་སྐབས་དང་བསྟུན་དགོས་སོ། །དེའི་ཡན་ཆད་བཤགས་པའི་ཡན་ལག་སོང་ནས།

བཞི་པ་ཕྲག་དོག་གི་གཉེན་པོ་རྗེས་སུ་ཡི་རང་བ།

དེ་ལ་གཉིས་ཏེ། རྗེས་སུ་ཡི་རང་གི་ཕན་ཡོན་དྲན་པ་དང་། རྗེས་སུ་ཡི་རང་དངོས་བཤད་པའོ།།

དང་པོ་རྗེས་སུ་ཡི་རང་གི་ཕན་ཡོན་དྲན་པ།

གཞན་གྱིས་དགེ་བ་བྱེད་པ་ཐོས་པའི་ཚེ། །དེ་ལ་ཕྲག་དོག་མི་དགེའི་སེམས་སྤངས་ནས། །སྙིང་ནས་དགའ་བས་རྗེས་སུ་ཡི་རང་ན། །དེ་ཡི་བསོད་ནམས་མཉམ་དུ་ཐོབ་པར་གསུངས། །ཞེས་གསུངས་སོ། །གཞན་གྱིས་དགེ་བ་བྱེད་པ་ཐོས་པའི་ཚེ། །དེ་ལ་ཕྲག་དོག་མི་དགེའི་སེམས་སྤངས་ནས། །ཞེས་གསུངས་ཏེ། གང་ཟག་བསོད་ནམས་ཅན་སྔོན་གྱི་སྨོན་ལམ་དུས་སུ་སྨིན་སོང་བ་འགའ་རེས་དུས་སྙིགས་མའི་སྐབས་ལ་སྐྱེ་དགུའི་མཆོད་སྡོང་རྒྱལ་བའི་བསྟན་པ་རིན་པོ་ཆེ་བྱི་དོར་བྱེད་པའི་ཆེད་དུ། ཐོས་བསམ་སྒོམ་གསུམ་འཆད་རྩོད་རྩོམ་གསུམ་གྱིས་ཐུབ་པའི་བསྟན་པ་ལུང་རྟོགས་ཀྱི་བདག་ཉིད་ཅན། འཛིན་སྲུང་སྤེལ་གསུམ་གྱི་མཛད་པ་རྨ་མེད་སྐྱོང་བཞིན་ཡོད་པ་དང་། ཡང་ལས་དང་སྨོན་ལམ་མཉམ་གཅིག་ཏུ་འཛོམས་པའི་གང་ཟག་འགའ་རེས། རྟེན་གཞི་གཙུག་ལག་ཁང་དང་ཀུན་དགའ་ར་བ་ལ་སོགས་པ་དགེ་འདུན་འདུས་པའི་བསྟི་གནས། དགེ་འདུན་ལ་བསྙེན་བཀུར་གྱི་ཆེད་དུ་བཞེངས་བ་དང། བརྟེན་པ་སྐུ་གསུང་ཐུགས་རྟེན་བཞེངས་བ། ཡང་དུས་ཀྱི་མཆོད་པ་དང་བཤད་སྒྲུབ་ཀྱི་རྒྱུན་འཛུགས་པའི་ཐེབས་རྩ་འཛུགས་པ་ལ་སོགས་པ། མདོར་ན་བསྟན་སྲོག་གཉིས་པ་ཞིག་མཐུད་པའི་དགེ་རྩ་ཆེ་ཆུང་གང་བྱེད་ཀྱིན་ཡོད་པ་ཐོས་པའི་ཚེ་ན། དེ་ལ་མི་དགའ་བར་ཨ་ཁ་དེས་དེ་འགྲུབ་སོང་། ངའི་དགེ་བ་ལས་དེའི་དགེ་བ་མཐོ་འགྲོ་འདུག དེ་ངའི་ཡན་ལ་ཤོར་ལས་ཆེ་སྙམ་པའི་ཕྲག་དོག ད་དུང་དགོན་པ་ཚོས་གཅིག་གིས་ཅིག་བཞེངས་འདུག་ངེད་ཚང་གི་དགོན་པ་བས་དེའི་ཡན་ལ་དེ་བརྒལ་ཨེ་སོང་སྙམ་ནས་སེམས་མི་བདེ་བ་དེ་འདྲ་མི་བྱེད་པར། ཕྲག་དོག་གི་སེམས་སྤངས་ནས། སྙིང་ནས་དགའ་བས་རྗེས་སུ་ཡི་རང་ན། །དེ་ཡི་བསོད་ནམས་མཉམ་དུ་ཐོབ་པར་གསུངས། །ཞེས་གསུངས་ཏེ། ད་དུང་མི་དགའ་བ་མེད་པར་མ་ཟད་དགེ་བ་བྱས་པ་ལ་རྗེས་སུ་ཡི་རང་བྱས་ན་དེའི་དགེ་བ་ནས་བཟུང་སྟེ་རང་ཉིད་ལ་དེ་དང་འདྲ་མཉམ་དུ་ཐོབ་པར་གསུངས་སོ། །ཤེར་ཕྱིན་སྡུད་པ་ལས། སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་གསུངས་སོ། །རྒྱུ་ཚེགས་དཀའ་ལས་གཅིག་ཀྱང་མི་དགོས་པར་བསོད་ནམས་རླབས་ཆེན་གསོག་དགོས་བསམ་ན། མི་གཞན་དག་གིས་དགེ་རྩ་རླབས་ཆེན་སྒྲུབ་བཞིན་ཡོད་པ་མཐོང་ཐོས་བྱུང་ན། དེ་ལ་མི་དགའ་བའི་ཕྲག་དོག་མེད་པར་སྙིང་ནས་དགའ་བས་རྗེས་སུ་ཡི་རང་བྱས་ན་དེའི་བསོད་ནམས་རང་ལ་ཐོབ་ཀྱིན་ཡོད། དེས་ན་དགེ་རྩ་ཆེན་པོ་ཐབས་སླ་མོས་ཐོབ་པའི་ཆེད་དུ་རྗེས་སུ་ཡི་རང་བྱེད་དགོས། དེ་བསམ་པའི་བྱེ་བྲག་ཅིག་ཡིན་པས་བསམ་བློ་གཏོང་བ་ལ་དཀའ་ལས་ཅང་མེད། དེ་ལ་གོ་བ་ཞིབ་ཕྲ་བླངས་ན་ཡི་རང་གི་ཡུལ་དང་ཡི་རང་བྱེད་པའི་བྱེད་པ་པོ་གཉིས་ཀ་རྒྱུད་ཚོད་འདྲ་འདྲ་ཡིན་པའི་དབང་དུ་བཏང་སྟེ་གསུངས་ཡོད། དེ་མིན་ཡི་རང་དང་ཡི་རང་གི་ཡུལ་གཉིས་ཀའི་ནང་ནས་ཡི་རང་གི་བསོད་ནམས་ཆེ་བ་ཡང་ཡོད་དེ། བྱང་ཆུབ་སེམས་དཔས་ཉན་རང་གི་དགེ་བར་ཡི་རང་བྱས་པ་ལྟ་བུ་དང་། ཡི་རང་བྱེད་པ་པོ་ལས་ཡི་རང་གི་ཡུལ་གྱི་བསོད་ནམས་ཆེ་བའང་ཡོད་དེ། སོ་སོའི་སྐྱེ་བོས་སངས་རྒྱས་འཕགས་པའི་དགེ་ཚོགས་ལ་ཡི་རང་བྱས་པ་ལྟ་བུའོ། །ཞིབ་ཕྲས་གོ་བ་བླངས་ན་དེ་འདྲ་ཡོད་པ་རེད།

གཉིས་པ་རྗེས་སུ་ཡི་རང་དངོས་བཤད་པ།

དེ་ལ་གསུམ་སྟེ། སྐྱེ་འཕགས་ཀྱི་དགེ་བ་སྤྱི་ལ་ཡི་རང་བ་དང་། ཐེག་ཆེན་གྱི་དགེ་བ་ལ་ཡི་རང་བ། ཐུན་མོང་གི་དགེ་བ་སྤྱི་ལ་ཡི་རང་བའོ།

དང་པོ་སྐྱེ་འཕགས་ཀྱི་དགེ་བ་སྤྱི་ལ་ཡི་རང་བ།

དེ་ཕྱིར་འཕགས་པ་རྣམས་དང་སོ་སྐྱེ་ཡིས། །དགེ་བ་གང་བསྒྲུབས་ཀུན་ལ་ཡི་རང་ངོ་། །ཞེས་གསུངས་ཏེ། །དེ་ཕྱིར་འཕགས་པ་རྣམས་དང་སོ་སྐྱེ་ཡིས། །ཞེས་པ་ནི། རྗེས་སུ་ཡི་རང་བྱས་པའི་དགེ་བ་དེ་ནི་འབད་པ་མི་དགོས་པར་བསོད་ནམས་རྒྱ་ཆེན་པོ་ཐོབ་བྱེད་ཡིན་པ་དེའི་ཕྱིར་ན། འཕགས་པ་རྣམས་དང་ཞེས་པའི་འདིའི་སྐབས་ཀྱི་འཕགས་པ་ནི་ཐེག་དམན་ཉན་རང་གི་འཕགས་པ་ཟུང་བཞི་ཡ་བརྒྱད་བསྡུས་པ་ལ་གོ་ན་བདེ་སྟེ། ཅིའི་ཕྱིར་ཞེ་ན། དེ་ཕྱིར་འཕགས་པ་རྣམས་དང་སོ་སྐྱེ་ཡིས། །དགེ་བ་གང་བསྒྲུབས་ཀུན་ལ་ཡི་རང་ངོ་། །ཞེས་པས་སྦྱོར་ལམ་མན་ཆད་དང་ལམ་མ་ཞུགས་པའི་ཟག་བཅས་ཀྱི་དགེ་བ་ལ་རྗེས་སུ་ཡི་རང་བ་གཙོ་བོར་བསྟན་ནས། ཐེག་ཆེན་གྱི་དགེ་བར་རྗེས་སུ་ཡི་རང་བ་འོག་ནས་འབྱུང་མ་རག་པ་ཡིན་པ་རེད། འདིར་སོ་སོའི་སྐྱེ་བོ་ཞེས་པ་འདི་གང་ཡིན་སྙམ་ན། ལས་ཉོན་ཐ་དད་པས་གནས་རིས་ཐ་དད་དུ་འགྲོ་བའམ་འཕེན་པར་བྱེད་པས་ན་སོ་སོའི་སྐྱེ་བོའོ།།

གཉིས་པ་ཐེག་ཆེན་གྱི་དགེ་བ་ལ་ཡི་རང་བ།

བླ་མེད་བྱང་ཆུབ་མཆོག་ཏུ་སེམས་བསྐྱེད་ནས། །འགྲོ་དོན་རྒྱ་ཆེན་མཛད་ལ་ཡི་རང་ངོ་། །ཞེས་གསུངས་སོ། །བླ་མེད་བྱང་ཆུབ་མཆོག་ཏུ་སེམས་བསྐྱེད་ནས། །ཞེས་གསུངས་ཏེ། དེ་ཡང་འདས་པའི་དུས་ན་ཕྱོགས་དུས་ཐམས་ཅད་དུ་བྱོན་པའི་སངས་རྒྱས་དཔག་ཏུ་མེད་པ་རྩིས་བགྲང་ལས་འདས་པ་བསམ་གྱིས་མི་ཁྱབ་པ་ཞིག་བྱོན་ཡོད་པ་དེ་ཐམས་ཅད་ཀྱིས། དང་པོ་བྱང་ཆུབ་མཆོག་ཏུ་ཐུགས་བསྐྱེད་པ་ནས་བཟུང་སྟེ། ཚོགས་རྣམ་པ་གཉིས་བསགས། སྒྲིབ་པ་རྣམ་པ་གཉིས་སྦྱངས་ཏེ་མཐར་མངོན་པར་རྫོགས་པར་སངས་མ་རྒྱས་ཀྱི་བར་དུ་བསགས་པའི་དགེ་བའི་རྩ་བ་ཇི་རྙེད་པ་དང་། སངས་རྒྱས་ནས་ཀྱང་དམ་པའི་ཆོས་ཀྱི་འཁོར་ལོ་བསྐོར། གདུལ་བྱ་སྨིན་པར་མཛད་དེ་ཡོངས་སུ་མྱ་ངན་ལས་མ་འདས་ཀྱི་བར་གྱི་དགེ་བའི་རྩ་བ་དང་། མྱ་ངན་ལས་འདས་ནས་ཀྱང་ཇི་སྲིད་བསྟན་པ་མ་ཞིག་གི་བར་གྱི་དགེ་བའི་རྩ་བ་གང་ལགས་པ། འགྲོ་དོན་རྒྱ་ཆེན་མཛད་ལ་ཡི་རང་ངོ་། །ཞེས་པ་ནི། མདོར་ན་བདེ་བར་གཤེགས་པའི་ཕྲིན་ལས་ནི་སེམས་ཅན་ལ་ཕན་བྱེད་དང་སེམས་ཅན་གྱི་འགྲོ་དོན་འབའ་ཞིག་ཡིན་པས་ན་དེ་ལ་ཡི་རང་ངོ་གསུངས་པ་རེད།

གསུམ་པ་ཐུན་མོང་གི་དགེ་བ་སྤྱི་ལ་ཡི་རང་བ།

མི་དགེ་བཅུ་པོ་སྤངས་པ་དགེ་བ་བཅུ། །གཞན་གྱི་སྲོག་སྐྱབས་སྦྱིན་པ་གཏང་བ་དང་། །སྡོམ་པ་སྲུང་ཞིང་བདེན་པར་སྨྲ་བ་དང་། །འཁོན་པ་སྡུམ་ཞིང་ཞི་དུལ་དྲང་པོ་སྨྲ། །དོན་དང་ལྡན་པའི་གཏམ་བརྗོད་འདོད་པ་ཆུང་། །བྱམས་དང་སྙིང་རྗེ་བསྒོམས་ཤིང་ཆོས་ལ་སྤྱོད། །དགེ་བ་དེ་རྣམས་ཀུན་ལ་ཡི་རང་ངོ། །ཞེས་གསུངས་ཏེ། །མི་དགེ་བཅུ་པོ་སྤངས་པ་དགེ་བ་བཅུ། །ཞེས་པ་ནི། སྲོག་གཅོད་ལ་སོགས་ལུས་ཀྱི་ལས་གསུམ། རྫུན་ལ་སོགས་པ་ངག་གི་ལས་བཞི། བརྣབ་སེམས་ལ་སོགས་ཡིད་ཀྱི་ལས་གསུམ་སྟེ་མི་དགེ་བཅུ་པོ་སྤོང་བར་དམ་བཅས་པ་ནི་དགེ་བ་བཅུ་ཡིན། དགེ་བཅུ་ཁྱད་པར་བ་དེ་སྲོག་མི་གཅོད་པའི་སྟེང་དུ་གཞན་གྱི་སྲོག་སྐྱོབས་པ། རང་ཉིད་ལ་དབང་བའི་སྒོ་ཟོག་སེམས་ཅན་ཚེ་ཐར་བྱེད་པ། སྒོ་བཤས་རང་གིས་མི་བཤའ་གཞན་ལ་བཤོས་ཤོག་དང་ངས་ཉོ་ཡང་མི་ཟེར་བ། རྩྭ་ས་དང་རྒྱུག་ཆུ་སོགས་ལ་གནས་པའི་སྲོག་ཆགས་ཚེ་ཐར་བྱེད་ཆེ་ཐུབ་ཆུང་ཐུབ་བྱེད་པ། འཁོར་ཡུག་གི་རི་རྒྱ་རྔོན་ཁྲིམས་དེ་རྣམས་ཚང་མས་གཅིག་ཐོག་ལ་བབ་པ་འདྲ་བར་ཁར་སང་བཤད་པ་ལྟར་ཚང་མས་སེམས་ཁུར་བྱས་ན་བསོད་ནམས་ཆེན་པོ་མཉམ་དུ་ཐོབ་པ་ཡིན། སའི་གོ་ལ་འདིའི་སྟེང་ན་མི་ལ་སོགས་པའི་སྲོག་ཆགས་མང་པོ་ཞིག་གི་མཉམ་དུ་འཚོ་གནས་བྱས་ཡོད། ཐམས་ཅད་རང་ཉིད་དང་འདྲ་བར་རང་སྲོག་རང་གིས་གཅེས་པ་ཁོ་ན་ཡིན་པ་རེད། དེའི་ནང་གི་འུ་བུ་ཚོ་མི་ནི་རྣམ་དཔྱོད་ཀྱི་ཤེས་རབ་ཡོད་པས་བཟང་བ་འདྲ་ཡིན་དགོས། ཁྱད་པར་དུ་སྲོག་ཆགས་གཞན་པ་རྣམས་ཀྱིས་མི་ཤེས་པ་ལས་རྒྱུ་འབྲས་ཀྱི་འགྲོ་སྟངས་དང་སྐྱེ་བ་སྔོན་རྗེས་ཀྱི་སྐྱིད་སྡུག་ལ་འདང་རྒྱག་བྱེད་ཀྱི་རིག་གཞུང་དང་། མ་ནོར་མ་འཁྲུལ་བའི་ལམ་བཙལ་ཐབས་ཡོད་པ་རེད། ཁྱད་པར་དུ་འུ་བུ་ཚོ་ཡབ་ཆེན་སྤྲེལ་རྒན་རྒྱལ་པོ་དང་མ་ཡུམ་བྲག་སྲིན་གཉིས་ཀའི་ཤ་ཁྲག་རིགས་རུས་ལས་ཆད་པའི་གདོང་དྲུག་ཆོལ་གསུམ་གྱི་བོད་མི་མང་ཆེ་བ། སྤྱིར་ནང་ཆོས་དང་ཡང་དགོས་ཐེག་ཆེན་མདོ་སྔགས་ཀྱི་ཆོས་ལག་ལེན་ལ་འདེབས་པ་ཤ་སྟག་ཡིན་དགོས་པ་ཡིན་པས། མ་རྒན་སེམས་ཅན་ཐམས་ཅད་ལ་ཕན་ཐོགས་ཅན་གྱི་སྦྱོར་བ་ལག་ལེན་ལ་འདེབས་ད་དུང་མ་ཐུབ་ཀྱང་། ཁྱིམ་མཚེས་ལ་ཁའི་རི་དྭགས་དང་ཆུ་ནང་གི་ཉ་མོ་འདི་དག་ཇི་ཙམ་སྡུག་ནའང་རང་སའི་སྟེང་དུ་སྲུང་སྐྱོབས་ཤིག་ཐུབ་དགོས་པ་རེད། སྲོག་གཅོད་སྤངས་པའི་སྟེང་དུ་སྲོག་བསྐྱབས་ན་ལྷའི་བུ་ཀུན་དགའི་གཏམ་རྒྱུད་ལྟ་བུ་ན་ནིང་ཞིག་ལ་བཤད་པ་བཞིན། ཆུ་སྲིན་གྱི་ཁ་ནང་དུ་ཚུད་ཀྱང་མི་ཤི་བ། ཆུ་ནང་དུ་མཆོངས་ན་ཆུས་ཐུར་དུ་མི་ཁྱེར་བར་གྱེན་དུ་ཁྱེར་ཡོང་བ། མཚོན་གྱིས་བརྒྱབ་ན་མི་ཆོད་པ། བྲག་མགོ་ནས་མཆོངས་ཀྱང་ཤི་མི་ཐུབ་པ། མེ་ནང་དུ་ལྕེབས་ཀྱང་མི་ཚིག་པ་དེ་འདྲ་བསོད་ནམས་ཅན་གྱི་མཐུ་འགྲུབ་རྒྱུ་ཡོད་པ་རེད། ཚེ་གཅིག་ལ་ན་ནས་འཆི་ཆས་བྱེད། ཚེ་ནད་མགོ་ནས་མི་དྭངས་བ་དང་། བྱིས་པ་མི་འཚམས་ནས་ནམ་ཡིན་ཡང་རོ་རེས་གནན་འདུག་པ། མི་དགོས་ས་ནས་གསར་ཤི་ངན་ཆག་རེད་ཀྱིན་འདུག་པ་འདི་ཚོ་ལའང་ཚེ་ཐར་སྲོག་བླུ་བྱེད་པས་དགའ་ཞིག་རིམ་གྲོ་ཡོད་པ་མ་རེད། སྦྱིན་པ་གཏོང་བའི་མཆོག་ཀྱང་མི་འཇིགས་པ་སྐྱབས་ཀྱི་སྦྱིན་པ་གཏོང་བ་འདི་ཡིན་ཏེ། དྲན་པ་ཉེར་བཞག་ལས། ཚུལ་ཁྲིམས་ཀྱི་ནང་ན་མཐོ་རིས་སུ་སྐྱེ་བའི་མཆོག་ནི་འདི་ཡིན་ཏེ། འདི་ལྟ་སྟེ། སྲོག་སྦྱིན་པའི་ཚུལ་ཁྲིམས་སོ། །ཞེས་གསུངས། སྟོན་པའི་སྐྱེས་རབས་ལས། བྱང་ཆུབ་སེམས་དཔའ་དོམ་ལ་སྐྱེས་སྐབས་རྔོན་པའི་སྲོག་བསྐྱབས་པ་དང་། གཅན་གཟན་ཀུན་ཏས་རྒྱལ་པོ་ཚངས་སྦྱིན་གྱིས་མངག་པའི་རྔོན་པའི་སྲོག་བསྐྱབས་པའི་རྣམ་ཐར་ཇི་འདྲའི་ངོ་མཚར། །སོ་སྐྱེས་ཀྱི་སྐབས་ཡིན་པས་དེ་ཙམ་ཞིག་རང་སྲོག་དང་གཞན་སྲོག་ད་ལྟ་ནས་རྗེ་མ་ཐུབ་ཀྱང་རྗེས་སུ་མཐུན་པའི་ལམ་ལ་སློབ་དགོས། འདི་ནས་རང་རེས་སྦྱིན་པ་ཆེན་པོའི་གཏམ་རྒྱུད་གཅིག་བཤད། སངས་རྒྱས་བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་བོ་ན་དགེ་སློང་གི་དགེ་འདུན་བརྒྱ་ཕྲག་ཕྱེད་དང་བཅུ་གསུམ་དང་མཉམ་དུ་བཞུགས་ཡོད་སྐབས་ཤིག་ལ། བཅོམ་ལྡན་འདས་ཀྱིས་གསུངས་པ། ང་རྒས་ཀྱི་ཡོད་པས་བསྙེན་བཀུར་བྱེད་པའི་གཡོག་ཅིག་དགོས་སོ་ཞེས་བཀའ་སྩལ་པས། ཀུན་ཤེས་ཀོོཎྜི་ནྱ་དང་། འོད་སྲུང་དང་། ཤཱ་རིའི་བུ་དང་། མོའུ་འགལ་གྱི་བུ་ལ་སོགས་པ་ལྔ་བརྒྱ་ཙམ་ཞིག་གིས། ཁོང་རྣམས་ཀྱིས་བསྙེན་བཀུར་བྱེད་ན་ཞེས་རིམ་པ་བཞིན་དུ་བཅོམ་ལྡན་འདས་ལ་ཞུས་པས། བཅོམ་ལྡན་འདས་ཀྱིས་སུ་ཡང་ལ་མ་གནང་། དེའི་ཚེ་མ་འགག་པས་མངོན་ཤེས་ཀྱིས་བཅོམ་ལྡན་འདས་ཀྱིས་ཐུགས་རྩེ་གང་ལ་གཏད་ཡོད་པ་ཅི་དགོངས་ཀྱིན་ཡོད་པ་བརྟགས་ཚེ་ཀུན་དགའ་བོ་ལ་དགོངས་ཡོད་པ་ཤེས་ཏེ། མཆོག་ཟུང་གཉིས་ཀ་ཀུན་དགའ་བོའི་ཐད་དུ་སོང་ནས་ཁྱེད་ཀྱིས་བཅོམ་ལྡན་འདས་ལ་བསྙེན་བཀུར་བྱ་བར་དད་དམ་བཅོམ་ལྡན་འདས་ཀྱིས་ཀྱང་ཁྱེད་འབའ་ཞིག་ལ་དགོངས་སོ་ཞེས་བསྐུལ་ཀྱང་། ཀུན་དགའ་བོས་བདག་ནི་བཅོམ་ལྡན་འདས་ལ་བསྙེན་བཀུར་བྱ་བར་མི་སྤྲོ་སྟེ། དེ་ནི་ཤིན་ཏུ་བསྒྲུབ་པར་དཀའོ། །ཡང་མོའུ་འགལ་གྱི་བུས་ནན་གྱིས་བསྐུལ་བས། དེས་སྨྲས་པ་ང་ལ་འདོད་པ་གསུམ་ཡོད་བཅོམ་ལྡན་འདས་ཀྱིས་དེ་གནང་ན་བསྙེན་བཀུར་བྱ་ཞེས་ཞུས་པས། འདོད་པ་གསུམ་པོ་གང་ཞེ་ན། བཅོམ་ལྡན་འདས་ཀྱི་ན་བཟའ་མི་མནབ་པ་རྣམས་ང་ལ་གནང་བ་དང་། བཅོམ་ལྡན་འདས་ཀྱི་མི་གསོལ་བའི་གསོལ་ལྷག་ང་ལ་གནང་བ་དང་། ནམ་འགྲོ་འདོད་ན་བཅོམ་ལྡན་འདས་ཀྱི་སྐུ་མདུན་དུ་འགྲོ་ཆོག་པ་དང་གསུམ་པོ་གནང་ན་བསྙེན་བཀུར་བྱ་ཞེས་ཞུས་པས། མཆོག་ཟུང་གཉིས་ཀས་བཅོམ་ལྡན་འདས་ལ་དོན་དེ་ཞུས་པ་དང་། བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས། ཆོག་པའི་བཀའ་ལན་གནང་། བཅོམ་ལྡན་འདས་ཀྱིས་གསུངས་པ་དགེ་སློང་ཀུན་དགའ་བོ་ནི་གང་ཟག་མཁས་པ་ཡིན་པས་འགའ་རེས་ཟས་གོས་ཀྱི་དོན་དུ་སྟོན་པ་ལ་བསྙེན་བཀུར་བྱེད་དོ་ཞེས་སྨྲ་བར་མི་འགྱུར་བའི་ཕྱིར་དང་། དུས་ཤེས་ཤིང་དུས་རིག་པ་ལགས་ཏེ་འདི་ནི་ངོ་མཚར་རྨད་དུ་བྱུང་བའི་ཆོས་སོ་ཞེས་བཀའ་སྩལ་པ་ན། འཁོར་རྣམས་ཐེ་ཚོམ་དུ་གྱུར་ཏེ། དགེ་སློང་ཀུན་དགའ་བོ་འདི་ཅིའི་རྒྱུ་ཅིའི་རྐྱེན་གྱིས། དུས་ཚོད་ལ་མཁས་པར་གྱུར་ཅེས་གསོལ་བ་ན། སྟོན་པས་གསུངས་པ། སྔོན་བསྐལ་བ་གྲངས་མེད་ཅིག་གི་ཕ་རོལ་ན་གྲོང་ཁྱེར་ཝ་རི་ཏ་ཞེས་བྱ་བ་ན་འཛམ་བུ་གླིང་དུ་དབང་རྒྱུར་བའི་རྒྱལ་པོ་ཞིག་ཡོད། རྒྱལ་པོ་དེའི་བླ་མཆོད་ཀྱི་རིགས་ཡིན་པ་བྲམ་ཟེ་ནྱ་གྲོ་དྷྱ་ཞེས་བྱ་བ་ཡོད། བྲམ་ཟེ་ནྱ་གྲོ་དྷ་ཞེས་བྱ་བ་དེ་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་དང་འདྲ་བར་བསྙེན་བཀུར་བྱེད་ས་བརྩི་བཀུར་བྱེད་ས། རྒྱུ་ཆེ་ཞིང་ཕྱུག་པོ་རྣམ་ཐོས་ཀྱི་བུ་ལྟ་བུ་ཞིག་ཡིན། དེ་ཚང་ལ་རིགས་རྒྱུད་བཟང་བའི་བུ་མེད་པས་ལོ་བཅུ་གཉིས་ཀྱི་བར་དུ་ལྷ་ལ་གསོལ་བ་བཏབ་པ་ལས། སྐབས་ཤིག་ལ་བུ་ཞིག་སྐྱེས་པ་དེ་མཛེས་ཤིང་ལྟ་ན་སྡུག་པ་ཞིག་ཡོད། བུའི་མཚན་ལ་བརྟགས་ནས་མིང་ལ་སྦྱིན་པ་ཆེན་པོ་བཏགས། སྦྱིན་པ་ཆེན་པོ་ནར་སོན་ནས་བཟོ་དང་རིག་གནས་སྒྱུ་རྩལ་སྣ་དགུ་ལ་བྱང་ཆུབ་སྟེ་འཁོར་མང་པོས་བསྐོར་ནས་ཉིན་གཅིག་གྲོང་ཁྱེར་གྱི་ཕྱི་རོལ་ཏུ་ལྟད་མོར་སོང་བ་དང་། ལྟད་མོ་ལྟ་རུ་སོང་ཚེ་མི་འདྲ་དང་མི་འདྲ་མང་པོས་ལས་འདྲ་དང་མི་འདྲ་མང་པོ་བྱེད་བཞིན་ཡོད་པར་མཐོང་། དེའི་ནང་ནས་སྤྲང་པོ་ཉམ་ཐག་པ་འགའ་རེས་སློང་མོ་བྱེད་པ། ཤན་པ་དག་གིས་སྲོག་ཆགས་མང་པོ་བསད་དེ་པགས་པ་བཤུ་བ་དང་། ཞིང་པ་རྣམས་ཀྱིས་ཞིང་རྨོས་པའི་ཤུལ་དུ་བྱ་མང་པོས་འབུ་རྣམས་འཐུ་བ་དང་། ཉ་བ་རྣམས་ཀྱིས་ཉ་རྒྱ་བཙུགས་ནས་ཉ་མང་པོ་སྐམ་ལ་ཕྱུངས་ནས་ཉ་རྣམས་ཀྱིས་འགྲེ་ལྡོག་བྱེད་པ་ལ་སོགས་པ། དབུལ་ཕོངས་དང་སྡུག་བསྔལ་མི་དགེ་བའི་ལས་སྣ་ཚོགས་པ་མང་པོ་བསགས་བཞིན་ཡོད་པ་མཐོང་ནས་ཡིད་སྐྱོ་ཞིང་སྙིང་རྗེའི་སེམས་སྐྱེས་ཏེ་ཁྱིམ་དུ་ཕྱིན་ནས། ཁྱིམ་གྱི་ཕ་ལ་གནང་བ་ཞུས་ཏེ་ཁོས་དཀོར་མཛོད་ཀྱི་ནང་ནས་སྦྱིན་པ་ཞིག་གཏོང་དགོས་ཞེས་ཞུས་ཚེ་ཕས་གནང་བ་ཐོབ། དེ་ནས་སྦྱིན་པ་བཏང་བཏང་མཐར་སྐབས་ཤིག་ལ་ཕའི་དཀོར་མཛོད་སུམ་ཆ་གཅིག་མ་གཏོགས་ཟད་སོང་། དེ་ནས་དཀོར་མཛོད་ཀྱི་གཉེར་བ་རྣམས་ཀྱིས་ཕ་ལ་སྨྲས་ཏེ་ད་མཛོད་ཁང་གི་རྒྱུ་ནོར་རྣམས་སྦྱིན་མཚམས་ཤིག་བྱས་ན་མི་དགའ་འམ་ད་ནི་འཛད་ལ་ཉེ་འདུག་ཞེས་སྨྲས་པས། ཡབ་ཀྱིས་བདག་གིས་བུའི་ངོ་མི་ལྡོག་པས་ཁྱེད་རྣམས་ཀྱིས་ཐབས་བྱོས་ཤིག་ཅེས་སྨྲས་པས། དེ་ནས་དེ་དག་གིས་ཐབས་སྣ་ཚོགས་ཀྱིས་མཛོད་སྒོ་ཕྱེ་རོགས་མ་བྱེད། བུ་སྦྱིན་པ་ཆེན་པོས་འདི་རྣམས་ཀྱིས་འདི་ལྟར་བྱེད་པ་འདི་ཡབ་ཀྱི་བཀའ་ཡོད་པར་ངེས་ཤིང་། ལར་ཡབ་ཀྱིས་དཀའ་བས་བསགས་པའི་རྒྱུ་ནོར་འདི་ངས་མེད་པར་བྱེད་འོས་པའང་མ་ཡིན་པས། དེ་བས་ཐབས་གཞན་ཞིག་བཙལ་དགོས། ཅི་འདྲ་བྱས་ན་ལོངས་སྤྱོད་འབད་མེད་དུ་འབྱུང་ཐབས་ཤིག་ཡོད་སྙམ་ནས་མི་ཐམས་ཅད་ལ་སྐད་ཆ་དྲིས་པ་རེད། མི་འགའ་རེས་ཞིང་ལས་བྱས་ན་དགའ་ཞེས་རེད་སྨྲས། འགའ་རེས་ཡང་ཚོང་ལས་བྱས་ན་དགའ་ཞེས་སྨྲས། ཡང་འགའ་རེས་ཕྱུགས་ཟོག་སྤེལ་ན་དེས་དགའ་འམ་ཞེས་སྨྲས། དེ་ལྟར་འདྲ་མིན་ཐམས་ཅད་སྨྲས་ཀྱང་དོན་ངོ་མ་འདི་དགའ་འདུག་སྙམ་པ་ཞིག་གཅིག་ཀྱང་མ་བརྙེད་པ་རེད། འགའ་ཞིག་གིས་རྒྱ་མཚོ་ནང་ནས་ནོར་བུ་བླང་ན་དགའ་ཞེས་སྨྲས་ཚེ་དེ་ཡིད་ལ་བབ་ནས་ཕ་མ་གཉིས་ལ་གནང་བ་ཞུས་པར་ཕ་མ་གཉིས་ཀས་རྒྱ་མཚོའི་ནང་དུ་འགྲོ་བ་ནི་གནོད་པ་མང་བར་མ་ཟད་དེ་འདྲའི་ལས་སླ་མོ་ཞིག་མིན་པས་རྒྱ་མཚོའི་ནང་དུ་མ་འགྲོ་ཞིག་ཅེས་གནང་བ་མ་ཐོབ། བུས་བསམ་པ་འདི་བཞིན་མ་འགྲུབ་ཀྱི་བར་དུ་མི་ལྡང་ངོ་ཞེས་སྨྲས་ཏེ་ཁ་སྦུབ་ཏུ་ཉལ་ཏེ་ཞག་དྲུག་གི་བར་བཟའ་བཏུང་ཟར་མ་འདོད་པས་ཤིར་དོགས་ནས། ཕ་མ་གཉིས་ལའང་ཐབས་མེད་པས་ཉིན་གཅིག་གནང་བ་ཐོབ། དེ་ནས་མི་ལྔ་བརྒྱ་དང་འགྲོགས་ཏེ་སོང་སོང་མཐར། སྐབས་ཤིག་ལ་ཇག་པ་མང་པོ་དང་འཕྲད་དེ་དངོས་པོ་ཚང་མ་ཕྲོགས་སོ། །དེ་ནས་ཡང་སོང་བས་གྲོང་ཁྱེར་ང་ཤུ་བར་ཞེས་པར་ཕྱིན་ནས། དེར་བྲམ་ཟེ་ཀ་བྱི་ལི་ཞེས་པའི་ཁྱིམ་ཚང་ཕྱུག་པོ་ཚང་ཞིག་དང་འཕྲད་ནས་དེ་ཚང་ལ་གསེར་སློང་པ་ན་བྲམ་ཟེ་ཚང་གིས་འདི་ནི་རང་བཞིན་སྐྱེས་བུ་མ་རེད་སྙམ་ནས་གཞན་དང་མ་འདྲ་བ་ཡིན་པར་ཤེས་ཏེ་གསེར་སྲང་སུམ་སྟོང་བྱིན། དེ་ནས་རྒྱ་མཚོ་ཆེན་པོའི་ནང་དུ་གྲུ་གཟིངས་ལ་ཞུགས་ཏེ་སོང་བས་རིན་པོ་ཆེའི་གླིང་དུ་བསླེབས། ཚོང་པ་རྣམས་ལ་རིན་པོ་ཆེ་གང་གི་ཡག་ཡག་བསལ་རོགས་བྱས་ཏེ་བྱིན་ནས་ཕྱིར་འཛམ་བུ་གླིང་དུ་མངག ཚང་མ་མགོ་ཐོན་དུ་ཕྱིར་ཡུལ་ལ་བསླེབས་སོང་། སྦྱིན་པ་ཆེན་པོ་འདོད་དགུ་འབད་མེད་དུ་འཇོ་བའི་ཡིད་བཞིན་གྱི་ནོར་བུ་ཞིག་མ་བརྙེད་བར་དུ་ཕྱིར་ཡུལ་ལ་མི་འགྲོ་སྙམ་ནས། ཀླུའི་རྒྱལ་པོའི་ལག་ནས་ནོར་བུ་སློང་བའི་ཆེད་དུ་སྙིང་སྟོབས་ཆེན་པོ་བསྐྱེད་དེ། ཞག་བདུན་ལ་ཆུས་པུས་མོ་ནུབ་འདུག་ས་ཞིག་ལ་སོང་། ཡང་ཞག་བདུན་ལ་བརླ་མན་ཆད་ནུབ་འདུག་ས་ཞིག་ཏུ་སོང་། ཡང་ཞག་བདུན་ལ་འཕྲག་མགོ་མན་ཆད་ནུབ་འགྲོ་ས་ཞིག་བརྒལ་ནས་སོང་། དེ་ནས་ཞག་བདུན་ལ་ཆུ་རྐྱལ་ནས་སོང་། དེ་ནས་རི་ཞིག་གི་རྩར་བསླེབས། རི་དེའི་ངོར་ཞག་བདུན་དུ་འཛེགས། རི་རྩེར་བསླེབས་ནས་ཐུར་དུ་ཞག་བདུན་ལ་བབ་པས་ཆུ་འགྲམ་ཞིག་ཏུ་བསླེབས། ཆུ་དེའི་ནང་དུ་མེ་ཏོག་པད་མ་གསེར་གྱི་མདོག་ཅན་གྱི་རྩ་བར་དུག་སྦྲུལ་གྱིས་དཀྲིས་པར་མཐོང་ནས། བྱང་ཆུབ་སེམས་དཔའ་དེ་སྐྱིལ་ཀྲུང་ཞིག་བཅས་ཏེ་བྱམས་པའི་ཏིང་ངེ་འཛིན་ལ་ཞུགས་པས། ཀླུ་དེ་དག་གི་ཞེ་སྡང་ཞི་ཞིང་གནོད་པ་དང་བྲལ། དེ་ནས་ཆུ་དེའི་ནང་གི་མེ་ཏོག་པདྨའི་སྟེང་དུ་གོམ་པ་སྤོས་ཏེ་ཡང་ཞག་མ་བདུན་ལ་སོང་། དེ་ནས་པདྨའི་ཆུ་མཚོའི་ཕ་རྒྱབ་ཀྱི་སྲིན་མོའི་གླིང་དུ་ཐོན། དེ་ན་སྲིན་མོ་འཇིགས་སུ་རུང་བ་མང་པོ་ཡོད། དེ་རྣམས་ཀྱིས་མིའི་དྲི་མ་ཚོར་ནས་བརྒྱུགས་ཏེ་ཟ་གྲབ་བྱས་པར། བྱང་ཆུབ་སེམས་དཔས་བྱམས་པའི་སེམས་བསྐྱེད་ཅིག་བསྒོམས་པས་དེ་རྣམས་ཀྱི་གདུག་རྩུབ་ཞི། དེ་ནས་འཇམ་པོའི་ཚིག་གིས་ཁྱེད་གང་ནས་འོང་། གང་དུ་འགྲོ་དྲིས་པས། །དེས་ཁོ་བོ་ནི་ཡིད་བཞིན་གྱི་ནོར་བུ་རིན་པོ་ཆེ་འཚོལ་དུ་ཡོང་བ་ཡིན་པའི་ལོ་རྒྱུས་ཆ་ཚང་བཤད། དེ་རྣམས་ཀྱིས་འདི་རང་བཞིན་གྱི་མི་ཞིག་མ་རེད་རང་བཞིན་གྱི་མི་ཞིག་དང་འདྲ་མི་འདུག་འདི་འདྲའི་སྙིང་སྟོབས་ཆེན་པོ་དང་བསོད་ནམས་ཆེན་པོ་ཅན་ཞིག་རེད་འདུག་ཅེས་སྨྲས་ནས། དགའ་སྟེ་ཀླུའི་ཕོ་བྲང་ལ་ད་དུང་ཐག་ཤིན་ཏུ་རིང་བས་དེ་ལྟར་སོང་ན་ཉོན་མོངས་པར་གྱུར་གྱིས། ཁོ་ཚོས་གང་འཚམ་ཞིག་ལ་བསྐྱལ་འཇོག་ཅེས་སྨྲས་ནས་ནམ་མཁའ་ནས་ཁྱེར་ཏེ་དཔག་ཚད་བཞི་བརྒྱའི་ཕ་རོལ་དུ་བཞག་པ་རེད། དེ་ནས་སོང་བས་ཡུན་རིང་མ་འགོར་བར་དངུལ་གྱི་མཁར་ཞིག་མཐོང་ནས་འདི་ཀླུའི་མཁར་ཡིན་པ་འདྲ་སྙམ་སྟེ་ཐག་ཉེ་སར་སོང་བས། མཁར་དེའི་ཕྱི་རོལ་ན་འོབས་རིམ་པ་བདུན་གྱིས་བསྐོར་ཡོད་པ། འོབས་ཐམས་ཅད་སྦྲུལ་གདུག་པ་ཅན་གྱིས་གང་ཡོད་པར་མཐོང་། དེ་ནས་ཡང་བྱམས་པའི་སེམས་བསྐྱེད་ནས་ཀླུའི་གདུག་པ་ཞི། སྦྲུལ་ཐམས་ཅད་རྐང་པས་བརྫིས་ནས་མཁར་ལ་གཏད་དེ་སོང་། མཁར་དེ་ཀླུ་སྦྲུལ་གཟུགས་ཅན་གཉིས་ཀྱི་ལུས་པོས་དཀྲིས་བརྒྱབ་ནས་མགོ་གཉིས་ཀ་མཁར་སྒོ་ལ་གཏད་དེ་བསྡད་ཡོད་འདུག སྦྱིན་པ་ཆེན་པོ་མཐོང་བ་ན་མགོ་ཡར་བཀྱག་ནས་གདུག་རྩུབ་བསྟན་ཡོང་བས། ཡང་བྱམས་པའི་སེམས་ཤིག་བསྐྱེད་ཚེ་མགོ་མར་དམའ་ནས་ས་ལ་སྣར། དེ་གཉིས་ཀའི་མགོ་ལ་བརྫིས་ཏེ་མཁར་གྱི་ནང་དུ་སོང་། མཁར་གྱི་ཡང་ཐོག་གི་གཙོ་བོ་རིན་ཆེན་སྣ་བདུན་གྱིས་གཞལ་མེད་ཁང་གི་ཚོམ་ཆེན་གྱི་ནང་དུ་ཀླུའི་རྒྱལ་པོ་ཞིག་ཡོད། ནང་དུ་སོང་ཚེ་ཀླུ་དེས་བྱང་ཆུབ་སེམས་དཔའ་མཐོང་བ་དང་སྔངས་ཏེ། འོབས་བདུན་གྱིས་བསྐོར་བས་གཞན་སུ་ཡང་འདིར་འོངས་མི་ནུས་ནའང། འདི་ལྟ་བུ་སུ་ཡིན་སྙམ་སྟེ་ཡར་ལངས་ནས་གུས་པས་བསུས་ཏེ་རིན་པོ་ཆེའི་ཁྲི་སྟེང་དུ་བཞག་ནས་གསོལ་སྣ་མང་པོ་འདྲེན། དེ་ནས་ཀླུའི་རྒྱལ་པོས་ཁྱེད་འདི་རུ་ཅིའི་དོན་དུ་གང་ནས་ཡོང་བ་ཡིན་ཞེས་དྲིས་པས། ང་འཛམ་གླིང་གི་མི་ཡིན་པས་འཛམ་བུ་གླིང་ནས་ཡོང་བ་ཡིན། འཛམ་གླིང་གི་མི་ཐམས་ཅད་དབུལ་ཞིང་ཕོངས་པས་སྡིག་པ་སྣ་ཚོགས་བྱས་ནས་ཕྱི་མ་ངན་སོང་དུ་ལྷུང་བ་དེ་དག་ལ་སྙིང་བརྩེ་བས་ལམ་གྱི་དཀའ་ངལ་ལ་མ་འཛེམ་པར། རྒྱལ་པོ་ཆེན་པོ་ཁྱེད་ལ་ཡིད་བཞིན་གྱི་ནོར་བུ་རིན་པོ་ཆེ་སློང་དུ་ཡོང་བ་ཡིན། ནོར་བུས་སེམས་ཅན་ལ་ཕན་བཏགས་པའི་བསོད་ནམས་ཀྱིས་མངོན་པར་རྫོགས་པར་སངས་རྒྱས་པར་འགྱུར་བས་ཁྱོད་རང་གི་འདང་རྒྱོབ། བདག་གི་ཡིད་དང་མི་འགལ་བར་རིན་པོ་ཆེ་སྩལ་དུ་གསོལ་ཞེས་སྨྲས་པས། ཀླུའི་རྒྱལ་པོས་སྨྲས་པ། ཡིད་བཞིན་གྱི་ནོར་བུ་རིན་པོ་ཆེ་ནི་སླ་མོ་ཞིག་ཡིན་པ་མ་རེད་རྙེད་དཀའ་མོ་ཡིན་པས། ཁྱེད་འདིའི་དོན་ལ་དཀའ་ལས་འདི་འདྲ་ཞིག་བརྒྱབ་ནས་སེམས་ཅན་གཞན་ལ་ཕན་པའི་ཆེད་དུ་ཡོང་ན། འདི་ནས་ཟླ་བ་གཅིག་ལ་བཞུགས་ཏེ་བདག་གི་མཆོད་པ་བཞེས་ཤིང་ཆོས་བསྟན་ན་ནོར་བུ་རིན་པོ་ཆེ་སྦྱིན་ཞུས། བྱང་ཆུབ་སེམས་དཔས་ཀྱང་དེ་བཞིན་དུ་ཁས་བླངས་ནས། ཟླ་བ་གཅིག་གི་ཚེ་ལ་དྲན་པ་ཉེ་བར་བཞག་པའི་ཆོས་ཀྱི་རྣམ་གྲངས་བསྟན་ཞིང་དེའི་རིང་ལ་ཀླུའི་རྒྱལ་པོས་མཆོད་པ་སྣ་ཚོགས་པ་ཕུལ། དེ་ནས་ཟླ་བ་གཅིག་ཚང་བས་ཀླུའི་རྒྱལ་པོས་གཙུག་གི་ནོར་བུ་བཀྲོལ་ནས་སྦྱིན་པ་ཆེན་པོ་ལ་ཕུལ། སྐྱེས་བུ་ཆེན་པོ་ཁྱེད་སངས་རྒྱས་པའི་གནས་སྐབས་སུ་བདག་ཁྱེད་ཀྱི་ཉེ་གནས་ཀྱི་མཆོག་ཏུ་གྱུར་ཅིག་ཅེས་སྨོན་ལམ་བཏབ་བོ། །སྦྱིན་པ་ཆེན་པོས་ནོར་བུ་འདི་ལ་ནུས་པ་ཇི་འདྲ་ཞིག་ཡོད་པར་དྲིས་པས། འདིས་དཔག་ཚད་ཉིས་སྟོང་གི་འཁོར་ཡུག་གི་ས་མཚམས་སུ་ཅི་དགོས་གང་དགོས་ཐམས་ཅད་དགོས་འདོད་ཆར་བཞིན་དུ་འབེབས་ནུས་ཤེས་སྨྲས། བྱང་ཆུབ་སེམས་དཔའི་ཐུགས་དགོངས་ལ་ནོར་བུ་འདི་མཐུ་ཆེ་མོད་ཀྱི། བདག་གི་བསམ་པ་ཡིད་བཞིན་དུ་སྒྲུབ་མི་ནུས་པར་དགོངས། དེ་ནས་ཀླུའི་རྒྱལ་པོ་འཁོར་བཅས་ཀྱིས་སྐྱེལ་མ་བྱས་ཏེ་ཡང་སོང་སོང་མཐར། སྐབས་ཤིག་ལ་བཻཌཱུརྱ་སྔོན་པོའི་མཁར་ཕྱི་རོལ་གྱི་འོབས་ལ་སོགས་པ་ལམ་འཕྲང་སྔར་ལྟ་བུ་ལ། སྔར་བཞིན་བྱམས་པའི་སེམས་བསྒོམས་ནས་ནང་དུ་ཐར། རྒྱལ་པོ་དེས་ཀྱང་བསུས་ཤིང་བཀུར་སྟི་བྱས་པས། ནོར་བུ་སློང་བ་ལ་ཟླ་བ་གཉིས་སུ་ཆོས་བསྟན་ན་འབུལ་བར་སྨྲས་པ་བཞིན། ཟླ་བ་གཉིས་ལ་བཞུགས་ཏེ་རྫུ་འཕྲུལ་གྱི་རྐང་པའི་ཆོས་བསྟན་པས་ཀླུའི་རྒྱལ་པོས་ཡིད་བཞིན་གྱི་ནོར་བུ་རིན་པོ་ཆེ་དཔག་ཚད་བཞི་སྟོང་ལ་ཅི་འདོད་ཀྱི་ཆར་འབེབས་ཐུབ་པ་ཞིག་ཕུལ་ཏེ། སངས་རྒྱས་པའི་ཚེ་ན་ཉེ་གནས་སུ་སྨོན་ལམ་བཏབ། །ཡང་དེས་མ་ཚིམས་པར་སྔར་བཞིན་སོང་བས་གསེར་གྱི་མཁར་བཀོད་པ་སྔ་མ་ལྟ་བུ་ཞིག་ཡོད་པ་ལ་སྔར་གྱི་འགྲོ་ལུགས་ལྟར་སོང་བས་བསུ་བ་དང་དྲི་བ་སྔར་ལྟར་བྱས། ཟླ་བ་བཞི་ལ་ཆོས་ཀྱི་རྣམ་གྲངས་མང་པོ་བསྟན་པས་ཀླུའི་རྒྱལ་པོས་གཙུག་གི་ནོར་བུ་བཀྲོལ་ནས་ཕུལ་ཏེ། སངས་རྒྱས་པའི་ཚེ་ཉེ་གནས་ཅིག་ཏུ་འགྱུར་བའི་སྨོན་ལམ་བཏབ། ནོར་བུ་འདིས་དཔག་ཚད་བརྒྱད་སྟོང་གི་འཁོར་ཡུག་ཏུ་ཅི་འདོད་ཀྱི་ཆར་འབེབས་པར་སྨྲས་པས། བྱང་ཆུབ་སེམས་དཔས་ཐུགས་བསམ་ཞིག་བཏང་སྟེ་ཐུགས་དགྱེས་ནས་འཛམ་བུ་གླིང་གི་ཁྱོན་དུ་དཔག་ཚད་བདུན་སྟོང་ལས་མེད་པས། ནོར་བུ་རིན་པོ་ཆེ་འདིས་བདག་གི་འདོད་པ་བསྐང་ངོ་སྙམ་ནས། སྔ་ཕྱིར་རྙེད་པའི་ནོར་བུ་རིན་པོ་ཆེ་གསུམ་པོ་ན་བཟའི་སྣེ་མོ་ལ་བཏགས་ཏེ་ཕྱིར་ཡུལ་ལ་ལོག་ཅིང་ཀླུའི་རྒྱལ་པོ་འཁོར་བཅས་ཀྱིས་སྐྱེལ་མ་མཛད། བྱང་ཆུབ་སེམས་དཔའ་དེ་ལས་ཅུང་ཟད་རིང་ས་ཞིག་ནས་འདི་རྣམས་ནོར་བུ་རིན་པོ་ཆེ་ཡང་དག་པ་ཞིག་ཡིན་ན་བདག་ནམ་མཁའ་ལ་འཕུར་ཐུབ་པར་གྱུར་ཅིག་ཅེས་སྨོན་ལམ་མཛད་པས། འཕུར་ཐུབ་པ་ཞིག་ཏུ་གྱུར། དེ་ནས་ནམ་མཁའ་ལ་འཕུར་ཏེ་རྒྱ་མཚོའི་ནང་གི་གེགས་ཐམས་ཅད་ལས་ཐར་ཏེ་རྒྱ་མཚོའི་འགྲམ་དུ་བསླེབས་སྐབས་ས་སྟེང་དུ་བབ་ནས་ངལ་ཅུང་ཟད་ཅིག་གསོས་པར་དེའི་ཚེ་གཉིད་དུ་ཡུར་སོང་བས། ཀླུ་ཕྲན་རྣམས་ཀྱིས་གྲོས་བྱས་པ། ང་ཚོའི་རྒྱ་མཚོའི་ནང་དུ་ནོར་བུ་རིན་པོ་ཆེ་འདི་གསུམ་མ་གཏོགས་མེད་པས་གལ་ཏེ་འདི་གསུམ་མི་འདིས་ཁྱེར་སོང་ན་མི་ལེགས་པས་ཕྱིར་ལ་རྐུ་དགོས་སྙམ་ནས་ཕྱིར་བརྐུས་སོང་། བྱང་ཆུབ་སེམས་དཔའ་གཉིད་སད་དུས་ནོར་བུ་རྣམས་མེད་པར་མཐོང་ནས། འདི་རྒྱ་མཚོའི་ཀླུས་བརྐུས་པ་སེམས་ཐག་ཆོད་དེ། བདག་གིས་ནུས་པ་ཡོད་ཚད་ཀྱིས་རྒྱ་མཚོའི་ཆུ་བསྐམ་དུ་འཇུག་དགོས་དགོངས་ནས་ནོར་བུ་ལག་ལ་མ་ལོན་གྱི་བར་དུ་ཁ་ཕྱིར་ལ་མི་འཁོར་བའི་དམ་བཅའ་བཞག་སྟེ། རུས་སྦལ་གྱི་ཁོག་པ་རྙིང་བ་ཞིག་མཚོ་འགྲམ་དུ་ཡོད་པ་དེ་བླངས་ནས་རྒྱ་མཚོའི་ཆུ་བཅུ་བཞིན་པའི་སྐབས། རྒྱ་མཚོའི་ལྷ་དེས་སྦྱིན་པ་ཆེན་པོའི་བསམ་པ་ཤེས་ཏེ་གམ་དུ་ཡོང་ནས་རྒྱ་མཚོ་ཆེན་པོའི་ཁ་ཞེང་རྐྱང་རྐྱང་ན་དཔག་ཚད་སྟོང་ཕྲག་སུམ་བརྒྱ་སུམ་ཅུ་ཡོད་པས། ཁྱོད་མི་གཅིག་ལྟ་ཅིི་ཁྱེད་འཛམ་བུ་གླིང་གི་མི་ཐམས་ཅད་ཡོང་ནས་བཅུས་ནའང་སྐམ་ཐབས་མེད་པར་མ་ཟད་ཁ་དམའ་ཐབས་ཙམ་ཡང་ཐོན་པ་མ་རེད་ཁྱོས་བཅུས་པ་དོན་མེད་རེད་ཅེས་སྨྲས། བྱང་ཆུབ་སེམས་དཔས་གསུངས་པ་མི་ཞིག་གིས་ངོ་མ་ཞེ་སྙིང་གི་ལས་ཀ་ཞིག་སྒྲུབ་ན་མི་འགྲུབ་པ་ཞིག་ཡོད་པ་མ་རེད། ངས་རིན་པོ་ཆེ་རྙེད་པས་འགྲོ་བ་ཐམས་ཅད་ལ་ཕན་པ་དང་བདེ་བ་བྱ་སྙམ་ཞིང་། དེའི་བསོད་ནམས་ཀྱིས་སངས་རྒྱས་པར་འདོད་དེ། དེ་ལ་སེམས་མ་ཞུམ་ན་སྡུག་གི་རྒྱ་མཚོ་ཅིའི་ཕྱིར་སྐམ་མི་ཐུབ་ཅེས་གསུངས། དེའི་སྐབས་སུ་ལྷ་ཁྱབ་འཇུག་ལ་སོགས་པས་རྒྱང་ནས་བལྟས་ཚེ། བྱང་ཆུབ་སེམས་དཔའ་མི་གཅིག་གིས་རྒྱ་མཚོ་ཆེན་པོའི་ཆུ་བཅུས་ཏེ་འགྲོ་བ་མང་པོའི་དོན་བྱེད་བཞིན་ཡོད་པ་མཐོང་ནས། ལྷ་ཐམས་ཅད་ཀྱིས་གཅིག་གིས་གཅིག་ལ་སྦྲན་ཏེ་ཐམས་ཅད་བྱང་ཆུབ་སེམས་དཔའི་མདུན་དུ་ཡོང་ནས། དེ་རྣམས་ཀྱིས་རང་རང་གི་གྱོན་པ་ཕུད་ནས་ཆུ་ནང་དུ་བྱན་ཏེ་ཕྱིར་ལན་རེ་བླངས་དུས། ལན་ཕོག་གཅིག་གིས་རྒྱ་མཚོའི་ཆུ་དཔག་ཚད་བཞི་བཅུ་ཐམ་པ་ཕྲིས་སོང་། ལན་གཉིས་ཀྱིས་བརྒྱད་ཅུ་ཕྲིས་སོང་། ལན་གསུམ་གྱིས་དཔག་ཚད་བརྒྱ་དང་ཉི་ཤུ་ཕྲིས་སོང་བས། ཀླུ་རྣམས་སྐྲག་ནས་བྱང་ཆུབ་སེམས་དཔའི་མདུན་དུ་ཡོང་སྟེ་རྒྱ་མཚོ་ཆེན་པོའི་ཆུ་སྐམ་པར་མ་བྱེད་ཅིག་ཅེས་སྨྲས་པ་དང་། བྱང་ཆུབ་སེམས་དཔས་དེའི་སྐབས་དེར་མཚམས་བཞག ཀླུ་རྣམས་ཀྱིས་སྨྲས་པ་ཁྱེད་ཀྱིས་ནོར་བུ་རིན་པོ་ཆེ་འདིས་ཅི་ཞིག་དགོས་ཤེས་སྨྲས། དེས་སྨྲས་པ། སེམས་ཅན་ལ་ཕན་ཐོགས་པའི་དོན་ཡིན་ཞེས་གསུངས། ཀླུས་སྨྲས་པ། འོ་ན་རྒྱ་མཚོའི་ནང་ན་སེམས་ཅན་མང་དུ་ཡོད་པས་ངེད་རྣམས་ཀྱིས་ཀྱང་ཅི་ཕྱིར་སྦྱིན་སྨྲས། བྱང་ཆུབ་སེམས་དཔས་གསུངས་པ། རྒྱ་མཚོའི་ནང་ན་སེམས་ཅན་ཡོད་མོད་ཀྱི་དེ་ལ་དབུལ་ཕོངས་ཀྱི་སྡུག་བསྔལ་མེད་། འཛམ་བུ་གླིང་གི་སེམས་ཅན་དབུལ་པོ་ཡིན་པས་རྒྱུ་ནོར་གྱི་དོན་དུ་གཅིག་གིས་གཅིག་ལ་གནོད་བསྐྱལ་བས་མི་དགེ་བ་བཅུ་རྫོགས་པར་བྱས་ཏེ་ཤི་ནས་དམྱལ་བར་སྐྱེ་འགྲོ་བས། ཁོང་གིས་དེ་རྣམས་ལ་སྙིང་རྗེ་སྟེ་རིན་པོ་ཆེ་ཨེ་ལོན་བལྟས་པ་ཡིན་ཞེས་གསུངས། ཀླུ་རྣམས་ཀྱིས་སེམས་རྙེད་དེ་ནོར་བུ་གསུམ་པོ་ཁྱེར་ཡོང་ནས་ཕྱིར་ལ་ཕུལ། རྒྱ་མཚོའི་ལྷ་དེས་ཀྱང་སངས་རྒྱས་པའི་ཚེ་ན་ཉེ་གནས་ཀྱི་མཆོག་ཏུ་སྨོན་ལམ་བཏབ། །དེ་ནས་བྱང་ཆུབ་སེམས་དཔར་ནོར་བུ་རིན་པོ་ཆེ་ཐོབ་སྟེ་སྟེང་གི་ནམ་མཁར་འཕུར་ནས་མར་ས་ལ་བབ་དུས། སྔར་གྱི་ཚོང་རོགས་ལྔ་བརྒྱ་བོ་མགོ་ཐོན་ནས་འགྲོ་བཞིན་ཡོད་པ་དང་ཐུག སྔར་གྱི་བྲམ་ཟེ་གསེར་སྲང་སུམ་སྟོང་ཕུལ་མཁན་ཚང་གི་ཁྱིམ་ལ་ཕེབས། བྱང་ཆུབ་སེམས་དཔས་ནོར་བུ་རིན་པོ་ཆེ་ཕྱག་ཏུ་བསྣམས་ནས་ཁྱིམ་དུ་ཕེབས་པས། དེ་ཚང་གི་བང་མཛོད་ཐམས་ཅད་ནོར་སྣ་མང་པོས་གང་། དེ་ཚང་གིས་ཚོང་པ་ལྔ་བརྒྱ་དང་བཅས་པ་ལ་བསྙེན་བཀུར་རྒྱ་ཆེན་པོ་བྱས། གླང་པོ་ཆེ་ལྔ་བརྒྱ་ལ་རྒྱན་གྱིས་བརྒྱན་ཏེ་བྱང་ཆུབ་སེམས་དཔའ་འཁོར་དང་བཅས་པ་ལ་ཕུལ་ནས་སྐྱེལ་མ་བྱས། སྐབས་དེར་སྦྱིན་པ་ཆེན་པོའི་ཕ་མ་གཉིས་ཀ་བུ་དང་བྲལ་བས་སྡུག་བསྔལ་གྱིས་རྟག་ཏུ་ངུས་པས་གཉིས་ཀའི་མིག་ལོང་། བུ་ཕྱིར་ལ་ཐོན་ནས་ཕ་མ་གཉིས་ཀ་ལ་ཕྱག་འཚལ་ཞིང་དེའི་ལག་པ་ནས་བཟུང་སྟེ་ཁ་བརྡ་བྱས་པས་བུ་ཡིན་པ་ངོ་ཤེས་ཏེ་ཁྱོད་ཀྱིས་ཕ་མ་གཉིས་ཀ་ཤུལ་ནས་བསྐྱུར་ཏེ་བུད་སོང་བས་ངུས་ངུས་ཀྱིས་མིག་ལོང་སོང་། ཁྱོད་རྒྱ་མཚོ་ནང་དུ་སོང་ནས་ཅི་ཞིག་རྙེད་དྲིས་ཚེ། ནོར་བུ་རིན་པོ་ཆེ་ཕ་མ་གཉིས་ཀའི་ལག་ཏུ་བཞག་ནས་བདག་གིས་འདི་རྙེད་དོ་ཞེས་སྨྲས་པ་དང་། ཕ་མས་ལག་ཏུ་བླངས་ནས། འདི་འདྲའི་རྡོ་འུ་ཚང་གི་མཛོད་ཀྱི་ནང་ན་ཅི་འདྲའི་མང་པོ་ཡོད་ཁྱོད་དེའི་དོན་དུ་སྲོག་ལ་བསྡོ་ཅི་དགོས་ཞེས་སྨྲས། བྱང་ཆུབ་སེམས་དཔས་ཕ་མའི་ལག་ནས་ནོར་བུ་ཕྱིར་བླངས་ཏེ་ཕ་མའི་མིག་སྔར་བཞིན་དུ་འགྱུར་བར་ཤོག་ཅིག་ཅེས་སྨོན་ལམ་བཏབ་པས་ཕ་མ་གཉིས་ཀའི་མིག་སྔར་ལས་ཀྱང་གསལ་བ་ཞིག་ཏུ་གྱུར། ཕ་མ་གཉིས་ཀ་དགའ་ནས་ནོར་བུ་རིན་པོ་ཆེ་ཡང་དག་པ་རེད་འདུག་ཅེས་བྱ་བ་ལ་ཡི་རང་བྱས། སྦྱིན་པ་ཆེན་པོས་ནོར་བུ་རིན་པོ་ཆེ་བཟུང་སྟེ་ཕ་མའི་འོག་ན་རིན་པོ་ཆེའི་གདན། སྟེང་དུ་རིན་པོ་ཆེའི་བླ་བྲེ་འོང་བའི་སྨོན་ལམ་བཏབ་པས་ཇི་བཏབ་པོ་འགྲུབ། དེ་ལྟར་དུ་སྨོན་ལམ་བཏབ་སྟེ་བང་མཛོད་སྟོངས་པ་ཐམས་ཅད་གང་བར་བྱས། དེ་ནས་འཛམ་བུ་གླིང་གི་མི་ཐམས་ཅད་ལ་དྲིལ་གྱིས་བསྒྲགས་ཏེ། ཞག་བདུན་གྱི་མཚམས་ནས་ཡོ་བྱད་ཐམས་ཅད་ཆར་བཞིན་དུ་འབེབས་པ་ཡིན། ཐམས་ཅད་ཀྱིས་རང་རང་སོ་སོའི་ཅི་འདོད་ཀྱི་ཡོ་བྱད་རྣམས་ལོངས་ཞེས་བསྒྲགས། དེ་ནས་དུས་ཚོད་ཀྱི་སྟེང་དུ་ཉེ་དུས་སྦྱིན་པ་ཆེན་པོས་ཁྲུས་བྱས་གོས་གསར་བ་གྱོན་ནས། ཐང་ཡངས་ས་ཞིག་ཏུ་རྒྱལ་མཚན་ཞིག་བཙུགས་ཏེ་དེའི་རྩེ་མོར་ཡིད་བཞིན་གྱི་ནོར་བུ་བཏགས། སྤོས་ཕོར་ལག་ཏུ་བཟུང་ནས་སྨོན་ལམ་བཏབ་པ། འཛམ་བུ་གླིང་གི་མི་ཐམས་ཅད་པོ་དབུལ་ཕོངས་ཤ་སྟག་སྟེ། དེ་དག་ལ་ཕན་ཞིག་འདོགས་པའི་ཆེད་དུ་ཡིད་བཞིན་གྱི་ནོར་བུ་འདི་མི་རྫུན་པ་ཞིག་ཡིན་ན། མི་ལ་སོགས་པའི་སྲོག་ཆགས་ཐམས་ཅད་ལ་ཅི་དགོས་པའི་ཡོ་བྱད་ཐམས་ཅད་ཆར་བཞིན་དུ་འབབ་པར་ཤོག་ཅིག་ཅེས་སྨོན་ལམ་བཏབ་པས། དང་པོ་ཕྱོགས་བཞི་ནས་རླུང་ལངས་ཏེ་མི་གཙང་བའི་ཉལ་ཉིལ་ཐམས་ཅད་ཕྱགས། དེ་ནས་ཆར་ཟིམ་ཟིམ་ཞིག་བབ་སྟེ་རྡུལ་མི་ལྡང་བར་བྱས། དེ་ནས་ཐོག་མར་བཟའ་བཏུང་རོ་བརྒྱ་དང་ལྡན་པ་སྣ་ཚོགས། དེ་ནས་འབྲུའི་རིགས། དེ་ནས་གོས་ཀྱི་རིགས། དེ་ནས་རིན་པོ་ཆེ་སྣ་ཚོགས་ཆར་བཞིན་དུ་བབ་སྟེ་འཛམ་བུ་གླིང་གི་ས་ཆ་ཐམས་ཅད་རྒྱུ་ནོར་གྱིས་གང་སྟེ་མི་ཐམས་ཅད་རྒྱུ་ནོར་གྱིས་ཚིམས་པར་གྱུར། །དེ་ནས་བྱང་ཆུབ་སེམས་དཔས་འཛམ་བུ་གླིང་གི་མི་ཐམས་ཅད་ལ་འདི་ལྟར་གསུངས། ཁྱེད་རྣམས་ཀྱིས་ཟས་ནོར་གྱི་དོན་དུ་སྲོག་གཅོད་པ་ལ་སོགས་པ་མི་དགེ་བའི་ལས་ངན་མང་པོ་ཞིག་བསགས་ཏེ་དེའི་རྣམ་སྨིན་ངན་སོང་དུ་འགྲོ་བ་ལ། བདག་ནི་དེ་ལ་སྙིང་རྗེ་ནས་འཇིགས་སྐྲག་དང་སྡུག་བསྔལ་མང་པོ་ཞིག་ཁྱད་དུ་བསད་དེ་རྒྱ་མཚོའི་ནང་ནས་ནོར་བུ་རིན་པོ་ཆེ་བླངས་བ་ཡིན། ད་ནི་ཁྱེད་རྣམས་ལ་ལོངས་སྤྱོད་ཀྱིས་ཕོངས་པ་མེད་པས། ཁྱེད་རྣམས་ཀྱིས་སྒོ་གསུམ་མི་དགེ་བ་ཐམས་ཅད་བསྡམས་ཏེ་དགེ་བ་བཅུའི་ལས་ཀྱི་ལམ་ལ་བརྩོན་འགྲུས་གྱིས་ཤིག་གསུངས་ཏེ་ཐབས་སྣ་ཚོགས་ཀྱི་སྒོ་ནས་ཆོས་བསྟན། དེ་ཐམས་ཅད་དགེ་བའི་ལས་ལ་བརྩོན་པ་བསྐྱེད་དུ་བཅུག་སྟེ་འཛམ་གླིང་གི་མི་ཐམས་ཅད་སྐབས་དེར་ཤི་འཕོས་ནས་མཐོ་རིེས་ཀྱི་ལྷ་ཡུལ་དུ་སྐྱེས་སོང་བ་ཤ་སྟག་ཡིན་ཞེས་བཅོམ་ལྡན་འདས་ཀྱིས་གཏམ་རྒྱུད་དེར་གསུངས། དེའི་སྐབས་ཀྱི་སྦྱིན་པ་ཆེན་པོའི་ཕ་མ་གཉིས་ཀ་ད་ལྟའི་ཡབ་ཟས་གཙང་དང་ཡུམ་སྒྱུ་མ་ལྷ་མཛེས་གཉིས་ཀ་ཡིན་ལ། སྦྱིན་པ་ཆེན་པོ་ནི་སྟོན་པ་ཁོང་ཡིན། རྒྱ་མཚོའི་ནང་གི་ལྷ་དེ་མ་འགགས་པ་དང་། དངུལ་གྱི་མཁར་དུ་ཡོད་པའི་ཀླུ་དེ་ཤཱ་རིའི་བུ་དང་། བཻཌཱུརྱའི་མཁར་ནང་དུ་ཡོད་པའི་ཀླུ་དེ་མོའུ་འགལ་གྱི་བུ་དང་། གསེར་གྱི་མཁར་ནང་དུ་ཡོད་པའི་ཀླུ་དེ་ཀུན་དགའ་བོ་རེད། ཀུན་དགའ་བོ་དུས་དེ་ནས་ད་ལྟའི་བར་དུ་དུས་ཤེས་ཤིང་དུས་ལ་མཁས་པ་ཡིན། ད་ཐེངས་འདོད་པ་གསུམ་པོ་ཡང་བསམ་པ་ལྟར་དུ་གནང་བ་སྦྱིན་པ་ཡིན་གསུངས་ཏེ་བཅོམ་ལྡན་འདས་ཀྱིས་བཀའ་བསྩལ་ཏོ། །ཀུན་དགའ་བོ་དགའ་མགུ་ཡི་རང་ནས་ཇི་སྲིད་འཚོའི་བར་དུ་བཅོམ་ལྡན་འདས་ལ་བསྙེན་བཀུར་བྱེད་པར་ཁས་བླངས། གཏམ་རྒྱུད་འདིའི་ཅི་ཞིག་མཚོན་ན་བྱང་ཆུབ་སེམས་དཔའ་རྣམས་ཀྱིས་སློབ་པ་ལམ་གྱི་གནས་སྐབས་སུ་སྦྱིན་པ་བཏང་ཚུལ་དང་། ཞོར་དུ་སྙིང་སྟོབས་དང་བརྩོན་འགྲུས་བྱམས་པ་བསྒོམས་པའི་ཕན་ཡོན་སོགས་ཀྱང་བསྟན་ཏོ། དེ་ནས་ཡང་ཐུན་མོང་གི་དགེ་རྩ་སྤྱི་ལ་རྗེས་སུ་ཡི་རང་པ་ནི། སྲོག་གཅོད་སྤོང་བའི་སྟེང་དུ་གཞན་གྱི་སྲོག་བསྐྱབ་པ་སྦྱིན་པ་རྣམ་གསུམ་གྱིས་བསྡུས་པའི་སྦྱིན་པ་གཏོང་བ་དེ་དང་། སྡོམ་པ་སྲུང་བ་ལ་སོ་ཐར་རིགས་བདུན་དབྱེ་བ་ཡོད་པས་དེ་ནི་མཁན་སློབ་ཀྱི་མདུན་དུ་ཁས་བླངས་ཚར་བའི་རང་ལམ་ཀྱི་སྲུང་བྱ་ཐམས་ཅད་སྲུང་དགོས་པའོ། །བསྲུངས་ན་ཕན་ཡོན་ཆེ་ཞིང་། དག་པའི་ཞིང་ཁམས་ཤིག་ནས་བསྐལ་བ་བརྒྱ་སྟོང་ཕྲག་མང་པོའི་ཚེ་ལ་ཚངས་སྤྱོད་ཀྱི་སྡོམ་པ་བསྲུངས་བ་ལས་འདིར་སྔ་དྲོ་ཞིག་ལ་སེམས་མི་ཞུམ་པར་སེམས་ཅན་ཐམས་ཅད་ཀྱི་དོན་དུ་རང་ཉིད་ཀྱིས་སྡོམ་པ་བསྲུངས་བ་སྟེ། སེམས་ཅན་ལ་འཚེ་བ་མི་བྱེད་པའི་སྡོམ་པ་སྣ་གཅིག་སྲུང་བ་ཕན་ཡོན་ཆེ་གསུངས། ཡང་དུས་བཟང་བསྐལ་བཟང་གི་སྐབས་སུ་བསྐལ་བ་བྱེ་བ་ཁྲག་ཁྲིག་ཏུ་སངས་རྒྱས་བྱེ་བ་ཁྲག་ཁྲིག་མཆོད་པ་བས་ཀྱང་དུས་སྙིགས་མའི་བསྟན་པ་ནུབ་པའི་སྐབས་ལ་ཉིན་ཞག་གཅིག་ཏུ་སྲོག་གཅོད་སྤོང་བ་ལྟ་བུའི་བསླབ་པ་སྣ་གཅིག་སྲུང་ན་ཕན་ཡོན་ཆེ་བ་མདོ་ལས་གསུངས་བས། རང་རྒྱུད་ནས་བསླབ་པ་སྣ་རེ་ཡིན་ཀྱང་སྲུང་། གཞན་གྱི་དགེ་བ་སྣ་རེ་བྱས་པ་མཐོང་ཐོས་བྱུང་ཚེ་རྗེས་སུ་ཡི་རང་བྱེད་དགོས་ཏེ། །ཚོམས་ལས། ངག་རྣམས་བསྲུངས་ཤིང་ཡིད་ནི་ལེགས་བསྡམས་ཏེ། །ལུས་ཀྱི་མི་དགེ་བ་དག་ཆེད་མི་བྱ། །ལས་ལམ་གསུམ་པོ་འདི་དག་རྣམ་སྦྱངས་ན། །དྲང་སྲོང་གསུང་བའི་ལམ་ནི་ཐོབ་པར་འགྱུར། །ཞེས་དང་། ཚུལ་ཁྲིམས་ཡང་དག་པར་བསྡམ་པའི་མདོ་ལས། ཇི་ལྟར་མིག་མེད་གཟུགས་མཐོང་མི་འགྱུར་ལྟར། །དེ་བཞིན་ཚུལ་ཁྲིམས་མེད་ན་ཆོས་མི་མཐོང་། །ཇི་ལྟར་རྐང་མེད་ལམ་འཇུག་ག་ལ་ནུས། །དེ་བཞིན་ཚུལ་ཁྲིམས་མེད་ན་ཐར་མི་འགྱུར། །ཞེས་གསུངས་ཏེ། །བདེ་བ་ཅན་དུ་སྐྱེ་བ་ལ་སྨོན་ལམ་རྣམ་པར་དག་པས་མཚམས་མ་སྦྱར་ན་རྒྱུ་གཞན་དག་ཡོད་ཀྱང་སྐྱེ་མི་ཐུབ། སྨོན་ལམ་འགྲུབ་མི་འགྲུབ་ཚུལ་ཁྲིམས་རྣམ་པར་དག་མིན་ལ་རག་ལས་པས། ཕྱི་མ་བདེ་བ་ཅན་ལ་སྐྱེ་འདོད་སྙིང་ནས་ཡོད་ན། རང་རང་གི་སྡོམ་པ་གང་ཁས་བླངས་ཡོད་ན་དེའི་བསྲུང་བྱ་རྣམ་པར་དག་པ་བསྲུང་། གཞན་གྱི་སྲུང་བ་ལ་ཡི་རང་བྱེད། བདེན་པར་སྨྲ་བ་ལས་རྫུན་བཤད་མི་རུང་གཏམ་གང་བཤད་ན་བདེན་པར་སྨྲ་དགོས། རྫུན་གྱི་ཉེས་དམིགས་གོང་དུ་བཤད་པ་ལྟར་རེད། རྫུན་མི་བཤད་པར་བདེན་པར་སྨྲ་བ་ལ་རྗེས་སུ་ཡི་རང་བྱ་རང་གིས་ཀྱང་དེ་ལྟར་བསླབ། སྡེ་བ་དགོན་པ་གང་ཟག་ནང་ཕན་ཚུན་ལ་མི་མཐུན་པའི་འཁོན་གཞི་ཡོད་པ་དེ་ཞི་ཐབས་ལ་རང་གིས་འབད། གཞན་གྱིས་འཁོན་པ་སྡུམ་ན་དེ་ལ་རྗེས་སུ་ཡི་རང་བྱ་དགོས། རྗེས་སུ་ཡི་རང་བྱས་ན་དེ་ལ་དགེ་བ་འདྲ་འདྲ་ཐོབ་པ་གང་ཡིན་ཡང་གཅིག་མཚུངས་རེད། འཁོན་པ་བསྡུམ་ན་ཡང་རང་འདོད་ཀྱི་བསམ་པ་ཆེ་འདོད་གྲགས་འདོད་ཟ་འདོད་མེད་པའི་སྟེང་དུ་དྲང་པོར་བྱ་དགོས། ཁྱད་པར་དུ་རྒྱུ་མེད་ཉམ་ཆུང་གི་སྟེང་དུ་གྱོད་གཡོན་བྱས་ན་ད་ལྟའི་ཉི་མ་འགའ་ཞིག་ལ་དེ་ཕམ་སོང་ཡང་། ཕྱི་མའི་ཡུལ་དུ་བསླེབ་མི་དགོས་པར་ཉི་མ་འགའ་ཞིག་གིས་དེའི་ལེ་ལན་དང་རྒྱུ་འབྲས་འཁོར་ཡོང་བ་རེད། སྤྱིར་བླ་སེར་གྱོད་འཁོན་ཁ་མཆུའི་ནང་དུ་འདྲེས་མི་རུང། ཡས་ཚང་གི་གཉེན་སྒྲིག་ས་ན་བླ་སེར། མས་ཚང་གི་གྱོད་བཤད་ས་ན་བླ་སེར། བླ་སེར་འཇིག་རྟེན་གྱི་བྱ་བའི་ནང་ཐེ་མེད་ས་ཞིག་མེད་དུས། འཇིག་རྟེན་ཇི་འདྲ་ཞིག་འགྲུབ་ཀྱིན་ཡོད་ན་དེའི་ཚོད་ཀྱིས་དོན་གྱི་བསྟན་པ་དམ་པའི་ཆོས་ཕྱོགས་ནས་དེ་ཙམ་ཞིག་ཤོར་གྱིན་ཡོད་པའི་རྟགས་རེད། འོན་ཀྱང་དམེ་འཁྲུགས་འཁོན་ཁ་ཆོས་དམ་གྱིས་གནན་རྒྱུ་དེ་ཚོ་བཀའ་དྲིན་ཆེ། ཆགས་སྡང་གི་གནོད་འཚེ་མེད་ན་སེམས་རྒྱུད་འཇམ་པོ་ཡིན། ཞི་དུལ་གྱི་སྤྱོད་ལམ་རང་ཤུགས་ཀྱིས་ཡོད་པ་རེད། ཞི་ཞིང་དུལ་བའི་སྒོ་ནས་གཏམ་དྲང་པོར་བཤད། དྲང་པོར་བཤད་ན་དགྲ་ཡང་མགུ་ཟེར་བས། བདེན་པའི་ཚིག་ནི་བདུད་རྩི་སྟེ། །བདེན་པའི་ཚིག་ནི་བླ་ན་མེད། །ཅེས་གསུངས་པ་ལྟར། གཏམ་བཤད་ན་དོན་མེད་སྨྱོན་བའི་འཆལ་གཏམ། སྨྱོན་པ་རེད་ཟེར་ན་སྨྱོ་ཡག་རེད་མེད་པ་འདྲ་བ། གཟའ་བོ་རེད་ཟེར་ན་དེ་ཡང་ཅུང་མིན་པ་འདྲ་བ། གཏམ་མགོ་མེད་རྔ་མེད་ཅི་དྲན་གང་དྲན། ཚིག་ལ་མཚོན་ཆ་མེད་ཀྱང་མི་སེམས་ཚལ་བར་གཏོང་བྱེད་དང་གནོད་པ་ཅན་གྱི་ཚིག་བརྟགས་དཔྱད་སྔོན་དུ་མ་སོང་བ་དེ་འདྲ་མི་བཤད་པར། དོན་ཡོད་པ་གཞན་ལ་ཕན་པའི་སྐད་ཆ། སྡིག་ཅན་ཐར་བ་ཐོབ་བྱེད་ཀྱི་སྐད་ཆ། ལྟ་ལོག་ཆོས་དང་འཕྲད་བྱེད། སྡུག་བསྔལ་ཅན་གྱི་སྡུག་སེམས་ནད་ཞི་བྱེད། ཡིད་ཆད་ཉམ་ཐག་གི་སེམས་ཀྱི་རེ་བ་སྐོང་བྱེད། མ་ཤེས་པ་ལ་བསླབ་སྟོན་དང་། མ་རིག་པ་ལ་མཛུབ་སྟོན་བྱེད་ནུས་ན་དེ་ཡག་པ་རེད། རང་གིས་ཆེན་པོ་ཞིག་བྱེད་མ་ཐུབ་ཀྱང་། མི་བློ་ཆེན་ཤེས་རྒྱ་ཅན་གྱིས་མི་གཞན་ལ་ཕན་སེམས་ཀྱི་གཏམ་བཤད་ཀྱིན་ཡོད་པ་ལ་ཡི་རང་བྱེད། དེའི་སྟེང་ནས་འདོད་པ་ཆུང་བར་བྱེད་པ་ཆོག་ཤེས་ཀྱི་གཞི་མ་རེད། འདོད་ཆུང་ཆོག་ཤེས་འཕགས་པའི་ནོར་བདུན་གྱི་ནང་ནས་རེད། འདོད་ཆུང་ཅན་དེ་འཕགས་པའི་རིགས་ཡིན་ཞིང་འདོད་པ་ཟད་ན་འཕགས་པ་དངོས་ཡིན། འདོད་ཆེན་གྱི་སྡུག་བསྔལ་དེ། བྱེ་ཚན་གྱི་ནང་དུ་ཉ་འཕང་པ་ལྟ་བུ་ཞིག་ཡིན། ཆོག་ཤེས་ཀྱི་བདེ་བ་དེ། ལྷའི་ཕོ་བྲང་གི་ནང་དུ་ཙནྡན་གྱི་ཆུ་བསིལ་གཏོར་གྱིན་ཡོད་པ་ལྟ་བུའི་ཁྱད་པར་ཡོད། འདོད་ཆེན་གྱིས་འཇིག་རྟེན་གྱི་ནོར་ལ་སྤྱད་པའི་བདེ་བ་དེས་འདོད་ཆུང་ཆོག་ཤེས་ཀྱིས་འཕགས་ནོར་ལ་སྤྱད་པའི་བདེ་བ་དོ་ཟླ་མེད། འོན་ཀྱང་བདེ་བ་དེ་ཅི་འདྲ་ཞིག་ཡིན་པ་འདོད་ཆུང་ཅན་ཁོ་རང་གིས་མ་གཏོགས་ཤེས་པ་མ་རེད། ཁྱད་པར་དུ་རབ་ཏུ་བྱུང་བས་བཀའ་གདམས་པའི་དགེ་བའི་བཤེས་གཉེན་རྣམས་ཀྱིས་གསུངས་བའི་གཏད་པ་བཞི་ལ་ཕུགས་བཅོལ་རྒྱུ་དེ་གནད་ཆེན་པོ་ཡིན། བྱ་བཏང་རི་ཁྲོད་པ་ཞིག་ལ་གཏད་པ་བཞི་ཡོད་དགོས་གསུངས་པ་དེ་གང་ཡིན་ཞེ་ན། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུག་གྲོག་སྟོངས་ལ་གཏད་ཅེས་གསུངས་པ་རེད། །ཡང་བྱ་བཏང་གི་རི་ཁྲོད་པ་ཞིག་ལ་ཅི་ཞིག་དགོས་ཤེ་ན་བུད་བསྙེག་ཐོབ་གསུམ་དགོས། གང་ནས་བུད་ན་མི་གྲལ་ནས་བུད། གང་ལ་སྙེག་ན་ཁྱི་གྲལ་དུ་སྙེག གང་ཐོབ་ན་ལྷ་གྲལ་ཐོབ་པ་སྟེ་འདི་ལ་བུད་བསྙེག་ཐོབ་གསུམ་ཟེར། ཁྱི་གྲལ་ཞེས་པ་ནི་དམན་ས་འཛིན་པ་ཞིག་ལ་ཟེར། ཡང་བཀའ་གདམས་པའི་དགེ་བཤེས་རྣམ་པས་བྱ་བཏང་གི་རི་ཁྲོད་པ་ཞིག་ལ་རྡོ་རྗེ་གསུམ་དགོས་གསུངས་ཡོད། རྡོ་རྗེ་གསུམ་པོ་གང་ཡིན་ཞེ་ན། ཐེབ་མེད་རྡོ་རྗེ་སྔོན་ལ་བཏང་། ཁྲེལ་མེད་རྡོ་རྗེ་རྗེས་སུ་འཇོག ཡེ་ཤེས་རྡོ་རྗེ་རང་དང་འགྲོག་ཅེས་གསུངས་ཡོད། ཐེབ་མེད་རྡོ་རྗེ་ཞེས་པ་ཚེ་བློས་བཏང་དེ་དབེན་པའི་རི་ལ་སྒྲུབ་པ་བྱེད་དུས་ཕ་མ་གཉེན་བཤེས་སོགས་ཀྱིས་མ་འགྲོ་ཞེས་གཤོལ་བཏབ་ཀྱང་གཤོལ་མི་ཐེབ་པ་ལ་ཐེབ་མེད་རྡོ་རྗེ་ཞེས་བྱ། ཚེ་འདིའི་ཕ་མ་གཉེན་བཤེས་ཀྱང་མ་བསྐྱངས་ཏེ་ཁྲེལ་མེད་རེད་རི་ལ་འགོས་ཐལ་ཨེ་ཟེར་བསམ་ནས་དེ་འདྲ་འཛེམས་མི་འདུག་པ་ལ་ཁྲེལ་མེད་རྡོ་རྗེ་ཟེར། ཡེ་ཤེས་རྡོ་རྗེ་ཞེས་པ་ཆོས་མ་གཏོགས་བྱ་བ་གཞན་པ་བསམ་པ་དང་དྲན་པ་གཉིས་ཀ་མེད་པ། གཟུང་འཛིན་ཐམས་ཅད་སྤངས་པའི་འཛིན་མེད་བྱེད་བསམ་པ་ལས་གཞན་བྱ་ལོང་མེད་པར་ལྷ་ཡིན་ཡང་འཆི་བ་རེད་བསམ་ནས་དེ་ཡིད་ལ་བཞག་སྟེ་ཆོས་མ་གཏོགས་བསམ་རྒྱུ་མེད་པ་དེ་ལ་ཡེ་ཤེས་རྡོ་རྗེ་ཞེས་བྱ། དེ་ལྟ་བུ་རྡོ་རྗེ་གསུམ་དང་གཏད་པ་བཞི་བུད་སྙེག་ཐོབ་གསུམ་སྟེ་བཅུ་པོ་ལ་བཀའ་གདམས་པའི་དགེ་བའི་བཤེས་གཉེན་རྣམ་པས་ཕུགས་ནོར་བཅུ་ཞེས་གསུངས་ཡོད། གཞན་སེམས་ཅན་ལ་བརྩེ་བ་མེད་ཅིང་གཞན་དོན་མི་བྱེད་པ་ནི་ཐེག་པ་དམན་པའི་རིགས་ཡིན། ཐེག་པ་ཆེན་པོའི་ཆོས་ལམ་ལ་ཞུགས་པ་ཞིག་གིས་བྱམས་སྙིང་རྗེ་བྱང་ཆུབ་ཀྱི་སེམས་དང་སྐད་ཅིག་ཙམ་ཡང་འབྲལ་མི་རུང། བྱམས་སྙིང་རྗེ་གཉིས་ལས་བྱམས་པ་ལ་དབྱེ་ན། སེམས་ཅན་ལ་དམིགས་པའི་བྱམས་པ། ཆོས་ལ་དམིགས་པའི་བྱམས་པ། དམིགས་པ་མེད་པའི་བྱམས་པ་སྟེ་གསུམ། སེམས་ཅན་ལ་དམིགས་པའི་བྱམས་པ་དེ་ནི་དང་པོ་སེམས་བསྐྱེད་པའི་བྱང་ཆུབ་སེམས་དཔའི་རྒྱུད་ལ་ཡོད་པ་དང་། ཆོས་ལ་དམིགས་པའི་བྱམས་པ་དེ་སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱི་རྒྱུད་ལ་ཡོད་པ་དང་། དམིགས་པ་མེད་པའི་བྱམས་པ་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་སེམས་ཀྱི་སྤྱོད་ཡུལ་དུ་གྱུར་བ་ཞིག་ཡིན། སྐབས་འདིར་བྱམས་པ་དང་པོ་སེམས་ཅན་ལ་དམིགས་པའི་བྱམས་པ་གཙོ་བོར་བྱས་ན། དེའི་དམིགས་པའི་ཡུལ་སེམས་ཅན་ཐམས་ཅད། རྣམ་པའི་བློ་བདེ་བ་དང་འཕྲད་འདོད་ཀྱི་སེམས། དེ་ཇི་ལྟར་སྒོམ་དགོས་ཤེ་ན་རྩ་བ་དྲིན་དྲན་པ་ལ་རག་ལས་པ་ཡིན་པས། སེམས་ཅན་གྱི་དྲིན་བསམ་སྟེ་སྒོམ་དགོས། བྱམས་པའི་ཤུགས་ཀྱིས་མིག་ནས་མཆི་མ་འཁྲིགས་པའམ་ལུས་ནས་བ་སྤུ་ལྡང་བ་ཞིག་ཏུ་བྱམས་པ་ཆེན་པོའོ། །དེ་ལྟ་བུ་འདི་སེམས་ཅན་ཐམས་ཅད་ལ་སྐྱེས་ན་བྱམས་པ་ཚད་མེད་དང་། །རང་བདེ་འདོད་ཀྱི་བློ་མེད་པར་གྱུར་ཏེ་སེམས་ཅན་ཐམས་ཅད་བདེ་འདོད་ཀྱི་ཀུན་སློང་ཞིག་མ་གཏོགས་མེད་དུས་བྱམས་པ་འབྱོངས་བའི་ཚད་དོ། །བྱམས་པ་འབྱོངས་ན་སྙིང་རྗེ་འབྱོངས་བ་ལ་དཀའ་ལས་ཆེན་པོ་ཡོད་པ་མ་རེད། སྙིང་རྗེ་ལ་སེམས་ཅན་ལ་དམིགས་པའི་སྙིང་རྗེ། ཆོས་ལ་དམིགས་པའི་སྙིང་རྗེ། དམིགས་པ་མེད་པའི་སྙིང་རྗེ་གསུམ་ཡོད་ན། དེ་ལས་སེམས་ཅན་ལ་དམིགས་པའི་སྙིང་རྗེ་སེམས་ཅན་རྣམས་ཀྱི་ངན་སོང་གི་སྡུག་བསྔལ་ལ་སོགས་པ་མཐོང་བས་སྙིང་རྗེ་སྐྱེས་པའོ། །གཉིས་པ་ཆོས་ལ་དམིགས་པའི་སྙིང་རྗེ་རང་འཕགས་པའི་བདེན་པ་བཞི་ལ་གོམས་ནས་རྒྱུ་འབྲས་ཀྱི་འགྲོ་ལུགས་ཤེས་དུས། རྒྱུ་འབྲས་མི་ཤེས་པ་རྣམས་ཅི་འདྲའི་འཁྲུལ་གྱིན་ཡོད་འདུག་བསམ་པའི་སྙིང་རྗེ་བའོ། །གསུམ་པ་དམིགས་པ་མེད་པའི་སྙིང་རྗེ་རང་མཉམ་པར་བཞག་སྟེ་ཆོས་ཐམས་ཅད་སྟོང་ཉིད་དུ་རྟོགས་དུས། སེམས་ཅན་དངོས་འཛིན་ཅན་ཐམས་ཅད་ལ་ཁྱད་པར་དུ་སྙིང་རྗེ་སྐྱེས་ཏེ་སྟོང་ཉིད་སྙིང་རྗེའི་སྙིང་པོ་ཅན་ལས་རྣམ་པ་གཞན་མ་ཡིན་པ་ལས་སྙིང་རྗེ་སྐྱེ་བ་ཡིན་ན། སྐབས་འདིར་སེམས་ཅན་ལ་དམིགས་པའི་སྙིང་རྗེ་སེམས་ཅན་ཐམས་ཅད་ཀྱིས་ངན་སོང་གི་སྡུག་བསྔལ་མྱོང་བ་དེ་ལ་སྙིང་རྗེ་བ་གཙོ་བོར་བྱས་པས། དམིགས་པའི་ཡུལ་སེམས་ཅན་ཐམས་ཅད། རྣམ་པ་སྡུག་བསྔལ་རྒྱུ་འབྲས་ཐམས་ཅད་དང་བྲལ་བར་འདོད་པའི་བློ། སྒོམ་ཐབས་རྩ་བའི་མ་དང་སྦྱར་ནས་བསྒོམ་ན། སྙིང་རྗེ་འབྱོངས་བའི་ཚད་ཅི་འདྲ་ཞིག་ཡིན་ཞེ་ན། རང་གཅེས་འཛིན་དོར་ནས་སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པའི་བློ་ཚིག་ཙམ་མ་ཡིན་པར་སྐྱེས་ན་སྙིང་རྗེ་འབྱོངས་བའི་ཚད་དོ། སྙིང་རྗེ་བསྒོམ་ན་ཕན་ཡོན་ཇི་ལྟར་ཡོད་ཅེ་ན། སྤྱན་རས་གཟིགས་ཀྱི་རྟོགས་བརྗོད་ལས། ཆོས་གཅིག་ཡོད་ན་སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་བཞག་པ་ལྟ་བུར་འགྱུར། གཅིག་གང་ཞེ་ན་སྙིང་རྗེ་ཆེན་པོའོ་གསུངས། སངས་རྒྱས་ཀྱི་ཐམས་ཅད་མཁྱེན་པའི་ཡེ་ཤེས་ཀྱི་རྩ་བ་སྙིང་རྗེ་ལས་བྱུང་བ་ཅན་ཞིག་ཡིན། བྱམས་པས་སེམས་ཅན་ཐམས་ཅད་བདེ་བ་ཐོབ་འདོད་དང་སྙིང་རྗེས་སྡུག་བསྔལ་དང་བྲལ་འདོད་དང་། རང་གི་ཞི་བདེ་མི་བསམ་པར་སེམས་ཅན་གཞན་དོན་ཁོ་ན་བསམ་པ་ཡིན་པས། རང་ལས་གཞན་གཅེས་པར་འཛིན་པ་སྐྱེས་བུ་མཆོག་ཡིན་ཞིང་། དེ་ལྟ་བུ་བྱམས་དང་སྙིང་རྗེ་རང་གིས་སྒོམ། གཞན་གྱི་བསྒོམས་པ་ལ་རྗེས་སུ་ཡི་རང་སྒོམ་ཞིང་བྱ་སྤྱོད་ཆོས་དང་མཐུན་པའི་སྤྱོད་པ་ལ་སོགས་པ་མདོར་ན་འཕགས་དང་སོ་སྐྱེས་ཀྱིས་བསྡུས་པའི་ཟག་བཅས་ཟག་མེད་ཀྱི་དགེ་རྩ། གོང་དུ་ལས་དང་པོ་བ་དང་བསྟུན་ཏེ་སྨོས་པའི་གཙོ་བྱས་པའི་དགེ་རྩ་ཐམས་ཅད་ལ་རྗེས་སུ་ཡི་རང་ངོ་ཞེས་གསུངས་སོ། ཚིག་རྐང་རྗེས་མ་འདི་ཐ་མས་གསལ་བྱེད་ཡིན་པས། གོང་མའི་དགེ་བ་རེ་རེ་བཞིན་དུ་རྗེས་སུ་ཡི་རང་བྱ་གསུངས་པ་རེད། འདི་ཡན་ཆད་རྗེས་སུ་ཡི་རང་གི་ཡན་ལག་སོང་ནས།

ལྔ་པ་ཆོས་འཁོར་བསྐོར་བར་བསྐུལ་བའི་ཡན་ལག

ཕྱོགས་བཅུའི་འཇིག་རྟེན་རབ་འབྱམས་ཐམས་ཅད་ན། །རྫོགས་སངས་རྒྱས་ནས་རིང་པོ་མ་ལོན་པར། །དེ་དག་རྣམས་ལ་ཆོས་ཀྱི་འཁོར་ལོ་ནི། །རྒྱ་ཆེན་མྱུར་དུ་བསྐོར་བར་བདག་གིས་བསྐུལ། །མངོན་ཤེས་ཐུགས་ཀྱིས་དེ་དོན་མཁྱེན་པར་གསོལ། །ཞེས་གསུངས་ཏེ། །ཆོས་འཁོར་བསྐོར་བར་བསྐུལ་བ་འདི་ཆོས་སྤོང་གི་ལས་ཀྱི་གཉེན་པོའོ། །སྤྱིར་ཆོས་འཁོར་ལ་བཞེད་ཚུལ་མང་དུ་ཡོད་ཀྱང་། མཐོང་སྒོམ་མི་སློབ་ལམ་ཐམས་ཅད་ཆོས་འཁོར་ལ་བཞག་ན། དེ་དེ་བཞིན་གཤེགས་པས་ཆོས་བསྟན་པ་ལ་བརྟེན་ནས་གདུལ་བྱའི་རྒྱུད་ལ་མངོན་དུ་སྣང་བར་བྱས་པས་ན་དེ་ཆོས་འཁོར་བསྐོར་བའོ། །དེ་དོན་དུ་གཉེར་ཏེ་འདུན་པ་ཤུགས་དྲག་ཏུ་བསྐྱེད་ནས་གསོལ་བ་འདེབས་པ་ཆོས་འཁོར་བསྐོར་བར་བསྐུལ་བའོ། ཕྱོགས་དང་དུས་ཞེས་བྱ་བ་ཚད་དང་རིས་ཀྱིས་བཟུང་བར་བྱ་བ་ཞིག་མ་ཡིན། དཔེར་ན་ཤར་ཕྱོགས་ཀྱི་ཤར་ཕྱོགས་དེའི་ཤར་ཕྱོགས་ཀྱི་ཤར་ཕྱོགས་ལ་སོགས་པ་དེད་དེ་སོང་ན་ཐུག་མེད་མུ་མེད་ཅིག་ཡིན་པ་རེད་མོད། དེའི་མཚོན་ཏེ་ལྷོ་ནུབ་བྱང་གསུམ་མཚམས་བརྒྱད་སྟེང་འོག་དང་བཅས་པ་མུ་མེད་མཐའ་མེད་ཅིག་ཡིན་པ་རེད། ཆེ་ས་ནས་བཤད་ན་ནམ་མཁའི་རྒྱ་ཁྱོན། ཆུང་ས་ནས་བཤད་ན་རྡུལ་ཕྲན་གཅིག་གི་ནང་དུ་རྡུལ་ཇི་སྙེད་ཅིག་ཡོད་པའི་གྲངས་དང་མཉམ་པའི་འཇིག་རྟེན་ཇི་སྙེད་ཅིག་ཡོད་པ་ཐམས་ཅད་ཤོང་བའི་རབ་འབྱམས་མཐའ་ཡས་ཀྱི་ཞིང་ན། སྔར་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་དགུང་ལོ་སོ་ལྔ་བཞེས་པའི་སྐབས་སུ་རྒྱ་གར་རྡོ་རྗེ་གདན་དུ་ས་ག་ཟླ་བའི་ཚེས་བཅོ་ལྔའི་སྲོད་ལ་བདུད་བཏུལ། དགོང་ལ་མཉམ་པར་བཞག ཐོ་རངས་བླ་ན་མེད་པའི་ཡེ་ཤེས་བརྙེས། མངོན་པར་རྫོགས་པར་སངས་རྒྱས་པའི་གནས་སྐབས་ན་ཞག་བདུན་ལ་ཆོས་མ་གསུངས་པར། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབས་ཉིད་དུ་གནས་པར་བྱ། །གསུངས་བའི་སྐབས་དེར། ལྷ་ཚངས་པ་དང་རྒྱ་བྱིན་གྱིས་སྔོན་གྱི་སྨོན་ལམ་གྲུབ་སྟེ་ཆོས་ཀྱི་འཁོར་ལོ་བསྐོར་བར་བསྐུལ་བ་ལྟར། ད་ལྟའི་གནས་སྐབས་སུ་ཡང་ཕྱོགས་བཅུའི་འཇིག་རྟེན་གྱི་ཁམས་ན་རྫོགས་སངས་རྒྱས་པའི་སངས་རྒྱས་གང་དག་གིས། ཆོས་དཀོན་མཆོག་གལ་ཆེན་དུ་ཤེས་པའི་ཕྱིར་དང་གསོལ་བ་འདེབས་པ་པོའི་བསོད་ནམས་ཀྱི་ཚོགས་རྫོགས་པར་བྱ་བའི་ཕྱིར་ཆོས་མི་གསུངས་བར་བཞུགས་ཡོད་པ་དག་ལ་ཆོས་ཀྱི་འཁོར་ལོ་རྒྱ་ཆེ་ལ་རྒྱུན་མི་ཆད་པར་བསྐོར་བར་ཞུ་བ་འབུལ་བ། ཕྱོགས་རྣམས་ཀུན་ཀྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མེ་སྦར་དུ་གསོལ། །གསུངས་པ་ལྟར་གསོལ་བ་བཏབ་པས། ཕྱོགས་བཅུའི་སངས་རྒྱས་དེ་དག་གི་ཐུགས་མངོན་པར་མཁྱེན་པའི་ཡེ་ཤེས་ཀྱིས་གཟིགས་ཤིང་དགོངས་ནས་ཞལ་གྱིས་བཞེས་ཏེ་བཀའ་ཡི་གནང་བ་ཐོབ་པར་བསམ་ནུས་ན་དངོས་སུ་ཞུས་པ་དང་འདྲ་བའོ། །དེ་བཞིན་དུ་སྙིགས་དུས་སུ་སངས་རྒྱས་དངོས་བྱོན་གྱི་རྒྱལ་ཚབ་བླ་མ་དགེ་བའི་བཤེས་གཉེན་རྣམས་ལ་ཆོས་ཚིག་བཞི་རེའི་ཡན་ཆོད་གསུང་རོགས་རྩོམ་རོགས་ཞུ་བའི་སྣ་འདྲེན་བྱས་ན་སེམས་ཅན་མང་པོ་ལ་ཕན་ཐོགས་པ་དང་། དམ་པའི་ཆོས་འཇིག་རྟེན་གྱི་ཁམས་ནས་མི་ནུབ་པའི་རྐྱེན་བྱས་ཏེ་སེམས་ཅན་མང་པོ་ཞིག་ཐར་བའི་ལམ་ལ་བཀོད་ཐུབ་ཅིང་། ཆོས་འཁོར་བསྐོར་བར་བསྐུལ་ན་ཐོག་མེད་ནས་བསགས་པའི་སྡིག་སྒྲིབ་སྤྱི་དང་ཁྱད་པར་དུ་ཆོས་སྤོང་གི་ལས་སྒྲིབ་དག་སྟེ་ཆོས་མེད་མུན་པའི་བསྐལ་ངན་དུ་མི་སྐྱེ་བར་ཆོས་དང་འཕྲད་པའི་ཕན་ཡོན་དང་དགོས་པ་ལྡན།

དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ།

སངས་རྒྱས་བྱང་སེམས་བསྟན་འཛིན་དགེ་བའི་བཤེས། །མྱ་ངན་འདའ་བར་བཞེད་ཀུན་དེ་དག་ལ། །མྱ་ངན་མི་འདའ་བཞུགས་པར་གསོལ་བ་འདེབས། །ཞེས་གསུངས་ཏེ། །མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པ་འདིའི་ངོ་བོ་འདུན་པའོ། །སྤྱིར་མྱ་ངན་ལས་འདས་ཞེས་པ་ནི་ལྷག་བཅས་ཀྱི་ས་ལས་ལྷག་མེད་ཀྱི་དབྱིངས་སུ་ཞིག་པ་དེ་ལ་ཟེར་ཞིང་། ལྷག་མ་ཞེས་པ་ཉེར་ལེན་གྱི་ཕུང་པོ་ལ་བཏགས་པ་ནི་སྤྱིར་བཏང་བའི་བཤད་ཚུལ་ཞིག་རེད། སངས་རྒྱས་འཕགས་པ་ལ་ཉེར་ལེན་གྱི་ཕུང་པོ་མི་མངའ་ཡང་ཚུར་མཐོང་གི་སྣང་ངོར་སྐྱེ་འཆི་ལྟར་སྟོན་པའི་ཚུལ་དབང་བཙན་དུ་མཛད་དེ། ཞིང་འགའ་རེ་ནས་གཟུགས་སྐུའི་རྣམ་རོལ་བསྡུས་པ་ཙམ་ལ་མྱ་ངན་ལས་འདས་པ་ཞེས་བཏགས། བློ་དང་ལྡན་པའི་སྐྱེ་བོ་ཐམས་ཅད་ཀྱིས་སེམས་ཅན་ལོང་བ་མགོན་མེད་ཐང་དཀྱིལ་དུ་ལུས་པ་ལྟ་བུ། དེ་རྣམས་ཀྱི་དོན་དུ་དེ་བཞིན་གཤེགས་པ་སྲས་དང་སློབ་མར་བཅས་པ་ཐམས་ཅད་ཡུན་རིང་དུ་བཞུགས་པར་གསོལ་བ་འདེབས་པ་ནི་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་ཡིན། །མྱ་ངན་ལས་མི་འདའ་བར་གསོལ་བ་འདེབས་པ་འདི་ལོག་ལྟའི་གཉེན་པོ་ཡིན། སྤྱིར་སངས་རྒྱས་དང་ས་ཐོབ་ཀྱི་སེམས་དཔའ་ཆེན་པོ་ཐམས་ཅད་སྐྱེ་འཆི་ལ་རང་དབང་ཐོབ་པ་ཤ་སྟག་ཡིན། འོན་ཀྱང་གདུལ་བྱ་རྟག་འཛིན་ཅན་གྱིས་དུས་རྟག་ཏུ་བཞུགས་ཏེ་ཡོད་པ་ཞིག་རེད་སྙམ་ནས་གལ་ཆེན་དུ་མི་མཐོང་བར་ཆོས་ཀྱི་སྐལ་བ་ཆད་ནས་སེམས་ཅན་གྱི་འགྲོ་དོན་མི་འབྱུང་བ་ཡིན་པས་ན། སེམས་ཅན་གྱི་རྟག་འཛིན་ཟློག་པའི་ཆེད་དུ་བདེ་བར་གཤེགས་པ་རྡོ་རྗེའི་སྐུ་བརྙེས་པ་དེ་ཚོ་ཡང་སྐུ་མྱ་ངན་ལས་འདའ་བའི་དུས་ཚོད་ཡོད་ན། རང་རེའི་ལུས་ཆུ་བུར་ལྟ་བུ་འདི་ལ་རྟག་བརྟན་ཅི་ཡོད་བསམ་སྟེ་མི་རྟག་པའི་འདུ་ཤེས་སྐྱེ་བའི་ཆེད་དུ། མྱ་ངན་ལས་འདའ་བར་བཞེད་པ་དེ་དག་ལ་མྱ་ངན་ལས་མི་འདའ་བར་ཡུན་རིང་འཇིག་རྟེན་གྱི་ཁམས་སུ་འཚོ་ཞིང་བཞུགས་པར་ཞུ་བ་ཕུལ་ན། བསོད་ནམས་ཆེན་པོ་འབྱུང་བར་མ་ཟད་གསོལ་བ་བཏབ་པའི་རྟེན་འབྱུང་སླུ་མེད་ཀྱིས་དེ་བཞིན་དུ་འགྲུབ་པ་ཡང་ཡོད་དེ། བདག་ཅག་གི་སྟོན་པས་ཀྱང་མྱ་ངན་ལས་འདའ་ཁར་ཟླ་བ་གསུམ་གྱི་དུས་ཚོད་ལ་སྐུ་ཚེའི་འདུ་བྱེད་བྱིན་གྱིས་བརླབས་པ་ལྟ་བུ་དང་། །ཨ་སྐྱོང་བླ་མ་རྟོགས་ལྡན་རིན་པོ་ཆེ་ཚང་སྨན་པས་མགྱོག་པར་འདས་པ་ཐག་བཅད་ཚར་དུས་ངས་བཞུགས་ཞུས་ཕུལ་བས་ཟླ་བ་གཉིས་ལ་ཕྱིར་འཐེན་བྱས་ནས་བཞུགས་སོང་། རང་དབང་ཡོད་ན་དེ་འདྲ་ཡིན་པ་རེད། མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པ་འདི་རྟག་པར་ལྟ་བ་རྣམས་སུན་འབྱིན་པ་དང་ལེ་ལོ་ཅན་རྣམས་བརྩོན་པ་བསྐྱེད་པའི་དགོས་པ་ཡོད། །རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་ལྡོང་བར་མི་འགོད་ཅིང་། །བསྐལ་བ་གྲངས་མེད་བཞུགས་པར་གསོལ། །གསུངས་པ་ལྟར། སངས་རྒྱས་བྱང་སེམས་སྤྱི་དང་ཁྱད་པར་དུ་དུས་འདི་ལ་བསྟན་པའི་སྲོག་འཛིན་པའི་བསྟན་འཛིན་གྱི་སྐྱེས་བུ་དགེ་བའི་བཤེས་གཉེན་རྣམ་པ། སྙིགས་མའི་སེམས་ཅན་གདུལ་དཀའ་བ་དམུ་རྒོད་པ་འདི་ཚོས་ལོག་སྒྲུབ་བྱས་པ་དང་དམ་སེལ་དམ་ཉམས་ཀྱིས་ལུང་པ་གང་བས། དེ་དག་ཐམས་ཅད་ཀྱིས་དྲིན་ཆེན་ལ་དྲིན་དུ་བརྩི་མི་ཤེས་པར་བཀའ་འགལ་དམ་འགལ་མང་པོ་བུད་ཡོང་དུས་དེ་ཞིང་ཁམས་གཞན་ལ་ཐུགས་གཏད་འགྲོ་རྒྱུ་དེ་འདྲ་ཡོད་སྲིད་པ་རེད། དེ་ལྟར་ན་དེ་ཚོར་བཞུགས་ཞུས་འབུལ་བ་དང་ཞབས་བརྟན་སྒྲུབ་པ་སོགས་བྱས་ན་རང་ཉིད་ཀྱིས་ཚེ་རབས་ཐོག་མེད་ནས་ད་ལྟའི་བར་དུ་ལོག་ལྟའི་སྒོ་ནས་བསགས་པའི་སྡིག་སྒྲིབ་དག་པ་དང་། མ་འོངས་པ་ན་རང་ཉིད་ཀྱིས་ཆོས་འཁོར་སྐོར་བའི་ཚེ་ན་བར་ཆད་མི་འབྱུང་བ་ལ་སོགས་པའི་དགོས་པ་ཆེན་པོ་དང་ལྡན། །འདི་ཡན་ཆད་ཀྱིས་ཕྱག་འཚལ་བ་ལ་སོགས་པ་ཡན་ལག་དྲུག་སོང་ནས། ཡན་ལག་བདུན་པ་བསྔོ་བ་རེད། བདེ་བ་ཅན་དུ་སྐྱེ་བའི་རྒྱུ་བཞི་པ་ནི་བསྔོ་བ་སྨོན་ལམ་ཡིན་པས། བསྔོ་བའི་སྐོར་འོག་ནས་བདག་དང་བདག་ལ་འབྲེལ་ཐོག་ཀུན་ལ་སོགས་པའི་སྐབས་ནས་རྒྱས་པར་ས་བཅད་བཞི་བ་དང་བསྟུན་ཏེ་འབྱུང་བ་རེད། འོན་ཀྱང་བསྔོ་བ་ཅི་ལྟར་བྱེད་དགོས་པ་ནི་བསྔོ་བའི་ཡན་ལག་འདི་དང་ཡང་འབྲེལ་ཡོད་པ་ཞིག་ཡིན་པས།

