ངག་འདོན་བྱིན་རླབས་གློག་ཞགས་ཀྱི་བླ་རྣལ་རྒྱས་འགྲེལ་ཡེ་ཤེས་མཆོག་སྩོལ།

ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས།

ཕྱོགས་བཅུའི་སངས་རྒྱས་བྱང་སེམས་བླ་མ་དགོངས།།

དཀོན་མཆོག་གསུམ་ལ་སྙིང་ནས་སྐྱབས་སུ་འཆི།།

སེམས་ཅན་དོན་དུ་བྱང་ཆུབ་སེམས་མཆོག་བསྐྱེད།།

ཕྱག་འཚལ་མཆོད་འབུལ་སྡིག་ལྟུང་ཐམས་ཅད་བཤགས།།

དགེ་ལ་ཡི་རང་ཆོས་འཁོར་བསྐོར་བར་བསྐུལ།།

མི་འདའ་བཞུགས་གསོལ་དགེ་ཀུན་བྱང་ཆུབ་བསྔོ།།

མདུན་མཁར་འདབ་སྟོང་པདྨའི་དབུས་བཞུགས་པའི།།

སྐྱབས་གནས་ཀུན་འདུས་བླ་མ་རྡོ་རྗེ་འཆང་།།

ངོ་བོ་སངས་རྒྱས་ཀུན་དང་དབྱེར་མེད་པ།།

རྣམ་པ་མཚོ་སྐྱེས་རྡོ་རྗེའི་གནས་གསུམ་ལས།།

དཀར་དམར་མཐིང་ཁའི་འོད་འཕྲོས་སྒོ་གསུམ་ཐིམ།།

སླར་ཡང་ཐུགས་ཀའི་འོད་མཐིང་སྙིང་ལ་ཕོག།

སྒྲིབ་དག་དབང་ཐོབ་སྐུ་བཞིའི་ས་བོན་ཐེབས།།

མཐར་ནི་གུ་རུའི་ཐུགས་ཀའི་འོད་དམར་གྱིས།།

དྲངས་ནས་བདག་ཉིད་རྡོ་རྗེ་རྣལ་འབྱོར་མ།།

འོད་དམར་གྱུར་ཏེ་བླ་མའི་ཐུགས་ཀར་ཐིམ།།

ཐུགས་ཡིད་དབྱེར་མེད་ཆོས་སྐུའི་དགོངས་པར་འདྲེས།།

སྟོང་གསལ་མཐའ་དབུས་བྲལ་བའི་ཆོས་ཀྱི་དབྱིངས།།

འཛིན་མེད་འོད་གསལ་རིག་སྟོང་རྗེན་པའི་གཤིས།།

ཡེ་ཤེས་གཅིག་གི་ངོ་བོར་རོ་གཅིག་པའི།།

མ་བཅོས་མཉམ་པ་ཆེན་པོའི་ཀློང་དུ་ཨཿ།།

ཞེས་བརྗོད་གཡོ་མེད་མཉམ་པར་བཞག

ཐུན་མཐར་དཔལ་ལྡན་རྩ་བའི་བླ་མ་སོགས་དང་།

ཆོས་ཉིད་མི་འགྱུར་སྣང་བ་མཐའ་ཡས་ནི།།

འགག་མེད་སྙིང་རྗེར་ལོངས་སྤྱོད་སྤྱན་རས་གཟིགས།།

ཨོ་རྒྱན་པཎ་ཆེན་རྫུས་སྐྱེས་སྤྲུལ་བའི་སྐུ།།

གསོལ་བ་འདེབས་སོ་ནད་གདོན་བར་ཆད་སོལ།།

འཆི་ཁར་གནད་གཅོད་སྡུག་བསྔལ་མི་འབྱུང་ཞིང་།།

ཚེ་འདིའི་སྣང་བ་ནུབ་པར་གྱུར་མ་ཐག།

བདེ་བ་ཅན་དང་རི་བོ་པོ་ཏ་ལ།།

ཟངས་མདོག་དཔལ་གྱི་རི་བོར་སྐྱེ་བར་ཤོག།

ཅེས་ཀུན་མཁྱེན་འཇིགས་གླིང་གི་གསུང་བྱིན་ཅན་ལས་དྲངས་པ་འདི་ཉིད་བཏོན་ལ་མ་ཎི་སིདྡྷི་སོགས་རྒྱུན་གྱི་དགེ་སྦྱོར་དང་ངག་འདོན་རིགས་ལ་འབད་དེ་རྗེས་བསྔོ་སྨོན་ཅི་ཤེས་བརྗོད་ཅེས་ཁྱིམ་ན་གནས་པའི་དགེ་བསྙེན་ཕོ་མོ་ལས་ཁུར་གྱིས་བྲེལ་བ་འགའི་དགོས་མཁོར་ཞོགས་པའི་ཐུན་བར་ཤིག་ལ་བྲིས་ཞེས། པདྨ་སྐལ་བཟང་དེས།

ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས་མའི་ནང་དོན་གནད་བསྡུས།

དེ་ཡང་ལམ་ལོག་པ་ལས་ལྡོག་པའི་ཆེད་དུ་སྐྱབས་འགྲོ་དང་ལམ་དམན་པ་ལས་ལྡོག་པའི་ཆེད་དུ་སེམས་བསྐྱེད། དེའི་སྟེང་ནས་ཚོགས་བསགས་སྒྲིབ་པ་སྦྱངས་བའི་ཐབས་ལ་མེད་དུ་མི་རུང་བ་བསོད་ནམས་ཀྱི་ཚོགས་བསགས་དང་ཡེ་ཤེས་ཀྱི་ཚོགས་གཉིས་རྫོགས་དགོས་པ། དཔེར་ན་ཤིང་རྟ་ཞིག་ལ་ཕང་ལོ་ཉིས་ལྡན་དང་། བྱ་ཞིག་ལ་གཤོག་པ་གཉིས་ལྡན་ན་ནམ་འཕངས་གཅོད་ཐུབ་པ། དེ་ལྟ་བུས་རྣམ་མཁྱེན་རྫོགས་བྱང་གི་ས་ལ་བགྲོད་བྱེད་ཡན་ལག་བདུན་པ། ཚོགས་བསག་སྒྲིབ་པ་སྦྱང་བའི་ལག་རྗེས་ལ་བརྟེན་ནས་རྟོགས་ལྡན་བླ་མའི་དགོངས་བརྒྱུད་ཀྱི་བྱིན་རླབས། རྒྱལ་བ་ཐམས་ཅད་ཀྱི་ཐུགས་དང་གཉིས་སུ་མེད་པ་དེ་ནི་རང་རྒྱུད་ལ་བཙན་ཐབས་སུ་འཕོ་དགོས་པ་སྟེ་གནད་ཡོངས་རྫོགས་དེའི་ནང་ལ་འདུས་པར་བསྟན། དེ་ནས་བླ་མའི་རྣལ་འབྱོར་གསུང་ནས་ཁྱིམ་པ་ཕོ་མོ་ཁྱད་མེད་དུ་སྒོམ་རྒྱག་སྟངས་བསླབས། འོན་ཀྱང་ཆོས་ར་གཅིག་གི་ནང་ནས་ཆོས་མཉམ་པོར་ཉན་རུང་ཉམས་ལེན་ལག་ལེན་སྟེང་ནས་ཐམས་ཅད་གཅིག་འདྲ་ཞིག་ཡོང་དཀའ་བས། ཚེ་འདིར་ལུས་འདིའི་སྟེང་ནས་གྲོལ་བ་རྒྱལ་པོ་ཨིནྡྲ་བྷཱུ་ཏི་འཁོར་ཚོམ་བུ་འབུམ་དང་བཅས་པ་ཐམས་ཅད་ཕྱམས་གཅིག་ལ་གྲོལ་རྒྱུ་དཀའ་རུང་། གལ་ཏེ་ཚེ་འདིར་མ་གྲོལ་ན་བདེ་བ་ཅན་དག་པའི་ཞིང་ཁམས་ཁྱད་པར་ཅན། བདེ་སྐྱིད་ལོངས་སྤྱོད་ཞིང་ཁམས་གཞན་སྟོང་ཕྲག་བརྒྱད་ཅུ་རྩ་གཅིག་གི་བདེ་སྐྱིད་བསྡོམས་ཡོད་ས། སངས་རྒྱས་འོད་དཔག་མེད་ཀྱི་ཐུགས་བསྐྱེད་དང་ནི་སྨོན་ལམ་གྱིས་སོ་སོའི་སྐྱེ་བོ་ཡིན་རུང་སྐྱེས་ཐུབ་པའི་ས་ལ་འདུན་པ་ཡིན་གཅིག་མིན་གཅིག་གཏད་དགོས་པ་ནན་ཆེར་གསུང་ནས། བདེ་བ་ཅན་ལ་སྐྱེས་པའི་རྒྱུ་བཞི་མདོར་ཙམ་གསུངས་མཐར་བསྔོ་བ་དང་སྨོན་ལམ་རྣམ་པར་དག་པས་མཚམས་སྦྱར་བའོ།།

ངག་འདོན་བྱིན་རླབས་གློག་ཞགས་ཀྱི་བླ་རྣལ་རྒྱས་འགྲེལ་ཡེ་ཤེས་མཆོག་སྩོལ་ཞེས་བྱ་བ་བཞུགས་སོ།།

མཆོད་པར་བརྗོད་པ།

ཀ་དག་སྟོང་ཆེན་གཞི་ཀློང་དབྱིངས་ལ་གདོད་ནས་མངོན་པར་སངས་རྒྱས་ཀྱང་།།

རྗེས་ཆགས་འགྲོ་ལ་སྙིང་རྗེ་ཆེན་པོས་གང་འདུལ་གཟུགས་སྐུ་འགགས་པ་མེད།།

ཕུང་ཁམས་སྐྱེ་མཆེད་གཟུགས་སུ་སྣང་ཡང་གཟུང་དང་འཛིན་པ་ཀུན་དང་བྲལ།།

འདི་དང་ཕྱི་མ་བྱང་ཆུབ་བར་དུ་མགོན་པོ་ཁྱོད་བསྟེན་བྱིན་གྱིས་རློབས།།

གང་ཐུགས་ཡེ་ཤེས་ཆོས་སྐུའི་དབྱིངས་སུ་འཁོར་འདས་རོ་མཉམ་གཅིག་ཏུ་རྫོགས།།

རྩལ་སྣང་འགགས་མེད་ལྷུན་གྲུབ་ཀློང་ནས་རབ་འབྱམས་ཞི་ཁྲོའི་སྣང་ཞལ་མཇལ།།

རྩོལ་མེད་རང་བྱུང་རིག་པའི་གཤིས་ལ་སྣང་སྟོང་ཆོས་ཀྱི་ཐ་སྙད་བྲལ།།

རྩོལ་དང་རྟོག་པའི་འཆིང་བ་མེད་ཀྱང་འགྲོ་དོན་ལྷུར་ལེན་ཁྱོད་གཅིག་པུ།།

སྡེ་གསུམ་ཀློང་དགུའི་ཟབ་གསལ་གསང་མཛོད་ཤིན་ཏུ་ཐེག་རྩེའི་རྣལ་འབྱོར་གྱིས།།

ཅོག་བཞག་བཞི་ལྡན་གསང་ལམ་བརྟོལ་ཏེ་འོད་གསལ་ཆོས་སྐུའི་རང་ཞལ་མཇལ།།

སྣང་བཞི་མཐར་ཕྱིན་ཟད་པའི་སར་ཐུག་ཀུན་བཟང་དགོངས་པའི་རྩལ་རྫོགས་པ།།

ངེས་དོན་རྫོགས་ཆེན་སྐལ་བཟང་རྣལ་འབྱོར་འཛམ་གླིང་འཛིན་མའི་ཁྱོན་ལས་རྒྱལ།།

ཀུན་བཟང་དགོངས་པའི་རྩལ་ཆེན་རབ་ཏུ་རྒྱས།།

ཡུལ་སྣང་ཀུན་རྟོག་སྒྱུ་མའི་འཕྲུལ་དུ་གཟིགས།།

རྟོག་ཚོགས་རིག་རྩལ་ཆུ་ཟླའི་སྣང་བར་ཤར།།

རིག་འཛིན་པདྨ་སྐལ་བཟང་འགྲོ་བའི་མགོན།།

ཀུན་རྟོག་གཟུང་འཛིན་སྤྲོས་པའི་རྫུན་རིས་རྣམས།།

ཀ་དག་འོད་གསལ་ཆེན་པོའི་དབྱིངས་སུ་ཞི།།

སྙིགས་ལྔའི་རྒུད་པས་མནར་བའི་འགྲོ་བ་ལ།།

རྣམ་དག་བརྩེ་ཆེན་ཐུགས་ཀྱིས་སྐྱོང་མཛོད་ཅིག།

ཡེ་སྟོང་རྩ་བྲལ་ཁྱ༵བ་གདལ་ཆེན་པོའི་ངོར།།

བད༵ག་གཞན་སྤྲོས་པའི་མཚན་མ་ཉེར་ཞི་ཡང་།།

པད༵་མ༵འི་འདབས་ལྟར་ཡངས་པའི་རིག་པ་ལ།།

ཆོས་ཀུན་རྫོགས་པར་ཤར་བ་སྐ༵ལ་བཟ༵ང་དཔལ།།

གང་ཐུགས་མཁྱེན་བརྩེ་ཆུ་འཛིན་གློག་ཞགས་འཁྲིག།

ཞི་བསིལ་དམ་ཆོས་རྒྱས་འགྲེལ་སྦྲང་ཆར་འཇོ།།

ཡེ་ཤེས་མཆོག་སྩོལ་གདམས་ངག་བདུད་རྩིའི་ཐིགས།།

ཐར་འདོད་སྐྱེ་དགུའི་དོན་དུ་གུས་པས་འབྲི།།

ཉིན་དང་པོའི་ཆོས་ཁྲིད།

སྔོན་དུ་འགྲོ་བའི་གཏམ།

ང་ཚོའི་ཆོས་ར་འདི་ཧ་ཅང་ཆུང་བ་མ་རེད་མོད། འདུས་ཚོགས་ཧ་ཅང་མང་བཞག་དུས་ཤོང་མིན་གྱི་གནས་སྟངས་ལ་མཚམས་རེ་ཐུག་གི་ཡོད་པ་རེད་མོད། ཆོས་ཁྲིད་ཀྱི་སྐབས་སུ་འདུག་དུས་བཙིར་ནས་མི་འདུག་པར་ཅི་ཐུབ་གང་ཐུབ་ཀྱིས་ཐར་ཐར་བྱས་བསྡད་ན་བཟང་རྒྱུ་རེད། ཆོས་ཁྲིད་ཀྱི་སྐབས་ལ་ཐར་ཐར་བཀྲམ་ནས་བསྡད་ན་ངག་བཅད་དང་ཉན་རྒྱུ་ལ་སོགས་པ་སྟབས་བདེ་བའི་དགོས་པ་ལྡན་པ་དགེ་འདུན་པས་མཁྱེན་ནི་རེད། དེས་ན་ཆོས་ར་འདིར་ཞུགས་ནས་བཟུང་སྟེ་སྔོན་གྱི་སྲོལ་བཞིན་ཁྱིམ་པ་ཕོ་མོས་ཞེ་ལ་ངེས་རྒྱུར་སྐད་ཆ་ཚིག་གཅིག་ཀྱང་མི་བཤད་པར་ངག་བཅད་བྱེད་དགོས། ད་སྔ་ད་ཡི་བར་དུ་བཤད་པ་རེད་ད་རེས་མི་བཤད་པར་ཐུན་གཅིག་ལ་སྨྲ་བ་བསྡམས་བཞག་ན། ཆོས་ཚུལ་བཞིན་ཉན་པའི་བསོད་ནམས་རང་ཉིད་ལ་འབྱུང་བས་མི་ཚད་གཞན་གྱི་ཐོས་པ་ལ་གེགས་བྱེད་པའི་ཉེས་པ་འགོག་ཐུབ་པ་རེད། དེའི་མི་ཚད་རང་གི་ཐོས་དོན་བསམ་སྒོམ་ལ་དྲིལ་ཐུབ་རྒྱུའི་གནད་ཀྱི་དོན་སྒོ་ཡང་ལག་ཏུ་ལོན་ཞིང་། ཆོས་རའི་ནང་དུ་ཡོང་ནས་ཆོས་ཞིག་ཉན་པས་ཉན་གོ་ཆོད་པའམ་ཡོང་གོ་ཆོད་པ་ཞིག་རེད་རྒྱུ་རེད། ཚང་མ་དང་འདི་འདྲའི་མཉམ་དུ་འཛོམས་ས་ཞིག་ནས་མ་ཐུག་པར་ལོ་གཅིག་གི་དུས་ཡུན་འགོར་སོང་ན། མྱི་མ་ཤི་བ་རྣམས་ལོ་རེའི་ནང་དུ་ཐེངས་རེར་འདི་ལྟར་ཐུག་ཙམ་རེ་ཡོང་རྒྱུའི་དུས་ཐོག་ཏུ་ཐོན་སོང་དུས། ངོ་མ་ཡིན་ན་འདིར་ཡོད་ཀྱི་མྱི་རེ་རེ་དང་རེ་རེ་བཞིན་དུ་བདེ་སྡུག་གི་ཁ་བརྡ་ཡོང་དགོས་རྒྱུ་ཅན་པོ་ཡིན་ནི་རེད། ས་འདིའི་མྱི་ཐོག་སྔོན་རྗེས་ཚང་མ་སྐྱིད་སྡུག་མཉམ་ཁུར་བྱས་པ་མང་ཆེ་བ་ཡིན་ནི་རེད། ཤོག་ཁག་ཡར་མར་གྱི་མི་ཡིན་རུང་དེ་དང་དེ་མཚུངས་རེད། མིན་རུང་གཞན་འབྲེལ་ཡོད་ཀྱི་ས་ཆ་སོ་སོ་ཐག་རིང་གི་མྱི་སྣ་ཡང་། སྔར་འབྲེལ་ལས་དང་སྨོན་ལམ་ཡོད་པའི་སྟབས་ཀྱིས་ཕྱི་འབྲེལ་ཆོས་དང་དམ་ཚིག་གིས་འདི་བཞིན་དུ་འབྲེལ་ཡོད་པ་རེད་མོད། ད་དུས་ཚོད་ཟེར་བའི་སྲིད་གསུམ་རྔམ་ཟས་སུ་ཟོས་ནས་ཁྱུད་མིད་ལ་གཏོང་འགྲོ་བའི་དུས་ཟེར་རྒྱུའི་དབང་ཆེན་འདིའི་དབང་འོག་ནས། རང་རོགས་ཐམས་ཅད་ཀྱི་མྱི་ཚེའི་དུས་ཚོད་སྐད་ཅིག་སྐར་མའི་ཆ་ཤས་རེ་རེ་བཞིན་དུ་ཟད་འགྲོ་གི་ཡོད་དུས། ད་དོན་ཆེན་རང་གཞན་འདི་ཕྱིའི་བདེ་དོན་རེ་འགྲུབ་རྒྱུའི་གནད་བས་ཆེ་ཞིག་བཤད་ལོངས་དང་ལས་ལོངས་གཉིས་ཀ་མེད་པའི་སྟབས་དང་བསྟུན་ནས། ཚང་མ་ཡོངས་རྫོགས་ལ་ཁམས་བདེའི་འཚམས་འདྲི་གཅིག་གིས་འཐུས་བཞག་རྒྱུ་མི་བྱེད་ཐབས་མེད་ལ་ཁེལ་བ་རེད། འདིར་ཡོད་མང་ཆེ་བ་ས་ཆ་འདིའི་གཏན་སྡོད་ཀྱི་ཡུལ་མི་འབྲོག་རུ་བསོད་ནམས་ལྷ་སྡེའི་སྡེ་ཤོག་ཚོ་བ་བཅུ་གསུམ་གྱི་མི་སྣ་ཡིན་པ་རེད། དེའི་སྟེང་ལ་གདན་ས་ཆོས་འཁོར་འདི་དང་གནའ་ནས་ད་ལྟའི་བར་དུ་འབྲེལ་བའི་ཆོས་བརྒྱུད་གཅིག་པ་ལྟ་བུའི་མི་སྣ་དང་ཤོག་ཁག་སྡེ་འདྲིས་རུ་འདྲིས་ཀྱི་སྡེ་ཤོག་ཡར་མར། དེ་མིན་རིས་མེད་བསྟན་ལ་དད་པའི་མི་སྣ་ས་ཐག་རིང་ལེ་བར་སྟོང་ཚོ་བརྒལ་ནས་ཆེད་གཏད་ཀྱིས་ཡོང་བའི་དད་ལྡན་སེར་སྐྱ་ཕོ་མོ་དང་བཅས་པ་ཡིན་ན། ཆོས་ར་འདིའི་ནང་ལ་ལོ་ལྟར་ཆོལ་གསུམ་བོད་ཀྱི་མི་སྣ་འཛོམས་པའི་མི་གྲངས་སྟོང་ཚོ་ཁྲི་ཚོའི་ཁ་གྲངས་ཅན་འདི་ལྟར་ཚོགས་པ་ཡིན་ན། ད་འདི་བོད་གངས་ཅན་ཆོས་ལྡན་གྱི་ཡུལ་དུ་སྐྱེས་པའི་མྱི། ཕ་ཨ་མྱེ་དང་ཡང་མྱེས་ཀྱི་རིང་ཚུན་ཆད་ལ་ཆོས་ཀྱིས་སྐྱེས་ནས་ཆོས་ཀྱིས་རྒས་པའི་སྲོལ་རྒྱུན་བཟང་བོའི་ཤུལ་བཞག་ཕ་ནོར་ཆང་ལ་མ་བརྗེ་བར། རང་ལ་ཡོད་པའི་རིན་ཐང་ཅན་གྱི་ཆོས་དང་རིག་གཞུང་གི་ནོར་བུ་དེ་རང་གི་ཉར་ཚགས་ཐེངས་ཀྱིན་ཡོད་པ་དང། ཚེ་འདི་ཕྱིའི་རང་གཞན་གཏན་གྱི་འདུན་མ་མ་ཉེས་པར་ཡོད་པའི་རྟག་མཚན་གྱི་ངོ་མཚར་ཞིག་དང་། མྱི་སོ་སོའི་བསམ་པ་མི་གཅིག་བསམ་ལུགས་སྤྱོད་སྟངས་ཁ་ཁ་ཡིན་རུང་། ཚེ་འདི་ཕྱི་གཉིས་ཀྱི་བློ་རྩེ་ཆོས་ལ་དད་ལུགས་གཅིག་པ་ཡིན་པས་ཆོས་གཅིག་གིས་བསྡུས་ཏེ་ཆོས་ར་གཅིག་ལ་མཉམ་དུ་འདི་ལྟར་འཛོམས་ཀྱིན་ཡོད་པ་རེད། འཇིག་རྟེན་ཡང་དག་གི་ལྟ་བར་དད། རྒྱུ་འབྲས་བསླུ་མེད་ཀྱི་རྣམ་བཞག་ཁས་ལེན་པའི་མི་ཡིས་ལས་སྐྱིད་སྡུག་ཡག་ཉེས་བཟང་ངན་གང་བྱུང་ན། དེ་རྒྱུ་མེད་ཀྱི་འབྲས་བུ་ཞིག་མིན་པར་སྔོན་བསགས་ཀྱི་ལས་ཤིག་གི་མཐུ་ཡིན་པར་ཡིད་ཆེས་བྱེད་པ་ཡིན་ན། ད་རང་རེ་ཆོས་ར་གཅིག་ལ་འདི་ལྟར་ཚོགས། ཐེག་ཆེན་མདོ་སྔགས་ཀྱི་ཆོས་དང་འབྲེལ་བའི་ཆོས་གདམས་པ་རེ་འདི་ལྟར་འཆད་ཉན་བྱེད་པ་འདི་ཡང་། སྔར་སྤྱི་མཐུན་གྱི་བསོད་ནམས་ཤིག་མཉམ་དུ་བསགས། ལས་སྨོན་ལམ་གཅིག་གིས་འབྲེལ་བའི་དབང་གིས་མིན་ན་ཅི་ཡིན། དེ་ཡང་ང་ཚོའི་འཇིག་རྟེན་པའི་ཁ་སྐད་ལྟར་ན། ལྷ་ཡུལ་གྱི་དམ་ཚིག་གཅིག། མྱི་ཡུལ་གྱི་འདུན་མ་གཅིག་པས་འདི་བཞིན་མཉམ་དུ་ཆོས་གཅིག་ལ་སྤྱོད་བཞིན་ཡོད་པ་རེད་ཟེར་རྒྱུ་ཅན་པོ་རེད། འདིའི་ཚོགས་གྲལ་ལ་བཞུགས་པའི་མཁན་སྤྲུལ་སྐྱེས་ཆེན་རྣམས་ཀྱི་གཙོས་སྡེ་སྣོད་འཛིན་པའི་བཞུགས་གྲལ་ཡར་ལ་ཕུད་ཤུལ་ནས། མྱི་མང་འདིའི་ནང་ན་ཡང་ཕལ་བའི་ཚུལ་བཟུང་བའི་སངས་རྒྱས་བྱང་སེམས་ཀྱི་སྤྲུལ་བ་མེད་ཟེར་ཤེས་པ་མ་རེད། ཐབས་ལ་མཁས་པའི་འགྲོ་དོན་གང་ལ་གང་འདུལ་གྱི་སྤྲུལ་བསྒྱུར་གྱི་རོལ་གར་ཇི་ལྟར་སྟོན་བཞིན་ཡོད་སུས་ཤེས། གང་ཟག་གི་ཚོད་གང་ཟག་གིས་སུས་ཟིན་མོད། གནས་སྐབས་ཀྱི་སྣང་ཚུལ་ལ་སྐྱ་སེར་གྱི་ཁྱད་ཐང་ཙམ་གྱི་གནས་བབས་དང་། དགེ་འདུན་པ་ཡིན་ན་ཡང་སྐྱེས་སྔ་ཕྱིའི་དུས་རབས་བརྒྱུད་ལན་ཞིག་གིས་ཆོས་ཀྱི་བརྒྱུད་པ་འགའ་རེའི་རྒྱུན་རེ་འབུལ་རྒྱུའི་གོ་སྐབས་བཟང་བོ་ཐོབ་ཀི་བསྡད་པས། ངས་ཡིན་ཡིན་གྱིས་ཁ་མར་འཁོར་ནས། སྔུན་ཐུར་དུ་ཅིག་བཤད་དགོས་རྒྱུ་ཞིག་གི་རྒྱུན་འདྲ་ཞིག་འཇགས་སོང་བ་ཡིན་དུས། དེ་ཡང་ཉིན་ལྟར་བཟང་མདོག་གིས་ད་རེས་ང་མིན་ཟེར་རྒྱུ་འདྲ་འདྲ། ཁྱིམ་པ་ཕོ་མོའི་ཕྱག་མགོ་ཚོར་མི་འདུག་ཁ་བྱེད་ཀྱིན་མེད། མཚམས་རེར་རང་རྒྱུད་ཀྱི་བསླབ་པ་ལ་ཡང་གུས་པའི་རྣམ་འགྱུར་སྟོན་གྱི་ཡོད་པ་རེད། རྫོགས་ཆེན་པདྨ་ཐང་འདི་ནས་ཆོས་དུང་ཞིག་བུས་ནས་ད་ལོ་དང་མྱི་ལོ་བཅུ་གསུམ་གྱི་མི་ཚད་བཅུ་བཞི་རེད་ཀི་ཡོད་ཀི །རང་ལོ་དྲུག་ཅུ་ལོན་དུས་དགོན་སྡེ་འདིའི་བསྟན་དགོན་གྱི་སྒྲིག་ཡིག་ལྟར་དུ་དྲུག་ཅུ་རེ་གཅིག་ཆུ་མོ་ལུག་གི་ལོ་ནས་དོན་གསུམ་ལ་མ་ཐོན་གྱི་བར་ལ་ཆོས་རེ་བཤད་རྒྱུའི་སྐལ་བ་བཟང་པོ། མྱི་ངའི་མིང་དང་དོན་མཚུངས་པའི་སྐལ་བ་བཟང་པོ་ཐོབ་ཀི་བསྡད་པ་དེ། ངའི་རྩ་བའི་བླ་མ་འཇིགས་མེད་ཡོན་ཏན་མགོན་པོ་དང་རྫོགས་སྤྲུལ་དྲུག་པ་འཇིགས་བྲལ་བྱང་ཆུབ་རྡོ་རྗེ། མཁན་ཆེན་ཐུབ་བསྟན་སྙན་གྲགས་ཚང་རྣམ་པ་གསུམ་གྱི་ཐུགས་བསྐྱེད་སྨོན་ལམ་གྱི་མཐུ་ཡིན། གནའ་མྱི་འདིའི་ཁ་བརྡ་བཤད་དུས་གནའ་གཏམ་དང་འབྲེལ་ནས་རང་ཤུགས་ཀྱིས་བཤད་པ་རེད། ངས་ནམ་ཡིན་ན་བཤད་ཀི་འདུག་རྒྱུའི་གནའ་དུས་རབས་སྔོན་མའི་དུས་སྐེད་ཀྱི་ང་དགུའི་དུས་འགྱུར་ཆེན་མོ་ཟེར་བ་ཚེས་རན་ཁའི་ཡར་སྔོན། བསྟན་དགོན་ཉམས་ཉེས་སུ་འགྲོ་རན་ཁར། སྡེ་དགེའི་བཙོན་ཁང་ལ་མ་དེད་པའི་ཉི་མ་ཁ་ཤས་ཀྱི་སྔོན་ལ། འཇིགས་བྲལ་བྱང་ཆུབ་རྡོ་རྗེ་ཚང་གིས། དེ་རིང་ནི་ཐུགས་ཁོང་ལ་མ་གཏད་པར་འདི་ལ་གཏོད་གསུངས་ནས་རྣམ་པ་གསུམ་པོས་སྐྱ་མོའི་མདུན་ལུང་ཁའི་མཁན་པོ་ཐུབ་སྙན་ཚང་གི་གཟིམ་ཁང་གི་ནང་ནས། ལོ་བཅོ་ལྔ་ཅན་གྱི་མྱི་ང་ལ་ཚེ་དབང་ལོ་གྲངས་ཞིག་བསྐུར་བཞག་ཐལ། ངས་དེང་སང་བསམ་བློ་གཞི་གཏོང་བྱེད་དུས་ང་ལ་མཚོན་ན་བླ་བརྒྱུད་མི་བརྒྱུད་གང་ཐད་ནས་བསམ་ན་ཚེ་འཕྲང་སྲི་གེགས་མེད་པ་ཞིག་མིན་མོད། ཁོང་རྣམས་ནི་དབང་བཅུ་ཐོབ་པའི་སྐྱེས་ཆེན་ཏག་ཏག་རེད། ཁོང་རྣམ་པའི་སྐུ་ཚེའི་ལྷག་མ་ང་ལ་བསྟིམས་མཛད་ཨེ་བཏང་ཟིག་གོ་བསམ་གིན་ཡོད། དེ་ཡང་རྒས་ཕྱིན་རྒས་ན་ལུས་ཁམས་ཇེ་བདེ་ཡིན་པ་ཞིག་མི་སྲིད་མོད་དེ། ཆོས་འདི་བཤད་པ་ཚུན་ཆད་དུ་འབྱུང་ཁམས་བདེ་ཐང་ཡིན་པས་ཇེ་དགའ་རེད། འདི་ལ་བལྟས་ན་དེ་དུས་ཐུགས་དགོངས་གཏད་རྒྱུ་དེ་མན་ངག་ཟབ་ཁྲིད་ཀྱི་རྒྱུན་རེ་སྤེལ་རྒྱུའི་གོ་ཞིག ཆོད་ཀི་དགོངས་པ་ཡིན་ས་རེད་བསམ་ནས་རང་གིས་རང་ལ་སྤོབས་པ་དང་སྤྲོ་སྣང་བསྐྱེད་བཞིན་ཡོད། ད་རུང་ཨ་བུ་ལྷ་སྒང་ཚང་གིས་སྔོན་རྗེས་ཀྱི་གསུངས་ཞལ་ཆེམས་དེ་ཚོ་རེ་རེ་དྲན་དུས་སྙིང་སྟོབས་ཀྱི་ཤུགས་རེ་རང་གི་སྙིང་དབུས་ནས་དད་མོས་དང་མཉམ་དུ་སད་ཐུབ་པ་རེད། ང་ཕོ་ལོ་བཅོ་ལྔ་བཅུ་དྲུག་གི་སྟེང་ནས་བསྐལ་བ་རྟ་རྒོད་ཀྱི་འགྲེ་ལོག་ཡོང་། དུས་འགྱུར་ཡོ་ལང་གི་ཁུགས་སོ་ཚེས་པ་རེད། དེའི་སྐབས་ཁེར་འཁྱར་ལ་ལུས་པ་རེད། ཁེར་འཁྱར་ལ་ལུས་ན་མགོ་རྡོ་ལོག་གིས་བརྡུང་ནའང་མ་ཤི་བར་ལྷག་སོང་བ་རེད། དུས་བསྐལ་བ་ཅུང་ཟད་ཇེ་བཟང་ལ་སོང་བ་ཚུན་ཆད་ནས། དེ་དུས་ཀྱི་ཁ་ཡ་ན་ཟླའི་རྒན་རབས་པ་རྣམས། ད་དེང་སང་བལྟས་ན་ཅང་ལྷག་མེད་ཀི་མོད། དེ་དུས་ཀྱི་བྱིས་པ་རྣམས་ཀྱིས་མི་ཚད་དེ་དག་གི་བྱིས་པ་རྣམས་ཀྱང་ད་རྒས་ས་ལ་ཐོན་ཡོང་དུས་རང་སྡེའི་མི་ཡིན་རུང་གཅིག་ངོ་གཅིག་གིས་མི་ཤེས་ས་ཐོན་པ་རེད་མོད། དེ་ལྟར་ཡིན་དུས་ངའི་མི་ཐོག་སྔོན་མའི་གང་ལ་ལས་ཀྱིས་བསྐོས་པའི་གདན་ས་ཆོས་འཁོར་འདིའི་བསྟན་པ་འཇིག་ཤུལ་དུ། ས་ར་རྡོ་ཁང་ལས་ས་ནས་འགོ་བཙུགས་ཏེ་འདི་སྔ་འགྱུར་བསྟན་པའི་ཆུ་འགོ་གནད་ཆེན་ཞིག་རེད། ཁྱད་པར་དུ་མདོ་ཁམས་སྨད་ཕྱོགས་ནས་བསམ་བློ་བཏང་ན་འདུལ་བསྟན་དར་བའི་ལྟེ་གནས་ཡིན་ན་སངས་རྒྱས་བསྟན་པའི་གཞི་མ་དམ་ཆོས་འདུལ་བ་ཡིན་ནི་རེད། བཤད་སྒྲུབ་ཐུན་མོང་མ་ཡིན་པའི་རྒྱུན་བཞུགས་ས་ཡང་འདི་རེད་བསམ། ད་འདི་མ་ཉམས་པར་རྐང་ཞིག་ཚུགས་དུས་ཡོངས་རྫོགས་བསྟན་པའི་ཆ་ཤས་ཆེ་བ་ཞིག་མ་ཉམས་པ་རེད། འདི་བཞིན་དུ་རང་སྐལ་གྱི་ལས་སྒོ་རེ་ཐམས་ཅད་ཀྱིས་འགྲུབ་ཡོང་ན་ཡོངས་རྫོགས་བསྟན་པའི་མངའ་ཐང་ཁྱོན་ཡོངས་ནས་དར་ཞིང་རྒྱས་པ་རེད་བསམ་ནས། མྱི་ཤུལ་དུ་མྱི་བསྡད་པའི་དོན་སྒོ་འདྲ་བོ། ཕ་ཤུལ་བུ་ཡིས་མ་ཟིན་རུང་ཕ་མཚེར་དུ་བ་ལང་ལོང་ཆད་མི་ཉན་པར་བསམ་ནས། ངེད་ཤི་འཕྲོ་ལྷག་དུམ་གྱི་ནང་ནས་དེ་དུས་རྫོགས་ཆེན་ཀུན་འབྲུག་གཉིས་ཀ་དགུང་ལོ་ཆེ་བ་རེད། ཁོང་རྣམ་པ་ཡར་གཙོ་བོ་ཀླད་ནས་བཞུགས་སའི་སྟེང་ནས་ང་ཚོས་ས་ར་རྡོ་ཁང་གི་རྟེན་གཞི་མཛུབ་མོས་འཛུགས་ས་འདྲ་རེ་འཛུགས་རྒྱུ་དང་། དཔལ་གྱི་སེང་གེ་རིའི་ཆོས་གྲྭའི་འཆད་ཉན་གྱི་རྒྱུན་རེ་བསྐྱར་གསོ་རྒྱ་བསྐྱེད་བྱེད་རྒྱུ་དེ་འདྲའི་བྱ་བའི་གཙོ་བྱས་ནས། དགོན་མ་ལག་ཆོས་བརྒྱུད་དང་བཅས་པར་འབྲེལ་བའི་བྱ་བཞག་དེ་ལོ་ནས་ལོ་མཐུད་དེ། ལོ་ཉུང་ལུས་སྟོབས་དར་བའི་དུས་ཚོད་དེ་དུས་ངན་གྱི་ནང་ནས་ས་རྡོ་གཉིས་ཀྱི་ངལ་རྩོལ་བསྒྱུར་བཀོད་ཀྱི་འཕྲོ་ནས་དེ་ལ་བུད་སོང་བ་རེད། དེ་ནས་ས་འདིའི་ལྷག་བསམ་ཅན་གྱི་སེར་སྐྱ་མང་ཚོགས་ཀྱི་སྟོབས་ཤུགས་དང་བཅས་ཏེ་རྟེན་གཞི་བཞེངས་བསྐྲུན་གནས་དུས་དང་མཐུན་པ་ཞིག རེད་ཞོར་མི་རེད་ཞོར་ལ་དོན་གྱི་བསྟན་པའི་མདོ་ཕྱོགས་ཀྱི་བཤད་རྒྱུན་མ་ནུབ་པ་ཞིག་ཚུགས་ཐལ་ཟེར་དགོས་པ་རེད། དུས་དེང་སང་འདི་རྣམ་པའི་ཕྱག་ལ་མ་ཐོན་གྱི་བར་དུ་མི་ལོ་བཅུ་ཕྲག་ཁ་གྲངས་ཅན་ལ་ཆོས་དུང་མ་ཆད་པ་རེད། བསྟན་འཛིན་གྱི་སྐྱེས་བུ་མ་མང་མི་ཉུང་། དགོན་མ་ལག་དང་བཅས་པར་ད་ལྟའི་སྐབས་ལ་མཁན་སྤྲུལ་དྲག་གྲས་ག་ཚོད་ཡོད་ན། མང་ཆེ་བ་མ་ཡུམ་ཆོས་གྲྭ་ཆེན་མོའི་ཐོག་དང་བོའི་སློབ་གྲྭ་དེ་ནས་བུད་ནི་ཏག་ཏག་ཡིན། དེ་ལྟར་ཡིན་དུས་མདོ་ཕྱོགས་ཀྱི་བཤད་རྒྱུན་ཞིག་དེའི་ཚུགས་སོང་བ་རེད། ད་སྔགས་ཕྱོགས་དང་ནི་ཁྱད་པར་དུ་རྫོགས་པ་ཆེན་པོའི་ཐུན་མིན་གྱི་ཆོས་རྒྱུན་འདིའི་གདམས་ཁྲིད་ཀྱི་རྒྱུན་སྤེལ་རྒྱུ་གལ་ཆེན་ལ་ཐུག་ཡོང་དུས། ངའི་ཆོས་གྲོགས་རྒན་པ་རྟོགས་ལྡན་བླ་མ་བློ་གྲོས་རྒྱ་མཚོ་ཚང་ལ་ཁྱེད་བྱོན་ཤོག་ཁྲིད་རྒྱུན་ཞིག་སྤེལ་དགོས་ཞུས་ཏེ། ངས་ཁོང་ལ་ཡི་གེ་མང་བོ་བསྐུར་བསྡད་པ་དེང་སང་ངའི་རྩོམ་ཡིག་དེབ་ཀྱི་ནང་ན་ཡོད་པ་དེ་ཚོ་ཡིན། ཁོང་བྱོན་ཡོང་ནས་མི་ལོ་བཞི་ལ་རྫོགས་པ་ཆེན་པོའི་གདམས་ཁྲིད་གསུངས་པ་རེད། ཁྱེད་ཀྱིས་དེའི་སྔོན་ལ་མ་གསུང་བ་ཞེས་ང་ལ་འཁང་རའང་ཅི་མང་མཛད་སོང་། དེ་ནས་ཁོང་དགོངས་པ་རྫོགས་པ་དེ་ནས་བཟུང་སྟེ་ད་ལྟའི་བར་དུ་ངས་ཁྲིད་རྒྱུན་རེ་སྤེལ་བ་ཡིན། ཁྱད་པར་དུ་བླ་མ་ཡང་ཏིག་འདི་ཚོ་ཆིག་བརྒྱུད་དམ། མང་དུས་ཡིན་ན་སློབ་མ་བདུན་གྱི་ཡན་ན་ངའི་བླ་མས་སྤྱིར་བཏང་གསུང་དར་མ་རེད། བླ་མ་རྟོགས་ལྡན་ཚང་དེ་དུས་འདིར་བྱོན་དུས་བླ་མ་ཡང་ཏིག་དང་རྒྱུད་བཅུ་བདུན་ཡིན་ན་མིན་ན་གསུང་དགོས་ཞེས་ཞུས་བསྡད་དུས། ཁོང་གིས་ཇི་ལྟར་སློབ་མ་ཇི་ཙམ་ལ་གསུང་ཞེས་ང་ལ་དྲི་བ་མཛད་ཐལ། དེ་ལ་ངས་དེང་སང་ཆོས་རྒྱུན་ཆད་ལ་ཉེ་བའི་དུས་ཚོད་ཡིན་པས། དུས་ཚོད་ད་རུང་བཟང་ངན་ཅི་འདྲ་ཡོང་ཅི་ཤེས། གཅིག་ཤི་ཀུན་རྫོགས་རེད་དུས་མི་བཟང་། དུས་ཀྱི་འགྱུར་བ་མིན་རུང་གང་ཟག་རེ་རེའི་ངོས་ནས་འགལ་རྐྱེན་སྣ་ཚོགས་དང་འཕྲད་རྒྱུ་ཡོད་ན། ང་ཚོའི་ཆོས་བརྒྱུད་ཀྱི་ཆོས་སྒོའི་བཀའ་རྒྱ་དམ་པ་རེད་མོད། སློབ་མ་མཁན་སྤྲུལ་ཉི་ཤུ་རྩ་གཅིག་ལ་གསུང་དགོས་ཞུས་པས། ཁོང་གིས་རྫོགས་ཆེན་ཚང་རང་གི་བཀའ་ཡིན་ཞེས་གསུངས་པ་རེད། ངས་ཀྱང་དེ་བཞིན་དུ་བླ་མ་ཡང་ཏིག་ཡིད་བཞིན་ནོར་བུ་འདི་ད་ལོ་རེར་ཐེངས་རེར་མ་མཐར་བྱས་ནས་འདོན་ཆག་ཡིན། ཐེངས་རེར་འདུས་པའི་ཞལ་གྲངས་ཉི་ཤུ་རྩ་གཅིག་རེ་ལ་འདོན་བཞིན་ཡོད། ཡེ་ཤེས་བླ་མ་འདི་རྟེན་རབ་སྔགས་གང་ཡིན་གྱི་དགེ་འདུན་གྱི་སྡེར་ཞུགས་པའི་དམ་ཚིག་ལ་སེལ་དང་ཉམས་ཆགས་མ་སོང་བ། ཀློག་པ་ཐོས་བསམ་པ་འཆད་ཉན་མཛད་བཞིན་པའི་སྒང་ཅན་འདྲ་མིན་ན། འབུམ་ལྔའི་བསགས་སྦྱངས་སྔོན་སོང་ཅན་ཐམས་ཅད་པོ་མ་འོངས་ལོ་གསུམ་གྱི་ཁྲིད་སྦྱངས་ཟླ་མཚམས་ལ་བཞུགས་ངེས། དེ་ཡང་དམ་བཅའ་དང་ལྡན་པ་དགོས་རྒྱུ། ཐོབ་མི་ཐོབ་ཀྱི་ས་མཚམས་དེ་འདྲ་ཡིན་ཞེས་བཤད་པ་རེད། དེང་སང་ཕལ་ཆེ་བ་སློབ་ཚོགས་སྟོང་ཕྲག་ལྷག་ཡོད་དུས་ཏག་ཏག་རེད་མོད། ད་གསན་མཁན་ཚོའི་ནང་ནས་མང་ཆེ་བའི་དམ་བཅའ་ཚད་ལྡན་རེད་ཀྱི་ཡོད་ཅན་པོ་རེད། དེ་འཕྲོར་པདྨ་ཐང་འདི་ན་ཡོད་པའི་རྒྱུན་བཞུགས་ཀྱི་ཉིན་སྲིབ་ཇོ་སེར་མཚམས་པ་ལ་མཚོན་ན། ལོ་རེའི་ཕྱེད་ཞག་བརྒྱ་གཉིས་སྔོན་འགྲོ་དངོས་གཞི་གཉིས་ཀའི་མཚམས་ལ་བཞུགས་པ། ཆོས་ཁྲིད་དང་ཚོགས་འཛུགས་སོགས་ཀྱི་དབྱར་ཆོས་ཞག་བརྒྱ་གཅིག་གི་རྩིས་འདེབས་ལོ་གཅིག་གི་ཞག་པོ་སུམ་བརྒྱ་དེ་ལྟར་སོང་ནས། དེའི་ཤུལ་གྱི་ཞག་མ་དྲུག་ཅུ་དེ་གུང་གསེང་བྱས་ནས་བསྡད་ན། ལོ་སར་ཉི་མ་ཁ་ཤས་ཀྱི་ངལ་གསོ་མིན་པ་ལོ་འཁོར་མོ་གཅིག་ལ་ཆོས་མཛད་ཀྱིས་རྒྱུན་འདའ་རྒྱུའི་འཆར་འགོད་དེ་འདྲ་ཡིན། ས་ཆ་འདི་ལ་ཐོན་བཞག་དུས། ས་དེའི་ཁོར་ཡུག་གི་གནས་ཚུལ་དང་བསྟུན་པའི་རྒྱབ་ལྗོངས་ཤིག་རང་ཤུགས་ཀྱི་མཐོང་ཐོས་མྱོང་ཚོར་ཡོང་བ་ཡིན་པས་ན་དེ་ལྟར་བཤད་པ་ཡིན། གདན་ས་ཆོས་འཁོར་ཆེན་པོའི་ཉེ་འཁྲིས་ཡིན་མིན་མེད་པར། ཆོས་སྐལ་མེད་ན་རྒྱ་མཚོ་ཆེན་པོའི་འགྲམ་ནས་ཁ་སྐོམ་ནས་ཤི་བའི་དཔེ་ཡོད་པ་རེད། དེ་བས་སྡེ་མང་ཚོགས་འདི་དང་སྐྱིད་སྡུག་མཉམ་མྱོང་བྱས་དྲག་པས་འདི་རྣམས་ཀྱི་བདེ་སྡུག་ཆ་ཚང་ཤེས་པ་རེད། དགོན་ཚུགས་ཞིག་འཛིན་ཆོག་ཚུན་ཆད་ནས་བླ་རྒན་རྣམ་པ་དཀོར་གྱིས་བརྒྱག་ནས་ངོ་ཚོ་མི་ཤེས་པར་འདུག་ཁུལ་བྱས་པ་དེ་འོས་མེད་རེད་སྙམ་ནས། ཡི་གེའི་ཤོག་མཐའ་རེར་རེག་མྱོང་དང་མ་མྱོང་གི་ཁྱད་པར་རེ་ཡོད་སྲིད་པས་ཁྱེད་ཚོ་ཤོག་དང་ང་ཚོའི་ཞིང་སྒྲུབ་འཚོགས། ཞིང་ཁྲིད་བཤད། མྱི་རྒྱུ་ཆོས་གསུམ་རང་ལ་ཡོད། མགོ་རང་ལ་ཡོད་དུས་ལྕེ་གཞན་ལ་གཡར་རྩ་བ་ནས་མི་དགོས་པར་ཆོས་ལུང་དཀར་པོ་རང་གིས་བྱེད་འཇོག དུས་སྙིགས་མ་ཡིན་རུང་སངས་རྒྱས་ཀྱི་བསྟན་པ་ངོ་མ་སྤྲིན་བར་ཉི་མའི་གསལ་མཐོང་མགོ་གང་མ་ཞིག་རང་གིས་ཤར་ཁ་བཞག་གཏོང་ཞེས་བཤད་ནས། ང་ཚོའི་ཞིང་སྒྲུབ་ཞིང་ཁྲིད་སོགས་ཀྱི་ཆོས་ཁྲིད་དང་སྦྲགས་མ་བྱས་ནས་འཚོགས་པ་ད་ལོའི་འདི་ཐེངས་དགུ་བ་རེད།།

ད་ཁྱིམ་པ་ཕོ་མོ་ཡིན་རུང་མྱི་རེད། སངས་རྒྱས་ཀྱི་གོ་འཕང་བླ་མ་གྲྭ་བ་མིན་རུང་ཐོབ་དགོས། གཞི་རྒྱུད་བདེ་གཤེགས་སྙིང་པོས་ཐམས་ཅད་ཀུན་ལ་ཁྱབ་པས་ན་སུས་བསྒོམ་ན་དེ་སངས་རྒྱས་རེད། ཚེ་ཕྱི་མ་རང་གཞན་སེམས་ཅན་ཐམས་ཅད་ཀྱི་མཐར་ཐུག་གི་དོན་ཆེན་སྒྲུབ་པའི་ཆོས་དགོས་པ་དང་། དེ་མ་ཐོབ་ཀྱི་སྔོན་དུ་ཚེ་འདིའི་རྐྱེན་དང་བར་ཆད་སེལ། བསམ་དོན་ལམ་དུ་འགྲོ། ཚེ་བསོད་ནམས་ལོངས་སྤྱོད་འབྱོར་བ་འཕེལ་རྒྱུ་ལ་ཡང་ཆོས་དགོས་པ་རེད། རྣམ་དཀར་གྱི་དགེ་བ་ལུས་ངག་གཉིས་ཀྱིས་སྒྲུབ་ན་བཟང་རུང་། སེམས་ཀྱིས་སྒྲུབ་ཤེས་ན་དེ་བས་ཀྱང་ཆོད་ཆེ་བ་ཡིན་པ། དཔེ་ཆག་བཞག་ན་ཟས་ཟོས་པ་ཁ་ཡི་བྲོ་བ་མྱངས་རྒྱུ་རྐྱང་པའི་ཆེད་དུ་མ་ཡིན་པར། གཙོ་ཆེ་བ་ལྟོ་ཕོ་བའི་ནང་དུ་བབས་ནས་ལུས་ཀྱི་འཚོ་བཅུད་ལ་ཡོང་དགོས་པ། དེ་བཞིན་དུ་ཆོས་ཁ་ནས་བཤད་པ་དང་ནི་རྣ་ཅོག་རྐྱང་བས་ཉན་པས་བེད་མ་ཆོད་པ་རེད། སེམས་ཀྱི་བཅུད་ལ་བབས་ནས་ཉམས་ལེན་རང་རྒྱུད་དང་སྦྱར་ཤེས་དུས་དེ་དུས་ཕན་ཞིག་ཐོག་གི་ཡོད་པ་རེད། སེམས་དང་ཆོས་འདྲེས་ནས་ཆོས་ཀྱིས་རང་རྒྱུད་དུལ། བསམ་སྤྱོད་ཆོས་དང་མཐུན་པའམ་བསམ་སྤྱོད་ཆོས་དང་མི་འགལ་བ་ཞིག་རེད་དུས། མྱི་དེའི་བསམ་སྤྱོད་གཉིས་ཀ་བཟང་པོའི་ཕྱོགས་སུ་འགྱུར། མྱི་བཟང་ཡ་རབས་ཡོན་ཏན་ཅན་རེད། ཚེ་འདི་ཕྱི་གཉི་གའི་རྒྱང་མིག་རིག་པའི་མྱི་དེ་འདྲ་རེ་རེ་ཡོད་ནའང་ཡུལ་གྱི་རྒྱན་རེད་བསམ་རྒྱུའི་ཀུན་གྱི་སྨོན་སའི་ཡུལ་དུ་གྱུར་དུས་ཆོས་སྒྲུབ་གོ་ཆོད་ཡོང་གི་ཡོད་པ་རེད། མཐོ་རིས་ལྷ་མིའི་གནས་སུ་སྐྱེས་ཏེ་འཇིག་རྟེན་མྱི་ལུས་ཤིག་བླངས་ཡོད་པ་རེད། ཁྱིམ་པ་ཕོ་མོར་རྒྱུ་ཕྱུག་དགོས། བུ་ནོར་ལོངས་སྤྱོད་འཛོམས་དགོས། །མྱི་རྒྱུ་ཆོས་གསུམ་པོ་དགོས་པ་རེད། ཆོས་ནོར་འདོད་དང་ཐར་བ་བཞི་པོའི་མིང་ལ་ཕུན་ཚོགས་སྡེ་བཞི་ཟེར་བ་ཡིན། ཕུན་ཚོགས་སྡེ་བཞི་བོ་དེ་མ་འཛོམས་དུས་མངོན་མཐོའི་འབྱོར་བ་ཚོགས་པའི་མིང་ཡོད་པ་མ་རེད། མྱིས་རང་སྟོབས་ཀྱིས་སྒྲུབ་མི་ཐུབ་པ་ཚང་མ་བསོད་ནམས་ཀྱི་ཚོགས་བཟང་པོ་ཆོས་སྒྲུབ་པ་ལ་བསྟེན་ནས་འགྲུབ་དགོས་དུས། ཆོས་ངོ་མ་སྒྲུབ་ལུགས་ཤེས་རྒྱུ་དེ་ཚེ་ཕྱི་མའི་དོན་གྱིས་མི་ཚད་ཚེ་འདིའི་བདེ་ཐབས་སྐྱིད་ཐབས་ལ་མེད་ཐབས་མེད་པ་རེད། ཆོས་སྒྲུབ་རྒྱུ་དེ་ནི་འཚོ་བའི་ཆ་ཤས་གལ་ཆེན་མེད་མི་རུང་བ། མི་དང་དུད་འགྲོ་གཉིས་ཀའི་ཁྱད་པར་འབྱེད་བྱེད་ཀྱང་དེ་ལ་ཐུག་ཡོད་པས་ན། ང་ཚོ་ལོ་རེའི་ནང་ལ་ཐེངས་རེར་འདི་ལྟར་བྱས་ནས་འདུག་ཙམ་རེ་བྱས་ཏེ་ཆུ་ཚོད་རེ་ཙམ་ལ་ཁ་བརྡ་རེ་བྱེད་རྒྱུའི་གོ་སྐབས་ཐོབ་པ་དེ་ནི་ཆོས་ཕྱོགས་ཀྱི་གླེང་མོལ་ལམ། ཚེ་འདི་ཕྱི་གཉིས་ཀའི་སྐྱིད་སྡུག་གི་གྲོས་འགོ་རེ་འདོན་རྒྱུའི་ཕྱོགས་ལ་དམིགས་ཡུལ་གཏད་པ་ཡིན་ན། ཆོས་འཇིག་རྟེན་གཉིས་ཀའི་དོན་བྱ་བ་གང་བསྒྲུབ་ན་ཡང་། མི་མགོ་བསྐོར་བྱེད་ཙམ་གྱིས་མི་ཆོག་པར་སྒྲུབ་ན་སྒྲུབ་པ་འདྲ་ཞིག་གིས་འགྲུབ་ནི་ཞིག་དགོས་པས་ན། ཆོས་སྒྲུབ་དུས་ཆོས་ངོ་མ་སྒྲུབ་སྒྲུབ་བྱེད་དགོས་པ་རེད། ཆོས་བཤད་དུས་ཀྱང་དེ་བཞིན་དུ་ཆོས་ངོ་མ་བཤད་བཤད་བྱེད་དགོས་པ་རེད། ད་སངས་རྒྱས་བཅོམ་ལྡན་འདས་ཀྱིས་སྐྱེས་བུ་ཆུང་འབྲིང་ཆེ་གསུམ་གྱི་བློ་རིམ་དང་བསྟུན་ནས་ཆོས་ཀྱི་འཁོར་ལོ་བསྐོར་བ་རེད། སོར་བྱང་སྔགས་གསུམ་གྱི་ལམ་གྱི་རིམ་པ་ཡང་དེ་ལས་བྱུང་བ་ཡིན་ན། དེ་བས་ང་ཚོ་ཐེག་ཆེན་མདོ་སྔགས་ཀྱི་ཆོས་སྒོར་ཞུགས་པ་ཙམ་གྱིས་ཐམས་ཅད་ཡར་ལྡན་དུ་ཚང་བ། ཐུབ་པའི་བསྟན་པ་རིན་པོ་ཆེའི་ཐེག་པ་རིམ་ཞུགས་ཀྱི་སྐས་ཐེམ་དང་པོ་ནས་གཉིས་པ་ལ་སོགས་པའི་རིམ་པ་བརྒྱུད་ནས་མཐར་ཁང་ཐོག་ལ་ཐོན་སོང་བ་བཞིན། མགོ་རྔ་ཆ་ཚང་དགོས་རྒྱུའི་གནད་དང་བསྟུན་ཏེ། ང་ཚོས་ཀྱང་ལོ་ལྟར་སྐྱབས་འགྲོའི་རྨང་གཞི་བྱས་ནས། དགེ་བསྙེན་གྱི་སྡོམ་པ་སྦྱིན་གྱིན་ཡོད་པ་རེད། འདིའི་ནང་གི་མང་ཆེ་བ་སྐྱབས་གསུམ་འཛིན་པའི་རྨང་གཞིར་བྱས་པའི་དགེ་བསྙེན་གྱི་སྡོམ་པ་མ་བླངས་པ་ཕལ་ཆེར་མེད་པ་ཙམ་ཡིན། དེ་ཡང་བསམ་པ་སེམས་བསྐྱེད་དང་སྦྲེལ་ཏེ་བླངས་པ་ཡིན་པས་ཐེག་ཆེན་སོ་ཐར་གྱི་སྡོམ་ལྡན་ཡིན། བྱང་ཆུབ་སེམས་བསྐྱེད་འབོག་ནས་སྨོན་པ་བྱང་ཆུབ་མཆོག་ཏུ་ཁས་བླངས་ཞིང་དེའི་བསླབ་བྱ་ལ་ཡང་སློབ་བཞིན་པ། བྱང་ཆུབ་སེམས་སྡོམ་ཡང་ཐོབ་ལ་མ་ཉམས་པ་ཡོད་པའི་དབང་དུ་བྱས། སྔགས་ཕྱི་ནང་གཉིས་ཀའི་དཀྱིལ་འཁོར་ལ་ཞུགས་ནས་དབང་མ་ཞུས་མ་ཐོབ་བསམ་པ་ཅི་ཡོད། སྔགས་ཀྱི་དམ་ཚིག་སྲུང་རྒྱུ་དེ་དབང་དུས་སུ་ཁས་བླངས་པ་ཡིན་དུས། སོར་བྱང་སྔགས་གསུམ་གྱི་ཐད་ནས་ཐོབ་དགོས་རྒྱུ་མང་པོ་ཐོབ། སྨིན་བྱེད་དབང་གིས་ཀྱང་རྒྱུད་སྨིན་པར་བྱས་པ་ལ་ཆགས་བཞག་ནས། ད་གྲོལ་བྱེད་ཀྱི་ཁྲིད་ཀྱིས་སྨིན་པ་དེ་གྲོལ་བར་བྱེད་དགོས་པ་ཡིན་དུས། ད་སྐབས་རང་རེ་ལ་མཚོན་ན་ས་རྫོགས་ཆེན་གྱི་ས་ཐོག་རེད། མྱི་རྫོགས་ཆེན་པ་མང་ཆེ་བ་རེད། དེ་དང་འབྲེལ་བའི་གང་ཟག་ཡང་ཡོད་པ་རེད། ཆོས་རྫོགས་པ་ཆེན་པོའི་ཆོས་བརྒྱུད་རང་རྐང་གི་ཉམས་ལེན། ཞེ་ལ་བཟུང་རྒྱུའི་ཚིག་ཅིག་དང་རུམ་ལ་བཅུག་རྒྱུའི་གྲོ་ཞིག ད་ཐེངས་ཉི་མ་བཞི་ལ་ཆོས་ཞུ་རུ་སོང་ནས་ཡོང་སྒོ་རེ་འདི་ཡོད་ཐལ་བསམ་པས། ས་གར་སོང་ཟེར་ན་འདིར་སོང་དང་དོན་ཅི་ཆོད་ཅེ་ན་འདི་ཆོད་ཞིག་ཡོད་དགོས་པ་རེད། རབ་ཡིན་ན་ཚེ་གཅིག་གཏན་གྱི་འདུན་མ། མྱི་ཚེ་གཅིག་ལ་བརྒྱུག་བསྡད་པའི་ཡོང་སྒོ་ལས་དགའ། མྱི་ལུས་བླངས་པས་དོན་གོ་ཆེན་པོ་ཞིག་དེ་རིང་ཆོད་ཐལ་བསམ་པ་ཞིག འབྲིང་ཡིན་ན་རྐྱེན་ངན་བར་ཆད་ཀྱི་རུ་འཛིང་། དཀའ་སྡུག་སྣ་ཚོགས་ཐོག་ལ་བབས་དུས་བྱིའུ་ཕྲུག་ལ་རྡོས་ཕོག་པ་འདྲ་འདྲ་རེད་མི་འགྲོ་བར། ཆོས་ལ་བརྟེན་ནས་རྐྱེན་ངན་གྲོགས་ལ་བསྒྱུར། ལྟས་ངན་གཡང་དུ་འགུག་རྒྱུར་འབད་ཤེས་པ་ཞིག ཐ་མ་སྡུག་ཤོས་ཡིན་རུང་སྐྱིད་སྡུག་གང་བྱུང་དཀོན་མཆོག་གསུམ་ལ་ཕུགས་གཏོད་ཤེས་པ་ཞིག ལས་དགེ་ངོ་དང་སྡིག་ངོ་འཁྲོལ་བ། ཤེས་བཞིན་དུག་འཐུང་མི་བྱེད་པ། རྒྱུ་མེད་རུང་ཁྱིམ་ཚང་ཆོས་ཡོད། བག་དྲོ། བཟའ་ཚང་ཁ་སེམས་མཐུན་པོ། ཕོ་མོ་ཆེ་ཆུང་ཚང་མ་ཁ་ངོ་འཛུམ་གྱིས་གང་། སེམས་ལ་སྤྲོ་སྣང་ཡོད་པ། མི་ཚེ་སྐྱིད་ལ་སྐྱེལ་པ་ཞིག་རེད་རྒྱུའི་རེ་བ་དེ་བྱེད་ཀི་ཡོད་པ་རེད། རྫོགས་པ་ཆེན་པོའི་ཆོས་འདི་ལ་སྔོན་འགྲོ་དངོས་གཞི་གཉིས་ཡོད་པ་ཡིན། མྱི་ཞིག་ལ་ཆ་བཞག་ན་ཁོག་སྟོད་སྨད་གཉིས་འདྲ་ཞིག་རེད། འུ་ཅག་གིས་ད་རེས་སྔོན་འགྲོ་བཤད། དེ་དང་འབྲེལ་ནས་བདེ་ཆེན་ཞིང་ཁྲིད་ཀྱང་ཚང་བསྡད་ཡོད་པ་ཞིག་བྱས་ནས་བཤད་ཆགས་རེད། ད་སྔ་ཆོས་ར་འདིའི་ནང་ནས་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་བཤད་མྱོང་བ་རེད། ཡང་དེའི་ནང་ནས་བློ་ལྡོག་རྣམ་བཞི་ཟུར་བཀོལ་གྱིས་བཤད་མྱོང་བ་རེད། སྔོན་འགྲོའི་ངག་འདོན་རྒྱས་བསྡུས་གཉིས་ཀ་བྱས་ནས་ཁྲིད་པ་རེད། དེ་བཞིན་ཞིང་ཁྲིད་ཆགས་མེད་བདེ་སྨོན་གྱི་སྟེང་ནས་སྔོན་རྗེས་ཚར་གཉིས་རྒྱས་ཁྲིད་དང་། ན་ནིང་བདེ་སྨོན་བསྡུས་པའི་སྟེང་ནས་ཡང་གཅིག་ཁྲིད་པ་ཡིན། དེ་ཚོ་ལ་བསྐྱར་ཉན་རེ་བྱེད་རྒྱུ་ཡོད། འགའ་རེས་བསྐྱར་ཉན་བྱས་ན་ཕན་ཐོག་ཅུང་ཙམ་རེ་འབྱུང་ཤས་ཆེ་བ་རེད། སྤྱིར་མི་སྐྱ་ཕོ་མོ་ལ་ཆོས་རྒྱ་ཆེན་གྱི་ཐོས་པ་བརྟེན་རྒྱུའི་གོམས་འདྲིས་ཆེ་མ་རེད། དེའི་སྟེང་ནས་ལོ་ཡར་རྒས་ཀྱི་ལོ་ལོན་ཡིག་ངོ་བལྟ་རྒྱུའི་བྱང་ཆ་དེ་འདྲ་མེད་པ་ཡང་ཡོད་པས་ན། ཡི་གེ་ལྡེབ་བུ་མང་བོ་ཅན་ཞིག་གི་སྟེང་ནས་ཆོས་སྐད་དམ་པོ་གོ་མི་བདེ་བ་ཏག་ཏག་བཤད་ནས་དགོས་པ་མེད་བསམ་བཞིན་ཡོད། སྤྱིར་ཟབ་དང་རྒྱ་ཆེའི་ཆོས་ཚུལ་གྱི་ཆོས་སྒྲ་ཞིག་གོ་བསྡད་དུས། དོན་གྱི་ཐད་ནས་གཏིང་ནས་དེ་ཙམ་ཞིག་གོ་མ་སོང་རུང་། རྒྱུད་ལ་བག་ཆགས་བཟང་པོ་ཞིག་བཞག་ན། དད་པ་དག་སྣང་གི་སྟོབས་ཀྱིས་མ་འོངས་ཤེས་རབ་ཁྱད་པར་ཅན་རྒྱུད་ལ་བསྐྱེད་བྱེད་ཀྱི་དགོས་པ་དང་ཡང་ལྡན་པ་རེད། བར་དོའི་ཁྲིད་ཡིག་ཚོའི་ནང་ན་ལུས་རྒྱ་འདི་དང་བྲལ་བའི་བར་དོའི་རྣམ་ཤེས་དེ་སྔར་བས་རིག་པ་ལྡབ་འགྱུར་གྱིས་གསལ་བ་ཞིག་ཡིན། སྔར་ཐོས་པའི་ཆོས་ཀྱི་རྣམ་གྲངས་མང་པོའི་དོན་རྒྱུད་ལ་ཤར་ཡོང་གསུང་ཡོད་མོད། ད་ལྟ་ཐད་ཀ་ཐད་ཀར་གོ་དོན་རྒྱུད་ལ་འབྱོར་བར་བྱེད་པ་ལ་ཡི་གེ་ཉུང་ཉུང་ཞིག དེ་ཡང་ཁ་སྐད་ཀྱིས་ཟ་སྐད་འཐུང་སྐད་བྱས་ནས་སྒྲོག་བཀྲོལ་ཏེ་གོ་སླ་ཉན་བདེ་ཞིག་བསམ་ནས། ད་ལོ་ཡང་ང་ཚོས་འདི་ནས་ངས་ན་ནིང་གཞིས་ནིང་ཞིག་ལ། ཆོས་དད་མང་ཚོགས་ལ་འབབ་སྐལ་སྦྱིན་རྒྱུ་ཡིན་ཞེས། ག་ཤེད་ནས་ཐོན་རན་ཁར་བསུ་མཁན་མང་པོ་ཞིག་ཐོན་བཞག་པ་དེ་དག་ལ། ལག་སྟོང་མིན་ཙམ་སྤྲད་རྒྱུ་ཞིག་བྲིས་པའི་སྔོན་འགྲོའི་རྒྱུན་འདོན་བླ་རྣལ་གཙོ་བོར་བྱས་པའི་ཚིག་ག་རྡོག་མ་ཁ་ཤས་ཅན་པོ་འདི་ཁྱེད་ཚོའི་ལག་ཏུ་ཡོང་ཡོད་རྒྱུ་རེད། འདི་འདོན་ཆགས་ཡིན། བླ་མའི་རྣལ་འབྱོར་འདི་སྔོན་འགྲོ་བྱས་ན་སྔོན་འགྲོ་རེད། ཐུན་མིན་སྔོན་འགྲོའི་ཁྲིད་རྐང་གི་ནང་ལ་བཞག་ཡོད་མོད། དངོས་གཞི་བྱས་ན་དངོས་གཞིའི་ཆ་ལག་གིས་མ་ཚད་པའི་རྫོགས་པ་ཆེན་མོའི་དངོས་གཞིའི་གནད་ཐམས་ཅད་པོ་འདིའི་ཉམས་ལེན་གྱི་ནང་དུ་འདུ་བ་རེད། དེས་ན་ཆོས་ཟབ་མོ་གསང་སྔགས་ཀྱི་གདམས་པ་ཡིན། སྔོན་འགྲོའི་ཁྲིད་ལུང་ཐམས་ཅད་ཐོབ་མྱོང་བའི་སྡོམ་གསུམ་ཡར་ལྡན་དུ་རྫོགས་པའི་གང་ཟག་སྣོད་ལྡན་ཏག་ཏག་ཡིན་ཆག་བྱས་ནས་ད་རེས་འདོན་ཀི་ཡོད་པ་ཡིན། དུས་ཚོད་ཐུང་ཐུང་ལ་བསྟུན་ཡོང་ན་ང་ཚོས་ཆ་ལེ་ཆོལ་ལེ་བཤད་རྒྱུ་མང་ཐལ། དེ་ཡན་ཆད་ཀྱིས་ལོ་གཅིག་གི་ནང་དུ་འུ་ཅག་གསར་དུ་ཐུག་པོའི་སྤྱིར་བཏང་གི་ཁ་བརྡ་རེད། དེ་དང་འབྲེལ་ནས་ཆོས་སྒྲུབ་ལུགས་ཆོས་སྒོར་ཞུགས་སྟངས་ཀྱི་སྤྱི་ཁོག་གི་སྒྲོམ་གཞི་འདྲ་བོ་ངོས་སྦྱོར་བྱས་པ་ཡིན་ན། འདིའི་མཚམས་ནས་ང་ཚོའི་ཆོས་ཁྲིད་ངོ་མ་ལ་འཇུག་རྒྱུ་བྱེད། ད་རེས་ང་ཚོའི་འཆད་ཉན་བྱ་རྒྱུའི་ཚིག་ག་ཁ་ཤས་འདི་ཡིན་རྒྱུ་ངས་བྲིས་པ་ཞིག་ཡིན་མོད། ནང་དོན་ཟབ་དང་རྒྱ་ཆེའི་བཀའ་མདོ་རྒྱུད་ཀྱི་སྙིང་དོན་དྲིལ་བཞག་པ། དམ་པའི་གསུང་གི་སྔོན་འགྲོའི་ཚིག་དོན་གཉིས་ཀྱི་གནད་བསྡུས། རྫོགས་ཆེན་གསང་སྔགས་ཀྱི་ཆོས་རེད། བཅུད་བཟང་པོ་བླུགས་སར་སྣོད་གཙང་མར་བྱེད་དགོས་པ་ལྟར། དང་བོའི་མགོ་ནས་རྡོར་སེམས་སྒོམ་བཟླས་དང་སྦྲེལ་ཏེ་ཐོག་མེད་ནས་ད་ལྟའི་བར་དུ་བསགས་པའི་སྡིག་པ་དང་སྒྲིབ་པ། ཁྱད་པར་དུ་བྱིན་རླབས་དང་དངོས་གྲུབ་ཐོབ་པའི་གེགས་དམ་ཚིག་ཉམས་ཆག་བཤགས། དེའི་འཕྲོར་ཤེས་བྱར་ཐོགས་མེད་ཀྱི་མཁྱེན་རབ་ཁྱད་པར་ཅན་ནང་ནས་རྒྱས་ཤིང་། ཆོས་ཀྱི་ཚིག་དོན་བདེ་བླག་ཏུ་རྟོགས་པའི་མི་ཟད་གཟུངས་དང་སྤོབས་པ་ཐོབ་པའི་ཆེད་དུ། སྔར་པཎྜི་ཏ་ལྔ་བརྒྱས་མགྲིན་དབྱངས་གཅིག་གྱུར་གྱིས་བསྟོད་པའི་རྒྱལ་བ་ཐམས་ཅད་ཀྱི་མཁྱེན་པའི་རང་གཟུགས། འཕགས་པ་འཇམ་པའི་དབྱངས་ཀྱི་བསྟོད་པ་གང་བློ་མ་འདོན་ལོངས་ཡོད་ན་ཚར་གསུམ་འདོན་རྒྱུའི་བརྒྱུད་པའི་ཕྱག་ལེན་ལྟར་དུ་ངེད་ཅག་གི་ཆོས་ཁྲིད་དངོས་ལ་འཇུག་རྒྱུ་བྱེད། དེ་འཕྲོར་གོང་དུ་འགོ་ནས་བཤད་པ་ལྟར། སྔར་གྱི་རྒྱུན་སྲོལ་བཞིན་དུ་ཆོས་རའི་ནང་དུ་འཛུལ་བ་དང་ཚང་མས་ངག་བཅད་བྱེད་རྒྱུ་རྒྱུན་འཁྱོངས་བྱོས། ད་སྔ་ཉི་མ་ཡན་ཆད་དུ་འཇིག་རྟེན་མྱི་ལུས་ཤིག་བླངས། འདིའི་སྣང་བ་སྐྱ་རིབ་པོ་འདི་ཤར་ཚུན་ཆད་གསོན་གྲང་ང་ཁམས་ལ་ཐོན་ཚུན་ཆད་དུ་གཉིད་ཐུན་གཅིིག་གི་ཚེ་མིན་པ་མྱི་གཅིག་གི་ཚེ་གང་བོར་བཤད་བཤད་ནས། ད་མ་བཤད་པར་ཆུ་ཚོད་གཅིག་གི་ཚེ་ལ་བསྡད་བཞག་ན། དེའི་ཚོར་སྣང་གསར་བའི་བྲོ་བ་དེ་ཅི་འདྲ་ཞིག་ཡིན་གཅིག་བལྟས་ན། ངག་གི་ཉེས་པ་དེ་ངག་བཅད་བྱས་ནས་བཀག་བཞག་དུས་ལུས་སེམས་གཉིས་ཀྱི་སྡིག་པ་ཕལ་ཆེར་དེས་ཁོག་རྒྱུའི་ཆོད་སྒོ་ཕན་ཡོན་དེ་ཙམ་ཞིག་ཆེ་བ་རེད། སངས་རྒྱས་བཅོམ་ལྡན་འདས་ཀྱིས་ཆོས་གསུང་དུས། དགེ་སློང་དག་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་ཁྱེད་ལ་བསྟན་པར་བྱའོ་ཞེས་གསུངས་ཡོད་པ་ལྟར། ཆོས་ཉན་དུས་སྣོད་ཀྱི་སྐྱོན་གསུམ་པོ་སེལ་དགོས་པ་རེད། སྣོད་ཀྱི་སྐྱོན་གསུམ་གང་ཡིན་ཞེ་ན། སྣོད་ཞབས་རྡོལ། སྣོད་ཁ་སྦུབ། སྣོད་དུག་ཅན་གསུམ་གྱི་ནང་ལ་བཅུད་བླུགས་པ་ལྟ་བུ། དེ་གསུམ་གྱི་ནང་ལ་བཅུད་བླུགས་ན་ཡག་པོ་རེད་ནི་མ་རེད། དེའི་སྐྱོན་ཆ་དེ་རྣམས་བསལ་ཆེད་དུ་བཅོམ་ལྡན་འདས་ཀྱིས་གསུངས་པ་རེད། ལེགས་པར་ཉན་པས་ཅིའི་ཕན་ཐོགས་ཡོད་པ་རེད་ཅེ་ན། སྣོད་དུག་ཅན་གྱི་སྐྱོན་སེལ། རབ་ཏུ་ཉན་པས་ཁ་སྦུབ་ཀྱི་སྐྱོན་སེལ་བ་རེད། ཡིད་ལ་བཟུང་བས་ཞབས་རྡོལ་གྱི་སྐྱོན་སེལ་ནི་ཡིན། སངས་རྒྱས་བཅོམ་ལྡན་འདས་ཀྱིས་དེ་ལྟར་གསུངས་པ་ལས། ཁྱེད་ཚོས་ཡག་པོ་མ་ཉན་པས་ཁོང་ལ་གནོད་ཡོང་གི་རེད་གསུང་ཡོད་པ་མ་རེད། ཁྱེད་ཚོས་ཡག་པོ་བྱས་ནས་མ་ཉན་པས་ཁྱེད་རང་ཚོའི་ཉན་གོ་ཆོད་པ་མ་རེད་གསུངས་པ་རེད། དེས་ན་ང་ཚོས་ཆོས་ཉན། དཔེ་བལྟས་བྱེད་ན། སེམས་རྣལ་དུ་ཕབས་ནས་ཆོས་གང་ཡིན་ནའང་དེའི་ཚིག་དོན་ལས་གཞན་དུ་མ་ཡེངས་པར་བྱེད་དགོས་པ་རེད། ཆོས་བཤད་མཁན་ཉན་མཁན་གཉིས་ཀས་འཆད་ཉན་ཚུལ་བཞིན་དུ་བྱས་ན། ཆོས་འཆད་ཉན་གཅིག་གི་སྟེང་ནས་སྦྱིན་པ་ཚུལ་ཁྲིམས་བཟོད་པ་བརྩོན་འགྲུས་བསམ་གཏན་ཤེས་རབ་སྟེ་ཕར་ཕྱིན་དྲུག་ག་ཚང་བ་ཞིག་བྱེད་ཀྱང་ཆོག་ལ་བྱེད་དགོས།།

ཚོགས་ཀྱི་ཞལ་འདོན།

དེ་བས་ང་ཚོས་དུས་ཚོད་དང་བསྟུན་ནས་རྡོར་སེམས་བསྒོམ་བཟླས་མཉམ་དུ་འདོན་རྒྱུ་བྱེད།

ཨཱཿ བདག་ཉིད་ཐ་མལ་སྤྱི་བོ་རུ༔ པད་དཀར་ཟླ་བའི་གདན་གྱི་དབུས༔ ཧཱུྃ་ལས་བླ་མ་རྡོ་རྗེ་སེམས༔ དཀར་གསལ་ལོངས་སྤྱོད་རྫོགས་པའི་སྐུ༔ རྡོ་རྗེ་དྲིལ་འཛིན་སྙེམས་མར་འཁྲིལ༔ ཁྱོད་ལ་སྐྱབས་གསོལ་སྡིག་པ་སྦྱོང་༔ འགྱོད་སེམས་དྲག་པོས་མཐོལ་ལོ་བཤགས༔ ཕྱིན་ཆད་སྲོག་ལ་བབ་ཀྱང་སྡོམ༔ ཁྱོད་ཐུགས་ཟླ་བ་རྒྱས་པའི་སྟེང་༔ ཧཱུྃ་ཡིག་མཐའ་མར་སྔགས་ཀྱིས་བསྐོར༔ བཟླས་པ་སྔགས་ཀྱིས་རྒྱུད་བསྐུལ་བས༔ ཡབ་ཡུམ་བདེ་རོལ་སྦྱོར་མཚམས་ནས༔ བདུད་རྩི་བྱང་ཆུབ་སེམས་ཀྱི་སྤྲིན༔ ག་བུར་རྡུལ་ལྟར་འཛག་པ་ཡིས༔ བདག་དང་ཁམས་གསུམ་སེམས་ཅན་གྱི༔ ལས་དང་ཉོན་མོངས་སྡུག་བསྔལ་རྒྱུ༔ ནད་གདོན་སྡིག་སྒྲིབ་ཉེས་ལྟུང་གྲིབ༔ མ་ལུས་བྱང་བར་མཛད་དུ་གསོལ༔

ཨོཾ་བཛྲ་ས་ཏྭ་ས་མ་ཡ། མ་ནུ་པ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲྀཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾཿཀུ་རུ་ཧཱུྃ། ཧ་ཧ་ཧ་ཧ་ཧོཿབྷ་ག་ཝཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་ཝ། མ་ཧཱ་ས་མ་ཡ་ས་ཏྭ་ཨཱཿ

མགོན་པོ་བདག་ནི་མི་ཤེས་རྨོངས་པ་ཡིས༔ དམ་ཚིག་ལས་ནི་འགལ་ཞིང་ཉམས༔ བླ་མ་མགོན་པོས་སྐྱབས་མཛོད་ཅིག༔ གཙོ་བོ་རྡོ་རྗེ་འཛིན་པ་སྟེ༔ ཐུགས་རྗེ་ཆེན་པོའི་བདག་ཉིད་ཅན༔ འགྲོ་བའི་གཙོ་ལ་བདག་སྐྱབས་མཆི༔ སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ༔ སྡིག་པ་དང་སྒྲིབ་པ་ཉེས་ལྟུང་དྲི་མའིཚོགས་ཐམས་ཅད་བྱང་ཞིང་དག་པར་མཛད་དུ་གསོལ༔ རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་བྱིན་ཞིང་འོད་དུ་ཞུ་ནས་རང་ལ་ཐིམ་པའི་རྐྱེན་ལས་རང་ཉིད་ཀྱང་རྡོ་རྗེ་སེམས་དཔའ་སྣང་སྟོང་མེ་ལོང་ནང་གི་གཟུགས་བརྙན་ལྟ་བུར་གྱུར་པའི་ཐུགས་སྲོག་ཧཱུྃ་གི་མཐའ་མར་ཡི་གེ་འབྲུ་བཞི་པོ་གསལ་བ་ལས་འོད་ཟེར་འཕྲོས་ཁམས་གསུམ་སྣོད་བཅུད་དང་བཅས་པ་རྡོར་སེམས་རིགས་ལྔའི་རྟེན་དང་བརྟེན་པའི་རང་བཞིན་དུ་སངས་རྒྱས་པར་བསམས་ལ།

ཨོཾ་བཛྲ་ས་ཏྭ་ཧཱུྃ༔

དགེ་བ་འདི་ཡིས་མྱུར་དུ་བདག། རྡོ་རྗེ་སེམས་དཔའ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག།

བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བ། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང༌། །འབྲུག་ལྟར་ཆེར་སྒྲོགས་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང༌། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་པའི་དབྱངས་ལ་འདུད། །ཚར་གསུམ།

དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། །གང་གི་ཞལ་བཟང་བལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས། །བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས། །འཛམ་བུའི་གླིང་འདིར་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་། །སྐུ་གསུམ་མཛད་པའི་ངོ་བོར་གཅིག་སྟེ་དཔལ་ལྡན་སངས་རྒྱས་པདྨ་སྐྱེས། །གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད། །འཛམ་གླིང་མཛེས་པའི་རྒྱན་དྲུག་མཆོག་གཉིས་དང་། །ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྟོགས་པའི་ཀློང་ཆེན་པ། །དྲི་མེད་འོད་ཟེར་ཞབས་ལ་གསོལ་བ་འདེབས། །ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར། །དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད། །འོད་གསལ་ཀློང་ཆེན་ནམ་མཁའི་རྣལ་འབྱོར་པ། །འཇིགས་མེད་གླིང་པའི་ཞབས་ལ་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །དགོངས་རྒྱུད་རྟོགས་པ་འཕོ་བར་བྱིན་གྱིས་རློབས། །ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །གང་ཞིག་གསེར་མཆོག་རང་བཞིན་རི་རབ་ལ་གནས་མནྡཱ་ར་དང་ལྷར་བཅས་གནོད་སྦྱིན་དང་། །གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། དེ་དག་ཐམས་ཅད་ཐར་པ་དམ་པའི་སྒོར་གྱུར་ཐུབ་པའི་གསུང་མཉན་ཕྱིར་ནི་འདིར་གཤེགས་ཤིག །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མི་འམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག །བསྐལ་པ་སྟོང་དུ་ཐོས་པ་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན། །གང་ཞིག་གཏན་གྱི་སྐྱབས་གནས་མཆོག་གྱུར་པ། །དཀོན་མཆོག་གསུམ་གྱི་ཡོན་ཏན་བསམ་མི་ཁྱབ། །དེ་ལ་དད་བྱས་རྣམ་སྨིན་ཡང་དེ་བཞིན་ཏེ། །བསྐལ་པ་བྱེ་བ་ཁྲག་ཁྲིག་བགྲང་ན་ཡང་། །དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་། །རྣམ་པར་གྲོལ་བ་རིན་ཆེན་སྣ་ཚོགས་དང་། །ཟབ་མོ་རྒྱལ་བའི་བཀའ་འདི་གུས་པས་ཉོན། །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ཆོས་འདི་འགྱུར་བར་ཤོག།

ཆོས་འཆད་ཉན་གྱི་ཀུན་སློང་དང་ཀུན་སྤྱོད།

ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཕ་མར་བྱས་མ་མྱོང་བ་གཅིག་ཀྱང་མེད། དེ་ཡང་ཐེངས་གཅིག་མིན་པར་ལན་གྲངས་བརྩིས་བཞག་ན་གྲངས་ཚད་རྩིས་གྲངས་ལ་མི་ཐེབས་པའི་ཚད་དུ་ཕ་མར་བྱས་མྱོང་ན། ཕ་མ་བྱས་དུས་ཡིན་ན་ད་ལྟའི་ཕ་མ་བཞིན་དུ་དྲིན་གྱིས་བསྐྱངས་པ་ཤ་སྟག་ཡིན། འོན་ཀྱང་ཕ་མ་སེམས་ཅན་འདི་ཐམས་ཅད་མ་རིག་རྨོངས་པའི་གཞན་དབང་དུ་གྱུར་སོང་བས་བདེ་བ་འདོད་ནའང་སྡུག་བསྔལ་གྱི་རྒྱུ་དག་དག་སྒྲུབ་ནས་མྱེ་ཆེ་ཐོག་ལ་ཤིང་བསྣན་པ་བཞིན་དུ། ཟད་རྒྱུ་མེད་པའི་འཁྲུལ་སྣང་སྡུག་བསྔལ་རྒྱུ་འབྲས་གཉིས་ཀ་ལ་འཁོར་མོ་ཡུག་ཏུ་སྤྱོད་བཞིན་པ་ཡིན་ན། ད་རེས་བདག་གིས་དལ་འབྱོར་གྱི་རྟེན་བཟང་ཐོབ། དམ་པའི་ཆོས་དང་འཕྲད་པའི་སྐབས་འདིར་བདག་རང་ཉིད་གཅིག་པུ་འཁོར་བ་ངན་སོང་གི་གནས་ནས་ཐར་བ་ཞིག་གིས་མི་ཆོག་པར་མཐའ་ཡས་སེམས་ཅན་དེ་དག་ཐམས་ཅད་པོ་གཅིག་ཀྱང་འཁོར་བ་ངན་སོང་གི་གནས་ནས་མི་ལུས་པར་ཐར་ཐབས་བྱེད་དགོས། དེ་ཡང་རང་ཉིད་ལ་ནུས་པ་ཞིག་མེད་ན། རང་མགོ་རང་གིས་མི་ཐོན་པ་ཞིག་གིས་གཞན་ཇི་ལྟར་སྐྱོབ་ཐུབ། དེས་ན་ད་རེས་དམ་པའི་ཆོས་འདི་ལ་བརྟེན་ནས་མ་སེམས་ཅན་ཐམས་ཅད་སྐྱོབ་ཆེད་དུ་མཁྱེན་བརྩེ་ནུས་གསུམ་དང་ལྡན་པའི་རྫོགས་པའི་སངས་རྒྱས་ཀྱི་གོ་འཕང་། སྲིད་པ་འཁོར་བའི་མཐའ་དང་ཞི་བ་མྱ་ངན་འདས་པའི་མཐའ་གཉིས་ལ་མི་གནས་པའི་བྱང་ཆུབ་དམ་པ་ཞིག ངེས་པར་སྒྲུབ་དགོས་བསམ་པའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་ལྡན་པས་ཆོས་ཉན་དགོས་པ་རེད། ཀུན་སློང་དེ་ལྟ་བུ་སྔོན་ལ་སོང་བ་ཡིན་ན། ཆོས་འཆད་ཉན་ལ་སོགས་རྣམ་དཀར་དགེ་བའི་བྱེད་ལས་ཆེ་ཆུང་ཅི་ཞིག་སྒྲུབ་པའམ་གང་སྒྲུབ་ཡོད་ནའང་ཆེ་ཆུང་ལ་མ་ལྟོས་པར་ཐེག་ཆེན་ཐར་བ་ཆ་མཐུན་གྱི་དགེ་རྩ་སངས་རྒྱས་ཐོབ་བྱེད་ཀྱི་རྒྱུ་རུ་འགྲོ་བ་རེད། ཆོས་ལྟར་སྣང་ལ་ཐེག་དམན་གྱི་ཆོས་ཞིག་ཡིན་རུང་ཀུན་སློང་སེམས་བསྐྱེད་དེས་ཟིན་སོང་ན་ཐེག་ཆེན་གྱི་ཆོས་གོ་ཆོད་འགྲོ་བ་རེད། དེ་མིན་པར་ང་གནས་སྐབས་བདེ་བྱེད་ཅིག་དང་། ངེད་ཚང་ལ་ན་ཤི་རྐྱེན་ཆག་མེད་སྤྱད་ཅིག ང་ཤི་དུས་ངན་སོང་ལ་ལྷུང་མི་འགྲོ་བའི་ཆེད་དེ་འདྲ་བསམ་བསྡད་དུས། དེའི་མྱིང་ལ་རང་དོན་ཡིད་བྱེད་ཀྱི་ཀུན་སློང་ཟེར་བ་རེད། རང་དོན་ཡིད་བྱེད་ཀྱི་ཀུན་སློང་གུ་དོག་པོ་དེས་བསླད་སོང་དུས། ཆོས་ཐེག་ཆེན་གྱིས་མི་ཚད་ཡང་ཆེན་ཡིན་ཡང་ཐེག་དམན་གྱི་ཆོས་གོ་ཆོད་ལ་མི་ཆོད་པ། དེ་ཡང་ད་རུང་བརྟག་པར་བྱ་བ་རེད། ད་རེས་ང་ཚོའི་འཆད་ཉན་བྱེད་རྒྱུ་འདི་གསང་སྔགས་རྫོགས་ཆེན་ལ་གཏོགས་པའི་ཆོས་ཡིན་པས། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དེའི་སྟེང་ལ་ད་རུང་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་དགོས་པ་རེད། འདིའི་སྣོད་བཅུད་ཀྱི་སྣང་བ་འདི་ཐམས་ཅད་པོ་མ་དག་འཁྲུལ་བའི་ངོ་ཁ་ལ་འདི་འདྲའི་མ་དག་པ། མཁྲིས་ནད་ཅན་གྱི་ངོ་ཁ་ལ་དུང་དཀར་བོ་སེར་བོར་སྣང་བ་འདྲ་འདྲ་ལོག་རྟོག་གི་སྣང་བ་ཤར་ཀི་འདུག་པ་རེད་མ་གཏོགས། དོན་ལ་ལས་དག་པས་གཟིགས་ན་དག་པ་ཏག་ཏག་ཡིན་པ་རེད། སྣོད་དག་པ་ལྷ་ཡི་ཞིང་ཁམས། བཅུད་དག་པ་ལྷ་དང་ལྷ་མོ། སྣང་སྤྱོད་ཐམས་ཅད་པོ་དག་པ་རབས་འབྱམས་རེད་བསམ་སྟེ་རང་གིས་ཀྱང་དེ་ཉིད་ཡིན་པར་བསྒོམ། ཆོས་འཆད་པ་པོ་ཡང་དཀྱིལ་འཁོར་གང་ཡིན་གྱི་གཙོ་བོ་ལ་བསྒོམ་དགོས་པ་རེད། ད་རེས་ཀྱི་སྐབས་འདིར་མཚོན་ན་བླ་མ་དང་རྒྱལ་དབང་མཚོ་སྐྱེས་རྡོ་རྗེ་གཉིས་མེད་ཀྱི་རྣམ་པར་བསམ་ནས། ཆོས་གསུང་པ་པོའི་ཞལ་དང་ལྗགས་ནས་འོད་ཟེར་འཕྲོས་ཡོང་བ། རང་ཉིད་ཀྱང་འཁོར་དཔའ་བོ་མཁའ་འགྲོ་གང་རུང་ཞིག་ལ་བསམ་པའི་སྙིང་ལ་འོད་ཟེར་དེ་ཕོག་པས་མ་རིག་པའི་མུན་པ་སེལ། ཤེས་རབ་ཡེ་ཤེས་ཀྱི་སྣང་ཆེན་རྒྱས། རྒྱལ་བའི་སྐུ་གསུང་ཐུགས་ཀྱི་གསང་བ་གསུམ་ཀྱི་བྱིན་རླབས་ཐོབ་པར་བསམ་ནས་ཆོས་ཉན་དགོས་པ་རེད། ཆོས་ཉན་དུས་ཀྱི་ཀུན་སྤྱོད་ཀྱི་ཐད་ནས་ཀྱང་སེམས་ཆོས་ལས་གཞན་དུ་མི་གཡེང་། ངག་གི་སྨྲ་བ་བསྡམ། ལུས་གུས་པའི་རྣམ་འགྱུར་དང་བཅས་ཏེ་དགའ་བཞིན་སྤྲོ་བཞིན་ཉན་དགོས་པ་རེད།།

ཐོག་མར་དགེ་བ་ཀླད་ཀྱི་དོན།

ཀ བསྟན་བཅོས་ཀྱི་མཚན་ནས་སྨོས་པ།

སྐབས་འདིར་གང་ཞིག་འཆད་པར་བྱ་བ་དེབ་ཆུང་གི་མགོར་ལྟོས་དང་ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས་ཞེས་བྱ་བ། ད་ལྟ་རང་རེའི་འཆད་བྱའི་ཆོས་འདི་ཡིན་པ་རེད། ཆོས་བཤད་དུས་ཆོས་བཤད་ལུགས་ཀྱི་རྣམ་གྲངས་ལ། མདའ་ལྟར་རྩེ་མོ་ནས་བཟུང་སྟེ་བཤད་ལུགས་ཡོད་པ་ནི། ཆོས་གང་ཡིན་བསྟན་བཅོས་ཀྱི་མཚན་གྱི་ཐོག་ནས་གཞུང་དོན་གྱི་བརྗོད་བྱ་ཆ་ཚང་གསལ་ནུས་པ་ཡིན། མདུང་ལྟར་སྐེད་པ་ནས་བཤད་ལུགས་ནི། གཞུང་དངོས་གཞིའི་ས་བཅད་སྤྱི་ཁོག་ལྟར་བྱས་ཏེ་བཤད་ལུགས་དང་། རལ་གྲི་ལྟར་ཡུ་བ་ནས་བཟུང་སྟེ་བཤད་ལུགས་ནི། དོན་མདོ་སྔགས་གཅིག་ལ་དྲིལ་ཏེ་གནད་ནས་བཟུང་སྟེ་བཤད་ལུགས་ཡོད་པ་ཡིན་ན། ང་ཚོའི་འདི་ཇི་ལྟར་བཤད་ཅེ་ན། བཀའ་བསྟན་བཅོས་འདི་རེད་ཟེར་རྒྱུ་ཞིག་འདི་ལ་མེད་མོད་རང་གིས་བྲིས་པ་ཡིན་ཡང་། བཀའ་བསྟན་བཅོས་ལ་མི་ཐེ་ཡང་ཟེར་རྒྱུ་མེད་ཀི། གཞུང་བཟང་སྟོང་གི་ཆུ་བོ། ལེགས་བཤད་གདམས་ཟབ་གྱི་བདུད་རྩི་རུ་གཅིག་འདུས་སུ་འཁྱིལ་བའི་ཀློང་ནས་སྐྲ་རྩེའི་ཉག་མས་བླངས་པའི་ཆུ་ཐིགས་ཆུང་ཆུང་ཞིག་ཡིན་རུང་དེར་མི་གཏོགས་ཟེར་མི་ཤེས་མོད། ད་འཆད་ཉན་བཟང་ངན་ཟེར་བ་དེ་ཡང་བཤད་མཁན་ཁ་སྟབས་དང་ཉན་ནི་བོའི་ཉན་ལུགས་བཟང་ཞན་གཉིས་ལ་རག་ལས་པ་ཞིག་ཡིན། ད་འདིར་ཐོག་མཐའ་བར་དགེའི་ཆིངས་ཆེན་པོ་གསུམ་དུ་བཅིངས་ནས་བཤད་པའི་དབང་དུ་བྱས་ན། ཐོག་མར་དགེ་བ་ཀླད་ཀྱི་དོན་ལ་ཐོག་མར་མཚན་སྨོས་པ་ཞེས་པ་ཞིག་འབྱུང་བ་རེད། མཚན་ཞེས་པ་མིང་རེད། འདིའི་མིང་ལ་ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས་ཞེས་བྱ་བ་ཟེར་ནས་བཏགས་ཡོད་པ་ནི་ངས་བཏགས་པ་ཞིག་རེད། འདི་ལྟར་ཅིའི་ཕྱིར་བཏགས་པ་ཡིན། དོན་ཅི་ཡོད་དོན་དེ་ཤོད་དང་ཞེ་ན། ད་འདིའི་དོན་འགྲེལ་བ་ཡིན་ན། འདིའི་ཐོག་མའི་ཚིག་ངག་འདོན་ཟེར་བ་དེ་སྔོན་འགྲོའི་ངག་འདོན་ལ་གོ་ན་ཡང་ཆོག རྫོགས་པ་ཆེན་པོ་ཀློང་ཆེན་སྙིང་ཐིག་ཀུན་མཁྱེན་འཇིགས་མེད་གླིང་བའི་གསུང་ལ་གཞིར་བཞག རྡོ་གྲུབ་ཆེན་འཇིགས་མེད་འཕྲིན་ལས་འོད་ཟེར་གྱི་ཞལ་བསྐང་མཛད་པ་ང་ཚོའི་དུས་རྒྱུན་ཕོ་མོ་ཆེ་ཆུང་ཚང་མས་རྒྱུན་འདོན་བྱེད་རྒྱུའི་སྔོན་འགྲོའི་ངག་འདོན་རྣམ་མཁྱེན་ལམ་བཟང་གི་དོན་ཚུར་ལ་བསྡུས་པ། རྒྱུན་འདོན་ནམ་ཞོར་འདོན་འཁྱེར་བདེར་སྤེལ་བ་ཡིན། ཆོས་བརྒྱུད་ཀྱི་ཐད་ནས་དེ་ཡིན་ཡང་དགོས་པ་རེད། དེའི་ཕྱིར་ན་འདི་སྔོན་འགྲོའི་ངག་འདོན་གྱི་དོན་ཅན་གྱི་ངག་འདོན་གྱི་གོ་དོན་བྱེད་ན་ཆོག་གི དེ་ན་འདི་ལ་སྔོན་འགྲོ་ཞེས་པའི་ཚིག་དངོས་སུ་མི་སྦྱོར་བ་ཅི་ཡིན་ཞེ་ན། འདི་ན་སྔོན་འགྲོ་ངག་འདོན་གྱིས་མི་ཚད་པར་ཀུན་མཁྱེན་འཇིགས་མེད་གླིང་པའི་གསུང་བྱིན་རླབས་ཅན་བདེ་བ་ཅན་སོགས་ཀྱི་ཞིང་ཁམས་སུ་སྐྱེ་བའི་སྨོན་ལམ་ཁྱད་པར་ཅན་ཚུར་ལ་བསྡུས་ཏེ་བཀོད་ནས། དེ་ལ་བརྟེན་ཏེ་གཟུངས་སྔགས་བཟླ་བ་སོགས་དགེ་སྦྱོར་གང་སྒྲུབ་རུང་སྦྱར་ཆོག་པ་གསོལ་འདེབས་སྨོན་ལམ་གཅིག་འདུས་ཀྱི་ཆོ་ག་དང་ཡང་འབྲེལ་བའི་ཕྱིར་ན། འདིའི་སྤྱི་མིང་ལ་ངག་འདོན་ཞེས་བརྗོད་པ་ཡིན། ཁ་ཏོན་ཁ་ནས་འདོན་རྒྱུ་ཐམས་ཅད་ངག་འདོན་ཡིན་ན། འདིར་དམིགས་གསལ་གྱིས་ངག་འདོན་ཞེས་སྦྱར་བ་ཅི་ཡིན་སྙམ་ན། ཉིན་མཚན་དུས་དྲུག་ནམ་དྲན་ན། འགྲོ་ཞོར་འདུག་ཞོར་ཡན་ཆད་ལ་རྒྱུན་འདོན་ནམ་ཞོར་དུ་འདོན་བདེ་མོ་ཚིག་ཉུང་ཉུང་ཁ་གང་མ། ངེད་ཚོའི་ཁ་སྐད་ཡིན་ན་ཁ་ཐོག་འཁོར་ལོ་ཟེར་བ་ལྟར་བྱེད་ཆོག་པ། ཆོས་དང་བླ་མ་ནམ་དྲན་ལ་འདོན་ཆོག་རྒྱུའི་གོ་དོན་ཅན་ཞིག་རེད།།

