ཐོད་རྒལ་གྱི་ཞལ་ཁྲིད་འོད་གསལ་མཐོང་བ་ཆེན་པོ།

འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཅར་འབྱེད་པའི་ལྡེའུ་མིག་ཞལ་ཁྲིད་འོད་གསལ་མཐོང་བ་ཆེན་པོ་ཞེས་བྱ་བ་བཞུགས་སོ།།

ཉིན་དང་པོའི་ཆོས་ཁྲིད།

འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཅར་འབྱེད་པའི་ལྡེའུ་མིག་ཅེས་བྱ་བ་བཞུགས་སོ།།

དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། གང་གི་ཞལ་བཟང་བལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས། །བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས། །འཛམ་བུའི་གླིང་འདིར་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་། །སྐུ་གསུམ་མཛད་པའི་ངོ་བོར་གཅིག་སྟེ་དཔལ་ལྡན་སངས་རྒྱས་པདྨ་སྐྱེས། །གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད། །ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །མཁྱེན་པས་ཤེས་བྱ་ཀུན་གྱི་དེ་ཉིད་གཟིགས། །ཐུགས་བརྩེའི་འོད་ཟེར་གདུལ་བྱའི་དཔལ་དུ་ཤར། །ཟབ་ལམ་ཐེག་རྩེའི་བསྟན་པ་གསལ་མཛད་པ། །རིག་འཛིན་འཇིགས་མེད་གླིང་པ་ལ་ཕྱག་འཚལ། །དུས་གསུམ་ཀུན་མཁྱེན་པདྨ་འབྱུང་གནས་ཀྱིས། །ཟབ་གཏེར་བདག་པོར་མངའ་གསོལ་འཁོར་ལོས་བསྒྱུར། །སངས་རྒྱས་གླིང་པའི་ཡང་སྤྲུལ་སྦས་ཚུལ་འཆང་། །ཀུན་བཟང་གཞན་ཕན་ཞབས་ལ་གསོལ་བ་འདེབས། །འཕགས་པ་འཇིག་རྟེན་དབང་ཕྱུག་ཐུགས་རྗེའི་འཕྲུལ། །འགྲོ་བ་ཐར་གླིང་བགྲོད་པའི་དེད་དཔོན་མཆོག །འབྲེལ་ཚད་དོན་ལྡན་ཀློང་ཆེན་རྣལ་འབྱོར་པ། །འཇིགས་མེད་རྒྱལ་བའི་མྱུ་གུར་གསོལ་བ་འདེབས། །དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །འཇའ་ལུས་རྡོ་རྗེའི་སྐུ་བརྙེས་བི་མ་ལ། །དབྱེར་མེད་ཐུགས་རྗེ་གཅིག་བསྡུས་སྤྲུལ་པའི་སྐུ། །མི་འགྱུར་ནམ་མཁའི་རྡོ་རྗེར་གསོལ་བ་འདེབས། །ཨོ་རྒྱན་རིག་འཛིན་ཆེན་པོའི་རིང་ལུགས་ཀྱི། །བཤད་སྒྲུབ་བསྟན་པའི་རྒྱལ་མཚན་འཛིན་མཛད་ཅིང་། ཡོན་ཏན་ནོར་བུའི་མཛོད་མངའ་ཆོས་ཀྱི་རྗེ། །དཔལ་ལྡན་བླ་མའི་ཞབས་ལ་གསོལ་བ་འདེབས། །འཕགས་ཡུལ་མཁས་པའི་དབང་ཕྱུག་ཟླ་བ་གྲགས། །གངས་ལྗོངས་འཇམ་པའི་དབྱངས་དངོས་ཀུན་མཁྱེན་རྗེ། །དབྱེར་མེད་ཐུགས་རྗེ་ཡས་སྤྲུལ་དགེ་བའི་བཤེས། །གཞན་ཕན་ཆོས་ཀྱི་སྣང་བར་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །དགོངས་བརྒྱུད་རྟོགས་པ་འཕོ་བར་བྱིན་གྱིས་རློབས། །ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །གང་ཞིག་གསེར་མཆོག་རང་བཞིན་རི་རབ་ལ་གནས་མནྡཱ་ར་དང་ལྷར་བཅས་གནོད་སྦྱིན་དང་། །གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། དེ་དག་ཐམས་ཅད་ཐར་པ་དམ་པའི་སྒོར་གྱུར་ཐུབ་པའི་གསུང་མཉན་ཕྱིར་ན་འདིར་གཤེགས་ཤིག །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མི་འམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག །བསྐལ་པ་སྟོང་དུ་ཐོས་པ་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན། །གང་ཞིག་གཏན་གྱི་སྐྱབས་གནས་མཆོག་གྱུར་པ། །དཀོན་མཆོག་གསུམ་གྱི་ཡོན་ཏན་བསམ་མི་ཁྱབ། །དེ་ལ་དད་བྱས་རྣམ་སྨིན་ཡང་དེ་བཞིན་ཏེ། །བསྐལ་པ་བྱེ་བ་ཁྲག་ཁྲིག་བགྲང་ན་ཡང་། །དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་། །རྣམ་པར་གྲོལ་བ་རིན་ཆེན་སྣ་ཚོགས་དང་། །ཟབ་མོ་རྒྱལ་བའི་བཀའ་འདི་གུས་པས་ཉོན། །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ཆོས་འདི་འགྱུར་བར་ཤོག། ༈ དེ་ཡང་ཀུན་མཁྱེན་ཆོས་རྗེས་མན་ངག་མཛོད་ཀྱི་གདམས་ངག་དྲུག་གིས་གནད་དུ་བརྡེག་པ་ཞེས་པའི་ནང་དུ། བཟའ་མི་ཚོང་འདུས་མགྲོན་པོ་འཚོགས་པ་འདྲ། །ནམ་འབྲལ་མི་ཤེས་མཐར་ཐུག་དོན་ལ་སྦྱོངས། །གཉེན་འདུན་ལྕང་ཁའི་བྱེའུ་ཆུང་འདུས་པ་འདྲ། །ནམ་གྱེས་མི་ཤེས་གདུང་སེམས་འཁྲི་བ་ཆོད། །ཚེ་སྲོག་མི་རྟག་རྩྭ་ཁའི་ཟིལ་བ་འདྲ། །སྒོམ་སྒྲུབ་ཆོས་ལ་བརྩོན་པ་དྲག་དུ་སྐྱེད། །ལ་སོགས་པ་གསུངས་པ་དང་ནི། ད་དུང་ཆོས་བྱེད་རྣམས་ཀྱི་དུས་ཚོད་རྣམ་དྲུག་གི་ནང་ན། གནས་ལུགས་དོན་ལ་ལྟ་བའི་རྩལ་སྦྱོང་ཚེ། །གོལ་སྒྲིབ་འོང་བའི་དུས་ཡིན་བླ་མ་བསྟེན། །ཞེས་གསུངས་ཡོད་པས། ཁྱིམ་བཟའ་ཚང་གྲྭ་རོགས་གྲོགས་མཆེད། འཁོར་སློབ་མ། གཉེན་བཤེས་དགའ་འདུན་གཅིག་ཀྱང་རྟག་པ་མེད་ཅིང་བརྟན་པ་མིན་པ་དེ། ཚོང་འདུས་ཀྱི་མགྲོན་པོ། ལྕང་སྡོང་མགོའི་བྱེའུ་ཁྱུ། རྩྭ་རྩེའི་སྟེང་གི་ཟིལ་བ་སོགས་ཀྱི་དཔེ་དང་དོན་མཚུངས་པ་རེད། སེམས་ཅན་ཐམས་ཅད་འཚང་རྒྱ་རུང་གཞི་རྒྱུད་བདེ་གཤེགས་སྙིང་པོས་ཁྱབ་ལུགས་འདྲ་ན་ཡང་། དམ་པའི་བླ་མ་མ་བསྟེན། དགེ་བའི་བཤེས་གཉེན་གྱིས་མ་ཟིན། གདམས་ངག་བདུད་རྩིའི་ཟེགས་མ་སྐལ་བཟང་སྙིང་གི་རོ་བཅུད་ལ་མྱང་རྒྱུའི་སྐལ་བ་མ་ཐོབ་པས། འདི་བཞིན་དུ་འཁོར་བ་མུ་མཐའ་མེད་པའི་གནས་ལ། སྔར་འཁྱམས་འཁྲུལ་བའི་ཐོག་མ་འདི་དུས་རེད་ཟེར་ནས་སྟོན་རྒྱུ་མེད་པ་ཞིག་དང་། ད་འཁྱམས་འཁྲུལ་བའི་ཐ་མ་འདི་དུས་རེད་ཟེར་ནས་ཡང་འདི་འཛུབ་མོས་འཛུགས་ས་ཞིག འདིའི་རྔ་མ་འདི་ནས་བུད་འདུག་བསམ་རྒྱུ་ཞིག་རིག་རྒྱུ་མེད་པའི་སྐབས་འདིར། ཆོས་ཉམས་ལེན་གྱི་གནད་རེར་འདིའི་ཅིག་ཨེ་མི་བཟང་བསམ་ནས་འཇུག་ཁུལ་བྱས་ཀྱང་། ཡང་དེ་ལ་ཐོས་བསམ་གྱི་ཞུན་མཐར་ཆོད་མེད། ཉམས་ལེན་གྱི་བོགས་འདི་ལྟར་བྱས་ནས་འདོན་ཏེ། ཐེ་ཚོམ་གྱི་སྒྲོགས་འདི་ལྟར་བྱས་ནས་འཁྲོལ་དགོས་བསམ་པའི་བློ་གཏད་སའི་མན་ངག་འདི་ཡིན་བསམ་པ་ཞིག་མེད་ན། གོལ་སྒྲིབ་ནོར་འཕྱུགས་ལ་འགྲོ་བའི་དུས་ཚོད་ཡིན་པས། དེའི་ཕྱིར་ནའང་བླ་མ་བསྟེན་དགོས་ཀྱི་ཡོད་གསུངས་པ་རེད། དང་པོ་བླ་མ་བསྟེན་དགོས་ཏེ། ཐར་བའི་ལམ་སྣེ་དེ་དང་པོ་བླ་མས་སྟོན་པའི་ཕྱིར་དང་། བར་དུ་ཡང་བླ་མ་བསྟེན་དགོས་ཏེ། བླ་མའི་དགོངས་སྤྱོད་ཚུལ་བཞིན་དུ་བསླབས་དགོས་པའི་ཕྱིར། ཐ་མར་བླ་མ་དང་འབྲལ་བ་ཡོད་མི་རུང་སྟེ་དགོངས་ཀློང་དབྱེར་མེད་རོ་གཅིག་ཏུ་འདྲེས་དགོས་པ་ཡིན་ན། དེའི་ཐད་ཚོད་བླ་མ་འབྲལ་མེད་སྙིང་དབུས་སུ་རིག་སྟོང་གཉུག་མའི་ཡེ་ཤེས་གང་ཡིན་པ་དེ་ཉིད་མཚོན་བྱེད་རྟགས་ཀྱི་བླ་མས་མཚན་པའི་མཚོན་བྱ་དོན་གྱི་བླ་མའི་རང་ཞལ་མཇལ་བ་རེད། དེས་ན་བླ་མ་བསྟེན་ཟེར་རྒྱུ་དེ། གང་བྱུང་དེས་ཆོག་གིས་གྲགས་རྗེས་སུ་འབྲངས་ནས་སླ་ཆོས་བྱེད་བཞག་ཉན་རྒྱུ་ཞིག་མིན་པར། ཁེ་ཉེན་ཡག་ཉེས་ཆེན་པོའི་བྱ་བ་འཆུགས་དང་མི་འཆུག་གི་གནད་དེ་ན་ཡོད་པ་ཡིན། འཇིག་རྟེན་ཚེ་འདིའི་བྱ་བ་ཆེན་པོ་ཡིན་བསམ་རྒྱུ་ཅི་འདྲ་ཞིག་འཆུགས་སོང་རུང་། དེས་ཚེ་འདིའི་བྱ་བ་ཞིག་འཆུགས་པ་ཙམ་ཞིག་རེད། ཐར་བའི་ལམ་སྟོན་གྱི་བླ་མ་བསྟེན་རྒྱུ་འཆུགས་སོང་བ་ཡིན་ན་ཚེ་རབས་གཏན་གྱི་འདུན་མ་འཆུགས་པས་མི་ཚད། རང་གཞན་སེམས་ཅན་མང་པོ་མཐའ་ཡས་པ་ཞིག་གི་ཕན་དང་བདེ་བའི་སྒོ་འཕར་བརླགས་འགྲོ་བ་རེད། དེས་ན་ཁྱི་དང་གློ་བ་འཕྲད་པ་བཞིན་དུ་བླ་མ་བསྟེན་སྔ་བྱེད་མི་རུང་། དང་པོར་བླ་མ་བརྟག་ལ་མཁས་པ་གསུངས་པ་རེད། ཁྱད་པར་སྙིགས་མའི་དུས་འདི་ལ་བརྟག་ཞིབ་ནན་པོ་ཞིག་མ་བྱས་ན། རྟགས་ཙམ་འཛིན་པའི་བསྟན་པའི་དུས་མགོར་ཉེ་ཤིང་ཉེ་ད། རྟགས་ཆ་ལུགས་མ་དགོས་མིང་དང་ཐོབ་ཐང་གི་ཆེ་བ་ལའང་བལྟ་རྒྱུ་མེད་པའི་དུས་ཡིན་པ་རེད། གཞན་གྱི་ཁ་ལའང་ཉན་རྒྱུ་ཡོད་པ་མ་རེད། སྙིགས་མའི་སྐྱེ་བོ་འདི་བླུན་པོ་ཅོལ་ཆུང་ཡིན་པས་ནོར་དང་གཏམ་གྱི་རྗེས་སུ་འབྲངས་ནས་མགོ་བོ་གདུགས་བཞིན་འཁོར་མཁན་མང་དུས་རེད། དེས་ན་མིང་གི་བླ་མ་རེད་དང་དོན་གྱི་བླ་མ་རེད་རང་གིས་བརྟག་དགོས། བརྟག་ཐབས་ཅི་འདྲས་བརྟག་སྙམ་ན། ཆོས་ཀྱིས་བརྟག་དགོས་ཏེ། ཕྱི་སོ་ཐར་གྱི་ཆ་ནས་བརྟན་མཁས་བཙུན་པའི་ཡོན་ཏན་དང་ལྡན་མི་ལྡན། ནང་བྱང་སེམས་ཀྱི་ཐད་ནས། བཤེས་གཉེན་ཞི་བ་དུལ་བ་ཉེར་ཞི་བ། །ཡོན་ཏན་ལྷག་པར་བརྩོན་བཅས་ལུང་གིས་ཕྱུག །ལ་སོགས་པ་བྱང་ཆུབ་སེམས་དཔའི་དགེ་བའི་བཤེས་གཉེན་ཡོན་ཏན་བཅུ་ལྡན་རེད་ཡོད་དང་མེད། གསང་སྔགས་རྡོ་རྗེ་ཐེག་པའི་ལུགས་ཀྱི་སྟོན་པ་མཛོད་ལྡན་ཆུ་བོ་རྫོགས། །ལ་སོགས་པ་གསང་སྔགས་སྟོན་པའི་སློབ་དཔོན་གྱི་ཡོན་ཏན་བརྒྱད་པོ་ཚང་དང་མི་ཚང་། དེའི་སྟེང་ནས་རང་བཞིན་རྫོགས་པ་ཆེན་པོའི་མན་ངག་སྟོན་པའི་བླ་མ་དེ། རང་ལམ་གྱི་དབང་ཐོབ། རྒྱུད་སྨིན། དམ་ཚིག་ལ་སྐྱོན་མ་ཞུགས་པ་ཞིག་ཡིན་དགོས་པ་རེད། ཁྱད་པར་གྲོལ་བྱེད་གདམས་པའི་ཐད་ནས། ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གཉིས་ཀྱི་སྒོ་ནས། ཆོས་ཉིད་དོན་གྱི་གནས་ལུགས་ཀྱི་རང་ཞལ་མཐོང་ཞིང་། ལམ་སྣང་བཞི་ལུགས་འབྱུང་དང་ལུགས་ལྡོག་གི་གོ་རྟོགས་མྱོང་བ་ཅི་ཙམ་ལྡན་པ་ཞིག་རེད་འདུག བླ་མ་དེ་བསྟེན་བཞག་ན། བརྒྱུད་པ་གོང་མའི་བྱིན་རླབས་བུམ་པ་གང་བྱོའི་ཚུལ་དུ་གནང་རྒྱུ་ཡོད་པའི་སྙན་བརྒྱུད་ཀྱི་བྱིན་རླབས་དང་ལྡན་པ་ཞིག་རེད་དང་མ་རེད། དེ་ཚོ་གཙོ་བོ་བརྟགས་ཤིང་རྟོགས་དགོས་པ་རེད། རེད་དེ་གང་ཟག་སྐྱེས་ཆེན་ཁྱད་འཕགས་ཀྱི་དགོངས་སྤྱོད་དེ་སོ་སྐྱེའི་བློས་དཔོག་ས་མ་རེད། འགའ་རེ་སྦས་པའི་ཚུལ་དུ་བཞུགས་པའང་མང་བ་ཡིན་ན། དམ་པའི་བཤེས་གཉེན་བརྟགས་ནས་རྙེད་དུས་ཤིག་ཡོང་རྒྱུ་མི་འདུག་ཨང་བསམ་དགོས་པ་མ་རེད། བླ་མ་བརྟག་ཐབས་ལག་ལེན་ལ་ཁེལ་བའི་སྟབས་ལ་དེས་བདེ་མེད་པ་དེ་གང་རེད་ཟེར་ན། མེ་རྟགས་ཀྱི་དུ་བ། ཆུ་རྟགས་ཀྱི་རླངས་པ། དེའི་ཐུགས་རྒྱུད་བྱང་ཆུབ་སེམས་ཀྱིས་གཏམས་ཤིང་བཀང་ཡོད་མེད་ཀྱིས་ཤེས་ནི་རེད། བྱང་ཆུབ་ཀྱི་སེམས་དང་ལྡན་ན་འབྲེལ་ཚད་དོན་ལྡན་ཡིན་ནི་རེད། བཟང་འབྲེལ་རེད་ན་ཅི་བཤད། ཚེ་གཅིག་སངས་རྒྱས་ཀྱི་ལམ་སྟོན་པ་རེད། ངན་འབྲེལ་ཡང་དེའི་ཐུགས་བསྐྱེད་དང་སྨོན་ལམ་གྱི་དབང་གིས་འཁོར་བ་མཐའ་ཅན་ལ་འགྱུར་བ་ཡིན་ན། དེ་ལྟ་བུའི་དམ་པ་བསྟེན་ཚུལ་དེ། ཕར་ཕྱིན་ཐེག་པ་དང་ཐུན་མོང་གྱུར་བའི་ལུགས་ལྟར་དུ་བྱས་ནའང་། འཇིག་རྟེན་འདྲེན་ཕྱིར་ཀུན་དང་ཆ་མཐུན་ལ། །འཇིག་རྟེན་འདས་ཕྱིར་ཀུན་དང་ཆ་མི་མཐུན། །སྒོ་གསུམ་སྤྱོད་པ་ཀུན་ལས་ཁྱད་པར་འཕགས། །ཞེས་གསུངས་ན། དེ་ཅི་གསུངས་པ་རེད་ཟེར་ན། མཐུན་པས་མཐུན་པ་འདུལ་དགོས་པའི་ཕྱིར་ན། རྣམ་པ་མི་དང་འདྲ་མོའམ་མི་ཡིན་པ། སྐད་ཀྱིས་གོ་བརྡ་འཕྲོད་ཅིང་ཁ་ལག་སྤྱོད་གསུམ་རང་ཅག་དང་འདྲ་བ་ཞིག སྐྱེ་དགུ་འདྲེན་ཐུབ་པས་མཐོང་ན་མི་མཐུན་པ་མེད་པ། ཀུན་དང་ཆ་མཐུན་གསུང་བ་དེ་འདྲ་ཞིག་རེད། ཡང་འཇིག་རྟེན་ལས་འདས་པའི་ཟབ་མོའི་དགོངས་བཅུད་མངའ་བའི་སྟོབས་ཀྱིས་ཀུན་དང་ཐུན་མོང་དུ་མ་གྱུར་པ་ཆ་མི་མཐུན་པ་གསུངས་པ་རེད། མདོར་ན་སྒོ་གསུམ་གྱི་སྤྱོད་པ་ཐམས་ཅད་བརྩོན་པ་དོན་དང་ལྡན་ཞིང་ཕན་བདེ་འགྲོ་ལ་སྦྱིན་པའི་མཛད་པ་ཅན། ཕལ་བ་ཞིག་དང་བསྡུར་ན་བསྡུར་ཐབས་མེད་པ། ཀུན་ལས་ཁྱད་པར་དུ་འཕགས་པ་དེ་ལ་གསུངས་པ་རེད། དེ་ལྟ་བུའི་ཡོན་ཏན་མཆོག་ལྡན་གྱི་བླ་མ་དམ་པ་དེ་ལ་དཔེ་དང་དོན་གྱི་སྒོ་ནས་བསྔགས་བརྗོད་མཛད་ཡོད། དཔེའི་སྒོ་ནས་བསྔགས་བརྗོད་མཛད་པ། གྲུ་བོ་ཆེ་དང་། དེད་དཔོན་དམ་པ། ཡིད་བཞིན་ནོར་བུའི་རྒྱལ་པོ་སོགས་དཔེར་བཞག་ནས། འཁོར་བའི་རྒྱ་མཚོ་ལས་སྒྲོལ་བས་གྲུ་བོ་ཆེ། ཐར་བའི་ལམ་ཞུགས་དག་གི་ལམ་འཁྲིད་ཡིན་པས་དེད་དཔོན་དམ་པ། སྲིད་པའི་རྒུད་པ་ཐམས་ཅད་སེལ་བས་ཡིད་བཞིན་ནོར་བུའི་རྒྱལ་པོ་གསོལ་བ་གང་བཏབ་ན་བསམ་དོན་འགྲུབ་པ་དང་། ད་དུང་ཆུ་དང་སྤྲིན་ལྟ་བུ་གསུངས་ཡོད། ལས་ཉོན་གྱི་མེ་ཆེན་གཞིལ་བས་ཆུ་ལྟ་བུ། ཆོས་ཀྱི་ཆར་ཆེན་འབེབས་པས་སྤྲིན་ལྟ་བུ་སོགས་དཔེ་མང་པོས་བསྟན་ཡོད་པ་རེད། དོན་དང་མཐུན་པའི་བསྔགས་བརྗོད་ཀྱི་ཐད་ནས་ཀྱང་། དྲི་མེད་ཀྱི་ནམ་མཁའ་ལྟ་བུ། མཁའ་ལ་གཟའ་སྐར་ཤར་བ་ལྟ་བུ་སོགས་གསུངས་དུས། དགོངས་ཀློང་ཡངས་པ་དྲི་མེད་ཀྱི་ནམ་མཁའ་ལྟ་བུ། ཏིང་འཛིན་འོད་གསལ་ལྷུན་གྲུབ་ཀྱི་ཡོན་ཏན་ལྡན་པ་མཁའ་ལ་གཟའ་སྐར་ཤར་བ་ལྟ་བུ། སྙིང་རྗེ་དཔག་མེད་གཞལ་མེད་མངའ་བ་གངས་ཅན་གྱི་མཚོ་ལྟ་བུ། ཐུགས་རྗེ་ཚད་མེད་པ་ཆུ་ཀླུང་ཆེན་པོའི་རྒྱུན་ལྟ་བུ། རྣམ་གཡེང་གི་རླུང་གིས་མི་གཡོ་བ་གངས་རི་ཆེན་པོའི་འགྱིང་ལྟ་བུ་ལ་སོགས་ཀྱིས་གསུངས་ཡོད་པ་རེད། དེས་ན་ཀུན་མཁྱེན་ཆོས་རྗེས། དཀོན་མཆོག་བཞི་བ་བླ་མ་སངས་རྒྱས་ཏེ། །དཀྱིལ་འཁོར་དབང་ཕྱུག་ཧེ་རུ་ཀ་དཔལ་ཉིད། །སྙིགས་དུས་འགྲོ་བ་གདུལ་དཀའི་དོན་མཛད་པས། །གདུལ་བྱའི་ངོར་ནི་སངས་རྒྱས་ཀུན་ལས་ལྷག །ཅེས་གསུངས་ཡོད། དེ་ལྟར་ཡིན་པ་དེའི་ཕྱིར་ན། དངོས་གྲུབ་རྩ་བ་རྡོ་རྗེ་སློབ་དཔོན་ལ། །སྒོ་གསུམ་ཟོལ་མེད་གཙང་མའི་སྤྱི་བོས་བསྟེན། །ཞེས་གདམས་པ་གནང་ཡོད་པས། བླ་མའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཡིན་པས་ན། དཀོན་མཆོག་ཀུན་འདུས་ཀྱི་ངོ་བོ་རུ་གཟུང་བར་བྱས་པས། དཀོན་མཆོག་གསུམ་གྱི་བྱིན་རླབས་ཀྱང་འབྱུང་བ་ཡིན་ལ། དེས་མི་ཚད་དཀོན་མཆོག་བཞི་བ་ཞེས་ཀྱང་གསུངས་ཡོད། གཞན་བླ་མ་མི་རུ་བཟུང་ན། དངོས་གྲུབ་ཆུ་ལས་མི་འབྱུང་གསུངས་རྒྱུ་ཞིག་ཡོད་པ་རེད། དེས་ན་བྱིན་རླབས་དངོས་གྲུབ་ཐམས་ཅད་ཀྱི་འབྱུང་གནས་དེ་བླ་མ་ཡིན་པས། བླ་མ་དེ་ཉིད་རྩ་གསུམ་ཀུན་འདུས་དང་། སྐུ་གསུམ་ཀུན་འདུས་ཡིན། སྐྱབས་ཡུལ་ཐམས་ཅད་ཀྱི་ངོ་བོ་བླ་མ་གཅིག་ལ་མ་འདུས་པ་མེད་པ་ཡིན། དེ་ལྟ་བུའི་བླ་མ་དམ་པ་དེ་ཉིད་བརྟགས་ནས་བསྟེན་པའི་གནས་སྐབས་ནའང་། ནད་པས་སྨན་པ་བསྟེན་པ་ལྟར་དུ། སྲིད་པའི་སྡུག་བསྔལ་གྱི་རྒྱ་མཚོ་ཆེན་པོ་ཕ་མཐའ་བལྟར་མི་མངོན་པ་འདི་ལས་རང་སྟོབས་ཀྱིས་མི་ཐར་དུས། བླ་མ་དམ་པ་ཡོན་ཏན་གྱི་མཐུས་ཕྱུག་པ་དེ་ཉིད་གྲུར་ཞུགས་པས་མཉན་པ་བསྟེན་པ་ལྟར་བློ་གཏད་ཡིད་ཆེས་དེ་ལ་བྱས་ནས་བསྟེན་དགོས་ཏེ། མདོ་སྡོང་པོ་བཀོད་པར། ནད་པས་ནད་ཞི་བའི་དོན་དུ་སྨན་པ་བསྟེན་ཚུལ་དང་། འབངས་ཀྱིས་འཇིགས་པ་མེད་པའི་ཆེད་དུ་རྒྱལ་པོ་བསྟེན་ལུགས། མགྲོན་པོས་དགྲ་ཇག་གི་ཉེན་ལས་སྐྱོབ་པའི་ཆེད་དུ་སྐྱེལ་མ་དཔའ་བོ་བསྟེན་དགོས་པ་ལྟ་བུ། ཚོང་པས་ཚོང་འོང་ཕྱིར་ཚོང་ཟོང་འདུ་བྱས་ཏེ་ཁེ་སྤོགས་བསྒྲུབས་པ་ལྟ་བུ་སོགས་དཔེར་བཞག་ནས་གསུངས་པ་དག་དང་། རྒྱལ་སྲས་ཞི་བ་ལྷས་ཀྱང་། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་ངོ་། །ཞེས་པ་ལ་སོགས་པ་གསུངས་པ་ལྟར་དང་། དགེ་བའི་བཤེས་གཉེན་མ་ཟད་དགེ་བའི་གྲོགས་པོའང་ཡུན་རིང་འགྲོགས་བསྡད་ན། ཇི་ལྟར་མ་ལ་ཡ་ཡི་ནགས་ཀླུང་དུ། །རྣམ་པར་འཁྱམས་པའི་སྡོང་དུམ་ཕལ་བ་ཡང་།།ཡལ་འདབ་བརླན་པས་ཙནྡན་དྲི་བསུང་ལྟར། །གང་ལ་བསྟེན་པ་དེ་ཡི་རྗེས་སུ་འགྲོ། ཞེས་གསུངས་པས། ཁྱད་པར་གང་ཟག་ལས་དང་པོ་བ། རང་ཉིད་ཀྱི་ཚུལ་ཁྲིམས་དང་བརྟུལ་ཞུགས་ཀྱིས་སོ་མ་ཟིན་པའི་ཚེ་ན། གྲོགས་དང་འཁོར་ཡུག་གི་བཟང་ངན་གྱིས་ཕན་གནོད་ཆེན་པོ་གཏུགས་བཞིན་ཡོད་པ་རེད། དེ་ལྟ་བུའི་དམ་པའི་རྗེས་སུ་འགྲོ་ཞིང་སྔོན་བྱོན་བརྒྱུད་པའི་བླ་མ་ཐམས་ཅད་ཀྱི་ཞབས་རྗེས་ཟིན་པ་ཞིག་ངེས་པར་བྱེད་དགོས་བསམ་པ་ཐམས་ཅད་ཀྱིས་བཤེས་གཉེན་བསྟེན་པའི་ཚུལ་འདི་ཉིད་གལ་ཆེའི་གནད་ཀྱི་དོན་ཆེན་ལ་མཐོང་བའི་ཆེད་དུ། ས་ཁོངས་འཛིན་བྱེད་ཙམ་ཞིག་ཞུས་ནས། ད་གང་ཞིག་གསན་པར་བྱ་བའི་ཆོས། རྫོགས་པ་ཆེན་པོའི་གདམས་ཁྲིད་འདི་ཉིད་ཇི་ལྟར་ཡིན་ན། གཞི་ཀ་དག་གིས་བཟུང་ན་ལམ་ཁྲེགས་ཆོད་ཀྱིས་བསྐྱངས་ཏེ། འབྲས་བུ་རྡུལ་ཕྲན་དུ་དེངས་རྒྱུ་དང་། གཞི་ལྷུན་གྲུབ་ཀྱིས་བཟུང་ན་ལམ་ཐོད་རྒལ་གྱིས་བསྐྱངས་ཏེ། འབྲས་བུ་འཕོ་ཆེན་གྱི་སྐུར་བཞེངས་པ་ཡིན་ན། ཀ་དག་དང་ལྷུན་གྲུབ་གཉིས་ཀ་དབྱེར་མེད་ཡིན་པ་ལ་ལྡོག་ཆའི་དབང་གིས་གདུལ་བྱ་ལམ་ལ་དཀྲི་ཚུལ་གྱི་དགོས་པས་དེ་ལྟར་རིམ་ཅན་དུའང་བསྟན་པ་ཡིན། ཀ་དག་སྟོང་པའི་འོད་གསལ་དང་ཐོད་རྒལ་སྣང་བའི་འོད་གསལ་གཉིས་ཟུང་འཇུག་དབྱིངས་རིག་དབྱེར་མེད་ཀྱི་ཉམས་ལེན་ལ། ཁོག་གཞི་གཅིག་ལས་གཉིས་སུ་ཕྱེ་རུ་མེད་པས། དེ་ཡང་སྨིན་བྱེད་རང་ལམ་གྱི་དབང་གིས་རྒྱུད་སྨིན་པར་བྱས་ཏེ། གྲོལ་བྱེད་ཁྲིད་ཀྱི་གདམས་པ་འདེབས་དགོས་རྒྱུ་དང་ནི། ཁྱད་པར་ཐོད་རྒལ་གྱི་ཁྲིད་ལ་སྔོན་དུ་མ་སོང་ཐབས་མེད་དེ་གང་ཡིན་ན། ཐུན་མིན་ཁྱད་པར་ཅན་གྱི་སྔོན་འགྲོ་ཕྱི་ནང་གི་རུ་ཤན་ལ་སོགས་པ་སྒོ་གསུམ་གྱི་སྦྱངས་པ་སྔོན་དུ་མ་སོང་ཐབས་མེད་ཡིན། དེ་ལྟར་ན། སྙིང་ཐིག་གི་ཁྲིད་ཆེན་ཡེ་ཤེས་བླ་མའི་ཁྲིད་ཀ་ན་ནིང་མཁར་མདའ་དགོན་དུ་བཤད་པ་ཡིན་ཞིང་། ད་ལོའི་འདི་རྒྱབ་ཆོས་ཀྱི་ཚུལ་དུ་བྱས་ཏེ་འདོན་བཞིན་ཡོད་ན་ཡང་ཕྱག་ལེན་རྒྱས་པ་ཞིག་རེད་ཀྱིན་ཡོད་པ་མ་རེད། སློབ་མའང་མང་པོ་ཞིག་ཆོས་གྲོགས་རྙིང་པ་ཡིན་ཡང་གསར་བའང་མང་པོ་ཡོད་པའི་རྐྱེན་དང་། ཆོས་རྒྱུན་འདིའི་ཕྱག་ལེན་ཧ་ཅང་དོ་དམ་པོ་ཡིན་པའི་སྟབས་ཀྱིས། རང་ལམ་གྱི་དབང་དོ་ཞག་སྔོན་དུ་སོང་མ་ཐག་པ་ཡིན་པས། དགོས་དོན་རབ་ཅིག་དེའི་ནང་ནས་ཚང་རྒྱུ་བྱས་ནས། ཁ་རྩང་ཁྲེགས་ཆོད་ཀྱི་ཁྲིད་སྐོར་ལྟ་བའི་གླུ་དབྱངས་མཁའ་ལྡིང་གཤོག་རླབས་བཤད་གྲུབ་པའི་རྗེས་ཐོག་དེ་མ་ཐག་པ་དེ་རིང་ཐོད་རྒལ་གྱི་གླུ་དབྱངས་བཤད་པའི་སྐབས་སུ་བབས་པ་ཡིན། འདིའི་བཤད་བྱའི་ཡན་ལག་བཤད་པ་མན་ངག་སྡུད་པོའི་མཚན་དང་ཆེ་བའི་ལོ་རྒྱུས་སྔར་བཤད་པ་ལྟར་ལས།

༼ཀ༽ ཐོག་མར་དགེ་བ་ཀླད་དོན།

བཤད་བྱ་དངོས་བཤད་པ་ལ་ཐོག་བར་ཐ་གསུམ་གྱི་ཐོག་མར་དགེ་བ་ཀླད་དོན་ལ། མཚན་སྨྲོས་པ། མཚན་དོན་འགྲེལ་བ། ཕྱག་འཚལ་བ། མཆོད་བརྗོད། བརྩམ་པར་དམ་བཅའ་བ། ཟབ་ཁྲིད་འཆད་པར་བཀའི་གནང་བ་ཞུ་བ་སོགས་འདི་ལའང་དམིགས་བསལ་གྱིས་འབྱུང་བས་དེ་དག་བཤད་པ་ལ་ཐོག་མར་མཚན་བསྟན་པ་ནི།

༼ཀ དང་པོ་མཚན་བསྟན་པ།

འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཅར་འབྱེད་པའི་ལྡེའུ་མིག་ཅེས་བྱ་བ་བཞུགས་སོ།།

ཞེས་གསུངས་ན། འདིའི་དབུའི་ཞལ་བྱང་དུ་བཀོད་པ་འདི་ཉིད་ཀྱིས་མཚན་བསྟན་པ་ཡིན་ན།

༼ཁ གཉིས་པ་མཚན་དོན་འགྲེལ་བ།

གཉིས་པ་མཚན་དོན་འགྲེལ་བ་ལ་འོད་གསལ་རྫོགས་པ་ཆེན་པོ་གསུང་རྒྱུའི་མཚན་དོན་འདི་ལ། ཕྱི་སེམས་སྡེ་ལྟར་དུ་འགྲེལ་ལུགས། ནང་ཀློང་སྡེ་ལྟར་དུ་འགྲེལ་ཚུལ། གསང་བ་མན་ངག་སྡེ་དང་བསྟུན་ནས་བཀྲལ་ཚུལ་བཅས་ཀྱི་རྣམ་གྲངས་ཡོད་ན། སྐབས་འདིར་འཆད་བྱ་གཞུང་དོན་དང་སྒོ་བསྟུན་ན། གསང་བ་མན་ངག་སྡེའི་ཡང་གསང་བླ་ན་མེད་པའི་དགོངས་པ་དང་འབྲེལ་ནས་བཤད་དགོས་པ་ཞིག་ཡིན། སྤྱིར་འོད་གསལ་ཞེས་པ་དེ། སེམས་ཀྱི་རང་བཞིན་དྲི་མ་དང་བྲལ་བའི་ཁྱད་པར་དུ་བྱས་པ་ཞིག་ལ་གོ་དགོས་པ་ཡིན་དུས། འོད་གསལ་ཞེས་པའི་ཐ་སྙད་དེ། སྣང་བའི་ཆ་ལ་འཇུག་དུས་ཤིག་དང་། སྟོང་བའི་ཆ་ལ་འཇུག་དུས་ཤིག་སྟེ་གཉིས་ཡོད། སྒྱུ་ལུས་དང་འོད་གསལ་ཞེས་པའི་སྐབས་སུ་སྟོང་ཉིད་ལ་གོ་རྒྱུ་དང་། དབྱིངས་དང་འོད་གསལ་གསུངས་པའི་སྐབས་སུ་སྣང་བའི་ཆ་ལ་གོ་དགོས་པ་ཞིག་ཡིན། སྐབས་འདིའི་བསྟན་དོན་ལ་གཙོ་བོའི་ཆ་ནས་སྣང་བའི་འོད་གསལ་ལ་གོ་དགོས་པ་ཡིན། རྒྱལ་བ་རྫོགས་པའི་སངས་རྒྱས་ཀྱི་བཀའ་འཁོར་ལོ་ངེས་དོན་བར་ཐ་གཉིས་ཀྱི་དགོངས་དོན་དེ་ཆོས་ཉིད་ཟབ་མོར་ལ་ཟློ་བའི་སྐབས་སུ་འཁོར་ལོ་བར་བ་དང་མཐུན་པར་རྟོག་མེད་སྤྲོས་བྲལ་གྱི་ངང་ལ་མཉམ་པར་འཇོག་པ་དང་། རྗེས་ཐོབ་ཤན་འབྱེད་པའི་སྐབས། ཆོས་ཐམས་ཅད་ལ་ཡང་དག་པར་སོ་སོར་རྟོག་ཡོང་དུས། འཁོར་ལོ་ཐ་མ་དང་གསང་སྔགས་རྡོ་རྗེ་ཐེག་པ་བཞིན་དུ་རྣམ་པར་ཕྱེ་སྟེ་བཤད་ན་ཟབ་དོན་གྱི་གནད་ཚང་ངོ་ཞེས་རིས་མེད་ཀྱི་མཁས་པ་དག་གིས་གསུངས་པ་ལྟར་དུ། དེ་བཞིན་གཤེགས་པའི་བཀའ་ཐ་མ་དོན་རྣམ་པར་ངེས་པའི་ཆོས་ཀྱི་འཁོར་ལོའི་བསྟན་བྱ། སེམས་ཅན་གྱི་ཁམས་ལ་སངས་རྒྱས་ཀྱི་སྙིང་པོས་ཁྱབ་པའི་བདེ་གཤེགས་སྙིང་པོ་ཉིད། སྔགས་ཀྱི་རྒྱུད་སྡེའི་སྐབས་ན། གབ་དོན་སྦས་པ་གསལ་འབྱེད་ཀྱིས་བསྟན་པ་དེ། དབང་རྣོན་ཤིན་ཏུ་ཡང་རབ་ཀྱི་གདུལ་བྱའི་ངོ་སྐལ། རྗོགས་ཆེན་མན་ངག་སྡེས། གཞི་དང་འཁྲུལ་ཚུལ་ཁྱབ་ཚུལ་དང་། །གནས་དང་ལམ་དང་སྒོ་དང་ཡུལ། །ཉམས་ལེན་ཚད་དང་བར་མ་དོ། །གྲོལ་ས་ཉིད་དང་བཅུ་གཅིག་གོ །ཞེས་རྡོ་རྗེའི་གནས་བཅུ་གཅིག་གིས་བསྟན་བྱའི་སྙིང་པོ། སྒྲ་ཐལ་འགྱུར་རྩ་བའི་རྒྱུད་ཀྱི་ནང་དུ། རང་རིག་ཡེ་ཤེས་ལུས་ལ་གནས། །ཏིལ་འབྲུ་ལ་ནི་མར་བཞིན་ནོ། །ལུས་ཀྱི་བཀྲག་དང་གཟི་མདངས་ནི། །ཡེ་ཤེས་རླན་གྱིས་ཁྱབ་པར་བྱེད། །ཅེས་གསུངས་པ་དང་། ཡང་རྒྱུད་རང་ཤར་ལས། ཡང་དག་སངས་རྒྱས་དགོངས་པ་ནི། སེམས་ཅན་ཀུན་གྱི་རང་རྒྱུད་ལ། །སྐུ་དང་ཡེ་ཤེས་ཚུལ་དུ་གནས། །ཞེས་གསུངས་ན་དེ་ལྟ་བུའི་ཡེ་ཤེས་དེའི་ངོ་བོ་སྟོང་གསལ་མཐའ་བྲལ་ཞིག་ཡིན་པ་དེ་ལ་སྐབས་འདིར་འོད་གསལ་རིག་པའི་ཡེ་ཤེས་ཞེས་གསུངས་པ་རེད། དེ་ནི་སྐུ་ལྔ། ཡེ་ཤེས་ལྔ། འོད་ལྔ། རིགས་ཀྱི་ཆོས་ལྔ། ཡེ་ཤེས་ཀྱི་རླུང་ལྔ་ལ་སོགས་པར་ཡེ་ནས་གནས་པ་ཞིག་ཡིན་དུས། དེའི་གཞི་ལམ་འབྲས་བུ་དོན་རྒྱུད་རྫོགས་པར་བསྟན་པའི་དགོས་དོན་མང་པོ་ཞིག་བརྗོད་བྱར་གྱུར་ཡོད་པའི་སྒྲ་དང་ཚིག་དེ་རྗོད་བྱེད་ཚིག་གི་རྫོགས་ཆེན་ཡིན་ལ། ཆོས་དབྱིངས་ཐིག་ལེ་ཉག་གཅིག་ཆོས་ཟད་ཆོས་སྐུའི་དགོངས་པའི་ནང་དབྱིངས་ཆེན་པོར། དབྱིངས་རིག་དབྱེར་མེད་སྐུ་གསུམ་འདུས་པའི་ངོ་བོར་བཟླུམས་པ་དེ་བརྗོད་བྱ་དོན་གྱི་རྫོགས་ཆེན་མཐར་ཐུག་ཡིན། ཆོས་ཐམས་ཅད་ཀྱི་གནས་ལུགས་མཐར་ཐུག་དབྱིངས་རིག་དབྱེར་མེད་དེ་ཁོ་ན་ཉིད། དེའི་ཡན་ན་རྟོགས་བྱ་དང་བསྟན་བྱ་གཞན་ཞིག་མེད་པས་མི་ཚད་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་ཀྱང་འདི་ལས་ལྷག་པའི་དོན་ཆེན་ཞིག་གཟིགས་སུ་མེད་ཅིང་། བསྟན་དུའང་མེད་པས་ན་ཆེན་པོ་ཞེས་གསུངས་པའོ། །ཀ་དག་དང་ལྷུན་གྲུབ་ཟེར་རྒྱུ་འདི་རྫོགས་པ་ཆེན་པོའི་ཆོས་སྐད། གཞན་དང་ཐུན་མོང་མ་ཡིན་པ་ཞིག་ཡིན་ན། འདི་གཉིས་ཐ་དད་མ་ཡིན་པར་ཟུང་འབྲེལ། ངོ་བོ་ཀ་དག་ཡིན་པས་ན་རང་བཞིན་ལྷུན་གྲུབ་ཡིན། ཀ་དག་ཀ་ནས་མ་དག་ན། ལྷུན་གྲུབ་ལྷུན་གྱིས་གྲུབ་ལུགས་ཡོད་པ་མ་རེད། དཔེར་ན་དབུ་མའི་ཆོས་སྐད་དུ་སྟོང་རྟེན་འབྱུང་དབྱེར་མེད་ཅེས་པ་ལྟར་དུ་རེད། རེད་དེ་གཞི་དབུ་མ་ཆེན་པོའི་ལྟ་བ་ལ། ལམ་ཕྱག་རྒྱ་ཆེན་པོའི་སྒོམ་པ་བརྒྱུད་ན། མཐར་ཐུག་འབྲས་བུ་རྫོགས་པ་ཆེན་པོའི་ས་ལ་ཐོན་རྒྱུའི་རྒྱལ་བའི་དགོངས་པར་ཐད་ཀར་འཇུག་པའི་ཡང་གསང་གི་མན་ངག་འདིའི་སྐབས་སུ། ཐུན་མིན་ཡང་འབྱེད་ཀྱི་སྐབས་དོན་ཀ་དག་གསུམ་དང་ལྷུན་གྲུབ་གསུམ་གྱི་དབྱེ་བ་ཕྱེ་རུ་ཡོད། དེ་གང་ཞེ་ན། ཐོག་མ་གཞིའི་ཀ་དག གནས་སྐབས་ལམ་གྱི་ཀ་དག མཐར་ཐུག་འབྲས་བུའི་ཀ་དག་དང་གསུམ་གྱི་དབྱེ་བ་བཞག་ནས་དེ་ལྟར་ཕྱེ་བའང་། བརྟེན་ཆོས་ལྷུན་གྲུབ་ཀྱི་ངོས་ནས་བཞག་པ་མ་གཏོགས་ཀ་དག་རང་ངོ་ན་ཁྱད་ཕྱེ་རྒྱུ་ཞིག་མེད་ལ། ལྷུན་གྲུབ་གསུམ་ཡང་གཞི་ལམ་འབྲས་བུའི་ལྷུན་གྲུབ་གསུམ་ཏུ་འཇོག་སྟེ། འཁོར་བར་འཁྲུལ་རུང་མ་སྤང་བའི་གནས་སྐབས་ལ་གཞིའི་ལྷུན་གྲུབ། འཁྲུལ་རུང་ཅི་རིགས་སྤོང་བའི་གནས་སྐབས་ན་ལམ་གྱི་ལྷུན་གྲུབ། འཁྲུལ་རུང་ཡོངས་སུ་སྤངས་པའི་གནས་སྐབས་འབྲས་བུའི་ལྷུན་གྲུབ་ཏུ་གསུངས་ཡོད། དེ་ལྟར་ན་གནས་སྐབས་དེ་དང་དེའི་ལྷུན་གྲུབ་དང་ངོ་བོ་དབྱེར་མེད་དུ་གྱུར་བའི་ཀ་དག་དེ་ལ། བརྟེན་ཆོས་ལ་ལྟོས་པའི་མིང་གི་དབྱེ་བ་ཙམ་མ་གཏོགས་ཀ་དག་རང་ངོས་ནས་འགྱུར་བའི་གནས་སྐབས་ཡོད་པར་བཤད་པ་མིན་ནོ། །དེ་ལྟ་བུའི་འོད་གསལ་རིག་པའི་ལྷུན་གྲུབ་སྐུ་དང་ཡེ་ཤེས་འོད་དང་ཐིག་ལེའི་ཚུལ་དུ་རྡོ་རྗེའི་ལུས་ལ་བཞུགས་པ་དེ། འཇམ་དཔལ་སྒྱུ་དྲྭའི་ནང་ན། འོད་བཟང་འབར་བ་དཔལ་གྱི་བེའུ། །ཞེས་གསུངས་པ་ལྟར། གང་ན་བཞུགས་ན་སྙིང་རིན་པོ་ཆེ་དཔལ་གྱི་བེའུའི་གནས་སུ་བཞུགས་ཡོད། དེའི་གདངས་དེ་འགྱུ་བྱེད་རྩ་ཡི་གཞལ་ཡས། དུང་ཁང་བྷནྡྷའི་གཞལ་ཡས། ལྟ་བྱེད་མིག་གི་གཞལ་ཡས་སོགས་ན་བཞུགས་ཡོད་པ་དེ་ལ། ལམ་འོག་མས་བསྐལ་པ་གྲངས་མེད་དང་། ཚེ་སྐྱེ་བ་མང་པོར་ས་ལམ་སྦྱངས་བསྒྲོད་ཀྱི་འབྲས་བུར་བསྙེགས་དགོས་པ་དེ། འདིར་ལམ་གཞན་བར་ནས་བོར་ཏེ་ཐོད་ཀྱིས་སམ་ཐད་ཀར་བརྒལ་བ་ལ་ཐོད་རྒལ་ཞེས་གསུངས་སོ། །འུ་བུས་ལྡེབ་གྲངས་ཀྱང་འགྲོ་དགོས་པས་དེ་ཙམ་བསྣར་ལོང་ཡོད་པ་མ་རེད། དེ་ལྟ་བུའི་ལྷུན་གྲུབ་ཐོད་རྒལ་གྱི་གསང་བའི་མན་ངག གསང་བ་མན་ངག་སྡེའི་ཕྱི་སྐོར་ནང་སྐོར་གསང་སྐོར་གསུམ་ལས་ཀྱང་ཆ་ཚང་བར་མ་གསུངས་པའི་ཡང་གསང་མན་ངག་སྡེའི་འོག་ནས་འབྱུང་མ་རག་པའི་ཁྱད་ཆོས་ཀྱིས་ཁྱད་པར་འཕགས་ཡོད་པའི་རྣལ་འབྱོར་ཉམས་རྟོགས་དང་སྦྱར་བའི་གླུ་དབྱངས། དོན་གྱི་ཆ་ནས་སམ་བྱེད་ལས་ཀྱི་སྒོ་ནས་བཏགས་པའི་མཚན། ཏིང་ངེ་འཛིན་གྱི་སྒོ་འཕར་བརྒྱ་ཕྲག་ཅིག་ཆར་དུ་འབྱེད་པར་བྱེད་པ་ཞེས་གསུངས་ན། འདིའི་བརྒྱ་ཕྲག་མང་ཚིག་རེད། བྱེ་བ་ཕྲག་བརྒྱའི་ཏིང་འཛིན་སྒོ་འབྱེད་པ། །ཞེས་གསུངས་པ་ལྟར། རྒྱལ་བའི་ཐུགས་གསང་བ་བསམ་གྱིས་མི་ཁྱབ་པའི་ཡེ་ཤེས་ཀྱི་མཉམ་བཞག་ཏིང་ངེ་འཛིན་ལས་རྟག་ཏུ་འདའ་བ་མེད་པའི་ཚད་གཞལ་མཐའ་ཡས་པ་ཞིག་རེད། དེའི་ཕྱིར་འོད་བཟང་འབར་བ་དཔལ་བེའུའི་མིང་གིས་གསུངས་པ་དེ་དཔལ་བེའུའི་རི་མོར་ཟད་མཐའ་མེད་པ་བཞིན་དུ། རྒྱལ་བའི་ཐུགས་གསང་ཟད་མེད་ཀྱི་བརྡ་དོན་བསྟན་པའོ། །དེ་ལྟ་བུའི་སྟོང་གསལ་མཐའ་དབུས་བྲལ་བའི་ཡེ་ཤེས་ཟད་མེད་ཀྱི་ཏིང་འཛིན་འཆར་བའི་སྒོ་འབྱེད་ལྡེའུ་མིག་གིས་ཕྱེ་བ་ལྟ་བུ། དབང་པོ་རྟུལ་འབྲིང་རྣོ་གསུམ་ཀུན་ལ་ཕན་པའི་གོ་བདེའི་གསུང་གི་ཁྱད་ཆོས་དང་སྦྱར་ནས་གསུངས་པའོ།།

༼ག གསུམ་པ་ཕྱག་འཚལ་བའི་སྒོ་ནས་མཆོད་པར་བརྗོད་པ།

གསུམ་པ་ཕྱག་འཚལ་བའི་སྒོ་ནས་མཆོད་པར་བརྗོད་པ་དེ་ལ། དངོས་དང་བརྒྱུད་པའི་བླ་མར་སྙིང་ནས་འདུད་པ་དང་། མཁའ་འགྲོ་ཆོས་སྐྱོང་རྣམས་ལ་གུས་པས་འདུད་པ་དང་། རྩོམ་པ་ལ་བཀའ་ཡི་གནང་བ་དང་བྱིན་རླབས་ཞུ་བ་སྟེ་གསུམ་ལས་དང་པོ་ནི།

༡༽ དང་པོ་དངོས་དང་བརྒྱུད་པའི་བླ་མ་ལ་སྙིང་ནས་འདུད་པ།

དུས་གསུམ་རྒྱལ་བའི་མེས་པོ་ཀུན་ཏུ་བཟང་།།

རྡོར་སེམས་དགའ་རབ་འཇམ་དཔལ་བཤེས་གཉེན་དང་།།

ཤྲཱི་སིང་ཧ་སློབ་དཔོན་པད་འབྱུང་སོགས།།

དངོས་དང་བརྒྱུད་པའི་བླ་མར་སྙིང་ནས་འདུད།།

ཅེས་གསུངས་ཏེ། དུས་གསུམ་བྱོན་དང་འབྱོན་འགྱུར་གྱི་མེས་པོའམ་ཡང་མེས། སངས་རྒྱས་ཀུན་ལ་ལམ་སྟོན་པ་པོ་དེ་ཐོག་མའི་སངས་རྒྱས་འོད་མི་འགྱུར་བ་ཡིན། གདོད་མའི་ཆོས་སྐུ་ཀུན་ཏུ་བཟང་པོ་ཞེས་པས་རྒྱལ་བ་དགོངས་བརྒྱུད་བསྟན་ལ། རྡོ་རྗེ་སེམས་དཔའ་ནས་པདྨ་འབྱུང་གནས་ཀྱིས་རིག་འཛིན་བརྡ་བརྒྱུད་བསྟན། སོགས་ཁོངས་ལས་གང་ཟག་སྙན་བརྒྱུད་དང་བཅས་ཏེ། དངོས་དང་བརྒྱུད་པའི་རྩ་བརྒྱུད་ཀྱི་བླ་མ་ཐམས་ཅད་ལ་སྙིང་ནས་གུས་པ་ཆེན་པོས་འདུད་པའི་ཕྱག་དང་བཅས་ཏེ་མཆོག་གསུམ་འདུས་པའི་ངོ་བོ། རྩ་གསུམ་འདུས་པའི་བདག་ཉིད། བྱིན་རླབས་ཀྱི་རྩ་བ་བླ་མ་ལ་མཆོད་པར་བརྗོད་པའོ།།

༢༽ གཉིས་པ་མཁའ་འགྲོ་ཆོས་སྐྱོང་རྣམས་ལ་གུས་པས་འདུད་པ།

གཉིས་པ་ནི།

མཆོག་དང་ཐུན་མོང་དངོས་གྲུབ་མ་ལུས་པ།།

སྩོལ་མཛད་ཡི་དམ་ཞི་ཁྲོའི་ལྷ་ཚོགས་དང་།།

ཕྲིན་ལས་ཐོགས་མེད་སྒྲུབ་པའི་མཐུ་ལྡན་པ།།

མཁའ་འགྲོ་ཆོས་སྐྱོང་རྣམས་ལ་གུས་པས་འདུད།།

ཅེས་དངོས་གྲུབ་ཀྱི་རྩ་བ་ཡི་དམ། དེ་ཡང་ཞི་དང་ཁྲོ་བོའི་སྐུར་བཞེངས་ཀྱི་ནང་དུ་མ་འདུས་པ་མེད་ལ། ཕྲིན་ལས་ཀྱི་རྩ་བ་མཁའ་འགྲོ། དེ་ཡང་གནས་གསུམ་ན་བཞུགས་པའི་དཔའ་བོ་དང་དཔའ་མོ་ཐོགས་མེད་ཀྱི་མཐུ་རྩལ་དང་ལྡན་ཞིང་། དམ་ལྡན་ཆོས་ཀྱིས་འཚོ་བའི་རྣལ་འབྱོར་བ་བུ་བཞིན་སྐྱོང་བར་དམ་མནོས་པའི་བཀའ་སྡོད་ཆོས་སྐྱོང་བའི་སྲུང་མ། མདོར་ན་རིག་འཛིན་ནང་གི་དགེ་འདུན་རིག་པ་ཁྱད་པར་ཅན་གྱི་འཁོར་ཚོགས་ཀྱིས་བསྡུས་པ་ཐམས་ཅད་ཀུན་ལ་གུས་འདུད་དང་བཅས་ཏེ་མཆོད་བརྗོད་མཛད་པའོ།།

༣༽ གསུམ་པ་རྩོམ་པ་ལ་བཀའ་ཡི་གནང་བ་དང་བྱིན་རླབས་ཞུ་བ།

གསུམ་པ་ནི།

འོད་གསལ་རྫོགས་ཆེན་ལྷུན་གྲུབ་ཐོད་རྒལ་གྱི།།

ཟབ་ལམ་འཆད་པའི་གནང་བ་སྩོལ་བ་དང་།།

སྐལ་ལྡན་སློབ་མ་རྣམས་ཀྱི་ཤེས་རྒྱུད་ལ།།

སྣང་བཞི་ཡེ་ཤེས་སྐྱེ་བར་བྱིན་གྱིས་རློབས།།

གསུངས་ནས་བརྒྱུད་གསུམ་རིག་འཛིན་བླ་མ། ཡི་དམ་ཞི་ཁྲོའི་དཀྱིལ་འཁོར། གནས་གསུམ་དཔའ་བོ་མཁའ་འགྲོ་ཆོས་སྲུང་ཡེ་ཤེས་ཀྱི་སྤྱན་དང་ལྡན་པ་ཐམས་ཅད་ཀྱིས། དུས་འདིར་འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་ཟབ་ཁྲིད་གདམས་པའི་ཉེ་ལམ་འཆད་ཅིང་རྩོམ་པ་ལ་བཀའ་ཡི་གནང་བ་སྩོལ་བར་མཛད་པ་དང་ཆབས་གཅིག་སྐལ་ལྡན་སློབ་མའི་ཚོགས་འདི་རྣམས་ཀྱི་ཤེས་རྒྱུད་ཀྱང་བྱིན་གྱིས་བརླབས་ནས། སྐུ་གསུམ་ལམ་སྣང་དུ་སྒྲུབ་པའི་ལམ་སྣང་བ་བཞིའི་ཡེ་ཤེས་རིམ་གྱིས་སམ་ཅིག་ཅར་གྱིས་སྐྱེ་བར་ཡང་བྱིན་གྱིས་རློབས་ཤིག་གསུངས་པ་དང་བཅས་ཏེ་ཡུལ་གོང་མར་དད་ཅིང་འདུན་པ། དེ་ཡང་གནས་ལུགས་རང་ངོ་ཤེས་པའི་དོན་ཕྱག་དང་བཅས་བཀའ་ཡི་གནང་བ་ཞུས་པའོ།།

༼ག བཞི་བ་བརྩམ་པར་དམ་བཅའ་བ་དང་བཅས་པས་ཉན་པར་བསྐུལ་བ།

དེ་ནས་བརྩམ་པར་དམ་བཅའ་བ་དང་བཅས་པས་སློབ་མ་ལ་སྣོད་ཀྱི་སྐྱོན་སྤངས་ཤིང་ཡོན་ཏན་ཚོགས་པའི་སྒོ་ནས་ཉན་པར་བསྐུལ་བ་ནི།

འོད་གསལ་ལྷུན་གྲུབ་སྣང་བཞིའི་ཏིང་འཛིན་གྱི།།

སྒོ་འཕར་བརྒྱ་ཕྲག་ཅིག་ཆར་འབྱེད་མཛད་པའི།།

གནད་ཀྱི་ཞལ་གདམས་རྡོ་རྗེའི་གླུ་དབྱངས་ལེན།།

སྐལ་ལྡན་ལས་འཕྲོ་ཅན་རྣམས་གུས་པས་ཉོན།།

ཅེས་གསུངས་ཏེ། འདིར་དབང་རྣོན་གྱིས་དབུ་མཚན་ཙམ་མཐོང་བའམ་ཐོས་པས་ཀྱང་། དབུ་ཞབས་ཀྱི་དོན་མཐའ་དག་ཁོང་དུ་ཆུད་པའི་དགོས་གནད་དང་མཐུན་པར་གདམས་པ་འདིས་ལུས་རྣམ་བཞག་ལྷུན་གྲུབ་སྣང་བཞིའི་ལམ་ནས་འཕོ་ཆེན་གྱི་སྐུར་བཞེངས་བའི་གདམས་པའི་ཆེ་བ་བསྟན་པ་དང་བཅས་ཏེ། སྤྱིར་དམ་པའི་ཆོས་དང་མཇལ་བ་དཀོན། དེའི་ནང་ནས་གསང་བ་སྔགས་ཀྱི་མྱུར་ལམ་ལ་ཞུགས། ཁྱད་པར་དུ་འོད་གསལ་རྫོགས་ཆེན་གྱི་གདམས་པ་རང་ལ་སྙིང་རུས་ཡོད་ན་ལོ་དང་ཟླ་བའི་ཁ་གྲངས་ཀྱིས་ཀྱང་འཚང་རྒྱ་བར་ནུས་པ་དང་། འོད་ལུས་འཕོ་ཆེན་གྱི་སྐུར་བཞེངས་ནས་ལུས་འདི་མ་སྤངས་བཞིན་དུ་མངོན་གྱུར་གདོད་མའི་ས་ལ་གཤེགས་ནས་པད་འབྱུང་དང་བི་མ་སོགས་ཀྱི་རྣམ་ཐར་འཆང་བའི་ལམ་མཆོག་འདི་ལ་ཞུགས་རྒྱུར་སྤྲོ་བ་བསྐྱེད་དེ་གུས་པས་ཉོན་གསུངས་པའོ།།

༼ཁ༽ གཉིས་པ་བར་དུ་དགེ་བ་གཞུང་གི་དོན།

གཉིས་པ་བར་དུ་དགེ་བ་གཞུང་གཞུང་གི་དོན་ལ་ཡེ་རྫོགས་ལམ་གྱི་སྤྱི་ཆིངས་བསྟན་པ་དང་། ཇི་ལྟར་འཕགས་པའི་འཕགས་ཆོས་བསྟན་པ་དང་། ཁྱད་དུ་འཕགས་པའི་ཐོད་རྒལ་གྱི་གདམས་པ་དེ་ཉིད་ཇི་ལྟར་ཉམས་སུ་ལེན་པའི་སྤྱི་ཆིངས་བསྟན་པ་དང་། ཐོད་རྒལ་དངོས་ཀྱི་སྤྱི་ཆིངས་བསྟན་པ་སྟེ་བཞི་ལས།

ཀ༽ དང་པོ་ཡེ་རྫོགས་ལམ་གྱི་སྤྱི་ཆིངས་བསྟན་པ།

དང་པོ་ཡེ་རྫོགས་ལམ་གྱི་སྤྱི་ཆིངས་ནི།

ཨེ་མ་ཧོ།

ཤིན་ཏུ་སྤྲོས་མེད་གསང་བ་ཆེན་པོ་ཡི།།

ལྷུན་གྲུབ་ཐོད་རྒལ་གནད་ལ་བརྩོན་འགྲུས་ཅན།།

ཚེ་འདི་ཉིད་ལ་གདོས་བཅས་འོད་ལུས་སུ།།

དག་ནས་འཚང་རྒྱ་བྱེད་པའི་གདམས་པ་འདི།།

ཐེག་པ་གཞན་ལ་མིང་ཙམ་མ་གྲགས་པའི།།

ཐེག་དགུའི་ཡང་རྩེ་རྫོགས་ཆེན་ཁྱད་ཆོས་ཡིན།།

ཞེས་གཙོ་བོ་ལྷུན་གྲུབ་ཐོད་རྒལ་གྱི་ཆེ་བ་བརྗོད་པར་མཛད་པ་རེད། རྫོགས་ཆེན་ཉམས་ལེན་གྱི་གནད་ཐམས་ཅད་དབང་བཞིའི་སྒྲོམ་ལས་མི་འདའ་བ་ཡིན་པས། དབང་བཞི་པའི་ཡེ་ཤེས་དེ་ལ་ཡང་བཞིར་ཕྱེ་བའི་ཤིན་ཏུ་སྤྲོས་མེད་ཀྱི་དབང་དོན། ཚེ་འདིར་གདོས་བཅས་དག་ནས་འོད་ལུས་འཕོ་བ་ཆེན་པོར་བཞེངས་པ་འདི་ནི། འོག་མའི་ཐེག་པ་སྔགས་ལམ་གཞན་དང་བཅས་པ་ནས་དངོས་སུ་མ་དགོས། མིང་ཙམ་ཡང་མ་གྲགས་པའི་འབྲས་བུའི་བསྟན་པ་ཆོས་སྐུའི་དགོངས་པར་ཐད་ཀར་འཇུག་པའི་གསང་མཛོད་ཡིན། འདིའི་མན་ངག་གི་ལྡེའུ་མིག་གིས་གང་འབྱེད་པར་བྱེད་པའི་ཆོས་ཀྱི་སྒོའི་ཕྱོགས་ཙམ་བསྟན་ནས།

ཁ༽ གཉིས་པ་ཇི་ལྟར་འཕགས་པའི་འཕགས་ཆོས་བསྟན་པ།

དེ་ལ་རྫོགས་ཆེན་ཁྲེགས་ཆོད་དང་ཐོད་རྒལ་གཉིས་པོ་ཐུན་མོང་གི་ཆོས་གཞན་ལས་ཁྱད་པར་འཕགས་ཚུལ་བསྟན་པ་དང་། ཐོད་རྒལ་དེ་ཁྲེགས་ཆོད་ལས་ཀྱང་ཁྱད་པར་བདུན་གྱིས་འཕགས་ཚུལ་བསྟན་པ་དང་གཉིས་ལས།

༼༡ དང་པོ་རྫོགས་ཆེན་ཁྲེགས་ཆོད་དང་ཐོད་རྒལ་གཉིས་པོ་ཐུན་མོང་གི་ཆོས་གཞན་ལས་ཁྱད་པར་འཕགས་ཚུལ་བསྟན་པ།

དེ་ནས་ཁྱད་པར་ཇི་ལྟར་འཕགས་པའི་འཕགས་ཆོས་ཐུན་མོང་དང་ཐུན་མིན་གཉིས་ཀྱིས་བསྟན་པ་ཡོད་པ་ལས། དེ་ལས་དང་པོ་རྫོགས་ཆེན་ཁྲེགས་ཆོད་དང་ཐོད་རྒལ་གཉིས་ཐུན་མོང་གི་ཆོས་གཞན་ལས་ཁྱད་པར་འཕགས་ཚུལ་བསྟན་པ་ནི།

གནད་རྣམ་བདུན་གྱིས་གཞན་ལས་ཁྱད་པར་འཕགས།།

ཞེས་མདོར་བསྟན་ནས་རེ་རེ་བཞིན་དུ་རྒྱས་པར་བཤད་པ་ནི།

རིག་པ་གཅེར་མཐོང་ཉིད་དུ་རྟོགས་པའི་ཕྱིར།།

དབང་པོ་རྣམས་ལ་རྣོལ་རྟུལ་མེད་པའི་གནད།།

ཅེས་གནད་གཅིག་དང་།

ཆོས་ཉིད་དབང་པོས་བལྟ་རུ་ཡོད་པས་ན།།

བློ་ཡི་ཡིད་དཔྱོད་ཙམ་ལ་མི་ལྟོས་གནད།།

ཅེས་གནད་གཉིས་པ་དང་།

བླང་དོར་འབད་པའི་རྩོལ་སྒྲུབ་ལས་འདས་པའི།།

ན་སོ་ལ་ཡང་རྒན་གཞོན་མེད་པའི་གནད།།

ཅེས་གནད་གསུམ་པ་བསྟན།

རང་རིག་ཡེ་ཤེས་དྲི་མ་དང་བྲལ་བའི།།

དཀར་ནག་ལས་ལ་བཟང་ངན་མེད་པའི་གནད།།

ཅེས་དེས་བཞི་པ་བསྟན།

ཆོས་ཉིད་འོད་གསལ་མངོན་སུམ་མཐོང་བས་ན།།

ཐ་སྙད་ཚིག་ལ་ཅུང་ཟད་མི་ལྟོས་གནད།།

ཅེས་པས་གནད་ལྔ་བ་བསྟན།

ཆོས་ཉིད་བསམ་བརྗོད་ཡུལ་ལས་འདས་པས་ན།།

ལྟ་སྒོམ་གཞི་ལམ་འབྲས་བུར་མི་ལྟོས་གནད།།

ཅེས་དྲུག་པ་དང་།

སྐུ་གསུམ་ལམ་སྣང་ཉིད་དུ་ཤེས་ནས་ཀྱང་།།

ཁམས་གསུམ་འཁོར་བར་ཕྱིར་མི་ལྡོག་པའི་གནད།།

ཅེས་གསུངས་པ་འདི་གནད་བདུན་པ་རེད།

མདོར་ན་ཐུན་མོང་ཐེག་པ་གཞན་དག་ལས།།

གནད་ནི་བསམ་གྱིས་མི་ཁྱབ་འཕགས་ན་ཡང་།།

བརྗོད་ཀྱིས་མི་ལངས་པས་ན་འདིར་མ་སྤྲོས།།

དེ་ལྟ་བུའི་གནད་བདུན་པོ་རེ་རེ་བཞིན་དུ་བསྟན་པ་དེ་དག་བསྐྱར་ཟློས་མི་དགོས་པ་སླ་མོ་ཞིག་རེད་ལ། འོག་ནས་མན་ངག་གཞུང་གི་སྐབས་ནས་ཀྱང་འབྱུང་རྒྱུ་དང་། སྔོན་མར་ཁྲེགས་ཆོད་སྐབས་ཀྱི་བསྟན་དོན་གཙོ་བོར་བྱས་ཏེ་གསུངས་པ་དང་། འདིར་གཞན་ལས་ཁྱད་པར་དུ་འཕགས་ཚུལ་བསྟན་པ་དེ་སྤྲོ་བར་བྱ་བའི་སྐབས་མ་ཡིན་པས་མ་སྤྲོས་སོ་ཞེས་མདོར་ན་ཐུན་མོང་གི་མདོ་དང་སྔགས་ཀྱི་ཐེག་པ་འོག་མ་གཞན་དག་ལས་ཁྱད་པར་འཕགས་པའི་གནད་བསམ་གྱིས་མི་ཁྱབ་ཀྱང་། འདིར་ཆེ་ལོང་མདོ་ཙམ་ཞིག་ལུང་བཞིན་དུ་བརྗོད་པ་འདི་ཙམ་ལས་མན་ངག་གི་ཡིག་ཆར་ཚིག་ཚོགས་མང་པོ་ཞིག་བྲིས་ན་མང་ཆེ་བར་དོགས་ནས་དགོས་པའི་དབང་གིས་མ་སྤྲོས་པར་གསུངས་པའོ།།

༼༢ གཉིས་པ་ཁྲེགས་ཆོད་ལས་ཀྱང་ཁྱད་པར་བདུན་གྱིས་འཕགས་ཚུལ་བསྟན་པ།

དེ་ནས་སྐབས་ཀྱི་བསྟན་བྱ་ཡང་གསང་བླ་ན་མེད་པའི་མན་ངག་གི་བསྟན་དོན་དམིགས་ཀྱིས་བཀར་བ་ཐུན་མོང་མ་ཡིན་པ་ཐོད་རྒལ་གྱི་ལམ་གནད་ཁྱད་ཆོས་ཁྱད་དུ་འཕགས་ལུགས་བསྟན་པ་ནི།

ཁྲེགས་ཆོད་ལས་ཀྱང་ཁྱད་པར་བདུན་གྱིས་འཕགས།།

ཞེས་ཡང་སྡོམ་གྱིས་མདོར་བསྟན་ནས། དེ་ནས་རྒྱས་པར་བཤད་ན་ཇི་ལྟར་འཕགས་ཚུལ་ནི།

ཉམས་ལེན་ལག་ལེན་འདྲིལ་བའི་ཁྱད་པར་དང་།།

ལུས་གནད་རྩ་ཡི་ཁྱད་པར་སྣང་བྱེད་སྒོའི།།

ཁྱད་པར་མཐོང་བ་དབང་པོའི་ཁྱད་པར་དང་།།

རང་སྣང་མངོན་སུམ་གཟིགས་པའི་ཁྱད་པར་དང་།།

སྣང་བ་འོད་ཀྱི་ཁྱད་པར་ཉམས་སྣང་ཉིད།།

གོང་འཕེལ་ཁྱད་པར་དང་བཅས་བདུན་གྱིས་འཕགས།།

ཞེས་གསུངས་ན། ཉམས་ལེན་ལག་ལེན་དུ་དྲིལ་བའི་ཁྱད་པར་དང་གཅིག ལུས་གནད་རྩ་ཡི་ཁྱད་པར་དང་གཉིས། སྣང་བྱེད་སྒོའི་ཁྱད་པར་དང་གསུམ། མཐོང་བ་དབང་པོའི་ཁྱད་པར་དང་བཞི། རང་སྣང་མངོན་སུམ་གཟིགས་པའི་ཁྱད་པར་དང་ལྔ། སྣང་བ་འོད་ཀྱི་ཁྱད་པར་དང་དྲུག ཉམས་སྣང་ཉིད་གོང་འཕེལ་གྱི་ཁྱད་པར་དང་བདུན་རེད།

འགྲེལ་བཤད་ཀུན་མཁྱེན་དགོངས་པའི་ཐེག་མཆོག་མཛོད།།

ཚིག་དོན་མཛོད་ལས་རྒྱས་པར་བཤད་པའོ།།

ཞེས་གསུངས་ཏེ། གོང་དུ་དྲངས་པའི་ཐེག་མཆོག་མཛོད་དང་ཚིག་དོན་མཛོད་དེ་མཛོད་ཆེན་རྣམ་པ་གཉིས་ལས་གསུངས་པ་དག་ཚིག་གི་ཁྱད་པར་ཅུང་ཙམ་རེ་མ་གཏོགས་དོན་གྱི་འབབ་ས་གཅིག་པའོ།།

ག༽ གསུམ་པ་ཁྱད་དུ་འཕགས་པའི་ཐོད་རྒལ་གྱི་གདམས་པ་དེ་ཉིད་ཇི་ལྟར་ཉམས་སུ་ལེན་པའི་སྤྱི་ཆིངས་བསྟན་པ།

དེ་ནས་ཁྱད་དུ་འཕགས་པའི་ཐོད་རྒལ་གྱི་གདམས་པ་དེ་ཉིད་ཇི་ལྟར་ཉམས་སུ་ལེན་པའི་སྤྱི་ཆིངས་ནི།

དེ་འདྲའི་གདམས་པ་ཉམས་སུ་ལེན་འདོད་ན།།

དང་པོ་ཚེ་འདི་ཉིད་ལ་མ་ཆགས་པར།།

འཇིག་རྟེན་བྱ་བ་ཐམས་ཅད་བློས་བཏང་ནས།།

ཐེག་པ་འདི་ལ་ཉམས་ལེན་མི་ཞན་པའི།།

མཚན་ལྡན་བླ་མ་བསམ་དང་སྦྱོར་བ་ཡིས།།

ལོ་དང་ཟླ་བའི་བར་དུ་བསྟེན་པ་གནད།།

སྨིན་བྱེད་དབང་ཞུས་གྲོལ་བྱེད་ཁྲིད་རིམ་རྣམས།།

ཡང་ཡང་ཁྲིད་ནས་ཡིད་ལ་འབྱོར་པ་དགོས།།

ཞེས་གསུངས་ཏེ། ཁྱད་པར་བདུན་གྱིས་ཁྱད་དུ་འཕགས་པའི་གདམས་པ་གཞན་མཚུངས་བྲལ་བ་དེ་ཉིད་ཐོས་ཤིང་ཉམས་སུ་ལེན་རྒྱུའི་སྐལ་བ་བཟང་པོ་ཐོབ་པ་འདིའི་སྟེང་ནས་ད་རུང་ཡང་ཁ་ཧང་ཏེ་བལྟས་མི་འདུག་པར་ཉམས་སུ་ལེན་པར་འདོད་པ་ཡིན་ན། ཡང་ན་ཚེ་འདིའི་བྱ་བ་གདམ་དགོས་རེད། ཡང་ན་ཕྱི་མའི་དོན་ཆེན་ལ་འཐམས་དགོས་རེད། དེས་ན་ཐོག་མ་ཉིད་ནས་འཇིག་རྟེན་གྱི་བྱ་བ། ཁྱད་པར་ཆོས་བརྒྱད་བདུད་ཀྱི་མགོ་སྐོར་འདིའི་དབང་དུ་ཤོར་མི་བཅུག ཚེ་འདིའི་འདོད་ཡོན་སྤུ་གྲིའི་ཁ་ཡི་སྦྲང་རྩི་འདྲ་བོ་ལ་མི་ཆགས་པར་བློས་བཏང་རྒྱབ་ཏུ་བོར་ཏེ། མཚན་ལྡན་གྱི་བླ་མ་དམ་པ་ཐར་བའི་ལམ་དུ་བགྲོད་པའི་ལམ་སྟོན། འཁོར་བའི་མཚོ་ལས་སྒྲོལ་བའི་དེད་དཔོན། དུག་ལྔའི་ནད་ཆེན་འཇོམས་པའི་སྨན་པ་ཆེན་པོ། ད་ནངས་གོང་ནས་བཤད་པ་ལྟ་བུ་དེ་མ་བསྟེན་པར། རང་སྟོབས་ཀྱིས་ཐར་ལམ་རྣམ་དག་བགྲོད་མི་ཐུབ་ལ། བླ་མ་ལའང་རྩ་བ་དང་ཡན་ལག་གི་བླ་མའི་ཁྱད་པར་ཡོད་དེ། དབང་བསྐུར། རྒྱུད་བཤད། མན་ངག་འབོགས་པ་དང་གསུམ་པོ་ཚང་བ་ལ་རྩ་བའི་བླ་མ་ཞུ་བ་ཡིན་ལ། དེའི་ནང་ནས་གཅིག་ལྡན་ནམ་གཉིས་ལྡན་ལྟ་བུ། ཡན་ལག་གང་ཡང་རུང་བ་མ་ཚང་ན་ཡན་ལག་གི་བླ་མ་ཡིན། སྒྲ་ཐལ་འགྱུར་ལས། མཚན་ཉིད་ཚོགས་པའི་བླ་མ་ནི། །ཡོན་ཏན་ཀུན་གྱི་འབྱུང་ཁུངས་ཡིན། །རྫོགས་པའི་བྱང་ཆུབ་གཞི་འཛིན་པའོ། །ཞེས་གསུངས་ན། དེ་ཡང་མཚན་ཉིད་ལྡན་དང་མི་ལྡན་ལྟ་སྒོམ་སྤྱོད་འབྲས་བཞིའི་སྟེང་ནས་ཕྱེ་དགོས། ཇི་ལྟར་ཕྱེ་ན། རྟོགས་ལྡན་ལྟ་བ་ལ་མཁས་པས་ཆོས་ཉིད་མངོན་སུམ་གྱི་དྲོད་ཚད་ཐོབ་པ། གོམས་དོན་སྒོམ་པ་ལ་མཁས་པས་རྟག་ཏུ་ཆོས་ཉིད་ལས་མི་འདའ་བ། གཉིས་མེད་སྤྱོད་པ་ལ་མཁས་པས་གཟུང་འཛིན་གྱི་རྣམ་རྟོག་ཆུང་ཞིང་བླང་དོར་འཛིན་ཞེན་ཆུང་བ། མཐར་ཕྱིན་འབྲས་བུ་ལ་མཁས་པས་གྲོལ་ཚད་ཀྱི་རྟགས་དང་ལྡན་ཞིང་རེ་དོགས་ནང་ནས་ཞིག་པས་ཁོང་ཡང་བློ་བདེ་ཡིན་པ་བཅས་དགོས་གསུངས་ཡོད། ཡིན་ནའང་དེ་རིང་ཁ་རྩང་གི་དུས་འདི་ལ་གདུལ་བྱ་རང་དང་མཐུན་པའི་ངོ་སྐལ་དུ་འདུལ་བྱེད་ཀྱང་བསོད་ནམས་ཀྱིས་ཁྱོག་ཚོད་ཅིག་མ་གཏོགས་དཀའ་བ་ཡིན་ཡང་། སངས་རྒྱས་ཀྱི་སའི་ཐུགས་རྗེའི་ཆོས་ལྔ་དང་སྦྱར་ཡོང་ན། རང་བཞིན་ཤུགས་ཀྱི་ཐུགས་རྗེ། རྐྱེན་ཡུལ་དང་འཕྲད་པའི་ཐུགས་རྗེ། བསྐུལ་ཞིང་གསོལ་བ་བཏབ་པའི་ཐུགས་རྗེ། མཛད་པ་སྣ་ཚོགས་ཀྱི་ཐུགས་རྗེ། གདུལ་བྱ་མི་འགྱུར་བའི་ཐུགས་རྗེ་དང་ལྔ་བོ་ལས་ནམ་ཡང་འདའ་མི་སྲིད་པ་ཡིན། འོན་ཀྱང་ཁ་བྱང་བསྟན་གྱི་བྲག་ཕུག རང་ཉིད་ལ་གསལ་ཉི་ཟླའི་འཆར་ནུབ་ཀྱི་ལན་ཁ་མེད་པ་ལྟ་བུ་ནི་རེ་ཞིག་རིགས་ཆད་ལ་འཇོག་རྒྱུའང་མི་སྲིད་པ་མིན་པས་ན། རང་རང་གི་དད་པ་དང་མོས་པའི་ཆུ་སྣོད་ལ་རྒྱལ་བའི་ཐུགས་རྗེའི་ཟླ་གཟུགས་བླ་མ་དགེ་བའི་བཤེས་གཉེན་ཡང་དེའི་ཚོད་ཅིག་སྣང་བ་རེད། སྔར་བསྐལ་བ་དུས་ཚོད་བཟང་དུས་ཀྱི་བླ་མ་དག་གི་རྣམ་ཐར་གྱི་ནང་ན་ཡོད་པ་དེ་ལྟ་བུ། དེང་འཇིག་རྟེན་གྱི་ཁམས་ན་ཡོད་དར་ས་མ་རེད་བསམ་ནས་བསྡད་འདུག་རྒྱུ་ཡོད་པ་མ་རེད། བླ་མ་མེད་པས་མེད་པ་དང་། དད་པ་མེད་པས་མེད་པ་གཉིས་མཐར་སྐལ་མེད་ལག་སྟོང་དུ་ལུས་པར་འདྲ་འདྲ་རེད་བསམ་ནས་མ་མཐར་ཡང་ཐེག་པ་འདི་ལ་ཉམས་ལེན་མི་ཞན་ཅིང་། རང་ལས་ལྷག་པའི་བརྒྱུད་ལྡན་གྱི་བྱིན་རླབས་ཤིག་ཡོད་ངེས་སྙམ་པའི་བློ་གཏད་ཆོག་ས་ཞིག་བསྟེན་དགོས་ལ། དེ་ལྟ་བུའི་མཚན་ཉིད་ཀུན་ལྡན་པའམ་ཡང་དུས་ཀྱི་དབང་དང་གདུལ་བྱའི་བསོད་ནམས་ཀྱིས་ཆ་ཤས་རེ་ལྡན་ནའང་། བསམ་པས་དད་ཅིང་འདུན་པ་དང་། སྦྱོར་བས་གུས་ཤིང་བརྩི་བཀུར་གྱི་ཐོག་ནས་ཅི་གསུང་བཀའ་བཞིན་སྒྲུབ་པའི་བསྟེན་ཚུལ་གྱིས་ལོ་ཟླ་ཅི་ཙམ་ཞིག་ལ་དྲུང་དུ་བསྙེན་ཞིང་སྡོད་དགོས་ན། དེའི་ཚེ་ལ་བཀའ་ལས་འདའ་ཞིང་དམ་ཚིག་ཆགས་ཉམས་འགྲོ་བའི་རྒྱུ་ཞིག་མཐོང་ཐོས་དོགས་གསུམ་གྱིས་རེད་མི་ཤོར་བ་ཞིག་རང་བློ་དག་ས་ནས་བྱེད་དགོས། སྨིན་བྱེད་ཀྱི་དབང་དང་གྲོལ་བྱེད་ཀྱི་ཁྲིད། རྒྱབ་རྟེན་གྱི་ལུང་། མན་ངག་གནད་ཀྱི་ཞལ་ཤེས་དང་བཅས་པ་ཡང་ནས་ཡང་དུ་ཞུས་ཏེ། ཁྲིད་ཅིང་བསྐྱང་བར་མཛད་པའི་གནད་ཐམས་ཅད་ཡིད་ལ་སྦྱོར་བ་ཞིག་དགོས་ཞེས་གསུངས་པ་ཡིན་པས། དེ་ནི་དང་པོ་ཐོས་བསམ་ལ་ཞུགས་པ་ཆོས་རྣམས་ཀུན་གྱི་རོ་མྱོང་བ་བུང་བ་ཚང་ལ་ཞུགས་པ་ལྟ་བུའི་སྤྱོད་པ་དེ་དང་ནི། གསང་བ་སྔགས་ཀྱི་ཐེ་ཚོམ་གཅོད་པ་ཐི་བྱ་ལྟ་བུའི་སྤྱོད་པ་ཞེས་གསུངས་པ་དེ་ལྟ་བུའི་སྤྱོད་པའི་སྐབས་ཡིན། དེ་ནས་སྒྲུབ་པ་ལ་རེམ་པའི་དུས་ལ་སླེབས་དུས་དབེན་པ་བསྟེན་དགོས་པས།

དེ་ནས་རྣམ་གཡེང་འདུ་འཛི་མེད་ས་རུ།།

ཐུན་མོང་སྔོན་འགྲོ་ཚད་ལྡན་ཁྲིད་གཞུང་ལྟར།།

སྔོན་དུ་བཏང་ནས་ཐོད་རྒལ་གཞི་མ་ལ།།

ཁྲེགས་ཆོད་ལྟ་བ་གདེངས་སུ་གྱུར་པ་དགོས།།

དེའི་ཕྱིར་ཁྲེགས་ཆོད་ལྟ་བ་གནད་བསྣུན་ཏེ།།

བརྟན་པ་ཐོབ་ནས་ཐོད་རྒལ་བསྒོམ་པ་གནད།།

ཅེས་གསུངས་ཏེ། འདིའི་སྐབས་སུ་འཁྲུལ་བའི་རྐྱེན་འགྱུར་གྱི་ཡུལ་ཐམས་ཅད་སྤངས་ཏེ་རི་དྭགས་ལྟ་བུའི་སྤྱོད་པས་རྣམ་གཡེང་འདུ་འཛི་སྤངས་། གནས་དབེན་པས་མི་ཚད་ལུས་དབེན་ངག་དབེན་སེམས་དབེན་ཏེ། དབེན་གསུམ་ཞི་བའི་རྒྱལ་ས་ནས་ཐུན་མོང་ཕྱིའི་སྔོན་འགྲོ། ཐུན་མིན་ནང་གི་སྔོན་འགྲོ། ཁྱད་པར་གསང་བའི་སྔོན་འགྲོ་སོགས་ཚད་ལྡན་དུ། རྫོགས་ཆེན་སྙིང་ཏིག་གི་རྩ་བའི་ཁྲིད་གཞུང་ལྟར་དུ་སྔོན་དུ་འགྲོར་བཅུག དེས་མི་ཚད་བསྐྱེད་རྫོགས་ཐུན་མོང་སྔགས་བླ་མེད་ཀྱི་རྫོགས་རིམ་གཞན་དང་བཅས་པ་སྔོན་དུ་བཏང་ནས། འཇུག་སྒོའི་དབང་ནས་ཞུགས་ཏེ་ཁྲེགས་ཆོད་ཀྱི་ལྟ་བས་རིག་པའི་རང་ངོ་འཕྲོད་པའི་སྟེང་། ལྟ་བའི་ངང་སྒོམ་པས་བསྐྱངས་ཏེ་ལྟ་བ་གདེང་དང་ལྡན་པར་གྱུར་པས། བློས་བྱས་ཡིད་དཔྱོད་ལ་རག་མ་ལས་པར། ཁྲེགས་ཆོད་ལྟ་སྒོམ་ཀྱི་བརྟན་པ་གང་འཚམ་ཞིག་ཐོབ་པར་བྱས་ཏེ། དེ་ནས་ཐོད་རྒལ་བསྒོམ་པ་གནད་ཡིན་གསུངས་པའོ། །འདི་ཀུན་མཁྱེན་ཆེན་པོ་མན་ཆད་ཀྱི་ཕྱག་ལེན་ཡིན། དུས་སྙིགས་མའི་གཞན་དབང་དུ་གྱུར་ཅིང་གྱུར་ལ། སློབ་མའི་རྒྱུད་ཚོད་དང་བསྟུན་ནས་གཏན་ལ་ཕབ་པར་མཛད་པའི་ཕྱག་བཞེས་སོ། །ཐེག་པའི་རྒྱལ་པོ་འདིའི་ལུགས་ལ་སེམས་དང་ཡེ་ཤེས་ཀྱི་གནད་ཕྱེ་བ་ཐོག་མ་ཉིད་ནས་ངེས་དགོས་སོ། །དེ་ངེས་ཚུལ་ཡང་གཞི་དང་འཁྲུལ་ཚུལ་ཁྱབ་ཚུལ་སོགས་གོང་དུ་ཞུས་པའི་རྡོ་རྗེའི་ཚིག་དོན་བཅུ་གཅིག་གི་ནང་དུ་གཞི་ལམ་འབྲས་བུའི་གནད་ཐམས་ཅད་བསྡུས་པ་བཞིན་དུ། ཡེ་ཐོག་གཞིའི་ཀ་དག་དེ་ངོ་བོ་ཀ་ནས་དག་པས་ཡོད་པ་རྟག་པའི་མཐའ་དང་བྲལ། དངོས་པོ་དང་མཚན་མའི་ཆོས་སུ་མ་གྲུབ། རང་བཞིན་ལྷུན་གྱིས་གྲུབ་པས་མེད་པ་ཆད་པའི་མཐའ་ལས་འདས། འོད་གསལ་སྟོང་པའི་ཆོས་ཉིད་རྣམ་པར་དག་པ་ངོ་བོ་རང་བཞིན་ཐུགས་རྗེ་ཡེ་ཤེས་གསུམ་ལྡན། དེ་ཡང་ཀ་དག་ཡིན་པས་དྲི་མ་རང་དག ལྷུན་གྲུབ་ཡིན་པས་སྣ་ཚོགས་འབྱུང་བའི་འཁོར་འདས་ཀུན་གྱི་སྤྱི་གཞི་རུ་གྲུབ། གཞི་དེ་ལ་མ་རིག་པ་མི་ལྡན་པའི་ཆ་ནས་ཀ་དག་དང་། གཞི་དེ་ཡིས་མ་རིག་པ་མ་སྤངས་པའི་ཆ་ནས་ལྷུན་གྲུབ་ཅེས་བརྗོད་ན་མི་ཆོག་པ་མེད། གཞི་ལས་གཞི་སྣང་ཤར་བའི་གནས་སྐབས་ན། ཀུན་ཏུ་བཟང་པོས་རང་ངོ་ཤེས་པས་གྲོལ། ཁམས་གསུམ་སེམས་ཅན་གྱིས་རང་ངོ་མ་ཤེས་པས་འཁྲུལ་བ་ཡིན་ན། གཞི་སྣང་དེ་ཇི་ལྟར་ཤར་བ་ཡིན་སྙམ་ན། གཞི་དབྱིངས་ལས་གཡོ་བྱེད་ཡེ་ཤེས་ཀྱི་རླུང་གཡོས་པས་ཡིན་ལ། ཐུགས་རྗེ་ཉིད་ཤེས་པ་གསལ་རིག་ཡུལ་སྐྱོན་མེད་ཅིག་ལ་ཤར་ཡོང་དུས། སེམས་ཅན་ཇི་ལྟར་འཁྲུལ་ན། སེམས་ཉིད་རླུང་དང་ཐིག་ལེའི་དྭངས་མ་དང་འགྲོགས་པའི་སྣང་བ་གསུམ་པོ་འདི་བྱུང་བ་ཡིན། དེ་ཁོ་རང་རང་བཞིན་གྱིས་དབང་པོ་རྟུལ་བས་མེ་ལོང་ལ་རང་བྱད་ཤར་བ་རང་གི་ངོ་ཡིན་པར་མ་ཤེས་པར་གཞན་དུ་བཟུང་བ་ལྟར་དུ། སྐུ་དང་གཅིག དབྱིངས་དང་གཉིས། རིག་པ་གསུམ་དེ་གཞན་སྣང་དུ་མཐོང་ནས་སྐུ་ལས་ལུས་སུ་འཁྲུལ། དབྱིངས་ལས་ཡུལ་དུ་འཁྲུལ། རིག་པ་སེམས་སུ་འཁྲུལ་ཏེ། གཞི་ལས་གཞི་སྣང་ཤར་དུས་རྐྱེན་བཞིས་ཡར་གྲོལ་བ་བཞིན་དུ་རྐྱེན་བཞིས་མར་འཁྲུལ་རྐྱེན་ཡང་བྱས་ཏེ་འཁྲུལ་ནས་ཁམས་གསུམ་འཁོར་བའི་གནས་དོན་ལུས་གསུམ་འདི་བཞིན་གྲུབ་པ་ཡིན་མོད། འོན་ཀྱང་འཁྲུལ་བཞིན་པའི་གནས་སྐབས་ན་གཞི་ལ་ཇི་ལྟར་གནས་པ་བཞིན་དུ་གནས་ཡོད་པ་ཡིན་ནོ། །སྐུ་འོད་རིག་པ་གསུམ་ཡར་གྲོལ་བས་རྒྱལ་བའི་སྐུ་གསུང་ཐུགས་དང་། མར་འཁྲུལ་བས་སེམས་ཅན་གྱི་ལུས་ངག་ཡིད་གསུམ་བྱུང་བ་ཡིན་པས་དེའི་སྟོབས་ཀྱིས་སེམས་ཅན་གྱི་ཁམས་ལ་སངས་རྒྱས་ཀྱི་སྙིང་པོས་ཁྱབ་ཡོད། ཁྱབ་ཚུལ་བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ་གསུངས་པ་ལྟར་དང་། ཁྱབ་ཆོས་བྱེ་བྲག་གི་ཐད་ནས། སྙིང་པོའི་ཡེ་ཤེས་ལ་སྐུ་ལྔ་ཡེ་ཤེས་ལྔ་འོད་ལྔ་ལ་སོགས་པར་ཡེ་ནས་གནས་པ་ཡིན། གནས་པའི་རྟགས་ནི་མ་དག་པའི་སྐབས་འདིར་ཉོན་མོངས་ལྔ་དང་ཕུང་པོ་ལྔ། འབྱུང་བ་ལྔ་སོགས་སུ་གནས་ནས་ཡོད་པས། སྐུ་ལྔ་ཡེ་ཤེས་ལྔ་སོགས་ཀྱིས་ཁྱབ་ཡོད་པར་མཚོན་ཅིང་། འདི་ད་ལྟ་ལུས་ཅན་རྣམས་ཀྱི་གནས་གང་ན་བཞུགས་སྙམ་ན་ལུས་ལ་བཞུགས་ཚུལ་གཞི་དང་འཁྲུལ་ཚུལ་ཁྱབ་ཚུལ་དང་། གནས་དང་ལམ་དང་སོགས་གསུངས་པའི་ཡེ་ཤེས་དངོས་དེ་གང་ན་བཞུགས་ན་སྙིང་ཙིཏྟ་ཤའི་སྒྲོན་མ་ན་ཉི་མའི་དཀྱིལ་འཁོར་དང་བུམ་ནང་གི་མར་མེ་བཞིན་དུ་བཞུགས་ཡོད་པའི་ཟེར་ཕྱིར་འཕྲོ་སའི་ལམ་དེ་ལུས་ཀྱི་རྩ་ཆེན་བཞི་དང་རྩ་ཕྲན་དག་གི་ནང་ན་ཡོད་པ་རེད། སྙིང་ཁའི་འོད་གསལ་གྱི་འོད་རྩའི་སྒོ་བཞི་ནི། ཀ་ཏི་གསེར་གྱི་རྩ་ཆེན་དང་གཅིག ཤེལ་སྦུབ་ཅན་དང་གཉིས། དར་དཀར་སྣལ་མ་དང་གསུམ། སྟོང་པ་རང་གྲོལ་དང་བཞི་པོ་ཡིན། མུ་ཏིག་ཕྲེང་རྒྱུད་ལས། ལམ་ནི་རྩ་བཞི་འགྱུ་བྱེད་རླུང་། །འཆར་བྱེད་སྒོ་ནི་མིག་སོགས་སོ། །ཞེས་གསུངས་པ་རེད། སྒོ་གང་ནས་འཆར་ན། གཉིས་ཀྱིས་ཆ་འཛིན་འཁོར་འདས་སྟོན། །གསུངས་པ་ལྟར་དུ། རྒྱང་ཞགས་ཆུའི་སྒྲོན་མ་མིག་གི་དབང་པོ་ལ་བརྟེན་པའི་འོད་རྩ་དྭངས་བ། སྐྱོན་ཡོན་དབང་པོ་དྭངས་བྱེད། ལས་དག་མ་དག་གི་སྟོབས་ཀྱིས་མཐོང་སྣང་ཆ་གཉིས་སུ་འབྱུང་བ་འདི་ཡིན་ན་འདི་གཙོ་ཆེ་བའི་ཆ་ནས་གསུངས་པ་རེད་མ་གཏོགས། ངོ་མ་ཞིབ་ཏུ་བརྟགས་ན་ཡེ་ཤེས་འཆར་བའི་སྒོ་དེ་མིག་གཉིས་མིན་པར་མ་ཟད་རྒྱང་ཞགས་ཆུའི་སྒྲོན་མ་རེད་ཟེར་ནའང་ཅུང་རྩིང་བཤད་ཙམ་ཡིན་པ་རེད། རྒྱང་ཞགས་དག་པ་ཆུའི་སྒྲོན་མ་དེ་ཡེ་ཤེས་འཆར་བའི་སྒོ་རེད་ཅེས་བརྗོད་ན་འགྲིགས་པོ་ཡོད་རེད། དེ་གང་ལ་འཆར་ན། ཕྱི་ནི་སྤྲིན་བྲལ་མཁའ་ལ་འཛིན། །ནང་དབྱིངས་སྒྲོན་མ་དག་ཏུའོ། །ཞེས་གསུངས་པས་ཕྱི་ཡུལ་ནམ་མཁའ་སྟོང་པས་གོ་ཕྱེས་ནས། ནང་ཡུལ་རྣམ་དག་དབྱིངས་ཀྱི་སྒྲོན་མ་འཆར་བ་དང་། ཕྱི་ཡུལ་ནམ་མཁའ་སྟོང་པར་རིག་པ་གཏད་པས། དེས་མཚོན་པའི་སྟོང་གསལ་མཐའ་དབུས་བྲལ་བ་ཞིག་འཆར་བས་ན་ཕྱི་ཡུལ་ནམ་མཁའ་ཞེས་པའི་ཚིག་དེ་བྱུང་བ་རེད། དོན་དངོས་ཐོག་ནས་བཤད་ན་དབྱིངས་ཀྱི་ར་བར་ལུག་རྒྱུད་འགུལ་འཕྲིག་མེད་པར་བཞག་ནས་དབྱིངས་རིག་གཉིས་སུ་མེད་པའི་རང་ངོ་ལ་ལྟ་བ་དེ་གནད་ངོ་མ་བོ་ཡིན། དེ་ཐབས་གང་གིས་མཐོང་ན། ལྟ་སྟངས་དང་གཟིགས་སྟངས་བྱས་པས་མཐོང་དགོས་པ་དེའི་ཕྱིར་ན། ཡུལ་གནད་རྩོལ་མེད་དང་རྩོལ་བཅས་གཉིས་སུ་ཕྱེ་ནས་བཤད་དུ་ཡོད་དེ། རྩོལ་མེད་དེ་ཇི་ལྟར་བཤད་ན། རང་གདངས་ནམ་མཁའི་རྣལ་འབྱོར་དང་། རང་གནད་རྒྱ་མཚོའི་རྣལ་འབྱོར་གཉིས་བྱས་ཏེ་བཤད་དགོས། རྩོལ་བཅས་ལ་རྒྱང་ཞགས་བལྟེམས་པ་དང་འོད་རྩ་བལྟེམས་རྒྱུ་དོ་ཞག་དབང་གི་སྐབས་ནས་བྱུང་བ་ལྟ་བུ་དང་དེ་ལྟར་གཉིས་ཡོད། གནས་དང་ལམ་དང་སྒོ་དང་ཡུལ། །ཉམས་ལེན་ཞེས་གསུངས་ན། ལམ་ཉམས་ལེན་དེ་སྨིན་བྱེད་དབང་དང་གྲོལ་བྱེད་ཁྲིད་ཡིན་པས་རང་ལམ་གྱི་དབང་ཐོབ། དབང་སྲོག་དམ་ཚིག་གིས་རྒྱུད་དག་པར་བྱས་ཏེ། དམིགས་པ་ཡུལ་གྱི་བློ་ཅན་དང་རིག་པ་རང་སྣང་གི་བློ་ཅན་གཉིས་ཀྱི་རང་རང་གི་བློ་དང་དབང་པོ་ལྟར་དུ་རིམ་ཅན་ནམ་ཅིག་ཆར་གྱིས། ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ཉམས་ལེན་མན་ངག་ལྟར་དུ་བྱ་དགོས་ལ། དེ་ལས་ཁྲེགས་ཆོད་ནི་སྣང་བ་ལ་མ་ལྟོས་པར་རིག་པ་རྗེན་པ་ཉམས་ལེན་གྱིས་འབད་མེད་རང་གྲོལ་ལེ་ལོ་ཅན་མ་བསྒོམས་པར་འཚང་རྒྱ་བའི་ཆོས་ཡིན་པ་དང་། ཐོད་རྒལ་ནི་འོད་གསལ་གྱི་སྣང་བ་ལ་ལྟོས་ནས་འབད་བཅས་ཀྱིས་གྲོལ་བ་བརྩོན་འགྲུས་ཅན་ཚེ་འདི་ཉིད་ལ་གདོས་བཅས་འོད་ལུས་སུ་དེངས་སྟེ་འཚང་རྒྱ་བ། དེ་གཉིས་ཀའང་དབང་པོ་རྣོན་པོའི་དབང་དུ་བྱས་པ་གཉིས་མེད་ཟུང་འཇུག་གི་ཡེ་ཤེས་ལམ་བྱེད་ཡིན་པའི་དགོངས་གནད་གཅིག་པ་རེད། སྣང་སྟོང་ཟེར་བ་ལུགས་འབྱུང་ལྡོག་གི་བཤད་སྟངས་ཙམ་མ་གཏོགས་སྐུ་གསུམ་ལམ་སྣང་དུ་བྱས་ཏེ་སྣང་བཞི་མཐར་ཕྱིན་དགོས་པའི་གནད་གཅིག་ལས་གཉིས་སུ་ཡོད་པ་མ་ཡིན་ནོ། །མདོར་ན་གོང་དུ་ཁྱབ་ཚུལ་བཤད་པ་བཞིན། གཞི་སྐུ་གསུམ་འདུ་འབྲལ་མེད་པས་ཁྱབ་ཡོད་ཀྱང་། ཚོགས་བརྒྱད་སེམས་བྱུང་དང་བཅས་པའི་རྣམ་ཤེས་དང་། བདེ་གསལ་མི་རྟོག་གསུམ་གྱི་ཉམས་ཞེན། མ་རིག་ལུང་མ་བསྟན་གྱི་ཀུན་གཞི་སོགས་ཀྱིས་བསྒྲིབས་ནས། དོ་ཞག་ཞུས་པ་ལྟར། རལ་གྲི་ཤུབས་དང་མེ་ལོང་འདམ་ནོར་བུ་སྒྲོམ་གྱིས་སྒྲིབ་པ་ལྟར་བསྒྲིབས་ཡོད་པ་དེ་སྨིན་བྱེད་དབང་གིས་སྨིན་པར་བྱས། གྲོལ་བྱེད་ཁྲིད་ཀྱིས་གྲོལ་བར་བྱས་ནས། ཚེ་འདིའི་སྟེང་གི་མ་འཁྲུལ་དོན་གྱི་གནས་ལུགས་གཞི་འབྲས་དབྱེར་མེད་པའི་སར་ཕྱིན་པའི་ཉམས་ལེན་མཐའ་རུ་ཕྱིན་དགོས་སོ། །དེའི་ཚད་ནི་སྣང་བཞིའི་ཉམས་ལེན་མཐར་ཕྱིན་ནས་གདིང་བཞིའི་དགོངས་པ་ཚད་དུ་ཕྱིན་དགོས་སོ། །གདེང་བཞི་ནི། མར་གྱི་གདེང་གཉིས་དང་ཡར་གྱི་གདིང་གཉིས་ཏེ། མར་གྱི་གདེང་གཉིས་ནི། དམྱལ་བ་ཚ་གྲང་གི་སྡུག་བསྔལ་ད་མྱོང་ངོ་བརྗོད་ཀྱང་ཡ་ང་བག་མི་ཚ། འཁོར་བའི་བདེ་སྡུག་ལ་ད་དུང་འཁོར་རོ་ཟེར་ཡང་རེ་དོགས་མེད་པའི་གདེང་དང་ནི། ཡར་གྱི་གདེང་གཉིས་ནི། མྱང་འདས་ཀྱི་ས་ལ་རེ་བ་མེད་པ་དང་སངས་རྒྱས་ཀྱི་ཡོན་ཏན་ལ་དགའ་བྲོད་མེད་པའི་གདེང་སྟེ། དེ་ལྟར་གདེང་བཞི་ཐོབ་པས་ཉམས་ལེན་དྲོད་རྟགས་ཀྱི་ཚད་འཛིན་ཆོག་པ་ཡིན་ནོ།། ཉམས་ལེན་ཚད་དང་བར་མ་དོ། །གྲོལ་ས་ཉིད་དང་བཅུ་གཅིག་གོ །ཞེས་གསུངས་པས། འདིའི་སྐབས་སུ་བར་དོ་རྣམ་པ་བཞི་སྟེ་རང་བཞིན་འཆི་བ་ཆོས་ཉིད་སྲིད་པ་བར་དོ་དང་བཞི་ཡིན་ན། ཉམས་ལེན་བྱས་པའི་དོན་སྒོ་དེ་བར་དོ་གཅད་དུས་ཡོད་དགོས་པ་ཡིན་ན་རབ་ཚེ་འདིའི་འཆི་སྲིད་ཆོས་སྐུའི་འོད་གསལ་ཤར་ཚུན་ཆོད་དང་། འབྲིང་ཆོས་ཉིད་བར་དོའི་ནམ་མཁའ་འོད་གསལ་ལ་ཐིམ་པ་ནས་ལྷུན་གྲུབ་སྒོ་བརྒྱད་ཀྱི་སྣང་བ་ཤར་ཚུན་ཆོད་ལ་གྲོལ་བ་དང་། ཐ་མ་ཡིན་ཡང་སྲིད་པ་བར་དོའི་གནས་སྐབས་སུ་རང་བཞིན་སྤྲུལ་བར་དབུགས་འབྱིན་ཐུབ་པ། ཡང་ཐ་ངོ་མ་ཞིག་ཡིན་ཡང་སྐྱེ་བ་ཚེ་རབས་མང་པོ་ཞིག་བརྒྱུད་མི་དགོས་པར་ཆོས་འདི་དང་འཕྲད་ནས་གྲོལ་བ་ཐོབ་པ་དེ་ལྟ་བུའོ། །དེ་ནས་གང་དུ་གྲོལ་བའི་གྲོལ་ས་དེ། ལམ་སྦྱང་ཚུལ་གྱིས་དབང་པོ་ཐ་དད་འགྲོ་བའི་ལམ་མ་གཅིག་ནའང་། ཐོན་ས་དེ་གཅིག་ལ་ཐོན་པ་བཞིན་འབྲས་བུ་དག་པ་གཉིས་ལྡན་གྱི་ཆོས་སྐུ་ཀ་དག་རིན་པོ་ཆེའི་སྦུབས་སུ་གྲོལ་བ་ལ་ངོ་བོ་གཅིག་པ་ཡིན། འདི་ལ་སྐུ་དང་ཡེ་ཤེས་ཡོན་ཏན་ཕྲིན་ལས་ལ་སོགས་པའི་དབྱེ་བ་མང་ཡང་། དོན་ལ་ཆོས་ཀྱི་སྐུ་ལས་མ་གཡོས་བཞིན་དུ་གཟུགས་སྐུ་ལོངས་སྤྲུལ་གཉིས་ཕྲིན་ལས་དང་བཅས་པས་དོན་གཉིས་ལྷུན་གྲུབ་ཀྱི་མཛད་པ། ནམ་མཁའ་མ་ཞིག་འཁོར་བ་མ་སྟོང་གི་བར་དུ་མཛད་པ་དེ་མཐར་འབྲས་ཡིན་ནོ། །འདིའི་སྐབས་སུ་མཐར་ཐུག་གི་གྲོལ་ས་དེ། ཐོག་མའི་ངེས་མེད་གཞིའི་ཀ་དག་དེ་མ་ཡིན་པར་ལྷུན་གྲུབ་ཀྱི་རྩལ་རིག་པར་རྟོགས་པ་ལས་མ་རིག་པའི་ཆ་སྤངས་ཏེ་དབྱིངས་ཀྱི་ཡོན་ཏན་མཐར་ཕྱིན་པ་དེ་ཉིད་ཡིན་ནོ། །དེ་གཉིས་ངོ་བོ་རང་བཞིན་ཐུགས་རྗེ་གསུམ་དུ་གནས་པའི་རིག་པའི་ཡོན་ཏན་འདྲ་ཡང་སླད་ཀྱིས་འཁྲུལ་གཞི་བྱེད་མི་བྱེད་ཀྱི་ཁྱད་པར་ཆེན་པོ་ཡོད་པས་ན། གཞི་སྣང་ལས་གྲོལ་ཏེ་གཞི་འབྲས་དབྱེར་མེད་ཀྱི་སར་ཕྱིན་པ་ཡིན་པས་གཞི་ཐོག་ཏུ་གྲོལ་ཞེས་ཟེར་ན་ཅུང་ཟད་གནད་མ་གོ་བའི་ཉམས་ཡིན་ནོ།།

ག༽ བཞི་བ་ཐོད་རྒལ་དངོས་ཀྱི་སྤྱི་ཆིངས་བསྟན་པ།

དེ་ལ་ས་བཅད་ཀྱིས་བཅད་མཚམས་བྱས་ནས་ཁྲིད་རྐང་གི་རིམ་པ་སྡོམ་དུ་བཀོད་པས་མདོར་བསྟན་པ་དང་། དེ་དག་རིམ་པ་བཞིན་དུ་རྒྱས་པར་བཤད་པ་སྟེ་གཉིས་ལས།

༼༡༽ དང་པོ་ཁྲིད་རྐང་གི་རིམ་པ་སྡོམ་དུ་བཀོད་པས་མདོར་བསྟན་པ།

དེ་ལྟ་བུའི་སྤྱིར་རྫོགས་པ་ཆེན་པོ། བྱེ་བྲག་འོད་གསལ་ཐོད་རྒལ་གྱི་ལམ་གནད་དེ་ངེས་པར་བྱས་པའི་ཐོག་ནས། ད་ནི་ཐོད་རྒལ་དངོས་ཀྱི་སྤྱི་ཆིངས་དེ་ས་བཅད་ཀྱིས་བཅད་མཚམས་བྱས་ནས་ཁྲིད་རྐང་གི་རིམ་པ་སྡོམ་དུ་བཀོད་པས་མདོར་བསྟན་པ་ནི།

ཨེ་མ་ཧོ།

སུས་ཐོབ་འཚེངས་པས་ནོར་བུ་ལྟ་བུ་ཡི།།

ཐོད་རྒལ་ཉམས་ལེན་ཁྲིད་རིམ་འདི་ལྟ་སྟེ།

ཞེས་མཚམས་སྦྱར་ཏེ་དེ་ནས།

སྒོ་གསུམ་བྱ་བ་དགུ་ཕྲུགས་གཏོང་ཚུལ་དང་།།

སྒོ་གསུམ་གནད་རྣམས་གཟིར་ཚུལ་གནད་གསུམ་གྱིས།།

ཡེ་ཤེས་མངོན་སུམ་གཏན་ལ་འབེབས་ཚུལ་དང་།།

གཏན་ལ་ཕབ་ནས་དངོས་གཞིའི་ངོ་སྤྲོད་དང་།།

རྗེས་སུ་རྣལ་འབྱོར་བཞི་ཡིས་ཉམས་བླང་ཚུལ།།

ཉམས་སུ་བླངས་ནས་སྣང་བཞི་འཆར་ཚུལ་དང་།།

མཐའ་རྟེན་མན་ངག་དང་བཅས་བདུན་ཡིན་ནོ།།

ཞེས་རིམ་པ་བཞིན་དང་པོ་སྒོ་གསུམ་བྱ་བ་དགུ་ཕྲུག་གཏོང་ཚུལ་དང་། གཉིས་པ་སྒོ་གསུམ་གནད་རྣམས་གཟིར་ཚུལ་གྱི་གནད་གསུམ་དང་། གསུམ་པ་ཡེ་ཤེས་མངོན་སུམ་གཏན་ལ་འབེབས་ཚུལ་དང་། བཞི་པ་གཏན་ལ་ཕབ་ནས་དངོས་བཞིའི་ངོ་སྤྲད་པ་དང་། ལྔ་བ་རྗེས་ཀྱི་རྣལ་འབྱོར་བཞི་ཡིས་ཉམས་སུ་ལེན་ཚུལ་དང་། དྲུག་པ་ཉམས་སུ་བླངས་ནས་སྣང་བཞི་འཆར་ཚུལ་དང་། བདུན་པ་མཐའ་རྟེན་མན་ངག་དང་བཅས་པས་བདུན་ཏེ་ཆིངས་སམ་ས་བཅད་ཀྱིས་བཅིངས་ཏེ་རེ་རེ་བཞིན་དུ་འཆད་པའོ།།

༼༢༽ གཉིས་པ་དེ་དག་རིམ་བཞིན་རྒྱས་པར་བཤད་པ།

དེ་ལ་མདོར་བསྟན་པ་ལྟར་དུ་བདུན་དུ་ཡོད་པ་ལས་དང་པོ་ནི།

༡༽ དང་པོ་སྒོ་གསུམ་བྱ་བ་དགུ་ཕྲུགས་གཏོང་ཚུལ།

ཨེ་མ་ཧོ།

དང་པོ་སྒོ་གསུམ་བྱ་བ་གཏོང་ཚུལ་ནི།།

ཆོས་ཉིད་ཡིད་བྱེད་ཙམ་དུ་མ་ལུས་པར།།

མངོན་སུམ་རང་ཐོག་ཕབ་ནས་ཉམས་ལེན་ཚེ།།

སྒོ་གསུམ་བྱ་བ་དགུ་ཕྲུགས་གཏོང་དགོས་པས།།

ལུས་ཀྱི་ཕྱི་ཡི་བྱ་བ་ཚེ་འདི་ཡི།།

དགྲ་འདུལ་གཉེན་སྐྱོང་སོ་ནམ་ཐམས་ཅད་དང་།།

ནང་གི་བྱ་བ་ཕྱག་དང་བསྐོར་བ་དང་།།

གསང་བ་ལྷ་ཡི་གར་དང་ཕྱག་རྒྱ་སོགས།།

སྤངས་ནས་གྲོགས་མེད་གཅིག་པུར་གནས་པར་བྱ།།

ཞེས་གསུངས་ཏེ། ལུས་ངག་ཡིད་ཀྱི་སྒོ་གསུམ་འདི་མ་དག་འཁོར་བའི་སྒོ་ཡིན་པས་ན། འདིའི་སྒོ་གསུམ་གྱི་བྱ་བ་རྣམ་པ་དཀར་ནག་བཟང་ངན་དུ་སྣང་བ་ཐམས་ཅད་བཏང་བཞག་ན། གཞི་ནས་རྒྱལ་བའི་གསང་གསུམ་གྱི་ངོ་བོ་འགྲུབ་པ་ཡིན་པ་དང་། ཁྱད་པར་འོད་གསལ་རྫོགས་ཆེན་གྱི་ཉམས་ལེན་ལ་ཆོས་ཉིད་ཅེས་པ་དེ། གོ་བའི་དབྱིངས་ཙམ་ཞིག་གི་སྤྱི་དོན་ཡིད་བྱེད་ཙམ་དུ་མ་ལུས་པར་མངོན་གསུམ་གནད་ལ་འཇལ་བའི་རང་ཐོག་ཏུ་ཕབ་དགོས་པ་ཡིན་པས། ཉམས་ལེན་དེ་ཉིད་རྒྱུད་ལ་འབྱོར་དགོས་ཤིང་། དེ་རྒྱུད་ལ་འབྱོར་བའི་ཐབས་སུ་ངེས་པར་དུ་སྒོ་གསུམ་གྱི་བྱ་བ་གསུམ་གསུམ་དགུ་རུ་ཕྱེ་བ། དགུ་ཕྲུགས་སམ་དགུ་བོ་དེ་ཕྲུགས་ཀྱིས་སམ་རྦད་ཀྱིས་གཅོད་པར་བྱེད་དགོས་གསུངས་སོ། །རྒྱུ་མཚན་དེས་ན་འདི་ནས་ཉམས་སུ་ལེན་པའི་མན་ངག་བསྟན་ན། ཉམས་ལེན་བྱེད་སྐབས་སུ་མཉམ་དུ་དགུ་ཕྲུགས་སུ་གཏང་དགོས་ཀྱང་འཆད་པའི་སྐབས་སུ་རིམ་ཅན་དུ་བཤད་དགོས་པས་ཐོག་མར་ལུས་ཀྱི་བྱ་བ་གཏང་ཚུལ་གསུངས་པའོ། །ལུས་ཀྱི་ཕྱིའི་བྱ་བ་མི་དགེ་སྡིག་པའི་ལས་སམ། དེ་དང་འབྲེལ་བའི་ལུང་མ་བསྟན་ལ་སོགས་ཆགས་སྡང་རྨོངས་གསུམ་གྱིས་བསླངས་བའི་དགྲ་འདུལ་གཉེན་སྐྱོང་ཚོང་སོ་ནམ་ཁྱིམ་ལས་ལ་སོགས་ཚེ་འདིའི་གཡེང་བ་སྣ་ཚོགས་དང་། ནང་གི་བྱ་བ་དཀར་པོ་དགེ་བའི་ལས་སུ་གཏོགས་པ་ཕྱག་དང་སྐོར་བ་འཁོར་ལོ་བསྐོར་རྒྱུ་ལ་སོགས་པ་ལུས་ཀྱི་ལས་སུ་གཏོགས་པའི་དགེ་སྦྱོར་གྱི་རིགས་དང་། གསང་བ་གསང་སྔགས་ཀྱི་ཆོ་ག་དཀྱིལ་འཁོར་སོགས་དང་འབྲེལ་བའི་ལྷ་ཡི་གར་འཆམ་དང་ཕྱག་རྒྱ་སྣ་ཚོགས་ཀྱི་སྒྱུར་སྟབས་ལ་སོགས་པ་སྤངས་ཏེ་གྲོགས་མེད་གཅིག་པུར་དབེན་པའི་གནས་སུ་གནས་པར་བྱ་ཞེས་གསུངས་པ་རེད།

ངག་གི་ཕྱི་ཡི་འཇིག་རྟེན་འཁྲུལ་གཏམ་དང་།།

ནང་གི་བྱ་བ་ཁ་ཏོན་བཟླས་བརྗོད་དང་།།

གསང་བའི་བྱ་བ་རྩ་རླུང་བཟླས་པ་སོགས།།

སྤངས་ཏེ་སྨྲ་མེད་ཉིད་དུ་གནས་པར་བྱ།།

ཞེས་གསུངས་ན། ངག་འདི་ངག་གི་ཉེས་པ་བསྐྱེད་པའི་སྒོ་ཡིན་པས་མི་ཚད་སེམས་དང་ལུས་ཀྱི་ཉེས་པ་དུ་མ་ཞིག་ཀྱང་འདིས་འདྲེན་བཞིན་ཡོད་པས་འདི་ཁྱད་པར་གནད་ཆེ་བ་རེད། ངག་གི་ཕྱིའི་འཇིག་རྟེན་འཁྲུལ་བའི་གཏམ་འུ་ཚོས་རྒྱུན་དུ་བཤད་འདུག་རྒྱུ་འདི་མང་ཆེ་བ་ངག་གི་མི་དགེ་བ་བཞི་བོའི་ཁོངས་གཏོགས་ཡིན་པས་དེ་འདྲའི་འཇིག་རྟེན་གྱི་འཁྲུལ་གཏམ་དང་ནི། ངག་གི་ནང་གི་བྱ་བ་དགེ་ཕྱོགས་སུ་གཏོགས་པའི་ཚུགས་འདྲ་བོའི་ཁ་ཏོན་བཟླས་བརྗོད་དང་ནི། གསང་བའི་བྱ་བ་ཐུན་མོང་གི་རྫོགས་རིམ་དང་འབྲེལ་བའི་རྩ་རླུང་བཟླས་པ། གོང་གི་བཟླས་པ་ངག་བཟླས་དང་འདི་རླུང་བཟླས་སོགས་ལ་གོ་ཆོག་གོ། དེ་ལྟ་བུའི་གསང་བའི་བྱ་བ་དུས་རྒྱུན་རྩ་ཆེན་ཡིན་ནོ་སྙམ་པའི་མངོན་ཞེན་ཅན་དེ་དག་ཀྱང་སྤངས་ཏེ། ངག་སྨྲ་མེད་པི་ཝང་གི་རྒྱུན་ཐག་ཆད་པ་ལྟ་བུར་སྡོད་གསུངས་སོ།།

སེམས་ཀྱི་ཕྱི་ཡི་ཐ་མལ་འཁྲུལ་རྟོག་དང་།།

ནང་གི་བྱ་བ་དད་དང་སྙིང་རྗེ་དང་།།

གསང་བའི་བྱ་བ་བསྐྱེད་རྫོགས་སེམས་འཛིན་སོགས།།

སྤངས་ཏེ་རྟོག་མེད་ལྷན་ནེར་གནས་པར་བྱ།།

ཞེས་གསུངས་ཏེ། དེ་བཞིན་སེམས་ཀྱིས་ཀྱང་ཕྱི་ཡི་བྱ་བ་ཐ་མལ་འཇིག་རྟེན་གྱི་འཁྲུལ་རྟོགས་སྣ་ཚོགས། ནང་གི་བྱ་བ་དད་དང་སྙིང་རྗེ་དམིགས་གཏད་འཛིན་པ་ཅན་བྱེད་པ། གསང་བའི་བྱ་བ་བསྐྱེད་རྫོགས་སེམས་འཛིན་གྱི་སྐོར་སོགས་ཀྱང་བློས་བཏང་ནས་བསྐྱུར་ཏེ་བཞག་ལ་སྤངས་ནས་ཅི་ཡང་དྲན་མེད་རྟོག་མེད་ཀྱི་ངང་ལ་ལྷམ་མེར་གནས་པར་བྱའོ་གསུངས་པའོ། །ད་དེ་ལྟར་བྱ་བ་དགུ་ཕྲུགས་སུ་བཏང་བ་ལ་དགོས་པ་ཅི་ཡོད་སྙམ་ན།

དེ་ལྟར་བྱ་བ་བཏང་བའི་དགོས་པ་ནི།།

ལུས་ཀྱི་བྱ་བ་བཏང་བས་རང་ལུས་དལ།།

རང་ལུས་དལ་བས་རྩ་རྣམས་ཤིན་ཏུ་དལ།།

རྩ་རྣམས་དལ་བས་རླུང་སེམས་ཤིན་ཏུ་དལ།།

རླུང་སེམས་དལ་བས་རྣམ་རྟོག་རང་ཤུགས་ཀྱིས།།

འགགས་ནས་འོད་གསལ་ཡེ་ཤེས་མྱུར་དུ་འཆར།།

ཞེས་གསུངས་ཏེ། སྒོ་གསུམ་གྱི་བྱ་བ་ཐམས་ཅད་བཏང་བས་ཅི་ཞིག་ཕན་ཐོགས་ཡོད་ན། དེ་ཡང་ལུས་ཀྱི་བྱ་བ་མ་བཏང་ན་ཁོམ་པ་སྐད་ཅིག་ཀྱང་མེད་པར་བྲེལ་བ་ཆེ་བས་འཇིག་རྟེན་གྱི་བྱ་བ་ལ་ཟད་དུས་མེད་ཅིང་། ཆོས་ཕྱོགས་ཀྱི་བྱ་བ་ཡིན་བསམ་པ་དོན་ལ་ཆོས་བརྒྱད་དཀར་ནག་ཁྲ་གསུམ་གང་ལ་གཏོགས་མི་ཤེས་པ་འདི་དག་ལའང་ལས་རྔ་བུད་ནས་ཟད་འགྲོ་རྒྱུ་ཞིག་མེད་ལ། བྱས་ན་མི་ཟིན་བཞག་ན་ཟིན་གསུངས་པ་འདྲ་བོ་ཡིན་པས་མདོར་ན་ལུས་ཀྱི་བྱ་བ་བཟང་ངན་ཐམས་ཅད་བཏང་བས་རང་ལུས་དལ། ལུས་ཟེར་བ་ནི་རྩ་དང་རླུང་གི་བྱེད་པ་ཅན་ཞིག་ཡིན་པས། རང་ལུས་དལ་བས་རྩ་རླུང་ཡང་དལ་མི་འགྲོ་བའི་ཐབས་མེད་ཡིན། ལུས་ལ་རྩ་བརྟེན་ཅིང་རྩ་ལ་རླུང་བརྟེན་ཡོད། རིག་གདངས་རླུང་དང་འགྲོགས་པའི་སེམས་དེ་ཡང་རླུང་སེམས་དང་བྱེད་པ་གཅིག་པ་ཡིན་པས་མཉམ་དུ་དལ་འགྲོ། རླུང་སེམས་རྒྱུ་བ་དལ་བས་རྟ་རྒོད་ལོང་བ་ལྟ་བུའི་རླུང་འགག་སྟོབས་ཀྱིས་དེ་ལ་ཞོན་པའི་རིག་གདངས་མི་ཞ་བོ་ལྟ་བུ་དེ་ཉིད། རིག་གདངས་རིག་པའི་མ་ལ་ཐིམ་ནས་རྣམ་རྟོག་འགགས། རྣམ་རྟོག་འགགས་པའི་ཕ་རོལ་ན་འོད་གསལ་གྱི་ཡེ་ཤེས་ཟེར་བ་ཞིག་ཀྱང་གཞན་ན་མེད་པ་ཡིན་པས་ལུས་དལ་བས་འོད་གསལ་གྱི་ཡེ་ཤེས་མྱུར་དུ་འཆར་བའི་དགོས་པ་དེ་ལྟར་དུ་ཡོད་གསུངས་པའོ།། གཞན་ཡང་

ལུས་ཀྱི་འབྱུང་བ་རྣམས་ནི་མ་འཁྲུགས་པས།།

རྣལ་འབྱོར་ལུས་ལ་ན་ཚ་མི་འབྱུང་ངོ་།།

ངག་གི་བྱ་བ་བཏང་བས་བརྗོད་མེད་ཀྱི།།

ཏིང་འཛིན་སྐྱེ་ཞིང་ཀ་ཏི་ཤེལ་སྦུགས་ཀྱི།།

རྩ་ཡི་ནང་དུ་རླུང་གི་རྒྱུ་བ་ནི།།

རན་པར་རྒྱུ་བས་འོད་གསལ་འཕེལ་ཆེ་ཞིང་།།

རླུང་ཡང་དལ་བར་རྒྱུ་བའི་སྟོབས་ཀྱིས་ནི།།

རྣལ་འབྱོར་པ་དེ་ཚེ་ཡང་རིང་བ་ཡིན།།

སེམས་ཀྱི་བྱ་བ་བཏང་བས་རྣམ་རྟོག་གི།

འཕྲོ་འདུ་དུས་གཅིག་ཉིད་ལ་འགག་པ་དང་།།

ཁྲེགས་ཆོད་རང་བབ་རྒྱུད་ལ་སྐྱེ་བ་ཡིན།།

ཞེས་གསུངས་ཏེ། ལུས་དལ་བས་འབྱུང་བ་མི་འཁྲུགས་ཤིང་འབྱུང་ཁམས་ཀྱི་འདུ་བ་མ་འཁྲུགས་པས་རྣལ་འབྱོར་པ་ལ་ན་ཚ་མི་འབྱུང་ལུས་བདེ། ངག་གི་བྱ་བ་བཏང་བས་འཁྲུལ་བའི་སྨྲ་བརྗོད་ཟད་ནས་བརྗོད་མེད་ཀྱི་ཏིང་འཛིན་སྐྱེ་སླ་བ་ཡིན། ཁྱད་པར་དུ་ཡེ་ཤེས་རྒྱུ་བའི་འོད་རྩ། ཀ་ཏི་ཤེལ་གྱི་སྦུ་གུ་ཅན་གྱི་ནང་དུ་རླུང་གི་རྒྱུ་བ་ལས་རླུང་གིས་མ་དཀྲུགས་པར་རན་པོར་རྒྱུ་བས་དེའི་ནང་ནས་འཆར་བའི་འོད་གསལ་ཀྱི་གདངས། ཡར་འཕེལ་སྟོབས་ཇེ་ཆེ་རུ་སོང་ནས། སྤྱིར་རླུང་དལ་ཞིང་སྙོམས་པའི་སྟོབས་ཀྱིས་རླུང་སེམས་བྱེད་པ་གཅིག་པ་དང་། ལུས་སེམས་གཉིས་གཅིག་ལ་གཅིག་བརྟེན་ཡིན་པས་རྣལ་འབྱོར་པ་རྒས་དཀའ་ཞིང་ཚེ་རིང་བའི་ཡོན་ཏན་འབྱུང་བའོ། །དེ་བཞིན་སེམས་ཀྱི་བྱ་བ་བཏང་བས་རྣམ་རྟོག་སྤྲོས་པའི་འཕྲོ་འདུ་རང་ཤུགས་ཀྱིས་དུས་གཅིག་ལ་འགགས་ནས་ཁྲེགས་ཆོད་ཀྱི་ཀ་དག་དགོངས་པའི་གནས་ལུགས་རང་བབས་སུ་རྒྱུད་ལ་སྐྱེས། དེ་སྐྱེས་པས་ཐོད་རྒལ་སྒོམ་པའི་རྩ་བ་ནང་ཤེས་རབ་རང་བྱུང་གི་སྒྲོན་མའི་ངོ་བོ་ཡང་དེ་ལས་མ་འདས་པས་ན། ཟུང་འཇུག་འོད་གསལ་གྱི་ཉམས་རྟོགས་རྒྱུད་ལ་སྐྱེས་སླ་བའི་དགོས་པ་དེ་ལྟར་ཡོད་གསུངས་སོ།།

༢༽ གཉིས་པ་སྒོ་གསུམ་གྱི་གནད་རྣམས་གཟིར་ཚུལ་རྣམ་པ་གསུམ་གྱིས་སྒོ་གསུམ་འབྱོངས་བའི་གནད་བསྟན་པ།

དེ་ལ་སྒོ་གསུམ་གྱི་གནད་རྣམས་གཟིར་ཚུལ་རྣམ་པ་གསུམ་གྱིས་སྒོ་གསུམ་འབྱོངས་བའི་གནད་བསྟན་པ་ལས་དང་པོ།

ཀ༽ དང་པོ་ལུས་གནད་སྐུ་གསུམ་བཞུགས་སྟངས་བསྟན་པ།

ཨེ་མ་ཧོ།

གཉིས་པ་སྒོ་གསུམ་གནད་རྣམས་གཟིར་ཚུལ་ལ།།

ཞེས་མཚམས་སྦྱར་ཏེ།།

དང་པོ་ལུས་གནད་སྐུ་གསུམ་བཞུགས་སྟངས་ཀྱི།།

ཆོས་སྐུའི་བཞུགས་སྟངས་སེང་གེ་ལྟ་བུ་ནི།།

འབོལ་སྟན་སྟེང་དུ་རྐང་མཐིལ་གཉིས་སྤྲད་པས།།

ལུས་ཀྱི་འབྱུང་བ་ཐམས་ཅད་ཆ་སྙོམས་ཤིང་།།

ལུས་ཉམས་འགྱིང་ཚུལ་ལྟ་བུར་བསྡད་པ་ཡིས།།

ལས་རླུང་གནོན་ཅིང་ཡེ་ཤེས་རླུང་རྣམས་འཕེལ།།

ལག་སོར་ཚིགས་བསྐུམས་བརླ་ཡི་ཕྱིའམ་ནང་།།

ས་ལ་བཙུགས་པས་འཕྲོ་བ་ལས་ཀྱི་རླུང་།།

ལྡོག་ཅིང་རོ་སྟོད་དྲང་པོར་བསྲང་པ་ཡིས།།

ཉམས་སྣང་མྱུར་དུ་འཆར་བའི་དགོས་པ་ཡོད།།

མཇིང་པ་ཡིད་ཙམ་གྱེན་ལ་བོར་བ་ཡིས།།

དབྱིངས་རིག་གཉིས་དང་འདུ་འབྲལ་མེད་པའོ།།

ཞེས་གསུངས་ཏེ། ཚིག་གི་སྟེང་ནས་གོ་སླ་མོ་རེད། སྒོ་གསུམ་གྱི་གནད་གཟིར་རྒྱུའི་ནང་གི་དང་པོ་དེ་སྐུ་གསུམ་གྱི་བཞུགས་སྟངས་ཡིན་ན། ལུས་གཅིག་གིས་སྐུ་གསུམ་གྱི་བཞུགས་སྟངས་བཅའ་རྒྱུ་འདི། སྐུ་གསུམ་ངོ་བོ་གཅིག་ལ་ལྡོག་པ་ཐ་དད་ཙམ་ཡིན་པས་རེད། ཆོས་སྐུའི་བཞུགས་སྟངས་སེང་གེ་ལྟ་བུ་དེ་དགོས་པ་དང་བཅས་པ་འདི་ནས་གསུངས་པ་ཇི་བཞིན་ལ་དེའི་ནང་གི་ལག་སོར་གྱི་ཚིགས་བསྐུམས་ནས་བརླ་ཡི་ནང་ཕྱོགས་སུ་འཇོག་རྒྱུ་འདི་རང་ལུགས་བརྒྱུད་པའི་ཕྱག་བཞེས་ཡིན། ཆོས་སྐུའི་བཞུགས་སྟངས་སེང་གེ་འགྱིང་བ་ལྟ་བུ་འདི་མ་འོངས་པ་ན་ཡ་ང་བག་ཚ་མེད་པར་གྲོལ་བའི་བརྡ་ཡིན་གསུངས་པའོ།། དེ་ནས།

ལོངས་སྐུའི་བཞུགས་སྟངས་གླང་ཆེན་ལྟ་བུ་ནི།།

འབོལ་སྟན་སྟེང་དུ་ཁ་སྦུབས་ཉལ་བ་ཡིས།།

ལུས་ཀྱི་འཚོགས་པའི་ཆོས་རྣམས་བཅར་ལ་གནོན།།

པུས་མོ་གཉིས་ཀ་བྲང་ལ་སྦྱར་བ་ཡིས།།

བདེ་དྲོད་སྐྱེ་ཞིང་ཁམས་རྣམས་རྒྱས་པ་དང་།།

རྐང་བའི་སོར་མོ་འཕོངས་ཀྱི་ཕྱི་རོལ་ཏུ།།

ཕུལ་ཏེ་བསྐུམས་པས་བྱིང་རྒོད་ཆ་སྙོམ་མོ།།

ལག་གཉིས་གྲུ་མོ་སར་བཙུགས་ལག་མཐིལ་གཉིས།།

ཨོལ་ཀོ་བརྟེན་ཅིང་སོར་མོ་འགྲམ་སྦྱར་བས།།

དབྱིངས་ལ་རིག་པ་འདྲེན་ཅིང་མཇིང་པ་ཉིད།།

གྱེན་ལ་བཏེགས་པས་དབྱིངས་རིག་འདུ་འབྲལ་མེད།།

ཅེས་གསུངས་ཏེ། འདི་དག་ཐེག་མཆོག་མཛོད་ཀྱི་དགོངས་པ་སྒྲ་ཇི་བཞིན་པ་རེད། འདིའི་ནང་དུ་གབ་པ་ཅང་མི་འདུག ལོངས་སྐུའི་བཞུགས་སྟངས་གླང་ཆེན་ལྟ་བུར་མཛད་རྒྱུ་འདི་ཕྱལ་གྲོལ་ལྷུན་གྱིས་གྲུབ་པའི་ངང་ནས་གྲོལ་བའི་བརྡ་ཡིན་ནོ།།

སྤྲུལ་སྐུའི་བཞུགས་སྟངས་དྲང་སྲོང་ལྟ་བུ་ནི།།

འབོལ་སྟན་སྟེང་དུ་ཙོག་པུར་བསྡད་ནས་ཀྱང་།།

རྐང་བའི་ལོང་བུ་གཉིས་ནི་གཤིབ་པ་ཡིས།།

ཐབས་དང་ཤེས་རབ་འབྲེལ་བ་འབྱུང་བར་བྱེད།།

རྐང་བའི་མཐིལ་གཉིས་ས་ལ་ཕབ་པ་ཡིས།།

གཟུང་འཛིན་ལས་ཀྱི་རླུང་གཉིས་གནོན་པར་བྱེད།།

པུས་བྲང་སྦྱར་བས་ལུས་ཀྱི་འབྱུང་བ་རྣམས།།

ཆ་སྙོམས་ལུས་སྤྱི་དྲང་བོར་བསྲང་བ་ཡིས།།

རྩ་མི་འཆུས་ཤིང་རླུང་ཡང་ངང་གིས་དལ།།

ལག་གཉིས་བསྣོལ་བས་པུས་མོར་བསྐོར་བ་ཡིས།།

དབྱིངས་དང་རིག་པ་འདྲེས་པར་བྱེད་པའོ།།

ཞེས་གསུངས་ན། དུས་རྒྱུན་ལས་དང་པོ་པས་ཐོད་རྒལ་ཉམས་ལེན་ལ་བཞུགས་སྟངས་གཙོ་བོ་འདི་མཛད་རྒྱུའི་ཕྱག་སྲོལ་ཡོད་པ་ཡིན། །འདིའི་བཞུགས་སྟངས་དགོས་པ་དང་བཅས་པ་ཐེག་མཆོག་མཛོད་ཀྱི་དགོངས་པ་ཇི་བཞིན་དུ་ཚིག་མ་བསྒྱུར་བར་འདི་ན་བཀོད་ཡོད་པ་འདི་ལྟར་དུ་རེད་ལ། དེའི་ཐོག་ད་རུང་རྒྱུ་ཞབས་ཅུང་ཙམ་འཐེན་ནས་སྒལ་བར་བཅར་ན་རྟོགས་པ་རྒྱུན་འཆོས་པ་ལ་ཕན་ཐོགས་ཡོད་ཅེས་གསུངས་པ་དང་། ལག་པ་རེའུ་མིག་ལྟར་དུ་བསྣོལ་བ་དེས་པུས་མོ་གཉིས་ཀ་བཀབ་ན་ཚད་པའི་ནད་སེལ་བ་དང་། ཡང་ན་མཆན་ཁུང་ལ་རེག་ན་གྲང་བའི་ནད་སེལ་བ། གྲུ་མོ་གཉིས་པུས་མོའི་སྟེང་དུ་བཞག་སྟེ་ལག་སོར་སྒོང་སྟེ་ལྐོག་མ་ནས་ཡར་བཏེགས་ན། ཚ་གྲང་སྙོམ་པར་བྱེད་ཅེས་གསུངས་སྲོལ་ཡོད། དེ་ཀུན་མཁྱེན་འཇིགས་གླིང་གི་ཞལ་ཤེས་ཤིག་རེད། སྤྲུལ་སྐུའི་བཞུགས་སྟངས་དྲང་སྲོང་ཙོག་པུར་མཛད་དགོས་པ་ནི། མ་འོངས་པའི་དུས་ན་དཀའ་ཐུབ་ལ་བརྟེན་ནས་གྲོལ་བའི་བརྡ་ཡིན་པར་གསུངས་སོ། །སླར་ཡང་བཞུགས་སྟངས་དེ་དག་གི་གནས་སྐབས་དང་མཐར་ཐུག་གི་དགོས་གནད་རེ་རེ་བཞིན་དུ་བསྟན་པ་ནི།

དེ་ལྟར་བཞུགས་སྟངས་བྱས་པའི་དགོས་པ་ནི།།

ཆོས་སྐུའི་བཞུགས་སྟངས་བྱས་པས་གནས་སྐབས་སུ།།

ནང་གི་ལུས་ཀྱི་འབྱུང་བ་ཆ་སྙོམས་ཤིང་།།

མཐར་ཐུག་གནས་ལུགས་རིག་པའི་དོན་རྟོགས་སོ།།

ལོངས་སྐུའི་བཞུགས་སྟངས་བྱས་པས་གནས་སྐབས་སུ།།

གཡོ་བྱེད་རླུང་ཟིན་མཐར་ཐུག་ལྷུན་གྲུབ་ཀྱི།།

འོད་ལྔའི་ཡེ་ཤེས་མྱུར་དུ་འཆར་བར་བྱེད།།

སྤྲུལ་སྐུའི་བཞུགས་སྟངས་བྱས་པས་གནས་སྐབས་སུ།།

ལུས་ལ་དྲོད་སྐྱེ་མཐར་ཐུག་མ་དག་པའི།།

འཁྲུལ་སྣང་ཞིང་ཁམས་ཉིད་དུ་འཆར་བར་བྱེད།།

ཅེས་གསུངས་ན། འདི་དག་གིས་རིམ་པ་བཞིན་དུ་ཆོས་སྐུའི་བཞུགས་སྟངས་ཀྱིས་གཡོ་བ་ལས་ཀྱི་རླུང་གནོན་པས་གནས་སྐབས་ལུས་ཀྱི་འབྱུང་བ་ཆ་སྙོམས་པར་བྱེད། རྣམ་རྟོག་འགག་སྟོབས་ཆེ། རྣམ་རྟོག་འགག་སྟོབས་ཆེ་བས་མཐར་ཐུག་གནས་ལུགས་རིག་པའི་དོན་རྟོགས་པའི་དགོས་པ་དང་ནི། ལོངས་སྐུའི་བཞུགས་སྟངས་ཀྱིས་ཁམས་ལ་བདེ་དྲོད་རྒྱས། ཕོ་མོའི་རླུང་མ་ནིང་དུ་ཆ་སྙོམས་པས་གནས་སྐབས་གཡོ་བྱེད་ཀྱི་རླུང་ཟིན། རགས་རླུང་འགག་ཅིང་བྱིང་རྒོད་ཆ་སྙོམས་པས་མཐར་ཐུག་ལྷུན་གྲུབ་འོད་གསལ་གྱི་འོད་ལྔའི་ཡེ་ཤེས་མྱུར་དུ་འཆར་བའོ། །སྤྲུལ་སྐུའི་བཞུགས་སྟངས་ཀྱིས་རྩ་རླུང་ཆ་སྙོམས་པས་མི་ཚད་ཆུའི་རྩ་མནན་པས་གནས་སྐབས་ལུས་ལ་བདེ་དྲོད་རྒྱས་ཏེ་མེ་ལོང་ཡེ་ཤེས་སུ་འབར། རླུང་སེམས་ཆོས་ཉིད་དུ་རྒྱུ་བས་མཐར་ཐུག་འཁྲུལ་སྣང་དག་ནས་ཞིང་ཁམས་ཉིད་དུ་འཆར་བར་བྱེད་པའི་དགོས་པ་ཡོད་དོ། །ཕན་ཡོན་གཞན་བསྟན་པ་ནི།

