 ཁྱབ་བདག་པདྨ་སྐལ་བཟང་གི་གསུང་འབུམ་གླེགས་བམ་བཅུ་བཞི་པ།ལས་བྱང་ཚོར་བ་རང་གྲོལ་གྱི་སྙིང་པོའི་རྣམ་བཤད་རིམ་གཉིས་གསལ་བྱེད།ཁྱབ་བདག་པདྨ་སྐལ་བཟང་གི་གསུང་། མཁན་བསོད་ནམས་རྒྱ་མཚོ་ཡིས་ཡི་གེར་ཕབ།པདྨའི་འོད་སྣང་ཚོགས་པ།ཀན་སུའུ་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། མཆོག་སྤྲུལ་མུ་ར་རིན་པོ་ཆེའི་གཙོས་པདྨའི་འོད་སྣང་ཚོགས་པ་ནས་༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་གསུང་འབུམ་མཚན་བཟང་སོ་གཉིས་ཀྱི་གྲངས་ལྡན་ཅན་འདིར་གནང་འབྱོར་བྱུང་བ་ལགས་ན། ཁོང་རྣམ་པའི་རྨད་དུ་བྱུང་བའི་མཛད་རྒྱས་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། ལས་བྱང་ཚོར་བ་རང་གྲོལ་གྱི་སྙིང་པོའི་རྣམ་བཤད་རིམ་གཉིས་གསལ་བྱེད།ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོའི་རྣམ་བཤད་རིམ་གཉིས་གསལ་བྱེད་ཅེས་བྱ་བ་བཞུགས་སོ།། བཀའ་དྲིན་མཚུངས་ཟླ་མ་མཆིས་པ་རྩ་བའི་བླ་མ་མཆོག་ལ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་བདག་གཞན་རྣམས་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། གཞི་དབྱིངས་སྤྲོས་བྲལ་ཆོས་དབྱིངས་ཆེན་པོ་ལས།། མ་འགགས་ལྷུན་གྲུབ་མཚན་དཔེ་རྫོགས་པའི་གར།། སྣ་ཚོགས་གདུལ་བྱའི་སྣང་ངོར་ཡོངས་ཁྱབ་པའི།། རྩ་གསུམ་ཞི་ཁྲོའི་ལྷ་ལ་གུས་པས་འདུད།། རབ་འབྱམས་རྒྱལ་བའི་མཁྱེན་བརྩེ་ནུས་པའི་དཔལ།། གཅིག་བསྡུས་གངས་ལྗོངས་འགྲོ་བའི་སྐྱབས་གཅིག་པུ།། མཚོ་འཁྲུངས་བླ་མ་པདྨ་འབྱུང་གནས་ལ།། མི་ཕྱེད་དད་པས་འདུད་དོ་རྟག་ཏུ་སྐྱོངས།། ཆེར་སྙིགས་དུས་ཀྱི་ཐ་མའི་ཡང་ཐ་ལ།། རྨད་བྱུང་རྒྱལ་བསྟན་སྤེལ་བའི་ཕྲིན་ལས་ཀྱིས།། ལྔ་བདོའི་འགྲོ་བ་རྟག་ཏུ་སྐྱོང་མཛད་པའི།། དཔལ་མགོན་བླ་མ་སྤྱི་བོའི་རྒྱན་དུ་མཆོད།། གང་གི་ཐུགས་གསང་སྙིང་རྗེའི་རྩལ་སྣང་ལས།། བྱུང་བའི་ལེགས་གསུང་རིམ་གཉིས་གསལ་བྱེད་མཆོག། ཇི་བཞིན་ཡི་གེའི་གཟུགས་སུ་དགོད་པ་ལ།། རྩ་གསུམ་ལྷ་དང་སྲུང་མས་མཐུན་འགྱུར་མཛོད།། དེ་ཡང་རུ་དམ་གནས་ཀྱི་ཡང་དབེན་ཨོ་རྒྱན་པདྨས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་མཆོག་རྫོགས་ཆེན་པདྨ་ཐང་ངོ་མཚར་སྟོང་ལྡན་གངས་རྒྱན་གསེར་གྱི་པདྨའི་གཙུག་ལག་ཁང་ག་ལ་བ་དེར། ཡང་གསང་བསྟན་པའི་སྒྲོན་མེ་སྙིང་པོའི་དོན་གྱི་བསྟན་འཛིན་མཚན་བརྗོད་པར་དཀའ་ན་ཡང་དོན་གྱི་སླད་དུ་མཚན་ནས་སྨོས་ན་༧ཆོས་རྗེ་བླ་མ་པདྨ་སྐལ་བཟང་རིན་པོ་ཆེ་མཆོག་གིས་ཆོས་ཀྱི་འཁོར་ལོ་རྒྱུན་མ་ཆད་པར་རྟག་ཏུ་སྐོར་བར་མཛད་པ་ལས། ལྕགས་ཕོ་སྟག་གི་ལོའི་རྩི་ཤིང་མེ་ཏོག་གི་འཛུམ་ཞལ་གསར་དུ་ངོམ་ཞིང་སྙན་འགྱུར་དཔྱིད་ཀྱི་རྒྱལ་མོས་གླུ་སྒྲ་སྒྲོག་བཞིན་པའི་དུས་བཟང་གི་སྐབས་ཤིག་ཏུ། བླ་སྤྲུལ་མཁན་གསུམ་གྱིས་གཙོར་མཛད་པའི་སྐལ་ལྡན་རྡོ་རྗེའི་མཆེད་ལྕམ་ལྷན་ཅིག་ཏུ་འཛོམས་པ་ལ། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོ་ཟབ་ཁྲིད་གནང་བ་ནི་འདི་ལྟར་ཏེ། ཉིན་དང་པོའི་ཆོས་ཁྲིད།༡ སྔོན་དུ་འགྲོ་བའི་ཆོས་བཤད་པ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་རིགས་དང་དཀྱིལ་འཁོར་རྒྱ་མཚོའི་ཁྱབ་བདག་བཀའ་དྲིན་མཚུངས་ཟླ་མ་མཆིས་པ་དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ་བྱིན་གྱིས་བརླབ་པར་མཛད་དུ་གསོལ། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུ་བརྗིད་པའི་སྐུ། །ཤཱཀྱའི་རྒྱལ་པོ་དེ་ལ་མགོས་ཕྱག་འཚལ། །དྲི་མེད་མཚོ་གླིང་པདྨའི་སྡོང་པོའི་རྩེར། །རྒྱལ་བའི་རྣམ་སྤྲུལ་རང་བྱུང་ལྷུན་གྱིས་གྲུབ། །མཚན་རྫོགས་དཔེ་བྱད་ཡོན་ཏན་ཚོགས་འབར་བ། །པདྨ་འབྱུང་གནས་བདག་བློའི་པད་མཚོ་སྐྱོངས། །ཀུན་ཏུ་བཟང་པོའི་ཐུགས་ཀྱི་འོད་ཟེར་ལས། །ཡེ་ཤེས་སྤྱན་ལྡན་ཀླུ་ཡི་རྒྱལ་མཚན་ཞེས། །སྨོན་ལམ་ལེགས་གྲུབ་མཆོག་གི་ཟབ་གཏེར་བདག །གཏེར་ཆེན་ཀརྨ་གླིང་པར་གསོལ་བ་འདེབས། །ཧྲཱིཿ སྔོན་ཚེ་དེ་བཞིན་གཤེགས་པ་གཙུག་གཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རི། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་བ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མི་འམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡེ་ལྡན་ཐམས་ཅད་འདིར་ཤོག་ཅིག །བསྐལ་བ་སྟོང་དུ་ཐོས་པ་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན། །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ཆོས་འདི་འགྱུར་བར་ཤོག། ད་ཡང་རང་རེའི་མི་ཚེའི་ལོ་ཟླ་ཡི་ཕྲེང་བའི་ནང་གི་ལོ་གཅིག་ཟླ་བ་བཅུ་གཉིས་ཀྱི་དུས་ཚོད་འདས་པའི་ཕྱོགས་སུ་སོང་ནས། ན་ནིང་རིག་འཛིན་འདུས་པའི་བསྙེན་མཚམས་ལ་བཞུགས་སྐབས་ཀྱི་དུས་ཐོག་ཏུ་ཐོན་པ་དང་། བོད་རབ་བྱུང་བཅུ་བདུན་པའི་ས་མོ་གླང་གི་ལོ་ཕར་འདས་ནས་ལྕགས་ཕོ་སྟག་གི་ལོ་ཚུར་ཚེས་པས་མ་ཚད་དཔྱིད་ཀྱི་རྗེས་དབྱར་ཐོན་པ་ཡིན་ཞིང་། འདི་འདྲའི་སྒོ་ནས་རྨི་ལམ་ལྟ་བུའི་ལོ་ཟླའི་གྲངས་ཀ་ཁ་ཤས་བསགས་ནས་ཚེ་ཚད་ཀྱི་མཐའ་གཞུག་ནམ་ཐོན་མི་ཤེས་པར་ཉིན་གཅིག་ཉི་མ་ཞིག་ལ་སང་ཉིན་ཚེས་རྒྱུ་མེད་པའི་ཉི་མ་ལ་སླེབས་པ་ཡིན་ནོ། །འུ་ཚོས་དུས་རྒྱུན་བཤད་རྒྱུར་སེ་གོལ་གཅིག་བརྡབས་པའི་སྐད་ཅིག་མའི་ཡུན་དང་མི་ཚེའི་དུས་ཚོད་གཉིས་ཀ་ཟད་པའི་མཐའ་ལ་ཐུག་ལུགས་གཅིག་ཡིན་ཟེར་བ་ལ་རྒྱུ་མཚན་ཡོད་པ་ཞིག་ཡིན་ཞིང་། སེ་གོལ་ཞིག་རྡེབ་ཚེ་ཡུན་རིང་ཞིག་མི་འདུག་པས། དེའི་ཚེ་ལས་ལོང་བཅའ་ལོང་བསམ་ལོང་དྲན་ལོང་མེད་པ་དང་འདྲ་བར་མི་ཞིག་གི་མི་ཚེ་གང་པོ་ལ་ཁོམ་པ་སྐད་ཅིག་ཙམ་ཞིག་མེད་ནས་མི་ཁོམ་མི་དལ་བར་ཤི་ཁའི་ནངས་མོ་ལ་ཐོན་དུས་ཅི་ཡང་མ་འགྲུབ་ནས་ལག་སྟོང་ལ་ལུས་ནས་དོན་དག་སྙིང་པོ་ཅན་མ་འགྲུབ་པའི་ཐད་ཀྱིི་སྐད་ཅིག་སྐར་མའི་ཡུན་དང་མི་ཚེའི་དུས་ཚོད་གཉིས་ཀ་གོ་མ་ཆོད་པའི་ཐད་ནས་འདྲ་སོང་བ་ཡིན་ལ། སྤྱིར་བཏང་གི་མི་ཚེའི་དུས་ཚོད་དེ་སྐད་ཅིག་མ་གཅིག་བས་རིང་བ་ཡིན་ཡང་འདི་ཕྱིར་རང་གཞན་གཉིས་ཕན་གྱི་དགེ་ཕྱོགས་སྒྲུབ་ལོང་གི་ལས་ལོང་བཅའ་ལོང་བསམ་ལོང་དྲན་ལོང་ཞིག་མ་གཏད་པའི་ཐད་ནས་སྐད་ཅིག་སྐར་མའི་དུས་ཚོད་དང་མི་ལུས་ཙམ་པོ་བ་ཞིག་གི་མི་ཚེའི་དུས་ཚོད་གཉིས་འདྲ་སོང་བ་ཡིན་ནོ། །དེ་གཉིས་མི་འདྲ་ས་གང་ཡོད་ཟེར་ན། སྡིག་དང་སྡུག་བསྔལ་གཉིས་ཀ་རྒྱུ་འབྲས་སྤེལ་མར་གྱུར་ནས་མང་པོ་ཞིག་གསོག་ལོང་མྱོང་ལོང་གཉིས་ཀ་བྱུང་བ་དེ་མི་ཚེའི་དུས་ཚོད་ལ་ཡར་ལྷག་ཡོད་རྒྱུའི་དོན་དག་ཡིན་ལ། དེ་འདྲ་བྱས་ནས་རེ་རེ་སྐྱེ་བ་དང་རེ་རེ་ཤི་ནས་རྒྱུ་སྡིག་པ་གསོག་ཞོར་དང་འབྲས་བུ་སྡུག་བསྔལ་མྱོང་ཞོར་དུ་ཨ་འཁོར་ཡང་འཁོར་བྱས་ནས་འཁོར་བའི་འཁོར་ལོ་བར་མེད་དུ་འཁོར་བའི་ནང་དུ་ཚུད། ཐོག་མེད་ནས་ད་ལྟའི་བར་གོམས་སོང་བའི་ལས་ཉོན་དེ་དབང་ཆེ་ཤུགས་དྲག་སོང་བ་དེ་ཉིད་ནི། ལས་ཀྱི་ཤུགས་ནི་ཆུ་བོའི་གཞུང་དང་འདྲ། །ལས་དབང་ཆུ་ཀླུང་འཕྲལ་དུ་ག་ལ་བཟློག །ཅེས་རཱུ་ཏྲས་སྨྲེ་ངག་བཏོན་པ་དང་འདྲ་བར་ཆུ་བོ་རྒྱུན་ཕྱོགས་སུ་ཡུན་རིང་དུ་རྒྱུགས་པའི་བཞུར་ཁ་དེ་གཞན་ཞིག་ཏུ་དྲངས་ནས་བསྒྱུར་དགོས་རྒྱུ་ཞིག་ཡིན་ན་སླ་མོ་ཞིག་གིས་བསྒྱུར་མི་ནུས་པ་དང་། ཁྱད་པར་དུ་ཆུ་རྒྱུན་གྱེན་ཕྱོགས་སུ་བསྒྱུར་རྒྱུ་སླ་མོ་མ་ཡིན་པ་བཞིན་དུ་གཅིག་ན་རྣམ་སྨིན་དབང་བཙན་པ་དང་། གཉིས་ན་ཡུན་རིང་ངན་གོམས་བག་ཆགས་ཀྱི་དབང་དུ་སོང་ནས་མི་དགེ་སྡིག་པའི་ལས་བསྒྲུབ་པ་དེ་ཆུ་བོ་ཐུར་དུ་རྒྱུགས་པ་དང་འདྲ་བར་བཟང་གྱེན་ཕྱོགས་སུ་སླ་མོ་ཞིག་གིས་མི་འགྲོ་རྒྱུ་དེ་སོ་སོ་སྐྱེ་བོ་ལས་ཉོན་གྱི་གཞན་དབང་ཅན་ཁོ་རང་གི་ཆོས་ཉིད་ཡིན་ནོ། །འོན་ཀྱང་ངན་ལོབས་མ་ལ་བཅོས་རྒྱུ་མེད་བསམས་ནས་ཅི་བྱུང་གང་བྱུང་བྱེད་རྒྱུ་མེད་ལ། ད་ལྟ་ནི་མཐོ་རིས་ཀྱི་འཇིག་རྟེན་མི་ཡུལ་ན་ཡོད་ཅིང་། སྡུག་བསྔལ་ཞེས་བརྗོད་ཀྱང་སྡུག་བསྔལ་རགས་པའི་ཚོར་བ་དེ་འདྲ་མི་ཆེ་བ་ཡིན་པས་འདི་ལ་ཧ་ཅང་སྐྱོན་ཆ་མི་ཆེ་སྙམ་ནས་དེའི་ངང་དུ་ཡུན་རིང་འདུག་གྲབས་བྱེད་རྒྱུ་མེད་དོ། །སྡུག་བསྔལ་རྣམ་པ་གསུམ་དང་རྒ་ན་འཆི་བ་ལ་སོགས་པའི་བདུད་ཀྱི་ཆུ་བོ་བཞི་ཡིས་བཏང་མེད་པ་ཡིན་པས་ད་བདེ་ན་ད་སྡུག་པའི་འགྱུར་བའི་སྡུག་བསྔལ། སྡུག་བསྔལ་གཅིག་གི་སྟེང་དུ་སྡུག་བསྔལ་མང་པོ་བརྩེགས་མར་འབྱུང་བའི་སྡུག་བསྔལ་གྱི་སྡུག་བསྔལ། སྤྱིར་གང་བྱས་ཐམས་ཅད་སྡུག་བསྔལ་རྒྱུ་འབྲས་ལས་མ་འདས་པའི་ཁྱབ་པ་འདུ་བྱེད་ཀྱི་སྡུག་བསྔལ་དང་། སྐྱེ་རྒ་ན་འཆིའི་སྡུག་བསྔལ་ལ་བསམ་བློ་ཞིག་བཏང་ན། སྐྱེ་བའི་སྡུག་བསྔལ་ཐེངས་གཅིག་མྱོང་ཟིན་པ་ཡིན་ལ། ཡུན་རིང་གི་འདང་རྒྱག་མ་བྱས་ན་སྐྱེ་བ་འདི་ལ་ད་ཡང་བསྐྱར་དུ་སྐྱེ་མི་དགོས་པས་དེ་ཕར་ཞོག རྒས་པ་ཟེར་རྒྱུའི་ཤི་ན་དགའ་འོ་སྙམ་པའི་སྡུག་བསྔལ། ན་བ་ཟེར་རྒྱུའི་ཤི་གཟེར་ཐོག་ཏུ་བབས་པ་དང་། དེ་མིན་ན་ཡང་ནད་དེའི་ཁ་འོག་ནས་ཐར་རྒྱུ་མེད་པའི་ནད་ཅིག་ཕོག་བཏང་ན་དེའི་སྐྲག་དངངས་ཁོ་ནས་ཐེངས་གཅིག་ཤི་བའི་སྡུག་བསྔལ་དང་འདྲ་བ་ཞིག་མ་ཤི་གོང་ནས་མྱོང་རྒྱུ་ཡོད་པ་དེ་དང་། ཤི་བ་ངོ་མའི་སྡུག་བསྔལ་བཤད་ཀྱང་མི་དགོས་ལ། ཤི་བ་ཞེས་པའི་མིང་ཙམ་ཡང་མ་གོ་ན་བསམ་པའི་སྲོག་ལྡན་ཐམས་ཅད་སྐྲག་དགོས་ས་གཅིག་པུ་དེ་ཡིན་ནོ། །འོན་ཀྱང་དེ་དག་ཆུང་ཆུང་ཞིག་ཡིན་ལ། ཤི་ནས་ངན་སོང་གསུམ་དུ་སྐྱེས་སོང་ན་ཇི་ལྟར་བྱེད། ངན་སོང་གསུམ་གྱི་སྡུག་བསྔལ་དེ་ཚོའི་ནང་གི་སྣེ་གཅིག་ཆུ་ཚོད་སྐར་མ་ཁ་ཤས་ལ་མྱོང་དགོས་ན་བཟོད་ཐབས་མེད་མོད་ཀྱང་བཟོད་ཐབས་མི་འདུག་ཟེར་ས་མེད་ཅིང་། ལས་བྱས་པ་རང་ཐོག་མ་གཏོགས་འགྲོ་ས་མེད་ལ། ངན་སོང་ལ་ཨེ་འགྲོ་མི་འགྲོ་མེད་པར་འགྲོ་ངེས་ཅན་ཞིག་ཡིན་ཏེ། སྔ་དྲོར་གྱེན་ལ་འགོས་ན་ཕྱི་དྲོར་ཐུར་དུ་མི་འབབ་གང་དུ་འགྲོ། གསོན་འདི་གང་གིས་སྡིག་པ་མི་དགེ་བའི་ལས་བསགས་བསགས་ནས་ཚེ་ཕྱི་མའི་ཡུལ་ལ་ཐོན་དུས་དེའི་འབྲས་བུ་ངན་སོང་གི་སྡུག་བསྔལ་མི་མྱོང་བར་ཐར་འགྲོ་ས་ཞིག་མེད་ཤག་ཤག་ཡིན་ནོ། །དེ་ལྟ་བས་ན་ཐེག་ཆེན་མདོ་སྔགས་ཀྱི་ཆོས་ལམ་ལ་ཞུགས་དུས་ཆོས་དབང་བཙན་དུ་བྱས་ན་དང་པོ་ཉིད་ནས་ནམ་མཁའི་མཐའ་དང་མཉམ་པའི་སེམས་ཅན་གྱི་དོན་དུ་ཟེར་ནས་བློ་བཅོས་དགོས་པ་ཞིག་ཡིན་མོད་ཀྱང་གང་ཟག་དབང་བཙན་དུ་བྱས་ནས་ང་འདྲ་བས་རང་དཔེ་རོགས་ལ་བླངས་ན་གཞན་དོན་མ་དགོས་རང་དོན་སྒྲུབ་མ་ཤེས་བསམ་མ་ཤེས་ནས་དགེ་སྡིག་འཆོལ་ཉོག་ཏུ་སྤྱོད་བཞིན་པ་འདི་ལ་བལྟས་ན་རང་རྒྱུས་རོགས་རྒྱུས་གཉིས་ཀ་རྟགས་སྤྱོད་པས་སྟོན་བཞིན་ཡོད་པ་འདི་ཡིན་ལ། ལྟ་བ་ཡས་འབེབས་ཡིན་ཡང་སྤྱོད་པ་མས་འཛེགས་བྱེད་དགོས་སོ། །དེ་ཡང་ཐེག་པ་གསུམ་གྱི་བབས་རིམ་དང་བསྟུན་ནས་དམའ་ས་ནས་ཡར་མ་བརྒྱུད་ན་ཡར་གྱི་ཤྭ་རྗེས་ཐེག་ཆེན་གྱི་ཐར་ལམ་མ་ཟིན། མར་གྱི་ཤེའུ་རྗེས་ཐེག་དམན་གྱི་ཐར་བའི་ལམ་ལ་མ་བསྙེགས་ན་ཁ་ཡིས་ཉེ་ལམ་དང་མྱུར་ལམ་བཤད་མཁན་དེ་ཉིད་ཀྱིས་དོན་ལ་རིང་ལམ་མ་དགོས་དང་ལམ་ཞུགས་ལྷ་མིའི་ཐེག་པའི་འཇིག་རྟེན་ཡང་དག་གི་ལྟ་བ་རྒྱུ་འབྲས་དགེ་སྡིག་གཞུང་བཞིན་དུ་སྤང་བླང་འདོར་ལེན་བྱེད་མི་ཤེས་པ་འདི་ལ་བལྟས་ཡོང་ན་ནང་པ་སངས་རྒྱས་པའི་མཆོད་གནས་ཤིག་མ་དགོས་སྦྱིན་བདག་དད་པ་ཅན་ཞིག་དང་། དགེ་བསྙེན་ཚད་ལྡན་ཚུལ་མཐུན་ཞིག་གི་ཆ་ཚད་ལྡན་ཡོད་མེད་ཐེ་ཚོམ་གྱི་གཞི་རྩ་ཞིག་ལ་ཐུག་ཡོད་པ་ཡིན་ནོ། །ང་ལ་གདམས་ངག་ཁྱད་པར་ཅན་གྱི་མན་ངག་གི་ཞལ་ཤེས་ཡོད་པ་མ་ཡིན་ལ། ཉམས་མྱོང་གི་སྟེང་ནས་བཤད་ཡོང་རྒྱུ་མེད་ཀྱང་རང་རྒྱུད་ཐ་མར་ལུས་པའི་འདྲ་དཔེ་ཆོས་དང་རང་རྒྱུད་མ་འདྲེས་པའི་ཉེས་དང་སྐྱོན་ཆ་ལག་ལེན་གྱི་ཐོག་ནས་བཤད་རྒྱུ་ཡོད་པ་རྣམས་དེ་ཚོ་རེད། དེས་ན་ལས་དང་པོ་བས་གཞན་ཕན་ཁ་ཟེར་ཙམ་མིན་པའི་རྣམ་དག་ཅིག་ཤེས་རྒྱུའི་ཆེད་དུ་དང་པོར་གཞན་ཕན་གཏན་ནས་མི་བཤད་པར་རང་ཕན་གྱི་སྐོར་དེ་བཤད་ནས་ཤེས་ཁར་བཅུག་རྒྱུ་དེ་གལ་ཆེན་ཞིག་རེད་སྙམ། བློ་ལྡོག་རྣམ་བཞིས་བློ་སྦྱོང་དུས་དང་པོར་དལ་འབྱོར་རྙེད་དཀའ་བསམ་རྒྱུ་བསྐྱུར་ནས་དང་པོར་ལས་རྒྱུ་འབྲས་ཀྱི་སྐོར་དེ་ནས་ངེས་ཤེས་གདིང་ནས་རྙེད་པ་ཞིག་དགོས་སོ། །འོ་ན་དེའི་ཆོས་དེ་ཐེག་ཆེན་གྱི་ཆོས་ཤིག་མ་ཡིན་ནམ་སྙམ་ན་མི་ཤེས་མོད། དཔེ་ཞིག་བླངས་ན་གོམ་ཁ་སྤོ་མི་ནུས་པ་ཞིག་གིས་མཆོང་རྩལ་དང་། རྒྱུག་རྩལ་དང་། གཞན་ཡང་ནམ་མཁའ་ནས་འཕུར་ལྡིང་བྱེད་པའི་སྐོར་བཤད་པར་བྱས་ཀྱང་དོན་ལག་ཏུ་ལེན་རྒྱུ་མེད་པའི་མ་མཐོང་རྒྱང་གི་གཏམ་རྒྱུད་སྙན་མོར་གྱུར་སོང་ན་ལྷ་ཡུལ་ན་རོ་བརྒྱ་ལྡན་པའི་ཞལ་ཟས་ཡོད་ཀྱང་མི་ཡུལ་གྱི་མི་ལྟོགས་ཀྱི་ཕོ་བ་ལ་འབབ་རྒྱུ་མེད་ན་བཤད་རྒྱུ་ལ་སྙིང་བོ་མེད་པ་ལྟ་བུ་ཞིག་ཡིན་ནོ། །དེ་ལྟར་བཤད་ན་ཁྱོད་ཀྱིས་དང་པོ་རང་གཅེས་མི་ཤེས་པ་ཞིག་གིས་གཞན་གཅེས་མི་ནུས་ལ། དང་པོ་ལས་རྒྱུ་འབྲས་ཀྱི་འགྲོ་སྟངས་ལ་ཡིད་ཆེས་བྱེད་མི་ཤེས་པ་ཞིག་གིས་བླང་དོར་གྱི་གནས་གཞན་དག་མི་ཤེས་པ་རེད་ཅེས་བརྗོད་ན་དེ་ག་ལ་ཡིན་ཏེ། གཞན་ལ་གཅེས་ཟེར་ན་དཀའ་མོ་ཞིག་རེད་མ་གཏོགས་རང་ལ་གཅེས་ལོས་ཤེས། དེ་ལ་མ་གཅེས་ན་བདག་འཛིན་དང་བྲལ་ཡོད་པའི་རྟགས་ཡིན་པ་དང་། རང་དོན་བསྒྲུབས་ནས་ཤི་བ་ལ་མ་ཐུག་གིི་བར་དུ་རྒྱུག་བཞིན་པ་འདི་རང་དོན་སྒྲུབ་པ་ཡིན་ཞིང་། ལས་རྒྱུ་འབྲས་ལ་ཡིད་ཆེས་ནི་ནམ་ཡང་བྱེད་བཞིན་ཡོད་ལ། ཟོམ་སྟོང་ཞིག་སྔུན་འདི་ནས་ཁུར་ཡོང་ན་རྣམ་རྟོག་ཡོད། རྨི་ལམ་འཚུབ་མོ་ཞིག་མདང་རྨིས་ཡོང་ན་དེ་རིང་ཟློག་པ་རྒྱག་བཞིན་ཡོད་སྙམ་ན། དེ་བདེན་མོད་ཀྱང་ལས་འབྲས་བསླུ་མེད་ལ་ཡིད་ཆེས་ཡོད་པའི་སྟོང་རྟེན་འབྱུང་གི་གནད་ཤེས་པའི་རྒྱུ་འབྲས་ཡིད་ཆེས་ཡོད་པའི་རྟགས་ཡང་དག་ཅིག་གི་གྲལ་དུ་མི་འགྲོའོ། །རང་དོན་ཆུང་ཆུང་ཞིག་ཨེ་འགྲུབ་བསམ་ན་ཚེ་འདིར་ཚེ་རིང་ནད་མེད་བསམ་དོན་ལམ་དུ་འགྲོ་རྒྱུ་དེ་ཚོ་ཡིན་ལ། དེའི་དོན་དུ་སྲོག་མི་གཅོད་རྐུ་མི་བྱེད་པར་མཆོད་པ་དང་སྦྱིན་པ་རེ་བྱེད་དགོས། རང་དོན་འབྲིང་ཞིག་ཨེ་འགྲུབ་བསམ་ན་ཕྱི་མར་ངན་སོང་ལ་མི་ལྷུང་བར་བདེ་འགྲོ་ལྷ་མིའི་གོ་འཕང་འཐོབ་ཐབས་བྱེད་དགོས་ལ། དེའི་ཆེད་དུ་མི་དགེ་བཅུ་སྤོང་གི་ཚུལ་ཁྲིམས་བསྲུངས་ནས་དགེ་བཅུ་ཁྱད་པར་བ་སྤྱད་དགོས། ཁམས་གོང་མ་ལ་སྐྱེ་དགོས་ན་ད་རུང་བསམ་གཟུགས་ཀྱི་ཏིང་ངེ་འཛིན་བསྒོམ་དགོས་སོ། །དལ་འབྱོར་ཚང་བའི་རྟེན་རྣམ་པར་དག་པ་ཞིག་འཐོབ་པ་ལ་ཚུལ་ཁྲིམས་རྣམ་པར་དག་པས་གཞིར་བཟུང་། སྦྱིན་སོགས་དགེ་བའི་དངོས་པོས་གྲོགས་བྱས། སྨོན་ལམ་དྲི་མ་མེད་པས་མཚམས་སྦྱར་དགོས་ཤིང་། རྒྱུ་དེ་ལྟ་བུ་སྒྲུབ་པ་ཙམ་ཡང་དུས་འདི་ལ་དཀོན་པ་ཡིན་ནོ། །རང་དོན་ཆེན་པོ་ཞིག་བསྒྲུབ་བསམ་ན་འཁོར་བའི་ནང་ནས་དུས་གཏན་དུ་ཐར་བའི་ཐར་བ་ཞིག་ཐོབ་དགོས་ལ། དེ་ཡང་རང་དོན་གཙོ་ཆེར་བྱས་པ་ཡིན་རྒྱུའི་དབང་དུ་བཏང་ན་ཉན་རང་དགྲ་བཅོམ་གྱི་གོ་འཕང་ཐོབ་ན་འཁོར་བའི་ནང་དུ་ཕྱིར་ལ་འཁོར་མི་དགོས་ཀྱང་དེ་ལ་ཡང་རང་རང་གི་ཚོགས་བསགས་སྒྲིབ་སྦྱང་བསླབ་པ་གསུམ་གྱི་ཉམས་ལེན་བྱེད་དགོས་སོ། །དེ་བས་ཀྱང་དགའ་ཞིག་དགོས་སོ་སྙམ་ན་རང་གཞན་གཉིས་དོན་མཉམ་དུ་འགྲུབ་པའི་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་ནས་རྫོགས་པའི་སངས་རྒྱས་བསྒྲུབ་རྒྱུ་དེ་ཉིད་ཡིན་ཞིང་། དེའི་དགེ་རྩ་བསྒྲུབ་དགོས་ན་ཁྱད་ཆོས་ཆེན་པོ་བདུན་གྱིས་འཕགས་པའི་ཐེག་ཆེན་གྱི་ལམ་ལ་ཞུགས་དགོས་སོ། །དེ་ཚོ་གཅིག་ཀྱང་མི་ཤེས་པར་གཅིག་ཙམ་ཡང་སྒྲུབ་མི་ཐུབ་པ་དེ་ཉིད་བདག་འཛིན་དང་བྲལ་ནས་རང་འདོད་མ་བསྒྲུབས་པ་ཞིག་མ་ཡིན་ལ། བདག་འཛིན་རྩ་བ་མ་རིག་པའི་གདོན་གྱི་གཞན་དབང་དུ་སོང་ནས་བདེ་སྡུག་རྒྱུ་འབྲས་གོ་ལོག་ཏུ་སོང་བ་ཡིན་ནོ། །རང་དོན་ཆུང་ཆུང་ཚེ་འདིའི་ཚེ་རིང་ནད་མེད་ཙམ་ཞིག་སྒྲུབ་མ་ཤེས་ནས་སྲོག་གཅོད་དང་འབྲེལ་བའི་ལས་བྱས། ཚེ་ཐུང་བྱེད་དང་ནད་མང་བྱེད་དུ་གྱུར། མཆོད་སྦྱིན་མ་བྲ་བའི་ཐོག་གཞན་ནོར་ཧམ་པས་བླངས་ནས་རྒྱུ་མེད་པར་འགྱུར་བྱེད་རང་གིས་བསྒྲུབས། དེ་བཞིན་དུ་བཅས་དང་རང་བཞིན་གྱི་ཉེས་པ་སྣ་རེས་མི་འདོད་པ་སྣ་རེ་བསྐྱེད་ནས་དེ་ལྟ་བུའི་སྒོ་ནས་ཐ་མར་སྡུག་བསྔལ་གྱི་ནང་དུ་ཚུད་པ་ཡིན་ནོ། །རང་དོན་འབྲིང་བོ་འགྲུབ་བྱེད་སྤང་དགོས་རྒྱུའི་མི་དགེ་བཅུ་བོ་སྤོང་མ་ཐུབ། བསྒྲུབ་དགོས་རྒྱུའི་དགེ་བ་བཅུ་བོ་སྒྲུབ་མ་ཐུབ་ནས་ཕྱི་མར་མི་ལུས་ལེན་དགོས་བསམ་ཡང་ལེན་བྱེད་ཀྱི་རྒྱུ་འགྲུབ་མེད་ལ། རང་དོན་ཆེ་བ་ཐར་བ་འཐོབ་བྱེད་དམ་ཉན་རང་དགྲ་བཅོམ་འཐོབ་བྱེད་ཀྱི་ཐེག་དམན་ཐར་བ་ཆ་མཐུན་ཙམ་ཞིག་སྒྲུབ་མ་ཐུབ་ན་ཐེག་ཆེན་ཐར་བ་ཆ་མཐུན་བཤད་པས་ཅི་ཞིག་བྱ་སྟེ་དྲན་རྒྱུ་དེ་ལྟ་བུའི་སྒོ་ནས་ཁ་ཚོད་མཐོ་ཡང་རྒྱུད་ཚོད་དམའ་ནས་བཀའ་མདོ་རྒྱུད་ཀྱི་བཤད་པ་བས་མོ་པ་རྩིས་པ་གལ་ཆེན་དུ་བརྩིས་ཤིང་། དམ་ཚིག་སྡོམ་པ་འགལ་ཉམས་སོང་བ་བས་མདང་དགོང་རྨི་ལམ་འཁྲུགས་པ་དང་ད་ནངས་ཟོམ་སྟོང་གཏུགས་པ་རྩ་ཆེན་རྩི་མཁན་དུ་གྱུར་སོང་བ་དང་། དེ་ལྟར་ཡིན་ཕྱིར་དགེ་སློང་ཚུལ་ལྡན་ཞིག་བས་ཀྱང་སྐྱ་སེར་གཉིས་གོ་ཆོད་མཁན་ཞིག་གིས་དགའ་རྒྱུ་དང་། བླ་མ་དགེ་བའི་བཤེས་གཉེན་ཞིག་བས་ཀྱང་ཟོག་པོ་ཁྲམ་རྐྱལ་གྱི་མགོ་འཕང་མཐོ་བ་ཞིག་ཏུ་གྱུར་སོང་བ་ཡིན་པས། ཆོས་མཐུན་བཀུར་སྟིའི་བཞུགས་གྲལ་ཡིན་ཡང་མགོ་མཇུག་ལྡོག་པའི་སྤྱོད་ངན། སེང་གེ་ཁྱི་ཡི་གཡོག་ཏུ་འགྱུར་རྒྱུའི་གནས་ཚུལ་དེ་ལྟར་དར་ནས་དུས་ངན་གྱི་རྒུད་པ་རང་ཤུགས་ཀྱིས་འདྲེན་པ་ཡིན་ནོ། །དེ་ལྟར་ཡིན་པས་རང་གཞན་གཉིས་དོན་འགྲུབ་པའི་ཆོས་པ་དགེ་འདུན་གྱི་བཞུགས་གྲལ་མི་བརྫད་པའི་དམ་པའི་ཆོས་འཛིན། རྒྱལ་བའི་གདུང་འཚོབ་མཁན་ཞིག་བྱེད་པ་ལ་དངོས་གཞི་ཆོས་ཞུ་བའི་སྔོན་དུ་ཤེས་བྱ་རྣམ་པར་འབྱེད་པའི་རྣམ་དཔྱོད་ཀྱི་ཤེས་རབ་ཅིག་བསྟེན་ནས་རྒྱུ་མཚན་ཤེས་པའི་དད་པ་ཡིས་མཆོག་གསུམ་དམ་པའི་སྐྱབས་འོག་ནས་རང་གཞན་གཉིས་དོན་འགྲུབ་མཁན་ཞིག་བྱེད་བསམ་ན་དང་པོ་སྔོན་འགྲོ་བློ་ལྡོག་རྣམ་བཞིས་སྦྱོང་བ་བྱེད་རྒྱུ་ཤིན་ཏུ་ནས་ཀྱང་གལ་ཆེ་བ་ཡིན་ནོ། །ཆོས་ཞུ་བའི་སྔོན་དུ་བློ་སྦྱོང་ལ་འབད་དགོས་པར་མ་ཟད་ཆོས་ཞུས་ཟིན་པས་ཀྱང་བློ་སྦྱོང་དང་དུས་ནམ་དུ་ཡང་མི་འབྲལ་རྒྱུ་གནད་ཆེ་བ་ཡིན་ཏེ། བློ་སྦྱོངས་བློ་སྦྱོངས་རང་གི་བློ་སྦྱོངས་ཤིག །བློ་ལྡོག་རྣམ་བཞིས་རང་གི་བློ་སྦྱངས་ན། །ལུས་ངག་དགེ་བ་སྣ་གཅིག་མ་གྲུབ་ཀྱང་། །ཐར་བའི་ལམ་ལས་འགྲོ་ས་གཞན་དུ་མེད། །ཅེས་དཔལ་སྤྲུལ་འཇིགས་མེད་ཆོས་ཀྱི་དབང་པོས་ལན་གཅིག་མ་ཡིན་པར་བཟླས་ཏེ་སྐུལ་མར་བྱས་འདུག་ལ། དེ་བཞིན་དུ་བཀའ་གདམས་པའི་དགེ་བའི་བཤེས་གཉེན་རྣམ་པས་ཀྱང་ཡང་དང་ཡང་དུ་ཐབས་དུ་མས་ནན་གྱིས་གསུངས་སོ། །དམ་པའི་ཆོས་ལམ་ལ་ཞུགས། འབད་པ་བརྒྱ་ཕྲག་གིས་དོན་གཉེར་བྱེད་རྒྱུ་དེ་ཐར་ལམ་གྱི་སྣེ་མོ་ཞིག་ཨེ་ཟིན་བསམ་པའི་དམིགས་འདུན་གྱི་གཙོ་བོ་ཡིན་ནོ། །དེས་ན་ཆོས་ཞུ་བའི་སྔོན་དུ་རང་ཉིད་ཀྱི་བསམ་བློ་ཡང་དག་པའི་ཕྱོགས་སུ་བཅོས་དགོས་ཤིང་། ཆོས་ཐོབ་རྒྱུ་གལ་ཆེ་ཡང་རྒྱུད་དག་རྒྱུ་དེ་བས་ཀྱང་གནད་ཆེ་ལ། རྒྱུད་མ་དག་ན་རུལ་བའི་ས་བོན་ལ་རྐྱེན་ཅི་ཞིག་ཚོགས་ཀྱང་ལོ་འབྲས་ཡང་དག་པ་ཞིག་སྨིན་རྒྱུ་མེད་དེ། མགོན་པོ་བྱམས་པས། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་བ་མེད་པས་བཟང་མི་མྱོང་། །ཞེས་གསུངས་སོ། །དེའི་ཕྱིར་ན་དུས་ནམ་དང་ནམ་དུ་ཡང་བློ་སྦྱོང་གནད་ཆེ་ཞིང་། བློ་སྦྱོང་མཛད་རྒྱུ་དེ་ཡང་རང་རྒྱུས་རང་ལ་ཆེ་བ་ཡིན་པས་གནད་གང་གི་ཆེ་རང་གིས་རང་ལ་བརྟག་དཔྱད་ཅིག་བྱས་ན་ཅི་ཞིག་གིས་ཕན་ཐོགས་ཆེ་འདུག་བརྟགས་ཏེ། ཚེ་འདི་ལ་མངོན་ཞེན་ཆེ་རྒྱུ་ཤུགས་དྲག་ན་མི་རྟག་པ་དང་ངན་སོང་ངན་འགྲོའི་ཉེས་དམིགས་བསྒོམ་རྒྱུ་གཙོ་བོར་བྱེད་དགོས། འཁོར་བ་ལ་སྐྱོ་ཤས་ཆུང་ན་འཁོར་བའི་ཉེས་དམིགས་བསམ། དགེ་བའི་བཤེས་གཉེན་ལ་དད་པ་དང་གུས་པ་ཆུང་ན་བཤེས་གཉེན་བསྟེན་ཚུལ་ལ་བསླབ། རང་འདོད་ཡིད་བྱེད་ཀྱི་སྒྲོག་གིས་བཅིངས་འདུག་བསམ་ན་སྨོན་སེམས་རྒྱུ་དང་བཅས་པ་ལ་བསླབ་པ་དེ་ལྟར་བྱེད་དགོས་སོ། །མདོར་ན་རང་རྒྱུད་དེ་ཉིད་རང་གིས་ཆོས་བཞིན་དུ་འཆོས་པའི་རང་དྲིན་རང་ལ་ཆེ་བའི་མཛད་ཕྱོགས་ལ་ཐོས་བསམ་བཞེས་པའི་ཐོག་ནས་ཐེག་ཆེན་མདོ་སྔགས་ཀྱི་དམ་ཆོས་འཆད་ཉན་གྱི་གནས་སྐབས་འདིར་ཐོག་མར་བྱང་ཆུབ་མཆོག་ཏུ་སེམས་བསྐྱེད་པ་དང་མི་འབྲལ་རྒྱུ་དེ་གནད་ཀྱི་ནང་ནས་ཀྱང་གནད་ཆེན་ཡིན་ནོ། །དེ་ཇི་ལྟར་བྱེད་དགོས་ཟེར་ན། དེ་ཡང་འདི་ལྟར་ནམ་མཁས་གར་ཁྱབ་ཏུ་སེམས་ཅན་གྱིས་ཁྱབ། ནམ་མཁའ་ལ་མཐའ་མེད་པ་དང་འདྲ་བར་སེམས་ཅན་ལ་མཐའ་མེད། སེམས་ཅན་གྱིས་གར་ཁྱབ་ལ་ལས་ཉོན་གྱིས་ཁྱབ། ལས་དང་ཉོན་མོངས་ཀྱིས་གཞན་དབང་དུ་མ་གྱུར་པའི་སེམས་ཅན་ཞིག་མེད། དེ་ལྟར་དུ་ལས་ཉོན་གྱིས་གར་ཁྱབ་ལ་སྡུག་བསྔལ་གྱིས་ཁྱབ། རྒྱུ་ལས་ཉོན་གྱི་ས་བོན་བཏབ་ཡོད་ས་ཞིག་ལ་འབྲས་བུ་སྡུག་བསྔལ་གྱི་མྱུ་གུ་སྨིན་མི་དགོས་པ་ཞིག་མི་སྲིད་དོ། །དེ་ལྟར་ཡིན་ཕྱིར་འཁོར་བའི་སྡུག་བསྔལ་ལ་བསམ་བློ་ཞིག་བཏང་ན་སྡུག་བསྔལ་རྣམ་པ་སྣ་ཚོགས་འདི་མྱོང་དང་འདི་མི་མྱོང་ཟེར་རྒྱུ་མེད་པར་ངན་སོང་མིན་ཡང་མཐོ་རིས་ཀྱི་ལུས་རྟེན་ཐོབ་ཀྱང་བདེ་བ་མེད་པར་འཁོར་བའི་གནས་འདིར་གང་དུ་སྐྱེས་ཀྱང་མེའི་འོབས། སྲིན་མོའི་གླིང་། དུག་སྦྲུལ་གདུག་པ་ཅན་གྱི་ཚང་དང་འདྲ་བར། མདོར་ན་བདེ་བའི་གོ་སྐབས་འཕྲོག ཐར་བའི་སྲོག་གཅོད་མཁན་ཞིག་ཡིན་ནོ། །འཁོར་བའི་གནས་ནས་སྡུག་བསྔལ་རྣམ་པ་སྣ་ཚོགས་མྱོང་བཞིན་ཡོད་པའི་རིགས་དྲུག་གི་སེམས་ཅན་འདི་ཐམས་ཅད་ལ་བསམ་བློ་ཞིག་བཏང་ན་འདི་གཞན་ཞིག་མ་ཡིན་ལ། རང་ཉིད་ཀྱི་སྐྱེ་བ་གཅིག་ལ་མིན་ཡང་གཅིག་ལ་ཕ་མར་བྱས་མྱོང་ཞིང་། ཕ་མར་བྱས་པའི་སྐབས་ན་ད་ལྟའི་ཚེ་འདིའི་ལུས་འདིའི་ཕ་མ་དང་འདྲ་བར་དྲིན་ཆེན་པོས་དྲིན་གྱིས་བསྐྱངས་པ་ཤ་སྟག་ཡིན་ནོ། །ཡང་མཚམས་རེར་རང་ཉིད་ཀྱི་བུ་རྒྱུད་བྱས་པ། མཚམས་རེར་གཉེན་དང་གྲོགས་པོ། མཚམས་རེར་རང་བྱས་ལས་ཀྱི་ལན་ཆགས་ཀྱིས་དགྲ་ཟླར་གྱུར་དུས་ཀྱང་ཡོད་དོ། །རང་ཉིད་ཀྱི་དོན་དུ་འདི་དག་གིས་ལུས་སྲོག་ལོངས་སྤྱོད་དང་བཅས་པ་བཏང་བའི་གྲངས་ཀ་ཡང་རྩི་ཚོད་ཅི་ཡོད་དེ་མེད་དོ། །རྨོངས་པ་མ་རིག་པའི་གཞན་དབང་དུ་གྱུར་ནས་བདེ་འདོད་སྡུག་བསྔལ་གྱི་རྒྱུ་བསྒྲུབས། བསམ་རྒྱུ་ལས་རྒྱུ་གཉིས་ཀ་ཐོ་མི་ཐུག ཡང་དག་པའི་ལམ་དང་ཁ་བྲལ་ནས་ལམ་ལོག་མགོ་རྨོངས་ལ་འཁྱམ་བཞིན་པའི་ཕ་མར་མ་གྱུར་པ་མེད་པའི་སེམས་ཅན་འདི་དག་སྙིང་རེ་རྗེ། ངས་དལ་འབྱོར་གྱི་རྟེན་བཟང་ཞིག་རྙེད། ཐར་བ་སྒྲུབ་པའི་མཐུན་རྐྱེན་ཚང་མ་ཚོགས་ཡོད་པའི་སྐབས་འདིར་དོན་ཞིག་བསྒྲུབ་དགོས་ཤིང་། ད་སྔ་ཡན་ཆད་ལ་བསམ་བློ་ཞིག་བཏང་ནས་ཕྱི་ལྟས་ཤིག་བྱས་ན་མི་ཚེའི་དུས་ཚོད་ཀྱི་བཟང་ས་ཡག་ས་ཚང་མ་ཤོར་འདུག འདི་ལྟ་བུའི་ཆོས་དང་འཕྲད་པའི་ལུས་རྟེན་ནམ་ཡིན་ཡང་འཐོབ་དཀའ་བ་ཡིན་ནོ། །དཀའ་བའི་རྒྱུ་མཚན་དེ་སྔོན་འཁོར་བ་ཐོག་མེད་ནས་ད་ལ་ཐུག་གི་བར་འཁོར་བའི་ནང་ནས་ཐར་ཐབས་ཀྱི་ཆོས་ཤིག་དང་ཐུག་མ་མྱོང་ནས་ད་རུང་འཁོར་བར་འཁྱམ་བཞིན་པ་འདི་ཡིན་ནོ། །རྒྱུ་ཆེན་པོ། ཐོབ་མཐོན་པོ། དབང་འབྱོར་བ་མངའ་ཐང་ཅན་མ་དགོས་དང་འཁོར་ལོས་བསྒྱུར་བའི་རྒྱལ་པོའི་ལུས་རྟེན་གང་མང་མང་ཐོབ་མྱོང་ཡོད་ཀྱང་མཐར་མ་བརྟན་ནས་ཡང་འཁོར་ཏེ་ཡང་འཁོར་ནས་མནར་མེད་དུ་སོང་ནས་སྒྱེད་རྡོ་བྱས་པའི་གྲངས་ཀ་རྩི་ཚོད་ག་ལ་ཡོད་དེ་མེད་དོ། །དེས་ན་ནམ་ཡིན་ཡིན་དུ་ཐོབ་པ་དང་རྙེད་པར་དཀའ་བའི་རིན་ཐང་ཅན་གྱི་དལ་འབྱོར་ཚང་བའི་ལུས་རྟེན་རྙེད་བཞིན་དུ་འདི་འཕྲོ་བརླག་ཆུད་ཟོས་སུ་མི་གཏོང་བར་ལུས་རྟེན་འདིའི་སྟེང་ནས་དོན་ཆེན་ཐར་བའི་བྱང་ཆུབ་དོན་གཉིས་ལྷུན་གྲུབ་རྫོགས་པའི་སངས་རྒྱས་ཀྱི་གོ་འཕང་འཐོབ་ཤག་ཤག་བྱས་ཏེ། སྙིང་རྗེ་བའི་སེམས་ཅན་འདི་ཐམས་ཅད་གཅིག་ཀྱང་མ་ལུས་པར་གཏན་བདེའི་ས་ལ་འགོད་དགོས་བསམ་པའི་སྙིང་རྗེས་སེམས་ཅན་ལ་དམིགས་པ་དང་། སྙིང་རྗེ་བ་ཙམ་མ་ཡིན་པར་ཤེས་རབ་ཀྱིས་རྫོགས་བྱང་ལ་འགོད་འདོད་ཀྱི་བློ་གཉིས་ཀ་དང་ལྡན་པའི་དོན་གཉིས་ལྡན་པའི་སེམས་བསྐྱེད་སྔོན་དུ་འགྲོ་དགོས་སོ། །དེ་ཡང་སྨོན་པའི་རྗེས་འགྲོ་ཙམ་མ་ཡིན་པར་རྒྱལ་བའི་སྲས་ཀྱི་སྤྱོད་པ་རྒྱ་མཚོ་ལྟ་བུ་ལ་དངོས་སུ་ཞུགས་ཤིང་། མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཤི་མཐར་ཐུག་གི་བར་དུ་དམ་ཆོས་བཙལ། །ཞེས་གསུངས་པ་དང་མཚུངས་པར་ཆོས་ཐོས་བསམ་སྒོམ་གསུམ་གྱི་དོན་དུ་དཀའ་ན། སྡུག་ན། ན་ན། ཤི་ན་ཕྱི་གྱེད་མི་བྱེད་སྙམ་པའི་དམ་བཅའ་ལྡན་པ་ཞིག་དང་། ཐབས་ཁྱད་པར་ཅན་ཐེག་ཆེན་གསང་སྔགས་ཀྱི་ཆོས་འཆད་ཉན་གྱི་སྐབས་སུ་གནས་དུས་སྟོན་འཁོར་ཆོས་དང་བཅས་པ་ཕུན་སུམ་ཚོགས་པ་ལྔ་ཡི་རང་བཞིན་དུ་ཡེ་ནས་སྣོད་བཅུད་དག་པའི་དཀྱིལ་འཁོར་ཡིན་པ་ལ་ཡིན་པར་ཤེས་པའི་ངེས་ཤེས་དང་ལྡན་པའི་སྒོ་ནས་གསན་དགོས་སོ། །འུ་ཚོས་འདི་ལྟ་བུའི་དག་མ་དག་གི་སྐད་ཆ་བཤད་དུས་ཚིག་གི་གྲྭ་ཟུར་གཅད་རྒྱུ་ཡོད་ཅིང་། དག་མ་དག་འདི་ལ་སྣང་ངོ་དང་ངེས་ངོ་གཉིས་སུ་ཕྱེ་དགོས་ལ། བརྟགས་ཤིང་དཔྱད་པའི་ངེས་ཤེས་ཀྱི་ངོ་དེར་སྣང་ངོར་མ་དག་པ་དང་ངེས་ངོར་དག་པ་ཡིན་པ་དང་། རིག་ངོ་འཕྲོད་ཟིན་པའི་གང་ཟག་ལ་སྣང་ངོ་ངེས་ངོ་གཉིས་ཀ་ལ་དག་པ་ཡིན་དགོས་སོ། །བླ་མས་རིག་ངོ་སྤྲད་པ་དེ་འཕྲོད་ཟིན་ནས་སྙིང་ཁ་ཆོས་ཀྱི་ཕོ་བྲང་ནས་འོད་གསལ་གྱི་རིག་པ་དེ་སད་ནས་སེམས་སེམས་བྱུང་དང་བཅས་པའི་ཡུལ་ཅན་ཐམས་ཅད་ཡེ་ཤེས་སུ་ཤར་ཞིང་། ཡུལ་ལྔ་ལ་སོགས་པའི་ཡུལ་ཐམས་ཅད་རིག་པའི་རྣམ་ལྡན་དུ་ཤར་དུས་སྣང་བ་ལྷ་དང་ཡུལ་ཅན་ཡེ་ཤེས་སུ་སད་ནས་རང་དུས་དེའི་ཐོག་ནས་གནས་ཚུལ་དང་སྣང་ཚུལ་གཉིས་ཀ་མཐུན་ལ། སྣང་བའི་མདུན་ན་མུན་པ་མེད་པ་དང་འདྲ་བར་དག་པའི་སྣང་བ་འབའ་ཞིག་མ་གཏོགས་མ་དག་པའི་སྣང་བ་མེད་དོ། །གང་ལྟར་ཡང་མདོར་ན་སྣོད་བཅུད་དག་པའི་དཀྱིལ་འཁོར་ཡིན་པ་ལ་ཡིན་པར་གསལ་འདེབས་དང་། ཡང་སྒོས་སུ་དེང་དུས་བསྟན་པ་ཉམས་དམའ་ཉག་ཕྲའི་སྐབས་སུ་སྐྱེ་དགུའི་ཕན་དང་བདེ་བའི་འབྱུང་གནས་རྒྱལ་བའི་བསྟན་པ་རིན་པོ་ཆེ་ལ་དོན་དང་ལྡན་པའི་བྱ་བ་ཕྲན་བུ་རེ་སྒྲུབ་ཐུབ་ན་སྔོན་བསྐལ་བ་བཟང་དུས་དང་བསྟན་པ་དར་དུས་སུ་བསྟན་པ་ལ་ཅི་འདྲའི་བྱ་བ་ཆེན་པོ་ཞིག་བསྒྲུབས་པ་བས་ཀྱང་ཆོད་སྒོ་ཆེ་བ་དང་། བསོད་ནམས་ཀྱང་དེ་བཞིན་དུ་ཆེ་བ་ཡིན་ནོ། །ཐུབ་པའི་ལུང་རྟོགས་ཀྱི་བསྟན་པ་རིན་པོ་ཆེ་གང་ཟག་གི་རྒྱུད་ལ་བཞུགས་པ་ཞིག་ཡིན་པས་འདི་གང་ཟག་རང་རྒྱུད་ལ་འཛིན་རྒྱུའི་གནད་ཤེས་པ་དང་། རྒྱལ་བསྟན་འཛིན་སྐྱོང་སྤེལ་བའི་རྒྱལ་བའི་ཕྲིན་ལས་རྨ་མེད་པ་འདི་ལྟ་བུའི་སྒོ་ནས་མཛད་པ་བསྒྲུབ་རྒྱུ་ཡོད་པ་འདི་སྐལ་བ་རེ་བཟང་ཞིང་། ཕྱི་ཚུལ་གྱི་དམར་མདོག་ཅིག་གོན་པས་བསྟན་པའི་རྗེས་འཇུག ནང་པའི་དགེ་འདུན་པའི་གྲལ་དུ་དོན་གྱི་ཐོག་ནས་ཐོན་པའི་ངེས་པ་མེད་ལ། བླ་མ་གྲྭ་པ་ཟེར་རྒྱུའི་མཆོད་གནས་དགེ་འདུན་པ་སྐྱེ་བོ་ཕལ་བ་ཐམས་ཅད་ཀྱིས་ཕྱག་དང་མཆོད་པ་དད་གུས་བྱེད་སའི་ཡུལ་ཡིན་ན་དེའི་གྲལ་དུ་བསྡད་ནས་མིན་ན་ཡིན་མདོག་བྱས་པས་གོ་མི་ཆོད་ཅིང་། གནས་སྐབས་གཞན་མགོ་གཡོག་ཅིང་མཐར་གཏུགས་ན་རང་མགོ་གཡོགས་པར་བྱས་ཡོད་དོ། །ལས་བྱ་བ་གང་ལ་ཞུགས་ཀྱང་། ཞུགས་ན་ཞུགས་གོ་ཆོད་པའི་དོན་དེ་འགྲུབ་དགོས་ཤིང་། སྐྲ་སོར་གསུམ་གྱི་གཙུག་ཕུད་དེ་མཁན་སློབ་ཀྱི་མདུན་དུ་ཕུལ་ལ། གོས་སྣེ་གསུམ་གྱི་སྟོན་པའི་ན་བཟའ་དེ་རང་གི་ལུས་ལ་གོན་ན་དེའི་རྟགས་ཆ་ལུགས་འཆང་བའི་མི་དེས་དེའི་བྱ་བ་དེ་འགྲུབ་དགོས་སོ། །དེ་དགོས་ན་ཆོས་གོས་རྣམ་གསུམ་ལུས་ལ་གོན་ནས་བསླབ་གསུམ་ཉམས་ལེན་གྱི་དམ་བཅའ་བླངས་པའི་གང་ཟག་དེས་བསྒྲུབ་རྒྱུ་དེ་གང་རེད་ཟེར་ན། དམག་ལས། ཇག་ལས། ཚོང་ལས། སྲིད་དོན། གཉེན་སྒྲིག་མཐུན་སྦྱོར། ཞིང་འབྲོག་སོ་ནམ་ལ་སོགས་པ་གཅིག་ཀྱང་མ་ཡིན་ཏེ། ལས་ཀ་དེ་རྣམས་ཀྱི་ནང་ནས་བུད་བཏང་བས་ན་རབ་བྱུང་ཞེས་བརྗོད་པ་དང་། ཁྱིམ་ནས་ཁྱིམ་མེད་པར་བུད་ནས་ནང་པའི་ཚུལ་ཁྲིམས་དང་བརྟུལ་ཞུགས་འཆང་རྒྱུ་དེ་ལ་རབ་ཏུ་བྱུང་ཞེས་བརྗོད་པ་ཡིན་ནོ། །རབ་ཏུ་བྱུང་བ་ལ་ལས་ཀ་མང་བོ་ཞིག་མེད་ལ། ལས་ཀ་གཅིག་ཁོ་ན་ཡོད་དོ། །ལས་ཀ་གཅིག་དེ་ཅི་ཞིག་ཡིན་ཟེར་ན། དམ་པའི་ཆོས་འཛིན་རྒྱུ་དེ་ཡིན་ནོ། །དམ་པའི་ཆོས་སམ་ཐུབ་པའི་བསྟན་པ་དེ་ཅི་འདྲ་ཞིག་ཡིན་ཟེར་ན། སློབ་དཔོན་དབྱིག་གཉེན་གྱིས། སྟོན་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ནའོ། །ཞེས་གསུངས་ཏེ། རྣམ་གཅོད་ཀྱིས་རྒྱལ་བའི་ལུང་རྟོགས་ཀྱི་བསྟན་པ་བཤད་དང་སྒྲུབ་པ་ཁོ་ནས་འཛིན་རྒྱུ་དང་། ཡོངས་གཅོད་ཀྱིས་དེ་ལས་གཞན་པས་བསྟན་པ་འཛིན་ཐབས་མེད་པར་ཤུགས་ལ་བསྟན་ཡོད་དོ། །དེས་ན་ལུང་གི་བསྟན་པ་བཤད་པའི་སྒོ་ནས་འཛིན་རྒྱུ་དང་། རྟོགས་པའི་བསྟན་པ་སྒྲུབ་པའི་སྒོ་ནས་དངོས་སུ་འཛིན་ས་ལ་ཐོན་ཅིང་། འཛིན་རྒྱུའི་བགོ་སྐལ་བཟང་པོ་ལག་ལ་ཐོན་རྒྱུ་འདི་སྔོན་བསགས་ཀྱི་ལས་དང་སྨོན་ལམ་གྱི་དབང་གིས་བྱུང་བ་ཞིག་ཡིན་ནོ། །བསོད་ནམས་མ་བསགས་ན་ཆོས་བཟང་པོ་འདི་ལྟ་བུ་དང་འཕྲད་རྒྱུ་མེད་པས་གོ་སྐབས་བཟང་པོ་འདི་མི་ཤོར་བའི་ཐོག་ནས་དལ་འབྱོར་དོན་ལྡན་གྱི་གཡུར་དུ་ཟ་བའི་འབྲས་བུ་མཐའ་ཡས་སེམས་ཅན་གྱི་དོན་དུ་སྨིན་ཤག་ཤག་གི་དོན་འབྲས་ཤིག་ལེན་དགོས་དགོངས་པའི་ཐུགས་བསྐྱེད་ཁ་ཙམ་ཚིག་ཙམ་མ་ཡིན་པར་དོན་ཐོག་ཏུ་གནས་པའི་དགོངས་བཞེས་སྔོན་དུ་འགྲོ་བ་དང་བཅས་པས་གསན་དགོས་སོ།། ༢ དངོས་ཀྱི་དོན་བཤད་པ། ད་ནི་གང་གསན་པར་བྱ་བའི་ཆོས་ཀྱི་རིམ་པ་ལ་མཚོན་ན། སྤྱིར་ན་རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་ཀྱིས་ཐོག་མར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་མང་པོར་ཚོགས་བསགས། ཐ་མར་མངོན་པར་རྫོགས་པར་སངས་རྒྱས་པ་ཐམས་ཅད་སེམས་ཅན་ཁོ་ནའི་དོན་ཡིན་ནོ། །དེའི་ཕྱིར་ན་སྟོན་པས་ཆོས་གསུངས་པ་ཐམས་ཅད་ཀྱང་སེམས་ཅན་གྱི་དོན་མིན་ཐབས་མེད་ཅིང་། གདུལ་བྱའི་སེམས་ཅན་འདྲ་དང་མི་འདྲ་མང་པོ་ཡོད་པའི་རྒྱུ་མཚན་གྱིས་དེ་ཐམས་ཅད་ཀྱི་ཁམས་དང་མོས་པ་བསམ་པའི་ཁྱད་པར་མི་འདྲ་བ་ཡིན་ཞིང་། དེའི་དབང་གིས་དེ་འདུལ་བྱེད་ཆོས་ཀྱི་རྣམ་གྲངས་ཀྱང་ཆོས་ཕུང་བརྒྱད་ཁྲི་བཞི་སྟོང་ལ་སོགས་པར་ཕྱེས་ནས་བསམ་གྱིས་མི་ཁྱབ་པར་གསུངས་ཡོད་དོ། །ཐུབ་པའི་གསུང་གི་ཆོ་འཕྲུལ་དེ་སྒྲ་གཅིག་དོན་མང་ལ་འཇུག་པ། དོན་གཅིག་སྒྲ་སྣ་ཚོགས་ཀྱིས་སྟོན་པ། གདུལ་བྱ་འགའ་རེ་ལ་སྒྲ་ཚིག་དང་ཡི་གེས་སྟོན་པ། འགའ་རེ་ལ་བརྗོད་དུ་མེད་པས་ཆོས་གསུང་རྒྱུ་ལ་སོགས་པ་ཡོད་ཅིང་། སོ་སོ་སྐྱེ་བོའི་བློ་ཡུལ་ལས་འདས་པ་ཞིག་ཡིན་ནོ། །ཡིན་ན་ཡང་སངས་རྒྱས་ཀྱི་ཆོས་གསུངས་པ་ཐམས་ཅད་སེམས་ཅན་གྱི་དོན་སྒྲུབ་པའི་ཆེད་དུ་ཡིན་པས་གང་བསྒྲུབ་པར་བྱ་བ་སེམས་ཅན་གྱི་དོན་དེ་རྣམ་པ་གཉིས་ཀྱི་ཁོངས་སུ་འདུས་ཏེ། གནས་སྐབས་མངོན་མཐོ་ལྷ་མིའི་རྟེན་སྒྲུབ་པ་དང་། མཐར་ཐུག་ངེས་ལེགས་རྫོགས་པའི་སངས་རྒྱས་ཀྱི་གོ་འཕང་སྒྲུབ་པ་དེ་གཉིས་ཀ་ཡིན་ནོ། །དེ་ཡང་ལམ་གྱི་རྣམ་གཞག་གི་དབང་དུ་བཏང་ནས་ཕྱེས་ན་སྐྱེས་བུ་གསུམ་གྱི་ལམ་གྱི་རིམ་པ་སྟེ། མངོན་མཐོ་སྒྲུབ་བྱེད་ཀྱི་སྐོར་ནས་གསུངས་པ་ཐམས་ཅད་སྐྱེས་བུའི་ཆུང་ངུའི་ལམ་དངོས་དང་སྐྱེས་བུ་ཆུང་ངུ་དང་ཐུན་མོང་བའི་ལམ་ཡིན་ཞིང་། འཁོར་བའི་ནང་ནས་གྲོལ་བ་ཙམ་གྱི་ཐར་བ་ཉན་རང་གི་ཐེག་པའི་སྐོར་ནས་གསུངས་པ་ཐམས་ཅད་སྐྱེས་བུ་འབྲིང་གི་ལམ་དངོས་སམ་འབྲིང་དང་ཐུན་མོང་བའི་ཆོས་སྐོར་ཡིན་ལ། ཐམས་ཅད་མཁྱེན་པ་རྣམ་མཁྱེན་སངས་རྒྱས་ཀྱི་གོ་འཕང་སྒྲུབ་པའི་ཐབས་ཀྱི་ཆོས་སྐོར་ཐམས་ཅད་སྐྱེས་བུ་ཆེན་པོའི་ལམ་གྱི་རིིམ་པ་སྟེ་དེ་ལྟར་དུ་ཡིན་ནོ། །དེ་ལས་ཀྱང་རང་རེ་ཐེག་ཆེན་གྱི་གདུལ་བྱར་གྱུར་པའི་གང་ཟག་ལ་སྐྱེས་བུ་ཆེན་པོའི་ལམ་དེ་ཡང་རྒྱུ་དང་འབྲས་བུའི་ཐེག་ཆེན་རྣམ་པ་གཉིས། མདོ་དང་སྔགས་ཀྱི་ཆོས་ཚུལ་ནས་བརྩམས་ཏེ་གསུངས་པ་ཞིག་ཡིན་ནོ། །ད་རེས་སྐབས་དོན་གསན་བྱའི་སྙིང་པོ་གང་ཡིན་ན་སྐྱེས་བུ་ཆེན་པོའི་ཆོས་སྐོར། མདོ་སྔགས་གཉིས་ཀྱི་ནང་ནས་སྔགས། སྔགས་ལ་ཡང་རྒྱུད་སྡེ་བཞིའམ་དྲུག་གི་འཆད་ཚུལ་གྱི་ནང་ནས་ཐུན་མོང་གི་བཤད་ཚུལ་ལྟར་དུ་བྱས་ན་སྔགས་བླ་མེད་ཀྱི་ཆོས་སྐོར་ཡིན་ཞིང་། སྔགས་འདི་ལ་ཡང་འགྱུར་སྔ་ཕྱིའི་དབང་གིས་གངས་ཅན་བོད་ཀྱི་ལྗོངས་འདི་ནས་སྔགས་གསར་རྙིང་གི་དབྱེ་བ་ཕྱེ་རྒྱུའི་ཐ་སྙད་ཅིག་ཡོད་སོང་བ་ལྟར་དུ་བྱས་ན་སྔགས་རྙིང་མ། སྔ་འགྱུར་རྙིང་མའི་ལུགས་ཀྱི་སྔགས་ཕྱི་རྒྱུད་གསུམ་དང་ནང་རྒྱུད་གསུམ་གྱི་དབྱེ་བ་ཡོད་པའི་ནང་གི་ནང་རྒྱུད་ཡོ་ག་རྣམ་པ་གསུམ་དང་འབྲེལ་བའི་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཆོས་ཚན་འདི་ཉིད་ཡིན་པ་ལས། ལས་བྱང་རྩར་ཕྲེང་ཚོར་བ་རང་གྲོལ་གྱི་སྙིང་པོ་ཚུར་བསྡུས་པ། རང་རེའི་དུས་རྒྱུན་གྱི་ཁ་སྐད་ལྟར་དུ་བྱས་ན་ལས་བྱང་ཆུང་བ་འདི་ཉིད་འཆད་ཉན་བགྱི་བའི་སྐབས་ཡིན་ནོ། །འདིའི་ཆོས་ཁུངས་བརྒྱུད་པ་གསུམ་གྱི་ལོ་རྒྱུས་ཀྱི་ཐོག་ནས་བཤད་ན་སེམས་ཅན་ཐམས་ཅད་ཀྱི་འདྲེན་པ། འགྲོ་བ་སྐྱབས་མེད་ཀྱི་སྐྱབས། མགོན་མེད་ཀྱི་མགོན་དུ་གྱུར་པ། རྒྱལ་བ་རྫོགས་པའི་སངས་རྒྱས་བསྐལ་བཟང་རྣམ་འདྲེན་བཞི་པ་དེ་ཉིད་གཞི་ཀ་དག་ཆེན་པོའི་རང་ངོ་ལས་མ་གཡོས་བཞིན་དུ་གཞི་སྣང་ལྷུན་གྲུབ་རིན་པོ་ཆེའི་སྐབས་སུ་ཁྱད་ཆོས་དྲུག་གིས་གདོད་མའི་ནང་དབྱིངས་སུ་མངོན་པར་རྫོགས་པར་སངས་རྒྱས་ནས་ཆོས་སྐུ་འགྱུར་མེད་ཀྱི་ཀློང་ན་ཀུན་ཏུ་བཟང་པོའི་རྣམ་རོལ་ཏུ་བཞུགས་ཏེ་ཡེ་ཤེས་རང་གི་ངང་གིས་གསལ་བའི་འཁོར་ཚོགས་ལ་ཆོས་ཉིད་འཕོ་འགྱུར་མེད་པའི་ཆོས་གསུངས་པ་ཡིན་ནོ། །དེའི་སྣང་ཆ་ལོངས་སྤྱོད་རྫོགས་པའི་རྒྱལ་ཐབས་ལ་མངའ་དབང་འབྱོར་བའི་སྟོན་པ་ཡིས་དགོངས་པ་ཐ་མི་དད་པའི་རིགས་ལྔའི་རྒྱལ་བ་གངས་ཆེན་མཚོ་ལ་བརྡ་ཚིག་ལས་འདས་པའི་ཆོས་བསྟན་ཅིང་། དེ་ལས་ཀྱང་ཕྱི་གསལ་དུ་ཕྱེད་སྤྲུལ་ལོངས་སྐུས་དག་པའི་ས་ལ་གནས་པའི་སེམས་དཔའ་ཆེན་པོ་སོ་སོ་ལ་བརྡ་ཆོས་བསྟན་ལ། དེ་ལས་གང་ཟག་མི་དང་མི་མིན་གྱི་སྙན་ནས་སྙན་དུ་བརྒྱུད་པའི་བརྒྱུད་པ་དེ་གསང་སྔགས་སྤྱིའི་བཤད་ཚུལ་དང་འདྲ་བ་དང་། དེའི་ནང་གི་བྱེ་བྲག་གི་ཁྱད་པར་ལོངས་སྐུ་རིགས་ལྔར་སྣང་བའི་སྒྱུ་འཕྲུལ་བཀོད་པའི་ཞིང་ཁམས་རྣམ་གྲོལ་དབུགས་ཆེན་འབྱིན་པའི་སྤྲུལ་བའི་ཞིང་ཁམས་ལྔའི་ནང་གི་ནུབ་ཕྱོགས་བདེ་བ་ཅན་གྱི་ཞིང་ཁམས་ནས་མགོན་པོ་འོད་དཔག་མེད་ཀྱི་ཐུགས་ཀའི་ཧྲཱིཿཡིག་ལྷོ་ནུབ་འོ་མ་ཅན་གྱི་རྒྱ་མཚོ་ལ་འཕོས་པ་དེ་མེ་ཏོག་པདྨའི་སྙིང་པོ་ལས་རང་འཁྲུངས་རིག་པ་ཐོལ་སྐྱེས་ཀྱི་ཚུལ་དུ་བརྫུས་ཏེ་འཁྲུངས་པའི་སྤྲུལ་སྐུ་པདྨ་འབྱུང་གནས་ལ་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་དེ་གསུམ་པོ་ཚང་བའི་བརྒྱུད་ཚུལ་གསུམ་གྱི་རིམ་པ་ཡིས་གུ་རུ་རིན་པོ་ཆེ་ལ་རྒྱལ་བ་ཐམས་ཅད་ཀྱི་ཐུགས་བཅུད་དགོངས་པའི་གསང་སྔགས་ཀྱི་བཀའ་བབས་པའམ་ཡང་ན་གསང་སྔགས་ཀྱི་སྟོན་པར་སངས་རྒྱས་རང་ཉིད་ཀྱིས་ལུང་བསྟན་པ་ལྟར་དུ་སངས་རྒྱས་གཉིས་པའི་ཚུལ་དུ་བྱོན་ཏོ། །གུ་རུ་རིན་པོ་ཆེས་ཟབ་ལམ་བཀའ་བབ་ཀྱི་གདམས་པ་གྲངས་ལས་འདས་པ་ཞིག་གི་ཆོས་ཆར་ཕབ་པའི་ནང་ནས་ཟབ་ཆོས་ཞི་ཁྲོ་དགོངས་པ་རང་གྲོལ་འདི་ནང་བརྒྱུད་སྡེ་གསུམ་གྱི་དགོངས་པའི་བཅུད་འདུས་སྙིང་པོ་དྲིལ་བ་ཡིན་ལ། འདི་བཀའ་གཏེར་དག་སྣང་གི་ཆོས་ཚན་གྱི་ནང་ནས་ཟབ་མོ་གཏེར་གྱི་ཆོས་སྐོར་ཡིན་ནོ། །ཞི་ཁྲོའི་ཆོས་སྐོར་ལ་ཡང་གཏེར་ཁ་སྣ་ཚོགས་ཀྱི་ཁྱད་པར་གྱིས་ཞི་ཁྲོའི་དཀྱིལ་འཁོར་རིགས་འདྲ་དང་མི་འདྲ་མང་དུ་ཡོད་ཅིང་། ཞི་ཁྲོ་རང་གཞུང་ལ་བཀོལ་རྒྱུད་ཀྱིས་ཁ་སྐོང་མཛད་དེ་རྒྱུད་སྡེ་དང་སྒྲུབ་སྡེ་འབྲེལ་བའི་སྒྲུབ་པ་གཙོ་བོར་བྱེད་པའི་ལུགས་རྩལ་འདོན་མཛད་པ་ཞིག་ཡིན་ནོ། །སྒྲུབ་ཐབས་དེ་ཡང་མན་ངག་གི་དགོངས་པས་ཟུར་བརྒྱན་ཏེ་སྒྲུབ་ཐབས་མན་ངག་དང་འབྲེལ་བའི་གནད་ཚང་བ། མན་ངག་དེ་ཡང་ཞལ་ཤེས་ཀྱི་ལྡེ་མིག་ཡོད་པ། ཞལ་ཤེས་ཀྱི་ལྡེ་མིག་མེད་ན་ཐོར་བུ་ཡིན་པས་དེ་ལྟར་ཞལ་ཤེས་ཀྱི་ལྡེ་མིག་མེད་པའི་ཐོར་བུ་མ་ཡིན་པར་མན་ངག་ཆོག་ཁྲིགས་དང་འབྲེལ་བའི་སྟར་འགྲིག ཆོག་ཁྲིགས་དེ་ཡང་ལག་ལེན་གྱི་གནད་དུ་མ་ཁེལ་བའི་ཚོད་ཡོད་དུ་མ་སོང་བའི་ཆོག་ཁྲིགས་ཕྱག་བཞེས་དང་འབྲེལ་བའི་འབྲེལ་བ་བཞི་ལྡན་གྱི་ཟབ་ཆོས་འདི་གུ་རུས་ལུང་ཟིན་གཏེར་སྟོན་གླིང་པ་བརྒྱད་དམ་བཅུ་གཅིག་གི་ནང་ནས་རིགས་ལྔའི་རིགས་ལས་དྲས་པའི་མཚན་གྱི་ནང་ནས་བྱང་ན་ཀརྨ་གླིང་པ་ཞེས་ཡོངས་སུ་གྲགས་པའི་གཏེར་སྟོན་ཆེན་པོ་དེ་ཉིད་ཀྱི་གཏེར་སྐལ་ལས་བྱོན་པའི་ཟབ་ཆོས་འགྲོ་དོན་ནམ་མཁའ་དང་མཉམ་པ་དེ་ཉིད་ཡིན་ནོ། །འདི་ལ་བསྐྱེད་རིམ་གཙོ་བོར་བསྟན་པའི་དཀྱིལ་ཆོག་དང་ལས་བྱང་ཆེ་ཆུང་ངམ་རྒྱས་བསྡུས་རྣམ་པ་གཉིས། རྫོགས་རིམ་གཙོ་བོར་བསྟན་པའི་བར་དོ་དྲུག་གི་ཁྲིད་ཡིག གཉིས་ཀ་གཙོ་བོར་བསྟན་པའི་སྨིན་བྱེད་དབང་གི་རིམ་པ་རྒྱས་འབྲིང་བསྡུས་གསུམ་སོགས་ཀྱི་ཆོས་ཚན་མང་ངོ་། །ལས་བྱང་དང་། བསྐང་བཤགས། རིགས་དྲུག་གནས་འདྲེན་དང་། སྦྱིན་སྲེག་གི་སྐོར་ལ་སོགས་པ་གཙོ་བོར་བསྐྱེད་པ་མ་ཧཱ་ཡོ་གའི་ཉམས་ལེན་གྱི་གནད་དང་མཐུན་ལ། ཡང་མཆོག་དབང་སྐོར་གསུམ། ལུས་དཀྱིལ་སྒོམ་རིམ། བག་ཆགས་རང་གྲོལ། ཐབས་ལམ་བདེ་ཆེན་གྱི་ཁྲིད་ལ་སོགས་པ་འགའ་རེ་ལུང་ཨ་ནུ་ཡོ་གའི་ཉམས་ལེན་དང་གཙོ་བོར་མཐུན་ཤས་ཆེ་བ་ཡིན་ཞིང་། སྐྱེ་གནས་བར་དོ་དང་། བསམ་གཏན་བར་དོའི་ཁྲིད། རིག་པ་ངོ་སྤྲོད་ཅེར་མཐོང་རང་གྲོལ་དེ་ཚོ་ཕྱག་རྫོགས་ཟུང་འཇུག དེའི་ནང་ནས་ཀྱང་རྫོགས་ཆེན་ཁྲེགས་ཆོད་ཀྱི་ཉམས་ལེན་གྱི་གནད་བསྡུས་པ་ཡིན་པ་དང་། སྐུ་གསུམ་ངོ་སྤྲོད་དང་། ཐོད་རྒལ་སྒྲོན་དྲུག་གི་ཁྲིད་ལ་སོགས་པ་མང་པོ་ཞིག་རྫོགས་ཆེན་མན་ངག་སྡེའི་སྐོར་དུ་གཏོགས་སོ། །ད་རུང་ལམ་གྱི་ཆ་ལག་མ་བསྒོམས་སངས་རྒྱས་ཆོས་ལྔ་གསུང་རྒྱུའི་ལམ་གྱི་སྐྱེལ་མ་ལྟ་བུ་འཕོ་བ་དྲན་པ་སངས་རྒྱས། དེ་ལ་བརྟན་པ་མ་ཐོབ་ན་བསུ་མ་ལྟ་བུ་བར་དོའི་ངོ་སྤྲོད་ཐོས་པས་སངས་རྒྱས། ཉམས་ལེན་མི་ཤེས་པའི་ཐ་མལ་བའི་སྐྱེ་བོ་ལ་བཏགས་པས་གྲོལ་བ་འཁོར་ལོའི་གདམས་པ། ཟོས་པས་འཚང་རྒྱ་བ་སྐྱེ་བདུན་གྱི་རིལ་བུ་ལ་སོགས་པ་ཡོད་དོ། །རྫོགས་རིམ་བར་དོ་དྲུག་གི་དངོས་གཞིའི་ཁྲིད་ཡིག་དེ་ཚོ་ལ་མཚོན་ན་སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ་ཕྱི་ནང་གི་ཐོས་བསམ་གྱིས་སྒྲོ་འདོགས་གཅོད་པ་ཐི་བྱ་ཚང་དུ་འཇུག་པ་ལྟ་བུའི་གདམས་ངག་ཐེ་ཚོམ་མི་དགོས་པར་གྲོལ་བ་ཐོབ་པའི་ཆོས་དང་གཅིག རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ་བག་ཆགས་ཀྱི་མཚམས་སྦྱོར་ཞིང་འོད་གསལ་ལམ་དུ་འཁྱེར་བ་མུན་ཁང་དུ་སྒྲོན་མེ་བཏེག་པ་ལྟ་བུའི་ལམ་ཚད་རང་གིས་འཛིན་ཆོག་པའི་གདམས་ངག་དང་གཉིས། བསམ་གཏན་བར་དོའི་ཁྲིད་ཡིག་རིག་པ་རང་གྲོལ་དྭ་ཕྲུག་མ་དང་འཕྲད་པ་ལྟ་བུའམ་སྒེག་མོས་མེ་ལོང་ལ་བལྟ་བ་ལྟ་བུ་ཟུང་འཇུག་གཉིས་མེད་དུ་གྲོལ་བའི་གདམས་ངག་དང་གསུམ། འཆི་ཁ་བར་དོའི་ཁྲིད་ཡིག་དྲན་པ་རང་གྲོལ་མི་གསལ་བ་ལ་གསལ་གདབ་པ་རྒྱལ་པོས་བཀའ་ཐེམ་བསྐུར་པ་ལྟ་བུ་ཆོས་ཉིད་རང་ངོ་འཕྲོད་པའི་གདམས་ངག་དང་བཞི། ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུ་གདོད་མའི་གྲོལ་སར་སྤར་གྱིས་འདེབས་པའི་གདམས་ངག་དང་ལྔ། སྲིད་པ་བར་དོའི་ཁྲིད་ཡིག་སྲིད་པ་རང་གྲོལ་ཡུར་བ་རྐང་ཆད་ལ་ཝ་འཛུགས་པ་ལྟ་བུ་སྐྱེ་བ་སྤྲུལ་སྐུའི་གདམས་ངག་དང་དྲུག་ཡོད་དོ། །དེ་ཐམས་ཅད་ཀྱང་རེ་རེ་བཞིན་དུ་བར་དོའི་ངོ་བོ། ངེས་ཚིག དབྱེ་བ། རང་བཞིན། མཚན་ཉིད། ས་མཚམས། དཔེ་དྲུག རྟགས་དྲུག གནས་དྲུག ལུས་དྲུག ཚེ་ཚད་དྲུག དེ་བཞིན་དུ་བར་དོ་རེ་རེ་བཞིན་དུ་བར་དོའི་སྣང་ལུགས། ངོ་སྤྲོད། ཉམས་ལེན། གདམས་ངག ཉེས་དམིགས། ཕན་ཡོན། རྩ་ཚིག་དང་བཅས་རྣམ་གྲངས་དྲུག་གསུམ་བཅོ་བརྒྱད་ཀྱི་ཐོག་ནས་བར་དོའི་ཆོས་ཐམས་ཅད་གཏན་ལ་ཕབ་ནས་གསུངས་སོ། །འདི་ལ་ཆོས་བཀའ་གཞན་གྱི་ཕ་རྒྱུད་ཀྱི་རིམ་ལྔ་ཞེས་པ་དང་། མ་རྒྱུད་ཀྱི་ཕྱག་རྒྱ་བཞི་ཞེས་པ་དང་། དེ་མིན་སྦྱོར་དྲུག་ལ་སོགས་པའི་རྫོགས་རིམ་ཐམས་ཅད་ཀྱི་གནད་ཡོངས་རྫོགས་འདུས་ཡོད་པ་ཡིན་ནོ། །ད་རེས་ཀྱི་སྐབས་སུ་བཤད་བྱ་ལས་བྱང་རྩར་ཕྲེང་ཚོར་བ་རང་གྲོལ་རྒྱས་བསྡུས་འདི་ལྟ་བུ་ཡིན་ན་སྒྲ་ཐལ་འགྱུར་རྩ་བའི་རྒྱུད་ལ་སོགས་པ་རྒྱུད་བཅུ་བདུན་དང་སྒྱུ་འཕྲུལ་སྡེ་བརྒྱད་ལ་སོགས་པའི་སྤྱི་རྒྱུད་དེ། འདི་ནས་སྒྱུ་འཕྲུལ་སྡེ་བརྒྱད་ཅེས་པའི་སྒྱུ་འཕྲུལ་སྡེ་བརྒྱད་འདི་རྡོར་སེམས་སྒྱུ་འཕྲུལ་དྲ་བ་སྡེ་བརྒྱད་ལ་གོ་དགོས། སྒྱུ་འཕྲུལ་དྲ་བ་ཡོད་ཚད་ལ་གོ་སོང་ན་ཁྱབ་ཆེ་སོང་བ་ཡིན་ལ། རྡོར་སེམས་སྒྱུ་འཕྲུལ་དྲ་བ། རྣམ་སྣང་སྒྱུ་འཕྲུལ་དྲ་བ། ལྷ་མོ་སྒྱུ་འཕྲུལ་དྲ་བ། འཇམ་དཔལ་སྒྱུ་འཕྲུལ་དྲ་བ་ལ་སོགས་པ་ཡོད་ཅིང་། འདིར་སྒྱུ་འཕྲུལ་སྡེ་བརྒྱད་གསུང་རྒྱུ་འདི་རྩ་རྒྱུད་གསང་བ་སྙིང་པོ་སེམས་དང་ཡེ་ཤེས་རང་སྣང་བར་བསྟན་པའི་བརྗོད་བྱ་ཅན་དེ་ཉིད་དང་། ཕྲིན་ལས་རྫོགས་པར་བསྟན་པའི་སྒྱུ་འཕྲུལ་བཞི་བཅུ་བ་བཤད་རྒྱུད། དཀྱིལ་འཁོར་རྫོགས་པར་བསྟན་པའི་སྒྱུ་འཕྲུལ་བརྒྱད་པ། དབང་བསྐུར་གསལ་བར་བསྟན་པ་སྒྱུ་འཕྲུལ་བླ་མ། དམ་ཚིག་མཆོག་ཏུ་བསྟན་པ་སྒྱུ་འཕྲུལ་ལེ་ལག ཡོན་ཏན་རྒྱས་པར་བསྟན་པ་སྒྱུ་འཕྲུལ་བརྒྱད་ཅུ་བ། ལྷའི་སྐུ་མདོག་དང་ཕྱག་མཚན་བསྟན་པ་སྒྱུ་འཕྲུལ་རྡོ་རྗེའི་མེ་ལོང་། དེའི་སྟེང་དུ་སྒྱུ་འཕྲུལ་རྒྱ་མཚོ་དང་ཐལ་བ་གཉིས། རྒྱ་མཚོ་དང་ཐལ་བ་གཉིས་ཀ་གང་ཡིན་ཟེར་ན། རྒྱ་མཚོ་དེ་འོད་གསལ་གཙོ་བོར་བསྟན་པ་དང་། ཐལ་བ་ནི་ཐབས་ལམ་གཙོ་བོར་བསྟན་པ་སྟེ་དེ་དག་ཐམས་ཅད་ཡིན་ནོ། །དེ་ཡིས་མི་ཚད་པར་ལས་བྱང་རྩར་ཕྲེང་འདི་གླང་པོ་རབ་འབོགས། མན་ངག་སྙིང་གོང་། བཀའ་བརྒྱད་གསང་འདུས། ཀློང་གསལ་ཉི་མའི་རྒྱུད་ལ་སོགས་པའི་སྒོས་རྒྱུད་རྣམས་ཀྱི་སྙིང་པོ་གཅིག་ཏུ་དྲིལ་བ་ཡིན་ནོ། །ཡང་ཞི་ཁྲོ་དཔང་ཀོང་གི་དོན་བསྡུས་བརྒྱ་ཕྱག དྲི་མེད་ཕྱག་རྒྱུད་ཀྱི་དོན་བསྡུས་ཀློང་བཤགས་ལ་སོགས་པ་མདོར་ན་དབང་པོ་རྣོ་རྟུལ་ལ་མ་ལྟོས་པའི་གང་ཟག་གཅིག་འཚང་རྒྱ་བའི་ལམ་གྱི་རིམ་པ་ཆ་ཚང་ཞིབ་རྒྱས་སུ་བཞུགས་པ་ཡིན་ནོ། །འདིའི་བརྒྱུད་ཚུལ་གྱི་ལོ་རྒྱུས་དང་འབྲེལ་བའི་ཆོས་ཀྱི་ཆེ་བའི་ཐོག་ནས་བཤད་ན་ཁ་རྩང་ང་ཚོས་དབང་བསྐུར་དུས་དབང་གི་ལོ་རྒྱུས་ཀྱི་ནང་ནས་བྱུང་བ་བཞིན་དུ་སྔར་སློབ་དཔོན་ཆེན་པོ་བོད་ཡུལ་དུ་དངོས་སུ་ཕྱགས་ཕེབས། བོད་ཀྱི་ལྷ་འདྲེ་མ་རུང་བ་ཐམས་ཅད་བཏུལ། མདོ་སྔགས་དམ་པའི་ཆོས་ཀྱི་ཉི་ཟླ་ཟུང་གཅིག་ཤར་ནས་བོད་ཡུལ་དམ་ཆོས་ཀྱི་འབྱུང་གནས་སུ་བསྒྱུར་བའི་སྐབས་སུ་སློབ་དཔོན་ཆེན་པོ་སྲིན་ཡུལ་ལ་འབྱོན་རན་ཁའི་ཉིན་ཞིག་ལ་སློབ་དཔོན་ཆེན་པོའི་མདུན་དུ་ཆོས་རྒྱལ་ཚངས་པ་ལྷའི་མེ་ཏོག་ཡབ་སྲས་དང་། མཁའ་འགྲོ་ཡེ་ཤེས་མཚོ་རྒྱལ། ལོ་ཙཱ་བ་ཅོག་རོ་ཀླུའི་རྒྱལ་མཚན་ལ་སོགས་པ་ལས་ཅན་དག་པའི་འཁོར་མང་པོ་ཞིག་འདུས་ནས་དེ་རྣམ་པས་གསེར་གཡུ་ལ་སོགས་པའི་རིན་པོ་ཆེའི་མཎྜལ་མང་པོ་ཞིག་གུ་རུ་རིན་པོ་ཆེ་ལ་ཕུལ་ཏེ། ཆོས་རྒྱལ་ཁྲི་སྲོང་ལྡེའུ་བཙན་གྱིས་གཙོ་བོར་མཛད་དེ་གུ་རུ་རིན་པོ་ཆེ་ལ་སློབ་དཔོན་དུས་གསུམ་མཁྱེན་པ་ཁྱེད་ཀྱི་བཀའ་དྲིན་གྱིས་བོད་ཡུལ་མུན་པའི་གླིང་འདིར་ཐེག་པ་གོང་འོག་རྒྱུད་སྡེ་ཕྱི་ནང་གི་ཆོས་ཀྱི་སྒྲོན་མེ་སྦར་བར་བྱས་ཤིང་། ཆེ་ཐོབ་ཆེ་ཡིས་འཚེངས་ལ། ཆུང་ཐོབ་ཆུང་གིས་འཚེངས་ཡོད་ཀྱང་། བདག་མངའ་བདག་རྒྱལ་པོ་རྗེ་འབངས་དང་ཁྱད་པར་དུ་མ་འོངས་ཕྱི་རབས་ཀྱི་འགྲོ་བའི་དོན་དུ་ཆོས་ཐམས་ཅད་ཀྱི་འགག་དོན་གཅིག་ཏུ་དྲིལ་བའི་ཚེ་ལུས་གཅིག་གི་སྟེང་དུ་སངས་རྒྱས་འཐོབ་ཐུབ་པའི་ཆོས་ཡུན་རིང་གི་དཀའ་སྤྱད་དང་སྡུག་རུས་འབད་བརྩོན་ལ་མི་ལྟོས་པའི་ཐོས་པ་ཙམ་གྱིས་གྲོལ་བའི་ཆོས་ཟབ་དོན་འདུས་པ་ཞིག་གནང་རོགས་གྱིས་ཞེས་དེ་ལྟར་ཞུས་པས། གུ་རུ་རིན་པོ་ཆེས་ཞལ་དགྱེས་འཛུམ་གྱི་ངང་རྒྱལ་བློན་རྗེ་འབངས་ལས་ཅན་གྱི་འཁོར་ལ་གཟིགས་ནས་ཁྱེད་རྒྱལ་པོ་ཡབ་སྲས་རྗེ་བློན་དང་བཅས་པའི་ཐུགས་བཞེད་བཞིན་དཔལ་ཀུན་ཏུ་བཟང་པོའི་དགོངས་པ་མངོན་དུ་ཕྱུང་བ། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་གནད་འགག་གཅིག་ཏུ་དྲིལ་བ། ཐོས་པ་ཙམ་གྱིས་ངན་སོང་གི་སྐྱེ་སྒོ་གཅོད་པ། གོ་བ་ཙམ་གྱིས་བདེ་ཆེན་གྱི་ཞིང་ལ་འདྲེན་པ། དོན་ཡིད་ལ་བྱས་ན་ལྷུན་གྲུབ་རིག་འཛིན་གྱི་ས་ལ་སྙེག་ཐུབ་པ། གང་འབྲེལ་ཚད་དོན་དང་ལྡན་པའི་ཆོས་ཤིག་ཡོད་ཀྱང་། ཁྱབ་གདལ་དུ་སྤེལ་ཉེས་སོང་ན་གདུལ་བྱ་བློ་ཆུང་སྐལ་དམན་ལོག་ལྟ་ཅན་གྱིས་བློ་ལ་མི་ཤོང་ནས་སྐུར་འདེབས་བྱས་ན་ངན་སོང་དུ་འཕེན་པས་དེ་ལྟ་བུའི་གང་ཟག་ལ་རླུང་ཕྱོགས་སུའང་སྒྲོག་མི་ཉན་ཞིང་། ཆོས་འདི་མ་འོངས་སྙིགས་མའི་དུས་ཀྱི་སྐལ་ལྡན་འགྲོ་བའི་དོན་དུ་གཏེར་དུ་སྦོས་གསུངས་ལ། ཆོས་ཟབ་མོ་དེའི་མཚན་ལ་ཟབ་ཆོས་ཞི་ཁྲོ་དགོངས་པ་རང་གྲོལ་བཏགས་ཏེ་ཆོས་བཀའ་ཡོངས་རྫོགས་གནང་ནས་མཐར་གཏེར་དུ་སྦས་པ་ཡིན་ནོ། །གུ་རུའི་གཏེར་ལུང་གི་ཁ་བྱང་གི་ནང་དུ། དེ་དུས་སྙིང་གི་བུ་མཆོག་སྐལ་ལྡན་ཞིག །ཕ་ལ་གྲུབ་ཐོབ་ཉི་ཟླའི་མིང་ཅན་འབྱུང་། །ཀརྨ་གླིང་པ་ཞེས་བྱའི་སྙིང་སྟོབས་ཅན། །བརླ་གཡས་སྨེ་བ་ཡེ་ཤེས་སྤྱན་འབྲས་མཚན། །འབྲུག་སྦྲུལ་ལོ་པ་ལས་ཀྱི་དཔའ་བོའི་རིགས། །སྐལ་ལྡན་སྐྱེས་བུ་དེ་དང་འདི་འཕྲད་ཤོག །ཅེས་གསུངས་ནས་སྨོན་ལམ་གཏད་རྒྱ་མཛད་པ་ཡིན་ཞིང་། སྨོན་ལམ་གཏད་རྒྱ་མཛད་པ་ལྟར་དུ་འདོན་དུས་འདུལ་བྱང་དུས་རྟགས་རྟེན་འབྲེལ་དང་བཅས་པ་སྟོབས་སུ་བདོ་བའི་གནས་སྐབས་ན། ཡབ་གྲུབ་ཐོབ་ཉི་ཟླ་སངས་རྒྱས་ཞེས་པ་དགུང་ལོ་བརྒྱ་དང་ཉི་ཤུ་བཞུགས་མཁན་དེའི་སྲས་གྲུབ་ཐོབ་གཏེར་སྟོན་གྱི་རྒྱལ་པོ་ཀརྨ་གླིང་པས་སྒམ་པོ་གདར་གྱི་རི་བོའམ་དྭགས་ལ་སྒམ་པོའི་རི་ལྷ་བྲན་གར་སྟབས་བྱེད་པ་དང་འདྲ་བའི་གཏེར་གནས་ནས་སྤྱན་དྲངས་ཏེ། ཁོང་རང་ཉིད་ཀྱི་དངོས་སློབ་བཅུ་གཅིག་གི་ནང་ནས་མཆོག་ཏུ་གྱུར་པ་སྐུ་སྲས་ཉི་ཟླ་ཆོས་རྗེ་ལ་གནང་། དེས་གུ་རུ་ཉི་ཟླ་འོད་ཟེར་ལ་གནང་། དེས་ཆོས་བདག་ནམ་མཁའ་རྒྱ་མཚོ་ལ་བརྒྱུད་དེ་བརྒྱུད་པ་གསུམ་གྱི་ཚེ་དེར་ཆིག་བརྒྱུད་མ་གཏོགས་བཀའ་རྒྱ་མ་ཁྲོལ་བ་ཡིན་ནོ། །དེའི་མཚམས་སུ་སྤེལ་ཆོག་རྒྱུ་དབྱིངས་ཀྱི་མཁའ་འགྲོའི་ལུང་བསྟན་ལྟར་ཆོས་བདག་བཀའ་བབ་ཀྱི་བདག་པོ་རྒྱ་ར་བ་ནམ་མཁའ་ཆོས་ཀྱི་རྒྱ་མཚོའི་སྐུ་ཚེའི་སྨད་ཙམ་ཞིག་ཏུ་བཀའ་རྒྱ་ཡོངས་སུ་རྫོགས་པ་ཁྲོལ་ནས་དབང་ཁྲིད་རྒྱས་པའི་ལུགས་ལྟར་དུ་ཐུགས་ཆེན་ཀརྨ་ཆགས་མེད་ནས་གྲུབ་ཐོབ་རྫོགས་ཆེན་རིན་པོ་ཆེ་པདྨ་རིག་འཛིན་ནས་ད་ལྟའི་བར་བརྒྱུད་པའི་བརྒྱུད་པ་དེ་ལྟར་ལགས་སོ། །ངའི་འདིའི་དབང་འདི་ཐུབ་བསྟན་ཆོས་ཀྱི་རྡོ་རྗེ་ནས་མཁྱེན་བརྩེ་ཆོས་ཀྱི་བློ་གྲོས་ལ་བརྒྱུད་པ་དང་། ཁྲིད་ཡིག་བར་དོ་དྲུག་ཁྲིད་དེ་མི་འགྱུར་ནམ་མཁའི་རྡོ་རྗེ་ནས་འཇིགས་མེད་ཡོན་ཏན་མགོན་པོའི་བར་བརྒྱུད་པའི་བརྒྱུད་པ་ནི་རང་ཅག་གི་ཀློང་ཆེན་སྙིང་ཐིག་གི་བརྒྱུད་པ་མི་འགྱུར་ནམ་མཁའི་རྡོ་རྗེ་མན་ཆད་འདྲ་འདྲ་ཡིན་ཞིང་། འདིའི་འདོན་ཆའི་བཀླག་ལུང་ནི་འཇིགས་བྲལ་བྱང་ཆུབ་རྡོ་རྗེའི་མདུན་ནས་ཐོབ་པ་ཡིན་ནོ། །ལས་བྱང་གི་འཆད་ཁྲིད་ཀྱི་རྒྱུན་ཟེར་རྒྱུ་ཞིག་ཁ་ཁར་ཐོབ་མ་མྱོང་ལ། སྔོན་ཆད་འདི་འདྲས་ཁྲིད་རྒྱུའི་ཕྱག་སྲོལ་ཡོད་མེད་མི་ཤེས་མོད། སྨིན་བྱེད་དབང་གི་སྐབས་ནས་བསྐྱེད་རིམ་གཙོ་བོར་བྱས་ནས་དབང་ཁྲིད་སྦྲགས་མར་མཛད་པ་ཡིན་ཞིང་། གྲོལ་བྱེད་ཁྲིད་ཀྱི་སྐབས་ནས་རྫོགས་ཆེན་གྱི་ཁྲིད་ཡིག་གཞན་དང་འདྲ་བར་མྱོང་ཁྲིད་ཆིག་བརྒྱུད་མར་མཛད་ནས་གསུངས་པ་ཡིན་ལ། དེའི་ཐོག་ཏུ་ལྗགས་ལུང་ཐོབ་ན་དབང་ཁྲིད་ལུང་གསུམ་གྱི་ནང་དུ་མ་འདུས་པའི་བཀའ་རྒྱ་གསར་པ་ཞིག་ཡོད་པ་མ་ཡིན་ནོ། །དེས་ན་ལས་བྱང་གི་ཐོག་ནས་བསྐྱེད་རྫོགས་ཀྱི་ལམ་ལ་མོས་པ་ཅན་དང་། ད་རེས་བསྙེན་སྒྲུབ་ཀྱི་དགོས་མཁོ། ཁྱད་པར་དུ་སྔགས་ལ་མོས་པའི་གང་ཟག་ལས་དང་པོ་པ་དང་། གྲོང་ཆོག་པ་རྣམས་ལ་བསམ་བློ་རེ་བཏང་ནས་ཤི་བོ་འཁྱག་སྒང་ངེར་སོང་བའི་ཆོས་མེད་ཀྱི་སེམས་ཅན་རྣམ་ཤེས་བར་དོ་ལ་འཁྱམ་བཞིན་ཡོད་པ་དང་། གསོན་པོ་གཟེར་རིལ་ལེར་ཡོད་པའི་དབུགས་ཕར་འཕེན་ཚུར་འཕེན་ལ་འཆི་ཁའི་འཇིགས་སྐྲག་གིས་མནར་བཞིན་ཡོད་པ་རྣམས་ལ་མགོ་མི་གཡོག་པའི་ཆེད་དང་། བསྐྱེད་རྫོགས་ཀྱི་དོན་མ་དགོས་དང་ཚིག་རྗེས་དོན་དྲན་ཙམ་ཞིག་དང་། དེ་མ་དགོས་དང་ཆོ་ག་སྒྲ་དག་སྒྲོས་གཙང་ཀློག་འདོན་གྱི་ས་མཐའ་ར་མཐའ་ཡག་པོ་ཞིག་གཅད་མི་ཤེས་པར་ད་རུང་མིང་ཆེན་པོའི་ཁ་བྱང་རྫུན་མ་རེ་ཡི་ཕག་ཏུ་དད་རྫས་དང་དཀོར་རྫས་ལ་བརྔམས་ཏེ། སྤྱང་རྟ་ཟོས་ཁོག་པ་ལུག་རོས་མི་བརྒྱག་ནས་ཧཱུྃ་གིས་རྟ་ཕཊཿཀྱིས་མཛོ་ཞེས་པའི་དཔེ་ལྟར་ལོག་འཚོས་ཟས་ནོར་སྒྲུབ་པའི་ལག་ཆ་ཆོས་ཀྱིས་བྱེད་པ། གསང་སྔགས་བོན་གྱེར་ཆོས་ལ་དབང་ཟ་བའི་ཉེས་པ་འགོག་པའི་ཆེད་དུ་བསམས་ནས། སྐུལ་བ་པོ་འགའ་རེའི་དགོངས་བཞེད་བཞིན་ད་རེས་ཀྱི་དུས་སྐབས་འདི་དང་བསྟུན་ཏེ་ལས་བྱང་ཆུང་བའི་ཐོག་ནས་བཤད་འཆར་ཡིན་ཞིང་། ལས་བྱང་ཆེ་ཆུང་གཉིས་ཀ་ཚིག་གི་རྒྱས་བསྡུས་ཙམ་མ་གཏོགས་བསྐྱེད་རྫོགས་ཀྱི་དོན་གྱི་འགྲོས་གཅིག་ཡིན་ནོ།། ༼ཀ༽ཐོག་མར་དགེ་བ་ཀླད་ཀྱི་དོན། ༼ཀ མཚན་གྱི་དོན་བཤད་པ། འདི་འཆད་པ་ལ་ཐོག་མཐའ་བར་གྱི་དགེ་བ་གསུམ་གྱི་ཆིངས་ཀྱིས་བཅིངས་ནས་བཤད་དགོས་པ་ཡིན་ན་འདིའི་ཐོག་མར་དགེ་བ་ཀླད་ཀྱི་དོན་ལ། མཚན་བསྟན་པ། ཕྱག་འཚལ་བ། བསྟན་པར་དམ་བཅའ་བ་དང་གསུམ་ཡོད་པའི་དབང་དུ་བྱས་ན་དང་པོ་མཚན་ནི། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོ་བཞུགས་སོ༔ ཞེས་གསུངས་ཏེ། མཚན་དོན་འགྲེལ་ན་ཟབ་ཆོས་ཞེས་གསུངས་པ་ནི་ཐེག་པ་ཐམས་ཅད་ཀྱི་རྩེ་མོ། ནང་རྒྱུད་ཡོ་ག་གསུམ་གྱི་ཡང་སྙིང་། འཇམ་དཔལ་སྒྱུ་དྲྭ་ལས། དོན་ཟབ་དོན་ནི་རྒྱ་ཆེ་ཞིང་། །དོན་ཆེན་མཚུངས་མེད་རབ་ཞི་བ། །ཞེས་གསུངས་པ་ལྟར་མན་ངག་ཐམས་ཅད་ཀྱི་གནད་དྲིལ་བའི་གདམས་པ་ཟབ་མོ་གསེར་ཆོས་ཡིན་པས་ན་ཟབ་ཆོས་སོ། །ཞི་ཁྲོ་ཞེས་པ་ནི་སངས་རྒྱས་ཀྱི་སྐུ་གསུམ་དང་རྣམ་པར་འཕྲུལ་བ་དང་། དེ་དང་དེའི་ཞིང་ཁམས་ཚད་མེད་པའི་ནམ་མཁས་གར་ཁྱབ་ལ་ཆོས་སྐུ་དང་ལོངས་སྐུས་ཁྱབ། སེམས་ཅན་གྱིས་གར་ཁྱབ་ལ་སྤྲུལ་སྐུ་དང་ཕྲིན་ལས་ཀྱིས་ཁྱབ་ཡོད་པ་ཡིན་ལ། གདུལ་བྱའི་སེམས་ཅན་གང་དང་གང་ལ་འདུལ་བྱེད་ཀྱི་རྣམ་རོལ་དེ་དང་དེར་སྣང་བའི་ཞི་བ་དང་ཁྲོ་བོའི་སྐུའི་རྣམ་པ་དང་ཆ་ལུགས་སུ་སྣང་བ་ལ་ཞི་ཁྲོ་ཞེས་བྱའོ། །ཡང་ན་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་ཐད་ནས་མཐའ་དབུས་བྲལ་བའི་འོག་མིན་ཆེན་པོའི་ཞིང་ཁམས་ན་ཡེ་ཤེས་རིན་པོ་ཆེའི་གཞལ་ཡས་ཁང་ཕྱི་དང་ནང་མེད་པ་ན། གསང་སྙིང་ལས། རྡོ་རྗེའི་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་གསུངས་པ་ལྟར་དུ་ཡེ་ཤེས་ལྔའི་རང་བཞིན་རིགས་ལྔར་ཤར་བའི་གཙོ་འཁོར། གཅིག་ལས་དུ་མར་ཤར་བའི་ཞི་བའི་དཀྱིལ་འཁོར་གྱི་ལྷ་ཚོགས། རྒྱུད་ཉི་ཟླ་ཁ་སྦྱོར་ལས། ཙིཏྟ་རིན་ཆེན་གཞལ་ཡས་ན། །ཞི་བའི་དཀྱིལ་འཁོར་བཞི་བཅུ་གཉིས། །སྐུ་ནི་སྣང་ལ་རང་བཞིན་མེད། །ཆ་ཕྲ་འོད་གསལ་སྙིང་ཁར་བཞུགས། །ཞེས་དང་། གདངས་ཀྱི་ཁྲག་འཐུང་ལྔ་བཅུ་བརྒྱད། །དུང་ཁང་བྷནྡྷའི་གཞལ་ཡས་ན། །ཞེས་གསུངས་པ་ལྟར་དུ་རྣལ་འབྱོར་བའི་རྡོ་རྗེའི་ལུས་གདན་གསུམ་ཚང་བའི་ཕུང་ཁམས་སྐྱེ་མཆེད་ལ་རྒྱལ་བ་ཞི་ཁྲོའི་ལྷ་ཚོགས་ཡེ་ནས་ཚང་ཡོད་པ་དང་། སྣོད་བཅུད་དག་མཉམ་ཆེན་པོ་སྐུ་དང་ཞིང་ཁམས་ཡེ་ནས་གྲུབ་བཞིན་དུ་ཡོད་པའི་ལྷ་ཚོགས་ཞི་བ་དང་ཁྲོ་བོ། གདུལ་བྱའི་ཁམས་ལ་ཡང་དེ་བཞིན་དུ་སྣང་བཞིན་དུ་ཡོད་པ་ཡིན་ནོ། །འདི་སྣང་བའི་སྣང་ལུགས་ལ་བསམ་ན་གསང་གསུམ་མི་ཟད་རྒྱན་གྱི་འཁོར་ལོའི་ཚུལ་དུ་སྣང་ལ། དེ་ཇི་ལྟར་ཡིན་ཞེ་ན། ཆོས་སྐུས་ཆོས་དབྱིངས་ཀྱིས་གར་ཁྱབ། ལོངས་སྐུས་ནམ་མཁས་གར་ཁྱབ། སྤྲུལ་སྐུས་གདུལ་བྱའི་འཇིག་རྟེན་བསམ་གྱིས་མི་ཁྱབ་པ་ཐམས་ཅད་ལ་ཁྱབ་པར་མཛད་དེ་ཞི་དང་ཁྲོ་བོ་མི་ཟད་རྒྱན་འཁོར་སྣ་ཚོགས་ཀྱི་ཚུལ་གྱིས་སྣང་བ་ཡིན་ནོ། །འདི་ནས་ཟབ་ཆོས་ཞི་ཁྲོ་ཞེས་གསུངས་པའི་སྐབས་སུ་དེ་ལྟ་བུ་ཟབ་དང་རྒྱ་ཆེ་གཏིང་དཔག་དཀའ་བའི་སངས་རྒྱས་ཀྱི་རོལ་བ་རྨད་དུ་བྱུང་བ། གསང་བ་བསམ་གྱིས་མི་ཁྱབ་པ། ཀུན་ཏུ་བཟང་པོའི་ཐུགས་བཅུད། སྐུ་གསུམ་གསང་བ་གསུམ་གྱི་བྱིན་རླབས་ཀྱི་བཅུད། དགུ་ལྡན་བརྒྱུད་པའི་དགོངས་པའི་ཀློང་ནས་གནད་དུ་དྲིལ་ཏེ་སྒྲ་ཚིག་གི་ལམ་དུ་འཕོས་ནས་རྒྱུད་སྒྲུབ་ཐབས་དང་འབྲེལ་བའི་ཆོས་བཀའ་གསུངས་པ་ཞིག་ལ་གོ་དགོས་སོ། །རང་རེས་རྒྱུད་སྡེ་དང་སྒྲུབ་སྡེ་ཞེས་བཤད་པའི་སྐབས་སུ་སྤྱིར་བཤད་ཐབས་གསལ་བྱེད་ཀྱི་མན་ངག་རྒྱུད་ཀྱི་ཆིངས་ལྔ། ལུང་གི་སྡེབ་ལྔ། སྒྲུབ་ཐབས་ཀྱི་སྦྱོར་ལུགས་ལྔ་སོགས་དང་འབྲེལ་ནས་བཤད་དགོས་ཤིང་། རྒྱུད་ཀྱི་ཆིངས་ལྔ་ལ་མཚོན་ན་ཁོག་འབུབ་སྟོང་ཐུན་གྱི་ཆིངས། ས་གཅོད་ཚོམ་གྱི་ཆིངས། འགྲེལ་བ་འབྲུ་གནོན་གྱི་ཆིངས། ཊཱི་ཀ་བསྡུས་དོན་གྱི་ཆིངས། ལག་ལེན་མན་ངག་གི་ཆིངས་ཏེ་དེ་རྣམས་ཀྱིས་བཅིངས་པའི་ཐོག་ནས་བཤད་དགོས་སོ། ལུང་གི་སྡེབ་ལྔ་གང་ཡིན་ཞེ་ན། རྒྱུད་ལུང་སྒྲུབ་ཐབས་ཕྲིན་ལས་ལག་ལེན་རྣམས་ཁ་མི་ཕྲལ་ནས་གང་དང་གང་ལག་ལེན་ལ་འདེབས་ལུགས་ལ་གསུངས་པ་ཡིན་ལ། དེ་ཡང་རྒྱུད་ལུང་ལ་སྡེབ། ལུང་སྒྲུབ་ཐབས་ལ་སྡེབ། སྒྲུབ་ཐབས་ཕྲིན་ལས་ལ་སྡེབ། ཕྲིན་ལས་ལག་ལེན་ལ་སྡེབ། ལག་ལེན་ཉམས་མྱོང་ལ་སྡེབ་རྒྱུ་དེ་རྣམས་ཡིན་ནོ། །སྒྲུབ་ཐབས་ཁྱད་པར་དུ་བཤད་པའི་སྐབས་སུ་སྒྲུབ་ཐབས་ཀྱི་སྦྱོར་ལུགས་ལྔ་དེ་ངེས་པར་འབྲེལ་དགོས་པས། རྩ་བ་སྒྲུབ་ཐབས་དང་སྦྱོར། སྒྲུབ་ཐབས་ཕྲིན་ལས་དང་སྦྱོར། ཕྲིན་ལས་སྒོམ་ཁོག་དང་སྦྱོར། སྒོམ་ཁོག་ཏིང་ངེ་འཛིན་དང་སྦྱོར། ཏིང་ངེ་འཛིན་གདམས་པ་དང་སྦྱོར་བ་དེ་ལྟར་ཡིན་ནོ། །དགོངས་པ་རང་གྲོལ་གྱི་ཞེས་པ་ནི་གོང་ནས་གསང་གསུམ་མི་ཟད་རྒྱན་གྱི་འཁོར་ལོ་ཡི་གདུལ་བྱའི་སེམས་ཅན་གྱི་སྣང་ངོར་ཞི་ཁྲོའི་ལྷ་ཚོགས་གསུངས་པ་ལྟར་གྱི་ཆོས་ཐམས་ཅད་ཀྱི་ཆོས་ཉིད་ཀུན་ཏུ་བཟང་པོ་ཡེ་ཇི་བཞིན་པ། ཀུན་བཟང་ཀློང་ན་མི་བཟང་གཅིག་ཀྱང་མེད། །ཅེས་གསུངས་པ་དང་འདྲ་བར་ཆོས་སྐུའི་དགོངས་པ་དེ་ཡེ་གྲོལ་མཉམ་པ་ཆེན་པོ་དང་པོ་ཉིད་ནས་འཆིང་མ་མྱོང་བས་དགྲོལ་བྱ་དང་འགྲོལ་བྱེད་མེད་པའི་རང་གྲོལ། ཆོས་དབྱིངས་ཀྱི་དགོངས་པ་མི་གཡོ་མཁའ་མཉམ་ལ་ཁྱབ་པའི་བདག་ཉིད་གང་ཡིན་པ་སྟེ། དེ་ཉིད་སྐུ་གསུམ་སྟོན་པས་གསང་གསུམ་གྱི་ཐོག་ནས་འགྲོ་བ་ལ་བསྟན་ཡོང་དུས་མི་ཟད་རྒྱན་འཁོར་ཇི་ལྟ་བུའི་སྒོ་ནས་བཀོད་ཅེ་ན། ནང་གསལ་ཕྲ་བའི་ཡེ་ཤེས་འབྲས་ཆོས་ཐམས་ཅད་ཀྱི་རྟེན་དུ་གྱུར་པ་ཆོས་སྐུའི་སྐབས་སུ་ཆོས་སྐུ་ཀུན་བཟང་ཡབ་ཡུམ་སྐུ་མི་ཟད་ཞལ་ཕྱག་གི་མཚན་མ་ལས་འདས་པ། གསུང་མི་ཟད་སྒྲ་ཚིག་གི་རྣམ་པས་ཉན་དུ་མི་བཏུབ་པའི་བརྗོད་མེད་བརྗོད་བྲལ་སྐྱེ་བ་མེད་པའི་གསུང་། ཐུགས་མི་ཟད་ནང་གསལ་ཡེ་ཤེས་ལྔའི་ལྡོག་ཆ་ཙམ་དུའང་བཤད་རྒྱུ་མེད་པའི་སྤྲོས་པ་ཐམས་ཅད་ཞི་བའི་དབྱིངས་འདུས་མ་བྱས་པ། ལོངས་སྐུའི་སྐབས་སུ་ནམ་མཁའི་མཐའ་ཀླས་ཀྱི་རང་སྣང་ལྷུན་གྲུབ་སྟུག་པོ་བཀོད་པའི་ཞིང་དུ་སྐུ་མི་ཟད་མཚན་དང་དཔེ་བྱད་ཀྱིས་བརྒྱན་པ་ནམ་མཁའ་ལྟ་བུ། གསུང་མི་ཟད་ཞལ་གྱི་དཀྱིལ་འཁོར་ལས་འོད་ཟེར་འཕྲོས་པ་ཙམ་གྱིས་བརྗོད་བྱའི་དོན་ཁོང་དུ་ཆུད་ནུས་པ། ཐུགས་མི་ཟད་ཆོས་དབྱིངས་ཡེ་ཤེས་ལ་སོགས་པ་ཡེ་ཤེས་ལྔའི་མཚན་ཉིད་དུ་བཞུགས་པ་དེ་ལྟ་བུ་དང་། སྤྲུལ་སྐུའི་སྐབས་སུའང་གདུལ་ཞིང་འགྲོ་དྲུག་གི་གནས་ནམ་མཁའི་ཁམས་དང་མཉམ་པ་ལ་སྐུ་མི་ཟད་གང་ལ་གང་གིས་འདུལ་བ། གསུང་མི་ཟད་འགྲོ་དྲུག་སོ་སོའི་སྒྲ་སྐད་དང་། ཐུགས་མི་ཟད་ཇི་ལྟ་ཇི་སྙེད་ཀྱི་མཁྱེན་གཉིས་ཀྱི་ཡེ་ཤེས་རྒྱས་པས་འགྲོ་བའི་དོན་མཛད་པ་དེ་ལྟར་ཡིན་ནོ། །དེ་ལྟར་ན་སྒྱུ་འཕྲུལ་ལེ་ལག་ལས། མཉམ་ཉིད་དོན་རྟོགས་རང་རིག་རྒྱལ་པོ་དང་། །བླ་མེད་དོན་རྟོགས་ཐབས་ཆེན་འདི་དག་ཏུ། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་གསུངས་པ་ལྟར་དུ་གཞི་ལམ་འབྲས་གསུམ་གྱི་ཐོག་ནས་བཤད་ན་གཞི་སྣང་སྲིད་འཁོར་འདས་ཀྱི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན། ལམ་བསྐྱེད་རྫོགས་གཉིས་སུ་མེད་པ་སྤང་བླང་རེ་དོགས་ལས་འདའ་བར་བྱེད་པ། འབྲས་བུ་ལྷུན་རྫོགས་ཀུན་ཏུ་བཟང་པོའི་ས་ལ་ད་ལྟ་ཉིད་ནས་མཐར་ཕྱིན་པར་བྱེད་པའི་གཞི་ལམ་འབྲས་གསུམ་རྫོགས་པའི་དགོངས་པ་རང་གྲོལ་གྱི་ཞེས་དང་། ལས་བྱང་ཞེས་གསུངས་ཏེ་ལས་ནི་ཀརྨ་ཞེས་པའི་སྒྲ་ལས་དྲངས་ན་ཕྲིན་ལས་ལ་འཇུག་ཅིང་། ཞི་རྒྱས་དབང་དང་དྲག་པོའི་ལས་བཞིའི་ཕྲིན་ལས་སྒྲུབ་པའི་སྒྲུབ་ཐབས་མན་ངག་དང་འབྲེལ་བའི་བྱང་བུ། བྱེད་ལས་ཀྱི་ཆ་ནས་མཚན་བཏགས་པའི་ཚོར་བ་རང་གྲོལ། འགྲོ་བ་གང་གིས་འདིའི་སྒྲ་ཙམ་ཞིག་རྣ་བས་འདུས་ཏེ་རེག་པའི་ཚོར་བ་ཙམ་གྱིས་ཀྱང་ཨོ་རྒྱན་ཆེན་པོས། ཐོས་པ་ཙམ་གྱིས་གྲོལ་བ་བྱེད་པའི་ཆོས། །ཞེས་གསུངས་པ་ལྟར་ཡིན་ནོ། །ས་ཆ་འགའ་རེས་འདིའི་གླེགས་བམ་ལ་ཞི་ཁྲོ་ཞེས་དཀྱིལ་འཁོར་གྱི་ལྷའི་ཆ་ནས་མཚན་བཏགས་ལ། འགའ་རེས་ཐོས་གྲོལ་ཞེས་བྱེད་ལས་སམ་ནུས་པའི་ཆ་ནས་མཚན་བཏགས་པ་དང་འདྲ་བར་བསྟན་པ་བུ་གཅིག་གི་རྒྱུད་ལས། བཀླགས་པས་ཐོས་ཚད་འཚང་རྒྱ་བས། །དེ་ཕྱིར་ཐོས་གྲོལ་ཞེས་བྱའོ། །ཞེས་གསུངས་པ་ལྟར་ཚོར་བའམ་ཐོས་པ་ཙམ་གྱིས་གྲོལ་བར་བྱེད་པའི་ཆོས་ཡིན་པས་ལས་བྱང་གི་མཚན་ལ་ཚོར་བ་རང་གྲོལ་ཞེས་ངེས་བཟུང་མཛད་པ་ཡིན་ནོ། །ད་རུང་ལས་བྱང་ཆེ་བ་ལ་རྩར་ཕྲེང་ཞེས་གསུངས་པ་ནི་ཞི་ཁྲོ་འདུས་པའི་དཀྱིལ་འཁོར་གཅིག་སྒྲུབ་ཀྱི་ཆོ་ག ངོ་བོ་དང་གདངས་ཙམ་ལས་ཤར་བའི་ཞི་ཁྲོའི་ལྷ་ཚོགས་གཙོ་འཁོར་དང་བཅས་པ་དཀྱིལ་འཁོར་གཅིག་ཏུ་འདུས་པའི་རྩ་བའི་ལས་བྱང་ཆོ་གའི་རིམ་པ་ཕྲེང་བསྟར་དུ་བཀོད་པ་ཞེས་གསུངས་པ་ཡིན་ནོ། །འོ་ན་འདི་རྩར་ཕྲེང་མ་ཡིན་ནམ་སྙམ་ན། སྙིང་པོ་བཞུགས་སོ་ཞེས་པའི་སྙིང་པོ་གསུང་རྒྱུའི་ཚིག་དེ་འདི་ལ་ཡར་ལྷག་ཡོད་ཅིང་། ལས་བྱང་རྩར་ཕྲེང་རྒྱས་པ་དེ་ཉིད་འཁྱེར་བདེ་བའི་ཆེད་དུ་ཚིག་སྣ་བསྡུས་ཏེ་སྙིང་པོ་གནད་དུ་བསྡུས་པ་ལ་གོ་དགོས་སོ། །བཞུགས་སོ་ཞེས་པ་ནི་འདིར་མཆིས་པའམ་འདི་ན་ཡོད་པའི་ཞེ་སའི་ཚིག་ཅིག་ཡིན་ནོ། །མིང་མེད་ན་འཇིག་རྟེན་ཐམས་ཅད་རྨོངས་པར་འགྱུར་བ་ཡིན་ལ། འདི་ན་ཡོད་པའི་ལྷ་ཁང་གང་པོ་ལ་མི་རེ་ལ་མིང་རེ་མེད་ན་བོས་ནས་གོ་བརྡ་འཕྲོད་ཐབས་ཡོད་པ་མ་ཡིན་ཞིང་། ང་དང་ཁྱོད་ཅེས་པ་ཙམ་ཞིག་མེད་ན་བླང་དོར་གྱི་གནས་བསྟན་མི་ནུས་པར་མ་ཟད་བྱ་བ་ཐམས་ཅད་ལོང་བསྙབས་སུ་འགྱུར་བ་ཡིན་ནོ། །འཇིག་རྟེན་ཐམས་ཅད་རྨོངས་པར་འགྱུར་བ་དེ་ཉིད་བསལ་བའི་སླད་དུ་མགོན་པོ་ཐབས་ལ་མཁས་པ་དེ་ཉིད་ཀྱིས་ཆོས་རྣམས་མིང་དུ་གདགས་པར་མཛད་པའི་སྲོལ་དེ་མཛད་ཅེས་འཕགས་པ་ཀླུས་གསུངས་པ་ལྟར་དུ་ཆོས་རྣམས་མིང་དུ་གདགས་པར་མཛད་པ་ཡིན་ལ། མཚན་བཏགས་པའི་དགོས་པ་དབང་པོ་རྣོ་རྟུལ་འབྲིང་གསུམ་དང་སྦྱར་བའི་སྤྱི་འགྲོས་ལྟར་དུ་བྱས་ན་དེ་ལྟར་ཡིན་ནོ།། ༼ཁ ཕྱག་འཚལ་བ། དེ་ཡན་ཆད་ཀྱིས་མཚན་བསྟན་པ་སོང་ནས་ད་ནི་གཉིས་པ་ཕྱག་འཚལ་བ་ནི། ཞི་ཁྲོ་འདུས་པའི་ལྷ་ལ་ཕྱག་འཚལ་ལོ༔ ཞེས་གསུངས་ཏེ། རྒྱལ་བ་ཐམས་ཅད་ཀྱི་སྤྱི་མེས་ཀུན་ཏུ་བཟང་པོ་དང་། ཁྲོ་བོ་ཐམས་ཅད་ཀྱི་རྗེ་བཙན་དཔལ་ཆེ་མཆོག་ཧེ་རུ་ཀ་དཀྱིལ་འཁོར་གྱི་གཙོ་བོར་བཞུགས་པའི་ཞི་བ་རྡོ་རྗེ་དབྱིངས་ཀྱི་ལྷ་ཚོགས་དང་། ཁྲོ་བོ་མངོན་པར་འབྱུང་བའི་དཀྱིལ་འཁོར། ཞི་བ་དང་ཁྲོ་བོའི་སྤྲིན་རབ་འབྱམས་ཀྱི་ལྷ་ཚོགས། ཞི་བ་བཞི་བཅུ་རྩ་གཉིས་དང་ཁྲག་འཐུང་ལྔ་བཅུ་རྩ་བརྒྱད་དེ་ཞི་ཁྲོ་དམ་པ་རིགས་བརྒྱའི་ལྷ་ཚོགས། དེ་ཡང་ཡེ་ཤེས་ཀྱིས་བསྐུལ་བའི་གཙོ་བོ་གཅིག་གི་ཆོ་འཕྲུལ་ཡིན་པས་རང་ལས་ཤར་བའི་ལྷ་ཚོགས་དཀྱིལ་འཁོར་གཅིག་ཏུ་འདུས་པས་ན་ཞི་ཁྲོ་འདུས་པ་སྟེ། དཔེར་བཞག་ན་གསེར་གྱི་བྱང་བུ་གཅིག་གི་ངོས་ལ་ལྷ་ཚོགས་གཙོ་འཁོར་མང་པོ་ཞིག་གི་རི་མོ་བཀོད་ཡོད་ན་ཐམས་ཅད་གསེར་གྱི་བྱང་བུ་གཅིག་ལས་མ་འདས་པ་བཞིན་དུ་སྣོད་བཅུད་དག་མཉམ་ཆེན་པོ་བདེ་ཆེན་ཡེ་ཤེས་ཀྱི་དཀྱིལ་འཁོར་ཞི་ཁྲོའི་དཀྱིལ་འཁོར་གཅིག་ཏུ་འདུས་པ་དེ་གང་བཤད་པར་བྱ་བའི་ཆོས་དང་། ཕྱག་འཚལ་བའི་ཡུལ་དང་། སྒྲུབ་པ་ཕྲིན་ལས་ལ་སོགས་པའི་གཞིར་གྱུར་པ་དེ་ཉིད་ཡིན་ནོ། །ཕྱག་འཚལ་བ་འདི་ལ་གང་ཟག་དབང་པོ་རབ་འབྲིང་ཐ་གསུམ་གྱིས་ཕྱག་འཚལ་ལུགས་ལ་ཀུན་རྫོབ་བརྡ་ཡིས་ཕྱག་འཚལ་བ་དང་། དོན་དམ་ཆོས་ཉིད་ཀྱིས་ཕྱག་འཚལ་བ་གཉིས་ཀ་སྦྱར་ནས་བཤད་ན་དབང་པོ་ཐ་མ་དང་འབྲིང་དུ་གྱུར་བའི་གང་ཟག་གིས། ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །ཞེས་གསུངས་པ་ལྟར་དུ་སྤྱོད་པ་མོས་གུས་ཀྱི་ཕྱག་དང་སྒོམ་པ་གོམས་པའི་ཕྱག་འཚལ་ལ། དབང་པོ་རབ་ཀྱིས་མགོན་པོ་ཀླུ་སྒྲུབ་ཀྱིས། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་ལྟར། །རང་གི་རང་རིག་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །ཞེས་གསུངས་པ་ལྟར་རང་རིག་རང་གྲོལ་གྱི་དགོངས་པ་རང་ལས་རྙེད་པ་རབ་ལྟ་བ་མཇལ་བའི་ཕྱག་དང་སྦྱར་ནས་བཤད་རྒྱུ་ཡིན་ནོ།། ༼ག བསྟན་པར་དམ་བཅའ་བ། གསུམ་པ་བསྟན་པར་དམ་བཅའ་བ་ནི། བདག་འདྲ་པདྨ་འབྱུང་གནས་ཀྱིས༔ སྐལ་ལྡན་བློ་དམན་དོན་དུ་ནི༔ ཞི་ཁྲོ་འདུས་པའི་ལས་བྱང་བསྟན༔ ཞེས་གསུངས་ཏེ། འདི་རྒྱུད་འབྱུང་གི་གླེང་གཞི་དང་འབྲེལ་བར་ཕུན་སུམ་ཚོགས་པ་ལྔ་ཡི་ཐོག་ནས་འགྲེལ་ན་དུས་གསུམ་སངས་རྒྱས་འདུས་པའི་སྤྱི་གཟུགས་རྒྱལ་དབང་མཚོ་སྐྱེས་རྡོ་རྗེ་དེ་ཉིད་བོད་ཡུལ་དབུས་སུ་བྱོན། ཕྱི་རབས་མོས་པའི་བུ་ལ་ཆེད་དུ་བསྩལ་བའི་བཀའ་རྟགས་མི་ཉམས་པའི་བརྡ་རུ་བདག་འདྲ་གསུངས་ཏེ་སྐུ་དངོས་ཀྱི་བདག་རྐྱེན་ལས་བྱུང་བའི་ཁྱད་པར་མཚོན་པའི་ཆེད་དུ་མཚན་ཁོལ་འདོན་མཛད་དེ་པདྨ་འབྱུང་གནས་ཞེས་གསུང་རྒྱུ་འདིས་སྟོན་པ་ཕུན་སུམ་ཚོགས་པ་བསྟན་ལ། སྐལ་ལྡན་བློ་དམན་གསུང་རྒྱུ་འདིས་འཁོར་ཕུན་སུམ་ཚོགས་པ་བསྟན་ཏོ། །འདིའི་སྐབས་སུ་དོགས་པ་སྐྱེ་རྒྱུ་ཞིག་ལ་སྐལ་ལྡན་ཡིན་ན་བློ་དམན་ཇི་ལྟར་ཡིན། བློ་དམན་ཡིན་ན་འཁོར་ཕུན་སུམ་ཚོགས་པའི་མཚན་ཉིད་ཇི་ལྟར་ཚང་སྙམ་པའི་དོགས་པ་སྐྱེ་སྲིད་མོད། སྤྱིར་ན་གསང་སྔགས་ཀྱི་སྐབས་ནས་གསུངས་པའི་དབང་པོ་རྣོ་རྟུལ་དང་བློ་མཆོག་དམན་དེ། ཚེ་འདིའི་ཐོས་བསམ་སྦྱངས་པ་ལ་ལྟོས་ནས་ཤེས་མཁན་ཞིག་ལ་གསུངས་པ་མ་ཡིན་ལ། སྔགས་ཐུན་མིན་གྱི་གདུལ་བྱར་གྱུར་ཚད་དེ་ཉིད་དབང་རྣོན་ཡིན་ཞིང་། དེས་ན་དེ་ཡིན་པའི་ངོས་ནས་འདིའི་སྐབས་སུ་སྐལ་ལྡན་ཞེས་གསུངས་སོ། །དེ་མ་ཐག་ཏུ་བློ་དམན་ཞེས་འབྱུང་རྒྱུ་འདི་ཉན་རང་གི་གདུལ་བྱའི་རིགས་ཅན་ལྟ་བུའི་བློ་ཆུང་ངམ་སྔགས་ཀྱི་གདུལ་བྱར་མ་གྱུར་བའི་བློ་དམན་ལ་གསུངས་པ་མ་ཡིན་ལ། ཐེག་ཆེན་སྔགས་ཀྱི་གདུལ་བྱར་གྱུར་པ་ཙམ་གྱིས་མ་ཚད་པར་ནང་རྒྱུད་ཡོ་ག་གསུམ་གྱི་གདུལ་ཞིང་དུ་གྱུར་པའི་གང་ཟག་དེ་དབང་རྣོན་བློ་མཆོག་ཡིན་པ་གཞིར་བཞག་གི་ཐོག་ནས་འདི་ནས་བློ་དམན་ཞེས་གསུང་རྒྱུ་དེ་གང་ཟག་སྨོད་པའི་ཆེད་མ་ཡིན་པར་ཆོས་ཀྱི་ཆེ་བ་འདོན་པའི་ཆེད་ཡིན་ནོ། །དུས་ཡུན་རིང་གི་མཐའ་བསྒུགས་ནས་གདུང་བས་དབང་པོ་ཚར་གཅད་རྒྱུའི་དཀའ་ཐུབ་དྲག་པོ་བསྟེན་མི་དགོས་པར་བདེ་བླག་ཏུ་འཚང་རྒྱ་བའི་ཆོས་ཡིན་པར་བསྟན་ལ། ཐོས་པ་ཙམ་གྱིས་གྲོལ་བར་བྱེད་པའི་ཆོས་ཡིན་ཞེས་པའི་ལུང་དོན་འདི་ནས་དྲན་དགོས་ཤིང་། དེའི་ཕྱིར་ན་འཁོར་ཕུན་སུམ་ཚོགས་པ་བསྟན་པ་དེ་ཤུགས་ལ་གྲུབ་ཡོད་དོ། །གསང་སྔགས་ཀྱི་ཆོས་འཆད་ཉན་བྱེད་པའི་སྐབས་སུ་མཐའ་དྲུག་ཚུལ་བཞིས་མན་ངག་དང་ལྡན་པས་ཁོག་དབུབ་སྟོང་ཐུན་གྱི་ཆིངས་ཀྱིས་བཅིངས་ནས་ཁྱུང་ནམ་མཁའ་ནས་འཕུར་བ་དང་འདྲ་བར་སྤྱི་རྒྱ་རླབས་ཀྱིས་བཅད་ནས་བཤད་དགོས་མ་གཏོགས་ཚིག་རེ་རེ་གཉིས་རེ་ཡི་ལམ་འབར་འབུར་གྱི་རྡོ་སྤོ་ཐོ་རེ་ལ་ཐོགས་བསྡད་ན་དོན་ཐོག་ནས་མ་དགོས་ཚིག་ཐོག་ནས་ཐར་རྒྱུ་མེད་དོ། །དོན་དུ་ནི་ཞེས་པ་འདིས་དགོས་པ་དང་ཉིང་དགོས་བསྟན་ཅིང་། བརྗོད་བྱ་དང་འབྲེལ་བ་ཞོར་དུ་གོ་དགོས་ལ། དགོས་པ་བརྗོད་བྱ་རྟོགས་པ་ལ་རག་ལས་ན་དེ་རྗོད་བྱེད་ལ་ཐུག་ཡོད་པས་བརྗོད་བྱ་རྗོད་བྱེད་གཉིས་ཀ་ཤེས་བྱ་ཤེས་བྱེད་དང་། རྗོད་བྱེད་དགོས་པ་གཉིས་ཀ་ཐབས་དང་ཐབས་བྱུང་། དེའི་སྟབས་ཀྱིས་དགོས་པ་ཉིང་དགོས་གཉིས་ཀ་དེ་ལས་དེ་བྱུང་དང་། ཉིང་དགོས་བརྗོད་བྱ་གཉིས་ཀ་ངོ་བོ་བདག་གཅིག་གི་འབྲེལ་བར་དེ་ལྟར་དུ་གྲུབ་པ་ཡིན་ནོ། །ཞི་ཁྲོ་འདུས་པའི་ལས་བྱང་ཞེས་པ་འདིས་ཆོས་ཕུན་སུམ་ཚོགས་པ་བསྟན་པ་དང་། གནས་དུས་གཉིས་ཀ་ཤུགས་ལ་གོ་བར་མཛད་ཅིང་། བསྟན་ཞེས་པ་འདི་བསྟན་པར་དམ་བཅའ་བའི་ཚིག་ཡིན་ལ། འདིའི་ཚིག་རྐང་གསུམ་གྱིས་རྒྱུད་འབྱུང་གི་གླེང་གཞི་ཡང་དེ་ལྟར་དུ་གོ་ཐུབ་བོ།། ༼ཁ༽བར་དུ་དགེ་བ་གཞུང་གི་དོན། ༼ཀ༽ དང་པོ་སྔོན་འགྲོའི་ལེའུ། དེ་ཡན་ཆད་ཀྱིས་ཐོག་མར་དགེ་བ་ཀླད་ཀྱི་དོན་སོང་ཞིང་། གཉིས་པ་བར་དུ་དགེ་བ་གཞུང་གི་དོན་ལ་ཐུག་པ་ཡིན་ལ། འདི་ལས་བྱང་ཆེ་བའི་ནང་ན་ལེའུ་ས་བཅད་བཅོ་བརྒྱད་ཀྱིས་བསྟན་ཡོད་པ་ཞིག་ཡིན་ནོ། །འདི་ནས་སྙིང་པོ་ཚུར་བསྡུས་ནས་འདི་ལ་སྤྱིའི་ཁོག་འབུབ་ཀྱི་ཆིངས་བསྟན་པ་ནི། འདི་ལ་ལེའུ་གསུམ་ཡིན་ཏེ༔ སྔོན་འགྲོ་དངོས་གཞི་རྗེས་གསུམ་མོ༔ ཞེས་པ་འདིས་བསྟན་པ་ཡིན་ནོ། །འདིའི་སྔོན་འགྲོ་ལ་ནང་གསེས་ཀྱི་ས་བཅད་གསུམ། དངོས་གཞི་སྟོད་ལས་ལ་བདུན། རྗེས་སྨད་ལས་ལ་བདུན། དེའི་ཐོག་ཏུ་རྫོགས་རིམ་བསྡུ་བ་བརྩིས་ན་ནང་གསེས་ས་བཅད་བཅོ་བརྒྱད་ཀྱིས་བསྟན་ཏོ། །དེའི་ནང་གི་སྔོན་འགྲོའི་ཆིངས་བསྟན་པ་ནི། དང་པོ་སྔོན་འགྲོ་ལ་ཡང་གསུམ༔ བཀའ་བསྒོ་མཚམས་གཅོད་བྱིན་བརླབ་བོ༔ ཞེས་གསུངས་པ་ཡིན་ནོ། ། ༼ཀ༽ དང་པོ་བགེགས་ལ་བཀའ་བསྒོ་བ། ནང་གསེས་དང་པོ་བགེགས་ལ་བཀའ་བསྒོ་བ་ནི༔ ཞེས་མཚམས་སྦྱར་ཏེ། ཧཱུྃ༔ ང་ཉིད་ལྷ་ཡི་ང་རྒྱལ་གྱིས༔ འོད་དང་འོད་ཟེར་ཕྱོགས་བཅུར་འཕྲོས༔ ཕྱོགས་བཅུ་ཀུན་ཀྱང་ཞི་ཁྲོའི་ལྷ༔ རབ་ཏུ་གང་ནས་འོད་འཕྲོས་པས༔ ཞེས་གསུངས་ཏེ། ཧཱུྃ་ཡིག་འདི་རྒྱལ་བ་ཐམས་ཅད་ཀྱི་ཐུགས་ཡེ་ཤེས་ཆེན་པོ་མི་ཤིགས་པའི་ཐུགས་གསང་མཚོན་བྱེད་ཀྱི་ཡི་གེ་དེས་སྣ་དྲངས་ནས། གདུག་ཅན་འཁྲུལ་བའི་དགྲ་བགེགས་སྔངས་ཤིང་སྐྲག་པར་བྱེད་པའི་དོན་དང་། ཕྱི་རོལ་དུ་བསྐྲད་པའི་དོན་དུ་ང་ཉིད་ཅེས་པ་བསྐྱེད་རིམ་གྱི་སྤྲོ་གཞི་བཀོད་ནས་ལྷའི་ང་རྒྱལ་རང་སེམས་རྟོག་པ་དང་བྲལ་བའི་ངང་ནས་རང་རིག་གཉུག་མ་མི་ཤིགས་པའི་ངོ་བོ་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་རང་བཞིན་དཔལ་རྡོ་རྗེ་སེམས་དཔའི་ཐུགས་ཀ་ནས་ཐུགས་སྙིང་རྗེ་ཆེན་པོའི་རང་རྩལ་ཡེ་ཤེས་ལྔའི་འོད་དང་འོད་ཟེར་ཁ་དོག་སྣ་ཚོགས་ཅན་ཕྱོགས་བཅུ་ཐམས་ཅད་དུ་འཕྲོས་ཞེས་ཚིག་གི་འབྲུ་བཅོམ་ན་དེ་ལྟ་བུ་ཞིག་ཡིན་ལ། འོན་ཀྱང་དེ་ཙམ་ཞིག་བཤད་པས་དོན་གྱི་འགག་ངོ་མ་ནི་ཁྲོལ་དཀའ་བ་ཞིག་ཡིན་ནོ། །དེས་ན་ང་ཉིད་ལྷ་ཡི་ང་རྒྱལ་ཞེས་གསུངས་པ་འདི་ང་བདག་གཟུང་འཛིན་དང་བྲལ་བའི་སེམས་ཉིད་ཆོས་ཀྱི་དབྱིངས་རང་བྱུང་གི་ཡེ་ཤེས་ཡེ་ནས་འཁྲུལ་མ་མྱོང་བའི་དབང་གིས་སྣང་སྲིད་ཡེ་སངས་རྒྱས་པའི་རང་བཞིན་དུ་ལྟ་བ་དེའི་ཐོག་ནས་དེ་དང་མཚུངས་པའི་སྒོམ་པ་དང་སྤྱོད་པ་ལ་སོགས་པ་ཐམས་ཅད་ཀྱང་གནད་གཅིག་ཏུ་རང་ཤུགས་ཀྱིས་འདུ་ལ། དེ་སྔགས་ནང་པ་ཡོ་ག་རྣམ་གསུམ་ཐུན་མོང་གི་བཞེད་པ་ཡིན་ཞིང་། དེའི་སྟབས་ཀྱིས་ཁྱད་པར་དུ་རྒྱུད་མ་ཧཱ་ཡོ་གའི་སྐབས་སུ་དམིགས་ཀྱིས་བཀར་ནས་སྣང་བ་ལྷ་རུ་སྒྲུབ་པ་དང་ཡུལ་ཅན་ཡེ་ཤེས་སུ་སྒྲུབ་པ་འདི་འབྱུང་བ་ཡིན་ནོ། །ང་ཉིད་ལྷ་མ་ཡིན་པ་ཞིག་ལྷའི་ང་རྒྱར་བཟུང་བས་དེས་འབྲས་བུ་འབྱིན་མི་ནུས་མོད། ཆོས་ཐམས་ཅད་ཡེ་ནས་ལྷ་ཡིན་གསུངས་ལ། མ་དག་འཁོར་བའི་སྣང་ཤས་འདི་ངོ་མས་བཤད་ན་སྡུག་ཀུན་གྱིས་བསྡུས་པའི་སྣང་བ་འདི་ལས་གཞན་ཞིག་ཏུ་མེད་ཅིང་། དོན་དམ་དཔྱོད་པའི་ཚད་མའི་ངོར་བདག་གཉིས་ཀྱིས་སྟོང་བའི་དབྱིངས་དང་ཟུང་དུ་འཇུག་པའི་སྣང་བ་ལ་སྡུག་ཀུན་གྱིས་བསྡུས་པའི་མ་དག་པའི་མིང་ཙམ་ཡང་མེད་པར་རང་བཞིན་གྱིས་དག་པར་གནས་སོ། །དེ་ལྟ་བུ་སྟོང་ཉིད་མཉམ་པ་ཆེན་པོའི་རང་བཞིན་དུ་མ་གྱུར་པའི་ཆོས་ཤིག་མེད་པས་སྣང་སྲིད་ཡེ་ནས་དག་པ་ཆེན་པོར་གྲུབ་ཅིང་། འདིའི་དག་ལུགས་འདི་སྟོང་ཆ་དོན་དམ་གྱི་ཐད་ནས་དག་ཅེས་བརྗོད་པ་ཙམ་ཞིག་མ་ཡིན་པར་ཐ་སྙད་ཙམ་དུའང་སྟོང་པ་དང་དབྱེར་མེད་པའི་ཇི་ལྟར་སྣང་བ་དེ་ཉིད་ཡེ་ནས་དག་པ་ཡིན་པས་ཀུན་བཟང་བདེ་བ་ཆེན་པོའི་རང་བཞིན་ལ་མི་བཟང་བའི་དུས་མེད་པར་བསྟན་པ་ཡིན་ནོ། །དེས་ན་ང་ཉིད་ཡེ་ནས་ལྷ་ཡིན་པ་ལ་ལྷའི་ང་རྒྱལ་ལམ་དེ་ལྟར་ཡིན་པ་ལ་ཡིན་པར་རང་ངོ་ཤེས་པའི་སྒོ་ནས་བསྐྱེད་རིམ་གྱི་གཞི་བཏིང་བ་ལ་ང་ཉིད་ལྷ་ཡི་ང་རྒྱལ་གྱིས་ཞེས་གསུངས་སོ་སྙམ་པའི་གོ་བ་དང་ངེས་ཤེས་དེ་ལྟར་ཡོད་དགོས་སོ། །དེ་ཡང་བསྐྱེད་རིམ་གྱི་སྐབས་སུ་ལྷ་ཡིན་པར་སྒོམ་དུས་ལྷ་ཡིན་པ་དང་ལྷ་མི་སྒོམ་དུས་ལྷ་མིན་པ་དེ་འདྲ་མ་ཡིན་པར་རྒྱུ་འབྲས་དབྱེར་མེད་ལྷུན་གྲུབ་ཀྱི་དཀྱིལ་འཁོར་དུ་བལྟ་རྒྱུའི་གོ་བའི་གདིང་ལེན་དགོས་ལ། སྣང་བ་ལྷར་བསྒྲུབ་རྒྱུ་འདི་ལུང་དང་། རིགས་པ། མན་ངག་གསུམ་གྱི་ཐོག་ནས་བསྒྲུབས་ཡོད་དོ། །ལུང་ཅི་འདྲ་ཡོད་ཅེ་ན། སངས་རྒྱས་མཉམ་སྦྱོར། གསང་བ་འདུས་པ། སྒྱུ་འཕྲུལ་དྲ་བ་ལ་སོགས་པ་དང་། དེའི་ལུང་དོན་རིགས་པའི་བཀའ་ལུང་ཚད་མ་སློབ་དཔོན་ཆེན་པོའི་མན་ངག་ལྟ་ཕྲེང་ལ་སོགས་པའི་ནང་ན་གསུངས་ཡོད་དོ། །ལུང་གིས་ཇི་ལྟར་གསུངས་ཡོད་ཅེ་ན། སྒྱུ་འཕྲུལ་གྱི་ནང་དུ། སྲིད་པ་གསུམ་ནི་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་བས། །གཞན་དུ་གྱུར་པའི་ཆོས་མི་བཙལ། །ཞེས་གསུངས་ཤིང་། ཡང་དེ་མ་ཐག་ཏུ། ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་གསུངས་སོ། །རིགས་པའི་འཐད་ཚུལ་གྱི་ཐད་ནས་ཡིན་ན་སྤྱིར་ལྷ་གསུང་རྒྱུ་འདི་ལ་ཆོས་ཉིད་དོན་གྱི་ལྷ་དང་། ཡེ་ཤེས་ཕྱག་རྒྱའི་ལྷ་དང་། མཚན་མ་རྟགས་ཀྱི་ལྷ་དང་གསུམ་གྱི་དབྱེ་བ་ཡོད་དོ། །ཀུན་རྫོབ་སྒྱུ་མ་ལྟ་བུར་སྣང་བའི་སྐབས་སུ་སྣང་ཚུལ་ཕྱོགས་རེ་བ་ལ་ངེས་པ་མེད་ལ། མེད་ལུགས་ཇི་ལྟར་ཡིན་ཞེ་ན། དཔེར་ན་ཆུ་གཅིག་ལ་འགྲོ་བ་སོ་སོའི་སྣང་ལུགས་མི་འདྲ་བ་ལྟར་ཡིན་པས་དག་དང་མ་དག་གང་སྣང་ན་ཆོས་ཐམས་ཅད་དོན་དམ་སྤྲོས་པ་དང་བྲལ་བའི་ཆོས་ཉིད་ཀྱི་རང་བཞིན་ལ་དབྱེར་མེད་ཡིན་པ་དང་། དེས་ཆོས་ཐམས་ཅད་ཀྱི་ཆོས་ཉིད་རང་བཞིན་གྱིས་དག་པའི་དབྱིངས་སུ་གཉིས་སུ་མེད་པར་གོམས་སོང་དུས་ཁོ་རང་རང་བཞིན་གྱིས་དག་པ་ཡིན་པའི་རྒྱུ་མཚན་གྱིས་དག་པ་ཁོ་ནར་སྣང་རྒྱུ་དེ་གསལ་སྣང་ཐམས་ཅད་ཀྱི་ནང་ནས་རབ་ཀྱི་མཐར་ཐུག་ཡིན་པ་ནི་རྗེས་དཔག་གིས་ཀྱང་གྲུབ་པ་ཞིག་གོ །དེ་ལྟར་ལུང་རིགས་པ་གཉིས་ཀས་བསྒྲུབས་ན་མན་ངག་གི་ཐད་ནས་ལུང་དོན་རིགས་པས་དཔྱད། དཔྱད་པ་དོན་ཐོག་ཏུ་གཏན་ལ་ཕབ་ནས་མཐར་ཐུག་མི་བསླུ་བའི་དོན་གྱི་དམ་པ་ལྷའི་དཀྱིལ་འཁོར་དུ་སྣང་བ་ནི་མན་ངག་སྙན་བརྒྱུད་ཀྱི་ཐོག་ནས་མངོན་སུམ་དུ་ངོ་སྤྲོད་ཀྱིས་མངོན་དུ་གྱུར་ནས་རྟོགས་པའི་ཕ་ཕོག་ཐོབ་པའི་གང་ཟག་ལ་མངོན་སུམ་རྟགས་ལ་ལྟོས་མི་དགོས་པར་མཐོང་རྒྱུ་ཞིག་ཡིན་ནོ། །དག་དང་མ་དག་གི་ཚུལ་ལ་མཐོང་བ་མི་འདྲ་བ་ཡོད་རྒྱུ་འདི་རྣམས་འོག་མས་གོང་མ་ལ་མི་གནོད་པའི་ཐོག་ཏུ་གོང་མས་འོག་མ་ལ་སུན་འབྱིན་ཐུབ་པ་ཡིན་ལ། མིག་ནི་རབ་རིབ་ཅན་གྱིས་དམིགས་པ་ཡིས། །རབ་རིབ་མེད་ཤེས་ལ་གནོད་མིན་ཇི་ལྟར། །དེ་བཞིན་དྲི་མེད་ཡེ་ཤེས་སྤངས་པའི་བློས། །དྲི་མེད་བློ་ལ་གནོད་པ་ཡོད་མ་ཡིན། །ཞེས་གསུངས་པའི་འཇུག་པའི་ལུང་དོན་དང་མཐུན་ནོ། །འོན་ཀྱང་ཏིང་ངེ་འཛིན་ལ་རྩལ་སྦྱངས་མ་སྦྱངས་དང་། སྦྱངས་ན་སྦྱངས་པའི་རིམ་པ་ལ་ལྟོས་པའི་མཐོང་བའི་ཁྱད་པར་ཡོད་རྒྱུ་ནི་འགོག་མེད་ཡིན་ནོ། །དེའི་སྟབས་ཀྱིས་ཆོས་ཐམས་ཅད་གཟུགས་བརྙན་གྱི་དཀྱིལ་འཁོར་དུ་སངས་རྒྱས་པར་ལྟ་བ་ལ་རང་བཞིན་གྱི་སངས་རྒྱས་དང་། རྟོགས་པའི་སངས་རྒྱས། གྲུབ་པའི་སངས་རྒྱས་ཏེ་དབྱེ་བ་གསུམ་གྱི་རྣམ་བཞག་མཛད་དོ། །རང་བཞིན་གྱི་སངས་རྒྱས་དེ་སེམས་ཅན་ཐམས་ཅད་ལ་གསུངས་ཤིང་། དེ་ལ་ནང་གསེས་ཀྱི་དབྱེ་བ་ཕྱེ་སྐབས་སྐྱེ་བ་རྒྱུའི་སངས་རྒྱས་དང་། སྐྱེ་བ་རྟེན་པའི་སངས་རྒྱས། སྐྱེ་བ་མངོན་པར་གྲུབ་པའི་སངས་རྒྱས་ཞེས་སྐབས་གསུམ་དང་སྦྱར་ནས་གསུངས་ཡོད། རྟོགས་པའི་སངས་རྒྱས་དེ་གང་ཡིན་ཞེ་ན། རིག་འཛིན་གྱི་ས་ལ་བཞུགས་པ་རྣམས་ཡིན་ལ། གྲུབ་པའི་སངས་རྒྱས་དེ་གང་ཡིན་ཞེ་ན། དེ་ཉིད་མངོན་སུམ་དུ་གཟིགས་པའི་མཁྱེན་གཉིས་ཡེ་ཤེས་མངོན་དུ་གྱུར་པ་རྣམས་ལ་གསུངས་པ་ཡིན་ནོ། །མདོར་ན་དེའི་ཡན་ན་བོགས་དབྱུང་དུ་མེད་པའི་དག་གཟིགས་ཀྱི་ངོ་ན་གང་གྲུབ་པ་དེ་ཉིད་ཀུན་རྫོབ་ཀྱི་ཆོས་ཐམས་ཅད་ཀྱི་ཐ་སྙད་ཀྱི་གནས་ཚུལ་མཐར་ཐུག་པ་ཡིན་པར་གྲུབ་ལ། ཀུན་རྫོབ་ཇི་སྙེད་པའི་ཆོས་ཐམས་ཅད་ལ་ཀུན་རྫོབ་འཁྲུལ་ངོར་སྣང་ཚུལ་ཞིག་དང་། ཀུན་རྫོབ་རང་གི་གནས་ཚུལ་ཞིག་ཡོད་རྒྱུ་དེ་ཉིད་ངེས་རྒྱུ་གལ་ཆེའོ། །དེས་ན་མཐར་ཐུག་དཔྱོད་པའི་ངེས་ངོ་ན་གོང་དུ་བཤད་མ་ཐག་པ་ལྟར་དུ་སྡུག་ཀུན་གྱིས་བསྡུས་པའི་མ་དག་པ་མིང་ཙམ་ཡང་མེད་པར་རང་བཞིན་གྱིས་དག་པས་ན་སྣང་བ་ལྷ་རུ་སྒྲུབ་པ་དང་ཡུལ་ཅན་ཡེ་ཤེས་སུ་སྒྲུབ་རྒྱུའི་ཐད་ཀྱི་སེམས་གཟུང་འཛིན་གྱི་རྣམ་རྟོག་སྣ་ཚོགས་གོམས་པའི་བག་ཆགས་ཀྱི་མཐུ་བརྟས་ནས་རིགས་དྲུག་གི་སྣང་བ་འདྲ་དང་མི་འདྲ་ཤར་བའི་མ་དག་པའི་སྐབས་དང་། སྒྲིབ་པ་ཐམས་ཅད་ཟད་ནས་འབྲས་བུ་ཤིན་ཏུ་དག་པའི་སྐབས་གཉིས་ཀ་སེམས་རང་གི་སྣང་ཚུལ་ཙམ་ལས་གཞན་དུ་མེད་ཀྱང་དེ་ཐམས་ཅད་ཀྱི་གཞིར་གྱུར་པའི་སེམས་དེ་བདག་གཉིས་ཀྱིས་སྟོང་ཞིང་འོད་གསལ་བ་སྣ་ཚོགས་སྣང་བའི་འཆར་སྒོ་མ་འགགས་ནས་སྣང་བ་ཞིག་ཡིན་ལ། སེམས་རང་གི་གནས་ཚུལ་ངོ་མ་དང་མཐུན་པར་ལམ་སྦྱངས་ནས་རང་སྣང་འཁྲུལ་བའི་ཆ་ཐམས་ཅད་ལོག་སོང་དུས་དག་པའི་སྣང་བ་སྐྱོན་མེད་ཉིད་སྣང་བ་ཡིན་ནོ། །དེ་ནི་མི་བསླུ་བ། སླར་མི་ལྡོག་པ། དོན་དང་མཐུན་པ་ཡིན་པས་ཡུལ་ཅན་ཡེ་ཤེས་སུ་སྒྲུབ་པའི་ངེས་པ་དེ་ལྟར་དུ་སྐྱེ་དགོས་སོ། །དེ་ལྟ་བུའི་སྒོ་ནས་བཤད་ན་སངས་རྒྱས་ཀྱི་ཟག་མེད་ཀྱི་ཡོན་ཏན་དེ་རྣམས་མཐར་གཏུགས་ན་དབྱིངས་ཀྱི་ཡོན་ཏན་ཡིན་པ་ལས་གཞན་ཞིག་མིན་པར་གྲུབ་ཚེ་དབྱིངས་རྣམ་དག་གི་ངང་ཚུལ་དེ་ལས་མ་འདས་པའི་དག་དང་མ་དག་པའི་ཆོས་ཐམས་ཅད་དབྱིངས་དང་ཐ་མི་དད་པའི་རང་བྱུང་གི་ཡེ་ཤེས་ཀྱི་སྣང་བ་ལས་མ་འདས་པ་ཡིན་པའི་ཕྱིར་ན་ཡོན་ཏན་མངོན་དུ་གྱུར་རུང་མ་གྱུར་རུང་གཞི་ལམ་འབྲས་བུའི་ཆོས་ཐམས་ཅད་དེ་བཞིན་གཤེགས་པའི་ཡེ་ཤེས་རྣམ་པ་ཐམས་ཅད་པ་ངོ་བོ་ཉིད་སྐུའི་རང་བཞིན་དུ་སངས་རྒྱས་པ་ཡིན་ནོ། །དེ་ལྟར་སངས་རྒྱས་ཀྱི་དགོངས་པ་གཏན་ལ་ཕབ་ནས་ལྟ་བས་ཐག་བཅད་པ་ལྟར་སྒོམ་པས་ཉམས་སུ་བླངས། སྤྱོད་པས་བོགས་དབྱུང་ནས་གཏན་ལ་ཕབ་པའི་དོན་དེ་སྒོམ་པ་པོའི་གང་ཟག་ལ་མངོན་དུ་འགྱུར་རྒྱུ་ཞིག་མཐར་ཕྱིན་སངས་རྒྱས་ཀྱི་བར་ཡོང་ནས་མངོན་གྱུར་མཐར་ཐུག་སྐབས་སྣང་ཚུལ་ལ་ཡང་སངས་ཤིག་རྒྱས་ནས་ཡང་སངས་རྒྱས་པ་ཞེས་པའི་ཐ་སྙད་གྲུབ་པ་ཡིན་ཞིང་། བསྐྱར་ཟློས་བྱས་ན་གདོད་ནས་ཡེ་སངས་རྒྱས་པ་ལ་ད་ལམ་གྱིས་གསར་དུ་བསྒྲུབ་ཏུ་མེད་པར་ཐག་བཅད་པ་ལྟར་དུ་གོམས་པ་རྫོགས་ནས་མངོན་དུ་གྱུར་པ་ལ་ཡང་སངས་རྒྱས་པའི་ཐ་སྙད་མཛད་པ་ཡིན་ནོ། །སྣང་བ་ཐམས་ཅད་ལྷ་དང་ཡུལ་ཅན་ཐམས་ཅད་ཡེ་ཤེས་ཡིན་ན་སེམས་ཅན་གྱིས་འགྲོ་བ་འདྲེན་མི་ནུས་ལ་སངས་རྒྱས་ཀྱིས་འགྲོ་བ་འདྲེན་ནུས་པའི་རྒྱུ་མཚན་ཅི་ཞིག་སྙམ་པ་དང་། ཡང་ཐོག་མའི་སངས་རྒྱས་གྲོལ་ནས་སངས་རྒྱས་པ་དང་ཁམས་གསུམ་སེམས་ཅན་འཁྲུལ་ནས་འཁོར་བ་འཁྱམས་པ་རྣམས་ཅིའི་ཕྱིར་མི་འདྲ་སྙམ་ན། སེམས་ཅན་དང་སངས་རྒྱས་གཉིས་འགྲོ་བ་འདྲེན་པའི་མཁྱེན་བརྩེ་ནུས་གསུམ་གྱི་ཡོན་ཏན་ཡོད་མེད་ཀྱི་ཁྱད་པར་ཡོད་པའི་རྒྱུ་མཚན་དེ་རང་བཞིན་གྱིས་རྣམ་པར་དག་པ་དེ་མངོན་དུ་གྱུར་མ་གྱུར་གྱི་ཁྱད་པར་ཡོད་པ་ཡིན་ལ། དོན་བྱེད་ནུས་མི་ནུས་ཀྱི་ཐད་ནས་བསམ་བློ་བཏང་ན་ལས་དག་པ་ཞིག་ལ་ནི་གང་གིས་ཡིན་ན་ཡང་དོན་བྱེད་ནུས་པ་ཡིན་ཞིང་། སྣང་སྲིད་གཞིར་བཞེངས་གཞིར་བཞུགས་སུ་མཐོང་བ་ཡིན་ནོ། །ལས་མ་དག་པ་ཞིག་ལ་ནི་སངས་རྒྱས་དངོས་སུ་བྱོན་ཀྱང་དོན་བྱེད་མི་ནུས་ལ། གདུལ་བྱ་ཡུལ་ལ་འཇུག་པའི་ཕྲིན་ལས་ཀྱི་རྐྱེན་མ་ཚང་བ་ཡིན་ནོ། །འཁྲུལ་མ་འཁྲུལ་གྱི་ཁྱད་པར་གྱི་ཐོག་ནས་བཤད་ན་གཞི་ལ་འཁྲུལ་བ་མེད་པའི་སྟབས་ཀྱིས་གཞི་སྣང་གི་དུས་སུའང་འཁྲུལ་བ་རང་བཞིན་མེད་པར་རྣམ་པ་ཀུན་ཏུ་ངེས་པ་ཡིན་ལ། རང་བཞིན་རྣམ་དག་གི་ཆོས་ཉིད་དེ་ལས་དུས་ནམ་ཡང་འགྱུར་ཞིང་འདའ་མ་མྱོང་བ་ཞིག་གོ །དེའི་ཕྱིར་ན་འཁྲུལ་བ་གློ་བུར་བ་ཅན་གྱི་སེམས་ཅན་གྱི་ངོ་ལ་གཞི་འབྲས་དབྱེར་མེད་མི་འཆར་ལ། འོན་ཀྱང་དེ་འཁྲུལ་སྣང་ཡིན་པས་མ་འཁྲུལ་བའི་གནས་ལུགས་གཏན་ལ་འབེབས་སྐབས་དེ་དབང་བཙན་དུ་འཇོག་རྒྱུ་མེད་ཅིང་། དེའི་རྒྱུ་མཚན་ཅི་ཡིན་ཞེ་ན། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །ཞེས་གསུངས་ལ། གནས་ལུགས་དཔྱོད་པའི་དྲི་མ་མེད་པའི་ཡེ་ཤེས་དབང་བཙན་དུ་བྱས་ན་ཀུན་ཏུ་བཟང་པོས་གཟིགས་པ་ལྟར་དུ་ཡེ་ནས་སངས་རྒྱས་པར་བསྒྲུབ་དགོས་ཤིང་། དེས་ན་སངས་རྒྱས་ཉག་གཅིག་གི་དགོངས་པ་དུས་གསུམ་འཕོ་འགྱུར་མེད་པའི་ཆོས་ཉིད་མཉམ་པ་ཉིད་དུ་གཟིགས་པ་དེའི་དབང་དུ་བྱས་ནས་གཞི་འབྲས་དབྱེར་མེད་མཉམ་པ་ཆེན་པོའི་ལྟ་བས་ཆོས་ཐམས་ཅད་གཏན་ལ་འབེབས་རྒྱུ་དེ་ལས་ལྷག་པའི་རྡོ་རྗེ་ཐེག་པའི་གྲུབ་མཐའ་ཞིག་མེད་དོ། །དེ་ལྟ་བུ་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་གཏན་ལ་ཕབ་པའི་ལྷའི་ང་རྒྱལ་རང་རིག་མི་ཤིགས་པའི་ངོ་བོ་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་རང་བཞིན་དཔལ་རྡོ་རྗེ་སེམས་དཔའི་རྣམ་པར་ཤར་བའི་རྡོ་རྗེ་སེམས་དཔའ་དེ་ཉིད་ལོངས་སྐུའི་རྒྱན་ཆས་ཅན་ལྷ་གཅིག་ཁོ་ན་ཡིན་པ་ལ་བསམ་བློ་མི་གཏོང་བར་རྡོ་རྗེ་སེམས་དཔའ་ཞེས་གསུང་རྒྱུ་དེ་ནི་རང་བྱུང་བྱང་ཆུབ་ཀྱི་སེམས་སེམས་ཉིད་གདོད་ནས་དག་པ་དེ་ཉིད་རྡོ་རྗེ་ལྟར་འཕོ་འགྱུར་སྐྱེ་འགག་དང་བྲལ་བ་བརྟན་ཞིང་མི་གཡོ་བ་དཔའ་བ་ཡིན་པས་རྡོ་རྗེ་སེམས་དཔའ་ཞེས་བྱ་སྟེ། རྣམ་པ་ཀུན་མཁྱེན་ཡེ་ཤེས་ནི། །དེང་འདིར་རྡོ་རྗེ་སེམས་དཔའ་སྟེ། །བརྟན་པའི་ཕྱིར་ན་དཔའ་ཞེས་བྱ། །ཞེས་གསུངས་ཤིང་། གསང་སྔགས་ཀྱི་སྐབས་སུ་རིགས་བརྒྱ་རིགས་གཅིག་ཏུ་འདུས་པ་དེ་རྡོ་རྗེ་སེམས་དཔའ་ཡིན་པར་མ་ཟད་སངས་རྒྱས་ཐམས་ཅད་རྡོ་རྗེ་གསུམ་གྱི་རང་བཞིན་དུ་བསྟན་ཡོད་དོ། །གསང་སྔགས་བཀའ་ཡི་ཐ་རམས་སོགས་ཀྱི་དགོངས་པ་ལྟར་བྱས་ན་ལྟ་བའི་རྫོང་འཕྲང་རྣམ་གཉིས་བཤད་སྐབས་ལྟ་བའི་རྫོང་སྟེ། ཁྱབ་གདལ་བདེ་ཆེན་བརྡལ་བའི་རྫོང་དང་། འུབ་ཆུབ་ཀུན་འདུས་དགོངས་པའི་རྫོང་དང་གཉིས་སུ་དབྱེ་བ་ཡོད་པའི་ནང་ནས་འུབ་ཆུབ་ཀུན་འདུས་དགོངས་པའི་རྫོང་བཤད་པའི་སྐབས་སུ་གསང་སྔགས་ཀྱི་གདངས་བདུན་གྱི་ནང་གི་གཅིག་སངས་རྒྱས་ཐམས་ཅད་རྡོ་རྗེ་སེམས་དཔའི་སྐུར་གཏན་ལ་དབབ་པ་དེ་ཡིན་ནོ། །སྐབས་ཐོབ་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལམ་འདི་ལ་ཞུགས་ནས་སྒོམ་པ་ཆུ་བོའི་རྒྱུན་གྱི་རྣལ་འབྱོར་ལ་ཉམས་ལེན་བྱེད་མཁན་ཞིག་ལ་མཚོན་ན་མདང་དགོང་ཐུན་མར་བསྡུས་ནས་རྗེས་ཐོབ་སྒྱུ་མའི་རྣལ་འབྱོར་ལ་ལྡང་བའི་སྐབས་སུ། སྐད་ཅིག་སྟོང་གསལ་ཆེན་པོའི་ངང་ཉིད་ལས། །རྡོ་རྗེ་སེམས་དཔའི་ང་རྒྱལ་མ་བྲལ་བར། །སྣང་སྟོང་སྒྱུ་མ་ལྟ་བུའི་ངང་ནས་སྤྱོད། །ཅེས་ཐུན་མཚམས་སྤྱོད་ལམ་ལ་ཞུགས། སྣང་གྲག་དྲན་རྟོག་ལྷ་སྔགས་ཆོས་ཉིད་ཀྱི་འཁོར་ལོ་རུ་ཤར། མཚན་སྣང་འོད་གསལ་གྱི་རྣལ་འབྱོར་ཉམས་དེ་དང་འབྲེལ་བའི་ཐོག་ནས་བསྐྱངས་ཏེ་དེ་རིང་ཐུན་གྱི་དང་པོ་ལ་རང་ཉིད་རྡོར་སེམས་སུ་གསལ་བཞིན་དུ་ལྷའི་ང་རྒྱལ་ལམ་ལྷ་རྟོག་དབྱེར་མེད་ཀྱི་དམིགས་པ་ཡིས་ཐུགས་གསང་མི་ཟད་དཔལ་གྱི་བེའུ་ཡི་དབྱིངས་ནས་ཐུགས་མཁྱེན་བརྩེ་ནུས་པའི་བདག་ཉིད་ཡེ་ཤེས་ལྔའི་རང་གདངས་ཀྱི་འོད་དང་འོད་ཟེར་ཁ་དོག་སྣ་ཚོགས་འཕྲོ་བ་ཅན་ཏེ། གང་དུ་འཕྲོ་ན་ཕྱོགས་བཅུར་འཕྲོས་ནས་ལོག་རྟོག་མ་རིག་པ་ཉོན་མོངས་རྒྱུ་འབྲས་དང་བཅས་པའི་བགེགས་མིང་མེད་དུ་བསྐྲད་པ། ཕྱོགས་བཅུ་ཀུན་ཀྱང་ཞི་ཁྲོའི་ལྷས་ཞེས་པ་ནི་ཕྱོགས་བཞི་མཚམས་བརྒྱད་སྟེང་འོག་དང་བཅས་པའི་ཕྱོགས་བཅུ་དུས་གསུམ་དང་བཅས་པ། རབ་ཏུ་གང་ནས་འོད་འཕྲོས་པས་ཞེས་པ་ནི་ཡེ་ཤེས་ཀྱི་འོད་དང་འོད་ཟེར་གྱི་དྲ་བས་མ་ཁྱབ་པ་མེད་པ་ཀུན་ཁྱབ་མཁའ་དང་མཉམ་པའི་རྒྱལ་བ་ཞི་ཁྲོའི་ལྷས་རབ་ཏུ་ཀུན་ཏུ་ཡོངས་སུ་གང་ཞིང་བར་མཚམས་མེད་པར་གཏམས་པས་དོན་གང་ཞིག་བྱེད་ན་འདི་ནས་མར་བསྟན་ཡོད་དོ། །རང་རེས་བསྐྱེད་རྫོགས་མན་ངག་ལག་ཁྲིད་ཀྱི་སྐབས་འདིར་མཐའ་དཔྱད་མང་པོ་ཞིག་དགོས་པ་མི་ཆེ་ཡང་ཁོ་བོ་ལ་མྱོང་བ་དོན་ཐོག་ཏུ་ཁེལ་བའི་ཐུན་མིན་གྱི་ཉམས་མྱོང་ནི་མེད་ན་ལོང་བས་ལམ་སྟོན་ཕ་མགོ་བུས་གཡོག་བྱེད་པ་བས་རྡོ་རྗེ་འཆང་གི་དགོངས་དོན་ཚད་མ་དང་། བདེ་བར་གཤེགས་པའི་བཀའ་ལུང་ཚད་མ། དངོས་སྟོབས་ཆོས་ཉིད་ཀྱི་རིགས་པའི་འཇལ་བྱེད་ཀྱི་ཚད་མས་བསྒྲུབས་ན་རང་གཞན་གཉིས་ཀས་གོ་བ་ངེས་ཤེས་ཀྱི་གདེང་ཞིག་རྙེད། ལྟ་བ་རྣམ་དག་གི་རྩ་བ་ཞིག་ཟིན་པ་ལ་ཕན་ཐོགས་ཡོད་རྒྱུ་རེད་སྙམ་པ་ཡིན་ཞིང་། ཕྱོགས་བཅུ་ཀུན་ཀྱང་ཞི་ཁྲོའི་ལྷས། །རབ་ཏུ་གང་ནས་འོད་འཕྲོས་པས། །ཞེས་པས་དོན་ཅི་ཞིག་བྱེད་ན། ལུས་ངག་སེམས་ལ་གནོད་བྱེད་ཅིང༔ མཆོད་པའི་མདངས་འཕྲོག་མ་རིག་བགེགས༔ ཉོན་མོངས་མ་རིག་རྒྱུ་ལས་བྱུང་༔ འདི་རུ་མ་འདུག་གཞན་དུ་དེངས༔ ཞེས་གསུངས་ཏེ། ལུས་ངག་སེམས་ལ་གནོད་བྱེད་ཅིང་ཞེས་པ་འདི་ཀློང་ཆེན་པས་ཡིད་བཞིན་མཛོད་ཀྱི་དབུ་ཕྱོགས་ཤིག་ནས། ཡུལ་གྱི་བག་ཆགས་སྣོད་ཀྱི་འཇིག་རྟེན་དང་། །དེ་ལ་བརྟེན་པའི་གཟུགས་སོགས་ཡུལ་ལྔའོ། །དོན་གྱི་བག་ཆགས་རྣམ་ཤེས་ཚོགས་བརྒྱད་དང་། །དེ་ལ་བརྟེན་པའི་དགེ་སྡིག་ལས་རྣམས་སོ། །ལུས་ཀྱི་བག་ཆགས་འགྲོ་དྲུག་སོ་སོའི་གཟུགས། །དེ་ལ་བརྟེན་པའི་ཡན་ལག་ཉིང་ལག་གོ། །ཞེས་གསུངས་ཡོད་ལ། ཡུལ་གྱི་བག་ཆགས། དོན་གྱི་བག་ཆགས། ལུས་ཀྱི་བག་ཆགས་ཏེ་བག་ཆགས་གསུམ་བཞག་པ་ཐོག་མེད་ནས་གོམས་སོང་བའི་ཚེ་རབས་ཀུན་ཏུ་དེ་ལྟར་སྣང་བ་ཡིན་པས་རྡོ་རྗེ་ཐེག་པའི་ཉེ་ལམ་ནས་ལུས་ལ་བརྟེན་པའི་སྒོ་གསུམ་རྡོ་རྗེ་གསུམ་སྐུ་གསུང་ཐུགས་ཀྱི་ངོ་བོར་སྒྲུབ་པ་ལ་བར་དུ་གཅོད་པ་དེ་ཉིད་སེལ་བར་བྱེད་པ་ལ། སེམས་ཅན་གྱི་དུས་ན་ཡུལ་དང་ཡུལ་ཅན་དུ་སྣང་བའི་ཆོས་ཐམས་ཅད་རང་བཞིན་རྣམ་པར་དག་པ་གནས་ཚུལ་གྱི་ངོས་ནས་གཞལ་སོང་ན་གཟུགས་རྣམ་སྣང་། ཚོར་བ་རིན་ཆེན་འབྱུང་ལྡན། འདུ་ཤེས་སྣང་བ་མཐའ་ཡས། འདུ་བྱེད་དོན་ཡོད་གྲུབ་པ། རྣམ་པར་ཤེས་པ་མི་བསྐྱོད་པ། དེ་བཞིན་དུ་ས་སངས་རྒྱས་སྤྱན་མ། ཆུ་མཱ་མ་ཀཱི་ལ་སོགས་པ་དང་། ཀུན་གཞི་ཆོས་དབྱིངས་ཡེ་ཤེས། ཀུན་གཞི་རྣམ་ཤེས་མེ་ལོང་ཡེ་ཤེས། ཉོན་ཡིད་སོར་རྟོག་ཡེ་ཤེས་ལ་སོགས་པ་ཡེ་ཤེས་ལྔའི་རང་བཞིན་ཡིན་ནོ། །དེ་ཡིན་རྒྱུ་དེ་ཡང་སྣམ་བུ་ཚོས་ཀྱིས་བསྒྱུར་བ་དང་འདྲ་བར་སྦྱང་གཞི་སྦྱོང་བྱེད་ཅན་ཞིག་གནས་གྱུར་ནས་སྡུག་པོ་ཞིག་ཡག་པར་གྱུར་པ་ནི་མ་ཡིན་པར་ཡིན་པ་ལ་ཡིན་པར་ཤེས་ན་འཁོར་བ་མྱང་འདས་སུ་གྲོལ་བ་ཉིད་ཡིན་ཡང་དེ་ལྟར་མ་རྟོགས་པར་ཨ་འཐས་འཁྲུལ་བར་གྱུར་པ་ལ་ཆུ་འཁྱག་རོམ་དུ་གྱུར་པ་ལྟར་དུ་ལུས་ངག་ཡིད་གསུམ་ལ་གནོད་ཅིང་འཚེ་བ་བྱེད་པ་ཞེས་གསུངས་པའོ། །གནོད་ཇི་ལྟར་དུ་བྱེད་ཟེར་ན། སྒོ་གསུམ་རྡོ་རྗེ་གསུམ་གྱི་རང་བཞིན་ཡིན་པ་ལ་དེ་ལྟར་རང་ངོ་ཤེས་སུ་མི་སྟེར་ནས་འཁྲུལ་རྐྱེན་གྱིས་བར་ཆད་བྱེད། ལམ་སྒྲུབ་པའི་གང་ཟག་ལ་ལུས་ལ་ན་ཚ་དང་སྡུག་བསྔལ། སེམས་ལ་ཡིད་མི་བདེ་བ་དང་རྣལ་དུ་མི་ཕེབས་པ། ལུས་སེམས་གཉིས་ཀ་དང་འབྲེལ་བའི་ངག་གི་བཟླས་བརྗོད་ལ་སོགས་པ་སྨྲ་བ་ངག་གི་སྒོ་ལ་ཡང་བར་ཆད་བྱེད་རྒྱུ་དེ་ལྟ་བུ་དང་། མཆོད་པའི་མདངས་འཕྲོག་མ་རིག་བགེགས་ཞེས་པ་ནི་མཆོད་པའི་མདངས་ཇི་ལྟར་དུ་འཕྲོག་པ་ཡིན་ཞེ་ན། མཆོད་པའི་མདངས་འཕྲོག་པར་བྱེད་པའི་བགེགས་དཀྱིལ་འཁོར་གྱི་མདངས་འཕྲོག མར་མེའི་འོད་འཕྲོག བདུད་རྩིའི་ངད་འཕྲོག དཔལ་བཤོས་ཀྱི་བཅུད་འཕྲོག རཀྟའི་དྲི་འཕྲོག་པར་བྱེད་པའི་བགེགས་ཞེས་གསུངས་པའོ། །དེ་ལྟ་བུ་བགེགས་དེ་དག་ཐམས་ཅད་གང་ནས་འབྱུང་ན་ལོགས་ཤིག་ནས་འབྱུང་བ་མ་ཡིན་ལ། འཁྲུལ་སྣང་གཟུང་འཛིན་ཅན་དུ་ཤར་ནས་ཕན་གནོད་ལྷ་འདྲེའི་ཀུན་རྟོག་དེ་གཞི་མེད་དུ་ཤར་བ་ཉིད་ནི་ཉོན་མོངས་མ་རིག་རྒྱུ་ལས་བྱུང་ཞེས་གསུངས་ཤིང་། ཉོན་མོངས་པ་དུག་ལྔ་དང་ཕུགས་གཏུགས་ན་མ་རིག་པའི་རྒྱུ་ལས་བྱུང་བ་ཀུན་བཟང་དགོངས་པ་ཟང་ཐལ་གྱི་རྒྱུད་ལས་ཕྱུང་བའི་ཀུན་བཟང་སྨོན་ལམ་གྱི་ནང་དུ། དེ་ཕྱིར་སེམས་ཅན་འཁྲུལ་བའི་གཞི། །དྲན་མེད་མ་རིག་ཡིན་པའི་ཕྱིར། །ཞེས་གསུངས་པ་དང་འདྲ་བར་ལྷན་སྐྱེས་ཀུན་བརྟགས་ཀྱི་གདོན་ཆེན་བགེགས་རིགས་སུ་ཤར་བ་ཐམས་ཅད་འདི་རུ་མ་འདུག་གཞན་དུ་དེངས་ཞེས་གསུངས་ལ། །དག་ཆེན་ཡེ་ཤེས་ཀྱིས་ཁྱབ་པའི་གནས་འདིར་མ་འདུག་པར་གཞན་དུ་སོངས་ཤིག་གམ་གཞན་དུ་དེངས་ཞེས་གསུངས་པའོ། །དེས་ན་འདིའི་གཞན་ཇི་ལྟ་བུ་ཞིག་ལ་གོ་ན་ཁྱོད་ངེད་ཚང་ལ་མ་འདུག་ཕར་ཀ་ཚང་ལ་བུད་སོང་ལྟ་བུའི་གཞན་དེ་མ་ཡིན་ཞིང་། ཕྱི་ནང་གཞན་གསུམ་གཉིས་མེད་ཀྱི་ཀློང་ཆོས་དབྱིངས་སྐྱེ་བ་མེད་པ་བདག་གཞན་བཟང་ངན་ཕན་གནོད་ལ་སོགས་པའི་གྲྭ་ཟུར་མེད་པའི་ཆོས་སྐུ་ཐིག་ལེ་ཉག་གཅིག་གི་ཀློང་དུ་བཟླུམས་པའི་དོན་ཡིན་ལ། ང་བདག་གཟུང་འཛིན་རྩད་ནས་གཅོད་པའི་ཡུམ་ཤེས་རབ་ཕར་ཕྱིན་གྱི་དགོངས་པ་དང་བསྟུན་ན་ཉག་གཅིག་རྩད་ནས་བཅད་པ་འཁྲུལ་བ་མིང་མེད་དུ་ལ་བཟླ་བ་ཕྱག་རྫོགས་གཉིས་མེད་ཀྱི་དགོངས་པའི་གནད་ཀྱང་དེ་ཡིན་ནོ། །ཧཱུྃ་ཧཱུྃ་ཨུ་ཙ་ཏ་ཡ་ཕཊ༔ཅེས་གསུངས་ཏེ། ཧཱུྃ་ཧཱུྃ་ཞེས་པའི་ཧཱུྃ་དང་པོ་ནི་འཁོར་བའི་སྡུག་བསྔལ་ཐམས་ཅད་འཇོམས་པར་བྱེད་པའི་ཧཱུྃ། ཧཱུྃ་གཉིས་པ་ནི་སྲིད་རྩ་བདག་འཛིན་གྱི་འགོང་པོ་འཇོམས་པར་བྱེད་པའི་ཧཱུྃ། ཨུ་ཙ་ཏ་ཡ་ནི་བྱེར་བར་གྱིས་ཤིག་ཅེས་པའི་སྔགས་ཤིག་ཡིན་ལ། བགེགས་ཚོགས་ཕྱིར་བསྐྲད་ཅིང་བགེགས་དཔུང་འཐོར་བར་བྱེད་པའི་སྔགས་ཡིན་ཞིང་། ཕཊཿནི་གདུག་ཅན་འཇོམས་པར་བྱེད་པའི་སྔགས་ཡིན་ནོ། །ཕྲིན་ལས་རྣམ་པ་བཞིའི་ལས་ཆེན་བཅུ་གཉིས་ཏེ་ཞི་རྒྱས་དབང་དང་འགུགས་པ། རྨོངས་རེངས་དབྱེ་དང་བསྐྲད་པ། མནན་གཟིར་གསད་དང་གསོ་བ་སྟེ་བཅུ་གཉིས་ཡོད་པའི་ནང་གི་བགེགས་རིགས་འབྱུང་པོའི་ཚོགས་ལ་སྡིགས་ཤིང་གཟིར་བར་བྱེད་པ་སའི་ཕྱོགས་འདིར་མ་ཟད་རྒྱ་མཚོའི་ཕ་རོལ་ཙམ་དུའང་འདུག་དབང་མེད་པར་བྱས་ནས་བསྐྲད་གཟིར་གསད་གསུམ་གྱི་སྒོ་ནས་སྒྱུ་མའི་མངལ་ཁུང་མིང་མེད་དུ་བཏང་སྟེ་སེམས་ཉིད་ཆོས་སྐུའི་ཀློང་དུ་གསོད་རྒྱུའི་ལས་དང་དམིགས་གནད་ཁྱད་པར་ཅན་ཞིག་ཡིན་ནོ།། ༼ཁ༽ གཉིས་པ་མཚམས་གཅོད་པ། ༼ཀ དངོས་བཤད་པ། གཉིས་པ་མཚམས་གཅོད་འདི་སྐད་དོ༔ ཞེས་སྔོན་འགྲོའི་ས་བཅད་གཉིས་པའི་མཚམས་སྦྱར་ཏེ། ཧཱུྃ༔ རང་ཉིད་ལྷ་ཡི་ཐུགས་ཀ་ནས༔ རྡོ་རྗེ་རིན་ཆེན་པདྨ་དང་༔ རྒྱ་གྲམ་འཁོར་ལོ་མེ་རིའི་གུར༔ རིམ་པ་དྲུག་གི་ཚུལ་དུ་བསྐོར༔ ཁྲོ་ཚོགས་སྤྲུལ་བ་དཔག་མེད་ཀྱིས༔ རབ་ཏུ་གཏམས་ཤིང་མཚམས་བཅད་དོ༔ ཞེས་གསུངས་ཏེ། ཧཱུྃ་རང་ཉིད་ལྷ་ཡི་ཐུགས་ཀ་ནས་ཞེས་པའི་ཧཱུྃ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བསམ་གྱིས་མི་ཁྱབ་པ་མཚོན་བྱེད་ཀྱི་ཡི་གེས་སྣ་དྲངས་ནས། རང་ཉིད་སྟོང་གསལ་རིགས་ཀུན་འདུས་པའི་ངོ་བོ་རྡོ་རྗེ་སེམས་དཔའི་ལྷའི་ང་རྒྱལ་གསལ་བརྟན་གྱི་ངང་དང་མ་བྲལ་བའི་ཐོག་ནས་གནས་གྱུར་ཞེ་སྡང་རྡོ་རྗེ་དང་དབྱེར་མེད་པའི་གསང་བའི་བདག་པོའི་ཐུགས་ཀ་ནས་རིགས་ལྔའི་ཕྱག་མཚན་གྱི་ནང་ནས་ཤར་ཕྱོགས་ནས་ཧཱུྃ་ལས་རྡོ་རྗེ་རིམ་པ་ལྔའི་གུར་ཁང་། ལྷོ་ཕྱོགས་ནས་ཏྲྃ་ལས་རིན་པོ་ཆེའི་གུར་རིམ་པ་ལྔ། ནུབ་ཕྱོགས་ནས་ཧྲཱིཿལས་པདྨའི་གུར་རིམ་པ་ལྔ། བྱང་ཕྱོགས་ནས་ཨཱཿལས་རྒྱ་གྲམ་གྱི་གུར་རིམ་པ་ལྔ། སྟེང་ཕྱོགས་ནས་ཨོཾ་ལས་འཁོར་ལོའི་གུར་རིམ་པ་ལྔ། དེ་རྣམས་ཀྱི་ཕྱི་རོལ་དུ་རྃ་ཡིག་འཕྲོས་པ་ལས་ཡེ་ཤེས་ཀྱི་མེ་དཔུང་རབ་ཏུ་འབར་བའི་གུར་དང་། སྲུང་བའི་ར་གུར་རིམ་པ་དྲུག་གིས་ཕྱི་ནང་དུ་བསྐོར་ནས་སྤྲུལ་བའི་ཁྲོ་ཆུང་གི་ཚོགས་དཔག་ཏུ་མེད་པ་དང་། འབར་བའི་མཚོན་ཆ་སྣ་ཚོགས་ཀྱིས་རབ་ཏུ་གང་ནས་བར་ཆད་གང་གིས་ཀྱང་ཚུགས་པའི་སྐབས་དང་གནས་མེད་པའི་མཚམས་བཅད་དོ་ཞེས་གསུངས་པའོ། །སྲུང་འཁོར་སྒོམ་རྒྱུ་འདི་ལ་ཀུན་རྫོབ་ཀྱི་རོལ་བ་དམིགས་བཅས་སུ་སྒོམ་པ་ཞིག་དང་། དོན་གྱི་རོལ་བ་དམིགས་མེད་དུ་སྒོམ་པ་ཞིག་སྟེ་གཉིས་ཀྱི་གོ་དོན་ཡོད་དོ། །གཅིག་ན་འདི་ལྟ་བུའི་དམིགས་པའི་རིགས་ལ་ཨ་འཐས་མཚན་མ་ཅན་དུ་བཟུང་སྟེ་གཅིག་སྒོམ་བཞིན་པའི་སྐབས་སུ་ཡང་དེ་བསྐྱུར་ནས་གཞན་པ་ཞིག་བསྒོམ་དགོས་རྒྱུ་རེད་དྲན་པའི་མི་བདེ་བར་བསམ་པའི་གུ་དོགས་མི་དགོས་ཤིང་། ནང་གི་དེ་ཁོ་ན་ཉིད་ལ་དབང་འབྱོར་བ་ཞིག་ཡིན་ན་དེ་འདྲའི་གསལ་འདེབས་མི་དགོས་མོད་ཀྱང་ལས་དང་པོ་པས་ཐམས་ཅད་སེམས་ཀྱི་རྣམ་རོལ་ལ་ཐོ་ཐུག་མི་ཐུག་དང་ལོ་མི་ལོ་དེ་ལྟ་བུ་བསམ་མི་དགོས་སོ། །གཉིས་ན་བསྒོམ་བྱའི་ཐད་ནས་ཡིན་ན་འདི་མ་ཧཱའི་ཨ་ནུ་ཐབས་བསྐྱེད་ཆོག་ཁོ་ན་གཙོར་འདོན་བྱེད་པ་དང་མི་འདྲ་བར་ཟབ་པ་གཙོར་འདོན་དབྱིངས་དང་ཡེ་ཤེས་མཉམ་སྦྱོར་རྟོགས་པའི་དོན་རྒྱུད་ལ་སྦྱོར་ནས་རང་རིག་རྩ་བའི་ལྷ་སྟོང་གསལ་ཀ་དག་གི་ངོ་བོ་རྡོ་རྗེ་སེམས་དཔའ་ནམ་མཁས་གར་ཁྱབ་ལ་སྐུ་ཡིས་ཁྱབ་པ་དེ་ཡང་གོང་ནས་བཤད་པ་ལྟར་དུ་ཨ་འཐས་མཚན་མ་ཅན་མ་ཡིན་པར་ཟང་ཐལ་སྒྲིབ་གཡོག་དང་བྲལ་བ་ཆོས་དབྱིངས་གང་བ་ཞིག་ཏུ་གསལ་བཏབ་ནས་ཏིང་འཛིན་གྱི་འཕྲོ་འདུ་ཐམས་ཅད་འདིའི་ངང་ནས་མ་འགགས་རོལ་རྩལ་དུ་ཤར་བ་ཞིག་ཏུ་བསྒོམ་དགོས་སོ། །དེའི་ཐོག་ཏུ་སྲུང་བའི་ར་གུར་ཞེས་གསུངས་ན་དང་པོ་རྡོ་རྗེའི་གུར་ཡིན་ལ། རྡོ་རྗེ་ཞེས་པ་ནི་མི་ཆོད། མི་ཤིགས། སྲ་བ། བརྟན་པ་ལ་སོགས་པའི་ཆོས་བདུན་གྱི་བདག་ཉིད་ཅན་ཞིག་ཡིན་ནོ། །དེ་ནི་མཚོན་བྱེད་རྣམ་པ་རྟགས་ཀྱི་རྡོ་རྗེ། དོན་ཆོས་དབྱིངས་འགྱུར་བ་མེད་པ། དེའི་བྱེད་ལས་དང་མཚུངས་པའི་ཕྱག་མཚན་གྱི་རྣམ་པ་དེས་ཕྱོགས་དང་ཕྱོགས་མཚམས་ལོགས་ཐམས་ཅད་རྡོ་རྗེའི་རྡུལ་ཕྲ་རབ་ཀྱིས་བཀག་ནས་བར་མཚམས་ཤིག་གཏན་ནས་མེད་པར་བསྐལ་བའི་རླུང་ཡིན་ཡང་མི་ཐར་བའི་འོག་ཐམས་ཅད་རྡོ་རྗེའི་ས་གཞི། དེ་ཡང་ཡངས་ཤིང་རྒྱ་ཆེ་བ། སྟེང་ཐམས་ཅད་རྡོ་རྗེའི་གུར་དང་བླ་བྲེ། ཐོག་ཕིབས་ཀྱི་དབྱིབས་དེ་ལྕགས་རྨོག་ཁ་སྦུབ་པ་དང་འདྲ་བར་གསུང་ས་ཡང་ཡོད་དོ། །རྡོ་རྗེ་རིན་ཆེན་པདྨ་དང་ཞེས་པ་ལ་སོགས་པ་ནི་རྡོ་རྗེའི་གུར་ཁང་གི་ཕྱི་རོལ་ན་རིན་ཆེན་འབར་བའི་གུར་ཁང་། ཡང་དེའི་ཕྱི་རོལ་ན་པདྨ་དམར་བོའི་གུར་ཁང་། དེའི་ཕྱི་རོལ་ན་རྒྱ་གྲམ་ལྗང་གུའི་གུར་ཁང་། རྒྱ་གྲམ་ནི་རྡོ་རྗེའི་རྒྱ་གྲམ་ཡིན་ལ་འདི་ཡང་སྣ་ཚོགས་རྡོ་རྗེ་ལ་གོ་ཞིང་། སྣ་ཚོགས་རྡོ་རྗེ་ཞེས་པ་ནི་ཁ་དོག་སྣ་ཚོགས་ཡོད་པ། འོད་ཟེར་སྣ་ཚོགས་འཕྲོ་བ། ཕྲིན་ལས་སྣ་ཚོགས་འགྲུབ་པ་དེ་ལྟ་བུ་གྲངས་མེད་པ་འཕྲོས་ནས་གུར་ཁང་དུ་འཁྲིགས་ལ། དེའི་ཕྱི་རོལ་དུ་འཁོར་ལོ་དཀར་བོའི་གུར། ཐམས་ཅད་ཀྱི་ཕྱི་རོལ་དུ་མེ་རིའི་གུར་ཁང་། ད་རུང་ཕྱག་མཚན་མཚོན་ཆ་སྣ་ཚོགས་ཀྱི་གུར་ཁང་དང་འབྱུང་བ་ལྔའི་གུར་ཁང་ཡང་གསུངས་ཡོད་དོ། །སྲུང་འཁོར་འདི་དག་ཐམས་ཅད་རྣམ་པ་སོ་སོར་གསལ་ཡང་རྒྱུ་མི་ཤིགས་པ་རྡོ་རྗེ་ལས་གྲུབ་པ། རང་བཞིན་ཡེ་ཤེས་ལྔའི་རྣམ་པར་ཤར་བ། སྲུང་འཁོར་འཁོར་འདས་ཐམས་ཅད་དབྱེར་མེད་དུ་སྲུང་བ་དེ་ལྟ་བུའི་གོ་བ་ལེན་དགོས་ལ། སྒྱུ་འཕྲུལ་རྒྱས་པའི་ནང་དུ། རྡོ་རྗེའི་རང་བཞིན་སྒྲིབ་པ་ཀུན། །འཇོམས་ཤིང་ཅིས་ཀྱང་མི་ཚུགས་ལ། །ཞེས་གསུངས་སོ། །དོན་དམ་ངོ་བོ་དམིགས་མེད་སྒོམ་པའི་ཐད་ནས་བཤད་ན་མཚན་བཅས་ཀྱི་སྲུང་འཁོར་བསྒོམ་རྒྱུ་དེ་དག་དོན་དམ་པར་བདག་གཞན་ཕན་གནོད་བསྲུང་བྱ་སྲུང་བྱེད་ཐམས་ཅད་ལས་འདས་པ། སྤྲོས་པ་ཀུན་གྲོལ་གྱི་ཆོས་ཀྱི་དབྱིངས། གདལ་ཁྱབ་ཀུན་ལ་སྙོམས་པ། ཡེ་གྲོལ་ཆེན་པོའི་ཀློང་ན་སྣང་གྲག་ཐམས་ཅད་རྒྱས་འདེབས་པའི་ལྟ་བའི་གདེང་གིས་ཟིན་པ་དེ་ཡིན་ཞིང་། བཀའ་བརྒྱད་བདེར་འདུས་ལས། ཐམས་ཅད་སྐུ་དང་ཡེ་ཤེས་ངང་། །བགེགས་སུ་རྟོགས་པ་གང་ཡང་མེད། །བསྲུང་བར་བྱ་དང་སྲུང་བྱེད་མེད། །ཅེས་གསུངས་པ་ལྟར་ཡིན་ནོ། །བཛྲ་རྡོ་རྗེ། རཏྣ་རིན་ཆེན། པདྨ་པདྨའི་རིགས་ཀྱི་ཕྱག་མཚན། ཀརྨ་ལས་ཀྱི་རིགས་ཀྱི་ཕྱག་མཚན་རྒྱ་གྲམ། ཙཀྲ་འཁོར་ལོ། ཛྭ་ལ་འབར་བ། རཾ་ཧཱུྃ་ཕཊ༔དང་བཅས་པས་ནི་རིགས་ལྔའི་ཕྱག་མཚན་དང་མེ་དཔུང་འབར་བས་ཡོངས་སུ་གཏམས་ཤིང་བསྲུངས་པས་མཚམས་བཅད་པ་ཡིན་ལ། བཛྲ་རཏྣ་པདྨ་ཀརྨ་ཙཀྲ་ཛྭ་ལ་རཾ་ཧཱུྃ་ཕཊཿཀྱི་སྔགས་འདི་གདོན་བགེགས་ཀྱིས་མི་ཚུགས་པར་བྱེད་པའི་སྔགས་ཡིན་ནོ།། ༼ཁ ཞར་བྱུང་རྡོར་དྲིལ་བྱིན་རླབས། དེ་ཡན་ཆད་ཀྱིས་འགལ་རྐྱེན་བགེགས་བསལ་བ་བསྟན་ལ། འདི་མན་ཆད་མཐུན་རྐྱེན་དཀྱིལ་འཁོར་སྦྱོང་བའི་ཡན་ལག་གི་སྐོར་དེ་གསུངས་པ་ཡིན་ཞིང་། མཚམས་འདི་ནས་ཆོ་ག་སྤྱི་འགྲོས་ལ་རྡོར་དྲིལ་བྱིན་བརླབ་འབྱུང་བ་ཡིན་ལ། ལས་བྱང་རྩར་ཕྲེང་ལྟར་ན། ཧཱུྃ་ཆོས་ཉིད་སྐྱེ་བ་མེད་པ་ལས། །མ་འགགས་ཐབས་ཤེས་བརྡར་མཚོན་ཕྱིར། །རྡོ་རྗེ་གསོར་ཞིང་དྲིལ་བུ་དཀྲོལ། །འགྲོ་བ་སེམས་ཅན་ཐམས་ཅད་ཀུན། སད་ནས་སངས་རྒྱས་སར་འཇུག་ཕྱིར། །ཡང་དག་ཉིད་དུ་བརྡས་མཚོན་ནོ། །ཟུང་འཇུག་ལམ་ལ་མ་བསྟེན་པར། །མཐར་ཕྱིན་འབྲས་བུ་ཐོབ་མི་སྲིད། །ཐབས་ཤེས་ཡང་དག་ཉིད་ལ་འཇུག །ཧཱུྃ་བཛྲ་གནྡྷེ་དྷརྨ་ཧཱུྃ་ཨཱཿཞེས་གསུངས་པའི་ཚིག་དེ་ཡིན་ནོ། །འདི་ཐབས་ཤེས་ཡ་མི་འབྲལ་བའི་ཕྱིར་ཕྱག་རྒྱ་གསུམ་གཟུང་བ་ཞེས་པ་དེ་ཡིན་ལ། རང་ཉིད་རྡོར་སེམས་སུ་གསལ་བ་སྐུ་ཡི་དམ་ཚིག་དང་གཅིག ཧཱུྃ་ལས་བྱུང་བའི་ཡེ་ཤེས་རྡོ་རྗེ་ཐབས་ཀྱི་རང་བཞིན་དྲན་རྟོག་ཐུགས་ཀྱི་དམ་ཚིག་དང་གཉིས། ཨ་ལས་བྱུང་བའི་དབྱིངས་ཀྱི་དྲིལ་བུ་གྲག་པ་གསུང་གི་དམ་ཚིག་དང་དམ་ཚིག་གསུམ་དྲན་པའི་ངང་ནས་ལག་པ་གཡས་པས་རྡོ་རྗེ་གསོར་ཞིང་གཡོན་པས་དྲིལ་བུ་དཀྲོལ་ཡོང་དུས་འགྲོ་ཀུན་མ་རིག་པའི་གཉིད་ལས་སད་པར་བསམ་དགོས་སོ། །འདིའི་རྡོར་དྲིལ་བྱིན་རླབས་ཀྱི་ཚིག་དང་བསྟུན་ན་ཆོས་ཉིད་སྐྱེ་བ་མེད་པ་ལས་ཞེས་གསུངས་པས་སྣང་རིག་གདོད་མའི་ཆོས་ཉིད་དེ་ཡེ་ནས་སྤྲོས་པ་དང་བྲལ་བ་སྐྱེ་འགག་གཉིས་སྣང་དུ་གྲུབ་པ་མེད་པ་དེ་ལས་མ་འགགས་འགག་པ་མེད་པའི་རྩལ་སྣང་ཐབས་བདེ་བ་ཆེན་པོ་དང་། ཤེས་རབ་སྟོང་པ་ཉིད་མཚོན་པའི་ཕྱིར་བདེ་བ་ཆེན་པོའི་བདག་ཉིད་ཀྱི་རྡོ་རྗེ་གསོར་ཞིང་སྟོང་བ་ཉིད་ཀྱི་དྲིལ་བུ་དཀྲོལ་བས་བདེ་སྟོང་ཟུང་འཇུག་དབྱེར་མི་ཕྱེད་པའི་སྒྲ་དེ་ཡིས་འགྲོ་བ་དྲུག་གི་སེམས་ཅན་ཐམས་ཅད་མ་རིག་པའི་གཉིད་ལས་སད་ནས་ཞི་བ་མཆོག་གི་གོ་འཕང་སངས་རྒྱས་ཀྱི་སར་འཇུག་པའི་ཕྱིར་དུ་ཐབས་ཤེས་ཡ་མ་བྲལ་བའི་བདེ་སྟོང་ཟུང་དུ་འཇུག་པའི་ལྷན་སྐྱེས་བདེ་ཆེན་གྱི་ཡེ་ཤེས་མཆོག་ཏུ་མི་འགྱུར་བའི་ལམ་ཡང་དག་པ་ཉིད་ལ་འཇུག་པའི་བརྡས་མཚོན་པར་བྱ་བ་ཞིག་ཡིན་ཞིང་། དེ་ཡིས་དམ་བཅའ་བའམ་ཕྱག་རྒྱ་གསུམ་བཟུང་བའི་དོན་ཡང་བསྟན་པ་ཡིན་ནོ། །ཨཱོྃ་བཛྲ་གནྡྷེ་དྷརྨ་ཧཱུྃ་ཨཿཞེས་པའི་སྔགས་ཀྱི་དོན་ཨཱོྃ་ཡེ་ཤེས་ལྔ་ཡི་རང་བཞིན་ཡིན་ལ། བཛྲ་ཐབས་ཀྱི་རང་བཞིན་རྡོ་རྗེ། གནྡྷེ་ཤེས་རབ་ཀྱི་རང་བཞིན་དྲིལ་བུ། གནྡྷེ་དྷརྨ་ཞེས་པའི་དྷརྨ་ཆོས་ཁམས་དབྱིངས་སྟོང་ཉིད་མཚོན་པའི་དྲིལ་བུ་ཆོས་ཀྱི་འབྱུང་གནས་ལ་གོ་ཞིང་། ཧཱུྃ་ཨཿཞེས་པ་ཟུང་དུ་འཇུག་པའི་དོན་ཡིན་ནོ། །དེ་ལྟ་བུ་རྡོ་རྗེ་སེམས་དཔའ་གཉིས་མེད་ཀྱི་དགོངས་པ་ལས་མ་གཡོས་བཞིན་དུ་འདི་ལ་འཁྱུད་རྒྱ་བྱས་ན་དགོས་པ་ཅི་ཞིག་ཡོད་ན་ཐབས་ཤེས་ཡ་བྲལ་གྱི་ལྟ་བ་ངན་པའི་བག་ཆགས་དག་ནས་ཟུང་འཇུག་དབྱེར་མེད་བདེ་བ་ཆེན་པོའི་ཡེ་ཤེས་མ་བཙལ་ངང་གིས་རྙེད་པའི་རྟེན་འབྲེལ་བསྒྲིགས་པ་ཡིན་ལ། དེའི་མཐུ་ཡིས་རྫོགས་རིམ་བདེ་སྟོང་དབྱེར་མེད་ཀྱི་ཡེ་ཤེས་མ་བྱས་ཡེ་རྫོགས་ལྷུན་གྲུབ་ཏུ་འགྲོ་བའི་དགོས་པ་ཡོད་ཅིང་། ཕར་ཕྱིན་སྡུད་པའི་ནང་དུ། དེ་ཡང་ཐབས་དང་ཤེས་རབ་མཆོག་གིས་ཡོངས་ཟིན་ན། །མི་མཉམ་དེ་བཞིན་གཤེགས་ཀྱི་བྱང་ཆུབ་རེག་པར་འགྱུར། །ཞེས་གསུངས་པ་ལྟར་དུ་ཡིན་ནོ། །གསང་སྔགས་ཀྱི་བཅང་བའི་དམ་ཚིག་མེད་དུ་མི་རུང་བ་རྡོར་དྲིལ་དང་ཅང་ཏེའུ་ཡི་རྣམ་བཞག་འདི་སྔོན་ན་ནིང་ཞིག་ནས་བཤད་མྱོང་ཡང་འདིར་སྐབས་བསྟུན་གྱིས་མདོར་བསྡུས་ཤིག་ཞུས་ན། རྡོ་རྗེ་ནི་དེ་ལ་ཚད་དང་། མཚན་ཉིད། དག་དྲན་གསུམ་གྱི་ཐོག་ནས་བཤད་དགོས་སོ། །དེའི་ནང་ནས་ཚད་དེ་གང་ཡིན་ཞེ་ན། མཚོན་བྱ་དོན་གྱི་རྡོ་རྗེ་དང་། མཚོན་བྱེད་རྟགས་ཀྱི་རྡོ་རྗེ་སྟེ་དབྱེ་བ་གཉིས་ཡོད་ཅིང་། མཚོན་བྱ་དོན་གྱི་རྡོ་རྗེ་དེ་རྒྱལ་བའི་ཐུགས་གཉིས་སུ་མེད་པའི་ཡེ་ཤེས་ཡིན་ལ། དེས་མཚོན་ནས་སྐུ་གསུང་ཐུགས་རྡོ་རྗེའི་རྣམ་པར་རོལ་བ་ལ་གོ་ཆོག་གོ །མཚོན་བྱེད་རྟགས་ཀྱི་རྡོ་རྗེ་དེ་ཇི་ལྟ་བུ་ཞིག་ཡིན་ན། བི་ཏོ་ཏ་མ་འབུམ་སྡེའི་རྒྱུད་ལས། གསེར་སོགས་ལས་བྱས་རྡོ་རྗེ་ནི། །རྩེ་གསུམ་རྩེ་ལྔ་རྩེ་དགུ་བ། །ཆངས་གཟུང་རྩ་གསུམ་མཛེས་པའི་ཚད། །ཅེས་གསུངས་པ་དང་། རྩེ་མོ་གཅིག་པ་ནས་རྩེ་མོ་སྟོང་གི་བར་ཡོད་ཚུལ་ཡང་གསུངས་ཡོད་དོ། །གང་ལྟར་ཡང་ཡོངས་ཁྱབ་ལ་རྩེ་ལྔ་རྩེ་དགུ་གཉིས་ཀ་གྲགས་ཆེ་བས་རྩེ་ལྔ་བ་དེ་ཉིད་ལ་དམ་ཚིག་གི་རྡོ་རྗེ་ཟེར་ལ། དགུ་བ་ལ་ཡེ་ཤེས་ཀྱི་རྡོ་རྗེ་ཟེར་ཞིང་། དེ་བཞིན་དུ་དྲིལ་བུའི་རྩེ་རྡོར་ལ་ཡང་རྭ་མང་ཉུང་གིས་དམ་ཚིག་གི་དྲིལ་བུ་དང་། ཡེ་ཤེས་ཀྱི་དྲིལ་བུ་ཞེས་འབོད་སྲོལ་ཡོད་དོ། །རྡོ་རྗེ་འདི་ལ་ཆ་གསུམ་གྱི་ཆ་ཚད་ཡོད་ཅིང་། དབུས་ཀྱི་ཆངས་གཟུང་དེ་ཆ་གཅིག་ཡིན་ལ། ཆངས་པ་ནི་ལག་པའི་སྤར་མོ་ཡིན་པས་ལག་པའི་སྤར་མོས་གཟུང་ས་ལ་ཆངས་གཟུང་ཞེས་ཟེར་རོ། །སྣེ་གཉིས་ཀྱི་རྭ་རེའི་རིང་ཐུང་གི་ཆ་རེ་རེ་ལ་ཆ་གཉིས་ཏེ་ཆ་གསུམ། ཆེ་ཆུང་གི་ཚད་དེ་སོར་བཞི་ནས་ཉི་ཤུའི་བར་སྤྱིར་བཏང་གིས་བཤད་ཡོད་ཀྱང་མཐའ་མ་བཀག་པ་ཡིན་ཞིང་། དྲིལ་བུའི་ཚད་ཀྱང་དེ་དང་མཉམ་དགོས་ལ། དེ་ཚད་དང་མཚན་ཉིད་ཡིན་ནོ། །དག་དྲན་གྱི་ཐད་ནས་བཤད་ན་སྟེང་གི་རྭ་ལྔ་དེ་རྒྱལ་བ་རིགས་ལྔ། འོག་གི་རྭ་ལྔ་དེ་དབྱིངས་ཕྱུག་ཡུམ་ལྔ། སྟེང་གི་པད་འདབ་བརྒྱད་དེ་སེམས་དཔའ་ཡབ་བརྒྱད། འོག་གི་པད་འདབ་བརྒྱད་དེ་སེམས་མ་ཡུམ་བརྒྱད་སོགས་ཀྱི་རང་བཞིན་ཡིན་པར་དག་དྲན་བྱ་དགོས་སོ། །རྭ་དགུ་བ་ཡིན་ན་སྟེང་ཕྱོགས་ཀྱི་ཕྱོགས་བཞིའི་རྭ་བཞི་དེ་རྣམ་སྣང་ལ་སོགས་པ་བདེ་བར་གཤེགས་པ་བཞི། མཚམས་ཀྱི་རྭ་བཞི་དེ་སྤྱན་མ་ལ་སོགས་པ་ཡུམ་བཞི། དབུས་རྭ་དེ་རྡོ་རྗེ་མི་བསྐྱོད་པ། འོག་ཕྱོགས་ཀྱི་རྭ་ཚང་མ་བྱང་ཆུབ་སེམས་དཔའ་བརྒྱད། དབུས་རྭ་རྡོ་རྗེ་སེམས་དཔའ་སྟེ་དེ་ལྟ་བུའི་སྒོ་ནས་གསུངས་ཚུལ་ཡོད་ལ། ད་རུང་བཤད་པ་མང་པོ་ཡོད་དོ། །འདིའི་དག་དྲན་གྱི་གཙོ་བོ་གཞི་ལམ་འབྲས་གསུམ་དང་སྦྱར་སྐབས་གཞི་ཆོས་དབྱིངས་སྤྲོས་པ་ཀུན་བྲལ་དོན་དམ་པའི་རྡོ་རྗེ། ལམ་སྣང་བཞི་འོད་གསལ་མངོན་དུ་གྱུར་པ་རིག་པ་བྱང་ཆུབ་སེམས་ཀྱི་རྡོ་རྗེ། འབྲས་བུ་དབྱིངས་རིག་དབྱེར་མེད་དེ་ཁོ་ན་ཉིད་ཀྱི་རྡོ་རྗེ་སྟེ། མདོར་ན་སྟོང་ཉིད་སྙིང་རྗེ་དབྱེར་མེད་དུ་རྟོགས་པའི་ལྟ་བས་འཁོར་གསུམ་དམིགས་མེད་ཀྱི་ཀློང་དུ་རྒྱས་འདེབས་པ་དེ་དོན་གྱི་རྡོ་རྗེ་ཡིན་ནོ། །འདིར་དོན་དམ་སྟོང་ཉིད་ཀྱི་རྡོ་རྗེ། ཀུན་རྫོབ་རྫས་ཀྱི་རྡོ་རྗེ། སྣང་བ་བརྡ་ཡི་རྡོ་རྗེ། བཏགས་པ་མིང་གི་རྡོ་རྗེ་ལ་སོགས་པ་སྤྲོས་བཤད་མང་ཡང་དོན་ངོ་མའི་ཐོག་ནས་བཤད་ན་གཟུང་འཛིན་ཐ་དད་མེད་པའི་སྟོང་བ་ཉིད་ཀྱི་རང་བཞིན་ལ་རྡོ་རྗེ་ཟེར་རོ། །དྲིལ་བུའི་རྣམ་བཞག་ལའང་དྲིལ་བུའི་རྒྱུ། ལུས་ཚད། རིགས་ཀྱི་དབྱེ་བ། དག་དྲན་རྣམས་བཤད་རྒྱུ་ཡོད་དོ། །རྒྱུ་འཁར་བའམ་ཡང་ན་ལྕགས་གསུམ་ལས་བྱར་གསུངས་ལ། འཁར་བ་ནི་ང་ཚོའི་ཁ་སྐད་ལ་འཁར་ར་ཞེས་པ་དེ་ཡིན་པ་དང་། ལྕགས་གསུམ་ནི་གསེར་དངུལ་ཟངས་གསུམ་ལ་ཟེར་རྒྱུ་ཡིན་འདུག་གོ །ལུས་ཚད་ཀྱི་ཐོག་ནས་ཆ་གསུམ་ལུས་ནི་ལྡན་པར་བྱ་ཞེས་ཆ་གསུམ་ཕྱེས་ནས་གསུང་ས་ཡང་ཡོད་ལ། ཡོངས་གྲགས་ཀྱིས་ལུས་ཚད་དེ་ཆ་དྲུག་བྱས་ནས་འོག་ཕྱོགས་ཀྱི་ཆ་བཞི་དེ་ཁོག་པ་དང་། སྟེང་གི་ཆ་གཉིས་པོའི་ཞབས་མ་ཤེས་རབ་ཞལ་བུམ་གདན་དང་བཅས་པ་དང་། ཐོག་མ་པད་མ་དང་བཅས་པའི་རྡོ་རྗེ་ཕྱེད་པར་བྱས་ན་དྲིལ་བུའི་ལུས་ཚད་སྒྲོས་པ་ཡིན་ཞིང་ཚད་དང་ལྡན་ནོ། །སྟེང་ཕྱོགས་ཀྱི་དབྱུག་པའི་ཆ་གཟུགས་མེད་ཀྱི་ཁམས། ཁོག་པའི་ཕྱིའི་ལྷ་མོ་བརྒྱད་ཀྱི་མཚན་མ་བཀོད་ཡོད་ས་དེ་གཟུགས་ཁམས། དེའི་འོག་ནང་གི་དབྱུག་གུ་དང་ནམ་མཁའི་སྟོང་ཆ་རྣམས་འདོད་ཁམས་ཏེ་ཁམས་གསུམ་གྱི་རང་བཞིན། དེ་བཞིན་དུ་ཁམས་གསུམ་དག་པ་སྐུ་གསུམ་གྱི་རང་བཞིན་སོགས་འོག་ནས་དག་དྲན་གྱི་སྐབས་ནས་བཤད་རྒྱུ་ཡིན་ནོ། །དྲིལ་བུའི་རིགས་ཀྱི་ཐོག་ནས་དྲིལ་བུ་འདི་ལ་རིགས་གསུམ་ཡོད་དེ། རྡོ་རྗེ་སེམས་དཔའི་དྲིལ་བུ་ཞེས་པ་དང་། དཔའ་བོའི་དྲིལ་བུ་ཞེས་པ་དང་། རིགས་སོ་སོའི་དེ་བཞིན་གཤེགས་པའི་དྲིལ་བུ་ཞེས་པ་དེ་ལྟར་ཡོད་ཚུལ་དང་། དེའི་དབྱེ་བ་ཡང་མང་པོ་གསུངས་ཡོད་དོ། །རྡོ་རྗེ་སེམས་དཔའི་དྲིལ་བུ་དང་དཔའ་བོའི་དྲིལ་བུ་འདི་གཉིས་ཧ་ལམ་འདྲ་བ་ཞིག་ཡིན་ཞིང་། རྩེ་ལྔ་བ་དགུ་བ་གང་ཡིན་ན་ཡང་ཡོད་ཆོག་གོ །དེ་བཞིན་གཤེགས་པའི་དྲིལ་བུ་དེ་མཐའ་གཅིག་ཏུ་རྩེ་མོ་ལྔ་བ་ཡིན་དགོས་པ་དང་། རྡོ་རྗེ་སེམས་དཔའི་དྲིལ་བུ་ལ་སྟེང་གི་པདྨ་རྣམས་སུ་ཤར་དུ་སྒྲོལ་མའི་ས་བོན་ནས་བྱང་ཕྱོགས་ལ་གོས་དཀར་མོ་ལ་སོགས་པ་ཡོད་ཅིང་། འདི་ནས་དྲིལ་བུའི་མཚན་ཉིད་བཤད་དུས་ཤར་ཕྱོགས་སྒྲོལ་མའི་ས་བོན་ཡོད་ས་ལ་ཞལ་བསྟན་དགོས་གསུངས་ན་སྒྲོལ་མ་ཞེས་པ་རྗེ་བཙུན་སྒྲོལ་མ་དཀར་ལྗང་ལ་གོ་རྒྱུ་མ་ཡིན་ལ། འདི་རིགས་ཀྱི་ཡུམ་ལྔའི་ནང་ཚན་དོན་གྲུབ་སྒྲོལ་མ་ལ་གོ་དགོས་སོ། །དེ་བཞིན་དུ་ནུབ་ཏུ་མཱ་མ་ཀཱི། ལྷོར་སངས་རྒྱས་སྤྱན་མ་རྣམས་ཀྱི་ས་བོན་ཡོད་ལ། མཚམས་བཞིར་ས་བོན་ཡོད་ཅིང་། ཁོག་པའི་ལོགས་ཀྱི་དྲ་བ་དྲ་ཕྱེད་སྟེང་གི་པད་འདབ་སོ་སོའི་ཐད་ཀ་ནས་རྫོགས་ནས་ཡོད་དོ། །དྲ་ཕྱེད་འཕྱང་ཡོད་པའི་བར་ནས་མུ་ཏིག་གི་ཕྲེང་བ་ལྟ་བུའི་སྐེད་རགས་གཉིས་ཡོད་པ། དེའི་བར་རྡོ་རྗེའི་ཕྲེང་བ་ཡོད་པ། དྲ་ཕྱེད་ཀྱི་ནང་ན་ཕྱག་མཚན་ཡོད་པ། དཔའ་བོའི་དྲིལ་བུ་ལ་ལྷ་མོ་བརྒྱད་ཀྱི་ས་བོན་དང་དྲ་ཕྱེད་མེད་པ་མ་གཏོགས་འདྲའོ། །དེ་བཞིན་གཤེགས་པའི་དྲིལ་བུ་དེ་ཁྱད་པར་དམིགས་བསལ་ཅན་སྐེད་རགས་གཉིས་ཀྱི་བར་རམ་དབུས་ས་ནས་རང་རང་གི་རིགས་དང་མཐུན་པའི་ཕྱག་མཚན་གྱི་ཕྲེང་བ་དགོས་རྒྱུ་སོགས་ཁྱད་པར་དེ་ལྟར་དུ་གསུངས་ཡོད་དོ། །དྲིལ་བུའི་དག་དྲན་དེ་ཇི་ལྟ་བུ་ཞིག་ཡིན་ན་སྒྲུབ་པ་བོ་རང་ཉིད་རྣམ་སྣང་ལ་སོགས་པ་རིགས་སོ་སོ་དང་། རིགས་དྲུག་པ་རྡོ་རྗེ་འཆང་གི་ང་རྒྱལ་བྱས་ནས་རྡོ་རྗེ་སྙེམས་མ་ལ་སོགས་པ་དབྱིངས་ཀྱི་ཡུམ་སོ་སོར་སྒོམ་དུས་རིགས་སོ་སོའི་ལས་ཀྱི་ཕྱག་རྒྱ་མཚོན་ལ། རྡོ་རྗེ་ཐབས་དང་དྲིལ་བུ་ཤེས་རབ་ཀྱིས་བདེ་བ་དང་སྟོང་བ་ཕན་ཚུན་རྒྱས་གདབ་པའི་ཕྱིར་དུ་རྩེ་མོར་རྡོ་རྗེ་ཕྱེད་པས་མཚན་པའི་རྡོར་དྲིལ་ཞལ་སྦྱོར་གྱིས་ཐབས་ཤེས་ཟུང་འཇུག་མཚོན་ནོ། །དེས་ན་རྡོ་རྗེ་དང་དྲིལ་བུ་གཉིས་ཀ་ལག་གཡས་གཡོན་གཉིས་ཀས་མཉམ་པོར་གཟུང་དགོས་ཤིང་། དྲིལ་བུའི་ཤེས་རབ་ཞལ་ནས་ལག་པ་གཡོན་པའི་མཐེ་མོ་དང་མིང་མེད་གཉིས་ཀས་བཟུང་སྟེ་དཀྲོལ་དགོས་ལ། དེ་ཕྱི་ལྟར་དུ་བཤད་པ་ཡིན་ནོ། །ནང་ལྟར་དུ་བཤད་ན་དྲིལ་བུའི་ནང་གི་སྟོང་ཆ་ནམ་མཁའི་རང་བཞིན་དེ་ཟབ་མོ་སྟོང་པ་ཉིད་ཆོས་དབྱིངས་སྤྲོས་པ་དང་བྲལ་བ་མཚོན་བྱེད། ནང་གི་དྲིལ་ལྕེ་ཡེ་ཤེས་ཀྱི་རྒྱལ་པོ། དཀྲོལ་ཡོང་དུས་སྟོང་ཉིད་བདེ་ཆེན་དབྱེར་མེད་མ་བཅོས་ལྷན་ཅིག་སྐྱེས་པའི་ཡེ་ཤེས་ཀྱིས་ཆོས་སྒྲ་སྒྲོག་པར་བསམ་རྒྱུ་དང་། དེའི་ཆོས་སྒྲ་དེ་ཡིས་ཕྱོགས་བཅུ་དེ་བཞིན་གཤེགས་པ་ཐམས་ཅད་ཀྱི་ཐུགས་མཉེས། སེམས་ཅན་ཐམས་ཅད་མ་རིག་བག་ཆགས་ཀྱི་གཉིད་འཐུག་ལས་སད། དེ་ཁོ་ན་ཉིད་ཀྱི་དོན་རྟོགས་ནས་འཁོར་བའི་སྡུག་བསྔལ་དྲུངས་ནས་འབྱིན་པར་བསམ་དགོས་སོ། །གསང་བ་ལྟར་དུ་བྱས་ན་རྡོར་དྲིལ་འདི་ཐབས་ཤེས་དབྱེར་མེད་བདེ་སྟོང་ཟུང་འཇུག་རྒྱལ་བའི་གསང་གསུམ་མཚོན་བྱེད་ཀྱི་སྐུ་གསུང་ཐུགས་ཀྱི་རྟེན་གསུམ་ག་ཚང་བ་ཡིན་པས་སྤྱིར་བཏང་གི་ཉེར་མཁོའི་ཡོ་བྱད་ཙམ་དུ་མི་བརྩི་བར་གུས་པ་ཆེན་པོའི་སྒོ་ནས་མཆོད་དགོས་ཤིང་། ས་རྗེན་གྱི་སྟེང་དུ་འཇོག་མི་རུང་ངོ་། ཅང་ཏེའུའམ་ཌཱ་མ་རུ་ཡང་གསང་སྔགས་ཀྱི་རྣལ་འབྱོར་བས་བཅང་བའི་དམ་ཚིག་གི་ནང་ནས་བསྲུང་བྱ་གཅིག་ཡིན་ལ། འདི་ལ་མཚན་ཉིད་དང་དགོས་པ་དཀྲོལ་ལུགས་ཡོད་དོ། །ཅང་ཏེའུ་ཡི་མཚན་ཉིད་དེ་ཇི་ལྟར་གསུངས་ཡོད་ན་རྒྱུ་རྡོ་རྗེ་ཅན་གྱི་ཤིང་དང་། ཙན་དན་བ་གླང་མགོའི་རྩ་བ་རྣམས་ཡོད་དགོས་པར་རྒྱུད་ཀྱི་ནང་ན་གསུངས་ཀྱང་མ་རྙེད་ན་རྒྱུ་གང་ཡང་རུང་བས་བྱེད་ཆོག་གསུངས་ལ། མིའི་ཐོད་པས་ཀྱང་བྱེད་ཆོག་ཅིང་། དེ་ལ་ཐོད་རྔ་གསུང་ས་ཡང་ཡོད་དོ། །ཡང་གསང་བའི་རྔེའུ་ཆུང་ཞེས་པ་ཞིག་ཡོད་ཅིང་། དེ་ཁ་ཁ་ཞིག་ཡིན་ནོ། །འུ་ཚོས་བརྒྱད་གཉིས་ལྟག་སྤྲོད་དང་། བཅུ་དྲུག་ལྟག་སྤྲོད་ཅེས་ཟེར་དར་ཡང་རྒྱུད་ཀྱི་ནང་ངོ་མ་ན་བུ་ལོ་བཅུ་དྲུག་པ་དང་། བུ་མོ་ལོ་བཅུ་གཉིས་ཅན་གྱི་ཐོད་པ་ལྟག་སྤྲོད་བྱས་པའི་ཌཱ་མ་རུ་བདེ་སྟོང་ཡེ་ཤེས་སྦོར་བའི་རྟེན་འབྲེལ་དུ་བཟང་གསུངས་སོ། །དེ་ལ་སྔགས་ཡིག་འབྲི་རྒྱུ་དང་། འབྲི་བྱེད་ཀྱི་རྒྱུ་ཆ། དེའི་རྒྱན་དང་། ལུང་ཐག་ལ་སོགས་པའི་ཆ་ཚད་དང་བཤད་པ་མང་ལ། འདི་དཀྲོལ་བའི་གནས་སྐབས་ན་ཅང་ཏེའུ་ཡི་དག་དྲན་ཤེས་པའི་ངང་ནས་དཀྲོལ་དགོས་ཤིང་། ཅང་ཏེའུ་ཡི་སྒྲས་གྲག་སྟོང་སྐྱེ་མེད་སྟོང་པ་ཉིད་ཀྱི་དོན་མཚོན་ནོ། །ཐོད་པས་བདེ་ཆེན། སྒྲ་ཡིས་སྟོང་ཉིད། དེ་གཉིས་ཀ་དབྱེར་མི་ཕྱེད་པས་བདེ་སྟོང་གཉིས་མེད་ཀྱི་ཡེ་ཤེས་མཚོན་ལ། རྒྱུད་ལས་ཐབས་ཀྱི་རྡོ་རྗེ་ཅང་ཏེའུ་ཉིད་ཅེས་དང་། ཤེས་རབ་ཌཱ་མ་རུ་ཡི་སྒྲ་ཞེས་གསུངས་ཡོད་ཅིང་། དེ་ལྟ་བུའི་དག་དྲན་གྱི་ངང་ནས་མཐེབ་མཛུབ་གཉིས་ཀྱིས་ཌཱ་མ་རུའི་དྲྭ་བ་བསྣོལ་མཚམས་ཀྱི་སྐེ་དཀྲིས་ནས་བཟུང་སྟེ་དཀྲོལ་དགོས་གསུངས་སོ། །དགོས་པ་ཅི་ཞིག་ཡོད་ན་དེ་ལྟ་བུའི་དག་དྲན་དང་བཅས་ཏེ་དཀྲོལ་ན་བདེ་སྟོང་གཉིས་མེད་ཀྱི་ཡེ་ཤེས་ཕྱག་རྒྱ་ཆེན་པོ་སྒྲའི་རྣམ་པར་ཤར་བའི་རོལ་བས་བླ་མ་དང་དཀྱིལ་འཁོར་གྱི་ལྷ་ཚོགས་མཉེས་པར་བྱ་བའི་ཕྱིར་དང་། དེ་དག་གི་བྱིན་རླབས་དང་དངོས་གྲུབ་དུས་རིང་པོར་མི་ཐོགས་པར་མྱུར་དུ་སྩོལ་བའི་དགོས་པ། སྒྲ་དེ་ཡིས་བསྐུལ་ནས་དཔའ་བོ་མཁའ་འགྲོ་གནས་ཡུལ་ཞིང་སྐྱོང་ཐམས་ཅད་འདུས་ནས་བྱིན་གྱིས་རློབ་པའི་དགོས་པ། མཁའ་འགྲོ་ཆོས་སྐྱོང་རྣམས་བདག་གི་དབང་དུ་འདུས་ནས་ཐུགས་རྒྱུད་བསྐུལ་ན་ཕྲིན་ལས་མྱུར་བའི་དགོས་པ་དེ་ལྟར་མང་པོ་ཡོད་དོ། །དེ་ཡན་གྱིས་འུ་ཚོས་ཞོར་དུ་རྡོར་དྲིལ་ཅང་ཏེའུ་བཅང་བའི་དམ་ཚིག་གི་རྣམ་བཞག་དང་འབྲེལ་བ་ཅུང་ཟད་ཅིག་འཕྲོས་དོན་དུ་བཤད་པ་ཡིན་ནོ།། ༼ག སྔོན་འགྲོ་རྒྱུད་སྦྱང་བ། ད་ནི་སྔོན་འགྲོ་རྒྱུད་སྦྱང་ནི༔ ཞེས་མཚམས་སྦྱར་ཏེ། ལས་བྱང་ཆེ་བའི་ནང་གི་ཡན་ལག་བཅུ་དེ་འདི་ནས་ཡན་ལག་བདུན་གྱི་ནང་དུ་བསྡུས་ཏེ་སྙིང་པོར་དྲིལ་ནས་བསྟན་ཡོད་ལ། ཡན་ལག་བཅུ་ནི་སྐྱབས་སུ་འགྲོ་བའི་ཡན་ལག སྤྱན་འདྲེན་པའི་ཡན་ལག བཞུགས་སུ་གསོལ་བའི་ཡན་ལག ཕྱག་འཚལ་བའི་ཡན་ལག མཆོད་པ་འབུལ་བའི་ཡན་ལག བཤགས་པ། ཡི་རང་། ཆོས་འཁོར་བསྐོར་བར་བསྐུལ་བ། མྱ་ངན་ལས་མི་འདའ་བར་བཞུགས་གསོལ་འདེབས་པ། བསྔོ་བའི་ཡན་ལག་སྟེ་དུས་རྒྱུན་འབྱུང་བ་ལྟར་དུ་བཅུ་བོ་དེ་ཡིན་ཞིང་། འདིའི་ནང་ནས་མི་འདྲ་ས་ཞིག་ལ་སྐྱབས་སུ་འགྲོ་བ་ལ་སོགས་པ་ཁ་ཤས་ཡོད་དོ། །བཅུ་བོ་འདི་བདུན་གྱི་ཁོངས་སུ་བསྡུ་ན་ཇི་ལྟར་ཡིན་ཞེ་ན། སྐྱབས་འགྲོའི་ཚོགས་ཞིང་དེ་ཕྱག་འཚལ་བའི་ཡུལ་ཡིན་ཞིང་། མཆོད་པ་འབུལ་བའི་ཞིང་ཡིན་ལ། སྡིག་པ་བཤགས་པའི་རྟེན་གྱི་སྟོབས་ལ་སོགས་པ་ཡིན་པས་ན་སྤྱན་འདྲེན་དང་གཉིས་ཀ་སྤྱི་ཁྱབ་ཀྱིས་བསྡུ་ཚུལ་དང་གཅིག ཡང་ཁྱད་པར་ཅན་གྱི་ཡན་ལག་སྐྱབས་འགྲོ་དེ་ཕྱག་གི་ཁོངས་སུ་ཡང་བསྡུ་ཆོག་ཅིང་། སྐྱབས་ཡུལ་ཕྱོགས་བཅུ་དུས་གསུམ་གྱི་ཞིང་ཁམས་རབ་འབྱམས་རྒྱ་མཚོ་མུ་མེད་ནམ་མཁའི་ཕ་མཐར་ཐུག་པའི་བདེ་གཤེགས་ཞི་ཁྲོ་རབ་འབྱམས་མཆོག་གསུམ་རྩ་གསུམ་རྒྱ་མཚོ་ཐམས་ཅད་ཡིན་ནོ། །བཞུགས་སུ་གསོལ་བའི་ཡན་ལག་ཀྱང་ཆོ་གའི་འགྲོས་ལྟར་ན་སྤྱན་འདྲེན་གྱི་དེ་མ་ཐག་ཏུ་འབྱུང་བས་དེ་དང་ཆབས་ཅིག་ཏུ་སྦྲེལ་བའམ་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་གི་ཁོངས་སུ་བསྡུ་ནའང་ཆོག་གོ །རྒྱུད་སྦྱོང་བ་ཡན་ལག་བདུན་པའམ་བདུན་རྣམ་དག་དངོས་ནི་འདི་ནས་དངོས་བསྟན་དུ་འབྱུང་བའི་རྡོ་རྗེ་སློབ་དཔོན་སངས་རྒྱས་དཔལ་ལ་སོགས་པ་འདི་ཡིན་ཞིང་། དུས་རྒྱུན་གྱི་ཐུན་མོང་གི་ལུགས་ཀྱི་ཡན་ལག་བདུན་དང་འདི་མི་འདྲ་ལ། ཡན་ལག་བརྒྱད་པར་གྱུར་ཡོད་དོ། །ཆོས་འཁོར་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་བཞུགས་གསོལ་འདེབས་པ་གཉིས་ཤུགས་ལ་བསྟན་ནས་དངོས་བསྟན་ལ་ཕྱག་འཚལ་བ། མཆོད་པ། བཤགས་པ། ཡི་རང་། བསྔོ་བ་རྣམས་ཀྱི་སྟེང་དུ་སྐྱབས་འགྲོ། སེམས་བསྐྱེད། ལུས་འབུལ་རྣམས་བསྣན་པས་དོན་གྱིས་ཡན་ལག་བཅུ་བར་གྱུར་ཡོད་དོ།། རྡོ་རྗེ་སློབ་དཔོན་སངས་རྒྱས་དཔལ༔ དུས་གསུམ་བཞུགས་ལ་ཕྱག་འཚལ་ལོ༔ མཆོག་གསུམ་བསྟེན་པའི་ཞིང་གྱུར་ལ༔ གཉིས་མེད་ཡིད་ཀྱིས་སྐྱབས་སུ་མཆི༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ དག་པའི་མཆོད་པ་བཞེས་སུ་གསོལ༔ དངོས་གྲུབ་ཆུ་བོ་གཅོད་པའི་གེགས༔ ཉེས་བྱས་མ་ལུས་བཤགས་པར་བགྱི༔ ཕྱོགས་བཅུ་འཁོར་གསུམ་དག་པའི་ཆོས༔ མ་ཆགས་སྤྱོད་ལ་རྗེས་ཡི་རང་༔ དག་པའི་མཐའ་བཞི་དྲི་མ་མེད༔ རྫོགས་པའི་བྱང་ཆུབ་སེམས་བསྐྱེད་དོ༔ བདེ་གཤེགས་དབང་ཕྱུག་སེམས་ཅན་ལ༔ དགོས་པ་གསུམ་ཕྱིར་ལུས་འབུལ་ལོ༔ ཚེ་རབས་བགྲངས་པའི་ལས་རྣམས་ཀུན༔ བསྡུས་ཏེ་བྱང་ཆུབ་ཆེན་པོར་བསྔོ༔ ཞེས་གསུངས་ཏེ། འདི་ནས་རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །ཞེས་གསུངས་པ་འདིས་ཅི་ཞིག་བསྟན་ན་ཕྱག་འཚལ་བ་བསྟན་ལ། ཕྱག་འཚལ་བ་དེ་ང་རྒྱལ་གྱི་གཉེན་པོ་ཡིན་ཞིང་། འདིའི་དོན་སྔགས་ཀྱི་ལམ་ནས་དངོས་གྲུབ་ཐོབ་པ་དེ་བླ་མ་རྡོ་རྗེ་སློབ་དཔོན་ལ་རག་ལས། རྡོ་རྗེ་སློབ་དཔོན་དེ་ནི་ཕྱི་ནང་གསང་བའི་དེ་ཉིད་བཅུ་དང་། རང་བཞིན་བརྒྱད་ལྡན་དུས་གསུམ་སངས་རྒྱས་ཀུན་གྱི་ཞལ་སྐྱིན་ཡིན་པའི་སྟབས་ཀྱིས་རྡོ་རྗེ་སློབ་དཔོན་དེ་ཉིད་ནི་དུས་གསུམ་སངས་རྒྱས་ཐམས་ཅད་ཀྱི་སྤྱི་དཔལ་ལམ་ངོ་བོར་གྱུར་པ་སངས་རྒྱས་སྐུ་གསུམ་གྱི་རྣམ་པར་འཕྲུལ་བ་ཡིན་རྒྱུ་དང་། དེ་ཡང་ནང་གསལ་རིགས་ལྔར་བཞེངས་པའི་ཐུགས་རང་བྱུང་གི་ཡེ་ཤེས་གཉིས་སུ་མེད་པའི་ངང་དེ་ལས་ཕྱི་གསལ་གཟུགས་སྐུར་སྣང་བའི་མཛད་པ་ཆོས་ཐམས་ཅད་ཡེ་ནས་སངས་རྒྱས་པའི་ཆེད་དུ་བརྗོད་པར་མཛད་པས་ཀྱང་སངས་རྒྱས་ཀྱི་དཔལ་ཞེས་གསུངས་པའོ། །ཇི་ལྟ་བུའི་སྒོ་ནས་ཆེད་དུ་བརྗོད་པར་མཛད་ཅེ་ན། འདི་ཡང་གཞི་ལམ་འབྲས་གསུམ་གྱི་ཐོག་ནས་བཤད་ན་གཞི་འཁོར་འདས་སྣང་སྲིད་ཀྱི་ཆོས་ཐམས་ཅད་ཡེ་སངས་རྒྱས་པའི་རང་བཞིན། ལམ་བསྐྱེད་རྫོགས་གཉིས་མེད་སྤང་བླང་རེ་དོགས་ལས་འདས་པ། འབྲས་བུ་ལྷུན་རྫོགས་ཀུན་བཟང་གདོད་མའི་མགོན་པོའི་ས་ལ་ད་ལྟ་ནས་སྦྱོར་བར་མཛད་པ་པོ། དགོངས་པ་སངས་རྒྱས་ཀྱི་ཐུགས་དང་གཉིས་སུ་མེད་པ། དུས་གསུམ་བཞུགས་ལ་ཕྱག་འཚལ་ལོ་ཞེས་དུས་གསུམ་ཀུན་ཏུ་འཕོ་འགྱུར་བྲི་གང་དང་བྲལ་བ། དུས་གསུམ་དུས་ལས་འདས་པའི་དུས་མེད་ཀ་དག་གི་དུས་གཉིས་མེད་མཉམ་པ་ཆེན་པོར་རྟག་ཏུ་བཞུགས་པ་དེ་ལ་ཕྱག་འཚལ་ལོ་ཞེས་གསུངས་པའོ། །ཕྱག་འདི་ལ་དྲང་དོན་ཀུན་རྫོབ་བརྡ་ཕྱག་དང་། ངེས་དོན་དོན་དམ་མཇལ་ཕྱག་གཉིས་ཡོད་པའི་ནང་གི་དོན་དམ་ལྟ་བའི་མཇལ་ཕྱག་གསང་སྔགས་ཐུན་མིན་གྱི་ཕྱག་ཡིན་ལ། སྐྱབས་འགྲོའི་སྔོན་དུ་ཕྱག་འཚལ་བ་འབྱུང་བ་འདི་སྐབས་འདི་དང་བསྟུན་ན་བླ་མ་རྡོ་རྗེ་སེམས་དཔའ་དཀྱིལ་འཁོར་ཀུན་གྱི་གཙོ་བོ་རིགས་ཀུན་གྱི་ཁྱབ་བདག་སྐྱབས་ཡུལ་ཀུན་གྱི་མཐར་ཐུག་ཡིན་པའི་རྒྱུ་མཚན་གྱིས་ཡིན་ནམ་སྙམ། གཉིས་པ་སྐྱབས་སུ་འགྲོ་བ་ནི། མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །ཞེས་གསུངས་ཏེ། འདི་ཚོ་འགྲེལ་སྐབས་མཆོག་གསུམ་ཞེས་པ་སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ་ཡིན་ལ། དེ་ལ་གུས་པའི་ཡིད་ཀྱིས་སྐྱབས་སུ་མཆི་གསུངས་པ་ཡིན་ཞེས་བྱིས་པ་ཞིག་ལ་བཤད་པ་དང་འདྲ་བར་བྱས་པས་འོས་ཤིང་འཚམས་པ་མ་ཡིན་ཞིང་། འདི་ཐུན་མོང་མ་ཡིན་པའི་སྔོན་འགྲོས་རྒྱུད་སྦྱོང་བ་བཤད་པའི་སྐབས་ཡིན་ན་ཐུན་མོང་གི་ནང་གི་ཐུན་མོང་ཞིག་ལ་བཤད་ན་འོས་འཚམས་མ་ཡིན་ནོ། །འདིའི་སྐྱབས་འགྲོ་འདི་ཚོ་ཐུན་མིན་དོན་གྱི་གནས་ལུགས་དོན་དམ་རྡོ་རྗེའི་སྐྱབས་འགྲོ་ཡིན་ལ། དཀོན་མཆོག་གསུམ་ཡང་རང་ལ་ཡེ་ནས་གནས་པའི་མཆོག་གསུམ་ལ་གོ་དགོས་ཤིང་། ཆོས་ཉིད་མ་འཁྲུལ་བ་གཞི་ཡི་སངས་རྒྱས། སྒྲ་ཚིག་ལས་འདས་པ་དོན་གྱི་དམ་ཆོས། འགྱུར་བ་མེད་པར་གནས་པ་སྙིང་པོའི་དགེ་འདུན་ཏེ་དེ་ལྟ་བུའི་མཆོག་གསུམ་བསྒྲུབ་བྱའམ་བསྟེན་པའི་སྐྱབས་སུ་གྱུར་པ་ལ་རང་ངོ་ཤེས་པའི་ངང་ནས་གཉིས་འཛིན་འཁྲུལ་བ་ཞིག་པའི་གཉིས་མེད་མཉམ་པ་ཆེན་པོའི་སྒོ་ནས་སྐྱབས་སུ་མཆི་ཞེས་གསུངས་པ་ཡིན་ནོ། དངོས་འབྱོར་ཡིད་ཀྱིས་རྣམ་སྤྲུལ་པའི་ཞེས་དངོས་སུ་འབྱོར་བ་དང་ཡིད་ཀྱིས་སྤྲུལ་བའི་ཕྱི་ནང་གི་མཆོད་པ་འབུལ་བ་དང་། དག་པའི་མཆོད་པ་བཞེས་སུ་གསོལ་ཞེས་དངོས་འབྱོར་ཡིད་སྤྲུལ་གྱི་མཆོད་པ་ཐམས་ཅད་ལས་ཀྱང་ཁྱད་པར་དུ་གྱུར་པ་གསང་བ་རྨད་བྱུང་གི་མཆོད་པ་དུག་ལྔ་ཡེ་ཤེས་ལྔ་རུ་མཆོད་པ། དུག་གསུམ་སྐུ་གསུང་ཐུགས་སུ་མཆོད་པ། སྣང་སྲིད་བདེ་བ་ཆེན་པོར་མཆོད་པ། ལྟ་བ་དག་མཉམ་ཆེན་པོ། སྒོམ་པ་སྣང་སྲིད་གཞིར་བཞེངས། སྤྱོད་པ་གང་ཤར་རང་གྲོལ་གྱི་དེ་ཁོ་ན་ཉིད་ཀྱི་མཆོད་པ་ལ་དག་པའི་མཆོད་པ་ཞེས་དེ་ལྟ་བུའི་མཆོད་པ་འབུལ་བ་དང་། མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ཀྱི་ཆུ་བོ་དེ་རྒྱུན་མི་ཆད་པར་འབབ་ཅིང་འབྱུང་བའི་བགེགས་སམ་གེགས་སུ་གྱུར་པའི་ཉེས་བྱས་མ་ལུས་བཤགས་པར་བགྱི་ཞེས་ཉེས་བྱས་མ་ལུས་ཏེ། ཉེས་པར་བྱས་པ་མ་རྟོགས་འཁྲུལ་བར་འཕྱན་པའི་དུག་ལྔ་རང་རྒྱུད་དུ་ཞེན་པ་དང་། སྒོ་གསུམ་ཐ་མལ་དུ་བལྟས། གདན་གསུམ་ལྷའི་རང་བཞིན་དུ་མ་ཤེས་ནས་ཆོས་ཉིད་ཀྱི་དོན་མ་རྟོགས་པའི་ཉེས་འགལ་མ་ལུས་པ་བཤགས་པ་དང་། ཕྱོགས་བཅུ་འཁོར་གསུམ་དག་པའི་ཆོས་ཞེས་ཕྱོགས་བཅུ་རབ་འབྱམས་ཆོས་ཀྱི་དབྱིངས་མ་ལུས་ཡོངས་སུ་གང་བའི་རྒྱལ་བ་སྲས་དང་བཅས་པའི་འཁོར་གསུམ་འཛིན་པ་དང་བྲལ་བའི་ཚོགས་ཆེན་ཡེ་རྫོགས་ཀྱི་ཟག་མེད་རང་ངོ་ཤེས་པའི་དགེ་ཚོགས་ལ་གོ་དགོས་ལ། དེ་ལྟ་བུའི་ཆོས་དེ་མ་ཆགས་སྤྱོད་ལ་རྗེས་ཡི་རང་ཞེས་མ་ཆགས་ཞེན་མེད་དུ་སྤྱོད་པར་རྗེས་སུ་ཡི་རང་ཞིང་། དག་པའི་མཐའ་བཞི་དྲི་མ་མེད་ཅེས་ལུས་དག་པ་དང་། དམིགས་པ་དག་པ། སེམས་དག་པ། ཡེ་ཤེས་དག་པ་སྟེ་དག་པའི་མཐའ་བཞི་དྲི་མ་མེད་པས་གསལ་ཆ་ནས་སྙིང་རྗེའི་གདངས་སུ་ཤར་ཡང་སྟོང་ཆ་ནས་ཞེན་པ་མེད་པའི་སྟོང་ཉིད་སྙིང་རྗེ་ཟུང་འབྲེལ་གྱིས་བདེན་གཉིས་དབྱེར་མེད་ཀྱིས། རྫོགས་པའི་བྱང་ཆུབ་སེམས་བསྐྱེད་དོ་ཞེས་མཐའ་ཡས་ཀྱི་སེམས་ཅན་ཐམས་ཅད་ལ་དམིགས་པ་མེད་པའི་དམིགས་པས་རྫོགས་པའི་བྱང་ཆུབ་ཏུ་འཁོར་འདས་དབྱེར་མེད་ཀྱིས་སེམས་བསྐྱེད་ཅེས་དང་། དེ་ནས་བདེ་གཤེགས་དབང་ཕྱུག་སེམས་ཅན་ལ་ཞེས་ཕྱོགས་བཅུ་ནམ་མཁའི་མཐས་གཏུགས་ཀྱི་བདེ་བར་གཤེགས་པ་དང་བྱང་ཆུབ་སེམས་དཔའ་དབང་བཅུའི་འབྱོར་བས་ཕྱུག་པ་རྡུལ་སྙེད་གངས་ཆེན་མཚོའི་བཀོད་པ་དཔག་ཡས་ནམ་མཁའ་གང་བའི་ལྷ་ཚོགས་ཞེས་དེ་ལྟ་བུ་ཞིག་ལ་གོ དཔག་ཡས་ནམ་མཁའ་གང་བའི་ལྷ་ཚོགས་ཞེས་པའི་གོ་བར་བྱས་ན་འདིའི་སེམས་ཅན་འདི་སེམས་ཅན་ཆེན་པོ་ལ་འགྲེལ་ཆོག་ལ། ཡང་ན་བདེ་གཤེགས་དབང་ཕྱུག་སེམས་ཅན་ཞེས་པ་འདི་སེམས་ཅན་ཐམས་ཅན་ལ་གོ་ཆོག་གམ་སྙམ། དེ་ཅིའི་ཕྱིར་ཞེ་ན། གོང་ནས་བཤད་མ་ཐག་པ་ལྟར་དུ་རང་བཞིན་གྱི་སངས་རྒྱས་དེ་སེམས་ཅན་ཐམས་ཅད་ཡིན་ལ། དེས་ན་འདི་སྐྱེ་བ་རྒྱུའི་སངས་རྒྱས་ལ་འགྲེལ་ན་ཆོག་གོ། །ལུས་འགྲུབ་པའི་རྒྱུ་དེ་ཁུ་རྡུལ་རླུང་གསུམ་ཡིན་ན་ཐབས་ཀྱི་ངེས་པའི་ལམ་ནས་མ་ཀྵེ་ཀའི་སྦྱོར་བས་ལྕགས་ཁམས་ཡུད་ཀྱིས་གསེར་དུ་བསྒྱུར་བ་ལྟར་དུ་ཀུན་རྟོག་འགྱུ་བ་དང་བཅས་པ་བདེ་སྟོང་བདུད་རྩིའི་དབྱིངས་སུ་ཐིམ་སོང་དུས་ཁམས་དང་རྩ་ཡི་འགྲོས་དག་ནས་འཁོར་ལོ་བཞིའི་རྩ་འདབ་ལས་སུ་རུང་། དབུ་མའི་རྩ་འདབ་གྲོལ་ཏེ། སྣང་གསུམ་འཕོ་བའི་བག་ཆགས་དག་ན་དེའི་དུས་སུ་བདེ་ཆེན་རྡོ་རྗེའི་སྐུ་འགྲུབ་པའི་ཕྱིིར་ན་འབྱུང་མ་རག་པའི་དགོས་པ་གསུམ་གྱི་ལུས་འབུལ་བ་ལ་གོ་ཆོག་གོ། །དེ་ལས་གཞན་ཡང་སླ་མོ་ངོ་མ་ཞིག་གིས་གོ་བ་བླངས་ན་རང་བཞིན་སངས་རྒྱས་སེམས་ཅན་ཐམས་ཅད། རྟོགས་པའི་སངས་རྒྱས་རིག་འཛིན་གྱི་ས་ལ་བཞུགས་པ་རྣམས་དང་། གྲུབ་པའི་སངས་རྒྱས་དེ་ཉིད་མངོན་དུ་གཟིགས་པ་རྣམས་ཡིན་ན་དེ་གསུམ་ཡང་རང་བཞིན་དང་གནས་སྐབས་ཀྱི་བྱེ་བྲག་གི་ཆ་ནས་ཕྱེས་པ་ཞིག་ཡིན་ནོ། །དོན་ལ་སངས་མ་རྒྱས་པའི་ཆོས་ཤིག་མི་དམིགས་ཤིང་མ་རྟོགས་པ་རྟོགས་པར་བྱ་བའི་ཕྱིར་དང་། མ་བསྒོམས་པ་གོམས་པར་བྱ་བའི་ཕྱིར་དང་། སེམས་ཅན་མ་གྲོལ་བ་བསྒྲལ་བར་བྱ་བ་དང་། དབུགས་མ་དབྱུང་བ་འབྱིན་པའི་ཆེད་དུ་ཡང་དག་པ་གསུམ་མམ་དགོས་པ་གསུམ་ཕྱིར་ལུས་འབུལ་ལོ་ཞེས་གོ་ཆོག་གམ་སྙམ། རང་ལུས་གདན་དུ་འབུལ་བ་འདི་སྔགས་བླ་མེད་ཀྱི་སྐབས་དང་བསྟུན་ན་དུས་རྒྱུན་དུ་ཡོང་རྒྱུ་ཞིག་ཡིན་ལ། འདིའི་ནང་དུ་ཐུན་མོང་མ་ཡིན་པའི་བསགས་སྦྱང་གི་གནད་ཁྱད་པར་ཅན་མང་པོ་ཞིག་འདུས་པ་ཡིན་ནོ། དག་པ་གསུམ་ཕྱིར་ལུས་འབུལ་ལོ་ཞེས་དག་པ་གསུམ་གྱི་ལུས་དེ་གང་ཡིན་ན། རྩ་དག་པ། རླུང་དག་པ། ཐིག་ལེ་དག་པའི་རང་བཞིན་འབུལ་བའམ་ཡང་མཚམས་རེར་རྒྱུད་ཀྱི་ནང་དུ་དགོས་པ་གསུམ་ཕྱིར་ཞེས་འབྱུང་སྐབས་དེ་ལྟར་དག་པའི་དགོས་པ་གསུམ་ཕྱིར་ལུས་འབུལ་བ་དང་། ཚེ་རབས་བགྲང་བའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ་ཞེས་ཚེ་རབས་བགྲང་མཐའ་ཡས་པའི་ཐོག་མེད་ནས་ད་ལ་མ་ཐུག་གི་བར་དུ་བསགས་པའི་རང་གཞན་གྱི་ཟག་བཅས་ཟག་པ་མེད་པའི་དགེ་ཚོགས་གསག་འགྱུར་དང་བཅས་པ་ཐམས་ཅད་འཁོར་གསུམ་དག་པའི་དམིགས་འདུན་མཉམ་བཞག་ནམ་མཁའ་ལྟ་བུ་དམིགས་མེད་ཀྱི་ངང་དེ་ལས་རྗེས་ཐོབ་སྙིང་རྗེའི་གསལ་སྣང་སྒྱུ་མ་ལྟ་བུའི་རང་བཞིན་དུ་བསྔོ་བ་སྟེ་ཡན་ལག་བརྒྱད་དངོས་བསྟན་དང་། ཆོས་འཁོར་བསྐོར་བར་བསྐུལ་བ་དང་། བཞུགས་གསོལ་འདེབས་པ་གཉིས་གོང་ནས་ཀྱང་བཤད་པ་ལྟར་ཞོར་དུ་འདུས་པའི་ཡན་ལག་བཅུ་བ་འདི་རྡོ་རྗེ་ཐེག་པའི་ཐུན་མོང་མ་ཡིན་པའི་ཚོགས་གསོག་པའི་སྒོ་ཁྱད་པར་ཅན་ཚོགས་བསགས་ཀྱི་རིགས་ཐམས་ཅད་འདི་རྣམས་ཀྱི་ཁོངས་སུ་འདུ་བ་དེ་ལྟ་བུ་ཞིག་ཡིན་ནོ། །ཕར་ཕྱིན་ཐེག་པའི་སྐབས་སུ་བསྐལ་བ་གྲངས་མེད་གསུམ་ལ་ཚོགས་གསོག་དགོས་ཚུལ་གསུངས་པ་དེ་དག་གནད་ཁྱད་པར་ཅན་འདི་དག་གིས་ཟིན་ན་གྲངས་མེད་ཀྱི་ཚོགས་སྐད་ཅིག་མ་ལ་འདུམ་ཐུབ་ཅིང་། ཚུལ་གསུམ་སྒྲོན་མེ་ལས། ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། ཞེས་གསུངས་པ་ནི་དེ་ལྟ་བུ་ཞིག་ལ་གོ་དགོས་སོ། །དེ་དག་གི་གནད་མ་ཤེས་ན། ཀུན་མཁྱེན་འཇིགས་གླིང་གིས། གནད་འགག་དེ་ལྟ་བུ་ཁོང་དུ་མ་ཆུད་པར་ངེས་པའི་གནད་ཐམས་ཅད་སྟོང་སྒྲ་ཁོ་ན་ལ་རྒྱས་འདེབས་ཤིང་། ཚིག་ཤར་ཀློག་པ་ཙམ་ལའང་རོ་འཛིན་ལ་རྒྱ་མདུད་ཀྱིས་བརྩེགས་པའི་རྨོངས་པ་དག་གིས་དམ་པའི་བྱ་བ་ལ་ནན་གྱིས་འགྲན་ཞིང་མུ་ཅོར་སྨྲ་བ་དག་སྙིང་རྗེ་བའོ། །ཞེས་གསུངས་སོ། །ཞེས་པ་ལན་གསུམ་སོགས་བརྗོད༔ ཞེས་འདིའི་སོགས་ཁོང་གི་ནང་ན་འདི་ལས་འཕྲོས་པའི་ཡན་ལག་སྡོམ་གཟུང་དང་དམ་བཅའ་རྣམས་བསྡུས་པ་ཨེ་ཡིན་སྙམ། ༼ག གསུམ་པ་མཆོད་རྫས་བྱིན་གྱིས་བརླབ་པ། སྔོན་འགྲོའི་ས་བཅད་གསུམ་པ་མཆོད་རྫས་བྱིན་གྱིས་བརླབ་པ་ནི༔ ཧཱུྃ༔ བསམ་བརྗོད་བྲལ་བའི་ངང་ཉིད་ལས༔ ཐམས་ཅད་སྟོང་པའི་རང་བཞིན་ཉིད༔ སྨན་རག་གཏོར་མཆོད་དངོས་པོ་རྣམས༔ སྟོང་ཉིད་བདག་འཛིན་བྲལ་བ་ལས༔ ཞེས་གསུངས་ཏེ། ཐོག་མའི་ཧཱུྃ་ཡིག་དེ་དམིགས་བསམ་བརྗོད་པ་དང་བྲལ་བ་ཐུགས་རྡོ་རྗེའི་རང་བཞིན་མཚོན་པའི་བརྡའམ་སྒྲ་ཡིས་བསྐུལ་ནས། ཆོས་ཐམས་ཅད་ཀྱི་ཆོས་ཉིད་སྨྲ་བསམ་བརྗོད་པ་དང་བྲལ་བའི་གཞིའི་གནས་ལུགས་བསམ་གྱིས་མི་ཁྱབ་པའི་ངང་དེ་ལས་ཐམས་ཅད་སྟོང་ཉིད་རང་བཞིན་ཉིད་ཅེས་འཁོར་བ་དང་མྱང་འདས་ཞེས་པའི་ཆོས་ཐམས་ཅད་ཐ་སྙད་ཙམ་དུའང་མ་གྲུབ་པར་ཆོས་ཐམས་ཅད་སྟོང་པ་ཆེན་པོའི་རང་བཞིན་ཉིད་ལས་གཞི་ལས་གཞི་སྣང་གི་འཆར་ཚུལ་མ་གྲུབ་པའི་གྲུབ་པ་ཆེན་པོ་ལྷུན་གྲུབ་ཡེ་ཤེས་ཀྱི་རོལ་བ་སྣ་ཚོགས་འདོད་ཡོན་གྱི་རྒྱན་དུ་ཤར་བ་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པའི་རྫས་ཀྱི་རྣམ་པར་ཤར་བ། སྨན་རཀ་གཏོར་མཆོད་ལ་སོགས་པའི་དངོས་པོ་རྣམས་ཞེས་བཤད་པའི་སྐབས་སུ་ཕྱི་མཆོད་དེ་མེ་ཏོག་བདུག་སྤོས་ལ་སོགས་པ། ནང་མཆོད་དེ་སྨན་རག་གཏོར་གསུམ་ལ་སོགས་པ། གསང་མཆོད་དེ་བདེ་སྟོང་འབར་འཛག་དང་དེ་ཁོ་ན་ཉིད་གནས་ལུགས་དོན་གྱི་མཆོད་པ་རྣམས་ལ་གོ་དགོས་སོ། །འདི་ནས་བྱིན་གྱིས་བརླབ་པའི་སྐབས་སུ་ཁྱད་པར་དུ་ཀུན་རྫོབ་མཚན་མའི་རྫས་དེ་དག་ལ་དམིགས་ནས་སྟོང་ཉིད་བདག་འཛིན་དང་བྲལ་བའི་ངང་དེ་ལས། རྃ་ཡྃ་ཁྃ་གསུམ་མེ་རླུང་ཆུས༔ བདག་གཞན་རྟོག་པའི་དྲི་མ་སྦྱངས༔ མེ་རླུང་ཆུ་ཡང་འོད་དུ་ཞུ༔ སྨན་རག་གཏོར་མཆོད་དངོས་པོར་གྱུར༔ རྟོག་གཉིས་དག་ནས་སྣོད་བཅུད་རྣམས༔ འདོད་པའི་ཡོན་ཏན་དུ་མར་གྱུར༔ ཞེས་གསུངས་ཏེ། རྃ་ཡྃ་ཁྃ་གསུམ་མེ་རླུང་ཆུས་ཞེས་རྃ་མེ་ཡི་སྙིང་པོ་ཡིན་ལ། ཡི་གེ་རྃ་ལས་སོར་རྟོག་ཡེ་ཤེས་ཀྱི་མེ་འབར་ནས་བདག་འཛིན་རྟོག་པའི་དངོས་འཛིན་གྱི་དྲི་མ་ཐམས་ཅད་བསྲེགས། ཡྃ་རླུང་གི་སྙིང་པོ་ཡིན་ཞིང་། ཡྃ་ལས་བྱ་གྲུབ་ཡེ་ཤེས་ཀྱི་རླུང་འཕྲོས་ནས་མ་དག་འབག་བཙོག་གི་མངོན་ཞེན་གྱི་དྲི་མ་གཏོར། ཁྃ་ཆུ་ཡི་སྙིང་པོ་ཡིན་པས་ཡི་གེ་ཁྃ་ལས་མཉམ་ཉིད་ཡེ་ཤེས་ཀྱི་ཆུས་གཉིས་འཛིན་གྱི་དྲི་མ་ཐམས་ཅད་བཀྲུས་ནས་བདག་འཛིན་གྱི་རྟོག་པ་བདག་གཞན་གཙང་བཙོག་ལ་སོགས་པའི་གཉིས་འཛིན་འཁྲུལ་བའི་དྲི་མ་ཐམས་ཅད་བསྲེགས་གཏོར་བཀྲུས་ཏེ་དག་ཅིང་སྦྱངས་པར་བྱས་ནས་བུད་ཤིང་མེ་རུ་གྱུར་ཟིན་ནས་མེ་ཉིད་ཀྱང་རང་ལོག་པ་ལྟར་དུ་སླར་སྦྱོང་བྱེད་མེ་རླུང་ཆུ་ཡང་འོད་དུ་ཞུ་ནས་སྨན་རཀ་གཏོར་མ་ལ་སོགས་པའི་མཆོད་རྫས་ཐམས་ཅད་ཀྱི་དངོས་པོ་རྣམས་ཀྱང་གཟུང་བ་དང་འཛིན་པར་ཤར་བའི་མ་དག་པའི་རྟོག་པ་གཉིས་དག་ནས་སྣོད་བཅུད་བརྟན་གཡོའི་དངོས་པོ་འདོད་དགུ་མི་ཟད་པའི་ཡོན་ཏན་དུ་མ་དང་ལྡན་པ་སྟེ། འདི་ནས་དུ་མའི་སྒྲ་ཡིས་བསམ་གྱིས་མི་ཁྱབ་པར་གྱུར་པར་བསམ་དགོས་སོ། །ཇི་ལྟར་བསམ་དགོས་ན། ཕྱི་རྨད་བྱུང་ལྷུན་གྲུབ་ཀྱི་མཆོད་པ་གླིང་བཞི་གླིང་ཕྲན་ལྕགས་རི་ཉི་ཟླ་རྒྱུ་སྐར་ལ་སོགས་པ་དབུས་ཀྱི་རི་བོ་མཆོག་རབ་དང་བཅས་པ་ཕྱི་སྣོད་ཀྱི་འཇིག་རྟེན་བཀོད་ལེགས་པ། ནང་རྩོལ་མེད་ཤུགས་འབྱུང་གི་མཆོད་པ་ནི་སྤྲུལ་བའི་ལྷ་དང་ལྷ་མོ་ལ་སོགས་པ་མཐོ་རིས་ཀྱི་འབྱོར་བ་རྒྱན་དང་ཆ་ལུགས་རྣམ་འགྱུར་འཕྱོར་སྒེག་དང་ལྡན་པ་ལོངས་སྤྱོད་འབྱོར་བ་དང་བཅས་པ། གསང་བ་སེམས་ཀྱི་རོལ་བ་དམིགས་པའི་ཆོ་འཕྲུལ་ལས་བྱུང་བའི་མཆོད་རྫས་འཕགས་པ་ཀུན་ཏུ་བཟང་པོའི་མཆོད་སྤྲིན་དང་འདྲ་བ། ད་རུང་ཞར་བྱུང་རྫས་ཀྱི་མཆོད་པ་ཕྱི་གཟུགས་སྒྲ་དྲི་རོ་རེག་བྱའི་རིགས་སུ་གཏོགས་པ། ནང་བཟའ་བཏུང་ལོངས་སྤྱོད་ཉེར་མཁོའི་རིགས་སུ་གྱུར་པ། གསང་བ་ཟབ་མོའི་སྦྱོར་སྒྲོལ་ཤ་ལྔ་བདུད་རྩི་ལྔ་ལ་སོགས་པ། རྩོལ་བས་བསྒྲུབས་པའི་མཆོད་པ་ཡིན་ན་མཆོད་ཡོན་ཞབས་བསིལ་མེ་ཏོག་བདུག་སྤོས་རྣམས་ཀྱིས་མཚོན་པ་དེ་རྣམས་ཡིན་ནོ། །འདི་ནས་མཆོད་པ་བྱིན་རླབས་འདི་ལ་ཕྱི་ནང་གི་མཆོད་རྫས་ཐམས་ཅད་ཏིང་ངེ་འཛིན་དང་འབྲེལ་བའི་འདོན་སྒོམ་སྦྲགས་མ་ཡིས་བསྲེགས་གཏོར་སྦྱངས་གསུམ་བྱས་ནས་ཡེ་ཤེས་ཀྱི་རང་མདངས་ཀྱི་མཆོད་རྫས་ལ་བྱིན་གྱིས་བརླབ་པ་དང་། སྨན་རཀ་གཏོར་གསུམ་སྒོས་སུ་བརླབ་རྒྱུ་ཡིན་ན་སྨན་རཀ་གཏོར་གསུམ་གྱི་ཐད་ནས་སྐབས་འདི་དང་འབྲེལ་ནས་ཅུང་ཟད་ཞིབ་ཆ་ཞིག་བྱས་ན་སྙམ་གྱིན་ཡོད། སྨན་གྱི་སྣོད་དེ་བནྡྷ་མཚན་ལྡན་ཡིན་དགོས་གསུངས་ཤིང་། ཀ་པཱ་ལ་མཚན་ལྡན་དངོས་ཡིན་ན་རབ་ཡིན་ལ། དེ་མིན་ཡང་དེའི་གཟུགས་སུ་བཅོས་པའི་འུ་ཚོས་མཆོད་ཆའི་ནང་ན་ཡོད་པའི་སྨན་སྣོད་འདི་ཚོས་ཆོག་གོ །དེ་ཡང་ཆག་གྲུམ་གས་ཡོ་མེད་པ་སྐྱོན་མེད་དངོས་གཙང་ཞིག་ཡིན་ན་བསོད་ནམས་ལྷག་ཏུ་ཆེ་བ་ཡིན་ལ། སྨན་རཀ་གཡའ་ཁུ་མ་ཁྲལ་གསོབ་བྱེད་མི་ཉན་གསུངས་ཡོད་དར་བས་མཆོད་རྫས་ཐམས་ཅད་ལ་གང་བྱུང་དེས་ཆོག་བྱས་ན་ལོངས་སྤྱོད་དབུལ་བ་ལ་སོགས་པའི་བསོད་ནམས་མ་ཡིན་པའི་འབྲས་བུ་འབྱུང་བ་ཡིན་ནོ། །ཟངས་རག་གི་རིགས་འདི་ཚོ་གཡའ་སླ་བ་ཡིན་ཞིང་། གཡའ་རྒྱུ་མེད་པའི་ལྕགས་རིགས་ཡིན་ན་ཡང་གཙང་མར་བྱས་ནས་བཀྲུ་བཤལ་དང་ཕྱི་རྒྱུ་མ་བྱས་ན་བཙོག་པར་གྱུར་ཡོད་ལ། ཟངས་རག་གི་སྣོད་དེ་ཚོའི་ནང་དུ་རྩི་གཞན་དག་བརྒྱབ་ནས་གཡའ་མི་ཆགས་ཐབས་བྱེད་རྒྱུ་དང་། མདོར་ན་མཆོད་པའི་རྫས་དེ་རང་བློ་དག་པའི་དངོས་གཙང་དགོས་སོ། །རྟོགས་ལྡན་དང་རྫབ་ངན་གཉིས་ནོར་ས་ཡོད་ལ། ཆོག་རྒྱུ་དང་རུང་རྒྱུར་བྱས་ནས་དེ་འདྲ་མི་དར་བསམ་མི་ཉན་ལ། རྒྱུན་སྲོལ་བཟང་པོ་བསྣུབ་མི་ཉན་པར་འཛིན་དགོས་ཀྱང་མི་རིགས་ཀྱི་ཡ་རབས་གཙང་སྦྲ་ལ་བརྩི་འཇོག་མ་བྱས་ཐབས་མེད་དུ་ཁེལ་བ་ཡིན་པ་དང་། དེ་མིའི་རིགས་ཀྱི་བྱ་སྤྱོད་བཟང་པོ་ཞིག་ཡིན་ནོ། །གཙང་སྨེ་གཉིས་འཛིན་གྱི་རྟོག་པ་ཡོད་པའི་རིང་ལ་དེའི་ཚོད་དང་མཐུན་པ་ཞིག་མ་བྱས་ན་ལྟ་སྤྱོད་ཆ་མ་འགྲིགས་ནས་རྒྱུ་འབྲས་མཉམ་པར་ལྟ་ལུགས་ནོར་ནས་མི་གཙང་ཟན་དུ་ཟ་བའི་ཁྱི་ཕག་གི་སྤྱོད་པ་དང་འདྲེས་ལ་ཉེ་བ་ཡིན་ཞིང་། ཨ་ལ་རྩེད་མཚར་ཡིན་མོད་མཆོད་པའི་རྫས་ཐམས་ཅད་ཚོགས་བསགས་ཀྱི་ཆེད་དུ་དངོས་གཙང་བྱེད་རྒྱུ་ནི་ཤིན་ཏུ་ནས་ཀྱང་གལ་ཆེ་བ་ཡིན་ནོ། །སྨན་གྱི་རྒྱུའམ་བཅུད་དུ་གྱུར་པ་སྨན་ཐམས་ཅད་ཀྱི་ནང་དུ་བླུག་རྒྱུ་ནི་པཉྩ་ཨ་མྲྀ་ཏ་ཡོད་ན་རབ་ཡིན་ལ། མ་འབྱོར་ན་བདུད་རྩིའི་རིགས་དང་། སྨན་སིནྡྷུ་ར་ལ་སོགས་པ་མདོར་ན་དྲི་རོ་བཅུད་ལྡན་གྱི་རྫས་ཁྱད་པར་ཅན་གང་འཛོམས་སྦྱར་ཆོག་གསུངས་ཡོད་དོ། །པཉྩ་ཨ་མྲྀ་ཏ་གསུང་རྒྱུ་དེ་བདུད་རྩིའི་ཆོས་སྨན་ལ་ཟེར་ཞིང་། གཙོ་བོ་བདུད་རྩིའི་ཆོས་སྨན་སེལ་མེད་ཡོད་རྒྱུ་གལ་ཆེ་བ་ཡིན་ནོ། །ཡང་འུ་ཚོས་སྨན་སྒྲུབ་ཀྱི་རིགས་ཤིག་ལག་ན་ཅི་ཡོད་གང་ཡོད་བྱིན་རྟེན་ཡིན་དྲན་ནས་བསྲེ་རྒྱུ་དེ་ཡང་ཡང་དག་པ་ཞིག་མ་ཡིན་ལ། རྩ་བརྒྱད་སྟོང་སྦྱར་གྱི་སྨན། སྨན་གྱི་སྒྲུབ་པར་བྱེད་དུས་ཚོགས་དགོས་རྒྱུ་མང་ཡང་དམ་རྫས་འདི་ལ་དམ་ཚིག་གི་སེལ་མེད་རྒྱུ་དེ་གལ་ཆེ་བ་ཡིན་པས་ཆོས་ཀྱི་བརྒྱུད་པའི་ཁུངས་ལ་སོགས་པ་ལ་བལྟ་རྒྱུ་གནད་ཆེ་བ་ཡིན་ནོ། །དམ་རྫས་ཡིན་ན་ཡིན་གསུམ་གྲུབ་བཞིའི་མཚན་ཉིད་ཚང་དགོས་ཤིང་། ཡིན་པ་གསུམ་དེ་གང་ཡིན་ན། ངོ་བོ་ཡེ་ཤེས་ལྔ་ཡིན་པ། དུག་ལྔ་སེལ་བའི་སྨན་ཡིན་པ། དངོས་གྲུབ་སྒྲུབ་པའི་རྫས་ཡིན་པ་ཞིག་དགོས་སོ། །གྲུབ་པ་བཞི་དེ་གང་ཚོགས་དགོས་ན། ཆོས་ཉིད་ངོ་བོས་གྲུབ་པ། ཆོས་ཅན་རང་བཞིན་གྱིས་གྲུབ་པ། ནུས་པ་མཐུ་ཡིས་གྲུབ་པ། བྱིན་གྱིས་རླབས་ཀྱིས་གྲུབ་པ་དེ་རྣམས་ཚོགས་དགོས་སོ། །དམ་རྫས་ཟེར་རྒྱུ་དེ་ལོ་གསར་གྱི་དགུ་ཐུག་བསྐོལ་བསྐོལ་བྱེད་རྒྱུ་མེད་ལ། རྒྱུ་དྲུག་རྐྱེན་བཞི་ཚང་བའི་ར་ས་ཡ་ན་ཞེས་གསུངས་ཡོད་དོ། །འདིའི་རྒྱུ་དྲུག་རྐྱེན་བཞི་ཞེས་པ་འདི་བྱེད་རྒྱུ་ལྷན་ཅིག་འབྱུང་བ་དང་ལ་སོགས་པ་ལ་སྦྱར་རྒྱུ་ཞིག་མ་ཡིན་ལ། འདི་དམིགས་བསལ་བ་ཞིག་ཡིན་ནོ། །ཕྱིའི་རྒྱུ་དྲུག་དང་ནང་གི་རྒྱུ་དྲུག་གསུང་རྒྱུ་ཡོད་ཅིང་། ཕྱིའི་རྒྱུ་དྲུག་དེ་གང་ཡིན་ན། བདུད་རྩི་ཛ་གད་ཅེས་པ་ཆང་སྦྱོར་གྱི་སྐབས་ཀྱི་གྲོ་ནས་འབྲས་གསུམ་རྒུན་འབྲུམ་ལ་སོགས་པའི་རྩ་བ། སྡོང་བུ། ཡལ་ག ལོ་མ། མེ་ཏོག འབྲས་བུ་དང་དྲུག ནང་གི་རྒྱུ་དྲུག་དེ་སྨན་སྦྱོར་གྱི་སྐབས་ཀྱི་སྨན་རྩ་བ། སྡོང་བུ། ཡལ་ག ལོ་མ་ལ་སོགས་པ་རྒྱུ་དྲུག གསང་བ་ལྟར་ན་ཡབ་ཀྱི་རྒྱུ་གསུམ། ཡུམ་གྱི་རྒྱུ་གསུམ་དང་དྲུག་གོ །དེ་ལྟར་རྒྱུ་དྲུག་རྐྱེན་བཞི་གསུང་སྐབས་རྐྱེན་བཞི་ནི་རྒྱུའི་རྐྱེན་འབྲུ་སྨན་གང་ཡིན་ན་རྒྱུ་གཙང་ཞིང་དག་པ། བདག་པོའི་རྐྱེན་སྟོན་པ་རྡོ་རྗེ་སློབ་དཔོན་མཚན་ཉིད་ཚང་བ་དེ་ཉིད་བཅུ་ལྡན། དམིགས་པའི་རྐྱེན་བྱིན་གྱིས་བརླབས་པའམ་སྒྲུབ་པའི་ཏིང་འཛིན་ལས་སུ་རུང་བ། དེ་མ་ཐག་རྐྱེན་དམིགས་པའི་བྱེ་བྲག་དང་སྒྲུབ་པའི་ལག་ལེན་སྦྱོར་དངོས་རྗེས་གསུམ་སྔ་མའི་རྗེས་སུ་ཕྱི་མ་འབྲེལ་བ་དེ་ཡིན་ནོ། །དེ་ལྟ་བུའི་རྒྱུ་དྲུག་རྐྱེན་བཞི་ཚང་བའི་བདུད་རྩིའི་ངེས་ཚིག་དེ་གང་ཡིན་ཞེ་ན། ཀུན་རྫོབ་ཀྱི་ལུས་ཀྱི་ཁམས་དཀར་དམར་གོང་དུ་འཕེལ་ནས་དོན་དམ་བྱང་ཆུབ་ཀྱི་སེམས་དང་དབྱེར་མེད་དུ་གྱུར་པའི་ཕྱིར་ན་ཉོན་མོངས་འདོད་ཆགས་ཀྱི་བདུད་བཅད་ནས་བདེ་སྟོང་གི་ཡེ་ཤེས་སོ་སོར་རྟོག་པའི་ཤེས་རབ་ཀྱི་རྩི་རྒྱས་པས་ན་བདུད་རྩི་ཞེས་ཟེར་རོ། །འདི་ལ་ར་ས་ཡ་ན་ཞེས་ར་ས་ནི་རོ་མཆོག་ཏུ་གྱུར་པ་དང་། ཡ་ན་ནི་ཐེག་པ་ཡིན་པས་དོན་དམ་ཐེག་པའི་མཆོག་ཅེས་པ་ལ་འཇུག་པའི་མིང་ཞིག་ཡིན་ལ། །སྨན་རཀ་འདི་དག་བྱིན་རླབས་ཀྱི་སྐབས་ཞལ་ཁེབས་བསལ་དགོས་སོ། །ཀ་པཱ་ལའི་སྣོད་དུ་བདུད་རྩི་རིགས་ལྔ་ཡབ་ཡུམ་སྦྱོར་བའི་བྱང་སེམས་སྐུ་གསུང་ཐུགས་ཀྱི་བདུད་རྩི་དཀར་དམར་མཐིང་གསུམ་གྱི་རྣམ་པར་འཆར་བར་བསམ་ནས་འདི་ནས་བྱིན་གྱིས་བརླབ་པའི་སྔགས་ནི་ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ཞེས་པའི་སྔགས་དོན་ནི་ཨོཾ་ཨཱཿཧཱུྃ་སྐུ་གསུང་ཐུགས་རྡོ་རྗེ་གསུམ། སརྦ་པཉྩ་ཨ་མྲྀ་ཏ་བདུད་རྩི་ཐམས་ཅད། ཧཱུྃ་ཧྲཱིཿཋཱ༔ཡེ་ཤེས་ཀྱི་བདུད་རྩི་འགུགས་པར་བྱེད་པའི་སྙིང་པོ་ཡིན་ནོ། །ཇི་ལྟར་ཡིན་ན་དེ་ཡང་ཧཱུྃ་གིས་དབྱིངས་ནས་བསྡུས། ཧྲཱིཿཡིས་འཛད་མེད་དུ་སྤེལ། ཋཱ༔ཡིས་ཅི་འདོད་དུ་ལོངས་སུ་སྤྱོད་པའི་རྒྱན་དུ་བྱས་པའི་དོན་ཡིན་ནོ། །འདི་བཤམས་དུས་གཏོར་མའི་གཡས་སར་བཤམས་དགོས་ཤིང་། བདུད་རྩི་གསང་གནོན་ཞེས་གསུང་རྒྱུ་ཡོད་ལ། བདུད་རྩིའི་རྒྱུན་གཏོར་མ་ལ་ལན་གསུམ་བྲན་ཐུར་གྱིས་སྦྲེང་དགོས་སོ། །ལན་གསུམ་སྦྲེང་དུས་དང་པོས་ལྷ་རྣམས་དགྱེས་པར་བསྐྱེད། གཉིས་པས་ཉན་ཐོས་རྣམས་འགོག་པ་ལས་བསླངས། གསུམ་པས་རྒྱལ་བ་རྣམས་གཞན་དོན་ལ་སྐུལ་པའི་དོན་ཅན་དེ་ལྟར་ཡིན་ནོ། །གཉིས་པ་རཀྟ་བཤད་པ་ལ་རཀྟའི་སྣོད་ནི་རྒྱུ་དང་དབྱིབས་ལ་སོགས་པ་གོང་གི་སྨན་སྣོད་དང་འདྲ་ལ། རཀྟ་ལ་རྣམ་གྲངས་མང་ཡང་འཁོར་བའི་རྒྱུ་ཆགས་སྡང་གཉིས་ཀ་ཡིན་པས་དེ་མཚོན་པར་བྱེད་པ་རཀྟ་ཡིན་གསུངས་སོ། །འདིའི་ངོ་བོའི་སྐབས་སུ་འདོད་ཆགས། དངོས་པོའི་སྐབས་སུ་ཁྲག ཁ་དོག་གི་སྐབས་སུ་དམར་པོ་ལ་འཇུག་གོ །འདིའི་དབྱེ་བའི་ཐོག་ནས་བཤད་ན་ཀུན་རྫོབ་རྫས་ཀྱི་རཀྟ། གུ་ཧྱ་མུ་ལ་རཀྟ། ཡན་ལག་བརྟན་པའི་རཀྟ། མཁའ་དབྱིངས་པདྨ་རཀྟ། ཉོན་མོངས་འཁོར་བའི་རཀྟ་ལ་སོགས་པ་དེ་ལྟར་དུ་བཤད་རྒྱུ་ཡོད་དོ། །དེ་རེ་རེ་ལ་ཡང་ནང་གསེས་ཀྱི་དབྱེ་བ་ཡོད་ཀྱང་མཐོང་བརྒྱུད་ཀྱི་ཕྱག་ལེན་ལྟར་ན་འུ་ཚོས་སྨན་གྱི་རྫས་ཟླ་བ་བདུད་རྩིའི་ཐིག་ལེ་དང་། རཀྟའི་རྫས་དམར་ཆེན་ཉི་མའི་འཁོར་ལོ་ཞེས་བསྡུས་ཏེ་མིང་བཏགས་པ་རྣམས་བཅུད་དུ་བྱས་ན་འགྲིགས་ཡོད་དོ། །སྒྲུབ་ཐབས་འགའ་རེའི་ནང་རཀྟ་ཚར་གསུམ་ཞེས་གསུངས་པ་དེ་ཚོ་རཀྟའི་དྭངས་མ་ཡེ་ཤེས་ཀྱི་བདུད་རྩི་དེ་ལྷ་ཚོགས་མཉེས་པའི་ཆེད་དུ་འབུལ་བ་དང་། རཀྟའི་ཁུ་བ་བསྒྲལ་བྱ་ཞིང་བཅུ་ཚང་བ་སོགས་གདུག་པ་ཅན་རྣམས་བརླག་པའི་ཆེད་དུ་འབུལ་བ་དང་། རཀྟའི་རྩི་དེ་ཁམས་གསུམ་གདུལ་དཀའ་འགྲོ་བ་སོགས་ཐུགས་རྗེས་བསྒྲལ་བའི་ཆེད་དུ་དུག་གསུམ་ཤ་རུས་ཀྱི་རྣམ་པར་འབུལ་བ་དེ་ལྟར་དུ་ཡིན་ལ། དོན་དེ་དག་མཚོན་ཕྱིར་དུ་རཀྟ་ལན་གསུམ་དུ་སྦྲེང་བ་འབྱུང་ངོ་། །མདོར་ན་རཀྟའི་མཆོད་པ་ཡིས་ཆགས་པའི་རྒྱུ་རྐྱེན་ཟད། འཁོར་བ་གཏིང་ནས་སྟོངས་ཏེ་སྐྱེ་ཤིའི་རྒྱུན་ཆོད་པའི་དགོས་པ་དང་ལྡན་པ་ཞིག་ཡིན་ལ། བྱིན་རླབས་ཀྱི་སྐབས་སུ་ཁེབས་བསལ་དགོས་སོ། །རཀྟ་དམར་གྱི་སྟོང་ཆེན་ཡངས་པའི་ནང་དུ་ཁམས་གསུམ་དུ་ཞེན་པའི་རྟོག་ཚོགས་ཐམས་ཅད་བསྡུས་ཤིང་སྟོང་གསལ་དུ་སྦྱངས་ནས་འགག་མེད་ཀྱི་རོལ་བར་རྒྱུ་དུག་གསུམ་དང་རྐྱེན་ཁམས་གསུམ་གྱི་ཉོན་མོངས་རྣམ་པར་དག་པའི་རྦ་ཀློང་རྣམ་པ་ཁྲག་གི་རྒྱ་མཚོར་གསལ་ནས་བྱིན་གྱིས་རློབ་པའི་སྔགས་ནི་ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱ༔ཞེས་གསུངས་སོ། །འདིའི་སྔགས་དོན་ནི་ཨོཾ་ཨཱཿཧཱུྃ་གོང་བཞིན་དུ་སྐུ་གསུང་ཐུགས་རྡོ་རྗེ་གསུམ་གྱི་ས་བོན། མ་ཧཱ་ཞེས་པ་ཆེན་པོ། རཀྟ་ཁྲག་སྟེ་མ་ཧཱ་རཀྟ་ཁྲག་ཆེན། ཛྭ་ལ་འབར་བ། རྗེས་ཆགས་ཀྱི་བདེ་བ་ཆེན་པོ་འབར་བའི་དོན་ཡིན་ལ། མཎྜལ་དཀྱིལ་འཁོར། བདེ་བ་ཆེན་པོ་གསང་བའི་དཀྱིལ་འཁོར་ནས་ཧཱུྃ་གིས་ཁམས་གསུམ་འཁོར་བའི་ཆགས་ཞེན་སྦྱངས་ཏེ་དབྱིངས་ཀྱི་ངང་ནས་དྭངས་མའི་བཅུད་ཐམས་ཅད་བསྡུས། ཧྲཱིཿཡིས་ཟུང་འཇུག་གིས་ཁྱད་པར་དུ་བྱས་པའིི་དོན་རྟོགས། ཋཱ༔ཡིས་རྒྱས་པར་བྱས་པའམ་དབྱེར་མེད་དུ་བསྲེས་པའི་དོན་བསྟན་པ་ཡིན་ནོ། །རཀྟ་གཏོར་མའི་གཡོན་དུ་བཤམས་དགོས་ཤིང་། གཏོར་མ་བཤད་པ་ལ་གཏོར་མའི་རྒྱུ་ནི། བསོད་ནམས་ཚོགས་ཆེན་སྤེལ་བའི་ཕྱིར། །ཅི་འབྱོར་གཏོར་སྤུངས་ཆེ་བར་བསྐྱེད། །ཅེས་གསུངས་ཏེ་དངོས་པོ་རྣམ་པར་དག་པ་འབག་བཙོག་གིས་མ་སྦགས་པ་ཞིག་དགོས་གསུངས་སོ། །རྣམ་པར་དག་ཅེས་པ་ནི་སེར་སྣ་དང་རློམ་སེམས་མེད་པ་དང་། རྐུ་འཕྲོག་ལས་བྱུང་བའི་དངོས་པོ་མ་ཡིན་པའི་ཕྱེ་ཕུད་གཙང་མ་ཞིག་ལ་གཏོར་རྫས་དང་བདུད་རྩིའི་ཕུར་མ་སེལ་མེད་ཆང་གི་ཉིང་ཁུ་དཀར་གསུམ་མངར་གསུམ་ལ་སོགས་པའི་ཁ་ཚར་བཏབ་སྟེ་གཏོར་ཟན་རྫི་སྐབས་རང་ཉིད་ཀྱི་ཟན་ཟ་བའི་སྐ་སླ་ཙམ་ལས་གཏོར་རྒྱུ་སླ་མོར་བྱེད་མི་ཉན་ལ། ཇོ་བོ་རྗེ་སྔོན་བོད་དུ་བྱོན་སྐབས་བོད་འདི་ཕྱུག་པོར་གྱུར་མི་འདུག་ལ་འགྱུར་རྒྱུ་མེད་པ་འདྲ་སྟེ་གཏོར་ཟན་རྣམས་སླ་མོར་གྱུར་འདུག་པས་བསོད་ནམས་ཅི་ལ་ཡོད་གསུངས་སོ། །མདོར་ན་གཏོར་མའི་རྫས་དང་ཁ་ཚར་སྐ་སླ་ལ་སོགས་པ་རང་ཉིད་ཀྱིས་ཟོས་ན་རང་ཉིད་ཅི་འདྲ་ལ་དགའ་ན་དེའི་འདང་རྒྱག་བྱེད་དགོས་ཤིང་། མཆོད་པའི་རིགས་ཐམས་ཅད་ལ་རང་ཉིད་ཀྱི་ཞེན་འཛིན་དག་པའི་ཆེད་དང་ཚོགས་རྫོགས་པའི་ཆེད་དུ་རང་ཉིད་གང་ལ་དགའ་བའི་དངོས་པོ་འབུལ་བ་ཡིན་ནོ། །དེའི་དངོས་འཛིན་མེད་ན་ཀུན་རྫོབ་རྫས་ཀྱི་མཆོད་པ་ལ་ལྟོས་མི་དགོས་ལ། རྣལ་འབྱོར་པ་ལྟ་དགོངས་རྟོགས་པ་ཁྱད་པར་ཅན་འཇིག་རྟེན་པའི་ཆོས་བོར་བ་ཞིག་གིས་ཀུན་རྫོབ་གཟུགས་བརྙན་གྱི་གཏོར་མ་ལ་ཆེད་དུ་མ་ལྟོས་པར་སྣང་གྲག་ཐམས་ཅད་གཏོར་མའི་རང་བཞིན་དུ་བསྒྱུར་ནུས་ཀྱང་ལམ་པ་ཐམས་ཅད་དེ་ལྟར་མིན་པས་འདི་དག་ལ་དོན་གཉེར་དང་རྩོལ་བར་བྱེད་དགོས་སོ། །གཏོར་མའི་ངེས་ཚིག་ནི་ཆགས་འཛིན་གྱི་ཞེན་པ་གཏོར་ཞིང་ལས་རབ་འབྱམས་ཀྱི་གཞི་མ་ཡིན་པས་ན་གཏོར་མ་ཞེས་བྱ་ལ། བྷ་ལིངྟ་ཞེས་པ་ལ་ཨ་ནུ་ཡོ་ག་དང་མཐུན་པར་བདེ་སྟོང་གཉིས་མེད་དང་སྦྱར་ནས་ཕྱི་ནང་གསང་བའི་གོ་དོན་དང་དག་དྲན་བྱེད་རྒྱུ་ཡོད་དོ། །གཏོར་མའི་དབྱེ་བ་ལ་དོན་གྱི་གཏོར་མ། སྒྲུབ་པའི་གཏོར་མ། མཆོད་པའི་གཏོར་མ། ཕྲིན་ལས་ཀྱི་གཏོར་མ། དྲག་པོའི་གཏོར་མ་སྟེ་དབྱེ་བ་ལྔ་ཙམ་ཞིག་ཡོད་དོ། །དོན་གྱི་གཏོར་མ་ནི་དེ་ཁོ་ན་ཉིད་ཀྱི་ཡེ་ཤེས་དང་སྦྱར་ཡོང་སྐབས་གཏོར་སྣོད་ཆོས་ཀྱི་དབྱིངས། དཔལ་བཤོས་སྐྱེ་བ་མེད་པ་ལས། འཁོར་མཐེབ་སྐྱུ་མ་འགགས་ཡེ་ཤེས་ཀྱི་རོལ་རྩལ་དུ་འཆར་བ་དེ་ཡིན་ནོ། །སྒྲུབ་པའི་གཏོར་མ་ནི་གཏོར་སྣོད་གཞལ་ཡས་ཁང་། དཔལ་བཤོས་རྩ་གསུམ་ཞི་ཁྲོའི་གཙོ་བོ། འཁོར་མཐེབ་སྐྱུ་འཁོར་གྱི་ལྷ་ཚོགས་ལ་གསལ་རྒྱུ་དེ་ལྟ་བུ་དང་། མཆོད་པའི་གཏོར་མ་ནི་གཏོར་སྣོད་རིན་པོའི་ཆེའི་སྣོད་དུ། དཔལ་བཤོས་དཀར་གསུམ་མངར་གསུམ་བདུད་རྩི་ལྔ། འཁོར་མཐེབ་སྐྱུ་འདོད་ཡོན་གྱི་རྫས་སུ་དམིགས་རྒྱུ་དེ་ལྟར་ཡིན་ནོ། །མཆོད་གཏོར་དང་སྒྲུབ་གཏོར་སོ་སོར་མ་ཕྱེས་པ་མང་ལ། དེ་ཇི་ལྟར་ཡིན་ཞེ་ན། མཆོད་པའི་དུས་སུ་མཆོད་རྫས་སུ་ཤེས་པ་དང་། སྒྲུབ་པའི་དུས་སུ་ལྷར་ཤེས་པ། ཕྲིན་བཅོལ་གྱི་དུས་སུ་དམག་དཔུང་དུ་ཤེས་པ། བསྐུལ་བའི་དུས་སུ་ཟོར་དུ་ཤེས་པ་སྟེ་དེ་དང་དེའི་སྐབས་སུ་ཏིང་ངེ་འཛིན་གྱིས་འཕྲལ་དང་འཕྲལ་དུ་ཁ་བསྒྱུར་རྒྱུ་དེ་ལྟར་ཡིན་ནོ། །ཕྲིན་བཅོལ་གྱི་གློ་བུར་ལས་བཅོལ་གྱི་གཏོར་མ་རྣམས་གཏོར་སྣོད་ཀ་པཱ་ལ། དཔལ་བཤོས་རཱུ་ཏྲའི་སྙིང་། འཁོར་མཐེབ་སྐྱུ་ཤ་ཁྲག་ནང་རོལ་ལ་དམིགས་རྒྱུ་དང་། དྲག་པོའི་གཏོར་མ་ནི་གཏོར་སྣོད་དྲག་པོའི་ཧོམ་ཁུང་གི་ནང་དུ། དཔལ་བཤོས་ནད་མཚོན་དང་ཐོག་ཆར་མེའི་འཕྲུལ་འཁོར། འཁོར་མཐེབ་སྐྱུ་ཤན་པ་གྲི་ཐོགས་གསལ་རྒྱུ། འདི་ཚོ་སྨད་ལས་དགྲ་བགེགས་བསྒྲལ་བའི་སྐབས་ཀྱི་རྩལ་འདོན་བྱེད་རྒྱུའི་རིགས་ཡིན་ནོ། །བཟུང་ནས་མི་གཏོང་རྒྱུའི་གཏོར་མ་དང་། བཏང་ནས་མི་གཟུང་རྒྱུའི་གཏོར་མ་ལ་སོགས་པ་ན་ནིང་ཞིག་ནས་མང་པོ་ཞིག་བཤད་ཟིན་པས་ཡང་བསྐྱར་བཤད་མི་དགོས་ལ། གཏོར་མའི་བཟོ་དབྱིབས་ནི་རྩ་གསུམ་ཆོས་སྐྱོང་དང་བཅས་པའི་གཏོར་མ་གཏེར་ཁ་སོ་སོའི་སྒོས་ཆོས་ལྟར་དུ་གདན་ས་ཆེན་པོའི་མཐོང་བརྒྱུད་གྲུབ་བརྙེས་གོང་མའི་ཕྱག་ལེན་གྱི་རྒྱུན་མ་ཉམས་པ་འཕྱུག་མི་ཉན་རྒྱུ་འདི་རྣམས་དང་། བཤམས་ཚུལ་ནི་རྩ་བ་གསུམ་ཁ་ཡོད་ན་དབུས་སུ་བླ་གཏོར་བཤམས་ལ། གཡས་དེར་ཡི་དམ་དང་སྨན། གཡོན་དུ་མཁའ་འགྲོ་དང་རཀྟ། མདུན་ལ་སོགས་པ་ལ་ཆོས་སྐྱོང་གི་གཏོར་མ། དེ་ཡང་ཕོ་རྒྱུད་གཡས་ལ་བཞག་པ་དང་། མོ་རྒྱུད་གཡོན་ལ་འགོད་རྒྱུ་ལ་སོགས་པ་ཕྱག་ལེན་ལྟར་དུ་ཡིན་ནོ། །འདི་དག་གནད་ཆུང་བྱེད་རྒྱུ་མེད་ཅིང་། སེམས་དང་དམིགས་པའི་བྱེད་ལས་གཙོ་ཆེ་ཞེས་ལག་ལེན་གྱི་སྐབས་སུ་དམིགས་པ་ལ་ཁག་བཞག དམིགས་པའི་སྐབས་སུ་སྟོང་བསམ་ཞིག་སྒོམ་པས་ཅི་ཡང་མི་ཕན་གསུངས་ཡོད་དོ། །ལག་ལེན་ཡིན་པ་ཚུལ་ལྡན་བྱས་ནས་དམིགས་པ་ལ་རྩལ་འདོན་བྱེད་རྒྱུ་ཡོད་ན་དངོས་སུ་བཤམས་རྒྱུ་དེ་དམིགས་རྟེན་ཡིན་པས་དེ་ལ་དམིགས་རྟེན་བྱས་ནས་སྣང་སྲིད་ཐམས་ཅད་གཏོར་མའི་རང་བཞིན་དུ་དམིགས་ནས་འབུལ་དགོས་སོ། །ནང་གི་མཆོད་པའི་སྐབས་ཡིན་ན་དབང་ལྔའི་མེ་ཏོག གསུར་ཆེན་གྱི་བདུག་སྤོས། ཞུན་ཆེན་གྱི་སྣང་གསལ། མཁྲིས་པའི་དྲི་ཆབ། ཤ་རུས་ཀྱི་ཞལ་ཟས་དེ་རྣམས་རྒྱུ་མ་བཅོས་ལྷུན་གྱིས་གྲུབ་པའི་མཆོད་པ་ཤ་ལྔ་བདུད་རྩི་ལྔའི་རང་བཞིན་ཡིན་ན་རྐྱེན་འདུ་བྱེད་བཟོ་བཀོད་ཀྱིས་བསྒྱུར་བ་ལ་རྨད་དུ་བྱུང་བའི་མཆོད་པ་ཞེས་ཟེར་རོ། །མཆོད་ཡོན་མེ་ཏོག་ལ་སོགས་པའི་ཕྱི་མཆོད་ཐུན་མོང་གི་མཆོད་པ་དེ་ཚོ་ནང་གི་མཆོད་པ་དང་མ་འདྲེས་པར་བཤམས་ལ། ཕྱི་མཆོད་དེ་ཚོར་སྨན་རཀ་གི་ཟེགས་མ་མ་འཐོར་བ་བྱེད་དགོས་སོ། །གཏོར་མ་ལ་ལྷ་སོ་སོའི་སྐུ་མདོག་ལྟར་དུ་གཏོར་གདུགས་དབུབ་རྒྱུ་དང་། ཆོས་སྐྱོང་གི་གཏོར་མ་ལ་རུ་མཚོན་འཛུགས་རྒྱུ་དེ་ཚོ་རྒྱུད་དོན་དང་མཐུན་པ་ཡིན་ཞིང་། དར་གྱི་ཅོ་པན་དང་། རཏྣའི་སྲོ་ཚར། སྟག་གཟིག་གི་རྒྱལ་མཚན་ལ་སོགས་པས་བརྒྱན་དགོས་ལ། ད་རུང་ཅི་འབྱོར་བའི་ཟས་རིགས་དང་བཟའ་བཅའ་ལ་སོགས་པ་མཆོད་རྫས་ཀྱིས་མཛེས་པར་བརྒྱན་དགོས་པ་དེ་ལྟར་གསུངས་ཡོད་དོ། །བཟང་སྤྱོད་ཀྱི་ཡན་ལག་བདུན་པའི་ནང་དུ། བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །ཞེས་གསུངས་པ་དང་འདྲ་བར་རང་གི་སྣང་བ་དྭངས་ཤར་རེ་སོང་བའི་མཆོད་པ་ཞིག་བཤམས་ན་མཆོད་པ་འབུལ་ཡུལ་རྣམས་རང་རྩལ་ལས་ཤར་བ་ཡིན་པས་བཤམས་པ་ཙམ་གྱིས་བསོད་ནམས་ཐོབ་བོ། །གཏོར་མ་བྱིན་རླབས་ཀྱི་སྐབས་སུ་གཏོར་སྣོད་བྷནྡྷ་འབར་བའི་གཏོར་གཞོང་གི་ནང་དུ་གཏོར་མ་ཤ་ལྔ་བདུད་རྩི་ལྔ་རྣམ་པར་དག་པ་ཡེ་ཤེས་ལྔའི་རང་བཞིན་འདོད་ཡོན་གྱི་ཕུང་པོར་གསལ་ནས་སྔགས་ནི་ཨོཾ་ཨཱཿཧཱུྃ་མ་ཧཱ་བྷ་ལིངྟ་ཧཱུྃ་ཧྲཱིཿཋཱ༔ཞེས་གསུངས་སོ། །སྔགས་དོན་ཨོཾ་ཨཱཿཧཱུྃ་རྡོ་རྗེ་གསུམ། མ་ཧཱ་བྷ་ལིངྟ་གཏོར་ཆེན། ཧཱུྃ་གིས་འཁོར་བའི་ཆགས་ཞེན་སྦྱངས། ཧྲཱིཿཡིས་ཟུང་འཇུག་གི་ངོ་བོར་རྟོགས། ཋཱ༔ཡིས་རྒྱས་པར་སྦར་བ་སོགས་གོང་དང་མཐུན་ནོ། །རྒྱས་པའི་སྐབས་སུ་ཏེ་ཛྭ་བྷ་ལིངྟ་བྷ་ལ་བྷ་ཏེ་གུ་ཧྱ་ས་མ་ཡ་ཞེས་འབྱུང་བ་ནི་ཏེ་ཛྭ་བྷ་ལིངྟ་ཐུགས་རྗེས་འགྲོ་བ་འདུལ་བའི་རྩལ་སྣང་གི་གཏོར་མ་ཞེས་པའི་དོན་ཡིན་ལ། བྷ་ལ་བྷ་ཏེ་ཞེས་དེ་གཉིས་ཀ་དབྱེར་མེད་རོ་གཅིག་ཏུ་སྦྱོར་བའི་དོན། གུ་ཧྱ་ཞེས་པ་གསང་བ་བྱུང་རྩོལ་གྱི་རྟོག་པ་ཁྱབ་གདལ་ཆེན་པོའི་གཏོར་མ་ལ་གོའོ། །དེ་ཡན་གྱིས་སྐབས་འདི་ལས་འཕྲོས་ནས་དུས་རྒྱུན་གྱི་མཐོང་བརྒྱུད་ཀྱི་ཕྱག་ལེན་རྒྱུད་ཀྱི་དགོངས་པ་དང་ར་སྦྲགས་རྒྱུ་གོ་བ་རྙེད་དགོས་ལུགས་ཀྱི་མཚོན་བྱེད་ཐུགས་གསོས་ཙམ་དུ་སྨན་རག་གཏོར་གསུམ་གྱི་སྐོར་ནས་ཕྲན་བུ་ཞིག་ཞུས་པ་ཡིན་ནོ། །འདིའི་དེ་མ་ཐག་ཏུ་ཕྱི་མཆོད་འདོད་ཡོན་རྣམ་ལྔ་བྱིན་གྱིས་རློབ་པའི་སྔགས་ཨོཾ་ཨཱཿཧཱུྃ་བཛྲ་པུཥྤེ་དྷུཔྤེ་ཨཱ་ལོ་ཀེ་གྷནྡྷེ་ནེེ་ཝི་ཏེ་ཤཔྟ་ཨཱཿཧཱུྃ༔ཞེས་གསུངས་སོ། །ཨོཾ་ཨཱཿཧཱུྃ་རྡོ་རྗེ་གསུམ་མམ་སྐུ་གསུམ་གྱི་ས་བོན་གྱི་གསང་བ་གསུམ་གྱི་ཡེ་ཤེས་ཀྱིས་མཆོད་རྫས་སྦྱོང་རྟོགས་སྦོར་བར་བྱེད་པ། སྦྱོང་རྟོགས་སྦར་བ་གསུམ་ཇི་ལྟར་བྱེད་ཅེ་ན། ཨོཾ་གྱིས་ཐ་མལ་གྱི་སྣོད་དེ་རིན་པོ་ཆེའི་སྣོད་དུ་སྦྱོང་བ་དང་མཆོད་རྫས་ཀྱི་འབག་བཙོག་སྦྱོང་ཞིང་། ཨཱཿཡིས་གནས་ཡུལ་རྣམ་པར་དག་པའི་མཆོད་པར་རྟོགས་པ། ཧཱུྃ་གིས་མི་ཟད་མཁའ་དབྱིངས་ཐམས་ཅད་ཁྱབ་པར་སྦར་བའི་དོན་ཡིན་ལ། བཛྲ་པུཥྤེ་ནི་རྡོ་རྗེ་མེ་ཏོག་མ་ཞེས་པའི་དོན། མེ་ཏོག་མ་སྐུ་མདོག་སེར་མོ་མེ་ཏོག་བསྣམས་པ། དྷུཔྤེ་ཞེས་པ་བདུག་སྤོས་མ་སྔོན་མོ་སྤོས་ཀྱི་རེང་བུ་བསྣམས་པ། ཨཱ་ལོ་ཀེ་ཞེས་པ་མར་མེ་མ་དམར་མོ་འབྲུ་མར་དང་རྩི་མར་གྱི་སྒྲོན་མེ་ཐོགས་པ། གྷནྡྷེ་ཞེས་པ་དྲི་ཆབ་མ་སེར་མོ་གཙང་སྦྱོར་གྱི་དྲི་ཆབ་བསྣམས་པ། ནཻ་ཝི་ཏེ་ཞེས་པ་ཞལ་ཟས་མ་དཀར་མོ་བཤོས་གཙང་བསྣམས་པ། ཤཔྟ་ཞེས་པ་རོལ་མོ་མ་ལྗང་གུ་རོལ་མོ་སྣ་ཚོགས་ཐོགས་པ། དེ་དག་རེ་རེ་ལས་ཀྱང་རང་འདྲའི་ལྷ་མོ་དཔག་མེད་འཕྲོས་ཏེ་གནས་ཡུལ་རྣམ་དག་གི་མཆོད་པ་སྟེ། གནས་འཛིན་བྱེད་དབང་པོ་དང་། ཡུལ་གཟུགས་སོགས་དག་པའི་མཆོད་པའོ། །ཨཱཿཡིས་ངོ་བོ་ཟག་མེད། ཧཱུྃ༔གིས་རང་བཞིན་རྒྱས་པར་སྤེལ་བ་མཆོད་རྫས་དཔག་ཏུ་མེད་པར་སྤྲོ་བའི་དོན་དེ་ལྟར་ཡིན་ནོ། །མཆོད་པ་བྱིན་རླབས་ལ་དགོས་པ་ཅི་ཞིག་ཡོད་ཅེ་ན། ཡོན་ཆབ་ལ་དྲི་ཟ་ཉེ་བར་འཁོར། མེ་ཏོག་ལ་མེ་ཏོག་ཚེ་རྒྱལ། བདུག་སྤོས་ལ་དྲི་ཡི་ངད་ལྡང་། མར་མེ་ལ་གྲིབ་གནོན་རྐུན་པོ། དྲི་ཆབ་ལ་གདུག་པ་དྲི་འཕྲོག ཞལ་ཟས་ལ་ལོག་འདྲེན་གདོང་བརྒྱ་པ་ཞེས་པ་ལ་སོགས་པའི་བགེགས་མི་འཇུག་པའི་ཆེད་དང་། འདིའི་སྦྱང་བྱ་སྦྱོང་བྱེད་སྦྱངས་འབྲས་ཀྱི་ཐོག་ནས་ཐུན་མོང་གི་སྦྱོང་བྱེད་བྱིན་རླབས་ཀྱི་རིམ་པས་སྦྱང་བྱ་འཁོར་བའི་གནས་ནས་སྦྱངས་འབྲས་འོད་ཟེར་ཆེན་པོའི་དབང་བསྐུར་ཐོབ་པ་དང་སངས་རྒྱས་ཀྱི་ཞིང་སྦྱོང་བའི་ཏིང་འཛིན་རྟོགས་པ་དང་། ཐུན་མོང་མ་ཡིན་པའི་དག་རྫོགས་སྨིན་གསུམ་གྱི་ཐད་ནས་བཤད་ན་གཟུང་འཛིན་གྱིས་བསྡུས་པའི་ཞེན་ཆགས་མ་སྤངས་གནས་སུ་དག ཡེ་ཤེས་ཀྱི་རྣམ་རོལ་ཀུན་བཟང་མཆོད་པའི་སྤྲིན་ལ་མངའ་དབང་འབྱོར་བའི་རྟེན་འབྲེལ་མ་བཙལ་རང་ལ་རྫོགས། རྫོགས་རིམ་བདེ་སྟོང་གི་ཡེ་ཤེས་མ་བྱས་ལྷུན་གྲུབ་ཏུ་སྨིན། དེ་ལྟ་བུའི་དག་རྫོགས་སྨིན་གསུམ་གྱི་གོ་བ་ལེན་དགོས་སོ། །སྔོན་དུ་འགྲོ་བའི་ལེའུའོ༔ཞེས་པ་འདིས་སྐབས་ཀྱི་དོན་བསྡུ་བ་དང་སྦྱར་ན་མཚམས་ཀྱི་ཆིངས་ལེའུའམ་ལེའུ་ཚན་གྱིས་བཅད་པའི་སྐབས་དོན་གྱི་རྫོགས་ཚིག་སྦྱར་བས་བཀའ་ཡི་བསྡུ་བ་མཛད་པ་པོ་ཐམས་ཅད་ཀྱིས་ལེའུ་དང་། བམ་པོ། སྐབས་དང། གནས། རིམ་ཁང་ལ་སོགས་པས་ཕྱེ་རྒྱུ་ཅན་ཞིག་ཡིན་ནོ། །ལེའུ་དེ་ཁ་ཡར་བསྟན་དང་། བམ་པོ་དེ་ཁ་ཕྱིར་བསྟན། གཞན་ཐམས་ཅད་ལེའུ་དང་འདྲ་བར་སྦྱར་རྒྱུ་དེ་ལྟར་ཡིན་ནོ། །ས་མ་ཡཱ༔ནི་དམ་ཚིག་གི་རྒྱ། རྒྱ་རྒྱ་རྒྱ༔གསུམ་ནི་གསང་བ་གསུམ་གྱི་རྒྱ། གསང་བར་གདམས་པའི་བཀའ་རྟགས་ཀྱི་ཕྱག་རྒྱ་ཡིན་ནོ། ། དེ་ཡན་ཆད་ཀྱིས་སྔོན་འགྲོའི་ས་བཅད་སོང་ནས་གཉིས་པ་དངོས་གཞིའི་ལེའུ་བསྟན༔ ལྷ་བསྐྱེད་སྤྱན་འདྲེན་བཞུགས་གསོལ་ཅིང་༔ ཕྱག་མཆོད་བསྟོད་བཤགས་བདུན་གྱིས་བསྟན༔ཞེས་གསུངས་ཏེ་ཆིངས་བདུན་གྱི་རྣམ་གཞག་མདོར་བསྟན་གྱིས་བསྟན། དེའི་རྣམ་དབྱེ་རྒྱས་པར་བཤད་པ་ལ་དང་པོ་བསྐྱེད་པའི་རིམ་པ་ནི༔ཞེས་མཚམས་སྦྱར་ཏེ། ཧཱུྃ༔རྟོག་བྲལ་སྒོམ་མེད་དེ་བཞིན་ཉིད༔ཅེས་གསུང་ས་འདི་ནས་མགོ་བཟུང་སྟེ་སང་ཉིན་ནས་བཤད། ད་རེས་འདི་ན་གཉུག་མར་གནས་པ་རྫོགས་ཆེན་གདན་ས་འདིའི་བཤད་སྒྲུབ་ལས་གསུམ་གྱི་གྲྭ་ཚང་ཁག་དང་། ཕྱོགས་སོ་སོ་ནས་ཕེབས་པའི་ཆོས་འདོད་དོན་གཉེར་ཅན་མང་པོ་ཞིག་མཉམ་དུ་འཛོམས་ན་འདི་མ་བོས་ཕྱོགས་གཅིག་ཏུ་འདུས་པའི་ལས་ཅན་རྡོ་རྗེའི་མཆེད་ལྕམ་གྱི་ཚོགས་པ་ཞིག་ཡིན་ལ། མཉམ་དུ་གྲོས་མ་བྱས་ནས་བསམ་པ་ཕྱོགས་མཐུན་གྱིས་འཛོམས་པ་ཞིག་ཀྱང་ཡིན་ཞིང་། འདི་སྔོན་སྨོན་ཐུགས་བསྐྱེད་ཀྱི་མཐུ་གྲུབ་པ་ཞིག་ཀྱང་ཡིན་ནོ། །ཁྱད་པར་དུ་རྫོགས་ཆེན་འབྲུག་ཆེན་རིན་པོ་ཆེས་བསྟན་ལ་སྨན་པའི་ལྷག་བསམ་ཐུགས་བསྐྱེད་ཆེན་མོས་སྣ་འདྲེན་གྱིས་རྫོགས་ཆེན་ཚང་གི་དབུ་མཆོད་བརྒྱད་ཅུས་གཙོ་བོར་བྱས་པའི་གྲྭ་མང་གཞོན་དར་མང་པོ་ཞིག་འདིའི་ཆོས་གྲྭའི་ནང་དུ་འཛོམས་ནས་བསྙེན་སྒྲུབ་ཐུན་བཞིའི་རྣལ་འབྱོར་མཐར་ཆགས་སུ་གནང་བཞིན་པ་འདི་ཚོ་བསྟན་པའི་མིག་རྒྱན་ཡིན་ནོ། །ཤྲཱི་སེང་ཆོས་གྲྭའི་བཤད་གྲྭ་པ་རྣམ་པ་བཤད་ཅི་དགོས་ཏེ། དཔལ་གྱི་ནཱ་ལེནྡྲ་གཉིས་པ་ངས་བཏགས་པ་ཞིག་མ་ཡིན་ལ། ལོ་རྒྱུས་ཀྱི་དོན་གྱིས་ཁ་རང་གྲགས་བྱས་པ་ཞིག་ཡིན་ཞིང་། གངས་ལྗོངས་མཁས་པའི་འབྱུང་གནས་ཀྱང་དེ་ལྟར་དུ་ཐོགས་པ་ཞིག་ཡིན་ནོ། །མདོར་ན་ཁྱེད་རྣམ་པས་ཐུབ་པའི་ལུང་རྟོགས་ཀྱི་བསྟན་པ་བཤད་སྒྲུབ་གཉིས་ཀྱིས་འཛིན་པ་དང་། ཁྱད་པར་དུ་དགོན་གྱི་གྲྭ་གཞོན་རྣམ་པས་འདི་ལྟར་དུ་བསྐྱེད་རྫོགས་ཀྱི་ཉམས་ལེན་གནད་སྨིན་མཛད་པ་ལ་ངས་བཀའ་དྲིན་ཆེ་ཞུས་པ་ཡིན་ཞིང་། འདི་གང་ཟག་གཅིག་གི་བྱ་བ་ཡག་ཉེས་ཀྱི་མཛད་པ་ཁོ་ན་ཞིག་མ་ཡིན་ལ། འདི་གསང་སྔགས་སྔ་འགྱུར་བའི་ཡང་དར་བསྟན་པའི་མིག་ལྟོས། མ་འོངས་ཕྱི་རབས་པ་ལ་དཔེ་བསྟན་གྱི་ལམ་སྲོལ་ཞིག་བཏོད་པ་ཞིག་ཡིན་ཞིང་། སྔ་དྲོ་ཕོ་ཆེན་ཤ་ཕོས་གངས་བཤགས་ན། །ཕྱི་དྲོ་ཤེའུ་ཆུང་ཡུ་མོ་དེ་ལ་འཁོར། །ཞེས་པའི་དཔེ་ལྟར་ཁྱེད་རྣམ་པས་མ་འོངས་མི་རབས་མང་པོ་ལ་བསྟན་རྒྱུན་དྲི་མ་མེད་པའི་རྒྱུན་བཞག་པ་ཡིན་ནོ། །གང་ཟག་རེ་རེའི་ངོས་ནས་ཐུན་རེ་རེ་སྡོམ་པ་འདི་རླབས་ཆེན་གྱི་མཛད་རྗེས་སོག་རྒྱུ་ཡོད་པ་ཞིག་ཡིན་ལ། ཐུན་བཞི་ཆགས་མེད་དུ་བཅད། དེའི་ཐོག་བསྐྱེད་རྫོགས་ཉམས་ལེན་ལ་གཞི་ནས་འདྲིས་དགོས་པ་ཡིན་པས་འོ་རྒྱལ་ཡོད་ཀྱང་འདིའི་དོན་ལ་དཀའ་སྤྱད་མཛོད་དང་མཛད་རིན་ཡོད་པ་ཞིག་ཡིན་ནོ། །མི་ཚེའི་ནང་གི་ལོ་རེའི་ཞག་པོ་སུམ་བརྒྱ་དྲུག་ཅུའི་བྱ་བའི་བསྡོམས་རྩིས་ཤིག་བརྒྱབ་ན་འདི་བརྩི་རིན་ཡོད་པའི་ཉི་མ་ཉི་ཤུ་རྩ་གཅིག བརྗེད་རྒྱུ་མེད་པའི་ཉི་མ་ཉི་ཤུ་རྩ་གཅིག རང་གཞན་དོན་གཉིས་འགྲུབ་པའི་ཉི་མ་ཉི་ཤུ་རྩ་གཅིག གྲོ་གྱོང་ཚུགས་ལྷག་མ་ཤོར་བའི་ཉི་མ་ཉི་ཤུ་རྩ་གཅིག་ཡིན། ཞི་ཁྲོ་འདོན་ཆོག་ཁ་ཐོག་འཁོར་ལོ་ཡིན་རུང་དེའི་ཚིག་ཙམ་གྱི་ནང་དོན་བརྡ་མ་ཁྲོལ་ན་སེར་གཟུགས་དོན་བྱེད་ནུས་སྟོང་དུ་མི་འགྱུར་བའི་ངེས་པ་མེད་ལ། དེ་ལྟར་ཡིན་ཕྱིར་རང་རེ་རྣམས་ཀྱིས་འཆད་ཉན་བྱེད་བཞིན་པའི་ཟབ་ཆོས་ཞི་ཁྲོ་འདིའི་འགྲོ་དོན་གྱི་ཐད་ནས་གསུང་སྐབས་འགྲོ་དོན་ནམ་མཁས་གར་ཁྱབ་ལ་ཁྱབ་པ་ཞིག་ཡིན་ཚུལ་ལོ་རྒྱུས་མང་པོར་གསུངས་ཡོད་ཅིང་། ངེས་པ་དོན་དུ་དེ་ལྟར་ཡིན་ཤག་ཤག་ཡིན་ནོ། །འུ་ཚོས་རིག་གང་གོ་གང་གི་བོད་ཡུལ་གྱི་ས་ཆ་སྟོད་སྨད་བར་གསུམ་གྱིས་མ་ཚད་པར་སངས་རྒྱས་ཀྱི་བསྟན་པས་གར་ཁྱབ་ལ་ཁྱབ་འདུག་བསམ་རྒྱུའི་ཚོད་ཙམ་དུ་སླེབས་ཡོད་ཅིང་། གྲྭ་ཆུང་བྱིས་པ་ལོ་བརྒྱད་ཡན་ཆད་ཀ་ཁ་ཚེག་དེད་ཚར་བའི་དེ་མ་ཐག་ཏུ་ང་ཉིད་ལྷ་ཡི་ང་རྒྱལ་ལ་འཐམས་ནས་ཞི་ཁྲོའི་འདོན་ཆའི་འདོན་ཆོག་སྦྱངས། དེའི་འདོན་རྗེས་ཟིན་ཙམ་ནས་དཀོར་ཟས་ཟ་བའི་མགོ་འཛུགས་ཁུལ་བྱེད་པ་ཡིན་ཞིང་། དེ་གཅིག་བྱས་ན་ཡག་པ་ཞིག་མིན་རྒྱུ་མི་འདུག་སྟེ། གསང་སྔགས་ཀྱི་ཆོས་དར་ནས་མོས་པ་ཅན་གྱི་གང་ཟག་མང་སྟེ་ཀློག་འདོན་ཙམ་ཞིག་ཤེས་ན་ཡང་དེ་མཆོད་གནས་སུ་བཀུར་བ་དེ་ཡག་པ་ཞིག་ཡིན་རྒྱུ་རེད། འོན་ཀྱང་གཅིག་བྱས་ན་དངོས་དང་གཟུགས་བརྙན། ལྟར་སྣང་དང་ཡང་དག་གི་དབྱེ་བ་ཞིག་ཕྱེ་རྒྱུ་མེད་ན་བར་ཞིག་གསང་སྔགས་བོན་དུ་གྱེར་རྒྱུ་དང་། གསང་སྔགས་ཀྱི་དཀྱིལ་འཁོར་ར་ཚང་དུ་བཞེངས་པ་རྣམས་ཀྱི་ལུང་བསྟན་ཐོག་ཏུ་ཁེལ་ན་རྟགས་ཙམ་འཛིན་པའི་ས་ཚོད་དེ་ལྟར་བྱས་ནས་ཐོན་པ་མ་ཡིན་ནམ་སྙམ་པའི་འཇིགས་སྐྲག་ཅན་གྱི་ཚོར་བ་སྐྱེད་བྱེད་ཀྱང་ཡིན་ནོ། །གསང་སྔགས་ལུང་གི་སྒོ་བཞིའི་ནང་གི། དོན་རྣམས་གསལ་འདེབས་བརྗོད་པ་ཚིག་གི་སྒོ། །ཞེས་གསུངས་པས་བརྗོད་པ་ཚིག་གི་སྒོ་འདོན་རྒྱུ་དེ་དགོས་དགོས་ཀྱང་འདོན་དགོས་རྒྱུ་དེ་དོན་རྣམས་གསལ་འདེབས་ཀྱི་ཆེད་དུ་འདོན་པ་ཡིན་པས་མ་མཐའ་ཡང་ཚིག་རྗེས་དོན་དྲན་ཞིག་མེད་ན་བྲག་ཆའི་སྒྲ་དང་། བྱ་ནེ་ཙོའི་ཁ་ཡི་འདོན་པ། སྒྲ་འཁོར་ནང་ནས་མངགས་པ་དང་ཁྱད་པར་མེད་དོ། །ད་རུང་ཉོན་མོངས་དང་འདྲེས་པའི་ཆགས་སྡང་གི་ཀུན་སློང་མེད་པ་ལ་དེ་ཚོས་དགའ་ཤས་ཆེ། དེས་ན་འདོན་པ་ཁ་ཡིས་འདོན་སྐབས་དེ་དང་འབྲེལ་བའི་བསྐྱེད་རྫོགས་དང་དམིགས་པ་གཙོ་ཆེ་ལ། བསྙེན་ཚད་བཟླས་གྲངས་འཁྱོལ་བ་ཞིག་སྔོན་དུ་འགྲོ་བ་ནི་དེ་བས་ཀྱང་གལ་ཆེའོ། །གལ་ལོས་ཆེ་སྟེ་གཞན་དོན་ཕྲིན་ལས་ཀྱིས་འགྲོ་དོན་སྐྱོང་བ་ལ་རང་དོན་དངོས་གྲུབ་ཀྱི་བྱིན་རླབས་ཐོབ་པ་ཞིག་ཡིན་དགོས་མ་གཏོགས་རང་མགོ་མི་ཐོན་རོ་མགོར་ཅ་ཅོ་སྒྲོག་གསུངས་པ་ནང་བཞིན་འགྱུར་ཉེན་ཆེ་ཞིང་། རྗེ་བཙུན་མི་ལ་རས་པས། མི་ཤི་བའི་རོ་ཡི་མགོ་བོ་ལ། །ནོར་འདོད་པའི་བན་བོན་གླུ་དབྱངས་ལེན། །ཞེས་གསུངས་པ་ལྟར་དུ་གཤིན་པོ་འཁྱག་རིལ་ལེར་སོང་བའི་རོ་མགོ་ཞིག་ནས་དབང་མེད་བར་དོའི་སེམས་ཅན་འཇིགས་པའི་སྒྲ་བཞི། ཡ་ང་བའི་གཡང་ས་གསུམ་ལ་སོགས་པ་ལ་སྡུག་བསྔལ་བཞིན་ཡོད་པ་དེ་ལ་སྙིང་རྗེ་སྐད་ཅིག་མ་ཙམ་ཞིག་མེད་པའི་ཐོག་ཏུ། ད་རུང་རྒྱུ་ཞིག་ཟ་འདོད། ལེན་འདོད། བླ་མས་རྟ་སྒོམ། གྲྭ་པས་མཛོ་སྒོམ་པའི་དཔེ་ལྟར་གྱུར་སོང་ན། གནས་སྐབས་ལྟར་སྣང་ལ་གཞན་མགོ་ཤི་བོ་ཤུལ་མི་དང་བཅས་པའི་མགོ་གཡོགས་ཀྱང་མཐར་ཐུག་དོན་གྱི་ཐོག་ནས་རང་མགོ་རང་གིས་གཡོགས་ཟིན་པའི་བདག་གཞན་གཉིས་ཕུང་གྱུར་ཟིན་པ་ཡིན་ནོ། །དཀོར་ནག་པོའི་ལན་ཆགས་ཀྱི་བུ་ལོན་མི་ཐེག་པ་ཞིག་རང་ཐོག་ཏུ་སྤུངས་ཟིན་པ་ཡིན་ལ། དཀོར་ནག་པོ་སྲོག་གི་སྤུ་གྲི་ཡིན། །ཟོས་དྲགས་ན་ཐར་བའི་སྲོག་རྩ་གཅོད། །ཅེས་དང་། །ལྡན་གྲོལ་གཉིས་མེད་དཀོར་ལ་རང་གར་སྤྱོད། །ཅེས་ངན་འགྲོའི་གནས་ལ་མི་སྐྱེ་བར་སྨོན་ལམ་འདེབས་ས་ཞིག་ཡིན་ཞིང་། རང་གིས་མི་ཚད་པར་དེ་ཁར་རེག་ཚད་གྲིབ་ཟས་སུ་འགྱུར་བ་ཡིན་ནོ། །དེ་བས་ཇག་པ་རྟ་འདེད་ཀྱིས་དགའ་ཞེས་ངས་དུས་རྒྱུན་དུ་བཤད་བཞིན་པ་ལྟར་ཡིན་ཞིང་། དེས་ན་སུ་གཅིག་ཀྱང་འདོན་སར་མི་འགྲོ་བར་འདུག་རྒྱུ་དེ་ཨེ་རེད་ཟེར་ན་དེ་ཡང་མ་ཡིན་ལ། དད་པ་ཅན་གྱི་ཚོགས་གཅག་མི་ཉན། དེ་མི་གཅག་པར་བྱ་བ་ལ་ཆེ་ཚོད་ཆུང་མིན་གྱིས་ཆོས་ཀྱི་གནད་དང་རྒྱུ་མཚན། སྨིན་གྲོལ་གྱི་འགྲོས་དང་རིམ་པ་ཤེས་པའི་སྟེང་དུ་སྔོན་འགྲོས་རྒྱུད་སྦྱངས། བསྙེན་སྒྲུབ་ལས་རུང་རེ་ཡོད་པའི་ཐོག་ནས་བསམ་པ་དག་པས་གསང་སྔགས་ཀྱི་དཀྱིལ་འཁོར་ཞལ་ཕྱེ་སའི་ཚོགས་སྒྲུབ་ལ་ཞུགས་ན་ཕན་པ་མ་ཆེ་ན་རང་གཞན་གཉིས་ཀ་ལ་གནོད་པ་ཆུང་བ་ཡིན་ནོ། །བདུན་ཚིགས་ཀྱི་ཆོ་ག་དེ་ཚོ་ལ་དམིགས་པ་གསལ་འདེབས་བྱེད་རྒྱུ་གལ་ཆེ་ལ། གནས་འདྲེན་གྱི་སྐབས་ལྟ་བུ་ཡིན་ན་ཆོ་ག་སྒྲ་དག དམིགས་པའི་དེ་ཉིད་གསལ། མ་ཡེངས་ནས་ཏིང་འཛིན་བརྟན་ན་ཕ་རོལ་པོ་བར་དོའི་སེམས་ཅན་རྟེན་ལ་བསྟིམས་ཡོད་པ་དེ་ཉམས་དགའ། ཤེས་པ་གསལ། བག་ཕེབས་ནས་དགའ་ཞིང་དད་པའི་ངང་ནས་མཚན་བྱང་ལྟ་བུ་ལ་རྟེན་བཅས་ནས་འདུག་པ་ཡིན་ནོ། །དེ་ལས་ལྡོག་ན་ཤེས་པ་བག་མི་ཕེབས་པར་མ་ཟད་བར་དོའི་སེམས་ཅན་ལ་སྙིགས་མའི་ལུས་རྟེན་རགས་པ་མེད་ཅིང་ཆོས་ཉིད་བར་དོའི་ཡེ་ཤེས་ཀྱི་སྣང་བ་མཐོང་མ་ཐག་པ་ཡིན་པས་གཞན་སེམས་ཤེས་པའི་མངོན་ཤེས་ཕྲན་བུ་ཡོད་པ་ཡིན་ཞིང་། མཆོད་གནས་ཀྱི་རྒྱུད་མ་དག་སྡོམ་དམ་ཚིག་མ་གཙང་ན་ལོག་ལྟ་ཤར་ནས་ངན་སོང་ལ་འགྲོ་བའི་རྒྱུ་བྱེད་པའི་ཉེན་ཁ་ཡོད་དོ། །བླ་མ་ཐུགས་རྗེ་ཅན་ཞིག་གིས་གཙོ་བོར་བྱས་པའི་དགེ་འདུན་པས་སློབ་མ་དད་ལྡན་དམ་ཚིག་གཙང་མ་ཞིག་གི་དོན་དུ་ཆོ་ག་དག ཏིང་འཛིན་གསལ་ན་བར་དོ་ན་གནས་པའི་སེམས་ཅན་དེ་ཆུ་ནང་གི་གྲུ་དང་འདྲ་བར་ཡར་མར་གང་ཡིན་ན་བསྒྱུར་སླ། བག་ཆགས་བསྒོ་སླ་བ་ཡིན་པས་ཆོས་ཀྱི་བྱིན་རླབས་དང་གང་ཟག་རྟོགས་པ་མཆོག་ལྡན་གྱི་དམིགས་པས་འཚང་རྒྱ་བར་བྱེད་ཐུབ་བོ། །དེ་མིན་ཡང་མཐོ་རིས་རིམ་བརྒྱུད་ཀྱིས་ཐར་བའི་ལམ་སྣ་ཟིན་ནུས་ལ། དེ་ལྟར་ཡིན་ཕྱིར་ཞི་ཁྲོ་འདོན་ཤེས་པས་མི་ཚད་དོན་གོ དོན་གོ་ཙམ་གྱིས་མི་ཚད་པར་བསྐྱེད་རྫོགས་ཀྱི་རིམ་པ་ལ་བསླབས་ནས་བསྙེན་སྒྲུབ་ཚད་ལྡན་རེ་མཛད་ན་རང་གཞན་ཐམས་ཅད་ལ་ཕན་ཐོགས་དེ་ལྟར་ཆེ་བ་ཡིན་ནོ། །དེ་ཡིས་དགེ་འདུན་པའི་ཆས་ཆ་ལུགས་འཆང་བ་དེ་དོན་དང་ལྡན། གྲྭ་ས་ཆེན་པོའི་བསྟན་པའི་རྐང་ཚུགས། སྙིགས་མའི་དུས་སུ་བསྟན་འགྲོའི་དོན་ཆེན་རང་ཐོག་ཏུ་བབས་པ་དེ་འགྲུབ་པ་ཡིན་ནོ། །དེས་ན་དང་པོ་རབ་ཏུ་བྱུང་། སྒྲིག་གྲྭ་སའི་ཀློག་འདོན་ཆ་ཚང་སྦྱངས། དེའི་ཐོག་ཏུ་ཐོས་པ་སློབ་གཉེར་རེ་མཛད་ན་སྨོས་མ་དགོས་པར་བཟང་གི་ཐོག་ཏུ་རྒྱན་ཡིན་ཞིང་། དེ་མིན་ཡང་མཐོང་བརྒྱུད་ཀྱི་ཕྱག་ལེན་ཆ་ཚང་རེ་ཤེས་ཚར་རྗེས་སྔོན་འགྲོ་འབུམ་ལྔའི་བསགས་སྦྱངས་རེ་བྱས། ཞི་ཁྲོ་དབང་ཆེན་མཆོག་དབང་རྒྱས་པ་ནས་བཟུང་སྟེ་ཐོབ། རྫོགས་པ་ཆེན་པོའི་དངོས་གཞིའི་ཁྲིད་ཁ་ཁྲིད་སྦྱོང་དང་བཅས་པ་རེ་སོང་། བསྐྱེད་རྫོགས་ཀྱི་གོ་དོན་རེ་ངེས། ཞི་ཁྲོའི་གཞི་བསྙེན་ལས་རུང་རེ་བསགས་ཚར་དུས་དེ་ནས་སྔ་བས་གྲོང་ཆོག་ལ་ཕེབས་ན་ཅི་འདྲའི་བསྟན་པའི་མིག་ལྟོས། ཉམ་ཐག་གི་མཆོད་གནས། ཤི་བོའི་ཡར་འདྲེན་ལ་ཇི་ལྟར་མི་བཟང་། དེ་འདྲའི་དགེ་ཚུལ་སློང་དགེ་འདུན་བཅུ་ཐམ་པས་ཞི་ཁྲོའི་གནས་བརྒྱ་ཞིག་བསྐུར་ན་ཆབ་བེ་ཆོབ་བེ་བརྒྱ་བས་མི་ཚད་སྟོང་ཞིག་འདོན་པ་བས་དེས་རྣམ་པར་དག་པ་ཡིན་ནོ། །དེ་མི་ཤེས་ནས་སྡོམ་དམ་ཚིག་བསྲུང་མི་དགོས་དང་བསྲུང་རྒྱུ་གང་ཡིན་མིང་ཙམ་ཞིག་མ་ཤེས་ནས་བསྐྱེད་རྫོགས་ཕར་ཞོག་མ་ཎི་ཕྲེང་སྐོར་གཅིག་ཙམ་ལ་སྦྱོར་དངོས་རྗེས་གསུམ་དམ་པ་གསུམ་ཚང་བ་ཞིག་འདོན་མ་མྱོང་བའི་མི་རྒོད་གོས་དམར་ཅན་འགའ་རེས་ཤི་བོ་ལ་སྙིང་རྗེ་མ་དགོས་དང་དེ་ཚང་གི་ངོ་ཙམ་ལ་མི་འཛེམ་པར་རྩེད་མོ་ཧ་རྒོད་ཇ་མཚམས་བསྙེན་མཚམས་ལ་དམག་དང་ཚོང་གི་གཏམ་ལ་སོགས་པ་ཆགས་སྡང་འཕེལ་བྱེད་ཀྱི་ངག་གི་མི་དགེ་བཞི་བོ་ཚང་བའི་ཐོག་ཏུ་ལུས་དང་ཡིད་ཀྱི་མི་དགེ་བ་དང་བཅས་པ་མི་དགེ་བ་ཐམས་ཅད་ཀྱི་སྣ་འདྲེན་བྱེད་རེ་བྱས་ནས་བུད་འགྲོ་མཁན་ཡང་སྙིགས་མའི་དུས་ཡིན་པས་མེད་མི་སྲིད་པ་མ་ཡིན་ནོ། །དེའི་ཕྱིར་ན་རྣམ་པ་ཚང་མ་ནི་སྔར་གྱི་ཐུགས་བསྐྱེད་དང་སྨོན་ལམ་གྱི་དབང་གིས་གདན་ས་ཆོས་འཁོར་ཆེན་པོའི་མ་འོངས་པའི་བསྟན་རྒྱུན་འཛིན་མཁན་ཤ་སྟག་ཡིན་པས་སྤྱིར་ན་གང་ཟག་རང་རྒྱུད་ལ་བཞུགས་པའི་བསྟན་པ་དེ་རང་བློ་རང་ལ་མི་ཁྲེལ་བ་ཞིག་གིས་བསྲུང་རྒྱུ་དང་། ཁྱད་པར་དུ་བསྐྱེད་རྫོགས་ཀྱི་གནད་དེ་ཚོ་ཐུགས་ཉམས་ལ་བཀོལ་ནས་རང་གཞན་སྨིན་ཅིང་གྲོལ་བའི་ཐབས་དང་ལམ་ཟབ་མོ་ལ་ཉམས་ལེན་མཛད་ན་བསྟན་འགྲོའི་དོན་ཆེན་ཞེས་པ་ཞིག་ཁ་ཁ་ནས་འགྲུབ་མི་དགོས་ལ། གྲུབ་པའི་རྟགས་ཀྱང་དེ་ཡིན་ནོ། །མངོན་ཤེས་མི་རིག་རྒྱུ་ཏག་ཏག་བཤད་ན་ཐིག་བཞིན་ཨེ་ཡོད་མི་ཤེས་ལ། ཞབས་རྗེས་བཞག་ཡོད་ཟེར་ཡང་ངོ་མས་མིག་གིས་རིག་ས་ཞིག་ལ་འདམ་འབག་གི་ནང་ལ་རྫིས་པ་དང་འདྲ་བར་བཞག་ན་མ་གཏོགས་འགའ་རེ་རྡོ་ཟད་པོ་ཞིག་ཨེ་རེད་དྲན་རྒྱུ་ཡོད་ཅིང་། དེ་ཚོ་རེ་ཞིག་བརྟག་པར་བྱ་ཞེས་པའི་གྲལ་དུ་འཇོག་དགོས་ཐུག་པ་ཡིན་ནོ། །ལར་མ་གཞིར་གནམ་ལ་འཕུར་སོང་ན་ཡང་དོན་ངོ་མས་བཤད་ན་དེ་ལ་ཆེ་རྒྱུ་ཅི་ཡང་མེད་ལ། མཁའ་བསྐྱོད། རལ་གྲི། རིལ་བུ། མིག་སྨན། རྐང་མགྱོགས་སོགས་ཐུན་མོང་གི་གྲུབ་པ་ཡིན་ཞིང་། མུ་སྟེགས་ཉི་མ་སྲེག་གིས་མིག་གིས་གཅིག་བལྟས་པས་དཔལ་ནཱ་ལེནྡྲའི་མངོན་པའི་བཀའ་ཚང་མ་བསྲེགས་པར་བྱས་པ་ཡིན་ནོ། །དེ་བས་རིག་རྒྱུ་ཡོད་ཤག་ཤག ཕན་ཐོགས་ཆེ་ཤག་ཤག དམ་པའི་ཚུལ་དགུའི་ཡོན་ཏན་དང་ལྡན་པས་ལུང་རྟོགས་ཀྱི་བསྟན་པ་བཤད་སྒྲུབ་ཀྱིས་བཟུང་ནས་འབྲེལ་ཚད་དོན་ལྡན་ཞིག་མཛོད་དང་གྲུབ་རྟགས་དེ་རེད། ཡོན་ཏན་དེ་རེད། ངོ་མཚར་ཅན་གྱི་རྣམ་ཐར་དེ་ཡིན་ལ། དེ་ཡང་རྩོད་པ་ཅན་མ་ཡིན་པར་ཚད་མ་གསུམ་གྱིས་གྲུབ་པ། ལུང་རིགས་གཉིས་ཀ་དང་མཐུན་པ་ཡིན་ནོ། །འུ་ཚོ་སྟོན་པས་གནང་བའི་ན་བཟའ་གོན་མཁན་རྣམས་ཀྱིས་རབ་ན་བསྟན་པའི་ཞབས་ཕྱི། མིན་ཡང་བསྟན་ཞབས་ལ་ཐག་པ་མི་གདགས་རྒྱུ་དེ་དུས་འདི་ལ་མིག་ལྟོས་ཡག་པ། སྒྲུབ་འོས་པའི་བྱ་བ། ཐོག་ཏུ་བབས་པ་ཞིག་རེད་སྙམ་མོ།། །། ཉིན་གཉིས་པའི་ཆོས་ཁྲིད།༼ཁ༽ གཉིས་པ་དངོས་གཞིའི་ལེའུ། ༡ སྔོན་དུ་འགྲོ་བའི་ཆོས། ཡང་ཐོག་མར་མེད་དུ་མི་རུང་བ་ནམ་མཁའི་མཐའ་དང་མཉམ་པའི་མགོན་མེད་སྐྱབས་བྲལ་ལོང་བ་ཐང་དཀྱིལ་དུ་ལུས་པ་ལྟ་བུའི་སེམས་ཅན་འདི་དག་ཐམས་ཅད་སྙིང་རེ་རྗེ་དགོངས་པའི་ཐུགས་བསྐྱེད་དེ། དེའི་ཐོག་ཏུ་འདི་ཐམས་ཅད་འཁོར་བ་དང་ངན་སོང་གི་སྡུག་བསྔལ་ཕྲ་རགས་གཏན་བྲལ་གྱུར་ནས་རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས་ཏེ་བླ་མེད་རྫོགས་པའི་བྱང་ཆུབ་ཀྱི་གོ་འཕང་ལ་འགོད་པར་བགྱིའོ། །དེའི་ཆེད་དུ་བདག་གིས་ད་རེས་དམ་པའི་ཆོས་ཟབ་མོ་ཉན་ནས། དེའི་ཐོས་དོན་བསམ། བསམ་དོན་སྒོམ་པས་ཉམས་སུ་བླངས་ནས་ཡུན་རིང་མི་འགོར་བར་ཚེ་ལུས་འདིའི་ཐོག་ཏུ་སྟོབས་བཅུའི་སྟོབས་མངའ། དབང་བཅུའི་དབང་དང་ལྡན་པའི་གོ་འཕང་དམ་པ་རྨད་དུ་བྱུང་བ་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་དཔལ་གདོད་མའི་མགོན་པོའི་གོ་འཕང་མངོན་དུ་བྱ་སྙམ་པའི་དོན་གཉིས་ལྡན་པའི་སེམས་བསྐྱེད་རང་འདོད་ཡིད་བྱེད་ཀྱི་བློ་དང་བྲལ་བ་ཞིག་བྱེད་དགོས་སོ། །དེ་ལྟར་བྱེད་པ་ལ་ཡང་བསམ་བཟང་སྨོན་པའི་རྗེས་འགྲོ་ཙམ་ཞིག་མ་ཡིན་པར་གཞན་དོན་དངོས་ལ་ད་ལྟ་ནས་འཇུག་པའི་དོན་དུ་རང་དོན་གྱི་སྟོབས་རྫོགས་པར་བྱེད་པ་ལ་ཐབས་གཞན་ལས་ཁྱད་པར་དུ་འཕགས་པ་ཐབས་ཤེས་ཟུང་འབྲེལ་གྱི་ཟབ་གསང་མྱུར་ལམ་གྱི་གདམས་པ་གསང་ཆེན་ཐེག་རྩེའི་ལམ་གྱི་ཆོས་འཆད་ཉན་བགྱི་བའི་སྐབས་ཡིན་པས་སེམས་བསྐྱེད་སྔོན་དུ་འགྲོ་བ་ཙམ་གྱིས་མི་ཆོག་པར་དངོས་གཞི་དམིགས་པ་མེད་པ་འཁོར་འདས་མཉམ་ཉིད་ཆེན་པོ་ཆོས་ཉིད་གཅིག་གི་རོལ་བ་སྣང་སྲིད་རྣམ་པར་དག་པའི་བཞུགས་ཚུལ་ངོ་མ་ཉིད་ནི་གནས་ལུགས་སྤྲོས་བྲལ་དག་མཉམ་ཆེན་པོའི་ལྟ་བའི་ངང་དང་མ་བྲལ་བ་ཞིག་གི་ཐོག་ནས་རིག་གདངས་སོ་སོར་རྟོག་པའི་ཡེ་ཤེས་ཀྱི་རང་རྩལ་རྣམ་དཔྱོད་ཀྱི་ཤེས་རབ་ཏུ་འབར་བ་ཉིད་ཆོས་རབ་རྣམ་པར་འབྱེད་པའི་ཤེས་རབ་ཀྱི་སྣང་བ་དང་མི་འབྲལ་བར་གསན་བཞེས་གནང་དགོས་སོ། །དེ་དགོས་ན་གང་འཆད་པ་པོ་ཡང་རྒྱུད་རྣམས་ཀུན་གྱི་སྟོན་པ་རིགས་ལྔའི་སྤྱི་དཔལ་ཆོས་སྐུ་དྲུག་པ་རྡོ་རྗེ་འཆང་ཆེན་ནམ། ཡང་མིན་ན་ཀུན་ཏུ་བཟང་པོ་རྣམ་པ་རྒྱལ་ཀུན་མཁྱེན་རབ་ཡེ་ཤེས་ཀྱི་ཕུང་པོ་འཇམ་པའི་དབྱངས་དང་གཉིས་སུ་མེད་པ་དེ་ཉིད་ཀྱི་ལྗགས་རྨོངས་མུན་འཇོམས་པར་བྱེད་པའི་ཤེས་རབ་ཀྱི་སྣང་བའི་འོད་ཟེར་ལས་ཨཱ་ལི་ཀཱ་ལིའི་སྒྲ་གདངས་སྔགས་སུ་འཕོས་པའི་ཟེར་ཕྲེང་འཕྲོས་ནས། ཉན་པ་པོ་རང་ཉིད་གསང་འཛིན་རྡོ་རྗེའི་ཆོས་སམ། ཡང་མིན་ན་འཕགས་མ་སྒྲོལ་མའི་རྣམ་པ་ཅན་གྱི་སྙིང་ཁ་ལ་ཆོས་ཀྱི་འོད་ཟེར་ཕོག་པས་མི་ཤེས་རྨོངས་པའི་མུན་པ་ཐམས་ཅད་རྒྱང་རིང་དུ་བསལ་ནས་མི་ཟད་པའི་གཟུངས་དང་སྤོབས་པའི་གཏེར་ཁ་ཕྱེ་བ་དང་ཆབས་ཅིག་ཤེས་རབ་ཡེ་ཤེས་ཀྱི་སྣང་བ་རྒྱ་ཆེན་པོ་ཐོབ། བྱང་ཆུབ་ཀྱི་སེམས་གཉིས་འབྱོངས། ཉོན་ཤེས་ཀྱི་སྒྲིབ་པ་དག བསོད་ནམས་དང་ཡེ་ཤེས་ཀྱི་ཚོགས་གཉིས་འབད་མེད་བདེ་བླག་ཏུ་རྫོགས་བཞིན་ཡོད་པའི་འདུན་པ་ཁྱད་པར་ཅན་དང་ལྡན་པས་གསན་དགོས་སོ། །བྱ་བ་གང་ཡིན་ནའང་དང་པོ་བསྙབ་སའི་མགོ་ཞིག་ནས་ཅུང་ཟད་མ་འདྲ་བའི་ཁྱད་ཆོས་དང་། སྤོབས་པ་འདོན་ཐུབ་ན་དེའི་རྒྱུན་ཡང་དེ་དང་འདྲ་བར་ཁྱད་པར་འཕགས་པའི་ཁྱད་ཆོས་ཅན་ཞིག་འགྲུབ་པ་ཡིན་ལ། དང་པོ་ཞིག་ནས་ཉོབ་འདྲ་ཞིག་ལངས་ནས་རྟ་ངན་སྤོ་ཐོའི་ནང་དུ་སོང་བ་དང་འདྲ་བར་སྣ་བཙུགས་ཁུར་ལ་ཁད་བྱས་ནས་དམའ་བལྟས་ཤིག་མ་གཏོགས་མ་བྱས་ན་མཐོ་ས་ཞིག་ལ་སྙོག་དོན་མེད་དོ། །ཁྱད་པར་དུ་བསམ་པའི་བྱེ་བྲག་དེ་ཚོ་སེམས་ཀྱི་འདུ་ཤེས་འཛིན་ལུགས་ཤིག་ཡིན་པས་གསང་སྔགས་དག་སྣང་གི་ལམ་ཡིན་ལ། སེམས་ཉིད་ཡིད་བཞིན་རིན་ཆེན་གྱི་གཏེར་ཞེས་གསུངས་པས་བསམ་པ་རྒྱ་ཆེན་པོ་ཞིག་ལ་ཐོག་མ་ཉིད་ནས་གཏོད་དང་དེ་ལ་འཁོབ་དགོས་དོན་མེད་དོ། །གང་ཞིག་གསན་པར་བྱ་བའི་ཆོས་དེ་ལ་ཡང་ཐེག་པའི་རྣམ་གཞག་དང་། མདོ་སྔགས་ཀྱི་ཁྱད་པར་མང་པོ་ཞིག་ཡོད་ན་ད་རེས་ཀྱི་སྐབས་འདིར་ཐེག་དམན་གྱི་ལམ་ལས་ཁྱད་པར་དུ་མས་འཕགས་པའི་ཐེག་ཆེན་གྱི་ཆོས། དེ་ལ་ཡང་རྒྱུ་ལམ་བྱེད་མདོ་ཕར་ཕྱིན་ཐེག་པ་དང་། འབྲས་བུ་ལམ་བྱེད་གསང་སྔགས་རྡོ་རྗེ་ཐེག་པ་གཉིས་ཡོད་པའི་ནང་གི་ཁྱད་ཆོས་ཁྱད་པར་ཅན་མང་པོས་འཕགས་པའི་གསང་སྔགས་ཀྱི་ཆོས་སོ། །དེ་ལ་སྔགས་རྒྱུད་སྡེ་བཞིའམ་དྲུག་གི་རྣམ་བཞག་ཡོད་པའིི་ནང་གི་ཐུན་མོང་ལྟར་དུ་བཤད་ན་རྣལ་འབྱོར་བླ་ན་མེད་པའམ་ཐུན་མིན་ལྟར་དུ་བཤད་ན་ནང་རྒྱུད་ཡོ་ག་རྣམ་གསུམ་གྱི་རྒྱུད་ལུང་མན་ངག་གི་དོན་བསྐྱེད་རྫོགས་དང་འབྲེལ་ནས་འཆད་པའི་སྐབས་ཡིན་ཞིང་། གསང་ཆེན་སྔ་འགྱུར་བའི་བསྟན་པ་ཆ་ཚང་བ་རང་རྐང་མ་ཉམས་པ་ཞིག་འཛིན་བསམ་ན་བཀའ་གཏེར་ཟུང་འཇུག་གི་ཆོས་ལ་ཉམས་ལེན་བྱས་ནས་རྒྱུད་སྡེ་དང་སྒྲུབ་སྡེའི་ཕྱག་བཞེས་ལ་ལྷད་མ་ཞུགས་པ་ཞིག་ཁ་རྩང་སྔོན་ནས་ཞུས་པ་བཞིན་རྒྱུད་ཀྱི་ཆིངས་ལྔ་ཡིས་བཅིངས། ལུང་གི་སྡེབ་ལྔ་དང་སྦྱར། སྒྲུབ་ཐབས་ཀྱི་སྦྱོར་བ་ལྔ་ཆ་ཚང་བ་ཞིག་གི་སྒོ་ནས་དེ་ལྟར་གཏན་ལ་འབེབས་སྐབས་བཀའ་མ་མདོ་སྒྱུ་སེམས་གསུམ་ལ་སྔ་འགྱུར་བཀའ་བབས་ཀྱི་ཆུ་བོ་བཞི་ཞེས་སྨིན་བྱེད་དབང་གི་ཆུ་བོ་སྐུར་ཐབས་ངོ་སྤྲོད་དང་བཅས་པ། གྲོལ་བྱེད་གདམས་པའི་ཆུ་བོ་དམར་ཁྲིད་གནད་བྱང་དང་བཅས་པ། དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པ་ཡིས་བཀའ་མས་ཁོག་ཕུབ་ནས་གཏེར་མ་མན་ངག་ཏུ་གཟུང་དགོས་སོ། །ཁྱད་པར་དུ་ཟབ་མོ་གཏེར་ཕྱོགས་ལ་བསམ་བློ་བཏང་ན། སྤྱིར་ན་སངས་རྒྱས་ཀྱི་ཞིང་ཁམས་གྲངས་མེད་པ་ན་མདོ་སྟོན་པའི་སྟོན་པ་རེ་དང་། སྔགས་འགྲོལ་བའི་སློབ་དཔོན་སྤྲུལ་བ་ཡང་སྤྲུལ་དང་བཅས་པ་རེ་འབྱུང་རྒྱུ་དེ་སྟོན་པ་སངས་རྒྱས་རང་ཉིད་ཀྱི་མདོ་སྡེ་མྱང་འདས་དང་། དབུས་འགྱུར་འཆང་ལུང་བསྟན་པའི་མདོ། བླ་མེད་དོན་རྫོགས་འདུས་པའི་རྒྱུད་ལ་སོགས་པ་མང་པོ་ཞིག་ནས་སྟོན་པ་སངས་རྒྱས་ཉིད་ཀྱིས་ལུང་བསྟན་ལ། ཁྱད་པར་དུ་སྟོན་པ་མྱ་ངན་ལས་འདའ་ཁར་ཁོང་ང་ལས་ལྷག་པའི་སྐྱེས་བུ་ཞིག མདངས་ལྡན་དྲི་མེད་ཀྱི་མཚོ་གླིང་ནས་འབྱུང་ཞེས་གསུངས་པ་ལྟར་དུ་ཨོ་རྒྱན་དྷ་ན་ཀོ་ཤ་ཡི་སིནྡྷུ་རྒྱ་མཚོ་རོལ་བའི་ཀླུ་རྒྱལ་འཇོག་པོའི་ཕོ་བྲང་གི་ཡང་སྟེང་ནས་པདྨའི་སྡོང་པོའི་ཟེའུ་འབྲུའི་རྩེ་ནས་སངས་རྒྱས་མྱ་ངན་ལས་འདས་ནས་ལོ་བརྒྱད་ཀྱི་མཚམས་ནས་ཨོ་རྒྱན་སངས་རྒྱས་གཉིས་པ་སྐུ་བརྫུས་ཏེ་འཁྲུངས་ཤིང་། སྐུ་གཅིག་མཚན་གྱི་རྣམ་གྲངས་བརྒྱད་དུ་བྱུང་བའི་གསང་སྔགས་ཀྱི་སློབ་དཔོན་ཆེན་པོ་པདྨ་འབྱུང་གནས་ཞེས་ཞིང་ཁམས་བྱེ་བ་ཕྲག་བརྒྱར་སྣང་བ་དེ་ལྟ་བུ་ཞིག་ཡིན་ནོ། །གུ་རུ་རིན་པོ་ཆེ་ཁོང་ཉིད་ཀྱིས་ཀྱང་། རང་བྱུང་པདྨ་ཞེས་བྱར་གྲགས་པ་ང་། །སངས་རྒྱས་སྣང་བ་མཐའ་ཡས་ཐུགས་ལས་རྡོལ། །ཐུགས་རྗེ་སྤྱན་རས་གཟིགས་དབང་གསུང་ལས་སྤྲུལ། །མཁའ་འགྲོ་ཡོངས་ཀྱི་མིང་པོ་དཔའ་བོའི་རྒྱལ། །མཉམ་མེད་ཀུན་བཟང་རྡོ་རྗེ་འཆང་ཆེན་པོ། །སྤྲུལ་པའི་སྐུར་སྣང་ཐུགས་རྗེ་ཆེན་པོར་ལྡན། །ཞེས་ཞལ་བཞེས་གནང་བ་ཡིན་ནོ། །དེ་ལྟ་བུའི་སློབ་དཔོན་ཆེན་པོ་དེ་ཉིད་ཀྱི་ཐུགས་ཟབ་གསང་དགོངས་པའི་ཀློང་ལས་རྒྱུད་སྡེ་སྤྱི་དང་། ཁྱད་པར་དུ་ནང་རྒྱུད་ཡོ་ག་རྣམ་གསུམ་གྱི་སྤྱི་འདྲིལ་སྒྲུབ་ཐབས་མན་ངག་གི་རིམ་པ་ཟད་མི་ཤེས་པ་ཞིག་མ་འོངས་གདུལ་བྱ་ཕྱི་རབས་པའི་དོན་དུ་དགོངས་ནས་ཟབ་མོ་གཏེར་དུ་སྦ་བར་མཛད་པ་ཡིན་ལ། ང་ཡིས་བོད་ཁམས་གཏེར་གྱིས་བཀང་ནས་ཡོད། །དངོས་གྲུབ་འདོད་ན་གཏེར་གནས་ཀུན་ནས་ལོངས། །ཞེས་གསུངས་པ་ལྟར་རོ། །འདིའི་དགོས་པ་ནི་སྔར་ནས་དར་བའི་བཀའ་མ་ཐམས་ཅད་ཚོང་འདུས་ཀྱི་འོ་མ་ཇི་བཞིན་དུ་བྱིན་རླབས་འཆལ་ཞིང་ནུབ་ལ་ཉེ་བའི་སྐབས་སུ་གཏེར་དུ་བཞུགས་པའི་བཀའ་ཐམས་ཅད་ལ་སེལ་མ་ཞུགས་པའི་སྟབས་ཀྱིས་བསྒྲུབས་ན་འགྲུབ་ཐག་ཉེ་རྒྱུ་དང་། བྱིན་རླབས་དང་དངོས་གྲུབ་ཐོབ་སླ་བ། གྲུབ་པ་མྱུར་དུ་ཐོབ་པ་ཡིན་པས་གཏེར་ཆོས་འདི་ལ་ཆེད་དུ་བཀའ་གཙིགས་སུ་གནང་བ་དེ་ལྟར་ཡིན་ནོ། །དེ་ལྟ་བུའི་གཏེར་ཆོས་ཚད་མ་ཐམས་ཅད་ལ་སྔ་འགྱུར་བརྒྱུད་པ་དྲུག་ལྡན་ཏེ། དགོངས་པ་བརྡ་དང་སྙན་བརྒྱུད་ཀྱི་བརྒྱུད་པ་གསུམ་གྱི་ཐོག་ཏུ་སྨོན་ལམ་དབང་བསྐུར་གྱི་བརྒྱུད་པ། གཏད་རྒྱ་ལུང་བསྟན་གྱི་བརྒྱུད་པ། ཤོག་སེར་ཚིག་གི་བརྒྱུད་པ་དང་གསུམ་ཚང་བ་ཡིན་ཞིང་། སྨོན་ལམ་དབང་བསྐུར་གྱི་བརྒྱུད་པ་ནི་གཏེར་ཁ་དེ་ཉིད་འདོན་པ་པོའི་གང་ཟག་དེའི་ལག་ཏུ་འཕྲད་པར་ཤོག འཕྲད་ནས་འགྲོ་དོན་དཔག་མེད་འབྱུང་བར་ཤོག་ཅེས་གཏད་རྒྱ་ལུང་བསྟན་མཛད་པ་ཡིན་ཞིང་། སྨོན་ལམ་གྱི་དབང་གིས་འདོན་པ་པོའི་གང་ཟག་གི་ལག་ཏུ་འཕྲོད་པར་ཤོག་ཅེས་སྨོན་ལམ་གཏད་རྒྱ་མཛད་དར་བ་དེ་ཉིད་ཡིན་ནོ། །གཏད་རྒྱ་ལུང་བསྟན་གྱི་བརྒྱུད་པ་ནི་གཏེར་སྟོན་དེ་དང་དེ་ལ་མཚོན་བྱ་དོན་གྱི་ཡེ་ཤེས་ཀྱིས་རྒྱས་བཏབ་ནས་དགོངས་པའི་མཐིལ་གཏད། མ་འོངས་འབྱུང་འགྱུར་གྱི་དུས་རྟགས་འདོན་དུས་གཏེར་གནས་དང་བཅས་པའི་ལུང་བསྟན་དབུགས་འབྱིན་གནང་བ་དེ་ཡིན་ལ། དེའི་སྟེང་དུ་ཤོག་སེར་ཚིག་གི་བརྒྱུད་པ་ནི་མཚོན་བྱེད་བརྡ་ཡི་ཡི་གེ་དེ་ཚིག་བརྒྱུད་ལ་བཀོད་ནས་གཏེར་གནས་ལ་སྦས་པ་དེ་གཏེར་གནས་སོ་སོ་ནས་ཚུར་བཞེས་པ་ལྟ་བུ་སྟེ། གཏེར་གནས་ལ་མཚོན་ན་རྡོ་རྗེའི་བྲག་གི་གཏམས། གཡང་ཞག་འཁྱིལ་བའི་མཚོ། མི་འགྱུར་རིན་ཆེན་གྱི་སྒྲོམ་ལ་སོགས་པའི་གཏེར་གནས་དང་གཏེར་སྣོད། གཏེར་གྱི་གཉེར་བྱང་དང་བཅས་པ་གཏེར་བདག་སོ་སོ་ལ་གཏད་ནས་དེ་ཡང་མི་སྣང་བའི་རྒྱ་རིམ་པ་མང་པོས་བཏབ་ཡོད་དོ། དེ་ལྟ་བུའི་བརྒྱུད་པ་དྲུག་ལྡན་ནམ་དེའི་ཐོག་ཏུ་བཀའ་བབ་ཆུ་བོ་བཞི་དང་འབྲེལ་བའི་ཐད་ཀྱི་ཉམས་ལེན་བྱིན་རླབས་ཀྱི་བརྒྱུད་པ། སྙན་བརྒྱུད་དམར་ཁྲིད་ཀྱི་བརྒྱུད་པ། ཕྲིན་ལས་ཕྱག་བཞེས་ཀྱི་བརྒྱུད་པ་གསུམ་པོ་བསྣན་ནས་སྔ་འགྱུར་བརྒྱུད་པ་དགུ་ལྡན་གྱི་བདག་ཉིད་གཏེར་རིགས་དེ་དག་སྨོན་ལམ་གྱི་མཐུ་སྨིན། ལས་ཀྱི་འཕྲོ་སད་སྐབས་ཟབ་གཏེར་གྱི་སྒྲོམ་བུ་གང་དང་གང་ཡིན་པ་དེ་ཉིད་གཏེར་སྟོན་སོ་སོའི་ཕྱག་ཏུ་ཐོན་ཡོང་བ་དེ་ལྟ་བུ་ཡིན་ནོ། །དེ་ལ་ནང་གསེས་ཀྱི་གཏེར་ཆེན་དང་། གཏེར་ཕྲན་ཞེས་དཔེར་ན་བླ་རྫོགས་ཐུགས་གསུམ་པོ་ཡོངས་རྫོགས་ཀྱི་གཏེར་ཆོས་ཅན་ཞིག་ཡིན་ན་གཏེར་ཆེན་དུ་བརྩི་ལ། དེ་མིན་ན་གཏེར་ཕྲན་དུ་བརྩི་རྒྱུ་སོགས་དབྱེ་བ་མང་ཞིང་། ཡིན་ན་ཡང་གཏེར་ཆེན་དང་གཏེར་ཕྲན་ལ་བྱིན་རླབས་ཀྱི་ཚན་ཁ་ལ་ཁྱད་པར་མེད་ཅེས་གསུངས་ཡོད་དོ། །མདོར་ན་ཡོ་ག་རྣམ་པ་གསུམ་གྱི་རྒྱུད་སྡེ་ཐམས་ཅད་ཀྱི་རྒྱུད་ལུང་མན་ངག་བཀའ་བབས་དང་བཅས་པའི་ངེས་པའི་གནད་ཟབ་མོ་ཚང་མ་ཟབ་གཏེར་གྱི་ཆོས་བཀའ་འདི་ལ་ཚང་ཞིང་། གཏེར་ཁ་དེ་ལ་དབྱེ་ན་ཤར་གཏེར། ལྷོ་གཏེར། ནུབ་གཏེར། བྱང་གཏེར། དབུས་གཏེར་དང་ལྔ། དེ་ལ་ཡང་ཕྱི་ནང་གསང་བ་ཡང་གསང་ལ་སོགས་ཕྱེས་ན་གཏེར་གྱི་རྣམ་གྲངས་ཅོ་བརྒྱད་ལ་སོགས་པ་ཇི་སྙེད་ཅིག་ཇི་སྲིད་སངས་རྒྱས་ཀྱི་བསྟན་པ་མ་རྫོགས་ཀྱི་བར་དུ་ཟབ་མོའི་གཏེར་གྱི་འགྲོ་དོན་མི་རྫོགས་པ་དེ་ལྟར་ཡིན་ལ། སློབ་དཔོན་རིན་པོ་ཆེས། ཇི་སྲིད་སངས་རྒྱས་བསྟན་པ་མ་རྫོགས་པར། །དེ་སྲིད་གཏེར་གྱིས་འགྲོ་བ་དཔག་མེད་འདྲེན། །དེ་ཕྱིར་གཏེར་ལ་དད་དང་གུས་པར་གྱིས། །ཞེས་གསུངས་སོ། །དེ་ལྟ་བུའི་གཏེར་ཆོས་ཇི་སྙེད་ཅིག་བཞུགས་པ་ལས་གཏེར་སྟོན་ཀརྨ་གླིང་པའི་ཟབ་གཏེར་ལས་བྱོན་པའི་གསང་སྔགས་ནང་རྒྱུད་སྡེ་གསུམ་གྱི་སྙིང་པོའི་ཡང་ཞུན་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྐྱེད་རྫོགས་གཙོ་བོར་བྱས་པའི་བསྙེན་སྒྲུབ་ཡན་ལག་བཞིའི་ཆོ་ག་ལས་འགྲིག་གི་སྐོར་ལས་བྱང་ཚོར་བ་རང་གྲོལ་རྩར་ཕྲེང་དང་སྒོ་བསྟུན་ནས་ལས་བྱང་ཆུང་བ་ཚོར་བ་རང་གྲོལ་སྙིང་པོ་འབྲུ་གནན་ནས་དོན་འགྲེལ་ཚུལ་དུ་ཞུ་བཞིན་པའི་སྐབས་ལས། ཁ་རྩང་ཉིན་དང་པོ་ལ་མཆོད་པ་བྱིན་རླབས་ཡན་ཆད་སྔོན་འགྲོའི་ཆོས་ཐམས་ཅད་སོང་ནས་དེ་རིང་དངོས་གཞི་ལ་ཐུག་ཅིང་། སྤྱིར་བཏང་གི་ནང་སྒྲུབ་ཐབས་གསལ་བར་བྱེད་པའི་མན་ངག་ལ་ཞི་ཁྲོའི་སྒྲུབ་ཐབས་ལ་སྒྲུབ་ལུགས་རྣམ་པ་ལྔ་ཡིས་གསུངས་པ་ཞིག་ཡིན་ལ། ལྔ་བོ་གང་ཡིན་ཞེ་ན། དམ་པ་རིགས་བརྒྱར་སྒྲུབ་པ་ཞིག་དང་། ཞི་བ་བཞི་བཅུ་རྩ་གཉིས་སུ་སྒྲུབ་པ་ཞིག་དང་། དེ་ཁོ་ན་ཉིད་རིགས་ལྔར་སྒྲུབ་ཆོག་པ་ཞིག་དང་། གསང་ཆེན་རིགས་གཅིག་ཏུ་སྒྲུབ་པ་དང་། ཞི་བ་ཕྱག་རྒྱ་རྐྱང་པའི་སྒྲུབ་ཐབས་དང་དེ་ལྟར་ལྔ་ཡོད་པའི་ནང་གི་འདི་དང་པོ་ལྟར་དུ་དམ་པ་རིགས་བརྒྱར་སྒྲུབ་པའི་སྒྲུབ་ལུགས་དེ་ཡིན་ནོ། །དེ་ལ་ཞིབ་ཏུ་ཕྱེས་ན་ལས་ཆེན་ལྔ། ལས་ཆུང་ལྔ་ཡིས་བཅུ་ཡི་དབྱེ་བ་ཡོད་པ་ཞིག་ཡིན་ལ། གཟུང་བ་དཀྱིལ་འཁོར་གྱི་ཆོ་ག རིམ་པ་དབང་གི་ཆོ་ག བྱིན་རླབས་རབ་གནས་ཀྱི་ཆོ་ག་ལ་སོགས་པ་ལས་ཆེན་ལྔ། མཉེས་པ་མཆོད་པའི་ཆོ་ག མཆོད་འབྲིམ་གཏོར་མའི་ཆོ་ག མཆོད་སྦྱིན་ཆུ་གཏོར་གྱི་ཆོ་ག་ལ་སོགས་པ་ལས་ཆུང་ལྔ་ཡིས་ཆོས་ཚན་བཅུ་རུ་ཕྱེས་པ་ཡིན་ནོ།། ༢ དངོས་ཀྱི་དོན་བཤད་པ། དེ་ཐམས་ཅད་ཀྱི་རྩ་བ་སྒྲུབ་ཁོག་གི་སྟོད་ལས་ཀྱི། གཉིས་པ་དངོས་གཞི་ལེའུ་བསྟན༔ ལྷ་བསྐྱེད་སྤྱན་འདྲེན་བཞུགས་གསོལ་ཅིང་༔ ཕྱག་མཆོད་བསྟོད་བཤགས་བདུན་གྱིས་བསྟན༔ཞེས་ཆིངས་སམ་མདོར་བསྟན་གྱི་སྡོམ་ས་བཅད་རྣམ་པ་བདུན་གྱིས་བསྟན་ཏོ། །དེའི་ནང་གསེས་རེ་རེ་བཞིན་དུ་བཀྲལ་ཏེ་དབྱེ་བའི་དང་པོ་བསྐྱེད་པའི་རིམ་པ་ནི༔ཞེས་མཚམས་སྦྱར་ཏེ་དཀྱིལ་ཆོག་དངོས་གསུངས་པ་ཡིན་ལ། འདི་ཞི་ཁྲོའི་སྒོམ་ཁོག་ཡིན་ནོ།། ༼ཀ༽ དང་པོ་ལྷ་ཚོགས་བསྐྱེད་པའི་རིམ་པ། ༼ཀ ཤུགས་བསྟན་བསྒྲུབ་བྱ་དོན་གྱི་ལྷ་ངོས་གཟུང་བ། འདི་བཤད་པ་ལ་ཤུགས་བསྟན་བསྒྲུབ་བྱ་དོན་གྱི་ལྷ་ངོས་གཟུང་བ་དང་། དངོས་བསྟན་སྒྲུབ་བྱེད་ཆོ་གའི་རྣམ་བཞག་བཀྲོལ་ཏེ་བཤད་པ་ཞིག་སྟེ་གཉིས་ཀྱི་ཐོག་ནས་བཤད་དགོས་སོ། །ཤུགས་བསྟན་གྱི་ལྷ་ཇི་ལྟ་བུའི་སྒོ་ནས་ངོས་གཟུང་དགོས་ཞེ་ན། དེ་ངོས་འཛིན་པར་བྱེད་པ་ལ་ལུང་དང་། རིགས་པ། མན་ངག་གསུམ་ལ་བརྟེན་ནས་བསྒྲུབ་བྱའི་ལྷར་ངེས་པ་རྙེད་དགོས་ལ། འདི་ཐུན་མོང་དང་ཐུན་མིན་གཉིས་ཀྱི་སྒོ་ནས་བཤད་ན་ཐུན་མོང་བའི་བཤད་ཚུལ་ལྟར་ན་མགོན་པོ་བྱམས་པས། རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང་། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟར་དུ་འགྲོ་བ་ཐམས་ཅད་ཀྱིི་རྒྱུད་ན་བཞུགས་པའི་ཆོས་ཉིད་དེ་བཞིན་ཉིད། འོད་གསལ་བྱང་ཆུབ་ཀྱི་སེམས། འཆིང་འགྲོལ་ཐམས་ཅད་དང་བྲལ་བའི་གནས་ལུགས་རྣམ་པར་དག་ཅིང་ལྷུན་གྱིས་གྲུབ་པའི་བདག་ཉིད་དེ། རྒྱུད་མུ་ཏིག་ཕྲེང་བ་ལས། གནས་ལུགས་རྣམ་པ་མང་བཤད་ཀྱང་། །ཡེ་ཤེས་རྣམ་པ་གསུམ་ཡིན་ཏེ། །ཞེས་གསུངས་པ་ལྟར་དུ་ངོ་བོ་སྟོང་པ། རང་བཞིན་གསལ་བ། ཐུགས་རྗེ་འགག་མེད་སྐུ་གསུམ་རང་ཆས་སུ་རིག་པའི་ངང་དུ་བཞུགས་པ་དེ་བདག་དམ་ཚིག་སེམས་དཔའ་དང་། སངས་རྒྱས་ཐམས་ཅད་ཀྱི་ཆོས་སྐུ་དག་པ་གཉིས་ལྡན་གྱི་ཡེ་ཤེས་དབྱིངས་དང་ཡེ་ཤེས་གཉིས་སུ་མེད་པ་བརྟན་གཡོ་སྣོད་བཅུད་ཐམས་ཅད་ལ་ཁྱབ་པའི་ཡེ་ཤེས་མཁའ་ཁྱབ་མཁའ་དང་མཉམ་པའི་ཡེ་ཤེས་དེ་ཡེ་ཤེས་སེམས་དཔའ་སྟེ་དམ་ཚིག་སེམས་དཔའ་དང་ཡེ་ཤེས་སེམས་དཔའ་དེ་གཉིས་ཀ་གདོད་ནས་དབྱེར་མེད་དུ་བཞུགས་པའི་གཞི་འབྲས་དབྱེར་མེད་ཀྱི་བདག་ཉིད་དམ་ཡེ་གཉིས་མེད་དུ་གྱུར་པ་དེ་བསྒྲུབ་བྱའི་ལྷ་ཞེས་བྱའོ། །སྒྲུབ་གཞི་ངོས་གཟུང་བའི་སྐབས་འདིར་མིང་གི་སྒོ་ནས་ལྷ་ཞེས་བཏགས་པ་ཡིན་ལ། འདི་བཤད་པའི་སྐབས་འདིར་སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་དང་བཞི་བོ་དེ་དཔེ་དང་བཅས་པ་བཤད་དགོས་ཤིང་། སྒྲུབ་གཞི་མེད་པའི་སྒྲུབ་བྱེད་དེ་ངལ་བའི་གཞི་དོན་མེད་ཀྱི་རྒྱུ་ཡིན་ནོ། །དེས་ན་བཅོས་མའི་འཁྲུལ་སྣང་ལྷ་ཡིན་སྣང་ཤར་ནས་བསྒོམ་རྒྱུ་དེ་བསྐྱེད་རིམ་ཡང་དག་གི་གནད་མ་ཟིན་པ་ཡིན་ལ། སྦྱང་གཞིའམ་སྒྲུབ་གཞི་ཞེས་པ་དེ་གོང་ནས་བཤད་པའི་ཆོས་ཉིད་དེ་བཞིན་ཉིད་སྐུ་གསུམ་རང་ཆས་ཀྱི་བདག་ཉིད་ཡེ་ནས་དྲི་མས་གོས་མ་མྱོང་བ་དཔེར་ན་ནོར་བུ་རིན་པོ་ཆེ་ལྟ་བུ་དེ་ཡིན་ནོ། །སྦྱང་བྱ་ནི་མགོན་པོ་བྱམས་པས་རྒྱུད་བླ་མ་ལས། ཉོན་མོངས་ཤེས་བྱ་སྙོམས་འཇུག་གི། །སྒྲིབ་གསུམ་ལས་ནི་ངེས་གྲོལ་ཏེ། །ཞེས་གསུངས་པ་དང་། །རྒྱུད་མུ་ཏིག་ཕྲེང་བ་ལས་ཀྱང་། ཆ་མེད་རྡུལ་དང་བཅས་པའི་ཕྱིར། །འོད་གསལ་ཉིད་ཀྱང་བག་ལ་ཞ། །ཞེས་གསུངས་པ་ལྟར་དུ་གཞིའི་བཞུགས་ཚུལ་དེ་མ་རྟོགས་ནས་འཁྲུལ་སོང་བའི་སྒྲིབ་བྱེད་མེད་སྣང་གློ་བུར་བའི་འཁྲུལ་སྣང་ཕྲ་རགས་དཔེར་བཞག་ན་འདམ་རྫབ་ལྟ་བུ་དེ་ཡིན་ནོ། །འོ་ན་སྦྱོང་བྱེད་གང་ཡིན་ཞེ་ན། རྩ་རྒྱུད་ལས། །འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པ་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པ་སྦྱོར་བས་ཐོབ། །ཅེས་འཁྲུལ་བ་ཀུན་བཏགས་ཀྱི་ཆ་ཐམས་ཅད་བསྐྱེད་རིམ་གྱིས་སྦྱོང་། ས་བོན་ལྷན་སྐྱེས་ཀྱི་ཆ་ཐམས་ཅད་རྫོགས་རིམ་གྱིས་སྦྱོང་ལ། དེ་ཚིག་གི་སྣ་ཚུར་བསྟུངས་ནས་བཤད་ན་རིམ་གཉིས་ཀྱིས་བསྡུས་པའི་ཐབས་ཤེས་བྱེད་རྩོལ་གྱིས་སྦྱོང་བ་ཡིན་ཞིང་། དཔེར་བཞག་ན་འདམ་རྫབ་ཀྱིས་གོས་པའི་ནོར་བུའིི་སྟེང་ནས་འདམ་རྫབ་སྦྱོང་བའི་བྱེད་རྩོལ་དང་འདྲ་བ་ཡིན་ནོ། །སྦྱངས་འབྲས་ནི་སྦྱང་བྱའི་དྲི་མ་གློ་བུར་བ་སྦྱངས་པས་ཇི་ལྟ་བུའི་ཡོན་ཏན་མངོན་སུམ་དུ་བརྙེས་ནས་ཡེ་ཤེས་ཐུགས་རྗེ་ཕྲིན་ལས་དང་བཅས་པ་རྒྱུན་མི་ཆད་ནས་འགྲོ་དོན་ལྷུན་གྲུབ་ཏུ་འབྱུང་བ་དེ་སྦྱངས་འབྲས་ཡིན་ལ། དཔེ་བཞག་ན་ནོར་བུའི་སྟེང་གི་འདམ་རྫབ་སྦྱངས་ནས་ནོར་བུའི་ཡོན་ཏན་མངོན་དུ་གྱུར་པ་ལྟ་བུ་ཡིན་ནོ། །དེ་ཐུན་མོང་ལྟར་དུ་གློ་བུར་དྲི་བཅས་ཀྱི་ཁམས་དེ་སྦྱང་གཞི་དང་། དེའི་སྦྱང་བྱ་སྦྱོང་བྱེད་སྦྱངས་འབྲས་དང་བཅས་པ་བཤད་པ་ཡིན་ལ། ཐུན་མིན་ལྟར་དུ་བྱས་ན་ཕྱི་ནང་གསང་བ་གསུམ་གྱི་སྟེང་ནས་བཤད་དགོས་པས་ཕྱི་ལྟར་ན་ལུས་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་འཁོར་འདས་ཀྱི་ཆོས་ཐམས་ཅད་ཡེ་ནས་སངས་རྒྱས་སུ་ལྷུན་གྱིས་གྲུབ་པ་ཞིག་ཡིན་ཞིང་། ཕུང་ལྔ་རྒྱལ་བ་རིགས་ལྔ། འབྱུང་ལྔ་དབྱིངས་ཀྱི་ཡུམ་ལྔར་རྟོགས་དུས། ཉོན་མོངས་ལྔ་ཡེ་ཤེས་ལྔ་དང་། ཡུལ་ལྔ་འོད་ལྔར་སྣང་བ་དེ་ལྟར་ཡིན་པ་དང་། དེ་དུས་སྲིད་གསུམ་སངས་རྒྱས་ཀྱི་ཞིང་ཁམས་ཡིན་ལ། རང་ལུས་ལྷ་ཡི་དཀྱིལ་འཁོར་ཡིན་ནོ། །འདི་ནང་ལྟར་ན་སྙིང་ཁར་ཞི་བའི་ལྷ་ཚོགས། དེའི་རང་གདངས་ཁྲོ་བོའི་ལྷ་ཚོགས། རང་ལུས་ཞི་ཁྲོའི་ལྷ་ཚོགས། རྩ་ཐམས་ཅད་དཔའ་བོའི་རང་བཞིན། རླུང་དག་པ་དཔའ་མོའི་རང་བཞིན། ཐིག་ལེ་དག་པ་བྱང་ཆུབ་སེམས་ཀྱི་ངོ་བོར་བཞུགས་པ་ཡིན་ནོ། །འདི་གསང་བ་ལྟར་ན་དེ་དག་ཐམས་ཅད་ཀྱང་ཆོས་དབྱིངས་མཐའ་དབུས་དང་བྲལ་བ་སྟོང་གསལ་རང་བྱུང་གི་ཡེ་ཤེས་རིག་པ་གཅིག་གི་ཆོ་འཕྲུལ་དུ་ས་ར་ཧས་གསུངས་པ་ལྟར་ཏེ། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་དངོས་གྲུབ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་སོ། །འོན་ཀྱང་ལམ་སྒྲུབ་དགོས་པའི་རྒྱུ་མཚན་ནི་དཔེར་ན་གསེར་རྡོ་དངུལ་རྡོ་ཐམས་ཅད་བཞུ་ཁམས་ཀྱི་རིན་པོ་ཆེའི་ཁམས་སུ་གྲུབ་པ་ཡིན་ཡང་བཞུ་བཏུལ་མ་བྱས་ཀྱི་བར་དུ་གསེར་དངུལ་མངོན་དུ་མི་འགྱུར་བ་བཞིན་དུ་སྣོད་བཅུད་ཡེ་ནས་ཡེ་ཤེས་ཀྱི་ལྷར་གྲུབ་པ་དེ་སྣང་སྲིད་གཞིར་བཞུགས་ཀྱི་དཀྱིལ་འཁོར་ཡིན་ན་ཡང་མུན་ཁང་གི་ནང་དུ་སྒྲོན་མེ་བཏེག་ན་ཁང་བའི་ནང་གི་དངོས་པོ་ཇི་མ་ཇི་བཞིན་རིག་ནས་ལྷོང་ལ་གསལ་མོར་བྱས་ནས་བུད་པ་བཞིན་དུ་ལམ་བསྒྲུབས་ནས་སྒྲིབ་པ་སྦྱངས་ན་སྣང་སྲིད་གཞིར་བཞུགས་ཀྱི་རང་བཞིན་དེ་སྣང་སྲིད་གཞིར་བཞེངས་ཀྱི་དཀྱིལ་འཁོར་དུ་མངོན་དུ་གྱུར་པ་ཡིན་ནོ། །དེའི་སྐབས་སུ་འཁོར་བའི་ཀུན་རྟོག་ཡེ་ཤེས་སུ་གྲོལ་བ་དཔེར་བཞག་ན་འཁྱག་རོམ་བཞུས་ནས་ཆུར་གྱུར་པ་ལྟར་དུ་ཡིན་ལ། འཁྱག་ཡེ་ནས་ཆུའི་རང་བཞིན་མ་ཡིན་ན་བཞུས་ཀྱང་ཆུར་འགྱུར་དོན་མེད་ཅིང་། ཡེ་ནས་སངས་རྒྱས་པའི་རང་བཞིན་མིན་ན་འབད་ཀྱང་ངལ་བ་དོན་མེད་ཡིན་ནོ། །དེས་ན་སྦྱང་གཞི་སྦྱོང་བྱེད་ཐ་དད་དུ་གྱུར་ནས་མ་ཡིན་པ་ཞིག་ཡིན་པར་བསྒྱུར་བ་དཔེར་ན་ལྕགས་གསེར་དུ་བསྒྱུར་བ་ལྟར་དུ་འདོད་པ་མ་ཡིན་ཞིང་། གཞི་འབྲས་དབྱེར་མེད་ཡེ་གྲོལ་གྱི་ཡེ་ཤེས་ལ་གསར་དུ་འབད་པས་བསྒྲུབ་མི་དགོས་སོ།། ༼ཁ དངོས་བསྟན་སྒྲུབ་བྱེད་ཆོ་གའི་རྣམ་གཞག་བཀྲོལ་ཏེ་བཤད་པ། དེ་ཡན་ཆད་ཀྱིས་འདིའི་སྐབས་ཀྱི་ཤུགས་བསྟན་བསྒྲུབ་བྱ་དོན་གྱི་ལྷ་ཡི་ངེས་པ་བཤད་ནས་གཉིས་པ་སྒྲུབ་བྱེད་ཆོ་གའི་རྣམ་བཞག་འགྲོལ་ཏེ་བཤད་དགོས་ལ། སྐབས་འདི་ནས་ཡོ་ག་རྣམ་པ་གསུམ་གྱི་དགོངས་པ་གཅིག་ཏུ་དྲིལ་ནས་བརྡ་དོན་རྟགས་གསུམ་གྱི་རྣམ་པས་བསྐྱེད་རིམ་གསལ་གདབ་རྒྱུ་དེ་ཆོས་བཀའ་འདི་དང་གཏེར་ཁ་འདིའི་དགོངས་བཅུད་ཀྱི་སྙིང་པོ་ཡིན་ནོ། །དེ་ཇི་ལྟར་ཡིན་ན། བསྐྱེད་པ་མ་ཧཱ་ཡོ་ག་ལྟར་དུ་སྦྱང་གཞི་སྦྱོང་བྱེད་དཀྱིལ་འཁོར་སྒྲུབ་རྫས་དང་བཅས་པ་ཕྱི་དཀྱིལ་རྟགས་ཀྱིས་ངོ་སྤྲད་དགོས་ཤིང་། རྫོགས་པ་ཨ་ནུ་ཡོ་ག་ལྟར་དཀྱིལ་འཁོར་རྣམ་གསུམ་རང་ལུས་ལ་རྫོགས་པའི་ནང་དཀྱིལ་རྩ་རླུང་བརྡ་ཡི་ཉམས་ལེན་ལ་གནད་དུ་བསྣུན་དགོས་ལ། རྫོགས་ཆེན་ཨ་ཏི་ཡོ་ག་ལྟར་ན་མ་བྱས་ཡེ་གྲུབ་ཀྱི་དོན་དཀྱིལ་སེམས་སུ་རྫོགས་པ་སྙིང་པོའི་དོན་ཁྲིད་དེ་ནང་རྒྱུད་ཡོ་ག་གསུམ་གྱི་ཉམས་ལེན་གྱི་གནད་ཐམས་ཅད་དེ་ལྟར་དུ་འདུ་བ་ཡིན་ནོ། །འདི་སེམས་དང་ཡེ་ཤེས་ཐམས་ཅད་རང་སྣང་དུ་བསྟན་པའི་མན་ངག་གི་སྙིང་པོ་ཡིན་ཞིང་། རྒྱུད་གསང་འདུས་ལས་ཀྱང་། བསྐྱེད་དང་རྫོགས་དང་རྫོགས་པ་ཆེ། །གཅིག་ལ་གཅིག་བརྟེན་གཅིག་གི་ངང་། །ཞེས་གསུངས་སོ།། ཀ༽ རྒྱུ་ཏིང་འཛིན་རྣམ་གསུམ་གྱིས་ཁོག་ཕུབ་པ། དེས་ན་དང་པོ་རྒྱུ་ཏིང་འཛིན་རྣམ་གསུམ་གྱིས་ཁོག་ཕུབ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་དགོས་པ་ཡིན་པས་ལས་བྱང་གཏེར་བྱང་གི་ཚིག་དངོས་བསྟན་ནི། ཧཱུྃ༔ རྟོག་བྲལ་སྒོམ་མེད་དེ་བཞིན་ཉིད༔ ཀུན་ཁྱབ་རང་གསལ་ཀུན་ཏུ་སྣང་༔ འགག་མེད་རྒྱུ་ཡི་ཨཱཿམཐིང་གསལ༔ སྟོང་གསལ་རང་བབ་གདོས་བཅས་བྲལ༔ ཨཿལས་ཨེ་ཡྃ་བྃ་ལྃ་འཕྲོས༔ ནམ་མཁའ་རླུང་ཆུ་ས་གཞི་བརྡལ༔ ཞེས་གསུངས་ཏེ། ཐོག་མར་བྱུང་བའི་ཧཱུྃ་ཡིག་འདི་ནི་རྒྱལ་བ་ཀུན་གྱི་གསང་གསུམ་གཅིག་ཏུ་འདུས་པའི་ངོ་བོ་ཐུགས་ཡེ་ཤེས་ཆེན་པོ་སྒྱུ་འཕྲུལ་ལྷ་ཚོགས་ཀྱི་འཕྲོ་གཞིར་ཤར་བའི་རྡོ་རྗེ་གསང་བ་ཆེན་པོའི་ཡི་གེ་ཡིན་ཞིང་དེའི་ཡི་གེ་དེ་ཉིད་ཀྱིས་སྣ་དྲངས་ནས། ཚིག་རྐང་དང་པོ་རྟོག་བྲལ་སྒོམ་མེད་དེ་བཞིན་ཉིད༔ཅེས་པ་འདིས་ཏིང་འཛིན་རྣམ་གསུམ་གྱི་ནང་གི་དེ་བཞིན་ཉིད་ཀྱི་ཏིང་ངེ་འཛིན་བསྟན་ཏོ། །ཏིང་འཛིན་རྣམ་གསུམ་གྱི་བསྐྱེད་རིམ་འདིའི་སྤྱི་ཁྱབ་ཀྱི་གོ་བ་སྦྱང་བྱ་བརྟེན་པ་ལུས་ཅན་གྱི་སྐྱེ་བ། འཆི་བ། བར་དོ་གསུམ་དེ། རྟེན་སྣོད་ཀྱི་འཇིག་རྟེན་གྱི་ཆགས། འཇིག སྟོང་གསུམ་གྱི། སྦྱོང་བྱེད་སྟོང་ཉིད་དང་། སྙིང་རྗེ། ཟུང་འཇུག་གསུམ་གྱི་ཡེ་ཤེས་གསུམ་གྱིས་སྦྱངས་འབྲས་སངས་རྒྱས་སྐུ་གསུམ་གྱི་རྣམ་པ་མངོན་དུ་བྱེད་པའི་ལམ་དང་། དགོས་པ་སོ་སོ་དང་ལྡན་པ་དེ་ལྟ་བུ་ཞིག་ཡིན་ནོ། །དེའི་ནང་གི་དེ་བཞིན་ཉིད་ཀྱི་ཏིང་ངེ་འཛིན་དེའི་དོན་ནི་རང་བཞིན་རྣམ་པར་དག་པ་སྟོང་པ་ཉིིད་གདོད་མའི་སྟོང་ཆེན་གྱི་དོན་དྲན་པ་ལ་ཟེར་ལ། གཅེར་མཐོང་རང་གྲོལ་ལས། འདས་པའི་རྟོག་པ་རྗེས་མེད་ཡལ་བའི་རྟིང་། །མ་འོངས་རྟོག་པ་མ་སྐྱེས་སོ་མ་ལ། །ད་ལྟ་རང་ལུགས་བཟོ་མེད་གནས་པའི་དུས། །ཐ་མལ་རང་གའི་དུས་ཀྱི་ཤེས་པ་ལ། །ཞེས་གསུངས་པ་ལྟར་དུ་འདས་མ་འོངས་ད་ལྟ་དུས་གསུམ་གྱི་རྟོག་པ་དང་བྲལ་བའི་ཐད་ཀའི་ཤེས་པ་བཟོ་བཅོས་དང་བྲལ་བའི་སེམས་ཀྱི་ཆོས་ཉིད་སྟོང་ཉིིད་དམིགས་མེད་འཛིན་བྲལ་ལ་གློ་བུར་བག་ཆགས་ཀྱི་མཚན་འཛིན་ཆོས་ཅན་གྱི་ལྷད་པ་ཐམས་ཅད་གཤིས་ལ་ཞུགས་མ་མྱོང་བའི་མཐའ་བརྒྱད་སྤྲོས་པ་དང་བྲལ་བའི་རིག་པའི་ཡེ་ཤེས་གཞི་ཆོས་སྐུ་དེ་བཞིན་ཉིད་ཀྱི་ངང་ལ་བཟོ་མེད་དུ་མཉམ་པར་བཞག་དུས་དག་མཉམ་ནམ་མཁའ་ལྟ་བུའི་ངང་ལ་རང་བཞིན་གྱིས་གནས་པ་དེ་ཉིད་ཡིན་ནོ། །འདིའི་སྐབས་སུ་ཆོས་ཅན་ལ་ཆོས་ཉིད་ཀྱིས་རྒྱས་བཏབ་ན་གོལ་ས་ཡིན་ཞིང་། འདིའི་སྦྱང་བྱ་སྐྱེ་འགྲོ་ཐམས་ཅད་འཆི་བའི་གནས་སྐབས་སུ་གསར་རྒྱུད་ཀྱི་ཆོས་སྐད་གཙོ་བོར་བྱས་པའི་དབང་དུ་བཏང་ན་སྣང་གསུམ་མཐའ་ཡི་འོད་གསལ་གསུངས་པ་ཡིན་ལ། སྣང་གསུམ་མཐའ་ཡི་འོད་གསལ་རང་བཞིན་བརྒྱད་ཅུའི་རྟོག་ཚོགས་འགགས་ནས་ཉེར་ཐོབ་ཀྱི་ཕྲ་བ་ཡང་ཐིམ་ནས་འཆི་སྲིད་ཆོས་སྐུའི་འོད་གསལ་ཤར་དུས་ངོ་མ་ཤེས་ན་ལྡོག་པའི་ས་ཡོད་པ་དེ་ཉིད། སྦྱོང་བྱེད་ལ་སྟོང་ཞིང་བདག་མེད་དེ་བཞིན་ཉིད་ཀྱི་ཏིང་ངེ་འཛིན་བསྒོམས་པས། སྦྱངས་འབྲས་ནི་སྤྲོས་བྲལ་གྱི་ཡེ་ཤེས་ཆོས་སྐུ་ཐོབ་པ་དེ་ཡིན་ནོ། །དགོས་པ་ནི་འདི་བསྒོམས་པས་དག་རྫོགས་སྨིན་གསུམ་གྱི་ཐད་ཀྱི་འཆི་སྲིད་ཀྱི་བག་ཆགས་མ་སྤངས་གནས་སུ་དག འབྲས་བུ་ཆོས་སྐུ་མངོན་གྱུར་གྱི་ས་བོན་མ་བཙལ་ངང་གིས་རྫོགས། རྫོགས་རིམ་གྱི་འོད་གསལ་རྒྱུད་ལ་སྐྱེ་བའི་གཞི་མ་བྱས་ལྷུན་གྲུབ་དེ་རང་ཤུགས་ཀྱིས་སྨིན་ལ། ཆོས་སྐུ་ལས་གཟུགས་སྐུ་གཞན་དོན་དུ་འབྱུང་བའི་དོན་གཉིས་རང་བཞིན་གྱིས་འགྲུབ་པ་ཡིན་ཞིང་། དེ་ལྟ་བུའི་དེ་བཞིན་ཉིད་དེ་རྡོ་རྗེ་ལྟ་བུའི་ཏིང་ངེ་འཛིན་ཡིན་ནོ། །མགོན་པོ་བྱམས་པས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཆོས་དང་སངས་རྒྱས་ཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་འདྲེན་པ་རྣམས་ཀྱི་སྤྱོད་ཡུལ་ཡིན། །ཞེས་གསུངས་པ་ལྟར་དུ་ཇི་ལྟ་མཁྱེན་པའི་ཡེ་ཤེས་ཟབ་མོ་སྟོང་པ་ཉིད་དང་མི་གཉིས་པ་དེ་རྡོ་རྗེ་དང་ཆོས་མཚུངས་སྦྱར་ནས་རྟོག་གེའི་བློས་མི་ཆོད་པ། ཐ་སྙད་ཀྱི་རིགས་པས་མི་ཤིགས་པ། གནས་ལུགས་ཇི་ལྟ་བ་བཞིན་དུ་བདེན་པ། སྐལ་དམན་གྱིས་རྟོགས་དཀའ་བས་སྲ་བ། ངོ་བོ་ལ་འཕོ་འགྱུར་མི་སྲིད་པས་བརྟན་པ། འཁོར་འདས་ཐམས་ཅད་ལ་ཁྱབ་ཅིང་འཇུག་པས་ཐམས་ཅད་ལ་ཐོགས་པ་མེད་པ་དེ་ལྟར་གསུངས་སོ། །ཚིག་རྐང་གཉིས་པ་ཀུན་ཁྱབ་རང་གསལ་ཀུན་ཏུ་སྣང་༔ཞེས་པ་འདིས་ཀུན་སྣང་གི་ཏིང་ངེ་འཛིན་བསྟན་ལ། གསང་བ་བསམ་གྱིས་མི་ཁྱབ་པའི་རྒྱུད་ལས། སྤྲོས་དང་བྲལ་བའི་མཉམ་བཞག་ཆེན་པོ་ལས། །བསམ་གྱིས་མི་ཁྱབ་ཏིང་འཛིན་རྩལ་དུ་འཆར། །ཞེས་གསུངས་པ་ལྟར་དུ་འཁོར་འདས་ཀྱི་ཆོས་ཐམས་ཅད་སྣང་ངོར་ཇི་ལྟར་འཆར་ཡང་རིག་ངོ་ལ་སྤྲོས་པ་དང་བྲལ་བའི་བདེན་འཛིན་གྱི་འཆིང་བ་ཐམས་ཅད་གྲོལ་བའི་ངང་ནས་གཞན་དོན་བྱེད་པ་དེ་ཇི་ལྟར་ཡིན་ན་དོན་དམ་སྟོང་ཉིད་ཀྱི་དོན་མ་རྟོགས་ནས་འཁོར་བ་སྡུག་བསྔལ་གྱི་མཚོ་ཆེན་གྱི་ནང་དུ་འཁོར་བའི་སྡུག་བསྔལ་གྱིས་མནར་བཞིན་ཡོད་པའི་ཉམས་ཐག་སྙིང་རྗེའི་ཡུལ་གྱུར་གྱི་འགྲོ་བ་ལ་སྙིང་རྗེ་བསྐྱེད་པ་དང་། དེ་ཡང་སྟོང་པ་བདག་རྟོག་དང་བྲལ་བའི་ངང་ལས་མ་གཡོས་བཞིན་དུ་གསལ་ཆའི་རང་གདངས་དེ་ཀུན་ཁྱབ་སྙིང་རྗེ་ཆེན་པོར་ཤར་བ་དེ་ཡིན་ནོ། །འགྲོ་དྲུག་སེམས་ཅན་གྱི་སྡུག་བསྔལ་ལ་དམིགས་པ་སེམས་ཅན་ལ་དམིགས་པའི་སྙིང་རྗེ། མ་རྟོགས་འཁྲུལ་བ་འཁྱམ་ཚུལ་ཇི་བཞིན་དུ་གཟིགས་པ་ཆོས་ལ་དམིགས་པའི་སྙིང་རྗེ། དམིགས་པ་ཐམས་ཅད་དང་བྲལ་བའི་དམིགས་མེད་དེ་བཞིན་ཉིད་ཀྱི་རང་ངོ་རྗེན་པའི་ངང་དུ་མཉམ་པར་བཞག་པ་དེ་དམིགས་པ་མེད་པའི་སྙིང་རྗེ་སྟེ་ཡང་དག་ཡེ་ཤེས་ཀྱི་དོན་རྟོགས་པ་དེ་དོན་དམ་སེམས་བསྐྱེད་ཀྱང་ཡིན་ནོ། །འདིའི་སྦྱང་བྱ་བར་དོའི་ལུས་དབང་པོ་ཀུན་ཚང་རྨི་ལམ་ལྟ་བུ། སྦྱོང་བྱེད་ཀུན་ཏུ་སྣང་བའི་སྙིང་རྗེས། སྦྱངས་འབྲས་ལོངས་སྐུ་ཡེ་ཤེས་ཀྱི་སྐུ་ཅན་ནོ། །དགོས་པ་ནི་འདི་བསྒོམས་པས་བར་དོའི་འཁྲུལ་སྣང་མ་སྤངས་གནས་སུ་དག བར་དོའི་སྒྱུ་ལུས་ལོངས་སྐུར་གྲོལ་རུང་གི་ས་བོན་མ་བཙལ་ངང་གིས་རྫོགས། འོད་གསལ་གྱི་ངང་ལས་ཡེ་ཤེས་ཀྱི་སྐུར་ལྡང་བའི་གཞི་མ་བྱས་རང་བྱུང་དེ་སྨིན་པ་སྟེ་དེ་ཡིས་དག་རྫོགས་སྨིན་གསུམ་ཚང་བ་ཡིན་ནོ། །དེ་ལྟ་བུའི་དག་རྫོགས་སྨིན་གསུམ་ཚང་བ་དེ་ཉིད་ཀྱིས་གཟུགས་སྐུ་གཉིས་ཀྱི་སྤྲོ་གཞི་རང་ཤར་བས་འགྲོ་དོན་མ་འབད་ལྷུན་གྲུབ་ཏུ་འགྱུར་ཞིང་། ཀུན་སྣང་འདི་སྒྱུ་མ་ལྟ་བུའི་ཏིང་ངེ་འཛིན་ཡིན་ལ། བར་དོའི་ཡིད་ལུས་སྒྱུ་མ་ལྟ་བུ་དེ་ལོངས་སྐུའི་ཡེ་ཤེས་སྒྱུ་མ་ལྟ་བུའི་སྐུ་ཅན་དུ་བཞེངས་པའི་ཕྱིར་དེ་མ་རྟོགས་པའི་འགྲོ་བ་ལ་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་སྤྲོ་བ་དེ་ལ་ཀུན་སྣང་སྒྱུ་མ་ལྟ་བུའི་ཏིང་ངེ་འཛིན་ཟེར་རོ། །ཚིག་རྐང་གསུམ་པ་འགག་མེད་རྒྱུ་ཡི་ཨཱཿམཐིང་གསལ༔ཞེས་པའི་ཚིག་འདིས་རྒྱུའི་ཏིང་ངེ་འཛིན་བསྟན་ལ། གསང་སྔགས་བླ་མེད་ཀྱི་མྱུར་ལམ་ལས་སྟོང་ཉིད་སྙིང་རྗེ་ཟུང་འཇུག་གི་རང་མདངས་སྒྱུ་མ་དང་མིག་འཕྲུལ་ལྟ་བུའི་རྫུ་འཕྲུལ་གྱི་རོལ་བ་ལས། ངོ་བོ་རང་རིག་འགྱུར་མེད་ཡེ་ཤེས་ཀྱི་རྟེན་དུ་གྱུར་པའི་དྭངས་མའི་སྲོག་དེ་ཉིད། རང་བཞིན་ཞི་ཁྲོ་རིགས་བརྒྱའི་རྟེན་དང་བརྟེན་པའི་སྤྲོ་གཞིར་གྱུར་པ་དེ་རྒྱུ་རྡོ་རྗེ་འཛིན་པའི་ས་བོན་ཏེ། འཇམ་དཔལ་སྒྱུ་དྲྭ་ལས། རྫོགས་པའི་སངས་རྒྱས་ཨ་ལས་བྱུང་། །ཨ་ནི་ཡིག་འབྲུ་ཀུན་གྱི་མཆོག །ཅེས་གསུངས་པ་ལྟར་དུ་ངོ་བོ་སྐྱེ་མེད་ཀྱི་ཡི་གེ་ཨ་ཡིག་དེ་རང་བཞིན་འགྱུར་མེད་དུ་མཚོན་བྱེད་ཁ་དོག་མཐིང་ཁར་ཤར་བ་དེ་ཉིད་སྦྱང་བྱ་བར་དོའི་རླུང་སེམས་ཕྱི་མའི་སྐྱེ་གནས་ལ་འཇུག་ཁ་མ་འཇུག་སྲིད་ཀྱི་སྣང་བ་ཤར་བ་དེ། སྦྱོང་བྱེད་སྟོང་ཉིད་སྙིང་རྗེ་ཟུང་འཇུག་གི་རོལ་བ་རྒྱུའི་ས་བོན་གྱི་རྣམ་པར་ཤར་བའི་ཨ་ཡིག་དེས། སྦྱངས་པར་བྱས་པའི་སྦྱངས་འབྲས་སྤྲུལ་བའི་སྐུ་གང་འདུལ་དེར་སྟོན་སྣ་ཚོགས་སྒྱུ་འཕྲུལ་གྱི་རོལ་གར་ཅན་ནོ། །དགོས་པ་ནི་འདི་བསྒོམས་པས་སྐྱེ་གནས་ཀྱི་བག་ཆགས་མ་སྤངས་གནས་སུ་དག སྐྱེ་བ་སྤྲུལ་སྐུའི་ལམ་བྱེད་ཀྱི་ས་བོན་མ་བཙལ་ངང་གིས་རྫོགས། བདེ་སྟོང་རླུང་སེམས་ཀྱི་ཆ་ལས་བྱུང་བའི་མཚན་རྫོགས་གཟུགས་སྐུའི་བཀོད་པ་མ་བྱས་ལྷུན་གྲུབ་ཏུ་སྨིན་པ་སྟེ། དེ་ལྟ་བུའི་དག་རྫོགས་སྨིན་གསུམ་ཚང་བའི་སྟོབས་ཀྱིས་གང་འདུལ་སྤྲུལ་བའི་རྣམ་རོལ་གྱིས་འགྲོ་བའི་རེ་བ་སྐོང་བའི་འགྲོ་དོན་རང་ཤུགས་ཀྱིས་འབྱུང་བ་དེ་ལྟར་ཡིན་ནོ། །རྒྱུའི་ཏིང་ངེ་འཛིན་ཞེས་པ་འདི་དཔའ་བར་འགྲོ་བའི་ཏིང་ངེ་འཛིན་ཡིན་ལ། ཏིང་འཛིན་གྱི་རྣམ་རོལ་ཟབ་མོ་དེ་ཉིད་ཞུམ་པ་མེད་པར་དཔའ་ཉམས་སུ་ཤར་བའི་རྐྱེན་གྱིས་བྱ་དཀའ་བའི་གནས་ལ་མི་ཞུམ་པར་ཐེག་ཆེན་རྒྱལ་སྲས་ཀྱི་སྤྱོད་པ་རྨད་དུ་བྱུང་བས་གདུལ་བྱ་འདུལ་བར་མཛད་པའི་ཕྲིན་ལས་ཅན་ཞིག་ཡིན་ནོ།། ཁ༽འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ། ཀ ཇི་ལྟར་སྒོམ་པའི་ཚུལ་བཤད་པ། དེའི་མཚམས་སུ་སྟོང་གསལ་རང་བབ་གདོས་བཅས་བྲལ༔ཞེས་པ་འདིས་རྒྱུའི་ས་བོན་ཨ་ཡིག་དེ་ཉིད་སྟོང་གསལ་འགག་པ་མེད་པའི་ཡེ་ཤེས་ཀྱི་རང་བཞིན་ལས་ཤར་བའམ་བབས་ལས་གདོས་བཅས་གཟུགས་སུ་གྲུབ་པ་མ་ཡིན་པའི་སྣང་སྟོང་ནམ་མཁའི་འཇའ་ཚོན་ལྟ་བུར་གསལ་འདེབས་པ་ནི་བརྟེན་པ་ལྷ་ཚོགས་བསྐྱེད་པའི་སྔོན་དུ་རྟེན་གཞལ་ཡས་ཁང་བསྐྱེད་པའི་འོག་གཞི་འབྱུང་བ་རིམ་བརྩེགས་བསྐྱེད་པའི་ས་བོན་ཡིན་ནོ། །སྤྱིར་བསྐྱེད་རིམ་ཞེས་པ་འདི་ལ་ཡོ་ག་རྣམ་པ་གསུམ་གྱི་བསྐྱེད་ཚུལ་ལ་དབྱེ་བ་ཡོད་པ་ཞིག་ཡིན་པས་ཞི་ཁྲོ་དགོངས་པ་རང་གྲོལ་གྱི་སྐབས་འདི་ལ་ཡོ་ག་རྣམ་པ་གསུམ་གྱི་དགོངས་དོན་གཙོ་ཆེ་ཆུང་ལ་བཞག་སྟངས་དེ་ཆོས་ཚན་ནང་གསེས་ལ་ཁྱད་པར་ཡོད་པ་ཞིག་ཡིན་ལ། དཔེར་བཞག་ན་ཡིག་འབྲུའི་ས་བོན་ལས་བསྐྱེད་པ་འབྲུ་བསྐྱེད་གཙོ་བོར་བྱས་པ་དེ་ཐབས་བསྐྱེད་རིམ་གཙོ་བོར་བསྟན་པ་རྒྱུད་མ་ཧཱ་ཡོ་ག་ལྟར་དུ་བསྟན་པ་ལས་བྱང་ཆེ་བ་འདི་དང་། རྡོ་རྗེའི་ལུས་ཀྱི་རྩ་ཐིག་རླུང་གསུམ་གྱི་ངོ་བོ་ལ་མ་བསྐྱེད་ཡེ་རྫོགས་ཀྱི་ཚུལ་གྱིས་ཤེས་རབ་རྫོགས་པའི་རིམ་པ་ལྟར་དུ་གཙོ་བོར་བསྟན་པ་ཆོས་སྤྱོད་བག་ཆགས་རང་གྲོལ་ལྟ་བུ། སྤྱི་ཁྱབ་ཀྱི་འཁོར་བའི་རྟོག་ཚོགས་མ་སྤངས་གནས་དག་གི་ཚུལ་དུ་བསྒོམ་བྱ་སྒོམ་བྱེད་གཉིས་མེད་ལྷ་སྐུ་རིག་རྩལ་དུ་རྫོགས་པ་མ་ཧཱའི་ཨ་ཏི་ཞེས་པའམ་ཨ་ཏིའི་མ་ཧཱ་ལྟར་མན་ངག་རྫོགས་པ་ཆེན་པོའི་ལུགས་ལྟར་དུ་བྱས་པ་སྟེ་དེ་ལྟར་གསུམ་ཡོད་པའི་ནང་གི་སྐབས་འདིའི་ལས་བྱང་ཆུང་བ་འདི་ལ་དེ་གསུམ་ཁ་ཚང་བའི་ཐོལ་བསྐྱེད་གཙོ་བོར་བྱས་པ་ཞིག་ཡིན་ནོ། །དེ་གསུམ་ཇི་ལྟར་ཚང་ན། དབྱིངས་ལས་ས་བོན་ཤར་བ་དེ་རྒྱུད་མ་ཧཱ་ཡོ་གའི་དགོངས་པ་དང་མཐུན་ལ། དབྱིངས་དང་ཡེ་ཤེས་གཉིས་མེད་ཀྱི་ལྟ་བས་ཟིན་པ་དེ་ལུང་ཨ་ནུ་ཡོ་གའི་ལམ་དང་འབྲེལ་ཞིང་། དེ་ཡང་རིག་རྩལ་དུ་ཤེས་པ་མན་ངག་ཨ་ཏི་ཡོ་གའི་དགོངས་གནད་དང་མཐུན་པའི་ཐུན་མིན་གྱི་མན་ངག་ཡིན་ནོ། །དེའི་ཕྱིར་ན་མགོ་ཞིག་ནས་རྒྱུད་ལུང་མན་ངག་གི་ནང་བཅུད། ཡོ་ག་གསུམ་གྱི་བཅུད་འདྲིལ། སྙིང་པོའི་ཡང་ཞུན་ཡིན་ཞེས་བཤད་པ་དང་འདི་གཉིས་དོན་གཅིག་ཏུ་གྲུབ་བོ།། ཁ སྒོམ་པའི་རིམ་པ་དངོས་བཤད་པ། ༼༡༽རྟེན་གཞལ་ཡས་ཁང་འབྱུང་བ་རིམ་བརྩེགས་དང་བཅས་པ་བསྐྱེད་པ། དེ་ཡན་ཆད་ཀྱིས་ཇི་ལྟར་སྒོམ་པའི་ཚུལ་བཤད་ནས་ད་ནི་སྒོམ་པའི་རིམ་པ་དངོས་ལ་ཐུག་པ་ཡིན་ལ། འདིའི་བརྟེན་པ་དཀྱིལ་འཁོར་གྱི་ལྷ་ཚོགས་བསྐྱེད་པའི་སྔོན་དུ་རྟེན་གཞལ་ཡས་ཁང་། དེའི་སྔོན་དུ་འོག་གཞི་འབྱུང་བ་རིམ་བརྩེགས་བསྐྱེད་པ་དེ་ཉིད་འབྱུང་ཞིང་། ཨཿལས་ཨེ་ཡྃ་བྃ་ལྃ་འཕྲོས༔ ནམ་མཁའ་རླུང་ཆུ་ས་གཞི་བརྡལ༔ཞེས་པ་འདིས་འོག་གཞི་བསྐྱེད་པ་བསྟན་ཏོ། །གོང་ནས་གསལ་འདེབས་རྒྱུའི་སྟོང་གསལ་རང་བབ་གདོས་བཅས་དང་བྲལ་བའི་ཨ་ཡིག་མཐིང་ཁ་རང་བཞིན་གྱིས་མ་གྲུབ་པ་འཇའ་ཚོན་ལྟ་བུ་ཞིག་ནམ་མཁར་གནས་པའི་རྒྱུའི་ཨ་ཡིག་ཅིག་ཡོད་ཅེས་བཤད་པའི་རྒྱུའི་ཨ་ཡིག་དེ་ལས། ཨེ་ཡིག་མཐིང་ནག་ཅིག་ཆད་ནས་དེ་ཉིད་ནམ་མཁའ་མཐིང་ནག་རྣམ་པ་ཆོས་འབྱུང་སྣོལ་མ་ཟུར་དྲུག་ཅན་ཞིག་འཕེལ་ཁ་གྱེན་དུ་བསྟན་ནས་རྩ་བ་གཉིས་ཀའི་ཕྲ་བ་གཉིས་ཀ་ཟུར་དུ་མར་ཟུག་ཡོད་པ། དོན་ནམ་མཁའ་དབྱིངས་ཀྱི་དབང་ཕྱུག་མའི་མཁའ་ཀློང་རྣམ་པར་དག་པ། དེ་ཡང་རྒྱ་ཆེན་པོ་ཆོས་ཀྱི་དབྱིངས་དང་མཉམ་པ། ཆོས་འབྱུང་སྣོལ་མར་བྱས་པའི་འོག་མ་ཤེས་རབ་དང་། སྟེང་མ་ཐབས་ཀྱི་རང་བཞིན་ནོ། དེ་བཞིན་དུ་ཨ་ལས་ཨེ་ཡྃ་བྃ་ལྃ་རིམ་པ་བཞིན་དུ་འཕྲོས་ནས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བའང་བརྟེན། །ཞེས་གསུངས་པའི་སྣོད་བཅུད་ཆགས་པའི་འགྲོས་ལྟར་དུ་སྦྱང་གཞི་སྦྱོང་བྱེད་དག་རྫོགས་སྨིན་གསུམ་ཚང་བའི་ཐོག་ནས་བསྐྱེད་རིམ་འདི་བཤད་དགོས་སོ། །འཁོར་བ་དང་རྣམ་པ་མཐུན་པས་སྲིད་པ་སྦྱངས་ཤིང་དག མྱ་ངན་ལས་འདས་པ་དང་བཞུགས་ཚུལ་མཐུན་པས་འཁོར་བ་གཞི་ལ་རྫོགས། ཐམས་ཅད་རྫོགས་རིམ་གྱི་སྨིན་བྱེད་དུ་འགྲོ་བས་ན་དེ་ལྟར་དག་རྫོགས་སྨིན་གསུམ་ཚང་བ་ཡིན་ནོ། །ལས་བྱང་ཆུང་བའི་སྐབས་ཐོལ་བསྐྱེད་གཙོ་བོ་བྱེད་རྒྱུ་ཡིན་ཞིང་། ཚིག་སྣ་ཡང་བསྟུངས་ནས་སྙིང་པོ་དྲིལ་ཡོད་ལ། ཡོ་གའི་རྣལ་འབྱོར་གྱི་རྒྱུད་གསུམ་པོ་དང་འབྲེལ་སྐབས་བསྐྱེད་རིམ་གྱི་རྟེན་དང་བརྟེན་པའི་གོ་རིམ་ཡང་ངེས་དགོས་པ་ཡིན་ནོ། །བསྐྱེད་པའི་སྐབས་སུ་བསྐྱེད་རིམ་གྱི་གནད་མ་ཤོར་བ་ཞིག་དགོས་པས་ཅུང་ཟད་ཞིབ་ཆ་ཞིག་མ་བྱས་ཐབས་མེད་ཡིན་ལ། འོ་ན་འོག་གཞི་རླུང་ཆུ་ས་དཀྱིལ་གསུམ་མཁའ་ལ་བརྟེན་ནས་ཆགས་པ་ཡིན་ཞིང་། མཁའ་ཀློང་བདེ་བ་ཆེན་པོ་ཆོས་འབྱུང་གི་རྣམ་པ་ལས་ཡྃ་འཕྲོས་ནས་རླུང་གི་དཀྱིལ་འཁོར་རྡོ་རྗེ་རྒྱ་གྲམ་གྱི་རྣམ་པ་ཅན་ཁ་དོག་སྣ་ལྔ་འོད་ལྔའི་མུ་ཁྱུད་ཀྱིས་བསྐོར་བ་དམ་ཚིག་སྒྲོལ་མའི་མཁའ་ཀློང་རྣམ་པར་དག་པ་དེ་ཡིན་ནོ། །དེའི་སྟེང་དུ་བྃ་ལས་ཆུའི་དཀྱིལ་འཁོར་མཱ་མ་ཀཱའི་མཁའ་དབྱིངས་རྣམ་པར་དག་པ། དེའི་སྟེང་དུ་ལྃ་ལས་རིན་པོ་ཆེའི་གསེར་གྱི་ས་གཞི་ཆགས་པ་ཡིན་ནོ། འདི་འབྱུང་བ་རིམ་བརྩེགས་ཞེས་པ་ཡིན་པས་མེ་མེད་པའི་རྒྱུ་མཚན་གང་ཡིན་ཞེ་ན། དེའི་དོན་ནི་རྒྱུད་ཀློང་གསལ་ལས། མཁའ་ལ་རླུང་ཆགས་རྒྱ་གྲམ་ཚུལ། །རླུང་ལས་ཆུ་ཆགས་རྒྱ་མཚོར་འཁྱིལ། །ཆུ་ལས་ས་ཆགས་ད་ལའི་ཚུལ། །མེ་ནི་རླུང་གི་རྩལ་ཡིན་ནོ། །ཞེས་གསུངས་ཡོད་ལ། དེའི་དོན་ནི་མེ་རླུང་གི་རྩལ་ཡིན་ཞིང་རང་ཤུགས་ཀྱིས་ཡོད་པས་ཁྱད་པར་དུ་བྱས་ནས་མ་བསྟན་པ་ཡིན་ནོ། །དེ་སྤྱིར་བཏང་འུ་ཚོས་མཐོང་ཆོས་མངོན་གྱུར་གྱིས་ཤེས་རྒྱུ་ཞིག་ཀྱང་ཡིན་ལ། དེང་སང་མིའི་རིགས་ཀྱི་འཕྲུལ་རིགས་ཀྱི་ཆུ་ཚད་གོང་མཐོར་སོང་ནས་འཇིག་རྟེན་འཕུར་གྲུ་མཁའ་དབྱིངས་སུ་མངགས་ནས་ཕྱིར་ས་གཞི་ལ་ཤུགས་ཀྱིས་ལྷུང་ནས་འབབ་དུས་ལྕགས་སྤྱིར་བཏང་བ་ཞིག་ཡིན་ན་ཞུ་འགྲོ་བའི་མེ་ཚ་མོ་ཞིག་དེའི་བར་དུ་རླུང་ཤུགས་ཀྱིས་ཡོང་བ་ཡིན་ཞིང་། དེ་མིན་ན་ཡང་དངོས་པོ་གཉིས་དྲག་ཏུ་བརྡར་ཞིང་གཙུབས་པས་བར་ནས་དྲོད་དང་མེ་འབྱུང་བ་དེ་རླུང་གི་ནུས་པའམ་རྩལ་ལས་ཐོན་པ་ཡིན་ནོ། །ཀློང་གསལ་གྱི་ལུང་གི་མེ་ནི་རླུང་གི་རྩལ་ཡིན་ནོ་ཞེས་པ་འདི་ཡང་རྩལ་ཞེས་པ་རིག་རྩལ་ལ་སོགས་པ་ནམ་བཤད་ཀྱི་སྐབས་སུ་ནུས་པ་ལ་གོ་དགོས་ལ། ངོ་མས་བཤད་ན་རླུང་དེ་ཡང་འབྱུང་བ་གཞན་གསུམ་གྱི་གྲོགས་ཡིན་ནོ། །རླུང་རྒྱ་གྲམ་གྱི་ལྟེ་བ་ལ་ཡེ་ཤེས་ཀྱི་དྲོད་བག་ཙམ་ཞིག་བྱུང་། དེ་ཆུ་ལ་ཕོག་ནས་རླངས་པ་མཐོངས་ཁུང་གི་དུ་བ་འདྲ་བ་ཞིག་བྱུང་། དེ་ས་དཀྱིལ་ལ་ཕོག་ནས་ཆན་ལ་ཕབ་བཏབ་པ་དང་འདྲ་བའི་དྲོད་ཅིག་འབྱུང་ཞིང་། རྒྱུད་ཀློང་གསལ་ལས། རླུང་ནི་ཀུན་གྱི་གྲོགས་ཡིན་ནོ། །འབྱུང་བ་གསུམ་ལ་མཉམ་པར་ཁྱབ། །ཅེས་གསུངས་ལ། དེ་ཚོའི་ཁུངས་དང་གཏུགས་ནས་བཤད་ཆོག་གོ། །འབྱུང་བའི་ས་བོན་དེ་རྣམས་ཀྱི་ཡི་གེའི་ཁ་དོག་ཨེ་མཐིང་ཁ། ཡྃ་ལྗང་གུ། བྃ་ངོ་མས་བཤད་ན་ཡེ་ཤེས་ལྔ་ཡི་རང་མདོག་ལས་མཚོན་ན་དཀར་བོ་ཡིན་ཆོག་ཀྱང་འདིའི་བསྐྱེད་རིམ་གྱི་སྐབས་སུ་མ་ངེས་པ་ཞིག་ལ་བཞག་ཡོད་ལ། ལས་བྱང་ཆེ་བའི་ནང་དུ་ཁ་དོག་མ་ངེས་རྒྱ་མཚོ་འཁྱིལ་ཞེས་གསུངས་ཡོད་ཅིང་། གླིང་བཞིའི་རང་ཕྱོགས་ཀྱི་རི་རབ་དང་རྒྱ་མཚོ་དེ་དེ་དང་མཚུངས་པའི་ཁྱད་པར་ཡོད་ཚུལ་གསུངས་པ་དང་མཐུན་ནོ། །ལྃ་སེར་བོ་ཡིན་ཞིང་། རྒྱུའི་ས་བོན་ཨ་ཡིག་ལས་འབྱུང་བཞིའི་ས་བོན་འཕྲོ་འཕྲོར་མཆེད་སྐབས་འབྱུང་བ་དེ་དང་དེར་འཛིན་གྱི་རྟོག་པ་དང་བྲལ་བའི་འབྱུང་བའི་དྭངས་མ་ཡེ་ཤེས་ལྔའི་ཡོན་ཏན་བསྡུས་ནས་ཡི་གེའི་རྣམ་པར་འོད་དུ་ཞུ་བ་ལས་འབྱུང་དཀྱིལ་རིམ་པར་བརྩེགས་པ་དེ་ལྟར་ཡིན་ནོ། །འདིའི་སྦྱང་བྱ་ནི་དཔལ་ལྡན་ཟླ་བས། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་བཀོད། །འགྲོ་བ་མ་ལུས་ལས་ལས་སྐྱེས་པར་གསུངས། །སེམས་སྤངས་ནས་ནི་ལས་ཀྱང་ཡོད་མ་ཡིན། །ཞེས་གསུངས་པ་ལྟར་དུ་འཁྲུལ་ངོར་སྣང་བའི་འབྱུང་བཞི་རི་གླིང་དང་བཅས་པ་རང་སེམས་ལས་སྣང་བ་དེ་སྦྱང་བྱ་ཡིན་ལ། སྦྱོང་བྱེད་ཡེ་ཤེས་ལྔའི་རང་མདངས་འབྱུང་ལྔའི་ས་བོན་ལས་འོག་གཞི་འབྱུང་བ་རིམ་བརྩེགས་སུ་སྒོམ་པ། འདིའི་སྦྱངས་འབྲས་ནི་ཆོས་ཉིད་དོན་དམ་པའི་རང་སྣང་གི་ཡེ་ཤེས་བདེ་སྟོང་རྣམ་པར་དག་པའི་མཁའ་ཀློང་དུ་དྲིལ་བ་དང་། དགོས་པ་འབྱུང་ལྔའི་བག་ཆགས་མ་སྤངས་གནས་སུ་དག ཡུམ་ལྔའི་མཁའ་ཀློང་དག་པའི་རྟེན་འབྲེལ་མ་བཙལ་ངང་གིས་རྫོགས། རྩ་ཁམས་རྣམ་པར་དག་པའི་འབྲས་བུ་མ་བྱས་ལྷུན་གྲུབ་ཏུ་སྨིན་པ་དེ་ལྟ་བུ་ཡིན་ནོ།། ཨཿལས་བྷྲཱུྃ་འཕྲོས་གཞལ་ཡས་ཁང༔ ཟུར་བཞི་ལོགས་བཞི་སྒོ་བཞི་ལྡན༔ སྟོང་བའི་དབྱིངས་སུ་འཇའ་ལྟར་ཤར༔ ཕྱི་དང་ནང་མེད་ཟང་ཐལ་གསལ༔ ཡིད་འོང་མཛེས་ལྡན་གཞལ་ཡས་ཁང་༔ རྒྱལ་བ་ཞི་ཁྲོའི་བཞུགས་གནས་སོ༔ ཞེས་པ་འདིས་རྟེན་གཞལ་ཡས་ཁང་བཤད་ལ། རྒྱུའི་ཨ་ཡིག་དེ་ཉིད་ལས་འབྱུང་བཞི་རི་རབ་དང་བཅས་པའི་དྭངས་མ་འདུས་པའི་ཆོས་དབྱིངས་ཡེ་ཤེས་ཀྱི་རང་རྩལ་བྷྲཱུྃ་ཡིག་ཁ་དོག་ལྔ་དང་ལྡན་པ་ཞིག་ལས་ཐར་བ་ཆེན་པོའི་གཞལ་ཡས་ཁང་བསྒོམ་དགོས་སོ། །བྷྲཱུྃ་ཡིག་ཁ་དོག་ལྔ་ལྡན་ལས་ཐར་བ་ཆེན་པོའི་གཞལ་ཡས་ཁང་ཇི་ལྟར་བསྒོམ་དགོས་ཤེ་ན། ལས་བྱང་ཆུང་བའི་ཚིག་འདི་ཤིན་ཏུ་བསྡུས་པ་ཡིན་ཞིང་། བསྡུས་པའི་རྒྱུ་མཚན་ནི་བསྐྱེད་རིམ་ཤིན་ཏུ་བྱང་ཆ་ཡོད་པའི་རྣལ་འབྱོར་བས་ཐོལ་བསྐྱེད་ཀྱི་དགོས་པ་དང་བསྟུན་པ་ཡིན་ལ། འདི་ནས་ལས་དང་པོ་པ་ལ་ཕན་པའི་ཆེད་དུ་ཞིབ་ཆ་བྱས་ན་གོང་གི་ས་དཀྱིལ་གྲུ་བཞི་སེར་བོ་ཆགས་པའི་སྟེང་དུ། རིན་པོ་ཆེ་སྣ་ཚོགས་ཀྱི་རི་རབ་ཟུར་བཞི་ལོགས་བཞི་དང་བརྒྱད་ཅན་འདིའི་སྐབས་སུ་ཆུ་མཚམས་ཡན་ཆད་དུ་བསྒོམ་རྒྱུ་ཡིན་པ་དང་། ཆུ་མཚམས་ཡན་ཆད་ཀྱི་ཕྱེད་ཀྱི་སྨད་ཆ་དེ་བང་རིམ་བཞི་བརྩེགས་དང་། ཕྱེད་ཀྱི་སྟོད་ཆ་དེ་གཞལ་ཡས་ཁང་གི་འོག་གཞི་རུ་གསལ་འདེབས་དགོས་སོ། །དེ་ལྟ་བུའི་འོག་གཞིའི་སྟེང་ལ་ཕྲིན་ལས་རྣམ་བཞིས་ཡོངས་སུ་ཁྱབ་པའི་བརྡ་རུ་འོག་གཞི་པདྨ་འདབ་མ་སྟོང་ལྡན། དེའི་ལྟེ་བར་ཡོན་ཏན་ལྷུན་གྱིས་གྲུབ་པའི་བརྡ་རུ་ཉི་མའི་དཀྱིལ་འཁོར་བཀྲག་ལ་འཚེར་བ། དེའི་སྟེང་དུ་རྣམ་རྟོག་གི་འགྱུ་དྲན་རིག་སྟོང་དུ་གྲོལ་བའི་རྟགས་སུ་སྣ་ཚོགས་རྡོ་རྗེ་སྟེ། རྡོ་རྗེ་རྒྱ་གྲམ་ཕྱོགས་མདོག་ཅན། རྡོ་རྗེའི་ལྟེ་བ་གྲུ་བཞི་ཡིན་པ། འགྱུར་བ་མེད་པའི་བརྡ་རུ་མདོག་མཐིང་ཁ་ཡིན་པ། དེའི་སྟེང་དུ་གདུལ་བྱའི་དགོས་འདོད་ཡིད་བཞིན་དུ་སྐོང་བའི་བརྡ་རུ་རིན་པོ་ཆེའི་གཞལ་ཡས་ཁང་། ནང་ནས་ཕྱི་རུ་རིམ་པ་བཞིན་དུ་ཁ་དོག་ནི། སྔོ་དང་དཀར་དང་སེར་དང་དམར། །ཀུན་གྱི་ཐ་མ་ལྗང་གུ་སྟེ། །ཞེས་ཧེ་རུ་ཀ་འདུས་པའི་རྒྱུད་ཀྱི་ལུང་ལས་གསུངས་པ་ལྟར་བེེཌཱུརྱ་དང་། ཤེལ། གསེར། པདྨ་རཱ་ག མརྒད་དང་ལྔ་སྟེ་རིམ་པ་བཞིན་དུ་ཡོད་དོ། །ཡང་མཐིང་དཀར་དམར་སེར་ལྗང་གུའི་རིམ་པ་དེ་ལྟར་སྒྲིག་རྒྱུའི་དགོངས་པ་ཡང་ཡོད་ལ། བཀའ་བརྒྱད་བདེ་འདུས་ལས་རིགས་ལྔའི་རང་མདོག་གི་ཐོག་ནས་བཤད་ཡོད་ཅིང་། དེ་དག་ཐམས་ཅད་འགལ་བ་མེད་དོ། །གཞལ་ཡས་ཁང་དེ་ཉིད་ཆེ་བའི་ཡོན་ཏན་ལྡན་པས་གྲུ་བཞི་བ་ཡིན་ཞིང་། ཚད་མེད་པས་སྒོ་བཞི་དང་ལྡན་པ་ཡིན་ལ། སྔགས་ཀྱི་སྐབས་སུ་ཚད་མེད་བཞི་དང་སྒོ་བསྟུན་པའི་རྣམ་ཐར་ཡང་སྒོ་བཞིར་གསུངས་སོ། །སྒོའི་ནང་འགྲམ་རྣམ་ཤེས་ཚོགས་བརྒྱད་རྣམ་པར་དག་པའི་ལྷ་ཆེན་བརྒྱད་ཀྱི་ཀ་བ། ལྷ་བརྒྱད་ནི་ཁྱབ་འཇུག་དང་། མ་ཧཱ་དེ་བ། བྷྲྀངྒི་རི་དྷི་སོགས་ཡིན། བྷྲྀངྒི་རི་དྷི་ཞེས་པ་བྲམ་ཟེ་ཏམ་བུ་རའི་མིང་ཡིན་ཟེར་སྲོལ་ཡོད། དེ་ཐམས་ཅད་དག་པ་དང་སྦྱར་ན་ཉེ་ཉོན་ཉི་ཤུ་དག་པ་ལྷ་བྲན་གྱི་དྲལ་ཕྱམ། ཡོན་ཏན་ལྷུན་གྱིས་གྲུབ་པའི་རིན་པོ་ཆེ་སྣ་ཚོགས་ཀྱིས་ཐོག་ཕིབས་པ། རྣམ་ཤེས་ཡུལ་བརྒྱད་དང་བྲལ་བའི་རུས་སྦལ་བརྒྱད། ཐུགས་རྗེས་མི་གཏོང་བའི་བརྡ་རུ་ཆུ་སྲིན་གྱི་ཀ་གདན། བཀྲ་ཤིས་པའི་རྟགས་སུ་མུ་ཏིག་དང་རིན་པོ་ཆེའི་ཀ་རྒྱན། རྣམ་ཐར་བརྒྱད་དང་ལྡན་པའི་རྟགས་སུ་ཉི་མ་ལ་སོགས་པའི་གཟའ་བརྒྱད་དང་རྒྱུ་སྐར་གྱི་ཀ་གཞུ། ཆེ་བའི་ཡོན་ཏན་དང་ལྡན་པའི་རྟགས་སུ་རྩིག་པའི་སྟེང་གི་ཕ་གུ་སེར་བོ་རིན་པོ་ཆེའི་ཕྲ་ཡིས་བརྒྱན་པ། སྐྱོན་བྲལ་ཡོན་ཏན་དང་ལྡན་པའི་རྟགས་སུ་ཕ་གུའི་སྟེང་དུ་ཆུ་སྲིན་ཀ་མ་རུའི་ཁ་ནས་དྲ་བ་དང་དྲ་ཕྱེད་ཀྱི་མིག་ཚགས་དང་ལྡན་པ། ད་རུང་དཀོན་མཆོག་གསུམ་གྱི་ཆོས་སྒྲ་སྒྲོག་པའི་དྲིལ་བུ་རྩ་བརྒྱད་ཅེས་པ་དང་། མཚན་དཔེ་བརྒྱ་དང་རྩ་བརྒྱད་མཚོན་པའི་མཆོད་རྟེན་བརྒྱ་དང་རྩ་བརྒྱད་ཀྱིས་བསྐོར་བ། འདིའི་མཆོད་རྟེན་ཞེས་པ་པུ་ཤུ་རྟ་རྐན་རིས་ལ་གོ་བ་ཡང་གསུངས་ཡོད། བསྟན་པ་མི་ནུབ་པའི་རྟགས་སུ་མི་ནུབ་པའི་རྒྱལ་མཚན་བཅུ་ཡིས་བསྐོར་བ། མི་ནུབ་རྒྱལ་མཚན་བཅུ་ཡིས་བསྐོར་ཞེས་དུས་རྒྱུན་འདོན་བཞིན་པ་དེ་ཡིན་ལ། རྒྱལ་མཚན་དེ་ཡང་རྒྱལ་མཚན་འདྲ་འདྲ་རྡོག་མ་བཅུ་ལ་གསུངས་པ་མ་ཡིན་ཞིང་། རྒྱལ་མཚན་གྱི་རིགས་བཅུ་ལ་གསུངས་པ་སྟེ། དེ་ཡང་དཔའ་བོ་སྟག་གི་རྒྱལ་མཚན། གཅན་གཟན་གཟིག་གི་རྒྱལ་མཚན། གཏུམ་ཆེན་དོམ་གྱི་རྒྱལ་མཚན། རྩལ་ཆེན་སེང་གེའི་རྒྱལ་མཚན། གཟི་མདངས་མི་ཡི་རྒྱལ་མཚན། དམར་གསལ་ཁྲག་གི་རྒྱལ་མཚན། སྤྲུལ་བ་རྡོ་རྗེའི་རྒྱལ་མཚན། རྒྱ་སྟེའུ་ལྕགས་ཀྱི་རྒྱལ་མཚན། གདུལ་བྱ་ཤ་བའི་རྒྱལ་མཚན། རིན་ཆེན་སྦྲུལ་ནག་གི་རྒྱལ་མཚན་ནོ། །ད་རུང་རི་དྭགས་ཆོས་ཉན་ཆོས་འཁོར་ཡོད་ལ། རི་དྭགས་ཆོས་ཉན་ཆོས་འཁོར་ནི་རི་དྭགས་ཀྲིཥ་ཎ་སཱ་ར་ཕོ་མོས་ཆོས་ཉན་བཞིན་ཡོད་པ། ཆོས་འཁོར་རིམ་པ་བཅུ་གསུམ་དང་ལྡན་པ། གདུགས་དང་དར་དཔྱངས་བཀྲ་ཤིས་པའི་རྫས་སྣ་ཚོགས་པ་དེ་ཚོ་བརྡ་རྟགས་མཚོན་པའི་དག་དྲན་རེ་རེ་བཞིན་དུ་ཡོད་དོ། །ཕྱི་རོལ་ལ་རྣམ་ཤེས་ཚོགས་བརྒྱད་གནས་སུ་དག་པའི་བརྡ་རུ་དུད་ཁྲོད་བརྒྱད་ཀྱིས་བསྐོར་བ། རྡོ་རྗེ་མཚོན་ཆ་མེ་རིས་བསྐོར་བ་ལ་སོགས་པ་འདི་ནས་བསྙེལ་གསོས་ཙམ་མམ་ཐུགས་གསོས་ཙམ་དུ་ཞུས་པ་ཡིན་མ་གཏོགས་རྒྱས་པར་རྒྱུད་སྡེ་ཆེན་མོའི་ནང་དུ་གསལ་བ་ལྟར་དུ་ཡིན་ནོ། །ལྷའི་དཀྱིལ་འཁོར་སྒོམ་པའི་སྐབས་སུ་ཟག་མེད་ཡེ་ཤེས་ཆེན་པོའི་དཀྱིལ་འཁོར་ཡངས་དོག་གི་མཐའ་ལས་འདས་ཤིང་། མ་འགགས་འཇའ་ཚོན་བཞིན་དུ་ཤར་བ། ཕྱི་ནང་སྒྲིབ་གཡོགས་མེད་པའི་ཟང་ཐལ། རྒྱ་ཆེན་ཆོས་ཀྱི་དབྱིངས་དང་མཉམ་པ། ནམ་མཁས་གར་ཁྱབ་ལ་ཁྱབ་པའི་དེ་ལྟར་གཞལ་ཡས་ཁང་རྒྱ་ཆེན་པོ་བསྒོམ་དགོས་སོ། །གོང་དུ་མགོ་ཞིག་ནས་བཤད་པ་ལྟར་དུ་དམིགས་པ་རྒྱ་ཆེ་དགོས་ཤིང་། མི་ཟད་རིན་ཆེན་གྱི་གཏེར་ཞེས་པ་ལྟར་དུ་སེམས་ཀྱི་བསམ་པའི་རྒྱ་ཆེན་གཞལ་དུ་མེད་པས་དང་པོ་ནས་རྒྱ་ཆེ་དགོས་པས། རྒྱ་ཆེན་ཆོས་དབྱིངས་དང་མཉམ་པ་དེ་ལྟར་བསྒོམ་དགོས་སོ། །ད་རུང་གོང་ནས་མ་གླེང་བའི་གཞལ་ཡས་ཁང་གི་ཤར་བུ། མདབ་ཡབ། འདོད་སྣམ། སྒོ་དང་། སྒོ་ཁྱུད། རྟ་བབས། སྣམ་བུ། ཀ་བའི་སྟེང་གི་རྡོ་རྗེའི་གདུང་མ་དང་། གདུང་ཆེན། རྩེ་མོའི་རྡོ་རྗེའི་རིན་པོ་ཆེའི་ཏོག་ལ་སོགས་པ་ཞིབ་ཏུ་བློས་བསླངས་ལག་ཁྲིད་ཀྱི་ཐོག་ནས་མཁྱེན་པར་མཛད་དགོས་ཤིང་མ་མཁྱེན་ཐབས་མེད་ཡིན་ནོ། །འདིའི་སྦྱང་བྱ་ནི་སེམས་ཅན་ཐམས་ཅད་ཀྱིི་ལོངས་སུ་སྤྱད་རྒྱུའི་ཡུལ་དང་ཁང་ཁྱིམ་ལ་སོགས་པའི་ཞེན་རྟོག སྦྱོང་བྱེད་ཡེ་ཤེས་རིན་པོ་ཆེའི་གཞལ་ཡས་ཁང་བསྒོམས་པས། སྦྱངས་འབྲས་ཆོས་དབྱིངས་ཡེ་ཤེས་ཀྱི་རྟེན་གནས་གཞལ་ཡས་ཁང་ཡུམ་ལྔ་ཡི་མཁའ་དབྱིངས་རྣམ་པར་དག་པ་གཙུག་གཏོར་འཁོར་ལོས་བསྒྱུར་བའམ་རྣམ་སྣང་གི་ངོ་བོར་རྟོགས་པ་དེ་ཉིད་སྦྱངས་འབྲས་ཡིན་ནོ། །འདིའི་དགོས་པ་ནི་དག་རྫོགས་སྨིན་གསུམ་གྱི་དགོས་པ་ཚང་ཞིང་། ཇི་ལྟར་ཚང་ན་ཕྱི་ནང་གི་རྟེན་རི་ར་བ་ཁང་ཁྱིམ་ཕུང་ཁམས་ལ་སོགས་པ་མ་སྤངས་གནས་སུ་དག སངས་རྒྱས་རང་སྣང་གི་ཞིང་དང་གཞལ་ཡས་ཁང་གི་རྟེན་འབྲེལ་མ་བཙལ་ངང་གིས་རྫོགས། རྩ་རླུང་ཐིག་ལེའི་འདུ་བ་སྟོང་གསལ་བདེ་བའི་རང་བཞིན་དེ་མ་བྱས་ལྷུན་གྲུབ་ཏུ་སྨིན་པ་སྟེ་དག་རྫོགས་སྨིན་གསུམ་དེ་ལྟར་ཡིན་ནོ། །ཞི་ཁྲོ་དམ་པ་རིགས་བརྒྱ་ལ་ཞི་བ་དང་ཁྲོ་བོའི་རིགས་གཉིས་ཡོད་ཅིང་། བཞུགས་གནས་གཞལ་ཡས་ཁང་སོ་སོ་དང་བསྲེས་ནས་བཞུགས་པ་གང་ཡིན་ཞེས་ལས་དང་པོ་པས་བསམ་མི་སྲིད་པ་མ་ཡིན་ཡང་གཞལ་ཡས་ཁང་སྟེང་འོག་ཉིས་བརྩེགས་མེད་པ་དང་། ཁྲོ་བོའི་བཞུགས་གནས་སོ་སོར་བྱེད་པ་དེ་ལྟར་འདིའི་སྐབས་སུ་མི་དགོས་ལ། འདི་གཞི་ལམ་འབྲས་གསུམ་གྱི་ཐོག་ནས་བཤད་ན་གཞིའི་སྐབས་སུ་རྡོ་རྗེའི་ལུས་གཅིག་ལ་སྙིང་ཁར་ཞི་བ་དང་དུང་ཁང་ཁྲོ་བོའི་ལྷ་ཚོགས་བཞུགས་རྒྱུ་དང་། ལམ་གྱི་སྐབས་སུ་གཞིའི་བཞུགས་ཚུལ་གྱི་རྣམ་པ་དེ་ལྟར་དུ་ལྷུན་གྲུབ་ལུས་དཀྱིལ་ལ་བསྒོམ་དགོས་པ། འབྲས་བུའི་སྐབས་སུ། ཁམས་དང་སྐྱེ་མཆེད་གནས་དག་པའི། །ཞི་བའི་ལྷ་ཚོགས་ཐུགས་དམ་བསྐང་། །ཉོན་མོངས་རྟོག་ཚོགས་གནས་གྱུར་པའི། །ཁྲོ་བོའི་ལྷ་ཚོགས་ཐུགས་དམ་བསྐང་། །ཞེས་གསུངས་པ་ལྟར་དུ་ཕྱིའི་ཕུང་ཁམས་སྐྱེ་མཆེད་ཐམས་ཅད་མ་སྤངས་གནས་སུ་དག་པས་ཞི་བ་དང་། ནང་གི་ཉོན་མོངས་པའི་རྟོག་ཚོགས་ཐམས་ཅད་མ་སྤངས་གནས་གྱུར་དེ་ཁྲག་འཐུང་ཁྲོ་བོའི་སྐུའི་རྣམ་པ་ཡིན་ནོ། །ངོ་བོ་དང་གདངས་ཀྱི་རྣམ་པ་ཡིས་གདུལ་བྱའི་སྣང་ཚུལ་ལ་ཞི་བ་དང་ཁྲོ་བོ་གཉིས་སུ་སྣང་ཡང་དོན་ལ་གཅིག་ཡིན་ལ། སེང་གེ་རྩལ་རྫོགས་ཀྱི་རྒྱུད་ལས། གསང་འདུས་རིན་ཆེན་ཟུར་བརྒྱད་མཛོད། །རིག་པའི་ཡེ་ཤེས་ཡབ་ཡུམ་ཚུལ། །ཞེས་དང་། དོན་འཁྱིལ་བྷན་དྷའི་གཞལ་ཡས་མཛོད། །རིག་པའི་ཡེ་ཤེས་ཁྲོ་སྐུར་གནས། །ཞེས་གསུངས་སོ། །འདི་ལ་མཚམས་མཚམས་སུ་དཔེ་མར་མེ་དང་དེའི་འོད་མདངས་ཀྱི་ཚུལ་དུ་བཞག་པ་ཡང་ཡོད་ཅིང་། མར་མེ་དང་འོད་མདངས་ལྟར་འོག་ཏུ་ཞི་བའི་འོད་ལས་སྟེང་དུ་ཁྲོ་བོའི་མདངས་ཤར་གསུང་ཚུལ་ཡང་ཡོད་ལ། ཡང་འགའ་རེས་བུམ་པ་དང་ཁ་རྒྱན་གྱིས་གོ་བརྡ་སྤྲོད་ལུགས་ཀྱང་ཡོད་དོ། །མདོར་ན་ཇི་ལྟར་བཤད་ཀྱང་ངོ་བོ་གཅིག་གི་སྣང་ཚུལ་དང་ཤར་ལུགས་ཡིན་པས་གཞལ་ཡས་ཁང་ཡང་ཁ་ཁར་བྱས་ནས་བསྒོམ་མི་དགོས་ལ། སྣོད་ཀྱི་འཇིག་རྟེན་ཞིང་དང་གཞལ་ཡས་ཁང་དུ་གདོད་ནས་གྲུབ་པ་དག་པ་ལྷུན་གྲུབ་ཀྱི་ཞིང་ཁམས་སུ་ཤར་བའི་ཕ་རོལ་ན་འོག་མིན་ཞེས་པ་ཁ་ཁ་ཞིག་མེད་ཀྱང་དེ་ལ་ཞི་ཁྲོ་ཐ་དད་པའི་གཞལ་ཡས་ཁང་དང་ཡངས་དོག་དང་གཉིས་འཛིན་གྱི་བློ་གུ་དོག་མི་དགོས་སོ། །གོང་ནས་བཤད་པའི་གཞལ་ཡས་ཁང་གི་བཀོད་པའི་ནང་ན་ལྷ་ཆེན་གྱི་ཀ་བ། ལྷ་བྲན་གྱི་དྲལ་ཟེབ། མཐའ་སྐོར་གྱི་དུར་ཁྲོད་རོ་ལངས་ལ་སོགས་པ་དྲག་པོའི་གཞལ་ཡས་ཁང་གི་བཀོད་པ་ཡང་རང་ཤུགས་ཀྱིས་གྲུབ་ཀྱང་ངོ་བོ་དང་དེའི་གདངས་ཞེས་བཤད་པའི་སྐབས་སུ་ཞི་ཁྲོ་གཉིས་ཀ་འདྲེས་མར་བྱས་ནས་རྡོ་རྗེ་གྲོ་ལོད་དང་གྲོ་ཕྲུག་གཉིས་ཀ་མཉམ་དུ་འཆམ་པ་དང་འདྲ་བ་དེ་ལྟ་བུའི་འདང་རྒྱག་མི་དགོས་སོ། །བྷྲཱུྃ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜལ་བྷྲཱུྃ༔ཞེས་གསུངས་ཏེ། བྷྲཱུྃ་ཆོས་ཀྱི་དབྱིངས་གཞལ་ཡས་ཁང་གི་ས་བོན་ཡིིན་ལ། བི་ཤྭ་སྣ་ཚོགས། བི་ཤུདྡྷེ་རྣམ་པར་དག་པ། ཛྙཱ་ན་ཡེ་ཤེས། ཙཀྲ་འཁོར་ལོ། མཎྜལ་དཀྱིལ་འཁོར། དེའི་མཇུག་ཏུ་བྷྲཱུྃ་གཅིག་འབྱུང་བ་ནི་འགག་མེད་གསལ་བརྟན་དག་པའི་རང་བཞིན་དུ་གསལ་འདེབས་པའི་དོན་ཡིན་ནོ། །དེ་ཡན་ཆད་ཀྱིས་རྟེན་གཞལ་ཡས་ཁང་བཤད་ཟིན་ཏོ།། ༼༢༽བརྟེན་པ་ལྷ་ཚོགས་བསྐྱེད་པ། ད་ནི་བརྟེན་པ་ལྷ་ཚོགས་བསྐྱེད་པ་དེ་ཉིད་ཡིན་ཞིང་། འདིའི་སྔོན་དུ་གཞལ་ཡས་ཁང་གི་ས་གཞི་དང་གདན་བསྐྱེད་པ་དེ་ཤུགས་ལ་གོ་དགོས་པས། གཞི་ཆོས་སྐུ་འགྱུར་མེད་མཚོན་བྱེད་དུ་མཐིང་གསལ་བེེཌཱུརྱ་ཞུན་མའི་མདོག་ཅན་གྱི་གཞི་ཡི་སྟེང་ལ། ལོངས་སྐུ་འགག་མེད་མཚོན་བྱེད་ཀྱི་པདྨ་འདབ་བཞི་ལྟེ་བ་དང་བཅས་པའི་ལྔ་ཚོམ། དེའི་ཕྱི་རོལ་དུ་སྤྲུལ་སྐུའི་ཐུགས་རྗེ་སྣ་ཚོགས་སུ་འཆར་བ་མཚོན་བྱེད་འདབ་དྲུག་ཁ་དོག་སྣ་ཚོགས་སུ་བཀྲ་བ། སྐུ་གསུམ་འདུ་འབྲལ་མེད་པའི་པདྨ་མུ་ཁྱུད་གསུམ་ཅན། ཡེ་ཤེས་ལྔ་ལྷུན་གྲུབ་ཀྱི་བརྡ་རུ་མུ་ཁྱུད་ཀྱི་དབུས་དང་མཐའ་བརྩིས་ན་ཁ་དོག་ལྔ་ཅན། གདན་དེ་ནི་མངོན་རྟོགས་རྒྱས་བསྡུས་ཀྱི་ལུགས་གང་ལྟར་བྱས་ན་ཆོག་གོ།། ༼༡ ཞི་བའི་ལྷ་ཚོགས་བསྐྱེད་པ། ༡༽ སྤྱིའི་གཙོ་བོ་བསྐྱེད་པ། དེ་ལྟར་ལྷ་བསྐྱེད་འདི་ལ་ཞི་ཁྲོ་གཉིས་ལས་དང་པོ་ཞི་བ་ཡིན་ཞིང་། ཞི་བའི་ལྷ་ཚོགས་ལ་ཡང་གཙོ་འཁོར་ཡོད་ལ། གཙོ་བོ་ལ་ཡང་སྤྱིའི་གཙོ་བོ་ཞེས་པ་དང་། རིགས་ཀྱི་གཙོ་བོ་ཞེས་པ་གཉིས། འཁོར་ལ་ཡང་རྒྱལ་སྲས་སེམས་དཔའི་འཁོར་དང་། འགྲོ་འདུལ་སྤྲུལ་བའི་འཁོར་དང་། འཇོམས་བྱེད་ཁྲོ་བོའི་འཁོར་ཞེས་དེ་ལྟར་ནང་གསེས་ཀྱི་དབྱེ་བ་ཡོད་དོ། །འདི་ནས་དང་པོ་སྤྱིའི་གཙོ་བོ་ཡབ་ཡུམ་བསྟན་པ་ནི། ཧཱུྃ༔ བདག་ཉིད་ཐ་མལ་རང་སེམས་འདི༔ རྟོག་མེད་སྐད་ཅིག་དྲན་རྫོགས་སུ༔ ཀུན་ཏུ་བཟང་པོ་སྐུ་མདོག་མཐིང་༔ ཆོས་ཉིད་བཟང་མོ་སྐུ་མདོག་དཀར༔ མཉམ་བཞག་སྐྱིལ་ཀྲུང་གཉིས་མེད་འཁྲིལ༔ དལ་དབུས་པད་ཉིའི་གདན་ལ་བཞུགས༔ ཞེས་གསུངས་ཏེ། ཧཱུྃ་བདག་ཉིད་ཐ་མལ་རང་སེམས་འདི་ཞེས་པའི་ཧཱུྃ་ནི་ཐུགས་རྡོ་རྗེ་ཏིང་ངེ་འཛིན་ཐམས་ཅད་ཀྱི་སྙིང་པོའི་ཡིག་འབྲུའི་སྒྲ་ཡིས་བསྐུལ་ནས་བདག་ཉིད་ཅེས་བསྐྱེད་པའི་གཞི་བསྟན་པ་ཡིན་ནོ། །ཐ་མལ་ཞེས་པ་འདི་རྫོགས་ཆེན་བཤད་པའི་སྐབས་སུ་འཁྲུལ་རྟོག་ཐ་མལ་གྱི་ཤེས་པ་དང་། ཉམས་ཐ་མལ་གྱི་ཤེས་པ་ཞེས་པ་དེ་འདྲའི་ཐ་མལ་མ་ཡིན་པར་འཇིགས་མེད་ཡོན་ཏན་མགོན་པོས། ཐ་མལ་ཤེས་པ་རྗེན་པ་འདི། །རང་བབས་ཐད་ཀར་སྐྱོང་བའི་ཚེ། །ངོས་གཟུང་རྡུལ་ཙམ་མེད་མོད་ཀྱང་། །རྟོག་བྲལ་གསལ་ལ་མི་རྟོག་པའི། །རང་བཞིན་བར་སྣང་དག་པ་བཞིན། །སྟོང་སང་འཛིན་པ་བྲལ་བ་འདི། །བློ་ལས་འདས་པའི་ཡེ་ཤེས་ཡིན། །ཞེས་གསུངས་པ་ལྟར་དུ་ཡིན་ཞིང་། རྟོག་མེད་སྐད་ཅིག་དྲན་རྫོགས་སུ། ཀུན་ཏུ་བཟང་པོ་སྐུ་མདོག་མཐིང་། །ཆོས་ཉིད་བཟང་མོ་སྐུ་མདོག་དཀར། །མཉམ་བཞག་སྐྱིལ་ཀྲུང་གཉིས་མེད་འཁྲིལ། །ཞེས་གསུངས་ཡོད་ལ། ཆོས་སྐུ་ཀུན་ཏུ་བཟང་པོ་དེ་ཆོས་དབྱིངས་འགྱུར་བ་མེད་པའི་སྐུ་མདོག་ནམ་མཁའི་མདོག་ཏུ་སྣང་བའི་མཐིང་ག ཆོས་ཉིད་སྟོང་པའི་རང་བཞིན་ཡུམ་ཀུན་ཏུ་བཟང་མོ་དེ་ཀ་དག་གི་ངོ་བོ་མཚོན་པའི་སྐུ་མདོག་ཟླ་བ་ཆུ་ཤེལ་གྱི་མདོག་ལྟར་དཀར་ལ་འཚེར་བ་ཞིག་ཡིན་ཞིང་། ཆོས་དབྱིངས་ཐིག་ལེ་ཉག་གཅིག་མཚོན་བྱེད་དུ་ཀུན་བཟང་ཡབ་ཡུམ་གཉིས་ཀ་ཞལ་གཅིག་རང་མདོག་ཏུ་འཚེར་བ། ཀུན་ཏུ་བཟང་པོས་འཁོར་འདས་མཉམ་ཉིད་དུ་གཟིགས་པའི་བརྡར་ཕྱག་མཉམ་བཞག་ཏུ་མཛད་པ། དེ་ཡང་ཕྱག་གཡས་པ་སྟེང་མར་མཛད་པའི་མཉམ་བཞག་དང་། ཡུམ་ཀུན་ཏུ་བཟང་མོས་ཀུན་ཁྱབ་ཀྱི་ཡེ་ཤེས་མཚོན་བྱེད་དུ་ཕྱག་གཡོན་སྟེང་དུ་བཀོད་པའི་མཉམ་བཞག་ཅན་གྱིས་ཡབ་ཀྱི་གཡོན་ཕྱོགས་ནས་འཁྲིལ་ཏེ་ཞབས་གཉིས་རྫོགས་པའི་སྐྱིལ་ཀྲུང་གིས་བཞུགས་སོ། །དལ་ནི་དཀྱིལ་འཁོར་གྱི་མིང་ཡིན་ལ། འདི་རྒྱས་པར་བྱས་ན་ད་ལ་དང་། བསྡུས་ན་དལ་ཞེས་འབྲི་ཆོག་པའི་བརྡ་སྦྱོར་ཞིག་ཡིན་ཞིང་། པདྨ་དང་ཉི་མ་བཞུགས་སའི་གདན་ནོ། །ཤུགས་བསྟན་ཟླ་གདན་དང་རིན་ཆེན་ཁྲི་རྐང་ཡང་གོ་དགོས་ཤིང་། པདྨ་འཁོར་བར་མ་ཆགས་པ་མཚོན་བྱེད་དང་། ཐབས་ཟླ་བ་ཤེས་རབ་ཉི་མ་གཉིས་ཀ་ཐབས་ཤེས་ཟུང་འཇུག་གི་ཡེ་ཤེས་མཚོན་བྱེད། དཀྱིལ་འཁོར་གྱི་དབུས་སུ་གཙོ་བོ་ཀུན་བཟང་ཡབ་ཡུམ་བསྒོམ་ཚུལ་དེ་ལྟར་ཡིན་ནོ། །གདན་གྱི་ཐད་ནས་མི་འཇིགས་པ་སེང་གེའི་ཁྲི། སྟོབས་གླང་ཆེན་གྱི་ཁྲི། རྫུ་འཕྲུལ་རྟ་ཡི་ཁྲི། དབང་རྨ་བྱའི་ཁྲི། ཕྲིན་ལས་ཤང་ཤང་གི་ཁྲི། དེའི་ཐོག་ཏུ་ཐོགས་པ་མེད་པ་ནམ་མཁའ་ལྡིང་གི་ཁྲི་སྟེ་དེ་དག་རྣམས་སྲོག་ཆགས་བརྒྱད་རེས་བཏེག་པ་ཞིག་ཡིན་ལ། དེ་བཞིན་དུ་ཁྱུང་དང་ནམ་མཁའ་ལྡིང་གིས་བཏེག་པའི་གདན་ཁྲི། ཤེས་རབ་ཉི་མ། ཐབས་ཟླ་བ། སྐྱོན་གྱིས་མ་གོས་པ་པདྨ། འདོད་དགུ་འབྱུང་བའི་རིན་ཆེན་ཁྲི་རྐང་། དེ་ཡང་གཙོ་བོ་དང་འཁོར་གྱི་ཁྱད་པར་གྱིས་ལྔ་བརྩེགས། བཞི་བརྩེགས། སུམ་བརྩེགས། ཐུབ་པ་དྲུག་ལ་པདྨའི་གདན་རེ་རེ། སྒོ་བ་རྣམས་ལ་ཉི་རྐྱང་རེ་རེར་གསུངས་པ་ལྟར་དུ་ཡིན་ནོ། །བཞུགས་ཚུལ་ཡང་ཀུན་བཟང་ཡབ་ཡུམ་དང་དེ་བཞིན་གཤེགས་པ་ཐམས་ཅད་དོན་གཉིས་ལྷུན་གྲུབ་རྫོགས་པའི་སྐྱིལ་ཀྲུང་གིས་བཞུགས་པ་རྒྱལ་པོའི་ཚུལ་ཅན། སེམས་དཔའ་ཡབ་ཡུམ་རྣམས་བློན་པོའི་ཚུལ་གྱིས་གཙོ་བོ་ལ་ཞལ་ཕྱོགས་ནས་རང་དོན་མཐར་ཕྱིན་ནས་གཞན་དོན་མཛད་པའི་བརྡ་རུ་སེམས་དཔའི་སྐྱིལ་ཀྲུང་གིས་བཞུགས་པ། སེམས་དཔའི་སྐྱིལ་ཀྲུང་དེ་གཡས་བརྐྱངས་གཡོན་བསྐུམས་ཀྱི་ཚུལ་ཅན་ཞིག་ཡིན་ལ། ཐུབ་པ་དྲུག་ནི་འགྲོ་དོན་ལ་རྟག་ཏུ་བརྩོན་པ་རང་རང་གི་འགྲོ་བའི་གཙོ་བོའི་གཟུགས་ཀྱིས་གཞན་དོན་མཛད་པ་ཡིན་པས་རྒྱལ་ཕྲན་ལྟར་དུ་བཞེངས་པའི་རྣམ་པ་ཅན་ཞིག་ཡིན་ཞིང་། སྒོ་བ་རྣམས་དམག་དཔོན་གྱི་ཚུལ་གྱིས་བགེགས་དང་ལོག་འདྲེན་ཚར་གཅོད་པའི་ཚུལ་གྱིས་ཞལ་ཕྱིར་གཟིགས་ནས་གྱད་ཀྱི་དོར་སྟབས་ཀྱིས་བཞུགས་པ་དེ་ལྟ་བུ་ཞིག་ཡིན་ནོ། །འདིའི་བསྐྱེད་རིམ་ཡོ་ག་གསུམ་པོ་གཅིག་དྲིལ་གྱི་དགོངས་པ་ཡིན་པར་སྔར་ཡང་ཞུས་ཀྱང་ད་རུང་གསལ་འདེབས་བྱས་ན་འདི་ཨ་ཏི་ལྟར་གྱི་སྐད་ཅིག་དྲན་རྫོགས་ཡིན་ལ། ཨ་ནུ་ལྟར་གྱི་མངོན་བྱང་ལྔ་བསྐྱེད་ཚང་ཞིང་། མ་ཧཱ་ལྟར་དུ་ཏིང་འཛིན་གསུམ་བསྐྱེད་དམ་ཆོ་ག་གསུམ་བསྐྱེད་ཀྱང་འདི་ལ་ཚང་ངོ་། །སྐད་ཅིག་དྲན་རྫོགས་ཡིན་པར་ལས་བྱང་ཆེ་ཆུང་གཉིས་ཀའི་ཚིག་གིས་དངོས་སུ་ཟིན་ཡོད་ཅིང་། མངོན་བྱང་ལྔ་ཚང་ཚུལ་ནི་ཆོས་ཐམས་ཅད་དེ་བཞིན་ཉིད་དུ་སྒོམ་དུས་དེ་མངོན་བྱང་དང་པོ་སྟོང་པ་ཉིད་ལ་མངོན་པར་བྱང་ཆུབ་པ་ཡིན་ལ། ཡེ་ཤེས་ལྔའི་ནང་གི་ཆོས་དབྱིངས་ཡེ་ཤེས། རིགས་ལྔའི་ནང་གི་དེ་བཞིན་གཤེགས་པའི་རིགས་ཀྱང་ཡིན་ནོ། །པདྨ་དང་ཉི་མ་གསལ་བ་འདི་གདན་ཉི་མ་ལས་མངོན་པར་བྱང་ཆུབ་པ་ཡིན་ལ། མེ་ལོང་ཡེ་ཤེས་དང་། རྡོ་རྗེའི་རིགས་ཀྱང་ཡིན་ནོ། །རྒྱུའི་ས་བོན་ཨ་ཡིག་དེ་གསུང་ཡིག་འབྲུ་ལས་མངོན་པར་བྱང་ཆུབ་པ་ཡིན་ལ། མཉམ་ཉིད་ཡེ་ཤེས་དང་། རིན་ཆེན་རིགས་ཀྱང་དེ་ལ་ཚང་ངོ་། ལས་བྱང་ཆུང་བའི་ཤུགས་བསྟན་ཆེ་བའི་དངོས་བསྟན་ལ་བྱུང་བའི་རྡོ་རྗེ་མཐིང་ནག་བསྒོམ་རྒྱུ་ནི་ཐུགས་ཕྱག་མཚན་ལས་མངོན་པར་བྱང་ཆུབ་པ་ཡིན་པས་འདི་སོར་རྟོག་ཡེ་ཤེས་དང་པདྨའི་རིགས་ཡིན་ནོ། །རྒྱུའི་ཕྱག་མཚན་ནམ་ཡི་གེ་ཡོངས་གྱུར་ལས་བདག་ཉིད་ཀུན་བཟང་ཡབ་ཡུམ་བསྐྱེད་པ་ནི་སྐུ་ཡོངས་སུ་རྫོགས་པ་ལས་མངོན་པར་བྱང་ཆུབ་པ་ཡིན་ལ། འདི་ལ་བྱ་གྲུབ་ཡེ་ཤེས་དང་ལས་ཀྱི་རིགས་ཀྱང་འདུས་སོ། །ཆོ་ག་གསུམ་ཡང་འདི་ལ་ཚང་ཞིང་། ཚང་ལུགས་ནི་སྐུ་ཡོངས་སུ་རྫོགས་པའི་ཆོ་ག གསུང་ཡིག་འབྲུའི་ཆོ་ག ཐུགས་ཕྱག་མཚན་གྱི་ཆོ་ག་སྟེ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་འདུས་པ་ཡིན་ནོ། །འདིའི་སྐད་ཅིག་དྲན་རྫོགས་དང་། མངོན་བྱང་ལྔ་བསྐྱེད། ཆོ་ག་གསུམ་བསྐྱེད་འདི་རྣམས་དང་འབྲེལ་བའི་སྦྱང་བྱ། སྦྱོང་བྱེད། སྦྱངས་འབྲས་དང་བཅས་པ་རྒྱུད་དོན་གྱི་དགོངས་པ་ཤིན་ཏུ་རྒྱ་ཆེ་བའི་རྣམ་དབྱེ་ཤིན་ཏུ་མང་ཡང་། མདོར་བསྡུས་ན་སྦྱོང་བྱེད་གཙོ་བོ་ཀུན་ཏུ་བཟང་པོ་བསྒོམས་པས། སྦྱང་བྱ་བར་དོའི་སེམས་ཅན་གྱི་རྣམ་ཤེས་ཕ་མའི་ས་བོན་གྱི་དབུས་སུ་ཞུགས་ནས་རིམ་གྱིས་ལུས་རྫོགས་ནས་ཕྱི་རོལ་དུ་བཙས་པའི་བར་གྱི་བག་ཆགས་དེ་ཐམས་ཅད་སྦྱང་རྒྱུ་དང་། སྦྱངས་འབྲས་སངས་རྒྱས་རྣམས་སྤྲུལ་བའི་སྐུར་བཞེངས་པའི་དུས་སུ་ལྷུམས་སུ་ཞུགས་པ་ནས་བལྟམས་ཚུལ་བསྟན་པའི་བར་གྱི་མཛད་པ་ཐོབ་རྒྱུ་ལ་སོགས་པ་རིགས་འདི་དག་འདི་མན་ཆད་ལ་འགྲེ་དགོས་པའི་འགྲེས་རྐང་སྦྱར་རྒྱུ་ཅན་ཡིན་ནོ། །སྲིད་པ་སྦྱངས་ཤིང་དག མྱང་འདས་ཀྱི་བཞུགས་ཚུལ་རྫོགས། གཉིས་ཀ་རྫོགས་རིམ་ལ་སྨིན་པ་སྟེ། དག་རྫོགས་སྨིན་པའི་གོ་དོན་དང་དེ་ལྟར་སྦྲེལ་ནས་འགྲོ་དགོས་སོ།། ༢༽ རིགས་ཀྱི་གཙོ་བོ་བསྐྱེད་པ། ༡ རིགས་ལྔ་སྤྱིར་བསྐྱེད་པ། ད་ནི་རིགས་ཀྱི་གཙོ་བོ་ལྔ་བསྐྱེད་པ་ལ་ཐུག་པ་ཡིན་ཞིང་། འདི་ལ་རིགས་ཀྱི་གཙོ་བོ་ལྔ་སྤྱིར་བསྐྱེད་པ་དང་། གཙོ་བོ་ཡབ་ཡུམ་ཚོམ་བུ་དང་བཅས་པ་བྱེ་བྲག་སོ་སོར་བསྐྱེད་པ་སྟེ་མདོ་རྒྱས་གཉིས་སམ་བསྟན་བཤད་གཉིས་ཀྱིས་གསུངས་ཡོད་ལ། དང་པོ་གཙོ་བོ་རིགས་ལྔ་བསྐྱེད་པ་ནི། ཧཱུྃ༔ དཀྱིལ་འཁོར་ཕྱོགས་བཞི་དབུས་དང་ལྔར༔ སེང་གེ་གླང་ཆེན་རྟ་མཆོག་དང་༔ རྨ་བྱ་ཤང་ཤང་ཁྲི་སྟེང་དུ༔ ལོངས་སྐུ་རིགས་ལྔ་ཡབ་ཡུམ་གསལ༔ ཞེས་གསུངས་ཏེ། དཀྱིལ་འཁོར་གྱི་དབུས་སུ་གོང་དུ་ཀུན་བཟང་ཡབ་ཡུམ་བསྐྱེད་པ་ཡིན་ཞིང་། འདི་ནས་ཕྱོགས་བཞི་དབུས་དང་ལྔར་ཞེས་རིགས་ལྔ་བསྐྱེད་སྐབས་ས་ཁོངས་ཇི་ལྟར་ཡིན་ཞེ་ན། ལས་བྱང་ཆེ་བའི་མཆན་གྱི་ནང་དུ་ཀུན་བཟང་ཡབ་ཡུམ་གྱི་ཐུགས་ཀ་ནས་རྣམ་སྣང་ཡབ་ཡུམ་བསྐྱེད་པ་དང་། ཀུན་བཟང་ཡབ་ཡུམ་རྣམ་སྣང་ཡབ་ཡུམ་གཉིས་ཀྱི་སྤྱི་བོར་བཏེག་ལ་བཞུགས་སུ་གསོལ་ཞེས་གསུངས་ཡོད་ལ། འདིའི་མཆན་འདི་ལ་གཏེར་ཚེག་བརྒྱབ་འདུག་པས་གཏེར་གཞུང་ཡིན་ཤས་ཆེ་བས་དགོངས་པ་ལེན་དགོས་ཤིང་། གང་ལྟར་ཡང་ཀུན་བཟང་ཡབ་ཡུམ་གྱི་ཐུགས་ཀ་ལས་རྣམ་སྣང་བསྐྱེད་ཅེས་པ་ནི་བདག་བསྐྱེད་ཀྱི་སྐབས་སུ་ཐུགས་ཀའི་ཐད་ཀྱི་བར་སྣང་ལ་བསྐྱེད་པ་དང་། ཀུན་བཟང་ཡབ་ཡུམ་རྣམ་སྣང་ཡབ་ཡུམ་གྱི་སྤྱི་བོར་བཏེག་ཅེས་པ་དེ་མདུན་བསྐྱེད་ལ་དགོངས་ནས་གསུངས་པ་ཡིན་པར་དེ་ཉིད་གོ་དགོས་སོ། །འདི་གོ་ལྡོག་ནས་གསུང་མཁན་ཡང་ཡོད་མོད་ཀྱང་བརྟགས་ཤིང་དཔྱད་པའི་གཞི་ཞིག་རེད་སྙམ། རྣམ་སྣང་གི་སྤྱི་བོར་ཀུན་བཟང་ཡབ་ཡུམ་སྒོམ་སྐབས་སེང་ཁྲི་ལོགས་སུ་མི་དགོས་ལ། གཏེར་གཞུང་གི་ནང་དུ་ཡང་གསལ་སྟོང་པདྨ་ཉི་ཟླའི་གདན་ལ་བཞུགས་གསུངས་པ་དང་དགོངས་པ་གཅིག་པ་ཡིན་ནོ། །དང་པོ་དཀྱིལ་འཁོར་གྱི་དབུས་སུ་སྒོམ་སྐབས་ཁྲི་ཡོད་པའི་རྟགས་ཅི་ཡོད་ཅེ་ན། སྒྱུ་འཕྲུལ་ཐལ་བའི་ནང་དུ། འཁོར་ལོའི་ལྟེ་བར་མི་འཇིགས་སྟེང་། །ཞེས་གསུངས་ཡོད་ཅིང་། ཀུན་མཁྱེན་ཆེན་པོས་ཐེག་པ་འོག་མས་ཉམས་མི་ང་ཞིང་མི་འཇིགས་པ་བཞི་མཚོན་པའི་དབུས་སུ་སེང་གེའི་ཁྲི་ཞེས་དངོས་བསྟན་དུ་གསུངས་ཡོད་དོ། །འདིའི་སྐབས་སུ་ཐེ་ཚོམ་སྐྱེ་སྲིད་པའི་དོགས་གནས་ཤིག་ལ་དཀྱིལ་འཁོར་གྱི་གཙོ་བོ་ཀུན་བཟང་ཡབ་ཡུམ་ཡང་ཡིན་པ་ལྟ་བུ། སྒོམ་ཁོག་གི་ནང་ན་རྣམ་སྣང་དུ་ཡང་གྱུར་ཡོད་པ་ལྟ་བུ། གནས་འདྲེན་གྱི་སྐབས་སུ་རྡོར་སེམས་ཡིན་པ་འདྲ་བ་འདི་མི་འདྲ་བ་འབྱུང་བའི་རྒྱུ་མཚན་ཅི་ཡིན་སྙམ་པའི་རྟོག་པ་སྐྱེ་སྲིད་མོད། སྤྱིར་ན་སངས་རྒྱས་སྐུ་གསུམ་གྱི་རོལ་བ་ལ་རྣམ་པ་གཅིག་ཏུ་ངེས་དགོས་པ་དང་བཟང་ངན་དུ་བལྟ་རྒྱུ་དེ་ལྟར་མ་ཡིན་ཞིང་། ཀུན་ཏུ་བཟང་པོ་བཟང་ངན་མེད་པ་ལ། །བཟང་ངན་གཉིས་སུ་ལྟ་བ་ཐང་རེ་ཆད། །ཅེས་གསུངས་པ་ལྟར་དུ་ཡིན་ལ། ཁྱད་པར་དུ་གདུལ་བྱའི་དབང་གིས་འདུལ་བྱེད་དེ་དང་དེར་སྣང་བ་ཡིན་ན་ཆོས་སྐུའི་གནས་སྐབས་ན་ཆོས་སྐུ་ཀུན་ཏུ་བཟང་པོ། ལོངས་སྐུའི་གནས་སྐབས་ན་ལོངས་སྐུ་རྒྱལ་བ་རིགས་ལྔའི་གཙོ་བོ་རྣམ་པར་སྣང་མཛད། སྤྲུལ་སྐུས་འགྲོ་དོན་མཛད་པའི་གནས་སྐབས་ན་རྡོ་རྗེ་སེམས་དཔར་སྣང་བ་ལ་སོགས་པ་རྒྱལ་བའི་ཕྲིན་ལས་དང་སྤྲུལ་བའི་རོལ་གར་བསམ་གྱིས་མི་ཁྱབ་པ་ཡིན་པས་འདི་ལ་འགལ་བ་ཡོད་པ་མ་ཡིན་ནོ། །དེ་ལྟར་ན་དཀྱིལ་འཁོར་གྱི་དབུས་སུ་རིན་པོ་ཆེའི་ཁྲི་མི་འཇིགས་སེང་གེ་བརྒྱད་ཀྱིས་བཏེག་པ་པདྨ་ཉི་ཟླས་བརྒྱན་པའི་གདན་གྱི་སྟེང་ན་རྣམ་པར་སྣང་མཛད་ཡབ་ཡུམ། ཤར་ཕྱོགས་སུ་སྟོབས་གླང་ཆེན་གྱིས་བཏེག་པའི་ཁྲི་གོང་བཞིན་དུ་པདྨ་ཉི་ཟླས་བརྒྱན་པའི་སྟེང་ན་མི་བསྐྱོད་པ་ཡབ་ཡུམ། ལྷོ་ཕྱོགས་ན་རྫུ་འཕྲུལ་རྟའི་ཁྲི་པདྨ་ཉི་ཟླས་བརྒྱན་པའི་སྟེང་ན་རིན་ཆེན་འབྱུང་ལྡན། ནུབ་ཕྱོགས་ན་དབང་རྨ་བྱའི་ཁྲིའི་སྟེང་ན་སྣང་བ་མཐའ་ཡས། བྱང་ཕྱོགས་ན་ཐོགས་པ་མེད་པ་ཤང་ཤང་གི་ཁྲིའི་སྟེང་ན་དོན་ཡོད་གྲུབ་པ་ཡབ་ཡུམ་གསལ་འདེབས་ཞེས་སྤྱིར་བསྟན་པ་ཡིན་ནོ།། ༢ དབུས་ཕྱོགས་ཀྱི་ཚོམ་བུའི་དཀྱིལ་འཁོར་བསྐྱེད་པ། བྱེ་བྲག་རིགས་ཀྱི་གཙོ་བོ་ཚོམ་བུའི་འཁོར་དང་བཅས་པ་གསལ་འདེབས་པ་དེ་ཉིད་བཤད་པའི་སྐབས་ལས་དཀྱིལ་འཁོར་གྱི་གཙོ་བོ་དབུས་སུ་རྣམ་སྣང་ཡབ་ཡུམ་གསལ་འདེབས་པ་ནི། ཧཱུྃ༔ རྣམ་སྣང་དབྱིངས་ཕྱུག་སྐུ་མདོག་དཀར༔ འཁོར་ལོ་དྲིལ་འཛིན་གཉིས་མེད་འཁྲིལ༔ རང་སྣང་དཀྱིལ་འཁོར་དབུས་ཕྱོགས་སུ༔ སྣང་ལ་རང་བཞིན་མེད་པར་གསལ༔ ཞེས་གསུངས་ཏེ། རྣམ་སྣང་དང་དབྱིངས་ཕྱུག་གི་སྐུ་མདོག་ཅེས་རྣམ་སྣང་གཏི་མུག་མ་སྤངས་གནས་སུ་དག་པའི་སྐུ་མདོག་དཀར་བོ། འདི་ཡང་སྒྱུ་འཕྲུལ་དང་ཁྱད་པར་ཅུང་ཟད་ཡོད་ལ། ཡུམ་ནམ་མཁའ་དབྱིངས་ཀྱི་དབང་ཕྱུག་མ་ཡང་དེ་བཞིན་དུ་ནང་གི་སེམས་དང་ཕྱིའི་ནམ་མཁའ་མ་སྤངས་གནས་སུ་དག་པའི་སྐུ་མདོག་དཀར་མོ། ཡབ་ཀྱི་ཕྱག་གཡས་པས་དབང་སྒྱུར་གྱི་འཁོར་ལོ་རྩིབས་བརྒྱད་པ་ཐུགས་ཀར་འཛིན་ཅིང་། ཕྱག་མཚན་འདི་ཚོ་ཡང་སྒྱུ་འཕྲུལ་དང་ཁྱད་པར་མི་འདྲ་བ་ཅུང་ཟད་རེ་ཡོད་ཀྱང་ཁྱད་པར་ཆེན་པོ་དོན་ལ་མེད་དོ། །གཡོན་སྟོང་འཛིན་དག་པའི་ཤེས་རབ་ཀྱི་དྲིལ་བུ་དང་བཅས་ཏེ་ཡུམ་ལ་འཁྱུད་པ། ཡུམ་གྱི་ཕྱག་མཚན་ཡབ་དང་འདྲ་བར་གཡས་གཡོན་གོ་ལྡོག་སྟེ་བསྣམས་པ་འོག་མ་རྣམས་ཀྱང་འདྲ་ལ། སྒྱུ་འཕྲུལ་གྱི་ནང་དུ་ཕྱག་མཚན་བསྣམ་ལུགས་ཡབ་དང་འདྲའོ། །གསལ་འདེབས་ལུགས་སྣང་ལ་རང་བཞིན་མེད་པ་མ་འགགས་འཇའ་ཚོན་བཞིན་དུ་སྣང་ཞིང་། སྟོང་གསལ་སྒྲིབ་གཡོགས་དང་བྲལ་བ་འོད་ལུས་ཡེ་ཤེས་ཀྱི་སྙིང་པོ་ཅན་འདིའི་འོག་ནས་ཀྱང་ཐམས་ཅད་དེ་ལྟར་དུ་གསལ་འདེབས་དགོས་སོ། །བསྐྱེད་ཆོག་རྒྱས་པ་ལྟར་དུ་བྱས་ན་འདིའི་སྐབས་སུ་ས་བོན་སོ་སོར་བསྐྱེད་པ་རྐྱེན་གྱི་སྔགས་དང་སྦྲེལ་ནས་འབྱུང་བ་ཞིག་ཡིན་ཡང་འདི་ནས་མི་འབྱུང་བའི་རྒྱུ་མཚན་ནི་ལས་བྱང་ཆུང་བ་འདི་གཙོ་བོ་ཐོལ་བསྐྱེད་ཡིན་ཞེས་བཤད་ཟིན་པའི་རྒྱུ་མཚན་གྱིས་ཡིན་ནོ།། ༣ ཤར་ཕྱོགས་ཀྱི་ཚོམ་བུའི་དཀྱིལ་འཁོར་བསྐྱེད་པ། ད་ནི་ཤར་ཕྱོགས་ཀྱི་ཚོམ་བུའི་དཀྱིལ་འཁོར་ནི། ཧཱུྃ༔ རྡོར་སེམས་སྤྱན་མ་སྐུ་མདོག་མཐིང་༔ རྡོ་རྗེ་དྲིལ་འཛིན་གཉིས་མེད་འཁྲིལ༔ གཡས་སུ་ས་སྙིང་མྱུ་གུ་དཀར༔ གཡོན་དུ་བྱམས་པ་ཀླུ་ཤིང་དཀར༔ མདུན་དུ་ལཱ་སྱེ་མེ་ལོང་དཀར༔ རྒྱབ་ཏུ་པུཥྤེ་མེ་ཏོག་དཀར༔ རྡོ་རྗེ་རིགས་ཀྱི་གཙོ་འཁོར་དྲུག༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་གསུངས་ཏེ། ཤར་ཕྱོགས་ཀྱི་དཀྱིལ་འཁོར་གྱི་གཙོ་བོ་རྡོར་སེམས་སམ་མི་བསྐྱོད་པ་ཞེ་སྡང་མ་སྤངས་གནས་སུ་དག་པའི་འགྱུར་བ་མེད་པའི་སྐུ་མདོག་མཐིང་ཁ་ནམ་མཁའི་མདོག་ཅན། ཕྱག་གཡས་པས་ཐབས་འགྱུར་བ་མེད་པའི་རྡོ་རྗེ་རྩེ་ལྔ་བ་བསྣམས་པ། ཕྱག་གཡོན་པས་སྟོང་པ་ཉིད་ཀྱི་དྲིལ་བུ་དང་བཅས་ཏེ་ཡུམ་ལ་འཁྱུད་པ། ཡུམ་སངས་རྒྱས་སྤྱན་མ་ཆ་ལུགས། སྐུ་མདོག ཕྱག་མཚན་ཡབ་དང་འདྲ་བར་མཉམ་པར་སྦྱོར་ཞིང་གཉིས་མེད་དུ་འཁྲིལ་བ་དེ་རིགས་ཀྱི་གཙོ་བོ་ཡིན་ནོ། །འདི་འཁོར་གྱི་ནང་དུ་བསྡུ་དུས་རང་བཞིན་གཉིས་སུ་མེད་པའི་འཁོར་ཞེས་པ་དེ་ཡིན་ལ། གཙོ་བོ་ལ་ལྟོས་ན་རང་བཞིན་ཐ་མི་དད་པ་དང་འཁོར་ལ་ལྟོས་ན་རིགས་ཀྱི་གཙོ་བོ་ཡིན་ཞིང་། ཡིན་ན་ཡང་གཙོ་འཁོར་ཡོངས་རྫོགས་དཀྱིལ་འཁོར་གཅིག་ཏུ་འདུས་པ་ནི་ངེས་དོན་རྫོགས་རིམ་ལྟར་ན་རིག་པ་གཅིག་གི་སྤྲོ་བསྡུ་ལས་མ་འདས་པའི་སྟབས་ཀྱིས་ཡིན་ནོ། །རྒྱལ་སྲས་སེམས་དཔའ་སེམས་མའི་འཁོར་གཡས་སུ་ས་སྙིང་མྱུ་གུ་དཀར་ལ་སོགས་པས་བསྟན་ན་གཡས་སུ་བྱང་ཆུབ་སེམས་དཔའ་ས་ཡི་སྙིང་པོ་ཡིན་ཞིང་། འདི་ནས་མཐོང་། ཐོས། སྣོམ། མྱོང་བ་བཞི་བོ་དེ་ས་སྙིང་། བྱམས་པ། ཀུན་ཏུ་བཟང་པོ། ནམ་སྙིང་བཞི་བོ་དང་སྦྱར་ནས་བཤད་སྐབས་མིག་གི་རྣམ་ཤེས་མ་སྤངས་གནས་སུ་དག་པས་མཐོང་བ་རྣམ་པར་དག་པ་ས་སྙིང་སྐུ་མདོག་དཀར་པོ། ཡེ་ཤེས་ཀྱི་མྱུ་གུ་སྐྲུན་པར་བྱེད་པའི་བརྡ་རུ་རིན་པོ་ཆེའི་མྱུ་གུ་འཛིན་པ་ཞིག་ཡིན་ལ། གཡོན་དུ་རྣ་བའི་རྣམ་ཤེས་མ་སྤངས་གནས་སུ་དག་པ་བྱང་ཆུབ་སེམས་དཔའ་བྱམས་པ། དེ་ཉིད་ཐོས་པ་རྣམ་པར་དག་པ་ཕྱག་ན་ཉོན་མོངས་པའི་ཚ་གདུང་སེལ་བར་བྱེད་པའི་ཀླུ་ཤིང་བསྣམས་པ་སྐུ་མདོག་དཀར་པོ་ཅན། བྱང་ཆུབ་སེམས་དཔའ་གཉིས་ཀའི་ཕྱག་གཡོན་པས་སྟོང་ཉིད་ཤེས་རབ་ཀྱི་སྒྲ་དབྱངས་སྒྲོག་པའི་དྲིལ་བུ་འཛིན་པ། འཁོར་འདས་མཉམ་པར་རོལ་བའི་བརྡ་རུ་པད་ཉི་ཟླ་བའི་གདན་ལ་བཞུགས་པ་དང་། སྲིད་དང་ཞི་བའི་མཐའ་གཉིས་དག་པའི་ཞབས་སེམས་དཔའི་སྐྱིལ་ཀྲུང་གིས་བཞུགས་པ། འདི་མན་ཆད་སེམས་དཔའ་ཐམས་ཅད་གཅིག་མཚུངས་ཡིན་ནོ། །གཙོ་བོའི་མདུན་དུ་གཟུགས་སྣང་མ་སྤངས་གནས་སུ་དག་པ་སེམས་མ་ལཱ་སྱེ་མ་སྐུ་མདོག་དཀར་བོ་ཕྱག་ན་གཟུགས་ཀྱི་གསལ་སྣང་དག་པའི་ཕྱིར་དུ་མེ་ལོང་བསྣམས་པ། རྒྱབ་ཏུ་སེམས་མ་པུཥྤེ་མ་ཕྱག་ན་མེ་ཏོག་བསྣམས་པ། པཥྤེ་མ་ནི་འདས་པའི་རྟོག་པ་དག་ཅིང་བྱང་ཆུབ་ཀྱི་ཡན་ལག་མཚོན་པའི་མེ་ཏོག་ཕྱག་ན་བསྣམས་པ་སྐུ་མདོག་དཀར་པོ། པད་ཉི་ཟླ་བའི་གདན་ལ་སེམས་མའི་སྐྱིལ་ཀྲུང་གིས་བཞུགས་པ། འདིའི་སེམས་དཔའ་དང་སེམས་མའི་སྐྱིལ་ཀྲུང་གི་ཁྱད་པར་ནི་གཡས་བརྐྱངས་གཡོན་བསྐུམས་ཀྱི་ཁྱད་པར་ཡོད་ཅིང་། གཡས་གཡོན་བརྐྱངས་བསྐུམས་ཀྱི་ཁྱད་པར་ནི་ཡབ་རྣམས་ཀྱིས་གཡས་དང་ཡུམ་རྣམས་ཀྱིས་གཡོན་བརྐྱངས་པའི་ཕྱེད་སྐྱིལ། འདི་ད་རུང་གཞན་དོན་གྱི་མཛད་པ་མ་རྫོགས་པའམ་གཞན་དོན་གྱི་མཛད་པ་ལྷུར་བཞེས་པའི་བརྡ་རྟགས་སུ་སེམས་དཔའ་དང་སེམས་མའི་སྐྱིལ་ཀྲུང་གིས་བཞུགས་པ་ཡིན་ནོ། །དེ་ལྟ་བུ་ཐུགས་རྡོ་རྗེ་རིགས་ཀྱི་གཙོ་འཁོར་དྲུག་གཙོ་བོ་ཡབ་ཡུམ་གཉིས་འཁོར་སེམས་དཔའ་སེམས་མ་ཡབ་ཡུམ་བཞི་དང་དྲུག་པོ་དེ་མ་ཡེངས་ཡིད་ཀྱི་ཡུལ་དུ་གདོས་བཅས་ཟག་པ་ཅན་གྱི་སྙིགས་མ་ལྔ་དག་ནས་དྭངས་གསལ་འགག་པ་མེད་པའི་ཡེ་ཤེས་ལྔའི་གདངས་སྣ་ཚོགས་འོད་ལྔར་གསལ་ཞིང་འཚེར་བའི་ཀློང་ན་སྐུ་སྣང་སྟོང་གསུང་གྲག་སྟོང་ཐུགས་བདེ་སྟོང་ཡེ་ཤེས་ཀྱི་ངོ་བོར་འདུག་པའི་གཟུགས་སྐུ་མཚན་དཔེའི་བདག་ཉིད་སྣང་ལ་རང་བཞིན་མེད་པར་གསལ་བར་བསྒོམ་དགོས་གསུངས་སོ། །ལས་བྱང་ཆེ་བ་དང་འདྲ་བར་ཡབ་ཡུམ་གྱི་ཐུགས་ཀ་ནས་རྒྱུའི་ས་བོན་གྱི་ཡི་གེ་འཕྲོས་ནས་དེ་ཡོངས་སུ་གྱུར་པ་མེད་པ་ནི་སྐད་ཅིག་དྲན་རྫོགས་སུ་ཐོལ་བསྐྱེད་ཀྱི་བསྐྱེད་རིམ་གསལ་འདེབས་ཀྱི་ཁྱད་པར་ཡིན་ཚུལ་གོང་ནས་ཞུས་པ་ལྟར་དུ་ཡིན་ནོ།། ༤ ལྷོ་ཕྱོགས་ཀྱི་ཚོམ་བུའི་དཀྱིལ་འཁོར་བསྐྱེད་པ། དཀྱིལ་འཁོར་གྱི་རིགས་ཀྱི་ཚོམ་བུ་གཉིས་པ་ནི། ཧཱུྃ༔ རིན་འབྱུང་མཱ་ཀི་སྐུ་མདོག་སེར༔ རིན་ཆེན་དྲིལ་འཛིན་གཉིས་མེད་འཁྲིལ༔ གཡས་སུ་ཀུན་བཟང་སྙེ་མ་སེར༔ གཡོན་དུ་ནམ་སྙིང་རལ་གྲི་སེར༔ མདུན་དུ་མཱ་ལེ་ཕྲེང་འཛིན་སེར༔ རྒྱབ་ཏུ་དྷཱུ་པེ་སྤོས་ཕོར་སེར༔ རིན་ཆེན་རིགས་ཀྱི་གཙོ་འཁོར་དྲུག༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་གསུངས་ཏེ། ཚོར་བའི་ཕུང་པོ་དག་པ་རིན་ཆེན་འབྱུང་ལྡན། ང་རྒྱལ་མ་སྤངས་གནས་སུ་དག་པ་སྐུ་མདོག་སེར་བོ། ཕྱག་གཡས་པས་རང་རྟགས་ནོར་བུ་རིན་པོ་ཆེ་དང་། གཡོན་པས་དྲིལ་བུ་སྤྱི་མཚུངས་ཀྱིས་བསྣམས་པ། ཡུམ་མཱ་མ་ཀཱི་ཡང་རིན་པོ་ཆེ་དང་དྲིལ་བུ་འཛིན་པ་དང་གཉིས་མེད་དུ་འཁྲིལ་བའོ། །སྣོམ་བྱེད་སྣ་ཡི་རྣམ་ཤེས་མ་སྤངས་གནས་སུ་དག་པ་གཡས་སུ་བྱང་ཆུབ་སེམས་དཔའ་ཀུན་ཏུ་བཟང་པོ་སེམས་ཅན་གྱི་རེ་བ་སྐོང་བའི་རིན་པོ་ཆེའི་སྙེ་མ་འཛིན་པ། གཡོན་དུ་མྱོང་བྱེད་ལྕེ་ཡི་རྣམ་ཤེས་མ་སྤངས་གནས་སུ་དག་པ་བྱང་ཆུབ་སེམས་དཔའ་ནམ་མཁའི་སྙིང་པོ་ཉོན་མོངས་དུག་གསུམ་གྱི་རྒྱུན་གཅོད་པའི་རལ་གྲི་འཛིན་པ། སེམས་མ་མཱ་ལེ་དང་དྷཱུ་པེ་གཉིས་ཏེ་ཆོས་ཅན་གྱི་རྟོག་པ་དག་པའི་ཕྲེང་བ་དང་དྲིའི་ཞེན་པ་དག་པའི་སྤོས་ཕོར་བསྣམས་པ། དེ་ལྟ་བུའི་རིན་ཆེན་རིགས་ཀྱི་གཙོ་འཁོར་རྣམ་པ་དྲུག་པོ་དེ་ཡང་དེ་ལྟར་དུ་མ་ཡེངས་ཡིད་ཡུལ་གསལ་བར་བསྒོམ་གསུངས་སོ།། ༥ ནུབ་ཕྱོགས་ཀྱི་ཚོམ་བུའི་དཀྱིལ་འཁོར་བསྐྱེད་པ། ཡང་ནུབ་ཕྱོགས་ཀྱི་ཚོམ་བུའི་ལྷ་ཚོགས་ནི། ཧཱུྃ༔ མཐའ་ཡས་གོས་དཀར་སྐུ་མདོག་དམར༔ པདྨ་དྲིལ་འཛིན་གཉིས་མེད་འཁྲིལ༔ གཡས་སུ་སྤྱན་གཟིགས་པད་འཛིན་དམར༔ གཡོན་དུ་འཇམ་དཔལ་རལ་གྲི་དམར༔ མདུན་དུ་གཱིརྟི་པི་ཝང་དམར༔ རྒྱབ་ཏུ་ཨཱ་ལོ་མར་མེ་དམར༔ པདྨ་རིགས་ཀྱི་གཙོ་འཁོར་དྲུག༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་གསུངས་ཏེ། འདུ་ཤེས་ཀྱི་ཕུང་པོ་དག་ཅིང་འདོད་ཆགས་མ་སྤངས་གནས་སུ་དག་པ་སྣང་བ་མཐའ་ཡས་ཡིན་ལ། ཕྱག་གཡས་པས་མ་ཆགས་པདྨའི་རང་རྟགས་ཀྱི་ཕྱག་མཚན་དང་གཡོན་ན་དྲིལ་བུ་བསྣམས་པ། ཡུམ་ཆེན་གོས་དཀར་མོ་དང་མཉམ་པར་སྦྱོར་བ། གཡས་སུ་བྱང་ཆུབ་སེམས་དཔའ་སྤྱན་རས་གཟིགས་སྐྱོན་གྱིས་མ་གོས་པའི་བརྡ་རུ་པདྨ་བསྣམས་པ། གཡོན་དུ་འཇམ་དཔལ་གཏི་མུག་རྨོངས་པ་སྐྱོབ་པའི་རལ་གྲི་བསྣམས་པ། མདུན་དུ་ཡུམ་སེམས་མ་གཱིརྟི་མ་སྒྲ་གནས་སུ་དག་པའི་པི་ཝང་དང་། རྒྱབ་ཏུ་ཨཱ་ལོ་མའམ་མར་མེ་མ་ནི་མ་འོངས་པའི་རྟོག་པ་གནས་སུ་དག་པའི་མར་མེ་བསྣམས་པ་སྟེ་པདྨ་རིགས་ཀྱི་གཙོ་འཁོར་དྲུག་པོ་ཡིན་ནོ།། ༦ བྱང་ཕྱོགས་ཀྱི་ཚོམ་བུའི་དཀྱིལ་འཁོར་བསྐྱེད་པ། བྱང་ཕྱོགས་ཀྱི་ཚོམ་བུའི་དཀྱིལ་འཁོར་དུ། ཧཱུྃ༔ དོན་གྲུབ་སྒྲོལ་མ་སྐུ་མདོག་ལྗང་༔ རྒྱ་གྲམ་དྲིལ་འཛིན་གཉིས་མེད་འཁྲིལ༔ གཡས་སུ་སྒྲིབ་སེལ་པོ་ཏི་ལྗང་༔ གཡོན་དུ་ཕྱག་རྡོར་རྡོར་འཛིན་ལྗང་༔ མདུན་དུ་གྷན་དྷེ་དུང་ཕོར་ལྗང་༔ རྒྱབ་ཏུ་ནིརྟི་ཞལ་ཟས་ལྗང་༔ ལས་ཀྱི་རིགས་ཀྱི་གཙོ་འཁོར་དྲུག༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་གསུངས་ཏེ། འདུ་བྱེད་ཀྱི་ཕུང་པོ་དག་ཅིང་ཕྲག་དོག་མ་སྤངས་གནས་སུ་དག་པ་དོན་ཡོད་གྲུབ་པ། ཕྱག་གཡས་པས་ལས་བཞི་ལྷུན་གྱིས་གྲུབ་པའི་རང་རྟགས་རྡོ་རྗེ་རྒྱ་གྲམ་གྱི་ཕྱག་མཚན་དང་གཡོན་པས་དྲིལ་བུ་བསྣམས་པ། ཡུམ་ཆེན་དམ་ཚིག་སྒྲོལ་མ་དང་མཉམ་པར་སྦྱོར་བ། གཡས་སུ་སེམས་དཔའ་སྒྲིབ་པ་རྣམ་སེལ་ཉོན་མོངས་ཆོས་ཉིད་དུ་མཁྱེན་པའི་པོ་ཏི་བསྣམས་པ། གཡོན་དུ་ཕྱག་ན་རྡོ་རྗེ་བདུད་དང་ཉོན་མོངས་འཇོམས་པའི་རྡོ་རྗེ་བསྣམས་པ། མདུན་དུ་སེམས་མ་གྷན་དྷེ་མ་ད་ལྟའི་རྟོག་པ་དག་པའི་དྲི་ཡིས་གང་བའི་དུང་ཕོར་བསྣམས་པ། རྒྱབ་ཏུ་ནིརྟི་མ་རོ་དག་པའི་ཞལ་ཟས་བསྣམས་པ། དེ་ལྟ་བུའི་ལས་ཀྱི་རིགས་ཀྱི་གཙོ་འཁོར་དྲུག་པོ་དེ་ཡང་མ་ཡེངས་ཡིད་ཡུལ་གསལ་བར་བསྒོམ་པའི་གསལ་འདེབས་བརྗོད་པ་ཚིག་གི་སྒོ་ཡིན་ནོ། །འདིའི་ཤར་ལྷོ་ནུབ་བྱང་གི་ཚོམ་བུ་བཞིའི་ལྷ་ཚོགས་ཀྱི་སྐུ་མདོག་གཞུང་ཚིག་ཏུ་བུད་པ་ལྟར་ལས་བཞིའི་ཁ་དོག་གམ་ཡེ་ཤེས་ཀྱི་རང་འོད་དང་འབྲེལ་བའི་དཀར་སེར་དམར་ལྗང་བཞི་ཡིན་ཞིང་། དེའི་སྟེང་དུ་དབུས་མཐིང་ཁ་བསྣན་ན་ལྔ་ཡིན་ལ། འདི་རིགས་ཀྱི་མཚན་མར་གྱུར་པ་སྤྱིའི་ཁ་དོག་ཡིན་ནོ། །ཆོས་ཉིད་མི་འགྱུར་བའི་བརྡར་ཆོས་དབྱིངས་ཡེ་ཤེས་དང་རྡོ་རྗེའི་རིགས་མཐིང་ཁ། ཉེས་པའི་སྐྱོན་གྱིས་མ་གོས་པའི་བརྡ་རུ་མེ་ལོང་ཡེ་ཤེས་དང་དེ་བཞིན་གཤེགས་པའི་རིགས་དེ་དཀར་པོ། ཆེ་བའི་ཡོན་ཏན་རྒྱས་པའི་བརྡ་རུ་མཉམ་ཉིད་ཡེ་ཤེས་དང་རིན་ཆེན་གྱི་རིགས་དེ་སེར་པོ། གདུལ་བྱར་རྗེས་སུ་ཆགས་པའི་བརྡ་རུ་སོར་རྟོག་ཡེ་ཤེས་དང་པདྨའི་རིགས་དེ་དམར་པོ། སེམས་ཅན་གྱི་དོན་འབད་མེད་ལྷུན་གྱིས་གྲུབ་པའི་བརྡ་རུ་བྱ་གྲུབ་ཡེ་ཤེས་དང་ལས་ཀྱི་རིགས་ཀྱི་ཁ་དོག་དེ་ལྗང་གུ་ཡིན་ནོ། །ལྗང་གུ་སྣ་ཚོགས་མདོག་ཅན་ལས་བཞི་ལྷུན་གྱིས་གྲུབ་པའི་བརྡ་ཡིན་ལ། ཡང་རིགས་འདྲེས་ཀྱི་ཁ་དོག་ཀྱང་ཡོད་དོ། དབྱིངས་ཕྱུག་དཀར་དམར་ཞེས་པ་ལྟ་བུ་དང་། སྤྱན་མ་མཐིང་སྐྱ་ཞེས་པ་ལྟ་བུ་དང་། མཱ་ཀི་སེར་སྐྱ། ཀུན་བཟང་མ་དམར་སེར་ཏེ་དེ་དག་རྣམས་ཡིན་ནོ། །འདི་ངོ་མས་བཤད་ན་ཡན་ལག་གི་ཁ་དོག་ཡིན་ཞིང་། དཀར་དམར་ལ་མཚོན་ན་དཀར་བོ་དང་དམར་བོ་འདྲེས་སོང་བ་དང་། མཐིང་སྐྱ་ཞེས་པ་མཐིང་ཁ་དང་དཀར་བོ་འདྲེས་སོང་བ་དེ་ལྟར་ཡིན་ལ། འདི་ཚོ་ཞིབ་ཏུ་སྒོམ་ཁོག་རྒྱས་པ་དང་། དབང་གི་ངོ་སྤྲོད་དང་། དག་སྦྱོར་རྣམས་ཀྱི་ནང་ན་གསལ་བོ་ཡོད་དོ།། ཞི་བའི་ལྷ་ཚོགས་དེ་རྣམས་ཀྱང་༔ ལོངས་སྤྱོད་རྫོགས་སྐུའི་ཆས་རྣམས་རྫོགས༔ སྣང་ལ་རང་བཞིན་མེད་པར་གསལ༔ འཛིན་མེད་མ་བཅོས་རང་གསལ་བསྒོམ༔ ཞེས་གསུངས་ཏེ། དེ་ལྟར་ཀུན་བཟང་ཡབ་ཡུམ་ལ་སོགས་པ་རིགས་ལྔ་ཞི་བའི་ལྷ་ཚོགས་སེམས་དཔའ་སེམས་མ་དང་བཅས་པ་དེ་དག་ཐམས་ཅད་ཀྱང་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་བརྒྱན་ཏེ་སྐུ་ལ་རྫོགས་ཤིང་། རྒྱན་ཆས་བཅུ་གསུམ་དེ་ལ་བརྩི་ལུགས་འདྲ་དང་མི་འདྲ་ཅུང་ཟད་རེ་ཡོད་ཀྱང་རང་ལུགས་ལྟར་དུ་རང་རེས་བློ་ལ་འཛིན་བདེ་བའི་ཆེད་དུ་སྡོམ་ཚིག་བྱས་ན། དར་གྱི་སྟོད་གཡོག་སྨད་དཀྲིས་དང་། །ཅོ་པན་ཟི་ལྡིར་གར་དུང་མ། །ཞེས་དར་གྱི་ཆས་གོས་ལྔ་དང་། མགུལ་རྒྱན་དོ་ཤལ་སེ་མོ་དོ། །ཕྱག་གདུབ་ཞབས་གདུབ་སྐ་རགས་བརྒྱད། །ཅེས་རིན་པོ་ཆེའི་རྒྱན་བརྒྱད་དང་དེའི་སྟེང་དུ་དར་གྱི་ཆས་གོས་ལྔ་ཡིས་ལོངས་སྐུའི་རྒྱན་ཆས་བཅུ་གསུམ་བརྩིའོ། །ཟི་ལྡིར་ཞེས་པ་དེ་རྣ་ལྟག་གི་དར་དཔྱངས་ལ་ཟེར། སེ་མོ་དོ་དང་དོ་ཤལ་གཉིས་ཀྱི་ཁྱད་པར་ནི་རིན་པོ་ཆེའི་ཕྲེང་བས་མགུལ་ནས་ལྟེ་འོག་ཡན་ཆད་སླེབས་པ་དེ་དོ་ཤལ། ནུ་མའི་བར་དུ་སླེབས་པ་དེ་སེ་མོ་དོ་ཡིན་ནོ། །བཞུགས་ཚུལ་གྱི་ཐད་ཀྱི་རིགས་ལྔ་ཡབ་ཐམས་ཅད་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་མཉམ་པར་བཞུགས་པ་ཡིན་ལ། ཡུམ་རྣམས་ཀྱིས་བརྟུལ་ཞུགས་ཀྱི་སྐྱིལ་མོ་ཀྲུང་དང་། སེམས་དཔའ་སེམས་མ་རྣམས་གོང་ནས་ཀྱང་བཤད་པ་བཞིན་དེ་ལྟར་ཡིན་ནོ། །ཞི་བའི་ལྷ་ཚོགས་དེ་ཐམས་ཅད་ཞི་བའི་ཚུལ་དགུ་དང་ལྡན་པར་བསྒོམ་དགོས་ཤིང་། ཞི་བའི་ཚུལ་དགུ་ནི། མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བརྗིད་འབར། །ཞེས་པ་འུ་ཚོའི་བློ་ལ་ཡོད་པ་བཞིན་ཞི་བའི་ཚུལ་དགུ་དེ་ལྟར་ཡིན་ལ། སྐྱེ་བ་གནས་སུ་དག་པས་སྐུ་ཤ་མཉེན་ཤ་ཆགས་པ། ན་བ་གནས་སུ་དག་པས་དཀུ་སྐབས་ཕྱེད་ཅིང་རིམ་པ་འཚམས་ཤིང་ལྕུག་པ། འཆི་བ་གནས་སུ་དག་པས་སྐུ་ལྷོད་པོར་མ་གྱུར་པར་འཁྲིལ་བག་ཆགས་པ་དྲང་ཞིང་ལྡེམ་པ། རྒ་བ་གནས་སུ་དག་པས་ན་སྐུ་འཇམ་ཞིང་གཞོན་ཤ་ཆགས་པའི་ངང་ཚུལ་ཅན། མཉེན་ལྕུག་འཁྲིལ་ལྡེམ་གཞོན་ཚུལ་ལྔ་བོ་ལ་ངོ་བོའི་ཡོན་ཏན་ལྔ་ཞེས་བྱ་ལ། དེའི་ཐོག་ཏུ་མཚན་བཟང་གི་མེ་ཏོག་ལ་དཔེ་བྱད་ཀྱི་འབྲས་བུས་བརྒྱན་པའི་སྐུ་གཙང་ཞིང་ཁ་དོག་གསལ་བ་དང་། ཟད་པ་ཡི་ཏིང་ངེ་འཛིན་རྫོགས་པས་བཀྲག་ཅིང་འཚེར་བ། བརྗིད་ཅིང་ཡིད་དུ་འོང་བས་ལྷུན་སྟུག་པ། གདུལ་བྱ་ང་རྒྱལ་ཅན་རྣམས་ཟིལ་གྱིས་གནོན་པའི་གཟི་བརྗིད་དེ་རྣམ་པའི་ཡོན་ཏན་བཞི་དང་དགུ་བོ་དེ་ཞི་བའི་ཚུལ་དགུ་ཡིན་ནོ། །འདིའི་སྐབས་སུ་གོ་བ་གལ་ཆེན་ཞིག་ལ་ཕུང་ལྔ་གནས་དག་རྒྱལ་བ་རིགས་ལྔ་ཡིན་ཞིང་། འབྱུང་ལྔ་གནས་དག་དབྱིངས་ཀྱི་ཡུམ་ལྔ་ལ་སོགས་པ་དག་སྦྱོར་དང་སྦྲེལ་ནས་བཤད་པའི་སྐབས་སུ་མ་དག་འཁོར་བའི་ཆོས་ཅན་གྱི་ཕུང་ལྔ་ལ་སོགས་པ་རིགས་ལྔའི་རྒྱལ་བ་སོགས་ཡིན་གསུངས་པ་མ་ཡིན་ལ། མེད་སྣང་འཁོར་བའི་རྟོག་ཚོགས་གློ་བུར་གྱི་འཁྲུལ་སྣང་དེ་སྦྱང་བྱ་ཡིན་པ་དང་། དེ་སྦྱང་བའི་ཆེད་དུ་སྦྱང་བྱ་སྦྱོང་བྱེད་འབྲེལ་ནས་གསུངས་པ་དེ་མངོན་ཞེན་ལྷ་རྟོག་དབྱེར་མེད་ཀྱི་ཤེས་རབ་སྐྱེས་པ་ལ་ཁ་དྲང་བའི་ཐབས་སུ་གསུངས་པ་ཡིན་ནོ། །འོན་ཀྱང་ཕུང་སོགས་མིན་པའི་རིགས་ལྔ་ཟུར་ན་ཡང་མེད་ལ། རང་བཞིན་གཉུག་མའི་ཕུང་པོ་ཡེ་ནས་རིགས་ལྔའི་སངས་རྒྱས་སུ་རྣམ་པར་དག་པ་དེ་ཉིད་ལམ་བསྒོམས་ནས་མངོན་དུ་གྱུར་པ་དེ་ལ་འབྲས་བུ་ཞེས་པ་ལས་གཞན་དུ་བཙོག་པ་ཞེས་པ་ཞིག་སོ་སོ་བ་མེད་དོ། །དཔེར་བཞག་ན་མིག་ནད་ཅན་གྱིས་མིག་ནད་སྦྱངས་ནས་དྲག་ཚར་རྗེས་དུང་རིག་ཚད་ཐམས་ཅད་དཀར་བོ་ཡིན་ལ། དང་པོར་འཁྲུལ་ཤེས་སེར་པོར་སྣང་བ་ལས་ཁ་ཁ་ཞིག་ན་སྡུག་པོ་ཞིག་ཟུར་དུ་ལྷག་མེད་པ་དེ་འདྲ་བའི་གོ་དོན་ཡིན་ནོ། །སྐུ་དང་རྒྱན་གྱི་རྣམ་པ་བྱེ་བྲག་པ་དང་ལྡན་པ་དེ་དག་ཐམས་ཅད་ངོ་བོ་ཆོས་སྐུའི་ཡེ་ཤེས། རོལ་བ་ཐུགས་རྗེའི་འཆར་སྒོ་སྣ་ཚོགས་མ་འགགས་པ་སྣང་ལ་རང་བཞིན་མེད་པར་གསལ་ཞིང་། བློས་ཆེད་འཛིན་གྱི་རྟོག་པ་མེད་པར་སྣང་སྟོང་ཟུང་འཇུག་གི་རང་བཞིན་མ་བཅོས་བློ་འདས་ཀྱི་ངང་ནས་རང་ཤར་བ་གསལ་བརྟན་གྱི་ཚད་བརྒྱད་ན་ནིང་སྔོན་མ་ཞིག་ནས་མང་དུ་བཤད་མྱོང་བ་དེ་བཞིན་དུ་གསལ་བརྟན་གྱི་ཚད་བརྒྱད་དང་ལྡན་པས་སྐུའི་བ་སྤུ་རེ་རེ་དང་སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་ཞིང་སྐུ་ལས་འོད་ཟེར་དྲུག་ཕྲག་དྲུག་ཕྱོགས་བཅུར་འཕྲོས་པའི་སྣང་བས་ཕྱོགས་བཅུ་རབ་འབྱམས་ཞིང་ཁམས་ཁྱབ་པར་བསྒོམ་དགོས་སོ།། ༣༽ འགྲོ་འདུལ་སྤྲུལ་བའི་འཁོར་བསྐྱེད་པ། འགྲོ་འདུལ་སྤྲུལ་བའི་འཁོར་ཐུབ་པ་དྲུག་བསྒོམ་པ་ནི། ཧཱུྃ༔ སྟེང་དུ་བརྒྱ་བྱིན་པི་ཝང་དཀར༔ འོག་ཏུ་ཆོས་རྒྱལ་མེ་ཆུ་ནག༔ ཤར་ལྷོར་ཐགས་བཟང་གོ་མཚོན་ལྗང་༔ ལྷོ་ནུབ་ཤཀ་ཐུབ་གསེག་ཤང་སེར༔ ནུབ་བྱང་སེང་གེ་པོ་ཏི་མཐིང་༔ བྱང་ཤར་ཁ་འབར་སྒྲོམ་བུ་དམར༔ འགྲོ་དོན་མཛད་པའི་ཐུབ་པ་དྲུག༔ པད་རྐྱང་སྟེང་ན་བཞེངས་སྟབས་གསལ༔ ཞེས་གསུངས་ཏེ། འདིའི་སྟེང་འོག་གཉིས་ཀ་ཤར་ནུབ་གཉིས་དང་དེ་མིན་བཞི་མཚམས་བཞི་ལ་བཞག་དགོས་སོ། །སྟེང་ངམ་ཤར་གྱི་པད་འདབ་ལ་ང་རྒྱལ་མ་སྤངས་གནས་སུ་དག་པ་ལྷའི་ཐུབ་པ་དབང་པོ་བརྒྱ་བྱིན། ལྷའི་འཕོ་ལྟུང་གི་སྡུག་བསྔལ་དག་པའི་ཆེད་དུ་ཕྱག་ན་པི་ཝང་བསྣམས་པ། པི་ཝང་གི་སྒྲ་ཆོས་ཀྱི་སྡོམ་བཞི་རུ་གྲག་སྟེ་ལྷའི་ང་རྒྱལ་འཇོམས་པ། གཡེང་བའི་དྲི་མ་དག་པས་ན་སྐུ་མདོག་དཀར་བོ་ཡིན་ནོ། །འོག་ཏུ་ཞེ་སྡང་མ་སྤངས་གནས་སུ་དག་པ་དམྱལ་བའི་ཐུབ་པ་ཆོས་ཀྱི་རྒྱལ་པོ། དམྱལ་བ་ཚ་གྲང་གི་སྡུག་བསྔལ་སེལ་ཆེད་མེ་ཆུ་གཉིས་ཀ་ཕྱག་ན་བསྣམས་པ། ཚ་གྲང་གི་ཉེས་དམིགས་བསྟན་ནས་ཞེ་སྡང་དག་པར་མཛད་ཅིང་། སྡུག་བསྔལ་གྱི་སྡུག་བསྔལ་འཇོམས་པའི་སྐུ་མདོག་ནག་པོ་རུ་སྣང་བ། ཤར་ལྷོ་ན་ཉོན་མོངས་ཕྲག་དོག་མ་སྤངས་གནས་སུ་དག་པ་ལྷ་མིན་གྱི་ཐུབ་པ་ཐགས་བཟང་རིས། ལྷ་མིན་གསོད་གཅོད་ཀྱི་སྡུག་བསྔལ་སེལ་ཆེད་གོ་མཚོན་ཕྱག་ན་བསྣམས་པ། བཟོད་པའི་གོ་ཆས་ཕྲག་དོག་སྦྱོང་བར་མཛད་པའི་ཆོས་སྟོན་པ། འཐབ་རྩོད་ཀྱི་སྡུག་བསྔལ་མཐའ་དག་དག་པའི་སྐུ་མདོག་ལྗང་གུ་ཡིན་ནོ། །ལྷོ་ནུབ་ཏུ་འདོད་ཆགས་མ་སྤངས་གནས་སུ་དག་པ་མིའི་ཐུབ་པ་ཤཱཀྱ་ཐུབ་པ། མིའི་སྐྱེ་རྒ་ན་འཆི་དང་བྲེལ་ཞིང་ཕོངས་པའི་སྡུག་བསྔལ་བསལ་བའི་ཆེད་དུ་གསེག་ཤང་དང་པར་བུ་བསྣམས་གསུངས་ཡོད་ལ། གསེག་ཤང་ཞེས་པ་འཁར་གསིལ་དང་པར་བུ་ཞེས་པ་ལྷུང་བཟེད་ཡིན་ཞིང་། མདོ་སྔགས་ཀྱི་ཆོས་བསྟན་པས་ཆགས་སོགས་ཉོན་མོངས་དང་ལྟ་བ་ངན་པ་དག་པ། རྒ་ན་འཆི་བའི་སྡུག་བསྔལ་དག་པས་སྐུ་མདོག་གསེར་བཙོ་མ་ལྟར་དྭངས་ཤིང་གསལ་བའོ། །ནུབ་བྱང་ན་གཏི་མུག་མ་སྤངས་གནས་སུ་དག་པ་བྱོལ་སོང་གི་ཐུབ་པ་སེང་གེ་རབ་བརྟན། དུད་འགྲོ་གླེན་ལྐུགས་ཀྱི་སྡུག་བསྔལ་དག་བྱེད་དུ་ཆོས་ཀྱི་པོ་ཏི་བསྣམས་ཡོད་པ། ཤེས་རབ་ཀྱི་སྣང་བ་སྤྲོས་པས་རྨོངས་པའི་མུན་པ་འཇོམས་པ། བཀོལ་སྤྱོད་སྡུག་བསྔལ་སོགས་དག་པས་སྐུ་མདོག་མཐིང་ཁ་འགྱུར་བ་མེད་པའི་ཆ་བྱད་དོ། །བྱང་ཤར་དུ་སེར་སྣ་མ་སྤངས་གནས་སུ་དག་པ་ཡི་དྭགས་ཀྱི་ཐུབ་པ་ཁ་འབར་མ། ཡི་དྭགས་བཀྲེས་སྐོམ་གྱི་སྡུག་བསྔལ་སེལ་བྱེད་རིན་པོ་ཆེའི་སྒྲོམ་བུ་བསྣམས་ཡོད་པ། གང་འདོད་ལོངས་སྤྱོད་ཀྱི་གཏེར་ཁ་ཕྱེས་པས་མི་ཟད་འདོད་ཡོན་ལ་སྤྱོད་པ། འཇུར་འགེགས་ཀྱི་སེམས་ཞི་ཞིང་ཕོངས་པའི་སྡུག་བསྔལ་ལས་གྲོལ་བའི་སྐུ་མདོག་དམར་བོར་སྣང་བ་དེ་ལྟར་ཡིན་ནོ། །དེ་ལྟར་འགྲོ་བ་རིགས་དྲུག་གི་གནས་སུ་ཕར་ཕྱིན་དྲུག་གིས་སེམས་ཅན་གྱི་དོན་མཛད་པའི་སྤྲུལ་སྐུ་ཐུབ་པ་དྲུག་པོ་དེ་འགྲོ་བ་སོ་སོའི་གཙོ་བོ་ལ་སོགས་པ་གང་འདུལ་དེར་སྟོན་གྱི་རྣམ་པར་བསྟན་པ་ནི་རྣམ་འགྱུར་ཆ་ལུགས་གཅིག་ཏུ་མ་ངེས་ཀྱང་གདུལ་བྱའི་སྣང་ངོ་ལ་སྤྲུལ་སྐུའི་ཆ་ལུགས་ཅན་དུ་རང་གར་བྲིས་ཆ་ལ་གང་ལ་གང་འདུལ་གྱི་ཐབས་ཀྱིས་བྲིས་པ་ཡིན་ཞིང་། འཁོར་བར་མ་ཆགས་པའི་དབུ་རེག་ཞབས་རྗེན་ངུར་སྨྲིག་གི་ཆས་ཅན་དུ་གསལ་འདེབས་དགོས་ལ། ཚངས་པར་སྤྱོད་པའི་ཆ་ལུགས་སུ་སྣང་བ་དང་། འཁོར་བའི་སྐྱོན་གྱིས་མ་གོས་པའི་བརྡ་རུ་འུ་ཚོ་སྒོམ་མཁན་མི་ཡིན་པས་མིའི་སྣང་ངོ་ལ་སྤྲུལ་སྐུའི་ཆ་བྱད་དུ་བྱོན་པའི་སྤྲུལ་སྐུ་ཤཱཀྱ་ཐུབ་པ་ལྟར་དུ་རིགས་དྲུག་གི་ཐུབ་པ་གཞན་ཡང་དེ་ལྟར་དུ་གསལ་བདེ་བའི་ཆེད་དུ་གསལ་དགོས་སོ། །དེ་རྣམ་པ་པདྨ་རྐྱང་པའི་གདན་གྱི་སྟེང་དུ་འགྲོ་དོན་ལ་སྐྱོ་དུབ་མེད་པར་ཉིན་མཚན་དུས་དྲུག་ཏུ་སེམས་ཅན་ལ་གཟིགས་པའི་བརྡ་རུ་བཞེངས་སྟབས་སུ་མཛད་པའི་ཡེ་ཤེས་སྒྱུ་མའི་སྐུ་ཅན་གྱི་གཟུགས་སྐུར་གསལ་འདེབས་དགོས་སོ། །སངས་རྒྱས་སྤྲུལ་པའི་སྐུའི་ཆ་བྱད་ཅན་ཞིག་ལ་ཕྱག་ན་མཚོན་ཆ་བསྣམས་པ་དེ་ཚོ་གཏན་ནས་མི་འཐད་ཅེས་ལོག་རྟོག་ཅན་དེ་ལྟར་ཡོད་མྱོང་བ་ཡིན་ལ། དེ་ཚོའི་བརྒལ་ལན་ཟུར་ནས་གཟིགས་དང་མཁྱེན་པར་འགྱུར་རོ། །མདོར་བསྡུས་ནས་བཤད་ན་རྫོགས་པ་ཆེན་པོའི་ལུགས་ལ་སངས་རྒྱས་སྤྲུལ་པའི་སྐུ་ལ་རང་བཞིན་སྤྲུལ་པ། འགྲོ་འདུལ་སྤྲུལ་པ། དེའི་སྟེང་དུ་བཟོ་དང་། སྐྱེ་བ། མཆོག་གི་སྤྲུལ་པའི་སྐུ་ཐུན་མོང་གི་བཤད་ཚུལ་ལྟར་དུ་ཡོད་ཅིང་། རང་བཞིན་སྤྲུལ་པ་དེ་ཕྱེད་སྤྲུལ་ལོངས་སྐུ་ལས་དག་པ་སར་གནས་ཀྱི་སེམས་དཔའི་ངོ་ལ་སྣང་བ། འགྲོ་འདུལ་སྤྲུལ་པ་དེ་འགྲོ་དྲུག་གི་གནས་སུ་རང་སྣང་གི་སྟོན་པར་སྣང་ནས་ངོ་བོ་དག་ཅིང་རྣམ་པ་གདུལ་བྱའི་སྣང་བ་ལྟར་དུ་དག་དང་མ་དག་སྣ་ཚོགས་ཀྱི་ཚུལ་དུ་ཐུགས་རྗེའི་རོལ་བར་ཤར་བ་དེ་ཉིད་འདི་ཚད་མེད་ཐུགས་རྗེའི་སྤྲུལ་བ་ཡིན་ཞིང་སྲིད་པ་ཇི་སྲིད་དུ་རྒྱུན་མི་ཆད་པ་དེ་ལྟར་ཡིན་ནོ།། ༤༽ འཇོམས་བྱེད་ཁྲོ་བོའི་འཁོར་བསྐྱེད་པ། ད་ནི་འཇོམས་བྱེད་ཁྲོ་བོའི་འཁོར་བསྐྱེད་པ་ནི། ཧཱུྃ༔ ཤར་སྒོར་རྣམ་རྒྱལ་ལྕགས་ཀྱུ་དཀར༔ ལྷོ་སྒོར་གཤིན་རྗེ་ཞགས་པ་སེར༔ ནུབ་སྒོར་རྟ་མགྲིན་ལྕགས་སྒྲོག་དམར༔ བྱང་སྒོར་བདུད་རྩི་དྲིལ་བུ་ལྗང་༔ ཚད་མེད་བཞི་ལྡན་ཡབ་ཡུམ་བརྒྱད༔ ཁྲོ་བོའི་ཚུལ་རྫོགས་འདོར་སྟབས་བཞུགས༔ ཞི་བ་བཞི་བཅུ་རྩ་གཉིས་ནི༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་གསུངས་ཏེ། དཀྱིལ་འཁོར་ཆེན་པོའི་ཤར་སྒོ་ན་རྟག་པར་ལྟ་བ་མ་སྤངས་གནས་སུ་དག་པ་སྒོ་སྲུང་ཁྲོ་བོ་རྣམ་པར་རྒྱལ་བ། ཁྲོ་མོ་ལྕགས་ཀྱུ་མ་དང་མཉམ་པར་འཁྲིལ་ཡོད་པ། ཡབ་ཀྱིས་འཆི་བདག་གི་བདུད་དབྱིངས་སུ་བཅོམ་པའི་ཐོད་དབྱུག་དང་དྲིལ་བུ་བསྣམས་པ། ཡུམ་གྱིས་སྙིང་རྗེས་འགྲོ་བ་འདྲེན་པའི་བརྡ་རུ་ལྕགས་ཀྱུ་དང་དུང་ཆེན་བྷན་དམར་བསྣམས་ཡོད་པ། ཞབས་འདོར་སྟབས། ཡབ་ཡུམ་གཉིས་ཀ་སྐུ་མདོག་དཀར་བོ་ཡིན་ནོ། །ལྷོ་སྒོ་ལ་ཆད་པར་ལྟ་བ་མ་སྤངས་གནས་སུ་དག་པ་ཁྲོ་བོ་གཤིན་རྗེ་གཤེད། ཁྲོ་མོ་ཞགས་པ་མ་དང་མཉམ་པར་འཁྲིལ་བ། ཡབ་ཀྱིས་ལྷ་བདུད་དབྱིངས་སུ་བཅོམ་པའི་དབྱུག་ཏོ་དང་དྲིལ་བུ་བསྣམས་པ། ཡུམ་གྱིས་བྱམས་པས་རིགས་དྲུག་འཆིང་བའི་ཞགས་པ་དང་དུང་དམར་བསྣམས་པ། ཡབ་ཡུམ་གཉིས་ཀ་སྐུ་མདོག་སེར་བོ་ཡིན་ནོ། །ནུབ་སྒོར་བདག་ལྟ་མ་སྤངས་གནས་སུ་དག་པ་ཁྲོ་བོ་རྟ་མགྲིན་རྒྱལ་པོ། ཁྲོ་མོ་ལྕགས་སྒྲོག་མ་དང་འཁྲིལ་བ། ཡབ་ཀྱིས་ཕྱག་གཡས་པས་ལྕགས་སྒྲོག་བསྣམས་ཡོད་ལ། ཉོན་མོངས་པའི་བདུད་དབྱིངས་སུ་བཅོམ་པའི་ལྕགས་སྒྲོག་ནམ་མཁའ་ལ་ཕྱར་ཡོད་པ། གཡོན་གྱིས་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་གྱིས་དགའ་བ་ཆེན་པོས་འགྲོ་བ་སྡོམ་པའི་ལྕགས་སྒྲོག་དང་དུང་དམར་བསྣམས་པས་ཡབ་ལ་འཁྱུད་པ། ཡབ་ཡུམ་གཉིས་ཀ་སྐུ་མདོག་དམར་བོ་ཡིན་ནོ། །བྱང་སྒོ་ལ་མཚན་མར་ལྟ་བ་མ་སྤངས་དབྱིངས་སུ་དག་པ་ཁྲོ་བོ་བདུད་རྩི་འཁྱིལ་བ། ཁྲོ་མོ་དྲིལ་བུ་མ་དང་མཉམ་པར་འཁྲིལ་བ། ཡབ་ཀྱིས་རྒྱ་གྲམ་བསྣམས་ཡོད་ཅིང་། ཕུང་པོའི་བདུད་དབྱིངས་སུ་བཅོམ་པའི་རྡོ་རྗེ་རྒྱ་གྲམ་དང་དྲིལ་བུ་བསྣམས་པ། ཡུམ་དྲིལ་བུ་མས་བཏང་སྙོམས་ཆེན་པོས་རིགས་དྲུག་མཉེས་པར་མཛད་པའི་དྲིལ་བུ་དང་དུང་དམར་བསྣམས་ནས་ཡབ་ལ་འཁྱུད་པ། དེ་གཉིས་ཀ་སྐུ་མདོག་ལྗང་གུ་ཡིན་ནོ། །སྒོ་བ་ཡབ་ཡུམ་བརྒྱད་འདིས་བདུད་བཞི་འཇོམས་པའི་བརྡ་རུ་ཐོད་དབྱུག་ལ་སོགས་པ་དང་། ཚད་མེད་རྣམ་བཞིས་འགྲོ་བ་ཐུགས་རྗེས་འཛིན་པ་དང་། འཆིང་བ་དང་། མི་འཆོར་བར་སྡོམ་པ། ཉོན་མོངས་པ་ཐལ་བར་རློག་པའི་བརྡ་རུ་ལྕགས་ཀྱུ་ལ་སོགས་པའི་ཕྱག་མཚན་བསྣམས་པ་དེ་ལྟར་ཡིན་ལ། སྐུ་མདོག་དཀར་སེར་དམར་ལྗང་བཞི་རུ་བསྟན་པ་ནི་སྐྱེ་བ་རྣམ་བཞི་སྦྱངས་པའི་དོན་ཡིན་ཞིང་། སྒོ་བ་ཡབ་ཡུམ་བརྒྱད་པོ་དེ་ཁྲོ་བོ་དང་ཁྲོ་མོའི་ཆས་རྫོགས་པ་ཉི་གདན་གྱི་སྟེང་ན་ཞབས་འཁོར་འདས་མཉམ་པར་རོལ་བའི་འདོར་སྟབས་སམ་དོར་སྟབས་ཀྱིས་བཞུགས་པ་དང་། བསྐལ་བའི་མེ་དཔུང་འབར་བའི་ཀློང་ན་རྔམ་པའི་ཆ་བྱད་ཅན་གྱིས་བཞུགས་པ་དེ་ལྟར་བསྒོམ་དགོས་སོ། །དེ་ཡན་ཆད་ཀྱིས་བསྟན་པའི་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་ནི་ཀུན་བཟང་ཡབ་ཡུམ་གཉིས། རིགས་ལྔ་ཡབ་ཡུམ་བཅུ་ཡིས་བཅུ་གཉིས། སེམས་དཔའ་སེམས་མ་བཅུ་དྲུག་གིས་ཉི་ཤུ་རྩ་བརྒྱད། ཉི་ཤུ་རྩ་བརྒྱད་དེའི་སྟེང་དུ་ཐུབ་དྲུག་གིས་སུམ་ཅུ་སོ་བཞི། དེའི་ཐོག་ལ་སྒོ་བ་ཡབ་ཡུམ་བརྒྱད་བསྣན་པས་བཞི་བཅུ་ཞེ་གཉིས་ཡིན་ནོ། །ཞི་བའི་སྐབས་སུ་སྒོ་སྲུང་ཁྲོ་བོ་ཡབ་ཡུམ་བརྒྱད་ཡོད་པས་ཞི་བ་རྐྱང་རྐྱང་བཞི་བཅུ་ཞེ་གཉིས་མི་ཚང་ངོ་སྙམ་ན། དཀྱིལ་འཁོར་གྱི་རྩ་བ་ཞི་བའི་ལྷ་ཚོགས་ཡིན་ལ། དེ་སྟབས་ཀྱིས་ཞི་བའི་ལྷ་ཚོགས་ཞེས་དོན་དང་མཐུན་པའི་མཚན་ཡིན་ཞིང་། ལོག་རྟོག་དང་མཚན་མར་འཛིན་པ་འཇོམས་པའི་ཕྱིར་དུ་དྲག་པོའི་ཕྲིན་ལས་བསྟན་པའི་ཆེད་དུ་སྒོ་སྲུང་ཁྲོ་བོར་སྣང་བའི་གོ་བ་དང་། སྒོམ་ཁོག་རྒྱས་པ་རྣམས་ཀྱི་འདིའི་སྐབས་སུ་ཨོཾ་ཨཱཿཧཱུྃ་ལན་གསུམ་བཟླས་ནས་ཁྲོ་བོའི་དཀྱིལ་འཁོར་ལ་དབང་བསྐུར་བ་དེ་འབྱུང་བ་ཡིན་ནོ། །འདིའི་སྐབས་སུ་ཨོཾ་ཨཱཿཧཱུྃ་ལ་འུ་ཚོས་སྤྱིར་བཏང་གིས་ཕྱག་རྒྱ་མི་མཛད་མོད་དོན་ངོ་མ་ལ་ཨོཾ་ཨཱཿཧཱུྃ་གསུམ་འདིའི་སྐབས་སུ་བརྒྱུད་པ་འདིའི་པདྨ་བཛྲ་ལ་སོགས་པ་རྫོགས་ཆེན་ཚང་གི་གདན་སའི་གོང་མ་རྣམ་པས་རྡོ་རྗེ་རྩེ་ལྔ་བའི་ཕྱག་རྒྱས་གནས་གསུམ་དབང་བསྐུར་གྱི་རྒྱ་མཛད་པ་ཡིན་ལ། དེ་དོན་ལ་ངེས་པར་དུ་དགོས་རྒྱུ་ཅན་ཞིག་ཀྱང་ཡིན་ནོ། །དབང་བསྐུར་བ་ལ་དབང་ལྷ་གདན་གསུམ་ཚང་བའི་དཀྱིལ་འཁོར་དགོས་ཤིང་། གདན་གསུམ་ཞེས་པ་གདན་སུམ་བརྩེགས་བཏིང་ཡོད་པའི་དཀྱིལ་འཁོར་ཞིག་དགོས་པའི་དོན་ཨེ་རེད་ཟེར་ན་དེ་མ་ཡིན་ལ། ཞི་བའི་དཀྱིལ་འཁོར་འདི་ཁྲོ་བཅུར་དབང་སྐུར་བྱེད་ཡིན་པས་གཤེགས་པ་དང་གཤེགས་མ། སེམས་དཔའ་དང་སེམས་མ། ཁྲོ་བོ་དང་ཁྲོ་མོ་རྣམས་དཀྱིལ་འཁོར་གཅིག་ཏུ་ཚོགས་པ་ལ་གདན་འཛོམས་གསུངས། གདན་འཛོམས་པའི་བརྡ་ཆད་ཀྱི་སྐད་ཀྱི་ཐོག་ནས་གདན་གསུམ་ཚང་བའི་དཀྱིལ་འཁོར་ཟེར་རོ། །དེ་ཡང་གཞན་དུ་མ་གྲུབ་པར་སྣོད་བཅུད་རྒྱལ་བའི་དཀྱིལ་འཁོར་རྣལ་འབྱོར་བའི་རང་ལུས་ལ་རྒྱལ་བ་ཞི་ཁྲོའི་དཀྱིལ་འཁོར་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དེ་ཡེ་ནས་ཚང་ཡོད་པས་ན། ཕུང་ཁམས་དག་པ་གཤེགས་པ་གཤེགས་མའི་གདན། །དབང་ཡུལ་དག་པ་སེམས་དཔའ་སེམས་མའི་གདན། །ཡན་ལག་དག་པ་ཁྲོ་བོ་ཁྲོ་མོའི་གདན། །ཞེས་གདན་གསུམ་ཚང་བའི་དཀྱིལ་འཁོར་བཤད་པ་ཡིན་ནོ། །དབང་གི་ཕྲིན་ལས་མཛད་པའི་སྐབས་སུ་རིགས་ལྔ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་དབང་བསྐུར། སེམས་དཔའ་ཡབ་ཡུམ་གྱིས་བཀྲ་ཤིས་བརྗོད། ཁྲོ་བོ་ཁྲོ་མོས་བགེགས་བསྐྲད་ནས་ཀུན་ཀྱང་དབང་གི་བྱ་བ་ལ་དགྱེས་པར་གྱུར་ཅེས་དབང་བསྐུར་བའི་བརྡ་དོན་བླ་མེད་ཀྱི་སྔགས་རྒྱུད་མང་པོ་ནས་འབྱུང་བ་ཡིན་ཞིང་། ཞི་བའི་དཀྱིལ་འཁོར་ལ་སྒོ་སྲུང་ཁྲོ་བོ་ཡོད་པས་ཞི་བའི་དཀྱིལ་འཁོར་མིན་པ་དེ་ལྟར་མ་ཡིན་ནོ། །འདི་ནས་ཁྲོ་བོའི་ཚུལ་རྫོགས་ཞེས་དཔལ་གྱི་ཆས་བཅུ། དུར་ཁྲོད་ཀྱི་ཆས་བརྒྱད་ལ་སོགས་པ་ཁྲོ་བོའི་ཆས་སྤྱིར་བསྟན་ལ། འདི་ཁྲོ་བོའི་སྐབས་སུ་རྒྱས་པར་བཤད་དགོས་པ་ཡིན་ཡང་འདི་ནས་ཁྲོ་བོའི་ཚུལ་རྫོགས་ཞེས་པ་དང་སྒོ་བསྟུན་ནས་ཧ་ལམ་ཕྱོགས་མཚུངས་ཤིག་ཞུས་ན། དཔལ་གྱི་ཆས་གོས་ནི་བགོ་བའི་གོས་གསུམ། འདོགས་པའི་རྒྱན་གཉིས། བྱུག་པའི་རྫས་གསུམ་སྟེ། དེ་རྣམས་ལ་དཔལ་གྱི་ཆས་བརྒྱད་གསུང་ས་ཡང་ཡོད་དོ། །ཐོད་པ་སྐམ་རློན་དང་། སྦྲུལ་རྒྱན། རཀྟའི་ཐིག་ལེ་ལ་སོགས་པ་དུར་ཁྲོད་ཀྱི་ཆས་ལ་ཡང་བརྩི་རྒྱུ་ཞིག་ཡིན་ལ། བགོ་བའི་གོས་གསུམ་ནི་གླང་ཆེན་གྱི་པགས་པའི་སྟོད་གཡོག་དང་། ཞིང་ཆེན་གྱི་གཡང་གཞིའི་ན་བཟའ། སྟག་གི་པགས་པའི་ཤམ་ཐབས་ཏེ་དེ་རྣམས་ཡིན་ནོ། །འདོགས་པའི་རྒྱན་གཉིས་དེ་སྦྲུལ་སྣ་ཚོགས་དང་། ཐོད་པ་སྐམ་རློན་གཉིས་ལ་གསུངས་ཤིང་། བྱུག་པའི་རྫས་གསུམ་ནི་རཀྟའི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ་རྣམས་ཏེ་ཁྲོ་བོའི་ཆས་དང་། ཁྲོ་མོ་ཡང་དེའི་ཕྱོགས་མཚུངས་ཡིན་ལ། དེ་ཐམས་ཅད་ལ་དག་དྲན་རེ་རེ་བཞིན་དུ་སྦྱར་རྒྱུ་ཡོད་པ་དེ་ལྟར་ཡིན་ནོ། །ད་རུང་གར་གྱི་ཉམས་དགུ་ནི་སྒེག་པ། དཔའ་བ། མི་སྡུག་པ་སྟེ་སྐུ་ཡི་ཉམས་གསུམ། རྒོད་པ། དྲག་ཤུལ། འཇིགས་རུང་སྟེ་གསུང་གི་ཉམས་གསུམ་སྟེ་དྲུག སྙིང་རྗེ། རྔམ་དང་། ཞི་བ་སྟེ་ཐུགས་ཀྱི་ཉམས་གསུམ་གྱིས་དགུ་དང་ལྡན་པ་དེ་ལྟ་བུའི་སྒོ་སྲུང་ཁྲོ་བོ་ཡབ་ཡུམ་དང་བཅས་པ་མདོར་ན་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་མ་ཡེངས་ཡིད་ཡུལ་དུ་གསལ་བར་བསྒོམ་ཞེས་གསུངས་པའོ། །བསྐྱེད་རིམ་གྱི་སྐབས་འདི་ལ་བདག་བསྐྱེད་དང་། མདུན་བསྐྱེད། བདག་མདུན་དབྱེར་མེད་དུ་བསྐྱེད་པ་སྟེ་གསུམ་འབྱུང་རྒྱུ་ཡོད་ལ། འདི་ལ་སྒོམ་རིམ་གཅིག་གིས་ཆོག་ཅིང་། ཟུར་བ་ཞིག་མི་དགོས་སོ། །བདག་བསྐྱེད་ཕུང་ཁམས་སྐྱེ་མཆེད་རྟོག་ཚོགས་དང་བཅས་པ་ཐམས་ཅད་ལྷའི་འཁོར་ལོ་རུ་སྒོམ་པ་དང་། མདུན་བསྐྱེད་མེ་ཏོག་དང་རས་བྲིས་རྡུལ་མཚོན་གང་ཡིན་ན་དེས་མཚོན་ནས་ལྷའི་དཀྱིལ་འཁོར་དུ་བསྐྱེད་པ། བདག་མདུན་དབྱེར་མེད་ཀྱི་སྐབས་སུ་སྣོད་བཅུད་སྣང་སྲིད་ཐམས་ཅད་ལྷ་དང་གཞལ་ཡས་ཁང་དུ་གསལ་བ་སྟེ་དེ་འདྲའི་དབྱེ་བསྡུ་དང་ཁྱད་པར་ཙམ་ཞིག་ཡིན་ནོ། །སྤྱིར་ལྷ་བསྒོམ་ཟེར་རྒྱུའི་ལྷ་འདི་ལ་ཆོས་ཉིད་དོན་གྱི་ལྷ་དང་། ཆོས་ཅན་རྟགས་ཀྱི་ལྷ་རྣམ་པ་གཉིས་ཀྱི་གོ་དོན་གྱི་ཐོག་ནས་བཤད་ན་ཆོས་ཉིད་དོན་གྱི་ལྷ་དེ་ནི་སྣང་སྟོང་གཉིས་མེད་ཀྱི་ཡེ་ཤེས་སྒྲིབ་པའི་དྲི་མ་ཕྲ་མོ་ཡང་མེད་པའི་འཁོར་འདས་རོ་མཉམ་གཅིག་དང་དུ་མ་ལ་སོགས་པའི་མཚན་མའི་སྤྱོད་ཡུལ་ལས་འདས་པ་ཡིན་ཡང་ཤེས་བྱའི་རྣམ་པ་ཐམས་ཅད་དེ་འཆར་བའི་བདག་ཉིད་ཅན་བསམ་གྱིས་མི་ཁྱབ་པའི་ཡེ་ཤེས་དུས་གསུམ་བདེ་བར་གཤེགས་པ་ཐམས་ཅད་ཀྱི་དགོངས་པ་དང་ཐ་དད་མ་ཡིན་པ་རང་བྱུང་ཡེ་ཤེས་ཀྱི་སྐུ་རིགས་ཐམས་ཅད་ཀྱི་ཁྱབ་བདག་ཏུ་བཞུགས་པ་ནི་ཆོས་ཉིད་དོན་གྱི་ལྷ་ཡིན་ལ། དེའི་ལྷ་དེའི་ཡེ་ཤེས་ཀྱི་སྐུ་མཚན་མའི་སྤྱོད་ཡུལ་ལས་འདས་པ་དེ་ཉིད་རྣམ་པ་རྟགས་ཀྱི་ཕྱག་རྒྱར་ཤར་ནས་ཞི་བ་དང་ཁྲོ་བོ། གཙོ་དང་འཁོར། རྟེན་དང་བརྟེན་པའི་རྣམ་པ་གདུལ་བྱ་གཉིས་འཛིན་ཅན་འདུལ་བའི་ཆེད་དུ་དེ་དང་དེར་སྣང་བ་དེ་ནི་རྒྱུད་སྡེ་སོ་སོ་ནས་གསུངས་པ་འདི་དག་ཡིན་པར་གོ་དོན་ངེས་དགོས་སོ། །ཡང་ལྷ་ཞེས་གསུངས་སྐབས་ཆོས་ཉིད་ཀྱི་ལྷ། ཡེ་ཤེས་ཀྱི་ལྷ། མཚན་མའི་ལྷ་སྟེ་གསུམ་ཞེས་གསུང་སྐབས་ཀྱང་ཡོད་ཅིང་། དེའི་ཚེ་ཆོས་ཉིད་ཀྱི་ལྷ་ནི་ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བ་ལ་གོ་དགོས་པ་དང་། ཡེ་ཤེས་ཀྱི་ལྷ་ནི་ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བ་དེ་དང་ངོ་བོ་དབྱེར་མེད་པའི་སངས་རྒྱས་ཀྱི་ཡེ་ཤེས་སེམས་ཅན་གྱི་ཁམས་ལ་ཡེ་ནས་ཡོད་པ་དེ་ཉིད་ཡིན་ལ། མཚན་མའི་ལྷ་ནི་དེ་ལྟ་བུ་དབྱིངས་དང་ཡེ་ཤེས་ཟུང་དུ་འཇུག་པའི་ཆོ་འཕྲུལ་ལམ་དེའི་རྣམ་རོལ་ཞེས་བརྗོད་ཀྱང་ཆོག དེ་མཚན་མ་སྐུ་མདོག་ཕྱག་མཚན་ཅན་དུ་ཡོད་པའི་བསྐྱེད་རིམ་གྱི་སྐབས་སུ་བསྒོམ་རྒྱུ་དེ་ལ་གསུངས་པས་དེ་ལྟར་དབྱེ་བ་གསུམ་དུ་ཕྱེ་བ་ཡང་ཡོད་དོ།། ༼༢ ཁྲོ་བོ་ལྷ་ཚོགས་བསྐྱེད་པ། ༡༽ སྤྱིའི་གཙོ་བོ་བསྐྱེད་པ། དེ་ཡན་ཆད་ཀྱིས་ཞི་བའི་ལྷ་ཚོགས་བསྐྱེད་པ་སོང་ནས་འདི་མན་ཆད་ཁྲོ་བོའི་ལྷ་ཚོགས་བསྐྱེད་པ་ཡིན་ཞིང་། འདི་ལ་སྤྱིའི་གཙོ་བོ། རིགས་ཀྱི་གཙོ་བོ། གནས་མ། ཡུལ་མ། སྒོ་མ། དབང་མོ་དང་བཅས་པའི་ས་བཅད་ཀྱི་ཐོག་ནས་བསྟན་ཡོད་ལ། དེའི་ནང་གི་སྤྱིའི་གཙོ་བ་ནི། ཧཱུྃ༔ དབུས་སུ་བུདྡྷ་ཧེ་རུ་ཀ༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་དམར་དབུས་སྨུག་ནག༔ འཁོར་ལོ་དགྲ་སྟྭ་རལ་གྲི་གཡས༔ དྲིལ་བུ་ཐོང་གཤོལ་བྷན་དྷ་གཡོན༔ བུད་དྷ་ཀྲོ་ཏི་གཉིས་མེད་འཁྲིལ༔ ཞེས་གསུངས་ཏེ། ཧཱུྃ་ཞེས་པའི་སངས་རྒྱས་ཐམས་ཅད་ཀྱི་ཐུགས་མི་འགྱུར་བའི་ངོ་བོ་ཡི་གེར་སྣང་བའི་སྒྲ་ཡིས་བསྐུལ་ནས། བདག་བསྐྱེད་ཀྱིས་དུང་ཁང་འཁོར་ལོའི་དབུས་སུ་བསྒོམ་དགོས་ཤིང་། མདུན་བསྐྱེད་ཀྱིས་ཞི་བའི་སྟེང་གི་ནམ་མཁའ་ལ་བསྒོམ་དགོས་སོ། །ཞི་བའི་སྟེང་གི་ནམ་མཁའ་ལ་སྟེང་ཕྱོགས་མེ་རི་འབར་བའི་དཀྱིལ་འཁོར་དུར་ཁྲོད་རོལ་བའི་བཀོད་པ་ཡོངས་སུ་རྫོགས་པ་གཞི་དང་རྒྱ་ཆེན་ཚད་མེད་པའི་ཡེ་ཤེས་ཀྱི་རོལ་བ་བསམ་གྱིས་མི་ཁྱབ་པའི་ཁྲོ་བོའི་དཀྱིལ་འཁོར་དེའི་དབུས་ན་བུདྡྷ་ཧེ་རུ་ཀ་སྟེ་ལས་བྱང་ཆུང་བ་འདིའི་སྐབས་ན་ཆེ་མཆོག་དང་ངོ་བོ་གཅིག་པར་བྱས་ནས་བསྡུས་ཏེ་སྙིང་པོ་དྲིལ་ནས་གསུངས་པ་ཡིན་ལ། ཁྲག་འཐུང་ལྔ་བཅུ་ང་བརྒྱད་ཀྱི་ནང་ནས་གཅིག་ཆད་ནས་གཟུད་དགོས་པ་དེ་ལྟར་ནི་མ་ཡིན་ནོ། །སྔར་ཞི་བའི་སྐབས་ཀྱི་དཀྱིལ་འཁོར་གྱི་སྤྱིའི་གཙོ་བོ་ཀུན་བཟང་ཡབ་ཡུམ་དང་རྣམ་པར་སྣང་མཛད་སྒོམ་པའི་སྐབས་སུ་རྣམ་སྣང་ཡབ་ཡུམ་ཀུན་བཟང་ཡབ་ཡུམ་གྱི་མདུན་དང་འོག་ཏུ་བདག་མདུན་གྱི་ཁྱད་པར་གྱིས་བསྒོམ་དགོས་པ་དེ་ལ་དོན་གྱིས་བཤད་ན་གདངས་དང་འཆར་གཞིའི་ཁྱད་པར་ཙམ་ལས་ཐ་དད་མིན་པ་དང་འདྲ་བར་འདི་ནས་ཀྱང་ངོ་བོ་གཅིག་པའི་རྒྱུ་མཚན་གྱིས་དཀྱིལ་ཆོག་སྙིང་པོ་བསྡུས་ནས་ཐོལ་བསྐྱེད་མཛད་པའི་དགོངས་པ་འདི་ཞི་བའི་སྐབས་ཡིན་ན་ཡང་སྦྱར་ཆོག་པའི་གོ་བ་རིགས་འགྲེ་དགོས་པ་ང་རང་ཉིད་ཀྱིས་དེ་ལྟར་བསམ་པ་ཡིན་ནོ། །སངས་རྒྱས་ཐམས་ཅད་ཀྱི་སྐུ་རྡོ་རྗེའི་བདག་ཉིད་བུདྡྷ་ཧེ་རུ་ཀ སྐུ་གསུམ་ལྷུན་གྱིས་གྲུབ་པའི་ཞལ་གསུམ། ཕ་རོལ་ཕྱིན་དྲུག་ཚང་བའི་ཕྱག་དྲུག རྫུ་འཕྲུལ་རྐང་བཞི་མཚོན་པའི་ཞབས་བཞི། ས་ལམ་ཆིག་རྫོགས་གྱད་ཀྱི་འདོར་སྟབས་སུ་བསྒྲད་པ། ཞལ་གཡས་དཀར་སྣང་སྟོང་སྤྲུལ་སྐུའི་རང་བཞིན། གཡོན་དམར་བདེ་སྟོང་ལོངས་སྐུའི་རང་བཞིན། དབུས་སྨུག་པོ་རྩ་བའི་སྐུ་མདོག་ཡེ་སྟོང་ཆོས་སྐུའི་རང་བཞིན། འཇོམས་བྱེད་འབར་བའི་རང་མདོག་འཁོར་ལོ་དགྲ་སྟ་རལ་གྲི་གཡས་སུ་བསྣམས་པ་དེ་གཏི་མུག་འཁྲུལ་རྟོག་གཉིས་འཛིན་གསུམ་པོ་གཅོད་པའི་ཆེད་དང་། དྲིལ་བུ་ཐོང་གཤོལ་བྷན་དྷ་གསུམ་ཁ་གཡོན་པས་བསྣམས་པ་དེ་འཁོར་བ་སྟོང་། ཉོན་མོངས་འཇོམས། གཟུང་འཛིན་དབྱིངས་སུ་བསྒྲལ་བ་རྣམས་ཀྱི་དོན་ཡིན་ནོ། །ཡུམ་བུདྡྷ་ཀྲོ་ཏི་ཤྭ་རི་མ་ཆོས་དབྱིངས་ཐིག་ལེ་ཉག་གཅིག་མཚོན་པའི་ཞལ་གཅིག རིག་སྟོང་དབྱེར་མེད་མཚོན་པའི་ཕྱག་གཉིས། རྒྱན་ཆ་ལུགས་སྐུ་མདོག་ལ་སོགས་ཡབ་དང་འདྲ་བ་ལ་བདེ་ཆེན་ལྷན་ཅིག་ཡེ་ཤེས་མཚོན་བྱེད་ཀྱི་གཟིག་ཤམ་ཅན། ཕྱག་གཡས་ན་དགོངས་པ་མི་འགྱུར་བའི་འཁོར་ལོ་དང་། གཡོན་ན་དུང་དམར་གྱི་དབྱིངས་རིག་ཟུང་འཇུག་གི་བརྡ་རྟགས་བཟུང་ནས་ཡབ་ལ་གཉིས་མེད་དུ་འཁྲིལ་བ་དེ་ལྟར་དུ་བསྒོམ་དགོས་སོ། །བུདྡྷ་སངས་རྒྱས་ཀྱི་དོན་དང་། ཧེ་རུ་ཀ་ཞེས་པ་ནི་ཧེ་ནི་ཧེ་ལ་སྟེ་སྤྱོད་ཅིང་བརྩོན་པའི་དོན་ཡིིན་ཞེས་རྒྱུད་ཀྱི་ནང་དུ་གསུངས་ཡོད་ལ། རུ་ནི་རུ་དྷི་ར་སྟེ་ཁྲག་ཡིན་གསུངས་ཤིང་། ཀ་བདག་པོའི་དོན་ཡིན་པས་ཁྲག་ལ་རོལ་བའི་བདག་པོ་ལ་ཁྲག་འཐུང་ཞེས་གསུངས་སོ། །ཀྲོ་ཏི་ཞེས་པ་ཁྲོ་མོ། ཤྭ་རི་ནི་དབང་ཕྱུག་མ། བུདྡྷ་ཀྲོ་ཏི་གཉིས་མེད་འཁྲིལ་ཞེས་སངས་རྒྱས་ཁྲོ་མོའི་དབང་ཕྱུག་མ་དང་གཉིས་མེད་དུ་འཁྲིལ་བའི་དོན་ཡིན་ནོ། །ཕྱག་མང་པོའི་ཕྱག་མཚན་གྱི་དཀྱིལ་ཆོག་གི་སྐབས་སུ་དང་པོ་བར་བ་ཐ་མ་རྣམས་ཀྱི་བརྩི་སྟངས་དེ་ལ་འདྲ་མི་འདྲ་ཡོད་དེ། གཡས་འགྱེད་ཅེས་པ། གཡོན་འགྱེད་ཅེས་པ། མཉམ་འགྱེད། འཁོར་འགྱེད་དེ་དེ་ལྟར་གོ་བ་ལེན་སྟངས་ཁ་ཁར་ཡོད་ཅིང་། གཡས་ཀྱི་དང་པོ་ནས་ཐ་མའི་བར་དང་གཡོན་གྱི་དང་པོ་ནས་ཐ་མའི་བར་དུ་རིམ་བཞིན་འགྱེད་པ་ལ་གཡས་འགྱེད་ཟེར་བ་དང་། གཡོན་གྱི་དང་པོ་མགོ་བཟུང་ནས་དེའི་ཐ་མའི་བར་དང་དེའི་འཕྲོས་སུ་གཡས་ཀྱི་དང་པོ་ནས་ཐ་མའི་བར་དུ་འགྱེད་པ་དེ་ལ་གཡོན་འགྱེད་ཟེར་བ་དང་། མཉམ་འགྱེད་ཅེས་པ་ནི་གཡས་དང་པོ་ནས་གཡོན་དང་པོ་གཡས་བར་བ་ནས་གཡོན་བར་བ་སྟེ་དེ་འདྲའི་སྒོ་ནས་འགྱེད་པ་ལ་མཉམ་འབྱེད་ཟེར་ལ། འཁོར་འགྱེད་ནི་གཡས་ཀྱི་དང་པོ་ནས་ཐ་མའི་བར་དེ་ནས་གཡོན་གྱི་ཐ་མ་ནས་དང་པོའི་བར་འགྱེད་པ་ལ་འཁོར་འགྱེད་དམ་བསྐོར་འགྱེད་ཅེས་ཟེར་རོ། །བསྐྱེད་ཆོག་འདི་གཅིག་མཚུངས་ཁོ་ན་མ་ཡིན་ཞིང་། འདི་ནས་གཡས་འགྱེད་བྱས་ནས་གསུངས་ལ། གཡས་དང་པོ་ནས་ཐ་མའི་བར་འཁོར་ལོ་དགྲ་སྟ་རལ་གྲི་རྣམས་དང་། གཡོན་དང་པོ་ནས་ཐ་མའི་བར་དྲིལ་བུ་ཐོང་གཤོལ་བྷན་དྷ་རྣམས་རིམ་པ་བཞིན་དུ་བསྒྲིག་རྒྱུ་དེ་ཡིན་ནོ། །ཡིན་ན་ཡང་དང་པོར་སྟེང་ནས་མར་མི་བརྩི་བར་རྩ་ཕྱག་གིས་ཡུམ་ལ་འཁྱུད་སྟབས་མཛད་པ་དེ་དང་པོར་བྱེད་རྒྱུ་དགོངས་པ་ཨེ་ཡིན་སྙམ། ལར་མ་རྩར་ཕྱག་མཚན་གྱི་གོ་བ་འདི་ད་ལྟར་སངས་རྒྱས་ཀྱི་ཐུགས་ལམ་དུ་བྱེད་པ་དང་། མ་འོངས་པར་འགྲོ་བ་རྣམས་ཐབས་དུ་མས་འདུལ་རྒྱུའི་རྟེན་འབྲེལ་འགྲིག་རྒྱུའི་དགོས་པ་ཡིན་ཞེས་གསུངས་སོ། །དེ་རིང་འུ་ཚོས་མཚམས་འདི་ནས་འཇོག་ལ། དུས་ཚོད་ལ་ཡང་བསྟུན་དགོས་ཤིང་། སང་ཉིན་བཛྲ་ཧེ་རུ་ཀ་ནས་མགོ་བཟུང་སྟེ་བཤད་རྒྱུ་ཡིན། ཞི་ཁྲོ་འདི་གསང་སྔགས་འབྲེལ་བ་བཞི་ལྡན་གྱིས་གཏན་ལ་ཕབ་པའི་ཆོས་བཀའ་ཟབ་མོ་བཀའ་གཏེར་དག་སྣང་ཐམས་ཅད་ཀྱི་ཉིང་ཁུ་འདིས་རེག་པ་ཙམ་གྱིས་ངན་སོང་དུ་མི་མངག་པའི་ཆོས་ཟབ་མོ་བཀའ་གཉན་པོ་ཡིན་ངེས་ཀྱང་ཆོས་ཟབ་པ་ལྟར་དུ་གང་ཟག་ཀྱང་ཟབ་དགོས་པ་ཡིན་ཞིང་། ཟབ་དགོས་པ་ཡིན་ཡང་ལོ་བརྒྱད་ཀྱི་ཐོག་ནས་ཞི་ཁྲོའི་འདོན་ཆ་ཁ་ཐོག་འཁོར་ལོར་བྱས་ན་དོན་ཞིབ་ཏུ་སྒྲོ་འདོགས་བཅད་ནས་བསམ་བློ་གཏང་རྒྱུ་ལ་གནས་དུས་ཡུལ་དབང་གིས་མཐུན་རྐྱེན་མ་ཚང་བ་ཡིན་ཡང་། ད་རུང་ཡིན་ན་མ་སྔ་མ་ཕྱི་འདི་འདྲའི་བསྙེན་སྒྲུབ་དང་བསྐྱེད་རྫོགས་ལ་ཐུགས་གཞོལ་རྒྱུ་ནི་དུས་འདི་ལ་བསམ་ན་དགུན་ཁའི་མེ་ཏོག་ཡིིན་ལ། གང་ན་ཡིན་ན་དཀོན་རྒྱུའི་ངོ་མཚར་ཅན་ཞིག་ཡིན་ནོ། །དེས་ན་རྣམ་པ་ཐམས་ཅད་ལ་བཀའ་དྲིན་ཆེ་ཡང་བསྐྱར་ཞུས་པ་ཡིན་ལ། རྟོགས་པའི་བསྟན་པ་འཛིན་ཞེས་པ་དེ་རེད་སྙམ་ནས་ཡི་རང་བྱེད་བཞིན་ཡོད་ཅིང་། དེ་ལྟར་དགོས་ཀྱང་དགོས་པ་ཡིན་ཏེ། ཚོན་པོ་བཤས་ཤུལ་རེད། །སྐ་མོ་བསྐོལ་ཤུལ་རེད། །འཇའ་ལུས་འོད་སྐུར་གྲོལ་བའི་གཤེགས་ཤུལ་ཡིན་ཞིང་། གྲུབ་གཉིས་རིག་འཛིན་བྱོན་པའི་གདན་ས་ཡིན་པས་འདྲ་འདྲའི་ནང་གི་མི་འདྲ་བའི་ཁྱད་ཆོས་དོན་གྱི་བསྟན་པ་བཤད་སྒྲུབ་ཀྱིས་འཛིན་རྒྱུ་ལ་ད་རུང་ཐུགས་སྟོབས་བསྐྱེད་མཛོད་ཞུ་བ་དང་ལྷན་དུ་དེ་རིང་གི་ཆོས་མཚམས་འདི་ནས་འཇོག་རྒྱུ་བྱེད་དོ།། །། ཉིན་གསུམ་པའི་ཆོས་ཁྲིད།༡ སྔོན་དུ་འགྲོ་བའི་ཆོས་བཤད་པ། ཇི་སྐད་དུ་ཀུན་མཁྱེན་འཇིགས་བྲལ་གླིང་པས། ཚེ་འདི་སྐྱིད་ཀྱང་དེ་རིང་ཉིན་གང་ཙམ། །ཕྱི་མའི་སྣང་བ་མི་རིང་སང་ཉིན་འོང་། །བར་དོའི་འཁྲུལ་སྣང་དོ་ནུབ་རྨི་ལམ་ཚུལ། །ད་ལྟ་ཉིད་ནས་དམ་པའི་ཆོས་ལ་འབུངས། །ཞེས་གསུངས་ཏེ། ད་ལྟའི་སྐབས་སུ་མཐོ་རིས་མིའི་ལུས་རྟེན་ཞིག་བླངས། སྐྱེ་བའི་སྡུག་བསྔལ་འདས་ཚར་ནས། ན་རྒས་ཤི་གསུམ་པོ་ད་རུང་ཐོག་ལ་མ་བབས། སྡུག་བསྔལ་རགས་པའི་ཚོར་སྣང་གཞན་པ་གནས་སྐབས་ཆུང་བའི་སྐབས་འདིར་སྐྱིད་ཐོག་ཟེར་རྒྱུའི་དུས་འདི་མགོ་ཐོག་ཏུ་ཚེས་ཡོད་ཅིང་། དེ་ཡོད་པའི་ཚེ་ན་སྐྱིད་སྣང་ཤར་ཁུལ་བྱེད་ཀྱང་འདི་རྟག་བརྟན་འགྱུར་བ་མེད་པ་ཞིག་མ་ཡིན་ལ། མི་ཚེ་ཟེར་ཡང་དེ་རིང་གི་ཉིན་གང་པོ་འདྲ་ཞིག་ཡིན་ནོ། །ལར་གང་ཟག་གཅིག་དང་གཅིག་གི་ཚེ་ཚད་མི་འདྲ་ཞིང་། དེའི་ནང་གི་སྙིགས་དུས་ཀྱི་ཚེ་ལ་ངེས་པ་མེད་ལ། གལ་ཏེ་ཡོད་པའི་དབང་དུ་བཏང་ན་ཡང་ཚེ་སྟོད་སྔ་དྲོའི་ཉི་མ་འདྲ་བོ་སོང་ཚར་ནས། ད་ཚེ་སྨད་མར་ལ་སྒུར་བའི་ལམ་སྣེ་ཕྱི་དྲོའི་ཉི་མ་འདྲ་བོ་ལ་ཐོན་ཡོད་ན་ཟད་པའི་ཆོས་ཅན་ཚང་མ་སྐད་ཅིག་སྐར་མའི་ཡུན་ལ་ཇེ་ཐུང་ཇེ་ཉུང་ཞིག་མ་གཏོགས་མེད་པས་ཕྱི་མའི་སྣང་བ་སང་ཉིན་འདྲ་བོའི་མགོ་འཛུགས་རན་པ་ལ་ཅུང་ཟད་མ་གཏོགས་མེད་དོ། །ཚེ་འདི་ཕྱི་གཉིས་ཀའི་བར་ལ་བར་དོའི་སྣང་བ་ཞེས་པ་འཇིགས་སྐྲག་ཅན་ཞིག་ཡོང་རྒྱུ་ཡོད་པ་ནི་དོ་ནུབ་ཀྱི་རྨི་ལམ་འདྲ་ཞིག་ཡིན་པས་ད་ལྟ་རང་དབང་རང་ལག་ཡོད་ཅིང་། གནད་རྒྱུ་མཚན་ཚང་མ་ཤེས་པའི་སྐབས་འདི་ལ་དོ་དགོང་གི་རྨི་ལམ་འདྲ་བའི་བར་དོ་ལ་མི་འཁྲུལ་ནས་བར་དོ་ཆོད་བྱེད། ལམ་མགོ་ཐོན་བྱེད་ཅིག་དང་། སང་ཉིན་གྱི་ཉི་མ་ཚེས་སྐབས་སུ་ཕན་ཐོགས་ཡོང་བྱེད་ཀྱི་འདང་རྒྱག་ལྟ་བུ་ཚེ་འདིའི་ཚེ་སྨད་ཐོན་ནས་དེ་རིང་གི་ཕྱི་དྲོ་ལྟ་བུ་ལ་སོང་ཉིན་ཚེས་རྒྱུ་མེད་སྣང་མི་ཤར་བར་དེའི་སྐབས་སུ་རང་གཞན་གཉིས་ཀ་སྙིང་དམར་ཐང་ཅན་གྱི་མི་ནས་བཟུང་སྟེ་ཕན་ཐོགས་ཅན་གྱི་དམ་པའི་ལྷ་ཆོས་ལ་འབད་འབུངས་གྱིས་མ་གཏོགས་འགྱོད་པ་རྗེས་ནས་འབྱུང་ཞེས་པ་ལྟ་བུ་གསུངས་པ་ཡིན་ནོ། །ད་རུང་ཁོང་གིས་དེ་ལ་མཐུད་ནས་འདི་ལྟར་གསུངས་ཡོད་དེ། སང་བྱ་གནངས་བྱས་མི་ཚེའི་བསྲེག་བརྡར་བྱེད། །ཆོས་ལ་འཇུག་ཁར་གེགས་ནི་ཅིར་ཡང་བརྫུ། །གཏན་འདུན་སློབ་མཁན་བླ་མ་མ་གཏོགས་པ། །སུ་ཡང་མི་འབྱུང་བློ་སྣ་འཕྲལ་དུ་སྟུངས། །ཞེས་གསུངས་ཤིང་། སྤྱིར་གངས་ཅན་ཆོས་ལྡན་གྱི་ཡུལ་དུ་སྐྱེས། དེའི་ནང་གི་སོར་ཐར་རིགས་བདུན་གང་རུང་གི་སྡོམ་པ་ཞུས་པར་མ་ཟད་ཆོས་སྒོ་ངོ་མ་ལ་ཞུགས་ཡོད་ཟེར་མཁན་རྣམས་ཀྱིས་རང་གཞན་འདི་ཕྱི་གཉིས་ཀ་ལ་ཕན་ཐོགས་ཅན་གྱི་དམ་པའི་ཆོས་དེ་སྒྲུབ་དགོས་སྙམ་ཁུལ་བྱེད་ཀྱང་བསམ་རྒྱུ་ཐོག་ཏུ་མི་འཁེལ་ནས་བསམ་ས་ལ་མ་སོང་། གསོད་ས་ལ་སོང་། མི་ཚེའི་ཟློས་གར་གྱི་འཁྲབ་མཇུག་གློ་བུར་དུ་རྫོགས་མཁན་གང་མང་མང་རིག་ས་བལྟ་ས་རང་གི་ཁྱིམ་དང་རང་གི་ཟུར་ནས་བུད་དེ་མི་ཚེའི་ལ་མོ་བརྒྱབ་པ་ཚང་མས་མཐོང་བཞིན་པ་དེ་ཡིན་ནོ། །དེ་ཅི་ཞིག་གིས་ལན་སོང་བསམས་ནས་གཞན་ཐོག་ལ་དཔེར་བླངས་རང་ཐོག་ལ་ཚད་བཞག་ན་རྟག་འཛིན་དེ་བྱེད་ཆེ་ནས་ཚོད་ཀྱིས་མ་ཐིག་ནས་ད་རུང་མི་ཤི་བསམ་ས་ནས་འཆི་བདག་ཚུར་ལ་ཐོན། སང་བྱ་དང་གནངས་བྱའི་འདང་རྒྱག་ད་རེས་མིན་ཡང་རྗེས་ཤིག་ནས་ཡིན་བསམ་ཁུལ་བྱེད་ས་དེ་ཉིད་དེ་རིང་ལ་ཟད་རྒྱུ་མེད་ལ། རྗེས་ནས་ཡིན་དྲན་རྒྱུའི་དུས་ཚོད་ལ་འཁེལ་རྒྱུ་མེད་ནས་མི་ཚེ་བསྲེག་བརྡར་ཞེས་གསུངས་པས་དངོས་པོ་ཞིག་མེར་བསྲེགས་ན་འབར་ནས་མེད་འགྲོ་རྒྱུ་དང་། རྩུབ་པོ་ཞིག་བརྡར་བཞག་ན་ཟད་ནས་མེད་འགྲོ་བ་ལྟར་དུ་དེ་རིང་གི་རྒྱབ་ཀྱི་སང་ཉིན། ད་ལོའི་རྒྱབ་ཀྱི་སང་ཕོད་ཀྱི་མི་ཚེ་བྲེལ་བ་དང་རྣམ་གཡེང་གི་བར་དུ་ཟད་བཞིན་ཡོད་པ་ཡིན་ནོ། །ཟད་འགྲོ་བའི་རྒྱུ་མཚན་ལ་འདང་རེ་བརྒྱབ་ན་བཤད་ཡོང་རིན་གཏན་ནས་མེད་པའི་ཆུང་ཆུང་ཞིག་ལ་མགོ་འཁོར་ནས་དོན་ཆུང་ལ་ཡེངས་ཏེ་དོན་ཆེན་ཤོར་བཞིན་ཡོད་པ་དེ་ཁབ་ཙམ་ཞིག་ལ་བལྟ་ས་ནས་སྟ་རེ་ཙམ་ཞིག་ཆད་བཞིན་ཡོད་པ་ཡིན་ཞིང་། ཆོས་ལ་འཇུག་ཁར་གེགས་ནི་ཅིར་ཡང་བརྫུ་ཞེས་གསུངས་ཏེ་ཆོས་སྒྲུབ་རན་ཁ་ཞིག་ལ་མི་ཁོམ་པའི་རྐྱེན་དེ་འདྲ་མི་འདྲ་ཡི་ཐོག་ནས་འབྱུང་བ་ཡིན་ལ། གེགས་རང་སེམས་ལ་ཞུགས་པ་དེ་ཞུགས་ལུགས་སྡུག་ཤོས་དེ་ཡིན་པ་དང་། གཉེན་གྲོགས་ལ་རྫུས་པ་དེ་འབྲིང་འབྲིང་ཞིག དགྲ་གདོན་ལ་རྫུས་པ་དེ་བགེགས་སྟོབས་ཆུང་ཤོས་དེ་ཡིན་ནོ། །དེས་ན་བགེགས་སྟོབས་ཆེན་རང་ཉིད་ཀྱི་སེམས་ཀྱི་རྣམ་རྟོག་ལ་རྫུས་ཡོང་སྐབས་སུ་འཐབ་པར་བྱེད་པའི་བདུད་ཅེས་པ་རྒྱག་རེས་བྱེད་བསམ་རྒྱུ། གཡེང་བར་བྱེད་པའི་བདུད་ཅེས་པ་ཡེངས་མ་ལམ་དུ་མི་ཚེ་གཅོད་རྒྱུ། ཆགས་པར་བྱེད་པའི་བདུད་ཅེས་པ་ཟས་ནོར་གྲོགས་ལ་སོགས་པ་ལ་ཆགས་ཞེན་གྱིས་འཆིང་རྒྱུ། འདུ་ཤེས་ལོག་པར་སྒྱུར་བའི་བདུད་ཅེས་པ་དྲན་མི་རུང་རྒྱུ་དྲན་ནས་ཕྱིན་ཅི་ལོག་གི་བློ་སྣ་མང་པོ་ཞིག་སེམས་ལ་འཚུབ་བཞིན་པ་སྟེ་དེ་ཚོ་ཚང་མ་སེམས་ལ་ཞུགས་ནས་དེའི་དབང་དུ་འགྱུར་འགྲོ་བ་ཡིན་ཞིང་། དེ་ཚོ་རང་གི་སེམས་ཀྱི་རྣམ་རྟོག་གི་ཐོག་ལ་བགེགས་འཛུལ་བ་དེ་ཡིན་ནོ། །བརྫུས་ཟེར་ཡང་འཛུལ་བ་ཡིན་ལ། བགེགས་འཛུལ་ཟེར་ན་འདྲེ་འཛུལ་བ་ཡིན་ཞིང་། ཕྱི་རོལ་ནས་ཡོང་མཁན་ཡང་ཡོད་པ་ཡིན་ནོ། །དེ་ཡང་དགྲ་ཕྱོགས་ནས་འབྱུང་བ་ཤིན་ཏུ་ཉུང་ལ། གཉེན་ཕྱོགས་ནས་འབྱུང་བ་མང་ཞིང་། ཆགས་ཞེན་འཁྲུལ་བའི་བདུད་དང་། དཔོན་གྲོགས་བདུད་ཁྱེར་གྱི་བདུད། བསོད་ནམས་འདུ་འཛིའི་བདུད། ཟས་ནོར་འཛིན་ཆགས་ཀྱི་བདུད་དེ་རྣམས་བྱུང་ནས་དུས་སྙིགས་མའི་སྐབས་ཀྱི་བདུད་སྟོབས་དེ་ཚོ་ཤུགས་དྲག་ཡིན་པས་དེའི་དབང་དུ་རིག་རིག་ལྟ་ལྟ་བཞིན་དུ་ཤོར་འགྲོ་བ་ཡིན་ནོ། །ཆོས་ཁྲིད་ཀྱི་སྐབས་ཀྱི་སྐར་མ་གཅིག་གཉིས་ཀྱི་བློ་སྦྱོང་དང་ཚེ་གཅིག་གི་མཉམ་འགྲོ་མཉམ་འདུག་གི་མི་དགེའི་བཤེས་གཉེན་གཉིས་ཀ་ཤུགས་ཆེ་ཆུང་འགྲན་སྐབས་གོམས་ཤུགས་ཆེ་བ་འགྲོགས་ཡུན་རིང་བ་དེའི་དབང་དུ་ཤོར་ལོས་འགྲོ་སྟེ་དུད་འཐེན་ངན་ལོབས་མཁན་ངན་པ་དང་འདྲ་འདྲར་ངན་གོམས་ཀྱི་ཕྱོགས་སུ་ཤོར་འགྲོ་བ་ཡིན་ནོ། །ཁྱིམ་ཕ་མ་གཉེན་ཉེ་དུ་བསམ་པ་མི་དཀར་བ་མ་ཡིན་ཡང་རྨོངས་པའི་གཞན་དབང་དུ་སོང་ནས་བཟང་སློབ་མི་ཤེས་ལ། བྱ་རོག་ཕྲུ་གུས་མ་ཡི་སྤུ། །འཐོག་པ་དྲིན་ལན་ཡིན་པར་སྒོམ། །ཞེས་པ་ལྟར་ལ། ཕན་འདོགས་བཞིན་ཡོད་བསམ་ས་ནས་དོན་ལ་ངན་དུ་འགྱུར་བཞིན་ཡོད་དོ། །དེ་ལྟར་ཡིན་ཕྱིར་གཏན་གྱི་འདུན་མ་བཟང་པོ་སློབ་མཁན་དེ་བླ་མ་མ་གཏོགས་མེད་པར་གསུངས་ཤིང་། དེ་ཡང་མཚན་ལྡན་གྱི་བླ་མ་ལ་གསུངས་པ་ཡིན་མ་གཏོགས་མིང་དུ་བླ་མ་ཐོགས་ཚད་ང་ལྟ་བུ་ལ་གསུངས་པ་མ་ཡིན་ལ། གཏན་འདུན་སློབ་མཁན་བླ་མ་མ་གཏོགས་པར། །སུ་ཡང་མི་འབྱུང་བློ་སྣ་འཕྲལ་དུ་སྟུངས། །ཞེས་པའི་ཚིག་འདིའི་གོ་དོན་ཤིན་ཏུ་གནད་ཆེ་སྟེ། གཏན་འདུན་ཞེས་པ་ཚེ་འདི་ནས་བཟུང་བའི་སངས་རྒྱས་ཀྱི་གོ་འཕང་ཐོབ་ནས་གཞན་དོན་གྱི་ཕྲིན་ལས་རྒྱུན་མི་ཆད་པ་དང་བཅས་པ་ལ་གོ་ཆོག གཏན་འདུན་ཞེས་པ་སྐྱེས་བུ་ཆུང་འབྲིང་ཆེ་གསུམ་རང་རང་གི་ལམ་གྱི་གཏན་གྱི་འདུན་མ་ལ་སྦྱར་ཆོག་མོད་འུ་ཚོ་གྲུབ་མཐས་བློ་བསྒྱུར་ལ་མ་བསྒྱུར་ཁད་ཀྱི་གང་ཟག་ཅིག་ལ་མཚོན་ན་ཚེ་འདི་དང་ཕྱི་མའི་ཚེ་རབས་ཚེ་རྒྱུད་དུ་བདེ་བྱེད་ལ་ཇི་ལྟར་ངན་པའི་དབང་དུ་བཏང་ན་ཡང་གོ་ཞིང་། དེ་གོ་ན་གཏན་འདུན་སྟོན་མཁན་བླ་མ་མ་གཏོགས་མེད་ཅེས་པ་འདི་གཏན་འདུན་མ་འཆུག་གསུངས་པ་ལོས་ཡིན་ཡང་དེ་དང་མཉམ་དུ་བླ་མའི་བརྟག་ཐབས་ཀྱང་རང་ཤུགས་ཀྱིས་བསྟན་ཡོད་དོ། །གཏན་གྱི་འདུན་མ་བསྟན་མ་ནུས་ན་མིང་དུ་བླ་མིང་ཐོགས་ལ། ཕྱི་རོལ་ལ་བླ་མའི་རྟགས་འཆང་ཡོད་ཀྱང་དོན་གྱི་ཐོག་ནས་བླ་མའི་བྱེད་ལས་ཆ་མ་ཚང་བ་ཡིན་པས་བསྟེན་ཀྱང་བླ་གོ་མི་ཆོད་དོ། །གལ་སྲིད་གཏན་གྱི་འདུན་མ་མ་ནོར་བ་ཞིག་སྟོན་མཁན་ཡིན་ན་ཆས་ཆ་ལུགས། རིགས་རུས་མཐོ་དམན། གོ་གནས་ཆེ་ཆུང་། བཙན་ཉམས་ཞན་ལ་མ་ལྟོས་ནས་བླ་མར་བསྟེན་པར་གྱིས་དང་དེ་ནི་ཕ་མ་ལས་ཀྱང་ལྷག་པས་མི་ཚད་སུ་གཅིག་གིས་སྟོན་མི་ནུས་པའི་གཏན་བདེའི་ལམ་སྟོན་མཁན་ཡིན་པས་དེ་རིང་ཉིད་ནས་ད་ལྟ་ཉིད་ནས་དམ་པའི་ཆོས་སྒྲུབས་ཤིག་དེ་གསུངས་པ་ཡིན་ནོ།། ༢ དངོས་ཀྱི་དོན་བཤད་པ། ༢༽ རིགས་ཀྱི་གཙོ་བོ་བསྐྱེད་པ། ༡ ཤར་དུ་བཛྲ་ཧེ་རུ་ཀ་ཡབ་ཡུམ་བསྐྱེད་པ། དེ་ལྟ་བུའི་དམ་པའི་ལེགས་བཤད་ཐུགས་ཀྱི་དཀྱིལ་དུ་འཆང་བ་དང་བཅས་ཏེ་སྐབས་ཐོབ་གང་ཞིག་གསན་པར་བྱ་བ་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་སྙིང་པོར་བསྡུས་པ་འདི་ཉིད་འཆད་པའི་སྐབས་ཡིན་ཞིང་། འདི་ལ་སྔོན་འགྲོ། དངོས་གཞི། རྗེས་གསུམ་ལས་སྔོན་འགྲོ་སོང་ནས་དངོས་གཞིའི་སྐབས་ཡིན་ལ། དངོས་གཞི་ལ་ཡང་ལྷ་བསྐྱེད། སྤྱན་འདྲེན། བཞུགས་གསོལ། ཕྱག་འཚལ། མཆོད་པ། བསྟོད་པ། བཤགས་པ་དང་བདུན་གྱིས་བསྟན་པའི་ནང་གི་དང་པོ་ལྷ་བསྐྱེད་པའི་རིམ་པ་དེ་ཉིད་ཡིན་ནོ། །ལྷ་བསྐྱེད་པའི་རིམ་པའི་སྐབས་དེ་ཉིད་ལ་ཡང་ཞི་བ་དང་། ཁྲོ་བོ་གཉིས་ཡོད་པའི་ནང་གི་ཞི་བའི་སྐོར་ཁ་རྩང་ཞིག་ནས་བཤད་ཟིན་ཏེ་ཁྲོ་བོ་ལ་ཐུག་པ་ཡིན་ཞིང་། ཁྲོ་བོ་ལ་ཡང་སྤྱིའི་གཙོ་བོ། རིགས་ཀྱི་གཙོ་བོ། གནས་མ། ཡུལ་མ། སྒོ་མ། དབང་མོ་བཅས་ཀྱི་ནང་ནས་སྤྱིའི་གཙོ་བོ་ཆེ་མཆོག་ཧེ་རུ་ཀ་དང་གཉིས་སུ་མ་མཆིས་པའི་བུདྡྷ་ཧེ་རུ་ཀ་ཡབ་ཡུམ་བཤད་པ་སོང་ནས་དེ་རིང་རིགས་ཀྱི་གཙོ་བོ་བཤད་པ་ལ་བཞི་ཡོད་པའི་ནང་གི་དང་པོ་བཛྲ་ཧེ་རུ་ཀ་ནི། ཧཱུྃ༔ ཤར་དུ་བཛྲ་ཧེ་རུ་ཀ༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་དམར་དབུས་མཐིང་ནག༔ རྡོ་རྗེ་བྷན་དྷ་དགྲ་སྟྭ་གཡས༔ དྲིལ་བུ་བྷན་དམར་ཐོང་གཤོལ་གཡོན༔ བཛྲ་ཀྲོ་ཏི་གཉིས་མེད་འཁྲིལ༔ ཞེས་གསུངས་ཏེ། རང་བྱུང་གི་དཀྱིལ་འཁོར་ཆེན་པོའི་ཤར་ཕྱོགས་ཀྱི་དབུས་སུ་བཛྲ་ནི་རྡོ་རྗེ་སྟེ་མེ་ལོང་ཡེ་ཤེས་ཀྱི་རང་བཞིན་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་བདག་ཉིད་བཅོམ་ལྡན་འདས་བཛྲ་ཧེ་རུ་ཀ་ཞལ་གསུམ། ཕྱག་དྲུག ཞབས་བཞི་བསྒྲད་པ་ལ་སོགས་པའི་དག་སྦྱོར་བུདྡྷ་ཧེ་རུ་ཀ་ལྟར་དུ་ཡིན་ཞིང་། སྐུ་མདོག་མཐིང་ནག་ཡིན་པའི་རྒྱུ་མཚན་ནི་རིག་སྟོང་ཐུགས་ཀྱི་ཡེ་ཤེས་མཚོན་བྱེད་དུ་མཐིང་ཁ་དང་། མཐིང་ནག་ཅེས་པ་ཁྱད་པར་དུ་འགྱུར་བ་མེད་པའི་མཚོན་བྱེད་ཡིན་ལ། མཐིང་སྐྱ་དང་མཐིང་དཀར་དེ་ཚོ་གཉིས་འདྲེས་ཀྱི་ཁ་དོག་ཡན་ལག་གི་ཁ་དོག་ཡིན་ནོ། །མཐིང་ནག་རྩ་བའི་ཁ་དོག་དེ་བསྒྱུར་དུ་དཀའ་བའི་ཕྱིར་ན་འགྱུར་བ་མེད་པ་ཐུགས་ཀྱི་རྟགས་དང་། འདི་ནས་ཁྲོ་བོ་རྣམས་ལ་དམར་ནག་ལྗང་ནག་སེར་ནག་ཏུ་སྣང་རྒྱུ་དེ་ཚོ་ལོག་འདྲེན་འདུལ་བའི་དྲག་པོའི་ཆ་བྱད་དུ་བསྟན་པའི་དོན་ཡིན་ལ། ཡང་ལས་སྣ་ཚོགས་ཀྱི་ཕྲིན་ལས་ཀྱིས་དཀར་བོར་སྣང་བ་ཡང་མི་སྲིད་པ་མ་ཡིན་ཞིང་། ཞི་བའི་ལྷ་ཚོགས་ཀྱི་ནང་དུ་ཁྲོ་བོ་འདྲེས་པ་ལྟ་བུ་ཁྱབ་ཆེ་ཆུང་གི་གོ་བ་ཡང་དེ་དང་བསྟུན་ནས་སྐབས་དང་བསྟུན་དགོས་པ་ཡིན་ནོ། །འདིའི་ཕྱག་མཚན་རྡོ་རྗེ་བྷན་དྷ་དགྲ་སྟ་གཡས་སུ་བསྣམས་པ་དེ་ཞེ་སྡང་རྩད་གཅོད་མེ་ལོང་ཡེ་ཤེས་ཀྱི་རྡོ་རྗེ། ཆགས་སྡང་གཉིས་མེད་བདེ་སྟོང་ཟུང་འཇུག་གི་བྷན་དྷ། བདག་འཛིན་རྩད་ནས་གཅོད་པའི་རྟོག་བྲལ་ཡེ་ཤེས་ཀྱི་དགྲ་སྟ་རྣམས་དང་། ཕྱག་གཡོན་པས་དྲིལ་བུ་བྷན་དམར་ཐོང་གཤོལ་བསྣམས་པ་དེ་སྟོང་ཆེན་ཤེས་རབ་དབྱིངས་ཀྱི་དྲིལ་བུ་དང་། ཟུང་འཇུག་བདེ་བ་ཆེན་པོའི་བྷན་དམར། བྷན་དམར་ཞེས་པ་བྷན་དྷ་དམར་གྱི་ཁྲག་ཆེན་གྱིས་བཀང་བ་ཞིག་ལ་བྷན་དམར་ཟེར་ཞིང་། ཉོན་མོངས་ཐ་རྒོད་འདུལ་བའི་ཐུགས་རྗེའི་ཐོང་གཤོལ་རྣམས་ཕྱག་ན་བསྣམས་པ། ཡུམ་བཛྲ་ཀྲོ་ཏི་མ་སྐུ་མདོག་ཡབ་དང་འདྲ་བ། རྡོ་རྗེ་དུང་དམར་ཡབ་ལ་སྟོབ་པ། ཡབ་ཡུམ་གཉིས་མེད་དུ་འཁྲིལ་བ་ལ་སོགས་པ་གོང་གི་བུདྡྷ་ཧེ་རུ་ཀ་ལྟར་ཁ་རྩང་བཤད་པ་བཞིན་དུ་ཡིན་ནོ།། ༢ ལྷོ་རུ་རཏྣ་ཧེ་རུ་ཀ་ཡབ་ཡུམ་བསྐྱེད་པ། ལྷོ་ཡི་རཏྣ་ཧེ་རུ་ཀ་ནི། ཧཱུྃ༔ ལྷོ་རུ་རཏྣ་ཧེ་རུ་ཀ༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་དམར་དབུས་སེར་ནག༔ རིན་ཆེན་ཁ་ཊཱྃ་བེ་ཅོན་གཡས༔ དྲིལ་བུ་བྷན་དམར་རྩེ་གསུམ་གཡོན༔ རཏྣ་ཀྲོ་ཏི་གཉིས་མེད་འཁྲིལ༔ ཞེས་གསུངས་ཏེ། དཀྱིལ་འཁོར་ཆེན་པོའི་ལྷོ་ཕྱོགས་སུ་རཏྣ་སྟེ་རིན་ཆེན། མཉམ་ཉིད་ཡེ་ཤེས་ཀྱི་རང་མདངས་སངས་རྒྱས་ཐམས་ཅད་ཀྱི་ཡོན་ཏན་རིན་པོ་ཆེའི་བདག་ཉིད་བཅོམ་ལྡན་འདས་རཏྣ་ཧེ་རུ་ཀ་ཞལ་གསུམ་ཕྱག་དྲུག་རྣམས་སྔར་བཞིན་ལས་ཕྱག་མཚན་གཡས་ན་རིན་ཆེན་ཁ་ཊཱྃ་བེ་ཅོན་བསྣམས་པ་དེ་ནི་ང་རྒྱལ་རྩད་ནས་གཅོད་པ་མཉམ་ཉིད་ཡེ་ཤེས་ཀྱི་རིན་ཆེན། དུག་གསུམ་འཇོམས་པ་ཐུགས་རྗེའི་ཁ་ཊཱྃ། བདག་འཛིན་འཇོམས་པ་ཆོས་ཉིད་ཀྱི་བེ་ཅོན། བེ་ཅོན་ཞེས་པ་དེ་མཁྲེགས་ཤིང་གི་རྒྱུ་ལས་གྲུབ་པའི་དབྱུ་གུ་མཚོན་ཆའི་རིགས་ཤིག་ལ་གོ་དགོས་ལ། ཕྱག་གཡོན་ན་དྲིལ་བུ་བྷན་དམར་རྩེ་གསུམ་བསྣམས་པ་དེ་ནི་དྲིལ་བུ་བྷན་དམར་སྔར་བཞིན་དང་། སྲིད་པ་ཡོངས་གྲོལ་གྱི་ཐུགས་རྗེའི་ཏྲི་ཤུལ། ཏྲི་ཤུལ་ཞེས་པ་དེ་ཡང་མཚོན་ཆའི་རིགས་ཤིག་ལ་རྩེ་གསུམ་མམ་ཏྲི་ཤུ་ལ་ཡང་ཟེར་ཞིང་། ཡུམ་ཆེན་རཏྣ་ཀྲོ་ཏི་རང་རྟགས་དང་དུང་དམར་བསྣམས་ནས་ཡབ་ལ་སྟོབ་པ། ཡབ་ཡུམ་གཉིས་མེད་དུ་འཁྲིལ་བའོ།། ༣ ནུབ་ཏུ་པདྨ་ཧེ་རུ་ཀ་ཡབ་ཡུམ་བསྐྱེད་པ། ནུབ་ཀྱི་པདྨ་ཧེ་རུ་ཀ་ནི། ཧཱུྃ༔ ནུབ་ཏུ་པདྨ་ཧེ་རུ་ཀ༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་སྔོ་དབུས་དམར་ནག༔ པདྨ་ཁ་ཊཱྃ་དབྱུག་ཏོ་གཡས༔ དྲིལ་བུ་བྷན་དམར་རྔེའུ་ཆུང་གཡོན༔ པདྨ་ཀྲོ་ཏི་གཉིས་མེད་འཁྲིལ༔ ཞེས་གསུངས་ཏེ། རང་བྱུང་དཀྱིལ་འཁོར་ཆེན་པོའི་ནུབ་ཀྱི་དབུས་སུ་སོར་རྟོག་ཡེ་ཤེས་ཀྱི་རང་བཞིན་སངས་རྒྱས་ཐམས་ཅད་ཀྱི་གསུང་རྡོ་རྗེའི་བདག་ཉིད་བཅོམ་ལྡན་འདས་པདྨ་ཧེ་རུ་ཀ་ཞལ་གསུམ་ཕྱག་དྲུག་ཞབས་བཞི་བསྒྲད་པ་ཕྱག་གཡས་ན་པདྨ་ཁ་ཊཱྃ་དབྱུག་ཏོ་བསྣམས་པ། དེའི་རྒྱུ་མཚན་ནི་འདོད་ཆགས་རྩད་གཅོད་སོར་རྟོག་ཡེ་ཤེས་ཀྱི་རང་རྟགས་པདྨ། སྲིད་གསུམ་གདུག་པ་འདུལ་བའི་ཐུགས་རྗེའི་ཁ་ཊཱྃ། ཞེན་རྟོག་རྩད་ནས་གཅོད་པའི་རྟོག་མེད་ཀྱི་དབྱུག་ཏོ། གཡོན་པས་དྲིལ་བུ་བྷན་དམར་རྔེའུ་ཆུང་བསྣམས་པ་ནི་དྲིལ་བུ་བྷན་དམར་གཉིས་ཀ་གོང་ལྟར་དང་། ཉོན་མོངས་གཉིད་ལས་སློང་བའི་ཕྲིན་ལས་ཀྱི་རྔེའུ་ཆུང་བསྣམས་པ། ཡུམ་ཆེན་པདྨ་ཀྲོ་ཏི་རང་རྟགས་དང་། དུང་དམར་བསྣམས་ནས་ཡབ་ལ་སྟོབ་པ། ཡབ་ཡུམ་གཉིས་མེད་དུ་འཁྲིལ་བའོ།། ༤ བྱང་དུ་ཀརྨ་ཧེ་རུ་ཀ་ཡབ་ཡུམ་བསྐྱེད་པ། བྱང་གི་ཀརྨ་ཧེ་རུ་ཀ་ནི། ཧཱུྃ༔ བྱང་དུ་ཀརྨ་ཧེ་རུ་ཀ༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་དམར་དབུས་ལྗང་ནག༔ རྒྱ་གྲམ་རལ་གྲི་ཁ་ཊཱྃ་གཡས༔ དྲིལ་བུ་བྷན་དམར་ཐོང་གཤོལ་གཡོན༔ ཀརྨ་ཀྲོ་ཏི་གཉིས་མེད་འཁྲིལ༔ ཞེས་གསུངས་ཏེ། རང་བྱུང་གི་དཀྱིལ་འཁོར་ཆེན་པོའི་བྱང་གི་དབུས་ཕྱོགས་སུ་བྱ་གྲུབ་ཡེ་ཤེས་ཀྱི་རང་བཞིན་སངས་རྒྱས་ཐམས་ཅད་ཀྱི་ཕྲིན་ལས་ཀྱི་བདག་ཉིད་བཅོམ་ལྡན་འདས་ཀརྨ་ཧེ་རུ་ཀ་ཞལ་གསུམ་ཕྱག་དྲུག་ཞབས་བཞི་བསྒྲད་པ་ཕྱག་གཡས་ན་རྒྱ་གྲམ་རལ་གྲི་ཁ་ཊཱྃ་བསྣམས་པ་དེ་ཕྲག་དོག་རྩད་ནས་གཅོད་པ་བྱ་གྲུབ་ཡེ་ཤེས་ཀྱི་རང་རྟགས་རྒྱ་གྲམ་དང་། རལ་གྲི་ཁ་ཊཱྃ་གོང་བཞིན། ཕྱག་གཡོན་པས་དྲིལ་བུ་བྷན་དམར་ཐོང་གཤོལ་རྣམས་བསྣམས་པ། ཀརྨ་ཀྲོ་ཏི་སྐུ་མདོག་རྒྱན་ཆས་ཡབ་དང་ཆ་འདྲ་བ་ཡིན་པའི་ནང་གི་ཡུམ་ལ་གཟིག་ཤམ་སྟེ། བདེ་ཆེན་ལྷན་སྐྱེས་ཀྱི་ཡེ་ཤེས་མཚོན་བྱེད་དུ་ཡུམ་ཐམས་ཅད་ཀྱིས་གཟིག་ཤམ་མནབས་ཡོད་ལ། ཀརྨ་ཀྲོ་ཏི་གཡས་རང་རྟགས་དང་། གཡོན་དུང་དམར་ཡབ་ལ་སྟོབ་པ་དང་བཅས་ཡབ་ཡུམ་གཉིས་མེད་དུ་འཁྲིལ་བའོ། །དེ་ཡན་ཆད་ཀྱི་ཁྲག་འཐུང་གཙོ་བོ་ཡབ་ཡུམ་བཅུའི་སྐུ་མདོག་ཕྱག་མཚན་བསྟན་ནས་འདི་ནས་ཁྲོ་བོའི་རྒྱན་ཆས་དང་གདན་སོགས་བསྡུས་ཏེ་བསྟན་པ་ནི། ཁྲག་འཐུང་གཙོ་བོ་ཡབ་ཡུམ་བཅུ༔ ཁྲོ་བོའི་ཆ་ལུགས་རྫོགས་པར་ལྡན༔ བྱོལ་སོང་གཙོ་བོ་རིན་ཆེན་བྲག༔ པདྨ་ཉི་སྟེང་གསལ་བར་བསྒོམ༔ ཞེས་གསུངས་ཏེ། ཁྲོ་བོའི་ཆ་ལུགས་ཁ་རྩང་ཞིག་ནས་ཧ་ལམ་བཤད་ཟིན་མོད་ཀྱང་ཁྲོ་བོའི་ངེས་ཚིག་གི་སྟེང་ནས་རྣམ་པ་བཞི་རུ་འགྲེལ་རྒྱུ་ཡོད་ཅིང་། དེ་ལ་བདག་མེད་རྟོགས་པའི་ཤེས་རབ་ནི་ཆོས་ཉིད་ངང་གིས་ཁྲོ་བ་སྟེ། རྣམ་རྟོག་གམ་མཚན་མ་འཇོམས་པར་བྱེད་པས་ན་འཇོམས་བྱེད་ཁྲོ་བོ་ཞེས་ཟེར་རོ། །རང་རིག་པའི་ཡེ་ཤེས་ནི་རྟོགས་པ་ངང་གིས་ཁྲོ་བ་སྟེ། འཁོར་བའི་ས་བོན་དྲུངས་ནས་འབྱིན་པའི་ཕྱིར་ན་ཁྲོ་བོ་ཞེས་ཟེར་རོ། །ཐུགས་རྗེ་ཤུགས་ཀྱི་ཡེ་ཤེས་ནི་ཤུགས་ཀྱིས་ཁྲོ་བ་སྟེ། འགྲོ་བའི་རྒྱུད་ཀྱི་མི་མཐུན་པའི་ཕྱོགས་འཇོམས་པའི་ཕྱིར་ཁྲོ་བོ་ཞེས་ཟེར་རོ། །ཕྲིན་ལས་ཕྱག་རྒྱའི་ཁྲོ་བོ་ཞེས་པ་ནི་གདུལ་བྱའི་དབང་གིས་ཁྲོ་བོར་སྣང་བ་ཞིག་ཡིན་ཞིང་། གང་ལ་གང་འདུལ་གྱིས་གདུལ་བྱ་མི་འདོར་བར་འདུལ་བ་ཡིན་ལ། འདི་ནས་གསུངས་པ་ནི་ཕྲིན་ལས་ཕྱག་རྒྱའི་ཁྲོ་བོ་དེ་ཉིད་ལ་གཙོ་བོར་སྨྲས་པ་ཞིག་ལ་གོ་དགོས་སོ། །ཁྲོ་བོ་འདི་དག་གི་སྐུ་མདོག་ཕྱག་མཚན་སྣ་ཚོགས་སུ་སྣང་བ་ནི། ལས་བཞི་མཆོག་དང་ལྔ་ཡི་ཕྲིན་ལས་དང་སྦྱར་ནས་དེ་ཡང་དམར་ནག་སོགས་སྣང་བ་ནག་པོའི་སྒྲ་གོང་ནས་བཤད་མ་ཐག་པ་ལྟར་གྱི་ཁྱད་པར་དུ་དྲག་པོའི་མཛད་པ་མཐར་ཕྱིན་པའི་རྟགས་སོ། །ཡབ་རྣམས་ཀྱི་དབུ་གསུམ་དེ་སྐུ་སྟོང་པ་ཉིད། གསུང་སྨོན་པ་མེད་པ། ཐུགས་མཚན་མ་མེད་པ་སྟེ་རྣམ་ཐར་གསུམ་མཚོན་བྱེད། ཕ་རོལ་ཏུ་ཕྱིན་པ་དྲུག་མཐར་ཕྱིན་པའི་རྟགས་སུ་ཕྱག་དྲུག་དང་ལྡན་ཞིང་། ཕྱག་དྲུག་གིས་ཡེ་ཤེས་ལྔ་དང་རང་བྱུང་གི་ཡེ་ཤེས་དང་དྲུག་གི་རྟགས་ཀྱི་ཕྱག་རྒྱ་འོད་འབར་བའི་ཕྱག་མཚན་དྲུག་བསྣམས་པ། དུས་རྒྱུན་དུ་ཡེ་ཤེས་ལྔ་གསུངས་ཀྱང་འདི་ནས་ཡེ་ཤེས་དྲུག་གསུངས་པ་ནི་ཨ་ནུའི་སྒོས་ཆོས་ཡིན་ཞིང་། ཨ་ནུ་ཡོ་གའི་སྒོས་ཆོས་ལ་ཡེ་ཤེས་དྲུག་གསུངས་ཡོད་པ་ཡིན། ཞབས་བཞི་རྫུ་འཕྲུལ་གྱི་རྐང་བཞི། རྫུ་འཕྲུལ་གྱི་རྐང་བཞི་འདི་དུས་རྒྱུན་གྱི་འདུན་བརྩོན་སེམས་པ་དཔྱོད་པ་དེ་ཉིད་མ་ཡིན་ལ། ཆོས་ཀྱི་དབྱིངས་ཀྱི་རྫུ་འཕྲུལ། ཡེ་ཤེས་ཀྱི་རྫུ་འཕྲུལ། ཚོགས་གཉིས་རྫོགས་པའི་རྫུ་འཕྲུལ། སྤྲུལ་བའི་རྫུ་འཕྲུལ་དང་བཞི་བོ་ལ་གསུངས་པ་ཡིན་ནོ། །ཁྲག་འཐུང་ཁྲོ་བོ་དེ་རྣམ་པ་ཐུགས་ཞི་བའི་ངང་ལས་གདུག་པ་འདུལ་བའི་ཕྱིར་དུ་ཁྲོ་གཉེར་དང་། སྤྱན་སྡང་མིག་ཏུ་བསྒྲད་པ། འཁོར་བར་མི་ལྟུང་བའི་མཚོན་བྱེད་དུ་དབུ་སྐྲ་གྱེན་དུ་བརྫེས་པ། ཤངས་ནས་རྡོ་རྗེའི་རླུང་ནག་འཚུབ་པ། ཞལ་ནས་དུག་གསུམ་ཟད་པར་རྔུབ་བཞིན་ཡོད་པ། ལྗགས་གློག་དམར་ལྟར་འཁྱུག་པས་ཁམས་གསུམ་མྱོས་པ། མཆེ་བ་ཟླ་ཚེས་ལྟར་གཙིགས་པས་སྐྱེ་ཤི་རྩད་ནས་གཅོད་པ་ལ་སོགས་པ་དེ་ལྟར་གསུངས་ཡོད་དོ། །སྒེག་པ་དཔའ་བ་མི་སྡུག་སྟེ་སྐུ་ཡི་ཉམས་ཡིན་ལ། སྒེག་པ་ཞེས་པ་མཛེས་ཉམས་འཕྱོར་སྒེག་དང་ལྡན་པ་ཞིག་ལ་གོ་ཞིང་། དཔའ་ཉམས་སྟོབས་དང་ལྡན་པ་གཞན་གྱིས་མི་ཐུབ་པ། མི་སྡུག་ཁྲོ་གཏུམ་སྐྲག་པར་བྱེད་པའི་སྐུའི་ཉམས་གསུམ་མོ། །དགོད་གཤེ་དྲག་ཤུལ་གསུམ་དེ་གསུང་གི་ཉམས་ཡིན་ཞིང་། དགོད་པ་དགྱེས་ཤིང་དྲག་པའི་བཞད་སྒྲ་ཞིག་ལ་གོ་བ་དང་། གཤེ་བ་ཞེས་པ་གཤེ་ཚིག་ལ་གོ་ལ། དྲག་ཤུལ་ཞེས་པ་དེ་སྟོང་ཁམས་བཤིག་པའི་ངར་སྒྲའོ། །སྙིང་རྗེ་དང་། སྟོབས་ཀྱིས་འདུལ་བའི་རྔམ་པ། མཚན་འཛིན་དབྱིངས་སུ་ཞི་བའི་ཞི་ཉམས་ཏེ་ཐུགས་ཀྱི་ཉམས་གསུམ་ཡིན་ལ། སྐུ་གསུང་ཐུགས་ཀྱི་ཉམས་གསུམ་གསུམ་གྱིས་དགུ་སྟེ་གར་གྱི་ཉམས་དགུ་དང་ལྡན་པའོ། །རྒྱན་ཆས་ནི་སེམས་བྱུང་གནས་སུ་དག་པའི་བརྡ་རུ་ཐོད་པ་སྐམ་རློན་རྙིད་གསུམ་གྱི་དོ་ཤལ་རིམ་པ་གསུམ། ཚལ་བུ་ཡི་དཔུང་རྒྱན་དང་། གདག་པའི་རྒྱན་གཉིས་ནི་སྟོབས་ཀྱིས་གཏི་མུག་འཇོམས་པའི་བརྡ་རུ་གླང་ཆེན་གྱི་ཀོ་རློན་མནབས་པ། བྱང་ཆུབ་སེམས་ཀྱིས་འདོད་ཆགས་འཇོམས་པའི་བརྡ་རུ་ཞིང་ལྤགས་མནབས་པ་སྟེ། དེ་ཡང་ཕྲག་པའི་སྟེང་ནས་མར་ལག་པ་གཉིས་ཀ་ཐུར་དུ་འཕྱང་ནས་མགོ་གཡས་ས་ལ་བསྟན་ཡོད་པ། དཔའ་གཏུམ་གཏུམ་པོའི་རྟགས་ཀྱི་མཚོན་བྱེད་ཀྱི་ལས་ཀྱི་ཞེ་སྡང་འཇོམས་པའི་བརྡ་རུ་ཡབ་རྣམས་ཀྱིས་སྟག་ལྤགས་ཀྱི་ཤམ་ཐབས་དང་། ཡུམ་རྣམས་ཀྱིས་འདོད་ཆགས་དག་པའི་བརྡ་རུ་གཟིག་ཤམ་མནབས་པ་སྟེ་དེ་ལྟར་བགོ་བའི་གོས་གསུམ་མོ། །དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཏེ་བྱུག་པའི་རྫས་གསུམ་སྟེ། དེ་རྣམས་ལ་དུར་ཁྲོད་ཀྱི་ཆས་བརྒྱད་ཀྱང་ཟེར་ཞིང་། སྔོན་གྱི་དུས་ན་དཔལ་ཆེན་པོས་རུ་ཏྲ་བསྒྲལ་བའི་དཔའ་རྟགས་སུ་བཞེས་པའི་རྒྱན་ཆས་ཡིན་ནོ། ད་རུང་ཀླུ་རྒྱལ་རིགས་དཀར་བོའི་སྐྲ་ཆིངས། རྗེ་རིགས་སེར་བོའི་སྙན་ཆ། བྲམ་ཟེ་དམར་མོའི་སེ་མོ་དོ་དང་མགུལ་ཆིངས། དམངས་རིགས་ལྗང་གུའི་སྐ་རགས་དང་ནི་དོ་ཤལ། གདོལ་བ་ནག་པོའི་གདུ་བུ་སྟེ་དེ་རྣམས་གསུངས་ཡོད། གདན་གྱི་ཁྱད་པར་ནི་བྱོལ་སོང་གཙོ་བོ་རིན་ཆེན་བྲག་གསུངས་ན་བྱོལ་སོང་གཙོ་བོ་ནི་ཁྱུ་མཆོག་དང་། མ་ཧེ། གཟིག སྟག དོམ་རྣམས་ཡིན་ཞིང་། དྲེགས་པའི་ལྷ་བརྒྱད་ནི་ཤར་ཕྱོགས་དྲི་ཟ་ཕོ་མོ། ལྷོ་ཕྱོགས་ཀྱི་གཤིན་རྗེ་ཕོ་མོ། ནུབ་ཕྱོགས་ཀྱི་སྲིན་པོ་ཕོ་མོ། བྱང་ཕྱོགས་ཀྱི་གནོད་སྦྱིན་ཕོ་མོ་དང་། དབུས་ཕྱོགས་ཀྱི་རུ་ཏྲ་ཕོ་མོ་རྣམས་བསྣོལ་བའི་སྟེང་ན་ཞི་བའི་སྐབས་ཀྱི་སེང་གེ་ལ་སོགས་པ་ཚུར་གནས་གྱུར་ནས་ཁྱུ་མཆོག་ལ་སོགས་པར་གནས་གྱུར་པའི་སྟེང་ན་ཉི་ཟླ་པདྨའི་གདན་གྱི་སྟེང་དུ་ཁྲག་འཐུང་ཡབ་ཡུམ་གསལ་འདེབས་དགོས་སོ། །ཁྱུ་མཆོག གཟིག སྟག དོམ་རྣམས་ཤར་ནས་བཟུང་སྟེ་ཕྱོགས་བཞིའི་བྱོལ་སོང་གི་གཙོ་བོ་ལ་རིམ་པ་བཞིན་དུ་སྦྱར་རྒྱུ་ཡིན་ཞིང་། ཤར་ན་འགྲོ་བ་ཟིལ་གྱིས་གནོན་པ་གཏི་མུག་དག་པ་ཁྱུ་མཆོག་གི་གདན་ཏེ། ཁྱུ་མཆོག་ཅེས་པ་སྲོག་ཆགས་གང་ཡིན་ཞེ་ན། འདུལ་བ་ལུང་གི་ནང་ན་བ་གླང་གི་ཕྲུ་གུ་སེང་གེའི་འོ་མས་གསོས་པ་ལ་བཤད་ཡོད་ཅིང་། གཟི་བརྗིད་ཆེ་བ་ང་རྒྱལ་དག་པ་མ་ཧེ་དེ་ལྷོར། གདུག་པ་ཆེ་བ་ཕྲག་དོག་དག་པ་གཟིག དཔའ་རྟུལ་ཆེ་བ་ཞེ་སྡང་དག་པ་དེ་སྟག རང་བཞིན་གྱིས་གཏུམ་པ་འདོད་ཆགས་དག་པ་དོམ། བྱོལ་སོང་གི་གཙོ་བོ་དེ་དག་གསུངས་ཤིང་། རྒྱུད་སོ་སོའི་ནང་ན་འདྲ་མི་འདྲ་ཅུང་ཟད་རེ་ཡོད་ཀྱང་རྒྱུད་དོན་བཀྲལ་ལུགས་ཀྱི་ཁྱད་པར་མ་གཏོགས་གནད་ཀྱི་གོ་བ་གཅིག་ཡིན་ལ། བྱོལ་སོང་གཙོ་བོ་འདི་ཚོ་ཞབས་མནན་མིན་པར་འདི་རྣམས་ཀྱིས་པད་ཉི་ཡར་བཏེག་ཡོད་པ་བསྒོམ་དགོས་སོ། །དེས་ན་མཁའ་ལྡིང་ལ་སོགས་པ་བྱོལ་སོང་གཙོ་བོ་ཟུང་ཞེས་པ་གཉིས་རེས་བཏེག་པའི་གདན་གྱི་སྟེང་ན་དྲེགས་པའི་ལྷ་བརྒྱད་ཕོ་མོ་དེ་སྤྱི་ཆིངས་ཀྱི་ཚུལ་དུ་ཡོད་ཅིང་། སྤྱི་ཆིངས་ཞེས་པ་གན་རྐྱལ་ཞེས་པའི་དོན་ཡིན་ནོ། །དེའི་མཚམས་སུ་རྡོ་རྗེའི་བྲག་ཆེན་གྱི་སྟེང་ན་ཐུགས་རྗེའི་ཆགས་པ་ཆེན་པོའི་པདྨ་དང་། མཁྱེན་གཉིས་ཟུང་དུ་འཇུག་པའི་ཉི་ཟླའི་གདན་གྱི་ཐོག་ཏུ་ཞེས་གསུངས་ཤིང་། རྡོ་རྗེའི་བྲག་ཆེན་ནི་རྟོག་མེད་ལྷུན་གྱིས་གྲུབ་པའི་རྡོ་རྗེའི་བྲག་ཆེན། ཐུགས་རྗེའི་ཆགས་པ་ཆེན་པོའི་པདྨ་དང་། མཁྱེན་གཉིས་ཟུང་དུ་འཇུག་པའི་ཉི་ཟླའི་གདན་གྱི་ཐོག་ན་སྐུ་དང་ཡེ་ཤེས་སྣ་ཚོགས་འདུ་འབྲལ་མེད་པའི་འཇའ་འོད་དང་མེ་དཔུང་གི་ཀློང་ན་གསལ་བར་བསྒོམ་པར་གསུངས་ཏེ་རང་སྣང་ཡེ་ཤེས་ཀྱི་ལྷ་སྐུ་དེ་ཚོ་གསལ་སྟོང་དབྱེར་མེད་པར་བསྒོམ་དགོས་སོ། །བསྐང་བཤགས་སོགས་ཀྱི་དགོས་པ་དང་བསྟུན་ནས་འདིའི་མཚམས་སུ་མཚམས་བཞི་ལ་ལུང་གི་ཧེ་རུ་ཀ་ཡབ་ཡུམ་བརྒྱད་བསྒོམ་ཆོག་ཅིང་། ལུང་གི་ཧེ་རུ་ཀ་ཡབ་ཡུམ་བརྒྱད་ནི་སྟོང་ཉིད་ཡེ་ཤེས། འདའ་ཀ་ཡེ་ཤེས། དབྱིངས་སྒྲོལ་ཡེ་ཤེས། ཀློང་གྱུར་ཡེ་ཤེས་རྣམས་ཀྱི་རང་བཞིན་རཀྵ་ཧེ་རུ་ཀ་ཡབ་ཡུམ། ས་ནུ་ཧེ་རུ་ཀ་ཡབ་ཡུམ། གུ་ཧྱ་ཧེ་རུ་ཀ་ཡབ་ཡུམ། ཡཀྵ་ཧེ་རུ་ཀ་ཡབ་ཡུམ་རྣམས་བསྒོམ་ཆོག་གོ །རཀྵ་ཞེས་པ་སྲིན་པོ་སྟེ་སྲིན་པོ་ཧེ་རུ་ཀ་ཡབ་ཡུམ། ས་ནུ་ཞེས་པ་དམ་ཚིག་སྟེ་དམ་ཚིག་ཧེ་རུ་ཀ་ཡབ་ཡུམ་ལ་སོགས་པ་དེ་ལྟ་བུའི་གོ་དོན་ཡིན་ནོ།། ༣༽ གནས་མ་བསྐྱེད་པ། ད་ནི་གནས་ཀྱི་མ་མོ་ཀོའུ་རི་བརྒྱད་ཡིན་ཞིང་། ཀོའུ་རི་བརྒྱད་བསྒོམ་པ་དེ་ཉིད་ལ་ཐུག་པ་ཡིན་ལ། འདི་ལ་གནས་ཀྱི་མ་མོ་ཟེར་བའི་རྒྱུ་མཚན་ཅི་ཞེ་ན། རྣམ་ཤེས་ཚོགས་བརྒྱད་དེ་འཁོར་བ་བསྐྱེད་པའི་གནས་ཡིན་པ་དང་། དེ་རྣམས་དག་པར་བྱེད་པའི་ལྷའི་ཕྱག་རྒྱར་སྣང་བས་ན་གནས་ཀྱི་མ་མོ་བརྒྱད་གསུངས་ཏེ། ཧཱུྃ༔ ཤར་ཕྱོགས་ཀོའུ་རཱི་ཞིང་དབྱུག་དཀར༔ ལྷོ་ཕྱོགས་ཙོའུ་རཱི་མདའ་འགེངས་སེར༔ ནུབ་ཕྱོགས་པྲ་མོ་ཆུ་སྲིན་དམར༔ བྱང་ཕྱོགས་བེ་ཏཱ་བྷན་དམར་ལྗང་༔ ཤར་ལྷོ་པུསྐ་རྒྱུ་འདྲེན་སེར༔ ལྷོ་ནུབ་ཀསྨ་བྷན་དམར་ལྗང་༔ ནུབ་བྱང་ཙན་དྷ་རྒྱུ་ཟ་སེར༔ བྱང་ཤར་སྨེ་ཤ་རོ་ཟ་མཐིང་༔ ཞིང་ཆེན་གདན་ལ་གར་སྟབས་འགྱིངས༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་པ་འདིས་བསྟན་པ་ཡིན་ནོ། །ཧཱུྃ་ཞེས་པའི་ཀུན་བཟང་ཐུགས་ཀྱི་ཡི་གེའི་ཆོ་འཕྲུལ་གྱི་རང་སྒྲ་དེ་ཡིས་རྒྱུ་ཡི་ཡི་གེ་དེ་འཕྲོས་ནས། དཀྱིལ་འཁོར་ཆེན་པོའི་ཤར་ཕྱོགས་ཀྱི་ཁྱམས་ན་ཀུན་གཞི་རྣམ་ཤེས་གནས་སུ་དག་པ་ཀོའུ་རཱི་དཀར་མོ། འཁོར་བའི་རྣམ་རྟོག་གཞོམ་པའི་ཕྱིར་ཞིང་དབྱུག་དང་བྷན་དམར་འཛིན་པ། ཞིང་ཞེས་པ་ནི་ཞིང་ཆེན་དང་ཞིང་ཕྲན་ཏེ། དེ་ནི་རུ་ཏྲ་ཆེ་ཆུང་གི་རོ་ལ་གསུངས་པ་ཡིན་ལ། ཞིང་དབྱུག་ཅེས་པ་ནི་མི་རོའི་དབྱུག་པ་ལ་ཟེར་ཞིང་། མི་རོའི་རྒྱལ་མཚན་ཞེས་པ་དང་ཕྱོགས་འདྲ་ཡིན་ནོ། །ལྷོ་ཕྱོགས་ན་ཡིད་ཤེས་གནས་དག་ཙོའུ་རཱི་སེར་མོ། ཙོའུ་རཱི་སེར་མོ་ཐབས་ཤེས་གཉིས་སུ་མེད་ཕྱིར་མདའ་གཞུ་འགེངས་པ། དཀྱིལ་འཁོར་གྱི་ནུབ་ཕྱོགས་ན་ཉོན་ཡིད་གནས་དག་པྲ་མོ་ཧ་དམར་མོ། ཕྱག་གཉིས་ཀྱིས་སྙིང་རྗེས་འཁོར་བ་སྟོང་པའི་ཕྱིར་དུ་ཆུ་སྲིན་གྱི་རྒྱལ་མཚན་བསྒྲེངས་པ། བྱང་ཕྱོགས་ན་རེག་ཤེས་གནས་དག་བེ་ཏཱ་ལི་ནག་མོ། ཆོས་ཉིད་འགྱུར་བ་མེད་པའི་ཕྱིར་རྡོ་རྗེ་འཕྱར་ཞིང་བྷན་དམར་ཐུགས་ཀར་འཛིན་པ། ཤར་ལྷོ་ན་མིག་གི་ཤེས་པ་གནས་དག་པུསྐ་སུ་དམར་སེར། ཉོན་མོངས་གནས་ནས་འདྲེན་པའི་ཕྱིར་དུ་བྱིས་པའི་རྒྱུ་མ་འདྲེན་པ། ལྷོ་ནུབ་ན་ལྕེ་ཤེས་གནས་སུ་དག་པ་ཀསྨ་རི་ལྗང་ནག འཁོར་བ་ཞལ་དུ་གསོལ་ཕྱིར་དུང་ཁྲག་དཀྲུག་ཅིང་གསོལ་བ། ནུབ་བྱང་ན་སྣ་ཤེས་གནས་སུ་དག་པ་ཙན་དྷ་ལི་སེར་སྐྱ། འཁོར་བ་རྟེན་དང་བྲལ་ཕྱིར་བམ་གྱི་མགོ་ལུས་འབྲལ་བ། བྱང་ཤར་ན་རྣ་བའི་རྣམ་ཤེས་གནས་དག་སྨེ་ཤ་ནི་མཐིང་ནག ལོག་རྟོག་ཕྲལ་ཕྱིར་བྱིས་པའི་སྙིང་ཟ་བ་སྟེ་དེ་རྣམས་ཡིན་ཞིང་། ཕྱོགས་བཞི་དང་མཚམས་བཞི་ན་བཞུགས་པ་དེ་རྩ་བའི་ཚིག་ལྟར་དུ་ཡིན་ནོ། །དེ་རྣམ་པ་ཐམས་ཅད་རོའི་གདན་ལ་གར་སྟབས་འགྱིང་བག་གིས་སོ་སོའི་ཉམས་དང་རྣམ་འགྱུར་ཐུན་མིན་དང་བཅས་ཏེ་མ་ཡེངས་ཡིད་ཡུལ་སྣང་ལ་རང་བཞིན་མེད་པ་གསལ་ལ་འཛིན་པ་མེད་པར་བསྒོམ་གསུངས་པའོ། །འདི་རྣམས་ཀྱི་མཚན་གྱི་སྒྲ་དོན་ནི་ཀོའུ་རཱི་ཞེས་པ་མཛོད་ལྡན་མ་ཟེར་ཞིང་། ཙོའུ་རཱི་ཞེས་པ་ཆོམ་རྐུན་མ། པྲ་མོ་ཧ་ཞེས་པ་རབ་རྨོངས་མ། བེ་ཏཱ་ལི་ཞེས་པ་རོ་ལངས་མ། པུསྐ་སི་ནི་སྦོས་མོ། ཀསྨ་རི་ཞེས་པ་སྨེ་ཤ་ཅན། ཙནྡྲ་ལི་ཞེས་པ་གཏུམ་མོ། སྨེ་ཤ་ནི་ནི་དུར་ཁྲོད་མ་ཞེས་དེ་ལྟར་གསུངས་ཡོད་དོ། །འདིའི་སྐབས་ན་ཚོགས་བརྒྱད་གནས་དག དེའི་ཐོག་ཏུ་སྣང་སྟོང་། གྲག་སྟོང་། ཚོར་སྟོང་། མྱོང་སྟོང་བཞི། དེའི་སྟེང་དུ་རིག་སྟོང་། གསལ་སྟོང་། དྲན་སྟོང་། སྟོང་གསལ་གཉིས་སུ་མེད་པའི་ཡེ་ཤེས་རྣམས་དང་སྦྱར་ནས་བརྒྱད་དུ་གསུངས་པ་ཡིན་ཞིང་། དཔེར་ན་ཀུན་གཞིའི་རྣམ་ཤེས་གནས་དག་སྣང་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་ཀོའུ་རཱི་མའམ་མཛོད་ལྡན་མ་ཞེས་པ་ལྟ་བུ་དང་། ཐམས་ཅད་ཀྱི་རྗེས་མ་མ་མོ་ཆེན་མོ་སྨེ་ཤ་ནི་ལྟ་བུ་ཡིན་ན་སྟོང་གསལ་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་སྨེ་ཤ་ནི་ཞེས་པ་ལྟ་བུ་དེ་ལྟར་ཡིན་ནོ། །འདི་ཐམས་ཅད་ཐོད་སྐམ་ལྔ་ཡི་དབུ་རྒྱན་ནི་སངས་རྒྱས་སྐུ་ལྔ་ཡི་མཚོན་བྱེད་ཡིན་ཞིང་། ཐོད་རློན་གྱི་ཕྲེང་བའི་དོ་ཤལ་ཡོད་པ་ནི་རྟོག་མེད་ཆོས་སྐུའི་དགོངས་པ་མཚོན་བྱེད་དང་། མི་ལྤགས་ཀྱི་གཡང་གཞིའི་ན་བཟའ། གཟིག་གི་པགས་པའི་ཤམ་ཐབས། རུས་པའི་རྒྱན་ཆ་ལྔ་ལ་སོགས་པ་དག་དྲན་སྦྱར་ནས་བསྒོམ་དགོས་སོ།། ༤༽ ཡུལ་མ་བསྐྱེད་པ། ད་ནི་ཡུལ་མ་ལ་ཐུག་པ་ཡིན་ཞིང་། ཡུལ་མ་ཞེས་པ་ནི་སྒོ་ལྔའི་རྣམ་ཤེས་ཀྱི་ཡུལ་གཟུགས། སྒྲ། དྲི། རོ། རེག་བྱ་ལྔ། དེའི་ཐོག་ཏུ་ཡིད་ཀྱི་ཡུལ་ཆོས། ཉོན་མོངས་ཅན་གྱི་ཡིད་ཉོན་ཡིད་ཀྱི་ཡུལ་ཀུན་གཞི། ཀུན་གཞིའི་ཡུལ་ཕྱི་ནང་གི་ཆོས་སུ་གྱུར་པ་ཐམས་ཅད་མ་སྤངས་གནས་སུ་དག་པ་ནི་ཡུལ་མ་བརྒྱད་ཡིན་ནོ།། ཧཱུྃ༔ དེ་ཡི་ཕྱི་རིམ་ཕྱོགས་མཚམས་བརྒྱད༔ སེང་ཧ་སེང་གདོང་རོ་ཟ་སྨུག༔ བྱ་ཀྲི་སྟག་གདོང་ལག་བསྣོལ་དམར༔ སྲི་ལ་ཝ་གདོང་བྱིས་ལྡག་ནག༔ ཤྭ་ན་སྤྱང་གདོང་རོ་ཐོགས་མཐིང་༔ ཀྲྀ་ཏ་བྱ་རྒོད་རྒྱུ་འདྲེན་སེར༔ ཀང་ཀ་དུར་བྱ་ཞིང་ཕྲག་དམར༔ ཁ་ཁ་བྱ་རོག་བྷན་གྲི་ནག༔ ཧུ་ལུ་འུག་གདོང་ལྕགས་ཀྱུ་མཐིང་༔ ཞིང་ཆེན་གདན་ལ་གར་སྟབས་བཞུགས༔ མ་ཡེངས་ཡིད་ཡུལ་གསལ་བར་བསྒོམ༔ ཞེས་གསུངས་ཏེ། རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོའི་ཁྱམས་ཀྱི་ཤར་ཕྱོགས་ན་རྟོག་པ་ཟིལ་གྱིས་གནོན་པ་སེང་གདོང་མ་སྨུག་ནག་ཕྱག་གཉིས་ཀྱིས་ཞིང་ཆེན་བསྣམས་ཏེ་འཁོར་བ་གཏིང་ནས་དཀྲུག་ཕྱིར་རལ་བ་བསིགས་ནས་གསོལ་བར་བྱེད་པ། ལྷོ་ཕྱོགས་ན་དཔའ་ཞིང་རྟུལ་ཕོད་པ་སྟག་གདོང་དམར་མོ་ཕྱག་གཉིས་ཐུར་དུ་བསྣོལ་ཞིང་འཁོར་བ་ཞེ་ལ་གནོན་ཕྱིར་མིག་གིས་འབྲུ་ཚུགས་སུ་ལྟ་བ། ནུབ་ན་ཐབས་ལ་མཁས་པས་ཕུང་པོའི་བདུད་འཇོམས་པ་ཝ་གདོང་ནག་མོ། ལས་བྱང་ཆེ་བའི་ནང་ན་སྤུ་གྲི་བསྣམས་གསུངས་ལ། འདི་ནས་བྱིས་ལྡག་གསུངས་ཤིང་། གཡས་སྤུ་གྲི་དང་གཡོན་བྱིས་པའི་རོ་ལྕེས་ལྡག་བཞིན་རྒྱུ་མ་ཟ་བ་ཞིག་བསྒོམ་དགོས་སོ། །བྱང་ཕྱོགས་ན་ཤྭ་ན་སྤྱང་གདོང་ཞེས་མེལ་ཚེ་མཁས་ཤིང་ལྷའི་བུའི་བདུད་འཇོམས་པ་མཐིང་ནག་སྤྱང་གདོང་མ་འཁོར་བ་དོང་ནས་སྤྲུག་ཕྱིར་འབྲུ་ཚུགས་སུ་བལྟས་ནས་བམ་རོ་ཟ་བ། དེ་རྣམས་ཟ་བྱེད་མཆེ་བ་ཅན་བཞི་ཡིན་ཏེ། ལོག་རྟོག་མཚན་འཛིན་ཐམས་ཅད་མཚན་མེད་དབྱིངས་སུ་རོལ་བྱེད་ཡེ་ཤེས་བཞིའི་མཆེ་བ་ཟླ་ཚེས་ལྟར་དུ་གཙིགས་པའི་མཆེ་བ་ཅན་འབའ་ཞིག་ཡིན་ནོ། །ཤར་ལྷོ་ན་ཀྲྀ་ཏ་བྱ་རྒོད་རྒྱུ་འདྲེན་སེར་ཡིན་ལ། འདི་ལ་བཞད་གདོང་ཟེར་ས་ཡང་ཡོད་ཅིང་། མིག་རྣོ་ཞིང་ཤེས་བྱ་ལ་ཐོགས་པ་མེད་པས་ན་བཞད་ཀྱི་གདོང་ཅན་ནམ་བྱ་རྒོད་མགོ་ཅན་སྐུ་མདོག་དཀར་སེར་དུག་གསུམ་རྩད་ནས་གཅོད་ཕྱིར་རོ་ཐོགས་ནས་རྒྱུ་མ་འདྲེན་པ། ལྷོ་ནུབ་ན་དབུགས་བྲལ་ལ་སྤྱོད་ཅེས་གསུངས་ཏེ། འཆི་བདག་གི་བདུད་འཇོམས་པ་ཀང་ཀཱ་ནི་དུར་བྱ་སྟེ་དུར་བྱའི་མགོ་ཅན་འཁོར་བ་དང་དུ་ལེན་ཕྱིར་ཞིང་ཆེན་ཕྲག་ལ་གཟར་ནས་དྲི་ལ་སྣོམ་གྱིན་ཡོད་པ། ནུབ་བྱང་ན་ཉོན་མོངས་པ་ཟད་པར་བྱེད་པ་བྱ་རོག་གི་གདོང་ཅན་སྐུ་མདོག་ནག་མོ་ཡིན་པ་ཕྱག་གཡས་སུ་ཉོན་མོངས་གནས་ནས་བསྒྲལ་ཏེ་གསོལ་ཕྱིར་རལ་གྲི་དང་དུང་ཁྲག་ཐོགས་པ། བྱང་ཤར་ན་གདུལ་བྱ་ཕྲ་བ་ཡང་མི་གཏོང་བ་འུག་པའི་མགོ་ཅན་མཐིང་ནག་ལོག་རྟོག་འདྲེན་པའི་ཕྱིར་དུ་ཕྱག་གཡས་ལྕགས་ཀྱུ་དང་གཡོན་བྷན་དྷ་ཐོགས་པ་སྟེ་དེ་རྣམས་ཡིན་ལ། དེ་ཐམས་ཅད་མགོ་བརྙན་མི་འདྲ་བ་མི་སྲུན་གཏུམ་ཞིང་ཁྲོས་པའི་ཉམས་ཅན་ཡིན་ཞིང་། རྗེས་མ་འདི་བཞི་གསོད་བྱེད་གཤོག་པ་ཅན་བཞི་ཡིན་ཏེ། དུག་གསུམ་དབྱིངས་སུ་གསོད་ཅིང་འཁོར་འདས་མཉམ་ཉིད་ཀྱི་དབྱིངས་སུ་གཞུག་ཕྱིར་ཐབས་ཤེས་ཟུང་འབྲེལ་གྱི་གཤོག་པ་དང་ལྡན་པ་ཤ་སྟག་ཡིན་ནོ། །སེང་ཧ་ལ་སོགས་ཕྲ་མེན་བརྒྱད་འདིའི་རྒྱན་ཆ་ཐོད་རློན་གྱི་དོ་ཤལ་རྐྱང་པ་ཡིན་ཞིང་། བསྐང་བཤགས་ཀྱི་སྐབས་ཀྱི་གཏུམ་པའི་སྤོར་བྱེད་ཆེན་པོ་བརྒྱད་འདི་ནས་བསྒོམ་ན་འདིའི་ཁྱམས་ཕྱི་མ་ལ་བསྒོམ་རྒྱུ་ཡིན་ལ། ཤར་ཕྱོགས་ལ་སྤོར་བྱེད་ཁྱུང་ཐོགས་མ། ཤར་ལྷོ་ན་སྤོར་བྱེད་སྐར་མདའ་གདོང་། ལྷོ་ཕྱོགས་ན་སྤོར་བྱེད་མི་ཟད་མ། ལྷོ་ནུབ་ན་སྤོར་བྱེད་མདུང་ཐུང་འཕེན། ནུབ་ན་སྤོར་བྱེད་རལ་གྲི་འཛིན། ནུབ་བྱང་ན་སྤོར་བྱེད་གླག་ཤ་རྡེབ། འུ་ཚོའི་ཡི་གེའི་ནང་ན་གླག་ཤ་རྡེབ་ཅེས་བྲིས་ཡོད་ཀྱང་། སྤོར་བྱེད་གླག་ཤ་རྡེབ་མ་ཡིན་པར་སླག་ཤ་རྡེབ་ཡིན་ཞིང་། ཡང་འགའ་རེས་སློག་ཤ་རྡེབ་ཅེས་ན་རོ་སྦྱོར་གྱིན་ཡོད། སློག་པ་ནི་གོས་ཀྱི་དོན་ཡིན་ཞིང་། སླག་ཅེས་བཤད་ཀྱང་ཕལ་ཆེར་ཕྱོགས་འདྲ་ལ། དེ་ཡིན་ཤས་ཆེ་སྟེ། སྒྱུ་འཕྲུལ་གྱི་ནང་དུ། ཁྱབ་མཛད་རེ་སྐོང་རྡོ་རྗེའི་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེའི་སློག་པའི་ཆས། །སངས་རྒྱས་སར་བགྲོད་དབང་གི་བསེ་ཁྲབ་ཆས། །གནོད་གདུག་ཟློག་བྱེད་རྒྱ་གྲམ་ལྕགས་ཀྱི་ཆས། །ཞེས་གསུངས་པའི་མངའ་ཐང་རྫོགས་བྱེད་རྡོ་རྗེའི་སློག་པའི་ཆས་ཞེས་པ་འདི་དང་འགྲིག་ཡོད་པས་གླག་ཤ་རྡེག་ཅེས་པ་བཅོས་དགོས་པ་འདྲའོ། །མཚམས་མཚམས་སུ་རྒྱུད་རང་གི་ནང་ནས་མ་གོ་བ་དེ་རྒྱུད་གཞན་གྱིས་བཀྲལ་མ་ཤེས་ན་མཛངས་པ་ལྕེ་རྡུམ་གྱི་སྐྱོན་དང་། ལོང་བ་ལོང་ཐུག་གི་སྐྱོན་འབབ་ཉེ་བ་དེ་ལྟར་ཡིན་ཞིང་། དེས་ན་ནུབ་ཕྱོགས་ན་སྤོར་བྱེད་སློག་ཤ་རྡེག བྱང་ན་སྤོར་བྱེད་དྲིལ་འཁྲོལ་མ། བྱང་ཤར་ན་སྤོར་བྱེད་གློག་ཕྲེང་འཛིན་མ་དེ་རྣམས་ཡིན་ལ། དེ་རྣམས་ཀྱི་དག་དྲན་དང་ཕྱག་མཚན་གཞུང་གི་འདོན་ཆའི་ནང་ནས་འབུད་པ་བཞིན་ཡིན་ནོ།། ༥༽ སྒོ་མ་བསྐྱེད་པ། སྒོ་མ་བཞི་ནི། ཧཱུྃ༔ ཤར་དུ་རྟ་གདོང་ལྕགས་ཀྱུ་དཀར༔ ལྷོ་རུ་ཕག་གདོང་ཞགས་པ་སེར༔ ནུབ་ཏུ་སེང་གདོང་ལྕགས་སྒྲོག་དམར༔ བྱང་དུ་སྦྲུལ་གདོང་དྲིལ་བུ་ལྗང་༔ ཚད་མེད་བཞི་ལྡན་སྒོ་མ་བཞི༔ ཞིང་ཆེན་གདན་ལ་གསལ་བར་བསྐྱེད༔ ཅེས་གསུངས་ཏེ། གོང་གི་སྤོར་བྱེད་ཆེན་མོ་བརྒྱད་དེ་བཞུགས་ས་ཞིང་ཆེན་གདན་ལ་གར་སྟབས་ཀྱི་འགྱིང་བག་གིས་བཞུགས་དགོས་པ་དེ་ལྟར་ཡིན་ཞིང་། སྒོ་མ་བཞི་འདི་ཕྱིན་ཅི་ལོག་གི་བདུད་བཞི་འཇོམས་ཤིང་ཡེ་ཤེས་བཞིའི་ཕྱག་རྒྱས་རྒྱས་འདེབས་པའི་ཚུལ་ཅན་གྱི་ཐུགས་རྗེ་ཞི་བ་ཆེན་པོའི་ཡེ་ཤེས་བྱམས་པའི་ངོ་བོར་ཤར་བ་ཤར་སྒོ་ན་རྟ་གདོང་དཀར་མོ་ཡིན་ལ། ཕྱག་ན་འཁོར་བར་མི་གཏོང་བའི་ལྕགས་ཀྱུ་བསྣམས་པ། ཐུགས་རྗེ་རྒྱས་པ་ཆེན་པོའི་སྙིང་རྗེའི་ངོ་བོ་ལྷོ་སྒོ་ན་ཕག་གདོང་སེར་མོ་ཞགས་པ་བསྣམས་པ་ཡིན་ཞིང་། ལོག་རྟོག་ཡེ་ཤེས་དབྱིངས་སུ་འཆིང་གྲོལ་བྱེད་པའི་ཞགས་པ་བསྣམས་པ། ཐུགས་རྗེ་དབང་མཛད་ཆེན་མོའི་དགའ་བ་ཡི་ངོ་བོ་ནི་ནུབ་སྒོར་སེང་གདོང་དམར་མོ་ཡིན་ལ། ཉོན་མོངས་འཇོམས་པར་བྱེད་པའི་ཐུགས་རྗེའི་རང་གནས་ཀྱི་ལྕགས་སྒྲོག་བསྣམས་པ། ཐུགས་རྗེ་དྲག་པོ་ཆེན་པོའི་ཡེ་ཤེས་བཏང་སྙོམས་ཀྱི་ངོ་བོ་བྱང་སྒོར་སྦྲུལ་གདོང་ལྗང་གུ་ཡིན་ལ། ཕྱག་ན་དྲིལ་བུ་བསྣམས་པ་སྟེ། དུག་ལྔ་ཡེ་ཤེས་སུ་འབེབས་པར་བྱེད་པའི་ཐུགས་རྗེ་ལྷུན་གྲུབ་ཀྱི་དྲིལ་བུ་བསྣམས་པར་གསུངས་ཡོད་དོ། །སྒོ་མ་བཞི་འདིའི་གཡས་རང་རྟགས་ཀྱི་ཕྱག་མཚན་དང་། གཡོན་འཁོར་འདས་ཟུང་འཇུག་གི་བྷན་དམར་ཐོགས་པ། ཞིང་ཆེན་རོ་ཡི་གདན་ལ་གར་སྟབས་འགྱིང་བག་གི་ཚུལ་གྱིས་བཞུགས་པ་ལ་མ་ཡེངས་ཡིད་ཡུལ་དུ་མངོན་སུམ་བཞིན་དུ་གསལ་བར་བསྐྱེད་ཅེས་གསུངས་པའོ།། ༦༽ དབང་ཕྱུག་མ་བསྐྱེད་པ། འདིའི་མཚམས་ནས་དབང་ཕྱུག་ཉེར་བརྒྱད་ཡིན་ཞིང་། དེ་ཡང་སླས་ཏེ་ཆུང་མ་དང་། བྱི་མོ་སྟེ་མཛའ་མོ་དང་། བྲན་མོ་ཏེ་ལས་བྱེད་པའི་ཆ་ནས་བཏགས་པའི་དབང་ཕྱུག་ཉེར་བརྒྱད་དེ། ཞི་རྒྱས་དབང་དྲག་གི་ལས་བཞིའི་ཕྲིན་ལས་དང་སྦྱར་ནས་ཤར་དུ་ཞི་བའི་ལས་བྱེད་དྲུག ལྷོ་རུ་རྒྱས་པའི་ལས་བྱེད་དྲུག ནུབ་ཏུ་དབང་གི་ལས་བྱེད་དྲུག བྱང་དུ་དྲག་པོའི་ལས་བྱེད་དྲུག་གིས་དྲུག་བཞི་ཉི་ཤུ་རྩ་བཞི་ཡིན་ལ། དེའི་ཐོག་ཏུ་སྒོ་མ་བཞི་བསྣན་པས་ཉི་ཤུ་རྩ་བརྒྱད་ཡིན་ནོ། །དཀྱིལ་འཁོར་གྱི་ཕྱི་ཁྱམས་ལ་ཤར་ཕྱོགས་ནས་བརྩམས་ཏེ། ཧཱུྃ༔ ཤར་དུ་ཞི་བའི་ལས་མཛད་དྲུག༔ སྲིན་མོ་གཡག་གདོང་རྡོ་རྗེ་སྨུག༔ ཚངས་པ་སྦྲུལ་གདོང་པདྨ་སེར༔ ལྷ་ཆེན་གཟིག་གདོང་ཏྲི་ཤུལ་ལྗང་༔ གཏོག་འདོད་སྲེ་གདོང་འཁོར་ལོ་སྔོ༔ གཞོན་ནུ་དྲེད་གདོང་མདུང་ཐུང་དམར༔ བརྒྱ་བྱིན་དོམ་མགོ་རྒྱུ་ཞགས་དཀར༔ ཞིང་རྐྱང་གདན་ལ་གར་སྟབས་བཞུགས༔ ཞེས་གསུངས་ཏེ། དབང་ཕྱུག་མ་འདི་རྣམས་ཁྱོ་ཡི་མིང་ཆུང་མ་ལ་ཐོགས་མཁན་མང་ཞིང་། མིང་པོའི་མིང་སྲིང་མོ་ལ་ཐོགས་པ་ཡང་ཡོད་ལ། དེའི་འབོད་ཚུལ་གྱི་སྟེང་ནས་ཐ་སྙད་འདི་རྣམས་གསུངས་པ་ཡིན་ནོ། །དང་པོ་ཤར་ཕྱོགས་ཀྱི་ཞི་བའི་ལས་བྱེད་དྲུག་ཡིན་ལ། དེའི་ནང་གི་སྲིན་མོ་གཡག་གདོང་རྡོ་རྗེ་སྨུག་ཅེས་གསུངས་ཡོད་ཅིང་། སྲིན་མོ་གཡག་གདོང་མ་འདི་སྲིན་པོ་དྷ་ཤ་གྲཱི་ཝའི་ཆུང་མ་ཡིན་གསུངས་ལ། ཚངས་པའི་ཆུང་མ་ཚངས་མ་ལ་སོགས་པ་གཞུང་ཚིག་གིས་བུད་པའི་སྐུ་མདོག་ཀྱང་དེ་བཞིན་དུ་ཡིན་ནོ། །ཕྱག་མཚན་ལ་ཤར་གྱི་དབང་ཕྱུག་དྲུག་གིས་གཡས་ན་རྡོ་རྗེ་དང་། གཡོན་ན་རང་རྟགས་ཀྱི་ཕྱག་མཚན་གཞུང་གི་རྩ་བའི་ཚིག་གིས་བུད་པ་དེ་ཉིད་ཡིན་ལ། ལྷོའི་དབང་ཕྱུག་རྣམས་ཀྱིས་རིན་ཆེན། ནུབ་ཀྱིས་པདྨ། བྱང་གིས་རྒྱ་གྲམ་བསྣམ་རྒྱུ་ཡིན་གསུངས་པའོ། །དེ་བཞིན་དུ། ཧཱུྃ༔ ལྷོ་རུ་རྒྱས་པའི་ལས་མཛད་དྲུག༔ རྡོ་རྗེ་ཕ་ཝང་སྤུ་གྲི་སེར༔ ཞི་བ་ཆུ་སྲིན་བུམ་པ་དམར༔ བདུད་རྩི་སྡིག་གདོང་པདྨ་དམར༔ ཟླ་བ་ཁྲ་མགོ་རྡོ་རྗེ་དཀར༔ བེ་ཅོན་ཝ་གདོང་དབྱུག་ཏོ་ལྗང་༔ སྲིན་མོ་སྟག་གདོང་ཐོད་ཁྲག་ནག༔ ཞིང་རྐྱང་གདན་ལ་གར་སྟབས་བཞུགས༔ ཞེས་གསུངས་ཏེ། འདིའི་ནང་གི་ཞི་བ་ཞེས་པ་དེ་ཟླ་བའི་ཆུང་མ་ཞི་བ་ཡིན་ཞིང་། ཉི་མའི་སྲིང་མོ་བདུད་རྩི། ཡང་ཟླ་བའི་སྲིང་མོ་ཁྲ་མགོ་ཅན། སྤེན་པའི་སྲིང་མོ་བེ་ཅོན། སྲིན་པོ་ལངྐ་མགྲིན་བཅུའི་ཆུང་མ་སྲིན་མོ་དེ་རྣམས་ཡིན་ནོ།། ཧཱུྃ༔ ནུབ་ཏུ་དབང་གི་ལས་མཛད་དྲུག༔ ཟ་བ་བྱ་རྒོད་བེ་ཅོན་ལྗང་༔ དགའ་བ་རྟ་གདོང་ཁོག་ཆེན་དམར༔ སྟོབས་ཆེན་ཁྱུང་གདོང་དབྱུག་ཏོ་དཀར༔ སྲིན་མོ་ཁྱི་གདོང་རྡོ་རྗེ་དམར༔ འདོད་པ་པུ་ཤུད་མདའ་འགེངས་དམར༔ ནོར་སྲུང་ཤ་མགོ་བུམ་པ་ལྗང་༔ ཞིང་རྐྱང་གདན་ལ་གར་སྟབས་བཞུགས༔ ཞེས་གསུངས་ཏེ། ཟ་བ་ཆེན་པོ་ལྷའི་དམག་དཔོན་མ་ཧཱ་ཀཱ་ལའི་ཆུང་མ་བྱ་རྒོད་ཀྱི་གདོང་ཅན་སྐུ་མདོག་དམར་ལྗང་། དགའ་བ་མ་ནི་རྣམ་ཐོས་སྲས་སམ་དགའ་བྱེད་དབང་ཕྱུག་གི་ཆུང་མའི་ཚུལ་ཅན་རྟ་གདོང་ཅན་སྐུ་མདོག་དམར་མོ། སྟོབས་ཆེན་ཁྱུང་གདོང་ལྷ་སྟོབས་བཟང་གི་ཆུང་མའི་ཚུལ་སྐུ་མདོག་དཀར་ལ་དམར་བའི་མདངས་ཅན། གཤིན་རྗེ་ཁྱི་གདོང་དེ་གཤིན་རྗེའི་སྲིང་མོ་སྐུ་མདོག་དམར་མོ། འདོད་པ་པུ་ཤུད་མགོ་ཅན་འདོད་པའི་ལྷ་ཀ་མ་དེ་བའི་སྲིང་མོའི་ཚུལ་འཆང་བ་སྐུ་མདོག་དམར་མོ། ནོར་སྲུང་ཤ་བའི་མགོ་ཅན་ནོར་སྲུང་གི་སྲིང་མོའི་ཚུལ་ཅན་དམར་ལྗང་། རང་རྟགས་ཀྱི་ཕྱག་མཚན་དང་བྷན་དམར་བསྣམས་པ་ཐམས་ཅད་ཞིང་རྐྱང་རོའི་གདན་ལ་གར་སྟབས་ཀྱིས་བཞུགས་པར་བསྒོམ་མོ།། ཧཱུྃ༔ བྱང་དུ་དྲག་པོའི་ལས་མཛད་དྲུག༔ རླུང་ལྷ་སྤྱང་གདོང་བ་དན་ལྗང་༔ མེ་མོ་སྐྱིན་གདོང་གསལ་ཤིང་དམར༔ ཕག་མོ་ཕག་གདོང་མཆེ་ཞགས་ནག༔ རྡོ་རྗེ་ཁྭ་གདོང་ཞིང་ཆུང་དམར༔ སྣ་ཆེན་གླང་ཆེན་བམ་ཆེན་ལྗང༔ ཆུ་ལྷ་སྦྲུལ་གདོང་སྦྲུལ་ཞགས་ལྗང་༔ ཞིང་རྐྱང་གདན་ལ་གར་སྟབས་བཞུགས༔ ཞེས་གསུངས་ཏེ། རླུང་ལྷ་སྤྱང་གདོང་རླུང་ལྷའི་སྲིང་མོ་སྐུ་མདོག་ལྗང་སྔོན་ཅན་ཞིག་ཡིན་ནོ། །མེ་མོ་སྐྱིན་གདོང་མ་ནི་མེ་ལྷའི་ཆུང་མའི་ཚུལ་ཅན་སྐུ་མདོག་དམར་ལྗང་ཡིན་ལ། འདི་མི་མོ་ཞེས་ཟེར་བ་དེ་མི་དག་པ་ཡིན་ཞིང་། དཔེ་ངན་རྒྱུན་འབྱམས་པ་ཡིན་གསུངས་སོ། །སྐྱིན་གདོང་གཤིན་གདོང་གང་ཟེར་ཡང་དེ་ནི་གཡག་གདོང་ཞེས་ས་ཆ་འགའ་རེས་གཡག་གི་མིང་ལ་དེ་ལྟར་འབོད་ཚུལ་ཡོད་ཟེར་མཁན་ཡང་ཡོད་ཀྱང་དེ་ཡིན་པར་ངེས་པ་མི་ཆེ་ཞིང་། སྐྱིན་གོར་དང་སྐྱིན་བུ་གསུངས་དུས་གངས་སྦལ་ཡིན་ནོ། །དེས་ན་རིགས་མཐུན་གྱི་རྒྱུད་གཞུང་ཚོའི་ནང་ན་ཡང་སྐྱིན་བུ་གསུང་ས་ཡོད་པས་འདི་གངས་སྦལ་གྱི་གདོང་ཅན་དུ་ངོས་འཛིན་རྒྱུ་ཡིན་གསུངས་སྲོལ་ཡོད་ཅིང་། སྐྱིན་གདོང་མ་གསལ་ཤིང་མེ་སྒྲོན་གཟུང་བ་སྐུ་མདོག་དམར་ལྗང་ཅན། ཕག་མོ་ས་བདག་ཕག་ཅན་གྱི་ཆུང་མའི་ཚུལ་མཆེ་ཞགས་འཛིན་པ། མཆེ་ཞགས་ནི་ཞགས་པའི་སྣེ་གཉིས་མཆེ་བས་བརྒྱན་པ་ལ་གསུངས་སོ། །རྡོ་རྗེ་ཁྭ་ཏའི་གདོང་ཅན་གཤིན་རྗེའི་ཆུང་མ་སྐུ་མདོག་དམར་ལྗང་། སྣ་ཆེན་གླང་ཆེན་གདོང་ཚོགས་བདག་གི་ཆུང་མ་སྐུ་མདོག་ལྗང་གུ། ཆུ་ལྷ་སྦྲུལ་གདོང་ཅན་ཆུ་ལྷའི་ཆུང་མའི་ཚུལ་སྐུ་མདོག་ལྗང་གུ། དེ་ཐམས་ཅད་རང་རྟགས་ཀྱི་ཕྱག་མཚན་དང་རིགས་ཀྱི་ཕྱག་མཚན་རྒྱ་གྲམ་བསྣམས་པ། ཞིང་རྐྱང་པའམ་མི་རོའི་གདན་རྐྱང་གི་སྟེང་ལ་གར་སྟབས་ཀྱིས་བཞུགས་པ་ཡིན་ནོ།། ཧཱུྃ༔ དཀྱིལ་འཁོར་ཕྱི་རིམ་སྒོ་བཞི་རུ༔ ཤར་དུ་ཁུ་བྱུག་ལྕགས་ཀྱུ་དཀར༔ ལྷོ་རུ་ར་གདོང་ཞགས་པ་སེར༔ ནུབ་ཏུ་སེང་གདོང་ལྕགས་སྒྲོག་དམར༔ བྱང་དུ་སྦྲུལ་གདོང་དྲིལ་བུ་ལྗང་༔ ཞིང་རྐྱང་གདན་ལ་གར་སྟབས་བཞུགས༔ ཞེས་གསུངས་ཏེ། དཀྱིལ་འཁོར་ཆེན་པོའི་ཕྱིའི་རིམ་པའི་ཤར་སྒོ་ན་སྲིན་པོ་རྣམ་འཇིག་གི་ཆུང་མའི་ཚུལ་འཛིན་པའི་ཁུ་བྱུག་གི་གདོང་ཅན་རྡོ་རྗེ་དང་ལྕགས་ཀྱུ་བསྣམས་པ་སྐུ་མདོག་དཀར་བོ། སྙིང་རྗེ་ཚད་མེད་ཀྱི་ལྕགས་ཀྱུ་སྲིད་པ་གསུམ་ལ་འདེབས་པ། སྲིན་པོ་ལངྐ་མགྲིན་བཅུའི་ཆུང་མའི་ཚུལ་ཅན་ལྷོ་སྒོར་རྡོ་རྗེ་ར་གདོང་མ་རིན་པོ་ཆེ་དང་ཞགས་པ་བསྣམས་པ་བྱམས་པ་ཚད་མེད་ཀྱི་ཞགས་པས་འཁོར་བ་འཆིང་བ། དཀྱིལ་འཁོར་ནུབ་སྒོ་ལ་རྡོ་རྗེ་སེང་གདོང་མ་སྲིན་པོ་བུམ་སྣའི་ཆུང་མའི་ཚུལ་ཅན། ཕྱག་ན་པདྨའི་སྡོང་བུ་དང་ལྕགས་སྒྲོག་བསྣམས་པ། དགའ་བ་ཚད་མེད་ཀྱི་ལྕགས་སྒྲོག་གིས་ཉོན་མོངས་པ་སྡོམ་པ། དེའི་སྐུ་མདོག་དམར་མོ། བྱང་སྒོ་ན་རྡོ་རྗེ་སྦྲུལ་གདོང་མ་སྲིན་པོ་འབོད་སྒྲོག་གམ་འདི་ལ་གསུས་པོ་ཆེ་ཡང་ཟེར་ཏེ་གསུས་པོ་ཆེའི་ཆུང་མའི་ཚུལ་ཅན་རྒྱ་གྲམ་དང་དྲིལ་བུ་བསྣམས་པ་བཏང་སྙོམས་ཚད་མེད་ཀྱི་དྲིལ་བུས་སྟོང་ཁམས་ཀྱི་སྲིད་པ་མྱོས་པར་བྱེད་ཅིང་ཞི་བར་གཞོལ་བ། སྐུ་མདོག་ལྗང་ནག་གོ །གནས་ཡུལ་སྒོ་སྐྱོང་དབང་མོ་རྣམས་ཀྱི་རྒྱན་གྱི་བྱེ་བྲག་དེ་འདིའི་གཏེར་གཞུང་ནས་གསལ་ཁ་ཡོད་མེད་སྣ་ཚོགས་ཡིན་ཡང་རྒྱུད་རྡོ་རྗེ་མེ་ལོང་ལས། སླས་དང་བྱི་མོ་བྲན་མོའི་ཚུལ། །སྐུ་མདོག་ཕྱག་མཚན་བཞུགས་ཚུལ་ཉིད། །རིམ་པ་བཞིན་དུ་དགོད་པར་བྱ། །རིན་ཆེན་ཐོད་པའི་དབུ་རྒྱན་དག །གནས་སྐབས་དག་དང་འཚམ་པར་བྱ། །ཞེས་གསུངས་པས་རལ་བ་དང་ཐོད་སྐམ་གྱི་རྒྱན་ཆ་ཡོད་མེད་སྐབས་དང་བསྟུན་ནས་རིགས་པས་དཔྱད་བྱ་ཡིན་ལ། ཡང་མིན་ན་བྲིས་རྙིང་ཁུངས་དག་གི་ཐང་ག་སོགས་ལ་བལྟས་ན་ཤེས་ཐུབ་བོ། །མགོ་བརྙན་དེ་ཚོ་ཁྲོ་མོའི་བཞིན་ལ་སྣ་ཚོགས་པའི་གདོང་ཅན་དཔེར་ན་བྱ་སྦྲུལ་གྱི་མགོ་ཅན་ཞིག་ཡིན་ན་ཁྲོ་མོའི་སྤྱན་གསུམ་སྨིན་མ་མེ་ལྟར་འབར་བ་དེ་ཚོ་ཡིན་ཆོག་ཅིང་། མགོ་ཕྲེང་དང་གཡང་གཞི་མ་གཏོགས་པའི་རྒྱན་གཞན་མེད་པ་དང་རོ་གདན་རྐྱང་པ་མ་གཏོགས་པའི་རྒྱན་གཞན་མེད་པ་ཡིན་ནོ། །གར་སྟབས་ཀྱིས་བཞུགས་ཞེས་པ་དེ་ཡང་ཁྲོ་མོའི་འཇིགས་པའི་རྔམ་སྟབས་ཀྱི་གར་རང་རང་གི་ཕྱག་རྒྱ་དང་མཚུངས་པའི་ཉམས་འགྱུར་ཅན་མ་གཏོགས་གཅིག་ཁོ་ན་ཡིན་པའི་ངེས་པ་མེད་དོ།། དཀྱིལ་འཁོར་མུ་རན་སྐྱོང་བ་ཡི༔ དབང་ཕྱུག་ཉི་ཤུ་རྩ་བརྒྱད་ཀྱང་༔ མ་ཡེངས་ཡིད་ཡུལ་གསལ་བར་བསྒོམ༔ སྣང་ལ་རང་བཞིན་མེད་པར་གསལ༔ ཞེས་གསུངས་ཏེ། རང་བྱུང་རང་ལས་ཤར་བའི་རྒྱལ་བ་ཞི་ཁྲོའི་དཀྱིལ་འཁོར་གྱི་ཕྱིའི་མུ་རན་སྐྱོང་ཞིང་བཀའ་ཡི་བྱ་ར་དང་ལེགས་ཉེས་ཀྱི་སྟངས་འཛིན་བྱེད་པའི་དབང་ཕྱུག་མ་སྒོ་སྲུང་སྒོ་མ་བཞི་དང་བཅས་པ་ཤར་གྱི་དཀར་མོ་བདུན། ལྷོ་ཡི་སེར་མོ་བདུན། ནུབ་ཀྱི་དམར་མོ་བདུན། བྱང་གི་ལྗང་མོ་བདུན་དང་བཅས་པ་ཉི་ཤུ་རྩ་བརྒྱད་མ་ཡེངས་ཡིད་ཀྱི་ཡུལ་དུ་མངོན་སུམ་བཞིན་དུ་གསལ་བར་བསྒོམ་མོ། །བསྒོམ་རྒྱུ་དེ་ཡང་གསལ་སྟོང་ཟུང་དུ་འཇུག་པ་སྣང་ལ་རང་བཞིན་མེད་པ་ལྷ་ཉིད་རང་དང་རང་ཉིད་ལྷ་རུ་གསལ་བའི་ཟུང་འཇུག་དབྱེར་མེད་བདེ་བ་ཆེན་པོའི་རང་བཞིན་དུ་བསྒོམ་ཞིང་གསལ་དགོས་སོ། །ཞི་ཁྲོ་དམ་པ་རིགས་བརྒྱ་ཡི༔ སྒོམ་ཁོག་འདུས་པའི་སྒྲོན་མེའོ༔ ཞེས་པ་འདི་བསྐྱེད་རིམ་བསྒོམ་ཁོག་གི་མཇུག་སྡུད་ཀྱི་ཚིག་ཡིན་ཞིང་། ས་མ་ཡ༔དམ་ཚིག་གི་རྒྱ་ཡིན་ནོ། ། རྒྱ་རྒྱ་རྒྱ༔ཟབ་རྒྱ་སྦས་རྒྱ་གསང་རྒྱ་ཡི་རྒྱ་གསུམ་མམ་ཡང་ན་སྐུ་གསུམ་ཐུགས་ཀྱི་རྒྱ་རིམ་པ་གསུམ་གྱིས་བཏབ་ནས་དངོས་གཞིའི་ལེའུ་དང་པོ་ལྷ་བསྐྱེད་ཀྱི་རིམ་པ་བསྟན་ཟིན་ཏོ།། ༼ཁ༽ གཉིས་པ་ལྷ་ཚོགས་སྤྱན་འདྲེན་པ། གཉིས་པ་ལྷ་ཚོགས་སྤྱན་འདྲེན་ནི༔ཞེས་མཚམས་སྦྱར་ཏེ། ཧཱུྃ༔ དཔེ་མེད་བསམ་བརྗོད་བྲལ་བའི་དཀྱིལ་འཁོར་འདིར༔ བླ་མ་རིན་ཆེན་ཀུན་བཟང་ཆོས་ཀྱི་སྐུ༔ ལོངས་སྤྱོད་རྫོགས་སྐུ་བཅོམ་ལྡན་རིགས་ལྔ་ཡབ༔ འབྱུང་ལྔ་རྣམ་དག་ཡུམ་མཆོག་ལྔ་དང་སྦྱོར༔ སྐུ་གསུམ་ཡོན་ཏན་གསལ་ལ་འགག་པ་མེད༔ འགྲོ་དོན་ཡིད་སྣང་དག་པའི་གནས་མཆོག་འདིར༔ ཀུན་བཟང་རིགས་ལྔ་ཡབ་ཡུམ་གཙོ་འཁོར་རྣམས༔ རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ༔ ཅེས་གསུངས་ཏེ། ཐོག་མར་ཚིག་གི་མགོ་ལེན་ལ་ཧཱུྃ་ཞེས་པའི་བདེ་གཤེགས་དཔེ་མེད་བརྗོད་འདས་ཀྱི་ཐུགས་ཀྱི་སྙིང་པོས་ཐུགས་རྒྱུད་སྐུལ་བའི་ཡི་གེའི་སྒྲ་ཆེན་པོ་དེས་སྣ་དྲངས་ནས། མཚོན་པར་བྱེད་པའི་དཔེ་མེད་ཅིང་བསམ་པའི་ཡུལ་ལས་འདས་པ་དེ་ལྟ་བུ་མཚོན་བྱེད་ཀྱི་དཔེ་མེད་པ་དང་བློས་བསམ་པའི་ཡུལ་མིན་ཞིང་སྒྲ་ཚིག་ངག་གི་ལམ་ལས་འདས་པ་ཡེ་ནས་ཡིན་ལ། དེ་ཡིན་པར་ངེས་ན་བརྗོད་མེད་བརྗོད་པ་དང་བྲལ་བའི་ཕྱོགས་མེད་ཕྱོགས་བྲལ་གྱི་དཀྱིལ་འཁོར་ཆེན་པོ་ནས་མཆོག་གསུམ་སྐུ་གསུམ་བླ་མ་ལ་འདུས་ཤིང་། ཡི་དམ་ཞི་ཁྲོའི་ལྷ་ཚོགས་ཀྱང་བྱིན་རླབས་ཀྱི་རྩ་བ་བླ་མ་ལ་འདུས་པ་བདེ་གཤེགས་གཅིག་སྒྲུབ་ཐམས་ཅད་འགྲུབ་པའི་བླ་མ་མཚོན་བྱ་དོན་གྱི་ཡེ་ཤེས་རིག་པ་སྟོང་གསལ་སྐྱེ་འགག་དང་བྲལ་བའི་གནས་ལུགས་མ་བཅོས་པ་རིགས་རྣམས་ཀུན་གྱི་གཙོ་བོ་རིག་འཛིན་འདུས་པའི་ཁྱབ་བདག་བླ་མ་རིིན་པོ་ཆེ་ཀུན་བཟང་ཆོས་ཀྱི་སྐུ་ནང་གསལ་སྐུ་གསུམ་འཕྲོ་གཞིར་བཞུགས་པ་དེ་ཉིད་དང་། ཕྱི་གསལ་ལོངས་སྤྱོད་རྫོགས་སྐུ་ཕུང་ལྔ་གནས་དག་བཅོམ་ལྡན་རིགས་ལྔ་ཡབ་ལྔ་དང་། འབྱུང་ལྔ་རྣམ་པར་དག་པ་ཡུམ་མཆོག་ལྔ་དང་། ཁ་སྦྱོར་ཡོན་ཏན་བདུན་ལྡན་གྱིས་བཞུགས་པ། འགྲོ་འདུལ་སྤྲུལ་བའི་སྣང་བརྙན་སྣ་ཚོགས་སུ་ཤར་བ། ཆོས་སྐུའི་ནམ་མཁའ་ལ་ལོངས་སྐུའི་ཟླ་བ་ཤར་ནས་གདུལ་བྱའི་ཆུ་ནང་ལ་སྤྲུལ་སྐུར་ཤར་བའི་དཔེས་མཚོན་པའི་གཞི་གནས་ཀྱི་ཡེ་ཤེས་ངོ་བོ་སྟོང་ལ་རང་བཞིན་གསལ་བ་ཐུགས་རྗེ་འགག་མེད་ཀྱི་ཡོན་ཏན་གསལ་ལ་འགག་མེད་མ་དག་མ་དག་དག་པ་དང་སོགས་ཀྱི་ལུང་དོན་ལྟར་དུ་འགྲོ་དོན་དུ་འགྲོ་བའི་ཡིད་སྣང་དག་པའི་གནས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་མ་བསྐྱེད་ཡོངས་གྲུབ་གདན་གསུམ་ཚང་བའི་གནས་འདིར་གཤེགས་བྱ་གཤེགས་བྱེད་དང་བྲལ་བར་གཤེགས་སུ་གསོལ་གསུངས་ཤིང་། དཀྱིལ་འཁོར་སྤྱི་དང་བྱེ་བྲག་གི་གཙོ་བོ་ཡབ་ཡུམ་སྤྱན་དྲངས་པ་ཡིན་ནོ།། ཧཱུྃ༔ ཚོགས་བརྒྱད་གནས་དག་བྱང་ཆུབ་སེམས་དཔའ་བརྒྱད༔ ཡུལ་བརྒྱད་གནས་དག་བྱང་ཆུབ་སེམས་མ་བརྒྱད༔ འགྲོ་དོན་རྫོགས་མཛད་སྤྲུལ་སྐུ་ཐུབ་པ་དྲུག༔ ཕྲིན་ལས་འགྲོ་དོན་སྒོ་བ་ཡབ་ཡུམ་བརྒྱད༔ ཞི་བ་དབྱིངས་ཀྱི་དཀྱིལ་འཁོར་ཆེན་པོ་འདིར༔ ཞི་བ་བཞི་བཅུ་རྩ་གཉིས་གཤེགས་སུ་གསོལ༔ ཅེས་གསུངས་ཏེ། རྣམ་ཤེས་ཚོགས་བརྒྱད་མ་སྤངས་གནས་སུ་དག་པ་བྱང་ཆུབ་སེམས་དཔའ་བརྒྱད་དང་། མིག་ལ་སོགས་པའི་རྣམ་ཤེས་ཚོགས་བརྒྱད་ཀྱི་ཡུལ་གཟུགས་ལ་སོགས་པ་བརྒྱད་གནས་སུ་དག་པ་བྱང་ཆུབ་སེམས་མ་བརྒྱད། རིགས་དྲུག་འགྲོ་བའི་གནས་སུ་སེམས་ཅན་རང་རང་གི་ངོ་སྐལ་དུ་འགྲོ་དོན་མཛད་པའི་སྤྲུལ་སྐུ་ཐུབ་པ་དྲུག ཚད་མེད་རྣམ་བཞིའི་ཞི་རྒྱས་དབང་དྲག་གི་ལས་དང་འགུག་འཆིང་སྡོམ་མྱོས་ཀྱི་ཕྲིན་ལས་ཀྱིས་འགྲོ་དོན་མཛད་པའི་སྒོ་བ་ཡབ་ཡུམ་བརྒྱད་དེ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་རང་སྣང་དག་པའི་གནས་འདིར་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་སྤྱན་འདྲེན་པ་ཡིན་པས་འགྲོ་བའི་སྒོ་གསུམ་སངས་རྒྱས་སྐུ་གསུམ་གྱི་རང་བཞིན་དུ་བྱིན་གྱིས་བརླབ་པའི་ཕྱིར་གཤེགས་སུ་གསོལ་གསུངས་པའོ། །དེ་ཡིས་ཞི་བ་སྤྱན་དྲངས་ནས་ཁྲོ་བོའི་ལྷ་ཚོགས་སྤྱན་འདྲེན་པ་ནི། ཧཱུྃ༔ སངས་རྒྱས་ཀུན་གྱི་རང་བཞིན་སྐུ་གསུང་ཐུགས༔ ཡོན་ཏན་ཕྲིན་ལས་ཡོངས་སུ་རྫོགས་པའི་དཔལ༔ བཅོམ་ལྡན་དཔལ་ཆེན་རིགས་ལྔ་ཧེ་རུ་ཀ༔ གཉིས་མེད་ཡུམ་ཆེན་ཀྲོ་ཏི་ལྔ་དང་འཁྲིལ༔ དུག་ལྔ་འཇོམས་ཕྱིར་ཁྲག་འཐུང་སྤྲུལ་འཁོར་བཅས༔ འགྲོ་དོན་ཡིད་སྣང་དག་པའི་གནས་འདིར་བྱོན༔ ཅེས་གསུངས་ཏེ། ཕྱོགས་བཅུ་དུས་བཞིའི་གནས་དང་དུས་སུ་གཤེགས་ཤིང་བཞུགས་པའི་སངས་རྒྱས་ཐམས་ཅད་ཀྱི་བདག་ཉིད་ཆེན་པོ་དཔལ་ཀུན་ཏུ་བཟང་པོ་ཡིན་པས་དཔལ་ཀུན་ཏུ་བཟང་པོ་དེ་ཉིད་ཀྱི་སྐུ་གསུང་ཐུགས་རྡོ་རྗེའི་ངོ་བོའམ་རང་བཞིན་ཉིད་ཀྱི་ཆོས་སྐུ་སྤྲོས་པ་དང་བྲལ་བའི་ངང་ལས་མ་གཡོས་བཞིན་དུ་སྣང་བའི་ཁྲོ་བོའི་དཀྱིལ་འཁོར་རམ་ལྷ་ཚོགས་ཞེས་འགྲེལ་དགོས་ལ། ཁྲོ་བོ་འདི་ལ་ལོངས་སྐུ་དང་སྤྲུལ་སྐུ་གཉིས་སུ་སྣང་བའི་དབྱེ་བ་ཕྱེ་རྒྱུ་ཡོད་ཅིང་། ལྷུན་སྟུག་པོ་བཀོད་པའི་ཞིང་ཁམས་ན་རང་སྣང་ལོངས་སྤྱོད་རྫོགས་པའི་དཀྱིལ་འཁོར་ཁྲོ་བོའི་སྐུ་ཡིས་མངོན་པར་འདུ་མཛད་དེ། དེ་ལས་སྤྲུལ་སྐུའི་ཁྲོ་བོ་གདུལ་བྱ་ལ་སྣང་བ་ཡིན་ནོ། །དེ་ཡང་སྔར་ཞི་བའི་རང་བཞིན་ཕྱིས་ཤིག་ནས་ཁྲོ་བོའི་རང་བཞིན་དུ་བསྒྱུར་བ་མ་ཡིན་པར་ཡེ་ནས་དེ་ལྟར་གྲུབ་ཅིང་གནས་པ་ཞི་ཁྲོ་གཉིས་ཀ་དུས་ཐ་དད་མེད་ལ། རྗོད་བྱེད་ཀྱི་དབང་དུ་བྱས་ན་དང་པོར་ཞི་བ་བཤད་པ་དང་། དེ་ནས་ཁྲོ་བོ་མི་བཤད་ཐབས་མེད་ཅིང་། རྗོད་བྱེད་ཚིག་གིས་དེ་ལྟར་བསྙད་དགོས་དུས་འཕྲོས་འཕྲོར་མི་བཤད་ཐབས་མེད་དུ་གྱུར་ཡོད་དོ། །དེའི་ཕྱིར་ན་དེ་ལྟར་དུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཡོངས་སུ་རྫོགས་པའི་དཔལ་བཅོམ་ལྡན་དཔལ་ཆེན་རིགས་ལྔ་རུ་སྣང་བའི་ཧེ་རུ་ཀ་ཡབ་ཡུམ་ཐམས་ཅད་འདོད་ཆགས་ཞེ་སྡང་ལ་སོགས་པ་ཉོན་མོངས་པ་དུག་ལྔ་འཇོམས་པར་བྱེད་པའི་ཕྱིར་དུ་ཁྲག་འཐུང་སྤྲུལ་འཁོར་དང་བཅས་འགྲོ་བ་གདུལ་དཀའ་འདུལ་བའི་ཕྱིར་དུ་བདག་རྣལ་འབྱོར་བའི་ཡིད་སྣང་རྣམ་པར་དག་པའི་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ལ། ལམ་ཏིང་འཛིན་སྒོམ་པའི་དཀྱིལ་འཁོར་གྱིས་དེ་ལྟར་གསལ་བཏབ་པའི་གནས་འདིར་འབྱོན་པར་མཛོད་གསུངས་ནས་རིགས་ཀྱི་གཙོ་བོ་ཁྲག་འཐུང་ཡབ་ཡུམ་སྤྱན་དྲངས་པ་ཡིན་ནོ།། ཧཱུྃ༔ ཀོའུ་རཱི་ལ་སོགས་གནས་བདག་མ་མོ་བརྒྱད༔ སེང་ཧ་ལ་སོགས་ཡུལ་བདག་ཕྲ་མེན་བརྒྱད༔ རྟ་གདོང་ལ་སོགས་ཡེ་ཤེས་སྒོ་མ་བཞི༔ དཀྱིལ་འཁོར་མུ་རན་དབང་ཕྱུག་ཉི་ཤུ་བརྒྱད༔ བཀའ་སྲུང་གཏེར་བདག་དམ་ཅན་ཆོས་སྐྱོང་ཚོགས༔ ཞི་ཁྲོ་དམ་པ་རིགས་བརྒྱའི་ལྷ་ཚོགས་རྣམས༔ འགྲོ་དོན་ཡིད་སྣང་དག་པའི་གནས་འདིར་བྱོན༔ རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ༔ ཅེས་གསུངས་ཏེ། རྣམ་པར་ཤེས་པ་ཚོགས་བརྒྱད་དེ་འཁོར་བ་བསྐྱེད་པའི་གནས་ཡིན་ལ། དེ་དག་གནས་སུ་དག་པར་བྱེད་པའི་ཕྱག་རྒྱར་ཤར་བ་ལ་འདི་ནས་དེ་དང་དེའི་བདག་པོ་ཞེས་གསུངས་ཏེ་ཀོའུ་རཱི་ལ་སོགས་གནས་ཀྱི་མ་མོ་བརྒྱད། ཡུལ་གཟུགས་སྒྲ་ལ་སོགས་པ་གནས་སུ་དག་པར་བྱེད་པའི་ཕྱག་རྒྱར་ཤར་བ་ལ་ཡང་དེ་དང་དེའི་བདག་པོ་ཞེས་གསུངས་ཏེ་ཡུལ་བདག་སེང་ཧ་ལ་སོགས་མ་མོ་བརྒྱད། ཕྱིན་ཅི་ལོག་གི་བདུད་བཞི་འཇོམས་ཤིང་ཡེ་ཤེས་བཞི་ཡི་རྒྱས་འདེབས་པ་རྟ་གདོང་དཀར་མོ་ལ་སོགས་པ་སྒོ་མ་བཞི་དང་བཅས་པའི་དཀྱིལ་འཁོར་ཆེན་པོའི་མུ་རན་ལ་གནས་པའི་དབང་ཕྱུག་མ་ཉི་ཤུ་རྩ་བརྒྱད། ད་རུང་བཀའ་ཡི་སྲུང་མ། གཏེར་གྱི་བདག་པོ། དམ་ལ་གནས་ཤིང་བཀའ་ལས་མི་འདའ་བའི་ཆོས་སྐྱོང་གི་ཚོགས་དང་བཅས་པ་མདོར་ན་ཞི་ཁྲོ་དམ་པ་རིགས་བརྒྱའི་དཀྱིལ་འཁོར་གྱི་ལྷ་ཚོགས་རྣམས་འགྲོ་བ་འདུལ་བའི་དོན་དུ་རྣལ་འབྱོར་ཡིད་སྣང་དག་པ་སྣང་སྲིད་རྒྱལ་བའི་དཀྱིལ་འཁོར་རང་བྱུང་ལྷུན་གྲུབ་ཆེན་པོར་གསལ་བའི་གནས་འདིར་བྱོན་པར་དགོངས་ཏེ་ཞེས་ཐུགས་རྒྱུད་སྤྱི་ཁྱབ་ཀྱིས་བསྐུལ་ཏེ། འགྲོ་དོན་ལ་རིངས་པའི་ཆེད་དུ་ཐུགས་རྒྱུད་ནན་གྱིས་བསྐུལ་ནས་གཤེགས་སུ་གསོལ་ཅེས་པའི་ཚིག་གིས་དངོས་སུ་སྤྱན་དྲངས་པ་ཡིན་ནོ། །དོན་དམ་པར་ཆོས་སྐུའི་རང་བཞིན་དང་བདེ་བར་གཤེགས་པའི་ཡེ་ཤེས་ཀྱི་སྐུས་ཀུན་ལ་ཁྱབ་པའི་རང་བཞིན་ལ་རྟག་ཏུ་བཞུགས་པ་ཞིག་ཡིན་པས་གཞན་ནས་གཞན་དུ་སྤྱན་དྲང་མི་དགོས་ཀྱང་ཡེ་ཤེས་ཀྱི་ལྷ་ལ་དབང་མི་ཟ་བའི་ཆེད་དང་སྲི་ཞུའི་ཚུལ་དུ་རང་བཞིན་ལྷུན་གྱིས་གྲུབ་པའི་ཡེ་ཤེས་ཀྱི་དཀྱིལ་འཁོར་ལ་སྙན་གསན་དབབ་ནས་འགྲོ་བ་འདུལ་བའི་དོན་དུ་རྣལ་འབྱོར་བྱིན་གྱིས་བརླབ་ཕྱིར་གནས་འདིར་གཤེགས་སུ་གསོལ་ཅེས་པའི་དགོས་པས་ཆེད་དུ་བསྐུལ་བའི་བསྐུལ་བ་གསུམ་གྱི་སྒོ་ནས་སྤྱན་དྲངས་པ་ཡིན་ནོ།། ༼ག༽ གསུམ་པ་ལྷ་ཚོགས་བཞུགས་སུ་གསོལ་བ། གསུམ་པ་ལྷ་ཚོགས་བཞུགས་སུ་གསོལ་བ་ནི༔ ཧཱུྃ༔ སྒྱུ་མ་གཟུགས་བརྙན་ཆུ་ཟླ་འཇའ་ཚོན་ལྟར༔ འོད་ཟེར་ཡེ་ཤེས་ལྔ་ལྡན་གཞལ་ཡས་ཁང་༔ སྟོབས་ལྡན་རིན་ཆེན་པདྨ་ཉི་ཟླའི་གདན༔ ཆོས་སྐུ་ཀུན་བཟང་སྐུ་གསུང་ཐུགས་ཡོན་ཏན༔ ཕྲིན་ལས་ལྔ་ཡི་རིག་རྩལ་ཆོ་འཕྲུལ་ལས༔ བཅོམ་ལྡན་དཔལ་ཆེན་རིགས་ལྔ་ཡབ་ཡུམ་བཅུ༔ སེམས་དཔའ་སེམས་མ་ཡབ་ཡུམ་བཅུ་དྲུག་བཅས༔ རང་སྣང་དག་པའི་གནས་འདིར་བཞུགས་སུ་གསོལ༔ ཅེས་གསུངས་ཏེ། མཚོན་བྱ་དོན་གྱི་དཀྱིལ་འཁོར་མཚོན་བྱེད་རྟགས་ཀྱི་དཀྱིལ་འཁོར་དུ་ཤར་བ་སྒྱུ་མ་མཁན་གྱིས་སྤྲུལ་བའི་འཕྲུལ་དང་། མེ་ལོང་དུ་སྣང་བའི་གཟུགས་བརྙན། ཆུ་ནང་དུ་ཤར་བའི་ཟླ་གཟུགས། སྣང་བཞིན་སྟོང་པ་ནམ་མཁའི་འཇའ་ཚོན་ལྟར་དུ་ཡེ་ཤེས་ཀྱི་འོད་ཟེར་མཐའ་ཡས་མུ་མེད་པར་འཕྲོ་བའི་རང་སྣང་དག་པར་གྲུབ་པའི་རང་བཞིན་ལྷུན་གྱིས་གྲུབ་པའི་གཞལ་ཡས་ཁང་གི་ནང་ན་སྟོབས་དང་ལྡན་པ་མི་འཇིགས་པ་སེང་གེའི་ཁྲི། རྫུ་འཕྲལ་རྟའི་ཁྲི་ལ་སོགས་པ་དང་། རིན་ཆེན་ཁྲི་རྐང་གི་སྟེང་ན་འཁོར་བའི་ཉེས་སྐྱོན་གྱིས་མ་གོས་པའི་བརྡར་པདྨ་དང་། ཐབས་ཤེས་ཟུང་འབྲེལ་མཚོན་བྱེད་ཀྱི་ཉི་ཟླའི་གདན་གྱི་སྟེང་ན་གང་བཞུགས་སུ་གསོལ་བའི་ཆོས་སྐུ་ཀུན་ཏུ་བཟང་པོ་གཅིག་ཉིད་དེ་རིགས་ལྔའི་སངས་རྒྱས་སུ་སྣང་བ་དེ་བཞིན་གཤེགས་པའི་རིགས། རྡོ་རྗེའི་རིགས། རིན་པོ་ཆེའི་རིགས། པདྨའི་རིགས། ལས་ཀྱི་རིགས་ཏེ་ལྔ་རུ་སྣང་ཞིང་། དེ་ཐམས་ཅད་ཀྱང་རེ་རེ་བཞིན་དུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིགས་ལྔ་སྟེ། དེ་ཡང་དཔག་ཏུ་མེད་པར་སྣང་ཆོག་པས་རིགས་ལྔ་ཡབ་ཡུམ་བཅུ། གནས་ཡུལ་རྣམ་དག་སེམས་དཔའ་སེམས་མ་ཡབ་ཡུམ་བཅུ་དྲུག་དང་བཅས་པ་རང་སྣང་དག་པའི་གནས་འདིར་བཞུགས་སུ་གསོལ་ཅེས་གསུངས་པའོ།། ཧཱུྃ༔ རྣམ་ཐར་བརྒྱད་ལྡན་སྒོ་བ་ཡབ་ཡུམ་བརྒྱད༔ རིགས་དྲུག་དོང་སྤྲུགས་བཅོམ་ལྡན་ཐུབ་པ་དྲུག༔ ཞི་བའི་ལྷ་ཚོགས་སངས་རྒྱས་བཞི་བཅུ་གཉིས༔ རང་སྣང་གནས་ཡུལ་དག་པའི་དཀྱིལ་འཁོར་དུ༔ ཕྱོགས་མཚམས་རང་རང་བཞུགས་པའི་གདན་ཁྲི་ལ༔ གཉིས་མེད་རང་བཞིན་བརྟན་པར་བཞུགས་སུ་གསོལ༔ ཅེས་གསུངས་ཏེ། རྣམ་ཐར་བརྒྱད་ལྡན་བདུད་བཞི་འཇོམས་པའི་ཁྲོ་བོ་གཤིན་རྗེ་གཤེད་དང་། ཁྲོ་མོ་ལྕགས་ཀྱུ་མ་ལ་སོགས་པ་ཡབ་ཡུམ་བརྒྱད། རིགས་དྲུག་འཁོར་བ་དོང་ནས་སྤྲུག་ཅིང་འདྲེན་པར་བྱེད་པའི་སྤྲུལ་སྐུ་ཐུབ་པ་དྲུག་སྟེ་ཞི་བའི་ལྷ་ཚོགས་སངས་རྒྱས་བཞི་བཅུ་རྩ་གཉིས་པོ་ཐམས་ཅད་ཅེས་ཐམས་ཅད་ཀུན་བཟང་གཅིག་ལས་ཤར་བ་ཡིན་པས་སངས་རྒྱས་བཞི་བཅུ་གཉིས་གསུངས་ཤིང་། ཕྱོགས་མཚམས་རང་རང་བཞུགས་པའི་གདན་ཁྲིའི་དབུས་སུ་བཅོམ་ལྡན་འདས་ཀུན་ཏུ་བཟང་པོ་དང་གཉིས་སུ་མེད་པའི་རིགས་ཀྱི་གཙོ་བོ་རྣམ་པར་སྣང་མཛད། ཤར་ནས་མི་བསྐྱོད་རིན་འབྱུང་སོགས་ནས་བསྐྱེད་ཆོག་གི་སྐབས་སུ་ཇི་ལྟར་འབྱུང་བ་བཞིན་དུ་རང་རང་གི་བབ་ཐོབ་ཀྱི་གདན་ཁྲི་ལ་གཉིས་མེད་རང་བཞིན་བརྟན་པར་བཞུགས་ཞེས་པའོ། །སུ་ཇི་ལྟར་བྱས་ནས་གང་དང་གཉིས་མེད་དུ་བསྟིམ་དགོས་ཤེ་ན། དམ་ཚིག་གི་འཁོར་ལོ་ལ་ཇི་ལྟར་བཞུགས་པ་བཞིན་དུ་ཡེ་ཤེས་ཀྱི་འཁོར་ལོ་རྣམས་དེ་ལ་དེ་ལྟར་དུ་གཉིས་སུ་མེད་པའི་རང་བཞིན་དུ་མི་གཡོ་བརྟན་པར་བཞུགས་སུ་གསོལ་ཅེས་གསུངས་ནས་དེ་ཡན་ཆད་ཀྱིས་ཞི་བའི་ལྷ་ཚོགས་བཞུགས་སུ་གསོལ་བ་ཡིན་ནོ།། ད་ཁྲོ་བོའི་ལྷ་ཚོགས་ཀྱི་བཞུགས་གསོལ་ནི། ཧཱུྃ༔ ཞི་བ་ལོངས་སྐུའི་རིག་རྩལ་ཆོ་འཕྲུལ་ལས༔ དུག་ལྔ་འཇོམས་པའི་ལྷ་ཚོགས་དཔག་མེད་འཕྲོས༔ བཅོམ་ལྡན་ཁྲག་འཐུང་རིགས་ལྔ་ཧེ་རུ་ཀ༔ ཤེས་རབ་དབྱིངས་ཕྱུག་ཀྲོ་ཏི་ལྔ་དང་སྦྱོར༔ ཡབ་ཡུམ་སྲས་དང་བཀའ་སྡོད་སྤྲུལ་འཁོར་བཅས༔ རང་སྣང་དག་པའི་གནས་འདིར་བཞུགས་སུ་གསོལ༔ ཅེས་གསུངས་ཏེ། ཞི་བ་དང་ཁྲོ་བོ་ངོ་བོར་དབྱེར་མེད་དུ་བཞུགས་པ་གོང་ནས་ཀྱང་བཤད་ལ། སྙིང་ཁའི་ཞི་བའི་ལྷ་ཚོགས་ཀྱི་གདངས་སམ་རྩལ་དེ་དུང་ཁང་ཁྲོ་བོའི་ལྷ་ཚོགས་སུ་ཤར་བ་ཙམ་ཞིག་ཡིན་པ་དང་། དེ་ཡང་རྒྱལ་བ་རིགས་ལྔ་ཁྲག་འཐུང་རིགས་ལྔ། དབྱིངས་ཀྱི་ཡུམ་ལྔ་ཀྲོ་ཏི་ལྔར་གནས་གྱུར་པ་ཙམ་ཞིག་ཡིན་ནོ། །དེས་ན་སྤྱིར་བཏང་ཀྲོ་དྷ་ཞེས་པའི་སྒྲ་ལས་ཁྲོ་བོ་ཞེས་གསུངས་ན་འདི་མི་མཐུན་པའི་ཕྱོགས་ལས་རྣམ་པར་རྒྱལ་བའི་འགྲོ་བའི་དོན་རྔམ་པའི་ཕྲིན་ལས་དྲག་པོའི་སྒོ་ནས་མཛད་པ་ཞིག་ལ་ཁྲོ་བོ་གསུངས་ཤིང་། འདིའི་དབྱེ་བ་ཕྱེས་ན་གཞི་ཆོས་ཉིད་ཀྱི་ཁྲོ་བོ། གནས་ལུགས་དོན་གྱི་ཁྲོ་བོ། ཐུགས་རྗེ་སྤྲུལ་བའི་ཁྲོ་བོ་དང་གསུམ་གྱི་དབྱེ་བ་ཕྱེ་ཆོག་ལ། གཞི་ཆོས་ཉིད་ཀྱི་ཁྲོ་བོ་ནི་དངོས་པོ་དང་མཚན་མར་འཛིན་པ་འཇོམས་པར་བྱེད་པའི་ཆོས་སྐུ་སྤྲོས་པའི་མཐའ་དང་བྲལ་བ་དེ་ཉིད་ཡིན་པ་དང་། གནས་ལུགས་དོན་གྱི་ཁྲོ་བོ་ནི་དེའི་ངང་ལས་ལོངས་སྤྱོད་རྫོགས་པའི་གནས་སྐབས་ན་ཁྲག་འཐུང་ཧེ་རུ་ཀའི་དཀྱིལ་འཁོར་དུ་སྣང་བ་དེ་དང་། ཐུགས་རྗེ་སྤྲུལ་བའི་ཁྲོ་བོ་ནི་ཐུགས་རྗེ་ལྷུན་གྲུབ་ཀྱི་ཆ་དེ་ཉིད་ལས་གང་ལ་གང་འདུལ་གྱི་ཁྲོ་བོར་སྣང་བར་མཛད་པ་ཕྲིན་ལས་ཀྱི་རང་བཞིན་སྤྲུལ་བའི་སྐུར་སྣང་བ་དེ་ཡིན་ཏེ། མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོ་བས་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ། །ཞེས་རྒྱུད་ཐབས་ཀྱི་ཞགས་པའི་ལུང་ལས་གསུངས་པ་དེ་ཚོ་དེའི་དོན་ཡིན་ནོ། །དེ་ལྟ་བུའི་ཆོས་སྐུའི་དབྱིངས་ལས་མ་གཡོས་བཞིན་དུ་ལོངས་སྐུའི་སྤྲུལ་གཞི་ཁྲོ་བོའི་ཆོ་འཕྲུལ་དེ་ལས་དུག་ལྔ་འཇོམས་པར་བྱེད་པའི་ལྷ་ཚོགས་དཔག་མེད་འཕྲོས་ཤིང་། དེ་འཕྲོ་དགོས་པའི་རྒྱུ་མཚན་ནི་སེམས་ཅན་གྱི་རྣམ་རྟོག་གྲངས་མང་བ་དང་བསྟུན་ཏེ་དེའི་གནས་ལུས་ལོངས་སྤྱོད་ཕུང་ཁམས་སྐྱེ་མཆེད་སྦྱོང་བར་བྱེད་པའི་ལྷ་ཚོགས་དཔག་མེད་འཕྲོས་ནས་རིགས་སམ་གཙོ་བོའི་ཆ་ནས་བུདྡྷ་བཛྲ་རཏྣ་པདྨ་ལ་སོགས་པ་ཁྲག་འཐུང་རིགས་ལྔ། བུདྡྷ་ཀྲོ་ཏི་ལ་སོགས་པ་ཤེས་རབ་ཀྱི་ཆར་གྱུར་པའི་ཀྲོ་ཏི་ལྔ་དང་སྦྱོར་བའི་ཡབ་ཡུམ་སྲས་དང་བཀའ་སྡོད་སྤྲུལ་འཁོར་དང་བཅས་པ་སྟེ། འདིའི་སྐབས་ཀྱི་སྲས་ཞེས་པ་ལུང་གི་ཧེ་རུ་ཀ་ལ་འགྲེལ་མཁན་ཡང་ཡོད་དོ། །ཡང་རང་སྣང་དག་པ་རབ་འབྱམས་ལྷུན་གྲུབ་རྒྱལ་བའི་དཀྱིལ་འཁོར་དུ་ཡེ་ནས་གྲུབ་པ་ལ་དེ་ལྟར་གསལ་བཏབ་ནས་རང་ངོ་ཤེས་པའི་གནས་འདིར་གཤེགས་ནས་བཞུགས་སུ་གསོལ་ཅེས་གསུངས་པའོ།། ཧཱུྃ༔ ཀོའུ་རཱི་ལ་སོགས་གནས་བདག་མ་མོ་བརྒྱད༔ སེང་ཧ་ལ་སོགས་ཡུལ་བདག་ཕྲ་མེན་བརྒྱད༔ ཚད་མེད་བཞི་ལྡན་ཡེ་ཤེས་སྒོ་མ་བཞི༔ སྤྲུལ་བའི་ལས་མཛད་དབང་ཕྱུག་ཉི་ཤུ་བརྒྱད༔ ཁྲག་འཐུང་ལ་སོགས་འབར་བ་ལྔ་བཅུ་བརྒྱད༔ དུ་མ་རོ་གཅིག་བརྟན་པར་བཞུགས་སུ་གསོལ༔ ཅེས་གསུངས་ཏེ། ཁྲོ་བོའི་ལྷ་ཚོགས་འདི་གོང་ནས་བཤད་མ་ཐག་པ་ལྟར་གྱི་གདུལ་བྱའི་དབང་གིས་དེ་ལྟར་དུ་སྣང་བ་ཡིན་ནོ། །དེ་ཡང་གཞི་ལམ་འབྲས་གསུམ་དང་སྦྱར་ནས་བཤད་ན་གཞི་ཁྲོ་བོ་ཁྲག་འཐུང་གི་དཀྱིལ་འཁོར་ལ་ཡེ་ནས་ལྷུན་གྱིས་གྲུབ་ཅིང་། མགོའི་སྤྱི་བོ་ཀླད་པ་དུང་ཁང་གི་ཕོ་བྲང་ན་བཞུགས་པ་ནི། རྒྱུད་ལས། བྷནྡྷ་སྨུག་ནག་འབར་བའི་གཞལ་ཡས་ན། །མཐུ་ཆེན་བདུད་ཀྱི་རྒྱལ་པོའི་མགོ་བཅད་བརྩིགས། །རྔམ་པའི་ཁྲོ་བོ་རྣམས་ཀྱི་གཟེར་གྱིས་བཏབ། །ཅེས་གསུངས་ལ། དུང་ཁང་གི་མཚོག་གསང་གཉིས་དང་ལྟག་གསང་གཉིས་ན་སྒོ་མ་བཞིའི་རང་བཞིན་རྩ་དང་ཐིག་ལེའི་དྭངས་མར་གནས་པ་དེ་ཉིད་སྒོ་སྲུང་གི་ཚུལ་དུ་ཡོད་ཅེས་གསུངས་པའོ། །ལམ་གྱི་ཐད་ནས་བཤད་ན་ལམ་མངོན་པར་སྒྲུབ་པའི་ཆེད་དུ་ཁྲོ་བོའི་དཀྱིལ་འཁོར་བསྒོམ་པ་དང་། འབྲས་བུའི་སྐབས་སུ་འབྲས་བུ་ལྷུན་གྱིས་གྲུབ་པའི་ཁྲོ་བོ་དྲི་མ་དབྱིངས་སུ་དག་ཚེ་རང་སྣང་ལྷུན་གྲུབ་སྟུག་པོ་བཀོད་པའི་ཞིང་ལ་ཁྲོ་བོའི་དཀྱིལ་འཁོར་དུ་གྲོལ་ནས་སྣང་བ་དེ་ཉིད་ཡིན་ནོ། །དེ་ལྟ་བུའི་སྤྲུལ་བའི་ཁྲོ་བོའི་བྱེ་བྲག་ལས་ཀོའུ་རཱི་ལ་སོགས་གནས་བདག་གི་མ་མོ་བརྒྱད་དང་། སེང་ཧ་ལ་སོགས་ཡུལ་བདག་གི་ཕྲ་མེན་མ་བརྒྱད། ཕྲ་མེན་ཞེས་པ་ལུས་གཅིག་ཏུ་མ་ངེས་ཅིར་ཡང་སྣང་དུ་རུང་བའི་ཆོ་འཕྲུལ་ཅན་ཞིག་ལ་སྐབས་འདིར་ཕྲ་མེན་གསུངས། ཚད་མེད་བཞི་ལྡན་ཡེ་ཤེས་ཀྱི་སྒོ་མ་བཞི། སྤྲུལ་བའི་ལས་མཛད་དབང་ཕྱུག་ཉི་ཤུ་རྩ་བརྒྱད་དེ་འདི་དག་ཐུན་མོང་གི་ལུགས་ལ་འཇིག་རྟེན་པ་ལྟར་སྣང་ཞིང་འཇིག་རྟེན་པའི་ལྷ་ཆེན་དྲག་ཤུལ་ཅན་དེ་ཚོའི་མིང་གི་ཐོག་ནས་སླས་དང་བྲན་མོ་མཆིས་བྲང་ལ་སོགས་པའི་མཚན་ནས་སྨོས་ན་ཡང་དོན་གྱི་ཐོག་ནས་ཐུན་མིན་གྱིས་བཤད་ན་འཇིག་རྟེན་ལས་འདས་པ་དང་། ཤིན་ཏུ་ཐུན་མིན་གྱི་ཐོག་ནས་བཤད་ན་རྡོ་རྗེའི་ལུས་ཀྱི་རྩ་གནས་ཀྱི་འཁོར་ལོའི་ནང་ན་ཡོད་པ་སངས་རྒྱས་པའི་སྐབས་སུ་དེ་ལྟར་དུ་སྣང་བ་དེ་ལྟ་བུ་ཞིག་ཡིན་ནོ། །ཁྱིམ་ཚང་ཞིག་གི་ཨ་མཆོད་ཀྱིས་ཐོས་གྲོལ་ཞིག་ཉིན་བཞིན་དུ་གསུངས་པར་མཛད་པས་དེའི་ནང་གི་ཀོའུ་རཱི་མ་ཞེས་པ་དེ་དེ་ཚང་གི་གཡོག་མོས་རྒྱུན་དུ་གོ་བས་ཞི་ཁྲོ་དམ་པ་རིགས་བརྒྱའི་ནང་གི་དེ་ཉིད་ཞེ་ལ་ངེས་ནས་མོ་རང་ཉིད་ལ་དད་པ་བརྟན་པོ་ཡོད་པའི་རྐྱེན་གྱིས་གཡོག་མོ་ཤི་དུས་ཆོས་ཉིད་བར་དོའི་གནས་སྐབས་སུ་ཞི་ཁྲོའི་སྐུ་ཤར་ཚེ་ཀོའུ་རཱི་དཀར་མོ་ངོ་ཤེས་དད་པ་བཞག་པས་དེའི་ངང་དུ་གྲོལ་བའི་ཚུལ་དམ་པའི་སྐྱེས་བུ་ཞིག་གིས་མངོན་ཤེས་ཀྱིས་གཟིགས་རབས་བཤད་རྒྱུ་ཡོད་པ་ལྟར་དུ་ཡིན་ནོ། །དེ་ལྟ་བུ་བསྐྱེད་ཅིང་སྤྱན་དྲངས་པའི་འབར་བ་ཁྲག་འཐུང་གི་ལྷ་ཚོགས་ལྔ་བཅུ་རྩ་བརྒྱད་པོ་བདག་དམ་ཚིག་པ་ཡེ་ནས་ཕུང་ཁམས་ལྷའི་རང་བཞིན་དུ་གྲུབ་ཅིང་གསལ་བཏབ་པ་དེར་དབྱིངས་ནས་སྤྱན་དྲངས་པའི་ཡེ་ཤེས་པ་དམ་ཡེ་དབྱེར་མེད་གཉིས་མེད་ཟུང་འཇུག་ཆེན་པོར་དུ་མ་རོ་གཅིག་ཅེས་གསུངས་ཏེ་མཚོན་བྱེད་རྟགས་ཀྱི་ལྷ་ཚོགས་ཀྱི་དབང་དུ་བྱས་ན་འབར་བ་ཁྲག་འཐུང་ལྔ་བཅུ་རྩ་བརྒྱད་ཡོད་ཀྱང་མཚོན་བྱ་དོན་གྱི་དབང་གིས་ཡེ་ཤེས་གཅིག་གི་རང་བཞིན་དུ་རོལ་བ་ལས་མ་འདས་པ་ཡིན་པས་ཡིན་པ་ལ་ཡིན་པར་ཤེས་པའི་ཏིང་འཛིན་གྱི་སྟོབས་ཀྱིས་དབྱེར་མེད་བརྟན་པར་བཞུགས་སུ་གསོལ་ཅེས་གསུངས་པའོ། །དུ་མ་རོ་གཅིག་ཅེས་པ་གོ་སོང་ངམ། དུ་མ་ཞེས་པ་མང་ཚིག་ཡིན་ལ་མང་པོ་གཅིག་ཏུ་ཇི་ལྟར་གྱུར་ཅེ་ན། མཚོན་བྱེད་རྟགས་ཀྱི་ལྷ་ཚོགས་དབྱིངས་ནས་སྤྱན་དྲངས་པའི་ཡེ་ཤེས་པ་ཁྲོ་བོ་ལྔ་བཅུ་རྩ་བརྒྱད་པོ་མཚོན་བྱ་དོན་གྱི་ཡེ་ཤེས་བདག་དམ་ཚིག་སེམས་དཔའི་ཕུང་ཁམས་ཡེ་ནས་སངས་རྒྱས་པའི་ཆོས་ཉིད་ཐིག་ལེ་ཉག་གཅིག་ལ་རོ་གཅིག་ཏུ་བཟླུམས་པ་ལ་དུ་མ་རོ་གཅིག་ཅེས་གོ་དགོས་སོ། །ས་མ་ཡ༔ རྒྱ་རྒྱ་རྒྱ༔ཞེས་ཏེ་བཞུགས་གསོལ་གྱི་ལེའུའི་མཚམས་སུ་དམ་ཚིག་གི་རྒྱ་དང་གསང་བ་གསུམ་མམ་རྡོ་རྗེ་གསུམ་གྱི་རྒྱ་རྟགས་ཀྱིས་རྒྱས་གདབ་པ་ཡིན་ནོ།། ༼ང༽ བཞི་བ་གུས་པས་ཕྱག་འཚལ་བ། བཞི་བ་གུས་པས་ཕྱག་འཚལ་བ་ནི༔ཞེས་མཚམས་སྦྱར་ཏེ། འདི་ལ་ཞི་བའི་ལྷ་ལ་ཕྱག་འཚལ་བ་དང་། ཁྲོ་བོའི་ལྷ་ལ་ཕྱག་འཚལ་བ་གཉིས་ཀྱི་ནང་གི་དང་པོ་ཞི་བའི་ལྷ་ལ་ཕྱག་འཚལ་བ་ནི། ཧཱུྃ༔ ཡིད་ཆོས་གནས་དག་ཀུན་བཟང་ཡབ་ཡུམ་ལ༔ རང་སྣང་གནས་ཡུལ་དག་པས་ཕྱག་འཚལ་ལོ༔ ཧཱུྃ༔ ཕུང་ལྔ་གནས་དག་ཡེ་ཤེས་ལྔ་དང་ལྡན༔ ལོངས་སྐུ་རིགས་ལྔའི་ཚོགས་ལ་ཕྱག་འཚལ་ལོ༔ ཧཱུྃ༔ འབྱུང་ལྔ་གནས་དག་བདེ་ཆེན་ཡེ་ཤེས་ངང་༔ དབྱིངས་ཀྱི་ཡུམ་ཆེན་ལྔ་ལ་ཕྱག་འཚལ་ལོ༔ ཞེས་གསུངས་ཏེ། ཧཱུྃ་ཞེས་པ་འདི་བདེ་གཤེགས་ཀུན་གྱི་གསང་ཆེན་རྨད་དུ་བྱུང་བའི་གསང་བ་ཐུགས་ཀྱི་ངོ་བོ་ཡིན་ཞིང་། དེ་ཉིད་མཚོན་པའི་མི་འགྱུར་རྟགས་ཀྱི་རྡོ་རྗེ་དང་ཆོས་མཚུངས་པའི་འགྱུར་མེད་ཐུགས་ཀྱི་ཡི་གེས་སྣ་དྲངས་ནས། ཡིད་དང་ཡིད་ཀྱི་ཡུལ་དུ་གྱུར་པའི་ཆོས་ཁམས་གནས་སུ་དག་པ་དཀྱིལ་འཁོར་སྤྱི་ཡི་གཙོ་བོ་སངས་རྒྱས་ཀུན་གྱི་སྤྱི་མེས་ཆོས་སྐུ་ཀུན་ཏུ་བཟང་པོ་དང་ཆོས་ཉིད་ཀུན་ཏུ་བཟང་མོ་སྟེ་ཀུན་བཟང་ཡབ་ཡུམ་གཉིས་ལ་རང་སྣང་གནས་ཡུལ་དག་པས་ཕྱག་འཚལ་ལོ། །ཇི་ལྟར་འཚལ་ཞེ་ན། བསྐྱེད་རྫོགས་ལྷའི་ཏིང་འཛིན་དང་སྣང་སྲིད་ཀུན་ཏུ་བཟང་པོའི་ཕྱག་རྒྱར་ཤེས་པའི་སྒོ་ནས་ལྟ་བ་དོན་ཕྱག་གིས་རང་སྣང་ཐམས་ཅད་ཡེ་ནས་དག་པ་ཀུན་བཟང་ཡབ་ཡུམ་གྱི་ཐུགས་ཆོས་དབྱིངས་ཆེན་པོ་གཅིག་ལས་མ་འདས་པར་ཤེས་པས་ཕྱག་འཚལ་བ་དང་། དེ་བཞིན་དུ་རྣམ་ཤེས་གནས་དག་རྣམ་པར་སྣང་མཛད། གཟུགས་ཕུང་གནས་དག་རྡོ་རྗེ་མི་བསྐྱོད་པ་ལ་སོགས་པ་མེ་ལོང་ཡེ་ཤེས་ལ་སོགས་ཡེ་ཤེས་ལྔའི་རང་བཞིན་དང་ལྡན་པ་ལོངས་སྐུ་རིགས་ལྔའི་ཚོགས་དང་། ནམ་མཁའ་གནས་དག་དབྱིངས་ཀྱི་དབང་ཕྱུག ས་ཁམས་གནས་དག་སངས་རྒྱས་སྤྱན་མ་སོགས་བདེ་བ་ཆེན་པོའི་ཡེ་ཤེས་ཀྱི་ངང་ལས་ཤར་བའི་དབྱིངས་ཀྱི་ཡུམ་ཆེན་ལྔ་ལ་ཕྱག་འཚལ་ལོ་གསུངས་ནས་གཙོ་བོའི་ལྷ་ཚོགས་ཡབ་ཡུམ་ལ་ཕྱག་འཚལ་བ་ཡིན་ནོ།། ཧཱུྃ༔ ཚོགས་བརྒྱད་གནས་དག་སེམས་དཔའ་ཆེན་པོ་བརྒྱད༔ ཡུལ་བརྒྱད་གནས་དག་སེམས་མ་ཆེན་མོ་བརྒྱད༔ ཉེ་བའི་སྲས་མཆོག་བྱང་སེམས་བཅུ་དྲུག་ལ༔ རང་སྣང་གནས་ཡུལ་དག་པས་ཕྱག་འཚལ་ལོ༔ ཞེས་གསུངས་ཏེ། མིག་གི་རྣམ་ཤེས་ཀྱིས་གཟུགས་མཐོང་བ་ལས་ཀྱང་ཁྱད་པར་དུ་འཕགས་པ་སངས་རྒྱས་ཀྱི་སྤྱན་དེ་ཡུལ་ལྔ་ཁ་ལ་འཇུག་ཀྱང་ཆོས་ཉིད་རོ་གཅིག་ཏུ་གཟིགས་པའི་ཆ་ནས་ནི་རྡོ་རྗེ་མཐོང་བ་སྟེ་ས་ཡི་སྙིང་པོ། དེ་བཞིན་དུ་རྣ་ཤེས་ཀྱིས་སྒྲ་ཐོས་པ་ཙམ་གྱིས་མི་ཚད་པར་དེ་ལས་ཁྱད་པར་དུ་འཕགས་པའི་སངས་རྒྱས་ཀྱི་སྙན་གྱིས་ཡུལ་ལྔ་ཁ་ལ་འཇུག་ཀྱང་དེ་བཞིན་དུ་རོ་གཅིག་པར་གསོན་པའི་ཆ་ནས་རྡོ་རྗེ་ཐོས་པ་སྟེ་ཕྱག་ན་རྡོ་རྗེ། དེ་ལྟར་ཚོགས་བརྒྱད་དང་སྦྱར་བའི་རྡོ་རྗེ་སྣོམ་པ་སྟེ་ནམ་མཁའི་སྙིང་པོ་ལ་སོགས་པ་སེམས་དཔའ་བརྒྱད་དང་། དེ་དག་གི་ཡུམ་མམ་བཙུན་མོ་འདས་པའི་དུས་མེད་པ་ལས་ཁྱད་པར་དུ་འཕགས་པ་སྔ་མའི་ཆོས་ལ་མ་ཆགས་མ་ཐོགས་པའི་གཟིགས་པ་འཇུག་པའི་མཚོན་བྱེད་བདུག་སྤོས་མར་སྣང་བ་དང་། དེ་བཞིན་དུ་མེ་ཏོག་མ། སྣང་གསལ་མ་ལ་སོགས་པ་ཡུལ་བརྒྱད་མ་སྤངས་གནས་སུ་དག་པ་སེམས་མ་ཆེན་མོ་བརྒྱད་དེ་ཉེ་བའི་སྲས་མཆོག་བྱང་ཆུབ་སེམས་དཔའ་ཡབ་ཡུམ་བཅུ་དྲུག་ལ་རང་སྣང་གནས་ཡུལ་དག་པས་ཡང་གོང་བཞིན་དུ་ཕྱག་འཚལ་ལོ་ཞེས་གསུངས་པའོ།། ཧཱུྃ༔ རིགས་དྲུག་དོང་སྤྲུགས་སྤྲུལ་སྐུ་ཐུབ་པ་དྲུག༔ ཚད་མེད་བཞི་ལྡན་སྒོ་བ་ཡབ་ཡུམ་བརྒྱད༔ ཞི་བའི་ལྷ་ཚོགས་བཞི་བཅུ་རྩ་གཉིས་ལ༔ རང་སྣང་གནས་ཡུལ་དག་པས་ཕྱག་འཚལ་ལོ༔ ཞེས་གསུངས་ཏེ། སྟོན་པ་ཀུན་ཏུ་བཟང་པོ་ཉིད་ཆོས་སྐུ་ལས་མ་གཡོས་པར་ལོངས་སྤྱོད་རྫོགས་པའི་སྐུར་བཞེངས་པའི་ཐུགས་རྗེའི་ངང་དེ་ལས་ཕྱོགས་བཅུའི་འཇིག་རྟེན་ན་སྤྲུལ་བ་བསམ་གྱིས་མི་ཁྱབ་པར་སྣང་བ་དང་། ཁྱད་པར་དུ་འགྲོ་དྲུག་དོང་ནས་སྤྲུག་པའི་ཕྱིར་དུ་ལྷའི་ཐུབ་པ་བརྒྱ་བྱིན། ལྷ་རྣམས་ལ་ཆོས་ཀྱི་སྡོམ་བཞི་བསྟན་པའི་ཕྱག་མཚན་པི་ཝང་བསྣམས་པ། ཐགས་བཟང་རིས་ཀྱིས་ལྷ་མ་ཡིན་འཐབ་རྩོད་འདུལ་བའི་ཆེད་དུ་གོ་མཚོན་བསྣམས་པ། ཤཱཀྱ་ཐུབ་པ་མི་རྣམས་ལ་དགེ་བཅུ་སྟོན་པའི་ཕྱིར་དུ་འཁར་གསིལ་ལྷུང་བཟེད་བསྣམས་པའི་ཚུལ་ཅན་ལ་སོགས་པ་སྤྲུལ་སྐུ་ཐུབ་པ་དྲུག ཚད་མེད་བཞིས་འགྲོ་ཀུན་ཐར་ལམ་ལ་འགོད་པའི་སྒོ་བ་ཡབ་ཡུམ་བརྒྱད་དེ་མདོར་ན་ཞི་བའི་ལྷ་ཚོགས་བཞི་བཅུ་རྩ་གཉིས་ལ་རང་སྣང་གནས་ཡུལ་དག་པས་ཕྱག་འཚལ་ལོ་ཞེས་གསུངས་པའོ།། ད་ནི་ཁྲོ་བོའི་ལྷ་ཚོགས་ལ་ཕྱག་འཚལ་བ་ནི། ཧཱུྃ༔ དུག་ལྔ་འཇོམས་མཛད་ཁྲག་འཐུང་ཁྲོ་བོ་ལྔ༔ དབྱིངས་ཀྱི་ཡུམ་ཆེན་ཀྲོ་ཏི་ལྔ་དང་སྦྱོར༔ ཁྲག་འཐུང་ཁྲོ་བོ་ཡབ་ཡུམ་བཅུ་རྣམས་ལ༔ རང་སྣང་གནས་ཡུལ་དག་པས་ཕྱག་འཚལ་ལོ༔ ཞེས་གསུངས་ཏེ། ཉོན་མོངས་པ་གཏི་མུག་གནས་སུ་དག་པས་ན་གཙོ་བོ་བུདྡྷ་ཧེ་རུ་ཀ ཞེ་སྡང་དག་པས་བཛྲ་ཧེ་རུ་ཀ ང་རྒྱལ་དག་པས་རཏྣ་ཧེ་རུ་ཀ འདོད་ཆགས་དག་པས་པདྨ་ཧེ་རུ་ཀ ཕྲག་དོག་དག་པས་ཀརྨ་ཧེ་རུ་ཀ་སྟེ་དེ་ལྟར་སྦྱར་རྒྱུ་ཡིན་ཞིང་། ཁྲག་འཐུང་ཁྲོ་བོ་ཡབ་ཡུམ་བཅུ་རྣམས་ལ་ཡང་རང་སྣང་གནས་ཡུལ་དག་པས་ཕྱག་འཚལ་ལོ་ཞེས་གསུངས་པའོ།། ཧཱུྃ༔ ཀོའུ་རཱི་ལ་སོགས་གནས་ཀྱི་མ་མོ་བརྒྱད༔ སེང་ཧ་ལ་སོགས་ཡུལ་གྱི་ཕྲ་མེན་བརྒྱད༔ རྟ་གདོང་ལ་སོགས་ཡེ་ཤེས་སྒོ་མ་བཞི༔ བཀའ་ཡི་ལས་བྱེད་དབང་ཕྱུག་ཉི་ཤུ་བརྒྱད༔ ཁྲག་འཐུང་ལྷ་ཚོགས་ལྔ་བཅུ་རྩ་བརྒྱད་ལ༔ རང་སྣང་གནས་ཡུལ་དག་པས་ཕྱག་འཚལ་ལོ༔ ཞེས་གསུངས་ཏེ། ཀུན་གཞིའི་རྣམ་ཤེས་གནས་དག་ཀོའུ་རཱི་དཀར་མོ། ཡིད་ཀྱི་རྣམ་ཤེས་གནས་དག་ཙོའུ་རཱི་སེར་མོ། ཉོན་མོངས་པ་ཅན་གྱི་ཡིད་གནས་སུ་དག་པ་པྲ་མོ་ཧ་དམར་མོ་ལ་སོགས་པ་གནས་ཀྱི་མ་མོ་བརྒྱད་དང་། དེའི་ཡུལ་བརྒྱད་གནས་སུ་དག་པ་ཕྲ་མེན་སེངྷ་བྱ་ཀྲི་ལ་སོགས་པ་བརྒྱད། རྟ་གདོང་དཀར་མོ་ལྕགས་ཀྱུ་ཅན། ཕག་གདོང་ནག་མོ་ཞགས་པ་ཅན་ལ་སོགས་པ་སྒོ་མ་བཞི། དུར་ཁྲོད་དབང་ཕྱུག་གི་ཆུང་མ་སྲིན་མོ་ཆེན་མོ་མིའི་སྲིན་མོ་དང་། ཚངས་པའི་ཆུང་མ་ཚངས་མ་ལ་སོགས་པ་ཤར་ཕྱོགས་ཀྱི་ཞི་བའི་ལས་བྱེད་དྲུག འདོད་པ་དམར་མོ་དང་བདུད་རྩི་དམར་མོ་ལ་སོགས་པ་ལྷོ་ཕྱོགས་ཀྱི་རྒྱས་པའི་ལས་བྱེད་དྲུག དགའ་བ་དང་མྱོས་མ་ལ་སོགས་པ་ནུབ་ཕྱོགས་ཀྱི་དབང་གི་ལས་བྱེད་དྲུག གསོད་བྱེད་མ་དང་མེ་མོ་ལ་སོགས་པ་ལྗང་མོ་དྲག་པོའི་ལས་བྱེད་དྲུག སྒོ་མ་བཞི་དང་བཅས་པའི་དབང་ཕྱུག་ཉེར་བརྒྱད་དེ་ཁྲག་འཐུང་ཁྲོ་བོའི་དཀྱིལ་འཁོར་གྱི་ལྷ་ཚོགས་ལྔ་བཅུ་རྩ་བརྒྱད་ལ་རང་སྣང་གནས་ཡུལ་རྣམ་པར་དག་པ་སྟེ། ཇི་ལྟར་རྣམ་པར་དག་ཅེ་ན། གཞི་ཡེ་དག་གི་ཁྲོ་བོ་མི་འབྲལ་དུང་ཁང་གི་གཞལ་ཡས་ན་བཞུགས་ཤིང་། ལམ་མངོན་པར་སྒྲུབ་པའི་ཁྲོ་བོ་དེ་དཀྱིལ་འཁོར་དུ་བསྐྱེད་ནས་བསྒོམས་ཚེ། འབྲས་བུ་ལྷུན་གྲུབ་ཀྱི་ཁྲོ་བོ་དེ་རང་སྣང་བའི་ཆེད་དུ། ཕྲིན་ལས་སྤྲུལ་བའི་ཁྲོ་བོ་དེ་ཉིད་གདུལ་བྱ་ལ་མངོན་དུ་སྣང་བ་དེ་འདྲའི་སྒོ་ནས་རྒྱུ་འབྲས་སྦྱོར་ཤེས་དགོས་སོ། །དེ་ཡང་ཚུལ་ཇི་ལྟར་ཡིན་ན་གཞི་ཡེ་དག་གི་ཁྲོ་བོ་དེ་མི་འབྲལ་དུང་ཁང་ན་བཞུགས་དུས། ལམ་མངོན་པར་སྒྲུབ་པའི་ཁྲོ་བོ་དེ་དཀྱིལ་འཁོར་དུ་བསྐྱེད་ནས་བསྒོམས་ན། འབྲས་བུ་ལྷུན་གྲུབ་ཀྱི་ཁྲོ་བོ་དེ་རང་སྣང་བའི་ཆེད་དུ། ཕྲིན་ལས་སྤྲུལ་བའི་ཁྲོ་བོ་དེ་གདུལ་བྱ་ལ་མངོན་དུ་སྣང་བ་རྒྱུ་འབྲས་གཉིས་སུ་མེད་པར་སྦྱོར་ཤེས་པའི་རྣམ་པར་དག་པའི་ཡིད་ཀྱིས་གནས་ལུགས་ལྟ་བ་མཇལ་བའི་ཕྱག་འཚལ་ལོ་གསུངས་པའི་དོན་ཡིན་ནོ། །ས་མ་ཡ༔ རྒྱ་རྒྱ་རྒྱ༔ཞེས་ཏེ་དམ་ཚིག་སྔགས་ཀྱི་རྒྱ་དང་མི་འདའ་རྡོ་རྗེའི་རྒྱ་ཡིས་མནན་པའོ།། ༼ཅ༽ ལྔ་བ་མཆོད་པ་འབུལ་བ། ༼ཀ ཕྱི་ནང་གསང་གསུམ་གྱི་མཆོད་པ་འབུལ་བ། ཀ༽ དང་པོ་ཕྱི་ཡི་མཆོད་པ། ལྔ་བ་ཕྱི་ནང་གསང་མཆོད་ནི༔ དང་པོ་ཕྱིའི་མཆོད་པ་འདི་སྐད་དོ༔ ཧཱུྃ༔ བླ་མ་ཀུན་བཟང་རྒྱལ་བ་ཞི་ཁྲོའི་ཚོགས༔ དཔག་མེད་ནམ་མཁའ་གང་བའི་ལྷ་ཚོགས་ལ༔ དག་པ་རྣམ་གསུམ་ཡིད་ཀྱིས་མཆོད་པའི་སྤྲིན༔ གཟུགས་སྒྲ་དྲི་རོ་རེག་བྱ་ཆོས་ལ་སོགས༔ སྣང་སྟོང་རིག་སྟོང་གསལ་སྟོང་བདེ་སྟོང་དང་༔ དྲན་སྟོང་གྲགས་སྟོང་ཚོར་སྟོང་མཆོད་པའི་ཚོགས༔ མེ་ཏོག་བདུག་སྤོས་དྲི་ཞལ་རོལ་མོར་བཅས༔ བླ་མ་ཞི་ཁྲོའི་དཀྱིལ་འཁོར་ལྷ་ལ་འབུལ༔ ཐུགས་རྗེས་འགྲོ་བའི་དོན་དུ་བཞེས་སུ་གསོལ༔ ཅེས་གསུངས་ཏེ། མཆོད་པའི་ཡུལ་གང་ཞིག་ལ་གུས་པས་བཀུར་ཞིང་མཆོད་པའི་བསམ་པས་ཕྱི་ནང་གི་དངོས་པོ་སྟོབ་པའི་སྒོ་ནས་འབུལ་ཡུལ་མཉེས་པར་བྱེད་པའི་ལས་ཀྱི་བདག་ཉིད་དེ་མཆོད་པ་ཡིན་ནོ། །འདིའི་སྐབས་སུ་ཧཱུྃ་ཞེས་རྒྱལ་བའི་ཐུགས་ཀྱི་ཡི་གེ་སྣ་ཚོགས་སྤྲུལ་བའི་སྤྲིན་འཕྲོ་བའི་ས་བོན་དེས་མགོ་བླངས་ནས། མཆོད་པ་འབུལ་ཡུལ་ནི། ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་ནས་མ་འཚོལ་ཅིག །ཅེས་རྒྱུད་ཀྱི་ནང་ནས་གསུངས་པ་བཞིན་དུ་མཚོན་བྱ་དོན་གྱི་བླ་མ་ཁྱབ་བདག་རིགས་དྲུག་པ་ཀུན་ཏུ་བཟང་པོ་སྤྲོ་གཞིར་བཞུགས་པའི་རྒྱལ་བ་ཞི་ཁྲོའི་ལྷ་ཚོགས་དཔག་མེད་རྡུལ་སྙེད་ཀྱི་གྲངས་དང་མཉམ་པའི་ནམ་མཁའ་གང་བའི་ལྷ་ཚོགས་ལ། དག་པ་རྣམ་གསུམ་ཞེས་ཐུན་མིན་གྱི་སྐབས་རྩ་དག་པ། རླུང་དག་པ། ཐིག་ལེ་དག་པ་གསུམ་ཁ་རྩང་ང་ཚོས་ཡན་ལག་བཅུ་བའི་སྐབས་སུ་འགྲེལ་བ་ལྟར་དུ་ཡིན་ལ། འོན་ཀྱང་ཕྱི་མཆོད་ཀྱི་སྐབས་སུ་དེ་ལྟར་མ་ཡིན་པར་འབུལ་ཡུལ་དག་པ། དངོས་པོ་དག་པ། བསམ་པ་དག་པའི་ཞིང་བསམ་དངོས་པོ་གསུམ་ཁ་དག་པའི་དག་པ་རྣམ་གསུམ་དང་ལྡན་པ་འདི་ཉིད་ཀྱིས། གང་དབུལ་བར་བྱ་བ་འཇིག་རྟེན་དང་འཇིག་རྟེན་ལས་འདས་པའི་མཆོད་པ། བླ་ན་ཡོད་པའི་མཆོད་པ། བླ་ན་མེད་པའི་མཆོད་པ། དངོས་བཤམས་དང་ཡིད་སྤྲུལ་ལ་སོགས་པའི་རྣམ་གྲངས་མང་པོ་ཡོད་ན་ཕྱི་འདོད་ཡོན་གྱི་མཆོད་པ་གཟུགས་མཛེས། སྒྲ་སྙན། དྲི་ཞིམ། རོ་མངར། ཡིད་ཀྱི་ཡུལ་དུ་གྱུར་བའི་ཆོས་ཁམས་དགེ་བ་དང་བཅས་པ་འཇིག་རྟེན་དང་འཇིག་རྟེན་ལས་འདས་པའི་མཆོད་པའི་སྤྲིན་ལྷུན་གྲུབ་ཀུན་ཏུ་བཟང་པོའི་མཆོད་པའི་སྤྲིན་བསམ་གྱིས་མི་ཁྱབ་པར་སྤྲུལ་ཏེ་གཟུགས་སྣང་སྟོང་། སྒྲ་གྲག་སྟོང་། དྲི་རིག་སྟོང་། རོ་ཚོར་སྟོང་། རེག་བྱ་བདེ་སྟོང་། ཆོས་གསལ་སྟོང་དང་དྲན་སྟོང་གི་ངོ་བོ་ཡིན་ཞིང་། ལོངས་སྤྱོད་རྒྱན་གྱི་རོལ་བ་བསམ་གྱིས་མི་ཁྱབ་པར་སྤྲུལ་ཏེ་མེ་ཏོག་བདུག་སྤོས་དྲི་ཞལ་རོལ་མོ་དང་བཅས་པས་མཚོན་པའི་མཆོད་རྫས་དེ། བླ་མ་ཞི་ཁྲོའི་དཀྱིལ་འཁོར་གྱི་ལྷ་ལ་བསམ་པ་དག་པ་དམིགས་མེད་འཛིན་པ་དང་བྲལ་བས་འབུལ་བ་ཡིན་པས་བཞེས་སུ་གསོལ་ཅེས་གསུངས་པའོ། །དོན་ངོ་མའི་ཐོག་ན་འབུལ་ཡུལ་དང་འབུལ་མཁན་ཁ་ཁ་ན་མེད་པར་གཉིས་མེད་མཉམ་པ་ཆེན་པོའི་ཟུང་འཇུག་གི་ཡེ་ཤེས་རོ་གཅིག་ཏུ་ཡིན་ཡང་ཐ་སྙད་ཚིག་གི་ལམ་ནས་དོན་གྱི་གོ་བའི་བསྣོལ་མཚམས་རྙེད་དགོས་པ་ཡིན་པས་ལྷ་ལ་ལྷ་རོལ་བའི་ཚུལ་གྱིས་ཐུགས་རྗེས་འགྲོ་བའི་དོན་དུ་བསོད་ནམས་དང་ཡེ་ཤེས་ཀྱི་ཚོགས་རྫོགས་པའི་སླད་དུ་བཞེས་སུ་གསོལ་ཅེས་པའི་དོན་དེ་ལྟ་བུ་ཞིག་ཡིན་ནོ།། ཁ༽ གཉིས་པ་ནང་གི་མཆོད་པ། གཉིས་པ་ནང་མཆོད་འབུལ་བ་ནི༔ ཧཱུྃ༔ བླ་མ་ཀུན་བཟང་ཞི་ཁྲོའི་ཚོགས༔ རྒྱལ་བ་རྒྱ་མཚོའི་ཚོགས་བཅས་ལ༔ ལྷ་རྫས་ནང་མཆོད་འབུལ་བ་ནི༔ སྣོད་བཅུད་སྣང་སྲིད་ཐམས་ཅད་ཀུན༔ རྡོ་རྗེ་གཟུགས་སྒྲ་དྲི་རོ་རེག༔ རྡོ་རྗེ་ཆོས་མའི་ཚོགས་སྤྲུལ་ནས༔ དངོས་འབྱོར་ཡིད་སྤྲུལ་མཆོད་པའི་ཚོགས༔ ཀུན་བཟང་ཞི་ཁྲོའི་ལྷ་ཚོགས་ལ༔ གུས་པའི་སེམས་ཀྱིས་འབུལ་ལགས་ན༔ འགྲོ་བའི་དོན་དུ་བཞེས་སུ་གསོལ༔ ཅེས་གསུངས་ཏེ། བླ་མ་ཀུན་བཟང་ཞི་ཁྲོའི་ལྷ་ཚོགས་རྒྱལ་བ་རྒྱ་མཚོའི་ཚོགས་དང་བཅས་པ་ལ་ལྷ་རྫས་སམ་ཞིང་ཁམས་རྣམ་པར་དག་པ་རྣམས་ཀྱི་རྒྱན་དང་སྤྱོད་ཡུལ་དུ་གྱུར་པའི་དངོས་པོ་སྤྱི་དང་ཁྱད་པར་དུ་ནང་གི་མཆོད་པ་སྣོད་བཅུད་ཀྱི་སྣང་ཞིང་སྲིད་པའི་དངོས་པོ་ཐམས་ཅད་དག་པ་ཏིང་ངེ་འཛིན་གྱི་རོལ་བར་ཤར་བའི་སྣང་སྲིད་གཞི་བཞེངས་ཀྱི་མཆོད་པ་ཀུན་བཟང་ཞི་ཁྲོའི་ལྷ་ཚོགས་ལ་གུས་པའི་སེམས་ཀྱིས་གཉིས་འཛིན་དང་བྲལ་བར་དམིགས་མེད་ཀྱི་ངང་ནས་འབུལ་བ་ལགས་ན་འགྲོ་བ་ཀུན་རང་བྱུང་གདོད་མའི་གནས་ལུགས་མ་བཅོས་དོན་གྱི་ཞི་ཁྲོའི་སྐུར་མངོན་པར་སངས་རྒྱ་བའི་ཕྱིར་དུ་འབུལ་བ་ཡིན་པས་བཞེས་སུ་གསོལ་ཅེས་གསུངས་པའོ།། ག༽ གསུམ་པ་གསང་བའི་མཆོད་པ། གསུམ་པ་གསང་མཆོད་འབུལ་བ་ནི༔ ཧཱུྃ༔ སྣང་བ་ཡབ་ལ་སྟོང་བ་ཡུམ༔ གསལ་བ་ཡབ་ལ་འོད་ཟེར་ཡུམ༔ བདེ་བ་ཡབ་ལ་སྟོང་བ་ཡུམ༔ སྒྲ་གྲགས་ཡབ་ལ་གྲགས་སྟོང་ཡུམ༔ དྲན་པ་ཡབ་ལ་རིག་སྟོང་ཡུམ༔ སྐུ་གསུང་ཐུགས་ཡོན་ཕྲིན་ལས་བདེ༔ རིག་མ་དཀར་སེར་དམར་ལྗང་མཐིང་༔ བདེ་བ་ཡེ་ཤེས་ཀུན་ལྡན་དུ༔ བདེ་བའི་རོ་སྙོམས་མཆོད་པ་འབུལ༔ སྐུ་གསུང་ཐུགས་ཡོན་དགྱེས་ཕྱིར་བཞེས༔ ཞེས་གསུངས་ཏེ། གསང་མཆོད་འདི་འདིའི་ཤོ་ལོ་ཀ་གཉིས་དང་ཕྱེད་འདིས་བསྟན་པས་སྣང་གྲག་དྲན་རིག་བྱུང་ཚོར་ཐམས་ཅད་ཐབས་དང་ཤེས་རབ་འབྲེལ་བ་བདེ་ཆེན་བདེ་བའི་ངོ་བོར་སྣང་བ་ཐབས་ཀྱི་རང་བཞིན་ཡབ་ཡིན་པ་ལ་སྟོང་པ་དེ་དང་གཉིས་སུ་མ་མཆིས་པ་ཡུམ་གྱི་ངོ་བོ་སྣང་སྟོང་ཟུང་འཇུག་ཐབས་ཤེས་ཡབ་ཡུམ་གྱི་བདག་ཉིད་ཅན་དང་། ཡང་གསལ་བ་ཡབ་ཀྱི་རང་བཞིན་ལ་གསལ་བའི་འོད་ཟེར་དེ་དང་གཉིས་སུ་མེད་པ་ཡུམ་གྱི་ངོ་བོ། བདེ་བ་ཐབས་ཀྱི་རང་བཞིན་ལ་དེའི་ངོ་བོ་སྟོང་པ་ཤེས་རབ་ཡུམ་དང་གཉིས་སུ་མེད་པ་ཐབས་ཤེས་ཟུང་དུ་འབྲེལ་བ་དང་། སྒྲ་གྲག་པའི་ངོ་བོ་དེ་ཐབས་ཀྱི་རང་བཞིན་ཡབ་ཡིན་ན་གྲག་བཞིན་དུ་སྟོང་པ་དེ་ཤེས་རབ་ཡུམ་དང་གཉིས་སུ་མེད་ཅིང་ཟུང་དུ་འབྲེལ་བ། དྲན་པ་དེ་ཐབས་ཀྱི་རང་བཞིན་ཡབ་ཡིན་ན་དྲན་པའི་ངོ་བོ་རིག་ཅིང་སྟོང་པ་ཤེས་རབ་ཡུམ་དང་ཟུང་དུ་འབྲེལ་བ། སྐུ་གསུང་ཐུགས་ཡོན་ཕྲིན་ལས་ཀྱི་བདེ་བའི་རིག་མ་ཞེས་གསུངས་ཏེ། གཟུགས་རྡོ་རྗེ་མ་སྐུ་མདོག་དཀར་མོ་མེ་ལོང་ཐོགས་པ། སྒྲ་རྡོ་རྗེ་མ་སྔོན་མོ་པི་ཝང་སྦྲེང་ཞིང་སྙན་པའི་གླུ་ལེན་པ། དྲི་རྡོ་རྗེ་མ་སེར་མོ་དུང་ཕོར་དྲི་ཞལ་འཛིན་པ་ལ་སོགས་པ་མཆོད་པའི་ལྷ་མོ་བརྒྱད་དང་བཅུ་དྲུག་དཔག་མེད་ཀྱིས་མཚོན་པའི་དཀར་སེར་དམར་ལྗང་མཐིང་ཁའི་མདོག་ཅན་གྲངས་དཔག་ཏུ་མེད་པ་མང་པོས་དགའ་བཞིས་དྲངས་པའི་སྟོང་བཞིའི་ཡེ་ཤེས་བདེ་སྟོང་མཆོག་གི་རོལ་མོའི་ཚུལ་དུ་བདེ་བའི་རོ་སྙོམས་ཀྱི་མཆོད་པ་མི་བདེའི་སྡུག་བསྔལ་མིང་ཡང་མི་གྲགས་པ་གསང་མཆོག་བདེ་བའི་མཆོད་པ་འབུལ་བ་ཡིན་པས་བཞེས་སུ་གསོལ་ཞེས་གསུངས་པའོ།། ༼ཁ སྨན་རཀ་གཏོར་གསུམ་གྱི་མཆོད་པ། ཀ༽ དང་པོ་སྨན་མཆོད་འབུལ་བ། ཀ སྨན་མཆོད་འབུལ་བ་དངོས་བཤད་པ། དེ་ཡན་ཆད་ཀྱིས་ཕྱི་ནང་གསང་བའི་མཆོད་པ་གསུམ་སོང་ནས་འདི་ནས་ཐུན་མིན་ནང་གི་མཆོད་པའམ་སྐབས་འགའ་རེར་སྦྱོར་སྒྲོལ་གསང་བའི་མཆོད་པ་ཞེས་པ་དེ་དང་འབྲེལ་བའི་སྨན་རཀ་གཏོར་གསུམ་གྱི་མཆོད་པ་འབུལ་བ་ནི། སྨན་རག་གཏོར་གསུམ་འབུལ་བ་ལ༔ དང་པོ་སྨན་མཆོད་འབུལ་བ་ནི༔ཞེས་མཚམས་སྦྱར་ཏེ། ཧཱུྃ༔ རིགས་ལྔ་ཡབ་ཡུམ་གཉིས་ཀྱི་རྒྱུ་བྱས་ཏེ༔ སྐུ་ལྔ་ཡེ་ཤེས་ལྔ་ཡི་རྐྱེན་བྱས་ནས༔ ཐབས་ཤེས་རྒྱུ་ལ་མ་འགགས་རྐྱེན་སྦྱར་བའི༔ དམ་པ་རིགས་བརྒྱའི་འབྲུ་བཅུད་བདུད་རྩི་འདི༔ བླ་མ་ཀུན་བཟང་ཞི་ཁྲོའི་ཚོགས་ལ་འབུལ༔ ཐུགས་རྗེའི་བརྩེར་དགོངས་དབང་དང་དངོས་གྲུབ་སྩོལ༔ ཅེས་གསུངས་ཏེ། འདི་ནས་ཧཱུྃ་ཞེས་གསང་གསུམ་གཅིག་ཏུ་འདུས་པའི་གསང་ཆེན་རྨད་དུ་བྱུང་བའི་ཡི་གེས་མགོ་བླངས་ནས། རིགས་ལྔ་ཡབ་ཡུམ་གཉིས་ཀྱིས་རྒྱུ་བྱས། སྐུ་ལྔ་ཡེ་ཤེས་ལྔ་ཡིས་རྐྱེན་བྱས་ཞེས་གསུངས་ཏེ། འདིའི་ངེས་ཚིག་རྒྱུ་དྲུག་རྐྱེན་བཞིས་བསྐྲུན་པའི་སྨན་མཆོག་བདུད་རྩི་ར་ས་ཡཱ་ན་ཞེས་རྒྱུ་དྲུག་དེ་ཕྱི་ནང་གསང་གསུམ་གྱི་ཐོག་ནས་དབྱེ་ན་ཕྱི་ལྟར་དུ་བདུད་རྩི་ཛ་གད་དམ་མ་ད་ནའི་རྒྱུ་དྲུག ནང་ལྟར་ན་བདུད་རྩིའི་ཆོས་སྨན་སྦྱོར་བའི་སྨན་རྩ་བ་དང་སྡོང་བུ་ལ་སོགས་པ་དྲུག གསང་བ་ལྟར་ན་ཡབ་ཀྱི་རྒྱུ་གསུམ་ཡུམ་གྱི་རྒྱུ་གསུམ་སྟེ་དྲུག་གོ །འདིའི་ཕྱི་ནང་གཉིས་ཀའི་ཐུན་མོང་གི་རྐྱེན་བཞི་ནི་རྒྱུའི་རྐྱེན། བདག་རྐྱེན། དམིགས་རྐྱེན། དེ་མ་ཐག་རྐྱེན་ཏེ་བཞི་ཡིན་ཞིང་། དེ་ལྟ་བུའི་རྒྱུ་དྲུག་རྐྱེན་བཞི་ལས་གསང་ཆེན་རྨད་བྱུང་གི་རྫས་ར་ས་ཡཱ་ན་གྲུབ་ལུགས་ཁ་རྩང་སྔོན་ནས་བཤད་པ་བཞིན་དུ་ཡིན་ནོ། །འོ་ན་སྨན་རྫས་དེ་ཉིད་ཀྱི་བྱིན་གྱིས་བརླབ་པའི་སྐབས་སུ་ཁྱོད་ཀྱིས་རྒྱུ་དྲུག་རྐྱེན་བཞི་ཞེས་བཤད་ལ་འདི་ནས་རྒྱུ་ལྔ་དང་རྐྱེན་ལྔ་གསུངས་པས་དེ་གཉིས་ཀྱི་དོན་ཇི་ལྟར་ཡིན་ཞེ་ན། རྫས་དང་བྱིན་རླབས་གཉིས་ཀ་ཁ་ཁ་ཡིན་ལ། དམ་ཚིག་གི་བདུད་རྩི་དང་ཡེ་ཤེས་ཀྱི་བདུད་རྩི་གཉིས་ཀ་ཁ་ཁ་ཡི་གོ་བ་ལེན་དགོས་ཤིང་། ཡེ་ཤེས་ཀྱི་བདུད་རྩི་དེས་དམ་ཚིག་གི་བདུད་རྩི་ལ་བྱིན་གྱིས་བརླབས་ནས་དམ་ཡེ་དབྱེར་མེད་དུ་འགྱུར་དགོས་སོ། །དེས་ན་དེ་ལྟ་བུའི་སྨན་རྫས་དེ་ཉིད་བྱིན་གྱིས་བརླབ་པའི་སྐབས་སུ་སྨན་སྣོད་ཀྱི་བྷན་དྷའི་ནང་ན་རིགས་ལྔ་ཡབ་ཡུམ་ལྔ་ཚོགས་སྐད་ཅིག་དྲན་རྫོགས་སུ་གསལ་བཏབ་ནས་རྒྱུ་རིགས་ལྔ་ཡབ་ལྔ། རྐྱེན་སྐུ་ལྔ་ཡེ་ཤེས་ལྔ་འདུས་པའི་ཐབས་ཤེས་ཀྱི་རྒྱུ་ལ་མ་འགགས་པའི་རྐྱེན་སྦྱར་ནས་རིགས་ལྔ་ཡབ་ཡུམ་སྙོམས་པར་ཞུགས་པའི་རྗེས་ཆགས་ལྷག་པར་སྦྱོར་བའི་སྦྱོར་མཚམས་ནས་ཡེ་ཤེས་བདུད་རྩིའི་རྒྱུན་བབས་ཏེ་སྨན་བཅུད་ཐམས་ཅད་རིགས་ལྔའི་རོལ་བ་དམ་པ་རིགས་བརྒྱའི་བྱིན་རླབས་ཀྱིས་ཐམས་ཅད་བདུད་རྩིའི་རང་བཞིན་ཡེ་ཤེས་ཀྱི་བདུད་རྩི་དམ་ཚིག་གི་བདུད་རྩི་དང་དབྱེར་མེད་དུ་གྱུར་པའི་འབྲུ་བཅུད་ཆང་ལ་ཉིང་ཁུ་སྦྱར་བའི་བདུད་རྩི་འདི་བླ་མ་ཀུན་བཟང་ཞི་ཁྲོའི་ལྷ་ཚོགས་ལ་འབུལ་བ་ཡིན་པས་ཟག་མེད་ཀྱི་ཐུགས་རྗེའི་བརྩེ་བ་ཆེན་པོས་ཉེ་བར་དགོངས་ཏེ་གསང་བ་བདེ་སྟོང་གི་དབང་དང་ཐུན་མོང་མ་ཡིན་པ་མཆོག་གི་དངོས་གྲུབ་དམ་པ་སྩོལ་ཅིག་ཅེས་གསུངས་པའོ། །སརྦ་པཉྩ་ཨ་སྨྲྀ་ཏ་ལ་ཁ་རཾ་ཁཱ་ཧི༔ཞེས་པའི་སྔགས་དོན་ནི་སརྦ་ཐམས་ཅད། པཉྩ་ཨ་མྲྀ་ཏ་སྨན་བཅུད་ཀྱི་བདུད་རྩི། ཁ་རཾ་སྟོབ་པ། ཁཱ་ཧི་དགྱེས་པར་བཞེས་ཤིག་ཡིན་ལ། ཐམས་ཅད་བསྡོམས་ན་སྨན་དང་བཅུད་ཐམས་ཅད་བདུད་རྩི་ལྔའི་རང་བཞིན་དུ་གྱུར་པ་སྟོབ་པ་ཡིན་པས་དགྱེས་པར་བཞེས་ཤིག་ཅེས་པའི་དོན་ཡིན་ནོ།། ཁ སྨན་མཆོད་ཀྱི་ཁ་སྐོང་བཤད་པ། སྨན་མཆོད་ཀྱི་ཁ་སྐོང་ནི། རྒྱལ་ཀུན་སྤྱི་མྱེས་ཀུན་བཟང་རྡོ་རྗེ་འཆང་༔ རྡོ་རྗེ་སེམས་དཔའ་དགའ་རབ་ཤྲཱི་སེང་༔ ཨོ་རྒྱན་ཡབ་ཡུམ་རྗེ་འབངས་ལོ་པཎ་དང་༔ ཀརྨ་གླིང་པའི་ཞལ་དུ་ཨོཾ་ཨཱཿཧཱུྃ༔ ཉི་ཟླ་ཆོས་རྗེ་ཉི་ཟླ་འོད་ཟེར་མཚན༔ ནམ་མཁའི་མཚན་སོགས་བཀའ་བབས་བརྒྱུད་ལྡན་གྱི༔ རྩ་བརྒྱུད་བླ་མ་སྐྱབས་མཆོག་ཀུན་འདུས་དངོས༔ དྲིན་ཆེན་བླ་མའི་ཞལ་དུ་ཨོཾ་ཨཱཿཧཱུྃ༔ འཁོར་འདས་དམིགས་མེད་སྒྱུ་འཕྲུལ་རྡོ་རྗེའི་སྤྲིན༔ ཞི་བ་རྡོར་དབྱིངས་འབར་བ་ཁྲག་འཐུང་དང་༔ དག་པ་རིག་འཛིན་མཁའ་འགྲོ་ཆོས་སྐྱོང་བཅས༔ མཆོད་པར་འོས་རྣམས་ཞལ་དུ་ཨོཾ་ཨཱཿཧཱུྃ༔ ཞེས་གསུངས་ཏེ། འདི་གོ་སླ་བས་འདིའི་ཚིག་གི་དོན་འགྲེལ་མི་དགོས་ལ། ཐབས་ཤེས་རོལ་བའི་བདུད་རྩི་བྷན་དྷའི་སྣོད་དུ་འཁྱིལ་བ་དེ་ཉིད་མཐེབ་སྲིན་ཉི་ཟླའི་སྐྱོགས་ཀྱིས་བཅུས་ནས་ཕུལ་བས་ལྷ་ཚོགས་ཐམས་ཅད་བདེ་བའི་རོས་མཉེས་པར་བསམ་དགོས་སོ།། ཁ༽ གཉིས་པ་རཀྟ་འབུལ་བ། གཉིས་པ་རཀྟ་འབུལ་བ་ནི༔ ཧཱུྃ༔ དུག་ལྔ་ཡེ་ཤེས་ལྔ་རུ་བསྒྲལ་བའི་ཁྲག༔ མ་ཆགས་ཆགས་བྲལ་ཆགས་པ་ཆེན་པོའི་ཁྲག༔ གཉིས་མེད་འཛིན་བྲལ་གསང་པའི་ཁྲག་ཆེན་འདི༔ བླ་མ་ཀུན་བཟང་ཞི་ཁྲོའི་ཚོགས་ལ་འབུལ༔ ཞེས་གསུངས་ཏེ། རཀྟ་འདི་ལ་རྣམ་གྲངས་མང་ཡང་དོན་གྱི་ཐོག་ནས་བཤད་ན་འཁོར་བའི་རྒྱུ་ཆགས་སྡང་གཉིས་ཀ་ཡིན་པས་དེ་མཚོན་པར་བྱེད་པ་རཀྟ་ཡིན་ཞིང་། རཀྟ་ཞེས་པ་རྒྱ་གར་གྱི་གནའ་བོའི་སྐད་སཾ་སྐྲི་ཏའི་སྐད་ཡིན་ལ། བོད་སྐད་ཀྱི་ཐོག་ནས་ངོ་བོའི་སྐབས་སུ་འདོད་ཆགས། དངོས་པོའི་སྐབས་སུ་ཁྲག ཁ་དོག་གི་སྐབས་སུ་དམར་བོ་ལ་འཇུག་པ་ལ་སོགས་པ་ཁ་རྩང་གོང་ཞིག་ནས་བཤད་པ་ལྟར་ཡིན་ནོ། །རྫས་འདི་ཚོ་མན་ངག་གི་ངེས་པས་རྫས་སོ་ལྔ་ལ་སོགས་པ་བསྡུས་ནས་ཕྱི་ནང་གསང་བའི་རཀྟ་ཐམས་ཅད་ཚང་བར་བྱ་བ་ཡིན་ལ། སྨན་རཀ་གཉིས་ཀ་ལ་རྫས་ངོ་མ་ཚོགས་རྒྱུ་གལ་ཆེན་ཡིན་ཞིང་། གལ་ཏེ་མ་འབྱོར་ནས་ཐབས་མེད་དུ་གྱུར་ན་སྨན་སྣོད་དུ་བདུད་རྩིའི་རིགས་དང་སྨན་སིནྡྷུ་ར་ལ་སོགས་པ་དྲི་རོ་བཅུད་ལྡན་གྱི་རྫས་དེ་སྨན་སྣོད་ལ་བཏབ་ནས་སྨན་གྱི་ཚབ་བྱེད་པ་དང་། རཀྟའི་ཚབ་ཏུ་ཁྲག་གཙང་དང་ཇ་ཁུ་ལ་སིནྡྷུ་ར་འདེབས་པ་དག་ཀྱང་མི་རུང་བ་མ་ཡིན་ནོ། །དེའི་རྒྱུ་མཚན་ནི་སྤྱིར་རཀྟ་དེ་ལ་ཀུན་རྫོབ་རྫས་ཀྱི་རཀྟ། གུ་ཧྱ་མུ་ལ་རཀྟ། ཡན་ལག་བརྟན་པའི་རཀྟ། མཁའ་དབྱིངས་པདྨ་རཀྟ། ཉོན་མོངས་འཁོར་བའི་རཀྟ་དང་ལྔ་ཡོད་པའི་དང་པོ་ཀུན་རྫོབ་རྫས་ཀྱི་རཀྟ་ནི། སྲོག་མ་བཅད་པའི་རཀྟ་ཉེར་ལྔ་ཡིན་ཏེ། རྡོའི་རཀྟ་ལྔ། ཤིང་གི་རཀྟ་ལྔ། རྩིའི་རཀྟ་ལྔ། འབྲུའི་རཀྟ་ལྔ། མེ་ཏོག་གི་རཀྟ་ལྔའོ། །འོ་ན་རཀྟ་འདི་ཁྲག་རིགས་ཡིན་དགོས་པའི་ངེས་པ་མེད་དམ་ཞེ་ན། མིན་ཏེ་རཀྟ་ཐམས་ཅད་མཐར་གཏུགས་ན་ཁྲག་ལ་ཐུག་ཡོད་པའི་ཕྱིར་། དེ་ཡང་ཀུན་རྫོབ་རྫས་ཀྱི་རཀྟ་ཉི་ཤུ་བོ་ཡང་རཀྟ་ཡིན་པའི་རྒྱུ་མཚན་ཞེ་སྡང་རྡོ་རྗེས་རུ་ཏྲ་སྒྲོལ་བའི་གནས་སྐབས་ན་ཁྲག་ཐིགས་ས་ལ་ལྷུང་བ་སྟེ། སྔར་བསྐལ་བ་དང་པོའི་གནས་སྐབས་ན་ཞེ་སྡང་རྡོ་རྗེའི་ངོ་བོ་ཡིས་རུ་ཏྲ་བསྒྲལ་བའི་གནས་སྐབས་ན་ཁྲག་ཐིགས་གཅིག་ས་ལ་ལྷུང་ནས་དེ་ས་ལ་ལྷུང་བ་ལས་བྱུང་བའི་སྲོག་མ་བཅད་པའི་རཀྟ་ཉེར་ལྔ་རྡོ་རིགས་ཤིང་རིགས་ལ་སོགས་པ་དེ་ལྟར་གྲུབ་པ་ཡིན་པ་དང་། གཞན་ཡང་སྣང་བ་བརྡའི་རཀྟ་ཁ་དོག་དམར་པོར་གྱུར་ཚད་དང་། འཁོར་བ་རྒྱུའི་རཀྟ་ཁྲག་གི་རིགས་མཐའ་དག སྲིད་པ་གཞིའི་རཀྟ་ནི་ལྟེ་བའི་ཁྲག་ཅེས་རྒྱུད་དང་མན་ངག་རྣམས་ལས་འབྱུང་བའི་ཕྱིར་རོ། །གཉིས་པ་གུ་ཧྱ་མུ་ལ་རཀྟ་དེ་རྟེན་འབྲེལ་བཅུ་གཉིས་ལུགས་འབྱུང་དུ་ཚང་བའི་མིའི་སྙིང་ཁྲག་ལ་ངོས་བཟུང་བས་མ་རིག་པ་ནས་རྒ་ཤིའི་བར་དུ་ཚང་བ་དེ་མི་རྒན་པོ་ཞིག་གི་སྲོག་པ་རྩ་ལ་གོས་པའི་ཁྲག་ཡིན་པ་དང་། གསུམ་པ་ཡན་ལག་བརྟན་པའི་རཀྟ་ནི། ལོང་རྩའི་ཁྲག་ལ་ངོས་འཛིན་བྱེད་པ་ཡིན་པ་དང་། བཞི་པ་མཁའ་དབྱིངས་པདྨ་རཀྟ་ནི། མཚན་ཉིད་ཚང་བའི་མུ་ཏྲ་སྐྱེས་པས་མ་བརྩེགས་པའི་གསང་བའི་རཀྟ་དང་། ལྔ་པ་ཉོན་མོངས་འཁོར་བའི་རཀྟ་ནི། ཞིང་བཅུ་ཚང་བའི་དགྲ་བོ་བསྒྲལ་བའི་རཀྟའོ། །འདི་ནས་རཀྟ་འབུལ་བའི་གནས་སྐབས་ན་ཧཱུྃ་ཞེས་བདག་མེད་རྟོགས་པའི་ཐུགས་སྲོག་རྡོ་རྗེའི་ངོ་བོ་ཧཱུྃ་གིས་མཚོན་པས་ཚིག་སྣ་དྲངས་ནས། ཉོན་མོངས་དུག་ལྔ་ཡེ་ཤེས་ལྔ་རུ་བསྒྲལ་བའི་ཁྲག་འདོད་ཆགས་སོར་རྟོག་ཡེ་ཤེས། ཞེ་སྡང་མེ་ལོང་ཡེ་ཤེས། གཏི་མུག་ཆོས་དབྱིངས་ཡེ་ཤེས་ལ་སོགས་པ་མ་ཆགས་ཆགས་བྲལ་ཆགས་པ་ཆེན་པོའི་ཁྲག་ཅེས་གསུངས་ཏེ་མ་ཆགས་ཞེས་པ་སྲིད་ལ་མ་ཆགས། ཆགས་བྲལ་ཞེས་པ་ཞི་ལ་མི་གནས། ཆགས་པ་ཆེན་པོ་ཞེས་པ་གཉིས་ཀའི་མཐའ་ལས་འདས་པའི་བདེ་ཆེན་ཡེ་ཤེས་ཀྱི་ཁྲག་འཁོར་འདས་གཟུང་འཛིན་གཙང་སྨེ་ལ་སོགས་པའི་གཉིས་འཛིན་གྱི་མཐའ་ཐམས་ཅད་ལས་འདས་པའི་གཉིས་མེད། གཉིས་མེད་ཙམ་དུའང་འཛིན་པ་དང་བྲལ་བའི་གསང་བའི་ཁྲག་ཆེན་འདི་བླ་མ་ཀུན་བཟང་ཞི་ཁྲོའི་ལྷ་ཚོགས་ལ་འབུལ་བ་ཡིན་པས་བཞེས་སུ་གསོལ་ཅེས་པ་སྔགས་ཀྱིས་བསྟན་པ་ཡིན་ནོ། །མ་ཧཱ་རཀྟ་ལ་ཁ་རཾ་ཁཱ་ཧི༔ཞེས་པའི་སྔགས་དོན་ནི་མ་ཧཱ་ཆེན་པོ་རཀྟ་ཁྲག་སྟེ་ཁྲག་ཆེན། ཁ་རཾ་བསྟབ་པ། ཁཱ་ཧི་བཞེས་ཤིག་གི་དོན་ཡིན་ནོ།། ག༽ གསུམ་པ་གཏོར་མ་འབུལ་བ། གསུམ་པ་གཏོར་མ་འབུལ་བ་ནི༔ ཧཱུྃ༔ ཕྱི་སྣོད་འཇིག་རྟེན་གཏོར་གཞོང་དུ༔ ནང་བཅུད་སེམས་ཅན་གཏོར་མར་བཤམས༔ རྩི་བཅུད་འབྲས་བུ་སྨན་གྱིས་བརྒྱན༔ ཞི་ཁྲོའི་ལྷ་ཚོགས་རྣམས་ལ་འབུལ༔ ཞེས་གསུངས་ཏེ། གཏོར་མའི་རྒྱུ་དང་གཏོར་མའི་དབྱེ་བ་སོགས་ཀྱི་ཐོག་ནས་གོང་ནས་ཁ་རྩང་སྔོན་མར་བཤད་པ་ལྟར་དུ་ཡིན་ཞིང་། འདིར་སྒྲུབ་གཏོར་ལ་དམིགས་ཀྱིས་བཀར་ནས་བསམ་བློ་བཏང་ན་བྱིན་རླབས་བླ་མའི་གཏོར་མ། དངོས་གྲུབ་ཡི་དམ་གྱི་གཏོར་མ། ཕྲིན་ལས་མཁའ་འགྲོའི་གཏོར་མ། དྲེགས་པ་སྡེ་བརྒྱད་ཀྱི་གཏོར་མ། ཐམས་ཅད་འདུས་པའི་གཏོར་མ་ལ་སོགས་པ་ཡིན་ན་འདིའི་བཟོ་དབྱིབས་དང་བཤམས་བཀོད་ལ་སོགས་པ་མཐོང་བ་བརྒྱུད་པའི་ཕྱག་ལེན་ལ་དར་རྒྱུ་འདི་ཚོ་བརྒྱུད་པའི་སྲོལ་མ་ཉམས་པར་བྱེད་པ་ནི་གལ་ཆེའོ། །དེ་ལ་བློ་བཟོ་དང་སླ་བཅོས་བྱེད་མི་ཉན་ལ། ཁ་རྩང་ཡང་ཞུས་པ་ལྟར་དུ་ཡིན་ཞིང་། སྐབས་འདི་དང་འབྲེལ་ན་སྲིད་པ་རང་གྲོལ་འདོད་ཡོན་རྒྱན་ཤར་གྱི་གཏོར་མ་མཆོད་རྫས་སུ་དམིགས་ནས་འབུལ་བའི་སྐབས་ཡིན་ནོ། །ཧཱུྃ་ཞེས་དཔལ་གྱི་རྔམ་པའི་བཞད་སྒྲས་བསྐུལ་ནས། ཕྱི་སྣོད་ཀྱི་འཇིག་རྟེན་གཏོར་གཞུང་གི་ནང་ན་ནང་བཅུད་ཀྱི་སེམས་ཅན་གཏོར་མའི་ཚུལ་དུ་རྩི་བཅུད་འབྲས་བུ་སྨན་སྣ་དང་འདོད་ཡོན་བདོག་པ་རྒྱུ་ཡི་འབྱོར་བ་དངོས་རྫས་དེ་ཉིད་གཏོར་རྫས་སུ་བཤམས་ཏེ་ལུས་སྣང་བའི་གྲོང་ཁྱེར་འདོད་པའི་ཁམས། ངག་ཕྱེད་སྣང་གི་གྲོང་ཁྱེར་གཟུགས་ཀྱི་ཁམས། ཡིད་མི་སྣང་བའི་གྲོང་ཁྱེར་གཟུགས་མེད་ཀྱི་ཁམས་ཏེ་སྲིད་གསུམ་ཀ་དག་གི་གཏོར་ཆེན་བཤམས་ནས་ཡང་ཞི་ཁྲོའི་ལྷ་ཚོགས་རྣམས་ལ་འབུལ་བ་ཡིན་ཞེས་པའོ། །མ་ཧཱ་བ་ལིང་ཏ་ལ་ཁ་རཾ་ཁཱ་ཧི༔ཞེས་གསུངས་ཏེ། སྔགས་དོན་ནི་མ་ཧཱ་བ་ལིང་ཏ་གཏོར་ཆེན། ཁ་རཾ་བསྟབ་པ། ཁཱ་ཧི་བཞེས་ཞེས་པའི་དོན་ནོ། དེ་ཡན་ཆད་ཕྱི་ནང་གསང་བ་སྨན་གཏོར་རཀྟའི་མཆོད་པ་དང་བཅས་པ་སོང་ནས་ས་མ་ཡ༔ རྒྱ་རྒྱ་རྒྱ༔ཡིས་འདའ་དཀའ་དམ་ཚིག་གི་རྒྱ་གསང་བ་རྡོ་རྗེ་གསུམ་གྱི་བཀའ་རྟགས་ཀྱི་རྒྱས་མནན་པའོ།། ༼ཆ༽ དྲུག་པ་བསྟོད་པ་བྱ་བ། དྲུག་པ་བསྟོད་པ་བྱ་བ་ནི༔ ཧཱུྃ༔ སྐུ་ནི་མི་འགྱུར་ཀ་དག་ཟང་ཐལ་སྐུ༔ གསུང་ནི་མི་འགགས་རང་བྱུང་ཡེ་ཤེས་གསུང་༔ ཐུགས་ནི་མི་གཡོ་བསམ་བརྗོད་བྲལ་བའི་ཐུགས༔ ཀུན་བཟང་སྐྱེ་འགགས་མེད་ལ་ཕྱག་འཚལ་བསྟོད༔ ཅེས་གསུངས་ཏེ། འདི་ཀུན་ཏུ་བཟང་པོའི་དོན་བསྟོད་ཡིན་ཞིང་། ཧཱུྃ་འགག་མེད་ཆོས་ཉིད་རང་སྒྲས་བསྐུལ་ནས། ཆོས་སྐུ་ཀུན་ཏུ་བཟང་པོའི་སྐུ་གསུང་ཐུགས་རྡོ་རྗེ་གསུམ་ངོ་བོ་རང་བཞིན་ཐུགས་རྗེ་གསུམ་དང་སྦྱར་ནས་འགྲེལ་ན་སྐུ་མི་འགྱུར་ཀ་དག་ཟང་ཐལ་ངོ་བོ་ལ་ཡོད་མེད་ཡིན་མིན་སོགས་སྤྲོས་མཚན་ཀུན་གྱི་མཐའ་དང་བྲལ་བས་ཆོས་ཉིད་གང་དུ་ཡང་མ་ཕྱེས་པའི་ཀ་དག གསུང་མི་འགག་རང་བྱུང་གི་ཡེ་ཤེས་རང་བཞིན་འགག་པ་མེད་པས་སྐུ་དང་ཡེ་ཤེས་འདུ་འབྲལ་མེད་པའི་ལྷུན་གྲུབ། ཐུགས་མི་གཡོ་བསམ་བརྗོད་དང་བྲལ་བ་སྨྲ་བསམ་བརྗོད་པ་ཀུན་ལས་འདས་ཤིང་ཐུགས་རྗེ་ཕྱི་གསལ་གྱི་མཁྱེན་ཆའི་གོ་མ་འགགས་པ་ཤིན་ཏུ་ཕྲ་བའི་ཡེ་ཤེས་གཞོན་ནུ་བུམ་པ་སྐུའི་བདག་ཉིད་སྣང་བ་གསུམ་དང་ཐབས་གཅིག་གི་རང་བཞིན་ལས་འདུ་འབྲལ་མེད་པའི་བདག་ཉིད་ཅན་དུ་བཞུགས་པ་ཀུན་བཟང་སྐྱེ་འགག་མེད་པ་མཐའ་བྲལ་མཉམ་པའི་ཆོས་ཉིད་དེ་ལ་ཕྱག་འཚལ་བསྟོད་ཅེས་པའོ།། ཧཱུྃ༔ ཆོས་སྐུ་ནམ་མཁའ་ལྟ་བུར་ཁྱབ་པ་ལ༔ ལོངས་སྐུ་ཉི་འོད་ལྟ་བུར་སོ་སོར་འཕྲོ༔ སྤྲུལ་སྐུ་འཇའ་ཚོན་ལྟ་བུར་འགྲོ་དོན་མཛད༔ རྒྱལ་བ་ཞི་ཁྲོའི་ཚོགས་ལ་ཕྱག་འཚལ་བསྟོད༔ ཅེས་གསུངས་ཏེ། འདི་རྒྱལ་བ་ཞི་ཁྲོའི་ལྷ་ཚོགས་སྤྱིའི་བསྟོད་པ་ཡིན་ལ། ཆོས་སྐུའི་ངོ་བོ་ནི་རང་བྱུང་གི་ཡེ་ཤེས་ནང་གསལ་སྤྲོས་པ་ཐམས་ཅད་དང་བྲལ་ན་ཡང་ཐམས་ཅད་མཁྱེན་པའི་ཡེ་ཤེས་ཀྱི་འཆར་གཞི་མཁའ་ཁྱབ་མཁའ་དང་མཉམ་པ་ནམ་མཁའ་ལྟ་བུ་ལས། གདངས་ཕྱི་གསལ་མཁྱེན་ཆ་འགག་པ་མེད་པ་ལོངས་སྤྱོད་རྫོགས་སྐུ་ཕུན་སུམ་ཚོགས་པ་ལྔ་དང་ངེས་པ་ལྔ་ལྡན་སྐུ་དང་ཞིང་ཁམས་རྒྱ་མཚོའི་བདག་ཉིད་ཅན་ཉི་མའི་འོད་ཟེར་ལྟར་སོ་སོར་འཕྲོས་པས་ན། སྤྲུལ་སྐུ་ཆུ་སྣོད་ཟླ་གཟུགས་ཀྱི་དཔེ་བཞིན་དུ་གདུལ་བྱ་སོ་སོའི་ངོ་ལ་ཞི་བ་དང་ཁྲོ་བོ་ཞི་མ་ཁྲོ་ལ་སོགས་པ་གདུལ་བྱ་དང་འདུལ་བྱེད་རྒྱུ་རྐྱེན་རྟེན་འབྲེལ་ཚོགས་པའི་སྐབས་སུ་ཤར་བ་དེ་ནམ་མཁའི་འཇའ་ཚོན་ལྟར་སོ་སོར་གསལ་བའི་སྒོ་ནས་འགྲོ་དོན་མཛད་པ་རྒྱལ་བ་ཞི་ཁྲོའི་ལྷ་ཚོགས་ལ་ཕྱག་འཚལ་བསྟོད་ཅེས་པའོ།། དམིགས་བསལ་ཞི་བའི་ལྷ་ཚོགས་ལ་བསྟོད་པ་ནི། ཧཱུྃ༔ གསལ་འཚེར་ལྷུན་སྡུག་གཟི་བརྗིད་འོད་ཟེར་འཕྲོ༔ མཉེན་ལྕུག་འཁྲིལ་ལྡེམ་གཞོན་ཚུལ་ཞི་བའི་ཚོགས༔ མཚན་དང་དཔེ་བྱད་རྒྱན་རྣམས་མཛེས་ཚུལ་ལྡན༔ ཞི་བ་བཞི་བཅུ་གཉིས་ལ་ཕྱག་འཚལ་བསྟོད༔ ཅེས་གསུངས་ཏེ། མ་རིག་པ་སྤངས་པས་སྐུ་ཤེལ་ལྟར་གཙང་ཞིང་གསལ་བ། ཡེ་ཤེས་རྒྱས་པས་ན་ཉི་ཟླ་བཞིན་དུ་བཀྲག་མདངས་འཚེར་བ། སྐུ་བརྗིད་ཅིང་ཡིད་དུ་འོང་བ་རི་རབ་ལྟ་བུ་ལྷུན་སྟུག་པའམ་དཔངས་མཐོ་བ། ཆེ་བའི་ཡོན་ཏན་གྱིས་ཐམས་ཅད་ཟིལ་གྱིས་གནོན་པས་གཟི་བརྗིད་དང་ལྡན་པ། སྐུའི་གནས་དྲུག་དང་བ་སྤུའི་བུ་ག་ཐམས་ཅད་ནས་འོད་ཟེར་གྲངས་མེད་དུ་འཕྲོ་བ་སྟེ། སྐུའི་གནས་དྲུག་ནི་གཙུག་གཏོར། སྨིན་མཚམས། མགུལ། ཐུགས་ཀ ལྟེ་བ། ཞབས་མཐིལ་ཏེ་དེ་རྣམས་ཡིན་ཞིང་། འོད་ཟེར་གྱི་ཁ་དོག་སྔོ་སེར་དཀར་དམར་བཞི། བཙོད་དང་ལེ་བརྒན་གྱི་ཁ་དོག་རྣམས་འཕྲོ་བའོ། །སྐྱེ་བ་གནས་སུ་དག་པས་སྐུ་ཤ་གཤོང་གཤོང་མ་ཡིན་པར་མཉེན་ཤ་ཆགས་པ། ན་བ་གནས་སུ་དག་པས་དཀུ་སྐབས་ཕྱེད་པ་སྟེ་ཕྲ་བས་རྩི་ཐུར་འདྲ་བ་དང་། སྦོམ་པས་ཟོམ་ཁྲིག་འདྲ་བ་དེ་ལྟ་བུ་མ་ཡིན་པར་ཕྲ་ས་ནས་ཕྲ་བ་དཀུ་སྐེད་རྡོ་རྗེའི་སྐེད་པ་འདྲ་བ་དང་། ཞིང་ཆེ་ས་ནས་ཆེ་བ་སྐུ་སྟོད་སེང་ཆེན་འགྱིངས་པ་ལྟ་བུ་སྟེ་ཕ་དམ་པའི་བསྟོད་པ་རྣམས་ཀྱི་ནང་ན་དེ་ལྟར་གསུངས་ཡོད་ལ། དེ་ལ་ལྕུག་པ་ཟེར་རོ། །འཁྲིལ་ཞེས་པ་ནི་འཁྲིལ་བག་ཆགས་པ་ཤ་ལྷོད་པོ་ལུག་ལུག་མ་ཡིན་པར་འཆི་བ་གནས་སུ་དག་པས་འཁྲིལ་བག་ཆགས་པ། ལྡེམ་པ་ནི་དགྱེ་དགུ་གཉིས་ཀ་བྱེད་རྒྱུ་མེད་པའི་དབྱུག་པ་ལྟ་བུ་མ་ཡིན་པ་ལྡེམ་པ། གཞོན་ཚུལ་ཞེས་པ་རྒ་བ་གནས་སུ་དག་པས་ན་ཤ་རྩུབ་པོ་དང་སྨེ་ཤ་དང་མཛེར་ནག་དང་འབུར་ཐོ་ཡིས་གང་བ་དེ་ལྟར་མ་ཡིན་པར་སྐུ་འཇམ་ཞིང་གཞོན་ཤ་ཆགས་པའི་ངང་ཚུལ་ཅན་ཏེ། དེ་རྣམས་ངོ་བོའི་ཡོན་ཏན་ཡིན་ནོ། །རྣམ་པའི་ཡོན་ཏན་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་དང་ལྡན་པ། མཚན་དང་དཔེ་བྱད་འུ་ཚོས་དུས་རྒྱུན་བཤད་ཀྱིན་ཡོད་པ་བཞིན་མཚན་དང་དཔེ་བྱད་ཀྱི་སྒྲ་དོན་གྱི་ཐད་ནས་བཤད་ན་སྐྱེས་བུ་ཆེན་པོར་མཚོན་པར་བྱེད་པས་ན་མཚན་གསུངས་ཤིང་། ནང་གི་ཡོན་ཏན་གྱི་དཔེ་ལྟ་བུ་ཕྱི་རོལ་ལ་སྣང་བས་ན་དཔེ་བྱད་གསུངས་སོ། །དེ་ལྟ་བུའི་མཚན་དཔེ་ལྡན་ཞིང་ལོངས་སྐུའི་རྒྱན་ཆས་བཅུ་གསུམ་ལ་སོགས་པའི་རྒྱན་གྱིས་བརྒྱན་པས་མཛེས་ཚུལ་དང་ལྡན་པའི་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་ལ་ཕྱག་འཚལ་བསྟོད་ཅེས་པའོ།། ཁྲོ་བོའི་ལྷ་ཚོགས་ལ་བསྟོད་པ་ནི། ཧཱུྃ༔ སྒེག་པ་དཔའ་བ་འཇིགས་སུ་རུང་བ་དང་༔ རྒོད་དང་གཤེ་དང་རྔམ་པར་སྟོན་པ་དང་༔ སྙིང་རྗེ་ངོ་མཚར་ཆེ་ཚུལ་གར་དགུར་ལྡན༔ ཁྲག་འཐུང་ཁྲོ་བོའི་ཚོགས་ལ་ཕྱག་འཚལ་བསྟོད༔ ཅེས་གསུངས་ཏེ། གར་གྱི་ཉམས་དགུ་དང་ལྡན་པའི་ཚུལ་གྱིས་བསྟོད་པ་ཡིན་ཞིང་། གར་གྱི་ཉམས་དགུ་གོང་ནས་ཀྱང་བཤད་མྱོང་བ་བཞིན་སྒེག་པ་དཔའ་བ་འཇིགས་རུང་གསུམ་དེ་སྐུའི་གར། རྒོད་དང་གཤེ་དང་རྔམ་པར་སྟོན་པ་གསུམ་དེ་གསུང་གི་གར། སྙིང་རྗེ་ཞེ་སྡང་གཏུམ་པ་གསུམ་དེ་ཐུགས་ཀྱི་གར་ཏེ་གར་དགུ་ཡིན་ནོ། །འོ་ན་སྙིང་རྗེ་ཞེ་སྡང་གཉིས་ཀ་མཉམ་དུ་ཇི་ལྟར་གནས་ཏེ་ལྷན་ཅིག་མི་གནས་འགལ་མ་ཡིན་ནམ་ཞེ་ན། ལས་ངན་གྱི་གདུལ་བྱ་ལ་ལྷག་པར་སྙིང་རྗེ་བའི་སྙིང་རྗེ་ཕུལ་དུ་བྱུང་བས་ཐུགས་ཞི་བ་ཆོས་ཉིད་ལས་མ་གཡོས་བཞིན་དུ་ཐབས་ལ་མཁས་པའི་དབང་གིས་དཔལ་ཧེ་རུ་ཀ་ཡེ་ཤེས་ཀྱི་སྐུ་མཆོག་འབར་བའི་ཚུལ་དུ་སྣང་བ་ལ་ཞེ་སྡང་གི་སྒྲས་བསྙད་པ་ཡིན་ནོ། །དེའི་ཕྱིར་ན་ངོ་མཚར་ཆེ་བའི་ཚུལ་གསུངས་པ་ཡིན་མ་གཏོགས་ཞེ་སྡང་རང་ག་མ་ལ་ངོ་མཚར་ཅི་ཞིག་ཆེ། དེ་ལྟ་བུའི་ཁྲག་འཐུང་ཁྲོ་བོའི་ཚོགས་ལ་བསྟོད་གསུངས་ནས་གར་དགུའི་ཉམས་ལྡན་གྱི་ཁྲོ་བོའི་དོན་བསྟོད་མཛད་པ་ཡིན་ནོ།། ཧཱུྃ༔ ཐལ་ཆེན་རཀྟ་ཞག་གི་ཟོ་རིས་དང་༔ ཀོ་རློན་གཡང་གཞི་སྟག་གི་ཤམ་ཐབས་དང་༔ ཐོད་ཕྲེང་སྦྲུལ་ཆུན་མེ་དཔུང་ཆས་དགུས་བརྒྱན༔ དུར་ཁྲོད་ཆས་རྣམས་རྫོགས་ལ་ཕྱག་འཚལ་བསྟོད༔ ཅེས་གསུངས་ཏེ། དཔལ་གྱི་ཆས་དགུའི་རྒྱན་རྫོགས་པའི་ཆ་ནས་རྟགས་བསྟོད་ཡིན་ལ། འདུལ་བྱེད་ཕྲིན་ལས་ཀྱི་རྒྱན་དཔྲལ་བ་ན་ཐལ་ཆེན་གྱི་ཚོམ་བུ། ཐུགས་རྗེ་ཆགས་པའི་རྒྱན་སྨིན་མཚམས་ན་རཀྟའི་ཐིག་ལེ། དོན་དམ་བཅུད་ཀྱི་རྒྱན་ཨོག་མ་ན་གཟི་ཆེན་ཞག་གི་ཟོ་རིས་ཏེ་བྱུག་པའི་རྩི་གསུམ་མོ། །ཐེག་པ་མཆོག་གི་རྒྱན་སྟོབས་བཅུ་རྫོགས་པ་གླང་ཆེན་གྱི་ཀོ་རློན་དང་། ཚུལ་ཁྲིམས་གོས་ཀྱི་རྒྱན་མི་ལྤགས་ཀྱི་གཡང་གཞིའི་སྟོད་གཡོགས། དཔའ་རྟུལ་ཟ་བྱེད་ཀྱི་རྒྱན་སྟག་གི་ཤམ་ཐབས་སོ། །ཁྲོ་མོའི་གཟིག་ཤམ་ཡང་དེ་དང་གཅིག་པ་ཡིན་ཞིང་། དེ་ཡིས་བགོ་བའི་གོས་གསུམ་མོ། །དུག་གསུམ་དབང་དུ་བྱེད་པའི་མི་མགོ་སྐམ་པོའི་དབུ་རྒྱན། རློན་པ་དང་རྙིང་པའི་དོ་ཤལ། གོང་ཞིག་ནས་བཤད་པ་བཞིན་དུ་སྦྲུལ་རྒྱལ་རིགས་དཀར་ཕྲས་དབུ་སྐྲ་བཅིངས། རྗེ་རིགས་སེར་བོས་སྙན་ཆ་དང་དཔུང་རྒྱན་བྱས། བྲམ་ཟེའི་རིགས་དམར་བོས་སེ་མོ་དོ་དང་མགུལ་ཆིངས། དམངས་རིགས་ལྗང་གུས་དོ་ཤལ་བྱས་པ་དེ་སྦྲུལ་ཆུན་ཡིན་ལ། ཡེ་ཤེས་ཀྱི་མེ་རི་མེ་དཔུང་འབར་བའི་ཟེར་ཕྱོགས་བཅུར་འཕྲོ་བ་སྟེ་དཔའ་བའི་རྒྱན་གསུམ་གྱིས་དགུའོ། །འདི་ནས་གཞུང་གིས་ལྷག་ཏུ་གསལ་ཁ་མ་མཛད་ཀྱང་སྒྱུ་འཕྲུལ་བླ་མའི་ནང་དུ། ཐབས་དང་ཤེས་རབ་ལྡན་པ་ཡི། །རྡོ་རྗེ་མཐིང་གི་གཤོག་པ་བརྐྱང་། །ཞེས་གསུངས་པ་ལྟར་དུ་ཐབས་དང་ཤེས་རབ་ཟུང་འབྲེལ་དང་སྲིད་ཞི་གཉིས་ཀའི་མཐའ་ལ་མི་གནས་པའི་རྟགས་སུ་རྡོ་རྗེའི་གཤོག་པ་ཡང་རང་ཅག་གི་བྲིས་ཆ་རྣམས་ཀྱི་ནང་ན་ཡོད་པ་ལྟར་དུ་ཡིན་ལ། སྒྱུ་འཕྲུལ་གྱི་འགྲེལ་བར། ཐབས་དང་ཤེས་རབ་ཟུང་འབྲེལ་ཉི་ཟླའི་ཆས། །གདུག་པ་ཅན་སྲེག་ཡེ་ཤེས་མེ་ཡི་ཆས། །སྐྱེ་ཤི་རྩད་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེའི་གཤོག་པའི་ཆས། །ཞེས་ཀྱང་གསུངས་སོ། །དཔལ་དང་དུར་ཁྲོད་ཀྱི་ཆས་གོས་འདི་ཚོ་དཔལ་ཆེན་པོས་རུ་ཏྲ་འདུལ་སྐབས་དཔའ་རྟགས་ཀྱི་ཚུལ་དུ་བཞེས་པ་ཡིན་ཞིང་། དེ་ལྟ་བུའི་དུར་ཁྲོད་ཆས་རྣམས་རྫོགས་ལ་ཕྱག་འཚལ་བསྟོད་ཅེས་པའོ།། ཧཱུྃ༔ རྒྱལ་བའི་བསྟན་པ་སྲུང་བའི་ལས་ལ་བརྩོན༔ རྣལ་འབྱོར་ཀུན་གྱི་དམ་ཚིག་རྗེས་གཅོད་ཅིང་༔ བཀའ་བཞིན་རྗེས་སུ་སྒྲུབ་པའི་གྲོགས་མཛད་པའི༔ དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད༔ ཅེས་གསུངས་ཏེ། འདི་བཀའ་སྡོད་དམ་ཅན་སྲུང་མའི་ཚོགས་ལ་བསྟོད་པ་ཡིན་ཞིང་། ཟིལ་གནོན་འཇིགས་པར་བྱེད་པ་ཐུགས་ཀྱི་ཡི་གེ་ཧཱུྃ་ཡིག་གིས་སྣེ་དྲངས་ནས། རྒྱལ་བ་ཤཱཀྱ་སེང་གེ་དེ་ཉིད་ཆོས་སྐུའི་དུས་ན་ཆོས་སྐུ་ཀུན་ཏུ་བཟང་པོ། ལོངས་སྐུའི་དུས་ན་ལོངས་སྐུ་རྒྱལ་བ་རིགས་ལྔའི་སངས་རྒྱས། སྤྲུལ་སྐུའི་དུས་ན་དེ་དང་དེར་འཚམས་པའི་སྤྲུལ་བ་དང་། ཁྱད་པར་སྐལ་བཟང་རྣམ་འདྲེན་བཞི་བའི་ལུང་རྟོགས་མདོ་སྔགས་ཀྱི་བསྟན་པ་སྲུང་བའི་ལས་ལ་བརྩོན་ཞིང་དམ་ལྡན་བུ་བཞིན་དུ་སྐྱོང་། དམ་མེད་ཚར་གཅོད་པའི་རྣལ་འབྱོར་ཀུན་གྱི་དམ་ཚིག་གི་རྗེས་གཅོད་ལ་དཀྱིལ་འཁོར་གཙོ་བོའི་བཀའ་བཞིན་རྗེས་སུ་སྒྲུབ་ཅིང་དམ་ལྡན་སྒྲུབ་པ་པོའི་གྲོགས་མཛད་པའི་དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད་ཅེས་པའོ། །ས་མ་ཡ༔ རྒྱ་རྒྱ་རྒྱ༔ཞེས་པས་བསྟོད་པའི་ལེའུ་གཏེར་བྱང་ཆོས་ཚན་གྱི་ཚོམ་གཅིག་རྫོགས་མཚམས་སུ་དམ་ཚིག་དང་རྡོ་རྗེའི་རྒྱས་མནན་པ་ཡིན་ནོ།། ༼ཇ༽ བདུན་པ་བཤགས་པ་བྱ་བ། ༼ཀ དངོས་བཤད་པ། བདུན་པ་བཤགས་པ་བྱ་བ་ནི༔ ཧཱུྃ༔ བླ་མ་ཀུན་བཟང་མཐའ་བྲལ་ཆོས་ཀྱི་སྐུ༔ ཉག་གཅིག་ཟང་ཐལ་སྐྱེ་མེད་ལོངས་སྤྱོད་རྫོགས༔ ཤར་གྲོལ་འགག་མེད་སྣ་ཚོགས་སྤྲུལ་པའི་སྐུ༔ རྒྱལ་བ་ཞི་ཁྲོ་སྤྲུལ་འཁོར་དགོངས་སུ་གསོལ༔ ཞེས་གསུངས་ཏེ། ཆོས་དབྱིངས་སྤྲོས་བྲལ་ཐིག་ལེ་ཉག་གཅིག་གི་ཀློང་ནས་རང་ཤར་བའི་སྐུ་གསུམ་གང་འདུལ་གྱི་རོལ་བ་རྒྱལ་བ་ཞི་ཁྲོའི་ལྷ་ཚོགས་ཐམས་ཅད་བཤགས་པར་བྱ་བའི་ཡུལ་དུ་རྟེན་གྱི་སྟོབས་སུ་དགོངས་གསོལ་ཞུས་ནས་སྙན་གསན་དབབ་པ་ཡིན་ནོ།། བདག་དང་འཁོར་བའི་སེམས་ཅན་ཐམས་ཅད་ཀྱིས༔ གཏི་མུག་འཁྲུལ་སེམས་དཔག་མེད་བླངས་པ་ནས༔ ད་ལྟ་ཚེ་འདིའི་ལུས་བླངས་ཡན་ཆད་དུ༔ རིག་དང་མ་རིག་འཁྲུལ་པའི་ལས་དབང་གིས༔ སྐུ་གསུང་ཐུགས་དང་རྩ་བ་ཡན་ལག་གི༔ དམ་ཚིག་ཆགས་ཉམས་ནོར་འཁྲུལ་གྱུར་པ་ཀུན༔ མི་གསང་མི་སྦེད་གནོང་འགྱོད་མཐོལ་ལོ་བཤགས༔ ཀློང་ཡངས་ཆེན་པོའི་ངང་དུ་བཟོད་པར་གསོལ༔ ཅེས་གསུངས་ཏེ། བཤགས་པ་བྱེད་མཁན་བདག་རང་ཉིད་གཅིག་པུ་ཙམ་མ་ཡིན་པར་བདག་དང་བཅས་པའི་ཁམས་གསུམ་འཁོར་བ་ན་གནས་ཤིང་སྡུག་བསྔལ་ཏེ་འཁྲུལ་བར་འཕྱན་པའི་སེམས་ཅན་ཐམས་ཅད་ཀྱིས། གཏི་མུག་མ་རིག་པས་སྲིད་པའི་རྩ་བར་བྱས་ཏེ་འཁྲུལ་ནས་སྐྱེ་བ་མང་པོར་སེམས་ཀྱི་རྒྱུད་འབྲེལ་བའི་ལུས་རྟེན་དཔག་མེད་བླངས་ཏེ་སྐྱེ་ཤིའི་ཁ་བརྒྱུད་པ་ནས་ད་ལྟའི་ཚེ་འདིའི་ལུས་བླངས་པ་དེ་ཉིད་ཀྱི་ལུས་ཐོག་ཡན་ཆད་དུ་རིག་དང་མ་རིག་གིས་ཤེས་བཞིན་དུ་ཅི་མི་སྙམ་པའི་སྒོ་ནས་སྡིག་ལས་བྱས་པ་དང་། མི་ཤེས་པའི་རྒྱུ་བཞིའི་དབང་དུ་སོང་ནས་འཁྲུལ་བའི་ལས་དབང་གིས་དམ་ཚིག་གི་རྣམ་གཞག་མང་ན་ཡང་སྐུ་གསུང་ཐུགས་ཀྱི་དམ་ཚིག་གི་ནང་ན་འདུས་ཤིང་དེ་ལྟར་ནོངས་པར་གྱུར་པའི་རྩ་བ་དང་ཡན་ལག་གི་དམ་ཚིག་ནོར་འཁྲུལ་དུ་གྱུར་པ་ཐམས་ཅད་མི་གསང་མི་སྦེད་གནོང་འགྱོད་དྲག་པོ་དང་བཅས་ཏེ་བཤགས་པ་ཡིན་པས་བཤགས་བྱ་བཤགས་བྱེད་གཉིས་མེད་ཀྱི་དགོངས་པ་ཆོས་ཉིད་ཀློང་ཡངས་ཆེན་པོའི་ངང་དུ་བཟོད་པར་གསོལ་ཅེས་བཤགས་པ་ཡིན་ལ། འདིའི་ནང་ན་ཉེས་བྱས་སུན་འབྱིན་གྱི་སྟོབས་དངོས་བསྟན་དང་། སྡོམ་པའི་རྟེན་ཤུགས་ལ་བསྟན་ནས་གཉེན་པོ་ཀུན་ཏུ་སྤྱོད་པའི་སྟོབས་ཡི་གེ་བརྒྱ་བས་བསྟན་ཏོ། །འདི་དག་གི་སྐབས་སུ་བསྐྱེད་རིམ་གསལ་འདེབས་དགོས་རྒྱུ་ནི་ཆོ་གའི་སྲོག་ཡིན་ལ། བསྐྱེད་རིམ་སྒོམ་པའི་སྐབས་སུ་ཡང་ཐ་མལ་སྣང་ཞེན་ལྡོག་པའི་ཆེད་དུ་རྟེན་དང་བརྟེན་པ་ཐམས་ཅད་རིག་རྩལ་འགག་མེད་དུ་ཤར་བའི་ལྷའི་ང་རྒྱལ་ལ་སེམས་བཟུང་བ་ཡིན་ན་རྣམ་པ་གསལ་བ། རྣམ་དག་དྲན་པ་གཉིས་ཀ་ཟུང་དུ་འབྲེལ་དགོས་ཤིང་། སྦྱང་བྱ་མ་དག་པའི་སྣང་བ་རྣམ་པར་གསལ་བས་སྦྱངས་ནས་ཞེན་འཛིན་ལྷར་ཞེན་དུ་རྟོག་པ་དེ་རྣམ་དག་དྲན་པས་སྦྱང་བར་བྱའོ། །ཨོཾ་བཛྲ་ས་ཏྭ་སོགས།ཞེས་གསུངས་ཏེ། འདི་ནས་ཡི་གེ་བརྒྱ་བའི་སྔགས་དོན་ཧ་ལམ་ཞིག་བཀྲལ་ན་ཨཱོྃ་ཞེས་སྐུ་ལྔ་མཚོན་པའི་ཡི་གེས་མགོ་བླངས་ནས། བཛྲ་ས་ཏྭ་རྡོ་རྗེ་སེམས་དཔའ། ས་མ་ཡ་དམ་ཚིག མ་ནུ་པཱ་ལ་ཡ་རྗེས་སུ་སྐྱོང་ཞེས་པའི་དོན་ཡིན་ལ། བཛྲ་ས་ཏྭ་ཏྭེ་ནོ་པ་ཏིཥྛ་རྡོ་རྗེ་སེམས་དཔའ་ཉིད་ཉེ་བར་གནས་པར་མཛོད། ཌྲི་ཌྷོ་མེ་བྷ་ཝ་བདག་ལ་བརྟན་པར་མཛད་དུ་གསོལ། སུ་ཏོཥྱོ་མེ་བྷ་ཝ་བདག་ལ་ཤིན་ཏུ་དགོངས་པར་མཛོད། སུ་པོཥྱོ་མེ་བྷ་ཝ་བདག་ལ་ཤིན་ཏུ་དགྱེས་པར་མཛོད། ས་ཆ་འདིའི་རྫོགས་ཆེན་གྱི་སྐད་ལ་སུ་ཏོས་ཡོ་དང་པོས་ཡོ་ཟེར་ལ། གཞན་དག་གིས་སུ་ཏོ་ཁ་ཡོ་ལ་སོགས་པ་ཟེར་ཡང་དོན་གྱིས་འགལ་བ་ཡོད་པ་མ་ཡིན་ནོ། །ཨ་ནུ་རཀྟོ་མེ་བྷ་ཝ་བདག་ལ་རྗེས་སུ་ཆགས་པར་མཛོད། སརྦ་སིདྡྷི་མྨེ་པྲ་ཡཙྩ་བདག་ལ་དངོས་གྲུབ་ཐམས་ཅད་སྩོལ་ཅིག སརྦ་ཀརྨ་སུ་ཙ་མེ་བདག་ལ་ལས་ཐམས་ཅད་སྩོལ། ཙིཏྟཾ་ཤྲེ་ཡ་ཀུ་རུ་སེམས་ལ་དགེ་ལེགས་སུ་ཞི་བར་མཛོད། ཧཱུྃ་ཐུགས་ཀྱི་ས་བོན། ཧ་ཧ་ཧ་ཧ་ཧོ་ནི་ཡེ་ཤེས་ལྔ་མཚོན་བྱེད། བྷ་ག་ཝཱན་སརྦ་ཏ་ཐཱ་ག་ཏ་བཅོམ་ལྡན་འདས་དེ་བཞིན་གཤེགས་པ་ཀུན་གྱིས། བཛྲ་མ་མཱེ་མུཉྩ་བདག་རྡོ་རྗེ་སེམས་དཔའ་ཉིད་དུ་གྲོལ་བར་མཛོད། བཛྲཱི་བྷ་ཝ་མ་ཧཱ་ས་མ་ཡ་སཏྭ་དམ་ཚིག་སེམས་དཔའ་ཆེན་པོར་མཛོད། མཇུག་གི་ཨཱ་དེ་ཐམས་ཅད་སྐྱེ་བ་མེད་པའི་ཀློང་དུ་གཅིག་ཅེས་པའི་དོན་ཡིན་ནོ། །ཧ་ལམ་དེ་ལྟར་དུ་བསྒྱུར་ནས་གསུངས་ཡོད། ཕྲིན་ལས་དངོས་གཞིའི་ལེའུ་གཉིས་པའོ༔ ས་མ་ཡ༔ རྒྱ་རྒྱ་རྒྱ༔ཞེས་གསུངས་ཏེ། ཆོ་གའི་གཏེར་གཞུང་ངོ་མའི་དངོས་གཞིའི་ལེའུ་བདུན་པོ་བསྟན་གྲུབ་པ་ཡིན་ལ། ལས་བྱང་གི་གཏེར་གཞུང་ངོ་མའི་ཐོག་ནས་རྗེས་ཆོག་ལ་ཐུག་ཡོད་ཀྱང་འདིའི་བར་གྱི་འཛབ་དགོངས་དེ་བསྙེན་སྒྲུབ་ཡན་ལག་བཞིའི་སྙིང་པོ་ལྟ་བུ་ཡིན་པས་དེའི་སྐོར་འཛབ་བཟླས་ཚངས་པའི་སྒྲ་དབྱངས་འཁོར་འདས་རང་གྲོལ་གྱི་ཐོག་ནས་གོ་དོན་གྱི་མདོ་རྩ་མདོ་རྩ་འུ་ཚོས་སང་ཉིན་ནས་བཤད་རྒྱུ་བྱེད་དོ།། །། ཉིན་བཞི་བའི་ཆོས་ཁྲིད།༡ སྔོན་དུ་འགྲོ་བའི་ཆོས་བཤད་པ། ད་ཡང་རྣམ་པ་ཚང་མས་ཐུགས་དགོངས་པས་གསལ་འདེབས་བྱེད་རྒྱུ་ལ་ད་རེས་མི་ལུས་ལན་གཅིག་ཐོབ་པ་འདི་ཡིད་བཞིན་གྱི་ནོར་བུ་རིན་པོ་ཆེ་བསམ་དགུ་ཐམས་ཅད་འགྲུབ་པ་ཞིག་རྙེད་པ་བས་ལྷག་ཡིན་རྒྱུ་དང་། དམ་པའི་ལྷ་ཆོས་དང་མཇལ་བ་འདི་ཚེ་སྔོན་བསོད་ནམས་བསགས་པའི་འབྲས་བུ་ཡིན་རྒྱུ་དེ་གོ་ལོ་ཐོས་ལོ་དང་ཡིན་དར་རྒྱུ་རེད་བསམ་པ་ཙམ་མ་ཡིན་པར་ཐུགས་གདིང་གི་ངེས་ཤེས་འདྲོང་དགོས་ཤིང་། དེ་ནི་ཐུན་མོང་གི་བློ་སྦྱོང་གི་སྐོར་གྱི་བཤད་དར་བའི་བཤད་སྒྲོས་ཙམ་ཞིག་རེད་དགོངས་མི་ཉན་ལ། དལ་འབྱོར་རྙེད་པར་དཀའ་ལུགས་དང་ཆོས་དང་འཕྲད་པ་དེ་སྐལ་བ་བཟང་ཚུལ་གདིང་གི་ངེས་ཤེས་ཤིག་མེད་ན་མིན་ཟེར་ཡང་རྟག་འཛིན་ཕྱི་ཚིས་དང་འཇིག་རྟེན་ཚེ་འདིའི་གཡེང་བ་ཤུགས་ཆེར་མི་འགྲོ་ཐབས་མེད་དོ། །དམ་པའི་སྐྱེས་བུ་མིའི་ཟོལ་དུ་ཕེབས་པ་རེ་རེ་གཉིས་རེ་ཡིས་ཐབས་མཁས་གང་འདུལ་གྱི་མཛད་ཕྲིན་དམིགས་བསལ་བ་སྲིད་པ་ཙམ་ཟེར་མི་ཤེས་མ་གཏོགས་དེ་མིན་གྱི་ཕལ་བའི་བསམ་སྤྱོད་ལས་མ་འདས་པའི་ལམ་པ་ཞིག་གིས་ནི་ཆོས་འཇིག་རྟེན་གཉིས་ཀ་འདྲེས་ཐབས་མི་ཐོན་ལ། བུ་ལུགས་ལྷ་ལུགས་གཉིས་ཀ་ཡོད། ཆོས་འཇིག་རྟེན་གཉིས་ཀའི་མཛད་པ་བཟང་ཟེར་ན་སྲང་མདའི་མཐོ་དམན་དང་འདྲ་བར་གཅིག་ཤོས་མཐོ་ཚེ་གཅིག་ཤོས་དམའ་བཞིན་ཡོད་པའི་རྟགས་ཡིན་ནོ། །དེས་ན་ཚེ་འདིའི་བྱ་བ་ཞིག་ལས་ཚེ་རབས་ཚེ་རྒྱུད་མང་པོའི་འདང་རྒྱག་གལ་ཆེ་ལ། རང་དོན་ཉི་ཚེ་བ་ཞིག་ལས་རང་གཞན་གཉིས་དོན་མཉམ་དུ་སྒྲུབ་པ་རླབས་དང་ཕན་ཐོགས་ཆེའོ། །ཟུར་དེ་ནས་ཉམ་ཆུང་མང་པོ་ཞིག་གིས་སྡུག་མྱོང་བཞིན་ཡོད་ས་ཞིག་ནས་རང་གཅིག་པུ་བདེ་ཐབས་ཤིག་ཡོད་ཀྱང་སྐྱིད་ཅིག་མེད་ཅིང་། ཚང་མ་མཉམ་སྡུག་བྱས་ན་དེ་ཐབས་ཤིག་མ་ཡིན་ལ། རང་གཞན་ཐམས་ཅད་བདེ་དགོས་པ་དང་། དེའི་ནང་ནས་ཀྱང་དང་པོར་འདི་རྣམས་བདེ་ཐབས་བྱུང་ན་དེའི་འཕྲོས་ང་གཅིག་པུ་བཟོད་སྙམ་སྟེ་འདང་རྒྱག་དེ་འདྲའི་ཐོག་ནས་རྙེད་དཀའི་མི་ལུས་འདིའི་སྟེང་གི་ཐོབ་དཀའ་བའི་དམ་པའི་ལྷ་ཆོས་ངོ་མ་ཞིག་དང་འཕྲད་པ་འདི་སྐྱོན་དང་གེགས་ཀྱི་དབང་དུ་ཤོར་བཅུག་མི་ཉན་ཞིང་། དེ་མི་ཤོར་བའི་ཐབས་ནི་གཅིག་རང་ཉིད་ཀྱི་སྒོ་གསུམ་གྱི་ཐོག་ནས་གཟབ་རྒྱུ་དེ་ཉིད་གལ་ཆེ་ལ། གཉིས་སུ་བློ་ཆོས་སུ་འགྲོ་ཆོས་ལམ་དུ་འགྲོ་བའི་དོན་དུ་ཚོགས་གསོག་སྒྲིབ་སྦྱོང་ཡང་བྱེད་དགོས་སོ། །ཉམས་ལེན་པ་དཀྱུས་མ་ཞིག་ཡིན་པའི་དབང་དུ་བཏང་ན་བོགས་འདོན་གྱི་ཆེད་དུ་དམ་པ་གོང་མས་ཞབས་ཀྱིས་བཅགས་བྱིན་གྱི་བརླབས་པའི་སྒྲུབ་གནས་སྒྲུབ་ཕུག་ཁྱད་པར་ཅན་འདི་ཚོའི་ནང་ལ་ལོ་མཚམས་མིན་ན་ཟླ་མཚམས། ཅི་ཡང་མ་ཐུབ་ན་ཞག་བདུན་ཕྲག་གཉིས་གསུམ་རེ་ཙམ་དང་། ཞག་བདུན་ཕྲག་རེ་ཙམ་ལ་གནས་འབྲེལ་རེ་བཞག་ནས་རིག་པ་གཏད་མེད། སྐྱིད་སྡུག་རོ་སྙོམས། ན་དགའ་ཤི་སྐྱིད་ཀྱི་ཉམས་ལེན་གནད་སྨིན་རེ་མཛད་ན་མཛད་པ་རིན་ཐང་ཅན་ཡིན་ནོ། །དུས་དང་རྒྱུན་པ་རྣམ་དྲུག་ལ་དགེ་སྦྱོར་ཐམས་ཅད་ཀྱི་ནང་གི་གཙོ་བོ་དེ་ནི་བྱང་ཆུབ་མཆོག་ཏུ་སེམས་བསྐྱེད་པ་དང་གཅིག བླ་མའི་རྣལ་འབྱོར་བསྒོམ་རྒྱུ་དང་གཉིས། ལྟ་བ་བློ་འདས་ཀྱི་རྩི་དང་མི་འབྲལ་བ་གསུམ་པོ་ལ་འབད་ན་ཆོས་བརྒྱུད་འདི་ལ་ཞུགས་མཁན་ཞིག་གི་ཉམས་ལེན་གྱི་སྙིང་པོ་དེས་ཆོག་ཅིང་། དེ་ཟེར་ནས་ནམ་རྒྱུན་དུ་བཤད་ཀྱིན་ཡོད་ལ། ཡར་ཀ་ཐོབ། མར་ཀ་ཐོབ། མང་པོ་ཞིག་ཐོབ་ནས་ཉམས་ལེན་གནད་ཐོག་ལ་ཁེལ་བ་ཞིག་ནི་གཅིག་ཀྱང་མེད་ན་མཐར་ཐུག་གི་བློ་གཏད་ས་འདི་རེད་ཟེར་རྒྱུ་ཞིག་མེད་པས། ད་ཡིན་ཟེར་དུས་ལག་སྟོང་ཡིན་ནོ། །དེས་ན་མན་ངག་ཉམས་ལེན་གནད་ཐོག་ཏུ་ཁེལ་བ་གཅིག་ཀྱང་མེད་ན་མི་རུང་། མན་ངག་མང་པོ་ཞིག་ཡར་མར་ཚང་མ་ལ་འགྲམ་ཆུ་ལྡང་མི་འདུག་པར་གང་ལ་མོས་པ་དང་འདུན་པ་ཡོད་པའི་ལས་འབྲེལ་ཅན་དེ་ཉིད་བསྒྲུབ་དགོས་སོ། །ཟག་བཅས་སྡུག་བདེན་གྱིས་བསྡུས་པའི་ཉེར་ལེན་གྱི་ཕུང་པོ་འདི་དང་མ་བྲལ་བའི་ཚེ། ལུས་ལ་ན་ཚ། སེམས་ལ་སྡུག་བསྔལ། གློ་བུར་གྱི་ཡེ་འདྲོག་ཚིག་རྩུབ་མཚང་འབྲུ་ལ་སོགས་པ་ལེགས་པ་མི་ལེགས་པ་མང་པོ་ཡོང་རྒྱུ་ཡོད་ཅིང་། དེ་མི་གཅིག་དང་གཉིས་ཙམ་ལ་ཚུལ་དང་མི་མཐུན་པས་སྡུག་གཏད་པ་ཞིག་ཅི་ཡང་མ་ཡིན་ལ། དེ་ཁོ་རང་འཁོར་བའི་ཆོས་ཉིད་ཡིན་ནོ། །འོན་ཀྱང་དེའི་གནས་སྐབས་སུ་ཆོས་པ་ཡིན་པའི་རང་གཤིས་མི་ཤོར་བར་བཟོད་པའི་གོ་ཆ་གྱོན། དྲན་ཤེས་བཞིན་དང་མ་བྲལ་བའི་ཐོག་ནས་གནོད་ལན་ཕན་གྱིས་འཇལ་བའི་གོ་སྐབས་བཟང་པོ་བེད་སྤྱད་དགོས། དེའི་བེད་སྤྱད་ཤེས་ན་རྐྱེན་ངན་གྲོགས་སུ་བཀུག ལྟས་ངན་གཡང་དུ་སྒྱུར་ཆོག་ཅིང་། དོན་ངོ་མའི་ཐོག་ནས་རྐྱེན་ངན་ཆོས་སྒྲུབ་པའི་མཐུན་རྐྱེན་བཟང་ཤོས་དེ་ཡིན་ནོ། །རང་རེའི་འཇིག་རྟེན་གཏམ་གྱི་ཁ་དཔེ་ལ། ཕོ་གསར་དགྲ་ལ་མ་ཐུག་པའི་ངར་བ། །ཁྱི་གསར་རྡོ་ལ་མ་ཐུག་པའི་བཙན་པོ་ཟེར་ཞིང་། ཆོས་པ་གསར་བ་རྐྱེན་དང་འཕྲད་མ་མྱོང་བ་ལ་ཕུག་ཅི་ཡོད་གཞན་གྱིས་ཤེས་མ་དགོས་རང་གིས་ཤེས་དཀའ་འོ། །དེའི་ཕྱིར་ན་ཆོས་སྦྱངས་པ་དེ་ཉིད་དངོས་སུ་རྐྱེན་དང་འཕྲད་ཚེ་སྤྱོད་སྒོ་ལག་ལེན་འདེབས་ས་ལ་ཐུག་ཡོད་ལ། དེ་དུས་རང་རྒྱུད་ཅི་འདྲ་ཞིག་གི་ཚད་དུ་སླེབས་ཡོད་རང་གིས་ཤེས་ཐུབ་ཅིང་། དེ་སྔོན་གྱི་སྐྱེ་བ་ཚེ་རབས་ཐོག་མེད་ནས་ད་ལྟའི་བར་དུ་འཁོར་བའི་གནས་སུ་འཁྱམ་ཡུན་རིང་བ་དེ་ཉིད་ཀྱི་ངན་གོམས་ལོག་པའི་བག་ཆགས་དེ་གཏིང་ཟབ་པས་ཆོས་ཕྱོགས་ལ་འབད་པ་རྩལ་འདོན་བྱེད་དགོས་ས་ལ་ཐུག་སྐབས་དང་པོའི་སྣ་རྒྱག་ལ་དཀའ་མོ་ཞིག་དང་འཚེར་མོ་ཞིག་གི་སྣང་བ་ཤར་ཡང་འཕྲང་འགག་སྒོ་རེ་རེ་གཉིས་གཉིས་ཀྱི་ཐོག་ནས་སྙིང་ཤོར་ནས་ཕྱི་གྱེད་མ་བྱེད་དང་ཇེ་སླ་ཇེ་སླར་འགྱུར་རྒྱུ་ཡོད་དེ། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། །ཞེས་གསུངས་སོ། །འདང་བརྒྱབ་ན་འཇིག་རྟེན་གྱི་བྱ་བ་ཚེ་འདིའི་དོན་དག་ཆུང་ཆུང་རེར་སྡུག་དཀའ་ལས་ཇི་འདྲ་ཞིག་རྒྱག་དགོས། ལུས་སྲོག་འབེན་ལ་བཙུགས་ནས་ལས་དགོས་རྒྱུ་ཅི་འདྲ་མང་། ལས་དེ་འདྲ་བསྒྲུབས་ན་ཕྱི་མར་དམྱལ་བའི་གཏིང་རྡོར་འགྱུར་རྒྱུ་ཤེས་བཞིན་དུ་སྒྲོན་འབུ་མེ་འོད་ལ་ལྕེབས་འདྲའི་ཤེས་བཞིན་དུག་འཐུང་ཇི་འདྲ་ཞིག་བྱེད་བཞིན་ཡོད་པས་ཆོས་ཕྱིར་དཀའ་སྤྱད་རེ་བྱས་ནས་འབད་པ་དོན་ཡོད་བྱས་ན་བྱས་རིན་ཡོད་པ་ཞིག་ཡིན་ནོ། །ཆོས་ཀྱི་ཕྱིར་དཀའ་སྤྱད་འབད་བརྩོན་གྱི་སྐབས་སུ་ན་ཚ་སྡུག་བསྔལ་རེ་བྱུང་ན་དེས་བསྐལ་བར་བསགས་པའི་སྡིག་སྒྲིབ་འདག་ཅིང་། དེ་བཞིན་དུ་བསོད་ནམས་དཔག་མེད་སོག་པ་རེད་དྲན་ནས་རང་གིས་རང་ལ་འདང་ཕོག་བསམ་བློ་ཐོང་བའི་ལྕག་འདེད་བྱེད་དགོས་སོ། །རྣམ་རྟོག་སྣ་ཚོགས་ཀྱི་འཆར་སྒོ་དེ་རི་མོ་མཁན་དང་འདྲ་བས་བསམ་པ་དགེ་བའི་རྣམ་པ་ཅན་ཞིག་གི་ཐོག་ཏུ་ཡོད་ཡོད་ཁར་སྔོན་གྱི་ལས། འཕྲལ་གྱི་རྐྱེན། ཁྱད་པར་དུ་ཡུལ་གྱི་གཞན་དབང་། གྲོགས་ངན་གྱི་རྒྱུ་རྐྱེན་ལ་བརྟེན་ནས་བློ་སྣ་ལོག་སྟེ་ངན་པའི་ལམ་ལ་སྙོག་རྒྱུ་མེད་པ་ཞིག་མ་ཡིན་པར་མ་ཟད་དུས་སྙིགས་མའི་སྐབས་སུ་ལྷག་པར་དུ་གྲོགས་ངན་བདུད་དབང་དུ་འགྲོ་རྒྱུ་མང་སྟེ། སྐྱེས་རབས་ལས། གང་ཚེ་ཐར་པའི་ལམ་མཆོག་གསལ་གྱུར་པ། །དེ་ཚེ་བདུད་རྣམས་ཟུག་རྔུ་ལྡང་གྱུར་ཏེ། །རིན་ཆེན་རིན་ཐང་མེད་པ་རྙེད་གྱུར་པ། །དེ་ལ་དགྲ་བྱེད་མང་འདི་ཆོས་ཉིད་ཡིན། །ཞེས་གསུངས་པ་དང་མཚུངས་པར་རང་གཞན་འདི་ཕྱིའི་དོན་ཆེན་འགྲུབ། ཁྱད་པར་སྙིགས་དུས་མུན་པའི་སྨག་རུམ་གྱི་ནང་ནས་ལུང་རྟོགས་ཀྱི་བསྟན་པ་ཉིན་བྱེད་ཀྱི་སྣང་བ་དང་འདྲ་བ་ཞིག་གང་ཟག་ཅིག་གི་རྒྱུད་ལ་འཆར་རོ་སྙམ་ཚེ་འབྱུང་བྱ་འུག་པ་དང་འདྲ་བའི་བདུད་དང་བདུད་ཀྱི་སྡེ་རིས་སུ་གཏོགས་པའི་མི་དང་མི་མིན་ཐམས་ཅད་མི་དགའ་ལ། དཔེར་བཞག་ན་མི་ཞིག་གིས་རིན་ཆེན་རིན་ཐང་ཅན་གྱི་རྒྱུ་ཆེན་པོ་ཞིག་ཁུར་ནས་འགྲོ་བའི་སྐབས་སུ་དེ་ལ་དགྲ་རྐུན་མ་ལྷག་པར་དུ་ལྡང་བ་ཡིན་ཞིང་། དེ་དང་འདྲ་བར་གང་ཟག་གཅིག་གི་རྒྱུད་ནས་ཐར་བའི་ལམ་མཆོག་ཅིག་གསལ་ཡོང་ངོ་སྙམ་ཚེ་དེའི་སྐབས་སུ་བདུད་རིགས་ཐམས་ཅད་ཀྱིས་བར་ཆད་སྣ་ཚོགས་སུ་བརྫུས་ཏེ་གནོད་སྐྱལ་བ་ཡིན་པས་དེའི་སྐབས་སུ་མི་འཇིགས་པའི་བཟོད་པའི་གོ་ཆ་གྱོན་ནས་ཆོས་ཕྱིར་དཀའ་སྤྱད་བཟོད་པའི་སྙིང་རུས་སུ་བཟང་ལ་ཐ་མའི་རྒྱལ་ཁ་ཐོབ་པ་ཡིན་པས་དང་པོའི་དམ་བཅའ་མི་འདོར་རྒྱུ་དེ་སྐྱེས་བུ་དམ་པའི་རང་རྟགས་ཡིན་ནོ། །དེས་ན་དེའི་ཐོག་ཏུ་གསང་སྔགས་ཀྱི་ལམ་ནས་དངོས་གྲུབ་ཚེ་འདིའི་ཐོག་ཏུ་ཐོབ་དང་མི་ཐོབ་གཙོ་བོ་དམ་ཚིག་གཅིག་པུ་ལ་རག་ལས་པས་དེ་སྔོན་ཉེས་ལྟུང་བྱུང་ཚད་ཚང་མ་ལ་སྙིང་ནས་འགྱོད་སེམས་དང་བཤགས་པ། དེའི་ཐོག་ཏུ་ཕྱིན་ཆད་སྡོམ་སེམས་བརྟན་པོ་དང་བཅས་ཏེ་སྡོམ་དམ་ཚིག་དག་རྒྱུ་དེ་ཉིད་ནི་གནད་ཆེ་ཚུལ་བཤད་ཅི་དགོས། དེ་ལྟ་བུའི་རང་དྲིན་རང་ལ་ཆེ་བ་ཞིག་མཛད་རྒྱུའི་དགོངས་བཞེས་ཀྱི་ཐོག་ནས་སྐབས་སུ་བབས་པ་གང་ཞིག་གསན་པར་བྱ་བ་སྔ་འགྱུར་གཏེར་སྟོན་བརྒྱ་རྩའི་ནང་གི་གཏེར་སྟོན་གླིང་པ་བརྒྱད་ཀྱི་ཡ་གྱལ་སྤྲུལ་སྐུ་ཀརྨ་གླིང་པའི་གཏེར་བྱོན་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོ་འདི་ཉིད་འདུས་པ་མང་ཚོགས་ཀྱི་བསྙེན་སྒྲུབ་ཀྱི་དགོས་མཁོ་ལ་བཤད་ཁྲིད་དང་སྦྲེལ་ནས་དབང་ལུང་ཁྲིད་གསུམ་བསྙེན་སྒྲུབ་ལས་སྦྱོར་དང་བཅས་པ་སྟབས་གཅིག་ལ་ཚང་བའི་བཀའ་གཏེར་བཀའ་བབས་ཀྱི་ཆུ་བོ་བཞིའི་གདམས་པ་གཞིར་བཞེངས་སུ་སློང་བའི་ད་སྐབས་ཀྱི་གྲུབ་དབང་རྫོགས་ཆེན་པའི་བསྟན་པའི་བདག་པོ་གཞོན་རབས་པའི་ཐུགས་བཞེད་མཛད་པ་དང་བསྟུན་ཏེ་བཤད་ཁྲིད་བྱེད་པའི་སྐབས་ནས་ཁ་རྩང་ཡན་ཆད་ཆོ་གའི་སྔོན་འགྲོ་དང་དངོས་གཞིའི་རིམ་པ་ལེའུ་བཅུའི་ཁོངས་སུ་བསྡུས་པའི་ས་བཅད་ཀྱི་དང་པོ་སྔོན་འགྲོའི་ལེའུ་གསུམ་བཀའ་བསྒོ། མཚམས་གཅོད། བྱིན་རླབས་གསུམ། དེ་ནས་དངོས་གཞིའི་ལེའུ་བདུན་ལྷ་བསྐྱེད་སྤྱན་འདྲེན་བཞུགས་གསོལ་ཕྱག་མཆོད་བསྟོད་བཤགས་བདུན་གྱིས་བསྟན་པ་ཚང་མ་སོང་ཟིན་ཏོ།། ༢ དངོས་དོན་བཤད་པ། ༼ཁ འཕྲོས་དོན་འཛབ་བཟླས་ཚངས་པའི་སྒྲ་དབྱངས་འཁོར་འདས་རང་གྲོལ་གྱི་དགོས་གནད་བཤད་པ། ཀ༽ སྔགས་དོན་བཤད་པ། དེ་རིང་དངོས་གཞིའི་བསྙེན་སྒྲུབ་ལ་གལ་འགངས་ཆེ་བའི་འཛབ་དགོངས་གྲུབ་དབང་རྫོགས་ཆེན་པའི་ཞལ་བསྐང་ཕྱག་རྒྱུན་ལ་ཁྲིགས་ཆགས་སུ་ཡོད་པའི་འཛབ་བཟླས་ཚངས་པའི་སྒྲ་དབྱངས་འཁོར་འདས་རང་གྲོལ་གྱི་སྟེང་ནས་མདོ་མཚམས་མདོ་མཚམས་ཀྱི་དགོས་གནད་དེ་གསལ་འདེབས་ཤིག་ཞུ་འཆར་ཡིན་ནོ། །ལྷ་ཚོགས་ཞི་བ་རྣམས་ཀྱི་ཐུགས་ཀར་ཟླ་བ་དང་། ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་ལ་རང་སྲོག་ས་བོན་གྱི་མཐར་ཞི་བ་ལ་བྷོ་དྷི་ཙིཏྟ་དང་ཁྲོ་བོ་ལ་རུ་ལུའི་སྔགས་སམ་རང་སྔགས་རྣམས་ཀྱིས་བསྐོར་བ་ལས་ཞེས་པ་འདི་ཡན་ཆད་དམིགས་པ་འདི་བཞིན་དུ་གསལ་ནས། འོད་ཟེར་འཕྲོས་ཞེས་པ་ནས་མདུན་བསྐྱེད་ཀྱི་ལྷ་ལ་ཕོག དེའི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས། དུས་གསུམ་བདེ་གཤེགས་རྣམས་ཀྱི་ཐུགས་རྒྱུད་བསྐུལ། བྱིན་རླབས་ཐམས་ཅད་འོད་ཕུང་གི་རྣམ་པར་སྔགས་ཕྲེང་ལ་ཐིམ། འོད་ཟེར་འབར་ཞེས་པ་འདི་ཡན་ཆད་ནི་བདག་དོན་བྱིན་རླབས་བསྡུ་བའི་དམིགས་པ་ཡིན་ལ། སླར་ཡང་ཐུགས་ཀའི་འོད་ཟེར་བཀའ་སྲུང་དམ་ཅན་རྣམས་ལ་ཕོག སྔོན་གྱི་དམ་བཅའ་དྲན་པས་ཅི་བསྒོ་བའི་ལས་ཐམས་ཅད་ཐོགས་མེད་དུ་བསྒྲུབ་པར་བསམ་ཞེས་པ་འདི་བཀའ་སྲུང་ལས་ལ་བཀོལ་བའི་དམིགས་པ་ཡིན་ཞིང་། དེའི་འཕྲོས་ནས་སེམས་ཅན་ཐམས་ཅད་ལ་འོད་ཟེར་ཕོག་པས་སྣང་སྲིད་དག་པ་ལྷ་ཡི་ཞིང་དང་རྩ་བ་གསུམ་གྱི་རང་བཞིན་དུ་གྱུར་པར་བསམ་ལ་ཞེས་པ་འདི་གཞན་དོན་ཕྲིན་ལས་ཀྱི་དམིགས་པ་ཡིན་ནོ། །འདིའི་སྐབས་སུ་འཛབ་ཁང་དབྱེ་བའི་ཕྱག་ལེན་ལྟར་དུ་བྱས་ན་བྷྲཱུྃ་བི་ཤྭ་བི་ཤུདྡྷེ་ཕཊཿཛཿབརྗོད་སྐབས་བྷྲཱུྃ་ཡིག་འདི་རྣམ་སྣང་དང་། བུམ་པ། གཞལ་ཡས་ཁང་། གཙུག་གཏོར་འཁོར་ལོས་སྒྱུར་བ་སྟེ་དེ་ཚང་མའི་ས་བོན་ཡིན་ཞིང་། གཙུག་གཏོར་འཁོར་ལོས་སྒྱུར་བ་ཞེས་པ་འདིའི་གཏམ་བརྒྱུད་དང་སྦྲེལ་ནས་བཤད་ན་སྔར་འདས་པའི་དུས་ཤིག་ལ་བྲམ་ཟེ་གང་པོའམ་གང་ཤི་ཟེར་བ་ཞིག་འཇིག་རྟེན་ན་ཡོད་མྱོང་ལ། དེའི་སྐབས་སུ་ཡུལ་ཐམས་ཅད་གདོན་བགེགས་དང་འབྱུང་པོའི་གནོད་འཚེ་ཆེ་བས་བྲམ་ཟེ་གང་པོ་ལ་བུ་བརྒྱད་ཡོད་པ་རྣམས་ཀྱིས་སེམས་ཅན་ཐམས་ཅད་གདོན་བགེགས་ལས་སྐྱོབ་པའི་ཆེད་དུ་སེམས་བསྐྱེད་བརྟན་པོར་བྱས། ཡབ་ཡུམ་གཉིས་ཀ་སྲས་བརྒྱད་པོ་དང་བཅུ་བོ་དེ་ཕྱོགས་བཞི་མཚམས་བརྒྱད་སྟེང་འོག་ཕྱོགས་བཅུ་ཡི་ཁྲོ་བོར་གྱུར་སོང་བ་ཡིན་ནོ། །དེ་ཐམས་ཅད་དེ་ལྟར་གྱུར་པའི་རྒྱུ་མཚན་ནི་སྟེང་ཕྱོགས་ཀྱི་ཁྲོ་བོ་དང་ངོ་བོ་གཅིག་པ་དེ་ཉིད་ཀྱི་སྨོན་ལམ་གྱི་སྟོབས་ཀྱིས་བྷྲཱུྃ་ཡིག་ཡིག་འབྲུ་གཅིག་དེ་ཅིར་ཡང་འགྱུར་བའི་སྨོན་ལམ་གྱི་མཐུ་གྲུབ་སྟེ་གཞལ་ཡས་ཁང་དང་ཁྲོ་བོ་བཅུ་བྱུང་བ་ཡིན་ལ། འཛབ་ཁང་དབྱེ་བ་འདིའི་སྐབས་སུ་མདུན་བསྐྱེད་དམ་བུམ་བསྐྱེད་ལོགས་སུ་ཕྱེ་བའི་སྐབས་ལ་བུམ་པ་ཡང་གཞལ་ཡས་ཁང་དུ་བྷྲཱུྃ་གྱིས་བསྐྱེད་པའི་དོན་ཡིན་ཞིང་། དཀྱིལ་འཁོར་སྣ་ཚོགས་བྷྲཱུྃ་དུ་འཕྲོ། །ཡོངས་གྱུར་ཡེ་ཤེས་གཞལ་ཡས་ཁང་། །ཞེས་གསུངས་པ་དང་། དེ་ཡང་ཕྱི་ལྷ་ཡི་ཁང་པ། ནང་ལྷ་ཡི་ས་བོན། གསང་བ་ཡུམ་གྱི་མཁའ་དབྱིངས་ལ་གོའོ། །བི་ཤྭ་བི་ཤུདྡྷེ་ཞེས་པ་བི་ཤྭ་སྣ་ཚོགས། འཁོར་འདས་ཀྱི་ཆོས་སུ་སྣང་བ་ཐམས་ཅད་ལ་གསུངས་ཤིང་། བི་ཤུདྡྷེ་རང་བཞིན་གྱིས་དག་པ་ལ་གོ་ལ། འཁོར་འདས་རང་བཞིན་གྱིས་དག་པ་དེ་ཆོས་ཀྱི་དབྱིངས་ཡིན་ནོ། །ཆོས་དབྱིངས་སྤྲོས་པ་དང་བྲལ་བ་དེ་སངས་རྒྱས་ཀྱི་བཞུགས་གནས་ཡིན་པས་འདི་ནས་དེ་མཚོན་པར་བྱེད་པའི་དོན་བསྟན་པའོ། ཕཊཿནི་ཐབས་ཤེས་འབྲེལ་བའི་ཡི་གེ ཛཿཞེས་པས་གནས་ནས་འདྲེན་པའམ་དབྱིངས་ནས་བསྐུལ་བའི་དོན་གྱིས་གསལ་འདེབས་པ་ཡིན་ནོ། །དུས་རྒྱུན་གྱི་ཕྱག་ལེན་ལ་འཛབ་ཁང་དབྱེ་བ་དེ་སྒྱུ་འཕྲུལ་ལ་སོགས་པའི་ལུགས་གཞན་དང་འབྲེལ་བའི་གནད་ཀ་རྒྱུ་མཚན་ལ་བརྟེན་ནས་མཛད་པའི་གཞན་ཕན་མཐའ་ཡས་ཀྱི་ཕྱག་སྲོལ་དང་། མི་དབྱེ་བ་དེ་ནི་པདྨ་རིག་འཛིན་གྱི་ཞལ་རྒྱུན་ནམ་མཁའ་འོད་གསལ་སོགས་ཀྱི་ཕྱག་ལེན་ལ་འདེབས་པའི་གདན་ས་འདིའི་རྩ་བའི་ཕྱག་བཞེས་ཡིན་ནམ་སྙམ། བདག་མདུན་དམ་ཡེ་དབྱེར་མེད་དང་འཇུག་པ་ཐ་དད་དུ་སྒྲུབ་པ་ལ་སོགས་པ་རྣལ་འབྱོར་བའི་རྟོགས་རིགས་ཀྱི་ཁྱད་པར་ལ་ཐུག་ཡོད་ཅིང་། ཁྱད་པར་དུ་གང་ཟག་གཅིག་གི་དཔེ་ཡིས་ཚང་མ་ཡོངས་རྫོགས་ལ་འགེབས་རྒྱུ་མེད་དོ། །གང་ལྟར་ཡང་འདི་ནས་བཟླ་བྱའི་སྔགས་དེ་ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱརྟུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃཿཞེས་པའི་སྤྱི་དྲིལ་གྱི་སྔགས་འདི་ཞི་ཁྲོའི་རྩ་བའི་སྔགས་ཡིན་ཞིང་། འདིའི་སྔགས་དོན་ཨོ་རྒྱན་ཆེན་པོས་འགྲེལ་ཡོད་དེ། ཨོཾ་དང་ཨཱཿདང་ཧཱུྃ་དང་གསུམ། །དུས་གསུམ་སངས་རྒྱས་སྐུ་གསུང་ཐུགས། །བོ་དྷི་ཙིཏྟ་བྱང་ཆུབ་སེམས། །ཞེས་གསུངས་ཏེ། ཨོཾ་དང་ཨཱཿདང་ཧཱུྃ་གསུམ་པོ་དེ་དུས་གསུམ་སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་ངོ་བོ་ཡིན་ཞིང་། ཡིག་འབྲུ་གསུམ་དེ་སྐུ་གསུང་ཐུགས་ཀྱི་སྙིང་པོར་གྱུར་ཡོད་ལ། བོ་དྷི་ཙིཏྟ་བྱང་ཆུབ་ཀྱི་སེམས་སོ། །མ་ཧཱ་སུ་ཁ་བདེ་བ་ཆེ། །ཛྙཱ་ན་དྷཱརྟུ་ཡེ་ཤེས་དབྱིངས། །ཨཿནི་སྐྱེ་བ་མེད་པའོ། །ཞེས་གསུངས་ཏེ་མ་ཧཱ་སུ་ཁ་ཞེས་པ་བདེ་བ་ཆེན་པོའི་དོན་ཡིན་ལ། ཛྙཱ་ན་དྷརྟུ་ཡེ་ཤེས་དབྱིངས་སམ་ཆོས་ཀྱི་དབྱིངས། ཨཱཿནི་སྐྱེ་བ་མེད་པའི་དོན་ཏེ། ཨ་ནི་ཡིག་འབྲུ་ཀུན་གྱི་མཆོག་གསུངས་པ་ལྟར་དུ་ཡིན་ནོ། །ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱརྟུ་ཨཱཿཞེས་པ་འདི་ཡན་ཆད་ཞི་བའི་སྙིང་པོ་ཡིན་ཏེ། ཞི་བ་ལྷུན་གྲུབ་ཡེ་ཤེས་ལྷ། །བཞི་བཅུ་རྩ་གཉིས་སྙིང་པོའོ། །ཞེས་གསུངས་སོ། །ཁྲོ་བོའི་སྔགས་དོན་དེ་ལ་མཐུད་ནས། ཨོཾ་ནི་སྐུ་ལྔ་ཡེ་ཤེས་ལྔ། །རུ་ལུ་གནས་ལུགས་ཆོས་ཀྱི་དབྱིངས། །ཞེས་གསུངས་ཏེ། ཨོཾ་ནི་སྐུ་ལྔ་ཡེ་ཤེས་ལྔ་ལ་འཇུག་ཅིང་། རུ་ལུ་གནས་ལུགས་ཆོས་ཀྱི་དབྱིངས་ཡིན་གསུངས་ལ། རུ་ལུ་རུ་ལུ་གཉིས་ཡོད་པའི་གོང་མ་དེ་གནས་ལུགས་ཆོས་ཀྱི་དབྱིངས་ཀྱི་མཚོན་དོན་དང་། འོག་མ་དེ་གནས་ལུགས་ཆོས་ཀྱི་སྐུ་ཡི་མཚོན་དོན་ཡིན་གསུངས་ཏེ། འོག་མ་གནས་ལུགས་ཆོས་ཀྱི་སྐུ། །ཧཱུྃ་ནི་འགགས་མེད་ཐིག་ལེ་ཉིད། །བྷྱོ་ནི་སྐྱེ་མེད་མཁའ་ལ་འཁྱིལ། །ཧཱུྃ་ནི་སྐྱེ་འགག་གཉིས་སུ་མེད། །ཁྲག་འཐུང་ཁྲོ་བོའི་རང་བཞིན་རྩལ། །དྲུག་ཅུ་ཐམ་པའི་སྙིང་པོའོ། །ཞེས་གསུངས་སོ། །དེ་ལྟར་ན་ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱརྟུ་ཨཱཿཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃཿའདི་ཞི་ཁྲོ་འདུས་པའི་ལྷ་ཚོགས་སྤྱི་དྲིལ་གྱི་སྔགས་ཞི་ཁྲོ་གཉིས་ཀའི་སྔགས་ཡིན་ནོ། །དེའི་མཚམས་སུ་ལྷ་ཚོགས་སོ་སོའི་སྔགས་ཧཱུྃ་བཛྲ་ཙིཏྟ་འགག་མེད་ཐུགས་རྡོ་རྗེ་ཡིན་ཞིང་། ཨཱཿསྐྱེ་མེད་ཡབ་ཀྱི་ས་བོན། སྐྱེ་འགག་བྲལ་བའི་ཐུགས་མི་ཤིགས་པ་ཀུན་ཏུ་བཟང་པོའོ། །བཛྲ་ས་མནྟ་བྷ་དྲ་རྡོ་རྗེ་ཀུན་ཏུ་བཟང་མོ། མཐའ་མའི་ཨོཾ༔དེ་ཡེ་ཤེས་ལྔ་ཡི་དོན་གོང་ནས་ཞུས་པ་ལྟར་ཡིན་ནོ། །སྤྱིར་བཏང་གིས་བཤད་ན་ཨོཾ་ཡབ་དང་ཨཱཿཡུམ་གྱི་ས་བོན་ཡིན་གསུངས་ཡོད་ཀྱང་འདི་ནས་གཏེར་གཞུང་གི་ཁྱད་ཆོས་གཞི་ཆོས་དབྱིངས་སྐྱེ་བ་མེད་པ་ལྷ་ཚོགས་ཀུན་གྱི་འཕྲོ་གཞི་ཡིན་པའི་ཆ་ནས་ཐབས་ཤེས་ཟུང་དུ་འབྲེལ་བ་ལས་ཤེས་རབ་སྟོང་པ་ཉིད་བདེ་ཆེན་གྱི་ཡེ་ཤེས་དང་གཉིས་སུ་མེད་པ་རྩལ་འདོན་མཛད་པ་ནི་ཨ་ནུའི་ལུགས་གཙོ་བོར་བསྟན་པའི་གོ་བ་རེད་སྙམ་པ་ང་རང་ཉིད་ཀྱི་གོ་བ་ཡིན། འདི་མན་ཆད་སྔགས་ཀྱི་མགོར་ས་བོན་གྱི་སྔགས་ཡོད་པ་ནི་རྒྱུ་མ་ནོར་བ་རྩ་བའི་སྔགས་ཞེས་ཟེར་ལ། སྔགས་འདི་ལ་རྒྱུ་མ་ནོར་བ་རྩ་བའི་སྔགས་དང་གཅིག བསྐྱེད་པ་རྐྱེན་གྱི་སྔགས་དང་གཉིས། བཟླས་པ་ལས་ཀྱི་སྔགས་དང་གསུམ་ཡོད་པ་དེ་ཉིད་ངེས་དགོས་སོ། །དེ་ལྟ་བུ་གསུམ་ཡོད་ན་ལྷ་རང་རང་གི་ས་བོན་གྱི་སྔགས་མགོར་ཡོད་པ་ནི་རྒྱུ་མ་ནོར་བ་རྩ་བའི་སྔགས་ཡིན་ལ། དེའི་འཕྲོས་སུ་རང་སྔགས་ཡོད་པ་ནི་བསྐྱེད་པ་རྐྱེན་གྱི་སྔགས། དེ་གཉིས་ཀ་སྦྲེལ་ནས་བཟླ་རུ་རུང་བའི་སྔགས་སུ་གྲུབ་པ་དེ་བཟླས་པ་ལས་ཀྱི་སྔགས་ཡིན་ནོ། །དཔེར་ན་ཨོཾ་ཛི་ན་ཛིཀ༔ལྟ་བུ་ལ་མཚོན་ན་ཨོཾ་རྒྱུ་མ་ནོར་བ་རྩ་བའི་སྔགས་ཡིན་ཞིང་། ཀུན་བཟང་ཐུགས་ལས་ཨོཾ་ལཱཾ་གཉིས་ཀ་འཕྲོས་ནས་དཀྱིལ་འཁོར་གྱི་གཙོ་བོ་འུ་ཚོས་རྣམ་སྣང་ཡབ་ཡུམ་བསྐྱེད་པ་ཡིན་པས་ཨོཾ་སྐུ་རྡོ་རྗེ་ཡིན་ལ། རྣམ་སྣང་གི་རྒྱུ་མ་ནོར་བ་རྩ་བའི་སྔགས་ཀྱང་ཨོཾ་ཡིན་ནོ། །ཛི་ན་ཛིཀ༔རང་སྔགས་ཡིན་ཞིང་། ཛི་ན་ཛིཀ༔ནི་རྣམ་པར་རྒྱལ་བའི་དོན་ཡིན་ལ། མི་དགེ་བ་ལས་རྣམ་པར་རྒྱལ་བས་ན་རྣམ་པར་སྣང་མཛད་གསུངས། དེ་གཉིས་ཀ་སྦྲེལ་ན་བཟླས་པ་ལས་ཀྱི་སྔགས་སུ་གྱུར་པ་ཡིན་ནོ། །རིགས་ལྔ་ཡབ་ལྔའི་རྒྱུའི་ས་བོན་ནམ་རྒྱུ་མ་ནོར་བ་རྩ་བའི་སྔགས་ནི་ཨོཾ་ཧཱུྃ་སྭཱ་ཨཾ་ཧཱ་རྣམས་ཡིན་ཞིང་། དེ་རྣམས་རིགས་ལྔ་ཡབ་ལྔའི་རྒྱུའི་ས་བོན་དང་། ཡུམ་ལྔའི་ས་བོན་ནི་མཱུ་ལཱྃ་མཱྃ་པྱཾ་ཏཱཾ་རྣམས་ཡིན་ཞིང་། དེ་ལྟར་སྦྲེལ་བའི་ཚེ་ལཱྃ་ཏེ་ཤྭ་ར་ཏི་སྟྭཾ༔ཞེས་པ་རང་བཞིན་གྱིས་དག་པ་ཞེ་སྡང་རྣམ་པར་དག་པའི་དགའ་བ་མོ་སྤྱན་མ་ལ་གོ་བ་དང་། སྟྭཾ་ཞེས་པ་འདུད་ཅིང་གུས་པའི་དོན་ཏོ། །ཧཱུྃ་བཛྲ་དྷྲིཀྲ༔རྣམ་ཤེས་དག་པ་ཟུང་འཇུག་དབྱེར་མི་ཕྱེད་པའི་རྡོ་རྗེ་འཛིན་པ་མི་བསྐྱོད་པ་ཡིན་ལ། མཱུྃ་དྷཱ་ཏུ་ཤྭ་རཱི་སྟྭཾ༔ཞེས་པ་ཆོས་ཐམས་ཅད་རྣམ་པར་དག་པ་དབྱིངས་ཀྱི་དབང་ཕྱུག་མ། སྭཱ་རཏྣ་དྷྲིཀ༔ཅེས་པ་ཚོར་ཕུང་དག་པ་རིན་ཆེན་འཛིན་པ་རིན་ཆེན་འབྱུང་ལྡན། མཱྃ་མཱ་ཀའི་སྒྲ། མོ་ཧ་གཏི་མུག་ལ་འཇུག ར་ཏི་དགའ་མ་ཡིན་ཞིང་། སྟྭཾ༔གོང་ནས་ཞུས་མ་ཐག་པ་ལྟར་འདུད་པའམ་གུས་པའི་དོན་ཅན་གུས་པས་ཡབ་ལ་འདུད་པའི་གོ་དོན་ཏེ། གཏི་མུག་རྣམ་པར་དག་པས་ཡབ་ལ་འདུད་པའི་དགའ་བ་མོ་ཡུམ་ཆེན་མཱ་མ་ཀཱི་ཡིན་གསུངས་པའི་དོན་ཏོ། །དེ་བཞིན་དུ་ཨཱཾ་ཨ་རོ་ལྀཀྲ༔འདུ་ཤེས་དག་པ་སྣང་བ་མཐའ་ཡས། པྱཾ་རཱ་ག་ར་ཏི་སྟྭཾ༔འདོད་ཆགས་དག་པ་གོས་དཀར་མོ། ཧཱ་པྲ་ཛྙཱ་ཌྷྲྀཀྲ༔འདུ་བྱེད་དག་པ་ཤེས་རབ་འཛིན་པའི་དོན་ཡོད་གྲུབ་པ། ཏཱཾ་བཛྲ་ར་ཏི་སྟྭཾ༔ཞེས་པ་ཕྲག་དོག་རྣམ་པར་དག་པ་དམ་ཚིག་སྒྲོལ་མ། ཀྵཱི་ཧི་རཱ་ཙ་ཡ་སྭཱ་ཧཱ༔འདི་སེམས་དཔའ་ས་ཡི་སྙིང་པོའི་ལས་སྔགས་ཡིན་ཞིང་། འདི་ལ་མཚོན་ན་ཀྵཱི་ཡིག་དེ་རྒྱུ་མ་ནོར་བ་རྩ་བའི་སྔགས་ས་བོན་ཡིན་ལ། ཧི་ངོ་མཚར་བའི་དོན། རཱ་ཛ་རྒྱལ་པོ། ཡ་རྣམ་དབྱེ་ཡིན་ཞིང་། སྭཱ་ཧཱ་གཞི་ཚུགས་ཞེས་པའི་དོན་ཏེ། ངོ་མཚར་རྒྱལ་པོ་ས་ཡི་སྙིང་པོའོ། །རྒྱུ་མ་ནོར་བ་རྩ་བའི་སྔགས་དང་བསྐྱེད་པ་རྐྱེན་གྱི་སྔགས་གཉིས་སྦྲེལ་ཚེ་བཟླས་པ་ལས་ཀྱི་སྔགས་སུ་གྱུར་ཅེས་གོང་ནས་བཤད་པ་ལྟར་ཐམས་ཅད་དེ་ལྟར་ཡིན་ནོ། །མེེ་ཏྲི་དྷཱ་ར་ནི་སྭཱ་ཧཱ༔བྱམས་པ། ཧཱུྃ་ལཱ་སྱེ་ས་མ་ཡ་སྟྭཾ༔སྒེག་པ་མ། ཧཱུྃ་པུཤྤེ་ཨ་ཝེ་ཤ་ཡ་སྟྭཾ༔མེ་ཏོག་མ། སྭཱ་ཧཱ་གང་གི་སྐབས་སུ་ཡིན་ན་ཡང་གཞི་ཚུགས་པའམ་རྗེས་སུ་འཛིན་པ་དང་། སྟྭཾ་ཞེས་པ་ཡབ་ལ་གུས་པས་འདུད་པ་གོ་དོན་གཅིག་མཚུངས་ཡིན་ནོ། །ཧཱུྃ་སྭ་རཱ་ཙ་ཡ་སྭཱ་ཧཱ༔ཞེས་པ་ཀུན་བཟང་རྒྱལ་པོ། ཏྲཱཾ་ཨ་གརྦྷ་ཡ་སྭཱ་ཧཱ༔ཞེས་པ་ནམ་མཁའི་སྙིང་པོ། ཏྲཱཾ་མ་ལེ་ས་མ་ཡ་ཧོཿའདི་ལྟ་བུ་ལ་མཚོན་པ་ཡིན་ན་ཏྲཱཾ་རིན་ཆེན་རིགས་ཀྱི་ས་བོན། མ་ལེ་ཕྲེང་བ་མ། ས་མ་ཡ་ཧོ་དམ་ཚིག་དུས་ལ་བབ་པའི་དོན་ཏེ། ཕྲེང་བ་མོས་ཡབ་ལ་འཁྱུད་པར་རྩོམ་པའི་དོན་ཡིན་པར་དེ་ལྟར་གསུངས་ཡོད་དོ། །ཛཿདྷཱུ་པེ་པྲ་ཝེ་ཤ་ཡ་སྟྭཾ༔བདུག་སྤོས་མ། ཧྲཱིཿཧཱ་ཧཱུྃ་པདྨ་བྷ་ཏ་མ་སྭཱ་ཧཱ༔པདྨའི་ཕྱག