བདུན་པ་བསྔོ་བའི་ཡན་ལག

དེ་ལ་ནང་གསེས་གཉིས་སྟེ། མཐར་ཐུག་བྱང་ཆུབ་མཆོག་ཏུ་སྨོན་ཏེ་བསྔོ་བ་དང་། གནས་སྐབས་རྒྱལ་སྲས་ཀྱི་སྤྱོད་པ་ལ་སྨོན་ཏེ་བསྔོ་བའོ།།

དང་པོ་མཐར་ཐུག་བྱང་ཆུབ་མཆོག་ཏུ་སྨོན་ཏེ་བསྔོ་བ།

འདིས་མཚོན་བདག་གི་དུས་གསུམ་དགེ་བ་རྣམས། །འགྲོ་བ་སེམས་ཅན་ཀུན་ཀྱི་དོན་དུ་བསྔོ། །ཀུན་ཀྱང་བླ་མེད་བྱང་ཆུབ་མྱུར་ཐོབ་ནས། །ཁམས་གསུམ་འཁོར་བ་དོང་ནས་སྤྲུག་གྱུར་ཅིག །ཅེས་གསུངས་ཏེ། །བསྔོ་བ་ནི་ཐེ་ཚོམ་གྱི་གཉེན་པོ་ཡིན་པ་རེད། རྐང་པ་སྔོན་མ་གཉིས་ཀས་བསྔོ་བ་དང་རྗེས་མ་གཉིས་ཀས་བསྔོ་བ་དེ་དང་འབྲེལ་བའི་སྨོན་ལམ་གྱིས་རྒྱས་བཏབ་པ་ལྟ་བུ་ཞིག་རེད། ད་ལྟ་གསོག་བཞིན་པའི་དགེ་རྩ་འདིས་མཚོན་ཏེ་འདས་མ་འོངས་ཀྱི་བསགས་དང་བསག་འགྱུར་གྱི་དགེ་རྩ་ཐམས་ཅད་དྲན་རིག་ཟག་མེད་ཀྱི་ཡེ་ཤེས་ཀྱིས་རྒྱས་བཏབ་སྟེ། དགེ་བའི་རྩ་བ་དེ་དག་ཐམས་ཅད་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་སྡུག་བསྔལ་བསལ་ཞིང་བདེ་བ་སྒྲུབ་པའི་རྒྱུ་རུ་བསྔོ་བ་ཡིན་བསམ་མོ། །དེ་ལྟར་བསམ་ནུས་ན་བསྔོ་བ་འདི་ལ་ཕན་ཡོན་ཆེན་པོ་འབྱུང་བ་རེད། ཉག་ཕྲུག་འདས་ལོག་དང་སྟག་ལེབ་བླ་མའི་འདས་ལོག་དེ་ཚོའི་ནང་དུ་བལྟས་དུས་དམྱལ་བའི་སེམས་ཅན་གྱི་ནང་ནས་སེམས་ཅན་མང་པོས་ཆ་བསྐུར་ཏེ་གསོན་མི་ཡུལ་དུ་ཡོད་པའི་ངེད་ཚོའི་བུ་དང་བུ་མོ་ཉེ་རིང་རྩ་གསུམ་ཚོར་སྐད་ཆ་འདི་ཤོད་ཅིག ཁྱེད་རྣམས་ཀྱིས་ངེད་ཅག་ལ་དམིགས་ནས་དགེ་རྩ་རྣམ་དག་རེ་གྱིས་དང་ཕན་ཐོགས་ཆེན་པོ་འདུག་ཅེས་ཆ་མང་པོ་བསྐུར་ཚུལ་ཡོད་པ་རེད། འདས་ལོག་གླིང་བཟའ་ཆོས་སྐྱིད་མཚོ་བར་དོར་བྱོན་མྱོང་བ་རེད། བར་དོའི་གྲོང་ཁྱེར་ཆེན་པོ་ཞིག་གི་ནང་དུ་བྱོན་པས། མི་ལ་ལར་དང་པོ་ཟས་སྐོམ་མེད་པས་སྡུག་བསྔལ་བཞིན་ཡོད་སྐབས་གློ་བུར་དུ་ཟས་གོས་མང་པོ་ཞིག་ཐོན་བཞག་པ་དེ་ལྟར་བྱུང་བས། འདི་གང་ནས་ཐོན་ཡོང་བ་དང་ཅི་འདྲ་རེད་ཅེས་དེར་སྐྱེས་པའི་ཁོ་རང་ཚང་གི་ལུག་རྫི་དེ་ལ་དྲིས་པས། འདི་ཁོ་རང་ཚོའི་བུ་དང་བུ་མོ་ཤུལ་ན་ཡོད་པ་རྣམས་ཀྱིས་ཁོ་ཚོའི་དོན་དུ་ཚོགས་ཞིང་ས་ཁྱད་པར་ཅན་ལ་བསོད་ནམས་བསགས་ཏེ་དགེ་རྩ་བསྒྲུབས་ནས་འདི་རྣམས་ལ་བསྔོ་བ་བྱས་པའི་འབྲས་བུ་སྨིན་པ་རེད་ཅེས་སྨྲས། སེམས་རྣམ་དག་གིས་བསྔོས་པ་བསྔོ་ཡུལ་དེ་ལ་ཐོབ་རྒྱུ་ཡོད་པ་རེད། ཤི་བོ་མིན་ཀྱང་གསོན་ཡིན་ནའང་ཐོབ་རྒྱུ་ཡོད། གནའ་སྔོན་མ་ཞིག་ལ་རྔོན་པ་ཞིག་ཡོད། ཉིན་ཞིག་དེ་རྫ་དོང་འདོམ་པ་བརྒྱ་ཚོ་མང་པོ་ཡོད་པའི་དོང་ནང་ཞིག་ཏུ་ལྷུང་ནས་ཡུན་རིང་པོ་ཞིག་ལ་ཕྱིར་ཡོང་རྒྱུ་མེད་པ་རེད། ཁྱིམ་ཚང་དེས་ཤི་སོང་བ་རེད་སྙམ་ནས་དགེ་རྩ་རྒྱ་ཆེན་བསྒྲུབས་ཏེ་བསྔོ་སྨོན་གྱིས་མཚམས་སྦྱར་བཟང་པོ་བྱས་པས། མི་དེའི་སྣ་སྒོར་མཚམས་མཚམས་སུ་གསུར་དྲི་རེ་ཚོར་ཞིང་། གསུར་དྲི་ཚོར་བཞིན་པའི་སྐབས་སུ་ལྟོགས་སྐོམ་གྱི་སྡུག་མ་མྱོང་བ་རེད། བར་སྐབས་ཤིག་ལ་དཔྱིད་ཀ་སླེབ་སོང་། དེ་འབྲུག་དོང་ཡིན་པས་དཔྱིད་ཀར་འབྲུག་ནམ་མཁར་འགྲོ་དུས་ཁོ་རང་འབྲུག་ཅིག་གི་རྔ་མར་འཐམས་ཏེ་འབྲུག་གིས་དོང་ཁར་འཕང་བཞག་པ་རེད། ཁོ་རང་གསོན་པོར་ཁྱིམ་ལ་ཐོན་པ་དེ་ནི། ཁྱིམ་ཚང་གིས་ཤི་ཚར་སྙམ་ནས་དེའི་དོན་དུ་གསུར་བསྔོ་བྱས་པའི་རྐྱེན་གྱིས་ཡིན་པ་རེད། གསོན་པོ་ཡིན་ཡང་ཐོབ་རྒྱུ་ཡོད་པ་དེ་འདྲ་ཡིན། དགེ་བས་ར་མདའ་བྱེད་པ་དེ་ལྟར་ཕན་ཡོན་ཆེ་བས། ང་ཚོས་ཤི་བོ་གསར་རྙིང་ཚང་མའི་བསྔོ་སྨོན་མང་པོ་རེ་བླ་མ་སྐྱེས་ཆེན་དང་དགེ་འདུན་འདུས་པ་བྱ་བཏང་གི་རྣལ་འབྱོར་རི་ཁྲོད་ཀྱི་སྒོམ་ཆེན་ཚོ་ལ་འཇོག་དགོས་པ་རེད། དམྱལ་བར་ཡོད་ན་ལས་སྒྲིབ་དག་ནས་མཐོ་རིས་སུ་སྐྱེ་ཐུབ་པ་ལ་ཕན་ཐོགས་ཡོད་པ་དང་། མཐོ་རིས་སུ་ཡོད་ན་དག་ཞིང་དུ་སྐྱེ་བ། དག་ཞིང་དུ་ཡོད་ན་མྱུར་དུ་སངས་རྒྱས་པ་ལ་སོགས་པའི་ཕན་ཡོན་དེ་འདྲ་ཡོད་པ་རེད། མདོར་ན་རང་གཞན་སུའི་དོན་དུ་ཡིན་ཡང་ཞིང་དག་པ་བླ་མ་དགེ་འདུན་ཉམ་ཐག་དབུལ་ཕོངས་སོགས་ལ་དངོས་པོ་དག་པ་སྡིག་དང་མ་འདྲེས་པ་རེ་མཆོད་སྦྱིན་བྱས་ཤིང། བསྔོ་བ་དག་པ་རང་གཞན་སེམས་ཅན་ཐམས་ཅད་གནས་སྐབས་བདེ་ཞིང་མཐར་ཐུག་སངས་རྒྱས་པའི་ཆེད་དུ་བསྔོས་ན་གནས་སྐབས་དང་མཐར་ཐུག་གི་དོན་ཐམས་ཅད་ཡིད་བཞིན་དུ་འགྲུབ་སྟེ། བསྟན་དང་འགྲོ་ལ་ཕན་ཐོགས་རྒྱ་ཆེན་པོ་འགྲུབ་པ་ཡིན། སེམས་ཅན་དེ་དག་ཀུན་ཀྱང་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་མྱུར་བ་མྱུར་དུ་ཐོབ་པར་གསུངས། བསྔོ་བ་ལ་གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་འཁོར་གསུམ་གྱི་བདག་ཉིད་ཅན་ཞིག་ཡིན་པས། གང་བསྔོ་བྱ་བདེ་བ་ཅན་ལ་སྐྱེ་བའི་རྒྱུ་བསྒྲུབ་པ་འདིས་མཚོན་པའི་དུས་གསུམ་བསགས་པའི་དགེ་རྩ། གང་ལ་བསྔོ་བ་འགྲོ་བ་སེམས་ཅན་ཐམས་ཅད་ཀྱི་དོན་དུ། ཅིའི་དོན་དུ་བསྔོ་བ་བདེ་བ་ཅན་ལ་སྐྱེ་བའི་དོན་དུ་བསྔོ་བ། བསྔོ་ཚུལ་ཡང་། ཤེས་རབ་ཆེན་པོས་རྫོགས་བྱང་ལ་དམིགས་ཏེ་ཁམས་གསུམ་འཁོར་བའི་སེམས་ཅན་ཐམས་ཅད་ལ་དམིགས་ཏེ་བསྔོས་ན་དེ་ནི་འཁོར་གསུམ་མི་དམིགས་པའི་ཡེ་ཤེས་ཀྱིས་རྩིས་ཟིན་པའི་སྒོ་ནས་བསྔོས་པ་ཡིན་ཏེ། དེ་ལྟར་འདི་དག་ཀུན་བྱས་ནས། །དགེ་བ་བདག་གིས་བསགས་པ་གང་། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་བསལ་བར་ཤོག །གསུངས་ཏེ། ཁམས་གསུམ་འཁོར་བ་དོང་ནས་སྤྲུག་པའམ་རྨང་ནས་སྤྲུག་པར་གྱུར་ཅིག་གམ་སྟོངས་འགྲོ་བར་གྱུར་ཅིག་བསམ་སྟེ། འཁོར་བའི་མིང་ཙམ་ཡང་མེད་པར་གྱུར་ནས་ཐམས་ཅད་དག་མཉམ་ཡེ་ཤེས་ཆེན་པོའི་རོལ་བར་འབྱམས་ཀླས་པར་གྱུར་ཅིག་བསམ་ནས་བསྔོ་དགོས། ཡན་ལག་བདུན་གྱི་ནང་གི་བསྔོ་བ་སོང་བ་རེད། བསགས་སྦྱངས་སྤེལ་དང་མི་ཟད་པའི་ཐབས་དམ་པ་དེ་ཡན་ལག་བདུན་ཡིན་པས་དེ་དག་སོང་ངོ་། འདིའི་ནང་གི་ཕྱག་འཚལ་བ་དང་། མཆོད་པ་འབུལ་བ། ཆོས་འཁོར་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་འདེབས་པ། རྗེས་སུ་ཡི་རང་སྟེ་དེ་ལྔ་པོ་ཚོགས་བསགས་དང་། བཤགས་པ་དེ་སྒྲིབ་སྦྱོང་ཡིན། ཡི་རང་གི་ཕྱོགས་གཅིག་རང་གི་དགེ་བ་ལ་དགའ་བ་སྒོམ་པ་དེ་ཡར་སྤེལ་བ་དང་། བསྔོ་བ་དེས་བསགས་སྦྱོང་སྤེལ་བའི་དགེ་བ་ཐམས་ཅད་ཉུང་ཉུང་མང་པོར་སྤེལ་པར་མ་ཟད་འབྲས་བུ་བྱུང་བས་ཟད་པར་གྱུར་བ་ཐམས་ཅད་ནམ་ཡང་མི་ཟད་པར་བྱེད་པའོ། །གོང་ཏུ་བཤད་མ་ཐག་པའི་བསྔོ་བ་ཡང་དག་ཡིན་མིན་གྱི་གནད་ནི་དགེ་བ་རྨི་ལམ་ལྟ་བུ་དང་། བསགས་པ་པོ་རྨི་ལམ་ལྟ་བུ། ལེན་པ་པོ་རྨི་ལམ་ལྟ་བུ་དེ་དག་གི་སྣང་ཚུལ་མ་འགགས་ཤིང་དོན་དུ་བདེན་པར་མི་འཛིན་པ་ཞིག་ལ་འཁོར་གསུམ་ཡང་དག་གི་བསྔོ་བ་ཞེས་བྱའོ། །འདིར་བསྟན་བསྔོ་བ་དང་སྨོན་ལམ་སྦྲེལ་ཏེ་གསུངས་ཡོད་པས། བསྔོ་བ་དང་སྨོན་ལམ་ལ་ཅི་ཞིག་གིས་ཁྱད་པར་ཡོད་ཅེ་ན། བསྔོ་བ་ནི་བསྔོ་བྱའི་རྫས་དེ་ཉིད་ཁྱད་པར་གྱི་གཞིར་བཟུང་སྟེ་དེའི་སྟོབས་ཀྱིས་འདི་དང་འདི་ལྟ་བུ་གྱུར་ཅིག་ཅེས་སྨོན་པ་དང་། །སྨོན་ལམ་ལ་བསྔོ་བྱའི་རྫས་མེད་ཅིང་འདོད་བྱའི་འབྲས་བུ་ལ་དོན་གཉེར་དང་ཐོབ་འདོད་ཀྱིས་འདུན་པའི་སྒོ་ནས་སྨོན་པ་ལམ་དུ་བྱས་པའོ། །རྒྱུ་སྔོན་དུ་སོང་བའི་འབྲས་བུ་ལ་སྨོན་པ་བསྔོ་བ་དང་། རྒྱུ་སྔོན་དུ་སོང་མིན་ལ་མ་ལྟོས་པར་འབྲས་བུ་བདེ་བ་ཞིག་ཐོབ་པར་སྨོན་པ་ནི་སྨོན་ལམ་མོ། བསྔོ་བ་གང་ཡིན་སྨོན་ལམ་ཡིན་པར་མ་ངེས་པ་དང་། སྨོན་ལམ་ཡིན་ཚད་བསྔོ་བ་ཡིན་པས་མ་ཁྱབ་པའོ། །ཀློང་ཆེན་པས། རྒྱུ་དགེ་བ་སྔོན་སོང་ཡོད་མེད་ཀྱིས་བསྔོ་བ་དང་སྨོན་ལམ་གྱི་ཁྱད་པར་མཛད་ས་ཡང་ཡོད།

གཉིས་པ་གནས་སྐབས་རྒྱལ་སྲས་ཀྱི་སྤྱོད་པ་ལ་སྨོན་པ།

དེ་ཡི་དགེ་བ་བདག་ལ་མྱུར་སྨིན་ནས། །ཚེ་འདིར་དུས་མིན་འཆི་བ་བཅོ་བརྒྱད་ཞི། །ནད་མེད་ལང་ཚོ་རྒྱས་པའི་ལུས་སྟོབས་ལྡན། །དཔལ་འབྱོར་འཛད་མེད་དབྱར་གྱི་གང་གཱ་ལྟར། །བདུད་དགྲས་འཚེ་བ་མེད་ཅིང་དམ་ཆོས་སྤྱོད། །བསམ་པའི་དོན་ཀུན་ཆོས་ལྡན་ཡིད་བཞིན་འགྲུབ། །བསྟན་དང་འགྲོ་ལ་ཕན་ཐོགས་རྒྱ་ཆེན་འགྲུབ། །མི་ལུས་དོན་དང་ལྡན་པ་འགྲུབ་པར་ཤོག །ཅེས་གསུངས་ཏེ། གོང་དུ་བཤད་མ་ཐག་པ་ལྟར་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བ་དམ་པར་འགོད་པ་དང་། ཁྱད་པར་དུ་འཁོར་གསུམ་དམིགས་པ་མེད་པའི་ཤེས་རབ་ཀྱིས་རྩིས་ཟིན་པའི་དགེ་རྩ་དེས། ཁམས་གསུམ་འཁོར་བ་རྨང་ནས་སྟོངས་པའི་རྒྱུ་རུ་གྱུར་ཏེ་དེའི་དགེ་བ་སྐྱེ་བ་གཞན་དང་ཚེ་རབས་གཞན་དུ་སྒུག་མི་དགོས་པར། རང་གཞན་ཐམས་ཅད་ཀྱི་དོན་ཆེན་སྒྲུབ་པའི་ཆེད་དུ་བདག་ལ་ཚེ་འདིར་སྨིན་ནས། ཚེ་འདིའི་སྟེང་དུ་འཕྲལ་རྐྱེན་གྱི་བར་ཆད་ཞུགས་ཏེ་འཆི་མ་རན་པར་འཆི་བ་དང། དུས་མ་ཡིན་པའི་འཆི་བ་བཅོ་བརྒྱད་གཡང་གཟར་རྦབ་དང་ཐོག་གི་འཇིགས་པ་ལ་སོགས་པ་ཞི་ནས། འབྱུང་བཞིའི་འདུ་ཁམས་འཁྲུག་པའི་ནད་རིགས་བཞི་བརྒྱ་རྩ་བཞིས་མ་གཙེས་པར་ལང་ཚོའི་བཀྲག་མདངས་རྒྱས། ལུས་སྟོབས་དང་ལྡན་པ་སྲེད་མེད་ཀྱི་བུ་ལྟ་བུར་གྱུར་ཏེ། དཔལ་འབྱོར་ལོངས་སྤྱོད་ཐམས་ཅད་འཛད་པ་མེད་པ་དབྱར་ཁའི་དུས་ཀྱི་ཆུ་བོ་གང་གཱ་བཞིན་དུ་རྒྱས་པ། དེ་ཡང་། དངོས་མེད་ཀྱི་བདུད་དང་དངོས་ཡོད་ཀྱི་དགྲ་ཡིས་འཚེ་བ་མེད་པར་དམ་པའི་ཆོས་སྤྱོད་པ་ཁོ་ནས་མི་ཚེ་འདས་ནས། ཇི་ལྟར་བསམ་པའི་དོན་ཀུན་ཆོས་དང་མཐུན་པའི་སྒོ་ནས་ཡིད་བཞིན་དུ་འགྲུབ་པ་དང་། བསྟན་པ་འདི་ལུང་དང་རྟོགས་པའི་བདག་ཉིད་ཅན་ཡིན་ཞིང། དེ་བཤད་དང་སྒྲུབ་པ་གཉིས་ཀྱིས་འཛིན་དགོས་པ་ཡིན་པས་ན་ལུང་གི་ཆོས་ལ་འཆད་ཉན་འཛིན་སྤེལ། རྟོགས་པའི་ཆོས་ལ་སྒོམ་སྒྲུབ་ཉམས་ལེན་བྱས་ཏེ་བསྟན་པ་འཛིན་སྐྱོང་སྤེལ་གསུམ་བྱེད་པ་དང་། མཐའ་ཡས་འགྲོ་བའི་ཁམས་ལ་གནས་སྐབས་དང་མཐར་ཐུག་གི་ཕན་པ་དང་བདེ་བ་རྒྱ་ཆེན་པོ་ཞིག་འགྲུབ་ནས། མདོར་ན་ཚེ་འདིར་སྐྱེ་བ་བླངས་པ་དོན་མེད་དུ་མ་སོང་པར་མི་ལུས་བླང་བ་རང་གཞན་གཉིས་དོན་འགྲུབ་པའི་དོན་རྒྱ་ཆེན་པོ་དང་ལྡན་པ་སྨོན་འདུན་ཅི་བཞིན་དུ་འགྲུབ་པར་ཤོག་གསུངས་སོ། །འདི་ནས་སྨོན་ལམ་ཇི་ལྟར་བཏབ་པ་བཞིན་མི་བསླུ་བའི་གཏམ་རྒྱུད་ཅིག་བཤད་ན། ཡང་སྟོན་པ་ཐུགས་རྗེ་ཅན་ཡུལ་མཉན་ཡོད་ན་བཞུགས་ཡོད་པའི་སྐབས་ཤིག་ལ། ཡུལ་དེའི་ཁྱིམ་བདག་ཕྱུག་པོ་ཚང་ཞིག་ལ་བུ་ཁྱེའུ་གཟུགས་བཟང་ཞིང་ལྟ་ན་སྡུག་པ་ལུས་ལ་རྒྱན་གྱིས་བརྒྱན་པ་ཞིག་འཁྲུངས། ཁྱེའུ་དེའི་ལུས་པོ་འཁྲུད་དགོས་བསམ་ནས་རྒྱན་ཆ་མར་ལ་བླང་ཚེ་རེ་རེ་བླང་དུས་དེའི་ཤུལ་དུ་རེ་རེ་རང་གྲུབ་ཏུ་གྱུར་ནས། ཡང་རེ་རེ་བླང་དུས་རེ་རེ་རང་གྲུབ་ཏུ་གྱུར་ནས་རྒྱན་མེད་པར་བྱས་དེ་ལེན་ཡོང་རྒྱུ་ཞིག་མེད་པས། མཐར་རྒྱན་ཆ་ལེན་པའི་ཐབས་མེད་པར་རྒྱན་ཆ་དང་བཅས་པར་ཁྲུས་བྱས། ཁྲུས་བྱས་ཚར་ནས་ཡར་ཁྲི་ཐོག་ཏུ་འཇོག་གྲབས་བྱས་ཚེ་ཡང་རང་བཞིན་གྱི་མི་ཡུལ་གྱི་ཁྲི་མ་ཡིན་པར་ལྷའི་མལ་ཁྲི་བཀོད་པ་རྒྱན་དང་བཅས་པ་ཞིག་རང་གྲུབ་ཏུ་བྱུང་། ཁྱེའུ་ཡར་འཇོག་སའི་ཁང་པ་དེ་ཡང་རང་བཞིན་གྱིས་ཁང་པ་མ་ཡིན་པར་ཁང་བཟང་དུ་གནས་འགྱུར་ཏེ་ལྷའི་གཞལ་མེད་ཁང་ཐོག་བརྩེགས་གདུགས་དང་རྒྱལ་མཚན་བ་དན་ཐམས་ཅད་བསྒྲེངས་ཡོད་པ། མེ་ཏོག་སྣ་ཚོགས་པ་ལྷ་ཡུལ་མ་གཏོགས་མེད་པའི་མེ་ཏོག་གི་གཅལ་དུ་བཀྲམ་ཡོད་པ། སྤོས་ཀྱི་ཆུ་དྲི་བཟང་པོ་ཅན་གྱིས་འཁོར་ཡུག་ལ་ཆག་ཆག་བཏབ་ཡོད་པ་དེ་འདྲ་རང་བྱུང་གིས་གྲུབ་ཅིང་དྲི་བསུང་གི་ངད་ཀྱིས་ཕྱོགས་ཐམས་ཅད་ཁྱབ་ཀྱིན་ཡོད་པ། ཁང་བརྩེགས་ཀྱི་ནང་གི་མལ་ཁྲི་ཡོད་སའི་སྔས་མགོའི་ཕྱོགས་སུ་ལྷའི་མཆོད་སྡོང་རྒྱུ་གསེར་ལས་གྲུབ་པ་རིན་པོ་ཆེ་སྣ་ཚོགས་པའི་ཁྲ་རྒྱན་གྱིས་བརྒྱན་པ་ཞིག་རང་འགྲུབ་ཏུ་བྱུང་། མཆོད་སྡོང་དེའི་མདུན་དུ་ཡང་གཏེར་གྱི་སྒྲོམ་ཆེན་པོ་རིན་པོ་ཆེ་སྣ་ཚོགས་ཀྱིས་ཕྱུར་བུར་གང་བ་ཁ་ཕྱེ་བ་བཞི་བྱུང་སྟེ། དེའི་ཁ་ནས་ཅི་འདྲ་བླངས་ན་འཕེལ་ཏེ་ཟད་དུ་མེད་པ་དེ་འདྲ་རང་འགྲུབ་ཏུ་བྱུང་ཞིང་། ངོ་མཚར་ཅན་གྱི་ཁྱེའུའི་བསོད་ནམས་ཀྱི་མཚན་མ་དེ་ཚོ་ལ་བལྟས་ནས་ཕ་མ་གཉིས་ཀ་ཤིན་ཏུ་དགའ་སྟེ་ཁྱེའུའི་མིང་ལ་དབྱིག་གི་མཚོ་ཞེས་བཏགས་སོ། །རིན་པོ་ཆེའི་གཏེར་མཛོད་མཚོན་པའི་མིང་དེ་བཏགས་པས། ཡུལ་མི་ཐམས་ཅད་ཀྱིས་ཁྱེའུའི་མིང་ལ་དབྱིག་མཚོ་ཞེས་ཕྱོགས་ཐམས་ཅད་ལ་གྲགས། དེ་ནས་བུ་དེ་ནར་སོན་པས་རིག་པ་རྣོ་ཞིང་ཤེས་པ་གསལ་བ། མཁས་ཤིང་མཛངས་པ། ལོ་མཉམ་ན་ཟླའི་བྱིས་པ་གཅིག་གིས་འགྲན་དུ་མེད་པ་བརྟག་པ་བརྒྱད་ལ་སོགས་པ་ཤེས་བྱ་རིག་པའི་རྣམ་གྲངས་མང་པོ་ལ་མི་ཤེས་པ་ཞིག་མེད་པར་གྱུར་སོང་། དེ་ཡར་ནར་སོན་ཏེ་གཞོན་ནུར་གྱུར་ཡོང་བའི་གནས་སྐབས་ན་རྩེ་གྲོགས་ལྷའི་བུ་དང་བུ་མོ་ཁོ་ན་ཡིན་ཞིང་། དེ་ནས་ཡུན་རིང་སོང་བའི་གནས་སྐབས་ཤིག་ན་ཁོ་རང་རང་ཤུགས་ཀྱིས་དཀོན་མཆོག་གསུམ་ལ་དགའ་ཞིང་དད་པ་བྱེད་པ་ཞིག་ཏུ་གྱུར་ནས། བདག་གིས་ལྷ་དང་མིའི་འདོད་པའི་ཡོན་ཏན་ཐམས་ཅད་ལོངས་སྤྱོད་ཟིན་གྱི། ད་ནི་སངས་རྒྱས་ཀྱི་བསྟན་པ་ལ་རབ་ཏུ་བྱུང་དགོས་སྙམ་ནས་སྦྱིན་པ་མང་པོ་བྱིན། བསོད་ནམས་མང་པོ་བསགས། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་། རབ་ཏུ་བྱུང་ནས་ས་ཕྱོགས་གང་དུ་བསྡད་ཀྱང་དེ་ན་ཡང་ལྷའི་མལ་ཁྲི་ལ་སོགས་པ་དང་པོ་སྐྱེས་དུས་ཅི་ཡོད་རང་ཤུགས་ཀྱིས་གྲུབ་ཡོང་བ་དེ་འདྲ་ཞིག་ཡིན་ཞིང་། གང་དུ་སོང་ན་དེ་ན་ལམ་གྱི་སྟེང་དུ་མི་མ་ཡིན་རྣམས་ཀྱིས་རས་གསར་པ་གདིང་བར་བྱེད་ལ། མེ་ཏོག་སྣ་ཚོགས་པ་ཡང་མཚམས་མཚམས་སུ་འཐོར་ཡོང་བ་ཡོད་པ་དེ་འདྲ་ཡིན། དགེ་སློང་དེ་སུ་དང་མི་འདྲ་བ་ཞིག་ཡོང་གིན་ཡོད་པས། དེ་དེར་མ་དགའ་ཞིང་དགེ་སློང་རྣམས་ཀྱི་གྲལ་ནས་ངོ་ཚ་བར་གྱུར། དེ་ངོ་ཚ་བཞིན་ཡོད་པ་བཅོམ་ལྡན་འདས་ཀྱིས་དགོངས་ཏེ་ཁྱོད་རང་ལ་དེ་རྣམས་མེད་ན་དགའ་འདུག་སྙམ་ན་སྙིང་ཐག་པ་ནས་དེ་ལ་མི་ལྟ་བའི་སེམས་བསྐྱེད་ཅིག་དང་མེད་པར་འགྱུར་རོ་གསུངས་པས། དགེ་སློང་གིས་དེ་ལྟར་དུ་སེམས་བསྐྱེད་པས་དེ་རྣམས་མེད་པར་གྱུར། དེ་ནས་དགེ་སློང་དེས་བརྩོན་འགྲུས་བསྐྱེད་དེ་སྒྲུབ་པ་ལ་འབད་པ་བྱས་པས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པའི་གོ་འཕང་ཐོབ། བཅོམ་ལྡན་འདས་ཀྱི་འཁོར་དགེ་སློང་མང་པོས་བཅོམ་ལྡན་ལ་དེའི་ལས་ཀྱི་རྒྱུ་ཞུས་ཚེ། བཅོམ་ལྡན་འདས་ཀྱིས་གསུངས་པ། སྔོན་ཞིག་ལ་སངས་རྒྱས་འོད་སྲུང་གི་དུས་སྐབས་ཤིག་ཏུ་ཝཱ་རཱ་ཎ་སཱིའི་ཁྱིམ་བདག་ཕྱུག་པོ་ཞིག་སངས་རྒྱས་དང་ཆོས་དང་དགེ་འདུན་ལ་མངོན་པར་དགའ་ནས། རྣམ་པ་ཐམས་ཅད་ཡོངས་སུ་རྫོགས་པའི་གཙུག་ལག་ཁང་ཞེས་བྱ་བའི་གཙུག་ལག་ཁང་རྒྱ་ཆེན་པོ་ཞིག་བརྩིགས་ཏེ། སངས་རྒྱས་འཁོར་དང་བཅས་པ་དེའི་ནང་དུ་སྤྱན་དྲངས་ཏེ་མཆོད་པ་ཕུལ་ཞིང་། དེར་མ་ཟད་དེ་བཞིན་གཤེགས་པའི་དབུ་སྐྲ་དང་ཕྱག་སེན་ནང་གཟུངས་ལ་བཞུགས་སུ་གསོལ་བའི་མཆོད་རྟེན་ཞིག་བརྩིགས། འཁོར་ཡུག་ཉམས་དགའ་བའི་ཆེད་དུ་གཙང་ཁང་ཕྱུར་བུ་ཕུག དེ་ལ་ལན་ཀན་དང་རྟ་བབས་དཀར་ཁུང་ཆར་ཁེབས་ལ་སོགས་པའི་རྒྱན་ཆ་མང་པོས་བརྒྱན། གདུགས་དང་རྒྱལ་མཚན་བ་དན་མང་པོས་བརྒྱན་ཡོད་པ་དེ་འདྲ་ཞིག་བྱས་ཏེ། ནང་གི་ས་གཞི་ཐམས་ཅད་ལ་རས་ཀྱི་གཞི་བཏིངས་། ཡང་བདུག་པ་དང་བྱེ་མ་སྤོས་དང་མེ་ཏོག་རོལ་མོའི་སྒྲ་ལ་སོགས་པས་བཀུར་སྟི་བྱས་ནས། མ་འོངས་པ་ན་ཕྱུག་ཅིང་ནོར་མང་པའི་ཁྱིམ་དུ་གཟུགས་བཟང་ཤིང་ལྟ་ན་སྡུག་པ་རྒྱན་གྱིས་བརྒྱན་པ་ཞིག་ཏུ་སྐྱེས་ཤིང་མངལ་གྱིས་དྲི་མས་མ་གོས་པ་དང་། ཁྱིམ་དུ་ལྷའི་མལ་ཁྲི་དང་ཁང་བརྩེགས་ལྷའི་མཆོད་སྡོང་ཕྱོགས་བཞི་རིན་པོ་ཆེའི་གཏེར་དང་བཅས་པར་གྱུར་ཏེ། ཡར་ནར་སོན་ནས་ལྷ་དང་མིའི་འདོད་ཡོན་ལ་ལོངས་སྤྱད་དེ་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ཞིང་འབྲས་བུ་ཐོབ་པར་ཤོག་ཅིག་ཅེས་སྨོན་ལམ་བཏབ། སྨོན་ལམ་དེའི་འབྲས་འགྲུབ་ནས་འདི་དག་འབྱུང་བ་རེད་གསུངས། སྨོན་ལམ་གྱི་མཐུ་དེ་འདྲའི་སྟོབས་བཙན་པོ་ཡིན། འོན་ཀྱང་རྒྱུ་མེད་པར་སྨོན་ལམ་བཏབ་པ་ཙམ་གྱིས་འགྲུབ་པ་མ་རེད། སྨོན་ལམ་འགྲུབ་པའི་རྒྱུ་ཚོགས་ཁྱད་པར་ཅན་བསག་དགོས། ཚོགས་བསགས་དང་འབྲེལ་ན་སྨོན་ལམ་གྱི་མཐུ་འགྲུབ། དེ་ཡང་བྱང་ཆུབ་ཀྱི་སེམས་དང་སྦྲེལ་ན་ཚོགས་རྫོགས་སྟོབས་ཆེ་ཞིང་། འུ་ཚོ་ཐེག་ཆེན་པ་ཐེག་པ་ཆེན་པོའི་ཆོས་མདོ་སྔགས་ཟུང་འབྲེལ་གྱི་ལམ་ལ་ཞུགས་པ་ཆོས་བསོད་ཆེན་པོ་ཡིན་པས། ཆོས་ཐོབ་པའི་ཆོས་བསོད་ཆེ་བ་ལྟར་ཆོས་ཉམས་སུ་ལེན་པའི་བསོད་ནམས་རང་གིས་སྒྲུབ་དགོས། ཁྱེའུ་དབྱིག་མཚོ་ལ་འབད་པ་མེད་པར་གོས་དང་རྒྱན་ཁྲི་དང་མལ་ཆས་གང་འདོད་ཀྱི་ལོངས་སྤྱོད་ལྷ་དང་ལྷ་མོའི་རྩེ་གྲོགས་ཡོད་པ་དེ་དག་སྔོན་སངས་རྒྱས་འོད་སྲུང་འཁོར་བཅས་ལ་བསྙེན་བཀུར་བྱས། བདེ་བར་གཤེགས་པའི་དབུ་སྐྲ་དང་ཕྱག་སེན་གྱི་མཆོད་རྟེན་བཞེངས། དེ་ལ་ཞབས་ཏོག་ཕུལ་བ་ལ་སོགས་པའི་བསོད་ནམས་བསགས་པ་སྔོན་སོང་གི་སྟེང་ནས་སྨོན་ལམ་བཏབ་པས་འགྲུབ་པ་རེད། འུ་ཚོའི་འདུན་པ་གཏད་ས་བདེ་བ་ཅན་གྱི་ཞིང་ཁམས་ནི་ལྷ་དང་མི་ཡི་བདེ་སྐྱིད་དང་ལོངས་སྤྱོད་ལ་ཆ་ཙམ་མམ་ཕྱོགས་ཙམ་ཡང་བསྡུར་ཡོང་ས་མེད་པའི་བདེ་སྐྱིད་ཕུན་སུམ་ཚོགས་པའི་ཞིང་ཁམས་ཡང་། །སངས་རྒྱས་འོད་དཔག་མེད་དགེ་སློང་ཆོས་ཀྱི་འབྱུང་གནས་ཀྱི་སྐྱེ་བ་བཞེས་པའི་སྐབས་སུ། སངས་རྒྱས་འཇིག་རྟེན་དབང་ཕྱུག་རྒྱལ་པོའི་དྲུང་དུ་ཐུགས་བསྐྱེད་དེ་མི་ལོ་བྱེ་བའི་བར་དུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཡོན་ཏན་དང་རྒྱན་བཀོད་པ་ཕུན་སུམ་ཚོགས་པ་ཐམས་ཅད་ཡུལ་ཕྱོགས་དང་བཅས་པ་གཞི་ཅི་ཞིག་ལས་གྲུབ་པ་ཐམས་ཅད་སྐྱོ་ངལ་མེད་པར་གསན་ཏེ། དེ་ཐམས་ཅད་སངས་རྒྱས་ཀྱི་ཞིང་ཁམས་གཅིག་ཏུ་བསྡམ་པ་ལྟ་བུའི་ཞིང་ཁམས་ཤིག་གཟུང་བའི་ཆེད་དུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ལམ་གྱི་སྦྱང་པ་རྫོགས་སྨིན་སྦྱོང་གསུམ་གྱི་སྟོབས་རྫོགས་པར་མཛད་དེ། ཐུན་མིན་གྱི་སྨོན་ལམ་ཅི་ཞིག་བཏབ་ཡོད་ཅེ་ན། ཁོང་གི་མཚན་ཙམ་ཐོས་པའི་གང་ཟག་ཀྱང་ཞིང་ཁམས་བདེ་བ་ཅན་ལ་སྐྱེ་བར་ཤོག སོ་སོའི་སྐྱེ་བོ་ཐ་མལ་བ་ཡིན་ཡང་ཆོས་སྤོང་དང་མཚམས་མེད་བྱས་པ་མ་གཏོགས་པ་བདེ་བ་ཅན་གྱི་ཞིང་ཁམས་དེ་རུ་སྐྱེ་བར་ཤོག་ཅེས་སྨོན་ལམ་བཏབ་པས། དེའི་ཐུགས་རྗེའི་དཔྱང་ཐག་ནམ་མཁའ་ནས་མར་སྣར་བཞག་པ་ལྟ་བུ་ཞིག་ཡིན་པས་འུ་ཚོ་བདེ་བ་ཅན་ལ་འགྲོ་བསམ་མཁན་ཞིག་ཡིན་ཕྱིན་དེ་ལ་བརྩོན་པ་ལས་གཞན་ཅི་ཡང་མི་དགོས་པ་ལྟ་བུ་ཞིག་ཡིན། གལ་ཏེ་དེ་མེད་ན་རང་རེས་གནམ་ལ་སྐས་བཙུགས་ཏེ་རང་སྟོབས་ཀྱིས་ལམ་ཞིག་རྙེད་དགོས་ན་རྙེད་དཀའ་ཞིང་། ཚེ་འདི་ལ་ཆོས་ཟབ་མོ་ཞིག་དང་འཕྲད་དེ་ཉམས་ལེན་གྱིས་བརྩོན་འགྲུས་བྱེད། ས་ལམ་མཐོན་པོར་ཐོན་ཏེ་ལམ་རྟགས་ཀྱི་ཡོན་ཏན་ཡོད་པ་ཞིག་ཡིན་ན་ཞིང་ཁམས་གང་ལ་འགྲོ་འགྲོ། གར་བཞུགས་དག་པའི་ཞིང་ཁམས་ཡིན་པ་རེད་མ་གཏོགས། སོ་སོའི་སྐྱེ་བོ་སྒྲིབ་གཉིས་ཀྱི་དྲི་མ་ཆ་ཙམ་ཡང་མ་སྤོང་བ་ཞིག་གིས་འབད་བརྩོན་མི་དགོས་པར་དག་པའི་ཞིང་དུ་འགྲོ་ཐུབ་པ་མ་རེད། དེས་ན་འོག་དཔག་མེད་པའི་ཐུགས་བསྐྱེད་སྨོན་ལམ་དང་དེའི་བསོད་ནམས་ཀྱི་མཐུ་ལས་གྲུབ་པའི་ཞིང་ཁམས་དེ་ལ་སེམས་ཅན་ཐ་མལ་བ་ཡང་སྐྱེ་ཐུབ་པ་འདི་དེའི་སྨོན་ལམ་གྱི་སྟོབས་རེད། ཡང་དཔེ་གཞན་པ་ཞིག་བཞག་ན། བྲག་གཡང་ས་མཐོན་པོ་ཞིག་གི་སྐེད་པ་ནས་མར་ལ་ལྷུང་གྲབ་བྱེད་གྱིན་ཡོད་ཅིང་། རྐང་པའི་སྔ་རྟིང་གི་རྡོག་ཅུང་ཟད་ཅིག་རྟེན་ཚེ་ལག་པ་ཡ་གཅིག་གིས་རྩྭ་ཕུང་ཞིག་ཏུ་བཟུང་ས་ལོན་ཏེ། ཡར་བྲག་སྟེང་དུ་འགོས་དགོས་ན་འགོས་པའི་སྟོབས་དང་ནུས་པ་རང་ལ་མེད། ཡང་མིན་ན་རྩྭ་ཕུང་གོག ཡང་མིན་ན་སྔ་རྟིང་ཅུང་ཟད་ཅིག་འགྱུར་ཏེ་གཅིག་ལྷུང་ཚེ་ཁང་བརྩེགས་བརྒྱད་བརྒྱ་ཙམ་ཞིག་གི་མར་ཞབས་ཀྱི་དུག་མཚོའི་ནང་དུ་ཆུ་སྲིན་མ་རུང་བས་བསྒུག་ཡོད་པས་དེ་ལ་ལྷུང་ཚེ་སྐྱབས་དང་སྐྱོབས་པ་ཞིག་གང་ན་ཡོད། ཤ་ཚལ་བ་ཁྲག་ཐིག་པ་བྱེད་འགྲོ་བ་རེད། དེ་དུས་མྱ་ངན་གྱིས་འོ་དོད་བོས་ཀྱང་ཕན་ཐོགས་ཅི་ཡང་ཡོད་པ་མ་རེད། དེ་ལྟར་ཉེན་ཁ་ཅན་གྱི་བྲག་གཟར་མོའི་ངོ་ནས་ལྷུང་གྲབ་བྱེད་སྐབས་ཤིག་ལ། བྲག་སྟེང་ནས་གཅིག་གིས་ལག་པ་བསྐྱངས་ནས་ཁྱོད་འདི་ལ་འཐོམས་དང་ངས་ཁྱོད་ཡར་ལ་འཐེན་ཆོག་ཅེས་ཟེར་མཁན་ཞིག་ཡོད་ན། གལ་ཏེ་འཐམ་ས་ལོན་དུས་ཐེ་ཚོམ་ཞིག་ག་ལ་སྐྱེ། དེ་བཞིན་སངས་རྒྱས་འོད་དཔག་མེད་པས་སེམས་ཅན་གྱི་དོན་དུ་ཐུགས་བསྐྱེད་ཀྱིས་ཞིང་ཁམས་བཟུང་། སྨོན་ལམ་འགྲུབ་པའི་སྟོབས་ཏེ་གཅིག་གིས་བྲག་མགོ་ནས་མར་ལ་ལག་པ་བསྐྱངས་པ་ལྟ་བུ་དང་། འུ་ཚོའི་ཡིད་ཆེས་ཀྱི་དད་པའི་ཤུགས་དང་ཡིད་ཆེས་ཀྱི་སྟོབས་དེ་ལས་བདེ་བ་ཅན་ལ་སྐྱེ་བའི་རྒྱུ་འགྲུབ་པ་ལག་པས་ཡར་ལ་འཐམ་པ་ལྟ་བུ་གཉིས་ཀ་འཕྲད་ཚེ། ད་གཟོད་ཞིང་ཁམས་བདེ་བ་ཅན་ལ་རང་མི་རང་ཁྱིམ་ཕ་ཁྱིམ་བུ་འགྲོ་ཡིན། དེས་ན་རང་རེས་ཀྱང་ཕྱོགས་གཅིག་ནས་ཚོགས་བསག་ཕྱོགས་གཅིག་ནས་སྨོན་ལམ་འདེབས་དགོས། སངས་རྒྱས་འོད་དཔག་མེད་པས་ལོ་བྱེ་བ་ཞིག་ལ་ཞིང་ཁམས་མང་པོའི་བཀོད་པ་དང་ཡོན་ཏན་མང་པོ་གསན་བསམ་མཛད་ནས། དེ་ཐམས་ཅད་ཕྱོགས་གཅིག་ཏུ་བསྡམ་པ་ལྟ་བུའི་ཞིང་ཁམས་བཟུང་བའི་ཆེད་དུ་ཚོགས་གཉིས་བསགས་པའི་འབྲས་བུ་ལ། རང་རེའི་དཀའ་ལས་ཆེན་པོ་ཞིག་རྒྱག་མི་དགོས་པར་ལོངས་སྤྱོད་ཆོག་པར་ཉེ་བ་རེད། སངས་རྒྱས་འོད་དཔག་མེད་པའི་སློབ་པ་ལམ་གྱི་གནས་སྐབས་སུ་བྱ་དཀའ་བའི་སྤྱོད་པ་དེ་ལྟར་མཛད་ནས་གྲུབ་ཡོང་བ་ལ་མཉམ་དུ་ལོངས་སྤྱོད་དགོས་ཚེ། དེ་དང་ཕྱོགས་མཚུངས་པ་རྟེན་དང་བརྟེན་པའི་ཞིང་ཁམས་ཡིད་ལ་བྱེད་པ་དང་ཚོགས་གསོག་པ་སེམས་བསྐྱེད་པ་སྨོན་ལམ་འདེབས་པ་དཀའ་ལས་ཆུང་ཆུང་ཚེ་ཐོག་འདིར་འགྲུབ་ཐུབ་པ་ཞིག་རེད། དེ་ཡང་ཁྱིམ་སྤོང་མི་དགོས་ཤིང་འཇིག་རྟེན་ཁྱིམ་ལས་ཀྱང་སྐྱུར་མི་དགོས་སྒལ་ཚིགས་བྲག་ལ་སྦྱར་མ་ཐུབ་ནའང་འགྲུབ་པ་ཡོད། བསྒྲུབ་ན་ཅི་འདྲའི་མི་ཉམ་ཆུང་ཐབས་སྡུག་ཅིག་ཡིན་རུང་བསྒྲུབ་ཐུབ་པ་དེ་ཚོ་སྒྲུབ་ལོས་དགོས། དེ་མ་བསྒྲུབས་དུས་ཅི་བཤད་ཀྱང་རྒྱུ་འབྲས་ཡིད་ཆེས་ཀྱི་དད་པ་གཏིང་ནས་མེད་རྟགས་རེད། དད་པ་མེད་ན་བྱིན་རླབས་མི་འཇུག དགེ་སློང་ལེགས་པའི་སྐར་མ་དང་ལྷའི་སྦྱིན་ཚོ་བཅོམ་ལྡན་འདས་ཀྱི་སྐུ་གཉེན་སྐུ་འཁོར་རེད། མཉམ་འགྲོག་གི་བདུད་ཀྱིས་བསླུས། སྡིག་ལྟ་ངན་པའི་དབང་དུ་ཤོར་བས་བཅོམ་ལྡན་འདས་དང་མཉམ་དུ་གཤིབས་ཀྱང་བྱིན་རླབས་མི་འཇུག་པར་ཉེས་པ་བསགས་པའི་རྐྱེན་དུ་འགྱུར་སོང། ལྷས་སྦྱིན་གྱིས་མཚམས་མེད་པའི་ལས་བསགས་པ་དེ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་མྱོང་བ་རེད། དང་བ་དང་དད་པ་ཡོད་ན་དང་བའི་ཡིད་ཀྱིས་སྲན་རྡོག་འགའ་རེ་སངས་རྒྱས་ལ་ཕུལ་བའི་སྟོབས་ཀྱིས་ཅི་འདྲའི་བསོད་ནམས་ཆེན་པོ་ཐོབ་འདུག གནའ་སྔོན་མ་ཞིག་ལ་ཁྱིམ་བདག་ཞིག་ལ་བུ་ངོ་མཚར་ཅན་གཉིས་སྐྱེས། བུ་སྐྱེས་མ་ཐག་ཏུ་ནམ་མཁའ་ནས་ལྷ་རྫས་ཀྱི་མེ་ཏོག་ཆར་བཞིན་དུ་བབ་སྟེ་ཁང་པའི་སྟེང་འོག་ཐམས་ཅད་གང་། ལྟས་བཟང་པོ་དེ་ལ་ལྟོས་ནས་བུ་ཆེ་བའི་མིང་ལ་ལྷའི་མེ་ཏོག་བཏགས། ལྷའི་མེ་ཏོག་ནར་སོན་དུས་སངས་རྒྱས་འཁོར་བཅས་ལ་དད་པའི་སེམས་སྐྱེས་ཏེ་སངས་རྒྱས་འཁོར་དང་བཅས་པ་གདུགས་ཚོད་ལ་སྤྱན་དྲང་། ཁང་བཟང་གི་ནང་དུ་རིན་པོ་ཆེའི་ཁྲི་དང་ཁ་ཟས་རྣམ་པ་སྣ་ཚོགས་པ་ཅི་འདོད་གང་འདོད་ཐམས་ཅད་ཁོ་རང་གི་བསོད་ནམས་ཀྱི་སྟོབས་ཀྱིས་འབད་མེད་རང་འགྲུབ་དུ་གྲུབ་ཅིང་། དེ་ནས་བཅོམ་ལྡན་འདས་འཁོར་དང་བཅས་པ་བྱོན་ཆོས་བསྟན་ཁྱིམ་གང་གི་མི་ཐམས་ཅད་ལ་རྒྱུན་ཞུགས་ཀྱི་འབྲས་བུ་དེ་ཉིད་དུ་ཐོབ་བོ། །དེ་ནས་ལྷའི་མེ་ཏོག་གིས་ཕ་མ་ལ་གནང་བ་ཞུས་ཏེ་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་། དེ་ནས་བརྩོན་འགྲུས་བརྩམས་ཏེ་འབད་པ་ཆེན་པོས་དགྲ་བཅོམ་པའི་གོ་འཕང་མངོན་དུ་བྱས། དེའི་སྐབས་སངས་རྒྱས་ཀྱི་ཉེ་གནས་ཀུན་དགའ་བོས་ལྷའི་མེ་ཏོག་གི་ལས་ཀྱི་རྒྱུ་ཞུས་ཚེ། བཅོམ་ལྡན་འདས་ཀྱི་ཞལ་ནས། སྔོན་སངས་རྒྱས་གསེར་ཐུབ་འཇིག་རྟེན་དུ་བྱོན་སྐབས་ཤིག་ལ། མི་དབུལ་པོ་ཞིག་ཡོད་པ་ཁོ་རང་སངས་རྒྱས་ལ་རབ་ཏུ་དགའ་ཞིང་དད་པའི་སེམས་སྐྱེས་ཏེ། སྤང་དང་ནེའུ་གསེང་གི་སྟེང་ནས་མེ་ཏོག་སྣ་ཚོགས་བཏུས་ཏེ་དགེ་འདུན་ལ་གཏོར་བ་དང་། བསམ་པ་རྣམ་པར་དག་པས་དགེ་འདུན་བཞུགས་པའི་གནས་དེར་ཕྱགས་བརྡར་བརྒྱབ་པ་རེད། རྒྱུ་དེས་བསྐལ་བ་དགུ་བཅུ་རྩ་གཅིག་གི་བར་དུ་གང་དུ་སྐྱེས་ཀྱང་གཟུགས་བཟང་ཞིང་ལྟ་ན་སྡུག་པ། ཅི་བསམ་གང་འདོད་དུ་བཟའ་བཏུང་གོས་རྒྱན་ལ་སོགས་པ་ལོངས་སྤྱད་དུ་ཡོད་པ་དེ་འདྲའི་བསོད་ནམས་ཅན་ཤ་སྟག་ཏུ་སྐྱེ་བ་བླངས་བར་མ་ཟད་རྟེན་དེ་ལ་དགྲ་བཅོམ་པ་ཐོབ་སོང་བ་འདི་རེད། ཀུན་དགའ་བོ་ཞེས་ནན་ཏན་གྱིས་བོས་མཛད་དེ་སེམས་ཅན་ཐམས་ཅད་ཀྱིས་ཀྱང་སྦྱིན་པ་ཆུང་ངུ་ཞིག་ལ་བསོད་ནམས་ཆེན་པོ་ཞིག་ཡོད་པ་མ་རེད་སྙམ་ནས་མ་བརྙས་དང་། བསམ་པ་དག་ན་མཆོད་རྫས་ཆུང་ཡང་ལྷའི་མེ་ཏོག་ལྟ་བུ་ཅི་བསམ་འགྲུབ་པའི་འབྲས་བུ་སྨིན་པ་ཡོད་གསུངས། ཞིང་བཀོད་ཀྱི་མདོ་ལས། གང་ཟག་གང་ཞིག་གིས་འཇིག་རྟེན་ཁམས་ཀྱི་རྡུལ་ཕྲ་རབ་ཀྱི་གྲངས་དང་མཉམ་པའི་འཇིག་རྟེན་གྱི་ཁམས་བཤིགས་ནས་རྡུལ་ཕྲ་རབ་ཁོ་ནར་བྱས་ཏེ་དེའི་རྡུལ་ཕྲ་རབ་ཇི་ལྟར་མང་པོ་ཡོད་པ། དེ་ལས་ཀྱང་མང་བའི་འཇིག་རྟེན་གྱི་ཁམས་ཐམས་ཅད་རིན་པོ་ཆེའི་བཀང་སྟེ་སྦྱིན་པ་བཏང་ན་དེའི་བསོད་ནམས་ཀྱི་ཚད་འདི་འདྲ་ཞིག་ཡིན་ཞེས་ཚད་བཟུང་དུ་མེད་ཀྱང་། དེ་བས་ཀྱང་གང་ཟག་འགའ་ཞིག་གིས་འོད་དཔག་མེད་པའི་མཚན་དང་ཞིང་ཁམས་བདེ་བ་ཅན་གྱི་ཡོན་ཏན་ཁྱད་དུ་འཕགས་པ་རྣམས་ཐོས་ནས་དགའ་སྟེ་ཐལ་མོ་ཞིག་སྦྱར་ན་དེའི་བསོད་ནམས་ཆེ་བ་དང། གོང་གི་སྦྱིན་པ་རྒྱ་ཆེན་བཏང་བ་ལས་ཕྱི་མ་དེའི་ཆ་ཤས་ཙམ་ཡང་མི་ཐུབ་པར་གསུངས་བས། བསོད་ནམས་སོགས་དང་མི་སོགས་དད་པ་ལ་ཐུག བདེ་བ་ཅན་གྱི་ཞིང་གི་ཡོན་ཏན་གྱི་བཀོད་པ་དང་དེའི་རྒྱུ་སྒྲུབ་ཚེ་དེ་འདྲ་ལས་སླ་མོ་ཞིག་གིས་སྐྱེ་འམ་མི་སྐྱེ་སྙམ་པ་ནི་ཐེ་ཚོམ་རེད། ཐེ་ཚོམ་གྱི་ངང་ནས་རྒྱུ་སྒྲུབ་པ་དག་ནི་བདེ་བ་ཅན་ལ་སྐྱེས་ཚེ་མེ་ཏོག་པདྨའི་སྦུབས་ལས་ལོ་གྲངས་ལྔ་བརྒྱའི་བར་དུ་སངས་རྒྱས་ཀྱི་གསུང་ཐོས་ཀྱང་ཞལ་མི་མཇལ་པའི་སྐྱོན་འབྱུང་བས། ཐེ་ཚོམ་མེད་པའི་དད་པ་ཕྱིར་མི་ལྡོག་པའམ་དད་པ་བརྟན་པོ་ཞིག་གིས་བདག་གཞན་སེམས་ཅན་ཐམས་ཅད་ཀྱི་དུས་གསུམ་དང་འབྲེལ་བའི་ཚོགས་གཉིས་ཐམས་ཅད་ཕྱོགས་གཅིག་ཏུ་བསྡོམས་ནས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པའི་བྱང་ཆུབ་ཆེན་པོར་བསྔོས་པའི་མཐུ་དེ་ལ་བརྟེན་ནས། བདག་འཆི་ཁར་འདྲེན་པ་འོད་དཔག་མེད་རྒྱལ་སྲས་ཐུ་བོ་རྣམ་གཉིས་ལ་སོགས་པའི་འཁོར་གྱིས་བསྐོར་བ། མངོན་སུམ་མིག་གི་ལམ་དུ་མཇལ་ཏེ་རྒྱལ་བ་འཁོར་དང་བཅས་པ་ལ་དད་པ་དྲག་པོ་སྐྱེས་པའི་སྟོབས་ཀྱིས། འཆི་ཁ་མནར་གཅོད་ཀྱི་སྡུག་བསྔལ་ཤི་ནས་འཁྲུལ་སྣང་གི་འཇིགས་སྐྲག་མེད་པར། རྒྱལ་སྲས་སེམས་དཔའ་བརྒྱད་པོ་རྫུ་འཕྲུལ་གྱིས་བྱོན་ནས་བདེ་བ་ཅན་དུ་འགྲོ་བའི་ལམ་སྟོན་ལམ་སྣ་འདྲེན་པར་ཤོག་ཅིག ཅེས་ལམ་བསྟན་པ་དེ་ལ་བརྟེན་ནས་བདེ་བ་ཅན་གྱི་ཞིང་ཁམས་ལ་སྐྱེས་དུས་རིན་པོ་ཆེ་མེ་ཏོག་པདྨའི་ནང་དུ་བརྫུས་ཏེ་སྐྱེས་ཤིང་ཐེག་ཆེན་གྱི་རིགས་ཅན་དབང་པོ་རྣོན་པོ་ཞིག་དུ་སྐྱེ་བར་ཤོག་ཅིག སྐྱེས་པ་དང་གཟུངས་དང་ཏིང་འཛིན་སྤོབས་པ་ལ་སོགས་པ་ཐོབ་ནས་སངས་རྒྱས་འོད་དཔག་མེད་དང་ཕྱོགས་བཅུའི་སངས་རྒྱས་ཀྱི་མདུན་ནས་ཐེག་ཆེན་གྱི་ཆོས་ཐོབ་པར་ཤོག་ཅིག ཆོས་ཀྱི་དོན་ཁོང་དུ་ཆུད་ནས་བྱང་ཆུབ་སེམས་དཔའི་སྤྱོད་པ་རླབས་ཆེན་སྤྱོད་པར་ཤོག་ཅིག ཞིང་ཁམས་དག་པའི་གནས་དེ་ནས་བརྩེ་བའི་ཤུགས་དྲག་པོས་ཀུན་ནས་བསླངས་ཏེ་མ་དག་པའི་ཞིང་ཁམས་ལ་རྫུ་འཕྲུལ་གྱིས་སོང་ནས་སེམས་ཅན་མང་པོ་འདྲེན་ནུས་པར་ཤོག་ཅིག སྤྱོད་པ་རྨད་དུ་བྱུང་པའི་སྟོབས་རྫོགས་ཏེ་སེམས་ཅན་ཐམས་ཅད་ཀྱི་དོན་དུ་རྒྱལ་བ་རྫོགས་པའི་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པར་ཤོག་ཅིག་ཅེས། དེ་ལྟར་བསམ་ནས་རྒྱུན་དུ་སྨོན་ལམ་བཏབ་ན་སངས་རྒྱས་འོད་དཔག་མེད་པའི་ཐུགས་བསྐྱེད་དང་། རང་གི་བསོད་ནམས་ཀྱི་སྟོབས་སྨོན་ལམ་རྣམ་པར་དག་པའི་མཚམས་སྦྱར་བ་ཐམས་ཅད་མཉམ་དུ་འཛོམས་ན་སྨོན་ལམ་འགྲུབ་པ་རེད། དེ་དུས་འཆི་བ་ཞེས་པ་དེ་ཡང་རུ་ཞིག་བཀལ་བའི་སྣང་བ་ཙམ་རེད། འུ་ཚོས་རུ་ངན་བཀལ་བ་འདྲ་ཞིག་ག་ལ་ཡིན། མི་གཙང་བའི་རྫས་མི་གཙང་བའི་ལུས་མི་གཙང་བའི་ལས་ཐམས་ཅད་བསྐྱུར་ཏེ། འཇའ་འོད་གུར་ཁང་གི་ལམ་འཐེན་ནས་ནུབ་ཕྱོགས་བདེ་བ་ཅན་གྱི་ཞིང་ཁམས་ལ་འགྲོ་ཆོག་པ་རེད། སྤྱན་རས་གཟིགས་དང་མཐུ་ཆེན་ཐོབ་སོགས་ཀྱིས་ལམ་གྱི་སྣ་ཁྲིད་དེ་ལྷ་དང་ལྷ་མོས་མེ་ཏོག་གི་ཆར་ཕབ། བདུག་སྤོས་སྣ་ཚོགས་ཀྱི་དྲི་ཞིམ་འཐུལ་ཞོར་དུ་འགྲོ་བའི་ཆེད་དུ། འུ་ཚོས་ཞིང་ཁྲིད་བཤད། ཞིང་སྒྲུབ་འཚོགས་བདེ་བ་ཅན་ལ་འགྲོ་བྱེད་ཀྱི་རྒྱུ་བཞི་སྒྲུབ་ཀྱིན་འདུག་པ་འདི། རུ་བཀལ་བའི་སྔ་འོར་ཞིག་འཕེན་གྱིན་ཡོད་པ་རེད། དེས་ན་ཐམས་ཅད་ཀྱིས་དགའ་དགའ་སྤྲོ་སྤྲོ་གྱིས། གསོན་ན་དགའ་འདུག་ཚོགས་བསག་སྨོན་ལམ་ཉིན་རེ་བྱེད་སར་ཡོད་ན་བསོད་ཆེན་རེད། ཤི་ན་སྐྱིད་འདུག་འགྲོ་ས་བདེ་བ་ཅན་རེད། མ་ཤི་བསྡད་ཀྱང་སྡུག་བསྔལ་མྱོང་བྱེད་རེད། དེས་ན་ན་དགའ་ཤི་སྐྱིད་རེད། གང་བྱུང་དེའི་ཆོག་རེད། གུ་ཡངས་ཁྲོལ་ལེ། སེམས་ལྷོད་ཤ་རེ་གྱིས་དང་སྐྱིད་པོ་རྗེས་སུ་ཡོད། དེ་རིང་གི་ཆོས་མཚམས་མི་ལུས་དོན་དང་ལྡན་པར་འགྲུབ་པར་ཤོག་ཟེར་ས་འདི་ནས་འཇོག རང་རེས་ཆོས་བཤད་ཆོས་ཉན་ཆོས་སྒྲུབ་གང་སྨྲས་ཀྱང། དམ་པའི་ལྷ་ཆོས་ལ་བློ་ཁ་ཕྱོགས་པ་འདི་མ་འོངས་ཕྱིན་ཆད་ཀྱི་སྐྱིད་ཐབས་བདེ་ཐབས། སྡུག་བསྔལ་མེད་ཐབས། ཚེ་འདི་ལ་ཚེ་ལྷག་ཅི་ཡོད་ཀྱི་ཚེ་སྐེད་ཚེ་སྨད་ཚེ་ཕྱི་མའི་སྐྱེ་བ་ཐམས་ཅད་ལ་སྡུག་བསྔལ་མེད་པའི་བདེ་བ་ཞིག་དོན་གཉེར་གྱི་ཆེད་དུ། བསླུ་མེད་སྐྱབས་ཀྱི་དམ་པ་དཀོན་མཆོག་གསུམ་ལ་བཟུང་ནས་སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་ལམ་སྒྲུབ་པའི་གྲོགས་ཀྱི་འདུ་ཤེས་ལ་སོགས་པས་བློ་སྟོབས་ཆེ་ཆུང་ལྟར་དུ་འགའ་རེའི་རང་དོན་ཙམ་ཞིག འགའ་རེའི་རང་གཞན་གཉིས་དོན་ཞིག ཐེག་ཆེན་མདོ་སྔགས་ཀྱི་ལམ་གྱི་ཁྱད་ཆོས་དང་བསྟུན་ཏེ་འགའ་རེའི་སེམས་ཅན་གཞན་དོན། མདོར་ན་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པའི་ཆེད་དུ་ཐེག་ཆེན་གྱི་ལམ་ནས་དམ་ཆོས་སྒྲུབ་པ། བརྒྱ་ཡར་བཤད་སྟོང་ཕྱིར་བཤད་གང་བྱས་ཀྱང་མདོ་འགག་རྩ་བ་དེ་འདྲ་ཞིག་རེད། ཁ་བཤད་མཐོ་ཡང་ལག་ལེན་གྱི་སྟེང་ནས། གཅུས་ཕུར་རྩ། སྣ་ཐག་སྣ་རྩ་ལ་གཏུག་ན་དམ་པའི་ལྷ་ཆོས་ལ་ལག་བསྟར་བྱེད་པའི་ཆོས་པ་བཟང་པོ་ཞིག་ལྟ་ཅི། འཇིག་རྟེན་ཡ་རབས་ཀྱི་སྤྱོད་པ་དང་མཐུན་པའི་མི་ཚུལ་ལྡན་ཞིག་གི་ཚད་དུ་ཡང་ཐོན་མེད་པ་འདི། ད་སྔ་ཆོས་རྣ་བས་གོ་མ་མྱོང་བར་ལྷག་སོང་བ་ཞིག་ཀྱང་མ་རེད། ས་ཆོས་ས་ཆོས་ཡུལ་དུ་སྐྱེས་པས་དུས་རབས་སྔོན་མའི་དུས་སྨད་ཀྱི་མི་འདྲ་ཡིན་ན་མི་ཤེས་མ་གཏོགས་ཆོས་གཏན་ནས་གོ་མ་མྱོང་བ་ཞིག་མ་རེད། ཆོས་ཐོས་པ་རྒྱུད་ལ་སྦྱར་ལུགས་ཀྱི་ལག་ལེན་འདེབས་མ་ཐུབ་པར་མདའ་ལན་གཞུ་ལན་གྱིས་ཆོས་ཆེ་ས་ལ་མ་ཐོན། ཆུང་སའི་མ་མགུ་བར་ཐ་མ་ལག་སྟོང་དུ་ལུས་ཡོད། ད་དུང་འདི་ལྟར་མུ་མཐུད་དུ་སོང་ན་ཡར་གྱི་ཤ་རྗེས་མ་ཆོད་མར་གྱི་ཤེའུ་རྗེས་མ་ཆོད་པར། ལམ་མཁན་གཤིན་རྗེས་ལས་མཁན་དང་ངོ་ཤེས་ཨ་ཁུ་ཆོས་རྒྱལ་མ་གཏོགས་མེད་པར་རྡོག་སྣེ་རྡོ་ལ་ཐུག་རྒྱུར་ཐག་རིང་བ་མ་རེད། དེས་ན་རང་རེ་ཆོས་པར་མ་གྱུར་པའི་སྔོན་དུ་མི་བྱེད་ཤེས་དགོས། མི་ལོས་ཡིན་མི་མིན་ན་ཟོག་ཨེ་རེད་སྙམ་ན། རྐང་བཞི་ས་ལ་བཙུག་པའི་ནོག་ལྐོག་ཤལ་དང་ལྡན་པའི་མཚན་ཉིད་ཅན་གྱི་ཟོག་མ་རེད་མོད། རྐང་གཉིས་གྱེན་དུ་འགྲེང་བའི་རྨོངས་མུན་ཅན་གྱི་བྱོལ་སོང་ཞིག་གི་མཚན་ཉིད་ལ་ཉེ་ཡོང་བ་རེད། དེས་ན་དང་པོ་དུད་འགྲོ་ལས་ཁྱད་དུ་འཕགས་པའི་མིའི་རྣམ་དཔྱོད་ཀྱི་རྩལ་དེའི་ཁྱད་ཆོས་ཤིག་འདོན་ཤེས་དགོས། ཚེ་འདིར་མ་གཏོགས་བསམ་མ་ཤེས། དེ་ཡང་ལེགས་པོ་ཞིག་བསམ་མ་ཤེས་ཚེ་དུད་འགྲོ་ལས་ཁྱད་དུ་འཕགས་པའི་ཁྱད་ཆོས་ཤིག་འདོན་མ་ཐུབ་པ་རེད། མི་དང་དུད་འགྲོའི་བར་གྱི་ཁྱད་པར་འབྱེད་བྱེད་དེ་གང་ཡིན་ཞེ་ན། ཆོས་སྒྲུབ་ཤེས་མི་ཤེས་ལ་ཐུག ཚེ་འདིའི་བྱ་བཞག་ལ་ད་དུང་དུད་འགྲོས་མཁས་ས་མང་བ་རེད། འདི་ནས་རང་རེས་དེའི་ལོ་རྒྱུས་ཤིག་བཤད་ན། དཔའ་རྩལ་དྲུག་གི་ཐོག་ནས་བཤད་ན་ཁྲ་དར་མས་བྱེའུ་དང་ཕུག་རོན་གྱི་ཁྱུ་དེད་ན་ཅི་འདྲ་འདྲའི་སྟོབས་རྩལ་ཞིག་འདུག ཁྲ་དེ་ཚོ་གཟུགས་ཆུང་རུང་རྡོ་ཕ་བོང་ལ་གཤོག་ལྕག་བརྒྱབ་ན་གས་འགྲོ་ཞེས་ཟེར་བ་རེད། དེར་མ་ཟད་གླག་རོག་མོ་ཟན་ལ་ཞེན་དུས་གླག་གིས་གླ་བ་དང་རི་བོང་ལུ་གུ་དེ་ཚོ་བཟུང་སྟེ་ནམ་མཁའི་ཁམས་ལ་བཀྱགས་ནས་བར་སྐབས་ཤིག་ལ་མི་ཁྱག་གི་བསམ་ཚེ་འཕང་བཞག་ཚེ་ཡང་གླག་མོས་བར་སྣང་ཁམས་ནས་བཟུང་སྟེ་དེ་ལྟར་བཟུང་རེས་ལག་རེས་ཤ་སྟག་བྱས་ཏེ་ཁྱེར་འགྲོ་བ་རེད། ད་དུང་གླག་ཕོ་བས་མོ་ཡི་རྩལ་མྱུར་འདུག་ཟེར་སྲོལ་རེད། དེ་འདྲའི་སྤྱང་གྲུང་དང་བཅས་ཡོད་པ་རེད། དགྲ་ཐབས་ཀྱི་ཕྱོགས་ནས་བསམ་ན་དུད་འགྲོ་མཁས་ས་ཡོད་པ་རེད། བྲག་ཞིག་གི་རྒྱབ་ཏུ་བྱ་རོག་ཅིག་གིས་ཚང་བཅས་ཡོད་པ་ཉིན་གཅིག་ཕ་མ་མེད་ཤུལ་དུ་འུག་པ་ཞིག་ཡོང་ནས། བྱ་རོག་གི་ཕྲུ་གུ་ཁྱེར་སོང་སྟེ་གཤོག་པའི་ཞབས་ནས་སྙིང་བྲུས་ཏེ་བསད་སོང་བ་རེད། དེའི་ཤ་ལན་དུ་ཕོ་རོག་གཉིས་ཀྱིས་འུག་པ་དེད་ནས་ཤི་བ་སྲོག་ལ་མ་འཛེམ་པར་དེད་དེད་འཛིང་འཛིང་གི་མཐའ་མར་འུག་པ་ཚུར་ལ་བཟུང་ནས་བུ་གསད་ས་ལ་ཁྱེར་ནས་བུ་གསད་གསད་བྱས་ཏེ་བསད་བཞག་པ་རེད། འུ་ཚོ་ཅི་འདྲའི་བུ་ངར་བ་ཞིག་ཡིན་ནའང་དཀའ་བ་རེད་མོད། བློ་རིག་པའི་ཐད་ནས་བྱེ་སྦྲུལ་ཞིག་ནམ་ཡིན་ན་སྦྲུལ་གྱིས་གནོད་བསྐྱལ་གྱིན་ཡོད་ཚེ། ཉིན་གཅིག་བྱེ་སྦྲུལ་གྱིས་ཁོ་རང་གི་ཚང་གི་སྐེད་པ་ཙམ་གྱི་སྟེང་ནས་མར་གནམ་ཁུང་ཞིག་བཏོད་ནས། དེ་ནས་བྱེ་སྦྲུལ་གྱིས་སྦྲུལ་ལ་ནམ་རྒྱུན་དམའ་ཕབས་ཀྱིན་ཡོད། སྦྲུལ་གྱིས་རྗེས་དེད་ཚེ་བྱེ་སྦྲུལ་ཚང་གི་ནང་དུ་བྲོས། སྦྲུལ་གྱིས་ཚང་ནང་དུ་དེད་ཚེ་བྱེ་སྦྲུལ་གནམ་ཁུང་ནང་ནས་གྱེན་ལ་བུད་དེ་ཕྱི་རོལ་ཏུ་སོང་། སྦྲུལ་སྣ་ལྡོག་སྟེ་ཚང་གི་ཕུག་ལ་སོང་ཚེ་བྱེ་སྦྲུལ་གྱིས་གནམ་ཁུང་ནང་ནས་མར་སྦྲུལ་གྱི་སྐེད་པ་ལ་སོ་བཏབ་སྟེ་བསད། ཡང་འཕྱི་བདའ་བ་ཞིག་གིས་འཕྱི་བ་ཞིག་དེད་ཡོང་ནས་ཁུང་བུ་ཞིག་གི་ནང་དུ་བཙུད། འཕྱི་བདའ་བས་བལྟས་ཚེ་ལག་པས་ཟིན་ས་ཞིག་ན་འཕྱི་བ་ཡོད་པས། འཕྱི་བདའ་བས་འཕྱི་བའི་རྐང་པ་ནས་བཟུང་སྟེ་མར་ལ་འཐེན་དུས་འཕྱི་བས་གྲུ་མོ་གཉིས་ཀ་ཐད་ལ་བརྒྱང་ནས་སྲ་བཟུང་སྟེ་ཁ་ཕྱིར་ལ་འཁོར་ནས་མིའི་ལག་པ་ལ་སོ་བཏབ་ནས་རྨ་བྱས། རོགས་པ་རྣམས་གྱིས་འཕྱི་བ་ཟིན་ནམ་ཞེས་དྲིས་པས་ངས་འཕྱི་བ་ཟིན་མ་ཐལ་མོད་འཕྱི་བས་ང་ཟིན་སོང་ཞེས་སྨྲས་པ་རེད། སྡུག་ཐུག་ན་ཐབས་དང་སྙིང་རུས་དེ་འདྲ་གཅིག་ཡོད། གཡག་ཡུ་ལུ་ཞིག་དང་རྭ་ཅོ་ཅན་གཉིས་རྡུང་ཁ་གཏུག་ནས་རྭ་ཅན་ཁེ་སོང་བ་རེད། ཡུ་ལུས་དེ་ལ་ཞེ་འཁོན་བཟུང་ནས་རྩལ་ཉིན་མང་པོ་ཞིག་ལ་སྦྱངས་ནས་ཡང་གཅིག་འཐབ་དུས་གཡག་རྭ་ཅན་མཐའ་མགོ་ནས་འཕང་བཞག་པ་རེད། དེ་མིན་ནའང་དུད་འགྲོ་དགྲ་ཐབས་ལ་མཁས་པ་ཡོད་པ་རེད། སྲིད་སྡེ་སྐྱོང་ལུགས་ཀྱི་ཐད་ནས་བསམ་བློ་བཏང་ན། ས་ཆ་ཞིག་གི་ལྕང་མའི་གསེབ་ཅིག་ན་བྱ་སྐྱ་ཀའི་ཚང་མང་པོ་ཞིག་ཡོད་དེ་འུག་འུ་ཆུང་གིས་འཕྲོག་སོང་བ་རེད། ཚང་བདག་སྐྱ་ཀ་བཟའ་བ་གཉིས་ཀ་སོང་ནས་གཞན་པ་ནས་སྐྱ་ཀ་མང་པོའི་དམག་དཔུང་ཞིག་བོས་ཡོང་སྟེ། དམག་མང་པོ་རུབ་ནས་འུག་འུ་ཆུང་ཡུལ་ཕུད་བཞག་པ་རེད་ཟེར་བའི་གཏམ་རྒྱུད་ཡོད་པ་རེད། གཉེན་དང་བུ་རྒྱུད་སྐྱོང་བའི་ཐད་ནས་དུད་འགྲོ་མཁས་པ་རེད། ཟླ་བ་རེ་རེ་ཙམ་གྱི་ཕ་མཉམ་བུ་མཉམ་རེད་འགྲོ་འདུག འུ་ཚོས་ལོ་མང་པོ་ཞིག་ལ་ཕ་མཉམ་བུ་མཉམ་རེད་ཐབས་མི་ཐོན་པ་རེད། རྒྱུ་ནོར་བསོག་སྐྲུན་གྱི་ཐད་ནས་ཡིན་ནའང་བྱི་ལོང་དང་ཙི་གུ་ཚོས་ས་འོག་གི་གྲོ་མ་ལ་སོགས་པ་གསོག་པ་དང་། དུས་རྒྱུན་དུ་གྲོ་ནས་འབྲས་སྲན་བརྐུས་ཏེ་དེ་འདྲ་གཅིག་བསོག་གི་ཡོད་པ་རེད། གླང་རི་ཐང་པ་ངོ་ནག་གི་མཎྜལ་གྱི་ནང་གི་གཡུ་བྱི་བ་གཉིས་ཀྱིས་བརྐུས་ཏེ་གཅིག་པོས་མ་ཁྱག་པར་གཅིག་པོས་འཐེན། གཅིག་པོས་ཕུལ་བས་གླང་རི་ཐང་པ་གཅིག་འཛུམ་མྱོང་ཚུལ་བཤད་པ་ཡོད། དུད་འགྲོ་འགའ་རེ་རྒྱུ་ལ་ཆགས་ཞེན་ཡང་དེ་འདྲ་ཞིག་ཆེ་བ་རེད། མི་ཞིག་གིས་བྱི་ཚང་ནང་ནས་གཡུ་ཞིག་རྙེད་དེ་ཁྱེར་སོང་བས། ཕྱི་ཉིན་བྱི་ཚང་ནང་ལ་གཅིག་བལྟས་ཚེ་བྱི་བ་རྩྭ་འཇག་མ་ཞིག་གིས་སྐེ་བསྡམས་ཏེ་ཤི་ཡོད་པ་རེད། བཟོ་སྐྲུན་ལས་ཀ་ལ་ཡང་དེ་འདྲ་མཁས་པ་རེད། ཁ་ལ་ཡུག་གི་ཁང་པ་ལས་ལུགས་དང་སྲོག་ཆགས་འགའ་རེའི་ཚང་ལས་ལུགས་ལ་ལྟོས་དང་། ཁ་ལ་ཡུག་གི་ད་དུང་ས་དཔྱད་བཟང་ས་ཚོ་ལྟ་ཤེས་ཟེར་སྲོལ་ཡོད་པ་རེད། ས་དཔྱད་མ་བཟང་ན་ཁང་པ་ལས་པ་མ་རེད། ས་དཔེ་ལྟ་རྒྱུ་ལ་སོགས་པར་དེ་འདྲ་མཁས་པ་དང་། ད་དུང་ནམ་ཟླ་དུས་བཞིའི་འགྱུར་བ་དང་འབྱུང་བཞིའི་རང་བྱུང་གི་འགྱུར་བ་སྔོན་དཔག་བྱེད་པ་ལ་མི་ལས་ཀྱང་དུད་འགྲོ་མཁས་ཤིང་། ད་ལོ་རྒྱ་ཡུལ་དུ་ས་འགུལ་མ་བརྒྱུག་པའི་སྔོན་དུ་འབུ་གྲོག་མ་ཐམས་ཅད་ཀྱིས་རུ་སྤོར་ཏེ་ཉིན་ལམ་མང་པོར་འཕྲེང་བསྒྲིག་ནས་གཤར་སོང་བས། ཞིང་པ་རྣམས་ཀྱིས་ས་འགུལ་རྒྱུགས་གྲབ་མ་རེད་དམ་ཞེས་སྨྲས་པས། ཆེད་མཁས་ཀྱི་ཚན་རིགས་པ་རྣམས་ཀྱིས་འདི་རང་བྱུང་ཁམས་ཀྱི་འགྱུར་བ་གཞན་ཞིག་གིས་རྐྱེན་རེད་ཅེས་འགྲེལ་བཤད་རྒྱག་ལོག་བྱས། ཐ་མ་ཁྱེད་རྣམས་གསོ་བ་ལས་འབུ་གྲོག་མ་གསོས་ན་དགའ་འདུག་ཅེས་པ་ཞིག་རེད་འདུག བྱ་རྒོད་དག་ཀྱང་དགེ་བཤས་ཉག་གི་དུར་ཁྲོད་ནས་བྱ་འབོད་བྱས་དུས་ཐོན་ཡོང་བ་དེ། མི་འགའ་རེར་ཡོད་པའི་མངོན་ཤེས་ཕྱོགས་རེ་བ་དེས་དོ་ཟླ་ཡོད་མེད་མི་ཤེས། འུ་ཚོ་འཇིག་རྟེན་གྱི་མི་ཡིན་ཡང་། འདི་ཕྱི་གཉིས་ཀའི་དོན་སྒྲུབ་མི་ཤེས་པ་དག་ཅི་ཞིག་གི་གྲལ་དུ་རྩི་སྟེ། ཚེ་འདིའི་དོན་ལ་ཕོ་རྒོད་དུ་རྩི་རྒྱུ་ཚོས་དུད་འགྲོ་བཟང་བ་ཞིག་གིས་དོ་ཟླ་ཡང་མི་འོང། བློ་རིག་དྲན་འཁྲུལ་གྱིས་མ་ཐུབ་ན་ཤེད་སྟོབས་ཤུགས་ཀྱིས་ཅི་ཐུབ་སྟེ་གླང་པོ་ཆེ་གཅིག་མི་མང་པོ་ཞིག་འཐམ་ན་ཐུབ་ས་མི་འདུག འོ་ན་གང་གིས་ཁྱད་པར་དུ་འཕགས་ཤེ་ན། ཤེས་རབ་ཀྱིས་ཏེ། འདི་ལྟར་ཚེ་འདི་ཕྱི་དང་རང་གཞན་གཏན་བདེའི་ལམ་སྒྲུབ་ཤེས་པ་ལ་མི་མ་གཏོགས་མེད། དམ་པའི་ཆོས་ཡང་མི་ཡུལ་དུ་དར་བ་རེད། དེས་ན་དལ་འབྱོར་གྱི་མི་ལུས་རིན་པོ་ཆེ་དང་འདྲ་བ་ཞིག་ཐོབ་ཡོད་པ་འདི། འཕྲོ་བརླག་མི་བྱེད་པར་དོན་དང་ལྡན་པ་ཞིག་བྱ་དགོས། དལ་འབྱོར་གྱི་མི་ལུས་ཐོབ་སྟེ་དགེ་བའི་ལས་མ་འགྲུབ་པར་ཤི་ན་ནོར་བུ་རིན་ཐང་གཞལ་མེད་ཅིག་རྙེད་ཀྱང་དེ་ལ་གསོལ་བ་མ་བཏབ་པར། འདོད་དོན་མ་བསྒྲུབས། ལོངས་མ་སྤྱད་པར་དོར་བཞག་པ་ལྟ་བུའོ། །ཁྱད་པར་དུ་འུ་ཚོ་བོད་ཆོས་ལྡན་གྱི་ས་ལ་སྐྱེས་པའི་མི། མི་ཐོག་མི་རབས་ཀྱི་རིང་ལ་ཆོས་ལ་སྐྱེས་ཤིང་ཆོས་ལ་རྒས་པའི་ཐུན་མིན་གྱི་ཁྱད་ཆོས་ལྡན་པའི་ས་ཆའི་མི་ཡིས། མ་མཐའ་རང་འགོ་ཐོན་པའི་ཆོས་རེ་ཤེས་དགོས་པ་རེད་མ་གཏོགས་དེ་མ་ཤེས་ཕྱིན་དེ་མིན་ཤེས་ཡོང་བ་ཅི་ཞིག་ཡོད་ཅི་ཡང་ཡོད་པ་མ་རེད། གནམ་ནས་འཕུར་བྱེད་ནི་ལས་མི་ཤེས། ས་ནས་རྒྱུག་བྱེད་ནི་ལས་མི་ཤེས། མེ་ཐུར་སྒམ་ཞིག་ཀྱང་ལས་མི་ཤེས། རང་ལ་ཡོད་པའི་ཆོས་རིག་གཞུང་རྩ་ཆེན་འདི་མ་ཤེས་ཕྱིན་དེ་མིན་ཅི་ཡང་མི་ཤེས། དེར་མ་ཟད་ཨར་འདམ་དང་ལྕགས་ཀྱི་ཁང་པ་ལས་སྟངས་ཤིག་ཤེས་ན་རང་རེའི་ལུང་པ་འདིའི་ནང་རྐྱང་པ་ནས་ལོ་རེར་སྒོར་མོ་ཁྲི་སྟོང་ཕྲག་ཡན་ཆད་ཀྱི་འཛུགས་སྐྲུན་བྱེད་ཀྱིན་ཡོད། དེ་ས་ཆ་རང་གི་ལག་ལ་སྨིན་སོང་ན་ལེགས་མོད་དེ་འདྲ་ཙམ་ཞིག་ཀྱང་ཤེས་པ་མ་རེད། མདོར་ན་རང་ལག་དུ་ཡོད་ཀྱང་རང་སྒོ་ནས་སྒྲུབ་ཆོག་པའི་ཆོས་དེ་རང་གི་སྒྲུབ་ཤེས་དགོས། དེས་ན་དུད་འགྲོ་ལས་དྲག་ཅིག་བྱེད་དགོས། རང་ཉིད་ཡག་ན་བསམ་མཁན་རྣམས་ཀྱིས་དང་པོ་རང་ཉིད་མི་ཚད་ལྡན་ཞིག་བྱ། དེ་ནས་གོམ་པ་གཉིས་པ་ཆོས་པ་རྣམ་དག་ཞིག་བྱས་ཏེ། ཚེ་འདི་ཕྱི་རང་གཞན་གཉིས་དོན་འགྲུབ་དགོས་པ་རེད། ཆོས་འཇིག་རྟེན་གཉིས་ཀ་ལག་རྒྱབ་ཐོ་ཐུག་མེ་ཆུ་དགྲ་གཤེད་མ་རེད་དམ། མེ་ཆུ་གཉིས་ཀ་མཉམ་དུ་འཇོག་མི་རུང་ཆོས་འཇིག་རྟེན་དེ་འདྲ་མ་ཡིན་ནམ། དེ་གཉིས་ཀ་མཉམ་དུ་སྒྲུབ་ཐབས་ཨེ་ཡོད་དམ་སྙམ་ན་བདེན་པ་རེད། འཇིག་རྟེན་ཆོས་བརྒྱད་ཀྱི་དོན་གཉེར་གཞན་གནོད་གཞི་དང་བཅས་པ་མ་སྤངས་བར་སྒྲུབ་ན་དམ་པའི་ཆོས་དང་རྒྱབ་འགལ་ལོས་ཡིན་མ་གཏོགས། འཇིག་རྟེན་ཡང་དག་གི་ལྟ་བ་རྒྱུ་འབྲས་ཡིད་ཆེས་ཀྱི་དད་པ་ལ་བརྟེན་ནས་མཆོག་གསུམ་སྐྱབས་སུ་འཛིན་ཞིང་ལས་འབྲས་ལ་བླང་དོར་ཚུལ་བཞིན་དུ་བྱེད་པ་དམ་པའི་ཆོས་ཀྱི་རྨང་གཞི་ཡིན། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། འཛེག་ན་ཐར་བ་གམ་ན་གནས། །ཞེས་གསུངས་སོ། །དེས་ན་སངས་རྒྱས་ཀྱི་བསྟན་པ་ནི་མས་ནས་ཡར་ལ་འགོ་བའི་སྐས་ཐེམ་ལྟར་ཐེག་པ་རིམ་བགྲོད་ཀྱི་ལམ་ཞིག་ཡིན་པས་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེས། སྐྱེས་བུ་གསུམ་གྱི་ལམ་རིམ་ཐེག་པའི་འཇུག་སྒོ་མཐའ་ཡས་པ་ཞིག་གསུངས་པས། རང་རེས་ཀྱང་དང་པོ་ཕོ་མོ་སེར་སྐྱ་རྒན་གཞོན་སུ་ཡིན་ཡང་གཞན་གྱི་སྲོག་མི་གཅད། མི་གེས་ཤི་ནའང་སེམས་ཅན་གྱི་སྲོག་གཅད་པ་མ་རེད་ཅེས་གཞན་གྱིས་ཟེར་བ་རང་གིས་ཀྱང་བསམ་པ་དེ་འདྲ་ཞིག་དགོས། དེའི་སྟེང་དུ་རྐུ་མི་བྱེད་པ་ཞིག་གསེར་སིལ་མ་གཞོང་པ་གང་ལག་ཏུ་བཞག་ན་རྐུ་མི་དྲན་པ་ཞིག་བྱེད་དགོས། དེའི་སྟེང་དུ་རྫུན་ཆེན་པོ་ལྟ་ཅི་རྫུན་ཆུང་ངུ་ཁ་རྫུན་སྣ་རྫུན་མི་བཤད་རྒྱུ་དམ་བཅའ་ལག་ཏུ་ལེན་ཐུབ་པ་ཞིག་རེད་ཐུབ་པའི་སྟེང་ནས། ལྐོག་ལབ་བླ་བཙག་མི་ཡི་སྐྱོན་ཁོ་ན་བཤད་ཀྱིན་མི་འདུག་པ་དེ་འདྲའི་མི་དེས་དགེ་བསྙེན་གྱི་སྡོམ་པ་ཞུས་ཏེ་བསླབ་པའི་གཞི་ལྔ་སྲོག་གཅོད་མ་བྱིན་ལེན་རྫུན་གསུམ་པོ་སྔར་ནས་ཀྱང་མི་བྱེད། དེའི་སྟེང་དུ་ལོག་གཡེམ་དང་ཆང་རག་སྤངས་བར་མ་ཟད་ཤོ་བག་རྒྱལ་སྐུགས་ཁ་དུད་སྣ་དུད་དེ་ཚོ་སྤོང་ནས། དཀོན་མཆོག་གསུམ་ཤི་ཡང་མི་སྤོང་ཞིང་རྒྱུན་དུ་དཀོན་མཆོག་གསུམ་ལ་མཆོད་ཅིང། རྒྱུ་འབྲས་སྲུང་ན་ད་གཟོད་ཆོས་པ་ཞིག་རེད། ཆོས་དད་པ་ཞིག་རེད་ཟེར་ཆོག དེའི་ཆ་རྐྱེན་མ་འཛོམས་ན་ཅི་བྱས་ཀྱང་ཁ་ཆོས་མ་གཏོགས་དོན་ཆོས་ཤིག་འགྲུབ་དཀའ་བ་རེད། མི་ཡ་རབས་ཤིག་གི་ཆ་ཚད་ཀྱང་མེད་ན་ཆོས་པ་བཟང་པོ་ཞིག་གི་ནང་དོན་ཚང་བ་ནི་མི་རྩེབས་གནམ་གྱི་སྐར་མར་ལག་བསྙབ་རེད། བདེ་བ་ཅན་ནི་མི་དེའི་རིགས་དང་བར་ཐག་ཤིན་ཏུ་རིང་པ་རེད། ཆོས་དང་འཇིག་རྟེན་གཉིས་ཀ་སྤྱིར་བཤད་ན་རྒྱབ་འགལ་ཡིན་ཡང་། གོང་དུ་བཤད་པ་ལྟར་འཇིག་རྟེན་ཡང་དག་གི་ལྟ་བ་ལ་བསྟེན་པའི་ལམ་ཞུགས་ལྷ་མིའི་ཐེག་པ་ནས་སྐྱེས་བུ་ཆུང་འབྲིང་དང་ཐུན་མོང་གི་ལམ་བརྒྱུད་དེ་ཐེག་ཆེན་ཐར་བའི་ལམ་སྣེ་ཞིག་ཟིན་དགོས་པ་བསྟན་པ་ཐམས་ཅད་འགལ་མེད་དུ་རྟོགས་པ་དང་། གཞུང་ལུགས་ཐམས་ཅད་གདམས་པར་ཤར་བ། དེ་ལ་བསྟེན་ཏེ་རྒྱལ་བའི་དགོངས་པ་རྨ་མེད་དུ་རྟོགས་པ། ཉེས་སྤྱོད་ཆེན་པོ་རང་འགག་ཏུ་འགྲོ་བའི་ཉམས་ལེན་གྱི་གནད་ལ་ཁེལ་དགོས་པ་ཞིག་གིས་དེ་འདྲ་སྒྲུབ་དགོས་པ་རེད་མ་གཏོགས། ཆོས་འཇིག་རྟེན་གཉིས་ཀའི་འབྲེལ་མཐུད་མ་ཤེས་སངས་རྒྱས་སེམས་ཅན་གཉིས་ཀ་རྒྱང་ཆད་འཁོར་འདས་གཉིས་ཀ་ལྟེ་ཆད་ཚེ། སེམས་ཅན་ལ་སངས་རྒྱས་ཐོབ་པ་དང་སངས་རྒྱས་ཀྱི་ཐུགས་རྗེ་སེམས་ཅན་ལ་འཇུག་པ་མེད་ན། གདུལ་བྱ་ཕྲིན་ལས་དང་བཅས་པའི་སྟེང་ནས་འགལ་བ་མང་པོ་ཞིག་འདུ་ཡོང་བས། ཤིན་ཏུ་དོན་དང་ལྡན་པ་ལ། །ཚིག་གཅིག་ལན་གཉིས་བཟླ་བར་བྱ། །ཞེས་གསུངས་པ་ལྟར། མི་ཞིག་ཡིན་པའི་ཆ་ནས་ཟོག་ལྟར་བདག་པོས་དེད་ན་སྒུ་རུ་རུ། རྐུན་མས་ཁྲིད་ན་སྒུ་རུ་རུ་བྱེད་མི་རུང་། ལེགས་ཉེས་བླང་དོར་ཐམས་ཅད་རང་གི་རྣམ་དཔྱོད་ཀྱི་ཤེས་རབ་ལ་འདྲེན་ཐུབ་པའི་རྩལ་བཏོན་ཏེ་བྱ་བ་ཁྱད་འཕགས་ཤིག་རང་གིས་སྒྲུབ་ཤེས་དགོས་པ་རེད། ས་ཆ་གཞན་དང་མ་འདྲ་བའི་རྫོགས་ཆེན་ཚང་ལ་སྔ་ནས་ད་ལྟའི་བར་དུ་གཞན་དང་མི་འདྲ་བའི་ཁྱད་ཆོས་ཁྱད་པར་བ་ཅི་ཞིག་ཡོད་ཅེ་ན། བརྟགས་ཤིང་དཔྱད་པ་མང་པོ་མ་བཏང་ན་གྱ་ཚོམ་མ་བརྟགས་མ་དཔྱད་པར་ཅི་ཞིག་གི་ཐད་ནས་ཡིན་ན་ཁས་མི་ལེན་པ་མཁས་པའི་དར་གྱི་ཕྱི་བཞག་ལྟར་སྲོལ་བཟང་ཡོད་པ་རེད། དེ་དམ་པ་གོང་མའི་ཐུགས་བསྐྱེད་དང་ལས་སྨོན་བཙན་པོས་བསྐོས་ཐང་། ཟློག་མེད་ཐོད་པའི་རི་མོ་ཡང་ཡིན་པ་རེད། ཇི་འདྲའི་ཆེན་པོ་རི་འདྲ་བ། མཐོན་པོ་གནམ་འདྲ་བ། ཁོས་རྩེ་མོ་ལྷ་ལ་སླེབས་ཡོད། སྐེད་པ་གཉན་ལ་ཆགས་ཡོད། རྩ་བ་ཀླུ་ཡུལ་ལ་ཟུག་ཡོད་ཅེས་བཤད་ཀྱང་། དང་པོ་བསྟན་འཛིན་གྱི་སྐྱེས་བུས་དག་ཐེར་གྱི་སྟེང་ནས་བསྟན་པ་ལ་བྱི་དོར་བྱེད་པའི་རྣམ་དཔྱོད་དང་སྙིང་སྟོབས་ཀྱི་ཡོན་ཏན་ལ་མངོན་རྒྱུ་ཡོད་མོད་ཡོད་དགོས་པའང་ཡང་རེད། དེ་ཅིའི་ཕྱིར་ཞེ་ན། འུ་ཚོ་སྐྱབས་མེད་མགོན་མེད་ཉམ་ཐག་འཁོར་བའི་སེམས་ཅན་གྱི་སྐྱབས་ཡུལ། ནང་བ་སངས་རྒྱས་པ་ཞིག་ཡིན་ཕྱིན་བློ་གཏད་ས་སྐྱབས་དཀོན་མཆོག་གསུམ་རེད། དེ་ཡང་མཐར་གཏུག་ན་སངས་རྒྱས་དཀོན་མཆོག་གཅིག་ལ་འདུས་པ་ཡིན་པས། སངས་རྒྱས་བཅོམ་ལྡན་འདས་ཀྱིས་མ་འོངས་པར་ངའི་སྟོན་པ་དང་བསྟན་པ་གཉིས་ཀའི་རྒྱལ་ཚབ་དམ་ཆོས་འདུལ་བའི་བསྟན་པ་ཡིན་གསུངས་པས། འུ་ཅག་བོད་ཀྱི་ས་ཆ་ལ་མཁན་སློབ་ཆོས་གསུམ་ཀྱི་སྐབས་སད་མི་མི་བདུན་རབ་ཏུ་བྱུང་བ་ནས་བརྩམས་ཏེ་དགེ་འདུན་གྱི་སྡེ་དར་སངས་རྒྱས་ཀྱི་བསྟན་པ་ཚུགས། འོན་ཀྱང་རྒྱ་ནག་ཧྭ་ཤང་ལ་སོགས་པས་ལྟ་བ་རྙོག་མ་ཅན་དུ་ཅུང་ཟད་བྱས་ཚེ་སྤྱོད་པ་ཆལ་མ་ཆོལ་ཅན་དུ་འགྱུར་བའི་ཉེན་ཁ་ཡོད་པའི་སྐབས་ལ། མཁས་པ་ཀ་མ་ཤི་ལ་གདན་དྲངས་ཏེ་བསྟན་པ་དག་ཐེར་མཛད། དེའི་རྗེས་སུ་ཡང་ཡུན་རིང་སོང་བའི་དུས་མཚམས་ཞིག་ཏུ་གླང་དར་མས་འདུལ་བའི་བསྟན་པ་བསྣུབས་ཏེ། སྟོད་དབུས་གཙང་གི་ཡུལ་ནས་འདུལ་བའི་བསྟན་པ་བསྣུབ་དུས་སྨར་གཡོ་གཙང་གསུམ་གྱིས་འདུལ་བའི་པོ་ཏི་དྲེལ་རྒྱབ་ལ་བཀལ་ནས་མདོ་སྨད་དུ་བྲོས་ཡོང་བས། བསྟན་པའི་མེ་རོ་མདོ་ཁམས་སྨད་ནས་ཡར་ལ་གསོས་ཏེ་ཕྱི་དར་གྱི་བསྟན་པ་དར། ཡང་དེའི་རྗེས་སུ་དུས་ཡུན་རིང་པོའི་མཚམས་སུ་བསྟན་པ་དར་ནུབ་ཅི་རིག་པ་ལ་འཕྲད་དེ་ལྷ་བླ་མ་ཡེ་ཤེས་འོད་ཀྱིས་ཐུགས་བསྐྱེད་ལ་བརྟེན་ནས་ཇོ་བོ་རྗེ་དཔལ་ལྡན་ཨ་ཏི་ཤ་གདན་དྲངས་ཏེ་བསྟན་པ་དག་ཐེར་མཛད། སློབ་མ་ཁུ་རྔོག་འབྲོམ་གསུམ་ལ་སོགས་པས་བསྟན་རྒྱུན་བསྐྱངས་ཏེ་བསྟན་པ་དར། དེའི་རྗེས་སུ་ཡང་མར་ལ་ཉམས་ཆས་བྱེད་ཀྱིན་ཡོད་དུས་རྗེ་མཉམ་མེད་ཙོང་ཁ་བ་བྱོན་ཏེ་བོད་མཐའ་དབུས་ཀུན་ལ་སྟོན་པ་བསྟན་པ་གཉིས་ཀའི་བདག་ཉིད་ཅན་གྱི་དམ་ཆོས་འདུལ་པའི་བསྟན་པ་ཡོད་པ་ཞིག་མཛད་སོང་བ་རེད། སྔ་འགྱུར་རྙིང་མ་པར་མཚོན་ན་མཁན་ཆེན་ཞི་བ་འཚོ་ནས་ད་ལྟའི་བར་དུ་བསྟན་པ་ཕྱི་དར་ནས་གཙོ་བོ་སྨད་འདུལ་གྱི་འདུལ་བསྟན་གྱི་སྡོམ་རྒྱུན་རང་ལུགས་ཀྱི་བརྒྱུད་པ་མ་ཆད། ཁྱད་པར་དུ་རྫོགས་ཆེན་སྐུ་ཕྲེང་རིམ་བྱོན་དང་། རྒྱལ་སྲས་གཞན་ཕན་མཐའ་ཡས་ཀྱི་སྐུ་དུས་ནས་གདན་ས་འདི་གཅིག་པུར་མ་ཟད་མདོ་ཁམས་ཀྱི་ས་ཆ་གཙོ་བོར་བྱས་པའི། དགོན་སྡེ་ཆོས་རྒྱུད་མང་པོ་ཞིག་ལ་འདི་ནས་གྱེས་པའི་འདུལ་བའི་སྡོམ་རྒྱུན་དང་གཞི་གསུམ་གྱི་ཕྱག་ལེན་དར་བ་ཡིན་པས། བསྟན་པའི་རྩ་བ་དམ་ཆོས་འདུལ་བའི་གཞིར་བཟུང་སྟེ་བསྐྱངས་པ་ཞིག་ཡིན། གྲུབ་དབང་རྫོགས་ཆེན་པའི་གདན་ས་འདི་འདུལ་བསྟན་དར་བའི་རྩ་བ་ལྟར་ཡིན་པ་དང་། དེ་ཡང་ལོ་རྒྱུས་དེབ་ཐེར་ཆོས་འབྱུང་ཁུངས་མ་ཚོ་དང་སྡོམ་བརྒྱུད་ཀྱི་བརྒྱུད་རིམ་ལ་ལྟོས་དང་ཤེས་པ་ཡིན། འདུལ་བསྟན་ལ་རྫོགས་ཆེན་ཚང་གི་གདན་ས་འདི་ནི་སྔ་འགྱུར་རྙིང་མའི་འདུལ་བསྟན་གྱི་མགོ་ལྟར་གྱུར་བ་དང་། རྫོགས་ཆེན་ཚང་གི་གདན་ས་ནས་འདུལ་བསྟན་ཉམས་སོང་ན་རྙིང་མ་ཚང་གི་འདུལ་བསྟན་གྱི་མགོ་ལྟ་བུ་དེ་མེད་སོང་བ་ཡིན། སངས་རྒྱས་ཀྱི་བསྟན་པ་ལ་དང་པོ་དར་བའི་དུས་བར་དུ་གནས་པའི་དུས་ཐ་མ་འཇིག་པའི་དུས་ཡོད་པས། བསྟན་པའི་གནས་ཚད་མི་ལོ་ལྔ་བརྒྱ་བ་ཕྲག་བཅུ་ཡིན་པ་སྟོན་པ་སངས་རྒྱས་བཅོམ་ལྡན་འདས་ཉིད་ཀྱིས་གསུངས་ཡོད། ཉམས་མི་ཉམས་དེ་གང་ལ་ལྟ་དགོས་པ་རེད་ཅེ་ན། འདུལ་བའི་བསྟན་པ་ལ་ལྟ་དགོས། བསྟན་པ་ཆགས་འཇིག་གི་ཤི་གསོན་གཉིས་ཀའི་འགག་རྩ་འདུལ་བའི་བསྟན་པ་ལ་ཐུག་ཡོད་པས། གདན་ས་འདིའི་ཕྱག་སྲོལ་ལ་རབ་བྱུང་མིན་ཕྱིན་ལུང་པ་འདིའི་ནང་དུ་འདུག་མི་ཆོག་པ་དེ་གྲུབ་ཐོབ་པདྨ་རིག་འཛིན་ནས་ད་ལྟའི་བར་དུ་དར་པ་ཡིན་པས། འདི་འགོས་ནད་ངན་པ་ཞིག་འགོས་ཡོང་གི་བསམ་ནས་དོག་པ་བྱས་པ་མིན་ཡང་འདུལ་བའི་བསྟན་པ་ཉམས་ཡོང་གི་དགོངས་ནས་ཁ་མཚམས་ཕྱེས་པ་ཡིན། དེའི་ཕྱག་ལེན་དེ་ཚོ་ད་དུང་མི་ཉམས་པར་རྒྱུན་འཛིན་མཛད་པའི་ཁྱད་ཆོས་ངོ་མཚར་ཅན་འདི་དག་གཙོ་ཆེ་བ་དམ་པ་གོང་མའི་ཐུགས་བསྐྱེད་དང་སྨོན་ལམ་ལོས་ཡིན་མོད། མང་ཆེ་བ་ད་བཞུགས་ཀྱི་གཞོན་རབས་པའི་རྣམ་དཔྱོད་དང་། ཁྱད་པར་དུ་བླ་སྤྲུལ་བགྲེས་རབས་པ་འདི་ཚོས་མཛད་པ་ཕྲིན་ལས་ཀྱི་བདག་རྐྱེན་ལས་བྱུང་བ་ཡིན་པས། ཅི་འདྲའི་ལྷག་བསམ་ཐུགས་སྟོབས་ཤིག་ཡོད་འདུག་སྙམ་ནས་ཡང་ལྟ་ཤོར་བྱེད་ཅིག་རེད། དུས་ཀྱི་དབང་དང་ལྟ་བའི་སྙིགས་མས་ཉོན་མོངས་ཕྲག་དོག་ཤས་ཆེ་བས། འགའ་རེ་ལ་རྒྱུ་མ་ཚོས་པ་ལས་རྡོལ་ནས་ཐེད་སོང་ན་དགའ་བའི་ལྷ་མ་ཡིན་གྱི་རྒྱུ་མཐུན་ཡོད་མོད། མདོར་ན་རང་སྐལ་ལ་བབ་པའི་བསྟན་པའི་སྲོག་དེ་སྲོག་གིས་སྲུང་རྒྱུ་དེ་འགྲན་ཟླ་བྲལ་བའི་དཔའ་བོའི་ལག་རྗེས་ཐུན་མོང་མ་ཡིན་པ་ཞིག་རེད་སྙམ་གྱིན་འདུག འདི་ཕྱི་རབས་བསྟན་པའི་མིག་རྒྱན་ལ་བཞག་པའི་མཛད་རྗེས་ཡུན་རིང་རྒྱང་གི་བལྟས་ན་བཀྲག་མདངས་ཇེ་ཆེར་འབར་རྒྱུ་ཞིག་ཡིན་ལ། དེས་ན་མི་རབས་རྗེས་མ་ཡིན་ནའང་སྔ་དྲོ་ཕོ་ཆེན་ཤྭ་ཕོས་གངས་གཤགས་ན། ཕྱི་དྲོ་ཤེའུ་ཆུང་ཡུ་མོ་དེ་ལ་འཁོར་ཏེ་རྒྱུན་འཁྱོང་བྱེད་དགོས་པ་ནི་གནད་ཀྱི་དྭངས་མ་ཞིག་ཡིན། དེས་ན་ངས་གོང་དུ་བཤད་པ་ལྟར་མགོན་མེད་ཉམ་ཐག་གི་སེམས་ཅན་གྱི་སྐྱབས་ས་རེ་ས་བསྟེན་ས་སངས་རྒྱས་ཀྱི་བསྟན་པ་ཡིན་པས། བསྟན་པ་བསྟན་འཛིན་གྱི་སྐྱེས་བུའི་རྒྱུད་ལ་ཡོད་པ་ཞིག་ཡིན་པས། དེ་ཡག་པ་བློ་གཏད་ཁེལ་བ་ཞིག་དགོས་པ་ནི་སྤྱི་དོན་སྒེར་དོན་གཉིས་ཀ་ཡིན། དེས་ན་ཚེ་འདི་ཕྱི་གཉིས་ཀ་མི་རབས་སྔོན་རྗེས་ཐམས་ཅད་ཀྱིས་གཏད་ས་ཐུན་མོང་གི་བསྟན་པ་འདི་དྲི་མ་མེད་པ་ཞིག་ཏུ་བྱི་དོར་དག་ཐེར་ཕུད་རྒྱུ་དེ་མཆོད་ཡོན་སྡེ་དང་བཅས་པའི་ཐོག་ལ་བབ་པའི་ལས་ཁུར་ཡིན་ལ། དོན་དག་ཆེན་པོ་ལ་འཕྲད་ཚེ་ཁ་མི་ཧང་མགོ་མི་འཁོར་བར་བློ་རྩེ་གཅིག་ཏུ་སྒྲིམ་རྒྱུའི་ཐད་ནས་ས་འདིའི་མི་ལ་ཁྱད་ཆོས་ཁྱད་པར་བ་ཞིག་ཡོད་ཅེས་མངོན་པར་བསྟོད་ཀྱིན་ཡོད་པ་ཡིན། དེ་དགོས་པ་ཡང་སྟོན་པ་སངས་རྒྱས་ཀྱིས་བཀའ་ཡིན་ཏེ། བཅོམ་ལྡན་འདས་ཀྱིས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་སོ། །ཁོང་ཤཱཀྱའི་རྒྱལ་པོའི་སྲས་རེད་བསམ་ནས་ཁྱེད་རྣམས་ཀྱིས་དང་ལེན་བྱེད་མི་དགོས། ཁོང་གི་བཀའ་འདི་གསེར་བཟང་པོ་ལྷད་མེད་བསྲེག་ ཅིང་བདར་ན་ཇེ་ལེགས་སུ་འགྲོ་བ་ལྟར་བརྟགས་ཤིང་དཔྱད་དེ་གཞི་ནས་ཡག་གི་སྙམ་ན་ཁོང་གི་རྗེས་སུ་ཞུགས་ཤིག་གསུངས་པ་དང་། འུ་ཚོས་ནོར་བསྒྲུབས་ནས་ལུས་སྲུང་གི་ཡོད་ཅིང་། ནོར་དང་ལུས་གཉིས་ཀས་སྲོག་སྲུང་གྱིན་ཡོད་ལ། ནོར་དང་ལུས་དང་སྲོག་རྣམས་ཀྱིས་ཆོས་སྲུང་དགོས། ཆོས་ཟེར་ན་རྒྱལ་བའི་བསྟན་པ་ཡིན་ལ། རྒྱལ་བའི་བསྟན་པ་འདི་སྐྱེ་དགུའི་བདེ་སྐྱིད་ཀྱི་གཞི་རྩ་ཡིན་པས་སྐྱེ་དགུ་ཐམས་ཅད་བདེ་བའི་ཆེད་དུ་རྒྱལ་བསྟན་གྱི་སྲོག་བསྲུང་དགོས། རྒྱལ་བསྟན་གྱི་སྲོག་བསྲུང་བའི་ཕྱིར་དུ་རང་གི་སྲོག་གཏོང་ཐུབ་ན་གཏོང་དགོས། ད་དུང་སྲོག་གཏོང་ས་ལོན་ན་བསོད་ནམས་ཆེ་ཞིང་། དེས་ན་སྲུང་དགོས་རྒྱུའི་ཆོས་སྟོན་དང་བསྟན་པ་གཉིས་ཀའི་བདག་ཉིད་དམ་ཆོས་འདུལ་བ་ལ་ངོས་བཟུང་དགོས། སྔོན་འགྲོའི་སྐབས་ནས་དང་པོ་བླ་མ་བརྟགས་ལ་མཁས་པ་ལ་སོགས་པ་ནས་མཚན་ཉིད་ཐེག་པའི་སྐབས་སུ་བཤེས་གཉེན་ཞི་བ་དུལ་བ་ཉེར་ཞི་བ་ལ་སོགས་པ་དང་། གསང་སྔགས་ཀྱི་དེ་ཉིད་བཅུ་དང་རང་བཞིན་བརྒྱད་ལ་སོགས་པ་རྡོ་རྗེ་སློབ་དཔོན་གྱི་མཚན་ཉིད་བཤད་པ་དེ་དག་གནད་ཚང་མ་དེ་ལ་འདུས་ཤིང་། རྒྱུ་མཚན་དེ་ཚོ་བསམ་ནས་དམ་པའི་མགོན་དང་བསྟེན། དགེ་བའི་གྲོགས་དང་འགྲོག མཁས་པའི་གཞུང་ལུགས་དང་བསྟུན་ཏེ། རང་གི་རིན་ཐང་རང་གིས་བསྒྲུབས་ཏེ། རིན་ཐང་ཅན་གྱི་ཤེས་རབ་དེ་རང་གིས་འབད་པས་ཡོད་ཐབས་བྱེད་དགོས། ལོ་ཉུང་གསར་སྐྱེས་ཐམས་ཅད་ཀྱིས་ལེགས་ཉེས་རང་གི་རྣམ་དཔྱོད་ཀྱིས་འབྱེད་ཐུབ་པའི་ཤེས་རབ་ཀྱི་མིག་གསར་བ་ཞིག་ཐོབ་པའི་ཆེད་དུ་ཤེས་རིག་ཡོན་ཏན་སྦྱོངས། སྦྱངས་པ་ཕྱིན་ཅི་ལོག་ཏུ་མི་འགྲོ་བའི་ཆེད་དུ་ལྷག་བསམ་གྱི་ལ་རྒྱ། ཉམས་མྱོང་གི་ལག་ལེན། རྒན་རྒོན་བསམ་ཤེས་ཀྱི་གམ་ནས་སྦྱངས་ཏེ། ས་འདིར་མཚོན་ན་ཆོས་འཇིག་རྟེན་གཉིས་གང་ཐད་ནས་འདྲ་འདྲའི་ནང་ནས་མི་འདྲ་ཙམ་ཞིག་ཡོད་པ་འདི། རྒྱུན་ཡུན་དུ་བརྟན་རྒྱུའི་ཆེད་དུ་ལྷག་བསམ་ཕྱ་ར་གྲུ་འདེགས་བྱེད་དགོས་པ་ཡིན། ཕྱ་ར་གྲུ་བཞི་ཞིག་གི་སྟེང་དུ་འབྲུ་དང་ཆུར་བ་ཅི་ཞིག་ཡོད་ཀྱང་བཏེགས་ནས་ས་གཞན་ལ་སྤོ་དགོས་ན་སྣེ་བཞི་ནས་བཟུང་དགོས་པ་རེད་མ་གཏོགས། གཅིག་མངག་བཞག་ན་ཕྱར་སྟེང་གི་ནས་ཆུར་བ་ཅི་ཡོད་བོ་འགྲོ་བ་དེ་དང་གཅིག་མཚུངས་ཡིན། ཐམས་ཅད་མི་གཅིག་བསམ་པའི་སེམས་འདྲ་། ཕྱོགས་གཅིག་སྟ་རེའི་སོ་འདྲ་བྱས་ཏེ། སྡེ་ཡུལ་དགོན་གསུམ་སུ་ཡིན་ཡང་གཅིག་ཐོག་ལ་བབ་པ་འདྲ་ཞིག་གི་ལྷག་བསམ་བསམ་པ་ཕྱོགས་གཅིག་ཏུ་ད་སྔ་ལྟར་དུ་བྱས་ན། སྤྱི་ཆོས་སྒྲུབ་ཞོར་དུ་སྒེར་ཆོས་རང་བཞིན་ཤུགས་ཀྱིས་འགྲུབ་ཡོང་བ་དང་། སྡེ་དགོན་གཉིས་ཀ་ལ་ཚུགས་དང་མཚན་ཉིད་མེད་ས་ཞིག་ནས་ཁྱོད་མི་གཅིག་ཁྱི་ཚང་ནང་ནས་སེང་གེའི་ཕྲུ་གུ་བུད་ཡོང་བའི་གྲལ་དུ་ཨེ་འགྲོ་མི་ཤེས། མདོར་ན་བརྒྱ་བཤད་ཚིག་གི་རྩ་བ། སྟོང་བཤིགས་འོ་མའི་མར་ལོ། ཆོས་བརྒྱུད་འདི་དང་སྡེ་བ་འདི་ཆོས་ར་འདི་ལ་གཏོགས་ཚད་དང་འབྲེལ་ཚད་ཐམས་ཅད། མདོར་ན་རབ་ཏུ་བྱུང་བས་འདུལ་ཁྲིམས་སྲུང་དགོས། བདེ་བར་གཤེགས་པས་བཅས་པའི་བསླབ་པའི་གཞི་ལྔ་མིག་གི་འབྲས་བུ་བཞིན་དུ་སྲུང་དགོས་པ་དང་། སོར་བྱང་སྔགས་གསུམ་གྱི་སྡོམ་པ་ཡར་ལྡན་གྱིས། བསྐྱེད་རྫོགས་ཉམས་ལེན་གྱི་གདེངས་དང་ལྡན་པ་མཆོད་ཡུལ་དད་པའི་ཞིང་ས་རང་གཞན་གཉིས་ཀ་མགོ་མི་གཡོགས་པ་ཞིག་གྱིས། གལ་ཏེ་སྐྱ་གོ་སེར་གོ་གཉིས་ཀ་མཉམ་དུ་བཅད་ན་ཚེ་ཕྱི་མའི་རི་མགོ་ལ་ཡང་ལྟ་བྱེད་པ་ཞིག་མི་རུང་ངོ་སྙམ་ན། ཁྱིམ་ལ་གནས་ཤིང་ཡང་དག་ལྟ་ལ་དད། །དཀོན་མཆོག་གསུམ་ལ་བླ་མར་བྱེད་པ་ནི། །ཐེག་པ་ཆེན་པོའི་གདུལ་བྱ་ཉིད་ཀྱི་ཕྱིར། །གཡེལ་བ་མེད་པར་མེལ་ཚེ་སྲུང་སྐྱོབས་མཛོད། །ཅེས་འཕྲིན་བཅོལ་མཛད་ས་ཡང་ཡིན། གྲྭ་ཆས་ཐབས་ཆག་ཅིག་གྱོན་པ་བས་ཁྱིམ་པ་བཟང་པོ་བསྟན་དགོན་ལ་ཞབས་ཞུ་སྒྲུབ་མཁན་ཞིག་གིས་དགའ་བ་ཡང་ཡོད། ཡང་ན་མཆོད་ཡུལ་འོས་ངེས་པ་ཞིག་མིན་ན་ཡོན་བདག་གོ་ཆོད་པ་ཞིག་མཆོད་ཡོན་གཉིས་ཀའི་འདི་རེད་སྙམ་པ་ཞིག་བྱེད་དགོས་པ་ལས། ར་མིན་ལུག་མིན་གྱིས་ཅི་ཡང་མི་ཕན་པས། བོད་ཀྱི་མི་རྒྱུད་བཟང་བ་རེ་མ་ཆད་ནའང་དོན་གཅིག་རེད། དགེ་སློང་མ་གསལ་བའི་ཚུལ་ཁྲིམས་ལྟ་བུ་ཡིན་ན་དེ་བས་ཡག་གི མི་སྐྱ་ཁྱིམ་ལ་གནས་པ་ཞིག་ཡིན་ན་མི་དགེ་བཅུ་སྤོང་དགེ་བ་བཅུ་སྒྲུབ། མྱི་བྱེད་ན་མི་རབ་ཕན་སེམས་ཅན། ཆོས་བྱེད་ན་ཆོས་པ་རྒྱུ་འབྲས་ཅན་ཞིག་གྱིས་དང་། བྱ་བ་ལམ་དུ་འགྲོ། ཁ་ལས་རླུང་རྟ་དར། བསང་གསོལ་ཁ་མ་བྱས་ཀྱང་དཀར་ཕྱོགས་སྐྱོང་བའི་ལྷ་དང་སྲུང་མས་བསྐྱབ། གལ་ཏེ་དེ་ལས་བཟློག་ན་གསོལ་ཀ་ཕྲིན་བཅོལ་བརྒྱབ་པར་མ་ཟད་དགྲ་ཆོས་དགྲ་མནན་བྱས་ཀྱང་ཕན་ཐོགས་མེད། ཆོས་སྐྱོང་ཆོས་མཐུན་གྱི་རྒྱབ་ན་ཡོད་ཅིང་ཆོས་མཐུན་གྱི་མི་སྲུང་བ་པོ་ཡིན་པས། སྲུང་མ་གཤེད་དུ་བབ་ནས་དེ་བས་སྡུག་ཅིག་བྱེད་པ་ཡིན། དེས་ན་ལྷ་སྡེ་གཞུང་མ་བསམ་ཤེས་དཀྱུས་མ་རྣམས་ཀྱིས་ད་སྔ་མང་པོ་ཐོས་པས་ཤེས་རྒྱུ་རེད། དེང་སང་སྡེ་སར་རུ་སར་གྱི་མི་མང་པོ་འདུག་ཟེར་བ་དེ་ཚོ་སྡུག་པོ་ཅི་ཡང་མ་ཡིན་སྟེ། རི་སྨུག་པ་ཅན་ལ་རི་དྭགས་འཁོར། མཚོ་རླངས་པ་ཅན་ལ་ཉ་སྲམ་འཁོར་བའི་དཔེ་ལྟར། དེ་རྣམས་ཀྱིས་སྦྲ་སྒོ་ཤར་ལ་བསྟན་ན་ཨེ་དྲོ། སྦྲ་ཕུགས་བྲག་ལ་བརྟེན་ན་ཨེ་བཙན་བསམ་པའི་འདེང་ཞིག་བརྒྱབ་ནས་འདི་རུ་ཡོང་བ་ཡིན་པས་དེ་དག་ལ་ཡ་རབས་ཀྱི་སྤྱོད་བཟང་ལོབ་ཏུ་འཇོག་དགོས་པ་ཡིན། ས་ཆ་ཡ་རབས་ཡིན་ན་ཡ་རབས་ལོབ་འགྲོ་སྟེ། སྐྱེ་རོགས་ཐང་ཤིང་བཟང་ན་དབྱི་མོང་དགུང་དང་མཉམ། །འདྲིས་རོགས་རྨ་བྱ་བཟང་ན་མཇུག་མ་དུག་དང་འདྲིས། །ཞེས་པ་ལྟར་ཡིན། གལ་ཏེ་སྐྱུར་རྒྱུ་མགར་རྒྱུ་ལས་རྒྱུ་སྒྱུར་རྒྱུ་གཅིག་ཀྱང་མེད་པ་ཞིག་ཡིན་ན་ལམ་ཞིག་སྟོན་དགོས་པའི་དུས་ཡིན། ད་ཕན་ཆད་རྐུན་མ་རྣམས་ཀྱི་མིང་ལ་ཁྱི་རྐུན་ཐོགས། ཁྱི་རྐུན་གྱི་ནང་ན་མིང་འདྲ་མིན་ཡོད་པ། རྔ་གཡུག་ཟེར་བ་དང་། ཞོ་རྐུ་ཟེར་བ་ཅི་འདྲའི་མིང་མཚར་པོ་བཏགས་རྒྱུ་ཡོད། དེ་དང་ཆ་མཚུངས་པར་རྫུན་སྐྱལ་གྱི་མིང་ལ་རྫུན་རྒན་རི་འགུལ་དེ་ཚོ་བཏགས་ཆོག་པ་ཡིན། ཁ་ཕར་ལ་འཁོར་ལོང་མེད་པར་བླ་བཙག་འདུག་མཁན་ལ་ཨ་ཁུ་ཁྲོ་ཐང་བཏགས་ན་ཌ་རུ་ལྟ་བུ་ཡིན་ཡང་། ཌ་རུ་བ་སོའི་ཌ་རུ། ཙནྡན་གྱི་ཌ་རུ། ཤིང་གི་ཌ་རུ། བྱིས་པས་རྩེད་མོ་རྩེ་བྱེད་ལ་སོགས་པའི་ཌ་རུ་ཡོད་པས། སྤྱི་སེམས་ཅན་གྱི་མྱི་ཕན་སེམས་བསམ་བཟང་མ་གཏོགས་མེད་པའི་བུ་རབས་དང་། རང་འདོད་ངན་སེམས་ཅན་པོ་མ་རབས་ཡིན། ཡ་རབས་རིགས་ཀྱི་གདོང་ན་པདྨ་མེད། །མ་རབས་རིགས་ཀྱི་ཀླད་ལ་རྭ་མ་སྐྱེས། །ཇི་ལྟ་ཇི་ལྟར་སྤྱོད་པའི་ཁྱད་པར་གྱིས། །འཕྱོན་མའི་བུ་ཡི་རིགས་རྣམས་གསལ་བར་འབྱེད། །ཅེས་གསུངས་ཡོད། མི་ཡ་རབས་དང་པོ་སྐྱེས་དུས་ནས་ཐོད་པའི་ངོ་ན་འདི་ཡ་རབས་ཡིན་ཞེས་བྲིས་ཡོད་པ་མིན་ལ། མ་རབས་ཀྱི་མགོ་ལ་རྭ་ཅོ་སྐྱེས་ནས་ཡོད་པ་ཡང་མིན། འོ་ན་ཡ་རབས་མ་རབས་ཀྱི་ཁྱད་པར་ཇི་ལྟར་ཕྱེ་དགོས་པ་ཡིན་ཞེ་ན། ཇི་ལྟ་ཇི་ལྟར་སྤྱོད་པའི་ཁྱད་པར་གྱིས། །འཕྱོན་མའི་བུ་ཡི་རིགས་རྣམས་གསལ་བར་འབྱེད། །ཅེས་གསུངས་པས། ཕ་མེད་ཚང་གི་བུ་ཕྲུག་དེ་མི་རིགས་གང་ཡིན་བྱ་བ་སྤྱོད་པ་ལ་ལྟོས་དང་ཤེས་གསུངས་པ་ཡིན། ཡ་རབས་དེ་ཆོས་མཐུན་ཕན་སེམས་ཅན་ཞིག་དང། མ་རབས་དེ་སྡིག་ལ་དགའ་བ་གནོད་སེམས་ཅན་ཞིག་ཡིན་པས། ལས་དེ་ལ་བརྟེན་ནས་འབྲས་བུ་སྐྱིད་སྡུག་མི་འདྲ་བ་རང་ཐོག་ཏུ་སྨིན་རྒྱུ་ཡིན་པ་ཆོས་ཁྲིད་ཀྱི་ཞོར་ལ་རང་གར་འཕྲོས་དོན་གྱི་སྐད་ཆ་ཉ་ཉོག་མང་ཐལ། མཚམས་པ་ཁེར་འདུག་མི་དང་མ་ཐུག་པར་ཡུན་རིང་ལོན་སོང་བས་ད་མི་དང་ཐུག་ནས་ཁ་བརྡ་བཤད་དུས་སྔོན་སོང་བག་ཆགས་ཀྱི་རྗེས་དེད་ནས་ཁ་བརྡ་ཉོག་འགྲོ་བཞིན་འདུག་མ་གཏོགས་རི་ཁྲོད་ཀྱི་མཚམས་པ་གྲོགས་བྱ་དང་རི་དྭགས་བྱེད་མཁན་ཞིག་ལ་དེ་འདྲའི་འོས་བབ་དང་འདེང་རྒྱག་ཡོད་དགོས་པ་མིན། རང་རེའི་ཆོས་ཁྲིད་ཀྱི་དུས་ཚོད་མཚམས་རེ་མཚམས་རེ་ཡིན་པ་དང་། ཡང་ཉི་མ་མང་པོ་ཞིག་ལ་ཁྱེད་རྣམས་ཁོམ་པ་མེད་པས། ད་ཡུན་རིང་ཞིག་འགོར་སོང་ཡང་དེ་རྗེས་ཁས་ལེན་གྱི་སྐོར་དེ་རིང་མར་ལ་གཅིག་བསྒྲག་ན། རུ་ཁག་གཉིས་པའི་ཁྱི་ལོ་ནས་ཟེར་དུས། འདིའི་རུ་ཁག་གཉིས་པ་གསུམ་པ་ཟེར་བཞིན་འདུག་པ་འདི། འདིའི་མིང་བཏགས་ལུགས་འདི་ཅི་ཡང་མི་ལོ་བས། ཁྱེད་རང་ཚོས་སྡེ་བ་གང་གི་ཡིན་ན་ཁོང་རྣམ་པ་སར་ཡི་གེ་རྒྱག་དུས་དེའི་མི་ཡིན་ཞེས་མིང་སྨོས་ཏེ་དེ་ལྟར་ཤོད། སྡེ་བའི་མིང་གི་བཟུང་ནས་སྨོས་དང་དགའ་བ་རེད། དང་པོ་གཉིས་པ་ཟེར་མ་འདུག རུ་ཁག་དང་པོ་གཉིས་པ་ཟེར་བཞིན་ཡོད་པ་འདི་རིགས་གནས་གསར་བརྗེའི་དུས་སྐབས་སུ་བཏགས་པའི་མིང་ཞིག་རེད། ད་དེ་ཟེར་དགོས་པ་མ་རེད། གནའ་སྡེ་དར་དཔོན་དར་གྱི་སྐབས་སུ་འབྲོག་རུ་ཤོག་ཆེན་བཅོ་བརྒྱད། ཤོག་ཆུང་གཉིས་དང་ཉི་ཤུ་ཡོད་པའི་ཚོད་དུ་དེང་སང་མེད་ཀྱང་ད་དུང་ཤོག་ཁག་བཅུ་ཙམ་ཞིག་རྩི་རྒྱུ་ཡོད་ཅིང་། དང་པོ་ཚང་ཟེར་པ་འདི་ཀྲུང་ཧྭ་སྤྱི་མཐུན་རྒྱལ་ཁབ་ཀྱི་དུས་རབས་ཚུན་ཆད་ལ། ན་གཞུང་ཁོག་པ་དང་གད་ཐོག་རྒྱ་ཤེས་མའི་དུ་ཚོ་གཉིས་ཚོ་བསྡོམས་ཏེ་ཚོ་བ་ཆེན་པོ་གཅིག་བྱས་ནས་དེ་ལ་ན་རྒྱ་གཉིས་ཀ་སྨྲས་ཡོང་བ་དང་། གཉིས་པ་ཚང་ཟེར་བ་འདི་བ་ཁོག་མ་དང་སྲས་ཚ་སྡེ་བ་གཉིས་ལ་ཟེར་བ་རེད། བ་ཁོག་མ་ཟེར་ན། བ་ཡི་ཕྱོགས་ལ་གསེར་གྱི་མེ་ཏོག་འཁྲུངས་ཞེས་མཁན་པོ་མཁས་པ་མང་པོ་འཁྲུངས་མྱོང་བའི་ས་ཆ་ཞིག་ཡིན། དེ་གཉིས་ཀ་ལ་བ་སྲས་གཉིས་ཟེར། ཡིག་ཚང་འགའ་རེའི་ནང་ན་སྲས་བ་གཉིས་ཀ་ཞེས་སྨྲས་འདུག གསུམ་པ་ཚང་ཟེར་བ་དེ་སྟག་མཛེས་སྨུག་རིང་དེ་གཉིས་ཀ་ལ་སྟག་སྨུག་གཉིས་ཟེར། དྲུག་པ་བཀྲ་ནང་གདོང་ནང་གཉིས་ཀ་ལ་བཀྲ་གདོང་གཉིས་ཟེར་བཞིན་ཡོད། མི་མིང་ས་ལ་ཐོགས། ས་མིང་སྡེ་ལ་ཐོགས་པས། ང་རང་ཚོའི་སྡེ་བ་གང་གི་ཡིན་ན་དེའི་མིང་ཟེར་ཆོག ན་གཞུང་ཁོག་པ་དང་གཅིག གད་ཐོག་རྒྱ་ཤེས་མ་དང་གཉིས། བ་ཁོག་སྲས་ཚ་གཉིས་དང་བཞི། སྟག་མཛེས་སྨུག་རིང་གཉིས་དང་དྲུག བཀྲ་ནང་གདོང་ནང་གཉིས་དང་ཤོག་ཁག་བརྒྱད། དེའི་སྟེང་དུ་གཡང་འཁྱིལ་དང་དགུ། ལྔ་དགུ་གཉིས་ཀ་དགོན་མདའི་སྡེ་བ་རེད། སྔོན་ཆད་ཡིན་ན་དགོན་མདའ་ཉིན་མོ་ཕྱོགས་དང་སྲིབ་མོ་ཕྱོགས་ཟེར་ཞིང་། ཆུ་ཉིན་སྲིབ་ཀྱིས་ཕྱེས་ཏེ་སྡེ་བ་གཉིས་ཆགས་ཡོད་པ་ཡིན། དེང་སང་ས་མདོ་ཇེ་ཆེར་སོང་ནས་སྡེ་བ་དེ་གཉིས་གཅིག་པུས་མི་ཚད་པ་འབྲོག་དང་བརྟན་ཆགས་ཀྱི་ཁང་པ་ཐམས་ཅད་ཡར་སྤར་མར་སྤར་མང་པོ་བྱས་ནས་ཆགས་ལུགས་ཡར་འདྲེས་མར་འདྲེས་བྱས་ཏེ་ཆགས་འདུག མིང་ལ་ད་དུང་ལྔ་བ་དགུ་བ་ཟེར་གྱིན་ཡོད་ན་ཡང་། མདོར་གོང་གི་ཕྱོགས་ཁག་དགུ་པོའི་ཁ་ལ་ལྔ་དགུ་གཉིས་ཀ་བསྣན་ཚེ་བཅུ་གཅིག་དང་། དེའི་སྟེང་དུ་འབམ་ཁོག་ན་ཡོད་པའི་འབམ་མཐའ་མའམ་འབམ་རུ་བརྗོད་ན་ཆོག་པ་དེ་དང་བཅུ་གཉིས་ཡོད་ལ་ཁྱོན་བསྡོམས་ན་མོ་དུད་སྟོང་རུ་ཞིག་གིས་མི་ཚད་པ། རང་རང་གི་ཤོག་ཁ་དང་སྡེ་བའི་མིང་འཛིན་དགོས་པ་ཡིན། ཕ་ཁུ་བོའི་ཐོད་རུས་འཇོག་ས་བུ་ཚ་བོའི་ལྟེ་ཐག་གཅད་ས། ས་མིང་མི་ལ་ཐོགས་པ་ཞིག་ཡིན། གནའ་དང་མ་བཤད་ན་འདིའི་ས་གནད་ཀྱི་དཀྱིལ་དུ་སྟོ་རུ་དུད་བདུན་མ་ཆགས་ཡོད་པ་དང་། རྫོགས་ཆེན་དགོན་པ་ཆགས་ཡོད་ས་འདི་སྟོ་རུ་ཨ་དགེའི་དགུན་མཚེར་ཡིན་ཟེར་སྲོལ་ཡོད། རུ་སྡེའི་འགྱུར་བ་དེང་སང་བལྟས་ཡོང་ན་སྟོ་རུ་ཚོ་གཅིག་ཚེམ་སྟོད་དུ་ཆགས། ཚོ་གཅིག་ལེ་ལ་ཕ་རྒྱབ་སྡེ་དགེ་ཁོག་ཏུ་ཆད་བསྡད་ཡོད་ལ། གད་ཐོག་ཡང་དེ་བཞིན་དུ་རེད། ལོ་སུམ་བརྒྱའི་ཡར་སྔོན་དུ་མདོ་ཁམས་སྨད་ཀྱི་ས་ཆ་ལ་གསང་སྔགས་སྔ་འགྱུར་བའི་བསྟན་པ་སྤེལ་བར་བྱ་བའི་ཆེད་དུ་རྫོགས་ཆེན་པདྨ་རིག་འཛིན་བྱོན་ཏེ་གདན་ས་བར་བ་འདི་བཏབ་ནས་སྡེ་དགེ་རྒྱལ་བོ་དང་གཉིས་ཀ་མཆོད་ཡོན་འབྲེལ་ནས་འབྲོག་རུ་ཤོག་ཆེན་བཅོ་བརྒྱད་དང་ཤོག་ཆུང་གཉིས་དང་ཉི་ཤུ་ཞེས་པའི་ཤོག་ཁག་ཉི་ཤུ་དེ་དུས་ལྷ་སྡེ་ལ་ཕུལ་བ་ཡིན། ལོ་རྒྱུས་ཟེར་བ་འདི་མི་རིགས་རིག་གནས་ཀྱི་གྲུབ་ཆའི་གཙོ་བོ་གཅིག་ཡིན་པས། མི་རང་གི་རིགས་རྒྱུད་མ་ཤེས་ན་ནགས་གསེབ་ཀྱི་སྤྲེའུ་འདྲ་ཟེར་ཞིང་། དེ་ཅི་ཞིག་གི་དོན་དུ་བཤད་པ་ཡིན་ན་རང་རེའི་ཤོག་ཁའི་མིང་འཛིན་མི་འཛིན་གྱི་ཐད་ནས་བཤད་པ་ཡིན། ལོ་འགའ་ཞིག་སྔོན་དུ་ལྔ་བ་སྡེ་ཕྱོགས་ཀྱིས་ང་ལ་སྡེ་བའི་མིང་ཐོགས་ཅེས་སྨྲས་པ་དང་། ངས་གཟའ་སྐར་བཟང་བའི་ཉི་མ་ཞིག་ལ་མིང་བཏགས་ཡོད། རྫ་རྡོའི་རི་འདི་ཁྱེད་སྡེ་བའི་མི་ཐོག་སྔོན་མ་ནས་བཟུང་སྟེ་མེས་པོའི་བླ་ཡིད་དུང་དུང་དུ་འཁོར་བའི་བླ་རི་ཡིན་ཞེས་དེ་དང་འབྲེལ་བའི་ཡི་གེ་ཞིག་བྲིས་ལ། ཡི་གེའི་ནང་དོན་དེ་རིང་གསལ་མོ་བཤད་མི་ཤེས་ཀྱང་དེ་དུས་ཀྱི་སྣང་ཤེས་དྭངས་དུས་ཡིད་ངོར་ཅི་ཤར་ཞིག་བྲི་མྱོང་། བླ་མ་ལ་སྡེ་མིང་ཚོ་རྗེ་བའི་འགན་ཁུར་ཅི་ཞིག་ཡོད་རེད་ཅེ་ན། བོད་ཀྱི་མིའི་མིང་དང་བཅས་པ་ཕ་མས་མི་བཏགས་པར་བླ་མས་བཏགས་ན་བཀྲ་ཤིས་པ་ཡིན་ཟེར་སྲོལ་ཡོད་པས་ཡིན་ཞེས་གཞན་ལ་སྨྲོས། དེ་ཚོ་རང་གར་ཟུར་འཕྲོས་ལ་བཤད་པ་ཡིན། དེ་ནས་ལོ་ཀེག་གི་སྟེང་དུ་ཐོན་པ་དང། སྲི་ཐོག་ཏུ་ཐོན་པ། དགུ་མིག་དང་བདུན་ཟུར་ལ་ཁེལ་བ། རྒྱལ་འགོང་གི་འཚེ་བ་ཅན། འདྲེ་དང་གཞི་བདག་གི་གནོད་པ་ཡོད་འདུག་བསམ་སའི་སེམས་ཁ་མི་བདེ་བའི་སྨྱོ་ནད་ཅན་དག་ནུབ་མོར་གཅོད་ཞབས་ལ་སྡོད། དེ་མིན་སུ་ཡིན་ཡང་གཅོད་ཞབས་ལ་སྡོད་དང་ཁྱོད་རང་ལ་རྐྱེན་གེགས་བར་ཆད་ཞི་བ་ལ་ཕན་ཐོགས་ཡོད་པ་ཡིན། དགེ་ཚུལ་སློང་གི་དམ་ཚིག་ལ་གནས་པའི་དགེ་འདུན་པ་མང་པོ་གཅོད་ཀྱི་བཀའ་ལུང་དབང་གསུམ་ཁྲོས་མའི་བསྙེན་ཚད་ཚང་མ་ཡོད་པ་འདི་འདྲ་མཉམ་དུ་འཛོམས་ནས་གསུངས་བཞིན་ཡོད་པ་ཕལ་ཆེར་མདོ་དབུས་ཁམས་གསུམ་ལ་བཙལ་ན་ཡོད་པ་མིན་ཞིང་། བོད་ན་མེད་ན་མཐའ་མའི་ཡུལ་ན་དེ་བས་ཀྱང་མེད་པས་འཛམ་གླིང་ལ་བཙལ་ན་མེད་ཚོད་ཡིན་པས། ལྷ་ཁང་ནང་ནས་ཁ་མ་ཞ། །ཚ་ཆུ་ནང་ནས་ལག་མ་ཞ། །ཟེར་བ་ཡིན་པས་རང་དོན་རང་གི་ཉག་ཤ་བྱེད་དགོས་པ་མ་ཡིན་ནམ། དེ་ཚོ་གཅིག་གིས་གཅིག་ལ་ཤོད་དང་ཕན་ཐོགས་ཡོད་པ་ཡིན། ཁྱད་པར་དུ་སྦྲུམ་མ་ནད་པ་ཡ་མ་དེ་ཚོ་ཁྲིད་ཤོག་དང་འདུས་པའི་བྱིན་རླབས་མེ་དཔུང་འདྲ་ཞེས་པས། བླ་རྒན་ཁེར་བུ་ཞིག་ལ་སྐྱབས་པ་ཡིན་ཞེས་དེ་ལ་ལྗིད་བཀལ་ན་ཡང་དེས་རང་ཉིད་རང་གིས་རང་སྐྱབས་མི་ཐུབ་པ་ང་འདྲ་ཞིག་ཡིན་ཕྱིན་གཞན་པ་སྐྱབས་རྒྱུ་འགོས་ངན་འགེབས་ངེས་ཡིན་པ་རེད། དེའི་དྲག་འདྲ་ཡིན་ན་མི་ཤེས། དོ་དགོང་བརྩིས་པ་ཞིག་གི་གཅོད་ཐུན་ཐེངས་མ་གསུམ་མ་གཏོགས་མེད་པས་ཚང་མ་ཡོངས་རྫོགས་གཅོད་ཞབས་ལ་སྡོད་གཅོད་ཐུན་རེ་ཨེ་ཐོབ་བལྟས་ན་དགའ་བ་ཡིན། ཀུན་བཟང་ཞལ་ལུང་ཚར་ཉེར་ལྔ་ལྟ་མཁན་ལ་དཔའ་དར་ཡོད་ལ། དཔའ་དར་ཅི་ཞིག་ཡོད་ཟེར་ན་དམ་རྫས་ཨ་ཐམ་ཅན་རེ་དང་། འཇམ་དབྱངས་རིལ་བུ་སྒམ་དོ་རེ་ཚེ་སྒྲུབ་རིལ་དཀར་སྒམ་དོ་རེ་འཇིགས་མེད་ཡོན་ཏན་མགོན་པོའི་གསུང་འབུམ་དེབ་རེ་བཅས་ཡོད། ཚར་ལྔ་བཅུ་ཅན་ལ་ཉིས་ལོག་དང་། ཚར་བརྒྱ་ལྟ་མཁན་ལ་བཞི་ལོག་བྱས་ཏེ་སྦྱིན་རྒྱུ་ཡིན། དེའི་ཚར་ཁ་གྲངས་དང་དཔའ་དར་གྱི་སྐོར་གཞུང་ལས་པས་ཞིབ་བཤེར་ཞིབ་ཆ་བྱས་ཚར་དུས་སྤྲད་རྒྱུ་ཡིན། ལྕགས་རྙི་རེ་རེ་ལོན་མཁན་ལ་འཇམ་དབྱངས་རིལ་བུ་སྒམ་རེ་དང་། མང་པོ་ལོན་མཁན་ལ་དམ་རྫས་ཨ་ཐམ་ཅན་ལ་སོགས་པ་ཅི་འདྲའི་ཡར་ལ་སྤར་དགོས་ཡང་གནས་ཚུལ་ངོ་མ་ལ་ལྟ་རྒྱུ་བྱེད། ད་ལོ་དབྱར་ཆོས་ཀྱི་ཆོས་ཁྲིད་མེད་པ་དང་། ཆོས་ཞུ་བ་མེད་པས་ནགས་གསེབ་ཀྱི་ལྕགས་རྙི་རུག་ཐུབ་མེད་ལ། ངས་བསམ་ན་དེ་རིང་ཚེས་པ་དྲུག་རེད། ཚེས་པ་དགུའི་ཉིན་པར་ཚོགས་འཁོར་གྱི་གྲ་སྒྲིག་ཡིན་པས། དེའི་སྔ་དྲོ་འགའ་ཞིག་གིས་ཚོགས་འཁོར་གྱི་གྲ་སྒྲིག་བྱ་ཞིང་། གཞན་སྐྱ་སེར་ཕོ་མོ་མེད་པ་ནགས་གསེབ་དུ་སོང་ནས་ཆུ་ཉིན་སྲིབ་གཉིས་ཀའི་ལྕགས་རྙི་གཅིག་ཤེར་ཡོང་ན་བསམ་འདུགམི་འཇིགས་པ་སྐྱབས་ཀྱི་སྦྱིན་པ་ཡིན་པར་མ་ཟད་སྲོག་བསླུ་ཚེ་ཐར་ཆེན་པོ་ཞིག་ཏུ་འགྱུར་འགྲོ། ལོ་ཉུང་འགའ་རེ་རང་གི་ས་ཆའི་དགོན་པའི་ནགས་གསེབ་དུ་འགྲོ་ཡང་མྱོང་མེད་ན། སོང་དང་ཚོར་སྣང་དམིགས་བསལ་བ་རེ་ཡོང་རྒྱུ་ཡོད་ན་ཐང་། དེའི་ཉིན་པར་སྔ་དྲོའི་དུས་ཚོད་གཉིས་ལ་དེ་བྱས་ན་ཕྱི་དྲོ་མ་ཎི་དང་གསུར་ཆེན་ཕུད་རྒྱུ་ཡིན་ལ། ལྕགས་རྙི་ལོན་མཁན་ལ་དཔའ་དར་བཏགས་རྒྱུ་ཡོད།