གཞན་ཡང་ཆོས་སྐུའི་བཞུགས་སྟངས་བྱས་པ་ཡིས།།

སངས་རྒྱས་མཁྱེན་པ་ཚེ་འདིར་རྫོགས་པར་བྱེད།།

ལོངས་སྐུའི་བཞུགས་སྟངས་བྱས་པས་འདི་ཉིད་ལ།།

སངས་རྒྱས་ཞིང་ཁམས་མངོན་སུམ་མཐོང་བར་འགྱུར།།

སྤྲུལ་སྐུའི་བཞུགས་སྟངས་བྱས་པས་ཚེ་འདི་རུ།།

འགྲོ་དོན་ཐོགས་པ་མེད་པར་འགྲུབ་པར་གསུངས།།

བཞུགས་སྟངས་གསུམ་ལས་གཡོ་བར་མ་བྱས་ན།།

སངས་རྒྱས་སུམ་སྟོང་ཉིད་དང་སྐལ་མཉམ་ཞེས།།

གསང་བ་སྤྱོད་པའི་རྒྱུད་ལས་གསུངས་པའོ།།

ཞེས་གསུངས་ནས། དེ་ཡང་གསང་བ་སྤྱོད་པ་ས་བོན་གྱི་རྒྱུད་ཀྱི་ལུང་དྲངས་པའི་བསྟན་དོན་དེ་ཇི་ལྟར་ཡིན་ན་བཞུགས་སྟངས་ཙམ་ཞིག་བྱས་པས་ཀྱང་ཕན་ཡོན་དཔག་ཏུ་མེད་པ་ཡོད་པ་དེ་སྒྲ་ཇི་བཞིན་པར་བཟུང་ཆོག་སྟེ། གཙོ་ཆེར་ཡན་ལག་གི་ཕྱག་རྒྱ་དང་ལུས་ཀྱི་སྟངས་སྟབས། ངག་གི་སྔགས་བཟླ་བ་སོགས་ཕར་བལྟས་ན་ལུས་ངག་གི་ལས་ཡིན་ཡང་། འདི་ལ་རྒྱལ་བའི་བྱིན་རླབས་དང་། ཆོས་ཉིད་བདེན་པའི་ནུས་པ་བསམ་གྱིས་མི་ཁྱབ་པའི་སྟོབས་དེ་ནི། ཆོས་ཉིད་ལ་ཆོས་ཉིད་རོལ་བ་དང་། གྲུབ་པ་བཞི་ལྡན་སོགས་གསུངས་པ་ལྟར་ཡིན་པས་མི་ཚད་འདི་ནི་སྒོ་གསུམ་གྱི་གནད་གཟིར་ནས་ཆོས་ཉིད་མངོན་སུམ་རང་ཐོག་ཏུ་བབས་ཏེ། ཀ་དག་གི་རིག་པ་སྟོང་གསལ་ལྷག་མཐོང་གི་རང་གདངས་རྡོ་རྗེའི་ལུ་གུ་རྒྱུད་དུ་མངོན་སུམ་དུ་སྣང་ནས་ཀུན་ཏུ་བཟང་པོའི་རང་ཞལ་ཐོག་མེད་ནས་མ་མཇལ་བ་དེ་མཇལ་བའི་གནད་བཞུགས་སྟངས་གསུམ་དང་གཟིགས་སྟངས་གསུམ་ལ་ཐུག་པས་ཕན་ཡོན་ཆེ་ཡང་ལོས་ཆེ་སྟེ། ཕན་ཡོན་ཆེ་བར་བསྟན་པའོ། །ཕན་ཡོན་ཆེ་བར་བསྟན་པའི་རྒྱུད་ཀྱི་ལུང་གཞན་ཡང་། ནོར་བུ་ཕྲ་བཀོད་ལས། སྐྱེ་ཤི་མེད་པའི་སྲོག་འཛིན་པར་འདོད་ན་རྡོ་རྗེའི་ལུ་གུ་རྒྱུད་ཀྱི་ལྟ་སྟངས་ལ་ཐུག་གོ །ཅེས་པ་ལ་སོགས་པ་གསུངས་པ་འདི་དག་གིས་ཀྱང་ཤེས་ཐུབ་བོ། །འདི་ཡན་གྱིས་ལུས་ཀྱི་གནད་གཟིར་ཚུལ་བསྟན་ནས།

ཁ༽ གཉིས་པ་ངག་གི་གནད་གཟིར་ཚུལ་བསྟན་པ།

གཉིས་པ་ངག་གི་གནད་གཟིར་ཚུལ་བསྟན་པ་ནི།

གཉིས་པ་ངག་གི་གནད་ནི་སྨྲ་བ་རྣམས།།

ཇེ་ཉུང་ཇེ་ཉུང་བཏང་ནས་ཐ་མལ་གྱི།།

གཏམ་རྣམས་བཅད་ལ་ཐུན་ནི་ཆུང་ངུར་བསླབ།།

དེ་ནས་རིམ་བཞིན་ཐུན་ནི་ཇེ་རིང་གཏོང་།།

སྔགས་དང་བཟླས་བརྗོད་ལ་སོགས་མི་དགག་ཅིང་།།

གཞན་ལ་ཚིག་འབྲུ་གཅིག་ཀྱང་མི་བཤད་དོ།།

འདི་ཡི་དུས་སུ་དཔེ་དང་བརྡ་ཙམ་གྱིས།།

སྟོན་པར་བྱེད་པ་དག་ལ་གནས་པའོ།།

དེ་ནས་རིམ་བཞིན་བཟླས་བརྗོད་ཇེ་ཉུང་གཏོང་།།

ཐ་མ་བཟླས་བརྗོད་ཐམས་ཅད་ཕྱམ་གྱིས་བསྐྱུར།།

བརྗོད་དུ་མེད་པའི་ངང་ལས་མི་འདའ་ཞིང་།།

ལུས་ཀྱི་དཔེ་བརྡ་ཙམ་ཡང་མི་བྱའོ།།

ཞེས་གསུངས་ཏེ། འདིའི་ཐད་ན་ཐལ་འགྱུར་རྩ་བའི་རྒྱུད་ལས། ངག་ནི་བསླབ་དང་གནས་པ་དང་། །ལ་བཟླ་བ་ཉིད་བརྟན་པར་བྱ། །ཞེས་པའི་ལུང་ཡེ་ཤེས་བླ་མའི་ནང་དུའང་དྲངས་ཡོད་པ་ལྟར་དུ་དང་པོ་ངག་གི་གནད་ལ་བསླབ་པ་རེད། དེ་ནི་དང་པོ་སྨྲ་བ་བཅད་ནས་རིམ་པར་བསླབ་ཚུལ་ནི། མི་ལ་ལ་བཤད་དགའ་ཅན་ཅི་ཡང་མི་ཆོག་པ་ལས་ཁ་གྲག་མ་ཆོག་ན་སྡུག་མཁན་གྱི་མི་ཡོད་པས། དེ་འདྲའི་མིས་ཡང་སྒོས་དང་པོར་བསླབ་དགོས། ཇི་ལྟར་བསླབ་ན་དང་པོར་ལུང་སྟོང་ངམ་ཁང་སྟོང་ལྟ་བུའི་ནང་དུ་སོང་ནས་བཤད་བསམ་པའི་གཏམ་དེ་དག་བརྒྱ་སྟོང་མང་པོར་འོར་ནས། དམུས་མ་སོང་། ཡི་མ་ཆད་ཀྱི་བར་སྨྲ་དགོས། དམུས་ཏེ་བཤད་མི་འདོད་པར་གྱུར་དུས་རིམ་བཞིན་སྨྲ་བ་ཇེ་ཉུང་དུ་བཏང་སྟེ། མཐར་ཁ་ཏོན་ཆོས་སྤྱོད་ཀྱི་བགྱི་བ་ཙམ་ཡང་སྤོངས་གསུངས་པའི་དོན་དེ་རེད། དང་པོ་བསླབ་པའི་རིམ་པ་དང་། དེ་ནས་གནས་པའི་དུས་དང་། དེ་ནས་ལ་བཟླ་བ་དང་། ཐམས་ཅད་ཀྱི་རྗེས་སུ་ལ་བཟླ་བའང་བརྟན་པར་བྱ། །ཞེས་འདི་ནས་གསུངས་པའི་དགོངས་པ་དང་སྦྱར་ན་གཅིག་པའོ།།

དེ་ལྟར་བྱས་པའི་དགོས་པ་ཕ་རོལ་གྱི།།

གཞན་ལ་ངག་མ་འདྲེས་པས་ལུས་འབྱོངས་ཏེ།།

ལུས་འབྱོངས་རྟགས་སུ་སངས་རྒྱས་བྱང་སེམས་དང་།།

མཁའ་སྤྱོད་མཁའ་འགྲོ་རྣམས་ཀྱིས་བྱིན་གྱིས་རློབས།།

ལུས་ནི་སྒྱུ་མའི་སྐུ་རུ་གྲོལ་བའོ།།

དེ་ནས་བཟླས་བརྗོད་བཀག་པས་ངག་འབྱོངས་ཏེ།།

དེ་ཡི་རྟགས་སུ་མི་མ་ཡིན་རྣམས་ཀྱིས།།

བརྡ་དང་གཏམ་རྣམས་ཟེར་བ་དག་ཀྱང་འོང་།།

བརྗོད་པ་ཐམས་ཅད་བཀག་པས་ཡིད་འབྱོངས་ཏེ།།

དེ་ཡི་རྟགས་སུ་སྔོན་དུ་མི་མ་ཡིན།།

གཟུགས་མཐོང་དེ་ནས་མངོན་ཤེས་དམ་དུམ་འཆར།།

ཁྱད་པར་གནས་སྐབས་འཁྲུལ་གཏམ་ཉོན་མོངས་རྣམས།།

མི་འཕེལ་མཐར་ཐུག་སངས་རྒྱས་ཐམས་ཅད་ཀྱི།།

གསུང་གི་ཀློང་དུ་མྱ་ངན་འདའ་བའོ།།

ཞེས་གསུངས་སྟེ། ངག་གི་སྨྲ་བ་བཅད་པས་ངག་གི་སྒྲིབ་པ་མི་འབྱུང་བར་མ་ཟད། ངག་གི་སྒྲ་སྐད་དེ་ལུས་ཀྱི་བྱེད་རྩོལ་ལས་འབྱུང་བ་ཡིན་པས་ལུས་ངག་འབྲེལ་ཆེ་བའི་སྟབས་ཀྱིས། ངག་སྨྲ་མེད་དུ་འབྱོངས་ཤིང་བྱང་བ་དང་མཉམ་དུ་ལུས་ཀྱང་དེ་བཞིན་དུ་འབྱོངས་བ་ཡིན་ལ། ལུས་འབྱོངས་བའི་རྟགས་སུ་སངས་རྒྱས་བྱང་སེམས་དང་མཁའ་སྤྱོད་ཀྱི་དཔའ་བོ་མཁའ་འགྲོ་དྲང་སྲོང་རིག་འཛིན་གྲུབ་པའི་ཚོགས་དང་བཅས་པས་དངོས་སུ་བྱིན་གྱིས་བརླབས་པ་དང་། ངག་འབྱོངས་རྟགས་སུ་མི་མ་ཡིན་པ་ཚོར་བརྡ་དང་གཏམ་བཤད་རྒྱུ། ངག་གི་སྨྲ་བ་བཅད་པའི་སྟོབས་ཀྱིས་ལུས་ངག་གཉིས་ཀ་འབྱོངས་བ་དང་མཉམ་དུ་ཡིད་ཀྱང་འབྱོངས་ཏེ་མངོན་ཤེས་འཆར་བ་སོགས་མདོར་ན་རྒྱུད་ཀློང་གསལ་ལས། དེ་ལྟར་ངག་གནད་སུས་གཟིར་བ། །ངག་གི་རྐྱེན་ཟད་མྱ་ངན་འདའ། །ཞེས་གསུངས་པ་ལྟ་བུའི་དགོས་པ་ཆེན་པོ་དེ་ལྟ་བུ་དང་ལྡན་པའི་ཕྱིར་ན་ཉམས་ལེན་པ་ཚོས་ངག་གི་སྨྲ་བ་བསྡམས་པ་དང་། སྤྱིར་བསྐྱེད་རྫོགས་བཟླས་དམིགས་གང་གི་སྐབས་སུ་ཡིན་ཡང་སྨྲ་བ་བསྡམ་རྒྱུ་འདི་གནད་ཆེན་པོ་ཡིན། འདུས་པ་མང་པོ་མཉམ་དུ་འཚོགས་དུས་ཀྱང་ངག་སྨྲ་བཅད་གྱིས་དང་སྒོ་གསུམ་གྱི་ཉེས་འགལ་མང་པོ་ཞིག་ཁོག་ཐུབ་པ་ཡིན། དེས་ངག་གི་གནད་གཟིར་ཚུལ་བསྟན་པ་སོང་བའོ།།

ག༽ གསུམ་པ་སེམས་ཀྱི་གནད་གཟིར་ཚུལ་བསྟན་པ།

གསུམ་པ་སེམས་ཀྱི་གནད་གཟིར་ཚུལ་བསྟན་པ་ནི།

གསུམ་པ་སེམས་གནད་ནམ་མཁའ་སྟོང་སང་ལ།།

མིག་ཤེས་འགྱུར་བ་མེད་པར་གཏད་ནས་ཀྱང་།།

ནམ་མཁའ་རང་སེམས་འདྲེས་པ་ལྟ་བུ་ཡི།།

ཤེས་པ་དྲག་ཏུ་གཅུན་པས་རང་རིག་ཉིད།།

གསལ་སྟོང་ལྷག་གེར་འཆར་བར་འགྱུར་བའོ།།

དེ་ཡི་གནས་སྐབས་རང་རིག་མངོན་སུམ་དུ།།

གསལ་བར་མཐོང་བས་མཐར་ཐུག་ལྷག་མེད་དུ།།

འཚང་རྒྱའི་དགོས་པ་ཡོད་དོ་སྐལ་ལྡན་ཀུན།།

ཞེས་གསུངས་སྟེ། དེ་ཡང་རྒྱུད་ཀློང་གསལ་ལས། སེམས་ཉིད་ཕྱི་ཡི་མཁའ་ལ་གཏད། །ནང་གི་སྒྲོན་མ་མངོན་སུམ་སྣང་། །ཞེས་གསུངས་ཡོད་པས། འདིའི་སྐབས་སུ་སེམས་ནམ་མཁར་གཏད་གསུངས་པའི་སེམས་དེ། ལས་རླུང་གི་གཡོ་བས་བསྐྱོད་པའི་སེམས་རིག་པའི་སྙིང་པོ་ཅན་དེ་ཕྱིའི་རྒྱན་གྱི་ནམ་མཁའ་སྟོང་གསལ་ལ་སེམས་དང་ནམ་མཁའ་འདྲེས་པ་ལྟར་དུ་མདུང་ཚུགས་སུ་གཏད་ནས། ཤེས་པ་དྲག་ཏུ་དེའི་སྟེང་དུ་གཅུན་པས་གཡོ་བྱེད་ཀྱི་རླུང་དེ་ཇེ་དལ་ལ་སོང་བས། ནང་གི་སྒྲོན་མའི་གདངས་སྟོང་གསལ་འདུས་མ་བྱས་པ་དེ། འདི་དུས་གསལ་སྟོང་ལྷག་གེར་ཤར་ནས་དབྱིངས་རིག་ཟུང་དུ་ཆུབ་པར་འབྱོངས་བར་གསུངས་སོ། །འདི་ནས་རང་རིག་གསུང་རྒྱུའི་ཚིག་ཅིག་ཡོད་རྒྱུ་འདི། སེམས་ཙམ་སྐབས་ཀྱི་ཤེས་པ་རང་རིག་རང་གསལ་བདེན་གྲུབ་ཏུ་འདོད་པའི་རང་རིག་དང་སྒྲ་གཅིག་ཀྱང་དོན་ཁ་ཁ་ཡིན། འདིའི་ཚིག་འདི་ཁྲེགས་ཐོད་གཉིས་ཀའི་སྐབས་སུ་འབྱུང་། ནང་ཤེས་རབ་རང་བྱུང་གི་སྒྲོན་མའམ་ཀ་དག་གི་རིག་པ་དབྱིངས་རིག་ཟུང་འཇུག་གི་ཡེ་ཤེས་སམ་རིག་པའི་རང་ངོ་ཤེས་མཁན་སེམས་དང་རིག་པ་གཉིས་གང་རུང་ཡིན་དགོས་ཚེ། སེམས་དང་རིག་པ་རྫས་འགལ་བ་གཅིག་ཏུ་བསྲེས་ན་འདྲེ་ཐབས་མེད་པ་ཡིན་ལ། འཁྲུལ་མ་འཁྲུལ་གཉིས་ཡིན་པའི་ཕུང་གསུམ་པ་ཞིག་མི་སྲིད་པས་རིག་ངོ་མཐོང་བྱེད་དེ་རིག་པ་ཡིན། གཞི་ལས་གཞི་སྣང་འཆར་བའི་ད་ལྟའི་གནས་སྐབས་རིག་པ་འོད་ཀྱི་གོང་བུ་ན་ཡོད་དུས་གདངས་རྩལ་འགག་མེད་དུ་འཆར་བ་རེད། རྩལ་གྱི་རིག་པས་རང་གི་རང་བཞིན་ཇི་ལྟ་བ་བཞིན་དུ་ཤེས་པ་དེ་ལ་རང་རིག་བྱང་ཆུབ་ཀྱི་སེམས་ཞེས་གསུངས་ཤིང་། དེའི་གོ་དོན་གྱི་གནད་མི་འཆུག་རྒྱུ་འདི་མ་ངེས་ན། སེམས་ཀྱིས་རྫོགས་ཆེན་ལོ་བརྒྱར་བསྒོམས་ཀྱང་སྐྱེད་རྒྱག་རྒྱུ་མེད་པའི་ཐོག ད་དུང་བསོད་ནམས་ཆ་མཐུན་གྱི་ལས་ཤིག་དང་འབྲེལ་ན་གཟུགས་མེད་ཁམས་སུ་སྐྱེས་ཐུབ་མོད། དེ་དང་ཡང་མ་འབྲེལ་ན་ནི། ཕྱི་བ་དང་གྲུམ་པའི་ལུས་ལེན་བྱེད་མ་གཏོགས་མེད་པས་སོ། །སྐབས་དོན་སྒོ་གསུམ་གྱི་གནད་འདི་ལུས་གནད་བཞུགས་སྟངས་ལས་མི་གཡོ། ངག་གནད་བརྗོད་མེད་ལས་མི་གཡོ། སེམས་གནད་མ་ཡེངས་རྟོག་མེད་ཀྱི་ངང་ལས་མི་གཡོ་བ་གསུམ་པོ་ལ་མཆོག་ཏུ་བསླབ་པའི་གནད་འདི་ལ་ཐུག་གི་ཡོད། འདིའི་སྐོར་ཡང་བསྐྱར་བསམ་བློ་ཞིག་བཏང་ན། རང་བྱུང་གི་རིག་པ་ཟེར་བ་འདི་རང་རང་ལས་ཇི་ལྟར་བྱུང་། རང་རིག་ཟེར་སའི་རང་རིག་དེ་ཇི་ལྟར་ཡིན། རང་རིག་ཟེར་བའི་སྒྲ་དེ་ཐེག་པ་གོང་འོག་གང་ནས་ཡིན་ཡང་འབྱུང་རྒྱུ་ཞིག་ཡིན་ན། འདི་དག་གཅིག་རེད་དང་མ་རེད། སེམས་ཙམ་པའི་བསླད་ཅིག་ཀྱང་འདི་ལ་ཨེ་འདུག་སྙམ་པའི་ལྟ་བའི་ཐོག་ནས་གོ་ནོར་རེད་རྒྱུ་ལྟ་བུ་ཡོད་སྲིད་པས་དེའི་འཕྲོས་དོན་ཡང་གཅིག་ཞུས་ན། རང་རིག་ཟེར་བའི་སྒྲ་གཅིག་ཀྱང་དོན་ཁ་ཁ་རེད། ཚིག་འདི་ཁྲེགས་ཐོད་གཉིས་ཀའི་སྐབས་སུ་འབྱུང་མོད་ཀྱང་། ནང་ཤེས་རབ་རང་བྱུང་གི་སྒྲོན་མའམ་ཀ་དག་གི་རིག་པ་དབྱིངས་རིག་ཟུང་འཇུག་གི་ཡེ་ཤེས་དེ། རང་ངོ་ཤེས་མཁན་ངོ་མ་སུས་ཤེས་པ་ཡིན། སེམས་སམ་ཡང་ན་རིག་པས་ཤེས་ཟེར་ན་གོང་བཤད་བཞིན། སེམས་དང་ཡེ་ཤེས་གཉིས་རྫས་འགལ་ཡིན་པས་གཅིག་ཏུ་བསྲེས་ཀྱང་འདྲེས་ཐབས་ཡོད་མ་རེད། གཅིག་འཁྲུལ་བ་དང་གཅིག་ཤོས་མ་འཁྲུལ་ཡིན་པས་སོ། །འཁྲུལ་མ་འཁྲུལ་གཉིས་ཀ་ཡིན་པའི་ཕུང་གསུམ་པ་ཞིག་མི་སྲིད་པ་དེས་ན་རིག་པའི་རང་ངོ་མཐོང་བྱེད་ཀྱི་རིག་པ་དེ། གཞི་ལས་གཞི་སྣང་ཤར་བའི་ད་ལྟའི་གནས་སྐབས་རིག་པ་འོད་ཀྱི་གོང་བུ་ན་ཡོད་དུས། དེ་ཡིན་པ་ཚིག་དོན་མཛོད་ཀྱི་དགོངས་པ་རེད། གདངས་རྩལ་འགགས་མེད་དུ་འཆར་བཞིན་ཡོད་ན། དེའི་རྩལ་གྱི་རིག་པ་དེ་ཉིད་ཀྱིས་རང་གི་རང་བཞིན་ཇི་ལྟ་བ་བཞིན་དུ་རང་ངོ་ཤེས་པ་དེ་ལ་རང་རིག་བྱང་ཆུབ་ཀྱི་སེམས་ཞེས་གསུངས་པ་ཡིན། དེའི་གོ་དོན་གྱི་གནད་མི་འཕྱུགས་པར་ངེས་རྒྱུ་དེ་གལ་ཆེའོ།།

༣༽ གསུམ་པ་སྒོ་ཡུལ་རླུང་རིག་གནད་གསུམ་གྱིས་ཡེ་ཤེས་མངོན་སུམ་གཏན་ལ་འབེབས་ཚུལ་བསྟན་པ།

དེ་ལ་སྒོ་ཡུལ་རླུང་རིག་གི་གནད་གསུམ་མདོར་བསྟན་པ་དང་། སྒོ་ཡུལ་རླུང་རིག་གི་གནད་གསུམ་སོ་སོར་བཤད་པ་དང་། ཇི་ལྟར་ཉམས་སུ་ལེན་ཚུལ་རྒྱས་པར་བསྟན་པ་དང་གསུམ་ལས།

༼ཀ དང་པོ་སྒོ་ཡུལ་རླུང་རིག་གི་གནད་གསུམ་མདོར་བསྟན་པ།

དེ་དག་གིས་སྒོ་གསུམ་གྱི་གནད་གཟིར་ཚུལ་བསྟན་པ་སོང་ནས། ད་ཁྲིད་རིམ་གསུམ་པ་ཡེ་ཤེས་མངོན་སུམ་གཏན་ལ་འབེབས་ཚུལ་བསྟན་པ་ནི།

ཨེ་མ་ཧོ།

གསུམ་པ་སྒོ་ཡུལ་རླུང་རིག་གནད་གསུམ་གྱིས།།

ཡེ་ཤེས་མངོན་སུམ་གནད་ལ་འབེབས་ཚུལ་ནི།།

ཞེས་མཚམས་སྦྱར་ཏེ།

དེ་ཡང་དཔེར་ན་དོན་སྙིང་ལ་སོགས་ལ།།

མཚོན་གྱིས་འཕོག་ན་ཅིས་ཀྱང་མི་འཚོ་ལྟར།།

སྒོ་ཡུལ་རླུང་རིག་གནད་གསུམ་མན་ངག་གིས།།

ཆོས་ཉིད་འོད་གསལ་འགྱུར་བའི་ས་མེད་དེ།།

སྒོ་ཡི་གནད་ཀྱིས་མངོན་སུམ་མཐོང་བར་བྱེད།།

ཡུལ་གྱི་གནད་ཀྱིས་འགྱུར་བ་མེད་པར་བྱེད།།

རླུང་རིག་གནད་ཀྱིས་ཚད་ལ་ཕེབས་པར་བྱེད།།

དེ་ཡང་སྒོའི་གནད་དཔེར་ན་སོ་བ་འདྲ།།

ཡུལ་གྱི་གནད་ནི་མགྲོན་ཁང་མགྲོན་པོ་འདྲ།།

རླུང་གི་གནད་ནི་ཇག་པ་འདྲ་བ་ཡིན།།

སོ་པས་ཐེབས་ཚེ་ཇག་པ་མི་འཁྱུ་ལྟར།།

དབང་པོའི་སྒོ་རྣམས་མ་འགུལ་རླུང་དལ་ཏེ།།

མགྲོན་པོ་མགྲོན་ཁང་ཕྱིན་ནས་སྡོད་པ་ལྟར།།

ཡེ་ཤེས་ཡུལ་དུ་མངོན་སུམ་མཐོང་བའོ།།

ཞེས་གསུངས་ཏེ། འདིས་ནི་གནད་གསུམ་ལ་བསྟེན་ནས་ཆོས་ཉིད་མངོན་སུམ་རང་ཐོག་ཏུ་འབེབས་པའི་སྤྱི་དོན་བསྟན་པ་སྟེ། དཔེ་བཞག་ན་མཚོན་ཆ་ཞིག་གིས་མི་ཞིག་གི་གནད་གཉན་ས་དོན་སྣོད་སྙིང་ལྟ་བུ་ཞིག་ལ་ཕོག་སོང་ན། མི་དེ་གསོན་པོར་འཚོ་མི་ཐུབ་པ་བཞིན་དུ། སྒོ་ཡུལ་རླུང་རིག་གི་གནད་གསུམ་པོ་ཟིན་ན་འཁྲུལ་བའི་སྲོག་རྩ་ཆད། དེ་ཆད་པས་ཆོས་ཉིད་འོད་གསལ་མི་ཟིན་པར་འགྱུར་འགྲོ་ས་ཞིག་མེད་དོ་ཞེས་གསུངས་སོ། །ཡང་དཔེ་གཞན་ཞིག སོ་བ་མགྲོན་པོ་ཇག་པ་གསུམ་ལ་བཞག་ན། སྒོ་གནད་སོ་བ་དང་འདྲ། ཡུལ་གནད་དེ་མགྲོན་པོ་དང་འདྲ་ལ། རླུང་རིག་གི་གནད་དེ་ཇག་པ་ལ་འདྲ་བར་གསུངས་པས། སྒོ་གནད་ཀྱིས་མཐོང་བར་བྱེད། ཡུལ་གནད་ཀྱིས་མི་འགྱུར་བར་བྱེད། རླུང་རིག་གི་གནད་ཀྱིས་རྟགས་ཚད་ལ་འབེབས་པར་བྱེད་གསུངས། རླུང་རིག་གཉིས་ཁ་ཁ་བྱས་ནས་བཞི་རུ་གསུངས་སྐབས་ཤིག་དང་། གསུམ་དུ་བསྡུ་དུས་དང་གཉིས་ཡོད་པ་ལས་འདི་ནས་རླུང་རིག་དལ་བས་ཡེ་ཤེས་འགྲུབ། །ཅེས་པའི་རྒྱུད་ཀྱི་ལུང་དང་བསྟུན་པ་སྟེ་གང་ལྟར་གཅིག་པ་ཡིན།

༼ཁ གཉིས་པ་སྒོ་ཡུལ་རླུང་རིག་གི་གནད་གསུམ་སོ་སོར་བཤད་པ།

དེ་ལ་གནད་གསུམ་རིམ་པར་བསྟན་པ་ལས།

༼༡ དང་པོ་འཆར་བྱེད་སྒོ་ཡི་གནད་བསྟན་པ།

དང་པོ་འཆར་བྱེད་སྒོ་ཡི་གནད་ཉིད་ནི།།

ཐ་མལ་པ་ལྟར་བལྟས་པས་འོད་གསལ་གྱི།།

ཡེ་ཤེས་མི་འཆར་ཅུང་ཟད་འཆར་ན་ཡང་།།

གོང་ནས་གོང་དུ་འཕེལ་བར་མི་འགྱུར་བས།།

སྒོ་གནད་གཟིགས་སྟངས་གསུམ་ལ་བསླབ་པ་གནད།།

ཅེས་གསུངས་ཏེ། འཆར་བྱེད་སྒོའི་གནད་ཀྱི་སྤྱི་དོན་བསྡུས་ཏེ་བསྟན་པའོ། །དེ་ནས་སྐུ་གསུམ་གྱི་གཟིགས་སྟངས་རེ་རེ་བཞིན་ཏུ་གསུངས་ཏེ་བསྟན་པ་ནི།

དེ་ཡང་རིག་པའི་ཡེ་ཤེས་ཙིཏྟ་ཡི།།

སྦུབས་ན་བུམ་ནང་མར་མེ་ལྟར་གསལ་བའི།།

རང་གདངས་ཀ་ཏི་ཤེལ་སྦུག་འོད་ཀྱི་རྩ།།

དར་སྐུད་བརྐྱངས་པ་ལྟ་བུའི་ལམ་བརྒྱུད་ནས།།

མིག་གི་སྒོ་རུ་འཆར་བས་ཆོས་སྐུ་ཡི།།

གཟིགས་སྟངས་གྱེན་དུ་ལྡོག་ནས་གཙུག་ཏོར་གྱི།།

རྣམ་པར་བལྟ་ཞིང་ལོངས་སྐུའི་གཟིགས་སྟངས་ཀྱིས།།

གཡས་གཡོན་ཟུར་འཁྲིད་མདའ་སྨྱུག་སྲོང་ལྟར་བལྟ།།

སྤྲུལ་སྐུའི་གཟིགས་སྟངས་མིག་གཉིས་ཕྱེད་བཙུམས་ཏེ།།

ཅུང་ཟད་ཐུར་ལ་ཕབ་ནས་དྲང་སྲོང་གི།

བསམ་གཏན་བསྒོམས་པ་བཞིན་དུ་བལྟ་བར་བྱ།།

ཆོས་སྐུ་གྱེན་ལ་ལྡོག་ནས་བལྟས་པ་ཡིས།།

བག་ཆགས་ཐུར་ལ་སེལ་བའི་དགོས་པ་ཡོད།།

ལོངས་སྐུའི་ཟུར་ལ་མཉམ་པོར་བལྟས་པ་ཡིས།།

འཁོར་འདས་རོ་མཉམ་ཉིད་དུ་བསྲེ་བར་བྱེད།།

སྤྲུལ་སྐུའི་ཐུར་ལ་ཕབ་ནས་བལྟས་པ་ཡིས།།

ཡེཤེས་སྣང་བ་དངོས་སུ་འཕེལ་བའོ།།

ཞེས་གསུངས་ཏེ། གཟིགས་སྟངས་ལ་བསླབ་པའི་གནད་དང་། ཇི་ལྟར་བསླབ་པ། བསླབ་པའི་དགོས་པ་དང་བཅས་པ་བསྟན་པ་སྟེ། སྒོ་གནད་ཆོས་ལོངས་སྤྲུལ་སྐུའི་སྐུ་གསུམ་གྱི་གཟིགས་སྟངས་མ་བྱས་པར། དུས་རྒྱུན་ལྟར་ཐ་མལ་བའི་ལྟ་སྟངས་ཀྱིས་བལྟས་པས་འཁྲུལ་བར་སྣང་བ་འདི་ལས་མཐོང་མི་ཐུབ། སྒྲོན་མའི་རྟགས་ཙམ་མཐོང་བ་ཡིན་ཡང་ཇི་བཞིན་དུ་མཐོང་མི་ཐུབ། དེས་ན་སྐུ་གསུམ་གྱི་སྤྱན་དེ། ཆོས་ཉིད་ཀྱི་སྤྱན་དང་། ཡེཤེས་ཀྱི་སྤྱན། ཤེས་རབ་ཀྱི་སྤྱན་དང་གསུམ་པོ་ཡིན་པས་འདི་གསུམ་གྱིས་གཟིགས་ན་རིག་པ་མངོན་སུམ་དུ་མཐོང་ཐུབ། མཐོང་བ་གོང་དུ་འཕེལ་ཏེ་འཁྲུལ་བ་སྐད་ཅིག་ལ་ལྡོག་ཐུབ་པ་ཡིན། དེ་ཡང་མཐོང་བར་བྱ་བ་རང་ཉིད་ཀྱི་རྡོ་རྗེའི་ལུས་འདིའི་སྙིང་དབུས་ཙིཏྟ་རིན་ཆེན་དཔལ་བེའུ་ན་བཞུགས་པའི་ཉི་མའི་དཀྱིལ་འཁོར་ལྟར་དུ་གསལ་བ། བུམ་ནང་གི་མར་མེ་བཞིན་དུ་བཞུགས་པའི་རང་གདངས་དེ་ཉིད། འོད་གསལ་གྱི་རྩ་ཆེན་བཞི་ལས་བརྒྱུད་དེ་འཆར་གྱིན་ཡོད། དེའི་ནང་ནས་རྒྱ་མཚོ་གསེར་གྱི་ཉི་མའམ་ཀ་ཏི་གསེར་གྱི་རྩ་ཆེན་ཞེས་པའི་ཤེལ་གྱི་སྦུ་གུ་ཅན་དེ་བརྒྱུད་དེ། དར་དཀར་སྣར་མ་དང་། ཕྲ་ལ་ཁྲིལ་པའི་འོད་རྩའི་ལམ་ནས་རྒྱང་ཞགས་ཆུའི་སྒྲོན་མའི་མིག་སྒོ་རུ་རྟེན་བརྟེན་པའི་ཚུལ་གྱིས། བརྟེན་པ་ཡེ་ཤེས་འདུས་པའི་རྒྱང་ཞགས་ཀྱིས་གཟིགས་ཏེ་འཆར་གྱིན་ཡོད། དེ་འཆར་བའི་སྐབས་ན་རྩ་རྒྱུད་ལས། སྒོ་གནད་ལྡོག་ཕབ་ཟུར་གྱིས་བལྟ། །ཞེས་གསུངས་པས། ཆོས་སྐུ་ལ་ཆོས་ཉིད་ཀྱི་སྤྱན་ཡོད་པས་གཟིགས་སྟངས་གྱེན་དུ་ལྡོག་ནས་གཙུག་ཏོར་གྱི་རྣམ་པར་བལྟས་པས་གཞི་ཀ་དག་གི་ངོ་བོར་སྒྲིབ་པ་གཤིས་ལ་མེད་པས་འཁྲུལ་བའི་བག་ཆགས་ཐུར་ལ་སེལ་བའི་གནད་ཡོད་དེ། ཆོས་ཉིད་ཀྱི་སྤྱན་གྱིས་ཆོས་ཉིད་ཇི་བཞིན་གཟིགས་པ་ཡིན། དེ་གཟིགས་པའི་མཐུས་དེའི་སྟེང་ནས་འཁྲུལ་བ་རྩད་ནས་གཅོད་པར་བྱེད་དོ། །ལོངས་སྐུ་ལ་ཡེ་ཤེས་ཀྱི་སྤྱན་ཡོད་པས། གཟིགས་སྟངས་ཟུར་ལ་གཏད་དེ་དབྱིངས་སྣང་ཁྲིད་པས་འཁོར་འདས་རོ་མཉམ་དུ་བསྲེ་ཐུབ་པ་དང་། ཡེ་ཤེས་ཀྱི་སྤྱན་གྱིས་རང་རྩལ་དུ་མཐོང་ནས་མཁྱེན་པ་ནང་ནས་རྒྱས། སྤྲུལ་སྐུ་ལ་ཤེས་རབ་ཀྱི་སྤྱན་ཡོད་པས་མིག་གཉིས་ཕྱེད་བཙུམ་བྱེད་དགོས་པ་འདིའི་སྐབས་ཀྱི་ཞལ་ཤེས་ཡིན་ནོ། །དྲང་སྲོང་གིས་བསམ་གཏན་སྒོམ་པ་བཞིན་དུ་གཟིགས་སྟངས་ཐུར་ལ་ཕབ་པའི་དགོས་པ་ཇི་ཡོད་ན། ཡེ་ཤེས་ཀྱི་སྣང་བ་དངོས་སུ་ཕེབས་པ་ཡིན་ནོ། །ཤེས་རབ་ཀྱི་སྤྱན་གྱིས་སྒྲ་ཚིག་དང་བྲལ་བར་དངོས་སུ་རྟོགས་ཏེ། ཐོས་བསམ་སྒོམ་པར་རག་མ་ལུས་པ་སོགས་དེ་ལྟ་བུའི་བྱིན་རླབས་འདི་ཉིད་འབྱུང་བར་གསུངས་སོ། །འདི་དག་གི་དུས་སུ་མིག་གཉིས་མ་འགུལ་ན་འོད་རྩ་མི་འགུལ། འོད་རྩ་མ་འགུལ་དུས་བརྟན་ཆགས་ནས་རྟོགས་པ་རྒྱུན་ཆགས་པར་འབྱུང་བ་ཡིན་ནོ། །དེ་ལྟར་དགོས་པ་དང་བཅས་པས་འཆར་བྱེད་སྒོའི་གནད་བསྟན་ནས།

༼༢ གཉིས་པ་འཆར་གཞི་ཡུལ་གྱི་གནད་བསྟན་པ།

གཉིས་པ་ཡུལ་གྱི་གནད་ནི་རང་རིག་གི།

རང་གདངས་ནང་ནས་ཕྱི་རོལ་འཆར་བ་ལ།།

ཕྱི་ཡི་དངོས་པོ་རགས་པ་ས་དང་ཆུ།།

མེ་དང་རླུང་ལ་གཏད་པས་མི་འོང་བས།།

གནས་ནི་རྐྱེན་བྲལ་དྭངས་ཤིང་མཐོ་བའི་སར།།

ཡུལ་རྐྱེན་བྲལ་བ་ནམ་མཁའ་གཡའ་དག་དུས།།

དབང་པོ་རྐྱེན་དང་བྲལ་བ་མིག་གཉིས་ཀྱིས།།

སྔ་དྲོ་ནུབ་དང་ཕྱི་དྲོ་ཤར་དུའམ།།

འོད་གསལ་འཆར་སྣང་བདེ་ཕྱིར་ཟེར་གཉིས་སྦྱར།།

སྔ་དྲོ་ཤར་དང་ཕྱི་དྲོ་ནུབ་ཏུ་བལྟ།།

དེ་ཡང་ཉི་མ་ལས་ནི་ཁྲུ་གང་གི།

འོག་གི་ནམ་མཁའ་སྟོང་སང་དེ་ལ་བལྟ།།

དེ་ལྟར་ཕྱི་ཡི་ནམ་མཁའ་སྟོང་པ་ལ།།

རིག་པ་སྟོང་པས་གཏད་པས་སྟོང་གསལ་ཉམས།།

འཕྲོ་འདུ་དང་བཅས་ཕྱལ་ཡས་པ་ཞིག་འཆར།།

དངོས་པོ་མཚན་མ་བྲལ་བའི་དགོས་པ་ཡོད།།

ཅེས་གསུངས་ན། འདི་ལ་དབྱིངས་དང་རིག་པའི་ལྟ་སྟངས་གསུངས་པ་རེད། ནང་གི་རིག་པའི་གདངས་གསང་བའི་འོད་རྩ་ནས་བརྒྱུད་དེ། ཕྱི་རོལ་གྱི་དབྱིངས་ལ་འཆར་དགོས་དུས། ཡུལ་ས་ཆུ་མེ་རླུང་སོགས་ཕྱི་རོལ་རག་པའི་དངོས་པོ་གཟུགས་ཅན་ལ་བལྟས་པས་ཇི་བཞིན་དུ་མི་འཆར་བས། རང་གི་སྨིན་མཚམས་ཀྱི་ནམ་མཁར་མིག་ཡར་གཏད་དེ་ཤེས་པ་མ་ཡེངས་པར་བལྟ་རྒྱུ་དེ་ལ་དབྱིངས་དང་རིག་པའི་ལྟ་སྟངས་གསུངས་པ་ཡིན། ནམ་མཁའ་ནི་དབྱིངས་རྣམ་དག་གི་སྒྲོན་མ་འཆར་བའི་གཞི་ཡིན་པས་དེ་ལ་བལྟ་བ་དབྱིངས་ཀྱི་ལྟ་སྟངས་དང་། མ་ཡེངས་པའི་ཤེས་པ་ནི་རིག་པའི་རྩལ་ཡིན་པས་མ་ཡེངས་པར་བཞག་ནས་རིག་གདངས་ལུག་རྒྱུད་ཀྱི་སྣང་བ་འཆར་བ་ཡིན་པས་རིག་པའི་ལྟ་སྟངས་ཞེས་གསུངས་པ་ཡིན། ཀློང་གསལ་ལས། རྐྱེན་བྲལ་གསུམ་ལ་གསལ་བར་འགྱུར། །ཞེས་གསུངས་པས་རྐྱེན་བྲལ་གསུམ་ཚོགས་པ་ཞིག་གིས་བལྟ་དགོས་དུས་གནས་རྐྱེན་བྲལ་བསམ་གཏན་སྒོམ་པའི་རྒྱུ་ཚོགས་ཚང་ཞིང་ཁྱད་པར་ས་ཁད་ཅུང་མཐོ་ས་ཞིག་ནས་བལྟས་ན་བཟང་ནི་རེད། ཤར་ལྷོའི་ཕྱོགས་སམ་ནུབ་དང་བྱང་ཡང་ཁོད་ཡངས་ས་དེ་འདྲ་ཞིག་ནས་བལྟ་དགོས། ཡུལ་རྐྱེན་བྲལ་དེ་ཇི་ལྟར་ཡིན་ན། སྤྲིན་དང་དུ་བ་རྡུལ་དང་ཁུག་སྣ་སོགས་ནམ་མཁའ་སློང་བྱེད་ཀྱི་རྐྱེན་དང་བྲལ་བ་དང་། དབང་པོ་རྐྱེན་བྲལ་ཟེར་བ་དེ། ཡེ་ཤེས་འཆར་བའི་འོད་རྩའི་མིག མིག་སྐྱོན་མེད་པ་སྟེ་དེ་ལྟར་རྐྱེན་བྲལ་གསུམ་པོ་ཚང་བས་འོད་གསལ་ཐོད་རྒལ་གྱི་འཆར་སྣང་དེ་འཆར་བ་ཡིན། འཆར་བ་དེ་ཡང་ཡུན་གྱིས་རིང་སྒྲུབ་བྱེད་བསམ་པ་ཚོས། སྔ་དྲོ་ཉི་མ་རྒྱབ་ཏུ་བཞག་སྟེ་ཁ་ནུབ་ཏུ་འཁོར་ནས་དང་། ཕྱི་དྲོ་དེ་བཞིན་ཁ་ཤར་དུ་འཁོར་ནས་ཕྱི་དབྱིངས་ནམ་མཁའ་སྟོང་གསལ་ལ་གཏད་ནས། མདོར་ན་ནངས་དགོང་གི་ཉི་མ་རྒྱབ་ཏུ་བཞག་ནས་བལྟས་ན་ཆོག་གོ །ཡང་ན་ལས་དང་པོ་པ་ཚོས་མྱུར་སྒྲུབ་ཀྱིས་མགྱོགས་པོར་འཆར་སྣང་ཞིག་མཐོང་ན་འདོད་པ་དག་གིས་ནངས་དགོང་གི་ཉི་མ་འཆར་ནུབ་ཀྱི་ཟེར་གཉིས་དང་བསྟུན་ནས། ཉི་མའི་འོག་གི་ཁྲུ་གང་གི་ནམ་མཁའ་སྟོང་སང་ལ་ལྟ་བའམ། ཡང་ན་ཉི་མའི་འོག་གི་མར་རི་ལ་སོགས་པའི་ནག་གྲིབ་ལ་འཁྲིད་ནས་བལྟས་ནའང་ཆོག་གོ། །དེས་མིག་ལ་མི་གནོད་པའི་དགོས་པ་དང་ཡང་ལྡན་པའོ། །གསར་བ་ཚོས་དགོས་སྣང་ཤར་ཏེ་བལྟ་མི་ཤེས་པར་མིག་གིས་ཉི་མ་རྐྱང་རྐྱང་ལ་བལྟས་ན། ལྟ་མ་ཤེས་པར་མིག་ལོང་ལ་ཁད་གྱུར་པ་ཡང་ཡོད་པས་གཟབ་དགོས་སོ། །བལྟ་མ་ཤེས་ནས་ཉི་མར་ཅེར་བ་རྐྱང་པས་བྱིན་རླབས་འཇུག་རྒྱུ་ཡོད་པ་མ་རེད། མུ་སྟེགས་པའི་ལུགས་ལའང་ཉི་མ་ལྷར་བཟུང་ནས་བལྟ་བ་ཡོད་ཀྱང་ཐར་ལམ་དང་མི་ཉེ་བ་བཞིན་ནོ། །མདོར་ན་ཕྱི་ཡུལ་ནམ་མཁའ་སྤྲིན་དེངས་ལ་གཏད་ནས་རིག་པའི་དྭངས་སང་ཕྱེ་དགོས། ནང་ཡུལ་དབྱིངས་ཀྱི་སྒྲོན་མེ་ལ་གཏད་དེ་འོད་གསལ་མ་བུ་འདྲེས། གསང་ཡུལ་རིག་པ་སྟོང་སང་ལ་གཏད་པས། ཀ་དག་ཆོས་ཟད་ཀྱི་དགོངས་པ་རང་ས་ན་གསལ་བའི་གནད་ཟིན་དགོས་སོ། །གོང་ནས་ཀྱང་ཐེངས་མ་གཅིག་གཉིས་ལ་བཤད་མོད། ཡེ་ཤེས་ཀྱི་འོད་རྩ་གཙོ་བོ་དེ། རྒྱ་མཚོ་གསེར་གྱི་ཉི་མ་དང་། ཀ་ཏི་ཤེལ་གྱི་སྦུ་གུ་ཅན། ཕྲ་ལ་ཁྲིལ་དང་། དར་དཀར་སྣར་མ་བཞི་པོ་དེ་ལ་གསུངས་པ་ཡིན། རྒྱ་མཚོ་གསེར་གྱི་ཉི་མ་སྙིང་དབུས་སུ་བཞུགས་པའི་འོད་རྩ་ཞིག་ཡིན། ཀ་ཏི་ཤེལ་གྱི་སྦུ་གུ་ཅན་སྙིང་དབུས་ནས་མིག་ཏུ་འབྲེལ་བའི་འོད་ཀྱི་རྩ་དང་ནི། ཕྲ་ལ་ཁྲིལ་བ་དང་། དར་དཀར་སྣར་མ་གཉིས་འོད་གསལ་ཕྱི་རུ་མཆེད་པའི་རྩ་ཡིན། ཁྱད་པར་དར་དཀར་སྣར་མ་མིག་ཏུ་ཞུགས་པའི་རྩ་ཡིན་གསུངས་སོ། །སྤྱིར་ན་ཐོད་རྒལ་གྱི་འཆར་སྣང་འདི་འདུས་བྱས་དང་འདུས་མ་བྱས་གང་ཡིན་ཟེར་ན། སྣང་ཉམས་འཕེལ་འགྱུར་གྱི་ཆ་ནས་འདུས་བྱས་དང་། རིག་གདངས་ཡིན་པའི་ཆ་ནས་འདུས་མ་བྱས་ཡིན་གསུངས། ལས་རླུང་རྣམ་རྟོག་གི་ཁ་ལོ་བ་ཇི་ལྟ་ཇི་ལྟར་དབང་བཙན་པ་དེ་སྲིད་དུ། ཡེ་ཤེས་ཀྱི་གཞོན་པ་ཤིན་ཏུ་ཕྲ་བའི་རླུང་དེ་མངོན་དུ་འགྱུར་མི་ཐུབ་པ་ཡིན། དེ་མངོན་དུ་མ་གྱུར་པ་དེ་སྲིད་དུ། དེ་ལྟ་དེ་ལྟར་རང་བཞིན་ཡེ་གནས་ཀྱི་རིག་པ་ཐེར་ལ་འབུད་དཀའ་བ་ཡིན་ནོ། །འདི་ཁྲེགས་ཆོད་ཐོད་རྒལ་གཉིས་ཀྱི་ཐུན་མོང་གི་ལམ་གནད་ཡིན། གོང་ནས་སྐུ་གསུམ་གྱི་བཞུགས་སྟངས་གསུངས་རྒྱུའི་སྐོར། གླེན་པ་ངོ་མ་ཞིག་ཡིན་ན། སྐུ་གསུམ་དེ་དུས་རྒྱུན་དེ་ལྟར་དུ་བཞུགས་ཡོད་ནི་ཨེ་རེད་སྙམ་ན། དེ་ལྟར་གསུངས་པ་མིན། ཆོས་སྐུས་མཚན་མའི་རྟོག་པ་ཟིལ་གྱིས་གནོན་པའི་བཞུགས་སྟངས་འཇིགས་པ་མེད་པ་སེང་གེས་རི་དྭགས་ཟིལ་གྱིས་གནོན་ཚུལ་དང་འདྲ་བ། ལོངས་སྐུའི་སྐབས་སུ་ཞིང་ཁམས་རྫོགས་པ་དེ། གླང་ཆེན་སྟོབས་ཤུགས་རྫོགས་པའི་ཚུལ་འདྲ་བ་དང་། སྤྲུལ་སྐུ་གཞན་དོན་ལས་གཡོ་བ་མེད་པ་དྲང་སྲོང་དཀའ་ཐུབ་ཀྱིས་ལུས་མི་གཡོ་བར་བསྟན་པ་དེ་དག་གིས་མཚོན་པ་ཡིན་ནོ། །རྟེན་འབྲེལ་ལུས་ལ་བསྒྲིགས་ན་རྟོགས་པ་སེམས་ལ་འཆར་བའི་དགོས་གནད་ཁྱད་པར་བ་དང་ཡང་ལྡན་ནོ། །དེ་རིང་དངོས་པོ་མཚན་མ་བྲལ་བའི་དགོས་པ་ཡོད། །གསུངས་པའི་མཚམས་འདིར་བཞག་རྒྱུ་བྱེད། ཆོས་ཁྲིད་རྗེས་མར་རླུང་རིག་གི་གནད་བཤད་པའི་དེ་མ་ཐག་ཏུ། རིག་པའི་རྩལ་དབང་བསྐུར་རན་ནས་བསྡད་ཡོད་པས། རིག་པའི་རྩལ་དབང་དེ་བླ་གབ་མེད་པའི་གནས་ཤིག་ནས་བཤད་རྒྱུ་བྱེད་དགོས་ཀྱང་། མང་ཆེ་བ་བླ་གབ་མེད་པའི་གནས་སུ་བཞུགས་ཀྱང་ཡོད་མོད། ཚང་མ་མཉམ་དུ་ཤོང་སའི་ས་ཁོངས་གཞན་གྱིས་མཐོང་ཡུལ་དུ་མ་གྱུར་བ་ཞིག་སྟབས་མ་བདེ་བས་ངས་འདི་ནས་འདོན་རྒྱུ་མ་བྱེད་ཐབས་མེད་རེད། སྤྱིར་ད་རེས་ཀྱི་ཆོས་ཁྲིད་ལ་རྫོགས་ཆེན་ཁྲེགས་ཆོད་ཐོད་རྒལ་གཉིས་ཀ་སྒོམ་པ་དོན་ལ་སྦྱོར་དུས་ཟུང་དུ་འབྲེལ་བའམ། བཤད་པའི་གནས་སྐབས་ཀྱི་ཚུལ་ཡིན་ན་རིམ་ཅན་དུ་འཕྲོའི་འཕྲོར་འཆད་ཉན་འདི་ལྟར་བྱེད་བཞིན་པ་ཡིན། ལྟ་བ་མཁའ་ལྡིང་གཤོག་རླབས་ཀྱིས་སེམས་ཀློང་མན་ངག་གི་སྡེ་གསུམ་པོའི་དགོངས་དོན་དང་ནི་ཁྱད་པར་དུ་སེམས་ཀློང་གཉིས་ཀ་གཙོ་བོར་མཛད་པའི་ཆ་ནས་སྣང་སེམས་ཐམས་ཅད་ཡེ་གྲོལ་སོར་བཞག་ཆེན་པོར་ཁྲེགས་ཀྱིས་ཉམས་སུ་ལེན་པ། ཁྲེགས་ཀྱིས་སམ་ཐད་ཀར་འཁྲུལ་བའི་རྟོག་པ་ཐམས་ཅད་རྩ་དྲས་མའི་ཐག་པ་བཞིན་དུ་ཆོད་པར་བྱས་པས་ན་ཁྲེགས་ཆོད་ཀྱི་ཉམས་སུ་ལེན་པ་བསྟན། ཐོད་རྒལ་འདི་སྤྱིར་མན་ངག་སྡེ། དེ་ལའང་སྐོར་ཚོ་བཞི་ཡོད་པའི་ནང་གི་ཡང་གསང་བླ་ན་མེད་པའི་དགོངས་པ་རྩལ་འདོན་གྱི་ཐོག་ནས་ལྷུན་གྲུབ་ལུས་ཀྱི་དཀྱིལ་འཁོར་དེ་བཞིན་གཤེགས་པའི་གསང་མཛོད་སྒོ་ཕྱེས་ཏེ་ཇི་བཞིན་བསྟན་པར་མཛད་པ་ཞིག་ཡིན། དེ་ཡིན་ན་རྫོགས་ཆེན་སེམས་སྡེ་དེ་ཇི་ལྟར་ཡིན་སྙམ་ན། སྣང་སྲིད་སྣོད་བཅུད་ཀྱི་སྣང་བ་ཐམས་ཅད་པོ་སེམས་ཉིད་རང་བྱུང་གི་ཡེ་ཤེས་བརྗོད་བྲལ་ཆོས་ཀྱི་སྐུར་གཏན་ལ་ཕབ་ནས་བསལ་བཞག་མེད་པར་སྐྱོང་བ་འདིའི་དགོངས་དོན་རེད། ཀློང་སྡེ་ནི། རང་བྱུང་གི་ཡེ་ཤེས་དང་ནི་དེ་ལས་ཤར་བའི་ཆོས་ཐམས་ཅད་རང་གྲོལ་ཡེ་དག་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པར་གཏན་ལ་ཕབ་ནས། ཆོས་ཉིད་དམིགས་པ་མེད་པ་བྱ་རྩོལ་དང་བྲལ་བའི་ངང་སྐྱོང་བའོ། །མན་ངག་སྡེའི་ཡང་གསང་བླ་ན་མེད་པའི་སྐོར་ཚོའི་བསྟན་དོན། ཡང་སྒོས་སྐབས་འདི་དང་ཁྱད་པར་དུ་སྦྱར་ནས་བཤད་ན། རང་གནས་ཀྱི་ཡེ་ཤེས་འོད་གསལ་ལྷུན་གྲུབ་ཀྱི་དཀྱིལ་འཁོར་དུ་ཤར་བ་དེ་ཉིད། བཞུགས་སྟངས་གསུམ་དང་གཟིགས་སྟངས་རྣམ་གསུམ་གྱིས་སྒྲོན་དྲུག་འཇའ་ཟེར་ཐིག་ལེའི་ལམ་བརྒྱུད་དེ། ཐོད་རྒལ་སྣང་བཞིའི་མཐར་ཐུག་ལ་ཟད་སར་སྐྱོལ་བ་ཡིན། དེ་ལྟར་ཟད་སར་སྐྱོལ་བས་ཕུང་ཁམས་སྐྱེ་མཆེད་ཐམས་ཅད་རང་དག སྡོད་པ་གསུམ་གྱིས་ཚད་བཟུང་། ཐོབ་པ་གསུམ་གྱིས་གཟེར་གདབ། གདེང་བཞིས་གྲོལ་ཚད་བསྟན་ནས། ནང་ཤེས་རབ་རང་བྱུང་གི་སྒྲོན་མའི་ངོ་བོ། ཀ་དག་ཁྲེགས་ཆོད་ཀྱི་བསྟན་པའི་དོན་དེ་དང་གཉིས་སུ་མ་ཡིན་པའི་རིག་པའི་འོད་གསལ་དེ་ཉིད་མངོན་དུ་གྱུར་ཏེ། ནང་རིག་པའི་དབྱིངས་ཀྱི་ངོ་བོའི་རྩལ་རྫོགས་རིམ་བཞིན་དུ། ཕྱིའི་རིག་གདངས་དེ་ཉིད་ལུ་གུ་རྒྱུད་ཀྱི་སྐུ་རུ་སྨིན་ནས་རིག་གདངས་རིག་པའི་མ་ལ་ཐིམ་པ་ཟད་པ་མཐར་ཐུག་གི་གནས་སྐབས་ན། འབྱུང་བ་མ་ལ་ཞ། རླུང་ལྔ་རང་སར་དག ཡེ་ཤེས་དབྱིངས་སུ་འཆར། ལྷུན་གྲུབ་གདོད་མའི་དབྱིངས་སུ་བཙན་ས་ཟིན་པས། དེ་དུས་སྐྱེ་འཇུག་གཉིས་ལ་རང་དབང་ཐོབ་པའི་འཕོ་ཆེན་དྭངས་མའི་སྐུར་བཞེངས་པ་ཡིན། ཐོད་རྒལ་གྱི་སྤྱི་ཁོག་ནི་དེ་ལྟ་བུ་ཞིག་རེད། ཐོད་རྒལ་ཁྱད་འཕགས་ཀྱི་ཁྱད་ཆོས་ནི་ལྷུན་གྲུབ་རྒྱ་ཆེ་བ་རྩལ་འདོན་གྱིས་གསུངས་པ་ཡིན། ཀ་དག་ལྷུན་གྲུབ་ཅེས་པ་འདིའང་གོང་ནས་ཀྱང་བཤད་པ་ལྟར་དུ་ངོ་བོ་གཅིག་གི་ལྡོག་ཆ་ནས་གསུངས་པ་ཡིན་པས། ཁྲེགས་ཆོད་ཐོད་རྒལ་གཉིས་ཟུང་དུ་འཇུག་པ་ཡིན། ཁྲེགས་ཆོད་ཁྲེགས་མ་ཆོད་ན་ཐོད་རྒལ་ཐོད་མི་རྒལ་ཟེར་བའི་ཁ་སྲོལ་ཞིག་ཡོད་པ་ནང་བཞིན་རེད། ཀ་དག་ལྷུན་གྲུབ་གཉིས་ཀྱི་རྩ་བ་རིག་པ་ཟང་ཐལ་རྗེན་ལ་ཕུད་དགོས་པ་དེ་ལ་ཐུག དེ་ཕུད་མ་ཤེས་ན་ཐོད་རྒལ་གྱི་སྟོང་གཟུགས་དངོས་པོ་རུ་གོལ་ནས་གཟུགས་ཁམས་སུ་འཕེན་པ་མ་གཏོགས་གཞན་ཕན་པ་ཅི་ཡང་མེད་པར་འགྱུར་རྒྱུ་ཡོད། གང་ལྟར་གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ། འབྲས་བུ་ཆོས་གཟུགས་ཀྱི་སྐུ་གཉིས་ཡིན་དུས། གཞི་ལམ་འབྲས་གསུམ་ཟུང་འཇུག་ཡ་མ་བྲལ་བའི་གོ་བས་དེད་རྒྱུ་འདི་གནད་ཆེའོ། །དེ་ཡང་ཟུང་འཇུག་གཉིས་མེད་ཀྱི་ཡེ་ཤེས་གསུངས་ཡོང་དུས་གང་དང་གང་གཉིས་སུ་མེད་པ་ཡིན་ཞེ་ན། ཆོས་ཀྱི་དབྱིངས་དང་རང་བྱུང་གི་ཡེ་ཤེས་གཉིས་ཀ་གཅིག་ཏུ་འདྲེས་ཤིང་རོ་མཉམ་པ་ལ་གསུངས་པའོ། །དེ་ལྟར་རོ་མཉམ་པ་དེ་ནི་སྟོང་ཉིད་དང་སྙིང་རྗེ་ཟུང་འཇུག་དང་། ཐབས་དང་ཤེས་རབ་ཟུང་འཇུག བདེ་དང་སྟོང་པ་ཟུང་འཇུག་ཀྱང་ཡིན། དེ་ལྟར་ཡིན་པས་གནས་ལུགས་མཐར་ཐུག་གི་དབང་དུ་བྱས་ན། ཤེས་དང་ཤེས་བྱ་རོ་གཅིག་པ་དབྱིངས་དང་ཡེ་ཤེས་དབྱེར་མེད་པ་དེ་ཉིད་ཡིན་པས་དེ་ལྟ་བུའི་དག་པ་གཉིས་ལྡན་གྱི་ཁྱད་པར་ཕྱེ་བའི་དབྱིངས་ཡེ་དབྱེར་མེད་མངོན་དུ་འགྱུར་བའི་ཆེད་དུ། རྒྱལ་བའི་ཆོས་སྒོ་ཐམས་ཅད་མི་མཐུན་པ་ཡོད་པ་མིན་པས་གནད་མཐུན་པའི་ཚུལ་ཡང་ཇི་ལྟར་ཡིན་ན། ཐེག་པ་ཆེ་ཆུང་གི་ཆོས་ཐམས་ཅད་ཀྱི་དགོས་པའི་རྩ་བ་དེད་དེ་སོང་ན། བདག་འཛིན་འདུལ་བའི་ནང་དུ་འདུས་ལ། བདག་འཛིན་གྱི་གཉེན་པོར་མ་སོང་ན། ཆོས་བྱས་ཚད་དོན་མེད་རེད་སོང་བ་རེད། ཆོས་བྱས་ཚད་བདག་འཛིན་གྱི་གཉེན་པོར་སོང་ན་བློ་སྦྱོང་རྒྱུད་ལ་སྐྱེས་པའི་རྟགས་ཡིན་པས་མི་ཚད། ཆོས་ཆོས་སུ་སོང་དང་མ་སོང་གི་ཚད་གཞི་འཇོག་ས་ངོ་མ་བོ་ཡང་དེ་ན་ཡོད་པས། འདི་ཆོས་པ་སྲང་ལ་བཀྱག་བྱེད་ཀྱི་རྒྱ་མ་ཡིན་པར་ཡང་གསུངས་སོ། །ཆོས་པ་བཟང་པོ་ཟེར་རྒྱུ་བོ་གཞན་གྱིས་མ་ཁྲེལ་ནའང་དཔང་པོ་ཡིན་ཡང་། འཇིག་རྟེན་ཕལ་བ་ཚོས་གཞན་སེམས་ཤེས་པ་མིན་པས་ཕྱིའི་སྤྱོད་ལམ་ལ་མ་སྐྱོན་པ་རེ་རེ་སྣེ་གཉིས་ཙམ་རེ་རིག་རྒྱུ་ཡོད་སོང་དུས་མགུ་སླ་བས་དེ་གཙོ་བོ་བཟུང་རྒྱུ་མེད། རང་གི་བསམ་སྤྱོད་ཐམས་ཅད་རང་ཉིད་ལ་ཆ་རྒྱུས་ཆེ་བས། རང་གི་སེམས་རང་ལ་མ་ཁྲེལ་བ་དེ་དཔང་པོ་གཙོ་བོ་ཡིན་པས་ན། བློ་གཟུ་བོས་ལེགས་པར་བརྟགས་ཏེ་རང་ལ་རང་གིས་མ་ཁྲེལ་བའི་བློ་ཞིག་རང་ལ་ཡོད་ན། བློ་འབྱོངས་བའི་རྟགས་ཆ་ཚང་ཡིན་པས་ན། གཉེན་པོ་བསྐྱེད་དེ་རང་ལ་རང་གིས་མ་ཁྲེལ་བ་ཞིག་ལ་འབད་པ་དེ་གལ་ཆེའོ། །རྣལ་འབྱོར་ལམ་ལ་སྦྱང་བའི་གནས་སྐབས་འདིར་ཁྱད་པར་དུ་སྤྱོད་པ་རྒྱུ་འབྲས་ཞིབ་རྒྱུ་དེ་གནད་ཆེན་ཡིན། ད་ལྟའི་ཚོར་བ་དང་འདུ་ཤེས་མ་ཞིག་པའི་ཚེ་ན། ཟག་བཅས་ཀྱི་དགེ་བའམ་ཀུན་རྫོབ་དམིགས་བཅས་བསོད་ནམས་ཀྱི་ཚོགས་བསགས། དེ་ནས་སྣང་བ་འདི་འགྱུར་ནས་བདེ་སྡུག་གི་ཚོར་བས་ཕན་གནོད་མེད་ས་རུ་ཐོན་སོང་དུས། ཟག་མེད་ཡེ་ཤེས་ཀྱི་ཚོགས་བསགས་ཏེ། དེ་དུས་དམིགས་བཅས་ཀྱི་ཚོགས་བསགས་རྒྱུ་བསྐྱུར་ནའང་ཆོག་གོ །དེ་ལྟ་བུའི་ཚོགས་གཉིས་སྟབས་གཅིག་ཏུ་རྫོགས་པའི་མྱུར་ལམ་ཟབ་མོ་ཁྲེགས་ཆོད་ཐོད་རྒལ་ཟུང་འབྲེལ་དུ་སྒོམ་པའི་གནས་སྐབས་འདིར། འོད་གསལ་རིག་པའི་ཡེ་ཤེས་སྙིང་དབུས་ནས་སད་ཡོང་དུས། ཉི་མ་འབུམ་གྱི་གཟི་བྱིན་གྱིས་འགྲན་དུ་མེད་པ། དེའི་གསལ་དྭངས་ངར་དང་བཅས་པའི་ཟིལ་ཤུགས་དེས། ཁང་སྟོང་ནང་གི་ལོ་སྟོང་དག་གི་མུན་པ་དེ། སྒྲོན་མེ་གཅིག་གིས་སྐད་ཅིག་ལ་སེལ་བ་བཞིན་དུ། ཤེས་རབ་ཀྱི་རྩལ་ཁ་རང་ཤུགས་ཀྱིས་འབར་ཏེ། དེ་དང་མཉམ་དུ་ཕྱོགས་རིས་མེད་པའི་དད་པ། ཉེ་རིང་མེད་པའི་སྙིང་རྗེ་ཤུགས་འབྱུང་དུ་ཤར་ཡོང་བ་ཡིན་ནོ། །དེ་དུས་ལྟ་སྒོམ་སྤྱོད་པའི་གོལ་འཕྱུགས་མེད་པར་འབྲས་བུ་རེ་དོགས་བྲལ་བའི་རང་སར་ཕྱིན་པ། མ་འབད་ཀྱང་ངང་གིས་འབྱུང་བར་འགྱུར་རོ། །འུ་ཅག་གིས་དེ་རིང་ཕྱི་དྲོའི་ཁྲིད་སྦྱང་དང་། སང་ཉིན་གྱི་སྔ་ཕྱི་དྲོ་གཉིས་ཀྱི་ཁྲིད་སྦྱང་རྣམས་མུ་མཐུད་དེ་ཁྲེགས་ཆོད་ཀྱི་རིག་ངོ་སྐྱོང་བའི་ཁྲིད་སྦྱང་བྱེད་དགོས། ཁྲིད་སྦྱང་མཛད་ལུགས་ཁ་རྩང་ཞུས་པ་ལྟར་དུ་སྤྱོད་པས་བོགས་འདོན་གྱི་ཚུལ་དུ་རྣམ་པ་ཚོ་རང་རང་གིས་གར་བདེའི་ས་ཆ་རེར་ཕེབས་ཏེ། སྒེར་གྱིས་ཁྲིད་སྦྱང་མཛད་དགོས། འདི་ཕན་ཆོད་ཀྱི་ཁྲིད་སྦྱང་ཐམས་ཅད་ཐོད་རྒལ་གྱི་ཁྲིད་སྦྱང་མཛད་རྒྱུ་ཡིན། ཇི་ལྟར་དགོས་ཚུལ་རིམ་པས་ཞུས་ན་ཆོག་གི ཐེངས་འདིའི་ཁྲིད་སྦྱང་ཚང་མ། རྗེས་མར་རང་གི་ཁྲིད་སྦྱང་ཐུན་དུ་ཇི་ལྟར་བཅད་ཚུལ་གྱི་ཕྱོགས་སྟོན་ཞིག་ཀྱང་རེད་འགྲོ་བ་རེད། ཁྱད་པར་དུ་ནངས་དགོང་གི་སྲོད་དང་ཐོ་རངས་ཀྱི་ཐུན་དེ་ཚོ་རྣལ་འབྱོར་རིག་པ་དྭངས་བའི་དུས་རེད། དེས་ན་ཐུན་གྱི་ཁྱད་པར་དང་བསྟུན་ཏེ། རིགས་མཐུན་གྱི་ཁྲིད་སྦྱང་ངོ་མའི་ཕྱག་བཞེས་ལྟར་དུ་ཉམས་ལེན་གྱི་གནད་ལ་འཛིན་པར་མཛད་དགོས་པ་རེད། དེ་ལྟར་ཆོས་འཆད་ཉན་བགྱིས་པའི་སོགས་ནས་བསྔོ་སྨོན་གསུངས་སོ།།

ཉིན་གཉིས་པའི་ཆོས་ཁྲིད།

ཐར་བ་འདོད་པའི་གང་ཟག་ཅིག་གིས། ཐོག་མར་བློ་ལྡོག་རྣམ་བཞིས་བློ་སྦྱོང་སྟེ་འཁོར་བའི་གནས་ནས་ངེས་པར་འབྱུང་བའི་ཀུན་སློང་སྐྱེས། ཐར་བའི་ཕན་ཡོན་ཤེས་པའི་སྟེང་ནས། ལམ་སྟོན་གྱི་བཤེས་གཉེན་དམ་པ་ཞིག་བཙལ་བའི་འཕྲོར། ཀུན་མཁྱེན་ཆེན་པོས། དེ་ལྟར་དགེ་བའི་བཤེས་གཉེན་ལེགས་བསྟེན་ནས། །ཐར་བའི་ལམ་ལ་རིམ་གྱིས་འཇུག་པར་བྱ། །ཞེས་གསུངས་ན། དེ་ཡང་དཔེ་ཞིག་བླང་ན། མཁར་ཕོ་བྲང་ཞིག་གི་ཡང་ཐོག་ཏུ་འཛེག་དགོས་ན། དང་པོ་སྒོ་ནས་ཡར་ཞུགས། དེ་ནས་སྐས་ནས་བརྒྱུད། དེ་ཡང་སྐས་ཐེམ་འོག་མ་ནས་ཡར་རིམ་བགྲོད་ཀྱིས་བརྒྱུད་དགོས་པ་ལྟར། སངས་རྒྱས་བཅོམ་ལྡན་འདས་ཉིད་ཀྱིས་མདོའི་ནང་དུའང་། ཇི་ལྟར་སྐས་ཀྱི་རིམ་པ་བཞིན། །ང་ཡི་བསྟན་པ་ཟབ་མོར་ཡང་། །རིམ་གྱིས་བསླབ་ཅིང་ནན་ཏན་བྱ། །ཐོད་རྒལ་མ་ཡིན་མཐར་ཆགས་སོ། །གསུངས་པ་དང་། ད་དུང་དེའི་འཕྲོར། བྱིས་པ་ཆུང་ཆུང་ནས་རིམ་གྱིས་ན་གཞོན་དང་དར་མའི་ལུས་ཚད་རྫོགས་དགོས་པ་ལྟར་བརྒྱུད་དགོས་གསུངས། དེ་བཞིན་ཁོང་གི་ཆོས་ཀྱང་དང་པོའི་འཇུག་རིམ་ནས་ཡོངས་སུ་རྫོགས་པའི་བར་དུ་གཏུག་དགོས་གསུང་རྒྱུའི་རིམ་པ་མང་པོ་ཞིག་གསུངས་ཡོད་པས་ན་བརྩེགས་མཆོངས་བརྒྱབ་ནས་འགྲོ་ས་ཞིག་མེད་ལ། མཁར་ཕོ་བྲང་གི་ཡང་ཐོག་ལ་འགྲོ་དགོས་ན་རིམ་པ་བཞིན་བརྒྱུད་དགོས་པ་དང་འདྲ་བར་གསུངས་ན། རིམ་གྱིས་བསླབ་དགོས་པས་མི་ཚད་སྡོམ་པ་འོག་མ་དག་གལ་མི་ཆེ་སྙམ་པའི་ཁྲལ་སོད་ཙམ་གྱིས་ཀྱང་མི་ཆོག་པར་ནན་ཏན་གྱིས་ཤིག་གསུངས་པ་ཡིན། དེ་ཅིའི་ཕྱིར་མི་ཆོག་སྙམ་ན། འོག་མ་མེད་ན་གོང་མའང་མི་འགྲུབ་ཅིང་མེད་པ། མི་ཞིག་གི་ལུས་པོ་ཆ་ཚང་ཞིག་ལ་ཡན་ལག་དང་ཉིང་ལག་གཅིག་ཀྱང་ཆད་མི་ཉན་པ་བཞིན་དང་། གྱང་མེད་ན་རི་མོ་འབྲི་ཐབས་མེད་པ་ལྟ་བུ་ཡིན། དེས་ན་ལམ་ལོག་པ་ལས་ལྡོག་པའི་ལམ་ཐམས་ཅད་ཀྱི་རྨང་གཞི་སྐྱབས་འགྲོ། མཁར་སྐྱ་རིང་ཞིག་བརྩིགས་དགོས་ན་དེའི་རྨིང་རྡོ་བཞག་པ་འདྲ་བོ་ཡིན་ན། སྡོམ་པ་རྣམ་དག་གིས་རྒྱུད་མ་བསྡམས་པ་ཞིག་ལ་ཐར་ལམ་ཡང་དག་ཡོད་པ་མ་རེད། སྡོམ་པས་རྒྱུད་སྡོམ་པ་ལ་སྐྱབས་འགྲོ་རྩོམ་བྱེད་དུ་ངེས་པར་དགོས་ཏེ། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་གསུངས་པས་སོ། །ད་འདི་ལྟར་གསུངས་དུས། ང་རང་ཚོའི་ཁ་སྐད་ལྟར་བཤད་ན། རབ་བྱུང་ལ་སྡོམ་པ་ཟེར་བ་ཞིག་དགོས་པ་རེད་མ་གཏོགས། སྔགས་པ་ཕོ་མོ་ལ་སྡོམ་པ་ཟེར་རྒྱུ་ཞིག་ཅང་དགོས་རྒྱུ་ཨེ་རེད་གོ་བསམ་མཁན་ཕལ་ཆེར་ཡོད་རྒྱུ་མ་རེད་དེ། ལམ་ཐམས་ཅད་གསུངས་པ་དེ། མདོ་སྔགས་ཐམས་ཅད་གསུངས་པ་ཡིན་དུས། སོ་བྱང་སྔགས་གསུམ་གྱི་སྡོམ་པའི་ནང་ནས་མཐོ་ཤོས་དེ་སྔགས་སྡོམ་རེད། སྔགས་སྡོམ་ལ་སྡོམ་གསུམ་ཡར་ལྡན་དུ་རྫོགས་དགོས་པས་མི་ཚད། དམ་ཚིག་དང་སྡོམ་པ་སྔགས་ཀྱི་བསླབ་པ་ཐམས་ཅད་ཀྱི་གཞི་རྟེན་ཡང་སྐྱབས་འགྲོ་ཡིན། སྐྱབས་འགྲོ་རྩོམ་བྱེད་དུ་མ་སོང་བའི་དགེ་བའི་སྡོམ་པ་རྣམ་དག་ཅིག་མེད་པ་དེ། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་པ་འདིས་ཀྱང་ཤེས་སོ། །གཞི་ཚུལ་ཁྲིམས་ནི་ཡོན་ཏན་ཀུན་གྱི་རྟེན་གཞི་ས་ལྟ་བུ་ཞིག་ཡིན་པས་ན། བཅོམ་ལྡན་འདས་ཀྱིས་ཐོག་མར་དམ་ཆོས་འདུལ་བ་གསུངས་དུས་སོ་ཐར་རིགས་བདུན་རབ་བྱུང་དང་ཁྱིམ་པ་གཉིས་ཀར་གསུངས་པ་རེད། དེའི་ནང་ན་ཁྱིམ་པའི་དགེ་བསྙེན་ལ་སྡོམ་པ་གཏན་ཁྲིམས་དང་དུས་ཁྲིམས་གཉིས་ཀར་གསུངས་ཡོད། སྤྱིར་སྔགས་པ་ཟེར་ན་ཁྱིམ་ཐབ་པ་ཞིག་ལ་གོ་དགོས་པས་ཁྱབ་པ་ཡོད་པ་མ་རེད། སྔགས་པ་དྲ་མའམ་བཟང་ཤོས་དེ་ནི་ད་རུང་དགེ་སློང་རེད། གསུམ་གྱི་མཆོག་ནི་དགེ་སློང་ཡིན། །ཞེས་དཔལ་ལྡན་དུས་ཀྱི་འཁོར་ལོར་དངོས་སུ་གསུངས་ཡོད་པ་འདི་བས་ལྷག་གི་ལུང་ཞིག་མི་དགོས། རྒྱུ་མཚན་དེ་དག་ལ་བརྟེན་ནས། རང་རེས་ཀྱང་ཆོས་ར་ནམ་བཟུང་། ཆོས་འགོ་ཞིག་ནམ་བསྡུས་ཐམས་ཅད་ལ། སོ་བྱང་སྔགས་གསུམ་གྱི་རིམ་པ་མ་ནོར་ཞིང་ཆ་ཚང་བར་བྱས་པའི་ཆོས་བརྒྱུད་འདིའི་ཕྱག་སྲོལ་བཞིན་དུ། ཐེངས་འདིར་མཚོན་ན་ཡང་། དོ་ཞག་ཐོག་མ་ཉིད་ནས་སྐྱབས་སྡོམ་གྱིས་གཞི་བྱས་པའི་སོ་ཐར་དགེ་བསྙེན་གྱི་སྡོམ་པ་སྦྱིན་རྒྱུས་དབུ་བཟུང་། དེའི་མཚམས་ནས་བྱང་ཆུབ་སེམས་སྡོམ་འབོགས་པར་བྱས། སྔགས་ཀྱི་འཇུག་སྒོ་སྨིན་བྱེད་ཀྱི་དབང་ནས་གྲོལ་བྱེད་ཁྲིད་ཀྱི་རིམ་པ་ལ་འཇུག་བཞིན་པ་ཡིན་ན། ཕྱི་བ་ནང་བ་སྐྱབས་འགྲོའི་ཁྱད་གསུངས་པས་ན། སྐྱབས་སུ་མ་སོང་བ་ཞིག་ཡིན་ན་ནི། ནང་བ་སངས་རྒྱས་པའི་སྐྱབས་འོག་ཏུ་མཆིས་པའི་སློབ་མའི་གྲལ་ཙམ་དུའང་ཚུད་མེད་པས་ན་སྐྱབས་ཡུལ་དགེ་འདུན་པའི་གྲལ་དུ་ཇི་ལྟར་ཚུད། དེས་ན་སྐྱབས་སུ་འགྲོ་བ་འདིའང་ཆོ་ག་དངོས་ཀྱིས་སྐྱབས་སུ་འགྲོ་དགོས། འདི་ལ་ཡོངས་གྲགས་སྐྱབས་གསུམ་འཛིན་པའི་དགེ་བསྙེན་ཞེས་པའི་ཐ་སྙད་ཅིག་ཡོད་ཀྱང་གཙོ་བོ་སྐྱབས་འགྲོའི་རྨང་གཞིའམ་རྩོམ་གཞི་བྱས་པའི་དགེ་བསྙེན་གྱི་སྡོམ་པ་ངོ་མ་དེ་ལེན་དགོས་པ་ཐམས་ཅད་ཀྱིས་མཁྱེན་བཞིན་པ་ལྟར་དུ་ཡིན་པས། འདིར་ཡོད་ཚང་མ་རྟེན་དགེ་ཚུལ་སློང་དང་དགེ་བསྙེན་གང་ཡིན་ལ་མ་ལྟོས་པའི་སྔགས་པ་རྐྱང་རྐྱང་རེད། བོད་ཀྱི་རབ་བྱུང་སྔགས་ལ་མ་ཞུགས་པ་ཞིག་ཕལ་ཆེར་ཡོད་རྒྱུ་མ་རེད། ཆོས་བརྒྱུད་གསར་རྙིང་ཚང་མ་མདོ་སྔགས་གཉིས་ལྡན་གྱི་རང་ལུགས་འཛིན་མཁན་ཤ་སྟག་ཡིན་པས་ན་སྔགས་པ་རེད། དེ་ལྟར་ལམ་ཐམས་ཅད་ཀྱི་སྒོ་སྐྱབས་འགྲོས་ཕྱེས་པ་རེད་ལ། སྐྱབས་འགྲོའི་སྒོ་གང་གིས་ཕྱེ་ན་དད་པས་ཕྱེ། སྤྱིར་སྐྱབས་འགྲོ་དེ་རང་གཞན་འཁོར་བའི་སྡུག་བསྔལ་གྱིས་འཇིགས་ནས་ཡུལ་ཁྱད་པར་ཅན་ལ་སྐྱབས་སུ་འཛིན་པར་ཁས་བླངས་པ་ཞིག་ཡིན་ན། ཐུན་མོང་གི་ལུགས་ལ་འཇིགས་དད་གཉིས་ཀ་ཟེར་བ་ལ་ཐུན་མིན་གྱི་ལུགས་ལ་སྲིད་ཞི་གཉིས་ཀའི་མཐའ་ལ་འཇིགས་ནས་སྐྱབས་སུ་འགྲོ་བ་ཡིན། དང་འདོད་ཡིད་ཆེས་ཀྱི་དད་པ་ཡོད་པས་མི་ཚད་ཕྱིར་མི་ལྡོག་པའི་དད་པ་བརྟན་པོ་ཞིག་དང་པོ་ནས་ཡོད་དགོས། དད་པ་ཡོད་ན་རྒན་མོ་ཁྱི་སོ་ཡིས་སངས་རྒྱས་པ་དང་ནི། དད་པ་མེད་ན་སངས་རྒྱས་སྐུ་དངོས་ཀྱི་མདུན་ནས་དགེ་སློང་ལེགས་སྐར་དང་ལྷས་སྦྱིན་རྣམས་ངན་སོང་དུ་ལྟུང་བར་ལྡོག་རྒྱུ་མེད་པ་དེ་ཚོས་ཤེས་ཐུབ་པ་ཡིན། དད་པ་དེ་ཡང་སྐྱབས་ཡུལ་གྱི་ཡོན་ཏན་དྲན་པ་ལས་འབྱུང་བ་ཡིན་པས། དང་པོ་སྐྱབས་ཡུལ་ངོས་ཟིན་དགོས། དེ་ཟེར་ན་ཅི་ཟེར་དཀོན་མཆོག་གསུམ་ངོས་ལོས་ཟིན། སྐྱབས་འགྲོའི་ངག་འདོན་བཞི་སྐོར་མ་བློ་ལ་མི་འགྲོ་མཁན་སུ་ཡོད་བསམ་རྒྱུ་ཞིག་ཡིན་ན་ཡང་། དེ་ཡང་སླ་མོ་ཞིག་མིན། སྐྱབས་འགྲོ་མཐར་ཕྱིན་པ་ཞིག་ཤེས་དུས་ཐུབ་པའི་བསྟན་པ་མཐའ་དག་ལ་ཆགས་ཐོགས་མེད་སོང་བ་རེད། གང་ལ་གང་འཚམ་གྱི་སྐྱབས་ཡུལ་ངོས་ཟིན། སྐྱབས་སུ་འགྲོ་ལུགས་དང་། སྐྱབས་འགྲོའི་བསླབ་བྱ་རགས་རིམ་ཞིག་མ་ཤེས་དུས། དགོན་པའི་དགོན་དཔོན་གྱིས་མི་ཚད་བླ་ཆེན་གདུགས་སུམ་བརྩེགས་ཕུབ་པ་ཞིག་ཡིན་ཡང་དོན་དུ་ནང་བ་སངས་རྒྱས་པའི་ཁྱུ་རུ་ཚུད་ཡོད་མེད་ཐེ་ཚོམ་གྱི་གཞི་ཡིན། སྐྱེས་བུ་གསུམ་གྱི་རིམ་པས་ཞིབ་པར་ཕྱེ་ཡོང་དུས། སྐྱབས་སུ་འགྲོ་བའི་བསམ་པའི་ཁྱད་པར། དུས་ཀྱི་ཁྱད་པར། ཡུལ་གྱི་ཁྱད་པར་ལ་སོགས་པ་ཡོད། དེའི་ནང་གི་སྐྱེས་བུ་ཆེན་པོ་ཐེག་ཆེན་གྱི་ལམ་ལ་ཞུགས་པའི་གང་ཟག་ཞིག་གི་དབང་དུ་བཏང་། ཁྱད་པར་སྐབས་དོན་ཐུན་མིན་ནང་གི་སྔོན་འགྲོས་ཁྱད་པར་དུ་བྱས་པའི་སྐྱབས་འགྲོ་ལ་བསམ་ན། སྦྱོར་བ་སེམས་བསྐྱེད་ཀྱི་བསམ་པ་ཁྱད་པར་ཅན་གྱིས་གཞན་དོན་དུ་རྫོགས་པའི་སངས་རྒྱས་ཐོབ་པའི་ཆེད་དུ། དུས་ཇི་སྲིད་བྱང་ཆུབ་སྙིང་པོ་མ་ཐོབ་ཀྱི་བར་དུ། ཡུལ་གྱི་ཁྱད་པར་གྱི་དབང་དུ་བྱས་ན་ཕྱི་ནང་གསང་བ་གསུམ་ལས། ཕྱིའི་སྐྱབས་ཡུལ་སྤྱིར་བཏང་གིས་ཁས་ལེན་རྒྱུའི་སྤངས་རྟོགས་མཐར་ཕྱིན་སྐུ་བཞི་ཡེ་ཤེས་ལྔ་ལྡན་གྱི་སངས་རྒྱས་དང་ཐེག་པ་ཆེན་པོའི་ལུང་རྟོགས་ཀྱི་ཆོས། སར་གནས་ཀྱི་བྱང་སེམས་འཕགས་པའི་དགེ་འདུན་ཏེ་ཐུན་མོང་གི་དཀོན་མཆོག་གསུམ་ཡིན་ལ། ཐུན་མིན་ནང་གི་སྐྱབས་ཡུལ་དེ་གང་ཞེ་ན། བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། ཕྲིན་ལས་ཀྱི་རྩ་བ་མཁའ་འགྲོ་སྟེ་རྩ་བ་གསུམ་དང་ནི། དེ་ནས་ཐབས་མཆོག་རྡོ་རྗེ་སྙིང་པོའི་སྐྱབས་ཡུལ་གནས་པ་རྩ། གཡོ་བ་རླུང་། བཀོད་པ་བྱང་ཆུབ་ཀྱི་སེམས་དང་གསུམ། མཐར་ཐུག་བསླུ་མེད་གནས་ལུགས་རྡོ་རྗེའི་སྐྱབས་ཡུལ་སྙིང་ཐིག་སྔོན་འགྲོའི་ངག་འདོན་ང་ཚོས་ནངས་རེ་བཞིན་འདོན་གྱིན་ཡོད་པའི་ནང་བཞིན་དུ། རྩ་རླུང་ཐིག་ལེ་གསུངས་སའི་མཚམས་ནས་རང་བཞིན་བྱང་ཆུབ་སེམས། ངོ་བོ་རང་བཞིན་ཐུགས་རྗེའི་དཀྱིལ་འཁོར་ཟེར་གྱིན་ཡོད་ཡིན་ན། ངོ་བོ་རང་བཞིན་ཐུགས་རྗེའི་དཀྱིལ་འཁོར་གྱི་བདག་ཉིད་དེ། རྫོགས་པ་ཆེན་པོའི་སྐབས་ཀྱི་སྐྱབས་ཡུལ་ཉག་ཅིག སྐྱབས་ཡུལ་ཐམས་ཅད་གཅིག་ལ་འདུས་པ་དེ་ཡིན། རང་བྱུང་བྱང་ཆུབ་ཀྱི་སེམས་འོད་གསལ་བའི་ཡེ་ཤེས། མདོ་ལྟར་དུ་བཤད་ན་བདེ་གཤེགས་སྙིང་པོ། སྔགས་ལྟར་ན་རང་བྱུང་གི་ཡེ་ཤེས། ཡང་གཅིག་ཏུ་བྱས་ན་ཡེ་ཤེས་ཐིག་ལེ་ཉག་གཅིག གཉིས་སུ་ཕྱེ་ན་ཀ་དག་སྟོང་པའི་ཡེ་ཤེས་དང་ལྷུན་གྲུབ་སྣང་བའི་འོད་གསལ། གསུམ་དུ་དབྱེ་ན། ངོ་བོ་རང་བཞིན་ཐུགས་རྗེ་སྟོང་གསལ་འགགས་མེད་ཀྱི་ཡེ་ཤེས་དང་གསུམ་ཡིན་ནོ། །དུས་ཀྱི་ཁྱད་པར་གྱི་ཐོག་ནས་བཤད་ན། ངོ་བོ་ཡེ་དག་ལ་རང་བཞིན་ཡོངས་དག་གིས་གཞིའི་གནས་ལུགས་མངོན་དུ་གྱུར་ཏེ། གཞི་འབྲས་དབྱེར་མེད་དུ་སངས་མ་རྒྱས་ཀྱི་བར་དུ་སྐྱབས་སུ་འགྲོ་བ། སྐྱབས་ཡུལ་ཕྱི་ན་མི་བཞུགས་ནང་ན་བཞུགས། ནང་རང་གི་སེམས་ཉིད་འོད་གསལ་བའི་ཡེ་ཤེས་རིག་པ་བདེ་བར་གཤེགས་པའི་སྙིང་པོ་འོད་གསལ་ཐིག་ལེ་ཉག་ཅིག་འདི་ལ། མཆོག་གསུམ་རྩ་གསུམ་ལ་སོགས་པའི་སྐྱབས་ཡུལ་ཐམས་ཅད་ཚང་བ་དེ། ཁྲེགས་ཆོད་རིག་པ་ངོ་སྤྲོད་ཀྱི་སྐབས་སུ་བཤད་པ་ལྟར་དང་། ད་དུང་ཐོད་རྒལ་དུ་ཡང་འཆད་འགྱུར་ཡིན་པ་ལྟར་དུ་ཡིན། སྐྱབས་འགྲོ་འདི་ལ་རྒྱུའི་སྐྱབས་འགྲོ་དང་། འབྲས་བུའི་སྐྱབས་འགྲོ། དེའི་ནང་གསེས་ཀྱི་དབྱེ་བ་དང་འདོད་ཚུལ་ཡང་མང་པོ་ཡོད་མོད། སྤྲོས་མེད་ཉམས་ལེན་སྒོམ་པ་ལ་བརྩོན་པའི་རྣལ་འབྱོར་པས་བླ་མ་མཆོག་གསུམ་རྩ་གསུམ་ཀུན་འདུས་ཀྱི་ངོ་བོར་ཤེས་རྒྱུ་དེར་གནད་འདུས་པ་ཡིན་པས། དེ་ཡང་བླ་མའི་ཐུགས་ཡེ་ཤེས་ཆེན་པོ། དེའི་རྣམ་འགྱུར་སྐུ་ལྟར་དུ་ཤར། གསུང་ལྟར་དུ་གྲགས། ཐུགས་ལྟར་དུ་འཕྲོ་བ་ཡིན། ཆོས་སྐུའི་རྣམ་འགྱུར་གཟུགས་སྐུ་དང་ནི། གཟུགས་སྐུའི་ངོ་བོ་ཆོས་སྐུ་ལས་མ་འདས་པ་སྟེ། དེ་ཡང་དབྱེར་མི་ཕྱེད་པ་རྣམ་གསུམ་དབྱེར་མེད་ཟུང་འཇུག་ཆེན་པོ་ལ་རྡོ་རྗེ་འཆང་ཞུ་བ་ཡིན། ཡེ་ནས་འཁྲུལ་མ་མྱོང་བའི་རང་རིག་ཆོས་སྐུའི་རང་ཞལ་གདོད་མའི་མགོན་པོ་ཀུན་ཏུ་བཟང་པོའི་གོ་འཕང་ཡང་དེ་ལས་གཞན་དུ་མ་གྱུར་བ་ཞིག་ཡིན་ནོ། །སྐྱབས་སུ་འགྲོ་ཚུལ་ལ་བསམ་ན། དོན་གྱི་ཐོག་ནས་སྐྱབས་སུ་འགྲོ་བྱ་དང་འགྲོ་ཡུལ་འགྲོ་བའི་བྱེད་པ་དང་བཅས་པ་མི་དམིགས་པ། མི་དམིགས་ནམ་མཁའ་ལྟ་བུའི་ཆོས་ཉིད་སྤྲོས་བྲལ་རང་ངོ་ཤེས་པས་དོན་དམ་དམིགས་མེད་འབྲས་བུའི་སྒོ་ནས་སྐྱབས་སུ་འགྲོ་རྒྱུ་རེད། ལས་དང་པོ་བས། རྟོགས་པས་དེའི་སྟེང་མ་ཕྱིན་བར་དུ་ཀུན་རྫོབ་དམིགས་བཅས་རྒྱུའི་སྐྱབས་འགྲོ་ནས་ཆོ་ག་མཐོང་བརྒྱུད་ལྟར་དུ་ཚུལ་བཞིན་སྐྱབས་སུ་འགྲོ་བ་གནད་ཡིན་ནོ། །སྐྱབས་འགྲོའི་བསླབ་བྱའང་ཐུན་མོང་དང་ཐུན་མིན་གྱི་ལུགས་ལྟར་བསྲུང་དགོས་ལ་འདིའི་གཏོང་ཚུལ་དང་། སླར་ཇི་ལྟར་ལེན་ཚུལ་ལ་སོགས་པ་ཞིབ་པར་གཞུང་ལས་མཁྱེན་གནང་རྒྱུ་དང་ནི། སྐྱབས་སུ་སོང་བའི་ཕན་ཡོན་ལ་བསམ་ན། སྐྱབས་སོང་བསོད་ནམས་གཟུགས་མཆིས་ན། །ནམ་མཁའ་འདི་ཡང་སྣོད་དུ་ཆུང་། །ཞེས་གསུངས་ཡོད་པ་རེད། འཇིག་རྟེན་སྲིད་པ་གསུམ་ན་ལྷ་དང་བཅས་པའི་འགྲོ་བ་ཐམས་ཅད་ཀྱི་མགོན་དང་སྐྱབས་མགོན་མཆོག་ཏུ་གྱུར་པ་དེ་དཀོན་མཆོག་གསུམ་ཡིན་ལ། དཀོན་མཆོག་གསུམ་གྱིས་ཉེས་པ་ཐམས་ཅད་ལས་སྐྱོབ་པ་དང་ཞི་བར་འདྲེན་པར་བྱེད་པའི་དེད་དཔོན་མཛད་ཀྱིན་ཡོད་པ་དེས་ན་ཡིད་ཁྱེད་ཤེས་ཀྱི་དད་པས་ཉིན་མཚན་དུས་དྲུག་ཏུ་དཀོན་མཆོག་གསུམ་ལ་ཕྱག་འཚལ་བ། མཆོད་པ་འབུལ་བ། སྡིག་པ་བཤགས་པ་ལ་སོགས་བསགས་སྦྱང་གི་གནད་བསྡུས་པ་ཡན་ལག་བདུན་པ་སོགས་ཀྱི་སྒོ་ནས། དགེ་བའི་རྩ་བ་དངོས་གཞི་དམིགས་མེད་དང་འབྲེལ་བས་བསགས་ཏེ། རྗེས་དཀོན་མཆོག་མཆོད་པའི་དགེ་རྩ་ཇི་སྙེད་འཁོར་གསུམ་དམིགས་མཐའ་དང་བྲལ་བས་མ་གྱུར་སེམས་ཅན་ཐམས་ཅད་བྱང་ཆུབ་ཆེན་པོ་ཐོབ་པའི་དོན་དུ། བསྔོ་བ་དུག་མེད་ཀྱིས་རྩིས་ཟིན་པར་བྱས་ནས། དུས་རྒྱུན་དུ་དཀོན་མཆོག་རྗེས་དྲན་སོགས་བཏོན་ན། སྡིག་ཟད་དགེ་བ་འཕེལ་ཏེ་མྱུར་དུ་བྱང་ཆུབ་འགྲུབ་པའི་རྒྱུ་བྱེད་དོ། །དེ་ལྟ་བུའི་ཐུན་མོང་དང་ཐུན་མིན་གྱི་སྐྱབས་འགྲོའི་འགྲོ་ཕྱོགས་ཙམ་བསྟན་ནས། སྐབས་བབས་གང་ཞིག་འཆད་པར་བྱ་བ་འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཆར་འབྱེད་པའི་ལྡེའུ་མིག་ཅེས་བྱ་བའི་མན་ངག་གི་ཡི་གེ རྟོགས་པའི་འདྲ་འབག ཞབས་དཀར་བ་ཚོགས་དྲུག་རང་གྲོལ་གྱིས་ཕྱི་རབས་རྗེས་འཇུག་གི་གང་ཟག་ལ་དད་པའི་རྟེན། བསོད་ནམས་ཀྱི་ཞིང་། ཐར་བའི་ལམ་སྟོན་དུ་གསུང་ཆོས་སྐུའི་རིང་བསྲེལ་གྱི་ཕུང་པོར་བཞག་པ་འདི་ཉིད་ཀྱི་བཤད་བྱའི་ཡན་ལག་བཤད་པ་སོང་ནས། བཤད་བྱ་དངོས་བཤད་པའི་སྐབས་ཀྱིའང་ཐོག་མར་དགེ་བ་ཀླད་དོན་སོང་། བར་དུ་དགེ་བ་གཞུང་དོན་ལས་ཀྱང་། ཐེག་དགུའི་ཡང་རྩེ་རྫོགས་པ་ཆེན་པོའི་ཆོས་འདི་ཐེག་པ་འོག་མ་བརྒྱད་ལས་གནད་རྣམ་པ་བདུན་གྱིས་འཕགས་ཚུལ། དེ་ལ་ཡང་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་ཏེ་གཉིས་སུ་ཡོད་པ་ལས་སྐབས་ཀྱི་བསྟན་བྱ་ཐོད་རྒལ་དེ་ཉིད་ཁྲེགས་ཆོད་ལས་ཀྱང་ཁྱད་པར་བདུན་གྱིས་འཕགས་ཚུལ་སོགས་བསྟན་ནས། དེ་ནས་ཐོད་རྒལ་ལམ་གྱི་ཉམས་ལེན་གྱི་ཁྲིད་རིམ་ཉིད་རྣམ་པ་བདུན་གྱི་སྤྱི་ཆིངས་ཀྱིས་རྣམ་པར་བསྟན་ན། སྤྱི་ཆིངས་དང་པོ་སྒོ་གསུམ་བྱ་བ་དགུ་ཕྲུགས་སུ་གཏོང་ཚུལ་དང་། ཁྲིད་རིམ་གཉིས་པ་སྒོ་གསུམ་གྱི་གནད་གཟིར་ཚུལ་དང་གཉིས་གོང་དུ་སོང་ནས། ད་ཁྲིད་རིམ་གསུམ་པ་སྒོ་ཡུལ་རླུང་རིག་གི་གནད་གསུམ་གྱིས་ཡེ་ཤེས་མངོན་དུ་གཏན་ལ་འབེབས་ཚུལ་བསྟན་པ་ལས་དང་པོ་གཉིས་སོང་སྟེ། དེ་རིང་གནད་གསུམ་གྱིས་ཡེ་ཤེས་གཏན་ལ་འབེབས་པའི་སྐབས་ནས།

༼༣ གསུམ་པ་རླུང་རིག་གི་གནད་བསྟན་པ།

དེ་ལ་རླུང་རིག་གི་གནད་ཐུན་མོང་དུ་མདོར་བསྟན་པ་དང་། རླུང་རིག་གི་གནད་སོ་སོར་རྒྱས་པར་བཤད་པ་གཉིས་ལས།

དང་པོ་རླུང་རིག་གི་གནད་ཐུན་མོང་དུ་མདོར་བསྟན་པ།

གསུམ་པ་རླུང་རིག་གནད་ནི་དལ་བ་ལ།།

བརྟེན་ནས་རིག་པ་བཙོན་དུ་བཟུང་བར་བྱ།།

ཞེས་མདོར་བསྟན། རླུང་རིག་གི་གནད་སོ་སོར་རྒྱས་པར་བཤད་པ་ལ་རླུང་གནད་དང་རིག་གནད་གཉིས་ལས།

དང་པོ་རླུང་གནད་བཤད་པ།

རླུང་གནད་སྣ་ནས་མི་གཏོང་ཁ་ནས་གཏོང་།།

སོ་དང་མཆུ་གཉིས་བག་ཙམ་མ་རེག་པར།།

ཤིན་ཏུ་དལ་བུས་འབྱུང་འཇུག་བྱེད་པ་ནི།།

ཐེག་པ་འདི་ཡི་རང་ལུགས་ཡིན་པའི་ཕྱིར།།

འདི་ཉིད་རླུང་གནད་གལ་པོ་ཆེ་ཞིག་ཡིན།།

ཞེས་གསུངས་ཏེ། རླུང་དལ་བ་ལ་བརྟེན་སྟེ་གདངས་གཞི་ཐིམ་གྱི་འགྲོས་དང་བསླབ་ན། ནང་ཀ་དག་གི་རིག་པ། ཤེས་རབ་རང་བྱུང་གི་སྒྲོན་མའི་ངོ་བོར་ཇེ་བརྟན་དུ་འགྲོ་བའི་རིམ་པ་བཞིན། ཕྱིའི་རིག་པའམ་རིག་གདངས་རྡོ་རྗེ་ལུ་གུ་རྒྱུད་དབྱིངས་ཀྱི་ཐིག་ལེར་བཙོན་དུ་ཚུད་པ་དེ་ཉིད་འགུལ་འཕྲིག་མེད་པར་བརྟན་པར་བཟུང་བར་བྱ་ཞེས་གསུངས་པས། ཐོད་རྒལ་གྱི་སྐབས་འདིར་རིག་པ་ཞེས་གསུངས་པའི་ཚིག་འདི། སྐབས་ཐོབ་ཀྱི་གོ་བས་ཤེས་རབ་རང་བྱུང་གི་སྒྲོན་མའི་ངོ་བོ་དང་། གདངས་དང་རྩལ་ཏེ་གསུམ་གྱི་ནང་ནས་གང་ལ་གསུངས་པའི་དབྱེ་བ་འབྱེད་ཐུབ་པ་དེ་གནད་ཀྱི་མིག་ཐུར་ཞིག་ཡིན། རྫོགས་ཆེན་གྱི་སྐབས་སྤྱི་དང་ཁྱད་པར་ཐོད་རྒལ་ལ་རླུང་གནད་སྣ་ནས་མི་གཏོང་ཁ་ནས་གཏོང་། ཁ་ནས་གཏོང་ཚུལ་ཡང་སོ་མཆུ་བག་ཙམ་མམ་ཅུང་ཟད་མ་རེག་པའི་བར་ནས་རླུང་འབྱིན་འཇུག་དལ་མོ་བྱེད་དགོས་གསུངས་པ་ཡིན། འདི་ཐེག་པ་འདིའི་གཞན་ལ་མེད་པའི་རང་ལུགས། འདིའི་རླུང་གནད་འདི་གལ་ཆེན་ཡང་ཡིན། སྔགས་བླ་མེད་ཐུན་མོང་གི་ཐེག་པ་འོག་མའི་རྫོགས་རིམ་དག་གི་ནང་ནས་རླུང་ཆེད་དུ་སྣ་ནས་འབྱིན་འཇུག་བྱེད་པ་ཡིན། རླུང་སྣ་ནས་འབྱིན་འཇུག་བྱེད་པ་ལ་དགོས་པ་ཅི་ཡོད་ཟེར་ན། སྣ་བུག་གཉིས་རྩ་རོ་རྐྱང་གཉིས་དང་འབྲེལ། དེ་གཉིས་ལྟེ་འོག་ནས་དབུ་མར་འབྲེལ་ཡོད་པའི་སྟོབས་ཀྱིས་རླུང་ཐད་ཀར་རོ་རྐྱང་བརྒྱུད་དེ་དབུ་མར་ཞུགས་ཏེ་རྩ་འཁོར་བཞི་ལ་སོགས་པ་བཀང་ནས་ཞུ་བདེའི་ཡེ་ཤེས་འདྲེན་གྱིན་ཡོད་པ་རེད། དེ་ལམ་འདི་དང་བསྡུར་ན་ཅུང་ཟད་གསལ་བ་རིས་ཆད་ཡིན། མི་རྟོག་པའི་ངང་དུ་ཀུན་རྟོག་གནས་སྐབས་ཀྱི་ཚེ། དུས་ཐུང་ངུར་འགགས་ཀྱང་གཏན་འགགས་རེད་ཐུབ་དཀའ་ལ། དེའི་སྟེང་ནས་སྟོང་པས་རྒྱས་འདེབས་བྱས་པའི་བདེ་སྟོང་བཅོས་མ་འོང་ཤས་ཆེ་བ་ཡིན་པས་འདོད་ཁམས་པའི་སེམས་དང་འབྲེལ་བ་ཞིག་གིས་འཁོར་རྩ་རྒྱུན་མི་ཆོད། དེ་མིན་རླུང་ལོག་འབྱམས་སུ་འགྲོ་བ་སོགས་ཀྱི་སྐྱོན་ཡང་འབྱུང་ཉེན་ཡོད་པས་ན། སྙིང་ཐིག་པས་རླུང་ཁ་ནས་འབྱིན་པར་བྱེད་པ་འདི་གནད་ཆེན་པོར་བརྩིའོ། །དེ་ལྟར་བྱས་པའི་དགོས་པ་ནི།

དེ་ལྟར་བྱས་པས་རླུང་ཡང་རབ་ཏུ་དལ།།

ཕྱི་ལྟར་རྣལ་འབྱོར་ཚེ་རྒྱས་གྲོགས་སུ་འགྲོ།།

ནང་དུ་རྣམ་རྟོག་ནུབ་པའི་རྐྱེན་བྱེད་ཅིང་།།

གསང་བ་ཉམས་སྣང་འཕེལ་བའི་གཞི་བྱས་ནས།།

ཟག་བཅས་མི་སྣང་འཚང་རྒྱ་ནུས་པར་བྱེད།།

ཅེས་གསུངས་ན། དེ་ལྟ་བུའི་རླུང་ཁ་ནས་འབྱིན་འཇུག་བྱས་དུས། རླུང་ཐད་ཀར་གློ་བའི་རྩ་སྦུག་བརྒྱུད་དེ་སྙིང་དབུས་རིན་ཆེན་ཟུར་བརྒྱད་ཀྱི་གུར་ཁང་ནང་དུ་བཞུགས་པའི་རིག་པའི་མ་ལ་རླུང་རང་འགག་གིས་ཐོག་ནས་རིག་གདངས་རང་ཐིམ་དུ་འགྲོར་བཅུག་དུས། རྟ་རྒོད་ལོང་བ་འདྲ་བའི་རླུང་དེ་ཕྱིར་གྱེས། མི་ཞ་བོ་ལྟ་བུའི་རིག་གདངས་དྲན་རྟོག་ཏུ་ཤར་བ་ཉིད་རིག་པ་ལ་ཐིམ་དུས། རང་བབས་ཀྱི་བསམ་གཏན་ལ་རང་ཤུགས་ཀྱིས་གནས་སོ། །དེ་དང་བསྟུན་དབྱིངས་སྣང་ལུག་རྒྱུད་ཀྱི་འགྲོས་ཀྱང་དེ་བཞིན་དལ་བས་མི་ཚད། བརྟན་པར་འགྱུར་བ་བརྒྱུད་དེ་རིམ་གྱིས་འཕེལ་སྣང་གི་ཆ་རྫོགས་པ་ཡིན། མདོར་ན་སྙིང་ཐིག་པས་རླུང་ཁ་ནས་གཏོང་རྒྱུ་དེ། རླུང་འཕེལ་བ་ལམ་དུ་མི་བྱེད་པར་དག་པ་ལམ་དུ་བྱེད་པ་ཡིན་ནོ།། འདི་ནས་ཕྱི་ནང་གསང་གསུམ་གྱི་དགོས་པ། ཕྱི་ལྟར་རྣལ་འབྱོར་བའི་ཚེ་རིང་ཞིང་ཚེ་དང་བསོད་ནམས་རྒྱས་པའི་གྲོགས་སུ་འགྲོ། ཇི་ལྟར་འགྲོ་ན། རིགས་དྲུག་སེམས་ཅན་ཀྱི་ཚེ་ནི་ཉམས་ཤིང་འཕོ་བ་ཅན་གྱི་ཚེ་ཡིན་པས་སྲོག་མི་བརྟན། ཚེ་ཚད་ལ་ངེས་པ་མེད་པ་ཞིག་ཡིན་ལ། དག་པའི་སངས་རྒྱས་ཀྱི་གཉུག་མའི་སྲོག་ལ་དབང་ཐོབ་པ་དེས་འཕོ་མེད་རྡོ་རྗེའི་སྐུ་བརྙེས་པའོ། །དེའི་རྒྱུ་མཚན། ཆོས་ཉིད་ཀྱི་དོན་རྟོགས་པ་མཐར་ཕྱིན་པས། འགྱུར་བ་མེད་པ་རྡོ་རྗེའི་ཚེ། འཕོ་བ་མེད་པ་གཡུང་དྲུང་གི་ཆོས་སུ་རྟག་ཏུ་བརྟན་པས་ཡེ་ཤེས་ཀྱི་རླུང་དང་ཡེ་ཤེས་ཀྱི་སྣང་ཆ་དེ་ཉིད་ཐུགས་སྲོག་གི་རྣམ་པར་གནས་ཡོད་པ་དེའི་ཕྱིར་ན་ལམ་དང་འབྲས་བུའི་བྱེད་པ་མཐུན་པས་རླུང་གནད་དལ་བས་ཕྱི་ལྟར་ན་རྣལ་འབྱོར་པ་ཚེ་རིང་། ཚེ་བཅུད་བརྟན་གཡོའི་དྭངས་མ་འཕེལ་བས་ན། འདུ་བ་གསུམ་དང་འབར་བ་རྣམ་གསུམ་རང་ཤུགས་ཀྱིས་རྒྱས། ནང་དུ་རྣམ་རྟོག་དབྱིངས་སུ་ནུབ་པས་རྣམ་མེད་སྟོང་ཉིད་ཀྱི་ཕྱག་རྒྱར་རོལ་བའི་ལྷན་སྐྱེས་བདེ་ཆེན་གྱི་ཡེ་ཤེས་འགྱུར་བ་མེད་པ་ནང་ནས་རྒྱས། གསང་བ་འོད་གསལ་གྱི་རིག་པར་རང་དབང་ཐོབ་པས་ཉམས་སྣང་འཕེལ་བ་ནས་ཚད་རྫོགས་ཏེ་སྣང་བཞི་མཐར་ཕྱིན་འཕོ་མེད་ཆོས་སྐུའི་རྒྱལ་སར་བསྙེགས་ཏེ། ཟག་བཅས་གདོས་བཅས་ཀྱི་ཕུང་པོ་མི་སྣང་བར་ཟག་མེད་འཕོ་བ་ཆེན་པོའི་འོད་ལུས་བརྙེས་པའི་དགོས་པ་དང་ལྡན་པའོ། །དེ་ཡན་གྱིས་རླུང་གནད་དགོས་པ་དང་བཅས་པ་བསྟན་པའོ།།

གཉིས་པ་རིག་པའི་གནད་བསྟན་པ།

རིག་པའི་གནད་ནི་རྡོ་རྗེ་ལུ་གུ་རྒྱུད།།

དབྱིངས་ཀྱི་རྭ་བར་བཞག་ནས་འབྲལ་མི་བྱ།།

དེ་ལྟར་ལུག་རྒྱུད་ཨར་ལ་གཏད་པ་ཡིས།།

རྣམ་རྟོག་ཟད་ནས་འཁྲུལ་བ་གཞི་ལ་སངས།།

ཡེ་ཤེས་མ་བུ་འཕྲད་ཅིང་རིག་པ་ཉིད།།

རླུང་དང་བྲལ་ནས་འགྲོ་འོང་མེད་པ་ཡི།།

རིག་པ་རང་བྱན་ཚུད་པའི་དགོས་པ་ཡོད།།

ཅེས་གསུངས་ན། རིག་པའི་གནད་དང་དགོས་པ་གཉིས་ཀ་ཚིག་ཉུང་དོན་འདུས་ཀྱིས་མདོར་བསྟན་གྱི་ཚུལ་དུ་བསྟན་ནས། རྒྱས་པར་ཇི་ལྟར་ཉམས་ལེན་ལ་སྦྱོར་བའི་ཚུལ་འོག་ནས་རྒྱས་བཤད་ཀྱིས་བསྟན་པ་ཡིན། གོང་གི་མདོར་བསྡུས་སུ་བསྟན་པ་འདིས་འོད་གསལ་ཐོད་རྒལ་གྱི་ལམ་གནད་སྙིང་པོར་དྲིལ་ཏེ་བསྟན་ཡོད། འདིའི་སྐབས་ཀྱི་རིག་པ་གསུང་རྒྱུ་དེ་རྡོ་རྗེ་ལུ་གུ་རྒྱུད་ལ་གོ་དགོས། དེ་འབྲལ་མེད་དབྱིངས་ཀྱི་ར་བར་བཙུད་དེ་ལུག་རྒྱུད་འཆོར་མེད་ཨར་ལ་གཏད་གསུངས་པ་ནི། ཅི་བྱས་རང་ལག་ལ་རང་དབང་ཐོབ་སོང་དུས། འཁྲུལ་བའི་རྣམ་རྟོག་ཟད་དེ་འཁྲུལ་མེད་ཀྱི་ཡེ་ཤེས་བརྙེས་པ་ཡིན། རྣམ་རྟོག་སྤངས་པའི་ཕ་རོལ་ན། ཡེ་ཤེས་ཟེར་བའི་གསལ་རིག་ཅིག་ཁ་ཁ་ན་མེད། དེ་དུས་འཁྲུལ་བ་གཞི་ལ་སངས། མ་འཁྲུལ་མངོན་དུ་གྱུར། གཞི་གནས་མ་ཡི་འོད་གསལ་མ་ལྟ་བུ་དེ། ཉམས་ལེན་ལམ་གྱི་འོད་གསལ་བུ་ལྟ་བུ་དེས་མ་ངོ་ཤེས་སོང་དུས་ནོར་ས་གཞན་ཞིག་མེད་ཅེས་གསུངས་པའོ། །ཡེ་ཤེས་མ་བུ་འཕྲད་ནས་རིག་པའི་རང་བྱན་ཚུད་པ་ཡིན་ནོ།།

༼ག གསུམ་པ་ཇི་ལྟར་ཉམས་སུ་ལེན་ཚུལ་རྒྱས་པར་བསྟན་པ།

དེ་ལྟར་བཞུགས་སྟངས་སྒོ་ཡུལ་རླུང་རིག་གནད།།

བཅིངས་ནས་ཉི་འོག་ཁྲུ་གང་མཚམས་བལྟས་པས།།

ཕྱི་ཡི་དབྱིངས་ནི་ནམ་མཁའ་སྟོང་པ་ལ།།

ནང་དབྱིངས་རྣམ་དག་སྒྲོན་མ་ཞེས་བྱ་བ།།

སྨིན་མཚམས་ལས་ཀྱང་མཆེད་དེ་ལྔ་ལྡན་གྱི།།

འཇའ་ཚོན་ལྟ་བུར་ཤིན་ཏུ་གསལ་བར་འཆར།།

ཞེས་གསུངས་ནས། དབྱིངས་རྣམ་དག་གི་སྒྲོན་མ་ཇི་ལྟར་འཆར་ཚུལ་བསྟན་པ་རེད། སྤྱིར་རྫོགས་ཆེན་གྱི་ཁྲིད་སོ་སོའི་སྐབས་ན་སྒྲོན་མ་བཞི་དང་། སྒྲོན་མ་དྲུག སྒྲོན་མ་དགུའི་བཤད་ཚུལ་ཀྱང་ཡོད་མོད། ཕྱི་དུས་བཞིའི་འགྱུར་བ། ནང་སྣང་བཞིའི་འཕེལ་ཟད་དང་། གསང་བ་དབང་བཞིའི་ངེས་པ་སོགས་ལ་བརྟེན་ཡོང་དུས། གནད་ཐམས་ཅད་སྒྲོན་མ་བཞིའི་ནང་དུ་འདུས་སོ། །དེ་ལྟར་ན་སྒྲོན་མ་རྣམ་བཞི་དེ་གང་ཡིན་ན། རྒྱང་ཞགས་ཆུའི་སྒྲོན་མ་དང་གཅིག དབྱིངས་རྣམ་དག་གི་སྒྲོན་མ་དང་གཉིས། ཐིག་ལེ་སྟོང་པའི་སྒྲོན་མ་དང་གསུམ། ཤེས་རབ་རང་བྱུང་གི་སྒྲོན་མ་དང་བཞིའོ། །སྒྲོན་མ་རྣམ་བཞིའི་བཞུགས་ཚུལ་ཇི་བཞིན་དུ་ངེས་རྒྱུ་དེ་སྤྱིར་སྙིང་ཐིག་གི་ཆོས་ཉམས་ལེན་པ། ཁྱད་པར་ཐོད་རྒལ་ཉམས་ལེན་བྱེད་མཁན་ཞིག་ལ་མེད་དུ་མི་རུང་བ་ཡིན། དེ་ཡང་རྒྱལ་བ་ཀློང་ཆེན་པའི་དགོངས་པའི་རང་གནད་ལས་མི་འདའ་བ་གལ་ཆེ་བ་ཡིན་པས། འདི་རེ་རེ་བཞིན་ཞིབ་ཏུ་ངེས་དགོས། རྫོགས་ཆེན་ཀློང་ཆེན་སྙིང་ཏིག་གི་ཆོས་སྒོར་ཞུགས་པ་ཞིག་གིས་རྫོགས་ཆེན་གནད་ཀྱི་གོ་དོན་གལ་ཆེ་ས་ནས། ཐེག་མཆོག་མཛོད་དང་ཚིག་དོན་མཛོད་ཚོའི་ཡི་གེའི་ཕྲེང་ཤར་ཆ་རེ་མིག་སྔར་བབས་འདུག་པ་ཞིག་མ་རེད་བར་དུ་ཚར་བརྒྱ་ཚོ་སྟོང་ཚོ་བལྟ་དགོས། དེས་ན་རྒྱང་ཞགས་ཆུའི་སྒྲོན་མ་དེ། ངོ་བོ་དང་ངེས་ཚིག་དབྱེ་བའི་ཐོག་ནས་བཤད་ན། རྒྱང་ཞགས་ཆུའི་སྒྲོན་མའི་ངོ་བོ། སྣང་བ་གཉིས་ཀྱི་ཆ་འཛིན་པའི་འཁོར་འདས་མཐུན་པར་བལྟ་བ་གསུངས། འདིའི་ངེས་ཚིག་ནི། རྒྱང་རིང་གི་ཡུལ་རྟ་ཞགས་པས་གཟུང་བ་ལྟར་འཛིན་པ་ལ་དཔེས་གསུངས་ཡོད། དྭངས་སྙིགས་འབྱེད་པ་ཆུའི་བྱེད་ལས་ཅན་ཡིན་པས་ཆུའི་སྒྲོན་མ། སྒྲོན་མ་ཟེར་བའང་སྣང་བཞི་གསལ་བར་བྱེད་པའི་ཆ་ནས་འདིའི་མཚན་དེ་ལྟར་དུ་བཏགས་པ་ཡིན། མཚན་ཉིད་ནི། གཟུགས་སྣང་འཛིན་རུང་དུ་སྐྱེས་པའི་སྒྲོན་མ་གང་ཞིག་ཡེ་ཤེས་ཀྱི་སྣང་བ་མཐོང་བས་འཁྲུལ་སྣང་འགག་བྱེད་དུ་གནས་པ་རྒྱང་ཞགས་ཆུའི་སྒྲོན་མའི་མཚན་ཉིད་ཡིན། འདིའི་དབྱེ་བ་གོང་ཞུས་བཞིན་འབྱུང་བ་འདུས་པའི་རྒྱང་ཞགས་དང་། དབང་པོ་འདུས་པའི་རྒྱང་ཞགས། ཡེ་ཤེས་འདུས་པའི་རྒྱང་ཞགས་དང་གསུམ་ཡོད་ལ། འདིས་དག་དང་མ་དག་གི་ཆ་གཉིས་འཛིན་པ་ཡིན་ན། འདི་ནས་ཕྱི་མ་འོད་རྩ་དྭངས་བའི་རྩ་སྣ་འོད་གསལ་གྱི་སྣང་བ་མཐོང་བྱེད་དུ་གནས་པ་དེ་ལམ་དུ་བྱེད་དགོས་པ་ཡིན། དེ་བཞིན་གཉིས་པ་དབྱིངས་རྣམ་དག་གི་སྒྲོན་མ་ལའང་ངོ་བོ་ངེས་ཚིག་སོགས་ཀྱིས་བཤད་ན། དེའི་ངོ་བོ་ནི་ངེས་པའི་ཡུལ་དུ་བྱེད་པ་ཞིག་ལ་གསུངས། ངེས་ཚིག་ནི་རྣམ་དག་རིག་པའི་ངོ་བོ་དབྱིངས་སུ་སྡུད་པར་བྱེད་པའི་སྒྲོན་མ་དང་། མཚན་ཉིད། རིག་པའི་ཡུལ་གྱི་ཆར་གནས་པ་གང་ཞིག་མཐིང་ག་ཁྱབ་པ་ཆེན་པོ་དང་ནི་ལྔ་ལྡན་འོད་དུ་སྣང་བའི་རང་བཞིན་ཅན་དེ་དབྱིངས་རྣམ་དག་གི་སྒྲོན་མའི་མཚན་ཉིད། དབྱེ་བ་ནི། གཞིའི་དབྱིངས། ལམ་གྱི་དབྱིངས། ཡུལ་ལ་སྣང་བའི་དབྱིངས་དང་གསུམ་ལས། གཞིའི་དབྱིངས་ནི་རང་གི་སྙིང་ག་ན་འོད་ལྔ་ལྷུན་གྲུབ་ཏུ་རང་ཆས་སུ་ཡོད་པ། ལམ་དབྱིངས་ནི། མིག་གི་འོད་རྩའི་རང་འོད་སྣང་བ་དང་། ཡུལ་ལ་སྣང་བའི་དབྱིངས་ནི། མཐིང་ག་དང་ལྔ་ལྡན་དུ་སྣང་བ། དེ་ཡང་གོང་དུ་འཕེལ་བ་ལ་སོགས་པའི་སྣང་ཚུལ་ཅན་དེའོ། །གསུམ་པ་ཐིག་ལེ་སྟོང་པའི་སྒྲོན་མའི་ངོ་བོ་ནི་རང་གསལ་ཀ་དག་སྟོང་པའི་རང་གདངས་སུ་གནས་པ། ངེས་ཚིག་ཐིག་འགྱུར་མེད་དང། ལེ་ཁྱབ་བརྡལ་སྟོང་པ་དངོས་མཚན་དང་བྲལ་བ་ཞེས་གསུངས་པ་ཡིན། སྤྱིར་རྒྱུད་ཀྱི་ཚིག་འདི་འབྲུ་གཤགས་བྱེད་ནས་འགྲེལ་དར་བ་དང་། དེ་བོད་སྐད་དུ་བསྒྱུར་དུས་ནའང་འབྲུ་གཤགས་སོར་བཞག་ཡོད་པ་མང་ངོ། །སྒྲོན་མ་གསུང་རྒྱུ་འདི་མུན་པ་སེལ་བའི་ངེས་འབྱེད་ལ་ཚང་མ་འདྲ་བའོ། །འདིའི་མཚན་ཉིད་ནི། ཚོན་གང་འོད་ཀྱི་ཐིག་ལེར་གསལ་བ་གང་ཞིག རང་གསལ་ཟླུམ་ཞིང་ཟུག་རྔུ་དང་བྲལ་བ་ཐིག་ལེ་སྟོང་སྒྲོན་གྱི་མཚན་ཉིད་ཅེས་སོ། །དབྱེ་བའང་། གཞི་གནས་རིག་པའི་ཐིག་ལེ། ལུས་གནས་རྩའི་ཐིག་ལེ། ཀུན་རྫོབ་རྒྱུའི་ཐིག་ལེ། དོན་དམ་སྤྲོས་མེད་ཀྱི་ཐིག་ལེ། རང་བྱུང་འབྲས་བུ་ཐིག་ལེ་དང་རྣམ་པ་ལྔར་དབྱེར་ཡོད་པ་ལས། འདིར་ཐམས་ཅད་ཀྱི་གནད་འདུས་པ་རང་བྱུང་འབྲས་བུ་ཐིག་ལེ་སྟོང་པ་མིག་ལ་གནས་པ་དེ་ཉིད་ལམ་དུ་བྱས་ནས་གཞི་གནས་རིག་པའི་ཐིག་ལེར་རོ་གཅིག་ཏུ་བཟླུམས་པ་དེ་གནད་ཀྱི་སྙིང་པོའོ། །བཞི་བ་ཤེས་རབ་རང་བྱུང་གི་སྒྲོན་མའི་ངོ་བོ་ནི། སྒྲོན་མ་གཞན་ལ་ཁྱབ་བྱེད་དུ་འགྲོ་བའི་ཤེས་རབ་ཀྱི་རྣམ་པ་ཅན་དེ་ཉིད་ཡེ་ཐོག་གདོད་མའི་གནས་ལུགས་ཀ་དག་སྟོང་གསལ་གྱི་རང་བཞིན་ཅན་ཡིན་པ་དེའོ། །ངེས་ཚིག་ནི། ཤེས་པ་རབ་ཀྱི་རྩེ་མོར་ཕྱིན་པ་ལ་ཤེས་རབ་གསུངས་པས། གཞན་གྱི་ཡུལ་མིན་རང་བྱུང་རང་ཤེས་ཆོས་ཉིད་གཉིས་མེད་དུ་སྣང་བས་སྒྲོན་མ། མཚན་ཉིད་ནི། སྤྲོས་བྲལ་རང་བྱུང་གི་ཡེ་ཤེས་གང་ཞིག་ཆོས་ཅན་དང་ཆོས་ཉིད་ཕྱིན་ཅི་མ་ལོག་པར་རྟོགས་པ་དེ་ཤེས་རབ་རང་བྱུང་སྒྲོན་མའི་མཚན་ཉིད། དབྱེ་ན་ལྔ། གཞི་གནས་རང་བྱུང་གི་ཤེས་རབ། སྣང་བ་ཅེར་འཛིན་གྱི་ཤེས་རབ། དྲན་པ་འགགས་མེད་ཀྱི་ཤེས་རབ། སོ་སོར་རྟོག་པའི་ཤེས་རབ། འཇུག་བྱེད་རྣམ་གསུམ་གྱི་ཤེས་རབ་དང་ལྔའོ། །དེ་ལས་གཞི་གནས་རང་བྱུང་གི་ཤེས་རབ་ཀྱིས་ཆོས་ཐམས་ཅད་ཀྱི་རྟེན་བྱེད། སྣང་བ་གཅེར་འཛིན་གྱི་ཤེས་རབ་ཀྱིས་དབྱིངས་རིག་ཐད་ཀར་རྟོགས། དྲན་པ་འགགས་མེད་ཀྱི་ཤེས་རབ་ཀྱིས་མཉམ་གཞག་ཏུ་དྭངས་གསལ་ཕྱེད། སོ་སོར་རྟོག་པའི་ཤེས་རབ་ཀྱིས་ཆོས་སྤྱི་དང་རང་གི་མཚན་ཉིད་ཤེས། འདི་ནས་འཇུག་བྱེད་རྣམ་གསུམ་ཞེས་པ། ཐོས་བསམ་སྒོམ་གསུམ་ལ་གོ་དགོས། ཐོས་བསམ་སྒོམ་པའི་མཚམས་ཕྱེད་པ་ལ་འཇུག་བྱེད་རྣམ་གསུམ་གྱི་ཤེས་རབ་གསུངས་པའོ། །བཞུགས་སྟངས་གསུམ་དང་གཟིགས་སྟངས་རྣམ་གསུམ་གྱིས་གཅུན། སྒོ་ཡུལ་རླུང་རིག་གི་གནད་ཐམས་ཅད་ཀྱིས་བཅིངས་ཏེ། ལས་དང་པོ་བར་མཚོན་ན་ཐོད་རྒལ་གྱི་འཆར་སྣང་ལ་བལྟ་དུས་ཉི་མའི་ཁ་འོག་ཏུ་ཉི་ཟེར་མར་ཁྲུ་གང་མཚམས་སུ་ཁྲིད་ནས་ཞེས་གསུངས་པས། གླེན་པ་ཞིག་ལ་བཤད་ན། འདི་ལྟར་ཉི་མའི་འོག་ཁྲུ་གང་གི་ཞབས་ཞེས་བརྡ་སྤྲད་དར་བ་བཞིན། མར་རང་གི་འཆར་ཆ་དང་བསྟུན་ནས་ཁྲིད་དུས་གོང་དུ་བཤད་མ་ཐག་པའི་སྒྲོན་བཞིའི་ནང་གི་དབྱིངས་རྣམ་དག་གི་སྒྲོན་མ་དེ་ཇི་ལྟར་ཤར་ན། ཕྱི་དབྱིངས་ནམ་མཁའ་སྟོང་པས་གོ་ཕྱེ་པའི་ཆ་ལ་ནང་དབྱིངས་རྣམ་དག་སྒྲོན་མའི་གདངས་དེ། རྒྱན་གྱི་ནམ་མཁའ་འདི་མ་ཡིན་པ་ཞིག་འཆར་རྒྱུ་ཡོད་པ་རེད། ཐོད་རྒལ་བལྟ་དུས་རང་ཉིད་ཀྱི་སྨིན་མཚམས་སངས་རྒྱས་ཀྱི་མཛོད་སྤུ་ཡོད་སའི་ཐད་ཀྱི་ནམ་མཁའི་མཐོངས་སུ་ཡར་བལྟ་དགོས། བྱང་སོང་དུས་དབྱིངས་རིག་སྨིན་མཚམས་ནས་ཕར་མཆེད་དེ། ལྔ་ལྡན་འོད་ཀྱི་ཐིག་ལེ་འཇའ་ཚོན་གྱི་མདོག་འདྲ་བ་ཤིན་ཏུ་གསལ་བོ་འཆར་རྒྱུ་ཡོད་གསུངས་པ་ཡིན། དེ་ཡང་གང་ཟག་སོ་སོའི་རྩ་ཁམས་ཀྱི་ཁྱད་པར་གྱིས་ཐམས་ཅད་ཀྱི་མཐོང་སྣང་གཅིག་པ་མིན་མོད། གང་ལྟར་མི་འཆར་བ་ནས་འཆར་བ་དང་། མི་གསལ་བ་ནས་གསལ་བ། ཐག་ཉེ་བ་ནས་རྒྱང་རིང་དུ་འགྲོ་བ། རྒྱ་ཆུང་ངུ་ནས་ཇེ་ཆེར་འཕེལ་བ་དེ་ལྟ་བུ་ཡིན། འོན་ཀྱང་འོད་གསལ་གཟུགས་ཅན་མ་ཡིན་ལ་ལྟ་བྱེད་མིག་ཅན་མ་ཡིན་ཞེས་གསུངས་པས། ནང་དབྱིངས་རིག་པའི་ཀ་དག་གི་ངོ་བོ་ལས་མི་གཡོ་བ་གནད་ཡིན་ནོ། །ཁྲེགས་ཆོད་ཀྱིས་ཁྲེགས་མ་ཆོད་ན། ཐོད་རྒལ་གྱིས་ཐོད་རྒལ་ཐུབ་པ་མིན་ཞེས་གོང་བཤད་བཞིན། ལུག་རྒྱུད་དངོས་པོར་འཛིན་པ་ཤིན་ཏུ་ཐ་ཆད་ཀྱི་ལམ་ཡིན། དཔེ་འཇོག་དུས་བུམ་ནང་གི་མར་མེ་ལ་བཞག་ནས། འཆར་བ་ཕྱི་རུ་འཆར་ཡང་གནས་པ་ནང་ན་གནས་པ། ཇི་ལྟར་གནས་ན། ནང་དབྱིངས་རིག་པའི་གོམས་སྟོབས་དང་བསྟུན་ནས་དེའི་གདངས་ཕྱིར་འཆར་བ་དེ་ལ་འཕེལ་འགྲིབ་འགྲོ་བ། བུམ་པའི་ནང་ན་མར་མེ་ཡོད་ན། མར་མེ་ཡོད་ས་བུམ་པའི་ནང་ཡིན་ཡང་འོད་བུམ་པའི་ཁ་ནས་འོང་ཆོག་པ་ལྟ་བུ་ཡིན་པར་གསུངས། གདངས་དེ་ཕྱིར་འཆར་བ་ལ་འཕེལ་འགྲིབ་འགྲོ་གིན་ཡོད་པ་འདི་འདིའི་ཁྱབ་བྱེད་གནད་ཀྱི་གོ་དོན་ཞིག་ཡིན། དེ་ནས་གང་ལས་འཆར་བ་རྒྱང་ཞགས་ཆུའི་སྒྲོན་མ་དང་། ཅི་ཞིག་འཆར་བ་རྣམ་དག་དབྱིངས་ཀྱི་སྒྲོན་མ་གཉིས་དངོས་དང་ཤུགས་ཀྱིས་དེ་ལྟར་བསྟན་ཏེ། གསུམ་པ་ཐིག་ལེ་སྟོང་སྒྲོན་ནི།

དེའི་ནང་ཐིག་ལེ་སྟོང་པའི་སྒྲོན་མ་ནི།།

དཔེར་ན་རྫིང་ནང་རྡོ་འཕངས་རི་མོ་བཞིན།།

ཐོག་མར་འལ་འོལ་དག་ཏུ་སྣང་བ་ལས།།

ཐ་མར་ཐིག་ལེ་གསལ་མདངས་ཅན་དུ་འཆར།།

ཞེས་གསུངས་ན། རྒྱང་ཞགས་ཆུའི་སྒྲོན་མས་རིག་གདངས་ཀྱི་སྒོ་ཕྱེ། དག་པ་དབྱིངས་ཀྱི་སྒྲོན་མའི་གཞི་ལ་ཐིག་ལེ་སྟོང་སྒྲོན་འཆར་དགོས་ན། དེ་ལ་རྒྱང་ཞགས་ཀྱི་གཟིགས་སྟངས་གཅུན་པས། ནང་ཤེས་རབ་རང་བྱུང་གི་སྒྲོན་མའི་ངོ་བོ་དང་རྩལ་གདངས་འཆར་བ་ཡིན། དེ་ཡང་གོང་ནས་བཤད་མ་ཐག་པ་ལྟར་དག་པ་དབྱིངས་ཀྱི་སྒྲོན་མ་དེ་ནམ་མཁའ་སྟོང་པ་ལ་གསུངས་པ་མིན། ནམ་མཁའ་སྐྱེས་བུ་དང་འབྲེལ་བ་མ་གྲུབ། སྒྲོན་མ་སྐྱེས་བུ་ཡོད་མེད་ཀྱི་རྗེས་སུ་འགྲོ་ལྡོག་བྱས་པས་ཀྱང་ཤེས་ཞེས་ཀུན་མཁྱེན་ཆེན་པོས་གསུངས་ཡོད། ནང་གདངས་ཕྱི་རུ་འཆར་བའི་གདངས་སྔོ་རེ་བ་ཞིག་འོང་རྒྱུ་ཡོད། དེ་མི་གསལ་བ་གསལ་བར་གོ་འཕོས་པ་དེ་འཇའ་འོད་ཀྱི་གུར་ཁྱིམ་དུ་སོང་ནས། དེའི་ནང་དུ་ལས་རླུང་དག་པའི་ཆ་ལས་ཐིག་ལེ་སྟོང་སྒྲོན་དུ་ཤར་བ་ཡིན། ཇི་ལྟར་ཤར་ན་རྫིང་བུའི་ནང་ངམ། ཀོ་མོའི་ཆུ་ནང་དུ་རྡོ་འཕང་བ་ལྟ་བུ་གསུངས་ནས། རི་མོ་ཕྱི་རིམ་ནང་རིམ་མང་པོ་ཡོད་པ་ཐིག་ལེ་ཟླུམ་པོ་འོད་ལྔའི་མུ་ཁྱུད་ཅན་དུ་སྣང་ཞིང་། དང་པོ་མི་གསལ་བ་ནས་མཐར་གསལ་མདངས་ཅན་དུ་འགྱུར་བ་དེ་ལྟ་བུའོ། །དེ་ནས་ཤེས་རབ་རང་བྱུང་གི་སྒྲོན་མ་ནི། སྒྲོན་མའི་འཆར་ཆ་ཐམས་ཅད་གདངས་ཡིན་པས་འདིར་ཡང་རྡོ་རྗེ་ལུ་གུ་རྒྱུད་ཀྱི་རིག་གདངས་ལ་རིག་པའི་སྒྲ་སྦྱར་བ་མ་གཏོགས་དོན་དུ་ཤེས་རབ་རང་བྱུང་གི་སྒྲོན་མའི་ངོ་བོ་སྙིང་ལ་གནས་པ་དེ་ཉིད་ཀྱི་གདངས་ཕྱི་རུ་འཆར་བ་ཡིན་ནོ། །

རིག་པ་རྡོ་རྗེ་ལུག་རྒྱུད་ཅེས་བྱ་བ།།

རྟ་རྔ་མདུད་པ་བཏབ་འདྲ་གསེར་སྐུད་དང་།།

མུ་ཏིག་ཕྲེང་བ་མེ་ཏོག་ཆུན་པོ་དང་།།

ལྕགས་ཐག་ལྟ་བུ་ཐོག་མར་སྨིག་རྒྱུ་ལྟར།།

འལ་འོལ་འགུལ་འཁྲིགས་བྱེད་ཅིང་འཆར་བའོ།།

ལྟ་སྟངས་ཀྱིས་ཁྲིད་དབྱིངས་ཀྱི་ར་བ་རུ།།

བཅུག་ནས་གཡོ་མེད་བལྟ་བ་གནད་ཡིན་ནོ།།

ཤེས་རབ་རང་བྱུང་སྒྲོན་མ་ཞེས་བྱ་བ།།

ཀ་དག་ལྷུན་གྲུབ་གཉིས་མེད་ཡེ་ཤེས་ཀྱི།།

ཤེས་པ་གསལ་སྟོང་འཛིན་མེད་དེ་ལ་ཟེར།།

ཞེས་གསུངས་སྟེ། རིག་པའི་ངོ་བོ་དངོས་དེ་གོང་ནས་བཤད་པ་ལྟར་ནང་ན་ཡོད་པ་ཡིན་ཡང་། གདངས་ཕྱིར་གསལ་བའི་ལུག་རྒྱུད་དམ། གཅིག་ལ་གཅིག་འབྲེལ། རྩའི་གནད་ལ་བརྟེན་ནས་གྲོལ་བའི་རྟགས་སུ་འཁྱོགས་མཚམས་ཅན། རླུང་གི་གནད་ལ་བརྟེན་ནས་གྲོལ་བའི་རྟགས་སུ་གཡོ་འགུལ་ཅན། ཐིག་ལེའི་གནད་ལ་བརྟེན་ནས་གྲོལ་བའི་རྟགས་སུ་འཁྱོགས་མཚམས་རྣམས་སུ་ཐིག་ལེ་ཕྲ་མོ་ཡོད་པ། དཔེར་ན་རྟ་རྔར་མདུད་པ་བརྒྱབ་ནས་ནམ་མཁར་བོར་བ་ལྟ་བུ་དང་། ད་དུང་མུ་ཏིག་ཕྲེང་བ་བསྟར་ལ་བརྒྱུས་པ་དང་། མེ་ཏོག་གི་ཆུན་པོ་མཁའ་ནས་ལྡིང་པ་ལྟ་བུ། ལྕགས་ཐག་གམ་གསེར་ཐག་མཐུད་པའམ་ལྷུ་བསྒྲིགས་པ་ལྟ་བུ་ལ་སོགས་དཔེས་མཚོན་པར་བཤད་ཡོད། མདོར་ན་གཅིག་ལ་གཅིག་འབྲེལ་ལ་བརྟེན་ཏེ་ལུག་རྒྱུད་ཅེས་གསུངས་སོ། །དེ་ཡང་ཐོག་མར་གཡོ་འགུལ་ཅན་རི་དྭགས་ཐད་ལ་རྒྱུག་པ་དང་། བུང་བ་བཅུད་ལ་ལྡིང་བ། ཤ་ར་ཎ་དལ་གྱིས་འགྲོ་བ་སོགས་ཀྱི་དཔེས་ཁྲིད་ཀ་རྣམས་སུ་གསུངས་ཡོད། དེ་རིམ་གྱིས་ཇེ་དལ་དུ་སོང་བ་ལྟ་སྟངས་གཅུན་ཏེ་མར་ཁྲིད་ནས་དབྱིངས་ཀྱི་ར་བ་རུ་བཅུག་ནས་སམ་བཙུད་དེ་དེ་ལ་གཡོ་མེད་དུ་བལྟ་བའོ། །དབྱིངས་ཀྱི་ར་བར་རྡོ་རྗེ་ལུ་གུ་རྒྱུད་བཙུད་རྒྱུ་དེ་གནད་ཡིན་གསུངས་སོ། །དེ་ལྟར་བཙུད་པས་བར་སྐབས་དབྱིངས་རྣམ་དག་གི་སྒྲོན་མ་ཞིང་ཁམས་སུ་ཤར། ཐིག་ལེ་སྟོང་པའི་སྒྲོན་མ་དེ་གཞལ་ཡས་ཁང་དུ་ལོག རིག་གདངས་རྡོ་རྗེ་ལུ་གུ་རྒྱུད་རིམ་གྱིས་སྐུ་རུ་སྨིན་ཏེ། མཐར་ཟད་པའི་སྒོ་ནས་ནང་དབྱིངས་ཀ་དག་ཏུ་འཆར་ནས་སྣང་བཞིའི་བགྲོད་པ་རིམ་ཅན་དུ་འབྱུང་བ་ཡིན་ནོ། །སྒྲོན་མ་བཞི་ལ་བརྟེན་ནས་འཆར་བའི་གདངས་བཞི་འདི། ནང་ཀ་དག་གི་རིག་པ་རྗེན་པ་ཤེས་རབ་རང་བྱུང་གི་སྒྲོན་མའི་ངོ་བོའི་གདངས་ཡིན། དཔེ་བཞག་ན་གོང་ཞུས་བཞིན་མར་མེའི་འོད་མར་མེ་ལ་བརྟེན་པ་བཞིན་ནོ། །དེའི་ཕྱིར་ན་ཀ་དག་གཙང་མའི་ཡེ་ཤེས་ཁྲེགས་ཆོད་ཀྱི་རིག་པ་རྗེན་ལ་བུད་པ་དེ་ཉིད་ཀྱི་ངང་སྐྱོང་མ་ནུས་པར། ཕྱིའི་འོད་ལ་ཞེན་པ་ཨ་འཐས་ཅན་རེད་སོང་ན་ས་རྡོ་ལ་ཞེན་པ་དང་གཅིག་པ་ཡིན་གསུངས། ལྟ་སྒོམ་དེ་ཡིད་དཔྱོད་ཅན་རེད་སོང་དུས། སེམས་ལམ་དུ་བྱེད་པ་རེད་ལ། སེམས་ལམ་དུ་བྱེད་པས་ཡེ་ཤེས་མཐོང་མི་ཐུབ། དུག་སྨན་འཐུང་བ་དེ་སྨན་དུ་མ་གྱུར་ནས་ཁོག་པའི་ནང་དུ་ལུས་ཏེ་སྨན་དུག་དུ་གྱུར་པ་བཞིན་ནོ། །དེ་ལྟར་ཡིན་དུས་ཐོད་རྒལ་གྱི་སྐབས་སུ་སྐུ་གསུམ་ལམ་སྣང་དུ་འཆར་བ་ཡིན་མོད། དེ་ལ་ཞེན་འཛིན་བྱེད་ན་དགའ་བྲོད་ཀྱི་བདུད་དུ་གྱུར་ཏེ་ལྟུང་བར་ཡང་བྱེད་དོ། །