ད་ཁ་ནས་ངག་འདོན་བྱེད་དུས་སེམས་ནས་དེའི་དོན་དྲན་དགོས་པ་དང་། དམིགས་པ་གསལ་འདེབས་དེ་འདོན་པ་གང་བཏོན་རུང་དགོས་པ་དེ་ཤེས་བཞིན་པ་ཡིན་ན། འདི་གསང་སྔགས་ལུང་གི་སྒོ་བཞི་སྟེ། དོན་རྣམས་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། །མཚོན་པ་བརྡ་རྟགས་ཕྱག་རྒྱ་གར་གྱི་སྒོ། །ཞེས་གསུངས་པ་རེད། ཆོ་ག་བསྐྱེད་རྫོགས་བཟླས་སྒོམ་ཅན་ཞིག་ལ་ཁྱད་པར་དུ་འདི་བཞི་བོ་མ་ཚང་ཐབས་མེད་པ་རེད།།

དེ་ཡིན་ན་དོན་རྣམས་གསལ་འདེབས་བརྗོད་པ་ཚིག་གི་སྒོ་གསུངས་དུས་ཅི་ཟེར་བ་རེད་ཅེ་ན། ངག་འདོན་ངག་ནས་འདོན་རྒྱུའི་བརྗོད་པ་ཚིག་གི་སྒོ་དེ། དེའི་དོན་ཡིད་ལ་གསལ་འདེབས་བྱེད་སྤྱད། གསལ་འདེབས་ཟེར་ན་དོན་དྲན་པའི་ཆེད་དུ་ཁ་ནས་འདོན་བཞིན་ཡོད་གསུངས་པ་རེད།།

གཉིས་པ་ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །ཞེས་སྔགས་བཟླ་རྒྱུ་དེ་ཐུགས་ཀྱི་དམ་བཅའ་གནད་ནས་བསྐུལ་བའི་སྒོ་རེད། དེ་ཇི་ལྟར་ཡིན་ན། སྔགས་ཞེས་པ་དེ་མ་གཞི་མཐའ་གཅིག་ཏུ་རྒྱ་གར་གྱི་གནའ་སྔ་མོའི་སྐད་རིགས་མཆོག་ལ་བརྩི་རྒྱུའི་སཾ་སྐྲྀ་ཏའི་སྐད་ཡིན་དགོས་པའི་ངེས་པ་མེད་དེ། སྔགས་འདིའི་ནང་དུ་འགྲོ་ལྡིང་བའི་སྐད་དང་ཨོ་རྒྱན་གྱི་སྐད། མཁའ་འགྲོའི་བརྡ་སྐད་ལ་སོགས་པ་ཡོད་པར་མ་ཟད། བོད་སྐད་ཀྱང་ཡོད་དེ། པདྨ་ཐོད་ཕྲེང་རྩལ་ཞེས་པའི་ཐོད་ཕྲེང་རྩལ་བོད་སྐད་རེད། དེ་ལྟར་ན་ཁ་ནས་བརྗོད་ཚད་པོ་དང་སྔགས་ལ་ཅི་ཡི་ཁྱད་ཡོད་ཅེ་ན། དེ་རླུང་སྔགས་ཡི་གེ་འཁོར་ལོར་དག་སོང་དུས། དེའི་ངོ་ཁར་གྲགས་པ་ཐམས་ཅད་སྔགས་ཀྱི་རང་བཞིན་མངོན་གྱུར་ཡིན་ན་ཐང་མ་གཏོགས། དེ་མིན་གྲགས་ཚད་པོ་སྔགས་མ་རེད། དེ་ཡང་གྲུབ་པ་བཞི་ལྡན་གྱི་སྔགས་ཀྱི་ངོ་བོར་གསུངས་པ་རེད། གཙོ་ཆེ་བ་རྒྱལ་བས་བྱིན་གྱིས་བརླབས་པའི་སྒྲ་ཚིག་ཡི་གེའི་གཟུགས་སུ་གྲུབ་པ་ཞིག་ཡིན་པ་རེད། །སྔགས་ལ་ནང་གསེས་སུ་གསང་སྔགས། རིགས་སྔགས། གཟུངས་སྔགས་སོགས་ཀྱི་རྣམ་དབྱེ་དང་། རྒྱུ་མ་ནོར་བ་རྩ་བའི་སྔགས། བསྐྱེད་པ་རྐྱེན་གྱི་སྔགས་སོགས་ཀྱི་རྣམ་གྲངས་ཡོད་པའི་ནང་ནས། ངེད་ཚོའི་མ་ཎི་སིདྡྷི་བཟླ་རྒྱུ་འདི་བཟླས་པ་ལས་ཀྱི་སྔགས་ལ་གསུང་པ་རེད། ཐུགས་སྲོག་གི་སྙིང་པོ་སྔགས་ཀྱིས་བསྐུལ་ནས་འབོད་བཞིན་ཡོད་པ་རེད། ཐུགས་སྲོག་གི་སྙིང་པོར་གྱུར་བའི་སྔགས་དེས་ཐུགས་རྒྱུད་བསྐུལ་ནས་འབོད་པ་ཡིན། མ་ཎི་སིདྡྷི་བཟླ་དུས། མང་པོ་བཟླ་མང་པོ་བཟླས་པས་ཐེངས་གཅིག་མ་ཡིན་པར་བརྒྱ་སྟོང་ཁྲི་འབུམ་བྱེ་བ་ས་ཡ་དུང་ཕྱུར་གྱིས་ཐུགས་རྒྱུད་བསྐུལ་ནས་སྲོག་སྔགས་ཀྱི་མཚན་ནས་བོས་དུས། སངས་རྒྱས་ཀྱིས་དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། མཐར་མངོན་པར་རྫོགས་པར་སངས་རྒྱས་པའི་དུས་དང་བཅས་པའི་མཛད་པ་ཡོད་ཚད་ཚུར་བསྡུ་ན་གཞན་དོན་ཁོ་ན་ཡིན་པ་རེད་མོད། དེ་ཡང་རྒྱལ་བའི་ཐུགས་སྙིང་རྗེ་ཆེན་པོ་གཞན་དོན་མཛད་པའི་དམ་བཅའ་ལ་ཐུགས་དམ་ཟེར་བ་ཡིན་ན། ང་ཚོའི་ལུས་ངག་ཡིད་གསུམ་ལས་གཙོ་བོ་གོང་ནས་བཤད་པ་ལྟར་སེམས་འདི་རེད་ཅེས་སྨོས་པ་བཞིན་དུ། རྒྱལ་བའི་གསང་གསུམ་གྱི་རྩ་བ་ཐུགས་རེད་མོད། དེས་ན་གནད་ངོ་མ་ཐུགས་རྒྱུད་བསྐུལ་བས་བདག་སོགས་སེམས་ཅན་ཐམས་ཅད་ལ་ཐུགས་རྗེས་གཟིགས་ཟེར་བཞིན་ཡོད་པས་ན་ཐུགས་དམ་གནད་བསྐུལ་གསང་བ་སྔགས་ཀྱི་སྒོ་གསུངས་པ་རེད།།

གསུམ་པ་དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། །ཞེས་དམིགས་པ་ལ་ཡང་ཁྱད་པར་ཡོད་པ་ཡིན་ཏེ། བསྐྱེད་རྫོགས་སོ་སོའི་འགྲོས་དང་བསྟུན་མཚན་བཅས་དང་མཚན་མེད་ཀྱི་རྣལ་འབྱོར། དམིགས་པ་ལ་བརྟེན་ཏེ་མི་དམིགས་པར་འཇོག་ལུགས་ལ་སོགས་པ་མང་བ་ཡིན་མོད། འདོན་པ་རྐྱང་བ་མ་ཟད་གང་ལ་གང་འོས་ཀྱི་མ་ཡེངས་རྩེ་གཅིག་གིས་འདུན་པའི་གཞུར་ལ་དྲངས་པའི་དམིགས་གཏད་དགོས་པ་རེད་གསུངས་པ་རེད། དེ་ནི་དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ་ཞེས་པ་དེ་ཡིན།།

གསང་སྔགས་ལུང་གི་སྒོ་བཞི་ལས་རྗེས་མ་བཞི་པ་ནི། མཚོན་པ་བརྡ་རྟགས་ཕྱག་རྒྱ་གར་གྱི་སྒོ། །ཞེས་ལུས་ཀྱི་ཕྱག་རྒྱའི་སྟངས་སྟབས་ནི། ང་ཚོའི་འཆམ་འཆམས་ནས་ལྷ་འཆམ་འཆམས་རྒྱུ་འདི་རིགས། རང་བཞིན་ཅི་མཚར་གང་འདོད་དང་གང་ཡག་གི་ཟློས་གར་འཁྲབ་པ་ལྟ་བུ་མ་ཡིན་པར་པད་སྐོར་རེ་རེ་དང་ནི་སེ་གོལ་རེ་རེ། རྐང་བའི་སྟངས་སྟབས་རེ་རེ་དང་ནི་ལག་པའི་ཕུར་དར་རེ་གཡུག་ལུགས་ཚུན་ཆད་ལ་ཁྱད་པར་ཆེན་པོ་ཡོད་པ་རེད། དེ་ལ་རྒྱུ་མཚན་རེ་དང་འགྲེལ་བཤད་རེ་ཡོད་པ་རེད། བརྒྱུད་པའི་བྱིན་རླབས་མ་ཉམས་པ་ཡིན་པས་ན་མཐོང་བ་བརྒྱུད་པའི་ཕྱག་ལེན་ལ་ནོར་འཆུག་འགྲོ་མི་ཉན་པའི་རྩ་བ་དེར་ཐུག་པ་རེད། འདིའི་སྟངས་སྟབས་ཕྱག་རྒྱ་ཐམས་ཅད་ལྷའི་སྐུ་གསུང་ཐུགས་ཀྱི་དག་པ་དང་སྦྱར་བ་དག་དག་ཡིན་པ་རེད། དེ་ཡིན་ན་ལྷ་ཉིད་སྔགས་དང་ཕྱག་རྒྱར་ཤར་བས་སྔགས་ཕྱག་རྒྱ་ལྷ་དང་གཉིས་མེད་དུ་གྲུབ་པ་རེད། འདི་ལ་ཡང་ནང་གསེས་ཀྱི་དབྱེ་བ་ཕྱེ་ན། དམ་ཚིག་གི་ཕྱག་རྒྱ། ལུས་ཀྱི་ཕྱག་རྒྱ་དང་ཆོས་ཀྱི་ཕྱག་རྒྱ། ཕྱག་རྒྱ་ཆེན་པོ་བཞི་ཚང་དགོས་པའི་བསྐྱེད་རིམ་ཞིབ་ཏུ་བཤད་རྒྱུ་ཡོད་པ་ཞིག་རེད། །དེ་ལྟ་བུའི་གསང་སྔགས་ལུང་གི་སྒོ་བཞི་དང་འབྲེལ་བའི་ངག་འདོན་རྒྱས་སྤྲོས་ཀྱི་ཚིག་ཚོགས་མང་བོ་ཅན་མ་ཡིན་པས་བསྡུས་པ། བསྡུས་པའི་ནང་ནས་ཀྱང་ཉུང་བསྡུས་སུ་བཀོད་པ་ཡིན་པས་ན་ཤིན་ཏུ་བསྡུས་པ་ཞེས་པ་ཡིན།།

ད་བྱིན་རླབས་གློག་ཞགས་ཞེས་པ་ཞིག་ཡོད་པ་དེ་མིང་ངོ་མ་བོ་རེད། མིང་ལ་བཏགས་ལུགས་མང་བོ་ཞིག་ཡོད་པ་ལས་འདི་བྱེད་ལས་ལ་ལྟོས་ཏེ་འདྲ་བ་རྒྱུ་མཚན་དུ་བྱས་ཏེ་བཏགས་པ་ཡིན། འདི་འབྲི་བ་པོ་ངས་བྲིས་པ་ཡིན་མོད། ནང་དོན་ཆོས་ཡིན་པས་ན་ཆོས་བཤད་བཤད་བྱེད་དུས་མཚན་ཞེས་བརྗོད་དགོས་ན་མཚན་བཏགས་པའི་དགོས་པ། རབ་ཀྱིས་དབུ་མཚན་མཐོང་བ་དང་དབུ་ཞབས་ཀྱི་ནང་དོན་ཤེས་སྤྱད། འབྲིང་གིས་འདི་ཅི་ཞིག་གི་སྐོར་ཡིན་པ་རྟོགས་སྤྱད། ཐ་མ་ཡིན་ཡང་ངག་འདོན་མང་བོའི་ནང་ནས་འདི་གང་ཡིན་བཙལ་བདེ་བའི་དགོས་པ་དང་ལྡན། འདི་འདི་ཅན་པོ་རེད་བསམ་རྒྱུ་དེ་ཤེས་པའི་ཆེད་དུ་ཡིན་པ་རེད། དེ་ཚོ་གཅིག་ཡིན་ན་བཤད་རྒྱུའི་དགོས་པ་མི་ཆེ། འདི་ཟུར་བཀོལ་གྱི་ངག་འདོན་བསྡུས་བཀོད་ཅིག་རེད། གཞུང་བཤད་བྱེད་ཡོང་ས་ཞིག་མེད་མོད། གཅིག་ཐང་ན་མི་སྐྱ་ཕོ་མོ་འདི་ཙམ་གྱི་སྣེ་ཁྲིད་ནས་ཐོས་པ་ལ་ཁ་ཕྱོགས་སྤྱད་དང་། ཆོས་ཐོས་བསམ་གྱིས་དེ་ལྟར་བྱས་ནས་གཏན་ལ་ཕབས་བསམ་རྒྱུའི་རྒྱུད་ལ་བག་ཆགས་བཟང་བོ་ཞིག་འཇོག་སྤྱད་ཨེ་ཡོང་བསམ་ནས་དེ་ལྟར་བཤད་པ་ཡིན། དེ་ནས་བྱིན་རླབས་ཞེས་པ་དེ་ཅི་འདྲ་ཞིག་ལ་གོ་དགོས་ནི་རེད་བསམ་ན། བྱིན་རླབས་ཞེས་པའི་བྱིན་དེ་མིང་ཚིག་ཅིག་རེད། རླབས་ནི་བྱ་ཚིག་ཅིག་རེད། བྱིན་ནི་རྒྱལ་བའི་ཐུགས་གསུང་གི་གསང་བ་བསམ་གྱིས་མི་ཁྱབ་པའི་བྱིན་ནམ་ཡོན་ཏན་རང་བཞིན་ཅན་གྱི་མཐུ་ནུས་ཤིག་ལ་གོ་དགོས། དེས་ཇི་ལྟར་རླབས་པ་ཡིན་ཞེ་ན། དཔེར་ན་ལྕགས་ལ་གསེར་འགྱུར་གྱི་རྩིས་ཐེབས་པ་ལྟར་དུ། རང་རྒྱུད་ལྕགས་ནག་གི་གོང་བུ་ལྟ་བུ་དམན་པ་ལ་རྒྱལ་བའི་གསང་གསུམ་གྱི་བྱིན་ནུས་གསེར་འགྱུར་གྱི་རྩི་ལྟ་བུ་དེ་ཐེབས་སོང་དུས། ལྕགས་གསེར་ལ་འགྱུར་བ་ལྟར་འགྱུར་སོང་བ། རྒྱུད་སྡུག་པོ་དེ་བཟང་པོར་འགྱུར་བ་དེ་བརླབས་པའི་གོ་དོན། སེམས་ཅན་སངས་རྒྱས་སུ་འགྱུར་བའམ་འགྱུར་རུང་གི་མཆོག་གི་དངོས་གྲུབ་ཀྱི་ནུས་པ་ཐོབ་པ་ལ་བྱིན་རླབས་ཐོབ་པ་ཞེས་གོ་དགོས་པ་རེད། གློག་ཞགས་ཞེས་པ་ནི་འདིར་དཔེ་བཞག་པ་རེད། གློག་ཞགས་དེ་མྱུར་བའི་དཔེ་ཞིག་དང་མགྱོགས་པའི་དཔེ་ཞིག་ཡིན་པས་ན་མྱུར་མགྱོགས་ཅན་གྱི་དཔེ་ཞིག་ཡིན། གློག་འདི་དེ་འདྲའི་མགྱོགས་དོན་ཅི་རེད། དེ་བས་མགྱོགས་པ་ཞིག་མེད་པ་ཡིན་ནམ་ཞེ་ན། མི་ཚོས་སྒྲ་མགྱོགས་པའི་ཚད་ལ་འཇོག་མོད་སྒྲ་ལས་ཀྱང་གློག་གི་འཇུག་པ་མྱུར་བ་རེད། དེ་མྱུར་ས་ཨེ་ཡོད་ཀི་འབྲུག་གློག་གཉིས་ལས་གློག་འཁྱུག་པ་དང་མཐོང་བ་འདི་སྒྲ་བས་གློག་མྱུར་བའི་རྟགས་རེད། དོན་ངོ་མས་བཤད་ན། འབྲུག་སྒྲ་གློག་གི་སྒྲ་ཡིན་པས་གཉིས་ཀ་དུས་མཉམ་ཡིན་མོད། ཐུགས་རྗེ་གློག་ལྟར་མྱུར་བའི་ཐོད་ཕྲེང་རྩལ་ཟེར་བ། སློབ་དཔོན་ཆེན་པོ་ད་ལྟ་ལྷོ་ནུབ་སྲིན་པོའི་ཁ་གནོན་ལ་ཐོད་ཕྲེང་རྩལ་གྱི་སྐུར་བཞུགས་པ་ལ་ཐད་ཀར་མཚན་ནས་བོས་པ་ལྟ་བུ། ངག་འདོན་འདི་ཡང་། བླ་མ་མཚོ་སྐྱེས་རྡོ་རྗེའི་དགོངས་ཀློང་དུ་ཐུགས་ཡིད་དབྱེར་མེད་རོ་གཅིག་ཏུ་འདྲེས་པའི་བྱིན་རླབས་ཐོབ་བྱེད་ཀྱི་བྱེད་པ་མྱུར་བའི་ཐད་ནས་གློག་གི་ཞགས་པ་དང་ཆོས་མཚུངས་ཀྱི་དཔེར་སྦྱར་བ་རེད། ཞགས་པ་དེ་རྒྱང་རིང་ན་ཡོད་ཀྱང་གམ་ན་གནས་པ་ཇི་བཞིན་འཛིན་སྤྱད་ཞིག་རེད། འདི་ནས་སྙན་ངག་པའི་དཔེའི་གཟུགས་རྒྱན་གྱི་རྒྱན་དུ་བཞག་ནས་བྱིན་རླབས་གློག་གི་ཞགས་པ་ཞེས་དོན་འདུས་ཞིང་འཛིན་བདེ་བ། འདི་ལ་སྒྲ་བཤད་འཇུག་གཉིས་ཀ་ཡོད་པའི་མིང་ངམ་མཚན་སྨོས་པ་ཡིན། དེ་ཉིད་འདི་ན་བཞུགས་ཞེས་པ་ཞེ་སར་བྱས་པའི་ཚིག་གྲོགས་སྦྱར་ནས་འདི་ན་ཡོད་ཅེས་པ་རེད། དེ་ཡན་ཆད་ཐོག་མར་དགེ་བ་ཀླད་ཀྱི་དོན་རེད།།

དེ་ནས་རྩིས་མགོ་ཡན་ལག་ལྔ་དང་དགོས་འབྲེལ་ཡན་ལག་བཞི་ལ་སོགས་པ་བཤད་རྒྱུ་ཡོད་པ་རེད་དེ། ད་རེས་ཀྱི་སྐབས་སུ་བཤད་གལ་མི་ཆེ། མི་ཆེ་རུང་འདི་ཨབ་བྲ་ཆུང་རུང་སུག་བཞི་ཚང་ཡོད་པ་རེད། དེ་དག་འདིའི་མཇུག་བྱང་ཡན་ཆད་ནས་གསལ་ཞིང་ཚང་བ་ཞིག་ཡིན་པ་རེད། དེས་ཆོག་མོད། དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱོར་བཅས། །བརྒལ་ལན་བཅས་ཏེ་ཞེས་གསུངས་ཡོད་པ་དེའི་ནང་ནས་བརྒལ་ལན་གྱི་ཐད་ནས་ངག་འདོན་བྱིན་རླབས་གློག་ཞགས་འབྲེལ་མི་ཆགས། རྒྱལ་བའི་ཐུགས་རྗེ་བྱིན་རླབས་གདུལ་བྱར་འཇུག་དགོས་དུས། ངག་འདོན་ལ་དེ་བཏགས་པ་མི་འཐད་དོ་ཟེར་ན། དེ་ནི་ཆེས་འཐད་དེ། ཅིས་ཕྱིར་ན་དང་པོ་མགོ་ལེན་དུས་ནས་བྱེད་ལས་ལ་ལྟོས་ཏེ་བཏགས་པའི་མིང་ཡིན་ཞུས་པ་ཡིན་པས། ངག་འདོན་གྱི་བརྗོད་པ་ཚིག་གི་སྒོ་ཡིད་ཀྱི་མོས་གུས་གདུང་ཤུགས་དང་འགྲོགས་པས། རྒྱལ་བའི་ཐུགས་རྗེའི་ཐུགས་དམ་གྱི་གནད་ནས་བསྐུལ་བ་དང་ནི། རྣམ་པ་གཅིག་ཏུ་ན་འདིའི་ཚིག་དོན་དག་ཀྱང་རྡོ་རྗེའི་གསུང་སྡུད་པར་བྱེད་པའི་ཚིག་ཕྲེང་ཡིན་པས་ན། གང་ལྟར་བྱས་ཀྱང་འཐད་པར་གྲུབ་པ་རེད།།

བར་དུ་དགེ་བ་གཞུང་གི་དོན།

ཧཱུྃ། ལམ་ལོག་པ་ལས་ལྡོག་པའི་ཆེད་དུ་སྐྱབས་འགྲོ།

ཀ ཕྱི་ནང་གསང་བའི་སྐྱབས་འགྲོ་བཤད་པ།

༡ ཐུན་མོང་ཕྱི་ཡི་སྐྱབས་འགྲོ

བར་དུ་དགེ་བ་གཞུང་དོན་དངོས་ལ། ཐུན་དང་ཐུན་མཚམས་གཉིས་ཀྱི་ཆོས་སྤྱོད་ལ་དབྱེ་ཡོང་དུས། དང་པོ་ཐུན་གྱི་སྐབས་ལ་ཡང་། ནང་གསེས་སུ་སྐྱབས་འགྲོ། སེམས་བསྐྱེད། ཡན་ལག་བདུན་པ། བླ་མའི་རྣལ་འབྱོར་དངོས་ཏེ་དངོས་བསྟན་ས་བཅད་བཞིའི་ཁུངས་སུ་བསྡུ་རྒྱུ་རེ་ཡོད།།

དེའི་ནང་ནས་དང་པོ་སྐྱབས་འགྲོ་ཡིན། དེའི་སྔོན་ལ་སྐྱབས་འགྲོ་སེམས་བསྐྱེད་ཐུན་མོང་གི་ཚོགས་ཞིང་གསལ་འདེབས་སེམས་བསྐྱེད་ཀྱི་སྒོས་ཆོས་དགོངས་གསོལ་དང་སྦྲགས་ཏེ་ཡོང་གི་ཡོད་པ་རེད། དེ་དག་ཚིག་རྐང་རེ་རེའི་བསྟན་ཡོད་པ་རེད། ཕྱོགས་བཅུའི་སངས་རྒྱས་བྱང་སེམས་བླ་མ་དགོངས། །ཞེས་པས་ཚོགས་ཞིང་གསལ་འདེབས་པའི་དགོངས་གསོལ་དང་བཅས་པ་བསྟན་པ་ཡིན། དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །ཞེས་པས་སྐྱབས་འགྲོ་དངོས་བསྟན་པ་ཡིན།།

དེ་ནས། སེམས་ཅན་དོན་དུ་བྱང་ཆུབ་སེམས་མཆོག་བསྐྱེད། །ཅེས་པས་ངག་འདོན་འདིའི་སེམས་བསྐྱེད་བསྟན་པ་རེད། ངག་འདོན་འདིའི་དངོས་བསྟན་སྐྱབས་འགྲོ་སེམས་བསྐྱེད་གཉིས་བླ་མའི་རྣལ་འབྱོར་དང་གསུམ་གྱིས་ཐུན་མིན་ནང་གི་སྔོན་འགྲོ་རྡོར་སེམས་སྒོམ་བཟླས་དང་མཎྜལ་གཉིས་ཀ་ཡང་བསྡུས་ཡོད།།

ཅི་ལྟར་བསྡུས་ཞེ་ན། བླ་རྣམ་གྱི་སྔོན་ལ་མ་སོང་ཐབས་མེད་ཀྱི་ཡན་ལག་བདུན་པའི་བསགས་སྦྱང་གི་ཁོངས་སུ་དེ་གཉིས་འདུས་པར་མ་ཟད། ཤུགས་བསྟན་ཐམས་ཅད་ཀྱི་སྔོན་ལ། ཐུན་མོང་ཕྱིའི་སྔོན་འགྲོའི་ཁྲིད་རྐང་ཐམས་ཅད་ཀྱང་ཡིད་ལ་ངེས་པ་གཞིར་བཞག་གི་སྟེང་ནས། ཐུན་བཞིའི་རྣལ་འབྱོར་གྱི་སྐབས་ཀྱི་རླུང་དང་ངག་བྱིན་རླབས་ལ་སོགས་པ་དག་ཀྱང་ཤུགས་ནས་གོ་རྒྱུའམ། ཉིན་དང་མཚན་མོར་རྣལ་འབྱོར་གཅིག་པུར་བརྩོན་པའི་ཁོམ་ལོངས་ཅན་གྱིས་ངག་འདོན་རྒྱས་པར་འཇུག་པ་དང་ནི། སྔོན་འགྲོའི་ངག་འདོན་རྒྱས་བསྡུས་ཐམས་ཅད་ཀྱི་རྒྱབ་ཆོས་སུ་གྱུར་བ་དེ་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་། དེ་ལས་ཉམས་ལེན་བློ་སྦྱོང་གི་གནད་ཞིབ་ཕྲ་ངེས་རྒྱུ་ཅན་པོའི་སྒོ་ཡང་འདིའི་འབྱེད་བཞིན་ཡོད་པ་རེད། དེས་ན་ཐོག་མར་ངེས་དགོས་རྒྱུའི་དལ་འབྱོར་གྱི་ཆོས་བཅོ་བརྒྱད་དང་སོ་བཞིའི་ཐད་ནས་ཆོས་སྒྲུབ་པའི་མཐུན་རྐྱེན་ཚོགས་པ་དཀོན་པོ་ཡིན་རྒྱུ། ད་རེས་དལ་རྟེན་རྙེད་ཀྱང་ཚེ་ལ་ངེས་པ་མེད་ལུགས། འཁོར་བ་གང་དུ་སྐྱེས་ཀྱང་སྡུག་བསྔལ་ལས་མ་འདས་པ་ཡིན་ཚུལ། བདེ་སྡུག་ཐམས་ཅད་པོ་ལས་ལས་བྱུང་བ་ཡིན་པས་དགེ་སྡིག་སྤང་བླང་འདོར་ལེན་གྱི་གནད་ཤེས་དགོས་ལུགས། དེ་ལྟ་བུའི་བློ་ལྡོག་རྣམ་བཞིའི་འཁོར་བ་ལས་ཡིད་འབྱུང་བའི་ཞེན་ལོག་གཅིག་པུ་རྐྱང་རྐྱང་གིས་མི་ཆོག་པར་འཁོར་བའི་གནས་ལས་བྲོས་ནས་གང་དུ་ཐར་བའི་ཐར་བ་མཆོག སྲིད་ཞིའི་མཐའ་ལ་མི་གནས་པའི་གཏན་བདེ་བྱང་ཆུབ་དམ་པའི་གོ་འཕང་ཡིན་པས། དེ་ཐོབ་དགོས་ན་དེའི་ལམ་རྒྱུས་ཅན་གྱི་ལམ་ཁྲིད་དགེ་བའི་བཤེས་གཉེན་མིང་དོན་གཉིས་ཀ་མཚུངས་པ། བློ་ཧྲིལ་སེ་བཀལ་བཏང་ཆོག་པའི་བླ་མ་མཚན་ཉིད་ལྡན་པ་ཞིག་བསྟེན་དགོས་པ་དང་། བསྟེན་ལུགས་དང་བསྟེན་པའི་དགོས་དོན་དང་བཅས་པ་ངེས་དགོས་པའི་སྟེང་ནས་ཐུན་མིན་ནང་གི་སྔོན་འགྲོའི་ངག་འདོན་གྱི་དངོས་བསྟན་ལ་འཇུག་དགོས་པ་ཡིན། དེ་བས་འདི་ཁྲིད་བྱས་ནས་རྒྱས་རྒྱས་བྱས་ནས་བཤད་པ་དང་རྒྱུན་འདོན་བྱས་ནས་ངག་ཐོག་ནས་མགྱོགས་འདོན་བྱས་ནའང་མདོར་ན་གཅིག་ཡིན་ནི་རེད། དེ་རིང་ང་ཚོའི་འགོའི་ཚིག་རྐང་གསུམ་པོ་བཤད་པར་བྱ་བ་དང་། སང་ཉིན་དེའི་འཕྲོར་ཚིག་གསུམ་ཡན་ལག་བདུན་པ་བཤད། གནངས་ཉིན་བླ་མའི་རྣལ་འབྱོར་བཤད་ན། དེའི་ཕྱི་ཉིན་ཐམས་ཅད་ཀྱི་རྗེས་མ་ཆོས་ཉིད་མི་འགྱུར་སོགས་བདེ་ཆེན་ཞིང་ཁྲིད་དངོས་དང་འབྲེལ་ནས་བཤད་ན་བསམ་པ་ཡིན།།

ཚོགས་ཞིང་གསལ་འདེབས་སེམས་བསྐྱེད་ཀྱི་སྒོས་ཆོས་དགོངས་གསོལ།

དེ་རིང་གི་ཚིག་རྐང་དང་པོ། ཕྱོགས་བཅུའི་སངས་རྒྱས་བྱང་སེམས་བླ་མ་དགོངས། །ཟེར་བ་འདི་རེད། འདིའི་སྐྱབས་འགྲོའི་ཚོགས་ཞིང་དང་ནི་སེམས་བསྐྱེད་ཀྱི་ཚོགས་ཞིང་གཉིས་ཀ་སྟབས་གཅིག་ཏུ་བསྟན་པ་ཡིན་ན། མཇུག་དེ་ན་དགོངས་ཞེས་པའི་ཚིག་ཞིག་ཡོད་པ་དགོངས་ཟེར་བ་སེམས་བསྐྱེད་ཀྱི་དཔང་པོར་དགོངས་སུ་གསོལ་བའི་ཚིག་རེད།།

སྤྱིར་ན་བླ་མ་བསྒོམ་དུས་བྱིན་རླབས་ཀྱི་འཇུག་པ་མྱུར་དགོས་བསམ་ན་ཚོགས་ཞིང་གི་སྐབས་སུ་བརྒྱུད་པའི་བླ་མ་ཐོ་བརྩེགས་སུ་སྒོམ་དགོས་གསུང་ཡོད་པ་རེད། ཡང་ཁྲོམ་ཚོགས་སུ་བསྒོམ་པ་གསོལ་འདེབས་དང་འཕོ་བ་སོགས་ཀྱི་དགོས་དོན་གློ་བུར་བའི་དགོས་པ་ཡོད་པ་རེད། ཡང་བླ་མའི་རྣལ་འབྱོར་སྐབས་ལ་ཀུན་འདུས་ནོར་བུའི་ལུགས་སུ་གཅིག་ཆོག་ཏུ་བསྒོམ་ལུགས་ཀྱང་ཡོད། གང་ཟག་ཕལ་བས་བླ་མ་མི་རུ་བཟུང་བའི་རྣམ་པ་བཟློག་སྤྱད་དུ་བླ་མ་ཉིད་རྣམ་པ་མཚོ་སྐྱེས་རྡོ་རྗེ་སོགས་སུ་བསྒྱུར་བ་མ་གཏོགས། བླ་མ་སངས་རྒྱས་དངོས་མཐོང་གི་དད་པ་བཅོས་མིན་ངོ་མ་ཡོད་ན། རྣམ་པ་བསྒྱུར་མི་དགོས་པར་བླ་མ་ཇི་ལྟ་བ་བཞིན་བསྒོམ་ན་ཡང་ཆོག་པར་གསུངས་པའི་ལོ་རྒྱུས་ཡོད་པ་རེད། དེ་ལྟ་བུའི་བྱིན་རླབས་འཇུག་པའི་རྒྱུ་མཚན་ཡང་བཤད་རྒྱུ་ཡོད་པ་རེད། ཕྱག་ལེན་དང་ཞལ་རྒྱུན་ལ་སྐྱབས་འགྲོ་དང་སེམས་བསྐྱེད་གཉིས་ཀྱི་ཚོགས་ཞིང་སྐྱབས་འགྲོའི་ཚོགས་ཞིང་ལྟར་བསྒོམ་ནས། མཐར་ཐུན་བསྡུ་དུས་སྐྱབས་འགྲོའི་སྐབས་ལ། རང་གཞན་སེམས་ཅན་ཐམས་ཅད་སྐྱབས་ཡུལ་ལྷ་ཚོགས་ནས་བླ་མའི་ཐུགས་ཀར་ཡར་ལ་ཐིམ་དགོས་རྒྱུ་དེ་ནི་དགོངས་ཀློང་དབྱེར་མེད་དུ་འདྲེས་དགོས་པའི་དོན་ཅན་དང་། སེམས་བསྐྱེད་སྐབས་སུ། སྐྱབས་ཡུལ་ལྷ་ཚོགས་ཐམས་ཅད་མཐའ་ནས་འོད་དུ་ཞུ་ནས་དབུས་ཀྱི་བླ་མར་ཐིམ། བླ་མ་ཡང་འོད་དུ་ཞུ་ནས་རང་ལ་ཐིམ་པས། སེམས་བསྐྱེད་རྒྱུད་ལ་འཇུག་པའི་ཐིམ་ལུགས་ཀྱི་ཁྱད་པར་གྱིས་དེ་གཉིས་ཀྱི་ཐུན་བསྡུ་ལུགས་འདྲ་བ་མ་ཡིན། ད་སེམས་བསྐྱེད་ཀྱི་ཐུན་བསྡུ་དུས། ལྷ་ཚོགས་ཐམས་ཅད་མཐའ་ནས་རིམ་བཞིན་འོད་དུ་ཞུ་སྟེ་དབུས་ཀྱི་བླ་མར་ཐིམ་པ་ནས། བླ་མ་ཡང་འོད་དུ་ཞུ་ནས། རང་ལ་ཐིམ་རྒྱུའི་ཚིག་འགྲོས་དེ་དེད་ན་ཁྲོམ་ཚོགས་སུ་གསལ་ན་འགལ་བ་མེད་པའི་གནད་དེ་ཨི་རེད་ཀོ་བསམ་རྒྱུ་ཡིན་རུང་། ཕྱག་ལེན་ལ་གཉིས་ཀའི་སྐབས་ལ་བརྒྱུད་གསུམ་བླ་མ་ཐོ་བརྩེགས་སུ་གསལ་པ་དེ་འདྲ་རེད། སྐྱབས་འགྲོའི་ཚོགས་ཞིང་བསྒོམ་དུས་རང་ཉིད་འདུག་པའི་ས་ཕྱོགས་ཐམས་ཅད་ཀྱང་ཐ་མལ་གྱི་མ་དག་པའི་འཇིག་རྟེན་གྱི་ཁམས་འདི་ལྟ་བུ་མ་ཡིན་པར་མཛེས་ཞིང་ཡིད་དུ་འོང་བའི་ཞིང་ཁམས་རྒྱ་ཁྱོན་དཔག་པར་དཀའ་བ་ཞིག་ལ་བསྒོམ་ནས་མདུན་ན་རིན་པོ་ཆེའི་སྣ་ཚོགས་ལས་གྲུབ་པའི་དཔག་བསམ་གྱི་ལྗོན་ཤིང་ཡལ་ག་ལྔ་བ་ཞིག་ཡོད་པ། དེའི་དཔག་བསམ་གྱི་ལྗོན་ཤིང་དེ་ཉིད་རྒྱ་དང་དཔང་ཚད་དུ་མེད་པ། དེའི་དབུས་ཀྱི་ཡལ་ག་ལ་བླ་མ་དང་གུ་རུ་མཚོ་སྐྱེས་རྡོ་རྗེ་དབྱེར་མེད། དེའི་སྤྱི་བོ་ན་བརྒྱུད་པའི་བླ་མ་ཐམས་ཅད་ཐོ་བརྩེགས་སུ་གཅིག་གི་གདན་ལ་གཅིག་གི་དབུ་མ་རེག་པར་ཡོད་པ། དེའི་མཐའ་བསྐོར་ཐམས་ཅད་དུ་ཡི་དམ་མཁའ་འགྲོ་ཆོས་སྐྱོང་དང་བཅས་པ་དེ་ལྟར་བསྒོམ་དགོས། དཔག་བསམ་གྱི་ལྗོན་པ་ཡལ་ག་ལྔ་བ་བསྒོམ་དུས་མདུན་གྱི་ཡལ་ག་ན་སངས་རྒྱས་སྤྲུལ་བའི་སྐུ་ཤཱཀྱ་ཐུབ་པ་ལ་སོགས། གཡས་ཀྱི་ཡལ་གར་བྱང་སེམས་ཀྱི་དགེ་འདུན། གཡོན་གྱི་ཡལ་གར་ཉན་རང་དགྲ་བཅོམ་པ། རྒྱབ་ཀྱི་ཡལ་གར་ཆོས་དཀོན་མཆོག་གླེགས་བམ་བརྩེགས་པའི་རྣམ་པར་བཞུགས་པ་ལ་སོགས་ཀུན་བཟང་ཞལ་ལུང་གི་གསུངས་བ་ལྟར་བསྒོམ་དགོས། །འདིའི་ནང་ན་ཀུན་བཟང་ཞལ་ལུང་མང་བོ་བལྟ་རྒྱུའི་ཁས་ལེན་བྱེད་མཁན་ཡོད། མང་པོས་བལྟས་ཀྱང་ཚར་བ་རེད། དེ་འདྲ་ཁས་མ་བླངས་པ་རྣམས་ཀྱིས་ཀུན་བཟང་བླ་མའི་ཞལ་ལུང་དུས་རྒྱུན་ལ་བལྟ་དགོས་པ་ཡིན། ཚར་གཅིག་བལྟས་པས་མི་འོང་བས་ཚར་མང་བོ་བལྟ་དགོས་པ་རེད། ཚར་མང་བོ་ཅི་ཙམ་བལྟས་ན་རང་ལ་ཡོང་སྒོ་དེ་བས་ཆེ་བ་རེད། ད་ང་ཚོས་འདིའི་ཚིག་དེད་ན་ཕྱོགས་བཅུའི་སངས་རྒྱས་བྱང་སེམས་བླ་མ་དགོངས་ཟེར་བ། ཕྱོགས་བཅུ་ཟེར་དུས་ཅི་ཟེར་བ་ཡིན་མི་སྐྱ་ཕོ་མོས་དེ་ཡང་ཤེས་དཀའ་བ་རེད། ཕྱོགས་བཞི་མཚམས་བཞི་དང་བརྒྱད། སྟེང་འོག་གཉིས་དང་བཅུ་ལ་ཕྱོགས་བཅུ་ཟེར། དེ་ལས་འདས་པའི་ཕྱོགས་ཞིག་མེད་མོད་ཕྱོགས་མེད་ཕྱོགས་དང་བྲལ་བའི་ཤར་ཕྱོགས་ན། ཞེས་སོགས་གྲོང་ཆོག་པའི་འདོན་པ་དེ་ཚོ་གོ་ན། འདོན་ཆོག་གི་ནང་ན་ཡོད་པ་དེ་ནི་སྤྱིར་བཏང་གི་ཕྱོགས་སུ་བཅད་པ་འདི་ཡིད་ངོར་མོས་པའི་གསལ་འདེབས་ཀྱི་བརྡ་སྟོན་པ་ཙམ་གསུང་གི་ཡོད་པ་རེད། དེ་འདྲ་རེད་མ་གཏོགས་ཤར་ཕྱོགས་ཀྱི་ཤར་ལ་སོགས་པ་ངོ་མས་དེད་ན་ཕྱོགས་ཀྱང་དོན་ལ་མ་གྲུབ་པ་མཐའ་མེད་ཡིན་རེད། དེ་ལྟར་ཡིན་པས་ན། ཕྱོགས་མེད་ཕྱོགས་བྲལ་གྱི་དོན་དུ་སངས་རྒྱས་བྱང་སེམས་བླ་མ་ཐམས་ཅད་ཅེས་སྨོས་རུང་། དོན་ལ་མཁའ་ཁྱབ་མཁའ་དང་མཉམ་པའི་སྐུ་ལྔའི་སངས་རྒྱས། དེ་ཐམས་ཅད་ཀྱང་རང་བཞིན་སྤྲོས་པ་དང་བྲལ་བའི་ཆོས་ཀྱི་དབྱིངས་ན་དགོངས་ཀློང་ཐ་མི་དད་པར་བཞུགས་པ་ཡིན། ཇི་སྙེད་སངས་རྒྱས་ཐམས་ཅད་དང་བླ་མ་རྡོ་རྗེ་འཛིན་པ་གསང་སྔགས་ཀྱི་དཀྱིལ་འཁོར་ཐམས་ཅད་ཀྱི་གཙོ་བོ། རིགས་ཀུན་འདུས་པའི་སྤྱི་བདག་གམ་ཁྱབ་བདག རིགས་རྣམས་ཀུན་འདུས་རྡོ་རྗེ་འཆང་ངམ་རྡོ་རྗེ་སེམས་དཔའི་ངོ་བོ་རུ་བཞུགས་པ་ལ་རྡོ་རྗེ་འཛིན་པ་ཞེས་གསང་བ་སྔགས་ཀྱི་དཀྱིལ་འཁོར་གྱི་གཙོ་བདག་ཆེན་པོ་ཞེས་པའི་དོན། སེམས་བསྐྱེད་ཀྱི་སྐབས་ལ་དགོངས་སུ་གསོལ་བ་གསུམ་སྔོན་དུ་འགྲོ་བ་ཅི་ཞིག་གི་དོན་དུ་རེད་ཅེ་ན། སངས་རྒྱས་དང་གཅིག བྱང་སེམས་དང་གཉིས། བླ་མ་གསུམ་པོ་རེ་རེ་བཞིན་དུ་དགོངས་གསོལ་ལན་གསུམ་རེ་བརྗོད་རྒྱུ་དང་སྟབས་གཅིག་ཏུ་བརྗོད་པའི་ཁྱད་པར་སྲོལ་གཉིས་སོ་སོའི་ཕྱག་ལེན་གྱི་སྐབས་ནས་འབྱུང་བ་ལྟར་དུ་རེད། སྐབས་དོན་དགོངས་ཟེར་བ་འདིས་དགོངས་སུ་གསོལ་ཞེས་སྙན་གསན་དབབ་པ། ཁྱེད་རྣམ་པའི་ཐུགས་ང་ལ་གཏོད་ཅེས་ཟེར་བ་ལྟ་བུ་རེད།།

དཀོན་མཆོག་གསུམ་ལ་སྙིང་ནས་སྐྱབས་སུ་འགྲོ་བ།

ཚིག་རྐང་གཉིས་པ། དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །ཞེས་སྨོས་ན། དཀོན་མཆོག་གསུམ་ལ་སྙིང་ནས་སྐྱབས་སུ་མཆི་ཞེས་པས་སྐྱབས་འགྲོ་བསྟན་ན། དཀོན་མཆོག་གསུམ་ཁ་ནས་བརྗོད་པས་མི་ཡོང་གི་དཀོན་མཆོག་གསུམ་གང་ཡིན་རེ་རེ་བཞིན་དུ་ངོས་ཟིན་ནས་ཤེས་དགོས་པས། དཀོན་མཆོག་གསུམ་གང་ཡིན་ངོས་མ་ཟིན་གོང་ནས་དེ་རྣམ་པ་གསུམ་པོ་ཚད་དུ་བཙུགས་ནས་མནའ་བསྐྱལ་བ་ཚོས་ཁ་གྲངས་རང་གིས་ཀྱང་མི་ཤེས་རྒྱུ་ཁ་ནས་ནམ་ཇི་ལྟར་འགྲོ་བ་མི་ཤེས་པར་སྡིག་ཆེན་དོན་མེད་དུ་བསགས་ཚར་བ་ཡིན་མོད། ད་ནི་བསམ་བློ་རིག་པ་གཏན་ལ་ཕབས་ནས་ཡང་བལྟ་བྱས་ན་རེད་མེད་ཀི་བསམ་རྒྱུའི་གོ་རྟོགས་དེའི་སྟེང་ནས་དཀོན་མཆོག་གསུམ་ཞིབ་ཅིང་ཕྲ་བའི་རྣམ་དབྱེ་ནས་བཟུང་མ་ཤེས་ནའང་རགས་རིམ་ཙམ་ཞིག གཏད་ཡུལ་འདི་ཡིན་བསམ་རྒྱུ་མ་ཤེས་དུས་ནང་པ་སངས་རྒྱས་པའི་ཆོས་ལ་གཏན་ནས་ཚུད་ཀི་ཡོད་པ་མ་རེད། རལ་བས་མ་ཡིན་དབྱུག་པས་མིན། །གསུངས་ཡོད་ནི་རེད། དེ་ཅི་རེད་ཅེ་ན། ཆོས་པ་དང་ནང་པ་ཡིན་ཉམས་བསྟན་ནས་ཚུགས་ཀ་ཞིག་བཏོད་ནས་ཕྲེང་བ་སྐེ་ལ་གོན་པ་ཙམ་གྱིས་ཡོང་མ་རེད་གསུངས། མུག་མུག་མུག་ཁ་ཞིག་འགུལ་བ་ཙམ་གྱིས་ཡོང་མ་རེད་གསུངས། ང་ཕྱི་རོལ་པ་ནི་མིན་ནང་བ་སངས་རྒྱས་པ་མིན་ན་སུ་རེད་ཅེ་ན། ཁྱེད་ཕྱི་པ་མིན་ནའང་ནང་བ་མ་རེད་ཟེར་རྒྱུ་ཡིན།།