ཉིན་དྲུག་པའི་ཆོས་ཁྲིད།

མཚམས་སྦྱོར་གྱི་གདམས་ངག

ཇི་སྐད་དུ་འཇམ་མགོན་བླ་མ་མི་ཕམ་རིན་པོ་ཆེས། ཕྱུག་པོ་མི་རྟག་ནམ་མཁའི་སྤྲིན་དང་མཚུངས། །མཐོན་པོ་མི་རྟག་ལ་ཁའི་ན་བུན་འདྲ། །གཞོན་པ་མི་རྟག་སྟོན་གྱི་མེ་ཏོག་བཞིན། །རྟག་འཛིན་ཆེ་ན་རང་བསྡུས་རང་སྡུག་འབོད། །ཅེས་གསུངས་སོ། །ཕྱུག་པོ་མི་རྟག་ནམ་མཁའི་སྤྲིན་དང་མཚུངས་ཤེས་པ་ནི། ཕྱུག་པོ་ཚེ་གཅིག་ལ་ཕྱུག་པོའི་ཐོག་ནས་མི་འདུག་པར། ཕྱུག་པ་དེ་སྔར་བསགས་བསོད་ནམས་ཀྱི་འབྲས་བུ་ཡིན་ཡང་བསོད་ནམས་ཀྱི་མ་རྩ་ཟད་ཚེ་སྤྲང་པོར་འགྱུར་འགྲོ། དཔེར་ན་ནམ་མཁའི་ལྷོ་སྤྲིན་ཇི་ལྟར་མཛེས་ཀྱང་གཅིག་ཏུ་མི་སྡོད་པར། རླུང་རྒོད་པོ་གཅིག་གིས་སྣ་ལ་འཐོར་རྒྱུ་རེད། དེ་དང་འདྲ་གསུངས་པ་དང་། མཐོན་པོ་མི་རྟག་ལ་ཁའི་ན་བུན་འདྲ་ཞེས་པ་ནི། ཐོབ་མཐོན་པོ་ཡིན་ཡང་མི་རྟག་པར། ལ་ཁའི་ན་བུན་ད་ལྟ་རི་མགོར་ཡོད་ཀྱང་ཡུད་ཙམ་ཀྱིས་ཉི་མས་བཞུ་འགྲོ་བ་ལྟར། ཁར་རྩང་མི་མང་གི་འགོ་ནས་གཏམ་བཤད་མཁན་དེ་ཚོ་དེ་རིང་སྨྲ་འབེབ་ཀྱི་དུང་ལ་ལྷུང་ནས། སང་ཉིན་ཐལ་བ་ཐོག་ཏུ་གཏོར་གྱིན་ཡོད་པ་མང་པོ་ཞིག་ཡོད། གཞོན་པ་མི་རྟག་སྟོན་གྱི་མེ་ཏོག་བཞིན་ཞེས་པ་ནི། གཞོན་ནུའི་ལང་ཚོ་དེ་བས་མི་རྟག་སྟེ། རྒས་ཟེར་བ་ནི་ཉིན་གཅིག་མགོ་ལ་གསར་ཐོན་ཞིག་མིན་པར། རྒས་རྒན་རྣམས་ལ་སྔོན་ནས་མི་སྡུག་བཞིན་གྱི་གཉེར་མ་ཐོན་མེད་པར། སྐད་ཅིག་སྐད་ཅིག་གི་ལང་ཚོའི་ན་ཚོད་ཡོལ་ཏེ་མི་འདོད་བཞིན་དུ་རྒས་ཤིང་རྒུད་པའི་རྟགས་ཐམ་རང་ཤུགས་ཀྱིས་ཕོག་འགྲོ་བ་རེད། སྟོན་གྱི་མེ་ཏོག་དེ་མཛེས་ཀྱང་བ་མོ་གཅིག་གིས་འདབ་ལོ་སེར་པོར་འགྱུར་ནས་འཐོར་འགྲོ་བ་རེད། རྟག་འཛིན་ཆེ་ན་རང་བསྡུས་རང་སྡུག་འབོད། །ཅེས་པ་ནི། མི་རྟག་པ་ལ་རྟག་པར་འཛིན་པ། ཕྱུག་ན་སྤྲང་རྒྱུ་མེད་པ། མཐོ་ན་དམའ་རྒྱུ་མེད་པ། གཞོན་ན་རྒས་རྒྱུ་མེད་པར་འཛིན་པའི་རྟག་འཛིན་འདིས། མ་བསམ་ས་ནས་སྡུག་བསྔལ་ཐོག་ལ་ཐོན་དུས་འགྱོད་པ་སྡུག་བསྔལ་ལྷག་ཏུ་སྐྱེ་བ་འདི། རང་བསྡུས་ཏེ་རང་གིས་བསྡུས་པའི་རང་སྡུག ལས་བསགས་པའི་འབྲས་བུ་རང་གིས་མྱོང་བ་རེད། བཀའ་གདམས་པའི་དགེ་བའི་བཤེས་གཉེན་ཚོས། ལེ་ལན་ཐམས་ཅད་རང་ལ་གདའ་གསུངས་པ་དང་དོན་གཅིག་ཡིན། ལན་པ་ཕྱི་མྱི་ཁུངས་ལ་ཐུག་ནི་ཞིག་མ་ཡིན་པར་ནང་རང་ཁུངས་ལ་ཐུག་ནི་ཞིག་རེད། སྡུག་བསྔལ་ཡོང་བ་ཐམས་ཅད་རང་གིས་བསྡུས་པའམ་རང་གིས་ལས་ནི་ཤ་སྟག་ཡིན་གསུངས་པ་རེད། ཡང་དེ་ལས། ཕྱུག་ན་ཆོག་ཤེས་གྱིས་ལ་སྦྱིན་པ་ཐོང་། །མཐོ་ན་ཁེངས་སེམས་སྐྱུངས་ལ་གཞན་ཕན་གཅེས། །གཞོན་ན་རྒྱགས་པ་མེད་པར་བག་ཡོད་བྱ། །དེ་ལྟར་བྱས་ན་འདིར་ལེགས་ཕྱི་མ་བདེ། །ཞེས་གསུངས་སོ། །ཕྱུག་ན་ཆོག་ཤེས་གྱིས་ལ་སྦྱིན་པ་ཐོངས། །ཞེས་པ་ནི་རྒྱུ་ནོར་རྫས་ཀྱི་འབྱོར་བ་ཕུན་སུམ་ཚོགས་པའི་ཕྱུག་པོ་ཡིན་ན། ཕྱུག་པོ་ལས་ཕྱུག་པོ་འབྱུང་བ་ཞིག་སྟེ་ཚེ་འདིར་མ་ཟད་ཕྱི་མ་ཕྱུག་པོར་འགྱུར་བའི་རྒྱུ། ཚེ་ཕྱི་མའི་ཡུལ་ལ་བསྐྱལ་མ་ཐུབ་ཕྱིན། བསོག་བསོག་སྡུག་གི་ཁུར་བོ། ཚེ་འདི་ལ་སྡུག་མྱོང་བྱེད། དེ་ཁོ་ནའི་དོན་ལ་མི་ཚེ་ཟད། ཚེ་ཕྱི་མར་དེ་བས་སྡུག སྡིག་སྡུག་གཏམ་ངན་མི་དགེ་སྡིག་ལས་སྣ་ཚོགས། ལོངས་སྤྱོད་བསོག་བསྐྲུན་གྱི་ཁུངས་ནས་བྱེད་དགོས་ཐུག་ན། དེའི་རྣམ་སྨིན་མྱོང་བྱེད། དེར་མ་ཟད་ཤི་ཁར་ཞེ་ཆགས་ཏེ་མི་ལུས་ལེན་བྱེད་ཀྱི་ཚོགས་བསགས་ཞིག་ཡོད་ན་ཡང་ཤི་ཁར་ཞེན་ཆགས་སེར་སྣ་དེས་དང་པོ་ཡི་དྭགས་ཀྱི་གནས་སུ་ཁྲིད། ད་དུང་ཞེ་སྡང་གི་སེམས་ཤིག་དང་ཀུན་འདྲེས་ཡོད་ན་ཞེ་སྡང་གི་འབྲས་བུ་དམྱལ་གནས་ཡིན། ཕྱུག་ན་ཆོག་ཤེས་གྱིས་ལ་སྦྱིན་པ་ཐོངས། །ཞེས་པ་ནི་རྒྱུ་བསོག་པ་ལ་ཆོག་ཤེས་བྱེད་དགོས་ཞིང་། ཆོག་ཤེས་བྱེད་མ་ཤེས་ཚེ་ཉེན་ཁ་དང་ཐུག་རབས། ཆོག་ཤེས་མེད་པས་དེའི་དོན་ལ་ཤི་རབས་མང་བས། མཚམས་ཤིག་ལ་ཆོག་ཤེས་གྱིས་ལ་སྦྱིན་པ་ཐོངས་གསུངས་པ་རེད། ནོར་ལས་ནོར་གྱི་སྙིང་པོ་ལོངས་ལ་ཚེ་ཕྱི་མའི་ཡུལ་དུ་མངག་ནས་ཐོན་ཡོད་པ་ཞིག་བྱེད་དགོས་ན་མཆོད་སྦྱིན་གཉིས་ཀ་བྱེད་དགོས་པ་ཡིན། མཆོད་སྦྱིན་བྱེད་ལུགས་དེར་ཆགས་ཞེན་འཁྲུལ་བ་རང་འདོད་དང་མ་འདྲེས་པར་གཏོང་ཐུབ་ན་བཟང་ཞིང་། གཏོང་སའི་ཡུལ་གཏོང་བའི་དུས་གཏོང་ལུགས་ཀྱི་ཐབས་སོགས་ལ་བཟང་ངན་གྱི་ཁྱད་པར་དང་དབྱེ་བ་ཡོད་ལ། མདོར་བསྡུས་ན་ཚོགས་བསག་ཁྱད་པར་ཅན་བྱེད་དགོས་པའི་སྐབས་སུ། ཡུལ་ཁྱད་པར་ཅན་གྱི་ཞིང་ས་ལ་དངོས་པོའི་འབྱོར་བ་ཆེ་ཆུང་ལ་མ་ལྟོས་པར་རྣམ་པར་དག་པས་ཕུལ་ཏེ་བསྔོ་བ་སྨོན་ལམ་དང་འབྲེལ་ན། རྒྱུ་གཅིག་གིས་ཚེ་འདི་ཕྱི་གཉིས་ཀའི་གོ་ཆོད་པར་མ་ཟད་རང་གཞན་གཉིས་ཀའི་དོན་ཆེན་ལ་ཆུད་མི་ཟ་བའི་དགེ་རྩ་ཞིག་བསྐྲུན་ཐུབ་བོ། །མཐོ་ན་ཁེངས་སེམས་སྐྱུངས་ལ་གཞན་ཕན་གཅེས། །ཤེས་པ་ནི་ཐོབ་གོ་ས་དང་མཐོན་པོའི་མིང་ཞིག་ལྷག་ཏུ་མེད་ཀྱང་ཉེས་ཁ་ཆེན་པོ་ལ་མ་བརྫིས། ཁ་ལས་རླུང་རྟ་དར། བྱ་བ་ལམ་ལ་འགྲོ་བཞིན་ཡོད་སྐབས་རྒུད་པ་ཅན་གྱི་དམའ་མོའི་ས་ལ་མ་ལྷུང་བ་ཡིན་ལ། རང་རང་གི་ཚོད་ཀྱི་མི་ཚེའི་ནང་གི་མཐོ་དུས་ཟེར་དགོས་ཤིང་དར་སྐབས་ཡིན་མོད། འོན་ཀྱང་དེ་ཉིད་ཚེ་གཅིག་ལ་མི་རྟག་པས། གང་མེད་ན་དོ་ཡོད་མདོག་གིས་ང་རྒྱལ་མ་བྱེད། དེ་ནི་ཚེ་སྔོན་གྱི་བསོད་ནམས་མ་ཞན། ལྷ་དང་བླ་མས་ཐུགས་རྗེས་སྐྱབས་ཏེ། རྡོག་མ་འཁྱོར་བ་ཡིན་ཞིང་། ལས་ཐུར་ལ་ལོག་དུས་ཡུང་རྡོག་སྒྱོ་ཁ་ཐུར་བསྟན་ལྟར། ཉམས་ཉེས་རྒུད་པ་ཞེ་ལ་མ་ཤར་བ་ཡོང་རྒྱུ་ཡོད། ལས་བྱ་བ་ཐུར་ལ་འགྲོ་ཚེ། །རྐྱེན་ངན་པ་མང་པོ་རང་འཁོར་ཡིན། །ཞེས་པ་ལྟར་ཡིན། ཡག་བཞིན་ཡོད་ཚེ་ཡག་ཚོད་ཟུང་དགོས་པ་རེད་མ་གཏོགས་ཚོད་མི་ཐིག་པར་ཕ་རྒྱབ་ཏུ་མཆོང་འགྲོ་བའི་ཉེན་ཁ་ཡོད་ཅེས་གསུངས་པ་རེད། རང་ལ་ཅི་དགོས་དེ་མི་ལའང་དགོས་པས་ཐམས་ཅད་དམའ་འབེབས་བྱ་མི་རུང་། ཁྱད་པར་དུ་ཉམ་ཆུང་ལ་དམའ་འབེབས་བྱ་མི་རུང་། དེས་ན་མཐོ་དུས་ཁེངས་སེམས་བསྐྱུངས་ཏེ་གཞན་ཕན་གྱིས་བྱ་བ་སྒྲུབས། དང་པོ་རང་ལ་གནོད་མེད་པའི་གཞན་ལ་ཕན་རེ་ཨེ་ཐོགས་དང་། སྐབས་ཤིག་ནས་རང་ལ་གནོད་ཆུང་ཆུང་རེ་ཡོད་རུང་གཞན་ལ་ཕན་ཆེན་པོ་ཐོགས་འདུག་སྙམ་ན་དེ་ཨེ་ཐོགས་ལྟ་བ་དང་། དེ་ནས་རང་གཞན་འདྲ་མཉམ་གྱིས་མཐར་རང་ལ་སྡུག་ཡོང་ན་ཡང་གཞན་ལ་ཕན་རེ་བཏགས་པའི་བསམ་པ་མ་གཏོགས་མེད་པ་ཞིག་མ་འགྱུར་ཀྱི་བར་དུ་གཞན་ཕན་བྱ་དགོས། གཞན་ལ་ཕན་པ་ཇི་ཙམ་བྱས་ན་རང་ལ་བདེ་བ་དེ་ཙམ་ཡོང་བ་ཡིན། ཡིན་ཡང་རང་དོན་མེད་པར་གཞན་དོན་སྒྲུབ་པ་མཆོག་ཡིན། གཞོན་ན་རྒྱགས་པ་མེད་པར་བག་ཡོད་བྱ། ཞེས་པ་ནི་ལོ་ཉུང་ཞིང་། ལུས་སྟོབས་རྒྱས་དུས་དེ་དང་མཉམ་པའི་སེམས་ཤེད་མ་ཉམས་གོང་ལ་འཇིག་རྟེན་འདི་ན་ང་བས་ཡན་ལ་སུ་གཅིག་མེད་མ་བསམ་ཀྱང་། ང་ཡང་སྐྱོན་མེད་ཅིག་ཡིན་སྣང་ཤར་ཏེ་སྣང་བ་མཐོ་མཐོ་བྱེད་སྲིད་མོད། དེ་དུས་ཕོ་སར་རྒྱགས་པས་ཕྱི་མཐའ་མི་རིག་པ་དང་། རྟ་སར་རྒྱགས་པས་རྔ་མཐའ་མི་རིག་པས་ཚོད་མི་ཟིན་པ་ཡོང་སྲིད། དེ་བས་བག་ཡོད་པར་གྱིས། གཞོན་ཡང་རྒན་པའི་ཉེ་བར་བྱེད་ལ་དགའ། །མཁས་པར་གྱུར་ཀྱང་ཤེས་པའི་ང་རྒྱལ་མེད། །གསུངས་པ་ལྟར། ཐམས་ཅད་དང་འགྲོག་བདེ་མོ་ཀུན་དང་འདྲིས་བྱམས་པོ་ཞིག་བྱས་ཏེ། ང་རྒྱལ་དང་ཁེངས་སེམས་སྤངས་ནས་འདི་དང་ཕྱི་མ་རང་གཞན་ཕན་བདེའི་ཐབས་ཚུལ་ལ་བློ་ཁ་ཕྱོགས་ཏེ། ཐོས་བསམ་ཤེས་རབ་ཀྱི་མིག་བསྟེན་དགོས་པའི་དུས་ཚོད་ཡིན་པས། དེ་ལྟར་བྱས་ན་འདི་ལེགས་ཕྱི་མར་བདེ་གསུངས་ལ། ཕྱུག་ན་ཆོག་ཤེས་བརྟེན་ཏེ་ཆོས་ཀྱི་ཐབས་ཀྱིས་ནོར་ལས་ནོར་གྱི་སྙིང་པོ་ལོངས། མཐོ་ན་ཁེངས་སེམས་སྐྱུངས་ལ་དམན་ས་བཟུང་སྟེ་གཞན་ཕན་ལ་བརྩོན། ན་ཚོད་གཞོན་ཡང་ང་རྒྱལ་མེད་པར་བག་ཡོད་པར་གྱིས། ཚེ་འདིར་ལེགས་མི་ཚེ་ཆོས་ཀྱིས་བསྐྱལ་ནས་རང་ཕན་རོགས་ཕན་གྱི་ལས་ཀས། གསོན་ན་དོན་ཆེ་བ་ཕྱི་མར་བདེ་བ་ཐོབ་པ་དང་། ཚེ་འདིར་རྣམ་དཀར་བསོད་ནམས་ཀྱི་ས་བོན་ཞིག་བསགས་པའི་རྐྱེན་གྱིས་རྒྱུ་ཆུང་ཡང་འབྲས་བུ་ཆེན་པོ་གཏན་དུ་བདེ་བའི་ལམ་སྣ་ཞིག་ཟིན་པས། འདི་བདེ་ཕྱི་མར་བདེ་བའི་བདེ་སྐྱིད་རྒྱུ་འབྲས་དང་ལྡན་པའི་མི་ཚེ་ཞིག་སྐྱེལ་བསམ་ན་དེ་འདྲ་གྱིས་གསུངས་ཏེ་གདམས་ངག་གནང་བའོ། །ལོ་གཅིག་གི་ནང་ནས་ལན་རེ། དེ་ཡང་ན་ནིང་ད་ལོ་ད་གཟོད་རང་རེ་མཉམ་དུ་འཛོམས་ནས། རང་གཞན་གཉིས་ཀས་ཕྱི་མའི་དོན་ཆེན་ལ་གྲོས་མོལ་ཞིག་བྱེད་པའི་སྐལ་བ་ཞིག་ལྡན། མི་ལུས་ཞིག་བླང་། སྐེ་རགས་ཐད་ལ་བཅིང་། རྐང་པ་ས་ལ་བཙུགས་ནས་འགྲོ་བཞིན་ཡོད་པས། རང་རེའི་དེད་དེ་འགྲོ་བཞིན་ཡོད་པའི་དུད་འགྲོ་རྩྭ་ཟན་གཡག་རྒན་འབྲི་རྒན་རྣམས་ལས་ལྷག་ཅིག་གི་འདེང་རྒྱག་ཡོད་དགོས་པས། རང་རང་གི་དེ་སྔོན་གྱི་དུས་ཚོད་ལ་ཕྱི་ལྟས་རེ་བྱས་ཏེ། མི་ཚེའི་བྱ་བར་ཕྱོགས་སྡོམ་ཞིག་བརྒྱབ་ན། ཉིན་གཅིག་ལའང་མ་བསྡད་པར་བྲེལ་གྱིན་ཡོད་པ་འདིས་ཅི་ཞིག་བསྒྲུབས་ཀྱིན་ཡོད། གང་ཞིག་འགྲུབ་ཀྱིན་འདུག་པར་བལྟས་ན། ཚེ་འདིར་ཟ་གྱོན་ལོངས་སྤྱོད་དང་ཉེ་རིང་ཆགས་སྡང་ཙམ་དང་། ཡར་ལས་མར་ལས་ཡར་བཤད་མར་བཤད་རེ་བྱས་ནས་དབྱར་དགུན་སྟོན་དཔྱིད་ཀྱི་ཉི་མ་ནམ་ཟླ་ཕུད། ད་གཅིག་བལྟས་ཚེ་ལོ་ཡར་ཟད་ཐོད་པའི་སྟེང་ལ་རྒས་གཉེར་འབབ་སར་ཐོན་ཡོང་གི་ཡོད་པ་ཡིན། དེ་དང་མཉམ་དུ་རྟ་རྒན་ཟོག་རྒན་ཐམས་ཅད་བེའུ་ཡ་རུ་ཤད་ལེ་ཁ་ཡར་བསགས་ཚོ་སོ་ཆད་ལ་ལྷུང་རྒྱུའི་འགྲོ་སྟངས་དང་གཅིག་མཚུངས་ཡིན། དེ་རྣམས་ཀྱིས་ཀྱང་རྩྭ་ཟོས་ལྕི་བ་བཏང་དགུང་མོ་ཉལ་རྒྱུ་དེ་ང་ཚོ་དང་གཅིག་པ་ཡིན་པས། བཤད་ཀྱང་མ་བཤད་རུང་དེ་སྔོན་བྱ་བར་ཁྱི་ཞིག་མི་རི་ལ། སྒོའི་གནག་ཕྱུགས་རྣམས་དང་ཁྱིམ་གྱི་མི་ཐམས་ཅད་ལ་རང་དབང་ཡོད་མེད་ཅུང་ཟད་ཙམ་མ་གཏོགས་དམིགས་ཡུལ་འདུན་པ་མེད་ལུགས། ཟ་ཉལ་འགྲོ་འདུག་ཙམ་ཞིག་ཤེས་ལུགས། ཚེ་ཕྱི་མ་གཉིས་ཀས་མ་ཤེས་ལུགས་འདྲ་བ་མ་ཡིན་ནམ། ད་རེས་ཆོས་རའི་ནང་དུ་འདུས་པའི་དོན་དག་ཅི་ཞིག་ཡིན་ཞེ་ན། ཚེ་འདི་ཕྱིའི་དོན་ཆེན་ལ་གྲོས་ཀྱི་སྟེང་ནས་བློ་སྒོ་ཕྱེ་རྒྱུ་ཡོད་མིན་གྱི་དོན་དག་དེ་ཡིན་ལ། དེས་ན་ཚེ་འདི་ཕྱིའི་དོན་དག་ལ་ཞིབ་བཤེར་ཞིག་ཕུད་དགོས་ཚེ། འདས་མ་འོངས་གཉིས་ཀའི་བྱ་བའི་འགྲོ་ལམ་གྱི་སྟེང་དུ་འདེང་ཞིག་བརྒྱབ་ན། འདི་བྱས་ན་འདི་རེད་ཟེར་རྒྱུའི་ལམ་སྟོན་གསལ་བོར་ཞིག་མེད་པའི་ཚེ། ད་དུང་ཅི་བྱུང་ཅི་མཐའ་ཡི་འདེང་རྒྱག་མེད་པར་ལོང་འགྲོ་ཞིག་བྱེད་དགོས་ན་མི་འགྲིག་པས། དེ་སྔོན་སོང་སོང་གི་འགྲོ་ལམ་དོན་མེད་སྟོང་ལོག་བྱས་པའི་གྱོང་ཁ་དེ་འདྲ་ཕྱིན་ཆད་མི་ཡོང་ཐབས་ལ་བསམ་བློ་གཏོང་དགོས། འགོ་རྒྱ་གར་སྐད་ནས་སྔོན་ནས་ད་ཡི་བར་དུ་ལས་ལས་བརྒྱུགས་བརྒྱུགས་འདུར་འདུར་བྱས་པ་ཐམས་ཅད་ཀྱིས་གཡག་རྒན་སྣ་ལོ་ཞིག་གི་གོ་མ་གཏོགས་མ་ཆོད་པ་གསལ་བོ་ལྷང་ལ་ཕུད་ནས། དུད་འགྲོ་ཞིག་དང་བསྡུར་ན་རང་དབང་ཡོད་མེད་མི་ཡི་དྲག་ཟེར་མོད། དོན་ལ་རང་དབང་ཡང་མེད་སྟེ། མི་ན་བསམ་ན་རང་དབང་མེད། མི་འཆི་བསམ་ན་རང་དབང་མེད། ཆགས་སྡང་རྨོངས་གསུམ་གྱིས་ཁ་ལོ་ཞིག་སྒྱུར་ཚེ། སྡུག་བསྔལ་མྱོང་འདོད་སུ་ལའང་མེད་མོད། འོན་ཀྱང་མི་མྱོང་རང་དབང་མེད་པར་སྔོན་ལས་བཙན་པོས་དེད་ཚེ་དེ་རིང་འཆི་དགོས་ཀྱང་འཆི་སར་འགྲོ་བ་ལས་ཐབས་གཞན་མེད། ད་ལྟ་ཤི་རན་ནས་བསྡད་ཡོད་པ་ཨེ་ཡིན་ཡང་མི་ཤེས་པར་ཤི་སར་ཡིན་སྣང་མ་ཤར་ནས་འགྲོ་བ་རེད། དེས་ན་ད་སྔོན་ཚར་བ་རྣམས་ནི་འགྱོད་ཀྱང་ཕྱིར་འོངས་མེད་པས་ད་ནི་ཚེ་མཐའ་ཅུང་ཟད་ཅིག་ཡོད་ན་མ་འོངས་པའི་དུས་ཚོད་དེའི་ནང་ནས་རང་དབང་གི་རང་ལམ་ཞིག་རྙེད་དགོས། སྔ་དྲོ་མ་ཤེས་འཁྲུལ་བའི་དབང་དུ་སོང་ནའང། ཕྱི་དྲོ་བསམ་བློ་རིག་པས་གཏན་ལ་ཕབ་སྟེ་བློ་ཞིག་རྙེད་དགོས། དེ་རྙེད་པའི་བློ་སྒོ་དེ་རྒྱལ་བའི་བཀའ་རྗེས་འཇུག་གི་བསྟན་བཅོས་ཀྱིས་ཕྱེ་བཞིན་ཡོད་པའི་དུས་ཚོད་དེ་འདྲ་ཞིག་ལ་ཁེལ་ན། ད་ནི་རང་བསམ་རང་གིས་བཏང་སྟེ་བག་མེད་རྣམ་གཡེང་དོན་མེད་འཁྲུལ་བའི་བྱ་གཞག་ཚང་མ་བསྐྱུར་ནས། སྲོག་གཅོད་སར་བླ་མི་འཁོར་བར་འདི་ཕྱིའི་དོན་ཆེན་སྒྲུབ་རན་པ་ཡིན། དེ་རིང་ཁ་རྩང་འཛམ་གླིང་གི་མི་སྐྲ་སེར་པོ་དང་ནག་པོ་ཅན། མིག་སྔོན་པོ་དང་རག་རག་ཅན་ལ་མ་ལྟོས་པར་གནམ་འོག་གི་མི་མང་པོ་ཞིག་གིས། བོད་དུ་དར་བའི་ནང་ཆོས་འདི་ལ་རྩ་ཆེན་དོན་ཆེན་དུ་བརྩི་བཞིན་ཡོད་པ་འདི། བོད་གཅེས་པས་མ་ཡིན་ལ། བོད་ཡག་པས་དེ་བས་མིན། མི་ཞེས་པ་འདི་རང་འདོད་ཆེ་བ་དང་ལྷག་པར་དུ་མཐའ་མིའི་རིགས་འདི་འདོད་རྔམ་ཆེ་བས། གང་ན་སྣུམ་ཐིག་ཅིག་དང་སུས་ལག་ན་མཁོ་བྱེད་ཅིག་ཡོད་པ་མཐོང་ཚེ། འདི་ལེན་དགོས་བསམ་པས་སོ། །རྒྱུ་ནོར་འདི་ལ་རིགས་གཉིས་ཡོད་པ་ལས། རིན་ཐང་ཅན་གྱི་དངོས་པོ་གཟུགས་སུ་གྲུབ་པའི་གསེར་དངུལ་གཟི་བྱུར་ཕ་ལམ་ལ་སོགས་པ་དང་ད་དུང་གནའ་རྫས་དཀོན་པའི་རིགས་དང་། རིན་ཐང་ཅན་གྱི་དངོས་པོ་གཟུགས་སུ་མ་གྲུབ་པ་ན། རིན་ཐང་ཅན་དེ་གང་ཡིན་ཞེ་ན། གང་ཟག་གི་རྒྱུད་ན་ཡོད་པའི་ཡོན་ཏན་ཚེ་འདི་ཕྱི་གཉིས་ཀའི་བདེ་སྐྱིད་སྒྲུབ་བྱེད་ཀྱི་ལུང་རྟོགས་ཀྱི་བསྟན་པ་དེ་ཡིན། དེ་གང་ཟག་གི་རྒྱུད་ན་ཡོད་པས་བསད་ན་མ་གཏོགས་ལེན་ཐབས་མེད། ད་དུང་ཡང་ལྷག་ཡོད་པ་འདི་ལྟར་ཡིན། ད་དུང་དངོས་པོ་གཟུགས་སུ་གྲུབ་མ་གྲུབ་གཉིས་ཀ་ཡིན་པའི་རིན་ཐང་ཅན་ཞིག་ཡོད། དེ་ནི་གང་ཡིན་ཞེ་ན། རྟེན་གསུམ་ལི་གཏེར་ལ་སོགས་པ་བྱིན་རླབས་ཅན་སངས་རྒྱས་ཀྱི་རབ་གནས་འཐོར་བ་དང་། གཏེར་སྟོན་ཚད་ལྡན་གྱིས་གཏེར་ནས་བཞེས་པ་འདི་ཚོ་ཡིན། དེ་གསུམ་ལས་ཆེས་བཟང་བ་ནི་ལེགས་ཉེས་བླང་དོར་གྱི་གནས་འདོམས་པའི་ལམ་སྟོན་གྱི་སྒྲོན་མེ། གང་ཟག་གི་རྒྱུད་ན་ཡོད་པའི་ཤེས་རིག་ཡོན་ཏན་དངོས་པོ་གཟུགས་སུ་མ་གྲུབ་པ་འདི་ཡིན་ལ། དེང་སང་འཛམ་བུ་གླིང་ན་ཆ་ཚང་བ་རྒྱུད་པ་མ་ཆད་པ་ཚན་རིག་གིས་བརྟགས་དཔྱད་བྱས་པའི་རིག་གཞུང་དེ། མདོ་སྔགས་ཉིས་ལྡན་གྱི་རིང་ལུགས་བོད་ལ་དར་རྒྱུ་འདི་ལས་ལྷག་ཅིག་མེད། དེ་གཞན་ལ་མེད་པའི་ཁྱད་ནོར་ཞིག་ཡིན་པས། དེ་བདག་ཐུབ་དང་མི་ཐུབ་བོད་མི་རང་ཉིད་ལ་རག་ལས་ཤིང་། རང་ལ་ཡོད་པའི་རྒྱུ་བེད་སྤྱོད་གཏོང་ཤེས་མིན་རང་ལ་ཐུག་པ་ཡིན། ཧ་ལས་ཏེ་བལྟ་མི་འདུག་པར། ཆོས་ཉམས་ལེན་རང་གིས་གྱིས་དང་ངའི་དེ་ཁྱོས་ཁྱེར་ཐལ་མི་སྐུར་ཟེར་མཁན་མེད། ཆོས་དང་འཛམ་གླིང་གི་ཉི་མ་གཉིས་ལ་ང་དང་ཁྱོད་ཀྱི་ཁྱད་པར་མེད་དེ། རྫ་ཁྲ་ཡག་ནོར་གྱི་བང་མཛོད་ལ་སྙབ་ཀྱི་ལག་པ་སུ་རིང་དང་། གཅོད་ཀྱི་གྲི་ཆུང་སུ་རྣོ་སུས་བདག་བྱེད་ན་དེ་ལ་དབང་བ་རེད། གཅིག་གིས་ཁྱེར་སོང་ཚེ་གཅིག་ཤོས་ལ་མི་ལྷག་པ་དེ་འདྲ་མ་ཡིན་པས། དེའི་རིན་ཐང་ཅན་གྱི་ཆོས་དེ་ཅི་འདྲའི་སྒྲུབ་དགོས། གོ་མ་མྱོང་ཟེར་ན་གོ་ལོས་མྱོང་ཕ་ཚེ་བུ་རིང་བུ་ཚེ་བདག་རིང་ལ་ཕྲེང་བ་ལག་ལ་བཟུང་བ་དང་། བོད་གོང་བ་ཅན་དང་ཕྲེང་བ་ཅན་ཟེར་ནི་ཡིན་པ་གོ་མྱོང་བ་དེ་རེད། བློ་གཏད་ས་ཞིག་ཤེས་མེད་པས་གོ་རྩ་ཉན་བདེའི་ཐོག་ནས་གཅིག་ཤོད་དང་། དང་པོ་འགོ་ནས་གོམ་པ་གང་ལ་སྤོ་དགོས་པ་རེད་ཟེར་ན། དང་པོ་འཇིག་རྟེན་ཡང་དག་གི་ལྟ་བ་ཡོད་དགོས། འཇིག་རྟེན་ཡང་དག་གི་ལྟ་བ་གང་རེད་ཟེར་ན། མཐའ་མི་ཀླ་ཀློ་སྤྲ་རིགས་སྤྲེའུ་རིགས་ཐམས་ཅད་ལ་མེད་པའི་ལས་རྒྱུ་འབྲས་ལ་ཡིད་ཆེས་བྱེད་དགོས། ལས་རྒྱུ་འབྲས་ལ་ཡིད་ཆེས་མེད་ཕྱིན་ཕྱག་སྐོར་བ་བྱས་ཀྱང་ཕན་ཐོགས་ཆུང་བ་ཡིན། ལས་རྒྱུ་འབྲས་ལ་ཡིད་ཆེས་ཡོད་པ་དེ་འཇིག་རྟེན་གྱི་བདེ་བའི་རྒྱུའི་རྩ་བ་ཡིན། དེ་ནས་གོམ་པ་གཉིས་པ་དེ་གང་ཡིན་ཞེ་ན་མཆོག་གསུམ་ལ་དད་པ་ཡོད་དགོས། དད་པ་མེད་ན་མཆོག་གསུམ་གྱི་སྐྱབས་འོག་ཏུ་ཚུད་ཐབས་མེད་ལ། དད་པ་འདི་ཡོད་ན་འདི་ཕྱིའི་ལེགས་ཚོགས་ཀྱི་གཏེར་མཛོད་ཀྱི་སྒོ་རྙེད་པ་ལྟ་བུ་ཞིག་ཡིན། འདི་གཉིས་ཀ་ཡོད་ན་སྲིད་པ་འདི་ན་འདི་གཉིས་ལས་ལྷག་པའི་ཡིད་རྟོན་ཁེལ་བའི་གྲོགས་དགོས་ན་ཡང་རྙེད་རྒྱུ་མེད། ཆོས་དེ་གཉིས་ཀ་གཅིག་པུ་བསྒྲུབས་ཏེ་མི་ཚེ་དེ་ཡིས་བསྐྱལ་ན་མི་ཆོག་པ་མེད་ལ། གལ་ཏེ་ཕྱི་མར་མི་བསམ་ཀྱང་། ལས་རྒྱུ་འབྲས་ལ་ཡང་མི་རྩི་ན་ཡང་ཚེ་འདི་ཁས་མི་ལེན་པ་མི་སྲིད་པས། ད་ལྟར་ཡ་རབས་ཀྱི་ཀུན་སྤྱོད་དུ་བཅོས་བྱེད་ལ་ཆོས་འདི་ལས་ལྷག་ཅིག་མེད། མིའི་སེམས་ཁམས་ཀྱི་ནང་གི་བདེ་སྐྱིད་སྐྲུན་ཐབས་ལ་འདིས་ཡན་ཞིག་མེད་པས། གོང་དུ་བཤད་པ་ལྟར་མཐའ་མི་ཡན་ཆད་ཀྱིས་འདི་ལ་ཧམ་སེམས་ལངས་ཏེ་ཧབ་ཐོབ་རྒྱག་གིན་ཡོད་པར་མ་ཟད་དེ་དོན་གཉེར་ཆེན་པོ་ཞིག་བྱེད་ཀྱིན་ཡོད་པ་ཡིན། གཅིག་བྱས་ན་དེ་རིང་ཁ་རྩང་རྒྱ་བླ་དང་ཕྱི་བླ་ཟེར་ནས་དེ་ལ་སྙིང་ཁྲེལ་འཇོག་རྒྱུ་མེད་པར་མགོ་སེར་ནག་ཐམས་ཅད་ཀྱི་མགོ་སྟེང་དུ་ལག་པ་ཞོག་མཁན་བླ་རྒན་རྣམས་ཡིན། སྟག་དམར་ཡག་གི་མགོ་མ་དགོས་འཕོངས་ལ་རེག་ས་སུ་གཅིག་གིས་མི་ལོན་པས། དེ་ལ་བསྟོད་སྒྲ་མེད་ན་སྨད་སྒྲ་ཅིའི་ཕྱིར་ཡོད། གཉིས་བྱས་ན་ཞགས་པའི་ཨ་ལོང་ཕར་ལ་སྐོན་གྱིན་ཡོད་དམ་ཚུར་ལ་སྐོན་གྱིན་ཡོད་ཤེས་ཀྱང་མི་ཤེས། ཡང་འགའ་རེའི་དེའི་བར་ནས་བླ་མ་མཚར་འདུག་སྙམ་ནས་བླ་རྫུན་བྱས་ནས་བླ་རྐུབ་བུད་དུས་འདི་རྐུབ་ཕྱི་རྐུབ་གཉིས་ཀ་བུད་པ་ཡིན། ཨ་ལ་རྩེད་མོ་ཡིན་དེ་ཚོ་དོན་མེད་ཀྱི་ཁ་བརྡ་ནང་དུ་བུད་སོང་བ་རེད། ཆོས་ཁྲིད་བཤད་པའི་སྐབས་ཡིན་པས། སྐབས་སུ་བབ་པ་གང་ཞིག་གསན་པར་བྱ་བའི་ཆོས་ཀྱི་རིམ་པ་ནི་རྣམ་དག་བདེ་ཆེན་ཞིང་གི་སྨོན་ལམ་མཁས་གྲུབ་རཱ་ག་ཨ་སྱས་མཛད་པ་འདི་ཉིད་འཆད་པའི་སྐབས་ལས་འགའ་ཞིག་གོང་དུ་སོང་ནས་།

རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ།

རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ནི། ཞིང་ཁམས་བདེ་བ་ཅན་ལ་ཐེག་པ་ཆེ་ཆུང་གི་རིགས་གཉིས་ཡོད་པའི་ནང་གི་ཐེག་ཆེན་གྱི་རིགས་ལ་སྐྱེ་བ་འཛིན་པའི་དབང་དུ་བཏང་སྟེ་གསུངས་ཀྱིན་ཡོད་ལ། བདེ་བ་ཅན་ལ་སྐྱེ་བའི་རྒྱུ་གཞན་པ་གསུམ་པོ་ཐུན་མོང་གི་དབང་དུ་བྱས་ཏེ་གསུངས་པ་ཞིག་དང་། ཡིན་ན་ཡང་རང་རེ་ཐེག་ཆེན་མདོ་སྔགས་ཟུང་འབྲེལ་གྱི་ལམ་ལ་ཞུགས་པར་མ་ཟད་འགྲོ་བ་སེམས་ཅན་ཐམས་ཅད་ཐར་ལམ་ལ་འདྲེན། འཁོར་བ་དོང་ནས་སྤྲུག་པའི་ཆེད་དུ་རྫོགས་བྱང་དོན་གཉེར་རེ་བྱེད་ཀྱིན་ཡོད་པའི་ཐེག་ཆེན་པ་ཡིན་པའི་དབང་གིས། སྨོན་ལམ་གཞུང་གི་བསྟན་དོན་ཡང་སྙིང་རྗེའི་དྲང་བའི་བྱང་ཆུབ་ཀྱི་སེམས་རིན་པོ་ཆེ་ཐེག་ཆེན་མདོ་སྔགས་གཉིས་ཀའི་གཞུང་ལྟར་ཡིན་ན། དེ་དང་མི་འབྲལ་བའི་ཐོག་ནས་དངོས་ཤུགས་བརྒྱུད་གསུམ་གྱིས་བསྟན་ལ། འདི་ནས་ས་བཅད་ཀྱི་དབང་དུ་བྱས་ཏེ་དེའི་དོན་རགས་བསྡུས་ཀྱི་ས་ཁུངས་འཛིན་བྱེད་ཙམ་ཞིག་ཞུས་ན། བྱང་ཆུབ་སེམས་བསྐྱེད་ཀྱི་ངོ་བོ་དེ་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའོ། །མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར་རོ། །བྱང་ཆུབ་མཆོག་ཏུ་སེམས་བསྐྱེད་པ་འདི་ལ་དབྱེ་ན་རྣམ་པ་གསུམ། དཔེའི་སྒོ་ནས་དབྱེ་བ། ས་མཚམས་ཀྱི་སྒོ་ནས་དབྱེ་བ། མཚན་ཉིད་ཀྱི་སྒོ་ནས་དབྱེ་བའོ། །དེའི་ནང་ནས་དང་པོ་དཔེའི་སྒོ་ནས་དབྱེ་ན་སོ་སོའི་སྐྱེ་བོ་ནས་སངས་རྒྱས་ཀྱི་སའི་བར་དུ། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །ལ་སོགས་པ་དཔེ་རྣམ་པ་ཉི་ཤུ་རྩ་གཉིས་ཀྱིས་དཔེ་གྲོགས་ཆོས་གསུམ་སྦྱར་ཏེ་བཤད་རྒྱུ་ཡོད། གཉིས་པ་ས་མཚམས་ཀྱི་སྒོ་ནས་དབྱེ་ན་རྣམ་པ་བཞི། མོས་པ་སྤྱོད་པའི་སེམས་བསྐྱེད་དང་། ལྷག་བསམ་དག་པའི་སེམས་བསྐྱེད། རྣམ་པར་སྨིན་པའི་སེམས་བསྐྱེད་དང་གསུམ། སྒྲིབ་པ་སྤོང་བའི་སེམས་བསྐྱེད་དང་བཞི། མོས་པ་སྤྱོད་པའི་ས་ནས་སངས་རྒྱས་ཀྱི་སའི་བར་དུ་བསྡུས་པའོ། །གསུམ་པ་མཚན་ཉིད་ཀྱི་སྒོ་ནས་དབྱེ་ན་གཉིས་ཏེ། དོན་དམ་བྱང་ཆུབ་ཀྱི་སེམས་དང་། ཀུན་རྫོབ་བྱང་ཆུབ་ཀྱི་སེམས་རྣམ་པ་གཉིས། དོན་དམ་བྱང་ཆུབ་ཀྱི་སེམས་ཇི་ལྟར་ཡིན་ཞེ་ན། སྟོང་ཉིད་སྙིང་རྗེའི་སྙིང་པོ་ཅན་གསལ་ལ་མི་གཡོ་སྤྲོས་པའི་མཐའ་དང་བྲལ་བ་ཞིག་གོ། ཀུན་རྫོབ་བྱང་ཆུབ་ཀྱི་སེམས་དེ་སྙིང་རྗེས་སེམས་ཅན་ཐམས་ཅད་འཁོར་བའི་སྡུག་བསྔལ་ལས་དྲངས་ཏེ་ཤེས་རབ་ཀྱིས་རྫོགས་པའི་བྱང་ཆུབ་ལ་འགོད་འདོད་ཀྱི་བློའམ་དེ་ལ་དམ་བཅའ་བའོ། །དོན་དམ་བྱང་ཆུབ་ཀྱི་སེམས་དེ་ཕྲ་བ་ཆོས་ཉིད་ལས་ཐོབ་པ་བསྒོམས་སྟོབས་ལས་བྱུང་བ་དང་། ཀུན་རྫོབ་བྱང་ཆུབ་ཀྱི་སེམས་དེ་རགས་པ་བརྡ་ལས་ཐོབ་པ་བསམ་སྦྱོར་ལ་ལྟོས་ཏེ་སྡོམ་པ་ལེན་རྒྱུ་ཅན་ཞིག་ཡིན། སྐབས་ཐོབ་ཀྱི་བཤད་བྱ་ངོ་མ་ནི་ཀུན་རྫོབ་བྱང་ཆུབ་ཀྱི་སེམས་ཡིན་པས། ཀུན་རྫོབ་བྱང་ཆུབ་ཀྱི་སེམས་དེ་ལ་དབྱེ་ན་སྨོན་པའི་སེམས་དང་འཇུག་པའི་སེམས་གཉིས་ཡོད། སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །ཞེས་གསུངས་སོ། །འདི་ལ་བཞེད་པ་མི་འདྲ་བ་ཡོད་ན་ཡང་གཞུང་འདི་དང་བསྟུན་ན། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་བཞིན་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་སོ། །སྨོན་པ་དེ་འགྲོ་བར་འདོད་པ་དང་འདྲ། རྫོགས་པའི་སངས་རྒྱས་ཐོབ་འདོད་ཀྱི་བསམ་པའོ། །འཇུག་པ་འགྲོ་བ་དངོས་དང་འདྲ། སངས་རྒྱས་སྒྲུབ་པའི་སྦྱོར་བ་བརྩམས་ཏེ་ལམ་ལ་ཞུགས་པ་ལྟ་བུའོ། །འཕགས་པ་འཇམ་དཔལ་ནས་སློབ་དཔོན་ཀླུ་སྒྲུབ་ལས་བརྒྱུད་པའི་སློབ་དཔོན་ཞི་བ་ལྷས་དེ་ལྟར་གསུངས། ཡང་འཕགས་པ་བྱམས་པ་ནས་སློབ་དཔོན་ཐོགས་མེད་ལས་བརྒྱུད་པའི་ཇོ་བོ་གསེར་གླིང་པས། སྨོན་པ་དེ་སེམས་ཅན་ཐམས་ཅད་ཀྱི་དོན་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་དགོས་བསམས་ཏེ་འབྲས་བུ་ལ་དམ་བཅའ་བ་དང་། འཇུག་པ་དེ་སངས་རྒྱས་ཐོབ་བྱེད་ཀྱི་རྒྱུ་ཕར་ཕྱིན་དྲུག་སོགས་ལ་བསླབ་པར་བྱ་བསམ་ནས་རྒྱུ་ལ་དམ་བཅའ་བའོ། །གང་ལྟར་ཡང་སྙིང་རྗེས་སེམས་ཅན་ལ་དམིགས་པ་དང་ཤེས་རབ་ཀྱི་རྫོགས་བྱང་ལ་དམིགས་པ་སྟེ་ཟུར་གཉིས་སམ་དོན་གཉིས་དང་ལྡན་པའི་སེམས་བསྐྱེད་པའོ། །ཟབ་མོ་ལྟ་སྲོལ་དང་རྒྱ་ཆེན་སྤྱོད་སྲོལ་གང་ལྟར་ཡང་དངོས་གཞི་བྱང་ཆུབ་སེམས་དཔའི་སྡོམ་པ་ལེན་པའི་སྐབས་སུ། ལེན་ཡུལ་སློབ་དཔོན་མཚན་ཉིད་དང་ལྡན་པ། སྡོམ་པ་འབོག་པའི་ཆོ་ག་ལ་མཁས་པ། རང་ཉིད་སྡོམ་པ་ཐོབ་ལ་མ་ཉམས་པར་གནས་པ། ལུས་ངག་གི་རིག་བྱེད་ཀྱིས་བརྡ་སྤྲད་ནུས་པ། ཟང་ཟིང་ལ་མི་ལྟ་བར་སློབ་མ་བརྩེ་བས་སྐྱོང་བ་ཞིག་ཡིན་དགོས། དེ་ལྟ་བུ་མཚན་ཉིད་དང་ལྡན་པའི་བླ་མའི་མདུན་ནས་སྡོམ་པ་བླངས་ཏེ་དུས་རྒྱུན་དུ་རང་གིས་རྟེན་ནམ་ཚོགས་ཞིང་ཡིད་ལ་བྱས་པས་ཀྱང་ལེན་ཆོག་པའོ། །ཚད་མེད་རྣམ་བཞིའི་བློ་སྦྱོང་བ་སྔོན་དུ་སོང་སྟེ་ཟབ་མོ་ལྟ་སྲོལ་གྱི་ལུགས་ལྟར་བྱས་ན། སྦྱོར་བ་དངོས་གཞི་རྗེས་ལ་ཆོ་ག་དང་གསུམ་ཡོད་པ་ལས། དང་པོ་སྦྱོར་བ་ལ་ཕྱག་འཚལ་བ་མཆོད་པའི་ཁུངས་སུ་བསྡུས་ན་མཆོད་པ་འབུལ་བ་དང་སྡིག་པ་བཤགས་པ་ལ་སོགས་པ་དྲུག དེ་མ་བསྡུས་ན་ཡན་ལག་བདུན་ཁ་རྩང་གོང་དུ་བཤད་མ་ཐག་པ་ལྟར་སྔོན་དུ་སོང་ནས། དངོས་གཞི་དམ་བཅའ་བ་ལ་ཚོགས་ཞིང་མདུན་གྱི་ནམ་མཁར་སྤྱན་འདྲེན་པ་དེ། མགོན་པོ་འོད་དཔག་མེད་གཙོ་འཁོར་ལ་ཕྱོགས་བཅུའི་རྒྱལ་བ་སྲས་དང་བཅས་པས་བསྐོར་བ་རྣམས་དང་། བླ་མ་རྡོ་རྗེ་འཛིན་པ་ཆེན་པོ་རྣམས་མངོན་སུམ་དུ་བཞུགས་པའི་སྤྱན་སྔར་བདག་གིས་སེམས་ཅན་ཐམས་ཅད་རྫོགས་པའི་བྱང་ཆུབ་ཆེན་པོར་འགོད་པའི་ཕྱིར་དུ་ཐེག་ཆེན་བྱང་ཆུབ་སེམས་ཀྱི་སྡོམ་པ་ཞུ་བ་ཡིན་སྙམ་སྟེ། དགོངས་སུ་གསོལ་བ་གསུམ་གྱིས་སད་པར་བྱས། སྐྱབས་སུ་འགྲོ་བ་གསུམ་གྱི་གཞིར་བཟུང་སྟེ། སྤྱོད་འཇུག་ལས་གསུངས་པ་ལྟར། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་སྐྱབས་སྡོམ་དང་བཅས་པ་ལན་གསུམ་དང་། དམ་བཅའ་བ་བྱང་ཆུབ་སེམས་ཀྱི་སྡོམ་པ་ལེན་པའི་ཚིག་དངོས། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་ཀྱི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ཞེས་ལན་གསུམ་གྱིས་ཐོབ་མཚམས་བརྗོད་པ་གསུམ་གྱིས་ཐ་མའི་སྐབས་ལ་ཐོབ་ཀྱིན་ཡོད་པས་དེ་དུས་སྡོམ་པ་དངོས་སུ་ཐོབ་པར་བསམ་དགོས། དེའི་རྗེས་ཀྱི་ཆོ་ག་ལ་དཀོན་མཆོག་དང་ཆོས་སྐྱོང་བའི་སྲུང་མ་སོགས་དཀར་ཕྱོགས་སྐྱོང་བའི་ལྷ་ལ་གཏོར་མ་ཕུལ། དེང་དུས་བདག་ཚེ་འབྲས་བུ་ཡོད་སོགས་དང་། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་རང་གཞན་དགའ་བ་སྒོམ། དེའི་རྗེས་སུ། བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་ཡང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་རྣམས་སྤོང་བར་ཤོག །ལ་སོགས་པས་སྨོན་ལམ་དང་བསྔོ་བས་མཐའ་བརྒྱན། དེ་ལྟར་རང་རང་སོ་སོའི་མཆོད་ཁང་གི་ནང་དུ་དང་། ཡང་ན་ཡུལ་གཞན་ཞིག་ཏུ་འགྲོ་དུས་སམ། ཡང་ན་ལ་ཁར་ཕྱུགས་རྫི་ལ་འགྲོ་ཞོར་ཡན་ཆད་དུ་ལེན་ཆོག ཉིན་རེ་རེ་བཞིན་དུ་མ་ཆགས་པར་སེམས་བསྐྱེད་རེ་བླངས་ན་སེམས་བསྐྱེད་སྐྱེ་བ་དང་གོང་འཕེལ་དུ་འགྲོ་བས་བསོད་ནམས་བསམ་ཀྱིས་མི་ཁྱབ་པ་སོགས་འགྲོ་བ་ཡིན། བྱང་ཆུབ་མཆོག་དུ་སེམས་བསྐྱེད་པའི་ཕན་ཡོན་ཅི་འདྲ་ཞིག་ཡོད་ཅེ་ན། སྨོན་སེམས་བསྐྱེད་པའི་ཕན་ཡོན་དོན་བརྒྱད་ཀྱིས་བཤད་ཡོད་དེ། ཐེག་ཆེན་གྱི་རིགས་སུ་ཚུད་པ། བྱང་སེམས་ཀྱི་བསླབ་པའི་རྟེན་བྱེད་པ། སྡིག་པ་ཐམས་ཅད་རྩད་ནས་འཇོམས་པ། བསོད་ནམས་དཔག་མེད་ཐོབ་པ། སངས་རྒྱས་ཐམས་ཅད་མཉེས་པར་འགྱུར་བ་ལ་སོགས་པའོ། དེ་ཚོ་ཅི་འདྲ་ཡིན་ཞེ་ན། ཐེག་པ་ཆེན་པོའི་རིགས་སུ་ཚུད་པ་ཡིན། བྱང་ཆུབ་ཀྱི་སེམས་མ་སྐྱེས་ན་སྤྱོད་པ་ཕུན་སུམ་ཚོགས་པ་ཇི་ལྟར་ལྡན་ཀྱང་ཐེག་ཆེན་གྱི་ཁུངས་སུ་མི་ཚུད། དེར་མ་ཚུད་ན་རྫོགས་པའི་སངས་རྒྱས་མི་ཐོབ། གང་ལ་བྱང་ཆུབ་ཀྱི་སེམས་བསྐྱེད་པ་ཡོད་པ་ནས་བཟུང་ཐེག་པ་ཆེན་པོའི་རིགས་སུ་སྐྱེས་པར་མ་ཟད་བྱང་ཆུབ་སེམས་དཔའི་མིང་ཐོབ་ཅིང་བྱང་ཆུབ་སེམས་དཔའི་བསླབ་པ་ཐམས་ཅད་ཀྱི་རྟེན་ཡིན། སྨོན་སེམས་སངས་རྒྱས་ཐོབ་འདོད་ཀྱི་བློ་དེ་མེད་ན་སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་པོ་གནས་དོན་ཞིག་ཡོད་པ་མ་རེད། དེ་ལྟ་བུའི་བློ་ཡོད་པ་ནི་བསླབ་པའི་རྟེན་ཡིན། སྡིག་པ་ཐམས་ཅད་རྩད་ནས་གཅོད་པར་བྱེད་པ་དང་། དེ་ཇི་ལྟར་ཡིན་ཞེ་ན། སྡིག་པའི་གཉེན་པོ་དགེ་བ་རེད། དགེ་བ་ཐམས་ཅད་ཀྱི་མཆོག་ཏུ་གྱུར་བ་ནི་བྱང་ཆུབ་ཀྱི་སེམས་ཡིན་པས། གཉེན་པོ་སྟོབས་ཆེན་གྱིས་མི་མཐུན་ཕྱོགས་འཇོམས་པ་ཆོས་ཉིད་ཡིན། དཔེར་ན་མར་མེས་མུན་པ་དང་ཉི་མས་བ་མོ་ལྟ་བུའོ། །བླ་ན་མེད་པའི་བྱང་ཆུབ་ཀྱི་རྩ་བ་ཚུགས་པར་འགྱུར་བའང་ཡིན་ལ། ཇི་ལྟར་ཡིན་ཞེ་ན། སེམས་ཅན་གྱི་རྒྱུད་དེ་ས་གཞི་ལྟ་བུ་ཞིག་ཡིན་ལ་བྱམས་སྙིང་རྗེ་གཉིས་ཀའི་རླན་དང་འབྲེལ་ཏེ་བྱང་ཆུབ་སེམས་ཀྱི་རྩ་བ་ཚུགས་སོང་ན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཡལ་འདབ་རྒྱས་ཏེ་རྫོགས་པའི་སངས་རྒྱས་སྐུ་གཉིས་ཀྱི་བདག་ཉིད་ཅན་གྱི་འབྲས་བུ་སྨིན་ཏེ་སེམས་བསྐྱེད་ཀྱི་ཕན་བདེ་འབྱུང་བ་ཡིན། བསོད་ནམས་དཔག་མེད་ཀྱང་ཐོབ་སྟེ། སྤྱོད་འཇུག་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་སོ། །སངས་རྒྱས་ཐམས་ཅད་མཉེས་པར་འགྱུར་བའང་ཡིན་ཏེ། གལ་ཏེ་ཉན་ཐོས་དགྲ་བཅོམ་པ་ཞིག་ཤིང་རྟར་བཞུགས་ཡོད་ན་སངས་རྒྱས་བཅོམ་ལྡན་འདས་ཀྱི་ཕྱག་ལྟ་ཅི་ཞབས་ཀྱིས་དེ་ལ་རེག་པ་ཙམ་ཡང་མི་འོས་མོད། གལ་ཏེ་བྱང་ཆུབ་ཀྱི་སེམས་དང་པོ་བསྐྱེད་པ་ཞིག་ཤིང་རྟར་བཞུགས་ཡོད་ན་དེའི་ཤིང་རྟ་ནི་སྟོན་པས་དབུ་ཡིས་འདྲེན་ནའང་རུང་ངོ་ཞེས་གསུངས་ཡོད། དེའི་རྒྱུ་མཚན་གཙོ་བོ་ནི་བྱང་ཆུབ་ཀྱི་སེམས་སངས་རྒྱས་ཀྱི་རྒྱུ་ཡིན་པས་སོ། །བྱང་ཆུབ་ཀྱི་སེམས་སྐྱེས་ན་མྱུར་དུ་སངས་རྒྱས་ཐོབ། ཅིའི་ཕྱིར་སྙམ་ན། བྱང་ཆུབ་ཀྱི་སེམས་སྐྱེས་ན་མཐའ་གཉིས་ལ་མི་གནས་པ་ཡིན་པས་མངོན་པར་རྫོགས་པར་འཚང་རྒྱ་བར་འགྱུར་བ་དང་། སེམས་ཅན་ཐམས་ཅད་ལ་ཕན་པ་ཚད་མེད་འབྱུང་བ་དེ་སྨོན་སེམས་བླངས་པའི་ཕན་ཡོན་ཡིན་ལ། འཇུག་སེམས་སྐྱེས་པའི་ཕན་ཡོན་དེ་རྣམས་ཀྱི་སྟེང་དུ་རང་དོན་རྒྱུན་ཆགས་སུ་འབྱུང་བ་དང་། གཞན་དོན་སྣ་ཚོགས་སུ་འབྱུང་བ་ཡིན། རང་དོན་རྒྱུན་ཆགས་སུ་ཅི་འདྲའི་འབྱུང་ཞེ་ན། དེང་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པར་དུ་མ་ཞིག །ནམ་མཁའ་མཉམ་པ་རབ་དུ་འབྱུང་། །ཞེས་གསུངས་སོ། །འཇུག་སེམས་བླངས་ཚར་རྗེས་སྔར་དང་མི་འདྲ་བར་གཉིད་ལོག་པའི་སྐབས་དང་བརྒྱལ་བའི་སྐབས་བག་མེད་དུ་གྱུར་ཡོད་པ་ལ་སོགས་པའི་སྐབས་ཀྱང་བསོད་ནམས་ཀྱི་ཤུགས་རྒྱུན་མི་ཆད་པར་འབྱུང་བ་ཡིན་ཞེས་གསུངས་ཡོད། གཞན་དོན་སྣ་ཚོགས་ཇི་ལྟར་འབྱུང་ཞེ་ན། སེམས་ཅན་གྱི་སྡུག་བསྔལ་སེལ། བདེ་བ་སྒྲུབ། ཉོན་མོངས་པ་གཅོད་པར་བྱེད་པ་ལ་སོགས་པ། སྤྱོད་འཇུག་ལས། བདེ་བ་ཀུན་ཀྱིས་ཚིམས་པ་དང་། །སྡུག་བསྔལ་ཐམས་ཅད་གཅོད་བྱེད་ཅིང་། །གཏི་མུག་ཀྱང་ནི་སེལ་བྱེད་པ། །དེ་དང་དགེ་མཚུངས་ག་ལ་ཡོད། །ཅེས་པ་ལ་སོགས་པ་གསུངས་པ་ལྟར་རོ། །བྱང་ཆུབ་ཀྱི་སེམས་བླངས་ཏེ་དོར་ན་ཡང་ཉེས་དམིགས་ཆེན་པོ་འབྱུང་སྟེ། ཉེས་པས་ངན་འགྲོར་འགྲོ་བ་དང་། དམ་བཅའ་བྱས་ཏེ་དེ་མ་བསྒྲུབ་ན་ཁས་བླངས་ཉམས་པས་སེམས་ཅན་བསླུས་པ་རེད། སེམས་ཅན་ཐམས་ཅད་མགྲོན་དུ་བོས་ཏེ་དེའི་སྤྱན་སྔར་ཁས་བླངས་པ་ཡིན་པས་སེམས་ཅན་བློས་བཏང་བ་དང་། ཕྱོགས་བཅུའི་རྒྱལ་བ་སྲས་བཅས་ཀྱི་མདུན་ནས་ཁས་བླངས་པ་ཡང་རྫུན་དུ་འགྱུར་བས་ཕྱོགས་བཅུའི་རྒྱལ་བ་སྲས་བཅས་ཀྱི་དབུ་གཡོགས་པ་ཡིན་པས། དེའི་རྣམ་སྨིན་ངན་སོང་དུ་སྐྱེ་ཞིང་། ཡང་ཉེས་པ་དེས་གཞན་དོན་སྒྲུབ་པ་ལས་ཉམས་ཏེ། ས་ཐོབ་པ་ལ་ཡུན་རིང་འགོར། བྱང་ཆུབ་ཀྱི་སེམས་དེ་ཤོར་ཞིང་ཉམས་པའི་རྒྱུ་དེ་གང་ཡིན་ཞེ་ན། སྨོན་པ་སེམས་བསྐྱེད་ཉམས་བྱེད་སེམས་ཅན་བློས་བཏང་བ་དང་། ནག་པོའི་ཆོས་བཞི་བརྟེན་པ་དང་། སེམས་བསྐྱེད་དེ་དང་མི་མཐུན་པའི་སེམས་གཞན་དག་བསྐྱེད་ན་ཉམས་པར་འགྱུར། འཇུག་སེམས་ཉམས་བྱེད་ཀྱི་རྒྱུ་ཕམ་པའི་གནས་ལྟ་བུ་ཀུན་དཀྲིས་ཆེན་པོ་བསྐྱེད་ན་ཉམས་པར་གསུངས་ཡོད། སྨོན་པ་སེམས་བསྐྱེད་ཉམས་པ་ནི་འཇུག་སེམས་ཉམས་པའི་རྒྱུ་ཡིན་པས་བསླབ་བྱ་ཅི་ཞིག་སྲུང་དགོས་པ་ཡིན་ཞེ་ན། ཀུན་མཁྱེན་ཆེན་པོའི་སེམས་ཉིད་ངལ་གསོ་ལས། སྨོན་པའི་བསླབ་བྱ་ཚད་མེད་བཞི་པོ་བསྒོམས། །དེ་ཡི་མི་མཐུན་ཕྱོགས་སྤངས་སེམས་བསྲུང་བྱ། །འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱད། །དེ་ཡི་མི་མཐུན་ཕྱོགས་སྤངས་བརྩོན་པར་བྱ། །ཞེས་གསུངས་པ་ལྟར་རོ། །གཞན་ལ་ཕན་པར་གྱུར་ན་བྱང་ཆུབ་སེམས་དཔར་ལུས་ངག་གི་ལས་བདུན་གནང་བའི་སྐབས་ཀྱང་ཡོད་དེ། དཔེར་ན་སྲོག་གཅད་ངེས་ཀྱི་སེམས་ཅན་ཞིག་བསྐུངས་ཏེ་མ་མཐོང་ཞེས་སྨྲས་ན། དེ་སྲོག་བསྐྱབ་པ་དང་ཕ་རོལ་པོ་སྡིག་ལས་བསྐྱབ་པའི་ཕྱིར་ཡིན་པས་སྡིག་པ་མེད་པ་ལྟ་བུ་ཡིན། ཉམས་ན་ཕྱིར་བཅོས་ཚུལ་ལ་དབང་པོའི་ཁྱད་པར་ལས་དབང་འབྲིང་ལྷ་ཡི་རྣལ་འབྱོར་ལ་ནན་ཏན་དུ་བྱས་ཏེ་རང་གི་ཡི་དམ་གང་ཡིན་དང་། ཁྱད་པར་དུ་རིག་སྔགས་སྤྱིའི་ལྷ་འཕགས་པ་ནམ་མཁའི་སྙིང་པོའི་མདུན་དུ་བཤགས་དགོས་སོ། །དབང་པོ་དམན་པས་གཉེན་པོ་སྟོབས་བཞིའི་སྒོ་ནས་བཤགས་དགོས། དབང་རྣོན་གང་ཟག་རབ་ཅིག་ཡིན་ན་སྒྱུ་མ་རྨི་ལམ་གྱི་ཚུལ་གྱིས་རྒྱལ་བ་སྲས་བཅས་ཀྱི་སྤྱན་སྔར་ཚིག་གིས་བཤགས་པ་དང་། དམིགས་མེད་ནམ་མཁའ་ལྟ་བུའི་ངང་ལ་མཉམ་པར་བཞག་པས་ཉེས་ལྟུང་ལས་གྲོལ་བར་འགྱུར་པའོ། །འདིའི་སྐོར་ཞིབ་པར་གཞུང་ལས་ཤེས་པར་བྱའོ། །བྱང་ཆུབ་ཀྱི་སེམས་ཉམས་པའི་རྒྱུའི་གཙོ་བོ་ཞེ་སྡང་དང་རང་འདོད་ཀྱི་ཁུངས་ནས་འབྱུང་བ་ཡིན་ལ། འདི་ནས་བྱང་ཆུབ་སེམས་དཔའི་བཟོད་པའི་སྟོབས་དང་དགེ་བཅུར་སྤྱོད་པའི་འབྲས་བུ་བསྟན་པའི་གཏམ་རྒྱུད་ཅིག་བཤད། སངས་རྒྱས་བཅོམ་ལྡན་འདས་རྒྱལ་བོའི་ཁབ་བྱ་རྒོད་ཕུང་པོའི་རི་བོར་བཞུགས་པའི་དུས་ཤིག་ལ། ཀུན་དགའ་བོས་བཅོམ་ལྡན་འདས་ལ་དྲིས་པ། ལྷས་བྱིན་འདིས་ལས་སྣ་ཚོགས་པས་དེ་བཞིན་གཤེགས་པ་ཁྱེད་ལ་གནོད་པའི་བྱ་བ་ཤ་སྟག་རྩོམ་གྱིན་ཡོད་ན། དེ་བཞིན་གཤེགས་པས་ལྷས་བྱིན་དང་སྲས་དགྲ་གཅན་འཛིན་གཉིས་ཀ་ཁྱད་མེད་པར་ནམ་ཡང་ཐུགས་བརྩེ་བ་ཁོ་ནས་སྐྱོང་བ་འདི་ཇི་ལྟར་ཡིན་ཞེས་དྲིས་པས། བཅོམ་ལྡན་འདས་ཀྱིས་བཀའ་བསྩལ་བ། ལྷས་བྱིན་གྱིས་སྐྱེ་བ་འདིར་ང་ལ་གནོད་པ་བྱས་པར་མ་ཟད་སྐྱེ་བ་གཞན་དུའང་ང་ལ་གནོད་སེམས་བྱེད་མྱོང་བ་སྟེ། སྔོན་བསྐལ་བ་གྲངས་མེད་དཔག་མེད་འདས་པའི་སྔོན་རོལ་ཞིག་ཏུ། འཛམ་བུ་གླིང་འདིར་རྒྱལ་པོ་རིན་ཆེན་གོ་ཆ་ཞེས་བྱ་བ་རྒྱལ་ཕྲན་ལྔ་བརྒྱ་ལ་དབང་བྱེད་པ་ཞིག་ཡོད། དེ་ལ་སྲས་མེད་པས་མི་དགའ་བས། དེ་ལ་རྨི་ལམ་དུ་ལྷ་ཞིག་གིས། ཁྱོད་ཕྱི་རོལ་ནགས་ཚལ་གྱི་ནང་དུ་སོང་དང་དྲང་སྲོང་གཉིས་དང་འཕྲད་པར་འགྱུར་ཞིང་། དེའི་ནང་ནས་གཅིག་ནི་ལུས་གསེར་གྱི་མདོག་ལྟར་དྭངས་ཤིང་མི་འདྲ་བ་ཞིག་ཡོད། དེ་ལ་གསོལ་འདེབས་དང་སྐྱབས་འཇུག་ཞུས་དང་རྒྱལ་རྒྱུད་འཛིན་པའི་བུ་ཞིག་ཡོད་ཡོང་ཞེས་ལྷ་ཞིག་གིས་ལུང་བསྟན་པའི་རྨི་ལམ་ཞིག་རྨིས། ཕྱི་ཉིན་རྒྱལ་པོས་དྲང་སྲོང་བཙལ་དུ་སོང་བས་དྲང་སྲོང་རྙེད་པ་དང་། དེ་ནས་དྲང་སྲོང་གི་མདུན་དུ་བཅར་ཏེ་ཁོ་ལ་རྒྱལ་རྒྱུད་འཛིན་པའི་བུ་མེད་པས་ཁྱེད་ཁོ་བོའི་རིགས་སུ་སྐྱེ་བ་འཛིན་རོགས་ཞེས་ཞུས་ཚེ། དྲང་སྲོང་གིས་ཐུགས་བསམ་ཞིག་བཞེས་ཏེ་ཞལ་གྱིས་བཞེས། དེའི་རོགས་ལ་ཡོད་པའི་དྲང་སྲོང་གཅིག་པོ་དེས་ཀྱང་ཁོ་བོ་ཡང་ཁྱོད་ཀྱི་རིགས་སུ་སྐྱེ་བ་ལེན་པ་ཡིན་ཞེས་སྨྲས། དྲང་སྲོང་གིས་དེ་ལྟར་སྨྲས་ཚེ་རྒྱལ་པོ་དགའ་ནས་དེ་ལྟར་འགྱུར་བར་སྨོན་ལམ་བཏབ་པའོ། །དེ་ནས་དུས་ཚོད་ལོ་ཟླ་འགའ་ཞིག་སོང་རྗེས་སུ་དྲང་སྲོང་གསེར་མདོག་ཅན་ཚེ་འཕོས་དེ་རྒྱལ་པོ་ཚང་ལ་བུ་ཁྱེའུ་གསེར་གྱི་མདོག་ཅན་མཚན་དང་ལྡན་པ་ཞིག་ཏུ་སྐྱེས། བྲམ་ཟེ་མཚན་མཁན་གྱིས་བརྟགས་ཏེ་མིང་ལ་དགེ་དོན་ཞེས་བཏགས། དེའི་རྗེས་སུ་དྲང་སྲོང་གཞན་དེ་ཡང་ཚེ་འཕོས་ཏེ་རྒྱལ་པོ་ཚང་གི་བུ་རུ་སྐྱེས། དེའི་མིང་ལ་སྡིག་དོན་ཞེས་བཏགས། དེ་གཉིས་ཀ་མཉམ་དུ་ནར་སོན་ཞིང་དགེ་དོན་གཞུང་ལུགས་ཐམས་ཅད་ལ་མཁས་པར་གྱུར། འབྱོར་བ་རྒྱ་ཆེན་པོའི་ཡོ་ལང་དང་འཁོར་མང་པོས་བསྐོར་ཏེ་གྲོང་ཁྱེར་གྱི་ཕྱི་རོལ་ཏུ་ཉིན་ཞིག་ལ་སྐྱོ་སངས་ལ་ཕེབས། གྲོང་ཁྱེར་གྱི་ཕྱི་རོལ་དུ་ཐོན་པས་དབུལ་ཕོངས་དང་། ནད་པ་དང་། ཤན་པ་དང་། ཞིང་པ་དང་། བྱ་བཤོར་བ་དང་། ཉ་འཛིན་མཁན་སོགས་སྣ་ཚོགས་མཐོང་ཞིང་། དེ་དག་ལ་སྐད་ཆ་དྲིས་པས་རང་རང་གི་ལས་འདིས་རང་རང་འཚོ་ཐབས་བྱེད་ཀྱིན་ཡོད་པ་རེད་ཅེས་ཐོས་པས། རྒྱལ་བུ་དགེ་དོན་སེམས་ཅན་དབུལ་ཕོངས་སོགས་ཀྱི་སྡུག་བསྔལ་གྱིས་སེམས་ཤིན་ཏུ་སྐྱོ་བར་གྱུར་ནས། ཕྱིར་རྒྱལ་པོའི་ཕོ་བྲང་དུ་སོང་སྟེ་ཡབ་རྒྱལ་པོར་དཀོར་མཛོད་ཀྱི་ནོར་གྱི་སྦྱིན་པ་གཏོང་བའི་གནང་བ་ཞུས། རྒྱལ་པོས་གནང་བ་བྱིན་པས་དྲིལ་གྱིས་བསྒྲགས་ཏེ་སྦྱིན་པ་གཏོང་བ་ཡིན་ཞེས་དྲིལ་བསྒྲགས་པས་དཔག་ཚད་གཅིག་ནས་མང་པོའི་བར་གྱི་སྤྲང་པོ་ཐམས་ཅད་འདུས་པས། མཐའ་མེད་པའི་སྤྲང་པོ་མང་པོར་གང་ལ་ཅི་དགོས་ཡོ་བྱད་ཐམས་ཅད་བྱིན། སྐབས་ཤིག་ལ་རྒྱལ་པོའི་བང་མཛོད་ཀྱི་སུམ་ཆ་ཉིས་ཙམ་ཞིག་ཟད་སོང་། མཛོད་སྲུང་བ་རྣམས་ཀྱིས་རྒྱལ་པོར་ཞུས་ཏེ་དེ་ནས་ཐབས་ཀྱིས་མཛོད་སྒོ་བརྒྱབ་པས། རྒྱལ་བུ་དགེ་དོན་གྱིས་བསམ་པ་ལྟར་སྦྱིན་པའི་འཕྲོ་སྐྱོང་མ་ཐུབ། སྐབས་དེར་རྒྱ་གར་གྱི་རྒྱལ་པོའི་རིགས་དང་ཚོང་དཔོན་ཆེན་པོའི་རིགས་དེ་ཚོས་རྒྱུ་ནོར་སྒྲུབ་བྱེད་བཟང་ཤོས་དེ་གང་ཡིན་ཞེ་ན། རྒྱ་མཚོའི་ནང་དུ་ནོར་བུ་ལེན་སར་འགྲོ་བ་ཡིན་པས། རྒྱལ་བུ་དགེ་དོན་གྱིས་ཀྱང་རྒྱ་མཚོའི་ནང་དུ་ནོར་བུ་ལེན་དུ་འགྲོ་རྒྱུ་རྒྱལ་པོ་ལ་གནང་བ་ཞུས་ཚེ་རྒྱལ་པོ་ཡབ་ཡུམ་གཉིས་ཀྱིས་མ་གནང་། དེ་ནས་ཉི་མ་མང་པོ་ཞིག་ལ་ཟས་མ་བཞེས་པར་ནན་གྱིས་ཞུ་བ་ཕུལ་བས་མཐར་གནང་བ་བྱིན། དེའི་ཡུལ་ཁམས་དེ་ན་སྔོན་ཆད་རྒྱ་མཚོའི་ནང་དུ་ཐེངས་འགར་འགྲོ་མྱོང་བའི་དེད་དཔོན་རྒན་པ་ཞིག་ཡོད་པ་དེ་ཁྲིད་ནས་ཚོང་པ་ལྔ་བརྒྱ་དང་བཅས་པ་འགྲོ་བར་ཆས་པ་ན། རྒྱལ་བུ་སྡིག་དོན་གྱིས་ཁོ་ཡང་ཕུ་བོའི་གཡོག་ཏུ་འགྲོ་དགོས་པར་སྨྲས་པས། རྒྱལ་བོ་ཡབ་ཡུམ་གཉིས་ཀས་ཀྱང་གཞན་པ་ཞིག་འགྲོ་བ་ལས་ནུ་བོ་སོང་ན་དེས་དྲག་སྙམ་ནས་གནང་བ་བྱིན། དེ་ནས་རྒྱལ་བུ་དགེ་དོན་གྱིས་མཛོད་ཀྱི་ནང་ནས་གསེར་སྲང་སུམ་སྟོང་བླངས་ཏེ་གསེར་སྲང་སྟོང་གཅིག་གིས་གྲུ་གཟིངས་བྱས། དེའི་ཤུལ་གྱི་གསེར་སྲང་སྟོང་གཉིས་ཀྱིས་འཕྲལ་དགོས་ཀྱི་ཡོ་བྱད་ཚང་མ་གྲ་སྒྲིག་བྱས། དགོས་པའི་ཡོ་བྱད་ཚང་མ་ཚགས་སུ་ཚུད་པ་དང་རྒྱལ་བོ་དང་བཙུན་མོ་ལ་སོགས་པས་སྐྱེལ་མ་བྱས་ཏེ་ལམ་ལ་ཆས། དེ་ནས་རྒྱ་མཚོའི་འགྲམ་དུ་ཐོན་ཏེ་ཚང་མ་གྲུ་གཟིངས་ཀྱི་ནང་དུ་ཞུགས་ནས་གྲུ་གཟིངས་ཐག་པ་བདུན་གྱིས་བརྟོད་དེ་ཉིན་རེ་ཐག་པ་རེ་རེ་བཅད་ནས། རྒྱལ་བུ་དགེ་དོན་གྱིས་ཚོང་པ་ལྔ་བརྒྱ་ལ་སྨྲས་ཏེ་རྒྱ་མཚོའི་ནང་ན་བགེགས་བར་ཆད་སྣ་ཚོགས་ཡོད་པས། རྒྱ་མཚོར་ནོར་བུ་ལེན་སར་འགྲོ་བ་མང་ཡང་འགོ་ཐོན་ནས་ཕྱིར་ལ་འཁོར་ཐུབ་པ་ནི་ཉུང་ངོ་། །སེམས་ཐག་མི་ཆོད་པ་ཡོད་ན་ད་ནས་མ་འགྲོ་ན་ལེགས། གལ་ཏེ་རང་གི་ལུས་སྲོག་དང་ཕ་མ་སོགས་ཤུལ་མི་ལ་མི་ཆགས་ནས་འགྲོ་ཐུབ་ཅིང་། རིན་པོ་ཆེའི་གླིང་དུ་ཐོན་ནས་བདེ་མོར་ཕྱིར་འཁོར་ན་བུ་ཚ་བདུན་རྒྱུད་ཚུན་ཆད་ལ་ནོར་གྱིས་མི་དབུལ་བར་འགྱུར་རོ་ཞེས་ཉིན་རེ་བཞིན་དུ་སྨྲས་ཏེ་ཐག་པ་རེ་རེ་བཞིན་དུ་བཅད། ཉི་མ་བདུན་གྱི་ཉིན་པར་གཟིངས་རྟོད་བྱེད་ཀྱི་ཐག་པ་ཀུན་གྱི་རྗེས་མ་བཅད་དེ་རླུང་ཕྱོགས་སུ་བབ་དུས་གཡེར་ཤིང་བསྒྲེངས་ཏེ་མགྱོག་ཚད་མདའ་འཕངས་པ་ལྟར་སོང་། དེ་ནས་སོང་སོང་མཐར་རིན་པོ་ཆེའི་གླིང་དུ་ཐོན་ཞིང་རྒྱལ་བུ་དགེ་དོན་ནི་རིན་པོ་ཆེ་ལ་བརྟགས་མཁས་པ་ཞིག་ཡིན་པས་རིན་པོ་ཆེའི་བཟང་ངན་དང་ཁུར་མང་ཉུང་དང་། ཡང་ལྗིད་དང་བཅས་པ་བསྟན་ཞིང་ཚོང་པ་རྣམས་ལ་གདམ་དུ་བཅུག་ནས། རྒྱལ་བུ་དགེ་དོན་རང་གིས་དེད་དཔོན་ཁྲིད་ནས་གཉིས་ཀ་གྲུ་ཆུང་ཆུང་ཞིག་གི་ནང་དུ་བསྡད་དེ་ཡུན་རིང་དུ་སོང་ཚེ་རིམ་བཞིན་དང་པོ་དངུལ་གྱི་རི་དང་། བཻཌཱུརྱའི་རི་དང་། གསེར་གྱི་རི་ལ་ཐུག་སྟེ་གསེར་གྱི་བྱེ་མའི་ནང་དུ་གཉིས་ཀ་བསྡད་ནས་ངལ་གསོས། དེད་དཔོན་གྱིས་སྨྲས་པ། བདག་ནི་རྒས་ཏེ་ད་ནི་འགྲོ་མི་ནུས་སོ། །ཁོ་བོ་འདི་ཉིད་དུ་ཚེ་ཡི་དུས་བྱེད་པར་འགྱུར་གྱི། རྒྱལ་བུ་ཁྱེད་རང་འདི་ནས་སོང་ལ་རིན་པོ་ཆེ་སྣ་བདུན་གྱི་མཁར་ཞིག་ཡོད་ཀྱི་དེའི་མཁར་གྱི་སྒོ་བཅད་ཅིང་འདུག་ན། སྒོ་དྲུང་དུ་རྡོ་རྗེའི་གཏུན་བུ་ཞིག་ཡོད་པ་དེས་མཁར་སྒོ་རྡུངས་ཤིག་དང་། ནང་ནས་ལྷ་མོ་ལྔ་བརྒྱས་སོ་སོ་ནས་རིན་པོ་ཆེ་བཟུང་སྟེ་འབུལ་དུ་འོང་ངོ་། །དེའི་རྗེས་སུ་ལྷ་མོ་གཅིག་གིས་རིན་པོ་ཆེ་སྔོན་པོ་ཞིག་ཐོགས་ཤིང་མདུན་དུ་འོང་བས་དེ་ནི་ཡིད་བཞིན་གྱི་ནོར་བུ་རིན་པོ་ཆེ་ཡིན། ཐོབ་མ་ཐག་ཏུ་མ་ཤོར་བར་དམ་དུ་ཟུངས་ཤིག བུ་མོ་གཞན་དག་གི་ནོར་བུ་དེ་ཚོ་ཡང་ལོངས་ལ། དབང་པོ་བསྡམས་ནས་འདུག་དགོས་ཀྱི་དེ་དག་ལ་གཏམ་བཤད་མི་རུང་། གལ་ཏེ་ཁོ་བོ་འདི་ནས་ཤི་སོང་ན་ཁྱེད་ཀྱིས་དྲིན་དྲན་པར་གྱིས་ལ་ཁོ་བོའི་རུས་པ་འདིར་སྦས་ཏེ་སོང་ཤིག་ཅེས་སྨྲས། རྒྱལ་བུས་དེད་དཔོན་སྐྱུར་མ་ཐུབ་པར་བསྲུང་ཀྱང་ཡུན་རིང་མ་འགོར་བར་དེད་དཔོན་ཤི། ཁོ་རང་གིས་ཁ་ཆེམས་ལྟར་དུ་རུས་པ་གསེར་གྱི་བྱེ་མའི་ནང་དུ་སྦས་ཏེ་དེད་དཔོན་གྱི་དོན་དུ་སྨོན་ལམ་བཏབ་བོ། །དེ་ནས་རྒྱལ་བུ་དགེ་དོན་གཅིག་པུ་དེད་དཔོན་གྱི་སྨྲས་པ་ལྟར་སོང་བས་རིན་པོ་ཆེ་སྣ་བདུན་གྱིས་གྲུབ་པའི་མཁར་ཆེན་པོ་ཞིག་དང་འཕྲད། མཁར་སྒོ་བརྒྱབ་ཡོད་པས་སྒོ་འགྲམ་གྱི་རྡོ་རྗེའི་གཏུན་བུ་བླངས་ཏེ་སྒོ་བརྡུང་བས་དེད་དཔོན་གྱིས་བཤད་པ་ནང་བཞིན་ལྷ་མོ་ལྔ་བརྒྱའི་ནོར་བུ་དང་མཇུག་གི་ལྷ་མོ་གཅིག་གི་ནོར་བུ་མཐིང་ག་ཞིག་བྱིན་པ་ཐམས་ཅད་བླངས་ཏེ་གོས་གྱི་སྣེ་མོར་བསྡམས་ནས་གློ་བུར་དུ་ཁ་ཕྱིར་ལ་འཁོར་ཏེ་ཚོང་པ་རྣམས་ཡོད་སར་ཐོན་དུས་ཚང་མ་འཚགས་ཏེ་འགྲོ་རན་བཞིན་ཡོད་ལ། དེ་ནས་གྲུ་གཟིངས་ཀྱི་ཁ་ལོ་བསྒྱུར་ཏེ་ཁ་ཡུལ་ཕྱོགས་སུ་འཁོར་ནས་ལམ་ལ་ཆས། དེའི་སྔོན་དུ་སྡིག་དོན་གྱིས་ཚོང་པ་རྣམས་ལ་ངན་བསླབ་སྟེ་རིན་པོ་ཆེ་མང་པོ་ལོངས་སྨྲས་པས་གྲུ་ལྕི་ཆེ་བས་མི་རྒྱུ་དང་བཅས་པ་ཐམས་ཅད་མཚོའི་གཏིང་དུ་བྱིང་། དགེ་དོན་ལ་ནོར་བུ་རིན་པོ་ཆེ་ཡོད་པས་ནོར་བུའི་ཡོན་ཏན་གྱིས་རང་ཉིད་གཅིག་པུ་ཆུ་ནང་ལ་མ་ནུབ་ཅིང་སྡིག་དོན་ཡང་དེ་ལ་འཐམ་སྟེ་གཉིས་ཀ་ཐར་སོང། སྡིག་དོན་གྱིས་སྨྲས་པ་ངེད་སྤུན་གཉིས་ཀ་རིན་པོ་ཆེ་ལེན་སར་སོང་ཀྱང་ཕྱིར་ལག་སྟོངས་ལ་ཁྱིམ་དུ་ལོག་ན་ངོ་ཚའོ་ཞེས་སྨྲས་པས། དགེ་དོན་གྱིས་ཡིད་བཞིན་ནོར་བུ་དང་རིན་པོ་ཆེ་ཡོངས་རྫོགས་བསྟན་པས། སྡིག་དོན་ཕྲག་དོག་སྐྱེས་ཏེ་དགེ་དོན་གཉིད་ལོག་པའི་ཚེ་བསད་ནས་ནོར་བུ་ཁྱེར་ཞིང་། ཕ་མ་གཉིས་ཀར་ཕུ་བོ་ནི་རྒྱ་མཚོའི་ནང་དུ་ནུབ་སོང་ཞེས་སྨྲ་སྙམ་ནས། ཕུ་བོ་ལ་བདག་ཅག་སྤུན་གཉིས་ཀྱིས་ནོར་བུ་རིན་པོ་ཆེ་འདི་དག་རེས་མོས་སུ་སྲུང་དགོས་ཞེས་རེས་མོས་ཀྱིས་སྲུང་ཡོད་དུས། ཕུ་བོ་གཉིད་ཀྱི་གཏིང་ལ་ཟིན་ནས་བསྡད་ཡོད་དུས་ཤིག་ལ་སྨྱུག་མའི་ཚལ་དུ་སོང་སྟེ་དུག་གི་ཚེར་མ་རིང་པོ་གཉིས་བླངས་ནས་ཕུ་བོའི་མིག་གཉིས་ལ་རེ་རེ་བཞིན་བཙུགས་ཏེ། དེའི་མཚམས་ནས་སྐྲག་ནི་འཚབ་ནི་གཉིས་ཀས་རིན་པོ་ཆེ་ཁྱེར་ནས་བྲོས་སོ། །དགེ་དོན་གྱིས་ཇག་པ་ཐོན་ཐལ་ཟེར་ནས་ཡར་ལ་ཧར་ལང་ཞིག་བྱས་ཏེ་སྐད་ཆེན་གྱིས་བོས་ཚེ་གོ་རྒྱུ་ཚོར་རྒྱུ་གཉིས་ཀ་མེད་པས། ཤིང་གི་ལྷ་མོ་ཞིག་གིས་ཤིང་སྡོང་གིས་ཁ་གྲག་པའི་ཚུལ་བྱས་ཏེ་ཇག་པ་སྡིག་དོན་ཡིན་ནོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་མིག་གི་ན་ཚ་མ་བཟོད་པར་ནུད་ཞོར་དང་གོག་ཞོར་ལོང་སྙབ་བྱེད་ཞོར་དུ་ལྟོགས་ན་ཟས་མེད་སྐོམ་ན་ཆུ་མེད་འགྲོ་སའི་ཕྱོགས་མ་མཐོང་པར་སོང་བས། སྐབས་ཤིག་ལ་ཡུལ་ལི་ཤི་བར་ཟེར་བའི་ཐག་མི་རིང་ས་ཞིག་ལ་ཐོན། དེ་ན་བ་ལང་གི་རྫི་བོ་ཞིག་གིས་བ་ལང་ལྔ་བརྒྱ་གཟས་ལ་བཀྲམ་ནས་འཚོས་ནས་བསྡད་ཡོད་མཁན་ཞིག་གི་ཁྱུ་ལ་ཐོན་སོང་བ་དང་། དེ་ནས་མིག་གི་ན་ཚ་མ་བཟོད་པར་ཕྱིར་ལོང་བསྙབས་བྱས་ཏེ་ནུད་ཀྱིན་སོང་བས། བ་ལང་མང་པོའི་ནང་ན་ཁྱུ་མཆོག་གམ་བ་ལང་གི་ཁྱུ་དཔོན་ཅང་ཤེས་པ་ཟེར་པ་ཡོད་པ་ཞིག་གིས་རྒྱལ་བུའི་མིག་ལོང་ཡོད་པ་ཤེས་ཏེ། དེའི་མིག་ལ་ལྕེས་བལྡགས་པས་བ་ལང་ཐམས་ཅད་དེ་ལ་འདུས་པས། དེ་ནས་དེར་ཅི་ཞིག་ཡོད་བསྙམ་ནས་བ་ལང་གི་རྫི་བོ་ཡང་དེར་ཐོན་ནས། གཅིག་བལྟས་དུས་མི་ཞིག་ས་སྟེང་དུ་འགྲེས་ཏེ་བསྡད་ཡོད་པ་དང་མིག་ལ་དུག་སྨྱུག་གི་ཚེར་མ་ཟུག་ཡོད་པ་མཐོང་ནས་ཚེར་མ་གཉིས་ཀ་ག་ལེར་འདོན་སྟེ་ཁོ་རང་གི་ཁྱིམ་དུ་ཁྲིད། དེ་ནས་བ་ལང་རྫི་བོས་ཁོ་རང་གི་ཁྱིམ་ནས་ཟ་མ་ཞིམ་པོ་བྱིན། འོ་མ་དང་སྣུམ་གྱིས་རྨ་ཁ་ལ་བྱུགས་ཏེ་ངལ་གསོ་རུ་བཅུག་ནས་ནད་གཡོག་ལེགས་པོ་བྱས། དེ་ནས་རིམ་གྱིས་རིམ་གྱིས་རྨ་ཁ་ཇེ་དགའ་རུ་སོང་སྟེ་ཕལ་ཆེར་སོས་ཚར་དུས་ས་ཆ་དེའི་གྲོང་ཁྱེར་དང་ཐག་མི་རིང་ས་ཞིག་ཏུ་བསྐྱལ་བཞག་པ་དང་། རྒྱལ་བུ་དགེ་དོན་གྱིས་རྫི་བོ་ལ་སྨྲས་ཏེ་ཁྱོད་དྲིན་ཆེ་བས་དྲིན་ལེན་མི་བརྗེད། ད་དུང་ཁྱོད་ཀྱིས་ཁོ་བོ་ལ་སྒྲ་སྙན་ཉི་མ་ཞིག་ལོན་ཐབས་གྱིས་ཤེས་སྨྲས། བ་ལང་རྫི་བོས་རོལ་མོའི་རིགས་བྱད་ཞིག་ལ་སྒྲ་སྙན་ཉི་མ་ཟེར་བ་ཞིག་ཡོད་པ་དེ་ལོན་པས་དེ་དགེ་དོན་ལ་བྱིན། རྒྱལ་བུ་དགེ་དོན་སྤྱིར་རོལ་མོའི་སྒྱུ་རྩལ་ལ་ཧ་ཅང་མཁས་པ་ཞིག་ཡིན་ཞིང་དེ་ལས་ཀྱང་སྒྲ་སྙན་ཉི་མ་དཀྲོལ་བ་ལ་མཁས་པ་ཞིག་ཡིན་པས། མིག་ལོང་ཡོད་ཀྱང་རྒྱལ་བུས་སྒྲ་སྙན་ཉི་མའི་སྒྲ་དཀྲོལ་ཏེ་གླུ་ཚིག་སྙན་ངག་གི་ཚིག་སྙན་མོ་ཤ་སྟག་བླངས་པས། མི་ཡོད་ཚད་དེར་ཉན་དུ་འོང་ཞིང་ཟས་དང་སྐོམ་གྱི་ཆར་བབ་སྟེ། ཟ་བཏུང་ལ་བསམ་བློ་གཏོང་མི་དགོས་པར་གྱུར། སྤྲང་པོ་གཅིག་འཁྲི་གཉིས་འཁྲི་དེར་འཁྲི་ནས་མཐར་རྒྱལ་བུ་དགེ་དོན་ལ་སྤྲང་པོ་ལྔ་བརྒྱ་ཙམ་ཞིག་འཁྲི་པར་གྱུར། ཐམས་ཅད་ཀྱི་ཟ་བཏུང་ལོངས་སྤྱོད་ཐམས་ཅད་རྒྱལ་བུ་དགེ་དོན་གྱིས་སྒྲ་སྙན་དཀྲོལ་བ་དང་གླུ་བླངས་བ་ལས་བྱུང་། དེ་ལྟར་དུས་ཚོད་ཡུན་རིང་ཞིག་ལོན་པས། ཉིན་ཞིག་ལ་ཡུལ་དེའི་རྒྱལ་པོའི་སྐྱེད་ཚལ་སྲུང་བའི་མི་ཞིག་གིས་སྒྲ་སྙན་སྙན་མོ་གོ་ནས་དགའ་སྟེ། དེས་སྨྲས་པ་ཁྱོད་ཁོ་བོས་ཁྲིད་འགྲོ་དགོས། སྒྲ་སྙན་དཀྲོལ་ཞོར་དང་། སྐྱེད་ཚལ་སྲུང་ཞོར་བྱས་ན་ཅི་འདྲ་རེད་ཅེས་དྲིས་པས། རྒྱལ་བུ་དགེ་དོན་གྱིས་ང་མི་ལོང་བ་ཞིག་གིས་སྐྱེད་ཚལ་ཇི་ལྟར་སྲུང་ཞེས་སྨྲས། དེས་སྨྲས་པ་ཁྱོད་ཀྱིས་མིག་གིས་མ་མཐོང་ཀྱང་དྲག་སྟེ། ལྗོན་ཤིང་རྩེ་ནས་ཕར་ལ་ཐི་གུ་ཕྲ་མོ་ཞིག་འཐེན་ཞིང་དྲིལ་བུ་ཞིག་དེ་ལ་བཏགས་ཏེ། ཁྱོད་ཁོ་བོ་ལ་བརྡ་རྒྱག་དགོས་ཚེ་བྱ་ཡི་སྐད་གྲག་གྲག་བྱས་ཏེ་ཐི་གུ་འཐེན་རྒྱུ་བྱོས་དང་ཆོག་པ་རེད། དེ་མིན་གྱི་ལས་ཀ་གཞན་པ་ཁྱོད་ལ་ཅི་ཡང་མེད་པས། ཁོ་བོའི་སྐྱེད་ཚལ་གྱི་ནང་དུ་འགྲོ་ཞེས་ཁྲིད་དོ། །དེའི་དུས་སུ་སྡིག་དོན་ཕྱིར་རང་ཡུལ་དུ་ཐོན་ཏེ་ཕ་མ་དང་འཕྲད་པས། ཁྱོད་ཀྱི་ཕུ་བོ་གང་ན་ཡོད་ཅེས་དྲིས་པར། ཕུ་བོ་ཚོང་བ་ལྔ་བརྒྱ་རིན་པོ་ཆེ་མང་པོ་དང་བཅས་པ་མཚོ་ནང་དུ་ནུབ་སོང་། ཁོ་བོ་གཅིག་པུ་ཆུ་ལ་བརྐྱལ་ཏེ་ཐར་ཞེས་སྨྲས་པས། རྒྱལ་པོ་ཡབ་ཡུམ་གཉིས་ཀ་དྲན་མེད་དུ་བརྒྱལ་ཞིང་ཡུལ་མི་ཐམས་ཅད་ཀྱང་མྱ་ངན་སྡུག་བསྔལ་གྱིས་ནོན། ཡབ་ཡུམ་བརྒྱལ་སོས་ཚེ་སྡིག་དོན་ཁྱོད་ཀྱང་ཕུ་བོ་དང་མཉམ་དུ་ཤི་མ་ཐུབ་ཅེས་སྨྲས། དེ་ནས་ཡབ་རྒྱལ་པོས་དགེ་དོན་གཞན་དང་མི་འདྲ་བའི་སྐྱེས་བུ་ཁྱད་འཕགས་ཤིག་ཡིན། གཅིག་བྱས་ན་ག་ཤེད་ན་ཡོད་སྲིད་སྙམ་སྟེ། སྔོན་ཆད་དགེ་དོན་གྱིས་གསོས་པའི་བྱ་ངང་བ་ཞིག་ཡོད་པ་དེའི་སྐེ་ལ་རྒྱལ་པོས་ཡི་གེ་ཞིག་བཏགས་ཏེ། དགེ་དོན་འཚོལ་དུ་གཏོང་བ་དང་། བྱ་ངང་པ་གང་ཡིན་གྱི་ས་ཕྱོགས་སྟོད་སྨད་བར་གསུམ་དུ་འཕུར་ཏེ། ཉིན་ཞིག་ལ་རྒྱལ་བོ་ལི་ཤི་བའི་མེ་ཏོག་ལྡུམ་རའི་སྐྱེད་ཚལ་གྱི་ནང་དུ་དགེ་དོན་གྱི་གླུ་ལེན་བཞིན་ཡོད་པ་ཐོས་པས་སྐད་ངོ་ཤེས་ཏེ། དེར་བབ་ནས་རྒྱལ་བུ་དང་ངོ་འཕྲད། རྒྱལ་བུས་ཀྱང་ངང་བའི་སྐད་ཤེས་པས་མགུལ་ནས་ཡི་གེ་ཡོད་པ་བླངས་ཏེ་གཞན་དག་ལ་འདོན་བཅུག་པས་ཕ་མས་མངག་པ་ཡིན་པར་ཤེས་ཏེ། སྡིག་དོན་གྱིས་ང་ཡི་མིག་ལ་ཚེར་མ་བཙུགས་ཏེ། ནོར་བུ་འཕྲོག་ཅིང་བྲོས་ཤོར་བའི་ལོ་རྒྱུས་ཆ་ཚང་བརྡ་འཕྲོད་པའི་ཡི་གེའི་བཟོ་ལྟ་ལོང་བསྙབས་ཀྱིས་བྲིས་ཏེ། ཕྱིར་ངང་བའི་སྐེ་ལ་བཅིང་ནས་མངག དེའི་ཚེ་རྒྱལ་པོ་ལི་ཤི་བ་ཚང་ལ་ལྷའི་སྤྲུལ་བ་བུ་མོ་ངོ་མཚར་ཅན་ཞིག་ཡོད་ལ། དེ་སྐྱེད་ཚལ་གྱི་ལྡུམ་རའི་ནང་དུ་སོང་བས་དགེ་དོན་སྤྲང་པོར་གྱུར་ནས་སྐྲ་ཟིང་ཞིང་མིག་ལོང་སྟེ་རྨ་ཁ་ཡོད་པ་ངོ་མཆི་མས་གང་ནས་གོས་ངན་པ་ཧྲུལ་པོ་གྱོན་ཏེ། ཤིང་སྡོང་ཞིག་གི་རྩར་བསྡད་ཡོད་པ་མཐོང་བས། གམ་དུ་སོང་སྟེ་བལྟས་པས་བུ་མོ་དེ་ལ་སེམས་འཁྲེང་སྟེ། དེའི་གམ་ནས་བསྡད་དེ་རྒྱལ་པོའི་ཕོ་བྲང་ནང་དུ་ཕྱིར་འགྲོ་རོགས་མ་བྱས། རྒྱལ་པོ་ན་རེ་སྲས་མོ་འདི་རྒྱལ་པོ་རིན་ཆེན་གོ་ཆའི་བུས་རྒྱལ་སྲིད་བཟུང་བའི་བཙུན་མོར་སློང་ཡང་། དེ་ཚང་གི་རྒྱལ་བུ་རྒྱ་མཚོ་ནང་ནས་ཕྱིར་ལ་མ་འཁོར་པ་རེད། འདི་འདྲའི་སྤྲང་པོ་ཞིག་ཞེ་ལ་མ་ཤར་ཡང་། ད་ནི་བུ་མོ་རང་གི་ཅི་བསམ་རེད་ཅེས་ཟེར་ནས་རྒྱལ་པོས་གཉིས་ཀ་ཁྱོ་ཤུག་ཏུ་སྦྲེལ་ཏེ་རྒྱལ་པོའི་ཕོ་བྲང་ནང་དུ་བསུས། རྒྱལ་པོའི་སྲས་མོ་གཞན་དང་མི་འདྲ་བའི་མཚན་མ་བརྟགས་མཁས་པ་དང་། བདེན་ཚིག་གྲུབ་པ་ཞིག་ཡིན་པས་བདེན་པའི་ཚིག་བརྗོད་དེ་རྒྱལ་བུ་དགེ་དོན་གྱི་མིག་གཅིག་གིས་མཐོང་བར་གྱུར། དེ་ནས་གཏམ་ཞིབ་མོར་གླེང་བ་ན། རྒྱལ་བུ་ལ་ཁྱེད་ཀྱི་ཕ་མ་དང་ཡུལ་ཕྱོགས་གང་ནས་ཡིན་ཞེས་ཞིབ་པར་དྲིས་པ་ན། ཁྱོད་ཀྱིས་རྒྱལ་པོ་རིན་ཆེན་གོ་ཆ་ཞེས་པ་ཐོས་སམ་དེ་ནི་ངའི་ཕ་ཡིན་ཞེས་སྨྲས། ཁྱེད་ཀྱིས་རྒྱལ་བུ་དགེ་དོན་ཞེས་པ་ཐོས་སམ། དེ་ནི་བདག་ཡིན་ནོ་ཞེས་སྨྲས་པ་དང་། འོ་ན་ཅིའི་ཕྱིར་འདི་ལྟ་བུར་གྱུར་པ་ཡིན་དྲིས་པས། རྒྱལ་བུས་བྱུང་རབས་ལོ་རྒྱུས་ཆ་ཚང་ཞིབ་ཏུ་བཤད་པ་ན། སྲས་མོས་སྨྲས་ཏེ། རྒྱལ་བུ་སྡིག་དོན་གྱིས་ཁྱེད་ཀྱི་མིག་ཕྱུང་བ་འདི་ནི། འཇིག་རྟེན་སྟེང་ན་མི་སྲིད་པའི་བྱ་ངན་ཞིག་ཡིན་པས། ད་ཁྱོད་དེ་དང་འཕྲད་ན་ཅི་བྱེད་ཅེས་དྲིས་པས། རྒྱལ་བུས་སྨྲས་ཏེ། ང་ནི་དེ་ལ་མི་དགའ་བ་ཅུང་ཟད་ཙམ་ཞིག་དང་། འཁོན་འཛིན་གྱི་བསམ་པ་ཞིག་གཏན་ནས་མེད་ཅེས་སྨྲས། སྲས་མོས་སྨྲས་ཏེ་དེའི་ཚིག་དེ་ལ་བདག་ཡིད་ཆེས་པར་ཤིན་ཏུ་དཀའ་ཞེས་སྨྲས། རྒྱལ་བུས་སྨྲས་པ་གལ་ཏེ་ང་སྡིག་དོན་གྱི་སྟེང་དུ་མི་དགའ་བ་སྤུའི་རྩེ་མོ་ཙམ་ཞིག་མེད་ན། བདེན་པའི་ཚིག་འདིས་བདག་གི་མིག་ཡ་གཅིག་པོས་ཀྱང་མཐོང་བར་ཤོག་ཅིག་ཅེས་སྨོན་ལམ་བརྒྱབ་པས། དེ་མ་ཐག་ཏུ་མིག་ཡ་གཅིག་པོས་ཀྱང་གསལ་བར་མཐོང་བར་གྱུར། དེ་ནས་སྲས་མོ་ཤིན་ཏུ་དགའ་སྟེ་ཡབ་རྒྱལ་པོའི་མདུན་དུ་སོང་ནས་རྒྱལ་པོ་རིན་ཆེན་གོ་ཆའི་སྲས་དགེ་དོན་ཨེ་ཤེས་ཞེས་རྒྱལ་པོ་ལ་དྲིས། རྒྱལ་པོས་ཤེས་ཞེས་སྨྲས། འོ་ན་ཡབ་རྒྱལ་པོས་གཟིགས་སམ། ད་ལྟ་ང་དང་ཁྱིམ་ཐབས་བྱས་ནས་བསྡད་ཡོད་པ་འདི་རེད་ཅེས་སྨྲས། རྒྱལ་པོས་ཁྲེལ་རྒོད་ཅིག་བྱས་ཏེ་བུ་མོ་འདིས་ཅི་ཞིག་ཟེར་འདུག་ཁྱོད་སྨྱོས་པ་ཡིན་ནམ། རྒྱལ་བུ་དེ་རྒྱ་མཚོ་ནས་ཕྱིར་ལ་མ་འཁོར་བ་རེད། ད་དུང་སྤྲང་པོ་ཞིག་ལ་རྒྱལ་བུ་དགེ་དོན་རེད་ཅེས་གསུངས་ཏེ་བདེན་དུ་མ་བཟུང་། བུ་མོས་བདེན་ལ་མི་འཛིན་ན་གཅིག་གཟིགས་དང་ཞེས་ནན་གྱིས་ཞུས་ཚེ། དེར་རྒྱལ་པོ་བལྟ་རུ་ཕྱིན་པ་དང་རྒྱལ་བུ་དངོས་སུ་འདུག་པས། ངོ་ཤེས་དེ་རྒྱལ་པོས་ལྟོ་བ་ས་ལ་བླན། ཐོད་པ་ས་ལ་གཏུགས་ཏེ་ངོ་མ་ཤེས་ཞལ་མ་འཚོ་བ་རེད་ནོར་བ་ཐམས་ཅད་མཐོལ་ལོ་བཤགས་ཅེས་སྨྲས་པས། རྒྱལ་བུས་རྒྱལ་པོ་ཡར་ལ་བསླངས་ཏེ་ལོ་རྒྱུས་དང་བྱུང་རབས་རིམ་གྱིས་བཀའ་མོལ་བྱས། དེ་ནས་རྒྱལ་པོ་ལི་ཤི་བ་ཡིས་གནས་ཚུལ་ངོ་མ་གསང་སྟེ། རྒྱལ་བུ་དགེ་དོན་ལམ་གྱི་བཞི་མདོ་ཞིག་ཏུ་བསྐྱལ་ཏེ་རྒྱ་མཚོའི་ནང་ནས་ད་གཟོད་ཕྱིར་ལ་འཁོར་བའི་སྐད་ཆ་བསྒྲགས་ཏེ། བློན་པོ་རྣམས་དང་བཅས་པས་དགེ་དོན་བསུས་ནས་ཕོ་བྲང་དུ་ཐོན་གྱིན་ཡོད་པའི་ཚུལ་བསྟན། དེའི་དུས་ན་བྱ་ངང་པ་ཕྱིར་ལ་ཐོན་ཏེ། རྒྱལ་པོ་རིན་ཆེན་གོ་ཆས་ངང་པའི་སྐེ་ཡི་ཡི་གེ་བཤིག་ནས་བལྟས་ཚེ་ལོ་རྒྱུས་ཆ་ཚང་གི་དོན་རྟོགས་ཏེ། སྡིག་དོན་བཙོན་ཁང་ནང་དུ་བཅུག་ཅིང་རྒྱལ་པོ་ལི་ཤི་བ་སར་ཕོ་ཉ་བ་མངག་སྟེ། ངའི་བུ་དགེ་དོན་གྱིས་ཁྱོད་ཀྱི་ཡུལ་ན་དཀའ་ལས་མྱོང་ནས་ཡོད་ཀྱང་། ཁྱོད་ཀྱིས་ཡར་ཞུ་ཞིག་ཀྱང་མེད་པ་འདི་ཁྱོད་ཀྱི་ནག་ཉེས་རེད། ད་མི་འགྱང་བར་རྟ་དང་གླང་ཆེན་གྱི་ཚོགས་མང་པོ་བསྒྲིགས་ནས་སྐྱེལ་ལ་ཤོག མ་བསྐྱལ་ན་ང་ངོ་མ་ཡོང་དགོས་ཐུག་ཆས་རེད་ཅེས་བཀའ་འཕྲིན་བཙན་པོ་ཞིག་བསྐུར། དེའི་སྐབས་སུ་རྒྱལ་བུ་དགེ་དོན་གྱིས་ཕྱུགས་རྫིའི་དྲིན་དྲན་ཏེ། རྒྱལ་པོ་ལི་ཤི་བར་སྨྲས་པས། རྟ་དང་གླང་པོ་གོས་དང་ཁང་ཁྱིམ་ཞིང་དང་འབྲོག་པ་རིན་པོ་ཆེ་ལ་སོགས་པ་མང་པོ་ཞིག་བྱིན་ནས་རྫི་བོ་ཁོ་རང་ཚེ་གཅིག་ཏུ་མ་ཟད་བུ་ཚ་ཡང་རབས་དང་བཅས་པ་སྐྱིད་པ་ཞིག་བྱས། དེ་ནས་རྒྱལ་པོ་རིན་ཆེན་གོ་ཆའི་ཕོ་ཉ་དང་བསུ་མ་ཐོན། རྒྱལ་པོ་ལི་ཤི་བ་ཡིས་གླང་པོ་ཆེ་ལྔ་བརྒྱ་ལ་རིན་པོ་ཆེའི་བརྒྱན། རྒྱལ་བུ་ལ་མདུན་གཡོག་ལྔ་བརྒྱ། སྲས་མོ་ལ་ཞལ་ཏ་མ་ལྔ་བརྒྱ་དང་ཤིང་རྟ་ལྔ་བརྒྱ་རིན་པོ་ཆེའི་བཀང་ཞིང་། རྒྱལ་པོ་བློན་པོ་དང་བཅས་པ་འཁོར་བརྒྱ་སྟོང་མང་པོས་བསྐོར་ཏེ། རོལ་མོ་སྣ་ཚོགས་ཀྱིས་མདུན་བསུས། འཕན་གདུགས་རྒྱལ་མཚན་གྱིས་སྣ་དྲངས་ཏེ་སྐྱེལ་མ་བྱས། ཕོ་ཉ་བ་སྔ་འགྲོས་སུ་བཏང་སྟེ་རྒྱལ་པོ་རིན་ཆེན་གོ་ཆ་བཙུན་མོ་དང་བཅས་པས་རྒྱལ་བུ་བསུ་མ་བྱས། རྒྱལ་བུ་ས་ལ་བབ་པ་དང་མཉམ་དུ་ཕ་མ་གཉིས་ལ་ཕྱག་འཚལ་ནས་ཁམས་འདྲི་ཞུས། རྒྱལ་བུ་སྡིག་དོན་གང་ན་ཡོད་ཅེས་དྲིས་པས། ད་ལྟ་བཙོན་ཁང་ནང་དུ་བཟུང་ནས་ཡོད་ཅེས་སྨྲས། རྒྱལ་བུ་དགེ་དོན་གྱིས་སྡིག་དོན་བཙོན་ཁང་ནང་ནས་མྱུར་དུ་མངག་དགོས། གལ་ཏེ་མ་མངག་ན་ང་ཕོ་བྲང་ནང་དུ་མི་འགྲོ་ཞེས་ནན་གྱིས་བཤད་པས། སྡིག་དོན་བཙོན་ཁང་ནང་ནས་མངག དེས་ཀྱང་བསུས་ཏེ་སྤུན་གཉིས་ཀ་གཅིག་ལ་གཅིག་གིས་བཟུང་སྟེ། ནུ་བོ་ལ་སྔར་ལས་ཀྱང་ལྷག་པར་བྱམས་པ་ཞིག་བྱས་པས། མི་ཐམས་ཅད་ངོ་མཚར་དུ་གྱུར། དེ་ནས་ཕོ་བྲང་ནང་དུ་སོང་སྟེ་ནོར་བུ་རིན་པོ་ཆེ་གང་ན་ཡོད་ཅེས་དྲིས་པས། སྡིག་དོན་གྱིས་ལམ་གྱི་ས་འོག་ཅིག་ཏུ་བསྐུངས་ཡོད་ཅེས་སྨྲས། དེ་ལེན་སར་མངག་ཀྱང་མ་རྙེད། དགེ་དོན་དང་འགྲོག་ནས་གཉིས་ཀ་བསྐུངས་ཡོད་སར་སོང་བས་དགེ་དོན་གྱིས་རྙེད། དེ་ནས་ཕོ་བྲང་གི་ནང་དུ་ཡོང་ནས་རྒྱལ་ཕྲན་ལྔ་བརྒྱ་ལ་ནོར་བུ་རེ་རེ་བྱིན། གཅིག་བཞག་སྟེ་ལག་གིས་བཟུང་ནས་སྨོན་ལམ་བཏབ། སྨོན་ལམ་བཏབ་པ་བཞིན་དུ་ཕ་མ་གཉིས་ཀ་འདུག་སའི་རིན་པོ་ཆེའི་ཁྲི་དང་གདུགས་ཀྱང་བྱུང་ཞིང་། བང་མཛོད་སྟོངས་པ་ཐམས་ཅད་སྔར་བཞིན་དུ་གང་བར་གྱུར། དེ་ནས་ཕྱོགས་ཐམས་ཅད་ལ་དྲིལ་བསྒྲགས་བྱས་ཏེ། ད་ནས་བཟུང་སྟེ་དུས་ཚོད་འདི་འདྲ་ཞིག་གི་ཉིན་པར། རིན་པོ་ཆེ་སྣ་ཚོགས་པའི་ཆར་ཕབ་སྟེ་དབུལ་ཕོངས་ཀྱི་སྡུག་བསྔལ་སེལ་བའི་ཆེད་དུ། སྦྱིན་པ་གཏོང་བ་ཡིན་པས་ཐམས་ཅད་འདུས་ལ་ཤོག་ཅེས་སྨྲས། མི་ཁྲི་སྟོང་འབུམ་ཕྲག་མང་པོ་འདུས་ནས་དམར་ནག་ཁྲོམ་ལ་འཁྱིལ། དེ་ནས་ཉི་མ་ཚང་སྟེ་དུས་ཚོད་ཀྱི་སྟེང་ལ་སླེབ་དུས་རྒྱལ་བུ་དགེ་དོན་གྱིས་ནོར་བུ་རྒྱལ་མཚན་གྱི་རྩེ་མོར་བཏགས་ཏེ། ཕྱོགས་བཞིའི་ལྷ་ལ་ཕྱག་འཚལ། ལག་ཏུ་སྤོས་ཕོར་བཟུང་ནས། ནོར་བུ་འདི་ཡིད་བཞིན་གྱི་ནོར་བུ་དག་མ་ཞིག་ཡིན་ན་ས་སྟེང་གི་མི་ཐམས་ཅད་ཀྱིས་གང་ལ་ཅི་འདོད་གྱི་ཆར་ཡིད་བཞིན་དུ་ཕོབ་ཅིག་ཅེས་གསོལ་བ་བཏབ་པ་དང་། དང་པོ་རླུང་འཇམ་པོ་ཡོང་ནས་ས་གཞིའི་རྡུལ་ཕྱགས་ཏེ་གཙང་མར་བྱས། དེའི་སྟེང་དུ་ཆར་ཟིམ་ཟིམ་བབ་ནས་ས་ལ་ཆག་ཆག་བཏབ། དེ་ནས་ཟས་དང་གོས། འབྲུ་དང་ནོར། རིན་པོ་ཆེའི་རིགས་ལ་སོགས་པ་གང་ལ་ཅི་འདོད་ཅི་དགོས་ཀྱི་ཆར་བབ་ནས་ཡུལ་ཁམས་ཐམས་ཅད་རྒྱུ་ནོར་གྱིས་ཁེངས། ཚང་མ་སེམས་ཚིམ་ཞིང་དབུལ་ཕོངས་ཀྱི་སྡུག་བསྔལ་མེད་པར་གྱུར། དེ་ནས་རྒྱལ་བུས་མི་ཐམས་ཅད་ལ་ཁྲོམ་བསྒྲགས་བྱས་ཏེ། ད་ནི་ཐམས་ཅད་ལ་དབུལ་ཞིང་ཕོངས་བའི་སྡུག་བསྔལ་མེད་པས། ཐམས་ཅད་ཀྱིས་སྒོ་གསུམ་དགེ་བ་བཅུའི་ལམ་ལ་བརྩོན་པ་བསྐྱེད་ཅིག་གསུངས་ནས་བསྐུལ་མ་བྱས། དེ་ལྟར་ཐམས་ཅད་ཀྱིས་ནན་ཏན་གྱིས་བསྒྲུབས་ཏེ། དེའི་དུས་སུ་ཡུལ་དེའི་མི་ཚང་མ་ཚེ་འཕོས་དུས་མཐོ་རིས་ཀྱི་ལྷ་ཡུལ་དུ་སྐྱེས། བཅོམ་ལྡན་འདས་ཀྱིས་གཏམ་རྒྱུད་དེ་གསུངས་ནས། དེ་ལ་མཐུད་དེ་དེའི་དུས་གྱི་ཕ་མ་གཉིས་ཀ་ད་ལྟའི་རྒྱལ་པོ་ཟས་གཙང་མ་དང་ཡུམ་ལྷ་མཛེས་མ་གཉིས་ཀ་ཡིན། རྒྱལ་བུ་དགེ་དོན་ང་ཡིན། རྒྱལ་པོ་ལི་ཤི་བ་ཉན་ཐོས་འོད་སྲུང་དང་། དེའི་ཚེ་རྒྱལ་བུའི་ཆུང་མར་གྱུར་པ་དེ་ནི་སྐྱེ་རྒུའི་བདག་མོ་དང་། སྡིག་དོན་ལྷས་བྱིན་རེད། འཛམ་བུ་གླིང་གི་མི་ལ་ངའི་དྲིན་གྱིས་ཁྱབ་པ་དེ་རྣམས་ནི། ང་ཐོག་མར་སངས་རྒྱས་པའི་སྐབས་སུ་ལྷའི་སྲས་པོ་བརྒྱད་ཁྲི་འོང་བ་དེ་དག་དང་། ངའི་ཉེ་གནས་སུ་ལུང་བསྟན་པ་རྣམས་ཡིན། དེ་དུས་ཡང་ང་ལ་དེ་ལྟར་གནོད་པ་ཆེན་པོ་བྱས་ཀྱང་སྙིང་བརྩེ་བའི་སེམས་བསྐྱེད་པ་ཡིན་ན། མངོན་པར་རྫོགས་པར་སངས་རྒྱས་ཏེ་ཉོན་མོངས་པའི་སྒྲིབ་པ་ཟད། མ་རིག་པའི་གཉིད་ལས་སངས། ཐུགས་རྗེ་ཆེན་པོས་ཀུན་ལ་ཁྱབ་ཡོད་དུས་སུ་གནོད་པ་ཆུང་ཆུང་ཞིག་ལ་ཐུགས་བརྩེ་བ་ནི་ལྟ་ཅི་སྨོས་ཅེས་གསུངས་སོ། དེ་ལྟར་སེམས་ཅན་ཐམས་ཅད་ཕ་མ་ལྟ་བུར་སྙོམས་པར་བྱས་ཏེ་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་དང་དུས་རྒྱུན་དུ་མ་བྲལ་ན། ཚོགས་གཉིས་མཉམ་དུ་རྫོགས་ཏེ་རྣམ་མཁྱེན་སངས་རྒྱས་ཀྱི་གོ་འཕང་མྱུར་དུ་ཐོབ་པ་ཡིན། དེས་ན་སེམས་བསྐྱེད་ནི་བསམ་པ་བཟང་པོ་ལ་བློ་སྦྱོང་གྱིས་དང་། གལ་ཏེ་ལུས་ངན་སོང་དུ་ལས་ཀྱིས་སྐྱེ་དགོས་ཀྱང་སེམས་བསྐྱེད་པའི་དགེ་བའི་སྟོབས་ཀྱིས་ལོག་པར་མི་འགྱུར་ཏེ། ངན་འགྲོའི་རྟེན་གྱི་སྟེང་ནས་ཀྱང་ལམ་གྱི་འཕྲོ་སྦྱང་ནུས་པ་ཡིན། སྟོན་པ་ཐུགས་རྗེ་ཅན་དམྱལ་བའི་ནང་དུ་སྐྱེས་དུས་གྲོགས་ཀ་མ་རུས་པ་ལ་སྙིང་རྗེ་སྐྱེས་བ་ཙམ་གྱིས་ལྷ་ཡུལ་དུ་སྐྱེས་སོང་བ་ལྟ་བུ་ཡིན་ནོ། །དེ་ཡན་ཆད་ཀྱིས་བདེ་བ་ཅན་ལ་སྐྱེ་བའི་རྒྱུ་གསུམ་པ་གྲོགས་བྱང་ཆུབ་མཆོག་དུ་སེམས་བསྐྱེད་པ་སེམས་བསྐྱེད་ཀྱི་སྡོམ་པ་ཇི་ལྟར་ལེན་ལུགས་ཀྱི་སྐོར་རགས་རིམ་དང་བཅས་པ་ཞུས་ནས་རྒྱུ་དང་པོ་གསུམ་སོང་པ་ཡིན།

རྒྱུ་བཞི་པ་དེ་ལྟར་དགེ་བའི་རྩ་བ་བསགས་པ་ཐམས་ཅད་བདེ་བ་ཅན་དུ་སྐྱེ་བའི་རྒྱུར་བསྔོ་ཞིང་རྐྱེན་སྨོན་ལམ་དག་པས་མཚམས་སྦྱར་བ།

དེ་ལ་གསུམ་སྟེ། ཚེ་འདིར་འོད་དཔག་མེད་མཇལ་བའི་དབང་དུ་བྱས་པའི་སྨོན་ལམ་དང་། ཤི་འཕོས་ནས་བདེ་བ་ཅན་དུ་སྐྱེ་བའི་དབང་དུ་བྱས་པའི་སྨོན་ལམ་དང་། ཞིང་ཁམས་ཀྱི་བཀོད་པ་ཡིད་ལ་བྱས་ནས་སྨོན་ལམ་འདེབས་པའོ། །ཚེ་འདིར་འོད་དཔག་མེད་མཇལ་བའི་དབང་དུ་བྱས་པའི་སྨོན་ལམ།

དང་པོ་ཚེ་འདིའམ་འཆི་ཁར་འོད་དཔག་མེད་མཇལ་བའི་དབང་དུ་བྱས་པའི་སྨོན་ལམ།

བདག་དང་བདག་ལ་འབྲེལ་ཐོགས་ཀུན། །འདི་ནས་ཚེ་འཕོས་གྱུར་མ་ཐག །སྤྲུལ་བའི་སངས་རྒྱས་འོད་དཔག་མེད། །དགེ་སློང་དགེ་འདུན་འཁོར་གྱིས་བསྐོར། །མདུན་དུ་མངོན་སུམ་འབྱོན་པར་ཤོག །ཅེས་གསུངས་ཏེ། བདག་སྨོན་ལམ་འདེབས་པ་པོ་དང་བཟང་པོ་ཆོས་དང་ཟང་ཟིང་གི་འབྲེལ་བ་ཅན་དང་། ངན་པ་དགྲ་ཇག་ངན་སེམས་ཀྱིས་འབྲེལ་བ་སྟེ། མདོར་ན་བཟང་ངན་ལས་ཀྱིས་འབྲེལ་ཐོགས་ཀྱི་ཕ་མར་གྱུར་བའི་སེམས་ཅན་ཀུན། འཇིག་རྟེན་འདིའི་སྣང་བ་ནུབ་ནས་འཇིག་རྟེན་ཕ་རོལ་ཏུ་འགྲོ་ཉེ་བའི་དུས་ལ་བབ་སྟེ། ཚེ་ཞེས་བྱ་བའི་སྲོག་གི་རྒྱུན་ཐག་ཆད་དེ་རྣམ་སྨིན་གྱི་ལུས་རྟེན་གཞན་ལ་འཕོས་པར་གྱུར་མ་ཐག་ཏུ། སྐྱེ་བ་དང་འཆི་བ་ཁ་བརྒྱུད་དེ་ཡང་ནས་ཡང་དུ་འཁོར་གྱིན་འདུག་པ་འདི། སྲིད་པ་མངོན་པར་སྒྲུབ་པའི་ལས་དང་། དེའི་འབྲས་བུ་ལ་སྤྱོད་དེ་སྐྱེ་ཤི་ཁ་བརྒྱུད་པ་འདི་འཛད་མཐའ་མེད་པ་ཞིག་རེད། བཅོམ་ལྡན་འདས་ཀྱིས། སྲིད་པ་མངོན་པར་སྒྲུབ་པ་འདི་སྡུག་བསྔལ་ཡིན། སྲིད་པ་ཆེ་ཆུང་མཐོ་དམན་གང་སྒྲུབ་ཀྱང་སྡུག་བསྔལ་ཡིན། མི་གཙང་བ་མང་ཉུང་གང་ཡིན་ཡང་དྲི་ཞིམ་པོ་ཡོད་པ་མ་ཡིན་པ་དང་གཅིག་མཚུངས་ཡིན་ཞེས་གསུངས་སོ། །དེ་བཞིན་དུ་འགྲོ་བའི་གནས་རིས་སོ་སོ་ནས་ཚེ་འཕོས་དུས་ཇི་ལྟར་འཕོ་བ་རེད་ཅེས་གསུངས་ཅེ་ན། སེམས་ཅན་གང་ཡིན་རུང་གནས་རིས་དེ་ནས་ཤི་འཕོས་ཏེ་དེ་ལ་ཚུར་སྐྱེས་ཏེ་ལྷ་ཤི་ཚད་ལྷ་ལ་སྐྱེ། མི་ཤི་ཚད་མི་ལ་སྐྱེ། ཁྱི་ཤི་ཚད་ཁྱི་ལ་སྐྱེ་རྒྱུ་དེ་འདྲ་མིན་པར། དགེ་མི་དགེ་ལས་ཀྱི་དབང་གིས་མཐོ་རིས་དང་ངན་སོང་ཐ་དད་པར་སྐྱེ་བ་ཡིན། དཔེ་བཞག་ན་ས་བོན་གང་བཏབ་ན་མྱུ་གུ་དེ་འཁྲུངས་པ་ལྟ་བུ་ཡིན་གསུངས། ཡང་འཇིག་རྟེན་རྒྱང་འཕེན་པའི་འདོད་པ་ལྟར་ཚེ་ཕྱི་མ་མེད་པར་ཆུ་སྐམ་པ་དང་མར་མེ་ཤི་བ་ལྟ་བུ་མིན་པར། འོ་ན་ཤི་ཚར་དུས་རིག་རྒྱུ་ཐུག་རྒྱུ་མེད་པ་ཅིའི་ཕྱིར་ཞེ་ན། ཤི་བའི་སྐབས་སུ་གཟུགས་ཀྱི་ཕུང་པོ་ཤུལ་དུ་བསྐྱུར་སོང་བ་ཡིན་ལ། སེམས་ནི་ཤི་དུས་ལྟ་ཅི་གསོན་དུས་ཀྱང་མཐོང་ཐུབ་པ་ཅན་ཞིག་མ་ཡིན་ཞིང་། མ་མཐོང་ཕྱིར་ན་མེད་པ་ཁས་ལེན་རྒྱུ་མེད་དེ། མཐོང་བྱེད་ཀྱི་དབང་པོའི་ཁྱད་པར་གྱིས་རང་རེས་མ་མཐོང་བ་ནི་གཞན་འགའ་རེས་མཐོང་པ་དང་། དེ་ཚོས་མ་མཐོང་པ་ནི་དེ་བས་ལྷག་གི་དབང་པོ་ཅན་གྱིས་མཐོང་པ་ལ་སོགས་པ་མང་བས། མདོ་སྡེ་རྒྱན་ལས། དབང་པོ་ལྔ་རྣམས་གཞན་གྱུར་ན། །ཡོན་ཏན་བརྒྱ་ཕྲག་བཅུ་གཉིས་འབྱུང་། །ཞེས་གསུངས་པ་ལྟར་རོ། །འོ་ན་དེ་མཁྱེན་པ་པོ་སུ་ཡིན་ཞེ་ན། སངས་རྒྱས་ཡིན་ཏེ། དེ་མཁྱེན་པ་ནི་ཀུན་མཁྱེན་ཏེ། ཀུན་མཁྱེན་ཡེ་ཤེས་མིན་པས་མིན། །ཞེས་གསུངས་པས་སོ། །ཡང་སངས་རྒྱས་བཅོམ་ལྡན་འདས་བཞུགས་ཡོད་པའི་དུས་སུ་ལྷས་བྱིན་ལ་སོགས་པ་འགའ་ཞིག་སངས་རྒྱས་ཀྱི་མཁྱེན་པ་ལ་ཡིད་མ་ཆེས་པར། མཁྱེན་དང་མི་མཁྱེན་ཚོད་བགམ་པའི་ཕྱིར་དུ་འཛམ་བུ་གླིང་གི་ཤིང་རིགས་སྣ་ཚོགས་མེ་ལ་བསྲེགས་ཏེ། ཐལ་བ་ཐམས་ཅད་སོ་སོར་མི་ནོར་བའི་རྟགས་བརྒྱབ་ནས། བཅོམ་ལྡན་འདས་ལ་ཁྱེད་ཀྱིས་མཁྱེན་ན་འདིའི་ཐལ་བ་ཐམས་ཅད་སོ་སོར་བྱས་ནས་སོལ་ཤིག་ཅེས་ཞུས་པས། བཅོམ་ལྡན་འདས་ཀྱིས་རེ་རེ་བཞིན་དུ་མ་འདྲེས་པར་གསུངས་བས་ལོག་ལྟ་ཅན་ལྷའི་བྱིན་ཡིན་ཡང་ཁས་ལེན་དགོས་ཐུག་པར་མ་ཟད། བཅོམ་ལྡན་འདས་ཀྱིས་གསུངས་པ་བདེན། །ཀུན་གཟིགས་ཁྱེད་ལ་ཕྱག་འཚལ་ལོ། །ཞེས་བསྟོད་པ་བྱེད་ཁུལ་བྱས་པ་རེད། འཇིག་རྟེན་འདི་ནས་ཚེ་འཕོས་ཏེ་ཕ་རོལ་ཏུ་སྐྱེ་བ་ལེན་པ་བཅོམ་ལྡན་འདས་ཀྱིས་ཇི་ལྟར་གསུང་ཡོད་ཅེ་ན། སྐྱེ་བ་བརྒྱུད་ལེན་བྱེད་པ་འདི་རྟག་པ་འཕོས་སོང་བ་ཞིག་ཀྱང་མིན་པར། ཆད་པ་མེད་པར་འགག་སོང་བ་ཞིག་ཀྱང་མིན། རྒྱུ་མེད་ལས་བྱུང་བ་ཞིག་ཀྱང་མིན། བྱེད་པ་པོས་བྱས་ཡོང་བ་ཞིག་ཀྱང་མིན། ལས་དང་ཉོན་མོངས་པའི་རྒྱུ་རྐྱེན་ཚོགས་ནས་སྐྱེས་ཡོང་བ་ཞིག་ཡིན་གསུངས། སྐྱེ་བ་རྗེ་བ་བརྒྱུད་རྒྱུ་འདི་དཔེ་བརྒྱད་ཀྱི་སྒོ་ནས་བསྟན་ཏེ། །ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲ། །ཞེས་གསུངས་ཏེ། བླ་མས་སློབ་མ་ལ་ཁ་ཏོན་འདོན་རྒྱུ་བསླབ་ན་བླ་སློབ་གཉིས་ཀ་ལ་ཡོད། སློབ་དཔོན་གྱི་རྒྱུད་ཀྱི་ཁ་ཏོན་མེད་པར་བྱས་ཏེ་དེ་སློབ་མས་ཁྱེར་སོང་བ་མ་རེད། སློབ་དཔོན་གྱིས་ཁ་ཏོན་འདོན་ཤེས་པ་དེ་སློབ་མ་དང་གཉིས་ཀར་བགོས་བཞག་པ་ཞིག་ཀྱང་མ་རེད། དེས་ན་སྔ་མ་ལས་ཕྱི་མ་འབྱུང་རྒྱུ་འདི་རྟག་པ་འཕོས་སོང་བ་ཞིག་མ་ཡིན་ཞིང་། ཆད་པ་རྒྱུ་མེད་ལས་བྱུང་བ་ཞིག་ཀྱང་མ་ཡིན། རྐྱེན་གསུམ་གསུམ་ཚོགས་པ་ལས་སྐྱེ་བ་བསྟན་པ་ཡིན། བླ་མ་ཚེ་འདིའི་དཔེ། སློབ་མ་ཚེ་ཕ་རོལ་གྱི་དཔེ། ཁ་ཏོན་རྣམ་པར་ཤེས་པ་ཉིང་མཚམས་སྦྱོར་བའི་དཔེ་ཡིན། དཔེ་འདི་རྐྱང་པས་ད་ལྟའི་སྐྱེ་བ་འདིའི་རྣམ་ཤེས་མ་འགག་བཞིན་ཕ་རོལ་ཏུ་རྣམ་ཤེས་འཕོ་བའི་གོ་ནོར་མི་འགྲོ་བའི་ཆེད་དུ་དཔེ་གཞན་པ་རྣམས་བཞག་པ་ཡིན། མར་མེ་གཅིག་ལས་མང་པོ་མཆེད་པ་ཡང་དེ་ལྟར་དུ། མར་ཁུ་སྡོང་བུ་ཀོང་བུ་ཐམས་ཅད་འཛོམས་པ་ལས་མར་མེ་འབྱུང་། མར་མེ་སྔ་མ་ཚེ་འདིའི་དཔེ། རྗེས་མ་ཚེ་ཕྱི་མའི་དཔེ། མར་མེ་སྔ་མ་ལས་ཕྱི་མ་འབྱུང་དུས་སྔ་མ་ཡོད་པ་འདི་ཆད་པ་མ་ཡིན་པའི་དཔེ། ཕྱི་མ་ཡོད་པ་འདི་རྟག་པ་མ་ཡིན་པའི་དཔེ་བསྟན་པ་ཡིན། མར་མེའི་དཔེ་ཡིས་འདི་དང་ཕ་རོལ་གཉིས་ཀའི་ཕུང་པོ་དུས་གཅིག་ཏུ་ཡོད་པའི་གོ་ནོར་མི་འགྲོ་བའི་ཆེད་དུ་དཔེ་གཞན་པ་རྣམས་བསྟན་པ་ཡིན་ནོ། །ནམ་མཁའ་དང་མེ་ལོང་སྐྱེས་བུའི་ངོ་གསུམ་པོ་འཛོམས་དུས། མེ་ལོང་ངོར་བྱད་ཀྱི་གཟུགས་བརྙན་འཆར་བ་ཡང་སྐྱེ་བ་འཕོ་ལེན་གྱི་དཔེ་སྟེ། མེ་ལོང་ནི་ཚེ་འདི་ཡོད་པའི་སྒོ་ནས་ཕྱི་མའང་ཡོད། ཡོད་ཀྱང་དངོས་པོ་མི་འཕོ་བའི་སྟེང་ནས་ཕ་རོལ་ཀྱང་ཡོད་ངེས་པའི་དཔེར་བཞག འོན་ཀྱང་ཆག་པོ་ལས་ཆག་པོ་སྐྱེ་བ། མཁྲང་པོ་ལས་མཁྲང་པོ་སྐྱེ་བའི་ལོག་རྟོགས་ཟློག་པའི་ཆེད་དུ་དཔེ་གཞན་པ་ཚོ་བསྟན། རྒྱའམ་རྒྱ་འབུར་གསུངས་པ་འདི་བླུག་པའི་ནང་དུ་བླུག་རྒྱབ་བཞག་པ་ལྟ་བུ་ཞིག་ལ་གསུངས་པ་སྟེ། དཔེར་ན་ཚ་ཀོང་གི་ནང་དུ་སཙྪ་དཔར་དུས་ཚ་ཀོང་དང་འདམ་བག་དང་མིའི་ལག་པའི་རྩོལ་བ་ཐམས་ཅད་འཛོམས་པ་ལས་སཙྪ་འབྱུང་བའི་དཔེ་ཡིས། ཚེ་འདིར་ལས་ཅི་ཞིག་བསགས་ཡོད་ན་དེ་དང་མཐུན་པར་ཕ་རོལ་དུ་སྐྱེ་བ་ལེན་པའི་དཔེ་བསྟན། འོན་ཀྱང་ལྷ་འཕོས་པ་ལྷར་སྐྱེ། མི་འཕོས་པ་མི་ལ་སྐྱེ་བ་ལ་སོགས་པའི་ངེས་པ་ཅན་དུ་མི་འོས་པའི་ཆེད་དུ་ཡང་དཔེ་གཞན་པ་ཚོ་བསྟན། དེ་བཞིན་དུ་མེ་ཤེལ་ས་བོན་སྐྱུར་དང་སྒྲ་གསུངས་ཏེ། མེ་ཤེལ་ལས་མེ་འབྱུང་བ་དང་། ས་བོན་ལས་འབྲས་བུ་སྐྱེ་བ་དང་། སྐྱུར་ཞེས་པའི་སྒྲས་རྐྱེན་བྱས་ཏེ་སྐྱུར་མོ་ཞེ་ལ་ཤར་དུས་ལྕེ་རྩ་ཡང་སྐྱུར་ཏེ་འགྲམ་ཆུ་ལྡང་བ་དང་། བྲག་རྩ་དང་གྱང་རྩ་ནས་སྐད་སྒྲ་ཆེན་པོ་བརྒྱབ་ན་དེ་དང་འདྲ་བ་ཚུར་ལ་གྲག་པ་ལྟ་བུ་སྟེ། དཔེ་བརྒྱད་པོའི་དཔེ་རེའི་སྣེ་རེ་མཚོན་ཏེ། དེའི་དཔེ་བརྒྱད་པོ་བསྡམ་དུས་སྐྱེ་བ་གཅིག་ནས་གཅིག་ལ་འཕོ་བ་འདི། ལས་དང་ཉོན་མོངས་པའི་རྒྱུ་རྐྱེན་ཚོགས་པ་ལས་སྐྱེ་བ་ཡིན་པ་གོ་ཐུབ་བོ། །འདི་དག་འདི་ནས་ཕྱོགས་མཚོན་ཙམ་ཞིག་བཤད་དགོས་པ་ཅིའི་ཕྱིར་ཞེ་ན། སྤྱིར་རྒྱུ་འབྲས་རྟེན་འབྲེལ་བསླུ་མེད་དང་། ཁྱད་པར་དུ་སྐྱེ་བ་སྔ་ཕྱིའི་སྐོར་ལ་ཐོས་བསམ་སྦྱོང་བ་མ་མྱོང་བ་རྣམས་ཀྱིས་གནད་དངོས་དེ་མ་གོ་ན་རྒྱུ་འབྲས་ཡིད་ཆེས་ཀྱི་བློ་བརྟན་པོ་ཞིག་ཡོང་མི་ཐུབ་ལ། གལ་ཏེ་དེ་མ་ཐུབ་ན་འཇིག་རྟེན་ཡང་དག་གི་ལྟ་བ་ལ་དད་པ་ཙམ་ཞིག་ཀྱང་མེད་པས་ཐར་བའི་ས་བོན་ཐེབ་ཏེ་བདེ་བ་ཅན་དུ་སྐྱེ་བ་ལྟ་ཅི་མཐོ་རིས་ལྷ་མིའི་ལུས་རྟེན་ཀྱང་ཐོབ་དཀའ་བས་བཤད་པ་ཡིན། རྒྱུ་འབྲས་ཀྱི་སྐོར་འདི་ལ་ཞིབ་དུ་བསམ་བློ་བཏང་ནས་གོ་བ་ངེས་ཤེས་ཡོད་དུ་ཆུག དུས་རྒྱུན་ཆོས་པ་ཞིག་ལ་གཅིག་ཐུག་ན་རྒྱུ་འབྲས་དང་རྟེན་འབྲེལ། ཐེག་པའི་རིམ་པ་ཆོས་ཀྱི་རྣམ་གྲངས་སྔོན་འགྲོ་དང་དངོས་གཞིའི་ཉམས་ལེན་སྐོར་གྱི་ཁ་བརྡ་རེ་གླེང་རེས་གྱིས་དང་མ་ཤེས་པ་རྣམས་ཤེས་བྱེད་དང་། ཤེས་པ་ངེས་བྱེད་ལ་འགྲོ་ནི་རེད། ཚང་མས་མ་གོ་བ་ཐམས་ཅད་བླ་སེར་རྣམས་ལ་དྲིས་དང་ཕན་ཐོགས་རང་ཉིད་ལ་འབྱུང་བ་ཡིན། ཆོས་ཕྱོགས་ཀྱི་འགྲོ་ངོ་འདུག་ངོའི་གོ་བ་མ་ཤེས་ཕྱིན་གནད་འདྲ་བོ་མི་ཤེས་པས་ཆོས་སྒྲུབ་ཟེར་ན་ལུས་ངག་གི་བྱ་བ་ཞིག་ལ་འབད་བརྩོན་བགྱི་བ་ལས་གཙོ་བོ་སེམས་ཀྱི་བསམ་བྱ་དང་གནད་ཆེ་ཆུང་གི་འགག་སྒོའི་མདུད་པ་འདྲ་བོ་མ་བཀྲོལ་དུས་དོན་སྟེང་དུ་ཁེལ་མོ་ཞིག་རེད་ཐུབ་ནི་མ་རེད། རྒན་དར་གཞོན་གསུམ་སུ་ཡིན་ནའང་བཤད་བཤད་ད་བར་དུ་བཤད་ཀྱང་། ངག་གི་མི་དགེ་བཞིའི་ནང་དུ་མ་འདུས་པ་ཞིག་ཕལ་ཆེར་མེད་པས་ད་ནི་བཤད་ནས་ཅི་བྱེད། ཡ་རབས་ཀྱི་སྐད་ཆ་ཆོས་དང་མཐུན་པའི་གཏམ་ཡོན་ཏན་ཅན་གྱི་མི་ལ་དཔེ་ལྟོས་དང་ཕན་ཐོགས་ཆེན་པོ་ཡོད་དོ། །དེ་རིང་གནམ་ངོ་ཡག་བཙོག་ཅི་ཡིན་ན་ཡིན། རྒད་པོ་རྒན་མོ་རྣམས་ཀྱིས་རྐང་ལག་ན་རབས་ཚིགས་གཟེར་རབས་ཇི་ལྟར་བཤད་ཀྱང་དགོས་པ་མེད། དེ་རིང་གི་གནམ་ངོ་ཡག་བཙོག་དང་། རྒད་པོ་རྒད་མོ་རྣམས་ཀྱིས་རྐང་ལག་ན་ཚུལ་ཚིགས་གཟེར་ཚུལ་དང་། བུ་རྒྱུད་ཀྱི་ལོ་རྒྱུས་བཤད་པས་དགོས་པ་མི་འདུག གསར་སྐྱེས་རྣམས་ཀྱིས་མི་གཞན་ལ་འཕྱ་ཁུལ་དགོད་ཁུལ་མ་བྱེད། དེས་ཅི་ཡང་མི་ཕན། གཞན་སྐྱོན་རྗེས་ཟློས་བྱེད་པ་ནི་རང་སྐྱོན་གཞན་ལ་ངོམས་པ་དང་གཅིག་མཚུངས་ཡིན་པ་རེད། ཆོས་དང་རིག་གཞུང་འདི་ཕྱིའི་དོན་ཆེན་དང་འབྲེལ་བའི་ཁ་བརྡ་གོ་ཆོད་ནི་ཤོད། འདི་ནས་ཚེ་འཕོས་གྱུར་མ་ཐག་པའམ་ཡང་ན་དབུགས་ཆད་མ་ཐག་པའི་སྔོན་རོལ་དུ། སྤྲུལ་བའི་སངས་རྒྱས་འོད་དཔག་མེད། །དགེ་སློང་དགེ་འདུན་འཁོར་གྱིས་བསྐོར། །མདུན་དུ་མངོན་སུམ་འབྱོན་པར་ཤོག །ཅེས་གསུངས་ཏེ། ཚེ་འདིའི་སྣང་བ་མ་ནུབ་པར་སྲོག་གི་ལྷག་མ་ཅུང་ཟད་ཙམ་ཞིག་ཡོད་པའི་སྐབས་སུ། ད་ལྟ་མགོན་པོ་འོད་དཔག་མེད་ཡིད་ལ་བྱས། ཚོགས་བསགས་སེམས་བསྐྱེད་སྨོན་ལམ་བཏབ་པའི་སྟོབས་ཀྱིས་སྤྲུལ་བའི་སངས་རྒྱས་འོད་དཔག་མེད་པ་དགེ་སློང་དགེ་འདུན་གྱི་འཁོར་ཚོགས་མང་པོས་བསྐོར་ཏེ། མདུན་གྱི་ནམ་མཁར་མངོན་སུམ་མིག་གི་ལམ་དུ་མཇལ་དུ་ཡོད་པ་ཞིག་འབྱོན་པར་ཤོག འཆི་ལ་ཉེ་བའམ་འབྱུང་བ་བསྡུ་སར་ཐོན་དུས་ད་ལྟ་ནད་མེད་ཀྱི་སྐབས་ལྟ་བུའི་རང་ཁ་རང་དབང་ཅན་ཡིན་ནི་མ་རེད། ཤི་བྱེད་ཀྱི་ནད་ལའང་ཁྱད་པར་ཡོད་པ་རེད། གཟེར་ནད་དྲག་པོ་ཞིག་གིས་གད་ལ་ཉེ་བ་ཙམ་ཞིག་གཟེར་ཏེ། སྲོག་འདི་མགྱོག་པར་ཆད་རོགས་བྱས་ན་ཅི་མ་རུང་བསྙམ་པ་ལྟ་བུ་ཡང་ཡོད་ནི་རེད། གཟེར་ན་ཚའི་མནར་གཅོད་མེད་པར་ཤི་བ་ཡང་སྲིད་མོད། བསམ་ལོང་དྲན་ལོང་མང་པོ་ཡོད་ན་སེམས་ཆགས་སྡང་དང་འདྲེས་ཏེ་འཆི་ཁའི་ཉིང་མཚམས་ཆགས་སྡང་གིས་སྦྱར་ན་སྡུག་ནི་རེད། གང་ལྟར་ཡང་འབྱུང་བའི་ཐིམ་རིམ་གྱི་སྐབས་སུ་སྣང་བ་འགྱུར་མ་འགྱུར་ཞིག་ཏུ་གྱུར་ནས་སྡིག་ཅན་ལ་མ་དག་པའི་སྣང་བ་དང་། ལས་དག་པ་ལ་དག་པའི་སྣང་བ་འཆར་བས། དེ་དུས་མགོན་པོ་འོད་དཔག་མེད་འཁོར་དང་བཅས་པ་མཇལ་ཐུབ་མིན་ནི་ད་ལྟའི་དད་པ་དང་བརྩོན་འགྲུས་ལ་རག་ལས། དད་པ་དང་བརྩོན་འགྲུས་ཀྱི་སྒོ་ནས་བདེ་བ་ཅན་ལ་སྐྱེ་བའི་རྒྱུ་བཞི་སྒྲུབ་པ་དང་། ཁྱད་པར་དུ་བྱང་ཆུབ་མཆོག་ཏུ་སེམས་བསྐྱེད་པ་འདི་དང་འབྲེལ་ན་དགེ་རྩ་སྟོབས་ཆེན་དུ་འགྱུར་ཏེ་འབྲས་བུ་སྨིན་སྟོབས་ཆེ་བ་དང་ཚེ་འདི་ལ་མཇལ་ཐུབ་པའི་རྒྱུ་དངོས་ཡིན་ནོ། །དེས་ན་ཉིན་དཀར་མགོན་པོ་འོད་དཔག་མེད་གཙོ་འཁོར་ཡིད་ལ་བྱས་ན་མཚན་མོ་རྨི་ལམ་དུ་ཡོང་། དེར་ཡོང་ན་འཆི་ཁར་མིག་གི་ལམ་ལ་མངོན་སུམ་དུ་བྱོན་ནས་ལམ་སྣ་འདྲེན་པ་ལ་ཐེ་ཚོམ་མི་དགོས། སྐྱེ་བོ་གསོ་ཐིགས་ལས། ལུས་ཅན་རྣམས་ཀྱི་སྐྱོན་ཡོན་ནི། །ཐམས་ཅད་གོམས་པའི་རྩ་བ་ཅན། །གོམས་པའང་རང་ལ་རག་ལས་པས། །དེ་བས་ཡོན་ཏན་གོམས་པ་མཆོག །ཅེས་གསུངས་པས། སྐྱོན་ཡོན་གཉིས་ཀ་གང་ལ་གོམས་ཆ་ཆེ་ན་དེ་བྱ་ངེས་པས། སྐྱོན་ལ་གོམས་ན་སྐྱོན་ལ་འཇུག ད་སྔོན་གྱིས་བག་མེད་ཀྱི་ལས་ལ་གོམས་གོམས་ཀྱིས་ད་ལྟ་མི་གཉིས་ཐུག་ན་བཤད་རྒྱུ་མི་དགེ་བ་ཡིན་པ་བཞིན། དེ་བཞིན་ལས་རྒྱུ་ཡང་མི་དགེ་བ་ཡིན་པ་རེད། དེ་ལོས་ཡིན་བསམ་རྒྱུ་མི་དགེ་བ་ཡིན་པས་རེད། སྒོ་ལུས་ངག་ཡིད་གསུམ་ཆར་དེ་ལ་གོམས་པ་དང་། སྐྱེ་བ་འདི་ལ་གོམས་པར་མ་ཟད་སྐྱེ་བ་སྔོན་མ་ནས་གོམས་པའི་སྟོབས་ཀྱིས་མི་དགེ་བའི་ལས་དང་མ་དག་པའི་སྣང་བ་ཚེ་འདི་ལ་རང་ཤུགས་ཀྱིས་ཐོན་ཡོང་བ་རེད། དེ་མིན་པར་ཆུའི་རྐ་རྫོགས་པ་ལྟ་བུའི་ལུས་ངག་ཡིད་གསུམ་ད་གཟོད་དགེ་བའི་ལམ་ལ་འཇོག་དགོས་ན་དང་པོ་ཅུང་ཟད་དཀའ་ཡང་། ཐམས་ཅད་གོམས་པའི་རྩ་བ་ཅན་གསུངས་བས་གང་ཡིན་ཡང་གོམས་ན་མི་འགྲུབ་རྒྱུ་ཞིག་མེད་ལ་གོམས་ན་ཇེ་སླ་ལ་མི་འགྲོ་རྒྱུ་ཞིག་ཀྱང་མེད། དེས་ན་ལེགས་པའི་ཕྱོགས་ལ་གོམས་ཁ་བཞག་སྟེ་འདི་བདེ་ཕྱི་མར་སྐྱིད་པ་ཞིག་བྱེད་དམ། མི་ལེགས་པའི་ཕྱོགས་ལ་གོམས་ཁ་བཞག་ནས་འདི་མི་བདེ་ཕྱི་མ་མི་སྐྱིད་པ་ཞིག་བྱ་རྩ་བ་རང་ལ་རག་ལས་པ་རེད། གོམས་པ་གང་ལ་འཇོག་རང་ཉིད་ལ་རག་ལས་པ་ཡིན། དེ་བས་ཡོན་ཏན་གོམས་པ་མཆོག །ཅེས་གསུངས་པ་ལྟར། རང་ཉིད་ལ་བདེ་སྐྱིད་མི་འདོད་པ་སུ་ཡང་མེད་པས། ཡོན་ཏན་ལ་གོམས་པར་གྱིས་དང་ལེགས་ཚོགས་ཐམས་ཅད་དེའི་ཁུངས་ནས་བྱུང་བ་ཡིན་ཞེས་གསུངས། དེ་མཐོང་ཡིད་དགའ་སྣང་བ་སྐྱིད། །ཤི་བའི་སྡུག་བསྔལ་མེད་པར་ཤོག །ཅེས་གསུངས་ཏེ། སྤྲུལ་བའི་སངས་རྒྱས་འོད་དཔག་མེད་དགེ་སློང་གི་དགེ་འདུན་གྱི་འཁོར་གྱིས་བསྐོར་བ་སྔར་རང་ཉིད་ཀྱིས་གསལ་སྣང་ལ་བསྒོམས་པ་ཇི་ལྟ་བ་བཞིན་དུ་མངོན་སུམ་མིག་སྔར་བྱོན་པ་མཐོང་ཞིང་མཇལ་ཏེ་ཡིད་དགའ་བའི་དད་པའི་སྤུ་ལོང་གཡོ་བ་དང་ཆབས་ཅིག་ཏུ་སྣང་བ་དག་པར་མཐོང་ནས་སེམས་སྐྱིད་དེ། ངང་བ་པད་མཚོར་གཅིག་ནས་གཅིག་ཏུ་རྒྱུ་བ་བཞིན་དུ་སྡུག་ལྡན་གྱི་ཕུང་པོ་མི་གཙང་བའི་རང་བཞིན་སྡུག་བསྔལ་གྱི་གཞི་མ་འདི་བསྐྱུར་ཏེ། བདེ་ཆེན་དག་པའི་ཞིང་ཁམས་ལ་འགྲོ་བར་མགོན་པོ་འོད་དཔག་མེད་འཁོར་དང་བཅས་པ་མངོན་སུམ་དུ་བྱོན་ནས་ཤི་བའི་སྡུག་བསྔལ་མེད་པའི་སྟེང་དུ་སྤྲོ་བ་དཔག་མེད་དང་ལྡན་པར་ཤོག་ཅིག་ཅེས་གསུངས་པ་རེད། བྱང་ཆུབ་སེམས་དཔའ་མཆེད་བརྒྱད་ནི། །རྫུ་འཕྲུལ་སྟོབས་ཀྱིས་ནམ་མཁར་བྱོན། །བདེ་བ་ཅན་དུ་འགྲོ་བ་ཡི། །ལམ་སྟོན་ལམ་སྣ་འདྲེན་པར་ཤོག །ཞེས་གསུངས་ཏེ། མཁྱེན་བརྩེ་ནུས་གསུམ་གྱི་མངའ་བདག་བྱང་ཆུབ་སེམས་དཔའ་ཆེན་པོ་འཕག་པ་སྤྱན་རས་གཟིགས་དང་། མཐུ་ཆེན་ཐོབ། འཇམ་དཔལ་དབྱངས་ལ་སོགས་པ་ཉེ་བའི་སྲས་ཆེན་བརྒྱད་པོ་དེ་དགསྐུ་རྫུ་འཕྲུལ་གྱི་སྟོབས་ཀྱིས་དབུགས་ཕྱི་ནང་གཉིས་ཀའི་མཚམས་ན་ཡོད་པའི་འཆི་ཁར་མདུན་གྱི་ནམ་མཁར་བྱོན་ཏེ། བུ་གཅིག་པུ་ན་བར་མ་ལྷག་པར་བརྩེ་ཞིང་བྱམས་པ་ལྟར། བྱང་ཆུབ་སེམས་དཔའ་དེ་དག་གིས་ཐུགས་བརྩེ་བ་ཆེན་པོས་མངོན་སུམ་མི་དང་མི་འཕྲད་པ་ལྟར་མིང་ནས་བཟུང་སྟེ་ཁྱོད་སྐྲག་མི་དགོས་འཇིགས་མི་དགོས། བར་དོའི་འཇིགས་སྐྲག་བརྒྱུད་མི་དགོས་གཤིན་རྗེའི་མདུན་སར་འགྲིམ་མི་དགོས། ཞིང་ཁམས་བདེ་བ་ཅན་ལ་ཁོང་རྣམ་པའི་ཞབས་རྗེས་དེད་ནས་ཤོག་ཅིག་ཅེས་གསུངས་ཏེ། ཞིང་ཁམས་བདེ་བ་ཅན་ལ་འགྲོ་བའི་ལམ་སྣ་འདྲེན་པར་ཤོག་ཅིག་གསུངས་པ་རེད། ཀུན་མཁྱེན་འཇིགས་གླིང་གིས། མདོར་ན་གང་གི་མཚན་དང་སྒྲ་དང་ནི། །ལྟ་བ་ཡིད་ལ་གོམས་པར་བྱས་པ་ཡང་། །ཞིང་ཁམས་བདེ་བ་ཅན་དུ་དབུགས་འབྱིན་པར། །ཐུགས་བསྐྱེད་དམ་བཅའ་བསླུ་བ་མེད་པའི་ཕྱིར། །ཞེས་གསུངས་པ་ལྟར། སངས་རྒྱས་འོད་དཔག་མེད་པའི་མཚན་གྱི་སྒྲ་ཙམ་རྣ་ལམ་དུ་ཐོས་པ་དང་། བདེ་བ་ཅན་གྱི་ཞིང་ཁམས་ཀྱི་རྟེན་བརྟེན་པ་དང་བཅས་པ་ཡིད་ལ་གོམས་པ་བྱས་པ་ཙམ་གྱིས། ཤི་བའི་གནས་སྐབས་ན་ཞིང་ཁམས་བདེ་བ་ཅན་དུ་དབུགས་འབྱིན་པ་ནི་སངས་རྒྱས་འོད་དཔག་མེད་པའི་ཐུགས་དང་པོ་བསྐྱེད་པའི་དམ་བཅའ་ཡིན་པས་བསླུ་བ་ཡོད་པ་མ་ཡིན་གསུངས། བྱང་ཆུབ་སེམས་དཔའ་མཆེད་བརྒྱད་དེ་གང་ཡིན་ཞེ་ན། ཉེ་བའི་སྲས་ཆེན་བརྒྱད་དེ། འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་བྱམས་པ་ཀུན་ཏུ་བཟང་། །ཞེས་པ་རྣམས་སོ། །དེ་ཡང་འཕགས་པ་འཇམ་དཔལ་དབྱངས་སྐུ་མདོག་དམར་སེར་རལ་གྲི་དང་གླེགས་བམ་བསྣམས་པ། ཕྱག་རྡོར་སྔོན་པོ་རྡོ་རྗེ་ཅན། སྤྱན་རས་གཟིགས་སྐུ་མདོགས་དཀར་པོ་ཕྲེང་བ་དང་པདྨ་དཀར་པོ་བསྣམས་པ། ས་སྙིང་སེར་པོ་མེ་ཏོག་སྔོན་པོའི་ཐོད་ཆིངས་ཅན་ཤིང་ཏོག་དང་པདྨ་ནོར་བུའི་མཚན་པ་བསྣམས་པ། སྒྲིབ་པ་རྣམ་སེལ་སྐུ་མདོག་དཀར་པོ་བུམ་པ་བཟང་པོ་དང་པད་དཀར་ཟླ་བའི་མཚན་པ་བསྣམས་པ། ནམ་མཁའི་སྙིང་པོ་སྐུ་མདོག་སྔོན་པོ་ཆོས་འཆད་ཀྱི་རྒྱ་ཡིས་ཨུཏྤལ་རལ་གྲིའི་མཚན་པའི་ཕྱག་མཚན་བསྣམས་པ། བྱམས་པ་དམར་སེར་ཀླུ་ཤིང་གི་སྡོང་པོ་བསྣམས་ཤིང་ཐོད་གཙུགས་ན་གསེར་གྱི་མཆོད་རྟེན་ཅན། བྱང་ཆུབ་སེམས་དཔའ་ཀུན་ཏུ་བཟང་པོ་སྐུ་མདོག་དམར་པོ་བུམ་པ་དང་པད་དཀར་ཉི་མའི་མཚན་པ་བསྣམས་པ་སྟེ། དེ་རྣམས་ཉེ་བའི་སྲས་བརྒྱད་དོ། །འགྲོ་བའི་དོན་ལ་སྐྱོ་དུབ་མེད་པའི་བརྡར་བཞེངས་སྟབས་སུ་ཡོད་པ་གསལ་འདེབས་དགོས་སོ།།

གཉིས་པ་ཤི་འཕོས་ནས་བདེ་བ་ཅན་དུ་སྐྱེ་བའི་སྨོན་ལམ།

དེ་ལ་གཉིས་ཏེ། ཁམས་གསུམ་འཁོར་བའི་ཞེན་ཆགས་གཅོད་པ་དང་། བདེ་བ་ཅན་ལ་སྐྱེ་ཚུལ་གྱི་དབང་དུ་བྱས་པའི་སྨོན་ལམ་མོ།།