དེ་ལྟར་སྒྲོན་མ་བཞི་ཡི་ཉམས་བླངས་པས།།

དབྱིངས་རིག་སྨིན་མཚམས་དག་ལས་བྲལ་ནས་ཀྱང་།།

གསལ་འགྲིབ་མེད་པར་འཆར་བའི་ཉམས་སྣང་ནི།།

རིམ་གྱིས་སྐྱེ་བར་འགྱུར་རོ་སྐལ་ལྡན་ཀུན།།

དེ་ཡིས་གནས་སྐབས་རིག་པའི་ཡེ་ཤེས་ཉིད།།

མངོན་སུམ་མཐོང་བས་མ་རིག་པ་དང་བྲལ།།

ཚེ་དུས་བྱས་ཀྱང་བདེན་པ་མཐོང་བ་ཡིས།།

རང་བཞིན་སྤྲུལ་སྐུའི་ཞིང་དུ་སྐྱེ་བ་ལེན།།

ཉམས་སུ་བླངས་ན་སྣང་བཞི་མཐར་ཕྱིན་ནས།།

ལྷག་མ་མེད་པར་འཚང་རྒྱའི་དགོས་པ་ཡོད།།

ཅེས་གསུངས་ཏེ། སྤྱིར་ན་རིག་པའི་ངོ་བོ་དེ་ཆོས་སྐུ་ཀ་དག་དྲི་མེད་ཡིན་ལ། དེ་ནི་ལྟ་སྒོམ་ཉམས་ལེན་ལས་འདས་པ་ཞིག་ཡིན་ཡང་། དེ་ནི་ལྟ་སྒོམ་ལས་འདས་པའོ་ཞེས་བསྐྱུར་བཞག་ན། དེ་སྔ་ཡང་དེ་བཞིན་དུ་བསྡད་པས་བཟང་སྐྱེད་ཅིག་གང་ནས་རྒྱག་འོང་། དེ་ཐག་རིང་རྒྱང་གི་ལྟད་མོ་བྱང་ན་འབྲོང་ཡོད་དོ་ཞེས་པ་ལྟ་བུ་རེད་སོང་དུས་དོན་ལ་ཉམས་ཕན་མ་ཡོད་པ་རེད། དེ་བས་གདོས་བཅས་ཀྱི་ལུས་དག འཁྲུལ་རྟོག་གི་སེམས་དག་པའི་ཐབས་སུ། དབྱིངས་རིག་གི་མན་ངག་འདི་དག་ལ་བརྟེན་པར་བྱས་ན་གྲོལ་བ་རང་ལག་ཏུ་ཐོབ་ཐུབ་པོ། །རིག་པའི་རང་བཞིན་གྱིས་ཀུན་ལ་ཁྱབ་ཀྱང་། ཆོས་ཀྱི་སྐུ་གདམས་ངག་ལ་ཐུག་ཡོད་ཅེས་ཀུན་ཏུ་བཟང་པོས་རང་གི་རྒྱུད་ཀྱི་ནང་དུ་གསུངས་ཡོད་ན། སྒྲོན་མ་བཞིའི་རིམ་པས་ཉམས་སུ་བླངས་པས། བར་སྐབས་གོམས་པ་སྐྱོན་མེད་ཀྱི་སྐབས་སུ། དབྱིངས་རིག་སྨིན་མཚམས་ནས་ཕར་རྒྱང་དུ་བཀྱེད་ནས་མཐོང་སྣང་རྒྱ་ཇེ་ཆེར་སོང་སྟེ། ཆོས་ཉིད་མངོན་སུམ་ནས་ཉམས་སྣང་གོང་འཕེལ་སོགས་བརྒྱུད་དེ་འཇའ་འོད་ཐིག་ལེའི་ལུག་རྒྱུད་གྱི་གསལ་སྣང་འཆར་བ་དེ་འགྲིབ་པ་མེད་པར་ཇེ་འཕེལ་ལ་སོང་བ་དེ་སྣང་ཉམས་ཡིན་པས་རིམ་གྱིས་ཉམས་ཀྱི་སྣང་བ་རྣམས་འཆར་རོ།།

དགའ་བ་སྒོམས་ཤིག་སྐལ་ལྡན་ལས་ཅན་ཀུན།།

ཞེས་གསུངས། དེ་ལྟར་གོམས་པས་གནས་སྐབས་རིག་རྩལ་ཤེས་རབ་ཀྱི་གཏེར་བརྡོལ་འོད་འབར་ཏེ་མ་རིག་གཏི་མུག་གི་རྨོངས་པའི་དྲི་མ་ཐམས་ཅད་བསལ། ཚེ་འདིར་འོད་ལུས་སུ་འགྲུབ་སྟེ་འཚངས་རྒྱ། གལ་ཏེ་ཉམས་ལེན་གྱི་གོམས་པ་ཀློང་དུ་དེ་ཙམ་མ་གྱུར་ཏེ་ཚེ་འདིར་གྲོལ་མ་ཐུབ་ནའང་། ཕྱི་མར་བདེན་པ་མཐོང་བའམ་རང་བཞིན་སྤྲུལ་སྐུའི་ཞིང་ཁམས་སུ་སྐྱེ་བ་ལེན་པར་འགྱུར། དེ་ལྟ་བུའི་ཕན་ཡོན་ཆེན་པོ་དང་ལྡན་པའི་གནད་གང་ལ་ཐུག་ན། ཐོག་མའི་མགོན་པོ་ཀུན་ཏུ་བཟང་པོའམ་དང་པོའི་སངས་རྒྱས་ཡེ་ནས་རང་རྒྱུད་ལ་བཞུགས་ཡོད་པའི་རང་ཞལ། དེ་སྔ་མཇལ་མ་མྱོང་བ། དེ་རིང་དེའི་རང་གདངས་མངོན་སུམ་དུ་མཐོང་བ་ཡིན། ཐོག་མའི་ཀུན་བཟང་གིས་ཀྱང་རང་ལ་ཡོད་པའི་རང་ཞལ་མངོན་སུམ་མཇལ་བས་མི་ཚད། དེ་ངོ་ཤེས་པའི་གནད་ཀྱིས་གྲོལ་སོང་བ་ཡིན་པས། ཐོག་མའི་སངས་རྒྱས་ཀུན་ཏུ་བཟང་པོ་དང་སྐལ་བ་མཉམ་པའི་ཡོན་ཏན་ཐོབ་པའི་མགོ་ཚུགས་པ་ཡིན་པས་རྫོགས་པ་ཆེན་པོ་མན་ངག་སྡེའི་ཡང་གསང་བླ་ན་མེད་པའི་ཆོས་སྐུའི་བསྟན་པ་ལ་ཞུགས་ནས་ཆོས་སྐུའི་སྟོན་པ་རང་ལ་གནས་པའི་རང་ཞལ་མཇལ་བ་ནི་རང་བྱུང་བསྟན་པའི་རྒྱུད་ལས། འདི་ལྟར་སུ་ཡིས་མཐོང་བའི་མི། །ཐོག་མའི་ཀུན་ཏུ་བཟང་པོ་དང་། །སྐལ་བ་ཉིད་ནི་མཉམ་པའོ། །ཞེས་གསུངས་པ་ལྟ་བུའོ། །དེ་ཡན་ཆད་ཀྱིས་སྒོ་ཡུལ་རླུང་རིག་གི་གནད་གསུམ་གྱིས་ཡེ་ཤེས་མངོན་སུམ་གནད་ལ་འབེབས་ཚུལ་བསྟན་པ་སོང་ནས།

༤༽ བཞི་བ་དངོས་གཞིའི་ངོ་སྤྲོད་ཚུལ།

དེ་ལ་རིག་པའི་རྩལ་དབང་བསྐུར་བ་དང་། དངོས་གཞིའི་ངོ་སྤྲོད་བསྟན་པ་དང་གཉིས་ལས།

ཀ༽ དང་པོ་རིག་པའི་རྩལ་དབང་བསྐུར་བ།

དེ་ལ་ཡང་ཆོས་སྐུའི་ངང་དུ་ཡེ་ཤེས་ཕབ་པ་དང་། རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་འཇུག་པ་དངོས་བཤད་པ། རིག་པའི་རྩལ་དབང་ཐོབ་པའི་དགོས་པ་བསྟན་པ་དང་གསུམ་ལས།

དང་པོ་ཆོས་སྐུའི་ངང་དུ་ཡེ་ཤེས་ཕབ་པ།

ཨེ་མ་ཧོ།

བཞི་པ་དངོས་གཞིའི་ངོ་སྤྲོད་ཚུལ་ལ་གཉིས།།

དང་པོ་རིག་པའི་རྩལ་དབང་བསྐུར་བ་ནི།།

དེ་ཡང་ཡར་ངོའི་ཚེས་བཅུ་དགེ་བ་ལ།།

རི་རྩེ་དབེན་ཞིང་ནམ་མཁའ་མཐོང་རྒྱ་ཆེ།།

སྤྲིན་དང་ན་བུན་མེད་ཅིང་ཤིན་ཏུ་དྭངས།།

མངོན་སུམ་འོད་གསལ་འཆར་སྣང་བདེ་གནས་སུ།།

སྔ་དྲོ་ཉི་མ་རྩེ་ཤར་ཟེར་གྱི་དུས།།

ཕུན་སུམ་ཚོགས་པའི་ཚོགས་ཀྱི་འཁོར་ལོ་བསྐོར།།

བླ་མ་མཐོ་བའི་ཁྲི་ལ་ལེགས་པར་འཁོད།།

གསེར་གྱི་མཎྜལ་ལ་སོགས་ཕུལ་ནས་ཀྱང་།།

སློབ་མས་བླ་མར་གསོལ་བ་འདི་ལྟར་གདབ།།

ཅེས་གསུངས་ན། རིག་པའི་རྩལ་དབང་ཟེར་རྒྱུ་དེ། རང་ལ་ཡེ་ནས་ཡོད་པའི་རིག་པ་ཡེ་ཤེས་དེ་ཉིད། མངོན་གྱུར་རྩལ་གྱིས་ཐོབ་པར་བྱེད་པའི་བྱིན་རླབས་ཀྱི་བརྡ་དབང་ཡིན་པས་ན། རིག་པའི་རྩལ་དབང་གསུངས། འདི་ཉིད་ཕྱི་དུས་དང་གནས་ཀྱི་རྟེན་འབྲེལ་ཚོགས། ནང་རྣལ་འབྱོར་ལུས་ཀྱི་རྩ་རླུང་དག གསང་བ་སྒྲིབ་མེད་རིག་པའི་རྩལ་མདངས་རྒྱས་པའི་ཕྱི་ནང་གསང་བའི་མཐུན་རྐྱེན་ཚོགས་དགོས། དེ་ཡང་ཡར་ངོ་ཚེས་བཅུ་དཔའ་བོ་མཁའ་འགྲོ་འདུ་བའི་དུས་ཆེན་ཡིན་པས་ཚེས་བཅུ་ལ་སོགས་པའི་དུས་ཚེས་དགེ་བ་ཞིག་ལ་གོ་ན་ཆོག་པས། དེ་རིང་སྟོན་ཟླ་ར་བའི་ཚེས་བདུན་ལ་འཁེལ་ན། སྟོན་ཐ་ཆུང་། དབྱར་མ་སྟོན་དང་སྟོན་ཆུང་གསུངས་ཡོད་པའི་དབྱར་མ་སྟོན་ཀྱི་དུས་ཚོད་ཡིན། ཕྱི་རྐྱེན་ནམ་མཁའ་དྭངས་པའི་དུས་ལ་ཏག་ཏག་འཁེལ་ཡོད་ལ། གཟའ་པ་སངས་ཡིན། ངའི་བླ་གཟས་དབང་བྱེད་པའི་ཉི་མ་ཞིག་རེད། གཟའ་ཚེས་འཕྲོད་སྦྱོར་གྱི་ཐད་སྤྱིར་ན་འདི་སྤྲོས་མེད་རྣལ་འབྱོར་བ་ཞིག་གིས་བརྟག་བྱ་བྱེད་མི་དགོས་མོད། ཀུན་རྫོབ་རྟེན་འབྱུང་གི་ཆོས་ཀྱང་། དེ་དང་དེའི་སྣང་བ་མ་ཞིག་གི་བར་དུའམ་དེ་དང་དེར་སྣང་ཚུན་ཆོད་ལ་གཏན་ནས་ལྟོས་མི་དགོས་པ་མ་ཡིན་པས། གང་ཟག་གི་ལས་དབང་དར་དུས་སུ་གཟའ་སྐར་ངན་ཡང་མི་ཐུབ་ལ། ལས་དབང་ཐུར་ལ་རྒུད་ནས་བསོད་ནམས་མར་ཟད་ཀྱི་དུས་སུ་ནི་གཟའ་སྐར་བཟང་ཡང་ཕན་ཐོགས་མེད་ཅིང་། བར་བ་ཞིག་ལ་ཕན་གནོད་ཡོད་ཅེས་རྩིས་གཞུང་རང་གིས་བཤད་པ་ལྟར་དུ་རེད། ཉི་མ་ཐམས་ཅད་དགེ་བ་དང་། རྒྱུ་སྐར་ཐམས་ཅད་བཟང་པོ་རུ། མཆོག་གསུམ་བདེན་པའི་མཐུ་མ་དགོས། རྣལ་འབྱོར་སྔགས་ཀྱི་བདེན་པས་ཀྱང་བསྒྱུར་ཐུབ་པ་ཞིག་ཡིན་ནོ། །དེ་ནས་གནས་ཡིན་ན། གནས་འདི་ཚོ་དམ་པ་གོང་མས་ཞབས་ཀྱིས་བཅགས། བྱིན་གྱིས་བརླབས་མྱོང་ས་ཡིན། ཁྱད་པར་རི་རྩེ་གསུངས་པ་ནི་ཉི་ཟླ་འཆར་སྔ་ས་ཡིན་དགོས་པས་རེད། དེ་ལྟ་བུའི་དབེན་གནས། ནམ་མཁའི་མཐོངས་རྒྱ་ཆེ་ས། ཐོད་རྒལ་ནམ་མཁའ་སུམ་སྤྲུགས་སོགས་སྒོམ་བདེ་བའི་གནས་ཤིག་ནས། གཙོ་ཆེར་ནམ་མཁའ་སློང་བྱེད་ཀྱི་རྐྱེན་སྤྲིན་དང་ན་བུན་སོགས་མེད་པའི་ཤིན་ཏུ་དྭངས་སྐབས་ཀྱི་ཟེར་གཉིས་ལས་སྔ་དྲོ་ཉི་མ་རྩེ་ཤར་གྱི་སྐོར་ལ། མངོན་སུམ་འོད་གསལ་གྱི་འཆར་སྣང་བལྟ་བདེ་དུས་ཡིན། ཚོགས་ཀྱི་འཁོར་ལོ་བསྐོར་གསུངས་ན། ཚོགས་ཀྱི་འཁོར་ལོ་བསྐོར་མ་རག་པ་རེད། སྐལ་ལྡན་འདུས་པའི་ཚོགས་ཀྱིས་འབྱོར་ལྡན་ཡོ་བྱད་ཀྱི་ཚོགས་འདུ་བྱས་ནས། དངོས་གྲུབ་ལྷའི་ཚོགས། རྣལ་འབྱོར་རྡོ་རྗེའི་ལུས་ཀྱི་རྩ་རླུང་ཐིག་ལེའི་བདག་ཉིད་དུ་གནས་པའི་གནས་ཡུལ་ཉེར་བཞི་རྩ་གསུམ་དཔའ་བོ་མཁའ་འགྲོ་ལ་མཆོད་པའོ། །དེས་བསོད་ནམས་དང་ཡེ་ཤེས་ཀྱི་ཚོགས་ཟག་མེད་རང་ངོ་ཤེས་པས་རྫོགས་ཏེ། འདིར་དགོས་པའི་མཐུན་རྐྱེན་ཚང་མ་ཕུན་སུམ་ཚོགས་པར་གྲུབ་ནས་ཡོད་ན། དེ་ནས་ཆོས་ཀྱི་ཆེ་བ་འདོན་ཆེད་དུ། ཆོས་འཆད་པ་པོ་བླ་མའི་མིང་སྟེང་ནས་ཁྲི་ཐོག་དུ་བསྡད་ཡོད་པས། དེ་ལ་རྫོགས་ཆེན་རིག་པ་རྩལ་དབང་གི་ཁྲིད་ཡིག་ཐམས་ཅད་ཀྱི་ནང་ན་གསེར་གྱི་མཎྜལ་ལ་སོགས་འབུལ་དགོས་ཚུལ་གསུངས་ཡོད། འདི་ལྟར་སྔོན་ཆད་རྒྱ་གར་ནས་མདོ་རྒྱུད་ཀྱི་ཆོས་ལེན་དུས། མི་ཕངས་གསེར་ལ་བྱས་ཏེ་གསེར་གྱི་ཡོན་ཕུལ་རབས་དང་། ཕྱིས་སུ་བོད་ནས་ཀྱང་བེ་རོ་ཙ་ནས་ཤམ་ཐབས་བར་ནས་གསེར་སྲང་གང་བླངས་ཏེ། ཡང་ན་རིག་དང་རིག་པ་བརྗེ་བར་བྱ། །ཡང་ན་རིག་པ་མི་ཕངས་ནོར་གྱིས་བླུ། །གསུངས་ནས་གསེར་གྱི་རིན་ཐང་གཞལ་སྟེ་ཆོས་རིག་གཞུང་སྤེལ་ཚུལ་མང་པོ་ཡོད། དེ་མིན་ནའང་ཆོས་ཟབ་མོ་ཞུ་བའི་ཡོན་དུ་ལུས་ལོངས་སྤྱོད་དགེ་ཚོགས་དང་བཅས་པ་འབུལ་རྒྱུ་དབང་ཚོའི་ནང་ན་ཡོད། ཁྱད་པར་དབང་དུས་སུ་དུས་གསུམ་རྒྱལ་བ་སྲས་བཅས་ཐམས་ཅད་བླ་མའི་སྐུ་ལ་གཉིས་མེད་དུ་ཞུགས་ཡོད་དུས་ཡིན་པས་མཆོད་ན་ལྷག་པར་བསོད་ནམས་ཆེ་ཚུལ་ཡང་གསུངས་ཡོད་མོད། ད་ང་ལ་མཚོན་ན་སོ་སྐྱེའི་བླ་མ་ཡིན་དུས་འདིར་ཆོས་རྒྱུན་སྤེལ་བའི་བགོ་སྐལ་ཞིག་འཐོབ་པའི་དགའ་བས་ཡིད་ཚིམས་ནས་བསྡད་ཡོད་པའི་མི་ལ། གསེར་བརྒྱ་འབུལ་བས་ཆོས་པ་ཉམས་ལེན་པ་བཟང་པོ་རེ་ཡོད་རྒྱུའི་དགའ་འོ་སྙམ་པ་པོ་ཡིན། དེས་ན་མཎྜལ་གྱི་མཆོག་སྒྲུབ་པའི་མཎྜལ་རྗེས་ནས་ཕུལ་ཤོག་དང་དེ་མཆོག་ཡིན། གསེར་དང་དངུལ་གྱི་མཎྜལ། འབྲུ་ལྔ་སྨན་ལྔ་སྤོས་ལྔ་ལ་སོགས་པས་བསྡུར་རྒྱུ་མེད་པ་དེ་ཡིན་ནོ། །གནས་དུས་སྟོན་འཁོར་ཕུན་སུམ་ཚོགས་པའི་ཐད་ནས་གསུངས་ཡོད་ན། གནས་རྣལ་འབྱོར་གྱི་ལུས་ལ་བཞག་ན་ཙིཏྟ་རིན་ཆེན་གྱི་ཕོ་བྲང་། དྭངས་མ་ལྔ་འདུས་ཀྱི་གཞལ་ཡས་ཁང་ན། དུས་གཞི་རྫོགས་འཕོ་འགྱུར་བྲལ་བའི་ཀ་དག་གི་དུས། སྟོན་པ་རང་ཤེས་རིག་པའི་རྒྱལ་པོ་གདོད་མའི་མགོན་པོ་ཀུན་ཏུ་བཟང་པོ། འཁོར་ཡེ་ཤེས་ལྔ་རྫོགས་སྐུ་འོད་འཇའ་ཟེར་ཐིག་ལེ་དང་བཅས་ཏེ། ཆོས་ཟུང་འཇུག་དབྱིངས་རིག་དབྱེར་མེད་ཆོས་སྐུའི་བསྟན་པ། ལོངས་སྐུའི་སྤྱོད་ཡུལ། སྤྲུལ་སྐུའི་ཤེས་རབ་ཀྱི་སྤྱན་གྱིས་མངོན་སུམ་དུ་གྱུར་ནས་སྐུ་གསུམ་ལམ་སྣང་དུ་བྱས་པའི་ཆོས་ཀྱི་འཁོར་ལོ་བསྐོར་བའི་འདུ་ཤེས་བཟུང་ན་དོན་དང་མཐུན་པ་ཡིན། ད་འདིའི་མཚམས་ནས་ཚོགས་ཤིག་གསུང་དགོས། ཚོགས་གསུང་རྒྱུ་དེ་རང་གཞུང་དང་འབྲེལ་བའི་ཚོགས་ཞིག་དགོས་པས་ཚོགས་ཀྱི་ཞལ་འདོན་འགའ་རེ། ཚང་མ་ལ་ཕྱག་དཔེ་མེད་ཀྱང་། ངས་ཡིག་ངོར་བལྟས་ཏེ་མར་འདོན་ཡོང་དུས། ཡང་མང་ཆེ་བ་མཉམ་དུ་ཡང་གསུངས་ཆོག་པ་རེད། དང་པོ་ཚོགས་འདོན་རྒྱུ་བྱེད། ཧཱུྃ་ཨོ་རྒྱན་ཡུལ་གྱི་སོགས་ཚིག་བདུན་གསོལ་འདེབས་དང་། ཧཱུྃ་བཞེངས་ཤིག་པདྨ་འབྱུང་གནས་སོགས་ལྷུབ་འདོན། བསྩལ་དུ་གསོལ། །དཔལ་ལྡན་རྩ་བའི་བླ་མ་སོགས། སྐྱེ་བ་ཀུན་ཏུ་སོགས། མྱུར་ཐོབ་ཤོག །སྭ་བྷ་ཝས་སྦྱངས་། ཧཱུྃ་རྡོ་རྗེ་ཟླ་བའི་ཡེ་ཤེས་ཀྱིས་སོགས་ནས་ཚོགས་བྱིན་རླབས་སྤྱན་འདྲེན་མཆོད་བཤགས་སོགས་ཀྱི་མཐར། ཡེ་ཤེས་ལྷ་ལ་སོགས་བཤགས་པ། ཚོགས་རྫས་འདོད་ཡོན་ཡེ་ཤེས་རོལ་བའི་སོགས་ཚར་ཁ་ཤས་ནས་ཀ་དག་ཕྱོགས་ཡན་ཆེན་པོའི་སོགས་བསྐང་པའི་མཐར། ཧོ་བདག་ལུས་ཕུང་ཁམས་སོགས་ཀྱིས་ཚོགས་དྲངས་། ཨོ་རྒྱན་རིན་པོ་ཆེ་སོགས་ཁ་ཤས་མཐར། སངས་ཀུན་འདུས་པདྨ་ཐོད་ཕྲེང་སོགས། ད་འདིའི་མཚམས་ནས་རིག་པའི་རྩལ་དབང་བསྐུར་བར་གསོལ་གདབ་ཞིག་ཡོད་པ་འདི་ཉིད་ཁྱེད་རྣམས་ཀྱིས་རྗེས་ཟློས་མཛད་དགོས།

ཨེ་མ་བླ་མ་རྡོ་རྗེ་འཛིན་པ་ཆེ།།

བདག་ནི་འཁོར་བའི་མཚོ་ལས་བསྒྲལ་བའི་ཕྱིར།།

བླ་མེད་རྡོ་རྗེ་ཐེག་པའི་གསང་ལམ་ཆེ།།

དོན་དམ་རིག་པའི་རྩལ་དབང་བསྐུར་དུ་གསོལ།།

སློབ་མ་རྣམས་ཀྱིས་རྗེས་ཟློས་བཅས་ལན་གསུམ་གྱི་འཕྲོར།

ཅེས་པ་ལན་གསུམ་གསོལ་བ་འདེབས་སུ་གཞུག།།

གསུངས་པ་ཇི་བཞིན་དུ་གྲུབ་སྟེ།

དེ་ནས་སློབ་དཔོན་ཐུགས་ཀར་ཡི་གེ་ཨ།།

མཐིང་ཀ་ཤིན་ཏུ་གསལ་བ་གཅིག་བཀོད་ལ།།

སློབ་མ་རྣམས་ལ་སེམས་ནི་མ་ཡེངས་པར།།

མིག་གིས་འདི་ལ་ལྟོས་ཞེས་བརྡ་སྤྲད་ལ།།

བླ་མས་ཌཱ་མ་རུ་ཡི་སྒྲ་དང་བཅས།།

བརྒྱུད་པའི་གསོལ་འདེབས་སྙན་པའི་གསུང་དབྱངས་ཀྱིས།།

སློབ་མའི་སྣང་བ་མ་འགྱུར་བར་དུ་བརྗོད།།

བརྒྱུད་པའི་གསོལ་འདེབས་བྱིན་ནི་ཕབ་པའི་མཐར།།

དཔོན་སློབ་ཀུན་གྱི་ཤེས་པ་གློད་ལ་བཞག།

ཅེས་གསུངས་ན། འདིའི་སྐབས་སུ་འོད་གསལ་རིག་པའི་ཡེ་ཤེས་ཀྱི་སྣང་བ་དེ་ཉིད་སྒྲིབ་གཡོག་དང་བྲལ་བར་མཐོང་བའི་བརྡ་མཚོན་དུ། རྟེན་འབྲེལ་གྱི་ཁྱད་པར་གྱིས་དཔོན་སློབ་ཚང་མས་སྟོད་གཡོག་བསལ་དགོས། ད་དུང་ག་ལེ་བྱས་ན་ཆོག གནས་སྐབས་ཕྱག་དཔེ་ལ་མི་གཟིགས་རྒྱུ་བྱེད། དཔེ་ཆ་མནབ་གཟན་སོགས་ཕུད་བཞགས་པ་ལ་སོགས་པའི་སྟེང་ངམ་གཙང་སའི་ཟུར་ཞིག་ལ་ཕར་བཞག་སྟེ་བཞུགས་སྟངས་ཇི་ལྟར་བྱེད་ན། རྐང་མཐིལ་གཉིས་མདུན་དུ་སྤྲད། ལག་གཉིས་སྤྱི་བོར་ཐལ་སྦྱར་བྱས་ཏེ་མི་འགྱུར་རྡོ་རྗེའི་བཞུགས་སྟངས་དོ་ཞག་སྔོན་མ་བཞིན་མཛད་དགོས་པ་རེད། ད་དུང་ཡུད་ཙམ་བྲེལ་བ་མི་དགོས། ངས་བྱིན་འབེབས་འདོན་ཡོང་དུས་བཞུགས་སྟངས་དེ་མཛད་ན་ཆོག་གི། བླ་མའི་ཐུགས་ཀར་ཨ་ཡིག་བཀོད་པ་དེ་རྒྱུ་མཚན་ཅི་ཡིན་སྙམ་ན། སྐྱེ་བ་མེད་པའི་དབྱིངས་མཚོན་བྱེད་ཡིན། ཨ་མཐིང་ག་ཡིན་པ་དེ་ཆོས་ཉིད་འགྱུར་བ་མེད་པའི་བརྡ་དོན་མཚོན་བྱེད་ཡིན། ཨ་ནི་ཆོས་རྣམས་ཀུན་གྱི་འབྱུང་གནས་ཐམས་ཅད་སྤྲོས་པ་ཀུན་བྲལ་སྐྱེ་འགག་གནས་དམིགས་འགྲོ་སོགས་དང་བྲལ་བའི་ཆོས་ཀུན་འུབ་ཀྱིས་འདུ་བའི་སྟོང་ཆེན་དབྱིངས་ཀྱི་ཕྱག་རྒྱ། བརྗོད་མེད་བརྗོད་པ་ཀུན་དང་བྲལ་བ། ཆོས་སྐུ་ཐིག་ལེ་ཉག་གཅིག་གི་མཚོན་བྱེད་དང་ནི། འདིའི་ཁ་དོག་མཐིང་ཀ་ཡིན་པ་ད་ལྟ་སྔོན་དུ་ཞུས་པ་ལྟར། ཆོས་ཉིད་ཡེ་ནས་འགྱུར་བ་མེད་པ་རྣམ་ཀུན་མཆོག་ལྡན་གྱི་ངོ་བོར་བཞུགས་པའི་མཚོན་རྟགས་ཀྱང་ཡིན་ནོ། །སློབ་མས་རིག་གདངས་མོས་གུས་སུ་ཤར་བའི་ཡིད་ཀྱིས། མིག་གིས་བླ་མའི་ཐུགས་ཀའི་ཨ་ཡིག་ལ་གཟིགས་བཞིན་དུ་ཞེས་གསུངས་ཡོད་པས། འགའ་རེས་མངོན་སུམ་དུ་གཟིགས་ཀྱང་ཕྱོགས་བཞིའི་མཐའ་སྐོར་གྱི་ལྷ་ཁང་གི་ཕྱི་ལོག་ན་ཡོད་པ་དག་གིས་མངོན་སུམ་དུ་གཟིགས་མི་ཐུབ་ཀྱང་གཟིགས་ཀྱིན་ཡོད་པའི་ཐུགས་སྣང་ཞོགས། དེ་ལས་ཐབས་མེད་སོང་བ་རེད། འདིའི་སྐབས་སུ་ཚང་མས་སྟོད་གཡོག་བསལ། མི་འགྱུར་རྡོ་རྗེའི་བཞུགས་སྟངས་མཛད་དགོས་པས་རྐང་མཐིལ་གཉིས་མདུན་དུ་ཁ་སྤྲད། ཐལ་མོ་སྤྱི་བོར་མ་རེག་པར་སྦྱར་ནས་བཞུགས་དགོས། ངས་འདིའི་སྐབས་སུ་ཐབས་ཤེས་མཚོན་པའི་གསང་སྔགས་ཀྱི་དམ་ཚིག་ཁྱད་པར་ཅན་གྱི་རྫས་ཌཱ་དྲིལ་གྱི་སྒྲ་དང་བསྟུན་ནས་བརྒྱུད་པའི་གསོལ་འདེབས་དང་སྦྲགས་ཏེ་བྱིན་འབེབས་འདོན་ཡོང་དུས། ཁྱེད་རྣམས་ཀྱིས་བརྗོད་མེད་དོན་གྱི་ཡེ་ཤེས། རིག་པ་རྩལ་གྱི་དབང་ཆེན་ཐོབ་སྟེ། དོན་བརྒྱུད་ཀྱི་བྱིན་རླབས་བཙན་ཐབས་སུ་འཕོས་པར་བསམ་དགོས་སོ། །ད་ཚང་མས་སྟོད་གཡོགས་ཕུད་དེ་བཞུགས་སྟངས་མཛོད་། བླ་མ་རིན་པོ་ཆེས་ཌཱ་དྲིལ་དང་བཅས་གདངས་སྙན་མོས། ཨེ་མ་ཧོ། ཀུན་བཟང་རྡོ་རྗེ་སེམས་དཔའ་དགའ་རབ་རྗེ། །འཇམ་དཔལ་བཤེས་གཉེན་ཤྲཱི་སེང་ཧ་དང་། །ཛྙཱ་ན་སུ་ཏྲ་འཆི་མེད་པདྨ་འབྱུང་། །འོད་གསལ་སྙིང་པོའི་ཤིང་རྟ་བི་མ་ལ། །དབྱེར་མེད་ཀུན་མཁྱེན་ཆོས་ཀྱི་རྒྱལ་པོ་དང་། །འཇིགས་བྲལ་གླིང་པ་འཇིགས་མེད་འཕྲིན་ལས་ཞབས། །རྒྱལ་བའི་མྱུ་གུ་མི་འགྱུར་ནམ་མཁའི་མཚན། །ཨོ་རྒྱན་བསྟན་འཛིན་གཞན་ཕན་སྣང་བ་དང་། །མཚུངས་བྲལ་འཇིགས་མེད་གུ་ཎ་ན་ཐ་ཡི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིས། །དེང་འདིར་སྐལ་ལྡན་རྣམས་ལ་བྱིན་བརླབས་པས། །འགྱུར་མེད་སྐུ་ཡི་བྱིན་རླབས་ལུས་ལ་སྩོལ། །འགག་མེད་གསུང་གི་བྱིན་རླབས་ངག་ལ་སྩོལ། །འཁྲུལ་མེད་ཐུགས་ཀྱི་བྱིན་རླབས་ཡིད་ལ་སྩོལ། །ཅིར་སྣང་སྒྱུ་འཕྲུལ་དྲྭ་བའི་འཁོར་ལོར་ཤར། །སྒྲ་གྲགས་མི་ཤིགས་རྡོ་རྗེའི་དབྱངས་སུ་སྨིན། །ཀ་དག་རིག་པ་གདོད་མའི་ལྷུམས་སུ་ཞུགས། །ལྷུན་གྲུབ་སྣང་བ་རྣམ་བཞིའི་རྩལ་རྫོགས་ནས། །ཚེ་གཅིག་འཇའ་ལུས་རྡོ་རྗེའི་སྲོག་འགྲུབ་ཤོག །བཛྲ་ཀཱ་ཡཱ་ཝཀྐ་ཙིཏྟ་གུ་ན་སརྦ་ཀརྨ་སིདྡྷི་ཧཱུྃ་ཨཱ། དེ་ནས་བཞུགས་སྟངས་དཀྲོལ་ཏེ་ཕྱག་གཉིས་པུས་མོའི་སྟེང་དུ་ཞོགས། ལུས་ཚུགས་དྲང་པོར་བསྲང་ཏེ་རྣམ་སྣང་ཆོས་བདུན་མཛད་དེ་བཞུགས་དགོས།

ཡིད་ལ་མེད་པ་ཞིག་ཏུ་ཕཊ་ཀྱི་སྒྲ།།

དྲག་པོ་བརྗོད་དེ་སེམས་ཉིད་གང་ཡིན་ཞེས།།

ལན་གསུམ་བར་དུ་བླ་མས་བརྗོད་པ་ཡིས།།

སློབ་མ་རྣམས་ཀྱང་ཅི་ཟེར་གཏད་པ་དང་།།

བྲལ་ནས་ཧད་དེ་ཕྱད་དེ་ལུས་པའི་ཚེ།།

རིག་པ་མ་བཅོས་ལྷག་གེར་ཤར་བ་ནི།།

མ་མཐོང་བ་ཡི་མཐོང་བ་ཆེན་པོ་སྟེ།།

ཆོས་སྐུའི་ངང་དུ་ཡེ་ཤེས་ཕབ་པ་ཡིན།།

ཞེས་གསུངས་པས། ཡིད་ལ་མེད་པ་ཞིག་ཏུ་ཕཊ་ཀྱི་སྒྲ་དྲག་པོ་བརྗོད་དེ་སེམས་ཉིད་གང་ཡིན་ཞེས་ལན་གསུམ་བར་དུ་བླ་མས་བརྗོད་ཡོང་དུས། སློབ་མ་རྣམས་ཀྱང་ཅི་ཟེར་གཏད་པ་དང་བྲལ་ནས་ཧད་དེ་ལུས་པའི་ཚེར་རིག་པ་མ་བཅོས་ལྷག་གེར་ཤར་བ་ནི། མ་མཐོང་བ་ཡི་མཐོང་བ་ཆེན་པོ་སྟེ། ཆོས་སྐུའི་ངང་དུ་ཡེ་ཤེས་ཕེབས་པ་ཡིན་ཞེས་གསུངས་པའི་དོན་ལ་སྦྱོར་རྒྱུ་རེད། ཕཊ། ཕཊ། ཕཊ། སེམས་གང་ཡིན། སེམས་གང་ཡིན། སེམས་གང་ཡིན། དེ་ལྟར་ཡིད་ལ་མེད་པའི་གློ་རྒྱག་ཏུ་ཐབས་ཤེས་ཟུང་འབྲེལ། གཟུང་འཛིན་རྩད་ནས་གཅོད་བྱེད་ཀྱི་ཕཊ་སྒྲ་དྲག་པོ་གསུམ་མུ་མཐུད་དེ་བརྒྱབ་ཡོང་དུས། སེམས་གང་ཡིན་ལན་གསུམ་བརྗོད་ཡོང་ན། དེའི་སྐབས་སུ་འདི་ཡིན་ཟེར་རྒྱུའི་ཅི་ཟེར་འདི་ཟེར་མེད་པའི་གཟའ་གཏད་མཚན་མ་དང་བྲལ་བའི་སྟོང་པ་བར་མཚམས་མེད་པའི་ཧད་དེ་ཕྱད་དེ་ཞེས་པ་སྟེ། སྟོང་པ་བར་མཚམས་མེད་པས་ཧད་དེ་བ། གསལ་བ་ངོས་བཟུང་དང་བྲལ་བས་ཕྱད་དེ་བ། ཟང་ཐལ་བརྗོད་མེད་ཀྱི་རིག་ཆ་མ་བཅོས་ལྷག་གེར་ཤར་ཞིང་མཐོང་བ་དེ་ལྷག་མཐོང་གི་ཡེ་ཤེས། མ་མཐོང་བའི་མཐོང་བ་ཆེན་པོ། མཐོང་བ་ཐམས་ཅད་ཀྱི་ནང་ནས་མཆོག་ཏུ་གྱུར་པ། ཡེ་ནས་སྐད་ཅིག་ཀྱང་འབྲལ་མ་མྱོང་བའི་རང་རིག་ཆོས་སྐུའི་རང་ཞལ་དེ་རིང་མཐོང་བ་ཡིན་ནོ། །དེ་ནི་ཆོས་སྐུའི་ངང་དུ་རང་གནས་ཀྱི་ཡེ་ཤེས་རང་ལ་ཕབ་པ་ཡིན་པར་གསུངས་སོ།།

གཉིས་པ་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་འཇུག་པ་དངོས།

རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་འཇུག་པ་དེ་ཉིད་ནི།

དེ་ནས་འཇུག་པ་དངོས་ནི་སློབ་མ་རྣམས།།

སྤྲུལ་སྐུའི་བཞུགས་སྟངས་དྲང་སྲོང་ཙོག་པུར་འདུག།

མིག་གིས་རིམ་པ་བཞིན་དུ་ཕྱོགས་བཞིར་བལྟ།།

སངས་རྒྱས་ཞིང་ཁམས་ཡིད་ལ་བྱར་གཞུག་ཅིང་།།

ཞེས་གསུངས་པ་རེད། ད་རེས་ཞལ་ཤར་ཕྱོགས་སུ་འཁོར་ཏེ་སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་མཛད་དགོས། དྲང་སྲོང་ཙོག་པུ་ནི་འཕོངས་ཚོས་སར་བཞག་རྐང་གཉིས་ཀྱི་མཐིལ་མདུན་དུ་གཏད་དེ་ཕྱག་གི་གྲུ་མོ་གཉིས་པུས་མོའི་སྟེང་དུ་བཞག ཕྱག་རེའུ་མིག་ཏུ་བསྣོལ་བཞིན་སྤྱན་གཉིས་བར་སྣང་དུ་བལྟས་ནས་གཏད་མེད་དུ་འཇོག་དགོས་སོ། །བླ་མས་སློབ་མ་རྣམས་ལ་འདི་སྐད་བརྗོད་གསུངས་པ་ལྟར་དུ། ངས་གོང་དུ་ཞུས་པའི་ཡེ་ཤེས་རང་སྣང་གི་དཀྱིལ་འཁོར་དེ། ཚིག་བརྒྱུད་མིང་དང་ཡི་གེའི་སྟེང་ནས་འདོན་ཡོང་དུས། ཁྱེད་རྣམས་ཀྱིས་དེའི་དོན་དེ་རིག་རྩལ་ཤེས་རབ་ཀྱིས་རྣམ་འབྱེད་མཛད་པ་དང་ཆབས་གཅིག་ཏུ་དོན་བརྒྱུད་དགོངས་པའི་རྩལ་ཆེན་རྫོགས་ཏེ་ཡེ་ཤེས་རང་སྣང་གི་དཀྱིལ་འཁོར་མངོན་དུ་གྱུར་བའི་ཐུགས་འདུན་མཛད་དགོས། འདིའི་འོག་གི་ཚིག་དང་སྦྲགས་ནས་གླང་པོ་ཆེའི་ལྟ་སྟངས་གསུངས་ཡོང་དུས། གླང་པོ་ཆེའི་ལྟ་སྟངས་ཐད་ཀར་ལྟ་བཞིན། སེང་གེའི་མཆོངས་སྟངས་ཟེར་དུས་ཕྱག་གཉིས་ཀས་སྙིང་ཁའི་ཐད་ནས་ལྡིང་སྟབས་དང་བཅས་པས་མཆོངས་སྟངས་ཀྱི་ཚུལ་མཛད་དགོས།

བླ་མས་སློབ་མ་རྣམས་ལ་འདི་སྐད་བརྗོད།།

གསུངས་པ་རེད།

ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན།།

འདི་ནས་ཤར་གྱི་ཕྱོགས་ཀྱི་འཇིག་རྟེན་ཁམས།།

གྲངས་མེད་མང་པོ་འདས་པའི་ཕ་རོལ་གྱི།།

ཅུང་ཟད་སྟེང་དུ་འཕགས་པའི་ཡུལ་ས་ན།།

མངོན་པར་དགའ་པའི་ཞིང་ཁམས་ཞེས་བྱ་བ།།

བདེ་འཇམ་ཡངས་ཤིང་ཡོན་ཏན་དུ་མས་བརྒྱན།།

མཛེས་ཤིང་ཡིད་འོང་བལྟ་བས་ཆོག་མི་ཤེས།།

ཤིན་ཏུ་ཉམས་དགའ་སངས་རྒྱས་ཞིང་ཁམས་ཡོད།།

སྤྲུལ་པ་སྐུ་ཡི་ཞིང་ཁམས་དེ་ཉིད་ན།།

བཅོམ་ལྡན་རྡོ་རྗེ་སེམས་དཔའ་ཞེས་བྱ་བ།།

སྐུ་མདོག་དཀར་པོ་དར་དང་རིན་པོ་ཆེ།།

ལོངས་སྐུའི་རྒྱན་གྱིས་བརྒྱན་པ་ཅིག་བཞུགས་སོ།།

འཁོར་ཡང་བྱང་ཆུབ་སེམས་དཔའ་གྲངས་མེད་བཞུགས།།

དེ་རྣམས་སྟོན་པ་ཉིད་ལ་ཆོས་གསན་ཅིང་།།

རང་གི་ཉེ་འཁོར་རྣམས་ལ་ཆོས་སྟོན་ཏེ།།

ཕུན་སུམ་ཚོགས་པའི་ཞིང་ཁམས་དེ་ཉིད་ན།།

ངོ་མཚར་མ་བྲིས་པ་ཡི་དཀྱིལ་འཁོར་ཡོད།།

རྫོགས་ཆེན་ལྷ་ཡི་དཀྱིལ་འཁོར་ཞིང་ཁམས་ཡོད།།

སྐལ་ལྡན་བུ་ཁྱོད་ཤར་ཕྱོགས་ཞིང་ཁམས་དེར།།

འོག་ནས་ཨ་ཨ་བརྗོད་ཡོང་དུས་ཨ་ཨ་རྗེས་ཟློས་དང་བཅས་ཏེ་སྟང་སྟབས་མཛད་དགོས།

གླང་པོ་ཆེ་ཡི་ལྟ་སྟངས་ཀྱིས་ལྟོས་ལ།།

སེང་གེ་མཆོངས་སྟངས་བཟང་པོས་མཆོངས་ཤིག་བུ།།

མངོན་པར་དགའ་པའི་ཞིང་ཁམས་བསྟན་པ་ཡིན།།

སྐལ་ལྡན་བུ་ཁྱོད་སངས་རྒྱས་ས་དེ་ཟུངས།།

སེམས་ཉིད་འགྱུ་བ་སླར་ལ་མ་ལྡོག་ཅིག།

ཕཊ་དང་པྲ་ཝེ་ཤ་ཡ་ཨ་ཨ་ཞེས།།

འདི་ནས་ཕཊ་དང་པྲ་ཝེ་ཤ་ཡ་གསུངས་རྒྱུ་ཞིག་ཡོད། དེ་དཀྱིལ་འཁོར་གྱི་སྒོ་དབྱེ་བའི་སྔགས་ཡིན། ཨ་ཨ་གསུངས་དུས་དེའི་སྐབས་དང་བསྟུན་ནས་ངག་གི་བརྗོད་པ་དང་སྟངས་སྟབས་བྱེད་དགོས། པྲ་ཝེ་ཤ་ཡ། ཨ། ཨ། ཨ། འདི་ནས་ཨ་གཉིས་རེ་ལས་གསུངས་མེད་ཀྱང་། སྐུ་རེ་རེ་ལའང་སྐུ་གསུམ་ཚང་བས་ཨ་སྒྲ་གསུམ་སྒྲོག་མཛད་རྒྱུ་དེ་ཕྱག་སྲོལ་ཡིན་ནོ། །

མཇུག་ཏུ་སྟོང་པ་ཉིད་ཀྱིས་རྒྱས་གདབ་བོ།།

གསུངས་ཡོད་ན། སྔོན་མེད་པའི་སྟོང་ཉིད་གསར་བ་ཞིག་ཁུར་འོང་ནས་ད་རེས་ཀྱི་དེའི་སྟེང་དུ་ཁང་བའི་གྱང་ངོར་ཞལ་བ་བྱུག་པ་ལྟ་བུར་གྱིས་གསུངས་པ་མ་ཡིན་པར་འདི་ཡང་མཚན་འཛིན་དང་བྲལ་བར་སེམས་ཉིད་ཡེ་ཤེས་ཀྱི་རང་སྣང་དེ་ལས་སླར་མི་ལྡོག་པའི་དོན་ཡིན་ནོ། །དེ་ནས་ཡང་བཞུགས་སྟངས་དེའི་སྟེང་ནས་ཞལ་ལྷོ་ཕྱོགས་སུ་འཁོར་དགོས།

ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན།།

འདི་ནས་ལྷོ་ཡི་ཕྱོགས་ཀྱི་འཇིག་རྟེན་ཁམས།།

གྲངས་མེད་མང་པོ་འདས་པའི་ཕ་རོལ་གྱི།།

ཅུང་ཟད་སྟེང་དུ་འཕགས་པའི་ཡུལ་ས་ན།།

དཔལ་དང་ལྡན་པའི་ཞིང་ཁམས་ཞེས་བྱ་བ།།

བདེ་འཇམ་ཡངས་ཤིང་ཡོན་ཏན་དུ་མ་ལྡན།།

མཛེས་ཤིང་ཡིད་འོང་བལྟ་བས་ཆོག་མི་ཤེས།།

ཤིན་ཏུ་ཉམས་དགའ་སངས་རྒྱས་ཞིང་ཁམས་ཡོད།།

སྤྲུལ་པ་སྐུ་ཡི་ཞིང་ཁམས་དེ་ཉིད་ན།།

བཅོམ་ལྡན་རིན་ཆེན་འབྱུང་ལྡན་ཞེས་བྱ་བ།།

སྐུ་མདོག་སེར་པོ་དར་དང་རིན་པོ་ཆེ།།

ལོངས་སྐུའི་རྒྱན་གྱིས་བརྒྱན་པ་ཅིག་བཞུགས་སོ།།

འཁོར་ཡང་བྱང་ཆུབ་སེམས་དཔའ་གྲངས་མེད་བཞུགས།།

དེ་རྣམས་སྟོན་པ་ཉིད་ལ་ཆོས་ཉན་ཅིང་།།

རང་གི་ཉེ་འཁོར་རྣམས་ལ་ཆོས་སྟོན་ཏེ།།

ཕུན་སུམ་ཚོགས་པའི་ཞིང་ཁམས་དེ་ཉིད་ན།།

ངོ་མཚར་མ་བྲིས་པ་ཡི་དཀྱིལ་འཁོར་ཡོད།།

རྫོགས་ཆེན་ལྷ་ཡི་དཀྱིལ་འཁོར་ཞིང་ཁམས་ཡོད།།

སྐལ་ལྡན་བུ་ཁྱོད་ལྷོ་ཕྱོགས་ཞིང་ཁམས་དེར།།

སེང་གེའི་ལྟ་སྟངས་ཉིད་ཀྱིས་བལྟས་ནས་ཀྱང་།།

སྟག་མོའི་མཆོངས་སྟངས་བཟང་པོས་མཆོངས་ཤིག་བུ།།

སེང་གེའི་ལྟ་སྟངས་སྤྱན་གྱི་ཨ་འབྲས་གྱེན་ལ་ཡར་ལྡོག་པ་དང་། སྟག་མོའི་མཆོངས་སྟངས་མིག་གིས་འཕྲེད་ལ་ལྟ་བཞིན་སྐེད་པས་ཉག་ཉག་བྱེད་པ་ཡིན།

དཔལ་དང་ལྡན་པའི་ཞིང་ཁམས་བསྟན་པ་ཡིན།།

སྐལ་ལྡན་བུ་ཁྱོད་སངས་རྒྱས་ས་དེ་ཟུངས།།

སེམས་ཉིད་འགྱུ་བ་སླར་ལ་མ་ལྡོག་ཅིག།

ཕཊ་པྲ་ཝེ་ཤ་ཡ། ཨ། ཨ། ཨ།

ཕཊ་དང་པྲ་བེ་ཤ་ཨ་ཨ་ཞེས།།

མཇུག་ཏུ་སྟོང་པ་ཉིད་ཀྱིས་རྒྱས་གདབ་བོ།།

གསུངས་པ་དེ་གོང་དང་གཅིག་རེད། ད་ཞལ་ནུབ་ཕྱོགས་སུ་འཁོར་ཏེ་བཞུགས་སྟངས་དེ་ཉིད་མཛད་དགོས།

ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན།།

འདི་ནས་ནུབ་ཀྱི་ཕྱོགས་ཀྱི་འཇིག་རྟེན་ཁམས།།

གྲངས་མེད་མང་པོ་འདས་པའི་ཕ་རོལ་ན།།

ཅུང་ཟད་སྟེང་དུ་འཕགས་པའི་ཡུལ་ས་ན།།

བདེ་བ་ཅན་གྱི་ཞིང་ཁམས་ཞེས་བྱ་བ།།

བདེ་འཇམ་ཡངས་ཤིང་ཡོན་ཏན་དུ་མ་ལྡན།།

མཛེས་ཤིང་ཡིད་འོང་བལྟ་བས་ཆོག་མི་ཤེས།།

ཤིན་ཏུ་ཉམས་དགའ་སངས་རྒྱས་ཞིང་ཁམས་ཡོད།།

སྤྲུལ་པ་སྐུ་ཡི་ཞིང་ཁམས་དེ་ཉིད་ན།།

བཅོམ་ལྡན་སྣང་བ་མཐའ་ཡས་ཞེས་བྱ་བ།།

སྐུ་མདོག་དམར་པོ་དར་དང་རིན་པོ་ཆེ།།

ལོངས་སྐུའི་རྒྱན་གྱིས་བརྒྱན་པ་ཅིག་བཞུགས་སོ།།

འཁོར་ཡང་བྱང་ཆུབ་སེམས་དཔའ་གྲངས་མེད་བཞུགས།།

དེ་རྣམས་སྟོན་པ་ཉིད་ལ་ཆོས་ཉན་ཅིང་།།

རང་གི་ཉེ་འཁོར་རྣམས་ལ་ཆོས་སྟོན་ཏེ།།

ཕུན་སུམ་ཚོགས་པའི་ཞིང་ཁམས་དེ་ཉིད་ན།།

ངོ་མཚར་མ་བྲིས་པ་ཡི་དཀྱིལ་འཁོར་ཡོད།།

རྫོགས་ཆེན་ལྷ་ཡི་དཀྱིལ་འཁོར་ཞིང་ཁམས་ཡོད།།

སྐལ་ལྡན་བུ་ཁྱོད་ནུབ་ཕྱོགས་ཞིང་ཁམས་དེར།།

དཔལ་གྱི་རྔམས་སྟབས་ཉིད་ཀྱིས་བལྟས་ནས་ཀྱང་།།

ཁྱུང་གི་འཕུར་ལྡིང་བཟང་པོས་འཕུར་ཅིག་བུ།།

དཔལ་གྱི་རྔམས་སྟབས་གསུངས་དུས་སྤྱན་གྱིས་གཡོན་ཕྱོགས་སུ་རྔམས་སྟབས་ཀྱིས་གཟིགས་པ་དང་། ཁྱུང་གི་ལྡིང་སྟངས་གསུངས་དུས་སྤྱན་གཉིས་གྱེན་ལ་ལྡོག་སྟེ། ཕྱག་གཉིས་ཀྱིས་གཤོག་པའི་ཚུལ་བྱས་ནས་ལྡིང་སྟབས་མཛད་དགོས་པ་དེ་ལྟར་དུ་ཡིན།

བདེ་བ་ཅན་གྱི་ཞིང་ཁམས་བསྟན་པ་ཡིན།།

སྐལ་ལྡན་བུ་ཁྱོད་སངས་རྒྱས་ས་དེ་ཟུངས།།

སེམས་ཉིད་འགྱུ་བ་སླར་ལ་མ་ལྡོག་ཅིག།

ཕཊ་པྲ་ཝེ་ཤ་ཡ། ཨ། ཨ། ཨ།

ཕཊ་དང་པྲ་ཝེ་ཤ་ཡ་ཨ་ཨ་ཞེས།།

མཇུག་ཏུ་སྟོང་པ་ཉིད་ཀྱིས་རྒྱས་གདབ་པོ།།

ད་འདི་ནས་ཞལ་བྱང་ཕྱོགས་ཀྱི་སར་འཁོར་ཏེ། བཞུགས་སྟངས་སྔར་བཞིན་བཞུགས་དགོས།

ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན།།

འདི་ནས་བྱང་གི་ཕྱོགས་ཀྱི་འཇིག་རྟེན་ཁམས།།

གྲངས་མེད་མང་པོ་འདས་པའི་ཕ་རོལ་གྱི།།

ཅུང་ཟད་སྟེང་དུ་འཕགས་པའི་ཡུལ་ས་ན།།

ལས་རབ་རྫོགས་པའི་ཞིང་ཁམས་ཞེས་བྱ་བ།།

བདེ་འཇམ་ཡངས་ཤིང་ཡོན་ཏན་དུ་མ་ལྡན།།

མཛེས་ཤིང་ཡིད་འོང་བལྟ་བས་ཆོག་མི་ཤེས།།

ཤིན་ཏུ་ཉམས་དགའ་སངས་རྒྱས་ཞིང་ཁམས་ཡོད།།

སྤྲུལ་པ་སྐུ་ཡི་ཞིང་ཁམས་དེ་ཉིད་ན།།

བཅོམ་ལྡན་དོན་ཡོད་གྲུབ་པ་ཞེས་བྱ་བ།།

སྐུ་མདོག་ལྗང་གུ་དར་དང་རིན་པོ་ཆེ།།

ལོངས་སྐུའི་རྒྱན་གྱིས་བརྒྱན་པ་ཅིག་བཞུགས་སོ།།

འཁོར་ཡང་བྱང་ཆུབ་སེམས་དཔའ་གྲངས་མེད་བཞུགས།།

དེ་རྣམས་སྟོན་པ་ཉིད་ལ་ཆོས་ཉན་ཅིང་།།

རང་གི་ཉེ་འཁོར་རྣམས་ལ་ཆོས་སྟོན་ཏེ།།

ཕུན་སུམ་ཚོགས་པའི་ཞིང་ཁམས་དེ་ཉིད་ན།།

ངོ་མཚར་མ་བྲིས་པ་ཡི་དཀྱིལ་འཁོར་ཡོད།།

རྫོགས་ཆེན་ལྷ་ཡི་དཀྱིལ་འཁོར་ཞིང་ཁམས་ཡོད།།

སྐལ་ལྡན་བུ་ཁྱོད་བྱང་ཕྱོགས་ཞིང་ཁམས་དེར།།

རྡོ་རྗེ་འཆང་གི་ལྟ་སྟངས་ཀྱིས་ལྟོས་ལ།།

གློག་དམར་འཁྱུག་སྟངས་བཟང་པོས་སོང་ཞིག་བུ།།

རྡོ་རྗེ་འཆང་གི་ལྟ་སྟངས་སྤྱན་གཉིས་མཉམ་པའི་གཟིགས་སྟངས་ཀྱིས། ཕྱག་གཉིས་ཀྱི་ཁུ་ཚུར་མར་ཁ་སྦུབས་པ་སྙིང་ཁ་ནས་བསྣོལ་ཏེ་ཕྱིར་དཀྲོལ་བ་དང་ལྷན་དུ་གློག་དམར་གྱི་འཁྱུགས་སྟངས་ཕྱག་གཉིས་སྙིང་ཁར་བསྣོལ་བའི་དེ་མ་ཐག་ཏུ་མྱུར་སྟབས་བཅས་ཕྱིར་ཤུགས་དྲག་གིས་འཕེན་པ་དེ་ཡིན་ནོ། །

ལས་རབ་གྲུབ་པའི་ཞིང་ཁམས་བསྟན་པ་ཡིན།།

སྐལ་ལྡན་བུ་ཁྱོད་སངས་རྒྱས་ས་དེ་ཟུངས།།

སེམས་ཉིད་འགྱུ་བ་སླར་ལ་མ་ལྡོག་ཅིག།

ཕཊ་པྲ་ཝེ་ཤ་ཡ། ཨ། ཨ། ཨ།

ཕཊ་དང་པྲ་བེ་ཤ་ཡ་ཨ་ཨ་ཞེས།།

མཇུག་ཏུ་སྟོང་པ་ཉིད་ཀྱིས་རྒྱས་གདབ་པོ།།

ད་ཞལ་དྲང་ཐད་དུ་འཁོར་ནས་སྐྱིལ་མོ་ཀྲུང་གིས་བཞུགས་ན་ཆོག

དེ་ནས་སློབ་མ་སྐྱིལ་མོ་ཀྲུང་གིས་འདུག།

མིག་གཉིས་གྱེན་དུ་ལྡོག་ནས་མཁའ་ལ་བལྟ།།

དབུས་ཕྱོགས་དུར་ཁྲོད་མེ་རི་འབར་བའི་ཞིང་།།

ཡིད་ལ་བྱར་གཞུག་བླ་མས་འདི་སྐད་བརྗོད།།

ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན།།

འདི་ནས་སྟེང་གི་ཕྱོགས་ཀྱི་འཇིག་རྟེན་ན།།

དུར་ཁྲོད་མེ་རི་འབར་བའི་ཞིང་ཁམས་ཞེས།།

ཉིན་པར་རླུང་འཚུབ་མཚན་མོ་མེ་འབར་ཞིང་།།

མི་མགོ་སྐམ་རློན་རྙིང་པའི་གཞལ་ཡས་བརྩེགས།།

ཞིང་ལྤགས་སྒོ་ཁེབ་ཉི་ཟླའི་སྐར་ཁུང་གསལ།།

ཞིང་ཆེན་ཞིང་ཆུང་འཕན་གདུགས་རྒྱལ་མཚན་འཕྱར།།

ཤིན་ཏུ་འཇིགས་རུང་སྐྱི་གཡའི་ཞིང་ཁམས་ཡོད།།

རབ་འཇིགས་ཞིང་ཁམས་དེ་ན་རིགས་ཀྱི་བདག།

བཅོམ་ལྡན་གཞོན་ནུ་དཔའ་བོ་སྟོབས་ལྡན་ཞེས།།

ཐུགས་ནི་ཞི་བའི་ངང་ལས་མ་གཡོས་ཀྱང།།

ཁྲོ་བོའི་ཆ་བྱད་བསྟན་པ་ཅིག་བཞུགས་སོ།།

འཁོར་ཡང་རིག་འཛིན་དཔའ་བོ་མཁའ་འགྲོ་མ།།

བསམ་གྱིས་མི་ཁྱབ་བཞུགས་ཤིང་ཐམས་ཅད་ནི།།

ཁྲོ་བོའི་གཉེར་མ་ལྡན་པ་ཤ་སྟག་གོ།

དེ་རྣམས་རིགས་ཀྱི་བདག་པོར་ཆོས་ཉན་ཅིང་།།

རང་གི་ཉེ་འཁོར་རྣམས་ལ་གསང་སྔགས་ཀྱི།།

ཆོས་ཉིད་རྣམ་པར་དག་པའི་ཆོས་སྟོན་ཏེ།།

འཇིགས་རུང་བཟོད་པར་དཀའ་བའི་གཞལ་ཡས་ན།།

ངོ་མཚར་མ་བྲིས་པ་ཡི་དཀྱིལ་འཁོར་ཡོད།།

རྫོགས་ཆེན་ལྷ་ཡི་དཀྱིལ་འཁོར་ཞིང་ཁམས་ཡོད།།

བུ་ཁྱོད་འཇིགས་སྣང་རྣམ་རྟོག་མ་སྐྱེ་བར།།

དབུས་ཕྱོགས་མེ་རི་འབར་བའི་ཞིང་ཁམས་དེར།།

གླང་པོ་ཆེ་ཡི་ལྟ་སྟངས་ཀྱིས་ལྟོས་ལ།།

སེང་གེ་མཆོངས་སྟངས་བཟང་པོས་མཆོངས་ཤིག་བུ།།

གླང་པོའི་ལྟ་སྟངས་གོང་བཞིན་དུ་ཐད་ཀར་ལྟ་བཞིན་སེང་གེས་མཆོངས་སྟངས་ཕྱག་གིས་ལྡིང་སྟབས་ཀྱིས་མཆོངས་པའི་ཉམས་མཛད་དགོས།

མེ་རི་འབར་བའི་ཞིང་ཁམས་བསྟན་པ་ཡིན།།

སྐལ་ལྡན་བུ་ཁྱོད་སངས་རྒྱས་ས་དེ་ཟུངས།།

སེམས་ཉིད་འགྱུ་བ་སླར་ལ་མ་ལྡོག་ཅིག།

ཕཊ་པྲ་ཝེ་ཤ་ཡ། ཨ། ཨ། ཨ།

ཕཊ་དང་པྲ་བེ་ཤ་ཡ་ཨ་ཨ་ཞེས།

མཇུག་ཏུ་སྟོང་པ་ཉིད་ཀྱིས་རྒྱས་གདབ་པོ།།

དེ་ལྟར་ཕྱོགས་བཞི་དབུས་དང་བཅས་པའི་ཞིང་ཁམས་ལྔའི་ཡེ་ཤེས་ཀྱི་སྒོར་བཅུག་པའི་དགོས་པ་འདི་ནས་མར་སྟོན་གྱིན་ཡོད་པ་རེད། ད་དུང་བཞུགས་སྟངས་ཀྱིས་བཞུགས་བཞིན་གསུངས་ཡོད་ཀྱང་འདིའི་མཚམས་ནས་དེ་ཙམ་གྱིས་ཆོག་རྒྱུ་མཛད་དེ། ན་བཟའ་མནབས་ནས་ཕྱག་དཔེ་ལ་གཟིགས་ཞོར་མཛད་པའམ་ཅི་དགར་གྱིས།

དེ་ལྟར་རང་སྣང་རིག་པའི་དཀྱིལ་འཁོར་དུ།།

སྒོ་ལྔ་སོ་སོར་བཅུག་པའི་དགོས་པ་ནི།།

སློབ་དཔོན་ལྟ་དགོངས་ཅན་དང་སློབ་མ་ཉིད།།

དད་པ་དམ་ཚིག་ཅན་གཉིས་འཛོམས་པ་ན།།

ཚེ་འདི་ཉིད་ལ་ཉམས་སུ་མ་ལོན་ཀྱང་།།

རང་བཞིན་སྤྲུལ་སྐུའི་ཞིང་དུ་དབུགས་འབྱིན་པ་།།

འོད་གསལ་རྫོགས་པ་ཆེན་པོའི་ཁྱད་ཆོས་སོ།།

ཞེས་གསུངས་ཏེ། འདི་ཡན་ཆད་ཀྱིས་རང་སྣང་རིག་པའི་དཀྱིལ་འཁོར་དུ་གཞུག་པའི་ཞིང་ཁམས་དེ་གང་ཡིན་ན། གཟུགས་སྐུ་གཉིས་ཀྱི་ཞིང་ཁམས་ཡིན་པར་གོ་དགོས་པ་སྟེ། དེ་ཡང་ཆོས་སྐུའི་དབྱིངས་ལས་ལོངས་སྐུར་ཤར་བའི་གདངས། ཕྱེད་སྤྲུལ་ལོངས་སྐུའི་ཞིང་ཁམས། འདི་གནས་པའི་རང་བཞིན་སྤྲུལ་པ་རུ་རང་ལུགས་སྙིང་ཐིག་པས་བཞེད་པ་དེ་ཉིད་ལ་གོ་དགོས། དེའི་སྟབས་ཀྱིས་སློབ་དཔོན་ལྟ་དགོངས་མཐོན་པོ་ཅན་དང་། སློབ་མ་དད་དམ་གཙང་མ་ཅན་ཐམས་ཅད་ཐོད་གཏུགས་ན། ཚེ་འདི་ལ་ཉམས་སུ་འདི་ལོན་སོང་བསམ་རྒྱུ་ཞིག་མེད་ཀྱང་། ཕྱི་མར་རང་བཞིན་སྤྲུལ་བའི་ཞིང་ཁམས་སུ་དབུགས་འབྱིན་ཏེ། འོད་གསལ་རྫོགས་པ་ཆེན་པོའི་ཆོས་ཐོབ་པ་འདིའི་ཕན་ཡོན་གྱིས་དབུགས་འབྱིན་མི་འབྱིན་ལ་ཐེ་ཚོམ་མེད་པ་ཡིན་གསུངས་པ་འདི། འདིའི་ཁྱད་ཆོས་ཡིན་པར་གསུངས་པ་རེད། དེ་ཡང་རྒྱལ་བ་ཀློང་ཆེན་པས་ཇི་ལྟར་གསུངས་ན། གསང་མཆོག་འདིར་ངེས་པ་ཞུགས་ནས་ཁྲིད་དང་གདམས་པ་ཐོབ་ནས། གོ་དོན་དེ་ཙམ་ཞིག་མ་རྙེད་ཀྱང་། དེ་ལྟར་ཐོབ་པའི་སྐྱེས་པ་དང་བུད་མེད་དང་བྱིས་པ་དེ་དག་ཐོབ་པའི་ཕན་ཡོན་གྱིས་མྱུར་དུ་གྲོལ་ངེས་ཏེ། འབྲས་བུའི་ཐུས་ཀ་བླ་ན་མེད་པ་དང་འཕྲད་པའི་ཕྱིར་ཞེས་གསུངས་ཡོད། ཐུས་ཀ་ཞེས་པའི་ཚིག་འདི་རྫོགས་ཆེན་གྱི་ཆོས་སྐད་ཅིག་རེད། འདི་དེང་སང་གི་སྨྱུག་འཛིན་པ་འགའ་རེས། ཐུགས་ཀ་ཞེས་བསམ་བཞིན་བཅོས་འདུག་པ་ཡོད་ཀྱང་དེ་མ་རེད། འདིའི་ཐུས་ཀ་ཟེར་རྒྱུ་འདི། ནུས་པ་གཅིག་ཏུ་བསྡུས་པའི་མཐུ་ཅན་སྨན་གྱི་སྨན་ཐུས་ལྟ་བུ་རེད། སྨན་ཐུས་གཅིག་དེ་མང་པོ་ཞིག་མིན་ཀྱང་སྨན་དང་རིགས་སྔགས་ནོར་བུ་དག་ནུས་པ་བསམ་གྱིས་མི་ཁྱབ་པ་ལྟར་དུ་ཚོགས་བསགས་སྒྲིབ་སྦྱང་དང་འདིའི་སྦྱོང་པ་ཉམས་ལེན་ཡང་དེ་ཙམ་ཞིག་བརྒྱུད་མི་དགོས་པར་ཅིའི་ཕྱིར་རང་བཞིན་སྤྲུལ་བའི་ཞིང་དུ་དབུགས་འབྱིན་པ་ཡིན་ཞེ་ན། ཡང་ཀློང་ཆེན་པས། སྔོན་བསྐལ་བ་དུ་མ་ནས་ཚོགས་བསགས་པའི་མཐུས། བསྟན་པ་འདི་དང་གཟོད་འཕྲད་ནས་རིང་པོར་མི་ཐོགས་པར་འཚང་རྒྱ་བ་ལ་འབྲས་བུའི་ཐུས་ཀ་ཟེར་བས། བསྟན་པ་འདི་དང་འཕྲད་པ་ཐམས་ཅད་མྱུར་དུ་སངས་རྒྱས་འཐོབ་སྟེ། འབྲས་བུ་ཐུས་ཀ་དང་འཕྲད་པའི་ཕྱིར་གསུངས་སོ། །ད་དུང་ཀློང་ཆེན་པས། སྒྲུབ་ངག་བཀོད་མཛད་དེ་འོ་སྐོལ་དཔོན་སློབ་རྣམས་ཆོས་ཅན། ཚེ་འདིའམ། བར་དོའམ། རང་བཞིན་སྤྲུལ་སྐུའི་ཞིང་དག་པ་གང་རུང་ཞིག་ཏུ་མྱུར་དུ་སངས་རྒྱས་འགྲུབ་ངེས་པ་ཡིན་ཏེ། སངས་རྒྱས་འགྲུབ་ངེས་ཀྱི་རྒྱུ་ནུས་པ་ཐོགས་མེད་ལྡན་པའི་དག་པ་འབྲས་བུའི་ཐུས་ཀ་དང་འཕྲད་ནས་དེ་ལ་མོས་པས་སྤྱོད་པ་ཡིན་པའི་ཕྱིར། གསུངས་པ་སོགས་མང་ངོ། །གོང་ནས་གཟུགས་སྐུ་གཉིས་ཀྱི་ཞིང་ཁམས་སུ་ཞུགས་པ་ཡིན། འདི་ནས་ཞིང་ཁམས་དེ་དག་གི་འཆར་གཞི་ཆོས་སྐུའི་ཞིང་ཁམས་ཡིན་པས་ཆོས་སྐུའི་ཞིང་ཁམས་སུ་ཞུགས་པ་དེ་ཉིད་བསྟན་པ་ནི། དེ་ནས་སློབ་མ་སེངྒེའི་འདུག་སྟངས་བྱ། །ཞེས་སེང་གེའི་བཞུགས་སྟངས་མཛད་དགོས་གསུངས་ཡོད་མོད། དམིགས་པ་མཛད་ནས་ཚིག་རྗེས་དོན་དྲན་གྱིས་དང་མི་ཆོག་རྒྱུ་མི་འདུག་སྙམ། ཆོས་སྐུའི་བཞུགས་སྟངས་སེང་གེ་གངས་ལ་འགྱིངས་པ་ལྟ་བུ་ཡིན། དེའི་རྒྱུ་མཚན་སངས་རྒྱས་ཀྱི་ས་ན་ཡོད་པའི་སྤྱན་ལྔ་ཁྱད་པར་ཅན་ཐོབ་པའི་རྟེན་འབྲེལ་དུ། སྤྱན་གྱིས་གྱེན་ཐུར་གཡས་གཡོན་ཐད་དྲང་ཐམས་ཅད་དུ་ལྟ་བཞིན་དུ། རིག་སྟོང་རྗེན་པའི་ཡེ་ཤེས་ཐིམ་ལ་མ་རྨུགས་པ་ཡིན་པས་རང་རིག་བསམ་ངོ་བྲལ་བའི་ངང་དུ་འཇོག་དགོས་པ་དེའི་དོན་འདི་ནས་རིམ་བཞིན།

སངས་རྒྱས་ས་ན་ཡོད་པའི་ཡེ་ཤེས་ཀྱི།།

སྤྱན་ལྔ་ཚེ་འདིར་འཐོབ་པའི་རྟེན་འབྲེལ་དུ།།

མིག་གིས་གྱེན་ཐུར་གཡས་གཡོན་ཐད་དྲང་བལྟ།།

རིག་སྟོང་རྗེན་པའི་ཡེ་ཤེས་གསལ་གདབ་ལ།།

ཞེས་གསུངས་ཏེ། འདིའི་སྐབས་ཐོབ་ཀྱི་སྤྱན་ལྔ་གསུངས་པ་དེ། ཤའི་སྤྱན། ཤེས་རབ་ཀྱི་སྤྱན། ཆོས་ཀྱི་སྤྱན། ཐམས་ཅད་མཁྱེན་པའི་སྤྱན་དང་། རྣམ་པར་གྲོལ་བའི་ཡེ་ཤེས་མཐོང་བའི་སྤྱན་རྣམ་པར་དག་པ་དང་ལྔ་ཡིས་རྫོགས་པ་ཆེན་པོའི་སྐབས་ནས་གསུངས་ཤིང་། སྤྱན་ལྔ་ཙམ་ཚད་ཕེབས་དང་ཆོས་ཟད་ཀྱི་སྐབས་ནས་ཐོབ་ཀྱང་། སྤྱན་ལྔ་ཁྱད་པར་ཅན་ནི་སངས་རྒྱས་ཀྱི་ས་གཅིག་པུ་ན་ཡོད་པའི་གོ་དོན་ཅན་ཡིན། རྣམ་པར་དག་པའི་སྤྱན་ཆོས་སྐུ་དང་། ཤའི་སྤྱན་ལོངས་སྐུའི་ཞིང་སྣང་གཟིགས་པའི་སྤྱན་དང་། ཤེས་རབ་ཀྱི་སྤྱན་དང་། ཆོས་ཀྱི་སྤྱན། ཐམས་ཅད་མཁྱེན་པའི་སྤྱན་གསུམ་སྤྲུལ་སྐུ་ལ་འཇོག་པ་ཡིན། འབྲས་བུ་ལམ་དུ་བྱས་པའི་གནས་སྐབས་ན། ད་ལྟ་ནས་དེ་བཞིན་ལམ་ལ་བསླབ་ན། རང་གནས་ཀྱི་ཡེ་ཤེས་རང་གི་མངོན་དུ་བྱེད་སླ་བའི་འབྲེལ་བ་གྲུབ་པ་དེ་གླེན་པས་བལྟས་ཀྱང་ཤེས་རྒྱུ་ཅན་ཞིག་ཡིན། དེ་ནས།

ཨེ་མ་སྐལ་ལྡན་སེམས་ཀྱི་བུ་གཅིག་ཉོན།།

ཞིང་ཁམས་དེ་རྣམས་འཆར་གཞིར་གྱུར་པ་ཡི།།

རང་གི་རིག་པ་བསམ་ངོ་དང་བྲལ་བའི།།

ངོ་བོ་ཡེ་ཤེས་ཐིམ་ལ་མ་རྨུགས་པ།།

གང་དུའང་མ་ཕྱེ་ཆོས་ཉིད་ཚད་མེད་ཅིང་།།

དཔག་མེད་དམིགས་མེད་རང་རིག་ཁྱབ་གདལ་ཞིང་།།

ཡིད་ལ་བྱར་གཞུག

ཞེས་གསུངས་ཏེ། དེ་ཡང་རང་རིག་ཆོས་སྐུའི་ཡེ་ཤེས་ངོ་བོ་སྟོང་གསལ་གང་དུའང་མ་གྲུབ་པ་དེ་ཉིད་སྨྲ་བསམ་བརྗོད་འདས་དང་། འཁོར་འདས་ཀྱི་མཐའ་ལས་གྲོལ་བ་ཡིན་པས་ན་ནམ་མཁའ་ལྟར་གང་དུའང་མ་གྲུབ་པ་ཞིག་ཡིན། འོན་ཀྱང་ཡོན་ཏན་ཚད་མེད་ཀུན་འབྱུང་གི་ཡེ་ཤེས་ཉི་ཟླ་གཟའ་སྐར་འཕྲོ་བ་བཞིན་དུ་ནང་གསལ་ཐིམ་ལ་མ་རྨུགས་པ། གང་དུའང་མ་ཕྱེ་མི་འབྱེད་འབྱེད་པ་མེད་པའི་ཆོས་ཉིད་ཚད་མེད་མཐའ་ཡས་པ་དེ། དཔག་མེད་དམིགས་མེད་བསམ་གྱིས་མི་ཁྱབ་པའི་ཀུན་ཁྱབ་བརྡལ་བ་ཆེན་པོའི་ཆོས་སྐུའི་ཞིང་ཁམས་ཡིད་ལ་བྱེད་ཅིང་དེའི་ངང་ལས་འདའ་བ་མེད་པར་བཞུགས་དགོས་པ་ཡིན་ནོ། །འདི་དག་གི་སྐབས་སུ་སེང་གེའི་བཞུགས་སྟངས་བྱས་ཏེ་བཞུགས་ཡོད་སྙམ་པའི་མཉམ་གཞག་དང་བཅས།

བླ་མས་འདི་སྐད་བརྗོད།

ཨེ་མ་སྐལ་ལྡན་སེམས་ཀྱི་བུ་ཁྱོད་ཉོན།།

འདི་ནས་སྟེང་གི་ཕྱོགས་ཀྱི་འཇིག་རྟེན་ན།།

དུར་ཁྲོད་མེ་རི་འབར་བའི་ཞིང་ཁམས་ཞེས།།

ཉིན་པར་རླུང་འཚུབ་མཚན་མོ་མེ་འབར་ཞིང་།།

སྐྱེ་མེད་ཀློང་ཡངས་ཀ་དག་ཆོས་ཀྱི་སྐུ།།

ནམ་མཁའ་ལྟ་བུའི་འགྲོ་འོང་མེད་ཤེས་ལ།།

དོ་ཞག་དབང་གི་སྐབས་སུ་བཅོམ་ལྡན་འདས་ནམ་མཁའ་རྒྱལ་པོ་ཞེས་བྱ་བ་ཡོད་ཀྱི་གསུངས་པ་དེ་འདིའི་དོན་རེད།

འགྲོ་མཁན་སེམས་ཉིད་རྩད་བརྡར་ཆོད་ལ་ཞོག།

ཞིང་ཁམས་དེ་རྣམས་རང་གི་རིག་རྩལ་ལས།།

ལོགས་ནས་གྲུབ་པ་རྡུལ་ཙམ་མེད་པའོ།།

དེ་བཞིན་སངས་རྒྱས་ཞིང་ཁམས་གྲངས་མེད་ཀྱང་།།

རང་གི་རིག་པའི་རྩལ་ལས་ལོགས་ན་མེད།།

རིག་སྟོང་ཉིད་དུ་ཤེས་པས་གནས་ཚུགས་ཤིག།

ཡེ་ཤེས་གསལ་བ་ཉིད་ལ་ལམ་སྦྱོངས་ཤིག།

སྣ་ཚོགས་འཆར་བ་ཉིད་ལ་མ་ཞེན་ཅིག།

ཆོས་ཉིད་བསམ་གྱིས་མི་ཁྱབ་ཀློང་དུ་ཨ།།

ཞེས་པས་སྟོང་པ་ཉིད་ཀྱི་ངང་ལ་བཞག།

ཞེས་གསུངས་ཏེ། དབང་གི་སྐབས་སུ་ཨ་སུམ་བརྩེགས་ཤིག་བརྗོད་དེ་སྟོང་པ་ཉིད་ཀྱི་ངང་ལ་བློ་བཞག་པ་དེ་ཉིད་རེད། ཆོས་ཉིད་བསམ་གྱིས་མི་ཁྱབ་པའི་ཆོས་སྐུའི་དགོངས་པའི་ཀློང་དུ་ཞོག་ཅེས་གསུངས་ཀྱང་། སངས་རྒྱས་ཀྱི་ཐུགས་ཀློང་ལ་སེམས་ཅན་གྱི་ཇི་ལྟར་འཇོག་སྙམ་པ་ཞིག་དང་། སྟོང་ཉིད་ཀྱི་ངང་ལ་ཞོག་ཟེར་ཚེ། སྟོང་ཉིད་ཁ་བཤད་ཀྱི་ཕྱོགས་སུ་སེམས་འཁོར་འགྲོ་བ་མ་གཏོགས་ཅི་འཇོག་འདི་འཇོག་མེད་ཀི་བསམ་མི་དགོས། འདི་ལྟ་དོན་སྒོམ་པའི་གནད་ལ་ཐུག་པ་ཡིན་པས་གོ་མྱོང་རྟོགས་གསུམ་དང་སྦྱར་ན། གོ་ལྟ་ཟེར་བ་དེ། སྤྱི་མཚན་མ་ནོར་བ་བློའི་ཡུལ་དུ་གོ་བ་ཚོགས་ལམ་པ་དང་། མྱོང་ལྟ་ཟེར་བ། རང་མཚན་མངོན་སུམ་དང་འདྲ་བར་མྱོང་བ་སྦྱོར་ལམ་པ་དང་། རྟོགས་པའི་ལྟ་བ་ནི། ངེས་ཤེས་ཡིད་འཛིན་གྱི་དྲི་མ་དག་པ་མཐོང་ལམ་པ་ཡིན། དེ་འདྲའི་ཐག་རིང་གི་སྐད་ཆ་ཏག་ཏག་བཤད་ན་ཉེ་ས་ཞིག་ལ་མི་བཅར་ན་ཡང་། གཞུང་བརྒྱ་སྤུ་རིས་འབྱེད་པའི་བརྗོད་སྒྲོས་མེད་ཀྱང་། །རང་བཞག་ཡངས་པ་ཆེན་པོའི་ལྟ་སྟངས་གཅིག་གིས། །སྤྲོས་པའི་གྲྭ་ཟུར་འབུམ་ཕྲག་ཅིག་ཆར་ཆོད་ན། །ཐ་སྙད་ཚིག་སྐམ་མོལ་བ་འགྲམ་པའི་གཅོག་རྡོ། །ཞེས་གསུངས་པས་ན། སྒོམ་པ་རང་གནས་ཀྱི་ཡེ་ཤེས་དང་སྦྱར་ཡོང་ན། རིག་སྟོང་ཡིད་དཔྱོད་དང་བྲལ་བ། སེམས་དང་ཡིད་དང་རྣམ་ཤེས་གསུམ་པོ་དང་བྲལ་བ། དོ་ཞག་སྔོན་ནས་ཁྲེགས་ཆོད་ཀྱི་སྐབས་སུ་གསུངས་པ་ལྟ་བུ་འོད་གསལ་གྱི་ཡེ་ཤེས། ངོ་བོ་འཕོ་འགྱུར་བྲི་གང་མེད་པར་རང་ལ་བཞུགས་པ་དེར་ཐད་ཀར་བལྟས་ཡོང་ན། བལྟ་བྱ་ལྟ་བྱེད་དང་བྲལ་བར་གནས་པ། སེམས་འགག་ཡེ་ཤེས་མི་གཡོ་བའི་རང་བཞིན་འཛིན་མེད་ཆེན་པོར་ཐག་ཆོད་པ་དེ། གསང་བ་སྙིང་ཐིག་གི་དགོངས་པ་མ་ནོར་བ་ཡིན། དེ་ལྟ་བུའི་ཆོས་ཉིད་བསམ་གྱིས་མི་ཁྱབ་པ་བསལ་བཞག་དང་བྲལ་བའི་ངང་ལ་རང་བབས་སུ་འཇོག་དགོས། དེ་ཡང་གྲོལ་སའི་དབྱིངས་ཀྱི་ཀ་དག་ཆོས་སྐུའི་དགོངས་པ་དང་། ལམ་དུས་ཀྱི་རིག་པ་ཀ་དག་གཉིས་རྫས་ཐ་དད་མ་ཡིན་པས། བསལ་བཞག་བྲལ་བའི་ངང་ལ་རང་བབས་སུ་དེ་ལྟར་འཇོག་དགོས་སོ། །བཞག་བྱ་འཇོག་བྱེད་དང་བྲལ་བ་ཡིན་པས་ན། ཚིག་གིས་མཚོན་པ་མིན་པའི་རིག་སྟོང་འགག་མེད་ཀྱི་དོན་དེ་སྐྱེ་མེད་ཨ་ཡིག་གིས་མཚོན་པ་ཡིན། འདི་ཐོས་པ་ཧ་ཅང་ཆེ་བས་ཀློང་དུ་གྱུར་བ་ཞིག་དང་། དད་ལྡན་གླེན་པའི་ཤུགས་འཆང་བློ་རྩེ་གཅིག་ཏུ་གཏད་མཁན་ཚོར་མི་ཐོབ་རྒྱུ་དེ་འདྲ་ཞིག་མིན། ཁྱད་པར་འདིའི་སྐབས་ཀྱི་དབང་རྣོན་སྣོད་ལྡན་དེ། ཅི་འདྲ་ཞིག་ཡིན་ན། ངང་རིང་ཤུགས་དལ་གླེན་པའི་ལྷོད་ཡོད་པའི་བྱ་བྲལ་ཤེས་རབ་དང་ལྡན་པ་ཕྱི་མ་ཅན་པོ་ལ་ངོས་འཛིན་པ་ཡིན། དེ་ནས་རིག་པའི་རྩལ་དབང་ཐོབ་པའི་དགོས་པ་ནི།

གསུམ་པ་རིག་པའི་རྩལ་དབང་ཐོབ་པའི་དགོས་པ་བསྟན་པ།

འདི་ལྟར་རིག་པའི་རྩལ་དབང་ཐོབ་པ་ཡིས།།

མ་རིག་ཉོན་མོངས་ཐམས་ཅད་གཞི་ལ་སངས།།

རིག་པའི་ཡེ་ཤེས་རྒྱས་ཤིང་མངོན་སུམ་གྱི།།

ཆོས་ཉིད་འོད་གསལ་བསྒོམ་ལ་དབང་བ་དང་།།

གང་ཟག་མཆོག་རྣམས་ཚེ་འདིར་གྲོལ་བ་ཐོབ།།

གོམས་ཤུགས་ཆུང་རྣམས་བར་དོར་གྲོལ་བའོ།།

ཞེས་གསུངས་ཏེ། རིག་པ་བདུན་པའི་ཏནྟྲའི་ནང་དུ། བརྡ་དང་བརྡ་མཚོན་གོ་བ་ནི། །དབང་གི་ནང་ནས་དབང་དཀའ་འོ། །ཞེས་གསུངས་པ་ལྟར། རིག་པའི་རྩལ་དབང་ཐོབ་པ་དེས་མ་རིག་པ་གཞི་ལ་སངས་བ་ཡིན། ཁྱབ་བྱེད་མ་རིག་པ་དག་པས་ཉོན་མོངས་རང་དག་ཏུ་སོང་ནས། དེ་དང་ཆབས་ཅིག་རིག་པ་ཡེ་ཤེས་རྒྱས་ཡོང་དུས་དབང་དུས་སུ་རང་གནས་ཀྱི་ཡེ་ཤེས་སད་ཅིང་སྨིན་པ་ཡིན། དེ་ཉིད་མཐར་ཕྱིན་གོམས་པ་ཀློང་གྱུར་གྱིས་མངོན་སུམ་ཆོས་ཉིད་འོད་གསལ་གྱི་རྣལ་འབྱོར་སྒོམ་པ་ལ་དབང་བའི་སྟོབས་ཀྱིས། རྫོགས་ཆེན་འོད་གསལ་ཀྱི་ཆོས་ཉིད་ལ་སྒོམ་དུ་མེད་ཀྱང་གོམས་པ་ཀློང་དུ་གྱུར་བ་ཡོད་པས་ན་མཆོག་རྣམས་ཚེ་འདིར་གྲོལ་བ་དང་། གོམས་ཤུགས་ཆུང་བ་ཉམས་ལེན་ལ་བརྩོན་པ་དེ་ཙམ་མ་ཐུབ་པ་དག་ཀྱང་བར་དོར་གྲོལ་བ་ཡིན་པས་ན། ཉི་མ་དེ་རིང་ནས། མར་འདུག་དུས་སེམས་ཅན་ཡིན་ཡང་། ཡར་ལངས་དུས་སངས་རྒྱས་ཀྱི་ས་ལ་ཐོགས་པ་མེད་པར་བགྲོད་པའི་ལམ་སྣེ་ཟིན་སོང་སྙམ་པའི་དགའ་བ་བསྐྱེད་ཆོག ཀུན་མཁྱེན་འཇིགས་མེད་གླིང་པས། བསམ་བཞིན་བློ་བདེ་བུ་ལས་སྐྱིད་པ་མེད། །འུ་ཅག་ཉམས་རྩལ་རྫོགས་པའི་ཁྱུང་ཕྲུག་ཡིན། །སྒྱུ་མའི་འདུ་བྱེད་བཏང་བའི་དེ་མ་ཐག །གདོད་མ་གཞི་ཡི་ཀློང་དུ་འཕུར་ནས་འགྲོ། །ཞེས་གསུངས་པ་ལྟར་རེད། དེ་ཡན་ཆད་ཀྱིས་རིག་པའི་རྩལ་དབང་བསྐུར་ཏེ། རང་སྣང་ཡེ་ཤེས་ཀྱི་དཀྱིལ་འཁོར་ཏུ་ཞུགས་པའི་ཚུལ་སོང་ནས།

ཁ༽ གཉིས་པ་དངོས་གཞིའི་ངོ་སྤྲོད་བསྟན་པ།

དེ་ལ་སྒྲོན་མ་བཞི་ཡི་ངོ་སྤྲོད་བསྟན་པ་དང་། དངོས་གཞིའི་ངོ་སྤྲོད་ཚུལ་བརྒྱད་བསྟན་པ་དང་། དཀྱིལ་འཁོར་དབང་དང་བསྐྱེད་རྫོགས་བཟླས་བརྗོད་སྡོམ་དང་དམ་ཚིག་ལ་སོགས་པ་དང་རྩ་བ་གསུམ་ཡང་དེ་ལ་ཚང་བར་བསྟན་པ་དང་། སླར་ཡང་འདི་ཉིད་ཉམས་ལེན་ལ་བརྩོན་པར་གདམས་པ་དང་། མཇུག་ཏུ་སྤྲོ་བ་བསྐྱེད་པ་དང་། སླར་ཡང་ནན་གྱིས་བསྐྱར་ཏེ་ལམ་ལ་བརྩོན་པར་གདམས་པ་སྟེ་དྲུག་ལས།

ཀ༽ དང་པོ་སྒྲོན་མ་བཞི་ཡི་ངོ་སྤྲོད་བསྟན་པ།

ཨེ་མ་ཧོ།

གཉིས་པ་དངོས་གཞིའི་ངོ་སྤྲོད་ཚུལ་ལ་བརྒྱད།།

ཅེས་ས་བཅད་བཞག་ནས།

དང་པོ་སློབ་མའི་བཞུགས་སྟངས་གཟིགས་སྟངས་ཀྱིས།།

འོད་གསལ་ཐོད་རྒལ་སྣང་བར་བལྟ་བར་བྱ།།

འདི་ནས་ཐོད་རྒལ་ལག་ཁྲིད་ཀྱིས་ཕྱག་ལེན་འདེབས་རན་སོང་བ་རེད། དེ་ཡིན་ན་སྔར་བཤད་པའི་སྒོ་ཡུལ་རླུང་རིག་གི་གནད་གསུམ་གྱིས་རང་ཐོག་ཏུ་དབབ་པའི་དོན་དེ། རིག་པའི་རྩལ་དབང་གིས་མངོན་སུམ་རང་ངོ་སྤྲད་དེ། རང་སྣང་ཡེ་ཤེས་ཀྱི་དཀྱིལ་འཁོར་དུ་བཙུད་ཅིང་གཞུག་པའི་དོན་དེ། ཉམས་ལེན་ལག་ལེན་གྱིས་གནད་དུ་བསྣུན་ཏེ། ཡེ་ཤེས་མངོན་དུ་འགྱུར་བར་བྱེད་དགོས་པ་ཡིན། ཉམས་ལེན་གྱི་གནད་ཀྱིས་མ་ཟིན་ན་གནད་ཤེས་པ་ཙམ་རྐྱང་བས་གོང་བཤད་བཞིན་བྱང་ན་འབྲོང་ཡོད་ཅེས་པ་ལྟར་རེད་འགྲོ་བ་ཡིན། དེས་ན་རིག་པ་ལུས་ལ་གནས་པས་ན་ལུས་ཀྱི་བཞུགས་སྟངས་གལ་ཆེ། སྤྱིར་ན་བཞུགས་སྟངས་རྣམ་གསུམ་སྐབས་དང་བསྟུན་པ་མན་ངག་གི་གཞུང་སོ་སོ་ནས་འབྱུང་བ་ལྟར་ཡིན་པ་ལས། འདི་ནས་གཙོ་བོའི་ཆ་ནས་སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་མཛད་པ་དེ་ཆོས་བརྒྱུད་འདིའི་ཕྱག་ལེན་ཡིན། ཡང་རྣམ་པ་ཚོ་ཤར་ཕྱོགས་སུ་ཁ་འཁོར་ནས་དྲང་སྲོང་ཙོག་པུ་མཛད་དགོས། དཔེ་ཆ་ཅུང་ཟད་འཇོག་རྒྱུ་རེད། དྲང་སྲོང་ཙོག་པུ་མཛད་དེ་ཤར་ཕྱོགས་ཀྱི་ཉི་མའི་འོད་ཟེར་མར་ཁྲུ་གང་གི་མཚམས་ལ་ཁྲིད་གསུངས་པས། ཉི་མའི་འོག་གི་རིའི་ནག་གྲིབ་ཡོད་སར་མར་ཁྲིད་ན་ཆོག ཕྱི་སོའི་ཉི་མའི་ནང་ན་ཡོད་པ་ཚོས། སྤྱན་གྱིས་ཟུམ་ཟུམ་བྱས་ནས་ཡར་རང་གི་སྨིན་མཚམས་ཀྱི་ཐད་དུ་གཟིགས་ན་ཆོག དེ་རིང་གི་དུས་ཚོད་དེ། ཟེར་གཉིས་ཀྱི་དུས་ཚོད་མ་རེད། ཉི་མའི་གུང་དང་ཅུང་ཟད་འཁེལ་བསྡད་ཡོད་ནི་རེད། ཟེར་གཉིས་ཀྱི་དུས་ཚོད་མ་ཡིན་ན་ཡང་ཉི་འོད་ཀླད་ནས་ཤར་བའི་འོད་མདངས་དེ་ནམ་མཁའི་མཐོངས་སུ་མར་ཁྲིད་པའམ། ཡང་ན་རི་དང་ཁང་བ་སོགས་ཀྱི་ནག་གྲིབ་ཡོད་སར་མར་ཁྲིད། ཁང་བའི་ནང་ན་ཡོད་པ་ཚོས། རྒྱ་མཐོངས་ཀྱི་གསལ་མདའ། མར་འོག་ཏུ་ཁྲིད་ན་རྟེན་ཙམ་ཞིག་ཨེ་ཉན་ཁི། སྤྱིར་རྟེན་བཅས་ཀྱིས་སྒོམ་དུས་ཉི་ཟླ་མར་མེ་གསུམ་ཆོས་ལོངས་སྤྲུལ་སྐུའི་རྟེན་ཡིན་གསུངས་ནས་རྟེན་བྱེད་རྒྱུ་ཡིན་ནི་རེད། འདིའི་དུས་སུ་ལུས་ངག་ཡིད་གསུམ་གྱི་གནད། མི་གཡོ་བ་གསུམ་གྱིས་གཟིར་རྒྱུ་དེ་གལ་ཆེ་བ་ཡིན། ལུས་གནད་བཞུགས་སྟངས་ལས་མི་གཡོ་བ། ངག་གནད་བརྗོད་མེད་ལས་མི་གཡོ། སེམས་ཀྱི་གནད་ཕྱི་དབྱིངས་འཆར་བའི་གཞི་ནམ་མཁའ་སྟོང་པའི་དཀྱིལ་དུ་ལྟ་བ་ལས་མི་ཡེངས་ཤིང་སེམས་རྟོག་མེད་ལས་མི་གཡོ་བ་དེ། གནད་རྣམ་པ་གསུམ་དང་ལྡན་པས་ཆོས་ཉིད་རང་ཐོག་ཏུ་དབབ་པར་བྱེད་པ་ལ། སྒོའི་གནད་ནི། སྒོ་རྒྱང་ཞགས་ཆུའི་སྒྲོན་མ་གོང་དུ་བཤད་པ་བཞིན། རྒྱང་ཞགས་འགུལ་བ་མེད་པ་གནད། །ཞེས་གསུངས་པས་། མིག་གཉིས་མི་འགུལ་བའི་སྟོབས་ཀྱིས་རྟེན་དེ་ལ་བརྟེན་པའི་འོད་རྩ་མི་འགུལ་བ་ཡིན། འོད་རྩ་འགུལ་འཕྲིག་ཅན་དུ་ཡོད་པ་དང་། རྟོག་པ་འཕྲོ་འདུ་ཅན་དུ་ཤར་བ་གནད་གཅིག་པས་འོད་རྩ་མ་འགུལ་ན་རྣམ་རྟོག་དེ་དང་མཉམ་དུ་རྒྱུན་ཆད་འགྲོ་བ་ཡིན། ཡུལ་གྱི་གནད་ཀྱང་། གོང་དུ་བཤད་མ་ཐག་པའི་སྨིན་མཚམས་ཀྱི་ནམ་མཁའ་འམ་བར་སྣང་ལ་བལྟས་དུས། དབྱིངས་དང་རིག་པའི་ལྟ་སྟངས་གཉིས་ཀ་རེད་ཀྱིན་ཡོད། ཇི་ལྟར་ཡོད་ན་ནམ་མཁའ་ལ་མིག་གཏད་དུས། དབྱིངས་ཀྱི་སྒྲོན་མ་འཆར་བའི་གཞི་ལ་ལྟ་བ་དེ་དབྱིངས་ཀྱི་ལྟ་སྟངས་དང་ནི། རྣམ་རྟོག་གི་སྤྲོས་པ་མེད་པའི་མི་ཡེངས་པའི་ཤེས་པ་དེ་རིག་པའི་རྩལ་ཡིན་པས། དེར་མ་ཡེངས་པར་བལྟས་དུས། ལུ་གུ་རྒྱུད་ཀྱི་སྣང་བ་ཤར་བ་ཡིན་པས་ན་རིག་པའི་ལྟ་སྟངས་གསུངས་སོ། །རླུང་རིག་གི་གནད་ནི། རླུང་དལ་མོ་བྱེད་དགོས་པ་གོང་དུ་བཤད་པ་ནང་བཞིན་རེད། སོ་མཆུ་མ་རེག་པའི་བར་ནས་རླུང་དལ་མོ་རྒྱུ་བ་རང་གིས་ཀྱང་མི་ཚོར་བ་ཙམ་ཞིག་བྱེད་དགོས། ཁྱད་པར་དུ་རླུང་རྒྱང་རིང་ལ་ཕར་འཕེན་དགོས། དེས་ཅི་ཞིག་ལ་ཕན་ཐོགས་ཡོད་སྙམ་ན། རླུང་དེ་སེམས་ཀྱི་རྟ་ཡིན་པས་རླུང་ཕྱིར་འཕངས་པས་རྟ་ཕར་ཆད། མི་ཚུར་ཆད་དེ། རིག་གདངས་མི་ཞ་བོ་ལྟ་བུ་དེ་རིག་པའི་མ་ལ་ཐིམ། ནང་ཤེས་རབ་རང་བྱུང་གི་སྒྲོན་མའི་ངོ་བོ་ཀ་དག་ཆོས་སྐུའི་དགོངས་པའི་རང་བབས་ལ་གནས་པའི་ཕན་ཐོགས་ཡོད་པ་ཡིན། རིག་པའི་གནད་ནི། མིག་མི་འགུལ། སེམས་མ་ཡེངས་པས་དང་པོར་དབྱིངས་སྣང་ཤར། དེ་ནས་ཐིག་ལེ་སྟོང་སྒྲོན་ཤར། དེའི་འཕྲོར་རྡོ་རྗེ་ལུ་གུ་རྒྱུད་བཅས་ཤར་དུས་དབྱིངས་ཀྱི་ར་བ་རུ་རྡོ་རྗེ་ལུ་གུ་རྒྱུད་གཡོ་འགུལ་ཅན་པོ་དེ་འགུལ་འཕྲིག་མེད་པར་མཐར་འཛིན་ཐུབ་དགོས། མཐོང་སྣང་ཕྱི་རུ་འཆར་འཆར་འདྲ་བོ་དེ་རྩ་བ་ནང་ལ་ཐུག་ཡོད། འོ་ན་ཕྱིའི་ནམ་མཁའ་ལམ་དུ་བྱ་དགོས་པ་ཅི་ཡིན་སྙམ་ན། ལས་དང་པོ་བ་རིམ་གྱིས་ལམ་ལ་བཀྲི་བའི་སྦྱང་བ་བྱེད་བདེ་བའི་ཆེད་རེད་མ་གཏོགས། གལ་ཏེ་དངོས་སུ་འོད་ཕྱི་རུ་ཡོད་ན་གཞན་གྱིས་ཀྱང་འདྲ་བར་མཐོང་ཆོག་པ་ལས། མི་གཞན་གྱིས་མི་མཐོང་བ་དེ་རང་གི་ལུས་ཀྱིས་བསྒྲིབས་ཡོད་པས་རེད། རང་གིས་མཐོང་བ་ཅིའི་ཕྱིར་ཡིན་ན་འོད་རྩ་དག་པའི་གསང་ལམ་ནས་ཤར་བས་སྟེ། དཔེ་བཞག་ན་རྒྱ་མཐོངས་ནང་དུ་ཉི་འོད་ཕོག་པ་ལྟར། ཉི་མ་ནམ་མཁར་ཡོད་ཀྱང་ཉི་འོད་རྒྱ་མཐོངས་ནང་དུ་ཕོག་པ་བཞིན་ནོ། །བྱང་ནས་གོམས་ཆ་བརྒྱུད་ན་མིག་བཙུམས་ཀྱང་སྟོང་གཟུགས་འཆར་ཐུབ་པ་ཡིན། འདི་མེ་ལོང་ངོར་རང་གི་གཟུགས་བརྙན་ཤར་བའི་དཔེས་མཚོན་པ་ཡིན། སྙིང་གི་རིག་པ་རང་ཉིད་ཀྱི་བྱད་བཞིན་ལྟ་བུ་དེ། ཕྱིའི་ཡུལ་ན་མེད་ཀྱང་ནང་ན་ཡོད་པ་མཐོང་རྒྱུ་འདི། དམིགས་པ་དག་པའི་འོད་རྩའི་ཡོན་ཏན་གྱི་ཆ་ལས་ཤར་བ་ཡིན། གསར་བ་ཚོས་མིག་གིས་ཟུམ་པའི་ཚུལ་གྱིས་རྫི་མ་གཉིས་ཀྱི་བར་ཕྱོགས་སུ་ཡར་གཏད་དེ་བལྟས་དུས་དང་པོར་དབྱིངས་རྣམ་དག་གི་སྒྲོན་མ་འཆར་དགོས་པ་རེད། དེ་ཅི་འདྲ་བ་ཞིག་ཡིན་ན། མཐིང་ག་ཁྱབ་པ་ཆེན་པོ་དང་ནི། དེ་མཆེད་པའི་སྟོབས་ཀྱིས་ལྔ་ལྡན་འོད་ཀྱི་མུ་ཁྱུད་གཉིས་རིམ་པས་འཆར་བ་ཡིན། སྤྱིར་ན་གང་ཟག་སོ་སོའི་རྩ་ཁམས་ཀྱི་དབང་གིས་འཆར་ལུགས་གཅིག་ཏུ་མ་ངེས་ཀྱང་། ཕྱིའི་ནམ་མཁའ་སྔོན་པོ་འདི་མ་ཡིན་པའི་ནང་རྣམ་དག་དབྱིངས་ཀྱི་སྒྲོན་མའི་གདངས་སྔོ་རེ་བ་ཞིག་གིས་ནམ་མཁའ་ཁེབས་སོང་བ་ལྟ་བུའི་སྣང་བ་ཞིག་ཡོད་ཆོག དེ་དང་པོ་ནས་ཤར་ཐུབ་པ་མིན་ཡང་རིམ་གྱིས་གོམས་དགོས་པ་ཡིན། དེ་རིང་ལག་ཁྲིད་བྱེད་དུས་འདིའི་གོ་རིམ་ཚང་མ་བཤད་དགོས་པས་ཡིན། སྒོ་ཡུལ་རླུང་རིག་གི་གནད་གསུམ་པོས་གཅུན་ཏེ་ནང་རིག་པ་གཞི་ལས་མ་གཡོས་དུས། དེའི་གདངས་འོད་སྣང་ཆར་ཤར་ཐུབ་པ་ཡིན་པ་ལས་གཞན་ཕྱིའི་ནམ་མཁའི་མཐོངས་ལ་ཅེར་བས་ཅི་ཡང་རིག་རྒྱུ་མེད། དེ་མ་དགོས་སྔོན་ཐོན་གྱི་ལག་ཆ་རྒྱང་ཤེལ་སྤུས་ལེགས་ཤིག་ཚད་ནས་བལྟས་ཀྱང་རིག་འོང་རྒྱུ་ཞིག་མེད་པ་ཡིན། དེའི་ཕྱིར་ན་ཐོད་རྒལ་མིག་གི་རྗེས་སུ་སེམས་སོང་ནས་ཉི་ཟླ་མར་མེའི་རྟེན་ཙམ་བྱས་པར་བལྟ་མ་ཤེས་དུས་མིག་ལོང་བའི་རྒྱུ་ཙམ་ལས་ཕན་པ་མེད་པས་དང་པོའི་དུས་སུ་རྐྱེན་རེར་བརྟེན་དགོས་ན་རང་གི་སྒོམ་ཁང་གི་སྐར་ཁུང་གི་དྲ་མའི་འོད་མར་ཁྲིད་དེ་བལྟས་ནའང་ཆོག་ལ། མིན་ན་མཐེབ་མཛུབ་གཉིས་ཀའི་སྦྱོར་བ་བརྒྱུད་དེ་མུན་པའི་རྣལ་འབྱོར་གྱི་ཁྲིད་རིམ་བཞིན་དུ་བསྒོམ་ནའང་གཅིག་གོ །མདོར་ན་འཆར་སྣང་ལ་ཆེད་གཏད་ཀྱིས་མ་བལྟས་ཀྱང་མཐོང་ཐུབ་ལ། རིམ་བཞིན་ཚད་ཕེབས་བརྒྱུད་དེ་ཟད་པའི་མཐར་སྐྱེལ་དགོས། དང་པོ་སྐྱ་ཙིག་ཙིག་འདྲ་བོ་མ་གཏོགས་མི་མཐོང་ཡང་རིམ་གྱིས་མཆེད་པའམ་གནས་འགྱུར་བའི་ཚུལ་གྱིས་བར་སྐབས་ན་འཆར་སྣང་ལ་འདི་མི་འོང་བསམ་རྒྱུ་མེད་པ་དེ་ལྟ་བུའི་ཚད་ལ་ཐོན་རྒྱུ་ཡོད་དོ། །སྤྱིར་རྒྱང་ཞགས་ཆུའི་སྒྲོན་མར་དབྱེ་བ་ཡོད་པའི་ནང་ནས་འོད་གསལ་གྱི་འཆར་སྣང་སྟོང་གཟུགས་མཐོང་བ་དེ། ཡེ་ཤེས་འདུས་པའི་རྒྱང་ཞགས་ཀྱི་ཡུལ་ལས་མཐོང་བའོ། །རྣམ་དག་དབྱིངས་ཀྱི་སྒྲོན་མ་བརྒྱུད་དེ་ཐིག་ལེ་སྟོང་པའི་སྒྲོན་མ་འཆར་ལ། དེའི་མཚན་ཉིད་གོང་བཤད་བཞིན་ཚོན་གང་འོད་ཀྱི་ཐིག་ལེ་གང་ཞིག་རང་གསལ་ཟླུམ་ཞིང་ཟུག་རྔུ་དང་བྲལ་བ་ཞིག་ཡིན། དང་པོར་ཁ་དོག་དམར་སེར་གྱི་མདངས་ཅན་དེ་རིམ་པས་འོད་ལྔའི་ཐིག་ལེ་ཟླུམ་གོར་དུ་འཆར་བ། དེ་ཡང་དཀྱིལ་མཐིང་ག ཀོ་མོག་གི་ཆུ་ནང་དུ་རྡོ་འཕངས་པ་ལྟ་བུ་རི་མོ་ཕྱི་རིམ་ནང་རིམ་གོར་གོར་ཡོད་པ། ཕུབ་ཀྱི་སྦ་སྐོར་ལྟ་བུ་གསུངས་ས་ཡང་ཡོད། གང་ལྟར་གཞི་སྙིང་ན་གནས་དུས། དབྱིངས་འོད་ལྔའི་ནང་ན་ཡོད་པ་རྨ་བྱའི་སྒོ་ང་ལྟ་བུ། འདིའི་གཞི་འདི་གནས་སྐབས་ཀྱི་གཞི། གཞི་ལས་གཞི་སྣང་ཤར་བའི་ད་ལྟ་རིག་པ་སྙིང་ལ་འོད་ཀྱི་གོང་བུར་བཞུགས་དུས་ཀྱི་གཞི་དེ་ཉིད་ལ་གསུངས་པ་ཡིན། ལམ་དབྱིངས་ལ་ཤར་དུས། ནམ་མཁའི་འཇའ་འོད་དང་འདྲ་བ། མཐར་ཕྱིན་དུས། ཁྱུང་ཕྲུག་སྒོང་རྒྱ་ལས་གྲོལ་བ་དང་འདྲ་བར་གསུངས་པས། ཡེ་ཤེས་མ་སྨིན་པའི་དུས་སུ་ཀུན་གྱི་གོ་འབྱེད་སྤྱད་བྱེད་ལ། སྣང་བའི་དུས་སུ་འོད་དུ་ཤར། གོམས་པ་མངོན་དུ་གྱུར་ན་སྐུ་རུ་སྣང་བ་ཡིན་ནོ། །མདོར་ན་རྣམ་དག་དབྱིངས་ཀྱི་སྒྲོན་མ། ནང་ཐིག་ལེ་སྟོང་སྒྲོན་གྱི་སྣང་ཆ་མཐིང་ག་ཁྱབ་པ་ཆེན་པོའི་འོད་དང་དེ་ལས་མཆེད་པ་ལྔ་ལྡན་ཡེ་ཤེས་ཆེན་པོ་ཟ་འོག་གི་བེར་ཆེན་བཀྲམ་པ་ལྟ་བུ་དང་། རྨ་བྱའི་མདོངས་དང་། ཉའི་མིག་དང་། ད་རུང་སྲོག་ཆགས་རྐུན་མོའི་མིག་སོགས་མདོར་ན་འོད་མདངས་ཅན་གྱི་དཔེ་རུ་བཞག་པ་ཡིན་ནོ། །དེ་ལྟ་བུའི་འོད་མདངས་ཀྱི་དབྱིངས་སྣང་དང་རིག་གདངས་རྡོ་རྗེ་ལུག་རྒྱུད་ཤར་བ་རིག་པའི་སྣང་བ་ཡིན། སྟོང་སྒྲོན་ལ་ཐིག་ལེ་ཞེས་བཏགས་པའང་འོད་ལྔའི་ཟླུམ་གོར་གྱི་གྲྭ་ཟུར་མེད་པའི་ཐིག་ལེའམ། གཞི་གནས་རིག་པའི་ཐིག་ལེ་ནས་རང་བྱུང་འབྲས་བུའི་ཐིག་ལེ་སྟེ། གོང་བཤད་བཞིན་ལྔ་ཡོད་པ་ལས་འདི་ཕྱི་མ། མིག་གི་འོད་རྩ་དང་འབྲེལ་ནས་ཤར་བའི་རང་བྱུང་འབྲས་བུའི་ཐིག་ལེ་ཡིན། ཐིག་ལེ་སྟོང་པའི་གནད་ཐམས་ཅད་འདིའི་ནང་དུ་འདུས་པས་ན། སྒྲོན་མ་འབར་བ་ལས། རང་བྱུང་འབྲས་བུ་ཐིག་ལེ་ཡིས། །སངས་རྒྱས་ཀུན་གྱི་དགོངས་པ་རྣམས། །རྩོལ་སྒྲུབ་མེད་པར་དབྱིངས་སུ་ཟླུམ། །ཞེས་གསུངས་སོ། །སྒྲོན་མ་བཞིའི་སྣང་བ་ཐམས་ཅད་ལ་རྡོ་རྗེ་ལུ་གུ་རྒྱུད་འཁོར་དང་བཅས་པ་གསུངས་ནས་ལུག་རྒྱུད་ཀྱི་མིང་གཅིག་གིས་ཐམས་ཅད་མཚོན་དུས་ཀྱང་ཡོད་ལ། གང་ལྟར་དབྱིངས་རིག་ཟུང་འཇུག་གི་སྣང་ཆ་ཡིན་ནོ། །ཤེས་རབ་རང་བྱུང་གི་སྒྲོན་མ་རྟེན་གང་ལ་བརྟེན་ནས་གནས་ཤེ་ན། རང་བྱུང་གི་ཡེ་ཤེས་ལ་ལྡན་པ་དང་ལྡན་ཆོས་ཀྱི་ཚུལ་དུ་གནས་སོ། །སྒོ་གང་དུ་འཆར་ན་འདི་དཀའ་གནད་ཅིག་ཡིན། དེ་ཡང་ཤེས་རབ་ངོ་མ་དེ། ཤེས་པས་ཡུལ་རིག་ཅིང་རྟོག་པར་མ་སྐྱེས་པའི་གསལ་བ་དེ་ལ་ངོས་མི་འཛིན་ཐབས་མེད་ཡིན། དེ་ལྟ་ན་སྒོ་དབང་པོ་ལྔ་རེད། དབང་པོ་སྒོ་ལྔའི་རྟོག་མེད་ཀྱི་ཤེས་པ་དེ་སེམས་མིན་ནམ་ཞེ་ན། དབང་ཤེས་རྟོག་བྲལ་སེམས་ཡིན་ན་ཡང་། རང་བྱུང་ཡེ་ཤེས་ཀྱི་ཆ་གསལ་རིག་རྟོག་མེད་གང་ལའང་མི་འཛིན་པ་ཞིག་ཡོད་པ་དེ་ཤེས་རབ་ལ་ངོས་བཟུང་བ་ཡིན། ཤེས་རབ་ཀྱི་དབྱེ་བའི་སྐབས་སུ་འཇུག་བྱེད་རྣམ་གསུམ་གྱི་ཤེས་རབ་ཅེས་ཐོས་བསམ་སྒོམ་གསུམ་གྱི་ཤེས་པའི་རང་དུས་དེ་ལ། རྟོག་བྱེད་སེམས་ཀྱི་ཆ་མ་ཡིན་པའི་ཡེ་ཤེས་རང་བཞིན་གྱིས་གསལ་བའི་ཆ་ཞིག་ཡོད་པ་དེ་ལ་ངོས་འཛིན་ཤེས་པ་འདི་ཚོ་གནད་ཆེ་སའི་དཀའ་གནད་ཀྱི་སྒྲོག་འགྲོལ་ཡིན་ནོ། །མདོར་ན་ཤེས་རབ་རང་བྱུང་གི་སྒྲོན་མའི་ངོ་བོ་དེ་སྙིང་ན་གནས། རྩལ་གྱིས་ལུས་ལ་ཁྱབ་ཅིང་ཡུལ་ལ་འཕྲོ། གདངས་རྡོ་རྗེ་ལུ་གུ་རྒྱུད་དུ་ཤར་བ་ཡིན་པ་དེ་ལྟར་ཤེས་དགོས་སོ། །དེ་ལྟ་བུ་དབྱིངས་རིག་གི་སྣང་བ་དེ། དང་པོ་འདབ་ཆགས་འཕུར་སྐྱེན་ལྟ་བུ་ཞེས། བྱ་ནམ་མཁའ་ནས་འཕུར་བ་ལྟ་བུའི་མགྱོགས་ཚད་ཅན། དེ་རིམ་པས་ནང་གི་རླུང་རིག་དལ་རིམ་བཞིན་རི་དྭགས་རྩིབས་ནས་རྒྱུག་པ་ལྟར་ཅུང་ཟད་དལ་བ། དེ་འཕྲོར་བུང་བ་བཅུད་ལ་འཁོར་བ་ལྟ་བུ་དང་། དེ་འཕྲོར་སྨིག་རྒྱུ་དང་། དེ་ནས་འགུལ་འཁྲིགས་ཡོད་ཙམ། དེ་ནས་མཐར་དོན་ལ་མ་ཡེངས་པའི་ཚོད་ཀྱིས་ལྡེམ་བཞིན་པ་དང་མེར་བའི་རྣམ་པ་ཅན། དེ་ལྟར་དོན་ལ་ཇེ་བརྟན་དུ་གྱུར་ནས་ཐིག་ལེ་སྐུ་དང་ཚོམ་བུའི་དཀྱིལ་འཁོར་ཡོངས་རྫོགས་ཀྱི་རྣམ་པ་ཅན་དུ་འཆར་ཐུབ་པོ། །སྣང་བ་འཆར་ཚུལ་ལའང་། དང་པོ་དམར་སེར་ཟླུམ་པོ་ནས་ཕྱི་ནས་འོད་ལྔའི་མུ་ཁྱུད་དང་། སྒྲོན་མ་མེ་ལོང་ཙམ། འོད་རེ་ལྡེ་ཙམ། ཐིག་ལེ་མཁར་ཕོར་ཙམ་སྣང་རྒྱུ། དེ་ནས་རིམ་པར་སྐུ་དང་བཅས་པའི་མཆེད་ལུགས་དེ་ལྟར་ཡོད་ཚུལ་ཡང་གསུངས་ཡོད། དོན་བསྡུ་ན་ཡེ་ཤེས་རྫོགས་པའི་སྣང་བ་དབྱིངས་དང་། ཆོས་ཉིད་དག་པའི་སྣང་བ་རིག་པ། ཐིག་ལེ་སྨིན་པའི་སྣང་བ་སྐུ་རུ་ཤར་བ་ནས་དཀྱིལ་འཁོར་ཡོངས་རྫོགས་ཀྱི་ཚད་ལ་ཕེབས་པ་ཚེས་བཅོ་ལྔའི་ཟླ་བ་ལྟ་བུ་ནས། སླར་ཆོས་ཉིད་ཟད་པའི་སྣང་བ་ཀ་དག་ཆེན་པོ་ནང་དབྱིངས་སུ་གཞི་ཐིམ་རེད་རྒྱུའི་གོ་དོན་དེ་ལྟར་རེད། དེ་དང་ཆབས་ཅིག་འདིའི་ངོ་སྤྲོད་ཚང་མ་དེ་རིང་གི་རིག་པའི་རྩལ་དབང་དང་བསྟུན་ཏེ་ཚར་གཅིག་དལ་འདོན་བྱས་ནས་འགྲོ། ཆོས་ཁྲིད་རྗེས་མར། ཡང་བསྐྱར་ངོ་སྤྲོད་ཀྱི་ཚིག་དེད་དེ་ཁྲིད་ཀྱི་ལུགས་བྱས་ཏེ་བཤད་རྒྱུ་ཡིན། ད་འདིའི་མཚམས་ནས་བདེ་བར་ཞལ་རང་ལུགས་སུ་འཁོར་ཏེ་ཕྱག་དཔེ་མི་གཟིགས་པར་མཉམ་བཞག་མཛད་དགོས། དེ་ནས་བླ་མས་ངོ་སྤྲོད་འདི་ལྟར་གདབ་གསུངས་པའི་མཚམས་ནས་མར་ངས་འདོན་འགྲོ་དུས་ཁྱེད་རྣམས་ཀྱིས་གསན་བཞིན་དོན་ལ་གཞོལ་གནང་མཛོད། ཀྱེ་སྐལ་ལྡན་རིགས་ཀྱི་བུ་རྣམས་ཚུར་ཉོན་དང་། །དེ་ཡང་འོ་སྐོལ་རྣམས་ཀྱི་ཙིཏྟ་ཡི། །གསང་བའི་སྦུབས་ན་སངས་རྒྱས་ཐམས་ཅད་ཀྱི། །ཐུགས་དང་དབྱེར་མེད་རིག་པའི་ཡེ་ཤེས་ཉིད། །འདུས་མ་བྱས་ཤིང་ལྷུན་གྱིས་གྲུབ་པ་ཡི། །གདོད་མའི་མགོན་པོ་འོད་མི་འགྱུར་བ་ཞེས། །ངོ་བོའི་ཆ་ནས་སྟོང་ཞིང་བདག་མེད་པ། །རང་བཞིན་ཆ་ནས་འགག་པ་མེད་པར་གསལ། །ཐུགས་རྗེའི་རྩལ་ལས་སྐུ་དང་ཡེ་ཤེས་སུ། །དབྱེར་མེད་ནང་གསལ་བུམ་ནང་མར་མེ་ལྟར། །གསལ་བའི་འོད་གདངས་ཀ་ཏི་ཤེལ་སྦུགས་ཀྱི། །འོད་རྩའི་ནང་བརྒྱུད་རྒྱང་ཞགས་ཆུའི་སྒྲོན་མ། །མིག་གཉིས་སྒོ་རུ་འཐོན་ནས་ནམ་མཁའ་ལ། །འཇའ་ཚོན་ལྟ་བུར་ཤར་བ་དེ་ཉིད་ནི། །དབྱིངས་ནི་རྣམ་པར་དག་པའི་སྒྲོན་མ་ཡིན། །དེ་ཡི་ནང་དུ་དཔེར་ན་ཀོ་མོག་གི། །ཆུ་ལ་རྡོ་བསྐྱུར་རི་མོ་ལྟ་བུའམ། །རྨ་བྱའི་མདོངས་ལྟར་ཁ་དོག་ལྔ་ལྡན་གྱི། །ཐིག་ལེ་ཟླུམ་པོ་ཐིག་ཕྲན་བཅས་པ་འཆར། །དེ་ཉིད་ཐིག་ལེ་སྟོང་པའི་སྒྲོན་མ་ཡིན། །དབྱིངས་དང་ཐིག་ལེའི་ནང་དུ་རྟ་རྔ་ལ། །མདུད་པ་བཏབ་འདྲ་མེ་ཏོག་ཆུན་པོ་དང་། །མུ་ཏིག་དྲྭ་བ་ལྕགས་ཐག་འདྲ་བ་སོགས། །ཁ་དོག་སྔོན་པོ་སྦྲང་ཆར་འབབ་བཞིན་འཆར། །དེ་ཉིད་རྡོ་རྗེ་ལུག་རྒྱུད་ཅེས་བྱ་ཡིན། །ཀློང་ཆེན་མཛོད་བདུན་ངོ་སྤྲོད་སྐབས་ཤིག་ཏུ། །འོད་གསལ་སྤྱི་ལ་རྡོ་རྗེ་ལུག་རྒྱུད་ཅེས། །སྤྱི་སྡོམ་ཚིག་ཏུ་བཤད་པའང་ཡོད་པ་ཡིན། །དེ་དག་རྣམས་ལ་མ་ཡེངས་བལྟས་པའི་ཚེ། །ཀ་དག་ལྷུན་གྲུབ་གཉིས་སུ་མེད་པ་ཡི། །ཤེས་པ་གསལ་སྟོང་མི་རྟོག་ཡེ་ཤེས་དེ། །ཤེས་རབ་རང་བྱུང་སྒྲོན་མ་ཞེས་བྱ་ཡིན། །ཨེ་མ་ཧོ། དང་པོ་སྐུ་ལྔའི་ངོ་སྤྲོད་རིམ་པ་ནི། །འོད་གསལ་སྣང་བ་འདི་རྣམས་ཐམས་ཅད་ནི། །སྐུ་ལྔར་མཚོན་ཏེ་རིག་པའི་ཡེ་ཤེས་ཉིད། །འོད་གསལ་ཆེན་པོར་གསལ་བས་རྣམ་སྣང་སྐུ། །འཕོ་འགྱུར་མེད་པས་མི་བསྐྱོད་རྡོ་རྗེའི་སྐུ། །དེ་ཉིད་འཕེལ་དང་བཅས་པ་རིན་འབྱུང་སྐུ། །འོད་གསལ་མཐའ་དབུས་མེད་པས་སྣང་མཐའི་སྐུ། །འོད་ལྔ་ལྷུན་གྲུབ་ཤར་བ་དོན་གྲུབ་སྐུ། །རིགས་ལྔའི་སངས་རྒྱས་ལྷ་ཞལ་མཐོང་བའོ། །དེ་ཉིད་གཟུང་འཛིན་ཞེན་པས་མི་བཅིངས་པར། །གསལ་སྟོང་འཛིན་མེད་ཉིད་དུ་བསྒོམ་པ་ལམ། །རིགས་ལྔའི་སྐུ་རྣམས་མཐོང་དུས་འབྲས་བུའོ། །གཉིས་པ་ཡེ་ཤེས་ལྔ་ཡི་ངོ་སྤྲོད་ནི། །འོད་གསལ་དེ་ཉིད་དྲི་མ་དང་བྲལ་ཞིང་། །སྐུ་རྣམས་ཀུན་གྱི་འཆར་གཞི་བྱེད་པས་ན། །མེ་ལོང་ལྟ་བུའི་ཡེ་ཤེས་ཞེས་བྱའོ། །གང་དུའང་དབྱེར་མེད་མཉམ་ཉིད་ཡེ་ཤེས་སོ། །སོ་སོར་འཆར་བས་སོར་རྟོག་ཡེ་ཤེས་སོ། །ལྷུན་གྱིས་གྲུབ་པས་བྱ་གྲུབ་ཡེ་ཤེས་སོ། །དེ་རྣམས་གཞི་མེད་ཡེ་སྟོང་རྩ་བ་དང་། །བྲལ་བས་ཆོས་ཀྱི་དབྱིངས་ཀྱི་ཡེ་ཤེས་སོ། །རིག་པ་ཡེ་ཤེས་ལྔ་ཡི་རང་བཞིན་དུ། །ཡེ་ནས་འདུ་འབྲལ་མེད་པར་བཞུགས་པའོ། །དེ་ཡི་ངང་ལ་ས་ལེར་བསྒོམ་པ་ལམ། །སྟོང་ཉིད་འོད་དུ་གསལ་བ་འབྲས་བུའོ། །གསུམ་པ་རིགས་ལྔའི་ངོ་སྤྲོད་རིམ་པ་ནི། །འོད་གསལ་དེ་ཉིད་དེ་བཞིན་གཤེགས་པ་རྣམས། །གཤེགས་ལམ་ཡིན་པས་དེ་བཞིན་གཤེགས་པའི་རིགས། །འོད་གསལ་འཕོ་འགྱུར་མེད་པ་རྡོ་རྗེའི་རིགས། །ཡོན་ཏན་དུ་མ་འབྱུང་བས་རིན་ཆེན་རིགས། །སྣང་བ་སྐྱོན་གྱིས་མ་གོས་པདྨའི་རིགས། །དེ་ལ་གོམས་ན་ལྷག་མེད་འགྲུབ་པས་ན། །ལས་ཀྱི་རིགས་ཏེ་ཝ་ལེར་བསྒོམ་པ་ལམ། །མཐར་ཕྱིན་ཕྱིར་མི་ལྡོག་པའི་འབྲས་བུའོ། །བཞི་པ་འོད་ལྔའི་ངོ་སྤྲོད་རིམ་པ་ནི། །འོད་གསལ་དེ་རྣམས་དྲི་མ་མེད་པས་དཀར། །རྩལ་མ་འགགས་པས་སེར་པོ་རང་བཞིན་དུ། །རང་གསལ་སྣང་བས་དམར་པོ་བྱ་བ་དང་། །བྲལ་བས་ལྗང་གུ་འགྱུར་བ་མེད་པས་མཐིང་། །ཁ་དོག་སྣང་འཛིན་བྲལ་བ་བསྒོམ་པ་ལམ། །འབྱུང་ཁམས་དབྱིངས་སུ་དག་པ་འབྲས་བུའོ། །ལྔ་པ་རླུང་ལྔའི་ངོ་སྤྲོད་རིམ་པ་ནི། །འོད་གསལ་སྣང་བ་འདི་རྣམས་ཐམས་ཅད་ནི། །ཡེ་ཤེས་དྲོད་དང་མ་བྲལ་མེ་མཉམ་རླུང་། །འཁོར་འདས་སྣང་ཆ་འཛིན་པ་སྲོག་འཛིན་རླུང་། །དེ་ལ་གོམས་པས་འཁོར་བ་མྱང་འདས་གཉིས། །སོ་སོར་འབྱེད་པས་དྭངས་སྙིགས་འབྱེད་པའི་རླུང་། །དག་དང་མ་དག་ཀུན་ལ་ཡེ་ཤེས་ཀྱི། །འོད་ལྔ་དེ་ཡིས་ཁྱབ་པའི་ཁྱབ་བྱེད་རླུང་། །དེ་ཉིད་ཉམས་བླངས་འཁོར་བའི་སྲོག་བཅད་ནས། །མྱ་ངན་འདས་པའི་ས་རུ་སྐྱེལ་བས་ན། །སྙིང་རྗེ་མེད་པ་བསྐལ་པ་ལས་ཀྱི་རླུང་། །དེ་ཡི་ངང་ལ་མ་བཅོས་བསྒོམ་པ་ལམ། །མཐའ་རུ་ཕྱིན་དུས་མཐར་ཐུག་འབྲས་བུའོ། །དྲུག་པ་ཤེས་རབ་ལྔ་ཡི་ངོ་སྤྲོད་ནི། །འོད་གསལ་རྟོགས་དང་མ་རྟོགས་ཁྱད་པར་ལས། །འཁོར་བ་མྱང་འདས་གཉིས་སུ་འབྱེད་པས་ན། །འབྱེད་པའི་ཤེས་རབ་འོད་གསལ་ཡེ་ཤེས་ཀྱི། །རྩལ་སྣང་སྡུད་པས་སྡུད་པའི་ཤེས་རབ་དང་། །འོད་སྣང་འགྲོ་འོང་དང་བཅས་བསྐྱོད་པས་ན། །བསྐྱོད་པའི་ཤེས་རབ་དེ་ཉིད་དོན་རྟོགས་ན། །འཁོར་བ་ལས་སྒྲོལ་སྒྲོལ་བའི་ཤེས་རབ་སྟེ། །དེ་ཡིས་ངང་ལ་རྒྱུན་དུ་བསྒོམ་པ་ལམ། །མཐའ་རུ་ཕྱིན་དུས་མཐར་ཐུག་འབྲས་བུའོ། །བདུན་པ་མཁའ་འགྲོ་ལྔ་ཡི་ངོ་སྤྲོད་ནི། །འོད་གསལ་མཐིང་ཀ་སངས་རྒྱས་མཁའ་འགྲོ་དང་། །དཀར་པོ་རྡོ་རྗེ་མཁའ་འགྲོ་སེར་པོ་ནི། །རིན་ཆེན་མཁའ་འགྲོ་དམར་པོ་པདྨ་ཡི། །མཁའ་འགྲོ་ལྗང་གུ་ལས་ཀྱི་མཁའ་འགྲོ་སྟེ། །མཁའ་འགྲོ་ལྔ་ཡི་ལྷ་ཞལ་མཐོང་བ་ཡིན། །དེ་ཡི་ངང་ལ་མ་ཡེངས་བསྒོམ་པ་ལམ། །སྣང་བ་མཐའ་རུ་ཕྱིན་དུས་འབྲས་བུའོ། །བརྒྱད་པ་མཆོག་གསུམ་སྐུ་གསུམ་ངོ་སྤྲོད་ནི། །འོད་གསལ་ངོ་བོ་སྟོང་པ་ཆོས་ཀྱི་སྐུ། །འོད་དང་ཐིག་ལེ་འཆར་བ་ལོངས་སྤྱོད་རྫོགས། །སྣ་ཚོགས་འཆར་ཞིང་འཕྲོ་བ་སྤྲུལ་པའི་སྐུ། །ཡེ་ནས་སྐུ་གསུམ་འབྲལ་མེད་རང་ཉིད་ལ། །གནས་པ་ད་ལྟར་རང་ངོ་ཤེས་པ་ཡིན། །དེ་ལ་གོམས་ནས་སྐུ་གསུམ་ལམ་སྣང་དུ། །ཤར་ནས་མཐར་ཐུག་གཞོན་ནུ་བུམ་པའི་སྐུ། །བརྙེས་དུས་དོན་གྱི་འབྲས་བུ་ཐོབ་པའོ། །དཀོན་མཆོག་གསུམ་ཡང་རང་ལ་ཡེ་ནས་གནས། །ཆོས་ཉིད་མ་འཁྲུལ་གཞི་ཡི་སངས་རྒྱས་དང་། །སྒྲ་ཚིག་ལས་འདས་དོན་གྱི་དམ་པའི་ཆོས། །འགྱུར་མེད་གནས་པ་སྙིང་པོའི་དགེ་འདུན་ཏེ། །གནས་ལུགས་དོན་དམ་རྡོ་རྗེའི་སྐྱབས་འགྲོ་དང་། །འབྲལ་མེད་ངང་ནས་སྣང་བ་བཞི་པོ་ལ། །སྤྱོད་པ་ཡིན་ནོ་སྐལ་ལྡན་རིགས་ཀྱི་བུ། །འོད་གསལ་ཡེ་ཤེས་སྣང་ཆ་འདི་ཉིད་ནི། །བློ་ཡིས་བཏགས་ཤིང་རྩ་རླུང་འཛིན་རྩོལ་གྱི། །རྐྱེན་ལས་བྱུང་བའི་ཤེས་ཉམས་སྟོང་གཟུགས་ཀྱི། །འཁྲུལ་སྣང་རབ་རིབ་མ་དེ་མ་ཡིན་པར། །གདོད་ནས་གྲུབ་པའི་ཆོས་ཉིད་མངོན་སུམ་གྱི། །ཉམས་སྣང་མི་བསླུ་བ་དེ་མཐོང་བ་ཡིན། །དཀྱིལ་འཁོར་འདི་ཡིན་བསྐྱེད་བཟླས་རྫོགས་རིམ་འདི། །བླ་མ་ཡི་དམ་མཁའ་འགྲོ་འདི་ཡིན་ནོ། །དབང་དང་སྡོམ་པ་དམ་ཚིག་འདི་ཉིད་ཡིན། །འདི་ཉིད་ཉམས་སུ་ལེན་པ་སྐལ་བ་བཟང་། །དེ་ལྟར་སྣང་བ་དེ་རྣམས་ཀུན་རྫོབ་ཀྱི། །སྣང་ཚུལ་འཇིག་པའི་ཆོས་སུ་ཡེ་མེད་དེ། །དོན་དམ་འདུས་མ་བྱས་ཀྱི་ཆོས་ཉིད་དོ། །འདི་ཉིད་བྱས་ཤིང་གོམས་པས་བྱུང་བ་མིན། །ཡེ་ཉིད་ནས་ནི་རང་ལ་གནས་པ་ཡིན། །རིག་གདངས་སྒྲོན་མའི་སྣང་བ་འདི་ཉིད་ལ། །ས་ཆུ་མེ་རླུང་འབྱུང་བཞིའི་དགྲ་ཡིས་ཀྱང་། །འདི་ཉིད་གཞིག་ཅིང་གཞོམ་དུ་ནུས་མ་ཡིན། །འདོད་ཆགས་ཞེ་སྡང་གཏི་མུག་ཉིད་ཀྱིས་ཀྱང་། །འདི་ཉིད་ཡེ་ནས་སྒྲིབ་པ་མ་ཡིན་ནོ། །ཡེ་ནས་མ་བྱས་རང་བྱུང་རང་ཤར་བའི། །སྐུ་གསུམ་འདུ་འབྲལ་མེད་པའི་འོད་གསལ་གྱི། །དཀྱིལ་འཁོར་མཐོང་བ་ཡིན་པས་བསྒོམ་པ་ལ། །བརྩོན་པར་གྱིས་ཤིག་སྐལ་ལྡན་སྙིང་གི་བུ། །དེ་ནས་སློབ་མ་སྤྲོ་བ་བསྐྱེད་པ་ནི། །སྐལ་ལྡན་བུ་རྣམས་འདི་ལྟར་མཐོང་བ་འདི། །རང་བྱུང་རིག་པ་ཐིག་ལེ་ཉག་གཅིག་གི །ཆོས་ཉིད་མངོན་སུམ་སྣང་བ་ཞེས་བྱ་ཡིན། །བླ་མ་སངས་རྒྱས་བྱང་སེམས་ཡི་དམ་དང་། །མཁའ་འགྲོ་སོགས་ཀྱི་ལྷ་ཞལ་མངོན་སུམ་དུ། །མཐོང་བ་ཞེས་ཀྱང་བྱ་སྟེ་བསོད་ནམས་དང་། །ཡེ་ཤེས་ཚོགས་གཉིས་རྫོགས་པ་ཞེས་བྱའོ། །དུས་གསུམ་རྒྱལ་བ་མ་ལུས་ཐམས་ཅད་ཀྱི། །དབང་རྣམས་དུས་གཅིག་ཐོབ་པ་ཞེས་བྱའོ། །རིག་པའི་རྩལ་དབང་ཐོབ་པ་ཞེས་བྱའོ། །ཆོས་སྐུ་ལོངས་སྐུ་སྤྲུལ་སྐུ་ཡེ་ཤེས་ལྔ། །མངོན་དུ་གྱུར་པ་ཞེས་ཀྱང་བྱ་བའོ། །ལས་དང་བག་ཆགས་སྡིག་སྒྲིབ་མ་རིག་པ། །ཐམས་ཅད་དག་པ་ཞེས་ཀྱང་བྱ་བའོ། །ལས་དང་སྐལ་བར་ལྡན་པ་ཞེས་བྱའོ། །དེ་རིང་ཉིད་ནས་ཀུན་བཟང་རིགས་ལྔ་དང་། །སྐལ་བ་མཉམ་པ་ཞེས་ཀྱང་བྱ་བའོ། །བུ་ཁྱོད་དེ་རིང་རྙེད་པ་ཆེན་པོ་རྙེད། །རིག་པའི་རྩལ་གྱི་དབང་ཆེན་འདི་ཐོབ་པས། །སངས་རྒྱས་སུམ་སྟོང་མང་པོའི་ཞལ་མཐོང་ངོ་། །ད་ནས་མངལ་གྱི་གྲོང་ཁྱེར་རྒྱུན་ཆད་ནས། །ཐར་བའི་ལམ་སྣ་ཟིན་པ་ཡིན་ནོ་བུ། །དེ་ལྟ་ནའང་བྱང་ཆུབ་སེམས་དཔའ་ཉིད། །ས་བཅུ་རིམ་གྱིས་བགྲོད་པ་རྣམས་ཀྱིས་ཀྱང་། །དེ་བཞིན་གཤེགས་པའི་ཁམས་ཀྱི་ཡོན་ཏན་ཀུན། །མཐའ་དག་མངོན་སུམ་མཐོང་བ་མ་ཡིན་ཕྱིར། །ཁྱོད་ཀྱིས་ད་ལྟ་མངོན་སུམ་མཐོང་བ་ཡིན། །ཉམས་སུ་བླངས་ན་སྔར་གྱི་བཤད་པ་ཡི། །ཞིང་ཁམས་ལྔ་བོ་ཚེ་འདིར་མངོན་སུམ་དུ། །མཐོང་ནས་སངས་རྒྱས་ཞིང་ལ་སྤྱོད་ནུས་པའི། །དེ་རིང་ནས་བཟུང་སྣང་བཞིའི་ཡོན་ཏན་ཀུན། །མཐར་ཐུག་བར་དུ་ཉམས་ལེན་བྱས་ནས་ཀྱང་། །ཆོས་ཟད་བྱང་ཆུབ་ས་ལ་རེག་པར་མཛོད། །ཅེས་པ་ལ་སོགས་སྤྲོ་བ་བསྐྱེད་པ་དང་། །བཀྲ་ཤིས་རིན་ཆེན་ཕྲེང་བའི་ཤིས་པ་བརྗོད། །ཅེས་གསུངས་ནས་ངོ་སྤྲོ་སྤྲོ་བ་བསྐྱེད་པ་དང་བཅས་པ་སོང་སྟེ། ཚིག་གི་སྟེང་ནས་ཆོས་ཁྲིད་རྗེས་མར་ཁྲིད་རྒྱུ་བྱེད་ན་ཆོག་གི འདིའི་མཚམས་ནས་མཆོག་གསུམ་གྱི་བཀྲ་ཤིས་ཤིག་བརྗོད་ནས། རིན་ཆེན་འཕྲེང་བའི་ཤེས་པ་བརྗོད་པ་དེས་འགྲུབ་རྒྱུ་བྱེད། ཨོཾ་ཡེ་དྷརྨ་སོགས། སྟོན་པ་སངས་རྒྱས་རྣམས་ཀྱིས་སོགས་ནས་བཀྲ་ཤིས་ཤོག ཌཱ་དྲིལ་བཅས། ཧོ་གདོད་མོའི་མགོན་པོ་ཀུན་བཟང་འོད་མཐའ་ཡས། སྒྱུ་འཕྲུལ་དྲྭ་བའི་བདག་ཉིད་རྡོ་རྗེ་སེམས། །དབྱེར་མེད་རིག་འཛིན་བླ་མའི་བྱིན་རླབས་ཀྱིས། །དགོངས་བརྒྱུད་འཕོ་བ་ཐོབ་པའི་བཀྲ་ཤིས་ཤོག །སྒྲིབ་གཉིས་དབང་འཛིན་འཆིང་བ་དབྱིངས་སུ་ཞི། །ཀ་དག་ལྷུན་གྲུབ་དབྱེར་མེད་རྟོགས་པ་ཡིས། །རང་སྣང་དབང་བསྡུས་རླུང་སེམས་དབུ་མར་བསྒྲལ། མཆོག་གི་ཕྲིན་ལས་འགྲུབ་པའི་བཀྲ་ཤིས་ཤོག །ཌཱར་དྲིལ་འུར་བཅད། དེ་ཡན་ཆོད་ཀྱིས་རིག་པའི་རྩལ་དབང་བསྐུར་བ་དམ་པ་གོང་མའི་ཕྱག་བཞེས་ཀྱི་ལུགས་ལྟར་དུ། རྒྱུད་ཀྱི་དགོངས་དོན་མན་ངག་གིས་བཀྲལ་བ་ཐམས་ཅད་ཀྱི་བཞེད་པ་དང་མཐུན་པ་ཞིག་བྱས་ནས་ཡོངས་སུ་ཆ་ཚང་བར་གྲུབ་པ་རེད། མོས་གུས་ཅན་ལ་བྱིན་རླབས་འཕོ་བའི་སྟོབས་ཀྱིས་ངོ་སྤྲད་པ་དང་ནི། བརྩོན་འགྲུས་ཅན་ལ་ཉམས་ལེན་སྒོམ་པའི་ལུགས་ཀྱིས་ངོ་སྤྲད་པའི་ཚུལ་ཅན་གཉིས་ཀ་དེས་སོང་ནས། ཤེས་རབ་ཅན་ལ་ལྟ་ཐོག་ནས་ངོ་སྤྲད་པ། ད་ལྟ་གོང་ནས་བཤད་པའི་འཇུག་བྱེད་རྣམ་གསུམ་གྱི་ཤེས་རབ་ཐོས་བསམ་སྒོམ་པས་དབྱེ་མཚམས་འབྱེད་རྒྱུ་རེད། དེའི་ཚུལ་གོང་གི་ངོ་སྤྲོད་ཀྱི་ཚིག་རྣམས་ཆོས་ཁྲིད་རྗེས་མར་སླར་ཡང་ཚིག་རེ་བཞིན་དོན་དང་སྦྲེལ་ནས་འགྲེལ་བ་འབྲུ་ནོན་གྱི་ཚུལ་དུ། སྨིན་གྲོལ་གཉིས་ཀའི་བབས་རིམ་དང་ཡང་མཐུན་པ་ཞིག་གིས་གྲོལ་བྱེད་ཁྲིད་ཀྱི་ཚུལ་དུ་རྗེས་ནས་བཤད། དེ་ལྟར་ན་རིག་པའི་རྩལ་དབང་བསྐུར་བའི་དགོས་དོན་དང་། དེའི་ནང་དོན་གྱི་གནད་ངོ་མ་དེ་ཇི་ལྟ་བུ་ཞིག་ཡིན་སྙམ་ན། དེའི་དོན་སྐོར་གྱི་གསལ་འདེབས་རགས་བསྡུས་ཤིག་སླར་ཡང་ཞུས་ན། ནང་ཤེས་རབ་རང་བྱུང་གི་སྒྲོན་མའི་ངོ་བོའམ། ཀ་དག་ཁྲེགས་ཆོད་ཀྱི་དགོངས་པ་རིག་པ་སྟོང་གསལ་འགག་མེད་ཀྱི་རིག་ཆ་རྗེན་ལ་ཕུད་པའི་ཉམས་ལེན་དེ་ཉིད་ཡར་ན་སྨིན་པ་དང་མཉམ་དུ་བསྐྱེད་རིམ་སྔོན་སོང་གི་སྒྱུ་ལུས་ལྷ་སྐུར་ལྡང་བ་སོགས་ལ་མི་ལྟོས་པར། ཐོད་རྒལ་ཉམས་ལེན་ལ་གོམས་པའི་སྟོབས་ཀྱིས་ལུག་རྒྱུད་ལྷ་སྐུར་སྨིན་པའི་ཕྱིར་ན། འདི་ལ་བསོད་ནམས་ཀྱི་ཚོགས་མཐའ་ཡས་པའི་བྱེད་ལས་ཚང་ཞིང་མཚན་ཉིད་རྫོགས་པ་ཡིན་པས་ན། ལྷ་སྐུའི་སྣང་ཆ་ཐམས་ཅད་དངོས་སུ་གྲུབ་པའི་ཡེ་ཤེས་ཀྱི་སྐུར་སྨིན་རྒྱུ་ལ་སོགས་པ། འདིའི་ཡོན་ཏན་ཐམས་ཅད་རིག་པའི་རྩལ་དབང་ཐོབ་པ་ལ་རག་ལས་ཡོད། དེ་ཡིན་ན་རིག་པའི་རྩལ་དབང་གི་ནང་དོན་དངོས་དེ་ཇི་ལྟར་ཡིན་སྙམ་ནས་འདང་ཞིག་བརྒྱབ་ན། མ་འོང་རང་ཉིད་སངས་རྒྱས་དུས་ཀྱི་ཤེས་བྱ་ཐམས་ཅད་ལ་ཆགས་ཐོགས་མེད་པའི་མཁྱེན་རབ་ཀྱི་རྩལ་དང་། ཤིན་ཏུ་རྣམ་པར་དག་པའི་ལོངས་སྤྱོད་ཟད་མི་ཤེས་པ། དེ་དང་མཐུན་པའི་འཁོར་དང་གཟི་བརྗིད་ལ་སོགས་པ། གཟུགས་སྐུའི་ཕུན་ཚོགས་ཐམས་ཅད་པོ། གློ་བུར་སྒྲིབ་བྱེད་ཀྱིས་ད་ལྟའི་གནས་སྐབས་སུ་མངོན་དུ་གྱུར་མ་ཐུབ་པ་མ་གཏོགས། ཡིན་རྒྱུ་རང་ལ་ཡོད་པའི་ད་ལྟའི་རིག་པ་འདི་ཉིད་ཀྱི་རྩལ་ལམ་ནུས་པ་ལས་འབྱུང་བ་ཞིག་ཡིན་པ་དེ་བསྟན་པ་རེད། དེ་ལྟ་ན་ནང་གསལ་གནས་ཚུལ་གྱི་དབང་དུ་བྱས་ནས་བཤད་ན། དེའི་འབྲས་ཆོས་དེ་དག་ཐམས་ཅད་ད་ལྟ་ནས་རང་ལ་རང་ཆས་སུ་བཞུགས་ཡོད་པ། རིག་པའི་རྩལ་དབང་གིས་དེ་ཉིད་གཏན་ལ་འབེབས་གྱིན་ཡོད་པ་རེད། གཏན་ལ་འབེབས་པ་ཙམ་གྱིས་མ་ཚད་པར་རིག་པ་སྐུ་གསུམ་གྱི་དཀྱིལ་འཁོར་དུ་དངོས་སུ་ཞུགས་ནས་སྨིན་པར་བྱེད་པའི་བྱིན་བརྒྱུད་ཀྱི་རྩལ་དབང་གིས་སྨིན་ཅིང་སད་པར་བྱས་པ་རེད། སྤྱིར་ན་ཀུན་རྟོག་དང་ལས་རླུང་གཡོ་བའི་གདངས་དེ་མར་ཞི་སོང་དུས། དེ་དང་མཉམ་དུ་འོད་གསལ་གྱི་རླུང་སེམས་སམ། རླུང་རིག་དེ་ནུས་པ་ཡར་ཇེ་ཆེར་ཡོང་བ་ཆོས་ཉིད་ཡིན། ཁྱད་པར་དུ་རིག་པའི་རྩལ་དབང་གི་ཟབ་གནད་ངོ་ཤེས་བཞིན་པས་ཁྲེགས་ཆོད་ཐོད་རྒལ་ཟུང་འབྲེལ་གྱི་མཉམ་བཞག་བསྐྱངས་ན། སྙིང་གའི་གཞོན་ནུའི་བུམ་སྐུའི་སྟེང་ན། དབྱིངས་ཐིག་རིག་གསུམ་གྱིས་བསྡུས་པའི་རྡོ་རྗེ་གསུམ་སྐྱེད་བྱེད་ཀྱི་ནུས་པ་གཞི་ལ་ཡོད་པ་དེ། རིམ་གྱིས་ཇེ་ཆེ་ཇེ་འཕེལ་དུ་བཏང་སྟེ་ཅི་ཙམ་འཕེལ་བ་དང་ལྷན་དུ་མི་ཤིགས་འོད་ལྔའི་ལང་ཚོའང་དེ་བཞིན་བཀྲག་མདངས་ལྷག་པར་འབར་གྱིན་ཡོད། དེ་འབར་བའི་མཐུས་ལུས་ཀྱི་རྩ་གནས་གཞན་གྱི་ཡེ་ཤེས་ཀྱི་རླུང་ཐམས་ཅད་ཀྱང་ནུས་པ་ཇེ་ཆེར་སོང་བར་བསྟུན་ཏེ། རིག་གདངས་ཀྱི་ཐིག་ལེ་ཇེ་གསལ་དང་། ལུག་རྒྱུད་ཀྱི་འགུལ་འཕྲིག་ཇེ་བརྟན། ལྷ་སྐུའི་རྣམ་པ་ཇེ་མངོན། རིག་རྩལ་གྱི་ཤེས་རབ་ཇེ་རྣོ། དེ་བཞིན་དུ་འོད་གསལ་གྱི་གཏིང་ཇེ་མཐུག་ལ་འགྲོ་བའོ། །རིག་པའི་རྩལ་དབང་དང་སྦྲགས་པའི་སྣང་བ་དེས་སྒྲོན་མ་ལྷག་པར་སྡུད་སྟོབས་ཆེ། ཅིའི་ཕྱིར་ཞེ་ན། དབྱིངས་སྣང་ལ་གོམས་པ་མྱུར་བའི་སྟོབས་ཀྱིས་འོད་གསལ་ནང་ནས་སད་དེ་ཉི་མ་དང་ཟླ་བའི་ཟེར་གྱི་འཆར་སྡུད་དང་། མར་མེའི་འོད་སོགས་ཀྱི་རྟེན་དང་། མིག་ཕྱེ་བཙུམ་གྱི་བྱེད་པ་ལའང་མི་ལྟོས་པར། གནམ་མ་དྭངས་ཉི་མའང་མ་དྲོ་ན་སྒོམ་ཐབས་མེད་པ་མིན་པར། སྟོང་གཟུགས་ཐམས་ཅད་ནང་རྒྱང་ཞགས་ཀྱི་སྒྲོན་མའི་སྦུབས་སུ་འཆར་ཡོང་བ་ཡིན། གནད་དེ་མ་ཤེས་ནས་ཁ་གནམ་ལ་གདང་སྟེ་འོད་ལ་ཅེ་རེ་བལྟས་པས་ལྷག་པར་ཐོད་རྒལ་གྱི་སྣང་བ་ལ་བརྟེན་ཏེ་སྣང་རིག་དབྱེར་མེད་ཀྱི་རིག་པ་སྟོད་ལ་མནན་ཚུལ་དེ་རྒྱུད་ཀྱི་དགོངས་པ་དང་མཐུན་པ་ཞིག་མ་ཤེས་དུས། སྟོང་གཟུགས་དང་། རིག་པ་གཉིས་རྒྱང་ཆད་དུ་སྣང་བའི་འཆར་ཚུལ་དེ་ལོག་མི་ཐུབ། དེ་མ་ལོག་པས་དེ་གཉིས་ཟུང་དུ་སྦྱོར་བའི་སྐུ་ཐུགས་ཟུང་འཇུག་དུ་འགྱུར་བའི་མཐར་ཐུག་འབྲས་བུའི་དུས་ཀྱི་ཀ་དག་ལྷུན་གྲུབ་ཟུང་འཇུག་གི་གོ་འཕང་དམ་པ་དེ་འགྲུབ་ལུགས་མེད་པ་རེད། ཁྲིད་ཡིག་དག་གི་ནང་དུ། རྒྱང་ཞགས་ཀྱི་སྒོར་འཆར་རྒྱུའི་འོད་སྣང་སོགས་ཀྱི་ཕྱིའི་འཆར་ཆ་རྐྱང་བར་བལྟ་བ་གནད་མི་ཆེ་ཞེས་བཤད་པ་དེ་ཙམ་མེད་པའི་རྒྱུ་མཚན་ཅི་ཡིན་སྙམ་ན། རིག་པའི་རྩལ་དབང་གི་ཁོང་འདི་ནས་ཚང་ཞིང་རྒྱས་པར་བསྟན་པའི་རྒྱུ་མཚན་གྱིས་རེད་འདུག་བསམ་གྱིན་ཡོད། དེའི་སྟབས་ཀྱིས་འདིར་གནད་ཀྱི་སྙིང་པོ་ངོ་མ་རུ་བཟུང་ནས་ཞུས་ན། རྩལ་དབང་ངོ་སྤྲོད་ཀྱི་སྐབས་སུ། ལྷུན་གྲུབ་རིན་པོ་ཆེའི་སྣང་བ་ཐམས་ཅད་པོ། རིག་པ་ཉིད་ལས་མི་གཞན་པའི་གདངས་སམ་སྣང་ཆ་ཙམ་དུ་ངོ་སྤྲད་པའི་དོན་དེ་ལ་རྩེ་གཅིག་མཉམ་བཞག་གིས་གོམས་པ་བརྟན་སོང་དུས། དེའི་སྣང་བར་གྱུར་བ་དེ་དག་ཀ་དག་གི་སྣང་བ་དང་རོ་གཅིག་ཏུ་འདྲེས་ཏེ། རྣལ་འབྱོར་བའི་ཡིད་ངོར། འོད་ཀྱི་ལུས་ལ་ཡེ་ཤེས་ཀྱི་སྲོག་དང་ལྡན་པ་ཞིག་ལ་གོ་འཕོ་འགྲོ། གོ་འཕོ་འགྲོ་བ་དེ་ལ་ཤིན་ཏུ་གོམས་དུས། ནམ་ཞིག་དངོས་ལ་གྲུབ་པའི་འཕོ་ཆེན་གྱི་ལུས་ཉིད་དུ་འགྱུར་ཐུབ་པའི་གོ་བ་དེ་འདྲ་བ་ཞིག་རེད། ད་དུང་བསྐྱར་ཟློས་བྱས་ན། རིག་པའི་རྩལ་དབང་བསྐུར་ཏེ་རིག་པ་དང་དེའི་རྩལ་ངོ་སྤྲད་པའི་དོན་དེ། ཇི་བཞིན་ངོ་འཕྲོད་ནས་ལྷུན་གྲུབ་རིན་པོ་ཆེའི་སྣང་བ་རང་སྣང་དུ་ཡོད་པ་ཐམས་ཅད་རིག་པ་ཉིད་ལས་གཞན་མ་ཡིན་པ་དེའི་གདངས་སམ་དེའི་སྣང་ཆ་ཙམ་དུ་ངོ་སྤྲད་པའི་དོན་དེ་ལ་ཉམས་ཞེན་དང་ཆེད་འཛིན་མེད་པར་རྩེ་གཅིག་ཏུ་མཉམ་བཞག་གི་གོམས་པ་བརྟན་སོང་དུས། དེས་གང་ཤར་གྱི་འོད་ཐིག་སྐུ་དང་བཅས་པའི་སྣང་ཆ་དེ་དག་ནང་ཤེས་རབ་རང་བྱུང་གི་སྒྲོན་མའམ་ཀ་དག་གི་རིག་པ་དང་རོ་གཅིག་ཏུ་འདྲེས་ཏེ། རྣལ་འབྱོར་སྒོམ་པ་པོ་རང་གི་ཡིད་ཀྱི་ངོ་ཁ་ལ་ལུས་དྭངས་མ་འོད་ཀྱི་ཕུང་པོ་འཕོ་མེད་ཡེ་ཤེས་ཀྱི་སྲོག་དང་ལྡན་པ་ཞིག་ལ་གོ་འཕོ་འགྲོ་རྒྱུ་ཡོད། དེའི་སྐབས་ད་དུང་དེ་ལ་ཤིན་ཏུ་གོམས་པར་བྱས་ཡོང་ན། ནམ་ཞིག་ཉམས་ཙམ་སྣང་བ་ཙམ་མ་ཡིན་པའི་དངོས་ལ་གྲུབ་པའི་གྲུབ་བརྙེས་ཀྱི་དགའ་སྟོན་འཕོ་ཆེན་རྡོ་རྗེ་ལྟ་བུའི་སྐུ། ཆུ་ཟླ་ལྟ་བུའི་ལུས་ཉིད་དུ་འགྱུར་ཐུབ་པ་ཡིན། ད་དུང་ཡང་བཤད་ན། ཁྲེགས་ཆོད་སྟོང་པའི་འོད་གསལ་གྱིས་ལུས་རྡུལ་ཕྲན་དུ་དེངས་པར་བྱེད་པའི་གནད་དེའི་སྟེང་དུ། ཐོད་རྒལ་སྣང་བའི་འོད་གསལ་གྱིས་འོད་ལུས་འཕོ་ཆེན་གྱི་སྐུར་བཞེངས་རྒྱུ་དེ། མ་དག་ལས་རླུང་གིས་བསྐྱེད་པའི་སྣང་བ་ཐམས་ཅད། གཞོམ་མེད་ཡེ་ཤེས་ཀྱི་དགོངས་ཀློང་དུ་སྦྱངས་ཏེ། སྦྱངས་པ་སྟོབས་སུ་གྱུར་དུས་འཕོ་མེད་འཇའ་ལུས་རྡོ་རྗེའི་སྐུ་ཉིད་དུ་འགྲུབ་པ་ཡིན། དེའི་གནད་མཐར་ཐུག་གང་ལ་ཐུག་ན། སྣང་རིག་དབྱེར་མེད་ཀྱི་ཐོག་ནས་རིག་པ་སྟོད་ལ་མནན་ན། རྩ་བ་མི་ཤིགས་འོད་ལྔའི་ཐིག་ལེ་སྙིང་དབུས་ནས་ཡར་སྟོབས་རྒྱས་ཏེ། ཐུན་མོང་གི་ཆོས་སྐད་བྱས་ན་སྐུ་ཐུགས་ཟུང་དུ་འཇུག་པའམ། ཡང་ན་རིག་སྟོང་རྣམ་ཀུན་མཆོག་ལྡན་གྱི་སྟོང་ཉིད་དེས་གདོས་བཅས་རགས་པ་འོད་ལུས་སུ་བསྒྱུར་ཐུབ་པ་ཡིན། སྐུ་གསུམ་ལམ་སྣང་དུ་བྱེད་གསུངས་རྒྱུ་འདི་ལ་ལུགས་ལྡོག་དང་ལུགས་འབྱུང་གཉིས་ཡོད་པ་ཡིན་ན། སྟོང་ཆ་ཆོས་ཉིད་ཀྱི་ཆ་ནས་ཁྲེགས་ཆོད་ཀྱི་སྐབས་སུ་ལུགས་ལྡོག་དང་ནི། སྣང་ཆ་འོད་གསལ་གྱི་ཆ་ནས་ཐོད་རྒལ་ལ་ལུགས་འབྱུང་དུ་གསུངས་པའི་གནད་ཀྱི་རྩ་བའང་འདི་ལ་ཐུག་འདུག་སྙམ་པ་ཡིན། འདི་ཚོ་ངས་དམིགས་བསལ་གྱི་བཤད་ལུགས་རེད། རིག་རྩལ་རྣམ་འབྱེད་ཀྱི་ཤེས་རབ་སྟོབས་མ་རྒྱས་པའི་སོ་སྐྱེ་བྱིས་པའི་འཁྲུལ་གཏམ་ལ་གནད་མ་ཕིགས་པའི་ཆ་ཅི་འདྲའི་མེད། དེ་ལ་མཁས་པས་ཁྲེལ་རྒྱུ་དང་། གྲུབ་པས་སྨོད་རྒྱུ་མི་འདུག སྟོང་ཉིད་ལ་དོན་འགྱུར་གྱིས་དཔྱོད་པའི་བློའི་རྣམ་རིག་ཙམ་ཞིག་ཡིན་པ་རེད། གནད་ངོ་མ་ལ་གོ་བའི་གདིང་གིས་དེ་ལྟར་དུ་འཛིན་མ་ཐུབ་དུས། ཡར་ལ་བརྒྱུག་ནས་ཤ་ར་ར། མར་ལ་བརྒྱུག་ནས་འདུ་རུ་རུ། ལྷབ་སྒྲ་གྲགས་ནས་སོང་གི་བསྡད་ན་ཡང་། རང་གར་རྐང་སྣེ་རྡོ་ལ་བདར་བ་ཞིག་དང་ཅུང་མི་འདྲ་བར་ཆོས་སྒྲ་ཐོས་པའི་ཕན་ཡོན་ལོས་ཡོད་ཀྱང་། བུང་བ་ཚང་འཚོལ་ལས་ཐི་བྱ་ཚང་འཇུག་རེད་འགྲོ་རྒྱུ་ཞིག་རྩ་བ་ནས་མེད་དུས། ཡོང་སྒོ་ལག་འབབས་རྒྱུད་ལ་འབྱར་བའི་ཚོད་དེ་ཙམ་མེད་པར་འགྱུར་བ་ཡིན། རིག་པའི་རྩལ་དབང་ཐོབ་ཀྱང་ནང་ཤེས་རབ་རང་བྱུང་གི་སྒྲོན་མའི་ངོ་བོ་ཀ་དག་གི་རིག་པ་དང་ནི་དེའི་རིག་གདངས་ཐོད་རྒལ་གྱི་སྣང་ཆ་དེ་གཉིས་རོ་གཅིག་ཏུ་འདྲེས་པའི་རྟོགས་པ་ལ་ཅི་འདོད་ཀྱིས་དབང་བསྒྱུར་མ་ཐུབ་པ་ཡིན་ན། ལོ་བརྒྱ་ལ་བལྟས་ཀྱང་སྟོང་གཟུགས་གཟུགས་སྐུ་ངོ་མ་རུ་སྨིན་ཐུབ་པ་མ་རེད། དེས་དབང་བསྒྱུར་བར་སྟོབས་སུ་བྱས་པ་ལ་མཉམ་བཞག་གཡོ་བྱེད་ཀྱི་རླུང་དེ་གདིང་ནས་ཞི་དགོས། དེ་ཞི་བ་ལ། ལས་རླུང་ཟད་དགོས་པ་ཡིན། ལས་རླུང་ཅི་ཙམ་དབང་བཙན་པར་གྱུར་ན། འོད་གསལ་རིག་པའི་ཡེ་ཤེས་དེ་ལྟར་བག་ལ་ཞ་འགྲོ་བ་ཡིན། ལས་རླུང་འདུལ་ཐབས་ལ་སླར་ཡང་ཁྲེགས་ཆོད་ཀྱི་དགོངས་པའི་རང་གནད་ཟིན་དགོས་པས། དེས་ན་ཀུན་མཁྱེན་ཡབ་སྲས་ཀྱི་གཞུང་ལ་རང་རྒྱུད་འདྲིས་པར་བྱས་ཏེ་དད་དང་མོས་གུས་གཉིས་དང་། ཡེངས་མེད་ཀྱི་སྒོམ་པ་དང་གསུམ་པོ་མ་བྲལ་བའི་ཐོག་ནས་མཛོད་བདུན་གྱི་དཔེ་ཆ་གླེགས་བམ་རྣམས་སྔས་མགོ་དང་འབྲལ་མེད་བྱས་ཏེ། སྐྱིད་ན་སྐྱིད་ཀྱི་མགོ་ནོན་དང་། སྡུག་ན་སྡུག་གི་སྐྱོ་གྲོགས་ལ་འཛིན་རྒྱུ་དེ་མི་ལྷོད་པའི་སྟེང་ནས་གོང་ནས་ཞུས་པ་བཞིན་ཀུན་མཁྱེན་ཡབ་སྲས་ཀྱི་གསུང་། གནད་ཆེ་སའི་ཡིག་འབྲུ་ཁ་ཤས་མིག་ལ་བབས་འདུག་པ་ཞིག་མ་རེད་ཀྱི་བར་དུ་གཟིགས་མཛོད་དང་སྐྱིད་པའི་ཉི་མ་རྣལ་འབྱོར་བའི་ནང་ནས་འཆར་རྒྱུ་ཡོད་དོ། །དེ་ལྟར་ཆོས་འཆད་ཉན་བགྱིས་པའི་དགེ་བའི་རྩ་བ་འདིས་མཚོན་ནས་སོགས་བསྔོ་སྨོན་བཅས་ཉིན་གཉིས་པའི་ཆོས་ཁྲིད་མཇུག་གྲོལ་སོང་ངོ་།།