སྐྱབས་འགྲོའི་རྣམ་བཤད་ཞིབ་ཅིང་ཕྲ་བ་མཐར་ཕྱིན་པ་ཞིག་ཤེས་དགོས་ན། སོ་སོ་རང་རིག་པའི་ཤེས་རབ་ཁྱད་པར་བ་མ་བརྙེས་པར་རང་གཞན་སུས་ཀྱང་བཤད་ཤེས་དཀའ་མོད། ད་རང་རང་གི་རྒྱུད་ཚོད་དང་བསྟུན་པའི་སྐྱབས་ཡུལ་གང་ཡིན་ན། སྐྱབས་སུ་འགྲོ་ཚུལ་གང་ཡིན། སྐྱབས་སུ་སོང་བའི་དགོས་པ་དང་ཕན་ཡོན་ཤེས་དགོས་པ་རེད། སྐྱབས་འགྲོ་ཐེངས་གྲངས་མང་བོར་བཤད་པ་ཡིན་པས་ད་ནི་ཅུང་ཟད་ཙམ་ངེས་ཚོད་ཡིན་ཡང་། དཀོན་མཆོག་གསུམ་ཞུ་དུས། དཀོན་མཆོག་གསུམ་དེ་སངས་རྒྱས་ཆོས་དང་དགེ་འདུན་གསུམ་རེད། སྐྱབས་འགྲོ་བཞི་སྐོར་མ་སུ་ཡིན་རུང་འདོན་ཤེས་ནི་ཡིན་ན། འུ་ཅག་གིས་བོད་ཆོས་མདོ་སྔགས་གཉིས་ལྡན་གྱི་ལུགས་ཀྱིས་བླ་མ་མགོར་འཇོག་པ་དེ། བླ་མ་མཆོག་གསུམ་ཀུན་འདུས་ཀྱི་ངོ་བོ་ཡིན་པའི་ཕྱིར་ན། དཀོན་མཆོག་གསུམ་གྱི་ཁར་བླ་མ་དང་བཞིའི་སྐྱབས་འགྲོ་བཞི་སྐོར་མ་རེད་སོང་བ་རེད། དཀོན་མཆོག་གསུམ་སངས་རྒྱས་ཆོས་དང་དགེ་འདུན་གསུམ་རེད་ཟེར་སླ་མོད། ད་སངས་རྒྱས་གང་རེད། ཆོས་གང་རེད། དགེ་འདུན་གང་རེད་ཅེ་ན། དེའི་ནང་དུ་ཤེས་དགོས་རྒྱུ་མང་། དེ་ཨེ་ཤེས་ངེས་པར་དུ་བལྟ་དགོས། དེ་ལ་སྐྱེས་བུ་ཆུང་འབྲིང་ཆེ་གསུམ་ཐམས་ཅད་ནས་སྐྱབས་སུ་འགྲོ་བའི་ཡུལ་དང་། སྐྱབས་སུ་ཡུན་ཅི་འདྲ་ཞིག་ལ་འཛིན་པའི་དུས་དང་། གང་ལ་ཇི་ལྟར། ཅིའི་དོན་དུ་སྐྱབས་སུ་འགྲོ་བའི་བསམ་པའི་ཁྱད་པར་ཏེ་དེ་དག་གི་དབྱེ་བ་མང་བ་རེད། སྐྱེས་བུ་ཆུང་འབྲིང་ཞེས་པ་བློ་ཆུང་འབྲིང་ངམ་བློ་སྟོབས་ཆེ་ཆུང་གིས་བཞག་པ་ཡིན། སྐྱེས་བུ་ཆུང་ངུ་བློ་སྟོབས་ཆུང་ངུས་ཡུལ་གྱི་ཁྱད་པར་ཇི་ལྟར་ཡིན་ན། སངས་རྒྱས་ཞེས་པ་སངས་རྒྱས་ཀྱི་སྐུ་གཟུགས་སྐུ་འདྲ་ཐང་ག་འདྲ་འདྲ་དང་། ཆོས་ཞེས་པ་པོ་ཏི་གླེགས་བམ་དུ་བཞུགས་པའི་ཡི་གེ་པོ་ཏི་རྣམས། དགེ་འདུན་ཚུལ་ཁྲིམས་དང་ལྡན་པ་གྲྭ་བ་བཞི་ཚོགས་ལ་དགེ་འདུན་དུ་འཛིན་པ་ལས་འཕགས་པ་དང་མི་འཕགས་ཅང་ཤེས་ནི་མ་རེད། དུས་ཀྱི་ཁྱད་པར་ཡང་ཐ་མས་ནི་ཚེ་འདིར་མ་ཤི་ཚུན་ཆད། ཅུང་ཟད་བཟང་བས་ཚེ་ཕྱི་མ་ངན་སོང་ངན་འགྲོ་མིན་པའི་ལྷ་མིའི་ལུས་ཞིག་ཐོབ་ཚེ་གཉིས་ཀྱི་བར་ལ། བསམ་པའི་ཁྱད་པར་ཡང་ཚེ་འདིར་བསམ་དོན་འགྲུབ་པ་དང་ཕྱི་མ་ངན་སོང་ལ་མི་ལྷུང་རྒྱུའི་དོན་དེ་ཙམ་རེད། དེ་ནས་སྐྱེས་བུ་འབྲིང་ཉན་རང་རེད་ལ། དེ་ཚང་གིས་ཡུལ་གྱི་ཁྱད་པར་གང་ལ་འཛིན་ན་སངས་རྒྱས་ཞེས་པ་ཉན་རང་དགྲ་བཅོམ་པ་ཞིག་ལ་ངོས་འཛིན། སངས་རྒྱས་ཤཱཀྱ་ཐུབ་པར་མཁྱེན་པའི་ཡེ་ཤེས་དང་མཚན་དཔེའི་ཡོན་ཏན་ཡོད་པ་དེ། བསྐལ་བ་གྲངས་མེད་མང་བོར་ཚོགས་ལྷག་པར་བསགས་པའི་འཁོར་བསྒྱུར་གྱི་རྒྱལ་རིགས་ཡིན་པས་རེད་ཟེར་བ་དང་། སྐྱབས་སུ་འགྲོ་ས་ངོ་མ་དེ་དེའི་ཐུགས་ཀྱི་འགོག་པ་དམ་པ་མ་གཏོགས་པའི་སྐུ་རྣམ་སྨིན་སྡུག་བདེན་གྱི་ཕུང་པོ་ཡབ་ཡུམ་གྱི་རྒྱུ་རྐྱེན་ལ་བརྟེན་ནས་ཡོང་བ་སྐྱབས་ཡུལ་ལ་མི་བརྩི། དུས་ཀྱི་ཁྱད་པར། གནས་སྐབས་ཇི་སྲིད་འཚོ་སྟེ་མ་ཤིའི་བར་དུ་དང་མཐར་ཐུག་རང་ཉིད་དགྲ་བཅོམ་པའི་གོ་འཕང་མ་ཐོབ་ཀྱི་བར་ལ་སྐྱབས་སུ་འགྲོ་བ་རེད། དེ་ནས་བསམ་པའི་ཁྱད་པར་ནི། ཁམས་གསུམ་སྲིད་པ་རིགས་དྲུག་གི་གནས་ཡུལ་གང་དུ་སྐྱེ་རུང་སྡུག་བསྔལ་མ་གཏོགས་མེད་པས་ན། རང་ཉིད་དེ་ལས་ཐར་འདོད་ཀྱི་བསམ་པས་དེ་ལས་ཐར་ཆེད་དཀོན་མཆོག་གསུམ་ལ་སྐྱབས་སུ་འགྲོ་བ་རེད། དགྲ་བཅོམ་པ་ཞེས་པ་དེ་ཇི་ལྟ་བུ་རེད་ཅེ་ན། ཐར་བ་ལ་སྒྲིབ་པར་བྱེད་པ་ཉོན་མོངས་པའི་སྒྲིབ་པ་དང་ཐམས་ཅད་མཁྱེན་པ་ལ་སྒྲིབ་པར་བྱེད་པ་ཤེས་བྱའི་སྒྲིབ་པ་སྟེ། སྤྱིར་བཏང་སྒྲིབ་པ་གཉིས་ཡོད་པ་ལས་ཁམས་གསུམ་གྱི་ཉོན་མོངས་པའི་དགྲ་ཐམས་ཅད་བཅོམ་པས་དགྲ་བཅོམ་ཟེར་བ་ཡིན། ཟད་དང་མི་སྐྱེས་ཤེས་པའི་ཡེ་ཤེས་གཉིས་ལྡན་ཞིག་ལ་སྤང་དང་རྟོགས་པའི་སྒོ་ནས་དགྲ་བཅོམ་ཟེར་བ་ཡིན། ཆོས་ཐེག་པ་ཆེན་པོ་ཁས་ལེན་ནི་མ་རེད། ཐེག་དམན་རང་ལམ་གྱི་རྗོད་བྱེད་སྡེ་སྣོད་གསུམ་དང་བརྗོད་བྱ་བསླབ་པ་གསུམ། དེ་ཡང་འགོག་ལམ་གཉིས་སུ་ཕྱེ་བའི་འགོག་པའི་བདེན་པ་དེ་ཆོས་དཀོན་མཆོག་ལ་འཛིན་རྒྱུ་དེ་ལྟར་རེད། དགེ་འདུན་འཕགས་པའི་དགེ་འདུན་ལ་འཇོག་པ་རེད། དེ་ཡང་རྒྱུན་ཞུགས་ནས་ཕྱིར་མི་འོང་བར་གྱི་ཐུགས་རྒྱུད་ན་བཞུགས་པའི་འགོག་པ་དམ་པ། སྐྱབས་སུ་འགྲོ་བའི་ཡུལ་དཀོན་མཆོག་གསུམ་དེ་ལྟར་བརྩི་བ་རེད། སྐྱེས་བུ་ཆེན་པོ་ཟེར་དུས་གང་ཡིན་ཞེ་ན། ཐེག་ཆེན་པ་ཡིན་ལ། ཐེག་ཆེན་ལ་ཡང་མདོ་སྔགས་གཉིས་ཀྱི་དབྱེ་བ་ཡོད་པ་རེད། ཐེག་ཆེན་ཐུན་མོང་གི་སྤྱིའི་སྐྱབས་ཡུལ་སངས་རྒྱས་སྐུ་བཞིའི་ཡེ་ཤེས་ལྔ་ལྡན། སྐུ་བཞི་བོ་གང་རེད་ཅེ་ན། ཆོས་སྐུ། ལོངས་སྐུ། སྤྲུལ་སྐུ་གསུམ། ངོ་བོ་ཉིད་སྐུ་དང་བཞི་རེད། ཡེ་ཤེས་ལྔ་གང་ཡིན་ན། མཚན་ཉིད་འཛིན་པའི་ཡེ་ཤེས་ལྔ། ཆོས་དབྱིངས་ཡེ་ཤེས། མེ་ལོང་ཡེ་ཤེས། མཉམ་ཉིད་ཡེ་ཤེས། སོར་རྟོགས་ཡེ་ཤེས། བྱ་གྲུབ་ཡེ་ཤེས་ལྔ་བོ་རེད། ཆོས་ཇི་ལྟ་བུ་ཞིག་ལ་ངོས་འཛིན་ན། ཐེག་པ་ཆེན་པོའི་ལུང་རྟོགས་གཉིས། དགེ་འདུན་བྱང་སེམས་འཕགས་པ་ས་དང་བོ་ནས་བཅུ་བའི་བར་བཞུགས་པ། དུས་བྱང་ཆུབ་སྙིང་བོ་སྐྱབས་ཡུལ་སངས་རྒྱས་ཉིད་ཀྱི་གོ་འཕང་མ་ཐོབ་ཀྱི་བར་དུ་དང་། བསམ་པའི་ཁྱད་པར་བདག་གཞན་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་སྦྱོར་བའི་ཆེད་དུ་སྐྱབས་སུ་འགྲོ་བ་དེ་འདྲའི་དབྱེ་བ་ཡོད་ནི་རེད། དེ་ཐུན་མོང་ཕྱིའི་སྐྱབས་ཡུལ་དང་སྐྱབས་སུ་འགྲོ་ཚུལ་དེ་ལྟར་ངོས་བཟུང་བ་ཡིན་ན།།‘

༢ ཐུན་མིན་གསང་བ་སྔགས་ཀྱི་སྐྱབས་འགྲོ།

ད་ནི་ནང་ཐུན་མིན་གསང་སྔགས་ཀྱི་སྐབས་ལ་མཚོན་ན་སྐྱབས་ཡུལ་རྩ་བ་གསུམ་རེད། རྩ་བ་གསུམ་པོ་གང་རེད་ཅེ་ན། བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། འཕྲིན་ལས་ཀྱི་རྩ་བ་མཁའ་འགྲོ་སྟེ། མཆོག་གསུམ་རྩ་གསུམ་འདུས་པའི་རང་བཞིན་ཅན་དང་། གསང་བ་ཐབས་མཆོག་རྡོ་རྗེ་སྙིང་བོའི་འོད་གསལ་རྫོགས་པ་ཆེན་པོའི་སྐབས་ཀྱི་སྐྱབས་ཡུལ་ལ། གནས་པ་རྩ་དག་པ་སྤྲུལ་སྐུ་དང་དགེ་འདུན། གཡོ་བ་རླུང་དག་པ་ལོངས་སྐུ་དང་ཆོས། བཀོད་པ་བྱང་ཆུབ་ཀྱི་སེམས་སམ་ཐིག་ལེ་དག་པ་ཆོས་སྐུ་དང་སངས་རྒྱས་ཏེ། ངོ་བོ་རང་བཞིན་ཐུགས་རྗེའི་བདག་ཉིད་མཆོག་གསུམ་རྩ་གསུམ་ཀུན་འདུས་ཀྱི་རང་བཞིན། ང་རང་ཚོ་འདི་ན་འབུམ་ལྔ་བསགས་མཁན་མང་བོ་ཡོད་པས་འབུམ་ལྔ་གསོག་དུས། དཀོན་མཆོག་གསུམ་དངོས་བདེ་གཤེགས་རྩ་བ་གསུམ། །རྩ་རླུང་ཐིག་ལེའི་རང་བཞིན་བྱང་ཆུབ་སེམས། །ལ་སོགས་པའི་དོན་རེད།།

༣ ཡང་གསང་དེ་ཁོ་ན་ཉིད་ཀྱི་སྐྱབས་འགྲོ།

ཡང་གསང་མཐར་ཐུག་ལ་བསམ་བློ་བཏང་ན། བསླུ་མེད་གནས་ལུགས་རྡོ་རྗེའི་སྐྱབས་ཡུལ། མདོ་ལྟར་ན་བདེ་གཤེགས་སྙིང་པོ། སྔགས་ལྟར་ན་སྟོང་གསལ་མཐའ་དབུས་དང་བྲལ་བ། སྣང་སྟོང་དབྱེར་མི་ཕྱེད་པའི་ནང་རང་བྱུང་གི་ཡེ་ཤེས། ཐིག་ལེ་ཆེན་པོ་ཉག་གཅིག་ཏུ་རྣམ་གསུམ་དབྱེར་མེད་ཆེན་པོར་ཟླུམ་པ་དེའི་རང་རིག་རང་ངོ་ཤེས་པ་དེ་ལ། དེའི་རང་གནས་ཀྱི་ཡེ་ཤེས་མངོན་དུ་མ་གྱུར་བ་དེ་སྲིད་དུ་སྐྱབས་བྱ་སྐྱོབ་བྱེད་གཉིས་མེད་ཀྱི་ངང་ནས་སྐྱབས་སུ་འགྲོ་བ་ཡིན། །དེ་ལ་ལུང་དྲངས་ན། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་གྲུབ་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །གསུངས་པ་ལྟར་དུ་ཡིན།།

ཁ། སྐྱབས་འགྲོའི་དབྱེ་བ།

རྒྱུའི་སྐྱབས་འགྲོ་དང་འབྲས་བུའི་སྐྱབས་འགྲོ་གཉིས་ཡོད་པ་ལས།

༡ རྒྱུའི་སྐྱབས་འགྲོ།

རྒྱུའི་སྐྱབས་འགྲོ་ལ་ཡང་བཏགས་པ་བ་ཁས་ལེན་གྱི་སྐྱབས་འགྲོ་དང་ནི་ཁྱད་པར་བ་ལམ་རྗེས་སུ་སྒྲུབ་པའི་སྐྱབས་འགྲོ་ཟེར་བ་གཉིས་ཀྱི་ཁྱད་པར་ཡོད་ན།

དེ་ཡང་བཏགས་པ་བ་ཁས་ལེན་གྱི་སྐྱབས་འགྲོ་ཟེར་བ་ནི། སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་ལམ་སྒྲུབ་པའི་གྲོགས་སུ་ཤེས་པ་ཙམ་གྱི་སྒོ་ནས་སྐྱབས་འགྲོའི་ངག་འདོན་ལ་འབད་པ་བྱས།།

ཁྱད་པར་བ་ལམ་རྗེས་སུ་སྒྲུབ་པའི་སྐྱབས་འགྲོ་ནི་སྟོན་པ་དང་ལམ་དང་གྲོགས་སུ་སྦྱོར་བའི་ཁྱད་པར་གསུམ་ལྡན་དུ་ཉམས་ལེན་ལག་ལེན་གྱི་སྟེང་ནས་དངོས་སུ་སྒྲུབ་པ་རེད།།

༢ འབྲས་བུའི་སྐྱབས་འགྲོ།

དེ་ནས་འབྲས་བུའི་སྐྱབས་འགྲོ་གང་ཡིན་ཞེ་ན། མཚན་ཉིད་ཐེག་པས། གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་ལ་དམིགས་ནས་དེ་རང་རྒྱུད་ལ་ཐོབ་འདོད་ཀྱི་དམ་བཅའ་དང་། སྔགས་ཀྱི་སྐབས་སུ། སྔགས་ལམ་དེ་ཇི་ལྟར་བྱས་ཀྱང་འབྲས་བུ་ལམ་བྱེད་ཡིན། དེ་ཡིན་པས་གཟུགས་སྐུ་ལམ་བྱེད་ཐབས་བསྐྱེད་པའི་རིམ་པ་དང་ཆོས་སྐུ་ལམ་བྱེད་ཤེས་རབ་རྫོགས་པའི་རིམ་པ་སྟེ། རིམ་གཉིས་ལམ་གྱི་སྒོ་ནས་སྐུ་གསུམ་ཡེ་ཤེས་འཕྲིན་ལས་དང་བཅས་པ་ལམ་དུ་བྱེད་རྒྱུ་སོགས་དེ་ཙམ་རགས་རིམ་དུ་བཤད་པ་ཡིན། ཞིབ་ཕྲའི་དབྱེ་བ་མཐའ་ཡས་པ་རེད། རྒྱལ་བའི་མདོ་དང་སྔགས་ཀྱི་ཆོས་ཚུལ་མཐའ་དག་འདིའི་སྒྲོམ་ནས་བཤད་ཐུབ་རྒྱུ་ཅན་རེད། གང་ལྟར་ལམ་ཞུགས་ལས་དང་པོ་པ་ཞིག་གིས་དང་པོ་སྐྱབས་ཡུལ་ངོས་ཟིན་དགོས་པ་དེ་གནད་ཆེན་ཡིན། འདིའི་ཐད་ནས་ཡང་བཤད་ཅིག་བྱས་ན། རང་རེའི་ཐེག་ཆེན་མདོ་སྔགས་ཀྱི་ལམ་ལ་ཞུགས་པ་ཞིག་གིས་ཕྱི་ལྟར་ན་སངས་རྒྱས་ཆོས་དང་དགེ་འདུན་གསུམ་ལ་དཀོན་མཆོག་གསུམ་ཞེས་ཞུ། འཇིག་རྟེན་ན་དཀོན་པའི་མཆོག་ཏུ་གྱུར་བ་ཡིན་པས་ན་དཀོན་མཆོག་གསུངས་པ་རེད། ནོར་བུ་རིན་པོ་ཆེས་ཀྱང་འགྲན་དུ་མེད་པའི་རང་གཞན་འདི་ཕྱིའི་ལེགས་ཚོགས་ཐམས་ཅད་དེ་ལ་སྐྱབས་སུ་སོང་ན་འབྱུང་བས་ན་རིན་པོ་ཆེའི་སྒྲ་སྦྱར་བ་ཡིན་པ་དང་ནི། སངས་རྒྱས་སྐུ་བཞི་ཡེ་ཤེས་ལྔའི་བདག་ཉིད། ཆོས་ཀྱང་དེའི་ཐུགས་རྒྱུད་ན་བཞུགས་པའི་ཡོན་ཏན། དགེ་འདུན་ཡང་དེ་ལས་མ་འདས་པ། མཐར་གཏུག་ན་ཐམས་ཅད་སངས་རྒྱས་ལ་འདུས་པ་དང་། དེ་ཡང་ཆོས་ཀྱི་སྐུ་ལ་ཐུག་ནི་ཡིན་དུས། མཐར་ཐུག་གི་སྐྱབས་ཡུལ་ཉག་གཅིག་དེ་སངས་རྒྱས་ཆོས་ཀྱི་སྐུ་ཡིན་པར་ཤེས་དགོས། ཐུན་མིན་ནང་ལྟར་དུ་བླ་མ་ཡི་དམ་མཁའ་འགྲོ་སྟེ་རྩ་བ་གསུམ་ལ་འདུས་པ་གོང་ནས་བཤད་ཟིན།།

ཁྱད་པར་གསང་བ་ལྟར་ན་མཐར་ཐུག་དོན་གྱི་སྙིང་པོ་འོད་གསལ་རྫོགས་པ་ཆེན་པོའི་ལུགས་ལ། རྩ་རླུང་ཐིག་ལེའི་བདག་ཉིད། ངོ་བོ་རང་བཞིན་ཐུགས་རྗེའི་དཀྱིལ་འཁོར་རང་ལ་གདོད་ནས་བཞུགས་པའི་གཞི་རྒྱུད་བདེ་བཤེགས་སྙིང་པོ། རང་བྱུང་རིག་པའི་ཡེ་ཤེས་དེ་དག་ངོ་བོ་ཡེ་དག་གི་སངས་རྒྱས་ཡིན། དེ་ཉིད་གློ་བུར་བྲལ་དག་གིས་མངོན་དུ་གྱུར་སོང་དུས་རང་ཉིད་ཀྱང་སངས་རྒྱས་རེད་འགྲོ་བསམ་རྒྱུ། དེ་མངོན་དུ་མ་གྱུར་བར་འཁྲུལ་བའི་དྲི་མས་སྒྲིབ་ཚེ་འདི་ལ། ཐབས་སྣང་བཅས་བསོད་ནམས་ཀྱི་ཚོགས་བསགས་པ་ལ་བསྟེན་ནས་ཤེས་རབ་སྣང་མེད་ཡེ་ཤེས་ཀྱི་ཚོགས་རྫོགས་དགོས་པ་རེད། །ཚོགས་གཉིས་རྫོགས་སོང་དུས་སྐུ་གཉིས་ཐོབ་འགྲོ་བ་ཡིན་ན། ནང་དང་གསང་བའི་མཆོག་གསུམ་མངོན་དུ་མ་གྱུར་གྱི་བར་དུ་ཕྱིའི་མཆོག་གསུམ་ལ་བརྟེན་ནས་ཚོགས་བསགས་སྒྲིབ་སྦྱོང་དགོས་པ་ཡིན་དུས། དེ་ལ་སངས་རྒྱས་ཀྱི་སྐུ་གཟུགས་དང་གསུང་རབས་ཀྱི་གླེགས་བམ། སོ་སྐྱེས་དང་འཕགས་པ་གང་ཡིན་ལ་མ་ལྟོས་པའི་དགེ་འདུན་འདི་ཐམས་ཅད་དཀོན་མཆོག་གསུམ་གྱི་རྟེན་ཡིན་ན། འདི་དག་ལ་དཀོན་མཆོག་གསུམ་པོ་དངོས་ཀྱི་དད་པ་རང་གིས་བཞག་ཐུབ་ན། དེ་དག་ལ་བསྟེན་ནས་སམ་དེ་དག་བརྒྱུད་ནས་དཀོན་མཆོག་གི་བྱིན་རླབས་རང་ཉིད་ལ་འཇུག་པ་ཡིན་པ་དང་། དད་པ་མེད་ན་སངས་རྒྱས་དངོས་མཇལ་རུང་ཕན་ཐོགས་མེད་རབས་མང་ཀི། མདོ་གང་ནས་བཤད་ན་རྒྱ་གར་གྱེན་འདེད་རྒྱ་ནག་ཐུར་དེད་མང་པོ་ཉུང་ཉུང་ཅི་ཞིག་བཤད་ཀི་བསྡད་རུང་མ་བསྡད་རུང་། ཐམས་ཅད་ཀུན་འདུས་སྐྱབས་ཡུལ་ཉག་གཅིག་དེ་བླ་མ་རེད་ཡོད་ཀི་མོ། དེ་ཡང་མཇལ་འདུག་རྒྱུའི་བླ་མ་དེ་སྐུ་འདྲ་ཡི་གེ་ཚོའི་ཚབ། འདི་མཚོན་བྱེད་རྟགས་ཀྱི་བླ་མ་ཡིན་པ་ཤེས་པའི་ཐོག་ནས། འདིའི་མཚོན་རྒྱུའི་མཚོན་བྱ་དོན་གྱི་བླ་མ་དངོས་དེ་ནི་བླ་མའི་ཐུགས་ཡེ་ཤེས་ཆེན་པོ་རང་གི་སེམས་ཀྱི་ཆོས་ཉིད་དང་ངོ་བོ་ཐ་མི་དད་པ་དེ་ཡིན་པས་ན། དེ་ནམ་མཁའི་ཆར་བ་དང་ས་གཞིའི་ཆུ་གཉིས་འདྲེས་སླ་བ་བཞིན་ཏུ། ཐུགས་ཡིད་དབྱེར་མེད་དུ་བསྲེས་ན་འདྲེས་རྒྱུ་ཡོད་པའི་རྒྱུ་མཚན་དེས་ཡིན། སྐུ་འདྲ་སངས་རྒྱས་ཀྱི་རྟེན་ཞུས་རུང་ཚབ་རེད་མོད། སྐུ་འདྲས་བརྗོད་དུ་མེད་པའི་ཆོས་གསུང་བ་ང་ཚོས་ཉན་ཤེས་ནི་མ་རེད། བླ་མ་སངས་རྒྱས་ཀྱི་སྤྲུལ་བ་ཡིན་དགོས་པ་རེད། ལྔ་བརྒྱ་དུས་ཀྱི་ཐ་མ་ལ་ཁྱེད་ཚོ་མ་སྡུག་དང་ཁོང་དགེ་བའི་བཤེས་གཉེན་ལ་སྤྲུལ་ནས་བྱོན་ཡོང་ཞེས་སངས་རྒྱས་ཁོང་རང་གིས་གསུངས་ཡོད་པ་རེད། བླ་མས་ཞལ་གྲགས་ནས་སངས་རྒྱས་ཀྱི་མཛད་རྒྱུན་བསྐྱངས་དུས་གོ་བརྡ་འཇགས་པའི་ཐོག་ལ། དེ་བརྒྱུད་ནས་སངས་རྒྱས་ཀྱི་བྱིན་རླབས་འཇུག་པས་ན་བླ་མ་བཀའ་དྲིན་ཆེ། བླ་མ་རྩ་བ་ཆེ། དེ་ཡང་བླ་མ་གཅིག་ལ་སྐྱབས་གསུམ་འདུས་ཡོད་གསུང་གིན་འདུག་པ་དེ་རྒྱུ་མཚན་དེ་ལྟ་བུ་ཞིག་གིས་ཡིན། བླ་མ་དང་ཐུགས་ཡིད་དབྱེར་མེད་བསྲེས་རྒྱུ་དེ་ནི་ཉམས་ལེན་གྱི་མཆོག་ཡིན་ཟེར་བ་ལ་སོགས་པ་དང་ནི། སྐྱབས་ཡུལ་ཕྱི་ནས་མ་འཚོལ་ནང་ནས་རྙེད་དགོས་པ་རེད་ཟེར་བ་འདི་ཚོ་ད་གང་ཐད་ནས་བལྟས་ཡོང་ནའང་། གནད་ཀྱི་འགག་མདོ་ངོ་མ་དེ་བཟུང་ཤེས་ན་གཅིག་ལ་བབས་བསྡད་ཡོད་བསམ་རྒྱུའི་འཕྲིག་ཅིག་ཚུད་དགོས་པ་རེད། སྐྱབས་སུ་འགྲོ་བ་ནི་འཁོར་བ་ངན་སོང་གི་སྡུག་བསྔལ་ལ་སྐྲག་ཅིང་འཇིགས་ཏེ་དཀོན་མཆོག་གི་ཡོན་ཏན་མཐོང་ནས་དེས་སྐྱོབས་ཐུབ་བསམ་ནས། དེ་ལ་སྐྱབས་སུ་འགྲོ་བ་དཔེར་ན་བྱིས་པ་ཁྱིས་དེད་དུས་བྲོས་ནས་མྱི་ཆེན་ལ་སྐྱབས་བཅོལ་བ་འདྲ་བོ་ཡིན། སྐྱབས་འགྲོའི་སྒོ་དད་པས་ཕྱེ་བ་རེད། རང་ལུགས་ཐུན་མིན་ལ་འཁོར་བ་ངན་སོང་ལ་འཇིགས་པས་མི་ཚད་རང་དོན་ཡིད་བྱེད་རང་ཉིད་ཞི་བདེར་ཕྱོགས་པ་དང་གསུམ་ཁ་ལ་འཇིགས་ནས། སེམས་ཅན་ཐམས་ཅད་མཐའ་གཉིས་ལ་མི་གནས་པའི་རྫོགས་པའི་བྱང་ཆུབ་ལ་འགོད་ཆེད་དུ་སྐྱབས་སུ་འགྲོ་བ་ཡིན། དེའི་ན་སྐྱབས་སུ་འགྲོ་བའི་ཐོག་མ་ཉིད་ནས་རང་རྒྱུད་ལ་དད་པ་བརྟན་པོ་ཡོད་རྒྱུ་གལ་ཆེ།།

ག སྐྱབས་འགྲོའི་སྒོ་འབྱེད་དད་པ།

སྤྱིར་ན་དད་པ་ལ་རྣམ་གྲངས་ཀྱི་དབྱེ་བ་མང་མོད། དང་པོ་རྒྱུ་འབྲས་ཡིད་ཆེས་ཀྱི་དད་པ་འཇིག་རྟེན་ཡང་དག་གི་ལྟ་བ་རྒྱུད་ལ་ཡོད་པའི་ཐོག་ནས། དཀོན་མཆོག་གསུམ་ལ་དང་འདོད་ཡིད་ཆེས་ཕྱིར་མི་ལྡོག་པའི་དད་པ་བཞི་ག་ཚང་ཡོད་དགོས།།

༡ དང་བའི་དད་པ།

བླ་མ་དང་དཀོན་མཆོག་གི་ཡོན་ཏན་གོ་བའམ་ཐོས་དུས། ལྷ་ཁང་མཐོང་གྲོལ་ཞིག་གི་ནང་དུ་ཐོན་སོང་བ་འདྲ་འདྲ་སེམས་ཀྱི་དང་བ་འདྲེན་པ་དེ་ལ་དང་བའི་དད་པ་ཟེར།།

༢ འདོད་པའི་དད་པ།

འཁོར་བ་དང་དེའི་རྒྱུ་སྡིག་པ་སྤོང་འདོད་དང་། ཐར་བ་དང་དེའི་རྒྱུ་དགེ་བ་སྒྲུབ་འདོད་ཡོད་པའི་ཐད་ནས་སྐོམ་པ་ཆུ་ལ་འཁྲེང་བ་ལྟ་བུ་ལ་འདོད་པའི་དད་པ་ཟེར་བ་རེད། དེ་ནི་དང་འདོད་གཉིས་ཀ་རེད།།

༣ ཡིད་ཆེས་པའི་དད་པ།

དེ་ལ་གུ་རུ་རིན་པོ་ཆེས། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག །བློ་ཐེ་ཚོམ་དང་བྲལ་ན་ཅི་བསམ་འགྲུབ། །ཅེས་གསུངས་པ་ལྟར་སྐྱིད་སྡུག་ལེགས་ཉེས་མཐོ་དམན་བཟང་ངན་གང་བྱུང་ནའང་དཀོན་མཆོག་རིན་པོ་ཆེ་རྣམ་པ་གསུམ་པོ་ཁྱེད་མཁྱེན། ཁྱེད་ཀྱི་ཐུགས་རྗེའི་སྐྱབས་འོག་ནས་མ་འབོར་བསམ་རྒྱུའི་ཡིད་ཆེས་དང་འགྲོགས་པའི་དད་པ། རྨོངས་པའི་དད་པ་ཙམ་མ་ཡིན་པར། རྒྱུ་མཚན་ཤེས་པའི་སྒོ་ནས་དཔེར་ན་མ་དང་བུ་འཕྲད་ནི་འདྲ་ཞིག་གི་དུང་བའི་དད་པ་དེ་ངེས་པར་དུ་དགོས་པ་རེད། དེ་ལ་ཡིད་ཆེས་པའི་དད་པ་ཡིད་ཆེས་གཏིང་ནས་ཡོད་དགོས་པ་རེད།།

༤ ཕྱིར་མི་ལྡོག་པའི་དད་པ།

དེ་ནས་བཞི་བ་ཕྱིར་མི་ལྡོག་པའི་དད་པ་ནི། དཀོན་མཆོག་གི་བྱིན་རླབས་རང་རྒྱུད་ལ་ཞུགས་ནས། ཡང་དག་པའི་རྟོགས་པ་རྒྱུད་ལ་སྐྱེས་ཤིང་སྐྱེ་ན་ཡིད་ཆེས་ཀྱི་དད་པ་དང་གཅིག་གྲོགས་གཅིག་གིས་བྱས་ནས། བླ་མར་སངས་རྒྱས་དངོས་མཐོང་གི་གདམས་ངག་སྲོག་གི་ཟུངས་ལ་བཟུང་ནས། དཔེར་ན་ཉི་མས་གདུང་བའི་གླང་ཆེན་པདྨའི་མཚོ་རུ་འཇུག་པ་མི་འདོར་བ་བཞིན་ཏུ། དམ་པའི་ཆོས་ཀྱི་ཉམས་ལེན་མདུང་ཐུང་བྲང་ཁ་ལ་ཚད་ན་ཡང་མི་བསྐྱུར་བ་ཅན་དེ་ཡིན། རང་རྒྱུད་ལ་དད་པ་ཇི་ཙམ་ཡོད་ན་བྱིན་རླབས་དེ་ཙམ་འཇུག་པ་རེད། དད་པ་ཆེ་ན་བྱིན་རླབས་ཆེན་པོ་འཇུག་རྒྱུ། དད་པ་ཆུང་ན་བྱིན་རླབས་ཆུང་ཆུང་འཇུག་རྒྱུ། དད་པ་མེད་ན་བྱིན་རླབས་རང་འབྱར་བྱས་ཏེ་འཇུག་མི་ཡོང་རྒྱུ། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་སྟེ། །ས་བོན་མེ་ཡིས་འཚིག་པ་ལ། །མྱུ་གུ་སྔོན་མོ་ཇི་བཞིན་ནོ། །ཞེས་གསུངས་པ་ལྟར་ཡིན། ནས་བསྲེག་ཟིན་པ་ཞིག་ས་འོག་ལ་བསྡུས་ན། མྱུ་གུ་སྔོན་པོ་མི་འཁྲུངས་པ་ལྟར་དད་པ་མེད་དུས་བྱིན་རླབས་འཇུག་ནི་མ་རེད་གསུངས། འདི་ནས་ང་རང་ཚོས་བཤད་པ་རྩ་བའི་ཚིག་དེད་ན། དཀོན་མཆོག་གསུམ་ལ་སྙིང་ནས་སྐྱབས་སུ་མཆི། ཞེས་པའི་དཀོན་མཆོག་གསུམ་ཟེར་བས་སྐྱབས་ཡུལ་ངོས་བཟུང་བ་རེད། སྙིང་ནས་ཟེར་རྒྱུ་འདིིས་དད་པ་བརྟན་པོའི་སྒོ་ནས་སྐྱབས་སུ་འགྲོ་ཚུལ་བསྟན་པ་ཡིན། སྐྱབས་སུ་མཆི་ཟེར་བས་དོན་བསྡུས་པ་ཡིན།།

མཐར་སྐྱབས་ཡུལ་གྱི་ལྷ་ཚོགས་དམིགས་བཅས་མཚན་མ་ཅན་གྱིས་གསལ་འདེབས་པ་གསལ་ཞིང་བརྟན་པའི་རྗེས་སུ། དེ་དག་གི་སྐུ་ལས་འོད་ཟེར་འཕྲོས་ནས་རང་གཞན་སེམས་ཅན་ཐམས་ཅད་ལ་ཕོགས་པའི་མཐུས། རང་གཞན་སེམས་ཅན་ཐམས་ཅད་བྱ་ཁྱུ་འུར་རྡོས་དཀྲོགས་པ་ལྟར་དུ་གསུངས་ཡོད་པ། དེ་ལྟར་སྐྱབས་ཡུལ་གྱི་ལྷ་ཚོགས་ལ་ཐིམ་པ་ནས་ཚོགས་ཞིང་ཐམས་ཅད་དབུས་ཀྱི་བླ་མར་ཐིམ་པར་དམིགས་ནས། བླ་མ་ཡང་འོད་དུ་ཡལ་ཏེ། དེ་ནས་སྤྲོས་བྲལ་གདོད་མའི་རང་བཞིན་གྱི་ངང་དེར་སེམས་རྣམ་རྟོག་གི་འཕྲོ་འདུ་དང་བྲལ་བར་ཅི་གནས་གང་གནས་ཞིག་ལ་རང་བབ་ཀྱིས་བཞག་དགོས་པ་ཡིན། དེ་ནི་དམིགས་མེད་སྤྲོས་པ་དང་བྲལ་བའི་སེམས་ཉིད་ཆོས་སྐུའི་རང་ཞལ་མཇལ་བ་རེད། དེས་བླ་མ་ཕྱི་ན་མི་བཞུགས་ནང་ན་བཞུགས། སྐྱབས་ཡུལ་ཕྱི་ན་མི་དམིགས་ནང་ནས་རྙེད་པའི་མན་ངག་ཀྱང་བསྟན་པ་རེད།།

ང་། སྐྱབས་འགྲོའི་བསླབ་བྱ།

དེ་ནས་སྐྱབས་འགྲོའི་བསླབ་བྱ་དུས་རྒྱུན་བཤད་པ་ལྟར་དགག་སྒྲུབ་ཆ་མཐུན་གྱི་བསླབ་བྱ་གསུམ། དེ་རེ་རེ་ལ་ཡང་གསུམ་རེ་ཕྱེ་ནས་གསུམ་གསུམ་དགུ་ཡོད་པ་ལས།

༡ དགག་པའི་བསླབ་བྱ།

དགག་པའི་བསླབ་བྱའམ་སྤང་དགོས་པ་གསུམ་གང་ཡིན་ན། སངས་རྒྱས་ལ་སྐྱབས་སུ་སོང་ནས་འཁོར་བའི་ལྷ་ལ་སྐྱབས་སུ་མི་འཛིན་ཅིང་ཕྱག་མི་འཚལ་བ་དང་གཅིག ཆོས་ལ་སྐྱབས་སུ་སོང་ནས་སེམས་ཅན་རྣམས་ལ་དངོས་ཤུགས་བརྒྱུད་གསུམ་ནས་གནོད་པ་དང་འཚེ་བ་སྤོང་བ་དང་གཉིས། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་པའམ་དེའི་ལྟ་སྤྱོད་ཅན་དང་མི་འགྲོགས་པ་གསུམ་དགག་པའི་བསླབ་བྱ་གསུམ།།

༢ སྒྲུབ་པའི་བསླབ་བྱ།

སྒྲུབ་པའི་བསླབ་བྱ་གསུམ་དེ་གང་ཡིན་ན། སངས་རྒྱས་ལ་སྐྱབས་སུ་སོང་ནས་སངས་རྒྱས་དཀོན་མཆོག་གི་རྟེན་ལ་གུས་པས་མཆོད་པ་བྱེད་རྒྱུ་དང་གཅིག ཆོས་ལ་སྐྱབས་སུ་སོང་བས་ཆོས་ཀྱི་རྟེན་གསུང་རབ་ལ་གུས་པ་བསྐྱེད་རྒྱུ་དང་གཉིས། དགེ་འདུན་ལ་སྐྱབས་སུ་སོང་ནས་རབ་ཏུ་བྱུང་བའི་རྟགས་ཆ་ལུགས་སངས་རྒྱས་ཀྱི་ན་བཟའ་མནབ་པ་ཞིག་ཡིན་ནས་བཟུང་ཞེ་ཚིག་ཞུ། ཞེ་ས་དང་གུས་པར་བྱེད་དགོས། དེའི་ན་བཟའི་ནང་གི་གང་ཟག་གི་བཟང་ངན་ལ་མ་ལྟོས་པར་གོང་དུ་བཀུར་རྒྱུ་དང་ཞེ་ས་བྱ་དགོས་པ་བཅས་དེ་གསུམ་རེད།།

༣ ཆ་མཐུན་གྱི་བསླབ་བྱ།

དེ་ནས་ཆ་མཐུན་གྱི་བསླབ་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་བླང་དོར་གྱི་གནས་སྟོན་པའི་བླ་མ་དགེ་བའི་བཤེས་གཉེན་ལ་སངས་རྒྱས་དངོས་ཀྱི་འདུ་ཤེས་བཟུང་བ་དང་གཅིག། ཆོས་ལ་སྐྱབས་སུ་སོང་ནས་དེའི་ཅི་གསུང་ཆོས་དཀོན་མཆོག་དངོས་བཞིན་དུ་དང་དུ་བླངས་བ་དང་གཉིས། དགེ་འདུན་དཀོན་མཆོག་ལ་སྐྱབས་སུ་སོང་ནས་འཁོར་བའི་ཆོས་ལ་བློ་ལོག་པའི་ཐོག་ནས། བླ་མ་དང་རང་གི་ཆོས་གྲོགས་ལ་དགེ་འདུན་དཀོན་མཆོག་གི་འདུ་ཤེས་བཞག་ནས་མི་མཉེས་པ་ཅུང་ཟད་ཙམ་ཡང་མི་བྱ་བ་གསུམ་བཅས་གསུམ་གསུམ་དགུ་རེད། །ཁྱད་པར་དུ་དཀོན་མཆོག་ཀུན་འདུས་ཀྱི་ངོ་བོ་བླ་མ་ཡིན་པས་བླ་མའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་སུ་ཤེས་པས་བློ་གཏད་ལིང་སྐྱུར་བྱས་ནས། སྐྱིད་ན་དཀོན་མཆོག་གི་ཐུགས་རྗེ། སྡུག་ན་ཚེ་སྔོན་གྱི་ལས་འབྲས་ཡིན་པར་ཤེས་དགོས་པ་རེད།།

ཅ། སྐྱབས་འགྲོའི་ཕན་ཡོན།

ད་སྐྱབས་འགྲོའི་ཕན་ཡོན་ལ་བསམ་བློ་ཞིག་བཏང་ན། ཕར་ཕྱིན་བསྡུས་པ་ལས། སྐྱབས་སོང་བསོད་ནམས་གཟུགས་མཆིས་ན། །ནམ་མཁའ་འདི་ཡང་སྣོད་དུ་ཆུང་། །ཞེས་གསུངས་ནས་སྐྱབས་འགྲོ་བྱས་པའི་ཕན་ཡོན་དེ་གཟུགས་སུ་གྲུབ་པའི་དངོས་པོ་ཞིག་ཡིན་ན་ནམ་མཁའི་ཁམས་ལ་མི་ཤོང་གསུང་བ་རེད།།