དང་པོ་ཁམས་གསུམ་འཁོར་བའི་ཞེན་ཆགས་གཅོད་པ།

ངན་སོང་སྡུག་བསྔལ་བཟོད་བླག་མེད། །ལྷ་མིའི་བདེ་སྐྱིད་མི་རྟག་འགྱུར། །དེ་ལ་སྐྲག་སེམས་སྐྱེ་བར་ཤོག །ཅེས་གསུངས་ཏེ། ངན་སོང་གི་གནས་གསུམ་ནི་དམྱལ་བ་ཡི་དྭགས་དུད་འགྲོ་གསུམ་མོ། །དེ་ལས་དང་པོ་དམྱལ་བ་ནི་ཚ་དམྱལ་བརྒྱད་གྲང་དམྱལ་བརྒྱད་དང་བཅུ་དྲུག་དང་ཉི་ཚེ་ཉེ་འཁོར་གཉིས་དང་བཅོ་བརྒྱད་ཡོད་དོ། །དམྱལ་བའི་གནས་དེ་དག་གང་དུ་ཡོད་ཅེ་ན། འཛམ་བུ་གླིང་གི་འོག་ན་ཆགས་ཡོད་གསུངས་ཀྱང་། དོན་གྱི་གོ་བའི་ཐོག་ནས་རྣལ་འབྱོར་བ་གང་དུ་གྲོལ་བའི་ས་དེ་ལས་གཞན་དུ་མ་གྱུར་བ་འོག་མིན་དུ་ལྷུན་གྱི་གྲུབ་པ་ལྟར་སྡིག་ཅན་གང་དུ་ཤི་འཕོས་པའི་ས་དེ་ལས་གཞན་དུ་བགྲོད་མི་དགོས་པར་དམྱལ་བའི་སྣང་བ་ཤར་བ་ཡིན། འདིིར་དམྱལ་གནས་ཀྱི་ཆགས་རིམ་ནི། ཐམས་ཅད་ཀྱི་འོག་ན་མནར་མེད་པའི་དམྱལ་བ་ཡོད་ཅིང་། དེའི་སྟེང་དུ་རབ་ཏུ་ཚ་བ། ཚ་བ། ངུ་འབོད་ཆེན་པོ། ངུ་འབོད། བསྡུས་འཇོམས། ཐིག་ནག ཡང་སོས་རྣམས་རིམ་གྱིས་ཆགས་ཡོད་ཅིང་། དེའི་དམྱལ་ཁམས་རྣམས་སུ་སྡུག་བསྔལ་ཅི་འདྲ་མྱོང་གིན་ཡོད་ཅེ་ན། དམྱལ་ཁམས་སོ་སོའི་མིང་གི་སྒྲ་འཇུག་པའི་རྒྱུ་མཚན་དང་མཐུན་པར་ཡང་སོས་ལ་དམྱལ་བའི་སེམས་ཅན་དེ་རྣམས་ཀྱིས་གཅིག་གིས་གཅིག་ཤོས་མཐོང་ཚེ་དགྲ་མི་ཤ་བོ་མཐོང་བ་ལྟར་ཞེ་སྡང་སྐྱེས་ཏེ། མཚོན་ལག་ཏུ་རང་འགྲུབ་ཏུ་གྱུར་ཅིང་། མཚོན་ཆ་དེ་གིས་ཕན་ཚུན་ལ་རྡེག་པ་དང་གསོད་པར་བྱས་ཏེ་ཐེངས་མང་པོར་ཡང་ཤི་ཡང་སོས་ཁོ་ན་བྱེད་པ་དང་། ཚ་དམྱལ་སྤྱི་ཁྱབ་ཀྱི་སྡུག་བསྔལ་མདག་མེ་དང་མཚོན་ཆའི་གནོད་པ་ནི། ཐམས་ཅད་ལ་ཡོད་པས་སྤྱི་མཐུན་དུ་ཐམས་ཅད་ཀྱིས་མྱོང་གིན་ཡོད་ཅིང་། དམིགས་བསལ་བསྡུས་འཇོམས་པ་ལ་རི་བོའི་བར་དུ་གཅིར་བ་དང་གཏུན་གྱི་ནང་དུ་བརྡུང་བ་དང་། ངུ་འབོད་ཚང་གིས་མེས་ཚིག་ནས་ངུ་འབོད་བྱེད་པ་དང་། ངུ་འབོད་ཆེན་པོས་ལྷག་པར་དུ་མེས་ཚིག་ནས་ངུ་འབོད་ཀྱི་སྒྲ་ཆེན་པོ་མི་བཟོད་པར་སྒྲོགས་པ་དང་། ཚ་བ་ལྕགས་ཁང་སྒོ་མེད་མེ་འབར་བའི་ནང་ཚུད་པ་དང་། རབ་ཏུ་ཚ་བ་ལྕགས་ཁང་སྒོ་མེད་ཉིས་རིམ་མེ་འབར་བའི་ནང་དུ་ཚུད་དེ་ཁྲོ་ཆུ་ཁོལ་མས་ཁོག་པ་བསྲེག་པ་དང་། མཚོན་ཆ་རྩེ་གསུམ་གྱིས་ལུས་པོ་ཐལ་མར་དུ་ཕུག་པ་དང་། མནར་མེད་ཀྱི་དམྱལ་ཁམས་ན་ལྕགས་ཀྱི་ཁང་པ་མེ་འབར་བའི་ནང་དུ་ལྕགས་ཀྱི་ཟངས་ཆེན་ཁ་རྒྱ་ལ་དཔག་ཚད་སྟོང་ཕྲག་མང་པོ་ཡོད་པའི་ནང་དུ་ཁྲོ་ཆུ་ཁོལ་མས་དམྱལ་བའི་སེམས་ཅན་བཙོ་ཞིང་བསྲེགས་པ་དང་། ལྕགས་བསྲེགས་ཀྱི་རི་ལ་འཛེག་ཏུ་བཅུག་པ་དང་། ལྕགས་བསྲེགས་ཀྱི་ཐང་དུ་ལུས་ལྷུ་བཞི་ལྤགས་པ་བརྒྱངས་པ་ལྟར་བྱེད་པ་དང་། ལྕགས་ཀྱི་ཁང་པ་མེ་འབར་བཞིན་ཡོད་པའི་ནང་དུ་མེ་དང་ལུས་པོ་ཐ་དད་དུ་མཐོང་དུ་མེད་པར་བྱེད་པ་དང་། ངུ་འབོད་དང་ཨ་ཚ་ཨ་ནའི་སྒྲ་སྐད་གྲག་པས་དམྱལ་བའི་སེམས་ཅན་རེད་བསྙམ་པ་ལས་མེ་དང་དམྱལ་བའི་སེམས་ཅན་སོ་སོར་ཕྱེ་མི་ཤེས་པ་ལྟ་བུ་ཡིན་ཡང་། ད་དུང་ཤི་མི་ནུས་པར་དེ་འདྲའི་སྡུག་བསྔལ་ཆེན་པོ་ཚེ་ཚད་བར་བསྐལ་མང་པོར་མྱོང་དགོས་པ་ཡིན་ནོ། །དམྱལ་བར་སྐྱེ་བྱེད་གཙོ་བོ་ཞེ་སྡང་གི་ལས་བསགས་ཏེ་སྲོག་གཅོད་པ་དང་མཚམས་མེད་ཀྱི་ལས་བྱས་པ་དང་གསང་སྔགས་ཀྱི་དམ་ཚིག་ཉམས་པ་རྣམས་སྐྱེ་ལ། ཁྱད་པར་དུ་དམྱལ་བ་མནར་མེད་ཀྱི་གནས་སུ་དམ་ཚིག་ཉམས་པ་རྣམས་སྐྱེ་བ་ཡིན། ཉེ་འཁོར་བའི་དམྱལ་བ་ནི་དམྱལ་བ་བརྒྱད་པོའི་ཕྱོགས་བཞི་ན་ཡོད་ཅིང་། དམྱལ་བ་ཚ་དམྱལ་བརྒྱད་ཀྱི་ལས་མྱོང་སྟོབས་ཀྱིས་ཟད་དེ་སྒོ་ལ་ཐར་སོང་བསམ་དུས། དང་པོ་མེ་མ་མུར་གྱི་འོབས་ལ་ལྷུང་ཞིང་མེ་མ་མུར་དུ་པུས་མོ་མན་ཆད་ནུབ་སྟེ་རྐང་པ་ས་ལ་བཞག་པ་དང་མཉམ་དུ་མེ་མ་མུར་གྱིས་ཚིག་ནས་ཤ་རུས་ཁ་ཁར་ཕྱེ་བ་དང་། ཡང་རྐང་པ་གཅིག་ཡར་ལ་བཀྱག་དུས་གཅིག་ཤོས་སོས་འགྲོ་བ་དང་། ཡང་མར་ལ་བཙུགས་དུས་དེ་ཚིག་སྟེ་སྡུག་བསྔལ་བའོ། །དེ་ལས་ཕྱི་ལ་བུད་ཐུབ་ནས་ཡང་ཐར་སོང་བསྙམ་ནས་འགྲོ་དུས། ཡང་རོ་མྱགས་ཀྱི་འདམ་ཟེར་བའི་མི་གཙང་བའི་འདམ་རྫབ་ཏུ་ཚུད་དེ་འབུ་མཆུ་རྣོན་པོ་ཅན་མང་པོས་ཤ་ཕུག་སྟེ་རུས་པ་ལ་གཏུག་པས་སྡུག་བསྔལ་བ་དང་། དེ་ལས་བུད་དུས་སྤུ་གྲིའི་ཚལ་ལ་ཐུག་ཅིང་ལམ་དེ་མ་བརྒྱུད་པར་འགྲོ་ས་མེད་པས། རལ་གྲི་ལོ་མའི་ནགས་ཚལ་གྱི་ནང་ནས་རྐང་ལག་ཐམས་ཅད་ཕུག་ཅིང་བཅད་འགྲོ་བ་དང་། བཞི་པ་ཐལ་ཚན་གྱི་ཆུ་བོ་རབ་མེད་ནི། ཐལ་ཚན་མེ་མ་མུར་དང་འདྲེས་པའི་ཆུ་བོ་རབ་མེད་ཀྱི་ནང་དུ་ནུབ། ཁ་ལ་འབུད་དུས་ཆུ་འགྲམ་ན་སྐྱེས་བུ་ལག་ན་མཚོན་ཆ་བཟུང་བ་མང་པོས་བཅད་གཏུབ་བྱེད་པ་དང་དམྱལ་བ་རེ་རེའི་ཕྱོགས་བཞི་ན་དེ་འདྲ་བཞི་བཞི་སྟེ་བཅུ་དྲུག་ཡོད་ཅིང་། མཚམས་བཞི་ན་ལྕགས་ཀྱི་ཤལ་མ་ལིའི་སྡོང་པོ་སྡོམ་ཉམས་ཁྲིམས་འཆལ་ཐམས་ཅད་ཀྱི་སྣང་བ་ལ་རྩེ་མོ་ན་དགའ་མཐུན་གྱི་གྲོགས་ཀྱིས་འབོད་ཀྱིན་ཡོད་པའི་སྣང་བ་ཤར་ཏེ་གྱེན་ལ་འཛེགས་ཚེ། ལོ་མ་ཐམས་ཅད་རལ་གྲིར་གྱུར་ནས་ཁ་ཐུར་དུ་འཁོར་ཏེ་ལུས་ཕུག་པ་དང་། རྩེ་མོར་ཐོན་དུས་བྱ་ཁྭ་ཏ་ལྕགས་ཀྱི་མཆུ་སྡེར་ཅན་གྱིས་ཀླད་པ་ཕུག་ཅིང་མིག་འབྲུ་བ་དང། ཡང་རྩ་བ་ནས་ཡིད་མཐུན་གྱི་གྲོགས་ཀྱིས་འབོད་པའི་སྣང་བ་ཤར་ཞིང་མར་ལ་བབ་དུས། ཡང་ལོ་མ་རལ་གྲི་ཅན་ཐམས་ཅད་ཀྱི་རྩེ་མོ་གྱེན་ལ་བསྟན་ཏེ་ལུས་པོ་ཕུག་ཅིང་། ཡང་སྡོང་པོའི་རྩར་ཐོན་ཚེ་དེ་ན་གྲོགས་དགའ་མཐུན་ཞིག་ཅི་ལ་ཡོད། དེ་ལས་ལྡོག་སྟེ་ཁྱི་བསེ་བོ་འཇིགས་སུ་རུང་བ་མང་པོས་གསོན་ཟ་བྱེད་པའི་སྡུག་བསྔལ་ཡུན་རིང་པོར་མྱོང་དགོས་པ་ཡིན་ནོ། །ཡང་གྲང་དམྱལ་བརྒྱད་ནི་ཆུ་བུར་ཅན་འཁྱག་ནས་ཆུ་བུར་བུད་པ་དང་། ཆུ་བུར་རྡོལ་བ་དེ་ལས་ཀྱང་འཁྱག་སྟེ་ཆུ་བུར་ཐེད་ཅིང་རྡོལ་བ་དང་། སོ་འཐམ་པ་འཁྱག་ནས་སོ་འཁྲུགས་པ་དང་། ཨ་ཆུ་ཟེར་བ་འཁྱག་ནས་མི་བཟོད་པར་ཨ་ཆུའི་སྒྲ་སྐད་འདོན་པ་དང་། ཀྱེ་ཧུད་ཟེར་བ་དེ་ལས་འཁྱག་སྟེ་སྐད་སྒྲ་ཆེན་པོས་སྡུག་བསྔལ་གྱི་སྨྲེ་སྔགས་འདོན་པ་དང་། ཨུཏྤལ་ལྟར་གས་པ་ལུས་པོ་འཁེངས་ཏེ་ལྤགས་པ་སྔོན་པོར་གྱུར་ནས་ཁག་ལྔ་དྲུག་ཏུ་གས་པ་དང་། པདྨ་ལྟར་གས་པ་འཁེང་པ་དེ་མདོག་དམར་པོར་གྱུར་ཏེ་བཅུ་རེ་ཙམ་གས་པ་དང་། པདྨ་ལྟར་ཆེར་གས་པ་མདོག་ཤིན་ཏུ་དམར་པོར་གྱུར་ཏེ་ཁ་བཞི་ལྷུ་བརྒྱད་དུ་གྱུར་ནས་ཁག་བརྒྱ་རེ་ཙམ་དུ་གས་པ་སྟེ་དེ་ལྟ་བུའི་གྲང་པའི་སྡུག་བསྔལ་མྱོང་བ་དང་། ལས་མ་ཟད་ཀྱི་བར་དུ་འཆི་རྒྱུ་མེད་ཅིང་། ཚེ་ཚད་བར་བསྐལ་དང་བསྐལ་ཆེན་མང་པོར་མྱོང་དགོས་པ་ཡིན་ནོ། ཉི་ཚེ་བའི་དམྱལ་བ་གནས་ལ་ངེས་པ་མེད་ཅིང་། ཆུ་དང་། རི་དང་། ཤིང་དང་། མྱ་ངམ་གྱི་ཐང་ལ་སོགས་པར་གནས་ཡོད་པ་དང་། སྒོ་དང་ཀ་བ་ཐབ་དང་ཐག་པ་ལ་སོགས་པར་རང་གི་ལུས་ཡིན་སྣང་ཤར་ཏེ། དེ་དག་བཀོལ་སྤྱོད་བྱེད་དུས་སྡུག་བསྔལ་མྱོང་བ་སྟེ། དཔེར་ན་ཐབ་ཀ་ལྟ་བུའི་ནང་དུ་མེ་འབར་དུས་ཁོག་པ་མེ་ལ་འབར་བའི་སྣང་བ་ལ་སོགས་པའི་སྡུག་ལ་མྱོང་བ་ཡིན་ནོ། །དེ་མིན་ཡང་མཁའ་རྒྱུའི་ཡི་དྭགས་ཀྱི་རིགས་རི་དང་ནགས་ཚལ་མཚོ་ལ་སོགས་པར་གནས་བཅའ་བ་རྣམས་ཁ་ཁ་རེད། དམྱལ་བའི་སེམས་ཅན་གྱི་སྡུག་བསྔལ་བཤད་ནས་ཚར་རྒྱུ་ཡོད་པ་མ་ཡིན་ཞིང་། དེ་འདྲའི་སྡུག་བསྔལ་སེམས་ཅན་དེ་རྣམས་ཀྱིས་མྱོང་དགོས་དོན་ནི། རྒྱལ་སྲས་ཞི་བ་ལྷས། ལྕགས་བསྲེགས་ས་གཞི་སུ་ཡིས་བྱས། །མེ་ཚོགས་དེ་དག་གང་ལས་བྱུང་། །དེ་འདྲ་དེ་དག་ཐམས་ཅད་ནི། །སྡིག་སེམས་ཡིན་པར་ཐུབ་པས་གསུངས། །ཞེས་གསུངས་པས། རང་ཉིད་ཀྱིས་ལས་མི་དགེ་བ་བསགས་པས་ཉེར་ལེན་བྱས་ཏེ་ཡོང་བ་ཞིག་ཡིན། ངན་སོང་གི་གནས་གཉིས་པ་ཡི་དྭགས་ལ། ཕྱིའི་སྒྲིབ་པ་ཅན་ཟས་སྐོམ་ཞིག་མཐོང་ཀྱང་རྣག་ཁྲག་ཏུ་མཐོང་བ་དང་། དེ་མིན་ཡང་མཚོན་ཆ་བཟུང་བ་ཤ་སྟག་གིས་བསྲུངས་ནས་བསྡད་ཡོད་པ་དང་། ནང་གི་སྒྲིབ་པ་ཅན་ཁ་ཁབ་མིག་ཙམ། ལྟོ་བ་ཡུལ་ལྗོངས་ཙམ། རྐང་ལག་རྩྭ་འཇག་ཙམ། ཟ་རྒྱུ་ཞིག་ལོན་ཡང་ཁ་ཁབ་མིག་འདྲ་བོའི་ནང་དུ་མི་འགྲོ། ལྟོ་བ་ཡུལ་ལྗོངས་ཙམ་པོ་མི་ཁེང་། རྐང་ལག་རྩྭ་འཇག་འདྲ་བོའི་མི་ཐེག་པའི་སྡུག་བསྔལ་དང་། ཟས་སྐོམ་གྱི་སྒྲིབ་པ་ཅན་ཞེས་པ་འདི་ལ་མེ་ལྕེའི་ཕྲེང་བ་ཅན་ཡང་ཟེར། གལ་ཏེ་ཟས་ཞིག་ལོན་ཡང་ཅི་ཟོས་ཅི་འཐུང་གིས་ཁོག་པ་བསྲེག་པ་དང་། ལྗན་ལྗིན་ཟ་བ་ཞེས་པ་མི་གཙང་བ་ཁོ་ན་ཟ་བར་བྱེད་པ་སྟེ་དེ་འདྲའི་ཡི་དྭགས་ཀྱི་ཚེ་ཚད་ཀྱང་ཡུན་རིང་པོ་ཡིན་ཞིང་། ཡི་དྭགས་ལ་སྐྱེ་བྱེད་ཀྱི་རྒྱུའི་གཙོ་བོ་འདོད་ཆགས་དང་སེར་སྣས་འཕང་བ་ཡིན། ངན་སོང་གི་གནས་གསུམ་པ་དུད་འགྲོ་ནི། དུད་འགྲོ་མང་ཆེ་བ་རྒྱ་མཚོའི་ནང་དུ་ཡོད་ཅིང་། རྐང་གཉིས་རྐང་མང་རྐང་བཞི་རྐང་མེད་དང་། གཅིག་གིས་གཅིག་ཟ་བ་དང་། ཆེ་བས་ཆུང་བ་གསོད་པ་དང་། ཆུང་བས་ཆེ་བ་ཕུག་པ་དང་། སྲོག་ཆགས་རེ་རེའི་ལུས་པོ་སྲོག་ཆགས་མང་པོས་ཟ་བ་དང་། ཡང་སྐམ་ལ་གནས་པའི་དུད་འགྲོ་རི་དྭགས་གཡུང་དྭགས་གང་ཡིན་ཡང་གཞན་གྱིས་ཤ་ལྤགས་ལ་སོགས་པའི་དོན་དུ་གསད་པ་དང་། ཚ་གྲང་གི་སྡུག་བསྔལ་དམྱལ་བ་ལྟ་བུ་མྱོང་བ་དང་། བཀྲེས་སྐོམ་གྱི་སྡུག་བསྔལ་ཡི་དྭགས་དང་འདྲ་བ་མྱོང་གིན་ཡོད་པ་མཐོང་གིན་འདུག་པ་འདི་ཚོ་ཡིན་ལ། དུད་འགྲོ་ཐམས་ཅད་ལ་སྤྱི་མཐུན་གྱིས་བླུན་ཞིང་གཏི་མུག་པའི་སྡུག་བསྔལ་ཡོད་ཅིང་། དུད་འགྲོ་ལ་སྐྱེ་བྱེད་གཙོ་བོ་གཏི་མུག་གི་དབང་གིས་ལས་བསགས་པས་ཡིན། དུད་འགྲོའི་ཚེ་ཚད་མ་ངེས་པ་ཡིན་ཏེ། འགའ་རེ་ཚེ་བསྐལ་བ་ཐུབ་པ་དང་། འགའ་རེ་ཉིན་རེ་ལན་མང་པོར་སྐྱེས་ཤིང་ལན་མང་པོར་ཤི་བ་དེ་འདྲ་ཡང་ཡོད་པ་ཡིན་པས་ངན་སོང་གི་སྡུག་བསྔལ་བཟོད་བླག་མེད་པ་ཡིན་ནོ། །ལྷའི་བདེ་སྐྱིད་ཀྱང་འགྱུར་བའི་སྡུག་བསྔལ་དང་སྡུག་བསྔལ་གྱི་སྡུག་བསྔལ་རགས་པ་མེད་ཀྱང་ཁྱབ་པ་འདུ་བྱེད་ཀྱི་སྡུག་བསྔལ་ལས་མ་འདས་པ་ཡིན་ཞིང་། དམིགས་བསལ་འདོད་ཁམས་པའི་ལྷ་ནི་ལྷ་མིན་དང་འཐབ་པའི་སྡུག་བསྔལ་དང་། འཆི་འཕོ་ལྟུང་བའི་སྡུག་བསྔལ་ཡོད་པ་དང་། གཟུགས་གཟུགས་མེད་ན་འཆི་འཕོའི་སྡུག་བསྔལ་དང་གནས་ངན་ལེན་གྱི་སྡུག་བསྔལ་ཡོད་པ་ཡིན་ནོ། །མིའི་བདེ་སྡུག་ལ་བསམ་ན། སྐྱེ་རྒ་ན་འཆིའི་སྡུག་བསྔལ་ལ་སོགས་པ་རང་རེས་རང་ཐོག་ཏུ་མྱོང་བཞིན་པ་འདི་ཡིན་ཡང་། གནས་སྐབས་ལ་སྡུག་བསྔལ་ཆུང་བ་དང་། ངན་སོང་ལ་བསྡུར་ན་བདེ་བ་ཞིག་རེད་བསམ་ཁུལ་བྱེད་ཀྱང་དེ་ཡང་རྟག་པ་མ་ཡིན་ཏེ། འགྱུར་བའི་སྡུག་བསྔལ་དང་སྡུག་བསྔལ་གྱི་སྡུག་བསྔལ་གྱིས་མནར་ཏེ་འགྱུར་བ་ཅན་ཡིན་ནོ། །ལར་ཚོར་བ་བདེ་བར་སྣང་བ་ཐམས་ཅད་འགྱུར་བའི་སྡུག་བསྔལ་དང་། སྡུག་བསྔལ་དུ་སྣང་བ་ཐམས་ཅད་སྡུག་བསྔལ་གྱི་སྡུག་བསྔལ་དང་། བཏང་སྙོམས་སུ་སྣང་བ་ཐམས་ཅད་འདུ་བྱེད་ཀྱི་སྡུག་བསྔལ་ཡིན་ནོ། །གོང་དུ་བཤད་པའི་ངན་སོང་གསུམ་དང་ལྷ་མི་གཉིས་ཏེ་ལྔ་བོ་ལ་ལམ་རྒྱུད་ལྔ་ཟེར་ཞིང་། དེ་ལྟ་བུ་འཁོར་བའི་སེམས་ཅན་གྱི་སྡུག་བསྔལ་ལ་སྐྲག་ཤེས་པའི་སེམས་སྐྱེ་བར་ཤོག་ཅིག ངན་སོང་གི་སྡུག་བསྔལ་ཚེ་འདིའི་ལུས་ཐོག་ཏུ་མྱོང་ན་སྐྲག་སེམས་སྐྱེས་ཀྱང་། དེ་སྔོན་བདེ་བ་མྱོང་མ་མྱོང་བས་ལྷ་མིའི་བདེ་སྐྱིད་ཅེས་པ་སྐྱིད་མ་སྡུག་འདི་སྡུག་བསྔལ་ཡིན་པའི་སྣང་བ་མི་ཤར་བས་སྐྲག་མི་ཤེས་པར། དམྱལ་བ་རང་ཡུལ་ལ་ཞེ་ཆགས་ཟེར་བ་ལྟར། ད་དུང་ཆགས་ཞེན་བྱེད་པ་འདི་ནི་བློ་ནོར་འཁྲུལ་ཆེན་པོ་ཞིག་དང་། སྐྱིད་སྡུག་གི་གོ་ཆེན་པོ་ཞིག་ནོར་ཡོད་པས། དེས་ན་འཁོར་བ་འདི་ལ་སྐྱོ་ཤེས་དང་ངེས་འབྱུང་སྐྱེ་བར་ཤོག་ཅེས་གསུངས་པ་ཡིན། ཐོག་མ་མེད་ནས་ད་ལྟའི་བར། །འཁོར་བ་འདི་ན་ཡུན་རེ་རིང་། །དེ་ལ་སྐྱོ་བ་སྐྱེ་བར་ཤོག །ཅེས་གསུངས་ཏེ། འཁོར་བའི་ཐོག་མ་འདི་ཡིན་ཟེར་རྒྱུ་ཞིག་མེད་པས། དེའི་ཚེ་ལ་འགྲོ་བ་ལམ་རྒྱུད་ལྔ་ཁམས་གསུམ་འགྲོ་བ་རིགས་དྲུག་སྐྱེ་གནས་རྣམ་པ་བཞིས་བསྡུས་པའི་ལུས་འདྲ་དང་མི་འདྲ་ཅི་འདྲ་ཞིག་བླངས་མེད་དམ། ད་དུང་འཁོར་ལོས་སྒྱུར་བའི་རྒྱལ་པོ་དང་ཚངས་དང་དབང་པོ་བརྒྱ་བྱིན་མན་ཆད་ནས་དམྱལ་བ་མནར་མེད་ཀྱི་སེམས་ཅན་སྲིན་འབུ་ཕྲ་མོ་ཡན་ཆད་ཀྱི་ལུས་འདྲ་མི་འདྲ་ཅི་འདྲ་བླངས་མེད་དམ། དེ་ཡང་ལན་རེ་ལན་གཉིས་བླངས་བས་ཅི་ལ་ཚད། ལུས་རེ་རེ་ཡང་གྲངས་མང་བླངས་བར་རྩི་གྲངས་ཐེབ་ཏུ་མེད་ཅིང་། གྲོག་སྦུར་ཕྲ་མོའི་ལུས་བླང་བའི་རྐང་ལག་ཕྱོགས་གཅིག་ཏུ་བརྩིག་བཞག་ན་རིའི་རྒྱལ་པོ་རི་རབ་བས་མི་ཚད་ལ། ངུས་པའི་མཆི་མ་རྒྱ་མཚོ་བས་ཀྱང་མང་བའི་ཚོད་དེ་འདྲ་ཡིན་གསུངས་ཡོད་ལ། དེ་ཡིན་ངེས་པ་རེད། ཐར་བ་ད་དུང་ཐོབ་ཡོད་པ་མ་ཡིན་པས། དེ་སྔོན་ཐར་བ་མ་ཐོབ་པ་ཞིག་ད་དུང་ཐར་བའི་ལམ་སྣེ་མ་ཟིན་པས་འཁོར་བ་མ་གཏོགས་འགྲོ་ས་ཡོད་པ་མ་ཡིན། དེས་ན་འཁོར་བ་ཐོག་མེད་ནས་ད་ལྟའི་བར་དུ་སྡུག་བསྔལ་མྱོང་བའི་ཡུན་དེ་འདྲ་ཞིག་རིང་སོང་བས། ད་ནི་དམུས་ནི་ཡིན་སྙམ་པའི་ངེས་ཤེས་ཀྱི་སྟེང་ནས་དེ་ལ་སྐྱོ་བ་སྐྱེ་བར་ཤོག་ཅེས་སྨོན་པའི་ཚུལ་གསུངས་སོ། །མི་ནས་མི་རུ་སྐྱེ་ཆོག་ཀྱང་། །སྐྱེ་རྒ་ན་འཆི་གྲངས་མེད་མྱོང་། །དུས་ངན་སྙིགས་མར་བར་ཆད་མང་། །མི་དང་ལྷ་ཡི་བདེ་སྐྱིད་འདི། །དུག་དང་འདྲེས་པའི་ཟས་བཞིན་དུ། །འདོད་པ་སྤུ་ཙམ་མེད་པར་ཤོག །ཅེས་གསུངས་ཏེ། གོང་དུ་བཤད་པ་ལྟ་བུའི་ངན་སོང་ལ་སྐྱེས་སོང་ན་ཅི་མ་རུང་བསམ་པ་མེད་ཀྱང་། མི་ཡུལ་དུ་ད་དུང་ཚུར་སྐྱེ་ན་ཅི་མ་རུང་བསམ་པ་ཡོད་སྲིད་པ་རེད། དེ་ནི་དུག་དང་འདྲེས་པའི་ཟས་ལ་དུག་གི་གནོད་པ་མི་ཤེས་པར་ཟས་ཀྱི་རོ་ལ་སྲེད་པ་བྱེད་པ་དང་འདྲ་བ་ཡིན། དེ་ཇི་ལྟར་ཡིན་ཞེ་ན། གལ་ཏེ་མི་ནས་མི་རུ་སྐྱེ་ཆོག་ཀྱང་སྐྱེ་རྒ་ན་འཆིའི་སྡུག་བསྔལ་མེད་ན་ཅུང་ཟད་དྲག་ཀྱང་། གཞོན་པའི་ལང་ཚོ་མི་འདུག་པར་རྒས་འགྲོ་བ་དང་། ནད་མེད་ལུས་ཀྱི་གཟི་མདངས་མི་རྟག་པར་ནད་ཀྱིས་འཇོམས་པ་དང་། གསོན་ནས་ཡུན་རིང་འདུག་པར་འདོད་ཀྱང་ཤི་འགྲོ་བ་སོགས་དུས་ངན་སྙིགས་མ་ལ་བར་ཆད་མང་བ་རེད། བར་ཆད་ལོས་མང་དུས་སྙིགས་མ་ཡིན་པས། ཉོན་མོངས་སྙིགས་མ་བདོ། དེའི་དབང་གིས་ལྟ་བའི་སྙིགས་མ་ཡིན་པས་ལྟ་ངན་གྱི་སྟོབས་རྒྱས། དེ་འདྲའི་གང་ཟག་དེ་ལ་ཚེའི་སྙིགས་མ་བདོ་བས་ཤི་མ་རན་གོང་ནས་ཤི་བ་དང་། ན་མི་དགོས་ས་ནས་ན་སྟེ་ཤི་བ་མང་ནི་རེད། དེས་ན་མི་དང་ལྷ་ཡི་བདེ་སྐྱིད་འདི་ཅི་འདྲ་ཞིག་རེད་ཅེ་ན། དུག་དང་འདྲེས་པའི་ཁ་ཟས་ཤིག་དང་འདྲ་བ་ཡིན། དེ་དང་འདྲ་བར་ཤེས་དུས་དེ་འདྲའི་ཁ་ཟས་དེ་སུས་ཀྱང་ཟ་མི་ཕོད་པ་བཞིན། ད་ལྟ་ལྷ་མིའི་གནས་འདི་ལ་ཚུར་ཨེ་སྐྱེས་ཀྱི་རེ་བ་དང་འདོད་པ་སྤུ་ཙམ་མེད་པར་ཤོག་ཅེས་སྨོན་དགོས་པའི་ཚུལ་ཇི་ལྟར་ཡིན་པ་དེ་བསྟན། ཉེ་དུ་ཟས་ནོར་མཐུན་གྲོགས་རྣམས། །མི་རྟག་སྒྱུ་མའི་རྨི་ལམ་བཞིན། །ཆགས་ཞེན་སྤུ་ཙམ་མེད་པར་ཤོག །ཅེས་གསུངས་ཏེ། ཉེ་རིང་རྩ་གསུམ་ཞེས་པ་འདིའང་རྒྱང་ན་ཡོད་ན་ཟུར་ན་ཡོད་དགོས་པ་འདྲ་བ། ཟུར་ན་ཡོད་ན་མིག་གིས་མ་མཐོང་ན་སྙམ་པ་ལྟ་བུ་ཞིག་ཡིན་ལ། གྲོགས་ཡིན་ན་ཡང་མཐུན་པ་ཡུན་དུ་འགྲོགས་པ་དཀོན་གསུངས་པ་ཡིན། ཉེ་རིང་དང་མཐུན་གྲོགས་རྐྱང་བ་ངན་པས་མ་ཡིན་ཡང་རང་གཞན་གཉིས་ཀ་ཉོན་མོངས་ཀྱི་ནད་ཀྱིས་མནར་ཏེ་གནས་ཡོད་པ་དང་། རང་དབང་མེད་པའི་ནད་པ་སྡུག་བསྔལ་ཅན་གཉིས་དང་འདྲ་བ་ཡིན་པས། ཆང་བཟི་མ་འཁྲུལ་ཏེ་རྒྱག་རེས་བྱས་པ་ལྟ་བུ་ཡིན། མ་འཁྲུལ་བ་ཞིག་གིས་བལྟས་ན་འཁྲུལ་བའི་གཞན་དབང་ཅན་ཐམས་ཅད་སྨྱོན་པ་ཡིན་ཡང་། སྨྱོན་པ་དང་སྨྱོན་པ་ཐུག་དུས་བདེ་ཐབས་འགྲིག་ཐབས་སྐྱིད་ཐབས་ཤིག་ཡོད་པ་མ་ཡིན། དུག་སྦྲུལ་ཁོ་རང་གི་རང་བཞིན་གདུག་རྩུབ་ཅན་ཡིན་དུས་དར་འཇམ་པོ་ཞིག་གིས་ལྗིབས་ཀྱང་ཕན་ཐོགས་ཡོད་པ་མ་ཡིན། བྱིས་པ་སོ་སོའི་སྐྱེ་བོའི་གྲོགས་རང་གཞན་ཚང་མ་དེ་ཡིན་པས། དུག་སྦྲུལ་སྤྲོ་ལངས་སོང་ཟེར་ནས་ཁྱོད་དེའི་ལན་དུ་སྤྲོ་ལངས་པ་དང་། དུག་སྦྲུལ་གྱིས་ཕྲག་དོག་བྱས་བྱུང་ཟེར་ནས་དེའི་ལན་དུ་གནོད་སེམས་བྱེད་རྒྱུ་ཡོད་པ་མ་ཡིན་ཏེ། ཁོ་རང་གི་རང་གཤིས་དེ་ཡིན་པས་སོ། །དེའི་སྟེང་ཟས་ནོར་མཐུན་གྲོགས་འདི་ནི་སྐྱོན་མེད་ཅིག་ཡིན་བསམ་རྒྱུ་རེ་གནས་སྐབས་ཡོད་ན་ཡང་། འདི་དག་ལ་རྟག་བརྟན་མེད་པ་རྨི་ལམ་ནང་གི་ཁང་ཁྱིམ་དང་། མི་བདེན་སྒྱུ་མའི་སྤྲུལ་བ་ལྟར་མི་རྟག་སྟེ་ཅུང་ཟད་བཟང་གྲས་འདྲ་ཞིག་ཡོད་ཀྱང་ཤོར་ཐལ་ཟེར་རྒྱུ་ཅན་ཡིན་ནི་རེད། དེས་ན་འཁོར་བའི་གནས་སུ་མར་འཐེན་བྱེད་ཀྱི་གྲོགས་དེ་དག་ཐམས་ཅད་ལ་ཆགས་པ་དང་ཞེན་པ་སྤུ་ཙམ་ཡང་བྱེད་མི་རུང་བའི་དོན་ཏོ། །ས་ཆ་ཡུལ་རིས་ཁང་ཁྱིམ་རྣམས། །རྨི་ལམ་ཡུལ་གྱི་ཁང་ཁྱིམ་ལྟར། །བདེན་པར་མ་གྲུབ་ཤེས་པར་ཤོག །ཅེས་གསུངས་ཏེ། འདིའི་སྐབས་ཀྱི་བདེན་པར་མ་གྲུབ་ཤེས་པར་ཤོག་ཅེས་པ་འདི། རྟོག་པས་བཏགས་ནས་བཞག་པ་ཙམ་ཞིག་མ་གཏོགས་དོན་ལ་རང་བཞིན་གྱིས་གྲུབ་པ་མེད་ཅེས་པའི་གོ་བ་མ་རེད། དེ་འདིའི་སྐབས་ཐོབ་ཀྱི་བཤད་བྱ་མ་ཡིན། འདི་ནས་ཇི་ལྟ་བུ་ཞིག་ལ་གསུངས་པ་ཡིན་ཞེ་ན། དཔེར་ན་མི་དེའི་བཤད་པའི་གཏམ་དེ་བདེན་ནི་མ་རེད་ཅེས་པ་ལྟར་ཕུགས་མི་ཐུབ་པ་ཞིག་ལ་གོ་བ་ཡིན། དེ་ལྟར་དུ་ཚེ་འདིའི་ས་ཆ་ཡུལ་རིས་གནས་མལ་ནོར་རྫས་ཅི་འདྲ་ཞིག་ཡོད་ཀྱང་ཤི་དུས་རྗེས་སུ་མི་འབྲང་བའི་ཕྱིར་ན་དེ་རྣམས་ཀྱིས་མཐའ་ཐུབ་པ་མ་ཡིན་ཅེས་པའི་དོན་ཡིན། ས་ཆ་ཡུལ་རིས་ལ་ཞེན་ཆགས་བྱས་ན་ཡང་འཆང་བྱེད་ཀྱི་ཐག་པ་གཅིག་སྟེ། གང་ལ་ཆགས་ན་ཡང་འཁོར་བའི་གནས་ལ་ཕྱིར་ཁྲིད་བྱེད་ཡིན་ཞིང་། ས་ཆ་གང་ཡིན་ཡང་མི་རབས་རེ་ལ་བདག་པོ་རེ་འབུད་པས་ང་མ་གཏོགས་བདག་པོ་མེད་བསམ་ཁུལ་བྱེད་ཀྱང་། མི་རྟག་འཆི་བའི་རང་ལམ་ལ་སྙེགས་པའི་ཚེ། ས་ཆ་དང་ཁང་ཁྱིམ་དེད་ཅིང་ཁུར་ནས་འགྲོ་ས་མི་ལོན་པས་ཤུལ་དུ་སྐྱུར་རྒྱུ་རེད། ས་ཆ་སྐྱིད་པོ་སྔོ་སྤང་ལྗོངས་ནགས་ཚལ་ནེའུ་གསིང་ཡོད་ས་ཡང་མཚམས་མཚམས་ལ་བྱེ་ཐང་དུ་གྱུར་ཏེ། ཡ་ང་བ་འདྲེ་ཕུར་བས་བཏགས་ཀྱང་མི་གཟུང་སར་འགྲོ་རྒྱུ་ཡོད་ཅིང་། མཁར་ཁང་པ་རྒྱ་གྲོང་འདུ་འཛི་ཆེ་ས་དེ་ཚོ་མཚམས་རེ་ཐང་སྟོང་དུ་ལུས་རྒྱུ་ལ་སོགས་པ་འདྲ་མི་འདྲའི་འགྱུར་ལྡོག་ཅན་ཞིག་ཡིན་པས། ས་ཆ་ཡུལ་རིས་ཁང་ཁྱིམ་ཁོ་རང་ལ་རྟག་བརྟན་ཡོད་པ་ཞིག་མ་ཡིན་ཞིང་། དེ་བདག་འཛིན་བྱེད་པའི་མི་ལ་རྟག་འཛིན་བྱེད་རྒྱུ་དེ་བས་ཀྱང་མེད། ཞེ་ཆགས་ན་དེ་ཚོས་ཕན་མི་ཐོགས་པའི་སྟེང་དུ་གནོད་ཆེན་པོ་སྐྱེལ་བ་ཡིན། ས་ཆ་ལ་ཞེན་ཆགས་ཆེ་བ་རྣམས་ས་དེའི་འབུ་སྲིན་དང་ཨ་བྲ་ཡི་ལུས་ལེན་རྒྱུ་ཡོད་པས་ཁང་ཁྱིམ་ལ་ཆགས་ན་དེ་ལ་འཁྲི་བའི་སྲོག་ཆགས་ཙི་གུ་ལ་སོགས་པའི་ལུས་མི་ལེན་ཟེར་ཅི་ཤེས། རྨི་ལམ་གྱི་ནང་ནས་མཁར་ཁང་པ་དགུ་བརྩེགས་གྱི་ནང་ན་ཡོད་པར་མ་ཟད་འཁོར་ལོའི་བསྒྱུར་བའི་རྒྱལ་པོ་བྱེད་ཀྱིན་ཡོད་པ་རྨིས་ཀྱང་། རྨི་ལམ་ནང་གི་ལོངས་སྤྱོད་ཀྱིས་དེ་རིང་བེད་མི་ཆོད་པར་ལྟར། ད་ལྟའི་ཁང་ཁྱིམ་ནོར་རྫས་ཀྱི་ཕྱི་མ་ལ་བེད་མི་ཆོད་དོ། །སྟབས་མ་ལེགས་ན་ཚེ་འདི་ལ་བེད་མི་ཆོད་པར་མ་ཟད་གནོད་བསྐྱལ་ཏེ། མི་ལ་རས་པའི་ཨ་ཁུས་སྟོན་མོ་བྱས་པ་ལྟར་ཁང་པ་བརྡིབས་ནས་སྲོག་གི་གཤེད་མ་སོང་བ་ཡང་མང་ངོ། །མདོར་ན་འཇིག་རྟེན་འདི་སྣང་གི་འདོད་ཡོན་བདེན་པར་མ་གྲུབ་པའི་རང་གཤིས་ཇི་བཞིན་དུ་མཐོང་བར་ཤོག་ཅིག་ཅེས་གསུངས། ཐར་མེད་འཁོར་བའི་རྒྱ་མཚོ་ནས། །ཉེས་ཆེན་བཙོན་ནས་ཐར་བ་བཞིན། །བདེ་བ་ཅན་གྱི་ཞིང་ཁམས་སུ། །ཕྱི་ལྟས་མེད་པར་འབྲོས་པར་ཤོག །ཅེས་གསུངས་ཏེ། ཐར་དཀའ་བའི་ཕྱིར་ཐར་མེད་ཅེས་གསུངས་ཏེ། ཐར་དཀའ་ཚུལ་ལ་བསམ་ན་ཐོག་མེད་ནས་ད་ལྟའི་བར་དུ་འཁོར་བའི་རྒྱ་མཚོའི་ནང་དུ་ཆུ་བསྐྱལ་ཏེ་མཚོ་འགྲམ་གྱི་སྐམ་སར་གཏན་ནས་ཐོན་མ་མྱོང་བ་འདི་ལ་འདེང་བརྒྱབ་ན་ཐར་མེད་ཡིན་པ་རང་གིས་ཤེས་མོད་ཀྱང་། ཐར་མེད་པས་ཡང་དབང་མེད་དུ་ལས་ཤིག་གིས་རྗེས་ནས་དེད་དེ་འཁོར་ཆས་རེད། ད་ནི་ད་རེས་གཉིད་སད་པ་ལྟར་འཁྲུལ་བ་ཡིན་པར་ངོ་ཤེས། འཁྲུལ་སྣང་ལས་སད་རྒྱུ་ཡོད་པ་ཧ་གོ འཁོར་བའི་བཙོན་ཁང་གི་ནང་ནས་བྲོས་རྒྱུའི་ཐབས་རྙེད་པའི་སྐབས་འདིར་མ་བྲོས་ན་ཕྱིན་ཆད་འདི་འདྲའི་ལམ་རྙེད་དཀའ་བ་ཡིན་པས། ཕྱིར་འཁོར་བ་ལ་ཆགས་ཞེན་མི་བྱེད་པར་ཕྱིར་ལྟས་མེད་པར་འབྲོས་ན་བྲོས་ཐུབ་པར་ཤོག བྲོས་ནས་ཐར་པར་ཤོག་ཅེས་གསུངས་པའོ། །སྤྱིར་འཁོར་བའི་གནས་ལས་ཐར་བའི་ཐར་བ་མཆོག་ཏུ་གྱུར་པ་ཤེས་བྱ་ཐམས་ཅད་ཀྱི་ནང་ན་མི་མཉམ་ཞིང་མཚུངས་པ་མེད་པའི་ཡོན་ཏན་དང་ལྡན་པ་དེ་གང་ཡིན་ཞེ་ན། རྫོགས་པའི་སངས་རྒྱས་ཀྱི་གོ་འཕང་ཡིན་ལ། དེ་ཐོབ་དགོས་ན་བྱང་ཆུབ་སེམས་དཔའི་སྤྱོད་པ་ཚད་མེད་པ་ཞིག་སྤྱད་དགོས། དེ་དགོས་ན་སེམས་ཅན་ལས་དང་ཉོན་མོངས་དྲག་པོས་ཟིལ་གྱིས་མནན་པ་ཞིག་ལ། ཤེས་རབ་ལ་སོགས་པ་ཕུལ་དུ་བྱུང་བ་དང་མི་ལྡན་པས་ཟབ་དང་རྒྱ་ཆེའི་ཆོས་ཉམས་འོག་ཏུ་ཚུད་ཐབས་ཤིག་མེད། དེ་མེད་པས་ཐར་པའི་སྐམ་སར་ཐོན་པའི་ཉི་མ་ཞིག་དེ་སྔོན་ཡང་ཡོད་མ་མྱོང་ལ། ད་དུང་ཡང་མེད་པའི་རྒྱུ་མཚན་དེ་ལ་གཟིགས་ཏེ། མགོན་པོ་འོད་དཔག་མེད་སློབ་ལམ་གྱི་ས་བརྒྱད་པའི་བྱང་ཆུབ་སེམས་དཔའ་ཡིན་པའི་སྐབས་སུ། མཐའ་ཡས་པའི་སེམས་ཅན་མ་རིག་པས་བསྒྲིབས་ཏེ་ཐར་ལམ་བཙལ་མི་ཤེས། བརྩོན་འགྲུས་ཀྱིས་མཐར་མི་ཕྱིན། དཀའ་སྤྱད་ཀྱིས་ལ་མི་ཕོག་པ་རྣམས་ཀྱི་དོན་དུ། ས་མ་ཐོབ་པའི་སེམས་ཅན་ཕལ་བ་དག་ཀྱང་དག་པའི་ཞིང་ཁམས་སུ་དྲང་ཐུབ་པའི་ཚོགས་བསགས་རླབས་ཆེན་ཞིག་མ་འགྲུབ་ཀྱི་བར་དུ་ཁོང་འཚང་མི་རྒྱ་བར་ཤོག་གསུངས་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་ཀྱི་རྒྱན་དང་བཀོད་པ་ཐམས་ཅད་རྫོགས་པའི་ཞིང་ཁམས་ཤིག་བཟུང་པའི་སྟོབས་དེ་ཡོངས་སུ་མ་རྫོགས་ཀྱི་བར་དུ། བསྐལ་བ་གང་གཱའི་ཀླུང་གི་བྱེ་མ་སྙེད་མང་པོའི་གྲངས་སུ་རྫོགས་སྨིན་སྦྱོང་གསུམ་ཁྱད་དུ་འཕགས་པར་མཛད་པས། དེའི་ཐུགས་བསྐྱེད་སྨོན་ལམ་གྱི་མཐུ་གྲུབ་སྟེ། རང་རེའི་བསྐལ་ཆེན་བཅུ་བདེ་བ་ཅན་རང་གི་ཞག་བཅུ་ཡིན། དེས་ན་རང་རེས་རང་གར་རང་འདོད་ཀྱིས་སྨོན་ལམ་བཏབ་ན་ཨེ་འགྲུབ་མི་ཤེས་མོད། འོན་ཀྱང་སྐབས་འདིར་དེ་དང་མི་འདྲ་བར། འོད་དཔག་མེད་པའི་ཐུགས་བསྐྱེད་སྨོན་ལམ་དང་རང་ཉིད་ཀྱི་དད་འདུན་གཉིས་ཀ་ཐོ་ཐུག་ཀྱང་འཁོར་བའི་གནས་ནས་བྲོས་ན་ཐར་མིན་མི་ཤེས། ཤེས་ནི་མ་རེད་ཟེར་བའི་རྒྱུ་མཚན་ཅི་ཡིན་ཞེ་ན། གཙོ་བོ་རང་ཉིད་ལ་ཞེན་ཆགས་ཡོད་མི་རུང་། དེ་སྔོན་ཞེན་ཆགས་ཀྱི་དབང་གིས་འདམ་གྱིས་རྫས་འཛིན། རྩྭ་ཡིས་མེ་འཛིན། རྙི་ཡིས་བྱ་བཟུང་བ་ལྟར་བཟུང་སོང་བས་རེད། དེས་ན་འཁོར་བར་བཅོས་མིན་གྱི་ངེས་འབྱུང་ཡོད་ཅིང་དད་པའི་ཤུགས་དྲག་ན་སྨོན་ལམ་འགྲུབ་པར་ཐེ་ཚོམ་དགོས་པ་མ་རེད། སྤྱིར་སྨོན་ལམ་འགྲུབ་བྱེད་ཀྱི་རྒྱུ་ཚོགས་བསགས་ཡིན་ཏེ། རང་རེས་དཔེ་ཞིག་བཞག་ན། རླངས་འཁོར་ཞིག་བསྐོར་ནས་ཡུལ་ག་ཤེད་ལ་འགྲོ་དགོས་ན། དང་པོ་སྐོར་རྒྱུ་རླངས་འཁོར་ཡིན་པས་རླངས་འཁོར་ཡོད་དགོས་ལ། རླངས་འཁོར་ཡོད་པ་གཅིག་པུས་མི་ཕན། རླངས་འཁོར་མེ་ཤུགས་ལ་བརྟེན་ཏེ་འགྲོ་དགོས་པས་མེ་འབར་བྱེད་ཀྱི་སྣུམ་ཡོད་དགོས། རླངས་འཁོར་སྣུམ་གཉིས་ཀས་ཀྱང་མི་ཕན། ད་དུང་ཁ་ལོ་པ་ཡོད་དགོས་པ་ལྟར། སྤྲུལ་པའི་སངས་རྒྱས་འོད་དཔག་མེད་འཁོར་ཞིང་ཁམས་དང་བཅས་པ་ཡིད་ལ་བྱེད་དགོས། བསམ་བྱ་དམིགས་པ་གཏད་ས་འདི་གཅིག་པུ་ཡིན་བསམ་རྒྱུ་གསལ་ལྷང་ངེར་ཡིད་ངོར་ནམ་ཉིན་མཚན་གཉིས་ཀར་སེམས་ནས་མི་འབྲལ་རྒྱུ་ཞིག་ཡོད་དགོས་པ་རེད་མ་གཏོགས། ཡིད་ཡུལ་དུ་ཡོད་མ་མྱོང་བ་ཞིག་ཤི་རན་ཁར་ཤར་ཡོང་རྒྱུ་ཡོད་དཀའ་བ་ཡིན། རྟེན་ཚོགས་ཞིང་གསལ་བཏབ་སྟེ་བདེ་བ་ཅན་གྱི་ཞིང་ཁམས་རྟེན་དང་བརྟེན་པ་ཡིད་ངོར་ཤར་བ་དེ། རླངས་འཁོར་རང་ལ་ཡོད་པ་ལྟ་བུ་ཡིན། དེ་བྱང་ཆུབ་སེམས་དཔའ་དགེ་སློང་ཆོས་ཀྱི་འབྱུང་གནས་ཀྱིས་སངས་རྒྱས་ཀྱི་ཞིང་ཁམས་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་བཀོད་བསྐལ་བ་བྱེ་བ་གཅིག་ལ་ཐོས་བསམ་མཛད་པ་ལྟ་བུ་རེད། དེའི་སྟེང་དུ་རླངས་འཁོར་འགྲོ་བྱེད་ཀྱི་སྣུམ་ཡོད་དགོས་ཤིང་སྣུམ་རང་གིས་ལོན་དགོས་པ་ལྟ་བུ་ནི་རྒྱུ་ཚོགས་བསགས་སྒྲིབ་སྦྱོང་ཡིན་ཞིང་། རང་རེས་ཚོགས་བསགས་ཀྱི་སྒོ་ཐམས་ཅད་ཡན་ལག་བདུན་དུ་བསྡུས་ཏེ་བཤད་པ་རེད། འདི་མདོ་སྡོང་པོ་བཀོད་པའི་དགོངས་པ་ཡིན་པ་རེད། ཚོགས་བསག་གི་རིགས་ཐམས་ཅད་ཀྱིས་ཚོགས་བསག་དགོས་ཤིང་། དེ་ལ་ཚད་ཀྱིས་བཅད་དེ་དེ་མིན་མི་དགོས་པའི་དོན་མ་རེད། དགེ་སློང་ཆོས་ཀྱི་འབྱུང་གནས་རང་དོན་དུ་སངས་མ་རྒྱས་ཏེ། བསྐལ་ཆེན་མང་པོར་གཞན་དོན་གྱི་ཆེད་དུ་བྱང་ཆུབ་སེམས་དཔའི་སྤྱོད་པ་དབུ་དང་ཡན་ལག་གི་སྦྱིན་པ་གཏོང་རྒྱུ་ལ་སོགས་པ་བྱ་དཀའ་བ་མང་པོ་བྱས་པ་ལྟར་རེད། རླངས་འཁོར་ཡོད་སྣུམ་ཡོད་པས་མི་ཕན། ཁ་ལོ་པ་ཡོད་དགོས། ཁ་ལོ་པས་མ་བསྐོར་ན་རླངས་འཁོར་མི་འགྲོ་བ་ལྟར། གྲོགས་བྱང་ཆུབ་མཆོག་ཏུ་སེམས་བསྐྱེད་དགོས། སེམས་བསྐྱེད་རྣམ་པར་དག་པ་ཞིག་ཡོད་ན་ཁ་ལོ་པ་ལག་རྩལ་ཕུལ་བྱུང་ཅན་ཞིག་ཡོད་པ་ལྟར་འགྲོ་དགོས་ས་དེར་བདེ་བླག་གི་ངང་ནས་ཐོན་ཐུབ་པ་རེད། བྱང་ཆུབ་སེམས་དཔའ་དགེ་སློང་ཆོས་ཀྱི་འབྱུང་གནས་ཀྱིས་སངས་རྒྱས་འཇིག་རྟེན་དབང་ཕྱུག་རྒྱལ་པོའི་དྲུང་ནས་ཐུགས་བསྐྱེད་དེ་རླབས་ཆེན་གྱི་ཐུགས་བསྐྱེད་སྐད་ཅིག་ཀྱང་ཉམས་པར་མ་གྱུར་པ་རེད། རང་རེས་ཀྱང་དེའི་ཚུལ་བྱས་ནས་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བདེ་བ་ཅན་ལ་སྐྱེ་བ་དང་། མགོན་པོ་འོད་དཔག་མེད་ཚེ་འདི་ལ་མཇལ་བའི་བསོད་ནམས་ཀྱི་སྟོབས་ཡོད་པ་ཞིག་བྱེད་དགོས། དེ་ལྟར་བྱས་ན་རླངས་འཁོར། སྣུམ། ཁ་ལོ་པ་ཐམས་ཅད་རང་ལག་ཏུ་ཡོད་པ་ལྟ་བུའི་བདེ་བ་ཅན་ལ་སྐྱེ་བའི་རྒྱུ་གསུམ་པོ་ཚོགས་སོང་བ་རེད། ཆ་རྐྱེན་གསུམ་འཛོམས་སོང་བ་ཡིན་ཡང་དམིགས་ཡུལ་ངོ་མ་འགྲོ་དགོས་སའི་ས་དེ་ལ་ཐོན་པ་ལ། ཁ་ལོ་པས་རླངས་འཁོར་གྱི་འཕྲུལ་ཆ་བསྒུལ་ཏེ་དེའི་ཕྱོགས་སུ་འཁོར་ནས་སྐོར་དགོས་པ་ལྟ་བུ་ནི། བྱང་ཆུབ་སེམས་དཔའ་ཆེན་པོ་ཆོས་ཀྱི་འབྱུང་གནས་ཀྱིས་ཞིང་ཁམས་དེ་བཟུང་ནས་དེའི་མཚན་ཙམ་ཐོས་པའི་སེམས་ཅན་ཆོས་སྤོང་མཚམས་མེད་བྱས་པ་མ་གཏོགས་ཞིང་ཁམས་དེ་ལ་སྐྱེ་བར་ཤོགདེ་མ་འགྲུབ་བར་དུ་འཚང་མི་རྒྱ་བར་ཤོག་གསུངས་ནས་སྨོན་ལམ་བཏབ་ཅིང་དེ་འགྲུབ་ཡོད་པ་རེད། རང་རེས་རྒྱུ་ཚོགས་སྔོན་མ་གསུམ་པོ་ཚང་བའི་མཇུག་ཏུ་སྨོན་ལམ་རྒྱག་དགོས། བྱང་ཆུབ་མཆོག་ཏུ་སེམས་བསྐྱེད་པ་དང་མ་འབྲལ་བའི་ཐོག་ནས་ཚོགས་ཞིང་ཡིད་ལ་བྱས་ཏེ་ཚོགས་བསགས་བྱས་པ་དེ་ཉིད། འགྲོ་བ་སེམས་ཅན་ཐམས་ཅད་ངན་སོང་གི་གནས་ནས་དྲང་པའི་ཆེད་དང་། རྫོགས་པའི་སངས་རྒྱས་ཀྱི་གོ་འཕང་ཐོབ་པའི་དོན་དུ་ཞིང་ཁམས་བདེ་བ་ཅན་དུ་སྐྱེ་བའི་རྒྱུར་འགྱུར་བའི་སྨོན་ལམ་རྒྱག་དགོས། སྨོན་ལམ་གང་ལ་བརྒྱབ་ན་དེ་ན་སྨིན་པ་རེད། རླངས་འཁོར་ཁ་ལོ་པས་རླངས་འཁོར་ཁ་ཡར་ལ་བསྐོར་ནས་སོང་ན་ཡ་གའི་ན་ཐོན་འགྲོ་བ་དང་། མར་ལ་བསྐོར་ནས་སོང་ན་མ་གི་ན་ཐོན་འགྲོ་བ་རེད། རླངས་འཁོར་འགྲོ་བྱེད་ལ་སྣུམ་དགོས་པ་ལྟར། སྨོན་ལམ་འགྲུབ་བྱེད་ལ་བསོད་ནམས་དགོས། རང་གར་སྨོན་ལམ་བཏབ་པས་འགྲུབ་ནི་མ་རེད། རྒད་མོ་ངན་པ་འགའ་རེས་མཐུ་བྱས་པ་དང་འདྲ་བར། རྒད་མོ་མིན་ཡང་རྒད་པོ་འགའ་རེ་འང་མཐུ་མནའ་སྐུག་ཁ་ལ་བབ་སོང་བ་ཡོད་པ་རེད། རོང་པ་རྣམས་ཀྱིས་ཁྱོད་མགོ་ཐུར་ལ་སྒོར་འགྲོ་བར་ཤོག འབྲོག་པ་རྣམས་ཀྱིས་དམྱལ་བར་སྐྱེ་རྒྱུ་ཟེར་ཡང་། ཁྱོས་སྒོར་ཟེར་བས་དེ་སྒོར་ཨེ་འགྲོ་ཤེས་ནི་མ་རེད། ཁྱོད་མ་དགའ་ཙམ་གྱིས་དེ་དམྱལ་བར་སྐྱེ་ཨེ་འགྲོ་མི་ཤེས་ཀྱང་། ཁྱོད་རང་གི་བསོད་ནམས་མར་ལ་ངན་སེམས་འཆང་བའི་དབང་གིས་བྲི་འགྲོ་ངེས་པར་ཡིན་པ་རེད། དེས་ན་སྨོན་ལམ་གྱི་མཚམས་སྦྱོར་ཡག་པོ་མ་བྱས་ན་ཕྱིན་ཅི་ལོག་ཏུ་འགྱུར་པ་ཡིན། འདྲེ་ངན་གདུག་པ་ཅན་འགའ་རེས་ཚོགས་ཆེན་པོ་བསགས། བསྐྱེད་རིམ་གྱི་ལམ་བསྒོམས། སྔགས་བསྙེན་པ་མང་པོ་བཟླས་ཀྱང་། རྫོགས་རིམ་སྟོང་ཉིད་སྙིང་རྗེས་རྩིས་མ་ཟིན་ཏེ་ཤི་ཁར་སྨོན་ལམ་ལོག་འདེབས་བྱས་ནས་འདྲེ་ངན་སྟོབས་ཤུགས་ཅན་རེད་སོང་རབས་བཤད་རྒྱུ་ཡོད། དེས་ན་རྒྱུ་ཚོགས་བསགས་ཡོད་ན་སྨོན་ལམ་དེ་ལྟར་སྟོབས་ཆེ་བ་ཡིན་ཞིང་། རང་རེ་འཇིག་རྟེན་པའི་དུས་རྒྱུན་གྱི་ཁ་སྐད་ལ། ཕ་མ་བཟང་པོ་དང་གྲོགས་བཟང་པོས་སྨོན་ལམ་འགྲུབ་ཟེར་བ་ཡང་། ཕ་མ་དང་གྲོགས་བཟང་པོས་རང་ལས་ཀྱང་གཅེས་པའི་བསམ་པ་དཀར་པོ་ལྷད་མེད་རྣམ་དག་ཅིག་འཚག་པ་ཡིན་ལ། དེའི་བདེན་པའི་སྟོབས་དེ་ཡིས་དེའི་ཚོད་ཀྱི་ནུས་པ་ཐོན་པ་རེད། དེ་ཚོ་རྒྱུ་མཚན་ཡོད་པའི་སྐད་ཆ་ཡིན་ནི་རེད། མདོར་ན་སྨོན་ལམ་འགྲུབ་པའི་རྒྱུ་དེ་ཚོགས་བསག་ཡིན་པས་རང་རེའི་སྤྱིར་ཡན་ལག་བདུན་པ་དང་འབྲེལ་བའི་ཚོགས་བསགས་སྒྲིབ་སྦྱོང་དགོས་ལ། ད་དུང་ཚོགས་བསག་པའི་སྒོ་ཁྱད་པར་ཅན་དད་པ་ཡིན་ཞིང་། དད་པའི་སྒོ་ནས་འདུན་ཞིང་སྨོན་པ་དེ་ལ་སྨོན་ལམ་ཟེར་བས། དད་པ་ཤུགས་དྲག་པོ་དང་ལྡན་ན་གཞན་ལ་རག་མ་ལས་པར་ཚོགས་རྒྱ་ཆེན་པོ་ཞིག་བསགས་འགྲོ་བ་ཡིན། དད་པ་ཡོད་ལ་མེད་དང་། རྒྱུ་མཚན་ཤེས་ལ་མི་ཤེས་ཀྱི་ཐོག་ནས་ལྟར་སྣང་གི་ཕྱག་མཆོད་པ་ཅི་འདྲའི་མང་པོ་ཞིག་བྱེད་པ་བས་དད་པ་སྐད་ཅིག་མ་གཅིག་ཞོག་ན་སྟོབས་ཆེ་བ་ཡིན། རྫོགས་པའི་སངས་རྒྱས་བཅོམ་ལྡན་འདས་ཀྱིས། དོན་དམ་པ་ནི་དད་པས་རྟོགས་པར་བྱའོ་ཞེས་གསུངས་པས། དད་པ་བརྒྱུད་དེ་རྟོགས་དགོས། སངས་རྒྱས་ཀྱི་ཐུགས་རྗེ་སེམས་ཅན་གྱི་རྒྱུད་དུ་འདྲེན་བྱེད་དང་། བླ་མའི་བྱིན་རླབས་སློབ་མར་འཕོ་བྱེད་དད་པ་དང་མོས་གུས་ཡིན། ལར་མ་གཞི་འོད་དཔག་མེད་དང་བདེ་བ་ཅན་གྱི་མཚན་ཐོས་པ་དེ་ཡང་རྒྱུ་ཚོགས་བསགས་སྔོན་ལ་སོང་བའི་འབྲས་བུ་ཡིན་པས། ང་བསོད་ཟད་རེད་མ་བསམ་དང་བསོད་ནམས་ཆེ་བས་ཆོས་དང་འཕྲད་པ་དང་། བསོད་ནམས་ཆེ་བས་བདེ་བ་ཅན་ལ་སང་འགྲོ་གནང་འགྲོ། འཁོར་བའི་སྡུག་བསྔལ་མི་མྱོང་བའི་གྲ་སྒྲིག་པར་མ་ཟད། མཐའ་ཡས་སེམས་ཅན་གྱི་འདྲེན་སྟོན་ཞིག་ཏུ་འགྱུར་བའི་མཐུན་རྐྱེན་བསྒྲུབས་ཏེ་ལམ་གདམ་བཞིན་ཡོད་པ་རེད། བསོད་ནམས་ཆེ་བའི་སྟེང་དུ་འདིའི་གོ་སྐབས་འདི་བཟུང་ནས་རང་གཞན་གྱི་དོན་གཉིས་སྒྲུབ་དགོས་བསམ་རྒྱུའི་སྤོབས་པ་ཞན་མི་རུང་། ཐེག་པ་ཆེན་པོའི་རིགས་ཅན་གྱི་མི་ལ་སྤོབས་པ་གནམ་སྔོན་པོ་ལྟ་བུ་ཞིག་ཡོད་དགོས་པ་ཡིན། དང་ནས་དམའ་ལྟས་བྱེད་ཀྱིན་མ་འདུག ལྟ་ས་བྱ་ལམ་གོང་མ་ལ་ལྟོས་དང་། ཐོན་ས་བྱ་ལམ་བར་མའི་མན་ལ་ཨེ་ལྷུང་ཅི་ཤེས། དང་ནས་ས་མིག་མ་གཏོགས་མ་བྱེད་དུས་མིག་གི་སྔུན་ལ་རྒྱང་རིང་གི་མདུན་ལྗོངས་ཤིག་ཤར་ཡོང་རྒྱུ་ཡོད་པ་མ་རེད། སངས་རྒྱས་འོད་དཔག་མེད་འཁོར་ཉེ་བའི་སྲས་བརྒྱད་ཉན་རང་དགྲ་བཅོམ་གྱིས་བསྐོར་བ་ལ་དད་པ་ཟློག་མེད་རྩེ་གཅིག་ཏུ་ཞོག་ལ་གསོལ་བ་སྨོན་ལམ་ཐོབ། འདུན་པ་ཞོར་ལ་དྲོངས་དང་། ཕྱི་མ་བདེ་བ་ཅན་ལ་སྐྱེ་འགྲོ་བའི་སྐྱེ་རྟགས་རང་གིས་རང་ལ་བཤད་ཀྱང་ཆོག་པ་རེད། བསགས་རྒྱུ་ལས་རྒྱུ་མི་དགེ་སྡིག་པའི་རྣམ་གྲངས་འདི་མ་བྱས་བསྙམ་པ་མེད་ཅིང་། ད་དུང་ཆོས་ཀྱི་བྱིན་རླབས་དང་དཀོན་མཆོག་གི་བདེན་མཐུ་ལ་ཡིད་གཉིས་ཐེ་ཚོམ་བྱེད་པ་དང་། ཡང་ཕྱོགས་གཅིག་ནས་སེམས་མི་བདེ་སྟེ་ང་གང་དུ་སྐྱེ་ས་འདུག་ཅེས་སྐྱེ་རྟགས་ཞུས་ཀྱང་མ་ཞུས་ཀྱང་སྐྱེ་ས་གཅིག་ལས་མེད་དེ། ས་བོན་ཅི་བཏབ་ཡོད་ན་འབྲས་བུ་དེ་སྨིན་པས། བླ་རྒན་ཞུ་ས་དེས་ངོ་མ་ཐེགས་ནས་ཡག་པོ་ཞིག་གསུངས་ཀྱང་། དོན་ལ་དེ་མིན་ན་བྱིས་པ་མགོ་གཡོགས་གཡོགས་ཡིན་པས་ཕུགས་ཐུབ་པ་མ་རེད། ལར་བླ་རྒན་ཁོང་རང་ཡང་ཚེ་ཕྱི་མ་ལྟ་ཅི་ལ་ཕར་རྒྱབ། དེར་མ་ཟད་ལག་པའི་ནང་དུ་ཅི་འདུག་ཅེས་དྲིས་ན་མི་ཤེས་མཁན་ཞིག་ཡིན་ན་དེ་བས་ཀྱང་ཡིད་རྟོན་ཅི་ཡོད། གནའ་སྔ་མོ་ཉག་སྐེད་མགོན་པོ་རྣམ་རྒྱལ་གྱིས་བླ་མ་མང་པོར་སྐྱེ་རྟགས་ཞུས་དུས། བླ་རྒན་རྣམས་སྐྲག་སྟེ་ཁྱོད་དག་ཞིང་ལ་སྐྱེ་འགྲོ་ས་འདུག་ཤ་སྟག་སྨྲས་ཀྱང་། ཁོ་རང་གི་ཞེ་ལ་མི་བླུན་པོ་ཡིན་ཀྱང་ཕྱི་མར་ལེགས་པོ་ཞིག་ཡོང་རྒྱུ་མེད་བསྙམ་སྟེ་མི་འགྱུར་ནམ་མཁའི་རྡོ་རྗེ་ལ་ཞུས་པས་ཁྱོད་ཤི་དུས་དམྱལ་བ་རྡོ་རྗེ་གདན་ལ་སྐྱེ་འགྲོ་སར་འདུག་ཅེས་གསུངས། བླ་མ་ཟེར་ན་བླ་མ་ཁྱོད་རེད་ཅེས་སྨྲས་པ་ལྟར། སྤྱིར་སྔོན་ལས་ཟློག་མེད་ཡིན་པས་ལས་བསགས་པ་བྱེད་པོ་རང་ཉིད་ཀྱིས་མྱོང་དགོས་ཀྱང་། སྒྱུར་བཀོད་གཏོང་རྒྱུ་མེད་པ་ཞིག་མ་ཡིན། གནམ་ལས་གཉིས་ཀས་བསྐོས་ཐང་རེད་ཅེས་བལྟས་མ་འདུག་དང་། ལས་འདུས་བྱས་རེད་དང་པོ་ལས་ཡོང་བ་རེད། སྡིག་པ་བཤགས་ནས་མེད་པར་གྱིས་ཤིག བསོད་ནམས་མེད་ན་གསོག་ནས་ཡོད་པར་གྱིས་ཤིག ཚོགས་བསག་སྒྲིབ་སྦྱོང་གི་བྱེད་ཐབས་བྱ་བ་གཅིག་གིས་ཆོག་པ་དེ་གང་ཡིན་ཞེ་ན། བྱང་ཆུབ་ཀྱི་སེམས་ཡིན་ནི་རེད། བྱང་ཆུབ་ཀྱི་སེམས་རྒྱུད་ལ་སྐྱེ་བ་ལ་སྙིང་རྗེ་ཡོད་དགོས། དེ་ཡང་བསམ་པ་བཟང་པོ་ལ་རག་ལས་པ་ཡིན་པས། འཁོར་བ་སྡུག་བསྔལ་ཡིན་པར་ཤེས། དེ་ལས་ཐར་འདོད་ཀྱི་བསམ་པ་ཅན་གྱི་ངེས་འབྱུང་སྐྱེས། འཁོར་བའི་སེམས་ཅན་སྡུག་བསྔལ་ཅན་ལ་སྙིང་རྗེ། དེ་ཐམས་ཅད་ཐར་ལམ་ལ་འགོད་པའི་སེམས་བསྐྱེད་ཀྱིས་ཟིན་ན་ཅི་བྱས་བྱང་ཆུབ་ཀྱི་ལམ་ལ་འགྲོ། ཚོགས་བསག་ཐབས་སྒྲིབ་པ་སྦྱོང་ཐབས་དེའི་ཕན་ལ་མི་དགོས། མདོར་ན་གང་ནས་བཤད་ཀྱང་མདོར་བསྡུས་ཏེ་ཚིག་སྣ་ཐུག་ས་རྒྱུ་འབྲས་ཡིད་ཆེས་ཀྱི་འཇིག་རྟེན་ཡང་དག་གི་ལྟ་བ་དང་། སེམས་ཅན་ལ་སྙིང་རྗེ་དཀོན་མཆོག་ལ་དད་པ། སངས་རྒྱས་འོད་དཔག་མེད་ལ་དད་པ་བྱོས་དང་དེའི་ནང་དུ་ཕལ་ཆེར་འདུས་ཡོད་པ་རེད། མདོར་ན་ལམ་ཟབ་མོའི་ཉམས་ལེན་མི་ཤེས་པས། ཀུན་ཏུ་བཟང་པོའི་སྤྱོད་པ་ཐམས་ཅད་བདེ་བླག་ཏུ་དཀའ་བ་མེད་པར་རྫོགས་པའི་ཐབས་མཆོག་ཏུ་གྱུར་བ་བདེ་བ་ཅན་དུ་སྐྱེ་བའི་སྨོན་ལམ་འདེབས་པ་འདི་ཡིན། དེའི་རྒྱུ་མཚན་ཅི་ཡིན་ཞེ་ན། ཞིང་ཁམས་བདེ་བ་ཅན་དུ་སྐྱེ་བ་ལ་སངས་རྒྱས་ཀྱི་སྨོན་ལམ་དང་། ཡེ་ཤེས་ཀྱི་སྟོབས་ཀྱིས་དད་འདུན་ཙམ་ཞིག་གིས་ཆོག་པ་ཡིན། ཞིང་ཁམས་དེ་ལ་སྐྱེས་ནས་ཡོན་ཏན་ཕུལ་དུ་བྱུང་བ་མང་པོ་འབད་པ་མེད་པར་ཐོབ་སྟེ། ལམ་དེ་ལས་ཕྱིར་ཉམས་མི་སྲིད་པ་ཀུན་ཏུ་བཟང་པོའི་སྤྱོད་པ་ཡོངས་སུ་རྫོགས་པ་ཡིན་ཏེ། བཟང་སྤྱོད་སྨོན་ལམ་ལས། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །ཐམས་ཅད་མ་ལུས་མངོན་དུ་འགྱུར་བར་ཤོག །ཅེས་གསུངས་པ་ཡིན་པས། ཚུལ་འདི་སྒྲུབ་སླ་ལ་འགྲུབ་སླ་མོ་ཞིག་ཀྱང་ཡིན་ནོ། །འདི་ལ་ལག་ལེན་གྱི་གདམས་ངག་ཅི་ཞིག་ཡོད་ཅེ་ན། འདིའི་ཉམས་ལེན་གྱི་རྩལ་སྦྱོང་བྱེད་དུས་ཉིན་དང་མཚན་གྱི་ཉམས་ལེན་གཉིས་བྱེད་དགོས་པ་ཤེས་དགོས། ཉིན་དཀར་རྟེན་དང་བརྟེན་པའི་ཚོགས་ཞིང་ཡིད་ལ་བྱས། དེ་ལ་དགའ་ཞིང་དང་བ་དང་བའི་དད་པ་དང་། དེར་སྐྱེ་ན་སྙམ་པ་འདོད་པའི་དད་པ། རྒྱལ་བའི་རྣམ་འཕྲུལ་ཟབ་མོ་ལ་ཡིད་ཆེས་པ་ཡིད་ཆེས་ཀྱི་དད་པ་སྟེ་དད་པ་གསུམ་པོ་དང་མི་འབྲལ་བའི་ཐོག་ནས། བསགས་སྦྱོང་སྤེལ་གསུམ་གྱི་སྟེང་དུ་གནད་འདུས་པའི་ཡན་ལག་བདུན་པ་ལ་སོགས་པ་དགེ་བའི་ཚོགས་ཅི་ནུས་བསག འོད་དཔག་མེད་པའི་མཚན་ནས་བརྗོད། གཟུངས་སྔགས་བཟླ། ཐུགས་དམ་བསྐུལ། གསོལ་བ་གདབ། བསྔོ་བ་དང་སྨོན་ལམ་སོགས་ལ་བརྩོན་དགོས། དགོང་མོར་ཉལ་དུས་མགོན་པོ་འོད་དཔག་མེད་ལ་ཕྱག་གསུམ་ཡན་ཆད་འཚལ་ཏེ། རང་ཉིད་ཞིང་ཁམས་དེ་ན་ཡོད་པ་དང་། དེ་བཞིན་གཤེགས་པ་འཁོར་བཅས་ཀྱི་ཞལ་མཇལ་བཞིན་ཡོད་པའི་འདུན་པ་ཤུགས་དྲག་པོ་མ་ཉམས་པའི་ཐོག་ནས་ཉལ། བཀའ་གཏེར་གསར་རྙིང་གི་མཚན་མོའི་རྣལ་འབྱོར་གྱི་མན་ངག་འདྲ་ཡོད་ན་དེ་ཚོ་དང་བསྟུན། མདོར་ན་ཞིང་ཁམས་བདེ་བ་ཅན་ལ་སྐྱེ་བའི་ཡོན་ཏན་དང་། སྐྱེ་ཐུབ་པའི་གནད་དེ་ཚོ་ཤེས་པར་བྱས་ཏེ། ཉིན་མཚན་ཀུན་དུ་དད་པ་དང་བརྩོན་འགྲུས་རྒྱུན་ཆགས་སུ་བསྐྱེད་དགོས། དེ་ལྟར་བྱས་ན་རབ་ཡིན་ན་ཚེ་འདི་ལ་མགོན་པོ་འོད་དཔག་མེད་ཞལ་མཇལ་ཏེ་དབུགས་དབྱུང་ལུང་བསྟན་ཐོབ། འབྲིང་ཡིན་ན་ཉམས་སྣང་གི་ཚུལ་དུ་བྱིན་རླབས་ཐོབ། ཐ་མ་ཡིན་རུང་རྨི་ལམ་གྱི་ནང་དུ་ཞིང་ཁམས་དང་སྟོན་པ་རྨིས་ཡོང་བ་དེ་འདྲ་ཡིན་ནི་རེད། ཅི་ཡང་མིན་ནའང་བག་ཆགས་དགེ་བའི་ལྟས་བཟང་པོ་རེ་མི་ཡོང་བ་མི་སྲིད། ཡང་རྟགས་འདི་རེད་བསྙམ་པ་ཅི་ཡང་མེད་ནའང་སྐྱོན་མེད་དེ། ཚེ་འདི་ལ་དད་འདུན་གྱིས་གསོལ་བ་སྨོན་ལམ་བཏབ་པ་ལྟ་ཅི། འཆི་ཁར་ད་གཟོད་རྣ་ལམ་དུ་སངས་རྒྱས་ཀྱི་མཚན་ཐོས་ནས། དེར་དད་པ་བྱས་ཏེ་དེར་སྐྱེ་བར་ཤོག་སྙམ་པའི་འདུན་པ་ཙམ་ཞིག་བྱས་ཀྱང་སྐྱེ་ངེས་པ་ཡིན་པ་རེད། གཅིག་ན་འཆི་ཁའི་སྨོན་ལམ་སྟོབས་དང་ལྡན། གཉིས་ན་དེའི་སྟེང་དུ་སངས་རྒྱས་འདིའི་སྨོན་ལམ་ཁྱད་པར་འཕགས་པས་དྲང་ཐུབ་ནི་རེད། ཡང་བར་དོའི་གནས་སྐབས་ལ་ཐོན་ན་སངས་རྒྱས་འོད་དཔག་མེད་པའི་མཚན་ཞིག་དྲན་ན་དེ་ཙམ་གྱིས་ཀྱང་བདེ་བ་ཅན་ལ་སྐྱེ་བ་རེད། ཅིའི་ཕྱིར་སྙམ་ན། བར་དོའི་གནས་སྐབས་སྒྱུར་སླ་བ་ཆུ་ནང་གི་གྲུ་ལྟ་བུ་གང་ན་འཐེན་ན་འཐེན་བླ་མོ་ཡིན་པས། ཞིང་ཁམས་བདེ་བ་ཅན་ལ་སྐྱེ་བའི་ཆོ་ག་དང་སྨོན་ལམ་འདི་ཚོ་ཉམས་ལེན་བྱས་ན་འཆི་ཁ་དང་བར་དོར་ལྷག་པར་ཕན་ཐོགས་པའི་གནད་ཀྱི་གདམས་པ་ཡིན། རྒྱལ་བ་བདེན་པར་སྨྲ་བའི་བཀའ་ལ་བསླུ་བ་ཡོད་པ་མ་ཡིན་ཏེ། མདོ་སྡེ་ཏིང་འཛིན་རྒྱལ་པོ་ལས། ཟླ་བ་སྐར་མར་བཅས་པའི་གནས་སྟོངས་ཤིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། །ཁྱོད་ནི་མི་བདེན་པ་ཡི་ཚིག་མི་གསུང་། །ཞེས་གསུངས་པ་ལྟར་ཡིན་པས་དེ་བཞིན་གཤེགས་པའི་གསུངས་ལ་ཡིད་ཆེས་རྙེད་དགོས། དེ་བཞིན་གཤེགས་པའི་གསུང་ལ་ཡིད་ཆེས་ཀྱི་ངེས་པ་ཞིག་གཏིང་ནས་མ་རྙེད་ན་ཆོས་ཉན་བསམ་སྒོམ་སྒྲུབ་གང་བྱས་ཀྱང་གནད་ལ་ཁེལ་བ་ཞིག་མི་ཡོང་ལ་རྒྱལ་བ་དགྱེས་པའི་ལམ་མཆོག་ལའང་ཐོན་ཐུབ་པ་མ་ཡིན། དེས་ན་ངན་སོང་གི་གནས་སུ་སྐྱེ་བ་ལ་སྐྲག་ནི་ཞིག་ཡིན་ན་ངན་སོང་གི་སྒོ་གཅོད་ཐབས་དེ་གང་ཡིན་ཞེ་ན། ལས་རྒྱུ་འབྲས་དང་བདེན་པའི་བཀའ་ལ་ངེས་ཤེས་རྙེད་དེ། ཉིན་མཚན་ཐམས་ཅད་དུ་རང་གི་སྒོ་གསུམ་ལ་བརྟགས་མཁས་པ་ཞིག་བྱེད་པ་དེ་གནད་ཡིན། དེས་ན་ཚེགས་དཀའ་ལས་ཆུང་ཆུང་ཞིག་གིས་བྱང་ཆུབ་སེམས་དཔའི་ཡོན་ཏན་རྒྱ་ཆེན་པོ་རང་རྒྱུད་ལ་འདྲེན་པའི་ཐབས་དམ་པ་བདེ་བ་ཅན་ལ་སྐྱེ་བའི་རྒྱུའི་ཆོ་ག་དང་སྨོན་ལམ་ལ་བརྩོན་དགོས་པ་རེད། དེར་མ་བརྩོན་ན་ནོར་བུ་རིན་པོ་ཆེ་དགོས་འདོད་ཀུན་འབྱུང་ཞིག་ལག་ལ་ལོན་ཡོད་ཀྱང་དེ་ལ་གསོལ་བ་མ་བཏབ། འདོད་དོན་མ་བསྒྲུབས་པར་ཕྱིར་ལ་འཕང་བཞག་པ་ལྟ་བུ་ཞིག་ཡིན་ནི་རེད། དེ་རིང་གི་ཆོས་མཚམས་ཉེས་ཆེན་བཙོན་ནས་ཐར་བ་བཞིན། །བདེ་བ་ཅན་གྱི་ཞིང་ཁམས་སུ། །ཕྱི་ལྟས་མེད་པར་འབྲོས་པར་ཤོག །ཟེར་ས་འདི་ནས་འཇོག

ཉིན་བདུན་པའི་ཆོས་ཁྲིད།

མཚམས་སྦྱོར་གྱི་གདམས་ངག

ཇི་སྐད་དུ། མཁས་གྲུབ་ཀརྨ་ཆགས་མེད་ཀྱིས། ཚེ་འདི་ལ་ཚོགས་བསག་སྒྲིབ་སྦྱོང་བ། །རྟ་བཟང་པོར་སྒ་སྲབ་བྱས་པ་འདྲ། །དེ་བསྔོ་སྨོན་སྲབ་ཀྱིས་ཁ་བསྒྱུར་ནས། །རང་གང་འདོད་ཞིང་ཁམས་བགྲོད་པས་ཆོག །ཅེས་གསུངས་པ་ལྟར། ཚེ་འདི་ལ་ཚོགས་བསག་སྒྲིབ་པ་རང་གིས་སྦྱོང་ཐབས་བྱེད་རྒྱུ་འདི་ས་ཐག་རིང་གི་ལམ་ཐག་གཅད་དགོས་ན། རྟ་བཟང་པོར་སྒ་ཆས་གྲ་འགྲིག་ཅན་ཞིག་དགོས་པ་ལྟར། བདེ་བ་ཅན་གྱི་ཞིང་ཁམས་ལ་མིག་བཙུམ་པ་དང་ཐོན་ཡོད་པ་ཞིག་བྱེད་བསམ་ན། ཚེ་འདི་ལ་ཚོགས་བསག་སྒྲིབ་སྦྱོང་བྱེད་དགོས་པར་གསུངས་ཡོད། ཚེ་འདི་ལ་གསུངས་པ་འདིས་ཅི་ཞིག་བསྟན་ཞེ་ན། ཚེ་འདི་ལ་རང་གིས་མ་བསྒྲུབས་ན། རྗེས་སུ་འགའ་ཞིག་གིས་དགེ་བའི་ར་མདའ་བྱེད་ཅེས་པ་ནི། ཚེ་འདིར་རང་གིས་སྒྲུབ་པ་ལྟ་བུ་ཞིག་མི་ཡོང་ཞེས་པའི་དོན་དང་། ད་དུང་དལ་འབྱོར་ཚང་ཞིང་ཆོས་དང་འཕྲད་དེ་རང་ལ་རང་དབང་ཡོད་དུས་མ་བསྒྲུབས་ན་ལུས་འདི་འདྲ་ནམ་ཡིན་ཡང་ཐོབ་མིན་མི་ཤེས། ལོ་ཉུང་ཚེ། གཟུགས་འགོར་ཡོད་ཚེ། ཤེས་པ་གསལ་ཚེ་མ་བསྒྲུབས་ན། ཉིན་ཞིག་ལ་འགྱོད་པ་ཚད་མེད་ཞིག་ཡོང་ཞེས་པ་འདི་ཞོར་ལ་བསྟན་པ་རེད། ཚེ་འདི་ལ་ཚོགས་བསགས་སྒྲིབ་སྦྱང་བྱེད་པ་འདི་རྟ་བཟང་པོ་ཞིག་ལ་སྒ་སྲབ་བྱས་པ་ལྟ་བུ་ཞིག་ཡིན། རྟ་བཟང་པོ་ལ་བང་འགྲོས་ལྡན་ཞིང་། སྒ་སྲབ་ལ་སོགས་པ་ཆས་ཅ་ལག་ཐམས་ཅད་ཚང་ཡང་། མིས་སྲབ་ཀྱིས་ཁ་ལོ་བསྒྱུར་ཏེ་འགྲོ་འདོད་པའི་སར་འགྲོ་དགོས་པ་ལྟར། བསྔོ་བ་དང་སྨོན་ལམ་བཟང་པོས་ཐེབ་ན། གང་འདོད་ཀྱི་ཞིང་ཁམས་སུ་འགྲོ་ཆོག་པ་ཡིན་ཞིང་། ཞིང་ཁམས་གང་དགར་གདམ་པ་ལ་སྤྱིར་སངས་རྒྱས་རྣམས་ཀྱིས་དག་པའི་གཟིགས་སྣང་དང་། མ་དག་འགྲོ་དྲུག་གི་མ་དག་པ་འཁྲུལ་སྣང་གི་དབང་གིས་ཞིང་ལ་དག་མ་དག་གྲངས་མེད་པ་ཡོད་པར་གསུངས་ཀྱང་། གནས་འོག་མིན་ཆོས་དབྱིངས་ཀྱི་ཞིང་ཁམས་དེ་ནམ་མཁའི་གར་ཁྱབ་ཞིང་ཁམས་ཀྱིས་ཁྱབ་པ། ལས་དག་པའི་སྣང་ངོར་ཕྱི་སྣོད་ཀྱི་འཇིག་རྟེན་གཞལ་ཡས་ཁང་། ནང་བཅུད་ཀྱི་སེམས་ཅན་ཡི་དམ་གྱི་ལྷ་ཡིན་ཞིང་། འཁོར་བའི་སྡུག་བསྔལ་ཞེས་པའི་མིང་ཙམ་ཡང་མེད་པ། ནམ་མཁས་གར་ཁྱབ་ཀྱི་འཁོར་འདས་ཐམས་ཅད་ལ་རྒྱལ་བའི་སྐུ་གསུང་ཐུགས་ཀྱིས་ཁྱབ་པ་ནི་སྐུ་གསུང་ཐུགས་ཀྱི་གསང་བ་ཡིན་པ་རེད། རྡུལ་གཅིག་གི་སྟེང་ན་འཇིག་རྟེན་གྱི་ཁམས་ཀྱི་རྡུལ་ཇི་སྙེད་ཡོད་པའི་ཁར་གྲངས་རྫོགས་སོང་བ། དེ་རེ་རེའི་སྟེང་ན་དག་པའི་ཞིང་ཁམས་བརྗོད་ལས་འདས་པ་རྡུལ་སྙེད་ཀྱི་གྲངས་དང་མཉམ། དེ་ཐམས་ཅད་ལ་རྒྱལ་བ་སྲས་བཅས་ཀྱིས་ཆོས་འཁོར་སྐོར་གྱིན་ཡོད་པ་དང་། དེ་འདྲའི་ཞིང་ཁམས་མང་པོ་རྣམས་ཀྱང་གཅིག་གིས་གཅིག་ལ་མི་གནོད། དཔེར་ན་སྟོང་གསུམ་ཡུངས་འབྲུ་ཞིག་གི་ནང་དུ་བཙུད་ན་སྟོང་གསུམ་ཇེ་ཆུང་མ་སོང་། ཡུངས་འབྲུ་མ་ཇེ་ཆེར་མ་སོང་བ་དེ་སོ་སོའི་སྐྱེ་བོའི་བསམ་ཡུལ་ལས་འདས་པ་སངས་རྒྱས་ཀྱི་སྤྱོད་ཡུལ་དུ་གྱུར་པ་དང་། །ཞིང་ཁམས་ནམ་མཁས་གར་ཁྱབ་ལ་རྒྱལ་བ་སྲས་བཅས་རྟག་ཏུ་བཞུགས་པ་དེ་ཡང་ཐམས་ཅད་མཁྱེན་པས་གཟིགས་ཚུལ་རེད། དེས་ན་རིགས་དྲུག་སེམས་ཅན་གྱི་སྣང་ངོར་གནས་འགྲོ་བ་རིགས་དྲུག་གི་སྡུག་བསྔལ་སོ་སོར་སྣང་གི་ཡོད་པ་རེད། དཔེ་བཞག་ན་ངན་སོང་གསུམ་གྱི་སྡུག་བསྔལ་ལྟ་བུར་མཚོན་ན། རང་རེ་མིའི་འགྲོ་བ་ལ་མིའི་སྣང་བ་ཤར་བ་འདི་འདྲ་བར་རང་རང་ལ་རང་གི་སྣང་བ་ཤར་གྱིན་ཡོད། མདོར་ན་ལས་དག་དང་མ་དག་གི་ཁྱད་པར་གྱིས་བདེ་སྡུག་གི་མཐོང་སྣང་དང་མྱོང་སྣང་འདྲ་མི་འདྲ་རེད་སོང་བ་རེད། ཀརྨ་ཆགས་མེད་ཚང་ཁོང་རང་གིས་གསུངས་ན། དག་པའི་ཞིང་ཁམས་རྣམས་ལས་ཤར་ཕྱོགས་ན་མངོན་དགའི་ཞིང་ཁམས་ཡོད་ཅིང་། གནས་དེ་ན་རྒྱལ་བ་མི་འཁྲུག་པ་བཞུགས། ཤར་བཻཌཱུར་སྣང་བའི་ཞིང་ཁམས་ཞེས་བྱ་བ་ཡོད། བཅོམ་ལྡན་འདས་སྨན་པའི་རྒྱལ་པོ་དེ་ན་བཞུགས། ལྷོ་ཕྱོགས་དཔལ་ལྡན་གྱི་ཞིང་ཁམས་དང་བྱང་ཕྱོགས་ལས་རབ་རྫོགས་པའི་ཞིང་ཁམས་གཉིས་ཀ་ཡོད། དེ་གཉིས་ན་རིན་ཆེན་འབྱུང་ལྡན་དང་དོན་ཡོད་གྲུབ་པ་བཞུགས། ཞིང་དེ་དག་ནི་དག་པའི་སྣང་ངོར་སྣང་བའི་ས་ཐོབ་ཀྱི་སེམས་དཔའི་སྤྱོད་ཡུལ་ཡིན་པས་ས་དང་པོ་ཐོབ་པ་ཡན་ཆད་མ་གཏོགས་གནས་དེར་མི་སྐྱེ། ལོངས་སྐུའི་ཞིང་ཁམས་སྟུག་པོ་བཀོད་པ་ཡོད་ཀྱང་ས་བརྒྱད་པ་མན་ཆད་དེར་མི་སྐྱེ། ཡང་གནས་དུར་ཁྲོད་མེ་རི་འབར་བ་ལ་སོགས་པའི་ཞིང་ཁམས་ཡོད། གནས་དུར་ཁྲོད་མེ་རི་འབར་བའི་ཞིང་ཁམས་ལ་སོང་ན་བཅོམ་ལྡན་གཞོན་ནུ་དཔའ་བོ་སྟོབས་ལྡན་བཞུགས་ཀྱང་། དེ་ན་ཡང་རིག་འཛིན་གྱི་ས་མ་ཐོབ་པར་མི་སྐྱེ་འདུག དེ་ཚོ་ཚང་མ་ཞིང་དག་པ་ཡིན་པས་དེ་ལ་སྐྱེ་བའི་ཆ་རྐྱེན་ལྡན་དཀའ་འདུག ཡང་སྟེང་དགའ་ལྡན་ལྷ་ཡི་ཕོ་བྲང་ཞེས་བྱ་བ་ཡོད། གནས་དེ་ན་རྒྱལ་ཚབ་བྱམས་པ་མགོན་པོ་བཞུགས། ཚེ་འདི་ལ་ཚུལ་ཁྲིམས་གཙང་མ་བསྲུང་། ཆོས་ཐོས་བསམ་ཁོ་ན་ལ་བརྩོན་འགྲུས་བྱས་ཏེ་ཞིང་ཁམས་དེ་ལ་སྨོན་ལམ་བཏབ་ན་སྐྱེ་ཐུབ་ཅིང་། གནས་དེ་ལ་སྨོན་ལམ་འདེབས་ནི་ཡང་མང་ལ། བྱམས་པ་མགོན་པོ་སྐུ་དངོས་ཀྱི་མདུན་ནས་ཆོས་ཉན་ཆོག་མོད། འོན་ཏེ་ལྷ་ཡུལ་གྱི་སྐྱིད་དགའ་དང་གླུ་གར་རྩེད་མོའི་ངང་ལ་གཡེང་སོང་ན་མ་འོངས་པར་རྗེ་བཙུན་བྱམས་མགོན་མི་ཡུལ་དུ་བྱོན་དུས། དེར་ཡོད་པ་དག་ཚེ་འཕོས་ཏེ་མི་ལུས་བླངས། རབ་ཏུ་བྱུང་སྟེ་དམ་ཆོས་ཉན། བྱམས་མགོན་གྱི་བསྟན་པའི་གནས་ཚད་མ་རྫོགས་ཀྱི་བར་དུ་མི་ནས་མི་རུ་སྐྱེས་ཏེ་བསྟན་པ་འཛིན་པ་དང་། དེ་བཞིན་དུ་བསྐལ་བཟང་སངས་རྒྱས་སྟོང་མ་རྫོགས་ཀྱི་བར་དུ་ཆོས་ཉན་ཞིང་བསྟན་པ་འཛིན། དེའི་བསྐལ་བ་རྗེས་མ་ཞིག་ལ་སངས་རྒྱས་བརྒྱད་ཁྲི་བཞི་སྟོང་ལས་ཆོས་ཉན་བསྟན་པ་བཟུང་སྟེ་ད་གཟོད་སངས་རྒྱས་པ་དེ་འདྲ་ཡིན་པས། ཀརྨ་ཆགས་མེད་ཀྱིས་ལོ་བདུན་ལ་བྱམས་མགོན་གྱི་དྲུང་དུ་སྐྱེ་བའི་སྨོན་ལམ་བཏབ་ཀྱང་། འཁོར་བའི་སྐྱེ་འཆིའི་སྡུག་བསྔལ་འདི་ལ་ཤིན་ཏུ་འཚེར་བས། ཆོས་བྱམས་སྨོན་བཞག་ནས་བདེ་སྨོན་བཏོན་པ་ཡིན་གསུངས་ཡོད་པ་རེད། ཡང་ཁོང་གིས་གསུངས་ཏེ་གནས་འདི་ནས་ཉི་མ་ལྷོ་ནུབ་ཀྱི་མཚམས་སུ་སོང་ན། ལྷོ་འཛམ་བུ་གླིང་གི་གླིང་ཕྲན་སྲིན་པོའི་ཡུལ་ན་ཟངས་མདོག་དཔལ་གྱི་རི་བོ་པདྨ་འོད་ཀྱི་གཞལ་ཡས་ན་སློབ་དཔོན་པདྨ་འབྱུང་གནས་བཞུགས། གནས་དེ་ལ་སྨོན་ལམ་འདེབས་ནི་ཡང་མང་པོ་འདུག ཀརྨ་ཆགས་མེད་ཀྱང་སློབ་དཔོན་ཆེན་པོ་ལ་ཤིན་ཏུ་དད་པས། ཆུང་དུས་དེར་སྐྱེ་བའི་སྨོན་ལམ་བརྒྱབ། སྐྱེ་སླ་ཞིང་མི་སྐྱེ་བའི་དོག་པ་ཡང་མི་དགོས་མོད། བསམ་བློ་ཞིབ་ཏུ་བཏང་ན་དེ་ལ་སྐྱེ་ལུགས་བཟང་ངན་གཉིས་ཡོད་འདུག སྐྱེ་ལུགས་བཟང་ན་རིག་འཛིན་དཔའ་བོའི་ཚོགས་གྲལ་དུ་སྐྱེས་ཏེ། གསང་སྔགས་ཉམས་ལེན་བྱས་ཤིང་འཕྲལ་དུ་སྐྱིད་ལ་ཕུགས་སུ་སངས་རྒྱས་ཐུབ་པ་དེ་འདྲ་ཡིན་ཡང་། སྐྱེ་ལུགས་ངན་ནས་ཤ་ཟ་སྲིན་པོའི་བུ་རུ་སྐྱེས་ན་ཨོ་རྒྱན་ཆེན་པོའི་ཞལ་མཇལ་ཡང་རྒྱལ་པོ་ཡིན་པའི་འདེང་ཙམ་ལས་དད་པ་བཅོས་མིན་ཞིག་མི་ཞོག ལས་སྐལ་བ་ཅུང་ཟད་ཅིག་ལྡན་པ་ཡིན་ན་ཨོ་རྒྱན་ཆེན་པོས་བྱིན་རླབས་དབང་སྐུར་མཛད་དེ། ཁྱོད་འདི་ནས་མ་འདུག་བོད་ལ་སོང་། བོད་གངས་ལྡན་བསིལ་མོའི་ལྗོངས་ནས་འགྲོ་དོན་འདི་ལྟ་བུ་ཞིག་གྱིས་ཤིག་གསུངས་ན། ཆགས་མེད་ཚང་གིས་གསུངས་ཏེ། ཁོང་ནི་སྐྱེ་འཆི་འདི་ལ་འཚེར་བས་ཨོ་རྒྱན་པད་འབྱུང་ལ་དད་པ་ཆེ་ཞིང་། ཅི་གསུང་བཀའ་བཞིན་དུ་སྒྲུབ་ཐུབ་པ་ཡོད་ན་དེ་ལ་སྐྱེ་བའི་སྨོན་ལམ་ཐོབ་དང་ཆོག་འདུག ཁོང་ལྟ་བུ་ཡིན་ན་སྐྱེ་འཆི་འདི་ལ་ཧ་ཅང་འཚེར་བས་དེ་ལ་ཡང་སྨོན་ལམ་མ་བཏབ་པ་ཡིན་གསུངས་པ་རེད། ཁྱེད་རྣམས་ཀྱིས་དེ་འདྲ་ལ་སྨོན་ལམ་འདེབས་འདོད་པ་ཡོད་ན། བསྐལ་བ་འདིའི་ཡུན་ལྟ་བུ་ཞིག་ལ་གང་སར་སྐྱེ་སྲིད་བླངས་ཏེ། མཐར་བདེ་བ་ཅན་ལ་འགྲོ་རྒྱུ་རེད་འདུག བྱམས་མགོན་དང་གུ་རུ་རིན་པོ་ཆེ་བཞུགས་ས་གཉིས་ནི་སྤྲུལ་སྐུའི་ཞིང་ཁམས་ཆུང་ཆུང་རེ་རེད་ཡོད་འདུག ཡང་འགའ་རེས་གནས་པོ་ཊ་ལར་སྨོན་ལམ་འདེབས་ནིའང་ཡོད་འདུག པོ་ཊ་ལ་རྒྱ་གར་གྱི་སྐད་རེད། བོད་སྐད་དུ་རི་བོ་གྲུ་འཛིན་ཟེར་ནི་རེད། དེ་ཞིང་ཁམས་ཤིག་མ་རེད་གནས་རི་ཞིག་རེད། ལས་དག་པ་ལ་དག་པ་སྣང་ནི་རེད། མ་དག་ཀྱང་ཡི་གེ་དྲུག་མ་རང་བྱོན་དང་། ཁ་སརྤ་ཎི་རང་བྱོན་ཚོ་མཇལ་རྒྱུ་ཡོད་ནི་རེད། ནུབ་ཨོ་རྒྱན་གྱི་ཡུལ་ཡང་དེ་དང་འདྲ་བར། ལས་དག་པས་དུར་ཁྲོད་གཞལ་ཡས་ཁང་གི་དབུས་ན་ལྷ་བདེ་མཆོག་ཡབ་ཡུམ་དངོས་སུ་བཞུགས་པ་མཇལ་བྱུང་ཟེར་བ་ཡང་ཡོད་པ་རེད། ལས་མ་དག་ཀྱང་རང་བྱོན་རྡོ་ཡི་ལྷ་ཁང་ལ་སོགས་པ་མཇལ་ཐུབ་འདུག ཡང་ཤར་རྒྱ་ནག་རི་བོ་རྩེ་ལྔ་དང་། ལྷོའི་གནས་མཆོག་དཔལ་གྱི་ཙ་རི། ནུབ་གངས་དཀར་རྒྱལ་པོ་ཏེ་སེ་དེ་ཚོ་ལས་དག་པའི་སྣང་ངོར་གཞལ་ཡས་ཁང་དང་། མ་དག་པས་བལྟས་ན་གངས་རི་ནགས་ཚལ་ཞིག་རེད། ཁོང་ལ་དེ་ཚོར་ཨེ་སྐྱེ་ཡི་འདོད་པ་འདྲ་ཡོད་སོང་། བྱང་ཕྱོགས་ཤམ་བྷ་ལ་ཟེར་བའི་རིགས་ལྡན་སྤྲུལ་བའི་རྒྱལ་པོ་བྱོན་ས་ཆོས་དུས་ཀྱི་འཁོར་ལོ་དར་ས་ཡིན་ཡང་། ཚེ་རིང་ཐུང་སྐྱིད་སྡུག་མི་ཡུལ་འདི་ཚོ་དང་གཅིག་པ་འདྲ་རེད་འདུག ཡང་བོན་པོ་རྣམས་ཀྱིས་ཞང་ཞུང་དུ་སྐྱེ་བའི་སྨོན་ལམ་འདེབས་པ་རེད། དེ་ཡང་གངས་ཏེ་སེའི་རྒྱབ་ཕྱོགས་ཀྱི་བོད་ཡུལ་ཞིག་རེད། བོན་ལ་དེ་ལྟར་དར་ཡང་སྐྱིད་སྡུག་འདི་ཚོ་དང་འདྲ་མོ་རེད་འདུག དེས་ན་ཕྱི་རབས་པ་རྣམས་ཀྱིས་ཞིང་ཁམས་གདམ་ནོར་མ་བྱེད་ཅེས་ཆགས་མེད་ཚང་གིས་ཡང་ནས་ཡང་དུ་ནན་གྱིས་གསུངས་ཡོད་དོ། །དེས་ན་ས་འདི་ནས་ནུབ་ཀྱི་ཕྱོགས་རོལ་དུ་ནུབ་བདེ་བ་ཅན་གྱི་ཞིང་ཁམས་ཡོད་ཅིང་། བདེ་སྐྱིད་ངོ་མཚར་ཕུན་སུམ་ཚོགས་པ་དང་། སྣང་བ་མཐའ་ཡས་ཀྱི་ཞིང་ཁམས་ན། །འཕགས་པ་མིན་པ་མི་བཞུགས་ཏེ། །རྒྱུ་དྲུག་འཁོར་བའི་མིང་ཡང་མེད། །ཅེས་གསུངས་པ་ལྟར་ཡིན་པས། མི་བདེ་སྡུག་བསྔལ་གྱི་མིང་ཡང་མི་གྲག་ལ། འོད་དཔག་མེད་པའི་སྔོན་གྱི་ཐུགས་བསྐྱེད་སྨོན་ལམ་གྱི་མཐུ་ཡིས་ཞིང་དེ་ལ་སུས་སྨོན་ལམ་བཏབ་ན་ཆོས་སྤོང་མཚམས་མེད་བྱས་པ་ལས་གཞན་སྐྱེ་ཐུབ་པར་མགོན་པོ་འོད་དཔག་མེད་ཁོང་རང་གིས་གསུངས་ཡོད་པ་རེད། བྱང་ཆུབ་མཆོག་ཏུ་སེམས་བསྐྱེད་དགེ་བཅུའི་བསོད་ནམས་རྒྱ་ཆེན་ཞིག་བསགས། དེ་ཐམས་ཅད་བདེ་བ་ཅན་ལ་སྐྱེ་བའི་ཆེད་དུ་བསྔོས་ན། སེམས་མ་གཡེང་བར་དད་གུས་རྩེ་གཅིག་གི་ཐོག་ནས་ཞིང་དེ་ལ་སྐྱེ་བའི་སྨོན་ལམ་ཐེངས་མ་བཅུ་ལ་བཏབ་ན་ཨེ་སྐྱེ་མི་སྐྱེའི་ཐེ་ཚོམ་མི་དགོས། དེ་མི་དགོས་པ་མདོ་སྡེ་དཀོན་མཆོག་བརྩེགས་པ་དང་འོད་མདོ། བདེ་ཆེན་ཞིང་བཀོད་ཀྱི་མདོ། མདོ་སྡེ་པདྨ་དཀར་པོ། འཆི་མེད་རྔ་སྒྲ་དེ་ཚོའི་ནང་དུ་ལྟོས་དང་ཤེས་རྒྱུ་ཡོད་གསུངས་པ་རེད། རང་དབང་རང་ལག་ན་ཡོད་དུས་ཞིང་ཁམས་དེ་ཚོ་གདམ་སྟེ། འགྲོ་ཆས་ཀྱི་རྒྱགས་ཕྱེ་བསྒྲུབ་དང་ནོར་མེད་རེད། ཞིང་ཁམས་དེའི་བདེ་སྐྱིད་དང་ཡོན་ཏན་བརྗོད་དགོས་ན་སེམས་ཅན་ཐམས་ཅད་སངས་རྒྱས་ནས། དེ་ཐམས་ཅད་ཀྱི་རྡོ་རྗེའི་ལྗགས་ཀྱིས་བསྐལ་བ་ཆེན་པོ་ཞིག་གི་ཚེ་ལ་བརྗོད་ཀྱང་བདེ་བ་ཅན་གྱི་ཡོན་ཏན་བརྗོད་ནུས་པ་མ་རེད། དེར་སྐྱེས་ན་ཚེ་བསྐལ་བ་གྲངས་མེད་མང་པོར་ཐུབ་ནི་རེད། དེ་ལ་སྐྱེས་རྗེས་སྐྱེ་བ་གཞན་གྱིས་བར་མི་ཆོད་པར་སངས་རྒྱས་ཐོབ་རྒྱུ་ཅན་རེད། དེར་སྐྱེས་ན་རྫུ་འཕྲུལ་ལ་ཐོགས་པ་མེད། ཤར་མངོན་དགའ་དང་ལྷོ་དཔལ་དང་ལྡན་པའི་ཞིང་ཁམས། པོ་ཊ་ལ་དང་ཨོ་རྒྱན་གྱི་ཡུལ་ལ་སོགས་པ་མཁའ་སྤྱོད་དང་ས་སྤྱོད་ཀྱི་ཞིང་ཁམས་གང་ཡིན་ཡང་ཐོགས་མེད་ཀྱིས་ཐོན་པ་དང་། དེར་སོང་ནས་ཚོགས་བསག་མཆོད་འབུལ་བྱས། དབང་དང་གདམས་ངག་ཞུས་ཏེ་ཕྱིར་ལ་ཡང་དེ་མ་ཐག་ཏུ་ཡོང་ཆོག་ཅིང་། ཞིང་ཁམས་དེ་ཚོ་ཐམས་ཅད་ལ་སྐྱེས་པ་དང་ཁྱད་པར་མེད། ཕན་ཡོན་དེ་ཚོར་བསམ་བློ་བཏང་སྟེ་ཆོས་གཅིག་ཆོག་བདེ་སྨོན་ལ་ཐུགས་དམ་གྱིས། ལྷ་གཅིག་ཆོག་འོད་དཔག་མེད་ལ་གསོལ་བ་ཐོབ་དང་། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའི་བཞུགས་གྲལ་ནས་རང་གཞན་གྱི་དོན་གཉིས་ལྷུན་གྱིས་འགྲུབ་པར་གསུངས་ཡོད། ཆགས་མེད་ཚང་ཁོང་རང་གི་མ་དང་ཉེ་གནས་དང་སྒོ་ཁྱི་ཡན་ཆོད་འབྲེལ་བ་ཐོགས་ཚད་བདེ་བ་ཅན་ལ་མཉམ་དུ་ཁྲིད་དེ་སྐྱེ་སོང་བའི་ལོ་རྒྱུས་ཀྱང་ཡོད་པ་ཡིན། དེ་ལྟ་བུ་རྣམ་དག་བདེ་ཆེན་ཞིང་གི་སྨོན་ལམ་འཆད་པའི་སྐབས་ལས།

གཉིས་པ་བདེ་བ་ཅན་ལ་སྐྱེ་ཚུལ་གྱི་དབང་དུ་བྱས་པའི་སྨོན་ལམ།

ཆགས་ཞེན་འཁྲི་བ་ཀུན་བཅད་ནས། །བྱ་རྒོད་རྙི་ལས་ཐར་བ་བཞིན། །ནུབ་ཀྱི་ཕྱོགས་ཀྱི་ནམ་མཁའ་ལ། །འཇིག་རྟེན་ཁམས་ནི་གྲངས་མེད་པ། །སྐད་ཅིག་ཡུད་ལ་བགྲོད་བྱས་ནས། །བདེ་བ་ཅན་དུ་ཕྱིན་པར་ཤོག །ཅེས་གསུངས་ཏེ། རྒྱལ་བ་ཀློང་ཆེན་པས། ཡུལ་གྱི་བག་ཆགས་སྣོད་ཀྱི་འཇིག་རྟེན་དང་། །དེ་ལ་བརྟེན་པའི་ཡུལ་སོགས་གཟུགས་ལྔ་པོ། །དོན་གྱི་བག་ཆགས་རྣམས་ཤེས་ཚོགས་བརྒྱད་དང་། །དེ་ལ་བརྟེན་པའི་དགེ་སྡིག་ལས་རྣམས་སོ། །ལུས་ཀྱི་བག་ཆགས་འགྲོ་དྲུག་སོ་སོའི་གཟུགས། །དེ་ལ་བརྟེན་པའི་ཡན་ལག་ཉིང་ལག་གོ། ཞེས་གསུངས་པ་ལྟར། འཁོར་བའི་གནས་དོན་ལུས་གསུམ་པོ་ཆགས་སའི་ཡུལ་ཡིན་ལ། དེའི་ཆགས་ཞེན་གྱི་འཁྲི་བ་མ་ཆོད་ན་འཁོར་བའི་གནས་འདི་ལ་ཨ་འཁོར་ཡང་འཁོར་བྱས་ཏེ་འཁྱམ་པ་ཡིན་པས། དེའི་ཆགས་ཞེན་གྱི་འཁྲི་བ་ཐམས་ཅད་བཅད་ནས། བྱ་རྒོད་པོ་རྙི་ལས་ཤོར་ན་ཕྱིར་བལྟས་མེད་པར་གནམ་འཕང་གཅོད་འགྲོ་བ་ལྟར། འཇིག་རྟེན་འདིའི་སྣང་བ་མ་ནུབ་གོང་ནས་རྒྱལ་སྲས་བརྒྱད་ལ་སོགས་པ་བསུ་མར་བྱོན་ནས། འདིར་སྣང་ཡལ་བ་དང་བདེ་བ་ཅན་གྱི་ཞིང་ཁམས་ཀྱི་ཕྱོགས་སུ་འཇའ་ལམ་དར་ཐག་གིས་སྣ་དྲངས། རྔ་སིལ་རོལ་གླིང་གིས་མདུན་བསུས་ཏེ་འཇིག་རྟེན་གྲངས་མེད་ཀྱི་ཕ་རོལ་དུ། བདེ་བ་ཅན་གྱི་ཞིང་ཁམས་སུ་སྐར་མདའ་ནམ་མཁའ་ནས་བརྒྱུགས་པ་ལྟ་བུའི་མྱུར་ཁྱད་དང་། གྱད་རྩལ་ཆེན་གྱིས་མདའ་འཕང་པ་ལྟར་དུ་བདེ་བ་ཅན་དུ་བགྲོད་པར་ཤོག་ཅིག་ཅེས་པའོ།།