ཉིན་གསུམ་པའི་ཆོས་ཁྲིད།

ཐེག་ཆེན་མདོ་དང་སྔགས་ཀྱི་ཆོས་སྒོར་ཞུགས་པའི་གང་ཟག་དེས་སྒོ་གསུམ་དགེ་བའི་རྩ་བ་ཆེ་ཕྲ་གང་བྱས་ཐམས་ཅད་དམ་པ་རྣམ་གསུམ་གྱིས་རྩིས་ཟིན་དགོས་པ་དེ། གཅིག་བྱས་ན། ལྷག་ཏུ་ཞུ་མི་དགོས་པ་ཞིག་རེད། ཆོས་ཐེག་ཆེན་དར་བའི་ས་ཆ་ལ་སྐྱེས་པའི་སྐྱེ་བོ་མཆོག་དམན་ཐམས་ཅད་ཀྱི་ངག་འདོན་ལ། མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཟེར་ནས་སྐྱབས་འགྲོ་ཚིག་བཞི་རེ་དང་། སེམས་བསྐྱེད་ཚིག་བཞི་རེས་འགོ་ལེན་བྱེད་འཇོག་པ་རེད། འོན་ཀྱང་། ད་ཞག་སྐྱབས་འགྲོའི་སྐབས། སྐྱབས་འགྲོ་མ་ཤེས་ན་ནང་པའི་གྲལ་དུ་ཚུད་ཡོད་པ་ཙམ་ཡང་དཀའ་ཞེས་བཤད་པ་བཞིན་དུ། སེམས་ཇི་ལྟར་བསྐྱེད་དགོས་པ་དང་། སེམས་བསྐྱེད་ཀྱི་ངོ་བོ་དང་། དབྱེ་བ། དེའི་བསླབ་བྱ་མཐའ་དག་ཚུལ་བཞིན་དུ་མ་ཤེས་པ་ཡིན་ན། མིང་ཐེག་ཆེན་པ་ཡིན་པར་ཁས་འཆེས་ཀྱང་དོན་ཐེག་ཆེན་པའི་གྲལ་དུ་ཚུད་དང་མི་ཚུད་ཀྱི་ཐད་ནས། ཕྱི་ཚུལ་གཞན་ངོས་ཀྱི་བལྟ་ས་ཙམ་གྱིས་མི་ཚད་ནང་ཚུལ་རང་ཉིད་ཀྱི་ཉམས་ལེན་རྒྱུད་ལ་སྦྱོར་རྒྱུའི་ཐད་ནས་ཐེག་པ་གང་ལ་གཏོགས་པའི་ཆོས་རེད་འགྲོ་བཞིན་ཡོད། རང་ཉིད་ལར་ཐར་ལམ་ཡང་དག་ཞིག་གི་ནང་དུ་ཚུད་ཡོད་མེད། རང་གིས་རང་ལ་ཉམས་ཞིབ་ཚད་རྒྱུ་ཤིན་ཏུ་གལ་ཆེན་ཞིག་ལ་ཁེལ་གྱིན་ཡོད། ཐེག་པ་ཆེ་ཆུང་སེམས་བསྐྱེད་ཁྱད། །གསུངས་པས་ཐེག་ཆེན་ལམ་གྱི་རྩ་བ་སེམས་བསྐྱེད་ལ་ཐུག་ཡོད་དུས། བསམ་པ་བྱང་ཆུབ་སེམས་ཀྱིས་ཟིན་ན། ཆོས་ཐེག་དམན་གྱི་ཆོས་ཤིག་བྱས་ཀྱང་ཐེག་ཆེན་གྱི་ཆོས་སུ་འགྲོ་བ་དང་། བསམ་པ་བྱང་ཆུབ་སེམས་ཀྱིས་ཟིན་མེད་ན། ཆོས་ཐེག་ཆེན་མདོ་ཆོས་ཀྱིས་མི་ཚད་སྔགས་ཆོས། སྔགས་ཕྱག་རྫོགས་རྫོགས་ཆེན་གྱི་ཉམས་ལེན་མིང་མཐོན་པོ་ཇི་འདྲ་བ་ཡིན་ཡང་ཐེག་ཆེན་གྱི་ཆོས་གྲལ་ཙམ་དུའང་འགྲོ་དཀའ་བ་ཡིན་པས། ལས་དང་པོ་བ་ཞིག་ལ། ལྟ་བ་ལ་རག་མི་ལས། སྒོམ་པ་ལ་རག་མི་ལས། བསམ་པ་བྱང་ཆུབ་སེམས་ཀྱིས་ཟིན་མི་ཟིན་ལ་རག་ལས་པ་ཡིན། སྟོང་ཉིད་ཙམ་ཉན་ཐོས་ཀྱིས་ཀྱང་རྟོགས་ཡོད་ཀྱང་འབྲས་བུ་འགོག་པ་ཙམ་ཞིག་ཡིན་པ་དེས་ན་སྨོན་དང་འཇུག་པའི་བདག་ཉིད་ཅན་གྱི་ཀུན་རྫོབ་བྱང་ཆུབ་ཏུ་སེམས་བསྐྱེད་པ་དང་། ཚོགས་བསགས་པ་གཉིས་ལ་བརྟེན་ནས་སངས་རྒྱས་ཐོབ་དགོས་པ་ཡིན། དེས་ན་དང་པོ་ཀུན་རྫོབ་བྱང་ཆུབ་ཏུ་སེམས་བསྐྱེད། བར་དུ་བདེན་གཉིས་ཟུང་འཇུག་གི་བྱང་ཆུབ་སེམས་ཀྱི་ཉམས་ལེན་ལ་སྦྱངས། མཐར་དོན་དམ་བྱང་ཆུབ་ཀྱི་སེམས་ངེས་དོན་མཐར་ཐུག་གི་གནད་ལ་སྐྱེལ་ནས། མཐར་ཐུག་ཐེག་པ་གཅིག་ཏུ་དོན་དམ་སེམས་བསྐྱེད་ཀྱིས་བསྒྲུབ་དགོས་པ་ཡིན། དེས་ན་བསམ་པ་བཟང་པོ་ཚད་མེད་རྣམ་བཞི་ནས་མགོ་བཟུང་སྟེ་བྱང་ཆུབ་མཆོག་ཏུ་སེམས་བསྐྱེད་དགོས། དེ་དགོས་ན་སེམས་བསྐྱེད་ཀྱི་ངོ་བོ་ཟུར་གཉིས་ལྡན་པའི་སེམས་བསྐྱེད། ཟུར་དང་པོ་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་འདོད་ཀྱི་སྙིང་རྗེས་སེམས་ཅན་ལ་དམིགས་པ་དང་། ཟུར་གཉིས་པ་རྫོགས་པའི་སངས་རྒྱས་ཀྱི་གོ་འཕང་མཆོག་ལ་འགོད་པར་བྱ་བསམ་པའི་ཤེས་རབ་ཀྱིས་རྫོགས་བྱང་ལ་དམིགས་པའོ། །དེ་ལྟར་གཉིས་ལས་ཟུར་དང་པོའི་སྟེང་ནས་དབྱེ་བ་མེད་ཀྱང་། ཟུར་གཉིས་པ་ཤེས་རབ་ཀྱིས་རྫོགས་བྱང་ལ་འགོད་རྒྱུ་འདིའི་ཐད་ནས་བློ་སྟོབས་ཀྱི་དབྱེ་བ། རྒྱལ་པོ་ལྟ་བུའི་སེམས་བསྐྱེད། མཉན་པའམ་གྲུ་བ་ལྟ་བུའི་སེམས་བསྐྱེད། དཔེ་མེད་པ་རྫི་བོ་ལྟ་བུའི་སེམས་བསྐྱེད་དང་གསུམ། ས་མཚམས་ཀྱི་ཐད་ནས། མོས་པས་སྤྱོད་པའི་སེམས་བསྐྱེད་དང་། ལྷག་བསམ་དག་པའི་སེམས་བསྐྱེད། རྣམ་པར་སྨིན་པའི་སེམས་བསྐྱེད། སྒྲིབ་པ་སྤངས་པའི་སེམས་བསྐྱེད་དང་བཞིའི་དབྱེ་བ་ཡོད། འདི་དག་གི་སྐབས་སུ་དོན་དམ་སེམས་བསྐྱེད་ཀྱི་ཐད། ཚོགས་སྦྱོར་མཐོང་གསུམ་ལ་གོ་མྱོང་རྟོགས་གསུམ་སྦྱོར་རྒྱུ་ལ་སོགས་པ་ཞིབ་པར་ཕྱེས་ན་མང་ངོ་། །སེམས་བསྐྱེད་ཀྱི་ངོ་བོའི་ཐད་ནས་ཀྱང་། ཀུན་རྫོབ་བྱང་ཆུབ་ཀྱི་སེམས་དང་དོན་དམ་བྱང་ཆུབ་ཀྱི་སེམས་གཉིས་ཀྱི་དབྱེ་བ་ཡོད་ན། ཀུན་རྫོབ་བྱང་ཆུབ་ཀྱི་སེམས་དེ་བློ་རྣམ་པར་རྟོག་པ་འདིའི་སྟེང་ནས་འཇོག་རྒྱུ་དང་། དོན་དམ་བྱང་ཆུབ་ཀྱི་སེམས་དེ་རྣམ་རྟོག་གི་རྒྱུ་བ་དབྱིངས་སུ་ནུབ་སོང་བའི་ཡེ་ཤེས་ལ་ངོས་འཛིན་དགོས། ཀུན་རྫོབ་བྱང་ཆུབ་ཀྱི་སེམས་དེ་ལ་སྨོན་འཇུག་རྣམ་པ་གཉིས་ཏེ། འབྲས་བུ་ལ་དམ་བཅའ་བ་སྨོན་པ་སེམས་བསྐྱེད་དང་། རྒྱུ་ལ་དམ་བཅའ་བ་འཇུག་པ་སེམས་བསྐྱེད་གཉིས་ཀ་ཡིན་ནོ། །རྒྱུ་ཟེར་ན་ཐབས་ཤིག་རེད། ཐབས་ཕྱིན་དྲུག་སྒྲུབ་འདོད་ཀྱི་བསམ་པ་ཡོད་དགོས་པ་རེད། ཀུན་རྫོབ་བྱང་ཆུབ་ཀྱི་སེམས་དེ་ཆོ་ག་ལ་བརྟེན་ནས་སྐྱེས་པ་དང་། དོན་དམ་བྱང་ཆུབ་ཀྱི་སེམས་དེ་སྒོམ་སྟོབས་ལ་བརྟེན་ནས་སྐྱེས་པ་ཡིན། ཀུན་རྫོབ་བྱང་ཆུབ་ཀྱི་སེམས་ཆོ་ག་ལ་བརྟེན་པ་དེ་ལའང་དབུ་མའི་ལུགས་ཀྱི་ཟབ་མོ་ལྟ་སྲོལ་མགོན་པོ་འཇམ་དབྱངས་ནས་ཀླུ་སྒྲུབ་ཡབ་སྲས་ལ་བརྒྱུད་པ་དང་། སེམས་ཙམ་ལུགས་ཀྱི་རྒྱ་ཆེན་སྤྱོད་སྲོལ་འཕགས་པ་བྱམས་པ་ནས་ཐོགས་མེད་སྐུ་མཆེད་ལ་བརྒྱུད་པ་དེ་ལྟར་རེད། རང་རེ་ལ་མཚོན་ན་ཆུ་བོ་གཅིག་འདྲེས་ཀྱིས་ཀུན་མཁྱེན་ཆེན་པོས་ཟབ་ཅིང་རྒྱ་ཆེའི་བརྒྱུད་པ་དང་བཅས་པ་སེམས་བསྐྱེད་ཀྱི་སྡོམ་པ་རྒྱུན་དུ་འབོགས་ཀྱིན་ཡོད་པ་འདི་བཞིན་རེད། བྱང་ཆུབ་ཀྱི་སེམས་སྨོན་པ་སེམས་བསྐྱེད་ཙམ་ལེན་པའམ་སྨོན་འཇུག་གཉིས་ཀའི་སྡོམ་པ་ཆོ་གས་ལེན་རྒྱུ་འདི་དཀའ་མོ་ཞིག་མ་རེད། སེམས་བསྐྱེད་པ་སླ་ཡང་སེམས་སྐྱེས་པ་དཀའ་བས་ན་ཐོག་མ་ཉིད་ནས་ཚད་མེད་བཞི་ལ་བློ་འབྱོངས་བར་བྱས་ཏེ། དེ་ནས་རིམ་གྱིས་སེམས་བསྐྱེད་ཀྱི་སྡོམ་པ་བླངས་ཏེ་བསླབ་པར་བསླབ་ན་གོ་རིམ་མ་ནོར་བ་ཡིན། སོ་ཐར་གྱི་སྡོམ་པ་ཉམས་སོང་ན་མཁན་པོ་དང་སློབ་དཔོན་རྣམ་པ་ཁ་ཤས་ཤིག་དབུ་གཡོགས་པ་རེད། བྱང་ཆུབ་མཆོག་ཏུ་སེམས་བསྐྱེད་པ་ཁས་བླངས་ཏེ་དེ་ཉམས་སོང་དུས། དེ་ལེན་པའི་སྐབས་སུ་དགོངས་སུ་གསོལ་བ་གསུམ་གྱིས་སད་པར་བྱས་ཏེ་ཕྱོགས་བཅུ་དུས་བཞིའི་རྒྱལ་བ་སྲས་དང་སློབ་མར་བཅས་པ་ཚོགས་ཞིང་ལ་སྤྱན་དྲངས་ཏེ་དཔང་པོར་བཞུགས་པས་མི་ཚད། མ་སེམས་ཅན་ཐམས་ཅད་མགྲོན་དུ་གཉེར་ནས། ངས་ཉི་མ་དེ་རིང་ནས་བཟུང་ཇི་ལྟར་སྔོན་གྱི་བདེ་གཤེགས་རྣམས་ཀྱིས་ཐུགས་ཇི་ལྟར་བསྐྱེད་པ་ལྟར་བསྐྱེད། དེ་རྣམས་ཀྱིས་བསླབ་ལ་ཇི་ལྟར་གནས་ཡོད་ན་ངས་ཀྱང་དེ་ལྟར་བསླབ་པ་ཡིན་ཞེས་དཔའ་ཁས་བླངས། དུག་སོས་འགམ་པས་མི་ཚད། ལྷ་དང་ལྷ་མིན་སོགས་ཀྱིས་དགའ་བ་སྒོམས་ཟེར་ནས་རང་གཞན་གཉིས་ཀས་དགའ་བ་བསྒོམས་པ་ཡིན་ན། ཚིག་བཤད་ནས་ཁ་ནང་གི་རླངས་པ་མ་ཡལ་སྔོན་ནས། བསླབ་པ་བསྲུང་སེམས་མ་དགོས་བསྲུང་བྱའི་རྣམ་གྲངས་ཨེ་ཤེས་བལྟ་དགོས་སྙམ་པ་ཙམ་ཞིག་ཀྱང་མེད་ན། དེ་འདྲའི་རིགས་ཀྱིས་ཐོག་མ་ནས་མ་བླངས་ན་ཐོབ་པའི་ཕན་ཡོན་མེད་ཀྱང་ཉམས་པའི་ཉེས་པའང་མི་འབྱུང་བ་དེ་འདྲ་རེད། ད་དུང་མདོ་སྔགས་གང་ཐད་ནས་དེ་འདྲ་རྐྱང་རྐྱང་རེད་བསྡད་ན་ཆོས་ལ་དབང་ཟ་བའི་ཉེས་པའི་རྣམ་སྨིན་རང་གིས་ཉོ་བཞིན་ཡོད་པ་དང་འདྲ་འདྲ་རེད། དེ་དག་ཐམས་ཅད་ཀྱི་ལེ་ལན་གང་ལ་ཐུག་ན། རང་དོན་སྒྲུབ་པའི་བློ་ངན་འདིའི་ཁོང་ནས་ཡོང་གིན་ཡོད། རང་དོན་བསྒྲུབས་ནས་རང་དོན་འགྲུབ་ཡོད་ན་ཡང་ལུགས་གཅིག་རེད་མོད། རང་དོན་སྒྲུབ་ས་ནས་རང་གཞན་གཉིས་ཀའི་དོན་མ་འགྲུབ་པ་དེ་ཁམས་གསུམ་སེམས་ཅན་དང་ནི། གཞན་དོན་བསྒྲུབས་ནས་རང་དོན་ཞོར་འབྱུང་དུ་འགྲུབ་སོང་བ་དེ་རྫོགས་པའི་སངས་རྒྱས་ཡིན། དེ་གཉིས་ཀྱི་ཁྱད་པར་ཡང་རང་གཞན་གྱི་དོན་གཉིས་སྒྲུབ་ས་ནས་ཁྱད་པར་རྒྱུག་འགྲོ་བ་རེད། བདག་འཛིན་གྱི་འགོང་པོ། ངར་འཛིན་གྱི་འདྲེ་བགེགས། རང་དོན་ཡིད་བྱེད་ཀྱི་ཕུང་སྲི་འདིས་དེ་སྔོན་ཀྱང་ཕུང་བ་རེད། ད་དུང་ཡང་འདི་ལྟར་དུ་བསྐྱུར་བཞག་ན། འདིས་ཡག་པོ་ཞིག་མི་བྱེད། རང་གཅེས་པར་འཛིན་པ་འདི་འཁོར་བ་དང་ངན་སོང་གི་སྡུག་བསྔལ་ལ་སོགས་པའི་རྒུད་པ་ཐམས་ཅད་ཀྱི་འབྱུང་གནས་རེད། གཞན་གཅེས་འཛིན་ནི་ཡོན་ཏན་ཐམས་ཅད་ཀྱི་འབྱུང་གནས་རེད་འདུག་པས་ན་རང་དོན་ཡིད་བྱེད་ཀྱི་བློ་མི་སྐྱེ་བར་ཤོག སྐྱེས་པ་ཉམས་འགྲོ་བར་ཤོག གཞན་གཅེས་འཛིན་གྱི་བློ་མ་སྐྱེས་པ་སྐྱེས་པར་ཤོག སྐྱེས་པ་མི་ཉམས་པར་ཤོག དེ་ལྟར་འགྱུར་བར་ལྷ་དང་བླ་མས་བྱིན་གྱིས་བརླབ་ཏུ་གསོལ། བསམ་པའི་བློའི་འཕེན་པ་དེ་ལྟར་ཤུགས་ཆེན་སྔོན་དུ་འགྲོ་བ་དང་བཅས། བགྲང་བའི་རིམ་པ་ལྟར་དུ་བྱས་ན་བྱམས་དང་སྙིང་རྗེ་དགའ་བ་དང་བཏང་སྙོམས་བཞི་དེ། སྒོམ་པའི་སྐབས་སུ་རྒྱུད་ལ་སྐྱེས་སླ་བའི་དགོས་པས་མན་ངག་གི་ལུགས་ལ་བཏང་སྙོམས་ནས་མགོ་འཛིན་པ་ཕྱག་ལེན་ཡིན། དེ་ཡང་དབུ་མ་རྒྱན་ལས། བཏང་སྙོམས་ས་གཞི་ལེགས་བརྡལ་བར། །བྱམས་པ་ཡི་ནི་མེ་ཏོག་བཀྲམ། །སྙིང་རྗེའི་དྲི་མས་རབ་བརྒྱན་ཅིང་། །དགའ་བའི་ཆར་བཟང་རྙོག་པ་མེད། །ཅེས་གསུངས་པ་བཞིན་ནོ། །དེ་ལྟ་བུའི་རྣམ་པ་བཞི་པོ་འདི་ངེས་འབྱུང་གི་བསམ་པས་མ་ཟིན། སྟོང་ཉིད་ཀྱི་ལྟ་བ་བདག་མེད་རྟོགས་པའི་ཤེས་རབ་ཀྱིས་མ་ཟིན་ན་ཚད་མེད་རྣམ་བཞི་མི་ཟེར་བར་ཚངས་པའི་གནས་པ་བཞི་ཞེས་བརྗོད་དོ། །ཚངས་གནས་བཞི་འདི་ལྷ་ཡུལ་དུ་སྐྱེས་བྱེད་ཀྱི་རྒྱུ་སྲིད་པ་འགྲུབ་པའི་ལས་ཙམ་ཞིག་རེད། ཨུ་འུ་ཚོ་ལས་དང་པོ་བའི་གང་ཟག་ཅིག་གིས་སྟོང་ཉིད་ཀྱི་ལྟ་བ་དང་བདག་མེད་རྟོགས་པའི་ཤེས་རབ་ཀྱིས་ཟིན་ཟེར་ན་དཀའ་བ་ཡིན་ཡང་། བྱམས་སོགས་བཞི་འདི་སྒོམ་དུས་དམིགས་པའི་ཡུལ་ཚད་མེད་པ་ཞིག་ལ་རྣམ་པའི་བློ་ཚད་མེད་པར་བསྒོམས་ན། དེའི་འབྲས་བུའང་ཚད་མེད་པ་ཞིག་ཡིན་པས་ན། ཚད་མེད་བཞི་ལ་བློ་སྦྱོང་བའི་དོན་ཞིག་ཚང་འགྲོ་བ་རེད། སེམས་ཅན་བདེ་བ་རྒྱུ་འབྲས་གཉིས་དང་ལྡན་འདོད་བྱམས་པ། སྡུག་བསྔལ་རྒྱུ་འབྲས་གཉིས་དང་བྲལ་འདོད་སྙིང་རྗེ། ཆགས་སྡང་གཉིས་དང་བྲལ་འདོད་བཏང་སྙོམས། བདེ་བ་དང་མི་འབྲལ་བར་འདོད་པ་དགའ་བ་ཡིན་ནོ། །དང་པོ་དམིགས་བཅས་ཀྱིས་སྒོམ་དུས་དམིགས་རྣམ་སྤྲད་དེ་གོང་ནས་བཤད་པ་བཞིན་བསྒོམ་དགོས། དམིགས་མེད་རྟོགས་པ་མཆོག་ལྡན་ཞིག་ཡིན་ན། སྡུད་པ་ལས། རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་གསུངས་པ་ལྟར་ཡིན་པས་དེ་ལས་གཞན་དུ་དམིགས་མེད་ཅིག་ཟུར་ནས་བཏགས་འདུག་མི་དགོས། མཉམ་བཞག་དེའི་རྩལ་རྗེས་ཐོབ་བྱམས་དང་སྙིང་རྗེར་ཤར་བའང་དེ་རེད། གཞན་ལས་དང་པོ་བས་ཐུན་མཐར་སྒྱུ་མ་རྨི་ལམ་སོགས་ཀྱིས་བློ་སྦྱོང་དགོས་པ་ཡིན། བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་སྐྱེས་པའི་ཐབས་ཚད་མེད་རྣམ་བཞིས་བློ་སྦྱོང་བ་དང་ནི། སྐྱེས་པ་མི་ཉམས་པར་འཕེལ་བའི་ཐབས་ལ་སེམས་བསྐྱེད་པ་དང་དེའི་བསླབ་བྱར་བསླབ་པ་ཡིན་པས་ན། མ་སྐྱེས་པ་སྐྱེས་པ་དང་སྐྱེས་པ་མི་ཉམས་པར་འཕེལ་བ་གཉིས་ཀ་ལ་རྒྱས་པར་བྱས་ན་ཚད་མེད་བཞི་པོ། འབྲིང་ན་བྱམས་པ་དང་སྙིང་རྗེ་གཉིས་ཀ། གཅིག་ཏུ་བསྡུས་ན་སྙིང་རྗེ་ཚད་མེད་འདི་ལ་ཐུག་ཡོད་པས། ཚིག་གི་རྩ་བ་ཚུར་བསྡུས་ན་སྙིང་རྗེ་ཉག་མ་རེ་རེ་ཡིན་ཡང་བསྒོམ་རྒྱུ་འདི་བས་ལྷག་གི་ཆོས་ཤིག་ལོ་བརྒྱར་བཙལ་ཀྱང་རྙེད་རྒྱུ་མེད་པས་འདི་ལ་གཟབ་ནན་བྱེད་པ་ཐེག་ཆེན་མདོ་དང་སྔགས་ཀྱི་ཆོས་ཚུལ་ཐམས་ཅད་ཀྱི་སྙིང་པོའི་ཡང་བཅུད་ཡིན་ནོ། །བྱང་ཆུབ་སེམས་བསྐྱེད་ཀྱི་ཕན་ཡོན་ལ་བསམ་ན་ཡང་མིང་གནས་འགྱུར་ཏེ་ད་ལྟ་སོ་སྐྱེའི་སྐབས་ནའང་རྒྱལ་སྲས་བྱང་ཆུབ་སེམས་དཔའ་རུ་འགྱུར། དོན་གནས་འགྱུར་འགྲོ་བ་ལྷ་དང་བཅས་པའི་མཆོད་གནས་སུ་གྱུར། ད་དུང་ཁྱད་པར་དུ་འཕགས་པའི་ཕན་ཡོན་དགེ་རྩ་གང་བྱས་ཐམས་ཅད་རྣམ་མཁྱེན་སངས་རྒྱས་ཐོབ་པའི་རྒྱུར་འགྱུར། ངེས་པའི་སྡིག་པ་ཟིལ་གྱིས་མནན། མ་ངེས་པའི་སྡིག་པ་སྐད་ཅིག་གིས་འཇོམས། ལས་ཉོན་གྱི་སྒྲིབ་པ་དྲུངས་ནས་འབྱིན། ཤེས་བྱའི་སྒྲིབ་པ་མཐར་འབྱིན་པ་སོགས་ཀྱི་ཕན་ཡོན་བསམ་གྱིས་མི་ཁྱབ་པོ། དེ་ལྟ་བུའི་ཕན་ཡོན་དཔག་ཏུ་མེད་པ་དང་ལྡན་པའི་བྱང་ཆུབ་ཀྱི་སེམས་རིན་པོ་ཆེ་དེ་ཉིད་རང་རྒྱུད་ནས་སྐད་ཅིག་ཀྱང་མི་འབྲལ་བར་སྲུང་བའི་ཆེད་དུ་སྨོན་འཇུག་གི་བསླབ་བྱར་བསླབ་དགོས་པ་ཡིན་ན། དཔའ་ཆེན་བྱང་ཆུབ་སེམས་དཔའི་བསླབ་སྤྱོད་མཐའ་དག་གཞུང་དང་མན་ངག་གི་རིམ་པ་ལས་ངེས་པར་བྱས་ཏེ་རང་རྒྱུད་བྱང་ཆུབ་ཀྱི་སེམས་དང་ནམ་ཡང་མི་འབྲལ་བར་བྱེད་པ་ཉག་གཅིག་རྒྱལ་བ་དགྱེས་པའི་ལམ་བཟང་ཡིན་པའི་ཚུལ་ཕྱོགས་ཙམ་ཞིག་ཞུས་ཏེ། ད་སྐབས་བབས་རྫོགས་པ་ཆེན་པོའི་རྣལ་འབྱོར་བ་ཞབས་དཀར་ཚོགས་དྲུག་རང་གྲོལ་གྱི་གསུང། ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཆར་འབྱེད་པའི་ལྡེའུ་མིག་འདི་ཉིད་ལ་འཆད་ཉན་ཁྲིད་སྦྱང་དང་བཅས་པར་འཇུག་བཞིན་པའི་སྐབས་ཡིན་ན། འདིའི་གཞུང་དོན་ཁྲིད་རིམ་བདུན་དུ་བྱས་པའི་ནང་ནས་སྒོ་གསུམ་གྱི་བྱ་བ་དགུ་སྤྲུགས་སུ་གཏོང་ཚུལ། སྒོ་ཡུལ་རླུང་རིག་གི་གནད་གསུམ་གཟིར་ཚུལ། གནད་གསུམ་གྱིས་མངོན་སུམ་འོད་གསལ་གྱི་ཡེ་ཤེས་གཏན་ལ་ཕབ་ནས་རིག་པའི་རྩལ་དབང་བསྐུར་ཏེ་དངོས་གཞིའི་ངོ་སྤྲད་པ་དང་བཅས་པ་སོང་བའི་རྗེས་ཐོག་ནས་དེ་རིང་ཡང་བསྐྱར་ངོ་སྤྲོད་ཀྱི་སྐོར་རྣམས་བཤད་ཁྲིད་ཀྱི་ཚུལ་དུ་བསྐྱར་འདོན་ཞིག་བྱེད་ཆགས་བྱེད་པ་རེད། དེ་ཡིན་ན། དེ་ནས་བླ་མས་ངོ་སྤྲོད་འདི་ལྟར་གདབ། །གསུངས་སའི་མཚམས་ནས་རེད། ཀྱེ། སྐལ་ལྡན་རིགས་ཀྱི་བུ་རྣམས་གསུངས་ས་ནས་མར་ཕྱག་དཔེ་ལ་གཟིགས་དང་།

ཀྱེ།

སྐལ་ལྡན་རིགས་ཀྱི་བུ་རྣམས་ཚུར་ཉོན་དང་།།

དེ་ཡང་འོ་སྐོལ་རྣམས་ཀྱི་ཙིཏྟ་ཡི།།

གསང་བའི་སྦུབས་ན་སངས་རྒྱས་ཐམས་ཅད་ཀྱི།།

ཐུགས་དང་དབྱེར་མེད་རིག་པའི་ཡེ་ཤེས་ཉིད།།

འདུས་མ་བྱས་ཤིང་ལྷུན་གྱིས་གྲུབ་པ་ཡི།།

གདོད་མའི་མགོན་པོ་འོད་མི་འགྱུར་བ་ཞེས།།

ངོ་བོའི་ཆ་ནས་སྟོང་ཞིང་བདག་མེད་པ།།

རང་བཞིན་ཆ་ནས་འགག་པ་མེད་པར་གསལ།།

ཐུགས་རྗེའི་རྩལ་ལས་སྐུ་དང་ཡེ་ཤེས་སུ།།

དབྱེར་མེད་ནང་གསལ་བུམ་ནང་མར་མེ་ལྟར།།

གསལ་བའི་འོད་གདངས་ཀ་ཏི་ཤེལ་སྦུགས་ཀྱི།།

འོད་རྩའི་ནང་བརྒྱུད་རྒྱང་ཞགས་ཆུའི་སྒྲོན་མ།།

མིག་གཉིས་སྒོ་རུ་འཐོན་ནས་ནམ་མཁའ་ལ།།

འཇའ་ཚོན་ལྟ་བུར་ཤར་བ་དེ་ཉིད་ནི།།

དབྱིངས་ནི་རྣམ་པར་དག་པའི་སྒྲོན་མ་ཡིན།།

ཞེས་གསུངས་ཏེ། དེ་ཡང་འོ་སྐོལ་ལམ་རང་རེ་ཚོ་གསུངས་ས་དེ། སུ་ལ་གསུངས་ན་ལམ་ཞུགས་སོ་སོའི་སྐྱེ་བོ་རྫོགས་ཆེན་བསྟན་པའི་ཆོས་སྒོར་ཞུགས་པ་ཞིག་ལ་སྤྱིར་བཏང་གིས་གསུངས་པ་རེད། དེ་ཡིན་ན་རང་རེ་གསུངས་རྒྱུ་དེ་རང་དང་རོགས་ལ་གོ་ན། གཅིག་ངོ་གཅིག་གིས་མི་ཤེས་པའི་རྣམ་ཤེས་འཁྱམ་པོ་ཁ་ཤས་ལུས་རྟེན་འདིར་ཞུགས་ནས་མིང་གིས་འཛིན་སའི་ང་ཟེར་བ་ཞིག་དང་། ཐད་ན་ཡོད་པའི་ཁྱོད་ཟེར་བ་ཞིག་དང་། ཁོང་ཚོ་ཟེར་བ་ཞིག་གྲུབ་པ་ཡིན་ན། རང་རེ་འདི་ལར་གང་ནས་ཇི་ལྟར་འོང་བ་ཡིན་པའི་སྐོར་ལ་མ་གཞི་བསམ་བློ་ཞིག་འཁོར་མ་མྱོང་བ་ཡིན་ན། དེའི་བསམ་བློ་ཞིག་མ་འཁོར་ཐབས་མེད་ཡིན་པ་རེད། གཞི་ལས་གཞི་སྣང་ཤར་བའི་གནས་སྐབས་ན་རང་ངོ་མ་ཤེས་པས་དེ་དུས་འཁྲུལ་བ་རེད། ད་འཁྲུལ་བ་གཞི་ལ་ལྡོག་ནས་སླར་མི་འཁྲུལ་བའི་བཙན་ས་འཛིན་དགོས་པ་རེད་བསམ་པ་ཙམ་དང་། དེའི་གོ་བ་འདྲ་ཞིག་སྤྱི་ཁོག་གི་ཡོད་བཞིན་པ་དེའི་སྟེང་དུ། ཇི་ལྟར་འཁྲུལ་ནས་ལུས་འདི་གྲུབ་པ་ཡིན། འཁྲུལ་ལུགས་ངན་པ་ཁམས་གསུམ་རིགས་དྲུག་གི་གནས་ལ་ཐོག་མ་མེད་པ་ནས་འཁྱམས་སོང་བ་རེད་དེ། འཁྲུལ་ནའང་གཞི་ངོ་བོའི་ཆ་ནས་སྐུ་གསུམ་འདུ་འབྲལ་མེད་པ་སྐུ་གསུམ་འབྲལ་མེད་ཀྱི་སངས་རྒྱས་སྙིང་དབུས་ན་བཞུགས་རྒྱུ་འདི་ངོ་མཚར་ཆེ། དེའི་གནས་ལུགས་རྒྱུ་མཚན་ངེས་རྒྱུ་དེ་གནད་ཀྱང་ཆེའོ་སྙམ་པ་ཞིག་འོང་བ་ཡིན། དེ་ཡིན་ན་གཞི་ཀ་དག་རྒྱར་མ་ཆད། ཕྱོགས་སུ་མ་ལྷུང་བ་འཁོར་འདས་གང་དུའང་མ་གྲུབ་ཀྱང་འཁོར་འདས་གང་དུའང་སྣང་དུ་རུང་བ། གཞི་དེ་ལ་སྐུ་འོད་རིག་པ་གསུམ་ཡེ་ནས་གྲུབ་པ་དེ་ཇི་ལྟར་ཡིན་ན་ཏིལ་ལ་མར་གྱིས་གཞི་གྲུབ་པ་ལྟ་བུ་ཞིག་ཡིན། གཞི་དེ་ལས་ཡེ་ཤེས་ཀྱི་རང་སྣང་དཔེར་ན་ཉི་ཚན་གྱིས་སྤུ་ཉག་སྒུལ་བ་བཞིན་དུ་རིག་པ་གཡོས་ཏེ་གདངས་ཕྱི་རུ་འཆར་བའི་སྐབས་དེར། རང་བཞིན་གྱི་དབང་རྣོན་གྱིས་མེ་ལོང་ནང་གི་གཟུགས་བརྙན་རང་བྱད་དུ་ངོ་ཤེས་པ་བཞིན་རྐྱེན་གྱིས་གྲོལ་བ་སྐད་ཅིག་ལ་ཐོབ་པ་རེད། ཀུན་ཏུ་བཟང་པོས་སྐད་ཅིག་གཅིག་གིས་བྱེ་བྲག་ཕྱེད་ཅིང་སྐད་ཅིག་གཅིག་གིས་གྲོལ་སོང་ནི་རེད། དེ་ཇི་ལྟར་གྲོལ་བ་ཡིན་ན། རྒྱུའི་རྐྱེན་དངོས་པོའི་གནས་ལུགས། བདག་པོའི་རྐྱེན་རང་རིག་པའི་ཡེ་ཤེས། དམིགས་རྐྱེན་རང་གི་ཤེས་པ་དང་། དེ་དག་དུས་མཚུངས་པ་དེ་མ་ཐག་རྐྱེན་ཏེ། དེ་དག་གིས་སྐད་ཅིག་གཅིག་གིས་རྫོགས་སངས་རྒྱས་པ་དང་། རང་བཞིན་གྱི་དབང་པོ་རྟུལ་བོས་རང་ངོ་རང་གིས་མ་ཤེས་ནས་སྐུ་དང་དབྱིངས་རིག་གཞན་དུ་མཐོང་སྟེ། སྐུ་ལས་ལུས་སུ་འཁྲུལ། དབྱིངས་ལས་ཡུལ་དུ་འཁྲུལ། རིག་པ་སེམས་སུ་འཁྲུལ། དེ་ཡང་རྒྱུའི་རྐྱེན་མ་རིག་པ་གསུམ་འདུས་པ་དང་། གཞན་དུ་ཤེས་པ་བདག་པོའི་རྐྱེན། འཁྲུལ་སྣང་དུ་མར་ཤར་བ་དམིགས་པའི་རྐྱེན། དེ་དག་དུས་མཚུངས་པ་དེ་མ་ཐག་རྐྱེན་ཏེ་རྐྱེན་བཞིས་དེ་ལྟར་དུ་འཁྲུལ། དེ་ལྟར་འཁྲུལ་བ་ཙམ་མ་ཚད། དེ་དང་མཉམ་དུ་བདུད་བཞིའང་བྱུང་བ་རེད། ལྷའི་བུའི་བདུད་དང་། ཕུང་པོའི་བདུད། ཉོན་མོངས་པའི་བདུད། འཆི་བདག་གི་བདུད་དང་བཞིའོ། །རང་སྣང་དུ་མ་ཤེས་པ་ལྷའི་བུའི་བདུད། ཟག་བཅས་ཀྱི་ཕུང་པོར་གྲུབ་སྟེ་ལུས་བླངས་པ་དེ་ཕུང་པོའི་བདུད། ཟག་བཅས་ཀྱི་ཕུང་པོར་ཉོན་མོངས་ཡོད་པ་ཉོན་མོངས་ཀྱི་བདུད། ཟག་བཅས་ཀྱི་ཕུང་པོར་སྐྱེ་ཤི་ཡོད་པས་འཆི་བདག་གི་བདུད་དང་བཅས་དེ་ལྟར་བྱུང་བ་རེད། དེའི་ཕྱིར་ན་གཞི་ལས་གཞི་སྣང་ཤར་ཡང་། གཞི་ལས་སྐད་ཅིག་ཀྱང་མ་གཡོས་པའི་གནས་སྐབས་ཀྱི་གཞི་འདི་ལའང་སྐུ་འོད་རིག་པ་གསུམ་ཚང་ཞིང་གནས་པ་ཡིན། དེའི་སྟབས་ཀྱིས་སྐུ་འོད་རིག་པ་གསུམ་རང་ངོ་ཤེས་པས་སྐུ་གསུང་ཐུགས་སུ་ཡར་གྲོལ། མ་ཤེས་པས་ལུས་ངག་ཡིད་དུ་འཁྲུལ་དང་འཁྲུལ་བཞིན་པ་ཡིན། འབྱུང་འགྱུར་ཡང་དེ་བཞིན་ཡིན་པས། རྒྱུ་མ་རིག་པ་གསུམ་དང་རྐྱེན་བཞིའི་དམིགས་པ་མ་དག་པའི་ཆ་ལས་སྣང་བ་ལ་ཤེས་པ་གཟུང་འཛིན་དུ་འཁྲུལ་ནས་འོད་ལྔ་འབྱུང་བ་ལྔ་རུ་འཁྲུལ། འཁྲུལ་སྣང་ཇེ་རགས་སུ་སོང་སྟེ་ལུས་འདི་གྲུབ་པ་ཡིན། ཀུན་རྫོབ་རང་སའི་འབྱུང་བ་བཞིའི་ལུས་འདི་གྲུབ་པ་ཡིན། དེ་ཡང་ས་ལས་ཤ་གྲུབ། ཆུ་ལས་ཁྲག་གྲུབ། མེ་ལས་དྲོད་གྲུབ། དེ་བཞིན་དུ་རླུང་ལས་དབུགས་ཉིད་དངོས་སུ་གྲུབ་སྟེ་ཉོན་མོངས་དང་རྣམ་རྟོག་ཀྱང་དེ་ལ་དེར་བརྟེན་དུ་བྱུང་བ་ཡིན། དེ་དང་མཉམ་དུ་དོན་དམ་པའི་འབྱུང་བ་བཞིས་སྒྲོན་མ་རྣམ་བཞི་བསྐྱེད་པ་ཡིན་ན། སྒྲོན་མ་རྣམ་བཞི་དེས་འོད་སྐུ་ཐིག་ལེ་རིག་པ་རྣམས་བསྐྱེད་དེ་རྒྱང་ཞགས་ཆུ་སྒྲོན་གྱིས་ཆོས་ཉིད་མངོན་སུམ་གྱི་སྣང་བ་མཐོང་། ཐིག་ལེ་སྟོང་སྒྲོན་གྱིས་ཉམས་གོང་འཕེལ། དབྱིངས་རྣམ་དག་གི་སྒྲོན་མས་རིག་པ་ཚད་ཕེབས། ཤེས་རབ་རང་བྱུང་གི་སྒྲོན་མས་ཆོས་ཉིད་ཟད་པའི་སྣང་བ་མཐོང་བའི་རྟེན་བྱེད་པ་ཡིན། དེ་ལྟ་བུའི་རྟེན་ལུས་དེ་ལ་བརྟེན་པ་རྩ་རླུང་ཐིག་ལེ་སྟེ། གནས་པ་རྩ། གཡོ་བ་རླུང་། བཀོད་པ་བྱང་ཆུབ་ཀྱི་སེམས་བཅས་གནས་པ་ཡིན། རྩ་འཁོར་ལོ་བཞིའི་དྲྭ་བ་དེ་མང་དུ་རྩ་གནས་སོ་སོར་འབྲེལ་བ་ནས་རྩའི་གཙོ་བོ་དབུ་རྐྱང་རོ་གསུམ་དེ་ལུས་ཀྱི་དབུས་ན་ཀ་བའི་ཚུལ་དུ་ཆགས། ལས་དང་ཡེ་ཤེས་ཀྱི་རླུང་དེ་ལ་བརྟེན་ནས་རྒྱུ། དེ་བཞིན་དུ་ཐིག་ལེའི་དབྱེ་བ་མང་ཡང་། ཀུན་རྫོབ་རྒྱུའི་ཐིག་ལེ། དོན་དམ་འོད་ཀྱི་ཐིག་ལེ། གཞི་གནས་ཡེ་ཤེས་ཀྱི་ཐིག་ལེ། དེ་དག་གི་བྱེད་ལས་ཐོག་ནས། ཙིཏྟར་སྐུ་རུ་སྨིན། རྩ་རྣམས་སུ་ཐིག་ལེར་སྨིན། མིག་ཏུ་སྒྲོན་མ་བཞིར་སྨིན། འབྲས་བུ་དབྱིངས་དང་ཡེ་ཤེས་འདུ་འབྲལ་མེད་པར་བྱེད་པ་དེ་ལྟར་ཏུ་ཡིན་ནོ། །སྙིང་ཙིཏྟ་རིན་པོ་ཆེ་གསང་བའི་སྦུབས་ན་སངས་རྒྱས་ཐམས་ཅད་ཀྱི་ཐུགས་དང་དབྱེར་མེད་པའི་རིག་པ་ཡེ་ཤེས་དེ་ཉིད་འདུས་མ་བྱས་ཤིང་ལྷུན་གྱིས་གྲུབ་པར་ཇི་ལྟར་བཞུགས་ན། སྒྲ་ཐལ་འགྱུར་རྩ་བའི་རྒྱུད་ལས། ཙིཏྟ་རིན་ཆེན་གཞལ་ཡས་ན། །ངོ་བོ་ཀ་ནས་དག་པའི་ཆ། སྟོང་གསལ་འདུས་པ་སྐུ་ཡི་གདངས། །ཞལ་ཕྱག་རྫོགས་པ་བུམ་སྐུའི་ཚུལ། །ལྷུན་གྲུབ་འོད་ཀྱི་གོང་བུར་གནས། །ཐུགས་རྗེ་ཁ་དོག་སོ་སོར་གསལ། །ཞེས་གསུངས་པ་ལྟར་དུ། ངོ་བོ་སྐུར་གནས་པ་བུམ་པའི་སྐུ་ལྟ་བུ། རང་བཞིན་འོད་དུ་གནས་པ་བུམ་ནང་གི་མར་མེ་ལྟ་བུ། ཐུགས་རྗེ་འོད་ཟེར་དུ་གནས་པ་ཉི་མའི་འོད་ཟེར་དེ་ཚོར་དཔེར་བཞག་ནས་གསུངས་ཡོད་པ་རེད། དེ་ལྟར་གནས་པའི་སྟོང་གསལ་འགགས་མེད་སྐུ་དང་ཡེ་ཤེས་ཡོན་ཏན་ཐམས་ཅད་ལྷུན་གྲུབ་ལ་བཞུགས་པ་དེ་ཉིད་གདོད་ནས་ཡེ་སངས་རྒྱས་པའི་གདོད་མའི་མགོན་པོའམ་ཐོག་མའི་མགོན་པོ་འོད་མི་འགྱུར་བ། ངོ་བོ་རང་བཞིན་ཐུགས་རྗེའི་ཡེ་ཤེས་འགགས་མེད་དུ་གསལ་བ་ནང་གསལ་བུམ་པའི་སྐུར་བཞུགས་པ་དེ་ཉིད་ཡིན་གསུངས་པ་རེད། རྫོགས་པ་ཆེན་པོའི་ཐུན་མིན་གྱི་ཆོས་སྐད་ལ་གཞོན་ནུ་བུམ་སྐུ་གསུངས་རྒྱུ་ཞིག་ཡོད་ན། གཞོན་ནུ་བུམ་སྐུ་གསུངས་རྒྱུ་དེ་ནི་སྐྱེ་འཆི་བགྲེས་རྒུད་དང་བྲལ་བའི་ཆ་ནས་གཞོན་ནུ་དང་། ཕྱི་གསལ་གྱི་ཚུལ་དུ་མི་མངོན་ཡང་གཏིང་གསལ་གྱི་ཚུལ་དུ་གནས་པ་ནང་གསལ་ཕྲ་བའི་ཡེ་ཤེས། འདིའི་ཕྲ་བ་ཟེར་བ་དེ་ཟབ་ཅིང་གཏིང་དཔོག་དཀའ་བའི་དོན་ཡིན། དེ་ལྟ་བུའི་ནང་གསལ་གྱི་ཡེ་ཤེས་དེ་ལ་དོན་དམ་ཆོས་ཀྱི་སྐུའི་ཐ་སྙད་སྦྱར་ཏེ་བུམ་སྐུ་ཞེས་གསུངས་པའོ། །ཙིཏྟ་སྙིང་གི་དབུས་ན་སྐུ་རུ་གནས་ན། དེའི་གདངས་དེ་འགྱུ་བྱེད་རྩའི་གཞལ་ཡས་དང་། དུང་ཁང་བྷནྡྷའི་གཞལ་ཡས། ལྟ་བྱེད་མིག་གི་གཞལ་ཡས་སོགས་སུ་བཞུགས་པའོ། །སྟོང་པ་རང་གྲོལ་དང་འོད་རྩ་ལྔ་གསུངས་རྒྱུ་དེ་ཡེ་ཤེས་ལྔ་དང་སྦྱར་ནས་གསུངས་པ་རེད། སྒྲོན་མ་བཞི་དང་སྦྱར་ཡོང་དུས་སྙིང་ཁ་ནས་ཨ་ཝ་དྷུ་ཏཱིར་བརྒྱུད་དེ་སྒལ་ཚིགས་ནས་མགྲིན་པའི་རྩེའུ་ཆུང་གཡས་དང་། དུང་ཁང་ནས་རྒྱང་ཞགས་ལ་བརྒྱུད་པའི་འོད་རྩ་དྭངས་བ་ལས་སྒྲོན་མ་བཞིའི་རང་གདངས་ནམ་མཁར་འཆར་བ་ཡིན། རྩ་ཀ་ཏི་ཤེལ་བུག་བརྒྱུད་ནས་འོད་རྩ་དྭངས་པ་མིག་གི་དབང་རྟེན་དུ་ཟུག་པ་དེས། རྒྱང་རིང་གི་སྣང་ཆ་འཛིན་པ་ལ་རྒྱང་ཞགས་དང་། འདི་ནས་ཡེ་ཤེས་སྣང་བའི་སྒོར་གྱུར་བ་སྒོ་རྒྱང་ཞགས་ཆུ་ཡི་སྒྲོན་མ། གོང་ནས་དབྱེ་བ་ཕྱེ་མྱོང་བ་ཡིན། ཡེ་ཤེས་འདུས་པའི་རྒྱང་ཞགས་ལ་གོ་དགོས་པ་སྔར་ཡང་བཤད་པ་ལྟར་རེད། རྒྱང་ཞགས་ཆུ་ཡི་སྒྲོན་མས་སྒོ་ཕྱེ་སྟེ་གཞིའི་དབྱིངས་རང་གི་སྙིང་ག་ན་འོད་ལྔ་ལྷུན་གྲུབ་ཏུ་གནས་པ་དེ། ལམ་གྱི་དབྱིངས་མིག་གི་འོད་རྩའི་རང་འོད་ལ་སྣང་བ་དེ་ཉིད་ཡུལ་ལ་སྣང་བའི་དབྱིངས་མཐིང་ག་ཁྱབ་ཆེན་ལྔ་ལྡན་འོད་ཀྱི་དྲྭ་བར་གནས་པ་དེ་རྣམ་དག་དབྱིངས་ཀྱི་སྒྲོན་མ་རེད། ཅེས་གསུངས་ནི་རེད། དེ་ཡི་ནང་དུ་དཔེར་ན་ཀོ་མོག་གིའམ་ངས་འདི་ལ་ཀོ་མོ་ཡི་ཞེས་ཆུ་འཁྱིལ་ལ་གོ་བ་ཡིན་པས་དེ་ལྟར་འདོན།

ཆུ་ལ་རྡོ་བསྐྱུར་རི་མོ་ལྟ་བུའམ།།

རྨ་བྱའི་མདོངས་ལྟར་ཁ་དོག་ལྔ་ལྡན་གྱི།།

ཐིག་ལེ་ཟླུམ་པོ་ཐིག་ཕྲན་བཅས་པ་འཆར།།

དེ་ཉིད་ཐིག་ལེ་སྟོང་པའི་སྒྲོན་མ་ཡིན།།

དབྱིངས་དང་ཐིག་ལེའི་ནང་དུ་རྟ་རྔ་ལ།།

མདུད་པ་བཏབ་འདྲ་མེ་ཏོག་ཆུན་པོ་དང་།།

མུ་ཏིག་དྲྭ་བ་ལྕགས་ཐག་འདྲ་བ་སོགས།།

ཁ་དོག་སྔོན་པོ་སྦྲང་ཆར་འབབ་བཞིན་འཆར།།

དེ་ཉིད་རྡོ་རྗེ་ལུག་རྒྱུད་ཅེས་བྱ་ཡིན།།

ཀློང་ཆེན་མཛོད་བདུན་ངོ་སྤྲོད་སྐབས་ཤིག་ཏུ།།

འོད་གསལ་སྤྱི་ལ་རྡོ་རྗེ་ལུག་རྒྱུད་ཅེས།།

སྤྱི་སྡོམ་ཚིག་ཏུ་བཤད་པའང་ཡོད་པ་ཡིན།།

དེ་དག་རྣམས་ལ་མ་ཡེངས་བལྟས་པའི་ཚེ།།

ཀ་དག་ལྷུན་གྲུབ་གཉིས་སུ་མེད་པ་ཡི།།

ཤེས་པ་གསལ་སྟོང་མི་རྟོག་ཡེ་ཤེས་དེ།།

ཤེས་རབ་རང་བྱུང་སྒྲོན་མ་ཞེས་བྱ་ཡིན།།

ཞེས་གསུངས་ན། རྣམ་དག་དབྱིངས་ཀྱི་སྒྲོན་མའི་ནང་དབྱིངས་ཀྱི་གདངས་ཕྱི་རུ་ཤར་བའི་སྣང་བ་དེའི་རྗེས་ལ་དེ་ཉིད་མཆེད་པའམ་དེའི་གཞི་དེ་ལ་ཀ་དག་གི་རང་སྣང་སུས་ཀྱང་མ་བྱས་རང་གིས་གསལ་བ་ཐིག་ལེ་ཟླུམ་པོ་ཐིག་ཕྲན་དང་བཅས་པ་ཆུ་འཁྱིལ་གྱི་ནང་དུ་རྡོ་འཕངས་བའི་རི་མོ་ལྟ་བུའམ་། ཡང་ན་རྨ་བྱའི་སྒྲོ་མདོངས་ལྟ་བུའི་ཁ་དོག་ལྔ་ལྡན་དུ་སྣང་བ་ལ་སོགས་པ་གོང་ནས་ཀྱང་བཤད་པ་ལྟར་སྣང་བ་དེ་ཐིག་ལེ་སྟོང་པའི་སྒྲོན་མ་ཡིན། དབྱིངས་ཀྱི་སྒྲོན་མ་དང་ཐིག་ལེ་སྟོང་པའི་སྒྲོན་མ་སོགས་ཀྱི་གཞི་དེ་རུའམ་དེའི་ནང་ན་རྩ་རླུང་ཐིག་ལེར་བརྟེན་པའི་གྲོལ་རྟགས་དང་ལྡན་པའི་རྟ་རྔར་མདུད་པ་བརྒྱབ་འདྲའི་འཁྱོགས་མཚམས་སུ་ཐིག་ལེ་ཡོད་པ། རླུང་གི་འགྲོས་ཀྱིས་གཡོ་འགུལ་ཅན། མེ་ཏོག་གི་ཆུན་པོ་ལ་སོགས་པའི་དཔེ་གཞན་དང་ཡང་འདྲ་ཆོག་པ་དེ་རིག་གདངས་རྡོ་རྗེ་ལུ་གུ་རྒྱུད་ཡིན། ཁ་དོག་སྔོན་པོའམ་ནག་སྒྲིབ་ཅན་དེ་འདྲ་མང་པོ་སྦྲང་ཆར་བབས་པ་བཞིན་དུའང་འཆར་གསུངས་སོ། །དེ་ཡང་གང་ཟག་ཉམས་ལེན་པ་མང་པོ་ཞིག་ལ་དང་པོའི་འཆར་སྣང་ལ་ཕར་ཆེར་འདྲ་བ་ཡིན། ཡང་བོད་ཡིག་དབུ་ཅན་གྱི་ཡི་གེའི་ན་རོ་ལྟ་བུ་ནས་འཆར་ས་ཡང་ཡོད། ཡང་མིག་དང་ཤའི་མདངས་འཕྲད་པའི་རྐྱེན་ལ་བརྟེན་ཏེ་འཆར་རྒྱུའང་ཡོད་ཚུལ་གསུངས། ལུག་རྒྱུད་འཁོར་དང་བཅས་པའི་དབྱིངས་སྣང་ཐམས་ཅད་ལ་ལུག་རྒྱུད་ཀྱི་སྒྲས་བསྟན་པའང་། རྒྱུད་དོན་ཀློང་ཆེན་པས་བཀྲལ་བའི་གསུང་གི་ནང་དུ་ཡོད། གང་ལྟར་ཡང་སྐུ་འོད་ཐིག་ལེའི་ཡེ་ཤེས་ཀྱི་སྣང་བ་ལས་མ་འདས་པ་ཞིག་ཡིན་ནོ། །རྡོ་རྗེ་ལུ་གུ་རྒྱུད་དེ་ཤེས་རབ་རང་བྱུང་གི་སྒྲོན་མའི་གདངས་ཡིན། དེ་མིན་ཡང་འདིའི་ཕྱི་རུ་ཤར་བའི་འཆར་སྣང་ཐམས་ཅད་པོ་ནང་དབྱིངས་དང་རིག་པའི་གདངས་ཡིན་དགོས། ལུ་གུ་རྒྱུད་ནི་གྲངས་མང་བས། །ཞེས་རྒྱུད་ཀྱི་ལུང་ཞིག་དྲངས་ནས། དངོས་འོད་རྩའི་གདངས་དང་ཆ་ཤས་ཐིག་ལེ་དང་བཅས་པ། འོད་ལྔ་ཐམས་ཅད་པོ་ལུ་གུ་རྒྱུད་དུ་བཤད་ཡོད་ཅེས་གོང་དུ་གསུངས་ས་དེ། ཚིག་དོན་མཛོད་ཀྱི་ནང་དུ་གསུངས་ཡོད། ཤེས་རབ་རང་བྱུང་གི་སྒྲོན་མའི་ངོ་བོ་དེ་ཇི་ལྟ་བུ་ཞིག་ཡིན་ན། ཀ་དག་ལྷུན་གྲུབ་གཉིས་མེད་ཀྱི་དགོངས་པ། སྟོང་གསལ་འགག་པ་མེད་པའི་ཡེ་ཤེས་རང་སྣང་གི་རྩལ་སྐུ་གསུམ་རིག་པའི་ངང་དུ་ཐིམ་སོང་བས་རིག་པ་ཀ་དག་ལྷུན་གྲུབ་གཉིས་མེད་ཀྱི་འབྲས་བུ་གཞི་ལ་རྫོགས་པ། རིག་པའི་དབྱིངས་གདོད་ནས་རང་རྩལ་སྐུ་གསུམ་དུ་ཤར་བས་དོན་བྱེད་པ། གཉུག་མའི་ཡེ་ཤེས་ངོ་བོ་བཅོས་བསླད་དང་བྲལ་བ་དེ་ལ་གསུངས་ཀྱི་ཡོད། སྤྱིར་ཤེས་རབ་ལ་དབྱེ་ན་འབྱེད་སྡུད་སྒྲོལ་བསྐྱོད་ལ་སོགས་པ་རེད། དེ་ཡང་འབྱེད་པའི་ཤེས་རབ། རིག་དང་མ་རིག་ཉོན་མོངས་དང་ཡེ་ཤེས་སུ་འབྱེད་པ་སོགས་དང་། སྡུད་ཅེས་པས་རྣམ་པར་སྡུད་བྱེད་ཀྱི་ཤེས་རབ་འབྱུང་ལྔ་འོད་ལྔའི་ནང་དུ་སྡུད་པ་དང་། སྐུ་ལྔ་རིག་པའི་ངང་དུ་སྡུད་པ་ལ་སོགས་པ་དང་ནི། བསྐྱོད་པའི་ཤེས་རབ་ཅེས་པས་སྐུ་ལྔ་ཀ་དག་གི་དབྱིངས་སུ་བསྐྱོད། འོད་ལྔ་འཛིན་མེད་ཀྱི་དབྱིངས་སུ་བསྐྱོད་རྒྱུ་སོགས་དང་། སྒྲོལ་བྱེད་ཀྱི་ཤེས་ནི། མ་རིག་རིག་པའི་ཀློང་དུ་སྒྲོལ། །ཤེས་རབ་རྟོག་མེད་ངང་དུ་སྒྲོལ། །ཞེས་སོགས་གསུངས་པ་ལྟར་རོ། །འདིའི་སྒྲོན་མ་བཞིའི་སྐབས་ཀྱི་ཤེས་རབ་རང་བྱུང་གི་སྒྲོན་མ་བཤད་དུས། འབྱེད་པའི་ཤེས་རབ་རྩལ་འདོན་གྱིས་སྐུ་གསུམ་གྱི་སྤྱན་གསུམ་དང་སྦྲེལ་ཏེ་གཞི་གནས་རང་བྱུང་གི་ཤེས་རབ་དང་སྣང་བ་གཅེར་འཛིན་གྱི་ཤེས་རབ་སོགས་ཀྱི་དབྱེ་བའང་ཡོད་ཚུལ་ཆོས་ཁྲིད་སྔོན་མའི་སྐབས་ཤིག་ཏུ་བཤད་པ་ལྟར་ཡིན། དེ་འདི་ནས་བཤད་པའི་འབྱེད་པའི་ཤེས་རབ་རྩལ་འདོན་གྱིས་སྐུ་གསུམ་གྱི་སྤྱན་གསུམ་དང་སྦྲེལ་ཏེ་གསུངས་པ་ཞིག་རེད། རིག་པའི་ཡེ་ཤེས་གཅིག་ལ། སྐུ་ལྔ། ཡེ་ཤེས་ལྔ། རིགས་ལྔ་ལ་སོགས་པ་ལྔ་ཚན་བདུན་གྱི་ངོ་བོར་བཞུགས་པའི་ངོ་སྤྲོད་ཀྱི་ནང་ནས།

ཁ༽ གཉིས་པ་དངོས་གཞིའི་ངོ་སྤྲོད་ཚུལ་བརྒྱད་བསྟན་པ།

དེ་ལ་བརྒྱད་ལས།

༡༽ དང་པོ་སྐུ་ལྔའི་ངོ་སྤྲོད་བསྟན་པ།

ཨེ་མ་ཧོ།

དང་པོ་སྐུ་ལྔའི་ངོ་སྤྲོད་རིམ་པ་ནི།།

ཞེས་མཚམས་སྦྱར་ཏེ།

འོད་གསལ་སྣང་བ་འདི་རྣམས་ཐམས་ཅད་ནི།།

ཞེས་མདོར་བསྟན་ཏེ་དེ་ནས་རྒྱས་པར་བཤད་པ་ནི།

སྐུ་ལྔར་མཚོན་ཏེ་རིག་པའི་ཡེ་ཤེས་ཉིད།།

འོད་གསལ་ཆེན་པོར་གསལ་བས་རྣམ་སྣང་སྐུ།།

འཕོ་འགྱུར་མེད་པས་མི་བསྐྱོད་རྡོ་རྗེའི་སྐུ།།

དེ་ཉིད་འཕེལ་དང་བཅས་པ་རིན་འབྱུང་སྐུ།།

འོད་གསལ་མཐའ་དབུས་མེད་པས་སྣང་མཐའི་སྐུ།།

འོད་ལྔ་ལྷུན་གྲུབ་ཤར་བས་དོན་གྲུབ་སྐུ།།

རིགས་ལྔའི་སངས་རྒྱས་ལྷ་ཞལ་མཐོང་བའོ།།

དེ་ཉིད་གཟུང་འཛིན་ཞེན་པས་མི་བཅིངས་པར།།

གསལ་སྟོང་འཛིན་མེད་ཉིད་དུ་བསྒོམ་པ་ལམ།།

རིགས་ལྔའི་སྐུ་རྣམས་མཐོང་དུས་འབྲས་བུའོ།།

ཞེས་གསུངས་ཏེ། རྣམ་པར་སྣང་མཛད་དེ་རྒྱལ་བ་རིགས་ལྔའི་ནང་གི་སྐུའི་རིགས་རེད། རིག་པའི་ཡེ་ཤེས་དེས་རང་ཡུལ་ཆོས་ཉིད་ཀྱི་རྣམ་པ་ལས་ཡེ་གདངས་ལྷུན་གྲུབ་ཏུ་རྣམ་པར་སྣང་བར་མཛད་པ། སྐུ་མཚན་དཔེ་འོད་དུ་འབར་ཞིང་གསལ་བའི་རྣམ་པ་ཅན་ཡིན་པས་ན་རྣམ་པར་སྣང་མཛད་ཀྱི་སྐུ་ཡིན། མི་བསྐྱོད་པ་དེ་ཐུགས་ཀྱི་རིགས་ཡིན། རིག་པའི་ཡེ་ཤེས་དེ་རྡོ་རྗེ་ལྟར་གཞན་གྱིས་མི་བསྐྱོད་ཅིང་འཕོ་འགྱུར་མེད་པ་ཞིག་ཡིན། རིག་པའི་ངོ་བོའི་ལྡོག་ཆ་ནས་འཕོ་འགྱུར་དང་བྲལ་བ་གཟུང་འཛིན་གྱི་རྣམ་རྟོག་དང་ལས་རླུང་གིས་བསྐྱོད་དུ་མེད་པ་ཡིན་པས་ན་མི་བསྐྱོད་རྡོ་རྗེའི་སྐུ། རིན་ཆེན་འབྱུང་ལྡན་ནི་ཡོན་ཏན་གྱི་རིགས་ཡིན། རིག་པའི་ཡེ་ཤེས་ལ་འོད་གསལ་གྱི་ཡོན་ཏན་ཡེ་ནས་ཡོད་པ་དང་། རིག་པའི་ཡེ་ཤེས་ཀྱི་གདངས་འོད་གསལ་སྣ་ཚོགས་ཀྱི་སྣང་བ་འཕེལ་ཆ་དང་བཅས་པ་ཞིག་ཡིན་པ་རིན་པོ་ཆེའི་གཏེར་ལྟ་བུ་ཡིན་པས་རིན་ཆེན་འབྱུང་ལྡན་གྱི་སྐུ། སྣང་བ་མཐའ་ཡས་གསུང་གི་རིགས་ཡིན་ན། རིག་པའི་ཡེ་ཤེས་ཀྱི་གདངས་ཀྱི་སྣང་ཆའི་འོད་སྣང་དེ་མཐའ་ཡས་ཚད་མེད་པ་ཞིག་ཡིན་པ་དང་ནི། དེ་ཉིད་ཡོན་ཏན་མཐའ་ཡས་ཚད་མེད་པའི་སྒྲུབ་གཞིར་ཡང་གྱུར་པས་ན་སྣང་བ་མཐའ་ཡས་ཀྱི་སྐུར་བཞེངས་པ་ཡིན། དོན་ཡོད་གྲུབ་པ་ཕྲིན་ལས་ཀྱི་རིགས་ཡིན། རིག་པའི་ཡེ་ཤེས་ཉིད་འབད་ཅིང་རྩོལ་བ་མེད་པར་དོན་གཉིས་ལྷུན་གྲུབ་ཀྱི་སངས་རྒྱས་སམ་དཔེའི་ཡེ་ཤེས་རང་ལ་རྫོགས་ཤིང་གྲུབ་པ་ཡིན་པས་ན། འོད་ལྔ་ལྷུན་གྲུབ་ཏུ་འབར་བས་དེས་དོན་མཚོན་པ་དང་དོན་ཡོད་གྲུབ་པའང་འདི་ལ་ཚང་། དེས་ན་རིག་པ་གཅིག་གི་རང་ཞལ་མཐོང་བ་འདིས་རིགས་ལྔའི་སངས་རྒྱས་ཀྱི་ལྷ་ཞལ་རང་ལ་ཡེ་ནས་ཡོད་པ་དེ་རིང་རང་ངོ་ཤེས་ཏེ་དུས་གཅིག་ལ་མཇལ་བ་ཡིན། གཞི་སྐུ་གསུམ་ཡེ་ནས་རང་ལ་གནས་པ་དེ་ཉིད། ལམ་གཟུང་འཛིན་ཞེན་མེད་གསལ་སྟོང་འཛིན་མེད་དུ་བསྒོམས་པས། འབྲས་བུ་རིགས་ལྔ་རང་ལ་ཡོད་པ་མངོན་དུ་གྱུར་བར་བསྟན་པ་རེད། དེས་དང་པོ་སྐུ་ལྔའི་ངོ་སྤྲོད་སོང་ནས།

༢༽ གཉིས་པ་ཡེ་ཤེས་ལྔ་ཡི་ངོ་སྤྲོད་བསྟན་པ།

དེ་ནས་གཉིས་པ།

གཉིས་པ་ཡེ་ཤེས་ལྔ་ཡི་ངོ་སྤྲོད་ནི།།

ཞེས་མཚམས་སྦྱར་ནས།

འོད་གསལ་དེ་ཉིད་དྲི་མ་དང་བྲལ་ཞིང་།།

སྐུ་རྣམས་ཀུན་གྱི་འཆར་གཞི་བྱེད་པས་ན།།

མེ་ལོང་ལྟ་བུའི་ཡེ་ཤེས་ཞེས་བྱའོ།།

གང་དུའང་དབྱེར་མེད་མཉམ་ཉིད་ཡེ་ཤེས་སོ།།

སོ་སོར་འཆར་བས་སོར་རྟོག་ཡེ་ཤེས་སོ།།

ལྷུན་གྱིས་གྲུབ་པས་བྱ་གྲུབ་ཡེ་ཤེས་སོ།།

དེ་རྣམས་གཞི་མེད་ཡེ་སྟོང་རྩ་བ་དང་།།

བྲལ་བས་ཆོས་ཀྱི་དབྱིངས་ཀྱི་ཡེ་ཤེས་སོ།།

རིག་པ་ཡེ་ཤེས་ལྔ་ཡི་རང་བཞིན་དུ།།

ཡེ་ནས་འདུ་འབྲལ་མེད་པར་བཞུགས་པའོ།།

དེ་ཡི་ངང་ལ་ས་ལེར་བསྒོམ་པ་ལམ།།

སྟོང་ཉིད་འོད་དུ་གསལ་བ་འབྲས་བུའོ།།

ཞེས་གསུངས་ཏེ། རིག་གདངས་རྡོ་རྗེ་ལུ་གུ་རྒྱུད་དབང་པོའི་མངོན་སུམ་ལ་དངོས་སུ་མཐོང་རྒྱུ་འདིའི་ངོ་བོའི་ཆོས་ཉིད་ཡེ་ཤེས་ལྔ་རུ་ལྷུན་གྱིས་གྲུབ་པ་དང་། འོད་གསལ་དེ་ཉིད་ཡེ་ནས་དྲི་མ་ཀུན་བྲལ། སྐུ་རྣམས་ཀྱི་སྤྱི་དང་རང་གི་གཟུགས་བརྙན་གསལ་ཞིང་འཆར་གཞི་བྱེད་པ་ཡིན་པས་ན་མེ་ལོང་ལྟ་བུའི་ཡེ་ཤེས། རིག་པའི་ཡེ་ཤེས་ལ་བཟང་ངན་དུ་འགྲོར་མེད་ཅིང་ཆེ་ཆུང་ཡངས་དོག་མེད་པ་ནམ་མཁའ་ལྟ་བུའི་གཉིས་མེད་མཉམ་པ་ཆེན་པོར་བརྡལ་བ་དེ་མཉམ་པ་ཉིད་ཀྱི་ཡེ་ཤེས། རིག་པའི་རང་ངོར་སྣ་ཚོགས་སྣང་བའི་ཆོས་རྣམས་ཐམས་ཅད་བྱེ་བྲག་མ་འདྲེས་ཤིང་སོ་སོའི་མཚན་ཉིད་དུ་སོ་སོར་གསལ་བ་དང་ནི་གཏིང་གསལ་གཟུགས་ཅན་དུ་མ་གྲུབ་པའི་འོད་ལྔའི་ཁ་དོག་སོ་སོར་གསལ་བ་སོ་སོར་རྟོག་པའི་ཡེ་ཤེས། རིག་པ་རང་གྲོལ་མ་བཙལ་བར་བྱ་བ་རྫོགས་པས་ན་བྱ་གྲུབ་ཡེ་ཤེས། རིག་པའི་རང་བཞིན་ཡེ་སྟོང་རྩ་བྲལ་སྤྲོས་པའི་མཐའ་ཐམས་ཅད་བྲལ་བས་ན་ཆོས་ཀྱི་དབྱིངས་ཀྱི་ཡེ་ཤེས་ཀྱང་ཡིན། གཞི་རིག་པ་ལྔ་ཡི་རང་བཞིན་དུ་ཡེ་ནས་འདུ་འབྲལ་མེད་པར་བཞུགས་པ་ཉིད། ལམ་དེ་ཡི་ངང་ལ་མ་འདྲེས་ཟག་མེད་དུ་ས་ལེར་བསྒོམས་པས་འབྲས་བུ་སྟོང་གཞི་འོད་གསལ་ཆོས་ཉིད་དུ་དག་པའི་གཞི་འབྲས་ངོ་བོ་དབྱེར་མེད་དུ་བསྟན་པ་རེད། དེས་གཉིས་པ་ཡེ་ཤེས་ལྔ་ཡི་ངོ་སྤྲོད་སོང་ནས།

༣༽ གསུམ་པ་རིགས་ལྔའི་ངོ་སྤྲོད་རིམ་པ་བསྟན་པ།

གསུམ་པ་རིགས་ལྔའི་ངོ་སྤྲོད་རིམ་པ་ནི།།

ཞེས་མཚམས་སྦྱར་ཏེ།

འོད་གསལ་དེ་ཉིད་དེ་བཞིན་གཤེགས་པ་རྣམས།།

གཤེགས་ལམ་ཡིན་པས་དེ་བཞིན་གཤེགས་པའི་རིགས།།

འོད་གསལ་འཕོ་འགྱུར་མེད་པ་རྡོ་རྗེའི་རིགས།།

ཡོན་ཏན་དུ་མ་འབྱུང་བས་རིན་ཆེན་རིགས།།

སྣང་བ་སྐྱོན་གྱིས་མ་གོས་པདྨའི་རིགས།།

དེ་ལ་གོམས་ན་ལྷག་མེད་འགྲུབ་པས་ན།།

ལས་ཀྱི་རིགས་ཏེ་ཝ་ལེར་བསྒོམ་པ་ལམ།།

མཐར་ཕྱིན་ཕྱིར་མི་ལྡོག་པའི་འབྲས་བུའོ།།

ཞེས་གསུངས་ཏེ། འདས་དང་མ་བྱོན་ད་ལྟའི་སངས་རྒྱས་ཐམས་ཅད་ཀྱི་རིག་པའི་ཡེ་ཤེས་དེ་བཞིན་ཉིད། ཇི་བཞིན་དེ་བཞིན་དུ་གཟིགས་པས་ན་སངས་རྒྱས་ཀྱི་སར་གཤེགས་སམ་གཤེགས་འགྱུར་ཡིན་པས་ན་དེ་བཞིན་གཤེགས་པའི་རིགས། རྡོ་རྗེ་མི་འགྱུར་མི་ཤིགས་འགྱུར་བ་མེད་པའི་མཚོན་རྟགས་ཡིན་པ་ཇི་བཞིན་དུ་འོད་གསལ་འཕོ་འགྱུར་བྲལ་བ་གཉུག་མའི་གཤིས་ལུགས་དེ་ཉིད་བརྟན་པ་རྡོ་རྗེའི་རིགས། ཡང་རིག་པ་ཡོན་ཏན་ཀུན་འབྱུང་ཡིན། མི་ཟད་གསང་བའི་མཛོད་ཆེན་ཡོན་ཏན་མང་པོའི་དགོས་འདོད་འབྱུང་བའི་གཏེར་དུ་ལྷུན་གྱིས་གྲུབ་པ་ཡིན་པས་ན་རིན་ཆེན་གྱི་རིགས། འཁོར་བར་གནས་ཀྱང་འཁོར་བའི་སྐྱོན་གྱིས་མ་གོས་ཤིང་སྣ་ཚོགས་སྣང་བར་ཤར་ཡང་དྲི་བྲལ་སྐྱོན་གྱིས་གོས་པ་མེད་པ་མ་ཆགས་པདྨའི་རིགས། རིག་པ་ཕྲིན་ལས་ལྷུན་གྲུབ་ཡིན་པས་དོན་གཉིས་ངང་གིས་རྫོགས་པ་བྱ་བྲལ་ལས་ཀྱི་རིགས་ཏེ་རིགས་ལྔ་རིག་པའི་ཡེ་ཤེས་འོད་གསལ་ལྷན་ཅིག་སྐྱེས་པའང་འདི་ལ་ཚང་ཞིང་། གཞི་དེ་ལྟར་ཡིན་པ་ལམ་གྱིས་མ་འདྲེས་དབྱེར་མེད་དུ་ཝ་ལེར་བསྒོམས་ན་འབྲས་བུ་མཐར་ཕྱིན་ཕྱིར་མི་ལྡོག་པའི་རང་འབྲས་འབད་མེད་ལྷུན་གྲུབ་ཏུ་འབྱུང་བར་བསྟན་པ་ཡིན་ནོ། །སྤྱིར་ན་འཁོར་འདས་སྣང་སྲིད་ཀྱི་ཆོས་ཐམས་ཅད་རིག་པ་གཅིག་གི་ངོ་བོར་ཚང་བ་ཡིན། གཞི་རིག་པ་ལ་མ་ཚང་ན་ཉེར་ལེན་ལུས་སེམས་ལ་ཚང་བ་མི་འཐད་ཅིང་། དེའི་ཉེར་ལེན་དེ་ལུས་སེམས་ལ་མི་ཚང་ན། སེམས་ལ་སྣང་བའི་ཕྱི་ཡུལ་ལ་ཚང་དོན་མེད་དོ། །དེ་མེད་པའི་དཔེ། མོ་གཤམ་ལ་བུ་ཞིག་དང་པོ་ཉིད་ནས་ཡོད་མ་མྱོང་ན། དེའི་བཞིན་རས་འདི་རེད་ཅེས་ཡོང་དོན་མེད་པ་དང་། མོ་གཤམ་བུའི་བཞིན་རས་འདི་རེད་ཅེས་ཟེར་རྒྱུ་མེད་པ་དེ་མེ་ལོང་ལ་འདི་ལྟར་འཆར་འདུག་ཅེས་དེ་བས་ཀྱང་བརྗོད་རྒྱུ་མེད་པ་བཞིན་ནོ། །དེས་ན་སྣང་བ་ལ་སྣང་རྒྱུ་འདི་ལུས་སེམས་ལ་ཚང་བ་ལས་བྱུང་བ་ཡིན་པ་དང་། ལུས་སེམས་ལ་ཚང་བའང་རིག་པ་ལ་ཚང་བ་ལས་བྱུང་བ་ཡིན་པས་སོ། ཡང་དཔེ་བཞག་སྟེ། ལྷས་སྦྱིན་ལ་མགོ་ཡོད་པའི་སྟབས་ཀྱིས་ངོ་ཡོད། དེ་ཡོད་པས་ངོའི་གཟུགས་བརྙན་མེ་ལོང་ལ་འཆར་རྒྱུ་ཡོད་པ་བཞིན་དུ། རིག་པ་ལ་སྐུ་གསུམ་ཡེ་ནས་རྫོགས། སྐུ་གསུམ་རིག་པའི་ངང་ལ་འཁོར་འདས་སྣང་སྲིད་ཀྱི་ཆོས་མ་རྫོགས་པ་ཞིག་མེད། དེའི་ཕྱིར་ན་ལྷུན་གྱིས་གྲུབ་ཅིང་འདུས་མ་བྱས་པ་ཅིར་སྣང་འབྱུང་བའི་དབྱིངས་ཡོན་ཏན་ཀུན་གྱི་གཞི་སྟོང་གསལ་འགགས་མེད་ལྷུན་གྲུབ་ཡེ་ནས་ཡིན། ད་ལྟ་ཡིན། མ་འོངས་འབྱུང་འགྱུར་ལ་འགྱུར་བ་མེད། བླ་མས་རིག་ངོ་སྤྲད་པས་གསར་ཏུ་ཤེས་ཤེས་འདྲ་བོ་དེ་གསར་ཏུ་ཤེས་པ་དང་རྙེད་པ་ཞིག་ཅི་ཡང་མིན། རིག་པ་འགྱུར་མེད་ཡིན་པའི་གནད་ཀྱིས་དང་པོ་གཞི་ལས་གཞི་སྣང་དུ་ཤར་དུས་ནས་འཁོར་བར་འཁྲུལ་བ་ཡིན་ཡང་རིག་པ་ཇེ་ངན་དུ་སོང་མེད། ཐབས་དང་ལྡན་པས་ངོ་སྤྲད་དེ། དེ་ལ་གོམས་པས་ལམ་མཐར་ཕྱིན་པ་ཡིན་ཡང་རིག་པ་ཇེ་བཟང་དུ་སོང་མེད། སྒོམ་དུས་ཀྱི་རིག་པ་དང་མ་བསྒོམ་པའི་དུས་ཀྱི་རིག་པ་གཉིས་ཀའང་ཁྱད་མེད། དེ་བཞིན་དུ། དུས་ནམ་དང་ནམ། སྐབས་གང་དང་གང་གི་ཚེ་ཡང་རིག་པ་ལ་བཟང་ངན་དང་འཕོ་འགྱུར་འགྲོ་རྒྱུ་མེད། འོན་ཀྱང་སྣང་ཚུལ་ལ་བདེ་སྡུག་ཡོད་པ་གཉིས་སྣང་འཁྲུལ་བའི་ངོ་ཁར་སྣང་བ་ཡིན། རྨི་ལམ་མ་གཉིད་པའི་སྔོན་དུ་མེད་ལ་གཉིད་སད་དུས་ན་ཡང་མེད་ཀྱང་གཉིད་ཀྱི་ཚེ་ཁོ་རང་གི་ངོ་སྐལ་ཡོད་པར་བདེན་པ་འདྲ་བོར་སྣང་བའི་སྟབས་ཀྱིས། ལམ་བསྒོམ་པའི་ཐབས་ལ་བརྟེན་དགོས་པས་ན་གདུལ་བྱའི་ཁམས་དབང་མོས་པ་དང་སྒོ་བསྟུན་ནས་རྒྱུ་དང་འབྲས་བུའི་ཐེག་པའི་ཚུལ་མང་པོ་ཞིག་བསྟན་ཡོད་པ་དག་ལ་ཞུགས་དགོས། འདི་ནས་འོད་གསལ་སྒྲོན་མ་བཞིའི་གནད་ལ་བརྟེན་ཏེ་རིག་པའི་ཡེ་ཤེས་ཀྱི་གདངས་ཕྱི་རུ་འཆར་འཆར་འདྲ་བོ་དེ། རྨོངས་པའི་ངོ་ཁར་ལམ་ལ་བཀྲི་བའི་ཆེད་དུ་བསྟན་པ་ཙམ་མ་གཏོགས། དོན་དུ་ནང་གི་མཐོང་བ་རྣམ་དག་དམིགས་པ་དག་པའི་འོད་ལྔའི་ཡོན་ཏན་གྱི་ཆ་ཤས་ཙམ་ཡིན་ཏེ། མཐོང་བའི་ཡུལ་ལ་རྟོགས་པ་ཆེ། །གོ་བའི་ཡུལ་ན་བདེ་བ་ཆེ། །སྣང་བ་མཐོང་ན་ཉམས་མྱོང་ཆེ། །རང་རིག་གཅིག་པུ་གྲོགས་ཀྱི་མཆོག །ཅེས་སེངྒེ་རྩལ་རྫོགས་ཆེན་པོའི་རྒྱུད་ལས་གསུངས་པ་འདི་ལ་བློ་གྲོས་ཆེ་ན་གོ་རྒྱུ་ཆེན་པོ་ཡོད་ཅེས་ཀུན་མཁྱེན་ཆེན་པོས་གསུངས་པ་ལྟར་ཡིན་པ་རེད། དེ་ཡན་གྱིས་རིགས་ལྔ་རིག་པའི་ཡེ་ཤེས་ལ་ཚང་བར་བསྟན་པ་སོང་ནས།

༤༽ བཞི་པ་འོད་ལྔའི་ངོ་སྤྲོད་རིམ་པ་བསྟན་པ།

བཞི་པ་འོད་ལྔའི་ངོ་སྤྲོད་རིམ་པ་ནི།།

ཞེས་མཚམས་སྦྱར་ཏེ།

འོད་གསལ་དེ་རྣམས་དྲི་མ་མེད་པས་དཀར།།

རྩལ་མ་འགགས་པས་སེར་པོ་རང་བཞིན་དུ།།

རང་གསལ་སྣང་བས་དམར་པོ་བྱ་བ་དང་།།

བྲལ་བས་ལྗང་གུ་འགྱུར་བ་མེད་པས་མཐིང་།།

ཁ་དོག་སྣང་འཛིན་བྲལ་བ་བསྒོམ་པ་ལམ།།

འབྱུང་ཁམས་དབྱིངས་སུ་དག་པ་འབྲས་བུའོ།།

ཞེས་གསུངས་ཏེ། རིག་པ་ལས་དང་ཉོན་མོངས་ཀྱི་སྐྱོན་གང་གིས་ཀྱང་གོས་མ་མྱོང་བས་དཀར་པོ། རིག་པ་ཡོན་ཏན་ཡེ་ལྡན་ཕུན་སུམ་ཚོགས་པ་མ་བྱས་ལྷུན་གྱིས་རྫོགས་པ་ཡིན་པས་ན་སེར་པོ། དབང་བཞི་རང་ལ་རྫོགས་ཤིང་འགྱུར་མེད་བདེ་བ་ཆེན་པོ་དང་འབྲལ་མི་ཤེས་པའི་རང་མདངས་བཀྲག་ཏུ་འབར་བ་དེ་ཉིད་མ་བཙལ་བཞག་པས་དམར་པོ། སྣ་ཚོགས་པའི་ལས་ཀུན་འགྲུབ་པ་དེ་བྱ་རྩལ་རྫོགས་པས་ལྗང་ཁུ། འགྱུར་མེད་རྡོ་རྗེའི་རང་བཞིན་རྟག་ཏུ་གཡོ་བ་མེད་པ་མི་འགྱུར་བརྟན་པས་མཐིང་ག་སྟེ་འོད་གསལ་ཁ་དོག་ལྔ་ཡི་ཡེ་ཤེས་ཀྱི་རང་འོད་འཛིན་པ་དེ་ཡང་གཞི་ཡེ་ཤེས་གཅིག་གི་རང་བཞིན། ལམ་ཁ་དོག་སྣང་འཛིན་དང་བྲལ་བར་བསྒོམ་པས་འབྲས་བུ་འབྱུང་ཁམས་དབྱིངས་སུ་དག་སྟེ་ཡེ་ཤེས་མཁའ་ལ་འཆར། དབྱིངས་རིག་ཐིག་ལེར་འཆར་བའི་དོན་བཤད་པ་དེས་འོད་ལྔ་བསྟན་པའོ།།

༥༽ ལྔ་པ་རླུང་ལྔའི་ངོ་སྤྲོད་རིམ་པ་བསྟན་པ།

ལྔ་པ་རླུང་ལྔའི་ངོ་སྤྲོད་རིམ་པ་ནི།།

ཞེས་མཚམས་སྦྱར་ཏེ།

འོད་གསལ་སྣང་བ་འདི་རྣམས་ཐམས་ཅད་ནི།།

ཡེ་ཤེས་དྲོད་དང་མ་བྲལ་མེ་མཉམ་རླུང་།།

འཁོར་འདས་སྣང་ཆ་འཛིན་པ་སྲོག་འཛིན་རླུང་།།

དེ་ལ་གོམས་པས་འཁོར་བ་མྱང་འདས་གཉིས།།

སོ་སོར་འབྱེད་པས་དྭངས་སྙིགས་འབྱེད་པའི་རླུང་།།

དག་དང་མ་དག་ཀུན་ལ་ཡེ་ཤེས་ཀྱི།།

འོད་ལྔ་དེ་ཡིས་ཁྱབ་པའི་ཁྱབ་བྱེད་རླུང་།།

དེ་ཉིད་ཉམས་བླངས་འཁོར་བའི་སྲོག་བཅད་ནས།།

མྱ་ངན་འདས་པའི་ས་རུ་སྐྱེལ་བས་ན།།

སྙིང་རྗེ་མེད་པ་བསྐལ་པ་ལས་ཀྱི་རླུང་།།

དེ་ཡི་ངང་ལ་མ་བཅོས་བསྒོམ་པ་ལམ།།

མཐའ་རུ་ཕྱིན་དུས་མཐར་ཐུག་འབྲས་བུའོ།།

ཞེས་གསུངས་ཏེ། རིག་པ་ཡེ་ཤེས་ཀྱི་དྲོད་འབེབ་པའམ་དྲོད་དང་མ་བྲལ་བས་མེ་མཉམ་གྱི་རླུང་འདི་ལ་འདུས། འགྱུ་བྱེད་ཡེ་ཤེས་ཀྱི་རླུང་འཁྲུལ་རྟོག་ལས་ཀྱི་རླུང་གིས་བསླད་དང་མ་བསླད་ཀྱི་ཁྱད་པར་གྱིས་འཁོར་འདས་ཀྱི་སྲོག་འཛིན་པ་ཡིན་ན། དེའི་ཆ་གཉིས་འཛིན་པར་བྱེད་པས་ན་འཁོར་འདས་ཀྱི་སྣང་ཆ་འཛིན་པ་དེ་ཉིད་ལ་སྲོག་འཛིན་གྱི་རླུང་ཞེས་དང། འཁོར་བ་དག་པའི་མྱང་འདས་ཀྱིས་དྭངས་བྱེད་པས་ན་དྭངས་སྙིགས་འབྱེད་པའི་རླུང་ཟེར་ན་ཆོག རིག་པ་ཡེ་ཤེས་ཀྱི་རླུང་གིས་སེམས་ཅན་ཐམས་ཅད་ཀྱི་རྒྱུད་ལ་ཁྱབ་པ་ཡིན་པས་ཁྱབ་བྱེད་རླུང་། རིག་པའི་ཡེ་ཤེས་དེ་ཉིད་ཉམས་ལེན་ནུས་པ་རྫོགས་སྟོབས་ཀྱི་སྐབས་ལ་འཁོར་བ་མྱང་འདས་སུ་བསྒྲལ་ཞིང་འཁོར་བའི་སྲོག་བཅད་པ་ཡིན་པས་ན་སྙིང་རྗེ་མེད་པ་བསྐལ་བ་ལས་ཀྱི་རླུང་སྟེ་གཞི་རླུང་ལྔ་གཡོ་རྩོལ་བྲལ་བ་ལ། ལམ་དེ་ཡི་ངང་ལ་མ་བཅོས་པར་བསྒོམས་པས། འབྲས་བུ་མཐར་ཕྱིན་རླུང་ལྔ་དབྱིངས་སུ་དག་པའི་རླུང་ལྔ་རྣམ་དག་ཏུ་བསྟན་པའོ།།

༦༽ དྲུག་པ་ཤེས་རབ་ལྔ་ཡི་ངོ་སྤྲོད་བསྟན་པ།

དྲུག་པ་ཤེས་རབ་ལྔ་ཡི་ངོ་སྤྲོད་ནི།།

ཞེས་ཡང་མཚམས་སྦྱར་ཏེ།

འོད་གསལ་རྟོགས་དང་མ་རྟོགས་ཁྱད་པར་ལས།།

འཁོར་བ་མྱང་འདས་གཉིས་སུ་འབྱེད་པས་ན།།

འབྱེད་པའི་ཤེས་རབ་འོད་གསལ་ཡེ་ཤེས་ཀྱི།།

རྩལ་སྣང་སྡུད་པས་སྡུད་པའི་ཤེས་རབ་དང་།།

འོད་སྣང་འགྲོ་འོང་དང་བཅས་བསྐྱོད་པས་ན།།

བསྐྱོད་པའི་ཤེས་རབ་དེ་ཉིད་དོན་རྟོགས་ན།།

འཁོར་བ་ལས་སྒྲོལ་སྒྲོལ་བའི་ཤེས་རབ་སྟེ།།

དེ་ཡིས་ངང་ལ་རྒྱུན་དུ་བསྒོམ་པ་ལམ།།

མཐའ་རུ་ཕྱིན་དུས་མཐར་ཐུག་འབྲས་བུའོ།།

ཞེས་གསུངས་ཏེ། ཆོས་ཉིད་འོད་གསལ་གྱི་དོན་དེ་ཉིད་ལྷག་མཐོང་རྣམ་པར་མི་རྟོག་པའི་ཤེས་རབ་ཀྱིས་སྣང་ཤེས་འཁོར་འདས་ཀྱི་རྣམ་པར་སོ་སོར་མ་འདྲེས་པར་འབྱེད་པར་བྱེད་པས་ན་འབྱེད་པའི་ཤེས་རབ། དེ་ཉིད་ངོ་བོའི་ཆ་ནས་ཐམས་ཅད་རང་ལ་རྫོགས་ནས་ཡོད་པས་ཡེ་ཤེས་ཀྱི་རྩལ་སྣང་སྡུད་པར་བྱེད་པས་ན་སྡུད་པའི་ཤེས་རབ། འདི་ནས་འབྱེད་སྡུད་སྐྱོད་སྒྲོལ་ཏེ་ཤེས་རབ་རྣམ་པ་བཞི་མ་གཏོགས་གསུངས་མི་འདུག ཤེས་རབ་ལྔ་བཤད་པའི་སྐབས་ཡིན་པས་ཡི་གེའི་ཐོག་ནས་ཆད་པ་འདྲ་ཨེ་ཡིན་ན། གསུམ་པ་ཁྱབ་བྱེད་ཀྱི་ཤེས་རབ་ཡིན་དགོས་པ་རེད། ཆོས་ཅན་རྟེན་འབྲེལ་དུ་སྣང་བའི་སྣ་ཚོགས་པའི་ཆོས་ཐམས་ཅད་པོ་ཆོས་ཉིད་ཐིག་ལེ་ཆེན་པོར་བཟླུམས་པ། ཆོས་ཉིད་ཀུན་ཏུ་འགྲོ་བ་དེས་འཁོར་འདས་སྣང་སྲིད་ཡོངས་ལ་ཁྱབ་པ་ཡིན་པས་ན་ཁྱབ་བྱེད་ཀྱི་ཤེས་རབ། ཡེ་ཤེས་ཀྱི་རླུང་ལ་བརྟེན་ནས་ཤེས་རབ་མཁའ་ལ་བཏེགས་ཏེ་གཟོད་ཡེ་ཤེས་དབྱིངས་སུ་འཁྱིལ་ཞིང་རིག་གདངས་གཡོ་བ་དང་བཅས་པར་སྣང་བས་ན་སྐྱོད་པའི་ཤེས་རབ། འཁོར་འདས་གཉིས་ཀའི་སྲོག་ཆོས་ཉིད་དུ་སྒྲོལ་བ་སྟེ། ཤེས་རབ་ཀྱིས་དེ་བཞིན་ཉིད་ཀྱི་དབྱིངས་འཕོ་འགྱུར་དང་བྲལ་བར་རྟོགས། གཟུང་འཛིན་སྤངས་བའི་ཕན་ན་འཁོར་བ་མིང་ཙམ་ཡང་མ་གྲུབ་པས་ན་སྒྲོལ་བའི་ཤེས་རབ། གཞི་ཤེས་རབ་ལྔ་རུ་རང་ཤར་བ་དེ། ལམ་དེ་ཡི་ངང་ལ་མ་ཡེངས་རྒྱུན་དུ་གོམས་ཤིང་གོམས་པས། འབྲས་བུ་མཐར་ཕྱིན་མཁྱེན་པའི་ཡེ་ཤེས་དབྱིངས་ཡེ་དབྱེར་མེད་ཀྱི་ས་རུ་བཟླུམས་པ་སྟེ་དེས་ཤེས་རབ་ལྔ་བསྟན་པའོ།།

༧༽ བདུན་པ་མཁའ་འགྲོ་ལྔ་ཡི་ངོ་སྤྲོད་བསྟན་པ།

བདུན་པ་མཁའ་འགྲོ་ལྔ་ཡི་ངོ་སྤྲོད་ནི།།

ཞེས་མཚམས་སྦྱར་ཏེ།

འོད་གསལ་མཐིང་ག་སངས་རྒྱས་མཁའ་འགྲོ་དང་།།

དཀར་པོ་རྡོ་རྗེ་མཁའ་འགྲོ་སེར་པོ་ནི།།

རིན་ཆེན་མཁའ་འགྲོ་དམར་པོ་པདྨ་ཡི།།

མཁའ་འགྲོ་ལྗང་གུ་ལས་ཀྱི་མཁའ་འགྲོ་སྟེ།།

མཁའ་འགྲོ་ལྔ་ཡི་ལྷ་ཞལ་མཐོང་བ་ཡིན།།

དེ་ཡི་ངང་ལ་མ་ཡེངས་བསྒོམ་པ་ལམ།།

སྣང་བ་མཐའ་རུ་ཕྱིན་དུས་འབྲས་བུའོ།།

ཞེས་གསུངས་ན། རྡོ་རྗེ་རིན་ཆེན་པདྨ་ལས་དང་དེ་བཞིན་གཤེགས་པའི་རིགས་ཀྱི་མཁའ་འགྲོ་ལྔ་ཡང་རིག་པའི་ཡེ་ཤེས་གཅིག་ལ་འདུས་ཤིང་ཚང་བ་ཡང་། འོད་གསལ་ཡེ་ཤེས་ལྔ་ལྡན་གྱི་འོད་མཐིང་གར་གསལ་བ་དེ་དེ་བཞིན་གཤེགས་པའི་རིགས་ཀྱི་སངས་རྒྱས་མཁའ་འགྲོ། དཀར་པོར་སྣང་བ་རྡོ་རྗེ་རིགས་ཀྱི་རྡོ་རྗེ་མཁའ་འགྲོ། སེར་གསལ་དུ་སྣང་བ་རིན་ཆེན་རིགས་ཀྱི་རིན་ཆེན་མཁའ་འགྲོ། དམར་པོར་གསལ་བ་པདྨ་རིགས་ཀྱི་པདྨ་མཁའ་འགྲོ། དེ་བཞིན་དུ་འོད་ལྗང་ཁུར་འཚེར་ཞིང་སྣ་ཚོགས་མདོག་ཅན་དེ་ལས་ཀྱི་རིགས་ཀྱི་ལས་ཀྱི་མཁའ་འགྲོ་སྟེ་མཁའ་འགྲོ་ལྔ་འང་ཚང་། གཞི་ལ་དེ་ལྟར་གནས་པ་ལམ་གྱིས་དེ་བཞིན་དུ་བསྒོམས་པས་འབྲས་བུ་སྣང་བ་མཐའ་རུ་ཕྱིན་ཏེ་ཡེ་རྫོགས་མངོན་ཏུ་འགྱུར་བ་དེས་མཁའ་འགྲོ་ལྔ་སྟེ་ལྔ་ཚན་བདུན་པོ་བསྟན་པ་རེད། ད་དུང་ལྔ་ཚན་བརྒྱད་བྱས་ཏེ་ངོ་བོ་རང་བཞིན་ཐུགས་རྗེའི་ཆོས་ལྔ་བཤད་ཆོག་སྟེ། ངོ་བོ་གཞི་གནས་ཀྱི་ཡེ་ཤེས་སྐུ་གསུམ་ཚང་བའི་བདག་ཉིད་ཅན་ཡིན་ན། དེ་ལྟ་བུའི་སྐུ་གསུམ་ཚང་བའི་བདག་ཉིད་ཅན་དེ་འཆར་གཞི་ནང་གསལ་གྱི་སྐུ་གསུམ་དང་གཟུགས་སྐུ་གཉིས་ཏེ་ལྔ་ལ་སྦྱར་ན་དེ་ངོ་བོའི་ཆོས་ལྔ་དང་། རང་བཞིན་འོད་ལྔའི་སྣང་བ་གོང་ནས་བཤད་པ་ལྟར་དང་། ཐུགས་རྗེ་ལྔ་ཡེ་ཤེས་ལྔར་སྦྱར་ཏེ་ལྔ་རུ་འབྱུང་བ་ཡིན། དེ་ཇི་ལྟར་ཡིན་ན། རང་བཞིན་ཤུགས་ཀྱི་ཐུགས་རྗེ། རྐྱེན་ཡུལ་དང་འཕྲད་པའི་ཐུགས་རྗེ། བསྐུལ་ཞིང་གསོལ་བ་བཏབ་པའི་ཐུགས་རྗེ། མཛད་པ་སྣ་ཚོགས་ཀྱི་ཐུགས་རྗེ། གདུལ་བྱར་མི་འགྱུར་བའི་ཐུགས་རྗེ་དང་ལྔའོ། །རང་བཞིན་ཤུགས་ཀྱི་ཐུགས་རྗེ་ཟེར་བ་དེ་ཉི་མ་དང་འོད་ཟེར་ལྟ་བུ། རྐྱེན་ཡུལ་དང་འཕྲད་པའི་ཐུགས་རྗེ་དེ་བུ་གཅིག་པུ་ལ་མས་བྱམས་པ་ལྟ་བུ། བསྐུལ་ཞིང་གསོལ་བ་བཏབ་པའི་ཐུགས་རྗེ་དེ་གཏོང་ཕོད་ཅན་ལ་དབུལ་བོས་ནོར་བསླངས་པ་ལྟ་བུ། མཛད་པ་སྣ་ཚོགས་ཀྱི་ཐུགས་རྗེ་དེ་གང་འདུལ་ཀྱི་ངོ་སྐལ་དེར་སྣང་དུ་སྟོན་པ། གདུལ་བྱར་མི་འགྱུར་བའི་ཐུགས་རྗེ་དེ་རྒྱ་མཚོའི་དུས་རླབས་སྐད་ཅིག་སྐར་མའི་ཆ་ཙམ་ཡང་མི་གཟུར་བ་ལྟ་བུ་ཡིན་པར་གསུངས་སོ།།

༨༽ བརྒྱད་པ་མཆོག་གསུམ་སྐུ་གསུམ་ངོ་སྤྲོད་བསྟན་པ།

ད་ནི་ངོ་སྤྲོད་བརྒྱད་པ་འདི་ནས་གཞུང་དོན་གྱི་དངོས་བསྟན་ནི།

བརྒྱད་པ་མཆོག་གསུམ་སྐུ་གསུམ་ངོ་སྤྲོད་ནི།།

ཞེས་མཚམས་སྦྱར་ན། བགྲང་བའི་གོ་རིམ་ལྟར་ན་མཆོག་གསུམ་སྔོན་དུ་གསུངས་ཀྱང་བཤད་པའི་གོ་རིམ་ལྟར་ན་སྐུ་གསུམ་སྔོན་དུ་སྟོན་ཁི།

འོད་གསལ་ངོ་བོ་སྟོང་པ་ཆོས་ཀྱི་སྐུ།།

འོད་དང་ཐིག་ལེ་འཆར་བ་ལོངས་སྤྱོད་རྫོགས།།

སྣ་ཚོགས་འཆར་ཞིང་འཕྲོ་བ་སྤྲུལ་པའི་སྐུ།།

ཡེ་ནས་སྐུ་གསུམ་འབྲལ་མེད་རང་ཉིད་ལ།།

གནས་པ་ད་ལྟར་རང་ངོ་ཤེས་པ་ཡིན།།

དེ་ལ་གོམས་ནས་སྐུ་གསུམ་ལམ་སྣང་དུ།།

ཤར་ནས་མཐར་ཐུག་གཞོན་ནུ་བུམ་པའི་སྐུ།།

བརྙེས་དུས་དོན་གྱི་འབྲས་བུ་ཐོབ་པའོ།།

དཀོན་མཆོག་གསུམ་ཡང་རང་ལ་ཡེ་ནས་གནས།།

ཆོས་ཉིད་མ་འཁྲུལ་གཞི་ཡི་སངས་རྒྱས་དང་།།

སྒྲ་ཚིག་ལས་འདས་དོན་གྱི་དམ་པའི་ཆོས།།

འགྱུར་མེད་གནས་པ་སྙིང་པོའི་དགེ་འདུན་ཏེ།།

གནས་ལུགས་དོན་དམ་རྡོ་རྗེའི་སྐྱབས་ལའགྲོ་དང་།།

འབྲལ་མེད་ངང་ནས་སྣང་བ་བཞི་པོ་ལ།།

སྤྱོད་པ་ཡིན་ནོ་སྐལ་ལྡན་རིགས་ཀྱི་བུ།།

ཞེས་གསུངས་ཏེ། སྐུ་གསུམ་ཆོས་སྐུ་ལོངས་སྐུ་སྤྲུལ་སྐུ་དང་གསུམ་དེ་ངོ་བོ་རང་བཞིན་ཐུགས་རྗེ་གསུམ་རྣལ་འབྱོར་བའི་མཉམ་བཞག་རྗེས་ཐོབ་མཉམ་རྗེས་གང་དུའང་མ་ཕྱེས་པའི་དུས་གསུམ་དང་སྦྱར་ཏེ་འདི་འགྲེལ་ན། མཉམ་བཞག་གི་དུས་ན་ངོ་བོ་སྐུར་གནས་པས་ཤེས་བྱ་རང་གསལ་དུ་འཆར་བ་དེ་ངོ་བོ་སྟོང་པ་ཆོས་སྐུ། མཉམ་རྗེས་གང་དུའང་མ་ཕྱེད་པའི་སྐབས་ལྟ་བུར་ཡིན་ན་རང་བཞིན་འོད་དུ་གསལ་བས་འོད་གསལ་ཀློང་དུ་རྒྱས་པ་འོད་དང་ཐིག་ལེར་འཆར་བ་དེ་ལོངས་སྤྱོད་རྫོགས་སྐུ། རྗེས་ཐོབ་ཐུགས་རྗེ་ཡེ་ཤེས་སུ་གནས་པ་ཡིན་པས་མཛད་པ་ཕྱོགས་མེད་དུ་ཤར་བ་དེ་སྣ་ཚོགས་འཆར་ཞིང་འཕྲོ་བ་སྤྲུལ་བའི་སྐུ་སྟེ། དེ་ལྟར་སྐུ་གསུམ་ཡེ་ནས་འདུ་འབྲལ་མེད་པར་རང་ཉིད་ལ་གནས་པ་དེ། ད་ལྟ་གདམས་པའི་ཟབ་གནད་ལ་བརྟེན་ཏེ་འདི་ལྟར་རང་ངོ་ཤེས་པ་ཡིན་པས། འདི་གཞི་སྐུ་གསུམ་ཡེ་ནས་རང་ལ་གནས་པ་དེ་ཉིད། ལམ་སྐུ་གསུམ་ལམ་སྣང་དུ་ཤར་བའི་གནད་ལ་བརྟེན་ནས། འབྲས་བུ་མཐར་ཐུག་གཞོན་ནུ་བུམ་པའི་སྐུ་ཀ་དག་གི་ནང་དབྱིངས་ལ་གཤེགས་པ་དེ་བསྟན་པའོ། །གཞོན་ནུ་བུམ་སྐུ་སྔར་བཤད་པ་བཞིན་སྐྱེ་འཆི་བགྲེས་རྒུད་དང་བྲལ་བའི་ཆ་ནས་གཞོན་ནུ་སྟེ། རྟག་ཏུ་གཞོན་ལུས་འཆང་བ་པོ། །གསུངས་པ་ལྟ་བུ་དང་། བུམ་སྐུ་ཞེས་པས་ཕྱིའི་སྒྲིབ་བྱེད་བུམ་པའི་ནང་ན། ནང་རང་གསལ་མར་མེ་བཞག་པ་བཞིན་དུ་འོད་གསལ་རིག་པའི་ཡེ་ཤེས་དེ་ཉིད་མཐར་དབྱིངས་རིག་དབྱེར་མེད་དུ་འཆར་དུས་ཕྱི་གསལ་གྱི་ཚུལ་དུ་མི་མངོན་པར་གཏིང་གསལ་གཡོ་མེད་ཀྱི་ཚུལ་དུ་གནས་པ་དེ་ཉིད་ནང་གསལ་ཟབ་པའི་མཐར་ཐུག་ཡིན། ནང་གསལ་ཕྲ་བའི་ཡེ་ཤེས་ཀྱི་བརྡར་ཤེས་པའི་དོན་དུ་བསྙད་པ་དོན་དམ་ཆོས་སྐུའི་ཐ་སྙད་སྦྱར་ཏེ་དཔེ་བུམ་སྐུ་ཞེས་གཞོན་ནུ་བུམ་སྐུ་གསུངས་པའོ། །དེ་བཞིན་དུ་དཀོན་མཆོག་གསུམ་ཡང་རང་ལ་ཡེ་ནས་གནས། ཇི་ལྟར་གནས་ན། རིག་པའི་ངོ་བོར་རྫོགས་ནས་ཡོད་དེ། ཀློང་དྲུག་པ་ལས། སངས་རྒྱས་ཆོས་དང་དགེ་འདུན་ནི། །ཡེ་རྫོགས་རང་གི་ལུས་ལ་གནས། །ཞེས་གསུངས་སོ། །རིགས་པས་ཀྱང་གྲུབ་སྟེ། སེམས་ཅན་དང་སངས་རྒྱས་འཁྲུལ་མ་འཁྲུལ་གྱིས་དབྱེ་བ་ཕྱེ་དགོས་པས། ཆོས་ཅན་འཁྲུལ་བ་ལྟར་སྣང་ཡང་ཆོས་ཉིད་ཡེ་ནས་འཁྲུལ་མ་མྱོང་བ་དེ་བཞིན་ཉིད་དབྱིངས་ལ་འགྱུར་བ་མི་མངའ་བ། འབྲས་བུའི་དུས་སུ་དག་པ་གཉིས་ལྡན་དུ་འགྱུར་བ་དེ་མངོན་ཏུ་གྱུར་མ་གྱུར་གྱིས་ཕྱེས་པ་ཙམ་ཡིན། དེས་ན་མ་འཁྲུལ་བ་གཞིའི་སངས་རྒྱས་སེམས་ཉིད་རང་གི་ངོ་བོར་རྫོགས་པས་ན་གཞི་དུས་ཀྱི་རིག་པ་ལུས་དབུས་ཙིཏྟའི་དྭངས་མ་ན་བཞུགས། དམ་པའི་ཆོས་འགོག་ལམ་གྱི་བདེན་པས་བསྡུས་པའི་མཐར་ཐུག་བརྗོད་པ་ཐམས་ཅད་བརྗོད་མེད་ལ་འདུས་པས། བརྗོད་མེད་སྒྲ་ཚིག་ལས་འདས་པ་དོན་དམ་པའི་དམ་ཆོས། དགེ་ལ་འདུན་ཞིང་དེ་དང་མི་ཕྱེད་པ་ནི་དགེ་འདུན་ཡིན་པས། ཆོས་ཉིད་དོན་གྱི་སྙིང་པོ་གཡོ་འགུལ་འཕོ་འགྱུར་དང་བྲལ་བ་ཡོན་ཏན་ལྷུན་གྲུབ་ཀྱི་བདག་ཉིད་དེ་སྙིང་པོའི་དགེ་འདུན་ཡང་ཡིན་ན། མཆོག་གསུམ་རང་ལ་ཚང་བའི་སྟབས་ཀྱིས་འདུན་པས་འགྲོ་བ་དང་ཞེ་སྡང་གིས་འགྲོ་བ་གཏི་མུག་གིས་འགྲོ་བ་ལྟ་བུའི་སྐྱབས་འགྲོ་དོད་ཙམ་པ་ཉི་ཚེ་བ་དེ་འདྲ་མ་ཡིན་པར། སྐྱབས་ཡུལ་ཕྱི་ནས་མི་འཚོལ་བར་གནས་ལུགས་དོན་དམ་པའི་སྐྱབས་འགྲོ། དོན་དམ་འགྱུར་མེད་རྡོ་རྗེའི་སྐྱབས་འགྲོའང་འདི་ཡིན། གཞི་ལ་མཆོག་གསུམ་སྐུ་གསུམ་དེ་ལྟར་ཚང་བ་དེ། ལམ་གྱི་འོད་གསལ་སྣང་བ་བཞི་པོ་རིམ་དང་རིམ་མིན་གྱི་བགྲོད་པས་སྐུ་གསུམ་ལམ་སྣང་དུ་བྱས་པས། འབྲས་བུ་སྐུ་གསུམ་ལྷུན་གྲུབ་གཞི་འབྲས་དབྱེར་མེད་པའི་རྒྱལ་སར་དེ་ལྟར་དུ་བསྐྱོད་པ་ཡིན་ནོ་སྐལ་ལྡན་རིགས་ཀྱི་བུ་རྣམས་གོ་བར་གྱིས་ཤིག་ཅེས་གསུངས་པའོ།།

ག༽ གསུམ་པ་དཀྱིལ་འཁོར་དབང་དང་བསྐྱེད་རྫོགས་བཟླས་བརྗོད་སྡོམ་དང་དམ་ཚིག་ལ་སོགས་པ་དང་རྩ་བ་གསུམ་ཡང་དེ་ལ་ཚང་བར་བསྟན་པ།

འདི་ནས་དཀྱིལ་འཁོར་དབང་དང་བསྐྱེད་རྫོགས་བཟླས་བརྗོད་སྡོམ་དང་དམ་ཚིག་ལ་སོགས་པ་དང་རྩ་བ་གསུམ་ཡང་དེ་ལ་ཚང་བར་བསྟན་པ་ནི།

འོད་གསལ་ཡེ་ཤེས་སྣང་ཆ་འདི་ཉིད་ནི།།

བློ་ཡིས་བཏགས་ཤིང་རྩ་རླུང་འཛིན་རྩོལ་གྱི།།

རྐྱེན་ལས་བྱུང་བའི་ཤེས་ཉམས་སྟོང་གཟུགས་ཀྱི།།

འཁྲུལ་སྣང་རབ་རིབ་མ་དེ་མ་ཡིན་པར།།

གདོད་ནས་གྲུབ་པའི་ཆོས་ཉིད་མངོན་སུམ་གྱི།།

ཉམས་སྣང་མི་བསླུ་བ་དེ་མཐོང་བ་ཡིན།།

དཀྱིལ་འཁོར་འདི་ཡིན་བསྐྱེད་བཟླས་རྫོགས་རིམ་འདི།།

བླ་མ་ཡི་དམ་མཁའ་འགྲོ་འདི་ཡིན་ནོ།།

དབང་དང་སྡོམ་པ་དམ་ཚིག་འདི་ཉིད་ཡིན།།

འདི་ཉིད་ཉམས་སུ་ལེན་པ་སྐལ་བ་བཟང་།།

ཞེས་གསུངས་ཏེ། སྒྲོན་མ་སྣང་བྱེད་ལས། དཀྱིལ་འཁོར་དེ་ཡིན་ལྷ་དེ་རང་། །སྔགས་དང་ཕྱག་རྒྱ་མཆོད་པ་དེ། །བསྐྱེད་དང་རྫོགས་པའི་རིམ་པ་དེ། །སངས་རྒྱས་སེམས་ཅན་འཁོར་འདས་ཡིན། །དབང་དང་སྡོམ་པ་དམ་ཚིག་ཡིན། །རང་གི་བླ་མ་ལྷ་ཡང་ངོ་། །ཞེས་གསུངས་པ་ལྟར། འདིའི་འོད་གསལ་གྱི་སྣང་ཆར་ཤར་བའི། འདི་ཐམས་ཅད་པོ་བློས་བྱས་སེམས་ཀྱིས་བཏགས་པའི་རྩ་རླུང་འཛིན་རྩོལ་གྱི་འདུ་བྱེད་ཕལ་བ་ལ་བརྟེན་པའི་རྐྱེན་ལས་བྱུང་བའི་ཤེས་ཉམས་བརྟན་པ་མིན་པའི་སྟོང་གཟུགས། བྱིས་པ་བསླུ་བའི་འཁྲུལ་སྣང་རབ་རིབ་མ་དེ་འདྲ་མ་ཡིན་པར། འདི་ནི་སྣང་ཉམས་གདོད་ནས་གྲུབ་པའི་འོད་གསལ་གྱི་རང་གདངས་ཆོས་ཉིད་མངོན་སུམ་མཐོང་བའི་ཉམས་སྣང་ངམ་སྣང་ཉམས་མི་བསླུ་བ་དེ་མཐོང་བ་ཡིན་པས་ན། དེའི་སྣང་ཉམས་དེ་རིག་པའི་གདངས་ཡིན་ལ་འོད་གསལ་ཆེན་པོའང་དེ་ཡིན་པས་འདི་མཐོང་བ་ནི་གསང་སྔགས་བླ་མེད་ཀྱི་རྒྱུད་ཀྱི་དངོས་པོ་བཅུའམ་དེ་ཉིད་བཅུ་ཡོངས་སུ་རྫོགས་པའི་ལམ་དང་འབྲས་བུའི་ཆོས་ཐམས་ཅད་འདི་ལ་ཚང་བ་ཡིན། དེ་ཉིད་བཅུ་ནི། ལྟ་བ་སྒོམ་པ་སྤྱོད་པ་གསུམ། དཀྱིལ་འཁོར་དབང་དང་དམ་ཚིག་གསུམ་དང་དྲུག སྒྲུབ་པ་མཆོད་པ་ཕྲིན་ལས་གསུམ་དང་དགུ། སྔགས་ཕྱག་རྒྱ་གཉིས་གཅིག་ཏུ་བརྩིས་ན་བཅུ་དང་སོ་སོ་རུ་བརྩིས་ན་བཅུ་གཅིག་གོ དེ་ཁོ་ན་ཉིད་ལྟ་བ་ཉག་གཅིག་ནི་རིག་པའི་ཡེ་ཤེས་མཐོང་བ་ལས་གཞན་དུ་མེད་ལ། དེའི་ངང་ལ་བཞག་པ་ནི་སྒོམ་པ་དང་། དེ་དང་འབྲེལ་བའི་སྤྱོད་པ་ཡང་འདི་ལ་ཚང་། སྣང་ཤེས་ཆོས་ཉིད་དུ་རྟོགས་པའི་རྣལ་འབྱོར་བས་སྤྱོད་ལམ་ཅི་བྱས་ཐམས་ཅད་ཆོས་ཉིད་ལས་མ་འདས་དུས། སྣང་ཚུལ་ཅིར་སྣང་ཡང་ཐམས་ཅད་རོལ་བ་འགགས་མེད་དུ་ཤར་ཏེ། རང་བྱུང་དོན་གྱི་དཀྱིལ་འཁོར། བཟའ་བཏུང་ཆོས་ཉིད་ཀྱི་བསྙེན་པ། ཉལ་འདུག་བྱང་ཆུབ་ཀྱི་སྒྲུབ་པ། འདུ་བྱེད་ལྷག་གནས་ཀྱི་བསམ་གཏན། སྟོང་གསུམ་ལྷུན་གྲུབ་ཀྱི་དཀྱིལ་འཁོར་སོགས་དེ་ལྟར་དུ་གསུངས་ཡོད་ན། རང་ལུས་དབང་གི་བུམ་པ། རང་བབས་རྒྱུན་གྱི་དམ་ཚིག་ལ་སོགས་པ་ཁམས་གསུམ་ཡོངས་གྲོལ་གྱི་དགོངས་པར་དེ་ལྟར་གནས་སོང་བ་ཡིན་དུས། བཀོད་པ་ཐམས་ཅད་དཀྱིལ་འཁོར། རིམ་བགྲོད་དབང་། མི་འདའ་བ་དམ་ཚིག སྒྲུབ་མཆོད་ཕྲིན་ལས་སྔགས་དང་ཕྱག་རྒྱ་ཡང་དེ་ལ་ཚང་ཡོད་ཅེས་གསུངས། ཇི་ལྟར་ཚང་ན། དོན་གཉེར་སྒྲུབ་པ། གནས་སུ་སྟོབ་པ་མཆོད་པ། རོལ་བ་ཕྲིན་ལས། འཆིང་དང་བཟླ་བ་ཕྱག་རྒྱ་དང་སྔགས་བཅས་ཐམས་ཅད་པོ་རྫོགས། རྫོགས་རིམ་ཀུན་གྱི་རྒྱལ་པོ་གང་དུ་རྫོགས་པའི་རྫོགས་གཞིའང་འདི་ཉིད་ཡིན། བླ་མ་ཡི་དམ་མཁའ་འགྲོ་གསུམ་ཀའང་འདི་ལ་རྫོགས། དེའི་ཕྱིར་ན་རྒྱུད་ལས། སངས་རྒྱས་ཐམས་ཅད་ཀྱི་སྐུ་ལ་བལྟ་བར་འདོད་ན་རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག་ལ་སོགས་པ་གསུངས་སོ། །དེ་ལྟར་རང་ལ་ཡོད་པའི་གདོད་མའི་མགོན་པོའི་རང་ཞལ་མཇལ་བ་འདི་ཉིད་མངོན་གྱུར་གྱི་ཆེད་དུ་གདམས་ཟབ་ཀྱི་ཐབས་ལ་བརྟེན་ཏེ་ཉམས་སུ་ལེན་རྒྱུ་ཡོད་པ་འདི་ཇི་འདྲའི་སྐལ་བ་རེ་བཟང་ཞེས་གསུངས་པ་རེད།