མཱུྃ་ཤྲཱི་ཨ་རཾ་གྷཱ་ཡ་སྭཱ་ཧཱ༔ཞེས་པ་འཇམ་དབྱངས་ཡིན་ཞིང་། ཧྲཱིཿགྷཱིརྟི་རཱ་ག་ཡ་ཧོ་ཧཾ༔ཞེས་ཧྲཱིིཿགྷཱིརྟི་ནི་གླུ་མ་སྟེ་རཱ་ག་ཡ་ཧོ་ཆགས་པས་བསྐུལ་བ། པཾ་དྷཱི་པཾ་སུ་ཀི་ནི་ས་མ་ཡ་སྟྭཾ༔མར་མེ་མས་དམ་ཚིག་གི་དུས་ལ་བབ་བོ་ཞེས་བསྐུལ་བའོ། །ཐི་ལྷིཾ་ནི་ས་རཾ་པཱ་ཡ་སྭཱ་ཧཱ༔སྒྲིབ་པ་རྣམ་སེལ། ཛྷིཾ་ཀུ་རུ་པཱ་ཎི་ཧྲཱིཿསྭཱ་ཧཱ༔ཕྱག་ན་རྡོ་རྗེ། ཧོ་གྷནྡྷེ་ཙིཏྟ་དྲི་ཆབ་མ། ཡ་ཧོ་༔ཞེས་པ་དགྱེས་པར་བྱེད་པའོ། །ཨ་ནཱིརྟི་རཱ་ག་ཡ་མི་སྟྭཾ༔གར་མ་ཡིན་ཞིང་གར་མས་ཆགས་ཕྱིར་ཡབ་ལ་འདུད་པ་ཞེས་པ་གོང་ལྟར་ཡིན་ནོ། །ཨོཾ་མུ་ནེ་ཀྲེཾ་སྭཱ་ཧཱ༔ཞེས་པ་འདིའི་ཨོཾ་རྣམས་སྤྱིར་བཏང་གིས་བཀྲ་ཤིིས་པའམ་རབ་ཏུ་བསྔགས་པའི་དོན་ཡིན་ལ། འདི་ནས་ཕྱག་འཚལ་བའི་དོན་དང་ས་བོན་ལ་ཡང་གོ་ཆོག མུ་ནེ་རྣམས་ཐུབ་པ་ཡིན་ཞིང་ཀྲེཾ་ང་རྒྱལ་ལྷ་ཡི་ས་བོན། སྭཱ་ཧཱ་གཞི་ཚུགས་པ་ཡིན་ནོ། །ཅི་ཞིག་གི་གཞི་ཚུགས་པ་ཡིན་ན་འདིའི་སྐབས་སུ་འགྲོ་བ་དེ་དང་དེའི་བག་ཆགས་ཞི་བའི་གཞི་ཚུགས་པ་དེ་ལྟ་བུ་ཞིག་ལ་གོ་དགོས་སོ། །བྲེཾ་དེ་ཕྲག་དོག་ལྷ་མིན་གྱི་ས་བོན། ཏྲུྃ་མིའི་ས་བོན། གོ་ཆ་བཀོད་པ་ཞེས་པ་ལྟ་བུ་ལ་གསུངས་ཡོད། ཀྵཾ་ཞེས་པ་དངོས་སྣང་འགྱུར་བའམ་བློ་གྲོས་རྟུལ་བ་ཞིག་ལ་གོ་བ་ཡིན་པས་གཏི་མུག་བྱོལ་སོང་གི་ས་བོན། སྲུཾ་འཁྱིལ་བ་སྟེ་བཀྲེས་སྐོམ་གྱིས་ཉམས་ཉེས་པར་གྱུར་པ་ཡི་དྭགས་ཀྱི་ས་བོན། ཡེ་ཁྲིད་པ་མ་རུང་བར་གྱུར་པའི་གོ་དོན་ཡིན་གསུངས་པས་དམྱལ་བའི་ས་བོན་ལ་དེའི་ཕྱིར་ན་འཇོག་པ་ཡིན་ཞིང་། ས་མ་ཡ་སྟྭཾ་ཞེས་པ་འགྲོ་དྲུག་སྐྱོབ་པའི་ཐུབ་དྲུག་གི་འགྲོ་དོན་དམ་ཚིག་གི་དུས་ལ་བབ་བོ་ཞེས་འགྲོ་དོན་སྐུལ་བར་བྱེད་པའི་དོན་ཅན་ཞིག་ཡིན་ནོ། །ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ༔སྟེ་འདིའི་ཨོཾ་རྣམས་ཀྱང་རབ་ཏུ་བསྔགས་པའི་དོན་ཡེ་ཤེས་ལྔ་དང་ལྡན་པའི་དོན་ལ་འཇུག་ཅིང་། བཛྲ་རྣམས་རྡོ་རྗེ། ཀྲོ་ཏ་རྣམས་ཁྲོ་བོ། དེའི་ནང་གི་དམིགས་བསལ་གྱི་བི་ཛ་ཡ་རྣམ་པར་རྒྱལ་བ། ཧཱུྃ་ས་བོན་ནོ། །ཨཾ་ཀུ་ཤཱ་ལྕགས་ཀྱུ། ཛཿའགུག་པར་བྱེད་པའི་དོན་ཅན་ས་བོན་གྱི་སྔགས། ཨོཾ་བཛྲ་ཀྲོ་ཏ་ཡ་མཱནྟ་ཀ་ཧཱུྃ༔གཤིན་རྗེའི་གཤེད། བཛྲ་པཱ་ཤ་ཞགས་པ། འདིའི་ཧཱུྃ༔འདི་འཆིང་བྱེད་ཀྱི་ས་བོན། ཨོཾ་པདྨ་ཞེས་པ་སྐད་སོར་བཞག ཧྱ་གྲྀ་ཝ་ཞེས་པ་ནི་རྟ་མགྲིན། བཛྲ་སྥོ་ཊ་ལྕགས་སྒྲོག བཾཿསྡོམ་བྱེད་ཀྱི་ས་བོན། ཨ་མྲྀ་ཏ་བདུད་རྩི་ཀུཎྜ་ལཱི་འཁྱིལ་བ་སྟེ་བདུད་རྩི་འཁྱིལ་བ། བཛྲ་གྷནྡྷེ་དྲིལ་བུ། ཧོ༔ཞེས་པ་འབེབས་པར་བྱེད་པའི་ས་བོན། དེ་ལྟར་བྱས་ནས་སྒོ་བ་ཡབ་ཡུམ་བརྒྱད་ཀྱི་བཟླས་སྔགས་ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ༔ བཛྲ་ཨཾ་ཀུ་ཤཱ་ཛཿ ཨོཾ་བཛྲ་ཀྲོ་ཏ་ཡ་མཱནྟ་ཀ་ཧཱུྃ༔ བཛྲ་པཱ་ཤ་ཧཱུྃ༔ ཨོཾ་པདྨ་ཀྲོ་ཏ་ཧྱ་གྲྀ་ཝ་ཧཱུྃ༔ བཛྲ་སྥོ་ཊ་བཾཿ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྜ་ལཱི་ཧཱུྃ༔ བཛྲ་གྷནྡྷེ་ཧོ༔སྟེ་དེ་ཡིས་ཞི་བ་བཞི་བཅུ་རྩ་གཉིས་སོང་ཟིན་ཏོ། །ད་ནི་ཁྲོ་བོ་ལ་ཐུག་པ་ཡིན་ཞིང་། ཨོཾ་མ་ཧཱ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔འདི་ཆེ་མཆོག་གི་བཟླས་སྔགས་ཡིན་ལ། ཨོཾ་ཡེ་ཤེས་ལྔ་ལྡན་སྐུ་ལྔའི་བདག་ཉིད་ཡིན། སྤྱིར་བཏང་གི་ཨོཾ་སྔགས་ཀྱི་མགོར་སྦྱར་བ་དེ་བཀྲ་ཤིས་ཤིང་བྱིན་གྱིས་རློབ་པའི་ཚིག་དང་། སྭཱ་ཧཱ་མཇུག་ཏུ་སྦྱར་བ་ནི་གཞི་ཚུགས་པའམ་དེ་བཞིན་བརྟན་པར་གྱུར་པའི་ཚིག་ཅིག་ཡིན་པར་གོང་ནས་བཤད་མ་ཐག་པ་ལྟར་ཅུང་ཟད་ཅུང་ཟད་ཀྱི་གོ་བའི་ཁ་སྒྱུར་བྱེད་རྒྱུ་དེ་ལྟར་ཡིན་ནོ། ཨོཾ་སྐུ་ལྔའི་བདག་ཉིད་ཡེ་ཤེས་ལྔ་ལྡན་ཞེས་གསུངས་ཚེ་ཡེ་ཤེས་ལྔ་དང་སྐུ་ལྔ་ཚོགས་པའི་མཚོན་བྱེད་དེའི་ཡི་གེའི་གཟུགས་ཇི་ལྟར་ཡོད་པ་རྒྱུད་ཀྱི་ལུང་ཡང་ཡོད་ལ། དེ་ཉིད་ཇི་ལྟ་བུ་ཞིག་ཡིན་ན་ཨ། ན་རོ། ཟླ་ཚེས། བིནྡྷུ། འ་ཆུང་དང་བཅས་པའི་ཨཱོྃ་ཡིག་ཅིག་ཡིན་ཞིང་། འགའ་རེས་ཚེག་དྲག་དང་སྦྱར་ཚེ་ཨ་ནུའི་ལུགས་ལྟར་དུ་བྱས་ན་ཡེ་ཤེས་དྲུག་གི་མཚོན་བྱེད་དུ་གསུང་རྒྱུ་ཡོད་དོ། །དེ་ལྟ་བུ་ལ་ཨོཾ་རྒྱས་བསྡུས་ཇི་ལྟར་བྲིས་ན་ཡང་གསང་སྔགས་ཀྱི་ནང་གི་རྒྱུད་སྡེ་དང་འབྲེལ་བའི་སྐབས་སུ་གོ་དོན་གཅིག་པ་ཡིན་ནོ། །མ་ཧཱ་ཀྲོ་ཏ་ཁྲོ་བོ་ཆེན་པོ། མ་ཧཱ་ཤྲཱི་ཧེ་རུ་ཀ་ཞེས་པ་དཔལ་ཁྲོ་བོ་ཆེན་པོ་ཧེ་རུ་ཀ་ཞེས་པ་ལྟ་བུ་ཡིན་ཞིང་། ཧཱུྃ་རྩ་བའི་ས་བོན་དང་། ཕཊ༔གས་པར་གྱིས་ཤིག་གམ་དུམ་བུར་གཏོང་བའི་དོན་ཡིན་ནོ། །མ་ཧཱ་ཀྲོ་ཏི་ཤྭ་རི་སྟྭཾ༔ཞེས་པའི་ཤྭ་རི་དབང་ཕྱུག་མ་སྟེ་ཁྲོ་མོ་ཆེན་མོ་དབང་ཕྱུག་མ་ཞེས་པའི་དོན། སྟྭཾ་གོང་ནས་ཞུས་པ་བཞིན་འདུད་པའི་དོན་ཅན་ཞི་བའི་སྐབས་དང་གཅིག་ཡིན་ནོ། །འདི་མན་ཆད་ཀྱི་ཁྲོ་བོའི་བཟླས་སྔགས་འདི་གསང་བ་གསུམ་དང་སྦྱར་ན་ཨོཾ་རྣམས་སྐུ། སྔགས་དངོས་གཞི་རྣམས་གསུང་། ཧཱུྃ་རྣམས་ཐུགས་ཡིན་པར་གསུངས། གཙོ་བོ་བུདྡྷ་ཧེ་རུ་ཀ་ནི་ཨོཾ་བུདྡྷ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བུདྡྷ་ཀྲོ་ཏ་ཤྭ་རི་སྟྭཾ༔ཞེས་སྔགས་དོན་བཤད་ན་བུདྡྷ་སངས་རྒྱས། དེ་མིན་པ་གོང་དང་འདྲའོ། །ལས་བྱང་ཆུང་བའི་ནང་ཆེ་མཆོག་ཧེ་རུ་ཀ་མེད་པའི་རྒྱུ་མཚན་ནི་དམ་པ་རིགས་བརྒྱར་བསྡུ་བའི་ཕྱིར་དུ་ཆེ་མཆོག་བུདྡྷ་ཧེ་རུ་ཀར་བསྡུས་པ་ཡིན་ཞིང་། དེ་འཕྲོས་ཤར་ཕྱོགས་ཀྱི་རྡོ་རྗེའི་རིགས་ནས་རིན་ཆེན་པདྨ་རྒྱ་གྲམ་ལ་སོགས་པ་ཞི་བའི་ལྷ་ཚོགས་ཁྲོ་བོར་སྣང་བ་ཙམ་གྱི་གོ་བས་རིགས་འགྲེ་དགོས་སོ། །ཨོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བཛྲ་ཀྲོ་ཏི་ཤྭ་རི་སྟྭཾ༔ ཨོཾ་རཏྣ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ རཏྣ་ཀྲོ་ཏི་ཤྭ་རི་སྟྭཾ༔ ཨོཾ་པདྨ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ པདྨ་ཀྲོ་ཏི་ཤྭ་རི་སྟྭཾ༔ ཨོཾ་ཀརྨ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ ཀརྨ་ཀྲོ་ཏི་ཤྭ་རི་སྟྭཾ༔ ད་ནི་གནས་ཀྱི་མ་མོ་བརྒྱད་ཀྱི་སྔགས་ཡིན་ཞིང་། འདི་མན་གྱི་ཨོཾ་རྣམས་གོང་བཞིན་དུ་མགོ་ལེན་གྱི་སྔགས། བཛྲ་རྣམས་རྡོ་རྗེ། འདིའི་སྐབས་སུ་བཛྲ་དབང་དྲག་གི་ལས་ལ་འཇུག སྔགས་ཀྱི་ཚིག་གཅིག་ཡིན་རུང་མཚམས་མཚམས་སུ་གོ་བའི་ཁ་སྒྱུར་དགོས་ཞུས་པ་དེ་ཉིད་ཡིན་ཞིང་། ཧ་རྣམས་རྩ་བའི་ས་བོན་ཡིན་ནོ། །ཨོཾ་བཛྲ་ཀོོ་རཱི་ཧ༔ཀོོ་རཱི་དཀར་མོ་མཛོད་བདུན་མ། ཨོཾ་བཛྲ་ཙོོ་རཱི་ཧ༔ཙོོ་རཱི་ཆོམ་རྐུན་མ། ཨོཾ་བཛྲ་པྲ་མོ་ཧཱེ་ཧ༔པྲ་མོ་ཧ་རབ་རྨོངས་མ། ཨོཾ་བཛྲ་བེ་ཏ་ལཱི་ཧ༔བེ་ཏ་ལཱི་རོ་ལངས་མ། ཨོཾ་བཛྲ་པུསྐ་སཱི་ཧ༔པུསྐ་སཱི་སྦོས་མོ། ཨོཾ་བཛྲ་ཀསྨ་རཱི་ཧ༔སྨེ་ཤ་ཅན། ཨོཾ་བཛྲ་ཙནྡྷ་ལཱི་ཧ༔གཏུམ་མོ། ཨོཾ་བཛྲ་སྨེ་ཤ་ནི་ཧ༔དུར་ཁྲོད་མ། འདི་རྣམས་ཧ་བརྒྱད་ཀྱི་ས་བོན་ལས་བསྐྱེད་པའི་གནས་ཀྱི་མ་མོ་བརྒྱད་ཡིན་ནོ། །ད་ནི་ཧེ་བརྒྱད་ཀྱི་ས་བོན་ལས་བསྐྱེད་པའི་ཡུལ་གྱི་ཕྲ་མེན་བརྒྱད་ཀྱི་སྔགས་ནི། ཨོཾ་བཛྲ་སེང་ཧ་མུ་ཁཱ་ཧེ༔སེང་གདོང་མ། ཨོཾ་བཛྲ་བྱ་ཀྲི་མུ་ཁཱ་ཧེ༔སྟག་གདོང་མ། ཨོཾ་བཛྲ་སྲི་ལ་མུ་ཁཱ་ཧེ༔ཝ་གདོང་མ། ཨོཾ་བཛྲ་ཤྭ་ན་མུ་ཁཱ་ཧེ༔སྤྱང་གདོང་མ། དེ་ཡིས་ཟ་བྱེད་མཆེ་བ་ཅན་བཞི་སོང་ལ། ཨོཾ་བཛྲ་ཀྲྀ་ཏ་མུ་ཁཱ་ཧེ༔བྱ་རྒོད་གདོང་མ། ཨོཾ་བཛྲ་ཀང་ཀ་མུ་ཁཱ་ཧེ༔དུར་བྱ་ཡི་གདོང་མ། ཨོཾ་བཛྲ་ཁ་ཁཱ་མུ་ཁཱ་ཧེ༔བྱ་རོག་གི་གདོང་མ། ཨོཾ་བཛྲ་ཧུ་ལཱུ་མུ་ཁཱ་ཧེ༔འདི་མཚམས་མཚམས་སུ་ཧུ་ལཱུ་ཀ་མུ་ཁཱ་ཧེ་གསུངས་ས་ཡང་ཡོད་ཅིང་། འདི་འུག་གདོང་མ་ཡིན་ལ། དེས་གསོད་བྱེད་གཤོག་པ་ཅན་བཞིས་ཡུལ་གྱི་ཕྲ་མེན་མ་མོ་བརྒྱད་ཡིན་ནོ། །སྒོ་མ་བཞི་ནིཨོཾ་བཛྲ་ཨཾ་ཀུ་ཤ་ཛཿསོགས་གསུངས་ཏེ་འདིའི་སྔགས་མཇུག་གི་ཛཿཧཱུྃ་བཾ་ཧོ་བཞི་བོ་ས་བོན་གྱི་སྔགས་ཡིན་ལ། ཨོཾ་བཛྲ་ཨཾ་ཀུ་ཤ་ཛཿརྟ་གདོང་ལྕགས་ཀྱུ་མ། ཨོཾ་བཛྲ་པ་ཤ་ཧཱུྃ༔ཕག་གདོང་ཞགས་པ་མ། ཨོཾ་བཛྲ་སྥོ་ཊ་བཾ༔སེང་གདོང་ལྕགས་སྒྲོག་མ། ཨོཾ་བཛྲ་གྷནྡྷེ་ཧོ༔སྦྲུལ་གདོང་དྲིལ་བུ་མ་དེ་རྣམས་ཡིན་ནོ། །འདིའི་མཚམས་སུ་དབང་ཕྱུག་མ་ཉེར་བརྒྱད་ལ་ཐུག་ཡོད་ལ། དབང་ཕྱུག་མ་ཉེར་བརྒྱད་ཀྱི་སྔགས་མཇུག་གི་བྷྱོ་རྣམས་ས་བོན་གྱི་ཡི་གེ་ཡིན་ནོ། །དང་པོ་ཤར་གྱི་དཀར་མོ་མ་བདུན་ནི། ཨོཾ་མ་ནུ་རཀྵ་སཱི་བྷྱོ༔འདི་སྲིན་མོ་ཆེན་མོ་མིའི་སྲིན་མོ་ཡིན། ཨོཾ་པྲ་མ་ནཱི་བྷྱོ༔ཚངས་མ། ཨོཾ་རེའུ་ཏྲི་མ་བྷྱོ༔དབང་མོ། ཨོཾ་བྷ་ན་བྷྱ་བྷྱོ༔གཏོག་འདོད་སྲེ་གདོང་ཅན་ཁྱབ་འཇུག་གི་ཆུང་མ། ཨོཾ་ཀིའུ་རཱི་མ་བྷྱོ༔གཞོན་ནུ་དྲེད་གདོང་སྨིན་དྲུག་གི་ཆུང་མ། ཨོཾ་ཨིནྡྲ་ཡ་ནི་བྷྱོ༔བརྒྱ་བྱིན་གྱི་ཆུང་མ། དེ་ལྟར་བསྐྱེད་ཆོག་ལྟར་དུ་སྦྱར་རྒྱུ་ཡིན་ནོ། །ཨོཾ་སེང་ཧ་ཀ་ལ་ནི་བྷྱོ༔ ཨོཾ་ཨ་མྲྀ་ཏཾ་བྷྱོ༔ ཨོཾ་སིའུ་ནི་བྷྱོ༔ ཨོཾ་ཏ་ན་ཏཾ་བྷྱོ༔ ཨོཾ་རཀྴ་སི་བྷྱོ༔ ཨོཾ་བག་ཤ་སཱི་བྷྱོ༔ ཨོཾ་ར་ཏྲི་མ་བྷྱོ༔ ཨོཾ་རེ་ཏྲི་རེ་མ་ཏྲི་བྷྱོ༔ ཨོཾ་ཨེ་ཀ་ཙ་ར་མ་བྷྱོ༔ ཨོཾ་མ་ནུ་ཧ་ར་མ་བྷྱོ༔ ཨོཾ་སི་ཏི་ཀ་བྷྱོ༔ ཨོཾ་བཱ་ཡ་བཱེ་བྷྱོ༔ ཨོཾ་མ་ཧཱ་མཱ་ར་ན་བྷྱོ༔ ཨོཾ་ཨགྣེ་ཡེ་བྷྱོ༔ ཨོཾ་པཱ་ར་ཧཱི་བྷྱོ༔ ཨོཾ་ཙ་མུན་ཏྲི་བྷྱོ༔ ཨོཾ་པུ་ཏ་ནཾ་བྷྱོ༔ ཨོཾ་པ་ནཱི་བཛྲ་བྷྱོ༔ ཨོཾ་བཛྲ་མ་ཧཱ་ཀཱ་ལ་བྷྱོ༔ ཨོཾ་ཙ་ཀཱ་ལ་བཛྲ་བྷྱོ༔ ཨོཾ་བཛྲ་བུམ་པ་ཀ་ར་ན་བྷྱོ༔ ཨོཾ་བཛྲ་ལཾ་པོ་དྷ་རཱ་ན་བྷྱོ༔ ལས་བྱང་ཆུང་བའི་བསྐྱེད་ཆོག་གི་ནང་ན་ཕྱོགས་རེར་དབང་ཕྱུག་མ་དྲུག་རེ་རྡོ་རྗེ་ཁུ་བྱུག་མ་དང་ར་གདོང་མ་ལ་སོགས་པ་བཞི་ཡང་ཕྱོགས་བཞི་ལ་ཁ་ཁར་བྱས་ནས་གསུངས་པས་མདོར་ན་ཉེར་བརྒྱད་ཡིན་ལུགས་འདྲ་ལ། ཡིག་བརྒྱའི་སྔགས་དོན་ཁ་རྩང་བཤད་པ་ལྟར་ཡིན་ཞིང་། ཕྲིན་ལས་ཀྱི་ཁ་སྒྱུར་སྐབས་ལས་བཞིའི་སྔགས་ནད་གདོན་བར་ཆད་སྒྲིབ་གཉིས་བག་ཆགས་དང་བཅས་པ་ཐམས་ཅད་ཤནྟིཾ་ཀུ་རུ་ཡེ་སྭཱ་ཧཱ༔འདིའི་སྔགས་དོན་ཞི་བར་གྱུར་ཅིག་ཅེས་པའི་དོན་ཡིན། ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་པུཥྚིཾ་ཀུ་རུ་ཡེ་སྭཱ་ཧཱ༔འདི་འཕེལ་བར་གྱུར་ཅིག་ཅེས་པའི་དོན། ལྷ་འདྲེ་མི་གསུམ་ཟས་ནོར་ལོངས་སྤྱོད་ཐམས་ཅད་ཝཱ་ཤཾ་ཀུ་རུ་ཡེ་སྭཱ་ཧཱ༔འདི་དབང་དུ་གྱུར་ཅིག་གི་དོན། གནོད་བྱེད་དགྲ་བགེགས་དུག་ལྔ་དུག་གསུམ་ཐམས་ཅད་མཱ་ར་ཡ་ཕཊ༔རྡུལ་དུ་རློག་ཅིག་ཅེས་པའི་དོན། ཅེས་པ་རྣམས་རིམ་པ་ལྟར་སྔགས་ཤམ་དུ་འདོག་ཅིང་དམིགས་རིམ་བསྒྱུར་ཏོ༔ ཞེས་ཏེ་རྩ་སྔགས་བོ་དྷི་ཙིཏྟའི་མཇུག་ལ་བཏག་ནས་ལས་བཞིའི་དམིགས་པ་སོ་སོར་ཁར་བསྒྱུར་དེ་གསུངས་པ་ཡིན་ནོ། །ཡང་ན་ལྷ་ཚོགས་ཐམས་ཅད་ཀྱི་ཐུགས་ཀར་ཧཱུྃ་ཡིག་གསལ་བས་འོད་ཟེར་འཕྲོ་འདུ་ལ་དམིགས་ཏེ་ཧཱུྃ་གི་བཟླས་པ་བྱ་བ་རང་གཞུང་གི་དགོངས་པ་ཡིན་པས་གང་འོས་བཟླའོ༔ཞེས་གསུངས་ཏེ། ཧཱུྃ་བཟླས་འདི་ལས་བྱང་གཞུང་ནས་དམིགས་པ་འདི་ཙམ་མ་གཏོགས་མ་གསུངས་ལ། བསྙེན་ཡིག་དང་། དཀྱིལ་ཆོག རིགས་མཐུན་གྱི་ཆོ་ག་གཞན་ལ་བལྟ་རྒྱུ་མ་བྱུང་མོད་ཧཱུྃ་ཡིག་འདི་བདེ་བར་གཤེགས་པ་ཐམས་ཅད་ཀྱི་ཐུགས་སྲོག་གི་སྙིང་པོ་ཐུགས་རྡོ་རྗེ་འགྱུར་བ་མེད་པ་ཞི་ཁྲོ་ཀུན་འདུས་ཀྱི་ངོ་བོ་རྡོ་རྗེ་སེམས་དཔའི་ཐུགས་སྲོག་ཡིན་ཞིང་། དེས་ན་ལས་བཞི་མཆོག་དང་ལྔ་ཡི་ཕྲིན་ལས་ཐམས་ཅད་ཀྱི་འཕྲོ་གཞི་མིན་པའི་ཐབས་མེད་དོ།། ཁ༽ སྤྱི་དོན་དམིགས་གནད་བཤད་པ། དེ་ལྟར་ན་ལྷ་ཚོགས་ཐམས་ཅད་ཀྱི་ཐུགས་ཀར་ཧཱུྃ་ཡིག་གསལ་ནས་འོད་ཟེར་འཕྲོ་འདུ་བྱེད་པའི་སྐབས་སུ་སྲོག་སྡོམ་གཟེར་བཞི། རྫོང་འཕྲང་སྲོག་གསུམ་གྱི་བསྐྱེད་རྫོགས་ཀྱི་གནད་འདུས་པའི་དགོངས་དོན་བཅང་ས་ལ་ལྷག་པར་དུ་ཁེལ་བ་ཡིན་ལ། དེས་ན་འདི་དང་འབྲེལ་ནས་སྤྱིའི་གོ་དོན་གྱི་ཐོག་ནས་ཕྲན་བུ་ཞིག་ཞུས་ན་བསམ། གསང་སྔགས་རྡོ་རྗེའི་ཐེག་པའི་ལམ་ནས་ཚེ་ལུས་གཅིག་གིས་རྣམ་གྲོལ་སངས་རྒྱས་ཀྱི་སར་བགྲོད་ཐུབ་ཅིང་། དེ་ལྟར་བགྲོད་ཐུབ་པའི་གསང་སྔགས་རྡོ་རྗེ་ཐེག་པའི་ལམ་དེ་ཐམས་ཅད་ཚུར་བསྡུས་ན་བསྐྱེད་རྫོགས་ཟུང་འཇུག་རྡོ་རྗེའི་ལམ་ལ་འདུས་སོ། །དེས་ན་བསྐྱེད་རྫོགས་ཟུང་འཇུག་ཅེས་པ་ཐབས་ཤེས་ཟུང་དུ་འཇུག་པ་ཞིག་ཡིན་པས་ཐབས་བསྐྱེད་པའི་རིམ་པ་དང་། ཤེས་རབ་རྫོགས་པའི་རིམ་པ་གཉིས་ཀ་ཡིན་ལ། དེའི་ནང་གི་ཐབས་བསྐྱེད་པའི་རིམ་པ་དེ་ལ་མཚོན་ན་སྲོག་སྡོམ་གཟེར་བཞིའི་ནང་དུ་མ་འདུས་པ་ཞིག་མེད་ཅིང་། བསྐྱེད་རིམ་གྱི་ལམ་ཐམས་ཅད་སྲོག་སྡོམ་གཟེར་བཞིའི་ནང་དུ་འདུས་པ་དང་། དེ་ཐམས་ཅད་མ་ཤེས་ན་བསྐྱེད་རིམ་གཏན་ནས་མ་ཤེས་པ་ཡིན་ཟེར་ཆོག་གོ། །བསྐྱེད་རིམ་བཤད་སྐབས་མར་གྱི་འཁོར་བ་དང་གནས་ཚུལ་མཐུན་པ་ཞིག་གི་སྒོ་ནས་གསུངས་ཡོད་ཅིང་། བདག་སྲས་དང་གཞན་སྲས་ལ་སོགས་པ་སྐྱེ་གནས་རྣམ་པ་བཞི་དང་སྒོ་བསྟུན་ནས་གསུངས་ལ། དེ་ལོས་གསུངས་འུ་ཚོ་འཁོར་བ་ན་གནས་པའི་སེམས་ཅན་གྱིས་འཁོར་བའི་བག་ཆགས་སྦྱང་ཞིང་དག་དགོས་པས་སོ། །དེ་དག་པའི་ཐོག་ནས་ཡར་མྱང་འདས་དང་བཞུགས་ཚུལ་མཐུན་པར་གསུངས་ཡོད་ཅིང་། དེ་གསུངས་ལོས་དགོས་སངས་རྒྱས་ཀྱི་མཛད་པ་ལམ་དུ་བྱས་ནས་འབྲས་བུ་གཞི་ལ་རྫོགས་དགོས་པས་ཡིན་ལ། དེ་དང་མཉམ་དུ་བསྐྱེད་རིམ་དེ་ཡང་རྫོགས་རིམ་དང་མཐུན་པར་ཆོས་ཉིད་སྐྱེ་མེད་ཀྱི་ཀློང་དུ་ལ་བཟླ་དགོས་པས་རྫོགས་སྨིན་སྦྱངས་གསུམ་དེ་ལྟར་ཚང་དགོས་ན་རིམ་གཉིས་ཟུང་འཇུག་གི་ལམ་གྱི་སྨིན་བྱེད་དེ་ལ་བརྟེན་ཏེ་དེ་ལྟ་བུའི་དག་རྫོགས་སྨིན་བྱེད་ཚང་བའི་ཐོག་ནས་གཟེར་བཞི་དང་པོར་བཤད་ནས་དེའི་རྗེས་སུ་སྲོག་སྡོམ་ལུགས་དེ་ཤེས་དགོས་སོ། །གཟེར་བཞི་གང་ཡིན་ཞེ་ན། ཏིང་འཛིན་ལྷའི་གཟེར། སྙིང་པོ་སྔགས་ཀྱི་གཟེར། དགོངས་པ་མི་འགྱུར་བའི་གཟེར། འཕྲོ་འདུ་ཕྲིན་ལས་ཀྱི་གཟེར་རྣམས་ཡིན་ནོ། །གཟེར་ཞེས་པ་ཡིག་སྐད་ཡིན་ལ་དོན་ལ་འུ་ཚོའི་ཁ་སྐད་ལ་འཛེར་ཞེས་པའི་དོན་ཡིན་ཞིང་། མདོར་ན་མི་འགྱུར་བ་བརྟན་པར་བྱས་པའི་དོན་ཡིན་ནོ། །དེ་ལྟར་ན་གཟེར་བཞིའི་ནང་གི་ཏིང་འཛིན་ལྷ་ཡི་གཟེར་ཞེས་པ་ནི་ཏིང་འཛིན་རྣམ་པ་གསུམ་རང་རེས་གོང་ནས་བཤད་ཟིན་པའི་དེ་བཞིན་ཉིད་ཀྱི་ཏིང་ངེ་འཛིན། ཀུན་སྣང་གི་ཏིང་ངེ་འཛིན། རྒྱུའི་ཏིང་ངེ་འཛིན་དང་གསུམ་ལ་གཞིར་བྱས་ནས་སྐྱེ་གནས་བཞིའི་བག་ཆགས་སྦྱངས་པ་དང་མཉམ་དུ་ཕྱི་སྣོད་གཞལ་ཡས་ཁང་དང་ནང་བཅུད་ལྷ་རུ་གསལ་དགོས་ཤིང་། དེ་ལྟར་གསལ་བ་ཡང་སྣང་སྟོང་ཟུང་དུ་འཇུག་པ་མ་འདྲེས་ཡོངས་རྫོགས་སུ་གསལ་དགོས་པ་དེ་ཡིན་ནོ། །སྙིང་པོ་སྔགས་ཀྱི་གཟེར་ཞེས་པ་ནི་ལྷ་ཚོགས་གང་གསལ་ཡང་སེམས་དཔའ་སུམ་བརྩེགས་ཏེ་བདག་དམ་ཚིག་སེམས་དཔའ། ཐུགས་ཀར་ཡེ་ཤེས་སེམས་དཔའ། དེའི་ཐུགས་ཀར་ཏིང་འཛིན་སེམས་དཔའ་ཐུགས་སྲོག་ཡི་གེའི་རིམ་པ་བསྒོམས་ཏེ་བཟླས་པ་ངག་གི་སྔགས་བཟླས་སྐབས་ཐུགས་སྲོག་གི་སྔགས་ཕྲེང་འཁོར་བ་ལ་དམིགས་དགོས་སོ། །དེ་ཡང་གྲངས། དུས། མཚན་མ་དང་སྦྱར་ཏེ་འབྲུ་འབུམ་དང་བྱེ་ཆུང་ལ་སོགས་པ་ལྟ་བུའི་གྲངས། ལོ་དང་ཟླ་བ་ཞག་ལ་སོགས་པའི་ཁ་གྲངས་ངེས་པ་ལྟ་བུ་དུས། ལྷ་འགྲུབ་པའི་རྟགས་ཞལ་གཟིགས་པ་ལ་སོགས་པ་གྲུབ་པའི་མཚན་མ་མཐོང་བ་མཚན་མ་སྟེ་དེ་ལྟ་བུའི་བར་དུ་སྒྲུབ་རྒྱུ་ལ་སོགས་པ་དེ་ཡིན་ནོ། །དགོངས་པ་མི་འགྱུར་བའི་གཟེར་དེ་ནི་ཆོས་ཉིད་ཀྱི་ལྟ་བས་རྩིས་ཟིན་པར་བྱེད་པ་དེ་ཡིན་ཞིང་། སྣང་གྲག་སྣོད་བཅུད་ཐམས་ཅད་ལྷ་དང་གཞལ་ཡས་སུ་ལྷུན་གྱིས་གྲུབ་པར་གསལ་བ་དེ་ཡང་ཆོས་ཉིད་དག་མཉམ་ཆེན་པོའི་རང་རྩལ་སྣང་སྲིད་གཞིར་བཞེངས་ཀྱི་དཀྱིལ་འཁོར་དམ་ཡེ་བསྒྲུབ་བྱ་དང་སྒྲུབ་བྱེད་ཀྱི་གཉིས་འཛིན་སྤངས་པའི་གཉིས་མེད་མཉམ་པ་ཆེན་པོའི་འཁོར་འདས་ཡེ་སངས་རྒྱས་པའི་དཀྱིལ་འཁོར་དུ་ཤེས་པ་དེ་ཡིན་ནོ། །དེའི་སྟེང་དུ་འཕྲོ་འདུ་ཕྲིན་ལས་ཀྱི་གཟེར་ནི་ཐུགས་ཀའི་སྔགས་ཕྲེང་ལས་འོད་ཟེར་འཕྲོས་དོན་གཉིས་བསྒྲུབས་པ་སྟེ། ཕྱོགས་བཅུ་རྒྱལ་བ་སྲས་བཅས་ཀྱི་ཞིང་ཁམས་ན་བཞུགས་པའི་དཀྱིལ་འཁོར་གྱི་འཁོར་ལོ་ལ་མཆོད་བྱ་དང་མཆོད་བྱེད་གཉིས་སུ་མེད་པའི་བདེ་སྟོང་ཡེ་ཤེས་ཀྱི་མཆོད་པ་ཕུལ། གཞན་སྣང་གནས་དོན་ལུས་སུ་ཨ་འཐས་ནས་འཁྲུལ་བའི་དབང་དུ་གྱུར་པའི་འགྲོ་བའི་དོན་བྱས། དེ་དག་གི་སྡིག་སྒྲིབ་སྦྱངས། སྲིད་པ་མིང་མེད་དུ་དག་ནས་སངས་རྒྱས་ཀྱི་སར་འགོད་རྒྱུའི་དོན་གཉིས་ལྷུན་གྲུབ་ཀྱི་རྣལ་འབྱོར་དེ་ལྟ་བུ་ཞིག་ཡིན་ནོ། །དེ་ལྟ་བུའི་གཟེར་བཞི་དེ་ལྟ་སྒོམ་སྤྱོད་འབྲས་བཞི་ཡང་ཡིན་ཏེ། དགོངས་པ་མི་འགྱུར་བའི་གཟེར་ལྟ་བ་ཡིན། དེ་ཡིན་པས་ན་གཞི་ལམ་འབྲས་གསུམ་ཡང་དེ་བཞིན་དུ་ཡིན་ལ། ཏིང་འཛིན་ལྷ་ཡི་གཟེར་དེ་སྒོམ་པ་ཡིན་པ་དང་། སྙིང་པོ་སྔགས་ཀྱི་གཟེར་དེ་སྒོམ་པ་དང་སྤྱོད་པ་གཉིས་ཀ་ཡིན་ཞིང་། དེ་ལམ་ཡང་ཡིན་ནོ། །འཕྲོ་འདུ་ཕྲིན་ལས་ཀྱི་གཟེར་དེ་འབྲས་བུ་ཡིན་ལ། འབྲས་བུ་ཡིན་པའི་རྒྱུ་མཚན་ནི་མཆོག་ཐུན་གྱི་ཕྲིན་ལས་བསྒྲུབས་ནས་སངས་རྒྱས་ཀྱི་ཕྲིན་ལས་ད་ལྟ་ནས་ལམ་དུ་བྱེད་པས་ཡིན་ནོ། །སྲོག་སྡོམ་གཟེར་བཞི་ལྟ་སྒོམ་སྤྱོད་གསུམ་གཞི་ལམ་འབྲས་གསུམ་གང་ནས་བཤད་ཀྱང་དེ་རྣམས་ཐ་དད་དང་ཡ་བྲལ་རེས་འཇོག་ཅན་མ་ཡིན་པར་དབྱེར་མེད་ཟུང་འཇུག་ཏུ་ཤེས་དགོས་སོ། །དེས་ན་སྲོག་སྡོམ་གཟེར་བཞི་ཟེར་ན་གཟེར་དེ་ལྟར་ཡིན་ན་སྲོག་ཇི་ལྟར་སྡོམ་ཞེ་ན། གཞི་ལྟ་བས་འཁོར་འདས་མཉམ་ཉིད་དུ་རྟོགས་ནས་སྲིད་དང་ཞི་བ་གཉིས་ཀའི་སྲོག་ལ་དབང་བསྒྱུར། ལམ་སྒོམ་པས་ལྷ་སྔགས་ཆོས་ཉིད་ཀྱི་འཁོར་ལོའི་སྒོ་ནས་བསྐྱེད་རྫོགས་གཉིས་ཀྱི་སྲོག་ལ་དབང་བསྒྱུར། འབྲས་བུ་དོན་གཉིས་ལྷུན་གྲུབ་ཀྱི་སྤྱོད་པས་ཐབས་ཆེན་བསམ་གྱིས་མི་ཁྱབ་པའི་སྲོག་འཕྲོག་པ་དེ་དཔེར་བཞག་ན་གཟའ་སྒྲ་གཅན་གྱིས་ནམ་མཁའི་ཟླ་བ་གཅིག་ཟིན་ཚེ་ཆུ་ནང་གི་ཟླ་གཟུགས་ཇི་སྙེད་པོ་རང་ཤུགས་ཀྱིས་ཟིན་པ་དང་འདྲ་བར་སྲོག་སྡོམ་གཟེར་བཞིའི་མན་ངག་གི་གནད་གཅིག་ཤེས་དུས་མདོ་རྒྱུད་མན་ངག་གི་དགོངས་གནད་མང་པོ་ཞིག་མཉམ་དུ་ཟིན་ཡོད་དོ། །དེ་བཞིན་དུ་རྫོང་འཕྲང་སྲོག་གསུམ་གྱི་ཐོག་ནས་བཤད་ན་ཡང་བདག་ཉིད་ལྷ་ཡི་རྣལ་འབྱོར་དུ་གསལ་ཐེབས་པའི་བསྐྱེད་རིམ་གྱི་རྫོང་ཟིན་པར་བྱེད་པ་ལ་བྱིངས་རྒོད་དང་དམན་སེམས་ཀྱི་འཕྲང་ལས་གྲོལ་ནས་སྣང་སྟོང་ཟུང་འཇུག་ཆོས་ཉིད་འདུས་མ་བྱས་ཀྱི་གནས་ལུགས་ཇི་བཞིན་དུ་རྫོགས་རིམ་གྱིས་སྲོག་མཁར་དེ་ཚུགས་དགོས་ཤིང་། དེ་ཚུགས་པ་དེ་གལ་ཆེན་དོན་ཆེན་ཡིན་ལ། དེའི་ཕྱིར་ན་འདིའི་བསྐྱེད་རྫོགས་ལ་བསྐྱེད་རྫོགས་ཀྱི་གནད་དང་། བཟླས་པ། ཁྱད་པར་དུ་བཟླས་པའི་སྐོར་འདི་ནས་སྔོན་ཆད་སྒོམ་རིམ་གྱི་ཡིག་ཆ་འདྲ་མི་འདྲ་དང་། རིགས་མཐུན་གྱི་རྒྱུད་སྡེ་གཞན་དག་གི་ཕྱག་བཞེས་འདྲེས་སོང་བ་ལྟ་བུ་དེ་འདྲ་མང་པོ་ཡོད་པའི་རྒྱུ་མཚན་གྱིས་ཀཿཐོག་པ་ཀུན་གཟིགས་ཚེ་དབང་མཆོག་གྲུབ་ལ་སོགས་པའི་གསུང་ལས་དཔོག་ཐུབ་བོ། །གནད་ཀ་དེ་ལྟ་བུ་ལ་བརྟེན་ནས་ཞི་ཁྲོ་རང་རྐང་གི་བསྙེན་སྒྲུབ་ཡན་ལག་བཞིའི་གནད་ཚང་བའི་འཛབ་བཟླས་ཚངས་པའི་སྒྲ་དབྱངས་འཁོར་འདས་རང་གྲོལ་འདི་ཁམས་གྲུབ་དབང་རྫོགས་ཆེན་པའི་གདན་ས་འདིའི་ཕྱག་བཞེས་འཆུག་མེད་རྐང་ཐུབ་འཁྱེར་བདེ་བའི་ཆེད་དུ་ཚིག་ཉུང་དོན་འདུས་ཀྱི་ཐོག་ནས་དམ་པ་གོང་མ་ཚོས་གཏན་ལ་ཕབ་པས་མི་ཚད་ཡབ་སྲས་བརྒྱུད་པ་དང་བཅས་པས་བྱིན་གྱིས་བརླབས་པའི་བྱིན་རླབས་ཅན་ཡིན་ནོ། །དེས་ན་བྱིན་རླབས་མ་ཉམས་པའི་བརྒྱུད་པའི་ཕྱག་བཞེས་འདི་ལ་ད་ལྟའི་བར་དུ་ཕྱག་ལེན་དུ་འདེབས་པ་འདི་བཞིན་ཡིན་ལ། དེ་ལྟར་ན་ས་ཆ་གཞན་པའི་མི་རྣམས་ཀྱིས་ཐོས་གྲོལ་འདི་ལ་ཀཿཐོས་རེད་དམ་རྫོགས་ཐོས་རེད་ཅེས་དབྱེ་བ་ཕྱེ་བ་འདི་འདི་ཚོའི་ཐད་ནས་ཡིན་པ་དང་། སྤྱིར་བཏང་གི་མི་མང་ཆེ་བ་མ་དགོས་དང་གྲྭ་བ་མང་ཆེ་བ་སྡེ་སྣོད་གསུམ་གྱི་སྤོང་ཀློག་བྱེད་མཁན་ཤ་སྟག་མ་ཡིན་ཞིང་། མཐོང་བརྒྱུད་ཀྱི་ཕྱག་ལེན་འདིའི་ཐད་ནས་ཆོས་བརྒྱུད་ཀྱི་དབྱེ་བ་ཕྱེ་བྱེད་བྱེད་ཀྱིན་ཡོད་པས། དེ་ཡང་རྒྱུ་མཚན་མེད་པ་མ་ཡིན་ནོ། །སྔ་འགྱུར་བཀའ་གཏེར་གྱི་བརྒྱུད་པ་དེ་ལ་བཀའ་མ་ལ་མཚོན་ན་བརྒྱུད་པ་གསུམ་ལྡན་ཟེར་ཞིང་། གཏེར་མ་ལ་བརྒྱུད་པ་དྲུག་ལྡན་དང་དགུ་ལྡན་ལ་སོགས་པ་ཟེར་རོ། །དེས་ན་རྒྱུད་སྡེ་དང་སྒྲུབ་སྡེ་གཉིས་ཀ་མི་འབྲེལ་བ་ཞིག་མ་ཡིན་ཏེ། རྒྱུད་སྒྲུབ་ཐབས་དང་འབྲེལ། སྒྲུབ་ཐབས་མན་ངག་དང་འབྲེལ། མན་ངག་ཆོག་ཁྲིགས་དང་འབྲེལ། ཆོག་ཁྲིགས་ཕྱག་བཞེས་དང་འབྲེལ་ཞེས་ནམ་རྒྱུན་ཞུ་བཞིན་པ་དེ་ཡིན་ནོ། །མཐོང་བརྒྱུད་ཀྱི་ཕྱག་ལེན་ཆོས་བརྒྱུད་རང་གི་ལུགས་མི་འཕྱུག་པ་ནི་ཁུངས་བརྒྱུད་པའི་བྱིན་རླབས་མི་འཁྱར་བ་ལ་ཐུག་ཡོད་དོ། །དེ་ཅི་ཕྱིར་དུ་བཤད་ཅེ་ན། འཛབ་བཟླས་ཀྱི་སྐབས་སུ་ཐོན་དུས་ལྷ་ཚོགས་ཞི་བ་ཟེར་མཁན་ཡོད་ཚད་རྫོགས་ལུགས་ཀྱི་བརྒྱུད་པ་ལས་མཆེད་པ་ཡིན་པའི་རྟགས་བསྟན་པ་ཡིན་ལ། ཕྱག་ལེན་ཅུང་ཟད་འདྲ་མི་འདྲ་རེ་ཉེ་བའི་དགོན་ལག་ངོ་མ་ཡིན་ཡང་དར་སྲོལ་གྱི་དབང་གིས་ཁྱད་པར་ཆུང་ཙམ་རྒྱུགས་ཡོད་ཅིང་། གཙོ་ཆེ་བ་བརྒྱུད་སྲོལ་གྱི་རིམ་པ་དང་། བསྐྱེད་རྫོགས་ཀྱི་འགྲོས། ཆོ་གའི་སྙིང་པོ་འཛབ་བཟླས་བསྙེན་སྒྲུབ་ཡན་ལག་བཞིས་གཞུང་སྲོང་ལུགས་དེ་ཚོ་གལ་ཆེའོ། །ཆུང་ས་ནས་བྱང་འདྲེན་པས་ཚིག་མགོ་ལེན་ལུགས་ལ་ས་ཆའི་སྐད་གདངས་ཀྱི་ངག་གཤིས་ཀྱིས་འདྲ་མི་འདྲ་ཡོད་རྒྱུ་དང་། ཕྱག་ལེན་གྱི་ཐད་ནས་དཔེར་བཞག་ན་ཕྱག་འཚལ་སའི་རིགས་ཤིག་ཡིན་ན་ས་ཆ་གཅིག་ནས་ཐལ་སྦྱར་མཛད་རྒྱུ་ཡོད་ན་ས་ཆ་གཅིག་ནས་ལས་རྡོར་ཡར་ལངས་ནས་ཕྱག་འཚལ་རྒྱུ་དེ་ཚོ་སྤྲོས་པ་ཆེ་ཆུང་དང་གྲྭ་ས་ཆེ་ཆུང་གི་ཚོགས་སྒྲིགས་ལ་ལྟོས་ས་ལྟོས་འཇོག་གི་ཁྱད་པར་ཙམ་རེ་རེད་མ་གཏོགས་པའི་གཞན་གྱི་ཁྱད་པར་ཆེན་པོ་རྩ་བའི་དོན་དག་འཕྱུགས་སོང་བ་ཞིག་མ་ཡིན་ནོ། །དེས་ན་སྐབས་ཐོབ་ཀྱི་བཤད་བྱ་གང་ཡིན་ན་བཟླས་པའི་སྐབས་སུ་བསྙེན་སྒྲུབ་ཡན་ལག་བཞི་བོ་བཟླས་དམིགས་འཁོར་འདས་རང་གྲོལ་འདི་ལ་ཚང་བ་ཡིན་ཞིང་། བསྙེན་ཡིག་གཞན་དག་ལག་ལ་ཡོང་ཡང་མ་ཡོང་ལ། དགོས་ཀྱང་མི་དགོས་སྙམ། གཞན་པ་ཞིག་ཁྱེར་ནས་འགེབས་མི་དགོས་པ་དང་། འདི་རང་ལུགས་བརྒྱུད་པའི་ཕྱག་བཞེས་ཆ་ཚང་གནད་འདུས་ཡིན་པས་འདིའི་ཐོག་ནས་གོ་དོན་འཇག་དགོས་སོ། །བསྙེན་པ། ཉེ་བསྙེན། སྒྲུབ་པ། སྒྲུབ་ཆེན་ཏེ་བསྙེན་སྒྲུབ་ཡན་ལག་བཞི་ཡིན་ལ། ལྷ་ཚོགས་ཞི་བ་རྣམས་ཀྱི་ཐུགས་ཀར་ཟླ་བ་དང་ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་ལ་རང་སྲོག་ས་བོན་གྱི་མཐར་ཞི་བ་ལ་བོ་དྷི་ཙིཏྟ་དང་ཁྲོ་བོ་ལ་རུ་ལུའི་སྔགས་སམ་རང་སྔགས་རྣམས་ཀྱིས་བསྐོར་ཞེས་པ་ཡན་ཆད་ཀྱིས་བསྙེན་པ་བསྟན་ལ། འུ་ཚོས་གཞུང་ཤིང་ངོས་ལ་དམིགས་རིམ་ཁོང་རྣམ་པས་ཆེད་དུ་བྲིིས་ཡོད་ས་ཡོད། དེའི་དམིགས་པ་དེ་དང་ལྡན་པའི་ཐོག་ནས་འུ་ཚོས་བསྙེན་པ་ཞག་བདུན་དུ་བྱེད་འཆར་ཡིན་པ་དང་། དེ་རིང་ཉིན་ལྔ་བ་ཡིན་ཞིང་། ཞག་བཞི་བ་ཡིན། དེ་ལྟ་བུའི་སྔགས་ཀྱིས་བསྐོར་བ་ལས་འོད་ཟེར་འཕྲོས། མདུན་བསྐྱེད་ཀྱི་ལྷ་ལ་ཕོག དེའི་ཐུགས་ཀ་ནས་འོད་ཟེར་འཕྲོས། དུས་གསུམ་བདེ་གཤེགས་རྣམས་ཀྱི་ཐུགས་རྒྱུད་བསྐུལ། བྱིན་རླབས་ཐམས་ཅད་འོད་ཕུང་གི་རྣམ་པ་སྔགས་ཕྲེང་ལ་ཐིམ་འོད་ཟེར་འབར་ཞེས་པ་འདི་ཡན་ཆད་དམིགས་པ་དང་སྦྲེལ་ནས་བཟླ་རྒྱུ་དེ་ལ་ཉེ་བསྙེན་ཟེར་རོ། །འདི་བདག་དོན་དུ་བྱིན་རླབས་བསྡུ་བའི་དམིགས་པ་ཡང་ཡིན་ཞིང་། འདི་ང་ཚོས་ཉི་མ་དྲུག་བྱས་ན་སྙམ་གྱིན་ཡོད། སླར་ཡང་ཐུགས་ཀའི་འོད་ཟེར་བཀའ་སྲུང་དམ་ཅན་རྣམས་ལ་ཕོག་འདི་ཁྱེད་རྣམ་པས་གསུངས་དུས་དེ་ཡན་ཆད་མ་གཏོགས་འདོན་མི་དགོས་པ་མ་ཡིན་ཡང་གཙོ་ཆེ་བའི་དམིགས་པའི་ཁ་བསྒྱུར་དེ་དེའི་མཚམས་མཚམས་སུ་ཚིག་ལྷུག་གི་དབྱེ་བ་ཕྱེ་མཚམས་དེའི་ཐོག་ཏུ་མདོ་མཚམས་ལྟ་བུ་ཕྱེ་དགོས་སོ། །སླར་ཡང་ཐུགས་ཀའི་འོད་ཟེར་བཀའ་སྲུང་དམ་ཅན་རྣམས་ལ་ཕོག་སྔོན་གྱི་དམ་བཅའ་དྲན་པས་ཅི་བསྒོ་བའི་ལས་ཐམས་ཅད་ཐོགས་མེད་དུ་སྒྲུབ་པར་བསམ་ཞེས་གསུངས་པ་འདི་ཡན་ཆད་བཀའ་སྲུང་ལས་ལ་བསྐུལ་བའི་དམིགས་པ་ཡིན་ནོ། །དེ་དང་སྦྲེལ་ནས་སེམས་ཅན་ཐམས་ཅད་ལ་འོད་ཟེར་ཕོག་པས་ཞེས་པ་དེ་གཞན་དོན་ཕྲིན་ལས་ཀྱི་དམིགས་པ་ཡིན་ཞིང་། སྣང་སྲིད་དག་པ་ཞེས་པ་ནས་བདག་གཞན་གཉིས་མེད་ཀྱི་བཟླས་དམིགས་ཡིན་ནོ། །གོང་གི་སླར་ཡང་ཐུགས་ཀའི་འོད་ཟེར་གསུངས་ས་ནས་སྣང་སྲིད་དག་པ་ལྷ་ཡི་ཞིང་དང་རྩ་བ་གསུམ་གྱི་རང་བཞིན་དུ་གྱུར་ཅེས་པའི་བར་དེ་སྒྲུབ་པ་སྟེ་བསྙེན་སྒྲུབ་ཡན་ལག་བཞིའི་ནང་གི་གསུམ་པ་དེ་ཡིན་ནོ། །སྒྲུབ་པ་འདི་ལ་ང་ཚོས་ཉི་མ་ལྔར་བྱས་ན་སྙམ་གྱིན་ཡོད། འདིའི་རྗེས་ནས་དངོས་གྲུབ་བསྐུལ་བའི་བཟླས་དམིགས་དང་སྦྲེལ་ནས་དངོས་གྲུབ་ལེན་པ་དེ་སྒྲུབ་ཆེན་ཡིན་ཞིང་། འདི་ཉི་མ་གསུམ་བྱས་ན་བདུན་གསུམ་ཉི་ཤུ་རྩ་གཅིག་གི་རིང་རང་རེའི་ད་རེས་ཀྱི་བསྙེན་སྒྲུབ་དབུ་འཛུགས་པའི་དུས་ཚོད་མི་རིང་མི་ཐུང་ལ། སྤྱིར་བཏང་གིས་བསྙེན་ཚད་ཚད་མཐུན་རྒྱས་པ་ཞིག་ལ་དེ་ཙམ་གྱིས་ག་ན་ཡོང་སྟེ་འབྲིང་དང་ཐ་མའི་བཟླས་གྲངས་ཀྱང་འགྲོ་དཀའ་ཡང་། འོན་ཀྱང་འདུས་པའི་བྱིན་རླབས། སྒྲུབ་གནས་ཀྱི་ཁྱད་པར། རྒྱུན་གྱི་ཉམས་ལེན་པ་ཐུགས་དམ་ཆགས་མེད་ཅན་ཡང་མང་པོ་ཡོད་པའི་ཚོམ་བུ་ཚོགས་སྒྲུབ་ཅིག་ཉིན་ཞག་བདུན་ལ་བསྙེན་སྒྲུབ་ཡན་ལག་བཞི་བོ་འགྲོ་བ་མ་ཟད་ཆོ་ག་ཉིན་ཆོག་ཅིག་ལ་ཡང་གནད་དང་དམིགས་པ་ཤེས་ན་ཚང་བ་ཡིན་ལ་ཚང་ཡང་དགོས་སོ། །དེ་ལྟར་ཡིན་ཕྱིར་ཁྱད་པར་དུ་དེ་རིང་ཁ་རྩང་དུས་ཀྱི་དབང་གིས་དབང་ཁྲིད་དང་ཉམས་ལེན་ཕར་ཞོག བསྙེན་ཚད་བཞག་མ་དགོས་དང་འཇོག་རྒྱུ་ཡོད་པ་ཙམ་ཡང་མི་ཤེས་པར་ཞི་ཁྲོའི་དཀྱིལ་འཁོར་ཟ་ཆོག་གིི་འུར་འདོན་ཞིག་ལ་བརྩི་བའི་དུས་ཚོད་འདི་ལ་འདི་ལྟ་བུ་བསྙེན་སྒྲུབ་ཀྱི་མཚམས་ལ་བདུན་གསུམ་ཉི་ཤུ་རྩ་གཅིག་གི་ཞག་གྲངས་ལ་དགེ་འདུན་མང་ཚོགས་ཐུན་བཞི་བཅད་ནས་བཞུགས་རྒྱུ་འདི་ངོ་མཚར་ཆེན་པོ་ཡིན་ཞིང་། རྗེས་སུ་ཡི་རང་དང་བཅས་པས་ནམ་ཡིན་ན་བཀའ་དྲིན་ཆེ་ཞུ་རྒྱུ་དེ་ཉིད་བསྟན་འགྲོ་སྤྱིའི་ངོས་ནས་རྟོགས་པའི་བསྟན་པ་སྒྲུབ་པས་བཟུང་བ་དེ་ཉིད་བཀའ་དྲིན་ཆེ་བ་ངོ་མས་ཞེ་སྙིང་གིས་བསམས་ནས་ཞུས་པ་དེ་ལྟ་བུ་ཡིན་ནོ། །འདི་ལྟར་བྱས་ནས་བསྙེན་སྒྲུབ་ཀྱི་ཐུན་ལ་ཞུགས་ཏེ་བཟླས་པ་བྱེད་པའི་སྐབས་སུ་རང་གར་རྒད་པོ་རྒན་མོས་གོ་ཁ་ནས་མ་ཎི་བཏོན་པ་དང་འདྲ་བར་ལུས་ཀྱིས་དགྱེ་བ་དགུ་བ་ཀྱོག་པ་བསྙེས་པ་དེ་འདྲ་མི་བྱེད་པར་ལུས་ཚུགས་དྲང་མོ་མདའ་འདྲ་ཞིག་བསྲངས་ནས་བཞུགས་དགོས་ཤིང་། ངག་གིས་བཟླས་པ་འདོན་སྐབས་སྒྲ་དག་སྒྲོས་གཙང་ཆད་ལྷག་མི་ཤོར་བར་ཕྲེང་བ་སྟོང་འདྲེན་བྱེད་མི་ཉན་ལ། སེམས་ཀྱིས་ཡར་མར་ཐམས་ཅད་མི་དྲན་པར་ཏིང་འཛིན་དམིགས་གནད་བསྙེན་སྒྲུབ་ཡན་ལག་བཞི་བོའི་སྐབས་དང་བསྟུན་དགོས་སོ། །དུས་རྒྱུན་དུ་ཡིན་ཡང་བསྙེན་སྒྲུབ་ལས་བྱང་གི་ཡིག་སྣ་ལ་ཞིབ་ཏུ་བལྟས་ནས་ཆོས་ཁྲིད་ཀྱི་ནང་ནས་བཤད་པ་དང་གཉིས་ཀ་ར་སྦྲགས་ནས་དེང་སང་གི་སྐད་ལུགས་བྱས་ན་ངས་བཤད་པ་ལ་ཁྱོད་ཚོས་ཞིབ་འཇུག་གྱིས་ལ། འགལ་འབྲེལ་ཅི་འདྲ་རེད་ལྟོས་དང་ཆོག དཔྱད་པ་བཟང་པོས་མ་དྲངས་ན། །ངེས་ཤེས་བཟང་པོ་ག་ལ་སྐྱེ། །ངེས་ཤེས་བཟང་པོ་མ་སྐྱེས་ན། །སྒྲོ་འདོགས་ངན་པ་ག་ལ་ནུབ། །སྒྲོ་འདོགས་ངན་པ་མ་ནུབ་ན། །ལས་རླུང་ངན་པ་ག་ལ་འགག །ལས་རླུང་ངན་པ་མ་འགགས་ན། །འཁོར་བ་ངན་པ་ག་ལ་སྤོང་། །འཁོར་བ་ངན་པ་མ་སྤངས་ན། །སྡུག་བསྔལ་ངན་པ་ཅི་ལ་འཛད། །འཁོར་དང་མྱ་ངན་འདས་པ་ལ། །དོན་དུ་བཟང་ངན་ཡོད་མ་ཡིན། །བཟང་ངན་མེད་པར་མཉམ་ཉིད་དུ། །རྟོགས་པ་ངེས་ཤེས་བཟང་པོ་ཡིན། །ཞེས་མི་ཕམ་ཚང་གིས་གསུངས་པ་ལྟར་དུ་ཡིན་ནོ། །དེས་ན་འུ་ཚོས་བསྐྱེད་རིམ་ཞི་ཁྲོ་སྦྲགས་མར་བྱེད་དགོས་པ་བཤད་མ་དགོས་པ་ཡིན་ཞིང་། ལུས་དཀྱིལ་དང་མཐུན་པར་བསྐྱེད་རིམ་གྱི་ལུས་དཀྱིལ་ལྷ་ཡི་ཕོ་བྲང་བསྒོམ་སྐབས་ཕོ་བྲང་གི་གདན་ལ་ཞི་བའི་དཀྱིལ་འཁོར་གསལ་བཏབ། ཁྲོ་བོ་སྒོམ་པའི་གནས་སྐབས་ན་གཞལ་ཡས་ཁང་དུང་ཁང་ཕྱུར་བུར་གཏམས་པ་ཐོག་ཕུབ་མཆོད་རྟེན་གྱི་ལུགས་སུ་བྱས་ཡོད་པ་ཞིག་གི་ཐོག་ཕུབ་ཡོད་པའི་བུམ་དབྱིབས་ལྟ་བུའི་ནང་ན་ཞི་བའི་དཀྱིལ་འཁོར་ཡར་ནམ་མཁར་བཏེག་ནས་འཁོར་ལོ་རྩིབས་བཞིའི་གདན་ལ་ཞི་བ་རིགས་ལྔའི་ཚོམ་བུ། སྟེང་འོག་གཉིས་དང་མཚམས་བཞི་ལ་ཐུབ་པ་དྲུག་ཡོད་པ། བུམ་པའི་སྒོ་བཞི་ལ་སྒོ་བ་ཡབ་ཡུམ། འོག་ཁང་གི་དཀྱིལ་འཁོར་དངོས་ལ་ཁྲག་འཐུང་ཁྲོ་བོའི་ལྷ་ཚོགས་གསལ་བཏབ་ན་རྒྱུད་ལུང་ཐམས་ཅད་དང་མི་འགལ་བར་མ་ཟད་ལས་བྱང་གི་རང་གཞུང་དངོས་བསྟན་ཡང་ཡིན་ལ། རང་ལུགས་དམ་པ་གོང་མའི་ཕྱག་བཞེས་ཀྱང་དེ་ཡིན་ནོ། །དེ་ལྟར་བྱས་ན་དམིགས་པ་སྒོམ་དུས་རང་ལུས་རྒྱལ་བའི་དཀྱིལ་འཁོར་དུ་བསྒོམ་དགོས་ཤིང་། རང་ལུས་རྒྱལ་བའི་དཀྱིལ་འཁོར་དེ་ཞི་ཁྲོ་དམ་པ་རིགས་བརྒྱའི་ལྷ་ཚོགས་རྟེན་བརྟེན་པ་དང་བཅས་པ་སྟེ། དེ་ཡང་སེམས་དཔའ་སུམ་བརྩེགས་དམ་ཚིག་དང་ཡེ་ཤེས་དབྱེར་མེད་དུ་བསྒོམ་ལ། དེ་དང་བསྟུན་ནས་སྐབས་ཐོབ་ཀྱི་འོད་ཟེར་སྤྲོ་བསྡུ་ལ་སོགས་པའི་དམིགས་རིམ་རང་རང་གི་སྐབས་ཐོབ་ཅི་བདེར་ཁ་བསྒྱུར་རྒྱུ་དེ་ལྟར་ཡིན་ནོ། །འཛབ་བཟླ་རྒྱུ་འདིའི་སྦྱང་བྱ་འཁོར་བའི་མིང་ཚིག་གཉིས་ཀའི་བརྗོད་པ་དུ་མ་དང་སྒྲ་དོན་འདྲེས་འཛིན་གྱི་རྟོག་པ་དེ་ཚོ་སྦྱང་ཞིང་། སྦྱོང་བྱེད་བཟླས་པའི་རྣལ་འབྱོར་དེ་ཡིས། སྦྱངས་འབྲས་སངས་རྒྱས་ནས་གདུལ་བྱ་ལ་ཆོས་འཁོར་བསྐོར་བ་ལ་སོགས་པ་མདོར་ན་གསུང་རྡོ་རྗེས་འགྲོ་དོན་མཛད་པའི་རྟེན་འབྲེལ་སྒྲིག་པ་ཡིན་ནོ། །བསྙེན་སྒྲུབ་ཡན་ལག་བཞི་འདི་གསང་སྔགས་ལམ་རིམ་ནང་ན། འདི་ཡང་ལམ་སྒྲུབ་སྦྱོར་བ་ཡི་ཞེས་གསུངས་ཡོད་ལ། འདིའི་ཚིག་གཅིག་གི་ནང་ན་ཅི་ཞིག་བསྡུས་ཡོད་ཅེ་ན། འདིའི་དབྱེ་བ་ལམ་དུས་ཀྱི་བསྙེན་སྒྲུབ་ཡན་ལག་བཞི་ལྡན། སྒྲུབ་པའི་དུས་ཀྱི་བསྙེན་སྒྲུབ་ཡན་ལག་བཞི་ལྡན། སྦྱོར་བའི་དུས་ཀྱི་བསྙེན་སྒྲུབ་ཡན་ལག་བཞི་ལྡན་དེ་ལྟར་གསུངས་ཡོད་ཅིང་། རིམ་པ་སོ་སོར་ཕྱེས་ཡོད་དོ། །ལམ་དུས་འདྲ་ཡིན་ན་ཟག་བཅས་ལམ་གྱི་རྣལ་འབྱོར་ལྔ་བོ་མོས་སྒོམ་ཙམ་ཞིག་གིས་མི་ཚད་པར་ངེས་རྫོགས་ཀྱི་ཚུལ་དུ་སྒོམ་པ་ཞིག་ལ་སྟོང་པ་ཆེན་པོའི་རྣལ་འབྱོར་དང་། སྙིང་རྗེ་སྒྱུ་མའི་རྣལ་འབྱོར་གཉིས་ཀ་བསྙེན་པ་ལ་བཞག་ཅིང་། ཕྱག་རྒྱ་གཅིག་པ་དང་ཕྱག་རྒྱ་སྤྲོས་བཅས་གཉིས་ཀ་ཉེ་བསྙེན། ཚོམ་བུ་ཚོགས་སྒྲུབ་སྒྲུབ་པ། དེའི་འབྲས་བུ་མཐོང་ལམ་ཐོབ་མ་རག་པ་དེ་སྒྲུབ་པ་ཆེན་པོ་དེ་ལྟར་བཞག་གོ །ཐབས་ལམ་པའི་སྦྱོར་བའི་དུས་ཀྱི་ཡན་ལག་བཞི་ཡིན་ན་ཐབས་མཚན་བཅས་ཀྱི་རྫོགས་རིམ་གྱི་ནང་ནས་མ་ཀྵེ་ཀའི་སྦྱོར་བས་ལྕགས་ཁམས་གསེར་དུ་བསྒྱུར་བ་ལྟ་བུ་དེ་ཉིད། དགའ་བ་བཞི་དང་སྦྱར་ནས་བསྙེན་སྒྲུབ་ཡན་ལག་བཞི་ཚང་ཚུལ་ཡང་ཡོད་དོ། །དབྱེ་བ་དེ་ལྟར་ཡོད་ན་ད་རེས་ཀྱི་སྐབས་སུ་བབ་པ་སྒྲུབ་དུས་ཀྱི་བསྙེན་སྒྲུབ་ཡན་ལག་བཞི་བཤད་པའི་སྐབས་ཡིན་པས་འདི་ནས་དགོས་དོན་ངོ་མ་དེ་ཉིད་ཅི་ཞིག་ཡིན་ན་གཞི་བསྙེན་ལས་རུང་ཞིག་གི་བསྙེན་པ། གཞི་བསྙེན་གྱི་ནང་གི་ལས་རུང་ཙམ་ཞིག དེ་ཡང་མོས་སྒོམ་དང་བསྟུན་པ་ཞིག་གིས་ཆོག་ཀྱང་གདན་ས་ཆེན་པོའི་གྲྭ་ཚང་ཆེན་པོའི་ཆོ་གའི་འགྲོས་ལ་གཟིགས་པའི་སྐབས་ཡིན་པས་ན་སྐབས་འདི་དང་བསྟུན་ནས་ཚོགས་སྒྲུབ་མ་ཡིན་ཡང་ཚོགས་སྒྲུབ་དང་འབྲེལ་བའི་བསྙེན་སྒྲུབ་ཡན་ལག་བཞིའི་སྐོར་ནས་མདོ་ཙམ་ཞིག་ཞུས་ན་སྙམ། དེས་ན་དེ་ལྟ་བུའི་ཚོམ་བུ་ཚོགས་ཀྱི་སྒྲུབ་པ་འདི་ལ་ངོ་བོ། དབྱེ་བ། སྒྲུབ་ཚུལ། དགོས་པ་དང་བཞི་ཡི་ཐོག་ནས་བཤད་དགོས་པ་ཞིག་ཡིན་ནོ། །སྤྱིར་སྒྲུབ་པ་ཞེས་པ་འདི་ལ་སཾ་སྐྲི་ཏའི་སྐད་དུ་ས་དྷ་ན་ཟེར་ཞིང་། ས་དྷ་ནའི་སྒྲ་ལས་དྲངས་ན་བོད་སྐད་དུ་ཐད་བསྒྱུར་བྱས་ན་ཀུན་ཏུ་ལེན་པ་ཟེར་ལ། འདོད་པའི་དོན་ལེན་ཞིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་ཞེས་གསུངས་ཏེ་ཐ་སྙད་ཀྱི་རྣམ་བཞག་དེ་མཛད་དོ། །ཡང་སིདྡྷིའི་སྒྲ་ལས་དྲངས་ན་དངོས་གྲུབ་ལ་འཇུག་ན་གང་བསྒྲུབ་པའི་དངོས་གྲུབ་ཀྱི་ཐད་ནས་ཀྱང་སྒྲུབ་པ་ཞེས་པའི་མིང་དེ་བྱུང་ཞིང་། འདིའི་ངོ་བོ་ནི་གསང་སྔགས་ཀྱི་ཐབས་ཁྱད་པར་ཅན་ཞིག་གི་སྒོ་ནས་གང་དོན་དུ་གཉེར་བྱ་མཆོག་དང་ཐུན་མོང་གི་དངོས་གྲུབ་སྒྲུབ་པར་བྱེད་པ་བསྙེན་སྒྲུབ་ཀྱིས་བསྡུས་པ་ཞིག་ཡིན་ལ། དབྱེ་བ་ལ་སྤྱི་དང་ཁྱད་པར་གཉིས་ཀྱི་ཐད་ནས་བཤད་རྒྱུ་ཡོད་དོ། །སྤྱིའི་ཐད་ནས་བསྒྲུབ་བྱའི་སྒོ་ནས་དབྱེ་བ་ཞིག་དང་། ཐུན་མོང་དང་མཆོག་གི་ཐོག་ནས་དབྱེ་རྒྱུ་ཞིག ཐུན་མོང་ཡིན་ན་ལས་ཕྲ་མོ་དང་ཆེན་པོ་གཉིས་ཀྱི་ཁྱད་པར། མཆོག་ལ་དབྱེ་ན་གནས་སྐབས་དང་མཐར་ཐུག་གི་དབྱེ་བ། རྟེན་གྱི་སྒོ་ནས་ཕྱེས་ན་ཕྱི་རྫས་ཀྱི་སྒོ་ནས་སྒྲུབ་ལུགས་ཤིག་དང་། ནང་ལུས་ཀྱི་ལྟ་སྟངས། ངག་གི་བཟླས་པ། ཡིད་ཀྱི་ཏིང་འཛིན་རྣམས་ཀྱི་སྒྲུབ་ལུགས་དབྱེ་བ། ངོ་བོའི་སྒོ་ནས་དབྱེ་ན་བསྐྱེད་རིམ་ལ་བརྟེན་ནས་སྒྲུབ་པ། རྫོགས་རིམ་ལ་བརྟེན་ནས་སྒྲུབ་པ་སྟེ་དེ་ལྟར་སྒྲུབ་ཚུལ་གྱི་ཐོག་ནས་དབྱེ་བ་མང་ངོ་། །བསྙེན་པ་དང་སྒྲུབ་པ་གཉིས། དེ་རེ་རེ་ལ་ཡང་རྒྱུ་འབྲས་ཀྱིས་ཕྱེས་ནས་བསྙེན་པ་ཉེ་བསྙེན་སྒྲུབ་པ་སྒྲུབ་ཆེན་ཏེ་བསྙེན་སྒྲུབ་ཡན་ལག་བཞི་རུ་དབྱེ་རྒྱུ་སྤྱིར་བཏང་གི་དབྱེ་བ་ཕྱོགས་བསྣན་བྱས་ན་དེ་འདྲ་ཞིག་གི་དབྱེ་ཚུལ་གསུངས་ཡོད་དོ། །བྱེ་བྲག་ཁྱད་པར་ཅན་ཚོགས་སྒྲུབ་ཀྱི་ཐད་ནས་བཤད་ན་འདི་ལ་ཁྱད་པར་ཅན་ཟེར་དགོས་པའི་རྒྱུ་མཚན་ནི་རྒྱུ་དང་ངོ་བོ་འབྲས་བུ་གསུམ་གྱི་ཐད་ནས་ཁྱད་པར་དུ་འཕགས་པས་ཁྱད་པར་ཅན་ཡིན་གསུངས་ལ། རྒྱུ་ཡི་ཁྱད་པར་ཇི་ལྟར་དུ་འཕགས་ཤེ་ན། ཕྱི་ཡོ་བྱད་ཚང་བ་དང་། ནང་གི་ནུས་པ་ཐོབ་པའི་རྣལ་འབྱོར་ཕོ་མོ་རྡོ་རྗེའི་མཆེད་ལྕམ་ལྷན་གཅིག་ཏུ་འཚོགས་པའི་སྟོབས་ཀྱིས་དངོས་གྲུབ་སྒྲུབ་པ་ལ་བྱིན་རླབས་ལྷག་ཅིང་། ངོ་བོ་དེ་བསྙེན་སྒྲུབ་ཡན་ལག་བཞི་ལྡན་ལ་རྒྱུན་ཆགས་སུ་བརྩོན་དུས་འབྲས་བུ་བར་ཆད་མེད་པར་ཐོབ་པ་དེ་ཡིན་པ་དང་། འབྲས་བུ་ཚོམ་བུ་ཚོགས་སྒྲུབ་ལ་བརྟེན་ནས་ཟག་མེད་རིག་འཛིན་གྱི་གོ་འཕང་ཐོབ་པ་དེ་ཡིན་ནོ། །དེ་ལྟ་བུའི་ཁྱད་ཆོས་ཁྱད་པར་ཅན་གྱི་ཚོམ་བུ་ཚོགས་ཀྱི་སྒྲུབ་པ་དེ་ཕུན་སུམ་ཚོགས་པ་ལྔས་གཞི་བཟུང་། བསྙེན་སྒྲུབ་ཡན་ལག་བཞིས་གཞུང་བསྲང་དུས་འབྲས་བུ་རིག་འཛིན་རྣམ་བཞིའི་གོ་འཕང་ཞག་ཁ་གྲངས་ཅན་གྱིས་ཐོབ་པ་དེ་ལྟ་བུ་ཞིག་ཡིན་ནོ། །འདི་ནས་ཕུན་སུམ་ཚོགས་པ་ལྔ་ཟེར་དུས་དུས་རྒྱུན་གྱི་གནས་དུས་སྟོན་འཁོར་ཆོས་ཕུན་སུམ་ཚོགས་པ་དེ་དང་མི་འདྲ་ལ། གནས་དུས་སྟོན་འཁོར་རྫས་དང་ལྔ་བོ་ལ་གོའོ། །གནས་ལ་མཚོན་ན་སའི་དཔྱད་དང་དཔལ་ཕུན་སུམ་ཚོགས་པ་ཞི་རྒྱས་དབང་དྲག་གི་ལས་བཞི་དང་མཐུན་པའི་གནས། དུས་ཡིན་ན་སྒྲུབ་པ་ལ་འཇུག་པའི་དུས་བཟང་པོ་ཚེས་གྲངས་སྦྱོར་བ་ལ་སོགས་པ་བཀྲ་ཤིས་པའི་སྐབས། སྟོན་པ་ལ་མཚོན་ན་སློབ་དཔོན་རྡོ་རྗེ་རྒྱལ་པོར་འོས་པ་གསང་སྔགས་ཀྱི་དེ་ཉིད་བཅུ་ལ་རང་བྱན་ཆུད་པའི་རང་བཞིན་བརྒྱད་དང་ལྡན་པ་ཡིན་དགོས་ཤིང་། འཁོར་རྒྱལ་ཐེབས་དང་གཟུངས་མ་གིང་དང་གར་མ་ཤན་པ་ཕྱག་ཚང་བ་ལ་སོགས་པ། དེ་ལྟར་སོ་སོའི་ཐད་ནས་དགོས་པའི་ཡོན་ཏན་ཡོད་པ་དང་། དཀྱིལ་འཁོར་ཟབ་མོ་དེའི་ནང་དུ་འདུ་བར་འོས་པའི་རྣལ་འབྱོར་ཕོ་མོ་ཚོམ་བུའི་ལྷ་གྲངས་དང་མཉམ་པ་དགོས་དེ་ལྟར་གསུངས་སོ། །རྣལ་འབྱོར་ཟེར་རྒྱུ་དེ་ཡང་སྔགས་ལ་ཞུགས་ནས་སྒྲུབ་པ་ཉམས་ལེན་བྱེད་ཚོད་ལ་འདིའི་མིང་གིས་འཛིན་རྒྱུའི་སྲོལ་ཞིག་ཆགས་སོང་བ་རེད་མ་གཏོགས་དོན་ངོ་མས་རྣལ་འབྱོར་གྱི་ཆུ་ཚད་སྒྲ་དོན་མཚུངས་པ་ཞིག་དཀའ་མོ་ངོ་མ་ཞིག་ཡིན་ནོ། །གནས་དུས་སྟོན་འཁོར་རྫས་ཏེ་དེའི་ནང་གི་རྫས་ཀྱི་ཐད་ནས་ཇི་ལྟ་བུ་ཞིག་ཡིན་ན་འཚོ་བ་ཟས་ཀྱི་ཡོ་བྱད། ནད་ཟློག་སྨན་གྱི་ཡོ་བྱད། དགོས་པ་ཆས་ཀྱི་ཡོ་བྱད། སྒྲུབ་པ་རྫས་ཀྱི་ཡོ་བྱད་དེ་དེ་ལྟར་དུ་གསུངས་ཡོད་ཅིང་། དེ་བཞི་མ་ཚང་བ་མེད་པ་ཞིག་འདུ་བར་བྱ་དགོས་སོ། །དེ་ལྟ་བུ་ཕུན་སུམ་ཚོགས་པ་ལྔ་ཚང་བ་ཞིག་གི་ཐོག་ནས་བསྙེན་སྒྲུབ་ཡན་ལག་བཞིས་གཞུང་ཇི་ལྟར་བསྲང་དགོས་ཤེ་ན། དང་པོ་བསྙེན་པ་ནི་ལྷ་མཉེས་པའི་ཐབས་སུ་བསྙེན་ཞིང་བསྐུལ་ནས་ཐུགས་སྲོག་གི་བཟླས་པ་བྱ་བ་ལ་དེའི་མིང་དུ་བསྙེན་པ་ཞེས་ཟེར་ཞིང་། དེའི་འཕྲོས་ཉེ་བསྙེན་ནི་དངོས་གྲུབ་འགྲུབ་པ་ལ་མངོན་པར་ཕྱོགས་པ་དངོས་གྲུབ་ཐོབ་པ་ལ་ཉེ་བ་ཡིན་པས་ན་ཉེ་བསྙེན་ཞེས་གསུངས་པ་དང་། བསྙེན་པ་ཉེ་བསྙེན་གཉིས་ཀ་རྒྱུ་འབྲས་ཡིན་ནོ། །ལྷ་མཉེས་པར་བྱས་ནས་དངོས་གྲུབ་འགྲུབ་དགོས་ཤིང་། དེའི་མཚམས་སུ་སྒྲུབ་པ་ཡིན་ལ། སྒྲུབ་པས་ཅི་ཞིག་སྒྲུབ་ན་དངོས་གྲུབ་སྒྲུབ་བོ། །དེའི་སྟེང་དུ་སྒྲུབ་ཆེན་ཡིན་ཞིང་། དངོས་གྲུབ་གྲུབ་པ་དེ་བླངས་ནས་ཡོངས་སུ་གྲུབ་པ་སྒྲུབ་ཆེན་ཁོ་རང་གི་མཚན་ཉིད་ཡིན་ནོ། །དེ་ལྟ་བུའི་ཚོམ་བུ་ཚོགས་སྒྲུབ་དེ་ལ་ཕྱིའི་ཕྱི་མཚམས་གཅད་པ་དང་། དམ་སྲི་མནོན་པ། ནང་གི་ནང་མཚམས་གཅད་པ་དང་། སྒོ་བྱང་ཕྱི་ནང་དུ་མ་ཏྲཾ་བསྒྲལ་བ། དཀྱིལ་འཁོར་འབྲི་བ། སྒྲུབ་རྫས་བཀོད་པ། ཡོ་བྱད་བཀོད་བཤམས་བྱེད་པ། བྱིན་གྱིས་བརླབ་པ། དངོས་གཞིའི་མཆོད་པ་བཟླས་དམིགས་ལ་སོགས་པ་ནས་བདག་འཇུག་ལ་སོགས་པ་ཡན་ཆད་དེ་བསྙེན་པ་ཡིན་ནོ། །དེ་ནས་སྒྲུབ་པའི་གཞུང་ཚུལ་བཞིན་དུ་བསྲངས་ནས་བཟླས་སྒོམ་གྱི་ཕྱོགས་ལ་འབད་པ་དེ་ཉིད་ཀྱིས་དངོས་གྲུབ་ལ་ཉེ་བའི་མཚན་མ་མཐོང་བ་ནི་གོང་ནས་ཞུས་པ་ལྟར་དུ་ཉེ་བསྙེན། དེ་ལྟར་བསྒྲུབས་བསྒྲུབས་ནས་དངོས་གྲུབ་ཀྱི་མཚན་མ་བརྟན་པོར་མངོན་དུ་གྱུར་པ་ནི་སྒྲུབ་པ། དངོས་གྲུབ་དངོས་སུ་ལེན་པ་དེ་ཉིད་སྒྲུབ་ཆེན་ནོ། །དེ་ཡིས་འུ་ཚོས་སྒྲུབ་པའི་དབྱེ་བའི་ཐད་ཀྱི་ཁྱད་པར་ཅན་ཚོམ་བུ་ཚོགས་སྒྲུབ་ཞོར་དུ་བཤད་ཟིན་ཅིང་། གོང་ཞིག་ནས་སྒྲུབ་པ་འདི་ལ་ངོ་བོ་དབྱེ་བ་སྒྲུབ་ཚུལ་དགོས་པ་དང་བཞི་ཡིས་བཤད་དགོས་ཞེས་བཤད་པ་ཡིན་ལ། སྒྲུབ་ཚུལ་གྱི་དབང་དུ་བྱས་ན་ཇི་ལྟར་སྒྲུབ་པའི་ཚུལ་ཞིག་དང་། དེ་བསྒྲུབས་ནས་གྲུབ་པའི་འབྲས་བུ་ཞིག་སྟེ་གཉིས་ཡོད་དགོས་སོ། །ཇི་ལྟར་སྒྲུབ་པའི་ཚུལ་ནི་བསྐྱེད་རྫོགས་གཉིས་ཀྱི་སྒོ་ནས་བསྒྲུབ་དགོས་ཤིང་། དེའི་ལུང་ནི་མགོན་པོ་ཀླུ་སྒྲུབ་ཀྱིས། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་གསུངས་སོ། །དབང་རྣོན་ཞིག་ཡིན་ན་དང་པོ་ཉིད་ནས་བསྐྱེད་རྫོགས་ཟུང་འཇུག་སྒོམ་ཆོག་ལ། དེ་མ་ཡིན་ན་དང་པོར་བསྐྱེད་རིམ་ལ་བརྟན་པ་ཐོབ་ཏུ་བཅུག་ནས་དེ་ནས་རིམ་པས་རྫོགས་རིམ་ལ་འཇུག་དགོས་སོ། །བསྐྱེད་རིམ་ཁྱད་ཆོས་བཞི་ལྡན། རྫོགས་རིམ་ཁྱད་ཆོས་གསུམ་ལྡན་དེ་ལྟར་གསུངས་ཡོད་ལ། བསྐྱེད་རིམ་གྱི་ཁྱད་ཆོས་བཞི་ནི་ཆོ་གའི་ཁྱད་པར་རྒྱུད་དོན་དང་འབྲེལ་བའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་སྐྱེད་ནུས་པ། ངོ་བོའི་ཁྱད་པར་ཞུ་བདེ་དང་སྟོང་ཉིད། བྱེད་ལས་ཀྱི་ཁྱད་པར་རྫོགས་རིམ་གྱི་སྨིན་བྱེད་དུ་འགྲོ་བ་སྟེ་དེ་རྣམས་ཚང་བ་ཞིག་དང་། རྫོགས་རིམ་གྱི་ཁྱད་ཆོས་གསུམ་ཞེས་པ་ནི་རྒྱུའི་ཁྱད་པར་རྡོ་རྗེའི་ལུས་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་ཐིག་རླུང་གསུམ་དག་ནས་དབུ་མར་དག་པར་བྱེད་པ། རྣམ་པའི་ཁྱད་པར་ལྷན་སྐྱེས་ཀྱི་བདེ་བ་བདེ་སྟོང་ཟུང་འཇུག་སྟེ་སྔགས་ཀྱི་སྤྱི་ཁྱབ་གསུང་སྲོལ་དེ་ལྟར་ཡིན་ཞིང་། བསྐྱེད་རྫོགས་རང་རང་གི་སྐབས་ཀྱི་བསྙེན་སྒྲུབ་ཡན་ལག་བཞི་རང་རང་ལ་སྦྱོར་རྒྱུ་དེ་ལྟར་ཡོད་དོ། །མདོར་ན་རིམ་གྱིས་པའི་ལམ་ཐམས་ཅད་བརྒྱུད་ནས་མཐར་ཐུག་པ་སྟེ་དེའི་ནང་གི་རྫོགས་རིམ་ལ་མཚོན་ན་རིམ་གྱིས་པའི་ལམ་ཐམས་ཅད་བརྒྱུད་ནས་མཐར་ཐུག་རྫོགས་པ་ཆེན་པོ་ལ་ཐུག་པ་མ་གཏོགས་སངས་རྒྱས་སྒྲུབ་པའི་ལམ་གཞན་ཞིག་མེད་དོ། །རྫོགས་རིམ་ཡིན་ན་ཐབས་མཚན་བཅས་ཀྱི་རྫོགས་རིམ་གྱིས་ཐབས་བྱུང་མཚན་མེད་ཀྱི་རྫོགས་རིམ་དེ་འདྲེན་ཐུབ་དགོས་ཤིང་། དབང་རྣོན་གཅིག་ཆར་བ་རྫོགས་ཆེན་གྱི་ཆེད་དུ་བྱ་བའི་གདུལ་བྱ་ཡིས་ཐབས་གཞན་ལ་མི་ལྟོས་ནས་བླ་མའི་མན་ངག་དང་བྱིན་རླབས་འཕོ་བའི་སྟོབས་ཁོ་ན་ཡིས་ཚུལ་དེ་ལ་འཇུག་ཐུབ་བོ། །སེམས་ཉིད་རིག་སྟོང་རྗེན་པ་སྤྲོས་བྲལ་རང་བྱུང་གི་ཡེ་ཤེས་ཐད་ཀ་ཐད་ནས་ངོ་སྤྲད་ནས་དེའི་སྟེང་ལ་དགག་སྒྲུབ་བཅོས་ལྷད་མེད་པར་བཞག་སྐབས་དང་པོ་ངོ་སྤྲོད་ཀྱི་མན་ངག་ཐོས་པ་དེ་ཉིད་བསྙེན་པའི་ཚད་ཡིན་ལ། དེ་དཔེ་ཇི་ལྟར་ཡིན་ན་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ལ་ཞུགས་པ་ལ་མིག་ཕྱེས་བཏང་བ་ལྟ་བུ་ཡིན་ནོ། །དེ་འཕྲོས་ངོ་སྤྲོད་ཀྱི་མན་ངག་དེ་ལ་མཐོང་ཞིང་ཐོས་པས་བསྟན་པ་དེ་ཉིད་ཐོས། ཐོས་དོན་དབང་གིས་གོ་བ་དེ་ཉིད་ཉེ་བར་བསྙེན་པ་སྟེ། དཀྱིལ་འཁོར་ངོ་མ་རིག་པ་ལྟ་བུ་ཡིན་ནོ། །བསྟན་པ་དེ་ཉིད་གོ གོ་བ་བཞིན་དུ་གོམས་པར་བྱས། རང་གནས་ཀྱི་ཡེ་ཤེས་ལ་མྱོང་བ་ཐོན་པ་དེ་ཉིད་སྒྲུབ་པ་ཡིན་ཞིང་། དཀྱིལ་འཁོར་རིག་པ་ཙམ་གྱིས་མི་ཚད་པར་དཀྱིལ་འཁོར་གྱི་ནང་དུ་ཞུགས་པ་ལྟ་བུ་ཡིན་ནོ། །གོམས་པ་དེ་ཡང་ཇེ་བརྟན་དུ་གྱུར་ནས་ལམ་གྱི་བྱ་རྩོལ་དང་ཐེག་བརྒྱད་གྲུབ་མཐའི་ཞེ་འདོད་ཀྱི་འཛིན་པ་ཞིག་ནས་རྫོགས་ཆེན་གྱི་དོན་ལ་གདེང་ཐོབ་པ་དེ་ཉིད་སྒྲུབ་པ་ཆེན་པོ་ཡིན་ལ། དཀྱིལ་འཁོར་མཐོང་། མཐོང་བར་ཞུགས། ཞུགས་པས་མི་ཚད་དབང་ཐོབ་པ་ལྟ་བུ་ཡིན་ནོ། །དེས་ན་རང་བཞིན་གྱི་དཀྱིལ་འཁོར་ཆེན་པོར་འཇུག་པ་ལ་མཐར་གཏུགས་ན་རང་རིག་རྩོལ་མེད་ཀྱི་ལམ་ལ་འཇུག་ནུས་དགོས་ཤིང་། གཞི་ལམ་འབྲས་བུའི་སྐོར་ལ་སོགས་པ་རྫོགས་པ་ཆེན་པོའི་ཁྲིད་ཡིག་རྣམས་ཀྱི་སྐབས་ནས་ཤེས་ཐུབ་བོ། །སྒྲུབ་པ་འདི་ལ་དགོས་པ་ཅི་ཞིག་ཡོད་ཅེ་ན། གནས་སྐབས་དང་མཐར་ཐུག་གི་འདོད་དོན་འདིས་འགྲུབ་ནུས་ལ། ལྟ་བས་གཏན་ལ་ཕབ་པའི་དོན་མངོན་དུ་གྱུར་ནས་མཐར་ཐུག་གི་གཏན་སྲིད་ཟིན་པར་བྱེད་པ་དེ་སྒྲུབ་པའི་དགོས་པ་ཡིན་ནོ། །བསྐྱེད་རྫོགས་ཀྱི་སྐབས་སུ་གསལ་སྣང་དང་ཆོས་ཉིད་གཉིས་ཀ་ཟུང་དུ་འཇུག་མི་ཐུབ་པ་ལྟ་བུ་སྟོང་པ་སྒོམ་ན་གསལ་ཁར་མི་ཉན་ལ། གསལ་བ་བསྒོམས་ན་སྟོང་ཁར་མི་ཉན་ཞིང་། གསལ་སྟོང་ཟུང་དུ་འཇུག་པ་སྣང་སྟོང་གཉིས་ཀ་ཡ་མ་བྲལ་བ་ཞིག་མི་ཐུབ་པ་དེ་བརྟན་པ་མ་ཐོབ་པའི་རྟགས་ཁག་མེད་པ་ཞིག་ཡིན་ནོ། །ལྷ་དང་སྣང་བ་ཆོས་ཉིད་གསུམ་འདྲེས་པ་དེ་རྣམ་སྨིན་རིག་འཛིན་གྱི་སྐབས་ཡིན་པས་ལོ་དང་ཟླ་བ་ཞག་མ་ཆ་རེ་ཡིས་ཐད་ཀར་དང་པོ་ཉིད་ནས་དེ་ལྟར་ཞིག་འབྱུང་བ་དཀའ་ཞིང་། དེས་ན་དེ་ལ་སུན་དུ་མི་འཇུག་ནས་ཞུམ་པ་སྤོངས་དང་དཀའ་ཁག་མེད་དོ། །འོན་ཀྱང་ལམ་ཁྱེར་ལ་ལྷའི་སྣང་ཆ་བཀྲ་ས་ལེ་བའི་ངང་དེ་ནས་དྲན་པ་བརྗེད་འབྱམས་སུ་མ་སོང་ཚེ་སྟོང་ཉིད་ཅེས་པ་ལོགས་ཤིག་ནས་སྒོམ་མི་དགོས་ཤིང་། ལྷར་སྣང་དུ་གསལ་བ་ཁོ་རང་གནས་ལུགས་ཡིན་ལ། དེའི་ཕན་དུ་གནས་ལུགས་བཙལ་མི་དགོས་སོ། །དེ་བརྗེད་སླ་མོ་ཞིག་ཡིན་པ་དེ་ད་ལྟའི་སྐབས་སུ་ལྷག་མཐོང་ཤུགས་ཆུང་བས་ཡིན་ཡང་དེའི་སྐབས་སུ་མཚམས་རེར་ལྷའི་གསལ་སྣང་ལ་ཤུགས་བསྐྱེད། མི་གསལ་བའི་སྐབས་སུ་ལྷའི་ང་རྒྱལ་དང་དྲན་རིག་ཟུང་དུ་སྦྲེལ། ཡང་མཚམས་རེར་དག་དྲན་ལ་ཐུགས་གཏད་རྒྱུ་ལ་སོགས་པ་དུབ་པ་སེལ་ཐབས་དེ་ལྟར་བྱེད་དགོས་སོ། །སྤྱིར་ན་བསྐྱེད་རིམ་འདི་ལ་ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ་ཞེས་པ་ཞིག་དང་། ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ་ཞེས་པ། ལྷ་སྐུ་ཞལ་ཕྱག་དང་བཅས་པ་སྤྲུལ་བའི་བསྐྱེད་རིམ་སྟེ་དེ་ལྟར་གསུམ་དུ་རིག་འཛིན་གོང་མ་རྣམ་པས་གསུངས་ཡོད་ལ། རྟོགས་པ་ཀློང་དུ་གྱུར་པ་ཞིག་ཡིན་ན་ཀུན་བརྟགས་བློས་བྱས་ཀྱི་བསྐྱེད་རིམ་ལ་མི་ལྟོས་པར་ལྷུན་གྲུབ་འདུས་མ་བྱས་པའི་བསྐྱེད་རིམ་རང་ཤར་ལྷུན་རྫོགས་ཀྱི་ངང་དུ་རྣམ་བཞིའི་ཕྲིན་ལས་རབ་འབྱམས་ལ་དབང་འབྱོར་བ་ཡིན་ནོ། །འོན་ཀྱང་ལས་དང་པོ་བས་དེ་ཙམ་ཞིག་མི་འབྱོར་བའི་སྐབས་འདིར་སྟོང་ཉིད་ཤེས་རབ་ཀྱི་གསལ་སྣང་ཐབས་ཀྱི་ལྷ་སྐུར་འཆར་བ་ཞིག་ལ་ཡུན་ཅི་གནས་སུ་བསྒོམས་ན་མི་འཆར་བའི་སྐབས་སུ་གོང་ནས་བཤད་པ་ལྟར་གྱི་ལྷ་སྐུའི་བརྡ་དོན་གྱི་དག་དྲན་དང་གསལ་སྣང་གི་ང་རྒྱལ་རེས་འཇོག་སྤེལ་མར་བྱས་ཏེ་བསྒོམས་ན་བར་ཞིག་གཡོ་ཐོབ་གོམས་བརྟན་མཐར་ཕྱིན་ནས་རྩལ་རིམ་པ་བཞིན་དུ་རྫོགས་ཏེ་དྲན་རྫོགས་ཀྱི་ལྷ་སྐུར་ལྡང་ནུས་པ་ཞིག་འགྱུར་རྒྱུ་ཡོད་དོ། །ངང་ཐུང་བྲེལ་ཚུབ་ཀྱིས་བཙན་ཐབས་ཀྱིས་ཨེ་ཡོང་གི་རེ་བ་བྱེད་མི་ཉན་ཡང་སྒྱིད་ལུག་བྱེད་མི་ཉན་ལ། ཐུན་རེར་བསྒོམས་ན་དོན་ཆེན་པོ་དང་ལྡན་ཞིང་། བཀའ་བརྒྱད་ཡོངས་འདུས་ཀྱི་ནང་དུ། དང་པོ་ལྷ་ཡི་རྣམ་པར་བསྒོམ། །རྣམ་པ་སེམས་སུ་ཤར་ཙམ་ན། །ཐ་མལ་རྟོག་པ་འཇིག་པར་འགྱུར། །ཞེས་དང་། བར་དུ་ལྷ་ཡི་མོས་པ་བསྒོམ། །མོས་གུས་བརྟན་པར་གྱུར་ཙམ་ན། །རང་དབང་རང་གིས་ཐོབ་པར་འགྱུར། །ཞེས་དང་། མཐར་ནི་ལྷ་ཡི་བྱིན་རླབས་བསྒོམ། །བྱིན་རླབས་ནུས་པས་གཞན་སྣང་སྒྱུར། །རང་རིག་དོན་དང་མཇལ་བར་འགྱུར། །ཞེས་དེ་ལྟར་གསུངས་ཡོད་པས་འུ་ཚོ་རྫོགས་པ་ཆེན་པོ་ཉམས་ལེན་པར་ཁས་འཆེ་བ་ཞིག་གིས་ལྟ་བ་བརྗོད་མེད་བློ་འདས་ཀྱི་གསལ་སྣང་ལྷ་སྐུར་འཆར་བ་ཞིག་ཏུ་བསྒོམ་དགོས་ཤིང་། མཚམས་རེར་ཁམས་དུབ་ན་དག་དྲན་སོགས་དང་རེས་མོས་གོང་ནས་བཤད་པ་ལྟར་དུ་བྱེད་དགོས་པ་དེ་ལྟར་ཡིན་ནོ། །སྐབས་འདིར་བཟླས་པ་བཤད་པའི་སྐབས་ཡིན་པས་བཟླས་པ་སྔགས་ཡིན་ཞིང་སྐབས་འདིའི་བཤད་བྱའི་སྔགས་ཀྱི་ངོ་བོ་ནི་རྒྱུ་ཐབས་དང་ཤེས་རབ་ཀྱི་ཡི་གེ་ལས་བཟླ་བྱའི་སྔགས་ཀྱི་ངོ་བོར་གྲུབ་པ་གང་ཞིག གྲུབ་པ་བཞི་དང་ལྡན་པས་དངོས་གྲུབ་སྒྲུབ་པ་ལ་ནུས་པ་ཐོགས་མེད་དུ་ལྡན་པ་སྟེ་སྔགས་ཞེས་པ་དེ་ལྟ་བུ་ཞིག་ཡིན་དགོས་སོ། །དེ་ལྟར་བཤད་ན་སྔགས་ཀྱི་རྒྱུ་ཡི་གེ་ཡིན་པ་དང་། ངོ་བོ་གྲུབ་པ་བཞི་ལྡན་ཡིན་པ་དང་། འབྲས་བུ་ནུས་པ་ཐོགས་མེད་ལྡན་པ་ཞིག་ལ་སྔགས་ཞེས་ཟེར་ན་དེ་ཡིན་པའི་ཡིན་ལུགས་ཇི་ལྟར་ཞེ་ན། རྒྱུ་ཡི་གེའི་ཐད་ནས་བཤད་ན་ཨ་ལ་སོགས་པའི་ཤེས་རབ་ཀྱི་དབྱངས་ཡིག་དང་། ཀ་ལ་སོགས་པ་ཐབས་གསལ་བྱེད་ཀྱི་ཕྱི་མོ་རྣམས་འཛོམས་པའི་དུས་སུ་ཨོཾ་ལ་སོགས་པའི་སྔགས་སུ་གྲུབ་པ་ཡིན་ཞིང་། དེ་ཡིན་ན་དེའི་ཡི་གེ་ལ་ཡང་དབྱེ་བ་དང་ནང་གསེས་ཀྱི་ཁྱད་པར་ཡོད་དོ། །ལུས་གནས་རྩ་ཡི་ཡི་གེ ཕོ་བྲང་ལྷ་ཡི་ཡི་གེ ཆོ་འཕྲུལ་སྤྲུལ་བའི་ཡི་གེ མཚོན་བྱེད་སྒྲ་ཡི་ཡི་གེ་སྟེ་བཞི་ཡོད་གསུངས་ཤིང་། དེ་ཡོད་ན་ལུས་གནས་རྩ་ཡི་ཡི་གེ་དེ་ལུས་གནས་ཀྱི་རྩ་འདབ་ན་དག་མ་དག་སྦྱང་བྱ་དང་སྦྱོང་བྱེད་ཀྱི་ཡི་གེ་རང་བཞིན་གྱིས་གནས་པར་གསུངས་ཡོད་རྒྱུ་དེ་ཚོ་ཡིན་ལ། རིགས་དྲུག་གི་ས་བོན་དང་ཨོཾ་ཨཱཿཧཱུྃ་ལ་སོགས་པ་རྣམས་ལྟ་བུ་ཡིན་ནོ། །ཕོ་བྲང་ལྷ་ཡི་ཡི་གེ་ནི་ལྷ་སྒོམ་སྐབས་དཀྱིལ་འཁོར་གྱི་ལྷ་གནས་སོ་སོ་ལ་ཀྲིཾ་བྲེཾ་ཏྲུཾ་ཀྵཾ་སྲུཾ་ཡེ་འཕྲོས། དེ་དྲུག་ཞི་བས་ཐུབ་དྲུག་སྐུ་ལ་སོགས་པ་དང་། ཆོ་འཕྲུལ་སྤྲུལ་བའི་ཡི་གེ་ནི་སངས་རྒྱས་ལོངས་སྤྱོད་རྫོགས་སྐུའི་སྐུ་གསུང་ཐུགས་ལས་ཡི་གེའི་སྤྲིན་འཕྲོས་ནས་སྤྲུལ་བ་མཛད་པ་ལྟ་བུ། མཚོན་བྱེད་སྒྲ་ཡི་ཡི་གེ་ནི་སྔགས་ཀྱི་སྒྲ་སོ་སོར་ངག་ནས་བརྗོད་རྒྱུ་དེ་ཉིད་ཡིན་ནོ། །རྒྱུ་ཡི་ཡི་གེ་དེ་ལྟར་ཡིན་ན་ངོ་བོ་གྲུབ་པ་བཞི་ལྡན་ཇི་ལྟར་ཚང་ཞེ་ན། ཆོས་ཉིད་ངོ་བོས་གྲུབ་པ། ཆོས་ཅན་རང་བཞིན་གྱིས་གྲུབ་པ། བྱིན་གྱིས་རླབས་ཀྱིས་གྲུབ་པ། ནུས་པ་མཐུ་ཡིས་གྲུབ་པ་སྟེ་གྲུབ་པ་བཞི་ལྡན་ཡིན་ལ། ཆོས་ཉིད་ངོ་བོས་གྲུབ་པ་ནི་ཡི་གེ་ཐམས་ཅད་སྟོང་ཆེན་མཉམ་ཉིད་ཀྱི་ངོ་བོ་གཅིག་ལ་ཡེ་ནས་གྲུབ་པ་ཞིག་ཡིན་པ་ནི་ཆོས་ཉིད་ངོ་བོས་གྲུབ་པ་ཡིན་ལ། ཆོས་ཅན་རང་བཞིན་གྱིས་གྲུབ་པ་ནི་ཆོས་ཉིད་ཅི་ཡང་མ་ཡིན་པ་ལས་ཅིར་ཡང་འཆར་དུ་རུང་བའི་རྟེན་འབྲེལ་བསླུ་མེད་ཡིན་པ་དེ་ཡིན་ཞིང་། བྱིན་གྱིས་རླབས་ཀྱིས་གྲུབ་པ་ནི་ཆོས་ཐམས་ཅད་ལ་མངའ་དབང་འབྱོར་བའི་རྫོགས་པའི་སངས་རྒྱས་དང་གྲུབ་པའི་དབང་ཕྱུག་ཐམས་ཅད་ཀྱི་ཡེ་ཤེས་ཀྱི་རྣམ་པར་འཕྲུལ་བ་སྔགས་སུ་བཏབ་ནས་བྱིན་གྱིས་བརླབས་པ་དེ་ཉིད་བྱིན་གྱིས་རླབས་ཀྱིས་གྲུབ་པ་ཡིན་པ་དང་། ནུས་པ་མཐུ་ཡིས་གྲུབ་པ་ཞེས་པ་ནི་སྨན་ཞིག་ཡིན་ན་ནད་སེལ་བའི་ནུས་པ་དང་ལྡན་པ་དང། ནོར་བུ་ཡོན་ཏན་དང་ལྡན་པ་ཞིག་ཡིན་ན་ཁོ་རང་ལས་འོད་འབྱུང་བ་དང་གསོལ་བ་བཏབ་ན་དགོས་འདོད་འབྱུང་བའི་ནུས་པ་ཡོད་པ་ལྟར་དུ་སྔགས་ལ་དངོས་གྲུབ་སྒྲུབ་པའི་ནུས་པ་མི་བསླུ་བ་ཡོད་དེ། དཔེར་བཞག་ན་སིདྡྷི་ཧཱུྃ་ཞེས་པ་དངོས་གྲུབ་སྩོལ་ཞེས་པའི་དོན་ཡིན་ནོ། །ང་ཚོས་བོད་སྐད་ཀྱི་སྟེང་ནས་དངོས་གྲུབ་སྩོལ་དང་དངོས་གྲུབ་སྩོལ་ཅེས་བརྗོད་ན་ཇི་ལྟ་བུ་ཞིག་ཡིན་ཞེ་ན། དོན་རྣམས་གཅིག་པ་ཡིན་ཡང་བྱིན་གྱིས་བརླབས་པའི་ནུས་པ་དང་ལྡན་མི་ལྡན་གྱི་སྔགས་ཡིན་མིན་གྱི་ཁྱད་པར་ཆེན་པོ་རྒྱུགས་ཡོད་ཅིང་། དེ་བཞིན་དུ་ད་ལྟའི་སྐབས་སུ་དཔེར་བཞག་ན་སྐད་རིགས་གཞན་གྱི་ཐོག་ནས་ཆོས་བཤད་ཁུལ་བྱས་ན་སྒྱུར་སྟངས་ལེགས་པོ་ཡིན་རྒྱུ་ལོས་ཡིན་ཡང་དང་པོ་བོད་སྐད་དང་བོད་ཡིག་གི་ཐོག་ནས་ཐོབ་པ་དེ་ཉིད་དོན་ཕྱོགས་འདྲ་རེས་གོ་བརྡ་སྤྲད་པའི་རྗེས་སུ་དེ་ངོ་མ་ཐོབ་ཡོད་ཟེར་དགོས་ན་ཅུང་ཟད་དཀའ་མོ་རེད་སྙམ་གྱིན་ཡོད། འོ་ན་དགའ་རབ་རྡོ་རྗེས་བོད་སྐད་སྦྱངས་ནས་བོད་སྐད་ཀྱི་ཐོག་ནས་གསུངས་པ་ཡིན་ནམ། འུ་ཚོ་ལ་ཐོབ་པ་རྣམས་བོད་སྐད་ཀྱི་སྟེང་ནས་ཐོབ་པ་ཞིག་རེད་སྙམ་ན། དེ་མི་འདྲ་སྟེ། ཆོས་སྐུ་ཀུན་ཏུ་བཟང་པོ་ལ་བླ་མ་ཞེས་པ་ཞིག་མ་དགོས་ལ། བོད་ཀྱི་སྒྲུབ་བརྒྱུད་ཀྱི་བཀའ་བབས་རྣམས་ལ་དོན་དབང་རིག་པ་རྩལ་དུ་ཐོབ་ནས་བརྒྱུད་པ་གསུམ་ཁ་རྫོགས་སོང་བའི་ལོ་རྒྱུས་མང་པོ་ཡོད་ཅིང་། དཔེར་ན་ཀུན་མཁྱེན་འཇིགས་མེད་གླིང་པ་ཡི་བླ་མ་ངོ་མས་བཤད་ན་གུ་རུ་རིན་པོ་ཆེ་དང་ཀུན་མཁྱེན་ཀློང་ཆེན་རབ་འབྱམས་པ་གཉིས་ཀ་ཡིན་ལ། བླ་མ་བཟང་པོ་ཨོ་རྒྱན་ཆོས་རྗེ་ལ་ཞུས་པས། །བྱིན་རླབས་ཟབ་མོ་དགོངས་བརྒྱུད་སྤྲོས་བྲལ་དེ་བབས་བྱུང་། །ལྟ་སྒོམ་ཡེ་བབས་སྐུ་གསུམ་ལྷུན་གྲུབ་དེ་དགའ་འོ། །ཉམས་ལེན་བྱར་མེད་བློ་འདས་ཡེ་གྲོལ་དེ་སྐྱིད་དོ། །ཞེས་གསུངས་ཤིང། ཡང་། དོན་དབང་ཟབ་མོ་དྲི་མེད་འོད་ཟེར་ལ་ཞུས་པས། །ཐུགས་སྲས་ལས་ཅན་རྟོགས་གྲོལ་དུས་མཉམ་ལ་ལངས་སོང་། །དཀའ་སྤྱད་དུས་ལྟར་ཞེ་འདོད་མ་དགོས་པ་སྐྱིད་དོ། །ཞེས་གསུངས་པ་དང་འདྲ་བར་དེ་ལྟ་བུ་ཡིན་ན་རིག་རྩལ་ཆོས་རབ་རྣམ་འབྱེད་ཀྱི་མཁྱེན་པའི་ཀློང་བརྡོལ་ནས་ཤེས་བྱའི་མཁའ་ལམ་ལ་ཐོགས་མེད་དུ་གནམ་འཕང་གཅོད་པ་མ་གཏོགས་དཔྱིད་ཁའི་ཡར་ངན་ལ་ལ་འགོས་པ་དང་འདྲ་བར་ལྟ་སྤྱོད་གང་གི་ཐད་ནས་སྣ་བཙུགས་ཁུར་བ་མ་ཡིན་ནོ། །དེ་ཚོ་དོན་མེད་དུ་བཤད་བཞིན་འདུག བླ་བརྡོལ་སྨྲ་བའི་གཏམ་ཞེས་པ་དེ་ཡིན་ལ། དོན་མེད་ཀྱི་ངག་འཆལ་ཅི་ཞིག་གིས་བཤད་ཡོང་མ་ཤེས་སོ། །སྔགས་ལ་བྱིན་རླབས་ཡོད་པ་ཡིན་ཞིང་། ནུས་པ་མཐུ་ཡིས་གྲུབ་པ་ཟེར་བ་དེ་ཡིན། རང་གར་བཤད་པའི་ངག་ཚིག་དང་མི་འདྲའོ། །བརྒྱུད་པའི་བྱིན་རླབས་དེ་ཚོ་བླ་མས་གསུངས་པའི་སྐད་ཡིག་གི་ཐོག་ནས་གཞན་ལ་ལུང་ལ་སོགས་པ་བཏོན་ན་ཐོབ་ཤག་ཤག་མགོ་ངན་མེད་པ་དེ་རེད་སྙམ། དེ་འཕྲོས་དོན་ལ་ཅི་ཞིག་བཤད་བཞིན་ཡོད་ན་སྔགས་ལ་སྔགས་ཡིན་པར་མ་ཤེས་ནས་ཕལ་བ་དང་འདྲ་བར་བཟུང་ན་ཡང་བྱེད་ལས་མི་བྱེད་གསུངས་ཤིང་། སྔགས་ཡིན་རྒྱུའི་ནུས་པ་ཡོད་པ་དང་དེ་ལ་དད་པ་དང་འདུན་པ་ཡོད་ན་སྔགས་ཀྱི་བྱེད་ལས་ཡོད་མ་གཏོགས་སྔགས་ཡིན་པར་མ་ཤེས་ནས་རང་གར་ཁ་ལ་བབས་ནས་སྔགས་ཤིག་འགྱུར་བས་ནུས་པ་མེད་གསུངས་སོ། །སྔགས་ཞེས་པ་རྟོག་མེད་ཡིད་བཞིན་གྱི་ནོར་བུའི་ཚུལ་ཅན་ཞིག་ཡིན་པས་དེའི་བྱིན་རླབས་དེ་ཟླ་གཟུགས་ཆུ་ནང་དུ་ཤར་བ་དང་འདྲ་བ་ཡིན་ན་ཟླ་གཟུགས་ནམ་མཁའ་ན་ཡོད་ཀྱང་ཤར་སའི་ཆུ་ས་གཞི་ལ་མེད་ན་གཟུགས་བརྙན་ཤར་ཐབས་མེད་ལ། དེ་དང་འདྲ་བར་སྔགས་ཀྱི་བྱིན་རླབས་འཇུག་དགོས་བསམས་ནས་དངོས་གྲུབ་ཐོབ་པར་འདོད་ན་རྐྱེན་དད་པ་ལ་སོགས་པ་ཡོད་དགོས་སོ། །སྔགས་འདི་རྒྱུ་ཡི་གེ་ཡིན་ཞིང་། ངོ་བོ་གྲུབ་པ་བཞི་ལྡན་ཡིན་ལ། བྱེད་ལས་དེ་ནུས་པ་ཐོགས་མེད་ཡིན་ཞེས་དེ་ལྟར་བཤད་དོ། །གནས་སྐབས་དང་མཐར་ཐུག་གི་དོན་ཐམས་ཅད་སྔགས་ཀྱིས་སྒྲུབ་མི་ཐུབ་པ་ཞིག་མེད་ལ། མེད་པའི་རྒྱུ་མཚན་ནི་སྔགས་ལྷ་ཡི་ངོ་བོ་ཡིན་པས་སྒྲུབ་ཐུབ་ཅིང་། གང་ཟག་ཐ་མལ་པ་ཞིག་ལ་ཆ་མཚོན་ན་ད་ལྟ་སོ་སོའི་སྐྱེ་བོ་ནུས་པ་མེད་པ་ཞིག་ཡིན་ཡང་སངས་རྒྱས་དང་བྱང་སེམས་རིག་འཛིན་གྲུབ་པ་ཕོ་མོ་གྲོགས་སུ་བཀུག་ནས་ཞི་རྒྱས་དབང་དྲག་གི་ལས་བཞི་བསྒྲུབ་རྒྱུ་ཡོད་པས་མི་ཚད་འགྲུབ་རྒྱུ་ཡང་ཡོད་དོ། །ལར་འབྲོག་པའི་མི་སྐྱ་ཕོ་མོ་ཡིན་ཡང་རྟ་ཟོག་བདེ་འཚམས་མ་གྱུར་ན་རྟ་གཟུངས་ནོར་གཟུངས་རྒྱབ་ཆོག་བྱེད་དགོས་པ་དེ་ཉིད་ཤེས་བཞིན་ཡོད་ཅིང་། ཐུན་མོང་གི་སྤྱོད་ཡུལ་དུ་གྱུར་པ་ནུས་པ་ཅན་སྔགས་ལྟ་བུ་ཞིག་མེད་ལ། ཡང་འབྲོག་པ་རྣམས་ཀྱིས་ཁ་བ་ཆེན་པོ་འབབ་བོ་དྲན་དུས་གླ་ཆེན་པོ་བྱིན་ནས་ཁ་བ་འགོག་ཁར་བཅུག་པ་དང་། རོང་བའི་ས་ཆ་ཡིན་ན་དབུས་གཙང་གི་ཕྱོགས་སུ་སེར་བ་སྲུང་མཁན་ཁང་བའི་ཐོག་ཏུ་ཐུག་ནག་བཙུགས་ཡོད་པ་དེ་འདྲ་ཡོད་དར། དེ་ཚོས་སྔགས་བཟླས་ནས་དེའི་ནུས་པ་འདོན་ཁུལ་བྱེད་པ་རེད་མ་གཏོགས་གཞན་མིའི་ནུས་པ་ཞིག་ཅི་ཡང་མ་ཡིན་ནོ། །གྲུབ་པའི་རིག་འཛིན་གྱིས་བྱིན་གྱིས་བརླབས་པའི་སྔགས་ཀྱི་ནུས་པ་ལ་བརྟེན་པ་ཡིན་ཞིང་། ཡང་དེ་འདྲ་བའི་ནང་ལ་ནུས་པ་མི་འབྱིན་པ་མང་པོ་ཡོད་ལ། སྔགས་ལ་ནུས་པ་མེད་པ་ཅི་ཡིན་ཏེ་མིས་བཟླས་དམིགས་བསྐྱེད་རྫོགས་ཀྱི་གང་ཞིག་གི་ཕྱོགས་ནས་མ་ནུས་པ་ཡིན་ན་གཞན་ཕྱོགས་ཤིག་ནས་མ་ནུས་པའི་རྟགས་ཡིན་ནོ། །ཆོས་ཀྱི་སྐྱོན་མ་ཡིན་ཡང་གང་ཟག་གི་སྐྱོན་ཡིན་ལ། གང་ཟག་གི་སྐྱོན་ལ་ལོག་པའི་ལམ་ལ་མཐའ་མེད་པས་དེ་བཤད་ཚོད་ཅི་ཡོད། ཆོས་ཀྱི་གྲགས་པ་ཅིའི་ཕྱིར་མིི་བདེན་ཏེ་བདེན་པ་ཡིན་ནོ། །སྔགས་འདིའི་དབྱེ་བའི་སྟེང་ནས་བསམ་བློ་བཏང་ན་སྤྱི་དང་བྱེ་བྲག་ཁྱད་པར་གྱི་དབྱེ་བ་མང་ཞིང་། སྤྱིའི་དབྱེ་བའི་ཐད་ཀྱི་གཞི་ལམ་འབྲས་གསུམ། བྱེ་བྲག་སྔགས་ཀྱི་སྒྲ་འཇུག་ས་དེ་ལྟ་བུ་ཡོད་ལ། ཁྱད་པར་གྱི་དབྱེ་བ་ནི་དཔེར་ན་ཟློས་པའི་སྔགས་སྐབས་ཀྱི་བཤད་བྱ་འདི་ཡིན་ན་འདི་ལ་གསང་སྔགས། རིག་སྔགས། གཟུངས་སྔགས་གསུམ་གྱི་དབྱེ་བ། དེ་གསུམ་སླ་མོ་ཞིག་གིས་བཤད་ན་རྒྱུ་གཟུངས་ཐོབ་པ་ལས་སྔགས་བྱིན་གྱིས་བརླབས་པ་ཡིན་པས་གཟུངས་སྔགས། ངོ་བོ་རིག་པའི་ཡེ་ཤེས་ཀྱི་བདག་ཉིད་ཅན་ཡིན་པས་ན་རིག་སྔགས། ཐབས་གསང་བས་བཟླ་བར་བྱ་བ་ཡིན་པས་ན་གསང་སྔགས། དེ་ཡང་ལྡོག་པའི་དབྱེ་བ་ཙམ་མ་གཏོགས་ངོ་བོ་ལ་ཁྱད་པར་མེད་པ་ལ་སོགས་པ་སྦྱར་ཚུལ་སྣ་ཚོགས་པ་ཡོད་རྒྱུ་ཅན་དེ་ལྟ་བུ་ཞིག་ཡིན་ནོ། །བྱེ་བྲག་ཏུ་དཀྱིལ་འཁོར་གང་ཡང་རུང་བ་དང་འབྲེལ་བའི་སྔགས་ལ་མཚོན་ན་གོང་ནས་བསྐྱེད་ཆོག་གི་སྐབས་ནས་ཀྱང་བཤད་མྱོང་ཡང་རྒྱུ་མ་ནོར་བ་རྩ་བའི་སྔགས་ས་བོན་གྱི་སྔགས་ལྟ་བུ། བསྐྱེད་པ་རྐྱེན་གྱི་སྔགས་ལྷ་བསྐྱེད་དང་དབང་བསྐུར་སྤྱན་འདྲེན་མཆོད་པ་རྣམས་ཀྱི་སྐབས་སུ་བརྗོད་རྒྱུ་རྣམས་ལྟ་བུ། བཟླས་པ་ལས་ཀྱི་སྔགས་ལྷའི་སྙིང་པོ་བཟླ་རྒྱུ་ཅན་དང་གསུམ་མོ། །དེའི་ནང་གི་བཟླས་པ་ལས་ཀྱི་སྔགས་འདི་ཡིན་ན་ཡང་ནང་གསེས་ཀྱི་གཙོ་བོའི་སྔགས། འཁོར་གྱི་སྔགས། སྤྱི་དྲིལ་གྱི་སྔགས། ལས་ཀྱི་ཤམ་བུའི་སྔགས་ལ་སོགས་པ་དང་། ད་རུང་བསྙེན་སྒྲུབ་ལས་གསུམ་གྱི་སྔགས། རྩ་སྔགས་དང་སྙིང་པོ་ཉེ་སྙིང་ལ་སོགས་པ་ནང་གི་དབྱེ་བ་མང་པོ་ཡོད་དོ། །རྒྱུད་དང་སྒྲུབ་ཐབས་སོ་སོའི་ནང་གི་སྔགས་ཀྱི་དབྱེ་བསྡུ་མཐའ་གཅིག་ཏུ་གཅིག་ལྟ་བུ་ཡིན་པའི་ངེས་པ་ཡང་མེད་ཅིང་། སྤྱིར་བཏང་དེ་ལྟར་ཡིན་ནོ། །སྔགས་ལ་འཇུག་པ་ལ་འཇུག་ལུགས་གསུམ་ཡོད་ལ། ཤེས་རབ་དང་གཅིག ཏིང་འཛིན་དང་གཉིས། བརྩོན་འགྲུས་དང་གསུམ་ཡོད་པ་ཞིག་གིས་འཇུག་དགོས་སོ། །དེ་ཇི་ལྟར་ཡིན་ཞེ་ན། ཤེས་རབ་ཟབ་མོས་སྔགས་ལ་ཡིད་ཆེས་ཡོད་དགོས་ལ། དོན་དམ་པར་ཆོས་ཐམས་ཅད་དག་མཉམ་ཆོས་སྐུ་ཆེན་པོའི་ཀློང་ན་རིས་སུ་མ་ཆད་པ་དང་། ཀུན་རྫོབ་ཏུ་ལྷའི་སྐུ་དངོས་དང་སྔགས་གཉིས་ཀ་གདུལ་བྱའི་དོན་དུ་ཡེ་ཤེས་རྣམ་པར་འཕྲུལ་བ་ཡིན་པ་དེ་ཉིད་ཚང་མར་ཁྱད་མེད་དུ་རྟོགས་པ་ཞིག་གིས་སྔགས་དེ་ལྷ་རུ་འཛིན་ཤེས་དགོས་ཤིང་། དེའི་ཐོག་ཏུ་དེའི་གེགས་དང་བར་ཆད་དུ་འགྱུར་བའི་ཀུན་རྟོག་བསལ་ནས་མེད་པར་བྱེད་དགོས་པ་དང་། ལྷ་སྔགས་ལ་བཟང་ངན་བལྟས་ནས་དོན་ལ་ཐ་དད་དོ་སྙམ་པའི་དོགས་པ་བསལ་དགོས་སོ། །སངས་རྒྱས་དེ་གདུལ་བྱའི་ངོ་ལ་རྣམ་པ་འདྲ་དང་མི་འདྲར་བྱས་ཏེ་སྣང་བ་ཡིན་ཞིང་། སངས་རྒྱས་རྣམས་ཕལ་བའི་ངོར་སྔགས་ཀྱི་རྣམ་པར་སྟོན་བཞིན་ཡོད་པ་དང་། སྔགས་གྲུབ་དུས་ལྷ་མངོན་སུམ་དུ་སྣང་ཐུབ་ལ། ལྷ་ཉིད་སྔགས་སུ་སྣང་བར་བསྒྲུབས་པས་སྔགས་ཉིད་ལྷར་སྣང་བའི་ཚུལ་དུ་གདུལ་བྱ་ལ་དངོས་གྲུབ་སྩོལ་བར་བྱེད་ཐུབ་བོ། །ཡང་སྔགས་དེ་ཡི་གེའི་ཐོག་ཏུ་བྲིས་ཡོད་པ་དེ་ངས་རྗོད་ཀྱིན་ཡོད་པ་ཡིན་ཞིང་། དེ་ལྷ་མ་ཡིན་སྙམ་ནས་རྣམ་པ་ཐ་དད་པས་དོན་ལ་ཐ་དད་དུ་འཛིན་པའི་བློ་དེ་ཡང་བསལ་དགོས་ལ། བསམ་བློ་ཐོངས་དང་འུ་ཚོའི་འཁྲུལ་རྟོག་གི་རྣམ་པ་ཐ་དད་དུ་སྣང་བ་དེ་ཐ་དད་དུ་ཡིན་པའི་རྒྱུ་མཚན་དང་གཅིག་ཏུ་སྣང་ན་གཅིག་ཡིན་པའི་རྒྱུ་མཚན་མེད་དེ། དཔེར་ན་སེམས་གཅིག་པུ་འདི་ཉིད་རྨི་ལམ་རྨིས་པའི་གནས་སྐབས་ན་བག་ཆགས་ཀྱི་དབང་གིས་བེམ་པོར་སྣང་ལ། དེའི་གནས་སྐབས་ན་བེམ་ཤེས་གཉིས་སུ་སྣང་ཞིང་། བེམ་ཤེས་གཉིས་ཀ་གཅིག་ཡིན་ན་གཅིག་ཡིན་ས་མི་འགྲོ་ཡང་འཁྲུལ་རྟོག་ལ་དེ་ལྟར་སྣང་ངོ་། །ཡང་ཐ་དད་ཡིན་པ་དེ་ཉིད་གཅིག་ཏུ་ཡིན་སྣང་ཤར་ཞིང་། འུ་ཚོར་ཐ་དད་ཡིན་པའི་ལུས་རྡུལ་ཕྲན་ཕུང་པོ་བསགས་པ་འདི་ཉིད་ཀྱང་གཅིག་གི་སྣང་བ་ཤར་ལ། སངས་རྒྱས་གཅིག་ཉིད་ཞི་བ་དང་ཁྲོ་བོའི་ཚུལ་གྱིས་བསམ་ཡས་སྒྱུ་འཕྲུལ་དྲ་བའི་རོལ་བར་སྣ་ཚོགས་འཆར་བ་ཡིན་པས་རྣམ་པ་ཐ་དད་པ་ཙམ་ཞིག་གིས་ལྷ་མིན་པར་འཛིན་རྒྱུ་མེད་པ་དང་། ད་རུང་རང་རྒྱུད་དང་གཞན་རྒྱུད་ཀྱིས་བསྡུས་མ་བསྡུས་ཀྱི་ཐད་ནས་ཐ་དད་དོ་སྙམ་རྒྱུ་མེད་དོ། །ངེས་པ་དོན་གྱི་ལྷ་ཞེས་པ་ཆོས་ཐམས་ཅད་ཀྱི་གནས་ལུགས་ཟུང་འཇུག་གཞི་ཡི་དེ་བཞིན་ཉིད་གློ་བུར་དྲི་བྲལ་གྱི་གནས་སྐབས་ཀྱི་རང་བྱུང་ཡེ་ཤེས་ཀྱི་བདག་ཉིད་ཅན་དེ་ཡིན་ཞིང་། དེའི་ཡེ་ཤེས་སྒྱུ་འཕྲུལ་དྲ་བ་སྣ་ཚོགས་སུ་ཤར་བ་དེ་ཉིད་མི་ཤེས་ནས་གཞན་རྒྱུད་ཀྱིས་བསྡུས་པའི་ལྷ་ཞིག་ག་ཤེད་ཅིག་ན་ཡོད་སྙམ་བྱས་ན་དེ་རྡུལ་དང་སྐད་ཅིག་མའི་ཆ་ཤས་ཅན་ཞིག་མིན་ཐབས་མེད་ལ། ཕྱོགས་དུས་ཀུན་ན་ཁྱབ་པའི་རྣམ་པ་ཐམས་ཅད་པའི་སྐུར་གྱུར་ཐུབ་མེད་དོ། །དེས་ན་ཐ་མལ་བའི་བློ་ལ་སྣང་ཚུལ་ཙམ་གྱིས་ཆོས་ཐམས་ཅད་ལ་མངའ་དབང་འབྱོར་བའི་སངས་རྒྱས་ཀྱི་སྤྱོད་ཡུལ་བསམ་གྱིས་མི་ཁྱབ་པ་དཔོག་མི་ཐུབ་སྟེ། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །ཞེས་གསུངས་པ་ལྟ་བུ་ཡིན་ནོ། །རང་སེམས་ཀྱི་དྲི་མ་དག་རིམ་དང་བསྟུན་ནས་སངས་རྒྱས་ཀྱི་ཆོ་འཕྲུལ་དང་བྱིན་རླབས་ཇེ་མངོན་ཇེ་མངོན་དུ་གྱུར་ཡོང་ཞིང་། མཐར་ཐུག་དྲི་མ་ཡོངས་སུ་དག་ནས་གནས་ལུགས་མངོན་དུ་གྱུར་པའི་གནས་སྐབས་ན་སངས་རྒྱས་ཐམས་ཅད་རང་ཉིད་དང་། རང་ཉིད་དུས་གསུམ་གྱི་སངས་རྒྱས་ཐམས་ཅད་དང་གཉིས་སུ་མེད་པའི་ཆོས་ཉིད་ཡེ་ཤེས་ཀྱི་སྐུ་བརྙེས་ཡོང་ལ། ད་ལྟའི་གནས་སྐབས་ན་རང་གི་ངོ་ལ་སངས་རྒྱས་ཐམས་ཅད་སྔགས་ཀྱི་རྣམ་པར་ཤར་ནས་གནས་སྐབས་དང་མཐར་ཐུག་གི་དོན་སྒྲུབ་པར་མཛད་པ་ཡིན་སྙམ་ནས་སྔགས་ལ་ཡིད་ཆེས་བསྐྱེད་རྒྱུ་དེ་ཉིད་སྔགས་སྒྲུབ་པའི་རྒྱུའི་གཙོ་བོ་ཡིན་ནོ། །དེས་ན་སྔགས་ལ་ཞུགས་དུས་ཤེས་རབ་ཏིང་འཛིན་བརྩོན་འགྲུས་གསུམ་ཡོད་དགོས་ཞེས་བཤད་པ་ཡིན་ལ། ཤེས་རབ་ཀྱི་ཐད་ནས་དེ་ལྟར་ཡིན་ཞིང་། ཏིང་འཛིན་གྱི་ཐད་ཀྱི་དངོས་གཞི་ཏིང་འཛིན་གསལ་བ་ཡིན་པ་དང་གྲོགས་ལྟ་བས་ཟིན་པ་གཉིས་ཀ་གནད་ཆེའོ། །སྐུ་དང་ཐུགས་སྲོག་སྔགས་ཕྲེང་འཕྲོ་འདུ་དེ་ཚོ་རྣམ་པ་ཤིན་ཏུ་གསལ་བ་ཡིན་པ་དེ་ཡང་ཡིད་ངོར་ཤར་བ་ཙམ་མ་ཡིན་ལ། དེ་འདྲ་ཡོད་པ་ཡིན་སྙམ་པ་ཙམ་ཡང་མ་ཡིན་པར་བདག་ཉིད་ལྷའི་ང་རྒྱལ་དུ་བྱ་བ་དང་། ལྷ་དེ་ཡང་མིང་གཟུགས་མཚན་མའི་རྣམ་པ་ཅན་གྱི་རང་རྒྱུད་པ་ཞིག་ཏུ་མི་གཟུང་བར་སྤངས་རྟོགས་མཐར་ཕྱིན་འབྲས་བུའི་ཡེ་ཤེས་རྣམ་པ་ཐམས་ཅད་པ་དེ་ལྷ་སྔགས་ཀྱི་རྣམ་པར་ཤར་བའི་དག་དྲན་དེ་ལྟར་བྱེད་དགོས་སོ། །དེ་ལ་གྲོགས་ལྟ་བས་ཟིན་པར་བྱ་བ་ལ་ཇི་ལྟར་ཟིན་དགོས་ཤེ་ན། ལྷ་སྔགས་ཀྱི་གསལ་སྣང་དེ་ཐམས་ཅད་ཀྱང་དག་མཉམ་བདེན་པ་དབྱེར་མེད་ཡེ་ནས་ཆོས་སྐུ་ཐིག་ལེ་ཉག་གཅིག་གི་ངང་ཚུལ་ལས་མ་འདས་པར་ཤེས་པར་བྱས་ནས་དམིགས་པ་གཞན་གྱིས་བར་མ་ཆོད་པ་ཞིག་གི་ཐོག་ནས་རྩེ་གཅིག་ཏུ་གནས་དགོས་ལ། དེ་ལྟར་ཞི་གནས་སྒྲུབ་པའི་སྐབས་སུ་ལྷག་མཐོང་རང་ཤུགས་ཀྱིས་འབྱུང་ཞིང་། གསལ་བརྟན་དག་གསུམ་ཇི་སྙེད་པའི་ལྷག་མཐོང་དང་། ལྟ་བས་ཟིན་པ་དེ་ཇི་ལྟ་བའི་ལྷག་མཐོང་དུ་འགྲོའོ། །ཤེས་རབ་དང་ཏིང་འཛིན་གྱིས་སྔགས་ལ་ཞུགས་པ་དང་མཉམ་དུ་བརྩོན་འགྲུས་ཡོད་དགོས་ཤིང་། བརྩོན་འགྲུས་མེད་ན་མཐར་ཕྱིན་མི་ཐུབ་ལ། དང་པོ་སྔོན་འགྲོ་དབང་ཐོབ་དམ་ཚིག་ལ་གནས། སྔགས་དག་པ་དང་བཟླ་ལུགས་ཤེས་པ། དངོས་གཞི་སྔགས་བཟླ་བའི་གནས་སྐབས་ན་དྲན་ཤེས་བག་ཡོད་དང་ལྡན་པས་སྒོ་གསུམ་གྱི་གཡེང་བ་ཐམས་ཅད་སྤངས་ནས་ཚུལ་བཞིན་དུ་བཟླ་དགོས་སོ། །བཟླས་པ་ངོ་མ་ལ་བཟླ་ལུགས་ཀྱི་རྣམ་གྲངས་མང་པོ་ཡོད་པ་དང་། སྔོན་མ་ཞིག་ནས་ཀྱང་བཤད་མྱོང་ཞིང་། རྒྱས་བཤད་བྱས་མ་བྱས་མི་འདུག་ལ། ཧ་ལམ་ཕྱོགས་མགོ་ཙམ་ཞིག་བཤད་ན་ཡིད་བཟླས་ཞེས་པ། ཤུབ་བུར་བཟླས་པ་ཞེས་པ། དབྱངས་བཟླས་ཞེས་པ། དེ་རེ་རེ་ལ་ནང་གསེས་ཀྱི་དབྱེ་བ་མང་པོ་ཡོད་དོ། །དེའི་ནང་གི་ཡིད་བཟླས་རྐྱང་པ་ལ་མཚོན་ན་ཡིད་བཟླས་ཙམ་ཞེས་པ་དང་། འགོག་བཟླས་ཞེས་པ་རྣམ་པ་གཉིས་ཀྱི་དབྱེ་བ་སྟེ། ཡིད་བཟླས་ཙམ་ནི་སྙིང་ཁའི་སྔགས་ཕྲེང་དང་ས་བོན་ལ་དམིགས་པ་གཏད་ནས་དེས་རང་སྒྲ་སྒྲོག་པའི་ཚུལ་གྱིས་ཡིད་ཀྱིས་ཡང་ནས་ཡང་དུ་བཟླ་རྒྱུ་མ་གཏོགས་མཆུ་འགུལ་བ་སོགས་ཀྱི་རྩོལ་བ་མི་དགོས་པ་དེ་ལྟ་བུ་ཡིན་ལ། དེ་རླུང་དང་སྦྱར་ན་ཡང་འགོག་བཟླས་སུ་འགྱུར་རོ། །དེ་ལ་ཡང་ནང་གསེས་ཀྱི་འགོག་བཟླས་དང་། རྡོར་བཟླས། བུམ་ཅན་གྱི་བཟླས་པ་ཞེས་པ་དེ་ལྟར་ཡོད་ལ། དེའི་ནང་གི་འགོག་བཟླས་ལྟ་བུ་ཡིན་ན་སྲོག་རྩོལ་ནང་དུ་བསྡོམས་ཤིང་ཡིད་ཀྱིས་བཟླ་རྒྱུ་དེ་ལྟ་བུ་ཡིན་པ་དང་། སྲོག་རྩོལ་ཞེས་པ་ནི་སྲོག་ནི་རླུང་དང་རྩོལ་བ་དྲན་པའམ་ཡིད་ཀྱི་རྒྱུ་བ་ཡིན་གསུངས་ཡོད་ཅིང་། དེ་བསྡོམས་ནས་ཡིད་བཟླས་བྱེད་དུས་ལུས་ངག་གི་རྩོལ་བ་ཤུགས་ཀྱིས་ཁེགས་ནས་ཡོན་ཏན་ཁྱད་པར་ཅན་འགྲུབ་པའི་དགོས་པ་དེ་ལྟ་བུ་ཡོད་དོ། །རྡོར་བཟླས་ལྟ་བུ་ཡིན་ན་རླུང་འབྱུང་འཇུག་གནས་གསུམ་སྔགས་དང་སྦྱར་ནས་དམིགས་པ་མ་ཡེངས་པར་བྱེད་རྒྱུ་དེ་ཡིན་ཞིང་། བུམ་ཅན་བཟླས་པར་འདོད་ན་རླུང་སྦྱོར་བ་བཞི་ལྡན་གྱིས་བུམ་ཅན་དང་སྦྲགས་ནས་ཡིད་བཟླས་བྱེད་རྒྱུ་དེ་ཡིན་ནོ། །དེ་བཞིན་དུ་ཤུབ་བུར་བཟླས་པ་ཞེས་པ་ནི་སྒྲ་མེད་ཅིང་མཆུ་དང་མགྲིན་པའི་བྱེད་རྩོལ་གྱིས་སྒྲ་མ་གྲག་ན་ཡང་མཆུ་དང་མགྲིན་པའི་བྱེད་རྩོལ་དགོས་པ། དབྱངས་བཟླས་སྒྲ་མི་ཆེ་མི་ཆུང་ལ་སོགས་པ་ཡོན་ཏན་བཅུ་དང་ལྡན་པའི་ཐོག་ནས་དེ་ཡང་མཁུར་བར་དབུགས་ཀྱི་རླུང་འབྱིན་པའི་དབྱངས། ཚངས་པའི་དབྱངས་ཀྱི་འགྲན་ཚུལ་གྱི་དབྱངས་ལ་སོགས་པ་རྒྱུད་གཞུང་ནས་མང་པོ་གསུངས་ཡོད་པ་དེ་ལྟར་ཡིན་ནོ། །ད་ལྟ་རང་རེས་བཟླ་རྒྱུ་འདི་དབྱངས་བཟླས་ཀྱི་ཁོངས་སུ་གཏོགས་པའི་བཟླ་ཚུལ་ཞིག་ཡིན་ནོ། །དེ་ལྟར་ན་སྤྱིར་བཏང་གིས་བསྙེན་པ་འདི་ལ་གཞི་བསྙེན་དང་ལས་བསྙེན་རྣམ་པ་གཉིས་ཡོད་ལ། ད་ལྟའི་སྐབས་ཀྱི་རང་རེའི་བསྙེན་པ་འཇོག་རྒྱུ་འདི་གཞི་བསྙེན་ཡིན་ནོ། །དབང་དང་སྦྱིན་སྲེག་ལ་སོགས་པའི་ཆེད་དུ་བསྙེན་པའི་ཁ་གསོ་བྱེད་རྒྱུ་དེ་ཉིད་ལས་བསྙེན་ཡིན་ཞིང་། བསྙེན་པའི་ཁ་གསོ་དང་སྦྲེལ་ནས་དབང་རྫས་སོ་སོ་བསྒྲུབས་ཏེ་བྱིན་གྱིས་བརླབ་པ་ཡིན་ནོ། །དེ་གཉིས་ཀ་གང་ཡིན་ཡང་བསྙེན་སྒྲུབ་ཡན་ལག་བཞི་ཁ་ཚང་དགོས་པར་མ་ཟད་སྲོག་སྡོམ་གཟེར་བཞིའི་མན་ངག་གི་གནད་ཚང་བ་ནི་གལ་ཆེ་བ་ཡིན་ཞིང་། སྲོག་སྡོམ་གཟེར་བཞིའི་སྐོར་དེ་གོང་ནས་མང་པོ་བཤད་ཀྱང་། ཤིན་ཏུ་དོན་དང་ལྡན་པ་ལ། །ཚིག་གཅིག་ལན་གཉིས་བརྗོད་པར་བྱ། །ཞེས་གསུངས་པས་ད་རུང་ཡང་བཤད་བྱས་ན་འདི་ལྟ་སྒོམ་སྤྱོད་འབྲས་བཞིའི་དབང་དུ་བྱས་ན་དགོངས་པ་མི་འགྱུར་བའི་གཟེར་རམ་ཆོས་ཉིད་མི་འགྱུར་བའི་གཟེར་དེ་སྔོན་ལ་བཤད་ན་ཆོག་ཀྱང་ལྷ་སྔགས་ཆོས་ཉིད་ཕྲིན་ལས་ཀྱི་རིམ་པ་བརྒྱུད་སྐབས་དང་པོ་ཏིང་འཛིན་ལྷའི་གཟེར་དེ་བཤད་དགོས་པ་ཞིག་ཡིན་ལ། དེ་བཤད་ན་གནད་དུ་ཁེལ་བ་ཞིག་ཡིན་ནོ། །གོང་ནས་བསྐྱེད་ཆོག་གི་སྐབས་ན་བཤད་པ་བཞིན་ཏིང་འཛིན་གསུམ་བསྐྱེད་དེ་ཐོལ་བསྐྱེད་འབྲུ་བསྐྱེད་གང་ཡིན་ན་བསྐྱེད་རིམ་གསལ་བརྟན་གྱི་ཚད་བརྒྱད་དང་ལྡན་དགོས་སོ། །གསལ་བའི་ཚད་བཞི་སྟེ་སལ་ལེ་སང་ངེ་ལྷག་གེ་ལྷང་ངེ་བ་ཞེས་ཟེར་ལ། བརྟན་པའི་ཚད་བཞི་ཡོད་དགོས་ཤིང་། མི་གཡོ་མི་འགྱུར་མངོན་པར་མི་འགྱུར་བ་སོགས་བཞི་དང་བརྒྱད་ཀྱིས་སྒོམ་སྐབས་གོམས་ནས་ཡུལ་གསུམ་གྱད་དུ་གྱུར་པ་ཞེས་པ་དང་པོ་ཡིད་ཀྱི་ཡུལ། གཉིས་པ་དབང་པོའི་ཡུལ། གསུམ་པ་རེག་པའི་ཡུལ་དུ་གྱུར་པ་ཞིག་བྱེད་དགོས་སོ། །དེ་དུས་རྣམ་དག་དྲན་པ་དང་ང་རྒྱལ་རྩོམ་པ་གོང་ནས་ཀྱང་ཞུས་པ་ལྟར་དུ་ལྷ་ཐ་དད་དང་། ང་ཐ་དད། ངས་ལྷ་བསྒོམས་པ་ལྟ་བུ་མ་ཡིན་པར་རང་རིག་སྣང་སྟོང་གཉིས་སུ་མེད་པའི་བདག་ཉིད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དང་རོ་གཅིག་པ་དེ་ཡེ་ནས་ཆོས་ཉིད་དོན་གྱི་ལྷ་ཡིན་པ་དེ་དེའི་རང་རྩལ་འགག་མེད་རྟེན་དང་བརྟེན་པའི་འཁོར་ལོར་ཤར་བ་ཡིན་པ་དེ་ལྟ་བུའི་ངང་དུ་དྲན་པ་ཉེ་བར་བཞག་དགོས་ལ། འདིའི་དག་རྫོགས་སྨིན་གསུམ་བསྐྱེད་རིམ་གྱི་སྐབས་ལ་སོགས་པ་ནས་མང་པོ་བཤད་ཟིན་ཏོ། །སྙིང་པོ་སྔགས་ཀྱི་གཟེར་ཞེས་པ་དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བ་ཟབ་མོ་སྙིང་པོ་སྔགས་ཀྱི་བཟླས་པ་ལ་བརྟེན་ནས་སྒྲ་གྲག་སྔགས་ཀྱི་རང་བཞིན་གྲག་སྟོང་བརྗོད་བྲལ་ཤེས་པའི་ཐོག་ནས་འབྱུང་འཇུག་གནས་གསུམ་སྔགས་སུ་བཟླས་པས་ན་རྡོ་རྗེའི་བཟླས་པ་བྱེད་རྒྱུ་ལ་སོགས་པ་གོང་ནས་བཤད་པ་ལྟར་རོ། །འདིས་མར་འཁོར་བའི་གནས་སྐབས་ན་བརྗོད་པ་སྒྲ་ཡི་རང་བཞིན་དེ་འགྲོ་བའི་ངག་གི་བག་ཆགས་དག་པར་བྱེད་པ། ཡར་སངས་རྒྱས་ཀྱི་དུས་ན་གསུང་རྣམ་པ་ཐམས་ཅད་པ་ཐེག་པ་བསམ་གྱིས་མི་ཁྱབ་པ་འཆར་བའི་འབྲས་བུ་གཞི་ལ་རྫོགས་པ། བར་ཉམས་ལེན་གྱི་གནས་སྐབས་ལ་མཚོན་ན་ངག་རླུང་གི་རང་བཞིན་སྙིང་པོ་སྔགས་ཀྱི་རོལ་བར་སྦྱངས་པས་རླུང་ལ་བརྟེན་པའི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོ་བ་དེ་ལྟར་དག་རྫོགས་སྨིན་གསུམ་ཚང་བའོ། །དགོངས་པ་མི་འགྱུར་བའི་གཟེར་ཞེས་པ་དེ་གཉིས་མེད་མཉམ་པ་ཆེན་པོའི་འཁོར་འདས་ཡེ་སངས་རྒྱས་པའི་དཀྱིལ་འཁོར་ལ་བསླབ་པར་བྱ་བ་དེ་ཉིད་ཡིན་ལ། འདིས་མར་འཁོར་བའི་གནས་སྐབས་ལ་སེམས་ཀྱི་རྟོག་ཚོགས་ཐམས་ཅད་དག་པར་བྱེད་ལ། ཡར་སངས་རྒྱས་ཀྱི་དུས་ན་ཐུགས་རྣམ་པ་ཐམས་ཅད་པའི་མངོན་ཤེས་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོགས། བར་ཉམས་ལེན་གྱི་གནས་སྐབས་ན་སྟོང་པ་ཉིད་ཀྱི་རྫོགས་རིམ་སྒོམ་པའི་སྨིན་བྱེད་དུ་འགྲོ་བ་དེ་ལྟར་དག་རྫོགས་སྨིན་གསུམ་ཚང་ངོ་། །འཕྲོ་འདུ་ཕྲིན་ལས་ཀྱི་གཟེར་ལ་མཚོན་ན་ལྷ་སྔགས་ཆོས་ཉིད་གསུམ་པོ་དང་འབྲེལ་བའི་སྒོ་ནས་མཆོག་ཐུན་མོང་གི་ཕྲིན་ལས་སྒྲུབ་པའི་བྱེ་བྲག་ལ་འཕྲོ་འདུ་ཕྲིན་ལས་ཀྱི་གཟེར་ཞེས་ཟེར་ལ། སྤྱིར་ན་གཟེར་ཞེས་པ་མི་འགྱུར་བརྟན་པའི་ཐོག་ནས་དེ་དང་དེའི་དགོས་དོན་མངོན་དུ་གྱུར་པ་འཛེར་མ་བརྒྱབ་པ་དང་འདྲ་བར་གོང་ནས་བཤད་པ་ལྟར་ཡིན་པས་གཉིས་འཛིན་གྱི་ཆ་ཐམས་ཅད་གཉིས་མེད་ཡེ་ཤེས་ཆེན་པོར་གཅིག་ཏུ་བཟླུམས་པ་དེ་ལྟ་བུའི་གཟེར་བཞི་ཐེབས་པས་འཁོར་འདས་ཀྱི་སྟོང་སྲོག་ལ་དབང་ཐོབ་པས་ན་དེ་ལྟར་སྲོག་སྡོམ་གཟེར་བཞིའི་མན་ངག་གནད་དུ་བསྣུན་པ་དེ་ལྟ་བུ་ཡིན་ནོ།། ༼ག༽གསུམ་པ་རྗེས་ཀྱི་ལེའུ། ༼ཀ༽ དང་པོ་ཚོགས་ལས་བཤད་པ། དེ་ལྟ་བུའི་དངོས་གཞིའི་ཉམས་ལེན་གྱི་ཐུན་དང་སྦྲེལ་ནས་ད་ནི་གསུམ་པ་རྗེས་ཀྱི་ལེའུ་བདུན་གྱི་དོན་གཞུང་དོན་ངོ་མ་ལ་འཇུག་པ་ནི། སྤྱིའི་ཆིངས་གསུམ་པ་རྗེས་ཀྱི་ཆོ་ག་འདི་ལ་ལེའུ་བདུན་གྱིས་བསྟན༔ཞེས་གསུངས་ཏེ་བདུན་གང་ཡིན་ན་དེ་མ་ཐག་ཏུ་ཚོགས་ལས་བསྐུལ་དང་ཆད་མདོ་གཏོར་སྐྱོང་དང་༔ གཏོར་བྲོ་བཀྲ་ཤིས་སྨོན་ལམ་བདུན་ཡིན་ནོ༔ཞེས་གསུངས་ཏེ་དེའི་ནང་གི་ཚོགས་ལས་ཡིན་ལ། ཚོགས་ཞེས་པ་འདི་མང་པོ་མཉམ་དུ་ཚོགས་པའི་དོན་ཡིན་ཞིང་། ཚོགས་ཀྱི་སྒྲ་ཐད་ཀ་ཐད་དུ་བྱས་ན་དེ་ཡིན་ནོ། །སྤྱི་ཁྱབ་ཀྱིས་འདི་ལ་མཚན་ཉིད། དབྱེ་བ། ཇི་ལྟར་བྱ་བའི་ཐབས་དང་བཅས་པའི་ཐོག་ནས་གསུང་རྒྱུ་ཞིག་ཡིན་ཞིང་། ཚོགས་ཞེས་པ་གྷ་ན་ཙཀྲ་ཡི་སྒྲ་ལས་དྲངས་ན་བོད་སྐད་དུ་ཚོགས་ཀྱི་འཁོར་ལོ་ཞེས་བྱའོ། །འདིའི་མཚན་ཉིད་གསང་སྔགས་ཀུན་ཏུ་སྤྱོད་པའི་སྐབས་གང་ཞིག རྟེན་རྡུལ་ཚོན་རས་བྲིས་ཚོམ་བུ་རྣལ་འབྱོར་བའི་ལུས་དཀྱིལ་སྒོམ་པ་གང་རུང་གི་དཀྱིལ་འཁོར་དང་ལྟ་སྤྱོད་རྣམ་པར་དག་པའི་གང་ཟག་ཚད་མཐུན་ཕྱི་ནང་གསང་བའི་ཡོ་བྱད་ཁྱད་པར་ཅན་ཚོགས་པ་དེ་ཚོགས་ཀྱི་མཚན་ཉིད་ཡིན་ཏེ། རྟེན་དང་གང་ཟག་ཡོ་བྱད་ཚོགས། །ཐབས་ཆེན་གསང་བས་ཚོགས་ཞེས་བྱ། །ཞེས་གསུངས་སོ། །ཚོགས་ཀྱི་དབྱེ་བ་ལ་དངོས་དང་། ལས་རིམ་གཉིས། གང་གི་དོན་དུ་བྱ་བ་དང་གསུམ་གྱིས་གསུངས་ཡོད་ལ། དངོས་ཞེས་པ་ནི་སྐལ་ལྡན་འདུས་པའི་ཚོགས། འབྱོར་ལྡན་ཡོ་བྱད་ཀྱི་ཚོགས། དངོས་གྲུབ་ལྷའི་ཚོགས། བསོད་ནམས་ཡེ་ཤེས་ཀྱི་ཚོགས་དང་བཞི་ཙམ་གྱི་དབྱེ་བ་ཡོད་དོ། །སྐལ་ལྡན་འདུས་པའི་ཚོགས་ཞེས་པ་ནི་དམ་ལྡན་རྣལ་འབྱོར་ཕོ་མོ་ཟུང་ཚོགས་པ་དེ་ཐབས་ཤེས་གཉིས་ཀྱི་མཚོན་བྱེད་ཡིན་ལ། འདི་ལ་འདུས་པ་ཆུང་ངུ་དང་། འབྲིང་དང་། ཆེན་པོའི་དབྱེ་བ་དེ་ལྟར་ཡོད་ཅིང་། འདིའི་འདུས་པ་མང་ཉུང་གསུངས་པ་ནི་གང་ཟག་གི་ཞལ་གྲངས་མང་ཉུང་རྐྱང་པ་ལ་གསུངས་པ་ཞིག་མ་ཡིན་ཏེ། འདུས་པ་ཆུང་ངུ་ལ་མཚོན་ན་གཙོ་བོ་ཡབ་ཡུམ་དང་། ཡང་མིན་ན་སྐུ་གསུང་ཐུགས་ཀྱི་རང་བཞིན་མཚོན་བྱེད་ཟུང་གསུམ་ལྟ་བུ་དང་། ཡང་མིན་ན་རིགས་ལྔའི་མཚོན་བྱེད་ཀྱི་ཟུང་ལྔ་ཚོགས་དགོས་པ་དེ་ལྟ་བུ་གསུངས་ཡོད་པ་དང་། ཞལ་གྲངས་ཀྱི་ཐོག་ནས་གཉིས་དང་དྲུག་དང་བཅུ་ཚང་བ་ཞིག་ལ་གསུངས་ཡོད་དོ། །འདུས་པ་འབྲིང་ལ་དཀྱིལ་འཁོར་གྱི་ལྷ་གྲངས་དང་མཉམ་པར་གསུངས་ཡོད་ལ། འུ་ཚོའི་ཞི་ཁྲོའི་དཀྱིལ་འཁོར་འདིའི་སྐབས་ཡིན་ན་ཞི་ཁྲོ་དམ་པ་རིགས་བརྒྱའི་ལྷ་གྲངས་བརྒྱ་ཐམ་པ་ཡིན་ཞིང་། འདུས་པ་ཆེན་པོའི་ཚོགས་འཁོར་ལ་དེའི་ཡན་གྱི་གང་མང་མང་གསུང་ས་དེ་ལྟ་བུ་ཡང་ཡོད་དོ། །འོན་ཀྱང་གྲངས་རྐྱང་པས་མིན་པར་རྣལ་འབྱོར་ཕོ་མོ་མང་པོ་ཚོགས་ཀྱང་ཟུང་དུ་མ་འབྲེལ་ན་དཔའ་བོའི་དགའ་སྟོན་དང་དཔའ་མོའི་དགའ་སྟོན་ལས་ཚོགས་འཁོར་ངོ་མའི་མིང་མེད་གསུངས་པ་དེ་ལྟ་བུ་ཡང་ཡོད་དོ། །འོན་ཀྱང་ཀུན་ཏུ་བཟང་པོའི་ཚོགས་མཆོད་བཤད་པའི་སྐབས་སུ་དག་པ་གསུམ་དང་མཉམ་པ་བཞིས་ཆོས་ཐམས་ཅད་ཡེ་ནས་སངས་རྒྱས་པ་ཀུན་ཏུ་བཟང་པོའི་ཞིང་མཚོན་པ་ཡིན་ལ། དག་པ་གསུམ་གང་ཡིན་ཞེ་ན། ཕྱི་སྣོད་འབྱུང་ལྔའི་ངོ་བོ་ཡུམ་ལྔའི་རང་བཞིན་དུ་དག ནང་བཅུད་འབྱུང་ལྔས་བསྡུས་པ་རིགས་ལྔ་ཡབ་ལྔའི་རང་བཞིན་དུ་དག དབང་ཡུལ་རྣམ་ཤེས་སེམས་དཔའ་སེམས་མ་དང་སྒོ་བ་སྒོ་མར་དག་པ་ཡིན་ནོ། །སྣོད་བཅུད་རྒྱུད་རྣམས་དག་རུང་ཞིང་མཉམ་གཉིས་ལྷག་པའི་ལྷར་མཉམ་པར་གསང་སྙིང་གི་ནང་ན་གསུངས་ཏེ། སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པའི་མཉམ་གཉིས་ཀྱིས། །ཞེས་གསུང་སྐབས་ཆོས་ཐམས་ཅད་དོན་དམ་པར་མ་སྐྱེས་པར་མཉམ། ཀུན་རྫོབ་ཏུ་སྒྱུ་མ་ལྟ་བུར་མཉམ་པའི་མཉམ་གཉིས་ཡིན་ལ། དེའི་ཐོག་ཏུ་ལྷག་པའི་མཉམ་གཉིས་ཞེས་པ་ནི་ཕུང་པོ་སངས་རྒྱས་སུ་མཉམ། རྣམ་ཤེས་ཚོགས་བརྒྱད་ཡེ་ཤེས་སུ་མཉམ་པའི་མཉམ་པ་བཞི་ཚོགས་དུས་དཀྱིལ་འཁོར་ཀུན་ཏུ་བཟང་པོའི་ཞིང་དང་། བྱེད་སྤྱོད་ཚོགས་ཆེན་གཉིས་གྱུར་ནས་ཞེས་གསུངས་ཏེ། ཆོས་ཉིད་དོན་གྱི་དཀྱིལ་འཁོར་ལ་སྒོམ་པ་ཀློང་དུ་གྱུར་པའི་རྫོགས་ཆེན་རྟོགས་པའི་རྣལ་འབྱོར་བ་ཞིག་གིས་སྒོ་ལུས་ངག་ཡིད་གསུམ་བྱེད་སྤྱོད་གང་བྱས་ན་ཚོགས་གཉིས་རྫོགས་གསུངས་ལ། དེ་ལས་ལྷག་པའི་ཚོགས་ཀྱི་འཁོར་ལོའི་ཆ་རྐྱེན་ཞིག་གང་ན་འཛོམས་དགོས། དེ་མ་ཡིན་ནས་གསང་སྔགས་མོས་པ་ཡིད་བྱེད་ཀྱི་དག་སྣང་ཙམ་ཞིག་ལས་མེད་ན་རྣལ་འབྱོར་ཕོ་མོའི་གཟུགས་བརྙན་ཇི་ཙམ་ཞིག་ཚོགས་ཀྱང་ཚོགས་ཀྱི་འཁོར་ལོ་མཚན་ཉིད་པའི་མིང་ཡོད་དཀའོ། །འོན་ཀྱང་བསམ་པ་དག་ན་ཚོགས་ཀྱི་མཆོད་པ་ཙམ་དུ་འགྲོ་བ་དེ་ལྟ་བུ་ཞིག་ཡིན་ལ། དེས་སྐལ་ལྡན་འདུས་པའི་ཚོགས་བཤད་ཟིན་ཏོ། །གཉིས་པ་འབྱོར་ལྡན་ཡོ་བྱད་ཀྱི་ཚོགས་ཞེས་པ་ནི་ཕྱི་ནང་གསང་བའི་ཡོ་བྱད་ཐམས་ཅད་ཚོགས་དགོས་ལ། ཕྱི་ཉེར་སྤྱོད་འདོད་ཡོན། ནང་སྨན་རཀ་གཏོར་མ། གསང་བ་ཕྱག་རྒྱའི་ཡོ་བྱད་ཐམས་ཅད་ཚོགས་དགོས་ཤིང་། ཁྱད་པར་དུ་ཐབས་ཤེས་ཀྱི་རྫས། མ་ཧཱ་མཾ་ས་བདུད་རྩིར་བཅས། །མེད་དུ་མི་རུང་དངོས་གྲུབ་རྫས། །ཞེས་གསུངས་པས་མ་ཧཱ་ཞེས་པ་ཆེན་པོ། མཾ་ས་ཞེས་པ་ཤ་ཡིན་པས་ཤ་ཆེན་ལ་གསུངས་པ་ཡིན་ནོ། །དེ་ལྟ་བུའི་གཙང་སྨེ་གཉིས་འཛིན་དང་བྲལ་བའི་རྟོགས་པ་ཀློང་དུ་གྱུར་པའི་ཚེ་ན་དམ་ཚིག་གི་རྫས་དེ་མཚོན་བྱེད་ཙམ་གྱིས་ཀྱང་རུང་བ་ཡིན་པ་དང་། ཐབས་ཤེས་ཀྱི་རྫས་གཞན་དག་ཀྱང་དེ་དང་འདྲ་མཚུངས་ཡིན་པས་ཚོགས་ཤ་ཤ་ཆེན་གྱི་ཚབ་ཡིན་པ་དང་། ཟོག་ལུག་གི་ཤ་མིན་ན་ཚབ་གཞན་གྱིས་ཡོང་རྒྱུ་རེད་སྙམ་ལ། གོ་བ་དེ་ན་ཡོད་ཅིང་། ཆང་ཡང་དེ་བཞིན་ཡིན་ནོ། །གསུམ་པ་དངོས་གྲུབ་ལྷ་ཡི་ཚོགས་ཞེས་པ་ནི་ཞི་ཁྲོ་དམ་པ་རིགས་བརྒྱའི་དཀྱིལ་འཁོར་ཞལ་ཕྱེས་ནས་བདག་མདུན་དབྱེར་མེད་དུ་བསྒྲུབ་རྒྱུ་ཚོམ་བུའི་དཀྱིལ་འཁོར་དངོས་སུ་བཞུགས་པ་དེ་ཡིན་ལ། དེ་བསོད་ནམས་བསག་པའི་ཞིང་ས་ཡིན་ནོ། །བཞི་བ་བསོད་ནམས་ཡེ་ཤེས་ཀྱི་ཚོགས་ཞེས་པ་ནི་སྤྱིར་བཏང་གིས་རྒྱུན་དུ་ཚོགས་གཉིས་བསགས་པའི་དགེ་སྦྱོར་སྤྱི་དང་། ཁྱད་པར་དུ་ཚོགས་འཁོར་གྱི་སྐབས་སུ་ཐབས་བསྐྱེད་རིམ་དང་འབྲེལ་བའི་ཀུན་སྤྱོད་སྣང་བཅས་ཐམས་ཅད་བསོད་ནམས་ཀྱི་ཚོགས་ཡིན་ཞིང་། ཤེས་རབ་རྫོགས་རིམ་གྱི་ནང་དུ་འདུས་པའི་ཟབ་མོ་སྐྱེ་མེད་ཀྱིས་བསྡུས་པའི་སྒོམ་པ་ཐམས་ཅད་ཡེ་ཤེས་ཀྱི་ཚོགས་ཡིན་ནོ། །དེ་ལྟ་བུའི་ཚོགས་གཉིས་རྫོགས་ལུགས་ཀྱི་རིམ་པ་ནི། འདིའི་ལམ་རིམ་དང་འདིའི་བྱ་སྤྱོད་ཀྱི་རིམ་པ་ལ་སོགས་པའི་ནང་ནས་འབྱུང་རྒྱུ་དེ་ཉིད་གཞུང་ནས་གསུངས་པ་ལྟར་ཡིན་ནོ། །སྤྱིར་བཏང་གིས་བཤད་ན་ཚོགས་འདི་ཡང་མཆོད་པ་ཡིན་ཞིང་། འདི་ལ་ཐུན་མོང་ཚོགས་ཀྱི་མཆོད་པ་ཞེས་གསུངས་ལ། བསོད་ནམས་ནང་ནས་ཚོགས་འཁོར་མཆོག་གསུངས་ཏེ་མཆོད་པ་ཀུན་གྱི་མཆོག་ཡིན་གསུངས་སོ། །དེའི་རྒྱུ་མཚན་དང་སྤྱིར་འདི་ཐུན་མོང་ཡིན་པའི་རྒྱུ་མཚན་ནི་མཆོད་པ་ལ་རིགས་མང་པོ་ཡོད་པ་ཡིན་ན་ཕྱི་ཉེར་སྤྱོད་ཀྱི་མཆོད་པ། ནང་དམ་རྫས་ཀྱི་མཆོད་པ། གསང་བ་སྦྱོར་སྒྲོལ་གྱི་མཆོད་པ། དེ་ཁོ་ན་ཉིད་མཉམ་པ་ཆེན་པོའི་མཆོད་པ་ལ་སོགས་པ་ཡོད་པ་ཡིན་ལ། དེའི་ནང་ལ་བསམ་བློ་བཏང་ན་ཕྱག་རྒྱ་གར་གྱི་མཆོད་པ་ཞེས་པ། བསྟོད་དབྱངས་གླུ་ཡི་མཆོད་པ་ཞེས་པ། ཏིང་ངེ་འཛིན་ཡིད་ཀྱི་མཆོད་པ་ཞེས་པ། སྣ་ཚོགས་འདོད་ཡོན་གྱི་མཆོད་པ་ལ་སོགས་པ་ཡོད་པ་དེ་རྣམས་ཐམས་ཅད་ཚོགས་ཀྱི་འཁོར་ལོ་འདིའི་ནང་ལ་མ་འདུས་པ་མེད་པས་ན་ཐུན་མོང་གི་མཆོད་པ་གསུངས་པའི་རྒྱུ་མཚན་དེ་ཡིན་ནོ། །འདིའི་ཐུན་མོང་གི་གོ་བ་འདི་འདི་བས་ལྷག་པའི་ཐུན་མིན་ཞེས་པ་ཟུར་དུ་ཡོད་པའི་གོ་བ་མ་ཡིན་ལ། མཆོད་པ་གཞན་འདིའི་ནང་ན་འདུས་པས་མ་ཚད་འདི་ཉིད་ཁྱད་དུ་འཕགས་པ་ཡིན་ཞེས་པའི་གོ་བ་དེ་ལྟ་བུ་ཡིན་ནོ། །གསང་བ་བླ་མེད་ཀྱི་མཆོད་པ་འོག་མའི་མཆོད་སྦྱིན་ལས་ཀྱང་ཁྱད་དུ་འཕགས་པ་དེ་ཉིད་རྣམ་པ་བཞི་ཡི་སྟེང་ནས་འཕགས་པ་ཡིན་གསུངས་ཤིང་། ཡུལ། བསམ་པ། དངོས་པོ། དགོས་པ་བཞི་ཡི་ཐོག་ནས་འཕགས་པ་ཡིན་ནོ། །ཡུལ་གྱི་ཐད་ནས་བསོད་ནམས་ཀྱི་ཞིང་མཐར་ཐུག་སངས་རྒྱས་ཡིན་པས་སྣང་སྲིད་སྣོད་བཅུད་ཀྱིས་བསྡུས་པའི་ཆོས་ཐམས་ཅད་པོ་ཡེ་ནས་དག་པའི་དཀྱིལ་འཁོར་ཆེན་པོ་གཅིག་ཏུ་ལྷུན་གྱིས་གྲུབ་པར་ཤེས་ཚེ་ལྷ་གཅིག་ལ་མཆོད་པས་སྲིད་ཞི་མཉམ་ཉིད་ཐམས་ཅད་ཚིམས་པ་དང་། དེའི་དུས་ན་སྒོ་གསུམ་གྱི་རྣམ་པར་རྟོག་པ་དང་བྲལ་བའི་སྒོ་ནས་སྒོ་གསུམ་གྱི་རྣམ་པའི་ཡུལ་ལ་རོལ་བཞིན་ཡོད་པས་སངས་རྒྱས་ངོ་མ་དེ་ཉིད་དངོས་སུ་མཆོད་པ་དང་ཁྱད་པར་མེད་དོ། །སངས་རྒྱས་ཐམས་ཅད་མཉམ་ཉིད་ཡེ་ཤེས་ཀྱི་སྐུ་ཅན་ཡིན་པས་དེ་ལ་མཉེས་དང་མི་མཉེས་ཞེས་པའི་རྟོག་པ་ཞིག་མེད་ཀྱང་ཡེ་ཤེས་ཀྱི་སྐུ་རྣམ་པ་ཐམས་ཅད་པའི་བདག་ཉིད་ཅན་དེ་གདུལ་བྱའི་བློ་མོས་པ་དང་འཚམས་པར་འཇུག་པ་ཡིན་པས་ཁྱད་པར་ཅན་གྱི་ཚོགས་ཀྱི་འཁོར་ལོའི་མཆོད་པ་ཕུལ་ན་སྔགས་ཀྱི་ལྷ་ཤིན་ཏུ་མཉེས་པའི་ཚུལ་གྱིས་དངོས་གྲུབ་རྣམ་པ་གཉིས་ཐོབ་པའི་རྒྱུ་མཚན་དེ་ལྟར་ཡིན་ཞིང་། དེ་ཡུལ་གྱི་ཁྱད་པར་ཡིན་ནོ། །བསམ་པའི་ཁྱད་པར་གྱི་ཐད་ནས་ཡིན་ན་ཆོས་ཉིད་དག་མཉམ་ཆེན་པོའི་ངང་དེ་ལས་འཛིན་ཞེན་གྱི་རྣམ་རྟོག་ཐ་མལ་པ་མེད་པའི་ཐོག་ནས་ཚོགས་ལ་རོལ་ན་ཕ་རོལ་ཏུ་ཕྱིན་པ་བཅུ་དང་ལྡན་པ་དང་། དད་དང་སྙིང་རྗེ་ལ་སོགས་པ་བྱང་ཆུབ་ཆེན་པོ་ཐོབ་པར་བྱེད་པའི་རྒྱུའི་ཆོས་ཐམས་ཅད་མ་ཚང་བ་མེད་པ་ཞིག་ཡིན་ནོ། །རྒྱུ་མཚན་ཅི་ཡིན་ཞེ་ན། རྣམ་ཀུན་མཆོག་ལྡན་གྱི་སྟོང་ཉིད་དང་བདེ་བ་ཆེན་པོར་རོ་གཅིག་པའི་བདག་ཉིད་ཅན་དུ་གྱུར་པས་ཡིན་ནོ། །གསུམ་པ་དངོས་པོའི་ཐད་ནས་ཡིན་ན་ཚོགས་རྫས་ཀྱི་དངོས་པོ་ཐམས་ཅད་ཡེ་ཤེས་ཀྱི་བདུད་རྩིར་བསྒྱུར་བར་བྱས་པས་ཐ་མལ་པ་མ་ཡིན་ཞིང་། རང་བཞིན་དག་མཉམ་ཡིན་པས་ཆོས་ཉིད་ཅིར་ཡང་མ་ཡིན་པ་ལས་ཅིར་ཡང་འཆར་དུ་རུང་བའི་ཕྱིར་ན་དམིགས་པ་དང་སྔགས་དང་ཕྱག་རྒྱ་རྣམས་ཀྱིས་ཇི་ལྟར་དུ་བསྒྱུར་ན་དེ་ལྟར་དུ་རྡུལ་གཅིག་གི་ཁྱོན་ན་ཡིན་ཡང་མཁའ་ཁྱབ་ཀྱི་ཞིང་གི་བཀོད་པ་ཚང་བའི་འབྱོར་བ་རབ་འབྱམས་མཐའ་ཡས་པ་ཟད་པ་མེད་པའི་ཀུན་ཏུ་བཟང་པོའི་མཆོད་པའི་སྤྲིན་རྒྱ་མཚོའི་གཏེར་དུ་འགྱུར་ཐུབ་བོ། །དགོས་པའི་ཐད་ནས་ཡིན་ན་གསང་སྔགས་ཀྱི་ལྷ་མཉེས་བྱེད་ཀྱི་ཐབས་ཁྱད་པར་ཅན་འདིའི་སྒོ་ནས་ལས་དང་ཡེ་ཤེས་དངོས་གྲུབ་ཐམས་ཅད་འབད་མེད་དུ་འགྲུབ་ཅིང་། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པའི་སྒོ་དམ་པ་ཡང་དེ་ཡིན་ནོ། །སྒྲུབ་པའི་མཆོད་པ་དང་ཟང་ཟིང་གི་མཆོད་པ་ལུས་ངག་གི་གུས་འདུད་ཀྱི་མཆོད་པ་ཐམས་ཅད་ཀྱི་ནང་དུ་མ་འདུས་པའི་སྔགས་ཀྱི་ལམ་ཞིག་མེད་ལ། དེ་ཡིན་ན་གཞི་དཀྱིལ་འཁོར་དབང་དང་དམ་ཚིག་གསུམ། ལམ་ལྟ་བ་སྒོམ་པ་སྤྱོད་པ་གསུམ། ཉམས་ལེན་སྒྲུབ་པ་མཆོད་པ་ཕྲིན་ལས་གསུམ་གྱིས་དགུ་དང་། ཐབས་སྔགས་དང་ཕྱག་རྒྱ་སྟེ་བསླབ་པའི་གནས་བཅུ་གཅིག་པོ་ཚོགས་འཁོར་གྱི་ནང་དུ་འདུས་པར་བཤད་ཐུབ་པ་ཞིག་ཡིན་ཞིང་། དེ་ཡང་རང་གི་ངོ་བོའི་ལྡོག་ཆ་ནས་བསླབ་པའི་མཐའ་གཞན་དང་མ་འདྲེས་པར་འཆད་ཐུབ་པ་དེ་ལྟ་བུ་ཡིན་ནོ། །དེ་ལྟ་བུའི་ཚོགས་དེ་ལ་འདི་ནས་ཚོགས་ལས་ཞེས་པའི་ཡིག་ཆུང་གི་ས་བཅད་རྗེས་ཀྱི་ལེའུ་བདུན་གྱི་དང་པོ་འདིས་བསྟན་པ་ཡིན་པས་འདི་ལ་ནང་གསེས་ཀྱི་ཚོགས་ལ་བགེགས་བསྐྲད་པ་ནས་ལྷག་མ་ཡན་ཆོད་ལ་བགེགས་བསྐྲད། བསངས་སྦྱང་། བྱིན་རླབས། ཚོགས་ལ་སྤྱན་འདྲེན་པ། ཚོགས་ཕུད་མཆོད་པ་གོང་འོག་གཉིས་ལྟ་བུ་ཞིག་ཡོད་ཅིང་། བར་བ་བཤགས་པའི་ཆེད་དུ་ཡང་ཚོགས་ཕུལ་ནས་བསྐང་ཞིང་བཤགས་པ་དང་། བཤགས་པ་དངོས་ཤིག་དང་གཉིས། ཚོགས་ཐ་མར་བསྒྲལ་ཞིང་བསྟབ་པ་ལ་བསྒྲལ་བ་དང་བསྟབ་པ་ལེའུ་ཚན་གཉིས་སོ། །འདི་ནས་ཡིག་ཆུང་གི་ས་བཅད་ལ་ཨང་གྲངས་སྒྲིག་པ་དེ་ཧ་ཅང་ཐོ་ཐུག་ཁར་ཉན་ཨེ་ཐལ་ཏེ་མདོར་ན་ཚོགས་ལས་ཀྱི་རིམ་པ་དེ་ཚང་མ་ཡོངས་རྫོགས་བསྐང་བ་དང་ཟུར་ནས་སྦྲེལ་རྒྱུ་ཕྱག་བཞེས་ལྟར་དུ་ཡིན་ནོ།། ༼ཀ དང་པོ་བགེགས་བསྐྲད་པ། འདི་ནས་རྩ་བའི་གཞུང་གཏེར་གཞུང་གི་ཚིག་དེད་ནས་སོང་ན་དང་པོ་ཚོགས་འཁོར་བཤམས་ལ་འདི་སྐད་དོ༔ཞེས་མཚམས་སྦྱར་ཏེ་དང་པོ་བགེགས་བསྐྲད་པ་ནི། ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ ཚོགས་ལ་བར་ཆད་བྱེད་པའི་བགེགས༔ ལན་ཆགས་གནས་འདིར་མ་འདུག་པར༔ སོ་སོ་རང་རང་གནས་སུ་དེངས༔ ཞེས་གསུངས་ཏེ། གཏུམ་ཆེན་ཁྲོས་པའི་ཧཱུྃ་སྒྲ་དྲག་པོའི་ཧཱུྃ་གི་བཞད་པ་ཡིས་མགོ་བླངས་ནས། ཉོན་ཅིག་ཅེས་བགེགས་དང་ལོག་པར་འདྲེན་པ་སྤྱི་དང་། ཁྱད་པར་དུ་བགེགས་ཐམས་ཅད་ཀྱི་རྩ་བ་ཉོན་མོངས་དུག་ལྔ་དུག་གསུམ་གྱིས་བསྐྱེད་པའི་གདོན་གྱི་ཚོགས། ཚོགས་ཀྱི་འཁོར་ལོ་བསྐོར་བའི་གསང་སྔགས་ཀྱི་གཞི་དཀྱིལ་འཁོར་ཆེན་པོ་སྒྲུབ་པ་ལ་བར་ཆད་བྱེད་པའི་བགེགས་དང་ལན་ཆགས་ཐམས་ཅད་སྒྲུབ་པའི་གནས་འདི་ན་མ་འདུག་པར་སོ་སོ་རང་རང་གི་གནས་སུ་སོང་ཞེས་པའོ། །བགེགས་ཞེས་བགེགས་ཀྱི་རྒྱལ་པོ་བི་ན་ཡ་ག་ལ་སོགས་པ་ལ་རང་རང་གི་གནས་དང་འཁྲི་ས་དེ་ལྟར་ཡོད་རབས་གསུང་ས་ཡོད་ལ། འོན་ཀྱང་འདི་ནས་གཙོ་ཆེ་བ་ཉོན་མོངས་འཁྲུལ་བའི་གདོན་ཚོགས་གཞི་ཆོས་དབྱིངས་སྐྱེ་བ་མེད་པ་མ་འཁྲུལ་བའི་ཀློང་དུ་དེངས་ཤིག་ཅེས་པའི་དོན་ཡིན་ནོ། །ཧཱུྃ་ཧཱུྃ་ཨུ་ཙ་ཏ་ཡ་ཕཊ༔ཅེས་གསུངས་པའི་ཧཱུྃ་དང་པོ་རྡོ་རྗེ་ཁྲག་འཐུང་གི་ཐུགས་སྲོག་ས་བོན་གྱིས་བཞེངས་སུ་གསོལ་བར་བསྐུལ་ནས། ཧཱུྃ་གཉིས་པ་དེ་དྲག་པོ་ལས་ལ་བསྐུལ་བའི་ཚོམ་རྔམས་དང་བཅས་ཏེ། ཨུ་ཙ་ཏ་ཡ་ཚར་གཅོད་ཅིག་ཅེས་པའི་དོན་ཡིན་ཞིང་། ཕཊཿཅེས་པ་བསྐྲད་ཅིང་བརླག་པར་གྱིས་ཤིག་ཅེས་པའི་དྲག་པོའི་ཕཊཿསྒྲ་ཡིན་ནོ།། ༼ཁ གཉིས་པ་བྱིན་གྱིས་བརླབ་པ། གཉིས་པ་བསང་སྦྱངས་བྱིན་རླབས་ནི༔ ཧཱུྃ༔ བདག་ཉིད་རྡོར་སེམས་ཐུགས་ཀ་ནས༔ ཨོཾ་དཀར་ཨཱཿདམར་ཧཱུྃ་མཐིང་འཕྲོས༔ ཞལ་ཟས་དངོས་པོ་ཐམས་ཅད་ཀུན༔ ཨོཾ་ཨཱཿཧཱུྃ་གསུམ་ངོ་བོར་གྱུར༔ འབྲུ་གསུམ་མེ་ཆུ་རླུང་གསུམ་འཕྲོས༔ ཚོགས་ཀྱི་རྣམ་རྟོག་བསྲེགས་གཏོར་བཀྲུས༔ མེ་ཆུ་རླུང་གསུམ་འོད་དུ་ཞུ༔ སྐུ་གསུང་ཐུགས་ཀྱི་བདུད་རྩིར་གྱུར༔ ཀུན་བཟང་ཞི་ཁྲོའི་ལྷ་ཚོགས་རྣམས༔ དགྱེས་མཆོད་བདུད་རྩི་ཆེན་པོར་གསལ༔ ཞེས་གསུངས་ཏེ། བདེ་བར་གཤེགས་པ་ཐམས་ཅད་ཀྱི་གསང་བ་གསུམ་གྱི་ནུས་བྱིན་གཅིག་ཏུ་བསྡུས་པ་ཐུགས་སྲོག་གི་སྙིང་པོ་ཧཱུྃ་ཡིག་དེས་སྣ་དྲངས་ནས། བདག་ཉིད་དམ་ཚིག་སེམས་དཔའ་ཞི་ཁྲོ་ཀུན་འདུས་ཀྱི་ངོ་བོ་རྡོར་སེམས་སུ་གསལ་བའི་ལྷའི་ང་རྒྱལ་བརྟན་པའི་ཐུགས་ཀ་ནས་ཞེས་ཁ་རྩང་སྔོན་མ་དང་པོ་མགོ་ནས་ང་ཉིད་ལྷ་ཡི་ང་རྒྱལ་གྱིས་གསུངས་པ་ལྟར་དུ་ཡིན་ལ། རྒྱལ་བ་ཐམས་ཅད་ཀྱི་སྐུའི་བྱིན་རླབས་འདུས་པའི་ཨོཾ་ཡིག་དཀར་བོ། གསུང་གི་བྱིན་རླབས་འདུས་པ་ཨཱཿཡིག་དམར་པོ། ཐུགས་ཀྱི་བྱིན་རླབས་འདུས་པའི་ཧཱུྃ་ཡིག་མཐིང་ཁ་རྣམས་འཕྲོས་ནས་ཞལ་ཟས་ཚོགས་རྫས་ཀྱི་དངོས་པོ་ཐམས་ཅད་འབྲུ་གསུམ་གྱི་ངོ་བོར་གྱུར། དེའི་ཡི་གེ་འབྲུ་གསུམ་ལས་མེ་ཆུ་རླུང་གསུམ་འཕྲོས་ནས་ཚོགས་ལ་དངོས་པོར་འཛིན་པའི་རྣམ་རྟོག་དང་དམེ་ཡུགས་ཉམས་གྲིབ་ལ་སོགས་པས་གློ་བུར་དུ་སྦགས་པར་བྱས་པའི་ཉམས་གྲིབ་བཙོག་གྲིབ་མ་དག་པ་ཐམས་ཅད་མེས་བསྲེགས། རླུང་གིས་གཏོར། ཆུས་བཀྲུས་ནས་ཀུན་རྫོབ་མཚན་མའི་རྫས་དོན་དམ་ཡེ་ཤེས་ཀྱི་མེ་ཆུ་རླུང་གསུམ་གྱིས་སྦྱངས་ཏེ་མེ་ཆུ་རླུང་གསུམ་ཡང་འོད་དུ་ཞུ་ནས་སྐུ་གསུང་ཐུགས་ཀྱི་བདུད་རྩི་སྣོད་བཅུད་ཚོགས་ཀྱི་འཁོར་ལོའི་རོལ་བ་འབའ་ཞིག་ཏུ་བལྟ་རྒྱུ་དང་། འཇིག་རྟེན་གྱི་ཁམས་ཀྱི་འདོད་ཡོན་གྱི་བཅུད་ཐམས་ཅད་བདག་གི་འོད་ཟེར་གྱིས་བསྡུས་ནས་ཚོགས་ལ་བསྟིམས་པའི་དམིགས་པ་བྱེད་རྒྱུ་དེ་རང་ལུགས་བརྒྱུད་པའི་མན་ངག་ཡིན་ཞིང་། ཤིན་ཏུ་ཟབ་པའང་ཡིན་ནོ། །དེ་ལྟ་བུའི་ངོ་བོ་ཡེ་ཤེས་ཀྱི་བདུད་རྩི་ཡིན་པ་ལ་རྣམ་པ་འདོད་ཡོན་སྣ་ཚོགས་སུ་སྤྲོ་བ་ཅན་ཀུན་བཟང་ཞི་ཁྲོའི་ལྷ་ཚོགས་རྣམས་དགྱེས་མཆོད་ཀྱི་བདུད་རྩི་ཆེན་པོར་གསལ་གདབ་བོ། །ཨོཾ་ཨཱཿཧཱུྃ་ཧྲཱིཿཧ་ཧོ༔ཞེས་གསུངས་ཏེ། ཨོཾ་གྱིས་སྦྱངས། ཨཱཿཡིས་སྤེལ། ཧཱུྃ་གིས་མང་པོར་བསྒྱུར། ཧྲཱིཿཡིས་དགྱེས་པར་སྐྱེད་པའི་ནུས་མཐུ་ཅན་དུ་བྱས། ཧ་ཡིས་ཐུགས་དམ་བསྐངས། ཧོ་ཡིས་དགྱེས་པར་རོལ་བར་གྱུར་པ་དེ་ལྟར་དམིགས་འདུན་བྱེད་དགོས་སོ། །འདིའི་མཚམས་སུ་སྟོང་གསུམ་འདིའམ་ལ་སོགས་པའི་བསྐང་བ་འུ་ཚོས་འདོན་དར་བ་ལྟར་ཡིན་ལ། བསྐང་བ་ཞེས་པ་མཐོང་བརྒྱུད་ཕྱག་ལེན་ཤིན་ཏུ་གལ་ཆེ་བ་རྒྱུ་མཚན་དང་ལྡན་པ་ཡིན་ཞིང་། འདིའི་བསྐང་བའི་རྫས་དེ་ཚོ་ངེས་པར་ཚོགས་དགོས་པ་ཅན་ཡིན་ནོ། །ཕྱོགས་རྒྱས་པ་བཅའ་རྒྱུ་དེ་ཚོ་བསྐང་བ་འདིའི་དོད་འབའ་ཞིག་ཡིན་པ་དང་། དེ་མིན་ཡང་སྨན་གཏོར་རཀྟ་མར་མེ་ཐམས་ཅད་ཚོགས་རྒྱུ་གནད་ཆེ་ཞིང་། གཉེན་པོའི་སྒོ་ནས་བྱ་བའི་བསགས་སྦྱང་གི་ཐབས་གཙོ་བོ་འདི་ཚོ་ཡིན་པས་འདི་ཡོད་ན་ཆོག་རྒྱུ་དང་མེད་ན་ཆོག་རྒྱུའི་གནད་ཆུང་རེད་ཤོར་མི་ཉན་ལ། སྤྱིར་བཤད་ན་ཕྱི་ཐུན་མོང་མཆོད་པས་བསྐང་བ། ནང་ཐུན་མིན་རྫས་ཀྱིས་བསྐང་བ། གསང་བ་ཁྱད་པར་བླ་མེད་ཚོགས་ཀྱི་མཆོད་པས་བསྐང་བ་དང་གསུམ་གྱི་ཐོག་ནས་བཤད་རྒྱུ་ཡོད་ཅིང་། དེའི་ནང་གི་ཐུན་མིན་རྫས་ཀྱི་བསྐང་བའི་ཐད་ཀྱི་བདུད་རྩི་སྨན་གྱི་བསྐང་བ། དམར་ཆེན་རཀྟའི་བསྐང་བ། རྨད་བྱུང་གཏོར་མའི་བསྐང་བ། སྣང་གསལ་མར་མེའི་བསྐང་བ་དེ་ཚོ་བཞི་བོ་ཡིན་ནོ། །ཁྱད་པར་དུ་མར་མེའི་བསྐང་བ་དང་སྦྲེལ་ནས་དུར་ཁྲོད་གསང་བ་མཆོག་གི་དཀྱིལ་འཁོར་དུ་ལ་སོགས་པ་མར་མེའི་སྨོན་ལམ་གྱི་སྐབས་སུ་འདུན་པ་རྩེ་གཅིག་ཏུ་གཏད་ནས་སྨོན་ལམ་བཏབ་ན་ཤི་གསོན་ཐམས་ཅད་ལ་ཕན་ཡོན་གྱི་ནུས་པ་ཆེན་པོ་དང་ལྡན་པ་དེ་ལྟ་བུ་ཡིན་ནོ།། ༼ག གསུམ་པ་ཚོགས་ལ་སྤྱན་འདྲེན་པ། གསུམ་པ་ཚོགས་ལ་སྤྱན་འདྲེན་པ་ནི༔ ཚོགས་ཞིང་སྤྱན་འདྲེན་འདི་མདུན་བསྐྱེད་དང་མ་འབྲེལ་བ་ལ་དགོས་མ་གཏོགས་མདུན་བསྐྱེད་དང་འབྲེལ་ཚེ་དམིགས་བསལ་མི་དགོས་གསུང་མཁན་ཡང་ཡོད་དོ། །འོན་ཀྱང་འདི་ནས་མདུན་བསྐྱེད་དང་འབྲེལ་མ་འབྲེལ་ཞིག་གིས་མ་ཡིན་ལ། ཚོགས་ཞིང་སྤྱིའི་དཀྱིལ་འཁོར་ལ་རྩ་གསུམ་ཆོས་སྐྱོང་དང་བཅས་པ་སྤྱན་འདྲེན་གྱི་ཆེད་དུ་དགོས་པ་ཡིན་ཞིང་། དམིགས་བསལ་དུ་སློབ་དཔོན་ཆེན་པོས་ཡང་ཕུར་སྦྲགས་མའི་ཚུལ་དུ་གསུངས་པ་ཡིན་པ་དང་། རྡོ་རྗེ་ཕུར་བའི་ལྷ་ཚོགས་ཀྱང་མགྲོན་ཐབས་ཀྱི་ཚུལ་དུ་སྤྱན་འདྲེན་པ་ཡང་འཐུས་པ་ཡིན་ཞེས་དེ་ལྟར་ཞལ་འཕྲོས་ཡོད་པ་ཡིན་ནོ།། ཧཱུྃ༔ མ་བཅོས་ཆོས་དབྱིངས་ཞིང་ཁམས་ནས༔ བླ་མ་ཀུན་བཟང་ཡབ་ཡུམ་དང་༔ རྒྱལ་བ་ཞི་ཁྲོའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ཞེས་གསུངས་ཏེ། ཧཱུྃ་གིས་ཐུགས་བརྒྱུད་བསྐུལ་བ་ཡིན་ཞིང་། མ་བཅོས་ཆོས་དབྱིངས་དོན་གྱི་འོག་མིན་ལ་གསུངས་པ་ཡིན་ལ། འོག་མིན་ཞེས་པ་འདི་ཇི་ལྟ་བུ་ཞིག་ཡིན་ཞེ་ན། གནས་སུ་གྱུར་པ་གང་ཞིག དེའི་ཡན་ན་ཆེས་འཕགས་པའི་གནས་གཞན་མེད་པ་དེ་ཉིད་འོག་མིན་གྱི་མཚན་ཉིད་ཡིན་ནོ། །དེ་ལྟར་ན་ཡང་སྐུ་གསུམ་གྱི་འོག་མིན་ལ་དབྱེ་བ་ཡོད་ཅིང་། ཆོས་སྐུའི་འོག་མིན་ཞེས་པ་ནི། རྒྱུད་ཀུན་བྱེད་ལས། འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། །ཡང་དག་དོན་གྱི་འོག་མིན་དེ་རུ་བཤད། །ཅེས་གསུངས་ཏེ། མཐའ་དང་དབུས་ཕྱོགས་དང་ཆ་གང་དུ་གཞག་མི་བཏུབ་པའི་སྤྲོས་པ་དང་བྲལ་བའི་ངོ་བོ་སངས་རྒྱས་ཀྱི་མཐར་ཐུག་གི་བསྒྲུབ་བྱ་དེ་ལ་གསུངས་ཡོད་ལ། དེ་ཆོས་སྐུའི་འོག་མིན་ཡིན་ནོ། །ལོངས་སྐུའི་འོག་མིན་ནི་ཆོས་སྐུའི་དབྱིངས་དེ་ལས་ཡེ་ཤེས་ཆེན་པོའི་སྣང་བ་རང་བྱུང་བ་རྟེན་འོད་ཀྱི་གཞལ་ཡས་ཁང་དང་བརྟེན་པ་ལྷ་ཚོགས་གཙོ་འཁོར་དུ་སྣང་བའི་ཡེ་ཤེས་ལྔའི་རིགས་ལྷུན་གྱིས་གྲུབ་ཅིང་དུས་ཐམས་ཅད་དུ་འཕོ་འགྱུར་མེད་པ་ཉིད་དེ། གཙང་མའི་རིགས་དག་སྤངས་པ་ཡི། །འོག་མིན་ཆེན་པོའི་གནས་མཆོག་ན། །ཞེས་གསུངས་པ་དེ་ལྟ་བུ་ཡིན་ཞིང་། གཙང་མའི་གནས་སྤངས་པ་ཡིན་དུས་འཇིག་རྟེན་གྱི་སྣང་བ་ལས་འདས་པ་ཞིག་ཡིན་དགོས་ལ། འགའ་རེས་མི་མངོན་ནམ་མཁའི་དབྱིངས་ནས་ཞེས་ཟེར་ཁུལ་བྱས་ཏེ་ཀླད་ཅིག་གི་གྱེན་དུ་གྱེར་འདུག་ཁུལ་བྱས་ནས་གནམ་གྱི་སྟེང་མཐོ་ས་ཞིག་ལ་ཡོད་ལས་ཆེ་སྙམ་པར་བྱེད་ཀྱང་དེ་ལྟ་བུ་ཞིག་མ་ཡིན་ནོ། །འོག་མིན་ཡར་ལ་ཡིན་དགོས་པའི་ངེས་པ་མེད་དེ། སྟེང་དང་འོག་ཏུ་བལྟ་བ་ཐང་རེ་ཆད། །མཐོ་དམན་གཉིས་སུ་འཛིན་པ་ཉོན་རེ་མོངས། །ཞེས་གསུངས་ཡོད་ལ། སངས་རྒྱས་ཀྱི་རང་སྣང་ཡིན་པས་གང་ན་བཞུགས་ན་དེ་ན་ཡོད་པ་དང་། སངས་རྒྱས་ཕྱོགས་བཅུ་ན་བཞུགས་ཡོད་ཅིང་། ཐོག་ཁོ་ན་ལ་ཡོད་པའི་ངེས་པ་མེད་དོ། །འོན་ཀྱང་དེའི་ཕྱོགས་དེ་ཡང་ཕྱོགས་མེད་ཕྱོགས་དང་བྲལ་བའི་ཕྱོགས་མཚམས་ཆེན་པོ་ལ་གོ་དགོས་མ་གཏོགས་ཉི་མ་ཤར་ས་ལ་ངོས་རྟགས་བྱེད་ས་དེ་འདྲ་བའི་ཕྱོགས་ནི་མ་ཡིན་ལ། རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཞེས་གསུངས་པས་རྡུལ་ཕྲ་རབ་གཅིག་གི་ནང་ན་ཡང་སངས་རྒྱས་བསམ་གྱིས་མི་ཁྱབ་པའི་ཞིང་དང་བཀོད་པ་ཡོད་ཆོག་ཅིང་། དེས་ན་གནས་ཀྱི་ཕྱོགས་ཆར་མི་གཅད་པར་ཆོས་དབྱིངས་དག་པའི་དབང་གིས་ཡོན་ཏན་གྱི་ཁྱད་པར་གང་ན་སྣང་ན་དེ་ན་འོག་མིན་ཆེན་པོ་ཡོད་དོ། །སྤྲུལ་སྐུའི་འོག་མིན་ལ་མཚོན་ན་རང་བཞིན་སྤྲུལ་བའི་ཞིང་ཁམས་དང་། གཙང་མ་རིས་ཀྱི་འོག་མིན་ཞེས་པ་གཉིས་སུ་གསུངས་ཤིང་། གདུལ་བྱ་སར་གནས་ཀྱི་སེམས་དཔའི་དོན་དུ་རང་བཞིན་སྤྲུལ་བའི་ཞིང་ཁམས་སྟུག་པོ་བཀོད་པ་ལ་སོགས་པ་དང་། གདུལ་བྱ་འདྲེས་མའི་དོན་དུ་གཙང་མའི་རིས་ཀྱི་འོག་མིན་དྭངས་མ་འོད་ཀྱི་རང་བཞིན་དུ་གྲུབ་པའི་གནས་སངས་རྒྱས་འཇིག་རྟེན་དུ་འབྱུང་བའི་སྐབས་སུ་སྤྲུལ་བའི་དང་པོ་ལོངས་སྐུ་མཚན་རྫོགས་ཀྱི་ཚུལ་དུ་སྔགས་ཕྱི་བ་དང་ཕ་རོལ་ཏུ་ཕྱིན་པའི་ཐེག་པ་དུ་མ་གསུངས་ས་ཞིག་ཡོད་པ་དེ་ཡིན་ནོ། །མདོར་ན་འོག་མིན་འདི་ལ་དོན་གྱི་འོག་མིན། རྟགས་ཀྱི་འོག་མིན། རིག་པའི་འོག་མིན། རྟོགས་པའི་འོག་མིན། ད་རུང་གསང་བའི་འོག་མིན། གནས་ཀྱི་འོག་མིན་དེ་ལྟ་བུའི་དབྱེ་བ་དྲུག་ཙམ་ཡོད་དོ། །འདི་ནས་མཚོན་བྱ་དོན་གྱི་འོག་མིན་ཏེ་མཚོན་བྱེད་རྟགས་ཀྱི་འོག་མིན་ཡང་དེའི་ནང་དུ་འདུ་བའི་ཞིང་ཁམས་དེ་ནས་བླ་མ་ཀུན་བཟང་ཡབ་ཡུམ་ལ་རྒྱལ་བ་ཞི་ཁྲོའི་ལྷ་ཚོགས་ཀྱིས་བསྐོར་བ་གཙོ་འཁོར་དགོངས་པ་དབྱེར་མེད་ཀྱི་དཀྱིལ་འཁོར་ཆེན་པོའི་ལྷ་ཚོགས་ཐམས་ཅད་ཚོགས་ཀྱི་ལོངས་སྤྱོད་ཟག་མེད་ཀྱི་བདུད་རྩིའི་མཆོད་པ་འབུལ་བའི་གནས་འདིར་གཤེགས་སུ་གསོལ་ཞེས་པ་དེ་ལྟ་བུའི་དོན་ཡིན་ནོ།། ༼ང བཞི་བ་ཚོགས་མཆོད་འབུལ་བ། ཀ༽ ཚོགས་མཆོད་འབུལ་བ་དང་པོ་བཤད་པ། དེ་ནས་ཚོགས་ཕུད་གསུམ་བཅད་ལ༔ དང་པོ་མཆོད་པ་འདི་སྐད་དོ༔ ཧཱུྃ༔ བླ་མ་ཀུན་བཟང་ཐིག་ལེའི་སྐུ༔ ཉག་གཅིག་ཟང་ཐལ་ལོངས་སྤྱོད་རྫོགས༔ ཅིར་མི་དགོངས་པ་སྤྲུལ་པའི་སྐུ༔ རྒྱལ་བ་རྒྱ་མཚོ་ཞི་ཁྲོའི་ཚོགས༔ མཁའ་འགྲོ་ཆོས་སྐྱོང་སྤྲུལ་འཁོར་བཅས༔ ཞལ་ཟས་ཚོགས་ཀྱི་མཆོད་པ་འབུལ༔ ཞེས་གསུངས་ཏེ། ཧཱུྃ་ཞེས་པས་དུས་གསུམ་ཕྱོགས་བཅུ་སངས་རྒྱས་ཐམས་ཅད་ཀྱི་ཐུགས་གཡོ་མེད་ཆོས་དབྱིངས་མཐའ་དབུས་དང་བྲལ་བར་མཚོན་པའི་ཡི་གེས་སྣ་དྲངས་ནས། བླ་མ་ཀུན་བཟང་ཐིག་ལེའི་སྐུ་ཞེས་ཆོས་ཉིད་དོན་གྱི་བླ་མ་སངས་རྒྱས་ཀུན་གྱི་སྤྱི་མེས་ཆོས་སྐུ་ཀུན་ཏུ་བཟང་པོ་ཀུན་བཟང་ཀློང་ན་མི་བཟང་གཅིག་ཀྱང་མེད་པའི་ཀུན་ཁྱབ་བདེ་བ་ཆེན་པོ་དག་མཉམ་དབྱེར་མེད་པའི་བདག་ཉིད་ཀུན་ནས་ཟླུམ་པོ་ཐིག་ལེའི་བདག་ཉིད་དྲྭ་ཟུར་སྤྲོས་པའི་མཚན་མ་དང་ཕྱོགས་ཆ་ཐམས་ཅད་དང་བྲལ་བའི་ཆོས་ཀྱི་སྐུ་ཞེས་པའོ། །ཉག་གཅིག་ཟང་ཐལ་ལོངས་སྤྱོད་རྫོགས་ཞེས་ཉག་གཅིག་དེ་ཐིག་ལེའི་རང་བཞིན་འཁོར་འདས་དབྱེར་མེད་དུ་རྫོགས་པའི་ཟང་ཐལ་མཁའ་དང་མཉམ་པའི་ནང་དབྱིངས་དེ་ལས་ཕྱི་གསལ་ངེས་པ་ལྔ་དང་ཁ་སྦྱོར་བདུན་ལྡན་གྱི་ལོངས་སྤྱོད་རྫོགས་པའི་སྐུ། དེ་ལས་ཆུ་སྣོད་ཟླ་གཟུགས་ཀྱི་དཔེ་བཞིན་དུ་གང་འདུལ་གདུལ་བྱའི་མོས་ངོར་སྤྲུལ་བའི་སྐུར་ཤར་བ་ཅིར་མི་དགོངས་པ་སྤྲུལ་བའི་སྐུ་ཞེས་པ་སྟེ་སྤྲུལ་སྐུ་ཡིན་ཚད་ཅི་ཡང་མི་ཤེས་པ་ཡིན་པས་ཁྱབ་ཅེས་པའི་དོན་མ་ཡིན་ནོ། །འདི་དུས་ཐ་མའི་སྤྲུལ་རྫུན་ལ་གསུངས་པའི་ལུང་བསྟན་དེ་མ་ཡིན་ཞིང་། ཅིར་ཞེས་པའི་ལ་དོན་གྱི་ར་སྒྲ་འདིས་ཅི་ལ་ཡང་མི་དགོངས་པ་གསུངས་པ་ཡིན་ལ། གལ་སྲིད་ར་སྒྲ་འདི་མེད་ན་ངོ་མས་ཅི་མི་དགོངས་པ་ཅི་ཡང་མི་དགོངས་པ་ཟེར་ཆོག་ཅིང་འཁྱོག་འགྲེལ་བྱས་ན་ཆོག་ཀྱང་དེ་ལྟར་མ་ཡིན་ནོ། །འོ་ན་ཇི་ལྟར་ཡིན་ཞེ་ན། དཔལ་ལྡན་ཟླ་བས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །ཅེས་དང་། འཇིག་རྟེན་ལས་འདས་པའི་ལེའུ་ལས། སངས་རྒྱས་རྣམས་ནི་ཆོས་ཀྱི་སྐུ། །རྣམ་དག་ནམ་མཁའ་ལྟ་བུ་ཡིན། །ཞེས་གསུངས་པ་ལྟར་དུ་ཆོས་སྐུའི་དབྱིངས་ལ་རྟོག་པའི་མཚན་མ་མེད་ཀྱང་སྐུ་རྣམ་པ་ཐམས་ཅད་པ་ཤེས་བྱའི་སྣང་བརྙན་ཡོད་དགུར་འཆར་བའི་ཁ་སྦྱོར་དང་། གསུང་རྣམ་པ་ཐམས་ཅད་པ་སྒྲ་ཚིག་གི་མཚན་མ་མེད་ཅིང་སྒྲིབ་པ་ཐམས་ཅད་དང་བྲལ་བའི་ལོངས་སྤྱོད་རྫོགས་པ་དང་། ཐུགས་རྣམ་པ་ཐམས་ཅད་པ་གཟུང་འཛིན་གྱི་རྟོག་པ་ལས་གྲོལ་བ་དང་མཉམ་ཉིད་གཅིག་ཏུ་འགྱུར་མེད་བདེ་ཆེན་གྱི་རོལ་བ་དེ་ཡང་རང་བཞིན་མེད་ལུགས་མེད་དགག་གི་བྱེད་པའི་མཐའ་ལས་གྲོལ་བ་སོ་སོར་རང་རིག་པའི་མཚན་ཉིད་ཅན་རང་དོན་ཕུན་ཚོགས་སྙིང་རྗེས་ཡོངས་སུ་གང་བའི་མཐུ་དེ་ཡིས་དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་ལྟ་བུར་གཞན་དོན་འབད་མེད་དུ་འབྱུང་བ་དེ་ལྟ་བུ་ཡིན་ནོ། །དེས་ན་ཅིར་མི་དགོངས་པ་སྤྲུལ་བའི་སྐུ་ཞེས་ཅིར་ཡང་མི་རྟོག་པའི་དམིགས་པ་མེད་པའི་ཐུགས་རྗེ་དང་ཕྲིན་ལས་ལ་རྒྱུན་ཆད་མེད་པ་གདུལ་བྱའི་མོས་པ་དང་དབང་པོ་ལ་འཚམས་པའི་གཟུགས་སྐུའི་སྣང་བརྙན་དང་ཆོས་ཀྱི་སྒོ་མཐའ་ཡས་པ་འགོག་མེད་དུ་འཆར་རྒྱུ་ཡོད་པའི་སྤྲུལ་བའི་སྐུ་གཞན་དོན་ཕུན་སུམ་ཚོགས་པ་རང་བཞིན་ཤུགས་ཀྱིས་འབྱུང་བ་ཅན་དེ་ལྟ་བུ་ཡིན་པས་སྐུ་གསུམ་འདུས་པའི་བདག་ཉིད་དོན་གཉིས་ལྷུན་གྲུབ་སངས་རྒྱས་གཅིག་ལ་འདུས་པའི་རྒྱལ་བ་ཞི་ཁྲོའི་ལྷ་ཚོགས་མཁའ་འགྲོ་ཆོས་སྐྱོང་སྤྲུལ་བ་འཁོར་དང་བཅས་པ་ལ་ཞལ་ཟས་ཚོགས་ཀྱི་མཆོད་པ་འབུལ་ཞེས་གསུངས་ལ། འདིའི་ཚོགས་ཕུད་ཀྱི་མཆོད་པ་གོང་མ་འདི་སྙན་གསན་དབབ་པའི་རྣམ་པ་ལྟ་བུ་ཞིག་ཡིན་ནོ།། ཁ༽ ཚོགས་མཆོད་འབུལ་བ་གཉིས་པ་བཤད་པ། དངོས་སུ་འབུལ་བ་ནི་དྲུག་པ་ཞལ་ཟས་ཚོགས་ཀྱི་མཆོད་པ་ནི༔ ཧཱུྃ༔ བླ་མ་ཡི་དམ་ཞི་ཁྲོ་རབ་འབྱམས་དང་༔ མཁའ་འགྲོ་དམ་ཅན་མ་ནིང་ནག་པོ་དང་༔ ཨེ་ཀ་ཙ་ཏི་དཔལ་འབར་སྲོག་བདག་དང་༔ ཁྱབ་མཇུག་གནོད་སྦྱིན་དམ་ཅན་ཐིག་ལེ་རྩལ༔ བརྟན་མ་བཅུ་གཉིས་དགེ་བསྙེན་ཉེར་གཅིག་དང་༔ ཡུལ་ལྷ་གཞི་བདག་འཁོར་དང་བཅས་པ་ལ༔ ཞལ་ཟས་ཚོགས་ཀྱི་མཆོད་པ་འདི་འབུལ་བས༔ དགྱེས་པར་དགོངས་ལ་དངོས་གྲུབ་བསྩལ་དུ་གསོལ༔ ཞེས་གསུངས་ཏེ། དཀྱིལ་འཁོར་རྒྱ་མཚོ་ཐུགས་གསང་བ་བླ་མེད་ཀྱི་དཀྱིལ་འཁོར་གཅིག་ལ་འདུས་པའི་ཧཱུྃ་སྒྲ་དེ་ཡིས་སྣ་དྲངས་ནས། རྩ་གསུམ་དམ་ཅན་བསྟན་སྐྱོང་ཡུལ་རིས་ཀྱི་ཟོ་དོར་དང་བཅས་པ་དཀྱིལ་འཁོར་གཅིག་གི་གཙོ་འཁོར་བཀའ་སྡོད་དང་བཅས་པ་འདུས་པ་ལ་ཚོགས་མཆོད་འབུལ་བ་ཡིན་ཞིང་། འདིའི་ཚོགས་ཞིང་སྤྱིའི་ལྷ་ཚོགས་དང་བཅས་པ་ལ་ཚོགས་མཆོད་འབུལ་བ་ཡིན་པས་བྱིན་རླབས་ཀྱི་རྩ་བ་བླ་མ་སྟེ་རྩ་བ་དང་བརྒྱུད་པའི་བླ་མ། དངོས་གྲུབ་ཀྱི་རྩ་བ་ཡི་དམ་སྟེ་ཡི་དམ་ཞི་བ་དང་ཁྲོ་བོའི་ལྷ་ཚོགས་རབ་འབྱམས་སམ་མཐའ་ཡས་པ། ཕྲིན་ལས་ཀྱི་རྩ་བ་མཁའ་འགྲོ་སྟེ་དེ་ཡང་ལས་དང་ཡེ་ཤེས་ཀྱིས་བསྡུས་པ། དམ་ཅན་ཞེས་པ་ཆོས་སྐྱོང་བའི་སྲུང་མ་བཀའ་དང་དམ་ལ་གནས་པ་སྤྱི་ལ་དམ་ཅན་གསུངས་པ་ཡིན་ཞིང་། བྱེ་བྲག་ཟབ་ཆོས་འདིའི་བཀའ་དང་གཏེར་གྱི་སྲུང་མ་དཔལ་མ་ནིང་ནག་པོ་མགོན་པོ་ཀུན་གྱི་གཙོ་བོ། ཨེ་ཀ་ཙ་ཏི་མ་མོ་ཡོངས་ཀྱི་སྤྱི་རྗེ། སྲོག་བདག་ཤན་པ་དམར་ནག ཁྱབ་འཇུག་གམ་གཟའ་བདུད་རཱ་ཧུ་ལ། གནོད་སྦྱིན་ཆེན་པོ་ཡང་ལེ་བེར། དམ་ཅན་ཐིག་ལེ་རྩལ་ལམ་དམ་ཅན་རྡོ་རྗེ་ལེགས་པ། འདིའི་དམ་ཅན་སྤྱི་སྒྲ་བྱེ་བྲག་ལ་འཇུག་དུས་ཀྱང་ཡོད་པས་ཡིན་ལ། བདུད་མོ་བཞི་དང་སྨན་མོ་བཞི་ལ་སོགས་པ་བོད་སྐྱོང་བསྟན་མ་བཅུ་གཉིས། ཇོ་བོ་སྒྱོགས་ཆེན་གདོང་ར་ལ་སོགས་པ་དགེ་བསྙེན་ཉེར་གཅིག གཞན་ཡང་རྣལ་འབྱོར་བ་གང་ན་གནས་པའི་ས་ཕྱོགས་དེའི་དཀར་ཕྱོགས་སྐྱོང་བའི་ཡུལ་རིས་ཟོ་དོར་སྤྱི་དང་། ཁྱད་པར་འགོ་ཞིང་སྲུང་བའི་ཡུལ་གྱི་ལྷ་དང་གཞི་ཡི་བདག་པོ་འཁོར་དང་བཅས་པ་ལ་ཡང་ཞལ་ཟས་ཚོགས་ཀྱི་མཆོད་པ་འདི་འབུལ་བས་དགྱེས་པ་ཆེན་པོས་དགོངས་ཏེ་དངོས་གྲུབ་བསྩལ་དུ་གསོལ་ཅེས་གསུངས་པའོ། །མ་ཧཱ་གྷ་ན་ཙཀྲ་པུ་ཙ་ལ་ཁཱ་ཧི༔འདི་ཚོགས་ཕུད་དམ་ཚོགས་མཆོད་གོང་འོག་གཉིས་ཀའི་ནང་གི་འབུལ་ཚིག་གི་སྔགས་ཡིན་ལ། སྔགས་དོན་ནི་ཚོགས་ཀྱི་འཁོར་ལོའི་མཆོད་པ་ཆེན་པོ་བཞེས་ཤིག་ཅེས་པའི་དོན་ཡིན་ནོ།། ༼ཅ ལྔ་བ་བཤགས་པར་བྱ་བ། ཀ༽ བསྐང་ཞིང་བཤགས་པ། ཀ དངོས་ཀྱི་དོན་བཤད་པ། བར་པ་གཤགས་ཤིང་འབུལ་བ་ནི༔ ཧཱུྃ༔ བདག་ཅག་འཁོར་བའི་སེམས་གཞི་བླངས་པ་ནས༔ ད་ལྟའི་ལུས་འདི་བླངས་པ་ཡན་ཆད་དུ༔ རིག་དང་མ་རིག་བག་ཆགས་དབང་གྱུར་པས༔ རྩ་བ་ཡན་ལག་དམ་ཚིག་ཉམས་པ་རྣམས༔ ཞལ་ཟས་ཚོགས་འབུལ་བསྐང་ཞིང་བཤགས་པར་བགྱི༔ བཟོད་པར་བཞེས་ནས་ཚངས་པར་སྩལ་དུ་གསོལ༔ ཞེས་གསུངས་ཏེ། ཧཱུྃ་ཞེས་པ་བརྗོད་མེད་ཐུགས་ཀྱི་ཀློང་ན་བཤགས་བྱ་བཤགས་བྱེད་དང་བྲལ་བའི་དོན་གྱི་ཡི་གེས་སྣེ་དྲངས་ནས། བདག་ཅག་ཅེས་བདག་དང་བཅས་པའི་སེམས་ཅན་ཐམས་ཅད་ཀྱིས་ཞེས་པའི་དོན་བསྟན་པ་ཡིན་ལ། འཁོར་བའི་སེམས་གཞི་བླངས་པ་ན་ཞེས་པ་འཁོར་བའི་སེམས་འདི་རྒྱུ་བདག་ཉིད་གཅིག་པའི་མ་རིག་པའི་ལྷན་སྐྱེས་ཀུན་བརྟགས་ཀྱི་མ་རིག་པ་དང་རྐྱེན་བཞིའི་དབང་གིས་འཁྲུལ་བ་ཡིན་པས་དེའི་འཁྲུལ་མ་འཁྲུལ་གཉིས་ཀྱི་འདུས་མདོ་གཞི་གང་ལས་སྐྱེས་ན་གཞི་ལས་གཞི་སྣང་ཤར་བའི་གནས་སྐབས་ན་གཟུང་འཛིན་རྒྱང་ཆད་དུ་སོང་བ་སྟེ། དཔལ་ལྡན་ཟླ་བས། དང་པོ་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་བསྐྱེད་པ། །ཟོ་ཆུན་འཕྱན་ལྟར་རང་དབང་མེད་པ་ཡི། །ཞེས་གསུངས་པ་ལྟ་བུའི་གཞི་ལས་གཞི་སྣང་ཤར་བའི་གནས་སྐབས་ན་འོད་སྣང་གཞན་དུ་བཟུང་། གཟུང་འཛིན་ཇེ་རགས་སུ་གྱུར་ནས་གནས་དོན་ལུས་སུ་གྲུབ་ཅིང་། སྐྱེ་ཤི་མང་པོའི་ཁ་བརྒྱུད་པ་ནས་ཐ་མལ་ད་ལྟའི་ལུས་འདི་བླངས་པ་ཡན་ཆད་དུ་ཞེས་མདོར་ན་ཐོག་མེད་ནས་ད་ལྟའི་བར་དུ་ཞེས་པ་ལྟ་བུ་ཡིན་ནོ། །ཤེས་བཞིན་དུ་སྡིག་པའི་ལས་བྱས་པ་ཤི་རྒྱུ་ཤེས་ཤེས་ཁར་དུག་འཐུང་བ་ལྟ་བུ་དང་། མ་རིག་པ་དང་རྨོངས་པའི་གཞན་དབང་དུ་སོང་ནས་བསྲུང་མཚམས་མ་ཤེས་ནས་འགལ་བར་སོང་བ་དང་། མདོར་ན་བག་ཆགས་ངན་པའི་རང་གཤིས་ཀྱི་དབང་དུ་སོང་ནས་རྩ་བ་དང་ཡན་ལག་གི་དམ་ཚིག་ཉམས་པ་རྣམས་ཞལ་ཟས་ཚོགས་ཀྱི་མཆོད་པ་ཕུལ་བ་འདིས་མ་ཚང་བ་ཁ་སྐོང་། ཆད་པ་མཐུད། གས་པ་གསོས། ཉམས་པ་བཤགས་པ་ཡིན་གསུངས་ནས་གསང་སྔགས་ཀྱི་ཐབས་ཁྱད་པར་ཅན་འདི་ཚོས་བཤགས་ན་བཤགས་པའི་མཆོག་ཡིན་ཞིང་། ཚོགས་འཁོར་བསྐོར་རྒྱུ་འདི་གསང་སྔགས་ཀྱི་གསོ་སྦྱོང་དུ་རང་ཤུགས་ཀྱིས་འགྱུར་འགྲོ་ལ། དམ་ཚིག་ཉམས་སོང་བའི་དམ་ཉམས་ཟེར་བ་དེ་གནའ་ཞིག་ལ་ཡོད་མྱོང་བ་རེད་མ་གཏོགས་དེང་སང་ཅི་ལ་ཡོད་བསམ་རྒྱུ་དང་། གཞན་དག་ཅིག་དམ་ཚིག་གཙང་ས་མེད་མ་གཏོགས་ང་ནི་གཙང་མ་ཡིན། འགལ་ཉམས་འདས་རལ་ཟླས་ཉམས་ཞོར་ཉམས་ལ་སོགས་པའི་ཤན་ཞིག་ང་ལ་ཞུགས་མེད་སྙམ་ན་དེ་དཀའ་མོ་ཞིག་ཡིན་ནོ། །འགལ་ཡོད་དང་མེད། འགལ་རྒྱུ་ཅི་ཞིག་ཡིན། གང་ལ་ཇི་ལྟར་འགལ་ཡོད། འགལ་རྒྱུའི་རྣམ་གྲངས་དུ་ཙམ་ཞིག་ཡོད་མ་ཤེས་དུས་རིག་དང་མ་རིག་བག་ཆགས་དབང་གྱུར་གྱི་ནང་ལ་གཅིག་མིན་ན་གཅིག་གི་ཐད་ནས་བཤགས་དགོས་པར་གྱུར་ཡོད་རྒྱུ་དང་། སྟབས་ཉེས་ན་བཤགས་རྒྱུ་མེད་པའི་སྡིག་ཅན་དུ་འགྱུར་སྲིད་པ་དེ་ལྟར་ཡིན་ནོ།། ཁ འཕྲོས་དོན་བཤད་པ། ༼༡༽ རྩ་བའི་དམ་ཚིག་བཤད་པ། ༼༡ རྩ་བའི་དམ་ཚིག་དང་པོ་བཤད་པ། དམ་ཚིག་གི་རྣམ་གྲངས་འདི་ཤིན་ཏུ་མང་བ་ཡིན་ཞིང་། རྒྱུད་གཞན་པ་ཡི་ནང་ན་རྩ་ལྟུང་བཅུ་བཞི་ཡན་ལག་སྦོམ་པོ་བརྒྱད་ལ་སོགས་པ་དབྱེ་བསྡུའི་རྣམ་གྲངས་མང་ལ། སྒྱུ་འཕྲུལ་གྱི་ལུགས་གཞིར་བཟུང་ན་ཡང་རྩ་བ་ལྔ། ཡན་ལག་བཅུ་དང་བཅོ་ལྔར་བྱས་ནས་གསུངས་ཡོད་དོ། །རྩ་བའི་དམ་ཚིག་ལྔ་ལ་མཚོན་ན། བླ་མེད་མི་སྤོང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །ཅེས་གསུངས་ཏེ། རྩ་བའི་དམ་ཚིག་ལྔའི་ནང་གི་དང་པོ་དེ་བླ་མེད་མི་སྤོང་ཞེས་པ་ནི་བླ་མེད་ཅེས་པ་གང་ལ་ངོས་འཛིན་ན་ཆོས་ཐམས་ཅད་ཀྱི་གནས་ལུགས་མཐར་ཐུག་པ་དག་མཉམ་བདེན་པ་དབྱེར་མེད་ཆོས་སྐུ་ཆེན་པོ་དེ་ལ་གོ་དགོས་ཤིང་། དེའི་ཡན་ན་རྟོགས་དགོས་རྒྱུ་ཞིག་དང་ཐོབ་དགོས་རྒྱུའི་ལམ་དང་འབྲས་བུ་ཞིག་མེད་ལ། དེའི་ཕྱིར་བླ་མེད་ཅེས་གསུངས་སོ། །དེ་སྤང་མི་ཉན་ལ། དེ་མ་སྤངས་ན་དཀོན་མཆོག་གསུམ་དང་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་ཀ་རང་ཤུགས་ཀྱིས་སྤངས་མེད་དོ། །དཀོན་མཆོག་གསུམ་ནི་སྨྱོས་ཡོད་ན་མ་གཏོགས་སྤོང་དོན་མེད་དོ་སྙམ་ན། གཞི་ལམ་འབྲས་བུས་བསྡུས་པའི་དཀོན་མཆོག་གསུམ་མི་སྤོང་བ་མ་དགོས་དང་ངོ་ཤེས་པ་ཡང་དཀའ་ལ། ཆོས་ཉིད་དོན་གྱི་གནས་ལུགས་ཇི་ལྟ་བ་བཞིན་མངོན་དུ་གྱུར་པ་དེ་ཉིད་སངས་རྒྱས་ཡིན་པ་དང་། ཇི་ལྟ་བ་བཞིན་མངོན་དུ་མ་གྱུར་ཀྱང་ཅི་རིགས་རྟོགས་པ་དགེ་འདུན་ཡིན་ཞིང་། བླ་མེད་ལ་ཡིད་ཆེས་བྱས་ནས་མ་སྤངས་དུས་དེ་མཐོང་བའི་འཕགས་རིགས་ཀྱི་རྒྱུད་ན་བཞུགས་པའི་ཆོས་ཀྱང་སྤོང་མི་སྲིད་དོ། །དེ་ལྟ་བུའི་མཆོག་གསུམ་དེ་མ་སྤངས་དུས་དེའི་ཆོས་ཉིད་ཀྱི་ཚུལ་དུ་ཡོད་པའི་གཞི་ལམ་འབྲས་བུའི་དཀོན་མཆོག་གསུམ་གཞིའི་གནས་སྐབས་ན་སེམས་ཅན་གྱི་སེམས་ཉིད་སངས་རྒྱས་པའི་ངོ་བོར་གནས་ཡོད་པ་དང་། དེ་གནས་ན་ཆོས་ཀྱང་ཉི་མ་དང་ཟེར་བཞིན་དུ་འབྲལ་མེད་དུ་ཡོད་དགོས་ཤིང་། དེ་མིན་ཡང་ངག་ཡི་གེའི་འཁོར་ལོ་རང་བཞིན་གྱིས་གནས་ཡོད་ལ། ཆོས་ཉིད་དེ་ལྟ་བུ་དང་ལྡན་པས་སེམས་ཅན་བསོད་ནམས་སྒྲུབ་པའི་ཞིང་དུ་གྱུར་ན་དགེ་འདུན་མིན་པའི་ཐབས་གང་ན་ཡོད། གཞི་དུས་དེ་ལྟར་ཡིན་ན་ལམ་གྱི་གནས་སྐབས་ན་ལམ་ཞུགས་གང་ཟག་རང་ཉིད་ལྟ་བུ་ལ་ཆག་བཞག་ན་སྒོ་གསུམ་སྐུ་གསུང་ཐུགས་ཀྱི་ངོ་བོར་ཡེ་ནས་གནས་དུས་སངས་རྒྱས་མིན་པར་གང་དུ་འགྲོ་ས་ཡོད། ལམ་བསྐྱེད་རྫོགས་གཉིས་ཀ་ཉམས་ལེན་བྱེད་བཞིན་ཡོད་པ་འདི་ཆོས་ཡིན་ལ། ཆོས་ཉམས་ལེན་བྱེད་མཁན་དེ་དགེ་འདུན་མིན་པའི་ཐབས་མེད་ན་ལམ་དུས་ཀྱི་མཆོག་གསུམ་ཡང་དེ་ལྟར་དུ་ཚང་བ་ཡིན་ནོ། །འབྲས་བུའི་གནས་སྐབས་སུ་བསམ་བློ་བཏང་ན་ལམ་མཐར་ཕྱིན་པའི་སངས་རྒྱས་དང་། དེས་བསྟན་པའི་ཆོས། དེ་ཉམས་སུ་ལེན་པའི་དགེ་འདུན་ཏེ་ཡོངས་གྲགས་ཀྱི་མཆོག་གསུམ་མོ། །དེ་ཡང་མཐར་གཏུགས་ན་སངས་རྒྱས་གཅིག་ལ་ཐུག་པ་སྟེ། ཐུབ་པ་ཆོས་ཀྱི་སྐུ་ཅན་ཕྱིར་ཞེས་གསུངས་པ་ཡིན་པས་སློབ་པ་མཐར་ཐུག་འབྲས་བུའི་སྐབས་སུ་ཡིན་ན་དེ་ལྟ་བུའི་གཞི་ལམ་འབྲས་གསུམ་གྱི་དཀོན་མཆོག་ཐམས་ཅད་པོ་དག་མཉམ་བདེན་པ་དབྱེར་མེད་ཀྱི་ཚུལ་དེའི་ཕན་ན་ལོགས་སུ་མེད་པ་དེ་ཉིད་གནས་ལུགས་དོན་གྱི་དཀོན་མཆོག་ཡིན་ལ། དེའི་ངང་དུ་སྐྱབས་གནས་ཐམས་ཅད་འདུས་པ་ཡིན་ཞིང་། དེ་ལྟར་ན་བླ་མེད་དེ་བཟུང་དུས་སྐྱབས་གནས་ཐམས་ཅད་བཟུང་བ་ཡིན་ནོ། །ཡིན་ན་ཡང་གང་ཟག་གི་བློ་རིམ་གཅིག་དང་གཅིག་མི་འདྲ་ལ། བླ་མེད་མི་སྤོང་བཟུང་ལུགས་ལ་ཁྱད་པར་ཡོད་ཅིང་། འདི་ལ་མོས་པས་འཛིན་པ་དང་ངེས་པས་འཛིན་པ་ཞེས་པ་གཉིས་སུ་ཕྱེས་ཡོད་དོ། །མོས་པས་འཛིན་པ་ཡིས་འཛིན་ལུགས་དེ་ཉིད་ཧ་ཅང་ལེགས་པོ་ཞིག་མ་ཤེས་ནས་ངེས་པ་མ་རྙེད་པ་ཡིན་ཡང་རྒྱུད་སྡེ་ནས་གསུངས་པ་ལྟར་དུ་འཛིན་དགོས་སྙམ་པ་ཡིན་ལ། ངེས་པས་འཛིན་པ་གང་ཡིན་པ་དེ་ཉིད་ཀྱིས་ལྟ་བའི་དོན་གོ། དེ་ལ་ཡིད་ཆེས་ནས་དེ་འདྲ་བའི་སྒོ་ནས་ཡེ་ནས་ཡིན་པས་དེ་སྤོང་རྒྱུ་མེད་སྙམ་པའི་ངེས་ཤེས་རྙེད་ཡོད་པས་ངེས་པས་འཛིན་པ་ཡིན་ནོ། །དེ་ལྟ་བུ་དེ་ཉིད་དམན་ལམ་ལ་ལྡོག་རྒྱུ་ལ་སོགས་པ་རང་གི་ངེས་པ་དེའི་སྟོབས་ཀྱིས་འགོག་ནུས་ལ། ལྟ་བ་དེ་ལྟ་བུ་དང་ལྡན་པ་དེ་ལ་དེའི་མིང་རྡོ་རྗེ་འཛིན་པ་ཟེར་ཆོག་ཅིང་། ཆོག་པའི་རྒྱུ་མཚན་ནི་སྔགས་ཀྱི་དེ་ཁོ་ན་ཉིད་རྡོ་རྗེ་ལྟ་བུ་དེ་རང་གི་རྒྱུད་ན་བཟུང་སྟེ་སྲིད་ཞིའི་རྒུད་པ་འཇོམས་པའི་ནུས་པ་དང་ལྡན་པས་རྡོ་རྗེ་འཛིན་པར་གྱུར་ཡོད་དོ། །བྱང་ཆུབ་ཀྱི་སེམས་རྣམ་པ་གཉིས་སྤངས་པར་བྱས་མེད་དེ། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་རྒྱུད་ཀྱི་ནང་ན་གསུངས་པའི་དོན་རྟོགས་ཡོད་དོ། །དེས་ན་བླ་མེད་ཀྱི་སྔགས་ཀྱི་དེ་ཁོ་ན་ཉིད་དེ་ཆོས་ཉིད་དོན་གྱི་ལྷ་ཡིན་ན་དེ་རྣམ་པ་རྟགས་ཀྱི་ཕྱག་རྒྱར་ཤར་བའི་ལྷ་ཐམས་ཅད་ཀྱང་འདིའི་སྒོ་ནས་མི་སྤོང་བར་གྲུབ་ཡོད་ཅིང་། དེ་འདྲ་ཞིག་ཡིན་པའི་རྒྱུ་མཚན་གྱིས་དམ་ཚིག་དང་སྒོམ་སྒྲུབ་ཐམས་ཅད་ཀྱི་སྲོག་ལྟ་བ་འདིས་བཟུང་ན་མི་ཉམས་ཤིང་རྣམ་པར་དག་པར་འགྱུར་ཐུབ་བོ། །དེ་ལྟར་བྱས་ནས་སྔགས་ཀྱི་དེ་ཁོ་ན་ཉིད་དེ་གདེང་དུ་གྱུར་ནས་ལྟ་བ་ཡང་དག་ཡོད་པ་ཞིག་གིས་ནི་དམ་ཚིག་ཉམས་ཞེས་པ་མི་སྲིད་ཀྱང་དེ་ལྟ་བུའི་གདེང་ཚོད་ཡོད་པའི་ཚད་དུ་ཟིན་མ་དགོས་དང་ཟིན་ལ་ཉེ་བ་ཙམ་དུ་མ་གྱུར་ནས་མོས་པ་ཡིད་བྱེད་ཙམ་གྱིས་སྔགས་ལ་ཞུགས་ཁུལ་བྱས་པ་དེས་མཚམས་མཚམས་སུ་ལྟ་བ་ཟབ་མོ་དག་མཉམ་དབྱེར་མེད་ཀྱི་དོན་དང་གནད་མི་རྟོགས་ནས་རྩ་ལྟུང་འབྱུང་བ་ཡིན་ནོ། །དེས་ན་ལས་དང་པོ་བས་སྔགས་ཀྱི་ལྟ་སྤྱོད་ཟབ་མོ་རང་ཐད་ཀྱིས་ཉམས་འོག་ཆེན་པོ་ཞིག་མ་ཆུད་ཀྱང་ཆོས་སྤོང་གི་ཉེས་པ་དང་རྩ་ལྟུང་འབྱུང་བ་ལ་བསམས་ནས་སྨོད་མི་ཉན་ཞིང་། དབང་ཐོབ་དཀྱིལ་འཁོར་གཉན་པོ་ལ་མ་ཞུགས་པ་ཞིག་ནི་ཕལ་ཆེར་ཡོད་པ་མ་ཡིན་ལ། ཐམས་ཅད་པོ་གསང་སྔགས་ལྟ་སྤྱོད་ཟབ་མོ་ཤེས་མཁན་དང་དེ་ཉམས་སུ་ལེན་ཐུབ་མཁན་དེ་བས་ཀྱང་ད་ལྟ་ནས་དཀའ་ཡང་ནམ་ཞིག་དེ་དང་དེ་ལྟ་བུ་དང་དུ་ལེན་དགོས་སྙམ་པའི་མོས་པ་དང་དང་བ་བྱེད་དགོས་སོ། །དེ་རིང་ཚོགས་ཀྱི་བཤགས་པ་དང་སྦྲེལ་ནས་དམ་ཚིག་གི་སྐོར་འཕྲོས་དོན་ལ་བཤད་རྒྱུ་བྱུང་སོང་བ་ཡིན་ལ། འདི་རྒྱས་བཤད་བྱེད་རྒྱུ་འདི་སྐབས་སུ་བབས་ཟེར་རྒྱུ་མེད་ཀྱང་འདི་དང་མི་འབྲེལ་བ་ཞིག་མ་ཡིན་ཞིང་། དབང་ཐོབ་སྡོམ་པ་ཞུས་ཡོད་མཁན་ཞིག་གིས་སྡོམ་དམ་ཚིག་གི་རྣམ་བཞག་ཙམ་ཞིག་ཚིག་ཐོག་ནས་མ་ཤེས་དུས་དོན་ཐོག་ནས་ཇི་ལྟར་བསྲུང་སྟེ། བསྲུང་བྱ་མི་ཤེས་བསྲུང་བར་རློམ་པ་མཚར་གསུངས་པ་ལྟ་བུར་གྱུར་དུས་སོར་ཐར་གྱི་སྡོམ་པ་དེ་ན་བཟའ་ངུར་སྨྲིག་ཙམ་དང་། གསང་སྔགས་ཀྱི་དཀྱིལ་འཁོར་ཞལ་ཕྱེས་ནས་གྱེར་འདོན་བྱས་པ་ཙམ་གྱིས་ལྟར་སྣང་ཙམ་དང་གཟུགས་བརྙན་ཙམ་དུ་གྱུར་ནས་མདོ་སྔགས་གཉིས་ནས་རྟགས་ཙམ་འཛིན་པའི་བསྟན་པ་དེ་རྟགས་འཆང་མཁན་རང་ཉིད་ཀྱིས་མགོ་བཙུགས་པར་བྱས་པའི་བཞག་པ་ངན་པར་འགྱུར་འགྲོ་ཞིང་། རྗེ་མི་ལ་རས་པའི་མགུར་འབུམ་ལས། ཙནྡན་སྨན་གྱི་སྡོང་པོ་ལ། །ཤིང་རྟ་ཡུ་ནང་ནས་མ་ཤོར་ན། །ཕྱི་མོན་པ་སྟར་ཐོགས་མི་འོང་གིས། །ཤིང་ནང་སྲིད་སྡོམས་ཤིག་ནགས་མ་ལྗོངས། །གསུངས་པ་ལྟ་བུ་འདིའི་ཐད་ཀྱི་གདམས་པ་ཡིན་ནོ། །དེས་ན་དམ་ཚིག་གི་སྐོར་དེ་ད་རེས་ཞིབ་ཆ་འདྲ་ཞིག་རེད་སོང་ན་མིན་རྒྱུ་མི་འདུག་བསམ། རྩ་བའི་ལྟུང་བ་ལྔའི་ནང་གི་བླ་མེད་མི་སྤོང་གསུངས་པའི་དང་པོ་དེའི་དོན་རགས་རིམ་ཞིག་བཤད་པ་ཡིན་ལ། སང་ཉིན་བླ་མེད་མི་སྤོང་ཞེས་པའི་མཚམས་ཀྱི་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་པའི་སྒྱུ་འཕྲུལ་རྩ་བའི་དམ་ཚིག་འཕྲོ་མ་བཞི་བོ་དང་ཡན་ལག་གི་དམ་ཚིག་བཅུ་བོ་དེ་ཞུ་ཆོག དམ་ཚིག་གི་སྐོར་དེ་དེ་སྔོན་མགོ་གླེང་ཙམ་རེ་མ་གཏོགས་ཞུས་མྱོང་བ་ཕལ་ཆེར་དྲན་རྒྱུ་མི་འདུག་ལ། ད་རེས་བསྙེན་པ་གསོག་རྒྱུ་གལ་ཆེ་ཞིང་། དུས་ཚོད་འཕྲོག་བརླག་ཤོར་མི་ཉན་ཡང་དེ་རིང་ཡང་ལས་བྱང་རྔ་མ་མ་བུད་པས་སང་ཉིན་ཡོངས་སུ་གྲུབ་པ་ཞིག་དུས་ཚོད་ཀྱི་འཆར་གཞི་དང་འགྲིག་པ་ཞིག་བྱེད་ཆོག དེས་ན་ཆོས་ཁྲིད་སྣར་ཡུན་རིང་སོང་ཡང་ཕན་ཐོགས་ཀྱི་ཕྱོགས་ལ་ཅུང་ཟད་རེ་ཡོད་སྲིད་རྒྱུ་རེད་སྙམ་པའི་བསམ་པ་དེ་ལྟ་བུ་བྱས་པ་ཡིན་ནོ།། །། ཉིན་ལྔ་བའི་ཆོས་ཁྲིད།༡ སྔོན་དུ་འགྲོ་བའི་ཆོས་བཤད་པ། ཇི་སྐད་དུ་སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབས་ཀྱང་སླ། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་ལ། དེས་དོན་ཅི་ཞིག་བསྟན་ཅེ་ན། མཆོག་དང་ཐུན་མོང་གི་དངོས་གྲུབ་ཚེ་འདི་ལ་ཐོབ་ནས་རང་གཞན་གྱི་དོན་བྱེད་སེམས་མཁན་ངོ་མ་ཞིག་གིས་ཚེ་འདིའི་ཐོག་གི་འདོན་ཡོན་ལོངས་སྤྱོད་ཕར་ཞོག་སྲོག་གཏོང་དགོས་ན་ཡང་ཧ་ལས་རྒྱུ་ཅི་ཞིག་ཡོད་དེ། དེ་སྔོན་དོན་མེད་དོན་ཆུང་གི་ཆེད་དུ་སྲོག་ཅི་འདྲ་མང་པོ་ཞིག་བཏང་མ་མྱོང་། འཆི་བའི་དུས་ལ་ད་བབས་སོང་ན་སླ་ལ། ནམ་ཞིག་ལ་འཆི་དགོས་ཤིང་། མི་ཤི་བར་སུ་གཅིག་འདུག་ས་མེད་དོ། །དམ་ཚིག་སྲུང་དགོས་མ་གཏོགས་དེ་མ་བསྲུངས་ནས་ཉམས་ཤོར་ན་ཚེ་རབས་མང་པོ་ལ་སྡུག་བསྔལ་ཉམས་སུ་མྱོང་ནས་འདོད་དོན་བརླག་འགྲོ་བ་ཡིན་ཞིང་། དམ་ཚིག་ཉམས་ཤོར་བ་དེ་ཉིད་ཐེངས་གཅིག་ལ་སྲོག་འདོར་དགོས་ཐུག་པ་དང་ཐེངས་གཅིག་ཤི་བ་ལས་ཚབས་ཆེ་བ་ལས་ཆེ་ཡིན་ལ། དམ་ཚིག་བསྲུང་རྒྱུ་གལ་ཆུང་མི་བྱེད་རྒྱུར་སྲོག་བས་གནད་ཆེ་བ་ཡིན་པའི་འདང་རྒྱོབ་ཅེས་གསུངས་པ་ཡིན་ནོ། །འུ་ཚོ་མི་འདིས་འདང་ཕོག་པ་མ་ཡིན་ཞིང་། སོ་སོར་སྐྱེ་བོ་བྱིས་པའི་བློ་ཅན་ཡིན་ལ། མི་ཆེན་ཞིག་གིས་བལྟས་ན་བྱིས་པ་བསམ་མེད་ཚོས་འདི་ཅིའི་ཕྱིར་བྱེད་སྙམ་པའི་ལས་བྱེད་པ་ཡིན་པ་དང་། མི་ཆེན་ཞིག་གིས་སྲུང་བཞིན་མ་བསྡད་ན་ཐ་ན་རང་སྲོག་གི་ཉེན་ཁར་འཛེམས་མི་ཤེས་སོ། །དེ་དང་འདྲ་བར་འཕགས་པ་ཞིག་གིས་གཟིགས་ན་སོ་སྐྱེ་ཡི་བསམ་སྤྱོད་ཅི་ལས་གང་ལས་ཐམས་ཅད་པོ་རང་གིས་རང་ལ་གནོད་སྐྱེལ་བཞིན་ཡོད་པ་དང་འདྲ་བར་ཡིན་ཤག་ཤག་ངེས་ཤིང་། འུ་ཚོ་ཞེས་ཟེར་བ་མ་ཡིན་ཏེ་རང་དང་རང་འདྲ་བའི་རིགས་འདྲ་ལ་ཆ་མཚོན་ནས་བཤད་པ་ཡིན་ལ། ཅོལ་ཆུང་བ་ཡིན། མིག་ཐག་ཐུང་བ་ཡིན། སྔུན་གང་གི་འདང་རྒྱག་ཅིག་མ་གཏོགས་མཐའ་རིང་བོ་དང་དོན་ཆེན་པོ་ལ་ལྟ་མི་ཤེས་སོ། །བདེ་རྒྱུ་འཚོལ་མི་ཤེས་ནས་བདེ་འབྲས་ཤིག་ཨེ་ཐོབ་བལྟ་ས་ནས་རྒྱུ་མེད་ཀྱི་འབྲས་བུ་ཞིག་ཡོད་མ་སྲིད་ནས་ཁམས་གསུམ་འཁོར་བའི་སེམས་ཅན་གྱི་སྡུག་བསྔལ་མྱོང་བཞིན་པ་འདི་ཡིན་ལ། འཁོར་བའི་སེམས་ཅན་ཞིག་ཡིན་ཚེ་རང་ཅི་འདྲ་རོགས་ཡིན་ཞིང་། ཐམས་ཅད་ཀྱི་བསམ་རྒྱུ་ལས་རྒྱུ་ཕལ་ཆེར་གཅིག་ཡིན་ནོ། །འགྲོ་བ་མིའི་རིགས་ཤིག་ལ་མཚོན་ན་སོ་སོ་སྐྱེ་བོ་ཡིན་ནས་བཟུང་སྟེ་གཉེན་ལ་ཆགས་ནས་དེའི་ཕྱོགས་འཛིན་ཁུལ་བྱེད། དགྲ་ལ་སྡང་ནས་དེ་དང་དེའི་ཕྱོགས་ལ་གནོད་སེམས་འཆང་ཁུལ་བྱེད། གཉིས་མཉམ་གྱི་གཏི་མུག་ཡོད་ལ། ཆགས་སྡང་གང་བྱས་ན་རྨོངས་ནས་འཁྲུལ་བཞིན་ཡོད་ཅིང་། དེ་སྔོན་དེ་ལྟར་བྱས་ནས་འདི་ལས་མ་ཐར་བ་ཡིན་ནོ། །ད་རུང་དེར་མུ་མཐུད་ན་ཁམས་གསུམ་གྱི་གནས་སུ་དེ་སྔོན་བཞིན་འཁོར་ནས་སྡུག་བསྔལ་མྱོང་བ་ལས་ཕན་ན་མེད་ཤག་ཤག་གི་ཁ་ཕྱོགས་རིག་བཞིན་པ་འདི་ཡིན་ཞིང་། ད་ནི་དེ་སྔོན་གྱི་ལམ་ལ་འགྲོ་རྒྱུ་མེད་ལ། དེའི་ལམ་དེ་ལམ་ནོར་ཡིན་ཞེས་བཤད་དེ་ཁ་ཚུར་འཁོར་ནས་རྟགས་བསྣོག་པ་དང་ཆས་བསྒྱུར་ནས་གཅིག་ན་ཆོས་ལམ་ལ་ཞུགས་ཏེ་ཐེག་ཆེན་མདོ་སྔགས་གཉིས་ཀྱི་ཆོས་ཞུས། གཉིས་ན་ཚངས་པར་སྤྱོད་པའི་བརྟུལ་ཞུགས་འཆང་བ་དང་གསང་སྔགས་རིམ་གཉིས་ཀྱི་ལམ་ནས་སེམས་ཁྱད་པར་ཅན་བསྐྱེད། མན་ངག་མ་འདྲ་བ་ཞུས་ནས་ཚེ་འདིའི་ཐོག་ནས་ཐོད་རུས་མགོ་ལ་མི་ལེན་པར་སངས་རྒྱས་པ་ཞིག་བྱེད་རྒྱུའི་འདུན་པ་དེ་ལ་གཏད་ནས་ཆོས་ལམ་དེ་འདྲ་ཞིག་ལ་ཞུགས་ཡོད་དུས་ད་རུང་མི་སྐྱ་ཕོ་མོ་ལྟར་དུ་མནོག་ཆུང་ཚེ་འདིའི་ཁེ་གྲགས་ཀྱི་དོན་དུ་ལུས་པོ་བཙོངས་ནས་གཉེན་ལ་ཆགས། དགྲ་ལ་སྡང་། སྙན་གྲགས་འདྲ་ཞིག་དོན་གཉེར་བྱེད་ཁུལ་བྱས། རྒྱུ་འདྲ་ཞིག་ཨེ་སོག་ལྟ་ཁུལ་བྱས། དེའི་དོན་དུ་ཚོང་བརྒྱབ། མནའ་ཟོས། རྫུན་བཤད། གནོད་སེམས་བཅངས། དེ་མིན་ཡང་ལོག་འཚོའི་འཚོ་བ་དཀོན་མཆོག་གི་ཕག་ནས་གཅིག་ཨེ་རྙེད་ལྟ་ཁུལ་བྱས། ཡོད་པ་ཟད་དོགས་བྱས། མེད་པ་འཚོལ་དགོས་ཀྱིས་བྲེལ་ནས་འཁོར་ངན་གྱི་ལག་འོག་ཏུ་མི་ཚེ་འཛད་པ་དེ་འདྲར་འགྱུར་ཤོར་མི་ཉན། གོན་རྒྱུའི་ཁ་མདོག་ཙམ་མིན་པའི་བསམ་རྒྱུ་ལས་རྒྱུ་བྱེད་རྒྱུ་ཚང་མ་མི་སྐྱ་ཕོ་མོ་དང་ཨ་ན་མ་ནར་གྱུར་སོང་དུས་བླ་སེར་ལ་ཁྱད་ཆོས་ཁ་ཁ་ཞིག་མེད་སོང་བ་ཡིན་ནོ། །དེ་ལྟ་བུ་གཅིག་རྒྱུས་གཅིག་གིས་མི་ལེན་རྒྱུ་མེད་ཅིང་། ཤི་ཁར་སྔས་མགོ་ལ་དྲངས་ཡོང་ན་གཅིག་ཤོས་ཀྱིས་དད་པ་མི་ཞོག ཤི་ཁར་མ་དགོས་གསོན་པོའི་གནས་སྐབས་ཡིན་ན་ང་དང་ཁོ་ཡི་འདང་ཞིག་མ་གཏོགས་མེད་ལ། དེའི་ཐོག་ཏུ་ཁྱིམ་པ་བས་ཀྱང་སྡུག་པའི་ཆགས་སྡང་འཐབ་མོ་འཁོན་རྩོད་ཀྱི་ནང་དུ་ཞུགས་ན་གཞན་རྒྱུད་སྲེག་པའི་དགེ་སྦྱོང་ལུས་སྤོང་ཤོག་ཅེས་པའི་མཚན་གཞི་ང་ཡིན་ཞེས་པ་ལྟ་བུར་འགྱུར་བ་ཡིན་ནོ། །གཅིག་དང་མ་འདྲ་བའི་ཆོས་བསྒྲུབས་པའི་འབྲས་བུ་ཞིག་ཐོབ་དགོས་དུས་གཅིག་དང་མ་འདྲ་བའི་བསམ་སྤྱོད་བཟང་པོ་ཞིག་ཡོད་ལོས་དགོས་ཏེ། ལྟ་སྤྱོད་གཉིས་ཀ་ཡ་བྲལ་མི་ཉན་ལ། ཐུན་མིན་སྔགས་ཀྱི་བསྐྱེད་རྫོགས་ཉམས་ལེན་བྱེད་བཞིན་ཡོད་པ་ཞིག་ལ་སྣང་སྲིད་དག་མཉམ་གྱི་ལྟ་བ་ཡོད་ལོས་དགོས་ཏེ་སྨོས་མེད་ཡིན་ཡང་དང་པོ་སྔོན་དུ་མི་དགེ་བའི་རྣམ་རྟོག་སྐྱེས་མ་ཐག་ཏུ་དེའི་དབང་དུ་མི་ཤོར་བར་དེ་ལ་དགྲ་བཞིན་དུ་འབྲོས་ཤེས་པའི་བློ་ཞིག་དགོས་པ་དང་། ཁྱད་པར་དུ་བསླུ་བྲིད་སྒྱུ་མའི་ནོར་རྫས་ད་ཡོད་ད་མེད་གནོད་སྐྱེལ་བྱེད་འདིའི་གསོག་འཇོག་དང་བདག་འཛིན་དེ་ཇེ་ཆུང་དུ་བཏང་ནས་རང་ནུས་དང་བསྟུན་ནས་མཆོད་སྦྱིན་རེ་བྱེད་དགོས་ཤིང་། དེ་སྦྱིན་པ་ཡིན་ནོ། །ཁྲེལ་དང་ངོ་ཚ་ཡི་སྒོ་ནས་སྡོམ་དམ་ཚིག་སྲུང་དགོས་ཤིང་། དེ་ཚུལ་ཁྲིམས་ཡིན་ནོ། །གནོད་པ་ལ་ལན་མི་བྱེད་པ་དང་དེའི་ཐོག་ཏུ་ཁོང་ཁྲོ་ཞེ་སྡང་མི་སྐྱེ་ནས་བྱང་ཆུབ་སེམས་དཔའི་མཛད་སྤྱོད་རླབས་པོ་ཆེ་རྣམས་སེམས་ལ་ལོངས་དང་བཟོད་པ་ཡིན་ནོ། །རྣམ་གཡེང་འདུ་འཛི་ལ་དགའ་སྣང་ཤར་བ་དེ་ཉིད་ཆོས་ལ་ལེ་ལོ་བྱེད་པའི་དོན་ཡིན་པས་ད་ཤི་ན་བློ་གཏད་ཆོག་སའི་ཆོས་ཅི་ཞིག་ཡོད་བསམས་ནས་འདང་རང་ལ་བསྐོར་ཏེ་ཆོག་ཤེས་མེད་པའི་དགེ་སྦྱོར་ལ་འབད་པར་གྱིས་དང་དེ་བརྩོན་འགྲུས་ཡིན་ནོ། །བསྐྱེད་རྫོགས་ཀྱི་ཆོས་ཟབ་མོ་དང་རང་གི་སེམས་རྒྱུད་གཉིས་ཀ་བསྲེས་ནས་དུས་ནམ་ཡང་ཐ་མལ་དུ་མ་ལུས་པ་ཞིག་གྱིས་དང་དེ་བསམ་གཏན་ཡིན་ནོ། །གཤིས་རིག་པའི་རང་ངོ་སྤྲད་པའི་ཐོག་ཏུ་རྣམ་རྟོག་དང་རྐྱེན་ངན་གང་ཡོང་ན་རིག་པ་རྗེན་པ་དེའི་ངང་མ་ཤོར་བར་གློད་བྲལ་གྱི་ཤེས་པ་འཁུ་འཕྲིག་མེད་པ་ཞིག་གི་ཐོག་ཏུ་འདུག་ཐུབ་ན་དེ་ཤེས་རབ་ཡིན་ནོ། །དེ་ལྟ་བུའི་ཉམས་ལེན་གྱི་གནད་དང་མི་འབྲལ་བར་ཐ་མལ་གྱི་སྐྱེ་བོ་དང་མི་འདྲ་བའི་ཁྱད་ཆོས་རང་རྒྱུད་ནས་འདོན་རྒྱུ་དེ་གལ་ཆེན་ནང་གི་དོན་ཆེན་ཡིན་ཞུ་བའི་ཐུགས་གསོས་དང་ལྷན་ཏུ་གང་ཞིག་གསན་པར་བྱ་བ་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོ་འཆད་ཁྲིད་བྱེད་པའི་སྐབས་ནས་སྔོན་འགྲོ་སྦྱོར་བའི་ཆོས་ལེའུ་གསུམ། དངོས་གཞི་ཆོ་གའི་བབས་ལེའུ་བདུན་སོང་སྟེ། དེ་དང་སྙིང་པོ་འཛབ་དགོངས་ཀྱི་སྐོར་ནས་ཀྱང་བསྙེན་སྒྲུབ་ཡན་ལག་བཞིའི་སྐོར་བཤད་ནས། རྗེས་ཀྱི་ལེའུ་བདུན་གྱི་དང་པོ་ཚོགས་ལས་ཀྱི་སྐབས་ནས་ཚོགས་བྱིན་རླབས། ཚོགས་ཞིང་སྤྱན་འདྲེན། དང་པོ་ཚོགས་ཕུད་འབུལ་བ་རྣམས་སོང་སྟེ། བར་བ་བཤགས་པའི་སྐབས་ལ་ཐུག་ཡོད་ཅིང་། བར་བ་བཤགས་པའི་སྐབས་ཀྱི་གང་བཤགས་པར་བྱ་བ་དམ་ཚིག་ཉམས་ཆགས་ལས་འཕྲོས་ཏེ་དམ་ཚིག་གི་རྣམ་གཞག་ཅུང་ཟད་ཅིག་ཞུ་བཞིན་པའི་སྐབས་ཀྱི་སྒྱུ་འཕྲུལ་གྱི་ལུགས་ཀྱི་རྩ་བའི་དམ་ཚིག་སྟེ། རྩ་བ་ཞེས་པ་ལྗོན་ཤིང་གི་རྩ་བ་ལྟ་བུ་དེ་ཉིད་བསྲུངས་ཤིང་བསྐྱེད་ན་ཡོན་ཏན་གྱི་འབྱུང་གནས་ཡིན་པ་དང་། མ་བསྲུངས་ན་མི་འབྱུང་བ་དེ་ལྟ་བུའི་རྩ་བའི་དམ་ཚིག་ལྔ་སྟེ། བླ་མེད་མི་སྤོང་བླ་མ་བཀུར་ཞེས་གསུངས་པའི་བླ་མེད་ཇི་ལྟར་མི་སྤོང་བར་སྒྲུབ་དགོས་པའི་ཚུལ་ནི། དཀོན་མཆོག་གསུམ་པོ་ནམ་ཡང་མི་སྤོང་བ་དེ་ཉིད་ཡིན་ཞིང་། དེ་ཡང་གཞི་ལམ་འབྲས་གསུམ་གྱི་ཐོག་ནས་གཞི་སེམས་ཅན་ཐམས་ཅད་ཡེ་ནས་དཀོན་མཆོག་གསུམ་དུ་གནས་པས་དེ་མི་སྤོང་། ལམ་བསྐྱེད་རྫོགས་གཉིས་མེད་ཀྱི་རང་བཞིན་བདེན་གཉིས་ཀྱིས་བསྡུས་པའི་བྱང་ཆུབ་སེམས་གཉིས་མི་སྤོང་། འབྲས་བུ་བླ་ན་མེད་པའི་བྱང་ཆུབ་བམ་སངས་རྒྱས་སྐུ་གསུམ་མི་སྤོང་བ་དང་། མདོ་རྒྱུད་ལུང་རྟོགས་ཀྱི་ཆོས། དེ་ལ་སློབ་པའི་དགེ་འདུན་དཀོན་མཆོག་ཐམས་ཅད་མི་སྤོང་བ་རྣམས་བཤད་ཟིན་ཏོ།། ༢ དངོས་དོན་བཤད་པ། ༼༢ རྩ་བའི་དམ་ཚིག་གཉིས་པ་བཤད་པ། དེ་རིང་བླ་མ་བཀུར་ཞེས་པའི་རྩ་བའི་དམ་ཚིག་གཉིས་པ་ནས་བཤད་པ་ཡིན་ཞིང་། བླ་མ་ཞེས་པ་དེ་ཡང་བླ་མ་ཟེར་ཚད་ཐམས་ཅད་མི་འདྲ་ལ། རྣམ་གྲངས་འདྲ་མི་འདྲ་མང་པོ་ཡོད་པ་དང་། དེ་ལ་དབྱེ་བ་བྱས་ན་ལྔའམ་དྲུག་གི་ཐོག་ནས་བཤད་དགོས་སོ། །ལྔ་བོ་གང་ཡིན་ན་འདྲེན་པའི་བླ་མ་དང་གཅིག ཤེས་རྒྱུད་འགྲོལ་བའི་བླ་མ་དང་གཉིས། མན་ངག་སྟོན་པའི་བླ་མ་དང་གསུམ། ཉམས་ཆག་སྐོང་བའི་སློབ་དཔོན་དང་བཞི། དམ་ཚིག་དབང་གི་བླ་མ་དང་ལྔ་བོ་དེ་ཡིན་ནོ། །དེའི་སྟེང་དུ་སྤྱིའི་བླ་མ་དང་དྲུག་ཏུ་བརྩི་ས་ཡང་ཡོད་དོ། །འདྲེན་པའི་བླ་མ་ནི་དང་པོར་ཆོས་སྒོ་ལ་འདྲེན་པའི་རབ་བྱུང་གི་མཁན་པོ་ལྟ་བུ་དེ་ཡིན་ཞིང་། དགེ་བསྙེན་ཕོ་མོ་ཞིག་ལ་མཚོན་ན་དགེ་བསྙེན་གྱི་སྡོམ་པ་སྦྱིན་མཁན་དེ་ཡིན་ལ། དགེ་ཚུལ་ཞིག་ཡིན་ན་ཀཱ་རི་ཀཱའི་ནང་ན། བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་འདྲི། །ཞེས་གསུངས་པ་ལྟ་བུ་དེ་ཡིན་ནོ། །ཤེས་རྒྱུད་འགྲོལ་བའི་བླ་མ་ནི་ཆོས་འཆད་མཁན་གྱི་སློབ་དཔོན་ལ་ཟེར་ཆོག་སྟེ། མདོ་སྡེ་ཐར་བ་ཆེན་པོ་ལས། ཆོས་སྨྲ་བའི་དགེ་སློང་ལ་གུས་པས་བླ་མར་བྱ་སྟེ། ཞེས་གསུངས་པ་དེ་ཡིན་ནོ། །མན་ངག་སྟོན་ཞིང་ལུང་འབོག་པའི་བླ་མ་ནི་མན་ངག་ཐམས་ཅད་ཀྱི་རྩ་བ་བྱང་ཆུབ་ཀྱི་སེམས་ནས་བཤད་རྒྱུ་དེ་ཉིད་ཡིན་ཞིང་། དེས་ན་བྱང་ཆུབ་སེམས་ཀྱི་སྡོམ་པ་སྦྱིན་མཁན་ལ་མན་ངག་འདོན་ཞིང་ལུང་འབོག་པའི་བླ་མ་དེ་ལ་ཟེར་ཆོག་སྟེ། མདོ་སྡོང་པོ་བཀོད་པ་ལས། དེ་ནི་བདག་གིས་ཐོག་མ་མེད་པ་ནས་སེམས་བསྐྱེད་པའི་དགེ་བའི་བཤེས་གཉེན་ཡིན་ཏེ། ཞེས་བཅོམ་ལྡན་འདས་ཀྱིས་གསུངས་ཡོད་དོ། །དེ་ཡིས་འདྲེན་པའི་བླ་མ། ཤེས་རྒྱུད་འགྲོལ་བའི་བླ་མ། མན་ངག་ལུང་གི་བླ་མ་གསུམ་སོང་ནས། བཞི་བ་ཉམས་ཆག་སྐོང་བའི་སློབ་དཔོན་དེ་ནི་སྡིག་པ་བཤགས་ས་དེ་ཉིད་ཡིན་ཏེ། བཤགས་པའི་ཡུལ་དུ་གང་གྱུར་པ། །དེ་ཡང་དེ་ཡི་བླ་མ་ཡིན། །ཞེས་གསུངས་སོ། །ལྔ་བ་དམ་ཚིག་དབང་གི་བླ་མ་ཞེས་པ་དེ་ནི། དབང་བསྐུར་མཆོག་ཐོབ་རྡོ་རྗེ་ཡི། །བླ་མ་ལ་ནི་དེ་བཞིན་གཤེགས། །ཞེས་གསུངས་པ་དེ་ཉིད་ཡིན་ནོ། །དེའི་ཐོག་ཏུ་དྲུག་བྱེད་དུས་སྤྱིའི་བླ་མ་ཟེར་བ་དེ་ཡིན་ཞིང་། དགེ་བའི་བཤེས་གཉེན་ཐམས་ཅད་དམ་ཡང་ན་རང་ཉིད་ཀྱིས་ཆོས་འབྲེལ་ཙམ་གྱི་བཀའ་དྲིན་ཐོབ་མྱོང་ཚད་པོ་སྤྱིའི་བླ་མ་ཟེར་ཆོག་གོ །ཡང་བླ་མ་འདི་ལ་སུམ་ལྡན་གཉིས་ལྡན་གཅིག་ལྡན་གྱི་དབྱེ་བ་ཡང་གསུང་ཚུལ་ཡོད་ལ། དེ་ཇི་ལྟར་ཡིན་ན་དབང་བསྐུར་རྒྱུད་བཤད་གདམས་པ་བསྟན་རྒྱུ་གསུམ་པོ་དེ་བླ་མ་གཅིག་གིས་མཛད་ཡོད་ན་དེ་ལ་སུམ་ལྡན་ཞེས་དེའི་ཡན་གྱི་བླ་མ་མེད་རྒྱུ་ཅན་དེ་ཉིད་ཡིན་ཞིང་། དབང་བསྐུར་ལ་སོགས་པ་གང་རུང་གཉིས་གནང་མཁན་དེ་ཉིད་གཉིས་ལྡན་འབྲིང་པོ་ལྟ་བུ་ཡིན་ལ། གང་རུང་རེ་རེ་ཐོབ་ས་དེ་ཉིད་གཅིག་ལྡན་གོང་མ་གཉིས་ཀ་ལས་བཀའ་དྲིན་ཆུང་ཤོས་ཡིན་ནོ། །ཡང་གཉིས་ལྡན་དང་གཅིག་ལྡན་ལྟ་བུ་ལ་མཚོན་ན་དབང་དང་བཤད་པ་མན་ངག་གསུམ་པོའི་ནང་གི་མན་ངག་ཐམས་ཅད་ཀྱི་ནང་གི་གནད་ཆེ་བ་དང་། དེའི་འཕྲོས་བཤད་པ། དེའི་འཕྲོས་དབང་འཇོག་པ་ཡིན་ནོ། །དབང་ཡིན་ན་དབང་ཟེར་ཚད་པོ་གཅིག་མ་ཡིན་ཞིང་། ཚང་མ་དབང་མཆོག་མ་ཡིན་པ་དང་། དབང་གོང་མ་འཐོབ་ཡུལ་གྱི་བླ་མ་ཡང་དེ་ལྟར་དུ་གཉན་པ་ཡིན་ལ། མཆོག་དབང་གོང་མ་རྣམ་གསུམ་འཐོབ་སའི་བླ་མ་དེ་བཀའ་གཉན་པ་ཡིན་ནོ། །རྩ་བའི་དམ་ཚིག་གཉིས་པ་བླ་མ་བཀུར་ཞེས་པའི་དང་པོ་བླ་མ་གང་ཡིན་དེ་འུ་ཚོས་དེ་ལྟར་བཤད་ནས་བཀུར་ལུགས་ཇི་ལྟར་བྱས་ནས་བཀུར་དགོས་ཤེ་ན། མདོ་སྡོང་པོ་བཀོད་པའི་ནང་ནས་གསུངས་པ་འུ་ཚོས་དུས་རྒྱུན་དུ་བཤད་པའི་བདག་ཉིད་ལ་ནད་པ། གདམས་པ་ལ་སྨན། དགེ་བའི་བཤེས་གཉེན་ལ་སྨན་པ་མཁས་པ། གདམས་ངག་ཉམས་ལེན་བྱེད་པ་དེ་ཉེ་བར་འཚོ་བའི་འདུ་ཤེས་ཏེ་དེ་ལྟ་བུའི་འདུ་ཤེས་བཞི་དེ་བསྟེན་དགོས་པའི་ཐོག་ཏུ་གསང་སྔགས་ཀྱི་རྡོ་རྗེ་སློབ་དཔོན་ལ་དཀོན་མཆོག་བཞི་བ་ཡིན་པར་ཤེས་པའི་སྟེང་ནས་བཀུར་དགོས་ཏེ། སངས་རྒྱས་ཆོས་དང་དགེ་འདུན་དང་། །སློབ་དཔོན་ཡང་ནི་བཞི་པ་ཡིན། །ཞེས་གསུངས་ལ། སངས་རྒྱས་ཀུན་དང་བླ་མ་མཉམ་ཞེས་སྒྱུ་འཕྲུལ་དྲ་བ་ལས་ཀྱང་དེ་ལྟར་གསུངས་ཤིང་། སངས་རྒྱས་ཀུན་དང་བླ་མ་འདྲ་འདྲ་ཡིན་ཞེས་སངས་རྒྱས་ཀུན་དང་བླ་མ་མཉམ་གསུང་རྒྱུ་དང་། སངས་རྒྱས་ལས་ཀྱང་བསོད་ནམས་གསག་པའི་ཡུལ་དུ་ད་རུང་བླ་མ་གཉན་རབས། ཕྱོགས་བཅུའི་སངས་རྒྱས་ཐམས་ཅད་པས་བླ་མའི་བ་སྤུའི་ཁུང་བུ་གཅིག་མཆོག་ཅེས་གསང་བ་འདུས་པ་ལས་དེ་ལྟར་གསུངས་སོ། །བཀའ་དྲིན་གྱི་ངོས་ནས་སངས་རྒྱས་ལས་ཀྱང་ལྷག་པ་ཡིན་པ་དང་། དུས་ཐ་མའི་སེམས་ཅན་གདུལ་ཐབས་སུ་སངས་རྒྱས་བླ་མའི་ཚུལ་དུ་བྱོན་པ་ཡིན་ཏེ། བླ་མའི་གཞན་ཕན་གྱི་མཛད་པ་སངས་རྒྱས་ཀྱི་ཕྲིན་ལས་ཡིན་ན་དེའི་བདག་རྐྱེན་ཐུགས་སངས་རྒྱས་མིན་པའི་ཐབས་མེད་ཅིང་། དེ་ལྟར་ན་སྐུ་ཡང་སངས་རྒྱས་ཀྱི་རྣམ་སྤྲུལ་ཡིན་པར་རང་ཤུགས་ཀྱིས་གྲུབ་པ་ལ་སོགས་པ་དུས་རྒྱུན་དུ་འུ་ཚོས་བཤད་བཞིན་པ་ལྟར་དུ་ཡིན་ནོ། །མདོར་ན་གསང་སྔགས་ཀྱི་ལམ་ནས་དངོས་གྲུབ་ཐོབ་པ་དེ་ཉིད་རྡོ་རྗེ་སློབ་དཔོན་གྱི་དབང་དང་མན་ངག་ལ་མ་བརྟེན་ཐབས་མེད་ཅིང་། དེ་མེད་ན་མི་འབྱུང་བའི་དངོས་རྒྱུ་ཞིག་ཡིན་ན་དབང་དང་མན་ངག་སྟོན་པའི་བླ་མ་དེ་ཡིད་ཀྱིས་སྤངས་ཤིང་ལུས་ངག་གི་སྒོ་ནས་ཐུགས་དང་འགལ་བར་བྱེད་པ་དེ་ནི་རྩ་ལྟུང་བཅུ་བཞི་བརྩི་བའི་ལུགས་ལྟར་དུ་བྱས་ན་རྩ་བའི་ལྟུང་བ་དང་པོ་སྟེ་དེ་དང་འགལ་ན་ཤིན་ཏུ་ལྕི་བའི་ཚུལ་བཤད་པ་དེ་ཉིད་ཡིན་པ་དང་། རྩ་བ་བླ་མའི་སྐུ་གསུང་ཐུགས་གསུམ་ལས་དགུ་དགུར་ཕྱེ་བ་ཉི་ཤུ་རྩ་བདུན་འདི་ནས་འཕྲོས་པ་ཡིན་པ་དང་། དུས་ཚོད་འདས་ན་གསོར་མི་རུང་བ་དང་། རྣམ་སྨིན་ངན་སོང་ངན་འགྲོའི་གནས་དང་། ཁྱད་པར་དུ་དམྱལ་བ་མནར་མེད་ལས་ཡར་ཐར་མེད་རྒྱུ་ཐམས་ཅད་འདི་ནས་བྱུང་བ་ཡིན་ལ། རིགས་ཆད་འདོད་པ་མ་ཡིན་ཡང་ཐར་དཀའ་བ་ལ་དགོངས་ནས་དེ་ལྟར་གསུངས་པ་ཡིན་ནོ།། ༼༣ རྩ་བའི་དམ་ཚིག་གསུམ་པ་བཤད་པ། རྩ་བའི་ལྟུང་བ་གསུམ་པ་སྔགས་དང་ཕྱག་རྒྱ་རྒྱུན་མི་གཅད་པ་དེ་ཡིན་ཞིང་། སྔགས་ནི་གསུང་དང་སྐུ་ཡི་མཚན་མར་གྱུར་པ་ལྷ་སོ་སོའི་དངོས་གྲུབ་སྒྲུབ་པའི་ཐབས་ཀྱི་རིམ་པ་ཁ་རྩང་བཤད་པ་ལྟར་ཡིན་ནོ། །དེ་ཁོ་ན་ཉིད་ལྔ་དང་ལྡན་པའི་སྔགས་ཀྱི་བཟླས་པའི་རྒྱུན་གཅད་མི་ཉན་ལ། དེ་ཉིད་ལྔ་གང་ཡིན་ཞེ་ན། བདག་དང་ལྷ་དང་གསང་སྔགས་དང་། །བཟླས་བརྗོད་འཕྲོ་འདུ་ཡན་ལག་ལྔ། །ཞེས་གསུངས་སོ། །སྔགས་དང་ཕྱག་རྒྱ་རྒྱུན་མི་གཅད་ཅེས་པའི་ཕྱག་རྒྱ་ཞེས་པ་དེ་ནི་དངོས་གྲུབ་སྒྲུབ་པའི་གྲོགས་ཀྱི་ཡན་ལག་གཙོ་བོ་ཞིག་ཡིན་ཞིང་། བསམ་པ་ཆོས་ཀྱི་ཕྱག་རྒྱ། བརྗོད་པ་དམ་ཚིག་གི་ཕྱག་རྒྱ། སྦྱོར་བ་ལས་ཀྱི་ཕྱག་རྒྱ། ལྷའི་སྐུར་གསལ་བ་དེ་ཉིད་ཕྱག་རྒྱ་ཆེན་པོ་ཡིས་ཕྱག་རྒྱ་བཞི་ཡིན་ལ། སྔགས་དང་ཕྱག་རྒྱ་གཉིས་པོ་དེ་དེ་ལྟ་བུ་ཞིག་ཡིན་ནོ། །དེའི་ནང་གི་སྔགས་འདི་རྒྱུ་ཐབས་ཤེས་ཀྱི་ཡི་གེ་ལས་བཟླ་བྱའི་སྔགས་ཀྱི་ངོ་བོར་གྱུར་པ་གྲུབ་པ་བཞི་དང་ལྡན་པའི་ཚུལ་ཁ་རྩང་གོང་ནས་ཞུས་པ་ལྟར་དུ་སྔགས་ཞེས་པ་འདི་ལྷ་དང་དཀྱིལ་འཁོར་ཐམས་ཅད་ཀྱི་རྒྱུ་དང་ངོ་བོ་གཉིས་ཀ་ཡིན་པས་མ་ཚད་པར་སྒྲུབ་པ་མཆོད་པ་ཕྲིན་ལས་ཐམས་ཅད་ཀྱི་ཐབས་མཆོག་ཏུ་གྱུར་པ་སྙིང་པོར་གྱུར་པའི་ཆོས་གཅིག་པུ་ཡིན་པ་དང་། གསུང་རྣམ་པ་ཐམས་ཅད་པ་ལྷུན་གྱིས་གྲུབ་པའི་རྒྱུ་ཡང་སྔགས་དེ་ཉིད་ཡིན་ནོ། །ཕྱག་རྒྱ་ཡང་དེ་ལྟར་དུ་ལྷ་མཉེས་པ་དང་ལས་སྒྲུབ་པ་སྔགས་ཀྱི་སྟོབས་བསྐྱེད་པ་ལ་སོགས་པའི་བླ་ན་མེད་པའི་ཐབས་གཅིག་པུ་ཡིན་ལ། ཕྱག་རྒྱ་འདི་ལ་སྤྱི་དང་། བྱེ་བྲག ཁྱད་པར་གསུམ་གྱི་ཐོག་ནས་བཤད་ན་སྤྱིའི་ཐད་ཀྱི་གཞི་ལམ་འབྲས་གསུམ་གྱི་ཐོག་ནས་བཤད་རྒྱུ་ཡོད་ཅིང་། དེ་ཇི་ལྟར་ཡིན་ཞེ་ན། གཞི་གནས་ལུགས་ཀྱི་ཕྱག་རྒྱ་དེ་སྣང་གྲག་རིག་གསུམ་ལྷ་སྔགས་ཆོས་ཉིད་ཀྱི་ངང་དུ་དག་པ། ལམ་གནས་སྐབས་རྩལ་སྦྱངས་ཏེ་སྒོ་གསུམ་གསང་བ་གསུམ་གྱི་རོལ་བར་སྒྲུབ་པ། འབྲས་བུ་མཐར་ཐུག་ཡེ་ཤེས་ཀྱི་ཕྱག་རྒྱ་དེ་གསང་གསུམ་མི་ཟད་རྒྱན་གྱི་འཁོར་ལོས་ནམ་མཁའ་ཇི་སྲིད་སེམས་ཅན་གྱི་དོན་བྱེད་པ་སྟེ་གཞི་ལམ་འབྲས་གསུམ་ལ་སྦྱར་བ་དེ་ལྟ་བུ་ཞིག་ཡིན་ནོ། །བྱེ་བྲག་གི་ཐོག་ནས་བཤད་ན་བསྐྱེད་རིམ་དང་སྦྱར་བ། རྫོགས་རིམ་དང་སྦྱར་བ་རྣམ་པ་གཉིས་ཡོད་ལ། བསྐྱེད་རིམ་དང་སྦྱར་ན་སྐུ་ཕྱག་རྒྱ་ཆེན་པོ་དང་གཅིག གསུང་ཆོས་ཀྱི་ཕྱག་རྒྱ་དང་གཉིས། ཐུགས་དམ་ཚིག་གི་ཕྱག་རྒྱ་དང་གསུམ། ཕྲིན་ལས་ལས་ཀྱི་ཕྱག་རྒྱ་དང་བཞི་བོ་དེ་རྣམས་ཡིན་ནོ། །རྫོགས་རིམ་དང་སྦྱར་ན་རྟེན་དང་ལམ་འབྲས་བུའི་ཆ་ནས་སྦྱར་ཚུལ་མང་ཡང་འབྲས་བུ་ཡེ་ཤེས་བཞི་ལ་སྦྱར་སྐབས་ལྟ་བུ་ལ་མཚོན་ན་སྣང་སྟོང་སྐུ་རྡོ་རྗེ་དེ་ལས་ཀྱི་ཕྱག་རྒྱ། གསལ་སྟོང་གསུང་རྡོ་རྗེ་དེ་ཆོས་ཀྱི་ཕྱག་རྒྱ། བདེ་སྟོང་ཐུགས་རྡོ་རྗེ་དེ་དམ་ཚིག་གི་ཕྱག་རྒྱ། དེ་ཐམས་ཅད་དབྱེར་མེད་མཉམ་པ་ཉིད་དུ་གྱུར་པའི་རིག་སྟོང་ཡེ་ཤེས་ཀྱི་རྡོ་རྗེ་དེ་ཕྱག་རྒྱ་ཆེན་པོ་རུ་བརྩི་རྒྱུ་དེ་ལྟར་ཕྱག་རྒྱ་བཞི་ཡི་རྣམ་གྲངས་རྫོགས་རིམ་ལ་སྦྱར་བའོ། །དེ་ལྟ་བུའི་ཡེ་ཤེས་པའི་ལྷའི་སྐུ་གསུང་ཐུགས་མཛད་པ་དང་བཅས་པ་ཅི་རིགས་པ་མཚོན་བྱེད་ཀྱི་སྒོར་གྱུར་པའི་ལག་པའི་སྟངས་སྟབས་ཀྱིས་བཅའ་རྒྱུའི་ཕྱག་རྒྱ་འདི་ཡང་དེ་ཚོ་ལས་མི་འདའ་བ་ཞིག་ཡིན་པས་ན་སྤྱི་དང་བྱེ་བྲག་ལ་བཏགས་ནས་ཐམས་ཅད་ལ་ཕྱག་རྒྱའི་སྒྲ་འཇུག་པ་ཡིན་ནོ། །འདི་ལ་ཕྱག་རྒྱ་བཞི་ཁ་ཚང་ཞིང་། བཅའ་བའི་ཕྱག་རྒྱ་འདིའི་ཐད་ནས་ཡིན་ན་ཁོ་རང་གི་ངོ་བོ་དམ་ཚིག་གི་ཕྱག་རྒྱ། དེ་ལ་པད་སྐོར་བྱེད་པ་སེ་གོལ་གཏོགས་པ་སོགས་ལས་ཀྱི་ཕྱག་རྒྱ། དེ་དང་སྦྲེལ་ནས་སྔགས་བརྗོད་པ་དེ་ཉིད་ཆོས་ཀྱི་ཕྱག་རྒྱ་ཡིན་ལ། ཅི་བསམ་འདི་དྲན་མེད་ནས་སྔགས་ཕྱག་རྒྱ་ཅི་ལ་བྱེད་བཞིན་ཡོད་དེ། རང་ཉིད་ལྷའི་གསལ་སྣང་ལ་སོགས་པའི་དམིགས་པ་དང་ལྡན་པ་དེ་ཉིད་ཕྱག་རྒྱ་ཆེན་པོའོ། །དེས་ན་གསང་སྔགས་ལ་ཞུགས་མཁན་ཞིག་ཡིན་དུས་སྔགས་དང་ཕྱག་རྒྱ་རྒྱུན་བཅད་ན་རྩ་བའི་དམ་ཚིག་གསུམ་པ་དང་འགལ་སོང་བ་ཡིན་ཞིང་། དེའི་ཕྱིར་ན་རབ་ཆུ་བོའི་རྒྱུན། འབྲིང་ཉིན་མཚན་གྱི་ཐུན། ཐ་མ་ཡིན་ན་ཡང་ཉ་སྟོང་བརྒྱད། དེ་མིན་ཡང་ཡར་མར་གྱི་ཚེས་བཅུ་ལ་སོགས་པའི་ཟླ་བ་དང་ལོ་ལ་མི་ཆགས་པ་ཞིག་བྱས་ནས་སྔགས་དང་ཕྱག་རྒྱ་དང་དུ་ལེན་དགོས་སོ།། ༼༤ རྩ་བའི་དམ་ཚིག་བཞི་བ་བཤད་པ། རྩ་བའི་དམ་ཚིག་བཞི་བ་དེ་ཡང་དག་པའི་ལམ་ལ་ཞུགས་མཁན་ཚོ་ལ་བྱམས་པ་བྱེད་རྒྱུ་དེ་ཡིན་ལ། ཡང་དག་ལམ་ལ་ཞུགས་མཁན་དེ་སུ་ཡིན་ཞེ་ན། མཆེད་དང་ལྕམ་དྲལ་རྣམས་ཡིན་ཞིང་། འདིའི་དབྱེ་བའི་ཐོག་ནས་བཤད་ན་སྤྱི་རིང་ཉེ་དང་ནང་འདྲེས་བཞིའམ་དེའི་ཁར་མཛེས་པའི་མཆེད་དང་ཉེ་བའི་མཆེད་བསྣན་ནས་དྲུག་ཏུ་བརྩི་ཚུལ་ཡང་ཡོད་དོ། །འདིའི་ནང་གི་སྤྱིའི་མཆེད་དེ་སུ་ཡིན་ཞེ་ན་སེམས་ཅན་ཐམས་ཅད་ཡིན་ཞིང་། སེམས་ཅན་ཐམས་ཅད་སྤྱིའི་མཆེད་ཡིན་པའི་རྒྱུ་མཚན་ནི་ཆོས་ཉིད་བདེ་གཤེགས་སྙིང་པོ་གཅིག་གིས་བསྡུས་པས་ཡིན་ལ། ཡེ་གདོད་མ་ནས་སྤུན་མིན་པའི་སེམས་ཅན་གཅིག་ཀྱང་མེད་པས་ན་སྤྱིའི་མཆེད་དུ་གྱུར་པ་ཡིན་ནོ། །སངས་རྒྱས་ཀྱི་བསྟན་པ་ལ་ཞུགས་ཚད་པོ་རིང་བའི་མཆེད་ཟེར་ཏེ། བསྟན་པ་གཅིག་གིས་བསྡུས་པའི་ཆོས་ཀྱི་མཆེད་ཡིན་པས་ན་རིང་བའི་མཆེད་དོ། །ཉེ་བའི་མཆེད་ནི་དེའི་ནང་གི་ལྟ་སྤྱོད་མཐུན་པའམ་གཅིག་པ་རྣམས་ཡིན་ལ། སྤྱིར་ན་ལྟ་བ་སྟོང་ཉིད། སྤྱོད་པ་གཞན་ཕན་བསྒྲུབས་ནས་གཞན་གནོད་སྤོང་བའི་ཐད་ནས་སྤྱིར་བཏང་གིས་ཚང་མ་གཅིག་ཡིན་པ་སྨྲོས་མ་དགོས་ཀྱང་དམིགས་བསལ་གྱིས་མདོ་སྔགས་དང་ཐེག་རིམ་ལ་སོགས་པའི་ཐད་ནས་གཅིག་པས་ན་ཉེ་བའི་མཆེད་ཅེས་གསུངས་པའོ། །ནང་འདྲེས་པའི་མཆེད་ནི་དཀྱིལ་འཁོར་གཅིག་ལ་བསྟེན་ནས་དབང་ཞུས་པ་དང་གཞན་དང་མ་འདྲ་བ་ཞིག་གིས་སྙིང་ཉེ་ས་སྙིང་འདྲིས་ཤ་ཁྲག་གི་སྤུན་བས་ཀྱང་གནད་ཆེན་དུ་གྱུར་སོང་བ་དེ་ཉིད་ཡིན་ལ། དེའི་ཁར་བླ་མ་གཅིག་པ་དེ་མཛེས་པའི་མཆེད་དུ་བརྩི་ཞིང་། ཆོས་ལྷན་གཅིག་ཏུ་ཞུས་པ་དེ་ཉེ་བའི་མཆེད་དུ་བརྩི་བ་དང་། ད་ལྟ་གོང་ནས་ཉེ་བའི་མཆེད་དང་མཐུན་པའི་མཆེད་ཅེས་དྲུག་བརྩི་སྐབས་འདི་ལ་ཉེ་བའི་མཆེད་ཅེས་གསུངས་པ་ཞིག་ཡིན་ནོ། །རྡོ་རྗེའི་སྤུན་སྲིང་སྐལ་ལྡན་རྡོ་རྗེའི་མཆེད་ལྕམ་ཞེས་པ་དེ་འདི་ནས་བྱང་ཆུབ་མ་ཐོབ་པའི་བར་དུ་མར་མེའི་འོད་དང་སྡོང་བུ་བཞིན་དུ་མི་འབྲལ་འགྲོགས་པའི་གྲོགས་མཆོག་ཡིན་ཞིང་། རང་གི་ལུས་དང་སྲོག་ལ་ཡང་མི་ལྟ་བར་རྡོ་རྗེའི་སྤུན་གྱི་དགོས་པ་སྒྲུབ་དགོས་པ་ཞིག་ཡིན་ལ། གལ་ཏེ་བྱམས་པའི་སེམས་བཏང་བར་བྱས་ན་རང་ཉིད་རྩ་བའི་དམ་ཚིག་བཞི་བ་དང་འགལ་སོང་བ་ཡིན་ནོ། །རྩ་བའི་དམ་ཚིག་ཅེས་པ་ཇི་ལྟ་བུ་ཞིག་ཡིན་ཞེ་ན། ཤིང་ཞིག་ཡིན་ན་སྡོང་པོ་ལ་སྐྱོན་ཞུགས་ཤོར་ན་ཡལ་ག་དང་ལོ་མ་མེ་ཏོག་འབྲས་བུ་ལྟ་ཡོང་ས་ཞིག་མེད་ཅིང་། དེ་དང་འདྲ་བར་རྩ་བའི་དམ་ཚིག་ལ་སྐྱོན་ཞུགས་ཚར་དུས་གསང་སྔགས་བསྒྲུབས་པའི་ཡོན་ཏན་གྱི་དངོས་གྲུབ་འབྲས་བུ་ལྟ་བུ་ཨེ་ཡོད་བསམ་རྒྱུ་མེད་པར་འབྲས་བུ་འཐོབ་རྒྱུ་མེད་ལ། དེ་ཡིས་ཡང་དག་ལམ་དུ་ཞུགས་ལ་བྱམས་ཞེས་པ་དེ་སོང་བ་ཡིན་ནོ།། ༼༥ རྩ་བའི་དམ་ཚིག་ལྔ་བ་བཤད་པ། ལྔ་བ་ནི་གསང་བའི་དོན་ཕྱིར་སྨྲ་མི་བྱ་ཞེས་གསུངས་ཏེ། གསང་བ་འདི་ལ་སྤྱིར་གསང་བཞི། བར་གསང་བཞི་ཡིས་བརྒྱད། གསང་བར་འོས་པ་དང་གསང་བ་གཉེར་གཏད་པ་ཞེས་པ་གཉིས་ཀྱིས་བཅུ་ཐམ་པ་ཡོད་དོ། །སྤྱིར་གསང་བཞི་ནི་སྔགས་ཀྱི་ལྟ་བ་ཟབ་མོ། སྤྱོད་པ་བརླང་པོ། ལྷའི་མིང་གཟུངས། གྲུབ་པའི་རྟགས་དང་མཚན་མ་ཐམས་ཅད་གསང་དགོས་ཤིང་། བར་གསང་བཞི་ནི་སྒྲུབ་པའི་གནས། དུས། གྲོགས། རྫས་དང་བཞི་བོ་དེ་སྒྲུབ་པ་མ་ཚར་གྱི་བར་དུ་གསང་དགོས་པ་ཉིད་ཡིན་པ་དང་། དུས་རྒྱུན་གྱི་ཡིད་དམ་བསྒྲུབ་རྒྱུ་དེ་ཚོ་ཁྲོམ་བསྒྲག་བྱེད་དགོས་པ་མ་ཡིན་ལ། གསང་བར་འོས་པ་ནི་གསང་སྔགས་ཀྱི་དཀྱིལ་འཁོར་ལ་ཞུགས་མ་མྱོང་བ་དང་བློ་དམན་ཐེག་དམན་གྱི་རིགས་ཅན་གྱི་དད་ལོག་བཟློག་པའི་ཕྱིར་དུ་སྔགས་ཀྱི་དམ་རྫས་དང་ཡོ་བྱད་སྦས་ནས་སྤྱད་རྒྱུ་དེ་ཉིད་ཡིན་ནོ། །གསང་བ་གཉེར་གཏད་པ་ཞེས་པ་ནི་བླ་མ་དང་མཆེད་གྲོགས་ཀྱིས་དེ་མ་ཟེར་གསུངས་པ་དེ་ཉིད་མ་ཟེར་གསུངས་བྱུང་ཞེས་བཤད་མི་ཉན་ལ། བརྐུས་ནི་མ་བྱས་ཅིའི་ཕྱིར་གསང་བསམ་རྒྱུ་མེད་དེ། གསང་སྔགས་སྣོད་མིན་ལ་བཤད་ན་སེང་གེའི་འོ་མ་བླུག་ས་དེ་གསེར་སྣོད་མིན་ན་གས་འགྲོ་བ་ཡིན་ཞིང་། གསང་སྔགས་སྣོད་མིན་གྱི་བློ་ལ་མི་ཤོང་བར་ལོག་ལྟས་དམྱལ་བར་འཕེན་པ་ཡིན་ལ། གསང་བ་མ་གསང་བའི་སྐྱོན་གྱིས་རང་གི་དམ་ཚིག་ཉམས། དངོས་གྲུབ་ལ་བར་ཆད་ཡོང་བ་ཡིན་ནོ། །དེ་ལྟར་བྱས་ན་ཆོས་དད་བྱས་ཏེ་གསང་སྔགས་ཀྱི་ཆོས་སྒོར་ཞུགས་མཁན་རྣམས་ལ་མི་འདོད་འཕྲལ་རྐྱེན་ཡོང་བ་འདི་ཚོ་མང་ཆེ་བ་དམ་ཚིག་ཉམས་ཆག་གི་སྐྱོན་ཡིན་ཞིང་། མི་ན་བྱུང་། ཟོག་ཤི་སོང་། ཁ་ཆག སྣ་རལ། གོམ་གསུམ་གྱེན་དུ་སྤོས་ན་རྡོག་དྲུག་ཐུར་དུ་གཏོད་བཞིན་འདུག་རྒྱུ་འདི་མོ་བཏབ་ནས་བརྒྱ་བཞི། ཀླུ་མདོས། མོ་འདྲེ་གཟའ་མདོས། བསང་རླུང་རྟ་བཅའ་བཞིན་སྒྲུབ་བཞིན་ཡོད་ཀྱང་གཙོ་བོ་དམ་ཚིག་ཉམས་ཆག་གི་བཤགས་སྦྱངས་ཚོགས་བསགས་སྒྲིབ་སྦྱོང་གནད་སྨིན་རེ་བྱས་ན་ནད་བརྒྱ་སྨན་གཅིག་གི་སྐུ་རིམ་དེའི་དྲག་ཅིག་མེད་པ་དེ་ཡིན་སྙམ། དེ་ཡིས་རྩ་བའི་དམ་ཚིག་ལྔ་དེ་ཞིབ་ཆ་འདྲ་ཞིག་བྱས་ཏེ་བཤད་པ་ཡིན་ནོ།། ༼༢༽ ཡན་ལག་གི་དམ་ཚིག་བཤད་པ། ཡན་ལག་གི་དམ་ཚིག་བཅུ་ནི། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་གསང་སྙིང་ལས་གསུངས་ཏེ། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །ཞེས་པ་མི་སྤང་བའི་དམ་ཚིག་ལྔ་ཡིན་ལ། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་པ་དང་དུ་བླང་བའི་དམ་ཚིག་ལྔ་སྟེ་བཅུ་ཡིན་ནོ། །ཉོན་མོངས་དུག་ལྔ་མི་སྤང་སྟེ་སྤངས་ན་དམ་ཚིག་ཉམས་འགྲོ་ཟེར་ན་དེ་ནི་ཅི་ཞིག་སྟེ་ཟེར་རུང་རྒྱུ་ཞིག་ཡིན་ནམ་སྙམ་ན། ད་ལྟ་གོང་ནས་བཤད་མ་ཐག་པ་གསང་བར་འོས་པ་གསང་དགོས་ཞེས་པ་དེ་ལྟ་བུ་ལ་གསུངས་པ་ཡིན་ལ། ཉོན་མོངས་ལྔ་མི་སྤོང་བ་འདི་མི་སྤོང་བའི་ལུགས་ཡོད་དེ། ཉོན་མོངས་རང་མཚན་པ་མ་སྤོང་གསུངས་པ་མ་ཡིན་ལ། དེ་ནི་གསུང་དགོས་པ་ཞིག་མ་ཡིན་ནོ། །སྤྱིར་བཤད་ན་ཉོན་མོངས་དུག་ལྔ་འདི་ཉན་ཐོས་པས་སྤང་བྱར་འཛིན། བྱང་ཆུབ་སེམས་དཔས་སྦྱང་བྱར་འཛིན། གསང་སྔགས་ཀྱི་སྐབས་སུ་ལམ་དུ་བྱེད་པ་ཡིན་ཞིང་། དུག་ལ་བཙོག་ལྟ་བྱས་ཏེ་འཛེམས་པ་དང་། དུག་སྨན་དུ་སྒྱུར་བ་དང་ཕྱོགས་ཙམ་འདྲ་བ་ཡིན་ནོ། །དེའི་ཁྱད་པར་གྱིས་གོང་མ་གོང་མ་ལ་མ་རྨོངས་པ་དང་ཐབས་ཀྱི་ཁྱད་པར་གྱིས་འཕགས་པའི་འཕགས་ཆོས་ཡོད་དོ། །ཉོན་མོངས་དུག་ལྔ་མི་སྤང་བ་འདི་ལ་རང་བཞིན་ཤེས་པས་མི་སྤང་བ་ཞིག་དང་། ཐབས་ཀྱིས་ཟིན་ན་ལམ་གྱི་གྲོགས་སུ་འགྲོ་བས་མི་སྤང་བ་ཞིག སྐུ་དང་ཡེ་ཤེས་ཡིན་པས་ན་སྤང་མི་དགོས་པ་སྟེ་མི་སྤང་ལུགས་རྣམ་པ་གསུམ་གྱི་ཐོག་ནས་གསུངས་ཡོད་དོ། །དེའི་ནང་གི་ཉོན་མོངས་ཀྱི་རང་བཞིན་ཤེས་པས་མི་སྤང་བ་དེ་ཇི་ལྟ་བུ་ཞིག་ཡིན་ན་རང་བཞིན་གྱིས་རྣམ་པར་དག་པ་ཡིན་པས་ན་སྤང་བླང་མེད་པའི་ཕྱིར་ན་ཡང་མི་སྤང་བ་ཡིན་ཏེ། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །རང་གིས་མི་རྟག་རང་བཞིན་ཤེས་པས་གྲོལ། །ཞེས་གསུངས་ཤིང་། ཀུན་རྫོབ་ཏུ་ཉོན་མོངས་པ་སྨིག་རྒྱུའི་ཆུ་དང་འདྲ་ལ། རང་བཞིན་མེད་པས་རང་གི་ངོ་བོས་རང་སྤངས། དོན་དམ་ལ་གང་གི་དངོས་པོར་མ་གྲུབ་ཅིང་ཀུན་ཏུ་བཙལ་ན་ཡང་མི་རྙེད་པས་སྤང་དུ་མེད་པ་དེ་ལྟར་ཡིན་གསུངས་སོ། །ཉོན་མོངས་པ་ནི་དེ་བཞིན་གཤེགས་པའི་གདུང་ཞེས་དེ་ལྟ་བུ་ཡང་གསུང་ཚུལ་ཡོད་དེ། དྲི་མ་མེད་པར་གྲགས་པའི་མདོ་ལས། ཉོན་མོངས་པ་ནི་དེ་བཞིན་གཤེགས་པའི་གདུང་ངོ་། །ཞེས་གསུངས་ལ། དེ་ཡེ་ཤེས་ལྔ་དང་དབྱེར་མེད་ཡིན་པས་དེ་ལྟར་གསུངས་པ་ཡིན་ཞིང་། དེ་ལོས་ཡིན་ཏེ་དཔེ་གཏི་མུག་ལྟ་བུ་ལ་ཆག་བཞག་ན་གཏི་མུག་དེ་ཁོ་རང་གི་རང་བཞིན་ཇི་ལྟ་བུ་ཞིག་ཡིན་ཞེ་ན། ཡུལ་ལ་མི་ཕྱོགས་པར་མི་རྟོག་བཏང་སྙོམས་ལ་འདུག་པའི་ངང་ཚུལ་ཅན་ཞིག་ཡིན་ལ། དེ་ལྟ་བུ་ཡིན་པའི་རྩལ་སེམས་ལ་ཡོད་པའི་སྟབས་ཀྱིས་ལམ་གྱི་དུས་ན་མཚན་མར་མི་འཛིན་པ་དང་། འབྲས་བུའི་སྐབས་སུ་སྤྲོས་པའི་སྤྱོད་ཡུལ་ཐམས་ཅད་ལ་རྣམ་པར་མི་རྟོག་པ་ཆོས་དབྱིངས་ཡེ་ཤེས་ཀྱི་བདག་ཉིད་རྣམ་པར་སྣང་མཛད་དུ་གྲུབ་པ་ཡིན་ཞིང་། རང་བཞིན་ཤེས་ན་སྤང་མི་དགོས་སོ། །འདོད་ཆགས་ལ་མཚོན་ན་དཔེ་དེ་བཞིན་དུ་ཁོ་རང་སེམས་ཡུལ་ལ་འདུན་ནས་དང་དུ་ལེན་པའི་རྣམ་པ་ཅན་ཞིག་ཡིན་པས་དེའི་རྩལ་དེ་སེམས་ལ་ཡོད་པའི་སྟབས་ཀྱིས་ལམ་དུས་ཡིན་ན་ལམ་དང་འབྲས་བུའི་ཆོས་ལ་འདུན་ཞིང་མོས་པར་བྱེད་པ་དང་། འབྲས་བུའི་སྐབས་སུ་ཡང་ཆོས་ཀུན་ལ་རྒྱབ་ཀྱིས་མ་ཕྱོགས་ནས་དང་དུ་བླང་བའི་ཚུལ་གྱིས་གཟིགས་པ་དེ་ཉིད་སོ་སོར་རྟོག་པའི་ཡེ་ཤེས་ཀྱི་བདག་ཉིད་སྣང་བ་མཐའ་ཡས་སུ་གྲུབ་པ་ཡིན་ནོ། །ཞེ་སྡང་ལྟ་བུ་ཡིན་ན་ཞེ་སྡང་ནི་མི་མཐུན་པའི་ཕྱོགས་དེ་ཕར་འདོར་བའི་རྣམ་པ་ཅན་ཞིག་ཡིན་པས་དེའི་རྩལ་ལམ་ནུས་པ་དེ་སེམས་ལ་ཡོད་པའི་སྟབས་ཀྱིས་ལམ་དུས་ཡིན་ན་མི་མཐུན་པའི་ཕྱོགས་རང་རྒྱུད་ལ་མི་གནས་པར་བྱེད་པ་ཞིག་ཡིན་ཞིང་། འབྲས་བུའི་སྐབས་སུ་གནས་ལུགས་ཇི་ལྟ་བུའི་རང་བཞིན་ལ་འཁྲུལ་བའི་དྲི་མ་བསལ་བ་མེ་ལོང་ཡེ་ཤེས་ཀྱི་རང་བཞིན་ཅན་བདུད་དང་བར་གཅོད་ཐམས་ཅད་འཇོམས་པ་རྡོ་རྗེ་མི་བསྐྱོད་པར་འགྲུབ་པ་ཡིན་ནོ། །ང་རྒྱལ་དེ་ཁོ་རང་མཐོ་བའི་རྣམ་པ་ཅན་དང་། མཐོ་དགའ་ཅན། མཐོ་བའི་རྣམ་པ་ཅན་ལ་འཇུག་པ་ཞིག་ཡིན་ལ། དེའི་རྩལ་དེ་སེམས་ལ་ཡོད་པའི་སྟབས་ཀྱིས་ལམ་དུས་སུ་སྒྲུབ་པ་ཐམས་ཅད་ལ་མི་ཞུམ་པར་འཇུག་པ་དང་། ཁྱད་པར་དུ་སྔགས་ཀྱི་ལམ་ལ་ཞུགས་པའི་གནས་སྐབས་སུ་དེ་བས་མཆོག་གཞན་ཞིག་མེད་པར་འཛིན་ཅིང་། འབྲས་བུའི་དུས་སུ་འབྱོར་བས་དབུལ་བ་དང་ཞུམ་པའི་རྣམ་པ་མེད་ཅིང་། མ་སླེབས་པ་དང་མི་མཉམ་པའི་ཟུག་རྔུ་མེད་པ་མཉམ་ཉིད་ཡེ་ཤེས་ཀྱི་ངོ་བོ་རིན་ཆེན་འབྱུང་ལྡན་དུ་གྲུབ་པ་ཡིན་ནོ། །ཕྲག་དོག་ཁོ་རང་གི་ངོ་བོའམ་རང་གཤིས་དེ་ཇི་ལྟ་བུ་ཡིན་ན་བདག་དང་གཞན་གཉིས་ཀ་ལ་དམིགས་ནས་མི་བཟོད་པའི་བློ་མི་མཉམ་པར་འཇུག་པ་ཞིག་ཡིན་ཞིང་། དེའི་རྩལ་དེ་སེམས་ཀྱི་སྟེང་ན་ཡོད་པའི་སྟབས་ཀྱིས་ལམ་དུས་ཡིན་ན་བསྒྲུབ་བྱ་དང་སྒྲུབ་བྱེད་ཡིན་མིན་ལ་འཇུག་ལྡོག་བྱེད་པ། འབྲས་བུའི་དུས་སུ་གདུལ་བྱའི་སེམས་ཅན་ལ་ཕན་པར་སྒྲུབ་པ་དང་གནོད་པ་སྤོང་བའི་བྱ་བ་གྲུབ་པའི་ཡེ་ཤེས་ཀྱི་རང་བཞིན་དོན་ཡོད་གྲུབ་པར་གྲུབ་པ་ཡིན་ནོ། །དེ་ལྟར་ཡིན་པའི་རྒྱུ་མཚན་གྱིས་དཔེ་ཞིག་བཞག་ན་སྨན་གྱི་ནུས་པ་སྨན་ཁོ་རང་ལ་ཡོད་པ་དང་། ནོར་བུའི་རང་འོད་དེ་ནོར་བུ་རང་ཉིད་ལ་རང་ཆས་སུ་ཡོད་པ་དང་འདྲ་བར་སེམས་ཅན་གྱི་སེམས་ལ་རང་རྩལ་ལྔ་བོ་དེ་ཡེ་ནས་ཡོད་པའི་སྟབས་ཀྱིས་མ་རྟོགས་པའི་གནས་སྐབས་ན་འཁོར་བའི་ལས་ཐམས་ཅད་འདི་ལྔས་བྱེད་ལ། རྟོགས་པའི་དུས་ན་མྱ་ངན་ལས་འདས་པའི་བྱ་བ་ཐམས་ཅད་འདི་ལྔས་བྱེད་པ་དེ་ལྟར་ཡིན་མ་གཏོགས་རྩལ་ཤུགས་དེ་ལྔ་བོ་དང་བྲལ་སོང་ན་ཤུགས་ཟད་པའི་མདའ་དང་། སྒུལ་ཤུགས་མེད་པའི་འཕྲུལ་འཁོར་དང་འདྲ་བར་དོན་སྒྲུབ་པའི་ནུས་པ་མེད་དོ། །དེ་ནུས་པ་མེད་ལུགས་ཀྱི་མཚན་གཞི་བཞག་ན་ཇི་ལྟ་བུ་ཞིག་ཡིན་ཞེ་ན། ཉན་ཐོས་འགོག་པ་ལ་ཞུགས་པ་དང་འདྲའོ། །དུས་རྒྱུན་དུ་འུ་ཚོས་སྒོམ་བརྒྱབ་ན་ཡང་དེ་ལྟར་ཡིན་ཞིང་། རྣམ་རྟོག་བཀག་མི་ཉན་པ་དང་། རྣམ་རྟོག་གི་དབང་དུ་འཁྲུལ་ཤོར་མི་ཉན་ལ། དེས་ན་སེམས་ཀྱི་རང་རྩལ་དགག་ཐུབ་ཀྱང་མི་ཐུབ་ལ་དགག་ཀྱང་མི་དགོས་སོ། །ཅིའི་ཕྱིར་ཞེ་ན། འཁྲུལ་བས་མ་བསླད་ན་ཡེ་ཤེས་ལྔ་འཆར་བ་ཡིན་ལ། ཡེ་ཤེས་ལྔ་མ་ཤར་ན་འཁྲུལ་བ་ཤུགས་ཆེར་སོང་བ་ཡིན་ཞིང་། ཉོན་མོངས་རང་བཞིན་ཤེས་པས་མི་སྤང་བ་དེ་དེ་ལྟ་བུ་ཞིག་ཡིན་ནོ། །གཉིས་པ་ཐབས་ཀྱིས་ཟིན་ན་ལམ་གྱི་གྲོགས་སུ་འགྲོ་བའི་ཐབས་དེ་ཅི་འདྲ་ཞིག་ཡིན་ཞེ་ན། འབུད་ཤིང་མང་ན་མེ་དེ་ཙམ་མང་བ་དང་། དུག་ཇི་ཙམ་ཟོས་ན་རྨ་བྱའི་མདངས་དེ་ཙམ་དུ་འཕེལ་བ་དང་འདྲ་བར་ཉོན་མོངས་གང་ཡིན་ན་ཐབས་ཤེས་ཀྱིས་ཟིན་ན་ཡོན་ཏན་དང་། མ་ཟིན་ན་ཉེས་སྐྱོན་གྱི་རྐྱེན་དུ་འགྱུར་བ་དེ་ལྟར་ཡིན་ཏེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟ་ཇི་ལྟར་མེས་ནི་རྩྭ་རྙེད་པ། །དེ་ལྟ་དེ་ལྟར་དེ་སྟོབས་ཕྱིར་ཞིང་འཕེལ། །ཇི་ལྟར་བྱང་ཆུབ་སེམས་དཔའ་ཉོན་མོངས་སྲིད། །དེ་ལྟ་དེ་ལྟར་ཤེས་རབ་མེ་རབ་འཕེལ། །ཞེས་གསུངས་པ་ལྟར་དུ་ཡིན་ནོ། །གསུམ་པ་སྐུ་དང་ཡེ་ཤེས་ཡིན་པས་ན་སྤང་མི་དགོས་པ་ཞིག་ཡིན་ཏེ། ཉོན་མོངས་རེ་རེ་བཞིན་དུ་བཤད་ན་འུ་ཚོ་ལ་དུས་ཚོད་ཡོད་པ་མ་ཡིན་ཡང་གང་ཤར་གྱི་རྟོག་པ་དེ་མ་བཀག་པར་སྐྱེ་ཁར་བཞག་ནས་དེ་ཁོ་ན་ཉིད་དུ་རྟོགས་པའི་བློས་ཟིན་པར་བྱས་དུས་ཡུལ་ཡུལ་ཅན་གྱི་སྣང་བ་མ་འགགས་བཞིན་དུ་གཏད་ཞེན་གྱི་དམིགས་པ་འདིའོ་ཞེས་པ་ཞིག་མེད་པར་ཟང་ཐལ་དུ་མྱོང་བ་དེ་དུག་ལྔ་ཡེ་ཤེས་ལྔ་རུ་ཤར་བ་དེ་ཉིད་ད་ལྟ་གོང་ནས་བཤད་པ་ལྟར་དོན་འདྲ་བ་ཡི་སྨིག་རྒྱུའི་ཆུ་ལ་ཆུ་རགས་བརྒྱབ་མ་དགོས་པ་དང་། དགྲ་རུ་འཁྲུལ་བའི་གཉེན་དེ་ངོ་ཤེས་སོང་བ་ལྟ་བུ་ཡིན་ནོ། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་གསུངས་ཏེ་དེ་རྣམས་དང་དུ་བླང་བའི་དམ་ཚིག་ལྔ་ཡིན་ཞིང་། དང་དུ་བླང་བའི་དམ་ཚིག་ལྔ་དེ་དཔེར་ན་བདུད་རྩི་ལྔ་བོ་ཡིན་ལ། མཉམ་ཉིད་རྟོགས་པའི་ངོས་ནས་གཙང་དམེ་གཉིས་སུ་མེད་པའི་དོར་བྱ་མི་གནས་པར་མ་ཟད་དག་པ་ཡིན་པས་དང་དུ་བླང་དགོས་སོ། །དང་དུ་བླང་བའི་དམ་ཚིག་གསུངས་པའི་རྒྱུ་མཚན་དེ་ཡིས་ཡིན་ཞིང་། མཉམ་ཉིད་ཉམས་སུ་མྱོང་ནས་གཙང་དམེ་མེད་པར་སྤྱོད་པས་ན་མཚན་རྟོག་ཟིལ་གྱིས་གནོན། བརྟུལ་ཞུགས་ཀྱི་སྤྱོད་པ་ལ་བརྟེན་ནས་དངོས་གྲུབ་མྱུར་དུ་ཐོབ། ཐབས་ཀྱིས་ཟིན་པའི་དངོས་པོ་དེ་རྣམས་འཇིག་རྟེན་གྱི་བདུད་རྩིར་འགྱུར་བ་དང་། རང་གི་ངོ་བོ་གྲུབ་པའི་རྫས་ཡིན་པས་ན་དང་དུ་བླང་བྱ་ཡིན་གསུངས་པ་ཡིན་ནོ། །ཡིན་ན་ཡང་ཟབ་མོའི་དོན་མ་རྟོགས་བཞིན་དུ་འཆོལ་ཉོག་ཏུ་སྤྱད་ན་རང་རྒྱུད་ཆུད་ཟ་བྱེད་དུ་འགྱུར་ལ། དེ་ལྟ་བུའི་ཡན་ལག་གི་དམ་ཚིག་བཅུ་བོ་འདི་མེད་ན་ཉོན་མོངས་ལམ་དུ་འཁྱེར་ནུས་པའི་སྔགས་ཀྱི་བདེ་མྱུར་གྱི་ལམ་ཁྱད་པར་དུ་འཕགས་པ་དེ་ཉིད་དང་དུ་ལེན་རྒྱུ་ཞིག་མེད་ཅིང་། དེ་ལྟར་བྱས་ཏེ་དང་དུ་བླངས་ནས་ཉོན་མོངས་ཡེ་ཤེས་སུ་ཤར་དུས་ཀུན་འབྱུང་ལམ་བདེན་གྱི་ངོ་བོར་གྱུར། རྣམ་སྨིན་གྱི་ཕུང་པོ་དེ་དག་པའི་ཡེ་ཤེས་སུ་ཤར་སོང་ཚེ་སྡུག་བསྔལ་བྱང་ཆུབ་ཀྱི་ངོ་བོར་རང་ཤུགས་ཀྱིས་གྱུར་པ་ཡིན་ནོ། །འདིའི་རྩ་བ་དང་ཡན་ལག་གི་དམ་ཚིག་གི་དབྱེ་བ་རྒྱས་པར་བྱས་ན་སུམ་བརྒྱ་དྲུག་ཅུ་ལ་སོགས་པ་འགྱུར་བ་དེ་ཉིད་གཞུང་ངོ་མ་ནས་ཤེས་པར་བྱ་བ་དེ་ལྟར་ཡིན་ཞིང་། མཐར་ཐུག་གི་དོན་ལ་ཆོས་ཐམས་ཅད་ཡེ་ནས་དག་མཉམ་ཆེན་པོར་གནས་པས་ན་དགག་སྒྲུབ་བླང་དོར་དང་བྲལ་བ་མེད་པ། ཕྱལ་བ། གཅིག་པུ། ལྷུན་གྲུབ་ཀྱི་ཚུལ་གྱིས་རང་བཞིན་རྫོགས་པ་ཆེན་པོར་མཐར་ཕྱིན་པ་དེ་ཉིད་སྙིང་ཐིག་གི་ཁྲིད་ཡིག་ཆེན་མོ་རྣམས་ཀྱི་ནང་ནས་བཤད་པའི་དམ་ཚིག་གི་རྣམ་གཞག་དེ་ལྟར་ཡིན་ནོ། །འདི་ནས་ཚོགས་ཀྱི་བཤགས་པའི་སྐབས་སུ། རྩ་བ་ཡན་ལག་དམ་ཚིག་ཉམས་པ་རྣམས། །ཞལ་ཟས་ཚོགས་འབུལ་བསྐང་ཞིང་བཤགས་པར་བགྱི། །བཟོད་པར་བཞེས་ནས་ཚངས་པར་བསྩལ་དུ་གསོལ། །ཞེས་གསུངས་ཏེ། གོང་ནས་བཤད་པ་ལྟར་དུ་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་ཚོགས་མཆོད་ཡེ་ཤེས་ཀྱི་བདུད་རྩི་ཟག་མེད་འདོད་དགུའི་རང་བཞིན་དུ་རྣམ་པར་འཕྲུལ་བ་འདི་འབུལ་ནས་ཉམས་པ་བསྐང་ཞིང་འགལ་ཉེས་བཤགས་པ་ཡིན་པས་ཐུགས་དགོངས་པ་མ་འཁྲུལ་བའི་ཀློང་ནས་བཟོད་པར་བཞེས་ལ་བཤགས་པ་དང་ལེན་མཛད་ནས་ཚངས་པ་བསྩལ་དུ་གསོལ་ཞེས་ཏེ་ཟླ་བ་གཟའ་བྲལ་བཞིན་དུ་ཉེས་པ་དག་ནས་སྐྱོན་མེད་དུ་གྱུར་པའི་གནང་བ་བྱིན་ཞེས་པ་ལྟ་བུ་ཡིན་ནོ། །ཨོཾ་བཛྲ་ས་ཏྭ་ཨཱ༔ཞེས་གསུངས་ཏེ། ཨོཾ་བཛྲ་ས་ཏྭ་རྡོ་རྗེ་སེམས་དཔའ་ཡིན་ལ། ཨཱ༔ཆོས་ཉིད་སྐྱེ་བ་མེད་པའི་དོན་ཏེ། རྡོ་རྗེ་སེམས་དཔའི་ཐུགས་སྐྱེ་མེད་ཆོས་དབྱིངས་ཆེན་པོའི་ཀློང་དུ་སྒྲིབ་པ་དང་ཉེས་ལྟུང་མི་དམིགས་པར་གྱུར་པའི་དོན་ཡིན་ཞིང་། དེ་ཡན་ཆད་བཤགས་པའི་ཆེད་དུ་ཚོགས་མཆོད་འབུལ་བ་བཤད་ཟིན་ཏོ།། ཁ༽ བདུན་པ་བཤགས་པ་དངོས་བཤད་པ། བདུན་པ་བཤགས་པ་བྱ་བ་ནི༔ཞེས་པ་འདི་ནས་བཤགས་ཚིག་ངོ་མ་དེ་ཉིད་གསུངས་པ་ཡིན་ལ། ཧཱུྃ༔ བླ་མ་ཡི་དམ་མཁའ་འགྲོ་དམ་ཅན་དགོངས༔ བདག་ཅག་མ་རིག་འཁྲུལ་པའི་རང་བཞིན་གྱིས༔ ཉོན་མོངས་དབང་གྱུར་སྐུ་གསུང་ཐུགས་ལ་སོགས༔ རྩ་བ་ཡན་ལག་དམ་ཚིག་ཉམས་པ་ཀུན༔ གནོང་འགྱོད་དྲག་པོས་མཐོལ་བཤགས་བཟོད་པར་བཞེས༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཞེས་གསུངས་ཏེ། ལེའུ་ཚན་སྔ་མ་དེ་ཉིད་ཀྱིས་ཚོགས་འབུལ་གྱི་བསྐང་བཤགས་བསྐང་ཚིག་གིས་བསྟན་ནས། རྗེས་མ་འདིས་གནོང་འགྱོད་བཤགས་ཚིག་ལ་དམིགས་བསལ་ནན་གྱིས་སྤྱད་ནས་ཡང་བསྐྱར་གྱིས་བཤགས་པ་ཡིན་ནོ། །ཞེས་པ་དང་ཡི་གེ་བརྒྱ་པ་བཟླ་བར་བྱའོ༔ སྐབས་འདིར་ཞི་ཁྲོའི་མདངས་བསྐང་སོགས་དང་༔ ལྟ་བའི་ཀློང་བཤགས་ལ་སོགས་ཅི་རིགས་བྱ༔ཞེས་གསུངས་ཏེ་མཐོང་བརྒྱུད་ཀྱི་ཕྱག་བཞེས་ཀྱི་རྒྱུན་ཡོད་པ་འདི་ལ་གསུངས་པ་ཡིན་ནོ།། ༼ཆ དྲུག་པ་བསྒྲལ་ཞིང་བསྟབ་པ། ཀ༽ བསྒྲལ་བ་བཤད་པ། ཐ་མ་ཚོགས་ཕུད་བསྒྲལ་ཞིང་བསྟབ་པ་ནི༔ཞེས་གསུངས་ཏེ། འདི་ཕུད་ཅིའི་ཕྱིར་ཡིན་ཏེ་ཐ་མ་མ་ཡིན་ནམ་སྙམ་ན། ཚོགས་ཕུད་རིམ་པ་གསུམ་གྱི་དང་པོ་བར་དང་ཐ་མ་གསུམ་ཕྱེས་པའི་ནང་གི་ཐ་མ་ཡིན་མ་གཏོགས་ཚོགས་ཕུད་གསུམ་པོ་ཡིན་ཆོག་ལ། ལྷག་མ་མིན་དུས་ཕུད་ཡིན་ཆོག་གོ། ཧཱུྃ༔ ཆོས་སྐུ་ཞི་བའི་ངང་ལས་མ་གཡོས་ཀྱང་༔ ཐབས་ཀྱི་ཆོ་འཕྲུལ་རྒྱལ་བ་ཞི་ཁྲོའི་ཚོགས༔ ཁྲག་འཐུང་རྔམ་བརྗིད་འབར་བའི་སྐུར་བཞེངས་ལ༔ ཉོན་མོངས་མ་རིག་དུག་ལྔ་ཕུང་པོ་ལྔ༔ བསྟན་པ་བཤིག་པའི་དགྲ་བགེགས་མ་ལུས་པ༔ མྱུར་དུ་ཁུག་ལ་བསྒྲལ་བའི་ལས་མཛོད་ཅིག༔ ཅེས་གསུངས་ཏེ། འདིའི་མགོ་ལ་དང་པོར་དགུག་གཞུག་དགོས་ཤིང་། ན་མོ་དཀོན་མཆོག་གསུམ་དང་རྩ་གསུམ་ཆོས་སྐྱོང་སྲུང་མའི་བདེན་པས་གནོད་བྱེད་དགྲ་བགེགས་ཐམས་ཅད་ཚོགས་ཐ་མ་དམིགས་པའི་རྟེན་འདི་ལ་མཆིས་པར་གྱུར་ཅིག་ཅེས་འུ་ཚོས་འདོན་བཞིན་ཡོད་པའི་དུས་རྒྱུན་རྒྱུན་ལྡན་ལྟར་ཡིན་ནོ། །འདིའི་སྐབས་སུ་འདོན་རྒྱུ་རྐྱང་པས་མི་ཚད་པར་དམིགས་པ་ཕྱག་རྒྱ་དང་བཅས་པ་ར་སྦྲགས་དགོས་པ་ཡིན་གྱིས། རྡོར་དྲིལ་དང་བཅས་པའི་ཕྱག་གཉིས་ཀྱིས་དང་པོར་ཁྲོ་བོ་ཧཱུྃ་མཛད་ཀྱི་ཕྱག་རྒྱ་དང་བཅས་ཏེ་དགུག་པ་ལྕགས་ཀྱུའི་ཕྱག་རྒྱ། འཆིང་བ་ཞགས་པའི་ཕྱག་རྒྱ། སྡོམ་པ་ལྕགས་སྒྲོག་གི་ཕྱག་རྒྱ། མྱོས་པ་དྲིལ་བུའི་ཕྱག་རྒྱ་དང་བཅས་ཏེ། དེའི་སྐབས་སུ་དམིགས་པ་ཅི་ཞིག་དགོས་ན་བདག་མདུན་གྱི་ཐུགས་ཀའི་འོད་ཟེར་གྱིས་དཀྱིལ་འཁོར་ཆེན་པོའི་ཁྱམས་ན་གནས་པའི་འགུག་བྱེད་སྤྲུལ་བའི་ཕོ་ཉ་དཔག་ཏུ་མེད་པས་འགུག་པར་བྱེད་པའི་ལས་ལ་རྔམ་ཞིང་རིངས་པའི་སྒོ་ནས་ཞིང་བཅུ་ཚང་བའི་གཟས་པོ་དེའི་བླ་སྲོག་རྟེན་ལ་བཀུག་པར་དམིགས་དགོས་སོ། །འདི་ལ་བསྒྲལ་བ་དངོས་དང་ཞལ་བསྟབ་སྟེ་རྣམ་པ་གཉིས་ཡོད་པ་དེ་ཉིད་འདི་ནས་ལེའུ་ཚན་ཁ་ཁར་བྱས་ནས་བསྟན་ཡོད་ན་དང་པོ་བསྒྲལ་བ་ཡིན་ཞིང་། བསྒྲལ་བ་འདི་ལ་དམིགས་པའི་བྱེ་བྲག ཕུར་བའི་རྣམ་དབྱེ་དང་། ཚེ་ཁྲུས་གནས་གསུམ་གྱི་དགོངས་པས་ཚར་གཅད་པ་དང་གསུམ་གྱིས་བསྒྲལ་བའི་དོན་གོ་དགོས་སོ། །དེའི་ནང་གི་དང་པོ་དམིགས་པའི་བྱེ་བྲག་འདི་གསུམ་ཚན་བཞི་ཡི་ཐོག་ནས་བཤད་དགོས་ཤིང་། འདི་ལ་འུ་ཚོས་སྡོམ་བྱས་ན། གསལ་བ་གསུམ་དང་ལྷ་གསུམ་དང་། །ལྟ་སྒོམ་སྤྱོད་གསུམ་རྫོང་འཕྲང་སྲོག །ཅེས་འཛིན་བདེ་བའི་ཆེད་དུ་སྐྱོར་ཆོག་ལ། གསལ་བ་གསུམ་ནི་མི་ལྡོག་པའི་ཕྱིར་དུ་སྒྲོལ་མཁན་གྱི་རྣལ་འབྱོར་པ་རང་ཉིད་ལྷར་གསལ། མི་རྡུགས་པའི་ཕྱིར་དུ་སྒྲོལ་བྱེད་ཀྱི་ཕུར་བ་ཀཱི་ལ་ཡར་གསལ། མི་འབྱམ་པའི་ཕྱིར་དུ་བསྒྲལ་བྱ་རཱུ་ཏྲ་དངོས་སུ་གསལ་བ་དེ་ལྟར་དགོས་ལ། དེ་གསུམ་དེ་གསལ་བ་གསུམ་ཡིན་ནོ། །ལྷ་གསུམ་ནི་སྟོང་ཉིད་གྱད་ཀྱི་ལྷ། གཉེན་པོ་ཡེ་ཤེས་ཀྱི་ལྷ། སྤྱོད་པ་ལས་ཀྱི་ལྷ་གསུམ་པོ་ཡིན་ནོ། །ལྟ་བའི་གདེང་གིས་ཟིན་པ་དེ་ཉིད་སྟོང་ཉིད་གྱད་ཀྱི་ལྷ། བསྐྱེད་རིམ་གྱི་ངར་དང་ལྡན་པ་དེ་ཉིད་གཉེན་པོ་ཡེ་ཤེས་ཀྱི་ལྷ། བསྐྱེད་རྫོགས་ཟུང་འཇུག་གི་ངང་ནས་ཕོ་ཉ་ལས་ལ་འགྱེད་པ་དེ་ཉིད་སྤྱོད་པ་ལས་ཀྱི་ལྷ་ཡིན་ལ། དེ་ཡིས་གསལ་བ་གསུམ་དང་ལྷ་གསུམ་གྱིས་གསུམ་ཚན་གཉིས་བཤད་ཟིན་ཏོ། །རྗེས་མ་གཉིས་ཀ་ལྟ་སྒོམ་སྤྱོད་གསུམ་རྫོང་འཕྲང་སྲོག་ཅེས་པ་དེ་ཡིན་ཞིང་། ལྟ་སྒོམ་སྤྱོད་པ་གསུམ། རྫོང་འཕྲང་སྲོག་གསུམ་སྟེ་དེ་ཡིས་གསུམ་ཚན་བཞི་བསྟན་པ་ཡིན་ནོ། །ལྟ་སྒོམ་སྤྱོད་གསུམ་དེ་བསྒྲལ་བ་དང་བསྟུན་ནས་བཤད་དགོས་ཤིང་། དུས་རྒྱུན་གྱི་ལྟ་སྒོམ་སྤྱོད་གསུམ་དང་འདྲ་བ་ལ་འདི་ནས་དམིགས་བསལ་གྱི་བསྒྲལ་བའི་རྒྱབ་རྟེན་ལྟ་སྒོམ་སྤྱོད་གསུམ་དེ་ཇི་ལྟར་ཡིན་ན་རང་བཞིན་གྱིས་སྒྲོལ་བའི་ལྟ་བ། སྙིང་རྗེས་སྒྲོལ་བའི་སྒོམ་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་དང་གསུམ་པོ་དེ་ཡིན་ནོ། །ལྟ་སྒོམ་སྤྱོད་གསུམ་དེ་ལ་ཚད་མེད་བཞིའི་དག་སྦྱོར་ཇི་ལྟར་བྱེད་དགོས་ཟེར་ན། ཚད་མེད་བཞི་དེ་བྱམས་དང་སྙིང་རྗེ་དགའ་བ་བཏང་སྙོམས་བཞི་ཡིན་ལ། སྐབས་འདིའི་ཐུན་མོང་མ་ཡིན་པའི་ཚད་མེད་བཞི་དེ་སྙིང་རྗེ་ཁྲོས་པའི་ཚུལ་གྱིས་སྡིག་ཅན་རྗེས་སུ་འཛིན་པ་བྱམས་པ། ཤིན་ཏུ་བརྩེ་བ་ཆེན་པོས་མྱུར་དུ་སྒྲོལ་བའི་སྙིང་རྗེ། ཤེས་པ་གནས་སུ་སྤར་ཞིང་ཕུང་པོ་ཚོགས་སུ་སྟོབ་པའི་དགའ་བ། གདུལ་བྱ་ཡལ་བར་མི་འདོར་བའི་བཏང་སྙོམས་ཏེ་དེ་ལྟ་བུའི་སྒྲོལ་བ་མངོན་སྤྱོད་ཀྱི་ལས་འདི་ལ་མཆོག་ཏུ་བསྔགས་པའི་ཚད་མེད་བཞི་ཚང་དགོས་སོ། །གསུམ་ཚན་བཞི་བ་དེ་རྫོང་འཕྲང་སྲོག་གསུམ་ཡིན་ཞིང་། ལྟ་བ་བློ་འདས་ཀྱི་རྫོང་། སྒོམ་པ་ཡེངས་མེད་ཀྱི་འཕྲང་། སྤྱོད་པ་ངེས་མེད་ཀྱི་སྲོག་དང་གསུམ་པོ་དེ་ཚང་དགོས་སོ། །བསྒྲལ་བ་འདི་ལ་དམིགས་པའི་བྱེ་བྲག་ཕུར་བའི་རྣམ་དབྱེ་ཚེ་ཁྲུས་གནས་གསུམ་གྱི་དགོངས་པས་ཚར་གཅད་པ་དང་གསུམ་ཡོད་ཅེས་བཤད་པ་ཡིན་ལ། གསལ་བ་གསུམ་གྱིས་གསལ་འདེབས་རྒྱུ་དང་ལྷ་གསུམ་གྱི་ང་རྒྱལ་བཟུང་ནས་ལྟ་སྒོམ་སྤྱོད་གསུམ་གྱི་རྒྱབ་རྟེན་དང་ཚད་མེད་བཞིའི་དག་སྦྱོར་དང་བཅས་པ་རྫོང་འཕྲང་སྲོག་གསུམ་གྱིས་གཞི་འཛིན་དགོས་རྒྱུ་དེ་ཚོ་དམིགས་པ་ཡིན་ནོ། །སྒྲོལ་བྱེད་ཕུར་བའི་རྣམ་དབྱེ་འདི་ལ་ཕུར་བའི་དབྱེ་བ་དུ་ཡོད་ཟེར་ན་ཚད་མེད་སྙིང་རྗེའི་ཕུར་བ། བྱང་ཆུབ་སེམས་ཀྱི་ཕུར་བ། མཚན་མ་རྫས་ཀྱི་ཕུར་བ་དང་གསུམ་ཡོད་ཅིང་། དེའི་ནང་གི་ཚད་མེད་སྙིང་རྗེའི་ཕུར་བ་ཞེས་པ་ནི་བསྟན་པའི་སྤྱི་དགྲ། རྣལ་འབྱོར་བའི་སྒོས་དགྲ། དཀོན་མཆོག་གི་སྐུ་དགྲར་གྱུར་པའི་ཞིང་བཅུ་ཚང་བའི་ལས་ངན་གྱི་དགྲ་བོ་དེ་ཐབས་ཁྱད་པར་ཅན་གྱིས་འཕྲལ་དུ་མ་བསྒྲལ་ན་ལས་ངན་ཚབས་ཆེན་ད་རུང་མང་པོ་བསགས་ནས་དེའི་འབྲས་བུ་ངན་སོང་ལ་ལྷུང་། སྡུག་བསྔལ་དོས་དྲག་ཅིག་ཡུན་རིང་དུ་མྱོང་དགོས་ཐུག་པ་ཡིན་བསམས་ནས། སྙིང་རྗེ་བཟོད་བརླག་མེད་པའི་སེམས་ཀྱིས་བསྒྲལ་ལས་བྱེད་པའི་ཀུན་སློང་དང་ལྡན་པ་དེ་ཉིད་ཡིན་ཏེ། ལོག་ལྟ་རྣམས་ལ་སྙིང་རྗེ་བསྐྱེད། །གཉིས་མེད་སྒྲོལ་བའི་སྙིང་རྗེ་སྒོམ། །དེ་ནི་སྙིང་རྗེའི་ཕུར་བ་སྟེ། །ཞེས་གསུངས་པས་ཚད་མེད་སྙིང་རྗེའི་ཕུར་བ་ཞེས་པ་དེ་ལྟ་བུ་ཞིག་ལ་གསུངས་སོ། །བྱང་ཆུབ་སེམས་ཀྱི་ཕུར་བ་ཞེས་པ་ནི་བསྒྲལ་བྱ་དང་སྒྲོལ་བྱེད་ཀྱི་གཉིས་འཛིན་ཀ་ནས་དག་སོང་བའི་གསལ་མདངས་དེ་སྒྱུ་མ་ལྟ་བུའི་རྣམ་རོལ་དུ་ཤར་ནས་རང་ཉིད་ལྷར་གསལ་བའི་ཕྱག་གཡས་གཡོན་གཉིས་ཀ་རིགས་ལྔ་ཡབ་ཡུམ་དུ་བསྒོམས་ནས་སྐྱེ་འགག་གཉིས་མེད་ལྷུན་གྲུབ་སྙིང་རྗེ་ཤར་ཞིང་བསྒྲལ་བ་བྱེད་པ་དེ་ཉིད་ཡིན་ཏེ། མན་ངག་སྙིང་གཟེར་ནག་པོ་ལས། སྐྱེ་མེད་བྱང་ལ་འགག་མེད་ཆུབ། །གཉིས་སུ་མེད་པའི་སེམས་ཞེས་བྱ། །ཞེས་གསུངས་སོ། །འདི་ནས་གཏེར་གཞུང་གི་རྩ་བའི་ཚིག་ལས་ཧཱུྃ་ཞེས་རྔམ་ཆེན་གཏུམ་དྲག་རོལ་བ་ཐུགས་སྙིང་རྗེ་འབར་བའི་ཆོ་འཕྲུལ་ཁྲོས་པའི་སྐུ་རུ་བཞེངས་པའི་ཧཱུྃ་སྒྲ་ཡིས་ལས་ལ་བསྐུལ་བའི་སྣ་དྲངས་ནས། ཆོས་སྐུ་ཞི་བའི་ངང་ལས་མ་གཡོས་ཀྱང་། །ཐབས་ཀྱི་ཆོ་འཕྲུལ་རྒྱལ་བ་ཞི་ཁྲོའི་ཚོགས། །ཞེས་པའི་ཚིག་རྐང་གཉིས་འདིས་གསལ་བ་གསུམ་དང་ལྡན་པའི་སྟོང་ཉིད་གྱད་ཀྱི་ལྷ་དང་། གཉེན་པོ་ཡེ་ཤེས་ཀྱི་ལྷ་བསྒོམས་ནས་རང་བཞིན་གྱིས་སྒྲོལ་བའི་ལྟ་བ་དང་། སྙིང་རྗེས་སྒྲོལ་བའི་སྒོམ་པ་ཟུང་དུ་འབྲེལ་བ་ཚད་མེད་སྙིང་རྗེའི་ཕུར་བ་དང་། བྱང་ཆུབ་སེམས་ཀྱི་ཕུར་བ་དང་ལྡན་པས། ཁྲག་འཐུང་རྔམ་བརྗིད་འབར་བའི་སྐུར་བཞེངས་ལ་ཞེས་པ་མན་ཆད་ཀྱིས་སྤྱོད་པ་ལས་ཀྱི་ལྷ་བསྟན་ཅིང་། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་ལ་ཞུགས་ནས་རྫོང་འཕྲང་སྲོག་གསུམ་གྱི་གནད་དང་མ་བྲལ་བའི་ཐོག་ནས་དྲག་པོ་མངོན་སྤྱོད་ཀྱི་བསྒྲལ་ལས་དངོས་ལ་འཇུག་པ་དེ་ཉིད་བསྟན་ཏོ། །དེ་ཡང་སྒྲོལ་བྱེད་ཕུར་བ་རྣམ་གསུམ་གྱི་ནང་ནས་མཚན་མ་རྫས་ཀྱི་ཕུར་བ་དེ་མཚན་མ་རྟགས་ཀྱི་ཕྱག་རྒྱ་ཡིན་ཞིང་། སྐུ་ཕྱག་རྒྱའི་ཕུར་བ། ཕྲིན་ལས་ལས་བཞིའི་ཕུར་བ། བྱིན་རླབས་སྲས་མཆོག་གི་ཕུར་བ་དང་གསུམ་ཡོད་པའི་ནང་གི་སྐབས་འདིར་སྲས་མཆོག་གི་ཕུར་བ་ཡིན་ནོ། །དེ་ཡང་སྟོད་རྒྱ་མདུད་གོང་མའི་ཕྱོགས་བཞི་དབུས་ལྔ་རིགས་ལྔའི་སངས་རྒྱས་དང་ཡེ་ཤེས་ལྔའི་རང་བཞིན། བར་གྱི་གཞོགས་བརྒྱད་རྣམ་ཐར་བརྒྱད། སྨད་ཆུ་སྲིན་གྱི་ཁ་ནི་འཛིན་ཤེས་གཏོང་མི་ཤེས་པའི་ཐུགས་རྗེ། ཟུར་གསུམ་སྐུ་གསུང་ཐུགས་ཀྱི་རང་བཞིན། དེར་བྱུག་བདུག་བྲབ་གསུམ་གྱིས་གཟི་མདངས་བསྐྱེད་ནས་ཟུར་གསུམ་དབལ་གྱི་རྩེ་ཤིན་ཏུ་རྣོ་བ་མགར་གྱི་སོལ་མལ་ནས་ཕྱུང་མ་ཐག་པ་ལྟ་བུའི་མཚོན་ཆ་མེའི་ཚྭ་ཚྭ་འཕྲོ་བ་ཡི་བྱིན་གྱིས་བརླབས་པའི་འདུས་བྱས་རྫས་ཀྱི་དྲག་པོའི་ཕུར་བ་དེ་ལག་ཏུ་ཐོགས་ནས་བསྒྲལ་ལས་བྱེད་དགོས་སོ། །བསྒྲལ་ལས་བྱེད་པའི་སྐབས་སུ་དགྲ་བགེགས་ཀྱི་སྙིང་དཀར་ནག་གཉིས་ཀྱི་མཚམས་སུ་གཏད་པས་ལས་གྲུབ་པར་བྱེད་པ་འདི་ལ་བྱིན་རླབས་རྟགས་ཀྱི་ཕུར་བ་ཞེས་ཟེར་རོ། །མྱུར་དུ་ཁུག་ལ་བསྒྲལ་བའི་ལས་མཛོད་ཅིག་ཅེས་པའི་སྐབས་ཀྱི་ཚིག་དང་སྦྲགས་ནས་ཟན་གྱིས་བཅས་པའི་ཉ་བོ་ལིང་གཟུགས་ངོ་མ་ཡོད་ན་འཁོར་བ་རུ་ལོག་གི་རྟེན་འབྲེལ་དུ་མགོ་བོ་ལྷོ་ནུབ་དང་རྐང་བ་བྱང་ཤར་དུ་བསྟན་ནས་གན་རྐྱལ་དུ་བཞག་དགོས་ཤིང་། ཡང་མིན་ན་སྤྱིར་བཏང་གི་སྟབས་བདེ་དང་བསྟུན་ན་འཁོར་བ་ལ་རྒྱབ་ཀྱིས་ཕྱོགས་པའི་རྟེན་འབྲེལ་དུ་མགོ་བོ་ཕྱི་ཕྱོགས་སུ་ཕར་བསྟན་ལ། མྱང་འདས་ལ་མངོན་པར་ཕྱོགས་པའི་རྟེན་འབྲེལ་དུ་གདོང་ནང་ཕྱོགས་སུ་རང་ཉིད་ལ་བསྟན་ནས་བླ་སྲོག་སྐད་ཅིག་ཆགས་པའི་རྟེན་འབྲེལ་དུ་འཁོར་བའི་རྒྱུ་རྟེན་འབྲེལ་བཅུ་གཉིས་ཀྱི་རྩ་བ་རཀྟ་བྲན། ཉ་བོའི་གཟུགས་བཅས་པ་དེ་ཉིད་གལ་སྲིད་མེད་ན་ཚོགས་ཟན་དང་ཤ་དུམ་ལ་དམིགས་རྟེན་བྱས་ནས་ཨེ་ལས་གནམ་ལྕགས་འབར་བའི་གྲུ་གསུམ་དཀྱིལ་འཁོར་སྒོ་མེད་ཀྱི་ཁང་སྒྲོམ་གྱི་ནང་དུ་ནྲྀ་དང་ཏྲི་ལས་གནོད་བྱེད་དགྲ་བགེགས་སྡིག་ཅན་རྐང་ལག་ལྕགས་སྒྲོག་གིས་བཅིངས་ནས་ཉམས་ཐག་པ་མངོན་སུམ་ལྟར་དུ་གསལ་འདེབས་དགོས་སོ། །ལྟ་དགོངས་ཏིང་འཛིན་དམིགས་གནད་ལས་སྦྱོར་གྱི་ཞལ་ཤེས་དང་བཅས་པ་མེད་ན་རང་གར་ཟན་གོང་གྲི་ཡིས་གཏུབས་པ་ཙམ་གྱིས་ས་ཆོད་ཆེ་བ་མ་ཡིན་ལ། ཡང་བསྐྱེད་རིམ་གྱི་གསལ་སྣང་ཕྲན་བུ་རེ་དང་དྲག་སྔགས་ཀྱི་བཟླས་གྲངས་ཉུང་ཉུང་རེ་ཡོད་ཀྱང་རྫོགས་རིམ་སྟོང་ཉིད་སྙིང་རྗེའི་རྩི་དང་བྲལ་སོང་ན་དགྲ་བགེགས་ཕར་བསྒྲལ་མ་དགོས་དང་གཤེད་མ་རང་གཤེད་རང་ལ་འཁོར་རྒྱུ་ཡང་ཡོད་དོ། །བཟང་ངན་གཉིས་ཀྱི་གྲལ་དུ་མི་འགྲོ་བའི་ཟན་གོང་གྲིས་གཏུབས་པར་བྱས་པས་ཕན་གནོད་གཉིས་ཀ་མི་འབྱུང་ལས་ཆེ་ཡང་གཅིག་བྱས་ན་དེ་ཡང་གསང་སྔགས་ར་ཚང་དུ་བཞེངས་པའམ་གསང་སྔགས་བོན་དུ་གྱེར་བ་དང་། ཆོ་གའི་གཟུགས་བརྙན་ཆོས་ལ་དབང་ཟ་བ་སོགས་འབྱུང་བ་འགོག་མེད་ལྟ་བུ་ཞིག་ཡིན་ནོ། །བཤད་བྱ་ངོ་མ་གང་ཡིན་ན་བསྒྲལ་བ་དངོས་ལ་འཇུག་དུས་དགོངས་པ་གསུམ་གྱི་སྒོ་ནས་ཚར་གཅད་པ་ལ་ཚེ་ལུང་ཁྲུས་ལུང་གནས་ལུང་གསུམ་པོ་དེ་ངེས་པར་དུ་ཚང་དགོས་པ་ཡིན་ཞིང་། ཕུར་རྩེས་གཟས་པོའི་སྙིང་ཁར་རེག་པ་ཙམ་གྱིས་དེའི་ཚེ་རྟེན་ཨ་དཀར་གྱི་རྣམ་པ་རང་ཉིད་ལ་བསྟིམས་པ་དེ་ཚེ་ལུང་ཡིན་པ་དང་། འཚེངས་པ་གསུམ་གྱི་ནང་ནས་རྣལ་འབྱོར་པ་ཚེ་ཡིས་འཚེངས་པ་ཞེས་བྱ་སྟེ་དེའི་ཚེ་རྟེན་དེ་རྣལ་འབྱོར་བ་རང་ཉིད་ལ་བསྟིམས་པས་རྣལ་འབྱོར་བ་ཚེ་ཡིས་འཚེངས་པ་ཡིན་ལ། དེའི་ཚེ་བསོད་དབང་ཐང་ཚང་མ་རང་གིས་ལེན་དགོས་སོ། །དེའི་མཚམས་ཀྱི་དེའི་བླ་གནས་དང་བསྟུན་ནས་གནས་སོ་སོ་ལ་ཕུར་བ་གདབ་པའི་རྗེས་སུ་དགྲ་བོའི་རྣམ་ཤེས་ཉོན་ཡིད་ཀྱི་རྟེན་ཀུན་གཞིའི་རྣམ་ཤེས་ནྲྀ་ཡིག་གི་རྣམ་པར་ཡོད་པ་ལ་ཕུར་བ་གདབ་ནས་ནག་ཐིམ་མེར་སོང་ནས་བྱུང་ཚོར་གྱི་སྒོ་འགག་ལས་ངན་གྱི་བག་ཆགས་དང་ཉོན་མོངས་ཀྱི་འཁྲུལ་བ་རྩད་ནས་ཆོད་དེ་རྒྱལ་བའི་སྐུ་གསུམ་གྱི་རང་བཞིན་དུ་གོ་འཕོས་ནས་ཕུར་རྩེའི་ཧཱུྃ་ཡིག་དང་དབྱེར་མེད་དུ་འདྲེས་པར་དམིགས་པ་དེ་ཁྲུས་ལུང་ཡིན་ཞིང་། །ཕུར་རྩེའི་ཧཱུྃ་ཡིག་ལ་སོགས་པ་བསྒྲལ་བའི་སྐོར་འདི་ན་ནིང་ཧ་ཅང་ཞིབ་ཆ་བྱས་ནས་བཤད་ཡོད། འཁོར་བའི་གནས་ནས་སྦྱངས་པ་དེ་ཉིད་ལ་ཁྲུས་ལུང་ཞེས་བྱའོ། །དེའི་མཚམས་སུ་ཕུར་རྩེ་ནམ་མཁའ་ལ་དེངས་པ་གཅིག་བྱས་པ་དང་མཉམ་དུ་རྣམ་ཤེས་མེ་རྟགས་ཡལ་བ་ལྟར་དུ་འོག་མིན་གྱི་ཞིང་ལ་ཀུན་ཏུ་བཟང་པོའི་ཐུགས་ཀློང་དུ་འཕོས་པ་དེ་ཉིད་གནས་ལུང་ཡིན་ལ། བདེ་བར་གཤེགས་པའི་སྲས་སུ་སྐྲུན་པའི་སྦྱོར་སྒྲོལ་ཟུང་འབྲེལ་གྱི་གོ་བ་ཡང་ཤུགས་ལ་བསྟན་ཡོད་ཅིང་། དེས་བསྒྲལ་བྱ་གནས་ཀྱིས་འཚེངས་པ་ཡིན་ནོ། །ཤེས་པ་འོག་མིན་དུ་བསྒྲལ་བའི་རྗེས་སུ་ཕུང་པོ་དུར་ཁྲོད་དུ་བསྒྲལ་ནས་གཟས་པོའི་ཤ་ཁྲག་རུས་གསུམ་དམ་ཅན་ཆོས་སྐྱོང་ལ་ཕུལ་བ་དང་བཅས་པས་དམ་ཅན་ཤ་ཁྲག་གིས་འཚེངས་པ་ཡིས་འཚེངས་པ་གསུམ་པོ་ཚང་བ་ཡིན་ལ། འཚེངས་པ་ལྔར་གསུང་ས་ཡང་ཡོད་ཀྱང་འདིའི་ནང་དུ་འདུས་སོ། །དེས་ན་བསྒྲལ་བ་ལ་མཚོན་ན་དང་པོར་རྟོགས་པས་བདག་སྔོན་དུ་བསྒྲལ་ནས་དེའི་རྗེས་སུ་ཐུགས་རྗེས་གཞན་སྒྲོལ་བ་དེ་ཉིད་གོ་རིམ་མ་འཁྲུགས་པ་ཡིན་ནོ།། ཁ༽ ཞལ་བསྟབ་བཤད་པ། གཉིས་པ་ཕུང་པོ་ཞལ་དུ་བསྟབ་པ་ནི༔ འདིའི་ས་བཅད་བསྒྲལ་བ་ལ་ཡང་དང་པོ་དང་གཉིས་པ་གཉིས་སུ་ཕྱེས་པའི་ནང་གི་གཉིས་པ་ཞལ་བསྟབ་ཡིན་ནོ།། ཧཱུྃ༔ བླ་མ་ཀུན་བཟང་ཞི་ཁྲོ་སྤྲུལ་འཁོར་བཅས༔ མཁའ་འགྲོ་ཆོས་སྐྱོང་སྲུང་མ་ཞལ་ཕྱེས་ཤིག༔ དུག་ལྔ་དུག་གསུམ་བསྒྲལ་བའི་ཤ་ཁྲག་རུས༔ ཡེ་ཤེས་ལྔ་ལྡན་མི་འགྱུར་ཞལ་དུ་བསྟབས༔ རྣམ་རྟོག་བག་ཆགས་ཆོས་ཉིད་ཀློང་དུ་རོལ༔ བསྟབ་བོ་བཞེས་ཤིག་རོལ་ཞིག་ཁ་རཾ་ཁཱ་ཧི༔ ཞེས་གསུངས་ཏེ། ཞི་ཁྲོ་རྒྱལ་བའི་དཀྱིལ་འཁོར་རྩ་གསུམ་སྲུང་མ་དང་བཅས་པའི་ཞལ་དུ་དགྲ་བགེགས་ཀྱི་ཤ་ཁྲག་རུས་པ་དུག་ལྔ་དུག་གསུམ་དང་བཅས་པ་བསྟབས་པས་རྣམ་རྟོག་བག་ཆགས་ཆོས་ཉིད་ཀྱི་ཀློང་དུ་རོལ་ལ་བཞེས་ཤིག་ཅེས་གསུངས་པའི་དོན་ཡིན་ནོ། །འདི་ཡང་སྦྱོར་སྒྲོལ་གཉིས་མེད་ཀྱི་མཆོད་པའི་དམིགས་གནད་ཟབ་མོ་ཡིན་པར་གསུངས། དེའི་འཕྲོས་ཨོཾ་ཨཱཿཧཱུྃ༔ ཧཱུྃ་ཧཱུྃ་ཧཱུྃ༔ ཕཊཿཕཊཿཕཊཿཅེས་གསུངས་ཏེ། ཨོཾ་ཨཱཿཧཱུྃ་དུག་གསུམ་སྐུ་གསུམ་ཆོས་ཉིད་ཀྱི་ཀློང་དུ་རོལ་ཞིང་། ཧཱུྃ་ཧཱུྃ་ཧཱུྃ་ཚེ་ཁྲུས་ཀྱི་དགོངས་པ་དང་མཐུན་པའི་སྐུ་གསུམ་གྱི་རྣམ་པར་གནས་པ་ཕུར་རྩེའི་ཧཱུྃ་གསུམ་གྱི་མཚོན་བྱེད་དང་། ཕཊཿཕཊཿཕཊཿཅེས་གསུམ་གསུངས་པའི་ཕཊཿདང་པོ་ནི་དཔལ་ཀུན་ཏུ་བཟང་པོའི་ཐུགས་སྲོག་གི་ཡི་གེ་དང་བསྲེས། ཕཊཿགཉིས་པ་དེས་སྐུའི་དབྱིབས་བསྐྱེད། ཕཊཿགསུམ་པས་བདེ་བར་གཤེགས་པའི་སྲས་སུ་བསྐྲུན་པའི་ཚེ་ཁྲུས་གནས་གསུམ་གྱི་དགོངས་པ་དེ་ཡིས་ཚང་བ་ཡིན་ལ། དེ་ཡིས་བསྒྲལ་མཆོད་ཀྱི་རྣམ་བཞག་ཆ་ཚང་སོང་བ་ཡིན་ནོ། །འདིའི་མཚམས་སུ་བསྐང་བ་ལ་སོགས་པའི་བཤད་པ་མང་ལ། དཔེ་མཚོན་ཙམ་དུ་ཉམས་ཆགས་བསྐང་བ་རྐྱང་པའི་ཐད་ནས་བསམ་བློ་བཏང་ན་ཉམས་ཆག་གི་སྐོང་ཆེན་ལྔ་ཞེས་པ་མཆོད་པ་ཕུད་ཀྱིས་སྐོང་། དམ་རྫས་མདངས་ཀྱིས་སྐོང་། སྲོག་ཆགས་རྒྱུ་ཡིས་སྐོང་། རྣམ་བཞི་མདོས་ཀྱིས་སྐོང་། འགྱོད་ཚངས་བཤགས་པས་སྐོང་བ་དང་ལྔ་ཡི་དབྱེ་བ་ལྟ་བུ་སྐོང་བཤགས་ཀྱི་སྐོར་འདི་ཤིན་ཏུ་རྒྱས་ཤིང་། འདིའི་སྐབས་སུ་རང་གཞུང་གི་སྐབས་ལྟར་དུ་བྱས་ན་ཕྱི་ཐུན་མོང་མཆོད་རྫས་ཀྱི་སྐོང་བ་ཡོན་ཆབ། མེ་ཏོག བདུག་སྤོས། སྣང་གསལ་མར་མེ་ལ་སོགས་པ་དང་། ནང་ཐུན་མིན་རྫས་ཀྱི་སྐོང་བ་སྨན་དང་། རཀྟ། གཏོར་མའི་མཆོད་པ། གསང་བ་ཁྱད་པར་བླ་མེད་ཚོགས་ཀྱི་སྐོང་བ་ཕུད། བཤགས། བསྒྲལ་གསུམ་ཞི་ཁྲོའི་ལྷ་ཚོགས་ཀྱི་མདངས་སྐོང་དང་བཅས་པ། དེ་ཁོ་ཉིད་དོན་དམ་བྱང་ཆུབ་སེམས་ཀྱི་སྐོང་བ་ལ་མཚོན་ན་དངོས་པོ་ཆོས་ཉིད་ཡངས་པའི་ཀློང་དུ་བསྐང་བ། སྣང་བ་ཡེ་ཤེས་ཆེན་པོའི་ཀློང་དུ་བསྐང་བ་སོགས་འདོན་ཆའི་ནང་དུ་བུད་ཡོད་པ་ལྟར་དང་། དངོས་འཛིན་མཚན་མ་ཅན་གྱི་མཆོད་པ་ལས་འདས་སོང་བའི་གཉིས་མེད་རོལ་བ་ཆེན་པོས་མཆོད་པར་བྱ་བ་བསྐང་བྱ་སྐོང་བྱེད་ཀྱི་འཛིན་པ་བྲལ་བའི་སྐྱེ་མེད་ཀྱི་སྐོང་བས་བསྐངས་ནས་ཤེས་རབ་རྨད་དུ་བྱུང་བས་རླུང་སེམས་དབུ་མར་འཆང་བའི་མན་ངག་ཟབ་མོ་དེ་ཚོས་གཟུང་འཛིན་དང་བྲལ་བའི་མི་རྟོག་ཡེ་ཤེས་བདེ་བ་ཆེན་པོ་རང་ཤར་བ་བདག་དོན་ལྷུན་གྲུབ་སྦྱོར་བའི་མཆོད་པ་དང་། གཞན་དོན་ལྷུན་གྲུབ་སྒྲོལ་བའི་མཆོད་པ་རྟོགས་པས་བདག་བསྒྲལ། ཐུགས་རྗེས་གཞན་བསྒྲལ་བའི་ཡེ་སྦྱོར་ཡེ་སྒྲོལ་ཆེན་པོའི་ཟུང་འཇུག་གཉིས་མེད་ཀྱི་མཆོད་པར་འགྱུར་འགྲོ་བ་ཡིན་ནོ། །དེ་ཡང་ཇི་ལྟར་ཡིན་ན་ལྟ་བ་དག་མཉམ་ཆེན་པོ་སྣང་སྲིད་གཞིར་བཞེངས་ཀྱི་བསྐྱེད་རིམ་དང་། རྩོལ་བྲལ་མཚན་མ་མེད་པའི་རྫོགས་རིམ་ལས་རླུང་དབུ་མར་སྟོངས་ནས་དག་པའི་ཡེ་ཤེས་མངོན་དུ་འཆར་བ་ཐབས་ཤེས་དབྱེར་མེད་ཀྱི་ལྟ་སྒོམ་སྤྱོད་གསུམ་འབྲེལ་བའི་བསྙེན་སྒྲུབ་ཡན་ལག་བཞི་ལྡན་གྱི་ལམ་དེ་ནས་འབྲས་བུ་རང་གནས་ཀྱི་ཡེ་ཤེས་མངོན་དུ་བྱེད་པ་ཡིན་ནོ། །དེས་ན་སྔགས་བླ་མེད་ཀྱི་ཁྱད་པར་ཅན་གྱི་ལམ་འདི་ངོ་བོའི་ཆ་ནས་བསྐྱེད་རྫོགས་གཉིས་ཀ་ལ་བཤད་ན་ཡང་ཉམས་སུ་ལེན་ཚུལ་གྱི་ཐོག་ནས་ཐབས་གྲོལ་གཉིས་ལ་འདུས། བསྐྱེད་རིམ་འདི་ཚོ་སྲིད་པ་རིམ་པར་སྨིན་ཚུལ་དང་བསྟུན་ནས་སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་ཀྱི་རིམ་པ་ལ་དག་རྫོགས་སྨིན་གསུམ་སྦྱོར་རྒྱུ་དང་། རྫོགས་རིམ་ལ་རྩ་རླུང་ཐིག་ལེ་ལམ་དུ་བསླངས་ནས་ཀུན་རྟོག་བཞོན་པ་དང་བཅས་པ་བདེ་སྟོང་དྷུ་ཏིའི་དབྱིངས་སུ་ཐིམ་པ་དང་ཆབས་ཅིག་ཁམས་དང་རྩ་ཡི་འགྲོས་དག་ནས་འཁོར་ལོ་བཞིའི་རླུང་སེམས་ལས་སུ་རུང་ཞིང་། དབུ་མའི་རྩ་འདབ་གྲོལ་དུས་དགའ་བཞིའི་འགྲོས་ཀྱི་ཡེ་ཤེས་ཀྱི་སྣང་བ་རིམ་པ་བཞིན་དུ་མཆེད་ནས་འཕོ་བའི་བག་ཆགས་ཐམས་ཅད་ལོག་སོང་བའི་བདེ་ཆེན་རྡོ་རྗེའི་སྐུ་འགྲུབ་པ་དེ་ལྟར་ཡིན་ནོ། །དེ་ལམ་འདི་དང་བསྟུན་ན་ཡེ་ནས་དག་མཉམ་ཆེན་པོ་ཡིན་པ་དེ་ཉིད་རིམ་གཉིས་ལམ་གྱིས་དྲི་མ་བསལ་སྟོབས་ཀྱིས་དག་པ་མངོན་དུ་གྱུར་ཅེས་པ་དེ་ཡིན་ཞིང་། དེས་ན་ཉམས་ལེན་གྱི་ཐོག་ནས་ཐབས་གྲོལ་གྱི་ལམ་གཉིས་བསྟན་པ་འདི་ཐབས་ཤེས་ཀྱི་བྱེད་པ་གཙོ་ཆེ་ཆུང་གི་སྒོ་ནས་ཐབས་གྲོལ་གྱི་ལམ་ཞེས་ཁ་ཁར་བཞག་པ་ཡིན་མ་གཏོགས་གཅིག་གི་ནང་ན་གཅིག་གི་དོན་མི་ཚང་བ་དེ་ལྟར་མ་ཡིན་ལ། གཅིག་ལ་གཅིག་མི་འདུ་བ་ཡང་མ་ཡིན་པ་དང་། གནས་ལུགས་མ་སྐྱེས་པའི་དོན་མཐོང་བ་ལ་གཅིག་པ་ཡིན་ནོ། །སྐབས་དོན་འུ་ཚོས་སྐོང་བའི་ཐད་ནས་སྐད་ཆ་འཕྲོས་པ་ཡིན་ཞིང་། སྤྱིར་ན་འགྱོད་ཚངས་བཤགས་པའི་རིམ་པ་དང་། ཐུགས་དམ་སྐོང་བའི་རིམ་པ་གཉིས་ཀྱིས་ཞི་ཁྲོའི་ཆོས་ཚན་འདིའི་ཆ་ཤས་མང་ཆེ་ས་བཟུང་ཡོད་ལ། འགྱོད་ཚངས་བཤགས་པའི་རིམ་པ་ལ་མཚོན་ན་ལུས་ཀྱི་སྒོ་ནས་མོས་གུས་ཕྱག་གི་བཤགས་པ་བརྒྱ་ཕྱག་སྡིག་སྒྲིབ་རང་གྲོལ་ལྟ་བུ། ངག་གི་སྒོ་ནས་བྱིན་རླབས་སྔགས་ཀྱི་བཤགས་པ་དེ་ཡེ་ཤེས་སྐུ་མཆོག་མ་ལྟ་བུ། ཡིད་ཀྱི་སྒོ་ནས་རྟོག་ཚོགས་ལྟ་བའི་བཤགས་པ་དེ་ལྟ་བའི་ཀློང་བཤགས་ལྟ་བུ། སྒོ་གསུམ་ཐུན་མོང་གི་སྒོ་ནས་སྨེ་ངག་འགྱོད་ཚིག་གི་བཤགས་པ་རུ་ཏྲའི་སྨེ་བཤགས་ལྟ་བུ་དང་། ཀློང་བཤགས་བརྗོད་པ་རང་གྲོལ་རྣམས་ལྟ་བུ་ཡིན་ནོ། །ཐུགས་དམ་སྐོང་བའི་རིམ་པ་ལ་མཚོན་ན་གོང་ནས་བཤད་མ་ཐག་པ་ལྟར་དུ་ཕྱི་ནང་གསང་བ་དེ་ཁོ་ན་ཉིད་ཀྱི་སྐོང་བའི་རྣམ་བཤད་རྒྱུད་དོན་དང་འབྲེལ་ན་ཤིན་ཏུ་ནས་ཀྱང་མང་ལ། ཡིན་ན་ཡང་ད་རེས་བསྐྱུར་རྒྱུ་བྱེད་དགོས་ཤིང་། གནས་འདྲེན་གྱི་གོ་དོན་རེ་ཡང་བཤད་རྒྱུ་ཡོད་ཅིང་། དབང་བསྐུར་གནས་སྐབས་ཀྱི་རིམ་པ་དེ་བས་ཀྱང་གནད་ཆེ་བ་ཡིན་པ་དང་། དབང་བསྐུར་རྒྱུ་དང་། བྱང་ཁྲུས་དང་། གནས་ལུང་སྤར་ཆོག་གི་རིམ་པ་དེ་གནད་ཆེན་ཡིན་ཡང་ཐེངས་འདིར་སྐབས་ཐོབ་མིན་རྒྱུ་མི་བྱེད་པར་དུས་ཚོད་ཀྱིས་འདང་མི་འདུག ཆོས་ཁྲིད་ཏག་ཏག་བཤད་ན་བསྙེན་སྒྲུབ་ཀྱི་མིང་མེད་པ་ཞིག་འགྱུར་འགྲོ་འདུག ངོ་མས་བབས་དང་བསྟུན་ན་དང་པོ་སྨིན་བྱེད་ཀྱི་དབང་དེ་བསྐུར། དེ་ནས་གྲོལ་བྱེད་ཀྱི་ཁྲིད་དང་འབྲེལ་བ་འདིའི་རྒྱུད་དོན་གྱི་རྣམ་བཤད་ཆོས་ཁྲིད་དེ་བཏོན། དེའི་རྗེས་སུ་བསྙེན་སྒྲུབ་ཀྱི་རིམ་པ་ལ་ཞུགས་དགོས་པ་དེ་ལྟ་བུ་ཞིག་ཡིན་ཡང་། བླ་མ་ཁོམ་དུས་སློབ་མ་མི་ཁོམ། སློབ་མ་ཁོམ་དུས་བླ་མ་མི་ཁོམ། ཨ་ལ་རྩེད་མོ་སྟེ་དགོན་པའི་རྒྱུན་སྲོལ་གྱི་སྒྲུབ་ཆེན་དེ་ཚོ་གནད་ཆེན་ངོ་མ་ཡིན་ཞིང་། སྒྲུབ་པ་པོའི་མཆོག་ཐུན་གྱི་དངོས་གྲུབ་འགྲུབ་པར་མ་ཟད་རྒྱལ་ཁམས་སྤྱིའི་རིམ་གྲོ་ལའང་ཇི་ལྟ་བུ་ཞིག་མི་བཟང་སྟེ་ཐུབ་བསྟན་ཆོས་ཀྱི་རྡོ་རྗེས་ཕུར་སྒྲུབ་ཆེན་མོ་གར་འཆམ་དང་བཅས་པ་བཙུགས་ནས་མཐའ་དམག་ལན་གཅིག་བཟློག་སོང་བའི་ལོ་རྒྱུས་ཡོད་པ་ལྟར་ཡིན་ནོ། །ད་རེས་འཚོག་རན་ལ་ཉེ་བའི་བཀའ་གཏེར་གྱི་སྒྲུབ་མཆོད་ཆེན་མོ་ལྟ་བུ་ལ་མཚོན་ན་སྔར་ཡིན་ན་གཏེར་སྒྲུབ་དང་བཅས་པ་བརྩིས་ན་བཀའ་གཏེར་གྱི་མཆོད་ཁག་བཞི་བཅུ་ཐམ་པ་དབུ་མཆོད་བརྒྱད་ཅུ་དགོས་པའི་རྒྱུ་མཚན་དེ་ཡིས་ཡིན་པ་ལྟ་བུ་དེ་ཚོ་སྔ་འགྱུར་བའི་སྤྱིའི་བསྟན་པའི་ནང་བཅུད་ཡིན་ལ། འུ་ཚོས་ད་རེས་ཕྱོགས་གཅིག་ནས་བསྙེན་སྒྲུབ་ཀྱི་སྐོར་གྱི་གོ་དོན་གྱི་ཐད་ཀྱི་སྐྱོར་སྦྱོང་རེ་བྱེད་ཞོར་ཕྱོགས་གཅིག་ནས་ཐུན་བཞི་མི་ཆགས་རྒྱུ་དུས་ཚོད་བྲེལ་འཚུབ་ཅན་ལྟ་བུ་ཡིན་ཡང་བཟང་ཤོས་རྣམས་ཀྱིས་ནི་ཇི་ལྟར་བྱས་ཀྱང་བསྐྱེད་རྫོགས་ཀྱི་གདེང་རེ་རྙེད་འགྲོ་བ་དང་། ལས་དང་པོ་པ་གྲྭ་གཞོན་བྱིས་པའི་ཆ་བྱད་ད་རུང་མ་བཏང་བ་ཚོས་ཁྱིམ་ནས་བུད་དེ་རབ་ཏུ་བྱུང་། དམ་པའི་ཆོས་སྒོར་ཞུགས་པ་རྣམས་ཀྱིས་ཐུན་བཞིའི་ཉམས་ལེན་གྱི་རྣལ་འབྱོར་ནི་འདི་འདྲས་འབད་དགོས་འདུག་བསམ་པའི་ཕྱོགས་སྟོན་ཞིག་རྙེད་འགྲོ་རྒྱུ་རེད་སྙམ། འདས་མ་ཐག་པའི་ན་ནིང་གི་དགུན་ཁ་ལ་འབྲུག་ཆེན་རིན་པོ་ཆེས་དབུ་འདྲེན་འོག་ནས་རྫོགས་ཆེན་དགོན་པའི་གྲྭ་གཞོན་མང་པོ་ཞིག་གིས་ཐུན་མཉམ་དུ་བསྡམས་ནས་སྔོན་འགྲོ་འབུམ་ལྔའི་བསགས་སྦྱངས་མཛད་རབས་གོ་བྱུང་། དེ་ཚོ་བསྟན་པའི་མིག་རྒྱན་ཡིན་ལ། རྗེས་སུ་ཡི་རང་ཞུ་བཞིན་ཡོད། འབུམ་ལྔ་བླ་མའི་རྣལ་འབྱོར་དང་བཅས་པ་ཆ་ཚང་སོག་ཡོད་མེད་ལ་མ་ལྟོས་པར་དེའི་ནང་ལ་ཞུགས་ཚད་པོ་ད་ལོའི་ཡེ་ཤེས་བླ་མའི་ཁྲིད་གསན་འདོད་ན་དེའི་ནང་ཞུགས་ཆོག་རྒྱུ་རེད་སྙམ་གྱིན་ཡོད། དེ་འདྲ་ཡིན་དུས་འདིའི་དགོས་འབྲེལ་གནད་ཆེན་སྐོང་བ་ལ་མཚོན་ན་སྨན་རཀ་གཏོར་གསུམ་མར་མེ་ལ་སོགས་པའི་སྐོང་བ་ལ་བཤད་པ་མང་ཡང་དེ་ཁོ་ན་ཉིད་ཀྱི་སྐོང་བཤགས་ཕྱི་ཀུན་རྫོབ་སྒྱུ་མ་ལྟ་བུའི་ལྷའི་རྣམ་རོལ་ལས་ལུས་ཀྱི་ཕྱག་རྒྱ་གར་སྟབས་དང་། ནང་རིག་པ་སྐྱེ་འགག་གནས་གསུམ་དང་བྲལ་བ་སྤྲོས་བྲལ་བདེ་བ་ཆེན་པོའི་ངང་ལ་མ་བཅོས་པར་གཞག་རྒྱུ། གསང་བ་གྲག་སྟོང་སྐྱེ་མེད་ཀྱི་གདངས་ལས་ཀུན་རྫོབ་ཀྱི་གཞོམ་བྱ་ཐམས་ཅད་འཁོར་གསུམ་ཡོངས་དག་ཆེན་པོའི་ཀློང་དུ་སྐོང་ཞིང་བཤགས་པ་དེ་ཚོ་རྩ་བ་ཡིན་ནོ། །དེའི་རྗེས་ནས་ཚོགས་རྫས་འབྲིམ་རན་སོང་བ་ཡིན་ལ། ལས་ཀྱི་རྡོ་རྗེས་སློབ་དཔོན་ལ་གུས་ཕྱག་འཚལ་ཏེ་ཞུ་ལེན་མཐོང་བ་བརྒྱུད་པའི་ཕྱག་ལེན་ལྟར་བྱས་ནས་ཐབས་ཤེས་ཀྱི་རྫས་རྣམས་རིམ་གྱིས་ཡར་འབུལ། དེ་ནས་འདུས་པ་རྣམས་ལ་རིམ་གྱིས་བྲིམས་ཏེ་རོལ་བའི་སྐབས་སུ་བཟའ་བཏུང་ཐམས་ཅད་དཀྱིལ་འཁོར་གསུམ་ལྡན་གྱི་ངང་ནས་དང་དུ་ལེན་དགོས། གུ་རུ་རིན་པོ་ཆེས། བསྐྱེད་རྫོགས་དང་བྲལ་བཟའ་བ་ཟ་བ་རྣམས། །ཁྱི་ཕག་ཟས་ལ་སྤྱོད་དང་ཁྱད་མེད་པས། །ཞེས་གསུངས་ལ། ཚོགས་འཁོར་གྱི་སྐབས་མིན་ན་ཡང་བཟའ་བཏུང་གི་རྣལ་འབྱོར་གཞུང་ནས་བཤད་པ་བཞིན་དུ་དག་དྲན་ཐུབ་ན་ཚོགས་བསགས་ཞོར་དུ་འབྱུང་བ་ཡིན་ནོ། །བཟའ་བཏུང་ཐམས་ཅད་ཚོགས་འཁོར་གྱི་ཚུལ་དུ་མཆོད་ཅིག་ཅེས་འུ་ཚོས་འདོན་པ་དེ་ཁ་ཟེར་མིན་པར་དོན་ཟེར་བྱེད་དགོས་ཤིང་། རབ་ན་དབང་བཞིའི་གོ་དོན་དང་སྦྲགས་ཏེ། བུམ་དབང་གི་བཟའ་བའི་དམ་ཚིག་དང་བསྟུན་ནས་ཤ་ལྔ་བདུད་རྩི་ལྔའི་རང་བཞིན་དུ་ཤེས་རྒྱུ། གསང་དབང་དང་བསྟུན་ནས་བྱང་སེམས་དཀར་དམར་གྱི་རང་བཞིན་དུ་ཤེས་པ། དབང་གསུམ་པ་ཤེས་རབ་ཡེ་ཤེས་ཀྱི་དབང་དང་བསྟུན་ནས་ཐབས་ཤེས་ཟུང་འཇུག་གི་རྣམ་རོལ་དུ་ཤེས་པ། ཚིག་དབང་རིན་པོ་ཆེ་དང་བསྟུན་ནས་སྟོང་གསལ་མཁའ་ཁྱབ་འདུས་མ་བྱས་པར་ཤེས་པའི་ངང་ནས་དང་དུ་ལེན་པ་དང་། ལས་དང་པོ་པས་དེ་ཙམ་ཞིག་དང་དུ་ལེན་མ་ནུས་ན་ཡང་རང་ལུས་ཕུང་ཁམས་སྐྱེ་མཆེད་རྒྱལ་བ་ཞི་ཁྲོའི་དཀྱིལ་འཁོར་གྱི་རྣམ་པ་མ་བསྐྱེད་ཡེ་རྫོགས་ཀྱི་རང་བཞིན་དུ་ཡོད་པ་དེ་ཉིད་ངེས་ཤེས་དང་དག་དྲན་གྱི་ཐོག་ནས་ནང་གི་སྦྱིན་སྲེག་མན་ངག་གི་ལུགས་སྒྲ་ཇི་བཞིན་པ་དང་དུ་ལེན་རྒྱུ་དེ་ལྟར་དགོས་སོ། །དེ་ཡང་མ་ནུས་ན་ཕུང་ཁམས་སྐྱེ་མཆེད་གདོད་ནས་ལྷ་ཡི་རང་བཞིན་ཡིན་པ་དེ་དག་ལ་མཆོད་པ་འབུལ་བའི་བསམ་པ་ཡིས་ཐ་མལ་གྱི་སྣང་ཞེན་སྦྱངས་ནས་ཟོས་ན་རང་ཉིད་ལ་ཁ་ཟས་ཀྱི་བུ་ལོན་མི་འགྱུར། གཞན་དག་ལ་བསོད་ནམས་ཁྱད་པར་ཅན་ཐོབ་པའི་དགོས་པ་ཡོད་པ་དེ་ལྟར་ཡིན་ཞིང་། །ཅི་ཡང་མིན་ན་ལོག་འཚོའི་ཟས་ཀྱི་འཇིགས་པ་ལས་གྲོལ་བའི་དགོས་པ་དང་ལྡན་ནོ།། ༼ཇ བདུན་པ་ལྷག་མ་བསྔོ་བ། ད་ནི་ཚོགས་ལས་ཀྱི་ལེའུ་བདུན་གྱི་ནང་ནས་བདུན་པ་ལྷག་མའི་གཏོར་མ་འབུལ་བ་ནི། ལྷག་མ་བསྔོ་བ་ནི༔ ཨོཾ་ཨཱཿཧཱུྃ༔ ལྷག་ལ་དབང་བ་དྲེགས་པའི་ཚོགས༔ སྤྲིན་ལྟར་གཏིབས་ཤིང་ཧབ་ཤ་རྒྱུག༔ ཤ་ཁྲག་བརྒྱན་པའི་ཚོགས་ལྷག་བཞེས༔ སྔོན་གྱི་དམ་བཅས་ཇི་བཞིན་དུ༔ བསྟན་དགྲ་དམ་ཉམས་ཟས་སུ་ཟོ༔ རྟགས་དང་མཚན་མ་མྱུར་དུ་སྟོན༔ སྒྲུབ་པའི་བར་ཆད་བཟློག་པ་དང་༔ ཕྲིན་ལས་ཐོགས་མེད་འགྲུབ་པར་མཛོད༔ ཅེས་གསུངས་ཏེ། ཨོཾ་ཨཱཿཧཱུྃ་གསང་བ་གསུམ་གྱི་ངོ་བོ་ཡིན་པ་གཞི་བཞག་ལ། ལྷག་གཏོར་ཡེ་ཤེས་ཀྱི་བདུད་རྩིར་སྦྱོང་སྤེལ་སྒྱུར་བའི་ནུས་པ་ཅན་གྱི་ཡི་གེ་གསུམ་གྱིས་མགོ་དྲངས་ནས། ལྷག་ལ་དབང་བ་དཀྱིལ་འཁོར་ཆེན་པོའི་མུ་རན་ལ་གནས་པའི་བཀའ་ཡི་ཕོ་ཉ་དབང་ཕྱུག་མ་ཉི་ཤུ་རྩ་བརྒྱད། མཁའ་འགྲོ་སོ་གཉིས། མ་བདུན་སྲིང་བཞི། ཕོ་ཉ་སུམ་བརྒྱ་དྲུག་ཅུ་ལ་སོགས་པ་བཀའ་སྡོད་དྲེགས་པའི་ཚོགས་དང་བཅས་པ་ཡིན་ཞིང་། འདི་ནས་དྲེགས་པའི་ཚོགས་ཞེས་པ་བྱེ་བྲག་གི་མིང་སྤྱི་ལ་འཇུག་པའི་སྐབས་ཡིན་ནོ། །དེ་ལྟ་བུའི་ལས་མཁན་ཕོ་ཉའི་ཚོགས་མང་བ་སྤྲིན་ལྟར་གཏིབས་པ། མྱུར་བ་གློག་ལས་མགྱོགས་པ། དགྲ་བོའི་ཤ་ཁྲག་བླ་ཚེ་ལ་ཧབ་ཐོབ་ཀྱིས་ཤ་ལ་འཚངས་ཤིང་རྒྱུག་འབྲལ་བྱེད་པའི་ལས་བྱེད་གིང་དང་ཕོ་ཉས་དམ་ཉམས་དགྲ་བོའི་ཤ་ཁྲག་གིས་བརྒྱན་པའི་གཏོར་མ་འདི་བཞེས་ཏེ། སྔོན་ཁྲག་འཐུང་དཔལ་ཆེན་ཧེ་རུ་ཀའི་མདུན་ནས་ཇི་ལྟར་ཁས་བླངས་དམ་བཅས་པ་བཞིན་དུ་བསྟན་ལ་གནོད་པ་ཅན་དམ་ཚིག་ཉམས་པ་སྐལ་མེད་ལོག་ལྟ་ཅན་དེ་དག་སྙིང་རྗེས་སྒྲོལ་བའི་དམ་ཚིག་དང་དུ་ལོངས་ལ་ཤ་ཁྲག་རྔམ་ཟས་སུ་ཟོ་ཞེས་དང་། བསད་རྟགས་དོན་སྙིང་ཁྱེར་ལ་ཤོག་གསུངས་པ་ལྟར་དུ་དགྲ་བགེགས་ཚར་བཅད་པའི་དཔའ་རྟགས་དང་མཚན་མ་མྱུར་དུ་སྟོན། ཕྱིའི་དགྲ་བགེགས་བསྒྲལ་བ་དང་། ནང་གི་བར་ཆད་བཟློག་པ་གང་བཅོལ་ལས་བཞིའི་ཕྲིན་ལས་ཐོགས་ཤིང་འགོར་འགྱངས་མེད་པར་མྱུར་དུ་འགྲུབ་པར་མཛོད་ཅེས་གསུངས་པ་ཡིན་ནོ། །ཨུ་ཙིཥྚ་བྷ་ལིང་ཏ་ཞེས་ཨུ་ཙིཥྚ་ལྷག་མ། བྷ་ལིང་ཏ་གཏོར་མ། ཁཱ་ཧི༔བཞེས་ཤིག་ཡིན་ལ། ལས་ཀྱི་རྡོ་རྗེས་དེའི་སྐབས་སུ་མཁའ་ལྡིང་གི་རྒྱ་དང་བཅས་ཏེ། ཕྱིར་ནུད་ཀྱི་འགྲོས་དང་བཅས་པས་ལྷག་གཏོར་དེ་སྒྲུབ་ཁང་གི་ཕྱི་རོལ་དུ་སྲིན་མོའི་ཟ་ལམ་ཆེན་མོའི་ནང་དུ་བསྐྱལ་དགོས་སོ།། ༼ཁ༽ གཉིས་པ་སྲུང་མ་ལས་ལ་བསྐུལ་བ། རྗེས་ཀྱི་ལེའུ་གཉིས་པ་སྲུང་མ་ལས་ལ་བསྐུལ་བ་ནི༔ ཧཱུྃ་བྷྱོ༔ བཀའ་དང་དམ་ཚིག་གཞལ་ཡས་སུ༔ མཁའ་འགྲོ་ཆོས་སྐྱོང་བཀའ་སྲུང་རྣམས༔ ལ་ལས་བསྟན་པའི་གཞི་འཛིན་མཛད༔ ལ་ལས་བཀའ་ཡི་བྱ་ར་མཛད༔ ལ་ལས་ཆོས་མཛད་སྲུང་མ་མཛད༔ ལ་ལས་གཙུག་ལག་དཀོར་ཁང་བསྲུང་༔ ལ་ལས་ཡུལ་དགོན་དབེན་གནས་བསྲུང་༔ ལ་ལས་དམ་ཚིག་ལས་རྗེས་གཅོད༔ ལ་ལས་སྒྲུབ་པའི་སྡོང་གྲོགས་མཛད༔ ལ་ལ་སྟོང་གསུམ་ཁྱབ་པར་རྒྱུག༔ ལ་ལ་བསམ་གཏན་ངང་ལ་གནས༔ ལ་ལས་སྐྱེ་འགྲོའི་བླ་ཚེ་རྐུ༔ ལ་ལ་སྲོག་གཅོད་སྲིན་པོའི་རིགས༔ ལ་ལ་གཙང་སྦྲ་བྲམ་ཟེའི་རིགས༔ ལ་ལ་རིམས་དང་ནད་ཀྱི་བདག༔ ལ་ལ་ལྟས་ངན་ཆོ་འཕྲུལ་བདག༔ སྤྲུལ་པ་ཡང་སྤྲུལ་བསམ་མི་ཁྱབ༔ འཁོར་དང་ལས་བྱེད་བྱེ་བ་འབུམ༔ ཀུན་ཀྱང་ཞི་ཁྲོའི་ཆོ་འཕྲུལ་ཏེ༔ རིག་རྩལ་རོལ་པ་ཐོགས་མེད་འཕྲོ༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་གསུངས་ཏེ། ཐོག་མའི་མགོ་ལེན་གྱི་ཧཱུྃ་དེ་དཔལ་གྱི་ཐུགས་སྲོག་གིས་མགོ་འདྲེན་བྱས་ནས་ཕོ་རྒྱུད་ལས་ལ་སྐུལ་བའི་སྐད་བརྡ་དང་། དེའི་མཚམས་སུ་བྷྱོ་ཞིག་ཡོད་པ་དེ་འཇིགས་བྱེད་མ་མོའི་སྲོག་སྔགས་མོ་རྒྱུད་སྟོང་ཁམས་ཉུལ་བའི་ར་མདའ་སྦྲོན་པའི་སྔགས་ཀྱིས་བསྐུལ་ནས་སྲུང་མ་ལས་ལ་འགྱེད་པ་ཡིན་ལ། འདིའི་བཀའ་ཉན་གྱི་གིང་དང་། བཙན་བདུད་དང་། གནོད་སྦྱིན་གཟའ་དང་། སྲིན་པོ་ཀླུ་ལ་སོགས་པའི་སྐྱེ་རྒྱུད་དང་། གསོལ་ན་ཇི་ལྟར་གསོལ་དགོས། བསྟེན་ན་ཇི་ལྟར་བསྟེན་དགོས། སྒྲུབ་ན་ཇི་ལྟར་སྒྲུབ་དགོས་པ་ལ་སོགས་པ་དང་། མོ་རྒྱུད་མ་མོ་དབང་དུ་མ་འདུས་ན་འཁུ་ལྡོག་མང་ཞིང་ལས་ལ་གཡེལ་རྒྱུ་ལ་སོགས་པ་ཁུངས་རྒྱུ་མཚན་གྱི་བཤད་པ་མང་ངོ་། །སྲིད་པ་མ་མོའི་དཀྱིལ་འཁོར་ལ་མཚོན་ན་དབྱིངས་ཀྱི་ཡུམ་དྲུག རང་བཞིན་གྱི་རྣལ་འབྱོར་མ་བཅུ་བཞི། སྨན་མོ་ལྔ་བཅུ་རྩ་བརྒྱད་ལ་སོགས་པ་ལས་དང་ཡེ་ཤེས་ཀྱི་མཁའ་འགྲོ་འབུམ་སྡེ་བསམ་ཡས་གྲངས་ལས་འདས་པ་ཡོད་ཅིང་། དེ་ཐམས་ཅད་ཕ་མ་སྡེ་དང་ཁྱོ་རིགས་ལ་སོགས་པ་ངོ་མཚར་ཅན་གྱི་གཏམ་རྒྱུད་དང་འབྲེལ་བ། དེ་རྣམས་དབྱིངས་ཀྱི་ཡུམ་དྲུག་ལ་སོགས་པ་དེ་ཐམས་ཅད་ཆོས་ཀྱི་དབྱིངས་ལས་སྤྲུལ་ཞིང་རྣམ་རྟོག་གི་དབང་གིས་སྣང་བ་ཡིན་པའི་ལོ་རྒྱུས་མང་པོ་བཤད་རྒྱུ་ཡོད་ཀྱང་ད་རེས་ཡིན་ན་མིན་ན་འཕྲོས་དོན་དེ་མང་མི་ཉན་ཞིང་། སྤྱིར་ན་ཆོས་ཁྲིད་ཡུན་རིང་མི་ཉན་ལ། བཤད་པ་ཉོག་ན་མི་ཡག་མོད། དེ་བསམ་ཞོར་དུ་དུས་ཚོད་ཡུན་རིང་བ་རེ་འུ་ཚོས་ཤོར་འགྲོ་འདུག མདོར་ན་ཞི་ཁྲོའི་དཀྱིལ་འཁོར་ཆེན་པོའི་བཀའ་དང་དམ་ཚིག་ལ་གནས་པའི་མཁའ་འགྲོ་ཆོས་སྐྱོང་སྲུང་མས་བསྡུས་པའི་རིག་འཛིན་ནང་གི་དགེ་འདུན་ཡིན་པ་དང་། རྣམ་བཞིའི་ཕྲིན་ལས་རབ་འབྱམས་གང་ལ་གང་འོས་ཀྱི་མཛད་པ་ཅན་སྡེ་བརྒྱད་ལྷ་དང་མི་སྲུན་གྱི་གཟུགས་སྣ་ཚོགས་སྟོན་ཅིང་ལས་སྣ་ཚོགས་བྱེད་པ་པོ་ཐམས་ཅད་དཔལ་ཆེན་ཁྲོ་བོའི་རྒྱལ་པོ་ཆེ་མཆོག་ཀུན་ཏུ་བཟང་པོ་ཧེ་རུ་ཀའི་ཐུགས་ཆོས་དབྱིངས་ཆེན་པོ་གཅིག་གི་ཁོངས་སུ་འདུ་ལ། སྤྲོ་བསྡུའི་བྱེད་པོ་དཀྱིལ་འཁོར་གྱི་གཙོ་བོ་གཅིག་པའི་ཞི་ཁྲོ་རོལ་བའི་ཆོ་འཕྲུལ་ལས་བྱུང་བའི་བཀའ་སྡོད་ཕོ་ཉ་དང་བཅས་པ་ལས་ལ་རེམས་ཤིང་གང་བཅོལ་བའི་ཕྲིན་ལས་ཐོགས་མེད་མྱུར་དུ་སྒྲུབས་ཤིག་ཅེས་གསུངས་པའོ། །ཅེས་པས་བསྐུལ་ཞིང་ཕྲིན་ལས་བཅོལ༔ ས་མ་ཡ༔ རྒྱ་རྒྱ་རྒྱ༔ཞེས་གསུངས་ཏེ། ལེའུ་གཅིག་གི་ཆོས་ཚན་ལ་གཏེར་རྟགས་ཀྱི་རྒྱ་རིམ་པ་དྲུག་གིས་གཏད་པའོ།། ༼ག༽ གསུམ་པ་བཀའ་ཡི་ཆད་མདོ། གསུམ་པ་བཀའ་ཡི་ཆད་མདོ་ནི༔ཞེས་ཆད་མདོ་དང་ཆད་ཐོ་གཉིས་དོན་གཅིག་ཡིན་ལ། སྔོན་ཆད་ཁས་བླངས་པའི་ཆད་དེ་འུ་ཚོའི་ཁ་ཆད་ཀྱི་ཆད་དང་གཅིག་ཡིན་ཞིང་། མདོ་ཞེས་པ་ཁ་ཆད་བྱས་པ་དེ་ཉིད་ལས་དང་བྱ་བ་དུས་ཚོད་ལ་སོགས་པའི་མཚམས་ཚིག་ཡོད་པ་ཡིན་པས། དེའི་བཤད་པ་གཏམ་མཚམས་ཀྱི་མདོ་དོན་ནམ་མདོ་བྱང་ངམ་ཐོ་བྱང་ཡང་བསྐྱར་ཐ་ཚིག་གི་ཚུལ་དུ་བསྒྲགས་ནས་ཁས་བླངས་དམ་བཅའ་དེ་མི་ཉམས་པའི་དྲན་སྐུལ་དང་། དེ་དང་མཉམ་དུ་གཏོར་མ་མཐུན་རྫས་སུ་འབུལ་བ་དེ་ཆད་མདོ་ཡིན་ནོ།། ཧཱུྃ༔ སྔོན་ཚེ་འདས་དུས་བསྐལ་བའི་དང་པོ་ལ༔ བཅོམ་ལྡན་ཁྲག་འཐུང་ཆེ་མཆོག་ཧེ་རུ་ཀས༔ དྲེགས་པ་རཱུ་ཏྲའི་སྡེ་དཔུང་བཏུལ་བའི་ཚེ༔ ཀཽའུ་རཱི་ཕྲ་མེན་དབང་ཕྱུག་ཉེར་བརྒྱད་དང་༔ སྲུང་མ་དམ་ཅན་རྒྱ་མཚོ་ཐམས་ཅད་ཀྱིས༔ ཅི་ལྟར་ཁས་བླངས་དམ་བཅས་ཇི་བཞིན་དུ༔ གཏོར་མ་འདི་བཞེས་བདག་གི་སྡོང་གྲོགས་མཛོད༔ ཅེས་གསུངས་ཏེ། ཧཱུྃ་ཞེས་ཡང་དཔལ་ཆེན་ཁྲག་འཐུང་ཆེན་པོའི་ཐུགས་སྲོག་གི་ཡི་གེས་ཆེ་བཙན་གྱིས་བརྗིད་པར་བྱས་ནས། བཅོམ་ལྡན་ཁྲག་འཐུང་ཧེ་རུ་ཀས་དྲེགས་པ་རཱུ་ཏྲའི་སྡེ་དཔུང་འདུལ་དུས་ཞེས་གླེང་གཞི་ཞིག་བཞག་པར་མཛད་དེ། རྒྱུད་ཀྱི་ནང་ན་གདུལ་བྱ་ལས་ཀྱི་ཁྲོ་བོའི་བྱུང་ཚུལ་དང་། འདུལ་བྱེད་ཡེ་ཤེས་ཀྱི་ཁྲོ་བོས་བཏུལ་ཚུལ་གཉིས་ཀྱིས་གསུངས་ཡོད་དོ། །གདུལ་བྱ་ལས་ཀྱི་རཱུ་ཏྲ་དེ་རྒྱུ་གང་གིས་བསྐྱེད་ན་དགེ་སྡིག་གི་ལས་འབྲས་བསླུ་མེད་ཀྱི་རྟེན་འབྲེལ་ལ་རྨོངས་ཏེ་གསང་སྔགས་ཟབ་མོ་སྒྲ་ཇི་ལྟ་བར་སྤྱད་ནས་བྱུང་བ་དེ་ཐར་བ་ནག་པོ་ལྟ་བུ་ཡིན་ལ། རྒྱུ་དེ་བསགས་ནས་འབྲས་བུ་མྱོང་ཚུལ་ལ་རྣམ་སྨིན་གྱི་འབྲས་བུ་ངན་སོང་གསུམ་གྱི་སྡུག་བསྔལ་བསྐལ་ཆེན་མང་པོ་ལ་མྱོང་ཞིང་། རྒྱུ་མཐུན་གྱི་འབྲས་བུ་ལ་ལས་མྱོང་སྟོབས་ཀྱིས་ཟད་སྐབས་སུ་ཡང་རྒྱུ་མཐུན་གྱི་འབྲས་བུ་གཞན་ལ་འཚེ་བ་ཅན་ཞིག་ཏུ་སྐྱེས་ནས་ངོ་བོ་ཡི་དྭགས་ཀྱི་འགྲོ་བས་བསྡུས་ལ། ཆ་ལུགས་སྲིན་པོ་ཆེན་པོ་ཁྲོ་བོའི་ཆས་ཅན་སྟོབས་དང་ལྡན་པ་བསམ་གཏན་བཞི་བའི་གནས་རིས་མན་ཆད་དབང་དུ་སྡུད་མཁན་ཞིག་ཏུ་གྱུར་པ་ཡིན་ནོ། །དེ་འདྲ་སྟོབས་ཆེ་བ་དེ་སྔར་ཁྲོ་བོ་བསྒོམས། དྲག་སྔགས་བཟླས། དེ་ཡང་རང་མཚན་ཅན་དུ་ཞེན་ནས། དངོས་པོ་བཞི་ལ་སྤྱད་པ་དེ་ཉིད་ཀྱིས་རཱུ་ཏྲ་སྟོབས་ཆེན་དེ་ལྟ་བུ་ཞིག་གི་སྐྱེ་བ་བླངས་པ་དེ་ཉིད་གཞན་གྱིས་འདུལ་ཐབས་མེད་ནས་དཔལ་ཆེན་ཧེ་རུ་ཀས་བཏུལ་བ་ཡིན་ནོ། །ཕྲིན་ལས་དྲག་པོས་གདུག་པ་ཅན་ཚར་གཅད་ལུགས་དེ་ཡང་ཕོ་རྒྱུད་མངོན་སྤྱོད་དྲག་པོས་བསྒྲལ་བ་དང། མོ་རྒྱུད་སྦྱོར་བ་ཆེན་པོས་རོལ་བ་གཉིས་ཀྱིས་དབང་དུ་བསྡུས་ནས། ཐུགས་རྗེས་རྗེས་སུ་བཟུང་བས་སྟོང་ཁམས་ཐམས་ཅད་མཉམ་དུ་བཏུལ་ལ། དྲེགས་པ་ཅན་གྱིས་འབངས་སུ་ཁས་བླངས་ཏེ། དབང་བསྐུར་ནོད་དུས་བཀའ་དང་དམ་ཚིག་ལས་མི་འདའ་བར་ཁས་བླངས་པ་ཡིན་ནོ། །དེ་ལྟར་ཁས་བླངས་པ་བཞིན་དུ་གཏོར་མ་འདི་བཞེས་ལ་རྣལ་འབྱོར་སྒྲུབ་པ་པོ་བདག་གི་སྡོང་གྲོགས་མཛོད་གསུངས་ནས་ཆད་མདོའི་མདོ་བྱང་བསྒྲགས་པའོ།། དེ་ནས་དངོས་སུ་གཏོར་མ་འབུལ་བའི་ཚིག་ནི། ཧཱུྃཿ སྔོན་ཚེ་ཁས་བླངས་དམ་ལས་མ་འདའ་བར༔ ཆད་ཐོའི་དམ་ཅན་སྲུང་མ་ཐམས་ཅད་ཀུན༔ ཤ་ཁྲག་བརྒྱན་པའི་གཏོར་མ་འདི་བཞེས་ལ༔ ད་ལྟ་རྣལ་འབྱོར་བདག་གི་སྡོང་གྲོགས་མཛོད༔ ཅེས་གསུངས་ཏེ། གོང་གི་དོན་དང་འདྲ་བའི་ཁས་བླངས་བསྒྲགས་པ་དང་ལྷན་དུ་སྔར་གྱི་སྲིན་མོ་ཆེན་མོ་དང་དྲེགས་པ་ཅན་དེ་ཚོས་ཁམས་གསུམ་འགྲོ་བའི་སྲོག་དབུགས་སྡུད་པར་བྱེད་པ་ཡིན་ཞིང་། བཅོམ་ལྡན་འདས་དཔལ་ཆེན་ཧེ་རུ་ཀས་དཀྱིལ་འཁོར་གཉེན་པོའི་གྲལ་དུ་བཀོད། འགྲོ་བའི་སྲོག་དབུགས་ལ་མི་འཚེ་བར་ཁས་བླངས་པའི་སྐབས་སུ་དམ་ཉམས་དགྲ་བོའི་ཤ་ཁྲག་ཟས་སྐལ་དུ་གཏད་པ་ལྟར་དུ་གཏོར་མ་དམིགས་རྟེན་དུ་བྱས་པའི་ཉམས་པའི་ཤ་ཁྲག་དྲོད་དབུགས་མཐུན་རྫས་ལ་ཕུལ་ནས་ཕྲིན་ལས་བཅོལ་བ་ཡིན་ནོ། །འདིའི་སྔོན་ཚེ་འདས་དུས་ཞེས་པ་ནམ་ཞིག་ནས་ཡིན་སྙམ་དུ་དེ་ལྟར་བསམ་སྲིད་མོད། སྔོན་བསྐལ་བ་ཆེན་པོ་སྟོང་ཕྲག་བཅུ་གཉིས་ལྷག་ཅིག་འདས་པའི་སྔ་རོལ་ཞིག་ལ་སངས་རྒྱས་མི་བསྐྱོད་པའི་བསྟན་པ་བྱུང་དུས་གསང་སྔགས་སྤྱོད་པའི་དགེ་སློང་ཐུབ་དཀའ་གཞོན་ནུ་ཟེར་བ་ཞིག་ཡོད་པ་ལས། ཐར་བ་ནག་པོ་དང་དན་ཕག་གཉིས་ཀ་དཔོན་གཡོག་བྱས་ནས་ཆོས་ཞུས། བར་ཞིག་ནས་ལྟ་བ་མ་མཐུན། ཐར་བས་གསང་སྔགས་སྒྲ་ཇི་བཞིན་པར་སྤྱད་པའི་མཐར་མི་འཚམས་པའི་ལས་མང་པོ་ཞིག་བསགས་ཏེ་ད་ལྟ་གོང་ནས་བཤད་པ་དེ་ཉིད་གསུངས་ཡོད་ཀྱང་། དོན་ངོ་མའི་ཐོག་ནས་བཤད་ན་ཀུན་ཏུ་བཟང་པོའི་ཁྲོ་བོའི་དཀྱིལ་འཁོར་དུ་གནས་པའི་རང་སྣང་ལས་སྣང་བ་ཡིན་དགོས་ཤིང་། རང་བཞིན་གྱི་དཀྱིལ་འཁོར་ཞེས་གསུངས་པ་དེ་རྐྱང་པས་ཀྱང་གོ་ཐུབ་བོ། །དེ་གལ་སྲིད་མིན་རྒྱུ་ཞིག་ཡིན་ན་འཁོར་འདས་གཉིས་ཀ་དཀྱིལ་འཁོར་གཅིག་ལ་རྫོགས་མི་རུང་བ་ཡིན་ལ། སངས་རྒྱས་ཀྱི་རྣམ་པར་འཕྲུལ་བ་འདྲ་མི་འདྲ་སྣ་ཚོགས་སུ་སྣང་བ་དེ་ཡང་གདུལ་བྱའི་དབང་དང་གཞི་ལ་གནས་པའི་དབྱེ་བའི་ཐོག་ནས་སྐུ་དང་ཡེ་ཤེས་ཀྱི་རོལ་བ་ཐ་དད་པར་སྣང་གིན་ཡོད་ཅིང་། དོན་གྱི་ངོ་བོའི་ཐོག་ནས་ཡིན་ན་འཁོར་འདས་གཉིས་སུ་མེད་ལ། རྒྱུ་གཅིག་པ་དང་ཡིག་འབྲུའི་ཚུལ་ལ་སོགས་པའི་གོ་བ་འཆར་གཞིའི་ངང་ལས་དེ་དང་དེར་སྣང་བ་ནི་ལྷུན་གྱིས་གྲུབ་པའི་ཡེ་ཤེས་འགག་པ་མེད་པས་ཡིན་ནོ། །དེས་ན་སྔོན་ཚེ་འདས་དུས་ཞེས་པ་རྫོགས་ཆེན་སྒོམ་པའི་རྣལ་འབྱོར་པ་ཞིག་གི་ངོ་ཁ་ལ་སྦྱར་ན་བསྐལ་བ་མང་པོ་དཔེར་བརྗོད་བཞག་ནས་གཞི་ཀ་དག་གི་གནས་ལུགས་བསམ་བརྗོད་དཔེ་ཡིས་མཚོན་པ་དང་བྲལ་བའི་ངོ་བོ་དེ་ལས་མ་གཡོས་བཞིན་དུ་རང་བཞིན་གསལ་བའི་རིག་གདངས་ཤར་བའི་སྐབས་སུ་ལྷུན་གྲུབ་ཀྱི་སྣང་བ་ཤར་གྲོལ་དུས་མཉམ་པའི་ཚེ་ན་ཆོས་དབྱིངས་དོན་གྱི་འོག་མིན་ན་ཀུན་ཏུ་བཟང་པོ་ཡེ་སངས་རྒྱས་པ་རང་གི་ངང་དེ་ལས་རང་བྱུང་འོད་ལྔའི་དཀྱིལ་འཁོར་ཞལ་ཕྱེས་ནས་འདུལ་བྱེད་ལོངས་སྐུའི་ཁྲོ་བོའི་དཀྱིལ་འཁོར་བཀོད་དུས་རང་སྣང་རྣམ་པར་དག་པ་དེ་ཉིད་ལས་གདུལ་བྱ་ཁྲོ་བོའི་རང་རྩལ་ཤར་བའི་གོ་བ་དེ་འདྲ་ཞིག་ལེན་དགོས་སོ།། ༼ང༽ བཞི་བ་གཏོར་སྐྱོང་བྱ་བ། བཞི་བ་གཏོར་སྐྱོང་བྱ་བ་ནི༔ འདི་ནས་བཤལ་ཆུ་བྲན་དགོས་ལ། བརྟན་མའི་གཏོར་མ་ལ་བྲན་ནས་འབྲུ་གསུམ་གྱིས་ཟད་མེད་ལོངས་སྤྱོད་ཀྱི་གཏེར་དུ་སྤེལ་བའི་ཆེད་དུ་ཨོྃ་ཨཱཿཧཱུྃ་བཏགས་ནས། ཧཱུྃ་བྷྱོཿ ཤར་གྱི་དབང་ཕྱུག་མ་བདུན་གཏོར་མ་ལོངས༔ ཉོན་མོངས་དགྲ་བགེགས་ཞི་བའི་ཕྲིན་ལས་མཛོད༔ ཧཱུྃ་བྷྱོཿ ལྷོ་ཡི་དབང་ཕྱུག་མ་བདུན་གཏོར་མ་ལོངས༔ བསོད་ནམས་ཡེ་ཤེས་རྒྱས་པའི་ཕྲིན་ལས་མཛོད༔ ཧཱུྃ་བྷྱོཿ ནུབ་ཀྱི་དབང་ཕྱུག་མ་བདུན་གཏོར་མ་ལོངས༔ འཁོར་འདས་དབང་དུ་སྡུད་པའི་ཕྲིན་ལས་མཛོད༔ ཧཱུྃ་བྷྱོཿ བྱང་གི་དབང་ཕྱུག་མ་བདུན་གཏོར་མ་ལོངས༔ མ་རིག་སྡིག་སྒྲིབ་ཚར་གཅོད་ཕྲིན་ལས་མཛོད༔ ཧཱུྃ་བྷྱོཿ སློབ་དཔོན་པདྨའི་སྤྱན་སྔར་ཁས་བླངས་པའི༔ བོད་ཁམས་སྐྱོང་བའི་བསྟན་མ་བཅུ་གཉིས་དང་༔ བྲན་གཡོག་འཁོར་བཅས་བཀའ་ཡི་གཏོར་མ་ལོངས༔ མི་མཐུན་བར་ཆད་རྐྱེན་ངན་བཟློག་ཏུ་གསོལ༔ ཉམས་རྟོགས་བསོད་ནམས་འཕེལ་བའི་སྡོང་གྲོགས་མཛོད༔ བཅོལ་པའི་ཕྲིན་ལས་ཁྱོད་ཀྱིས་འགྲུབ་པར་མཛོད༔ ཅེས་གསུངས་ཏེ། སྔོན་ཆད་དཔལ་ཆེན་ཧེ་རུ་ཀས་འཇིག་རྟེན་གྱི་དྲེགས་པ་ཅན་དབང་དུ་བསྡུ་སྐབས་དེ་རྣམས་ཀྱི་འཁོར་དང་། ཆུང་མ་དང་། མ་དང་། ནུ་མོ་ཚོ་ལ་སོ་སོའི་བབས་བསྟུན་གྱི་ལོངས་སྤྱོད་ཀྱི་དབང་གིས་ཕྱུག་པར་མཛད་པ་དེའི་མིང་ལ་དབང་ཕྱུག་མར་བཏགས་ནས། སླས་དང་འཁོར་དུ་བྱིན་གྱིས་བརླབས་ཏེ་ཞི་རྒྱས་དབང་དྲག་གི་ལས་སྒྲུབ་པའི་ཐ་ཚིག་བླངས་པ་ལྟར་གྱི་མཐུན་རྫས་ཀྱི་གཏོར་མ་ལོངས་ལ་ལས་བཞིའི་ཕྲིན་ལས་སྒྲུབས་ཤིག་ཅེས་གསུངས་པའོ། །དབང་ཕྱུག་ཉེར་བརྒྱད་འདི་ཞི་ཁྲོ་དམ་པ་རིགས་བརྒྱའི་ལྷ་ཚོགས་ཀྱི་ནང་དུ་ཡོད་པ་ཞིག་ཡིན་ནོ། །བསྟན་མ་བཅུ་གཉིས་གང་ཡིན་ཞེ་ན། བསྟན་མ་བཅུ་གཉིས་འདི་སློབ་དཔོན་ཆེན་པོའི་ཐུན་མོང་མ་ཡིན་པའི་བཀའ་ཡི་ཕོ་ཉ་བ་ཡིན་ཞིང་། འདི་རྣམས་གངས་ཅན་བོད་ཡུལ་གྱི་སྲུང་མ་ཁྱད་པར་ཅན་ཡིན་པས་སྒོས་སུ་གཏོར་མ་ཕུལ་ནས་ཕྲིན་ལས་བསྒྲུབ་པར་གསོལ་བ་ཡིན་ནོ། །ངེས་དོན་གྱི་དབང་དུ་བྱས་ན་དབང་ཕྱུག་ཉེར་བརྒྱད་འདི་དཔལ་ཆེན་པོ་ཀུན་བཟང་ཧེ་རུ་ཀའི་དཀྱིལ་འཁོར་གཅིག་གི་སྤྲོ་བསྡུའི་རྣམ་པ་ཡིན་པ་ལྟར་དུ་བོད་སྐྱོང་བསྟན་མ་བཅུ་གཉིས་འདི་ཡང་ཡེ་ཤེས་དབྱིངས་ཀྱི་མཁའ་འགྲོ་མ་ཤ་སྟག་ཡིན་ལ། གོང་དུ་བཤད་པའི་དབང་ཕྱུག་ཉེར་བརྒྱད་དེ་དཔལ་ཆེན་ཀུན་བཟང་ཧེ་རུ་ཀའི་དཀྱིལ་འཁོར་གཅིག་ལ་འདུས་པ་ལྟར་དུ་བོད་སྐྱོང་བསྟན་མ་བཅུ་གཉིས་འདི་ཡེ་ཤེས་དབྱིངས་ཀྱི་མཁའ་འགྲོ་མ་ཁོ་ན་ཡིན་ནོ། །རྟེན་འབྲེལ་ཡན་ལག་བཅུ་གཉིས་ལུགས་ལྡོག་ཏུ་ཤར་ཏེ་འཁྲུལ་བ་གཞི་ལ་དག བདེན་དོན་རྣམ་པ་བཅུ་གཉིས་ཀྱི་ངོ་བོར་དག་སོང་བའི་སྣང་ཆར་བསྟན་མ་བཅུ་གཉིས་སུ་སྣང་བ་དེ་ལྟར་ཡིན་ལ། དེ་ཡང་ཀུན་རྫོབ་གདུལ་བྱའི་སྣང་ངོར་བདུད་མོ་བཞི་དང་། གནོད་སྦྱིན་མ་བཞི། སྨན་མོ་བཞི་སྟེ་བཅུ་གཉིས་ཀྱི་རྣམ་པ་ཅན་ཡིན་པས་གཏོར་མ་ཕུལ་ནས་མུ་སྟེགས་རྒྱུ་བའི་སྒོ་འཕྲང་ཆོད་ལ་བསྟན་པ་གཉན་པོ་སྲུང་བའི་ཕྲིན་ལས་བཅོལ་བར་མཛད་པ་ཡིན་ནོ།། ༼ཅ༽ ལྔ་བ་གཏོར་བྲོ་བརྡུང་བ། ལྔ་བ་གཏོར་བྲོ་བརྡུང་བ་འདི་སྐད་དོ༔ ཧཱུྃ༔ ཕྱོགས་མེད་ཕྱོགས་དང་བྲལ་བའི་ཕྱོགས་བཅུ་ནས༔ དུག་ལྔ་འཇོམས་པའི་ཡེ་ཤེས་ལྔ་ལྡན་གསལ༔ གསལ་འཚེར་སྒྱུ་མའི་ལྷ་དང་ལྷ་མོས་བསྐོར༔ ཕྱོགས་བཅུ་བདེ་གཤེགས་རིགས་ཀྱི་བྲོ་བརྡུངས་པས༔ དུག་ལྔའི་མགོ་ལ་ཡེ་ཤེས་ཆེམས་སེ་ཆེམ༔ བྲོ་ཡང་ཡེ་ཤེས་ལྔ་ཡི་སྣང་སྟོང་བྲོ༔ གླུ་ཡང་ཡེ་ཤེས་ལྔ་ཡི་གྲགས་སྟོང་གླུ༔ ཡེ་ཤེས་ལྔ་ཡི་གླུ་བླངས་བྲོ་བརྡུངས་པས༔ རྣམ་རྟོག་མཚན་མའི་དགྲ་བགེགས་རང་སར་གྲོལ༔ མ་རིག་ཉོན་མོངས་ཀ་དག་དབྱིངས་སུ་གནོན༔ ཞེས་གསུངས་ཏེ། འདིའི་སྐབས་སུ་གཏོར་གཞུང་རིའི་རྒྱལ་པོ་རི་རབ་ཏུ་གསལ་བའི་ཁ་འོག་ཏུ་དགྲ་བགེགས་ཀྱི་རྣམ་ཤེས་དང་པོར་དགུག་དགོས། དེ་ནས་བསྟིམས། དེ་ནས་ཡེ་ཤེས་ཀྱི་གླུ་དང་བྲོ་ཡིས་དུག་ལྔའི་རྟོག་ཚོགས་ཀྱི་དགྲ་བགེགས་ཐམས་ཅད་རང་སར་གྲོལ་བའམ་གཏན་དུ་འཕར་རྒྱུ་མེད་པར་བྱས་ནས་མནན་པ་ཡིན་ནོ། །ཕྱོགས་མེད་ཕྱོགས་དང་བྲལ་བའི་ཕྱོགས་བཅུ་གསུངས་པ་དང་། དུས་གསུམ་དུས་མེད་ཀ་དག་གི་དུས་ཀྱི་ཚེ་ཞེས་པ་རྣམས་གོ་བ་འདྲ་མཚུངས་ཡིན་ལ། འུ་ཚོས་བསམ་བློ་ཞིག་བཏང་ན། ཕྱོགས་ཞེས་པ་ཕྱོགས་བཞི་མཚམས་བརྒྱད་སྟེང་འོག་གཉིས་ཏེ་བཅུ་ཡི་ཆ་ཡིས་ཕྱེས་པ་ཞིག་ཡིན་ཞིང་། དེ་ཡང་ཉི་མ་ཤར་སའི་ཕྱོགས་ལ་ཤར་དང་ནུབ་སའི་ཕྱོགས་ལ་ནུབ་ཟེར་ཁུལ་བྱེད་པ་ཡིན་མོད་ཉི་མ་ལྷ་ས་ལ་ལྟོས་ན་འུ་ཚོ་ཤར་ཕྱོགས་ན་ཡོད་པ་དང་། དེ་ཡང་ཤར་ལྷོའི་ཕྱོགས་ན་ཡོད་ཀྱང་རྒྱ་ནག་དང་ཁོ་རེ་ཡ་ལ་ལྟོས་ན་ནུབ་ས་ལ་ཡོད་པས། དེ་འདྲ་བའི་སྒོ་ནས་དེད་ན་ཤར་གྱི་ཕར་ནང་ན་ཤར། ནུབ་ཀྱི་ཕར་ནང་ན་ནུབ། བར་ཞིག་ནམ་མཁའི་མཐའ་རྒྱ་བསྟན་ས་ལ་ཐུག་པ་དང་། ནམ་མཁའི་མཐའ་དབུས་བསྟན་རྒྱུ་མེད་པའི་ཚད་དུ་འཇོག་ས་དེ་ཉིད་ཡིན་ལ། དེ་ལྟར་གླེན་འདེང་བརྒྱབ་ན་ཡང་ཕྱོགས་མེད་པ་ཡིན་ནོ། །འོ་ན་ཕྱོགས་མེད་ཕྱོགས་དང་བྲལ་བའི་ཕྱོགས་དེ་ཉིད་གང་ཡིན་ཟེར་ན། སངས་རྒྱས་རང་སྣང་གི་ཡེ་ཤེས་ནང་གསལ་འགག་པ་མེད་པ་ཆོས་སྐུ་མཐའ་དབུས་དང་བྲལ་བའི་ཆོས་དབྱིངས་ཆེན་པོ་ཐིག་ལེ་ཉག་གཅིག་གི་ངོ་བོ་གཅིག་དང་དུ་མའི་ཐ་སྙད་ལས་འདས་པ་དེ་ལ་ཕྱོགས་མེད་ཕྱོགས་བཅུར་གསུངས་པ་ཡིན་ཞིང་། མདངས་ནང་གསལ་དུག་ལྔ་ཡེ་ཤེས་ལྔའི་ངོ་བོར་ཤར་བ་དམ་ཚིག་གི་སྐབས་སུ་ཁ་རྩང་ཞིག་ནས་བཤད་པ་ལྟར་ཡིན་ལ། དེ་ལས་གདངས་ཕྱི་གསལ་ལྷ་དང་ལྷ་མོའི་དཀྱིལ་འཁོར་གྱི་འཁོར་ལོ་རིགས་ལྔ་འདུས་པའི་རིགས་མཆོག་བདེ་གཤེགས་ཞི་ཁྲོ་ཡིས་བྲོ་བརྡུང་བས་ན་དུག་ལྔ་ཡེ་ཤེས་ལྔར་གྲོལ་ལུགས་ཀྱང་གོང་ནས་ཁ་རྩང་ཞིག་ནས་བཤད་པ་ལྟར་ཡིན་ནོ། །གོང་གི་འཕྲོས་དོན་དུས་བཞི་མཉམ་ཉིད་སོགས་བཤད་སྐབས་འདས་མ་འོངས་ད་ལྟ་ཡི་དུས་གསུམ་པོ་འདུས་བྱས་འགྱུར་བ་ཅན་གྱི་དུས་ཡིན་ལ། ཆོས་ཉིད་འགྱུར་བ་མེད་པ་འདུས་མ་བྱས་པ་དེ་ནི་མ་ངེས་པའི་དུས་ཡིན་གསུངས་ཤིང་། རྫོགས་ཆེན་ངོ་མའི་སྐབས་ནས་དུས་གསུམ་དུས་མེད་ཀ་དག་གི་དུས་ཀུན་ཏུ་བཟང་པོ་གྲོལ་གཞིའི་དུས་ལ་ངོས་བཟུང་བས་དུས་ལས་འདས་པའི་ཀ་དག་ཕྱོགས་ཡན་ཆེན་པོ་དེ་ཡེ་གྲོལ་ལྷུན་གྲུབ་འདུས་མ་བྱས་པའི་རང་བཞིན་ཞིག་ལ་ཐུག་འགྲོ་བ་ཡིན་ནོ། །འུ་ཚོས་ད་ལྟ་གོང་ནས་བཤད་པ་བཞིན་དུ་ཤར་ཕྱོགས་ཀྱི་ཕར་རྒྱབ་ཤར་ཕྱོགས་དེད་པ་དང་འདྲ་བར་ཁ་རྩང་གི་ཁ་རྩང་དེད་སོང་ན་བར་ཞིག་དུས་མེད་པར་གྱུར་ནས་མཉམ་ཉིད་དུ་ཐུག་འགྲོ་རྒྱུའི་ཕན་ན་མེད་ལ། ངས་དུས་དང་འབྲེལ་བའི་སྒྱུ་མ་མཁན་གྱི་གཏམ་རྒྱུད་ཅིག་བཤད་པ་དེ་ཉིད་རྒྱ་ཡིག་ལ་བསྒྱུར་འདུག་པ་དེའི་ནང་དོན་དང་འདྲ་བ་ཡིན་ནོ། །ཡིན་ན་ཡང་དོན་གྱི་ཡིན་ལུགས་དེ་ལྟར་ཡིན་རུང་ད་ལྟའི་སྣང་ཤེས་འདི་དང་མ་བྲལ་ཚེ་ཤར་ཕྱོགས་དང་ཁ་རྩང་ཡོད་ཆོག་པར་མ་ཟད་ཕྱོགས་དུས་ཀྱི་རྣམ་གཞག་ཐད་ཀ་ཐད་ཀྱི་ཐ་སྙད་ཀྱི་གནས་ཚུལ་དེ་བསྣུབ་མི་དགོས་ལ། ཁ་ཡིས་བསྣུབས་ཀྱང་དོན་གྱིས་ནུབ་པར་མི་འགྱུར་ཞིང་། ནམ་ཞིག་བྱིན་བརྒྱུད་འཕོས་པའི་ཡེ་ཤེས་ཀྱིས་ད་ལྟའི་སྣང་བ་འདི་དང་མ་བྲལ་བཞིན་དུ་འདི་ལས་འདས་པའི་དོན་ཞིག་གོ་ཡོང་ཚེ་དེ་དུས་གཏོར་བྲོ་དོན་དང་མཐུན་པ་ཞིག་རྡུང་ཐུབ་བོ། །ཨཱོཾ་ཨཱཿཧཱུྃ་གསུམ་རྡོ་རྗེ་གསུམ་གྱི་ས་བོན་ཡིན་ལ། སྟམ་བྷ་ཡ་ནི་གནོན་ཞེས་པའི་དོན་ཡིན་ཞིང་། སྐུ་གསུང་ཐུགས་ཀྱི་ཀློང་དུ་གནོན་ཞེས་པ་ཞིག་ལ་གོའོ། །ནན༔ཞེས་པ་འདི་བོད་སྐད་སྔགས་སུ་བྱིན་གྱིས་བརླབས་པ་ཞིག་ཨེ་ཡིན་སྙམ། སྐུ་གསུང་ཐུགས་ཀྱི་ཀློང་དུ་ཐར་མེད་དམ་འཆོར་བ་མེད་པར་གནོན་ཞེས་པའི་དོན་ཅན་གྱི་ནན་ཏན་གྱི་ཚིག་གོ །འདི་ཐད་ཀ་ཐད་ཀྱིས་བཤད་པ་ཡིན་མ་གཏོགས་བསམ་བློ་མ་བཏང་མོད་མདོར་ན་སྔགས་ཀྱི་ནང་ན་སཾ་སྐྲྀ་ཏའི་སྐད་མཐའ་གཅིག་ཏུ་ཡིན་དགོས་པའི་ངེས་པ་མེད་ཅིང་། བོད་སྐད་ལ་བྱིན་གྱིས་བརླབས་པའི་སྔགས་ཡོད་ལ། རིགས་མཐུན་གྱི་རྒྱུད་གཞུང་ལ་ཐོ་གཏུགས་དང་ཤེས་རྒྱུ་ཞིག་ཡིན་ནོ། །འདིའི་མཚམས་སུ་གཏང་རག་མཆོད་བསྟོད་སྤྱི་འགྲོས་ལྟར་དུ་ཡིན་ལ། ལས་བྱང་ཆུང་བ་འདིས་གཞུང་སྲོང་དུས་ནོངས་བཤགས་བདག་གི་སྤྱི་གཙུག་ལ་སོགས་པའི་རྡོར་སེམས་བསྒོམ་བཟླས་དང་འབྲེལ་བའི་ཡི་གེ་བརྒྱ་བས་བཤགས་ནས། ཀུན་གཞི་མ་བཅོས་སོགས་ཀྱིས་བདེ་སྟོང་གཉིས་མེད་བསྐང་བྱ་སྐོང་བྱེད་བཤགས་བྱ་བཤགས་བྱེད་དང་བྲལ་བའི་དོན་ལ་མཉམ་བར་བཞག་གོ། །འདིའི་ཀུན་གཞི་ཞེས་པ་འདི་ཡེ་དོན་གྱི་ཀུན་གཞི་རིག་པ་བདེ་བར་གཤེགས་པའི་སྙིང་པོ་ཆོས་ཐམས་ཅད་ཀྱི་ཆོས་ཉིད་དང་གཉིས་སུ་མ་ཡིན་པ་དེ་ལ་ཀུན་གཞིའི་སྒྲ་ཡིས་བསྙད་པའི་གོ་བ་ལེན་དགོས་པ་དང་། སླར་ཡང་ཆོ་ག་ལྷག་ཆད་སྐོང་ཞིང་ལྷ་ལ་བཟོད་པར་གསོལ་བའི་བཤགས་ཚིག་ནི་འུ་ཚོས་ཧོ་གང་ཡང་བདག་བློ་འདོན་དར་བ་འདི་བཞིན་ཡིན་ལ། འདོན་རྒྱུ་དེ་ཚོ་རྒྱུ་མཚན་ཆེན་པོ་དང་ལྡན་པ་ཡིན་ཞིང་། དེ་འདྲ་ཡིན་དུས་གོང་ནས་ཚོགས་ཀྱི་བཤགས་པ་དང་འབྲེལ་ནས་དམ་ཚིག་གི་སྐོར་ཞུ་རྒྱུ་བྱུང་ལ་འདི་བཤགས་པ་འདི་ཚོ་དང་བསྟུན་ནས་བཤགས་པའི་སྐོར་ནས་འཕྲོས་དོན་ཉུང་ཉུང་ཞིག་ཞུས་ན་འཚམས་འདུག་སྙམ། བཤགས་པ་ཟེར་རྒྱུའི་བཤགས་བྱ་དེ་ཉིད་གང་ཡིན་ཞེ་ན། གསང་སྔགས་ཀྱི་རྩ་བ་དང་ཡན་ལག་གི་དམ་ཚིག དེ་ཡང་སྐུ་གསུང་ཐུགས་ཀྱི་དམ་ཚིག་ལ་འདུས་པ་དེ་ཉིད་དང་འགལ་བའི་བཤགས་བྱ་སྡིག་པ་དང་སྒྲིབ་པ་ཉེས་ལྟུང་ཡིན་ལ། སྡིག་པ་ནི་ཉོན་མོངས་པས་ཀུན་ནས་བསླངས་པའི་མི་དགེའི་ལས་སེམས་ཅན་གྱི་ཤེས་རྒྱུད་དང་འབྲལ་དཀའ་བ་འདི་ཉིད་དང་། སྒྲིབ་པ་ཞེས་པ་སྤྱིར་ན་སྒྲིབ་གཉིས། དེའི་ནང་གི་གཙོ་བོ་ཤེས་བྱའི་སྒྲིབ་པ་ནི་བསམ་གཏན་པ་ཞིག་ལ་མཚོན་ན་མགོ་གྱེན་ལ་འཕར་ཁར་མི་འཇོག་པ་དེ་སྒོམ་འཛིན་གྱི་བློ་འདི་ཡིན་ཞིང་། ཉེས་ལྟུང་ཞེས་པ་ཉེས་པ་རང་བཞིན་གྱི་ཉེས་པ་དང་། ལྟུང་བ་བཅས་པའི་ཉེས་པ་སྟེ། བཅོམ་ལྡན་འདས་ཀྱིས་བཅས་པ་བསྙེན་གནས། དགེ་བསྙེན། རབ་བྱུང་གི་སྡོམ་པ་རྣམས་དང་། བྱང་སྡོམ་དང་འགལ་བ་དེ་ཚོ་ཡིན་ནོ། །དེ་ལྟ་བུའི་སྡིག་སྒྲིབ་ཉེས་ལྟུང་སྦྱང་ཞིང་དག་པར་བྱ་བ་དེ་ཐམས་ཅད་བཤགས་ནས་སྦྱངས་ཤིང་དག་དགོས་ན་ཇི་ལྟར་བྱ་དགོས་ཞེ་ན། སྦྱོང་བྱེད་རྡོ་རྗེ་སེམས་དཔའི་རྣལ་འབྱོར་ཁྱད་པར་ཅན་དེ་ཉིད་ཤེས་དགོས་ལ། སངས་རྒྱས་ཀུན་གྱི་སྐུ་གཅིག་པུའི་དཔལ་རྡོ་རྗེ་སེམས་དཔའ་ལ་དམིགས་ནས་དེ་ཉིད་ཡིན་པར་ཧ་གོ་བའི་ཐོག་ནས་ཡི་གེ་བརྒྱ་བའི་གཟུངས་འདི་ཆོ་ག་བཞིན་དུ་ཉིན་རེར་དུས་དྲུག་ཏུ་ཉི་ཤུ་རྩ་གཅིག་རེ་ཟློས་དང་དེ་ཡིས་ཉེས་ལྟུང་བྱིན་གྱིས་བརླབས་ནས་དེའི་ཡན་ན་མི་འཕེལ་གསུངས་ཤིང་། འབུམ་ཕྲག་གཅིག་བཟླས་ན་ཉེས་ལྟུང་སྒྲིབ་པ་ཐམས་ཅད་དག་པར་རྒྱུད་མང་པོའི་ནང་ན་དེ་ལྟ་བུའི་ཚུལ་གྱིས་གསུངས་སོ། །རྡོ་རྗེ་སེམས་དཔའ་འདིའི་སྒྲ་བཤད་བྱས་ན་དོན་གྱི་སྙིང་པོ་རིག་པའི་ངོ་བོ་ཅིར་ཡང་མ་གྲུབ་ཅིང་མ་དམིགས་པ་དེའི་གསལ་ཆ་དེ་རྡོ་རྗེ་ཡིན་ཞིང་། དེའི་རང་བཞིན་སྣང་ཡང་བདེན་པར་མ་གྲུབ་པ་སེམས་དཔའ། དེའི་གཤིས་ལུགས་ངོ་མ་དེ་གསལ་སྟོང་ཟུང་འཇུག་མཐའ་བྲལ་བློ་འདས་ཆེན་པོར་ལ་བཟླ་ནས་ཉམས་སུ་ལེན་པ་དེ་ཉིད་བཤགས་བྱ་བཤགས་བྱེད་སྦྱང་བྱ་སྦྱོང་བྱེད་དང་བྲལ་བའི་འཁོར་འདས་གཉིས་མེད་ཀྱི་སྦྱང་ཚུལ་ཡིན་ནོ། །སྤྱིར་གྱིས་བཤགས་པ་འདི་ལ་རབ་འབྲིང་ཐ་གསུམ་ཡོད་ལ། དབང་པོ་རབ་ཀྱིས་ལྟ་བས་བཤགས་པ། འབྲིང་གིས་སྒོམ་པས་བཤགས་པ། ཐ་མ་ཞིག་ཡིན་ན་འགྱོད་བཤགས་སྨེ་ངག་གིས་བཤགས་རྒྱུ་དེ་ལྟར་ཡིན་ཞིང་། གང་ཟག་དབང་པོ་ཡང་རབ་གནས་ལུགས་ཀྱི་ལྟ་དོན་ཐག་ཆོད། དེ་ལ་བརྟན་པ་ཐོབ་སོང་བ་ཞིག་གིས་ནི་བཤད་མ་ཐག་པ་ལྟར་དུ་བཤགས་བྱ་བཤགས་ཡུལ་བཤགས་བྱེད་ཐམས་ཅད་པོ་འཁོར་གསུམ་ཡོངས་སུ་དག་པ་ལས་མི་འདའ་བའི་ཐོག་ནས་ཡེ་དག་བྱར་མེད་མ་བཅོས་བློ་བྲལ་ཡེ་ནས་བཅིང་གྲོལ་མེད་པའི་དག་པ་དེའི་ངང་ལ་འགྱུ་བ་ཕྲ་རགས་གང་ཤར་རང་གྲོལ་རྗེན་པ་ལྷག་གེར་བཞག་པ་དེ་ཉིད་ལྟ་བའི་ཀློང་བཤགས་ཡིན་ཏེ། ཨོ་རྒྱན་ཆེན་པོས། ཐོས་བསམ་འབད་རྩོལ་སྒོམ་པ་དང་། །མི་བསྒོམ་མི་རྟོག་བྱར་མེད་སོགས། །གང་ལྟར་བྱས་ཀྱང་བཅོས་མའི་ལམ། །མ་བཅོས་ཆོས་སྐུའི་ཀློང་དུ་བཤགས། །ཞེས་གསུངས་སོ། །དབང་འབྲིང་གིས་སྒོམ་པས་བཤགས་པ་ཞེས་པ་དེ་ཉིད་ཇི་ལྟར་སྒོམ་དགོས་ཞེ་ན། ཕྱི་སྣང་བ་སྣོད་ཀྱི་འཇིག་རྟེན། ནང་གཡོ་བ་བཅུད་ཀྱི་སེམས་ཅན། རང་ལུས་ཕུང་ཁམས་སྐྱེ་མཆེད་དང་བཅས་པ་ཐམས་ཅད་རྒྱལ་བ་ཞི་ཁྲོའི་དཀྱིལ་འཁོར་ཉག་གཅིག་ཏུ་བསྒོམས་ནས་སྒོ་གསུམ་དཀྱིལ་འཁོར་གསུམ། སྣང་གྲག་རིག་གསུམ་ལྷ་སྔགས་ཆོས་ཉིད་ཀྱི་ངང་ལས་མ་གཡོས་པར་བྱས་ན་ཉམས་ཆག་དག་པ་ཡིན་ལ། དབང་པོ་ཐ་མ་དེ་ཉིད་ཀྱིས་འགྱོད་བཤགས་སྨེ་ངག་གི་བཤགས་ལུགས་ལ་སྟོབས་བཞི་ཚང་བའི་སྒོ་ནས་བཤགས་དགོས་ཤིང་། དེའི་དམིགས་གནད་གོང་གི་རྡོར་སེམས་བསྒོམ་བཟླས་ལྟར་རང་གི་གཡས་གཡོན་ལ་ཚེ་འདིའི་ཕ་མ་གཉིས་དང་དགྲ་བགེགས་གཉིས། མདུན་དུ་བཤགས་བྱ་དམིགས་བསལ་བ། མཐའ་སྐོར་ལ་སེམས་ཅན་ཐམས་ཅད་བཤགས་སྦྱང་གི་ཆེད་དུ་རང་ཉིད་དང་འདུན་པ་ཆིག་སྒྲིལ་དུ་འཁོད་པར་བསམས་ནས། ཕྱོགས་བཅུའི་དུས་བཞིའི་བདེ་བར་གཤེགས་པ་ཐམས་ཅད་རྒྱལ་བ་ཞི་ཁྲོའི་དཀྱིལ་འཁོར་ཉག་གཅིག་ཏུ་ཤར་བ་ལ་ཡིད་ཁྱེད་ཤེས་བློ་འགེལ་གྱིས་བཤགས་ཡུལ་ལ་འདུན་པ་རྩེ་གཅིག་ཏུ་གཏོད་པ་དེ་ཉིད་རྟེན་གྱི་སྟོབས། རང་དང་གཞན་གྱིས་བསགས་པའི་སྡིག་སྒྲིབ་ཉེས་ལྟུང་བསགས་པ་དེ་ཉིད་ལ་སྙིང་ནས་གནོང་ཞིང་འགྱོད་པ་བྱེད་པ་དེ་ཉིད་སུན་འབྱིན་པའི་སྟོབས། ད་ཕྱིན་ཆད་སྲོག་དམར་བོ་འདི་ལ་བབས་ཀྱང་དེ་ལྟ་བུའི་ལས་ངན་བསགས་ན་ཤི་བ་ཡིན་སྙམ་པའི་ཞེ་གཅོད་བྱེད་པ་དེ་ཉིད་སྡོམ་པའི་སྟོབས། རཱུ་ཏྲའི་སྨེ་བཤགས་དང་། ལྟུང་བ་བཤགས་པའི་མདོའམ་ཕུང་པོ་གསུམ་པའི་མདོ། གཏེར་གཞུང་གི་ཆོ་གའི་ནང་ནས་འབུད་པའི་བཤགས་པ་འདི་ཚོ་བཏོན་ནས་དོན་ཡིད་ལ་དྲན་པ་དེ་གཉེན་པོ་ཀུན་ཏུ་སྤྱོད་པའི་སྟོབས་ཡིན་ནོ། །དེ་ལྟར་བཤགས་པར་བྱས་ན། སྒྲིབ་གཉིས་དག སྒྲིབ་གཉིས་དག་ཚེ། ཚོགས་གཉིས་རྫོགས། ས་ནས་སར་འཕར་ཏེ་སངས་རྒྱས་ཀྱི་འབྲས་བུ་དངོས་དེ་ལ་མ་ཐུག་གི་བར་དུ་ཡོངས་སུ་རྫོགས་པར་འགྱུར་རྒྱུ་དེ་སྟོན་པ་ཀུན་ཏུ་བཟང་པོ་ཉིད་ཀྱིས་བཀའ་བསྩལ་བ་ཞིག་གོ། །སྡིག་པ་དག་ལུགས་འདི་ལ་རྟོགས་པས་དག་པ་ཞེས་པ། བཤགས་པས་དག་པ་ཞེས་པ། གཉེན་པོས་དག་པ་ཞེས་པ། མྱོང་བས་དག་པ་ཞེས་པ་བཞི་ལྟ་བུ་ཞིག་ཡོད་ཅིང་། རྟོགས་པས་འདག་པ་དེ་གང་ཡིན་ན། བདག་མེད་རྟོགས་པའི་ཤེས་རབ་ཀྱིས་འཁོར་འདས་ཀྱི་ཆོས་ཐམས་ཅད་སྣང་ཡང་བདེན་ཞེན་མེད་པར་རྟོགས་ན་ལས་དང་ལས་ཀྱི་འབྲས་བུས་དེ་ལ་གནོད་པ་མ་ཡིན་ལ། ཉིན་བཞིན་བྲམ་ཟེ་གསོད་པ་དང་ལ་སོགས་པའི་ལུང་དོན་བཞིན་ཡིན་ཡང་དེ་ལྟ་བུ་དེང་སོང་དཀའ་བ་དཀོན་པ་གཉིས་ཀའི་དུས་ཚོད་ཡིན་ནོ། །བཤགས་པས་དག་པ་ཞེས་པ་སྟོབས་བཞི་ཚང་བས་བཤགས་པ་སྟེ་མཚམས་མེད་ཀྱི་ལས་ཡིན་ཡང་བྱང་བར་གསུངས་ཏེ། སྒྲིབ་པ་ཀུན་རྫོབ་ཉིད་ཡིན་ཕྱིར། །སྦྱངས་ན་འདག་པར་གདོན་མི་ཟ། །ཞེས་སོ། །སྦྱང་རྒྱུ་ཡོད་མོད་སྡིག་པ་ཕྲ་མོ་ཡིན་ཀྱང་ཆུད་ཟ་བ་མ་ཡིན་པས་འཕྲལ་དང་འཕྲལ་དུ་བཤགས་པ་བྱེད་རྒྱུ་དེ་ཉིད་གལ་ཆེན་དོན་ཆེན་ཡིན་ནོ། །གཉེན་པོས་དག་པ་ཞེས་པ་ཇི་ལྟ་བུ་ཡིན་ཞེ་ན། མི་དགེ་བ་ཆུང་ངུ་ཡིན་ན་ཡང་གཉེན་པོའི་དགེ་བ་ཆེན་པོ་ཞིག་བསྟེན་ན་མི་དགེ་བ་དེ་ཟིལ་གྱིས་གནོན་ཏེ་བག་ལ་ཞ་ནས་གནོད་མི་ནུས། བཤགས་པས་འདག་པ་ཞེས་པ་བྲམ་ཟེ་དུང་ཕྲེང་ཅན་གྱི་ལོ་རྒྱུས་ན་རཀ་དོང་སྤྲུགས་ཀྱི་རྒྱུད་ནས་བྱུང་བའི་གཏམ་རྒྱུད་ལྟར་དུ་ཡིིན་ནོ། །དེའི་གཏམ་རྒྱུད་དེ་ཇི་ལྟར་ཡིན་ན་བྲམ་ཟེ་ཞིག་དུང་གི་ཕྲེང་བ་གྱོན་པའི་རྫུ་འཕྲུལ་དང་ལྡན་པ་ཞིག་ལ་སློབ་མ་རྒྱལ་བོའི་བུ་ཞིག་ཡོད་ལ། བྲམ་ཟེའི་བསམ་པ་བཟང་པོ་ཡིས་རང་གིས་ཅི་ཤེས་གང་ཤེས་དེ་ཉིད་དེ་ལ་བསླབས་ནས་རིག་པའི་གནས་ལྔ་ལ་མཁས་པ་ཞིག་རྒྱལ་པོའི་བུ་དེ་ཉིད་གྱུར་ཏོ། །བར་ཞིག་ཏུ་རྒྱལ་པོའི་བུ་ལ་བསམ་ངན་གདུག་པ་ཅན་ཞིག་ཤར་ནས་ངའི་གོང་ན་སློབ་དཔོན་འདི་ཉིད་མ་གཏོགས་འཇིག་རྟེན་ཁམས་ན་མི་འདུག འདི་རང་ཉིད་ཀྱི་གོང་ན་མངགས་རྒྱུ་མི་འདུག་བསམས་ནས་བྲམ་ཟེ་ལ་རྒུན་ཆང་བླུད་ཅིང་བཟི་ཁར་བཞག་ནས་བཟི་སྟེ་རོ་ལྟ་བུ་ཞིག་ཏུ་གྱུར་ཚེ་བྲམ་ཟེའི་མིག་ལ་ཁབ་ཀྱིས་གཙགས། ལྕེ་ལྕགས་ཀྱུས་དྲངས། ལུས་ལ་རུས་སྦལ་གྱི་ཁྲག་གིས་བྱུག བུད་མེད་མང་པོ་ལ་བྲམ་ཟེའི་ལུས་རྡོག་རྫིས་བྱེད་དུ་བཅུག སྒྱིད་པ་གཉིས་ཀ་བཅད་ནས་བཞག་གོ། །ཕྱི་ཉིན་ནངས་མོར་བྲམ་ཟེ་ཡར་ལ་བཟི་དྭངས་ཏེ་དྲན་པ་རྙེད་ནས་གཅིག་ལྟ་སྐབས་མིག་ལོང་ནས་དབྱེ་རྒྱུ་མེད་ཅིང་ལྟ་བྱེད་མིག་ཀྱང་མེད། ཟུར་ན་སུ་ཡོད་འབོད་དགོས་བསམ་ཚེ་ལྕེ་མེད་ནས་ཁ་གྲག་རྒྱུ་མེད་ཅིང་འབོད་བྱེད་ཀྱི་ལྕེ་མེད། ལངས་ནས་འགྲོ་དགོས་དྲན་དུས་ལང་རྒྱུ་མེད་ཅིང་ལང་བྱེད་ཀྱི་སྒྱིད་པ་བྲེགས་ཚར་སོང་། བུད་མེད་མང་པོས་བརྫིས་པར་བྱས་པས་གྲིབ་ཀྱི་དབང་གིས་འགུལ་མ་ཐུབ། རུས་སྦལ་གྱི་ཁྲག་གིས་ལུས་མགོ་རྔ་མེད་པར་བྱུག་པས་ཆུ་བུར་ཤ་སྟག་བུད། དེའི་སྟེང་དུ་ལུས་འཁུམ། དྲན་པ་ཡང་ཉམས་ལ་ཁད་དུ་གྱུར་ནས་དེ་ལྟར་ཉམ་ཐག་པའིི་གནས་སུ་གྱུར་ཡོད་དོ། །དེ་ནས་བྲམ་ཟེས་བསམ་བློ་ཞིག་བཏང་དུས་ངས་འདི་ལྟར་མ་ཤི་གསོན་དམྱལ་གྱི་སྡུག་ཅིག་རིག་རྒྱུ་འདི་ཚེ་རབས་སྔོན་གྱི་ལས་ཀྱི་རྣམ་སྨིན་སྨིན་པ་ཞིག་གམ་མིན་ཏེ་གཅིག་གིས་ཕྲག་དོག་གིས་གོང་ལ་ཤོར་དོགས་བྱས་ནས་འདི་ལྟར་བྱས་པ་ཡིན་བསམས་ནས་གཅིག་བརྟགས་པས་སློབ་མ་རྒྱལ་པོའི་ཕྲུ་གུས་བྱས་པ་ཡིན་པར་ཧ་གོ་སྟེ་བྲམ་ཟེས་དམོད་པ་བོར་བ་ཡིན་ཏེ། རྒྱལ་བོའི་ཕྲུ་གུ་ཁྱོད་ལ་ངས་ཡོན་ཏན་ཆ་ཚང་བསླབས་ནས་ང་ལ་དྲིན་ལན་མེད་པའི་ཐོག་ཏུ་འདི་འདྲས་དྲིན་ལན་ལོག་འཇལ་བྱས་པ་དེ་ཉིད་ཀྱིས་ཁྱོད་ལ་སྲོག་གི་ལན་ཆགས་ཀྱིས་ཚེ་ཐུང་ཐུང་དུ་གྱུར། ཤི་མ་ཐག་ཏུ་སེམས་ཅན་ལུས་སྲུལ་བོ་ཅན་དུ་སྐྱེས། དེའི་ལུས་ལ་མིག་མེད་པ། ལྐུགས་པ་ཡིན་པ། རྐང་བ་ཆད་ཡོད་པ། མཛེ་དང་ཤུ་བ། ལུས་ལ་ཤ་ཟ་མོ་སྟོང་གིས་ཚང་བཅའ་བ་ཚང་མ་ཁྱོད་ཀྱི་ལུས་ཐོག་ལ་དེ་ལྟར་ཡོང་བར་ཤོག ཚེ་འཕོས་ནས་ཀྱང་ཚ་གྲང་གི་དམྱལ་ཁམས་བཅུ་དྲུག་ལ་ཁ་འཁོར་ནས་ཐར་བའི་དུས་ཤིག་མེད་པར་ཤོག ཚེ་རབས་ཐམས་ཅད་དུ་འཕགས་པའི་ཞལ་ཉི་ཞུར་འདྲ་ཞིག་མི་མཐོང་བར་བྱང་ཆུབ་མྱུ་གུ་སྔོ་སྐམ་དུ་འགྲོ་བར་གྱུར་ཅིག་ཅེས་སྨྲས་ཏེ་སྨོན་ལམ་ལོག་འདེབས་བྱས་ནས་དེ་ལྟར་བྲམ་ཟེས་དམོད་པ་བོར་བར་བྱས་པ་ཡིན་ནོ། །དེ་ལྟར་དམོད་ངན་བོར་བས་བྲམ་ཟེ་རང་ཉིད་ཀྱི་ངན་སེམས་ཀྱིས་དམོད་པ་བོར་བས་བྲམ་ཟེ་ལ་ཡང་སྡིག་པ་འབྱུང་བ་ཡིན་ཞིང་། རྣམ་པར་སྨིན་པ་འབྱུང་ལ། དེ་ནས་ཡུན་རིང་ཞིག་མ་འགོར་ནས་བྲམ་ཟེ་ཡང་ཤི་སོང་། ཤི་མ་ཐག་ཏུ་དུར་ཁྲོད་ཅིག་གི་ནང་ན་བྱ་ཁ་ཏ་མགོ་དཀར་བོ་ཅན་ཞིག་ཏུ་སྐྱེས་པ་དང་། དེའི་མཚམས་སུ་རྒྱལ་བོའི་ཕྲུ་གུ་དེ་ཡང་ཤི་སོང་། ཤི་ནས་བྲམ་ཟེའི་རིགས་ཀྱི་སྐྱེས་པ་ཕོ་ལུས་ཤིག་བླངས། ཁོ་རང་ཉིད་ན་ཚོད་སྨིན་ནས་ཁྱིམ་སོ་བཟུང་སྟེ་བུ་ཞིག་སྐྱེ་བའི་དོན་དུ་མོ་ལུང་བསྟན་གཏོ་སྐུ་རིམ་བྱས། ལན་ཆགས་ཀྱི་དབང་གིས་དུར་ཁྲོད་ཀྱི་བྱ་ཁ་ཏ་མགོ་དཀར་བོ་དེ་ཉིད་ཚེ་འཕོས་ནས་རང་ཉིད་ཀྱི་བུ་རུ་སྐྱེས། དེ་སྐྱེ་བའི་སྐབས་སུ་དེའི་སྐྱེ་བ་ཡིན་པའི་རྟགས་མཚན་དེ་ཉིད་ཁོ་རང་གིས་ཧ་གོ་སོང་ཞིང་། དེ་ཡིན་དུས་ཕ་རྒན་གྱིས་དུར་ཁྲོད་ཀྱི་བྱ་ཁ་ཏའི་སྐྱེ་བ་དེ་ཉིད་ཀྱི་བུ་དེ་ཕ་ཡིས་ཐབས་ཤིག་བསྒྲིགས་ཏེ་ཡང་བུ་དེ་བསད། ཡང་དེའི་ཕྱི་ལོར་བུ་དེ་ཚུར་ལ་སྐྱེས་པ་ཡིན་ལ། དེ་དུས་ཁ་ཏ་མགོ་དཀར་ཅན་གྱི་སྐྱེ་བ་ཡིན་པར་མ་ཤེས་སོ། །དེའི་བུ་དེའི་མགོར་ལྕགས་ཀྱི་འཛེར་བ་ཞིག་སྐྱེས་ཡོད་ལ། འཛེར་བ་ཇེ་ཆེ་ཇེ་ཆེར་གྱུར་ཏེ་བར་ཞིག་ཏུ་ཐོད་པ་ཡང་གད་སོང་། བུ་ཡི་ངོ་ཡི་མདངས་ཤོར། ནར་སོན་རྒྱུ་མེད་པར་ཉམ་ཐག་པ་ཞིག་ཏུ་གྱུར། རྩིས་པས་བརྩིས་བྱས། མོ་བས་མོ་བཏབ། རིམ་གྲོ་འདི་མ་བྱས་བསམ་པ་ཞིག་མེད་ཀྱང་ཕན་ཐོགས་ཅན་ཞིག་མ་ཡོང་ངོ་། །ལས་ཀྱི་ལན་ཆགས་ཀྱི་དབང་གིས་ཕ་ཡིས་སེམས་ཀྱིས་མ་བཟོད་ནས་བུ་ཡི་མགོ་ཡི་འཛེར་བ་ཆེན་པོ་དེ་ལྕེ་ཡིས་ཉིན་ཞིག་བལྡགས་པས་འཛེར་བ་ཇེ་ཆུང་ལ་སོང་། བུའི་ངོ་མདངས་ཀྱང་ཇེ་བཟང་དུ་གྱུར། ནར་སོན་རྒྱུ་ཡོད་པར་གྱུར་ཏོ། །དེ་ནས་མི་ཆེན་དུ་གྱུར་དུས་བྲམ་ཟེ་མིའི་ཐོད་པ་ཅན་ཞེས་དེ་ཡིས་ཐོགས་པ་ཡིན་ཞིང་། དེའི་འཛེར་བ་དེ་ཟད་མ་ཐག་ཏུ་ཕ་ཡི་ལྕེ་ལ་རྨར་གྱུར་ནས་དེས་ཤི་རྐྱེན་བྱས་ཏེ་ཤི་སོང་ངོ་། །རང་གི་ཉེས་བྱས་དང་བྲམ་ཟེའི་དམོད་པ་བོར་བའི་སྟོབས་ཀྱིས་སེམས་ཅན་ལུས་སྲུལ་བོ་ཅན་གཅེར་བུ་པ་ཞེས་པའི་སྐྱེ་བ་བླངས་ནས་ལུས་ལ་ནད་སྣ་ཚོགས་ཀྱིས་མནར། ཤ་ཟ་མོ་སྟོང་གིས་ཚང་བཅས། བྱང་ཆུབ་ཀྱི་མྱུ་གུ་སྔོ་སྐམ་དུ་གྱུར། འགྲོ་བ་རིགས་དྲུག་གི་སྡུག་བསྔལ་དུས་གཅིག་ལ་མྱོང་ནས་བྲམ་ཟེའི་དམོད་པ་ཇི་མ་ཇི་བཞིན་དུ་སྡུག་བསྔལ་མྱོང་བ་ཡིན་ནོ། །དེའི་སྐབས་སུ་ཕྱོགས་བཅུའི་བདེ་བར་གཤེགས་པ་ཐམས་ཅད་ཀྱི་ཐུགས་ཡེ་ཤེས་ཆེན་པོ་ལས་ཀུན་རིགས་རྣམ་པར་སྣང་མཛད་དང་། ཀུན་ཏུ་བཟང་པོ་གཉིས་སུ་སྤྲུལ་ལོ། །ཡང་ཀུན་ཏུ་བཟང་པོའི་བྱིན་རླབས་ཀྱིས་རྡོ་རྗེ་སེམས་དཔར་སྤྲུལ། རྣམ་པར་སྣང་མཛད་ཀྱི་བྱིན་རླབས་ཀྱིས་ཕྱག་ན་རྡོ་རྗེར་སྤྲུལ་ནས་སྤྲུལ་གཞི་གཉིས་ཀས་སྤྲུལ་པ་གཉིས་ཀ་ལ་བཀའ་བསྩལ་བའི་ཚུལ་གྱིས་འདོད་ཁམས་ཀྱི་གནས་རིས་མར་ཀི་ན་སློབ་མས་སློབ་དཔོན་ལ་ལས་མི་རུང་བར་བྱས་པའི་རྣམ་སྨིན་ཞིག་གིས་སེམས་ཅན་ལུས་སྲུལ་བོ་ཅན་གཅེར་བུ་པ་ཞེས་པ་སྡུག་བསྔལ་གྱིས་གདུང་ནས་བྱང་ཆུབ་ཀྱི་མྱུ་གུ་བསྐམས་ཏེ་ཤི་མ་ཐག་ཏུ་དམྱལ་བར་སྐྱེས་ནས་དམྱལ་ཁམས་བཅུ་དྲུག་གི་ནང་ནས་ཐར་གྱིན་མེད་ལ། ཁྱེད་གཉིས་ཀས་དེ་ལས་ལྡོག་ཅིག་ཅེས་གསུངས་ཚེ་རྡོ་རྗེ་སེམས་དཔའ་དང་ལག་ན་རྡོ་རྗེ་རྣམ་པ་གཉིས་ཀྱིས་འདུལ་བའི་དུས་ལ་བབས་ཡོད་ན་ལྡོག་པའི་ཐབས་བསྟན་དུ་གསོལ་ཞེས་ཡར་ལ་ཞུས་པས་ཀུན་ཏུ་བཟང་པོས་རྡོ་རྗེ་སེམས་དཔའ་ལ་རིགས་ཀྱི་བུ་རྣལ་འབྱོར་སྤྱི་ཁྲུས་ན་རཀ་དོང་སྤྲུགས་འགྱོད་ཚངས་ཀྱི་རྒྱལ་པོ་སེམས་ཅན་དེའི་རྣ་བར་སྒྲོགས་ཞེས་དང་། ལུས་ངག་ཡིད་གསུམ་གྱི་སྒོ་ནས་འགྱོད་ཚངས་བྱེད་དུ་བཅུག་ནས་ལྡོག་པར་མཛོད་ཅེས་གསུངས་པ་དང་། ཀུན་རིག་རྣམ་པར་སྣང་མཛད་ཀྱིས་ལག་ན་རྡོ་རྗེ་ལ་རིགས་ཀྱི་བུ་ཕྱི་ནང་གསང་གསུམ་གྱིས་དབང་བསྐུར་ནས་ལྡོག་ཅིག་ཅེས་གསུངས་སོ། །དེ་ལྟར་གསུངས་དུས་དཔལ་རྡོ་རྗེ་སེམས་དཔའ་དང་ལག་ན་རྡོ་རྗེ་གཉིས་ཀ་བྲམ་ཟེ་མིའི་ཐོད་པ་ཅན་དང་སེམས་ཅན་ལུས་སྲུལ་བོ་ཅན་དེ་གཉིས་ཀའི་གམ་དུ་བྱོན་ནས་རྡོ་རྗེ་སེམས་དཔས་འདི་ལྟར་གསུངས་ཏེ་བྲམ་ཟེ་མིའི་ཐོད་པ་ཅན་དང་སེམས་ཅན་ལུས་སྲུལ་བོ་ཅན་ཁྱེད་གཉིས་ཀ་ཚེ་ཡི་ཡར་སྔོན་ན་སློབ་དཔོན་དང་སློབ་མ་དམ་ཚིག་ཉམས་སོང་བ་དེ་ཉིད་བསྐལ་བའི་མཐར་ཡང་སྡུག་བསྔལ་ཐར་རྒྱུ་མེད་པ་འདི་ལྟ་བུ་ཞིག་གི་གནས་ཚུལ་ལ་ལྷུང་ཡོད་པས། བདེ་བར་གཤེགས་པ་ཐམས་ཅད་ཀྱི་ཐུགས་རྗེའི་བྱིན་རླབས་ཀྱིས་བསྐུལ་ནས་སེམས་ཅན་ལས་ངན་པ་ཅན་ཁྱེད་གཉིས་ཀ་དྲང་ཕྱིར་ཡོང་བ་ཡིན་པས་བཤགས་ཚངས་གྱིས་ཞེས་གསུངས་པས། བྲམ་ཟེ་མིའི་ཐོད་པ་ཅན་གྱིས་བདག་ཅག་ལས་ངན་པའི་སེམས་ཅན་ལ་ཉེས་པ་བཤགས་ཐབས་དེ་ཁྱེད་རྣམ་པས་བསྟན་དུ་གསོལ་ཞེས་ཞུས་པ་དང་། དེ་ནས་རྡོ་རྗེ་སེམས་དཔས་རྣལ་འབྱོར་སྤྱི་ཁྲུས་འགྱོད་ཚངས་དོང་སྤྲུགས་ཀྱི་ཆོས་བསྟན་ཏོ། །ལག་ན་རྡོ་རྗེས་རིམ་པ་བཞིན་དུ་དབང་བསྐུར་མཛད་ནས་དེ་གཉིས་ཀྱི་བྱང་ཆུབ་ཀྱི་མྱུ་གུ་སྔོ་བསྐམས་སུ་གྱུར་པ་སླར་གསོས་ཏེ། བྲམ་ཟེ་མིའི་ཐོད་པ་ཅན་དང་། སེམས་ཅན་ལུས་སྲུལ་བོ་ཅན་དང་། ཕྱོགས་བཅུའི་གསང་སྔགས་ཀྱི་ཆོས་སྒོར་ཞུགས་པ་རྣལ་འབྱོར་པ་ཕོ་མོ་མང་པོ་ཞིག་གིས་ཀུན་གཞི་བྱང་ཆུབ་ཀྱི་སེམས་དང་ཕྲད་དེ་འབད་པས་རིག་འཛིན་གྱི་ས་ལ་ཕྱིན་པར་གྱུར་ཏོ་ཞེས་པའི་ལོ་རྒྱུས་འུ་ཚོས་འདོན་གྱིན་ཡོད་པའི་ནང་ལྟར་བཤགས་པར་བྱས་ནས་དེ་ལྟར་དག་སོང་བ་ཡིན་ནོ། །རྟོགས་པས་འདག་པ། གཉེན་པོས་འདག་པ། བཤགས་པས་འདག་པ་གསུམ་ཁ་མ་ལྡན་ན་མྱོང་བས་འདག་པ་དགེ་སློང་ཐར་བ་ནག་པོའི་སྐྱེ་རྒྱུད་ལྟར་དུ་ཡིན་ལ། གཉེན་པོས་མ་འཆགས་ན་རང་གཞན་ཐམས་ཅད་ལ་དེ་ལྟ་བུ་ཞིག་ལས་མི་འདའ་བ་ཡིན་ཞིང་། དེ་ལྟར་བཤགས་ཚུལ་དང་འདག་ཚུལ་མང་པོ་ཡོད་པའི་ནང་ནས་གཞུང་འདིའི་སྐབས་སུ་གཉེན་པོས་འདག་པ་དང་བཤགས་པས་འདག་པ་གཉིས་ཀ་གཙོ་བོར་གསུངས་པ་ཡིན་ནོ། །དེས་ན་ཞི་ཁྲོ་ཞེས་པ་ཟ་ཆོག་འདོན་ཆོག་ཡིན་པའི་སྣང་བ་དང་། འདིའི་མཆོད་པ་བཅའ་བཤམས་ཚོ་ཅི་བྱུང་གང་བྱུང་གིས་ཆ་མི་ཚང་བ་ལྟ་བུ་དང་། འདོན་པ་གསུང་ཆོག་ཡིན་ན་ཆོ་ག་ཆ་མི་ཚང་བ་དེ་ཚོ་ཉེས་པ་ཤིན་ཏུ་ནས་ཀྱང་ཆེ་བ་ཡིན་ཞིང་། དམ་པ་གོང་མའི་ཕྱག་སྲོལ་གྱི་ཞི་ཁྲོའི་གནས་བརྒྱ་དེ་ཚོ་ཆད་མ་ཤོར་ན་ཡག་པ་དང་། དེ་ཤི་བོ་གཅིག་དང་ཡོན་བདག་གཅིག་གི་དོན་མ་ཡིན་ལ། བསྟན་སྲོལ་བཟང་པོའི་ཕྱག་རྗེས་ནུབ་དང་མི་ནུབ་ཀྱི་རྩ་བ་ལ་ཐུག་ཡོད་དོ། །དེ་རིང་སླ་ལས་མགྱོགས་འདོན་བྱེད་ས་དེ་ཉིད་གཞན་ཡིན་ཡང་སང་ཕོད་གནངས་ཕོད་ཅིག་ལ་ཉིན་གཅིག་དེའི་ལེ་ལན་ལྟ་བུ་དེ་ཉིད་རང་ལ་འཁོར་ཡོང་བ་ཡིན་ཞིང་། སྤྱོད་ངན་གཞན་ལ་བཞག་ན་ཐ་མར་རང་ལ་འཁོར་བ་དང་། སྤྱོད་བཟང་གཞན་ལ་བཞག་ན་ཐ་མར་རང་ལ་འཁོར་བ་དེ་ཉིད་འཇིག་རྟེན་གཏམ་གྱི་དཔེ་ཡིན་ལ། གྲོང་ཆོག་ལ་བྱོན་ཁོམ་མེད་ན་མ་བྱོན་ན་ཡག་ཅིང་། གཅིག་བྱོན་དུས་སྔར་སྲོལ་ལྟར་དུ་བྱས་ན་ཚེ་འདི་ཕྱི་རང་གཞན་འཕྲལ་ཕུགས་ཐམས་ཅད་ལ་དེ་གནད་ཆུང་ཞིག་མ་ཡིན་ནོ། །རང་གར་འཕྲོས་མོལ་དུ་ཞུས་པ་ཡིན་ལ། ཁྱད་པར་དུ་ཚེ་འདས་གཤིན་པོ་དེ་ཚོ་སྡུག་ཐུག་ཉམ་ཐག་པའི་གནས་སྐབས་ལ་ཐུག་ཡོད་པས་བསྐྱེད་རྫོགས་ཀྱི་ཏིང་འཛིན་དང་ལྟ་བ་ཁྱད་པར་ཅན་གྱིས་ཟིན་ན་བཤད་མ་དགོས་པ་དང་། མ་མཐའ་ཡང་ཚིག་རྗེས་དོན་དྲན་གྱི་དད་དང་སྙིང་རྗེ་གཉིས་ཀས་མ་ཟིན་ཐབས་མེད་ཡིན་ལ། འདི་ཐོས་པས་གྲོལ་བའི་ཆོས་དུས་གསུམ་སངས་རྒྱས་རྣམས་ཀྱི་གཤེགས་ཤུལ་ཡིན་པས་ཡལ་བར་མ་དོར་ཞེས་གཏེར་གཞུང་རང་གི་ནང་དུ་ཡང་གསུངས་པ་ལྟར་དུ་ཡིན་ནོ། །ཁྱད་པར་དུ་གདན་ས་འདིའི་ཕྱག་སྲོལ་ལ་བར་དོའི་ཐོས་གྲོལ་ཆེན་མོ་འུ་ཚོའི་དུས་རྒྱུན་གྱི་ཁ་སྐད་ལ་ཐོས་གྲོལ་ཐོས་རྒན་མ་འདི་ཚོ་ཤི་བོ་ཡི་ཞེ་དགུའི་རིང་ཐམས་ཅད་ལ་མ་འགྲུབ་ཀྱང་བདུན་གསུམ་པ་ཚུན་ཆད་ལྟ་བུ་ལ་བསྙེན་ཚད་ཡོད་པ་བསྐྱེད་རྫོགས་ཀྱི་གནད་ཁྲོལ་བ་བླ་མཆོད་དཔོན་སློབ་གཉིས་རེ་གསུམ་རེ་བཞི་རེ་ཆེ་འཛོམས་ཆུང་འཛོམས་ཀྱིས་གསུང་བའི་སྲོལ་ཚུགས་དང་དོན་ཆེན་པོ་ཡིན་ནོ། །དེ་ཡིས་འུ་ཚོས་ནོངས་བཤགས་དང་སྦྲེལ་ཏེ་བཤགས་པའི་སྐོར་གྱི་འཕྲོས་དོན་བཤད་ཟིན་ཏོ།། ༼ཆ༽ དྲུག་པ་བཀྲ་ཤིས་བརྗོད་པ། ད་ནི་གཏེར་གཞུང་དཀྱུས་ཀྱི་མཇུག་བསྡུའི་དྲུག་པ་བཀྲ་ཤིས་བརྗོད་པ་ནི༔ ཨཱོཾ་ཆོས་སྐུའི་བཀྲ་ཤིས་སྟོང་ཞིང་བདག་མེད་ཤོག༔ ཨཱཿལོངས་སྐུའི་བཀྲ་ཤིས་གསལ་ལ་འཛིན་མེད་ཤོག༔ ཧཱུྃ་སྤྲུལ་སྐུའི་བཀྲ་ཤིས་ཐུགས་རྗེའི་རྒྱུན་འབྱུང་ཤོག༔ གཞི་ཡི་བཀྲ་ཤིས་རང་རྒྱུད་དུལ་བར་ཤོག༔ ལམ་གྱི་བཀྲ་ཤིས་གཞན་རྒྱུད་སྦྱོང་བར་ཤོག༔ འབྲས་བུའི་བཀྲ་ཤིས་གཞི་ཐོག་སྨིན་པར་ཤོག༔ ཅེས་གསུངས་ཏེ། འདིིའི་བཀྲ་ཤིས་འདི་གསུམ་སྐུ་གསུམ་དང་གཞི་ལམ་འབྲས་གསུམ་ལ་སྦྱར་ནས་གསུངས་ལ། འདིའི་བཀྲ་ཤིས་ཀྱི་ཚིག་གི་ཐོག་མར་ཨོཾ་ཡོད་པ་དང་སྤྱིར་བཏང་གི་སྔགས་ཐམས་ཅད་ཀྱི་མགོ་མར་ཨོཾ་ཡོད་པ་དེ་སྤྱིར་བཏང་གིས་འདྲ་ཡང་འདྲ་བའི་ནང་གི་མི་འདྲ་བའི་གོ་དོན་སྐབས་དང་བསྟུན་པ་ནི་སྤྱི་མཚུངས་ཡིན་ཞིང་། ཁྱད་པར་དུ་བཀྲ་ཤིས་པའི་བརྡ་ཆད་ཨོཾ་སྭ་སྟི་ལྟ་བུ་འདི་ཚོའི་མགོར་ཨོཾ་ཡོད་པ་དེ་ནོར་བུ་འཛིན་པའི་སྙིང་པོ་བཀྲ་ཤིས་པར་བྱེད་པའི་སྙིང་པོ་ཡིན་པ་དང་། བཀྲ་ཤིས་བརྒྱད་པའི་འགོ་ལ་ཨོྃ་ཡོད་པ་དེ་ཚོ་དེའི་རྒྱུ་མཚན་གྱིས་ཡིན་ཏེ། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ཞེས་གསུངས་སོ། །འདི་ནས་སྐུ་གསུམ་དང་སྦྱར་ཡོང་དུས་གཟུང་འཛིན་གཉིས་སྣང་གི་རྟོག་པ་ཐམས་ཅད་སྐྱེ་འགག་མེད་པའི་ངང་དུ་རང་ཞི་ཞིང་རྟག་ཆད་གང་གི་ཡང་མཐར་མ་ལྷུང་བ་བློ་འདས་ངོ་བོ་ཉིད་ཀྱི་ཆོས་སུ་གནས་པ་སྟོང་ཞིང་བདག་མེད་ཆོས་སྐུའི་བཀྲ་ཤིས་ཀྱིས་དེང་འདིར་ནང་གསལ་སྤྲོས་པ་དང་བྲལ་བའི་ཡེ་ཤེས་གདུལ་བྱའི་རྒྱུད་ལ་རྟག་ཏུ་འཆར་བའི་བཀྲ་ཤིས་ཤོག ངེས་པ་ལྔ་ལྡན་ཁ་སྦྱོར་ཡན་ལག་བདུན་ལྡན་གྱི་བདག་ཉིད་གསལ་ལ་འཛིན་མེད་ལོངས་སྐུའི་བཀྲ་ཤིས་ཀྱིས་ཕྱི་གསལ་མཚན་དཔེའི་རང་བཞིན་གཟུགས་སྐུའི་བཀོད་པ་རྒྱ་མཚོར་མངའ་དབང་འབྱོར་བའི་བཀྲ་ཤིས་ཤོག གང་འདུལ་གདུལ་བྱའི་སྣང་ངོར་སྣ་ཚོགས་སྤྲུལ་བའི་རོལ་གར་སྤྲུལ་སྐུའི་བཀྲ་ཤིས་ཐུགས་རྗེའི་རྒྱུན་འབྱུང་གིས་མཐའ་ཡས་སྤྲུལ་བའི་ཟློས་གར་གྱིས་འགྲོ་དོན་རྒྱུན་མི་ཆད་པའི་བཀྲ་ཤིས་ཤོག་ཅེས་ཆོས་ལོངས་སྤྲུལ་གསུམ་གྱི་བཀྲ་ཤིས་དེ་ལྟར་དུ་བཤད་པའོ། །ཡང་འདིའི་གཞི་ལམ་འབྲས་གསུམ་གྱི་སྐུ་གསུམ་ལུགས་ལྡོག་ཏུ་སྦྱར་ཏེ་བཤད་ན་གཞི་གནས་ལུགས་དོན་གྱི་ཆོས་ཉིད་མ་བཅོས་རང་བྱུང་གི་ཡེ་ཤེས་མ་བཙལ་རང་ལས་རྙེད་པའི་རྟོགས་པས་བདག་རྒྱུད་གྲོལ་བ་དེ་གཞིའི་བཀྲ་ཤིས་ཀྱིས་རང་རྒྱུད་དུལ་ནས་ལྟ་བའི་གདེང་ཆེན་རྙེད་ནས་རྣམ་བཞིའི་ཕྲིན་ལས་ལ་མངའ་དབང་འབྱོར་བ་ཐུགས་རྗེ་རྒྱུན་ཆད་མེད་པ་སྤྲུལ་སྐུའི་བཀྲ་ཤིས་ཤོག ལམ་བསྐྱེད་རྫོགས་རིམ་གཉིས་ཀྱི་སྒོམ་པས་ཐུགས་རྗེས་གཞན་རྒྱུད་སྒྲོལ་བའི་ཟུང་འཇུག་རྟོགས་པའི་ཡེ་ཤེས་མངོན་དུ་གྱུར་ཏེ་ལམ་གྱི་བཀྲ་ཤིས་གཞན་རྒྱུད་སྦྱངས་པས་གདུལ་བྱ་སྨིན་གྲོལ་ལ་འགོད་པ་རང་བཞིན་གསལ་བ་འགག་མེད་ལོངས་སྐུའི་བཀྲ་ཤིས་ཤོག འབྲས་བུ་དག་པ་གཉིས་ལྡན་མ་འཁྲུལ་གཞི་ཡི་གནས་ལུགས་རིག་སྟོང་དབྱེར་མེད་ཀ་དག་གཞི་ཡི་བཀྲ་ཤིས་ཀྱིས་མཚོན་བྱ་དོན་གྱི་ཡེ་ཤེས་འོད་གསལ་ཐིག་ལེ་ཉག་གཅིག་གི་ཀློང་དུ་འགྲོ་ཀུན་ཕྱམ་གཅིག་ཏུ་གྲོལ་བ་རིས་མེད་ཁྱབ་བདལ་ཆོས་སྐུའི་བཀྲ་ཤིས་ཤོག་ཅེས་གསུངས་པའོ། །ཅེས་བརྗོད་དབྱངས་བཅས་མེ་ཏོག་འཐོར༔ ༼ཇ༽ བདུན་པ་བསྔོ་བ་སྨོན་ལམ། ༼ཀ དངོས་བཤད་པ། བདུན་པ་བསྔོ་བ་སྨོན་ལམ་ནི༔ ན་མོ༔ འཁོར་གསུམ་ཡོངས་སུ་དག་པའི་དགེ་བ་འདིས༔ ཁམས་གསུམ་འཁོར་བའི་སེམས་ཅན་མ་ལུས་པ༔ སྐུ་གསུམ་འབྲས་བུ་མྱུར་དུ་ཐོབ་པར་ཤོག༔ འགྲོ་བ་སེམས་ཅན་ཡོངས་ཀྱི་དཔལ་དུ་ཤོག༔ ཅེས་གསུངས་ཏེ། འདིའི་སྐབས་སུ་རྐང་པ་དང་པོས་འཁོར་གསུམ་ཡོངས་དག་དམིགས་མཐའ་དང་བྲལ་བ་གང་བསྔོ་བྱའི་དགེ་བ་བསྟན། རྐང་པ་གཉིས་པས་བསྔོ་ཡུལ་ཁམས་གསུམ་རིགས་དྲུག་གིས་བསྡུས་པའི་སེམས་ཅན་བསྟན་ལ། རྐང་པ་གསུམ་པས་གང་ལ་བསྔོ་བའི་སྐུ་གསུམ་འདུས་པའི་ངོ་བོ་གཞི་འབྲས་དབྱེར་མེད་པའི་བདག་ཉིད་དེ་ཉིད་བསྟན་ཅིང་། རྐང་པ་རྗེས་མས་དམ་པའི་ཆོས་ཟབ་མོ་ཟབ་ཆོས་ཞི་ཁྲོ་དགོངས་པ་རང་གྲོལ་འདི་ཉིད་དུས་བསྐལ་པའི་མཐར་ཡང་ཉམས་པ་མེད་པར་འགྲོ་བ་སེམས་ཅན་ཡོངས་ཀྱི་དཔལ་ལམ་རྒྱན་ནམ་ཐར་ལམ་དམ་པར་བགྲོད་པའི་གསང་ལམ་དུ་འགྱུར་བར་ཤོག་ཅིག་ཅེས་གསུངས་པའོ། །འདིའི་མགོ་ན་ན་མོ་ཞེས་ཕྱག་འཚལ་བའི་ཚིག་སྦྱར་ནས་གང་ལ་ཕྱག་འཚལ་བའི་ཡུལ་མཆོག་གསུམ་རྩ་གསུམ་ཀུན་འདུས་རིགས་བརྒྱར་འདུས་པའི་དཀྱིལ་འཁོར་དཔང་པོར་བཞག་ནས་བདེན་ཚིག་གི་མཐུ་ཅན་གྱི་སྨོན་ལམ་བཏབ་པ་ཡིན་ནོ། །ཡང་བསྔོ་བ་དང་སྨོན་ལམ་སོ་སོར་བསྟན་པའི་དབང་དུ་བྱས་ན་རྐང་པ་སྔོན་མ་གསུམ་དེ་བསྔོ་བ་གཙོ་བོ་དང་། རྐང་པ་རྗེས་མ་སྨོན་ལམ་དུ་ངོས་བཟུང་ན་དོན་ལ་གནས་སམ་སྙམ། བསྔོ་བ་དང་སྨོན་ལམ་གྱི་ཁྱད་པར་རྒྱུ་དགེ་བ་སྔོན་སོང་ཡོད་མེད་ལ་ལྟོས་ནས་གཙོ་བོར་འཇོག་པ་དེ་ཉིད་རང་ལུགས་ཀློང་ཆེན་པའི་བཞེད་སྲོལ་དུས་རྒྱུན་འུ་ཚོས་བཤད་ཀྱིན་ཡོད་པ་དེ་ཡིན་ནོ།། ༼ཁ ལྷ་ཚོགས་གཤེགས་སུ་གསོལ་བ། ལྷ་ཚོགས་གཤེགས་སུ་གསོལ་བ་ནི༔ འདི་གཙོ་བོ་རྡུལ་ཚོན་གྱི་དཀྱིལ་འཁོར་ལ་བརྟེན་པའི་ཚོགས་སྒྲུབ་ཀྱི་སྐབས་ཀྱི་རྗེས་ཀྱི་བྱ་བའམ་ཡང་ན་མདུན་བསྐྱེད་བསྡུས་སྒོམ་གྱི་དོད་པོར་བྱས་པའི་ལུགས་ཡིན་མ་གཏོགས་བདག་མདུན་དབྱེར་མེད་དུ་སྒྲུབ་པའི་སྐབས་སུ་མི་དགོས་སོ།། ཨོཾ་ཁྱེད་ཀྱིས་སེམས་ཅན་དོན་ཀུན་མཛད༔ རྗེས་སུ་མཐུན་པའི་དངོས་གྲུབ་སྩོལ༔ སངས་རྒྱས་ཡུལ་དུ་གཤེགས་ནས་ཀྱང་༔ སླར་ཡང་འབྱོན་པར་མཛད་དུ་གསོལ༔ ཞེས་གསུངས་ཏེ། ཨོྃ་བཀྲ་ཤིས་པའི་ཚིག་གིས་སྣེ་དྲངས་ནས་གང་བྱ་བའི་དོན་པོ་དེ་ལྷག་པར་གཟུགས་བརྙན་གྱི་དཀྱིལ་འཁོར་དུ་སྤྱན་དྲངས་པའི་ལྷ་ཚོགས་ལ་ཆོས་ཀྱི་དབྱིངས་ལ་ཡུལ་གྱི་མིང་གིས་བསྙད་ནས་སླར་ཡང་འབྱོན་ཞུས་དང་བཅས་ཏེ། བཛྲ་མུ༔རྡོ་རྗེའི་དབྱིངས་སུ་གཤེགས་ཞེས་པའི་མདུན་བསྐྱེད་ཡེ་ཤེས་པ་གདོད་མའི་འཁོར་ལོ་ལ་བསྲེས་པའི་དོན་ཡིན་ནོ།། ༼ག རྗེས་སུ་རྫོགས་རིམ་བསྒོམ་པ། རྗེས་སུ་རྫོགས་རིམ་བསྒོམ་པ་ནི༔ གཟུགས་སྣང་ཐམས་ཅད་ཞི་ཁྲོའི་ལྷ་ཚོགས་གསལ༔ ལྷ་ཚོགས་ནམ་མཁའི་འཇའ་ཚོན་ཡལ་པ་ལྟར༔ སྣང་སྟོང་གཉིས་མེད་མཐའ་བྲལ་ངང་ལ་བཞག༔ སྒྲ་གྲགས་ཐམས་ཅད་ཞི་ཁྲོའི་ལྷ་ཚོགས་གསུང་༔ གྲགས་སྟོང་ནམ་མཁའི་འབྲུག་སྒྲ་ཡལ་བ་ལྟར༔ གྲགས་སྟོང་བརྗོད་མེད་ངང་ལ་མཉམ་པར་བཞག༔ དྲན་བསམ་ཐམས་ཅད་ཞི་ཁྲོའི་ཐུགས་སུ་ཤར༔ ཤར་གྲོལ་ཀློང་ཐུམ་མཁའ་ལ་སྤྲིན་དེངས་ལྟར༔ ཐུགས་དགོངས་མ་བཅོས་སྐྱེ་མེད་ངང་ལ་བཞག༔ ཅེས་གསུངས་ཏེ། འདི་རྟག་མཐའ་བསལ་བའི་ཆེད་དུ་སྒོ་གསུམ་གྱིས་བསྡུས་པའི་ལྷ་སྔགས་ཡེ་ཤེས་སུ་ཤར་བ་ཐམས་ཅད་སྐྱེ་མེད་ཀྱི་ཀློང་དུ་བཞག་པ་ཡིན་ཞིང་། བདག་ཉིད་ལྷ་ཡི་སྐུ་གསུང་ཐུགས་འོད་དུ་ཞུ་ནས་ནམ་མཁའི་འཇའ་ཚོན་ཡལ་བ་ལྟར་དུ་སྣང་སྟོང་གྲག་སྟོང་དྲན་སྟོང་གསང་གསུམ་སྐྱེ་བ་མེད་པའི་སྟོང་ཉིད་སྤྲོས་པ་དང་བྲལ་བ་མཉམ་པར་གཞག་བྱ་འཇོག་བྱེད་དང་བྲལ་བའི་ངང་ལ་ཨ་ཨ་ཨ༔ཞེས་སྐྱེ་འགག་གནས་གསུམ་གྱི་མཐའ་དང་བྲལ་བ་མི་དམིགས་བསམ་བརྗོད་དང་བྲལ་བའི་ངང་ལ་དལ་ཅིག་མཉམ་པར་བཞག་དགོས་སོ། །དེས་ཀུན་གཞིའི་ལས་དང་ཤེས་བྱའི་སྒྲིབ་པ་དག ཚིག་དབང་རིན་པོ་ཆེའི་དོན་རྫོགས། འབྲས་བུ་ངོ་བོ་ཉིད་སྐུའི་སྐལ་བ་རང་བཞིན་ལྷུན་གྲུབ་ཏུ་སྨིན་པར་བྱེད་པ་དེ་ལྟ་བུ་ཞིག་ཡིན་ནོ། །དལ་ཅིག་མཉམ་པར་བཞག་པའི་མཉམ་བཞག་ལྟ་བའི་ངང་བསྐྱངས་པ་དེ་ལས་ལངས་ནས་ཆད་མཐའ་བསལ་བའི་ཕྱིར་དུ། སྐད་ཅིག་སྟོང་གསལ་ཆེན་པོའི་ངང་ཉིད་ལས།། རྡོ་རྗེ་སེམས་དཔའི་ང་རྒྱལ་མ་བྲལ་བར།། སྣང་སྟོང་སྒྱུ་མ་ལྟ་བུའི་ངང་ནས་སྤྱོད།། ཅེས་གསུངས་ཏེ། སླར་ཡང་སྐད་ཅིག་གིས་སྟོང་གསལ་གྱི་ངང་ལས་རྡོ་རྗེ་སེམས་དཔའི་སྐུ་སྣང་སྟོང་སྒྱུ་མ་ལྟ་བུ་ལམ་གྱིས་གསལ་བཏབ་ནས་སྣོད་བཅུད་ལྷའི་འཁོར་ལོ་སྦྱོང་ཞོར་དུ་སྣང་སྟོང་ཟུང་འཇུག་སྒྱུ་མ་ཆུ་ཟླའི་ཚུལ་ཤེས་པའི་ཐོག་དེ་ནས་ཟ་འཆག་ཉལ་ལྡང་ལ་སོགས་པའི་སྤྱོད་ལམ་ལ་འཇུག་པ་དེ་བསྟན་པ་ཡིན་ཞིང་། །སྐད་ཅིག་སྟོང་གསལ་འདི་ལས་བྱང་ཆེ་བའི་ནང་ནས་ཚུར་བཏོན་པའོ།། ༼ག༽ ཐ་མར་དགེ་བ་མཇུག་གི་དོན། ཞི་ཁྲོ་རིགས་བརྒྱ་འདུས་པའི་ལས་བྱང་ཚོར་བ་རང་གྲོལ་སྙིང་པོ་ཞེས་བྱ་བ་རྫོགས་སོ༔ ས་མ་ཡ༔དམ་ཚིག་གི་སྔགས་ཀྱི་རྒྱ། རྒྱ་རྒྱ་རྒྱ༔གསུམ་གསང་བ་གསུམ་གྱི་མི་ཤིགས་པའི་རྡོ་རྗེའི་རྒྱའམ་ཟབ་པ་གསུམ་གྱི་རྒྱ་ཡིས་མནན་པ་ཡིན་ལ། གྲུབ་ཐོབ་ཀརྨ་གླིང་པའི་གཏེར་མའོ༔ཞེས་གཏེར་བྱང་བཀོད་པའོ། །དེ་ཡན་ཆད་ཀྱིས་འུ་ཚོས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོ་འཆད་ཁྲིད་ཐེངས་གཅིག་ཞིབ་རྒྱས་སུ་ཕུལ་གྲུབ་པའི་ཚུལ་ཡིན་ཞིང་། སྤྱིར་ན་རྒྱུད་ལུང་མན་ངག་གི་ཟབ་དོན་དེ་རྒྱལ་བ་རྡོ་རྗེ་འཆང་གི་དགོངས་པའི་མཐིལ། གྲུབ་བརྙེས་རིག་འཛིན་བྱེ་བའི་ཐུགས་བཅུད་ཀྱི་ཉིང་ཁུ་ཡིན་པ་དང་། ཡང་སྒོས་སུ་ཟབ་ཆོས་ཞི་ཁྲོ་དགོངས་པ་རང་གྲོལ་འདི་མན་ངག་ཐམས་ཅད་ཀྱི་བཅུད་འདུས། རྒྱུད་སྡེ་ཐམས་ཅད་ཀྱི་སྙིང་ཕྱུང་བ། ཆོས་ཉིད་ཅེར་མཐོང་དུ་བསྟན་པའི་མན་ངག་ཟབ་མོ། རྒྱུད་དང་སྒྲུབ་ཐབས་ལུང་དང་མན་ངག་ཐམས་ཅད་ཟུང་དུ་འབྲེལ་བ། གུ་རུ་རིན་པོ་ཆེས་མངའ་བདག་རྗེ་འབངས་ཡབ་སྲས་ལ་བཀའ་བསྩལ་ཏེ། ཐོས་པ་ཙམ་གྱིས་གྲོལ་བ་ཐོབ་པའི་ཆོས་ཡིན་ཞེས་གསུངས་པ་ལྟར་དུ་ཡིན་ལ། འདི་རྒྱུད་དོན་གཟིགས་པའི་བདེན་མཐོང་གི་གང་ཟག་ཁྱད་པར་པ་ཞིག་མིན་ན་འདིའི་དགོངས་དོན་འགྲོལ་དཀའ་བ་ཡིན་ནོ། །ཁྱད་པར་དུ་ང་ལྟ་བུ་སོ་སོ་སྐྱེ་བོ་འཆིང་བ་ཀུན་ལྡན་ཐོས་བསམ་ཐུན་མོང་གི་སྦྱང་བ་ཙམ་ཡང་སྔོན་དུ་མ་སོང་བ་ཞིག་གིས་དེ་བས་ཀྱང་དེའི་དགོངས་དོན་འགྲོལ་དགོས་ན་གཏིང་དཔོག་རྒྱུ་ཅན་ཞིག་ག་ལ་ཡིན་ཡང་བརྒྱུད་པ་བཟང་པོའི་ཕ་ནོར་ལ་སེལ་ཉམས་ཆགས་ངན་པ་ཞིག་གི་དྲི་མས་གོས་མེད་པའི་ཞེ་ཚོད་དཔའ་གདེང་གིས་དམ་པ་གོང་མའི་དགོངས་འདུན་རྒྱུད་འཛིན་བྱེད་རྒྱུ་དང་། ཕ་ནོར་བུ་སྐལ་དུས་ཐོག་ཏུ་འཕྲོད་དགོས་རྒྱུ། དུས་འདིར་བསྟན་པ་ཉམས་དམའ་ཉག་ཕྲའི་བསྟན་རྒྱུན་གསོ་བའི་དགོས་ཆེད་རྣམས་ལ་དམིགས་ནས་ལྷག་བསམ་སེམས་པ་བཟང་པོའི་ཀུན་སློང་སྔོན་དུ་འགྲོ་ས་དེ་ཉིད་ནས་དམ་པའི་ལེགས་བཤད་ལ་གཞི་བཅོལ་ནས་རྒྱུད་དོན་ཅུང་ཟད་ཅིག་འགྲོལ་རྒྱུའི་འབད་པ་འདི་བྱས་ལ། འདིའི་སྐབས་ནས་ལེགས་པར་བཤད་པའི་ཆ་ཅུང་ཟད་རེ་ཡོད་སྲིད་ན་དེའི་རྣམ་དཀར་གྱི་ཕུང་པོས་སྔ་འགྱུར་རྡོ་རྗེ་ཐེག་པའི་ནང་རྒྱུད་ཡོ་ག་གསུམ་གྱི་བསྟན་པ་བཀའ་གཏེར་དག་སྣང་དང་བཅས་པའི་ཆོས་འདི་བསྐལ་པ་མ་སྟོངས་ནམ་མཁའ་མ་ཞིག་གི་བར་དུ་ནུབ་པ་མེད་པའི་རྒྱུར་འགྱུར་བ་དང་། མཐའ་ཡས་འགྲོ་བའི་ཉེར་འཚོའི་གཞིར་འགྱུར་བར་སྨོན་ལམ་འདེབས་རྒྱུ། གལ་ཏེ་བདག་བློ་རྨོངས་དང་མ་རིག་པས་ནོན་པའི་གཞན་དབང་གིས་ཚིག་དོན་གང་གི་ཆ་ནས་ཡིན་ན་འགལ་ཉེས་ནོངས་པར་གྱུར་བའི་རིགས་ལྟ་བུ་ཤོར་ཡོད་ན་རྩ་གསུམ་ལྷ་དང་སྲུང་མའི་མདུན་ནས་བཤགས་རྒྱུ་དང་། ཆོས་སྤྱན་དང་ལྡན་པ་ཀུན་གྱིས་དེ་ལ་བཟོད་ཅིང་ཚངས་པར་མཛོད་ཅེས་ཞུ་རྒྱུ་ཡིན། དེ་དང་ཆབས་ཅིག་ཏུ་འདིར་བཞུགས་ཀྱི་སྐལ་ལྡན་རྡོ་རྗེའི་མཆེད་ལྕམ་དགེ་འདུན་འདུས་པ་རྒྱ་མཚོའི་བསྙེན་སྒྲུབ་ཕྲིན་ལས་མཐར་ཕྱིན་ཏེ་ཆོས་འདིའི་སྒོ་ནས་འགྲོ་དོན་རྒྱུན་མི་ཆད་པར་ཕྱོགས་མཐར་ཁྱབ་པའི་སྨོན་འདུན་དེ་ལྟར་ཞུ་བ་དང་བཅས་ཏེ་རེ་ཞིག་ཆོས་མཚམས་འུ་ཚོས་འདི་ནས་བཞག ད་རུང་མཆོག་སྤྲུལ་རྣམ་པའི་དགོངས་བཞེད་དང་བསྟུན་ན་ཞི་ཁྲོའི་འདོན་ཆའི་ལུང་དེ་ཆ་ཚང་དུ་འཇུག་དགོས་ཞེས་གསུངས་འདུག དེ་ཡང་ལེགས་སོ་ཞེས་དང་ལེན་ཞུས་ནས་སོང་ཉིན་གྱི་ཆོས་ཁྲིད་ད་ལྟའི་དུས་འདིར་འདོན་རྒྱུ་བྱས་ཡོད། ཡིན་ན་ཡང་འདོན་རྒྱུ་དུས་ཚོད་ཐུང་ཐུང་ཡིན་པ་དང་། གཅིག་ན་ཁྱེད་རྣམ་པས་ཐུན་ཆག་མི་ཉན། གཉིས་སུ་ངས་རབ་བྱུང་མང་པོ་བསྒྲུབ་རྒྱུའི་ཁ་ཆད་བྱས་ཚར་བ་ཡིན་ཞིང་། ཐག་རིང་གི་འགྲུལ་བ་ཐོན་ཚར་སོང་ཟེར་གྱིན་འདུག གང་ལྟར་ཡང་ལུང་དེ་ཡང་ནམ་ཐུབ་གང་ཐུབ་བྱེད་རྒྱུ་ཡིན། དེ་ལྟར་ཆོས་འཆད་ཉན་བྱས་པའི་དགེ་བ་འདིས་མཚོན་ཏེ་རང་གཞན་སེམས་ཅན་ཐམས་ཅད་དང་ཕྱོགས་བཅུའི་རྒྱལ་བ་སྲས་དང་བཅས་པས་དུས་གསུམ་ཀུན་ཏུ་བསགས་པའི་ཟག་བཅས་དང་ཟག་མེད་ཀྱི་དགེ་ཚོགས་ཐམས་ཅད་གཅིག་ཏུ་བསྡུས་ཏེ་བསྡོམས་པའི་མཐུས་ཀུན་མཁྱེན་རྒྱལ་བ་ཤཱཀྱ་སེང་གེའི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་ཅན་བཤད་དང་སྒྲུབ་པ་གཉིས་ལྡན་གྱི་འཛིན་སྐྱོང་སྤེལ་གསུམ་གྱིས་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་རླབས་ཆེན་བསྟན་འགྲོའི་དཔལ་མགོན་གང་ན་འཚོ་ཞིང་གཞེས་པ་དག་གི་སྐུ་ཚེའི་ཞབས་པད་བརྟན། ཐུགས་བཞེད་གེགས་མེད་དུ་འགྲུབ། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། ཡངས་པའི་རྒྱལ་ཁམས་ཐམས་ཅད་དུ་ནད་མུག་མཚོན་འཁྲུགས་འབྱུང་བཞིའི་འཇིགས་པ་ལ་སོགས་པ་རྒུད་པའི་སྐལ་བ་ངན་པ་ཐམས་ཅད་ཞི། འབྲེལ་ཐོགས་འགྲོ་བས་གཙོས་པའི་མཁའ་མཉམ་རིགས་དྲུག་གི་སེམས་ཅན་ཐམས་ཅད་མཐར་ཐུག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་ཐོབ་པའི་རྒྱུར་འགྱུར་བའི་ཕྱིར་དུ་སྔར་རྒྱལ་བ་སྲས་དང་བཅས་པས་ཇི་ལྟར་བསྔོས་པ་ལྟར་གྱི་བསྔོ་བའི་ཐུགས་འདུན་ཟབ་མོ་གནང་བར་ཞུའོ།། །།བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོས་དེ་ཡང་དེ་བཞིན་དེ། །དེ་དག་ཀུན་གྱི་རྗེས་སུ་བདག་སློབ་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ།། །།ཀྱེེ་མ་བདག་ལ་སྐྱེ་གནས་བར་དོ་འཆར་དུས་འདིར༔ ཚེ་ལ་ལོང་མེད་ལེ་ལོ་སྤངས་བྱས་ནས༔ ཐོས་བསམ་སྒོམ་གསུམ་མ་ཡེངས་ལམ་ལ་འཇུག༔ སྣང་སེམས་ལམ་བསླང་སྐུ་གསུམ་མངོན་གྱུར་བྱ༔ མི་ལུས་ལན་གཅིག་ཐོབ་པའི་དུས་ཚོད་འདིར༔ ཡེངས་མ་ལམ་ལ་སྡོད་པའི་དུས་ཚོད་མིན༔ ཀྱེེ་མ་བདག་ལ་རྨི་ལམ་བར་དོ་འཆར་དུས་འདིར༔ གཏི་མུག་རོ་ཉལ་བག་མེད་སྤངས་བྱས་ནས༔ དྲན་པ་ཡེངས་མེད་གནས་ལུགས་ངང་ལ་འཇུག༔ རྨི་ལམ་བཟུང་ནས་སྤྲུལ་བསྒྱུར་འོད་གསལ་སྦྱངས༔ དུད་འགྲོ་བཞིན་དུ་ཉལ་བར་མ་བྱེད་ཅིག༔ གཉིད་དང་མངོན་སུམ་འདྲེས་པའི་ཉམས་ལེན་གཙོ༔ ཀྱེེ་མ་བདག་ལ་བསམ་གཏན་བར་དོ་འཆར་དུས་འདིར༔ རྣམ་གཡེང་འཁྲུལ་བའི་ཚོགས་རྣམས་སྤངས་བྱས་ནས༔ ཡེངས་མེད་འཛིན་མེད་མཐའ་བྲལ་ངང་ལ་འཇོག༔ བསྐྱེད་རྫོགས་གཉིས་ལ་བརྟན་པ་ཐོབ་པར་བྱ༔ བྱ་བ་སྤངས་ནས་རྩེ་གཅིག་བསྒོམ་དུས་འདིར༔ ཉོན་མོངས་འཁྲུལ་བའི་དབང་དུ་མ་གཏོང་ཞིག༔ ཀྱེེ་མ་བདག་ལ་འཆི་ཁ་བར་དོ་འཆར་དུས་འདིར༔ ཀུན་ལ་ཆགས་སེམས་ཞེན་འཛིན་སྤངས་བྱས་ནས༔ གདམས་ངག་གསལ་བའི་ངང་ལ་མ་ཡེངས་འཇུག༔ རང་རིག་སྐྱེ་མེད་ནམ་མཁའི་དབྱིངས་སུ་འཕོ༔ འདུས་བྱས་ཤ་ཁྲག་ལུས་དང་འབྲལ་ལ་ཁད༔ མི་རྟག་སྒྱུ་མ་ཡིན་པར་ཤེས་པར་བྱ༔ ཀྱེེ་མ་བདག་ལ་ཆོས་ཉིད་བར་དོ་འཆར་དུས་འདིར༔ ཀུན་ལ་སྔངས་སྐྲག་འཇིགས་སྣང་སྤངས་བྱས་ནས༔ གང་ཤར་རང་སྣང་རིག་པར་ངོ་ཤེས་འཇུག༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགགས་ལ་ཐུག་པའི་དུས་ཚོད་འདིར༔ རང་སྣང་ཞི་ཁྲོའི་ཚོགས་ལ་མ་འཇིགས་ཤིག༔ ཀྱེེ་མ་བདག་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད༔ མངལ་སྒོ་དགག་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་ཤིག་ཡིན༔ མིག་སེར་སྤངས་ལ་བླ་མ་ཡབ་ཡུམ་སྒོམས༔ འཆི་བ་འོང་སྙམ་མེད་པའི་བློ་རིང་པོ༔ དོན་མེད་ཚེ་འདིའི་བྱ་བ་བསྒྲུབས་བསྒྲུབས་ནས༔ ད་རེས་སྟོང་ལོག་བྱས་ན་ཤིན་ཏུ་འཁྲུལ༔ དགོས་ངོ་ཤེས་པ་དམ་པའི་ལྷ་ཆོས་ཡིན༔ ད་ལྟ་ཉིད་དུ་ལྷ་ཆོས་མི་བྱེད་དམ༔ གྲུབ་ཆེན་རྣམས་ཀྱི་ཞལ་ནས་འདི་སྐད་གསུངས༔ བླ་མའི་གདམས་ངག་སེམས་ལ་མ་བཞག་ན༔ རང་གིས་རང་ཉིད་བསླུ་བར་མི་འགྱུར་རམ༔ ༈ བླ་མ་ཡི་དམ་མཁའ་འགྲོའི་ཚོགས་ལ་ཕྱག་འཚལ་ལོ༔ བརྩེ་བ་ཆེན་པོའི་ལམ་སྣ་དྲང་དུ་གསོལ༔ བདག་ནི་འཁྲུལ་བའི་འཁོར་བར་འཁྱམས་པའི་ཚེ༔ ཐོས་བསམ་སྒོམ་གསུམ་མ་ཡེངས་འོད་ལམ་ལ༔ བཀའ་བརྒྱུད་བླ་མ་རྣམས་ཀྱིས་ལམ་སྣ་དྲོངས༔ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ གཏི་མུག་དྲག་པོས་འཁོར་བར་འཁྱམས་པའི་ཚེ༔ ཆོས་དབྱིངས་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྣམ་པར་སྣང་མཛད་ལམ་སྣ་དྲོངས༔ ཡུམ་མཆོག་དབྱིངས་ཕྱུག་མ་ཡིས་རྒྱབ་ནས་སྐྱོར༔ བར་དོའི་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཞེ་སྡང་དྲག་པོས་འཁོར་བར་འཁྱམས་པའི་ཚེ༔ མེ་ལོང་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྡོ་རྗེ་སེམས་དཔས་ལམ་སྣ་དྲོངས༔ ཡུམ་མཆོག་སངས་རྒྱས་སྤྱན་མས་རྒྱབ་ནས་སྐྱོར༔ བར་དོའི་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ང་རྒྱལ་དྲག་པོས་འཁོར་བར་འཁྱམས་པའི་ཚེ༔ མཉམ་ཉིད་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རིན་ཆེན་འབྱུང་ལྡན་ལམ་སྣ་དྲོངས༔ ཡུམ་མཆོག་མཱ་མ་ཀི་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ འདོད་ཆགས་དྲག་པོས་འཁོར་བར་འཁྱམས་པའི་ཚེ༔ སོར་རྟོག་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་སྣང་བ་མཐའ་ཡས་ལམ་སྣ་དྲོངས༔ ཡུམ་མཆོག་གོས་དཀར་མོ་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཕྲག་དོག་དྲག་པོས་འཁོར་བར་འཁྱམས་པའི་ཚེ༔ བྱ་གྲུབ་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་དོན་ཡོད་གྲུབ་པས་ལམ་སྣ་དྲོངས༔ ཡུམ་མཆོག་དམ་ཚིག་སྒྲོལ་མས་རྒྱབ་ནས་སྐྱོར༔ བར་དོའི་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ བག་ཆགས་དྲག་པོས་འཁོར་བར་འཁྱམས་པའི་ཚེ༔ ལྷན་སྐྱེས་ཡེ་ཤེས་གསལ་བའི་འོད་ལམ་ལ༔ དཔའ་བོ་རིག་འཛིན་རྣམས་ཀྱིས་ལམ་སྣ་དྲོངས༔ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ འཁྲུལ་སྣང་དྲག་པོས་འཁོར་བར་འཁྱམས་པའི་ཚེ༔ སྔངས་སྐྲགས་འཇིགས་སྣང་སྤངས་པའི་འོད་ལམ་ལ༔ བཅོམ་ལྡན་ཞི་ཁྲོའི་ཚོགས་ཀྱིས་ལམ་སྣ་དྲོངས༔ དབྱིངས་ཕྱུག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཀྱེེ་མ༔ ནམ་མཁའི་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་མཐིང་ཁའི་ཞིང་ཁམས་མཐོང་བར་ཤོག༔ ཆུ་ཡི་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་དཀར་པོའི་ཞིང་ཁམས་མཐོང་བར་ཤོག༔ ས་ཡི་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་སེར་པོའི་ཞིང་ཁམས་མཐོང་བར་ཤོག༔ མེ་ཡི་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་དམར་པོའི་ཞིང་ཁམས་མཐོང་བར་ཤོག༔ རླུང་གི་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་ལྗང་གུའི་ཞིང་ཁམས་མཐོང་བར་ཤོག༔ འཇའ་ཚོན་ཁམས་རྣམས་དགྲ་རུ་མི་ལྡང་ཞིང་༔ སངས་རྒྱས་སྣ་ཚོགས་ཞིང་ཁམས་མཐོང་བར་ཤོག༔ སྒྲ་འོད་ཟེར་གསུམ་དགྲ་རུ་མི་ལྡང་ཞིང་༔ ཞི་ཁྲོ་རབ་འབྱམས་ཞིང་ཁམས་མཐོང་བར་ཤོག༔ སྒྲ་རྣམས་ཐམས་ཅད་རང་སྒྲར་ཤེས་པར་ཤོག༔ འོད་རྣམས་ཐམས་ཅད་རང་འོད་ཤེས་པར་ཤོག༔ ཟེར་རྣམས་ཐམས་ཅད་རང་ཟེར་ཤེས་པར་ཤོག༔ བར་དོ་རང་ངོ་རང་གིས་ཤེས་པར་ཤོག༔ སྐུ་གསུམ་ཞིང་ཁམས་མངོན་དུ་འགྱུར་བར་ཤོག༔ ༈ ཀུན་བཟང་ཞི་ཁྲོ་རབ་འབྱམས་ཐུགས་རྗེ་དང་། །ཆོས་ཉིད་རྣམ་པར་དག་པའི་བདེན་སྟོབས་དང་། །སྔགས་འཆང་རྩེ་གཅིག་བསྒྲུབས་པའི་བྱིན་རླབས་ཀྱིས། །སྨོན་ལམ་བཏབ་པ་དེ་བཞིན་འགྲུབ་གྱུར་ཅིག །རིག་འཛིན་བདག་གི་ལྷག་བསམ་རྣམ་དག་དང་། །ཆོས་ཉིད་རང་བཞིན་ཅི་ཡང་མ་ཡིན་པའི། །བདེན་པའི་མཐུ་ཡིས་ཁམས་གསུམ་ཡིད་ཅན་དང་། །ཁྱད་པར་འབྲེལ་བས་བསྡུས་པའི་སེམས་ཅན་ཀུན། །སྐུ་བཞིའི་ཞིང་ཁམས་རྨད་བྱུང་ཉམས་དགའ་བར། །ཚོམ་བུ་གཅིག་ཏུ་ཕྱམ་གཅིག་གྲོལ་བར་ཤོག །མདོ་སྔགས་ཆོས་ཚུལ་ཚང་ལ་མ་ནོར་བ། །མཁས་ཤིང་གྲུབ་བརྙེས་རིག་འཛིན་བརྒྱུད་པའི་སྲོལ། །ཐུབ་བསྟན་སྙིང་པོ་གསང་སྔགས་སྔ་འགྱུར་བའི། །བསྟན་པ་འཕེལ་རྒྱས་སྲིད་མཐར་ཁྱབ་གྱུར་ཅིག །ཧྲཱིཿསྔོན་ཚེ་དེ་བཞིན་གཤེགས་པ་གཙུག་གཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རི། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བར་འདེབས། །བསྟན་པ་ཡུན་རིང་གནས་པའི་བཀྲ་ཤིས་ཤོག །དཔལ་ལྡན་མཁས་གྲུབ་བྱེ་བའི་གཙུག་གི་རྒྱན། །མདོ་སྔགས་ལུང་རྟོགས་བསྟན་པའི་ཤིང་རྟ་ཆེ། །འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ། །ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག །ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ། །བཤད་སྒྲུབ་བསྟན་པའི་མངའ་བདག་འཇིགས་མེད་གླིང་། །མཚུངས་མེད་བླ་མའི་བསྟན་པ་སྲིད་མཐའི་བར། །བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག །གངས་རིའི་ར་བས་སོགས། སླར་སྨྲས་པ།རྨད་བྱུང་ཐུགས་ཀྱི་ཆུ་མཚོ་ལས་བྱུང་ཞིང་།། ཡང་དག་ལུང་དང་རིགས་པའི་རླབས་ཕྲེང་ཅན།། རྒྱུད་དོན་རྒྱ་མཚོའི་གསལ་བྱེད་རྣམ་བཤད་འདི།། ཀུན་མཁྱེན་རྒྱལ་བའི་གསུང་དང་དབྱེར་མ་མཆིས།། རིམ་གཉིས་ལམ་གྱི་ཟབ་གནད་དང་ལྡན་པས།། ཟབ་གསང་ཆོས་ཀྱི་སྙིང་པོ་ཐོས་གྲོལ་གྱིས།། རང་གཞན་དོན་གཉིས་བྱ་བ་སྒྲུབ་འདོད་པ།། སྐལ་བཟང་སྐྱེ་བོ་འདི་ལ་འཇུག་པར་རིགས།། ངེས་གསང་རྒྱུད་ཀྱི་དགོངས་དོན་ལྟ་ཅི་སྟེ།། རྡོ་རྗེའི་ཚིག་གི་གཟུགས་རིས་འབྲི་བ་ཡང་།། དམན་པ་བདག་ལ་སྤོབས་པ་མ་མཆིས་པས།། ནོངས་པ་འབྱུང་སྲིད་རྩ་གསུམ་ལྷ་ལ་བཤགས།། འདིར་འབད་དགེ་བས་ཁམས་གསུམ་ཡིད་ཅན་ཀུན།། ཐོས་གྲོལ་ཆོས་ཀྱི་ལམ་མཆོག་ལ་བརྟེན་ནས།། སྐུ་བཞིའི་ཞིང་ཁམས་ཆོས་དབྱིངས་ཕོ་བྲང་དུ།། འབད་མེད་ལྷུན་རྫོགས་མངོན་འཚང་རྒྱ་བར་ཤོག། ཅེས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོའི་རྣམ་བཤད་རིམ་གཉིས་གསལ་བྱེད་ཅེས་བྱ་བ་འདི་ཆེར་སྙིགས་དུས་ཀྱི་ཐ་མ་འདི་ལ་ངེས་གསང་བསྟན་པའི་གསལ་བྱེད་ཆེན་པོ་དོན་གྱི་སླད་དུ་མཚན་ནས་སྨྲོས་ན་༧ཆོས་རྗེ་བླ་མ་པདྨ་སྐལ་བཟང་རིན་པོ་ཆེ་མཆོག་གིས་ལས་བྱང་ཆུང་བའི་དོན་ཁྲིད་མཛད་པ་དེ་ཉིད་ཇི་བཞིན་དུ་ཡི་གེར་བཀོད་པ་ཡིན་ཞིང་། ཡི་གེའི་གཟུགས་སུ་འགོད་པ་པོ་ནི་ཆོས་རྗེ་བླ་མ་མཆོག་གི་སློབ་འབངས་ཀྱི་གྲལ་མཐར་གཏོགས་པ་བསོད་ནམས་རྒྱ་མཚོ་ཞེས་འབོད་པ་དེ་ཉིད་ཀྱིས་རབ་བྱུང་བཅུ་བདུན་པའི་ལྕགས་ཕོ་སྟག་གི་ལོའི་ཟླ་བ་བཅུ་གཅིག་པའི་ཚེས་བཅུ་བཞི་ཉིན་ལ་གྲུབ་པར་བགྱིས་ཏེ་སྦྱར་བར་བྱས་པས་འདིས་ཀྱང་སྤྱིར་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་ལ་ཁྱད་པར་དུ་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཕྲིན་ལས་ནམ་མཁའི་མཐའ་དང་མཉམ་པའི་རྒྱུ་རུ་སྨོན་ན་དེ་དེ་བཞིན་དུ་འགྲུབ་པར་རྩ་གསུམ་རྒྱལ་བ་སྲས་དང་བཅས་པས་མཐུན་འགྱུར་མཛད་དུ་གསོལ།། །། དགེའོ།། དགེའོ།། དགེའོ།། |