གསུམ་པ་བདེ་བ་ཅན་གྱི་ཞིང་ཁམས་ལ་སོང་སྟེ་ཡོན་ཏན་ཐོབ་ཚུལ་ལ་སྨོན་ལམ་འདེབས་པ།

དེ་རུ་སངས་རྒྱས་འོད་དཔག་མེད། །མངོན་སུམ་བཞུགས་པའི་ཞལ་མཐོང་ནས། །སྒྲིབ་པ་ཐམས་ཅད་དག་པར་ཤོག །ཅེས་གསུངས་ཏེ། ད་ལྟའི་གནས་སྐབས་ལ་དེ་འདྲའི་སླ་མོ་ཞིག་གིས་བདེ་བ་ཅན་དུ་སྐྱེའམ། ས་ལམ་གཅིག་ཀྱང་སྦྱོང་བགྲོད་མི་དགོས་པར་དག་པའི་ཞིང་དུ་སྐྱེ་ཐུབ་བམ་སྙམ་ན། བདེ་བ་ཅན་དུ་སྐྱེས་ཀྱང་མེ་ཏོག་པདྨའི་སྦུབས་ནས་ཡུན་རིང་དུ་སངས་རྒྱས་ཀྱི་ཞལ་དངོས་སུ་མི་མཇལ་བ་དང་། གསུང་མི་ཐོས་པ་ཡོད་པ་ནི་དེ་འདྲའི་རྐྱེན་གྱིས་ཡིན་པར་གསུངས། དེ་ལྟར་མིན་པར་བདེ་བ་ཅན་གྱི་ཞིང་ཁམས་དེ་རུ་སྐྱེ་བ་དང་སངས་རྒྱས་འོད་དཔག་མེད་མངོན་སུམ་དུ་བཞུགས་པའི་ཞལ་མཐོང་ནས། སྒྲིབ་པ་ཐམས་ཅད་དུས་གཅིག་ཏུ་དག་པར་ཤོག་ཅིག་ཅེས་གསུངས་པ་རེད། འོད་མདོ་ལས། དེ་དག་འགུམ་པའི་དུས་ཀྱི་ཚེ་སངས་རྒྱས་འཁོར་བཅས་མཐོང་སྟེ་དེ་དག་གི་ལས་ཀྱི་སྒྲིབ་པ་མ་ལུས་པ་ལྡོག་པར་གྱུར་ཅིག་ཅེས་སྨོན་ལམ་མཛད་ཡོད་པས། དེའི་སྨོན་ལམ་གྱི་མཐུ་གྲུབ་སྟེ་འཆི་འཕོས་ནས་བདེ་བ་ཅན་དུ་སྐྱེས་ཏེ་སངས་རྒྱས་ཀྱི་ཞལ་མཇལ། གསུང་ཐོས་པ་དང་། དེ་དང་མཉམ་དུ་མཐོང་ལམ་རྒྱུད་ལ་སྐྱེས་པ་དེ་འདྲ་རེད། སྐྱེ་གནས་བཞི་ཡི་མཆོག་གྱུར་པ། །མེ་ཏོག་པདྨའི་སྙིང་པོ་ལ། །བརྫུས་ཏེ་སྐྱེ་བ་ལེན་པར་ཤོག །ཅེས་གསུངས་ཏེ། སྐྱེ་གནས་རྣམ་བཞི་ཡི་ནང་ནས་མ་ལ་གནོད་པ་མེད་པ་དང་མངལ་གྱི་དྲི་མས་མ་གོས་པ་ལ་སོགས་པ་གང་ཐད་ནས་ཀྱང་། མཆོག་ཏུ་གྱུར་བ་རྫུས་སྐྱེས་ཡིན་ལ། རྫུས་སྐྱེས་ཀྱི་ནང་ནས་ཀྱང་མེ་ཏོག་པདྨའི་ནང་ནས་སྐྱེ་བ་འདི་མཆོག་ཡིན་པས་ན། རིན་པོ་ཆེའི་མེ་ཏོག་ནང་ཐ་གྲུ་ཡངས་ཤིང་རྒྱ་ཆེ་བ། གཞལ་མེད་ཁང་གི་རྣམ་པ་ལྟ་བུའི་པདྨའི་སྙིང་པོའི་ཟེའུ་འབྲུའི་དབུས་ནས་ཐོལ་བྱུང་དུ་འོད་ལུས་གཙང་མ་མཚན་བཟང་དང་ལྡན་པ་ཞིག་དུ་སྐྱེ་བ་ལེན་པར་ཤོག་ཅིག་ཅེས་གསུངས་པ་རེད། སྐད་ཅིག་ཉིད་ལ་ལུས་རྫོགས་ནས། །མཚན་དཔེ་ལྡན་པའི་ལུས་ཐོབ་ཤོག །ཅེས་གསུངས་ཏེ། ལུས་ཐོབ་པ་དེ་ཡང་གཞི་ནས་འཚར་ལོངས་བྱུང་དགོས་པ་དེ་འདྲ་མ་ཡིན་པར། ཐོག་མ་ཉིད་ནས་ལུས་ཀྱི་ཁོ་ལག་ཡོངས་སུ་རྫོགས་ཏེ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱེད་བཟང་པོ་བརྒྱད་ཅུ་སྟོན་པ་ཉིད་དང་ཆ་འདྲ་བ་དེ་ཉིད་དུ་ཐོབ་པར་ཤོག་ཅིག་ཅེས་གསུངས་པ་རེད། མི་སྐྱེ་དོགས་པའི་ཐེ་ཚོམ་གྱིས། །ལོ་གྲངས་ལྔ་བརྒྱའི་བར་དག་ཏུ། །ནང་དེར་བདེ་སྐྱིད་ལོངས་སྤྱོད་ལྡན། །སངས་རྒྱས་གསུང་ནི་ཐོས་ན་ཡང་། །མེ་ཏོག་ཁ་ནི་མི་བྱེ་བར། །སངས་རྒྱས་ཞལ་མཇལ་འཕྱི་བའི་སྐྱོན། །དེ་འདྲ་བདག་ལ་མི་འབྱུང་ཤོག །ཅེས་གསུངས་ཏེ། ཞིང་ཁམས་དེའི་བྱང་ཆུབ་སེམས་དཔའི་འཁོར་དུ་སྐྱེས་ཀྱང་། རེ་ཞིག་གི་ཚེ་ལ་སྔར་བཤད་པའི་ཕན་ཡོན་ཐམས་ཅད་ལས་ཉམས་བྱེད་ཀྱི་རྒྱུ་ཅི་ཞིག་ཡིན་ཞེ་ན། རྒྱུ་བཞི་བསྒྲུབས་ཀྱང་ཞིང་གི་ཡོན་ཏན་དང་དེའི་རྒྱུ་དེ་ལྟ་བུ་ཞིག་གིས་སྐྱེ་ཐུབ་བམ་སྙམ་པའི་བདེ་བར་གཤེགས་པའི་བཀའ་ལ་མི་སྐྱེ་བར་དོགས་པའི་ཐེ་ཚོམ་ཤོར་ན། ཐེ་ཚོམ་ཤོར་བའི་ཉེས་སྒྲིབ་ཀྱིས་ཞིང་ཁམས་དེའི་མེ་ཏོག་པདྨའི་སྦུབས་ནས་ལོ་གྲངས་ལྔ་བརྒྱའི་བར་དུ། མེ་ཏོག་པདྨའི་སྦུབས་སུ་ལུས་ཏེ་མེ་ཏོག་མྱུར་དུ་མི་ཕྱེ་བར་སངས་རྒྱས་ཀྱི་ཞལ་མཇལ་འཕྱི་བའི་སྐྱོན་དེ་འདྲ་མི་འབྱུང་བར་ཤོག་ཅིག་ཅེས་གསུངས། འདིར་སངས་རྒྱས་ཀྱི་སྐུའི་འོད་ཟེར་ཕོག་ཀྱང་སྐུ་དངོས་སུ་མི་མཇལ་བར་གསུང་ཐོས་པ་རེད་གསུངས་པ་འདི་དང་། མཐོང་བ་ལས་ཉམས་ན་ཆོས་ཐོས་པ་ལས་ཀྱང་ཉམས་པ་ཡིན་གསུངས་པའི་བཞེད་པ་འདྲ་མིན་ཅུང་ཟད་རེ་ཡོད་མོད། གསུང་ཙམ་ཐོས་ཀྱང་ཇི་བཞིན་པར་དམིགས་རྣམ་གྱི་བྱེ་བྲག་མ་ཕྱེ་བ་དང་། ད་དུང་སྒྲིབ་པ་མ་དག་པའི་མཐུ་དང་སྦྱར་ན། སྐུའི་འོད་ཟེར་ཕོག་པ་ལས་སྐུའི་རྣམ་པ་དངོས་སུ་མ་མཐོང་བ་དེ་དང་འདྲ་བར། གསུང་ལ་ཡང་དེ་བཞིན་དུ་སྦྱར་ན་དགོངས་པ་གོང་འོག་སྒྲིག་ཐུབ་པ་རེད། སྐྱེས་མ་ཐག་ཏུ་མེ་ཏོག་བྱེ། །འོད་དཔག་མེད་པའི་ཞལ་མཐོང་ཤོག །ཅེས་གསུངས་ཏེ། ཐེ་ཚོམ་གྱི་སྐྱོན་དང་ལོག་རྟོག་གི་དྲི་མ་དང་བྲལ་བའི་དབང་གིས་ཞིང་ཁམས་བདེ་བ་ཅན་ལ་བརྫུས་དེ་སྐྱེས་མ་ཐག་ཏུ། རིན་པོ་ཆེའི་མེ་ཏོག་པདྨ་ཁ་རང་ཕྱེར་གྱུར་ནས་སངས་རྒྱས་འོད་དཔག་མེད་པའི་སྐུ་མཚན་དཔེའི་ཞལ་མཐོང་། གསུང་ཚངས་དབྱངས་ཀྱི་ཆོས་སྒྲ་ཐོས་པར་ཤོག་ཅིག་ཅེས་གསུངས་སོ། །བསོད་ནམས་སྟོབས་དང་རྫུ་འཕྲུལ་གྱིས། །ལག་པའི་མཐིལ་ནས་མཆོད་པའི་སྤྲིན། །བསམ་མི་ཁྱབ་པར་སྤྲོས་བྱས་ནས། །སངས་རྒྱས་འཁོར་བཅས་མཆོད་པར་ཤོག །ཅེས་གསུངས་ཏེ། སྔར་བསོད་ནམས་བསགས་པའི་འབྲས་བུ་ལ། ད་ལྟ་སངས་རྒྱས་འོད་དཔག་མེད་པའི་མཚན་ཐོས། དེ་ལ་དད་ཅིང་འདུན་པ་བསྐྱེད་པའི་སྐལ་བ་བཟང་པོ་ཐོབ། དེ་ཐོབ་པ་དེ་ཡང་བསྐལ་བ་བཟང་པོ་ཡིན་པ་དེ་ལ་བརྟེན་ནས་བདེ་བ་ཅན་གྱི་ཞིང་དུ་སྐྱེ་བའི་རྒྱུ་བཞི་བསྒྲུབས་ན། དེའི་འབྲས་བུ་བདེ་བ་ཅན་གྱི་ཞིང་ཁམས་སུ་སྐྱེས་མ་ཐག་ཏུ་སྔར་བསགས་བསོད་ནམས་ཀྱི་དབང་དང་། རྫུ་འཕྲུལ་དང་མངོན་ཤེས་རང་ཆས་སུ་ཡོད་པའི་དབང་གིས་རང་གི་ལག་པའི་མཐིལ་ནས་གང་འདོད་མཆོད་པའི་སྤྲིན་གྱི་ཕུང་པོ། བསམ་གྱིས་མི་ཁྱབ་པ་ཟད་པ་མེད་པ་ཀུན་བཟང་མཆོད་པའི་སྤྲིན་དང་འདྲ་བ་མང་པོ་སྤྲོས་ཏེ་སངས་རྒྱས་འཁོར་དང་བཅས་པར་མཆོད་པར་ཤོག་ཅིག་ཅེས་གསུངས། དུས་རྒྱུན་དུ་དངོས་པོའི་འབྱོར་བ་ཆེ་ཆུང་ལ་མ་ལྟོས་པར་བསམ་པ་རྣམ་པར་དག་པས་མཆོད་པ་རྒྱུན་མི་ཆད་པར་འབུལ་རྒྱུ་དེ་གནད་ཆེ་བ་རེད། ད་ལྟའི་བསོད་ནམས་བསགས་སྟོབས་ཆེ་ཆུང་གིས་ལྷ་ཡུལ་དུ་སྐྱེས་ཀྱང་རྒྱན་དང་འབྱོར་བ་ལ་ཁྱད་པར་ཡོད་པ་ལྟར། སྤྱིར་བསོད་ནམས་ཀྱི་ཚོགས་མ་བསགས་ན་བདེ་བ་ཅན་ལ་སྐྱེ་བའི་རྒྱུ་བཞིའི་ནང་གི་གཙོ་བོ་གཅིག་མི་ཚང་ལ། བདེ་བ་ཅན་ལ་སྐྱེ་ཐུབ་པ་ཡང་མ་རེད། ཚོགས་ཁྱད་པར་ཅན་བསགས་ན་དེ་བས་ཀྱང་འབྱོར་བའི་ལོངས་སྤྱོད་དང་། མཆོད་པའི་རྣམ་གྲངས་རླབས་ཆེ་ཆུང་མི་འདྲ་ཞིང་། མཆོད་པ་རྣམ་པར་དག་མ་དག་ཟེར་བ་དེའང་གཅིག་སེར་སྣ་མེད་པ། གཉིས་དངོས་འཛིན་གྱི་རྣམ་རྟོག་དང་བྲལ་བ། གསུམ་ལྷག་བསམ་དག་པས་མཐའ་ཡས་སེམས་ཅན་གྱི་དོན་དུ་བསམ་པ། བཞི་རྡུལ་སྙེད་སངས་རྒྱས་ཀྱི་ཞིང་ཁམས་རབ་འབྱམས་ན་བཞུགས་པའི་མཆོག་གསུམ་རྩ་གསུམ་རྒྱལ་བ་སྲས་དང་སློབ་མར་བཅས་པ་ལ། ཟད་པ་མེད་པའི་ཏིང་འཛིན་གྱི་མཐུ་ཡིས་གཙང་མར་སྦྱོང་། མང་པོར་སྤེལ། གང་འདོད་དུ་བསྒྱུར་བ་དེ་འདྲ་ཞིག་ལ་གསུངས་པ་རེད། མི་སྐྱ་ཕོ་མོ་རྣམས་ཀྱིས་ཁ་ལག་གཙང་མའི་ཐོག་ནས་མཆོད་རྫས་གཙང་མ་རེ་ལ་སེར་སྣ་མི་བྱེད་པར་འདི་མགོན་པོ་འོད་དཔག་མེད་པའི་གཙོ་བྱས་པའི་ཕྱོགས་བཅུའི་རྒྱལ་བ་སྲས་དང་བཅས་པ་ལ་འབུལ་བ་ཡིན། བདག་སོགས་སེམས་ཅན་ཐམས་ཅད་ཀྱི་ཚོགས་རྫོགས་སྒྲིབ་པ་དག་པར་ཤོག་ཅེས་བསམ་དགོས། དེ་འདྲ་སོམས་དང་རེད་ནས་ཡོད། གཙང་མི་གཙང་ཞེས་པ་འདིའང་རང་སེམས་དག་ན་དག་པ་རེད། སྤྱིར་ན་སེམས་གུ་དོག་བློ་རྒྱ་ཆུང་བས་རེད་མ་གཏོགས་ཆོས་བསྒྲུབས་ནས་སྤྲང་པོར་གྱུར་བའི་དཔེ་མེད། ལོངས་སྤྱོད་གསོག་འདོད་ན་གཏོང་དགོས། ཁྲོན་པའི་ཆུ་ནི་སྤེལ་འདོད་ན། །བཅུ་བ་ཉིད་ནི་གདམས་ངག་ཡིན། །ཞེས་གསུངས་པ་རེད། །དེས་ན་མཆོད་པ་བཤམ་ཚེ་བདུན་ཚར་གྱི་རྒྱུ་བཟང་ཞིང་གཙང་མ་ཡིན་ན་ཚེ་རབས་ཐམས་ཅད་དུ་ལུས་རྟེན་བཟང་པོ་ཐོབ་སྟེ་དབང་པོ་སྒོ་ལྔ་ཚང་ཞིང་། སེམས་རྒྱུད་བཟང་ཞིང་ཚུལ་ཁྲིམས་གཙང་མར་འགྱུར་བར་གསུངས། བདུན་ཚར་བཤམ་ཚེ་ཡ་ཡོ་མེད་པ་དྲང་མོར་བསྒྲིགས་ཏེ་གཅིག་ལ་གཅིག་གཅར་ཆེ་བ་དང་། ཧ་ཅང་ཐར་ཐོར་བྱས་ཏེ་བཤམ་མི་རུང། བདུན་ཚར་འགྲིག་པོར་བཤམས་ན་སེམས་རྒྱུད་དྲང་ཞིང་ཅི་བྱེད་རང་དབང་ཐོབ་པའི་དགོས་པ་ཡོད་ཅེས་གསུངས། ཆུ་གཙང་མས་སྣོད་རན་པར་བཀང་ན་ཤེས་རྒྱུད་ཡོན་ཏན་དུ་མས་གང་ཞིང་། གང་ན་གནས་པའི་ས་ཕྱོགས་དེར་བཀྲ་ཤིས། སོ་ཐར་གྱི་སྡོམ་པ་དེ་སྣོད་གཙང་མ་ལྟ་བུ་ཞིག་ཡིན་ན་བྱང་སེམས་ཀྱི་སྡོམ་པ་དེ་ཆུ་གཙང་མ་ལྟ་བུར་ཆགས་ནས། དེ་ལ་སྔགས་ཀྱི་སྡོམ་པ་གཟུགས་བརྙན་ལྟ་བུ་དེ་ཤར་ནས་སུམ་ལྡན་རྡོ་རྗེ་འཛིན་པ་ཆེན་པོར་འགྱུར་བའི་རྟེན་འབྲེལ་ཡོད་ཅེས་གསུངས། གཞན་ཡང་དུས་རྒྱུན་དུ་དྭངས་ཤིང་བསིལ་བའི་ཡོན་ཆབ་གཙང་མ་ཕུལ་ན་ཤེས་རྒྱུད་ཀྱི་སྡིག་ལྟུང་བྱང་སྟེ་ས་ལམ་གྱི་རྟོགས་པ་སྐྱེ་བའི་དགོས་པ་ཆེ། ཡོན་ཆབ་འདི་སྒྲུབ་སླ་ལ་སེར་སྣ་སོགས་ཀྱི་ཉེས་པ་མི་འབྱུང་བའི་མཆོད་པ་བཟང་པོ་ཡིན་པ་རེད། དབྱར་ཁ་ནམ་ཟླ་ཡག་དུས་ཆུ་གཙང་མ་ཡོད་སའི་ཆུ་ཁ་ཞིག་ཏུ་གུར་ཆུང་ཞིག་ཕུབ་ནས་ཡོན་ཆབ་འབུམ་ཐེར་ཞིག་གསོགས་དང་སེར་སྣ་མེད་པའི་བསོད་ནམས་ཆེན་པོ་བསགས་འགྲོ། ཡང་བླ་མ་འགའ་ཞིག་གིས་མཆོད་པ་བཤམ་དུས་བདུན་ཚར་དྲང་མོར་བསྒྲིགས་ནས་བཤམ་ན། རང་རྒྱུད་དྲང་བར་མ་ཟད་ཆོས་གང་བྱས་ལ་བར་ཆད་མེད་ཅིང་ལམ་ལ་འགྲོ། ཆུ་བླུག་དུས་བདུན་ཚར་ཁ་གང་ན་སྒྲུབ་པ་པོ་དང་སྦྱིན་པའི་བདག་པོ་ཁོ་རང་འཚོ་བ་འབྱོར་ཞིང་ལོངས་སྤྱོད་རྒྱས་པ་ལ་ཕན། ཡང་ཆུས་གང་ཆེ་མ་སོང་ན་རིག་པ་བརྟན། ཆུ་ཕྱིར་འབོ་མ་ཤོར་ན་ཚུལ་ཁྲིམས་གཙང་ཞིང་འཁོར་འདུས། ཆུ་དྭངས་ཤིང་བསིལ་བའི་གཙང་མ་ཕུལ་ན་རིག་པ་དྭངས་ཤིང་ཆོས་ལ་ངེས་ཤེས་སྐྱེ། དེ་ལ་སོགས་པའི་དགོས་པ་ཡོད་པར་གསུངས་སྲོལ་ཡོད། རང་རེ་བོད་ན་ཡོད་པའི་ཆུ་གཙང་འདི་འདྲ་རྒྱ་དཀར་ནག་སོགས་ཡུལ་གཞན་ལ་ཧ་ཅང་དཀོན། འདི་ཚོ་ཚོགས་བསག་པའི་དངོས་པོ་འབྱོར་བ་བཟང་པོ་ཡིན་པས། ཅི་སྡུག་རུང་མཐའ་ན་ཆུ་མཆོད་བཟང་པོ་རེ་གཡོ་མི་བྱེད་པར་འབུལ་དགོས། ཅི་འདྲའི་བྲེལ་བ་ཆེ་རུང་བདུན་ཚར་ཆ་གཅིག་འབུལ་ལོང་ཡོད། དཀོན་མཆོག་གི་རྟེན་དེ་ཚོ་མཐོ་ས་གཙང་སར་བཞུགས་སུ་གསོལ། དེའི་མདུན་དུ་མཆོད་ཁྲི་སྟེགས་བུ་ཅི་འདྲ་ཞིག་ཡོད་ཀྱང་གཙང་མར་བྱས། དེ་ནས་མཆོད་རྫས་དང་རྟེན་ལ་ཁ་རླངས་མི་མངག་ཁ་ལག་གཙང་མར་བྱས་ཏེ་མཆོད་སྤྲིན་གྱི་གཟུངས་དང་ཡན་ལག་བདུན་པ་ཚོར་སྦྲགས་ཏེ་མཆོད་པ་འབུལ་དགོས། དེ་ནས་ཕྱག་ཁ་ཤས་བཙལ་ནས་བྱང་སྡོམ་ཆགས་མེད་ཀྱིས་ལེན་དགོས་པ་རེད། ཁྱིམ་པ་ཕོ་མོ་དག་གིས་ཀྱང་ཁ་ཏོན་མཆོད་ཁང་ནས་ནངས་མོ་མཆོད་པ་བཤམས་ཚར་བའི་འཕྲོ་ནས་བཏོན་ན་བཟང་། དེ་མིན་ཡར་སྒྱེད་ཁུག་ནས་ཕྱོགས་ཅིག་ནས་ཁ་ཏོན་འདོན་ཞོར་ཕྱོགས་ཅིག་ནས་སྐད་ཆ་བཤད་ཞོར་དང་ཁ་ལན་ཚིག་ལན་སྨྲ་ཞོར། ཞེ་ནས་མི་དྲན་དགུ་དྲན་འདི་བཏོན་ཚར་དུས་འདི་ལས་དགོས་སྙམ་སྟེ་དེའི་སྐོར་རྐྱང་པ་ལ་འདེང་རྒྱག་གིན་བསྡད་ན་བཏོན་པ་དེ་རྣམ་པར་དག་པ་ཞིག་མི་ཡོང་། གནའ་དུས་ཞིག་ལ་ཅིག་གིས་ཐུན་སྡོམ་རྒྱུ་དེ་ངོ་མ་བཟང་གི་ཟེར། ཅི་རེད་ཅེས་དྲིས་དུས། ངས་ལོ་དུ་མའི་སྔོན་ལ་སྒྱོ་སྟོང་ཞིག་གཅིག་ལ་གཡར་བ་དེ། ཐུན་སྡོམ་དུས་དྲན་བཞག་ཐལ་ཟེར། དེ་འདྲ་དེས་ཅི་ཡང་མི་འོང་མེ་ཏོག་དང་མར་མེ་སྤོས་དག་རྒྱལ་བ་སྲས་བཅས་ལ་ཕུལ་ན་བསོད་ནམས་ཆེ་བར་མདོའི་ནང་དུ་མང་དུ་གསུངས། ཁྱད་པར་དུ་མར་མེ་ཕུལ་ན་བསོད་ནམས་ཆེ་བ། སྤྱན་རས་གཟིགས་ཀྱི་མདོ་ལས། བདེ་གཤེགས་མཆོད་དོན་མར་མེ་ཕུལ་བ་ན། །རྣམ་གྲོལ་མཆོག་མངའ་སྟོབས་བཅུ་རྣམ་ལྡན་ཞིང་། །དེ་བཞིན་མ་འདྲེས་ཆོས་ཀྱི་ཕ་རོལ་ཕྱིན། །ཀུན་ནས་གཞན་ལྡན་བདེ་བར་གཤེགས་པར་འགྱུར། །ཞེས་གསུངས། གནའ་དབུལ་མོ་བསྙེན་དགའ་མས་མར་མེ་ཞིག་ཕུལ་བའི་བསོད་ནམས་ཀྱིས་སངས་རྒྱས་མར་མེ་མཛད་དུ་སངས་རྒྱས་པའི་ལུང་བསྟན་ཐོབ་པ་ཡིན། མཆོད་སྦྱིན་གང་ལའང་དངོས་པོ་ཆུང་ཆུང་ཞིག་བཏང་ཡང་བསམ་པ་དག་ན་བསོད་ནམས་ཆེན་པོ་འཐོབ་རྒྱུ་ཡོད་པ་རེད། གནའ་རྫི་བོ་ཞིག་གིས་རང་གི་རྫི་བྲོ་ལྷག་མ་གྲོག་ཚང་ཞིག་གི་ནང་དུ་བཏབ་པས་འབྲས་བུར་ཡུལ་གྲུ་ཆེན་པོ་ཞིག་གི་རྒྱལ་པོར་སྐྱེས་སོང་བའི་ལོ་རྒྱུས་དང་། ཡང་བུད་མེད་ཅིག་གིས་ཁྱི་ལྟོགས་པ་ཤི་ལ་ཉེ་བ་ཅིག་ལ་ཟས་བསྩལ་བའི་འབྲས་བུར། བུད་མེད་དེ་ཤི་ནས་གཤིན་རྗེའི་ལས་མཁན་གླང་མགོ་ཅན་ཞིག་གིས་དམྱལ་བའི་ནང་དུ་མར་ཁྲིད་ཆས་བྱེད་དུས། ལས་མཁན་ཁྱི་མགོ་ཅན་ཞིག་ཐོན་ནས་གླང་མགོ་ཅན་དང་འཛིང་རེས་བྱས་པའི་བར་དེ་ནས། བུད་མེད་དེ་ལམ་དཀར་པོ་ཞིག་གི་ནང་དུ་ཡར་བྲོས་ནས་ཐར་སོང་རབས་ཡོད་པ་རེད། གཙོ་ཆེ་བ་དངོས་པོ་ཆེ་ཆུང་དང་དངོས་པོ་འབུལ་རྒྱུ་ཡོད་མེད་རྐྱང་པ་ཞིག་ལ་མཆོད་པ་རྣམ་པར་དག་མི་དག་མི་ཟེར། མཆོད་པ་རྣམ་པར་ཨེ་དག་བསམ་ན་བསམ་པ་རྣམ་པར་དག་དགོས། གནའ་སྤྲང་པོ་ཞིག་གིས་ལམ་ཁ་ཞིག་ནས་དགེ་འདུན་པ་མང་པོ་བྱོན་པ་མཐོང་སྟེ། དད་པའི་ཤུགས་ཀྱིས་འདི་རྣམ་པ་ལ་ལྷའི་བདུད་རྩི་ལ་སོགས་པ་མཆོད་རྒྱུ་ཞིག་ང་ལ་ཡོད་ན་ཅི་མ་རུང་བསམས་སྟེ། སྔ་དྲོ་དེ་སེམས་ལ་ཤར་བས་ཕྱི་དྲོ་དེས་བསོད་ནམས་ཐོབ་སྟེ་ཚོང་དཔོན་ཞིག་གི་གོ་ས་ཐོབ་ནས་ནོར་མང་པོ་ལག་ཏུ་ཐོབ། སྔོན་རང་གི་བསམས་པ་བཞིན་དུ་ལྷའི་བདུད་རྩི་འདྲ་བའི་བཟའ་བཏུང་དང་མཆོད་རྫས་ཀྱིས་དགེ་འདུན་ལ་མཆོད་པ་བྱས་སོ། །ལར་བྱ་བ་གང་བསྒྲུབ་ན་ཐབས་ཤེས་དགོས། ཐབས་དམ་པ་ཉམས་སུ་བླངས་ན་ཕན་ཐོགས་རང་ལ་འབྱུང་། གནའ་ཞིག་ལ་ཚོང་དཔོན་ཞིག་རྒྱ་གར་གྱི་མཐའ་མཚམས་ཀྱི་ཕྱོགས་ཤིག་ལ་ཚོང་རྒྱག་ཏུ་སོང་། འགྲོ་ཁར་ཁོ་རང་གི་ཁྱིམ་མི་ཚང་མ་ལ་མཁོ་བའི་ཅ་ལག་ཅི་ཞིག་ཁྱེར་དགོས་ཞེས་དྲིས། ཁྱིམ་མི་ཚང་མས་རང་རང་གི་མཁོ་ཆས་དག་དགོས་ཞེས་སྨྲས། ཁོ་རང་ཚང་གི་ཁྱིམ་ན་ནེ་ཙོ་སྨྲ་མཁན་མི་སྐད་བཤད་ཤེས་པ་འདེང་ཆེན་ཞིག་ཡོད་པ་དེར་ཁྱོད་ལ་ཅི་ཞིག་དགོས་ཞེས་དྲིས་ཚེ། ནེ་ཙོས་ང་ལ་གཞན་པ་ཅི་ཡང་ཁྱེར་ཡོང་མི་དགོས། སྐད་ཞིག་སྐུར་རྒྱུ་ཡོད། ཁྱོད་འགྲོ་སའི་ལམ་ནས་ནེ་ཙོའི་ཁྱུ་ཆེན་པོ་ཞིག་དང་འཕྲད་ན་ཐང་། འཕྲད་ན་དེའི་ཁྱུ་དེར་སོང་ལ་ནེ་ཙོ་སྨྲ་མཁན་གྱིས་ཆ་འདི་བསྐུར་སོང་ཞེས་ཤོད་ཅིག ཁྱེད་རྣམས་བདེ་འཚམས་ཀྱི་ཐོག་ནས་བཟའ་ཤིང་གི་ར་བ་ན་སྐྱིད་པོར་བྱས་ཏེ་བསྡད་ཡོད་པར་ང་དགའ་བཞིན་ཡོད། ང་ནི་མིའི་ལག་ལ་ལྷུང་སྟེ་གཟེབ་ཀྱི་ནང་དུ་བཙུད་སོང་། དེའི་ནང་ནས་ཐར་ཐབས་ཅི་བྱས་ན་བཟང་ཞེས་བཤད་རོགས་གྱིས་དང་། དེ་མིན་ཅི་ཡང་མི་དགོས་ཞེས་སྨྲས། ཚོང་དཔོན་གྱིས་དེ་ལྟར་ཁས་བླངས་ཤིང་ཞེ་ལ་བཞག་སྟེ་བུད་སོང་། ཚོང་དཔོན་ལམ་ལ་ཆས་ཏེ་ཟླ་ལམ་འགའ་ཞིག་ཏུ་སོང་དུས། ཉིན་ཞིག་ལ་ནེ་ཙོའི་ཁྱུ་ཆེན་པོ་ཞིག་དང་འཕྲད། དེའི་ཁྱུ་དེ་ལ་སོང་ནས་ནེ་ཙོ་སྨྲ་མཁན་གྱི་ཆ་དེ་ཆད་ལུས་མེད་པར་བཤད་དུས། དེ་མ་ཐག་ཏུ་ནེ་ཙོ་དེ་རྣམས་ཀྱི་ནང་ནས་གཅིག་སེམས་སྡུག་ནས་དྲན་མེད་དུ་བརྒྱལ་བ་ལྟ་བུའི་ཉམས་བསྟན་ཏེ། གཤོག་པ་ལྷེབ་ལྷེབ་བྱས་ཏེ་སྐད་ཅིག་དེའི་ཐོག་ནས་ལྗོན་ཤིང་གི་རྩེ་ནས་ས་ལ་ལྷུང་སྟེ་ཤི་བའི་ཚུལ་བསྟན། ཚོང་དཔོན་གྱི་སེམས་སུ་ཆ་དེ་བཤད་པས་ཡིན་ཐལ་སྡིག་པ་ཆེན་པོ་ཞིག་བསགས་བཞག་ཐལ་བསམས་ཏེ་འགྱོད་པ་ཆེན་པོ་སྐྱེས། དེ་ནས་ཚོང་དཔོན་ཚོང་རྒྱག་སའི་ས་ནས་ཚོང་ཐམས་ཅད་ཕོག་སྟེ་ཕྱིར་ཡུལ་དུ་འཁོར། ནེ་ཙོས་ངས་ཆ་སྐུར་བ་དེ་འཕྲོད་ཨེ་སོང་ཞེས་སྨྲས། ཚོང་དཔོན་གྱིས་ཆ་འཕྲོད་སོང་། ང་འདི་ནས་སོང་བའི་ཟླ་ལམ་གཉིས་ལྟ་བུ་ཞིག་གི་ས་ཆ་ནས་ནེ་ཙོའི་ཁྱུ་ཆེན་པོ་ཞིག་དང་འཕྲད། དེའི་དཀྱིལ་དུ་སོང་ནས་ཁྱོད་རང་གིས་ཆ་བསྐུར་བ་ལྟར་བཤད་པ་ཡིན། དེ་གོ་བ་དང་དེའི་ནང་གི་ནེ་ཙོ་གཅིག་སྐད་ཆ་དེས་རྐྱེན་ལྟ་བུ་བྱས་ཏེ་ཤི་ཐལ་ཞེས་སྨྲས། དེ་གོ་བ་དང་མཉམ་དུ་ནེ་ཙོ་སྨྲ་མཁན་སྡུག་བསྔལ་བའི་ཉམས་ལྟར་བྱས་ཏེ་ཚང་ནང་ནས་གློ་བུར་དུ་ཤི་སོང་བ་ལྟར་གྱུར། ཚོང་དཔོན་འགྱོད་པ་ཆེན་པོ་སྐྱེས་ཏེ་ངས་ཆ་དེ་ཕར་ཁུར་ཚུར་ཁུར་གྱིས་དོན་མེད་ཀྱི་ནེ་ཙོ་གཉིས་དེའི་རྐྱེན་གྱིས་ཤི་སོང་། ངས་ནེ་ཙོ་སྨྲ་མཁན་སྙིང་རྗེ་བ་དེ་ཡང་མེད་པར་བྱས་ཐལ་སྙམ་ནས། རོ་ཚང་གི་ནང་ནས་ཕྱིར་ཕུད་དེ་ཟུར་དུ་བཞག་ནས་སེམས་སྡུག་བྱས་ཏེ་ངུས་ནས་བསྡད། ནེ་ཙོ་ཤི་ཁུལ་ཡིན་པས་མཚམས་ཤིག་ལ་ཡར་ལངས་ནས་རྒྱ་གར་གྱི་ཕྱོགས་སུ་འཕུར་སོང་། དེ་ལ་བལྟས་དུས་ནེ་ཙོ་སྔུན་མ་དེས་ཀྱང་ཤི་ཁུལ་ཡིན་པ་དེ་ད་གཟོད་ཤེས། ནེ་ཙོ་སྔོན་མ་དེས་ཤི་ཁུལ་བྱས་ནས་འཕུར་ལ་ཤོག་ཟེར་བའི་བརྡ་བསྟན་དུས་རྗེས་མ་དེས་དེ་ལྟར་བྱས་ནས་ཐར། བླ་མ་དམ་པ་ཞིག་གིས་འཁོར་བ་ལས་ཐར་བའི་ཐབས་བསྟན་དུས། སློབ་མ་རྣམས་ཀྱིས་དམ་པའི་ཆོས་བླ་མས་ཇི་ལྟར་བསྟན་པ་བཞིན་དུ་ཉམས་སུ་བླངས་ན་འཁོར་བ་ལས་ཐར་ཏེ་བདེ་ཆེན་དག་པའི་ཞིང་ཁམས་སུ་འགྲོ་ཐུབ། ནེ་ཙོ་སྔོན་མས་བརྡ་བྱས་པར་ནེ་ཙོ་རྗེས་མས་དེ་ལྟར་བྱས་ནས་ཐར་བ་དེ་དང་གཅིག་མཚུངས་རེད། ཡང་གནའ་སྔོན་མ་ཁྱིམ་ཚང་ཞིག་ལ་མི་ལོང་བ་ཞིག་ཡོད། སྟོན་ཁ་ཞིང་ལས་བྲེལ་བ་ཆེ་དུས་ཁྱིམ་གྱི་མི་ཚང་མ་ཞིང་ནང་དུ་ལོ་བརྔ་སར་སོང་། དེ་ཚང་གིས་ལོང་བ་ཤུལ་སྲུང་དུ་བཞག ལོང་བ་ཉིན་མང་པོར་གཅིག་པུར་འདུག་ཚོད་མ་ཡོད་པར་ཉིན་ཞིག་གནམ་གཤིས་ཡག་དུས་ཤིག་ལ་ཁམས་གསེང་དུ་འགྲོ་དགོས་བསམས་ཏེ་སོང་། སོང་སོང་མཐར་ཐག་རིང་ཞིག་ལ་ཐོན། ད་ཕྱིར་ཡུལ་དུ་ལོག་བསམ་དུས་ཕྱོགས་ནོར་ནས་མགོ་འཐོམས་ཏེ་འགྲོ་སའི་ལམ་མ་རྙེད། ད་ཅི་བྱས་ན་དགའ་བསམ་ནས་བསྡད། ཁོ་རང་ལ་མིག་ཡོད་པ་མ་རེད་དེ་རྣ་བ་ཡོད། བར་སྐབས་ཤིག་ལ་ཐག་ཉེ་ས་ཞིག་ན་བ་ལང་གི་ཁྱུ་ཞིག་ཡོད་པར་གོ་ཐོས་བྱུང་སྟེ། དེའི་ཕྱོགས་སུ་གཏད་དེ་སོང་། གམ་ལ་འབྱོར་དུས་ཁོ་རང་ཚང་གི་བ་ལང་རྣམས་ཡིན་པར་ངོ་ཤེས། སྐབས་དེར་ཁོ་རང་གིས་ཐབས་ཤིག་དྲན། གླང་ངེད་ཚང་གི་གླང་རེད་འགྲོ་ས་ཁྱིམ་ལ་འགྲོ། གླང་ཞིག་གི་རྔ་མ་ལག་ཏུ་ཐེབ་ན་དེ་ལ་བཟུང་ནས་མ་མངགས་ན་ལམ་འཕྱུག་འགྲོ་ས་ཞིག་ཡོད་པ་མ་རེད་བསམས་ཏེ། གླང་ཞིག་གི་རྔ་མ་ཨེ་ཟིན་བལྟས་ཚེ་ཟིན། དེ་ནས་གླང་རྒན་གྱི་རྔ་མར་འབྱར་སྟེ་གཏན་ནས་མ་མངགས་པར་རྡོ་ཚེར་མ་ས་ཆ་འཇམ་རྩུབ་གང་ལ་སོང་ན་དེའི་རྗེས་དེད་ནས་བརྒྱུགས། དགོང་མོ་ཁྱིམ་ལ་ཏག་ཏག་ཐོན། དམ་པ་གོང་མའི་གསུང་གི་ནང་དུ་ལོང་བས་གླང་རྔ་ཟིན་པ་དང་འདྲ་བ་ཟིན་ནས་མ་ཤོར་བར་བྱེད་དགོས་གསུངས་པའི་དཔེ་དེ་ཡོང་བ་རེད། བླ་མ་དགེ་བའི་བཤེས་གཉེན་གྱིས་བྱམས་སྙིང་རྗེ་བྱང་ཆུབ་སེམས་ཀྱི་གདམས་པ་ཚོགས་གསོག་ལུགས་སྒྲིབ་པ་སྦྱོང་ལུགས་བསྟན་པ་རྣམས་རྐྱེན་ངན་གང་བྱུང་ཡང་མངག་མི་གཏོང་པར་ཉམས་སུ་བླངས་ན། ནམ་ཞིག་སངས་རྒྱས་ཀྱི་སར་ཐོན་འགྲོ་རྒྱུ་ཡོད། གདམས་ངག་དམ་པའི་ལེགས་བཤད་ལས་ཉན་དགོས། དེ་བས་ཁྱེད་ཚོས་ཀུན་བཟང་ཞལ་ལུང་ཚར་མང་པོ་ལྟ་ཞེས་ཁས་ལེན་གྱིན་ཡོད་པ་རེད། འདིར་ལུང་མ་ཐོབ་པ་ཞིག་གིས་ཀུན་བཟང་ཞལ་ལུང་ལྟ་རུང་ངམ་སྙམ་ན། སྤྱིར་ཀུན་བཟང་ཞལ་ལུང་འདི་སྔོན་འགྲོའི་ཁྲིད་ཡིག་རེད། གསང་སྔགས་ཀྱི་དངོས་གཞིའི་ཁྲིད་དང་འདྲ་བར་ལྟ་རྒྱུ་ཉན་རྒྱུ་ཙམ་ཞིག་ལ་དེ་འདྲའི་བཀའ་རྒྱ་དམ་པོ་ཡོད་པ་མ་རེད། འདི་ནི་མདོ་ལུགས་སྔགས་དང་འབྲེལ་བ་དཔེར་ན་ཇོ་བོའི་ལམ་སྒྲོན་དང་རྗེའི་ལམ་རིམ་སོགས་དང་ཕྱོགས་འདྲ་བ་རེད། དེའི་ནང་གི་སེམས་ཉིད་ངལ་གསོའི་སྟོད་ཆ་འདི་འདིའི་ཁུངས་དང་ཕུགས་གཏུགས་ས་རེད། འདིའི་ཁྱད་ཆོས་ཐུན་མིན་གྱི་སྔོན་འགྲོ་རྫོགས་ཆེན་ཀློང་ཆེན་སྙིང་ཐིག་གི་བསྐྱེད་རྫོགས་དང་བསྟུན་ཏེ་གཙོ་བོ་བློ་སྦྱོང་གིས་བློ་སྦྱོང་རྒྱུ་དང་། སྔོན་འགྲོས་རྒྱུད་དག་པར་བྱེད་པའི་དེ་འདྲའི་རིམ་པ་ཅན་ཞིག་ཡིན། ཁྱད་པར་དུ་ལམ་ཟབ་བླ་མའི་རྣལ་འབྱོར་འདི་ནི་སྔོན་འགྲོ་དངོས་གཞི་གཉིས་ཀའི་སྐབས་ལ་མེད་དུ་མི་རུང་། དེས་ན་མདོ་སྔགས་ཀྱི་ཆོས་ཀྱི་སྙིང་བཅུད་ཅིག་རེད་འདུག་པས། ལུང་མ་ཐོབ་ན་ལྟ་རུང་ངམ་སྙམ་ན། འོ་ན་གཟུངས་མཆོག་ཡི་གེ་དྲུག་མ་ཆོས་ཕུང་བརྒྱད་ཁྲི་བཞི་སྟོང་གི་སྙིང་བཅུད་ཡིན་པས་དེའི་ནང་དུ་སྔོན་འགྲོ་ཕྱི་ནང་གི་གནད་དང་བསྐྱེད་རྫོགས་རྫོགས་ཆེན་གྱི་གནད་འདུས་མེད་ཟེར་བ་ཡིན་ནམ། དེས་ན་ལུང་མ་ཐོབ་ཀྱང་མ་ཎི་བཏོན་ན་ཕན་ཡོན་བྱིན་རླབས་ཡོད་ལ་བཀའ་རྒྱ་མེད། དེ་བཞིན་དུ་ཀུན་བཟང་བླ་མའི་ཞལ་ལུང་ལྟ་ཉན་སོགས་བྱས་ཀྱང་ཕན་ཡོན་དང་བྱིན་རླབས་ཡོད་པར་མ་ཟད་མཇལ་མི་རུང་བའི་བཀའ་རྒྱ་ཡང་མཛད་མེད། འདི་རྒན་གཞོན་སུ་ཡིན་ཡང་ཚར་མང་ཙམ་ལྟ་རྒྱུ་ཉན་རྒྱུ་ཚར་བའི་རྗེས་ལ་ཐུན་མོང་ཕྱིའི་སྔོན་འགྲོས་རང་རྒྱུད་ལས་སུ་རུང་། བློ་ནང་དུ་འཁོར། འཁོར་བའི་ཆོས་ལ་ངེས་འབྱུང་ཞིག་སྐྱེས་ཏེ། ཐུན་མིན་ནང་གི་སྔོན་འགྲོས་ཆོས་ལ་ངེས་ཤེས་དང་དུང་བ་ཞིག་སྐྱེ་ཡོང་དུས། དེ་དུས་ལྟ་རྒྱུ་ཉན་རྒྱུའི་མི་ཚད་ཉམས་ལེན་བྱེད་དགོས། ལུང་ཞིག་གིས་མི་ཆོག་ཁྲིད་ཞུ་དགོས། ཁྲིད་རྐྱང་བས་མི་ཆོག་པར་གདམས་པ་ཡོད་དགོས། ད་དུང་དེའི་མི་ཚད་སྙིང་ཐིག་རང་ལམ་གྱི་རྩ་གསུམ་གྱི་དབང་། མིན་ཡང་རྩ་གསུམ་ཀུན་འདུས་རིག་འཛིན་ཡབ་སྐུའི་དབང་ལྟ་བུ་ཞིག་ཞུས་ཏེ་འབུམ་ལྔའི་བསགས་སྦྱོང་གིས་འགོ་བཙུགས་ནས་ཉམས་ལེན་བྱེད་དགོས། མདོར་ན་གཙོ་བོ་བློ་སྦྱོང་གི་ཆེད་དང་ཆོས་ལ་ངེས་ཤེས་སྐྱེ་བྱེད་ཀྱི་བག་ཆགས་བཟང་པོ་འཇོག་པའི་ཆེད་དུ་ལུང་མ་ཐོབ་ཀྱང་ལྟ་ཆོག་ལ་ལྟ་དགོས། དང་པོ་ཐོས་པ་ཚོལ་བའི་ཆེད་དུ་བལྟས། དེ་ལ་བསྟེན་ནས་བསམ་སྒོམ་གཉིས་ཀའི་ཐར་བའི་ལམ་ཞིག་བཙལ་བའི་མོས་པ་བྱུང་ཚེ། དེ་དུས་སྨིན་བྱེད་ཀྱི་དབང་གྲོལ་བྱེད་ཀྱི་ཁྲིད་རྒྱབ་རྟེན་གྱི་ལུང་དང་བཅས་པ་ཡོད་དགོས་ཟེར་རྒྱུ་དེ་ངས་དགོངས་པ་བླངས་བ་རེད། འོ་ན་གནའ་སྔ་མོར་ཀུན་བཟང་ཞལ་ལུང་མི་སྐྱ་ཕོ་མོས་ལྟ་དགོས་ཤེས་པའི་སྲོལ་ཞིག་དར་སྲོལ་མེད་དོ་སྙམ་ན། ངས་ཁ་སང་སེར་རྒན་གོ་བོ་ལ་དཔེ་བླངས་ཏེ་བཤད་པ་ཡིན། དེ་དྲན་པར་གྱིས་དང་གདམས་ངག་ཡིན། གནའ་སྔོན་མ་འདྲ་ཞིག་ཡིན་ན་སྤྱིར་དུས་བཟང་པོ་དང་ཆོས་ཀྱི་ཕྱོགས་ནས་ཁྱད་པར་དུ་དུས་བཟང་པོར་ཆགས་ཡོད། དད་པ་དག་སྣང་ཅན་གྱི་མི་མང་ཟེར་ན་ཁྱད་པར་འཕགས་པའི་སྐྱེ་བུ་རེ་རེ་གཉིས་གཉིས་བྱོན་རྒྱུ་ཡོད་པ་རེད། དེང་སང་སྤྱིར་སྙིགས་མ་ལྔ་བདོ། ཁྱད་པར་དུ་ལྟ་བའི་སྙིགས་མ་ཤེས་རབ་འཆལ་བའི་སྦྱོར་སྐྱོན་ཅན་གྱིས་བསྟན་པ་རྙོག་མ་ཅན་བྱེད་པའི་དུས་ཚོད་ལ་ཁེལ། དེས་ན་མི་སྐྱ་ཕོ་མོའི་གཙོར་བྱས་པའི་ཐོས་པ་ཆུང་བའི་རིགས་བློ་ཁ་ངན་པའི་ཕྱོགས་སུ་སྒྱུར་སླ། དེ་ལྟར་སྦྱོང་བ་དམན་པ་ཚོའི་རིགས་ལ་ཀུན་བཟང་བླ་མའི་ཞལ་ལུང་འདི་གོ་སླ་ཉན་བདེ་བྱས་ཏེ་ཆེད་དུ་གསུངས་པ་རེད། སྔོན་འགྲོ་བློ་སྦྱོང་གི་ཆོས་ལ་བཀའ་རྒྱ་མི་བསྡམ་པ་དང་། དངོས་གཞི་རྫོགས་ཆེན་གྱི་ཁྲིད་སྣོད་མིན་ལ་མི་སྤེལ་བ། སྤྱིར་ཆོས་རྒྱུད་འདིའི་ཕྱག་སྲོལ་ཡིན་ལ་ཁྱད་པར་དུ་ངའི་ལུགས་ཡིན། ད་ལོར་འཛོམས་མ་ཐལ་མ་གཏོགས་སྔོན་འགྲོ་སེམས་སྦྱོང་བདུན་གྱི་དོན་ཁྲིད་ཟླ་ཁྲིད་ཅིག་ཁྲིད་སྦྱོང་དང་བཅས་པ་བྱས་ཏེ་མི་སྐྱ་ཕོ་མོ་སུ་ཞུགས་འདོད་ན་དེའི་ནང་དུ་ཞུགས་སུ་བཅུག་དགོས་བསམ། དེར་མ་ཟད་ཀློང་ཆེན་མཛོད་བདུན་གྱི་ནང་ནས་མན་ངག་མཛོད་བློ་སྦྱོང་ལྟར་དུ་བཀྲལ་ཏེ་ཚང་མར་ཐོབ་རྒྱུ་ཞིག་བྱེད་དགོས་བསམ་བཞིན་ཡོད། མདོར་བསྡུས་ན་ཀུན་བཟང་ཞལ་ལུང་འདི་མི་ཆེ་ཆུང་ཕོ་མོ་ཚང་མས་ཉན་ཆོགསྒྲ་ཙམ་ཁྱིམ་ནས་སྒྲགས་ཀྱང་བྱིན་རླབས་ཆེ། དེ་ལ་བསྟེན་ནས་ཆོས་རྣམ་དག་ཅིག་སྒྲུབ་དགོས་བསམ་སྐབས། དེ་དུས་དབང་ལུང་ཁྲིད་གསུམ་ཐོབ་དགོས། སྤྱིར་བཏང་གི་ས་འདི་ཀློང་ཆེན་སྙིང་ཐིག་གི་བསྟན་པ་དར་སའི་ས་ཆ་ཡིན། དམ་པ་གོང་མ་རྣམས་ཀྱི་ཐུགས་དམ་དགོངས་པའི་ཉམས་ལེན་གྱི་མཐིལ་ཡང་རྫོགས་པ་ཆེན་པོ་ཀློང་ཆེན་སྙིང་ཐིག་རེད། དེའི་སྐབས་ཀྱི་ཆོས་དད་སྡེ་འབངས་མང་ཆེ་བས་སྔོན་འགྲོའི་ངག་འདོན་རྒྱུནའདོན་བྱེད་ཀྱིན་ཡོད། ངག་འདོན་རྒྱུན་འདོན་བྱེད་རྒྱུ་ལ་ལུང་དགོས་པ་ཡིན་ཉམས་ལེན་གྱི་ཕྱོགས་སུ་གཏོགས། འདི་ན་ཡོད་པ་མང་ཆེ་བར་ལུང་ཐོབ་ཡོད་རྒྱུ་རེད་དེ་འདིའི་དབང་གི་ཉིན་ཡང་བསྐྱར་ལུང་ཐེངས་གཅིག་འདོན་ཆགས་ཡོད། སྔོན་འགྲོའི་ངག་འདོན་འདི་ཀུན་མཁྱེན་འཇིགས་གླིང་གི་དགོངས་གཏེར་ལ་རྡོ་གྲུབ་འཇིགས་མེད་ཕྲིན་ལས་འོད་ཟེར་ཀྱིས་ཁ་བསྐངས་མཛད་པ་ཞིག་རེད། འདི་རྩ་བ་དང་ཀུན་བཟང་ཞལ་ལུང་དེའི་འགྲེལ་བ་དང་རྒྱབ་ཆོས་རེད་ཟེར་ན་ཆོག ཀུན་བཟང་བླ་མའི་ཞལ་ལུང་ནང་གི་ཆོས་སྐད་རྣམས་བརྡ་ཁྲོལ་དུས་མདོ་སྔགས་ཀྱི་ཆོས་གང་ཞུས་ཀྱང་ཆོས་སྐད་གོ་བ་ཞིག་ཕལ་ཆེར་གྱུར་ཡོད། ཆོས་སྐད་ཙམ་ཡང་མ་གོ་ན་དོན་ཅི་ཞིག་ཟེར་གྱིན་ཡོད་ཤེས་དཀའ། མི་སྐྱ་ཕོ་མོ་རིག་གནས་ལ་སྦྱོང་མ་མྱོང་བ་རྣམས་ཅི་ཁག དཔེ་ཆ་བ་གསར་བ་རྣམས་ཀྱིས་ཀྱང་དང་པོ་ཡིག་སྐད་དང་ཆོས་སྐད་ཀྱི་འགག་སྒོ་མི་ཁྲོལ་བར་དུས་རིང་པོར་ལུས་འགྲོ། སྙིང་སྟོབས་མེད་པ་རྣམས་འགག་སྒོ་དང་པོ་དེ་ལ་ཐུག་པ་དང་ཕྱིར་ནུད་བྱེད་འགྲོ། དེ་ཚེ་དེ་བཞིན་གཤེགས་པ་དེའི། །ཕྱག་གཡས་བརྐྱངས་ནས་མགོ་ལ་བཞག །བྱང་ཆུབ་ལུང་བསྟན་ཐོབ་པར་ཤོག །ཅེས་གསུངས་ཏེ། བདེ་བ་ཅན་ལ་སྐྱེས་པ་དང་སངས་རྒྱས་འོད་དཔག་མེད་ཀྱི་ཞལ་མཇལ། མཆོད་པའི་སྤྲིན་གྱིས་རྒྱལ་བ་མཆོད་པ་དེའི་ཚེ་ན། དེ་བཞིན་གཤེགས་པ་དེའི་ཐུགས་དགྱེས་བཞིན་དུ་འཛུམ་པའི་ཞལ་མདངས་བསྟན། བརྩེ་བའི་སྤྱན་གྱིས་གཟིགས་ཏེ་བསོད་ནམས་ཀྱི་ཕུང་པོ་བརྒྱ་ཕྲག་ལས་གྲུབ་པའི་ཕྱག་གཡས་པ་རང་ཉིད་ཀྱི་མགོ་ཐོག་ཏུ་བཞག་སྟེ། བྱང་ཆུབ་སེམས་དཔའ་ག་གེ་མོ་ཁྱོད་སྔར་ཚོགས་བསགས་ཏེ་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་བྱང་ཆུབ་མཆོག་ཏུ་སེམས་བསྐྱེད་པས། ཁྱོད་ཀྱི་དད་པ་དང་མོས་པའི་ཡིད་ཀྱི་ནམ་མཁར་ཁོང་ཐུབ་པའི་དབང་པོའི་ཟླ་བ་དུས་རྟག་ཏུ་ཤར་ནས་ཡོད། སྐད་ཅིག་ཀྱང་འབྲལ་མ་མྱོང་། ད་དུང་ཁྱོད་ཀྱི་ཞུམ་པ་མེད་པའི་སེམས་བསྐྱེད་པ་དང་མི་འབྲལ་བར་བྱང་ཆུབ་ཀྱི་སྤྱོད་པ་རླབས་ཆེན་རྫོགས་སྨིན་སྦྱོང་གསུམ་གྱི་སྒོ་ནས་མཐར་ཕྱིན་པར་གྱིས་དང་མ་འོངས་པའི་དུས་ག་གེ་མོ་ཞིག་ཏུ་ཞིང་ཁམས་འདི་འདྲ་ཞིག་ལ་ཁྱོད་སངས་རྒྱས་ཀྱི་མཚན་དེ་དང་དེར་ཞེས་བྱ་བར་སངས་རྒྱས་པར་འགྱུར་རོ་ཞེས་དབུག་དབྱུང་ལུང་བསྟན་ཐོབ་པར་ཤོག་ཅིག་ཅེས་གསུངས་སོ། །ཟབ་དང་རྒྱ་ཆེའི་ཆོས་ཐོས་ནས། །རང་རྒྱུད་སྨིན་ཞིང་གྲོལ་བར་ཤོག །ཅེས་གསུངས་ཏེ། ད་ལྟ་རང་རེ་སོ་སོའི་སྐྱེ་བོའི་ས་ནས་ཟབ་རྒྱས་ཀྱི་ཆོས་སྟོན་པས་གསུངས་པ་དེ་ཐོས་པ་རེད་མོད། གཅིག་ན་ཐ་མལ་མིའི་ཡི་གེའི་སྒྲ་ཚིག་ཙམ་གྱིས་ཟབ་མོའི་དོན་མཐར་ཕྱིན་པ་ཞིག་མཚོན་མི་ཐུབ་པ་དང་། གཉིས་ན་སོ་སྐྱེ་བྱིས་པའི་བློ་མིག་གི་ནང་དུ་རྒྱ་ཆེ་བའི་བརྗོད་བྱའི་དོན་ཟབ་མོ་མི་ཤོང་བ་དང་མི་འདྲ་བར། དེ་དུས་མགོན་པོ་འོད་དཔག་མེད་པའི་མདུན་ནས་ཟབ་པ་སྟོང་བ་ཉིད་དང་། རྒྱ་ཆེ་བ་ཕར་ཕྱིན་དྲུག་གིས་བསྡུས་པའི་ཆོས་ཐོས་པར་མ་ཟད་དོན་ཁོང་དུ་ཆུད་དེ་རང་རྒྱུད་མ་སྨིན་པ་སྨིན། མ་གྲོལ་བ་གྲོལ་ཏེ་ས་ལམ་སྐད་ཅིག་གཅིག་གིས་རྫོགས་ནས་ཡོན་ཏན་རྒྱ་ཆེན་པོ་ཐོབ་པར་ཤོག་ཅིག་ཅེས་གསུངས། ད་ལྟའི་སྐབས་ནས་ཀྱང་ཆོས་ཉན་པའི་བག་ཆགས་རང་རྒྱུད་ལ་ཞོག་དང་སྐྱེ་བ་རྗེས་མར་ཐོས་པས་རང་རྒྱུད་གྲོལ་བ་དང་ཁྱད་པར་དུ་བདེ་བ་ཅན་དུ་ཆོས་འཛིན་པའི་མཆོག་ཏུ་གྱུར་ནས་སངས་རྒྱས་འོད་དཔག་མེད་པའི་སྲས་ཀྱི་ཐུ་བོར་འགྱུར་པ་རེད། ཆོས་ཉན་པ་ཙམ་གྱིས་ངས་མི་གོ་བསམས་ཏེ་སྐྱུར་མི་རུང་། བརྩོན་འགྲུས་གྱིས་མོས་པ་མ་ཞན་ན་ནམ་ཞིག་གོ་ཡོང་། ཁྱད་པར་དུ་ལྷག་པའི་ལྷ་ལ་གསོལ་བ་བཏབ་ན་ཤེས་རབ་རང་གིས་བསྒྲུབས་ན་ཆོག འདི་ནས་པཎྜི་ཏ་ནག་མོའི་ཁོལ་ཞེས་པའི་གཏམ་རྒྱུད་ཞིག་བཤད། གནའ་སྔོན་མ་རྒྱལ་པོ་ཚངས་པའི་བྱིན་ཞེས་པ་བློ་དང་ལྡན་པ་ཞིག་ཡོད་མྱོང་བ་རེད། དེས་བྲམ་ཟེ་མཆོག་སྲེད་སོགས་མཁས་པ་མང་པོ་ཞིག་བསྡུས་ནས་མཁས་པ་རྣམས་རྩོད་དུ་བཅུག བྲམ་ཟེ་མཆོག་སྲེད་ལ་རྒྱལ་པོ་ཚངས་བྱིན་མགུ་སྟེ། རྒྱལ་པོའི་བསམ་པར་མཁས་པ་དེ་དག་གི་ནང་ནས་བྲམ་ཟེ་མཆོག་སྲེད་འདི་མཁས་སོ་སྙམ་ནས། རྒྱལ་པོ་རང་ཉིད་ཀྱི་སྲས་མོ་འདེང་ཆེན་གསེར་མདོག་ཅན་ཟེར་བ་ཞིག་ཡོད་པ་དེ་ལ་ཁྱིམ་ཐབས་སུ་བྱིན་པ་རེད། བུ་མོའི་བསམ་པར་འདི་བས་ང་མཁས། གལ་ཏེ་ང་རང་ཉིད་ལས་མཁས་ཤིག་ཡོད་ན་དེའི་ཁྱིམ་ཐབས་སུ་འགྲོ་ཡི་དེ་མིན་མི་འགྲོ་སྙམ་ནས། དེ་ལྟར་སྨྲས་པས་བྲམ་ཟེ་མཆོག་སྲེད་མ་དགའ་བར། ང་ལྟ་བུའི་མཁས་པ་ཞིག་ལ་ཡང་མི་མགུ་བར་འདུག་མོད། ད་ནམ་ཞིག་ལ་མགོ་ཞིག་སྐོར་ཐུབ་པ་བྱ་དགོས་བསམ་སྟེ་བསམ་བློ་བཏང་ནས་བསྡད། དེ་ནས་བྲམ་ཟེ་མཆོག་སྲེད་ཀྱིས་མི་གླེན་པ་ཞིག་འཚོལ་ཕྱིར་དུ། གྲོང་ཁྱེར་གྱི་མཐའ་ལ་སོང་པས་གླང་རྫི་གཟུགས་མཛེས་ལ་འདུ་ཤེས་གླེན་པ་ཞིག་རྙེད། དེས་གླེན་རྟགས་ཅི་ཞིག་སྟོན་བཞིན་ཡོད་པ་རེད་ཟེར་ན། ཤིང་སྡོང་པོ་ཞིག་གི་རྩེ་མོར་སོང་ནས་རྩ་བ་གཅོད་ཀྱིན་འདུག དེས་ལས་སྟངས་ལ་བལྟས་ཏེ་གླེན་པ་ཞིག་རེད་བསམ་ནས་ག་ལེར་ལྐོག་ནས་ཁྲིད་ཡོང་སྟེ་གླང་རྫི་གྲིབ་མའི་ནང་དུ་བཞག་ནས་འོ་མས་བསྐུ་མཉེ་བྱས། ཟས་བཟང་པོ་བྱིན། གོས་ཡག་པ་བསྐོན་ཏེ་ཨོཾ་སྭ་སྟི་ཟེར་བ་ཞིག་ཁ་ཏོན་དུ་བྱང་དུ་བཅུག དེ་ནས་བྲམ་ཟེ་མཆོག་སྲེད་ཀྱིས་རྒྱལ་པོ་ལ་སྨྲས་པ། ང་ལ་སློབ་དཔོན་ཞིག་ཡོད། ང་ལས་ལྡབ་མང་པོས་མཁས་པའི་ཆེས་ཤིན་ཏུ་མཁས་པ་ཞིག་ཡོད་པས་དེ་སྲས་མོའི་ཁྱིམ་ཐབས་དང་རྒྱལ་བོའི་མཆོད་གནས་སུ་འབུལ་བ་ཡིན་ཞེས་ཞུས། གླེན་པ་བ་ལང་རྫི་བོ་ལ་པཎྜི་ཏའི་ཆས་གོས་བསྐོན་ཏེ་ཁྱོད་དེའི་འཕྲོར་མི་མང་འཛོམས་སའི་དཀྱིལ་དུ་ཐོན་དུས་ཨོཾ་སྭ་སྟི་ཞེས་འདོན་བཞིན་རྒྱལ་བོའི་མགོ་ལ་མེ་ཏོག་ཞོག གཞན་པ་སུ་ལའང་སྐད་ཆ་བཤད་མི་དགོས། ཚུར་ལ་བཤད་ཀྱང་ཕར་ལ་ཚིག་ལན་སྤྲོད་མི་དགོས་ཞེས་སྨྲས་ནས་ཁྲིད་སོང་། མི་ཚང་མས་མཆོག་སྲེད་ལས་ཀྱང་མཁས་པ་མཆོག་སྲེད་ཀྱི་སློབ་དཔོན་ཡིན་པ་དེ་ཅི་འདྲ་ཞིག་ཡོད་དམ་སྙམ་སྟེ་བལྟས། དེ་ནས་མི་མང་གི་ཁྲོམ་དཀྱིལ་དུ་རྒྱལ་པོ་དང་སྲས་མོ་བློན་པོ་མཆོག་སྲེད་རྣམས་ལ་ཁྲི་སོ་སོ་བརྒྱབ། བླུན་པོ་བ་ལང་རྫི་པཎྜི་ཏའི་ཆ་བྱེད་ཅན་དེ་མི་ཚང་མའི་གོང་དུ་ཁྲི་བརྒྱབ་སྟེ་བཞག དེ་ནས་རྒྱལ་པོའི་མགོ་ལ་མེ་ཏོག་འཇོག་རན་དུས་བླུན་པོས་རྒྱལ་པོའི་མགོ་ལ་མེ་ཏོག་བཞག་སྟེ་སྔོན་དུ་བསླབ་པའི་ཨོཾ་སྭ་སྟི་ཟེར་དགོས་པ་རེད་མོད། ཨོཾ་སྭ་སྟི་མ་དག་པར་སྒྲ་ལོག་ཕྱིན་ཅི་ལོག་གི་ནང་དོན་ཅན་ནང་དོན་མི་ལེགས་པ་ཞིག་སྨྲས་པས། མི་ཚང་མས་ཁྲེལ་བགད་བྱས་ཏེ་བརྙས་བཅོས་ཀྱི་ཉམས་བསྟན། བྲམ་ཟེ་མཆོག་སྲེད་ཀྱིས་ཚིག་སྐྱོར་བྱས་ཏེ་མཁས་པའི་ཚིག་ཡིན་རབས་ཀྱི་ལོ་རྒྱུས་འགྲེལ་བཤད་དང་བཅས་པ་བྱས་ནས་ཐམས་ཅད་ཀྱི་སྤོབས་པ་བཅོམ་སྟེ་ཅི་ཡང་ཟེར་རྒྱུ་མེད་པར་བྱས། དེའི་མཚམས་ནས་རྒྱལ་པོའི་སྲས་མོས་སཾསྐྲྀཏའི་སྐད་ཀྱི་སྟེང་ནས་ཁྱད་དུ་འཕགས་པའི་སྙན་ངག་འགའ་ཞིག་ཡོད་དམ་ཟེར་ནས་མཁས་པའི་རྣམ་དཔྱོད་དང་ལྡན་པའི་སྒོ་ནས་དྲི་བ་བྱས་ཚེ། ལན་ཅི་ཡང་མ་ཡོང་། ཡང་མཆོག་སྲེད་ཀྱིས་སྨྲས་ཏེ་ངའི་སློབ་དཔོན་མཁས་པ་ཆེན་པོ་ཡིན་པས་བུད་མེད་ཅིག་ལ་ལན་གང་ན་རྒྱག་རྒྱུ་རེད་ཅེས་ཚིག་གིས་རྒྱབ་སྐྱོར་བྱས་པས་སུས་ཀྱང་ཅིའང་ཟེར་རྒྱུ་མ་ལོན། དེ་ནས་རྒྱལ་པོའི་སྲས་མོས་གླེན་པ་དེ་ལྷ་ཁང་ནང་དུ་ཁྲིད་དེ་གཙུག་ལག་ཁང་མཇལ་ཁ་བསྟན་པས། གང་ན་བཤམས་པའི་བདེ་བར་གཤེགས་པའི་སྐུ་གཟུགས་ཚོ་ལ་མིག་གིས་ཤར་བལྟས་ཙམ་ཞིག་ཀྱང་མ་བྱས། མར་སྒོ་ཁའི་སྒོ་ཁང་དུ་ཐོན་དུས་སྲིད་པའི་འཁོར་ལོའི་ནང་གི་དུད་འགྲོ་བ་ལང་གི་གཟུགས་བྲིས་ཡོད་པ་མཐོང་ཚེ། སྔར་གྱི་བག་ཆགས་ཀྱིས་ཁོ་རང་གིས་འཚོ་འདུག་རྒྱུའི་བ་ལང་ཐམས་ཅད་དྲན་ཏེ་ཁ་ནས་མ་ཧེ་ཟེར་བ་སོགས་གཏམ་འདྲ་མིན་མང་པོ་ཤོར། དེ་ནས་རྒྱལ་པོའི་སྲས་མོས་བྲམ་ཟེ་མཆོག་སྲེད་ཀྱིས་མགོ་སྐོར་འདུག་པ་ཤེས་ཤིང་། མགོ་སྐོར་བཏང་ཡོད་ན་ཡང་འདི་བྲམ་ཟེ་མཆོག་སྲེད་ལས་མཁས་ཤིག་བྱེད་དགོས་སྙམ་ནས། བླུན་པོ་བ་ལང་རྫི་དེ་ལ་བློ་གྲོས་ཀྱི་རྩལ་སྦྱོང་དུ་བཅུག་ཀྱང་བློ་ནུས་ཤིག་གཏན་ནས་མེད་པས་ཅི་ཡང་མ་ཤེས། དེ་ལ་ཐབས་གཞན་མ་རྙེད་པར་ལྷ་མོ་དབྱངས་ཅན་མའི་སྐུ་གཟུགས་ཡོད་སའི་ལྷ་ཁང་ཞིག་གི་ནང་དུ་བཞག་ནས་ལྷ་མོ་དབྱངས་ཅན་མ་སྒྲུབ་ཏུ་བཅུག ཁོ་རང་གིས་ཀྱང་ཡུན་རིང་བསྒྲུབས་ཀྱང་འབྲས་བུ་ཅི་ཡང་མ་ཐོབ། རྒྱལ་པོའི་སྲས་མོས། ནག་མོ་ཟེར་བའི་གཡོག་མོ་ཞིག་ཡོད་པ་དབྱངས་ཅན་མའི་འདྲ་སྐུའི་རྒྱབ་ཏུ་གབ་ཏུ་བཅུག་སྟེ། དེ་ལ་ནམ་ཐོ་རེངས་ཀྱི་དུས་སུ་སྐུ་འདྲས་གསུང་འབྱོན་ཁུལ་གྱིས་མི་ཁྱོད་ཀྱིས་ཅི་འདོད་ཅེས་དྲིས་ཤིག གལ་ཏེ་ཁོས་དངོས་གྲུབ་འདོད་ཅེས་ལག་པ་བརྐྱངས་ན་ཁྱོད་རང་གི་ཁ་ནང་ནས་ལ་དུ་ཟ་འཕྲོ་ཞིག་དེའི་ཁ་ནང་དུ་ཆུག་ཅིག་ཅེས་སྨྲས། གཡོག་མོ་དེ་ལྟར་དབྱངས་ཅན་མའི་སྐུ་རྒྱབ་ཏུ་གབ་ནས་བསྡད། བར་སྐབས་ཅིག་ལ་མི་ཁྱོད་ཀྱིས་དངོས་གྲུབ་ཅི་འདོད་ཅེས་དྲིས། ཁོ་རང་གིས་འདི་དགོས་དེ་དགོས་ཅི་ཡང་ཟེར་མ་ཤེས་ཀྱང་ཅིག་སྦྱིན་ཆས་རེད་བསམ་ནས་ལག་པ་བཟེད། ལག་པ་བཟེད་ཡོང་དུས་གཡོག་མོས་ཁ་ནང་གི་ལ་དུ་ཟ་འཕྲོ་བླངས་ཏེ་ཁོ་ལ་བྱིན། རྫི་བོ་གླེན་པས་ལྷ་མོ་དབྱངས་ཅན་མས་མངོན་སུམ་དུ་དངོས་གྲུབ་གནང་བ་རེད་སྙམ་ནས་ཐེ་ཚོམ་མེད་པར་ཟོས་ནས་མིད་པ་དང་མཉམ་དུ་མགོ་བཏུམས་ཕུད་པ་ལྟར་གྱུར་ཏེ། དེ་མ་ཐག་ཏུ་མི་ཤེས་པ་ཐམས་ཅད་སངས་ཏེ་སྤྲིན་བྲལ་གྱི་མཁའ་ལ་ཉི་མ་ཤར་བ་ལྟ་བུ་ཞིག་ཏུ་གྱུར་ཀྱང་། བློ་གྲོས་ཀྱི་སྣང་བ་ཕྱོགས་མེད་དུ་རྒྱས་ཏེ་ཤེས་བྱའི་གནས་ཐམས་ཅད་མཁྱེན་པ་བྲམ་ཟེ་མཆོག་སྲེད་བས་ཀྱང་མཁས་པ་ཞིག་ཏུ་གྱུར། དེ་ནས་སྲས་མོས་སྔར་དྲིས་པའི་ལན་མ་བྱུང་བ་ཐམས་ཅད་ལ་དེའི་ལན་དུ་སྡེབ་སྦྱོར་གྱི་བསྟན་བཅོས་གཞོན་ནུ་མ་འབྱུང་བ་ཆེ་ཆུང་གསུམ་མཛད། དེའི་སྐབས་ལ་པཎྜི་ཏ་ནག་མོའི་ཁོལ་ཟེར་བའི་མཚན་དེ་འཇིག་རྟེན་གྱི་ཁམས་སུ་གྲགས་སོང་། དེ་ནས་མཁས་པ་ཆེན་པོ་དེས་གཞན་གྱི་ངོ་ལ་བལྟས་པ་ཙམ་གྱིས་ལུས་ཡོངས་རྫོགས་ཀྱི་ཆགས་ཚུལ་ཤེས་འགྲོ། ཡིན་ན་ཡང་སྙན་གྲགས་ཆེན་པོ་དང་མཉམ་དུ་བར་ཆད་ཀྱང་ཡོད་པ་ཡིན་པས་དོན་གཞན་དང་གཞན་གྱི་དབང་གིས་རྒྱལ་པོར་རྟོག་ལོག་ཅིག་ཤར་ནས་པཎྜི་ཏ་ཉིན་ཅིག་ཕུད་བཞག་པ་རེད། དེ་ནས་ཡུན་རིང་སོང་རྗེས་སྔར་གྱི་པཎྜི་ཏ་ལས་མཁས་པ་མི་འདུག་སྙམ་ནས་བཙལ་ཀྱང་མ་རྙེད། དེ་ནས་རྒྱལ་པོས་ད་དུང་མཁས་པ་གཞན་དག་བརྙེད་རྒྱུ་ཡོད་ན་ཐང་བསམ་ནས་དེ་དང་ཀུན་བརྟགས་པའི་ཆེད་དུ། རྒྱལ་པོ་མཁས་པ་ཞིག་ཡིན་པས་སྙན་ངག་ཞིག་བྲིས་ཏེ། ཆུ་ཡི་ནང་གི་པད་མོ་ལ། །འདར་བར་བྱེད་པའི་རྒྱུ་ནི་གང་། །ཞེས་དྲི་བའི་ཚིག་རྐང་པ་གཉིས་ཤོ་ལོ་ཀ་ཕྱེད་ཅིག་བྲིས་ཏེ་དེ་དགེ་འདུན་གྱི་གནས། རྒྱལ་བོའི་ཁབ། ཆང་འཚོང་མའི་གནས་ལ་སོགས་པར་གང་དུའང་བཀྲམ། དེའི་རྒྱུ་མཚན་ཤེས་མཁན་ཡོད་ན་བྱ་དགའ་ཆེན་པོ་ཡོད་ཅེས་དྲིལ་བསྒྲགས་བྱས། བྱ་དགའ་ལེན་བསམ་མཁན་མང་པོས་ལན་འདྲ་མིན་མང་པོ་ཞིག་བརྒྱབས་ཀྱང་རྒྱལ་པོའི་ཐུགས་ལ་བབ་པའི་ལན་ཞིག་སུས་ཀྱང་མ་ཐེབས། སྐབས་ཤིག་ལ་པཎྜི་ཏ་ནག་མོའི་ཁོལ་ཆང་འཚོང་སའི་ཆང་ཁང་ཞིག་གི་ནང་དུ་བསྡད་ཡོད་པས་ཆང་ཉོ་བའི་མི་ཚང་མས་དེའི་སྐོར་གླེང་། དེའི་ཚེ་པཎྜི་ཏ་ནག་མོའི་ཁོལ་གྱིས་སྨྲས་པ། པད་མ་འདར་བའི་རྒྱུ་ནི། གལ་ཏེ་བུང་བ་པདྨའི་ནང་དུ་ཞུགས་ཏེ་སྦྲང་རྩིའི་བཅུད་ལེན་གྱིན་པའི་སྐབས་སུ། ཉི་མ་ནུབ་རི་ལ་གློ་བུར་དུ་ནུབ་སོང་ན་པདྨོ་ཁ་ཟུམ་དེ་བུང་བ་ནང་ནས་ལྷག་འགྲོ། དེ་དུས་བུང་བ་འཕུར་བར་འདོད་དེ་ནང་ནས་འཕུར་བར་བརྩམ་ན་པདྨོ་འདར་བ་རེད་ཅེས་སྨྲས། བུང་བ་ཞུགས་ཚེ་ཉི་མ་ནུབ། །འཕུར་བར་འདོད་པ་འདར་བའི་རྒྱུ། །ཞེས་གོང་གི་རྒྱལ་བོའི་ཤོ་ལོ་ཀ་ཕྱེད་ཀྱི་སྟེང་དུ་ཤོ་ལོ་ཀ་ཕྱེད་ཅིག་བསྣན་ཏེ་ཤོ་ལོ་ཀ་གསོན་པོ་ཞིག་བྱས། དེ་ནས་ཆང་འཚོང་མ་ཞིག་ཡོད་པ་དེས་བྱ་དགའ་ལེན་པར་འདོད་ནས་ཤོ་ལོ་ཀ་ཕྱེད་དེ་ཡི་གེར་ཕབས་ཤིང་པཎྜི་ཏ་ལྐོག་ནས་བཀྲོངས་ཏེ་རོ་ས་འོག་ཏུ་སྦས་ནས་སྙན་ངག་ཤོ་ལོ་ཀ་ཕྱེད་ཀ་ཁྱེར་ཏེ་རྒྱལ་པོའི་སྐུ་མདུན་དུ་སོང་། རྒྱལ་པོའི་ཐུགས་ལ་བབ་ནས་མཁས་པ་ཟེར་བ་འདི་རེད་འདུག འདི་སུས་ཤེས་ཡོང་བ་རེད་ཅེས་དྲིས། ཆང་འཚོང་མས་མོས་ཤེས་ཡོང་བ་རེད་ཅེས་ལན་སྨྲས། རྒྱལ་པོས་བརྟག་དཔྱད་ཅིག་བྱས་ནས་རྫུན་ཡིན་པར་ཤེས་སྟེ་ཡང་འདྲི་ཅིག་བྱས་དུས་ད་དུང་དྲང་བཤད་མ་བྱས། དེ་ནས་ཆང་འཚོང་མའི་ཁང་པ་ཐམས་ཅད་བཤིགས་ནས་ཞིབ་བཤེར་བྱས་དུས་པཎྜི་ཏའི་སྐུ་གདུང་ས་འོག་ཏུ་སྦས་ཡོད་པ་རྙེད། དེ་ནས་དབང་ཕྱུག་ཆེན་པོས་སླར་ཡང་གསོན་དུ་བཅུག་རབས་ཀྱི་ལོ་རྒྱུས་ཡོད་པ་རེད། བློ་ཐེ་ཚོམ་མེད་པའི་ཐོག་ནས་ལྷག་པའི་ལྷ་བསྒྲུབས་ན་དངོས་གྲུབ་དེ་འདྲ་ཐོབ། ཡང་གནའ་སྔོན་མར་རྒྱ་གར་གྱི་གཙུག་ལག་ཁང་ཞིག་ན་མཁན་པོ་རྒན་ཁོག་ཞིག་མིང་ལ་མཁན་པོ་ཐོགས་ཤིང་དོན་ལ་ཆེར་མི་མཁས་པ་ཞིག་ཡོད། དེས་བསམ་པར་ལོ་ཆེན་པོ་ཤེས་ཡོན་མེད་པ་འདིས་ཅི་ཡང་མི་འོང་པས། ད་ནི་ཐོས་པ་ཞིག་འཚོལ་དགོས་དགོངས་ཏེ་ཐོས་པ་ལ་བརྩོན་འགྲུས་བྱས། གནས་དེར་རྒྱལ་པོ་དྷརྨ་པཱ་ལ་ཞེས་པ་ཞིག་ཡོད་པ་དེས། ཁྱོད་མཁས་པ་ཞིག་ཏུ་གྱུར་ཚེ་ཤིང་སྡོང་འདི་ལ་འབྲས་བུ་ཞིག་སྨིན་ཡོང་ངེས་རེད་ཅེས་ཤིང་སྡོང་སྐམ་པོ་ཞིག་བསྟན། མཁན་པོས་དེ་གོ་བ་དང་མཉམ་དུ་རྟ་མགྱོག་པ་ལ་ལྕག་ཚ་མོས་བསྐུལ་བ་ལྟར་འཇམ་དཔལ་དབྱངས་ལ་གསོལ་བ་རྩེ་གཅིག་ཏུ་བཏབ་སྟེ་བསྒྲུབས་པས་ཞག་བདུན་གྱིས་མཁས་པའི་དབང་པོ་ཞིག་ཏུ་གྱུར། དེ་ནས་རྒྱལ་པོའི་ཐད་དུ་སོང་སྟེ་ཁྱོད་ཀྱིས་ཤིང་སྐམ་པོའི་འབྲས་བུ་ཁྱེར་ཤོག་ཅེས་སྨྲས། རྒྱལ་པོ་དྷརྨ་པཱ་ལ་ངོ་མཚར་ཏེ་རྒྱལ་པོ་ལ་སོགས་པ་ཐམས་ཅད་ཀྱིས་བཀུར་སྟི་མཛད་པ་ལྟར་ཤེས་རབ་བསྒྲུབས་ན་འགྲུབ་རྒྱུ་ཡོད། བློ་གྲོས་དང་ལྡན་པར་རང་ཉིད་ཀྱིས་བྱས་ན་ཆོག ཡང་སྔོན་མ་ཞིག་ལ་མ་གྷ་དྷ་བཟང་མོས་སངས་རྒྱས་འཁོར་བཅས་སྤྱན་དྲངས་བའི་སྐབས་ལ་སྟོན་པས་དགེ་སློང་རྫུ་འཕྲུལ་དང་ལྡན་པ་ཐམས་ཅད་ཀྱིས་ཚུལ་ཤིང་ལོངས་དང་དེར་འགྲོ་ཞེས་གསུངས། དེའི་དུས་ན་དེར་མཁས་པ་ཆེན་པོ་རྫུ་འཕྲུལ་དང་མི་ལྡན་པ་ཞིག་ཡོད་པ་དེས་ཀྱང་ཚུལ་ཤིང་བླངས་ཏེ་འགྲོ་གྲབ་བྱས་ཚེ། གཞན་པས་ཁྱེད་ལ་རྫུ་འཕྲུལ་མེད་པས་ཇི་ལྟར་འགྲོ་བ་ཡིན་ཞེས་དྲིས་པས། དེས་གསུངས་པ་ཁོ་བོར་སྤོང་བར་བྱ་བ་སྤོང་ནུས་པ་དང་རྟོགས་པར་བྱ་བ་རྟོགས་ནུས་པའི་ཤེས་རབ་དང་ལྡན་པ་ཡིན་པས་རྫུ་འཕྲུལ་ད་ལྟ་ཉིད་དུ་བསྒྲུབས་ཆོག་ཁྱེད་རྣམས་ཀྱིས་ཅུང་ཟད་སྒུགས་ཤིག་ཅེས་གསུངས་ནས་དེ་ཉིད་དུ་བསྒོམ་པས་དེ་མ་ཐག་ཏུ་རྫུ་འཕྲུལ་ཐོབ་སྟེ་ཐམས་ཅད་ཀྱིས་དད་པའི་གནས་སུ་གྱུར། དེ་ནས་སྟོན་པ་འཁོར་དང་བཅས་པ་རྫུ་འཕྲུལ་ཅན་ཁོ་ན་ནམ་མཁའ་རུ་རྫུ་འཕྲུལ་སྣ་ཚོགས་ཀྱིས་ཕེབས་སོ། །བླ་མ་མཁས་པ་ལ་བསྟེན་ཞིང་ལྷག་པའི་ལྷ་ལ་གསོལ་བ་བཏབ་ནས་ཐོས་པ་བཙལ་ན་བླུན་པོ་བ་ལང་རྫི་ལྟ་བུ་ཡིན་ཀྱང་མཁས་པར་འགྱུར་ཐུབ། མཁས་པས་བསྒོམ་ན་ཉམས་རྟོགས་ཀྱང་སྐྱེ་སླ་ལ། དེས་ན་རང་རེས་ཀྱང་བླ་མ་མཁས་པར་བསྟེན་ཏེ་དམ་པའི་ཆོས་ཡང་ནས་ཡང་དུ་ཉན་ཞིང་ཐོས་པ་བཙལ་ནས་སྒོམ་ལ་སྦྱོར་ཐུབ་ན་འབྲས་བུ་ཐོབ་རྒྱུ་ཡོད་ལུགས་དེ་འདྲ་རེད། དེས་ན་ཚང་མས་ཐོས་པ་རང་གིས་བཙལ་དགོས་པ་རེད་མ་གཏོགས་ངས་ཅང་ཤེས་པ་མ་རེད་སྙམ་ནས་རྒྱུད་ལུག་བདག་ཉིད་བརྙས་པའི་ལེ་ལོ་བྱེད་མི་རུང་ངོ། །སྤྱན་རས་གཟིགས་དང་མཐུ་ཆེན་ཐོབ། །རྒྱལ་སྲས་ཐུ་བོ་རྣམ་གཉིས་ཀྱིས། །བྱིན་གྱིས་བརླབས་ནས་རྗེས་བཟུང་ཤོག །ཅེས་གསུངས་ཏེ། གཞན་ཡང་འཕགས་མཆོག་སྙིང་རྗེའི་མངའ་བདག་སྤྱན་རས་གཟིགས་མགོན་དང་། རྒྱལ་སྲས་གསང་བའི་མཛོད་འཛིན་མཐུ་ཆེན་ཐོབ་པ་སྟེ་སངས་རྒྱས་འོད་དཔག་མེད་པའི་ཞིང་ཁམས་ཀྱི་རྒྱལ་སྲས་ཐུ་བོའམ་གཙོ་བོ་རྣམ་པ་གཉིས་ཀྱིས་ཀྱང་། བདག་རྒྱུད་བྱིན་གྱིས་བརླབས་པ་དང་ཆབས་ཅིག་ཏུ་བརྩེ་བས་དགྱེས་བཞིན་དུ་རྗེས་སུ་བཟུང་བར་ཤོག་ཅིག་ཅེས་གསུངས་པ་རེད། ཞིང་ཁམས་བདེ་བ་ཅན་ལ་གནས་ནས་ཞིང་ཁམས་གཞན་དག་གི་སངས་རྒྱས་དང་བྱང་ཆུབ་སེམས་དཔའ་མང་པོ་མཇལ་ཏེ་ཆོས་ཐོབ་པར་སྨོན་ལམ་འདེབས་པ་ནི། ཉིན་རེ་བཞིན་དུ་ཕྱོགས་བཅུ་ཡི། །སངས་རྒྱས་བྱང་སེམས་དཔག་མེད་པ། །འོད་དཔག་མེད་པ་མཆོད་པ་དང་། །ཞིང་དེར་བལྟ་ཕྱིར་འབྱོན་པའི་ཚེ། །དེ་དག་ཀུན་ལ་བསྙེན་བཀུར་ཞིང་། །ཆོས་ཀྱི་བདུད་རྩི་ཐོབ་པར་ཤོག །ཅེས་གསུངས་ཏེ། བདེ་བ་ཅན་གྱི་ཞིང་ཁམས་ལ་ཉིན་དང་མཚན་མོའི་དབྱེ་བ་མེད་ཀྱང་། རང་རེའི་བག་ཆགས་ཀྱི་གོམས་པ་འདི་དང་བསྟུན་ཏེ་ཉིན་རེ་བཞིན་དུ་གསུངས་པའོ། །དོན་ལ་དུས་དང་དུས་སུ་གསུངས་པའི་གོ་བ་རེད། ཉིན་རེ་བཞིན་ནམ་སྐབས་དང་སྐབས་སུ་ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་རྒྱལ་པ་སྲས་དང་བཅས་པ། འོད་དཔག་མེད་པ་མཆོད་པའི་ཆེད་དང་། ཞིང་ཁམས་བདེ་བ་ཅན་ལ་ཞིང་སྦྱོང་སྟེ་བྱོན་པའི་ཚེ་ན། རང་ཉིད་ཀྱིས་ཀྱང་བསོད་ནམས་དང་ཡེ་ཤེས་ཀྱི་ཚོགས་རླབས་ཆེན་རྫོགས་པའི་ཕྱིར་དུ་མཆོད་པའི་སྤྲིན་རྒྱ་མཚོ་ལྟ་བུ་སྤྲོས་ཏེ་སངས་རྒྱས་དང་བྱང་སེམས་དེ་དག་ལ་མཆོད་པ་དང་བསྙེན་བཀུར་བྱེད་པ་དང་། དེ་དག་གི་མདུན་ནས་སྔར་ཐོས་པའམ་མ་ཐོས་པའི་ཆོས་ཀྱི་བདུད་རྩི་དཔག་ཏུ་མེད་པ་ཐོབ་པར་ཤོག་ཅིག་ཅེས་གསུངས་སོ། །རྫུ་འཕྲུལ་ཐོགས་པ་མེད་པ་ཡིས། །མངོན་དགའི་ཞིང་དང་དཔལ་ལྡན་ཞིང་། །ལས་རབ་རྫོགས་དང་སྟུག་པོ་བཀོད། །སྔ་དྲོ་དེ་དག་རྣམས་སུ་འགྲོ། །མི་བསྐྱོད་རིན་འབྱུང་དོན་ཡོད་གྲུབ། །རྣམ་སྣང་ལ་སོགས་སངས་རྒྱས་ལ། །དབང་དང་བྱིན་རླབས་སྡོམ་པ་ཞུས། །མཆོད་པ་དུ་མས་མཆོད་བྱས་ནས། །དགོང་མོ་བདེ་བ་ཅན་ཉིད་དུ། །དཀའ་ཚེགས་མེད་པར་སླེབ་པར་ཤོག །ཅེས་གསུངས་ཏེ། བདེ་བ་ཅན་གྱི་ཞིང་ཁམས་ལ་སྐྱེས་ཏེ་སངས་རྒྱས་འོད་དཔག་མེད་པའི་ཞལ་མཇལ་བ་དང་མཉམ་དུ་མཐོང་ལམ་ཆོས་ཉིད་ཀྱི་བདེན་པ་མཐོང་བ་ཡིན་པས། ས་དང་པོ་ཐོབ་པའི་བྱང་སེམས་ལ་ཞིང་ཁམས་བརྒྱ་ཉུལ་ཞིང་སངས་རྒྱས་བརྒྱ་མཇལ་ནུས་པའི་རྫུ་འཕྲུལ་མངའ་བ་ཡིན་པས་རྫུ་འཕྲུལ་ཐོགས་མེད་ཀྱིས། ཤར་ཕྱོགས་མངོན་པར་དགའ་བའི་ཞིང་ཁམས། ལྷོ་ཕྱོགས་དཔལ་དང་ལྡན་པའི་ཞིང་ཁམས། བྱང་ཕྱོགས་ལས་རབ་རྫོགས་པའི་ཞིང་ཁམས། དབུས་ཕྱོགས་སྟུག་པོ་བཀོད་པའི་ཞིང་ཁམས་དེ་དག་ལ། གོང་དུ་བཤད་པ་ལྟར་བདེ་བ་ཅན་གྱི་ཞིང་ཁམས་ལ་ཉི་མ་འཆར་ནུབ་ཀྱི་སྔ་དྲོ་ཕྱི་དྲོའི་དབྱེ་བ་མེད་ཀྱང་། འུ་ཚོས་བྱ་བ་བརྩམ་པའི་ཚུལ་དང་བསྟུན་ནས་སྔ་ཕྱིའི་རིམ་པ་དང་སྦྱར་ཏེ་སྔ་དྲོ་ཞིང་ཁམས་དེ་ཚོར་སོང་ནས། ཤར་ཕྱོགས་མངོན་དགའི་ཞིང་ཁམས་ན་བཞུགས་པའི་སངས་རྒྱས་མི་བསྐྱོད་པ་དང་། ལྷོ་ཕྱོགས་དཔལ་དང་ལྡན་པའི་ཞིང་ཁམས་ན་བཞུགས་པའི་སངས་རྒྱས་རིན་ཆེན་འབྱུང་ལྡན། བྱང་ཕྱོགས་ལས་རབ་རྫོགས་པའི་ཞིང་ཁམས་ན་བཞུགས་པའི་སངས་རྒྱས་དོན་ཡོད་གྲུབ་པ། དབུས་ཕྱོགས་སྟུག་པོ་བཀོད་པ་ན་བཞུགས་པའི་སངས་རྒྱས་རྣམ་པར་སྣང་མཛད་ལ་སོགས་པ་འཁོར་དང་བཅས་པ་མཇལ་ཏེ་ཐུན་མོང་མ་ཡིན་པ་གསང་སྔགས་ནང་བ་དང་གསང་བའི་དབང་དང་གདམས་ཟབ་ཁྱད་པར་ཅན་མང་པོ་ཞུས་ཏེ། རྗེ་རིན་པོ་ཆེས། ཡེ་ཤེས་རྒྱ་མཚོ་སེམས་ཅན་རྒྱ་མཚོའི་ཕྱིར། །རྒྱལ་བ་རྒྱ་མཚོའི་དྲུང་དུ་ཐུགས་བསྐྱེད་ནས། །ཐོས་པ་རྒྱ་མཚོ་འཚོལ་ལ་ངོམ་མེད་ཤོག །ཅེས་གསུངས་པ་ལྟར། ཆོས་ཞུས་ཏེ། མཆོད་པའི་སྤྲིན་རྒྱ་མཚོ་དཔག་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་སྤྲིན་གྱི་རྗེས་སུ་འགྲོ་བའི་མཆོད་པ་དུ་མས་མཆོད་པར་བྱས་ནས། དགོང་མོའམ་བྱ་བ་དེ་དག་རྫོགས་པའི་སྐབས་སུ་སླར་ཡང་བདེ་བ་ཅན་གྱི་ཞིང་ཁམས་དེ་ཉིད་དུ། འུ་ཚོ་ཐག་རིང་ལ་སོང་ནས་ཕྱིར་ཐོན་པ་ལྟར་མ་ཡིན་པར་དཀའ་ཚེགས་དང་ངལ་དུབ་མེད་པར་རྫུ་འཕྲུལ་གྱི་སྟོབས་ཀྱིས་སླེབ་པར་ཤོག་ཅིག་ཅེས་གསུངས་པ་རེད། སྤྱིར་བདེ་སྨོན་འདི་གོ་བདེ་བ་འུ་ཚོ་ཐ་མལ་བའི་ཁ་སྐད་དང་བྱ་བྱེད་འགྲོ་འདུག་དང་མཐུན་པར་སྦྱར་ཏེ་ལས་དང་པོ་བའི་རྒྱུད་ལ་ཕན་པའི་ཆེད་དུ་ཕྱི་ལྟར་མདོ་དང་སྦྱར་ཏེ་གསུངས། ནང་ལྟར་དང་གསང་བ་ལྟར་དུ་འགྲེལ་ན་ཕྱོགས་དང་དུས་ཀྱི་མཐའ་དབུས་སྔ་ཕྱི་རྒྱ་ཆད་ཕྱོགས་སུ་ལྷུང་བ་མ་ཡིན་པ། གནས་ཚུལ་སངས་རྒྱས་ངོ་མའི་མངོན་རྟོགས་དང་སྦྱར་ན་རང་སྣང་ཡེ་ཤེས་ཀྱི་ཐིག་ལེ་ཕྱི་གསལ་གདངས་ཀྱི་རྣམ་པར་སྣང་བ་ཞིག་ཡིན་པས། འདི་ལ་ཕྱོགས་དང་ཆ་ཡི་གཞལ་ཐབས་བྲལ་བའི་དགོངས་དོན་མངོན་དུ་ཕྱུང་རྒྱུ་ཡང་ཡོད་པ་རེད། པོ་ཊ་ལ་དང་ལྕང་ལོ་ཅན། །རྔ་ཡབ་གླིང་དང་ཨུ་རྒྱན་ཡུལ། །སྤྲུལ་སྐུའི་ཞིང་ཁམས་བྱེ་བ་བརྒྱ། །སྤྱན་རས་གཟིགས་དང་སྒྲོལ་མ་དང་། །ཕྱག་རྡོར་པད་འབྱུང་བྱེ་བ་བརྒྱ། །མཇལ་ཞིང་མཆོད་པ་རྒྱ་མཚོས་མཆོད། །དབང་དང་གདམས་ངག་ཟབ་མོ་ཞུས། །མྱུར་དུ་རང་གནས་བདེ་ཆེན་ཞིང་། །ཐོགས་པ་མེད་པར་ཕྱིན་པར་ཤོག །ཅེས་གསུངས་ཏེ། པོ་ཊ་ལ་ནི་སྤྱན་རས་གཟིགས་ཀྱི་ཞིང་ཁམས་སྤྱན་རས་གཟིགས་ཀྱིས་བྱིན་གྱིས་བརླབས་པའི་གནས་རི་དང་འབྲེལ་བའི་མཚན་ཞིག་རེད། པོ་ཊ་ལའམ་རི་བོ་ཏ་ལ་ཞེས་པའི་ཐ་སྙད་འདི་ཤར་གྱི་རི་བོའི་མིང་ཡིན་ཟེར་ས་ཡང་ཡོད། ད་ལྟ་ང་ཚོས་མཇལ་བའི་ལྷོ་ཕྱོགས་ཀྱི་རི་བོ་གྲུ་འཛིན་འདི་ནི་དམ་ཆོས་ཐོག་མར་དར་བའི་ཡུལ་དབུས་རྒྱ་གར་ནས་གཞལ་ན་ཤར་ཕྱོགས་ཡིན་རྒྱུ་རེད། དེ་བཞིན་དུ་ཕྱག་ན་རྡོ་རྗེའི་ཞིང་ཁམས་ལྕང་ལོ་ཅན། ཟངས་མདོག་དཔལ་གྱི་རི་བོ་པད་མ་འོད་ཀྱི་ཞིང་ཁམས་ནི་རྔ་ཡབ་གླིང་ཨོ་རྒྱན་མཁའ་འགྲོ་འདུ་བའི་ཡུལ་དེའི་མིང་གིས་མཚོན་པའི་དག་པའི་ཞིང་ཁམས། ཡང་ན་དག་དང་མ་དག་སྣ་ཚོགས་སུ་སྣང་བའི་ཞིང་ཁམས་སྤྲུལ་སྐུའི་ཞིང་ཁམས་བྱེ་བ་ཕྲག་བརྒྱ་འམ་བསམ་ཡུལ་ལས་འདས་པ་ནམ་མཁས་གར་ཁྱབ་རྣམས་སུ། འཕགས་པ་སྤྱན་རས་གཟིགས། རྗེ་བཙུན་འཕགས་མ་སྒྲོལ་མ། གསང་བདག་ཕྱག་ན་རྡོ་རྗེ། སློབ་དཔོན་པད་མ་འབྱུང་གནས་དེ་དག་གི་སྤྲུལ་དང་ཡང་སྤྲུལ་བྱེ་བ་ཕྲག་བརྒྱ་དང་བཅས་པ། དེ་ལས་མང་བ་ཐམས་ཅད་མཇལ་ཞིང་མཆོད་པ་སྣ་ཚོགས་མང་ཞིང་བཟང་བ་རྒྱ་མཚོ་ལྟ་བུས་མཆོད་དེ། དབང་དང་ཁྲིད་ལུང་མན་ངག་གནད་ཀྱི་གདམས་ངག་ཟབ་མོ་ཞུས་ནས། དེ་མ་ཐག་ཏུ་ཡིད་ལྟར་མྱུར་བའི་རྫུ་འཕྲུལ་གྱིས་སླར་ཡང་མྱུར་དུ་རང་གནས་བདེ་ཆེན་གྱི་ཞིང་ཁམས་སུ་ཐོགས་པ་མེད་པར་ཕྱིན་ཐུབ་པར་ཤོག་ཅིག་ཅེས་གསུངས་སོ། །དེ་ཡན་ཆད་ཀྱིས་རྗེ་ཙོང་ཁ་པས། གློག་བཞིན་འཁྱུག་པའི་ཐོགས་མེད་རྫུ་འཕྲུལ་གྱིས། །ཞིང་མང་བགྲོད་ནས་རྒྱལ་བའི་སྤྱན་སྔ་རུ། །རབ་འབྱམས་ཚོགས་གཉིས་བསྐྲུན་ནས་སླར་ཡང་ནི། །རང་གི་ཞིང་དུ་དགའ་བདེས་རོལ་བར་མཛོད། །ཅེས་པའི་དོན་བཤད་པ་རེད།

བཞི་བ་མ་དག་པའི་ཞིང་གི་གདུལ་བྱའི་སེམས་ཅན་གདུལ་བར་སྨོན་པ།

ཤུལ་གྱི་ཉེ་དུ་གྲྭ་སློབ་སོགས། །ལྷ་ཡི་མིག་གིས་གསལ་བར་མཐོང་། །སྲུང་སྐྱོབ་བྱིན་གྱིས་རློབ་བྱེད་ཅིང་། །འཆི་དུས་ཞིང་དེར་འཁྲིད་པར་ཤོག །ཅེས་གསུངས་ཏེ། རང་ཉིད་ཀྱིས་སྔར་བསོད་ནམས་བསགས་སྟོབས་ཀྱིས་འོད་དཔག་མེད་པར་དད་པ་དང་། བདེ་བ་ཅན་དུ་སྐྱེ་བའི་རྒྱུ་བསྒྲུབས་ཏེ་གནས་དེར་སྐྱེས་ན། ཤུལ་ན་ཡོད་པའི་ཡུལ་སྡེ་གྲྭ་མང་ཆོས་ཀྱིས་འབྲེལ་བའི་སློབ་མ། ཟང་ཟིང་གིས་འབྲེལ་བའི་སྦྱིན་བདག དམ་ཚིག་ལ་སེལ་སྒོ་ང་ལ་གས་ཆག་མ་སོང་བའི་གྲྭ་སློབ་ལ་སོགས་པ་ཐམས་ཅད། བདེ་བ་ཅན་ལ་སྐྱེས་པའི་མངོན་ཤེས་ཅན་དེས་ལྷའི་མིག་གི་མངོན་ཤེས་ཀྱིས་འདི་ནས་ཅི་བྱས་ཅི་བསམ་ཐམས་ཅད་གསལ་བོར་མཐོང་། བླ་མ་འདས་ཚར་དུས་དག་སྣང་ཇེ་ཆེར་འགྲོ་རྒྱུ་དེ་ཆོས་ཉིད་རེད། གང་ལྟར་བྱས་ན་ཡང་ཤི་བའི་མི་དང་བོར་བའི་རྟ་བཟང་ཟེར་ཞིང་། མི་ཤི་ཚར་དུས་དེ་བཟང་ཟེར་རྒྱུ་དེ་ཕྲག་དོག་དང་འགྲན་སེམས་གོང་དུ་ཤོར་དོག་མེད་པས་རེད་འདུག་སྙམ། ངོ་མ་བཟང་པོ་ཞིག་ཡིན་ན་དག་པའི་ཞིང་ནས་ཕྱིར་ལ་གཟིགས་ངེས་རེད། དེ་དུས་ཤུལ་གྱི་དེ་ཐམས་ཅད་རིག་ཡོང་དུས་ཅི་འདྲའི་མི་སྐྱོ་ན། མངོན་ཤེས་ཅན་ཞིག་གིས་ད་ལྟ་འུ་ཚོའི་ཟུར་ནས་བལྟས་ནས་ཡོད་པ་ལྟར། ལས་ལུགས་འགའ་རེ་ཅི་འདྲའི་དགོད་བྲོ་ཞིག་བྱེད་ཀྱིན་མེད། གནའ་དཀོར་བདག་མི་མ་ཡིན་པ་ཞིག་དང་མིག་མཐོང་ཅན་གྱི་མི་གཉིས་ཁ་བརྡ་བྱེད་སྐབས། མིག་མཐོང་ཅན་དེ་ལ་དཀོར་བདག་མི་མ་ཡིན་དེས། དེ་རིང་ཅིག་ཚང་གི་སྒར་ཁ་ནས་མི་ཞིག་གིས་ཕུར་བ་རྡེབ་ཀྱིན་འདུག་མོད། འོན་ཀྱང་ས་འོག་ན་རྡོ་ཞིག་འདུག་པས་ཕུར་བ་དེ་གཏན་ནས་ས་འོག་ཏུ་འགྲོ་ཐུབ་ཀྱིན་མི་འདུག་ཅེས་སྨྲས། དེ་ལྟར་དོན་ཆེ་ཆུང་གཉིས་ཀའི་ཐད་ནས་ཕྱི་མཐའ་མི་མཐོང་བའི་ལས་དང་། ཉེན་ཁ་ཅན་རིག་རིག་ཁར་གཡང་ལ་ལྕེབས་པ་ལྟ་བུ་ཅི་འདྲ་རེད་ཀྱིན་མེད། དེ་དུས་དེའི་རིགས་ཀྱི་མི་མཐུན་ཕྱོགས་དང་ནད་གདོན་བགེགས་ལ་སོགས་པའི་གནོད་པ་ལས་བསྲུངས་ཏེ་མཐུན་ཕྱོགས་ཀྱི་སྐྱབས་ཀྱི་ར་བ་ལས་ནམ་ཡང་མི་འདའ་བར་སྐྱོབ་པར་བྱེད་ཅིང་། དེ་དག་འཆི་བའི་གནས་སྐབས་ན་གྲོགས་བྱང་ཆུབ་སེམས་དཔའི་དགེ་སློང་གི་དགེ་འདུན་དང་འགྲོགས་ཏེ་དེ་རྣམས་མ་ཤི་གོང་ནས་མིག་སྔར་དུ་བྱོན་ནས་ཁྱོད་འཇིགས་མི་དགོས། ང་ལ་སོགས་པའི་བདེ་བ་ཅན་གྱི་ཞིང་ཁམས་ན་ཡོད་པའི་འཕགས་པ་མང་པོ་ཁྱོད་བསུ་རུ་ཐོན་ཡོད་ཅེས་དབུགས་ཆད་མ་ཐག་ཏུ་བདེ་བ་ཅན་གྱི་ཞིང་ཁམས་ལ་ཁྲིད་ཐུབ་པའི་ནུས་པ་ཡོད་པར་ཤོག་ཅིག་ཅེས་གསུངས། རང་གི་ཤུལ་ཡུལ་གྱི་ཉེ་དུ་གྲྭ་འཁོར་གྱི་མི་ཚད། བཟང་སྤྱོད་ལས། སྤྲུལ་བ་མང་པོ་བྱེ་བ་ཕྲག་བརྒྱ་ཡི། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། སེམས་ཅན་རྣམས་ལ་ཕན་པ་མང་པོ་བགྱི། །ཞེས་གསུངས་པ་ལྟར། སེམས་ཅན་འདུལ་བའི་ལས་འཕྲོ་ཅན་ཡོད་ཚད་ལ་བལྟས་ཏེ་བདེ་བ་ཅན་གྱི་ཞིང་ཁམས་ལ་ཁྲིད་ཐུབ་པར་ཤོག་གཅིག་ཅེས་གསུངས། བསྐལ་བཟང་འདི་ཡི་བསྐལ་བའི་ཡུན། །བདེ་བ་ཅན་གྱི་ཞག་གཅིག་སྟེ། །བསྐལ་བ་གྲངས་མེད་འཆི་བ་མེད། །རྟག་ཏུ་ཞིང་དེར་འཛིན་པར་ཤོག །ཅེས་གསུངས་ཏེ། མི་མཇེད་ཀྱི་འཇིག་རྟེན་འདིའི་ད་ལྟའི་བསྐལ་བ་འདིའི་མིང་ལ་བསྐལ་བ་བཟང་པོ་ཞེས་བྱ། འདིའི་ཆགས་གནས་འཇིག་སྟོང་གི་བསྐལ་ཆེན་གཅིག་གི་ཡུན་དེ་བདེ་བ་ཅན་གྱི་ཞག་གཅིག་གི་ཚོད་ཙམ་ཞིག་ཡིན་གསུངས་ནས་གོ་བདེ་བའི་ཆེད་དུ་དེ་ལྟར་གསུངས་པ་རེད། བདེ་བ་ཅན་གྱི་ཉི་མ་དེ་འདྲ་རིང་ན་མཚན་ཡང་དེ་འདྲ་ཞིག་ལོས་རིང་བསམ་མི་དགོས། འུ་ཚོའི་རྒན་ཁོག་རྣམས་ཀྱིས་དཔྱིད་ཀའི་ཉི་མ་མ་ཆོད་པར་བསྡད་ཡོད་པ་ལྟ་བུ་མ་ཡིན་པར། ཟག་མེད་ཀྱི་བདེ་བ་ཁོ་ནའི་དུས་འདའ་བ་ཡིན། སྐུ་ཚེའི་ཚད་དཔག་ཏུ་མེད་པ་རྒྱལ་བ་འོད་དཔག་མེད་ཉིད་དང་འདྲ་བར། ཚེ་དང་ཡེ་ཤེས་བསོད་ནམས་གཟི་བརྗིད་འོད་དང་འོད་ཟེར་ཐམས་ཅད་ཚད་མེད་པ་ཡིན་པར་མ་ཟད། ཟག་མེད་ཀྱི་བདེ་བ་ལ་རྟག་ཏུ་སྤྱོད་པས་ན་བདེ་ཞིང་། ཏིང་འཛིན་གསལ་བའི་སྒོ་འཕར་བརྒྱ་ཕྲག་ལ་ཚིམ་ཞིང་ངོམ་པ་མེད་པར་སླར་ཡང་འཇུག་ཅིང་འཇིག་རྟེན་འདིས་གཞལ་བའི་བསྐལ་བ་གྲངས་མེད་མང་པོའི་ཡུན་ལ་མི་འདའ་ཞིང་རྟག་ཏུ་ཞིང་ཁམས་དེ་ཉིད་འཛིན་པར་ཤོག་ཅིག་ཅེས་གསུངས་པ་རེད། དོན་དུ་གཉིས་འཛིན་འཁྲུལ་བ་ཅན་གྱི་དུས་ལས་རིང་དུ་འདས་པའི་གཉིས་མེད་དག་མཉམ་ཆེན་པོའི་བདེ་ཆེན་དག་པའི་དུས་ལ་མཉམ་པར་བཞག་པ་ལས་མ་འདས་པ་ཞིག་ལ་གོ་དགོས། བྱམས་པ་ནས་བཟུང་མོས་པའི་བར། །བསྐལ་བཟང་འདི་ཡི་སངས་རྒྱས་རྣམས། །འཇིག་རྟེན་འདི་ན་ནམ་བྱོན་ཚེ། །རྫུ་འཕྲུལ་སྟོབས་ཀྱིས་འདིར་འོངས་ནས། །སངས་རྒྱས་མཆོད་ཅིང་དམ་ཆོས་ཉན། །སླར་ཡང་བདེ་ཆེན་ཞིང་ཁམས་སུ། །ཐོགས་པ་མེད་པར་འགྲོ་བར་ཤོག །ཅེས་གསུངས་ཏེ། བསྐལ་བ་བཟང་པོ་ཞེས་བྱ་བ་འདི་ལ་སངས་རྒྱས་སྟོང་བྱོན་པ་ཡིན་ཞིང་། དེ་སྔོན་བཞི་བྱོན་ཟིན་པ་རེད། འཁོར་བ་འཇིག གསེར་ཐུབ། འོད་སྲུང་རྣམ་པ་གསུམ་དང་། རྣམ་འདྲེན་བཞི་པ་བདག་ཅག་གི་སྟོན་པ་མཉམ་མེད་ཤཱཀྱ་ཐུབ་པ་དང་བཞི། འདིའི་འཕྲོར་མ་འོངས་པའི་སངས་རྒྱས་བྱམས་པ་རེད། འདས་པའི་སངས་རྒྱས་མར་མེ་མཛད། ད་ལྟའི་སངས་རྒྱས་ཤཱཀྱ་ཐུབ་པ། མ་འོངས་པའི་སངས་རྒྱས་བྱམས་པ་མགོན་པོ་དང་གསུམ་ལ་དུས་གསུམ་སངས་རྒྱས་ཞེས་བྱའོ། །སངས་རྒྱས་ཤཱཀྱ་ཐུབ་པ་ཡན་ཀྱི་བྱོན་ཟིན་པའི་སངས་རྒྱས་བཞི་པོའི་སྟེང་དུ་རྣམ་གཟིགས་དང་། རིན་ཆེན་གཙུག་ཏོར་ཅན། ཐམས་ཅད་སྐྱོབས་གསུམ་པོ་བསྣན་ན་སངས་རྒྱས་རབ་བདུན་ཞེས་ཀྱང་བྱ། བསྐལ་བ་འདི་རྐྱང་བའི་དབང་དུ་བྱས་ན་རྣམ་འདྲེན་བཞི་བརྩི་ཞིང་། བྱམས་པ་མགོན་པོ་ནས་མཐར་བསྐལ་བཟང་སངས་རྒྱས་སྟོང་གི་རྗེས་མ་སངས་རྒྱས་མོས་པ་མ་བྱོན་གྱི་བར་དུ་བསྐལ་བཟང་འདིའི་སངས་རྒྱས་ཐམས་ཅད་འཇིག་རྟེན་གྱི་ཁམས་སུ་བྱོན་ཏེ་མཛད་པ་བཅུ་གཉིས་ཀྱི་མཛད་ཆེན་བསྐྱང་དུས། རྫུ་འཕྲུལ་གྱི་སྟོབས་ཀྱིས་བདེ་བ་ཅན་ནས་ཞིང་ཁམས་འདི་རུ་འོངས་ཏེ་སངས་རྒྱས་དེ་དག་ལ་མཆོད་པ་རྒྱ་ཆེན་པོ་རབ་འབྱམས་ཞིང་གི་ལྷ་མིའི་ལོངས་སྤྱོད་རྣམ་པར་སྤྲུལ་བས་མཆོད་ཅིང་སངས་རྒྱས་དེ་དག་གིས་ཆོས་འཁོར་བསྐོར་བ་དེ་ཚོར་ཉན་ཏེ། སླར་ཡང་བདེ་བ་ཅན་གྱི་ཞིང་ཁམས་སུ་ཐོགས་པ་མེད་པར་རྫུ་འཕྲུལ་གྱི་སྟོབས་ཀྱིས་འགྲོ་བར་ཤོག་ཅིག་ཅེས་གསུངས། དེའི་ཡན་ཆད་ཀྱིས་བདེ་བ་ཅན་ལ་སྐྱེ་བའི་རྒྱུ་བཞི་པ་རྐྱེན་སྨོན་ལམ་རྣམ་པར་དག་པས་མཚམས་སྦྱར་བའི་སྐབས་ཀྱི་ཚེ་འདིར་འོད་དཔག་མེད་མཇལ་བའི་དབང་དུ་བྱས་པའི་སྨོན་ལམ་དང་། ཤི་འཕོས་ནས་བདེ་བ་ཅན་ལ་སྐྱེ་བའི་དབང་དུ་བྱས་པའི་སྨོན་ལམ་གཉིས་ཀ་སོང་ནས།

གསུམ་པ་ཞིང་ཁམས་ཀྱི་བཀོད་པ་ཡིད་ལ་བྱས་ནས་སྨོན་ལམ་འདེབས་པ།

དེ་ལ་བདུན་ཏེ། ཞིང་ཁམས་སྤྱིའི་ཡོན་ཏན་དང་། ས་གཞིའི་ཡོན་ཏན། ཤིང་གི་ཡོན་ཏན། ཆུ་དང་པདྨོའི་ཡོན་ཏན། བཅུད་ཀྱི་ཡོན་ཏན་ལ་སོགས་པ། རེ་རེ་བཞིན་འོག་ནས་རིམ་པ་བཞིན་དུ་འབྱུང་ངོ་། །སྤྱིར་ཞིང་ཁམས་བདེ་བ་ཅན་གྱི་སྣོད་བཅུད་ཀྱི་བཀོད་པ་རྟེན་དང་བརྟེན་པ་ཇི་ལྟར་ཡིན་པའི་ཞིང་བཀོད་འདི། བདེ་བ་ཅན་དུ་སྐྱེ་བའི་རྒྱུ་དང་པོ་རྟེན་ཚོགས་ཞིང་གསལ་འདེབས་པའི་སྐབས་ནས་རྒྱས་བཤད་དགོས་པ་ཞིག་རེད། ཁྱད་པར་དུ་སྨོན་ལམ་འདེབས་པའི་ཐོག་མར་ཞིང་གི་ཡོན་ཏན་ཐམས་ཅད་དྲན་ཏེ་རྒྱལ་བ་འོད་དཔག་མེད་འཁོར་དང་བཅས་པ་ལ་དམིགས་པའི་དད་པ་བརྟན་པོ་ཞིག་དང་། ཞིང་གི་ཡོན་ཏན་དང་བཀོད་པ་ཕུལ་དུ་བྱུང་བ་ལ་དམིགས་ཏེ་དེར་སྐྱེ་བའི་འདུན་པ་དྲག་པོ་ཞིགསྨོན་པ་བདེ་བླག་ཏུ་འགྲུབ་པའི་མཐུན་འགྱུར་མཛད་ན་ཅི་མ་རུང་སྙམ་པའི་བསམ་པ་ཤུགས་དྲག་པོ་རྣམས་ཡོད་རྒྱུ་དེ་གནད་ཆེ། ཁྱད་པར་དུ་ཞིང་ཁམས་དེ་ལ་སྐྱེ་ཐུབ་པའི་འདུན་པ་ཤུགས་དྲག་པོ་ནི་ཞིང་དེ་ལ་སྐྱེ་བའི་རྒྱུའི་གཙོ་བོ་རེད། དེ་ཡང་གཙོ་བོ་ཞིང་གི་ཡོན་ཏན་ཤེས་རྒྱུ་གལ་ཆེ་བས་འདི་དང་པོ་ནས་བཤད་དགོས། ཡིན་ནའང་རང་རེས་རྒྱུ་དང་པོའི་སྐབས་ནས་རགས་རིམ་ས་བཅད་མ་སྟོངས་པ་ཙམ་ཞིག་བཤད་ནས། ཞིབ་པར་བདེ་སྨོན་འདིའི་ནང་དུ་གཙོ་ཆེར་སྨོན་ལམ་དང་སྦྲེལ་ཏེ་གསུངས་པས། འདི་ལྟར་དུ་སྨོན་པ་དང་སྨོན་ཡུལ་སྟབས་གཅིག་ཏུ་སྦྲེལ་བ་དེ་ཡང་འཇུག་པ་བདེ་བའི་དགོས་པ་གཞན་ཞིག་ཡོད་ངེས།

བཞི་བ་ཞིང་བཀོད་ཡིད་ལ་བྱས་པའི་སྨོན་ལམ་བདུན།

དང་པོ་ཞིང་ཁམས་སྤྱིའི་ཡོན་ཏན་ཡིད་ལ་བྱེད་པའི་སྨོན་ལམ།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག །བརྒྱད་ཅུ་རྩ་གཅིག་སངས་རྒྱས་ཞིང་ཀུན་ཀྱི། །ཡོན་ཏན་བཀོད་པ་ཐམས་ཅད་གཅིག་བསྡོམས་པ། །ཞིང་ཁམས་ཀུན་ལས་ཁྱད་འཕགས་བླ་ན་མེད། །བདེ་བ་ཅན་གྱི་ཞིང་དེར་སྐྱེ་བར་ཤོག །ཅེས་གསུངས་ཏེ། སྔོན་བསྐལ་བ་དཔག་ཏུ་མེད་པའི་གོང་རོལ་ནས་བདེ་བར་གཤེགས་པ་འཇིག་རྟེན་དབང་ཕྱུག་རྒྱལ་པོའི་མདུན་ནས་དགེ་སློང་ཆོས་ཀྱི་འབྱུང་གནས་ཀྱིས་བྱང་ཆུབ་མཆོག་ཏུ་ཐུགས་བསྐྱེད། སངས་རྒྱས་ཀྱི་ཞིང་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་བཀོད་པ་ཕུན་སུམ་ཚོགས་པ་ཐམས་ཅད་ཚང་ཞིང་། ད་དུང་དེ་ལས་ཀྱང་ཆེས་ཁྱད་པར་འཕགས་པའི་ཞིང་ཁམས་ཤིག་བཟུང་སྟེ་སེམས་ཅན་ཕལ་བ་ཡིན་ཡང་དེར་སྐྱེ་བའི་སྨོན་ལམ་བཏབ་ནས་རྒྱལ་པོ་རྩིབས་ཀྱི་མུ་ཁྱུད་ཀྱི་སྐྱེ་བ་བཞེས་པ་ལ་སོགས་པ་ཚུན་ཆད་དུ། བྱང་ཆུབ་སེམས་དཔས་མཛད་དཀའི་སྤྱོད་པ་དཔག་དུ་མེད་པ་ལ་བསླབས་པ་དེ་ཉིད་མཐར་ཕྱིན་ནས། སྔོན་གྱི་སྨོན་ལམ་ཡོངས་སུ་གྲུབ་པའི་ཞིང་ཁམས་བདེ་བ་ཅན། ཞིང་ཁམས་ཀུན་ལས་ཁྱད་དུ་འཕགས་པའི་ཡོན་ཏན་གྱི་ཆོས་དང་ལྡན་པའི་བདེ་བ་ཅན་གྱི་ཞིང་ཁམས་དེར་སྐྱེ་བར་ཤོག་ཅེས་གསུངས་སོ།།

གཉིས་པ་ས་གཞིའི་ཡོན་ཏན་ཡིད་ལ་བྱེད་པའི་སྨོན་ལམ།

རིན་ཆེན་ས་གཞི་ཁོད་སྙོམ་ལག་མཐིལ་ལྟར། །ཡངས་ཤིང་རྒྱ་ཆེ་གསལ་ཞིང་འོད་ཟེར་འབར། །མནན་ན་ནེམ་ཞིང་བཏེགས་ན་སྤར་བྱེད་པ། །བདེ་འཇམ་ཡངས་པའི་ཞིང་དེར་སྐྱེ་བར་ཤོག །ཅེས་གསུངས་ཏེ། ས་གཞི་ཐམས་ཅད་རིན་པོ་ཆེ་སྣ་བདུན་གྱིས་གང་བ། རིན་པོ་ཆེ་སྣ་བདུན་ལས་གྲུབ་པ་གསེར་གྱི་དྲྭ་བས་ཁེབ་པ། གཤའ་གཤོང་དང་འབའ་འབུར་ཁོད་མི་སྙོམ་པ་མ་ཡིན་པར་ཁོད་སྙོམ་པ་གཞོན་ནུའི་ལག་མཐིལ་ལྟ་བུ། ཀུན་མཁྱེན་འཇིགས་གླིང་གིས། གཞོན་ཤ་ཤིན་ཏུ་ཆགས་པའི་ལག་མཐིལ་དང་། །མཉམ་པའི་དཔེ་གྱུར་འོས་པའི་འགལ་ཟླ་ནི། །ཆུ་ཞེང་སྲིད་དུ་མི་མངོན་ཐ་གྲུའི་ཁྱོན། །རིན་ཆེན་སྣ་ཚོགས་གཅལ་དུ་བཀྲམ་པར་བྱས། །བདེ་བ་ཅན་གྱི་ཞིང་དེར་སྐྱེ་བར་ཤོག །ཅེས་གསུངས་པ་ལྟར། ཐ་གྲུ་ཁྱོན་ཡངས་ཤིང་རྒྱ་ཆེ་བ་འཇིག་རྟེན་འདིར་མེད་པའི་རིན་པོ་ཆེ་སྣ་ཚོགས་ཀྱིས་གང་བ། གསལ་ལ་བཀྲ་ཞིང་འོད་ཟེར་མཛེས་པ་འབར་བའི་རི་མོ་ཅན། རྐང་པས་བརྫིས་ན་སྲ་མོ་མིན་པར་ནེམ་ལ་རྐང་པ་ཡར་ལ་བཏེགས་ན་སོར་བཞི་གྱེན་ལ་འཕར་བ། བདེ་འཇམ་ཡངས་པའི་ཞིང་དེར་སྐྱེ་བ་འཛིན་ནུས་པར་ཤོག་ཅིག་ཅེས་གསུངས། དེ་ནི་ཐང་གི་ཡོན་ཏན་ཡིན་ཞིང་། ས་གཞི་དེ་ལ་རྟག་ཏུ་གནས་པའི་རིའི་རྒྱན་ནི། རི་ཐམས་ཅད་རིན་པོ་ཆེ་ལས་གྲུབ་པ་ཤ་སྟག་ཡིན་པ། རི་ཐམས་ཅད་ཀྱི་རྩེ་མོ་དབྱིབས་མི་འདྲ་བ་སྣ་ཚོགས་པ་ཅན། རི་དེ་དག་གི་ངོས་ཡངས་ཤིང་མཐོ་དམའ་མང་པོ་ཡོད་པ་རིམ་པ་བསྒྲིགས་པ་ལྟ་བུ་དང་། རི་མོ་བ་མཁས་པས་བྲིས་པ་ལྟ་བུ། ནོར་བུའི་བྲག་ཕུག་དང་ཟླ་བ་མཛེས་པའི་རྡོ་ལེབ། ཤེལ་བྲག་ཁ་ཏོག་སྣ་ཚོགས་ཀྱི་རི་མོ་ཅན། རིན་པོ་ཆེ་སྣ་ཚོགས་འཛད་མེད་དུ་འབྱུང་བའི་གཏེར་གྱི་མཛོད་མང་པོས་བརྒྱན་ཡོད་པ་ལ་སོགས་པ་ས་གཞིའི་ཡོན་ཏན་ཡོད་དོ། །གསུམ་པ་ཤིང་གི་ཡོན་ཏན་ཡིད་ལ་བྱེད་པའི་སྨོན་ལམ།

གསུམ་པ་ཤིང་གི་ཡོན་ཏན་ཡིད་ལ་བྱེད་པའི་སྨོན་ལམ།

རིན་ཆེན་དུ་མ་ལས་གྲུབ་དཔག་བསམ་ཤིང་། །ལོ་མ་དར་ཟབ་འབྲས་བུ་རིན་ཆེན་བརྒྱན། །དེ་སྟེང་སྤྲུལ་བའི་བྱ་ཚོགས་སྐད་སྙན་སྒྲས། །ཟབ་དང་རྒྱ་ཆེའི་ཆོས་ཀྱི་སྒྲ་རྣམས་སྒྲོག །ངོ་མཚར་ཆེན་པོའི་ཞིང་དེར་སྐྱེ་བར་ཤོག །ཅེས་གསུངས་ཏེ། རིན་པོ་ཆེའི་ཤིང་འགའ་རེ་རྩ་བ་སྡོང་བོ་ཡལ་ག་ལོ་མ་འདབ་མ་མེ་ཏོག་འབྲས་བུ་ཐམས་ཅད་རིན་པོ་ཆེ་ཡིན་པ། རིན་པོ་ཆེ་གསེར་དངུལ་མན་ཤེལ་བེེཌཱུརྱ་མུ་ཏིག་དམར་པོ་སྤུག་དང་མར་གད་ལ་སོགས་པས་ཐ་དད་དུ་གྲུབ་ཡོད་པ། རྩ་བ་གསེར་ཡིན་ན་སྡོང་པོ་དངུལ་ལས་གྲུབ་པ་ལ་སོགས་པ། རིན་པོ་ཆེ་དུ་མས་ཤིང་གཅིག་གྲུབ་པ། ཤིང་ལྗོན་པ་དེ་དག་རེག་ན་འཇམ་ཞིང་བསྣམ་ན་དྲི་ཞིམ་པ། ཤིང་སོ་སོ་ཁ་དོག་སྣ་ཚོགས་ཡོད་པ། ཤིང་གཅིག་ལ་ཁ་དོག་མང་པོ་ཅན། ཤིང་ལྗོན་པ་དེ་ཚོ་གསེར་གྱི་དྲ་བ་དང་དྲ་ཕྱེད་ཀྱིས་བརྒྱན་ཡོད་པ། ཡང་མུ་ཏིག་དང་མར་གད་ཀྱི་དྲ་བ་ཅན། མཚམས་མཚམས་སུ་དྲིལ་བུ་དང་གཡེར་ཁ་སྒྲ་སྙན་མོ་ཅན་བཏགས་ཡོད་པ། ཤིང་ཏོག་དང་འབྲས་བུ་རོ་བརྒྱ་དང་ལྡན་པས་ཡལ་ག་མར་དུད་ཡོད་པའི་ལྗོན་ཤིང་དང་། ལོ་མ་དར་ཟབ་དང་འབྲས་བུ་རིན་ཆེན་གྱི་རྒྱན་གྱིས་བརྒྱན་ཡོད་པའི་ལྗོན་ཤིང་གི་རྩེ་ན་སྤྲུལ་བའི་བྱ་སྐད་སྙན་མོ་ཅན་མང་པོས་སྙན་གླུ་འགྱུར་ཁུག་གིས་ལེན་གྱིན་ཡོད་པ། རིན་ཆེན་སྣ་བདུན་ལས་གྲུབ་ལྗོན་པ་ནི། །དཔག་ཚད་སྟོང་དང་དྲུག་བརྒྱའི་འཕངས་སུ་སྙེགས། །གསུངས་པ་ལྟར། ངོ་མཚར་ཡ་མཚན་ཆེན་པོ་དང་ལྡན་པའི་ཞིང་དེར་སྐྱེ་བར་ཤོག་ཅིག་ཅེས་གསུངས་སོ།།

བཞི་བ་ཆུ་དང་པདྨོའི་ཡོན་ཏན་ཡིད་ལ་བྱེད་པའི་སྨོན་ལམ།

སྤོས་ཆུའི་ཆུ་ཀླུང་ཡན་ལག་བརྒྱད་ལྡན་མང་། །དེ་བཞིན་བདུད་རྩིའི་ཁྲུས་ཀྱི་རྫིང་བུ་རྣམས། །རིན་ཆེན་སྣ་བདུན་ཐེམ་སྐས་ཕ་གུས་བསྐོར། །མེ་ཏོག་པདྨ་དྲི་ཞིམ་འབྲས་བུ་ལྡན། །པདྨའི་འོད་ཟེར་དཔག་ཏུ་མེད་པ་འཕྲོ། །འོད་ཟེར་རྩེ་ལ་སྤྲུལ་བའི་སངས་རྒྱས་བརྒྱན། །ཡ་མཚན་ཆེན་པོའི་ཞིང་དེར་སྐྱེ་བར་ཤོག །ཅེས་གསུངས་ཏེ། ཆུའི་རྒྱན་དེ་ལ་འབབ་ཆུའི་རྒྱན་དང་འཁྱིལ་ཆུའི་རྒྱན་གཉིས་ཡོད་པས། དེའི་ནང་གི་འབབ་ཆུའི་རྒྱན་ནི། སྤོས་ཀྱི་ནང་ནས་མཆོག་ཏུ་གྱུར་བའི་སྤོས་ཀྱིས་བགོས་པའི་ཆུ་ཀླུང་ཡངས་ཤིང་དྭངས་པ་བསིལ་ཞིང་འཇམ་པ་ལ་སོགས་པ་ཡན་ལག་བརྒྱད་ལྡན་གྱི་ཆུ་བོ། ཡན་ལག་བརྒྱད་ནི། བསིལ་བ། འཇམ་པ། རོ་ཞིམ་པ། ཡང་བ། དྭངས་པ། དྲི་མ་མེད་པ། འཐུང་ན་ལྟོ་ལ་བདེ་བ། མགྲིན་པ་ལ་མི་གནོད་པ་བཅས་སོ། །འབབ་ཆུའི་ཁ་ཞེང་དཔག་ཚད་གཅིག་པ་ནས་བརྒྱ་སྟོང་གི་བར་དུ་ཡོད་པ། ཆུའི་ནང་དུ་རོལ་རྩེད་ལ་ཞུགས་པའི་སྐྱེ་བོའི་བསམ་པ་ལྟར་དུ། ཆུ་སྲབ་དགོས་ཚེ་རྐང་པའི་ལོང་བུ་ནུབ་ཙམ་དང་དེ་ལས་ཅུང་གཏིང་ཟབ་དགོས་ཚེ་སྐེད་པ་མན་ཆད་ནུབ་པ། ཡང་མགྲིན་པའི་བར་དུ་ནུབ་པ། གནོད་པ་མེད་ཅིང་དྲི་ཞིམ་པ། འབབ་སྟེགས་བདེ་ཞིང་འདམ་རྫབ་མེད་པ། གསེར་གྱི་བྱེ་མ་བརྡལ་བ། ལྷའི་མེ་ཏོག་སྣ་ཚོགས་གྱིས་ཆུའི་ཁ་རུ་ཁེབས་ཡོད་པ། རྗེ་རིན་པོ་ཆེས། དག་པའི་སེམས་ཅན་རྣམས་ཀྱི་ཉེར་འཚོའི་གཞི། །ཡིད་འཛིན་ཏ་མ་ལ་དང་ཨ་ག་རུ། །རྒྱ་སྤོས་ཙན་དན་སྦྲུལ་སྙིང་གིས་བགོས་པ། །ཉལ་འགྲོའི་རྒྱུན་རྣམས་སྒྲ་སྙན་སྒྲོག་ཅིང་འབབ། །ཅེས་དང་། །ཀུན་མཁྱེན་འཇིགས་གླིང་གིས། འབབ་སྟེགས་མཆོག་ཏུ་བདེ་བའི་སྤོས་ཆུའི་ཀླུང་། །ཅ་ཅོའི་གཞན་དབང་མ་ཡིན་ཡིད་ལ་འབབ། །རྣམ་པར་བདེ་དང་སྙན་པས་ཆོག་མི་ཤེས། །མི་རྟག་ཞི་དང་བདག་མེད་དོན་ལ་རྟོན། །ཞེས་དང་། འདམ་རྫབ་སྤངས་བའི་གསེར་གྱི་བྱེ་མ་ལ། །བཞད་དང་ཁྲུང་ཁྲུང་ངང་ངུར་ཀ་རཎ་ད། །ནེ་ཙོ་རི་སྐེགས་རྨ་བྱ་ཀི་ལ་ན། ཀ་ལ་པིང་ཀའི་རྒྱུད་མང་ལ་བསྙེན་པ། །ཞེས་གསུངས་པ་ལྟར། ཆུ་ཀླུང་དེ་ཚོ་གང་ལ་གང་འདོད་ཀྱི་དྲོ་གྲང་གི་རེག་བྱ་ཅན། ཆུ་འགྲམ་ཕར་ཚུར་གཉིས་ཀ་ན་རིན་པོ་ཆེ་སྤོས་ཀྱི་ལྗོན་ཤིང་གིས་གང་ནས་ཡོད་པ་དང་། རྫིང་བུའི་རྒྱན་ནི། བདུད་རྩི་འདྲ་མིན་ལྷའི་བདུད་རྩི་རོ་ཞིམ་པ་དང་མངར་བའི་བཅུད་དང་ལྡན་པའི་རྫིང་བུ་དེ་ཚོ་ནད་སེལ་གྱི་སྨན་ཡིན་པ། རྫིང་བུའི་གཞི་རིན་པོ་ཆེ་སྣ་བདུན་ལས་གྲུབ་ཅིང་རིན་པོ་ཆེ་པདྨས་ཁེབས་ཡོད་པ། ཕྱོགས་བཞིར་རིན་པོ་ཆེའི་ཐེམ་སྐས་ཡོད་པ། ཕྱི་རོལ་དུ་རིན་པོ་ཆེའི་ལྗོན་ཤིང་གི་ཕྲེང་བས་བརྒྱན་པ། རིན་པོ་ཆེ་སྣ་བདུན་ནི། གསེར། དངུལ། ཤེལ། མུ་ཏིག་དམར་པོ། བེེཌཱུརྱ། སྤུག་དང་རྡོའི་སྙིང་པོ་དག་རེད། དེ་ནས་པདྨའི་རྒྱན་གྱི་ནི། མེ་ཏོག་པད་མ་རིན་པོ་ཆེ་སྣ་བདུན་གྱིས་གྲུབ་པ་རང་བྱུང་གི་དྲི་ཞིམ་པོ་ཅན། འབྲས་བུ་ཞིམ་མངར་ཅན། པདྨ་རེ་རེའི་རྒྱ་ཁྱོན་ལ་དཔག་ཚད་ཕྱེད་རེ་ཙམ་དང་། ཡང་འགའ་རེ་དཔག་ཚད་གཅིག་ནས་བཅུའི་བར་དུ་ཡོད་པ། དེ་ཐམས་ཅད་འོད་ཟེར་བྱེ་བ་སྟོང་ཕྲག་སུམ་ཅུ་རྩ་དྲུག་དྲུག་འབྱུང་བ་ཅན། འོད་ཟེར་རེ་རེའི་རྩེ་ནས་དེ་བཞིན་གཤེགས་པའི་སྐུ་གཟུགས་དཔལ་དང་གཟི་བརྗིད་འབར་བ་བྱེ་བ་སྟོང་ཕྲག་སུམ་ཅུ་རྩ་དྲུག་དྲུག་འབྱུང་བ། དེ་ཐམས་ཅད་ཀྱིས་ཕྱོགས་བཅུའི་ཇིག་རྟེན་གྱི་ཁམས་བགྲང་ལས་འདས་པ་ལ་ཆོས་སྟོན་པ། དེ་དག་ནི་ཆུ་དང་པདྨོའི་ཡོན་ཏན་རེད། འདིར་མེ་ཏོག་པདྨ་ཞེས་པ་འདི་ཟློས་སྐྱོན་མ་ཡིན་ནམ། མེ་ཏོག་ཅེས་པས་ཆོག་གི་པདྨ་ཟེར་མི་དགོས་སོ་སྙམ་ན། སྐྱོན་མེད་དེ་མེ་ཏོག་ཡིན་ན་པདྨ་ཡིན་པས་མ་ཁྱབ་པ་ཀུ་མུད་ལ་སོགས་པ་ཡང་ཡོད་པས་སོ།།