དངོས་པོ་གཟུགས་ཅན་མིག་གིས་བལྟ་བ་དང་ལག་པས་རེག་བཏང་ཆོག་རྒྱུ་ཞིག་ཡིན་ན། ནམ་མཁའི་ཁམས་ལ་མི་ཤོང་བའི་ཕན་ཡོན་ཆེན་པོ་ཡོད་པར་གསུངས་པས། སྐྱབས་འགྲོའི་ཕན་ཡོན་ལ་ཚད་དུ་གཞལ་ཡོང་རྒྱུ་མེད་པར་གསུངས་པ་ཡིན། དེ་ལ་ང་རང་ཚོའི་དུས་རྒྱུན་མོ་འདེབས་ཁུལ་དང་རྩིས་རྩི་ཁུལ་བྱས་ནས་གཏོ་སྐུ་རིམ་ལ་སོགས་པ་རིམ་གྲོ་ཅི་ཞིག་བྱེད་པ་ལས་ཀྱང་སྐྱབས་འགྲོ་འདི་མཆོག་ཡིན། གནའ་རྒྱ་གར་ནས་རྒྱལ་པོ་མ་སྐྱེས་དགྲ་ཟེར་བ་ཞིག་ཡོད་པས་ཁོང་གི་ཕ་བསད་ནས་མཚམས་མེད་ཀྱི་ལས་བསགས་པ་ཡིན། དེ་ཡང་དཀོན་མཆོག་གསུམ་ལ་སྐྱབས་སུ་སོང་བས། ཁོང་གི་ཕ་བསད་པའི་མཚམས་མེད་ཀྱི་ལས་ཀྱི་རྣམ་སྨིན་དེ་དམྱལ་བའི་སྡུག་བསྔལ་ཉི་མ་བདུན་མ་གཏོགས་མྱོང་མ་དགོས་རབས་ཡོད། ལྷས་བྱིན་ཞེས་པས་མཚམས་མེད་ཀྱི་ལས་གསུམ་བསགས། མཚམས་མེད་ཀྱི་ལས་ཚབ་ཆེན་བསགས་པས་གསོན་གསོན་ཁར་ས་གས་ནས་དམྱལ་བའི་མེ་ནང་ལ་ལྷུང་སོང་། དེའི་ཐོག་ནས་སངས་རྒྱས་ཀྱི་གསུང་ལ་ཡིད་ཆེས་ཏེ། ད་ནི་སྙིང་ཁོང་རུས་པའི་གཏིང་ནས་སངས་རྒྱས་ལ་སྐྱབས་སུ་མཆི་བ་ཡིན་ཞེས་བརྗོད་པས། དེ་མ་ཐག་རང་སངས་རྒྱས་རུས་པ་ཅན་ཞེས་པའི་སྐྱེ་བ་བླངས་སོང་བ་ལ་སོགས་པའི་དཔེ་མཚོན་མང་། ལོ་ཉུང་ཚོ་ཡར་ལ་ལངས་དུས་ཟོག་ལངས་ལངས། མར་ལ་ཉལ་དུས་ཟོག་ཉལ་ཉལ་མི་བྱེད་པར། ཐ་ན་ཡང་ཅི་མིན་རུང་སྐྱབས་འགྲོ་ཚར་གསུམ་རེ་ནངས་དུས་མགོ་ཡར་བཀྱགས་དུས་འདོན་དགོས། ནུབ་མར་ཉལ་དུས་བསམ་བློ་ཞིག་བཏང་ན། ངའི་མི་ཚེ་ནང་གི་དེ་རིང་གི་ཉི་མ་གཅིག་པོ་བུད་སོང་བ་རེད། ད་དེ་འདྲ་བའི་ཉི་མ་ཇི་ཙམ་ལྷག་ཡོད་པ་ཡིན། རྐྱེན་བར་ཆད་ན་ཤི་རྐྱེན་ཆག་ཇི་འདྲ་བས་སྔོན་འདི་ན་བསྒུག་ནས། མི་འདོད་པ་མ་བསམ་ས་ནས་ཐོག་ཏུ་བབས་རན་ཡོད་སུས་ཤེས། སྐྱིད་ལོང་དགའ་ལོང་གཉིས་ཀ་མ་གཏད་ནས། མི་ཚེ་ལ་རིང་སྐྱ་རིང་གི་འདང་རྒྱག་ས་ནས་དེའི་ཐོག་ཏུ་མ་སོང་བ་ཅི་འདྲ་མང་བ་བྱུང་སོང་། ལས་སྐྱིད་སྡུག་གང་བྱུང་དཀོན་མཆོག་རིན་པོ་ཆེ་རྣམ་པ་གསུམ་པོ་ཁྱེད་མཁྱེན། ཁྱེད་རྣམ་པ་ལ་བློ་ལུས་ངག་ཡིད་གསུམ་གཏད་པ་ཡིན་འབུལ་བ་ཡིན་སོམས་དང་། དཀོན་མཆོག་གསུམ་པོས་བསླུ་བ་ཡོད་རྒྱུ་མ་རེད། ཚེ་སྔོན་གྱི་བསགས་པ་རེ་དང་ཁྱིམ་ཕ་མའི་བསོད་ནམས་བསགས་རྒྱབ་བཟང་བས། ལམ་ལ་ཅུང་ཟད་རེ་འགྲོ་བཞིན་ཡོད་དུས། བུ་ང་རང་རྒོད་པོ་ཡིན་མ་བསམ་མ་གཏོགས། ཕོ་གསར་དགྲ་ལ་མ་ཐུག་གི་ངར་བ། ཁྱི་གསར་རྡོ་ལ་མ་ཐུག་གི་བཙན་པོ་ཟེར་བ་ཞིག་ཡོད་པ་རེད། རྐྱེན་ངན་ཆུང་ཆུང་ཞིག་གི་སྣ་ཁྱག་རྒྱུ་མ་རེད། བློ་བླ་མ་དཀོན་མཆོག་གསུམ་ལ་སུས་གཏད་ཡོད་ན་སྐྱིད་མཐའ་དེའི་རིང་ངེས། ད་ཕན་ཆད་སྐྱབས་འགྲོའི་སྐོར་འདི་ཕོ་མོ་རྒན་གཞོན་ཚང་མས་ཡིག་ངོ་ཆོད་པ་ཚོས་ཀུན་བཟང་ཞལ་ལུང་དང་རིགས་མཐུན་གྱི་ཁྲིད་ཡིག་དག་གི་ནང་ལ་ལྟོས། ཡིག་ངོ་མི་ཆོད་པ་ཚོས་ངས་བཤད་བཞག་པའི་འོད་ལྡེར་སྒྲ་ཕབས་བྱས་པ་དག་ལ་ཉོན་དང་ཕན་ཐོགས་ཕྲན་བུ་རེ་འབྱུང་སྲིད། སྐྱབས་འགྲོའི་དབྱེ་བ་འདི་ཞིབ་ཕྲ་བྱས་ནས་ཨེ་ཤེས་ལྟོས། རང་རང་གི་ཁྱིམ་གྱི་བླ་སེར་དང་རྒྱུན་གྱི་འབྲེལ་འདྲིས་ཡོད་སའི་བླ་གྲྭ་དགེ་འདུན་པ་རྣམས་མཇལ་འཕྲད་རེ་ཡོང་དུས་དུས་རྒྱུན་མི་ཤེས་རྒྱུ་དེ་ཚོ་ཐེ་ཚོམ་རེ་ཆོད། དམ་པའི་ཆོས་ཀྱི་ནང་དོན་ཆེ་ཆུང་ལ་མ་ལྟོས་པ་ཞིག་གིས་དགེ་ངོ་སྡིག་ངོ་ཤེས་ནས། འགྲོ་སྟངས་འདུག་སྟངས་རེ་ཤེས་ཡོང་ན་ཚེ་གཅིག་ཡུན་ལ་ཕན་པའི་རྒྱུ་ནོར་ནོམ་པ་དྲག་ཤོས་དེ་ཡིན། དེ་ཡང་མྱི་ཡིན་པ་འདྲ་འདྲ་དང་ཁ་ལག་སྤྱོད་གསུམ་དོད་ལུགས་ཀྱི་ཐད་ནས་འདྲ་འདྲ་ཡིན་རུང་། མྱིའི་རིན་ཐང་དང་གནས་བབས་མི་འདྲ་སྟེ་འདྲ་བ་མ་རེད། དེ་གང་ནས་མི་འདྲ་བ་རེད་ཅེ་ན། ཡོན་ཏན་གྱིས་མི་འདྲ་ནས་དེའི་ཡོ་རིང་དང་ཡང་ལྗིད་ཤོར་ཀི་འདུག་པས་རེད། ཡོན་ཏན་ཟེར་བ་དེ་སྦྱངས་པས་ཤེས་པ་ཞིག་ལ་ཡོན་ཏན་ཅེས་ཟེར། དེ་ཡང་ཡོན་ཏན་ཅིག་རེད་རེད་མོད། ཡོན་ཏན་བཟང་ཤོས་ལྷན་སྐྱེས་ཀྱི་ཡོན་ཏན་མི་གཤིས་བཟང་པོ་གསེར་འདྲ་བ་དེ་ཡོན་ཏན་གྱི་མཆོག་ཡིན། ལྷན་སྐྱེས་ཀྱི་ཡོན་ཏན་མི་གཤིས་བཟང་བ་དེ་ནི་རྒྱུ་གསེར་ཡིན་པ་འདྲ་འདྲ། མི་གཤིས་ངན་གྱིས་ཡོན་ཏན་སྦྱངས་པ་ལྕགས་ནག་གི་བཀྲ་ཤིས་རྟགས་བརྒྱད་མགར་བ་ལྟ་བུ་ཡིན། བཀྲ་ཤིས་རྟགས་བརྒྱད་ཡག་པོ་མཆོད་རྫས་རེད་མོད། རྒྱུ་རྩ་ལྕགས་ཡིན་དུས་དེ་ཡང་རིན་ཐང་ཡོད་རྒྱུ་མ་རེད། ལྷན་སྐྱེས་ཀྱི་ཡོན་ཏན་དང་སྦྱངས་བའི་ཡོན་ཏན་གཉིས་ཀ་ཡོད་ན་དེ་བཟང་ཤོས་སམ་རབ་ཏུ་གྱུར་བ་དེ་རེད། གསེར་གྱི་བཀྲ་ཤིས་རྟགས་བརྒྱད་མགར་བ་འདྲ་འདྲ་ཡིན། ད་རུང་གསེར་གྱིས་སྟོན་པའི་སྐུ་བརྙན་མགར་བ་འདྲ་འདྲ་རྒྱུ་བཟང་། སྤུས་དག མཚན་མ་ཡག དད་པའི་རྟེན་ཡིན་ནོ། །མི་གཤིས་ངན་པ་ཅན་ཞིག་ལ་མི་དེས་སྦྱངས་པའི་ཡོན་ཏན་དེ་ཙམ་ཞིག་མེད་ན་གནོད་པ་དེ་བས་ཆུང་ངེས་བསམ་རྒྱུ་དེ་འདྲ་ཡིན། ད་སྐད་རིགས་ཡིག་སྣ་ཚོ་མང་བོ་ཞིག་ཤེས་མ་བཞག་རུང་། ཐད་ཀ་ཐད་ཀར་གྱི་འཇོན་ཐང་ཇི་འདྲ་ཞིག་རེད་བསམ་རྒྱུའི་ནང་ན་ཡང་། ད་ཨ་ཉོག་གད་ལ་བཅར་ནས་བུ་བཟང་ངན་ཡུན་གྱིས་གཤིབ་སར་ཐུག་དུས། བོང་བུ་ཞོན་པ་ལྟར་འདར་རུ་འདུར་རེ་འགྱར་རུ་འགྱུར་རེ་མ་ཡིན་པར། བཀན་ལྕིག་གེར། བརྟན་ཤར་རེ་ཡོད་པ། བློ་ཞིག་ཕུད། ཁ་ཞིག་གྲགས་ནའང་རང་གཞན་གཉིས་ཕན་གྱི་རྒྱང་ཐག་རིག་པའི་བློ་རྒྱ་ཡོད་པ། རྣོ་ཡི་མ་བཅད་རུང་རུས་ཀྱིས་ཆོད། བློ་གཏད་ས་བླ་མ་དཀོན་མཆོག གྲོས་བྱེད་ས་དྲིན་ཆེན་ཕ་མ་བྱེད་འདུག་པ་ཅན་པོ་ཚེ་འདི་ཕྱི་གཉིས་ཀྱི་སྐྱིད་མཐའ་རིང་བ་རེད། ད་ལོ་རེའི་ནང་གི་ཆོས་ཐེངས་རེ་ཐེངས་གཉིས་གོ་ནི་བོར། དེའི་རྒྱབ་ཀི་ཕྱིར་ལྟས་ཤིག་མེད་པར་བསྐྱུར་མི་བཞག་པར་རང་རང་སོ་སོའི་ཤེས་ཚད་དུ་ཁྱིམ་བཟའ་ཚང་གྲོགས་པོ་དགའ་ཉེ་ལ་ཐུག་དུས་ཕར་བཤད་ཚུར་གླེང་རེ་བྱས་ན། ད་ནམ་འཁྱག་རབས། ཉི་མ་དྲོས་རབས་ཀྱིས་ཅི་བྱེད། མཁལ་སྐེད་ན་རབས་པུས་ཚིགས་གཟེར་རབས་བཤད་ཀྱང་ཕན་ཐོགས་འབྱུང་ནི་མ་རེད། དེ་བས་མ་ན་གོང་ནས་འཕྲོད་བསྟེན་ལ་རེམས་དགོས། སྤྱིར་ན་སྨན་པ་དྲག་ཤོས་སུ་རེད་ཅེ་ན་རང་ཉིད་ཡིན། དེ་བས་མ་ན་གོང་ནས་འཕྲོད་བསྟེན་ལ་རེམས། དེ་ཟས་དང་སྤྱོད་ལམ་གྱི་འཕྲོད་བསྟེན་ཤེས་ན་སྨན་ཡིན་ནི་རེད། ཟས་དང་སྤྱོད་ལམ་གྱི་འཕྲོད་བསྟེན་མ་ཤེས་ན་དུག་ལ་རང་གིས་བསྒྱུར་འགྲོ་བ་རེད། རང་རྒྱུས་རང་ཉིད་ཆེ་བ་རེད་གཞན་སྨན་པ་ཇི་འདྲ་མཁས་རུང་རྩ་ཆུ་ལ་བལྟ་དགོས་པ་རེད། རང་གི་ཚོར་བ་རང་གི་ལུས་ཀྱིས་མྱོང་ཆོག་པས། ཨོ་ང་ལ་རྒྱུན་ལྡན་ཅིག་རེད་མི་འདུག་བསམ་ན་མགོ་ཐོག་མ་ནས་བརྟག་ཞིབ་བྱེད་པ་གལ་ཆེ། ད་དེང་སང་གི་དུས་ཚོད་ལ་སྨན་བཅོས་ཀྱི་ཆ་རྐྱེན་བཟང་དུས་རེད་མོད། མྱི་བདེ་བཞིན་བསྡད་ཡོད་དུས་བཅའ་བ་སྐུ་རིམས་སྒྲུབ་དགོས། གློ་བུར་རྐྱེན་ངན་ཐོག་ལ་བབས་དུས་གཟོད་རྒྱུགས་དུས་ཕྱིས་སོང་བ་རེད། ལུས་ཀྱི་ཕྱག་སྐོར་སྒྲིབ་སྦྱོང་རྒྱུན་ཆད་མེད་པར་བྱས་ན་སྒྲིབ་པ་དག་རིམ་བཞིན་དེའི་བྱིན་རླབས་ཀྱིས་བདེ་ཐང་ཡོང་རྒྱུར་ཕན་ཐོགས་ཡོད། ལོ་ཉུང་རྣམ་པས་ཐུག་མ་ཁད་དུ་ཆགས་སྡང་རྨོངས་གསུམ་གྱི་འཕྱ་རེས་དགོད་གསུམ་བྱེད་ཁུལ་བྱས་ནས་ངག་གི་མི་དགེ་བསགས་པ་ལས་ཆོས་ཀྱི་ནང་དོན་རེ་ཕར་བཤད་ཚུར་གླེང་བྱོས་དང་རང་རོགས་ཚང་མར་བློ་སྐྱེད་ཡོད། མི་མཛེས་བྱེད་ཀྱི་རྒྱན་ཆ་དྲག་ཤོས་དེ་ཡོན་ཏན་གྱི་རྒྱན་ཆ་ཡིན། ཡོན་ཏན་འབད་པའི་ཤུགས་ལ་གནས། །འབད་མེད་ཡོན་ཏན་མི་སྒྲུབ་པར། །གཞན་ལ་འཁང་བས་ཅི་ཞིག་ཕན། །ཞེས་གསུངས་པ་ལྟར་ཡོན་ཏན་ལ་འབད་པ་བརྩོན་འགྲུས་ཅི་ཙམ་ཐུབ་ན་དེའི་ཚོད་ཀྱིས་རང་རྒྱུད་ལ་འབྱར་རྒྱུ་ཡོད། རིན་མེད་ཀྱི་ཐོག་ནས་རིན་ཐང་ཅན་གྱི་ཡོན་ཏན་དེ་ཅི་བསམ་གང་འདོད་དུ་ལེན་རྒྱུ་ཡོད་དུས་དེ་མི་ལེན་པར། རང་གི་མ་ཐོན་པ་མི་ཤེས་པར་གཞན་ལ་འཁང་ར་ཡིད་ཆད་བཤད་པས་ཕན་ཐོགས་ཡོད་པ་མ་རེད་གསུངས་ཡོད། ད་འཇིག་རྟེན་གྱི་ཁམས་འདིའི་བཟང་ཆ་ལེགས་ཆ་ཞིག་རིག་རྒྱུ་གོ་རྒྱུ་ཡོད་ཚད་པོ་འབད་པས་བསྒྲུབ་ཡོང་བ་ཏག་ཏག་ཡིན་ན། དེ་རྒྱུ་མེད་ཀྱི་འབྲས་བུ་ཞིག་འབྱུང་དོན་ཡོད་མ་རེད། མྱི་སྙོམས་ལས་ལེ་ལོ་ཅན་གཡོ་རྐྱལ་སྡུག་རུས་རྒྱག་མི་ཐུབ་པ་དེས་གནས་སྐབས་ཐང་རེ་ཙམ་ཟ་རྒྱུ་གཉིད་རྒྱུ་གཉིས་ཀ་རག་སོང་ན། དེའི་ཕན་གྱི་འདང་རྒྱག་མི་ཤེས་པར་གཡོ་བྱས་ཤིང་བྱས་ནས་རྣམ་གཡེང་བྱས་ཤིང་བྱས་ནའང་། ལས་མི་མོས་སྦྱང་མི་མོས་པར་ཇེ་སྡུག་རེད། སྐབས་ཤིག་ཉལ་རྒྱུ་འཁྱར་རྒྱུ་གཉིས་ཀས་མི་ཚེ་བཅད་དུས། རྒྱུད་ཀྱི་ཡོན་ཏན་ལ་ཡར་སྐྱེད་རྒྱག་ཡོང་རྒྱུ་ཞིག་དང་། རྒྱུད་ལ་མི་ལོ་ཅི་ཙམ་སོང་རུང་ཡོན་ཏན་གྱི་དྲི་ཞིག་འགོ་ཡོང་རྒྱུ་ཡོད་པ་མ་རེད། མི་གཤིས་བཟང་ལ་ཡོན་ཏན་ཞིག་ཡོད་ན་བཤད་ཅི་དགོས། མིན་ཡང་མི་གཤིས་ངན་སྡུག་ཐུག་ངོ་མ་ཞིག་མིན་ན། མཁས་པའི་ལེགས་བཤད་དང་དམ་པའི་གཞུང་ལུགས་ལ་བལྟས་པ་ཡིན་ན། གྲོགས་བཟང་པོ་རེར་བཅར་འདོད་ཡོད་པ་དང་ནི་ཡ་རབས་བཟང་བོའི་ལུགས་དེ་འདི་ལྟར་ཡིན་བསམ་རྒྱུ་རེ་ཤེས་ཡོང་དུས་མིན་ཟེར་རུང་། ཇི་ལྟར་མ་ལ་ཡ་ཡི་ནགས་ཀློང་དུ། །རྣམ་པར་འཁྱམས་པའི་སྡོང་དུམ་ཕལ་བ་ཡང་། །ཡལ་འདབ་བརླན་པས་ཙནྡན་དྲི་བསུང་ལྟར། །གང་ལ་བརྟེན་པ་དེ་ཡི་རྗེས་སུ་འགྲོ །ཞེས་གསུངས་པ་ལྟར་བཟང་པོ་དང་འགྲོགས་ན་བཟང་འགོས། ངན་པ་དང་འགྲོགས་ན་ངན་འགོས་པས། རྒྱུད་འགྱུར་ཏེ་གོམས་པའི་སྟོབས་ཀྱིས་བཟང་ཡ་རབས་དང་འགྲོགས་ན་བཟང་འགོས་ནས་རང་ཉིད་ཡ་རབས་ཡོན་ཏན་ཅན་བཟང་པོའི་ཕྱོགས་ལ་འགྱུར་རྒྱུ་ཡོད། མྱི་གཤིས་བཟང་ཟེར་ན་ཇི་ལྟ་བུ་ཞིག་རེད་བསམ་ན། མྱི་རྒྱུད་འཇམ་ཁོང་ཁྲོ་གདུག་རྩུབ་ཅན་མིན་པ་གདིང་ནས་རང་གཤིས་ལ་བརྟན་ཆ་ཡོད་པ། ལེགས་ཉེས་བཟང་ངན་གྱི་རྒྱང་མིག་མཐོང་བ། བརྟགས་ཤིང་དཔྱད་པ་མ་བཏང་བར་གཏམ་བཤད་པ་དང་ལས་བྱས་སྔ་མི་བྱེད་པ། རྒྱུད་ན་མྱི་གཞན་ལ་ཕན་སེམས་དང་སྤྱི་སེམས་མ་གཏོགས་པར་རང་འདོད་ཀྱི་འཁྲི་བ་མི་ཆེ་བ། མི་ཚེའི་ཕུགས་བསམ་མངོན་འགྱུར་མ་ཡོང་གི་བར་དུ་ཞེ་ནས་དམ་བཅའ་བཞག་ཚར་དུས་ཕྱིར་བཀྱེད་མི་བྱེད་པ། དགའ་སླ་སྡུག་མགྱོགས་དཔྱིད་ཀའི་གནམ་ངོ་འདྲ་འདྲའི་འགྱུར་ལྡོག་ཅན་མིན་པ། ཁ་ཉུང་ཉུང་གཤིས་འཇམ་པོ་འཛུམ་བག་ཅན། གདིང་ཀི་གཏིང་དཔོག་དཀའ་བ་དེ་ལྟ་བུའི་མྱི་ལ་ནམ་མཁའི་ལྷ་ཡང་འཇིགས་ཤིང་སྐྲག་གསུངས་ཡོད་པ། དཔལ་སྤྲུལ་ཚང་གི་གཞོན་ནུ་བློ་ལྡན་གྱི་དྲིས་ལན་ཚོར་ལྟོས་དང་། མྱི་རབ་རེ་རེའི་ཡུལ་ཁམས་སྡེ་འབངས་སྤྱི་ཡི་དོན་བྱེད་པ་རེད། མྱི་ངན་རེ་རེའི་ཡུལ་སྡེ་མང་བོའི་དཀྲུགས་ཤིང་བྱེད་པ་ཡོད་གསུངས་ཡོད་པ་དེ་ལྟར་རེད། སྐྱེས་ཕོ་རབ་ཅིག་གི་ཚད་ལ་མ་སླེབ་ནའང་། ཕོ་ཐ་མའི་གྲལ་ལ་ལྷུང་བའི་ངན་དཔེ་ལག་རྗེས་གསོན་གྲང་ང་ཁམས་ལ་འཇོག་མི་ཉན། ད་འཇིག་རྟེན་འཁོར་བ་པ་ལ་རྒྱུ་ནོར་ལོངས་སྤྱོད་འཛོམས་དགོས་པ་རེད། ཕུན་ཚོགས་སྡེ་བཞི་མངོན་མཐོའི་འབྱོར་བ་རེད་གསུངས་པ་རེད། རེད་དེ། རྒྱུ་གསོག་ལུགས་དེ་ཡང་ཁོ་རང་ཚུལ་དང་མཐུན་པ་ཞིག་གིས། རང་གི་རྣམ་དཔྱོད་ཀྱི་བསམ་བློ་བཏང་ནས་ཐབས་བཟང་པོ་བཙལ་ནས་གསོག་དགོས་པ་རེད། ཕྱོགས་གཅིག་ནས་བསོད་ནམས་བསགས་དགོས། བསོད་ནམས་མེད་ན་འབད་པ་བྱས་ཀྱང་དོན་འགྲུབ་རྒྱུ་མ་རེད། ཕྱོགས་གཅིག་ནས་འབད་པར་བྱེད་དགོས། ཁང་སྟོང་ནང་ནས་ཛམ་བྷ་ལ་བཏོན་པ་ཙམ་གྱིས་ནོར་བུའི་ཆར་བ་འབབ་ཡོང་རྒྱུ་ཞིག་དཀའ། བསོད་ནམས་ཤུགས་ཀྱིས་དོན་འགྲུབ་པ། །ཉི་མའི་འོད་བཞིན་ལྟོས་པ་མེད། །འབད་པའི་ཤུགས་ཀྱིས་དོན་སྒྲུབ་པ། །མར་མེའི་འོད་བཞིན་ཀུན་ལ་ལྟོས། །གསུངས་པ་ལྟར་རེད། འཁུམ་འཁུམས་བྱས་ནས་ལག་པ་བསྡམས་ནས་བསྡད་པ་ཞིག་གིས་རྒྱུ་སོག་རྒྱུ་མ་རེད། ཁྲོན་པའི་ཆུ་ཡར་ལ་འཕེལ་དགོས་པར་འདོད་ན་བཅུ་བ་ཉིད་ནི་གདམས་ངག་ཡིན་གསུངས་ཡོད་པ་ཡིན། ལོན་སྒོ་ཡོང་སྒོ་ཆེ་དགོས་པ་རེད་མོད། དེ་ཡང་རང་གི་ཚོད་དང་བསྟུན་པ་མ་གཏོགས། ཡིན་ཅིག་མིན་ཅིག་ཧེབ་ཆེ་བས་མི་ཕན། ཤིང་ཏོག་ཤིང་རྩེ་ལས་བླང་གིས། །དེ་ལས་ཐལ་ན་ས་ལ་ལྷུང་། །ཞེས་གསུངས་ཡོད། ཤིང་ཏོག་འཐུ་རུ་སོང་དུས། ཤིང་ཏོག་ཤིང་སྡོང་གི་རྩེ་ལ་ཡོད་ན་དེ་ལ་ཨེ་སྙོབ་བལྟ་དུས་འགོས་སའི་ཤིང་སྡོང་ལ་བསྟུན་ཞོར་གྱིས་མ་གཏོགས། ལེན་དགོས་བསམ་པའི་ཧམ་སེམས་ཆེན་པོས་ཤིང་རྩེའི་ཕར་རྒྱབ་མཆོང་མ་འགྲོ་མ་གཏོགས། ཤིང་ཏོག་མ་ལོན་པའི་སྔོན་ན་སྡུག་ཅིག་ཡོང་ནི་རེད་གསུངས་པ་རེད། མྱི་ངོ་མ་ཞིག་བྱེད་བསམ་ན་མཁས་པའི་ལེགས་བཤད་ལ་དུས་རྒྱུན་ཉམས་ཞིབ་བྱེད་དགོས། དཔལ་སྤྲུལ་ཚང་གི་གཞོན་ནུ་བློ་ལྡན་གྱི་དྲིས་ལན་གྱི་ནང་ན་ལོ་ཉུང་ལོ་ཉུང་གི་ཚོད་དང་། རྒན་པ་རྒན་པའི་ཚོད་ཀྱིས། བུད་མེད་བུད་མེད་ཀྱི་ཚོད་ཀྱིས་ཐམས་ཅད་ཀུན་པོ་བདེ་ཞིང་སྐྱིད་པའི་ངང་ནས་མཐུན་སྒྲིལ་འགྲོག་ལུགས་ལ་སོགས་པ་ཅི་འདྲ་འདྲ་གསུངས་ཡོད། གསུངས་པ་དུས་རབས་དང་སྤྱི་ཚོགས་ཀྱི་ཁོར་ཡུག་མ་འདྲ་རུང་། གསུང་ས་མྱི་ཡིན་པ་དང་མྱིའི་རྒྱུད་ཀྱི་ཉོན་མོངས་དུག་ལྔ་ཤུགས་ཆེ་བ། རང་དབང་རང་ལ་མེད་ཅིང་དུག་ལྔའི་གཞན་དབང་ལ་ཤོར་དྲག་ན། བདེ་འདོད་སྡུག་བསྔལ་རང་ཐོག་ལ་འདྲེན་གི་ཡོད་ལུགས་དེ་རྣམ་པ་ཀུན་ཏུ་གཅིག་པ་རེད། ཆོས་དང་འཇིག་རྟེན་གཉིས་ཀྱི་སྤྱོད་ཚུལ་ཁ་ཁ་ཡིན། མེ་ཆུ་གཉིས་ཀ་འདྲེས་ཐབས་ཅི་ལ་ཡོད། གཅིག་པོ་སྒྲུབ་དུས་གཅིག་པོ་བསྐྱུར་རྒྱུ་རེད་བསམ་རྒྱུ་དེ་གདུལ་བྱའི་རིགས་ཐམས་ཅད་ལ་སྦྱར་ན་ནོར་བ་ཡིན། རྒྱལ་བས་འགྲོ་ལ་དམ་ཆོས་བསྟན་པ་དེ་མངོན་མཐོ་ངེས་ལེགས་གཉིས་ཀ་སྒྲུབ་བྱེད་ཡིན་ན། དེ་ཡང་གནས་སྐབས་དང་མཐར་ཐུག་གི་བདེ་བ་སྒྲུབ་བྱེད་ཡིན་དགོས། ངན་སོང་ངན་འགྲོའི་མི་ཁོམ་པའི་གནས་ལས་མཐོ་རིས་ལྷ་མིའི་ལུས་རྟེན་ལ་བཀོད། དེ་ནས་ཐར་བའི་རྒྱུ་བསྒྲུབ་སྟེ་རང་གཞན་གཏན་བདེར་འགོད་པའི་ལམ་དེ་བསྟན་པ་ཡིན་པ་དེ་བས་ན། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་བ་གམ་ན་གནས། །གསུངས་པ་རེད། འདི་ཚོ་ལན་གྲངས་ཐེངས་མ་མང་པོ་བཤད་མྱོང་རེད། ད་དང་པོ་མྱི་ཞིག་བྱས་ནས། དེ་འཕྲོས་མྱི་ངོ་མ་ཞིག་བྱས། དེ་ནས་མྱི་ལུགས་ལ་བསླབ་ཏེ་མྱི་ཡང་དག་པ་ཟེར་བ་དེ་བྱེད། དེ་ནས་ཆོས་སྦྱངས་ནས་ཆོས་པ་ངོ་མ་རུ་འགྱུར་བཅུག དེ་ནས་རྒྱན་གྱིས་བརྒྱན་པར་བྱེད་ཀྱང་ཆོས་སྤྱོད་ཅིང་། དུལ་ཞིང་དག་སྤྱད་པ་གསུངས་པ་ཡིན་པས། དེ་ནས་ཆོས་འཇིག་རྟེན་གཉིས་ཀྱི་ཐད་ནས་བྱ་བ་ལེགས་འགྲུབ་ཀྱི་རྩེ་མོར་སོན་ཏེ། མྱི་ཡི་ཆོས་ལུགས་འཇིག་རྟེན་ཡང་དག་གི་ལྟ་བར་ཞུགས་སའི་ལྷ་མིའི་ཐེམ་སྐས་ལ་འགོས་ནས། ངེས་ལེགས་ཐར་བ་དམ་པའི་སྐས་ཐེམ་རིམ་བགྲོད་ཀྱིས་འཇུག་དགོས་པས་ན། ཆོས་བཤད་སའི་ཆོས་རའི་ནང་ནས་མྱི་ཡིན་ལུགས་ཀྱི་འཇིག་རྟེན་དང་མ་འབྲེལ་ན་ཆོས་བཤད་དུས་སུ་ལ་ཕན་བཏགས། ཁྱིམ་ན་གནས་པའི་འཇིག་རྟེན་པས། གྲྭ་སའི་གྲྭ་བའི་ལད་མོ་བྱས་ནས་གཞུང་བཀའ་པོད་ལྔ་པོའི་འཆད་ཉན་བྱ་དགོས་ནི་མ་རེད་ཞུས་པ་མིན་རུང་། དེ་འདྲ་ཐུབ་དཀའ་མོ་རེད། དང་པོ་སྔོན་ལ་མི་རིགས་ཀྱི་རིག་གནས་ཀྱི་སྲོག་མི་རིགས་ཆགས་འཇིག་གི་རྩ་བ་བོད་ཡིག་གི་ཡིག་ངོ་ཤེས་པ་ཞིག་བྱས་ནས། དཔེ་བལྟས་གང་བྱ་བསམ་ནའང་གོ་དོན་འཁྲོལ་བ་ཞིག་བྱས་བཞག་ན། རང་ལུགས་གཞན་ལུགས་ཀྱི་ཤེས་བྱ་མང་པོ། ཚེ་ཕྱི་མའི་བདེ་དོན་རང་གཞན་གཉིས་ཀྱི་གཏན་བདེ་ཡག་ཉེས་ཀྱི་ཐད་དུ་མིན་རུང་། ཁ་གསོ་ཚུལ་རྒྱབ་འགེབ་ལུགས་ལ་སོགས་པའི་ཐད་ནས་ཤེས་རྒྱུ་མང་བ་རེད། མདོ་དོན་ཚིག་གི་རྩ་བ་ཅི་ཟེར་བ་རེད་ཅེ་ན། མྱིའི་འཚོ་བའི་ནང་ན་ཆོས་ཀྱི་འཚོ་བ་དང་རིག་གནས་ཀྱི་འཚོ་བའི་ཆ་རྐྱེན་འཛོམས་སུ་ཆུག་དང་། ཟ་ཉལ་འགྲོ་འདུག་དུད་འགྲོ་སོགས་དང་ཐུན་མོང་མ་ཡིན་པའི་བདེ་སྐྱིད་དང་ཡོང་སྒོ། རིན་པ་བྱིན་ནས་ཉོ་མི་དགོས་པའི་རིན་ཐང་ཅན་ལེན་རྒྱུ་ཡོད། དེ་ཚོ་བླངས་ན་བཟང་བ་རེད་ཟེར་བ་ཡིན། དེ་རིང་དུས་ཚོད་མང་པོ་ཞིག་སོང་འདུག་པས་ཆོས་ཁྲིད་ཟེར་བ་དེ་ཧ་ཅང་ཡུན་རིང་མི་ཉན། དེ་རིང་གི་བཤད་སྐལ་གྱི་ནང་ནས་ང་ཚོའི་སེམས་ཅན་དོན་དུ་བྱང་ཆུབ་སེམས་མཆོག་བསྐྱེད་ཟེར་བ་ལྷག་རུང་། སང་ཉིན་ཡན་ལག་བདུན་པ་དང་མཉམ་དུ་བཤད་རྒྱུ་བྱེད། སེམས་བསྐྱེད་ཆོ་གས་ལེན་དུས་ཡན་ལག་བདུན་པ་སྔོན་ལ་འགྲོ་དགོས་པ་རེད། སེམས་བསྐྱེད་དང་ཡན་ལག་བདུན་པ་འབྲེལ་ཆེ་བ་རེད། བླ་མའི་རྣལ་འབྱོར་གྱི་སྔོན་ལ་དེ་བཞིན་དུ་འགྲོ་དགོས་པ་རེད། སེམས་བསྐྱེད་དང་བླ་རྣམ་གཉིས་ཀྱི་བར་ན་ཡོད་པ་འདི་བར་གྱི་གསལ་བྱེད་ལྟ་བུར་གོ་ཉིས་ཆོད་ཀྱི་ཚུལ་དུ་ཡོད་པར་གོ་བ་བླངས་ཆོག དུས་ཚོད་ཀྱི་དབང་གིས་དེ་རིང་གི་ཆོས་ཁྲིད་དེ་ཙམ་བྱེད། ཉེ་བའི་ཉི་མ་ཁ་ཤས་ཀྱི་ཡར་སྔོན་ལ་གནས་འདིར་ས་ཆ་མདོ་དབུས་ཁམས་གསུམ་གྱི་མྱི་སྣ་འཛོམས་ས་ནས་རྫོགས་པ་ཆེན་པོ་ཀློང་ཆེན་སྙིང་ཐིག་དུམ་གཉིས་ཀྱི་དབང་། དབང་ཁྲིད་བསྒྲགས་མའི་ཆོས་སྒོ་ཕྱེས་པ་ཡིན། དེར་མཐུད་ནས་རྒྱལ་ཁམས་སྤྱི་དང་བསྟན་པ་སྤྱིའི་ཞབས་རིམ། ཁྱད་པར་དུ་རྨད་བྱུང་ཐུགས་བསྐྱེད་ཀྱི་མཐུ་ལས་གཞན་ལས་ཁྱད་པར་དུ་འཕགས་པའི་བསྟན་འཛིན་གྱི་སྐྱེས་བུ་དམ་པའི་སྐུ་ཚེ་ཞབས་པད་བརྟན། ཐུགས་བཞེད་གེགས་མེད་དུ་འགྲུབ་ཆེད་སེམས་བསྐྱེད་འབུམ་མཆོད་ཆེན་མོ་ཐེངས་བཅུ་བ་ཚོགས་མ་ཐག་རེད། ཐེངས་འདིར་མདོ་ཁམས་ཉི་མ་ཤར་ལྷོའི་ཕྱོགས་འདི་ན། ལོ་རྒྱུས་ཀྱི་སྟེང་ནས་མཐོང་བར་དཀོན་པའི་རབ་སྔགས་ཀྱི་དགེ་འདུན་པའི་སྡེ་ཞལ་གྲངས་སྟོང་ཕྲག་མང་པོ། ཁྲི་ཁར་ལོངས་དང་མི་ལོངས་ཀི་ཚོད་འཇོག་བྱེད་སའི་ཆོས་འཚོགས་ཆེན་མོ། ཟླ་ཕྱེད་ཙམ་གྱི་རིང་ལ་ཚོགས་པ་ཡིན་ན། འབྲེལ་ཚད་དོན་ལྡན་ས་འདིའི་བསོད་ནམས་ཀྱི་དཔལ་དུ་མ་བོས་མགྲོན་དུ་ཁུག་པ་རེད། ཡིན་པ་ལྟར་དུ་འབྲོག་རུ་བསོད་ནམས་ལྷ་སྡེ་མྱིང་དང་དོན་མཚུངས་པ། གུར་བཞུགས་སྒར། ན་བཟའ་བཞུགས་གདན་སོགས་ཀྱི་གྲ་སྒྲིག་དང་ནི། འོ་ཞོ་མར་གསུམ་གྱི་གསོལ་བ་ཕུན་སུམ་ཚོགས་པའི་བསྙེན་བཀུར་ཞབས་ཏོག་ཞུས་ཏེ། བསོད་ནམས་བསགས་ནས་སྡེ་འདིར་གཏོགས་པའི་བླ་གྲྭ་སེར་སྐྱ་ཕོ་མོ་རྒན་གཞོན་ཚང་མས་མྱི་གཅིག་གི་སྟེང་ལ་བབས་པ་ལྟ་བུའི་སྲི་ཞུའི་ལས་ཀ་སྒྲུབ་པ་ཡིན་ན། ད་རང་གི་སྒེར་དོན་རྐྱང་བར་བབས་རུང་ནུས་པ་དེ་འདྲ་ཞིག་བྱུང་ཐུབ་རྒྱུ་མ་རེད་བསམ་རྒྱུའི་ཚད་ལ་བསྐྱལ་བ་ལ། ངས་དེ་རིང་ཐམས་ཅད་འཛོམས་ས་འདི་ནས་བསྔགས་བརྗོད་བྱས་པ་ཡིན། གནའ་འབྲོག་རུ་ཤོག་ཆེན་བཅོ་བརྒྱད་ཤོག་ཆུང་གཉིས་དང་ཉི་ཤུ་ཟེར་བ་རེད། གྲུབ་དབང་སྐུ་ཕྲེང་གོང་མ་རིམ་བྱོན་གྱི་བསྟན་སྲིད་དབུ་འཕང་དགུང་ལས་མཐོ་དུས་དེ་འདྲ་ཡིན་མོད། མདང་དོ་ཚིགས་ལ་བསམ་བློ་བཏང་ན། གནའ་ཤྭ་བ་ཉལ་ཤུལ་ན་མདང་དོ་ཚིགས་ཤེའུ་ཆུང་ཉལ་ནི་མ་རེད། །སྤྱིར་འཛམ་གླིང་གི་གནས་སྟངས་འགྱུར། སྒོས་བོད་ཁུལ་བསྟན་སྲིད་ཆགས་འཇིག་ཆེ་བའི་གནས་ཚུལ་གྱི་འོག་ནས་ས་ཆ་གདན་ས་འདི་ཚོར་ཡང་དགོས་ཡར་ལྷག་གིས་ཉམ་ཉེས་བྱུང་མྱོང་ས་ཡིན། ད་ལྟའི་སྐབས་ལ་བསམ་བློ་བཏང་ན་གཅིག་སྔར་བྱུང་དམ་པ་གོང་མའི་ཐུགས་བསྐྱེད་ལུགས། གཉིས་བསྟན་པ་སྤྱི་དོན་དུ་གཤེགས་པའི་མྱི་རབས་སྔ་མའི་མྱི་བརྒྱུད་ཀྱི་ལྷག་བསམ་སེམས་པ་གཅིག་མཐུན་ལ་འགྱུར་བ་མེད་པ། གསུམ་ད་ཡོད་དོན་གྱི་བདག་པོ་མཁན་སྤྲུལ་སྐྱེས་ཆེན་དམ་པའི་ཚུལ་དགུའི་སྐུ་ཡོན་ཅན་རྣམ་པས་གཙོས་བྱས་པའི་གཞོན་ནུ་སྡེ་སྣོད་འཛིན་པའི་དཔུང་སྡེ་འཚར་ལོངས་ཡོང་བཞིན་པ་ལ་བསྟེན་ནས། ད་ཡོད་སྡེ་ཤོག་ཚོ་བ་བཅུ་གསུམ། མོ་དུད་སྟོང་རུ་གཉིས་ཙམ་པོས་བློ་སེམས་བསམ་པ་གཅིག་མཐུན་དུ་དྲིལ་བའི་སྟོབས་ཀྱིས་འདྲ་འདྲའི་ནང་ནས་མི་འདྲའི་དོན་གྱི་བསྟན་པའི་སྲོག་ཚུགས། སྡེ་ཡུལ་བའི་མངའ་ཐང་བསོད་ནམས་ཇེ་དར་ལ་འགྲོ་བཞིན་པ་རང་གཞན་གཉིས་ཀྱིས་མཐོང་བ་མངོན་འགྱུར་ཡིན་ན། འདི་དང་འདི་བཞིན་ད་རུང་མུ་མཐུད་པས་མི་ཚད། མྱི་རེ་རེ་བཞིན་སེམས་རྒྱུད་གཞན་ཕན་གྱི་སེམས་དང་མི་འབྲལ་བའི་ཐོག་ནས། བསམ་སྤྱོད་བཟང་བོའི་དཔེར་སྟོན་གྱི་མིག་ལྟོས་བཟང་པོ་ཞིག་གི་སྣེ་ཁྲིད་ཀྱི་ནུས་པ་འདོན་དགོས་པ་རེད། དེ་བཞིན་དུ་ཕྱོགས་གཞན་གྱི་མི་སྣ་ཚང་མས་ཀྱང་ད་ཐེངས་ཀྱི་ཆོས་གྲལ་དུ་ཞུགས་ཏེ་བློ་སྒོ་གསར་བ་ཞིག་ཕྱེས་ནས། གུ་དོག་ཁོག་ཆུང་གི་རང་འདོད་ངན་ཞེན་གྱི་ཁོངས་ནས་མི་འདོད་སྣ་དགུ་ཡོང་གི་ཡོད་ན་འཇིག་རྟེན་བསྒྱུར་བཀོད་གཏོང་རྒྱུའི་ཁ་རྗེ་ནུས་སྟོབས་སུ་ལ་ཡང་མེད་ཀྱང་། རང་ཉིད་བཟང་བོའི་ལམ་ལ་འཇོག་པ་རང་ལག་ཡིན་པས་རང་སེམས་ངན་སྐྱོན་གྱི་མཚང་དེ་ཕུད་ནས་ཡ་རབས་བཟང་པོའི་བསམ་སྤྱོད་གསར་བས་དེའི་ས་དེ་བཟུང་བཞག་ན། རང་བདེ་བས་མི་ཚད་ཁྱིམ་བཟའ་ཚང་བདེ་ཞིང་སྐྱིད་པ། དེ་བཞིན་དུ་ཁོར་ཡུག་གི་གཉེན་ཉེ་ཁྱིམ་མཚེས་བདེ་བ་ནས་རྒྱ་བསྐྱེད་དུ་སོང་ན། དེ་བས་རྒྱ་ཆེ་བའི་ཡུལ་ཁམས་ཀྱི་བདེ་སྐྱིད་ཀྱི་འབྱུང་རྩ་ཡང་བསྐྲུན་མི་ཐུབ་པ་ཞིག་མ་རེད། ད་མི་འདོད་སྡུག་བསྔལ་ཐམས་ཅད་མྱི་རང་གི་བསམ་སྤྱོད་ཡང་མ་དག་པའི་ཁོངས་ནས་བྱུང་བ་ཡིན་པ་དེ་ལྷངས་ལ་བུད་དུས། བདེ་ཞིང་སྐྱིད་པའི་གཞི་རྩ་ཡང་མྱི་རང་གིས་བསྐྲུན་མི་ཐུབ་པ་ཞིག་མེད་པ་མངོན་དུ་གྱུར་བ་རེད། ནང་བཅུད་ཀྱི་སེམས་ཅན་གྱི་བསམ་སྤྱོད་ཡང་དག་པའི་ཕྱོགས་ལ་འགྱུར་བའི་དུས་སུ་ཕྱི་སྣོད་ནང་བཅུད་ཀྱི་རྟེན་དང་བརྟེན་པའི་འབྲེལ་བ་གཞི་ནས་ཟད་པ་ཡིན་པས་ན། གང་ན་བསམ་སྤྱོད་བཟང་པོ་ཅན་གྱི་མྱི་མང་ན་རྣམ་དཀར་བསོད་ནམས་བསགས་སྟོབས་ཆེ་ས་དེར་ཕྱི་སྣོད་ཀྱི་རྒུད་པ་ཡང་རང་ཤུགས་ཀྱིས་སོས་ནས་དག་ཞིང་མིན་རུང་དག་འདྲར་འགྱུར་རྒྱུའི་ཡུལ་ཁ་རིག་པ་རེད། མདོར་ན་འདིར་ཡོད་ཚང་མས་མ་འོངས་བདེ་ཞིང་སྐྱིད་པའི་འབྱུང་རྩ་སེམས་ཀྱི་ཡིད་བཞིན་ནོར་བུ་རིན་ཆེན་གྱི་གཏེར་མཛོད་དེ་ནང་རང་གི་སེམས་ལས་རྙེད་ཐབས་གྱིས་ཟེར་བ་འདི། རང་གཞན་འཕྲལ་ཡུན་གྱི་བདེ་ཐབས་འཛམ་གླིང་བསྐོར་བ་བརྒྱབ་རུང་མི་རྙེད་རྒྱུ་དེ་རིན་མེད་དུ་རང་རྒྱུད་ནས་རྙེད་ཐུབ་པ་རེད་ཟེར་བའི་གྲོས་མགོ་འདོན་པ་དང་བཅས་ཏེ། འདིའི་མཚམས་ནས་མགུར་དབྱངས་ཤིག་འཐེན་ནས་དེ་རིང་གི་ཆོས་མཚམས་འཇོག །

ད་ལོ་མགུར་དབྱངས་འཐེན་རྒྱུ་འདི་ཤྲཱི་སེང་ཆོས་གྲྭ་དང་དགོན་གྱི་མཁན་སྤྲུལ་དགེ་བའི་བཤེས་གཉེན་ནམ། བསླབ་བཙུན་སྡེ་སྣོད་འཛིན་པ་གང་སུ་ཡིན་རུང་བ་གཉིས་རེས་མགུར་དབྱངས་འཐེན་རྒྱུ་ཞུས་པ་རེད། དེ་རིང་སུས་འཐེན་རྒྱུའི་ཐུགས་ཁུར་མཛད་ཡོད་ན་རིམ་པ་བཞིན་དུ་མགུར་དབྱངས་འཐེན་རྒྱུ་ཡིན། རྫོགས་ཆེན་མཁན་པོ་རང་རིག་ནས་ཞབས་དཀར་བའི་སྐལ་ལྡན་གྱི་སྐྱེ་བུ་མང་བོ་ཞིག་ལ་ཞལ་གདམས་ཀྱི་མགུར་དབྱངས་ཚུལ་འདི་ལྟར་བསྩལ་ཏོ།།

རྗེ་རྩ་བའི་བླ་མ་རྡོ་རྗེ་འཆང་།།

སྟེང་སྤྱི་གཙུག་འཁོར་ལོ་རྒྱན་དུ་བཞུགས།།

གནས་འདིར་ཚོགས་སྐལ་ལྡན་ཕོ་མོ་ཡི།།

བློ་ཆོས་ལ་ཕྱོགས་པར་བྱིན་གྱིས་རློབས།།

ང་རྒྱལ་ཁམས་འགྲིམ་པའི་རྣལ་འབྱོར་བས།།

གདངས་སྙན་མོས་གླུ་དབྱངས་འདི་ལྟར་འཐེན།།

ངའི་ཕན་པའི་སྙིང་གཏམ་འདི་ཉིད་ལ།།

སྙན་ལྷན་ནེར་གསོན་དང་སྐལ་ལྡན་ཀུན།།

རྟེན་དལ་འབྱོར་མི་ལུས་རྙེད་པར་དཀའ།།

ཕྱིས་ཡང་ཡང་ཐོབ་པའི་དཔེ་མ་མཆིས།།

དུས་ད་རེས་ལན་གཅིག་ཐོབ་དུས་འདིར།།

ཚེ་སྟོང་ལོག་མ་བྱེད་སྐལ་ལྡན་ཀུན།།

དཔེ་གསོད་སར་འཁྲིད་པའི་བཤའ་ལུག་བཞིན།།

ཉིན་རེ་རེ་སོང་གིན་འཆི་ལ་ཉེ།།

དེ་ཡུན་རིང་སྡོད་པའི་གདེངས་མ་མཆིས།

ཚེ་མི་རྟག་སོམས་ཞིག་སྐལ་ལྡན་ཀུན།།

ནོར་མི་རྟག་རྩྭ་ཁའི་ཟིལ་བ་འདྲ།།

ཡུན་རིང་བོར་མི་རྟག་མྱུར་དུ་འཛད།།

སེམས་ཆགས་ཞེན་སེར་སྣ་མ་ཆེ་བར།།

ཀུན་ཆོས་ཕྱོགས་ཐོངས་དང་སྐལ་ལྡན་ཀུན།།

ཁྱིམ་བཟའ་ཚང་ཚོང་འདུས་མགྲོན་པོ་འདྲ།།

ཡུན་རིང་བོར་མི་སྡོད་སོ་སོར་གྱེས།།

ཚེ་ཕྱི་མའི་ཡུལ་ལ་མྱུར་དུ་འགྲོ།།

ད་མཐུན་པར་འགྲོགས་ཤིག་སྐལ་ལྡན་ཀུན།།

དགྲ་ཚེ་རབས་སྔོན་མའི་ཕ་མ་ཡིན།།

ཚེ་འདི་རུ་སྐྱོང་ཤེས་འདོད་ན་ཡང་།།

ཡུན་རིང་བོར་མི་སྡོད་ཁོ་ཡང་འཆི།།

སེམས་ཞེ་སྡང་མ་བྱེད་སྐལ་ལྡན་ཀུན།།

ཚེ་ཕྱི་མའི་ཡུལ་ལ་འགྲོ་བའི་ཚེ།།

མར་ངན་སོང་གསུམ་གྱི་སྡུག་བསྔལ་དེ།།

རང་ཐོག་ཏུ་བབས་ན་བཟོད་པར་དཀའ།།

ལས་མི་དགེ་སྤོངས་ཤིག་སྐལ་ལྡན་ཀུན།།

ཡར་མཐོ་རིས་ཐར་བའི་གནས་མཆོག་འདིར།།

བགྲོད་ནུས་ན་གཏན་དུ་བདེ་ཞིང་སྐྱིད།།

དེ་བགྲོད་པའི་ཐབས་མཆོག་ལྷ་ཆོས་ཡིན།།

ཆོས་དགེ་བ་སྒྲུབས་ཤིག་སྐལ་ལྡན་ཀུན།།

སྐྱབས་བསླུ་བ་མེད་པ་དཀོན་མཆོག་ལ།།

དུས་ནངས་ནུབ་ཀུན་ཏུ་སྐྱབས་འགྲོ་གྱིས།།

སེམས་བཟང་ན་ཅི་བྱེད་ཆོས་སུ་འགྲོ།།

ཡར་སེམས་བསྐྱེད་མཛོད་ཅིག་སྐལ་ལྡན་ཀུན།།

ཚོགས་རྫོགས་ཤིང་སྒྲིབ་པ་ཀུན་སྦྱོངས་པའི།།

ཐབས་མནྜལ་ཡིག་བརྒྱ་ནན་ཏན་གྱིས།།

རྗེ་བྱིན་རླབས་ཅན་གྱི་བླ་མ་ལ།།

རང་གསོལ་བ་ཐོབས་དང་སྐལ་ལྡན་ཀུན།།

བོད་ཁ་བ་ཅན་གྱི་ལྷ་སྐལ་མཆོག།

ལྷ་འཕགས་པ་སྤྱན་རས་གཟིགས་དབང་སྒོམས།།

ཆོས་ཀུན་གྱི་སྙིང་པོ་མ་ཎི་ཡིན།།

དུས་རྒྱུན་དུ་བསྒྲོངས་ཤིག་སྐལ་ལྡན་ཀུན།།

བོད་ཁ་བ་ཅན་གྱི་རྒྱལ་ཁམས་ན།།

དྲིན་ཆེ་བ་ཨོ་རྒྱན་པདྨ་ཡིན།།

ལྷ་གཞན་ལས་ཐུགས་རྗེ་བྱིན་རླབས་མྱུར།།

དེ་གསོལ་བ་ཐོབས་ཅིག་སྐལ་ལྡན་ཀུན།།

དུས་སྙིགས་མའི་སེམས་ཅན་བསོད་ནམས་ཆུང་།།

ནོར་དགྲ་འདྲེ་འབོད་པའི་གཡབ་མོ་ཡིན།།

གཞན་ནོར་ལ་བརྣབ་སེམས་མ་ཆེ་བར།།

སེམས་ཆོག་ཤེས་བསྟེན་ཞིག་སྐལ་ལྡན་ཀུན།།

མི་སྐྱོན་མེད་ཡོན་ཏན་ལྡན་པ་དེ།།

ད་དུས་ཀྱི་དབང་གི་དཀའ་མོ་གདའ།།

གྲོགས་གཞན་གྱིས་སྐྱོན་ལ་མ་རྟོག་པར།།

ཀུན་གོང་དུ་བཀུར་ཅིག་སྐལ་ལྡན་ཀུན།།

རང་དམན་ས་ཟུངས་ལ་དགེ་སྦྱོར་གྱིས།།

དགེ་གང་བྱས་རྣམས་ཀྱི་མཇུག་དེ་ལ།།

བསྔོ་སྨོན་ལམ་རང་གིས་གང་ཤེས་ཐོབས།།

དགེ་འཛིན་མེད་འཕེལ་ལོ་སྐལ་ལྡན་ཀུན།།

གླུ་འདི་ཉིད་བླངས་པའི་དགེ་བའི་མཐུས།།

མ་འགྲོ་ཀུན་བདེ་ཞིང་སྐྱིད་པར་ཤོག།

ཡུལ་འདི་རུ་བཀྲ་ཤིས་ཡོངས་ཁྱབས་ཤིང་།།

བཀྲ་ཤིས་པས་ས་གསུམ་ཁྱབ་གྱུར་ཅིག།

ཉིན་གཉིས་པའི་ཆོས་ཁྲིད།

དེ་ཡང་ཨོ་རྒྱན་རིན་པོ་ཆེས། ཡུན་ཐུང་ཚེ་ཡི་ཕྱེད་ཙམ་གཏི་མུག་གཉིད། །ཕྱེད་ཀྱང་སུམ་གཉིས་རྣམ་གཡེང་འདུ་འཛི་སྟེ། །སུམ་ཆ་གཅིག་ལ་བར་ཆད་རྐྱེན་དབང་མང་། །དེ་ཕྱིར་འདུ་བྱེད་སྟོན་ཁའི་སྤྲིན་ལྟར་གཡོ། །ལང་ཚོ་ལྡན་པའི་ལུས་སྲོག་མྱུར་དུ་འཇིག །དེ་ཕྱིར་ཕན་པའི་ཐབས་ལ་བརྩོན་པ་གཅེས། །ཞེས་གསུངས་ཡོད་པ་རེད། དེ་ལྟར་གསུངས་ན་ལོ་རྒན་གཞོན་དར་མ་གསུམ་གྱི་ནང་གི་སུའི་ཚེ་རིང་ཤེས་ནི་མ་རེད་དེ། ད་ལོ་ཉུང་འདྲ་ཚོས་ཚེ་ཡི་རིང་ཆགས་བྱེད་དུས། ད་རང་རེའི་ནང་གི་ཕོ་མོ་གང་ཡིན་རུང་ན་ཚོད་དར་མ་ལོ་གྲངས་སུམ་ཅུ་ཅན་ཞིག་ལ་ཆ་བཞག་ན། ལོ་གྲངས་སུམ་ཅུ་ཅན་གྱི་མྱི་དེ་ཚེ་མཐར་ཕྱིན་ལོ་གྲངས་བརྒྱད་ཅུ་ཐམ་པའི་བར་དུ་བརྟན་འགྲོ་བ་ཅན་ཞིག་ཡིན་ན། ད་རུང་མྱི་ལོ་ལྔ་བཅུ་ཐམ་པ་འདུག་ལོང་ཡོད། དེ་ཡང་ཡུན་ཐུང་ཐུང་ཞིག་མ་རེད་རིང་པོ་ཞིག་རེད། སྐྱིད་ལོང་སྡུག་ལོང་གཉིས་ཀ་ཡོད་ཀི་བསམ་རྒྱུ་ཞིག་ཡིན་རུང་། དེ་ཡང་ཨོ་རྒྱན་རིན་པོ་ཆེའི་གསུངས་ལུགས་ལྟར་ན། མྱི་ཚེ་ཕྱེད་ཀ་མལ་སའི་ནང་ནས་དྲན་མེད་ནག་ཐོམ་མེའི་ངང་ཟད་འགྲོ་བ་རེད་གསུངས་དུས་ཚེ་ཕྱེད་མལ་ས་ནས་ནག་ཐོམ་མེར་གཉིད་ནས་ཅི་ཡིན་འདི་ཡིན་མ་གོ་བར་ཟད་སོང་བ་ཕུད་ཤུལ་ན། ད་རུང་ལྔ་བཅུའི་ནང་གི་ཉི་ཤུ་རྩ་ལྔ་ལྷག་ཡོད་ནའང་། ཉི་ཤུ་རྩ་ལྔ་ལྷག་པ་དེའི་སུམ་གཉིས་རྣམ་གཡེང་འདུ་འཛིའི་དབང་ལ་ཤོར་འགྲོ་གསུངས་དུས། རྣམ་གཡེང་འདུ་འཛིའི་ངང་ནས་གར་སོང་འདིར་སོང་མི་གོ་བར་ཟད་འགྲོ་གསུངས་པ་རེད། བརྒྱད་གསུམ་ཉི་ཤུ་རྩ་བཞི་རེད་། ལོ་ཉི་ཤུ་རྩ་ལྔ་ཚོ་གསུམ་ལ་འཕངས་ན་དེ་རེ་རེ་ལ་ལོ་བརྒྱད་ལྷག་ཙམ་རེ་ཡིན་ན། དེའི་སུམ་གཉིས་ཀྱི་བརྒྱད་གཉིས་བཅུ་དྲུག་ལྷག་ཅིག་རྣམ་གཡེང་འདུ་འཛིའི་ནང་ལ་བུད་སོང་བ་རེད། དེའི་ཤུལ་ན་སུམ་ཆ་གཅིག་རྐྱང་བ་ལུས་རྒྱུ་བོ་དེ་ལོ་བརྒྱད་ཙམ་རེད། ལོ་བརྒྱད་ཀྱང་ཡུན་ཉུང་ཉུང་ངོ་མ་ཞིག་མ་རེད་དེ། ད་ལོ་བརྒྱད་པོ་དེ་བར་ཆད་རྐྱེན་གྱིས་དབང་དུ་མ་བསམ་ས་ནས་འགྲོ་རྒྱུ་མང་གསུངས་ཡོད་པ་རེད། ད་ང་རང་ཚོའི་གནས་སྟངས་ངོ་མའི་དབང་དུ་བཏང་ན་ལོ་རེའི་ནང་ལ་བསམ་བློ་བཏང་ནའང་། རང་དང་ཁྱིམ་མི། དེ་མིན་གཉེན་ཉེ་དགའ་མཛའ་གཅིག་ལ་མིན་རུང་གཅིག་གི་སྟེང་ལ། ན་རྒྱུ་ཚ་རྒྱུ་གྱོང་གོད་ཁ་དགྲ་གྱོད་ཁ་མཆུ་ལ་སོགས་པ་རྐྱེན་ངན་སྣ་ཚོགས་ཡོང་རྒྱུ་མང་བ་ཡིན་ན། རང་ཉིད་ངོ་མའི་ལུས་ཐོག་ལ་མ་ཡོང་ནའང་། རང་གི་ལུས་ཐོག་ཏུ་འོང་བ་དང་ཁྱད་མེད་པའི་མི་འདོད་སྣ་ཚོགས་ཀྱིས་བདེ་བདེ་ཞིག་མིག་གིས་རིག་རྒྱུའི་དུས་ཚོད་ཉུང་གི་ཡོད་པ་རེད། ད་རུང་དེའི་མི་ཚད་པར་ཁྱིམ་ཞིག་བཟུང་མྱེ་ཞིག་བུས་ན། ཁྱིམ་བཟའ་བའི་ཁ་གསོ་རྒྱབ་འགེབ། ཟས་གོས་ཉེར་སྤྱད་ཀྱི་དོན་ལ་དཀའ་ལས་ཤིག་མ་བརྒྱབ་པར་འབད་མེད་ལྷུན་གྲུབ་ཅིག་གང་ནས་བབས་ཡོང་། དེ་རིང་ཁ་སང་གི་དུས་ལ་ཡང་སྒོས་དགོས་རྒྱུ་མང་བ་རེད། ཆོག་ཤེས་མེད་པའི་མྱི་ཞིག་གི་འདོད་ཁ་གང་རྒྱུ་མ་དགོས་ཤུལ་ན་ལུས་རྒྱུ་མེད་པ་ཞིག་དགོས་པ་དེས་ཕྱིར་ན། འཇིག་རྟེན་འཁོར་བའི་གནས་ཀྱི་འདུ་བྱེད་སྣ་ཚོགས་བདེ་སྡུག་ལས་ཀྱི་རི་མོ་དེ་སྟོན་ཁའི་སྤྲིན་ལྟར་དུ་གཅིག་གི་ཐོག་ལ་བརྟན་པ་མིན་པར་གཡོ་བའི་རང་བཞིན་ཅན་ཡིན་པའི་སྟབས་ཀྱིས། ད་ལྟ་སྐབས་ཅིག་ལ་ལང་ཚོ་རྒྱས་པའི་རྟེན་ཤ་དར་ཁྲག་སྙོམས་ཀྱི་སྐབས་ཡིན་རུང་། དེ་ལ་ཡིད་རྟོན་དང་བློ་གཏད་མེད་པར་མྱུར་དུ་འཇིག་པའི་ཆོས་ཅན་ཡིན་པ་རེད། སུ་ཡིན་རུང་ཡུན་རིང་འདུག་པའི་འདང་རྒྱག་དང་ཚོད་རྩིས་བྱེད་ཐབས་མེད་པ་ཏག་ཏག་ཡིན་པས་ཁ་ཡི་ཐེབས་མི་ཐེབས་ཅི་ཡང་ཡོད་པ་མ་རེད། མདོར་ན་ཤི་ཆས་ཤིག་གྲ་སྒྲིག་གྱིས་གསུངས་གི་ཡོད་པ་རེད། ཤི་ཆས་གྲ་སྒྲིག་ཤི་དུས་ཕན་ཐོགས་ཅན་པོ་གང་ཡིན་ན་དེར་འབད་བརྩོན་གྱིས། དེ་ལ་འབད་པ་བྱས་ན་དེ་ནི་བྱས་པ་ཐམས་ཅད་ཀྱི་མཆོག་རེད་གསུང་གི་ཡོད་པ་རེད། ཨོ་རྒྱན་རིན་པོ་ཆེས། ད་དུང་དེའི་འཕྲོར་ཟས་ནོར་གྲོ་ཟན་གཅིག་དང་འགྲོགས་དབང་མེད། །མར་གྱི་དཀྱིལ་ནས་སྤུ་བཏོན་བཞིན་དུ་འགྲོ། །ཞེས་གསུངས་པ་རེད། སྤྱིར་གངས་ཅན་བོད་ལ་སློབ་དཔོན་ཆེན་པོ་བཀའ་དྲིན་ཆེ་བ་རེད། སྒོས་སུ་ང་རང་ཚོ་གསང་ཆེན་སྔ་འགྱུར་བའི་བསྟན་ཞབས་སུ་སྐྱེས་པ་ཞིག་ལ་རྒྱལ་བ་དངོས་བྱོན་རྒྱལ་བའི་དབང་པོ་སློབ་དཔོན་པད་འབྱུང་ལས་དད་ཅིག་སུ་ཡོད། དེས་གསུངས་པ་ལ་ཐུགས་ཅིའི་མི་དག ཡིད་ཅི་ལ་མི་ཆེས་ཏེ། ད་ཤི་བའི་ཉི་མ་ཐོག་ལ་ཐོན་པ་ཞིག་ཚེས་བཞག་དུས། ཟ་རྒྱུའི་ཟས་དང་འཚག་རྒྱུའི་རྒྱུ། གདགས་བྱའི་རྒྱན་གོས་ཡོ་བྱད་མ་དགོས། ཐ་ན་ལམ་ཆས་གྲོ་ཁ་ཙམ་ཞིག་ཀྱང་ཁྱེར་དབང་མེད་པས་མི་ཚད་ཁྱིམ་བཟའ་བ་གང་གཅེས་གང་དམར་དེ་དག་ཤུལ་ལ་བཞག་ནས། ཤི་གསོན་གཉིས་ཀས་ཕར་བལྟ་ཚུར་བལྟ་བྱེད་ཞོར་སྐྱོ་བས་སྡུག་གི་མཆི་མ་ཐར་ཐར་དྲུད་ནས། ཐ་ན་རང་ལུས་ཡང་ཤུལ་ལ་བཞག་སྟེ་མར་གྱི་ནང་ནས་སྤུ་བཏོན་པ་ལྟར་འགྲོ་དུས། ཆོས་དགེ་བའི་འགྲོ་རྟེན་འདི་ཡོད་ཐལ་བསམ་རྒྱུ་ཞིག་རང་ལ་མེད་པ་ཡིན་ན། དེ་དུས་ཤི་བར་དོ་ཟེར་བའི་འཇིགས་སྐྲག་ཅན་གྱི་འཕྲང་ནང་ལ་ཐོན་དུས། ཡ་ང་བའི་གཡང་ས་གསུམ་ཡོད་པ་རེད། འཇིགས་པའི་སྒྲ་བཞི་ཡོད་པ་རེད། མ་ངེས་པའི་རྟགས་དྲུག་ཚོ་ཐོན་ཡོང་དུས་གདོང་ལེན་ཅི་ཞིག་གིས་བྱེད་འདང་ཡོད། སྤྱིར་བར་དོའི་རྣམ་ཤེས་རྟེན་མེད་གནས་མེད་བྱ་སྤུ་རླུང་གིས་བསྐྱོད་པ་འདྲ་བ་རྟེན་ས་འཁྲི་ས་མེད་པ། སྐྱོ་ཆད་དེ། འཇིགས་ཡེར་རེ། གང་ལ་སོང་ནའང་ཕྱོགས་ཐམས་ཅད་མུན་ནག་གི་སྣང་བ་ཅན་ཡིན་གསུངས་པ་རེད། ཁྱད་པར་དུ་ཡ་ང་བའི་གཡང་ས་གསུམ། འདོད་ཆགས་ཞེ་སྡང་གཏི་མུག་གསུམ་ལས་གྱུར་བའི་སྐྱ་ཆད་དེ་བ། ནག་ངམ་མེ་བ། དམར་ཟིང་ངེ་བ་སོགས་འཇིགས་སྐྲག་གི་སྣང་བ་ཤར། འཇིགས་པའི་སྒྲ་བཞི་དང་མ་ངེས་པའི་རྟགས་དྲུག་ཤར་ཡོང་དུས། ཆུ་ཆེན་པོའི་རྦ་ཀློང་དྲག་ཏུ་འཁྲུགས། ཐོག་སེར་བ་གློག་དམར་དང་འབྲུག་སྒྲའི་གནམ་ས་གང་བའི་སྣང་བ། ཁ་ཆར་བུ་ཡུག་འཚུབ། རླུང་དམར་དྲག་པོ་གཡུག་མཚོན་ཆ་སྣ་ཚོགས་ཀྱི་ནང་ནས་མི་ཐར་བའི་སྣང་བ། གཅན་གཟན་གདུག་པ་ཅན་དང་གཤེད་མ་མཚོན་ཆ་ཅན་གྱིས་བདས་ཡོང་བའི་སྣང་བ་ཤར། དེ་དུས་ལས་ཀྱི་བུ་ཆུང་དཀར་ནག་གཉིས་ཀ་ཟེར་བའི་མཉམ་པར་འགྲོགས་པའི་ལྷ་བདུད་གཉིས་ཀས་ལས་ཀྱི་རྡེའུ་དཀར་ནག་གི་རྩིས་གྲངས་བགྲང་། གཤིན་རྗེ་རྒྱལ་པོའི་མདུན་ནས་ལས་ཀྱི་མེ་ལོང་སྲིད་གསུམ་དུས་གཅིག་ལ་ཤར་བ་བསྟན་ཡོང་བའི་སྣང་བ་ཤར་དུས། ང་ཚོས་བར་དོའི་སེམས་ཅན་སྐེ་དེ་བས་ཕྲ་ན་ཡི་དྭགས་དང་ཉམ་དེ་བས་དམའ་ན་བྱོལ་སོང་ཟེར་བ་ཅན་པོ་དེ་དུས་ངོ་མ་ཉམ་ཐག་ཡིན་ནི་རེད། དེ་དབང་མེད་བར་དོའི་སེམས་ཅན་བྲོས་ན་བྲོ་ས་མི་རྙེད། གབ་ན་གབ་ཁུང་མི་ལོན་ནི་རེད། ངོ་ཤེས་ས་གཤིན་རྗེའི་ལས་མཁན་མ་གཏོགས་རིག་རྒྱུ་མེད་པས། སྐྱབས་དང་རེ་ས་མགོན་དང་དཔུང་གཉེན་འབོད་ཡོང་ས་ཞིག་མེད་སའི་ཐོག་ལ་ཐོན་དུས། ད་གསོན་གྲང་ང་ཁམས་ཀྱི་ཚེ་འདིའི་སྡིག་པ་བསགས་པས་མི་ཚད་པའི་ཚེ་རབས་སྔོན་མ་ནས་སྡིག་པ་མ་བྱང་བའི་རྣམ་སྨིན་གྱི་རིགས་ལན་གྲངས་གཞན་ལ་མྱོང་འགྱུར་ཅན་ཅི་འདྲ་ཡོད། དེ་ཐམས་ཅད་དང་ཚང་མས་གཅིག་མནན་དུས། གཤིན་རྗེའི་སྐྱེས་བུ་དམྱལ་བའི་ལས་མཁན་སྟག་གཟིག་དོམ་དྲེད་ལ་སོགས་པའི་མགོ་བརྙན་སྣ་ཚོགས་ཅན་ཏག་ཏག་གིས་རྒྱོབ་སོད་གཉིས་ཀྱི་ཀི་སྒྲ་ཧ་དིར་དང་བཅས་ཏེ། ཚ་གྲང་དམྱལ་བའི་སྡུག་བསྔལ་གང་མྱོང་དགོས་པ་དེའི་ཕྱོགས་ལ་དེད་སོང་དུས་སྐྱབས་རེ་ས་དམ་པའི་ཆོས་ལས་མེད། དེ་དུས་ཤུལ་ན་ཡོད་པའི་མིའི་དགེ་བའི་ར་མདའ་ལྷད་མེད་སྟོབས་ཆེན་ངོ་མ་ཐིག་ཐོག་ལ་ཞོག་ནི་ཞིག་མངགས་ཡོང་ན། ཆུ་བོའི་བཞུར་ཁ་བསྒྱུར་བ་དང་འདྲ་བར་ལས་ངན་པ་བསགས་རུང་དགེ་རྩ་སྟོབས་ཆེན་གྱིས་བསྒྱུར་རྒྱུ་ཡོད་རྒྱུ་རེད། རེད་དེ་རང་དབང་རང་ལག་ལ་ཡོད་པའི་དུས་སུ་རང་ངོ་མས་སྔོན་བསགས་བྱས་པ་ཞིག་མེད་དུས། དེ་དུས་ཤུལ་ན་ཡོད་པའི་མིས་དགེ་བའི་ར་མདའ་ཞིག་མངགས་ཡོང་བར་རེ་དུས་ཅུང་ཟད་དཀའ་བ་རེད། ཤི་གསོན་བསམ་པ་ཁ་ཁ་བདུན་རེའི་རྒྱབ་ནས་གསོན་པོས་རང་གི་འདུག་ཆས་ཀྱི་ཤུགས་ཆེ་རུ་སོང་དུས་རྗེས་ནས་དགེ་རྩ་ཕན་ཐོགས་ཅན་ཞིག་ཡོང་རྒྱུའི་རེ་སྒུག་བྱས་ཀྱང་དཀའ་བ་རེད། ཕོ་རང་ལ་མེད་པའི་རྒྱབ་སོ་ནས་གྲོགས་རིལ་མ་མགོ་ཡིས་སྐྱོབ་ཡོང་བསམ་རྒྱུ་ཡོད་མ་རེད། ཕོ་ཁྲམ་པས་ཁྲམ་པ་བསླུས་དུས་བགད་ཀྱིན་བགད་ཀྱིན། མོ་ཁྲམ་པས་ཁྲམ་པ་བསླུས་དུས་ངུ་བཞིན་ངུ་བཞིན་ཟེར་བ་ལྟར་བསླུ་བ་རེད་བདེན་མཐའ་དེ་འདྲ་རྟག་ནི་མ་རེད། ཕོ་རང་ལ་ཨེ་ཡོད་དེ་དུས་རེད། དེ་དུས་མེད་དུས་མེད་པ་རེད། གསོན་ཚེ་འདིའི་བདེ་སྐྱིད་མངོན་མཐོའི་འབྱོར་བ་ཆེ་ཚད་ཆུང་མིན་ཞིག་ཡོད་ཁྱིམ་བཟའ་ཚང་ཁ་རུག་འཛོམས། འདི་ལྟ་བུའི་ཚེ་དམ་པའི་ཆོས་ལ་འབད་པ་བྱས་ནས་རང་མགོ་རང་གིས་ཐོན་པ་ཞིག་གྱིས་མ་གཏོགས། འཕོ་འདེབས་བླ་མ་གདན་འདྲེན་ཞུས་རུང་ང་འདྲ་བའི་བླ་མ་མྱི་མགོ་མ་དགོས་རང་མགོ་ཐོན་པའི་གདེངས་ཚད་དེ་འདྲ་མེད་པ་ཅན་པོས་སྙིང་རྗེའི་དབང་གིས་གསོལ་འདེབས་སྨོན་ལམ་རེ་དང་གཟུངས་སྔགས་ཟབ་མོ་རེ་སྒྲོག་རྒྱུ། འཕོ་བའི་དམིགས་རིམ་རེ་འདོན་ཁུལ་ལོས་བྱེད་དང་མོད། དེ་ཡང་མཐོང་ལམ་གྱི་བདེན་པ་མ་ཐོབ་ན་མི་གཞན་ལ་འཕོ་བ་འདེབས་སྔ་མ་བྱེད་གསུངས་ཚུལ་ལ་བལྟས་ཡོང་ན། ཕན་ཐོགས་ཆེན་པོ་ཞིག་ཡོད་དཀའ་བ་ཨེ་ཡིན་ཅི་ཤེས་བསམ། ཕན་ཐོགས་བྱུང་ཨེ་ཡོད་མི་ཡོད་དེ་མ་ཐག་ཚུར་སླེབས་ཏེ་བལྟ་ཆོག་པ་འདྲ་ཞིག་མེད་ན་མི་ཤེས་པ། དེ་བས་ན་སང་ཉིན་ཙམ་ཡང་མི་འཆིའི་གདེངས་ནི་མེད། རྟག་ཏུ་སྡོད་གྲབས་བྱེད་པ་བདུད་ཀྱིས་བསླུས། །གཤིན་རྗེའི་ཕོ་ཉ་བྱུང་ན་སུ་ལ་རེ། །ཐུགས་རྗེས་གཟིགས་ཤིག་རྔ་གཡབ་གླིང་པ་མཁྱེན། །ཞེས་གསུངས་པ་དེ་ངེད་ཚོའི་རྒྱུན་འདོན་རེད། ཡིན་ཡང་སང་ཉིན་ད་མི་ཤི། མི་ཤི་སེམས་ཐག་ཡིན། དེ་རིང་ན་མེད་པས་སང་ཉིན་ཅིའི་ཕྱིར་ཤི་ཡོད་བསམ་ཁུལ་བྱེད་མོད། རེད་ད། སང་ཉིན་ལ་ཟད་རྒྱུ་ཡོད་པ་མ་རེད། སང་ཉིན་གྱི་རྗེས་ལ་སང་ཉིན་ཡོང་རྒྱུ་མང་དུས། སང་ཉིན་ཐག་ཉེ་རེད་བསམ་ས་ནས། སང་ཉིན་ཞིག་ཚེས་ལོངས་མ་བྱུང་གོང་ཤི་བ་སྔོན་ལ་ཐོན་རྒྱུ་ངེས་པ་ཅན་ཡིན། དེའི་སང་ཉིན་དེ་ནམ་གི་སང་ཉིན་ཡིན་སུས་ཤེས། དེ་ཤེས་རུང་མ་ཤེས་རུང་འགྲོ་དགོས་པ་ཐོད་པའི་ཐིག་ཚད་ཡིན་དུས། འགྲོ་ཆས་སྔོན་ལ་བྱས་ནས་གྲ་སྒྲིག་ཚར་ན་དགའ་དགའ་རེད། དུས་ཚོད་ལྷག་མོ་ཡོད་ན་སེམས་བདེ་བའི་ཐོག་ནས། དགའ་དགའ་སྐྱིད་སྐྱིད་བྱས་ནས་བདེ་བདེ་འདུག་ཆོག མི་དགོས་ཉིན་པར་ཚགས་ཚུད་བྱས་ན་དགོས་པའི་ཉིན་པར་ཤར་སེ་ཡོད་ཟེར་བ་ལྟར་རེད། དཀའ་ལས་སྔོན་ལ་བརྒྱབ་ནས་སྐྱིད་པོ་གཞུག་ནས་མྱོང་བ་མྱི་འདང་རྒྱག་ཅན་གྱི་ལས་ལུགས་ཡིན་རེད། དེ་འཇིག་རྟེན་གྱི་བྱ་བའི་ཐད་ནས་ཚོད་ཐོག་ལ་འཇོག་ཐུབ་དགོས་མ་གཏོགས། མི་ཚེ་རིང་བའི་དབང་དུ་ཚད་ཤིང་བཞག་ཆེ་ནས་འདུག་ཆས་ཏག་ཏག་བྱས་པའི་ཚེ་འདུག་ལོངས་མ་སྟེར་བ་ཕལ་ཆེ་བ་རེད། ཁྱིམ་བཟའ་ཚང་གང་བོའི་སུ་སྔོན་ལ་སོང་། སུ་རྗེས་ལ་ལྷག་ནའང་། རང་རང་རང་མགོ་ཐོན་པའི་ཆོས་རེ་ཡོད་བསམ་པ་ཞིག དེས་མི་ཚད་གཉེན་ཉེ་རིང་ངོ་ཤེས་བཟང་ས་འདི་དག་ཀྱང་སྡུག་པོ་འོང་རྒྱུ་མ་རེད་བསམ་པ་ཞིག་བྱུང་ན། ངེད་ཚོའི་འཇིག་རྟེན་མིའི་སྐྱེས་བུ་ཆུང་ངུའི་བློ་ཅན་གཞན་ཕན་གྱི་བསམ་བློ་རྒྱ་ཆེན་མེད་པ་ཞིག་གིས་བློ་བདེ་སེམས་བདེ་ཡིན་ཆགས་རེད་མོད། དེས་ན་ཆོས་སྒྲུབ་པའང་སང་ཉིན་གྱི་སྔོན་ལ་སྒྲུབ་རྒྱུ་དེ་མགྱོགས་དགོས་པ་རེད། དུས་ད་ལྟ་སྒྲུབ་དགོས་པ་རེད། ཆོས་ད་ལྟར་བསྒྲུབ་ན་སང་ཉིན་གྱི་སྔོན་ལ་ཆོས་འགྲུབ་ཐུབ་སོང་བ་རེད། སང་ཉིན་གྱི་སྔོན་གང་རེད་ཅེ་ན། དེ་རིང་རེད། དེ་ཡང་དེ་རིང་ལ་ཡང་སྔ་ཕྱི་དྲོ་ཡོད་པ་རེད། སྔ་དྲོའི་ལས་ཀ་ཕྱི་དྲོར་མ་འཇོག་པར་ད་ལྟ་བསྡད་ཡོད་ན་ཡོད་པའི་ཐོག ལང་ཡོད་ན་ཡོད་པའི་ཐོག་བྱ་བ་གཞན་བཏང་ནས་ཆོས་སྒྲུབ་དགོས་པ་རེད། དེས་ན་ཁྱིམ་ན་གནས་པའི་ཁྱིམ་པ་ཕོ་མོ་ཚོས་ཉིན་རེ་བཞིན་དུ་ཆགས་མེད་དུ་ལས་དགོས་རྒྱུའི་ལས་ཀ་བསྐྱུར་བའམ་ཁྱིམ་བསྐྱུར་ནས་ག་ཤེད་ཞིག་ལ་བུད་འགྲོ་དགོས་ནི་མ་རེད། དེ་ཡང་གནའ་སྔོན་མ་སངས་རྒྱས་བཅོམ་ལྡན་འདས་འཇིག་རྟེན་གྱི་ཁམས་ན་བཞུགས་ཡོད་དུས་བཅོམ་ལྡན་འདས་ལ་རྒྱལ་པོ་ཞིག་གིས་ཞུས་ནས། ཁོ་འདྲ་བོའི་རྒྱལ་སྲིད་བསྐྱངས་ནས་ཁོམ་པ་མེད་པ་ཞིག་གིས་ཆོས་འགྲུབ་ས་མ་རེད། མ་གཞི་བཤད་ན་འདོད་ཡོན་སྤངས་ནས་ཆོས་སྒྲུབ་ཐུབ་ས་མེད་ཀི་ཞུས་དུས། བཅོམ་ལྡན་འདས་གྱིས་དེ་མི་སྐྱོན་གསུངས་པ་རེད། ཁྱོད་རྒྱལ་པོ་དོན་མང་བ་བྱ་བ་མང་བ་ཡིན་ན་ཡང་བྱང་ཆུབ་མཆོག་ཏུ་སེམས་བསྐྱེད་ནས་གཞན་ལ་ཕན་པ་སྒྲུབས་དང་དེ་ཆོས་ཡིན་གསུངས་པ་བཞིན་དུ་ཁྱིམ་པས་ལས་ཀ་དང་མཉམ་དུ་ཆོས་སྒྲུབ་ཆོག་པ་རེད་ལ། ཆོས་སྒྲུབ་དགོས་པའང་རེད། ཆོས་སྒྲུབ་དུས་ཚེ་འདིའི་བདེ་སྐྱིད་དང་ཁ་བྲལ་དགོས་པ་མ་རེད། དཀའ་སྡུག་རྐྱང་རྐྱང་མྱོང་དུས་ཆོས་རེད་ཟེར་བ་དེ་ནི་ཕྱི་རོལ་མི་སྟེགས་པའི་ལུགས་རེད། ལུས་ཟེར་བ་དེ་མདོ་ལྟར་ན་ཐར་བར་བགྲོད་པའི་གྲུ་གཟེངས་ལྟ་བུ་དང་། སྔགས་ལྟར་ན་གདན་གསུམ་ལྷ་ཡི་དཀྱིལ་འཁོར་ཡིན་གསུངས་པ་རེད། འདི་ལ་དཀའ་སྡུག་གཏད་ནས་གོ་ཆོད་པ་མ་རེད། དེ་ན་རྒྱུ་ཕུད་དགོས་པ་ཡིན་ནམ་ཞེ་ན། རྒྱུ་ནོར་རྫས་བསག་དང་སྲུང་དང་བརླག་པའི་སྡུག་བསྔལ་ཅན་རྔུལ་ཆུའི་ཐིགས་པ་རེ་དང་བརྗེས་ནས་དཀའ་སྡུག་བརྒྱབ་ནས་བསགས་པ་དེ། ལས་སླ་མོ་ཞིག་གིས་བློས་ཐོངས་པ་མ་རེད་མོད། ཐོངས་རུང་རྒྱུ་ནོར་ཟང་ཟིང་གི་དགེ་བ་སྒྲུབ་པ་ནི་དགེ་བ་སྒྲུབ་ལུགས་ཀྱི་ནང་ནས་ཐ་མ་འདྲ་བོ་རེད། དེས་ན་དགེ་བ་སྒྲུབ་ལུགས་བཟང་ཤོས་གང་རེད་ཅེ་ན། ཁར་སང་བཤད་པ་ལྟར་སེམས་ཀྱིས་བསྒྲུབ་རྒྱུ་དེ་ཡིན། དེའི་འཕྲོ་ནས་ལུས་ངག་གིས་བསྒྲུབ་པ་དང་། དེ་ནས་ཟང་ཟིང་རྒྱུ་ནོར་གྱིས་བསྒྲུབ་པ་ཡིན་པས་ན་སེམས་ཀྱི་དགེ་བ་བསྒྲུབ་པ་ལ་སེམས་སྟོབས་ཀྱི་དབང་གིས་བློ་རྒྱ་ཆེ་ཆུང་གི་སྟོབས་ཀྱིས་བློ་ཆུང་དང་འབྲིང་དང་ཆེན་པོ་གསུམ་ལ་ལྟོས་ནས། སྐྱེས་བུ་ཆུང་འབྲིང་ཆེ་གསུམ་གྱི་རྣམ་བཞག་མཛད་ནི་ཡིན་ན། དེ་གསུམ་གྱི་བསམ་བློ་གཏོང་ལུགས་ཀྱི་ཀུན་སློང་མི་འདྲ་བ་གསུམ་གྱིས་རྒྱུ་དགེ་བ་སྒྲུབ་ལུགས་མི་འདྲ་བ་དང་འབྲས་བུ་བདེ་བ་འགྲུབ་ལུགས་མི་འདྲ་ཞེས་ཁ་སང་སྐྱབས་འགྲོའི་སྐབས་སུ་བཤད་པ་ལྟར་ཡིན། དེས་ན་ཇི་ལྟར་དགོས་ཞེ་ན། སྒོ་དད་པས་ཕྱེ་ནས་ལམ་ལོག་པ་ལས་ལྡོག་པའི་སྐྱབས་སུ་འགྲོ་བས་གཞི་བཟུང་བ་ཡིན་ན། ལམ་དམན་པ་ལས་ལྡོག་པའི་ཕྱོགས་བྱང་ཆུབ་མཆོག་ཏུ་སེམས་བསྐྱེད་དགོས། དེ་ཡང་སེམས་ཅན་ཐམས་ཅད་ཀྱི་དོན་དུ་སྐྱབས་སུ་སོང་། སྐྱབས་གསུམ་སྔོན་དུ་འགྲོ་བའི་དགེ་བསྙེན་གྱི་སྡོམ་པ་གང་ཡང་རུང་བ་བླངས་པ་ཡིན་ན་ཐེག་ཆེན་སོ་ཐར་གྱི་སྡོམ་པ་ཡོད་སོང་བ་རེད། དེའི་སྟེང་ལ་བྱང་ཆུབ་མཆོག་ཏུ་སེམས་བསྐྱེད་དགོས་པ་ཡིན་ན། བྱང་ཆུབ་མཆོག་ཏུ་སེམས་བསྐྱེད་བཞག་ན་སངས་རྒྱས་ཀྱི་རིགས་སུ་ངེས་པའམ་སངས་རྒྱས་རྒྱུ་ཅན་པོའི་གྲལ་ལ་ཐོན་སོང་ནི་རེད། སངས་རྒྱས་ཀྱི་རིགས་སུ་ངེས་པས་སངས་རྒྱས་ཀྱི་མཛད་པ་ཐམས་ཅད་བསྡུས་བཞག་ན་སེམས་ཅན་གྱི་གཞན་དོན་ཡིན། དེ་ལས་གཞན་དུ་སངས་རྒྱས་ཀྱི་མཛད་པ་ཞེས་ལོགས་སུ་གྱུར་བ་ཡོད་པ་མ་ཡིན་པས་གཞན་དོན་གྱི་ཆེད་དུ་སངས་རྒྱས་པ་ཡིན། དེ་བས་ང་རང་ཚོས་ཀྱང་བྱང་ཆུབ་མཆོག་ཏུ་སེམས་བསྐྱེད་པས་སངས་རྒྱས་ཀྱི་རིགས་སུ་གཏོགས་སོང་དུས་དེའི་རིགས་ཀྱི་བྱ་བ་གང་ཡིན་དེ་སྒྲུབ་དགོས་པ་རེད། རིགས་ཀྱི་བྱ་བ་སངས་རྒྱས་ཀྱིས་ཅི་མཛད་ཡོད་པ་དེར་བསླབ་ནས། རྒྱལ་བའི་སྲས་ཀྱི་མིང་ཞིག་ཐོགས་ཡོད་པ་ལྟར་དུ་རྒྱལ་བའི་སྲས་ཀྱི་སྤྱོད་པ་རྫོགས་སྨིན་སྦྱངས་པ་རྒྱ་མཚོ་མཐར་ཕྱིན་པར་འབད་བརྩོན་བྱེད་དགོས་པ་རེད། གོང་དུ་ཁྱིམ་བཟའ་ཚང་གང་བོ་དགའ་ཉེ་ཤག་གསུམ་དང་བཅས་པ་གནས་སྐབས་ངན་སོང་ལ་མི་འགྲོ་བའི་ཞེ་ཚོད་ཅན་གྱི་དགེ་བའི་གྲོ་ཆས་རེ་འདང་ས་ཡོད་ཟེར་ནས་བློ་བདེ་བདེ་བྱེད་མོད། ད་བལྟས་ཡོང་ན་གླེན་འདང་བྱིས་པའི་བརྡོལ་གཏམ་ཞིག་རེད། ཚེ་འདིའི་ཕ་མ་དང་བུ་རྒྱུད་གཅེས་པ་ནང་བཞིན་ཚེ་སྔོན་མའི་ཕ་མ་བུ་རྒྱུད་དུ་གྱུར་བ་རྣམས་ཀྱང་གཅེས་དགོས་། འདིའི་ནང་ན་ཕ་མ་གནའ་ནས་འགྲོ་ཚར་མཁན་མང་རྒྱུ་རེད། དེའི་ཕ་མ་བླ་བདེ་དང་བླ་བདེ་མ་དེ་དག་གིས་མི་ལུས་རེ་བླངས་ཡོད་པའི་དབང་དུ་བྱས་ན། དེ་དག་གཞན་གྱི་བུ་རྒྱུད་དང་། ཡང་མིན་ན་གཞན་གྱི་ཕ་མ་རེད་ལོས་ཡོད། འདས་ཟིན་པའི་ཨ་མ་མངོན་སུམ་བཞིན་ཚུར་ལ་ཐོན་ཡོང་རྒྱུ་ཞིག་ཡོད་ནའང་ཤི་ནས་ལུས་རྟེན་བརྗེ་ཚར་བ་རེད། དེ་དུས་ཀྱི་དེ་མ་རེད་མོད། དེ་དུས་ཀྱི་ལུས་དེ་བྱ་ཁྱིས་ཟན་དུ་གྱུར་ནས་སྔར་ནས་སོང་ཚར་མོད། སྔོན་ལ་ཡོད་པ་འདིས་ཁྱེད་ཀྱི་སྔོན་གྱི་ཨ་མའི་རྣམ་ཤེས་ཀྱི་རྒྱུན་ཡིན་པས་ང་ཁྱོད་ཀྱི་ཨ་མ་ཡིན་ཞེས་བཤད་ཡོང་ནའང་། ད་ངོ་མི་ཤེས་པ་འདྲ་ཟིག་འགྱུར་ཡོད་པ་བསྟན་ཡོང་དུས། ཨ་མ་རང་གིས་ང་འདི་ཡིན་ཞེས་བཤད་ཡོང་དུས་མིན་རྒྱུའི་ཐེ་ཚོམ་ཞིག་ཞེ་ལ་ཤར་མི་སྲིད་པས་རང་གི་ཚེ་འདིའི་ལུས་ཤ་ཁྲག་མཆེད་སའི་མ་རྒན་དྲིན་ཆེན་མ་མིན་སྣང་ཤར་ས་མེད་མོད། ད་རང་གཞན་ཚང་མས་སྐྱེ་བ་ལུས་རྟེན་མང་པོ་བརྗེས་ཡོད་པས། སྔར་སྐྱེས་ཚད་ལ་དེའི་གྲངས་ཀྱི་ཕ་མ་ཡོད་པ་རེད། ཕ་མ་ས་ཆེན་པོའི་རྡུལ་གྲངས་ཀྱི་མི་ཚད་པས་སེམས་ཅན་རེ་རེས་ཕ་མ་བྱས་པ་བརྩི་ཚོད་མེད་པ་དེ་མཐོང་ཆོས་མངོན་གྱུར་དང་དེ་བཞིན་རིག་པས་བརྟགས་ཤིང་དཔྱད་ན་གྲུབ་པ་ཡིན། དེ་བས་ན་ན་ནིང་གི་ཨ་མ་དང་ད་ལོའི་ཨ་མ་ལྟ་བུའི་དུས་སྔ་ཕྱི། ལ་ཕར་རྒྱབ་ཀྱི་ཨ་མ་དང་ཚུར་ནང་ན་ཡོདཔའི་ཨ་མ་གཉིས་ཀ་ལྟ་བུའི་ཐག་རིང་ཐུང་ལ་ཁྱད་པར་མེད། དེ་ལྟ་བུའི་ཁྱད་པར་མེད་པ་བཞིན་གོང་གི་ཕྱོགས་དང་ཁྱེད་ཕྱོགས་ཅན་པོའི་བསམ་བློ་གཏོང་ལུགས་དེ། བློ་ཆུང་ན་བློ་ཆུང་བྱིས་པ་བསམ་མེད་ཀྱི་བསམ་བློ་རེད་ཡོད་པ་དེ་ལྟར་ཞིབ་མོས་བལྟས་ན་ཤེས་ཐུབ། མཐའ་ཡས་སེམས་ཅན་དེ་ཁྱིམ་གཅིག་རེད་དེ་ཚང་མ་ང་རང་གི་ཨ་མ་ཡིན་པ་ཤེས་སོང་དུས་ད་ནི་དེ་དག་བདེ་ལ་བཀོད་ཐབས་ཞིག་འགྲིག་ན། ང་རང་ལ་ཅི་བྱུང་ནའང་བྱུང་སྙམ་པའི་འདང་རྒྱག་རང་ཤུགས་ཀྱིས་ཡོད་ཡོང་བ་རེད། དེའི་ནང་ན་དགྲ་ཡང་ཡོད་པ་རེད་ཅེ་ན། རེད་མོད། སྔོན་གྱི་དགྲ་ད་ལྟའི་ཁྱེད་ཀྱི་བུ་ཚ་རྒྱུད་འདི་ཚོ་ཡིན་པ་དང་། ད་ལྟའི་བུ་ཚ་རྒྱུད་འདི་ཚོ་སྐྱེ་བ་རྗེས་མའི་དགྲར་འགྱུར་རྒྱུ་མང་བ་ནི། འཕགས་པ་ཀ་ཏ་ཡ་ནས། ཕ་ཤ་ཟ་ཞིང་མ་ལ་རྡེག །སྡང་པའི་དགྲ་བོ་པང་དུ་ལེན། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་འཆོར། །ཞེས་གསུངས་པ་བཞིན་ཡིན་པས། དགྲ་ངོ་མ་གཏན་གྱི་དགྲར་གྱུར་སོང་བ་ཞིག་ཡོད་པ་མ་རེད། ད་ལྟའི་དགྲ་འདི་ཡང་སྔར་བྱས་ཀྱི་གནོད་ལན་ཚུར་ལ་འཁོར་བ་ཡིན་པས་ན་རྒྱུ་མེད་ཀྱི་འབྲས་བུ་ཞིག་ག་ལ་ཡིན། འཇིག་རྟེན་གྱི་ཁམས་ན་ཕར་ལ་ཕན་བཏགས་ན་ཚུར་ལ་དགྲ་བྱེད་པ་མང་བ་འདི་ཡང་སྔར་གྱི་གནོད་ལན་འཁོར་བ་མིན་ན། ལས་མ་བསགས་པའི་རྣམ་སྨིན་ཞིག་གང་ནས་ཐོན་ཡོང་། དེས་ན་དགྲ་གཉེན་བར་མའི་འགྲོ་བ་ཐམས་ཅད་པོ་གཅིག་ན་མ་དང་གཉིས་ན་སྙིང་རྗེའི་ཡུལ་ཡིན་པས་ན་བྱང་ཆུབ་མཆོག་ཏུ་སེམས་བསྐྱེད་དགོས། དེ་ཡིན་ན་ང་རང་ཚོའི་དེ་རིང་བཤད་རྒྱུ་ཡང་སེམས་བསྐྱེད་ལ་ཐུག་ཡོད་པ་རེད། ད་ཁ་སང་བཤད་ལོངས་མ་བྱུང་བ་རེད། དེ་ཡིན་དུས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བྱང་ཆུབ་དམ་པ་བསྒྲུབ་པའི་ཆེད་དུ་ཆོས་འཆད་ཉན་ལ་ཞུགས་པ་ཡིན་བསམས།།

ཨོཾ། ལམ་དམན་པ་ལས་ལྡོག་པའི་ཆེད་དུ་སེམས་བསྐྱེད་པ།

ད་དེ་རིང་གང་འཆད་བྱ་ནི་ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས་དེ་ཟེར་བ་ཡིན་ན། དེའི་གཞུང་དོན་གྱི་སྐྱབས་འགྲོ་ཡན་ཆད་སོང་ནས། ད་ནི་སེམས་ཅན་དོན་དུ་བྱང་ཆུབ་སེམས་མཆོག་བསྐྱེད། །ཞེས་པ་ལ་ཐུག་ཡོད་པ་རེད། དེ་ཡང་གོང་ནས་བཤད་མ་ཐག་པ་ལྟར་དུ་སེམས་ཅན་ཐམས་ཅད་ཟེར་ན་མཐའ་ཀླས་པ་ཞིག་སྟེ་ནམ་མཁས་གར་ཁྱབ་ལ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལ་ལས་དང་ཉོན་མོངས་ཀྱིས་ཁྱབ། ལས་ཉོན་གྱིས་གར་ཁྱབ་ལ་སྡུག་བསྔལ་རྣམ་གསུམ་གྱིས་མ་ཁྱབ་པ་མེད་པ་ཡིན་ན། ཕ་མར་གྱུར་བའི་སྙིང་རྗེའི་ཡུལ་གྱུར་གྱི་སེམས་ཅན་དེ་དག་ཐམས་ཅད་སྡུག་བསྔལ་དེ་དག་དང་བྲལ་བའི་མཐར་ཐུག་གཏན་གྱི་བདེ་བ་དམ་པར་འགོད་པའི་དོན་དུ་བྱང་ཆུབ་མཆོག་ཏུ་སེམས་བསྐྱེད་ཅེས་པ་ཡིན། བྱང་ཆུབ་ཟེར་བའི་ངེས་ཚིག་འགྲེལ་ན་སྒྲིབ་གཉིས་བྱང་ཞིང་མཁྱེན་པའི་ཡེ་ཤེས་དང་ཡོན་ཏན་ཁུང་དུ་ཆུད་པའི་རྣམ་མཁྱེན་མངའ་བ་ཞིག་སྟེ་བྱང་ཆུབ་ཆེན་པོ་སངས་རྒྱས་ཀྱི་གོ་འཕང་ཐོབ་པ་དེ་རེད། གཞན་དོན་དུ་དེ་ཉིད་མངོན་དུ་བྱ་ཕྱིར། འགྲོ་མང་གི་མཐའ་དང་བསྐལ་མང་གི་ཡུན་སོགས་ལ་མི་སྐྲག་པར་སེམས་དཔའ་བའི་སྙིང་སྟོབས་ཀྱིས་བྱང་ཆུབ་མཆོག་ལ་སྤྱོད་པ་ནི་བྱང་ཆུབ་སེམས་དཔའ་ཟེར་བ་རེད། དེ་ལྟ་བུའི་བྱང་ཆུབ་སེམས་དཔར་ཡོད་རྒྱུའི་བྱང་ཆུབ་ཀྱི་སེམས་དེ་ཉིད་བསྐྱེད་པར་བྱ་ཟེར་བ་ཡིན། ཐུན་མོང་ཐེག་པ་དང་མཐུན་པའི་བཤད་ཚུལ་གྱི་སྟེང་ནས་བཤད་ཡོང་ན། བདག་ཅག་གི་སྟོན་པས་བསྐལ་བ་གྲངས་མེད་གསུམ་གྱི་སྔོན་རོལ་ནས་སངས་རྒྱས་ཤཱཀྱ་ཐུབ་པ་ཆེན་པོ་ལ་སོགས་པའི་དྲུང་ནས་བྱང་ཆུབ་མཆོག་ཏུ་ཐུགས་བསྐྱེད། གྲངས་མེད་གསུམ་གྱི་ནང་ནས་གྲངས་མེད་དང་པོ་ལ་ཚོགས་སྦྱོར། གཉིས་པ་ལ་མ་དག་ས་བདུན། གྲངས་མེད་གསུམ་པ་དག་ས་གསུམ་སྟེ་སློབ་པའི་ལམ་གྱིས་བསྡུས་པའི་ཚོགས་གཉིས་རྫོགས་པའི་མཐར། མི་སློབ་ལམ་མངོན་དུ་མཛད་ནས་སངས་རྒྱས་པ་ལྟ་བུ་རེད། དེ་ཡིན་ན་བྱང་ཆུབ་སེམས་ཀྱི་མཚན་ཉིད་དེ་ཅི་ལྟ་བུ་ཞིག་ཡིན་ཞེ་ན། གཞན་དོན་དུ་རྫོགས་པའི་བྱང་ཆུབ་ཐོབ་འདོད་ཀྱི་སྨོན་འཇུག་གི་བསྡུས་པ་བྱང་ཆུབ་སེམས་ཀྱི་མཚན་ཉིད་རེད།།

ཀ སྨོན་པ་སེམས་བསྐྱེད།

༡ སེམས་བསྐྱེད་ཀྱི་ངོ་བོ།

དེ་ཡིན་ན་སེམས་བསྐྱེད་འདི་ལ་ངོ་བོ་དང་དབྱེ་བ་ས་མཚམས་བཅས་ཀྱིས་གསུངས་ཡོད། སེམས་བསྐྱེད་ཀྱི་ངོ་བོ་ཇི་ལྟ་བུ་ཡིན་ཞེ་ན། དོན་གཉིས་ལྡན་པའམ་ཡང་ན་ཟུར་གཉིས་ལྡན་པའི་སེམས་བསྐྱེད་གསུངས་ནའང་ཆོག་རེད། དེ་གཉིས་ངེས་པར་དུ་ཚོགས་དགོས་ལ་དེ་གཉིས་མ་འཛོམས་དུས་སེམས་བསྐྱེད་ཡིན་ནི་མ་རེད། དེའི་ནང་གི་དོན་དང་པོའམ་ཟུར་དང་པོ་དེ་གང་རེད་ཟེར་ན། སྙིང་རྗེས་སེམས་ཅན་ལ་དམིགས་པ། གཉིས་པ་དེ་ཤེས་རབ་ཀྱིས་རྫོགས་བྱང་ལ་དམིགས་པ་རེད། དེ་ཡིན་ན་རྩ་བ་སྙིང་རྗེ་དང་ཤེས་རབ་གཉིས་ཀྱི་སྟེང་ནས་བཤད་ཀྱིན་ཡོད། སྙིང་རྗེས་སེམས་ཅན་ལ་ཇི་ལྟར་དམིགས་དགོས་པ་རེད་ཅེ་ན། སེམས་ཅན་ཐམས་ཅད་མ་ཡིན་པ། ད་ལྟའི་མ་དང་ཁྱད་མེད་པར་མ་སེམས་ཅན་ཐམས་ཅད་དྲིན་ཆེན་རེད། དྲིན་ཤེས་པས་མི་ཚད་དྲིན་ལན་གསབ་འདོད་ཡོད་སོང་དུས། ད་རེས་སྟབས་ཡག་པོ་ཞིག་ཁེལ་ནས་ངས་ཕན་བཏགས་རྒྱུ་དང་ཐོགས་རྒྱུའི་ལམ་སྣེ་ཞིག་རྙེད་སོང་རེད། དེས་ན་འདིའི་ཐེག་ཆེན་མདོ་དང་སྔགས་ཀྱི་ལམ་འདི་ནས་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་བ་ཞིག་བྱེད་དགོས་པས། དེ་ཡང་ཐབ་ནང་གི་མྱེ་མ་བསད་ན་ཐབ་སྟེང་གི་དུ་བ་ཆད་ཐབས་མེད་པ་བཞིན་འབྲས་བུ་སྡུག་བསྔལ་དེ་རྒྱུ་མི་དགེ་བ་དང་བྲལ་བ་ཞིག་བྱ་དགོས་འདུག་བསམ་ནས་དེའི་བསམ་པ་སྐྱེས་དགོས་ནི་རེད། སྙིང་རྗེས་སྡུག་བསྔལ་རྒྱུ་འབྲས་གཉིས་དང་བྲལ་བར་བྱ་བ་ལ་དམིགས་པ་དེའི་སྟེང་ལ་ཤེས་རབ་ཀྱིས་རྫོགས་བྱང་ལ་དམིགས་པ། སེམས་ཅན་ཐམས་ཅད་པོ་མཐར་ཐུག་གཏན་གྱི་བདེ་བ་དམ་པ་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱའོ་སྙམ་པ་དེ་རེད། བྱམས་སྙིང་རྗེ་ཙམ་ཞིག་སྐྱེས་པ་དང་བྱང་ཆུབ་ཀྱི་སེམས་གཉིས་ཁ་ཁ་རེད། མདོར་ན་ཐེག་པ་ཆེ་ཆུང་ཤེས་རབ་དང་སྙིང་རྗེ་ཡི་ཁྱད་པར་ཕྱེས་པ་ཡིན། ཐེག་པ་ཆུང་ངུའི་ཤེས་རབ་ཆུང་བ་ཡིན་པས་བདག་མེད་གཉིས་ཀ་རྟོགས་མི་ཐུབ། སྙིང་རྗེ་ཆུང་བས་གཞན་ཕན་རླབས་ཆེན་སྤྱོད་པར་མི་ནུས། ཐེག་པ་ཆེན་པོའི་གང་ཟག་ཤེས་རབ་ཆེ་བས་ན་བདག་མེད་གཉིས་རྟོགས་ནུས་པ་དང་། སྙིང་རྗེ་ཆེ་བས་ཞུམ་པ་མེད་པར་གཞན་དོན་འབའ་ཞིག་སྤྱོད་ནུས་པ་རེད། སེམས་བསྐྱེད་ཀྱི་ངོ་བོ་དེ་འདྲ་ཞིག་རེད།།

༢ སེམས་བསྐྱེད་ཀྱི་དབྱེ་བ།

སེམས་བསྐྱེད་ཀྱི་དབྱེ་བའི་སྟེང་ནས་བཤད་ན་དབྱེ་སྒོ་མང་ཡང་། གཙོ་བོའི་ཆ་ནས་བློ་སྟོབས་ཀྱི་དབྱེ་བ། ས་མཚམས་ཀྱི་དབྱེ་བ། ངོ་བོའི་སྒོ་ནས་དབྱེ་བ་དང་གསུམ་ལས།

དང་པོ་བློ་སྟོབས་ཀྱི་དབྱེ་ན། རྒྱལ་པོ་ལྟ་བུའི་སེམས་བསྐྱེད་དང་གྲུ་བ་ལྟ་བུའི་སེམས་བསྐྱེད། རྫི་བོ་ལྟ་བུའི་སེམས་བསྐྱེད་གསུམ། སེམས་བསྐྱེད་ཀྱི་དབྱེ་བ་འདི་དག་སེམས་བསྐྱེད་ཀྱི་ཟུར་དང་པོ་གོང་ནས་བཤད་མ་ཐག་པའི་སྙིང་རྗེས་སེམས་ཅན་ལ་དམིགས་པའི་ཐད་ནས་ཕྱེ་ཡོང་རྒྱུ་ཞིག་ཡོད་པ་མིན་ཏེ། ཟུར་ཕྱི་མ་ཤེས་རབ་ཀྱིས་རྫོགས་བྱང་ལ་དམིགས་པའི་ཐད་ནས་ཁྱད་པར་འཇོག།

༡༽ རྒྱལ་པོ་ལྟ་བུའི་སེམས་བསྐྱེད།

ད་རྒྱལ་པོ་ལྟ་བུའི་སེམས་བསྐྱེད་ཅི་འདྲ་ཞིག་ཡིན་ཞེ་ན། དང་པོ་སངས་རྒྱས་ཀྱི་གོ་འཕང་རང་གིས་བསྒྲུབས་ནས་དེ་ནས་སེམས་ཅན་ཐམས་ཅད་ཀྱང་བདེ་བ་ལ་འགོད་རྒྱུ། དཔེར་ན། རྒྱལ་པོ་རང་གིས་རྒྱལ་སྲིད་ཟིན། དེ་ནས་འབངས་མི་སེར་བསྐྱངས་པ་ལྟ་བུ་རེད། དེ་ལ་ཀུན་བཟང་ཞལ་ལུང་ནང་ན་འདོད་ཆེན་པོའི་སེམས་བསྐྱེད་གསུངས་ཡོད།།

༢༽ གྲུ་པ་ལྟ་བུའི་སེམས་བསྐྱེད།

དེ་ནས་ང་སྔོན་ལ་མི་འགྲོ་སེམས་ཅན་རྗེས་ལ་མི་འཇོག་ཐམས་ཅད་མཉམ་གཅིག་ཏུ་སངས་རྒྱས་ཐུབ་པ་ཞིག་བྱེད་སྙམ་པ་ནི་གྲུ་བ་ལྟ་བུའི་སེམས་བསྐྱེད་རེད། མཉན་པ་གྲུ་བ་གཉིས་ཀ་དོན་དག་གཅིག་ཡིན། དེ་ལ་ཡེ་ཤེས་དམ་པའི་སེམས་བསྐྱེད་གསུངས་ཡོད་པ་རེད།།

༣༽ རྫི་བོ་ལྟ་བུའི་སེམས་བསྐྱེད།

གསུམ་པ་རྫི་བོ་ལྟ་བུའི་སེམས་བསྐྱེད་ནི་སེམས་བསྐྱེད་ནང་གི་མཆོག་རེད། དཔེར་ན་ནོར་ལུག་གི་རྫི་བོ་བཟང་པོས་ཐོག་མར་ནོར་ལུག་གི་རྩྭ་རག་ཏུ་བཅུག དགྲ་དང་གཅན་སྤྱང་གིས་གནོད་པ་མེད་པར་ཚང་ཚང་རུག་རུག་གིས་བདེ་མོ་འཚམས་པོར་ལྷས་ལ་རུག དེ་ནས་རང་གིས་གཟོད་ཟས་ཟ་བ་དང་ངལ་གསོ་རྒྱག་པ་སོགས་བྱེད། ད་འདང་བརྒྱབ་ན་ད་སྔ་ཉི་མ་ཡན་ཆོད་ལ་རང་འདོད་དང་རང་དོན་རྐྱང་རྐྱང་བསྒྲུབས་མོད། འགྲུབ་ཡོང་རྒྱུ་མེད་པས་མཐའ་འདི་ལ་ཐུག་པ་རེད། མཐའ་ཡས་སེམས་ཅན་སྡུག་བསྔལ་ཅན་འདི་ཐམས་ཅད་སངས་རྒྱས་ཀྱི་གོ་འཕང་ལ་འགོད་ཐབས་ཞིག་ཐོན་ན། ང་ཅི་བྱུང་ན་བྱུང་བསམ་རྒྱུའི་རང་འདོད་ཡིད་བྱེད་ཀྱི་བློ་མེད་པ་དེ་རྫི་བོ་ལྟ་བུའི་སེམས་བསྐྱེད་རེད།།

དེ་ལྟ་བུའི་སེམས་བསྐྱེད་མི་འདྲ་བ་གསུམ་དེ་བློ་སྟོབས་ཆུང་འབྲིང་ཆེ་གསུམ་གྱི་ཁྱད་པར་གྱིས་དབྱེ་བ་ཞིག་རེད།།