ང༽ བཞི་བ་སླར་ཡང་འདི་ཉིད་ཉམས་ལེན་ལ་བརྩོན་པར་གདམས་པ།

སླར་ཡང་འདི་ཉིད་ཉམས་ལེན་ལ་བརྩོན་པར་གདམས་པ་ནི།

དེ་ལྟར་སྣང་བ་དེ་རྣམས་ཀུན་རྫོབ་ཀྱི།།

སྣང་ཚུལ་འཇིག་པའི་ཆོས་སུ་ཡེ་མེད་དེ།།

དོན་དམ་འདུས་མ་བྱས་ཀྱི་ཆོས་ཉིད་དོ།།

འདི་ཉིད་བྱས་ཤིང་གོམས་པས་བྱུང་བ་མིན།།

ཡེ་ཉིད་ནས་ནི་རང་ལ་གནས་པ་ཡིན།།

རིག་གདངས་སྒྲོན་མའི་སྣང་བ་འདི་ཉིད་ལ།།

ས་ཆུ་མེ་རླུང་འབྱུང་བཞིའི་དགྲ་ཡིས་ཀྱང་།།

འདི་ཉིད་གཞིག་ཅིང་གཞོམ་དུ་ནུས་མ་ཡིན།།

འདོད་ཆགས་ཞེ་སྡང་གཏི་མུག་ཉིད་ཀྱིས་ཀྱང་།།

འདི་ཉིད་ཡེ་ནས་སྒྲིབ་པ་མ་ཡིན་ནོ།།

ཡེ་ནས་མ་བྱས་རང་བྱུང་རང་ཤར་བའི།།

སྐུ་གསུམ་འདུ་འབྲལ་མེད་པའི་འོད་གསལ་གྱི།།

དཀྱིལ་འཁོར་མཐོང་བ་ཡིན་པས་བསྒོམ་པ་ལ།།

བརྩོན་པར་གྱིས་ཤིག་སྐལ་ལྡན་སྙིང་གི་བུ།།

ཞེས་ཡང་གདམས་ཏེ། ཕྱི་འོད་གསལ་ལ་བལྟས་པས་ནང་རྣམ་རྟོག་རང་འགག་ཏུ་སོང་སྟེ་རིས་མེད་མཉམ་པ་ཆེན་པོར་གྲོལ་འགྲོ་བས། ཀ་དག་གི་རིག་གདངས་དང་ལྷུན་གྲུབ་གྱི་འོད་གདངས་ཟུང་དུ་འབྲེལ་བ་འདི་སྣང་ཚུལ་ཙམ་དུ་ཉམས་ལྷན་པ་འདྲ་སྟེ་གོག་ནས་འགྲོ་བ་ཅན་པོའི་འཇིག་ཅིང་འགྱུར་བའི་ཆོས་ལས་འདས་པ། དོན་དམ་འདུས་མ་བྱས་ཀྱི་ཆོས་ཉིད་འདི་མཐོང་བ་གཟུགས་ཅན་མ་ཡིན། མཐོང་མཁན་མིག་ཅན་མ་ཡིན། བྱས་ཤིང་གོམས་པས་བྱུང་བ་མིན་པར། ཡེ་ནས་རང་ལ་གནས་པའི་རིག་གདངས་སྒྲོན་མའི་སྣང་བ་ཡིན་པས་ན། འདི་ལ་འབྱུང་བཞིའི་དགྲས་ཞིག་ཅིང་གཞོམ་ཏུ་མེད། ནང་ཉོན་མོངས་རྣམ་རྟོག་གིས་བསྒྲིབས་པས་འདི་ལ་འགྲིབ་རྒྱུ་མེད། ཡེ་ནས་སུས་ཀྱང་མ་བྱས་མ་བསྒྲུབ་རང་བྱུང་རང་ཤར་དུ་སྣང་བའི་དབྱིངས་རིག་གཉིས་མེད་མ་འཁྲུལ་བའི་སངས་རྒྱས་སྐུ་གསུམ་འདུ་འབྲལ་མེད་པའི་འོད་གསལ་ཀྱི་དཀྱིལ་འཁོར། མངོན་སུམ་དུ་མཐོང་བ་ཡིན་པས་དགའ་བ་དང་བཅས་ཏེ་ཉམས་ལེན་ལ་བརྩོན་པར་གྱིས་ཤིག འདི་འདྲའི་གོ་སྐབས་བཟང་པོ་རྙེད་པའི་སྐབས་སུ་ནོར་བུ་རང་ལག་ཏུ་ཡོད་བཞིན་དུ་ཤོར་བ་ལྟ་བུ་རེད་ན་རྗེས་ནས་འགྱོད་པར་འགྱུར་ཏ་རེ་ཞེས་པའི་དོན་ཤུགས་ལ་བསྟན་ཏེ། མ་འཆུགས་བརྩོན་པ་སྐྱེད་ཅིག་སྐལ་ལྡན་སྙིང་གི་བུ་ལ་སྙིང་གཏམ་ཚིག་གཅིག་ཡིན་གསུངས་པའོ།།

ཅ༽ ལྔ་བ་མཇུག་ཏུ་སྤྲོ་བ་བསྐྱེད་པ།

དེ་ནས་ངོ་སྤྲོད་ཀྱི་མཇུག་ཏུ་སྤྲོ་བ་བསྐྱེད་པ་ནི།

དེ་ནས་སློབ་མ་སྤྲོ་བ་བསྐྱེད་པ་ནི།།

ཞེས་མཚམས་སྦྱར་ཏེ།

སྐལ་ལྡན་བུ་རྣམས་འདི་ལྟར་མཐོང་བ་འདི།།

རང་བྱུང་རིག་པ་ཐིག་ལེ་ཉག་གཅིག་གི།

ཆོས་ཉིད་མངོན་སུམ་སྣང་བ་ཞེས་བྱ་ཡིན།།

བླ་མ་སངས་རྒྱས་བྱང་སེམས་ཡི་དམ་དང་།།

མཁའ་འགྲོ་སོགས་ཀྱི་ལྷ་ཞལ་མངོན་སུམ་དུ།།

མཐོང་བ་ཞེས་ཀྱང་བྱ་སྟེ་བསོད་ནམས་དང་།།

ཡེ་ཤེས་ཚོགས་གཉིས་རྫོགས་པ་ཞེས་བྱའོ།།

དུས་གསུམ་རྒྱལ་བ་མ་ལུས་ཐམས་ཅད་ཀྱི།།

དབང་རྣམས་དུས་གཅིག་ཐོབ་པ་ཞེས་བྱའོ།།

རིག་པའི་རྩལ་དབང་ཐོབ་པ་ཞེས་བྱའོ།།

ཆོས་སྐུ་ལོངས་སྐུ་སྤྲུལ་སྐུ་ཡེ་ཤེས་ལྔ།།

མངོན་དུ་གྱུར་པ་ཞེས་ཀྱང་བྱ་བའོ།།

ལས་དང་བག་ཆགས་སྡིག་སྒྲིབ་མ་རིག་པ།།

ཐམས་ཅད་དག་པ་ཞེས་ཀྱང་བྱ་བའོ།།

ལས་དང་སྐལ་བར་ལྡན་པ་ཞེས་བྱའོ།།

དེ་རིང་ཉིད་ནས་ཀུན་བཟང་རིགས་ལྔ་དང་།།

སྐལ་བ་མཉམ་པ་ཞེས་ཀྱང་བྱ་བའོ།།

ཞེས་གསུངས་ཏེ། སྐལ་ལྡན་གྱི་བུ་རྣམས་ཡང་བསྐྱར་འདང་ཞིག་རྒྱོབ་དང་། རང་བྱུང་རང་ལ་གནས་པའི་དོན་གྱི་སངས་རྒྱས། དེ་སྔ་མཇལ་མ་མྱོང་བའམ་ངོ་མ་ཤེས་པ་དེ། དེ་རིང་རིག་པ་ཐིག་ལེ་ཉག་གཅིག་གི་ཆོས་ཉིད་ཡེ་གདངས་ཀྱི་ཚུལ་དུ་མངོན་སུམ་སྣང་བ་མིན་ན་ཅི་ཡིན། གོང་ནས་བསྟན་པ་ལྟར་བླ་མ་སངས་རྒྱས་བྱང་སེམས་ཡི་དམ་མཁའ་འགྲོ་ལ་སོགས་པའི་སྐྱབས་ཡུལ་ཞིག་ཡོད་དོ་ཅོག་ཐམས་ཅད་མཉམ་དུ་མཇལ་བ་ཡིན། འདི་མཇལ་བ་ཙམ་གྱིས་ཟག་མེད་ཀྱི་དགེ་བ་དམ་པ་འདིས་ཚོགས་གཉིས་མཉམ་དུ་རྫོགས། དུས་གསུམ་བྱོན་བཞུགས་འབྱོན་འགྱུར་གྱི་རྒྱལ་བ་ཐམས་ཅད་ཀྱི་དབང་ཐོབ་པ་ཡིན། དེ་ཡང་དབང་ཐམས་ཅད་ཀྱི་རྒྱལ་པོ་རིག་པའི་རྩལ་དབང་ཐོབ་པ་ཡིན། སྐུ་གསུམ་ཡེ་ཤེས་ལྔ་མངོན་དུ་གྱུར། དེ་དང་མཉམ་དུ་ལས་དང་བག་ཆགས་ཀྱི་སྒྲིབ་པ་རང་དག་ཏུ་སོང་བ་ཡིན་པས། དེ་ལས་དང་སྐལ་བ་ལྡན་པ་མིན་ན་སུ་ཡིན། ཀུན་ཏུ་བཟང་པོས་ཀྱང་ཟག་མེད་རང་ངོ་ཤེས་པའི་དགེ་ཚོགས། རང་ངོ་རང་གིས་ཤེས། རང་ཞལ་རང་རང་གིས་མཇལ་བ་ལས་གཞན་དུ་གྲོལ་བྱེད་ཅིག་མེད་པ་རེད། རིག་པའི་དེ་ཉིད་མཐོང་སྟེ་མངོན་དུ་གྱུར་བས་གྲོལ་བ་རེད། དེས་ན་ཐོག་མའི་མགོན་པོ་ཀུན་ཏུ་བཟང་པོ་དང་སྐལ་བ་མཉམ་གསུངས་ན། སྐལ་བ་འདྲ་བར་ཐོབ་སོང་བས་ཀུན་ཏུ་བཟང་པོ་དང་འདྲ་སོང་བ་རེད་ཅེས་དེ་ལྟར་གསུངས་པའོ།།

ཆ༽ དྲུག་པ་སླར་ཡང་ནན་གྱིས་བསྐྱར་ཏེ་ལམ་ལ་བརྩོན་པར་གདམས་པ།

སླར་ཡང་ནན་གྱིས་བསྐྱར་ཏེ་ལམ་ལ་བརྩོན་པར་གདམས་པ་ནི།

བུ་ཁྱོད་དེ་རིང་རྙེད་པ་ཆེན་པོ་རྙེད།།

རིག་པའི་རྩལ་གྱི་དབང་ཆེན་འདི་ཐོབ་པས།།

སངས་རྒྱས་སུམ་སྟོང་མང་པོའི་ཞལ་མཐོང་ངོ་།།

ད་ནས་མངལ་གྱི་གྲོང་ཁྱེར་རྒྱུན་ཆད་ནས།།

ཐར་བའི་ལམ་སྣ་ཟིན་པ་ཡིན་ནོ་བུ།།

དེ་ལྟ་ནའང་བྱང་ཆུབ་སེམས་དཔའ་ཉིད།།

ས་བཅུ་རིམ་གྱིས་བགྲོད་པ་རྣམས་ཀྱིས་ཀྱང་།།

དེ་བཞིན་གཤེགས་པའི་ཁམས་ཀྱི་ཡོན་ཏན་ཀུན།།

མཐའ་དག་མངོན་སུམ་མཐོང་བ་མ་ཡིན་ཕྱིར།།

ཁྱོད་ཀྱིས་ད་ལྟ་མངོན་སུམ་མཐོང་བ་ཡིན།།

ཉམས་སུ་བླངས་ན་སྔར་གྱི་བཤད་པ་ཡི།།

ཞིང་ཁམས་ལྔ་བོ་ཚེ་འདིར་མངོན་སུམ་དུ།།

མཐོང་ནས་སངས་རྒྱས་ཞིང་ལ་སྤྱོད་ནུས་པའི།།

དེ་རིང་ནས་བཟུང་སྣང་བཞིའི་ཡོན་ཏན་ཀུན།།

མཐར་ཐུག་བར་དུ་ཉམས་ལེན་བྱས་ནས་ཀྱང་།།

ཆོས་ཟད་བྱང་ཆུབ་ས་ལ་རེག་པར་མཛོད།།

ཅེས་པ་ལ་སོགས་སྤྲོ་བ་བསྐྱེད་པ་དང་།།

བཀྲ་ཤིས་རིན་ཆེན་ཕྲེང་བའི་ཤིས་པ་བརྗོད།།

ཞེས་གསུངས་ན། གོང་དུ་བསྟན་པ་དེ་ལྟར། བུ་ཁྱོད་ཀྱིས་ཐོག་མེད་ནས་ད་ལྟའི་བར་དུ་མ་རྙེད་པའི་རྙེད་པ་ཡོང་སྒོ་ཆེན་པོ་ཞིག་རྙེད་བཞག་པ་རེད། རིག་པའི་རང་གཟུགས། ཆོས་སྐུའི་རང་ཞལ་མངོན་སུམ་དུ་མཇལ་བ་འདི་ནི་སངས་རྒྱས་སུམ་སྟོང་སོགས་མང་པོའི་ཞལ་མཇལ་བ་དང་འདྲ་བ་རེད། འཁོར་བར་ལས་ཀྱིས་སྐྱེ་བ་འཛིན་པའི་མངལ་གྱི་གྲོང་ཁྱེར་རྒྱུན་ཆད་དེ། མ་དག་འཁོར་བའི་ཐོད་རིས་དེ་ཕྱིན་ཆད་མགོ་ལ་ལེན་མི་དགོས་པའི་ཐར་བའི་ལམ་སྣ་ཟིན་པ་ཡིན། རྒྱུའི་ལམ་ནས་བྱང་ཆུབ་སེམས་དཔའི་ས་བཅུ་རིམ་བགྲོད་ཀྱིས་རྫོགས་སྨིན་སྦྱང་བ་མཛད་པ་རྣམས་ཀྱིས་ཀྱང་དེ་བཞིན་གཤེགས་པའིཁམས་ཀྱི་ཡོན་ཏན་མཐའ་དག་མངོན་དུ་མཐོང་བ་མ་ཡིན་ན་ཡང་། ཁྱོད་ཀྱིས་མངོན་སུམ་མཐོང་བ་ཡིན་པས་མཐོང་བ་ཇི་བཞིན་ཉམས་སུ་བླངས་ན། སྔར་གོང་ནས་ཡེ་ཤེས་ཀྱི་དཀྱིལ་འཁོར་ཆེན་པོར་ཞུགས་དུས་བཤད་པའི་ཞིང་ཁམས་ལྔ་བོ་ཚེ་འདིའི་ཐོག་ནས་མངོན་དུ་བྱས་ནས་སངས་རྒྱས་ཀྱི་ཞིང་ཁམས་དེ་དང་དེ་དག་དུ་བསྐྱོད་པའི་ཆེད་དུ། སང་དང་གནངས་ལ་མི་བཞག་པར་དེ་རིང་ནས་བཟུང་སྟེ་བརྩོན་པ་བསྐྱེད་དེ་འོད་གསལ་སྣང་བཞིའི་རིམ་པ་མཐར་མ་ཕྱིན་གྱི་བར་དུ་ཉམས་ལེན་ལོ་དང་ཟླ་བའི་ཁ་གྲངས་ཀྱིས་ཆོས་ཟད་གདོད་མའི་ས་ལ་རེག་སྟེ། དོན་གཉིས་ལྷུན་གྱིས་གྲུབ་པའི་བྱང་ཆུབ་ཆེན་པོ་མངོན་དུ་གྱིས་ཤིག་ཅེས་ནན་གྱིས་བསྐུལ་བ་དང་བཅས་ཏེ་བཀྲ་ཤིས་རིན་ཆེན་ཕྲེང་བའི་ཤིས་པ་དེ་ཉིན་མཆོག་གསུམ་གྱི་ཤིས་པ་བརྗོད་ཟིན་པ་རེད། དེ་ཡན་ཆད་ཀྱིས་ངོ་སྤྲོད་ཀྱི་སྐོར་འདི་ཞིབ་ཁྲིད་བྱས་པའི་རྣམ་པ་དང་བཅས་ཁྲིད་རིམ་བཞི་པ་ཆ་ལག་དང་བཅས་པ་སོང་།

༥༽ ལྔ་པ་རྗེས་སུ་རྣལ་འབྱོར་བཞི་ཡིས་ཀྱང་ཉམས་སུ་ལེན་ཚུལ།

དེ་ནས་ཁྲིད་རིམ་ལྔ་བ་རྗེས་སུ་རྣལ་འབྱོར་ལ་ལྟ་བ་རྒྱུན་གྱི་རྣལ་འབྱོར་དང་། སྒོམ་པ་རྒྱུན་གྱི་རྣལ་འབྱོར་དང་། སྤྱོད་པ་རྒྱུན་གྱི་རྣལ་འབྱོར་དང་། འབྲས་བུ་རྒྱུན་གྱི་རྣལ་འབྱོར་དང་བཞི་ལས།

༼ཀ དང་པོ་ལྟ་བ་རྒྱུན་གྱི་རྣལ་འབྱོར།

ཨེ་མ་ཧོ།

ལྔ་པ་རྗེས་སུ་རྣལ་འབྱོར་བཞི་ཡིས་ཀྱང་།།

ཉམས་སུ་ལེན་ཚུལ་ལྟ་སྒོམ་སྤྱོད་འབྲས་བཞིའི།།

ཞེས་གསུངས་ཏེ་རྣལ་འབྱོར་བཞི་ཡི་ཉམས་ལེན་དེ། ལྟ་བ་རྒྱུན་དུ་བྱས་པའི་རྣལ་འབྱོར་ལ་སོགས་པའི་ལྟ་སྒོམ་སྤྱོད་འབྲས་བཞིའི་ཆིངས་ཀྱིས་བསྟན་ཏེ། དེ་ལས་དང་པོ་ནི།

དང་པོ་ལྟ་བ་ལྷུན་གྲུབ་འོད་གསལ་གྱི།།

ངོ་བོ་སྟོང་པ་རང་བཞིན་གསལ་བ་དང་།།

ཐུགས་རྗེ་འགག་པ་མེད་པར་འཆར་བ་ཉིད།།

མཉམ་གཞག་ལྟ་བ་རྣམ་པ་སྣ་ཚོགས་སུ།།

ཇི་ལྟར་སྣང་ཡང་རང་བཞིན་མ་གྲུབ་པར།།

ཆུ་ཟླ་ལྟར་དུ་རྟོགས་པ་རྗེས་ཐོབ་ཀྱི།།

ལྟ་བ་ཡིན་ཏེ་

གསུངས་ནས། དེ་ཡན་ཆད་ཀྱིས་ལྟ་བ་རྣལ་འབྱོར་དུ་བྱས་པ་བསྟན་ཡོད། བསྒོམ་པའི་ཚུལ་ལ་གཉིས་གསུངས་ས་མན་ཆོད་ཀྱིས་སྒོམ་པ་བསྟན་པ་རེད། དེ་ལྟར་ཡིན་ན་འདིའི་ལྟ་བ་འདི་ལྷུན་གྲུབ་ཐོད་རྒལ་གྱི་ཉམས་ལེན་ལ་སྦྱར་དགོས་པ་ཡིན་དུས། འོད་གསལ་རིག་པའི་ཡེ་ཤེས་ལྷག་མཐོང་ལུ་གུ་རྒྱུད་ཀྱི་སྣང་བ། རྒྱ་མཚོ་དྭངས་པ་ལ་གཟུགས་བརྙན་ཤར་བ་ལྟ་བུའི་ཚུལ་གྱིས་སྣང་བསྡད་ཀྱང་། ངོ་བོ་རང་བཞིན་ཐུགས་རྗེའི་སྟོང་གསལ་འགག་མེད་ཀྱི་ནང་གི་ཤེས་པ་སྙེམས་བྱེད་དང་བྲལ་བར་མཉམ་པར་བཞག་པ་འདི་མཉམ་བཞག་གི་ལྟ་བ་ཡིན་གསུངས་པ་རེད། འདི་འདོན་དུས་མཉམ་གཞག་ལྟ་བ་ཟེར་ནས་ཡར་གཅད་དགོས། རྣམ་པ་སྣ་ཚོགས་སུ་ཇི་ལྟར་སྣང་ཡང་རང་བཞིན་མ་གྲུབ་པར་ཆུའི་ཟླ་བ་དང་སྒྱུ་མའི་སྤྲུལ་བ་སོགས་ལྟར་དུ་རྟོགས་པ་རྗེས་ཐོབ་ཀྱི་ལྟ་བ་ཡིན་གསུངས་པའོ། །སྣང་བས་ཤེས་པ་ལ་གོས་པ་མིན། དེ་ལ་ཞེན་འཛིན་བྱས་ན་འཆིང་འགྲོ་བ་ཡིན། བུ་སྣང་བས་མི་འཆིང་ཞེན་པས་འཆིང་། །ཞེན་པ་ཆོད་ཅིག་ན་རོ་བ། །གསུངས་པ་ལྟ་བུ་རེད།

༼ཁ གཉིས་པ་སྒོམ་པ་རྒྱུན་གྱི་རྣལ་འབྱོར།

དེ་ལ་སྤྲོས་པ་ཅན་གྱིས་ཐུན་བཞིའི་རྣལ་འབྱོར་ལ་སློབ་པ་དང་། སྤྲོས་མེད་རྣམས་ཀྱིས་ཉིན་མཚན་དུས་དྲུག་ཏུ་བསླབ་པ་གཉིས་ལས།

དང་པོ་སྤྲོས་པ་ཅན་གྱིས་ཐུན་བཞིའི་རྣལ་འབྱོར་སློབ་པ།

བསྒོམ་པའི་ཚུལ་ལ་གཉིས།།

ངོ་བོ་སྟོང་པ་རང་བཞིན་གསལ་བ་དང་།།

ཐུགས་རྗེ་འགག་པ་མེད་པར་འཆར་བ་ཉིད།།

དེ་ནས་སྒོམ་པའི་ཚུལ་ལ་གཉིས་ཞེས་སྤྲོས་པ་ཅན་ཐུན་བཞིའི་རྣལ་འབྱོར་དང་། སྤྲོས་མེད་ཉིན་མཚན་ཁ་སྦྱོར་གྱི་རིམ་པ་གཉིས་ཀ་འཕྲོ་འཕྲོར་གསུངས་པ་ལས། དང་པོ་སྤྲོས་པ་ཅན་གྱི་སྒོམ་པ་ཇི་ལྟར་སྒོམ་ཚུལ་དེ་ཉིད་བསྟན་པ་ནི། འདི་ཉིན་མཚན་གཉིས་སུ་ཕྱེ་བའི་སྒོ་ནས་གསུངས་པའི་དང་པོ་ཉིན་དུས་རེད།

སྤྲོས་པ་ཅན་གྱིས་ཐུན་བཞིའི་རྣལ་འབྱོར་སློབ།།

ཐོ་རེངས་དང་པོ་བླ་མའི་རྣལ་འབྱོར་བསྒོམས།།

བར་བ་ཁྲེགས་ཆོད་བསྐྱངས་ཤིང་ཐ་མ་ལ།།

བདེ་སྟོང་གཏུམ་མོ་བསྒོམ་ཞིང་ནམ་ལངས་ནས།།

ཉི་ཤར་བར་ལ་ཁ་ཏོན་སྒོམ་བཟླས་དང་།།

དཔེ་བལྟ་ལ་སོགས་བྱས་ནས་ཉི་ཤར་ནས།།

དགུང་གི་བར་ལ་ཐོད་རྒལ་ཉིད་ལ་བསླབ།།

གུང་ལ་ཕྱག་བསྐོར་ཆོས་སྤྱོད་ཅི་རིགས་བྱ།།

ཕྱི་དྲོ་ལའང་ཐོད་རྒལ་བསྒོམ་པ་དང་།།

དགོང་མོ་གཏོར་མ་རླུང་འཛིན་ལ་སོགས་བྱ།།

སྲོད་ཐུན་དང་པོ་འཆི་བ་མི་རྟག་པ།།

བར་བ་བསྐྱེད་རིམ་བསྒོམ་ཞིང་བཟླས་པ་བྱ།།

ནམ་དགུང་ཐུན་ལ་གཉིད་ནི་འོད་གསལ་སྦ།།

ཐམས་ཅད་ལའང་ཐུན་མགོར་སེམས་བསྐྱེད་བྱ།།

དངོས་གཞི་དམིགས་མེད་རྗེས་སུ་བསྔོ་བ་ཡི།།

རྒྱས་འདེབས་བྱེད་པ་དམ་པ་གསུམ་དང་ནི།།

འབྲེལ་པ་ཞེས་བྱ་ཡིན་པས་མེད་ཐབས་མེད།།

ཅེས་གསུངས་ཏེ། འདི་ཀུན་མཁྱེན་འཇིགས་གླིང་གིས་ཡེ་ཤེས་བླ་མའི་ནང་དུ་གསུངས་པ་དང་ཚིག་གཅིག་གི་ཆད་ལྷག་མེད་གི་ཟེར་ཆོག་གི ཐོ་རེངས་དང་པོ་དེང་སང་གི་འཁོར་ལོའི་ཆུ་ཚོད་དང་བསྟུན་ན། སྤྱིར་ཉི་མ་ཤར་སྔ་ཕྱི་ས་ཆ་ལ་ཁྱད་པར་ཡོད་མོད། ཐམས་ཅད་ལ་ཁྱབ་པའི་དབང་དུ་བྱས་ནས་བཤད་ན། ནངས་དུས་ཀྱི་ཆུ་ཚོད་ལྔ་བ་ཙམ་ཚོད་འཛིན་གྱིན་ཡོད། རླུང་རོ་དགུ་སྤྲུགས་སུ་འབུད་པ་དང་ནི་རླུང་བྱིན་རླབས། ངག་བྱིན་རླབས་སོགས་ནས་དུས་རྒྱུན་ལྟར་དུ་འཇུག་དགོས་པ་རེད། བླ་མའི་རྣལ་འབྱོར་གྱི་སྐབས་དང་བསྟུན་ནས་ཁྲེགས་ཆོད་ཀྱི་ཉམས་ལེན་བསྐྱང་རྒྱུ་སོགས་འདི་ནས་གསུངས་པ་ཇི་བཞིན་དང་། ཟེར་གཉིས་དང་བསྟུན་ཏེ་ཐོད་རྒལ་གཟིགས་རྒྱུ། དགུང་ལ་སོགས་པར་ཆོས་སྤྱོད་ཅི་རིགས་བྱ་རྒྱུ། སྔ་དགོང་གཏོར་མ་གཏོང་བ་དང་རླུང་འཛིན་རྒྱུ་འདི་ནས་གསུངས་པ་ལྟར་དང་། ད་དུང་གཅོད་དང་གསུར་ལ་སོགས་པའང་དེ་བཞིན་ཡིན། སྤྲོས་པ་ཅན་གྱི་རྣལ་འབྱོར་བཤད་པའི་སྐབས་ཡིན་ན་ཡང་། ཧ་ཅང་འདོན་རྒྱུའི་སྤྲོས་པ་ཏག་ཏག་ཆེ་སོང་ན། འདི་ཡང་འདོན་དགོས་པ་འདྲ་འདྲ། དེ་ཡང་ཆག་མི་ཉན་པ་ལྟ་བུ། བར་ཞིག་འདོན་བྱའི་ཁ་ཏོན་རྐྱང་རྐྱང་དུམ་པ་རེའི་མི་ཚད་དུས། དུད་ཚང་གི་ཨ་མཆོད་དང་འདྲ་བ་ཞིག་རེད་སོང་ན། ཡང་ཉམས་ལེན་དངོས་གཞི་ལ་གནོད་མི་འགྲོ་བའི་ངེས་པ་མེད། དམ་པ་གསུམ་དང་མི་འབྲལ་བར་བྱེད་པ་ནི་སྤྱིར་ཐེག་ཆེན་ཐར་བ་ཆ་མཐུན་གྱི་དགེ་རྩ་རུ་འགྱུར་བ་ལ་མེད་ཐབས་མེད། ཁྱད་པར་འདིར་ཁྲེགས་ཆོད་ཐོད་རྒལ་ཐུན་མོང་གི་དབྱིངས་རིག་དབྱེར་མེད་ཀྱི་ཉམས་ལེན་ལ་གནད་དུ་བསྣུན་བཞིན་པ་ཡིན་པས། ཀུན་རྫོབ་རྒྱུའི་སེམས་བསྐྱེད་ནས་དོན་དམ་འབྲས་བུའི་སེམས་བསྐྱེད་ལ་སྨིན་པ་དང་ནི། དངོས་གཞི་དམིགས་མེད་རྗེས་བསྔོ་བ་འཁོར་གསུམ་དམིགས་མཐའ་དང་བྲལ་བས་རྩིས་ཟིན་པའང་དེ་ཉིད་ཡིན་པར་མ་ཟད། བླ་མའི་ཐུགས་ཀྱང་དེ་ཉིད་ཡིན་ལ་དུས་གསུམ་སངས་རྒྱས་ཐམས་ཅད་ཀྱི་དགོངས་པའང་ཡིན། དབྱིངས་སྟོང་པ་ཀ་དག་གི་ངོ་བོ་དང་རིག་པ་ལྷུན་གྲུབ་ཡེ་ཤེས་ཀྱི་རང་བཞིན་ཡུལ་དང་ཡུལ་ཅན་གཉིས་མེད་ཤེས་དང་ཤེས་བྱ་རོ་གཅིག་མཉམ་ཉིད་ཆུ་ལ་ཆུ་བཞག་པ་བཞིན་དུ་གྱུར་པ་ལ་དག་པ་གཉིས་ལྡན་ཟེར་བ་ཡིན་དུས། བསམ་གཏན་གྱི་གནས་སྐབས་ལ་གཞི་བཞག་གི་གནས་ལུགས་སེམས་ཀྱིས་ལམ་དུ་བྱེད་པ་དང་ནི། ཤེས་རབ་ཀྱི་གནས་སྐབས་ན་རིག་ཐོག་ཏུ་སྤྲོས་པ་རང་ཞིག་ཏུ་གྱུར་པ་གཉིས་ཀྱི་ཁྱད་པར་གྱིས་རྫོགས་ཆེན་གྱི་སྐབས་ཀྱི་དམ་པ་གསུམ་གྱི་ཁྱད་འབྱེད་ཀྱང་ཤེས་དགོས། དེ་ལྟར་ན་ཉིན་གུང་ད་ལྟའི་འཁོར་ལོའི་ཆུ་ཚོད་བཅུ་གཉིས་པ་ཙམ་ལ་བཞག་ན། སྲོད་ཐུན་ནི་ཐ་མའི་དགུང་ཐུན་དང་ཉེ་བའི་དུས་ཆུ་ཚོད་དགུ་དང་ཕྱེད་དམ་བཅུ་པ་ཕན་ལ་མི་འཕྱི་བར་གཉིད་ཀྱི་རྣལ་འབྱོར་ལ་ཞུགས་ན་ཆུ་ཚོད་དྲུག་གམ་བདུན་ལ་གཉིད་དུས་ལུས་ཁམས་སྙོམས་སྒྲིག་གི་གཉིད་ཀྱིས་འདང་བ་རེད།

གཉིས་པ་སྤྲོས་མེད་རྣམས་ཀྱིས་ཉིན་མཚན་དུས་དྲུག་ཏུ་བསླབ་པ།

དེ་ལ་ཉིན་མོར་སྐུ་དང་ཐིག་ལེའི་ཀློང་དུ་རིག་པ་བརྗོད་མེད་དུ་བཞག་པ་དང་། མཚན་མོ་ཐུན་གསུམ་ལ་བསླབ་པ་སྟེ་གཉིས་ལས།

༡ ཉིན་མོར་སྐུ་དང་ཐིག་ལེའི་ཀློང་དུ་རིག་པ་བརྗོད་མེད་དུ་བཞག་པ།

དེ་ནས་གཉིས་པ་སྤྲོས་མེད་ཀྱི་རྣལ་འབྱོར་གྱིས་ཉམས་ལེན་བྱེད་ཚུལ་ནི།

སྤྲོས་མེད་རྣམས་ཀྱིས་ཉིན་མཚན་དུས་དྲུག་ཏུ།།

འོད་གསལ་ཐོད་རྒལ་ཉག་གཅིག་བསླབ་པ་ཡིན།།

དེ་ལྟར་བྱས་ན་འོད་གསལ་འཕེལ་ཆེ་ཞིང་།།

མྱུར་དུ་ཚད་ལ་ཕེབས་པས་ཤིན་ཏུ་ཟབ།།

ད་འདི་སྒྲོན་མ་སྣང་བྱེད་ཀྱི་ནང་ན། ཉིན་མཚན་ཁ་སྦྱོར་ཐེབས་རིམ་བཞིན། །ཞེསགསུངས་ཡོད་པར་གཞི་བྱས་ཏེ་གསུངས་པ་ཞིག་རེད། ཉིན་མཚན་ཐུན་དང་ཐུན་མཚམས་དབྱེར་མེད་ཀྱིས་ཆུ་བོའི་རྒྱུན་གྱི་རྣལ་འབྱོར་ལ་སྦྱོར་རྒྱུ་དེ། ཀ་དག་ལྷུན་གྲུབ་གཉིས་མེད་ཀྱི་གནས་ལུགས་ལ་རྟོགས་གོམས་མཐར་ཕྱིན་གྱི་དྲོད་ཅུང་ཟད་ཐོབ་ཡོད་པའི་རྣལ་འབྱོར་པའི་ཉམས་ལེན་གྱི་ཚོད་རེད། འདི་ཆོས་ཉིད་མངོན་སུམ་གྱི་སྣང་བ་མཐོང་བའི་རྣལ་འབྱོར་པ་ཞིག་གི་སྤྱོད་ཡུལ་དུ་བྱས་པ་ཡིན་ན། དམིགས་བསལ་འདི་ལའང་ཉིན་མཚན་གཉིས་སུ་ཕྱེས་ཏེ། ཉིན་མོར་སྐུ་དང་ཐིག་ལེའི་ཀློང་དུ་རིག་པ་བརྗོད་མེད་ཀྱིས་དེ་ལྟར་བཞག་གོ།

༢ མཚན་མོ་ཐུན་གསུམ་ལ་བསླབ་པ།

དེ་ལ་སྲོད་ལ་དབང་པོ་གནད་དུ་བསྡུ་བ་དང་། ནམ་གུང་ཤེས་བྱ་བུམ་པར་གཞུག་པ་དང་། ཐོ་རངས་རིག་པ་རང་གསལ་ལ་བཞག་པ་དང་གསུམ་ལས།

དང་པོ་སྲོད་ལ་དབང་པོ་གནད་དུ་བསྡུ་བ།

མཚན་མོ་སྲོད་དང་དགུང་ཐོ་རངས་གསུམ་ལ་སྲོད་ལ་དབང་པོ་གནད་དུ་བསྡུ་བ་དང་། ནམ་གུང་ཤེས་བྱ་བུམ་པར་གཞུག་པ། ཐོ་རངས་རིག་པ་རང་གསལ་ལ་གཏོད་པ་དང་གསུམ་གསུངས་པའི་དང་པོ་ནི།

སྲོད་ལ་དབང་པོ་གནད་དུ་བསྡུ་བ་ནི།།

བདེ་བའི་མལ་དུ་དྲང་སྲོང་འདུག་སྟངས་བྱ།།

རང་ལུས་རྡོར་སེམས་སྐུར་གསལ་སྐུ་དབུས་སུ།།

དབུ་མ་མཚན་ཉིད་བཞི་ལྡན་ལྟེ་བ་རུ།།

པདྨ་དམར་པོ་འདབ་མ་བཞི་པའི་སྟེང་།།

ཨ་ཐུང་དམར་པོ་རེག་བྱ་ཚ་བ་ལས།།

མེ་འབར་དབུ་མའི་ནང་དུ་ཡར་སོང་སྟེ།།

སྤྱི་བོའི་ཧཾ་ལ་ཕོག་པས་བྱང་སེམས་ཉིད།།

འོ་མའི་རྒྱུན་ལྟར་དཀར་ནར་མར་བབས་པས།།

དཔེར་ན་མེ་ལ་མར་ཁུ་བསྣན་པ་བཞིན།།

མེ་གསོས་བྱས་ཏེ་ཆེས་ཆེར་རབ་འབར་ནས།།

ལས་ཉོན་བག་ཆགས་བཅས་པ་བསྲེགས་པར་བསམ།།

བདེ་དྲོད་སྐྱེས་ཚེ་བདེ་སྟོང་ངང་ལ་བཞག།

འདིའི་དུས་ཐོག་མར་རླུང་རོ་ལན་གསུམ་བསལ།།

བུམ་ཅན་ཅི་མང་འཛིན་པ་ཞལ་ཤེས་སོ།།

ཞེས་གསུངས་ཏེ། འདི་དབང་པོ་གནད་ཀྱི་དམིགས་པ་གཅིག་ལ་བསྡུ་བའི་སྲོད་ཀྱི་ཉམས་ལེན་ཡིན། དབང་པོ་དེ་གནད་ཀྱི་དམིགས་པ་གཅིག་ལ་བསྡུས་ཏེ་སྲོད་ཀྱི་ཉམས་ལེན་སྒོམ་པ་འདི་རྡོར་སེམས་བསྒོམ་བཟླས་ཀྱི་བདུད་རྩི་འབེབ་སྦྱོང་དང་འབྲེལ་བ་ཞིག་གིས་འདི་ནས་གསུངས་འདུག དེ་ཡང་རང་ལུས་འོད་ཀྱི་གཞལ་ཡས་ཁང་ན་རྩ་དབུ་མ་ཤེལ་གྱི་ཀ་བ་བཙུགས་པ་ལྟ་བུའི་ལྟེ་འོག་གི་མར་སྣེར་འོད་ཀྱི་པདྨ་དམར་པོ་འདབ་བཞིའི་སྟེང་ཨ་ཐུང་དམར་པོ་གསུངས་ན། བོད་ཡིག་དབུ་ཅན་གྱི་ཡི་གེ་ཨ་ཡི་ཆ་སྨད་གྲུ་གསུམ་གྱེན་ལ་བསྟན་པ་ལ་གསུངས། ཨ་ཐུང་དམར་པོ་མེའི་ངོ་བོ་རེག་བྱ་ཚ་བའི་རང་བཞིན་ཅན་ལས་མེ་ལྕེ་ཕྲ་མོ་ཞིག་མཆེད་དེ། དེ་ཉིད་རྩ་དབུ་མའི་ཡར་སྣེ་སྤྱི་བོའི་ཧཾ་ཡིག་དཀར་པོ་བདུད་རྩིའི་རང་བཞིན་ཅན་ལ་ཕོག་པས། བདུད་རྩི་འཁྱགས་དཀར་ཞུ་བ་བཞིན་བདུད་རྩིའི་ཐིགས་པ་བབས་ཏེ་ཨ་ཐུང་གི་མེའི་གསོས་སམ་ཁ་སྣོན་དུ་གྱུར་ཏེ་ཇེ་འབར་ལ་སོང། ཧཾ་ཡིག་ཀྱང་མགོ་ཐུར་བསྟན་དུ་བསྒོམ་དགོས། མེ་ཆེས་ཆེར་རབ་ཏུ་འབར་ཏེ་ལས་དང་བགས་ཆགས་བསྲེག སྤྱི་བོའི་ཧཾ་ཡིག་ཞུ་བའི་བདུད་རྩིས་རྩ་འཁོར་བཞི་པོ་བརྒྱུད་དེ་ལུས་ཀྱི་རྩ་ཕྲན་ཐམས་ཅད་གང་སྟེ་དཔེར་ན་ཤེལ་བུམ་འོ་མས་གང་བ་ལྟ་བུར་གྱུར་ཏེ། བདེ་དྲོད་སྐྱེས་ཙ་ན་བདེ་སྟོང་དབྱེར་མེད་ཀྱི་ངང་ལ་བཞག སྤྱིར་ན་ཉམས་ལེན་ཐམས་ཅད་ལ་རླུང་བུམ་ཅན་ལྟེ་བར་འཛིན་པ་གནད་ཆེན་པོ་ཡིན། སློབ་དཔོན་པདྨས་མཁའ་འགྲོ་ཡེ་ཤེས་མཚོ་རྒྱལ་ལ་གདམས་པ་གནང་འདུག་པ་བཞིན་དུའོ། །འདི་ནས་རླུང་རོ་བསལ་གསུངས་རྒྱུ་དེ། རླུང་གི་རྣལ་འབྱོར་དམིགས་བསལ་བ་དང་སྦྱར་ཏེ་ཉམས་སུ་ལེན་པའི་དགོས་པར་གསུངས་པ་ཡིན་རྒྱུ་རེད་སྙམ། དེ་ནས་ནམ་གུང་རེད།

གཉིས་པ་ནམ་དགུང་ཤེས་བྱ་བུམ་པར་གཞུག་པ།

ནམ་དགུང་ཤེས་བྱ་བུམ་པར་གཞུག་པ་ནི།།

ལུས་ཀྱི་གནད་ནི་སེང་གེའི་ཉལ་ལུགས་བཅའ།།

འདི་ནས་བཅའ་ཞེས་ཨ་མདོའི་ཁ་སྐད་སོར་བཞག་གིས་གོ་བདེ་བའི་ཆེད་དུ་ཡུལ་སྐད་དང་བསྲེས་ནས་གསུངས་འདུག

གཞོག་གཡས་ཕབ་ལ་སྲིན་མཛུབ་སྣ་གཡས་བཀག།

ཡིད་གཞན་མ་ཡེངས་རང་ལུས་རྡོར་སེམས་ཀྱི།།

སྐུར་གསལ་སྐུ་དབུས་དབུ་མ་མདའ་སྨྱུག་ཙམ།།

སྙིང་གའི་ཐད་ཀའི་དབུ་མའི་ནང་ཉིད་དུ།།

པདྨ་དམར་པོ་འདབ་བཞིའི་ལྟེ་བ་རུ།།

ཨ་ཡིག་དཀར་པོ་བཀྲག་མདངས་ཅན་གཅིག་དང་།།

ཚངས་པའི་བུ་གར་དེ་འདྲའི་ཨ་དཀར་གཅིག།

དེ་གཉིས་བར་གྱི་དབུ་མའི་ནང་ཉིད་དུ།།

ཨ་དཀར་ཕྲ་མོ་ཤེལ་ཕྲེང་བརྒྱུས་པ་ལྟར།།

ཡོད་པར་བསམ་ལ་གཉིད་དུ་འགྲོ་ཁ་རུ།།

གཅིག་ལ་གཅིག་ཐིམ་ཚུལ་ཏུ་སྙིང་ག་ཡི།།

ཨ་ལ་ཐིམ་ནས་ཨ་དེ་འོད་ཟེར་གྱིས།།

དབུ་མའི་ནང་ཀུན་རྒྱ་སྐར་ཉི་ཞུར་ལྟར།།

གསལ་བར་སྒོམ་བཞིན་ངང་དུ་གཉིད་ལོག་གོ།

སད་པའི་དུས་སུ་སྔར་བཞིན་བསྒོམ་པར་བྱ།།

གཉིད་ནི་འོད་གསལ་སྦུབས་སུ་སྦ་བ་ཡི།།

གནད་ཀྱི་གདམས་པ་ཟབ་མོ་ཡིན་ནོ་བུ།།

དེ་ལྟར་བྱས་པས་གཉིད་ཀྱི་གནས་སྐབས་སུ།།

སྟོང་པའི་འོད་གསལ་རྟོག་མེད་ཏིང་འཛིན་དང་།།

སྣང་བའི་འོད་གསལ་ཐོད་རྒལ་ཉམས་ཤར་ནས།།

ཉིན་པར་ཇི་བཞིན་ཉིན་མཚན་དབྱེར་མེད་འབྱུང་།།

ཞེས་གསུངས་ཏེ། མཚན་མོའི་རྣལ་འབྱོར་གྱི་ཐུན་གསུམ་པོ་འདི་བདེ་དང་མི་རྟོག་གསལ་བ་གསུམ་གྱི་ཐབས་ཀྱི་ཁྱད་པར་ཙམ་མ་གཏོགས་གསུམ་པོའི་དམིགས་གནད་གཅིག་ལ་གཅིག་འབྲེལ་གྱི་ཚུལ་དུ་འབྱུང་པ་རེད། དེ་ཡང་སྔར་བཞིན་དུ་ལུས་ཀྱི་དབུས་ན་སྟེ། དབུ་མའི་སྙིང་ཁའི་ཐད་ཙམ་དུ་ཨ་དཀར་པོ་དཀར་ཞིང་འོད་དུ་འཚེར་བ། དེ་བཞིན་དུ་སྤྱི་བོའི་ཚངས་བུག་ལ་ཡང་ཨ་དཀར་གཅིག དེ་གཉིས་ཀྱི་བར་གྱི་དབུ་མ་ལ་ཨ་ཝ་དྷུ་ཏི་གསུངས་པ་རེད། ཨ་ཝ་དྷུ་ཏི་སོགས་དབུ་མ་ལ་མིང་མང་པོ་ཡོད། མདོར་ན་ཨ་དེ་གཉིས་ཀྱི་བར་གྱི་དབུ་མའི་ནང་ཐམས་ཅད་ལ་ཨ་དཀར་ཕྲ་མོ་ཤེལ་དཀར་གྱི་ཕྲེང་བ་བརྒྱུས་པ་ལྟར་མང་པོ་ཡོད་པ་སྤྱི་བོ་ནས་མར་གཅིག་ལ་གཅིག་ཐིམ་གྱིས་རྒྱ་སྐར་ལ་ཉི་ཞུར་ཕོག་པ་གསུངས་ན། ཁང་བའི་རྒྱ་མཐོངས་དང་སྐར་ཁུང་ལ་ཉི་འོད་ཕོག་པ་བཞིན་དུ་དབུ་མའི་ནང་ཐམས་ཅད་གསལ་མོ་རུ་གྱུར་ཏེ། མཐར་ཨ་ཐམས་ཅད་སྙིང་གའི་ཨ་ལ་ཐིམ་པ་དང་གཉིད་པ་དུས་མཉམ་བྱས། གཉིད་དུ་འགྲོ་ཁར་ཞེས་གསུངས་དོན་དེ་ལྟར་རེད། སད་པ་དང་ཡང་སྔར་བཞིན་བསྒོམ། མི་ཞིག་གི་མི་ཚེའི་ཕྱེད་ཀ་ཉལ་སའི་ནང་ནས་བུད་འགྲོ་བཞིན་ཡོད་པ། གཏི་མུག་རོ་ཉལ་མི་བྱེད་པར་སྣང་སྟོང་གི་འོད་གསལ་མཉམ་གཅིག་ཏུ་བསྒོམ་ན་གོམས་ནས་ཉིན་མཚན་དབྱེར་མེད་ཀྱི་ཏིང་འཛིན་བརྟན་པར་འགྱུར་བས་ན། གདམས་ཟབ་འདི་དག་ཉམས་ལེན་ལ་གཟོབ་ཅེས་གསུངས་པའོ། །འདིའི་འདུག་སྟངས་སེངྒེའི་འདུག་སྟངས་བཅས་གསུངས་ས་ཡོད། ངའི་བླ་མ་ཚང་གིས་ཆོས་བདུན་གྱི་ངང་ལ་ངལ་གསོ་ཡེ་ཤེས་ཀྱི་བཞུགས་སྟངས་མཛད་ནས་གཟིམས་དར། འདིའི་གོང་འོག་གཉིས་ཀྱི་གཅིག་སེངྒེའི་འདུག་སྟངས་དང་གཅིག་དྲང་སྲོང་ཙོག་པུ་རེད་ཡོད་འདུག འདི་ལ་གླང་ཆེན་ཉལ་བ་ལྟ་བུའི་ལོངས་སྐུའི་བཞུགས་སྟངས་མ་གསུངས་པར་འདུག་ཀྱང་། ཉལ་སྟངས་དགོས་པ་ཞིག་གི་མི་ཉལ་ཉལ་བྱས་ནས་དེ་ཡང་བདེ་བར་གཤེགས་པ་མྱ་ངན་ལས་འདའ་བའི་གཟིམས་སྟངས་བྱས་ན་མཆོག་ཏུ་བཟང་བ་ཡིན་པར་འདུག་དེ་ལྟར་གསུངས་ཀྱང་ཡོད། དེ་ནས་ཐོ་རེངས་རིག་པ་རང་གསལ་ལ་བཞག་པ་ནི།

གསུམ་པ་ཐོ་རེངས་རིག་པ་རང་གསལ་ལ་གཏོད་པ།

ཐོ་རེངས་རིག་པ་རང་གསལ་གཏོད་པ་ནི།།

ཐོ་རེངས་ལངས་མ་ཐག་ཏུ་ཧ་ཞེས་པས།།

དབུགས་རིང་ལན་གསུམ་བུས་ལ་སེང་གེ་ཡི།།

འདུག་སྟངས་བཅས་ཏེ་སྤྱི་བོའི་ནམ་མཁའ་ཡི།།

གཞུ་གང་ཐད་དུ་སྙིང་གའི་ཨ་དེ་ལས།།

ཨ་ཡིག་རང་འདྲ་གཉིས་པ་གཅིག་མཆེད་དེ།།

ལིང་ངེར་འདུག་པར་བསྒོམས་ལ་སེམས་བཟུང་ངོ་།།

དེ་ནས་ཇེ་མཐོར་སོང་ནས་ཡལ་བར་བསམ།།

དེ་ལྟར་བྱས་པས་གསལ་སྟོང་གཉིས་མེད་ཀྱི།།

ཡེ་ཤེས་ཀ་དག་གནས་ལུགས་ཤེས་པར་འགྱུར།།

ཞེས་གསུངས་ན། འདི་ཚོ་ཞལ་གསལ་པོ་འདུག ལྡེབ་གྲངས་ཡང་མང་པོ་འགྲོ་དགོས་པས་ཡང་བཤད་མི་དགོས་པ་བྱེད། བདེ་དང་མི་རྟོག་གསལ་བ་གསུམ་གྱི་ཐབས་དང་འགྲོགས་པའི་བདེ་སྟོང་དྲན་སྟོང་གསལ་སྟོང་གི་ཏིང་འཛིན་ལ་སྦྱོར་ཚུལ་དང་། འདི་དང་འབྲེལ་ཏེ་བསམ་གཏན་བཞི་དང་འགོག་པའི་སྙོམས་འཇུག་གི་གོལ་ས་བཅད་པའི་འབྱུང་བ་རང་ཟད་ཀྱི་གདམས་པ་ཡང་བཱི་མའི་བཀའ་སྲོལ་ལས་འབྱུང་བ་ཡིན།

དེ་དག་རྣམས་ནི་ཉིན་མཚན་ཁ་སྦྱོར་གྱི།།

སྒོམ་པའི་རིམ་པ་མཐར་ཐུག་ཡིན་པར་གསུངས།།

ཞེས་པས་དོན་བསྡུས་ཏེ། དེ་ཡན་ཆད་ཀྱིས་ལྟ་སྒོམ་རྒྱུན་དུ་བྱེད་པའི་རྣལ་འབྱོར་གྱི་རིམ་པ་གཉིས་ཀ་སོང་སྟེ་ད་སྤྱོད་པ་བསྟན་པ་ནི།

༼ག གསུམ་པ་སྤྱོད་པ་རྒྱུན་གྱི་རྣལ་འབྱོར།

དེ་ལ་བདུན་ལས།

ཀ དང་པོ་བུང་བ་ཚང་ཚོལ་ལྟ་བུའི་སྤྱོད་པ།

གསུམ་པ་སྤྱོད་པའི་རིམ་པ་འདི་ཡིན་གྱི།།

དང་པོ་ཆོས་ཀྱི་སྒོ་མོ་ཀུན་བསྡུར་ནས།།

རང་གི་ཉམས་སུ་ལེན་པའི་དོན་ཚོལ་ཕྱིར།།

བུང་བ་ཚང་ཚོལ་ལྟ་བུའི་སྤྱོད་པ་དགོས།།

དཔེར་ན་བུང་བས་ཚང་དེ་ཚོལ་བའི་ཚེ།།

རྩིག་ཁུང་གར་ཡོད་དེ་ལ་འགྲོ་བ་ལྟར།།

མཚན་ལྡན་བླ་མ་མང་པོའི་ཞབས་བསྟེན་ནས།།

ཐོས་པས་ཆོས་དང་ཆོས་མིན་བླང་དོར་འབྱེད།།

བསམ་པས་དེ་དོན་རྟོགས་ནས་ཉོན་མོངས་གནོན།།

བསྒོམ་པས་དོན་ཐོག་བཞག་པས་ཉོན་མོངས་རྣམས།།

རྩད་ནས་འབྱིན་ཏེ།

གསུངས་ན། དེས་སྤྱོད་པའི་རྒྱལ་པོ་བདུན་གྱི་ནང་ནས་དང་པོ་བསྟན་པ་རེད། དེ་ཡང་རྒྱུད་ཉི་ཟླ་ཁ་སྦྱོར་ལས། བུང་བ་ལྟ་བུའི་སྤྱོད་པ་ཡིས། །ཆོས་རྣམས་ཀུན་གྱི་རོ་མྱང་བྱ། །ཞེས་གསུངས་པ་ལྟར་ཐོས་བསམ་སྒོམ་པའི་རིམ་པ་མ་ནོར་བར་བརྟེན་དགོས་པའི་དོན་བསྟན་པ་རེད། དེ་ནས།

ཁ གཉིས་པ་ཐི་བྱ་ཚང་འཇུག་ལྟ་བུའི་སྤྱོད་པ།

དེ་ཡི་གྲོགས་སུ་ཡང་།།

ཐི་བྱ་ཚང་འཇུག་ལྟ་བུའི་སྤྱོད་པ་དགོས།།

དཔེར་ན་ཐི་བྱས་ཚང་དེ་བཅའ་བའི་ཚེ།།

མི་ཡི་སྒྲོ་འདོགས་སྔོན་དུ་བཅད་ནས་ཀྱང་།།

ཚང་དེ་བཙན་སར་བཅས་ནས་མཇུག་ཏུ་ཡང་།།

འཛལ་འཛོལ་མེད་པར་ཚང་དུ་འཇུག་པ་ལྟར།།

ཐོས་བསམ་སྒྲོ་འདོགས་བཅད་ནས་རང་ཉིད་ནི།།

གང་ལ་ཡིད་ཆེས་རྙེད་པའི་མན་ངག་ལ།།

ཐེ་ཚོམ་མེད་པར་འཇུག་སྟེ།

ཞེས་པས་ཐི་བྱ་ཚང་འཇུག་ལྟ་བུའི་སྤྱོད་པ། ཉི་ཟླ་ཁ་སྦྱོར་ལས། ཐི་བྱ་ལྟ་བུའི་སྤྱོད་པ་ཡིས། །གསང་བ་ཐབས་ཀྱིས་ཐེ་ཚོམ་བཅད། །ཅེས་གསུངས་པའི་དོན་བཞིན་རེད། ཡང་གོང་གི་ཐེ་ཚོམ་མེད་པར་འཇུག་སྟེ་ཞེས་པའི་འཕྲོར་མཐུད་དེ།

ག གསུམ་པ་རི་དྭགས་རྨས་མ་ལྟ་བུའི་སྤྱོད་པ།

དེའི་གྲོགས་སུ།།

ཀུན་གྱི་སྤྱོད་ཡུལ་ཉིད་ཀྱང་མ་ཡིན་པའི།།

རི་དྭགས་རྨས་མ་ལྟ་བུའི་སྤྱོད་པ་དགོས།།

དཔེར་ན་རི་དྭགས་རྨས་མ་དེ་ཉིད་ནི།།

རྨ་ཡི་གནོང་གིས་མི་ལ་བྲོས་ནས་ཀྱང་།།

ལུང་ཕུག་རི་རྩེ་སོགས་ལ་འགྲོ་བ་ལྟར།།

རྣལ་འབྱོར་དེ་ཡང་ཁམས་གསུམ་འཁོར་བ་རུ།།

ལྟུང་གིས་དོགས་པའི་གནོང་གིས་མི་མེད་ཀྱི།།

རི་ལ་གཅིག་པུར་གནས་ནས་ཉམས་སུ་ལེན།།

འདི་ཡང་རྒྱུད་དེ་ལས། རི་དྭགས་ལྟ་བུའི་སྤྱོད་པ་ཡིས། །འཁྲུལ་བའི་རྐྱེན་གྱུར་ཡུལ་རྣམས་སྤངས། །ཞེས་གསུངས་པ་དེ་ཉིད་རེད། དེ་ནས་ཡང་།

ང བཞི་བ་ལྐུགས་པ་ལྟ་བའི་སྤྱོད་པ།

དེ་ཡི་གྲོགས་སུ་ལྐུགས་པ་ལྟ་བུ་ཡི།།

སྤྱོད་པ་བྱ་དགོས་སྐྱེ་བོ་གཞན་དག་ལ།།

སྨྲ་བ་ཚིག་འབྲུ་གཅིག་ཀྱང་མི་བྱའོ།།

ཅ ལྔ་བ་སྨྱོན་པ་ལྟ་བུའི་སྤྱོད་པ།

དེ་ལྟར་བྱས་པས་དྲན་པ་རེངས་པ་ཡི།།

སྨྱོན་པ་ལྟ་བུར་འབྲེལ་བ་མེད་པའི་གཏམ།།

རང་རྡོལ་སྨྲ་བ་ལ་སོགས་ལུས་ངག་གི།

སྤྱོད་པ་གཟའ་གཏད་མེད་པ་ཤུགས་ལ་འབྱུང་།།

ཆ དྲུག་པ་ཁྱི་ཕག་ལྟ་བུའི་སྤྱོད་པ།

འདི་ཡི་དུས་ན་གཙང་དམེ་མེད་པ་ཡི།།

ཁྱི་ཕག་ལྟ་བུའི་སྤྱོད་པ་ཞོར་ལ་འབྱུང་།།

ཟས་གོས་གང་ལའང་བཟང་ངན་གདམ་ག་རྣམས།།

མེད་པར་འཇོལ་ཉོག་སྤྱོད་པ་འབྱུང་བའོ།།

ཇ བདུན་པ་སེང་གེ་ལྟ་བུའི་སྤྱོད་པ།

དེ་ལྟར་དྲུག་པ་རྫོགས་པའི་དུས་དེ་རུ།།

གཞན་གྱིས་ཚུར་ལ་ཟིལ་གྱིས་མི་ནོན་ཞིང་།།

ཕར་ལ་གནོན་པ་སེང་གེ་ལྟ་བུ་ཡི།།

སྤྱོད་པ་འབྱུང་སྟེ་སེང་གེ་གང་ལ་ཡང་།།

འཇིགས་དང་ཡ་ང་བག་ཚ་མེད་པ་ལྟར།།

རྣལ་འབྱོར་དེ་ཡང་ཕྱི་ཡི་སྣང་བ་དང་།

མི་མ་ཡིན་གྱིས་གནོད་པ་དང་བྲལ་ནས།།

གང་ལའང་དབང་བསྒྱུར་ནུས་པ་འབྱུང་བའོ།།

ཞེས་གསུངས་ན། འདིའི་སྤྱོད་པ་བདུན་པོ་འདི་རང་གི་རྒྱུད་ཚོད་ལ་དཔག་ནས་སྤྱད་རྒྱུ་རེད། སྤྱོད་པ་ལྟ་སྒོམ་གྱི་བོགས་འདོན་ཡིན་པས། ནང་སྟོང་ཉིད་ཀྱི་ལྟ་བ་དང་། ཕྱི་རུ་མི་དང་མི་མིན་གྱི་གནོད་པ་གཅིག་ལའང་ཡ་ང་བག་ཚ་མེད་པ་རེད་དུས་དེའི་མིང་ལ་སྣང་བ་དབང་བསྒྱུར་གྱི་སྤྱོད་པ་ཟེར། དེ་ནས་དེའི་རྟགས་ཅི་འདྲ་ཞིག་ཡིན་སྙམ་ན།

གཞན་གྱིས་མི་དད་པ་རྣམས་བསྒྱུར་ནུས་ཤིང་།།

བསད་པ་གསོ་ནུས་གསང་གཏམ་གོ་བར་ནུས།།

རྫུ་འཕྲུལ་ཐོབ་ཅིང་ཆོས་ཉིད་ཉམས་འབར་ནས།།

ཆང་གིས་མྱོས་ལྟར་ཕྱོགས་ཡན་རེ་དོགས་བྲལ།།

སྣང་བའི་དངོས་པོ་ས་ཆུ་མེ་རླུང་ལ།།

དབང་བསྒྱུར་ཕར་ཐལ་ཚུར་ཐལ་བགྲོད་པ་དང་།།

ནམ་མཁའ་ལ་ཡང་བྱ་བཞིན་འཕུར་བའོ།།

དེ་ལྟར་བྱུང་དུས་ཉོན་མོངས་ཡེ་ཤེས་སུ།།

གནས་འགྱུར་སྟབས་ཀྱིས་ཉོན་མོངས་ཀྱིས་མི་གནོད།།

དཔེར་ན་སྣམ་བུ་ཚོས་བསྒྱུར་ལྟ་བུའོ།།

སྤྱོད་པ་བདུན་པོ་རང་གི་རྒྱུད་ཚོད་ལ།།

དཔག་སྟེ་སྤྱོད་པས་ལྟ་སྒོམ་བོགས་འབྱིན་ནོ།།

ཞེས་དེ་དག་གིས་ལྟ་སྒོམ་སྤྱོད་གསུམ་པོ་སོང་ནས་འབྲས་བུ་རྒྱུན་དུ་བྱས་པའི་རྣལ་འབྱོར་ཡང་དེ་རིང་འདོན་ཐུབ་དགོས་པས།

༼ང བཞི་བ་འབྲས་བུ་རྒྱུན་གྱི་རྣལ་འབྱོར།

བཞི་པ་འབྲས་བུའི་དབྱེ་བ་གཉིས་སུ་འདུས།།

ཞེས་གཉིས་པོ་གནས་སྐབས་དང་མཐར་ཐུག་གཉིས་ཀ་ཡིན་ནོ།།

གནས་སྐབས་ལྷུན་གྲུབ་འོད་གསལ་འཆར་ཚུལ་ལ།།

དགག་སྒྲུབ་རེ་དོགས་མེད་པར་སྤྱད་པ་ཡིས།།

ལམ་རྟགས་ཡོན་ཏན་ཐམས་ཅད་རྩལ་རྫོགས་ཤིང་།།

མཐར་ཐུག་ལྷུན་གྲུབ་སྣང་བཞི་མཐར་ཕྱིན་ནས།།

ཀ་དག་ཆོས་སྐུ་མངོན་གྱུར་ནང་དབྱིངས་སུ།།

སྐུ་གསུམ་ཡེ་ཤེས་འདུ་འབྲལ་མེད་པར་བཞུགས།།

སླར་ཡང་ཆོས་སྐུའི་ངང་ལས་མ་གཡོས་བཞིན།།

གཟུགས་སྐུ་གཉིས་ཀྱིས་གང་ལ་གང་འདུལ་གྱིས།།

འགྲོ་དོན་རྒྱུན་མི་འཆད་པར་མཛད་པའོ།།

ཞེས་གསུངས་ཏེ། དེ་ལྟར་ལྟ་སྒོམ་གྱི་ཉམས་ལེན་སྤྱོད་པས་བོགས་དབྱུང་བའི་འབྲས་བུ་ལ། གནས་སྐབས་ལམ་གྱི་དུས་ན་འཛིན་མེད་ཞེན་གྲོལ་རེ་དོགས་མེད་པའི་ཉམས་ལེན་དོན་གྱི་གནད་འབྱོངས་བས། ལམ་རྟགས་ཀྱི་ཡོན་ཏན་འཕེལ་བས་མི་ཚད་རྩལ་རྫོགས། མཐར་ཐུག་ལྷུན་གྲུབ་སྣང་བ་བཞིའི་གོ་རིམ་མཐར་ཕྱིན་ཏེ་དཔེའི་ཡེ་ཤེས་ཀྱིས་མཚོན་པའི་དོན་གྱི་ཡེ་ཤེས་དེ་ཉིད་མངོན་དུ་གྱུར་ནས། ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀྱི་ཀློང་དུ་ཟད་དེ་སྐུ་གསུམ་ལམ་སྣང་དུ་བྱས་ཏེ་ཀ་དག་གདོད་མའི་ནང་དབྱིངས་ཆེན་པོ་ལ་སྐུ་གསུམ་འདུ་འབྲལ་མེད་པར་བཞུགས་བཞིན་དུ། སླར་ཡང་ནང་གསལ་ཆོས་སྐུའི་ངང་དེ་ལས་མ་གཡོས་བཞིན་ཕྱི་གསལ་ལོངས་སྐུ་དང་སྤྲུལ་སྐུའི་གཟུགས་སྐུ་གཉིས་ཀྱིས། དག་དང་མ་དག་ཕྱེད་དག་གི་གདུལ་བྱ་ལ་གང་ལ་གང་འདུལ་གྱིས་རྟག་ཁྱབ་ལྷུན་གྲུབ་ཀྱི་འགྲོ་དོན་ནམ་མཁའ་མ་སྟོང་འཁོར་བ་མ་ཞིག་གི་བར་དུ་རྒྱུན་མི་ཆད་པར་མཛད་པའོ། །ཞེས་དེ་ཡན་གྱིས་ལྟ་སྒོམ་སྤྱོད་པ་འབྲས་བུ་དང་བཅས་པ་རྒྱུན་དུ་བྱས་པའི་རྣལ་འབྱོར་གྱི་རིམ་པ་བསྟན་ནས། དེ་རིང་འགྲོ་དོན་རྒྱུན་མི་ཆད་པར་འབྱུང་བའོ་ཞེས་པའི་མཚམས་འདི་ནས་བཞག་ལ་ཆོས་ཁྲིད་རྗེས་མར་སྣང་བཞིའི་འཆར་ས་ནས་བཤད་རྒྱུ་བྱེད། དེ་རིང་འདི་ནས་ཐོད་རྒལ་ཞལ་ཤེས་ཀྱི་ལུང་ཞིག་འདོན་འཇོག་བསམ་སོང་། འདིའི་མཚམས་ནས་དེ་འདོན་རྒྱུ་བྱེད། ཞབས་དཀར་བའི་ཐོད་རྒལ་ཞལ་ཤེས་ཀྱི་ལུང་གསུངས་འཕྲལ། འུ་བུ་ཚོས་ཐོད་རྒལ་སྒོམ་དུས་འཆར་སྣང་ཤར་བ་ལ་ལྟ་གིན་ཡོད་པ་རེད། འཆར་སྣང་ཕྱི་རུ་འཆར་བ་རེད་དེ། འོན་ཀྱང་འཆར་གཞི་ནང་ན་ཡོད་པ་རེད། དེ་ལྟར་ཡིན་པས་ན་ནང་ཤེས་རབ་རང་བྱུང་གི་སྒྲོན་མའམ་ཀ་དག་གི་རིག་ཐོག་ལ་འཇོག་རྒྱུ་དེ་གནད་ཆེན་པོ་ཡིན། ཐོད་རྒལ་གྱི་སྐབས་ཀྱི་བཤད་བྱའི་གཙོ་བོ་དེ་གང་ཡིན་ན་དབྱིངས་རིག་ཀློང་དུ་གྱུར་པ་དེ་རེད། དབྱིངས་རིག་ཀློང་དུ་གྱུར་དུས་མཐར་རང་ལུས་ཀྱི་རྡུལ་ཕྲ་རབ་ཐམས་ཅད་མན་ཤེལ་ལ་ཉི་ཟེར་ཕོག་པའམ་མན་ཤེལ་ཉི་ཟེར་གྱི་ནང་དུ་བཞག་པ་ལྟ་བུས་ཁྱབ་པར་འཆར་གྱི་ཡོད། དེ་དུས་སེམས་ཆོས་ཉིད་དུ་གྲོལ་བ་དང་ཆབས་ཅིག་ཏུ་འོད་ལུས་འཕོ་ཆེན་གྱི་སྐུར་བཞེངས་དགོས་པ་ཡིན། དེ་ལྟར་ཡིན་ན་ཡང་། ང་རང་ཚོ་ལས་དང་པོ་བ་ཞིག་གིས་མཉམ་བཞག་ཐུན་དུ་བཅད་ཁུལ་གྱིས་རིག་ངོར་བཞག རིག་པ་རྗེན་ལ་ཕུད་ཁུལ་བྱས་ཀྱང་མཚམས་ཤིག་ནས་ཀུན་གཞི་ལུང་མ་བསྟན་གྱི་ཕྱོགས་སུ་ཤོར་ཏེ། སེམས་གནས་དང་པོ་གསུངས་སའི་ཐོམ་མེ་བ་དེའི་ངང་ལ་ལུས་ཏེ། རྣམ་རྟོག་ཕྲ་བ་འོག་འགྱུ་མ་ཚོར་བཞིན་དུ་འོང་གིན་འདུག་པ་འདི་མཉམ་བཞག་གིས་རང་ས་མ་ཟིན་པས་ཡིན། དེའི་ངང་ལ་ཇི་ལྟར་གོམས་ཀྱང་འཁྲུལ་རྟོག་གི་བག་ཆགས་ལྡོག་ཐུབ་པ་མིན། དེ་བས་འཆར་གཞིའི་རིག་པ་ཟང་ཐལ་དེའི་ངོ་བོའི་སྟེང་ལ་ཚུར་རང་ས་བཟུང་སྟེ། རིག་པ་རྗེན་ལ་ཕུད་དེ་རིག་ཆ་ལ་གསལ་གདངས་ངར་དང་བཅས་པའི་གྲུང་ཞིག་བཏོན་དེ། རྣམ་རྟོག་གི་འཆར་སྒོ་བཟང་ངན་གང་ཤར་ཡང་ཐམས་ཅད་ལ་བདག་པོ་མི་རྒྱག་པར་འཆར་གཞིའི་རིག་པ་རྗེན་པའི་སྟེང་དེ་ནས་ཆིག་ཆོད་དུ་བཅིངས་ཐུབ་པ་ཡིན་ན་རྟོག་པ་ཕྲ་རགས་གང་འདྲ་ཞིག་འཆར་བསྡད་རུང་། རིག་ངོ་རྗེན་པར་བསྐྱངས་བའི་ངོ་བོ་དེ་རྩལ་རྣམ་རྟོག་གིས་འཕྲོག་ཐུབ་པ་མིན། དེ་མ་ཐུབ་དུས་དེ་དུས་ཀྱི་རྣམ་རྟོག་ཇི་ཤར་ལ་རྩིས་གདབ་མེད་པ་དེ། ཡེངས་ནས་མ་གོ་མ་ཚོར་བ་མིན། ཡེངས་ཡུལ་ཆོས་ཉིད་དུ་གྲོལ་བའམ་དེ་དང་རྗེས་སུ་མཐུན་པ་ཞིག་རེད་རྒྱུ་ཡིན་པ་འདི་བཱི་མ་ལའི་དགོངས་པ་ལྟར་ན་གྲོལ་ལུགས་གསུམ་པ་ཁང་སྟོང་དུ་རྐུན་མ་ཞུགས་པའི་དཔེར་འཇོག་ས་ཅན་པོ་རེད། དེ་ལྟར་ན་ལས་དང་པོ་བ་གསར་བ་ཚོར་མཚོན་ན། སེམས་ངོ་ཤེས། རིག་ངོ་མཐོང་ཟེར་བའི་དུས་སུ་ཅི་ཞིག་ཤེས་ཤིང་གང་མཐོང་སྟེ་རིག་པ་ཡིན་ཟེར་ན། རང་སེམས་སྐྱེ་མེད་དུ་གོ་བ་དེ་ཡིན། རང་སེམས་སྐྱེ་མེད་ཀ་དག་ཡིན་པའི་ཐག་རང་གི་ཞེ་གདིང་ནས་ཆོད་སོང་དུས་སེམས་གཞི་མེད་རྩ་བྲལ་དུ་རྟོགས་པའི་མིང་བཏགས་ཆོག་པ་རེད། རེད་དེ་རང་སེམས་སྐྱེ་མེད་ཡིན་ལུགས་དེ་གདོད་ནས་སམ་དང་པོ་ཉིད་ནས་ཡིན་པ་མ་གཏོགས། དེའི་དུས་སུ་གསར་དུ་སྐྱེ་མེད་དུ་འགྱུར་སོང་བ་ཞིག་ག་ལ་ཡིན། རང་སེམས་གཞི་མེད་རྩ་བྲལ་དུ་ཤེས་པའི་སྐབས་སུ་སེམས་མེད་སོང་བའང་མ་རེད་ལ། དེ་ལྟར་ཆོས་ཐམས་ཅད་སྐྱེ་བ་མེད་པར་རྟོགས་སོང་དུས་ཆོས་ཐམས་ཅད་མེད་པར་གྱུར་ཏེ་སྟོང་པ་རྐྱང་ཆད་ལ་འགྱུར་མི་དགོས། ཆོས་ཐམས་ཅད་སྣང་བཞིན་དུའམ་སྣང་སྣང་ཁར་གདོད་མ་ཉིད་ནས་སྐྱེ་མེད་སྟོང་པ་ཡིན། སྟོང་གཞི་ཆོས་ཐམས་ཅད་དང་། དེའི་རང་བཞིན་ནམ་གནས་ལུགས་ཆོས་ཐམས་ཅད་ཀྱི་གཤིས་ཇི་བཞིན་པ་སྟོང་པ་ཉིད་ཡིན་པ་འདི་གཉིས་ཐ་དད་སོ་སོ་བ་མེད་པ་ཡིན་པར་ཐག་ཆོད་དུས། རིག་སྟོང་ཟུང་འཇུག་རྟོགས་སོ་ཞེས་པའོ། །དེས་ན་ཆོས་ཅན་སེམས་ཀྱི་ཆོས་ཉིད་དེ་རིག་པ་རེད་ལ་རིག་པའི་ཡེ་ཤེས་ཀྱང་རེད། འདི་ལྟར་བརྗོད་སྐབས་ཆོས་ཉིད་མ་འཁྲུལ་བའི་ཡེ་ཤེས་དེ་ཆོས་ཅན་འཁྲུལ་བའི་སེམས་མིན་ན་ཡང་ཆོས་ཅན་སེམས་དེ་ཆོས་ཉིད་ཡེ་ཤེས་དེའི་བདག་ཉིད་དང་ནི་ཆོས་ཅན་གྱི་ངོ་བོ་ཆོས་ཉིད་དུ་ཁས་ལེན་པ་ལས་གཞན་དུ་ཆོས་ཅན་དང་ཆོས་ཉིད་རྫས་ཐ་དད་པར་མི་འཇོག་གོ །དེ་ལྟར་ན་རིག་སྟོང་ཟུང་འཇུག་གི་སྣང་བ་དང་ནི་རིག་པ་ཞེསབརྗོད་རྒྱུ་དེ་བརྡ་ཤེས་པའི་ཐ་སྙད་གོ་བརྡ་འཕྲོད་བྱེད་ཙམ་དུ་ལྡོག་ཆ་ནས་བཤད་པ་ཙམ་མ་གཏོགས་དོན་ལ་ཐ་དད་ཁ་ཁ་སོ་སོར་ཕྱེས་རྒྱུ་ཞིག་མེད། གལ་སྲིད་དེ་ལྟར་ཡོད་ན་ཟུང་འཇུག་ཅེས་ཁ་ནས་བཤད་ཀྱང་ཁ་བཤད་ཙམ་ལས་དོན་དུ་མ་འདྲེས་གཉིས་གཤིབ་ཀྱི་དངོས་པོ་ཡིན་པས་ཟུང་དུ་འཇུག་གོ་མི་ཆོད་བ་ཞིག་རེད་འགྲོ། དེ་དུས་ཆོས་ཅན་ཐ་དད་དུ་སོང་བ་ཇི་བཞིན་ཆོས་ཉིད་ཀྱང་ཐ་དད་དུ་སོང་སྟེ་གནས་ལུགས་དོན་གྱི་ངོ་ཁ་ན་ཆོས་ཉིད་གཅིག་ལ་མཉམ་ཉིད་འོང་མི་སྲིད་པ་ཉིད་དུ་འགྱུར་རོ།། དེས་ན་ཆོས་ཅན་དང་ཆོས་ཉིད་ཀྱི་བཟང་ངན་གཉིས་གཤིབ་ཀྱི་སེམས་ཀྱི་འཛིན་སྟངས་དེ་མ་ཁེགས་ནས་གཟུང་འཛིན་བྲལ་བའི་མཉམ་བཞག་ཅིག་མི་སྲིད་པར་གྱུར་དུས། སྔགས་རྫོགས་ལྟ་ཅི་ཐེག་ཆེན་གྱི་དགོངས་དོན་ཐམས་ཅད་དོན་མེད་དུ་འགྱུར་བ་དེ་ལྟར་དུ་རེད། རིག་པའི་དྭངས། གསལ་བ་ཡུལ་རྗེས་སུ་མི་འབྲང་ཞིང་། འཆར་བ་མི་འགག་པ་མེ་ལོང་གི་དྭངས་ལྟ་བུ་དེ་སྣང་བ་ཐམས་ཅད་ཀྱི་འཆར་གཞི་ཡིན་པས། དེ་ཉིད་བཀག་ཀྱང་མི་ཁོགས་་ཏེ་འགག་མེད་ཀྱི་རྩལ་ཡིན་པས་སོ། །དེ་བསྒྲུབ་ཀྱང་འགྲུབ་པའང་མིན་ཏེ་སྐྱེ་མེད་དུ་རང་ལོག་ལ་བུད་འགྲོ། དེས་ན་སྣང་ཤེས་གཉིས་མེད་རོ་གཅིག་ཏུ་ཉམས་སུ་ལེན་མ་ཤེས་ནས་གང་ཤར་ཤར་ལ་བལྟ་བ་ནི་ཤེས་པ་ཡུལ་འབྱམས་ཀྱི་གདོན་གྱིས་ཟིན་ལ་ཉེ་བ་ཡིན། དེ་འདྲ་བ་དེས་རྟོག་པ་ཉིང་འཁྲུལ་ལ་འགྲོ་བཞིན་ཡོད་པའི་གནད་དེ་ལར་ནས་མ་རིག་པའམ་མ་ཤེས་པའི་རྟགས་རེད། སྣང་ཤེས་གཉིས་མེད་རོ་གཅིག་པའི་ཉམས་ལེན་མ་བསྐྱངས་པར། ཤེས་དང་ཤེས་བྱ་ཐ་མི་དད་པའི་དེ་བཞིན་གཤེགས་པའི་ཡེ་ཤེས་བརྙེས་པའི་ཐབས་མེད་པ་རེད། དེ་བས་རང་སེམས་སྐད་ཅིག་མ་འདིའི་སྟེང་ནས་འཁོར་འདས་གྲོལ་འཁྲུལ་ཐམས་ཅད་ཀྱི་ཕུགས་ཆོད་དགོས་པ་ཡིན། དེ་ལས་གཞན་པའི་གྲོལ་འཁྲུལ་གྱི་ཕུགས་ཆོད་ཐབས་གཞན་ཞིག་ཡོད་པ་མིན་ནོ། །རྒྱུ་མཚན་དེས་ན་ད་ལྟ་ནས་སེམས་ཉིད་རྫོགས་པ་ཆེན་པོ་རིག་སྟོང་མཉམ་ཉིད་ཀྱི་དོན་ངོས་ཟིན་པར་བྱས་ནས་ཡང་དང་ཡང་དུ་གོམས་པར་བྱ་བ་ནི་རྫོགས་རིམ་ཐམས་ཅད་ཀྱི་རྒྱལ་པོ་ཡིན། སེམས་ལ་དངོས་པོ་དང་མཚན་མ་མེད་ཀྱང་སྟོང་པར་བསྒོམ་ན་གོལ་ས་ཆེན་པོ་ཡིན། གསལ་སྟོང་ཟུང་འཇུག་ཡིན་ཡང་དེ་ལ་དེར་འཛིན་གྱི་ངེས་ཤེས་སྐྱེས་ན་བློ་བྲལ་མིན། དེ་བས་ན་ཀ་དག་དང་ལྷུན་གྲུབ་གཉིས་ཀྱི་རྩ་བ་རིག་པ་ཟང་ཐལ་རྗེན་ལ་བུད་མ་ཤེས་དུས། ཐོད་རྒལ་གྱི་སྟོང་གཟུགས་དངོས་པོར་གོལ་ཏེ་གཟུགས་ཁམས་སུ་འཕེན་པ་མ་གཏོགས་ཕན་ཐོགས་ཅི་ཡང་མེད་པ་དེ་ལྟར་ཡིན། རིག་པ་སངས་རྒྱས་ཡིན། སངས་རྒྱས་ཡིན་ན་རང་རེ་སེམས་ཅན་ཡིན་དུས་ལམ་རིག་པའི་ཁྱབ་བྱེད་དང་བཅས་པས་རིག་པ་ལས་གཞན་པའི་སངས་རྒྱས་ཞིག་ཡོད་བསམ་པའི་སྙེམ་བྱེད་ཀྱི་བློ་རྣམ་ཤེས་ཚོགས་བརྒྱད་དང་བཅས་པ་དེ། རིག་པའི་བདག་ཉིད་རང་ངོ་ཤེས་པ་དེས་ལོག་ཏུ་བཅུག་པས་དེ་ཉིད་གོམས་ནས་བརྟན་པ་ཐོབ། རྟོགས་གོམས་མཐར་ཕྱིན་སོང་བ་ཡིན་ན། འབྱུང་བ་རང་ལོག་སྟེ། མ་རིག་པའི་རྩ་བ་རིག་པ་ལ་ལྡོག་སྟེ་ཕྱིན་ཆད་འཁྲུལ་མི་ཤེས་པར་བྱེད་པ་ཡིན། དེ་ལྟར་གྱུར་སོང་དུས་སྣང་བ་ཆོས་ཉིད་དུ་རྟོགས་སོང་བས་འབྱུང་བའི་སྙིགས་མ་ཐམས་ཅད་རང་ལོག་སྟེ་ལུས་རྡུལ་ཕྲན་དུ་དེངས་པ་དང་། དེའི་སྟེང་བཞུགས་སྟངས་གསུམ་དང་གཟིགས་སྟངས་རྣམ་གསུམ་གྱིས་གཅུན་པས་སྣང་བཞི་མཐར་ཕྱིན་འཕོ་ཆེན་གྱི་སྐུར་བཞེངས་པ་ཡིན། དེ་ལྟར་ཡེ་ཤེས་དབྱིངས་ཀྱི་སྟོང་གཟུགས་རྣམ་བཅས་མཚན་མ་ཅན་དུ་སྣང་བའི་ལྷའི་ཕྱག་རྒྱ་དང་ནི་རྣམ་མེད་སྟོང་ཉིད་ཀྱི་ཨེ་ཡིག་ཆེན་པོ་བདེ་ཆེན་གཉུག་མའི་ཝཾ་ཡིག་དང་གཉིས་ཀ་རོ་མཉམ་དུ་གྱུར་པའི་བྱང་ཆུབ་དེ། རྡོ་རྗེ་སེམས་དཔའ་མ་ནིང་གི་གོ་འཕང་གསུངས་ཏེ་རྣལ་འབྱོར་བླ་མེད་ཀྱི་རྒྱུད་སྡེ་མང་པོའི་ནང་ནས་བསྔགས་བརྗོད་མཛད་སའི་གྲུབ་པ་ཆེན་པོའི་དགའ་སྟོན་དེ། རྫོགས་ཆེན་མན་ངག་སྡེ་འདིའི་སྐབས་སུ་རླུང་སེམས་རྩོལ་བཅས་ཀྱི་ངལ་བ་ཡུན་རིང་བརྟེན་མི་དགོས་པར་ཀུན་རྟོག་གི་སྤྲོས་པའི་དྲྭ་བ་ཐམས་ཅད་རང་གྲོལ་ཅོག་བཞག་གི་མན་ངག་གིས་འཁྲུལ་སྣང་གཞི་ཐིམ་དུ་བཏང་སྟེ། ཕྱི་གསལ་སྣོད་བཅུད་ཀྱི་རོལ་རྩལ་ཐམས་ཅད་ཆུ་ནང་གི་ཟླ་གཟུགས་ཤར་བ་ལྟར་ལས། ནང་གསལ་ལྷུན་གྲུབ་ཀྱི་ཡེ་ཀློང་གཞི་གྲོལ་མཉམ་པ་ཆེན་པོའི་ངང་ལས་མ་གཡོས་བཞིན་དུ་ལམ་སྣང་གི་རིག་པ་རྡོ་རྗེ་ལུ་གུ་རྒྱུད་འཇའ་འོད་ཟེར་ཐིག་ཏུ་ཤར་བ་རེད། ཕྱི་གསལ་སྣོད་བཅུད་ཀྱི་རོལ་རྩལ་ཐམས་ཅད་ཆུ་ནང་གི་ཟླ་གཟུགས་ལྟར་ཤར་ན་ཡང་། ནང་གསལ་ལྷུན་གྲུབ་ཀྱི་ཡེ་ཀློང་དེ་གཞི་གྲོལ་མཉམ་པ་ཆེན་པོའི་ངང་ལས་མ་གཡོས་དུས། དེ་མ་གཡོས་བཞིན་དུ་ལམ་སྣང་གི་རིག་པ་རྡོ་རྗེ་ལུ་གུ་རྒྱུད་འཇའ་འོད་ཟེར་ཐིག་ཞིང་དང་གཞལ་ཡས་ཁང་། སྐུ་དང་ཞལ་ཕྱག་གི་རྒྱན་བཀོད་པ་རབ་འབྱམས་སུ་ཤར་བ་དེ་ཆོས་ཉིད་མངོན་སུམ་གྱིས་ཞིང་ཁམས་ཀྱི་གོ་འབྱེད་པ་རེད། ཉམས་གོང་འཕེལ་གྱིས་སྤྲུལ་སྐུ། ཚད་ཕེབས་ཀྱིས་ལོངས་སྐུ། ཟད་པ་ཆོས་སྐུའི་སྣང་བ་སྟེ། སྣང་བཞི་དེ་ལྟར་མཐར་དབྱུང་སྟེ་བདེ་མཆོག་བདེ་བ་ཆེན་པོ་གསུངས་སའི་འཕོ་ཆེན་དྭངས་མའི་སྐུར་བཞེངས་ཏེ། ཁྱད་ཆོས་དྲུག་ལྡན་གྱི་ཀུན་ཏུ་བཟང་པོའི་གོ་འཕང་ཚེ་འདིར་མངོན་དུ་བྱས་པ་ཐེག་པ་འདིའི་ཁྱད་ཆོས་ཡིན་ནོ།། འུ་བུའི་ཐེངས་འདིའི་ཁྲིད་སྦྱང་གི་ཐད་ནས་མགོ་རྔ་ཚང་བ་ཞིག་རེད་ཐལ་བསམ་གྱིན་ཡོད། མགོ་དམ་མཇུག་ལྷོད་མིན་པར་རྣམ་པ་ཐམས་ཅད་ཀྱི་བརྩོན་སེམས་ཀྱི་ཐད་ནས་བཤད་ན་དབུས་སྐད་བྱས་ན་ཧ་ལས་པ་རེད་ཟེར་རྒྱུ་རེད། ད་དུང་མུ་མཐུད་དུ་ཐུན་ཁ་ཤས་ཤིག་ཡོད་པ་དེའི་ཚེ་ལ་སྒེར་སོ་སོས་སྟབས་གར་བདེའི་ས་ཆ་རེ་ནས་ཐོད་རྒལ་གྱི་ཁྲིད་སྦྱང་མཛད་ན་བསམ་པ་ཡིན། ཐེངས་འདིའི་ཐུན་ཐམས་ཅད་ཀྱིས་རྗེས་མའི་ཁྲིད་སྦྱང་དེ་གཞེས་ཉིན་ཨེ་རེད་གོ ཕྱི་དྲོའི་ཐུན་ཞིག་ཡོད། དེ་ལྷན་དུ་འཚོགས་སྟེ་མཇུག་མཐར་བཀྲ་ཤིས་ཤིག་ཀྱང་བརྗོད་མཛད་ན། དེའི་ཚེའི་སྒེར་གྱི་ཁྲིད་སྦྱང་ལ་གསར་པ་ཚོས་སྔ་དགུང་གི་ཟེར་གཉིས་དང་བསྟུན་ཏེ་རྟེན་བཅས་ཀྱིས་བསྒོམ་དགོས་དགོངས་ན་དེ་བཞིན་དུ་མཛོད་དང་ལྷག་ཏུ་དུས་ཚོད་རེའུ་མིག་དང་ཐུན་བརྡ་ལ་འགྲིགས་དགོས་པའི་ངེས་པ་མེད། ཡང་དེའི་ནང་ནས་ཉམས་ལེན་པ་རྙིང་པ་རྟེན་ལ་མི་ལྟོས་པ་ཚོས་རང་རང་གི་བཞུགས་ཤག་དང་སྒོམ་ཁང་དུ་ཁྲེགས་ཆོད་ཐོད་རྒལ་ཟུང་འབྲེལ་གྱི་ཉམས་ལེན་ཐུན་དུ་བཅད་དགོངས་ནའང་ཅི་དགྱེས་མཛོད། ཡང་བོགས་སྤྱོད་པས་འདོན་རྒྱུའི་གནད་ཆེ་བས། ས་འདིར་ད་རེས་མ་གཏོགས་ཐོན་ཡང་མ་མྱོང་བས་ཡར་མར་གཅིག་ཉུལ་ཏེ་སྤྱོད་པ་རྣལ་འབྱོར་དུ་བྱ་དགོས་དགོངས་མཁན་ཡོད་ན་ཡང་དགག་བྱ་མེད། སྐུ་གཟུགས་བདེ་འཇགས་སོགས་ཀྱི་ཐད་ནས་རང་འགན་རང་གིས་བཞེས། དེའི་འཕྲོར་དོན་དག་གཞན་པ་ཞིག་ལ་མཚོ་སྔོན་གྱི་ཕྱོགས་འདི་ནས། རབ་སྔགས་ཀྱི་དགོན་སྡེ་ཆེ་ཆུང་ལ་མ་ལྟོས་པའི་དགོན་སྡེ་མི་ཉུང་བ་ཞིག་གིས། ཁོང་རྣམ་པའི་དགོན་པའི་ནང་ནས་ལོ་རྗེས་མར་དབང་ཆོས་རེ་འདོན་རོགས་གསུངས་ནས་ཐུགས་རེ་དེ་ལྟ་བུ་ཞིག་སྔོན་རྗེས་བར་གསུམ་དུ་གནང་གིན་འདུག་པ་རེད། ད་དེང་སང་གི་དུས་འདི་ལ་བསམ་བློ་བཏང་ན་འབྱོར་འཁོས་ཆེ་ཆུང་གི་འགྲན་རྩོད་དང་ནི་ཟ་རྔམ་ཆེ་འདོད་ཀྱི་ཕུགས་འདུན་འཆང་ནས་ཕྱི་ཚུལ་འཕྱོར་ཆས་ཤིག་དང་དེ་འདྲ་ཞིག་ལ་འདང་རྒྱག་པ་མ་གཏོགས། ལུང་རྟོགས་ཀྱི་དོན་གྱི་བསྟན་པའི་ཉམས་ལ་རན་པའི་དམ་ཆོས་འཆད་ཉན་སྒོམ་སྒྲུབ་ལ་བསམ་བློ་གཏོང་མཁན་དཀོན་པའི་སྐབས་འདིར། ཁྱེད་རྣམས་ཀྱིས་དམ་ཆོས་དོན་གཉེར་གནང་བ་ལ་རྗེས་སུ་ཡི་རངས་ཞུས་པ་ཡིན། ངས་ཀྱང་ཚེ་སྐྱེ་བ་འདི་དང་གཞན་ལ་དམ་པའི་ཆོས་འཛིན་པའི་སྨོན་ལམ་བཏབ་དང་འདེབས་བཞིན་པ་ཡིན། ཡིན་ན་ཡང་གཅིག་ན་འདུས་བྱས་ཀྱི་ཆོས་ལ་རྟག་པ་དང་བརྟན་པ་མེད་ལ། སྒོས་སུ་མི་ལོ་ལོན་གྱི་ཚེ་མཇུག་ལ་ཟླ་བ་རྗེས་མའི་ཚོད་རྩིས་སྔ་ཟེར་བྱེད་དགོས་ན། རྟག་འཛིན་གྱིས་ལྷུས་ཐིངས་དཀའ་བ་དང་། གཉིས་ན་ས་ཕྱོགས་གང་ས་རུ་སོང་ནས་མང་པོ་འཚོགས་པའི་མགོ་འདི་རུག་མ་བསམ་ནས་མི་ཁྱུ་ནས་བུད་དེ་དུས་ཡུན་མི་ཐུང་བ་ཞིག་སོང་ནའང་། ཡང་མ་བསམ་ས་ནས་མི་བྱེད་ཐབས་མེད་ཀྱི་རླུང་འདྲ་རེས་མཚམས་རེར་དེད་འགྲོ་ནི་རེད། དེ་གང་ལྟར་ཡང་རྟེན་འབྲེལ་བཟང་པོའི་ལ་ཉེ་འཕྲལ་ཡུན་འདུན་མ་ལེགས་པའི་ཡང་རྩེ་དམ་པའི་ཆོས་ལ་མཉམ་དུ་སྤྱོད་པའི་སྨོན་ལམ་ཚང་མ་ལ་མཉམ་དུ་འདེབས། མདོར་ན་མ་འོངས་ཐག་རིང་གི་ཚིག་ལན་རྒྱག་སྔ་བྱེད་པའི་ཚོད་མི་ཐིག་པས་ད་ལྟའི་སྐབས་ལ་མ་འོངས་དམ་པའི་ཆོས་འཛིན་པའི་སྨོན་ལམ་བཟང་པོ་འདེབས་པ་གཅིག་པུ་འདི་མངོན་སུམ་སྤྱོད་ཡུལ་དུ་གྱུར་བའི་བྱ་བ་རེད། འདིར་ཕྱོགས་ཀྱི་རྣམ་པ་མང་པོ་ཞིག་གིས་ཆོས་དབྱིངས་སྟོབས་ལྡན་རྡོ་རྗེའི་གསུང་གི་མན་ངག་གི་རིགས་འདོན་རྒྱུའི་ཐུགས་རེ་ཆེར་མཛད་གནང་མཁན་མང་མོད། དེ་ནི་ངས་ཐོབ་མ་མྱོང་། ཞབས་དཀར་ཚང་གི་གསུང་ཡང་ཆ་ཚང་ཐོབ་མ་མྱོང་། ཁྲེགས་ཆོད་ཐོད་རྒལ་གཉིས་ཀྱི་སྐོར་འདི་ཡང་སྔོན་ཆད་ང་ལ་ཐོབ་མ་མྱོང་བས་དུས་ཕྱིས་ངའི་རྨད་བྱུང་ཆོས་ཀྱི་མཆེད་པོ་ཨ་སྐྱོང་རྟོགས་ལྡན་བློ་གྲོས་རྒྱ་མཚོ་ཚང་གི་མདུན་ནས་རྒྱུན་བླངས་ཏེ་ཁོང་ས་ནས་ཞུས་པ་ཡིན། ངས་འདི་བཤད་པའང་ད་རེས་ཐེང་དང་པོ་རེད། ཨ་ལགས་མཁར་མདའ་ཚང་ལ་ངས་འདོན་རྒྱུའི་ཁས་འཆེས་ཏེ་ཁྲིད་སྦྱང་དང་བཅས་པ་ཟླ་བ་གཅིག་ལ་བྱ་རྒྱུའི་སྐད་ཆ་བཤད་པའི་ཚིག་ཐོག་ལ་བསྡད་ནི་བོ་ཡིན། སྤྱིར་ང་ལ་མཚོན་ན་ཉམས་ཆུང་གྱི་ནས་འཚོ་བའི་ཆོས་པ་གྲྭ་རྐྱང་སྤྱིར་བཏང་བ་ཞིག་ཡིན་པར་རང་གིས་ཁས་འཆེ་བ་ཡིན་པས་མི་ཚད། དེ་ཅན་པོའི་མི་ལ་འདུན་པ་དང་དུང་བ་ཡོད་པའི་མི་ཡིན་ནི་རེད། ཆོས་སྲིད་གཉིས་ཀ་ཕེར་བའི་ཁ་སྟབས་ཅན། ཆེན་པོར་མཐོན་པོར་སྙེག་གིན་ཡོད་པའི་ཇི་འདྲ་བ་ཞིག་ལས། རས་གཟན་རས་ཤམ་རེའི་ཁུག་ན་ཟླ་བ་རྗེས་མའི་འཚོ་ཆས་ལས་འདང་རྒྱག་མེད་པའི་གྲྭ་རྐྱང་དཀྱུས་མ་ཡོན་ཏན་གྱི་ནང་རྫོངས་ཅན། ཕྱི་རྟིང་གནམ་ལ་བཀྱགས་ནས་ཅིག་མི་སླེབས་མི་ལོན་ནས་བསྡད་མེད་པའི་འདོད་ཆུང་ཆོག་ཤེས་ཅན་རེ་མཐོང་ན་ངས་ལྷག་པར་དུ་དུང་བ་སྟོན་གི་ཡོད། ངས་དེང་སང་སེམས་ཁུར་བྱེད་རྒྱུ་གཙོ་བོ་ཞིག་ཇི་ཡིན་ན། མ་བསམ་ས་ནས་འདི་བཞིན་དུ་ཆོས་རྒྱུན་རེ་སྤེལ་བར་འགྲོ་དགོས་ཐུག་ཟེར་རྒྱུ་མ་རེད་འོང་རྒྱུའི་སྐལ་བ་དང་ལྡན་སོང་དུས། རྗེས་དེད་བྱས་ནས་མང་པོ་ཞིག་མཉམ་པོར་འོང་གིན་འདུག་པས། ས་དེའི་དགོན་སྡེ་དང་འབྲེལ་ཡོད་ཀྱི་མི་སྣ་ཚང་མ་ལ་སྐུ་ཚེགས་འོ་བརྒྱལ་མང་པོ་ཞིག་དང་ཁྱད་པར་དཔལ་འབྱོར་གྱི་སྟེང་ནས་བརྡབ་གསིག་རེ་བཏང་འགྲོ་བཞིན་ཨེ་ཡོད་ན་བསམ་དང་སེམས་བཞིན་ཡིན། དགུ་རོང་ཚང་དང་ཨ་ལགས་མཁར་མདའ་ཚང་ཚོར་སྔར་ནས་ཞུས་བསྡད་པ་ཡིན། ང་འོངས་དུས་གྲོ་ཆས་རང་གིས་ཁྱེར་འོང་ཆོག འདུག་སའི་ཁང་བ་སྟབས་བདེ་ཞིག་དགོས་པ་རེད། བསུ་བ་སྣེ་ལེན་བྱེད་མ་འོང་ཞེས་དེ་གླེང་བསྡད་པ་ཡིན། ན་ནིང་མཁར་མདའ་དགོན་དུ་མ་ཡོང་གི་སྔར་ལོ་མི་ཉག་ནས་ངས་ཡེ་ཤེས་བླ་མའི་ཞིབ་ཁྲིད་རྒྱས་པ་ཞིག་བྱས་པ་ཡིན། དེ་དུས་དེ་ཚང་གིས་གྲ་སྒྲིག་རྒྱས་པ་ཞིག་བྱས་འདུག་སྟེ་རང་གྲོ་རང་གིས་ཁྱེར་ཏེ་རང་གི་ཐབ་རང་གིས་བཟུང་བ་ཡིན། དེ་སྟབས་བདེ་མོ་ངོ་མ་ཞིག་རེད། འདི་ནས་ན་ནིང་ད་ལོ་གཉིས་ཀ་ལ་ཟིང་ཆ་ཆེན་པོ་འདྲ་གནང་གི་འདུག དེ་ཉིན་མཚོ་སྐོར་ལ་འགྲོ་འདུག་སྐབས། རྗེས་དེད་རླངས་འཁོར་བདུན་ཅུ་བརྒྱད་བཅུ་མན་ཆོད་ཡོད་ས་ཡོད་བསམ་རྒྱུ་ཞིག་ཡིན། དེ་ཐམས་ཅད་ཀྱི་དོན་ལ་མཁར་མདའ་ཚང་དང་འདི་རྣམ་པས་འོ་བརྒྱལ་ཆེན་པོ་ཞིག་བརྒྱབ་ཡོད་ཐལ་བསམ་རྒྱུ་ཞིག་ཡིན། ད་རེས་ཕར་འགྲོ་དུས་སྐྱེལ་མ་མ་བྱེད་ཅེས་ཞུ་བཞིན་ཡོད། ད་དུང་དེ་བཞིན་སེམས་ལ་ཞོག ང་ལ་ནད་ཅིག་ཡོད་པ་དེ་གང་གང་རེད་ཟེར་ན། དེང་སང་ལྷག་ཏུ་མྱི་དང་ཐུག་འཕྲད་བྱེད་མི་བསམ་པའི་གོམས་གཤིས་ཤིག་ཆགས་ཡོད་པ་དེ་རེད། སྨྲ་བ་བསྡམས་དོན་ཡང་དེ་ཡིས་རེད། གཞན་ཉམས་ལེན་གྱི་གནད་ཀྱིས་ཅང་མ་རེད། བཤད་ཚར། གཏུགས་ཚར། བཤད་ནི་གཏུགས་ནི་ལས་ནི་ཚང་མའི་བྲོ་བ་མྱོང་ཚར་ཏེ། ད་མི་བཤད་མི་གཏུགས་མི་ལས་རྒྱུའི་སྙོམ་ལས་ངང་ནས་ཚེ་མཇུག་གི་དུས་ཚོད་བསྐྱལ་བསམ་པའི་མི་ཞིག་ཡིན། དེས་ན་བསམ་བཞིན་དུ་དེའི་རིགས་ཀྱི་མི་གྲལ་ནས་བུད་བཞག་པ་རེད། དེ་ཚོ་རང་གར་ཞོར་འབྱུང་གི་འཕྲོས་གཏམ་ཙམ་རེད། དེ་ནས་ཡང་ཆོས་ཁྲིད་རྗེས་མའི་སྐབས་སུ་མཇལ་ཡོང་། དེ་ལྟར་ཆོས་འཆད་ཉན་བགྱིས་པའི་དགེ་བའི་རྩ་བ་སོགས་ནས་བསྔོ་སྨོན་བཅས་ཉིན་གསུམ་པའི་ཆོས་ཁྲིད་མཇུག་གྲོལ་སོང་ངོ་། །

ཉིན་བཞི་པའི་ཆོས་ཁྲིད།

ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཐུགས་ལ་བཅངས་ཏེ་དམ་ཆོས་ཟབ་མོ་གསན་དགོས་པ་ཡིན། རང་རེ་ཐེག་རྩེ་རྫོགས་པ་ཆེན་པོ་བློ་འདས་བྱ་རྩོལ་དང་བྲལ་བའི་སྤྲོས་མེད་ཀྱི་རྣལ་འབྱོར་ལ་གཙོ་བོར་ཉམས་ལེན་བྱེད་པའི་ལས་ཅན་སྐལ་ལྡན་གྱི་མཆེད་ལྕམ་འདུས་པའི་ཆོས་གྲལ་ལ་ཞུགས་པ་ཤ་སྟག་ཡིན་དུས། ནམ་ཞིག་རྩོལ་མེད་རང་བཞག་གི་སེམས་ཀྱི་དེ་ཉིད་མངོན་སུམ་དུ་མཐོང་སྟེ་རང་ཉིད་ཀྱི་བརྩོན་པ་མ་ཞན་ན་བྱ་རྩོལ་རང་ཞིག་གི་ས་ལ་གོམས་པ་ཉམས་མྱོང་བརྒྱུད་དེ་ཐོབ་ངེས་པ་ཡིན། རིག་པའི་རང་སོ་ཟིན། དགོངས་པའི་ཕ་ཕོག་ཐོབ་དུས། རིག་པ་ཀུན་ཏུ་བཟང་པོ་ལ་ནོར་ས་དང་འཆལ་ཡོང་ས་ཞིག་མེད། དོན་དམ་ཆོས་ཉིད་ཀྱི་བདེན་པ་མཐོང་དུས་ཀུན་རྫོབ་དཀར་ནག་གི་དགེ་སྡིག་ལ་ལྟོས་པ་མ་རེད། མ་རེད་དེ། དེའི་ས་ལ་མ་ཐོན་གྱི་བར་དེར་ཐ་མལ་འཁྲུལ་བའི་རྣམ་རྟོག་འདི་དང་མ་བྲལ་བའི་རིང་ལ། གོ་བ་དང་མྱོང་བ་ཅུང་ཟད་ཐོན་པས་ཀྱང་མི་ཆོག་པར་རྟོགས་པའི་ཚད་རྫོགས། བདག་དང་གཞན་མཉམ། གསེར་དང་བོང་བ་མཉམ་པའི་ས་ཚོད་ལ་མ་སླེབ་བར་དུ་དམིགས་བཅས་བསོད་ནམས་ཀྱི་ཚོགས་ལ་མ་བརྟེན་ཐབས་མེད། སྔོན་འགྲོ་ཚོགས་བསགས་སྒྲིབ་སྦྱངས་དང་འབྲལ་མི་རུང་ལ། སྒྲིབ་པ་དག་ཅིང་དག་ན་རང་ལ་ཡོད་པའི་ཡེ་ཤེས་མངོན་དུ་གྱུར། ཚོགས་རྫོགས་ཤིང་རྫོགས་ན་ལམ་རྟགས་ཀྱི་ཡོན་ཏན་ཁྱད་པར་ཅན་དེ་བཞིན་དུ་རྙེད་པ་ཡིན། དེ་ཅིའི་ཕྱིར་ན། བསོད་ནམས་ཀྱི་ཚོགས་རྫོགས་པ་ལ་བརྟེན་ཏེ་ཡེ་ཤེས་ཀྱི་ཚོགས་རྫོགས། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པ་ལ་བརྟེན་ཏེ་འབྲས་བུ་སྐུ་གཉིས་ཐོབ་པ་ཡིན། དེའི་ཕྱིར་ན་རྒྱུན་འདོན་སྔོན་འགྲོའི་ངག་འདོན་གྱི་ནང་ལ། འགལ་རྐྱེན་སྡིག་སྒྲིབ་སྦྱོང་བ་བླ་མ་རྡོ་རྗེ་སེམས་དཔའི་སྒོམ་བཟླས་དང་མཐུན་རྐྱེན་ཚོགས་གསོག་པ་མཎྜལ་གྱི་ཁྲིད་རྐང་འདི་གཉིས་ཀ་མེད་ཐབས་མེད་པའི་ལམ་གྱི་ཡན་ལག་གནད་ཆེན་པོའི་ཆེ་ཐང་དུ་མཛད་ནས་བཞག་པ་རེད། འབུམ་ལྔའི་བསགས་སྦྱངས་ཀྱི་ནང་དུ་ཡིག་བརྒྱ་འབུམ་དང་མཎྜལ་འབུམ་བཞག་དགོས་པའང་ལམ་རྐྱེན་བསགས་སྦྱངས་གཉིས་ཀྱི་གནད་དུ་དེ་གཉིས་མེད་ཐབས་མེད་ཡིན་པས་བཞག་པ་རེད། སྡིག་སྒྲིབ་དག་ཆེད་དུ་བཤགས་སྦྱངས་བྱེད་དགོས་ན། སྡིག་པ་མི་དགེའི་ལས་ཀྱིས་རང་ལ་ཡོད་པའི་ངོ་བོ་ཡེ་དག་གི་སངས་རྒྱས་སྐུ་གསུམ་འདུས་པའི་བདག་ཉིད་དུ་བཞུགས་པ་དེ་མི་སྣང་བར་སྒྲིབ་པས་ན་སྡིག་སྒྲིབ་ཟེར་བ་ཡིན། ངོ་བོ་དང་བྱེད་ལས་ཀྱི་ཁྱད་པར་ཙམ་རེད་མ་གཏོགས་སྡིག་དང་སྒྲིབ་གཉིས་ཀ་གཅིག་དུ་བསྡུས་ནའང་འདུས་སོ། །རྩ་བ་མ་རིག་པ་ཁྱབ་བྱེད་དུ་བྱས་པའི་ཉོན་མོངས་དུག་གསུམ་དུག་ལྔའི་དབང་གིས། ལས་སྡིག་པ་སྒྲིབ་པའི་བྱེད་ལས་ཅན་བསགས་ནས་ཐར་བ་བྱང་ཆུབ་ཀྱི་གོ་འཕང་མི་ཐོབ་པར་སྡུག་བསྔལ་རྒྱུ་འབྲས་ལ་འཕྱན་པ་ཡིན་དུས། འདིའི་རྩ་བ་དེད་སོང་ན་འདི་ལ་ནང་གསེས་ཀྱི་དབྱེ་བ་ལས་དང་ཉོན་མོངས་ཤེས་བྱ་བག་ཆགས་ཀྱི་སྒྲིབ་པ་དང་བཞི་ཡོད། ལས་ཀྱི་སྒྲིབ་པ་རང་བཞིན་གྱི་སྡིག་པ་དང་བཅས་པའི་ལྟུང་བ་དག་ཡིན། དེ་དག་གིས་གང་ལ་སྒྲིབ་ན་མཐོ་རིས་ལྷ་མིའི་གོ་འཕང་ཐོབ་པ་ལ་སྒྲིབ། ཉོན་མོངས་པའི་སྒྲིབ་པ་ནི་ལས་དེ་དག་ཀུན་ནས་སློང་བར་བྱེད་པའི་ཉོན་མོངས། དབྱེ་ན་བརྒྱད་ཁྲི་བཞི་སྟོང་། ཚུར་བསྡུས་ན་དུག་ལྔ་དུག་གསུམ། དེ་ཡང་ཚུར་བསྡུས་ཏེ་འབྱུང་རྩ་དེད་ན་ཚུལ་བཞིན་མ་ཡིན་པ་ཡིད་ལ་བྱེད་པའི་ཀུན་རྟོག་འདིའི་ཁོངས་ནས་འབྱུང་གིན་ཡོད། ཉོན་མོངས་པ་དེས་ཅི་ཞིག་སྒྲིབ་ན། ཐར་བ་ཉན་རང་གི་གོ་འཕང་ཐོབ་པར་བྱེད་པ་ལ་སྒྲིབ་པ་ཡིན། ཤེས་བྱའི་སྒྲིབ་པ། རང་ལུགས་ལ་རྒྱུད་བླའི་དགོངས་དོན་བཞིན་སེར་སྣ་ལ་སོགས་རྣམ་རྟོག་ཉོན་སྒྲིབ་དང་འཁོར་གསུམ་དུ་རྣམ་པར་རྟོག་པ་དེ་ཤེས་སྒྲིབ་ཏུ་བཞག་པ་ཡིན་ལ། ལུགས་གཞན་དུ་བདེན་འཛིན་ཉོན་སྒྲིབ་ཏུ་འཇོག་རྒྱུ། ཉོན་སྒྲིབ་ཇེ་ཕྲར་སོང་བ་ཤེས་སྒྲིབ་དང་། དེ་ཡང་ཇེ་ཕྲར་སོང་བ་བག་ཆགས་ཀྱི་སྒྲིབ་པར་བཞེད་པ་ཡིན། གང་ལྟར་ཡང་གཉེན་པོ་ཆུང་ངུ་ཆུང་ངུས་སྒྲིབ་པ་ཆེན་པོའི་ཆེན་པོ་འཇོམས་ཤིང་། གཉེན་པོ་ཆེན་པོ་ཆེན་པོས་སྒྲིབ་པ་ཕྲ་བའི་ཕྲ་བ་བཅོམ་པ། སྒྲིབ་པ་རགས་པ་དང་པོར་བཅོམ་ཞིང་ཕྱིས་ནས་ཕྲ་བ་ཡང་དྲུངས་ནས་འབྱིན་པར་དགོངས་པ་གཅིག་ཏུ་མི་འབབ་ས་མི་འདུག་སྙམ་པ་ཡིན། ཆགས་བཞག་ན། གླ་རྩི་ཁྱེར་སོང་ན་མེད་འགྲོ་གི་སྟེ། དེ་བཞག་ཤུལ་གྱི་དྲི་མ་ཡལ་དཀའ་བ་ལྟ་བུའི་དཔེས་ཀྱང་ཤེས། གང་ལྟར་ཕྲ་བ་འཇོམ་དཀའ་བ་ཡིན་ནོ། །བག་ཆགས་ཀྱི་སྒྲིབ་པ་ཟེར་བ་དེ། མདོའི་ཆོས་སྐད་ལྟར་ན་ཤེས་བྱའི་སྒྲིབ་པ་ཤིན་ཏུ་ཕྲ་བའི་གནས་སྐབས་ལ་བཞག་གིན་ཡོད། འདི་སྔགས་ཀྱི་ལུགས་ལྟར་ན་སྣང་སེམས་འཕོ་བའི་བག་ཆགས་དཀར་དམར་རླུང་གསུམ་གྱི་ཆ་ཉོན་མོངས་ཅན་མ་ཡིན་པའི་མ་རིག་པས། ཟག་མེད་ཀྱི་ལས་དང་ཡིད་ཀྱི་ལུས་ལ་སོགས་པ་སྐྱེད་པར་བྱེད་པ། མཐར་ཐུག་རྡོ་རྗེ་ལྟ་བུའི་ཏིང་འཛིན་གྱིས་གཞོམ་བྱ་དེ་ཡིན་པ་རེད། ཤེས་སྒྲིབ་དང་བག་ཆགས་ཀྱི་སྒྲིབ་པ་གཉིས་ཀྱིས་གང་ལ་སྒྲིབ་ན། རྣམ་མཁྱེན་གྱི་ཡེ་ཤེས་ཐོབ་པ་ལ་སྒྲིབ་པ་ཡིན། ཇི་ལྟར་སྒྲིབ་ན་ནམ་མཁའི་ཉི་མ་སྤྲིན་གྱིས་སྒྲིབ་པ་བཞིན་དུ་སྒྲིབ་སྟེ། ཉི་མའི་དཀྱིལ་འཁོར་ལ་སྤྲིན་ཡེ་ནས་ཞུགས་མ་མྱོང་ཡང་སའི་སྟེང་གི་མིའི་མིག་སྔར་དེའི་བར་དུ་གཡོར་ནས་མིག་སྔོན་ལ་སྒྲིབ་པ་བཞིན། ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་དམ། ཡང་དག་མཐའ། ཆོས་ཀྱི་དབྱིངས། བདེ་གཤེགས་སྙིང་པོ། གཉུག་མའི་སེམས། དེ་ཁོ་ཉིད། ད་དུང་རང་བྱུང་བྱང་ཆུབ་ཀྱི་སེམས་དང་རིག་པ། རང་བྱུང་གི་རིག་པ་ལ་སོགས་མིང་གང་བཏགས་ནའང་། དོན་གཞི་ལྷུན་གྲུབ་ངོ་བོ་ཡེ་དག་རང་བཞིན་རྣམ་དག་གི་སངས་རྒྱས་རང་ལ་ཡོད་པ་དེ་ཉིད་ལ། ལས་ཉོན་གྱི་སྒྲིབ་པ་ཞིག་གཤིས་ལ་ཞུགས་མ་མྱོང་ཡང་། གློ་བུར་འཁྲུལ་བས་རང་ངོ་མ་ཤེས་ནས་མ་རིག་པ་ཙམ་ཞིག་ཡིན། གཞིའི་གནས་ལུགས་ལ་འགྱུར་བ་མེད་པ་དང་དྲི་མ་གློ་བུར་བ་ཡིན། དེའི་ཕྱིར་རྒྱུད་བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །ཞེས་གསུངས་སོ། །སེམས་ཅན་རྣམས་སངས་རྒྱས་ཡིན་ཡང་ཡིན་གོ་མི་ཆོད་པར་སེམས་ཅན་གྱི་མིང་ངན་དེ་བཟུང་ནས་ཁམས་གསུམ་འཁོར་བའི་ཡང་གཡོག་ལ་འཁྱམས་དགོས་པ་དེ་གང་ལ་ཐུག་ཅེ་ན། གློ་བུར་གཉིས་འཛིན་གྱི་འཁྲུལ་བའི་དྲི་མ་འདིས་བསྒྲིབས་སོང་བས་རེད། དེ་དག་པའི་ཐབས་ལ་དཀྱིལ་འཁོར་ཐམས་ཅད་ཀྱི་སྤྲོ་བསྡུའི་བྱེད་པོ་བླ་མ་ཡིན་པས་ན། རིགས་བརྒྱ་རིགས་གཅིག་འདུས་པའི་རང་བཞིན། གསང་ཆེན་རིགས་གཅིག་གི་ངོ་བོ་དེ་འདིའི་སྐབས་སུ་བླ་མ་རྡོར་སེམས་གཉིས་མེད་ཀུན་འདུས་སུ་བསྒོམས་ཏེ། བཤགས་པའི་ཚུལ་གཉེན་པོ་སྟོབས་བཞིའི་སྒོ་ནས་བཤགས་དགོས། སྡིག་པ་ལ་ཡོན་ཏན་མེད་ཀྱང་བཤགས་ན་འདག་པ་སྡིག་པའི་ཡོན་ཏན་ཡིན་གསུངས་པ་རེད། དེས་ན་རྟེན་གྱི་སྟོབས་བླ་མ་རྡོ་རྗེ་སེམས་དཔའ། སུན་འབྱིན་པའི་སྟོབས་ཉེས་པ་བྱས་པ་ལ་འགྱོད་པ་དྲག་པོ་བྱེད་པ། སྡོམ་པའི་སྟོབས་ཕྱིན་ཆད་མི་བགྱིད་པའི་སྡོམ་སེམས་བརྟན་པོ་འཆང་བ། གཉེན་པོ་ཀུན་ཏུ་སྤྱོད་པའི་སྟོབས་བདུད་རྩི་འབེབ་སྦྱོང་གི་དམིགས་པ་དང་ནི་ད་དུང་ཞིབ་ཏུ་བཤད་ན། བདག་དོན་ཆོས་སྐུའི་བཟླས་པའི་སྐབས་སུ་ཡུལ་གོང་མ་ལ་ཡིད་ཆེས་ཀྱི་དད་པ་བྱེད་པ་དང་། གཞན་དོན་གཟུགས་སྐུའི་བཟླས་པའི་སྐབས་སུ་མར་སེམས་ཅན་ལ་སྙིང་རྗེ་ཤས་མི་བཟོད་པ་བསྐྱེད། ཐམས་ཅད་ཀུན་ལ་རང་རེ་རྫོགས་ཆེན་པའི་རྣལ་འབྱོར་བས་འོད་གསལ་རིག་པའི་ཡེ་ཤེས་ཀྱི་སྟོང་གསལ་མཐའ་དབུས་དང་བྲལ་བའི་མཉམ་བཞག་གི་ངང་སྐྱོང་བ་འདི་བཤགས་པའི་རྒྱལ་པོ་མན་ངག་གི་མདོ་མདུད་ཡིན། ཟབ་མོའི་རྟོགས་པ་མངོན་དུ་བྱས་པ་ལ་བསགས་སྦྱངས་གཉིས་ཀ་དགོས་དུས་རྡོར་སེམས་བསྒོམ་བཟླས་ཀྱིས་སྡིག་པ་སྦྱང་པ་དང་ཆབས་གཅིག་ཏུ་མཎྜལ་འབུལ་བའི་ཆོ་ག་ལ་བརྟེན་ཏེ་ཚོགས་བསགས་དགོས་པ་ཡིན། མ་ཀི་ཉན་ཐོས་ཐེག་པ་ནས་ཡ་ཀིའི་ཨ་ཏི་རྫོགས་ཆེན་གྱི་བར། ལམ་ཐམས་ཅད་བྱ་དཀའ་སླ་དང་ཆོད་ཆེ་ཆུང་གི་ཁྱད་པར་ཞིག་རེད་མ་གཏོགས། ཐམས་ཅད་སྣང་བཅས་བསོད་ནམས་ཀྱི་ཚོགས་དང་སྣང་མེད་ཡེ་ཤེས་ཀྱི་ཚོགས་གཉིས་རྫོགས་བྱེད་ཀྱི་ནང་དུ་མ་འདུས་པ་མེད། འདུས་མོད་ཀྱང་སྐབས་འདིར་བསྟན་གྱི་མཎྜལ་འབུལ་བ་ནི་ཚོགས་བསགས་པའི་སྒོ་ཐམས་ཅད་འདུས་པས་མི་ཚད་བྱ་སླ་བ་ཆོད་ཆེ་བ་ཁྱད་པར་དུ་ལས་དང་པོ་བས་ཉམས་ལེན་ལག་ལེན་ལ་སྦྱར་བདེ་བའི་ཁྱད་ཆོས་དང་ལྡན་པ་ཡིན། ད་འུ་བུ་ཚོས་མཎྜལ་གྱི་རྟེན་མཆོད་ཆས་འདི་ཅི་ཡིན་ཞེ་ན། སྐུ་གསུམ་གྱི་ཞིང་ཁམས་བློས་བླངས་ཏེ་མཎྜལ་དུ་འབུལ་བའི་དམིགས་རྟེན་ཙམ་ཞིག་རེད། འདི་མི་བརྗེད་པའི་ཆེད་དུ་མཛུབ་སྐུད་བཏགས་པ་ལྟ་བུ་ཡིན་གསུངས་པ་རེད། དེ་ཡང་ཆོས་རྒྱུན་འདིའི་ཞལ་རྒྱུན་དང་ཕྱག་བཞེས་ལྟར་དུ་ཡིན་ན་སྣང་ཚུལ་སྤྲུལ་སྐུའི་མཎྜལ། གནས་ཚུལ་ལོངས་སྐུའི་མཎྜལ། ཁྱབ་བྱེད་ཆོས་སྐུའི་མཎྜལ་གསུངས་ཀི་ཡོད། སྣང་ཚུལ་སྤྲུལ་སྐུའི་མཎྜལ་དེ་གང་ཡིན་ན། སྤྲུལ་སྐུའི་ཞིང་ཁམས་མི་མཇེད་འཇིག་རྟེན་གྱི་ཁམས་བྱེ་བ་ཕྲག་བརྒྱ། སངས་རྒྱས་སྤྲུལ་བའི་སྐུ་གཅིག་གི་གདུལ་ཞིང་དུ་གྱུར་པ་རིགས་ལྔ་གངས་ཆེན་མཚོའི་སྐུའི་བཀོད་པའི་ཞིང་ཁམས་བསམ་གྱིས་མི་ཁྱབ་པའི་ལྷ་མིའི་ལོངས་སྤྱོད་ཐམས་ཅད་འབུལ་བ་དེའོ། །གནས་ཚུལ་ལོངས་སྐུའི་མཎྜལ་ནི། ལོངས་སྐུའི་ཞིང་ཁམས་ངེས་པ་ལྔ་ལྡན་གྱི་ཞིང་དང་གཞལ་ཡས་ཁང་རྒྱན་དང་བཀོད་པས་བརྒྱན་པ་ཕུན་སུམ་ཚོགས་པ་ལྔ་ལྔ་ཚོགས་པའི་རིགས་ལྔ་གངས་ཆེན་མཚོ། ཡང་སྒྱུ་འཕྲུལ་རབ་འབྱམས་མཐའ་ཡས་པ་དེ་ཉིད་དོ། །ཁྱབ་བྱེད་ཆོས་སྐུའི་མཎྜལ་ནི། འཁོར་འདས་གང་གི་ཕྱོགས་སུ་ཡང་རྒྱར་མ་ཆད། ཡོད་མེད་གང་གི་གནས་ལའང་ཕྱོགས་སུ་མ་ལྷུང་བ་ལྷུན་གྲུབ་ཕྱོགས་མེད་མཐའ་དང་བྲལ་བ། འཁོར་འདས་མཉམ་པར་བརྡལ་བའི་མ་བསྐུལ་ཡེ་རྫོགས་རང་བཞིན་འདུས་མ་བྱས་པའི་ཆོས་ཉིད་ཆེན་པོའི་ངོ་བོར། ནང་གསལ་རྙོག་པ་དང་བྲལ་བའི་མཁའ་མཉམ་ཆོས་ཀྱི་དབྱིངས་ཀྱི་ཞིང་ཁམས་ཡེ་ཤེས་ཀྱི་སྣང་བས་བརྒྱན་ཏེ་འབུལ་བ་དེ་ལྟ་བུའོ། །དེ་ལྟར་སྐུ་གསུམ་མཚོན་པའི་མཎྜལ། ངག་འདོན་རྒྱས་བསྡུས་ལ་མ་ལྟོས་པར་དམིགས་པ་གཅིག་གིས་འབུམ་ཐེར་བསོག་དུས་ཚོམ་བུ་བདུན་གྱིས་གསོག་པ་ཕྱག་ལེན་ལྟར་དང་། འདི་དང་འབྲེལ་བའི་བདུད་བཞི་ཅིག་ཆར་ཏུ་གཅོད་པ་ཀུ་ས་ལ་འབྱུང་བ་རེད། འདི་ཡང་མཆོད་སྦྱིན་གཉིས་ཀ་ཚང་ཞིང་། དེ་ཡང་སྤྲོས་པ་མི་ཆེ་བའི་རྣལ་འབྱོར་བས་འཁྱེར་བདེ་ཡིན། གཅོད་ཅེས་པས་གཅད་བྱ་བདུད་བཞི་དེ་གཅོད་བྱེད་ཐབས་དང་ཤེས་རབ་ཀྱིས་བཅད་པས་གང་གཅོད་པར་བྱེད་པ་བདག་འཛིན་རྩད་ནས་ཆོད་པ། ཡུམ་དོན་ཤེར་ཕྱིན་གྱི་དགོངས་པ་ལུས་སྦྱིན་འདིའི་ནང་དུ་འགྱེད་ཆེན་དཀར་ནག་ཁྲ་གསུམ་འདུས་པ་ཚོགས་གཉིས་རྫོགས་པའི་ཐབས་ཁྱད་པར་ཅན་ཡང་ཡིན། འདིའི་གཅོད་དམིགས་ཀྱི་དབང་སྡུད་ཟིལ་གནོན་ལ་སོགས་པ་སྦྱོར་དངོས་རྗེས་གསུམ་གྱི་འགྲོས་དེ་གཅོད་ཡུལ་མཁའ་འགྲོའི་གད་རྒྱངས་ངས་སྐོར་ཅིག་ཞིབ་ཁྲིད་བྱེད་མྱོང་བ་དེ་ཚོར་གསོན་དང་ཅུང་ཟད་རེས་ཕན་ཐོགས་འབྱུང་སྲིད་རྒྱུ་རེད། དེ་ལྟ་བུའི་སྔོན་འགྲོའི་སྐོར་ནས་རྗེས་དྲན་ཐུགས་གསོས་ཀྱི་ཚུལ་དུ་སྔོན་འགྲོ་དང་དངོས་གཞི་རྒྱུན་དུ་འབྲེལ་བར་བྱས་ཏེ་ཉམས་ལེན་ཕྱག་བཞེས་སུ་སྐྱོང་དགོས་ཚུལ་མདོ་ཙམ་ཞུས་པ་དང་བཅས་ཏེ། གང་ཞིག་གསན་པར་བྱ་བ་མཆོག་གི་རྣལ་འབྱོར་བ་ཆེན་པོ་ཞབས་དཀར་ཚོགས་དྲུག་རང་གྲོལ་གྱི་གསུང་། རྫོགས་པ་ཆེན་པོ་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཅར་འབྱེད་པའི་ལྡེའུ་མིག་ཅེས་བྱ་བའི་འོད་གསལ་རྫོགས་པ་ཆེན་པོའི་གདམས་པ་མན་ངག་ལེ་ཚན་གྱི་ཚུལ་དུ་བཞུགས་པ་འདི་ཉིད་འཆད་ཁྲིད་བྱེད་བཞིན་པ་ལས་དོ་ཞག་ཡན་ཆོད་ལ་འདིའི་གཞུང་དོན་དངོས་གཞིའི་ཁྲིད་རིམ་བདུན་གྱི་ནང་ནས་ལྔ་ཡན་ཆོད་སོང་ནས་། ལྔ་བ་རྗེས་སུ་རྣལ་འབྱོར་ལྟ་སྒོམ་སྤྱོད་འབྲས་བཞིའི་ཉམས་སུ་ལེན་ཚུལ་བཤད་པའི་འཕྲོར།

༦༽ དྲུག་པ་ཉམས་སུ་བླངས་ནས་སྣང་བཞི་འཆར་ཚུལ་བཤད་པ།

དེ་རིང་དྲུག་པ་ཉམས་སུ་བླངས་ནས་སྣང་བཞི་འཆར་ཚུལ་བཤད་པ་ལ་འདིའི་སྣང་བཞིའི་རིམ་པ་ས་བཅད་བཞིས་བསྟན་པ་ལས།

༡ དང་པོ་ཆོས་ཉིད་མངོན་སུམ་གྱི་སྣང་བ།

ཨེ་མ་ཧོ།

དྲུག་པ་ཤིང་རྟ་ཉི་ཟླའི་འགྲོས་ཇི་བཞིན།།

ཐེག་པ་གཞན་ལས་ལམ་གྱི་མྱུར་བུལ་གྱི།།

ཁྱད་པར་ཆེ་བའི་ཐེག་མཆོག་རྒྱལ་པོ་ཡི།།

སྣང་བཞིའི་ཚད་རྣམས་བདག་གིས་བཤད་པར་བྱ།།

སྐལ་ལྡན་ལས་འཕྲོ་ཅན་རྣམས་གུས་པས་ཉོན།།

ཅེས་གསུངས་ན། ཐེག་པ་གཞན་གྱིས་སྐུ་གསུམ་འབྲས་བུར་བྱས་པ་རེད། སྐུ་གསུམ་འབྲས་བུར་བྱས་ཏེ་རྒྱང་རིང་ལམ་གྱི་ངལ་བས་འབྲས་བུ་གཞན་ནས་བསྒྲུབ་དགོས་པས་ན་ལམ་བུལ་བ་དང་། འདིས་སྐུ་གསུམ་ལམ་སྣང་དུ་བྱས་ཏེ་སྣང་བཞི་རིམ་དང་ཅིག་ཅར་བསྒྲོད་པའི་ལམ་གྱི་འགྲོས་མྱུར་བ་ཡིན་པས་མི་ཚད། འབྲས་བུ་ལུས་འདི་མ་སྤངས་པར་འཕོ་ཆེན་གྱི་སྐུར་བཞེངས་པ་སྟེ། འཕོ་བ་ཆེན་པོ་འཇའ་ལུས་རྡོ་རྗེའི་སྐུར་བཞེངས་པ་སོགས་ཀྱི་མན་ངག་སྡེའི་ཡང་གསང་བླ་ན་མེད་པ་ཐེག་པའི་རྒྱལ་པོ་འདིའི་ཁྱད་ཆོས་བསྟན་ཅིང་སྣང་བཞིའི་ཚད་རྣམས་བཤད་པ་ལ་གུས་པ་ཆེན་པོས་ཉོན་གསུངས་ནས་མཚམས་སྦྱར་བ་དང་བཅས་ཏེ།

སྔར་བཞིན་བཞུགས་སྟངས་གཟིགས་སྟངས་གནད་གསུམ་གྱིས།།

ཉི་ཟེར་ལ་བལྟས་འོད་དང་འོད་ཁྱིམ་དང་།

རིག་པ་ལུ་གུ་རྒྱུད་བཅས་གསལ་བར་སྣང་།།

ཉམས་བླངས་དབྱིངས་ཀྱི་ར་བར་རིག་པ་ཚུད།།

ཐིག་ལེ་གསུམ་འབྲེལ་ཚུན་ཆད་སྣང་བའི་ཚེ།།

ཆོས་ཉིད་མངོན་སུམ་སྣང་བ་རྫོགས་པའོ།།

དེ་ལྟར་མཐོང་བས་ད་ལྟ་འདི་ཉིད་ལ།།

ཡིད་དཔྱོད་འཛིན་པའི་ལྟ་བ་ཉིད་དང་བྲལ།།

མཐར་ཐུག་ཁམས་གསུམ་འཁོར་བར་མི་ལྡོག་པར།།

རང་བཞིན་སྤྲུལ་སྐུའི་ཞིང་དུ་དབུགས་འབྱིན་ནོ།།

ཞེས་གསུངས་ཏེ། སྔར་བཤད་པའི་བཞུགས་སྟངས་གསུམ་དང་གཟིགས་སྟངས་རྣམ་གསུམ་སོགས་ཀྱི་གནད་དང་མཐུན་པར་མན་ངག་ཞལ་ཤེས་ཀྱི་ལག་ཁྲིད་བཞིན་དུ་གཟིགས་དུས། འདི་ནས་གཙོ་ཆེར་རྟེན་ལ་ལྟོས་པའི་གང་ཟག་ལས་དང་པོ་བ་དང་བསྟུན་དུས། ཉི་ཟེར་དང་ཟླ་ཟེར་མར་མེའི་ཟེར་སོགས་ཟུར་ཏུ་ཁྲིད་དེ་ལྟ་སྟངས་ཀྱིས་བལྟས་པའི་སྐབས་ན། འོད་དང་གསུངས་པ་དེ། འོད་ཟེར་དྲག་པོ་འཕྲོ་བ་དང་གྱེན་འགྲེང་རྩིབ་ཤར་སོགས་དང་། འོད་ཁྱིམ་གསུངས་རྒྱུ་འདི། གྲུ་ཆད་ལྟ་བུའི་གྲུ་བཞི་དང་ནི། ཟླུམ་པོ་འོད་གོར་ཟླུམ་པོ་འཁོར་ཡུག་ཅན་ལ་སོགས་པར་སྣང་བ་ཡིན་། དེ་ཡང་ཕྱིའི་སྣང་ཆར་ཞེན་འཛིན་མ་ཞུགས། ནང་རིག་པ་གཞི་ལ་གཡོ་འགུལ་མེད་པར་བཞག་ནས་ཉམས་སུ་བླངས་པས་དབྱིངས་ཀྱི་ར་བར་རིག་པ་ཚུད་རྒྱུའི་རིག་པ། འདིའི་རིག་པ་ཟེར་བ་རིག་གདངས་རྡོ་རྗེ་ལུག་རྒྱུད་ལ་གསུངས་ཀྱིན་ཡོད། ནང་དབྱིངས་རིག་འདྲེས་པ་དང་མཉམ་དུ་ཕྱིའི་དབྱིངས་གདངས་རྣམ་དག་དབྱིངས་སྒྲོན་གྱི་ར་བ་རུ་རིག་གདངས་རྡོ་རྗེ་ལུ་གུ་རྒྱུད་ཚུད་ཡོང་གསུངས། ལུག་རྒྱུད་འཁོར་དང་བཅས་པའི་གོ་བ་དང་ལུག་རྒྱུད་དབྱིངས་ཀྱི་ར་བར་ཚུད་པའི་མགོ་འཛུགས་པའམ་གཞི་ཚུགས་པ་ལའང་ཚུད་ཅེས་པའི་སྒྲ་དེ་འཇུག་པ་ཡིན། ཐིག་ལེ་སུམ་འབྲེལ་སྣང་བ་ཚུན་ཆད་ལ་ཆོས་ཉིད་མངོན་སུམ་གྱི་སྣང་བ་ལ་འཇོག གཤིས་དོན་དམ་རིག་པའི་ངོ་བོའི་ཆོས་ཉིད་ཀྱི་རང་གདངས་མངོན་སུམ་དབང་པོར་སྣང་བས་ན་ཡིད་དཔྱོད་མཐར་འཛིན་གྱི་སངས་རྒྱས་གཞན་ནས་འཚོལ་བའི་ཐེ་ཚོམ་བྲལ་བའམ་ཐེ་ཚོམ་ལྡོག་པ་དང་ནི། མཐར་ཐུག་ཁམས་གསུམ་འཁོར་བར་ཕྱིར་མི་ལྡོག་སྟེ་རང་བཞིན་སྤྲུལ་པ་སྐུའི་ཞིང་དུ་དབུགས་འབྱིན་པ་ཡིན་གསུངས་པའོ།། འདི་སྔགས་ཀྱི་བདེན་མཐོང་དཔེའི་ཡེ་ཤེས་མ་གཏོགས་དོན་གྱི་ཡེ་ཤེས་མངོན་སུམ་དུ་མཐོང་བའི་མཐོང་ལམ་ཆོས་ཉིད་ཀྱི་བདེན་པ་དངོས་སུ་མཐོང་བ་རུ་འཇོག་པ་མིན། འདིའི་མངོན་སུམ་དེ་གང་ཡིན་ཞེ་ན། དབང་པོའི་མངོན་སུམ། ཡིད་ཀྱི་མངོན་སུམ། རང་རིག་མངོན་སུམ་ལ་སོགས་པའི་ནང་ནས། འདི་དོན་དམ་དབྱིངས་ལ་འཇལ་བའི་མངོན་སུམ་ཆོས་ཉིད་དོན་དམ་པའི་དོན་དེ་ཉེ་བར་མཇལ་བ་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པའི་སོ་སོ་ཡང་དག་གི་རིག་པ་དང་ནི། དེའི་སྣང་ཡུལ་གཉིས་མེད་ཀྱི་ངང་ནས་གཟུང་འཛིན་བྲལ་བར་མྱོང་བའི་ངེས་པ་རྙེད་པ་ཞིག་ཡིན། འདི་ལྟར་མཐོང་བའི་རྣལ་འབྱོར་བ་དེས་ཆོས་ཉིད་གདོད་མའི་འོད་གསལ་ཟིན་པ་ཡིན་པས་ན་འཁོར་བ་མིང་མེད་དུ་སྟོང་པའི་སྲིད་གསུམ་གདར་ཤ་ཆོད་པ་ཡིན་གསུངས་པའོ། །སྣང་བཞིའི་རིམ་པ་འདི་བཞིན་དུ་ངེས་པ་དེ། གཞི་ཆོས་ཉིད་མངོན་སུམ་དུ་མཐོང་བ་འདི་མེད་པས་སྣང་བ་ལྷག་མ་གསུམ་པོའི་འཆར་གཞི་མེད་པ་དེ་ལྟར་གསུངས། དེ་ཡང་ཡིན་ཏེ་ཅིའི་ཕྱིར་ན། འདིའི་རྗེས་ཀྱི་ཉམས་སྣང་གོང་དུ་འཕེལ་བའི་གཞི་མངོན་དུ་མ་གྱུར་ན་ཅི་ཞིག་འཕེལ་ཡོང་། དེ་བཞིན་ཉམས་འཕེལ་ཏེ་བརྟན་པའི་ཚད་ལ་ཚད་ཕེབས་གསུངས་པ་དང་ནི། སྣང་ཉམས་གཞི་ལ་ཐིམ་སྟེ་ཕྲ་རགས་ཀྱི་སྣང་འཛིན་ཙམ་ཡང་ནུབ་པ་དེ་ཆོས་ཟད་ཀྱི་རིམ་པ་ཡིན། དེས་ན་རིམ་པ་རིམ་ཅན་དེ་ལྟར་དུ་འབྱུང་བ་ཡིན་པས་ན་སྐུ་གསུམ་ལམ་སྣང་དུ་བྱས་པའི་ཁྱད་འདོན་དུས། སྣང་བ་དང་པོ་གཉིས་སྤྲུལ་སྐུ། ཚད་ཕེབས་ལོངས་སྐུ། ཟད་པ་ཆོས་སྐུའི་སྣང་བ་ལམ་དུ་བྱེད་པ་ལ་འཇོག་པ་ཡིན། ཡིན་ཡང་འདི་ལ་ཞིབ་ཆ་ཕྱེས་ནས་བཤད་ན། ཁ་རྩང་ཆོས་ཁྲིད་སྔོན་མའི་སྐབས་སུ་ཞུས་པ་བཞིན་དུ་ཆོས་ཉིད་མངོན་སུམ་གྱིས་ཞིང་ཁམས་ཀྱི་གོ་འབྱེད། ཉམས་གོང་འཕེལ་གྱི་སྐབས་སུ་སྤྲུལ་སྐུ་དང་། ཚད་ཕེབས་ལོངས་སྤྱོད་རྫོགས་སྐུ། ཟད་པ་ཆོས་སྐུའི་སྣང་བ་ལ་འཇོག་པ་ཡིན་ནོ། །དེས་སྣང་བཞིའི་དང་པོ་བསྟན་ནས།