ལྔ་བ་བཅུད་ཀྱི་ཡོན་ཏན་ཡིད་ལ་བྱེད་པའི་སྨོན་ལམ།

མི་ཁོམ་བརྒྱད་དང་ངན་སོང་སྒྲ་མི་གྲགས། །ཉོན་མོངས་དུག་ལྔ་དུག་གསུམ་ནད་དང་གདོན། །དགྲ་དང་དབུལ་ཕོངས་འཐབ་རྩོད་ལ་སོགས་པ། །སྡུག་བསྔལ་ཐམས་ཅད་ཞིང་དེར་ཐོས་མ་མྱོང་། །བདེ་བ་ཆེན་པོའི་ཞིང་དེར་སྐྱེ་བར་ཤོག །ཅེས་གསུངས་ཏེ། བདེ་བ་ཆེན་པོའི་ཞིང་ཁམས་དེར་ལོག་ལྟ་ཅན་དང་ཀླ་ཀློ་ལ་སོགས་པ་མི་ཁོམ་པའི་རིགས་སུ་སྐྱེས་པའི་སེམས་ཅན་དང་། ངན་སོང་གི་སེམས་ཅན་ཡོད་པ་ལྟ་ཅི་མི་ཁོམ་དང་ངན་སོང་ངན་འགྲོའི་སྒྲ་ཙམ་ཡང་མི་གྲག་ཅིང་། ཉོན་མོངས་དུག་ལྔ་དང་དུག་གསུམ་གང་ཟག་གི་རྒྱུད་ལ་གཏན་ནས་མེད་པས། སྲོག་གཅོད་རྐུ་འཕྲོག་ལ་སོགས་པའི་ལས་མི་གསོག དེས་ན་ལས་ངན་གྱིས་བསྐྱེད་པའི་འབྲས་བུ་སྡུག་བསྔལ་གྱི་བྱེ་བྲག་དགྲས་གསོད་བཅོམ་འཕྲོག་གསུམ། ལྐོག་ནས་བླ་བཙག་པ། ངོས་ནས་མཚང་འབྲུ་བ། དེ་ལ་བརྟེན་པའི་ལུས་ངག་གི་འཐབ་རྩོད། རྒྱུ་ནོར་མེད་པས་དབུལ་བའི་སྡུག་བསྔལ། ཟས་གོས་མེད་པས་ཕོངས་པའི་སྡུག་བསྔལ། ནང་འཁྲུག་དམེ་མཁོན་ནད་རིགས་སྣ་ཚོགས་གདོན་བགེགས་ལ་སོགས་པ་མདོར་ན་སྡུག་བསྔལ་གྱི་རིགས་ཐམས་ཅད་དངོས་སུ་མྱོང་བ་ལྟ་ཅི་སྒྲ་ཙམ་ཡང་ཐོས་མ་མྱོང་བ། དེ་ལྟ་བུའི་བདེ་བ་ཅན་གྱི་ཞིང་དེར་སྐྱེ་བར་ཤོག་ཅིག་ཅེས་གསུངས་སོ། །བུད་མེད་མེད་ཅིང་མངལ་ནས་སྐྱེ་བ་མེད། །ཀུན་ཀྱང་མེ་ཏོག་པདྨའི་སྦུབས་ནས་འཁྲུངས། །ཐམས་ཅད་སྐུ་ལུས་ཁྱད་མེད་གསེར་གྱི་མདོག །དབུ་ལ་གཙུག་ཏོར་ལ་སོགས་མཚན་དཔེས་བརྒྱན། །མངོན་ཤེས་ལྔ་དང་སྤྱན་ལྔ་ཀུན་ལ་མངའ། །ཡོན་ཏན་དཔག་མེད་ཞིང་དེར་སྐྱེ་བར་ཤོག །ཅེས་གསུངས་ཏེ། སྤྱིར་བདེ་བ་ཅན་གྱི་ཞིང་ན་ལྷ་དང་མིའི་རྣམ་པ་ཅན་མ་གཏོགས་འགྲོ་བ་གཞན་མེད། དེ་གཉིས་ཀ་ཡང་མིང་གིས་ཁྱད་པར་ཕྱེ་བ་ཙམ་མིན། སྐྱེ་དམན་བུད་མེད་ཀྱི་ལུས་ཅན་མེད་ཅིང་སྐྱེ་བ་རྣམ་བཞིའི་ནང་གི་རྫུས་སྐྱེས་མ་གཏོགས་མངལ་སྐྱེས་ལ་སོགས་པ་མེད་པ། ཀུན་ཀྱང་མེ་ཏོག་པདྨའི་སྦུབས་རིན་པོ་ཆེའི་པདྨ་ཡངས་ཤིང་ཁ་དོག་གི་ཚོན་སྣ་ཚོགས་ཅན། རེག་ན་བདེ་ཞིང་དྲི་ཞིམ་པོའི་བསུང་དང་ལྡན་པའི་ནང་ནས་རྫུས་སྐྱེས་ཐོལ་བྱུང་གིས་སྐྱེ། ཐམས་ཅད་ཀྱི་སྐུ་ལུས་ལ་མཚན་དང་དཔེ་བྱད་ཀྱིས་བརྒྱན་ཅིང་བཟང་ངན་དང་མཛེས་མི་མཛེས་མེད་པ་གསེར་གྱི་མདོག་ཅན། དྭངས་ཤིང་འཚེར་བའི་གཟུགས་ཅན། ལུས་མི་གཙང་བའི་རྫས་དང་བྲལ་བ། རྡོ་རྗེ་ལྟར་དུ་མཁྲེགས་པའི་ལུས་ཅན། སྲེད་མེད་བུའི་སྟོབས་དང་ལྡན་པ། དམིགས་བསལ་གྱིས་པདྨའི་སྦུབས་ནས་ཡུན་རིང་འདུག་དགོས་པ་དག་མ་གཏོགས་ཐམས་ཅད་མངོན་པར་ཤེས་པ་ལྔ་དང་། སྤྱན་ལྔ་མངའ་བ་དེ་འདྲའི་ཤེས་རབ་དང་སྤོབས་པ་མཐའ་ཡས་པ། སྨོན་ལམ་གྱི་དབང་གིས་མ་གཏོགས་ཚེའི་ཚད་མཐའ་མི་མངོན་པ། འདི་ནས་མངོན་ཤེས་ལྔ་དང་སྤྱན་ལྔ་ཀུན་ལ་མངའ་གསུངས་པ་འདིར་གོ་བ་ཞིབ་ཕྲ་ལེན་རྒྱུ་ཡོད། མངོན་ཤེས་ཟེར་བ་འདིའི་ཐད་ནས་བསམ་བློ་ཞིག་བཏང་ན། སྤྱིར་མངོན་ཤེས་ཟེར་བ་དེ་བསམ་གཏན་གྱི་དངོས་གཞི་ལ་བརྟེན་པའི་མངོན་སུམ་གྱི་བློ་མ་འཁྲུལ་བ་ཞིག་ལ་གསུང་ཀྱིན་ཡོད། འདི་ནས་གཙོ་ཆེ་བའི་དབང་དུ་བྱས་ཏེ་ལྔ་གསུངས་ཀྱི་དྲུག་ཏུ་དབྱེ་བ་བྱས་ཀྱང་ཆོག་གོ། །གང་གང་རེད་ཅེ་ན། རྫུ་འཕྲུལ་གྱི་མངོན་ཤེས། ལྷའི་མིག་གི་མངོན་ཤེས། རྣ་བའི་མངོན་ཤེས། སྔོན་གནས་རྗེས་དྲན་གྱི་མངོན་ཤེས། ཕ་རོལ་གྱི་སེམས་ཤེས་པའི་མངོན་ཤེས། ཟག་ཟད་ཀྱི་མངོན་ཤེས་དང་དྲུག ནམ་མཁར་འགྲོ་ནུས་པ་དང་རི་བྲག་ལ་ཟང་ཐལ་དུ་བགྲོད་ནུས་པ་ལ་སོགས་པ་རྫུ་འཕྲུལ་གྱི་མངོན་ཤེས། འཇིག་རྟེན་ཁམས་ཀྱི་གཟུགས་ཉེ་རིང་ཐམས་ཅད་མཐོང་བ་དང་སེམས་ཅན་གྱི་འཆི་འཕོ་སྐྱེ་བ་ཤེས་པ་ལྷའི་མིག་གི་མངོན་ཤེས། ཐག་རིང་ཐུང་གི་སྒྲ་ཆེ་ཆུང་ཐམས་ཅད་ཤེས་པ་ལྷའི་རྣ་བའི་མངོན་ཤེས། ཚེ་རབས་སྐྱེ་བ་སྔོན་མ་དྲན་པ་སྔོན་གནས་རྗེས་དྲན་གྱི་མངོན་ཤེས། གཞན་གྱི་སེམས་ཤེས་པ་གཞན་སེམས་ཤེས་པའི་མངོན་ཤེས། ཟག་ཟད་ཀྱི་མངོན་ཤེས་ནི་རང་གཞན་གྱི་རྒྱུད་ཟག་པ་ཉོན་མོངས་དང་བྲལ་ཡོད་མེད་ཤེས་པ་ལ་ཟེར་ཞིང་། དཔེ་ནམ་མཁར་འགྲོ་བ་ཞིག་ལ་མཚོན་ན། ནམ་མཁར་འགྲོ་བ་ཁོ་རང་རྫུ་འཕྲུལ་གྱི་མངོན་ཤེས་མིན། ནམ་མཁར་འགྲོ་ནུས་པའི་བློ་ཁྱད་པར་ཅན་དེ་རྫུ་འཕྲུལ་གྱི་མངོན་ཤེས། ཐག་རིང་གི་གཟུགས་མཐོང་བ་དེ་ལྷའི་མིག་གི་མངོན་ཤེས་མིན་ཞིང་། དེ་མཐོང་བར་ནུས་པའི་བློ་ཁྱད་པར་ཅན་དེ་ལྷའི་མིག་གི་མངོན་ཤེས། ཚང་མ་ལ་དེ་ལྟར་དུ་གོ་བ་རིགས་འདྲ། སྤྱན་ལྔ་ལ་མཚོན་ན། ཤའི་སྤྱན། ལྷའི་སྤྱན། ཤེས་རབ་ཀྱི་སྤྱན། ཆོས་ཀྱི་སྤྱན། ཡེ་ཤེས་ཀྱི་སྤྱན་ཏེ་ལྔ། གཟུགས་ཕྲ་རགས་མང་པོ་ཤེས་པ་ཤའི་སྤྱན། འཆི་འཕོ་དང་སྐྱེ་བ་ཤེས་པ་ལྷའི་སྤྱན། བདག་མེད་མངོན་སུམ་དུ་རྟོགས་པ་ཤེས་རབ་ཀྱི་སྤྱན། རང་གཞན་དབང་པོ་རྣོ་རྟུལ་ཤེས་པ་ཆོས་ཀྱི་སྤྱན། རྣམ་མཁྱེན་གྱི་ཡེ་ཤེས་མངའ་བ་ཡེ་ཤེས་ཀྱི་སྤྱན་ནོ། །གཞན་ཡང་། མངོན་ཤེས་ལྔ་དང་སྤྱན་ལྔ་ཀུན་ལ་མངའ། །ཞེས་གསུངས་པ་འདི་ལ་དཔྱད་པ་ཞིབ་མོ་བྱེད་རྒྱུ་ཡོད། མངོན་ཤེས་ལྔའམ་དྲུག་པོ་བདེ་བ་ཅན་པ་ཚང་མ་ལ་ཡོད་དགོས་པ་རེད། ཀུན་ཤེས་པའི་དབང་པོ་མཐོང་བའམ་མ་ཐོབ་པ་མེད་པའི་ཕྱིར་ན་མངོན་ཤེས་ལྔའམ་དྲུག་པོ་ཡོད་རིགས། འདི་ནས་དངོས་བསྟན་ཡང་དེ་ཡིན། འོན་ཀྱང་སྤྱན་ལྔ་ཡོངས་སུ་རྫོགས་པ་དེ་བཞིན་གཤེགས་པ་ཁོ་ན་ཡིན་དགོས། དེ་ཅིའི་ཕྱིར་ཞེ་ན། སངས་རྒྱས་འཕགས་པ་ཁྱད་པར་དུ་ཕྱེ་བའི་འབྱེད་ཆོས་ཐུན་མོང་མ་ཡིན་པ་དེ་སངས་རྒྱས་ཀྱི་སྤྱན་རེད། དེ་ཡོད་པ་སངས་རྒྱས་འཕགས་པ་ཁོ་ན་ཡིན། དེ་ཡིན་ན་བདེ་བ་ཅན་དུ་བྱང་སེམས་འཕགས་པ་ཡོད་མི་རིགས་པ་མིན། འོད་མདོའི་ལུང་དང་བསྟུན་ན་ཡང་། སངས་རྒྱས་ཀྱི་སྤྱན་སྒྲུབ་པའི་ཕ་རོལ་ཏུ་ཕྱིན་པ་དེ་འདྲ་ཤ་སྟག་ཡིན་གསུངས། འོ་ན་མཁས་གྲུབ་རཱ་ག་ཨ་སྱས་གསུང་ནོར་ཡིན་ནམ་སྙམ་ན་ཅི་ལ་ཡིན། དེའི་དགོངས་པ་ཇེ་ལྟར་ལེན་དགོས་ཤེ་ན། དཔེར་ན་རྒྱལ་པོ་ཆེན་པོ་ཞིག་གིས་རྒྱུ་ཆེན་པོ་ཞིག་སྦྱིན་རྒྱུ་བཀའ་ཡིས་བཅད་དེ་བཀའ་ཐག་ཆོད་ཚར་དུས་དེའི་རྒྱུ་ནོར་དེ་དེའི་བདག་པོ་དེའི་ལག་ཏུ་འབྱོར་ངེས་པས་ང་ལ་རྒྱལ་པོས་དེ་གནང་སོང་ཟེར་ཆོག་པ་རེད། ཐོབ་པ་དངོས་མ་ཡིན་ཀྱང་རྙེད་པ་ལས་མི་ཟློག་པ་ཡིན་པས་ན་ཐོབ་པ་དང་འདྲ་བའི་ཆ་ནས་དེ་འདྲ་བཤད་ཆོག དེ་དང་འདྲ་བ་ཞིང་ཁམས་དེའི་བྱང་ཆུབ་སེམས་དཔའ་ཐམས་ཅད་རྫོགས་པའི་བྱང་ཆུབ་ལས་སླར་མི་ཟློག་པ་ཐོབ་ངེས་པས། བྱང་ཆུབ་ཆེན་པོ་ཐོབ་མ་རག་པ་ལ་དགོངས་ཏེ་ཐོབ་པ་དང་ཆ་འདྲ་བའི་ཆ་ནས་གསུངས་པ་ཞིག་ལ་གོ་བ་ལེན་དགོས། ཚིག་གི་ཐོག་ནས་མངོན་ཤེས་ལྔ་དང་སྤྱན་ལྔ་མངའ་གསུངས་ཡོད་པ་རེད་མ་གཏོགས་ཡོངས་སུ་རྫོགས་པ་མངའ་གསུངས་མེད། འདིར་ཅུང་ཟད་ཞིབ་ཚགས་ལྟ་བུ་བྱས་ན་དེ་འདྲ་ཞིག་རེད། བདེ་བ་ཅན་དུ་ཡོད་པའི་རྒྱལ་བའི་འཁོར་དེ་ཉན་ཐོས་ཀྱི་འཁོར་དང་བྱང་ཆུབ་སེམས་དཔའི་འཁོར་ཏེ་རིགས་གཉིས་སུ་འདུས། ཉན་ཐོས་ཀྱི་འཁོར་འདུས་པ་དང་པོའི་མང་ཉུང་ནི། རྫུ་འཕྲུལ་དཔག་ཏུ་མེད་པ་དང་ལྡན་པའི་འཕགས་པ་མོའུ་འགལ་གྱི་བུ་ལྟ་བུ་བྱེ་བ་ཁྲག་ཁྲིག་བརྒྱ་སྟོང་གིས་ལོ་བྱེ་བ་ཁྲག་ཁྲིག་བརྒྱ་སྟོང་ལ་བརྩིས་ན་རྩིས་གྲངས་མི་ཐུབ་པ་དེ་འདྲ་ཡོད། འདུས་པ་གཉིས་པ་དང་གསུམ་པ་དེ་བས་ཀྱང་ལྡབ་མང་པོའི་མང་ཞིང་། དེ་དག་ཐམས་ཅད་ཀྱང་འོད་འདོམ་པ་གང་གིས་བརྒྱན་པ་ཤ་སྟག་ཡིན། བྱང་ཆུབ་སེམས་དཔའི་འཁོར་ལ་ནི། གྲངས་མེད་དཔག་ཏུ་མེད་ཅིང་རེ་རེ་བཞིན་དུ་ཡོན་ཏན་མཐའ་ཡས་མུ་མེད་པ། སེམས་ཅན་ཐམས་ཅད་ལ་འདྲ་མཉམ་གྱི་ཕན་སེམས་དང་བྱམས་པའི་སེམས་དང་ལྡན་པ། ཤེར་རབ་རྒྱ་ཆེན་པོ་དང་མཉམ་པ། བློ་རི་རབ་དང་མཚུངས་པ། ཆོས་ཀྱི་རྔ་ཆེན་པོ་བརྡུང་། ཆོས་ཀྱི་དུང་ཆེན་པོ་འབུད། ཆོས་ཀྱི་རྒྱལ་མཚན་ཆེན་པོ་བསྒྲེངས། ཆོས་ཀྱི་བ་དན་ཆེན་པོ་འཛིན་པའི་རྒྱལ་བའི་གདུང་འཚོབ་པ། འཇིག་རྟེན་ན་འབྱུང་བར་དཀོན་པ་མེ་ཏོག་ཨུ་དམ་ཝ་ར་དང་འདྲ་བ་ཤ་སྟག་ཡིན། དེས་ན་ཀུན་མཁྱེན་འཇིགས་གླིང་གིས། ཉན་རང་བྱང་སེམས་ལྷ་མིའི་རྣམ་པ་ཅན། །ཀུན་ཀྱང་དབང་རྣོན་བཟོད་པ་ཐོབ་པ་སྟེ། །བར་སྣང་ལ་འགྲོ་ལོག་པར་མི་ལྟུང་ཞིང་། །སངས་རྒྱས་མཐོང་དང་མི་འབྲལ་དམ་ཆོས་ཉན། །ཞེས་གསུངས། དེ་ལྟ་བུའི་ཡོན་ཏན་དཔག་མེད་ཀུན་འབྱུང་བའི་ཞིང་ཁམས་དེར་སྐྱེ་བར་ཤོག་ཅིག་ཅེས་གསུངས་སོ།།

དྲུག་པ་རྟེན་གཞལ་ཡས་ཁང་གི་ཡོན་ཏན་ཡིད་ལ་བྱེད་པའི་སྨོན་ལམ།

རང་བྱུང་རིན་ཆེན་སྣ་ཚོགས་གཞལ་ཡས་ཁང་། །ཅི་འདོད་ལོངས་སྤྱོད་ཡིད་ལ་དྲན་པས་འབྱུང་། །རྩོལ་སྒྲུབ་མི་དགོས་དགོས་འདོད་ལྷུན་གྱིས་གྲུབ། །ང་ཁྱོད་མེད་ཅིང་བདག་ཏུ་འཛིན་པ་མེད། །གང་འདོད་མཆོད་སྤྲིན་ལག་པའི་མཐིལ་ནས་འབྱུང་། །ཐམས་ཅད་བླ་མེད་ཐེག་ཆེན་ཆོས་ལ་སྤྱོད། །བདེ་སྐྱིད་ཀུན་འབྱུང་ཞིང་དེར་སྐྱེ་བར་ཤོག །ཅེས་གསུངས་ཏེ། མིས་དཀའ་ཚེགས་ངལ་དུབ་ཀྱི་སྒོ་ནས་བཟོ་བསྐྲུན་བྱས་པ་ང་ཚོའི་ཁང་བརྩེགས་ལྟ་བུ་མ་ཡིན་པར། བསོད་ནམས་དང་ཐུགས་བསྐྱེད་ཀྱི་སྟོབས་ཀྱིས་རང་གྲུབ་རང་བྱུང་གིས་སྣང་བའི་གཞལ་མེད་ཁང་། གཞལ་མེད་ཁང་དེ་ཡང་རྟ་བབས་དང་འཕྱང་འཕྲུལ་ལ་སོགས་པ་རིན་པོ་ཆེས་བརྒྱན་པ། བྱུ་རུའི་རབ་གསལ་དང་ཤེལ་གྱི་ཐེམ་སྐས་ནོར་བུའི་རང་འོད་དང་ལྡན་པའི་མཛེས་རྒྱན་སྣ་ཚོགས་པས་བརྒྱན་པ། ཁང་བུ་བརྩེགས་པ་སྟོང་ཕྲག་གིས་མཛེས་པའི་མཁར་དང་ཕོ་བྲང་། སྐྱེད་མོའི་ཚལ་དང་། ཁྲུས་ཀྱི་རྫིང་བུ། མེ་ཏོག་གི་ལྡུམ་ར། ལྗོན་པའི་ཚལ་ཡིད་དུ་འོང་བ་ཕྲེང་ལྟར་བསྒྲིགས་པ། རོལ་མོའི་རིགས་སྣ་ཚོགས་པས་སྒྲ་སྙན་ཁོ་ན་སྒྲོགས་ཀྱིན་ཡོད་པ། མདོར་ན་གཞན་འཕྲུལ་དབང་བྱེད་ཀྱིས་ཀྱང་འགྲན་དུ་མེད་པའི་ལོངས་སྤྱོད་ཀྱི་འབྱོར་བ་ཕུན་སུམ་ཚོགས་པས། བར་སྣང་ལ་སྤྲུལ་གཞལ་མེད་ཁང་ལ་སོགས། །གཞན་འཕྲུལ་དབང་བྱེད་ཀྱིས་ཀྱང་དོ་ཟླ་མིན། །ཞེས་གསུངས་པ་ལྟར། སྤྱིར་བདེ་བ་ཅན་གྱི་ཞིང་ཁམས་ལ་གནས་པ་ཐམས་ཅད་ལྷ་མིའི་རྣམ་པ་ཅན་ཡིན་པ་གོང་དུ་བཤད་པ་ལྟར། གནས་རིས་ནི་དེ་དང་མཐུན་པ་ལྷ་མིའི་གནས་རིས་གཉིས་མ་གཏོགས་གཞན་མེད། ལྷ་གནས་ལ་མཚོན་ན་རྒྱལ་ཆེན་རིགས་བཞི་དང་སུམ་ཅུ་རྩ་གསུམ་ལ་སོགས་པའི་གནས་རིས་ཀྱི་ཐ་སྙད་ཙམ་རེ་སོ་སོར་ཡོད་ན་ཡང་རི་རབ་ལ་བརྟེན་པའི་ལྷ་གནས་མིན། རི་རབ་དང་རྒྱ་མཚོ་ཆེན་པོ་མེད་པར་གསུངས། དེས་ན་ཐམས་ཅད་ནམ་མཁའ་ལ་ཆགས་ཡོད་པ་ཁོ་ན་ཡིན། ཅི་དང་གང་འདོད་པའི་ལོངས་སྤྱོད་ཐམས་ཅད་ཡིད་ལ་དྲན་པ་ཙམ་གྱིས་དེ་དང་དེ་འབྱུང་བ། རྩོལ་བས་སྒྲུབ་པའི་ངལ་བ་བྱེད་མི་དགོས་པར་དགོས་འདོད་ལྷུན་གྱིས་གྲུབ་ཅིང་། ཞིང་ཁམས་དེ་ན་ལོངས་སྤྱོད་རྣམས་ངའི་འདི། ཁྱོད་ཀྱི་དེ། ཁོང་གི་དེ་ཟེར་བ་དང་གསོག་འཇོག་དང་ཞེན་འཛིན་གཏན་ནས་མེད་པར། གང་ལ་གང་འདོད་པའི་མཆོད་པའི་ཡོ་བྱད་ཅི་དང་ཅི་དགོས་པ་ཐམས་ཅད་ཞེ་ལ་དྲན་མ་ཐག་ཏུ་ལག་པའི་མཐིལ་ནས་འབྱུང་བ། ཞིང་ཁམས་བདེ་བ་ཅན་དུ་སྐྱེས་ཚད་གནས་དང་ཡོ་བྱད་ཡོངས་སུ་འཛིན་པའི་འདུ་ཤེས་བྲལ་བ། འདོད་པའི་རྗེས་སུ་འབྲང་བའི་འབྱོར་བ་ལ་རང་དགར་རྩེ་བའི་ཚོད་ཀྱི་ཉམས་དགའ་བ་ཙམ་མ་གཏོགས་ཞེན་པ་མེད་པ། མ་དག་པའི་ཞིང་གི་ལྷའི་བདེ་བ་ལས་འདས་པའི་བདེ་བ་གྱ་ནོམ་པ་རྒྱ་ཆེ་བ་སྣ་ཚོགས་པ་དང་ལྡན་པ། བདེ་བ་ཅན་གྱི་ཞིང་གི་རྒྱན་དང་འབྱོར་བ་འདི་དག་ཞིང་བཀོད་ཀྱི་མདོ་དང་འོད་མདོའི་ནང་དུ་གསུངས་ཡོད་པ་དག་ཕལ་ཆེར་ཕྱོགས་མཚོན་གོ་བརྡ་འཕྲོད་བྱེད་ཙམ་ཞིག་གསུངས་པ་རེད་མ་གཏོགས་ཇི་མ་ཇི་བཞིན་ནི་མིའི་ཚིག་དང་ཡི་གེའི་ལམ་ནས་སོ་སོ་སྐྱེ་བོ་ཞིག་ལ་གོ་བརྡ་འཕྲོད་མི་ཐུབ། གཞན་པ་ལྟ་ཅི་རྒྱལ་བའི་ལྗགས་ཀྱིས་གསུངས་ན་ཡང་དུས་ཐུང་ཐུང་ཞིག་གིས་གསུངས་མི་ཚར། ཞིང་དེ་ན་ཡོད་པ་ཐམས་ཅད་ཀྱིས་བླ་ན་མེད་པ་ཐེག་པ་ཆེན་པོའི་ཆོས་ལ་ལོངས་སྤྱོད་ཀྱིན་ཡོད། འོ་ན་ཉན་ཐོས་དང་རང་རྒྱལ་རྩིས་གྲངས་མི་ཐེབ་པ་ཞིག་ཡོད་པ་དེ་རྣམས་ཅི་རེད་ཅེ་ན། འོད་མདོ་དང་པདྨ་དཀར་པོའི་མདོའི་ནང་དུ་ཉན་ཐོས་དག་པ་ཞེས་གསུངས་ཡོད། ཀུན་མཁྱེན་གོ་རམས་པས། ཚངས་པའི་དབྱངས་ཀྱིས་འདུས་པའི་ཚོགས་རྣམས་ལ། །ཐེག་མཆོག་སྟོན་ཚེ་ཏིང་འཛིན་གྱིས་མྱོས་པའི། །དགྲ་བཅོམ་རྣམས་ཀྱང་དམན་པའི་སེམས་སྤངས་ནས། །བྱང་ཆུབ་མཆོག་ཏུ་སྦྱོར་མཛད་ལ་ཕྱག་འཚལ། །ཞེས་གསུངས་པ་དང་། དེ་དང་མཐུན་པར་ཀུན་མཁྱེན་འཇིགས་གླིང་གིས། ཀུན་འབྱུང་རྒྱུ་འབྲས་སྤངས་པའི་ལམ་བདེན་གྱིས། །འགོག་པ་མངོན་དུ་བྱས་པའི་དགྲ་བཅོམ་ཡང་། །རྣམ་ཐར་གསུམ་གྱི་དབྱིངས་ལ་དབུགས་ཕྱུང་ནས། །འོད་ཟེར་ཆེན་པོའི་དབང་བསྐུར་ལ་སྦྱོར་བ། །ཞེས་གསུངས། །རྣམ་པར་ཐར་བའི་སྒོ་སྟོང་ཉིད་མཚན་མེད་སྨོན་མེད་ཀྱི་དབྱིངས་མཐར་ཐུག་ཐེག་གཅིག་གི་ཐེག་པ་ཆེན་པོའི་ལྟ་སྒོམ་སྤྱོད་པ་དང་འབྲེལ་བའི་འོད་ཟེར་ཆེན་པོའི་དབང་བསྐུར་གྱིས་བྱང་ཆུབ་ཆེན་པོར་འགྱུར་བའི་ཉན་ཐོས་དགྲ་བཅོམ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔས་གང་བས། བསམ་གྱིས་མི་ཁྱབ་པའི་འཆི་འཕོ་སོགས་མེད་པས་བདེ་སྐྱིད་ཀུན་འབྱུང་གི་ཞིང་དེར་སྐྱེ་བར་ཤོག་ཅིག་ཅེས་གསུངས། འདི་ནས་བཅུད་དང་འབྲེལ་བའི་བཀོད་པ་གཞན་གོང་དུ་ཞིང་གི་ཕུན་ཚོགས་བཤད་པའི་སྐབས་ནས་ས་གཞི་དང་ནམ་མཁའི་རྒྱན་གཉིས་ཡོད་ཅེས་པའི་ནམ་མཁའ་ལ་འབྱུང་བའི་རྒྱན་གྱི་ནང་གི་རླུང་གི་སྦྱོར་བ་གསུང་གི་ཡོད་པ་རེད། དྲི་ཞིམ་རླུང་གིས་མེ་ཏོག་ཆར་ཆེན་འབེབས། །ཤིང་དང་པདྨོ་ཆུ་ཀླུང་ཐམས་ཅད་ལས། །ཡིད་དུ་འོང་བའི་གཟུགས་སྒྲ་དྲི་རོ་རེག །ལོངས་སྤྱོད་མཆོད་པའི་སྤྲིན་ཕུང་རྟག་ཏུ་འབྱུང་། །ཞེས་གསུངས་ཏེ། བདེ་བ་ཅན་གྱི་ཞིང་ཁམས་དེ་ན་སྔ་དྲོའི་དུས་སུ་ཕྱོགས་བཞི་ནས་རླུང་ལང་སྟེ་རླུང་གིས་རིན་པོ་ཆེའི་ལྗོན་ཤིང་གི་ཡལ་ག་བསྒུལ་ཡོང་བས། ལྗོན་ཤིང་གི་ཡལ་གའི་མེ་ཏོག་དྲི་ཞིམ་ཅན་ཡིད་དུ་འོང་བའི་ཆར་ས་སྟེང་དུ་བབ་སྟེ་མེ་ཏོག་གིས་མི་འགྲེང་བདུན་སྲིད་ཙམ་དུ་མཉམ་པར་ཁེབས་འགྲོ་བར་གསུངས། ཀུན་མཁྱེན་འཇིགས་གླིང་གིས། དྲི་བསུང་ལྷག་པར་རྒྱས་པའི་མེ་ཏོག་གིས། །ཀུན་ནས་ཀུན་ཏུ་བཀྲམ་བའི་བསྟི་སྟང་ནི། །མི་འགྲེང་བདུན་དུ་བསྙེགས་པས་མི་ངོམས་པར། །ཞེས་པ་ལྟ་བུ། དེས་སྤོས་དྲི་ངད་ལྡན་གྱིས་བགོས་པའི་རླུང་དེ་ཚོ་སྣ་ལ་ཕོག་ན་དགེ་སློང་འགོག་པ་ལ་སྙོམས་པར་ཞུགས་པ་ལྟ་བུའི་བདེ་བ་དང་ལྡན་པར་འགྱུར་བར་གསུངས། སྔ་དྲོ་འདས་མ་ཐག་ཏུ་མེ་ཏོག་རྙིང་བ་རྣམས་མེད་པར་གྱུར་ཏེ། དེ་ནས་ཞིང་ཁམས་དེ་དབེན་ཞིང་ཉམས་དགའ་བ་དག་ཅིང་གཙང་བར་གྱུར། ཡང་མཚམས་དང་མཚམས་སྐབས་དང་སྐབས་སུ་མེ་ཏོག་འདྲེན་པའི་རླུང་གསར་བ་ཡོང་བ་དང་། དུས་དང་དུས་སུ་ལྷའི་སྤོས་ཆུའི་སྤྲིན་གྱི་ཆར་དང་ལྷའི་མེ་ཏོག་ཁ་ཏོག་སྣ་ཚོགས་ཅན། དེ་མིན་ལྷའི་རིན་པོ་ཆེ་སྣ་བདུན་གདུགས་དང་ཕྱེ་མ་འཕན་ཕུར་བ་དན་བླ་བྲེ་རྒྱལ་མཚན་དག་ཆར་བཞིན་དུ་འབབ་པ་དང་། ལྷ་རྣམས་ཀྱིས་རིན་པོ་ཆེའི་གདུགས་དང་རྔ་ཡབ་ནམ་མཁའ་ནས་བཟུང་སྟེ་ལྷའི་རོལ་མོའི་སྒྲ་དབྱངས་སྒྲོགས་བཞིན་དུ། ལྷའི་བུ་དང་བུ་མོ་དག་གིས་གར་བྱེད་པ་དེ། འུ་ཚོའི་དུས་རྒྱུན་གྱི་ཆར་དང་གློག་དང་འབྲུག་སྒྲ་སྤྲིན་ལྟ་བུ་རེད། སྟེང་གི་བར་སྣང་ལ་ཀུན་དགའ་ར་བ་ཉམས་དགའ་བ་དང་ནགས་ཚལ་རྫིང་བུ་ཆུ་ཀླུང་སྐྱེད་མོའི་ཚལ་ཡོད་པ། འོག་མིན་གྱི་བར་གྱི་ནམ་མཁའི་ངོས་ན་རིན་པོ་ཆེའི་མེ་ཏོག་བཀྲམ་པའི་སྦྱོར་བ་དེ་འདྲ་ཡོད་པར་གསུངས། ད་དུང་ཞིང་ཁམས་དེའི་ནང་དུ་སྐྱེས་པ་ཚང་མ་གཞལ་མེད་ཁང་དཔག་ཚད་བརྒྱ་སྟོང་ཡོད་པ་དེ་འདྲའི་ནང་དུ་ཞུགས་ཏེ་བར་སྣང་ལ་འགྲོ་བཞིན་ཡོད་པ། ནམ་མཁའ་ལ་འབྱུང་བའི་ཁང་བཟང་ལ་སོགས་པ་ཡོད་པ་དང་། ས་གཞིའི་ཁང་བཟང་དུ་འགྲོ་འདོད་ན་ནམ་མཁའ་ལ་འགྲོ་ཐུབ་པ། ལྷ་མི་གཉིས་ཀའི་ཐུན་མོང་དུ་སྣང་བ་དེ་འདྲ་ཡིན་པ་རེད། གོང་དུ་བཤད་པ་ལྟ་བུའི་མཛེས་པའི་གཟུགས། སྙན་པའི་སྒྲ། ཞིམ་པའི་དྲི། རོ་བརྒྱའི་ཞལ་ཟས། རེག་ན་འཇམ་པ་ལྷའི་གོས་རིན་ཐང་གཞལ་མེད་ལ་སོགས་པ་ལོངས་སྤྱོད་དང་མཆོད་པའི་སྤྲིན་ཕུང་དུས་རྟག་ཏུ་རྒྱུན་ཆད་མེད་པ། འབད་པ་མེད་པ་གང་འདོད་ན་དེ་འབྱུང་བ་གཞན་འཕྲུལ་དབང་བྱེད་ཀྱི་ལྷའི་འབྱོར་བ་དང་འདྲ་བར་མ་ཟད། དེ་ལས་ཀྱང་ལྡབ་མང་པོས་ལྷག་ཅིང་ཟག་མེད་ཏིང་འཛིན་གྱི་བདེ་བས་དུས་འདའ་བ་ཡིན། །བུད་མེད་མེད་ཀྱང་སྤྲུལ་བའི་ལྷ་མོའི་ཚོགས། །མཆོད་པའི་ལྷ་མོ་དུ་མས་རྟག་ཏུ་མཆོད། །ཅེས་གསུངས་ཏེ། ཞིང་ཁམས་བདེ་བ་ཅན་དུ་ཐ་མལ་མ་དག་པའི་བུད་མེད་མེད་ཀྱང་སངས་རྒྱས་ཀྱི་སྤྲུལ་བའི་ལྷའི་བུ་དང་བུ་མོའི་ཚོགས་དང་མཆོད་པའི་ལྷ་མོ་དུ་མ་གསུངས་པ་ནི། མཆོད་པའི་ལྷ་མོ་བཅུ་དྲུག་དང་མཆོད་པ་སྟོབ་པའི་ལྷ་མོ་སྟོང་ཕྲག་བདུན་ལ་སོགས་པས་དེ་ན་གནས་པའི་བྱང་ཆུབ་སེམས་དཔའ་རེ་རེ་ལ་ཡང་མཆོད་པ་སྟོབ་པར་བྱེད་པ་ཡིན་པར་གསུངས་སོ། །འདུག་པར་འདོད་ཚེ་རིན་ཆེན་གཞལ་ཡས་ཁང་། །ཉལ་བར་འདོད་ཚེ་རིན་ཆེན་ཁྲི་བཟང་སྟེང་། །དར་ཟབ་དུ་མའི་མལ་སྟན་སྔས་དང་བཅས། །ཞེས་གསུངས་ཏེ། འདུག་པར་འདོད་ཚེ་རིན་པོ་ཆེ་སྣ་ཚོགས་ཀྱིས་བརྒྱན་པའི་གཞལ་མེད་ཁང་། བ་གམ་བརྒྱ་སྟོང་ཅན་གྱི་ནང་དུ་རིན་པོ་ཆེའི་ཁྲི་དང་ཁྲིའུ་མུ་ཏིག་དར་ཟབ་ཀྱི་འབོལ་བརྩེགས་ཅན། སྔས་ཁྲ་བོ་དང་རྐང་སྟེགས་བླ་བྲེ་ཡོལ་བ་ལ་སོགས་པས་བརྒྱན་ཡོད་པ་ལ་ལོངས་སུ་སྤྱོད་ཆོག་པ། ལྷའི་བུ་མོ་དག་གིས་གཡོས་ལེགས་པའི་ཞལ་ཟས་སྟོབ་ཅིང་དྲི་བསུང་ལྡན་པའི་ཡིད་འོང་གི་སྤོས་དྲི་ཐུལ་ནས། དེ་ན་སྐྱེས་པའི་བྱང་ཆུབ་སེམས་དཔའ་ཐམས་ཅད་ཀྱིས་རགས་པའི་ཟས་ཁམ་གྱི་ཟས་མི་གསོལ་ཡང་གང་འདོད་ཀྱི་མཆོད་པའི་ཟས་རིགས་ཅི་དང་ཅི་འདོད་པ་དྲན་པ་ཙམ་གྱིས་འབྱུང་བའོ། །གོས་རྒྱན་ནི། གོས་སྣ་ཚོགས་པ་ལྷའི་གོས་དེ་དག་ནི་འུ་ཚོའི་གོས་ཧྲུལ་འཐུག་པོ་ལྗིད་ཏིག་གི་རང་བཞིན་ཅན་དེ་འདྲ་མ་ཡིན་པར། ལྷ་རྫས་སྲབ་འཇམ་ཡང་ཞིང་དྲོ་དང་བསིལ་བའི་རེག་བྱ་གང་དགོས་ན་དེ་ལྟར་དུ་འབྱུང་བ། མདོར་ན་གོས་ཅི་འདྲ་དང་རྒྱན་ཅི་འདྲ་འདོད་ན་པ་ཐམས་ཅད་དེའི་མོད་ལ་རང་ཤུགས་ཀྱིས་འབྱུང་བ་དང་། དཔག་བསམ་གྱི་ལྗོན་ཤིང་ལས་ལེན་ཆོག་པའོ། །ཉལ་བར་འདོད་པའི་ཚེ་ཡང་དར་ཟབ་དང་ལྷའི་གོས་ཀྱི་སྔས་དང་མལ་ཆས་ལ་སོགས་པ་ཁ་ཏོག་སྣ་ཚོགས་པ་སྲབ་འཇམ་ཡང་བ་རེག་ན་ལུས་ལ་བདེ་བ་སྟེར་བ། དེ་ལྟར་ཡོད་པས་ཉམས་དགའ་བའོ། །བྱ་དང་ལྗོན་ཤིང་ཆུ་ཀླུང་རོལ་མོ་སོགས། །ཐོས་པར་འདོད་ཚེ་སྙན་པའི་ཆོས་སྒྲ་སྒྲོགས། །མི་འདོད་ཚེ་ན་རྣ་བར་སྒྲ་མི་གྲག །བདུད་རྩིའི་རྫིང་བུ་ཆུ་ཀླུང་དེ་རྣམས་ཀྱང་། །དྲོ་གྲང་གང་འདོད་དེ་ལ་དེ་ལྟར་འབྱུང་། །ཡིད་བཞིན་འགྲུབ་པའི་ཞིང་དེར་སྐྱེ་བར་ཤོག །ཅེས་གསུངས་ཏེ། །བྱ་དང་ལྗོན་ཤིང་ཆུང་ཀླུང་རོལ་མོ་སོགས། །ཐོས་པར་འདོད་ཚེ་སྙན་པའི་ཆོས་སྒྲ་སྒྲོགས། །མི་འདོད་ཚེ་ན་རྣ་བར་སྒྲ་མི་གྲག །ཅེས་གསུངས་པ་ནི། ཀུན་མཁྱེན་འཇིགས་གླིང་གིས། འདམ་རྫབ་སྤངས་བའི་གསེར་གྱི་བྱེ་མ་ལ། །བཞད་དང་ཁྲུང་ཁྲུང་ངང་ངུར་ཀ་རཎ་ཌ། །ནེ་ཙོ་རི་སྐེགས་རྨ་བྱ་ཀི་ལ་ན། །ཀ་ལ་པིང་ཀའི་རྒྱུད་མང་ལ་བསྙེན་པ། །ཞེས་གསུངས་པ་ལྟར། སྤྲུལ་བའི་བྱ་སྐད་སྙན་པའི་འགྱུར་ཁུག་ཅན་དང་ལྗོན་ཤིང་རླུང་གིས་བསྐུལ་བའི་སྒྲ་དབྱངས་སྙན་པ། ཆུ་ཀླུང་དལ་འབབ་ཀྱི་སྒྲ། བྲག་དཀར་ཤེལ་གྱི་བ་གམ་ཅན་དང་། བྲག་དམར་བྱུ་རུའི་མགུར་ཆིངས་ཅན་དེ་དག་གི་བང་རིམ་ནས་སམ་བ་གམ་དེ་ནས་འབབ་ཆུའི་སྒྲ། ལྷའི་རྔ་ལྟ་བུ། དྲི་ཟའི་རྒྱུད་མང་ལྟ་བུ། གླིང་བུ་ལྟ་བུ། ཟངས་དུང་ལྟ་བུ། རྫ་རྔ་ལྟ་བུ་ལ་སོགས་པ་ལྷའི་སྙན་པའི་དབྱངས་ཀྱི་འགྱུར་ཁུག་ཅན་དེ་དག་འདོད་པའི་ཚེ་ན། སྙན་པའི་སྒྲ་དབྱངས་ཟབ་དོན་གྱི་ཆོས་སུ་སྒྲོགས་པ་དང་། ཐོས་པར་མི་འདོད་པའི་ཚེ་ན་དབེན་ཞིང་འཇམ་ཐེང་ངེར་འདུག་པའོ། །བདུད་རྩིའི་རྫིང་བུ་ཆུ་ཀླུང་དེ་རྣམས་ཀྱང་། །དྲོ་གྲང་གང་འདོད་དེ་ལ་དེ་ལྟར་འབྱུང་། །ཞེས་གསུངས་ནི། ནད་བརྒྱ་སེལ་བའི་བདུད་རྩིའི་རྫིང་བུ་དང་ཆུ་ཀླུང་འབབ་སྟེགས་ཀྱི་བདེ་བ་དེ་དག་ཁ་དོག་སྣ་ཚོགས་པའི་དྲི་ཞིམ་དང་ལྡན་པ། རེག་བྱ་དྲོ་ན་འདོད་པའི་ཚེ་དྲོ་ཞིང་བསིལ་བར་འདོད་པའི་ཚེ་བསིལ་བ། ལྷའི་མེ་ཏོག་དག་གིས་ཁེབས་ཤིང་མདོག་སྣ་ཚོགས་སུ་གྱུར་བ། རྫིང་བུ་དང་ཆུ་ཀླུང་གི་འགྲམ་ཐམས་ཅད་ན་སྤོས་དྲི་ལྡན་པའི་ཤིང་ལྗོན་པ་ལྟ་ན་སྡུག་པ་མེ་ཏོག་གིས་བརྒྱན་པ་དག་ཕྲེང་ལྟར་བསྒྲིགས་པ། གོས་དང་ཟས་ལ་སོགས་པ་དང་རོལ་རྩེད་ཀྱི་ཆས་ལ་སོགས་པ་གང་ཅི་འདོད་ཐམས་ཅད་དེ་ནས་ལེན་ཆོག་པ། ཡིད་བཞིན་འགྲུབ་པའི་ཞིང་དེར་སྐྱེ་བར་ཤོག །ཅེས་གསུངས་ནི། ཡིད་ལ་ཅི་བསམ་པ་དེ་བཞིན་དུ་འགྲུབ་པའི་ཞིང་ཁམས་དེར་སྐྱེ་བར་ཤོག་ཅིག་ཅེས་གསུངས་པའོ།།

བདུན་པ་ཞིང་གི་གཙོ་བོའི་ཡོན་ཏན་ཡིད་ལ་བྱས་ནས་སྨོན་ལམ་འདེབས་པ།

ཞིང་དེར་རྫོགས་པའི་སངས་རྒྱས་འོད་དཔག་མེད། །བསྐལ་བ་གྲངས་མེད་མྱ་ངན་མི་འདའ་བཞུགས། །དེ་སྲིད་དེ་ཡི་ཞབས་འབྲིང་བྱེད་པར་ཤོག །ཅེས་གསུངས་ཏེ། ཞིང་ཁམས་དེའི་ས་གཞིའི་དཀྱིལ་འཁོར་གྱི་དབུས་ན་སྟོན་པ་འོད་དཔག་མེད་པའི་བྱང་ཆུབ་ཀྱི་ལྗོན་ཤིང་ཡོད་པ། བྱང་ཆུབ་ཀྱི་ལྗོན་ཤིང་དེའི་མཚན་ལ་རིན་པོ་ཆེ་པདྨོ་རྣམ་པར་སྣང་བ་ཞེས་ཟེར་ཞིང་། དེའི་དྲུང་དུ་པདྨའི་གདན་ཡོད་ཅིང་། དེའི་མཚན་ལ་དག་ཅིང་བཟང་ལ་བཀྲ་བའི་འོད་ཟེར་ཅན་ཞེས་འཆི་མེད་རྔ་སྒྲའི་ནང་དུ་གསུངས་ཡོད། བྱང་ཆུབ་ལྗོན་ཤིང་དེའི་ཚད་སྔར་བཤད་པ་ལྟར་རྒྱ་ཁྱོན་གྱི་ཚད་ལ་དཔག་ཚད་སྟོང་ཕྲག་དྲུག་བརྒྱ་དང་མཉམ་པ། རྩ་བའི་སྦོམ་ཕྲ་ལ་དཔག་ཚད་ལྔ་བརྒྱ་ཡོད་པའོ། །ཞེས་དཀོན་བརྩེགས་ཀྱི་ནང་དུ་དེ་སྐད་ཅེས་གསུངས་ཤིང་། སྙིང་རྗེ་པད་དཀར་ལས། དཔག་ཚད་ཁྲི་གསུངས་ས་ཡང་ཡོད་ལ། པདྨའི་གདན་ཡང་དེ་དང་མཚུངས་པར་གསུངས་ཀྱང་། འོན་ཏེ་དེ་གཉིས་ཀ་མི་མཐུན་པས་ཅི་ཡིན་སྙམ་སྟེ་དོགས་པ་བྱེད་མི་དགོས། དཀོན་བརྩེགས་ཀྱི་ནང་ནས་གསུངས་པ་དེ་བྱང་ཆུབ་སེམས་དཔའ་དགེ་བའི་རྩ་བ་ཆུང་ཤོས་ཡན་ཆད་ཀྱི་མཐོང་ཚོད་ཐུན་མོང་བའི་དབང་དུ་མཛད་པ་ལས་དེ་ཙམ་གྱིས་ཁྱབ་མཐའ་བཟུང་བ་མིན་པར་མདོ་རང་གི་ནང་ནས་ཀྱང་འབྱུང་ལ། དགེ་སློང་ཆོས་ཀྱི་འབྱུང་གནས་ཀྱིས་སྨོན་ལམ་བཏབ་པའི་ནང་ནས་ཀྱང་ཤེས་ཐུབ་པ་རེད། དེ་ལྟ་བུའི་ཤིང་གི་རྒྱལ་པོ་དེའི་ལོ་མ་དང་འབྲས་བུ་མེ་ཏོག་སྣ་ཚོགས་ཐ་དད་པ་དུས་རྟག་ཏུ་འབྱུང་བ། འཇིག་རྟེན་ན་མཆོག་ཏུ་བྱ་བའི་ནོར་བུ་རིན་ཐང་ཅན་དང་འཇིག་རྟེན་གྱི་ཁམས་ཕལ་བ་ན་མེད་པའི་རིན་པོ་ཆེ་སྣ་ཚོགས་པས་བརྒྱན་པ། གསེར་དང་ནོར་བུའི་དྲ་བ་དང་དྲ་ཕྱེད། དོ་ཤལ་དང་སེ་མོ་དོ་སྣ་ཚོགས་པ་ཕྱང་འཕྲུལ་ལ་དཔྱངས་པ། དྲིལ་བུ་དང་གཡེར་ཁས་བརྒྱན་པ། དེ་ཐམས་ཅད་རླུང་གིས་བསྐྱོད་པའི་སྒྲ་དབྱངས་སྙན་མོ་འཇིག་རྟེན་གྱི་ཁམས་ཚད་མེད་པ་ལ་གོ་བར་བྱེད་ཅིང་། བྱང་ཆུབ་ལྗོན་པའི་ཤིང་དེའི་དྲི་ཞིམ་པོ་ཕྱོགས་བཅུའི་འཇིག་རྟེན་དུ་ཁྱབ་པ་དང་། བྱང་ཆུབ་ཀྱི་ལྗོན་ཤིང་དེའི་དབྱིབས་གཟུགས་མཐོང་མཁན་དང་། དེའི་དྲི་ཚོར་མཁན། འབྲས་བུའི་རོ་མྱོང་ཚད། འོད་ལུས་ལ་ཕོག་ཚད་དང་། དེ་ལས་གཞན་ཤིང་དེ་ཡིད་ལ་སེམས་པ་དེ་ཐམས་ཅད་བྱང་ཆུབ་མ་ཐོབ་ཀྱི་བར་དུ་དབང་པོ་རྣམ་ལྔ་གསལ་ཞིང་ལུས་ལ་ནད་ཀྱིས་མི་ཐེབ། སེམས་ཏིང་ངེ་འཛིན་ལས་མི་གཡེང་པར་གསུངས་པ་དང་། རྒྱལ་བ་འོད་དཔག་མེད་ཀྱི་ཆོས་སྟོན་པའི་གནས་ཀྱི་གཞལ་ཡས་ཁང་དེ་ལ་ཆོས་ཡང་དག་པར་སྡུད་པའི་ཁང་བཟང་ཞེས་དང་། འོད་དཔག་མེད་ཀྱིས་གཞལ་མེད་ཁང་ན་ཆོས་སྟོན་པའི་བཀོད་པ་དེ་དག་གཙུག་ཏོར་རྣམ་རྒྱལ་གྱི་རྟོགས་པ་བརྗོད་པ་དང་དོན་ཞགས་སོགས་ཀྱི་ནང་དུ་རྒྱས་པར་གསུངས་ཤིང་། དེ་ན་བཞུགས་པའི་བཅོམ་ལྡན་འདས་མགོན་པོ་འོད་དཔག་མེད་པའི་མཚན་དང་དཔེ་བྱད་ལ་སོགས་པ་སྔར་ཚོགས་ཞིང་གསལ་གདབ་ཀྱི་སྐབས་ནས་ཞིབ་ཏུ་བཤད་ཀྱང་། ད་དུང་ཡིད་ལ་གོམས་པའི་ཆེད་དུ་གསལ་འདེབས་ཤིག་བྱེད་ན། སྐུ་མདོག་པདྨ་ར་གའི་ཕུང་པོ་ལ་ཉི་མ་བྱེ་བའི་འོད་ཀྱིས་འཁྱུད་པ་ལྟ་བུའི་འོད་དང་འོད་ཟེར་ཕྱོགས་བཅུར་འཕྲོ་བ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པའི་ཕ་རོལ་ཏུ་ཕྱིན་པས་ཁྱད་པར་བྱས་པ། སྐར་ཚོགས་བྱེ་བའི་དབུས་སུ་ཉི་མ་བཞིན་དུ་གཟི་བརྗིད་འབར་ཞིང་ལྟ་ན་སྡུག་པ། ཞལ་མཇལ་ན་ལྟ་བས་མི་ངོམས་ཤིང་ཡིད་ཚིམ་ནས་བདེ་བར་བྱེད་པ། རྒྱལ་བ་འོད་དཔག་མེད་ཀྱི་འོད་དེས་ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སྙེད་མང་པོ་ལ་དུས་རྟག་ཏུ་ཁྱབ་པ། འོད་དེ་དྲི་མ་མེད་ཅིང་གསལ་བ། སྒྲིབ་ཐོགས་ཀྱི་དངོས་པོ་ཐམས་ཅད་ལ་མི་ཐོགས་པ། འོད་དེས་ཕོག་ཚད་ལུས་སེམས་བདེ་བ་དང་དགའ་བའི་རོས་ཚིམ་པ། སངས་རྒྱས་འོད་དཔག་མེད་དེ་འཇིག་རྟེན་གྱི་ཁམས་འདི་ནས་དཔེར་བཞག་ན། རིའི་རྒྱལ་པོ་རི་རབ་ལྟར་དུ་སངས་རྒྱས་དང་སངས་རྒྱས་ཀྱི་ཞིང་ཐམས་ཅད་ལས་མངོན་པར་འཕགས་ཏེ་ཕྱོགས་ཐམས་ཅད་ཟིལ་གྱིས་གནོན་པ། དེ་ལྟར་ལྷམ་མེར་ལྷན་ནེ་ལྷང་ངེར་མཛེས་པ་དང་། སྐུའི་ན་བཟའ་ལ་སོགས་པ་ཡང་སྔར་བཤད་པ་ལྟར་རོ། །སངས་རྒྱས་འོད་དཔག་མེད་པའི་མཛད་པ་གཙོ་བོའི་འཇུག་ཚུལ་ནི། སྤྱིར་ན་སངས་རྒྱས་འཇིག་རྟེན་དུ་འབྱུང་བ་དེ་སེམས་ཅན་རྒུད་པ་ལས་སྐྱོབས་པའི་ཆེད་དང་། རང་གི་བརྙེས་པའི་ཆོས་ཀྱི་བདུད་རྩི་དེ་ཉིད་གདུལ་བྱའི་སྐལ་བ་དང་འཚམ་པར་བགོ་སྐལ་མཛད་པའི་དོན་དུ་ཡིན་པས། དེ་ལྟར་མཛད་པ་ཕྲིན་ལས་གདུལ་བྱའི་ཡུལ་ལ་འཇུག་པ་དེ་ལུང་གི་ཆོས་སྟོན་པ་ལ་ངེས་པར་རག་ལས་པ་ཞིག་ཡིན་པས་ན། སྟོན་པ་འོད་དཔག་མེད་ཀྱིས་གསུང་དབྱངས་ཡན་ལག་དྲུག་ཅུའི་དབྱངས་ཀྱིས་དུས་རྟག་ཏུ་གསུང་གི་བདུད་རྩིས་གདུལ་བྱའི་རྒྱུད་ཚིམ་པར་མཛད་པ་ཡིན་ཏེ། གདུལ་བྱ་ཐེག་དམན་གྱི་རིགས་ཅན་རྣམས་ལ་ཐོབ་བྱ་ཐར་བ་ཙམ་དང་། ཐོབ་བྱེད་རྟེན་གཞི་ངེས་འབྱུང་གི་བསམ་པའི་སྟེང་དུ་བརྟེན་པ་བསླབ་གསུམ་གྱི་ཉམས་ལེན་བསྡུས་ཡོད་པ་དེ་ལས་བརྩམས་ཏེ་ཐེག་ཆེན་གྱི་ཆོས་རིམ་གྱིས་བསྟན་པ་དང་། །ཐེག་པ་མཆོག་གི་རིགས་ཅན་རྣམས་ལ་ཐོག་མ་ཉིད་ནས་ཐོབ་བྱ་བླ་ན་མེད་པའི་བྱང་ཆུབ། ཐོབ་བྱེད་བྱང་ཆུབ་ཀྱི་སེམས་རིན་པོ་ཆེ་སྙིང་རྗེ་ཆེན་པོའི་རྩ་བ་ཅན་གྱི་བསམ་པ་དང་། དེའི་དྲང་བའི་སྦྱོར་བ་ཐུན་མིན་དང་ཐུན་མོང་ལས་བརྩམས་ཏེ་ཤིན་ཏུ་རྒྱས་པའི་ཆོས་བསྟན་པར་མཛད་པའོ། །དེ་ལྟ་བུའི་ཚུལ་གྱིས་གདུལ་བྱ་གྲངས་མེད་པ་ཞིག་མ་སྨིན་པ་རྣམས་སྨིན་པ་དང་། སྨིན་པ་རྣམས་གྲོལ་བ་དང་། གྲོལ་བ་རྣམས་མཐར་ཕྱིན་པར་མཛད་པ་དེ་ལྟར་མཛད་པ་ཕྲིན་ལས་སྐྱོང་བཞིན་ཡོད་པ་དང་། སྟོན་པས་ཆོས་གཅིག་གསུང་ཀྱང་གདུལ་བྱ་རང་རང་གིས་ཆོས་ཀྱི་རྣམ་གྲངས་ཇི་ལྟར་ཉན་འདོད་པ་དེ་ལྟར་དུ་འགྱུར་བ་དང་། །ཞིང་ཁམས་དེ་ན་བསྟན་པ་རྙོག་པ་མེད་པ་ཡིན་པས་བསླབ་པའི་གཞི་མ་རྫོགས་པར་ཉེས་པ་འབྱུང་བ་མེད་ལ། ལྟུང་བའི་རྣམ་གཞག་དང་བསླབ་པའི་གཞི། དམ་ཚིག་གི་བཅས་མཚམས་སོགས་ཀྱི་དགོས་པ་མེད་པའོ། །ཞིང་དེར་རྫོགས་པའི་སངས་རྒྱས་འོད་དཔག་མེད། །བསྐལ་བ་གྲངས་མེད་མྱ་ངན་མི་འདའ་བཞུགས། །ཞེས་གསུངས་ཏེ། ཞིང་ཁམས་བདེ་བ་ཅན་དུ་ད་ལྟ་དངོས་སུ་བཞུགས་ཏེ་ཆོས་གསུངས་བཞིན་ཡོད་པའི་མགོན་པོ་འོད་དཔག་མེད་པའི་སྐུ་ཚེའི་ཚད་དཔག་ཏུ་མེད་པ་ཡིན་པས། དེ་སྲིད་དེ་ཡི་ཞབས་འབྲིང་བྱེད་པར་ཤོག །ཅེས་གསུངས་ཏེ། སངས་རྒྱས་འོད་དཔག་མེད་བདེ་བ་ཅན་གྱི་ཞིང་གི་མགོན་ལ་ཇི་སྲིད་བཞུགས་པ་དེ་སྲིད་དུ་བདག་གིས་སངས་རྒྱས་དེའི་མདུན་ནས་ཆོས་ཉན་ཞོར་དུ་ཞབས་འབྲིང་བྱེད་པ་དང་དེ་ལ་བསྙེན་བཀུར་བྱེད་པར་ཤོག་ཅིག་ཅེས་གསུངས་པ་དང་། ནམ་ཞིག་འོད་དཔག་མེད་དེ་ཞི་བར་གཤེགས། །བསྐལ་བ་གང་གཱའི་ཀླུང་གི་བྱེ་མ་སྙེད། །གཉིས་ཀྱི་བར་དུ་བསྟན་པ་གནས་པའི་ཚེ། །རྒྱལ་ཚབ་སྤྱན་རས་གཟིགས་དང་མི་འབྲལ་ཞིང་། །དེ་ཡི་ཡུན་ལ་དམ་ཆོས་འཛིན་པར་ཤོག །ཅེས་གསུངས་ཏེ། སྤྱིར་སངས་རྒྱས་ཆོས་ཀྱི་སྐུ་རྟག་ཁྱབ་ལྷུན་གྲུབ་ཀྱི་བདག་ཉིད་ཅན་ཡིན་པས་སྐྱེ་འཆི་བགྲེས་རྒུད་ཀྱི་མཚན་མ་མི་སྲིད་ཀྱང་། ཞིང་ཁམས་བདེ་བ་ཅན་དེ་ལས་དག་པའི་སེམས་ཅན་མ་གཏོགས་མི་སྣང་བ་མ་ཡིན་པའི་མཆོག་གི་སྤྲུལ་སྐུའི་ཞིང་ཁམས་ཡིན་པས་ན། ནམ་ཞིག་སངས་རྒྱས་འོད་དཔག་མེད་སྐུ་མྱ་ངན་ལས་འདས་ཏེ་ནང་གསལ་ཆོས་སྐུའི་གཞི་དབྱིངས་སུ་ཐིམ་སྟེ་ཞི་བར་གཤེགས་པའི་སྐབས་ལ། བསྟན་པ་འཕེལ་འགྲིབ་མེད་པར་སངས་རྒྱས་བཞུགས་པ་དང་ཁྱད་མེད་པར་བསྐལ་བ་གང་གཱའི་ཀླུང་གི་བྱེ་མ་སྙེད་གཉིས་ཀྱི་བར་དུ། རྒྱལ་ཚབ་སྤྱན་རས་གཟིགས་དང་མི་འབྲལ་ཞིང་། །ཞེས་གསུང་ཏེ། སྟོན་པ་འོད་དཔག་མེད་ཀྱི་མདུན་ནས་རྒྱལ་ཚབ་གྱི་ཅོད་པན་བླངས་པ་རྒྱལ་སྲས་ཐུ་བོ་འཕགས་པ་སྤྱན་རས་གཟིགས་དབང་ཕྱུག་དང་མཐུ་ཆེན་ཐོབ་རྣམ་པ་གཉིས་སོ། །འོ་ན་དེ་གཉིས་ཅི་འདྲ་ཞིག་ཡིན་ནམ་སྙམ་ན། འཕགས་པ་སྤྱན་རས་གཟིགས་ནི་སེམས་ཅན་ཐམས་ཅད་ལ་ཐུགས་སྙིང་རྗེ་ཆེན་པོའི་སྦྱང་བ་སྔོན་ལ་སོང་བ་རྒྱལ་བ་ཐམས་ཅད་ཀྱི་ཐུགས་ཀྱི་སྙིང་སྟོབས་མངའ་ཞིང་རྒྱལ་བ་ཀུན་ཀྱི་མཐུ་སྟོབས་ནུས་པའི་མངའ་བདག་ཡིན་པས། དེ་གཉིས་ཀྱི་མཚན་ལ་སྤྱན་རས་གཟིགས་དང་མཐུ་ཆེན་ཐོབ་གསུངས་ཏེ་དེ་བཞིན་གཤེགས་པ་རིན་པོ་ཆེ་སྙིང་པོས་བཏགས་མཛད་པའོ། །དེ་རྣམ་པ་གཉིས་ཀའི་སྐུའི་འོད་ཟེར་གྱིས་ཞིང་ཁམས་བདེ་བ་ཅན་མ་ལུས་པ་ཡོངས་སུ་ཁྱབ་ཅིང་། བྱང་སེམས་ཀྱི་འཁོར་ཞིག་གིས་དེ་རྣམ་པ་གཉིས་ཀའི་མདུན་ནས་དྲི་བ་ལན་བདུན་ཉན་ཏེ་སྒྱུ་མ་ལྟ་བུའི་ཏིང་ངེ་འཛིན་མ་ཐོབ་པ་ཞིག་མེད་པར་གསུངས་པས། དེ་ལྟར་ཏིང་འཛིན་ཐོབ་པའི་བྱང་ཆུབ་སེམས་དཔས་ཞིང་ཁམས་དེ་ཡོངས་སུ་གང་ཡོད་པ་དང་། སངས་རྒྱས་འོད་དཔག་མེད་ཀྱི་རྒྱལ་ཚབ་སྤྱན་རས་གཟིགས་ཡིན་པས་རྒྱལ་ཚབ་སྤྱན་རས་གཟིགས་དེ་དང་མི་འབྲལ་ཞིང་། དེ་ཡི་ཡུན་ལ་དམ་ཆོས་འཛིན་པར་ཤོག །ཅེས་གསུངས་ཏེ། འོད་དཔག་མེད་དེ་ཡི་བསྟན་པ་ཇི་སྲིད་གནས་ཀྱི་བར་དུ་དེ་ཡི་ཡུན་ལ་དམ་ཆོས་འཛིན་པར་ཤོག་ཅེས་གསུངས་པ་དང་། སྲོད་ལ་དམ་ཆོས་ནུབ་པའི་ཐོ་རངས་ལ། །སྤྱན་རས་གཟིགས་དེ་མངོན་པར་སངས་རྒྱས་ནས། །སངས་རྒྱས་འོད་ཟེར་ཀུན་ནས་འཕགས་པ་ཡི། །དཔལ་བརྩེགས་རྒྱལ་པོ་ཞེས་བྱར་གྱུར་བའི་ཚེ། །ཞལ་ལྟ་མཆོད་ཅིང་དམ་ཆོས་ཉན་པར་ཤོག །ཅེས་གསུངས་སྟེ། མགོན་པོ་འོད་དཔག་མེད་སྐུ་དངོས་དང་དེའི་རྗེས་ཀྱི་བསྟན་པའི་གནས་ཚད་རྫོགས་པའི་སྐབས་ལ། སྲོད་ལ་དམ་ཆོས་ནུབ་པའི་ཐོ་རངས་ལ། །ཞེས་གསུངས་ནི། སྲོད་ལ་བསྟན་པ་དམ་པའི་ཆོས་ནུབ་པ་དེ་མ་ཐག་པའི་ཐོ་རངས་རྒྱལ་རྔ་གསར་བ་རྡུང་བའི་གནས་སྐབས་སུ། འཕགས་པ་རྒྱལ་སྲས་ཀྱི་ཐུ་བོ་སྤྱན་རས་གཟིགས་མངོན་པར་རྫོགས་པར་སངས་རྒྱས་ཏེ། མཚན་ལ་སངས་རྒྱས་འོད་ཟེར་ཀུན་ནས་འཕགས་པའི་དཔལ་བརྩེགས་རྒྱལ་པོ་གྱུར་བའི་གནས་སྐབས་སུ། དེའི་ཞལ་ལ་ལྟ་ཞིང་མཆོད་པ་སྣ་ཚོགས་ཀྱིས་མཆོད་དེ་ཆོས་འཁོར་སྐོར་བར་སྐུལ་ཞིང་། དེས་གསུངས་བའི་ཆོས་ཉན་ཞིང་འཛིན་ནུས་པར་ཤོག་གཅིག་ཅེས་སུངས་པ་དང་། །འདིའི་ཐོ་རངས་རྒྱལ་རྔ་རྡུང་བ་ལ་སོགས་པ་འདི་དག་ནི་བདག་ཅག་གི་སྟོན་པས་བྱང་ཆུབ་བརྙེས་པའི་ཚུལ་དང་སྦྱར་ཏེ། རང་རེའི་གོ་བདེ་ཞིང་ཡིད་ལ་ངེས་སླ་བའི་མོས་པ་དང་བསྟུན་ཏེ་གསུངས་པའོ། །སྐུ་ཚེ་བསྐལ་བ་བྱེ་བ་ཁྲག་ཁྲིག་ནི། །འབུམ་ཕྲག་དགུ་བཅུ་རྩ་དྲུག་བཞུགས་པའི་ཚེ། །རྟག་ཏུ་ཞབས་འབྲིང་བསྙེན་བཀུར་བྱེད་པ་དང་། །མི་བརྗེད་གཟུངས་ཀྱིས་དམ་ཆོས་འཛིན་པར་ཤོག །ཅེས་གསུངས་ཏེ། འཕགས་པ་སྤྱན་རས་གཟིགས་སངས་རྒྱས་པའི་སངས་རྒྱས་འོད་ཟེར་ཀུན་ནས་འཕགས་པའི་དཔལ་བརྩེགས་ཀྱི་རྒྱལ་པོའི་སྐུ་ཚེའི་ཚད་ཀྱང་བསྐལ་བ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དྲུག་བཞུགས་པ་དེའི་རིང་ལ། སངས་རྒྱས་དེའི་ཞབས་འབྲིང་བྱེད་པ་དང་མཆོད་པའི་ཡོ་བྱད་སྣ་ཚོགས་ཀྱིས་བསྙེན་ཅིང་བཀུར་སྟི་བྱས་ཏེ་མི་བརྗེད་པའི་གཟུངས་ལ་དབང་ཐོབ་སྟེ་སངས་རྒྱས་དེས་གསུང་པའི་དམ་ཆོས་གཅིག་ཀྱང་མ་ལུས་པར་འཛིན་ནུས་པར་ཤོག་ཅིག་ཅེས་གསུངས་བ་དང་། འུ་ཚོའི་ད་ལྟའང་བདེ་བར་གཤེགས་པའི་གསུང་དྲི་མ་མེད་པ་རྗེས་སུ་བསྟན་པའི་ཆོ་འཕྲུལ་གྱིས་གསུང་པས་ང་ཚོ་རང་གི་སྒྲ་སྐད་དང་མཐུན་པ་ཐོས་ཐུབ་ཀྱིན་ཡོད་ཀྱང་། མི་བརྗེད་པའི་གཟུངས་ལྟ་ཅི་མི་བརྗེད་བྱེད་ཀྱི་བློ་རིག་པ་བརྟན་པོ་ཞིག་ཀྱང་མེད་པའི་རྐྱེན་གྱིས། རྣ་སྒོ་ལ་རླུང་བརྒྱབ་པ་ལྟར་སོང་བ་དང་མེད་པ་གོ་བ་བརྗེད་པ་བཅས་དུས་མཉམ་པ་རེད་འགྲོ་བ་འདི་ཙམ་མིན་ཞིང་། རིག་ཚད་ཐོས་ཚད་ཐམས་ཅད་ཡིད་ལ་འཛིན་ཐུབ་ཙ་ན། རྒྱལ་བའི་ཆོས་མཛོད་མཐའ་དག་ད་ལྟ་ནས་བདག་གིར་བྱ་ཆོག་མོད། དེའི་བསོད་ནམས་དང་མ་ལྡན་རུང་། འོན་ཏེ་ཉི་མ་རེ་ལ་ཚིག་རེ་ཟིན་ན་རིང་བོར་མི་ཐོགས་པར་ཡོན་ཏན་གྱི་འབྱོར་བ་རྒྱས་རྒྱུ་ཡོད་ལ། དེ་ཡང་རྒྱས་མི་རྒྱས་རང་ལ་ཐུག་ཕྱིན་བདེ་སྨོན་གྱི་ཞིང་ཁྲིད་འདིའི་སྐབས་ལ་ཚིག་རེ་དང་དོན་རེ་རེ་ཡིན་ཡང་བློ་ལ་ཨེ་ཟིན་ལྟོས་དང་མ་འོངས་པར་མི་བརྗེད་པའི་གཟུངས་ཐོབ་པ་ལ་ཕན་ཐོགས་ཆེན་པོ་དང་ལྡན་ལ། སྤྱིར་ཐོས་པའི་ཡོན་ཏན་མེད་ན་སྐྱོན་ཆེན་པོ་དང་ལྡན་པ་ཡིན་ཏེ། བདག་བློ་ཤེས་བྱའི་གནས་ལ་མ་སྦྱོང་ན། །ཐམས་ཅད་མཁྱེན་པ་ནམ་མཁའི་མཐའ་ལྟར་རིང་། །ཞེས་གསུང་བ་ལྟ་བུ་ཡིན་ཏེ། །གནའ་སྔོན་མ་ཞིག་ལ་འབྲི་གུང་བའི་བླ་ཆེན་ཞིག་ཞིང་ལ་གཤེགས་སོང་བས་གྲྭ་བ་འགའ་ཞིག་ས་སྐྱ་པཎྜི་ཏའི་སྐུ་མདུན་དུ་མཆོད་བསྔོ་འབུལ་སར་སོང་བས། ས་པཎ་གྱིས་གྲྭ་པ་རྣམས་ལ་ཧ་ཅང་ཡག་ཡག་མཛད་ནས་བླ་མ་རིན་པོ་ཆེ་འོག་མིན་དུ་གཤེགས་སོང་བར་མ་བཟང་ཞེ་གསུངས་པས། གྲྭ་བ་རྣམས་ཀྱིས་ནང་དོན་ཆེན་པོ་ཞིག་མ་གོ་བར་དེ་ཡག་པ་ཞིག་གསུངས་མ་སོང་སྙམ་སྟེ། འོག་མིན་ལ་གཤེགས་མ་ཐལ་ཐོག་མིན་ལ་གཤེགས་ཐལ་ཞུས་པ་དང་། དེ་རྣམས་ཀྱི་སེམས་ལ་འོག་ཟེར་དུས་ངན་པ་ཞིག་རེད་ཐོག་མིན་ཟེར་དགོས་བསམ་ནས་ཐོག་མིན་སྨྲས་མོད། འོན་ཀྱང་ཐོག་མིན་ལས་གཞན་འོག་རེད་སོང་བས་དེའི་མན་ནམ་དེའི་སྡུག་མེད་ས་ལ་བྱོན་ཐལ་ཟེར་བ་ལྟ་བུས་ཁོང་ཚོས་ཚིག་སྐྱོན་གྱིས་བརྫབས་བཞག་པས། ས་པཎ་གྱིས་གྲྭ་པ་གླེན་པ་འདི་རྣམས་ཀྱིས་དེ་འདྲ་ཞིག་ཀྱང་ཤེས་མི་འདུག་དགོངས་ཏེ། དེའི་མཚམས་ནས་ས་པཎ་གྱིས་བླ་མའི་གདུང་བཞུ་དུས་རྐང་གི་ནང་ན་འདྲེན་པའི་སྐུ་འདྲ་འདྲ་མེད་དམ་ཞེས་གསུངས་པ་དང་། རྐང་འདྲེན་རྣམས་གསུངས་རྒྱུའི་བརྡ་ཡིན་ཡང་དོན་མ་གོ་བར་ངན་ཟེར་ཡིན་པ་མ་ཤེས་ཏེ་ཡོད་ཁུ་མང་པོ་ཡོད་ཁི་ཞུས་པས། དེ་ནས་ས་པཎ་ཐུགས་ལྷག་པར་སྐྱོ་སྟེ་བླ་མའི་མན་ངག་གི་སྟེང་དུ་རྒྱལ་བའི་བཀའ་མདོ་རྒྱུད་ལ་ཐོས་བསམ་རེ་བྱེད་རྒྱུའི་ཆེད་དམ་དེ་འདྲ་ལ་དགོངས་ནས། སྡོམ་གསུམ་རབ་དབྱེ་དང་ཐུབ་པའི་དགོངས་གསལ་སོགས་དེའི་རྐྱེན་གྱིས་བརྩམས་པ་ཡིན་ཚུལ་སོགས་གསུངས་ཡོད་པས། གདན་ས་ཆེན་པོ་འདི་ཚོ་འདྲ་ཡིན་ན་བཤད་སྒྲུབ་འཆད་ཉན་དར་སའི་ཆུ་འགོ་རེད་མ་གཏོགས། ཟ་ཆོག་འདོན་ཆོག་སྔས་མགོ་དང་འབྲལ་མེད། བཀའ་འགྱུར་བསྟན་འགྱུར་ཕྱུག་པོའི་ཁྱིམ་རྟེན། གཞུང་བཀའ་པོད་ལྔ་བོ་བེད་མེད་ཀྱི་ཡིག་ཉོབ་རེད་རྒྱུ་བྱུང་དུས་བསྟན་པ་ཉམས་པའི་སྔ་ལྟས་ཚང་ཡོང་བ་རེད། ཡང་སྟོད་ཀྱི་སེ་ལེ་རྒོད་ཚང་དུ་མི་ལོ་བཅོ་བརྒྱད་ལ་མཚམས་ལ་བསྡད་པའི་སྒོམ་ཆེན་ཞིག་ཡོད་པ་གསན་ཏེ། རྗེ་རིན་པོ་ཆེ་དེ་དུས་གྲྭ་བ་གྲྭ་རྐྱང་ཡིན་པས་ར་སྒྲེང་ལ་ཕེབས་ཞོར་དུ་སྒོམ་ཆེན་དེ་མཇལ་དུ་ཕྱིན། དེར་ཕེབས་ནས་སྒོམ་ཆེན་ལ་ཁྱེད་ལོ་བཅོ་བརྒྱད་དུ་མཚམས་ལ་བཞུགས་པ་ངོ་མཚར་ཆེ། དེའི་རིང་ལ་ཁྱེད་ཀྱིས་ཉམས་ལེན་ཅི་ཞིག་ལ་མཛད་པ་ཡིན་ཞེས་དྲིས་པས། སྒོམ་ཆེན་པས་ཁོ་བོས་ཐོས་བསམ་བྱེད་མ་མྱོང་བས་ཤེས་མཁན་ཞིག་མིན་པས་མ་ཎི་འདོན་ནས་བསྡད་པ་ཡིན་ཞེས་སྨྲས་པ་དང་། རྗེ་རིན་པོ་ཆེས་འདིས་མི་ཤེས་ཁུལ་རེད་དགོངས་ཏེ། ཞི་ལྷག་གི་སྐོར་འགའ་རེ་དྲིས་ཀྱང་དེ་ཚོ་མི་ཤེས་གསུངས། དེས་ན་མ་ཎི་འདོན་དུས་སྐྱབས་འགྲོ་སེམས་བསྐྱེད་རེ་འགོ་ནས་བྱེད་ཀྱིན་ལོས་ཡོད། དེ་ཚོའི་དམིགས་རིམ་ཇི་ལྟར་རེད་ཅེས་དྲིས་དུས་དེ་ཡང་མི་ཤེས་སྨྲས། དེ་མ་ཤེས་ན་འོ་ན་སྤང་བྱ་དང་བླང་བྱ་གང་ཡིན་ཞེས་དྲིས་པས། ཁོས་བསམ་བློ་ཞིག་བཏང་སྟེ་དེ་ལ་ལན་ཞིག་ཕོག་པར་འདུག་བསམས་ཏེ་སྤང་བྱ་གོང་མོ་དང་བླང་བྱ་འཇོལ་མོ་ཨེ་ཡིན་ན་གལ་ཏེ་དེ་མ་ཡིན་ན་མི་ཤེས་ཞེས་སྨྲས་པ་དང་། རྗེ་རིན་པོ་ཆེའི་ཐུགས་དགོངས་ལ་ཐོག་མར་ཐོས་བསམ་རེ་མ་བྱས་ན་སྐྱོན་འདི་འདྲ་ཆེ་བ་འདུག་དགོངས་ཏེ། ཕྱི་རབས་ཀྱི་སྒོམ་ཆེན་རྣམས་ཀྱིས་རང་རང་གི་བླ་མས་མན་ངག་གི་ཁུངས་གཏུག་ས། གསུང་རབ་དགོངས་འགྲེལ་དང་བཅས་པ་ལ་ཐོས་བསམ་རེ་བྱེད་རྒྱུའི་ཆེད་དུ་དྲི་བ་སྙན་བསྐུལ་ལྷག་བསམ་རབ་དཀར་མཛད་ཅེས་ཟེར་སྲོལ་ཡོད་པ་དེས་ན་དང་པོ་ཆོས་ཐོས་དགོས་ཤིང་ཐོས་པ་དེ་ཞེ་ལ་འཇོག་རྒྱུ་དེ་བས་ཀྱང་གནད་ཆེ་བ་དང་། ཆོས་ཐོས་པ་ཡིད་ནས་མི་བརྗེད་པ་ལ་མི་བརྗེད་པའི་གཟུངས་ཐོབ་དགོས་པས་མི་བརྗེད་པའི་གཟུངས་ཀྱི་དམ་ཆོས་འཛིན་པར་ཤོག་ཅེས་གསུངས་ཏེ་འདི་ནས་སྨོན་ལམ་བཏབ་པ་རེད། མྱ་ངན་འདས་ནས་དེ་ཡི་བསྟན་པ་ནི། །བསྐལ་བ་དུང་ཕྱུར་དྲུག་དང་བྱེ་བ་ཕྲག །འབུམ་ཕྲག་གསུམ་གནས་དེ་ཚེ་ཆོས་འཛིན་ཅིང་། །མཐུ་ཆེན་ཐོབ་དང་རྟག་ཏུ་མི་འབྲལ་ཤོག །ཅེས་གསུངས་ཏེ། མྱ་ངན་འདས་ནས་དེ་ཡི་བསྟན་པ་ནི། །ཞེས་པ་ནི། སངས་རྒྱས་འོད་ཟེར་ཀུན་ནས་འཕགས་པའི་དཔལ་བརྩེགས་ཀྱི་རྒྱལ་པོ་དེ་ཡང་སྐུ་མྱ་ངན་ལས་འདའ་བའི་མཛད་པ་བསྟན་ཏེ་རྒྱལ་བ་མཐུ་ཆེན་ཐོབ་དེ་ཉིད་རྒྱལ་ཚབ་ཏུ་བསྐོས་ཤིང་། དེའི་བསྟན་པ་མི་ཉམས་པར་བསྐལ་བ་དུང་ཕྱུར་དྲུག་དང་བྱེ་བ་ཕྲག་འབུམ་ཕྲག་གསུམ་ལ་གནས་པ་དེའི་ཚེ་ལ་ཡང་བདག་གིས་དམ་པའི་ཆོས་འཛིན་ཅིང་རྒྱལ་སྲས་ཐུ་བོ་སེམས་དཔའ་མཐུ་ཆེན་ཐོབ་དང་མི་འབྲལ་བར་རྟག་ཏུ་དམ་ཆོས་འཛིན་ནུས་པར་ཤོག་ཅིག་ཅེས་གསུངས། དེ་ནས་མཐུ་ཆེན་ཐོབ་དེ་སངས་རྒྱས་ནས། །དེ་བཞིན་གཤེགས་པ་རབ་ཏུ་བརྟན་པ་ནི། །ཡོན་ཏན་ནོར་བུ་བརྩེགས་པའི་རྒྱལ་པོར་གྱུར། །སྐུ་ཚེ་བསྟན་པ་སྤྱན་རས་གཟིགས་དང་མཉམ། །སངས་རྒྱས་དེ་ཡི་རྟག་ཏུ་ཞབས་འབྲིང་བྱེད། །མཆོད་པས་མཆོད་ཅིང་དམ་ཆོས་ཀུན་འཛིན་ཤོག །ཅེས་གསུངས་ཏེ། དེ་ནས་ནམ་ཞིག་གི་ཚེ་ན་རྒྱལ་བའི་སྲས་ཀྱི་ཐུ་བོ་མཐུ་ཆེན་ཐོབ་དེ་ཉིད་ཀྱང་སངས་རྒྱས་ཏེ། མཚན་ལ་དེ་བཞིན་གཤེགས་པ་རབ་ཏུ་བརྟན་པ་ཡོན་ཏན་ནོར་བུ་བརྩེགས་པའི་རྒྱལ་པོ་རུ་འགྱུར་གསུངས་པས། དེའི་སྐུ་ཚེ་བརྟན་པའི་ཚད་དང་མཛད་པ་ཕྲིན་ལས་ཀྱི་ཚད་སྤྱན་རས་གཟིགས་དང་མཉམ་པ་ཡིན་པས། སངས་རྒྱས་དེའི་སྐུ་ཚེའི་ཡུན་ལ་ཡང་བདག་གིས་དུས་རྟག་ཏུ་ཞབས་འབྲིང་དང་བསྙེན་བཀུར་བྱེད་པ་དང་། དེས་བསྟན་པ་དམ་པའི་ཆོས་ཐམས་ཅད་ཀྱང་མི་བརྗེད་པའི་གཟུངས་ཀྱིས་འཛིན་ནུས་པར་ཤོག་ཅིག་ཅེས་གསུངས་སོ།།

ལྔ་བ་མཐར་ཐུག་རང་ཉིད་ཀྱང་སེམས་ཅན་མཐའ་ཡས་པ་མ་བསྒྲལ་བ་རྣམས་བསྒྲལ་བ་དང་མ་གྲོལ་བ་རྣམས་གྲོལ་བར་བྱེད་པའི་ཆེད་དུ་སངས་རྒྱས་པར་སྨོན་ལམ་འདེབས་པ།

དེ་ནས་བདག་གི་ཚེ་དེ་བརྗེས་མ་ཐག །ཞིང་ཁམས་དེའམ་དག་པའི་ཞིང་གཞན་དུ། །བླ་མེད་རྫོགས་པའི་སངས་རྒྱས་ཐོབ་པར་ཤོག །ཅེས་གསུངས་ཏེ། བདག་ཉིད་ཀྱང་ཞིང་ཁམས་བདེ་བ་ཅན་དེར་སངས་རྒྱས་གསུམ་གྱི་སྐུ་ཚེ་མཛད་པ་མཐར་མ་ཕྱིན་གྱི་བར་དུ་བསྐལ་བ་འབུམ་ཕྲག་མང་པོར་རྫོགས་སྨིན་སྦྱང་བ་རྒྱ་མཚོ་ལྟ་བུར་བྱས་ཤིང་། དེ་ན་གནས་པའི་ཚད་རྫོགས་ཏེ་ཚོགས་གཉིས་རླབས་ཆེན་རྫོགས་པར་བྱས་པ་དེའི་མཐུས། ཞིང་ཁམས་བདེ་བ་ཅན་དེ་ཉིད་དུ་སངས་རྒྱས་པའམ་ཡང་ན་དག་པའི་ཞིང་ཁམས་གཞན་ཞིག་ཏུ་མགོན་པོ་འོད་དཔག་མེད་པས་ཐུགས་བསྐྱེད་པ་ལྟར། དེ་བས་ཀྱང་མི་དམན་པའི་ཞིང་ཁམས་ཤིག་བཟུང་སྟེ་མཐའ་ཡས་པའི་སེམས་ཅན་སྡུག་བསྔལ་གྱི་ཁུར་གྱིས་ནོན་པ། ས་ལམ་ལ་སྦྱང་བ་མ་བྱས་ཀྱང་སྨིན་ཅིང་གྲོལ་ནུས་པའི་ཞིང་ཁམས་ཤིག་ལ་སངས་རྒྱས་པར་ཤོག་ཅིག་ཅེས་གསུངས་སོ། །རྫོགས་སངས་རྒྱས་ནས་ཚེ་དཔག་མེད་པ་ལྟར། །མཚན་ཐོས་ཙམ་གྱིས་འགྲོ་ཀུན་སྨིན་ཅིང་གྲོལ། །སྤྲུལ་བ་གྲངས་མེད་འགྲོ་བ་འདྲེན་པ་སོགས། །འབད་མེད་ལྷུན་གྲུབ་འགྲོ་དོན་དཔག་མེད་ཤོག །ཅེས་གསུངས་ཏེ། བདག་མངོན་པར་རྫོགས་པར་སངས་རྒྱས་པ་དེ་ཡང་མགོན་པོ་རྒྱལ་བ་ཚེ་དཔག་མེད་པ་ལྟར་དུ་སངས་མ་རྒྱས་པའི་སྔོན་དུ་ཐུན་མོང་མ་ཡིན་པ་རླབས་ཆེན་གྱི་མཛད་པ་རྒྱལ་བ་ཐམས་ཅད་ཀྱི་ཐུགས་བསྐྱེད་ཕྱོགས་གཅིག་ཏུ་བསྡམ་པ་ལྟ་བུར་བྱས་ཏེ། དེའི་སྨོན་ལམ་གྱི་མཐུ་གྲུབ་སྟེ་གཞི་ནས་སངས་རྒྱས་ཏེ་མཚན་ཐོས་པ་ཙམ་གྱིས། མདོར་ན་གང་གི་མཚན་དང་སྒྲ་དང་ནི། །ལྟ་བ་ཡིད་ལ་གོམས་པར་བྱས་པ་ཡང་། །ཞིང་ཁམས་བདེ་བ་ཅན་དུ་དབུགས་འབྱིན་པའི། །ཐུགས་བསྐྱེད་དམ་བཅའ་བསླུ་བ་མེད་པའི་ཕྱིར། །ཞེས་གསུངས་པ་ལྟར། ཞལ་མཇལ་བ། གསུང་ཐོས་པ། མངོན་རྟོགས་ཡིད་ལ་གོམས་པ་ལྟ་ཅི། མཚན་གྱི་ཆ་ཟེགས་མའམ་ཆ་ཤས་ཙམ་ཞིག་རྣ་བར་ཐོས་ཚད་ཀྱི་འགྲོ་བ་སྡུག་བསྔལ་ལས་བསྒྲལ་འགྲོ་བ། སྤྲུལ་བ་འདྲ་དང་མི་འདྲས་གདུལ་བྱའི་བློ་དང་འཚམ་པ་གྲངས་མེད་སྤྲུལ་ཏེ། ཕྱོགས་བཅུ་དུས་གསུམ་གྱི་སེམས་ཅན་མཐའ་ཡས་པ་དག་པའི་ཞིང་དུ་འདྲེན་ནུས་པ་ལ་སོགས་པ། མདོར་ན་འགྲོ་བ་སེམས་ཅན་གྱི་དོན་འབད་མེད་ལྷུན་གྲུབ་ཡིད་བཞིན་ནོར་བུ་དང་དཔག་བསམ་གྱི་ཤིང་བཞིན་དུ་གཞན་དོན་དཔག་ཏུ་མེད་པ་འབྱུང་བར་ཤོག་ཅིག་ཅེས་གསུངས། འདིའི་ཡན་ཆད་ཀྱིས་རྣམ་དག་བདེ་ཆེན་ཞིང་གི་སྨོན་ལམ་གྱི་བར་དུ་དགེ་བ་གཞུང་གི་དོན་ཆ་ཚང་ཞིབ་རྒྱས་སོང་ཟིན་པ་དང་། འདིའི་བཤད་བྱའི་གཙོ་བོ་བདེ་བ་ཅན་ལ་སྐྱེ་བའི་རྒྱུ་བཞི་ཡིན་པས། དེའི་ནང་ནས་དང་པོ་མགོན་པོ་འོད་དཔག་མེད་ཡང་ཡང་ཡིད་ལ་བྱེད་པ་གསུངས་པ་ནི་གཙོ་བོའི་ཆ་ནས་སྨོས་ཏེ་གསུངས་ཤིང་། ཞིང་ཁམས་དེའི་སྣོད་བཅུད་ཡོད་ཚད་ཡིད་ལ་བྱས་ཏེ་དེའི་སྣོད་བཅུད་གཉིས་ཀའི་ཡོན་ཏན་ཐམས་ཅད་ཐོབ་པར་སྨོན་ལམ་འདེབས་རྒྱུ་གལ་ཆེ། དེས་ན་སྨོན་ལམ་འདི་ཉིད་ཚར་གྲངས་མང་པོ་བཏོན། ཆགས་མེད་བྱས་ཏེ་འདོན་དགོས་ལ། མང་པོ་བཏོན་ན་ཡིད་ལ་ངེས་པ་དང་སྨོན་ལམ་གྱི་མཐུ་གྲུབ་པ་ལ་ཕན་ཐོགས་ཆེན་པོ་ཡོད་པ་དང་། བསོད་ནམས་ཀྱི་ཕུང་པོ་དཔག་ཏུ་མེད་པ་ཐོབ་པ་དང་བདེ་བ་ཅན་ལ་སྐྱེ་བའི་རྒྱུ་ཐམས་ཅད་མགོན་པོ་འོད་དཔག་མེད་དང་དེའི་ཞིང་ཁམས་ཡོངས་སུ་དག་པའི་ཡོན་ཏན་ཐོབ་པ་དག་ལས་བྱུང་བ་ཡིན་པས། རྒྱལ་བའི་དབང་པོ་དེའི་མཚན་ཙམ་བསྒྲག་ན་སེམས་ཅན་གཞན་ཞིག་ལ་ལྷའི་རྒྱལ་པོའི་རྒྱལ་སྲིད་བྱིན་པ་བས་ཀྱང་ཕན་གདགས་ཡོད་ཅིང་། གྲངས་མེད་རྒྱལ་བའི་ཕྲིན་ལས་ཀྱི་གྲོགས་དང་། འོད་དཔག་མེད་ལ་གདུལ་བྱ་སྤྱིའི་ཕུལ་བའི་མཆོད་པ་ལ་འགྱུར་བ་ལ་སོགས་པར་བསམ་སྟེ་རང་གི་ཉམས་སུ་བླངས་ཤིང་གཞན་ལ་འཆད་པར་བྱས་ན་དུས་གསུམ་རྒྱལ་བའི་དགོངས་པ་རྫོགས་པར་འགྱུར་བའི་གཞན་ཕན་གྱི་འགྲོ་དོན་རྒྱ་ཆེན་པོ་ཡིན་པས། འདི་ཁྱིམ་པ་ཕོ་མོའི་ཆོས་སྐལ་ཞིག་རེད། ང་ལྟ་བུའི་རྣལ་འབྱོར་པའམ་མཁས་པ་ཞིག་གིས་འདི་ལྟ་བུ་ལ་མི་རེ་བསམ་པར་མི་བྱའོ། དེ་འདྲའི་རིགས་དེ་དམ་པའི་མདུན་ས་ལ་ཐོན་ན་རང་ཉིད་ཀྱི་ནང་མཚང་ཕྱིར་ངོམས་ཀྱིན་ཡོད་པ་ལྟ་བུ་ཞིག་ཡིན་པས་ན། ལས་དང་པོ་བ་དང་ཐོས་བསམ་སྦྱང་བ་རྒྱ་ཆེར་མཛད་མ་མྱོང་མཁན་ཚོས་བདེ་བ་ཅན་གྱི་ཞིང་བཀོད་དང་སྣོད་བཅུད་ཀྱི་འབྱོར་བ་དེ་ཚོ་ཡིག་ཐོག་ཏུ་ཞིབ་ཀྱིས་ལྟ། ཞལ་ཐང་རེ་མཇལ་ནས་ཚིག་རེ་དང་དོན་རེའི་སྟེང་ནས་རེ་རེ་བཞིན་དུ་ཤེས་ཤིང་ཞེ་ལ་ངེས་པ་གལ་ཆེ། བདེ་བ་ཅན་གྱི་ཞིང་ཁམས་ཀྱི་མེ་ཏོག་རྐང་གཅིག་གི་ཡོན་ཏན་ཤེས་ཏེ་དེ་ཁོ་ན་ཡིད་ལ་དྲན་པས་ཀྱང་སྒྲིབ་པ་ཆེན་པོ་དག་སྟེ་བསོད་ནམས་ཆེན་པོ་སོགས་པ་ཡིན་པས་ན། མེ་ཏོག་གཅིག་གསེར་གྱི་བྱེ་མ་འབྲུ་གཅིག་ཡིན་ཡང་དེ་ཉིད་སངས་རྒྱས་ཀྱི་སྨོན་ལམ་གྱིས་སྟོབས་དང་བསོད་ནམས་ཀྱི་དབང་གིས་བྱུང་བ་ཡིན་པས་སངས་རྒྱས་དངོས་ཀྱི་ཡོན་ཏན་དྲན་པ་དང་འདྲ་བ་ཡིན་ཞེས་གསུངས་སོ།།

གཉིས་པ་མཚན་བཟུང་བའི་བྱིན་བརླབ་ཚེ་འདིར་འབྱུང་བར་གསོལ་བ་འདེབས་པ།

དེ་བཞིན་གཤེགས་པའི་ཚེ་དང་བསོད་ནམས་དང་། །ཡོན་ཏན་ཡེ་ཤེས་གཟི་བརྗིད་ཚད་མེད་པ། །ཆོས་སྐུ་སྣང་བ་མཐའ་ཡས་འོད་དཔག་མེད། །ཚེ་དང་ཡེ་ཤེས་དཔག་མེད་བཅོམ་ལྡན་འདས། །ཞེས་གསུངས་ཏེ། དེ་བཞིན་གཤེགས་པའི་ཚེ་དང་བསོད་ནམས་དང་། །ཡོན་ཏན་ཡེ་ཤེས་གཟི་བརྗིད་ཚད་མེད་པ། །ཞེས་གསུངས་ནི། སྒྱུ་མ་ལྟ་བུའི་ཏིང་ངེ་འཛིན་གྱི་མདོའི་ནང་དུ། དེའི་སྐུ་ཚེའི་ཚད་ཀྱི་མཐའ་བསྐལ་བ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་དཔྱད་ཀྱང་རྟོགས་པར་སླ་བ་མ་ཡིན་ཞེས་གསུངས་པས་ན། སྐུ་ཚེའི་ཚད་བསྟན་ཡོད་པ་འདི་དག་གྲངས་ངོ་མ་མིན་ཞིང་། སྐུ་ཚེའི་ཚད་རིང་པོ་ཡིན་པའི་ཚད་ཀྱི་སྒོ་ནས་རང་ག་བའི་གཞལ་བྱའི་དོན་ཙམ་ཞིག་གསུངས་པ་ཡིན་ནོ། །མདོར་ན་སྐུ་ཚེའི་ཚད་དཔག་ཏུ་མེད་པ་ཡིན་པའི་ཕྱིར་ན། དེ་བཞིན་གཤེགས་པའི་མཚན་ལ་ཡང་ཚེ་དཔག་མེད་པ་ཞུ་བ་དང་། དེ་ལྟར་སྐུ་ཚེ་དང་བསོད་ནམས་ཡེ་ཤེས་ཀྱི་ཚོགས་གཉིས་རྒྱ་ཆེན་པོ་བསགས་པས། རྒྱུ་ཚོགས་གཉིས་རྒྱ་མཚོ་ལྟ་བུའི་ཡོན་ཏན་ཚད་མེད་པ་དང་འབྲས་བུ་སྤང་དང་རྟོགས་པའི་ཡོན་ཏན་མཐར་ཕྱིན་པ། གསང་གསུམ་མི་ཟད་རྒྱན་གྱི་འཁོར་ལོ་གདུལ་བྱའི་དཔལ་དུ་ཤར་བ་གང་ལ། སྐུ་བསོད་ནམས་ཆེན་པོའི་གཟི་བརྗིད་ཚད་མེད་པ་ལ་སོགས་པ་དྲན་ཏེ་མཚན་ནས་བཟུང་སྟེ་གསོལ་བ་འདེབས་དགོས་སོ། །ཆོས་སྐུ་སྣང་བ་མཐའ་ཡས་འོད་དཔག་མེད། །ཚེ་དང་ཡེ་ཤེས་དཔག་མེད་བཅོམ་ལྡན་འདས། །ཞེས་གསུངས་ཏེ། མཚན་ནས་བརྗོད་དེ་གསོལ་བ་འདེབས་པའི་གནས་སྐབས་ན་ཆོས་སྐུ་སྣང་བ་མཐའ་ཡས་སམ་ཚེ་དཔག་མེད་མགོན་གང་ཞུས་ཏེ་གསོལ་བ་བཏབ་ན་ཡང་། སྐུ་ལྔ་ལྷུན་གྲུབ་ཀྱི་བདག་ཉིད་རྒྱལ་བ་འོད་སྣང་མཐའ་ཡས་ཚེ་དཔག་མེད་མགོན་དེ་ཉིད་ལས་གཞན་མ་ཡིན་ནོ། །གང་ཞིག་ཁྱེད་ཀྱི་མཚན་ནི་སུས་འཛིན་པ། །སྔོན་གྱི་ལས་ཀྱི་རྣམ་སྨིན་མ་གཏོགས་པ། །མེ་ཆུ་དུག་མཚོན་གནོད་སྦྱིན་སྲིན་པོ་སོགས། །འཇིགས་པ་ཀུན་ལས་སྐྱོབ་པར་ཐུབ་པས་གསུངས། །ཞེས་གསུངས་ཏེ། །གང་ཞིག་ཁྱེད་ཀྱི་མཚན་ནི་སུས་འཛིན་པ། །ཞེས་པ་ནི། སྐྱེས་པ་དང་བུད་མེད་ཁྱེའུ་དང་བུ་མོ་ལ་སོགས་པ་གང་ཟག་གང་ཞིག་གིས། བདེ་བར་གཤེགས་པ་མགོན་པོ་འོད་དཔག་མེད་ཁྱེད་ཀྱི་མཚན་ཙམ་ཞིག་དད་དང་གུས་པས་སྒོ་ནས་སུ་ཞིག་གིས་འཛིན་པར་བྱེད་ན། སྔོན་གྱི་ལས་ཀྱི་རྣམ་སྨིན་མ་གཏོགས་པ། །ཞེས་པ་ནི། དེའི་མཚན་འཛིན་པ་པོ་དེའི་སྔོན་གྱི་ལས་ཀྱི་རྣམ་སྨིན། མགོན་པོ་ཀླུ་སྒྲུབ་ཀྱི་མགུལ་རྩྭ་ཀུ་ཤས་བཅད་པ་ལྟ་བུ་དང་དེ་བཞིན་གཤེགས་པའི་ཞབས་ལ་སེང་ལྡེང་གི་ཚེར་མ་ཟུག་སྟེ་ལས་ཐོག་ཏུ་བབ་པ་དང་དུ་བཞེས་ཚུལ་བསྟན་པས་མཚོན་པ་ལྟ་བུ་ཡིན་ན་མ་གཏོགས་དེ་མིན་གཞན་ཐམས་ཅད། མེ་ཆུ་དུག་མཚོན་གནོད་སྦྱིན་སྲིན་པོ་སོགས། །འཇིགས་པ་ཀུན་ལས་སྐྱོབ་པར་ཐུབ་པས་གསུངས། །ཞེས་གསུངས་ཏེ། སྔོན་གྱི་ལས་ཀྱི་རྣམ་སྨིན་ལས་གཞན་འཕྲལ་རྐྱེན་གྱི་གནོད་པ་མེའི་དགྲ་དང་ཆུའི་འཇིགས་པ། དུག་དང་མཚོན་ཆ་གནོད་སྦྱིན་སྲིན་པོ་སོགས་མི་མ་ཡིན་པས་འཇིགས་པའམ་ཤ་ཟས་འཇིགས་པ། དེ་དག་ལས་སྐྱོབ་ཅིང་དེ་དག་གིས་མི་གནོད་པར་སངས་རྒྱས་བཅོམ་ལྡན་འདས་ཀྱིས་མདོ་ལས་གསུངས་པ་ལྟར། དེ་ལ་ཡིད་ཆེས་ཀྱི་ཐོག་ནས་གསོལ་བ་འདེབས་དགོས་ཀྱི། ཁྱད་པར་དུ་དེ་རིང་ཁར་རྩང་ཤི་འདྲེ་རྒྱལ་འགོང་མི་གསོན་པོའི་ཁོག་ལ་ཞུགས་པའི་དུས་སུ་རང་གིས་རང་ལ་ཡིད་མི་ཆེས་པའི་སྐབས་ཡིན་པས། མགོན་པོ་འོད་དཔག་མེད་ལ་གསོལ་བ་བཏབ་མཆོད་པ་ཕུལ་སྨོན་ལམ་ཐོབ་དང་ལོ་སྲུང་ཞབས་བརྟན་སྐུ་རིམ་རིམ་གྲོ་ལྷ་ཁ་འདྲེ་ཁ་ཅི་ཞིག་གཙེ་བ་ལས་ཀྱང་དེའི་དགའ་ཞིག་ཡོད་པ་མིན། དེ་ནི་རྒྱལ་བ་བདེན་པར་སྨྲ་བའི་གསུང་ཡིན་པས་སླུ་བ་མ་མཆིས། དེ་མིན་ཕྲེང་མོ་ཤོ་མོ་རེ་འདེབས་ཁུལ་བྱས་ནས་འདི་སྒྲུབས་ལ་འདི་མ་སྒྲུབས་ཞེས་ཟེར་འཇོག་ཁུལ་བྱེད་མོད། གསོལ་འདེབས་བདེན་པ་བརྡར་ན་དཀོན་མཆོག་གི་བདེན་པས་ཐིག་མོད། འོན་ཀྱང་བརྡར་མཁན་ཁོ་རང་ལ་བདེན་ཚིག་གི་མཐུ་དང་བསོད་ནམས་ཀྱི་སྟོབས་མེད་ན་ཕྲེང་རྡོག་མཛུབ་མོས་གཅད་དེ་རང་གིས་རང་ལ་ཡང་ཡིད་མི་ཆེས་བཞིན་དུ། ཁ་ཕོ་ཞིག་སྡོམ་གྱིན་རྣོ་རྟགས་ཤིག་གཞག་ཡོད་མདོག་བྱས་ན་ཡང། མི་མ་ཤི་པ་ལ་ཞེ་དགུ་བཟུང་བཅུག་པ་དང་། ཤི་ཚར་བ་དག་སང་ཐོན་གནངས་ཐོན་རེད་ཅེས་སྨྲས་ན་སྐབས་ཤིག་ལ་ཁང་སྟོངས་ནང་ནས་ཁེར་དགོད་ཤོར་བ་དེ་འདྲ་ཡོང་སྲིད། དེ་དག་ནི་ཁ་རང་ལ་བསྐོར་ནས་བཤད་པ་ཡིན། འཇང་གི་མོ་མ་ཀུན་ཤེས་གཅིག་སྡུག་ཟེར་བ་དང་འདྲ་བར། ཀུན་ཤེས་མོ་མ་ང་རང་སྐྱིད། གཅིག་སྡུག་ནམ་ཤི་མི་ཤེས་སྡུག་ཟེར་བ་ལྟ་བུ། མངོན་ཤེས་གསལ་འགྲིབ་ཅན་གྱིས་ཅི་ཡང་མི་ཕན། དེས་ན་སངས་རྒྱས་ཀྱི་བཀའ་དྲི་མ་མེད་པ། འཆི་མེད་རྔ་སྒྲ་དང་འོད་མདོ་ལས་གསུངས་ཡོད་པ་ལ་ཡིད་ཆེས་གྱིས་དང་འདིས་བསླུ་ཡོང་ངམ་སྙམ་པའི་ཐེ་ཚོམ་མི་དགོས་མོད། འོན་ཀྱང་དེ་རིང་ཁ་རྩང་བདེ་བར་གཤེགས་པའི་བཀའ་བསླུ་བ་མེད་པ་ལས་མདང་གི་རྨི་ལམ་རྩ་ཆེན་བརྩི་བའི་དུས་ཚོད་ཡིན་པས། སྨྲས་ཚད་པོའི་ཐོག་ཏུ་མི་འགྲོ་ཞིང་དེ་ཨེ་འགྲོ་བསམ་པར་ཡང་མི་བྱའོ། །བདག་ནི་ཁྱེད་ཀྱི་མཚན་འཛིན་ཕྱག་འཚལ་བས། །འཇིགས་དང་སྡུག་བསྔལ་ཀུན་ལས་སྐྱབས་མཛད་གསོལ། །བཀྲ་ཤིས་ཕུན་སུམ་ཚོགས་པར་བྱིན་གྱིས་རློབས། །ཞེས་གསུངས་ཏེ། བདག་དད་པ་དང་མོས་གུས་ཅན་གྱི་གང་ཟག་གིས། ཁྱེད་མགོན་པོ་འོད་དཔག་མེད་ཀྱི་མཚན་ནས་བཟུང་སྟེ་བདག་སོགས་སེམས་ཅན་ཐམས་ཅད་ཀྱི་གནས་སྐབས་དང་མཐར་ཐུག་གི་འཇིགས་པ་མཐའ་དག་སེལ་པའི་ཆེད་དུ་གསོལ་བ་བཏབ་ཅིང་ཕྱག་འཚལ་བ་ཡིན་པས་ན་གནས་སྐབས་ཚེ་འདིའི་འཇིགས་པ་མཐར་ཐུག་ངན་སོང་གི་གཙོས་པའི་འཁོར་བའི་སྡུག་བསྔལ་ཀུན་ལས་ཁྱེད་ཀྱིས་སྐྱབས་པར་མཛད་དུ་གསོལ་ཞེས་དང། བཀྲ་ཤིས་པ་འདི་ཉིད་ལེགས་སྦྱར་གྱི་སྐད་དོད་ལས་སྭ་སྟི་ཞེས་པའི་སྒྲ་ལས་དྲངས་ན་ལེགས་པའམ་དགེ་བའི་དོན་ལ་འཇུག་པ་ཡིན་པས། གནས་སྐབས་ཚེ་འདིའི་བགེགས་དང་བར་ཆད་ཞི་ཞིང་བསམ་དོན་ཆོས་བཞིན་དུ་འགྲུབ། མཐར་ཐུག་ལུས་འདི་བརྗེས་པ་དང་བདེ་བ་ཅན་གྱི་ཞིང་ཁམས་བྱང་སེམས་འཕགས་པའི་བཞུགས་གྲལ་ནས་དམ་པའི་ཆོས་ཀྱི་མཛོད་འཛིན་ཞིང་། མཐའ་ཡས་མར་གྱུར་གྱི་སེམས་ཅན་ལ་ཕན་འདོགས་པའི་འདི་ཕྱིའི་ལེགས་ཚོགས་ཐམས་ཅད་ཕུན་སུམ་ཚོགས་ཏེ། རང་གི་ལག་ན་མཆིས་པ་བཞིན་དུ་སྨོན་པ་ཇི་བཞིན་དུ་འགྲུབ་པའི་བྱིན་རླབས་མགོན་པོ་ཁྱེད་ཀྱིས་མཛོད་ཅིག་ཅེས་སྨོན་ལམ་བཏབ་པའོ།།