༣ སེམས་བསྐྱེད་ཀྱི་ས་མཚམས།

དེ་ནས་སེམས་བསྐྱེད་ལ་ས་མཚམས་ཀྱི་དབྱེ་བ་ཡོད། ད་ས་མཚམས་ཟེར་ན་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ལ་ས་བཅུའི་རིམ་པ་བགྲོད་དགོས་པ་རེད། དེ་ཡང་སྤང་བྱ་སྤངས་པ་དང་རྟོགས་བྱ་རྟོགས་པའི་སྤང་རྟོགས་ཀྱི་ཡོན་ཏན་གྱིས་ཕྱེ་བའི་རིམ་པ་ཞིག་རེད། ས་བཅུ་དེ་ལམ་ལྔ་ལ་ལྟོས་ནས་བཤད་དགོསཔས་ལམ་ལྔས་བསྡུས་པ་ཞིག་རེད། ལམ་ལྔ་བོ་གང་རེད་ཅེ་ན། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་དང་ལྔ་པོ་དེ་རེད། ཚོགས་ལམ་དང་སྦྱོར་ལམ་གཉིས་ཀ་སོ་སོའི་སྐྱེ་བོའི་ས་ཡིན་པ་རེད། སོ་སོའི་སྐྱེ་བོ་ཟེར་ན་ང་ཚོ་འཕགས་ས་མ་ཐོབ་པའི་སེམས་ཅན་ཕལ་བ་ལ་གསུངས་པ་རེད། སོ་སོ་ཐ་དད་འགྲོ་བ་ལ། །སོ་སོའི་སྐྱེ་བོ་ཞེས་བརྗོད་དེ། །གསུངས་པ་ལྟར། ལས་དང་ཉོན་མོངས་པའི་དབང་གིས་རིགས་དྲུག་གི་གནས་ཡུལ་སོ་སོ་ལ་ཐ་དད་དབང་མེད་དུ་འཁྱམ་པ་ལ་སོ་སོའི་སྐྱེ་བོ་ཟེར་བ་རེད། མཐོང་ལམ་ཆོས་ཉིད་ཀྱི་བདེན་པ་མཐོང་ནས་ས་དང་པོ་རབ་ཏུ་དགའ་བ་ཐོབ་པ་ཡིན་ན། ད་སོ་སོའི་སྐྱེ་བོ་ལས་ཁྱད་དུ་འཕགས་པའི་འཕགས་ས་ཐོབ་ནས་ས་བཅུའི་རྒྱུན་མཐའི་བར་དུ་མཐོང་སྒོམ་གྱི་ལམ། དེ་ནས་སངས་རྒྱས་ཀྱི་ས་ལ་ཐོབ་དུས་སློབ་པ་ཡོངས་སུ་རྫོགས་པས་ན་མི་སློབ་པའི་ལམ་ཞེས་གསུངས་ནས། སངས་རྒྱས་ཀྱི་ས་ལ་མ་ཐོན་གྱི་བར་དུ་མངོན་རྟོགས་ཐམས་ཅད་ཡོངས་སུ་རྫོགས་པའི་ལམ་གྱི་ཐ་སྙད་ཀྱིས་བསྟན་པ་རེད། དེ་ལྟར་ན་ཚོགས་སྦྱོར་གཉིས་ཀྱི་ལམ་ནི་མོས་པས་སྤྱོད་པའི་སེམས་བསྐྱེད་དང་། ས་དང་པོ་ནས་བདུན་པའི་བར་གྱི་མ་དག་ས་བདུན་ལ་ལྷག་བསམ་དག་པའི་སེམས་བསྐྱེད། དག་ས་གསུམ་ལ་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་ས་ན་སྒྲིབ་པ་སྤངས་པའི་སེམས་བསྐྱེད་ཀྱི་དབྱེ་བ་ཕྱེས་ནས་བཤད་པ་རེད།།

ད་ནི་ངོ་བོའི་སྒོ་ནས་དབྱེ་བ་ཕྱེ་ན་གོང་ནས་ཀྱང་རགས་རིམ་ཞིག་བཤད་པ་ལྟར། དེ་ཡང་ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་ལ་འདུ་དགོས། དེའི་ནང་གི་ཀུན་རྫོབ་སེམས་བསྐྱེད་ལ་ཡང་སྨོན་པ་བྱང་ཆུབ་ཀྱི་སེམས་དང་འཇུག་པ་བྱང་ཆུབ་ཀྱི་སེམས་གཉིས་ཀྱི་དབྱེ་བ་ཡོད་མོད། འདི་ཚོ་དབྱེ་བ་ཞིབ་ཕྲ་ཕྱེས་ན་ཤིན་ཏུ་རྒྱ་ཆེན་པོ་རེད་དེ། དེ་ཡང་ལས་དང་པོ་པ་ཁྱིམ་པ་ཕོ་མོ་འཇུག་པའི་སྒོ་ཙམ་དུ་གོ་བརྡ་རགས་རིམ་ཙམ་སྤྲད་ཁུལ་བྱས་ན། ཀུན་རྫོབ་བྱང་ཆུབ་ཀྱི་སེམས་དེ་བློ་རྣམ་པར་རྟོག་པ་འདིའི་སྟེང་ནས་བསྐྱེད་རྒྱུ་དང་། དོན་དམ་བྱང་ཆུབ་ཀྱི་སེམས་འདི་ནི་སེམས་རྣམ་རྟོག་གི་རྒྱུ་བ་དབྱིངས་སུ་ནུབ་སོང་བའི་ཡེ་ཤེས་ལ་འཇོག་པ་རེད། སོ་སོའི་སྐྱེ་བོའི་ས་ནས་བྱང་ཆུབ་མཆོག་ཏུ་སེམས་བསྐྱེད་ནས་ཚོགས་སྦྱོར་གཉིས་ཀྱི་སྐབས་ལ་གོང་དུ་མོས་པས་སྤྱོད་པའི་སེམས་བསྐྱེད་ཟེར་བ་རེད་ཅེས་པའི་ཀུན་རྫོབ་སེམས་བསྐྱེད་མཚན་ཉིད་པ་རྒྱུད་ལ་སྐྱེ་རུང་དུ་ཡོད་ཀྱང་། དོན་དམ་བྱང་ཆུབ་ཀྱི་སེམས་ཀྱི་ཐད་ནས་དོན་སྤྱིའི་གོ་བ་དང་མྱོང་བ་ཙམ་ཞིག་མ་གཏོགས། ཆོས་ཉིད་མངོན་སུམ་དུ་རྟོགས་པ་རྒྱུད་ལ་མ་སྐྱེས་པས་མོས་སྤྱོད་ཀྱི་ས་ཟེར་བ་རེད། དེས་ན་ད་ལྟ་མཚན་ཉིད་པའམ་ངོ་མ་བོ་རྒྱུད་ལ་སྐྱེས་རུང་སྐྱེས་ཆོག་ཆོག་ཏུ་ཡོད་པ་ཀུན་རྫོབ་བྱང་ཆུབ་ཀྱི་སེམས་ཡིན་ན་དེ་ལ་ནང་གསེས་ཀྱི་དབྱེ་བ་ཅི་ཡོད་ཟེར་ན།

སྨོན་པ་བྱང་ཆུབ་ཀྱི་སེམས་དང་འཇུག་པ་བྱང་ཆུབ་ཀྱི་སེམས་ཏེ་སྨོན་འཇུག་གཉིས། སྨོན་སེམས་དེ་འབྲས་བུ་ལ་དམ་བཅས་པ་ཞིག་སྟེ། སེམས་ཅན་ཐམས་ཅད་ཀྱི་དོན་དུ་ངས་སངས་རྒྱས་བསྒྲུབ་པར་དམ་བཅས་པ་ཡིན་ཟེར་བ་དེ་རེད། དེ་ཐོབ་པའི་རྒྱུའམ་ཐབས་ཕ་རོལ་ཏུ་ཕྱིན་པ་དྲུག་བསྒྲུབ་འདོད་ཀྱི་བསམ་པས་རྒྱུ་ལ་དམ་བཅའ་བ་ནི་འཇུག་པ་སེམས་བསྐྱེད་རེད། ཀུན་རྫོབ་བྱང་ཆུབ་ཀྱི་སེམས་དེ་ཆོ་ག་ལ་བརྟེན་ནས་སྐྱེ་རྒྱུ་དང་ནི། དོན་དམ་བྱང་ཆུབ་ཀྱི་སེམས་ནི་སྒོམ་པའི་སྟོབས་ཀྱིས་སྐྱེ་དགོས་པ་ཞིག་ཡིན། བྱང་ཆུབ་ཀྱི་སེམས་དེ་ཉིད་ལེན་པའི་ཆོ་ག་ལ་ཡང་ཁྱད་པར་ཡོད་པ་རེད། ཟབ་མོ་ལྟ་སྲོལ་དང་རྒྱ་ཆེན་སྤྱོད་སྲོལ་ཟེར་བའི་སྲོལ་གཉིས་དང་། དེའི་སྟེང་ལ་རང་ལུགས་ཀུན་མཁྱེན་གྱིས་ཟབ་ཅིང་རྒྱ་ཆེའི་བརྒྱུད་སྲོལ་དང་རྣམ་པ་གསུམ་དུ་ཡང་ཕྱེ་ཆོག་རེད། དེ་ཡང་སྨོན་འཇུག་གཉིས་ཀ་སོ་སོར་ཕྱེས་ནས་ལེན་ལུགས་དང་སྨོན་འཇུག་སྟབས་གཅིག་ཏུ་ལེན་རྒྱུའི་སྲོལ་ཡང་ཡོད་པ་རེད།།

རང་ལུགས་བརྒྱུད་པ་འདིའི་ལུགས་ལ་ཀུན་མཁྱེན་ཆེན་པོའི་སྨོན་འཇུག་སྟབས་གཅིག་ཏུ་ལེན་པ་དེ་ཉིད་ཡིན་པ་རེད། ཡིན་ན་ཡང་ཁྱིམ་པ་ཕོ་མོ་སྤྱིར་བཏང་བ་ལ་སྡོམ་པ་འབོག་དུས། ཁྱིམ་ན་གནས་པའི་གང་ཟག་གིས་བསླབ་བྱ་སྲུང་མ་ཐུབ་ནས་རྩ་ལྟུང་འབྱུང་བ་འགོག་པའི་ཆེད་དུ་འུ་ཚོས་འདོན་པ་ཁ་བསྒྱུར་ནས་སྨོན་སེམས་རྐྱང་བ་དེ་ཁྱིམ་པ་ལ་འབོག་དགོས་པ་རེད། ང་ཚོས་དུས་རྒྱུན་ལ་བྱང་ཆུབ་སེམས་སྡོམ་འདོན་དུས་བྱང་ཆུབ་སྨོན་པའི་སེམས་དེ་ལེན་དགོས་པ་རེད། བྱང་ཆུབ་འཇུག་པའི་སེམས་བླངས་བཞག་ན་རྩ་ལྟུང་འབྱུང་བ་འགོག་མི་ཐུབ་པ་ཡིན་དུས། ཁྱིམ་ན་གནས་པའི་གང་ཟག་གིས་དེ་འགོག་སླ་མོ་ཞིག་མིན་པས་ན་དེས་ཉེས་ལྟུང་མི་འབྱུང་བའི་ཆེད་སྨོན་པ་བྱང་ཆུབ་ཀྱི་སེམས་ལེན་དགོས་པ་ཡིན། དོན་དམ་སེམས་བསྐྱེད་ཆོ་གས་ལེན་རྒྱུ་གསང་སྔགས་ཀྱི་དབང་གི་སྐབས་ལ་སོགས་པར་སྨོན་འཇུག་གཉིས་ཀ་དང་། དོན་དམ་སེམས་བསྐྱེད་ཚོའི་ཆོ་གས་ལེན་རྒྱུ་ཡོད་མོད། དེ་ནི་སྨིན་པར་བྱེད་པའི་རྟེན་འབྲེལ་ཁྱད་པར་ཅན་བསྒྲིག་པ་ཙམ་མ་གཏོགས་མཚན་ཉིད་པ་རེད་ཟེར་རྒྱུ་ཡོད་མ་རེད། འདུས་པ་མདོ་དབང་གི་སྐབས་སོགས་ན་དགེ་སློང་གི་སྡོམ་པ་ཡང་མིང་གིས་བླངས་ནས་ཆོས་གོས་སོགས་སྤྲད་རྒྱུའི་དབང་ཡོད་རྒྱུ་ཡོད་པ་རེད་དེ། འདིས་རབ་བྱུང་དང་བསྙེན་རྫོགས་མཚན་ཉིད་པའི་གོ་ཆོད་པ་མ་རེད། ད་སེམས་བསྐྱེད་ལེན་དུས་སྦྱོར་བ་སྔོན་འགྲོའི་ཆོས་གནས་ཁང་ངམ་གཙུག་ལག་ཁང་ལ་བྱི་དོར་བྱེད་དགོས། མཆོད་པ་བཤམས། རྟེན་གསུམ་བཀྲམས། རྒྱན་བཀོད་ཕུན་སུམ་ཚོགས་པ་དགོས། དེའི་སྟེང་ནས་སྐྱབས་སུ་འགྲོ་བ་གསུམ་གྱིས་གཞི་བཟུང་། དགོངས་སུ་གསོལ་བ་གསུམ་གྱིས་སད་པར་བྱས་ནས། བསགས་སྦྱང་ཡན་ལག་བདུན་པ་འོག་ནས་འཆད་འགྱུར་ལྟར་གྱིས་དངོས་གཞི་སེམས་བསྐྱེད་པར་དམ་བཅས། མཇུག་རང་གཞན་དགའ་བ་བསྒོམ་པ་དང་བཅས་པའི་བྱང་ཆུབ་སེམས་སྡོམ་ལེན་དགོས་པ་རེད། རང་རེས་ད་སྔ་དེ་ལྟར་བྱས་ནས་བླང་བ་ཡིན་ན། འདིར་ཡོད་མང་ཆེ་བ་དེ་ཕོ་ཐམས་ཅད་འཕགས་པའི་དགེ་བསྙེན། མོ་ཐམས་ཅད་ཆོས་ཀྱི་ལྷ་མོ་ཞེས་རྫ་དཔལ་སྤྲུལ་ཚང་གིས་གསུངས་པ་བཞིན་ཡིན་པས་མི་ཚད་སྨོན་པ་བྱང་ཆུབ་མཆོག་ཏུ་སེམས་བསྐྱེད་ཚར་ནི་ཏག་ཏག་ཡིན་དུས།།

ད་ནི་སེམས་དཔའ་སེམས་མའི་རིགས་སུ་སྐྱེས་པ་མིན་པའི་ཐབས་མེད་པ་ཞིག་རེད་བསྡད་ཡོད་པ་རེད། འཁོར་བའི་བཙོན་རྭར་བཅིངས་པའི་ཉམ་ཐག་རྣམས། །བདེ་གཤེགས་རྣམས་ཀྱིས་སྲས་ཞེས་བརྗོད་བྱ་ཞིང་། །ཞེས་གསུངས་པས་མ་ཚད། མཇུག་རང་གཞན་དགའ་བ་སྒོམ་དོན་ཡང་སངས་རྒྱས་ཀྱི་རིགས་སུ་ངེས་སོང་བས་རེད། ཡིན་ན་ཡང་དོན་ནང་སྙིང་གི་སྟེང་ནས་བཤད་ཡོང་ན་སེམས་མཆོག་བསྐྱེད་པ་མི་གཙོ་སྐྱེས་པ་གཙོ་གསུངས་ཡོད་པ་ཡིན་དུས། སེམས་བསྐྱེད་ཆོ་གས་བླངས་ནས་དེའི་གྲལ་ལ་འདུག་པ་དཀའ་མོ་མ་རེད་མོད། དེ་ཡང་དད་འདུན་མོས་པ་སྔོན་དུ་སོང་བ་ཞིག་གིས་དེའི་སེམས་བསྐྱེད་ཀྱི་དམ་བཅའ་ལེན་དགོས་པ་རེད། གཙོ་བོ་སེམས་བསྐྱེད་རྒྱུད་ལ་སྐྱེས་པ་མ་ཉམས་པའམ། མི་ཉམས་པའི་ཆེད་དུ་བསླབ་བྱར་སློབ་པ་གལ་ཆེན་རེད། བྱང་ཆུབ་སྨོན་པ་ལ་སྨོན་པའི་བསླབ་བྱ་དང་ནི་དེ་བཞིན་དུ་བྱང་ཆུབ་འཇུག་པ་ལ་འཇུག་པའི་བསླབ་བྱ་ཡོད་པ་རེད། དེ་ཡང་འགྲོ་བར་འདོད་དང་འགྲོ་བ་དངོས་ལྟ་བུའི་དཔེས་སྨོན་འཇུག་བྱེད་པ་གཅིག་མཐུན། སྨོན་འཇུག་གི་བསླབ་བྱ་སྤྱི་དང་ཁྱད་པར་ཕར་ཕྱིན་དྲུག་ལ་བསླབ་པ་གཙོ་གནད་ཡིན། དེ་ཡང་ལས་དང་པོ་པས་ཐོག་མར་བྱང་ཆུབ་སྨོན་པའི་སེམས་སྐྱེས་པ་མི་ཉམས་པར་བྱེད་པའི་སྨོན་པའི་བསླབ་བྱར་བསླབ་རྒྱུ་གཙོ་བོར་ཤེས་པར་བྱས་ནས། སྨོན་སེམས་མཚན་ཉིད་པ་ཞིག་རྒྱུད་ལ་སྐྱེས་པ་ལ་ཟུར་གཉིས་སམ་དོན་གཉིས་ཚང་དགོས་པ་ཡིན་ན། དེ་གཉིས་ཀྱི་སྟེང་ནས་སེམས་བསྐྱེད་རྒྱུ་ཁས་བླངས་པ་བཞིན་བསླབ་བྱ་སྲུང་རྒྱུ་ཡང་དེ་གཉིས་ཀྱི་སྟེང་ནས་སྲུང་དགོས་པ་རེད། དེ་གཉིས་ཀ་ཉམས་སུ་ལེན་མ་ཐུབ་པར་རང་རྒྱུད་ནས་ཉམས་སོང་དུས་བསླབ་པ་ཉམས་སོང་བ་རེད། དེར་མིང་བཏགས་ན་སེམས་ཅན་བློས་བཏང་དང་ནི་རྣམ་མཁྱེན་བློས་བཏང་ཟེར་བ་རེད། བྱང་སེམས་ཀྱི་བསླབ་བྱ་ལ་རྩ་བའི་ལྟུང་བ་དང་ཡན་ལག་གི་ལྟུང་བ་ཟེར་བ་དེ་སེམས་བསྐྱེད་ཀྱི་མི་མཐུན་ཕྱོགས་བྱུང་མི་ཉན་རྒྱུ་དེ་གཉིས་ཡིན་རེད། དེ་ལ་རྩ་བའི་ལྟུང་བ་དང་ཡན་ལག་གི་ལྟུང་བ། རྩ་བའི་ལྟུང་བ་ནི་ཤིང་སྡོང་པོའི་རྩ་བ་བཅད་བཞག་ན་དེའི་ཡན་ལག་རང་ཤུགས་ཀྱིས་ཉམས་འགྲོ་བ་ལྟར། དེ་བཞིན་དུ་རྩ་ལྟུང་བྱུང་ཚར་ནས་ཡན་ལག་སྲུང་ཁ་བྱས་ཀྱང་ཕན་ཐོགས་ཡོད་མ་རེད། དེས་ན་འདི་མི་ཉམས་པར་བྱེད་པ་ལ། དེ་ལ་བདག་གཞན་མཉམ་པ། བདག་གཞན་བརྗེ་བ། བདག་བས་གཞན་གཅེས་གསུམ་པོ་སྒོམ་དགོས་པ་རེད།།

ཁ འཇུག་པ་སེམས་བསྐྱེད།

༡ བདག་གཞན་མཉམ་པ།

དང་པོ། བདག་གཞན་མཉམ་པ་སྒོམ་དུས་རང་ཅི་འདྲ་བ་ལྟར་གཞན་ལ་བསམ་བློ་བཏང་ནས་རང་གིས་བདེ་བ་འདོད་པ་བཞིན་དུ་གཞན་གྱིས་བདེ་བ་འདོད་ཀི་ཡོད་པ་རེད། རང་གིས་སྡུག་བསྔལ་ཕྲ་མོ་ཙམ་ཡང་མི་འདོད་པ་ལྟར་དུ་གཞན་གྱིས་ཀྱང་དེ་བཞིན་དུ་འདོད་ཀི་ཡོད་མ་རེད། དེས་ན་གཞན་པོ་སུ་རེད། ཕ་མ་སེམས་ཅན་ཐམས་ཅད་རེད། ད་སྔ་དེ་མ་ཤེས་ནས་རང་འདོད་དག་དག་སྒྲུབ་པ་ཡིན་ན་མཐར་རང་འདོད་ཀྱང་མ་འགྲུབ་པར། ཐུབ་པས་གཞན་དོན་མཛད་པ་དང་བྱིས་པས་རང་དོན་སྒྲུབ་པ་གཉིས་ཀྱི་དཔེ་དང་དོན་གྱིས་ཤེས་ཐུབ་པ་རེད། ད་ནས་བཟུང་སྟེ་རང་ལ་གཅེས་པར་འཛིན་པ་དང་ནི་གཞན་ལ་སྡང་བར་འཛིན་པའི་ཆགས་སྡང་གི་བློ་ངན་འདི་གཉིས་ཀ་རྩ་བ་དྲུང་ནས་ཕྱུངས་ནས། མེད་པ་འཕྲོ་གཙང་བ་ཞིག་བྱས་ན། བདག་གཞན་མཉམ་པ་ཉིད་དུ་སྒོམ་རྒྱུའི་ཞེ་དམ་བཅའ་བ་དང་བཅས་ཏེ་བསམ་པས་དེ་བཞིན་བསྒོམ་པ་མ་ཚད། སྦྱོར་བས་དེ་བཞིན་ལག་ལེན་དུ་བཏབ་ནས་བྱང་ཆུབ་ཀྱི་སྤྱད་པ་སྤྱོད་རྒྱུ་དེ་ཡིན་ནི་རེད།།

༢ བདག་གཞན་བརྗེ་བ།

ད་བདག་གཞན་བརྗེ་བ་བྱང་ཆུབ་ཀྱི་སེམས་དེ་ཇི་འདྲ་ཡིན་ཞེ་ན། གོང་གི་བདག་གཞན་མཉམ་པ་སྒོམ་དུས་ཀྱི་བདག་གཞན་གཉིས་ཀ་འདྲ་འདྲ་ཟེར་བ་རེད་དེ། མིན་ཟེར་རུང་གཙོ་བོ་རང་ཉིད་འདྲ་ཟིག་རེད་ཀི་འདུག་རྒྱུའི་སྐྱོན་འབྱུང་སླ་ནི་ཡིན་ན། ད་འདི་ནས་གཉིས་ཀའི་བདེ་སྡུག་དེ་བརྗེས་ནས་ང་ཚོའི་ཁ་སྐད་ལ་བདེ་ས་ལ་མྱི་བཞག གཟར་ས་ལ་རང་འདུག མ་དྲིན་ཅན་མ་དེས་བུ་ལ་ཤ་ཚ་སྙིང་རྗེས་རང་ཉིད་ཀྱིས་སྡུག་ཅི་ཙམ་མྱོང་རུང་མྱོང་གི་བཞག བུ་ང་དག་དག་གི་སྐྱིད་ཐབས་ལ་བསམ་ནས་བུ་ན་བ་ལས་མ་རང་ཉིད་ཤི་བར་གདམ་པ་དེ་འདྲའི་དྲིན་གྱིས་བསྐྱངས་ནི་ཡིན་ན། ད་སྔ་མ་སེམས་ཅན་ཐམས་ཅད་ལ་མ་ངོ་མའི་མ་ངོ་མ་ཤེས་པར་བདག་འཛིན་འགོང་བོའི་སེམས་ཀྱི་གདོན་དེ་རང་གི་སེམས་ལ་ཞུགས་ཏེ་སེམས་རྒྱུད་གདོན་གྱིས་བརླམས་སོང་བ་ཡིན་ཀྱང་། ད་ནས་བཟུང་སྟེ་ཁེ་དང་རྒྱལ་ཁ་སེམས་ཅན་ལ་བྱིན། གྱོང་དང་ཕམ་ཁ་རང་གིས་ཁུར། དེ་ཡང་སྙིང་རྗེ་དང་བྱམས་པ་གཉིས་ཀྱི་སྒོ་ནས་སྙིང་རྗེས་སེམས་ཅན་གྱི་སྡུག་བསྔལ་རང་གིས་ལེན། དེ་བླངས་པ་བཞིན་དུ་ང་ལ་སྨིན་པར་ཤོག བྱམས་པས་བདག་གི་བདེ་བ་ཅི་ཡོད་པ་མ་སེམས་ཅན་ཐམས་ཅད་ལ་བྱིན་པ་ཡིན། དེ་བྱིན་པ་བཞིན་དུ་ཐོབ་འགྲོ་བར་ཤོག་བསམས་ནས་དེ་ལྟར་བསམ་པས་མི་ཚད་སྦྱོར་བས་དེ་ལྟར་དུ་སྒྲུབ་ཆེ་ཐུབ་ཆུང་ཐུབ་ཀྱིས་སྒྲུབ་ལུགས་ལ་སྦྱོང་དགོས་པ་ཡིན། སྙིང་རྗེས་གཞན་གྱི་སྡུག་བསྔལ་ལེན་རྒྱུ་དེ་སྙིང་རྗེའི་སེམས་ཅན་ལ་དམིགས་པའི་ཟུར་ཡིན། བྱམས་པ་ཆེན་པོས་རང་གི་བདེ་བ་རྒྱུ་འབྲས་གཞན་ལ་གཏོང་རྒྱུ་དེ་ཤེས་རབ་ཀྱིས་རྫོགས་བྱང་ལ་དམིགས་པའི་ཕྱོགས་ཡིན་ནི་རེད། དུས་རྒྱུན་རང་ལ་ན་ཚ་སྡུག་བསྔལ་ལ་སོགས་ཅི་བྱུང་ཡང་དེ་ཡིས་སེམས་ཅན་ཐམས་ཅད་ཀྱི་ན་གོ་ཚ་གོ་ཤི་གོ་ལ་སོགས་པ་ཆོད་པར་ཤོག་བསམ་དགོས་པ་རེད། དེ་ཡང་ངག་གིས་དེ་བཞིན་དུ་འདོན་དགོས་པ་རེད། དེ་ཡང་བྱང་ཆུབ་སེམས་དཔའ་ཟེར་བ་ནི་འབྲེལ་ཚད་དོན་ལྡན་བཟང་འབྲེལ་ཚེ་གཅིག་སངས་རྒྱས། ངན་འབྲེལ་འཁོར་བ་མཐའ་ཅན་ཡོང་ནི་ཞིག་དགོས་པ་ཡིན་དུས། ད་ལྟ་ནས་བསམ་སྦྱོར་གཉིས་ཀས་སྦྱངས་ནས་དེ་ཡང་སེམས་ཅན་ཐམས་ཅད་བདེ་བའི་དོན་ལ་རང་གིས་ཡོངས་སུ་བཟུང་བའི་གཞི་གསུམ་སྟེ། ཡོངས་སུ་བཟུང་བའི་གཞི་གསུམ་གང་ཡིན་ཞེས་ན། ལུས་དང་ལོངས་སྤྱོད་དགེ་ཚོགས་དགེ་བའི་དངོས་པོ་དང་བཅས་པ་གསུམ་པོ་གཏོང་དགོས་ནི་རེད། འདི་ལྟར་བཤད་ཡོང་ན་བྱང་ཆུབ་སེམས་བསྐྱེད་ནས་བྱང་ཆུབ་སེམས་དཔའི་སྤྱོད་པ་ལག་ལེན་དུ་བསྟར་ཟེར་རྒྱུ་འདི་དཀའ་སྙམ་པ་ཞིག་ཡིན། དཀའ་ཡང་སྒྲུབ་ཐུབ་པ་ལ་སེམས་དཔའ་ཟེར་རེད། བྱང་ཆུབ་སེམས་དཔའ་རྣམ་པས་ཀྱང་དང་པོར་སྒྲུབ་དཀའ་བ་ཡོད་པས་བྱང་ཆུབ་སེམས་དཔའ་ཐོག་རེད་དེ། འུ་བུ་ཚོས་རིམ་གྱིས་རིམ་གྱིས་སྦྱང་ན་དེ་ལ་བྱང་རྒྱུ་ཡོད་རེད་ལ་བྱང་ཆུབ་སེམས་དཔར་འགྱུར་ཐུབ་རེད། བྱང་ཆུབ་སེམས་དཔའ་ཡང་དང་པོ་ནས་བྱང་ཆུབ་སེམས་དཔའ་ཡིན་ཡིན་ཁར་ཡོད་ནི་དག་དག་མ་རེད་ཡིན་ན། ལས་བྱ་བ་ཅི་ཞིག་ཡིན་རུང་རིམ་གྱིས་རིམ་གྱིས་སྦྱངས་ན་དེ་གོམས་ན་སླ་བར་མི་འགྱུར་བའི་དངོས་པོ་ཞིག་ཡོད་ནི་མ་རེད། དེ་འདྲ་ཡིན་དུས། ལུས་ཀྱི་ན་ཚ། སེམས་ཀྱི་སྡུག་བསྔལ། བསམ་དོན་མི་འགྲུབ་པའི་བར་ཆད་ལ་སོགས་པ་མི་འདོད་པ་ཐམས་ཅད་པོ་མར་ལ་ཞི། དེའི་མི་ཚད་ཁམས་གསུམ་འཁོར་བའི་སྡུག་བསྔལ་དེའི་རྒྱུ་ཆགས་སྡང་རྨོངས་གསུམ་དང་དེའི་ཀུན་ནས་བསགས་པ་ཐམས་ཅད་མར་ལ་ཞི་ནས། མངོན་མཐོ་ངེས་ལེགས་ཀྱི་བདེ་བ་ཐམས་ཅད་དང་ནི་དེའི་རྒྱུ་དད་དང་ངེས་འབྱུང་བྱང་ཆུབ་ཀྱི་སེམས་སོགས་སེམས་ཅན་དེ་དག་གི་རྒྱུད་ལ་སྐྱེ་བར་ཤོག་བསམ་ནས་སྙིང་ཁོངས་རུས་པའི་གཏིང་ནས་བསམ་དགོས་པ་རེད། བདག་གཞན་བརྗེ་བ་བྱང་ཆུབ་ཀྱི་སེམས་ཟེར་བ་འདི་ཐེག་ཆེན་ཐར་བའི་ལམ་ཞུགས་ཀྱི་གང་ཟག་ཞིག་ལ་མེད་ན་ཐབས་མེད་མཐར་ཐུག་གི་བསྒོམ་བྱའི་སྙིང་པོ་དེ་རེད། སེམས་འདི་འདྲ་ཞིག་ལན་གཅིག་རྒྱུད་ལ་སྐྱེས་ན་དུས་བསྐལ་བ་མང་པོ་ལ་བསགས་པའི་སྡིག་སྒྲིབ་དེས་དག་འགྲོ་རེད་ལ། དེ་བཞིན་བསོད་ནམས་དང་ནི་ཡེ་ཤེས་ཀྱི་ཚོགས་གཉིས་རྒྱ་ཆེན་པོ་ཞིག་རྫོགས་འགྲོ་རེད། དེ་ཡིས་སྟོབས་ཀྱིས་ངན་སོང་ངན་འགྲོ་ལས་ཐར་བའི་ཕན་ཡོན། དེ་འདྲའི་ཕན་ཡོན་ཆེན་པོ་མ་འདོད་ཀྱང་རང་ཉིད་ལ་ངང་གིས་འབྱུང་གི་ཡོད་པ་རེད། གཅིག་བྱས་ན་ངའི་བདེ་བ་གཞན་ལ་སྦྱིན། གཞན་གྱི་སྡུག་བསྔལ་ངས་ལེན་ཟེར་བ་དེ་ནི་དཀའ་མོ་ངོ་མ་རེད། དེ་བསམ་ཐུབ་པ་ཞིག་ཀྱང་མ་རེད། ལག་ལེན་ལ་དེ་བས་འདེབས་ཐུབ་རྒྱུ་ཞིག་མ་རེད་བསམ་ན་ཡང་། དང་པོ་སེམས་ཀྱིས་སྦྱོངས་། དེའི་འཕྲོར་དངོས་སུ་སྤྱོད་པ་ལ་རིམ་བཞིན་སྦྱངས་ན་གོང་ནས་བཤད་པ་ལྟར་དུ་གོམས་ན་ཇེ་སླ་ལ་མི་འགྲོ་རྒྱུ་མེད། དེ་ཡང་ཅི་བསམ་འདི་དྲན་དེ་ཙམ་མེད་པར་ཕྱག་འབུམ་ཐེར་མང་པོ་དང་ནི་བསྐོར་ཚད་ཁ་གྲངས་ཅན་བསོག་མི་ཐུབ་པར་རྒྱུག་གི་འདུག་རྒྱུའི་དཀའ་ལས་བས། ངོ་མས་བཤད་ན་སེམས་ཀྱི་བསམ་བློ་གཏོང་ལུགས་སྐད་ཅིག་མ་གཅིག་གིས་ཆོད་སྒོ་ཆེ་རེད། དེ་སླ་ཡང་དེའི་སླ་བ་རེད། ང་ཚོའི་ཚོང་པ་ཞིག་གིས་ཚོང་བརྒྱབ་པ་དང་གཅིག་པ་རེད། ཁེ་གང་གིས་བཟང་དང་ཡོང་སྒོ་འབབ་སྒོ་གང་གིས་ཆེ་དེ་ལ་བལྟས་ནས། གང་ཁེ་ཁ་ཆེ་ན་དེ་ལ་འཐམ་རྒྱུའི་གནད་གལ་ཆེ་བ་དེ་བཞིན་ཆོས་སྒྲུབ་དུས་ཀྱང་ཡིན་ནི་རེད། སེམས་ཀྱིས་བྱང་ཆུབ་མཆོག་ཏུ་སེམས་བསྐྱེད་པ་དང་ནི་བདག་གཞན་མཉམ་བརྗེ་ཡི་འདུ་ཤེས་དང་མི་འབྲལ་བར། ངག་གིས་བཤགས་ཚིག་དང་བཟླས་བརྗོད་བགྲང་ཞོར་ལ། ལུས་ཀྱིས་ཕྱག་དང་བསྐོར་བར་སོགས་ལ་འབད་པར་བྱས་ན་ཐེག་ཆེན་དམ་པ་རྣམ་གསུམ་ཚང་བའི་སྟེང། ངག་གིས་ལྷ་སྔགས་ཆོས་ཉིད་ཀྱི་རོལ་བར་བྱས་པའི་དག་སྣང་དང་དེ་དག་འཛོམས་སོང་དུས། དོན་གཅིག་གིས་བསམ་པ་གཉིས་འགྲུབ། །རྟ་རྒྱུག་ཞོར་མེ་ཏོག་ཐུ་ཞོར། །ཟེར་བ་ལྟར་རང་གཞན་འདི་ཕྱིར་དགེ་བའི་གཏན་བདེའི་འདུན་མ་དེའི་འགྲུབ་ཀི་ཡོད་པ་རེད། དེ་ཡིན་དུས་ལུས་ངག་གི་དགེ་བ་ལས་ད་རུང་སེམས་ཀྱི་དགེ་བ་སྟོབས་ཆེ་ལུགས་དེ་ལྟར་ཡིན། སེམས་ཀྱི་དགེ་བའི་ནང་ནས་བྱང་ཆུབ་མཆོག་ཏུ་སེམས་བསྐྱེད་པ་འདིའི་གཙོ་ཆེ་བ་དང་དེའི་སྟོབས་ཆེ་བ་ཞིག་མེད་པས་སྡིག་པ་འདག་སྟོབས་དང་ནི་ཚོགས་རྫོགས་སྟོབས་གཉིས་ཀ་དེ་ལས་ལྷག་ཡོད་མ་རེད།།