༢ གཉིས་པ་ཉམས་སྣང་གོང་འཕེལ་གྱི་སྣང་བ།

ཨེ་མ་ཧོ།

གཉིས་པ་ཉམས་སྣང་གོང་འཕེལ་སྣང་བ་ལ།།

ཤེས་ཉམས་སྣང་ཉམས་གཉིས་ལས་དང་པོ་ནི།།

ཤེས་ཉམས་བདེ་གསལ་མི་རྟོག་ཏིང་འཛིན་དང་།།

ཤེས་པ་མཐའ་འགྱུར་ཅན་གྱི་ཉམས་རྣམས་ནི།།

སྲིན་བུ་མེ་ཁྱེར་སྤྲིན་དང་དུ་བ་དང་།།

སྨིག་རྒྱུ་ཟླ་བ་སྐར་མ་མར་མེ་དང་།།

ཉི་མ་ཤར་འདྲ་ཕྱི་ནང་ཟང་ཐལ་སྣང་།།

འཆར་ནུབ་གསལ་འགྲིབ་ཅན་དུ་མི་བརྟན་ཅིང་།།

ཚུགས་མི་ཐུབ་ཅིང་གནས་འགྱུར་འགྲོ་བས་ན།།

མཐའ་འགྱུར་ཅན་གྱི་ཉམས་ཞེས་བཤད་པ་ཡིན།།

ཞེས་གསུངས་ཏེ། དབྱིངས་དང་རིག་པའི་ཉམས་ལེན་ལ་སྦྱངས་པ་གོང་ནས་གོང་དུ་བརྒྱུད་དེ་ཉམས་སྣང་གོང་དུ་འཕེལ་ཡོང་དུས། ཕྱིའི་དབྱིངས་སྣང་ལ་རིག་པ་ལུག་རྒྱུད་དབྱེར་མེད་དུ་གནས་པ་བཞིན་དུ་ནང་ཀ་དག་གི་སྟོང་དབྱིངས་ལ་རང་གདངས་རིག་པའི་ཡེ་ཤེས་དེ་གཉིས་མེད་དུ་གནས་པ་ཡིན། དེ་གནས་པས་འོད་གསལ་མ་བུ་འདྲེས་སྟོབས་ཀྱིས་སྣང་ཉམས་སྣ་ཚོགས་སུ་འཕེལ་བ་ཡིན་པས་ན་ཉམས་སྣང་གོང་འཕེལ་གསུངས་པ་རེད། སྤྱིར་ཉམས་ཞེས་པའི་གནས་སྐབས་ན་དེ་ལ་ཤེས་ཉམས་དང་སྣང་ཉམས་གཉིས་ཀྱི་གོ་བ་ལེན་རྒྱུ་ཡོད། ཤེས་ཉམས་དེ་བཅོས་མའི་བསྒོམ་པ་ལས་བྱུང་བའི་བདེ་གསལ་མི་རྟོག་འཕེལ་འགྲིབ་ཅན་ཞེན་འཛིན་ཅན་ཞིག་དང་། ཡང་ཤེས་པ་མཐའ་འགྱུར་གྱི་ཉམས་ཞེས་པ་དེ་མི་བརྟན་འགྱུར་བའི་སྟོང་གཟུགས་རླུང་ཉམས་ཀྱི་སྣང་བ་སྲིན་འབུ་མེ་ཁྱེར་ལྟ་བུ་དང་སྤྲིན་ལྟ་བུ། དུ་བ་ལྟ་བུ། སྨུག་ཟིལ་ལྟ་བུ་ལ་སོགས་པ་ནས་ཉི་མ་ཤར་བ་ལྟར་གསལ་ཞིང་ཕྱི་ནང་ཟང་ཐལ་དུ་སྣང་བ་ལྟ་བུ་སོགས་རྣམ་པ་བརྒྱད་ལྟ་བུ་ཞིག་འཆར་རྒྱུ་ཡོད་པར་གསུངས་ཡོད། ཡོད་ཀྱང་འདི་རླུང་ཉམས་འགྱུར་བ་ཅན་དག་བྱ་ཡིན། ཚུགས་མི་བརྟན་ཅིང་བློ་གཏད་ས་མེད་པ་མཐར་འགྱུར་བ་ཅན་ཡིན་པས་ན་མཐར་འགྱུར་གྱི་ཉམས་གསུངས་པའོ། །

དེའི་ཕྱིར་ན།

དེ་ལ་ལམ་གྱི་ཚད་འཛིན་མི་བྱེད་པར།།

ཞེས་གདམས་པ་གནང་ནི་རེད། དེ་ནས་སྣང་ཉམས་ནི།

རང་བཞིན་རྫོགས་པ་ཆེན་པོའི་སྣང་བའི་ཉམས།།

མི་བསླུ་བ་ལ་ཚད་འཛིན་བྱེད་པ་ཡིན།།

དེ་ཡང་སྔར་བཞིན་ཉམས་སུ་བླངས་པ་ཡིས།།

དབྱིངས་རིག་སྨིན་མཚམས་ཉིད་ནས་འབྲལ་བར་འགྱུར།།

དབྱིངས་སྣང་འོད་ཀྱི་རང་བཞིན་དེ་རྣམས་ནི།།

འོད་ལྔ་གྱེན་འགྲེང་རྩིབ་ཤར་ཟླུམ་འཁྲིགས་དང་།།

མཆོད་རྟེན་པདྨ་སྟོང་ལྡན་མཁར་ཐབས་དང་།།

མདའ་མདུང་རྩེ་དང་འཁོར་ལོ་གྲི་གུག་དང་།།

རྒྱ་གྲམ་ཡིག་འབྲུ་དྲ་བ་དྲ་ཕྱེད་དང་།།

མིག་མང་རིས་དང་གཟུགས་བརྙན་སྣ་ཚོགས་དང་།།

གོས་ཀྱི་རི་མོ་ལ་སོགས་མཐའ་གཅིག་ཏུ།།

མ་ངེས་སྣ་ཚོགས་གོ་རིམ་མེད་པར་འཆར།།

འདི་དུས་འོད་གསལ་སྣང་བ་དེ་རྣམས་ཀྱིས།།

རང་ཉིད་གང་གནས་ལུང་བ་གང་བ་འབྱུང་།།

དེའི་ཚེ་ཉིན་མཚན་མེད་པར་སྣང་བ་ཡིན།།

ཉམས་སྣང་འོད་གསལ་དེ་དག་ཇེ་བཀྲ་དང་།།

ཇེ་ལེགས་ཇེ་མང་ཉིད་དུ་འགྲོ་བས་ན།།

ཉམས་སྣང་གོང་འཕེལ་སྣང་བ་ཞེས་བྱའོ།།

ཞེས་གསུངས་ཏེ། རླུང་གདངས་ཡིད་དཔྱོད་བཅོས་མས་བསྒོམ་པ་ལས་བྱུང་བའི་ཤེས་ཉམས་མ་ཡིན་པའི་རང་བཞིན་རྫོགས་པ་ཆེན་པོའི་མ་བཅོས་མཉམ་པར་བཞག་པའི་རིག་གདངས་ཀྱི་སྣང་ཉམས་ནི། མི་བསླུ་བའི་ཆོས་ཉིད་རིག་པའི་གདངས་སུ་ཤར་བ་ཡིན་ཏེ། དེ་ཡང་། འཕེལ་བརྟན་ཟླ་བ་ཡར་ངོ་བཞིན། །སྣང་བ་རེ་ལ་ཉམས་རེ་འོ། །ཞེས་སྒྲ་ཐལ་འགྱུར་རྩ་བའི་རྒྱུད་ལས་གསུངས་པ་ལྟར་ཆོས་ཉིད་མངོན་སུམ་མཐོང་བའི་རྨང་གཞི་དེའི་སྟེང་ནས་ཉམས་སུ་བླངས་པས་གོམས་པའི་ཚད་ངེས་པ་ཅན་ཞིག་ལ་ཐོན་དུས། དབྱིངས་རིག་སྨིན་མཚམས་ནས་བྲལ་ཏེ་ཐག་ཇེ་རིང་རྒྱ་ཇེ་ཆེར་སོང་ནས། འདི་རྒྱས་པར་བཤད་ན་དག་ཚུལ་དང་སྣང་ཚུལ་གཉིས་ཀྱི་ཐོག་ནས་བཤད་དུ་ཡོད་ཀྱང་བསྡུས་ན་ཡེ་ཤེས་ལྔའི་རང་མདོག་གི་ཁ་དོག་ཀྱང་ཇེ་བཀྲ་རུ་སོང་བ་དང་མཉམ་དུ་དབྱིབས་ཀྱང་ཡེ་ཤེས་ལྔ་དང་བསྟུན་པའི་མེ་ལོང་ལྟ་བུའི་གྱེན་འགྲེང་། མཉམ་པ་ཉིད་ཀྱི་རྩིབ་ཤར་སོགས་འདི་ནས་གསུངས་པ་ལྟར་དུ་གཅིག་ཏུ་མ་ངེས་སྣ་ཚོགས་སུ་འཆར་རྒྱུ་ཡོད་པའོ། །ད་ངེད་ཚོའི་ལུང་ལ་བརྟེན་པའི་གོ་ཡུལ་འདྲ་ལ་མ་ཡིན་པ་ཞིག་ཐོས་པ་ཚིག་གི་རྗེས་སུ་འབྲངས་ནས་བཤད་པ་ལས་མ་ཡོད་པས། རང་གི་མྱོང་བ་ངེས་པའི་རྟགས་ཚད་དང་སྦྱར་ཏེ་གསུངས་ཡོང་པ་དང་འདྲ་བ་མ་རེད། གོས་ཀྱི་རི་མོ་ལ་སོགས་པ་མ་ངེས་སྣ་ཚོགས་སུ་ཤར་བ་ཡིན། བར་ཞིག་འོད་གསལ་གྱི་སྣང་བས། རང་གང་ན་ཡོད་པའི་ལུང་པ་དང་ས་ཕྱོགས་གང་འགྲོ་བ་དེ་ལྟ་བུའི་ཉམས་སྣང་ཤར་རྒྱུ་འདུག་ཅེས་གསུངས་འདུག་ལ། དེ་ཡང་ཉིན་མཚན་མེད་པར་སྣང་བ་དང་ནི་སྣང་བ་དེ་དག་ཀྱང་ནང་རིག་པའི་ཉམས་འཕེལ་བ་དང་མཉམ་དུ་ཇེ་བཀྲ་ཇེ་ལེགས་ཇེ་བཟང་ཇེ་མང་དུ་འགྲོ་བས་ན་ཉམས་གོང་འཕེལ་གསུངས་པ་ཡིན། ཞེས་གསུངས་པ་རེད། འདི་དུས་ཐིག་ལེ་ལྔ་འབྲེལ་སོགས་སུ་སྣང་། ཆོས་ཉིད་མངོན་སུམ་སྐབས་ཀྱི་ཐིག་ལེའི་ཚད་བསྡུར་དུ་མེད་པའི་རྒྱ་ཇེ་ཆེ་མཐོང་བ་ཇེ་དག་ལ་འགྲོ་བ་ཡིན། འདི་ཚོ་དངོས་གཞིའི་ཉམས་ལེན་གཅིག་པུས་མ་ཡིན་པར་སྔོན་འགྲོའི་སྦྱོང་བ་རྣམ་པར་དག་པ་དང་བཅས་པའི་སྟོབས་ཀྱིས་ཡིན་ཚུལ་དང་ནི་འདིའི་སྐབས་སུ་ཕུང་ལྔའི་བདག་འཛིན་གྱི་ཞེན་པ་ལས་འདས་ཚུལ་སོགས་ཞིབ་པར་ཀུན་མཁྱེན་ཡབ་སྲས་ཀྱི་གཞུང་ལས་ཞུན་མཐར་གཅད་དགོས་པ་ཡིན་ནོ། །ཉམས་སྣང་དེ་ཚོ་ཇི་ལྟར་འཕེལ་བ་ཡིན་འདི་ནས་རིམ་བཞིན།

དེ་ཡང་བརྩོན་འགྲུས་རབ་ལ་ཞག་ལྔ་ལྔ།།

འབྲིང་ལ་བདུན་བདུན་དབང་པོ་ཐ་མ་ལ།།

ཉེར་གཅིག་ཉེར་གཅིག་འཕྲོ་ནས་གོང་མ་རྣམས།།

མི་སྣང་འོག་མའི་སྣང་བ་འཆར་བར་འགྱུར།།

ཐིག་ལེའི་ནང་དུ་ལྷ་སྐུ་ཕྲ་མོ་ཡི།།

དབུ་དང་ཕྱེད་ཞལ་རྡོར་སེམས་སྐུ་རྐྱང་རེ།།

མཐོང་དུས་ཉམས་སྣང་གོང་འཕེལ་རྫོགས་པའོ།།

ཕྱི་ཡི་འོད་གསལ་རྩལ་དེ་འཕེལ་བ་བཞིན།།

ནང་དུ་རིག་པའི་འོད་གསལ་ཏིང་འཛིན་དང་།།

སྤྱན་དང་མངོན་ཤེས་ལ་སོགས་འཆར་བར་གསུངས།།

དེ་ལྟར་ཉམས་སྣང་གོང་དུ་འཕེལ་བ་ཡིས།།

བར་དོ་མེད་པར་འཚང་རྒྱའི་དགོས་པ་ཡོད།།

ཅེས་གསུངས་ཏེ། འདིའི་མཐོང་སྣང་འཕེལ་བའི་རིམ་པ་འདི་རྣལ་འབྱོར་བའི་བརྩོན་འགྲུས་དང་ནི་དབང་པོའི་ཁྱད་པར་གྱིས་ཡིན་རྒྱུ་རེད། ཤིན་ཏུ་དབང་རྣོན་ཐོད་རྒལ་བའི་རིགས་ཟེར་བ་ཞིག་ཡོད། ལམ་གཞན་བར་ནས་བོར་ཏེ་ཐོད་རྒལ་དུ་མཆོངས་འགྲོ་བའི་རྣལ་འབྱོར་བརྩོན་པ་ཅན་དེ་འདྲ་བ་ལ། དབང་པོའི་ཁྱད་པར་གྱིས་ཤིན་ཏུ་དབང་རྣོན་ཐོད་རྒལ་བའི་རིགས་ལ་ལ་ཆོས་ཉིད་མངོན་སུམ་ནས་ཚད་ཕེབས་ལ་མཆོངས་འགྲོ་བ་དང་ཆོས་ཟད་དུ་མཆོངས་འགྲོ་བ་ཡང་ཡོད་པ་སོགས་གོང་འཕེལ་གྱི་སྣང་བ་འདི་དག་ཞག་གི་ངེས་པ་ལ་ལྷག་ཏུ་མི་ལྟོས་པར་བགྲོད་པ་མྱུར་བའི་འགྲོས་ཀྱིས་དུས་གཅིག་ལ་བཅད་འགྲོ་བ་ཡིན་པར་འདུག ཚིག་དོན་མཛོད་ཀྱི་ནང་ན་རྒྱུད་ཀྱི་དགོངས་པ་ལྟར་བརྩོན་འགྲུས་རབ་འབྲིང་ཐ་གསུམ་ཕྱེས་ཏེ་ཞག་གསུམ་བདུན་བཅུ་བཞིར་ཕྱེ་བ་དེ་འདྲའི་གསུང་སྟངས་ཤིག་ཀྱང་གཅིག་སྐྱེ་གཅིག་འགག་ཅེས་གསུངས་ཡོད། འདི་ནས་གསུངས་པ་དེ་ཉམས་མྱོང་དང་སྦྱར་ཏེ་གསུངས་པ་ཞིག་དང་འདྲ་བོ་ཡོད་རེད། སྐུ་ཤར་ཉམས་ཀྱི་སྣང་བ་རྫོགས། །ཞེས་གསུངས་ན། འདི་ལ་པད་འབྱུང་དང་བི་མའི་བཀའ་སྲོལ་གྱི་གསུང་སྟངས་མི་འདྲ་བ་གཉིས་ལྟ་བུ་ལས་། དོན་གྱི་གོ་བ་གཅིག་ཏུ་འབབ་པའི་གོ་ས་ཞིག་ཀྱང་ཡོད་པ་རེད། མདོར་ན་ཕྱིའི་སྣང་ཆ་ལྟད་མོའི་ཡུལ་མིག་འཕྲུལ་ལ་བལྟས་པ་བཞིན་རང་བཞིན་ཤར་བསྡད་པ་མ་ཡིན་པར། ནང་ཏིང་འཛིན་དག་པའི་འོད་གསལ་གྱི་སྒྲིབ་བྱེད་དག་རིམ་བཞིན་དུ། གསང་བ་སྤྱན་དང་མངོན་ཤེས་ལ་སོགས་པ་ཡང་དེ་བཞིན་དུ་འཆར་བ་ཡིན་པས་ན་སྤྲུལ་སྐུའི་སྣང་བ་ལམ་སྣང་དུ་བྱེད་པའི་ཉམས་སྣང་གོང་དུ་འཕེལ་བ་འདིའི་ཉམས་ལེན་ཚད་དུ་ཕྱིན་པ་ཡིན་ན་བར་དོ་མེད་པར་འཚང་རྒྱ་བའི་དགོས་པ་ཡོད་དོ་གསུངས། དེས་ཉམས་གོང་འཕེལ་བསྟན་པ་སོང་བའོ། །སྣང་བ་གོང་མ་གཉིས་ལ་འབད་པ་མཐར་ཕྱིན་ན་འོག་མ་གཉིས་ལ་རྩོལ་བ་ཆེར་མི་དགོས་པའི་གོ་དོན་ཡང་ཡོད་དོ། །ད་སྣང་བ་གསུམ་པ་ནི།

༣ གསུམ་པ་རིག་པ་ཚད་ཕེབས་ཀྱི་སྣང་བ།

ཨེ་མ་ཧོ།

གསུམ་པ་རིག་པ་ཚད་ཕེབས་སྣང་བ་ནི།།

ཞེས་མཚམས་སྦྱར་ཏེ་འདི་ལ་མདོར་བསྟན་པ་དང་། རྒྱས་པར་བཤད་པ་དང་། ཚད་ཕེབས་ཀྱི་ཡོན་ཏན་དང་དེའི་ལོག་རྟོག་བསལ་བ་སྟེ་གསུམ་ལས།

དང་པོ་མདོར་བསྟན་པ།

དབྱིངས་ཀྱི་སྣང་བ་ཐམས་ཅད་རྒྱས་ཐེབས་པའི།།

ས་ཆུ་མེ་རླུང་སྣང་བ་རང་དག་སྟེ།།

འོད་གསལ་སྣང་བ་མཐའ་དབུས་མེད་པ་རུ།།

རྣམ་སྣང་ལ་སོགས་རིགས་ཀྱི་ཡབ་ལྔ་དང་།།

དབྱིངས་ཕྱུག་ལ་སོགས་རིགས་ཀྱི་ཡུམ་ལྔ་སྟེ།།

རིགས་ལྔ་ཡབ་ཡུམ་ཟུང་ལྡན་ཚོམ་བུ་ནི།།

ལྔ་ཚན་དཀྱིལ་འཁོར་ནམ་མཁའ་གང་བར་འཆར།།

དེ་ལྟར་འོད་ཟེར་རང་ལུས་འབྲེལ་བར་སྣང་།།

འདིའི་དུས་འདུག་སྟངས་ལྟ་སྟངས་ལ་སོགས་ཀྱིས།།

ཆེད་དུ་མ་བསྒོམས་ན་ཡང་འབྲལ་བ་མེད།།

མི་འགྱུར་བས་ན་མ་བསྒོམས་ན་ཡང་ཆོག།

ཅེས་གསུངས་ཏེ། གཞི་འཛིན་པའི་རིག་པ་སྙིང་དབུས་ན་བཞུགས་པའི་གཞི་གནས་ཀྱི་རིག་པ་ཡེ་ཤེས་གསུམ་ལྡན་དེ་ཉིད། ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་དུ་ཤར་ཏེ། ཡུལ་སྣང་གི་རིག་པ་སྟོང་ཉིད་གང་དུའང་མ་ཕྱེས་པའི་དབྱིངས་ཀྱིས་སྣང་བ་རྒྱས་ཐེབས་ཤིང་དབྱིངས་རིག་གཉིས་མེད་དུ་གྱུར་པ་ན་འབྱུང་བཞི་རང་དག་འོད་གསལ་གྱི་སྣང་བ་མཐའ་དབུས་མུ་མེད་དུ་རིགས་རྐྱང་གི་ཚོམ་བུ་དང་རིགས་ལྔའི་དཀྱིལ་འཁོར་ཡོངས་སུ་རྫོགས་པ། འདིའི་དུས་སུ་ལོངས་སྐུའི་སྣང་བ་ལ་སྤྱོད་པའི་དུས་ཡིན་པས་ཐམས་ཅད་དག་པའི་ལམ་གྱི་སྣང་བ་རྩལ་རྫོགས་ཏེ་འཕེལ་བའི་ཚད་རྫོགས་པ་བཅོ་ལྔའི་ཟླ་བ་ཉ་གང་བ་ལྟ་བུ་དེ་ལ་རིག་པ་ཚད་ཕེབས་ཞེས་གསུངས་པའོ། །འདིའི་སྣང་བ་བཞི་པོ་འདི་ལ་ལུས་ཀྱི་བཞུགས་སྟངས་དང་མིག་གིས་གཟིགས་སྟངས། རླུང་རིག་ངང་གིས་དལ་དགོས་པ་སོགས་ཀྱི་གནད་དེ་ཚོ་མཐུན་པ་ཡིན་ཡང་། གོང་ནས་ཀྱང་ཞུས་པ་ལྟར་སྣང་བ་དང་པོ་གཉིས་ལ་ཞེན་འཛིན་དང་བྲལ་བའི་བརྩོན་པ་བསྐྱེད་དེ་སྦྱངས་པ་ན། སྣང་བ་ཕྱི་མ་རིག་པ་ཚད་ཕེབས་དང་ཆོས་ཉིད་ཟད་པ་གཉིས་ལ་རྩོལ་བ་ཆེན་པོ་བསྐྱེད་མི་དགོས་པར་ངང་གིས་འབྱུང་སྟེ་འོད་གསལ་དུ་གྲོལ་བ་དེ་ལྟ་བུ་ཡིན། འདིའི་གནད་གང་ལ་ཐུག་ཅེ་ན། དབྱིངས་རིག་དབྱེར་མེད་མངོན་དུ་གྱུར་བའི་ཚད་ལ་ཐོན་པས་ཡིན། ཚད་ལ་ཕེབས་ཞེས་པའི་ཕེབས་ཀྱི་སྒྲ་འདི། དེ་ལས་འདའ་བ་མེད་པའི་གོ་དོན་ཅན་ཡང་ཡིན་པས་ན་མི་འགྱུར་ཞིང་ངང་གིས་འབྱུང་བས་མ་བསྒོམ་ན་ཡང་ཆོག་གསུངས། ཞེས་ཚད་ཕེབས་མདོར་བསྟན་ནས་

གཉིས་པ་རྒྱས་པར་བཤད་པ།

དེ་ལ་ཡང་གསུམ་ལས།

༡༽ དང་པོ་ཕྱི་སྣང་བའི་ཚད་ཕེབས།

རྒྱས་པར་བཤད་ན་ཕྱི་ཡི་སྣང་བའི་ཚད།།

ནང་གི་ལུས་ཚད་གསང་བ་རིག་པའི་ཚད།།

གསུམ་གྱི།

ཞེས་གསུངས་ནས། འདི་ལ་ནང་གསེས་ཀྱི་ཕྱི་སྣང་བའི་ཚད་ཕེབས། ནང་ལུས་ཀྱི་ཚད་ཕེབས། གསང་བ་རིག་པའི་ཚད་ཕེབས་དང་གསུམ་ལས་དང་པོ་ནི།

དང་པོ་ཕྱི་ཡི་སྣང་བའི་ཚད།།

སྣང་བ་གང་ལའང་དབང་བསྒྱུར་ནུས་པ་ཡི།།

ཤེས་པ་གང་དུ་བཅུགས་པའི་བེམ་པོ་ཉིད།།

འགུལ་བར་ནུས་ཤིང་འབྱུང་བ་བཞི་ལ་ཡང་།།

ཐོགས་རྡུགས་མེད་པར་ཟང་ཐལ་བགྲོད་པའོ།།

ཞེས་གསུངས་ཏེ། འདི་ནས་ཕྱི་སྣང་བའི་ཚད་དང་ནང་ལུས་ཀྱི་ཚད་གསུངས་པ་འདི་ཐེག་མཆོག་མཛོད་ཀྱི་དགོངས་པ་དང་གསུང་སྒྲོས་ལྟར་ཏུ་བྱས་ནས་གསུངས་པ་རེད། དོན་གྱི་ཆ་ནས་བཤད་པ་ཙམ་མ་གཏོགས་ཕྱིའི་སྣང་བ་དག་པ་རྒྱུད་ལས་ཇི་ལྟར་འབྱུང་བ་བཞིན་དུ་ཕྱི་ལུས་ཀྱི་ཚད་དང་གཅིག་པ་ཡིན། རྣལ་འབྱོར་ལུས་ཀྱི་རྡུལ་ཕྲན་དག་པ་དང་མཉམ་དུ་ཕྱིའི་སྣང་བ་ཚད་ལ་ཕེབས་ཏེ་སྣང་བ་ལ་དབང་བསྒྱུར་ནུས་ཏེ་ཞིང་ཁམས་འོད་གསལ་དུ་རྫོགས་པ་ཡིན།

༢༽ གཉིས་པ་ནང་ལུས་ཀྱི་ཚད་ཕེབས།

གཉིས་པ་ནང་ལུས་ཚད་ལ་ཕེབས་པ་ནི།།

སྣང་བ་ཐམས་ཅད་རིགས་ལྔའི་ཞིང་དུ་མཐོང་།།

རིགས་ལྔའི་ཚོམ་བུའི་ཐུགས་ཀའི་འོད་གསལ་གྱི།།

སྐར་ཁུང་ཉིད་ནས་འོད་ཟེར་བྱུང་ནས་ཀྱང་།།

རང་གི་ལུས་ནང་སྙིང་གི་ཡི་གེ་ཨའི།།

རྣམ་པ་ཅན་ལ་འོད་གདངས་ཟུག་པར་འབྲེལ།།

རང་ལ་འོད་ཟེར་ཆེན་པོའི་དབང་ནོད་ཅིང་།།

རང་ཉིད་འོད་ཀྱི་པདྨ་ཆེན་པོའི་སྟེང་།།

འོད་ལུས་ཉིད་དུ་སྣང་ཞིང་མཛོད་སྤུ་ནས།།

འོད་ཟེར་སྣ་ལྔ་འདོམ་གང་གསལ་བར་སྣང་།།

སྤྱི་བོའི་གཙུག་ན་ཡེ་ཤེས་རླུང་ཉིད་ཀྱིས།།

བཏེགས་པའི་ཐིག་ལེ་མཁར་གཞོང་ཙམ་དགུའམ།།

ལྔ་ནི་བརྩེགས་མར་སྣང་ཞིང་།

ཞེས་གསུངས་ཏེ། གང་སྣང་བ་ཐམས་ཅད་རིགས་ལྔའི་ཞིང་དུ་སྣང་བའི་རིགས་ལྔའི་རྒྱལ་བའི་ཐུགས་ཀའི་འོད་ཟེར་རང་གི་སྙིང་དབུས་ཨ་ཡིག་གི་རྣམ་པ་ཅན་ལ་ཟུག་ནས་འོད་ཟེར་ཆེན་པོའི་དབང་བསྐུར་ནོད་པ་དང་ནི་མཛོད་སྤུའི་འོད་ཟེར་གསལ་བ་དང་། སྤྱི་གཙུག་ཡེ་ཤེས་ཀྱིས་རླུང་གིས་ཐིག་ལེ་བརྩེགས་མར་སྣང་བ་དང་རང་ལུས་ཞི་ཁྲོ་ལོངས་སྤྱོད་རྫོགས་པའི་སྐུར་སྣང་བ་སོགས་འབྱུང་བའོ། །དེ་འཕྲོས་གོང་གི་ཚིག་གི་མཇུག ལྔ་ནི་བརྩེགས་མར་སྣང་ཞིང་ཞེས་པའི་མཚམས་ནས།

ཡེ་ཤེས་ཀྱི།།

རླུང་རྣམས་ལག་སོར་ཚུད་པས་སོར་མོ་རྣམས།།

འོད་ལྔའི་ཕྲེང་བ་འཁྲིགས་ཤིང་འོད་རྩ་རུ།།

ཡེ་ཤེས་རང་གདངས་གསལ་བའི་རང་ལུས་ཀྱི།།

བ་སྤུའི་སྒོ་སོགས་ཕྱི་ནང་རྡུལ་ཕྲན་གྱི།།

ཁྱོན་ལས་ཆུང་བ་རེ་རེའི་ནང་ན་ཡང་།།

ཞིང་ཁམས་གྲངས་མེད་སངས་རྒྱས་ཚད་མེད་དང་།།

སེམས་ཅན་གྲངས་མེད་སྣང་ཞིང་དུང་ཁང་ན།།

ཁྲག་འཐུང་ཁྲོ་བོའི་ལྷ་ཚོགས་མངོན་སུམ་སྣང་།།

དེ་ཡི་གདངས་ལས་སྲིད་ཞི་མ་ལུས་པ།།

ཁྲོ་བོའི་ཞིང་ཁམས་ཉིད་དུ་མཐོང་བའོ།།

སྙིང་ནང་ཞི་བའི་ལྷ་ཚོགས་གསལ་བའི་གདངས།།

ཕྱི་རུ་ཤར་བའི་ཐད་སོ་ཐམས་ཅད་ནི།།

ཞི་བའི་དཀྱིལ་འཁོར་ཉིད་དུ་གསལ་བའོ།།

མདོར་ན་ལུས་ཀྱི་ཆ་ཤས་ཀུན་ན་ཡང་།།

རང་བཞིན་སྤྲུལ་པ་འགྲོ་འདུལ་སྤྲུལ་པ་དང་།།

སྣ་ཚོགས་སྤྲུལ་པ་བསམ་གྱིས་མི་ཁྱབ་བོ།།

ལྷུན་གྲུབ་སྒོ་བརྒྱད་འཆར་བའི་སྣང་བ་ཀུན།།

འདིའི་དུས་ལྷག་ཆད་མེད་པར་འཆར་བར་གསུངས།།

ཞེས་གསུངས་ཏེ། འདི་དག་ཚིག་དོན་མཛོད་ཀྱི་དགོངས་པ་ལྟར་ན། ལུས་ཚད་ཕེབས། སེམས་ཚད་ཕེབས། འབྲེལ་བ་ཆོད་པའི་ཚད་ཕེབས་དང་གསུམ་དང་། ད་དུང་དེའི་སྟེང་ཟད་པའི་འབྲས་བུ་འབྱུང་བ་རང་སར་དེངས་པའི་ཚད་ཕེབས་དང་བཞི་ཡིས་གསུངས་པ་རེད། ཡིན་ནའང་དོན་གྱིས་གཅིག་ལ་འབབ་ཁི། ལུས་གདོས་བཅས་དག་པས་རྩ་རླུང་རང་དག་ཏུ་གྱུར་ནས་ལག་སོར་འོད་ལྔའི་དྲྭ་བར་འབྲེལ་ཞིང་ལུས་ཕྱི་ནང་གི་རྡུལ་ཕྲན་གྱི་ཆ་ཐམས་ཅད་འོད་དུ་དག་སྟེ་རྡུལ་ཕྲན་རེ་རེའི་ཁྱོན་ན་ཡང་ཞིང་ཁམས་གྲངས་མེད་གདུལ་བྱ་གདུལ་བྱེད་དང་བཅས་པར་སྣང་། མངོན་ཤེས་དང་རྗེས་དྲན་སོགས་ཐོབ་སྟེ་ལྷུན་གྲུབ་སྒོ་བརྒྱད་ཀྱི་དག་དང་མ་དག་གི་སྣང་བ་ཐམས་ཅད་རང་སྣང་དུ་ཤར་བ་ཡིན་གསུངས་པ་རེད། དེ་ནས།

༣༽ གསུམ་པ་གསང་བ་རིག་པའི་ཚད་ཕེབས།

གསུམ་པ་གསང་བ་རིག་པ་ཚད་ཕེབས་ནི།།

ཀུན་རྟོག་བག་ཆགས་སྒྲིབ་པ་དག་ནས་ཀྱང་།།

ཆོས་དབྱིངས་དྲི་མེད་ཉིད་དུ་རང་གསལ་བའི།།

གཞན་གྱི་སེམས་རྣམས་ཤེས་པ་ལ་སོགས་པའི།།

མངོན་ཤེས་དྲུག་ཐོབ་ཐོགས་རེག་སྒྲིབ་པ་ཡིས།།

བར་དུ་ཆོད་པའི་ཕ་རོལ་གཞན་ཡུལ་དང་།།

སངས་རྒྱས་ཞིང་ཁམས་ཚད་མེད་མཐོང་བ་དང་།།

ཆོས་རྣམས་དུས་གཅིག་ཤེས་པའི་ཤེས་རབ་དང་།།

ཏིང་ངེ་འཛིན་གྱི་སྒོ་མོ་དཔག་མེད་ལ།།

མངའ་དབང་བསྒྱུར་སོགས་ཡོན་ཏན་བརྗོད་ལས་འདས།།

ཞེས་གསུངས་ཏེ། འདིའི་དུས་སུ་ལུས་སེམས་འབྲེལ་བ་ཆོད་པའི་ཚད་ལ་ཐོན་པ་ཡིན། ཀུན་ཏུ་རྟོག་པའི་སེམས་དང་ཡིད་དང་རྣམ་པར་ཤེས་པ་རྣམས་ནུབ། སྣང་བའི་སེམས་དང་སྟོང་བའི་སེམས་དག་སྟེ་མི་རྟོག་རང་རིག་གསལ་བའི་ཚོད་ལ་ཐོན་པས་ཤེས་རབ་དང་ཏིང་འཛིན་དཔག་མེད་ལ་མངའ་དབང་འབྱོར་བ་སོགས་ཀྱི་ཡོན་ཏན་བརྗོད་ལས་འདས་པ་ཐོབ་པ་ཡིན། འོན་ཀྱང་ཕྲ་བའི་རིག་པའི་ཆ་ལ་བག་ཉལ་གྱི་སེམས་སྐར་མདའ་འཕྲོ་བ་ཙམ་རེ་སྐད་ཅིག་འདྲ་རེར་ཤར་རྒྱུ་ཡོད་ཀྱང་དེས་ཕན་གནོད་མི་གཏུགས། འདིའི་སྐབས་སུ་འཁོར་འདས་ཀྱི་སྣང་ཆ་གཉིས་འཛིན་པའི་དུས་ཡིན་ཡང་འཁོར་བར་ཕྱིར་འཇུག་གི་ལུས་ངག་སེམས་ཀྱི་ཚོར་བ་མངོན་གྱུར་ལོག་ཟིན་པས་ཁམས་གསུམ་ལ་ལྡོག་རྒྱུ་ཡོད་པ་མིན་ནོ་གསུངས། འདི་དང་འབྲེལ་ནས་ཟད་པའི་འབྲས་བུ་འབྱུང་བ་རང་སར་རྫོགས་པའི་ཚད་ཕེབས་གསུངས་དུས། རིག་པ་ཚད་ཕེབས་ཀྱི་ཚད་ཐམས་ཅད་ཡོངས་སུ་རྫོགས་ཏེ་འབྲས་བུ་རང་དེངས་ཀྱི་ཚད་ལ་ཐོན་དུས་འབྲས་བུ་དངོས་དང་ཆ་འདྲ་བ་དཔེར་ན་ལོ་ལེགས་བསྡུས་ནས་ད་དུང་བང་མཛོད་དུ་བཅུག་མེད་ཀྱང་ཞིང་ཁར་ཡོད་པའི་སྟོན་ཁའི་ལོ་ལེགས་བསྡུ་རན་པ་ལྟ་བུ་དེ་ལ་ལོ་ལེགས་ཀྱི་སྒྲ་ཐོབ་པ་བཞིན་ནོ།།

གསུམ་པ་ཚད་ཕེབས་ཀྱི་ཡོན་ཏན་དང་དེའི་ལོག་རྟོག་བསལ་བ།

འདི་ནས་ཚད་ཕེབས་ཀྱི་ཡོན་ཏན་དང་དེའི་ལོག་རྟོག་བསལ་བ་གཉིས་བསྟན་པ་ནི།

དེ་ལྟར་ཚད་ལ་ཕེབས་པའི་ཡོན་ཏན་ནི།།

ཚེ་འདི་ཉིད་ལ་ཞིང་ཁམས་ཆོད་ནས་ཀྱང་།།

ལོངས་སྤྱོད་རྫོགས་པའི་སྐུ་རུ་གྲོལ་བར་འགྱུར།།

དེ་ཡང་གྲུབ་པའི་མཐའ་ནི་ཁ་ཅིག་གི།

བཤེས་གཉེན་བྱི་ལ་དང་མཚུངས་སྡེ་ཚོགས་ཀྱིས།།

རང་བཞིན་རྫོགས་པ་ཆེན་པོའི་སྣང་བཞི་ལ།།

མུ་སྟེགས་ཉི་མ་བལྟ་བའི་ལུགས་ཞེས་ནས།།

ཆོས་ལ་སྡང་བའི་རྩ་ལྟུང་ལ་སོགས་ལ།།

བག་ཚ་མེད་པར་འཇུག་པ་དེ་དག་ནི།།

ཡང་དག་ཆོས་སྤངས་དམྱལ་བ་མནར་མེད་འགྲོ།།

ཆོས་འདིའི་སྒོར་ཞུགས་སྐལ་ལྡན་བུ་རྣམས་ཀུན།།

འདི་རྣམས་ཀློང་ཆེན་མཛོད་ནས་གསུངས་པས་ན།།

ཨེ་མ་བློ་བདེ་མཛོད་ལ་ཐུགས་སྟོབས་བསྐྱེད།།

ཅེས་གསུངས་ཏེ། དེ་ལྟ་བུའི་རིག་པ་ཚད་ཕེབས་ལོངས་སྐུའི་སྣང་བའི་ཡོན་ཏན་ལ་ད་ལྟ་ནས་སྤྱོད་དུ་ཡོད་པ་འདིས་ཚེ་འདིར་ཞིང་ཁམས་ཆོད་པའམ་ཞིང་ཁམས་སྦྱངས་པ་མཐར་ཕྱིན་ནས་ད་ལྟ་ནས་ལོངས་སྐུར་གྲོལ་བའི་མཐུ་གྲུབ་པ་ཡིན། འོན་ཀྱང་འདི་ལ་གྲུབ་པའི་མཐའ་འམ་གྲུབ་མཐའི་སྡང་ཞེན་གྱིས་ལོག་པར་ཞུགས་སོང་བའི་བཤེས་གཉེན་གྱི་མྱིང་ཙམ་བཟུང་ཞིང་དོན་ཁྱིམ་པ་ཐ་ཤལ་ལས་ཀྱང་ཐུ་བའི་བྱི་ལའི་སྡེ་ཚོགས་དེ་འདྲ་བས། རང་བཞིན་རྫོགས་པ་ཆེན་པོའི་འོད་གསལ་སྣང་བཞིའི་མན་ངག་འདི་ལ། ཉི་མ་ལ་ལྷ་རུ་བཟུང་བའི་ཕྱི་རོལ་བ་ཉི་མ་ལ་བལྟ་བའི་ལུགས་རེད་ཅེས་ཆོས་ལ་སྡང་བའི་རྩ་ལྟུང་སོགས་ལ་བག་མི་ཚ་བའི་སྒོ་ནས་ཞུགས་པའི་ཆོས་སྤངས་པའི་ལས་ངན་བསགས་པའི་དམྱལ་བའི་ལམ་རྒྱུས་མཁན་དེ་ཚོ་སྙིང་རྗེའི་ཡུལ་རེད་གསུངས་པའོ། །དེས་ན་ཆོས་འདིའི་སྒོར་ཞུགས་པའི་སྐལ་ལྡན་གྱི་གདུལ་བྱ་ཐམས་ཅད་ཀྱིས་འདིའི་མན་ངག་འདི་ཚོ་ཀུན་ཏུ་བཟང་པོའི་ཐུགས་བཅུད། ཆོས་སྐུའི་བསྟན་པའི་གསང་མཛོད། མ་མཁའ་འགྲོའི་སྙིང་གི་དུམ་བུ། ཀློང་ཆེན་རྒྱལ་བ་གཉིས་པའི་གསུང་གི་མཛོད་ནས་ཕྱུང་བའམ། ཡང་ན་སྡེ་གསུམ་ཀློང་དགུའི་བཅུད་འདུས་གསང་འཛིན་དགའ་རབ་དཔའ་བོའི་གསང་མཛོད་ནས་ཕྱུང་བའི་རྒྱུད་དོན་དྲི་མ་མེད་པ་ཡིན་པས་ན་ཨེ་མ་ཞེས་ངོ་མཚར་བའི་ཚིག་གིས་རང་གི་མན་ངག་ལ་ཡིད་ཆེས་པར་བྱས་ཏེ་ཉམས་ལེན་འབྲས་བུར་བསྒྱུར་བའི་ཐུགས་སྟོབས་བསྐྱེད་མཛོད་ཅིག་གསུངས་ནས་གདམས་ངག་ཞལ་ཆེམས་སུ་གནང་བ་དང་བཅས་ཏེ་རིག་པ་ཚད་ཕེབས་བསྟན་པ་སོང་བའོ། །

༤ བཞི་བ་ཆོས་ཉིད་ཟད་པའི་སྣང་བ།

ཨེ་མ་ཧོ།

བཞི་པ་ཆོས་ཉིད་ཟད་པའི་སྣང་བ་ནི།།

འཆར་ཚུལ་མདོར་བསྟན་རྒྱས་པར་བཤད་པར་བྱ།།

ཞེས་ཟད་པའི་སྣང་བ་འཆར་ཚུལ་ལ་ཟད་ཚུལ་མདོར་བསྟན་པ་དང་། རང་བཞིན་རྒྱས་པར་བཤད་པ་དང་། ཐོབ་པ་རྣམ་པ་གཉིས་ཇི་ལྟར་འབྱུང་ཚུལ་བསྟན་པ་དང་གསུམ་ཡོད་པ་ལས།

དང་པོ་ཟད་ཚུལ་མདོར་བསྟན་པ།

ཚད་ཕེབས་ཟླ་བ་ཉ་གང་ལྟ་བུ་དེ།།

རང་གདངས་ཀ་དག་དབྱིངས་སུ་ཐིམ་ཚུལ་ནི།།

ཟླ་བ་མར་འགྲིབ་བཞིན་དུ་སྐུ་ཡལ་ནས།།

ཐིག་ལེ་ལ་ཐིམ་རིམ་པར་ནང་དབྱིངས་སུ།།

ཐིམ་ནས་ཅི་ཡི་ངོ་བོར་གྲུབ་པ་མེད།།

ཆོས་ཉིད་ཟད་པ་ཞེས་བྱ་དོན་གྱི་འབྲས།།

གཞོན་ནུ་བུམ་སྐུ་དེ་དུས་བརྙེས་པའོ།།

ཞེས་གསུངས་ཏེ། འདིའི་སྔོན་གྱི་རིག་པ་ཚད་ཕེབས་འདི་ཐེག་མཆོག་མཛོད་ལྟར་ན། ཕྱི་སྣང་བ། ནང་རང་ལུས། གསང་བ་རིག་པ་ཚད་ལ་ཕེབས་པ་གསུངས་ཡོད། ཚིག་དོན་མཛོད་ལྟར་ན། ལུས་ཚད་ཕེབས། སེམས་ཚད་ཕེབས། འབྲེལ་བ་ཆོད་པའི་ཚད་ཕེབས། ཟད་པའི་འབྲས་བུ་འབྱུང་བ་རང་དྭངས་བའི་ཚད་ཕེབས་དེ་ལྟར་གསུངས་སྲོལ་ཡོད། དེ་ཉིད་ཡེ་ཤེས་བླ་མར་ཚུར་བསྡུས་ཏེ་ལུས་ཚད་ཕེབས། སེམས་ཚད་ཕེབས། རིག་པ་ཚད་ཕེབས་དང་གསུམ་དུ་ཡང་བཀྲལ་རུང་བའི་ཚུལ་གྱིས་གསུངས། དོན་ཐམས་ཅད་པོས་སྒྲ་ཐལ་འགྱུར་རྩ་བའི་རྒྱུད་ཀྱི་དགོངས་དོན་ལྟར་བསྟན་པའི་ཚད་ལ་ཇི་ལྟར་ཕེབས་པའི་དཔེ་ཟླ་བ་ཉ་གང་ཆ་ཤས་ཡོངས་སུ་རྫོགས་པ་ལྟ་བུ་ཞིག་ཡིན། དེ་ལྟ་བུའི་ཟླ་བ་ཉ་གང་ཆ་ཤས་ཡོངས་སུ་རྫོགས་པ་ལྟ་བུའི་ཚད་ལ་ཕེབས་པ་དེ་ཉིད། རང་གདངས་རང་དབྱིངས་ཀ་དག་ཏུ་ཐིམ་ལུགས་དེ། སྣོད་བཅུད་ཆགས་གནས་འཇིག་སྟོང་བཞིའི་དཔེ་དང་ཡང་ཆོས་མཚུངས་པར་སྐུ་ཡལ་ནས་ཆོས་ཉིད་མངོན་སུམ་གྱི་སྐབས་ལ་སོགས་པར་སྣང་བའི་ཐིག་ལེའི་བར་དུ་ཕྱིར་ཐིམ། དེ་ཡང་ནང་དབྱིངས་ལ་ཐིམ་དུས། ཅིའི་ངོ་བོར་ཡང་གྲུབ་པ་མེད་པ་ཟེར་བ་མ་གཏོགས་སོ་སོའི་སྐྱེ་བོའི་སྒྲ་ཚིག་གིས་བརྗོད་དུ་མེད་ཅིང་སོ་སོའི་སྐྱེ་བོའི་བློས་དཔྱད་དུ་མེད་པར་ཕྱིན་པ་ལ་ཆོས་ཉིད་ཟད་པ་ཞེས་པའི་ཐ་སྙད་སྦྱར་བ་ཡིན། དོན་ཆོས་ཅན་གྱི་སྣང་བ་ཆོས་ཉིད་ཀྱི་ཀློང་དུ་ཟད་པ་ཞེས་བརྗོད་དུས། ཕྱི་གསལ་གྱི་ཡེ་ཤེས་ནང་དུ་བསྡུས་པའི་ནང་གསལ་གཞོན་ནུ་བུམ་སྐུ་ཞེས་པ་དེ་བརྙེས་པའོ། །

ཚད་ཕེབས་སྐུ་དང་ཡེ་ཤེས་ཀ་དག་གི།

དབྱིངས་སུ་ཐིམ་དུས་བྲི་གང་ཡེ་མེད་དེ།།

དཔེར་ན་མར་ངོའི་གནམ་སྟོང་དུས་སུ་ཡང་།།

ཟླ་བའི་སྣང་བ་བྲི་བར་སྣང་ན་ཡང་།།

དང་པོ་ལས་ནི་ཆེ་དང་ཆུང་ངུ་རུ།།

སོང་བ་མེད་ལྟར་རིག་པའི་སྣང་ཆ་རྣམས།།

ཡར་ལ་འཕེལ་དུས་ཆེ་རུ་མ་སོང་ཞིང་།།

མར་ལ་ཟད་དུས་ཆུང་ངུར་མ་སོང་ངོ་།།

རང་གདངས་གཞི་ལ་རང་ཐིམ་ལ་སོང་ཞིང་།།

ཤེལ་འོད་ནང་དུ་ནུབ་པ་ཇི་བཞིན་དུ།།

གང་བ་མེད་ཅིང་བྲི་བ་མེད་པའོ།།

དེ་ཡང་ཕྱིར་སྣང་ནང་དབྱིངས་ལ་ཐིམ་ནས།།

ཆོས་ཉིད་གང་དུའང་བསམ་བརྗོད་མེད་པ་ལ།།

གནས་དུས་ཆོས་ཟད་བརྡ་རུ་བཏགས་པ་སྟེ།།

སྣང་བ་མེད་པ་ཉིད་ལ་བལྟས་ནས་ཀྱང་།།

ཟད་དང་སྟོང་ཞེས་ཐ་སྙད་བཏགས་པ་ཡིན།།

ཞེས་གསུངས་ཏེ། ལར་མ་གཞི་བཤད་སྟངས་གཅིག་བྱེད་ན། ཚད་ཕེབས་ཀྱི་ཚད་མཐར་ཐུག་ཆོས་ཟད་གདོད་མའི་ནང་དབྱིངས་སུ་གཤེགས་དུས་རེད་ཅེས་པ་དང་། ཆོས་ཟད་ཀྱི་ཟད་པ་དེ་ཚད་ཕེབས་ནས་ཟད་པ་ཡིན་ཞེས་འཆད་ན་ཆོག་རྒྱུ་ཞིག་རེད། ཅིའི་ཕྱིར་ན་ཚད་ཕེབས་ཚད་ལ་ཕེབས་ཏེ་བཅོ་ལྔའི་ཟླ་བ་ཉ་གང་འདྲ་བའི་ཐོག་ཏུ་འདུག་འདུག་པ་ཞིག་ཡིན་ན་ཆོས་སྐུའི་དབྱིངས་སུ་ཆོས་ཟད་ཀྱི་སྣང་བ་མ་རྫོགས་པ་རེད། ཚད་ལ་ཕེབས་རྒྱུ་དེ་ཟད་པའི་སྟོད་ཆ་འདྲ་བོ་ཡིན། ཚད་ཕེབས་ཀྱི་སྐབས་ནས་ཕྱི་ཡུལ་ནང་ལུས་ཀྱི་གདོས་བཅས་ཟད་ནས་གཞི་ནས་ཚད་ལ་ཕེབས་པ་ཡིན་ན། འདི་ནས་ཀུན་གཞིའི་རྣམ་པར་ཤེས་པས་བསྡུས་པའི་སེམས་ཀྱི་ཆོས་རྣམས་ཀྱང་ཟད་དེ། སྒོ་གསུམ་གྱི་ཆོས་ཉིད་དུ་ཡོད་པའི་ཀུན་གཞིའི་ཆ་འཁོར་རྩ་མ་རིག་པ་དེ་དྲུངས་འབྱིན་ཟད་པར་སྦྱོང་བ་དང་ཆབས་གཅིག་ཏུ། འཁྲུལ་བའི་ཆོས་ལ་ལྟོས་འོང་ན། སྣང་བའི་འོད་གསལ་སྐྱེ་འཇིག་མེད་པ་དེ་ཆོས་ཉིད་དོན་དམ་དུ་གནས་པ་ཡིན་མོད་ཀྱང་། དེའི་སྐབས་སུ་ཆོས་ཉིད་གཉིས་ཀ་ཟད་པར་སྦྱོང་བས་ན་བཤད་ཚུལ་འདི་ལྟར་ན་ཆོས་ཉིད་ཀྱང་ཟད་པས་ཆོས་ཉིད་ཟད་པ་ཞེས་གསུངས་ན་ཆོག་གོ །

ཟད་ལུགས་རིམ་གྱིས་ཅིག་ཅར་གཉིས་ཡོད་པའི།།

རིམ་གྱིས་པ་ནི་སྣང་བ་བཞི་པོ་ཡང་།།

ཚད་དུ་ཕྱིན་པའི་དུས་སུ་ཟད་པའོ།།

ཅིག་ཅར་བ་ནི་ཆོས་ཉིད་མངོན་སུམ་གྱི།།

སྣང་བ་མཐོང་ནས་གོམས་པར་བྱས་པ་ཡིས།།

ཉམས་སྣང་གོང་འཕེལ་སྣང་བ་མ་སྐྱེས་པར།།

ཟད་པ་ཡོད་དེ་སྔོན་གྱི་ལས་འཕྲོ་ཅན།།

རེ་རེ་མ་གཏོགས་སྲིད་པ་ཙམ་ཡིན་ནོ།།

སྣང་བ་ཞེས་པ་དེ་སྔར་ལྷུན་གྲུབ་ཀྱི།།

སྣང་ཆ་ཐམས་ཅད་ནང་དུ་ཐིམ་དུས་སུ།།

ཀ་དག་སྤྲིན་མེད་ནམ་མཁའ་ལྟ་བུའི་ངང་།།

དར་གཅིག་གནས་པ་དེ་ལ་སྣང་བ་ཟེར།།

དངོས་པོ་མཚན་མ་ཁ་དོག་ལ་སོགས་ཀྱི།།

སྣང་བའི་སྣང་བ་ལྟ་བུ་མ་ཡིན་ནོ།།

ཞེས་གསུངས་ཏེ། དེ་ཡང་བློ་མཆོག་ཅིག་ཅར་བ་སྣང་བཞིའི་རིམ་པ་བརྒྱུད་མི་དགོས་པར་ཆོས་ཟད་གདོད་མའི་ནང་དབྱིངས་སུ་གཤེགས་འགྲོ་བ་ཡང་ཡོད་སྲིད་ཚུལ་བཤད་པ་སྔར་ལྟར་དུ་རེད། ད་དུང་དེའི་དོན་འདི་ནས་གསུངས་པ་འདི་འདྲ་ཞིག་རེད། དེས་ན་ལྷུན་གྲུབ་ཀྱི་སྣང་ཆ་ཡང་གཞི་ཐིམ་དུ་སོང་སྟེ་ཀ་དག་གི་སྣང་བ་ནམ་མཁའ་སྤྲིན་མེད་ལྟ་བུར་ངང་གིས་དག་པ་ལ་དར་གཅིག་གནས་པ་ཡིན་པས་ན་སྣང་བ་ཞེས་བཏགས་པ་རེད། འདིའི་སྣང་བ་དངོས་པོ་དང་མཚན་མར་སྣང་བའི་སྣང་བ་མ་ཡིན་པ་དེའི་ཕྱིར་ན་ཟླ་བ་ཡར་འཕེལ་དང་མར་འགྲིབ་ལ་དོན་གྱིས་ཆེ་ཆུང་མི་འགྲོ་བ་བཞིན་དུ། ཤེལ་འོད་རང་ཐིམ་གྱི་དཔེས་མཚོན་པའི་རང་གདངས་རང་ཐིམ་དུ་སོང་བ་ལ་བྲི་གང་ཡོད་པ་མིན། ཆོས་ཉིད་གང་དུའང་བསམ་བརྗོད་མེད་པ་ཅིའི་ངོ་བོར་ཡང་མ་གྲུབ་པ་ལ་མེད་པའི་ཐ་སྙད་ཟད་དང་སྟོང་པས་མཚོན་པར་བྱས་པ་ཡིན་ཡང་དོན་ལ་ཡོད་མེད་རྟག་ཆད་སོགས་ཀྱི་མཐའ་ལས་འདས་པའི་དོན་ཡིན་ནོ།། དེ་ཡན་གྱིས་ཆོས་ཟད་ཀྱི་སྣང་བ་མདོར་བསྟན་པ་སོང་ནས་རྒྱས་བཤད་ནི།

གཉིས་པ་རང་བཞིན་རྒྱས་པར་བཤད་པ།

གཉིས་པ་རང་བཞིན་རྒྱས་པར་བཤད་པ་ནི།།

ཞེས་མཚམས་སྦྱར་ནས།

དེ་ཡང་ཕྱི་ཡི་ཉམས་སྣང་འཕེལ་རྣམས་ཟད།།

ནང་གི་སྒྱུ་ལུས་ཆོས་ཟད་གསང་བ་ཡི།།

རྟོག་ཚོགས་སེམས་ཟད་འཁྲུལ་པའི་སྣང་བ་དག།

འཁོར་འདས་འདུ་ཤེས་བྲལ་ཞིང་དྲན་བསམས་ཀྱང་།།

རྗེས་མེད་སོང་ནས་འགྲོ་འདུག་འདུ་ཤེས་མེད།།

ཕྱི་ཡི་འབྱུང་བཞི་ཉི་ཟླའི་སྣང་བ་སོགས།།

རང་ཡུལ་རྗེས་མེད་སོང་ནས་འདི་ཡིན་ནོ།།

ཞེས་པའི་ཆོས་ཀྱི་མིང་ཙམ་མི་དམིགས་སོ།།

ཆོས་ཉིད་ཟད་པའི་སྣང་བ་ཞེས་ཀྱང་བྱ།།

གཟུགས་སྣང་མྱ་ངན་འདས་པ་ཞེས་བྱའོ།།

ཞེས་གསུངས་ཏེ། ཆོས་ཟད་ཀྱི་ཟད་པའི་རང་བཞིན་དེ་ཇི་ལྟར་ཡིན་ན། ཕྱིའི་ཉམས་སྣང་ཡར་འཕེལ་བའི་འོད་ལྔའི་སྣང་བ་སྐུ་དང་བཅས་པ་ཟད། ནང་འབྱུང་བཞི་ཚོགས་པའི་སྒྱུ་ལུས་གདོས་བཅས་ཀྱི་ཕུང་པོ་རྟོག་ཚོགས་སེམས་དང་སེམས་བྱུང་། སེམས་དང་། ཡིད་དང་། རྣམ་པར་ཤེས་པའི་ཚོགས་ཐམས་ཅད་ཟད། དེ་ཟད་པས་འཁོར་བའི་འཁྲུལ་སྣང་དག དག་པ་ཆོས་ཉིད་ཀྱི་ཉམས་སྣང་གི་ཡུལ་ཡང་ཟད་དེ་ཀ་དག་གི་ངང་ལ་གནས་པ་དེ་ལ་སྒྲ་ཐལ་འགྱུར་ལས། ཉམས་ཀྱི་སྣང་བ་སྟོང་ནས་ནི། །ལུས་ཟད་དབང་པོའི་ཡུལ་ཡང་ཟད། །རྟོག་ཚོགས་འཁྲུལ་བ་ལས་གྲོལ་ནས། །བརྗོད་གཞིའི་ཚིག་དང་བྲལ་བའོ། །ཞེས་གསུངས་སོ། །འཁོར་བའི་སྒོ་གསུམ་ཚོགས་པའི་ཆོས་ཉོན་མོངས་དང་བཅས་པ། དེ་སྦྱོང་བྱེད་འོད་གསལ་བསྒོམ་པའི་ཆ་ལམ་དང་བཅས་པ། བློ་ཡིད་དཔྱོད་ཅན་གྱི་སྒོམ་པ་ཡུལ་སྣང་དང་བཅས་པ་རང་ལོག་ཏུ་གྱུར་ཏེ། དེ་དུས་མི་དམིགས་པར་གྱུར་སོང་བ་རེད། འདི་ལ་མཚན་ཉིད་ཅིག་འཇོག་ན། སེངྒེ་རྩལ་རྫོགས་ལས། འདི་དུས་ཟད་པའི་མཚན་ཉིད་ནི། །བྱ་བྲལ་ནམ་མཁའ་ཇི་བཞིན་ནོ། །ཞེས་གསུངས་སོ། །ནམ་མཁའ་ཡང་ཕྱོགས་ཙམ་མཚོན་པའི་དཔེར་བཞག་པ་ལས་ནམ་མཁས་ཐམས་ཅད་ནས་ཐམས་ཅད་མཚོན་པ་མིན། ཐམས་ཅད་ནས་ཐམས་ཅད་མཚོན་པའི་དཔེ་ཞིག་བཞག་དགོས་ན། དོན་ཆོས་ཟད་རང་ཉིད་བཞིན་ནོ་ཞེས་པ་ལས་འོས་མེད། འདི་ལ་ཆོས་ཟད་ཅེས་བརྗོད་ན་ཆོག་ལ་གཟུགས་སྣང་མྱ་ངན་ལས་འདས་པ་བརྗོད་ནའང་དོན་གྱི་ཆ་ཤས་མཚོན་ཐུབ་པོ་ཞེས་གསུངས་ཡོད། ད་རུང་ཞིབ་པར་བཤད་ན་ཆོས་ཉིད་འདི་ལ་སྣང་བའི་ཆོས་ཉིད་དང་། སྟོང་པའི་ཆོས་ཉིད་གཉིས་སུ་ཕྱེས་ཆོག སྣང་བའི་ཆོས་ཉིད་ཟད་དེ་ཕྱི་ནང་གི་གདོས་བཅས་ཟད། དེ་ཟད་པའི་སྟོབས་ཀྱིས་རྩ་དང་རླུང་ཟད། དེ་ཟད་པས་སེམས་ལ་བརྟེན་པའི་བག་ཆགས། བག་ཉལ་གྱི་དྲི་མ་ཕྲ་མོ་ལྡང་རུང་གི་ཆ་དང་བཅས་པ་ཐམས་ཅད་ཀྱང་ཟད་དེ། རྒྱུན་གྱི་ཏིང་ངེ་འཛིན་ལ་གནས་པས་མི་ཚད་ཉིན་མཚན་ཆོས་ཉིད་ཀྱི་འཁོར་ལོ་ལས་མི་འདའ་བར་གྱུར་པ་དེ་ལྟར་ཡིན་ནོ། །

འདི་དུས་རྒྱུན་གྱི་ཏིང་ངེ་འཛིན་ལ་གནས།།

རྟག་ཏུ་ཆོས་ཉིད་ངང་ལས་མི་འདའ་ཞིང་།།

སྤྱན་དང་མངོན་ཤེས་ཆེན་པོར་དབང་བསྒྱུར་ནས།།

ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ཏུ།།

དེ་དུས་མངའ་དབང་བསྒྱུར་བ་ཞེས་ཀྱང་བྱ།།

ཀུན་གཞི་ཤེས་བྱའི་སྒྲིབ་པ་ཕྲ་མོ་ནི།།

དར་དཀར་ཡོལ་བ་ཙམ་གྱིས་བར་ཆོད་པ།།

མ་གཏོགས་སྒྲིབ་པ་མེད་པའི་ལམ་དུས་ཀྱི།།

ཆོས་ཉིད་ཟད་པའི་འབྲས་བུ་ཞེས་ཀྱང་བྱ།།

འདི་དུས་རྡོ་རྗེ་ལྟ་བུའི་ཏིང་འཛིན་གྱི།།

མཐུ་ཡིས་ཤེས་སྒྲིབ་ཕྲ་མོ་བསལ་བའི་ཚེ།།

སྒྲིབ་པ་མཐའ་དག་བྲལ་ནས་ནང་དབྱིངས་སུ།།

ཀ་དག་ཆོས་སྐུའི་ས་ལ་འཚང་རྒྱའོ།།

ཞེས་གསུངས་ཏེ། འདིའི་དུས་སུ་སྤྱན་དང་མངོན་ཤེས་ཁྱད་པར་ཅན་ལ་དབང་ཐོབ་པའམ་དབང་འབྱོར་ཏེ་ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ལ་དབང་བསྒྱུར་བ་ཡིན། ཡིན་ནའང་ད་དུང་ཤེས་སྒྲིབ་ཕྲ་མོ་ཀུན་གཞིའི་ཆ་ཞིག་དཔེར་བཞག་ན་དར་དཀར་གྱི་ཡོལ་བ་འདྲ་བ་ཞིག་ཡོད་པས་འདི་ལ་ལམ་གྱི་ཆོས་ཟད་ཀྱི་འབྲས་བུ་ཟེར་རོ། །དེ་ཡང་བསལ་བས་སངས་རྒྱས་ཀྱི་ས་སྒྲིབ་པ་ཐམས་ཅད་དང་བྲལ་བའི་ནང་དབྱིངས་ཀ་དག་གི་ཆོས་སྐུར་འཇུག་པ་རབ་ཏུ་ཞི་བ། དེ་ལ་འབྲས་བུའི་ཆོས་ཉིད་རང་སྣང་བ་ཞེས་སྟོང་པའི་ཆོས་ཉིད་ལ་བརྩི། རྩ་རླུང་རགས་པ་སེམས་སེམས་བྱུང་དང་བཅས་པ་ཟད་པས་མི་ཚད་སྐུ་དང་ཡེ་ཤེས་ཀྱི་སྣང་ཆ་ཚད་དུ་རྫོགས་པའང་དབྱིངས་སུ་ནུབ་སྟེ་ཀ་དག་གི་སྣང་བ་ལ་གནས་པ་ཡིན་པས་འདི་ལ་ཆོས་སྐུའི་སྣང་བ་ཞེས་པའི་ཐ་སྙད་ཅིག་བཏགས་ཆོག་པ་ཡིན་ནོ། །

ཀ་དག་ཉིད་ལ་སྐུ་དང་ཡེ་ཤེས་ཉིད།།

མེད་པར་འདོད་པའི་སྔར་དུས་རྫོགས་ཆེན་པ།།

ཁ་ཅིག་བྱུང་བ་ནོར་ས་ཆེན་པོ་སྟེ།།

ཕྱིར་སྣང་གདངས་ཀྱི་སྐུ་དང་ཡེ་ཤེས་ཉིད།།

ཤེལ་འོད་ནང་དུ་ལོག་པ་ལྟ་བུའི་ཆར།།

དེ་སྐད་གསུངས་པའི་དགོངས་པ་མ་ལོན་ངེས།།

མེད་ན་འགལ་བ་དུ་མ་འབྱུང་བའི་ཕྱིར།།

ཉེས་ཆ་དེ་འདྲ་ཁས་བླངས་མི་འོས་སོ།།

ཞེས་གསུངས་ཏེ། འདི་ཐལ་འགྱུར་རྩ་བའི་རྒྱུད་ལས། ཀ་ནས་དག་པའི་རང་བཞིན་ལ། །གཅིག་དང་དུ་མའི་གྲངས་ཟད་དེ། །ཞེས་དང་། དེའི་འཕྲོར། སྐུ་དང་ཡེ་ཤེས་མེད་པ་དང་། །ཆོས་རྣམས་ཟད་པའི་སར་ཕྱིན་པ། །འབྲས་བུའི་ཆོས་ཉིད་ཡིན་པར་འདོད། །ཅེས་གསུངས་པའི་ཚིག་ཕྱི་མ་གསུམ་ལ་གོ་ནོར་དུ་སོང་སྟེ། འབྲས་བུའི་ཀ་དག་གི་ས་ལ་ཐོན་དུས་ཅི་ཡང་མེད་པ་སྐུ་དང་ཡེ་ཤེས་ཀྱང་མེད་པ་དེ་འདྲ་ཞིག་ལ་གོ་བ་ལེན་མྱོང་བ་བྱུང་མྱོང་མོད་ཀྱང་། དེ་ནི་གོ་ནོར་ཁོ་ན་སྟེ། ཇི་ལྟར་ཡིན་ན་འདིའི་སྐབས་སུ་ཀ་དག་གི་ནང་དབྱིངས་གཅིག་དང་དུ་མ་ལས་འདས། ཡོད་དང་མེད་པའི་ཕྱོགས་འཛིན་ཞིག་སོང་བའི་རྒྱ་ཆད་ཕྱོགས་ལྷུང་དང་བྲལ་བ་ཡིན་པ་དེ་ལ་མེད་དང་ཟད་པའི་ཐ་སྙད་སྒྲས་བརྗོད་བརྡ་ཡིས་མཚོན་པའི་ཚིག་ཅིག་དོན་གྱི་ཚབ་བྱེད་དུ་གསུངས་པ་རེད་མ་གཏོགས། ནང་དབྱིངས་ཀ་ནས་དག་པའི་ལྷུན་གྲུབ་འདུས་མ་བྱས་པའི་ཆོས། དབྱིངས་དང་ཡེ་ཤེས་གཉིས་མེད་ཙམ་དུའང་མེད་པའི་ཆད་མཐའ་ཁས་བླང་ན། ཕྱིས་མེད་གཏན་བརླག་ཏུ་འགྲོ་བས་ན་འདུས་མ་བྱས་ཆེན་པོ་ཡིན་པ་དང་འགལ་བ་དང་ནི། ནང་དབྱིངས་སྐུ་དང་ཡེ་ཤེས་ཀྱི་འཆར་གཞི་ལས་སེམས་ཅན་གྱི་དོན་འབད་མེད་དཔག་བསམ་ཤིང་དང་ཡིད་བཞིན་ནོར་བུ་ལྟར་འབྱུང་བ་དང་། གཞི་དབྱིངས་དག་པ་མཐར་ཕྱིན་པའི་ཐོག་མའི་ཀུན་བཟང་། སེམས་ཅན་དང་སངས་རྒྱས་ལ་ལམ་སྟོན་པའི་ཐུགས་རྗེ་དང་མཛད་པ་ཕྲིན་ལས་ཀྱི་ཆ་ཐམས་ཅད་དང་འགལ་བའི་སྐྱོན་ཡོད་པས་གོ་ནོར་དེ་འདྲ་བ་མི་འགྱུར་བར་གཟོབ་ཅིག་ཅེས་གསུངས་པའོ། །ཀུན་མཁྱེན་ཆོས་རྗེས་ཀྱང་དེ་བཞིན་དུ་གསུངས་ཡོད།

གསུམ་པ་ཐོབ་པ་རྣམ་པ་གཉིས་ཇི་ལྟར་འབྱུང་ཚུལ་བསྟན་པ།

འདི་ནས་ཚད་ཕེབས་ཡོལ་ནས་ཆོས་ཟད་ལ་ཉེ་བའི་སྐབས་སུ་སྐྱེ་འཇུག་གཉིས་ལ་དབང་ཐོབ་པའི་ཐོབ་པ་རྣམ་པ་གཉིས་ཇི་ལྟར་འབྱུང་ཚུལ་དེ་བསྟན་བཤད་གཉིས་ཀྱི་སྒོ་ནས་གསུངས་ཡོད་པ་ལས།

༼ཀ དང་པོ་མདོར་བསྟན་པ།

དེ་ལྟར་ཟད་དུས་ཐོབ་པ་གཉིས་འབྱུང་སྟེ།།

སྐྱེ་འཇུག་གཉིས་ལ་དབང་ཐོབ་སྐད་ཅིག་ལ།།

འཚང་རྒྱར་འདོད་ན་འཚང་ནི་རྒྱར་ཡོད་ལ།།

འགྲོ་དོན་འཁོར་བ་མ་སྟོངས་བར་དུ་ནི།།

མཛད་པར་འདོད་ཀྱང་རང་དབང་ཐོབ་པའོ།།

ཞེས་གསུངས་ཏེ། དེའི་དུས་སུ་སྐྱེ་འཇུག་གཉིས་ལ་དབང་ཐོབ་པ་ཡིན་པས་སྐུ་ལུས་དེ་ཉིད་མི་སྣང་བར་གདོད་མའི་ནང་དབྱིངས་ལ་འཇུག་པས་འཚང་རྒྱ་བ་དང་། སྐུ་དེ་ཉིད་ཀྱིས་འགྲོ་དོན་འཁོར་བ་མ་སྟོང་གི་བར་མཛད་པ་ལ་རང་དབང་ཐོབ་པའི་དུས་རེད་ཅེས་པའོ།།

༼ཁ གཉིས་པ་རྒྱས་པར་བཤད་པ།

དེ་ནས་རྒྱས་བཤད་པ་ལ་གཉིས་ལས།

༼༡ དང་པོ་སྐྱེ་བ་ལ་དབང་ཐོབ་པའི་ཚུལ།

སྐྱེ་བར་དབང་ཐོབ་འཕོ་བ་ཆེན་པོའི་སྐུར།།

བཞེངས་ཏེ་འགྲོ་དོན་དཔག་མེད་མཛད་པ་ཡིན།།

འཕོ་བ་ཆེན་པོའི་སྐུ་ཡི་བཞེངས་ལུགས་ནི།།

སྣང་བ་ཐམས་ཅད་རིམ་གྱིས་ཟད་པའི་ཚེ།།

ལག་པའི་སོར་མོ་ལྔ་པོ་འོད་དཀྱིལ་ན།།

བཀྲམ་བཀྲམ་སྣང་བར་ཤེས་པ་གཏད་པའི་ཚེ།།

སྣང་བ་དེ་ལས་ཚུར་ལོག་སྣོད་བཅུད་ཀྱི།།

རྟེན་དང་བརྟེན་པ་ཆུ་ཟླ་ལྟ་བུར་མཐོང་།།

རང་ལུས་མེ་ལོང་ནང་གི་གཟུགས་བརྙན་ལྟར།།

ཡེ་ཤེས་སྒྱུ་མའི་སྐུ་རུ་རང་སྣང་ཞིང་།།

ཕྱི་ནང་ཟང་ཐལ་འབྱུང་བཞིས་གནོད་པ་དང་།།

བྲལ་ཞིང་རྡོ་རྗེ་ལྟ་བུའི་སྐུ་ཐོབ་བོ།།

ཞེས་གསུངས་ཏེ། འདིའི་གོ་བ་ལེན་ཕྱོགས་ཀྱི་འཕོ་ཆེན་གྱི་སྐུར་བཞེངས་པ་ལ་སྐྱེ་བ་ལ་དབང་ཐོབ་པ་མ་གཏོགས་འཇུག་པ་ལ་དབང་མ་ཐོབ་པ་མ་རེད། སྐྱེ་འཇུག་གཉིས་ཀ་ལ་དབང་ཐོབ་པ་འདྲ་བ་ཡིན་པ་ལ་ཐུགས་བསྐྱེད་དང་དགོས་པའི་དབང་གིས་སྐུ་དེས་འགྲོ་དོན་མཛད་པར་དགོངས་ན་འཕོ་ཆེན་གྱི་སྐུར་བཞེངས་པ་ཡིན། འཕོ་གང་ལ་འཕོས་ཏེ་ཆེན་པོའི་སྐུར་ཇི་ལྟར་གྱུར་ཞེ་ན། འབྱུང་བཞི་འདུས་པའི་གདོས་བཅས་རྡུལ་ཕྲན་འོད་དུ་དག་པ་དེ་ཉིད་ཡེ་ཤེས་སྒྱུ་མའི་སྐུ་རུ་འཕོས་པའི་འཕོ་བ་ཆེན་པོ། ཅིའི་ཕྱིར་ཆེ་ན། སྐྱེ་འཆིའི་འཇིགས་པ་དང་བྲལ། འབྱུང་བཞིས་གནོད་པས་མི་ཚུགས་པའི་རྡོ་རྗེའི་སྐུ་ཡིན་པས་ཆེན་པོའོ། །དེ་ཡང་ལག་སོར་གྱི་འོད་ལ་ཤེས་པ་གཏད་དུས་དེ་ཡིས་འཇུག་ལྡོག་བྱེད་པའི་ས་མཚམས་གོང་དུ་སྨོས་པ་ལྟར། ཚད་ཕེབས་ཟད་པར་འཇུག་པའི་མཚམས་ནས་ཡིན་ལ། སྐྱེ་འཇུག་དངོས་ཟད་པའི་རྗེས་ཐོག་དེ་མ་ཐག་ཏུ་ཡིན་གསུངས་པའོ། །དེ་ལྟར་སྐྱེ་བ་ལ་དབང་ཐོབ་པས་རྡོ་རྗེའི་སྐུ་བརྙེས་པའི་ཚད་དང་མཚན་གཞི་ནི།

ལུས་དེ་རང་གིས་ཕྱི་ནང་ཟང་ཐལ་མཐོང་།།

གཞན་གྱིས་མིག་མ་དག་པས་སྔར་དུས་ཀྱི།།

ལུས་ཙམ་མ་གཏོགས་ཟང་ཐལ་དུ་མི་མཐོང་།།

དཔེར་ན་སློབ་དཔོན་པད་འབྱུང་སྐུ་ཉིད་ལ།།

མུ་ཁྲི་བཙན་པོའི་ཕྱག་གིས་རེག་པའི་ཚེ།།

སྟན་ལ་ཐུག་པའི་ལོ་རྒྱུས་ཇི་བཞིན་ནོ།།

ཞེས་གསུངས་ཏེ། འཕོ་ཆེན་གྱི་སྐུར་གྱུར་དུས། རང་ལུས་འོད་ཀྱི་རང་བཞིན་ཡེ་ཤེས་ཀྱི་ལུས་ཕྱི་ནང་སྒྲིབ་གཡོགས་དང་བྲལ་བའི་ཟང་ཐལ་དུ་རང་གིས་མཐོང་ལ། གཞན་དག་པའི་ལྷ་མིག་ཅན་གྱིས་ཀྱང་དག་པར་མཐོང་བ་དང་། མ་དག་པའི་མིག་སྔར་སྔོན་གྱི་ལུས་དེ་ལས་དག་པ་དངོས་སུ་མི་མཐོང་བ་ཡིན། དཔེར་ན་སློབ་དཔོན་པདྨ་འབྱུང་གནས་ཀྱི་སྐུ་ལ་ལྷ་སྲས་མུ་ཁྲི་བཙན་པོས་བསྙབས་དུས། སྐུ་ལུས་ཟང་ཐལ་འཇའ་གཟུགས་སུ་གྲུབ་ཡོད་པས་ལྷ་སྲས་ལག་པ་བཞུགས་གདན་ལ་ཐུག་པའི་ལོ་རྒྱུས་བཞིན་ཡིན་ནོ་གསུངས། དེ་ཡང་ལྷ་སྲས་ལས་དག་པས་ཟང་ཐལ་ཡིན་པར་ཚོར་དུ་བཏུབ་པའི་རྫུ་འཕྲུལ་དང་གྲུབ་རྟགས་མཇལ་བ་ཡིན་པ་མ་གཏོགས། ལས་མ་དག་པའི་སྣང་བར་དེ་ཡང་མཇལ་རྒྱུ་མ་རེད་སྙམ། སྔོན་མ་དུས་རབས་སྔོན་མའི་དུས་སྐེད་ཀྱི་དུས་ངན་ཚེས་དུས། བླ་མ་སྐྱེས་ཆེན་དམ་པ་ཚོར་འཐབ་རྩོད་ཟེར་བ་ཞིག་བརྒྱབ་སྟེ་འོ་བརྒྱལ་གཏད་དེ། ཁྱོད་ལ་འཕུར་རྒྱུ་ཡོད་ན་ནམ་མཁར་ད་འཕུར་སོགས་ཟེར་དུས། ཐམས་ཅད་འཕུར་རྒྱུ་མེད་པའི་རྫུ་འཕྲུལ་གྲུབ་རྟགས་མེད་ནི་རྐྱང་རྐྱང་ཅི་ལ་ཡིན་མོད་ཀྱང་། ལས་མ་དག་པ་ཞིག་གིས་འཕུར་ཡང་མཇལ་མི་ཐུབ་པ་དང་ནི། ངོ་མ་བཤད་ན་ལས་ཀྱི་ལྷག་མ་སྦྱང་བའི་ཚུལ་ཙམ་མམ། ཡང་ན་ལས་ངན་སྨོན་ལོག་གི་མཐུ་བདོ་བའི་སྐྱེས་བོ་མ་རུངས་པ་དེ་དག་གི་ལས་དབང་རྫོགས་ཆེད་དང་ནི། ངན་འབྲེལ་འཁོར་བ་མཐའ་ཅན་ལ་དགོངས་ཏེ་འཐབ་རྩོད་ཀྱི་འོ་བརྒྱལ་དེ་རིགས་དང་དུ་བཞེས་ཀྱིན་ཡོད་ནའང་ཆོག་ལ། ཡང་གཅིག་བྱས་ན་ཐུགས་འོད་གསལ་ཆོས་དབྱིངས་ཀྱི་ཀློང་དུ་ཐིམ་སྟེ་སྔར་ཞིག་ནས་གདོད་མའི་མགོན་པོའི་ཐུགས་ཀློང་ངམ། ཡང་ན་བདེ་བ་ཅན་གྱི་ཞིང་དང་ནི། ཟངས་མདོག་དཔལ་རིར་གུ་རུའི་ཐུགས་ཀློང་། དེ་མིན་ན་དགའ་ལྡན་ཡིད་དགའ་ཆོས་འཛིན་ན་རྒྱལ་ཚབ་མ་ཕམ་མགོན་གྱི་མདུན་དྲུང་རྗེ་རིན་པོ་ཆེ་བཞུགས་ཡོད་ས་ལྟ་བུར། དགོངས་པ་གཏད་ཚར་ནས་སྐུ་ལུས་ཀྱི་སྙིགས་མ་ཙམ་ཞིག་ལས་ལུས་ཨེ་ཡོད་ཅི་ཤེས། རྫོགས་ཆེན་སྙིང་ཐིག་གི་བླ་མ་བརྒྱུད་པ་རིག་འཛིན་དགའ་རབ་རྡོ་རྗེ་ནས་པད་འབྱུང་དང་བི་མ་ལྕེ་བཙུན་སེངྒེ་དབང་ཕྱུག་ཡན་ཆད་ལ་འོད་ལུས་འཕོ་ཆེན་གྱི་སྐུར་བཞེངས་པ་ཤ་སྟག་བྱོན་པ་རེད། དེའི་རྒྱུ་མཚན་སྐྱེ་འཇུག་གཉིས་ལ་རང་དབང་ཐོབ་སོང་བས་སྐད་ཅིག་དེ་ཉིད་ལ་ཀ་དག་གི་ནང་དབྱིངས་སུ་ཞུགས་ནས་ལྷག་མེད་དུ་སངས་རྒྱ་ནའང་རྒྱ་ཆོག་ཆོག་དང་ནི། སྐུ་དེས་འཁོར་བ་མ་སྟོང་གི་བར་དུ་འགྲོ་དོན་མཛད་ནའང་མཛད་ཆོག་ཆོག་དེ་ལྟ་བུ་ཡིན་ནོ། །

གཞན་ཡང་སྤྲུལ་པ་བསམ་གྱིས་མི་ཁྱབ་པ།།

དངོས་སུ་བཀྱེ་ནས་རིགས་དྲུག་སོ་སོ་རུ།།

འགྲོ་དོན་དཔག་དུ་མེད་པ་མཛད་པ་དང་།།

གཞན་ཡང་གང་ལ་གང་འདོད་སྤྲུལ་ནས་ཀྱང་།།

འགྲོ་དོན་ལྷུན་གྲུབ་དཔག་མེད་བྱེད་པ་དང་།།

དེའི་ཚེ་བེམ་པོར་རིག་པ་བཅུག་ན་ཡང་།།

འགུལ་དང་སྒྲ་སྐད་འབྱིན་ཅིང་པདྨ་དང་།།

དཔག་བསམ་ཤིང་དང་ནོར་བུ་ལ་སོགས་པར།།

རིག་པ་བཅུག་པས་ཆོས་ཀྱི་སྒྲ་བྱུང་ནས།།

སེམས་ཅན་ཐམས་ཅད་སྨིན་པར་མཛད་པ་དང་།།

ཟས་གོས་ལ་སོགས་འདོད་དགུའི་ཆར་བབས་ནས།།

སེམས་ཅན་བདེ་སྐྱིད་དཔལ་ལ་འགོད་པའོ།།

ཞེས་གསུངས་ཏེ། སེམས་ཅན་ཐམས་ཅད་སྐྱེ་ཤི་གཉིས་ཀྱི་ཁར་བརྒྱུད་པ་ཤ་སྟག་ཡིན་པ་རེད། འདི་ནས་སྐྱེ་བ་ལ་དབང་ཐོབ་པས་སྐྱེ་འཆི་རྒུད་པ་དང་བྲལ་བའི་སྐྱེ་མེད་གཉུག་མའི་རྒྱལ་ས་འཆི་མེད་རྟག་པ་དམ་པའི་མི་འགྱུར་རྡོ་རྗེའི་གཉུག་མ་ཡེ་ཤེས་ཀྱི་སྲོག་ལ་དབང་ཐོབ་པས་འཕོ་ཆེན་སྒྱུ་མ་ཆུ་ཟླ་ལྟ་བུའི་སྐུ་དེས་འགྲོ་དོན་མཛད་པ་དང་ནི། གཞན་ཡང་སྤྲུལ་པ་བྱེ་སྟོང་འབུམ་ཕྲག་བསམ་གྱིས་མི་ཁྱབ་པ་ཇི་སྙེད་ཆོས་ཀྱི་དབྱིངས་དང་ནམ་མཁས་གཞལ་བར་ཕ་མཐའ་ཡས་པའི་ཞིང་དང་གདུལ་བྱའི་ཁམས་ལ། དེ་སྙེད་འདུལ་བྱེད་བསམ་གྱིས་མི་ཁྱབ་པ་རུ་སྤྲུལ་པ་དངོས་སུ་བཀྱེ་སྟེ་འགྲོ་བ་རིགས་དྲུག་སོ་སོའི་གནས་ལ་གང་འདུལ་གྱི་འགྲོ་དོན་དཔག་མེད་མཛད་པ་དང་། འཕོ་བའི་ནུས་སྟོབས་དང་རྫུ་འཕྲུལ་ལ་མངའ་བརྙེས་པའི་སྟོབས་ཀྱིས་བེམ་པོར་རིག་པ་བཅུག་ནའང་དེ་ལ་སྲོག་ཞུགས་ཏེ་འགུལ་བ་དང་སྒྲ་སྐད་འབྱིན་པ་སོགས་འབྱུང་ཞེས་གསུངས་པའོ། །མདོར་ན་སྐྱེ་འཇུག་ལ་རང་དབང་ཐོབ་པའི་ཆོས་ཟད་ཀྱི་དགོངས་པར་བསྙེགས་ནས་མངོན་སངས་རྒྱས་པ་དེའི་མཐུ་ལས་པད་མ་དང་དཔག་བསམ་གྱི་ཤིང་ཡིད་བཞིན་གྱི་ནོར་བུ་སོགས་ལས་གང་འདོད་ཀྱི་ཆོས་ནོར་ལ་སོགས་པ་འབྱུང་བར་མ་ཟད། རྒྱལ་བས་དང་པོ་ཐུགས་བསྐྱེད་པ་ནས་མཐར་སངས་རྒྱས་ཀྱི་བར་གྱི་མཛད་པ་ཐམས་ཅད་སྙིང་རྗེ་ཆེན་པོའི་གཞན་དབང་དུ་གྱུར་བའི་སྟོབས་ཀྱིས་འགྲོ་བའི་དོན་ཉག་གཅིག་ལས་མ་འདས་པས། གཅིག་ཏུ་མ་ངེས་གང་ལ་གང་འདུལ་གྱི་སྤྲུལ་པས་ཕྲིན་ལས་མཛད་པ་ནི། བྱ་དང་རི་དྭགས་གྲོང་ཁྱེར་སློང་མོ་བ། །གང་ལ་གང་འདུལ་དེ་ལ་དེར་མཐུན་དུ། །སྣ་ཚོགས་གཟུགས་ཀྱིས་འགྲོ་བ་འདུལ་བར་ཤོག །ཅེས་གསུངས་པ་ལྟར། གདུལ་བྱའི་ཆུ་སྣོད་ཇི་སྙེད་ལ་སྤྲུལ་བའི་ཟླ་གཟུགས་དེ་སྙེད་དུ། །ཇི་ལྟར་བེེཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་གསུངས་པ་ལྟར་རེད། །སོ་སོ་སྐྱེ་བོའི་ལས་མ་དག་པའི་སྣང་ངོར་ཐམས་ཅད་མ་དག་པ་རུ་ཤར་བ་ཡིན། དགེ་སློང་ལེགས་སྐར་གྱིས་བཅོམ་ལྡན་འདས་ཀྱི་ཞབས་འབྲིང་མི་ལོ་ཉེར་ལྔ་ལ་བྱས་ཀྱང་ཡོན་ཏན་ཏིལ་འབྲུ་ཙམ་ཡང་མ་མཐོང་བ་ལྟ་བུ་ཡིན་ནོ། །དེས་ན་རྒྱལ་དང་དེ་སྲས་ཀྱི་སྤྲུལ་པ་གང་ན་སུ་བཞུགས་ཇི་ལྟར་འགྲོ་དོན་མཛད་བཞིན་ཡོད་སུས་ཤེས། སྤྱིར་བཤད་ན་སྣང་སྲིད་དག་པ་རབ་འབྱམས་ཡེ་ཤེས་སྒྱུ་མའི་རང་གཟུགས་དོན་ལ་མྱ་ངན་ལས་འདས་པར་མ་གྱུར་བའི་ཆོས་ཤིག་གང་ན་ཡོད། འོན་ཀྱང་དེ་མ་རྟོགས་པའི་འཁྲུལ་བ་རང་མཚན་པར་གྱུར་པའི་སྐབས་འདི་ལའང་རང་བློ་ནང་དུ་ཚུར་བསྐོར་ཏེ་དག་སྣང་སྦྱང་བ་ནས་མགོ་བཙུགས་ན། རང་སྣང་དོན་གྱི་འོག་མིན་འཕོ་མེད་ཆོས་སྐུའི་རྒྱལ་ས་བརྙེས་ཐུབ་པ་ཡང་། ཐག་རིང་རྒྱང་ནས་འཚོལ་རྒྱུ་ཞིག་མ་ཡིན་པར་རང་གི་ཤེས་རྒྱུད་སྐད་ཅིག་མ་འདིའི་སྟེང་ནས་འཁོར་འདས་གཉིས་ཀྱི་སོ་མཚམས་འབྱེད་པ་ཡིན་པས། གཞི་ལམ་འབྲས་གསུམ་གང་ནས་བཤད་ཀྱང་རྩ་བ་འཁྲུལ་དང་མ་འཁྲུལ་གྱི་གཞི་རྩ་རང་རྒྱུད་ནས་རྩད་གཅད་རྒྱུ་ལ་ཐུག་ཡོད་དོ། །དེ་ཡན་གྱིས་སྐྱེ་འཇུག་གཉིས་ལ་དབང་ཐོབ་པའི་ནང་ནས་སྐྱེ་བ་ལ་དབང་ཐོབ་པ་བཤད་པ་སོང་སྟེ།

༼༢ གཉིས་པ་འཇུག་པ་ལ་དབང་ཐོབ་པའི་ཚུལ།

གཉིས་པ་འཇུག་པ་ཉིད་ལ་དབང་ཐོབ་པའི།།

ཀ་དག་གདོད་མའི་དབྱིངས་སུ་འཇུག་ཁ་མར།།

དུས་དེར་གཞན་དོན་རླབས་ཆེན་མཛད་འདོད་ན།།

སེམས་ཅན་སུམ་སྟོང་ཙམ་ལ་རིག་པ་ཉིད།།

བཅུག་པའི་མོད་ལ་ཐམས་ཅད་དུས་གཅིག་ཏུ།།

གྲོལ་བའི་མཐུ་ཆེན་ཐོབ་སྟེ་སྲིན་བུ་ཡང་།།

འོད་དུ་ཡལ་ནས་ན་བུན་ནམ་མཁའ་ལ།།

ཡལ་བ་བཞིན་དུ་ཀ་དག་ནང་དབྱིངས་སུ།།

མི་སྣང་སྐད་ཅིག་ཉིད་ལ་གཤེགས་ནས་ཀྱང་།།

སྐུ་དང་ཡེ་ཤེས་འདུ་འབྲལ་མེད་པར་བཞུགས།།

དེ་ཡང་སྐྱེ་འཇུག་དུ་མས་འཇིག་རྟེན་ཁམས།།

རྡུལ་གྱི་གྲངས་མཉམ་འགྲོ་བ་ཐམས་ཅད་ཀྱི།།

དོན་ལ་སྐད་ཅིག་ཙམ་ཡང་མི་གཡེལ་བར།།

འགྲོ་དོན་རྒྱུན་མི་འཆད་པར་མཛད་པའོ།།

ཞེས་གསུངས་ཏེ། འཇུག་པ་ལ་དབང་ཐོབ་པ་དེས་ཀ་དག་གདོད་མའི་ནང་དབྱིངས་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པའི་ནང་གསལ་གསང་བའི་མཛོད་ཆེན་པོར་ཞུགས་རན་ཁར་ཇི་ལྟར་མཛད་ཅེ་ན། རང་སྣང་གི་བར་དོར་སེམས་ཅན་སུམ་སྟོང་ཅིག་ཅར་དུ་གྲོལ་བར་མཛད་ནས་ནང་དབྱིངས་སུ་འཁྱིལ་ཏེ་སྐུ་དང་ཡེ་ཤེས་འདུ་འབྲལ་མེད་པར་བཞུགས་པ་ཡིན། འདི་ཉན་ཐོས་ཞི་བར་མནལ་ཏེ་འགྲོ་དོན་རྒྱུན་ཆད་པ་དེ་ལྟ་བུ་མ་ཡིན་པར་སྐྱེ་འཇུག་ལ་རང་དབང་ཐོབ་པའི་སྟོབས་ཀྱིས། སླར་ཡང་ཀ་དག་གི་དབྱིངས་ལས་ཐུགས་རྗེས་ཚུར་གཡོས་ཏེ་གཟུགས་སྐུ་གཉིས་ཀྱིས་རྡུལ་སྙེད་མཁའ་མཉམ་གྱི་འགྲོ་བའི་དོན་ལ་སྐད་ཅིག་ཙམ་ཡང་མི་གཡེལ་བར་འགྲོ་དོན་རྒྱུན་མི་ཆད་དུ་མཛད་པར་བསྟན་པའོ། །

དེ་ལྟར་རྡུལ་ཕྲན་དེངས་ནས་འོད་དུ་གསལ།།

སྐྱེ་འཇུག་གཉིས་ལ་རང་དབང་ཐོབ་པ་རྣམས།།

ལྷུན་གྲུབ་ཐོད་རྒལ་ཁོ་ནའི་ཁྱད་ཆོས་ཡིན།།

ཁྲེགས་ཆོད་ཉིད་ཀྱིས་ལུས་ནི་རྡུལ་ཕྲན་དང་།།

སེམས་ཀྱང་ཆོས་ཉིད་ངང་དུ་དེངས་ནས་ཀྱང་།།

ཀ་དག་སར་གྲོལ་ཙམ་ལས་མེད་ཕྱིར་རོ།།

སྐྱེ་དང་འཇུག་པ་གཉིས་ལ་དབང་བ་འདི།།

ཆོས་ཉིད་ཟད་པའི་ནང་དབྱིངས་འཇུག་ཁ་མར།།

འཐོབ་པའི་ཚུལ་ནི་ཀུན་མཁྱེན་མཛོད་ནས་གསུངས།།

དེ་ལྟར་ལྷུན་གྲུབ་སྣང་བཞི་མཐར་ཕྱིན་ནས།།

བརྩོན་འགྲུས་རབ་རྣམས་ཚེ་འདི་ཉིད་ལ་ཡང་།།

ཡང་དག་རྫོགས་པའི་སངས་རྒྱས་ཞེས་བྱ་བ།།

ཕུང་པོ་ལྷག་མ་མེད་པར་འཚང་རྒྱའོ།།

ཞེས་གསུངས་ཏེ། འུ་བུ་ཚོར་གནའ་དུས་སུ་རྫོགས་པ་ཆེན་པོའི་རྣལ་འབྱོར་བ་འཇའ་ལུས་པ་མང་པོ་བྱོན་མྱོང། འཇའ་ལུས་སུ་མང་པོ་འགྲུབ་སོང་བ་རེད་ཟེར་བ་ཞིག་ཡོད་རེད། དེང་གི་དུས་སམ་དུས་རབས་ཉི་ཤུ་དང་ཉེར་གཅིག་པ་དག་གི་ནང་དུའང་འཇའ་ལུས་པ་རེ་གཉིས་ང་ཚོའི་ཆོས་བརྒྱུད་འདིའི་ནང་ནས་ཡིན་ན་བྱོན་མྱོང་ཡོད་པ་རེད། སྐུ་གདུང་ཇེ་ཆུང་དུ་སོང་འདུག་ཟེར་བ་མང་པོ་རང་རེད་མོད། འདིའི་རྫོགས་ཆེན་གྱི་ཁྲིད་གཞུང་ངོ་མའི་ནང་ལྟར་ཡིན་ན། འདི་ནས་གསུངས་པ་བཞིན་ལུས་རྡུལ་ཕྲན་དུ་དེངས་པ་དང་། རྡུལ་ཕྲན་དྭངས་ནས་འོད་དུ་གཤེགས་པ་གཉིས་ཀྱི་ཁྱད་པར་ལས། ཡོངས་གྲགས་ཀྱི་འཇའ་ལུས་འགྲུབ་ཅེས་པའི་ཐ་སྙད་དེ་ལུས་རྡུལ་ཕྲན་དུ་དེངས་པ་ལ་ཐོགས་སོང་བ་འདྲ་མོ་ཞིག་ཡིན། ངོ་མ་བཤད་ན་འཕོ་ཆེན་གྱི་སྐུར་བཞེངས་པ་དེ་འཇའ་ལུས་ཡིན་ཏེ་ཡེ་ཤེས་སྒྱུ་མའི་སྐུ་འོད་ལུས་ཡེ་ཤེས་ཀྱི་སྙིང་པོ་ཅན་ཡིན་པས་སོ། །ལུས་ཟག་མེད་རྡུལ་ཕྲན་དུ་དེངས་པ་ལ་འཇའ་ལུས་ཟེར་སྲོལ་ཡོད་སོང་བ་རེད། འཕོ་ཆེན་གྱི་སྐུར་བཞེངས་པ་དེ་འདི་ནས་གསུངས་པ་ལྟར་ཐོད་རྒལ་ཁོ་ནའི་ཁྱད་ཆོས་སམ་རྫོགས་ཆེན་གསང་བ་མན་ངག་སྡེའི་ཡང་གསང་བླ་ན་མེད་པའི་ཁྱད་ཆོས་ཡིན་གསུངས་པའོ། །དེའི་སྟབས་ཀྱིས་སྣང་བྱེད་སྒོའི་ཁྱད་པར་དང་སྣང་བ་འོད་ཀྱི་ཁྱད་པར་ལ་སོགས་པ་ཁྲེགས་ཆོད་ལས་ཀྱང་ཁྱད་དུ་འཕགས་པའི་འཕགས་ཆོས་བདུན་བཞག་པ་རེད། ཁྱད་པར་ངོ་མ་མཐར་ཐུག་གི་འབྲས་བུ་འོད་ལུས་འཕོ་ཆེན་གྱི་སྐུར་བཞེངས་པ་འདིའི་སྟེང་ན་ཡོད་པ་ཡིན། ཡིན་ནའང་དང་པོ་ཉིད་ནས་བཟང་ཤོས་ཐོད་རྒལ་རྐྱང་རྐྱང་མི་བསྒོམ་པར། ཁྲེགས་ཆོད་ཀྱི་ལམ་ཅིའི་ཕྱིར་བསྟན་པ་ཡིན་སྙམ་ན། འདི་ཁྲེགས་ཆོད་དམན་པ་ཡིན་པས་དམན་སར་བཅད་པའི་དོན་མ་རེད། འོད་གསལ་ཐོད་རྒལ་གྱི་གནད་འདི་མ་ཚང་ན་ལུས་དབང་ཡོངས་སུ་རྫོགས་པའི་སྐྱེས་བུ་འདྲ་བ་ཞིག་མི་འགྱུར་བས་མན་ངག་སྡེའི་ནང་གསེས་ལའང་སྐོར་ཚོ་རང་རང་གི་ཁྱད་ཆོས་གསུངས་ཡོད་པ་ལྟར། འགའ་རེ་སྙིང་དང་འདྲ་བ་དང་འགའ་རེ་མིག་དང་འདྲ་བ་ཡིན་ཞེས་གསུངས་ཡོད་པས་སོ། །དེས་ན་གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ། འབྲས་བུ་སྐུ་དང་ཡེ་ཤེས་དབྱིངས་ཡེ་ཟུང་འཇུག་གི་ངོ་བོར་འཚང་རྒྱ་བའི་གནད་ཀྱི་དགོངས་དོན་གཅིག་ལ་འདུས་ནི་རེད། ཀ་དག་གི་ནང་དབྱིངས་ལ་སངས་རྒྱས་པའི་ཚེ་ཇི་འདྲ་བ་ཞིག་ཡིན་ན། ཕྱི་ཤེས་བྱ་གཟུང་བའི་བློ་དང་སྙེམས་བྱེད་ཀྱི་འཇུག་པ་ཐམས་ཅད་ཞི། དེ་དང་མཉམ་དུ་ནང་ཤེས་བྱེད་བློ་ཡི་འཛིན་སྟངས་ཀུན་རྫོབ་པའི་རྣམ་པ་ཐམས་ཅད་ཀྱང་སྐྱེ་འགག་མེད་པའི་ངང་དུ་རང་ཞིར་གྱུར་ཏེ། ཁམས་གསུམ་གྱི་ས་བས་བསྡུས་པའི་ཉེར་ལེན་ལས་བྱུང་བའི་འཁོར་བའི་ཆོས་ཐམས་ཅད་འགག་པའི་སྟེང་། གང་འགག་གཞིའི་དེ་ཁོ་ན་ཉིད་གང་ཡིན་པ་དབྱིངས་དང་རིག་པ་གཉིས་མེད། རྟག་དང་ཆད་པའི་མཐར་མ་ལྷུང་བའི་སོ་སོ་རང་གི་རིག་པ་རང་བྱུང་ཡེ་ཤེས་ཆེན་པོའི་སྐུས་མངོན་དུ་མཛད་པ་ཡིན་ནོ། །དེ་ཡང་དབུ་མ་འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེག་པས་ཞི་སྟེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགག་པ་སྟེ་སྐུ་ཡིས་མངོན་སུམ་མཛད། །ཞེས་གསུངས་པ་དེའི་སྦས་དོན་གབ་པའི་ཡང་འབྱེད་རྫོགས་ཆེན་གྱི་སྐབས་ནས་གསལ་བོར་བསྟན་པ་དེ་འདི་ཉིད་ཡིན། འདི་སྟོང་ཆད་ནམ་མཁའ་ལྟ་བུ་ཞིག་མིན་པས་ཆོས་སྐུའི་དུས་ན་ནང་གསལ་ཐིམ་ལ་མ་རྨུགས་པ་གཞོན་ནུ་བུམ་སྐུར་ནང་དབྱིངས་སུ་འཆར་བར་བསྟན་པ་འདི། ཐམས་ཅད་མཁྱེན་པའི་ཡེ་ཤེས་ཟབ་ཅིང་གཏིང་དཔོག་དཀའ་བ། དེ་ཟབ་ཞི་ཆེས་ཕྲ་རྒྱལ་བ་ཉིད་ལས་གཞན་སྣང་ལ་མི་མངོན་པར་བཞུགས་པའི་རྒྱུ་མཚན་གྱིས་དཔེ་གནམ་སྟོང་གི་ཟླ་བ་དབྱིངས་སུ་ནུབ་པ་ལ་བཞག་པ་ཡིན། ཟླ་བའི་ཆ་ཤས་ནམ་ཡང་འཕེལ་འགྲིབ་མེད་པ་བཞིན་དུ་གཟུགས་སྐུ་རྣམ་མཁྱེན་ཕྱི་གསལ་དུ་སྣང་བའི་གདངས་དེ། དུས་ནམ་ཡང་རྒྱུན་ཆད་མེད་པ་ཡིན། ཡིན་ན་ཡང་དེ་ལྟ་བུའི་ཆོས་ཉིད་དེ་ཇི་བཞིན་པར་བཤད་དགོས་ན། དེ་ཉིད་མངོན་སུམ་དུ་མཐོང་བའི་མཉམ་བཞག་ལས་འདའ་བ་མེད་པ་དག་གི་སྤྱོད་ཡུལ་ཡིན་པས་ས་བཅུའི་དབང་ཕྱུག་གིས་ཀྱང་སྤྱོད་ཡུལ་དུ་མ་གྱུར་པ་ཡིན་ཚུལ་གསུངས་ཡོད་པས། སོ་སོ་སྐྱེ་བོའི་ངག་ཚིག་གིས་ཇི་བཞིན་བརྗོད་མི་ཐུབ་པ་དེ་ལྟར་ཡིན། ཡིན་ནའང་འོད་གསལ་རང་བྱུང་གི་ཡེ་ཤེས་ཆོས་ཉིད་བདེ་བར་གཤེགས་པའི་སྙིང་པོ་ཡེ་ནས་འཕོ་འགྱུར་བྲི་གང་དང་བྲལ་བ་ཡིན་པའི་ཕྱིར་ན་ལས་དང་སྐལ་བ་ལྡན་པ་ཚོས། སྨིན་བྱེད་ཀྱི་དབང་ཐོབ། སྡོམ་དང་དམ་ཚིག་མ་ཉམས་པར་གྲོལ་བྱེད་ཁྲིད་ཀྱི་རིམ་པ་གདམས་པ་མན་ངག་གི་གནད་དང་བཅས་པ་བླ་མའི་དགོངས་བརྒྱུད་ཀྱི་བྱིན་རླབས་སྙིང་དབུས་སུ་འཕོས་པ་དང་ཆབས་གཅིག བརྩོན་པ་རབ་མཆོག་ཏུ་གྱུར་པའི་སྙིང་རུས་རང་ཉིད་ལ་ཡོད་ན་འཇའ་ལུས་འཕོ་ཆེན་གྱི་འོད་སྐུར་ཚེ་འདིར་བཞེངས་རྒྱུ་ཡང་འགྲུབ་རྒྱུ་གཏན་ནས་མེད་པའི་གནའ་སྔ་མོའི་ལྷ་སྒྲུང་བཤད་པ་ལྟ་བུ་ཞིག་མ་ཡིན་པའི་ཡིད་ཆེས་དང་དཔའ་གདེང་བསྐྱེད་ཆོག་པ་ཡིན། འདིའི་སྐྱེ་འཇུག་གཉིས་ལ་དབང་ཐོབ་པའི་ས་མཚམས་ངོ་མ་དེ་ཆོས་ཟད་ཀྱི་མཚམས། ཀ་དག་གདོད་མའི་ནང་དབྱིངས་སུ་གཤེགས་རན་ཁར་ཡིན་པ་ཀློང་ཆེན་མཛོད་བདུན་དང་ཤིང་རྟ་སྐོར་གསུམ་ཐམས་ཅད་ཀྱི་ནང་ནས་དངོས་ཤུགས་བརྒྱུད་གསུམ་གྱི་ཁྱད་པར་མ་གཏོགས་བསྟན་ཡོད་ལ། འདི་ནས་ཀུན་མཁྱེན་གྱི་མཛོད་ལས་གསུངས་ཡོད་ཅེས་གསུངས་པ་འདི་གཙོ་བོ་ཐེག་མཆོག་མཛོད་ལ་གསུངས་པ་རེད། ཚིག་དོན་མཛོད་ལས་གསུང་ཚུལ་གྱི་ཁྱད་པར་ཅུང་ཟད་རེ་མ་གཏོགས་བསྟན་བྱའི་ནང་དོན་གཅིག་པ་ཡིན།