གསུམ་པ་སྨོན་ལམ་འགྲུབ་པའི་རྒྱུ་བདེན་ཚིག་དང་གཟུངས་སྔགས་བརྗོད་པ།

རྩ་བའི་ས་བཅད་གསུམ་པ་སྨོན་ལམ་འགྲུབ་པའི་རྒྱུ་བདེན་ཚིག་དང་གཟུངས་སྔགས་བརྗོད་པ་གཉིས་ལས།

དང་པོ་བདེན་ཚིག་བརྗོད་པ།

སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུས་པའི་བྱིན་རླབས་ཀྱིས། །ཇི་ལྟར་སྨོན་ལམ་བཏབ་བཞིན་འགྲུབ་པར་ཤོག །ཅེས་གསུངས་ཏེ། མ་རིག་པའི་གཉིད་ལས་སངས་ཤིང་ཤེས་བྱ་ལ་མཁྱེན་པའི་བློ་གྲོས་རྒྱས་པས་ན་སངས་རྒྱས་ཏེ། སྐྱབས་འགྲོ་བདུན་ཅུ་པ་ལས། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པད་མོ་ལྟར་སངས་རྒྱས། །དེ་ཕྱིར་སངས་རྒྱས་མཚན་གསོལ་ཏོ། །ཞེས་གསུངས་པ་ལྟར། །སངས་རྒྱས་དེ་ཉིད་སྐུ་གསུམ་དབྱེར་མི་ཕྱེད་པའི་བདག་ཉིད་ཅན་ཞིག་ཡིན་པས། ཆོས་ཀྱི་དབྱིངས་སྤྲོས་པ་དང་བྲལ་བ་དབྱིངས་དང་ཡེ་ཤེས་དབྱེར་མི་ཕྱེད་པ་དྲི་མ་མཐའ་དག་དང་བྲལ་བའི་རྣམ་བྱང་ཆེན་པོའི་ཁམས་ནམ་མཁའ་ལྟ་བུ་དེ་ཆོས་ཀྱི་སྐུ་དང་། དེ་ལ་དབྱེ་ན་ངོ་བོ་ཉིད་སྐུ་དང་རྟོགས་པ་ཡེ་ཤེས་ཆོས་སྐུ་གཉིས། ངོ་བོ་ཉིད་སྐུ་ནི། མགོན་པོ་བྱམས་པས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་འགྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་གསུངས་པ་ལྟར། དབྱིངས་དག་མཉམ་ཆེན་པོ་སྟེ། ནམ་མཁའ་བཞིན་དུ་རྣམ་པར་མི་རྟོག་པ་ཡིན་ཡང་དེའི་སྐུ་རྣམས་ཀྱི་ཆོས་ཉིད་བྱེད་པའི་ཆ་ནས་ངོ་བོ་ཉིད་སྐུ་དང་། ཡེ་ཤེས་སྤང་རྟོགས་མཐར་ཕྱིན་པ་རིག་པའི་ངོ་བོ། རྒྱལ་བའི་ཡེ་ཤེས་དབྱིངས་རིགས་མཐར་ཐུག་པ་མངོན་དུ་གྱུར་བའི་དུས་ན། རྟོགས་པ་ཡེ་ཤེས་ཆོས་སྐུ་དེ་ངོ་བོ་ཉིད་ཀྱི་དབྱིངས་དེ་ནམ་མཁའ་ལྟར་གདངས་བྱེད་པའི་ངང་ནས་ཉི་མ་ལྟར་དུ་གློ་བུར་གྱི་སྒྲིབ་པའི་སྤྲིན་དྭངས་པ་ལྟར་སྣང་བའི་ཚུལ་དེ་དང་། ལོངས་སྐུ་དེ་འཁོར་བའི་ཆ་འདུས་བྱས་རྣམ་པར་ཤེས་པ་ཚོགས་བརྒྱད་ཀུན་གཞི་དང་བཅས་པ་དབྱིངས་སུ་ནུབ་པའི་སྟོབས་ཀྱི་ཆ་ནས་བཞག་པའི་གཞིའི་གནས་ལུགས་ཀྱི་སྣང་ཆའི་ཡོན་ཏན་རྫོགས་པའི་ངེས་པ་ལྔ་ལྡན་ཞིག་ལ་གསུངས་ཤིང་། ངེས་པ་ལྔ་པོ་གང་ཡིན་ཞེ་ན། གནས་ངེས་པ་འོག་མིན་སྟུག་པོ་བཀོད་པའི་ཞིང་ཁམས། འཁོར་ངེས་པ་ས་བཅུའི་བྱང་ཆུབ་སེམས་དཔའ། ཆོས་ངེས་པ་ཐེག་པ་ཆེན་པོ། སྟོན་པ་ངེས་པ་རྣམ་པར་སྣང་མཛད་ལ་སོགས་པ་རིགས་ལྔའི་སངས་རྒྱས། དུས་ངེས་པ་རྟག་པ་རྒྱུན་གྱི་འཁོར་ལོར་བཞུགས་པ་དེ་ལྟ་བུ་དང་། སྤྲུལ་སྐུ་དེ་ཉིད་ཇི་ལྟར་ཡིན་ན། ཆོས་སྐུའི་གདངས་ལོངས་སྐུ། ལོངས་སྐུའི་རྣམ་རོལ་ལས་གདུལ་བྱའི་ངོར་གང་ལ་གང་འདུལ་དུ་སྣང་བ། ཆུ་སྣོད་ཡོད་ན་ཟླ་གཟུགས་ཡོད་པ་ལྟར་གདུལ་བྱ་ཡོད་ན་འདུལ་བྱེད་ཡོད་པ་ཡིན་ཏེ། མགོན་པོ་བྱམས་པས། རྒྱུ་ནི་ཡོངས་སུ་སྨིན་གྱུར་ནས། །གང་དང་གང་ལ་གང་དང་ནི། །གང་ཚེ་བྱ་བ་ཕན་གྱུར་པ། །དེ་དང་དེ་ལ་དེར་སྣང་ངོ། །ཞེས་གསུངས་པ་ལྟར། གདུལ་བྱའི་ཆུ་སྣོད་མེད་ན་སྤྲུལ་སྐུའི་ཟླ་གཟུགས་མི་འཆར་བ་བཞིན་དུ། ཟླ་བ་ནམ་མཁའ་ན་ཡོད་ཀྱང་ཟླ་གཟུགས་འཆར་སའི་ཆུ་སྣོད་ས་གཞི་ལ་མེད་ན་གཟུགས་བརྙན་རང་འགག་ཏུ་འགྱུར་བ་བཞིན་དུ་སངས་རྒྱས་ཡོད་ཀྱང་དེ་ཉིད་སྐྲུན་པའི་དགེ་བ་མེད་ན། རྒྱུ་མེད་ན་འབྲས་བུ་མི་འབྱུང་བའམ་ས་བོན་རུལ་བ་འཕེལ་དུ་མི་རུང་བ་ལྟར་སྐལ་བ་མེད་པས་བཟང་མྱོང་བ་མ་ཡིན་ཏེ། མངོན་རྟོགས་རྒྱན་ལས། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱུང་གྱུར་ཀྱང་། །སྐལ་བ་མེད་པས་བཟང་མི་མྱོང་། །ཞེས་གསུངས་སོ། །སྤྲུལ་སྐུ་ལའང་བཟོ་དང་སྐྱེ་བ་མཆོག་གི་སྤྲུལ་སྐུའི་དབྱེ་བ་ཡོད་པས་དེ་ལྟར་སངས་རྒྱས་སྐུ་གསུམ་འདུས་པའི་བདག་ཉིད་དམ་པ་མཆོག་གི་གོ་འཕང་བརྙེས་པའི་བྱིན་རླབས་དང་། ཚིག་རྐང་དང་པོ་སངས་རྒྱས་སྐུ་གསུམ་བརྙེས་པའི་བྱིན་རླབས་དང་ཞེས་པས་སངས་རྒྱས་དཀོན་མཆོག་བསྟན་ལ། ཚིག་རྐང་གཉིས་པ་ཆོས་ཉིད་མི་འགྱུར་བདེན་པའི་བྱིན་རླབས་དང་ཞེས་པས་ཆོས་དཀོན་མཆོག་བསྟན་ཏེ། ཆོས་ཐམས་ཅད་ཀྱི་ཆོས་ཉིད་ཡེ་ནས་འགྱུར་བ་མེད་པ་མི་འགྱུར་བའི་རང་བཞིན་ཆོས་དཀོན་མཆོག་འགོག་ལམ་གྱིས་བསྡུས་པ། བརྗོད་བྱེད་ཀྱི་ཚིག་ལ་ལྟོས་པ་ལུང་གི་ཆོས་དང་། བརྗོད་བྱའི་དོན་ལ་ལྟོས་པ་རྟོགས་པའི་ཆོས་ཏེ་ལུང་རྟོགས་ཀྱི་བསྟན་པ་གཉིས་སུ་བཞག་པ་ཞིག་ཡིན་ཏེ། སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་གསུངས། འདི་ལ་བརྗོད་བྱའི་སྒོ་ནས་བདེན་པ་གཉིས། རྗོད་བྱེད་ཀྱི་སྒོ་ནས་གསུང་རབ་ཡན་ལག་བཅུ་གཉིས་སམ། བརྗོད་བྱའི་སྒོ་ནས་བསླབ་པ་གསུམ། རྗོད་བྱེད་ཀྱི་སྒོ་ནས་སྡེ་སྣོད་གསུམ་ལ་ཕྱེས་ཀྱང་ཆོག་པ་དེ་འདྲ་ཞིག་དང་། ཚིག་རྐང་གསུམ་པ་དགེ་འདུན་མི་ཕྱེད་འདུན་པའི་བྱིན་རླབས་ཀྱིས་ཞེས་པས་དགེ་འདུན་དཀོན་མཆོག་བསྟན་ལ། རིག་གྲོལ་ཡོན་ཏན་བརྒྱད་ལྡན་དགེ་འདུན་དཀོན་མཆོག་གི་མཚན་ཉིད། རིག་པའི་ཡོན་ཏན་གསུམ་དང་གྲོལ་བའི་ཡོན་ཏན་གསུམ། དབྱེ་གཞི་རིག་གྲོལ་གཉིས་བསྣན་པས་རིག་དང་གྲོལ་བའི་ཡོན་ཏན་བརྒྱད་ལྡན་ཡིན་ཞིང་། དེ་ཉིད་ཡང་བརྗོད་ཞིག་བྱས་ན། ཇི་ལྟ་བ་རིག་པའི་ཡོན་ཏན་དང་། ཇི་སྙེད་པ་རིག་པའི་ཡོན་ཏན། ནང་ཡེ་ཤེས་གཟིགས་པ་རིག་པའི་ཡོན་ཏན་དང་གསུམ། སྤང་བྱ་ཆགས་སྒྲིབ་ལས་གྲོལ་བའི་ཡོན་ཏན་དང་། ཐོགས་སྒྲིབ་ལས་གྲོལ་བའི་ཡོན་ཏན། དམན་སྒྲིབ་ལས་གྲོལ་བའི་ཡོན་ཏན་ཏེ་གསུམ་དང་དྲུག དེའི་སྟེང་དུ་རིག་གྲོལ་དབྱེ་གཞི་གཉིས་དང་བརྒྱད་ཀྱི་ཐ་སྙད་གསུངས་པ་དེ་བྱང་སེམས་འཕགས་པ་ཕྱིར་མི་ཟློག་པའི་དགེ་འདུན་གྱི་ངོ་བོ་ལ་གསུངས་ཀྱང་། མཐར་ཐུག་གི་སྐྱབས་ཆོས་སྐུ་ཉག་གཅིག་ལ་འདོད་དེ། རྒྱུད་བླ་མ་ལས། སྐྱབས་ནི་སངས་རྒྱས་ཉག་གཅིག་སྟེ། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཉིད། །ཅེས་གསུངས་པས། །རང་སྣང་དོན་གྱི་འོག་མིན་ན་ཆོས་ཉིད་དང་ཐ་དད་མེད་པར་བཞུགས་པའི་སངས་རྒྱས་དེའི། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཆོས་ཀྱི་སྐུ་རུ་གནས་པས་ན། སྐུ་གསུམ་དཀོན་མཆོག་ཀུན་འདུས་ཀྱི་རང་བཞིན་ཅན་ངོ་བོ་གཅིག་ལ་འདོད་པ་དང་། ཚིག་རྐང་རྗེས་མ་ཇི་ལྟར་སྨོན་ལམ་བཏབ་བཞིན་འགྲུབ་པར་ཤོག་ཅེས་གསུངས་པ་ནི། དེས་ན་དེ་ལྟ་བུ་བསླུ་མེད་མཆོག་གསུམ་དམ་པའི་བྱིན་རླབས་སམ་ཆོས་ཉིད་ཆོས་ཅན་བསླུ་མེད་ཀྱི་སྟོབས་གང་གིས། ཇི་ལྟར་སྨོན་ལམ་བཏབ་པའི་དོན་ཐམས་ཅད་དེ་བཞིན་དུ་འགྲུབ་པར་ཤོག་ཅིག་ཅེས་གསུངས་སོ།།

གཉིས་པ་བདེན་ཚིག་ཇི་བཞིན་འགྲུབ་པའི་གཟུངས་སྔགས།

དཀོན་མཆོག་གསུམ་ལ་ཕྱག་འཚལ་ལོ། །ཞེས་མཆོག་གསུམ་ལ་ཕྱག་འཚལ་བའི་ཚིག་གིས་སྣ་དྲངས་ཏེ། ཏདྱཐཱ། པཉྩནྡྲི་ཡ་ཨ་ཝ་བོ་དྷ་ནི་སྭཱ་ཧཱ། ཞེས་གསུངས་པ་འདིའི་ཞོར་དུ་ཕྱག་གི་འགྱུར་སྔགས་འདི་འབྱུང་སྟེ། དཀོན་མཆོག་གསུམ་ལ་ཕྱག་འཚལ་ལོ། །ན་མོ་མཉྫུ་ཤྲི་ཡེ། ན་མོ་སུ་ཤྲི་ཡེ། ན་མོ་ཨུཏྟ་མ་ཤྲི་ཡེ་སྭཱ་ཧཱ། ཞེས་བརྗོད་ནས་ཕྱག་གསུམ་འཚལ་ན་འབུམ་ཐེར་དུ་འགྱུར་བར་གསུངས་པ་དང་། དེས་ན་རབ་བརྒྱ་ཕྲག འབྲིང་ཅི་ནུས། ཐ་མ་ཕྱག་བདུན་ཡན་འཚལ། རབ་འདི་མ་ཆག་པ། འབྲིང་ལོ་ཟླ་ཙམ་མ་ཆག ཐ་མ་ནམ་སྐབས་སུ་ཁ་ནུབ་ཏུ་ཕྱོགས་ནས་བདེ་བ་ཅན་གྱི་ཞིང་ཁམས་ཡིད་ལ་དྲན་ཞིང་འོད་དཔག་མེད་ལ་ཐལ་མོ་སྦྱར་ཏེ་དད་པ་རྩེ་གཅིག་གིས་བཏོན་ན། ཚེ་འདིར་ཚེ་ཡི་བར་ཆད་སེལ། ཕྱི་མ་བདེ་བ་ཅན་དུ་སྐྱེ་བར་ཐེ་ཚོམ་མེད། འོད་མདོ་དང་ཞིང་བཀོད་ཀྱི་མདོ་པདྨ་དཀར་པོ་འཆི་མེད་རྔ་སྒྲ་སོགས་ཀྱི་དགོངས་པ་ཡིན། ཞེས་གསུངས་ཏེ་བདེ་སྨོན་འདི་ཉིད་འགྱུར་སྔགས་དང་བཅས་པ་བཏོན་པའི་ཕན་ཡོན་དང་ཕྱག་དང་སྦྲགས་ནས་བཏོན་ན་ཕན་ཡོན་ཆེ་ཚུལ་ནས་བཟུང་སྟེ་དོན་བསྡུས་ཏེ་བསྟན་པའོ། །གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཞེས་པ་དང་སྦྲགས་ན་ཡང་དེ་ལྟར་དུ་ཕན་ཡོན་ཆེ་བར་མ་ཟད། མཚན་ལན་གཅིག་དད་པས་བརྗོད་ན་ངན་འགྲོའི་སྡུག་བསྔལ་སེལ་བར་མ་ཟད་བདེ་བ་ཅན་གྱི་ཞིང་ཁམས་ལ་སྐྱེ་བར་ལན་གཅིག་མིན་པར་ལན་གྲངས་དུ་མར་གསུངས་པས། ཤིན་ཏུ་ལྐོག་གྱུར་གཞལ་བ་ལ་ལུང་ཚད་མ་སངས་རྒྱས་བཅོམ་ལྡན་འདས་ཀྱི་བཀའ་ལ་གཏུགས། ལྐོག་གྱུར་རྗེས་སུ་དཔག་པའི་གཏན་ཚིགས་ཚད་མ་སྔོན་དགེ་སློང་ཆོས་ཀྱི་འབྱུང་གནས་ཀྱི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་ཀྱི་ཡོན་ཏན་དང་བཀོད་པ་ཐམས་ཅད་གཅིག་ཏུ་བསྡམ་པའི་ཞིང་ཁམས་བཟུང་བའི་སྟོབས་མ་རྫོགས་ཀྱི་བར་དུ་ཁོང་འཚང་རྒྱ་བར་མ་གྱུར་ཅིག ཅེས་གསུངས་ཏེ་བསྐལ་བ་རྒྱ་མཚོར་ཚོགས་གཉིས་རླབས་ཆེན་བསགས་ཏེ་སྨོན་ལམ་ཀྱི་མཐུ་གྲུབ་པའི་སྟོབས་དེ་ལ་བཟུང་། དེའི་སྟེང་དུ་མངོན་སུམ་ཚད་མ་ད་ལྟ་བདེ་བར་གཤེགས་པའི་མཚན་ཐོས་པ་ཡང་བསོད་ནམས་རླབས་ཆེན་སྔོན་སོང་ཅན་ཡིན་པའི་མངོན་སུམ་ཚད་མ་སྟེ་ཚད་མ་གསུམ་གྱི་སྲང་ལ་བཏེག་སྟེ་གཞལ་ན་བསླུ་བ་མེད་པས། བསླུ་མེད་ཡིན་པ་ལ་ཡིད་ཆེས་ཀྱི་ཐོག་ནས་དལ་འབྱོར་དོན་ལྡན་དུ་བྱ་རྒྱུ་དེ་ཚེ་འདི་ཕྱི་གཉིས་ཀའི་དོན་ཆེན་འདིས་འགྲུབ་པར་གསུངས་ནས་འདིའི་ཁུངས་དང་བཅས་པ་གསལ་བར་བཀོད་དོ།།

ཐ་མར་དགེ་བ་མཇུག་གི་དོན་མཛད་བྱང་།

ཞེས་དགེ་སློང་ར་གཱ་ཨ་སྱའམ་ཀརྨ་ཆགས་མེད་ཀྱིས་སྦྱར་བས་འགྲོ་བ་སེམས་ཅན་མང་པོ་བདེ་བ་ཅན་དུ་སྐྱེ་བའི་རྒྱུར་གྱུར་ཅིག ཅེས་གསུངས་ཏེ་མཇུག་ཡོངས་སུ་རྫོགས་པའི་དགེ་བ་མཐའ་ཡས་པའི་སེམས་ཅན་སྤྱི་དང་། འདི་ཉིད་འཛིན་སྐྱོང་ཀློག་པའི་སེམས་ཅན་མང་པོ་བདེ་བ་ཅན་དུ་ཚེ་འདི་བརྗེས་མ་ཐག་ཏུ་སྐྱེ་བའི་རྒྱུར་འགྱུར་བར་ཤོག་ཅིག་ཅེས་གསུངས་ཏེ་སྨོན་ལམ་ཀྱིས་མཐའ་བརྒྱན་པར་མཛད་དོ། །དེ་ཡན་ཆད་གྱིས་རྣམ་དག་བདེ་ཆེན་ཞིང་གི་སྨོན་ལམ་མཁས་གྲུབ་ཀརྨ་ཆགས་མེད་ཀྱིས་མཛད་པའི་རྒྱལ་ཁམས་ཡོང་ལ་ཁྱབ་རྒྱ་འགྲོ་དོན་ཆེན་པོ་ཅན་འདིའི་ཐོག་ནས་བདེ་ཆེན་ཞིང་ཁྲིད་བཤད་དེ་དེ་རིང་གིས་མཇུག་ཡོངས་སུ་རྫོགས་ནས། མཇུག་མཐའི་ཞལ་གདམས། ཐེངས་འདིའི་ཆོས་འཆད་ཉན་ཚོགས་བསགས་མཆོད་འབུལ། ཕྱག་བསྐོར་སྒྲིབ་སྦྱོང་། གསོལ་འདེབས་སྨོན་ལམ། དེའི་སྟེང་དུ་དགེ་སྒྲུབ་སྡིག་སྤོང་གི་ཁས་ལེན་བྱས་པ་ལ་སོགས་པ། ད་རེས་ཀྱི་ཆོས་ར་འདིའི་ནང་དུ་ཞུགས་ཏེ་རྣམ་དཀར་གྱི་དགེ་རྩ་བསྒྲུབས་ཚད། ཕྱོགས་བཅུའི་རྒྱལ་བ་སྲས་བཅས་དང་། འཕགས་དང་སོ་སྐྱེ་ཡིས་ཕྱོགས་དུས་གནས་སྐབས་ཀུན་ལ་བསགས་པའི་དགེ་རྩ་དང་གཅིག་ཏུ་བསྡོམས་ཏེ། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པའི་དགེ་བ་གཅིག་པུའི་ནང་དུ་བསྡམ་པའི་མཇུག་དགེ་བ་རྫོགས་བྱང་དུ་བསྔོ་བའི་སྐབས་ལ་ཁེལ་བ་རེད། དེས་ན་ད་རེས་འདི་ན་ཆོས་ར་གཅིག་གི་ནང་དུ་མཉམ་དུ་འཛོམས་པའི་འདུས་པའི་ཞལ་གྲངས་ཀྱང་ཉུང་ཉུང་མ་རེད། འདིའི་ཁྱབ་ཚད་ཀྱི་ཐོག་ནས་བཤད་ན། བོད་མདོ་དབུས་ཁམས་གསུམ་ཟེར་ཀྱང་ཆོག་ལ་རྒྱ་ཞིང་ཆེན་ཕྱི་ནང་གི་མི་རིགས་འགའ་རེའི་མི་སྣའང་ཆོས་ཞུ་བ་ཡོད་ཅིང་། གྲུབ་ཆའི་གཙོ་ཕལ་གྱི་ཐོག་ནས་བཤད་ན་བླ་སྤྲུལ་གྲྭ་ཚང་གི་དགེ་འདུན་བཙུན་པ། དེ་ཡང་དགོན་སྡེ་ཁག་མང་པོའི་བླ་གྲྭ། བཙུན་མའི་དགེ་འདུན། སྔགས་སྡེ་ཕོ་མོ། དགེ་བསྙེན་གྱི་སྡེ། ཆོས་དད་མང་ཚོགས་སྤྱིར་བཏང་བ་དེ་ཚོ་ལས་གྲུབ་པ། གྲངས་ཚད་ཀྱི་སྟེང་ནས་བཤད་ན་ཧ་ཅང་མང་པོ་ཡིན་པས། སྤྱིར་མི་རིགས་གྲངས་ཉུང་གི་ས་ཆ་འབྲོག་སྡེ་ཁུག་ཀྱོག་ཅིག་ལ་མཚོན་ན་ཉུང་ཉུང་མ་རེད་མང་པོ་རེད། ཁྱད་པར་ད་ལོའི་དུས་སྐབས་ཀྱི་ཡུལ་དུས་གནས་བབས། ཧ་ཅང་དུས་བདེ་ཞོད་འཇགས་མིན་པའི་གནས་ཚུལ་དང་བསྟུན་ན་མང་པོ་ཡིན་པར་མ་ཟད། དེའི་སྟེང་དུ་ཁྱིམ་པ་ཕོ་མོས་སྟོན་ལས་དང་ཐུག་སྟེ་བྲེལ་བ་ཆེ་བའི་སྒང་ཡིན་ཡང་ཆོས་ཞུ་བ་མང་པོ་ཞིག་འཛོམས་བཞག་པ་འདི་ཡང་ངོ་མས་བཤད་ན་སྟབས་ལེགས་སྟེས་དབང་གིས་བྱུང་བའི་རྒྱུ་མེད་རྐྱེན་མེད་ཅིག་ཅི་ལ་ཡིན། ད་རེས་འདི་ན་འཛོམས་ཚད་སྤྱིར་རང་རང་རང་གི་ཚེ་སྔོན་བསགས་ཀྱི་བསོད་ནམས་ཀྱི་སྟོབས་ཀྱིས། ཆོས་ལྡན་དལ་འབྱོར་ཚང་བའི་ལུས་ཤིག་བླངས། དགོས་སུ་ཆོས་རྒྱུད་འདི་དང་འབྲེལ་བའི་ལས་དང་སྨོན་ལམ་མཐུན། དེ་ལྟར་སྔོན་འབྲེལ་ལས་དང་སྨོན་ལམ། ཕྱི་འབྲེལ་ཆོས་དང་དམ་ཚིག་གིས་བསྡུས་ཤིང་། ཁྱད་པར་དུ་རང་རེ་དུས་ཀྱི་ཐ་མ་འདིར་ཆོས་ཀྱི་གྲུ་ཆེན་པོ་ལ་མཉམ་དུ་ཞུགས་ཏེ། འཁོར་བའི་རྒྱ་མཚོ་བརྒལ་ཏེ་ཐར་བའི་སྐམ་སར་སྙེག་པའི་དོན་མཐུན་པའི་འདུན་པ་གཅིག་གིས་མཉམ་དུ་ཚོགས་པ་འདི། ཐུན་མོང་མ་ཡིན་པའི་ལས་ཀྱི་བསྐོས་ཐང་ཞིག་གིས་སྦྲེལ་སོང་བ་ཡིན་པས། འདིའི་ནང་ན་བསྟན་འཛིན་གྱི་སྐྱེས་ཆེན་བསྟན་པའི་རྩ་ལག་མ་འོངས་བསྟན་རྒྱུན་འཛིན་པའི་མཁན་སྤྲུལ་རྣམ་པ་ཡང་བཞུགས་ཤིང་། དེར་མ་ཟད་མཁས་བཙུན་བཟང་གསུམ་འཆད་རྩོད་རྩོམ་གསུམ་ལ་རང་དབང་འབྱོར་བའི་བསླབ་ལྡན་སྡེ་སྣོད་འཛིན་པས་གཙོས་པའི་གྲྭ་མང་དགེ་འདུན་འདུས་པའི་སྡེ་དང་། དེའི་སྟེང་དུ་སྡེ་ཡུལ་བའི་ཁྱིམ་པ་ཕོ་མོ་རྣམས་ཀྱང། མཆོག་གསུམ་སྐྱབས་སུ་མི་འཛིན་པ་ཞིག་དང་དེའི་དམ་བཅའ་མ་བླངས་པ་ཞིག་མེད་པས། སྤྱིར་གངས་ཅན་བོད་ཀྱི་ཡུལ་ཁམས་འདི་ཆོས་ལྡན་གྱི་ཡུལ་གྲུ་ཡིན་པས། ཕོ་ཐམས་ཅད་འཕགས་པའི་དགེ་བསྙེན། མོ་ཐམས་ཅད་ཆོས་ཀྱི་ལྷ་མོ་གསུངས་པ་འདྲ་བ་རེད་ཅེས་སྨྲས་ན་ཆོག་པ་གཞིར་བཞག་གི་ཐོག་ནས། འདིར་ཡོད་ཚང་མ་ཡང་དེ་ལས་མ་འདས་པ་ཡིན་རྒྱུའི་ཡིད་ཆེས་ཀྱི་ཐོག ང་ལྟ་བུ་ཞིག་ལ་མཚོན་ན་མིང་བོད་ཀྱི་བླ་མའི་མིང་ཞིག་ཐོགས། དུས་རབས་ཀྱི་དབང་གིས་དམ་པ་གོང་མའི་ཞལ་མཇལ་བྱིན་རླབས་ཐོབ་པས། བརྒྱུད་པ་རིམ་པ་གཅིག་གིས་ཉེ་བའི་འདང་རྒྱག་བྱེད་ཀྱིན་ཡོད་པ་རེད་མ་གཏོགས། དོན་ངོ་མའི་སྟེང་ནས་སོ་སྐྱེས་ཀྱི་ངང་ཚུལ་ལས་མ་འདས་པ་རང་བློ་རང་ལ་ལྐོག་ཏུ་མ་གྱུར་བ་ཞིག་རེད། འོན་ཀྱང་ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། །དེ་ཕྱིར་བདག་གི་སྙན་ངག་འདི་ངན་ཡང་། །དམ་ཆོས་བརྗོད་ལ་དད་སླད་སྨོད་མི་བགྱིད། །ཞེས་གསུངས་པ་ལྟར། བཤད་རྒྱུ་དམ་པའི་ཆོས་ཡིན་པས། དུས་ཕྱི་མའི་སྐབས་འདིར་ཕྱི་ཁྲ་ཁྲ་ཟང་ཟིང་གིས་བསྟན་པའི་ཕྱི་ཚུལ་དར་བའི་ཚུགས་ཀ་ཡོད་རུང་། ནང་དོན་གྱི་བསྟན་པ་ཉམ་དམའ་ཉག་ཕྲ་བའི་གནས་སྐབས། སློབ་དཔོན་དབྱིག་གཉེན་གྱིས། དེ་ལྟར་ཐུབ་པ་དག་གི་བསྟན་པ་ནི། །ལྐོག་མར་སྲོག་ཕྱིན་འདྲ་དང་དྲི་མ་རྣམས། །སྟོབས་དང་ལྡན་པའི་དུས་སུ་རིག་ནས་ནི། །ཐར་བ་འདོད་པ་དག་གིས་བག་ཡོད་གྱིས། །གསུངས་པ་ལྟ་བུའི་དུས་འདི་ལ་བསྟན་པ་དམ་ཆོས་ཀྱི་སྲོག་འཛིན་རྒྱུ་དེ་བསྟན་པ་འདི་ལ་ཞུགས་པའི་གང་ཟག་ཐམས་ཅད་ཀྱིས་མ་བགོས་ཐུན་མོང་གི་འགན་འཁྲི་ཞིག་ཡིན་ཕྱིར། ཆོས་ཚིགས་བཞི་ཞིག་གི་སྒྲོག་མ་ཁྲོལ་རུང་། དམ་པའི་ཆོས་རང་གིས་འཛིན་ཅིང་གཞན་ལ་སྤེལ་བའི་གོ་སྐབས་བཟང་པོ་ཐོབ་པ་ནི་བསྐལ་བ་བཟང་སོང་བསམ་གྱིན་ཡོད། འདི་དུས་གསུམ་བདེ་གཤེགས་སྲས་དང་སློབ་མར་བཅས་པ། ཁྱད་པར་དུ་དམ་པ་གོང་མ་བཀའ་དྲིན་ཅན་ཐམས་ཅད་ཀྱི་ཐུགས་དགོངས་རྫོགས་པའི་མཆོད་པ་ལ་ཕུལ་ན། བླ་ན་མེད་པའི་མཆོད་པའི་མཆོག་ལ་འགྲོ་རྒྱུ་རེད་བསམ་གྱིན་ཡིན། ཆོས་བཤད་རྒྱུ་དེ་རྒྱལ་བའི་ཕྲིན་ལས་རེད། གདུལ་བྱས་རྒྱུད་སྨིན་ཞིང་གྲོལ་བ་རྒྱལ་བའི་མཛད་པ་ཡིན་པས། རྒྱལ་བའི་ཕྲིན་ལས་ཆུད་མི་ཟ་བའི་ཐབས་ཚུལ་ལ་བསམ་ནས་བཤད་པ་ཡིན་པས། ཡོངས་རྫོགས་ཀྱིས་ཆོས་ཐོས་པ་རང་རྒྱུད་ལ་སྦྱར་ཏེ་ཉམས་ལེན་གྱི་གནད་ཐོག་ལ་ཁེལ་ཐུབ་པ་བྱ་རྒྱུ་ནི་གལ་ཆེན་རེད། གནད་ལ་མ་ཁེལ་བའི་ཆོས་བརྒྱ་ཐམ་པ་ཉན་པས་མ་ཟད། ཁ་བཤད་ཙམ་གྱིས་ཇི་ལྟར་བཤད་ཤེས་ཀྱང་། ཉམས་སུ་མ་ལོན་ན་ནེ་ཙོའི་འདོན་པ་ལྟ་བུ་ཞིག་ཡིན་པས་དེས་ཅི་ཡང་མི་ཕན། བླ་སེར་དགེ་འདུན་པ་རྣམས་ལ་ཞུ་ཅི་དགོས་ཚེ་འདི་ཕྱི་གཉིས་ཀའི་སྐྱབས་གནས་རེ་ལྟོས་རེད། བསྟན་རྩ་དགེ་འདུན་རེད། དགེ་ལ་གཅིག་ཏུ་འདུན་ཞིང་རང་རྒྱུད་བསླབ་པ་དང་མི་ཕྱེ་བ་ཞིག་ལ་དགེ་འདུན་པ་ཞེས་ཞུ་བ་ཡིན་ཞིང་། བསྟན་པ་ཕྱི་ན་མི་བཞུགས་གང་ཟག་གི་རང་རྒྱུད་ན་བཞུགས་པ་ཡིན་པས། རེ་རེ་ཚོགས་པའི་ཐུན་མོང་གི་བསྟན་པ་གངས་ལྗོངས་ཡུལ་གྱི་རྒྱན་ཆ་ཞིག་ཡོང་རྒྱུ་དང་། བསྟན་པ་འདི་ཉིད་བསྟན་པའི་འབྱུང་ཁུངས་ངོ་མ་ནས་དར་རྒྱུའི་རེ་བ་ཁྱེད་རྣམ་པ་ལ་བཅང་ཡོད་པས། ད་ལྟ་དུས་ཀྱི་འགྱུ་མཚམས་དང་། བསྟན་པའི་ཚིགས་མཚམས། མི་ཐོག་རྗེ་དུས་ཡིན་པས། ཡག་ཉེས་མངོན་མཚན་ཆེ་བའི་དུས་རབས། སྙོམ་ལས་ལ་བཞུགས་རྒྱུ་མེད་པའི་དུས་སྐབས། རེ་རེའི་ངོས་ནས་ཡིན་ན་བསྟན་པ་རང་སྐྱ་ཐུབ་པ་ཞིག་ཚུགས་རྒྱུའི་གདེང་ཚོད་ཡོད་ངེས་བྱེད་དགོས་པའི་དུས་ཚོད་རེད། མི་སྐྱ་ཕོ་མོ་ཚོ་དང་ཁྱད་པར་དུ་ལོ་ཉུང་ན་གཞོན་ཚང་མ། ཁྱེད་རྣམས་མ་འོངས་འཇིག་རྟེན་གྱི་བདག་པོ་རེད། ཆུས་ཕ་ཤུལ་བུ་ཡི་བཟུང་རེས་རེད། རྒྱན་ཕ་ཤུལ་བུ་མོའི་བཏག་རེས་རེད། མི་རེས་མི་ལ་བབ་ནི་རེད། མ་འོངས་ས་འདིའི་སྐྱིད་སྡུག་ཅི་ཡོང་ཁྱེད་རྣམས་ལ་རག་ལས་པ་ཡིན་པས། ཁྱེད་རྣམས་ནར་སོན་ནས་ཡར་སྐྱེས་ཏེ་མར་སྒུར་ས་ལ་ཐུག་དུས་ད་དུང་བྱིས་པ་བསམ་མེད་ཀྱི་ཐལ་རྩེད་རྩེ་བ་ལྟར་མི་བྱེད་པར། མི་རབས་སྔོན་མ་ཐམས་ཅད་དུས་རབས་ཀྱི་འཕེལ་འགྲིབ་ཀྱི་དབང་གིས་ཤེས་ཡོན་སྦྱང་བའི་གོ་སྐབས་མ་ཡོད་པས། དེ་རྣམས་ཀྱིས་ཁྱེད་རྣམས་ལ་བསམ་པ་ངན་པ་བཟུང་བ་མིན་ཀྱང་བསམ་བཟང་འཚག་ནས་བཟང་སློབ་མི་ཤེས་ཤིང་། མང་ཆེ་བས་རྫུ་བོ་བྱེད་སྟངས་དང་ས་ལས་རྡོ་ལས་བྱེད་རྒྱུ། སྡིག་ཉོ་མུག་ཚོང་གི་ཁ་མ་སོས་ནམ་མ་ལངས་ཏེ། རྨ་ཆུས་གྱེན་དང་འབྲི་ཆུས་ཐུར་ལ་ཁྱེར་ནས་ཉི་མ་ནམ་ཟླ་ཟད་མཁན་ཤ་སྟག་ཡིན་པས། ཁྱེད་རྣམས་ཀྱིས་རང་བསམ་གྱི་ཐོག་ནས་ཤེས་རིག་ཡོན་ཏན་སྦྱོངས། མགོ་རྣ་ལ་རྒྱ་ཤེས་ཡོན་སྦྱང་བརྩོན་གྱི་སྟེང་དུ་ཞོག་དང་དེའི་ནང་དུ་མདོ་འདུས་ནས་བསྡད་ཡོད་པ་རེད། ཁྱེད་རྣམས་ཀྱིས་མ་རབས་ཀྱི་བསམ་སྤྱོད་ལ་བསླབ་མི་ཉན་ཞིང་། ཡ་རབས་ཀྱི་བསམ་སྤྱོད་ལ་སྦྱོང་ནས། དགེ་སྒྲུབ་སྡིག་སྤོང་རེ་ཨེ་ཤེས་ལྟོས། མིའི་རིན་ཐང་ཤེས་ཡོན་དང་སྤྱོད་བཟང་ཡོད་མེད་ལ་ཐུག་ཡོད། རང་ལེགས་ན་མི་འདོད་མཁན་སུ་ཞིག་ཡོད། ལེགས་དགོས་ཚེ་གྲོགས་ངན་གྱི་ཁ་ལ་མ་ཉན། གྲོགས་ངན་གྱི་ཐོད་པའི་སྟེང་དུ་འདི་གྲོགས་ངན་རེད་ཅེས་ཡི་གེ་བྲིས་ཡོད་པ་མ་རེད་ལ། ང་གྲོགས་ངན་ཡིན་ཞེས་དེས་མི་བཤད་མོད། བསམ་ངན་རང་གིས་འཚག་ནས་མི་ལ་ཡང་བསླབས། དེ་ལ་ཐག་ཉེ་བས་བསམ་ངན་དང་སྤྱོད་ངན་རང་ཤུགས་ཀྱིས་འགོས་ཡོང་བ་ཡིན་ན་དྲིན་ཕ་མ་ཡིན་ཡང་གྲོགས་ངན་ཡིན་པས་སྤོང་དགོས། རྟེན་ས་ཁེན་ས་བློ་འདྲི་ས་རང་གི་ཡན་གྱི་ཡོན་ཏན་ཅན་ཞིག་ཡིན་དགོས་ཤིང་། གཏམ་བཤད་སྔ་དང་། ལས་ལས་སྔ་མ་བྱེད། སྔ་བསམ་ཕྱི་འདང་རྒྱོབ། ཐག་རིང་ས་རྒྱ་ཆེ་ས་ལ་ལྟོས། རི་མཐོན་པོའི་ཡན་ན་མཐོན་པོ་དང་སྤྲིན་དཀར་པོའི་ཡན་ན་ཉི་ཟླ་ཡོད་པ་ཡིན་པས། སྐྱིད་ན་བླ་མ་དཀོན་མཆོག སྡུག་ན་ཚེ་སྔོན་གྱི་ལས་འབྲས་ལ་བསམ་བློ་གཏོང་ཤེས་ན་སྐྱིད་སྡུག་གཉིས་ཀ་བཟོད་ནུས་པ་ཞིག་འོང་བ་ཡིན་པས། ཕ་མ་རྒན་གསུམ་ལ་བརྩི་བཀུར་གྱིས། ཕ་མ་དང་བླ་མ་ཡུལ་གཉེན་པོ་རེད། ནད་པ་མགོན་མེད་དབུལ་པོ་བདག་མེད་ལ་རོགས་ཆེ་ཐོན་ཆུང་ཐོན་གྱིས། ལར་སུ་ཡིན་ཡང་ཕན་སེམས་བསམ་པ་བཟང་པོ་རེ་གྱིས་དང་ཆོས་དེ་རེད། མི་སྐྱ་ཕོ་མོ་རྣམས། སྐྱེས་ཚད་ཤི་མི་དགོས་པ་ཞིག་ཡོད་པ་མིན་ཞིང་། ཤི་དགོས་པ་ཚང་མས་ལོས་ཤེས་ཏེ། གཅིག་ན་ནམ་ཤི་ཚོད་མི་ཐིག །གཉིས་སུ་མགྱོག་པར་མི་ཤི་རྒྱུའི་རྟག་འཛིན་གྱིས་བསླུས་ཏེ་གྱོང་ཕམ་ཁ་ཚང་མ་ཁུར་དགོས་ཐུག་པ་མང་བས་ན། བྱ་མུག་གུས་ཉལ་ས་བཅའ་ཚེ་ནམ་ལངས་བ་ལྟར། འདུག་ཆས་རྐྱང་རྐྱང་བྱེད་ཀྱིན་འདུག་ཚེ། ལར་འདུག་ལོང་མ་གཏད་པར་འཆི་བདག་གི་བསུ་མ་གློ་བུར་དུ་ཐོན་ཏེ། ཁ་ཆེམས་ཙམ་ཞིག་འཇོག་ལོང་མི་གཏད་པ་ཅི་འདྲའི་མང་པོ་ཡོད་འདུག ལོ་ཉུང་ཚེ་ན་གཞོན་གྱི་སྣང་བ་ཡིན་པས་ཚེ་འདིར་སྣང་ལ་ཞེན་པ་མེད་པ་ཞིག་སུ་ཡོད། འོན་ཏེ་མི་ཚེའི་འགྲོ་ཆས་འདུག་བཀོད་ཅིག་ད་ལྟ་ནས་ངེས་པར་བྱེད་དགོས་པས། ལྷ་བླ་མ་དཀོན་མཆོག་བློ་གཏད་ཀྱི་ཕུགས་ལ་ཞོག ལས་རྒྱུ་འབྲས་མིག་གི་འབྲས་བུ་བཞིན་དུ་སྲུངས། སྲོག་མ་གཅོད། མནའ་མ་ཟ། རྐུ་མ་བྱེད། རྫུན་མ་བཤད། དེའི་སྟེང་དུ་རྒྱག་རེས་མ་བགོ། འཁོན་ཁ་མ་གཏུགས། ཆང་མ་འཐུང་། དུ་བ་མ་འཐེན། ཤོ་སྐུགས་མ་འཇོག དེ་དག་ནི་དམ་པའི་ཆོས་དང་མི་མཐུན་ཞིང་། དམ་པའི་ཆོས་དང་འགལ་སོང་ན་ཉེས་པ་ཆེ། ལས་རྒྱུ་འབྲས་ལ་བསླུ་བ་མེད། རྣམ་སྨིན་རང་ཐོག་ཏུ་འཁོར་རྒྱུ་ཚེ་ཕྱི་མ་སྒུག་མི་དགོས། བསམ་ངན་མི་ལ་འཚགས་ན་སྦྱོར་ངན་རང་ལ་དུ་ཡོང་། བསམ་པ་ངན་པས་མི་མི་ཐུབ་ཅིང་རང་ཐུབ་པ་ཡིན། ལར་མ་གཞི་དགྲ་དང་གཉེན་ཞེས་པ་ནི་འཁྲུལ་བས་བཏགས་ལུགས་ཤིག་ཡིན་པ་ལས། དགྲ་གཉེན་ལ་རྟག་བརྟན་དང་ངེས་པ་མེད། དེས་ན་ལོ་རྒན་གཞོན་སུ་ཡིན་ཡང་གནོད་སེམས་དང་བསམ་ངན་མ་བྱེད། སེམས་བདེ་བདེ་དང་ཁོག་ཡངས་མོ་གྱིས། ལུས་ངག་ཡིད་གསུམ་གྱིས་མི་དགེ་བ་མང་པོ་སྒྲུབ་ཤོར་འགྲོ་བ་ཁག་ཅི་ཡོད་སོ་སོའི་སྐྱེ་བོ་རེད་མོད། འོན་ཀྱང་ཉན་མི་ཉན་གྱི་བླང་དོར་དེ་ཤེས་ཚར་དུས་དེ་མ་ཐག་ཏུ་བཤགས་པ་གྱིས། བཤགས་པས་དག་པ་སྡིག་པའི་ཡོན་ཏན་ཡིན། བཤགས་པས་དག་ནས་སྡིག་པ་གཏན་མེད་རེད་འགྲོ་བའི་བཤགས་པ་དྲག་པོ་རེད་མ་ཐུབ་ཀྱང་སྡིག་པ་ཡར་འཕེལ་དུ་མི་བཅུག སྡིག་པ་མ་བཤགས་པར་ཡུན་རིང་འགོར་སོང་ན་ཡར་འཕེལ་འགྲོ་བ་དང་། དང་པོ་སྡིག་པ་ཆེན་པོ་ཞིག་མིན་རུང་ཡུན་རིང་ན་འཕེལ་ཏེ་ཇེ་ཆེ་ཇེ་མང་ལ་བུད་འགྲོ་བས། སྡིག་ལྟུང་འདི་དང་ཡུན་རིང་ལ་འགྲོག་མི་ཉན། ནད་ཁོག་ཏུ་བཟུང་བ་དང་འདྲ་བ་ཡིན། བསམ་པ་བཟང་ན་ལུས་ངག་གི་སྤྱོད་པ་རང་ཤུགས་ཀྱིས་བཟང་ཡོང་། ནང་གི་བསམ་པ་བཟང་། ཕྱིའི་སྤྱོད་པ་ཡག་ན་མི་རབས་ཞེས་པ་དེ་ཡིན། མི་ཚང་མ་དེ་ལ་དགའ་བར་མ་ཟད་དཀར་ཕྱོགས་ཀྱི་ལྷ་དང་སྲུང་མ་དེ་ལ་དགའ་ནས་མགོན་སྐྱབས་དང་སྡོངས་གྲོགས་མཛད། དེ་ལྟ་བུའི་མི་ནི་ཕྲག་ལྷ་དང་ལས་ལྷ་དར། ཁ་ལས་ཀླུང་རྟ་ད་ལྟ་མེད་རུང་ཡུན་གྱིས་དར་ཡོང་། རྫུན་མའི་ལམ་དེ་ཡུན་ཐུང་ལ། བདེན་པའི་ཕུགས་དེ་རྒྱང་རིང་། ཐམས་ཅད་དགའ་ཐབས་ཐོན་དུས་དགེ་བ་རེད། འུ་ཚོའི་འཇིག་རྟེན་གཏམ་གྱི་དཔེ་ལ། ཐམས་ཅད་དགའ་ན་དགེ་བ། ཕ་མ་དགའ་ན་དྲིན་ལན་ཡིན་ཟེར་བ་ལྟར། སེམས་ཅན་མགུ་བྱེད་མ་གཏོགས་པའི་རྒྱལ་བའི་མཛད་པ་ཡང་ལོགས་སུ་མ་དམིགས་པ་ཞིག་ཡིན་མོད། འོན་ཀྱང་སེམས་ཅན་མོས་པ་སྣ་ཚོགས་ཡིན་པས་འགའ་རེ་དགའ་བྱེད་ལས་ན་དགའ་མི་ཤེས་པ་ཐམས་ཅད་ད་དུང་སྒུག་དགོས། རྒྱལ་བ་རྫོགས་པའི་སངས་རྒྱས་ཀྱིས་ཀྱང་མགུ་ཐབས་མ་ཐོན་པ་འགའ་རེ་ཡོད་སྲིད་པས་རང་རེས་མི་མགུ་བ་ཅིའི་ཕྱིར་མེད། དགེ་མི་དགེ་སེམས་ཀྱི་བྱེ་བྲག་ཡིན་ཞིང་ལྟར་སྣང་གཟུགས་བརྙན་ཙམ་གྱི་དགེ་སྡིག་ལ་ཆོད་ཆེན་པོ་ཞིག་ཡོད་པ་མིན་པས་ན། མཆོད་སྦྱིན་བསོད་ནམས་ཀྱི་སྙིང་པོ་ལོངས་དང་འབྱོར་བ་རྒྱས། མི་འཇིགས་པ་སྐྱབས་ཀྱི་སྦྱིན་པ་ནི་སྲོག་མ་གཅད་པར་ཚེ་ཐར་སྲོག་བླུ་གྱིས་དང་རང་དང་བཟའ་ཚང་ཚེ་རིང་ཞིང་ནད་ཉུང་། དགེ་བཅུ་སྒྲུབས། སྡིག་བཅུ་སྤོངས་། དེའི་སྟེང་དུ་དགེ་བསྙེན་དང་བསྙེན་གནས་ཀྱི་སྡོམ་པའི་ཚུལ་ཁྲིམས་སྲུངས་དང་ཕྱི་མ་མཐོ་རིས་དང་ཐར་བ་ཐོབ། དུས་རྒྱུན་དུ་བཟོད་པ་སྒོམས། མི་ཚེ་ནི་ཡུད་ཙམ་ཡིན་པས། ནང་བཟའ་ཚང་གི་བར་དུ་འཁོན་འཛིང་མ་བྱེད། རྗེས་ནས་འགྱོད་དུས་འཕྱིས་སོང་བ་རེད། ནང་རང་སྡེ། ཕྱི་གཞན་སྡེ་སུ་དང་སུའི་བར་ཡིན་རུང་འཁོན་འཛིང་མ་བྱེད། གཅིག་ལའང་མི་འདོད་པ་དེ་ཚང་མས་མི་འདོད། སུ་ཡིན་ཡང་གཅེས་པ་རང་སྲོག་ཡིན་པས་རང་ལ་མི་འདོད་པ་རྒྱུ་མཚན་དུ་བྱས་ཏེ་གཞན་ལ་གནོད་མ་སྐྱེལ། དེས་ན་སྤུན་ཟླ་ནང་དམེ་མ་བྱེད་རིགས་རུས་ཤ་ཁྲག་གཅིག་ལས་ཆད་པ་རེད། དགོན་ཡར་མར་ལ་སྐུར་བ་མ་འདེབས། སྟོན་པ་གཅིག་གི་ཆོས་ལུགས་རེད། ནམ་ཞིག་ལོག་ལྟའི་རྒྱུ་རུ་འགྱུར་འགྲོ། ཆོས་ཕྱིར་དཀའ་སྤྱད་ལ་བཟོད་དགོས་ཏེ། འཇིག་རྟེན་ཚེ་འདིའི་དོན་དུ་སྡུག་རུས་བྱེད་རྒྱུའི་དེའི་ཕྱེད་ཀ་ཆོས་ལ་གྱིས་དང་། ཇི་ལྟར་ཞན་རུང་རང་འགོ་ཐོན་ནི་ཞིག་ཡོང་ངེས་པ་ཡིན་པས། ཆོས་ཨེ་འགྲུབ་དང་། ཕྱི་མ་སྐྱིད་པོ་ཞིག་དང་། འཆི་ཁ་མི་སྐྲག་པ་ཞིག་ཡོང་བར་འདོད་ན་ཆོས་ཕྱོགས་ལ་བརྩོན་འགྲུས་གྱིས། ཉིན་ཞག་གཅིག་ལ་ཆུ་ཚོད་ཉི་ཤུ་རྩ་བཞིའི་ནང་ནས་འདི་ཆོས་སྒྲུབ་པའི་དུས་ཚོད་ཡིན་བསམ་རྒྱུ་ཞིག་ཡོད་ན། ཆུ་ཐིག་གསོག་པའི་རྒྱ་མཚོ་ལྟར་དུ་སོགས་རྒྱུ་ཞིག་ཡོད་པ་དང་། འཇིག་རྟེན་འདི་ན་ཡག་པ་ཞིག་ཡོད་ཚད་ཐམས་ཅད་འབད་པས་བསྒྲུབས་ཡོང་བ་ཁོ་ན་ཡིན་ཞིང་། ཆོས་སྒྲུབ་དུས་སྒོམ་དགོས་། སྒོམ་མི་ཤེས་མ་ཟེར། བསམ་ཤེས་ན་སྒོམ་ཤེས་ལ། སེམས་ཡོད་ན་བསམ་ཅིའི་ཕྱིར་མི་ཤེས། ཅི་ཞིག་སྒོམ་དགོས་པ་རེད་ཟེར་ན། དམྱལ་བ་སྒོམས། ཚ་གྲང་གི་སྡུག་བསྔལ་རང་ཐོག་ཏུ་མྱོང་གི་ཡོད་པར་སྒོམས། ཡི་དྭགས་སྒོམས། བཀྲེས་སྐོམ་གྱི་སྡུག་བསྔལ་མྱོང་གི་ཡོད་པ་དང་། །དུད་འགྲོ་སྒོམས། བཀོལ་སྤྱོད་ཀྱི་སྡུག་བསྔལ་མྱོང་གི་ཡོད་པ། མཚམས་མཚམས་སུ་གཡག་རྒན་མ་འབྲི་ཐམས་ཅད་རང་ཡིན་པར་སྒོམས། ཁ་རྒས་ནས་བཤས་ལ་ཕབ་པའི་སྡུག་བསྔལ་རང་ཐོག་ཏུ་ལོངས། མི་རྟག་པ་སྒོམས། བློ་ལྡོག་རྣམ་བཞིས་བློ་སྦྱོངས། སྙིང་རྗེ་སྒོམས། རང་གི་ད་ལྟའི་མ་རྒན་དེ་མདུན་གྱི་གཞི འདིར་གསད་འགྲོ་བཞིན་ཡོད་པར་སྒོམས། དེ་དང་བསྟུན་ནས་ཚད་མེད་བཞི་སྒོམས། སྐྱབས་འགྲོ་སེམས་བསྐྱེད་ཀྱི་ཚོགས་ཞིང་སྒོམས། བྱང་ཆུབ་ཀྱི་སེམས་སྒོམས། རྡོར་སེམས་དང་བླ་མའི་རྣལ་འབྱོར་གྱི་བསྐྱེད་རིམ་སྒོམས། མཐར་ཐུག་བླ་མ་དང་རང་སེམས་དབྱེར་མེད་ཀྱི་རྫོགས་རིམ་སྒོམས་དང་སྒོམ་དེ་ཚོས་ཡན་ཅི་ཞིག་བསྒོམ་དགོས། འདིར་སྣང་འདུས་བྱས་ཀྱི་ཆོས་ཐམས་ཅད་སྟོང་ཞིང་བདག་མེད་པར་སྒོམས་དང་གྲོགས་ཤེས་རབ་དང་འགྲོག་པའི་སྒོམ་ལ་འགྱུར་འགྲོ། །ཕར་ཕྱིན་དྲུག་གི་སྔ་མ་ལྔས་བསོད་ནམས་ཀྱི་ཚོགས་རྫོགས། ཤེས་རབ་ཀྱིས་ཡེ་ཤེས་ཀྱི་ཚོགས་རྫོགས་ཏེ། ཚོགས་གཉིས་རྫོགས་པའི་འབྲས་བུ་ལ་སྐུ་གཉིས་ཐོབ་པ་ཡིན། དེས་ན་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་གཙུག་ལག་ཁང་འདིའི་ནང་དུ་ད་རེས་ཀྱི་ཞིང་མཆོད་དང་འབྲེལ་བའི་ཞིང་ཁྲིད་འཚོགས་ཐེངས་གཉིས་ཡིན་ཞིང་། ད་ལོའི་ཞིང་ཁྲིད་ཆེན་མོ་འདི་ཐེངས་གཉིས་པ་རེད། ན་ནིང་རང་རེའི་འཚོགས་ར་ལ་ཐོག་ཁེབས་མེད་པས། བརྒྱད་སྡེ་གྲྭ་ཚང་གིས་ཆུ་ཤོག་དང་རས་སོགས་བཀབ་ནས་ཐབས་ཆག་ཤིག་འཚོགས་སོང་ཞིང་། མཆོད་མེ་ཟངས་འཁར་ཚོའི་ནང་དུ་ཆུ་རྒྱུགས་ཤོར་བ་དེ་འདྲ་རེད་བསྡད་ཀྱང་མདོར་ན་འཚོགས་ཐབས་དང་མཆོད་པ་བཤམས་ཐབས་ཤིག་འགྲིག་སོང་ཞིང་། ད་ལོ་མུ་ར་སྤྲུལ་སྐུ་དང་འདི་རྣམས་ཀྱིས་རྒྱུ་ཚེགས་གང་ལ་ཡང་མ་འཛེམ་པར་ཆེད་དུ་ཐོག་ཁེབས་བརྒྱབ་པ་ཡིན་པས། ལོ་འདིར་གནས་ཚུལ་ཟ་ངེ་ཟིང་ངེ་རེ་ས་ཆ་འགའ་རེ་ན་ཡོད་པས་དུས་བདེ་གནས་འཇམ་མིན་པའི་སྟབས་ཀྱིས་ཅ་ལག་འོར་འདྲེན་ལ་སྟབས་མ་བདེ་བས་དུས་ཚོད་ཀྱི་སྟེང་དུ་མ་འགྲུབ་སྟེ་ད་དུང་ལས་རྔ་མ་བུད་པར་ཡོད་ཀྱང་། ཐེངས་འདིའི་མཆོད་པ་མི་ཆགས་པའི་ཆེད་དུ་འཚོགས་ཆོག་ས་འདི་འདྲ་ཞིག་འཛོམས་སོང་བ་རེད། འདི་ཆོས་འཆད་ཉན་དང་ཚོགས་གསོག་མཆོད་འབུལ་ཞིག་བྱེད་ཡུལ་དང་། སྐྱེ་འགྲོ་ཐམས་ཅད་ཀྱིས་བསོད་ནམས་བསག་པའི་རྟེན་མཆོག་ཁྱད་པར་ཅན་བཞུགས་སུ་གསོལ་ཡུལ་དང་། མདོར་ན་སེམས་ཅན་ཀུན་ལ་ཕན་པ་ཞིག་འགྲུབ་པའི་ཆེད་ཡིན་ཞིང་། ཆོས་སྒྲུབ་རྒྱུ་དང་ཆོས་ཀྱིས་ཕན་བཏགས་ཏེ་ཕན་ཐོགས་རྒྱུ་ལ། རང་སྡེ་དང་གཞན་སྡེ། ཕྱི་སྡེ་དང་ནང་སྡེ་ཞེས་ཐ་དད་འབྱེད་རྒྱུ་མེད་པར་མ་ཟད་དམ་པའི་ལྷ་ཆོས་ཀྱི་ཕྱོགས་ནས་སེམས་ཅན་ལ་ཕན་བཏགས་རྒྱུ་ལ་མི་རིགས་དང་རྒྱལ་མཚམས་ཀྱི་དབྱེ་བ་ཡང་མེད་པས། འདི་ཆོས་པ་ཐམས་ཅད་ཀྱི་ཁྱིམ་དང་། དུས་རྒྱུན་དུ་ཁ་རྩང་སྔོན་མར་བཤད་པ་ལྟར་ཐག་ཉེ་སའི་མི་རྣམས་ཀྱིས་ཕྱག་དང་མཎྜལ་ལ་སོགས་པ་འབུམ་ལྔ་འདི་ནས་གསོག་འདོད་མཁན་ཡོད་ན་འདིའི་ལྷ་ཁང་ནང་ནས་གསོག་ཆོག་པ་རེད། རྟེན་གསུམ་མཆོད་པ་རང་འགྲིག་རེད། གནས་དང་དགེ་འདུན་འདུས་པའི་བྱིན་རླབས་བསམ་གྱིས་མི་ཁྱབ་པས། འདིའི་གཙུག་ལག་ཁང་འདིའི་ནང་ནས་ཆོས་སྒྲ་རྒྱུན་དུ་སྒྲོག་རྒྱུ་དང་ཁྱད་པར་དུ་ལོ་རེའི་ནང་དུ་དེ་སྔོན་འདྲ་ཞིག་ཡིན་ན་དུས་ཀྱི་མཆོད་པ་ཆེན་པོ་གཉིས་ཏེ། གཅིག་ཧོར་ཟླ་དྲུག་བའི་ཚེས་བཞི་རྒྱལ་བས་ཆོས་འཁོར་བསྐོར་བའི་དུས་ཆེན་ལ་སེམས་བསྐྱེད་འབུམ་མཆོད་ཆེན་མོ་འཚོགས་རྒྱུ་དང་། དེའི་སྐབས་ལ་རྟེན་དབང་སྐུར་རྒྱུ། གཉིས་པ་སྟོན་ཁའི་ཞིང་ཁྲིད་ད་ལོ་དང་ལོ་གཉིས་ལ་འཚོགས་པ་རེད། འདིའི་ཆོས་འཆད་ཉན་དང་ཚོགས་གསོག་མཆོད་འབུལ་དེ་ཚོ་བྱེད་པའི་དམིགས་ཡུལ་ཅི་ཞིག་ཡིན་ཞེ་ན། འདིའི་བསོད་ནམས་འདི་ལ་བརྟེན་ནས་སྐྱེ་དགུའི་བདེ་སྐྱིད་ཀྱི་འབྱུང་གནས་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་བསྟན་པའི་སྒྲོན་མེ་གང་ན་སུ་བཞུགས་ཐམས་ཅད་ཀྱི་སྐུ་ཚེ་ཞབས་པད་བརྟན། དེའི་བསོད་ནམས་ཀྱི་མཐུ་ཡིས་ས་ཆ་འདིའི་གཙོར་བྱས་པའི་འཛམ་གླིང་ཡངས་པའི་རྒྱལ་ཁམས་ཐམས་ཅད་ལ་ནད་མུག་མཚོན་འཁྲུགས་ཞི་བདེ་སྐྱིད་ལྷ་ཡུལ་ལ་འགྲན་པ་ཞིག་ཡོང་རྒྱུ་དང་། དེ་དང་མཉམ་དུ་མར་གྱུར་ནམ་མཁའ་དང་མཉམ་པའི་སེམས་ཅན་ཐམས་ཅད་འགྲོ་བ་རིགས་དྲུག་གི་སྡུག་བསྔལ་དང་བྲལ་ཏེ་རྣམ་མཁྱེན་རྫོགས་པའི་བྱང་ཆུབ་ཀྱི་གོ་འཕང་ཐོབ་པའི་ཆེད་དུ་ཡིན་པའི་དམིགས་ཡུལ་དེ་རེད། དེའི་ཕན་ཆད་འདི་ལ་ལན་དང་རྣམ་སྨིན་གྱི་རེ་བ་གཞན་མེད་ཅིང་། ན་ནིང་ད་ལོ་འཚོགས་རྒྱུ་ཨེ་འཛོམ་མི་འཛོམ་མི་ཤེས་སྨྲས་པ་དེ། གཅིག་ན་འདུས་བྱས་མི་རྟག་པ་ཡིན་པས་ཡུན་རིང་གི་རྟག་འཛིན་བྱེད་མི་ཤེས་ཤིང་། གཉིས་ན་བྱ་བ་གང་སྒྲུབ་ཀྱང་ཕན་ཐོགས་ཤིག་ཡོད་དགོས། ཆོས་སྒྲུབ་ན་སྤྱིར་ཕན་ཐོགས་ལོས་ཡོད་དེ་ཆོས་ཞེས་པ་འདི་རྒྱུད་ལ་སྦྱར་ཏེ་ཉམས་སུ་ལེན་དགོས། དེ་མ་བླང་ན་ནད་དང་སྨན་གཉིས་ཀ་མ་འཕྲོད་པ་ལྟར་དུས་ལ་མ་བབ། གནད་དུ་མ་ཁེལ་ན་ཕན་མེད་པའི་སྟེང་དུ་གནོད་དུ་འགྱུར་རྒྱུ། ཆོས་དྲེད་ཆོས་ཀྱིས་མི་ཐུལ་བ་རེད་དེ་ཆོས་ཆོས་བཞིན་མ་བསྒྲུབས་ན་ཆོས་ཀྱི་སླར་ངན་སོང་ལ་འགྲོ་བའི་རྒྱུ་བྱེད་པ་ཡིན་པས་ཕན་ཐོགས་མེད་ན་ཆོས་ཡིན་ཡང་གནས་སྐབས་སྐྱུར་དགོས་ཞེས་སྨྲས་ལ། དེ་ནས་ད་དུང་སང་ཕོད་ཞིང་ཁྲིད་ཨེ་བཤད་མི་བཤད་ལྟ་དགོས་ཤེས་སྨྲས་པ་ཡིན་མོད། བལྟས་ཡོང་ན་ལོ་གཅིག་པོ་འདིའི་ནང་དུ་ཆོས་ཞུས་ཆོས་གྲལ་ལ་ཡོང་མཁན་མང་ཆེ་བས་ཆོས་ཞུས་ན་ཞུས་ནི་འདྲ་བ། སྒྲུབ་ན་སྒྲུབ་ནི་འདྲ་བ་གྲུབ་འབྲས་མིག་གིས་ལྟ་སར་ཡོད་པ། ས་ཆོས་ས་ཆོས་ཡུལ་རེད་ཟེར་ན་ལོས་ཡིན་བསམ་རྒྱུ། སྡེ་ནང་ཁོངས་ནས་ཡིན་ནའང་ཆོས་ཞུས་དང་མ་ཞུས་ཀྱི་ཁྱད་པར་རྒྱུག་འདུག་པ་དེ་འདྲ་ཡིན་པས། དེའི་དངོས་ཡོད་ཀྱི་གནས་ཚུལ་དེ་ལ་བསྟུན་ཏེ་འཚོགས་སའི་ཆོས་ར་ལ་ཐོག་ཁེབས་བརྒྱབ་པ་ཡིན་པས། འདིའི་ནང་ནས་ཆོས་དུང་ལན་གཅིག་བུས། ཆོས་ཁྲིད་ཐེངས་གཅིག་ལ་བཤད། དམ་པའི་ཆོས་སྒྲ་དེ་འཇིག་རྟེན་གྱི་ཁམས་སུ་ལན་གཅིག་བསྒྲགས་ཤིང་མཆོད་འབུལ་ཐེངས་གཅིག་ལ་བྱེད་ཐུབ་སོང་བ་འདི་གཅིག་གིས་ཀྱང་བཞེངས་པའི་གོ་ཆོད་ཅིང་། བསོད་ནམས་ཀྱི་ཚོགས་རྫོགས་སོང་བ་ཡིན། འདིའི་ནང་ན་འཛམ་གླིང་ལ་བཙལ་ནས་སོང་ན་རྙེད་ཅིང་མཇལ་བར་དཀོན་པའི་རྟེན་འདི་འདྲ་གཅིག་གཉིས་ཙམ་མིན་པར་བཞུགས་ཡོད་ཅིང་། རྟེན་གང་གང་བཞུགས་ཤེ་ན། རྟེན་གྱི་བཞུགས་བྱང་ནི། འདིའི་ནང་རྟེན་ཁྱད་པར་ཅན་འདིར་བཞུགས་པ་ཞིག་ལ་ངོ་མཚར་རྟེན་གསུམ། ཡ་མཚན་ཁྱད་པར་ཅན་གྱི་རྟེན་བརྒྱད། བྱིན་རླབས་ཅན་གྱི་རྟེན་རྫས་བཅུ་གསུམ། ཁྱད་པར་འཕགས་པའི་རྟེན་གཅིག་བཅས་བཞུགས་ཤིང་། དེའི་ནང་ནས་ངོ་མཚར་རྟེན་གསུམ་པོ་གང་གང་ཡིན་ཞེ་ན། ངོ་མཚར་ཅན་གྱི་ལོ་རྒྱུས་རྣམ་ཐར་ཁྱད་འཕགས་དང་ལྡན་པ་ཐུགས་དམ་ཚིནྡྷ་མ་ཎི་དང་གཅིག །མདོ་མཁྱེན་བརྩེའི་གཏེར་མ་མདོ་མཁྱེན་བརྩེ་ཉིད་ཀྱི་རྟེན་སྒམ་ནང་དུ་བཞུགས་རྒྱུའི་གཟིའི་སྒྲོམ་བུ་དང་གཉིས། དེའི་སྟེང་དུ་རྒྱལ་སྲས་རིག་པའི་རལ་གྲི་འཁྲུངས་དུས་མདོ་མཁྱེན་བརྩེའི་གཟིམ་སྦྲའི་སྟེང་དུ་བབ་པའི་འཇམ་དབྱངས་ཤེས་རབ་རལ་གྲི་ངོ་མཚར་ཆེན་པོ་དང་ལྡན་པ་དེ་གསུམ་བཞུགས་ལ། དེ་གསུམ་གྱི་མིང་ལ་ངོ་མཚར་རྟེན་གསུམ་ཟེར་ཞིང་པདྨ་ཐང་ན་ད་ལྟ་བཞུགས་རྒྱུའི་རྟེན་རིམ་པ་དང་པོའི་ནང་གི་ཚན་པ་གཅིག་རེད། ཚན་པ་གཉིས་པ་ལ་ཡ་མཚན་ཅན་གྱི་རྟེན་བརྒྱད་བཞུགས། དེ་བརྒྱད་པོ་གང་ཚོ་རེད་ཅེ་ན། ཐུབ་པ་གྲོང་ཁྱེར་མ་གཅིག་ཡིན་ཞིང་འདི་མདོ་ཚང་གི་ནང་རྟེན་བོད་མདོ་དབུས་ཁམས་གསུམ་ལ་གྲགས་པ་ཞིག་རེད། ད་དུང་མདོ་མཁྱེན་བརྩེ་ང་འདྲ་གསུང་འབྱོན་མ། དེའི་སྟེང་དུ་སྒྲོལ་མ་མནྡྷ་ར། སྡོམ་རྟེན་ཐུབ་པ། རྡོ་རྗེ་འཆང་གདན་གཉིས་མ་ལ་སོགས་པ་ཡོད་ཅིང་དེ་རྣམས་རྟེན་བརྒྱད་རྩི་རྒྱུ་ཡོད། དེའི་རྟེན་དེ་ཚོ་དགོན་པ་རེ་ལ་རྟེན་གཅིག་རེ་ཡོད་ནའང་ནང་རྟེན་ཡོད་བསམ་འདུག་ཆོག་ནི་རེད། བྱིན་རླབས་ཅན་གྱི་རྟེན་རྫས་བཅུ་གསུམ་བཞུགས་ཡོད། དེ་དག་གང་གང་ཡིན་ཞེ་ན། ཀུན་མཁྱེན་འཇིགས་མེད་གླིང་པའི་སྐུ་ཤ་འཁྲུལ་མེད། དཔལ་སྤྲུལ་ཚང་གི་ཀུན་བཟང་ཞལ་ལུང་ས་འདིའི་གཤིན་རྗེ་སྒྲུབ་ཕུག་ནས་བརྩམས་པའི་རྩོམ་གཞིའི་ཕྱག་དཔེ་མ་ཡིག་ངོ་མ་དང་། དེའི་སྟེང་དུ་གྲུབ་ཆེན་དཀར་པོ་རས་ཆེན་གྱི་དབུ་ཐོད་ཅེས་པའི་ཐོད་པ་གཅིག་གི་སྟེང་དུ་ལྷ་བཅུ་གཉིས་རང་བྱོན་དུ་དོད་ཡོད་པ། གནའ་སྡེ་དགེ་རྒྱལ་པོའི་ནང་རྟེན་གྱི་ནང་དུ་ཡོད་ཀྱང་། དེའི་རྗེས་སུ་མདོ་རིན་པོ་ཆེ་སྐུ་ཕྲེང་གསུམ་པ་རིག་འཛིན་དྲི་མེད་གྲགས་པ་ལ་ཆོས་རྒྱལ་བསྟན་པ་ཚེ་རིང་གིས་ཕུལ་ཡོང་བ་དེ་ལ་སོགས་པ་བཞུགས་ཤིང་། ད་དུང་དེའི་ནང་དུ་དགེ་མང་སྐུ་ཞབས་ཀྱིས་པདྨའི་ཐང་ནས་གཏེར་ལ་བཞེས་པའི་དུང་དཀར་བདུད་རྩི་ཆོས་སྨན་གྱིས་གང་བ་དང་། རིག་འཛིན་ཉི་མ་གྲགས་པའི་དབུ་ཞྭ། བོད་སྤྲུལ་མདོ་སྔགས་བསྟན་པའི་ཉི་མའི་མགུལ་གའུ། རྒྱལ་སྲས་འགྱུར་མེད་རྡོ་རྗེའི་གྲི་མདུད། ཨ་བུ་ལྷ་རྒྱལ་དང་མཁན་པོ་ཐུབ་སྙན་གྱི་སྐུ་རུས་ལ་སོགས་པ་དེ་ཚོའི་ནང་དུ་མ་གཏོགས་པ་ཟུར་དུ་ཡོད་ཅིང་། ངོ་མཚར་རྟེན་གསུམ། ཡ་མཚན་ཅན་གྱི་རྟེན་བརྒྱད། བྱིན་རླབས་ཅན་གྱི་རྟེན་རྫས་བཅུ་གསུམ། འདི་ཚོ་ཚང་མ་བྱི་ལས་རང་རྟུག་གསེར་ལ་བསྒོམས་ནས་ཅིག་མིན་ན་ཡིན་ཟེར་བསྡད་པ་མ་ཡིན་པར་འདི་ཚོ་ཡོངས་གྲགས་ཤ་སྟག་ཡིན་ཞིང་། ཁྱད་པར་འཕགས་པའི་རྟེན་གཅིག་ཡོད་པ་དེ་གང་རེད་ཅེ་ན། ཇོ་བོ་རྒྱ་ནག་མ་རྒྱ་བཟའ་ཀོང་ཇོས་ལྷ་སའི་ཇོ་བོ་དང་མཉམ་དུ་གདན་འདྲེན་ཞུས་ཡོང་བ་དེ་ལ་སོགས་པའི་ལི་གཏེར་མང་པོ། དེའི་སྟེང་དུ་གསུང་རབ་ཀྱི་སྐོར་ནི་མདོ་ཁམས་སྨད་ཕྱོགས་སུ་དཔར་ཤིང་གི་ཐོག་ན་བཞུགས་ཡོད་རྒྱུའི་ནང་ནས་མང་ཆེ་བ་གསུང་རབ་ཀྱི་གླེགས་བམ་ཡང་བཞུགས་པ་དང་། ཐུགས་རྟེན་བདེ་བར་གཤེགས་པའི་མཆོད་རྟེན་མང་པོ་ཡོད་ཅིང་། ད་ལོ་རང་རེས་བཞེངས་པའི་རྡོ་ལས་གྲུབ་པའི་མཆོད་རྟེན་ཉིས་བརྒྱ་སུམ་བརྒྱ་ཞིག་ཡོད་པ་འདི་རྣམས་ཀྱི་ནང་ནས་ལྔ་བཅུ་ཐམ་པ་ལ་བདེ་བར་གཤེགས་པའི་རིང་བསྲེལ་དག་མ་ནང་དུ་གཟུངས་གཞུག་ཕུལ་ཡོད་ཅིང་། དེ་མིན་ཚང་མ་ཡང་ཚད་ལྡན་ཞིག་རེད་ཡོད། འདི་འདྲའི་སྐུ་གསུང་ཐུགས་རྟེན་བཞུགས་སུ་གསོལ་ན་འདི་མ་འོངས་སྐྱེ་དགུ་ཐམས་ཅད་ཀྱིས་བསོད་ནམས་བསག་ས་དང་། ཕྱག་སྐོར་སྒྲིབ་སྦྱང་གི་རྟེན་ཡིན་ཟེར་གྱིན་ཡོད་པས། འདིའི་ནང་རྟེན་གཅིག་ཕྱག་གི་རྟེན་དང་། བསོད་ནམས་བསག་པའི་རྟེན་དུ་ཡོད་ན་དེ་མིན་ཅི་ཡང་མི་དགོས་ཤིང་། འདིའི་རྟེན་གསུམ་ཚང་མ་ལོ་རེ་མཇལ་ཁ་རེ་སྟོན་བཞིན་ཡོད་པས། དེ་ནི་དབྱར་ཁ་སེམས་བསྐྱེད་མཆོད་པའི་སྐབས་ལ་སྟོན་གྱིན་ཡོད། ངོ་མཚར་རྟེན་གསུམ་འདི་ད་ཕན་ཆད་སང་ཕོད་ནས་བཟུང་སྟེ་སྔོན་མ་ང་འདུག་སའི་ཁང་པ་གཙུག་ལག་ཁང་གི་ལྷོ་ནུབ་ན་ཡོད་པའི་ཁང་པ་རྩེག་གཉིས་ཅན། ད་ལྟ་པདྨ་ཐང་གཞུང་གི་མཆོད་ཁང་ལ་བསྒྱུར་བཞག་པའི་མཆོད་ཁང་པདྨ་གཡང་འཁྱིལ་ཟེར་གྱིན་ཡོད་པ་དེར་བཞུགས་ཤིང་། ངོ་མཚར་རྟེན་གསུམ་སང་གནངས་དབྱར་ཁ་དེ་ནས་མཇལ་ནི་རེད། ཡ་མཚན་རྟེན་བརྒྱད་ཀྱི་ནང་གི་ཐུབ་པ་གྲོང་ཁྱེར་མའི་གཙོ་མཛད་པའི་གང་དྲག་འགའ་ཞིག་འདིའི་གཙུག་ལག་ཁང་ཕྱི་མའི་ཐོག་རྩེག་གོང་མའི་ལྷ་ཁང་དེའི་ནང་དུ་བཞུགས་པས། དེ་དུས་དེ་ནས་མཇལ་ལ། དེ་མིན་ཚང་མ་ལྷ་ཁང་གོང་མའི་ཕུག་གི་ཇོ་བོའི་སྐུའི་གཡས་གཡོན་ནས་མཇལ་བ་རེད། མདོ་ཁམས་སྨད་ཕྱོགས་ན་ནི་འདི་འདྲའི་རྟེན་རྩ་ཆེན་ཞིག་སྤྱིར་ནང་བ་སངས་རྒྱས་པ་ཁྱད་པར་དུ་སྔ་འགྱུར་རྙིང་མ་པ། དེའི་ནང་ནས་སྙིང་ཐིག་པ་ཞིག་གི་ངོས་ནས་བཤད་ན་ཡོད་རྒྱུ་མ་རེད་བསམ་གྱིན་ཡོད་པ་རེད། འདི་ད་ལྟའི་སྐབས་སུ་བོད་མཐོ་སྒང་གི་ཉི་མ་ཤར་ལྷོའི་མཚམས་སུ་བཞུགས་པ་ཡིན་པས། འདི་བོད་ཁམས་སྤྱིའི་ས་བཅུད་ཡུལ་བཅུད་འཛམ་གླིང་ཞི་བདེ་ཡུན་ནས་ཡོང་བྱེད། སྐྱེ་འགྲོའི་བདེ་སྐྱིད་ལ་ཕན་ཐོགས་ཡོད་པའི་རྟེན་འབྲེལ་གྱི་ཐོག་ནས་བསམ་བློ་བཏང་བ་ཡིན་ཞིང་། དེ་ལྟར་དུ་ཡོང་བའི་སྨོན་འདུན་འགྲུབ་པར་མཆོག་གསུམ་བདེན་དཔང་ལ་བཙུགས་ནས་སྨོན་ལམ་མི་ལོ་དྲུག་གི་རིང་ལ་དགེ་འདུན་པ་དང་བཅས་པས་བརྒྱབ་པ་ཡིན། ད་ལྟ་ཡང་རང་རེ་རྣམས་ཞིང་ཁྲིད་མཉམ་དུ་འཚོགས། གསང་སྔགས་དང་འབྲེལ་བའི་དབང་གི་དཀྱིལ་འཁོར་ཞལ་ཕྱེས། མཉམ་དུ་ཚོགས་བསགས་མཆོད་པ་ཕུལ་ཏེ་རྟེན་ཁྱད་པར་ཅན་འདི་ཚོའི་མདུན་དུ་སྨོན་ལམ་བཏབ་དང་འདེབས་འགྱུར་ཡིན་པས། ཚེ་ཕྱི་མ་འདི་བཞིན་དུ་ནུབ་ཕྱོགས་བདེ་བ་ཅན་གྱི་ཞིང་ཁམས་ནས་ཆོས་ཀྱི་དགའ་སྟོན་ལ་མཉམ་དུ་རོལ་བའི་རྟེན་འབྲེལ་སྨོན་ལམ་ཡིན། འདུས་པ་ཐམས་ཅད་འབྲལ་བའི་རང་བཞིན་རེད། སང་དང་གནངས་ཀྱི་ཡང་རང་རང་ཁ་ཁ་སོ་སོའི་གནས་ལ་གྱེས་རྒྱུ་ཡིན་པས། འདི་བཞིན་དུ་འདུས་བྱས་རྟག་པ་མེད་པའི་ཆོས་དེ་ལ་བསམ་བློ་བཏང་ནས་མགོན་པོ་འོད་དཔག་མེད་དང་སློབ་དཔོན་པདྨ་འབྱུང་གནས་རང་གང་ལ་དད་པ་ཡོད་ས་ཐམས་ཅད་དབྱེར་མེད་ངོ་བོ་གཅིག་ལ་བསྒོམས་ནས་གསོལ་བ་ཐོབ་དང་། ཚེ་འདི་དང་བར་དོ་ཕྱི་མ་ཐམས་ཅད་ལ་བསླུ་བ་ཡོད་ནི་མ་རེད། མཚོ་ཆེན་པོ་མ་དྲོས་པ་ནས་ཁ་འབབ་ཀྱི་ཆུ་བོ་ཆེན་པོ་བཞི་ཕྱོགས་ཕྱོགས་ནས་འབབ་སྟེ། གནས་སྐབས་ཀྱི་འགྲོ་ཕྱོགས་ཁ་ཁ་ཡིན་ཡང་མཐར་རྒྱ་མཚོ་ཆེན་པོའི་ནང་དུ་འཛོམ་པ་ལྟར། རང་ཅག་ཚང་མ་ཕྱོགས་བཞི་མཚམས་བརྒྱད་ནས་ཡོང་བའི་ཆོས་གཅིག་གིས་མཉམ་དུ་བསྡུས་པའི་ཆོས་གྲོགས་ཐམས་ཅད་ཉི་མ་སང་དང་གནངས་ཀྱི་ཡང་ཁ་ཁ་སོ་སོའི་ཕྱོགས་སུ་འགྲོ་དགོས་ཀྱང་མཐར་བདེ་བ་ཅན་གྱི་ཞིང་ཁམས་ནས་འཛོམ་པའི་སྨོན་ལམ་གོང་ནས་བཏབ་པ་ལྟར་རེད། རང་རེ་ཉི་མ་བདུན་བརྒྱད་ལ་མཉམ་དུ་འཛོམས་ནས་ཁ་ཁ་འགྲོ་རྒྱུ་འདི་ལྟར་དུ། ཚེ་འདིའི་ཁྱིམ་བཟའ་ཚང་ཡང་མི་རྟག་ཚོང་འདུས་ཀྱི་མགྲོན་པོ་འདྲ་བ་ཡིན་པར་མཚོན་ཞིང་། དེ་ལྟར་དུ་ང་ཟེར་སའི་གདག་གཞི་ཕུང་པོ་ཟེར་རྒྱུ་འདི། ཉིན་ཞིག་རྡུལ་ཕྲན་གྱི་ཕུང་པོར་དེངས་ཏེ་འབྱུང་བཞིའི་ཁམས་ལ་ཞ་རྒྱུ་ཡིན་པའང་མཚོན་ཡོད་པ་དང་། སྣང་བ་བརྡ་རུ་ཤར་ན་དེ་ཡང་བརྡ་ཆོས་ཀྱི་དཔེ་མཚོན་ཞིག་ཡིན་ཏེ། མཐོ་འཛམ་གླིང་གི་ཉི་མ་དེ་ས་དང་ཁ་ཐག་རིང་ཡང་། ཁ་བྱང་གཏད་ཀྱི་བྲག་ཕུག་མ་གཏོགས་མེ་ཏོག་པདྨ་གར་ཡོད་ཀྱི་ཚལ་ཐམས་ཅད་ལ་ཉི་མའི་འོད་ཟེར་གྱིས་ཁྱབ་སྟེ་དེའི་དྲོད་ཀྱིས་རྩི་བཅུད་གསོ་བ་ལྟར། དད་པ་འཇོག་སའི་བླ་མའི་ཐུགས་རྗེ་དེ་རྒྱང་ཉེ་རིང་མེད་པར་བྱིན་རླབས་འཇུག་པ་རེད། ཁོ་བོ་ནི་དེའི་ས་ཚོད་ན་མེད་ཀྱང་མོས་གུས་དད་པ་དག་ན་བྱིན་རླབས་ཁྱི་སོ་ལས་ཀྱང་འབྱུང་བ་ལྟར་ལས་དང་སྨོན་ལམ་གྱིས་འབྲེལ་ཏེ་ཆོས་དམ་གཅིག་གིས་སྦྲེལ་ནི་ཤ་སྟག་ཡིན་པའི་སྟབས་ཀྱིས་མཆོག་གསུམ་གསོལ་བཏབ་ཀྱི་སྐྱབས་སྲུང་གིས་ཕན་ཐོགས་འབྱུང་རྒྱུ་རེད། ཉི་མ་བདུན་བརྒྱད་ཀྱི་རིང་ལ་བཤད་པ་རེད་མོད། གལ་བོ་ཆེ་ལ་ནན་ཏན་འགྲོ་རན་ཁའི་ཕྱི་འབོད་ཀྱི་ཚིག་ནི་ཕོ་མོ་སུ་ཡིན་ན་ཤེས་རྒྱ་ཆེ་དང་མི་ཆེ། ཆག་ཞོག་དང་མི་ཞོག བུ་བཟང་དང་མི་བཟང་། བློ་གསལ་དང་མི་གསལ་དེ་ཚེ་ཕྱི་མའི་ཕྱི་འདེང་ཕོག་མི་ཕོག་ལ་ཐུག་ཡོད་པ་རེད། འགའ་རེ་ཚེ་འདི་བདེ་ཕྱི་མ་སྐྱིད། འགའ་རེ་འདི་མེད་ཕྱི་མེད་རེད་འགྲོ་བ་འདི་བུ་བཟང་ངན་འདེང་ཕོག་དང་མི་ཕོག་ལ་ཐུག་ཡོད་པས། ནད་མེད་ལང་ཚོ་རྒྱས་ཏེ་བསྡད་ཡོད་དུས་འཆི་རྒྱུ་ཞེ་ལ་ཤར་ནི་མ་རེད་མོད། དབང་མེད་འཆི་བདག་གི་ཞགས་པ་ནམ་ཐེབ་ཅི་ཤེས། ལར་འབྱུང་བཞིའི་འདུ་བ་འཁྲུགས་ཏེ་ན་ནས་ཤི་དགོས་པ་ཡིན་དང་། ཟས་ངན་པ་ཟ་ཉེས་ཀྱི་དུག་ནས་ཤི་དགོས་པ་ཡིན། དེ་མིན་ཐོག་གིས་བརྒྱབ་ནས་ཤི་རྒྱུ། ཁང་པ་རྡིབ་ནས་གསད་རྒྱུ། གཡང་ས་གཟར་མོ་ནས་འདྲིལ་རྒྱུ། རླངས་འཁོར་གྱིས་བརྡབ་རྒྱུ། རྟས་དྲུད་རྒྱུ། མེས་འཚིག་རྒྱུ། ཆུས་ཁྱེར་རྒྱུ། དགྲས་གསད་རྒྱུ། བུད་མེད་པང་སྟེང་ནས་ཤི་རྒྱུ། ནད་རིགས་བཞི་བརྒྱ་རྩ་བཞི། བགེགས་རིགས་སྟོང་ཕྲག་བརྒྱད་ཅུ་ཞེས་སྨྲས་ནི་ལྟར་རྐྱེན་ཅི་ཞིག་གིས་དང་ཤི་ལུགས་ཅི་འདྲ་ཡིན། ས་གང་ཞིག་ནས་དུས་ནམ་ཞིག་ལ་འཆི་མི་ཤེས་མོད། གང་ལྟར་བྱས་ནས་ཤི་རུང་། ཤི་དུས་ལེགས་པོ་ཚུགས་ཀ་ཅན་ཞིག་ཤི་བ་མ་རེད། འགའ་རེ་ཁ་གདངས་མིག་ཅེར། འགའ་རེ་ཁ་ཡོར་སྣ་བཟུར། ཁ་ཆུ་སྣ་ཆུ་མི་ཚོགས། ཁ་ནས་འཁྲུལ་གཏམ་སྣ་ཚོགས་བཤད། ཉལ་ས་བརྫད་ནས་ཤི་ནི་རེད། ཤི་ནས་རོར་འགྱུར་རྒྱུ་ཡིན་པས་ཤི་ལུགས་ཡག་བཙོག་གང་ཡིན་རུང་གཅིག་བྱས་ན་དེ་རེད་མོད། ཤི་ཚར་རྗེས་དེའི་ཕར་རྒྱབ་ཀྱི་བར་དོའི་འཕྲང་རིང་དང་གཤིན་རྗེའི་མདུན་སར་ཐོན་དུས། དུག་གསུམ་ལས་སྐྱེས་གཅོང་རོང་གསུམ། །བག་ཆགས་ལས་སྐྱེས་གཤེད་མའི་གཟུགས། །གསུངས་པ་ལྟར། བར་དོའི་འཕྲང་དམར་ཟིང་ངེ། སྐྱ་ཆད་དེ། ནག་ངོམ་མེ་བ་ཐམས་ཅད་དང་། གནོད་བྱེད་སྲོག་གཅོད་ཀྱི་ཤན་པ་འདྲེ་གཟུགས་སུ་ཤར་བ་དང་མགོ་བརྙན་སྣ་ཚོགས་ཅན་གྱི་ལས་མཁན་རྣམས་དང་ཐུག་དུས། དུས་རྒྱུན་ཞེ་ཆགས་རེ་འཁོན་ཡོད་སའི་བུ་ཚ་བོ་ཐམས་ཅད་དང་། དྲིན་ཀྱིས་བསྐྱངས་བའི་བཟའ་ཚང་ཉེ་འབྲེལ་མང་ན་ཡང་ཉིན་དེར་ཀི་ལྷང་ལྷང་བཏབ་ནས་ར་མདའ་རྒྱུགས་ཡོང་བ་ཞིག་དང་། རྒྱུ་ཟས་ནོར་ཁྱེར་ནས་ལམ་ལ་འཇོག་ཡོང་མཁན་ཞིག་ཡོད་པ་མ་རེད། དེའི་སྐབས་སུ་རང་གི་མི་ཚད་རོགས་མགོ་ཐོན་མཁན་ཞིག་ཡིན་ན་བཟང་མོད། དེ་ཙམ་ཞིག་མིན་རུང་གསུར་བསྔོ་ཞིག་ལ་རེ་མི་དགོས་པར་རང་མགོ་རང་གིས་བུད་པ་ཞིག་བྱེད་ཐུབ་ན་བུ་བཟང་བོ་ཞེས་པ་དེ་རེད། དེའི་འདང་རྩིས་ད་ནས་འདེང་བརྒྱབ་སྟེ་འདེང་ཕོག་པའི་ཐོག་ནས། ཕོ་རང་ཤེས་རིག་པའི་རང་བསམ་གཏང་ནས་ཁ་མར་ལ་མ་འཁོར་ཡར་ལ་འཁོར། མར་དམྱལ་བའི་ཁྲོ་ཆུ་འཐུང་ས་ལ་མ་འཁོར་ཡར་དག་པའི་ཞིང་ཁམས་ཀྱི་ལྷའི་བདུད་རྩི་འཐུང་ས་ལ་འཁོར། མར་གྱི་འཁོར་བ་མ་གདམ་ཡར་གྱི་ཞིང་ཁམས་འདོམས། ལས་རྒྱུ་འབྲས་བསླུ་བ་མེད་པ་ཡིན་ཏེ། མདོ་སྡེ་ཏིང་འཛིན་རྒྱལ་པོ་ལས། ཟླ་བ་སྐར་མར་བཅས་པའི་གནས་སྟོངས་ཤིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། །ཁྱེད་ནི་མི་བདེན་པ་ཡི་ཚིག་མི་གསུང་། །ཞེས་གསུངས་པས། གལ་ཏེ་ཉི་ཟླ་ཐང་ལ་ལྷུང་སྲིད་པའི་དབང་དུ་བྱས་ནའང། དབྱར་དགུན་སྟོན་དཔྱིད་གོ་ནོར་རྒྱུ་ཡོད་པའི་དབང་དུ་བྱས་ནའང། སངས་རྒྱས་ཀྱི་གསུང་ལ་འགྱུར་བ་དང་མི་བདེན་པ་ཡོད་སྲིད་པ་མ་རེད། བསླུ་མེད་དཀོན་མཆོག་གི་བདེན་མཐུ་ལ་ཕྱི་ལྟས་དགོས་པ་མ་ཡིན་ཏེ། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བ་ཡོད་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་སྲིད། །ཅེས་གསུངས་པས། རང་མི་འདོད་པ་རྒྱུ་མཚན་དུ་བྱས་ཏེ་གཞན་ལ་གནོད་མ་སྐྱེལ། བསམ་ངན་མ་འཚག་དང་ཕན་པ་རང་ཉིད་ལ་འཇུག ཆོས་ལྡན་ཀྱི་མི་ལུས་འདི་ནམ་ཡིན་ན་ཐོབ་ཐུབ་པ་མ་རེད། ཐོབ་ཡོད་རྒྱུ་འདི་ལ་རྟག་བརྟན་མེད་པ་ཡིན་པས་སང་ཉིན་ཤི་ན་འགྱོད་མེད་ཅིག་ཨེ་ཐོན་ལྟོས། འཁོར་བ་འདི་གང་དུ་སྐྱེས་ན་སྡུག་བསྔལ་མེད་ས་ཞིག་ཡོད་ནི་མ་རེད། དགེ་བའི་བཤེས་གཉེན་དང་དགེ་གྲོགས་བཟང་པོ་རེ་བཙལ་ནས། ཚོགས་བསགས་སྒྲིབ་སྦྱང་གི་ཐབས་ཟབ་མོ་ཞིག་ལ་བརྟེན་ནས་ཚེ་འདིའི་ཐོག་ཏུ་རང་གཞན་གྱི་དོན་འགྲུབ་པ་ཞིག་ཨེ་རེད་ལྟོས། ཚིག་གཅིག་ལ་བསྡུས་ན་བྱང་ཆུབ་ཀྱི་སེམས་རིན་པོ་ཆེ་སྐད་ཅིག་མ་རེ་རེ་ཡིན་ནའང་རྒྱུད་ལ་ཨེ་སྐྱེ་ལྟོས། ཉི་མ་གཅིག་གིས་མུན་ནག་ཐམས་ཅད་སེལ་འགྲོ་བྱེད་དང་། ཨ་རུ་ར་རྣམ་རྒྱལ་གཅིག་གིས་ནད་སྣ་ཐམས་ཅད་འཇོམ་འགྲོ་བྱེད། རལ་གྲི་གཅིག་གིས་འཆིང་བ་ཐམས་ཅད་གཅོད་བྱེད། ཡིད་བཞིན་གྱི་ནོར་བུ་གཅིག་གིས་རེ་བ་ཐམས་ཅད་སྐོང་ཐུབ་མཁན། བུ་དཔའ་བོ་གཅིག་གིས་དགྲ་ཐམས་ཅད་འདུལ་བར་བྱེད་མཁན་དེ་གང་ཡིན་ཞེ་ན་བྱང་ཆུབ་ཀྱི་སེམས་ཡིན་ཞིང་། བྱང་ཆུབ་ཀྱི་སེམས་སྐྱེ་དང་མི་སྐྱེ་གཙོ་བོ་བྱམས་དང་སྙིང་རྗེ་ལ་རག་ལས་པས། དུས་རྟག་ཏུ་སྙིང་རྗེའི་སེམས་དང་མི་འབྲལ་བ་ཞིག་མ་འཆུག་ཞེས་སྐུལ་རྒྱུ་ཡིན། དེ་ལྟར་ཆོས་འཆད་ཉན་བྱས་པ་དང་བདེ་བ་ཅན་གྱི་ཞིང་སྨོན་དང་འབྲེལ་བའི་སྒོམ་སྒྲུབ། ཚོགས་བསགས་མཆོད་འབུལ། མཆོད་པའི་ཞལ་འདེབས། མར་མེ་ཁ་གསབ། དགེ་སྒྲུབ་སྡིག་སྤང་གི་ཁས་ལེན། ཕྱག་སྐོར་སྒྲིབ་སྦྱང་། དགེ་འདུན་པ་ལ་བསྙེན་བཀུར། གུང་ཚིགས་འདྲེན་མཁན། འགྱེད་དང་མང་ཇ། ཇོ་བོར་གསེར་ཆབ་ཕུལ་བ། ཚོགས་འཁོར་ལ་འབྲེལ་འཇོག་བྱས་པ། སྒོ་ཟོག་ཚེ་ཐར་བྱས་པ། ཉ་དང་འབུ་སྲིན་སྣ་ཚོགས་སྲོག་བླུ་བྱེད་པ། གཙུག་ལག་ཁང་དང་སྐོར་ལམ་ལ་རྡུལ་ཕྱགས་བརྒྱབ་པ། རང་ཉིད་ཀྱི་ལག་བསྟར་ཏེ་མཆོད་མེ་མཆོད་པ་འབུལ་བ་ལ་ལུས་ངག་གིས་ཞབས་ཏོག་ཁ་ལག་གཙང་མས་མཆོད་པ་བྱས་པ། དེ་ཚོ་ལ་རྗེས་སུ་ཡི་རང་བྱས་པ། དགེ་སེམས་སྐད་ཅིག་མ་ཞིག་ཅི་སྐྱེས། མེ་ཏོག་རྐང་གཅིག སྤོས་ཐུར་སྡོང་གཅིག ཚོགས་བསགས་མཆོད་འབུལ་གྱི་བསམ་པ་དག་པས་མཆོད་པའི་ཕྱོགས་ལ་གཏོར་ཚད་འབུལ་ཚད། བསམ་པ་རྣམ་པར་དག་པས་ཆོས་ར་འདིའི་ཕྱོགས་ལ་གོམ་པ་གང་ཅི་སྤོས། རང་ཉིད་ཡོང་བའི་སྟབས་མ་འགྲིག་ཀྱང་རྒྱང་ནས་དགའ་བས་རྗེས་སུ་ཡི་རང་བྱས་པ་ཚུན་ཆད། རང་གི་ཆོས་རའི་ནང་ནས་ཆོས་ཚིག་གཅིག་གོ་ནས་གཞན་ལ་ཕན་ཐོགས་ཀྱི་ཆེད་དུ་གླེང་མོལ་བྱས་པ་ནས་བཟུང་སྟེ་དགེ་བའི་རྩ་བ་འདི་དག་གིས་མཚོན་ཏེ་ཕྱོགས་བཅུའི་རྒྱལ་བ་སྲས་བཅས་ཀྱི་ཟག་མེད་ཀྱི་དགེ་བ་དང་། རང་གཞན་སེམས་ཅན་ཐམས་ཅད་ཀྱིས་དུས་གསུམ་དུ་བསགས་པའི་ཟག་བཅས་ཀྱི་དགེ་རྩ་ཐམས་ཅད་ཕྱོགས་གཅིག་ཏུ་བསྡམས་ཏེ་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་། གཏན་བདེ་མཆོག་དམ་པ་རྫོགས་བྱང་ཆེན་པོ་ཐོབ་བྱེད་དང་། སེམས་ཅན་གྱི་རིགས་སུ་གྱུར་པ་གཅིག་ཀྱང་མ་ལུས་པར་མགོན་པོ་འོད་དཔག་མེད་པའི་ཞབས་དྲུང་བདེ་བ་ཅན་གྱི་ཞིང་ཁམས་སུ་སྐྱེ་བའི་ཆེད་དུ་བསྔོ་བ་ཡིན་པས། དེ་ལྟར་བསྔོས་པའི་མཐུ་དེ་ལ་བརྟེན་ནས་རྒྱལ་བའི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་ཅན་བཤད་སྒྲུབ་གཉིས་ལྡན་གྱི་སྒོ་ནས་དར་ཞིང་རྒྱས་པ་དང་། དེ་འཛིན་བསྟན་འཛིན་གྱི་སྐྱེས་བུ། དམ་པའི་ཚུལ་དགུའི་ཡོན་ཏན་དང་ལྡན་པ་ཐམས་ཅད་ཀྱི་སྐུ་དབུ་འཕང་མཐོ་ཞིང་སྐུ་ཚེ་བརྟན། བཞེད་དོན་འགྲུབ། ཡངས་པའི་རྒྱལ་ཁམས་ཐམས་ཅད་ལ་ནད་དང་མུ་གེ་འབྱུང་བཞིའི་འཇིགས་པ། ཞེ་སྡང་དང་ཕྲག་དོག་གི་ཀུན་ནས་བསླངས་ཏེ་འཁྲུགས་རྩོད་ལ་སོགས་པ་མི་བདེ་བའི་མིང་ཙམ་ཡང་མེད་པ་དང་། དབང་འབྱོར་ལྡན་པའི་མི་ཐམས་ཅད་ཀྱི་རྒྱུད་ལ་ཞི་བ་བྱང་ཆུབ་ཀྱི་སེམས་སྐྱེས་ཏེ་རྒྱལ་ཁམས་བྱམས་པས་སྐྱོང་བ་དང་། ཁྱད་པར་དུ་སྟོན་པ་གཅིག་གིས་བསྐྱངས་པའི་བསྟན་པ་ལ་གྲུབ་མཐའི་ཆགས་སྡང་མེད་པ། རིགས་རུས་གཅིག་ལས་ཆད་པའི་གདུང་རྒྱུད་ལ་ཕུ་ནུ་ནང་འཁྲུག་མི་ཡོང་བ་དང་། དམིགས་བསལ་གྱི་ད་རེས་ཆོས་ར་འདིའི་ནང་དུ་བསྔོ་ཡིག་མིང་བརྗོད་ཡོང་བ་དང་། ན་ནིང་ད་ལོའི་བར་གྱི་འཛམ་གླིང་གི་ཡུལ་གྲུ་མང་པོ་ལ་མི་འདོད་པ་ཐོག་བབ་ཡོང་སྟེ་རྒྱ་མཚོའི་རླབས་འོག་ཏུ་སོང་ནས་ཤི་བ། ས་འགུལ་བརྒྱུགས་ཏེ་བསད་པ། མདའ་བོས་གྲི་མཚོན་གྱིས་བསད་པ། བར་དོ་གསར་བའི་ཤི་བོ། ཤི་སྣང་ཡིད་ལ་མེད་ཀྱིིན་གློ་བུར་དུ་ཤི་བ། རྒྱ་བོད་གྲི་ཤི་རེད་ཚད། ད་རེས་ཆོས་ར་འདིར་རྡོག་པས་བརྫིས་ཚད་འབྲེལ་བ་བཞག་ཚད་ཀྱི་ཤི་བོ་མི་རབས་སྔོན་མ། སྒོ་བཤས་སྒོ་ཟོག་འོག་རྟ་མ་འབྲི་སྒོ་ཁྱི་ཁྱིམ་མཚེས་ནས་བཟུང་སྟེ་ཐ་ན་རྐང་ཞབས་ནས་བརྫིས་ཏེ་བསད་ཚད་འབུ་གྲོག་མ་ཡན་ཆད། བདེ་བ་ཅན་ལ་སྐྱེས་ཏེ་རིང་པོར་མི་ཐོགས་པར་གཏན་བདེ་རྫོགས་པའི་བྱང་ཆུབ་ལ་འགོད་པར་ཤོག་ཅེས་སྨོན་པ་དང་། དེ་ནས་ངས་རྒྱུན་དུ་སྨོན་ལམ་ཅི་ཞིག་འདེབས་ཀྱིན་ཡོད་ཅེ་ན། ང་རྫོགས་ཆེན་པདྨ་སྐལ་བཟང་མིག་གིས་མཐོང་ཚད། རྣ་བས་ཐོས་ཚད། ང་ལ་དགའ་བས་དང་བ་སྟོན་མཁན། ང་ལ་སྡང་བས་འཁོན་དུ་འཛིན་མཁན། ང་ལ་ཟས་ཀྱི་འདུ་ཤེས་འཇོག་མཁན་གྱི་འབུ་དང་སྦྲང་མ་ལ་སོགས་པ། མདོར་ན་འབྲེལ་ཚད་ཐམས་ཅད། ཐ་ན་ངའི་ལུས་པོ་བརྒྱུད་ནས་རླུང་གི་རྫི་ཕྱོགས་ཕོག་ཚད་ཀྱི་སྲོག་ལྡན་ནས་བཟུང་སྟེ་བདེ་ནས་བདེ་བའི་ལམ་དུ་འགྲོ་བར་ཤོག་ཅེས་སྨོན་པ་བྱེད་ཀྱིན་ཡོད། དེ་རིང་ཡང་དེ་བཞིན་དུ་ང་མཐོང་ཐོས་དྲན་རེག་གིས་མ་ཚད་འདིར་ཡོད་རང་རེ་ཚང་མ་མཐོང་ཐོས་དྲན་རེག་བྱེད་མཁན། ཐ་ན་རང་རེའི་ལུས་པོ་བརྒྱུད་དེ་རླུང་གི་རྫི་ཕྱོགས་ཕོག་ཚད། ད་ལྟ་རང་རེ་གནས་ཡོད་སའི་ས་གཞི་གོ་ལ་རིལ་མོ་འདིའི་འཁོར་ཡུག་དང་བཅས་པའི་མཁའ་དང་རླུང་ལ་རོལ་ཚད། དེ་ལྟར་ཞིང་ཁམས་ནམ་མཁའི་གར་ཁྱབ་ནས། དེ་བཞིན་དུ་འབྲེལ་ཚད་ཀྱི་འགྲོ་བ་ཡོད་ཚད་བདེ་ནས་བདེ་བའི་ཕྱོགས་སུ་བསྐྱོད་དེ་བདེ་ཆེན་དག་པའི་ཞིང་གི་བདེ་བ་ལྟ་བུ་ཞིག་དང་དུས་ནམ་ཡང་མི་འབྲལ་བར་ཤོག་ཅེས་དང་། དེ་ལྟར་བསྔོ་བ་དང་སྨོན་ལམ་དེ་ཡང་གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་འཁོར་གསུམ་འཛིན་པ་དང་བྲལ་བ་དམིགས་མེད་ཆོས་དབྱིངས་ཆེན་པོར་ཡོངས་སུ་བསྔོ་བ། སྔོན་བྱང་ཆུབ་སེམས་པ་ཆོས་ཀྱི་འབྱུང་གནས་དང་འཕགས་པ་ཀུན་ཏུ་བཟང་པོ། རྗེ་བཙུན་འཇམ་དཔལ་དབྱངས། རྒྱ་གར་གྱི་རྒྱན་དྲུག་མཆོག་གཉིས། གྲུབ་ཆེན་བརྒྱད་ཅུ། བོད་ཀྱི་མཁན་སློབ་རྗེ་འབངས་ཉེར་ལྔ། ས་སྐྱའི་གོང་མ་རྣམ་ལྔ། བཀའ་བརྒྱུད་པའི་མར་མི་དྭགས་གསུམ། རྗེ་བཙུན་ཙོང་ཁ་བ་ཡབ་སྲས། སྒྲུབ་བརྒྱུད་ཤིང་རྟ་བརྒྱད། བཤད་རྒྱུད་ཀྱི་ཀ་ཆེན་བཅུ་ལ་སོགས་པ། བོད་གངས་ཅན་གྱི་བསྟན་པའི་ཤིང་རྟ་ཆེན་པོའི་སྲོལ་འབྱེད་ཀྱི་སློབ་དཔོན་རྣམ་པ་དང་། ཀུན་མཁྱེན་རོང་ཀློང་རྣམ་གཉིས། ཀུན་མཁྱེན་འཇིགས་མེད་གླིང་པ་ནས་རིམ་པར་བརྒྱུད་པའི་སྔ་འགྱུར་སྤྱི་དང་བྱེ་བྲག་རྫོགས་ཆེན་ཀློང་ཆེན་སྙིང་ཐིག་གི་བརྒྱུད་པ་འདིའི་རྩ་བརྒྱུད་ཀྱི་བླ་མ་རྣམ་པས་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་དེ་ལྟར་དམིགས་པ་དང་བཅས་པའི་བསྔོ་བ་དང་སྨོན་ལམ་གྱི་ཞལ་འདོན་ལྷན་དུ་གསུངས་པར་ཞུ་ཞེས་བསྔོ་བ་དང་སྨོན་ལམ་གྱིས་མཐའ་བརྒྱན་ཏེ་མཇུག་ཡོངས་སུ་རྫོགས་སོ།། །།

སླར་སྨྲས་པ།

བདེ་གཤེགས་རྟེན་བཅས་ཡིད་ལ་བྱེད་པ་དང་།།

བྱང་ཆུབ་སེམས་བསྐྱེད་དགེ་ཚོགས་རྒྱ་ཆེར་སྤེལ།།

ཡོངས་བསྔོས་སྨོན་པ་རྫོགས་སྨིན་སྦྱང་བའི་གནད།།

རྡུལ་བྲལ་ཞིང་ཁམས་ཉུལ་བའི་ཐབས་སུ་བསྔགས།།

དེ་སླད་ཡང་ཟབ་གདམས་པའི་རིན་ཆེན་གྲུ།།

སྐལ་བཟང་དད་ལྡན་ཡོངས་ཀྱི་འཇུག་ངོགས་ཏེ།།

བདེ་སྐྱིད་དཔག་མེད་ཞིང་གི་ནོར་གླིང་དུ།།

རྩེན་པར་འདོད་རྣམས་དགའ་བས་འཇུག་པར་རིགས།།

འགྲོ་ཁམས་རྒྱ་མཚོའི་སྤྱི་དཔལ་བླ་མ་རྗེའི།།

ཟབ་གསང་མན་ངག་སྣང་བའི་དཀྱིལ་འཁོར་འབུམ།།

ཕན་བདེའི་འཇུག་ངོགས་སྟོན་པའི་ལམ་སྒྲོན་དེ།།

ཡུན་དུ་གསལ་ཕྱིར་ཡི་གེའི་འདུ་བྱེད་བགྱིས།།

རང་བློས་ལྷད་པའི་ཉེས་ཚོགས་ཅི་མཆིས་པ།།

ཆོས་སྤྱན་ལྡན་པའི་མདུན་སར་སྙིང་ནས་འཆགས།།

ལེགས་བྱས་དགེ་ཚོགས་མར་གྱུར་འགྲོ་བ་ཀུན།།

བདེ་ལྡན་ཞིང་དུ་སྐྱེ་བའི་རྒྱུར་འགྱུར་ཤོག།

ཅེས་བདེ་བ་ཅན་གྱི་ཞིང་གི་སྨོན་ལམ་ཚིག་དོན་གོ་སླ་བར་བཀྲལ་བ་ཐར་ལམ་བགྲོད་པའི་ཐེམ་སྐས་ཞེས་བྱ་བ་འདི་ཉིད། ཡི་གེའི་འདུ་བྱེད་པ་ཆོས་རྗེ་བླ་མའི་སློབ་འབངས་གྱི་ན་བ་འདུ་ཤེས་གསུམ་པ་ཤར་མི་ཉག་པ་པདྨ་གཞན་ཕན་ནམ་བྱང་ཆུབ་རྡོ་རྗེ་ནས། བོད་རབ་བྱུང་བཅུ་བདུན་པའི་ལྕགས་མོ་ཡོས་ཀྱི་སྤྲེལ་ཟླའི་ཡར་ཚེས་བཅོ་ལྔའི་ཉིན་རུ་དམ་ཡང་དབེན་པདྨ་ཐང་ལུང་རྟོགས་པདྨའི་དགའ་ཚལ་ནས་ཡོངས་སུ་གྲུབ་པར་བགྱིས་པའོ། །དགེའོ། །སརྦ་མངྒ་ལཾ།། །།