དེའི་ཕྱིར་ཐུན་མོང་ཐེག་པ་གཞན་དག་ལས།།

ཁྱད་པར་འཕགས་པའི་ཟབ་ལམ་འདི་ཉིད་ལ།།

ཕྲད་པའི་དུས་འདིར་བརྩོན་པའི་ཉམས་ལེན་ལ།།

འབད་པར་གྱིས་ཤིག་སྐལ་ལྡན་སྙིང་གི་བུ།།

སངས་རྒྱས་འཐོབ་པར་འདོད་ན་འདི་ལ་འབོད།།

འདི་འདྲ་བསྐལ་པ་བྱེ་བར་རྙེད་པར་དཀའ།།

སྐལ་དམན་ལོག་ལྟ་ཅན་ལ་མ་སྟོན་པར།།

རྟག་ཏུ་ཙིཏྟ་རིན་ཆེན་གཏེར་དུ་སྦོས།།

ཞེས་གསུངས་ཏེ། གོང་ནས་བསྟན་པ་ཇི་བཞིན་དུ་རྫོགས་ཆེན་གསང་བ་སྙིང་ཐིག་གི་ཡང་གསང་མན་ངག་སྡེའི་གདམས་ཁྲིད་འདི་ལ་ཉམས་ལེན་བརྩོན་པ་བསྐྱེད་ན་ལོ་དང་ཟླ་བ་མང་པོ་ཞིག་མི་དགོས་པར་ལུས་རྡུལ་ཕྲན་དུ་དག སེམས་ཆོས་ཉིད་དུ་དྭངས་ནས་ཚེ་འདིར་འཇའ་ལུས་འཕོ་ཆེན་རྡོ་རྗེའི་འོད་སྐུར་བཞེངས་ཏེ། སྐྱེ་འཇུག་གཉིས་ལ་རང་དབང་ཐོབ་པས་མཐའ་ཡས་གདུལ་བྱ་མཁའ་མཉམ་གྱི་འགྲོ་བའི་ཚོགས་ལ་དཔག་ཡས་མཛད་པ་རྒྱ་མཚོའི་འགྲོ་དོན་བྱེད་ནུས་པའི་ཁམས་གསུམ་ཆོས་ཀྱི་རྒྱལ་པོའི་མངའ་དབང་ལ་བདག་གིར་བྱ་ཆོག་པའི་ཆོས་གདམས་པ་ཟབ་མོ་འདི་ལྟ་བུ་དང་འཕྲད་དུས་ནོར་བུའི་ནོར་ངོ་ཆོད་པར་བྱས་ཏེ། ཆོས་གདམས་པ་གཞན་ལ་འགྲམ་ཆུ་མི་ལྡང་བར་ལས་ཀྱིས་འབྲེལ་བའི་གདམས་པ་འདི་ལ་བརྩོན་པའི་ཉམས་ལེན་མ་འཕྱུགས་པར་འབད་པ་གྱིས་ཤིག་ཅེས་གསུངས་པ་རེད། འབོད་ཅེས་པ་འདི་གཙོ་བོར་ཡུལ་གྱི་འཕྲལ་སྐད་སྐུལ་ཚིག་ཏུ་སྦྱོར་བའི་བརྡ་ཆད་ཀྱིས་གསུངས་འདུག ཡིན་ན་ཡང་། འདི་འདྲའི་གསང་བའི་མན་ངག་ཀུན་ཏུ་བཟང་པོའི་ཐུགས་བཅུད་རྗེན་ཅེར་ཏུ་བསྟན་པ་འདི་སྔོན་བསགས་ཀྱི་ལས་སྨོན་བཟང་པོ་སྔོན་དུ་མ་སོང་ན་བསྐལ་བ་བྱེ་བར་རྙེད་དཀའ་བ་ཡིན་པས་ན་ཟབ་དོན་གསང་བའི་རྒྱ་རྟགས་ཅན། བསྟན་ན་བློར་མི་ཤོང་བའི་སྐལ་དམན་ལ་མ་སྟོན་མ་གཏོགས། དེ་དག་གི་རྒྱུད་ལོག་ལྟས་བསླད་པའི་དབང་གིས་མཐའ་མེད་ངན་འགྲོར་ལྟུང་བ་ཡིན། གསང་བའི་མན་ངག་ཁྱབ་བརྡལ་དུ་བསྟན་ན་ཟབ་ཆོས་ཀྱི་བྱིན་རླབས་ཡལ་འགྲོ་བས་མི་ཚད་རང་ཉིད་ལའང་བཀའ་སྲུང་གི་འཁུ་ལྡོག་གིས་མི་འདོད་སྣ་དགུ་འོང་བ་ཡིན། ཉམས་ལེན་གྱི་དྲོད་ཚད་ལྡན། གདུལ་བྱ་སྣོད་ལྡན་རྙེད་ཅིང་རྒྱུད་ལས་འབྱུང་བའི་མཐུན་རྐྱེན་ཡོངས་མ་རྫོགས་ཀྱི་བར། སུ་གཅིག་ལའང་ཚིག་གི་ཕྱོགས་ཙམ་རླུང་ཕྱོགས་ཙམ་དུའང་མ་བསྒྲགས་ལ་རྟག་ཏུ་ཙིཏྟ་རིན་ཆེན་སྙིང་ལ་སྙིང་གི་གཏེར་ཏུ་སྦོས་ཤིག་ཅེས་གསུངས་སོ། །དེ་ཡན་གྱིས་འདིའི་ཁྲིད་རིམ་དྲུག་པ་ཉམས་ལེན་སྣང་བཞིའི་འཆར་ཚུལ་བསྟན་གྲུབ་པ་ཡིན། སྤྱིར་རྫོགས་པ་ཆེན་པོའི་སྐབས་ལ་ཐུན་མོང་གི་ལམ་ལྔ་ལས་ཁྱད་པར་དུ་གྱུར་པའི་ལམ་ལྔ་བཤད་ཡོང་དུས། ཀུན་མཁྱེན་འཇིགས་གླིང་གི་ཡོན་ཏན་མཛོད་ལས། མདོར་ན་དབྱིངས་ཀྱི་ལམ་ནི་ཆོས་ཉིད་ཅིག །རིག་པའི་ལམ་ནི་ཤེས་རབ་ཁྱད་པར་ཅན། །འོད་གསལ་ལམ་ནི་སྒྲོན་མ་རྣམ་པ་གཉིས། །ཁྲེགས་ཆོད་ལམ་ནི་ཤར་གྲོལ་དུས་མཉམ་སྟེ། །ཐོད་རྒལ་ལམ་ནི་དབྱིངས་དང་རིག་པ་ཡིན། །ཞེས་གསུངས་ནས་ལམ་ལྔ་དམིགས་བསལ་བ་ཞིག་གསུངས་ཡོད། དེས་ན་དབྱིངས་ཟབ་ཞི་སྤྲོས་བྲལ་འོད་གསལ་འདུས་མ་བྱས་པ་སྟོང་པ་ཆེན་པོའི་ཡུལ་ལ། གསལ་བ་འོད་ཀྱི་སྣང་བ་དང་ཡེ་ཤེས་རིག་པའི་སྤྱོད་ཡུལ་དུ་གྱུར་པ་དེ། ཡེ་ནས་ལྷུན་གྲུབ་བདེ་བར་གཤེགས་པའི་སྙིང་པོ། རང་བཞིན་འོད་གསལ་བའི་དབྱིངས་ལ་ངོས་འཛིན་གནང་བ་ཡིན། དེའི་ངེས་དོན་དེ་གཞི་དབྱིངས་ཁྱད་ཆོས་དྲུག་ལྡན་གྱི་གནས་ལུགས་ཇི་བཞིན་པར་རྟོགས་ཏེ། དེའི་ངང་ལས་མ་གཡོས་ན་རང་དང་ཆོས་ཉིད་གཅིག་པའི་ལམ་མ་ནོར་བ་ལ་གོམས་པའི་ལྟ་སྒོམ་དུ་མ་རོ་གཅིག་ཏུ་ལ་བཟླ་བའི་རྣལ་འབྱོར་བ་ཡིན་གསུངས་སོ། །ཐོད་རྒལ་རྐྱང་བའི་ཆོས་སྐད་དུ་འདི་ལ་གཞི་ལ་གནས་པའི་དག་དབྱིངས་གསུངས་ཡོད། དེ་ཉིད་རིག་པའི་ལམ་གྱིས་ཤེས་རབ། ཤེས་རབ་དེ་ལའང་གཞལ་ཡུལ་དབྱིངས་ཀྱི་རང་བཞིན་ཤེས་པའི་ཤེས་རབ། ཁྱད་པར་ཅན་གྱི་ཆོས་ཉིད་ཤེས་པའི་ཤེས་རབ། ཡུལ་ཡེ་ཤེས་ཀྱི་མཚན་ཉིད་ཀྱང་རྣམ་པར་མི་རྟོག་པའི་ཤེས་རབ་ཀྱི་རིག་ཆས་ཆོས་ཐམས་ཅད་སྐད་ཅིག་གིས་ཁོང་དུ་ཆུད་པ། ཤེས་རབ་ཆེན་པོའི་སྐད་ཅིག་ལ། །ཆོས་ཀུན་ཁོང་དུ་ཆུད་པ་འཆང་། །གསུངས་པ་སྒྲ་ཇི་བཞིན་དུ་འོད་གསལ་གྱི་ལམ་དངོས་རྒྱང་ཞགས་ཆུའི་སྒྲོན་མ་དང་ཐིག་ལེ་སྟོང་པའི་སྒྲོན་མ་གཉིས་ལ་བརྟེན་ཏེ། སྒྲོན་བཞི་དང་སྒྲོན་དྲུག་གི་རྣམ་བཞག་འབྱུང་བ་ཡིན་ན། དེའི་རྩ་བ་གང་ལ་ཐུག་ན་ཤེས་རབ་རང་བྱུང་གི་སྒྲོན་མའི་ངོ་བོ་དང་གཅིག་པའི་ཁྲེགས་ཆོད་ཀྱི་ལམ། ཀ་དག་གདོད་མའི་ཡེ་ཤེས་གཞི་གྲོལ་གཉུགས་མའི་གཤིས་སུ་ཤར་གྲོལ་དུས་མཉམ་པའི་བདག་ཉིད། དབྱིངས་ཀ་དག་རིག་པ་གསལ་འགྲིབ་བྱ་རྩོལ་ཐམས་ཅད་དང་བྲལ་བའི་ཤེས་རབ་རང་བྱུང་གི་སྒྲོན་མའི་ངོ་བོ། ཇི་ལྟ་བའི་མཁྱེན་ཆ་དེ་ལས་རྩལ་ཡུལ་ཤེས་ཀྱི་ཤེས་རབ་རྣོ་མྱུར་ཅན་འཆར་བ་དེ་ཇི་སྙེད་མཁྱེན་པའི་མཁྱེན་ཆ། གདངས་རིག་པ་རྡོ་རྗེ་ལུ་གུ་རྒྱུད་རྒྱུ་མིང་འབྲས་བུ་ལ་ཐོགས་སོང་བ་མུ་ཏིག་བསྟར་ལ་བརྒྱུས་པའམ་གསེར་སྐུད་མཁའ་ལ་འཕངས་པ་ལྟ་བུ་དེ་ཡིན་ན། སྤྱིར་ན་སྒྲོན་མ་རྣམ་བཞི་རྟེན་དང་བརྟེན་པའི་སྒོ་ནས་བཞག་པ་རེད་མོད། ལམ་གྱི་ངོ་བོའམ་སྙིང་པོ་ངོ་མ་དེ་དབྱིངས་ཀྱི་ར་བར་རིག་པའི་གདངས་འཛིན་པ་ལ་འདུས་པ་ཡིན། འདིའི་སྒྲོན་མ་ཞེས་པའི་དབྱེ་གཞི་གཅིག་ལ་དབྱེ་སྒོ་ཐ་དད་པའི་སྟེང་ནས་བཤད་ན་སྒྲོན་མ་དྲུག་ཏུ་ཕྱེ་དུས་ཡོད་དེ། གནས་པ་གཞི་ཡི་སྒྲོན་མ། ཙིཏྟ་ཤ་ཡི་སྒྲོན་མ། དཀར་འཇམ་རྩ་ཡི་སྒྲོན་མ། རྒྱང་ཞགས་ཆུའི་སྒྲོན་མ། བར་དོ་དུས་ཀྱི་སྒྲོན་མ། མཐར་ཐུག་འབྲས་བུའི་སྒྲོན་མ་སྟེ་དེ་ལྟ་བུའི་དྲུག་ཏུ་ཕྱེ་ན། གནས་པ་གཞིའི་སྒྲོན་མ་ནི། སེམས་ཉིད་འོད་གསལ་བ་ལ་གསུངས་པ་དང་། ཙིཏྟ་ཤའི་སྒྲོན་མ་ནི། སྙིང་རིན་པོ་ཆེ་མཆོང་གུར་ཕུབ་པ་ལྟ་བུ་འོད་གསལ་བུམ་ནང་གི་མར་མེ་ལྟ་བུར་བཞུགས་ས་དེ་དང་། རྒྱང་ཞགས་ཆུའི་སྒྲོན་མ་ནི། སྔོན་ནས་ཡང་བཤད་པ་ལྟར་མིག་གི་དབང་པོ་ལ་ཟུག་པའི་འོད་རྩ། འོད་གསལ་འཆར་བའི་སྒོ་དེ་ཉིད་ལ་ངོས་འཛིན་པ་ཡིན། བར་དོ་དུས་ཀྱི་སྒྲོན་མ་ནི། རང་སྣང་འོད་གསལ་གྱི་དཀྱིལ་འཁོར་ཤར་བ་དེ་ངོ་ཤེས་པས་གདོད་མའི་གྲོལ་སར་སྐྱེལ་བ་དེ་ཉིད་ཡིན། མཐར་ཐུག་འབྲས་བུའི་སྒྲོན་མ་ནི། ཡེ་ཤེས་དབྱིངས་སུ་འཁྱིལ་ཏེ་གཞོན་ནུ་བུམ་པ་སྐུའི་དབྱིངས་སུ་བཙན་ས་ཟིན་པ་དེའོ། །ད་རུང་འདིར་མ་སྨོས་པའི་སྒྲོན་མ་གཞན་གསུམ་པོ་བསྣན་ན་སྒྲོན་མ་དགུ་རུ་འགྱུར་བའོ། །འོན་ཀྱང་འདི་ནས་སྒྲོན་མ་བཞི་རུ་གསུངས་པ་དེ། གནད་ཐམས་ཅད་སྒྲོན་མ་བཞིའི་ནང་དུ་འདུས་པ་ཡིན་པས་སོ། །དེས་ན་ལམ་སྣང་བཞི་འབྱུང་བ་འདི། ཕྱིའི་ནམ་ཟླ་དུས་བཞིའི་འཕེལ་ཟད་དང་། ནང་ལུས་ངག་ཡིད་གསུམ་གྱི་འཆིང་བ་ལས་འགྲོལ་རྒྱུ། གསང་བར་དབང་བཞིའི་ངེས་པ་སྟོན་པའི་ཐོག་ཏུ། དེ་ཁོ་ན་ཉིད་དུ་སྒྲོན་མ་བཞིའི་སྣང་བ་ངེས་པ་ལ་ལྟོས་ནས་བཞི་རུ་འབྱུང་བ་ཡིན་པས་ན། དེ་ལས་མང་མི་དགོས་ཉུང་མི་དགོས་པའི་གནད་དུ་བཟུང་ནས་བསྟན་པར་མཛད་པ་ཡིན། ཐོད་རྒལ་གྱི་ལམ་གནད་ངོ་མ་དེ་དབྱིངས་ཀྱི་ར་བར་རིག་གདངས་བཙུད་རྒྱུ་དེ་གོང་དུ་ཞུས་པ་ལྟར་ཡིན་ན། སྒོ་རྒྱང་ཞགས་ཆུའི་སྒྲོན་མར་བརྟེན་ཏེ་ཡེ་ཤེས་འདུས་པའི་རྒྱང་ཞགས་ཀྱིས་འོད་གསལ་གྱི་སྣང་ཆ་འཛིན་རྒྱུ། དེའི་གནད་གཅུན་པས་ཆོས་ཉིད་མངོན་སུམ་གྱི་འོད་གསལ་མངོན་དུ་གྱུར་པ་དང་མཉམ་དུ་ནང་དབྱིངས་རྣམ་དག་དེ་ཉིད་སྒྲིབ་བྱེད་དང་བྲལ་ཡོང་དུས། དབྱིངས་ཐིག་གི་སྒྲོན་མ་རོ་གཅིག་ཏུ་མངོན་ནས་ཤེས་རབ་རང་བྱུང་གི་སྒྲོན་མའི་རྩལ་གདངས་མཆེད་དེ་ངོ་བོ་མངོན་གྱུར་དང་ཆབས་གཅིག་ཏུ་དབྱིངས་རིག་འདྲེས་པའི་འཆར་སྣང་སྐུ་གསུམ་ལམ་སྣང་ལྟར་མངོན་པར་འགྱུར་བ་དེ་ཐོད་རྒལ་གྱི་སྤྱིའི་ཆིངས་འདྲ་བོ་དེ་རེད། འཆར་བའི་གཞི་ནང་གི་དབྱིངས་ཀ་དག་ལ། གང་ཤར་བ་ཕྱིའི་དབྱིངས་སྣང་འོད་གསལ་གྱི་སྒྲོན་མ་ལམ་དུ་བྱས་པས། ཆོས་ཉིད་མ་བཅོས་པའི་གདངས་དབང་པོའི་ཡུལ་ལ་མངོན་སུམ་དུ་ཤར་བའི་རིག་པ་རྡོ་རྗེ་ལུ་གུ་རྒྱུད་ཀྱི་ངོ་བོ་སྡུད་པ་ཡིན་པས་རྣམ་དག་དབྱིངས་སྒྲོན་གསུངས། དེ་རྒྱང་ཞགས་ཆུའི་སྒྲོན་མས་མཐོང་བའི་སྒོ་ཕྱེས། རྣམ་དག་དབྱིངས་ཀྱི་སྒྲོན་མས་ཞིང་ཁམས་ཀྱི་གཞི་བཏིང་། ཐིག་ལེ་སྟོང་པའི་སྒྲོན་མས་ཤེས་རབ་སྡུད་པར་བྱས་ཏེ། ཐིག་ལེ་སྟོང་སྒྲོན་དང་རིག་གདངས་རྡོ་རྗེ་ལུ་གུ་རྒྱུད་དམ་ཤེས་རབ་རང་བྱུང་གི་སྒྲོན་མས་ཤེས་རབ་སྐུ་རུ་སྨིན་པར་བྱས་པས་མཐར་སྣང་བ་ཚད་རྫོགས། རྫོགས་པའི་ཡང་མཐའ་དེར་ཤེས་རབ་མཁའ་ལ་དག ཡེ་ཤེས་དབྱིངས་སུ་འཁྱིལ་བའི་འགྲོས་ལྟར་ཏུ་སྣང་བཞི་མཐར་ཕྱིན་ཆོས་ཟད་ཆོས་སྐུའི་དབྱིངས་སུ་འཁྱིལ་བའི་གོ་དོན་དེ་ལྟར་རེད། སྣང་བཞི་རིམ་བརྒྱུད་ཀྱི་ས་མཚམས་འདི་དག ཆོས་ཉིད་མངོན་སུམ་གྱིས་ཐིག་ལེ་སུམ་སྦྲེལ་མཐོང་བ་ནས་འོད་སྣང་སྨིན་མཚམས་ནས་བྲལ་ཏེ་དབྱིངས་སྣང་ཟ་འོག་རིས་དང་ནི་ལིང་ཚེ་རུ་ཤར་དུས་ཉམས་གོང་འཕེལ་གྱི་སྣེ་ཟིན་པ་ཡིན། གང་བལྟས་ཀྱི་ཡུལ་ཁམས་ལ་འོད་དང་ཟེར་གཅིག་གིས་ཁྱབ་པས་མི་ཚད་རིགས་ལྔའི་སྐུའི་སྣང་བ་ཤར་བ་ཚད་ཕེབས་ཀྱི་རྟགས་ཡིན། ཚད་ཐམས་ཅད་ཡོངས་སུ་རྫོགས་ཏེ་འབྱུང་བ་རང་དྭངས་ཀྱི་ཟད་པའི་སར་ཕྱིན་པ་ཆོས་ཉིད་ཟད་པ། ཟད་པའི་མཐར་ཕྱིན་ཏེ་སྐྱེ་འཇུག་གཉིས་ལ་རང་དབང་ཐོབ་ནས། སྐུ་གསུམ་ལམ་སྣང་དུ་བྱས་ནས་ཀ་དག་གདོད་མའི་ནང་དབྱིངས་སུ་འཁྱིལ་ཏེ། ནང་གསལ་སྐུ་དང་ཡེ་ཤེས་རྒྱ་མཚོ་ཀུན་འབྱུང་བའི་གཞིར་བཞུགས་པ་ནས། ཕྱི་གསལ་འགྲོ་བའི་དོན་དུ་རྟག་ཁྱབ་ལྷུན་གྲུབ་ཀྱི་མཛད་པ་རྒྱུན་མི་ཆད་པར་འབྱུང་བ་ཡིན་ཚུལ་གསུངས་པ་སོགས་ཕྱོགས་སྡོམ་བྱས་ན་དེ་ལྟ་བུ་ཞིག་རེད། ད་རུང་བསྐྱར་ཟློས་བྱེད་ན། ང་ཚོས་ཆོས་ཉིད་མངོན་སུམ་གྱི་སྣང་བས་ཕྱིའི་དབྱིངས་སྣང་བྲལ་བའི་དུས་ན། ནང་རང་རིག་པ་གཞི་ལ་གནས་པ་ཡིན་པས་ན་གདངས་རང་ཐིམ་དུ་འཁོར་ཏེ་རིག་གདངས་རིག་པའི་མ་ལ་ཐིམ། ཡེ་ཤེས་ཀྱི་ནམ་མཁའ་དབྱིངས་ཀྱི་ནམ་མཁའ་ལ་ཐིམ་སྟེ་ངོ་མཉམ་རིས་མེད་དུ་གྲོལ་བ་གསུངས་རྒྱུ་འདིའི་དུས་སུ། ཀ་དག་གི་རིག་པ་དབྱིངས་ལས་མ་གཡོས་པར་སྙིང་ཁ་ན་འོད་གསལ་བའི་དགོངས་པར་རང་བཞིན་གྱིས་གནས་ཡོད་པའི་རྒྱུ་མཚན་གྱིས་གདོད་མའི་འོད་གསལ་ཟིན་པ་ཡིན། འཁོར་བ་མིང་མེད་དང་སྲིད་གསུམ་གདར་ཤ་ཆོད་པ་ཡིན་གསུངས། ཉམས་གོང་འཕེལ་ལ་དབྱིངས་རིག་གི་སྦྱང་བ་དང་གོམས་ཚད་གོང་འཕེལ་དུ་སོང་བས་ཕྱིའི་དབྱིངས་སྣང་ལ་ལུག་རྒྱུད་དབྱེར་མེད་ཡིན་པ་བཞིན་དུ། ནང་ཀ་དག་གི་སྟོང་དབྱིངས་ལ་རང་གདངས་ཀྱི་རིག་དབྱིངས་གཉིས་མེད་དུ་གནས་པས་ན་འོད་གསལ་མ་བུ་འདྲེས་པའི་དུས་ཡིན། གཟུང་བ་ཡུལ་དུ་སྣང་བ་ལས་འདས་པས་མི་ཚད་འཛིན་པ་རྟོག་པའི་ཆ་ལས་ཀྱང་ལོག་པས་ན་བདག་མེད་གཉིས་རྟོགས་ཀྱི་མཐུས་ཀུན་རྟོག་གཞི་གྲོལ་རང་སངས་སུ་དག་པ་ཡིན་གསུངས་པ་རེད། རིག་པ་ཚད་ཕེབས་ཀྱི་སྐབས་ལ་སྣང་བ་ལ་དབང་བསྒྱུར་བས་ཞིང་ཁམས་འོད་གསལ་དུ་རྫོགས། ལུས་ཀྱི་གདོས་པ་དག ལུས་རྡུལ་ཕྲན་རེ་རེའི་གོ་ནའང་ཞིང་ཁམས་གྲངས་མེད་སངས་རྒྱས་དང་སེམས་ཅན་ཚད་མེད་སྣང་། ལྷུན་གྲུབ་སྒོ་བརྒྱད་ཀྱི་སྣང་བ་ཤར། མངོན་ཤེས་དང་རྗེས་དྲན། ཆོས་ཐམས་ཅད་ཤེས་པའི་ཤེས་རབ་ཐོགས་མེད་དུ་འཆར་བ་ཡིན་ནོ། །ཁྱད་པར་དུ་གསང་བ་རིག་པ་ཚད་ཕེབས་དངོས་ལ་ཐོན་དུས་ཀུན་གཞིའི་རྣམ་ཤེས་ཀྱི་ཆ་ཕྲ་མོ་ཞིག་ལས་ཕྲ་རགས་འགྱུ་བའི་སེམས་ཐམས་ཅད་དག རིག་པའི་ཡོན་ཏན་སྤྱན་དང་མངོན་ཤེས་འཆར། ཆོས་ཟད་ལ་སླེབས་དུས་ཕྱིའི་གདོས་བཅས་དྭངས། ནང་ཉོན་མོངས་དང་རྣམ་རྟོག་དྭངས། གསང་བ་སྣང་རིག་ཀྱང་དྭངས་ཏེ་ཆོས་ཉིད་མཐའ་འདས་གཡོ་མེད་ཏིང་ངེ་འཛིན་ལ་ངང་གིས་གནས་པ་ཡིན་པས་ན་འདི་ལ་ཡེ་ཤེས་རྫོགས་པའི་སྐུ་ཐོབ་པའང་གསུངས་པ་ཡིན། སྒྲ་ཐལ་འགྱུར་ལས། བཅོས་མའི་ཆོས་ལས་འདས་པས་ན། །ཆོས་ཞེས་ཚིག་ཏུ་མི་གནས་སོ། །ཞེས་གསུངས་པ་ལྟར། ནང་གསལ་ཟད་པའི་མཐར་ཐུག་ལ་ཡེ་ཤེས་དབྱིངས་སུ་འཁྱིལ་བའི་དུས་ཡིན་ནོ། །སྣང་བཞི་འདི་དག་གི་སྐབས་སུ་དག་བྱ་དྲི་མ་རེ་རེ་སྦྱོང་བའི་གཉེན་པོར་སྔོན་འགྲོ་ལ་སོགས་པ་གནད་དུ་སོང་བས་སྣང་བ་དེ་དག་ཤར་བ་ཡིན་པར་བཏགས་པ་ཡིན་ཡང་། དོན་གྱི་སྟེང་ནས་འདི་ནི་དག་བྱ་དག་བྱེད་ཀྱི་རྒྱུ་འབྲས་བཏགས་པ་བ་ཡིན་པ་མ་གཏོགས། རྒྱུ་འབྲས་མཚན་ཉིད་པ་དེས་བསྐྱེད་དེ་བྱུང་ལྟ་བུ་མ་ཡིན་པར། ཡེ་ཤེས་རང་གནས་རང་ལ་ཡོད་པའི་གདངས་དེ་ཉིད་དྲི་མའི་སྒྲིབ་པ་དག་སྟོབས་ཀྱིས་སྣང་བ་ཙམ་ཡིན། སྣང་བ་བཞིའི་ལམ་ནས་སྐུ་གསུམ་གྱི་ཡོན་ཏན་མ་ཚང་བ་མེད་པར་བྱང་ཆུབ་སྟེ་ཆོས་དབྱིངས་གཞོན་ནུ་བུམ་སྐུ་སྤངས་དང་རྟོགས་པའི་ཡོན་ཏན་མཐའ་དག་མཐར་ཕྱིན་པའི་ས་ལ། དབྱིངས་དང་ཡེ་ཤེས་གཉིས་མེད་ཀྱི་ཀ་དག་རིན་པོ་ཆེའི་གསང་བའི་སྦུབས་ལ་མཐར་ཐུག་གི་གྲོལ་ས་གསུངས་པ་རེད། འདི་ཐོག་མའི་གྲོལ་འཁྲུལ་གཉིས་ཀྱི་གཞི་ལ་ནོར་མི་ཉན། མཐར་ཐུག་གི་གྲོལ་ས་ཀ་དག་དང་ནི། ཐོག་མའི་ངེས་མེད་གཞིའི་ལྷུན་གྲུབ་གཉིས་ཀ་རིག་པའི་ཡོན་ཏན་ངོ་བོ་རང་བཞིན་ཐུགས་རྗེ་གསུམ་ཚང་བའི་ཆ་ནས་འདྲ་ནའང་། དྲི་མ་དག་དང་མ་དག་དང་ཕྱིན་ཆད་འཁྲུལ་གཞི་བྱེད་དང་མི་བྱེད་ཀྱི་ཁྱད་པར་ཆེན་པོ་ཡོད། རྒྱུད་མུ་ཏིག་ཕྲེང་བ་ལས། གྲོལ་ས་ཉིད་ནི་ཐོག་མའོ། །ཞེས་གསུངས་ཡོད་པ་དེ་འབྲས་བུ་ཐོག་མའི་གཞི་ཐོག་ཏུ་གྲོལ་འགྲོ་གསུངས་པ་མིན། ཐོག་མའི་ཀ་དག་གི་རིག་པའི་རང་ངོ་ཤེས་ཏེ་དག་པ་གཉིས་ལྡན་གྱི་ས་ལ་བྱང་ཆུབ་པ་ཡིན་པས་ན་ཕྱིན་ཆད་འཁྲུལ་རྒྱུ་རུ་ལྡོག་མི་ཤེས་པའམ་ལྡོག་མི་སྲིད་པ། འཁྲུལ་གཞི་ཟད་པས་གྲོལ་ས་ཞེས་པའམ་འབྲས་བུ་ཟེར་བའི་མིང་འགྱུར་བ་ཙམ་ཞིག་ཡིན། ད་དེ་རིང་ཉམས་ལེན་སྣང་བཞིའི་འཆར་ཚུལ་བསྟན་པ་སོང་བའི་མཚམས། རྟག་ཏུ་ཙིཏྟ་རིན་ཆེན་གཏེར་ཏུ་སྦོས། །གསུངས་སའི་མཚམས་འདི་ནས་བཞག་སྟེ་ཆོས་ཁྲིད་རྗེས་མར་ཁྲིད་རིམ་བདུན་པའམ་ཁྲིད་རིམ་ཐམས་ཅད་ཀྱི་རྗེས་མ་མཐའ་རྟེན་གྱི་མན་ངག་རྣམ་བཞི་བཤད་པ་ནས་ཐ་མར་དགེ་བ་མཇུག་དོན་བཤད་པ་དང་བཅས་པས་ཐེངས་འདིའི་ཆོས་ཁྲིད་ཡོངས་སུ་གྲུབ་ལ་ཉེ་བ་མཇུག་གི་རྫོགས་བྱང་དུ་བསྔོ་བ་དང་བཅས་པས། ཡང་འདུས་པ་ཐམས་ཅད་མི་རྟག་འབྲལ་བའི་ཆོས་ཡིན་པས་ན། གཞིས་བྱེས་སོ་སོར་ཕྱེ་སྟེ་ཁམས་བདེ་ཞུ་ས་ལ་ཐུག་རྩིས་བྱེད་གྲབས་རེད། ངས་འདི་ལྟར་བསམ་བློ་བཏང་དུས་ད་རེས་ཀྱི་ཐེངས་འདིའི་ཆོས་ཁྲིད་ཉི་མ་སུམ་ཅུ་ཐམ་པའི་ཕྱོགས་སྡོམ་ཞིག་བྱེད་ཡོང་ན། ཟླ་ཁྲིད་ཁྲིད་སྦྱང་དང་བཅས་པར་བར་ཆད་ཉེར་འཚེ་གཅིག་ཀྱང་མ་བྱུང་བའི་ཐོག་ནས་རྣམ་པར་རྒྱལ་བའི་ངང་ནས་འགྲུབ་ལ་ཉེ་བ་རེད། འདིའི་ཁྲིད་སྦྱང་རྒྱས་བསྡུས་ཀྱི་རིམ་པ་དང་བསྟུན་པའི་ཁྲེགས་ཆོད་ཐོད་རྒལ་གཉིས་ཀའི་ཁྲིད་སྦྱང་དེ་ཡང་དུས་ཚོད་ཐུང་ཐུང་དང་བསྡུར་ན། ཡང་མ་སྐྱོན་པ་ཞིག་བྱེད་རྒྱུ་བྱུང་སོང་བ་རེད། ད་མི་འགྱངས་བར་གོང་དུ་བཤད་པ་བཞིན་གཞི་བ་བཀྲ་ཤིས་བྱེས་པ་དོན་འགྲུབ་ཟེར་རྒྱུའི་ཁ་གཡང་སྒྲོག་སར་ཐོན་རན་པ་རེད་དེ། བློ་ལྷག་ཅིག་ལ་ཅུང་ཟད་ཅིག་ཅི་ཞིག་ཡོད་འདུག་ཟེར་ན། འཕོ་ཁྲིད་ཅིག་འདོན་དགོས་པ་ཡིན། སྔར་ཞིག་ནས་འདོན་བསམ་བསྡད་ཀྱང་། ཡར་བསྙབས་མར་བསྙབས་སྣ་ཟིན་སྣེ་ཟིན་རེ་བྱེད་པ་ཞིག་གིས་ཁྲིད་སྦྱང་གཙོ་བོ་དེ་ཆག་བྱེད་རེད་བསམ་ནས་བཏང་སྙོམས་སུ་བཞག་ཀྱང་། ད་འགྲོ་ས་ངོ་མ་ལ་ཐུག་ཡོང་དུས། ཡང་དེ་ལྷག་མི་ཉན་པ་ཞིག་རེད་བསམ་སོང་། གནའ་སྔོན་མ་ཡིན་ན་མདོ་ཁམས་གཉིས་ཀྱི་བར་ཟེར་ཡོང་དུས། ས་ཁད་ཀྱིས་ལེ་བར་བརྒྱ་ཚོ་སྟོང་ཚོས་ཕྱེས་ཡོད་པའི་རྒྱང་རིང་པོ་ཞིག་རེད། དེ་བཞིན་ད་དུང་འདི་ན་དབུས་གཙང་ཕྱོགས་ཀྱི་མི་ཡང་ཡོད་པ་རེད། དེང་སང་འགྲུལ་བཞུད་སྟབས་བདེའི་དུས་ཡིན་པས་ཐག་རིང་ཐུང་གིས་མདོ་དབུས་ཁམས་གསུམ་གྱི་ས་ཆ་རྨ་ཟླ་འབྲི་གསུམ་གྱི་ཁ་དབར་དེ་འདྲའི་མི་ཐུག་ས་ཞིག་མ་རེད་ཀྱང་། སྤྱིར་ན་འདུས་བྱས་རྟག་པ་མིན་པ་དང་སྒོས་སུ་རང་རང་སོ་སོ་ལ་བྱེད་སྒོའི་ལས་རིགས་རེ་གཉེར་རྒྱུ་ཡོད་པ་དང་། ཁྱད་པར་དུ་ས་འདིའི་སྔགས་རིགས་མང་ཆེ་བ་ཁྱིམ་ན་གནས་པའི་ལས་བྲེལ་ཅན་ཡིན་པས་ཡར་དང་མར་ལ་ཐོན་ཟེར་ན་ཅུང་དཀའ་བས་ན། སྡེ་གླིང་དཀར་ཉིན་ཉིན་མི་འཛོམས་ཁི། །རྟ་རག་དཀར་ཉིན་ཉིན་མི་རྒྱུག་ཁི། །ངས་ཀྱང་རྗེས་ཤིག་ནས་ཡིན་ཟེར་ན་ཤོབ་རེད་འགྲོ་རྒྱུ་རེད། དེས་ན་འདི་ནས་སྙིང་ཐིག་རང་གཞུང་གི་འཕོ་ཁྲིད་དེ་གཅིག་བཏོན་ན་བསམ་ནས་འདོན་རྩིས་ཡིན། དེ་རིང་ཕྱི་དྲོ་དང་སང་ཉིན་སྔ་ཕྱི་དྲོའི་ཐུན་གསུམ་པོ་དེ་ལ་འཕོ་ཁྲིད་འདི་སྦྱང་བཞག་ན་བསམ་གྱིན་ཡོད། ད་དུས་ཚོད་དམ་འཛིན་བྱས་ནས་འདོན་རྒྱུ་བྱེད། ཁྱེད་རྣམ་པས་དང་པོ་གསན་ནས་བཞུགས་ན་ཆོག་གི འདི་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཁྲིད་སྦྱང་ནང་ན་ཁོ་རང་འཕོ་ཁྲིད་ཆོག་ཁྲིགས་མ་ཡོད་པ་དེ་རེད། ༈ ནམ་མཁའ་དང་མཉམ་པའི་སེམས་ཅན་ཐམས་ཅད་ལ་ཕན་འདོད་ཀྱི་ལྷག་བསམ་ཡིད་ལ་མཆོག་ཏུ་བཅགས་ཏེ་དམ་པའི་ཆོས་ཉན་པ་ལ་ཞུགས་པ་ནི་སྐྱེས་བུ་ཆེན་པོའི་ལམ་བསོད་ནམས་ཚད་མེད་པའི་འཇུག་ངོགས་དམ་པ་ཡིན་ཏེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་པ། །ཕན་འདོད་དེ་ནི་དེ་འདྲའོ། །ཞེས་གསུངས་པ་ལྟར་སེམས་ཅན་ཐམས་ཅད་ཐུགས་ལ་བཅངས་ཏེ་གསན་པར་ཞུ། དེ་ལ་གང་གསན་པར་བྱ་བའི་ཆོས་ནི། སློབ་དཔོན་ཆེན་པོ་ཞི་བ་ལྷས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལས། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནི་ཡང་དག་འབྱོར་པར་ག་ལ་འགྱུར། །ཞེས་གསུངས་པ་ལྟར་ད་རེས་ཡིད་བཞིན་གྱི་ནོར་བུ་རིན་པོ་ཆེ་ལག་ཏུ་ལོན་པའི་དཔེས་བརྒྱ་སྟོང་གི་ཆར་ཡང་མི་ཕོད་པའི་དལ་བའི་རྟེན་བཟང་པོ་འདི་ལྟ་བུ་རྙེད་པའི་སྐབས་སུ་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་ཐབས་ལྷུར་ལེན་དགོས། དེ་ལ་ཡང་དག་པར་རྫོགས་པའི་སངས་རྒྱས་རྣམས་ནི་ཐབས་མཁས་ཤིང་ཐུགས་རྗེ་ཚད་མེད་པས་སེམས་ཅན་གྱི་ཁམས་ཡལ་བར་མི་འདོར་བའི་ཕྱིར། གདུལ་བྱ་རྣམས་ཀྱི་ཁམས་དབང་བསམ་པ་བག་ལ་ཉལ་གྱི་རིམ་པ་དང་རྗེས་སུ་མཐུན་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱི་ནང་ནས། མཆོག་དང་ཕུལ་དང་རབ་ཏུ་གྱུར་པ་ནི་རྡོ་རྗེ་ཐེག་པ་བླ་མེད་ཀྱི་ལམ་ཁོ་ན་ཡིན་ཅིང་། དེ་ལས་ཀྱང་ཇི་སྐད་དུ་དཔལ་རྡོ་རྗེ་གདན་བཞིའི་རྒྱུད་ལས། ཉེས་པ་ཀུན་གྱིས་གོས་པ་ཡང་། །འཕོ་བའི་སྦྱོར་བ་སྦྱོང་བས་གྲོལ། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་འགྲོ། །ཞེས་སོགས་རྒྱལ་བ་ཁྱབ་བདག་རྡོ་རྗེ་འཆང་ཆེན་པོས་ལན་གཅིག་མ་ཡིན་པར་བསྔགས་པའི་མ་བསྒོམས་སངས་རྒྱས་འཕོ་བའི་མྱུར་ལམ་ལ་བརྟེན་ནས་མཁའ་སྤྱོད་ཀྱི་གོ་འཕང་བདེ་བླག་ཏུ་སྒྲུབ་པའི་གདམས་པ་ཟབ་མོས་རྗེས་སུ་གཟུང་བའི་སྐབས་ཡིན། དེ་ལའང་མན་ངག་གི་རྣམ་གྲངས་མཐའ་ཀླས་ཀྱང་བསྡུ་ན་ལྔར་འདུས་ཏེ། རབ་ཆོས་སྐུ་གཏན་མེད་ཀྱི་འཕོ་བ། འབྲིང་ལོངས་སྐུ་ཟུང་འཇུག་གི་འཕོ་བ། ཐ་མ་སྤྲུལ་སྐུ་རྩལ་སྦྱོང་གི་འཕོ་བ། རང་དོན་དུ་འདུ་ཤེས་གསུམ་ལྡན་གྱི་འཕོ་བ། གཞན་དོན་དུ་ཐུགས་རྗེའི་ལྕགས་ཀྱུའི་འཕོ་བ་སྟེ་རྣམ་པ་ལྔར་ཡོད་པ་ལས། འདིར་སྤྲུལ་སྐུ་རྩལ་སྦྱོང་གི་འཕོ་བའི་གདམས་པ་ཉམས་སུ་བླངས་པ་ལའང་སྔོན་འགྲོ། དངོས་གཞི། རྗེས་དང་གསུམ་ལས། ཐོག་མར་སྔོན་འགྲོས་རྒྱུད་དག་པར་བྱ་བའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་མངོན་སུམ་ལྟ་བུར་བཞུགས་ཡོད་སྙམ་པའི་མོས་པས། དེ་རྣམས་ཀྱི་སྤྱན་སྔར་རང་གཞན་སེམས་ཅན་ཐམས་ཅད་འཁོད་དེ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཅི་མཛད་ཁྱེད་མཁྱེན་སྙམ་པའི་རེ་ལྟོས་ལིང་སྐྱུར་གྱིས་སྐྱབས་སུ་འགྲོ་བ་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ཟབ་ལམ་འཕོ་བའི་རྣལ་འབྱོར་ཟབ་མོ་ཉམས་སུ་བླང་བར་བགྱིའོ་སྙམ་པའི་ཡིད་ཀྱིས་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། ན་མོ༔ དཀོན་མཆོག་གསུམ་དངོས་བདེ་གཤེགས་རྩ་བ་གསུམ༔ རྩ་རླུང་ཐིག་ལེའི་རང་བཞིན་བྱང་ཆུབ་སེམས༔ ངོ་བོ་རང་བཞིན་ཐུགས་རྗེའི་དཀྱིལ་འཁོར་ལ༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ ལན་གསུམ། སླར་ཡང་ཚོགས་ཞིང་དེ་རྣམས་ཀྱི་སྤྱན་སྔར་བསགས་སྦྱངས་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་འདིའི་རྗེས་ཟློས་མཛོད། ཧྲཱི༔ ཆུ་ལས་ཆུ་བུར་ཇི་བཞིན་དུ༔ ཡེ་ཤེས་དབྱིངས་ལས་སྤྲུལ་པའི་ལྷར༔ བདག་ལུས་ཞིང་གི་རྡུལ་སྙེད་དུ༔ རྣམ་པར་འཕྲུལ་པས་ཕྱག་འཚལ་ལོ༔ དངོས་བཤམས་ཡིད་སྤྲུལ་ཏིང་འཛིན་མཐུས༔ སྣང་སྲིད་མཆོད་པའི་ཕྱག་རྒྱར་འབུལ༔ སྒོ་གསུམ་མི་དགེའི་ལས་རྣམས་ཀུན༔ འོད་གསལ་ཆོས་སྐུའི་ངང་དུ་བཤགས༔ བདེན་པ་གཉིས་ཀྱིས་བསྡུས་པ་ཡིཿ དགེ་ཚོགས་ཀུན་ལ་རྗེས་ཡི་རང༔ རིག་ཅན་གསུམ་གྱི་གདུལ་བྱ་ལ༔ ཐེག་གསུམ་ཆོས་འཁོར་བསྐོར་བར་བསྐུལ༔ ཇི་སྲིད་འཁོར་བ་མ་སྟོངས་བར༔ མྱ་ངན་མི་འདའ་བཞུགས་གསོལ་འདེབས༔ དུས་གསུམ་བསགས་པའི་དགེ་རྩ་ཀུན༔ བྱང་ཆུབ་ཆེན་པོའི་རྒྱུ་རུ་བསྔོ༔ ལན་གསུམ། དེ་ལྟར་ཐུན་མོང་གི་སྔོན་འགྲོས་རྒྱུད་སྦྱང་བ་སོང་ནས། དངོས་གཞིའི་མྱུར་ལམ་ཟབ་མོ་ལ་འཇུག་པའི་སླད་དུ། ལུས་གནད་སྐྱིལ་ཀྲུང་དྲང་པོར་བསྲང་། ངག་གནད་རླུང་རྒྱུ་བ་རང་སོར་བཞག །སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། ཨོཾ་མ་ཧཱ་ཤུནྱཏ་སོགས་ནས། ཁྱེད་རང་རྣམས་ཀྱི་ཕུང་ཁམས་དང་སྐྱེ་མཆེད་ཀྱི་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་ས་ཕྱོགས་འདི་ཉིད་དག་པ་རབ་འབྱམས་འོག་མིན་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་ཆེན་པོར་གསལ་བའི་དབུས་སུ་ཁྱེད་རང་རྣམས་སྐད་ཅིག་གིས་གཞི་ལུས་ཀྱི་བཀོད་པ་རྒྱལ་ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། གཡས་གྲི་གུག་དང་གཡོན་ཐོད་པ་ཁྲག་གིས་གང་བ་འཛིན་པ། མཆན་ཁུང་གཡོན་ན་ཡབ་ཧེ་རུ་ཀའི་ངོ་བོ་ཁ་ཊྭཱྃ་ག་འཁྱུད་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། ཞབས་གཡས་ཅུང་ཟད་བསྐུམ་ཞིང་། གཡོན་བརྐྱངས་པའི་དོར་སྟབས་ཀྱིས་པདྨཉི་མ་བམ་རོའི་སྟེང་ན་བཞུགས་པར་གསལ་བའི་སྐུའི་དབྱིབས་ཕྲུ་མ་ཕུས་བཏབ་པ་ལྟ་བུའི་ནང་དུ་རྩ་དབུ་མ་སྦོམ་ཕྲ་མདའ་སྨྱུག་ཙམ་པ་སྟོང་སང་ངེ་འོད་ཀྱི་སྦུ་གུའི་རྣམ་པར་གསལ་བའི་ཡར་སྣེ་ཚངས་བུག་གི་གནས་སུ་རྒྱ་མཐོངས་ཁ་བྱེ་བ་ལྟར་ཧ་རེ་ཡོད་པ། མར་སྣེ་ལྟེ་འོག་སོར་བཞིའི་གནས་སུ་ཁ་ཟུམ་པ། སྙིང་གའི་ཐད་སྨྱུག་མ་ཚིགས་ཀྱིས་བཅད་པ་ལྟ་བུའི་སྟེང་དུ་རླུང་གི་རང་བཞིན་ཐིག་ལེ་ལྗང་སྐྱ་སྲན་མ་ཙམ་པ་ཅུང་ཟད་གཡོ་བ་དང་བཅས་པ་ལ་རིག་པའི་ངོ་བོ་ཡི་གེ་ཧྲཱིཿདམར་པོ་འབྲུ་མར་གྱི་སྡོང་བུ་ལྟར་འབར་བས་མཚན་པར་གསལ་བཏབ། སྤྱི་བོར་ཁྲུ་གང་ཙམ་གྱིས་མཐོ་བའི་ནམ་མཁར་ཆོས་དབྱིངས་དོན་གྱི་འོག་མིན་ཆེན་པོར་རིག་པ་རྡོ་རྗེ་ལུ་གུ་རྒྱུད་འཇའ་ཟེར་ཐིག་ལེར་འཁྲིགས་པའི་ཀློང་དུ་པདྨ་ཟླ་བའི་གདན་ལ་སྐྱབས་གནས་ཀུན་འདུས་དྲིན་ཅན་རྩ་བའི་བླ་མ་དང་དབྱེར་མ་མཆིས་པའི་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་པ། ཕྱག་གཉིས་མཉམ་གཞག་གི་ཕྱག་རྒྱ་མཛད་པའི་སྟེང་ན་འཆི་མེད་བདུད་རྩིས་གང་བའི་ལྷུང་བཟེད་འཛིན་པ། ན་བཟའ་ཆོས་གོས་རྣམ་གསུམ་ངུར་སྨྲིག་ཏུ་གསོལ་ཞིང་མཚན་དཔེའི་གཟི་བྱིན་མཆོག་ཏུ་འབར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་གཡས་སུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ་པ་ལ་སོགས་སངས་རྒྱས་དང་བྱང་ཆུབ་སེམས་དཔའ་རྩ་གསུམ་རྒྱལ་བ་རབ་འབྱམས་ཀྱི་འཁོར་གྱིས་བསྐོར་ཏེ། ཁྱེད་རང་གི་ཐར་པའི་ལམ་སྟོན་ཆེན་པོར་མངོན་སུམ་ལྟ་བུར་བཞུགས་ཡོད་སྙམ་པའི་མོས་པས། བདག་གིས་བླ་མ་ལ་གསོལ་བ་བཏབ་ཅིང་ཧྲཱིཿལྔ་ཚར་བརྗོད་པའི་ཚེ། ཁྱེད་རང་གིས་ཀྱང་སྤྱི་བོའི་བླ་མ་ལ་མོས་གུས་གདུང་ཤུགས་དྲག་པོས་ཤེས་པ་གཞན་དུ་མ་ཡེངས་པར་རྩེ་གཅིག་ཏུ་གསོལ་བ་བཏབ་པས་སྙིང་གའི་རླུང་སེམས་ཀྱི་ངོ་བོ་ཐིག་ལེ་ཡིག་འབྲུ་དང་བཅས་པ་དེ་ཉིད་དབུ་མའི་ལམ་བརྒྱུད་ནས་ཤོག་སྐྱ་རླུང་གིས་བཏེགས་པ་བཞིན་ཡར་ཡར་འགྲོ་བའི་ངང་ལ་ཧིཀ་གམ་ཕཊཿཅེས་དྲག་ཏུ་བརྗོད་པ་དང་ལྷན་ཅིག་ཏུ་མདའ་འཕངས་བ་བཞིན་དུ་སོང་ནས་བླ་མའི་ཐུགས་ཀར་སིབ་ཀྱིས་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་སྤྲོས་བྲལ་བློ་འདས་ཀྱི་དབྱིངས་སུ་མཉམ་པར་ཞོག་མཛོད། ཞེས་བརྗོད་ལ། གཙོ་བོར་རང་ཉིད་ཀྱིས་འདུན་པ་རྩེ་གཅིག་ཏུ་གསོལ་བ་བཏབ་ནས། ཨེ་མ་ཧོཿ གནས་རང་སྣང་སོགས་ནས། རྒྱལ་ས་ཟིན་པར་ཤོགཿ ཧྲཱིཿཧྲཱིཿཧྲཱིཿཧྲཱིཿཧྲཱིཿ ཞེས་རྐན་གྱི་སྦུབས་ནས་བརྗོད་པའི་མཐར། ཧིཀ་གི་སྒྲས་འཕོ་རྒྱུ་རེད། ཕཊཿཕཊཿཕཊཿཕཊཿཕཊཿཅེས་པའི་ཕཊཿལྔ་ཡིས་བླ་མ་འོད་དཔག་མེད་ཀྱི་སྐུ་ལྔ་ཡེ་ཤེས་ལྔ་དབྱེར་མེད་བདེ་བ་ཆེན་པོའི་ཀློང་དུ་འཕོའོ། དེ་ལྟ་བུའི་དམིགས་པའི་རྟེན་གོམས་ཤིང་ཡིད་ཆེས་པའི་རྟགས་མ་བྱུང་བར་དུ་བསྐྱར་ནས། མཐར་འཁོར་གསུམ་སྤྲོས་པ་དང་བྲལ་བའི་སྟོང་པ་ཉིད་ཀྱི་ངང་དུ་མཉམ་པར་བཞག་ཅིང་། དེ་ལས་ལྡང་བ་ན་རྗེས་ཐོབ་སྙིང་རྗེ་ཆེན་པོའི་བློས་བསྔོ་སྨོན་གྱིས་མཚམས་སྦྱོར་རྒྱས་པར་བྱའོ། །འདིའི་དམིགས་རིམ་ཚང་མ་གོང་ནས་འཕོ་ཁྲིད་རང་གཞུང་གི་ནང་ནས་གསུངས་པ་ལྟར་ལས་ཞལ་ཤེས་ཀྱི་གསལ་འདེབས་ལྷག་གི་ཆེ་བ་ཞིག་ཅང་མེད། འདིའི་དམིགས་རིམ་དེ་ཚུར་བསྡུས་ན་མཚན་བཅས་དང་མཚན་མེད་གཉིས་སུ་བྱས་ན་འགྲིག་འདུག་བསམ། མཚན་བཅས་ཀྱི་སྐབས་སུ་ཇི་ལྟར་དམིགས་དགོས་ན། ཕྱི་ལུས་ཀྱི་སྟོང་ར་དང་གཅིག ནང་རྩའི་སྟོང་ར་དང་གཉིས། གསང་བ་སེམས་ཀྱི་ངོ་བོ་དང་གསུམ། སྐྱབས་ཡུལ་སྤྱི་བོའི་རིགས་བདག་དང་བཞི་པོ་ལ་དམིགས་པ་གཏད་དགོས་པ་ཡིན། དེའི་ནང་གི་ཕྱི་ལུས་ཀྱི་སྟོང་ར་དེ་གོང་ནས་གསུངས་པ་བཞིན་དུ་རང་ཉིད་རྡོ་རྗེ་རྣལ་འབྱོར་མ་དཔེར་ན་དར་དམར་གྱི་གུར་ཕུབ་པ་ལྟ་བུ་དང་། ནང་རྩ་ཡི་སྟོང་ར་དེ་རྩ་དབུ་མ་མཚན་ཉིད་བཞི་ལྡན་ནམ་ལྔ་ལྡན་གསུངས་པ་རེད། དེ་དག་གང་ཡིན་ན། དྲང་བ་ཆུ་ཤིང་གི་སྡོང་པོ་ལྟ་བུ། སྟོང་པ་ཤོག་བུ་ཁོག་སྟོང་ལྟ་བུ། གསལ་བ་ཏིལ་གྱི་མར་མེ་ལྟ་བུ། སྔོ་བ་མཐིང་ཞུན་གྱི་དྭངས་མ་ལྟ་བུ། སྲབ་པ་པད་མའི་འདབ་མ་ལྟ་བུ། དེ་ལྟ་བུའི་མཚན་ཉིད་བཞི་ལྡན་ནམ་ལྔ་ལྡན་དེ་ལྟེ་འོག་ནས་སྤྱི་གཙུག་བར་དུ་ཡར་ཟུག་ཡོད་པ། དེ་ཡང་ལྟེ་འོག་ཏུ་ཁ་ཟུམ་ཡོད་པ། ཚངས་བུག་ནས་རྒྱ་མཐོངས་ཁ་ཕྱེས་པ་ལྟར་ཕྱེས་ཡོད་པ་དེ་ལྟར་དུ་བསམ། གསང་བ་སེམས་ཀྱི་ངོ་བོ་སྙིང་ཁའི་ཐད་ན་རྩ་དབུ་མ་སྨྱུག་ཚིགས་འགག་པ་ལྟ་བུའི་སྟེང་ན་རིག་པ་ཧྲཱིཿཡིག་དམར་པོ་ཞིག་ཏུ་གསལ་གདབ། དེ་རླུང་རིག་འདུས་པའི་ངོ་བོ་རླུང་གི་ཐིག་ལེ་ལྗང་སྐྱ་ཞིག་ལ་བཀྱག་མ་རག་པ་ཞིག་འཕར་འདར་ལིང་ལིང་དུ་བསྒོམ། དེས་ཕྱི་ནང་གསང་བ་གསུམ་སོང་ནས། བཞི་པ་ནི། སྤྱི་བོའི་རིགས་བདག་འོད་དཔག་མེད་ངོ་བོ་རྩ་བའི་བླ་མ་ལ་རྣམ་པ་སངས་རྒྱས་འོད་དཔག་མེད་རྒྱལ་ཀུན་འདུས་པའི་ངོ་བོ་རུ་བསྒོམས་ཞིང་། དད་གུས་མོས་པ་རྩེ་གཅིག་གིས་གསོལ་བ་བཏབ་སྟེ་ངག་འདོན་གྱི་ཚིག་རྗེས་དོན་དྲན་དང་སྦྲགས་ནས་ཧིཀ་ཀ་འཕེན་དུས་དམིགས་པ་གཏོད་རྒྱུའི་ཆེད་གོང་ནས་གསུངས་པ་བཞིན་རྐན་བུག་ནས་ཧྲཱིཿ་ལྔ་ཚར་བརྗོད་དགོས། རྐན་བུག་ནས་ཧྲཱིཿ་ལྔ་ཚར་བརྗོད་པ་དང་མཉམ་དུ་སྙིང་གའི་སེམས་ཀྱི་ངོ་བོ་རིག་པ་ཧྲཱིཿཡིག་དམར་པོ་དང་པོ་ནས་འཕར་ལ་ཁད་དང་འཕུར་ལ་ཁད་པར་ཡོད་པ་དེ་ཧྲཱིཿརེ་རེ་བརྗོད་དུས་རེ་རེར་འཕར། ཧྲཱིཿལྔ་བའི་སྐབས་སུ་ཚངས་བུག་རྒྱ་མཐོངས་འདྲ་བོའི་ཁ་རུ་ཐོན་ཡོད་པར་བསམ། དེའི་མཚམས་ནས་ཧིཀ་གཅིག་གིས་མགོན་པོ་འོད་དཔག་ཏུ་མེད་པའི་ཐུགས་ཀར་རྩལ་ཆེན་གྱིས་མདའ་འཕང་བ་བཞིན་དུ་ཕྱིར་མི་ལྡོག་པའི་ཚུལ་གྱིས་དབྱེར་མེད་དུ་འདྲེས་པར་བསམ། དེ་ཡན་ཆོད་ཀྱིས་མཚན་བཅས་དམིགས་པ་ཅན་གྱི་བསྐྱེད་རིམ་དང་སྒོ་བསྟུན་པ་བྱས་ཏེ། དེ་ནས་མཚན་མེད་རྣལ་འབྱོར་རྫོགས་རིམ་ཐམས་ཅད་ཀྱི་རྒྱལ་པོ་རྫོགས་པ་ཆེན་པོ་རེད། རྫོགས་ཆེན་ཁྲེགས་ཆོད་ཐོད་རྒལ་གྱི་ཉམས་ལེན་དང་ཟུང་དུ་འབྲེལ་དགོས། རིག་སྟོང་ཟང་ཐལ་བརྗོད་མེད་ཀྱི་གཤིས་ལ་མ་བཅོས་མཉམ་པར་འཇོག་གོ ད་སྔོན་དུ་ངས་འཕོ་ལུང་ཞེས་པའི་སྒྲ་དོན་དང་མཐུན་པར་འཕོ་ཁྲིད་དང་སྦྲགས་ཏེ་ངག་འདོན་གྱི་ལུང་ཞིག་མར་བཏོན་ཡོང་དུས། ཁྱེད་རྣམ་པས་ལུས་ཀྱི་འདུག་སྟངས་རྣམ་སྣང་ཆོས་བདུན་གོང་ནས་གསུངས་པ་ལྟར་དུ་གྱིས། འདི་ལ་དམིགས་བསལ་ལག་གཉིས་ཁུ་ཚུར་གྱིས་མཐེ་བོང་གཉིས་ཀྱིས་རང་གི་སྲིན་མཛུབ་གཉིས་མནན་ཏེ་དེས་བརླ་རྩ་མནན་པ་དང་བཅས་གོང་དུ་བཤད་པའི་དམིགས་པ་གཙོ་བོར་གཏད་དགོས། ངས་སྙིང་ཐིག་རང་གཞུང་གི་འཕོ་བ་དང་ནི་རྫོགས་ཆེན་གདན་ས་ནས་བརྒྱུད་པའི་འཇག་ཟུག་མ། གནམ་ཆོས་ཀྱི་འཕོ་བ་བཅས་པ་ཚར་རེ་འཕྲོ་འཕྲོར་འདོན་ཡོང་དུས་འདིའི་སྐབས་ཁྱེད་རྣམ་པས་དམིགས་པ་འཛིན་རྒྱུ་མ་གཏོགས་ཞལ་འདོན་གསུང་རྒྱུ་དང་ཧིཀ་ཀ་འཕེན་མི་དགོས། འདི་ལ་རབ་ཆོས་སྐུ་གཏད་མེད་ཀྱི་འཕོ་བ་དང་། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། ཐ་མ་སྤྲུལ་སྐུ་རྩལ་སྦྱོང་གི་འཕོ་བ། རང་དོན་འདུ་ཤེས་གསུམ་ལྡན་གྱི་འཕོ་བ་ལ་སོགས་པ་གསུངས་ཡོད་པ་རེད་དེ། རྣལ་འབྱོར་བའི་ཉམས་རྟོགས་ཀྱི་ཁྱད་པར་གྱིས། ཆོ་ག་དེ་འདུ་ཤེས་གསུམ་ལྡན་གྱི་འཕོ་བའི་ཆོ་ག་འདི་ནས་གསུངས་པ་ལྟར་རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ཀྱི་ངོ་བོ་ལ་མགྲོན་པོའི་འདུ་ཤེས། ལམ་དེ་བརྒྱུད་དེ་སྤྱི་བོའི་བླ་མ་འོད་དཔག་མེད་ཀྱི་ཐུགས་ཀར་འཕོ་བ་འགྲོ་སའི་འདུ་ཤེས་ཞེས་བཤད་ཡོད་ཀྱང་། དོན་གྱི་ཐོག་ནས་བླ་མ་མགོན་པོ་འོད་དཔག་མེད་ཀྱི་ཐུགས་དུས་གསུམ་རྒྱལ་བ་ཀུན་གྱི་དགོངས་དབྱིངས་དང་གཉིས་སུ་མེད་པར་བསྒོམ་བྱ་སྒོམ་བྱེད་དང་བྲལ་བར་འཇོག་པ་དེ། རབ་ཆོས་སྐུ་གཏད་མེད་ཀྱི་འཕོ་བ་ཡང་རེད། ཁྲེགས་ཆོད་ཐོད་རྒལ་གཉིས་མེད་ཀྱི་དབྱིངས་རིག་བསྲེ་བའི་གདམས་པའང་དེ་ཡིན། ནམ་ཞིག་འཆི་བ་བཙན་ཐབས་སུ་བྱུང་སྟེ་ལས་ལ་སྦྱོར་རན་པའི་ཚེ་འཆི་བ་བཟློག་རྒྱུ་མེད་པ་རེད་དུས། སྣང་གསུམ་འཕོ་བའི་རིམ་པས་དབུགས་ཕྱིར་འགྲོ་བའི་སྐབས་དང་བསྟུན་ནས་འཆི་སྲིད་ཆོས་སྐུའི་འོད་གསལ་འཆར་དུས་འདི་ཉིད་ལས་ལ་སྦྱར་དགོས་པ་ཡིན། དབྱིངས་དང་རིག་པ་དབྱེར་མེད་དུ་བསྲེ་དགོས། དེ་གལ་ཆེན་པོ་ཡིན། ད་ལྟ་ནས་སྐབས་རེར་ཁྲེགས་ཆོད་ཐོད་རྒལ་གཉིས་མེད་ཀྱི་ནམ་མཁའ་སུམ་སྤྲུགས་སྒོམས་དང་ཕན་རླབས་ཆེ། འཕོ་བའི་གདམས་པ་འདི་སྦྱངས་ནས་མ་ཆག་པ་བྱེད་པ་དང་ཐུན་དང་ཐུན་མཚམས་གང་གི་སྐབས་སུ་ཡིན་ནའང་རིག་པ་སྤྱི་བོར་གཏད་པ་དང་། སྤྱི་བོར་བླ་མ་དང་མགོན་པོ་འོད་དཔག་མེད་གཉིས་མེད་དུ་རྒྱུན་དུ་བཞུགས་པར་བསྒོམ་པ་དེ་འདིའི་མན་ངག་ཀྱང་རེད་ལ་འཕོ་བའི་དམ་ཚིག་ཀྱང་རེད། དངོས་སུ་འཕོ་བའི་དམིགས་པ་གཏད་པའི་སྐབས་སུ་ད་རེས་ཀྱི་བཞུགས་སྟངས་དང་སྲིན་མཛུབ་མནན་རྒྱུ་དེ་ཚོ་མཛད་དགོས། དེ་ནས་འདིའི་ངག་འདོན་དེ་བསྡུས་པ་ངོ་མ་ཞིག་བྱེད་ནས་ཡི་གེ་ཤེས་དང་མི་ཤེས་ཚང་མས་ངག་འདོན་མཉམ་དུ་སྒྲིལ་ཆོག་པའི་ཆེད་དུ་རྒྱས་པ་འདོན་ཁི་ཡོད་པ་མ་རེད། བསྡུས་བསྡུས་འདིའི་ནང་འཐུས་པའང་ཡིན། འདི་གསུང་བྱིན་རླབས་ཅན་ཡང་ཡིན། དེ་ལྟར་ན་ངས་ཚར་གཅིག་མར་ལུང་བྱས་ནས་འདོན་འགྲོ། ༈ བླ་མ་མཁྱེན། བླ་མ་མཁྱེན། བླ་མ་མཁྱེན་ནོ། །སྐུ་གསུམ་བཀའ་བརྒྱུད་ཀྱི་ངོ་བོ། །ཡོངས་འདུས་ཡིད་བཞིན་གྱི་ནོར་བུ། །རྩ་བའི་བླ་མ་དེ་མཁྱེན་ནོ། །མཆོག་ཐུན་དངོས་གྲུབ་ཀུན་སྩོལ་ཅིག །ལན་གསུམ། རྒྱལ་བ་ཀུན་འདུས་རྗེ་བཙུན་བླ་མ་མཁྱེན་ནོ། །འཁོར་བ་དོང་ནས་སྤྲུགས་པར་བྱིན་གྱིས་རློབས་ཤིག །ལན་གསུམ། སྐྱབས་གནས་ཀུན་འདུས་ཀྱི་ངོ་བོ། །མཁྱེན་བརྩེ་ནུས་པའི་བདག་ཉིད། །དྲིན་ཆེན་མཚོ་སྐྱེས་རྡོ་རྗེར། །སྙིང་ནས་གསོལ་བ་འདེབས་སོ། །རྟག་ཏུ་དབྱེར་མེད་ཐུགས་རྗེས། །བདག་བརྒྱུད་བྱིན་གྱིས་རློབས་ཤིག །ལན་གསུམ། ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མའི་ཞབས་ལ་གསོལ་བ་འདེབས།། ༈ བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་དཔའ་བོ་ཆེ། །དག་པའི་ཞིང་དུ་ཁྲིད་པའི་དེད་དཔོན་མཆོག །མགོན་པོ་འོད་དཔག་མེད་ལ་གསོལ་བ་འདེབས། །གནད་གཅོད་གཤིན་རྗེའི་འཇིགས་ལས་བསྐྱབ་ཏུ་གསོལ། །འཇིགས་རུང་བར་དོའི་འཕྲང་ལས་བསྒྲལ་དུ་གསོལ། །བཟོད་དཀའ་ངན་འགྲོའི་གཡང་ལས་དྲང་དུ་གསོལ། །ཞིང་མཆོག་བདེ་བ་ཅན་དུ་ཁྲིད་དུ་གསོལ། །རེ་ས་གཞན་ན་མེད་དོ་ཐུགས་རྗེས་ཟུངས་།། ༈ ཨེ་མ་ཧོ༔ རང་སྣང་ལྷུན་གྲུབ་དག་པ་རབ་འབྱམས་ཞིང་༔ བཀོད་པ་རབ་རྫོགས་བདེ་ལྡན་ཞིང་གི་དབུས༔ རང་ཉིད་གཞི་ལུས་རྡོ་རྗེ་རྣལ་འབྱོར་མ༔ ཞལ་གཅིག་ཕྱག་གཉིས་དམར་གསལ་གྲི་ཐོད་འཛིན༔ ཞབས་གཉིས་དོར་སྟབས་སྤྱན་གསུམ་ནམ་མཁར་གཟིགས༔ དེ་ཡི་ཁོང་དབུས་རྩ་དབུ་མ༔ སྦོམ་ཕྲ་མདའ་སྨྱུག་ཙམ་པ་ལ༔ སྟོང་སངས་འོད་ཀྱི་སྦུ་གུ་ཅན༔ ཡར་སྣེ་ཚངས་བུག་གནས་སུ་ཧར༔ མར་སྣེ་ལྟེ་འོག་ཟུམ་པ་ཡི༔ སྙིང་ཁར་ཚིགས་ཀྱིས་བཅད་པའི་སྟེང༔ རླུང་གི་ཐིག་ལེ་ལྗང་སྐྱའི་དབུས༔ རིག་པ་ཧྲཱིཿཡིག་དམར་པོར་གསལ༔ སྤྱི་བོའི་ཁྲུ་གང་ཙམ་གྱི་སྟེང༔ སངས་རྒྱས་སྣང་བ་མཐའ་ཡས་ནི༔ མཚན་དཔེ་རྫོགས་པའི་ཕུང་པོར་གསལ༔ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ།། ལན་གསུམ། ༈ ཨེ་མ་ཧོ༔ གནས་རང་སྣང་དོན་གྱི་འོག་མིན་ན༔ ཡིད་དད་བརྒྱའི་འཇའ་གུར་འཁྲིགས་པའི་ཀློང་༔ སྐྱབས་ཀུན་འདུས་རྩ་བའི་བླ་མ་ནི༔ སྐུ་ཐ་མལ་མ་ཡིན་དྭངས་མའི་ལུས༔ དཔལ་སངས་རྒྱས་སྣང་མཐའི་ངོ་བོར་བཞུགས༔ ཡིད་མོས་གུས་གདུང་བས་གསོལ་བ་འདེབས༔ ལམ་འཕོ་བ་འབྱོངས་པར་བྱིན་གྱིས་རློབས༔ གནས་འོག་མིན་འགྲོད་པར་བྱིན་གྱིས་རློབས༔ དབྱིངས་ཆོས་སྐུའི་རྒྱལ་ས་ཟིན་པར་ཤོག༔ ཡིད་མོས་གུས་མན་ཆད་ལན་གསུམ། ཚིག་རྐང་རྗེས་མ་ཡང་ལན་གསུམ། ད་རེས་དམིགས་པ་དང་ཕྱག་སྟབས་མཛད་ནས་བཞུགས་དང་ཧིཀ་ཀ་ངས་འཕེན། ཧྲཱིཿ ལྔ་ཚར། ཧིཀ ལྔ་ཚར། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ།། ལན་གསུམ། ༈ སངས་རྒྱས་འོད་དཔག་མེད་ལ་ཕྱག་འཚལ་ལོ༔ ཨོ་རྒྱན་པདྨའབྱུང་གནས་ལ་གསོལ་བ་འདེབས༔ དྲིན་ཆེན་རྩ་བའི་བླ་མས་ཐུགས་རྗེས་ཟུང་༔ རྩ་བ་བརྒྱུད་པའི་བླ་མས་ལམ་སྣ་དྲོངས༔ ཟབ་ལམ་འཕོ་བ་འབྱོངས་པར་བྱིན་གྱིས་རློབས༔ མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས༔ བདག་སོགས་འདི་ནས་ཚེ་འཕོས་གྱུར་མ་ཐག༔ བདེ་བ་ཅན་དུ་སྐྱེ་བར་བྱིན་གྱིས་རློབས༔ ཟབ་ལམ་འཕོ་བ་སོགས་ལན་གསུམ། བདེ་བ་ཅན་དུ་སོགས་ལན་གསུམ། ཧྲཱིཿ ལྔ་ཚར། ཧིཀ ལྔ་ཚར། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ།། ལན་གསུམ། ༈ ཨེ་མ་ཧོ༔ ཤིན་ཏུ་ངོ་མཚར་འོད་དཔག་མེད་མགོན་དང་༔ ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ༔ བདག་སོགས་རྩེ་གཅིག་ཡིད་ཀྱིས་གསོལ་བ་འདེབས༔ ཟབ་ལམ་འཕོ་བ་འབྱོངས་པར་བྱིན་གྱིས་རློབས༔ བདག་སོགས་ནམ་ཞིག་འཆི་བའི་དུས་བྱུང་ཚེ༔ རྣམ་ཤེས་བདེ་ཆེན་འཕོ་བར་བྱིན་གྱིས་རློབས༔ ཚིག་རྐང་རྗེས་མ་ལན་གསུམ། ཧྲཱིཿ ལྔ་ཚར། ཧིཀ ལྔ་ཚར། ཀྱེ་མ་བདག་གཞན་གྱི་རྣམ་ཤེས་རྟེན་དང་བཅས། །འོད་བུན་ནེ་སངས་རྒྱས་ཀྱི་ཐུགས་ཀར་འཕོས། །ཀློང་དབྱེར་མེད་ཕྱམ་གཅིག་སངས་རྒྱས་ནས། །སྐུ་བདེ་ཆེན་ཞིང་གི་རྒྱན་དུ་བཞུགས། །ཕཊ༔ ཕཊ༔ ཕཊ༔ ཕཊ༔ ཕཊ༔ འདིའི་ཕཊ༔རེའི་མཚམས་སུ་ཨ་རེ་ཡིད་ཀྱིས་བསམ་པ་ནི་ངའི་བླ་མའི་ཞལ་ཤེས་ཡིན། དེ་ནས་སྤྱི་བོའི་འོད་དཔག་མེད་དེ་གནས་འགྱུར་ནས་ཚེ་དཔག་མེད་དུ་སྒོམ་དགོས། སྤྱི་བོའི་འོད་དཔག་མེད་པའི་སྐུ༔ འོད་དུ་ཞུ་ནས་རང་ལ་ཐིམ༔ རྐྱེན་དེས་སྐད་ཅིག་དྲན་རྫོགས་སུ༔ རང་ཉིད་ཚེ་དཔག་མེད་དུ་གྱུར༔ ཨོཾ་ཨ་མ་ར་ཎི་ཛི་ཝན་ཏི་ཡེ་སྭཱ་ཧཱ༔ ཅུང་བཟླས་མཐར། འཁོར་བའི་སེམས་ཅན་གང་ཡང་རུང་། །ཁྱེད་ཀྱི་མཚན་ཙམ་འཛིན་པ་ཡིས། །ཚེ་དང་ཡེ་ཤེས་སྩོལ་མཛད་པ། །ཚེ་དཔག་མེད་ཀྱི་བཀྲ་ཤིས་ཤོག། ཨེ་མ་ཧོཿ ངོ་མཚར་སངས་རྒྱས་སྣང་བ་མཐའ་ཡས་དང༔ གཡས་སུ་ཇོ་བོ་ཐུགས་རྗེ་ཆེན་པོ་དང༔ གཡོན་དུ་སེམས་དཔའ་མཐུ་ཆེན་ཐོབ་རྣམས་ལ༔ སངས་རྒྱས་བྱང་སེམས་དཔག་མེད་འཁོར་གྱིས་བསྐོར༔ བདེ་སྐྱིད་ངོ་མཚར་དཔག་ཏུ་མེད་པ་ཡི༔ བདེ་བ་ཅན་ཞེས་བྱ་བའི་ཞིང་ཁམས་དེར༔ བདག་གཞན་འདི་ནས་ཚེ་འཕོས་གྱུར་མ་ཐག༔ སྐྱེ་བ་གཞན་གྱིས་བར་མ་ཆོད་པ་རུ༔ དེ་རུ་སྐྱེས་ནས་སྣང་མཐའི་ཞལ་མཐོང་ཤོག༔ དེ་སྐད་བདག་གིས་སྨོན་ལམ་བཏབ་པ་འདི༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས༔ གེགས་མེད་འགྲུབ་པར་བྱིན་གྱིས་བརླབ་ཏུ་གསོལ༔ ཏདྱཱ་ཐ༔ པཉྩ་དྲི་ཡ་ཨ་ཝ་བོ་དྷ་ཡེ་སྭཱ་ཧཱ༔ ༈ འདིའི་མཚམས་འདིར་ངའི་བྲིས་པའི་བདེ་བ་ཅན་དུ་སྐྱེ་བའི་རྒྱུ་བཞི་དང་འབྲེལ་བའི་ཞིང་སྨོན་བདེ་ཆེན་ལམ་སྟོན་ཐུང་ངུ་འདིའི་ལུང་ཞིག་འདོན། བསླུ་མེད་བདེ་ལྡན་ཞིང་མགོན་འོད་དཔག་མེད། །རྩེ་གཅིག་དད་པའི་ཤུགས་ཀྱིས་ཁྱེད་བསྒོམ་ན། །དང་བའི་ཡིད་ངོར་སྣང་སྟོང་སྒྱུ་མའི་སྤྲིན། །སྐུ་དང་ཞིང་ཁམས་རྟག་ཏུ་འཆར་བར་ཤོག །བརྩེ་ཆེན་སྙིང་རྗེས་དྲངས་པའི་བྱང་སེམས་ལ། །རྟག་ཏུ་གོམས་པའི་རྒྱལ་སྲས་སྤྱོད་མཆོག་གིས། །རླབས་ཆེན་ཚོགས་གཉིས་སྤྱོད་པ་མཐར་ཕྱིན་ཏེ། །དཔག་ཡས་དགེ་བའི་རྩ་བ་ཡོངས་བསྐྱེད་ཤོག །རང་དང་གཞན་གྱིས་དུས་གསུམ་བསགས་པ་ཡི། །རྣམ་དཀར་བསོད་ནམས་ཕུང་པོ་ཇི་སྙེད་པ། །དམིགས་བྲལ་འཁོར་གསུམ་དག་པས་བྱང་ཆུབ་ཆེར། །ཡོངས་སུ་བསྔོ་བས་སྲིད་པ་མཐར་བྱེད་ཤོག །ཁྱེད་ལ་ཡང་ཡང་གསོལ་བ་བཏབ་པ་དང་། །མངོན་རྟོགས་ཡིད་ལ་གོམས་པའི་ཏིང་འཛིན་མཐུས། །ངེས་དོན་འོད་དཔག་མེད་པའི་ཞལ་མཐོང་ནས། །བདེ་ཆེན་ཞིང་ཁམས་རྟག་ཏུ་འཛིན་པར་ཤོག །དེས་ཟབ་ལམ་འཕོ་བའི་གདམས་པ་ལེགས་པར་ཐོབ་པ་ཡིན་པས་གནས་སྐབས་ཀུན་ཏུ་དམིགས་པའི་རྟེན་གོམས་ལ་བསླབ་པ་དང་། ནམ་ཞིག་འཆི་ངེས་པའི་དུས་ལ་བབ་པའི་ཚེ་ན་རང་དོན་འདུ་ཤེས་སུམ་ལྡན་གྱི་འཕོ་བས་ལས་ལ་སྦྱར་བ་ན། ཚེ་འདིར་སྣང་གི་ཆགས་སྡང་གི་འཁྲི་བ་ཐམས་ཅད་རྦད་ཀྱིས་བཅད་ལ། རྩ་དབུ་མ་ལམ་གྱི་འདུ་ཤེས། རང་ཉིད་ལམ་དེར་འགྲོ་བའི་འདུ་ཤེས། བླ་མའི་ཐུགས་ཀར་འཕོ་བའི་འདུ་ཤེས་གསུམ་ལྡན་གྱི་སྒོ་ནས་སྙིང་གའི་རླུང་སེམས་ཀྱི་ཐིག་ལེ་ཡིག་འབྲུ་དང་བཅས་སྔར་བཞིན་དུ་འཕོས་ནས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་ངང་ལ་མཉམ་པར་བཞག་པ་དང་། གཞན་ཡང་འཇིག་རྟེན་འདི་ནས་ཕ་རོལ་ཏུ་ཉིང་མཚམས་སྦྱར་བའི་དམིགས་ཡུལ་གྱི་སླད་དུ་ཐུགས་རྗེའི་ལྕགས་ཀྱུའི་འཕོ་བས་དག་པའི་ཞིང་ཁམས་སུ་དབུགས་དབྱུང་བ་སོགས་དོན་གཉིས་རླབས་པོ་ཆེ་སྒྲུབ་པའི་ཐབས་ལ་མཁས་པར་བྱའོ། །ཞེས་གསུངས་པ་སྟེ། དང་པོ་རང་གིས་འཕོ་བ་འབྱོངས་པར་བྱས་ནས་དེ་ནས་གཞན་བྱེད་པའི་རིམ་པ་བརྒྱུད་དགོས། དེ་ཡིས་ཀློང་ཆེན་སྙིང་ཐིག་རང་གཞུང་གི་འཕོ་ཁྲིད་ཆོག་ཁྲིགས་མའི་འགྲོས་ལྟར་དུ་ཕུལ་ནས་རྣམ་པ་ཚོར་ཐོབ་སོང་བ་རེད། ད་ལག་ཁྲིད་ཀྱི་ཚུལ་དུ་ཚར་གཅིག་ཁྲིད་སྦྱོང་བྱེད། འདུས་པ་ཡོངས་དང་ལྷན་དུ་འཕོ་བའི་ཁྲིད་སྦྱང་ཚར་གཅིག་མཛད་མཐར་བསྔོ་སྨོན་བཅས་ཉིན་བཞི་བའི་ཆོས་ཁྲིད་མཇུག་གྲིལ་སོང་ངོ།།

ཉིན་ལྔ་བའི་ཆོས་ཁྲིད།

དེ་ཡང་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཁྱབ་བདག་གདོད་མའི་མགོན་པོ་ཀུན་ཏུ་བཟང་པོའི་གོ་འཕང་མཆོག་ལ་འགོད་རྒྱུའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་། སྣོད་བཅུད་ཐ་མལ་མ་ཡིན་ཡེ་ནས་དག་པའི་རང་བཞིན། ཀུན་ཁྱབ་ཐིག་ལེ་ཉག་གཅིག་ལས་མ་འདས་པའི་སྤྲོས་མེད་དོན་གྱི་རྣལ་འབྱོར་ལ་ཐུགས་གཞོལ་བའི་སྒོ་ནས་གསན་དགོས་པ་མཁྱེན་པའི་སྟེང་ནས། རང་རེས་ཆོས་དུང་ཞིག་ནམ་བུས་ལ་སྔོན་འགྲོའི་སྐོར་འདི་ནན་བཤད་ཐུགས་གསོས་ཀྱིས། སྔོན་འགྲོ་དངོས་གཞི་འབྲལ་མི་རུང་བ་ཡིན་པ་ཉིན་བཞིན་བཤད་ཀྱིན་ཡོད་ན། དེ་ལས་ཀྱང་གལ་ཆེ་བ་སྔོན་འགྲོ་དངོས་གཞི་གཉིས་ཀའི་སྐབས་སུ་ཡང་འབྲལ་མི་རུང་བ་དེ་གང་ཡིན་ན། བླ་མའི་རྣལ་འབྱོར་ཡིན། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་སྦྱངས་བའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བརྟེན་པ་རྨོངས་པར་ཤེས་པར་བྱ། །ཞེས་གསུངས་པ་རེད། ཐུན་མོང་ཕྱིའི་སྔོན་འགྲོ་ནས་ཐུན་མིན་ནང་གི་སྔོན་འགྲོའི་བར་ཐམས་ཅད་སྒྲིབ་སྦྱངས་ཚོགས་བསགས་གཉིས་ལ་འདུས། ཡིན་ནའང་ཐབས་དེ་དག་ལས་བྱུང་བའི་ཐབས་བྱུང་བྱིན་བརྒྱུད་རྟོགས་པའི་ཡེ་ཤེས་རྒྱུད་ལ་འཆར་བ་ལ་བླ་མའི་རྣལ་འབྱོར་ཁོ་ན་ལ་བརྟེན་དགོས་པ་ཡིན། དེས་ན་རྟོགས་པའི་ཡེ་ཤེས་རང་རྒྱུད་ལ་སྐྱེས་པར་བྱེད་པའི་ཐབས་ཐམས་ཅད་ཀྱི་མཐར་ཐུག་པ་ལམ་ཟབ་བླ་མའི་རྣལ་འབྱོར་གྱི་ཁྲིད་ཡིན་ཞེས་རིམ་བྱོན་དམ་པ་གོང་མས་ལན་གཅིག་མིན་པར་ཡང་ཡང་བཟླས་ནས་གསུངས་ཡོད་པ་དེའི་རྒྱུ་མཚན་གང་ལ་ཐུག་པ་རེད་ཟེར་ན། རྫོགས་པ་ཆེན་པོའི་ལུགས་ལ་བླ་མ་སངས་རྒྱས་ཆོས་ཀྱི་སྐུར་མཐོང་དགོས། དེ་ལ་མོས་གུས་ལྟེམ་རྐྱང་མེད་པའི་སྒོ་ནས་གསོལ་བ་བཏབ་སྟེ་ཐུགས་ཡིད་དབྱེར་མེད་དུ་འདྲེས་པའི་ཉམས་ལེན་གཅིག་པུས། གཞན་རྐྱེན་ལ་མ་ལྟོས་པར་དགོངས་བརྒྱུད་རྟོགས་པའི་ཡེ་ཤེས་དེ་ཉིད་རང་རྒྱུད་ལ་སྐྱེད་ནུས་པ་ཡིན་པས་ན་བླ་མའི་རྣལ་འབྱོར་མཆོག་ཏུ་བསྔགས་པ་ཡིན། རྒྱུད་ལས། གང་གིས་བསྐལ་པ་བྱེ་བ་རུ། །ལྷ་སྐུ་འབུམ་ཕྲག་བསྒོམས་པ་ལས། །བླ་མ་སྐད་ཅིག་དྲན་པ་མཆོག །ལ་སོགས་པ་མདོ་རྒྱུད་བཀའ་དང་བསྟན་བཅོས་ཀྱི་ལུང་མང་པོ་རེད། དེ་ལ་འདི་ལྟར་བླ་མས་གདམས་ངག་བསྩལ་བས་བཀའ་དྲིན་ཆེ་བ་ཡིན་ཀྱང་། སངས་རྒྱས་ཆོས་ཀྱི་སྐུ་ཇི་ལྟར་ཡིན་སྙམ་ན། འདི་ལུང་རིགས་གཉིས་ཀྱིས་བསྒྲུབས་ཡོད། ལུང་གོང་དུ་དྲངས་པ་ལྟར་དང་གཞན་ཡང་། འདི་ནི་རང་བྱུང་བཅོམ་ལྡན་འདས། །ལ་སོགས་པ་མང་ལ་རིགས་པའི་ཐད་ནས་ཀྱང་། བླ་མའི་ཐུགས་སངས་རྒྱས་ཡིན། ཇི་ལྟར་ཡིན་ན། ཟབ་གསལ་གཉིས་སུ་མེད་པའི་གཞི་གནས་ཀྱི་ཡེ་ཤེས་དེ་རྟོགས་རུང་མ་རྟོགས་རུང་ངོ་བོ་ཡེ་དག་གི་སངས་རྒྱས་ཡིན། རྟག་བརྟན་འཕོ་འགྱུར་དང་བྲལ་བའི་འདུས་མ་བྱས་སངས་རྒྱས་ཆོས་སྐུ་རེད། དེ་ལྟ་བུའི་གཞི་འབྲས་དབྱེར་མེད་ཀྱི་ཆོས་སྐུ་དེའི་རྣམ་རོལ་བླ་མའི་རྣམ་པར་སྣང་བ་དེ། ང་ཉིད་ཕྱི་མའི་དུས་ཀྱི་ཚེ། །དགེ་བའི་བཤེས་ཀྱི་གཟུགས་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པའི་ལུང་དོན་ལྟར། ཕྱིར་མི་ལྡོག་པའི་ཆོས་བརྗོད་པའི་ངག་ལས་ཡང་དག་པའི་དགེ་བའི་བཤེས་གཉེན་དུ་དཔོག་པ་ཡིན་ཞིང་། སངས་རྒྱས་ཉིད་ཀྱི་སྐུ་གསུང་ཐུགས་མི་ཟད་རྒྱན་གྱི་འཁོར་ལོར་བཀོད་པའི་རོལ་བ་བླ་མའི་གཟུགས་སྐུར་སྣང་བ་ཡིན་པས། གཟུགས་སྐུའི་ངོ་བོ་ཆོས་སྐུ་དང་། ཆོས་སྐུའི་རྣམ་རོལ་གཟུགས་སྐུ། དེ་གཉིས་དབྱེར་མི་ཕྱེད་པའི་ཟུང་འཇུག་རྡོ་རྗེ་འཆང་རིགས་རྣམས་ཀུན་གྱི་གཙོ་བོར་ངང་གིས་གྲུབ་པ། ནང་མཚོན་བྱ་དོན་གྱི་བླ་མ། བླ་མའི་ཐུགས་ཡེ་ཤེས་ཆེན་པོ་དུས་གསུམ་བདེ་བར་གཤེགས་པ་ཐམས་ཅད་ཀྱི་དགོངས་པ་དང་གཉིས་སུ་མ་མཆིས་པ་དེ་ཡིན་ན། དེ་ཉིད་མཚོན་པར་བྱེད་པའི་མཚོན་བྱེད་ཕྱི་རོལ་རྟགས་ཀྱི་བླ་མའང་སངས་རྒྱས་ཉིད་ལས་མ་འདས་པ་ཆོས་ཉིད་ཀྱི་རིགས་པས་བསྒྲུབ་ན་དེ་ལྟར་དུ་གྲུབ་པ་ཡིན། དེས་ན་བླ་མ་སངས་རྒྱས་སུ་ཤེས་པ་དང་གཅིག མཛད་པ་སངས་རྒྱས་ཀྱི་ཕྲིན་ལས་སུ་ཤེས་པ་དང་གཉིས། རང་ངོར་སངས་རྒྱས་ལས་ཀྱང་བཀའ་དྲིན་ཆེ་བ་དང་གསུམ། སྐྱབས་གནས་རྒྱ་མཚོའི་སྤྱི་གཟུགས་སྐྱབས་ཡུལ་ཐམས་ཅད་བླ་མར་མ་འདུས་པ་མེད་པ་དང་བཞི། གསོལ་འདེབས་མོས་གུས་ཀྱི་རྐྱེན་ལ་བརྟེན་ནས་རྟོགས་པའི་ཡེ་ཤེས་རང་རྒྱུད་ལ་བསྐྱེད་ནུས་པ་དང་ལྔ་བོ་དེ་ཚང་དགོས། དེ་ལྟར་ལྔ་བོ་ཚང་ཡོད་པར་ཤེས་པའི་སྒོ་ནས་བླ་མ་བསྒྲུབ་རྒྱུ་ལ་བསམ་བློ་བཏང་ན་སྒྲུབ་པའི་སྒྲུབ་ཚུལ་མང་སྟེ། བླ་རྫོགས་ཐུགས་གསུམ་དགོངས་པ་གཅིག་འདུས་བཀའ་གཏེར་ཐམས་ཅད་ནས་འབྱུང་བ་དང་། ཀུན་མཁྱེན་ཆེན་པོའི་དགོངས་པ་ལྟར་ན་ཕྱི་སྤྲུལ་སྐུ་ལྟར་ཏུ་སྒྲུབ་པ། ནང་ལོངས་སྐུ་ལྟར་དུ་སྒྲུབ་པ། གསང་བ་མཁའ་འགྲོ་ལྟར་དུ་སྒྲུབ་པ། ཡང་གསང་ཡེ་ཤེས་བླ་མའི་མཉམ་བཞག་གིས་སྒྲུབ་ཚུལ་སོགས་ཡོད་པས་སོ། དེའི་དགོངས་དོན་ཀུན་མཁྱེན་ཕྱི་མ་འཇིགས་བྲལ་གླིང་པས་རྩལ་དུ་བཏོན་པ་རྫོགས་ཆེན་ཀློང་ཆེན་སྙིང་ཐིག་གི་ཆོས་སྡེ་ལ་མཚོན་ན། ཕྱི་སྒྲུབ་བླ་མའི་རྣལ་འབྱོར། ནང་སྒྲུབ་རིག་འཛིན་འདུས་པ། གསང་སྒྲུབ་ཐུགས་རྗེ་ཆེན་པོ། ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་སོགས་དཀྱིལ་ཆོག་དང་འབྲེལ་བ་དང། ཡང་གསང་མཉམ་བཞག་གིས་སྒྲུབ་ཚུལ་ཡང་ཡོད་པ་ཡིན། ཁྲིད་ཡིག་ཡེ་ཤེས་བླ་མ་དངོས་གཞིའི་ཁྲེགས་ཆོད་ཐོད་རྒལ་གྱི་ཉམས་ལེན་ལྟ་སྒོམ་སྤྱོད་འབྲས་ཀྱི་གནད་ཐམས་ཅད་ཀྱང་། ཁྲིད་ཡིག་ཡེ་ཤེས་བླ་མའི་ནང་ནས་བསྟན་པ་ལྟར་དུ་བླ་མ་ཆོས་སྐུའི་དགོངས་པ་འོད་གསལ་འཕོ་འགྱུར་དང་བྲལ་བའི་སྐུ་བཞིའི་རྒྱལ་སར་སྦྱོར་བ་ལས་མ་འདས་པ་ཞིག་ཡིན། བླ་མའི་རྣལ་འབྱོར་གྱི་ཚོགས་ཞིང་བསྒོམ་པའི་སྐབས་ཡིན་ན། དག་པ་གཞིར་བཞུགས་ཀྱི་དཀྱིལ་འཁོར་དུ་སྣང་སྲིད་དག་པ་རབ་འབྱམས་ཡེ་ནས་ཡིན་པ་ལ་གཞིར་བཞེངས་ཀྱི་སྒོ་ནས་ཡིན་པ་ལ་ཡིན་པར་གསལ་འདེབས་དགོས་པ་ཡིན། སྤྱིར་བཏང་གིས་བཤད་ན་མ་དག་འཁྲུལ་བའི་སྣང་བ་དང་རྟེན་འབྲེལ་སྒྱུ་མའི་སྣང་བ། ཡང་དག་ཡེ་ཤེས་ཀྱི་སྣང་བ་གསུམ་གྱིས་ནང་ནས་འུ་བུ་ཚོའི་སོ་སོ་སྐྱེ་བོའི་ལོག་རྟོག་འཁྲུལ་བའི་ངོ་ཁར་སྣང་གིན་འདུག་པ་འདི་མ་དག་འཁྲུལ་བའི་སྣང་བ་རེད། སར་གནས་ཀྱི་བྱང་ཆུབ་སེམས་དཔའ་ཚོའི་རྗེས་ཐོབ་དུ་ཀུན་རྫོབ་སྒྱུ་མ་དང་ཆུ་ཟླ་སོགས་ཀྱི་རྣམ་པར་སྣང་བ་དེ་རྟེན་འབྲེལ་སྒྱུ་མའི་སྣང་བ་ཡིན། དེ་ཁོ་ན་ཉིད་མངོན་དུ་གྱུར་བའི་ཡང་དག་ཡེ་ཤེས་ཀྱི་སྤྱོད་ཡུལ་དུ་ཇི་ལྟར་སྣང་ན། སྣང་སྲིད་སྐུ་དང་ཡེ་ཤེས་ཀྱི་རོལ་བར་ཤར་བ་ཡིན། དེ་དག་ལས་གང་ཡང་དག་ཡིན། གང་ཡང་དག་མིན་ཟེར་ན། ལོག་རྟོག་འཁྲུལ་བའི་སྣང་བ་དང་རྟེན་འབྲེལ་སྒྱུ་མའི་སྣང་བ་གཉིས་གཅིག་མ་དག་པ་དང་། གཅིག་མ་དག་དག་པ་གཉིས་ཀ་རེད། མདོར་ན་གཉིས་ཀ་སྣང་ཚུལ་ཡིན། ཤིན་ཏུ་རྣམ་དག་ཡང་དག་ཡེ་ཤེས་ཀྱི་སྣང་བ་དེ་གནས་ཚུལ་དངོས་ཡིན། དེས་ན་གནས་ཚུལ་སྐུ་དང་ཡེ་ཤེས་ཡིན་ལུགས་དག་པ་རབ་འབྱམས་སུ་གསལ་འདེབས་པ། སྣང་ཆ་དབུས་ཀྱི་བླ་མ་ནས་མཐའ་ཡི་བཀའ་སྡོད་ཕོ་ཉའི་འཁོར་ཚོགས་དང་བཅས་པ་བླ་མའི་ཐུགས་ཡེ་ཤེས་ཆེན་པོ་གཅིག་གི་ངོ་བོར་རྫོགས་པར་གསལ་དགོས་པ་ཡིན། མདོར་ན་བླ་མ་ཕྱོགས་དུས་རྒྱལ་བ་རབ་འབྱམས་ཀྱི་ངོ་བོར་བསྒོམ་དགོས། སྒོམ་ཚུལ་ལའང་ཁྱད་པར་ཡོད་པ་རེད། བྱིན་རླབས་ཀྱི་འཇུག་པ་མྱུར་བར་འདོད་ན་བླ་མ་གཅིག་ལ་ཚང་བའི་ཀུན་འདུས་ནོར་བུའི་ལུགས་སུ་བསྒོམ་ཆོག སྐྱབས་འགྲོ་དང་གསོལ་འདེབས་ཀྱི་དུས་སུ་བརྒྱུད་པའི་བབས་དང་བསྟུན་ནས་དད་གུས་མོས་པའི་རྟེན་དུ་ཐོ་བརྩེགས་སུ་གཅིག་གི་བཞུགས་གདན་ལ་གཅིག་གི་དབུ་མ་རེག་པར་བསྒོམ་རྒྱུ་དེ་ལྟ་བུ་དང་། ཚོགས་བསགས་གཙོ་བོར་བྱེད་པའི་སྐབས་ཡིན་ན་སྐྱབས་ཡུལ་ཚོགས་ཞིང་གི་ལྷ་ཚོགས་དང་ཁྱད་པར་བླ་མ་བརྒྱུད་པ་ཁྲོམ་ཚོགས་སུ་སྒོམ་ཚུལ་དེ་ལྟར་ཡང་གསུངས་ཡོད། རང་ཉིད་ཀྱི་ལུས་ཀྱང་སྐྱབས་འགྲོ་དང་སྒྲིབ་སྦྱང་གི་དུས་སུ་ཐ་མལ་དུས་རྒྱུན་ལྟར་དུ་སྒོམ་རྒྱུ་དང་ནི། བླ་མའི་རྣལ་འབྱོར་གྱི་སྐབས་སུ་རང་ཉིད་ཡི་དམ་དུ་བསྒོམ་རྒྱུ་དང་འཛིན་བྲལ་གྱི་ངང་ནས་མདུན་གྱི་ནམ་མཁར་སྒོམ་རྒྱུ་སོགས་གསུངས་ཡོད་ཀྱང་། ཀློང་ཆེན་སྙིང་ཐིག་གི་སྐབས་འདིར་རང་ཉིད་རྡོ་རྗེ་རྣལ་འབྱོར་མར་བསྒོམ་དགོས་པ་འདིའི་སྒོས་ཆོས་རེད། ཐུགས་རྒྱུད་དགོངས་པའི་བྱིན་རླབས་རང་རྒྱུད་ལ་འཕོས་པ་དེ་དོན་དམ་སེམས་བསྐྱེད་ཀྱི་ངོ་བོ་ཡང་ཡིན་ལ་ཡེ་ཤེས་ཀྱི་ཚོགས་ཀྱང་དེ་ཡིན། དེ་ཉིད་མངོན་དུ་གྱུར་པ་བསོད་ནམས་ཀྱི་ཚོགས་ལ་བརྟེན་དགོས་པ་ཡིན་པས་ན་ཚོགས་བསགས་ཐབས། སྒྲིབ་པ་སྦྱོང་ཐབས་མཐའ་ཡས་པ་ཞིག་ཡོད་པ་ཐམས་ཅད་ཀྱི་གནད་བསྡུས་ན་ཡན་ལག་བདུན་པའི་ནང་ལ་འདུས་པ་ཡིན་པའི་སྟབས་ཀྱིས་ང་རྒྱལ་གྱི་གཉེན་པོ་ཕྱག་འཚལ་བ། ཕྱག་འབུམ་ཐེར་གསོག་པ་འབུམ་ལྔའི་ནང་ནས་གཅིག་རེད། ངོ་མ་ཡིན་ན་ཕྱག་འདི་ཡན་ལག་བདུན་པ་དང་འབྲེལ་ན་བཟང་བ་རེད། སྐྱབས་འགྲོ་སོགས་དང་སྦྲེལ་ནའང་འགལ་བ་མི་འདུག འབུམ་ལྔ་ཟེར་དུས་སྐྱབས་འགྲོ་སེམས་བསྐྱེད་གཉིས། ཡིག་བརྒྱ་མཎྜལ་གཉིས་དང་བཞི། ཕྱག་དང་ལྔ་བོ་དེ་རེད། བརྐྱང་ཕྱག་འཚལ་ན། ཕྱག་རྣལ་འབྱོར་བའི་ལུགས་སུ་འཚལ་བ་ཟེར་བ་དེ་ཡིན་པས། ལུས་ཀྱིས་བརྐྱང་ཕྱག་བརྡབས་ཏེ་འཚལ་ཞེས་གསུང་ལུགས་ཀྱིས་སྡིག་སྒྲིབ་དག་སྟོབས་ལྷག་ཏུ་ཆེ་བ་ཡིན་པར་འདུག འདིའི་སྐབས་སུ་ལུས་རྐྱང་པས་མི་ཚད་པར་སྒོ་གསུམ་གུས་པས་ཕྱག་འཚལ་དགོས། ཡིད་ཀྱིས་རབ་ལྟ་བ་མཇལ་བའི་ཕྱག་དང་ནི་འབྲིང་སྒོམ་པ་གོམས་པའི་ཕྱག་ཙམ་མ་རེད་ནའང་། ལུས་དཔག་མེད་རྡུལ་སྙེད་ཀྱི་གྲངས་སུ་སྤྲུལ། དེ་བཞིན་དུ་ངག་གིས་བསྟོད་པ་དང་ཡིད་ཀྱིས་དད་དང་གུས་པ་བྱས་ནས་སྣང་སྲིད་ཐམས་ཅད་བླ་མའི་རོལ་བར་བསྒོམ་དུས་སྦྱོར་དངོས་རྗེས་གསུམ་དམ་པ་གསུམ་དང་འབྲེལ་བ་ཡང་ཟུར་ནས་བཤད་འདུག་མི་དགོས་ཁི། མཆོད་པ་ནི་འདོད་ཆགས་དང་སེར་སྣའི་གཉེན་པོ་ཡིན། བཤགས་པ་གཙོ་བོ་ཞེ་སྡང་གི་གཉེན་པོ། རྗེས་སུ་ཡི་རང་ཕྲག་དོག་གི་གཉེན་པོ། ཆོས་འཁོར་བསྐོར་བར་བསྐུལ་བ་གཏི་མུག་གི་གཉེན་པོ། མྱ་ངན་ལས་མི་འདའ་བར་གསོལ་བ་འདེབས་པ་ལོག་ལྟའི་གཉེན་པོ། བསྔོ་བ་ཐེ་ཚོམ་གྱི་གཉེན་པོ་སྟེ། གཉེན་པོ་དེ་དག་ལ་གསུངས་ནི་རེད། དབང་བཞི་ལེན་པ་འདི་རྟོགས་པའི་ཡེ་ཤེས་དངོས་སུ་རང་རྒྱུད་ལ་ལེན་པའི་གནད་འཛིན་ས་ངོ་མ་དེ་ཡིན། དབང་བཞི་ལེན་པ་འདི་རྟོགས་པའི་ཡེ་ཤེས་དངོས་སུ་རང་རྒྱུད་ལ་འདྲེན་པ་ཡིན་ན། སྤྱིར་དབང་ལ་གཞི་ལམ་འབྲས་གསུམ་གྱི་དབང་ཡོད་ན། འདི་གང་རེད་ཟེར་ན། དེ་ལྟ་བུའི་དབང་གསུམ་ཡོད་པ་ལས་འདི་ལམ་དབང་རེད། ལམ་དབང་ལ་ཡང་ནང་གསེས་ཀྱིས་གཞི་ལམ་འབྲས་གསུམ་གྱི་དབྱེ་བ་ཡོད་པ་ལས་འདི་ལམ་དབང་གི་ལམ་དབང་རང་ཉིད་ཀྱིས་ལེན་རྒྱུ་དེ་རེད། ལམ་དབང་གི་གཞི་དབང་བླ་མས་བསྐུར་ཏེ་རང་གིས་ཞུས་ནས་བསྐུར་ཐོབ་མཚན་ཉིད་པ་བྱས་པ་དེ་ཡིན་ལ། ལམ་དབང་གི་འབྲས་དབང་དེ་གང་ཡིན་ཞེ་ན། སྣང་གསུམ་འཕོ་བའི་བག་ཆགས་འཇོམ་བྱེད་མདོ་ལུགས་ལྟར་དུ་བཤད་ན་འོད་ཟེར་ཆེན་པོའི་དབང་བསྐུར། སྔགས་ལུགས་ལྟར་ན་ཟབ་གསལ་གཉིས་སུ་མེད་པའི་ཡེ་ཤེས་ཀྱི་དབང་གསུམ་བསྐུར་ཏེ་ཐོབ་པ་དེ་ཉིད་ལ་ངོས་འཛིན་དགོས་པ་རེད། སྐབས་འདིར་གུ་རུའི་སྨིན་མཚམས་ནས་སོགས་ཀྱིས་ངག་འདོན་དང་སྦྲགས་ཏེ་རྩ་རླུང་ཐིག་ལེ་ཀུན་གཞིའི་ལས་དང་ཤེས་བྱའི་སྒྲིབ་པ་ཐམས་ཅད་སྦྱངས། སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་ཞུགས། བུམ་གསང་ཤེས་རབ་ཚིག་དབང་རིན་པོ་ཆེ་དང་བཅས་པའི་དབང་བཞི་ཐོབ། དེའི་མཐར་གུ་རུ་དང་བླ་མ་དབྱེར་མེད་པའི་ཐུགས་ཀའི་འོད་དམར་གྱིས་རང་ཉིད་རྡོ་རྗེ་རྣལ་འབྱོར་མར་གསལ་ཡོད་པའི་སྙིང་ཁར་རེག་པའི་མོད་ལ་འོད་དམར་གྱི་གོང་བུ་ཞིག་ཏུ་གྱུར་ནས་གུ་རུའི་ཐུགས་དང་དབྱེར་མེད་དུ་འདྲེས་པའི་ངང་ལ་མཉམ་བཞག་གི་ཐུན་ཅི་ནུས་སུ་བཅད། རྗེས་སྣང་སྲིད་བླ་མའི་རོལ་བ་དང་མ་བྲལ་ཞིང་དངོས་གཞིའི་ཐུན་གྱི་ཉམས་ལེན་གྱི་ངང་སྐྱོང་བཞིན་པར་བསྔོ་བ་དང་སྨོན་ལམ་བྱེད་རྒྱུ་འདི་རྒྱུན་གྱི་ཕྱག་ལེན་ལྟར་དུ་རེད། དེ་ལྟར་བླ་མའི་རྣལ་འབྱོར་ལ་བརྩོན་པས་ཉམས་རྟོགས་ཁྱད་པར་ཅན་རྒྱུད་ལ་སྐྱེས་པ་ཡིན། དོན་བརྒྱུད་ཀྱི་དགོངས་པ་སྙིང་ལ་འཕོས་ཏེ་དེའི་རྟོགས་པ་སྐྱེས་པའི་རྟགས་སུ་བྱམས་དང་སྙིང་རྗེ་བྱང་ཆུབ་ཀྱི་སེམས། དད་དང་ངེས་འབྱུང་། དེའི་སྟེང་དུ་ཆོས་རབ་རྣམ་འབྱེད་ཀྱི་ཤེས་རབ་སོགས་འབྱུང་བ་ཡིན། རྟོགས་པ་སྐྱེས་རྟགས་སུ་ཡོན་ཏན་སྔོན་དུ་འབྱུང་བ་ཞིག་དང་། རྟོགས་པ་སྐྱེས་ནས་ཡོན་ཏན་ཕྱིས་སུ་འབྱུང་བ་ཞིག་དང་རིགས་གཉིས་ཡོད་པར་གསུངས། མདོར་ན་ཉམས་དང་རྟོགས་པ་གཉིས་ཀྱི་ནང་ནས་རྟོགས་པ་གཙོ་ཆེ་བ་ཡིན། ཆོས་ཉིད་ཀྱི་རྟོགས་པ་རྒྱུད་ལ་སྐྱེས་པ་དེ་ཉམས་ལེན་སྒྲུབ་པ་བྱས་པའི་འབྲས་བུ་ཡིན། དེ་ལྟར་ལམ་ཟབ་བླ་མའི་རྣལ་འབྱོར་གྱིས་མཐར་ཐུག་ཐུགས་ཡིད་དབྱེར་མེད་དུ་ཇི་ལྟར་བསྲེ་རྒྱུའི་སྐོར་རགས་ཙམ་ཞིག་ཞུས་ནས། གང་ཞིག་འཆད་ཉན་བྱ་བ་རྗེ་ཞབས་དཀར་ཚོགས་དྲུག་རང་གྲོལ་གྱི་གསུང་འོད་གསལ་རྫོགས་པ་ཆེན་པོའི་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ཁྲིད་རྣམ་པ་གཉིས་ལས་སྔ་མ་སོང་ནས། ཕྱི་མ་འོད་གསལ་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཆར་འབྱེད་པའི་ལྡེའུ་མིག་ཅེས་བྱ་བ་འདི་ཉིད་འཆད་ཁྲིད་ཐེངས་གཅིག་ཡོངས་སུ་གྲུབ་ལ་ཉེ་བ་ཆོས་ཁྲིད་སྔོན་མར་འོད་གསལ་སྣང་བཞིའི་འཆར་ཚུལ་བཤད་པ་ཡན་ཆོད་ཀྱིས་འདིའི་མན་ངག་གི་ལུས། ཁྲིད་རིམ་བདུན་གྱིས་བསྟན་པའི་ནང་གི་དྲུག་པ་ཡན་ཆོད་སོང་མ་ཐག་པའི་མཚམས།

༧༽ བདུན་པ་མཐའ་རྟེན་གྱི་མན་ངག་གི་ཁྲིད།

དེ་རིང་བདུན་པ་མཐའ་རྟེན་གྱི་མན་ངག་གི་ཁྲིད་ནི།

ཨེ་མ་ཧོ།

བདུན་པ་མཐའ་རྟེན་མན་ངག་རྣམ་བཞི་ཡི།།

གསུངས་ནས་རྫོགས་ཆེན་སྙིང་ཐིག་གི་ཁྲིད་གཞུང་སྤྱི་ཁྱབ་ཀྱི་འགྲོས་ཀྱིས། མི་འགུལ་གསུམ་གྱིས་གཞི་བཅའ། སྡོད་པ་གསུམ་གྱིས་ཚད་བཟུང་། ཐོབ་པ་གསུམ་གྱིས་གཟེར་གདབས། གདེང་བཞིས་གྲོལ་ཚད་བསྟན་པ་དང་། ས་ལམ་བགྲོད་ཚུལ་འབྲས་བུ་དང་བཅས་པ་བསྟན་པའི་སྤྱི་ཆིངས་བཞག་ནས་གསུངས་ཀྱིན་ཡོད་པ་དེ་ལས།

ཀ༽ དང་པོ་མི་འགུལ་གསུམ་གྱིས་གཞི་བཅའ་བ།

དང་པོ་མི་འགུལ་གསུམ་གྱིས་གཞི་བཅའ་བ།།

འདི་ལ་ནང་གསེས་ལུས་ངག་ཡིད་གསུམ་མི་འགུལ་བ་གསུམ་ཡིན་ན་འདི་ནས་དེ་དག་གི་དགོས་པ་དང་སྦྲགས་ནས་ལུས་དང་མིག་དང་རླུང་རིག་གསུམ་གྱི་སྒྲ་ཡིས་བཞུགས་སྟངས་གཟིགས་སྟངས་འོད་གསལ་དགོངས་པའི་འཕེལ་ཚུལ་དང་བཅས་པས་བསྟན་གྱིན་ཡོད་པ་རེད།

ལུས་ནི་བཞུགས་སྟངས་གསུམ་ལས་མི་འགུལ་བར།།

བྱས་པས་རྒྱུ་བྱེད་དྲན་རྟོག་རྒྱུན་ཆད་ནས།།

རིག་པ་གཡོ་མེད་གནས་པའི་དགོས་པ་ཡོད།།

མིག་གཉིས་གཟིགས་སྟངས་གསུམ་ལས་མི་འགུལ་བར།།

བྱས་པས་དབྱིངས་རིག་འདུ་འབྲལ་མེད་པའོ།།

རླུང་རིག་མི་འགུལ་རབ་ཏུ་དལ་བར་བྱ།།

འོད་གསལ་ཇེ་འཕེལ་ཇེ་བརྟན་འགྱུར་བའོ།།

ཞེས་གསུངས་ཏེ། སྒོ་གསུམ་གྱི་མི་འགུལ་བ་གསུམ་གསུམ་གྱིས། ལུས་མི་འགུལ་བ་གསུམ་གྱིས་གནད་གཟིར། ངག་མི་འགུལ་བ་གསུམ་གྱིས་ལམ་བསལ། སེམས་མི་འགུལ་བ་གསུམ་གྱིས་བཅུད་དུ་དྲིལ་བ་སྟེ། དེ་ལྟ་བུའི་ལུས་ངག་ཡིད་གསུམ་མི་འགུལ་བ་གསུམ་གསུམ་དགུ་རུ་ཕྱེས་ཏེ་གསུངས་ཡོད། འདི་གཙོ་བོ་ཐེག་མཆོག་མཛོད་ཀྱི་དགོངས་པ་དང་བསྟུན་ནས་ལུས་མི་འགུལ་བ་ལའང་གནད་གསུམ་ཡོད་པ་དེ་ཉིད་གཙོ་བོར་བཟུང་ནས་གསུངས་འདུག འདི་ནས། ལུས་ནི་བཞུགས་སྟངས་གསུམ་ལས་མི་འགུལ་བར། །བྱས་པས་རྒྱུ་བྱེད་དྲན་རྟོག་རྒྱུན་ཆད་ནས། །ཞེས་པས་ཅི་བསྟན་ན། ཁྱབ་པ་བཞུགས་སྟངས་ཀྱི་མི་འགུལ་བ་བསྟན་ཡོད། དེས་རྩ་གནད་ལ་དབབ་པ་དེ་ཉིད་བསྟན་པ་རེད། ཆོས་སྐུའི་བཞུགས་སྟངས་རྩལ་གསུམ་རྫོགས་པའི་སེང་ཆེན་གངས་ནས་འགྱིང་པ་ལྟ་བུ་ཡིན་པས་ན་འཁོར་བའི་འཇིགས་པར་ཉམ་ང་མེད་པ། ལོངས་སྐུའི་བཞུགས་སྟངས་སྟོབས་ལྡན་གླང་ཆེན་ཉལ་བ་ལྟ་བུ་ཡིན་པས་ན་ཡེ་ཤེས་ཁྱད་པར་ཅན་འདེགས་པར་བྱེད་པ། སྤྲུལ་སྐུའི་བཞུགས་སྟངས་དྲང་སྲོང་ཏིང་འཛིན་ལ་བཞུགས་པ་ལྟ་བུའི་ཚུལ་གྱིས་ཏིང་ངེ་འཛིན་ལ་རྒྱུན་དུ་གནས་པ་ཡིན་པ་བཅས་དེ་ལྟ་བུའི་བཞུགས་ཚུལ་གསུམ་པོ་འདི། བཅའ་བ་རྒྱུན་གྱི་གནད་དང་། ངལ་གསོ་ཡེ་ཤེས་ཀྱི་གནད་གཉིས་རེ་དང་ལྡན་པར་བསྟན་པ་རེད། དེ་ནས་གོང་དུ་རྩ་བའི་སྐབས་ན། མིག་གཉིས་གཟིགས་སྟངས་གསུམ་ལས་མི་འགུལ་བར། །བྱས་པས་དབྱིངས་རིག་འདུ་འབྲལ་མེད་པའོ། །གསུངས་པ་འདིས་ཅི་བསྟན་ན། འཆར་བྱེད་གཟིགས་སྟངས་ཀྱིས་མི་འགུལ་བས་ལམ་སྣ་དྲངས་པ་ཡིན། ཆོས་སྐུའི་གཟིགས་སྟངས་ཀྱིས་བལྟས་པས་རིག་པའི་ངོ་བོ་མཐོང་། ལོངས་སྐུའི་གཟིགས་སྟངས་ཀྱིས་བལྟས་པས་རིག་པའི་རང་བཞིན་གྱི་སྣང་བ་མངོན་སུམ་དུ་མཐོང་། སྤྲུལ་སྐུའི་གཟིགས་སྟངས་ཀྱིས་གཟིགས་པས་རིག་པའི་ཐུགས་རྗེའི་སྣང་བར་ལོངས་སྤྱོད་པའོ། །དེའི་འཕྲོ་ནས་རླུང་རིག་མི་འགུལ་རབ་ཏུ་དལ་བར་བྱ། །འོད་གསལ་ཇེ་འཕེལ་ཇེ་བརྟན་འགྱུར་བའོ། །གསུངས་རྒྱུ་འདིས་གཅུད་པ་དེམས་ཀྱི་མི་འགུལ་བ་གསུམ་གསུངས་པ་རེད། འདིའི་དེམས་འདི་བྲི་ནོར་བྱེད་པ་མང་པོ་འདུག དགོས་པ། རླུང་གི་འགྲོ་འོང་དགག་པའི་དགོས་པ་ཡོད། ལུས་ཀྱི་ཡན་ལག་སོར་མོའི་ཚིགས་ཀྱིས་སྐེའི་མཇིང་པའི་རྩ་ལྟེམས་རྒྱུ་འདི་དག་གིས་ལུས་ཀྱི་གཅུད་པ་རང་སོར་བཞག་པས་ཁམས་གསུམ་མིང་མེད་དུ་བྱེད་པ་ཡིན་གསུངས་པ་རེད། འདིའི་ལུས་མི་འགུལ་བར་སྡོད་པའི་ཤུགས་ལས་ངག་གི་སྡོད་པ་གསུམ་གྱིས་འགྲོ་དྲུག་ཕལ་བའི་ལས་སྟོངས་ནས། ཚིག་རང་བྱུང་ཡེ་ཤེས་སུ་འཆར། ཆོས་ཐམས་ཅད་བརྗོད་དུ་མེད་པའི་དོན་ལ་གནས། སེམས་ཀྱི་མི་འགུལ་བ་སྡོད་པ་གསུམ་འབྱོངས་བའི་རྟགས་སུ་སངས་རྒྱས་ཀྱི་དགོངས་པའི་གནས་ལུགས་ཀྱི་དོན་ལས་མི་གཡོ་ཞིང་སྣང་བཞི་ཚད་དུ་ཕྱིན་པའི་དགོས་པ་ཡོད། དེ་ལྟར་གསུངས་ཡོད། མདོར་ན་སྒོ་གསུམ་མ་བསྡད་པར་འགུལ་དུས་འགྱུ་བ་ཡིན། འགྱུ་དུས་རྟོག་པ་རེད། རྟོག་པས་འཁྲུལ་བ་ཡིན་པས། དེ་ལས་གྲོལ་བར་བྱེད་པའི་ཆེད་དུ་འགྱུ་བའི་རྟེན་རྩ་རླུང་གནད་དུ་གཅུན་པས་ན་རྟོག་པ་རྒྱུན་ཆད་པའི་རང་གནད་གལ་བོ་ཆེའང་དེ་ན་ཡོད་པ་ཡིན། དེས་མི་འགུལ་གསུམ་གྱིས་གཞི་བཅའ་བ་བསྟན་པའོ།།

ཁ༽ གཉིས་པ་སྡོད་པ་གསུམ་གྱིས་ཚད་གཟུང་བ།

དེ་ལ་སྡོད་པ་གསུམ་གྱིས་ཚད་གཟུང་བ་དངོས་དང་། རྟགས་ཚད་བསྟན་པ་གཉིས་ལས།

༡༽ དང་པོ་སྡོད་པ་གསུམ་གྱིས་ཚད་གཟུང་བ་དངོས།

དེ་ནས་སྡོད་པ་གསུམ་གྱིས་ཚད་གཟུང་བ་ནི། །

གཉིས་པ་སྡོད་པ་གསུམ་གྱིས་ཚད་བཟུང་བ།།

དབྱིངས་རིག་གཉིས་ལ་ཡུན་རིང་བར་གནས་པའི།།

བརྟན་པའི་ཚད་ནི་སྡོད་པ་གསུམ་འབྱུང་སྟེ།།

ཞེས་མདོར་བསྟན་ནས་རྒྱས་བཤད་ལ་ནང་གསེས་ཀྱི་དབྱེ་བས་ལུས་དང་རླུང་དང་སྣང་བ་སྡོད་པ་གསུམ་གྱིས་བསྟན་པ་ལས། ལུས་ཀྱི་སྡོད་པ་གསུམ་གྱིས་བྱ་བ་དང་བྲལ་བ་ཡིན། རླུང་གི་སྡོད་པ་གསུམ་གྱིས་མི་སྐྱེ་བའི་ཚད་རྫོགས་པ་ཡིན། སྣང་བ་སྡོད་པ་གསུམ་གྱིས་མི་ལྡོག་པར་ཡིད་ཆེས་པར་བྱེད་པ་ཡིན། འདི་ནས་གསུམ་པོ་བྱེད་ལས་དང་འབྲེལ་ཏེ་ཕྱི་ནང་གསང་གསུམ་གྱི་ཚུལ་གྱིས་འདྲེས་མར་བསྟན་ཡོད་འདུག

ཕྱི་ཡི་སྣང་བ་བསྐྱོད་བྱེད་རླུང་ཟད་པས།།

དབྱིངས་རིག་འགྲོ་འོང་མེད་པར་སྡོད་པ་དང་།།

ནང་གི་ཕུང་པོ་བསྐྱོད་བྱེད་རླུང་ཟད་པས།།

རང་ལུས་གཡོ་འགུལ་མེད་པར་སྡོད་པ་དང་།།

གསང་བ་རྟོག་པ་བསྐྱོད་བྱེད་རླུང་ཟད་པས།།

རྣམ་རྟོག་འགྱུ་མི་སྲིད་པར་སྡོད་པའོ།།

ཞེས་གསུངས། ལུས་ཀྱི་སྡོད་པ་གསུམ་དེ་ལུས་དང་ཡན་ལག་དེ་གཉིས་དང་འབྲེལ་བའི་བྱ་བ་དང་གསུམ་གྱིས་གསུངས་ཀྱིན་ཡོད་པ་རེད། ལུས་བྱ་བ་ལ་མི་གནས་པར་སྡོད་པས་འཁོར་བའི་འཁྲུལ་བ་འཕེལ་མི་སྲིད་པ་དང་གཅིག ཡན་ལག་གི་འཕེན་སྡུད་དང་འགུལ་བསྐྱོད་སྡོད་པས་འཁྲུལ་བའི་འཁོར་ལོའི་འཁོར་རྒྱུན་ཆད་རྒྱུ་དང་གཉིས། དེ་ནས་བྱ་བ་ཁོ་རང་གཞི་ཐོག་ཏུ་ཕབ་སྟེ་རྩོལ་མེད་དུ་བཞག་པས་བསགས་པ་ལས་ཀྱི་རྣམ་སྨིན་དང་བྲལ་བ་སྟེ་དེ་ལྟ་བུ་གསུམ་དང་། དེ་ནས་གཉིས་པ་རླུང་གི་སྡོད་པ་གསུམ་ནི། རླུང་ཕྱིར་མི་འགྲོ། ནང་དུ་མི་དགང་། ཕྱི་ནང་དུ་འགྲོ་འོང་མེད་པར་སྡོད་པ་དང་གསུམ་ཡིན། རླུང་ཕྱིར་མི་འགྲོ་བར་སྡོད་པ་དེས་རྐྱེན་སྣང་འདྲ་མི་འདྲའི་ཐ་དད་པའི་གནོད་པ་མེད་པར་རེད་རྒྱུ་དང་གཅིག རླུང་ནང་དུ་མི་འགེང་བར་སྡོད་པས་གཡོ་བར་བྱེད་པའི་རླུང་མེད་པས་རྣམ་རྟོག་ཐ་དད་པའི་རྟེན་མེད་པར་གྱུར་པ་དང་གཉིས། རླུང་ཕྱི་ནང་གཉིས་ཀར་འགྲོ་འོང་མེད་པར་སྡོད་པས་འཁོར་འདས་གཉིས་སུ་འཛིན་པའི་རེ་དོགས་ཀྱི་གཞི་སྟོངས་པ་དང་གསུམ་གྱི་དགོས་པ་ཅན་ཞིག་རེད། གསུམ་པ་སྣང་བའི་སྡོད་པ་གསུམ་ནི་འོད་དང་རིག་པ་སྐུ་གསུམ་པོ་ཡིན། འོད་ལ་འཕྲིག་ས་མེད་པར་སྡོད་པས་ཁམས་གསུམ་དུ་མི་ལྡོག་པར་ངོ་ཤེས་པ་དང་གཅིག རིག་པ་ལ་འཕྲིག་ས་མེད་པར་སྡོད་པས་ལས་དང་རྣམ་པར་སྨིན་པའི་མཐའ་ཟད་པ་དང་གཉིས། འདིའི་འཕྲིག་ས་གསུངས་རྒྱུ་འདི་གཞན་དུ་གཅར་བའམ་གོལ་ས་མེད་པའི་དོན་རེད། དེ་ནས་སྐུ་ལ་འདའ་ས་མེད་པར་སྡོད་པས་ལུས་ཀྱི་ཟག་པ་རྣམས་རང་ཟད་དུ་འགྱུར་གསུངས་ནས་དེ་ལྟར་གསུམ་གྱིས་བསྟན་པ་དེ་ཐེག་མཆོག་མཛོད་དང་ཚིག་དོན་མཛོད་གཉིས་ཀ་དགོངས་པ་མགྲིན་གཅིག་དབྱངས་གཅིག་གིས་གསུངས་པའི་ཚིག་ཀྱང་དེ་ལྟར་ཏུ་གསུངས་ཡོད་ས་ཡོད། མདོར་ན་ཕྱིའི་སྣང་བ་སྐྱོད་བྱེད་ཀྱི་རླུང་མེད་པར་བསྡད་སོང་དུས་དབྱིངས་དང་རིག་པའི་འཆར་སྣང་རང་ཤུགས་ཀྱིས་འགྲོ་འོང་དང་གཡོ་འགུལ་མེད་པར་སྡོད་པ་དང་། ནང་གི་ཕུང་པོ་ཡང་སྐྱོད་བྱེད་ཀྱི་རླུང་དང་བྲལ་ནས་ཟད་སོང་དུས་རང་ལུས་ཡན་ལག་བྱ་བ་དང་བཅས་པ་འགུལ་གཡོ་མེད་པར་འདུག་འགྲོ་བ། གསང་བ་རྟོག་ཚོགས་འགྱུ་བའི་རླུང་གཡོ་ཞིང་སྐྱོད་པར་བྱེད་པའི་བདག་ཉིད་ཅན་དེ་སྟོངས་ཤིང་ཟད་སོང་དུས་རྣམ་རྟོག་ཕལ་བ་འགྱུ་མི་སྲིད་པར་སྡོད་པ་ཡིན་རྒྱུའི་གནད་གསུམ་པོ་དེ་བཟུང་ནས་དེས་སྡོད་པ་གསུམ་གྱིས་ཚད་བཟུང་བ་བསྟན་པ་སོང་བ་རེད།

༢༽ གཉིས་པ་རྟགས་ཚད་བསྟན་པ།

ཚད་རྨི་ལམ་གྱིས་བཟུང་བ་དང་། རྟགས་སྒོ་གསུམ་ལ་འཆར་བ་གཉིས་ལས།

དང་པོ་ཚད་རྨི་ལམ་གྱིས་བཟུང་བ།

འདིའི་མཚམས་ནས་འདི་དག་གི་སྐབས་སུ་རྟགས་ལུས་ངག་ལ་འཆར་བ་དང་ནི་ཚད་རྨི་ལམ་གྱིས་བཟུང་བ་གཉིས་ཀ་འབྱུང་བ་རེད། ཐེག་མཆོག་མཛོད་དང་ཚིག་དོན་མཛོད་གཉིས་ཀར་དེ་བཞིན་དུ་བསྟན་ཡོད། འོན་ཀྱང་ཁྲིད་ཡིག་འགའ་རེའི་ནང་དུ་དེང་དུས་ཀྱི་གདུལ་བྱ་དང་བསྟུན་ཏེ་དགོས་པའི་དབང་གིས་ཚད་རྨི་ལམ་གྱིས་བཟུང་བ་སྔོན་དུ་ཁྲིད་ས་ཡོད་པ་རེད། འདི་ནས་ཀྱང་དེ་བཞིན་དུ་བསྟན་གྱིན་ཡོད། དེས་ན་དང་པོ་ཚད་རྨི་ལམ་གྱིས་འཛིན་པ་དེ་ཉིད་ནི།

སྐབས་འདིར་ཚད་ཀྱང་རྨི་ལམ་ཉིད་ཀྱིས་འཛིན།།

དབང་པོ་རྣོན་པོ་བརྩོན་འགྲུས་རབ་རྣམས་ནི།།

ལས་དང་བག་ཆགས་འབྲེལ་པ་ཆོད་ནས་ཀྱང་།།

ཚེ་འདི་ཉིད་ལ་གྲོལ་བའི་རྟགས་སུ་ཡང་།།

རྨི་ལམ་དབྱིངས་སུ་ཐིམ་ནས་རྒྱུན་ཆད་དེ།།

གཉིད་ཀྱང་འོད་གསལ་བདེ་བ་ཆེན་པོར་འཆར།།

འབྲིང་གི་རྨི་ལམ་གང་རྨིས་རྨི་ལམ་དུ།།

ཤེས་པས་བར་དོར་མངོན་པར་འཚང་རྒྱའོ།།

ཐ་མ་རྨི་ལམ་ངན་པ་རྒྱུན་ཆད་ནས།།

དཀར་ཕྱོགས་བཟང་པོ་ཤ་སྟག་རྨི་བ་ནི།།

རང་བཞིན་སྤྲུལ་སྐུའི་ཞིང་དུ་འཚང་རྒྱའོ།།

ཞེས་གསུངས་ཏེ། གསང་བ་སྒྲ་རྒྱུད་ལས། རབ་ལ་ཆད་དང་འབྲིང་གིས་ཤེས། །ཐ་མ་འགྱུར་བར་ངེས་པ་སྟེ། །ཞེས་གསུངས་པ་ལྟར་གང་ཟག་དབང་པོ་རྣོན་པོའི་རིགས་ཅན་དབང་པོ་རྣོ་བ་ཙམ་མ་ཟད་བརྩོན་འགྲུས་ཡང་རབ་ཅན་ཚོར་རྨི་ལམ་རྨིས་རྒྱུ་མེད་པར་རྒྱུན་ཆད་འགྲོ། དེས་ཅི་བསྟན་ན། ཉམས་ལེན་གྱི་གོམས་པ་རབ་ཏུ་གྱུར་ནས་ཚེ་འདིར་འཚང་རྒྱ་བ་རྣམས་རྨི་ལམ་འཁྲུལ་བའི་རྒྱུན་ཆད་སོང་བ་རེད། རྣལ་འབྱོར་དེ་འདྲ་བ་ལ་ལས་དང་བག་ཆགས་ཀྱིས་མི་གོས་ཤིང་ཕན་གནོད་མེད་པའི་རྟགས་ཡིན་གསུངས་པ་རེད། འབྲིང་གིས་རྨི་ལམ་ལ་རྨི་ལམ་ཡིན་པར་ཤེས་པ་དང་རྨི་ལམ་སྤྲུལ་སྒྱུར་ལ་སོགས་པའི་འོད་གསལ་བཟུང་ན་ཟིན་པ་ཡིན། དེ་ཡང་ལམ་ལ་གོམས་པ་ངེས་པར་བརྟན་པ་ལས་བྱུང་བ་ཡིན་པས་བག་ཆགས་བཟང་ངན་གྱི་རྟོག་པ་མེད་པའི་ཚོད་ཅན་གྱི་རྣལ་འབྱོར་བ་ཡིན། དེས་ཅི་བསྟན་ན། རྣལ་འབྱོར་བ་དེ་འདྲ་བ་ཚེ་འདིར་མ་གྲོལ་ཀྱང་སྐྱེ་བ་ཕྱི་མར་ལྟོས་མི་འཆའ་བར་བར་དོར་འཚང་རྒྱ་བའི་རྟགས་ཡིན་གསུངས་པ་རེད། ཐ་མ་འགྱུར་བར་ངེས་པ་དེ་ནི་ཅི་ཞིག་ལ་འགྱུར་བར་ངེས་པ་ཡིན་ཞེ་ན། རྨི་ལམ་ངན་པ་ནག་པོ་མི་དགེ་བའི་ཕྱོགས་རྣམས་རྨིས་པ་རྒྱུན་ཆད་དེ་འགྱུར་ནས་དཀར་ཕྱོགས་དགེ་བའི་ལས་དང་འབྲས་བུ་ལ་ཆ་མཐུན་པར་རྨི་ལམ་བཟང་པོ་ཤ་སྟག་རྨིས་ཏེ་ངན་པ་བཟང་པོར་འགྱུར་བས་འགྱུར་བར་ངེས་པ་ཞེས་པ་དེ་རེད། དེ་ཡང་ཉིན་སྣང་འོད་གསལ་གྱི་ཉམས་ལེན་ལ་གོམས་འདྲིས་གང་འཚམས་ཤིག་སོང་བའི་སྟབས་ཀྱིས་ཡིན། དེ་ཡང་བག་ཆགས་ཀྱི་མཐའ་སྟོངས་པའི་དབང་གིས་ཡིན་པས་ན་རང་བཞིན་སྤྲུལ་སྐུའི་ཞིང་དུ་དབུགས་འབྱིན་ནས་སངས་རྒྱས་པའི་རྟགས་ཡིན་གསུངས་ཡོད། སྤྱིར་ན་འཆི་བ་དང་རྨི་ལམ་གཉིས་ཕྲ་རགས་ཙམ་མ་གཏོགས་སྣང་མཆེད་ཐོབ་པའི་ལུགས་འབྱུང་ལྡོག་དང་ནི་འོད་གསལ་གྱི་དབྱིངས་ལས་ཤར་ཞིང་འོད་གསལ་གྱི་དབྱིངས་སུ་ནུབ་པའི་འཆར་ནུབ་དབྱིངས་དེ་ལས་འབྱུང་བའི་གཞི་གཞི་སྣང་གི་གོ་བ་ཞིག་ཆགས་རྒྱུ་ཡོད་པས་མི་ཚད་ཧ་ལམ་འདྲ་བའི་གོ་བ་ཆགས་རྒྱུ་ཡོད། མི་རྣམས་ཀྱི་མི་ཚེ་ཕྱེད་ཀ་རབ་ཅིག་གཉིད་ཀྱིས་ཆོད་ཀྱིན་ཡོད་པས་ན། རྨི་ལམ་འོད་གསལ་དུ་ཟིན་པའི་ཉམས་ལེན་འདི། ཚད་འཛིན་བྱེད་ཡིན་པ་བཞིན་དུ་ཚད་དེ་ལ་ཐོན་པའི་ཉམས་ལེན་གྱི་རྩལ་སྦྱང་ཡང་གལ་ཆེ་བ་ཡིན། རྫོགས་པ་ཆེན་པོའི་ཐུན་མོང་བའི་གདུལ་བྱ་ལ་རྩ་རླུང་དང་རྨི་ལམ། སྒྱུ་ལུས་དང་འོད་གསལ། འཕོ་བ་ཟུང་འཇུག་དང་བར་དོའི་གདམས་པ་སྟེ་དྲུག་བསྟན་ཡོད། དེ་ལྟར་བསྟན་པ་བཞིན་དུ་རང་རེས་ཀྱང་ཐམས་ཅད་དངོས་ཤུགས་བརྒྱུད་གསུམ་ནས་གནད་ཀྱིས་ཚང་ཞིང་བློ་རིམ་སོ་སོར་ཕན་ཐོགས་ཅན་གྱི་བསམ་བློ་བཏང་ནས་འགྲོ་དགོས་པ་ཡིན། རྨི་ལམ་འདིའི་ཁྲིད་རིམ་ངོ་མའི་སྐབས་སུ་སྔོན་འགྲོ་དངོས་གཞི་གཉིས་འདྲ་ཞིག་བྱས་ཏེ་དང་པོ་སྔོན་འགྲོ་ནི་བརྟག་པ་ཡིན། རང་གིས་རང་གི་རྨི་ལམ་ལ་བརྟགས་ཏེ་ཉམས་ལེན་གང་འདྲ་བོ་འཕྲོད་པ་ཡིན་བལྟ་བ་དེ་རེད། འདི་བརྟག་པ། ཟིལ་གནོན། བག་ཆགས་ངོས་བཟུང་བ་དང་གསུམ་གྱིས་གསུངས་ཡོད། དང་པོ་བརྟགས་པའི་ཚེ་ལུས་པོ་ཉིན་པར་དེ་ཙམ་འཁྲུགས་མི་བཅུག་པར་ནུབ་མོ་གཞོགས་གཡས་པ་ས་ལ་ཕབ་སྟེ་ཉལ་དུས་རྨི་ལམ་འདི་དང་དེ་འདྲ་ངོས་མ་ཟིན་ན་ཟིལ་གནོན་གྱི་དམིགས་པ་བྱེད་དགོས། ཟིལ་གནོན་གྱི་དམིགས་པ་དེ་མགྲིན་པར་ཨཱཿདམར་པོ་ཞིག་ལ་སེམས་བཟུང་བའི་ངང་གཉིད་དུ་བཅུག་ན་དེས་བག་ཆགས་ངོས་ཟིན་ཡོང་བ་ཡིན། སྔོན་ཆད་མྱོང་ཟིན་པའི་སྐོར་འབའ་ཞིག་རྨིས་ན་སྔར་ཞེན་གྱི་བག་ཆགས་ཚན་ཆེ་བའི་རྟགས་ཡིན། ཡིན་ནའང་བསྒྱུར་དཀའ་སླ་འབྲིང་ཙམ་ཡིན་གསུངས། ད་ལྟའི་སྐོར་གྱི་རྨི་ལམ་མ་གཏོགས་མ་རྨིས་ན་བསྒྱུར་སླ་བ་ཡིན། སྔོན་ཆད་འགྲོ་མ་མྱོང་ས་དང་། ངོ་མི་ཤེས་པའི་མི་དང་འཕྲད་པ། འདས་མ་འོངས་ད་ལྟ་དུས་གསུམ་གྱི་རྨི་ལམ་འདྲ་མི་འདྲའི་འཆལ་ལེ་འཆོལ་ལེ། འདི་རྨིས་དང་འདི་མི་རྨིས་མེད་པ་ཞིག་རེད་ན། བག་ཆགས་སུམ་འདུས་ཟེར་བ་ཆོད་དཀའ་བ་ཡིན་སོགས་གསུངས་ཡོད། བརྟག་པ་དང་དབང་སྡུད་སོགས་སྔོན་འགྲོ་ཐོག་མར་ངེས་དགོས། དངོས་གཞི་ལ་རྨི་ལམ་སྦྱང་བ། བསྒྱུར་བ། བཅད་པ། དཀྲུགས་པ། གཅུད་པ་སོགས་མང་པོ་ཞིག་གསུངས་ཡོད་ཀྱང་། གཙོ་བོའི་ཆ་ནས་ཉིན་སྣང་འདི་རྨི་ལམ་ལྟ་བུའི་དོན་ལ་རང་བཞིན་གྱིས་མ་གྲུབ་པར་ཤེས་པ་ཙམ་གྱིས་མི་ཆོག་པར། ཉིན་སྣང་འདི་ཐམས་ཅད་རྨི་ལམ་ངོ་མ་ཡིན་རྒྱུའི་ཉམས་བཞག་དགོས་པ་ཡིན། དེས་བདེན་བདེན་ཡིན་ཡིན་གྱི་ཞེན་པ་བཅད་པས་མི་ཚད་ཆོད་པ་ཞིག་བྱས་ཏེ་ཉིན་པར་གྱི་སྣང་བ་ཐམས་ཅད་རྨི་ལམ་ཡིན་བསམ་པའི་ཐོག་ནས་སྤྲུལ་བསྒྱུར་སྣ་ཚོགས་བྱེད་པའི་དམིགས་པའམ་འདུན་པ་བྱས་ཏེ། དེ་ལའང་དགའ་བྲོད་ཀྱི་ཞེན་པ་མི་བྱེད་པར་གཏད་མེད་ལ་བཞག་དགོས་པ་ཡིན། མཚམས་སུ་ཉམས་ལེན་གྱི་རྟོགས་པའི་དོན་དང་བསྲེ། བདེན་མེད་ཤར་གྲོལ་དུ་བསྐྱངས། ཐམས་ཅད་ཀྱི་མཐར་རྨི་ལམ་ཆོས་ཉིད་དུ་ལ་བཟླ་བ་གསུངས་ན། ཉིན་སྣང་དང་རྨི་ལམ་ལྟ་སྒོམ་ཐམས་ཅད་ཅོག་གིས་བཞག་སྟེ་གང་ཡང་ཡིད་ལ་མི་བྱེད་པར་སྟོང་ཉིད་ཀ་དག་གི་ནམ་མཁའ་ཀློང་ཡངས་ལ། རྣམ་རྟོག་གི་འཁྲུལ་བ་ཐམས་ཅད་རང་སངས་རྒྱ་ལས་གྲོལ་བ་ཆོས་ཉིད་ཀྱི་ངང་དུ་ཡལ་བར་བྱ་བ་དེ་ལྟ་བུས་སྦྱང་དགོས་པར་གསུངས་ཡོད། རྨི་ལམ་ཟིན་རྒྱུ་འདི་སླ་བོ་ཞིག་གཏན་ནས་མ་རེད། དེ་ལྟ་བུའི་སྦྱངས་པ་ཡུན་རིང་དུ་བརྒྱུད། བརྩོན་པ་ཡུན་གྱིས་མ་ལྷོད་ན། བརྩོན་འགྲུས་རབ་ཀྱིས་རྨི་ལམ་བརྗེད། འབྲིང་གིས་གསལ། ཐ་མས་དགའ་བྲོད་ཅན་གྱི་རྨི་ལམ་རྨིས། རིམ་གྱིས་རྨི་ལམ་རྒྱུན་ཆད་པ་འབྱུང་གསུངས་པ་རེད། འདི་དག་རྨི་ལམ་རྐྱང་པ་སྦྱངས་པའི་རིམ་པ་འདྲ་ཞིག་རེད། བཟང་ཤོས་ལྟ་བུ་ཡིན་ན་དེའི་གོམས་པ་བརྒྱུད་དེ་རྨི་ལམ་འོད་གསལ་དུ་སྦྱང་དགོས་པ་ཡིན། འོད་གསལ་སྤྱིར་སྒོམ་པ་དེ། ཉིན་པར་ལུས་གནད་དང་རླུང་གི་གནད་ལ་བསྟུན་ཏེ་ཤེས་པ་དྭངས་གསལ་ཕྱེ་རུ་བཅུག ཉམས་ལེན་པ་རྙིང་པ་ཚོས་གསལ་སྟོང་མཐའ་བྲལ་གྱི་རིག་ཐོག་ཏུ་བཞག་སྟེ་བསྒོམ། མཚན་དུས་ཡིན་ན་ཡང་དེའི་ངང་དུ་གཙོ་ཆེར་མི་རྟོག་པའི་ངང་བསྐྱངས། ཁྱད་པར་དུ་གཉིད་དུ་འགྲོ་ཁའི་ཤེས་པ་དེ་རྟོག་མེད་ཀྱི་འོད་གསལ་ངོས་བཟུང་བའི་ངང་དུ་གཉིད་དུ་ཡུར་བས། རྨི་ལམ་རྨིས་རྒྱུ་མེད་པ་ཞིག་གི་ངང་དུ་གནས་ནས་ཉེ་འཁོར་གྱི་སྣང་བ་རྣམས་མཐོང་བཞིན་པ་ལ་དེ་ལ་རྟོག་དཔྱོད་མི་འཇུག་པར། གཉིད་སོང་འདུག་ཟེར་ན། སྣང་བ་རང་ས་ན་གསལ་འདུག་པ། མ་གཉིད་པ་རེད་ཟེར་ན་སད་རྒྱུ་ཁ་ཁར་ཡོད་པ་དེ་ལྟར་ཡིན། འདིའི་དུས་སུ་ཐོད་རྒལ་ལ་གོམས་པ་ཞིག་ཡིན་ན་སྐུ་འོད་ཐིག་ལེའི་འཆར་ཆ་ཤར་བ་དང་ནི། མིན་རུང་སྣང་བའི་འོད་གསལ་འོད་ལྔའི་སྣང་བ་དང་ནི་མར་མེ་ལ་སོགས་པ་འཆར་བ་དང་། སྟོང་པའི་འོད་གསལ་བདེ་གསལ་མི་རྟོག་གསུམ་དང་ཁྱད་པར་དུ་ཤེས་པ་གསལ་དྭངས་ཕྱེད་པའི་མི་རྟོག་པའི་ངང་ལ་གནས་པ་ཡིན། ཡང་འོད་གསལ་གནད་དང་སྦྱར་ཏེ་བྱེ་བྲག་ཏུ་བསྒོམ་དུས། སྲོད་ལ་དབང་པོ་གནད་དུ་བསྡུ་བ། ནམ་ཕྱེད་ཤེས་བྱ་བུམ་པར་གཞུག་པ། ཐོ་རངས་ཡེ་ཤེས་གསལ་བར་བྱེད་པ། ཉིན་པར་སྣང་བ་རྒྱ་ཡིས་གདབ་པ་སོགས་ཁྲིད་ཡིག་སོ་སོའི་ནང་ནས་འབྱུང་བ་ལྟར་དུ་སྦྱང་བ་བརྒྱུད་དགོས་པ་ཡིན། སྐབས་དོན་གང་བཤད་ཀྱིན་ཡོད་ན་རྨི་ལམ་འོད་གསལ་དུ་སྦྱངས་ན་ཐ་མལ་གྱི་རྨི་ལམ་རྨིས་རྒྱུ་མེད་པར་གྱུར་ནས་རྨི་ལམ་འོད་གསལ་དུ་གྲོལ་ནས་ཆོས་ཉིད་ཀྱི་ཏིང་ངེ་འཛིན་ལ་ཉིན་མཚན་འདྲེས་པར་འབྱུང་སྟེ་བར་དོ་རང་ཆོད་རེད་རྒྱུའི་ས་ལ་ཐོན་རྒྱུ་ཡོད་པ་ཡིན། འདིའི་སྐབས་སུ་ལུས་ལ་གྲིབ་མ་མེད་པ་དང་ལུས་རྡུལ་ཕྲན་སིལ་བུ་བུའི་སྣང་བ་འཆར་བ་སོགས་རང་གིས་ཀྱང་རིག་རྒྱུ་ཅན་རེད་དེ་བདེན་མེད་དུ་འཆར་རྒྱུ་དེ་ལྟར་ཡོད་པ་ཡིན། སྤྱིར་རྨི་ལམ་འདི་ཚོགས་དྲུག་གི་རྣམ་ཤེས་འགགས་ནས་ཡིད་ཤེས་ཀུན་གཞི་ལ་ཐིམ་པའི་ཀུན་གཞིའི་རྣམ་ཤེས་ཀྱི་སྟེང་ནས་རྨི་ལམ་གྱི་འཁྲུལ་སྣང་ཉིང་འཁྲུལ་དུ་ཤར་གྱིན་ཡོད། རྨི་ལམ་འོད་གསལ་དུ་སྦྱངས་དུས་ཀུན་གཞི་ཆོས་དབྱིངས་ལ་སད་པའི་སྐབས་སུ་དཔེའི་འོད་གསལ་འཆར་བ་ཡིན་ན། སླར་ཡང་ལུགས་ལྡོག་ཏུ་མཆེད་དེ་ཡང་སད་པའི་སྣང་བ་འབྱུང་བ་ཡིན། དེ་ཡན་ཆོད་ཀྱི་ཚད་རྨི་ལམ་གྱིས་བཟུང་བའི་སྐོར་ནས་འཕྲོས་དོན་དང་བཅས་པ་ཅུང་ཟད་ཅིག་གླེང་སྟེ་འདི་ནས་རྟགས་སྒོ་གསུམ་ལ་འཆར་ཚུལ་བསྟན་པ་ནི།

གཉིས་པ་རྟགས་སྒོ་གསུམ་ལ་འཆར་བ།

རྟགས་ཀྱང་སྒོ་གསུམ་ཉིད་ལ་འཆར་བ་ནི།།

སྣང་བ་བཞི་ལ་གསུམ་གསུམ་བཅུ་གཉིས་ལས།།

ཞེས་མདོར་བསྟན། སྣང་བ་རེ་རེ་ལ་གསུམ་གསུམ་གྱིས་སྣང་བཞིར་བཞི་གསུམ་བཅུ་གཉིས་ཀྱིས་རིམ་པས་རྒྱས་པར་བཤད་པ་ལས།

༼༡ དང་པོ་ཆོས་ཉིད་མངོན་སུམ་རྟགས་གསུམ།

དང་པོ་ཆོས་ཉིད་མངོན་སུམ་རྟགས་གསུམ་ནི།།

ལུས་ནི་དཔེར་ན་འཁར་གཞོང་འཇམ་པོ་རུ།།

རུས་སྦལ་བཞག་ནས་འགུལ་མེད་སྡོད་པ་ལྟར།།

བྱ་བྱེད་གཡོ་འགུལ་མེད་པར་སྡོད་ཚུགས་སོ།།

ངག་ནི་ལྐུགས་པ་བཞིན་དུ་སྨྲ་མི་འདོད།།

སེམས་ནི་བྱ་རྣམས་རྙི་ཡིས་ཟིན་པ་ལྟར།།

ཤེས་པ་གར་གཏད་ཉིད་དུ་སྡོད་པའོ།།

ཞེས་གསུངས་ཏེ། རྣལ་འབྱོར་བ་གང་གིས་ཆོས་ཉིད་མངོན་སུམ་གྱི་སྣང་བ་མཐོང་བའི་ཚེ་ན། མི་གཞན་ཞིག་ལ་ཁྱོད་ཀྱིས་ཤེས་ན་ང་ཚད་གང་ལ་ཐོན་ཡོད་པ་འདྲ་འདུག་ཞེས་ཁེད་འཇོག་འཇོག་བྱས་ནས་འདྲི་དགོས་པ་མ་རེད། རྟགས་རང་གི་སྒོ་གསུམ་གྱི་སྟེང་དུ་འཆར་འོང་བ་ཡིན། དབང་གིས་སྨིན་པ་དེ་ཉིད་ཁྲིད་ཀྱིས་གྲོལ་ཏེ་སྨིན་གྲོལ་རིམ་པ་གཅིག་མཚུངས་ཀྱི་འབྲས་བུར། ལུས་རུས་སྦལ་འཁར་གཞོང་དུ་བཅུག་པ་ལྟར་བདེ་ལྷོད་དེ་འདུག་འདུག་པ་ལས་ཁྱི་རྔ་ལ་མེ་བགོས་པ་ལྟ་བུ་མ་ཡིན། ཅིའི་ཕྱིར་ན། རྫོགས་ཆེན་བྱ་རྩོལ་དང་བྲལ་བའི་དོན་དེ་ལུས་དང་ཡན་ལག་ལ་ཞུགས་ཏེ། དབང་བཞི་ལས་བུམ་པའི་དབང་གིས་ལུས་དག་སྟེ་སྤྲོས་བཅས་ཀྱི་ཡེ་ཤེས་རང་ལུགས་སུ་ཤར་བ་ཡིན། དེ་ལུས་ཀྱི་རྟགས་སོ། །དེ་ནས་ངག་གི་རྟགས་ནི། ངག་པི་ཝང་གི་རྒྱུན་ཐག་ཆད་པ་ལྟ་བུའམ་ལྐུགས་པ་ལྟ་བུར་གྱུར་ཏེ། གཏམ་སྨྲ་སྙིང་མི་འདོད། མགྲིན་པའི་རྩ་མདུད་གྲོལ་ཏེ་གང་སྣང་བརྡ་དང་དཔེ་ཆར་ཤར་ནས་མགྲིན་པ་ཐོལ་བྱུང་གླུ་དང་དོ་ཧའི་དཀོར་མཛོད་དུ་གྱུར་འདྲ་ཡོད་ན་མི་ཤེས་མ་གཏོགས། དེ་ལས་ཅི་ཡང་བཤད་མི་བསམ་པར་གྱུར་འགྲོ། དེ་གནད་ཅི་ལ་བརྟེན་ནས་བྱུང་སྙམ་ན། རྩ་ནང་དུ་རྣམ་ཤེས་ཚུད་པའི་དབང་གིས་བྱུང་བ་ཡིན་གསུངས། རྫོགས་ཆེན་བརྗོད་གཞི་རང་དག་གི་དོན་ངག་ལ་ཞུགས་པ་ཡིན། སྤྲོས་པ་ཕྱི་རུ་བཅད་ན་ཡེ་ཤེས་ནང་ནས་གསལ་བའོ། །དེ་ངག་གི་རྟགས་ཡིན། སེམས་ཀྱི་རྟགས་ནི། བྱ་རྣམས་རྙི་ཡིས་ཟིན་པ་ཞེས་གསུངས་ན། ཁྲིད་ཡིག་དག་གི་ནང་དུ་མཁའ་འགྲོ་རྙི་ཡིས་ཟིན་པ་ཞེས་གསུངས་ཡོད་པ་དེ་རེད། བྱ་ཐག་རྙིས་བཟུང་ཚར་དུས་ལྷེབ་སེ་འདུག་འདུག་པ་མ་གཏོགས་མེད་པ་བཞིན་དུ། ཤེས་པ་གར་གཏད་དུ་སྡོད། ཐ་མལ་གྱི་དྲན་འཛིན་མེད་པའི་ངང་དུ་འདུག་པ་ཡིན་གསུངས་ཡོད། ཐུན་དུས་ཚོད་སྐར་མ་ཁ་ཤས་ཤིག་ལ་སེམས་ཀྱིས་རི་ཡུལ་གཉིས་ཀ་སྐོར་མི་འཇོག་གསུངས་པ་རེད། དེ་ཅི་ལས་བྱུང་ན། རིག་པ་འོད་གསལ་དང་འདྲེས་པ་ལས་བྱུང་བ་ཡིན། རྫོགས་ཆེན་འཛིན་མེད་རང་གྲོལ་གྱི་དོན་སེམས་ཀྱི་སྣང་བ་ལ་ཞུགས་པས་སྤྲོས་པ་ཐམས་ཅད་དང་བྲལ་བའི་ངང་ལ་གནས་པ་ཡིན། དེ་སྣང་བ་དང་པོ་ཆོས་ཉིད་མངོན་སུམ་གྱི་སྐབས་སུ་རྟགས་སྒོ་གསུམ་ལ་འཆར་བ་ཡིན་ཚུལ་དེ་ལྟར་གསུངས་པའོ། །

༼༢ གཉིས་པ་ཉམས་སྣང་གོང་འཕེལ་རྟགས་གསུམ།

གཉིས་པ་ཉམས་གོང་འཕེལ་ཇི་ལྟར་ཡིན་པ་འདི་ལྟར།

གཉིས་པ་ཉམས་སྣང་གོང་འཕེལ་རྟགས་གསུམ་ནི།།

ལུས་ནི་སྐྱེས་བུ་ནད་ཀྱིས་གདུངས་པ་ལྟར།།

བྱི་དོར་རྒྱན་གྱི་སྤྲོས་པ་བྲལ་བའོ།།

ངག་ནི་སྨྱོན་པར་རང་ཚིག་རྡོལ་བ་ལྟར།།

གང་ལའང་ལྟོས་མེད་བྱུང་རྒྱལ་སྨྲ་བའོ།།

སེམས་ནི་དཔེར་ན་ལན་བདུན་རྩི་དུག་གིས།།

ཟིན་པའི་ཤེས་པ་མྱོས་པའི་སྐྱེས་བུ་བཞིན།།

འཁོར་བའི་བྱ་བར་གཏན་ནས་མི་འཇུག་གོ །

ཞེས་གསུངས་ཏེ། རྣལ་འབྱོར་བ་སྣང་བཞི་རིམ་བགྲོད་བྱེད་པ་ཞིག་གི་ཉམས་རྟོགས་ཀྱི་རྟགས་ཚད་ཉམས་གོང་འཕེལ་ལ་ཐོན་པའི་སྐབས་ལུས་ཀྱི་རྟགས། ལུས་སྐྱེས་བུ་ནད་ཀྱིས་གདུངས་བ་བཞིན་གསུངས་ན། ནད་གཟེར་ཟུག་ཚབས་ཆེན་ཞིག་གིས་ཐེབས་སོང་དུས། སྔོན་མ་ན་གོང་ཇི་འདྲའི་རྒོད་པོ་དང་འཕྱོར་བོ་ཞིག་ཡིན་རུང་ནད་ཀྱིས་ཐེབས་ཚར་དུས་མཛེས་ཆོས་དང་སྒེག་ཆོས་ཀྱིས་བྱི་དོར་རྒྱན་ཆ་བཏགས་པའི་སྤྲོས་པ་ཞིག་བྱེད་ཐུབ་མ་དགོས། ངོ་ཚ་སྐྱིད་སྡུག་མཚའ་མཚུངས་ཀྱི་༼འཛེམ་དོགས་ཀྱི་༽ རྣམ་པ་བཏོད་རྒྱུ་ཡིད་ལ་མི་འོང་བ་ལྟར་དུ་སྐྱིད་སྡུག་རོ་སྙོམས་ཀྱི་རྣལ་འབྱོར་བའང་དེ་འདྲ་བ་ཡིན་གསུངས། ནད་ཀྱིས་ཐེབས་སོང་བའི་མིས་མཛེས་མཛེས་ཡག་ཡག་བཅོས་མའི་ཚུལ་བྱེད་པའི་ཡི་ག་མེད་པ་བཞིན་དུ་སྐྱིད་སྡུག་རོ་སྙོམས་རྟོགས་པའི་རྣལ་འབྱོར་བ་ལའང་དེ་ལྟ་བུའི་བཅས་བཅོས་ཀྱི་བློའི་རྣམ་རྟོག་ཐམས་ཅད་ཞིག་སོང་བ་ཡིན་པར་འདུག ཅི་ལས་བྱུང་ན། རླུང་དབུ་མར་ཐིམ་པ་ལས་བྱུང་བ་ཡིན། རྫོགས་ཆེན་དགག་སྒྲུབ་མེད་པའི་དོན་དེ་ལུས་སྤྱི་ལ་ཞུགས་པ་དང་ཁྱད་པར་དུ་གསང་བའི་དབང་གིས་ལས་དག་སྟེ་སྤྲོས་པ་མེད་པའི་དབང་གི་བྱིན་རླབས་ཀྱིས་ཐོབ་པའི་ཡེ་ཤེས་རང་ལུགས་སུ་ཤར་བ་ཡིན། དེ་ལུས་ཀྱི་རྟགས་རེད། དེ་ནས་ངག་གི་རྟགས་སྨྱོན་པ་རང་ཚིག་རྡོལ་བ་ལྟར་གསུངས་ན། སེམས་ལས་སུ་མ་རུང་བའི་སྨྱོན་པས་ངག་གིས་ཅི་བྱུང་གང་བྱུང་བཤད་པ་བཞིན་དུ། ང་སྨྱོ་བ་ཆོས་ཀྱི་དབྱིངས་སུ་སྨྱོ། །ཞེས་གསུངས་པ་ལྟར། དེ་ཅན་པོས་འཛིན་རྩོལ་ཞེན་པ་དང་བྲལ་བ་ལྟོས་མེད་བྱུང་རྒྱལ་དུ་སྨྲ་བའི། ངག་གིས་སྨྲ་བ་དེ་རྫོགས་ཆེན་ཚིག་ལས་འདས་པའི་དོན་ངག་གི་གདངས་ལ་ཞུགས་ཏེ་སྤྲོས་པ་མེད་པའི་དོན་ནང་ནས་ཆོད་པའི་རྟགས་སོ། །དེ་ངག་གི་རྟགས་ཡིན། སེམས་ཀྱི་རྟགས་སུ་སེམས་སྐྱེས་བུ་རྩི་དུག་གིས་ལན་བདུན་དུ་ཟིན་པའམ་ཐེབས་མྱོང་བ་ཤེས་པ་མྱོས་པའམ་བྱུང་ཚོར་འགག་པ་ལྟར་ཏུ་གསུངས། འདིས་ཅི་བསྟན་ན། གཏད་ཡལ་འཛིན་མེད་རང་གྲོལ་དུ་སོང་བ་སེམས་སྐྱེ་མེད་ཀྱི་ཀློང་དུ་གྲོལ་བ་ལས་བྱུང་བ་ཡིན། འདི་རྫོགས་ཆེན་མ་སྐྱེས་རང་གྲོལ་གྱི་རྟོག་པ་སེམས་ཀྱི་བྱུང་ས་ལ་ཞུགས་པས་ཐ་མལ་འཁོར་བའི་བྱ་བར་གཏན་ནས་མི་འཇུག་པ་སྟེ། སྤྲོས་པ་ཡེ་ནས་མེད་པའི་ཡེ་ཤེས་དེ་ཉིད་རང་རྒྱུད་ལ་སྐྱེས་པའི་རྟགས་ཡིན། དེ་ཉམས་སྣང་གོང་འཕེལ་གྱི་སྣང་བ་དེའི་སྐབས་ཀྱི་རྟགས་སྒོ་གསུམ་ལ་འཆར་ཚུལ་ཡིན་གསུངས་པ་རེད། དེ་ནས་སྣང་བ་གསུམ་པའི་རྟགས་ནི།

༼༣ གསུམ་པ་རིག་པ་ཚད་ཕེབས་རྟགས་གསུམ།

གསུམ་པ་རིག་པ་ཚད་ཕེབས་རྟགས་གསུམ་ནི།།

ལུས་ནི་དཔེར་ན་གླང་ཆེན་འདམ་ནང་དུ།།

ཚུད་ཀྱང་རང་གིས་སྟོབས་ཀྱིས་འཐོན་པ་ལྟར།།

འབྱུང་བ་བཞི་ལ་ཐོགས་རྡུགས་མེད་པ་རུ།།

ཟང་ཐལ་ཕར་ཐལ་ཚུར་ཐལ་བགྲོད་པའོ།།

ངག་ནི་དཔེར་ན་གྲུལ་བུམ་ཕྲུ་གུ་ཡི།།

སྐད་གདངས་སྙན་པས་གླུ་དབྱངས་བླངས་པ་ན།།

ཕ་རོལ་གཞན་ཡིད་དབང་མེད་འཕྲོག་པ་ལྟར།།

ཅི་སྨྲས་ཐམས་ཅད་གཞན་ཡིད་ལ་འཇུག་ཅིང་།།

དད་པའི་རྒྱུ་བྱེད་འགྲོ་ལ་ཕན་ཐོག་གོ།

སེམས་ནི་སྐྱེས་བུ་འབྲུམ་ནད་བྱང་བ་ལྟར།།

ཕྱིན་ཆད་འཁོར་བར་མི་ལྡོག་ཐག་ཆོད་དོ།།

ཞེས་གསུངས་ཏེ། རིག་པ་ཚད་ཕེབས་ཀྱི་ཚད་ལ་ཐོན་པའི་རྣལ་འབྱོར་བའི་ལུས་ཀྱི་རྟགས་ཇི་ལྟར་ཡིན་ན། གླང་ཆེན་འདམ་ལ་ཟུག་ན་རང་སྟོབས་ཀྱིས་ཐོན་པ་བཞིན་དུ། སེམས་ཚད་ཕེབས་རྩ་དང་རླུང་ལ་ཐེབས་ཏེ་ནང་གི་འབྱུང་བཞི་ལ་རང་དབང་ཐོབ་པས་ཕྱིའི་འབྱུང་བཞི་ལ་རང་དབང་སྒྱུར་ཐུབ་པ། འབྱུང་བཞིར་ཐོགས་རྒྱུ་དང་དེ་ལ་རྡུགས་ནས་རང་དབང་དུ་མི་གྱུར་བ་མ་ཡིན་པར་རི་བྲག་ཁང་ཁྱིམ་ལ་ཐལ་བྱུང་ཟངས་ཐལ་གྱིས་བགྲོད་ཐུབ་པ་འབྱུང་། དེ་རྫོགས་ཆེན་སྤང་བླང་མེད་པའི་དོན་སེམས་ལ་ཞུགས། ཤེས་རབ་ཡེ་ཤེས་ཀྱི་དབང་གིས་ལུས་དག ཤིན་ཏུ་སྤྲོས་མེད་ཀྱི་ཡེ་ཤེས་རང་བྱུང་དུ་ཤར་བ་ཡིན། ངག་གི་རྟགས་ནི། གྲུལ་བུམ་གྱི་ཕྲུ་གུས་གླུ་དབྱངས་བླངས་པ་ལྟ་བུའི་སྙན་མོ། གསུང་དེས་གཞན་ཡིད་དབང་མེད་དུ་འགུག་ཅིང་འཕྲོག་ནུས་པ། རྣལ་འབྱོར་བ་གསུང་སྐད་སྙན་ནི་རྐྱང་བ་ལ་གསུངས་པ་ཡིན་ས་མ་རེད། འདི་གང་སྨྲས་གཞན་ཡིད་ལ་འབབ་ཅིང་། དེའི་སེམས་རྒྱུད་ལ་འཕྲོད་ཅིང་འཇུག་པ་ཞིག་ལ་གོ་དགོས། གཞན་གྱི་སེམས་རྒྱུད་ལ་འཕྲོད་ཅིང་འཇུག་པས་དེའི་རྐྱེན་གྱིས་དེ་ལ་བརྟེན་ཏེ་ཆོས་སྣང་བའི་སྒོ་དད་པ་ཡིན་ན། དད་པ་སྐྱེས་པའི་རྒྱུ་བྱས་ནས་དད་པས་ལེགས་ཚོགས་སྡུད་པ་ཡིན་པས་ན་འགྲོ་བ་སེམས་ཅན་མང་པོར་ཕན་ཐོགས་འབྱུང་རྒྱུ། འདི་ཤེས་རབ་ཀྱི་དབང་དུ་སྙིང་རྗེ་འདུས་པ་ལས་བྱུང་བ་ཡིན་གསུངས། རྫོགས་ཆེན་སྨྲ་བསམ་ལས་འདས་པའི་དོན་ངག་གི་སྒྱུར་བྱེད་ལ་ཞུགས་པས་ཤིན་ཏུ་སྤྲོས་པ་མེད་པའི་དོན་ནང་རང་རྒྱུད་ལ་ཆུད་པ་ཡིན། དེ་ངག་གི་རྟགས་རེད། སེམས་ཀྱི་རྟགས་ནི། རིམས་ནད་ལན་གཅིག་པ་དེ་གཅིག་ན་ཚར་ནས་ཡང་བསྐྱར་མི་ན་བ་ལྟ་བུའི་རིམས་ནད་བྱང་བའི་སྐྱེས་བུ་བཞིན། འདི་ལ་འདི་ནས་འབྲུམ་ནད་གསུངས་འདུག འུ་ཚོས་ལྷ་འབྲུམ་ཟེར་བའི་ནད་ཅིག་ཡོད་པ་དེ་ལྟ་བུ་ལ་གསུངས་པ་རེད། སེམས་འདས་པའི་ཆོས་ལ་རྗེས་བསྙེགས་མེད་པས་དུས་གསུམ་འབྲེལ་ཐག་ཆོད་དེ་ཕྱིན་ཆད་འཁོར་བར་མི་ལྡོག་པར་གྱུར། འདི་སེམས་ཡེ་ཤེས་ཀྱི་རླུང་གིས་ཟིན་ཅིང་རྫོགས་ཆེན་ཡེ་གྲོལ་བསྐྱར་གཞི་མེད་པའི་དོན་སེམས་ལ་ཞུགས། ཤིན་ཏུ་སྤྲོས་མེད་ཀྱི་ཡེ་ཤེས་རང་སྣང་རང་གྲོལ་ལ་དབང་ཐོབ་པས་ཡིན་གསུངས་པ་རེད། དེ་ནས་སྣང་བ་བཞི་པ་ནི།

༼༤ བཞི་པ་ཆོས་ཉིད་ཟད་པའི་རྟགས་གསུམ།

བཞི་པ་ཆོས་ཉིད་ཟད་པའི་རྟགས་གསུམ་ནི།།

ལུས་ནི་དཔེར་ན་དུར་ཁྲོད་མི་རོ་བཞིན།།

གཤེད་མ་ལྔ་བརྒྱས་བསྐོར་ཡང་བག་ཚ་མེད།།

ངག་ནི་དཔེར་ན་བྲག་ཆའི་སྒྲ་དབྱངས་བཞིན།།

ཕ་རོལ་གཞན་གྱི་རྗེས་སུ་ཟློ་བའོ།།

སེམས་ནི་ནམ་མཁར་ན་བུན་ཡལ་བ་ལྟར།།

སྐད་ཅིག་ཉིད་ལ་བག་ཆགས་ཕུང་པོ་ཡང་།།

མི་སྣང་འཚང་རྒྱ་ནུས་སོ་སྐལ་ལྡན་ཀུན།།

ཞེས་གསུངས་ཏེ། འོད་གསལ་སྣང་བ་བཞིའི་ཐ་མ་དེ་ཆོས་ཉིད་ཟད་པའི་སྣང་བ་ཡིན། ཆོས་ཉིད་ཟད་པའི་ས་རུ་བསྙེགས་པའི་རྣལ་འབྱོར་བ་དེའི་ལུས་ཀྱི་རྟགས་ནི། ལུས་དུར་ཁྲོད་ཀྱི་མི་རོ་བཞིན་དུ་གཡོ་འགུལ་མེད་པར་སྡོད་ཚུགས་པ་དང་ནི། གཤེད་མ་ལྔ་བརྒྱས་མདའ་གྲི་མདུང་གསུམ་པོ་ཐོགས་ནས་བསྐོར་བཞག་ཀྱང་ཡ་ང་དང་བག་ཚ་མེད། འཇིགས་དང་ཉམ་ང་མི་འབྱུང་བ་དེ་ལྟར་ཡིན། འདི་སེམས་འོད་གསལ་གྱི་དྲ་བར་ཚུད་སོང་བས་ལུས་ལ་དེའི་རྟགས་འབྱུང་བ་ཡིན། དབང་བཞིའི་ནང་གི་ཚིག་དབང་གིས་ལུས་ཀྱི་ལས་དག་ནས་རབ་ཏུ་སྤྲོས་མེད་ཀྱི་ཡེ་ཤེས་རང་བྱུང་དུ་ཤར་བ་ཡིན་གསུངས་པ་རེད། ངག་གི་རྟགས་ནི། བྲག་ཆའི་སྒྲ་སྐད་ལྟར་ཏུ་ཅི་སྨྲས་ཐམས་ཅད་གཞན་གྱི་རྗེས་ཟློས་བྱེད་པ་སྨྲ་བརྗོད་ལ་འཛིན་ཞེན་མེད་པར་གྱུར། རྩ་གནས་ཀྱི་ཡི་གེ་ཡེ་ཤེས་ཀྱི་རླུང་གི་ཐིག་ལེར་ཚུད་སོང་བའི་སྟོབས་ཀྱིས་དེ་ལྟར་འོང་བ་དང་། རྫོགས་ཆེན་བརྗོད་མེད་ཀྱི་དོན་དེ་ཉིད་ངག་གི་གྲག་པ་ལ་ཞུགས་ཏེ་རབ་ཏུ་སྤྲོས་མེད་སྨྲ་བྱའི་ཡུལ་ལས་འདས་པའི་ཡེ་ཤེས་ལ་དབང་འབྱོར་བ་ཡིན། སེམས་ཀྱི་རྟགས་ནི། སྐྱེས་བུའི་སྙིང་ལ་མདས་ཟིན་པ་ལྟ་བུ་གསུངས་ན། སྐྱེས་བུའི་སྙིང་ལ་མདས་ཟིན་ན་སྐད་ཅིག་དེ་ཉིད་དུ་འཆི་བ་ལྟར། སེམས་ན་བུན་ནམ་མཁར་ཡལ་བ་དང་རང་ཡལ་ནམ་མཁའི་སྐར་མདའ་འཕྲོ་བ་ལྟར་དུ་གདོད་མའི་གཞི་དབྱིངས་ནང་གསལ་གྱི་སྦུབས་སུ་གྲོལ་ཏེ་བག་ཆགས་རྣམ་སྨིན་གྱི་ཕུང་པོ་འབྱུང་བཞིའི་རྡུལ་ཕྲན་ཚོགས་པ་ཡང་དབྱིངས་སུ་ཡལ་ཏེ་མི་སྣང་བར་འཚང་རྒྱ་བ་ཡིན། འདི་རྫོགས་ཆེན་སྐད་ཅིག་མ་མྱུར་བྱེད་ཀྱི་གྲོལ་ཚད་སེམས་ཀྱི་འགྲོ་ས་ལ་ཞུགས་པ་ཡིན། རབ་ཏུ་སྤྲོས་མེད་ཉེ་བར་ཞི་བའི་ཡེ་ཤེས་ལ་དབང་འབྱོར་བ་ཡིན་པས་ན་དེ་ལྟར་གོ་བར་གྱིས་ཤིག་སྐལ་ལྡན་ཀུན་གསུངས་ནས་ཕྱི་རབས་འབྱུང་འགྱུར་གྱི་རྗེས་འཇུག་འུ་བུ་ཚོ་ལྟ་བུ་ལ་ལྷག་པར་ཏུ་གདམས་པ་རེད། འདི་དག་གི་དོན་ཚུར་བསྡུས་ན། ལུས་ཀྱི་རྟགས་བཞི་དེ་འབྱུང་བཞིའི་འཆིང་བ་ལས་གྲོལ་རྟགས་ཡིན་པས། འབྱུང་བ་རང་རྒྱུད་དུ་སྡོད་མི་སྲིད་པའི་གནད་ཅན་ཞིག་དང་། ངག་གི་བཞི་དེ་བརྗོད་གཞི་བརྗོད་རྐྱེན་བརྗོད་བྱ་རྗོད་བྱེད་བཞིའི་འཆིང་བ་ལས་གྲོལ་བའི་རྟགས་ཡིན་པས། བརྗོད་ཚིག་རང་རྒྱུད་དུ་སྨྲ་བར་མི་སྲིད་པའི་གནད་ཅན། སེམས་ཀྱི་བཞི་དེ་དྲན་པ་དང་དྲན་མེད་སྐྱེ་མེད་དང་བློ་འདས་བཞིའི་འཆིང་བ་ལས་གྲོལ་སོང་བས། ཕྱིས་ནས་དྲན་བསམ་ཡིད་ཀྱི་འཁོར་ལོ་ལ་དུས་ནམ་ཡང་འཇུག་མི་སྲིད་པའི་གནད་ཅན་དེ་ལྟར་ཡིན་པ་གསུངས་ཡོད། དེ་ལྟར་རྟགས་ལུས་ལ་འཆར་མཁན་གྱིས་ངོ་ངག་གིས་ཤེས། གདིང་སེམས་ལ་འཆར་བར་ཚད་རྨི་ལམ་གྱིས་བཟུང་བ་ཡིན་གསུངས་ནས་རྟགས་སྔོན་ལ་བཤད། ཚད་རྗེས་ནས་འབྱུང་བའི་རིམ་པ་ཡང་དེ་ལྟར་གྲུབ་པ་རེད། འོན་ཀྱང་ལས་དང་པོ་བ་དང་དེང་སང་གི་གདུལ་བྱ་ལ་གོ་ལྡོག་པར་བྱས་ཀྱང་འཕྲོད་མཁན་ཡང་ཡོད་པ་ཡིན་ས་རེད། དེ་དང་འདྲ་བའི་ཆ་ནས་ཞུས་ན། སྙིང་ཐིག་གོང་མའི་ཆོས་བཀའ་ཐམས་ཅད་ཀྱི་ནང་ནས་རྒྱུད་ཁོག་མའི་ནང་ནས་ཇི་ལྟར་འབྱུང་བ་བཞིན་དུ་སྔོན་ལ་ཐོད་རྒལ་གསུངས་ནས། སྒྲོན་བཞིའི་སྐབས་ཀྱི་ནང་ཤེས་རབ་རང་བྱུང་གི་སྒྲོན་མའི་ངོ་བོ་དང་འབྲེལ་ཏེ། ཀ་དག་ཁྲེགས་ཆོད་ཀྱི་དགོངས་པ་རྗེས་སུ་བསྟན་པ་ཡང་གསུངས་ཡོད། ཀུན་མཁྱེན་ཀློང་ཆེན་པ་བྱོན་ཚུན་ཆོད་དུས་རབས་ཀྱི་གདུལ་བྱའི་ཁམས་དབང་བསམ་པ་ལས་འཕྲོ་དང་བཅས་པར་བསྟུན་ནས་ཁྲེགས་ཆོད་སྔོན་ལ་བསྟན། དེའི་རྨང་གཞི་དེའི་སྟེང་ལ་ཐོད་རྒལ་གསུངས་པ་ལྟ་བུའི་དགོས་པ་སྣ་ཚོགས་དང་བསྟུན་ཏེ་མན་ངག་གི་འགྲོས་ཀྱང་དེ་བཞིན་དུ་ཁྲིད་ཡིག་སོ་སོའི་སྐབས་སུ་སོ་སོའི་ཁྱད་ཆོས་རྩལ་འདོན་གྱིས་ཁྱད་པར་འབྱུང་ཆོག་པ་རེད། དེ་ཡན་གྱིས་མཐའ་རྟེན་གྱི་མན་ངག་གཉིས་སོང་ནས་ད་གསུམ་པ་ཐོབ་པ་གསུམ་གྱིས་གཟེར་གདབ་པ་ནི།

ག༽ གསུམ་པ་ཐོབ་པ་གསུམ་གྱིས་གཟེར་གདབ་པ།

ཨེ་མ་ཧོ།

གསུམ་པ་ཐོབ་པ་གསུམ་གྱིས་གཟེར་གདབ་པ།།

གསུངས་ཏེ་མདོར་བསྟན་ནས། རྒྱས་བཤད་ལ་ས་བཅད་རྣམ་པ་གསུམ། སྐྱེ་བ་ལ་དབང་ཐོབ་པ་དང་། འཇུག་པ་ལ་དབང་ཐོབ་པ། རླུང་སེམས་ལ་དབང་ཐོབ་པ་གསུམ་མམ། ཡང་ན་ཕྱི་སྣང་བ་ལ་དབང་ཐོབ་པ། ནང་སྒྱུ་ལུས་ལ་དབང་ཐོབ་པ། གསང་བ་རིག་པ་ལ་དབང་ཐོབ་པ་གང་གསུངས་ཀྱང་དོན་གྱིས་གཅིག་པ་རེད།

༡༽ དང་པོ་སྐྱེ་བ་ལ་དབང་ཐོབ་ཚུལ།

སྐྱེ་བར་དབང་ཐོབ་འཕོ་ཆེན་སྐུར་བཞེངས་ནས།།

འགྲོ་བའི་དོན་ཀྱང་དངོས་སུ་བྱེད་པར་ནུས།།

གཞན་ཡང་གང་ལ་གང་འདོད་སྤྲུལ་ནས་ཀྱང་།།

འགྲོ་དོན་དཔག་ཏུ་མེད་པར་མཛད་པ་དང་།།

དེའི་ཚེ་མི་ལ་སོགས་པའི་འགྲོ་གཞན་ལ།།

རིག་པ་བཅུག་ན་མི་དེས་མི་དགེའི་ལས།།

ཅི་ཙམ་སྤྱད་ཀྱང་དེ་ལ་རང་བྱུང་གི།

རིག་པའི་ཡེ་ཤེས་གནས་པའི་གནད་ཉིད་ཀྱིས།།

འབྱུང་བ་རང་སར་དག་ནས་འཚང་རྒྱ་ནུས།།

བེམ་པོ་སོགས་ལ་རིག་པ་བཅུག་ན་ཡང་།།

འགུལ་ཞིང་ཆོས་ཀྱི་སྒྲ་འབྱིན་ལ་སོགས་པའི།།

ཕུལ་དུ་ཕྱིན་པའི་ཡོན་ཏན་སྟོན་ནུས་སོ།།

ཞེས་གསུངས་ཏེ། འདིའི་མཐའ་རྟེན་གྱི་མན་ངག་བཞི་འདིའི་དང་པོ་གཉིས་མི་འགུལ་གསུམ་ལ་གཞི་བཅའ་བ་དང་། སྡོད་པ་གསུམ་གྱིས་ཚད་བཟུང་བ་གཉིས་ཀ་སྣང་བཞི་ཐུན་མོང་དང་ནི། རྗེས་མ་ཐོབ་པ་གསུམ་གྱིས་གཟེར་གདབ་པ་དང་ནི་གདེང་བཞིའི་གྲོལ་ཚད་བསྟན་པ་གཉིས་ཀ་སྣང་བ་རྗེས་མ་ཚད་ཕེབས་དང་ཆོས་ཟད་གཉིས་ཀ་དང་། ཁྱད་པར་ཆོས་ཟད་དང་སྦྱར་བའི་མན་ངག་གི་འཆད་ཚུལ་དང་། སྣང་བཞི་ཡང་གཅིག་ལ་གཅིག་བརྟེན་ཡིན་པས་ན་གང་ལྟར་ཀུན་གྱི་མཐའ་རྟེན་དུ་ཡང་རུང་ཞིང་དེ་ལྟར་གྱུར་བ་ཞིག་ཀྱང་ཡིན་པ་རེད། སྐྱེ་བར་དབང་ཐོབ་པ་འདིའི་སྐབས་ལ་ཕྱི་སྣང་བ་ལ་དབང་ཐོབ་པས་ཅིར་སྣང་ཞིང་ཁམས་སུ་གྲོལ། སྐུ་དེས་འགྲོ་དོན་བྱེད་པར་དགོངས་ན་འཕོ་ཆེན་གྱི་སྐུ་རུ་བཞེངས་ཏེ་སྐུ་དངོས་དེས་འགྲོ་དོན་བྱེད་པར་ནུས། སྐུ་དེ་ཉིད་རྐྱང་པས་མ་གཏོགས་འགྲོ་དོན་མི་མཛད་པ་ཡང་མིན། སྐྱེ་འཇུག་གཉིས་ཀར་དབང་ཐོབ་པ་ཡིན་པས་གདུལ་བྱར་གང་འདོད་ཀྱི་སྤྲུལ་བསྒྱུར་སྣ་ཚོགས་མཛད་དེ་འགྲོ་དོན་དཔག་མེད་ཕྱོགས་མཐས་གཏུགས་པའི་སེམས་ཅན་ལ་མཛད། འཕོ་བ་ཆེན་པོའི་སྐུར་བཞེངས་པ་དེའི་ཚེ་ན་སྤྲུལ་པ་དང་དངོས་སུ་སྣང་བ་གཉིས་ཀས་འགྲོ་དོན་མཛད་པ་རེད། རིགས་དྲུག་སོ་སོའི་གནས་སུ་འགྲོ་དོན་མཛད་པས་མི་ཚད་མིའི་སྐྱེ་དགུ་སྨོན་ལམ་མཐུན་པ་སྟོང་ཕྲག་གསུམ་ལྷག་མེད་དུ་གྲོལ་བར་མཛད་དེ་སླར་ཆོས་ཉིད་ཀ་དག་གི་སར་གཤེགས། འགྲོ་བ་གཞན་གྲོལ་བར་མཛད་ནུས་པ་ནི། གཅིག་ན་དེ་དག་སྨོན་ལམ་མཐུན་པའི་ལས་འཕྲོ་ཡོད་པ་དང་ནི། ཡང་ལས་ཀྱི་སྒྲིབ་པ་མ་དག་པའི་མི་དགེའི་ལས་ཅན་ཡང་དགྲོལ་བར་ནུས་པ་འདི། དེ་ལ་ཡང་རིག་པའི་ཡེ་ཤེས་ཡོད་པའི་གནད་ཀྱིས་རིག་པའི་ཆོས་ཉིད་ནང་འཕྲད་པའི་སྟོབས་ཀྱིས་འབྱུང་བ་རང་སར་དག་ནས་འཚང་རྒྱ་ནུས་པ་ཡིན། དེ་ལྟར་གསུངས་པ་རེད། འདིའི་འབྱུང་བ་གསུངས་པའི་སྐབས་འདི་ལ། ཕྱིའི་རགས་པའི་ཕུང་ཁམས་སྐྱེ་མཆེད་དམ་འབྱུང་བཞི་རགས་པའི་གཟུགས་འདི་རྐྱང་པ་ལ་གསུངས་པ་མ་རེད། རྫོགས་པ་ཆེན་པོའི་ལུགས་ཀྱི་ཕྱི་འབྱུང་དང་ནང་འབྱུང་གསང་འབྱུང་ལ་སོགས་པའི་གོ་དོན་གྱི་གནད་ཀྱང་ཡོད་པ་རེད། ཡང་སྐྱེ་འཇུག་གཉིས་ལ་རང་དབང་ཐོབ་པའི་གནད་ཀྱིས་བེམ་པོ་ལ་རིག་པ་བཅུག་ན་འགུལ་བ་དང་བེམ་པོ་ལས་ཀྱང་ཆོས་ཀྱི་སྒྲ་འབྱིན་པ་ལ་སོགས་པ་ཕུལ་དུ་ཕྱིན་པའི་ཡོན་ཏན་གྱི་ནུས་པ་སྟོན་ནུས་ནི་ཡིན་གསུངས་པ་རེད། འདིའི་སྐབས་ཀྱི་བེམ་པོ་ལ་ཡང་རིག་པ་འཇུག་ནུས་པ་དང་ནི་ཐུན་མོང་གི་རྫོགས་རིམ་དང་འཕོ་བའི་གདམས་པས་གཞན་ལུས་ལ་གྲོང་འཇུག་ནུས་པ་གཉིས་ཀྱི་དབར་ལ་འདྲ་ལ་མ་ཡིན་པའི་ཁྱད་ཆོས། ལམ་མཐར་ཕྱིན་དང་མ་ཕྱིན་གྱི་སྟེང་ནས་ཕྱེ་རྒྱུ་ཡོད་པ་རེད་སྙམ། དེ་ཐོབ་པ་དང་པོ་རེད།

༢༽ གཉིས་པ་འཇུག་པ་ལ་དབང་ཐོབ་ཚུལ།

འཇུག་པར་རང་དབང་ཐོབ་པས་ནང་དབྱིངས་སུ།།

ཟག་བཅས་མི་སྣང་འཚང་རྒྱ་ནུས་པའོ།།

ཞེས་གསུངས་ཏེ། འདི་ནི་ནང་སྒྱུ་ལུས་ལ་དབང་ཐོབ་པ་རེད། སྒྱུ་ལུས་ལ་དབང་ཐོབ་པས་གདོས་བཅས་འོད་གསལ་དུ་གྲོལ་བའི་སྐབས་ཡིན། རྣལ་འབྱོར་པ་དེས་སྐུ་དེ་ཉིད་ཀྱིས་དུས་དེར་གཞན་དོན་མི་མཛད་པར་དགོངས་ན་སེམས་ཅན་སུམ་སྟོང་ལྷག་མེད་ལ་རང་དང་མཉམ་དུ་གྲོལ་ནས་ཀ་དག་གི་ས་ལ་སྐད་ཅིག་དེ་ཉིད་ལ་ན་བུན་ནམ་མཁར་ཡལ་བ་ལྟར་གཤེགས་ནས་སྐུ་དང་ཡེ་ཤེས་འདུ་འབྲལ་མེད་པའི་ཕྲིན་ལས་ཀྱིས་སེམས་ཅན་གྱི་དོན་མཛད་པ་རེད། དེ་དུས་ཟག་བཅས་ཀྱི་ཕུང་པོ་མི་སྣང་བར་ཟག་མེད་ཡེ་ཤེས་ཀྱི་སྐུ་རུ་འཚང་རྒྱ་བ་ཡིན་པ་རེད། དེ་ཐོབ་པ་གཉིས་པ་རེད། དེ་ནས་གསུམ་པ་རླུང་སེམས་ལ་དབང་ཐོབ་ཚུལ་ནི།

༣༽ གསུམ་པ་རླུང་སེམས་ལ་དབང་ཐོབ་ཚུལ།

རླུང་སེམས་གཉིས་ལ་རང་དབང་ཐོབ་ནས་ཀྱང་།།

རླུང་གི་ཡོན་ཏན་ཐམས་ཅད་འབྱུང་བ་དང་།།

དེ་ཡང་སེམས་ཅན་གཞན་རྣམས་ཚེ་འཕོ་ཚེ།།

དེ་ལ་རང་གི་ཤེས་པ་བཅུག་ནས་ཀྱང་།།

རིག་པ་ཀ་དག་ཆེན་པོར་བཞག་པའི་ཚེ།།

ལས་ལ་བཟང་ངན་མེད་པར་རང་ཉིད་དང་།།

མཉམ་དུ་འཚང་རྒྱ་ནུས་པའི་མཐུ་ཆེན་འཐོབ།།

ཅེས་གསུངས་ཏེ། འདི་རླུང་སེམས་ལ་རང་དབང་ཐོབ་སོང་བ་ཡིན་པས་ན་རླུང་སེམས་ཀྱི་དབང་གིས་འཁྲུལ་བས་ཁམས་གསུམ་དུ་ལྡོག་པ་མི་སྲིད་པའི་དུས་རེད། དོན་གྱི་འབྲས་བུ་ལ་དབང་ཐོབ་པར་འགྱུར་བའི་སྐབས་སུ་འཇོག་པ་དེ་རེད། ལས་རླུང་དབྱིངས་སུ་དག སེམས་ཉིད་ཡེ་ཤེས་སུ་སྨིན་ཏེ་དེ་དང་དེའི་ཡོན་ཏན་མང་པོ་འབྱུང་རྒྱུ་དང་ནི། ཚད་འདིར་ཐོན་པའི་རྣལ་འབྱོར་བས་སེམས་ཅན་གཞན་འཆི་ཁ་མ་ལ་རང་གི་ཤེས་པ་བཅུག་གསུང་ན་གོང་ནས་འཇུག་པར་དབང་ཐོབ་པའི་སྐབས་སུ་བཤད་པ་བཞིན་དུ་འཕོ་བ་འདེབས་པ་ཚོས་རིག་པ་ཀ་དག་ཆེན་པོར་བཞག་པའི་ཚེ། དེའི་རྣམ་ཤེས་ཀྱི་ངོ་བོ་རང་གི་རིག་པ་དང་བསྲེ་སྟེ་འོད་ཀྱི་གོང་བུ་དང་སྒྲ་ཡིས་འཕོ་བ་ཚོའི་ཚུལ་གྱིས་འཕངས་བཞག་ན་ཆོས་ཉིད་ནང་འཕྲད་ཀྱི་བདེན་པའི་སྟོབས་ཀྱིས། རབ་འོག་མིན་བདེ་ཆེན་དག་པའི་ཞིང་ཁམས་སུ་སངས་རྒྱས་ཀྱི་དགོངས་ཀློང་དང་དབྱེར་མེད་དུ་འདྲེས་ཐུབ་པ་དང་། འབྲིང་ཞིང་ཁམས་དག་པ་ཞིག་ཏུ་སྐྱེ་བ་གཅིག་གིས་ཐོགས་པའི་བྱང་སེམས་འཕགས་པའི་རིགས་ཅན་དུ་སྐྱེ་བར་བྱེད་ཐུབ་རྒྱུ། ཐ་མ་ཡང་སྐྱེ་བ་བརྒྱུད་ནས་གྲོལ་བ་ཐོབ་པ་ཆོས་ཉིད་བདེན་པའི་སྟོབས་ཀྱིས་བསླུ་བ་ཡོད་པ་མ་རེད། ལས་ལ་བཟང་ངན་མེད་པར་འཚང་རྒྱ་གསུངས་རྒྱུ་དེའང་རྒྱུ་མེད་ཀྱི་འབྲས་བུ་ཞིག་གྲུབ་གསུངས་པ་མ་རེད། མ་བསྒོམ་སངས་རྒྱས་ཀྱི་ཆོས་ལྔ་གསུངས་རྒྱུ་འདི་ཚོ་ཚེགས་ཆེན་པོ་དང་དུས་རིང་པོའི་ལམ་གྱི་སྦྱང་བགྲོད་ལ་མི་ལྟོས་པར་བཙན་ཐབས་ཀྱིས་གྲོལ་བ་གསང་སྔགས་ཐབས་ཀྱིས་འཕགས་པའི་ཁྱད་ཆོས་རེད་མོ། ཀུན་ཏུ་བཟང་པོས་དགེ་བ་སྣ་གཅིག་མ་བྱས་པར་སངས་རྒྱས་ཞེས་གསུངས་པ་དག་དང་གོ་དོན་ཕྱོགས་འདྲ་མོ་ཡིན་ནི་རེད། ཟག་མེད་རང་ངོ་ཤེས་པའི་དགེ་ཚོགས་ཀྱིས་དུས་རིང་གི་བསགས་སྦྱངས་གཉིས་ཀྱི་གོ་ཆོད་ནས་དེ་ཡིས་ཀྱང་བསྡུར་ཐབས་མེད་པ་སྐད་ཅིག་གཅིག་གིས་བྱེ་བྲག་ཕྱེད་དེ་སྐད་ཅིག་གཅིག་གིས་རྫོགས་སངས་རྒྱས་པ་རེད། སེམས་བསྐྱེད་ཁྱད་པར་ཅན་གྱིས་བསྐལ་བའི་ཚོགས་དུས་རིང་ལ་མི་ལྟོས་པར་འདུམ་པ་མདོ་ལས་ཀྱང་འབྱུང་བ་ལྟ་བུ་རེད། ཚད་ཕེབས་ཀྱི་སྐབས་ཀྱི་ཚད་ལ་ཕེབས་པ་དང་ནི་འདི་ནས་དབང་ཐོབ་པ་གཉིས་ཀ་དབང་འབྱོར་གྱི་ཡོན་ཏན་མངའ་བརྙེས་པ་ཡོངས་སུ་རྫོགས་དང་མ་རྫོགས་ཀྱི་ཁྱད་པར་གྱིས་འབྱེད་དགོས།

༤༽ བཞི་བ་ཡོན་ཏན་གྱི་ཁྱད་པར་གཞན་ཡང་ཐོབ་ཚུལ།

རི་བྲག་རྣམས་ལ་ཐལ་བྱུང་འགྲོ་བ་དང་།།

ནམ་མཁའི་ཁམས་ལ་བྱ་བཞིན་འཕུར་བ་དང་།།

འབྱུང་བཞིའི་གནོད་པ་གང་གིས་ཀྱང་མི་ཚུགས་ཤིང་།།

མངོན་པར་ཤེས་པ་ཕྱོགས་མེད་འཆར་བའོ།།

ཞེས་གསུངས་ཏེ། རླུང་སེམས་ལ་རང་དབང་ཐོབ་པའི་གནས་སྐབས་དེར་སྣང་སེམས་གཅིག་ཏུ་འདྲེས་ཏེ་རི་བྲག་ལ་ཐལ་བྱུང་གིས་འགྲོ་བ། སྔར་རྗེ་འབངས་ཉེར་ལྔའི་ནང་ནས་འགའ་རེ་རི་བྲག་ལ་ཟང་ཐལ་དུ་རྒྱུ་བ། འགའ་ཞིག་གིས་བྲག་ལ་ཕུར་བ་འདེབས་པ། འགའ་རེས་ནམ་མཁའི་བྱ་འཛིན་པ་ལ་སོགས་པའི་ཐུན་མོང་དང་མཆོག་གི་གྲུབ་པ་ཐོབ་པ་དེ་འདྲའི་ཚད་ཡིན་ས་རེད། ནམ་མཁའི་ཁམས་ལ་བྱ་བཞིན་དུ་འཕུར། ནམ་མཁར་སྐྱིལ་ཀྲུང་བཅས་ཏེ་བཞུགས་པ། སྔར་དང་ཕྱིས་ཀྱི་གསང་སྔགས་སྔ་འགྱུར་བའི་རིག་འཛིན་གྱི་བཞུགས་གྲལ་ན་སྔགས་པའི་རྒྱལ་པོ་སོ་ཟུར་གནུབས་གསུམ་ལ་སོགས་པ་ཅི་འདྲ་བྱོན་ཡོད། དེ་ཚོ་ལྟ་བུ་ལ་གསུངས་པ་རེད། འབྱུང་བཞིའི་གནོད་པ་གང་གིས་ཀྱང་མི་ཚུགས་པར་མ་ཟད་འབྱུང་བ་ལྔ་ལ་དབང་བསྒྱུར་ཏེ་མངོན་ཤེས་ཉི་ཚེ་བ་མ་ཡིན་པར་མངོན་པར་ཤེས་པ་ཕྱོགས་མེད་དུ་འཆར་གསུངས། འདིར་འཕོ་བའི་ཐད་ནས་ཟུར་བཤད་ཅིག་མཛད་འདུག

འཕོ་བ་འདེབས་པའི་ཟབ་གནད་ཉིད་ལ་ཡང་།།

འདིའི་དོན་རང་གི་རྒྱུད་ལ་ཁེལ་བ་ཞིག།

དགོས་པ་འདྲ་ཡང་ལམ་མཆོག་འདི་ཉིད་ལ།།

མ་གོམས་ཞལ་འདྲིས་ཙམ་ཡང་མ་ཐོབ་པའི།།

མཁས་རློམ་རྣམས་ཀྱི་ཐུགས་ལ་མི་འཆར་རོ།།

ཞེས་གསུངས་པ་རེད། འཕོ་བ་མིང་གཅིག་ནའང་དོན་གྱི་ཐད་ནས་རབ་འབྲིང་ཐ་མའི་འཕོ་བའི་དབྱེ་རིམ་ཡོད་པ་ཡིན། ཐུན་མོང་རྫོགས་རིམ་གྱི་ནང་གསེས་འཕོ་བའི་གདམས་པ་དང་ནི་རྫོགས་ཆེན་མན་ངག་སྡེའི་དབྱིངས་དང་རིག་པ་ལ་འཇུག་པ་དང་སྐུ་དང་ཞིང་ཁམས་འཇུག་པ་གསུངས་རྒྱུ་ལ་སོགས་པ་དེའི་ནང་ནས་ཀྱང་ཁྱད་པར་ཧ་ཅང་ཆེ། གཅིག་པ་མིན། ཕ་རོལ་པོ་གདབ་ས་ལ་ཡང་དེ་བཞིན་དུ་ཁྱད་པར་ཡོད་པ་རེད་མོད། འདི་ནས་སྡིག་ཅན་བཙན་ཐབས་སུ་འཕོ་བ་འདྲ་ཞིག་བཤད་པའི་གཞི་རུ་བྱས་ན། འདེབས་པ་པོ་རྟོགས་པ་མཆོག་ལྡན་ལམ་འདི་ལ་རང་བྱན་ཆུད་པ་ཞིག་ངེས་པར་ཡིན་དགོས་པ་རེད། གནའ་རྫོགས་ཆེན་པདྨ་རིག་འཛིན་ལ་སློབ་བུ་ཉི་ཟླ་སྐར་གསུམ་གྱི་འཁོར་གྱིས་བསྐོར་ཏེ་བཞུགས་ཡོད་སྐབས་ཤིག་ལ་ཚེ་འདས་བར་དོ་གསར་བ་ཞིག་གི་དོན་དུ་འཕོ་བ་ཞུས་ཡོང་དུས། བླ་མས་སློབ་མ་ཚོར་སྔོན་མ་ཁྱེད་ཅག་གིས་ཕོངས་དང་གཅིག་བལྟ་གསུངས་ནས་གཤིན་པོའི་རྣམ་ཤེས་དེ་ཐེབ་ཙེ་ཞིག་གི་ཁ་འོག་ཏུ་བཀུག་ནས་བཞག སློབ་མ་ཚོས་རེ་རེ་བཞིན་དུ་ཧིཀ་དང་སྦྲགས་ནས་དམིགས་པ་ནན་མོར་གཏད་ཏེ་འཕངས་ཡོང་དུས་ཐེབ་ཙེ་འགུལ་ཙམ་པ་ལས་གཅིག་གིས་ཀྱང་འཕེན་མ་ཐུབ། དེ་ནས་པདྨ་རིག་འཛིན་ཁོང་རང་གིས་ཐུགས་མཉམ་པར་བཞག་ནས་གཅིག་འཕངས་དུས་ཧིཀ་གཅིག་གིས་ཐེབ་ཙེ་ལིངས་སེ་ཁ་བཀྱགས་ནས་འཕངས་སོང་བ་རེད། ཐུགས་རྗེ་དང་ནུས་སྟོབས་ལྡན་ན་གཤིན་པོའི་རྣམ་ཤེས་སྐད་ཅིག་གིས་བདེ་ཆེན་དག་པའི་ཞིང་དུ་དེ་ལྟར་འཕེན་ཐུབ་པ་རེད། རང་ཆོས་ཉིད་ཀྱི་བདེན་པ་མ་མཐོང་ན། །གཞན་གཤིན་པོ་ལ་འཕོ་བ་མ་འདེབས་ཤིག །ཅེས་གསུངས་ཡོད། ཆོས་ཉིད་ཀྱི་བདེན་པ་ནང་འཕྲད་ཀྱིས་བཙན་ཐབས་སུ་འདྲོང་དགོས་ན། འདི་དོན་རང་གི་རྒྱུད་ལ་འཁེལ་བ་ཞིག་དགོས་པ་འདྲ་ཡང་གསུངས་པ་དེ་རྟིང་ཚིག་གིས་ཁྲེལ་གཏམ་མཛད་པ་རེད། བཙན་ཐབས་འཕོ་བའི་གདམས་པའི་གནད་རང་རྒྱུད་ལ་མ་ཁེལ་ཞིང་སྟོང་ཉིད་སྤྲོས་པ་བྲལ་བའི་ཆོས་ཉིད་ཀྱི་བདེན་པ་མཐོང་མ་དགོས། འཕོ་བའི་གདམས་པ་ཚོ་ཅི་འདྲ་ཞིག་ཡིན་པའི་ཞལ་འདྲིས་རྒྱུས་མངའ་ཙམ་ཡང་མེད་པ་ཞིག་གིས་ཕྱོགས་རེས་ཚིག་རྩོད་ཙམ་རེར་སྦྱོང་བ་མྱོང་བས་རང་ཉིད་མཁས་པར་རློམ། གཞན་མ་བརྟག་བླུན་པོའི་ཐོ་ཅོ་གྲགས་པའི་རྗེས་སུ་འབྲང་བ་འགས་མཁས་པར་བཀུར་ས་དག་གིས་འདིའི་གདམས་པ་འདི་ཚོའི་དགོས་གནད་ཀྱི་ཕྱོགས་ཙམ་ཡང་ཐུགས་ལ་འཆར་བ་མ་རེད་གསུངས་ནས། དོན་ལ་གདམས་པ་གང་དང་གང་ཞིག་ཡིན་ཡང་དམ་པའི་བཤེས་གཉེན་བསྟེན། ཐོས་པའི་མཐའ་རྒྱ་བཅད། བསམ་པས་ཞུ་དག་བཏང་། བསྒོམ་པས་ཉམས་སུ་བླངས་ཏེ་དྲོད་རྟགས་ངེས་ཅན་ཞིག་གོང་དུ་གསུངས་པའི་རྟགས་ཚད་ངེས་པའི་རྣམ་གྲངས་ལ་མི་བརྟེན་པར་མངོན་པའི་ང་རྒྱལ་ལམ་ཆོས་བརྒྱད་བདུད་ཀྱི་ལག་གཡུག་གི་དབང་དུ་ཤོར་ཏེ་གཞན་གྱི་འགྲོ་དོན་དུས་ལ་མ་བབས་གོང་བྱེད་སྔ་མ་བྱེད་ཅེས་དེ་ལྟར་གསུངས་པ་རེད། རྟོགས་པས་བདག་རྒྱུད་གྲོལ་བ་དང་གཞི་ནས་ཐུགས་རྗེས་གཞན་རྒྱུད་དགྲོལ་དགོས་པ་ཡིན་གསུངས་ཡོད་རེད། དེ་དང་འདྲ་བར་རྫོགས་ཆེན་གྱི་མན་ངག་ཐམས་ཅད། ཐོབ་སོང་ཞེས་ཕྱི་ཉིན་ནས་སྤེལ་བཞག་ཆོག་པ་ཞིག་མིན། འཕོ་བ་འདི་ཚོ་དགེ་འདུན་པ་དང་མཉམ་དུ་སྦྱང་ན་འདུས་པའི་བྱིན་རླབས་ཀྱིས་འབྱོངས་སླ་བ་ཡིན། རྟགས་ཐོན་སྦྱངས་ནས་ཀྱང་དུས་རྒྱུན་ཆག་མེད་ཀྱིས་རང་ཉིད་ཀྱིས་སྦྱང་རྒྱུ་གལ་ཆེན་རེད། དགེ་འདུན་འདུས་པས་གཤིན་གསོན་ལ་འཕོ་ཞོགས་ཀྱིས་མཉམ་དུ་འདེབས་རྒྱུའི་ཕྱག་སྲོལ་ཀྱང་ཡོད། ཁྱད་པར་དུ་ཆོས་དགེའམ་ཆོས་སྦྱིན་ལྟ་བུར་དེ་ཚོ་བཟང་ནི་རེད། དེ་ལས་རང་ཉིད་སྒེར་བས་འཕོ་བའི་དམིགས་རིམ་གྱི་གནད་ཙམ་དང་། ཉམས་ལེན་སྐར་མ་བཅུའི་ཐུན་མི་ཆོད་པ་ཞིག་གིས། གཞན་གཤིན་པོའི་རོ་མགོ་ནས་འཕོ་བ་འདེབས་རྒྱུ་རང་ཉིད་དམྱལ་བར་འགྲོ་བའི་གྲོ་ཆས་རེད། དེ་གསུངས་པ་རེད། དེ་ཡན་ཆོད་ཀྱིས་ཐོབ་པ་གསུམ་གྱིས་གཟེར་གདབ་པ་དང་བཅས་ཏེ་མཐའ་རྟེན་གྱི་མན་ངག་གསུམ་སོང་ནས། བཞི་བ་གདེང་བཞིའི་གྲོལ་ཚད་བསྟན་པ་ནི།

ང༽ བཞི་པ་གདེང་བཞིའི་དྲོད་ཚད་བསྟན་པ།

ཨེ་མ་ཧོ།

བཞི་པ་གདེང་བཞིའི་དྲོད་ཚད་བསྟན་པ་ནི།།

ཞེས་མཚམས་སྦྱར་བའི་ཚིག་གིས་མདོར་བསྟན་ཏེ། རྒྱས་པར་བཤད་པ་ནི་འདི་ལ་ཡར་གྱི་གདེང་གཉིས་དང་མར་གྱི་གདེང་གཉིས་ཏེ་བཞིར་བཤད་པ་དང་དོན་བསྡུས་ཏེ་བསྟན་པ་ལས།

༡ དང་པོ་ཡར་གྱི་གདེང་གཉིས་ཐོབ་ཚུལ།

ཡར་གྱི་གདེང་གཉིས་རང་བྱུང་རིག་པ་ལས།།

གཞན་པའི་སངས་རྒྱས་མེད་པར་རྟོགས་པ་ཡིས།།

སངས་རྒྱས་ཞིང་གི་ཡོན་ཏན་མཐོང་ན་ཡང་།།

སངས་རྒྱས་ཡོན་ཏན་འཐོབ་ཏུ་རེ་བ་དང་།།

མི་ཐོབ་སྙམ་པའི་དོགས་པ་མེད་པའི་གདེང་།།

ཞེས་གསུངས་ཏེ། རང་བཞིན་རྫོགས་པ་ཆེན་པོའི་ལྟ་སྒོམ་སྤྱོད་པ་ཀློང་དུ་གྱུར་པས་རང་བྱུང་རིག་པའི་ངོ་བོ་ཡེ་གྲོལ་བསྐྱར་གཞི་མེད་པ། རང་གྲོལ་གཉེན་པོ་མེད་པ། གཅེར་གྲོལ་མཐོང་ཡལ་ཡིན་པ། མཐའ་གྲོལ་སྤྲོས་པ་དང་བྲལ་བ། གཅིག་གྲོལ་ལ་བཟླ་མི་དགོས་པའི་གནད་དེ་དག་རྟོགས་པ་དེས། དེ་ལས་གཞན་པའི་སངས་རྒྱས་ཟུར་ན་མེད་པར་རྟོགས་ཏེ་ཡར་སངས་རྒྱས་ཀྱི་ཞིང་གི་བདེ་སྐྱིད་དང་སངས་རྒྱས་ཀྱི་སྤངས་དང་རྟོགས་པའི་ཡོན་ཏན་ཇི་ལྟར་བཤད་ཀྱང་མྱ་ངན་ལས་འདས་པའི་ས་ལ་རེ་བ་མེད་པ་དང་ནི། སངས་རྒྱས་ཀྱི་ཡོན་ཏན་ལ་དགའ་བྲོད་མེད་པའི་གདེང་དང་གཉིས་ཐོབ་གསུངས། དེ་ནས་མར་གྱི་གདེང་གཉིས་བཤད་པ་ནི།

༢ གཉིས་པ་མར་གྱི་གདེང་གཉིས་ཐོབ་ཚུལ།

མར་གྱི་གདེང་གཉིས་རང་བྱུང་རིག་པ་ལ།།

འཁྲུལ་བ་ཡེ་ནས་བྲལ་བར་རྟོགས་པ་ཡིས།།

འགྲོ་བ་རིགས་དྲུག་སྡུག་བསྔལ་མཐོང་ན་ཡང་།།

འཁོར་བའི་གནས་སུ་མི་ལྟུང་རེ་བ་དང་།།

ལྟུང་གིས་སྙམ་པའི་དོགས་པ་མེད་པའི་གདེང་།།

གསུངས་ན། མར་གྱི་གདེང་གཉིས་དེ་གང་ཡིན་ན། གཞི་ཀ་དག་གདོད་མའི་གནས་ལུགས་ངོ་བོ་དངོས་པོ་དང་མཚན་མའི་ཆོས་སུ་མ་གྲུབ། རང་བཞིན་ལྷུན་གྲུབ་ཡིན་པས་ལྷུན་གྲུབ་འོད་གསལ་བའི་ཆོས་ཉིད་རྣམ་དག་ཡིན་པ་ཧ་གོ ཐུགས་རྗེ་འཁོར་འདས་ཀྱི་རྩལ་སྣང་གང་ཤར་ཡང་འཁྲུལ་བ་ཡེ་ནས་བྲལ་བའི་རྟོགས་དོན་མངོན་དུ་གྱུར་སོང་དུས། སྤྱིར་འགྲོ་བ་རིགས་དྲུག་སྒོས་ངན་སོང་གསུམ་གྱི་སྡུག་བསྔལ། འཁོར་བ་ངན་སོང་གི་གནས་ལ་ལྟུང་བྱ་ལྟུང་བྱེད་ལྟུང་མཁན་དང་བཅས་པ་གཞི་མེད་རྩ་བ་བྲལ་བའི་ཕུགས་ཆོད་དེ་ལྟུང་གིས་དོགས་པ་དང་མི་ལྟུང་གི་རེ་བ་གཉིས་ཀ་མེད་པའི་མར་གྱི་གདེང་གཉིས་ཏེ་གདེང་བཞི་རྙེད་དེ་བློ་བདེ་ནང་ནས་རྙེད་ནི་ཡིན་གསུངས་པ་རེད།

༣ གསུམ་པ་དོན་བསྡུས་ཏེ་བསྟན་པ།

མདོར་ན་སེང་གེས་གངས་རི་ཟིན་པ་ལྟར།།

གདོད་མའི་གྲོལ་གཞིར་ཕྱིན་པས་ཡ་ང་བྲལ།།

ཀུན་བཟང་ཆོས་སྐུའི་རྒྱལ་ས་དེ་དུས་སུ།།

ཟིན་པའི་དུས་ཡིན་སྐལ་ལྡན་སློབ་བུ་ཚོ།།

ཞེས་གསུངས་ཏེ། དཔེ་བཞག་ན་རི་དྭགས་ཀྱི་རྒྱལ་པོ་སེངྒེ་དེས་གངས་ཀྱི་གཏན་གཞིས་ཟིན་སོང་དུས། སུ་ལ་ཡང་འཇིགས་དང་ཉམ་ང་མི་དགོས་པ་ལྟར་དུ་རིག་པ་རྗེན་པར་བུད་སོང་དུས་འཁོར་བ་མིང་ཙམ་ལས་མེད། ལས་དང་རྣམ་སྨིན་ལས་ལྡོག འཁོར་འདས་ལ་བཟློས། གདོད་མའི་གྲོལ་གཞིར་ཕྱིན་སོང་བས་རང་ས་ནམ་མཁའ་ལྟ་བུར་གྱུར་ནས་ཕྱིར་མི་ལྡོག་པའི་ས་ལ་ཐོན་དུས་ཀུན་བཟང་ཆོས་སྐུའི་རྒྱལ་སར་ཆོས་དྲུག་མངོན་དུ་གྱུར་ནས། དེ་དུས་ལས་ཟིན་པའི་དུས་ཡིན། སྐལ་ལྡན་དབང་པོ་ཡང་རབ་ཏུ་གྱུར་པ་ཚོས་བརྩོན་འགྲུས་མ་ཞན་པར་གདེང་བཞིའི་རྣལ་འབྱོར་ཚད་དུ་ཕྱིན་པར་སླར་ཡང་བསྐུལ་བ་དང་བཅས་ཏེ། དེ་ཡན་གྱིས་ཁྲིད་རིམ་བདུན་པ་མཐའ་རྟེན་གྱི་མན་ངག་བཞི་བསྟན་པའི་དངོས་གཞི་སོང་སྟེ། འདི་ནས་སྣང་བཞི་དང་འབྲེལ་བའི་ས་ལམ་བགྲོད་ཚུལ་དང་ནི་འབྲས་བུའི་སྐོར་ཅིག་གསུངས་པ་ནི།

ཅ༽ སྣང་བཞི་དང་འབྲེལ་བའི་ས་ལམ་བགྲོད་ཚུལ་འབྲས་བུ་དང་བཅས་པ་བསྟན་པ།

ཨེ་མ་ཧོ།

ལྷུན་གྲུབ་སྣང་བ་བཞི་ཡི་ཉམས་དེ་རྣམས།།

ཡོངས་སུ་རྫོགས་པའི་བར་ལ་ཕྱིའི་ས་བཅུ།།

དོན་ལ་རྫོགས་ཤིང་ནང་གི་འབྲས་བུ་ཡི།།

བཅུ་དྲུག་ས་རྣམས་རྫོགས་པའི་རིམ་པ་ནི།།

ཞེས་མཚམས་སྦྱར་བའི་ཚིག་གིས་མདོར་བསྟན་པ་རེད། ལྷུན་གྲུབ་སྣང་བཞི་འཆར་བ་དང་མཉམ་དུ་ཐེག་ཆེན་ཐུན་མོང་གི་ཕྱིའི་ས་བཅུ་རྫོགས་པ་དང་ཆབས་ཅིག་ཏུ་རྫོགས་ཆེན་ནང་གི་འབྲས་བུའི་ས། སྣང་བཞི་སྣང་བ་བཅུ་དྲུག་གམ་ས་བཅུ་དྲུག་གིས་རྫོགས་ཚུལ་བསྟན་པའི་ནང་གི་དང་པོ་རྒྱས་པར་བཤད་པས་དེའི་དོན་བཀྲལ་པ་རེད།

༼༡ དང་པོ་ཕྱི་ཡི་ས་བཅུ་རྫོགས་པའི་ཚུལ།

དང་པོ་ཕྱི་ཡི་ས་བཅུ་རྫོགས་པའི་ཚུལ།།

དང་པོ་མཚན་ལྡན་རྩ་བའི་བླ་མ་ཡིས།།

ངོ་སྤྲོད་བཏབ་པའི་དུས་སུ་གང་ཟག་དེས།།

དོན་དམ་ཆོས་ཉིད་བདེན་པ་མཐོང་བའི་ཚེ།།

དེ་ལ་དགའ་བ་སྐྱེས་པ་ས་དང་པོ།།

རབ་ཏུ་དགའ་བའི་ས་དེ་ཐོབ་པའོ།།

དེ་རྣམས་ཐམས་ཅད་རང་གི་རིག་པའི་གདངས།།

རང་སྣང་ཡིན་པར་རང་ངོ་ཤེས་པ་ནི།།

གཉིས་པ་དྲི་མ་མེད་པའི་ས་ཐོབ་བོ།།

དེ་ནས་དེ་ལ་གོམས་པར་བྱེད་པ་ནི།།

གསུམ་པ་འོད་བྱེད་པ་ཡང་ཐོབ་པའོ།།

ཞེས་གསུངས་ཏེ། ཕྱི་ནང་གི་ས་ལམ་ཐམས་ཅད་དུས་གཅིག་ལ་ཆོད་པ་ཉི་ཟླའི་བགྲོད་པ་ལྟ་བུ་ཡིན་ནི་རེད། དེའི་ཕྱིར་ན་ཤིན་ཏུ་མྱུར་བའི་ལམ་ཞེས་བརྗོད་པ་རེད་མོད། བློ་ཆུང་བའི་རིགས་ཀྱིས་ས་ལམ་བགྲོད་མི་དགོས་པའི་འབྲས་བུ་ཞིག་ཇི་ལྟར་ཐོབ་པ་ཡིན་སྙམ་པའི་ཐེ་ཚོམ་བསལ་ཕྱིར་དུ། རྒྱུ་འབྲས་ཀྱི་ཐེག་པའི་ས་ལམ་བགྲོད་ཚུལ་བཤད་པའི་སྐབས་རིམ་ཅན་དུ་མ་བཤད་ཐབས་མེད་ཡིན་པས། ཚོགས་སྦྱོར་གྱི་ལམ་ཇི་ལྟར་བགྲོད་ཚུལ་དང་ནི་དེའི་སྤངས་རྟོགས་ཀྱི་ཡོན་ཏན་ལ་སོགས་པ་ཞིབ་པར་གསུངས་པ་དེ་ཀུན་མཁྱེན་ཡབ་སྲས་ཀྱི་གསུང་ལས་ངེས་པའི་རྨང་གཞིའི་སྟེང་དུ། དང་པོ་མཚན་ཉིད་ཀུན་ལྡན་གྱི་བླ་མས་དབང་བསྐུར་ཁྲིད་བཤད་མན་ངག་གདབ་པར་མཛད་པའི་བླ་མ་དེ་ཉིད་ཀྱིས་གསུངས་ན། སུམ་ལྡན་རྩ་བའི་བླ་མ་དེ་ཉིད་ཀྱིས་དབང་དང་ཁྲིད་ཀྱི་དུས་གང་ཡང་རུང་བར་ངོ་སྤྲོད་བཏབ་སྟེ་རང་ངོ་འཕྲོད་སོང་བའི་སྣོད་ལྡན་ལས་ཅན་གྱི་སློབ་བུ་དེས། དོན་དམ་ཆོས་ཉིད་ཀྱི་བདེན་པ་མངོན་སུམ་དུ་མཐོང་དུས་དགའ་བ་ཚད་མེད་སྐྱེས་པ་རེད། དགའ་བ་ཚད་མེད་སྐྱེས་པ་དེ་ས་དང་པོ་རབ་ཏུ་དགའ་བ་ཡིན་གསུངས། ཆོས་ཉིད་མངོན་སུམ་སྔགས་ཀྱི་བདེན་མཐོང་ལ་ལྟ་བས་བསྟན་ཚོད་ཀྱིས་བཞག་པ་ཡིན་ཡང་། ཉམས་ལེན་གང་ཟག་གི་རྟོགས་ཚུལ་གྱིས་རང་ལུགས་ལ་དཔེའི་ཡེ་ཤེས་སུ་བཞེད་ནི་རེད། དེ་ཡིན་ན་དཔེའི་ཡེ་ཤེས་ཆུ་ཟླ་ལྟ་བུ་དེས་མཚོན་པའི་དོན་གྱི་ཡེ་ཤེས་གནམ་ཟླ་ལྟ་བུའི་བདེན་མཐོང་དངོས། ཉམས་སྣང་གོང་འཕེལ་ཡན་ཆད་ནས་འཇོག་དགོས། གཅིག་བྱེད་ན་མཐོང་ལམ་སྐད་ཅིག་བཅུ་དྲུག་གི་ཆར་ཕྱེ་བ་བཞིན། ཆོས་ཉིད་མངོན་སུམ་ཚད་དུ་ཕྱིན་ནས་མཐར་ཐུག་པའི་ཚེ་ན་བདེན་མཐོང་དངོས་ལ་འཇུག་པའི་གོ་དོན་ཡང་མེད་པ་ཞིག་མ་རེད་སྙམ། འདི་ཚོ་གནད་ལ་ཕིགས་པའི་གོ་བ་དཔེ་རྐྱང་བར་ལྟོས་པ་མ་ཡིན་པར་རང་ཉིད་ཀྱི་རྣམ་དཔྱོད་ཀྱིས་ཀྱང་ལེན་དགོས་པ་ཡིན། རིག་པའི་རང་གདངས་རང་སྣང་དྲི་བྲལ་དུ་ངོ་ཤེས་པ་ས་གཉིས་པ་དྲི་མ་མེད་པ་ཡིན། དེ་ལ་གོམས་པས་ཉམས་སྣང་རིམ་གྱིས་འཕེལ་བ་དེ་ས་གསུམ་པ་འོད་བྱེད་པ་དང་དེ་བཞིན་དུ།

དེ་ནས་དེ་ལ་གོམས་ནས་འོད་གསལ་གྱི།།

སྣང་བ་སྣ་ཚོགས་མཐོང་བ་དེ་ཉིད་དུས།།

བཞི་པ་འོད་འཕྲོའི་ས་ཡང་ཐོབ་པའོ།།

དེ་ནས་ཡེ་ཤེས་སྣང་བ་མཐོང་དེ་ལ།།

གོམས་ནས་ཉོན་མོངས་ཐམས་ཅད་རང་བཞིན་གྱིས།།

སྦྱངས་ནས་འོད་གསལ་རྒྱ་ཆེར་མཐོང་བ་ནི།།

ལྔ་པ་སྦྱངས་དཀའི་ས་ཡང་ཐོབ་པའོ།།

དེ་ནས་འོད་ལས་ཐལ་བའི་སྐུ་མཐོང་དུས།།

དྲུག་པ་མངོན་དུ་གྱུར་པའི་ས་ཐོབ་བོ།།

དེ་ནས་རབ་ཏུ་གོམས་པ་མཐར་ཕྱིན་ནས།།

ཉོན་མོངས་པ་ལས་རིང་དུ་སོང་བ་ནི།།

བདུན་པ་རིང་དུ་སོང་བའི་ས་ཐོབ་བོ།།

ཞེས་གསུངས་ནས་ནང་དུ་སྟོང་པའི་འོད་གསལ་གོམས་པ་དང་ལྷན་དུ་ཕྱི་རུ་སྣང་བའི་འོད་གསལ་གྱི་སྣང་བ་གོང་འཕེལ་དུ་འགྲོ་བར་སྣང་བ། ས་བཞི་བ་འོད་འཕྲོ་བ་དང་། དེ་ལ་གོམས་ནས་ཉོན་མོངས་ཡེ་ཤེས་སུ་དག་ཅིང་སྦྱངས་བ། ས་ལྔ་བ་སྦྱངས་དཀའ་བ་དང་། དེ་ནས་འོད་ལས་ཐལ་བ་ལུག་རྒྱུད་སྐུ་རུ་སྨིན་པའི་ཐོག་མའི་དུས་མགོ་ལྟ་བུ་ལ་དྲུག་པ་མངོན་དུ་གྱུར་པ་དང་། དེའི་མཐུས་ཉོན་སྒྲིབ་ཕལ་ཆེར་དག་སྟེ་ཉོན་མོངས་པ་ལས་རིང་དུ་སོང་བ། བདུན་པ་རིང་དུ་སོང་བ་གསུངས་པ་དང་། འདིའི་འོད་ལས་ཐལ་བའི་སྐུ་མཐོང་བ་ཉམས་གོང་འཕེལ་དང་ཚད་ཕེབས་གཉིས་ཀའི་མཚམས་མཐུད་ས་དེ་ནས་པད་འབྱུང་དང་བི་མའི་བཞེད་སྲོལ་ལ་བཤད་ཚུལ་གྱི་ཁྱད་པར་ཅུང་རེ་ཡོད་པ་ལྟར་དུ། མ་དག་ས་བདུན་གྱི་མཐའ་ལ་སྐུ་མཐོང་བའི་ཚད་ལ་ཐོན་པའི་ཚད་ཕེབས་དག་པ་ས་གསུམ་ལ་འཇོག་པ་ཡིན། པད་འབྱུང་དང་བི་མའི་བཞེད་སྲོལ་ལ་བཤད་ཚུལ་གྱིས་ཅུང་ཙམ་ཁྱད་ཡོད་པ་ལས་དོན་གྱིས་མི་གཅིག་རྒྱུ་མ་རེད་ཀྱང་མ་དག་ས་བདུན་གྱི་མཐའ་མ་ལ་སྐུ་མཐོང་བའི་ཚད་ལ་ཐོན་པའི་ཚད་ཕེབས་དག་སོང་བ་དེ་དག་པ་ས་གསུམ་ལ་འཇོག་གིན་ཡོད། སྣང་བ་དང་པོ་གཉིས་སྤྲུལ་སྐུའི་སྣང་བ་དག་དང་མ་དག་འདྲེས་མ། ཚད་ཕེབས་ལོངས་སྐུའི་སྣང་བ་དག་པ་འབའ་ཞིག་ཡིན་པ། ཆོས་ཟད་ཆོས་སྐུའི་སྣང་བ་ལ་བཞག་སྟེ་སྐུ་གསུམ་ལམ་སྣང་ལ་བཞག་དུས་ཆོས་ཟད་ས་བཅུའི་རྒྱུན་མཐའི་ཚད་ཕེབས་མཐར་ཐུག་གི་ཤེས་སྒྲིབ་ཕྲ་བ་བག་ཉལ་ཀུན་གཞིའི་ཆ་སྐར་མདའ་རྒྱུག་པ་འདྲ་བོ་ཡང་གཅོད་པའི་རྡོ་རྗེ་ལྟ་བུའི་ཏིང་ངེ་འཛིན་གྱི་གོམས་པ་མཐར་ཕྱིན་པ་ལ་བཞག་ན། ནང་གསལ་ཕྲ་བའི་ཡེ་ཤེས་གཞོན་ནུ་བུམ་སྐུ་རུ་འཁྱིལ་བ་ཆོས་སྐུའི་དགོངས་པ་གཉིས་མེད་ནམ་མཁའ་ལྟ་བུ་སྐུ་དང་ཡེ་ཤེས་ཕྲིན་ལས་དང་བཅས་པ་ལྷུན་གྲུབ་ཏུ་འབྱུང་རུང་གནམ་སྟོང་གི་ཟླ་བའམ་ཤེལ་འོད་ནང་དུ་ཐིམ་པ་ལྟ་བུའི་དུས་རེད་སྙམ།

དེ་ནས་འོད་གསལ་གཡོ་བ་མེད་པ་ནི།།

བརྒྱད་པ་མི་གཡོ་བ་ཡི་ས་ཐོབ་བོ།།

དེ་ནས་དཀྱིལ་འཁོར་ཡོངས་སུ་རྫོགས་པ་ནི།།

དགུ་པ་ལེགས་པའི་བློ་གྲོས་ས་ཐོབ་བོ།།

དེ་ནས་ཡེ་ཤེས་སྣང་བ་དེ་ཉིད་ལ།།

ཤེས་པ་ཟིན་ནས་སྣང་བ་ལྷུག་པར་ཤར།།

ཆོས་ཀྱི་སྤྲིན་ལྟར་མཐོང་བ་དེ་ཉིད་ནི།།

བཅུ་པ་ཆོས་ཀྱི་སྤྲིན་གྱི་ས་ཐོབ་བོ།།

ཕྱི་ཡི་ས་བཅུ་ཐོབ་ཚུལ་དེ་ཉིད་ནི།།

དོན་གྱིས་ཐོབ་ཕྱིར་དོད་ཐུབ་སྦྱར་བ་ཡིན།།

བྱང་ཆུབ་སེམས་དཔའི་ས་བཅུད་དངོས་མ་ཡིན།།

ཞེས་གསུངས་ཏེ། འོད་གསལ་གྱི་དགོངས་པ་གཡོ་མེད་དུ་བརྟན་པ་དེ་ས་བརྒྱད་པ་མི་གཡོ་བ་ཡིན། ཚོམ་བུ་ཡོངས་རྫོགས་ཀྱི་དཀྱིལ་འཁོར་ཆ་ཤས་གང་བར་སྣང་བ་དེ་དགུ་པ་ལེགས་པའི་བློ་གྲོས་ཡིན། སྣང་ཤེས་ཚད་ལ་ཕེབས་པའི་འོད་གསལ་གྱི་འཆར་སྣང་ཡོངས་སུ་རྫོགས་པ་དེ་བཅུ་པ་ཆོས་ཀྱི་སྤྲིན་དུ་འཇོག་ཆོག་རྒྱུའི་དོན་ཐོབ་ཀྱི་དོད་དུ་འདི་ནས་རགས་རིམ་གསུངས་པ་ཡིན་ན་བྱང་ཆུབ་སེམས་དཔའི་ས་བཅུ་དངོས་དང་སྦྱར་ན་ད་རུང་སྤངས་རྟོགས་ཀྱི་ཐད་ནས་ཕྲ་ཞིབ་ཀྱིས་མ་བཤད་ན་འདི་ཙམ་གྱིས་འཐུས་པ་མ་རེད། དེས་ན་དངོས་མ་ཡིན་གསུངས་རྒྱུའི་དོན་དེ་ལྟར་འགྲེལ་དགོས་སོ།།

༼༢ གཉིས་པ་ནང་གི་འབྲས་བུ་སྣང་བཞིའི་ས་བཅུ་དྲུག་རྫོགས་ཚུལ།

ནང་གི་ས་སྣང་བཞི་ཡིན། སྣང་བཞི་དེ་བཞི་བཞི་བཅུ་དྲུག་གིས་ཇི་ལྟར་རྫོགས་པ་འདི་ནས་མར་གསུང་ཀྱིན་ཡོད་རེད།

གཉིས་པ་ནང་གི་འབྲས་བུ་སྣང་བཞི་ཡི།།

བཅུ་དྲུག་ས་རྣམས་རྫོགས་པའི་རིམ་པ་ནི།།

ཞེས་གསུངས་ནས་མཚམས་སྦྱར་ཏེ།

ཆོས་ཉིད་མངོན་སུམ་སྣང་བ་མཆེད་པ་མིག།

ཉེ་བར་མཆེད་པ་མིག་གི་དེ་ཁོ་ན།།

ཉིད་དང་ཐོབ་པ་ལུག་རྒྱུད་མཐོང་བ་དང་།།

ཉེར་ཐོབ་དེ་ལ་གོམས་པ་རྙེད་པའོ།།

ཉམས་སྣང་གོང་འཕེལ་སྣང་བ་མཆེད་པ་འོད།།

ཉེ་བར་མཆེད་པ་ཐིག་ལེ་མཐོང་བ་དང་།།

ཐོབ་པ་ཁ་དོག་ལྔར་གསལ་ཉེར་ཐོབ་ནི།།

འགུལ་འཕྲིག་བྱེད་ཅིང་སྣ་ཚོགས་འཆར་བའོ།།

ཞེས་གསུངས་ཏེ། འདི་དག་སྣང་བ་བཞི་པོ་རེ་རེ་བཞིན་དུ་སྣང་བ་དང་མཆེད་པ། ཐོབ་པ། ཉེར་ཐོབ་བཞི་རེས་སྣང་བའི་སོ་མཚམས་ཀྱི་ས་བཅུ་དྲུག་ཏུ་ཕྱེས་ནས་གསུངས་ཚུལ་རེད། ཆོས་ཉིད་མངོན་སུམ་གྱི་ཚེ་ན་སྣང་གཞི་གང་ཡིན་ན་ཆོས་ཉིད་མངོན་སུམ་རེད། མིག་གམ་རྒྱང་ཞགས་ཆུའི་སྒྲོན་མས་སྒོ་ཕྱེ་དུས་དེ་ཁོ་ན་ཉིད་དེ་གང་ཡིན་ན་མཆེད་པ་རེད། ལུག་རྒྱུད་ལ་མཚམས་རེར་འོད་དང་ཐིག་ལེའི་སྒྲ་ཡང་འཇུག་པ་ཡིན་ན་དེ་མཐོང་བ་དེ་ཐོབ་པ། དེ་ལ་གོམས་པ་རྙེད་པ་དེ་ཉེར་ཐོབ། ཉམས་གོང་འཕེལ་གྱི་སྣང་མཆེད་ཐོབ་པ་ཉེར་ཐོབ་རྣམས་འོད་དང་ཐིག་ལེ་ཁ་དོག་སྣ་ཚོགས་སུ་གསལ་ཞིང་འོད་ཟེར་འབར་བ་རྣམས་ལ་བཞག

ཚད་ཕེབས་སྣང་བ་མཆེད་པ་སྐུ་རྐྱང་དང་།།

ཉེ་བར་མཆེད་པ་ཡབ་ཡུམ་ཟུང་འབྲེལ་དང་།

ཐོབ་པ་ཚོམ་བུ་ལྔ་ལྔར་གསལ་བ་དང་།།

ཉེ་བར་ཐོབ་པ་དཀྱིལ་འཁོར་རྫོགས་པའོ།།

ཆོས་ཉིད་ཟད་པའི་སྣང་བ་མཆེད་པ་ནི།།

འོད་གསལ་སྐུ་དང་ཡེ་ཤེས་མི་གནས་ཤིང་།།

ཉེ་བར་མཆེད་པ་སྟོང་པ་གཏད་པ་མེད།།

ཐོབ་པ་བརྗོད་དུ་མེད་ཅིང་ཉེར་ཐོབ་ནི།།

བལྟར་མེད་ཆོས་ཉིད་གང་དུའང་མ་གྲུབ་བོ།།

ཞེས་གསུངས་ཏེ། རིག་པ་ཚད་ཕེབས་ཀྱི་བཞི་བོ་དེ་གང་ཡིན་ན། རིགས་ལྔ་སོ་སོའི་སྐུ་རྐྱང་འཆར་བ་དང་ནི་ཡབ་ཡུམ་ཟུང་འབྲེལ་དུ་སྣང་བ། དེ་ནས་ཚོམ་བུ་སོ་སོར་ཤར་ཡོང་བ་དང་། དཀྱིལ་འཁོར་ཡོངས་སུ་རྫོགས་པར་འཇོག་པ་དང་། དེ་བཞི་བོ་དེ་ཆོས་ཟད་སྐབས་སུ་སྐུ་དང་ཡེ་ཤེས་ཙམ་ལའང་མི་གནས་པ་དང་། གཏད་མེད། བརྗོད་མེད། བལྟར་མེད་པའི་ཆོས་ཉིད་གང་དུའང་མ་གྲུབ་པའི་གནས་ལུགས་མཐོང་བ་གཤིས་ཀྱི་བཞུགས་ཚུལ་ངོ་མ་དང་སྦྱར་ནས་གསུངས་པ་རེད།

དེ་ལྟར་སྣང་བཞི་ས་ནི་བཅུ་དྲུག་པོ།།

རྫོགས་ནས་ཀ་དག་ས་ལ་གཤེགས་པ་ནི།།

མགོན་པོ་རྗོ་རྗེ་འཆང་གི་ས་ཞེས་བྱ།།

ས་འདི་རྣམས་ཀྱང་རྩ་བ་རིག་པ་ཡི།།

འོད་གསལ་སྦྱངས་བགྲོད་མེད་པའི་ས་གཅིག་གིས།།

སྣང་ཆ་གཅིག་ལས་སོ་སོར་དབྱེ་བ་ཡིན།།

དོན་ལ་རིག་པའི་ས་གཅིག་འདི་ཡིན་གྱི།།

སངས་རྒྱས་རྡོ་རྗེ་འཆང་ཆེན་ཐོབ་པ་ལ།།

རྒྱུ་ཡི་ས་ནི་སྒོས་སུ་སྦྱང་མི་དགོས།།

ཐེག་པ་ཐུན་མོང་པ་ལྟར་རྒྱུ་འབྲས་ཀྱི།།

རིམ་པས་ས་རེ་ཐོབ་པའི་ཚུལ་ཉིད་དང་།།

གསང་སྔགས་ཕྱི་ནང་ཇི་བཞིན་བསྐྱེད་རྫོགས་ཀྱིས།།

རྩོལ་སྒྲུབ་བྱས་པས་ས་ཐོབ་ལྟ་བུ་ཡི།།

འདི་ལ་སྦྱངས་ཤིང་བགྲོད་དུ་མེད་པ་སྟེ།།

དོན་ལ་རང་རིག་རྣམ་དག་ས་གཅིག་ལ།།

ཐེག་པ་ཀུན་འདུས་ས་ལམ་རྫོགས་པའོ།།

ཞེས་གསུངས་ཏེ། དེ་ལྟར་སྣང་བ་རྣམ་བཞི་དེར། སྣང་བ་བཅུ་དྲུག་ཏུ་ཕྱེ་བ་ཉིད་ཇི་བཞིན་མངོན་དུ་གྱུར་ཏེ་ངེས་པར་རྟོགས་ཤིང་རྫོགས་པའི་གང་ཟག་དེས་རང་རྒྱུད་ཡེ་ཤེས་སུ་སྨིན་པའི་མགོན་པོ་རྡོ་རྗེ་འཆང་གི་ས་ནོན་པ་ཡིན། དེ་ལྟ་བུའི་གང་ཟག་དེས། སའི་རྣམ་གྲངས་འདི་ལྟར་དུ་བཤད་ཀྱང་རྩ་བ་ངོ་མ་རིག་པ་ཡེ་ནས་འགྱུར་མེད་ཀྱི་འོད་གསལ་སྦྱང་བགྲོད་མེད་པའི་ས་གཅིག་པོ་དེ་ལས་སྣང་ཆའི་ལྡོག་པ་ནས་སོ་སོར་ཕྱེ་བ་ཙམ་ཡིན། དོན་ལ་རིག་པའི་དེ་ཉིད་དང་དེའི་ངོ་བོ་མངོན་དུ་གྱུར་པ་ལ་རྡོ་རྗེ་འཆང་ཆེན་ཐོབ་ཅེས་བརྗོད་པ་ཡིན། རྒྱུ་ཡི་ས་བཅུ་ལོགས་སུ་ཐོབ་འདུག་མི་དགོས་པར་རང་ཤུགས་ཀྱིས་ཐོབ་པ། དཔེར་ན་བྲེ་གསུམ་གྱི་ནང་དུ་བྲེ་དོ་ཤོང་པ་བཞིན་ཡིན་གསུངས་ཡོད། དེས་ན་རྒྱུའི་ཐེག་པ་ལྟར་གྱི་རྒྱུ་འབྲས་ཀྱི་རིམ་པས་ས་ཐོབ་ཚུལ་ཞིག་དང་། སྔགས་ཕྱི་ནང་གི་ཐེག་པ་འོག་མ་རྣམས་བཞིན་དུ་བསྐྱེད་རྫོགས་རྩོལ་སྒྲུབ་ཅན་གྱིས་སྦྱང་བགྲོད་མཚན་མ་ཅན་གྱི་ས་ཞིག་འདི་ལ་གཞན་ནས་བགྲོད་རྒྱུ་མེད། ས་ལམ་བརྩི་བའི་ངལ་བ་ཐང་རེ་ཆད་གསུངས་པ་ལྟར་དུ་དོན་ལ་རང་རིག་རྣམ་དག་གི་ས་གཅིག་པུ་དེ་ལ་ཐེག་པ་ཀུན་འདུས་པས་མི་ཚད་ས་ལམ་ཐམས་ཅད་རྫོགས་པ་ཡིན་གསུངས་པ་རེད། ད་དུང་བཅུ་གཅིག་ཀུན་ཏུ་འོད། བཅུ་གཉིས་མ་ཆགས་པདྨ་ཅན། བཅུ་གསུམ་ཡི་གེ་འཁོར་ལོ་ཚོགས་ཆེན་གྱི་ས། བཅུ་བཞི་ཏིང་འཛིན་ཆེན་པོའི་ས། བཅོ་ལྔ་རྡོ་རྗེ་འཛིན་པའི་ས། བཅུ་དྲུག་ཡེ་ཤེས་བླ་མའི་སའི་བར་དུ་གསུངས་རྒྱུ་ཡོད་ཀྱང་། འདི་རྣམས་ཀྱང་རིམ་བགྲོད་ཀྱི་ས་ཞིག་ཐ་དད་པར་ཡོད་པའི་གོ་དོན་ཅན་མ་རེད། གོང་ནས་གསུངས་པ་བཞིན་དོན་ལ་རིག་པའི་ས་གཅིག་པོར་ནང་གསལ་སྐུ་གསུམ་གྱི་ལྡོག་ཆ་ནས་སོ་སོར་ཕྱེས་པ་ཉིད་ཡིན་གསུངས་པ་རེད། དེས་ཞར་བྱུང་སྣང་བཞིའི་ས་ལམ་བགྲོད་ཚུལ་དང་བཅས་པ་བསྟན་ནས། འདི་ནས་མཐར་ཕྱིན་འབྲས་བུའི་རྣམ་བཞག་གསུངས་པ་ནི།

༼༣ གསུམ་པ་མཐར་ཐུག་དོན་གྱི་འབྲས་བུ་འཐོབ་ཚུལ།

ཨེ་མ་ཧོ།

མཐར་ཐུག་དོན་གྱི་འབྲས་བུ་འཐོབ་ཚུལ་ནི།།

ཞེས་མཚམས་སྦྱར་ཏེ།

སྣང་བཞི་གོང་མ་གཉིས་ཀྱི་སྤྲུལ་སྐུ་དང་།།

ཚད་ཕེབས་ལོངས་སྐུ་ཟད་པའི་ཆོས་སྐུ་ཡི།།

སྣང་བ་མཐོང་ནས་སླར་ཡང་ནང་དབྱིངས་སུ།།

ཤེལ་འོད་ནང་དུ་ནུབ་ལྟར་ཐིམ་ནས་ཀྱང་།།

སྐུ་གསུམ་ཡེ་ཤེས་འདུ་འབྲལ་མེད་པར་བཞུགས།།

སླར་ཡང་ཆོས་སྐུའི་དབྱིངས་ལས་མ་གཡོས་བཞིན།།

གཟུགས་སྐུ་གཉིས་ཀྱིས་གང་ལ་གང་འདུལ་གྱིས།།

འགྲོ་བའི་དོན་ནི་འཁོར་བ་མ་སྟོངས་བར།།

བུམ་བཟང་དཔག་བསམ་ཤིང་དང་ནོར་བུ་ལྟར།།

རྟག་པར་རྒྱུན་མི་འཆད་པར་མཛད་པའོ།།

ཞེས་གསུངས་ཏེ། སྣང་བ་གོང་མ་ཆོས་ཉིད་མངོན་སུམ་དང་ཉམས་གོང་འཕེལ་གཉིས་ཀ་སྤྲུལ་སྐུའི་སྣང་བ་དང་། ཚད་ཕེབས་ལོངས་སྐུ། ཆོས་ཟད་ཆོས་སྐུའི་སྣང་བར་གསུངས་པ་འདི་དག་སྐུ་གསུམ་ལམ་སྣང་དུ་འཆར་བའི་ཐུན་མིན་གྱི་བཞེད་པ་ཡིན། འོ་ན་སྐུ་གསུམ་ལམ་སྣང་ཡིན་དུས་འབྲས་བུ་དེ་གང་ཡིན་ཞེ་ན། སླར་ནང་དབྱིངས་སུ་དཔེ་ཤེལ་འོད་ནང་དུ་ནུབ་པ་ལྟར་དུ་ཐིམ་གསུངས་དུས་ཐིམ་ས་དེ་གང་རེད་ཅེ་ན། ཀ་དག་གི་ནང་དབྱིངས་སུ་ཐིམ་སྟེ་དེ་དུས་རིག་པའི་རང་ས་ཟིན་སོང་བས་རྒྱལ་བ་འོད་མི་འགྱུར་བའི་སངས་རྒྱས་སམ་སྟོན་པ་ཀུན་ཏུ་བཟང་པོར་གྱུར་སོང་བ་ཡིན། དབང་པོ་རྣོ་རྟུལ་འབྲིང་གསུམ་གང་ཡིན་ཡང་གྲོལ་བའི་སྐབས་སུ་འབྲས་བུ་ལ་ཁྱད་པར་ཡོད་པ་མ་རེད། དུས་གསུམ་སངས་རྒྱས་ཐམས་ཅད་ངོ་མཉམ་ཐ་དད་མེད་པའི་རང་བཞིན་ཐིག་ལེ་ཉག་གཅིག་ཏུ་སངས་རྒྱས་པ་རེད། དེ་ལྟ་བུའི་གྲོལ་སའི་ཀ་དག་གི་རང་ངོ་ལ་ཡོད་མེད་སོགས་ཀྱི་མཐའ་དང་བྲལ་བས་ན་སྐུ་དང་ཡེ་ཤེས་ལ་སོགས་པའི་སྣང་བ་ཡོད་མེད་གཉིས་ཀའི་མཐའ་ལས་འདས་པ་རེད། འོན་ཀྱང་ཤེལ་རང་ངོ་ལ་འོད་དང་ཁ་དོག་མ་གྲུབ་ཀྱང་དེའི་ངང་ནས་འོད་ལྔའི་འཆར་གཞི་མ་འགག་པ་ལྟ་བུ་ཡིན་གསུངས། རིག་པ་དབྱིངས་སུ་འཁྱིལ་བའི་གནས་ལུགས་ངོ་མ་བོའི་རང་བཞིན་དེ་ཇི་ལྟར་ཡིན་ཞེ་ན། འབྱུང་བ་མ་ལ་ཞ་བ། ཡེ་ཤེས་དབྱིངས་སུ་ཐིམ་པ། ཤེས་རབ་མཁའ་ལ་འདེགས་པ། འོད་གསལ་དབྱིངས་སུ་འཁྱིལ་བ་དང་། རིག་པའི་རང་ས་ཟིན་པ་དང་ལྔས་བསྟན་པ་དེ་ཞིབ་པར་ཀུན་མཁྱེན་ཡབ་སྲས་ཀྱི་གཞུང་ལས་མཁྱེན་དགོས་པ་ཡིན། དེ་ལྟ་བུའི་དགོངས་ཀློང་ཆོས་ཉིད་ཀྱི་དབྱིངས་སུ་འཁྱིལ་སོང་དུས་ངོ་བོ་སྟོང་པ་ལྟར་དུ་གཞལ་ན་ཀ་དག་ནམ་མཁའ་ལྟ་བུ་གང་དུའང་མ་གྲུབ་པས་ན་མཐའ་བྲལ་རྫོགས་པ་ཆེན་པོ་ཆོས་སྐུའི་ཀློང་ཡིན། རྣམ་པ་གསལ་བ་ལྟར་ཏུ་གཞལ་ཡོང་ན་ནང་གསལ་ལྷུན་གྲུབ་ཀྱི་ཡེ་ཤེས་མི་ཟད་རྒྱན་བཀོད་ཀྱི་འབྱུང་གནས་ལ་ཟབ་ཅིང་ཆ་ཕྲ་བའི་གཏིང་གསལ་དུ་བཞུགས་པ་ཡིན། དེའི་ཕྱིར་ན་ཆུ་སྣོད་ཟླ་གཟུགས་ཀྱི་དཔེ་ལྟར་ཆོས་སྐུའི་དབྱིངས་དེ་ལས་མ་གཡོས་བཞིན་དུ་ཕྱི་གསལ་གཟུགས་སྐུ་གཉིས་ཀྱིས་གང་ལ་གང་འདུལ་གྱི་འགྲོ་དོན་འཁོར་བ་མ་སྟོངས་ནམ་མཁའ་མ་ཞིག་གི་བར་དུ། བུམ་བཟང་དཔག་བསམ་ཤིང་དང་ཡིད་བཞིན་གྱི་ནོར་བུ་ལྟར་ཏུ་རྟག་ཁྱབ་ལྷུན་གྱིས་གྲུབ་ཅིང་རྒྱུན་མི་ཆད་པར་མཛད་པ་ཡིན་ཞེས་དེ་ལྟ་བུའི་གོ་དོན་རེད། འདིའི་སྐབས་སུ་སྐུ་གསུམ་ལམ་སྣང་ཡིན་པ་དང་སྐུ་གསུམ་འབྲས་བུ་ཡང་ཡིན་པ་འདི་དེ་ཙམ་གོ་མི་བདེ་བར་འདུག་སྙམ་ན། ལམ་སྣང་ཡིན་པ་དང་འབྲས་བུ་ཡིན་པ་འགལ་བ་ཅན་མ་རེད། སྤྱིར་དག་བྱའི་རྒྱུ་འབྲས་ལ་བཤད་པ་རེད་མ་གཏོགས་ལྷུན་གྲུབ་རྒྱུ་རྐྱེན་གྱིས་བསྐྱེད་ནས་ཐོབ་པ་ཞིག་སྲིད་པ་མ་རེད། རང་ཉིད་སྒྲུབ་པའི་ལམ་ན་ཡོད་དུས་ཀྱི་འབྲས་བུའི་སྔོན་རོལ་དུ་སྣང་གིན་ཡོད་པ་རེད། སྐུ་གསུམ་གྱི་ལམ་སྣང་སྣང་བཞི་རིམ་པས་བགྲོད་དེ་ལྷུན་གྲུབ་འབྲས་བུའི་སྦུབས་ཀ་དག་གི་ནང་དབྱིངས་སུ་སངས་རྒྱས་སོང་བ་རེད། སངས་རྒྱས་ཚར་ནས་གདུལ་བྱའི་སེམས་ཅན་གྱི་འགྲོ་དོན་མཛད་པའི་སྐབས་སུ་སྐུ་མངོན་པར་སྣང་ནས་དོན་མཛད་དགོས་པས་དེ་ཡང་ལམ་སྣང་ཡིན། དཔེ་སླ་མོ་ཞིག་གིས་འདིའི་སྟེང་བཤད་ན། ཀུན་མཁྱེན་ཆེན་པོའི་གསུངས་ཡོད་རེད། ལྷུན་གྲུབ་ཀྱི་སྦུབས་ཀ་དག་ཆེན་པོ་དེ་དོན་གྱི་འབྲས་བུ་ཁང་བ་འདྲ་ཞིག་ཡིན་པའི་དབང་དུ་བཏང་ན། དེའི་ནང་དུ་ཡར་འཛུལ་དུས་ལམ་རེད་ལ་ཕྱིར་མར་ལ་འབུད་དུས་ཀྱང་ལམ་རེད་མོ། དེ་ན་དེ་གཉིས་གཅིག་ཨེ་རེད་ཟེར་ན། ཕྱི་མ་འདི་མི་སློབ་པའི་ལམ་སྣང་ཡིན་པའི་ཁྱད་པར་འབྱེད་དགོས་གསུངས་པ་རེད། འོན་ཀྱང་ལམ་སྣང་ཡིན་པ་དང་འབྲས་བུ་ཡིན་པ་མི་འགལ་བའི་འབྲེལ་བ་དེ་ཇི་ལྟར་གྲུབ་ན། དེ་གོང་དུ་བཤད་པ་ལྟར་ཡིན། དེ་ཡན་ཆོད་ཀྱིས་འདིའི་བར་དུ་དགེ་བ་ཆ་ཚང་སོང་གྲུབ་ནས།

༼ག༽ གསུམ་པ་ཐ་མར་དགེ་བ་མཇུག་གི་དོན།

གསུམ་པ་ཐ་མར་དགེ་བ་འདིའི་དགོས་པ་རྒྱུ་མཚན་དུ་བྱས་པའི་མཛད་བྱང་དང་ནི་སྨོན་ལམ་གྱིས་མཐའ་བརྒྱན་པ་ལས།

༡༽ དང་པོ་དགོས་པ་རྒྱུ་མཚན་དུ་བྱས་པའི་མཛད་བྱང་།།

ཐེག་མཆོག་རྒྱལ་པོ་འོད་གསལ་ཐོད་རྒལ་གྱི།།

ཤིན་ཏུ་རྟོགས་པར་དཀའ་བའི་གནད་འགགས་རྣམས།།

འོད་གསལ་རྫོགས་པ་ཆེན་པོའི་རྣལ་འབྱོར་པ།།

བྱ་བཏང་ཚོགས་དྲུག་རང་གྲོལ་ཞེས་བྱ་ངས།།

བསྟན་དང་འགྲོ་ལ་ཕན་ཕྱིར་བཤད་པ་ཡིན།།

ཞེས་གསུངས་ཏེ། གང་ཞིག་གང་གི་དོན་དུ་མཛད་པ་པོ་སུས་ཇི་ལྟར་བརྩམས་པའི་ཚུལ་དེས་བསྟན་ཏེ།

༢༽ གཉིས་པ་སྨོན་ལམ་གྱིས་མཐའ་བརྒྱན་པ།

གཉིས་པ་སྨོན་ལམ་ལ་ངེས་གསང་སྙིང་པོའི་བསྟན་པ་བྱེ་བྲག་ཏུ་འཕེལ་བ་དང་ནི་རྒྱལ་བའི་བསྟན་པ་ཡོངས་རྫོགས་སྒོ་ཀུན་ནས་དར་བའི་སྨོན་ལམ་དང་རྣམ་པ་གཉིས་ལས་དང་པོ་ནི།

༡ ངེས་གསང་སྙིང་པོའི་བསྟན་པ་བྱེ་བྲག་ཏུ་འཕེལ་བར་སྨོན་པ།

འདི་ཡིས་སྙིང་པོའི་བསྟན་པ་ལ་ཕན་ནས།།

རི་སུལ་འཁྲུལ་ཞིག་བྱ་བྲལ་གྱིས་ཁེངས་ཤིང་།།

སྐྲ་སེན་སྙིགས་མའི་ལྷག་མར་བཞག་ནས་ཀྱང་།།

དགའ་རབ་འཇམ་དཔལ་བཤེས་གཉེན་ལྟར་འགྱུར་ཤོག།

ཅེས་སྨོན་ནས། གཉིས་པ་ནི།

༢ རྒྱལ་བའི་བསྟན་པ་ཡོངས་རྫོགས་སྒོ་ཀུན་ནས་དར་བར་སྨོན་པ།

རྒྱལ་བའི་བསྟན་པ་དར་ཞིང་རྒྱས་པ་དང་།།

བསྟན་འཛིན་ཚོགས་ཀྱི་ཞབས་པད་བརྟན་པ་དང་།།

འགྲོ་ཀུན་ལམ་བཟང་འདི་ཡི་སྒོར་ཞུགས་ནས།།

སྐུ་གསུམ་དགོངས་པ་མྱུར་དུ་མངོན་གྱུར་ཤོག།།

ཅེས་སོ།།

༣༽ གསུམ་པ་ཇི་ལྟར་བརྩམས་པའི་ཚུལ་ཞིབ་པར་བསྟན་པའི་མཛད་བྱང་།

ཇི་ལྟར་བརྩམས་པའི་ཚུལ་ཞིབ་པར་སླར་ཡང་འདི་ནས་བྱུང་རིམ་དང་བཅས་ཚིག་ལྷུབ་མཛད་བྱང་ངོ་མར་བཀོད་པས་བསྟན་པ་ནི།

ཅེས་འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཅར་འབྱེད་པའི་ལྡེའུ་མིག་ཅེས་བྱ་བ་འདི་ནི། དད་གཏོང་ཚུལ་ཁྲིམས་ནོར་གྱིས་ཕྱུག་ཅིང་ཟབ་ལམ་འདི་ལ་ཤིན་ཏུ་མོས་པའི་དད་ལྡན་གྱི་སློབ་མ་མང་པོས་བསྐུལ་ངོར། ཀུན་མཁྱེན་ཆེན་པོའི་མཛོད་བདུན་དང་ཟབ་དོན་རྒྱ་མཚོའི་སྤྲིན་ཕུང་། རྫོགས་ཆེན་མཁའ་འགྲོ་སྙིང་ཐིག མཁྱེན་བརྩེ་རིན་པོ་ཆེས་མཛད་པའི་ཡོན་ཏན་མཛོད་དང་། རྫོགས་ཆེན་ཡེ་ཤེས་བླ་མ། རྒྱལ་དབང་ལྔ་པ་རིན་པོ་ཆེས་མཛད་པའི་རྫོགས་ཆེན་རིག་འཛིན་ཞལ་ལུང་། རྫོགས་ཆེན་ཡང་ཏི་ནག་པོ་གསེར་གྱི་འབྲུ་གཅིག འོལ་ཁ་རིན་པོ་ཆེའི་གསུང་གི་རྫོགས་ཆེན། ཉི་གྲགས་རྫོགས་ཆེན། རྫོགས་ཆེན་ཀུན་བཟང་སྙིང་ཐིག རྫོགས་ཆེན་ཀུན་བཟང་ཐུགས་ཀྱི་སྙིང་བྱང་། རྫོགས་ཆེན་ཨ་ཏི་ཟབ་དོན། རྫོགས་ཆེན་ཡང་ཟབ་ཤེལ་གྱི་མེ་ལོང་ལ་སོགས་པའི་རྫོགས་ཆེན་དུ་མའི་ཐོད་རྒལ་གྱི་གདམས་པ་རྣམས་ལ་གཞི་བྱས། མཚན་ལྡན་གྱི་བླ་མ་མང་པོའི་ཞལ་ཤེས་དང་། རང་ལ་ཉམས་མྱོང་ཅུང་ཟད་ཡོད་པ་རྣམས་ཀྱིས་ཟུར་བརྒྱན་ཏེ་རྫོགས་པ་ཆེན་པོའི་རྣལ་འབྱོར་པ་བྱ་བཏང་༧ཚོགས་དྲུག་རང་གྲོལ་གྱིས་སྨྲས་པའོ། །འདིས་ཀྱང་རྒྱལ་བས་བསྔགས་པའི་ལམ་བཟང་རྡོ་རྗེ་ཐེག་པའི་བསྟན་པ་ཕྱོགས་རྣམས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པ་དང་སྐལ་ལྡན་གདུལ་བྱ་མང་པོ་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག སརྦ་མངྒ་ལཾ། །དེ་ལྟར་བཀྲ་ཤིས་ཀུན་ཏུ་དགེ་བའི་ཚིག་གིས་མཐའ་བརྒྱན་ཏེ་ཐེངས་འདིའི་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་གདམས་པ་གཉིས་ཀ་ཞིབ་ཁྲིད་ཁྲིད་སྦྱང་དང་བཅས་པ་གེགས་མེད་ལྷུན་གྲུབ་ཀྱིས་རྣམ་པར་རྒྱལ་བའི་ངང་ནས་ཡོངས་སུ་རྫོགས་པ་རེད། རྫོགས་ཟེར་རྒྱུ་འདི་ཚར་སོང་བའི་དོན་མ་རེད། རྫོགས་ཟེར་རྒྱུ་འདི་ཡོངས་སུ་ཚང་བ། མ་ཚང་བ་གཅིག་ཀྱང་མེད་པ་ཐམས་ཅད་ཡོངས་སུ་ཆ་ཚང་བའི་རྟེན་འབྲེལ་བཟང་པོའི་བརྡ་ཆད་ཅིག་རེད། དེ་ཡན་ཆོད་ཀྱིས་ཐེངས་འདིའི་ཆོས་ཁྲིད་ཡོངས་སུ་གྲུབ་སྟེ། མཚམས་འདི་ནས་དགེ་བ་རྫོགས་པའི་བྱང་ཆུབ་ཆེན་པོར་ཡོངས་སུ་བསྔོ་བ་དང་སྨོན་ལམ་རྣམ་པར་དག་པས་མཚམས་སྦྱར་ཏེ་གནས་དུས་དགེ་བའི་ཤིས་བརྗོད་ཀྱིས་མཐའ་བརྒྱན་ས་ལ་ཐུག་སོང་བ་རེད། ད་རེས་མདོ་སྨད་ཨ་མདོའི་ཡུལ་གྱི་དགུ་འདུས་པད་མོ་རོང་། དགུ་རོང་ཡབ་སྲས་ཀྱི་གདན་སའི་གནས་འདིར་རང་རེ་འཛོམས་ཏེ་འོད་གསལ་རྫོགས་པ་ཆེན་པོའི་ཀ་དག་ཁྲེགས་ཆོད་དང་ནི་ལྷུན་གྲུབ་ཐོད་རྒལ་གྱི་ཟབ་ཆོས་གདམས་པ་འཆད་ཁྲིད་བྱས་པ་ཡིན་ན། འདི་བཞིན་དུ་མི་མཇེད་འཇིག་རྟེན་གྱི་ཁམས་ཀྱི་འཛམ་གླིང་བྱེ་བ་ཕྲག་བརྒྱ་ནས། ང་པདྨ་སྐལ་བཟང་བྱེ་བ་ཕྲག་བརྒྱ་དང་ཁྱེད་སྐལ་ལྡན་འདུས་པའི་མཆེད་ལྕམ་བྱེ་བ་ཕྲག་བརྒྱ་ཡིས་འདི་ལྟར་ཆོས་ལ་མཉམ་དུ་སྤྱོད་པ་ནས། སྤྲུལ་སྐུའི་ཞིང་ཁམས་མཐའ་ཡས་ཞིང་རྡུལ་དང་མཉམ་པ་ནས་འདི་བཞིན་འོད་གསལ་རྫོགས་པ་ཆེན་པོའི་ཆོས་སྒྲ་རྒྱུན་མི་འཆད་པར་བསྒྲགས་ཏེ། དེ་ལས་ཀྱང་མང་བའི་སྐལ་ལྡན་གྱི་གདུལ་བྱ་བགྲང་ལས་འདས་པ་ཞིག་རིག་འཛིན་རྣམ་བཞིའི་མྱུར་ལམ་ནས་མ་བསྒོམས་མངོན་སངས་རྒྱ་བའི་མྱུར་ལམ་ཟིན་རྒྱུའི་རྟེན་འབྲེལ་གྱི་ཆེ་བ་ཡོད་པ་རེད། རྟེན་འབྲེལ་གྱི་སྙིང་པོ་བདེན་ཚིག་སྨོན་ལམ་གྱིས་མཚམས་སྦྱར་དགོས་པ་ཡིན་ན། ཀུན་རྫོབ་ཆོས་ཅན་རྟེན་འབྲེལ་བསླུ་མེད་ཀྱི་མཐུ་དེ་དོན་དམ་ཆོས་ཉིད་རང་བཞིན་གྱིས་དག་པའི་བདེན་པས་འགྲུབ་པ་རེད། དོ་ཞག་དང་པོ་འུ་ཅག་མང་ཆེ་བ་དེ་སྔོན་ཐུག་མ་མྱོང་བའི་མ་འདྲིས་ཆོས་མཐུན་གྱི་གྲོགས་པོ་མཉམ་གཅིག་གིས་གནས་འདིར་འཚོགས་པ་ཡིན་ན། གསང་ཆེན་རྫོགས་པ་ཆེན་པོའི་མན་ངག་གདམས་ཁྲིད་ཟབ་མོ་ལ་འཆད་ཁྲིད་ཉམས་ལེན་གྱིས་ཆོས་ཀྱི་གྲུ་ཆེན་པོ་ལ་འདི་ལྟར་མཉམ་དུ་ཞུགས་ཏེ། ཕ་གཅིག་སྤུན་ལས་ལྷག་པའི་ཆོས་དམ་ཚིག་གཅིག་པའི་མཆེད་གྲོགས་སུ་འབྲེལ་བ་ཡིན་ན། དུས་ཚོད་ཟེར་བའི་རང་རེའི་མི་ཚེ་དང་མཉམ་དུ་སྐད་ཅིག་ཀྱང་མི་སྡོད་པར་མདུན་ཕྱོགས་སུ་འཁོར་གྱིན་ཡོད་པ་འདི་འགྲོ་མགྱོགས་པོ་རེད། དེའི་ཚེ་ལ་ཟླ་བ་གཅིག་གི་དུས་ཡུན་འདས་པའི་ཕྱོགས་སུ་སོང་ནས། ཉི་མ་དེ་རིང་ནས་ད་ཞག་མཉམ་དུ་འཚོགས་ནས་ཆོས་ཀྱི་དགའ་སྟོན་ལ་མཉམ་དུ་སྤྱོད་པ་དེ། འདས་དོན་རྗེས་དྲན་གྱི་ཡུལ་དུ་འགྲོ་ཚར་བ་རེད། ཡུན་རིང་སོང་ཞིང་སོང་ན་འདི་ལོ་རྒྱུས་ཀྱི་སྣང་བརྙན་གསལ་ལ་མི་གསལ་བ་ཞིག་ཏུ་འགྱུར་རྒྱུ་ཡིན། ཡང་གཅིག་བྱས་ན་དུས་རྒྱུན་གྱི་མི་ཚེའི་བྱ་བཞག་གར་སོང་རྗེས་མེད་དང་མི་འདྲ་བར། འདི་ཆོས་འབྱུང་ལོ་རྒྱུས་ཀྱི་མཚོན་རྟགས་བོད་བསྟན་པ་ཡང་དར་གྱི་སྐབས་ཀྱི་དུས་རབས་ཉེར་གཅིག་པའི་ནང་གི་དེབ་ཐེར་ལེ་ཚན་གསར་བའི་ཟིན་ཐོ་ཞིག་ཏུ་འགྱུར་ནའང་ཐང་། གང་ལྟར་འགྱུར་ཅིང་འགྲོ་བ་འཇིག་རྟེན་གྱི་ཆོས་ཉིད་ཡིན་ན། རྒྱལ་བ་ཀློང་ཆེན་པས། བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །བཟའ་ཚང་གཉེན་འབྲེལ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །ཞེས་གསུངས་ན། ང་རང་བཟང་པོའི་བླ་མ་ཡིན་ནི་མ་རེད་ད། ཁྱེད་རྣམ་པ་ལས་སྨོན་གཅིག་མཐུན་གྱི་ཆོས་གྲོགས་བཟང་པོ་ཡིན་པའི་སྟབས་ཀྱིས་འདིའི་འདོན་པ་འདི་ཚུར་ཞལ་བསྒྱུར་ཏེ་ཚིག་རྐང་གཉིས་མཐུད་ཁུལ་བྱས་ན། བཟང་པོའི་མཆེད་ལྕམ་དག་དང་ལྷན་གཅིག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །ཟེར་རྒྱུ་ཅན་པོ་ཡིན་ནི་རེད། ད་ལྟའི་དུས་ཚོད་སྐར་མ་ཁ་ཤས་ཀྱིས་རང་རེ་འདི་བཞིན་འཛོམས་པ་དེ་འདུས་པའི་ཐ་མ་འབྲལ་བ་དང་མཚུངས་པར། དགོན་སྡེ་གཅིག་གི་བླ་གྲྭ། ཡུལ་སྡེ་གཅིག་གི་ཁྱིམ་མཚེས། ཁྱིམ་བཟའ་ཚང་གཅིག་ལ་ལས་ཀྱིས་བསྐོས་སོང་བའི་ཕ་མ་སྤུན་མཆེད་ཡིན་ཡང་འདུས་པ་ཡིན་པས་འབྲལ་བའི་ཆོས། སྐྱེས་པ་ཡིན་པས་འཆི་བའི་རང་བཞིན། ཀུན་མཁྱེན་ཆོས་རྗེས། གྲོགས་དག་ཚེ་ནི་སྟོན་ཁའི་སྤྲིན་ལྟར་གཡོ། །བསགས་པ་འཛད་ཅིང་འདུས་པ་རྣམས་ཀྱང་འབྲལ། །འབྱོར་བ་རྒུད་ཅིང་མི་རྟག་སྙིང་པོ་མེད། །འགྲོ་བ་འདི་དག་མཐའ་བཞིའི་ཆོས་ཅན་དུ། །དེ་རིང་ཉིད་ནས་ངེས་པར་རྟོགས་པར་བྱ། །ཞེས་གསུངས་པ་ལྟར་ཏུ། བསགས་མཐའ་འཛད། འབྱོར་མཐའ་རྒུད། འདུས་མཐའ་འབྲལ། སྐྱེས་མཐའ་འཆི་བའི་རང་བཞིན། ནམ་ཞིག་དུས་ཚོད་ཀྱི་ཐོག་ཏུ་ཐོན་དུས་ང་ཞེས་བཏགས་སའི་གདགས་གཞིའི་ཕུང་ལྔའི་ཚོགས་པ་འདི་ཡང་སོ་སོར་གྱེས་ཏེ་གཅེས་པར་བསྐྱངས་བའི་ལུས་འདི་ཡང་། སྐྲ་སེན་མོ་རི་ལུང་དུ་འཐོར། ཤ་ཁྲག་བྱ་ཁྱི་དང་འབུ་སྲིན་གྱི་ཁ་ཟས་སུ་གྱུར་ནས་རུས་གོང་དཀར་པོའི་ཚོགས་པ་ཞིག་དུས། སེམས་རྣམ་ཤེས་བྱ་སྒྲོ་རླུང་ཁྱེར་ལས་ཀྱིས་རྗེས་སུ་འབྲང་སྟེ་གར་འཁྱར་ངེས་མེད་ཡིན་པའི་བརྡ་ཆོས་རང་རེའི་འདུ་འབྲལ་འདིས་ཀྱང་མཚོན་ཐུབ་པ་རེད། ད་དུང་ཀུན་མཁྱེན་ཆེན་པོས། ཤིང་རྣམས་ཡལ་ག་ལོ་མ་ལྷག་པ་དང། །ཚལ་རྣམས་མེ་ཏོག་འདབ་མ་རྙིང་མཐོང་ནས། །རིང་པོར་མི་ཐོགས་འཆི་བ་དྲན་བྱས་ཏེ། །ཡོན་ཏན་འབྱུང་གནས་དབེན་པ་བསྟེན་པར་མཛོད། །ཅེས་གསུངས་རྒྱུའི་ཞལ་གདམས་རང་རེ་ལ་ལྷག་པར་འབྱོར་བ་རེད། སྲོག་ལྡན་སེམས་ཀྱི་འདུ་ཤེས་རང་སོར་གནས་པ་ཞིག་ཡོད་ཚད་པོས་དོན་གཉེར་བྱེད་རྒྱུ་དེ་བདེ་སྐྱིད་རེད། འོན་ཀྱང་། འཇིག་རྟེན་ས་འདིའི་སྟེང་དུ་རྐང་རྗེས་བཀོད་ཚད་མང་ཆེ་བས། བདེ་སྐྱིད་ཕྱི་ནས་བཙལ་ཏེ་མ་རྙེད་ནས་རེ་ཐག་ཆད་དེ་འགྱོད་བཞིན་འཇིག་རྟེན་ཕྱི་མའི་ལམ་ཆེན་ལ་མི་འདོད་བཞིན་དབང་མེད་དུ་སོང་བ་ཤ་སྟག་རེད། དེས་ན་བདེ་སྐྱིད་ནང་ནས་རྙེད་དགོས། ནང་རང་གི་སེམས་ཀྱི་སྟེང་ནས་རྙེད་དགོས། ཕྱི་རོལ་གྱི་སྣང་བ་བཟང་ངན་ནང་སེམས་ཀྱི་འགྱུར་བག་གིས་བྱས་པ་ཡིན་པས། ནང་སེམས་ཀྱི་གཏེར་སྒོ་ཕྱེ་ཤེས་ན་སེམས་ཉིད་མ་འཁྲུལ་བའི་སངས་རྒྱས། ཡིད་བཞིན་རིན་ཆེན་འཛད་མེད་ཀྱི་མཛོད། འུ་བུ་ཚོའི་ལྷ་མིའི་གནས་ཀྱི་ཟག་བཅས་ཀྱི་བདེ་བ་དོན་ལ་འདུ་བྱེད་ཀྱི་སྡུག་བསྔལ་ལས་མ་འདས་པ་འདི་ལས་ལྡབ་བརྒྱ་འགྱུར་དང་སྟོང་འགྱུར་ཁྲི་འགྱུར་དང་འབུམ་འགྱུར་གྱིས་ལྷག་པའི་ཟག་མེད་ནང་གི་བདེ་བ་དགའ་ཆེན་ཡེ་ཤེས་ཀྱི་རོལ་བར་རྟག་ཏུ་སྤྱོད་ཆོག་གི་ཡོད་པ་རེད། ཟས་ཀྱི་བྲོ་བ་ཁ་ཡིས་མྱོང་ན་དོན་གྱི་འཚོ་བཅུད་ཁོག་ལ་འབབ་དགོས་པ་དེ་བཞིན་དུ། ཆོས་ཀྱི་བྲོ་བ་དེ་ཡང་ཁ་དང་རྣ་བ་གཉིས་ཀས་བཤད་རྒྱུ་ཉན་རྒྱུ་རྐྱང་བ་ཞིག་གིས་མི་ཆོག་པར་ཉམས་ལེན་གནད་ཀྱི་སྙིང་པོ་སེམས་ཀྱི་འཚོ་བཅུད་དུ་འབབ་དགོས་པ་ཡིན། དེ་ཡང་རྗེས་ཕྱིན་ཆོད་ཀྱི་ལས་ཁྲལ་ཞིག་ཏུ་མི་བཞག་པར་ཐད་ཀ་ཐད་ཀྱིས། ཉན་པ་དང་གོ་བ་གཉིས་ཀ་དུས་གཅིག བསམ་པ་དང་བསྒོམ་པ་གཉིས་ཀ་དུས་མཉམ་གྱིས། བསམ་སྤྱོད་དམ་པའི་ལྷ་ཆོས་ལ་དེའི་སྟེང་ནས་འབྲེལ་ཐུབ་སོང་ན། ཐམས་ཅད་སྒོམ་དང་ཉམས་ལེན་ཡིན་པ་རེད། ཡ་རབས་ཀྱི་སྤྱོད་པ་ཤུགས་འབྱུང་ལ་འོང་བ་ཡིན། ལུགས་གཉིས་ཀྱི་སྲོལ་བཟང་ཐམས་ཅད་དེས་འགྲུབ་ཀྱིན་ཡོད་རེད། བྱས་ཚད་ཆོས་རེད། བསམ་ཚད་དགེ་བ་ཡིན་དུས་མི་ལུས་ལན་གཅིག་ལོན་པ་འབྲེལ་ཚད་དོན་དང་ལྡན་པའི་འདུན་མ་ལེགས་པའི་རྩེ་མོར་སོན་ཟེར་བ་དེ་ཡིན། ཆོས་ཀྱི་བརྒྱུད་པ་ཟིན། བླ་མའི་དགོངས་པ་རྫོགས། ཕ་མའི་དྲིན་ལན་ཀྱང་དེས་སོད་པ་ཡིན་ན། དེའི་ཐད་ཚོད་དེ་ལྟར་མ་རྟོགས་པའི་རང་གི་ཁྱིམ་རྒྱུད་ཀྱི་སྔར་འདས་མེས་དང་ཡང་མེས་ཚོའི་གཙོ་བོར་བྱས་པའི་ཆགས་སྡང་རྨོངས་གསུམ་གྱི་བྱ་བས་དུས་འདས་ནས་འདི་སྣང་འཁོར་བའི་འཁྲུལ་སྣང་ལ་སྤྱོད་དེ། ཤི་ཁར་ཆོས་མེད་ལག་སྟོང་དུ་སོང་བའི་སེམས་ཅན་ཚོར། དེ་ཚོས་འདི་འདྲ་བ་རེ་མ་ཤེས་པ་ལ་ཨང་སྙམ་རྒྱུ་དང་། ཆོས་འདི་འདྲ་བ་རེ་གོ་མ་མྱོང་བ་རེ་ཕངས་སྙམ་རྒྱུའི་སྙིང་རྗེ་སྐྱེ་བས་མི་ཚད། དེ་བཞིན་མཐའ་ཡས་ཀྱི་སེམས་ཅན་ལ་བྱམས་སྙིང་རྗེའི་ཤུགས་དེ་ཇེ་ཆེར་སོང་བ་དང་མཉམ་དུ། མཐའ་ཡས་སེམས་ཅན་ལ་ཕན་བདེ་སྒྲུབ་པའི་སྨོན་ལམ་གང་བཏབ་ཀྱང་ཇི་བཞིན་འགྲུབ་པའི་བདེན་ཚིག་གི་མཐུ་ཡང་མངོན་གྱུར་དུ་གྲུབ་སྲིད་པ་རེད། འདིའི་ནང་གི་མང་པོ་ཞིག་ཁྱིམ་ན་གནས་པའི་སྔགས་པ་ཕོ་མོ་རེད། ཁྱིམ་བཟའ་ཚང་གི་བདག་པོས། འཚོ་བ་ཟས་གོས་ཉེར་སྤྱོད་ཀྱི་འདུག་ཆུས་བསྒྲུབ་རྒྱུར་སོ་ནམ་གྱི་བྱ་བཞག་བྱེད་དགོས་པ་རེད། སྡིག་དང་མ་འདྲེས་པའི་ཐོག་ནས་དུས་རབས་དང་མཐུན་པའི་ལས་སྒོ་རེ་གཉེར་ཏེ་ལོངས་སྤྱོད་འབྱོར་བ་དེ་རྒྱས་སུ་ཆུགས། ཕུན་ཚོགས་སྡེ་བཞིའི་འབྱོར་བ་མ་ཚང་ན་མཐོ་རིས་ཀྱི་ལོངས་སྤྱོད་མ་ཚོགས་པ་རེད། འོན་ཀྱང་འཚོ་བའི་ཆ་ཤས་གལ་ཆེན་མེད་མི་རུང་བ་དེ་གང་ཡིན་ཞེ་ན། གཙོ་བོ་དམ་པའི་ཆོས་བསྒྲུབ་པ་དེ་ཡིན། ཆོས་ཀྱིས་འཚོ་བའི་སྐྱེ་བོ་དེ་དགའ་བཞིན་སྐྱིད་བཞིན་དུ་གསོན་པོའི་འཚོ་བ་ཆོག་ཤེས་འཕགས་པའི་ནོར་གྱིས་སེམས་ཁ་གང་བཞིན་སྤྱོད་པས་མི་ཚད། དགའ་བཞིན་སྐྱིད་བཞིན་དུ། དགའ་སྐྱིད་ཀྱི་ངང་ནས་འཆི་བ་ཐར་བའི་གྲོང་སྒོ་རུ་ཤེས་ནས་ཤི་རན་ཁར་སྡུག་གསོག་དགོས་པ་མ་རེད། འགྱོད་པ་མེད་བཞིན་དུ་སྐྱེ་བ་བརྗེ་ལེན་བྱེད་པ་རེད། ཆོས་མེད་ཚང་དེར་ཟས་གོས་ཡོ་བྱད་གནས་ཁང་ནོར་རྫས་ཀྱི་མཐུན་རྐྱེན་ཇི་ལྟར་ཚོགས་རུང་། ད་དུང་ཆོག་མི་ཤེས་པའི་སེམས་ཀྱིས་མེད་སྣང་ཡི་དྭགས་དངོས་ཀྱི་སྡུག་བསྔལ་མྱོང་བཞིན་དུ་རྒས་དུས་དེ་བས་ཀྱང་ལོངས་སྤྱོད་སྡུག་གི་སྣོན་མར་སོང་ནས། རེ་ས་རྒྱབ་རྟེན་སེམས་ཀྱི་གཏད་སོ་བྱེད་ས་གཅིག་ཀྱང་མེད་བཞིན་དུ་མུན་ནག་ཕྱི་མའི་ལམ་ཆེན་ལ་འགྲོ་དགོས། ཡིད་མི་འོང་བའི་རྣམ་སྨིན་རྗེས་ནས་མྱོང་དགོས་རྒྱུ་ཚོ་སྔར་ནས་ཤེས་རྒྱུ་ཞིག་ཡིན་ན་སྙིང་གས་ནས་ཤི་འགྲོ་བའི་ཚོད་ཡིན་ནི་རེད། དེའི་འཕྲོར་རབ་བྱུང་བཙུན་པའི་སྡེ་ཚོགས་འདི་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡིན་ན། དགེ་འདུན་འདུས་པའི་རྟེན་གཞི་དང་འདུ་སྒོ་དེ་རྒྱས་རྒྱུ་ཅི་ཡོད་གང་ཡོད་རྒྱས་པའི་ཐོག་ཏུ། ཁྱིམ་ཆུང་སྤོང་བའི་ཁྱིམ་ཆེན་དགོན་གཞིས་སྒེར་གྱི་ཆོས་བརྒྱད་ཀྱི་ཕ་མཁར་ལ་མི་ལོག་ས་བོ་ནས་༼མི་འགྱུར་བའི་ཐོག་ནས་༽ རྟག་ཏུ་ཆོས་སྤྱོད་ཉམས་ལེན་ལ་བརྩོན་རྒྱུ་གནད་ཆེན་ཡིན་པ་ཞུ་ཅི་དགོས་རེད། ཁྱད་པར་དེང་སང་གི་དུས་འདི་ལ་ཐུབ་པའི་ལུང་རྟོགས་ཀྱི་བསྟན་པ་གང་ཟག་རང་རྒྱུད་ལ་བཞུགས་པར་རང་ངོས་ནས་གཙང་སྦྲ་དང་བྱི་དོར་དག་ཐེར་མཛད་ན། རེ་རེ་ཚོགས་པའི་ཐུན་མོང་གི་བསྟན་པ་འཇིག་རྟེན་སྲིད་པའི་བླ་ན་མཐོ་བས་མི་ཚད། དེ་དང་མཉམ་དུ་ཆོས་ཚིགས་ཀྱི་ཡུལ་དབུས་བོད་གངས་ཅན་ཆོས་ལྡན་གྱི་ཞིང་ཁམས་འདི། མིང་དོན་མཚུངས་པའི་མི་ཡུལ་གྱི་དག་ཞིང་། འཛམ་གླིང་མིས་སྨོན་ས་ཞིག་ཨེ་རེད་དང་མི་རེད། བླ་གྲྭ་དགེ་འདུན་པས་གཙོ་བོར་བྱས་པའི་བོད་མི་སེར་སྐྱ་ཕོ་མོ་རྒན་གཞོན་ཐམས་ཅད་ཀྱི་བསམ་སྤྱོད་བཟང་ངན་མི་སྤུས་དག་ཞན་ལ་ཐུག་ཡོད་རེད་ཟེར་རྒྱུ་བོ། ཡང་སྒོས་མ་འོངས་ས་འདིའི་བདག་པོ་གཞོན་རབས་ཀྱི་མྱི་ཚོའི་ལས་སྐལ་ཡིན་པས་ན། དེ་བཞིན་མ་མཐོང་འབྱུང་འགྱུར་གྱི་ཕྱི་རབས་གྲོགས་པོ་ཚོར་ལྷག་བསམ་དཀར་པོའི་ཆ་འཕྲིན་དུ་བཞག་པ་ཡིན། ད་སང་དང་གནངས་ལས་མི་འགྱང་བར་རང་རེ་ཕྱོགས་བཞི་མཚམས་བརྒྱད་ནས་མ་བསྡུས་མགྲོན་པོ་ཆོས་གཅིག་གིས་བསྡུས་ཏེ་མཉམ་དུ་འཚོགས་པ་འདི། ཕྱོགས་སོ་སོའི་རང་རང་གི་གནས་ལ་འགྲོ་རན་པ་ཡིན་ན། རང་རེའི་བར་ལ་ས་ཁ་ཐག་རིང་པོའི་ས་ཆ་ཡུལ་ལུང་གིས་ཕྱེ་སོང་རུང་། སེམས་ཁ་ཐག་ཉེ་མོའི་ལུགས་གཉིས་གང་ཐད་ཀྱི་འདུན་མས་གམ་ན་གནས་པ་ཇི་བཞིན་དང་། ཁྱད་པར་དུ་མཆོག་གསུམ་དམ་པའི་བྱིན་མཐུ་ལ་ཉེ་རིང་མེད་པས་ན་དུས་དང་རྣམ་པ་རྒྱུན་དྲུག་ལ། མཆོག་གསུམ་སྐྱབས་བཅོལ་གྱིས་ཚེ་འདི་དང་ཕྱི་མར་བདེ་བའི་སྨོན་འདུན་མི་བརྗེད་ཞུ་རྒྱུ་དང་། རྟེན་འདིར་དཀྱིལ་འཁོར་གཅིག་ཏུ་འཚོགས། མར་མེ་གཅིག་ལ་བལྟས་པའི་སྨོན་ལམ་གྱིས་ཕྱི་མ་ཚོམ་བུ་གཅིག་ཏུ་མངོན་སངས་རྒྱ་རྒྱུའི་སྨོན་ལམ་དེ་བཞིན་དུ་བཏབ་པ་ཡིན། དེ་འཕྲོས་འདིའི་ཉམས་ལེན་ཞག་བརྒྱའི་མཚམས་ལ་འདུག་མཁན་ཐམས་ཅད་ཀྱིས། ཐོག་མར་ཉི་མ་གསུམ་ཙམ་ཞིག་ལ་བར་ཆད་ཞི་བའི་ཆེད་དུ་ཚིག་བདུན་གསོལ་འདེབས་རེ་གསོག་ན། དེ་འཕྲོས་ཉིན་བདུན་ལ་བླ་མའི་རྣལ་འབྱོར་གྱི་གནད་ལ་དྲིལ་ཏེ་རིག་འཛིན་སྤྱིའི་སྲོག་སྔགས་དང་སིདྡྷཱི་བཟླ་བར་བྱས་ཏེ་ཉིན་བདུན་ལ་གཙོ་བོ་བླ་རྣལ་དང་འབྲེལ་བའི་སིདྡྷི་གསོག་ན། དེ་ནས་ལྷག་འཕྲོ་ཡི་ཉིན་དགུ་བཅུ་ཐམ་པ་ཁ་སྐོང་དང་བཅས་པར་དངོས་གཞིའི་ཁྲིད་སྦྱང་མཛད་ན་བསམ་པ་ཡིན། ཁྲིད་སྦྱང་མཛད་ལུགས་ལ་ཡིན་ན་རིགས་གཉིས་སུ་ཕྱེ་ཆོག་གི ལས་དང་པོ་བ་ཁྲིད་ཡིག་འདིའི་སྟེང་ནས་ཐོག་མར་ཉམས་ལེན་མཛད་པ་ཞིག་ཡིན་ན། འདིའི་ལེ་ཚན་རེ་རེ་བཞིན་གྱི་ཁྲིད་རྐང་དུ་ཕྱེས་ཏེ་དུས་ཚོད་དང་མཐུན་པར་ཆ་བགོས་ན་ཆོག་པ་དང་། ཉམས་ལེན་པ་རྙིང་བ་ཚོ་དང་སྙིང་ཐིག་གི་ཁྲིད་ཆེན་གསན་ཚར་ནི་ཚོས་ཡེ་ཤེས་བླ་མའི་ཞག་བརྒྱར་གཞིར་བཟུང་ནས་འདི་ཉིད་ཟུར་གྱི་མན་ངག་གི་ཞལ་ཤེས་སུ་འཛིན་པའམ། ཡང་ན་འདིའི་ཁྲེགས་ཆོད་ཐོད་རྒལ་གཉིས་ཀ་ཟུང་འབྲེལ་གྱིས་ཉིན་རེའི་ཉམས་ལེན་གྱི་ཐུན་ལ་ཁྲེགས་ཆོད་ཐོད་རྒལ་གཉིས་ཀའི་དགོས་གནད་དང་བསྟུན་ཏེ་དུས་ཚོད་སྒྲིག་རྒྱུ་དང་ནི། རྩ་རླུང་བ་ཚོས་དུས་ཚོད་ཟུར་འདོན་རང་གིས་སྙོམ་སྒྲིག་བྱེད་ན་ཆོག ལོ་གསུམ་མཚམས་པས་ཀྱང་ཕལ་ཆེར་དེ་དང་འདྲ་བར་དུས་ཚོད་རྩིས་དྲུག་བརྒྱབ་ན་འགྲིག་རྒྱུ་ཞིག་ཡིན་པ་རེད། དེ་ཚོའི་ཐད་ནས་མཁྱེན་དགོས་དགོངས་ན་ཕལ་ཆེར་དེ་འདྲ་ཞིག་ཡིན་སྙམས། དེ་ལྟར་ན་ཆོས་འདི་འཛིན་ཅིང་ཉམས་སུ་ལེན་པའི་རྡོ་རྗེའི་མཆེད་ལྕམ་རྣལ་འབྱོར་ཕོ་མོ་ཐམས་ཅད་གཞི་ལམ་བྱེས་གསུམ་གར་བྱོན་གར་བཞུགས་ཀྱི་དུས་དང་གནས་སྐབས་ཐམས་ཅད་ལ། རྒྱལ་དབང་པདྨ་ཀ་ར་ལ་སོགས་པ་སྔོན་བྱོན་རྒྱལ་བའི་རྒྱལ་ཚབ་གྲུབ་བརྙེས་རིག་འཛིན་ཐམས་ཅད་ཀྱི་བཀའ་ཡི་སྲུང་མ་སྤྱི་དང་། ཁྱད་པར་དུ་སྲིད་གསུམ་གསལ་བའི་སྤྱན་གཅིག་གིས་སྟོང་གསུམ་ཁྱབ་པར་གཟིགས་པའི་སྔགས་སྲུང་ཨེ་ཀ་ཛ་ཊི། སྤྱན་སྟོང་དྲག་པོའི་སྡང་མིག་གིས་དགྲ་ལ་གཟིགས་པ་གཟའི་དགེ་བསྙེན་ཆེན་པོ་ར་ཧུ་ལ། དེ་བཞིན་དུ་སྲིད་པ་གསུམ་པོར་དབང་བྱེད་པ་ཐེའུ་རང་སྟོང་སྡེའི་དམག་དཔོན་དྲག་རྩལ་ཐོག་ལྟར་མྱུར་བ་དམ་ཅན་རྡོ་རྗེ་ལེགས་པ་རྩལ་ཏེ། བཀའ་སྲུང་མ་གཟའ་རྡོར་གསུམ་གྱིས་དམ་ལྡན་བུ་བཞིན་དུ་སྐྱོང་བའི་མེལ་ཚེ་དང་སྲུང་སྐྱོབ་གཡེལ་བ་མེད་པར་མཛད་ནས་ཆོས་འདི་དར་སའི་ས་ཕྱོགས་ཀུན་ལ་བཀྲ་ཤིས་ལེགས་ཚོགས་ཐམས་ཅད་མ་བསྡུས་གཡང་དུ་འཁྱིལ་བའི་ཕྲིན་བཅོལ་དང་བཅས་ཏེ། དེ་ལྟར་ཆོས་འཆད་ཉན་བགྱིས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱིས་དུས་གསུམ་བསགས་དང་ཡོད་པའི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་ཐམས་ཅད་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་དེ་མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར། རྗེ་བཙུན་འཇམ་པའི་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ།། ༈ འཕགས་པའི་རི་ངོགས་དབེན་ཞིང་ཉམས་དགའ་བར། །རིག་དང་མངོན་ཤེས་ཏིང་འཛིན་འགྲུབ་གྱུར་ནས། །དོན་གཉིས་ལྷུན་གྲུབ་བདེ་ཆེན་མཁའ་དབྱིངས་སུ། །ཚེ་འདི་ཉིད་ལ་ཕྱིན་པར་མཛད་དུ་གསོལ། །གཅིག་པུར་བསྲན་ཚུགས་སྒྲུབ་ལ་བརྩོན་པ་དང་། །ཚེ་འདིའི་ཕྱོགས་སུ་སྐད་ཅིག་མི་གཡེངས་ཤིང་། །གོང་མའི་རྗེས་སྙོགས་དངོས་གྲུབ་མཐར་ཕྱིན་ནས། །རྟག་ཏུ་བླ་མ་མཉེས་པར་མཛད་དུ་གསོལ། །དམ་ཚིག་སྡོམ་པ་ཉམས་ཆགས་མེད་པ་དང། །ལྟ་སྒོམ་སྤྱོད་འབྲས་མ་ནོར་དོན་རྟོགས་ནས། །ཉིན་མཚན་འོད་གསལ་ངང་ལས་མི་གཡོ་ཞིང་། །རང་གཞན་དོན་གཉིས་འགྲུབ་པར་མཛད་དུ་གསོལ། །སྣང་སྲིད་རྣམ་དག་བསྐྱེད་རྫོགས་མཐར་ཕྱིན་ནས། །མཁའ་འགྲོ་དམ་ཅན་སྤྲིན་བཞིན་འཐིབས་ནས་ཀྱང་། །དངོས་གྲུབ་རྣམ་གཉིས་ཆར་བཞིན་འབབ་པ་དང་། །འཕྲིན་ལས་རྣམ་བཞི་འགྲུབ་པར་མཛད་དུ་གསོལ། །དག་སྣང་མོས་གུས་ཕྱོགས་མེད་འཆར་བ་དང་། །བྱམས་དང་སྙིང་རྗེ་རྒྱུན་ཆད་མེད་པ་དང་། །ལྟ་སྒོམ་ཉམས་རྟོགས་ཡོན་ཏན་འབར་བ་དང་། །འགྲོ་དོན་ཕྱོགས་མེད་འགྲུབ་པར་མཛད་དུ་གསོལ། །བདག་གི་མོས་དགེ་ཕུན་ཚོགས་འདི་ཡིས་ནི། །འགྲོ་ཀུན་མ་ལུས་ཕྱམ་གཅིག་ཡོངས་གྲོལ་ནས། །བདེ་ཆེན་ལྷུན་གྲུབ་ཀུན་ཏུ་བཟང་པོའི་ཞིང་། །ཚེ་འདི་ཉིད་ལ་ཕྱིན་པར་མཛད་དུ་གསོལ།། ༈ དེང་ནས་བདག་ཀྱང་ནགས་ཚལ་མེ་ཏོག་ཅན། །སྐྱེ་བོས་སྟོང་ཞིང་འབབ་ཆུའི་སྒྲ་གྲགས་ལ། །དབེན་ཞིང་ཡིད་འོང་བྲག་རིའི་དྲུང་འདུག་སྟེ། །དུས་བཞིར་སྙིང་པོ་མེད་ཅེས་སེམས་པ་ཡི། །དགེ་བ་རྒྱན་གྱུར་འཇིག་རྟེན་མིས་བསྐྲུན་པ། །ཀུན་ལས་ཆེས་མཆོག་བདུད་རྩི་ཐོབ་གྱུར་ཅིང་། །མི་རྟག་སྟོང་པའི་སྒྲ་ཆེན་སྒྲོག་པར་ཤོག །སྨན་ཤིང་མེ་ཏོག་ཤང་ཤོང་མཛེས་པ་དེར། །ཆོས་ཚུལ་ཞི་བ་སྤྲིན་གྱི་བླ་བྲེ་ཅན། །རིག་འཛིན་རྒྱལ་བའི་གསེར་གྱི་གློག་འགྱུ་བས། །ཚེ་གཅིག་འོད་གསལ་སྙིང་པོ་འགྲུབ་པར་ཤོག །ཐར་བའི་ཁང་བཟང་རིན་ཆེན་ཕོ་བྲང་ནས། །ཆོས་ཚུལ་ཞི་བ་རྔ་སྒྲའི་དབྱངས་གྲགས་པས། །མ་ལུས་འགྲོ་ཀུན་མ་རིག་གཉིད་སངས་ཏེ། །གདོད་མའི་ས་ལ་མངོན་པར་བྱང་ཆུབ་ཤོག །སྐྱོ་བས་སེམས་པའི་རང་བཞིན་གསལ་བ་ཅན། །ཞི་བའི་ནགས་སུ་གཅིག་པུར་འགྲོ་འདོད་ནས། །སྙིང་ནས་སྨོན་པའི་ཚིག་གི་དབྱངས་སྨྲས་པ། །མོས་དགེ་དག་པས་མྱུར་དུ་འགྲུབ་པར་ཤོག། ༈ ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན། །ཕྱོགས་ཀྱི་ཐ་གྲུ་ཀུན་ཏུ་གྲགས་གྱུར་ཏེ། །བློ་གྲོས་པདྨོ་རབ་ཏུ་རྒྱས་བྱེད་ཅིང་། །སངས་རྒྱས་བསྟན་པ་དར་ཞིང་རྒྱས་པར་ཤོག། དེ་ནས་དགུ་རོང་མཆོག་སྤྲུལ་རིན་པོ་ཆེས་བཀའ་དྲིན་གཏང་རག་གི་མཎྜལ་རབ་སྒྲུབ་པའི་མཎྜལ་གྱིས་གཙོས་རབ་འབྲིང་ཐ་མའི་མཎྜལ་འབུལ་བའི་རྣམ་བཤད་དང་འབུལ་ཚན་བཅས་མཇུག་གྲུབ་མཐར། ད་སྤྱིར་བཏང་མཎྜལ་འབུལ་རྒྱུ་འདི་རྟེན་འབྲེལ་བཟང་པོའི་ཆོ་གའི་འགྲོས་ཤིག་རེད། ཐེངས་འདིའི་སྒྲུབ་པའི་མཎྜལ་ཕུལ་བ་འདི་སྤྱིར་བཏང་བ་ཞིག་མ་རེད་བསམ་གྱིན་ཡོད། དུས་འདི་ལ་མ་དགོས་དང་། སྔར་བོད་ལ་གསང་སྔགས་དར་བའི་དུས་ལའང་འདི་འདྲ་མཐོང་བ་དཀོན་པོ་ཡིན་རྒྱུ་རེད་སྙམ། ངས་འདིའི་དམ་བཅའི་སྐོར་ཕྱོགས་སྡོམ་བྱས་པ་འདི་ད་དུང་ཚར་གཅིག་འདོན་བསམ་གྱིན་ཡོད། ཐེངས་འདིའི་སྒྲུབ་པའི་མཎྜལ། ཕུར་བསྙེན་དུང་ཕྱུར་སུམ་ཅུ་སོ་ལྔ། བྱེ་ཆེན་གཉིས། འབུམ་བདུན། རྟ་མགྲིན་དུང་ཕྱུར་བཅུ། བྱེ་བ་གཅིག ས་ཡ་བཞི། འབུམ་གཅིག སིདྡྷི་དུང་ཕྱུར་བཞི་བཅུ་ཞེ་གཅིག བྱེ་བ་དྲུག ས་ཡ་བཞི། འབུམ་གཅིག ཁྲི་བདུན། མ་ཎི་དུང་ཕྱུར་བདུན། བྱེ་བ་གཅིག ས་ཡ་ལྔ། འབུམ་གཉིས། ཁྲི་གསུམ། ཡིག་བརྒྱ་དུང་ཕྱུར་གཅིག བྱེ་བ་གཉིས། ས་ཡ་གསུམ། འབུམ་བདུན། ཁྲི་གསུམ། ས་ཏྭ་དུང་ཕྱུར་གཉིས། བྱེ་བ་གཉིས། ས་ཡ་དགུ། འབུམ་དགུ། རྡོ་རྗེ་གྲོ་ལོད་བསྙེན་པ་དུང་ཕྱུར་གཅིག བྱེ་བ་གཅིག གུ་དྲག་བསྙེན་པ་དུང་ཕྱུར་གཅིག རྟ་ཁྱུང་བསྙེན་པ་དུང་ཕྱུར་གཅིག ས་ཡ་ལྔ། རྩ་གསུམ་དང་ཡི་དམ་ལྷའི་བསྙེན་ཚད་བདུན་ཅུ་དོན་བརྒྱད། ལོ་གསུམ་ཟླ་གསུམ་ཞག་གསུམ་པའི་མཚམས་པ་བརྒྱད་ཅུ་གྱ་དགུ། ཚེ་མཚམས་པ་གཉིས། ལོ་མཚམས་པ་བཅུ་དྲུག ཟླ་མཚམས་པ་དྲུག་བཅུ་རེ་ལྔ། ཞག་བརྒྱ་ཉིས་བརྒྱ་བདུན་བཅུ་དོན་གསུམ། བཀའ་འགྱུར་དག་ཚར་བཅུ་དྲུག ཚེ་ཐར་སྲོག་བསླུ་འབུམ་གསུམ། ཁྲི་གཅིག་སྟོང་བཞི་བརྒྱད་བརྒྱ་ཉེར་དགུ། ཤ་ཚེ་བཅད་བཞི་བཅུ་ཞེ་ལྔ། ཡར་ངོའི་ཚེས་བཅུར་སྨྲ་བཅད་མཁན་གསུམ། མར་མེ་ཁྲི་གཉིས་སྟོང་བཞི་སུམ་བརྒྱ་དང་། བླ་རྣལ་ཐུན་བཞིར་ཆག་མེད། ཐུན་གཉིས་ཆག་མེད། ཚེ་གཅིག་སྒྲུབ་ལ་གཞོལ་མཁན། དུས་ཆེན་དག་ལ་ཤ་མི་ཟ་མཁན། འོད་མཚན་ལྟུང་བཤགས་སྒྲོལ་མ་བཟང་སྤྱོད་བླ་མའི་ལྟ་བ་མཁའ་ལྡིང་ཁྲིད་ཆེན་ལ་སོགས་པ་གསུངས་འདུག ད་རུང་ངའི་ཟུར་ན་འདིའི་ནང་མ་ཕོག་པ་འགའ་རེ་ཡོད་ས་ཡོད་བསམ་རྒྱུ་ཞིག་ཡིན། འདིའི་དེབ་འདི་ཁར་རྩང་ངའི་ལག་ཏུ་ཡོང་བ་རེད། ངས་རྩིས་དྲུག་ཅིག་བརྒྱབ་པ་ཡིན། ལྡེབ་གྲངས་འདི་འདྲ་བའི་སུམ་ཅུ་སོ་ཁ་གྲངས་བཞི་བཅུ་མན་ཆོད་ཅིག་ཡོད་ཐལ། དེ་ལྟར་ཡིན་དུས། ད་འདི་རྨད་དུ་བྱུང་བའི་དོན་དག་ཡ་མཚན་ཅན་ཞིག་རེད། འདིའི་སྔོན་མ་མགོ་ན་ཡོད་རྒྱུའི་སྔགས་པ་འདི་ཚོ་སྔོན་མ་སྣ་ཁྲིད་བྱས་ནས་ཁས་ལེན་མཁན་ཚོ་ཡིན་ས་རེད། ཀོའུ་སྡེའི་སྔགས་པ་ལྕགས་ཐར་ཚེ་རིང་། རྟ་མགྲིན་བསྙེན་པ་དུང་ཕྱུར་གཅིག དེ་འཕྲོས་ཀོའུ་སྡེ་སྔགས་པ་བརྩོན་འགྲུས། ཕུར་བ་དུང་ཕྱུར་གཅིག སིདྡྷི་འབུམ་ཕྲག་བཞི་བརྒྱ། དེ་འཕྲོས་མག་སར་གྱི་སྔགས་པ་པདྨ་ལྷུན་གྲུབ། ཕུར་བ་དུང་ཕྱུར་གཅིག ད་དེ་ལ་སོགས་པ་མདོར་ན་མ་འདྲ་བ་ཡིན་ནི་རེད། དེ་ཇི་ལྟར་བྱས་ན་ལོ་གསུམ་མཚམས་པ་ད་དོན་གྱིས་ཚང་མ་རེད། ཡིན་ན་ཡང་འདིའི་ནང་ལ་ཡི་གེ་ཕོག་དང་མི་ཕོག་གི་ཁྱད་པར་གྱིས་ཡང་ཁ་གྲངས་ཅན་ཞིག་ཕོག་ཡོད་འདུག སྒྲུབ་པའི་མཎྜལ་ཕུལ་བ་དེ་རྒྱལ་བ་དགྱེས་པའི་མཆོད་པ་ངོ་མ་ཡིན། རྟོགས་པའི་བསྟན་པ་དོན་གྱི་སྟེང་ནས་འཛིན་གྱིན་ཡོད་པའི་དངོས་དོན་བཟང་པོ་ངོ་མ་བསླད་མེད་པ་འདི་ལ་དབྱིངས་ན་བཞུགས་པའི་མཆོག་གསུམ་རྒྱལ་བ་སྲས་བཅས་དང་ནི། བརྒྱུད་པའི་བླ་མ་གོང་མ་རྣམ་པ་དང་བཅས་པས་མི་མངོན་ཆོས་ཀྱི་དབྱིངས་ནས་དགྱེས་པའི་བཞད་སྒྲ་དང་བཅས་ཏེ་ཨེ་མ་ཧོ་དང་ཨ་ལ་ལ་ཡིས་ངོ་མཚར་ཤིས་པའི་མེ་ཏོག་འཐོར་བཞིན་ཡོད་པ་ལ་ཐེ་ཚོམ་མི་དགོས། འདིའི་མ་དེབ་འདི་ངས་ཁྱེར་སོང་ནས་འདུས་པ་མང་ཚོགས་ཆེན་པོའི་སྐབས་སུ་དྲིལ་གྱིས་བསྒྲགས་ན། དེའི་ཡི་རང་གི་དགེ་བ་རྐྱང་བ་ཡང་བསམ་གྱིས་ག་ལ་ཁྱབ། ད་དུང་ཡིན་ན་ན་གཞོན་སྔགས་པའི་གྲལ་ནས་ཕུར་པ་རྟ་མགྲིན་གཤིན་རྗེ་སོགས་ཀྱི་བསྙེན་པ་དུང་ཕྱུར་བཟླ་མཁན་མང་པོ་འབུད་རྒྱུའི་ཡིད་ཆེས་བྱེད་ཀྱིན་ཡོད། དེ་ནས་ད་རེས་འདིའི་ཡིག་ཚག་དོ་དམ་བྱེད་པ་མ་འདྲ་བ་ཞིག་རེད་འདུག དེ་དང་མཚུངས་པའི་དངུལ་གཉེར་དོ་དམ། དྲུང་ཡིག་ཚན་པའི་སྒྲ་ཕབ་དང་སྒྲ་བཤུས། ཆོས་ཁྲིད་དང་ཐུན་གྱི་དུང་བརྡ་བཏང་ལུགས། ཇ་མ་ཐབ་སྐོར་གྱི་གཡོས་སྦྱོར་གྱི་ལས་ཀ གཞན་ཡང་ཕྱི་ནང་གི་གཙང་སྦྲ། བདེ་འཇགས་ཀྱི་དོ་དམ། དེ་ནས་ཁྱད་པར་དུ་ཡུལ་ཁྲིམས་དང་བསྟུན་ཤེས་གནང་ཕྱོགས་ཀྱི་སྐོར་ལ་སོགས་པ་བྱ་བའི་སྒྲིག་གཞི་ཐམས་ཅད་ཚགས་སུ་ཚུད་པ་རེད་འདུག དེས་ན་མདོར་ན་ངས་བྱ་བ་གང་ཐད་ནས་བསྔགས་བརྗོད་ཞུས་པ་ཡིན། ངའི་ཆོས་ཁྲིད་གསན་མཁན་ཀྱི་ནང་ན་རབ་ཏུ་བྱུང་བ་མ་ཡིན་པའི་ཁྱིམ་ན་གནས་པའི་ཤེས་ཡོན་ཅན་སློབ་གྲྭ་ཆེ་འབྲིང་གི་དགེ་རྒན་དང་། ཞིབ་འཇུག་པ་དང་། རབ་འབྱམས་པ། ད་རུང་ལས་རིགས་སོ་སོའི་ཆེད་མཁས་མི་སྣ། ཚད་མཐོའི་ཤེས་ཡོན་ཅན་ད་རེས་མང་ཤོས་ཀྱི་ཐེངས་གཅིག་ཡིན། ཡོན་ཏན་ལྡན་པ་ཡོན་ཏན་ལ། །དགའ་ཡི་ཡོན་ཏན་མེད་པ་མིན། །སྦྲང་རྩི་འཛིན་པ་མེ་ཏོག་ལ། །དགའ་ཡི་ཤ་སྦྲང་དེ་ལྟ་མིན། །ཟེར་བ་མིན་ཏེ། སྨྱུག་འཛིན་པ་ཚོ་དང་འཛུམ་མདངས་སྟོན་རེས་བྱེད་པའི་གོམས་གཤིས་ཤིག་སྔར་ནས་ཡོད་པའི་བག་ཆགས་འདྲ་བོ་ད་རུང་དོར་མི་འདུག མདོ་སྨད་ཀྱི་ས་ཆ་འདི། སྨྱུག་རྩེས་ལབ་གླེང་བྱེད་པ་ལ་དུང་བ་ཅན་མང་བའི་ས་ཆ་རེད། རྣམ་པ་ཇི་ལྟར་ཡིན་རུང་གི་ཤེས་ཡོན་ཚད་མཐོ་ཅན་གྱི་རྣམ་དཔྱོད་དང་སྤོབས་པ་ལ་གདེང་འཇོག་དང་བརྩི་མཐོང་བྱེད་ཀྱིན་ཡོད། དེ་འཕྲོས་ཐེངས་འདིའི་དངོས་འབུལ་ཐམས་ཅད་པོ་ཡང་དང་པོར་རྟེན་འབྲེལ་གྱི་དབང་གིས་གཅིག་བླངས་ཏེ། དཀོན་མཆོག་མཉེས་པའི་མཆོད་རྫས་སུ་དངོས་འབྱོར་ཡིད་སྤྲུལ་དང་བཅས་པས་ཕུལ་ཏེ། དེའི་སྟེང་ནས་ཕྱིར་དོ་བདག་ཁོང་སོ་སོ་ལ་འབུལ་བ་ཡིན། འདི་ལ་ཡང་ཟེར་དང་ཡང་བཤད་བྱེད་ཡོང་ས་མེད། ང་ཁྲི་ཐོག་ནས་མར་བབ་ཚར་དུས་ཚང་མ་ཆོས་གྲོགས་འདྲ་མཉམ་གཅིག་མཚུངས་ཡིན་ཡང་། ཁྲི་ཐོག་ན་ཡོད་དུས་རྡོ་རྗེ་སློབ་དཔོན་གྱི་ཞལ་ཚབ་བྱེད་ཀྱིན་ཡོད་པས། དོ་ཞག་ཡང་དང་ཡང་འུ་ཅག་གིས་རྗེས་ཟློས་མཛད་འདུག་རྒྱུའི་གཙོ་བོས་ཇི་ལྟར་སོགས་ཀྱི་ནུས་པ་དོན་ལ་གནས་པ་རེད། ད་རུང་ང་འདི་ལ་ཐོན་དང་ཚུན་ཆོད་ཀྱིས་ས་འདིའི་མང་ཚོགས་ཀྱི་འབུལ་དངུལ་དང་ནི་མཎྜལ། དབང་ཡོན། གཅོད་འབུལ་ལ་སོགས་པའི་སྒོར་མོའི་གྲངས་ཀ་དེ་དམངས་སྒོར་ཉིས་འབུམ་ཆིག་ཁྲི་ལྷག་ཅིག་སྔགས་མང་གིས་དོ་དམ་བདག་གཉེར་བྱེད་ཡོད་པ་འདི། དེ་ཉིན་དབུ་འཛུག་བྱེད་རྒྱུའི་གོས་དཀར་ལྕང་ལོ་ཅན་གྱི་སྡེའི་སྔགས་པའི་སློབ་གླིང་འཛུགས་རྒྱུ་དེའི་གྲ་སྒྲིག་གི་ཐེབས་རྩ་ལ་འཇོག་པ་ཡིན། འདིའི་བྱ་བ་འདི་དུས་ལ་བབས་ན་མི་འགྱང་བར་འགྲུབ་ཀྱང་སྲིད་པ་རེད། གལ་ཏེ་གནས་སྐབས་རྒྱུ་རྐྱེན་མ་ཚོགས་ནས་ལུས་སོང་ན། ད་ལྟའི་མིས་བསྒྲུབ་འོས་པའི་བྱ་བ་འགྲུབ་སོང་སྟེ། བྱ་བའི་སྒྲུབ་འཕྲོ་ལས་རྔ་བཅའ་རྔ་དེ་འཇོག་འོས་པའི་མ་མཐོང་ཕྱི་རབས་ཀྱི་གྲོགས་པོའི་སྔོན་དུ་མི་ནུབ་ལོ་རྒྱུས་ཀྱི་རྡོ་རིང་ལ་བཀོད་བཏང་ན། འབྱུང་འགྱུར་ཕྱི་མའི་དུས་ཤིག་ལ་སྙིང་སྟོབས་ཞུམ་པ་མེད་པ་ཁ་ཤས་ཀྱིས་ལས་ཁུར་ཕྲག་ལ་བླང་འགྲོ་རྒྱུ་རེད། སྐུ་གསུང་ཐུགས་རྟེན་དང་ནི་མཆོད་རྫས་རིགས་འདི་ཚོ་ང་འདུག་སའི་རྟ་མགྲིན་ལྷ་ཁང་གི་ནང་ལ་རྟེན་སྐལ་ལ་བཞག་རྒྱུ་ཡིན། ས་ཆ་འདིའི་བོད་མི་རང་གིས་ཐོན་སྐྱེད་བྱས་པའི་སྣུམ་གཙང་མ་འགྱིག་དམ་ལག་བཟུང་གང་ངའི་མཚམས་གྲོ་ལ་ཁུར་འགྲོ། འདིའི་དངུལ་གྱི་དངོས་པོ་ཕྱིར་ལ་ཕུལ་བ་ཐམས་ཅད་པོ་དོ་དམ་ཕྱག་ལས་དགུ་རོང་རིན་པོ་ཆེས་མཛད་དགོས། ད་ཐེངས་འདིའི་སྒྲུབ་པའི་མཎྜལ་དང་། དངོས་འབུལ་རྒྱ་ཆེན་ཆོས་ཕྱིར་གཏོང་བའི་དགེ་རྩ་དང་ནི། ཟབ་ཁྲིད་གདམས་པར་ཉམས་ལེན་གྱིས་བརྩོན་པ་མཛད་པའི་དགེ་རྩ། གཞན་ཡང་དགེ་སྒྲུབ་སྡིག་སྤོང་གི་ཁས་ལེན་སྣ་ཚོགས་པ་བྱེད་པ། ཆོས་ར་འདི་རྡོག་པས་བརྫིས་ཚད། ཐ་ན་མི་ངོ་མ་འདིར་མ་ཐོན་ཡང་དང་ཞིང་དགའ་བའི་སེམས་ཀྱིས་རྗེས་སུ་ཡི་རངས་དང་བཅས་ཏེ་ཐལ་མོ་ཡ་གཅིག་དང་ལག་གིས་ཕྱག་རྒྱ་ཞིག་བཅས་པ་ཚུན་ཆོད་ཆོས་ཚོགས་འདི་དང་འབྲེལ་བའི་དགེ་རྩ་ཅི་ཡོད་དང་། རང་གཞན་སེམས་ཅན་ཐམས་ཅད་ཀྱིས་དུས་གསུམ་ཀུན་ཏུ་བསགས་པའི་ཟག་བཅས་ཀྱི་དགེ་རྩ་དང་། དུས་གསུམ་རྒྱལ་བ་སྲས་དང་བཅས་པའི་ཟག་མེད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་ནས་ཀུན་མཁྱེན་རྒྱལ་བ་ཤཱཀྱ་སེངྒེའི་མདོ་སྔགས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་ཐུགས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་ཐམས་ཅད་ཀྱི་སྐུ་ཚེ་ཞབས་པད་མི་འགྱུར་རྡོ་རྗེའི་ཁྲི་ལ་ཡུན་རིང་དུ་བརྟན། རྨད་བྱུང་ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་འགྲུབ། དེའི་ཐོག་ལ་བསྟན་པའི་གཞི་མ་དགེ་འདུན་འདུས་པའི་སྡེ་ཡིན་དུས། ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་ཡར་ངོའི་ཟླ་བ་ལྟར་གོང་ནས་གོང་དུ་འཕེལ། དེ་དང་མཉམ་དུ་འབྱོར་ལྡན་བསྟན་པའི་སྦྱིན་བདག་ཐམས་ཅད་ཀྱི་མངའ་ཐང་ལོངས་སྤྱོད་རྒྱས། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་ཐམས་ཅད་རྒྱུན་ཆད། ནད་མུག་མཚོན་འཁྲུགས་དང་འབྱུང་བཞིས་འཇིགས་པའི་མིང་ཙམ་ཡང་མེད་པར་ཞི། མདོར་ན་ཡིད་ཅན་འགྲོ་བ་ཐམས་ཅད་ཀྱང་གཞན་ཕན་བྱང་ཆུབ་སེམས་ཀྱིས་རྟག་ཏུ་འཚོ་ཞིང་ཕན་ཚུན་ཕ་མ་དང་སྤུན་སྲིང་ལྟ་བུའི་མཐུན་སེམས་དང་གཅེས་སེམས་ཀྱི་འདུ་ཤེས་ནམ་ཡང་མི་ལྷོད་པའི་ཐོག་ནས། ད་རེས་ཀྱི་ཆོས་ཁྲིད་འདིའི་ཐོག་ལ་དངོས་སུ་ཞུགས་ཚད། ཡི་རང་བྱས་ཚད་དང་བཅས་པའི་མཆོད་ཡོན་ཐམས་ཅད་དང་འབྲེལ་བའི་སྔར་ཤི་རྙིང་པ། ད་ཤི་གསར་བ། ཤི་བོ་ཆོས་མེད་དགེ་མེད། དགེ་བའི་བསགས་རྒྱབ་ཉུང་བ། ཆོས་ཀྱི་ར་མདའ་ཞན་པ། ཤི་བར་དོ་སྐྱབས་མེད་མགོན་མེད་ན་ཆོས་མེད་ལག་སྟོང་ལ་ཡོད་པ་ལ་སོགས་པ་འབྲེལ་ཐོག་ཚེ་འདས་ཕོ་མོ་རྣམས་ཀྱིས་གཙོར་བྱས་པའི་མར་གྱུར་མཐའ་ཡས་པའི་སེམས་ཅན་ཐམས་ཅད་མྱུར་དུ་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོའི་གོ་འཕང་ཐོབ་པའི་ཕྱིར་དུ། གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་འཁོར་གསུམ་ཡོངས་སུ་དག་པའི་བསྔོ་བ། མི་བསྔོ་བའི་བསྔོ་བ་ཆེན་པོ་དམིགས་བྲལ་བསམ་བརྗོད་ལས་འདས་པ་རང་བྱུང་ཀུན་ཏུ་བཟང་པོའི་ཐུགས་ཀློང་ཆོས་དབྱིངས་ཐིག་ལེ་ཉག་གཅིག་ཏུ་བཟླུམས་པའི་རྫོགས་པ་ཆེན་པོའི་ཀློང་དུ་བསྔོ་བ་ཡིན་པས་ན་དེའི་ཐུགས་དམིགས་དང་བཅས་ཏེ་ཞལ་འདོན་ལྷན་དུ་གསུངས་མཛོད། འདིས་མཚོན་དུས་གསུམ་བསགས་པའི་དགེ་རྩ་ཀུན། །དྲན་རིག་ཟག་པ་མེད་པའི་ཡེ་ཤེས་ཀྱིས། །འཁོར་གསུམ་ཡོངས་དག་ཆེན་པོར་རྒྱས་བཏབ་ནས། །གནས་ལུགས་རྫོགས་པ་ཆེན་པོའི་ཀློང་དུ་ཨ།། ཞེས་དལ་ཅིག་མཉམ་པར་བཞག་གོ། རྣམ་དཀར་དགེ་ཚོགས་བསོད་ནམས་སྙིང་པོ་འདི། །དམིགས་མཐའ་བྲལ་བའི་སེམས་ཅན་ཡོངས་ལ་བསྔོ། །ཡང་གསང་རྡོ་རྗེ་ཐེག་པའི་དོན་རྟོགས་ནས། །རིག་བདག་བླ་མའི་གོ་འཕང་མྱུར་ཐོབ་ཤོག །དཔལ་ལྡན་བླ་མའི་སྐུ་ཚེ་རབ་བརྟན་ཞིང་། །བསྟན་པའི་སྦྱིན་བདག་མངའ་ཐང་དར་བ་ཡི། །ཆོས་སྲིད་མི་ནུབ་ནོར་བུའི་རྒྱལ་མཚན་བསྒྲེངས། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཧྲཱིཿ སྔོན་ཚེ་དེ་བཞིན་གཤེགས་པ་གཙུག་ཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རུ། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བ་འདེབས། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ། །བཤད་སྒྲུབ་བསྟན་པའི་མངའ་བདག་འཇིགས་མེད་གླིང་། །མཚུངས་མེད་བླ་མའི་བསྟན་པ་སྲིད་མཐའི་བར། །བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག །དཔལ་ལྡན་མཁས་གྲུབ་བྱེ་བའི་གཙུག་གི་རྒྱན། །མདོ་སྔགས་ལུང་རྟོགས་བསྟན་པའི་ཤིང་རྟ་ཆེ། །འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ། །ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག །གངས་རིའི་ར་བས་སོགས། སྐར་མ་རབ་རིབ་མར་མེ་དང་། །སྒྱུ་མ་ཟིལ་བ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུར། །འདུས་བྱས་ཆོས་རྣམས་དེ་ལྟར་བལྟ།། །།