༣ བདག་བས་གཞན་གཅེས།

དང་པོ་བདག་གཞན་མཉམ་པ། གཉིས་པ་བདག་གཞན་བརྗེ་བ། གསུམ་པ་བདག་བས་གཞན་གཅེས། བདག་གཞན་བརྗེ་བ་སེམས་ཀྱི་སྟེང་ནས་གོམས་པར་བྱས་ནས་དེ་ལ་ལོབས་སོང་དུས། འདི་སྦྱོར་བ་ལག་ལེན་གྱི་སྟེང་ནས་བསྒྲུབ་དགོས་པ་ཞིག་རེད། བདག་བས་གཞན་གཅེས་མཚན་ཉིད་པ་རང་གི་མགོ་དང་ཡན་ལག་ཀྱང་གཞན་ལ་སྦྱིན་ཐུབ་མཁན་དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ཙམ་དུ་འཁོར་འདས་མཉམ་ཉིད་མ་རྟོགས་པར་འགྲུབ་རྒྱུ་ཞིག་ཀྱང་ཡིན་མ་རེད། བསམ་པས་སྦྱངས་ཞིང་སྦྱོར་བས་སྲུང་དགོས་དུས་ཤིག་ཀྱང་ཡོད་པར་གསུང་ནི་རེད། རེད་དེ་ཡང་སོ་སོའི་སྐྱེ་བོའི་དུས་སྐབས་ལ་བདག་བས་གཞན་གཅེས་བསམ་སྦྱོར་གཉིས་ཀས་མཉམ་དུ་སྦྱངས་ལུགས་མེད་པར། དེ་བྱང་ཆུབ་སེམས་དཔའི་ས་ཐོབ་པ་མ་གཏོགས་དགོས་པ་མ་རེད་ཅེས་བསྐྱུར་བཏང་རྒྱུ་ཞིག་ཀྱང་མིན་པར་སེམས་ཏེ། ཇོ་བོ་རྗེ་དཔལ་ལྡན་ཨ་ཏི་ཤའི་བླ་མ་གསེར་གླིང་པས་སྐུ་ཤ་དྲོན་པོ་བཅད་ནས་བྱིན་རབས་ཡོད་པ་རེད། ཁོང་ཚོགས་སྦྱོར་ལ་གནས་པའི་གང་ཟག་ཡིན་གསུངས་དར་རེད། ང་རང་ལ་ཆགས་བཞག་ན་ཚོགས་སྦྱོར་གཉིས་ཀའི་སྣེ་མོར་མ་ཟིན་པའི་སོ་སྐྱེས་ཕལ་བ་ངོ་མ་ཡིན་ན་ཡང་། ཁ་སང་བཤད་པ་ལྟ་བུ་ལོ་ངོ་བཅུའི་སྟེང་ནས་རྫོགས་ཆེན་ཨ་བུ་ལྷ་སྒང་གི་མདུན་ནས་བསྐལ་མང་གོང་ནས་རྒྱུགས་སྤྲད་རྒྱུ་ཁས་བླངས་རེད། བསྐལ་མང་གོང་ནས་ཟེར་བ་ཁ་སང་གོང་ནས་ཆོས་ཁྲིད་རྗེས་སུ་འདོན་འདུག་རྒྱུ་དེ་རེད། བྱང་ཆུབ་ཀྱི་སེམས་རྒྱུད་ལ་འབྱུང་བའི་སྨོན་ལམ་ཁྱད་པར་ཅན་ཞིག་རེད། སྲོལ་གཉིས་སྲོལ་གསུམ་གྱི་སེམས་བསྐྱེད་ཀྱི་དམ་བཅའ་ངས་ཅི་ཙམ་མ་བླངས་ཏེ་བླངས་ཡོད་ཅིང་ངག་ཐོག་ནས། ཡོད་ན་སངས་རྒྱས་སྒྲུབ་ལ་དེས་ཆོག་ཅིང་། །མེད་ན་སངས་རྒྱས་སྒྲུབ་ལ་ཐབས་ཆག་པ། །སོགས་ནས་ཡང་ནས་ཡང་དུ་བྱང་ཆུབ་སེམས་སྒོམས་ནས། །བྱང་ཆུབ་སེམས་དཔའི་སྤྱོད་ལ་འཇུག་པར་ཤོག །ཅེས་རང་གིས་ཀྱང་ཚར་བརྒྱ་ཚོ་སྟོང་ཚོ་བཏོན། ཞེ་ནས་སྨོན། མྱི་ལ་ཡང་དེ་འདྲ་བཤད་ཚར་རེད། ན་ནིང་ཞིག་ལ་ངོ་མས་མྱི་བརྒྱ་ཚོ་སྟོང་ཚོ་ཆ་རེའི་རེ་འདོད་གང་ནས། དངོས་གནས་དེ་རྣམས་དགའ་འགྲོ་རྒྱུ་ཞིག་ཡིན་དུས་སྲོག་གི་སྦྱིན་པ་ལོས་གཏོང་སྙམ་བྱུང་། ལུས་སྲོག་ཟེར་བ་འདི་གང་ལྟར་ཡུན་རིང་གི་ཅ་ལག་ཞིག་མ་རེད། ཁྱད་པར་དུ་བསྟན་པ་སྤྱི་དང་བྱེ་བྲག་གི་བྱ་བ་ཡང་རང་ཉིད་ལ་ལྟོས་ན་ཅུང་ཟད་འགྲུབ་ཡོད་ན་མེད་ན་དེ་རེད། དགོས་པ་བྱུང་། གོ་ཆོད་ས་རེ་ཡོད་དུས་སྲོག་ཅིའི་ཕྱིར་མི་གཏོང་། འདིའི་ནང་གི་མང་ཆེ་བས་ཤེས་རེད། གཅིག་ཐང་ན་བྱང་ཆུབ་ཀྱི་སེམས་ཀྱིས་གཅན་གཟན་གཏུམ་པོའི་སེམས་རྒྱུད་ཀྱང་ཐུལ་འགྲོ་རབས་ཡོད་པ་རེད། ད་ཕ་རོལ་པོའི་སྡང་སེམས་དེ་མར་ལ་ཞི་ནས་ཞི་འཇམ་ཅན་དུ་འགྱུར་ནི་རེད་བསམ་ཁུལ་བྱས་རུང་། སོ་སོ་སྐྱེ་བོས་བྱང་སེམས་འཕགས་པའི་སྟངས་བྱས་ན་དེ་ལས་ཅི་ཡོད། དེ་གཉིས་ཀ་ལམ་སློང་བྱུང་མ་ཐུབ་ཐལ་མོ། ད་གཉེན་གྱི་ཆགས་སེམས་ཟེར་ན་དེ་རེད་ད། གཅིག་སེམས་གཅིག་ལ་ཡོད་པའི་འབྲེལ་ཐག་ཟེར་དགོས་ན། ཕར་སྦྲེལ་ཚུར་སྦྲེལ་གྱིས་མཐའ་མར་མ་བསམ་ས་ནས་མི་བསམ་རྒྱུའི་མྱི་མང་ཞིག་ས་དེར་འཛོམས་བཞག་དུས། ད་གློ་བུར་ཕྱིར་ལ་རྫོགས་འཇོག་ཟེར་ན་མི་འགྲིག་པ་ལྟ་བུ། ངོ་ཡང་བཅག་མ་ཐུབ་པས་ཅི་ཡིན་འདི་ཡིན་མེད་ས་ཞིག་ནས། གློ་བུར་ཞིག་ལ་ཅིག་མིན་ན་ས་འདིའི་གནའ་སྔོན་མའི་སྲི་ཐོག་ལ་ཅུང་ཙམ་མིན་ན་བུད་སོང་བ་རེད། འགའ་རེས་རང་གི་ལུས་པོ་འབེན་ལ་བཙུགས་ནས་ང་འགེབ་ཅིང་སྲུང་བར་བྱེད། འགའ་རེས་བླ་སྤྲུལ་རྣམ་པའི་སྐུ་ལ་འགོག་སྲུང་གི་ཆེད་དུ་གཡུལ་སར་གདོང་མཆོངས་བྱས་ཐལ། རྡོ་ཁ་བཀྱེ་བ་ཙམ་ཆུང་ཆུང་ཡིན་པ་རེད། བོའུ་ཁྱུ་གཏད་བྱས་ནས་འཕང་ཡོང་དུས་མཚོན་སྔོན་མོ་ལུས་ལ་མ་སོང་མདེའུ་ཕྱོགས་ལ་མ་གཅར་བ་དེ་ཚོ་ཡ་མཚན་རེད། དོན་དེ་ཚོ་ཆོས་པ་ཞིག་ལ་མཚོན་ན་སྙིང་རྗེ་བའི་ཡུལ་བཟོད་པའི་གྲོགས་དགྲ་གཉེན་རྟག་པ་མེད་ལུགས་སྒོམ་བྱེད་དང་། ད་རུང་རྐྱེན་ངན་ལམ་དུ་སློང་བའི་མཐུན་རྐྱེན་རེད། རང་ཉིད་དགེ་སྦྱོང་གི་ཆོས་བཞི་ལ་གནས་པ་དེ་བཤད་རིན་ཁྱོགས་པའམ། བཤད་ན་ངོ་མི་ཚ་བའི་དོན་དག་ཡིན་རེད། ཕྱི་ནས་ད་དེང་སང་བསམ་བློ་བཏང་ན་ཡང་གཏོང་སེམས་དག་མ་ངོ་མ་ཡིན། གོ་སྐབས་བཟང་པོར་ཚེས་ཐལ་བསམ་པ་ཡིན་ཡང་། ངས་དུས་རྒྱུན་བླ་མ་འདས་དུས་སྐུ་ལུས་མདའ་བསླངས་པ་ལྟར་བྱས་ནས་འདས་རྟགས་བཞག་ཐ་འུ་ཚོའི་ཟེར་དར་མོད། འདས་རྟགས་བཟང་ཤོས་མགོ་ཐུར་ལ་བསྟན་ནས་ཁྱི་ཤི་ཤི་བྱེད་དགོས་ཞེས་མཚམས་རེར་ཕྱིན་ཅི་ལོག་ཀྱང་བཤད་པ་ཡིན། གང་ལྟར་གཉིས་ཀ་མི་ཡི་ཤི་ལུགས་རེད། ད་སེམས་ཅན་མང་བོའི་རེ་བ་སྐོང་བྱེད་དུ་ཤི་ན་དེས་ཆོག་ངོ་མ་རེད་ཞེ་ནས་བསམ་མོད། ཡང་ཕྱོགས་གཅིག་ནས་བལྟས་ཡོང་དུས་མྱི་ལོ་ལོན་ལ་གང་ལྟར་ཡུན་རིང་གི་འདང་རྒྱག་མེད་པས་གོ་ཞིག་ཀྱང་གཅོད་རྒྱུའི་རང་འདོད་ཞིག་ཀྱང་འདྲེས་ཡོད་ས་རེད་བསམ་ཡོང་བ་དེ་འདྲ་རེད། ད་ལས་དང་པོ་བའི་སྐབས་འདིར་ངོ་མ་ཡིན་ན་ཐབས་དང་ཤེས་རབ་ཀྱིས་ཟིན་པའི་བདེན་གཉིས་བྱང་ཆུབ་ཀྱི་སེམས་རིམ་ཅན་དུ་བསྒོམས་ནས། བདག་འཛིན་རྩད་ནས་གཅད་རྒྱུར་བཟོད་བསྲན་ཁ་ཆེ་ཆུང་བྱས་ནས་ཐུབ་མི་ཐུབ་བྱེད་རྒྱུ་རེད་མི་འདུག དང་པོ་ཀུན་རྫོབ་བྱང་ཆུབ་ཀྱི་སེམས་ལ་བློ་བཟང་པོ་ཞིག་སྦྱངས་ནས། དེའི་འཕྲོར་བདག་གཞན་མཉམ་པ་དང་བདག་གཞན་བརྗེ་བ། བདག་བས་གཞན་གཅེས་གསུམ་བསྒོམ་ནས། ཐབས་གྱིས་རང་དོན་ཡིད་བྱེད་ཀྱི་བློ་དེ་བཅད། དེ་ཆོད་དུས་ཐབས་བྱུང་ཤེས་རབ་ཀྱིས་བདག་འཛིན་དྲུང་འབྱིན་གྱི་རྩ་བ་གཅད་རྒྱུའི་དོན་དམ་བྱང་ཆུབ་ཀྱི་སེམས་ལ་སྦྱངས་ན་རིམ་པ་མ་ནོར་བ་རེད། །ཀུན་རྫོབ་བྱང་ཆུབ་སེམས་ཀྱིས་བདག་འཛིན་གྱི་མགོ་ནོན་དང་ནི་དོན་དམ་གྱི་བྱང་ཆུབ་སེམས་ཀྱིས་དྲུངས་འབྱིན་བྱས་ནས། ཐབས་དང་ཉམས་ལེན་གཉིས་ཀ་རྒྱུད་ལ་འབྱོར་དུས་དེ་དུས་བསམ་སྦྱོར་མཐུན་པ་ཞིག་ཡིན་ས་ཡོད་ཀི །ད་གང་ལྟར་རིན་ཆེན་བྱང་ཆུབ་ཀྱི་སེམས་མཆོག་གཅིག་པོ་འདི་གང་ཟག་གཅིག་གི་མྱི་ཚེའི་ཉམས་ལེན་གཅིག་ཆོག་མ་ཡིན་རེད། སྐྱིད་སྡུག་གང་བྱུང་ལ་འདི་ཉམས་ལེན་ལམ་ཁྱེར་གྱི་གནད་ལ་འཛིན་ཤེས་དགོས་པ་རེད། ད་ངས་ཉི་མ་དེ་རིང་ནས་བཟུང་རང་ཉིད་ཀྱི་ཐར་བ་མ་ཐོབ་རུང་ངན་སོང་གསུམ་ལ་སོགས་པའི་རིགས་དྲུག་གི་སྡུག་བསྔལ་དེ་ངས་ལེན་ནི་ཡིན། དེ་ཐམས་ཅད་མི་བདེའི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ངས་ཁ་ཡིས་ལེན་དང་ཞེ་ནས་ལེན་བསམ་པ་ཙམ་གྱིས་མ་ཚད་པར། ད་ལྟ་ཉིད་དུ་ངའི་སྟེང་ལ་སྨིན་པར་གྱུར་ཅིག་བསམ་ནས། སེམས་ཀྱི་བསམ་པ་དང་ལག་ལེན་གྱི་སྦྱོར་བ་གཉིས་ཀ་མཐུན་པ་ཞིག་བྱས་ཏེ། བདག་གི་དགེ་བས་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བར་དངོས་སུ་འགོད་པར་བསམ་དགོས། །དེ་ཡང་སེམས་ཅན་གཅིག་གི་དོན་དུ་ཡང་བསྐལ་བ་མང་བོའི་བར་དུ་མནར་མེད་དམྱལ་ཁམས་ལ་འདུག་དགོས་རུང་བཟོད་བསམ་པའི་འདུ་ཤེས་བསྐྱེད་ནས། སེམས་ཅད་ཐམས་ཅད་ངའི་དགེ་རྩས་སངས་རྒྱས་ཐོབ་སོང་ན། ད་ང་རང་གཅིག་པུ་མནར་མེད་ལ་ཞུགས་རུང་དེར་ལུས་སྡུག་རུང་སེམས་ཅི་འདྲ་མི་དགའ་མི་སྐྱིད་སྙམ་ནས། བསམ་པའི་གཏིང་ནས་དེ་ལྟར་སེམས་བསྐྱེད་ནས། ལུས་ལོངས་སྤྱོད་དང་བཅས་པ་སེམས་ཅན་ཐམས་ཅད་ལ་ཆགས་སེམས་དང་ཕངས་སེམས་མེད་པར་བཏང་ན། དངོས་སུ་སེམས་ཅན་ལ་ཕན་ཐོགས་འབྱུང་རྒྱུ་དང་བརྒྱུད་ནས་བདག་ཉིད་ལ་ཡང་ཕན་ཆེན་པོ་གྲུབ་ནས་བསྡད་ཡོད་པ་རེད། ཀུན་བཟང་ཞལ་ལུང་གི་ནང་ན་འདིའི་ཡར་མར་ཞིག་ནས་རྒྱལ་བུ་གཙུག་ན་ནོར་བུའི་རྟོགས་བརྗོད་གསུངས་ཡོད། དེ་ཡང་གནའ་སྔོན་མ་རྒྱ་གར་གྱི་ཡུལ་ཞིག་ན་རྒྱལ་པོ་ཆེན་པོ་ཞིག་ལ་སྲས་རྒྱལ་བུ་ཡ་མཚན་ཅན་ཞིག་ཡོད། དེའི་མིང་ལ་གཙུག་ན་ནོར་བུ་ཟེར་བ། གཙུག་ཏོར་ན་རང་གྲུབ་ཀྱི་ནོར་བུ་རིན་པོ་ཆེ་ཅི་བསམ་འགྲུབ་པ་ཞིག་ཡོད་པ་ལས་དེ་ལས་བདུད་རྩིའི་རྒྱུན་འབབ་པ། བདུད་རྩིའི་རྒྱུན་དེ་ལྕགས་ལ་ཐུག་སོང་ན་ཁ་སང་བཤད་པ་ནང་བཞིན་གསེར་འགྱུར་གྱི་རྩི་ཡིས་ལྕགས་གསེར་ལ་འགྱུར་བ། ད་རུང་རྒྱལ་སྲས་དེ་ལ་རིན་པོ་ཆེ་གཞན་ཞིག་ཡོད་པ་གླང་པོ་རིན་པོ་ཆེ་ཁྱད་དུ་འཕགས་པ་ཁ་མདོག་དུང་ལྟར་དཀར་བ། གཟུགས་བཟང་པོ་ཅན་སྐྱེ་མཆེད་ལེགས་པ། དེ་ལྷའི་གླང་པོ་ཆེ་དང་འདྲ་བ། གླང་པོ་ཆེ་དེའི་མིང་ལ་གླང་ཆེན་བཟང་པོའི་རི་ཟེར་བ། དེ་ལྟ་བུའི་གླང་པོ་རིན་པོ་ཆེ་དང་གཙུག་ན་ནོར་བུ་མ་འདྲ་བ་ཞིག་ཡོད་པའི་རྒྱལ་སྲས་དེ་ཉིད་རྒྱལ་སྲིད་ལ་མངའ་གསོལ་ཏེ་རྒྱབ་ཚབ་ལ་དབང་བསྒྱུར། མེ་ཏོག་པདྨའི་ནང་ནས་བརྫུས་ཏེ་སྐྱེས་པའི་བཙུན་མོ་མཚན་ལྡན་ཞིག་མདུན་ཐབས་ལ་བསུས་པས་སྲས་པདྨའི་གཙུག་ཏོར་ཟེར་བ་ཞིག་འཁྲུངས། རྒྱལ་སྲིད་ཆོས་བཞིན་དུ་བསྐྱངས་ནས་རྒྱལ་པོ་དེའི་མངའ་འབངས་ཐམས་ཅད་བདེ་ཞིང་སྐྱིད་པར་ཡུལ་གཞན་དག་གིས་ཀྱང་སྨོན་ལམ་འདེབས་ས་ཞིག་ཡོད་པ་རེད། རྒྱལ་པོའི་མངའ་འོག་ཏུ་རྒྱལ་ཕྲན་མང་བོ་ཡོད་པ་དེའི་ནང་ནས་རྒྱལ་པོ་བཟོད་དཀའ་ཟེར་བ་དེ་རྒྱལ་པོས་ལྷག་གིས་བཀའ་དྲིན་གྱིས་བསྐྱངས་མྱོང་ཞིང་། གཞན་དང་མ་འདྲ་བའི་འདང་ཆེན་ཡིན་པས་དུས་རྒྱུན་མདུན་ན་འདོན་དང་མཛའ་གྲོགས་འདང་ཆེན་གྱི་གྲབས་ལ་བཞག་སྟེ། ཁོང་དང་མཉམ་པོར་འགྲོགས་ནས་འགྲོ་བ་ཞིག་ཡིན། ཉིན་ཞིག རྒྱལ་པོ་བཟོད་དཀའ་ལ་སོགས་པ་ཕྱོགས་དེའི་རྒྱལ་ཕྲན་དང་ནི་སྲས་བློན་པོ་བཙུན་མོ་འཁོར་དང་བཅས་པའི་དབུས་ནས་རྒྱལ་པོས་མཆོད་སྦྱིན་གྱི་ཆོ་ག་ཆེན་པོ་ཞིག་གི་སྐབས་ལ་སྦྱིན་སྲེག་ཆེན་པོ་ཞིག་བླུགས་དུས། ལྷའི་དབང་པོ་བརྒྱ་བྱིན་ནས་རྒྱལ་པོའི་བསམ་པ་ཅི་འདྲ་ཞིག་ཡིན་པར་བརྟག་དཔྱད་བྱེད་རྒྱུའི་ཆེད་དུ། སྦྱིན་སྲེག་གི་མྱེ་ནང་ནས་ཚུར་སྲིན་པོ་འཇིགས་སུ་རུང་བ་ཞིག་ཏུ་བརྫུས་ནས་བུད་དེ། རྒྱལ་པོའི་མདུན་ལ་གཅར་ནས་ཁོ་ལ་བཟའ་བཏུང་ཞིག་བྱིན་ཟེར་བས། རྒྱལ་པོས་དེ་ལ་ཟ་རྒྱུ་དང་འཐུང་རྒྱུ་སྣ་ཚོགས་བྱིན་པར། དེའི་ཟ་འཐུང་མི་བྱེད་པའི་སྟེང་ལ། ད་རུང་ཁྲེལ་བགད་ཅིག་བྱས་ནས་ཁོ་བོར་བསད་མ་ཐག་པའི་ཤ་ཁྲག་དྲོན་པོ་རླངས་པ་མ་ཡལ་བ་ཞིག་དགོས་ཅེས་པས། རྒྱལ་པོའི་སེམས་ནད་དུ་ལོགས་ནས་ངོ་མདོག་འགྱུར། བསད་མ་ཐག་པའི་ཤ་ཁྲག་དྲོན་པོ་རླངས་པ་མ་ཡལ་བ་ཞིག་སེམས་ཅན་གྱི་སྲོག་ལ་འཚེ་བ་མ་བྱས་ན་གང་ནས་ཁྱེར་ཡོང་། འཆི་བ་རང་སྲོག་ལ་ཐུག་ནའང་སེམས་ཅན་གཞན་ལ་འཚེ་བ་མི་བྱེད། ད་ནས་སྦྱིན་རྒྱུ་མེད་ན་ཡང་འདིས་རེ་ཐག་ཆད་འགྲོ་བས། ད་ནི་རང་གི་ཤ་ཁྲག་སྦྱིན་པའི་དུས་ལ་བབས་པ་རེད་དགོངས་ནས། ཁོང་གིས་ང་རང་གི་ཤ་ཁྲག་ཁྱོད་ལ་སྦྱིན། ཁྱེད་ཀྱིས་ཅི་དགའ་གང་དགར་ལོངས་སུ་སྤྱོད་གསུངས་དུས། དེས་འཁོར་ཐམས་ཅད་ཟིང་ཆ་ཕོག་ནས་ཁྱེད་ཀྱིས་དེ་འདྲ་མ་གསུངས་། དེ་འདྲ་མཛད་རྒྱུ་ཡོད་པ་མ་རེད་ཞུ་དུས། བཟློག་ཐབས་མེད་པར་རྒྱལ་པོས་རང་གི་གྲི་ཤང་ལང་གྱེན་ལ་ཤབས་ནས། མགུལ་གྱི་སྐེ་རྩར་ཁྲག་གཏར་ཏེ་སྲིན་པོ་ལ་འཐུང་དུ་བཅུག་པ་རེད། སྲིན་པོས་རྒྱལ་པོའི་ཁྲག་འཇུབ་ཐེངས་གཅིག་གིས་འཇུབ་དུས་སྐེ་ལ་མ་ཐུག་གི་བར་དུ་འཐུང་། ད་རུང་མ་ངོམ་པའི་རྣམ་འགྱུར་བསྟན་ཡོང་དུས་རྒྱལ་པོས་རང་གི་ཤ་བཅད་ནས་བྱིན། སྲིན་པོས་རྒྱལ་པོའི་སྐུ་ལུས་ཀྱི་ཤ་རུས་པ་ལ་མ་ཐུག་གི་བར་དུ་ཟོས་སོང་། དེའི་སྐབས་དེར་ད་རུང་རྒྱལ་པོའི་སྐུ་སྲོག་ཤོར་མེད་པར། འཁོར་ཐམས་ཅད་ཀྱིས་ད་ནི་རྒྱལ་པོའི་སྐུ་སྲོག་མི་འཚོ་བར་བསམ་ནས། དེར་ཐམས་ཅད་ཀྱིས་མྱ་ངན་དང་སྨེ་ངག་བཏོན། བཙུན་མོ་དེ་བརྒྱལ་ནས་དྲན་མེད་དུ་གྱུར་ནས་ས་ལ་འགྱེལ། རྒྱལ་པོའི་དྲན་པ་མ་ཉམས་ནས་ཞལ་གྲགས་ཐུབ་པ་ཙམ་ཡོད་དུས། ལྷའི་དབང་པོ་བརྒྱ་བྱིན་ཤིན་ཏུ་ནས་ཀྱང་མགུ་ནས་རང་གཟུགས་དངོས་སུ་བསྟན་ཏེ། ཁོ་བོ་ནི་ལྷའི་དབང་པོ་བརྒྱ་བྱིན་ཡིན། ཁྱེད་ཀྱི་ཤ་ཁྲག་ལ་རྔམས་ནས་ཁོང་ཡོང་པ་མིན། ཁྱེད་ཀྱིས་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་བསྐྱེད་པ་དེ་བརྟན་པོ་ཨེ་ཡིན་ཉམས་ཚོད་བརྟག་ཕྱིར་ཡོང་བ་ཡིན། ད་སྦྱིན་པའི་འཕྲོ་ཆོད་གསུངས་ནས། ལྷ་ཡུལ་གྱི་བདུད་རྩི་ཞིག་བླངས་ཡོང་ནས་རྒྱལ་པོའི་རྨ་ཁ་ལ་བཏབ་པས་རྒྱལ་པོ་སྔོན་ལྟར་གནོད་མེད་དུ་གྱུར་སོང་བ་རེད། རྒྱལ་པོས་ཅི་མཛད་ནི་ཆོས་ཀྱི་བྱ་བ་ཡིན་རྒྱུ་རེད། སྦྱིན་སོགས་ཕར་ཕྱིན་དྲུག་གི་མཛད་པ་ཏག་ཏག་སྐྱོང་གིན་ཡོད་པས། དེའི་རྗེས་ནས་ཡང་ཉིན་ཞིག རྒྱལ་པོར་གླང་པོ་ཆེ་བཟང་པོའི་རི་ཞེས་པ་ནོར་སྣ་ཁྱད་འཕགས་ཤིག་ཡོད་པ། ཁོང་གི་བློན་པོ་ཚངས་པས་བྱིན་ལ་ཞེས་པ་དེ་ལ་བྱིན། ཡང་དེའི་སྐབས་ཞིག་ལ། ཡུལ་ཕྱོགས་དེ་དང་ཧ་ཅང་ཐག་མི་རིང་བའི་དྲང་སྲོང་མ་རི་རྩེ་ཟེར་བའི་སློབ་མ། བསམ་གཏན་ཐོབ་སོང་བ་ཞིག་ཡོད་པ་དེ་རྒྱལ་པོ་གཙུག་ན་ནོར་བུའི་ཕོ་བྲང་ལ་ཐོན་ཡོང་དུས། རྒྱལ་པོ་གཙུག་ན་ནོར་བུས། དེ་ལ་བཀུར་སྟི་རིམ་གྲོ་ཆེན་པོ་བྱས་ནས་མགྲོན་བསུ་བསྙེན་བཀུར་བྱས་ཏེ་ཁྱེད་ལ་ཐུགས་ཀྱི་བཞེད་དོན་ད་རུང་ཅི་ཡོད་ཅེས་དྲིས་པས། ཁོང་རང་ཉིད་ཀྱི་སློབ་དཔོན་རྒས་པ་མ་རུ་རྩེས་རིག་བྱེད་བསླབ་རོགས་བྱས་པའི་སྐུ་ཡོན་ལ། ཞབས་ཞུ་བྱེད་པ་ཞིག་འབུལ་རྒྱུ་ཨེ་ལོན་བསམ་ནས་དེའི་ཆེད་དུ་ཁྱེད་ཀྱི་མདུན་ལ་ཡོང་བ་ཡིན། ཁྱེད་ལ་ཅི་ཞིག་བསླང་ན་སྦྱིན་པར་ཐོས་ནས་ཡོང་བ་ཡིན། ཡོང་དོན་ངོ་མ་ཁྱེད་ཀྱི་བཙུན་མོ་དང་ནི་སྲས་པདྨའི་གཙུག་ཏོར་གཉིས་ཀ་སློང་དུ་ཡོང་བ་ཡིན་ཞེས་ཞུས་པ་ལ། རྒྱལ་པོས་དེ་གསན་དུས་ཐེ་ཚོམ་ཙམ་ཞིག་མ་མཛད་པར་དགའ་བཞིན་སྤྲོ་བཞིན་གུས་པ་དང་བཅས་བཙུན་མོ་དང་སྲས་གཉིས་ཀ་གནང་བ་རེད། དེས་སྲས་དང་ཡུམ་གཉིས་ཁྲིད་སོང་ནས་སློབ་དཔོན་མ་རུ་རྩེ་ལ་འབུལ་དུ་སོང་ངོ། དེའི་སྐབས་སུ་རྒྱལ་ཕྲན་གྱི་རྒྱལ་པོ་བཟོད་དཀའ་ཞེས་པ། རྒྱལ་པོ་དང་མཉམ་དུ་ག་དུས་ཡིན་ན་སྐུ་འཁོར་ནང་མའི་གྲལ་ན་འཁོད་པ་དེས། རྒྱལ་པོ་གཙུག་ན་ནོར་བུའི་གླང་ཆེན་ལ་རློམ་སེམས་སྐྱེས་ནས། ཁོང་གི་ཡུལ་ཁམས་ནས་བང་ཆེན་པ་ཞིག་ཆེད་གཏད་ཀྱིས་མངག་ནས་གཙུག་ན་ནོར་བུའི་མདུན་དུ་བཏང་། ཁོ་བོར་ཁྱེད་ཀྱི་གླང་བོ་ཆེ་དེ་བྱིན་ཞེས་སྐད་བསྐུར་ཡོང་བར། གཙུག་ན་ནོར་བུ་ཁོང་གིས་གླང་པོ་ཆེ་སྔོན་མ་ནས་བྲམ་ཟེ་མདུན་ན་འདོན་ཚངས་བྱིན་ལ་སྦྱིན་ཚར་བ་རེད། ཐེངས་འདིར་ཁྱེད་ཀྱི་འདོད་པ་སྐོང་རྒྱུའི་ཐབས་ཡོད་མ་ཐལ་གསུང་ནས་ལན་དེ་མི་བསྐུར་ཐབས་མེད་རེད་སོང་དུས་གུས་ཕྱག་ཞེ་ས་དང་བཅས་པར་འཕྲིན་ལན་ཕྱིར་ལ་བསྐུར་དུས། དེ་ལ་རྒྱལ་པོ་བཟོད་དཀས་རྒྱལ་པོའི་ཁར་མ་ཉན་ནས། གླང་བོ་ཆེ་མ་བྱིན་ན་དམག་རྒྱག་རྒྱུ་ཡིན་ཞེས་དམག་ངོ་མས་ཕབས་ནས་ཡོང་དུས། རྒྱལ་པོ་གཙུག་ན་ནོར་བུ་ཐུགས་ཕམ་སྟེ་མྱིའི་འདོད་རྔམས་ཟེར་བ་ཅི་འདྲའི་སྡུག་པོ་ཞིག་རེད། འདོད་ཞེན་ཆེ་བའི་དབང་གིས་གྲོགས་མཛའ་བཤེས་བཟང་པོ་ཡིན་ཡང་། འདི་ལྟར་སྐད་ཅིག་གཅིག་ལ་དགྲ་འགྱུར་པ་རེད། ད་འཛིང་བཞག་ན་སླ་མོ་བྱས་ནས་ཐུབ་ཀྱང་དེ་སེམས་ཅན་མང་པོ་ཞིག་ལ་གནོད་བསྐྱལ་འགྲོ། དེ་བས་ང་རང་བྲོས་སོང་ན་དགའོ་སྙམ་དུས། རང་སངས་རྒྱས་རྫུ་འཕྲུལ་ཅན་བཞི་ས་དེ་ལ་བྱོན་ཡོང་ནས་རྒྱལ་པོ་ཆེན་པོ་ནགས་སུ་ཕེབས་པའི་དུས་ལ་བབས་པ་ཡིན། ཞེས་རང་སངས་རྒྱས་བཞིའི་རྫུ་འཕྲུལ་གཞན་བརྟེན་གྱིས་དབེན་པའི་ནགས་སུ་བྱོན་པ་རེད། ཤུལ་གྱི་ཡུལ་ཁམས་རྒྱལ་པོ་བཟོད་དཀའི་དམག་གིས་གཏོར་གྲབ་བྱེད་དུས། བློན་པོ་ཐམས་ཅད་ཀྱིས་ཅི་བྱེད་འདི་བྱེད་མེད་པས་དྲང་སྲོང་མ་རུ་རྩེའི་མདུན་ལ་སོང་ནས། སྲས་པདྨའི་གཙུག་ཏོར་ཕྱིར་ལ་གནང་རོགས་ཞུས་པས། དྲང་སྲོང་གིས་ཀྱང་གནང་ཏེ། སྲས་པདྨའི་གཙུག་ཏོར་རྒྱལ་སར་ཚུར་བྱོན་ནས་དམག་གི་དུང་ཆེན་བཤམས། སྲས་ཀྱིས་དམག་དཔོན་བྱས་ཏེ་གཡུལ་བགྱེ་བས་རྒྱལ་པོ་བཟོད་དཀའ་ཕམ་ནས་རང་གནས་སུ་ཕྱིར་བྲོས་ཏེ། ཡུན་རིང་མ་འགོར་བར་རྒྱལ་པོ་བཟོད་དཀའི་བསམ་ངན་སྦྱོར་རྩུབ་དེའི་རྣམ་སྨིན་གྱིས་ཁོང་གི་མངའ་འོག་གི་ཡུལ་ཁམས་དེར་ནད་དང་མུ་གེ་ཆེན་པོ་ཞིག་ཡོང་བའི་སྐབས་ལ། རྒྱལ་པོ་གཙུག་ན་ནོར་བུ་དྲང་སྲོང་མ་རུ་རྩེ་ཡོད་སའི་ཕྱོགས་ཀྱི་ནགས་མཐའ་མྱུལ་ནས་ཕེབས་གྱིན་ཡོད་དུས། བཙུན་མོ་དྲང་སྲོང་གི་གཡོག་མོ་བྱས་ནས་ནགས་ནས་ཤིང་ཏོག་འཐུ་གཞིན་ཡོད་པའི་སྐབས་ལ། རྒྱང་རིང་ནས་མི་མངོན་པར་གཅར་ནས་དྲང་སྲོང་ལ་ཡོན་ཕུལ་ནས་ཞལ་འཛོམ་བྱུང་། རྒྱལ་པོ་བཟོད་དཀའི་འབངས་ནད་མུག་གིས་མནར་བར་སྡུག་ཐུག་ནས་ཁོ་རང་གི་མངའ་འོག་གི་བྲམ་ཟེ་བསམ་ཤེས་ཐམས་ཅད་ཚུར་བསྡུས་ནས། ད་ཅིའི་དགའ་གང་གི་དྲག་དྲིས་ནས་བློ་ཁ་བསྡུར་ཡོང་དུས་བྲམ་ཟེ་ཐམས་ཅད་ཀྱིས་ཁ་གཅིག་གྲགས་ཀྱིས། རྒྱལ་པོ་གཙུག་ན་ནོར་བུའི་གཙུག་གི་ནོར་བུ་ལོན་ན། ཡུལ་ཁམས་སྔ་ན་མེད་པའི་སྐྱིད་ལ་འགྱུར་རྒྱུ་ཡོད་རེད་ཟེར་དུས། བཟོད་དཀས་སུས་བསླང་ནའང་སྟེར་མི་སྲིད་ཟེར་བ་ལ། དེ་དག་གིས་དེ་ལ་བསླང་ན་མི་སྦྱིན་པ་མི་སྲིད་ཟེར་ནས་བྲམ་ཟེ་ཞིག་སློང་བར་མངགས་པས། རྒྱལ་པོ་གཙུག་ན་ནོར་བུ་ནགས་ན་ཡོད་པ་དང་མཇལ་ཏེ་ལོ་རྒྱུས་དང་བཅས་པ་བཤད་དེ་ནས་ནོར་བུ་བསླང་དུས། རྒྱལ་པོས་ཁྱེད་ཀྱིས་ཆོད་ནས་ཁྱེར་སོང་གསུངས། དེའི་ཚེ་ས་གཡོ་བ་ལ་སོགས་པ་ལྟས་བཟང་པོ་བྱུང་སྟེ་ནམ་མཁའི་ལྷ་ཡུལ་གྱི་ལྷའི་གཙོ་བོ་དང་ལྷ་ཐམས་ཅད་བྱོན། རྒྱལ་པོ་རང་གི་རྒྱལ་གཞིས་ཀྱི་འབངས་ལ་སོགས་པ་ལྷ་མྱི་མང་པོ་ཞིག་འདུས་ནས་རྒྱལ་པོ་ཁྱེད་ལ་ཅི་རེད་ཐལ་ཞུས་དུས། རྒྱལ་པོ་ཡུན་ཅིག་ལ་བརྒྱལ་སོང་བ་སླར་དྲན་པ་སོས་ནས་ཡར་བཞེངས་ཏེ། ཁྲག་ཕྱག་ཕྱིས་ནས་བཟོད་དཀའ་གཙུག་ཏོར་སློང་བར་སླེབས་པ་ལ། ངས་གཙུག་ཏོར་བཅད་ནས་བྱིན་པས་ན་ཟུག་ཅུང་ཙམ་ཡོང་བ་ལས་གཞན་ཅི་ཡང་མ་རེད་ཅེས་གསུངས་དུས། ལྷའི་བུ་ཞིག་གིས། ཁྱེད་ཀྱིས་རང་གི་སྐུ་ལུས་ལ་རང་འགྲུབ་དུ་ཡོད་པའི་གཙུག་ཏོར་བཅད་ནས་བྱིན་པ་ཅི་ཞིག་གི་ཐུགས་འདོད་ཡོད་པ་རེད་ཞུ་དུས། བཟོད་དཀའི་ཡུལ་གྱི་ནད་དང་མུ་གེ་མེད་ཐབས་མ་གཏོགས་གཞན་དུ་ཅི་ཡང་འདོད་པ་མེད་མོད། འདོད་པ་ཆེན་པོ་གཞན་ཞིག་དུས་རྟག་ཏུ་ཡོད་བཞིན་པ་ནི་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་རྒྱུ་དེ་རེད་གསུངས་པ་ལ། དེ་ནས་ལྷ་དེས། ཁྱེད་ཀྱིས་རྒྱལ་བུ་གཟོད་དཀའ་ལ་གཙུག་གི་ནོར་བུ་བཅད་ནས་སྦྱིན་དུས་འགྱོད་པ་མ་སྐྱེས་སམ་ཞུས་དུས། འགྱོད་པ་མེད་གསུངས། ལྷ་ཚངས་པས་ཁྱེད་ཀྱི་སྐུ་ལུས་ལ་ན་ཚ་ཟུག་གཟེར་ཡོད་པ་མཐོང་འདུག་པས་འགྱོད་པ་མེད་ཟེར་བ་བདེན་པར་མི་འཛིན་ཞུ་དུས། རྒྱལ་པོས་སྐུ་སྟོད་གྱེན་ལ་བསྲིངས་ནས་བཟོད་དཀའ་འཁོར་བཅས་ལ་བྱིན་པས་ང་ལ་འགྱོད་པ་མེད་པ་བདེན་པ་ཡིན་ན། དེའི་བདེན་པའི་མཐུ་སྟོབས་ཀྱིས་ངའི་ལུས་འདི་སྔ་མ་ཁོ་ན་བཞིན་དུ་འགྱུར་བར་ཤོག་གསུངས་པས། དེ་མ་ཐག་བདེན་པའི་སྟོབས་དེས་སྐུ་ལུས་སྔོན་མ་ཇི་བཞིན་མཛེས་པ་ཞིག་ཏུ་གྱུར་སོང་བ་རེད། དེ་དུས་འཁོར་ཐམས་ཅད་ཀྱིས་རྒྱལ་པོ་ཕོ་བྲང་དུ་ཕྱིར་ལ་བྱོན་རོགས་ཞུས་དུས་མ་བྱོན་པ་རེད། དེའི་སྐབས་སུ་སྔར་གྱི་རང་སངས་རྒྱས་གདན་འདྲེན་ཞུ་མཁན་བཞི་པོ་འོང་ནས། ཁྱེད་ཀྱིས་དགྲ་ལ་ཡང་ཕན་པར་བཞེད་ན་གཉེན་རྣམས་ཅི་སྟེ་འདོར། ད་ནི་ཕོ་བྲང་དུ་གཤེགས་རན་ཞུས་ནས། ཕོ་བྲང་དུ་གདན་ཞུ་བྱས་ཏེ་སྔར་བཞིན་འཁོར་འབངས་ཐམས་ཅད་ཕན་པ་དང་བདེ་བར་མཛད་པ་རེད། འདིའི་རྟོགས་བརྗོད་འདི་བདག་ཅག་གི་སྟོན་པས་སློབ་པ་ལམ་གྱི་གནས་སྐབས་ཀྱི་བྱང་སེམས་ཀྱི་བྱ་དཀའི་སྤྱོད་པར་བསླབ་པའི་ལེའུ་ཚན་དུམ་བུ་ཞིག་རེད། འདི་ཚོ་བྱང་ཆུབ་སྨོན་པའི་བསླབ་བྱ་དང་གཙོ་བོར་འབྲེལ་ནས་གསུངས་པ་ཞིག་རེད། །དེ་ཡང་སྨོན་འཇུག་གཉིས་ཀ་བསམ་པས་སྨོན་དང་སྦྱོར་བས་འཇུག་པ་གོང་ནས་བཤད་པ་ལྟར། འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ལ་ཡང་དོན་གྱི་བྱང་ཆུབ་མཆོག་ཏུ་སེམས་བསྐྱེད་ནས་བཟུང་ཕར་ཕྱིན་དྲུག་ལ་བསླབ་དགོས་པ་གཞིར་བཞག་རེད།།

ད་ཕར་ཕྱིན་ཟེར་ན་ཅི་ཟེར་བ་རེད་སྙམ་ན། ཚུ་རོལ་འཁོར་བ་ནས་བལྟས་ན་ཕ་རོལ་མྱ་ངན་ལས་འདས་པ། ཕ་རོལ་མྱ་ངན་ལས་འདས་པ་དེའི་ས་ལ་ཕྱིན་པར་བྱེད་པའི་ཐབས་སུ་གྱུར་པས་ན་ཕར་ཕྱིན་གསུངས་པ་རེད། འདིའི་གྲངས་དང་གོ་རིམ་ངེས་པའི་རྒྱུ་མཚན་ལ་སོགས་པ་མང་། དེ་ཡང་ཚོགས་སྦྱོར་གྱི་ལམ་མོས་པས་སྤྱོད་པའི་ས་ཡི་ཕར་ཕྱིན་འདི་ཕར་ཕྱིན་བཏགས་པ་བ་དང་མཐོང་ལམ་ཆོས་ཉིད་ཀྱི་བདེན་པ་མཐོང་ནས་ཕར་ཕྱིན་མཚན་ཉིད་པར་འགྱུར་བ་རེད། བཏགས་པ་བ་ཟེར་ན་ཡིན་ཙམ་པ་དང་མཚན་ཉིད་པ་ཟེར་ན་ངོ་མ་བོའམ་དངོས་ལ་ཟེར་བ་རེད།།

དེ་ཡང་སྨོན་འཇུག་གི་བསླབ་བྱའི་སྐོར་ལ་དབྱེ་བ་རྒྱ་ཆེ་ནི་རེད་ད། ལས་དང་པོ་པས་ཀུན་མཁྱེན་ཆེན་པོས། སྨོན་པའི་བསླབ་བྱ་ཚད་མེད་བཞི་བསྒོམ་ཞིང་། །འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱོད། །གསུང་རྒྱུའི་ཚིག་དེའི་ཐོག་ནས་སྦྱང་ན་གོ་སླ་ཉན་བདེ་རེད། སྨོན་པའི་བསླབ་བྱ་ཚད་མེད་བཞི་བསྒོམ་ཞིང་ཞེས་པའི་ཚིག་དང་པོ་ནི་སྨོན་སེམས་ཐོབ་ལ་མ་ཉམས་པར་བྱེད་པའི་འདུན་པ་ཅན་ཞིག་ཧ་ཅང་གནད་གལ་ཆེ། ཐག་རིང་སའི་རྒྱ་གར་རྡོ་རྗེ་གདན་ལ་ཐོན་དུས་ཇོ་བོ་བྱང་ཆུབ་ཆེན་པོར་མཇལ་དགོས་པས་དེར་ཐོན་དུས་དེའི་མདུན་སྒོ་རྙེད་རྒྱུ་གལ་ཆེ་རུང་། དེ་ལ་མ་ཐོན་གོང་གི་རང་གི་སྒོ་ཐེམ་བརྒལ་ནས་གོམ་པ་བླངས་དུས་ནས་རྡོག་སྣ་ཐོགས་མི་འགྲོ་རྒྱུའི་གོམ་ཁ་གཟབ་རྒྱུ་དང་པོ་གནད་ཆེ་བ་རེད།།

ག ཚད་མེད་བཞིའི་སྒོ་ནས་བློ་སྦྱོང་བ།

དེ་བས་ན་དང་པོ་ཚད་མེད་བཞིའི་སྐོར་གཟབ་ནན་སྦྱངས་རྒྱུ་བོ་རང་རེའི་ལས་དང་པོ་པ་ཐམས་ཅད་ལ་འཕྲོད་པའི་སྨན་ངོ་མ་དེ་ཡིན། ལས་དང་པོ་པ་ཟེར་ན་ཅི་རེད་ཅེ་ན། གསར་བུ་ཆོས་ཞུགས་བྱས་མ་ཐག་པ་ཞིག་ལ་ཟེར་བ་རེད་མོད། ལོ་ཚོད་ནམ་ཚ་ཡར་ཟད་ལ་ཐོན་ཚར་བ། ཆོས་ཞུགས་བྱས་ནས་མི་ལོ་མང་དུ་སོང་ཡང་། སྦྱོང་པ་ཉམས་ལེན་གྱིས་ལག་མ་ཁྱག ནར་མ་སོན་པ་ཐམས་ཅད། ལས་ལ་ཞུགས་ནས་ལས་མ་འགྲུབ་པའི་ཚོད་ཀྱིས་ལས་དང་པོ་བ་ཟེར་ན་ཆོག་པ་རེད། བྱང་ཆུབ་ཀྱི་སེམས་རིན་པོ་ཆེ་ཟེར་བའི་ཡོད་ན་ཐར་བ་སྒྲུབ་ལ་དེས་ཆོག་པ། མེད་ལ་ཐར་བ་སྒྲུབ་ལ་ཐབས་ཆག་སོང་བའི་རྣམ་དག་བྱང་ཆུབ་ཀྱི་སེམས་འདི་མདོ་སྔགས་ལམ་གྱི་གཞུང་རྟ། རྒྱལ་བ་སྲས་དང་བཅས་པའི་བགྲོད་པ་གཅིག་པུའི་ལམ་དེ་རེད། ཡིད་བཞིན་གྱི་ནོར་བུ་གསོལ་བ་བཏབ་ན་འདོད་རྒུ་ངང་གིས་འབྱུང་ཟེར་བ་དོན་ངོ་མས་བཤད་ན་བྱང་ཆུབ་སེམས་ཟེར་བ་འདི་ཡིན་ནི་རེད། འཇིག་རྟེན་གྱི་ནོར་བུ་ཕལ་གྱིས་ཚེ་འདིའི་བསམ་དོན་འགྲུབ་པ་ཙམ་ལ་ཆེ་ཐང་དུ་བཟུང་ནའང་། འདིས་ནི་མཐའ་ཡས་སེམས་ཅན་ཡོངས་རྫོགས་ལ་གཏན་དུ་བདེ་བའི་སྒོ་འཕར་ཕྱེས་ནས་མི་ཟད་བདེ་བའི་ལོངས་སྤྱོད་ཀྱི་གཏེར་མཛོད་ཅིག་ལ་མངའ་དབང་འབྱོར་ཏེ་སྲིད་ཞིའི་འཇིགས་པ་ཐམས་ཅད་དང་བྲལ་བའི་ཁམས་གསུམ་འགྲོ་བ་ཡོངས་རྫོགས་ཀྱི་མགོན་དང་དཔུང་གཉེན་དམ་པ་རྨད་བྱུང་ཆོས་ཀྱི་རྒྱལ་པོའི་རྒྱལ་ཚབ་ལ་སྦྱོར་བ་ཡིན་པས། དེ་ཉིད་མ་སྐྱེས་པ་སྐྱེ་བའི་ཐབས་ལ་ཚད་མེད་བཞིའི་བློ་སྦྱོངས་དགོས་པ་རེད། སྐྱེས་པ་མི་ཉམས་པར་འཕེལ་བའི་ཐབས་ཀྱི་བསླབ་བྱ་བསླབ་པ་ལ་ཡང་ཚད་མེད་བཞི་འདི་མེད་ན་ཐབས་མེད་རེད། དང་པོར་ཐེག་ཆེན་གྱི་ལམ་ལ་ཞུགས། བར་དུ་ལམ་སྦྱངས་དུས་དང་མཐར་སངས་རྒྱས་པའི་བར་ལ་ཚད་མེད་བཞི་དང་འབྲལ་ཐབས་མེད་པ་རེད། དེ་ཡང་ལམ་དུས་སུ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ནང་ན་དང་པོ་ཚད་མེད་བཞི་ཡོད་པ་རེད། དེ་བཞིན་འབྲས་དུས་སུ་ཡིན་ན་ངས་རྒྱས་ཀྱི་ཚད་མེད་བཞི་ཡང་ཚད་མེད་བཞི་འདི་རེད།།

འདི་རྒྱས་པར་བཤད་ན་ཚད་མེད་བཞི། འབྲིང་དུ་བསྡུས་ན་བྱམས་སྙིང་རྗེ་གཉིས་ཀ དེ་ཡང་ཚུར་བསྡུས་ན་སྙིང་རྗེ་ཉག་མ་གཅིག་པོ་འདི་བསྒོམ་རྒྱུ་དེའི་ནང་ལ་འདུས་པ་རེད། ད་བྱང་ཆུབ་སྒྲུབ་པ་ལ་མེད་ཀི་ཐབས་མེད་འདི་བས་གནད་ཆེ་ཡོད་པ་མ་རེད། དེ་ཡང་བྱམས་དང་སྙིང་རྗེ་དགའ་བ་བཏང་སྙོམས་བཞི་པོ་འདི། ངེས་འབྱུང་གི་ལམ་གྱིས་མ་ཟིན། བྱང་ཆུབ་སེམས་ཀྱིས་མ་ཟིན། སྟོང་ཉིད་ཀྱི་ལྟ་བས་མ་ཟིན། བདག་མེད་རྟོགས་པའི་ཤེས་རབ་ཀྱིས་མ་ཟིན་བཞག་ན་འདི་བཞི་པོར་ཚད་མེད་བཞི་ཟེར་པ་མིན། ཚངས་པའི་གནས་པ་བཞི་ཟེར་པ་རེད། འདི་བཞི་བསྒྲུབ་ན་གཟུགས་ཁམས་གནས་རིས་བཅུ་བདུན་གྱི་བསམ་གཏན་དང་པོའི་ཚངས་རིས་དང་ཚངས་པ་མདུན་ན་འདོན། ཚངས་ཆེན་སོགས་ལ་སྐྱེ་བྱེད་ཀྱི་རྒྱུ་རེད། གནའ་ཞིག་ལ་མ་རྒན་མ་བུ་གཉིས་ཆུ་ཆེན་ཞིག་གིས་ཁུར་སོང་བ་ལ། མ་ཡིས་བསམ་ན་བུ་མོ་འདི་ཐར་སོང་ན་བསམ། བུ་མོས་བསམ་ན་ཨ་མ་འདི་ཐར་སོང་ན་བསམ། དེ་ལྟར་གཉིས་ཀས་གཅིག་གིས་གཅིག་ཐར་ན་བསམ་པ་ལས་རང་ཉིད་ལ་བསམ་བློ་མ་བཏང་བའི་བྱམས་སྙིང་རྗེ་སླད་མེད་དེས་གཉིས་ཀ་ཆུ་ནང་ནས་མ་ཐར་མོད་ཚེ་འཕོས་ནས་ཚངས་པའི་ལྷ་ཡུལ་ལ་སྐྱེས་པ་རེད།།

༡ གཞུང་བཤད་པའི་ལུགས་ཀྱི་ཚད་མེད་བཞི།

འདི་བཞི་ཚད་མེད་བཞི་ལ་འགྱུར་རྒྱུར་ཆ་རྐྱེན་གང་ཞིག་ཚོགས་དགོས་ནི་རེད་ཅེ་ན། གཞུང་བཤད་པའི་ལུགས་ཡིན་ན་དམིགས་པ་ཚད་མེད། ཚོགས་ཚད་མེད། ཆོས་ཚད་མེད། ཡེ་ཤེས་ཚད་མེད་བཞི་བོ་ཚང་དགོས་པ་རེད། དམིགས་པ་ཚད་མེད་ནི་མཐའ་ཡས་སེམས་ཅན་གཅིག་ཀྱང་མ་ལུས་པར་ཐམས་ཅད་ལ་དམིགས་པ། ཚོགས་ཚད་མེད་ཟེར་ན་བསོད་ནམས་དང་ཡེ་ཤེས་ཀྱི་ཚོགས་གཉིས་འགྲུབ་པའི་རྒྱུ་སྒྲུབ་རྒྱུ། ཆོས་ཚད་མེད་ཟེར་དུས་སངས་རྒྱས་ཀྱི་སའི་འབྲས་ཆོས་ཉེར་ལྔ་དང་། ཡེ་ཤེས་ཚད་མེད་ནི། ཤེས་དང་ཤེས་བྱ་ཐ་མི་དད་པའི་དེ་བཞིན་གཤེགས་པའི་ཡེ་ཤེས་ལ་གོ་དགོས་པ་རེད། དེ་བཞི་ཚོགས་རྒྱུ་དེ་གཞུང་བཤད་པའི་ལུགས་རེད།།

༢ མན་ངག་པའི་ལུགས་ཀྱི་ཚད་མེད་བཞི།

ད་མན་ངག་གི་ལུགས་ལྟར་བཤད་ན། དམིགས་པའི་ཡུལ་ཚད་མེད། རྣམ་པའི་བློ་ཚད་མེད་པ། དེའི་འབྲས་བུ་ཚད་མེད་པ་གསུམ་བྱས་ནས་བཤད་ན་གཅིག་པ་འདྲ་བོ་རེད། འདིའི་གོ་རིམས་ཀྱི་ཐོག་ནས་བཤད་ན་གཞུང་བཤད་པའི་ལུགས་ལྟར་དུ་བགྲང་བའི་རིམ་པ་ལྟར་བྱམས་དང་སྙིང་རྗེ་དགའ་བ་བཏང་སྙོམས་བཞི་ལ་ཟེར་ནི་རེད་མོད། སྒོམ་པའི་ཐད་ནས་མན་ངག་གི་ལུགས་བཞིན་དང་པོ་བཏང་སྙོམས་ནས་མགོ་བཙུགས་ནས། ད་ལོ་ང་རང་ཚོའི་ཆོས་ཁྲིད་འདི་བསྒོམ་གཙོ་བོར་བྱ་རྒྱུའི་ཆོས་ཁྲིད་ཞིག་ཡིན། ད་སྔ་སུ་ཡིན་རུང་ཆོས་ཆེ་ཚད་ཆུང་མིན་རེ་ཉན་ཀི་བསྡད་པ་རེད། མདོ་རྒྱུད་བཀའ་དང་བསྟན་བཅོས་ཡོད་ཚད་མྱི་ཚེ་ལ་ཉན་ན་ཟད་རྒྱུ་ཡོད་མ་རེད། ཐོས་པ་མང་བ་ཚུར་ལ་བཅུད་དུ་དྲིལ་ནས་རང་རྒྱུད་ཉམས་ལེན་གྱི་གནད་དུ་སྨིན་དགོས་པ་རེད། གོ་ཚད་རྫ་རྒྱབ་ཆུ་ཕྱར་རེད་འདུག་རྒྱུ་འདི་ནི་ཐོས་བསམ་གཉིས་ཀ་བྱས་ཀྱང་མ་བསྒོམ་པའི་སྐྱོན་ཡིན་རེད། ད་དེ་སྒོམ་ཐུབ་པའི་མན་ངག་ཅི་ཡོད་རེད་ཅེ་ན། གང་ཐོས་པ་དེའི་དོན་དེ་མ་ཐག་བསམ་པའམ་དེའི་སྟེང་ནས་རྒྱུད་ཐོག་ལ་བླངས་ཏེ་བསྒོམ། ཐོས་བསམ་སྒོམ་པ་གཅིག་ཆར་དུ་བྱེད་མ་ཐུབ་དུས། དེའི་བར་ནས་ལེ་ལོའི་ཇག་པ་དང་ནི་རྣམ་གཡེང་གི་རྐུན་མ་བདུད་ལས་སྣ་ཚོགས་ཀྱི་དགྲ་ཆེན་དག་དང་ཐུག་སོང་དུས། འུ་བུའི་ཆོས་མགོ་ཐོན་རྒྱུ་འདི་རླུང་ནང་ལ་མར་མེ་བཞག་པ་ལྟར། དུས་ཚོད་སྐར་མ་བཅོ་ལྔའི་ཚེ་ལ་རྣམ་རྟོག་གི་དགྲ་བོས་མི་ཁྱེར་བའི་སྔོན་འགྲོ་དངོས་གཞི་གང་རུང་གི་མཉམ་བཞག་ཐུན་གཅིག་ལ་མགོ་ཐོན་བྱས་ནས་འདུག་མ་མྱོང་བས་ཉམས་མྱོང་ཡོད་པ་མ་རེད། དེས་ན་ཆོས་རའི་ནང་ནས་ཆོས་ཚིག་གཅིག་ཐོས་པ་སེམས་ཐོག་ལ་བླངས་ཏེ། ཕྱིར་ཁྱིམ་ལ་སོང་ནས་དེ་རྒྱུན་དུ་སྒོམ་དགོས་ནི་རེད། མི་སྐྱ་ཕོ་མོའི་སྒོམ་རྒྱག་ཟེར་རྒྱུ་ཞིག་གནའ་ག་གེ་མོ་ཚུན་ཆད་ནས་མ་དར་བ་ཞིག་ཅེས་ཁྲེལ་བགད་དང་ལྷན་དུ་འགོག་རྐྱེན་བྱེད་མཁན་དང་ཐུག་རྒྱུ་ཡོད་རེད་དེ། དེ་ཡང་རང་དོན་རང་གིས་མ་བསྒྲུབས་དུས་མྱི་ཁ་ལ་ཉན་རྒྱུ་ཡོད་པ་མ་རེད། མྱིས་ཅི་མི་ཟེར་ཕྱི་རོལ་མི་སྟེགས་པས་ཀྱང་མཐོ་རིས་ལ་ཐར་བར་བཟུང་ནས་བསམ་གཟུགས་སྒོམ་པ་རེད། ནང་པ་སངས་རྒྱས་པས་ཉན་ཐོས་བྱེ་བྲག་སྨྲ་བ་ཡན་ཆད་དང། དབུ་ཕྱག་རྫོགས་གསུམ་ཚུན་ཆད་ལ། སྒོམ་མི་དགོས་ས་གཅིག་ཀྱང་མེད་པས་ན་སྒོམ་དགོས། སྒོམ་རྒྱུ་དེ་ཡང་མཐའ་གཅིག་ཏུ་མི་མེད་ལུང་སྟོང་དུ་མཐུན་རྐྱེན་མེད་ན་ཆོག་པ་མ་རེད། གཅིག་པུ་ལུང་སྟོང་ཞིག་གི་ནང་ལ་བསྡད་པ་ཙམ་གྱིས་གྲོལ་བ་ཐོབ་ན་ལུང་སྟོང་གི་ནང་ན་བྱ་རི་དྭགས་ཚོ་དབེན་པར་བསྡད་ཡོད་ཀྱང་དེ་དག་སངས་རྒྱས་མི་འདུག དེས་ན་ཁྱིམ་ན་ཡོད་པའི་ཁྱིམ་པ་ཕོ་མོ་ཁྱིམ་གྱི་ལས་ཀས་བྲེལ་མཁན་ཐམས་ཅད་ཀྱིས་ལས་ཀའི་ཞོར་ལ། དྲན་དང་ཤེས་བཞིན་བག་ཡོད་གསུམ་དང་མ་བྲལ་བར་ཉམས་ལེན་སེམས་རྒྱུད་ལ་སྦྱར་རྒྱུ་མ་བརྗེད་ན་དེ་སྒོམ་ཡིན་པ་རེད། ཕྱུགས་འཚོ་འགྲོ་ཞོར་དང་ཡོག་ཡོག་ཞོར། འོ་བཤིགས་འཕྲུལ་ཆས་བཤིགས་ཞོར་དང་སྨན་རིགས་བརྐོ་ཞོར་སོགས་མདོར་ན་གནས་སྐབས་ཐམས་ཅད་དུ་སེམས་ཉམས་ལེན་གྱི་གནད་དང་མ་བྲལ་ན་འགྲོ་འདུག་ཐམས་ཅད་སྒོམ་ལ་འགྱུར་འགྲོ་བ་རེད། དེ་དུས་དུས་ཚོད་ཀྱིས་མི་འདང་རྒྱུ་མེད་ཀི་ཡིན་ན། ཆོས་སྒྲུབ་ལོངས་མི་སྟེར་གི་བསམ་དུས་ཆོས་སྒྲུབ་ལུགས་མི་ཤེས་པའི་རྟགས་རེད། དེ་ཡིན་པའི་རྒྱུ་མཚན་ཅི་རེད་ཅེ་ན། ལས་ཀ་ལས་ཞོར། འགྲོ་ཞོར་འདུག་ཞོར་ལ་ཞེ་སྡང་ཁོང་ཁྲོ་སྐྱེས་ཆོག་གི་ཡིན་ན། ཞེ་སྡང་ཁོང་ཁྲོ་སྐྱེས་རྒྱུ་དེ་མི་དགེ་བ་རེད། ཞེ་སྡང་ལྟ་བུའི་རྩ་བའི་ཉོན་མོངས་འཁོར་ཀུན་འགྲོ་ལྔ་དང་བཅས་པ་ཁོ་རང་ངོ་བོ་ཉིད་ཀྱི་མི་དགེ་བ་རེད། མི་དགེ་བ་སྐྱེས་ཆོག་དུས་དགེ་བ་སྐྱེས་མི་ཆོག་རྒྱུ་ཅི་ལ་ཡོད། མ་ལོབས་ནི་རེད་མ་གཏོགས་དེའི་ཚབ་ལ་དགེ་བ་སྐྱེས་བཏང་ན་སྐྱེས་ཆོག་ལུགས་གཅིག་པ་ཡིན་པ་རེད། ད་རུང་ཚད་མེད་བཞི་འདི་ཚོ་བསྒོམ་རྒྱུ་དང་མ་བྲལ་ན་རང་རྒྱུད་ཀྱི་གདུག་རྩུབ་དང་གནོད་སེམས་ཉམས་ཞན་པའམ་མགོ་ཇེ་དམའ་རུ་སོང་དུས། གཞན་རྒྱུད་ཀྱི་སྡང་སེམས་དང་གནོད་པ་ཡང་དེ་བཞིན་དུ་ཆུང་འགྲོ་ནི་རེད། བྱམས་སྙིང་རྗེ་བྱང་ཆུབ་ཀྱི་སེམས་དང་མ་བྲལ་བར་ཁྱད་པར་དུ་བྱམས་པ་དང་སྙིང་རྗེ་འདི་ཚོ་ཅུང་ཟད་རེ་རྒྱུད་ལ་སྐྱེས་ཐུབ་ན་བཟའ་ཚང་མཐུན་པ། ཁྱིམ་མཚེས་དང་འགྲིག་པོ། བྱ་བ་ཆེན་པོ་བྱེད་མཁན་ཡིན་ན་ལྷག་ཏུ་གོང་འོག་བར་གསུམ་ལ་མི་མཐུན་ས་ཞིག་མེད་དུས་བྱ་བ་འགྲུབ་རྒྱུར་ཕན་ཐོགས་ཆེ་བ་རེད། ད་བློ་ལྡོག་རྣམ་བཞི་ལ་སོགས་པ་འདི་ཚོ་ཅི་ཙམ་གོ་གི་བསྡད་ནའང་རང་གཞན་གཉིས་ཀར་གར་འཕང་འདིར་བརྒྱབ་མེད་པར་ཤིང་མདའ་སྒྲོ་མེད་ནགས་ལ་འཕངས་བ་འདྲ་ཞིག་རེད་འདུག་རྒྱུ་དེ། བསྒོམ་མ་ཐུབ་པའམ་སྒོམ་རྒྱུ་ཉུང། གོ་རྒྱུ་མང་བས་ཆོས་དྲེད་རེད་ནས་བཤད་ཤེས་རུང་དོན་ལ་མེད་པ་རེད་འགྲོ་བ་རེད། ངེད་ཚོ་ལྟ་བུ་ཡིན་ན་དེ་འདྲ་རེད། ད་གཞན་རྒྱུད་བརྟག་པའི་མངོན་ཤེས་མེད་དུས་རང་རྒྱུད་རང་གིས་ཚད་གཞི་ལ་བཞག་ནས་མ་བཤད་དུས་བཤད་ཐབས་གཞན་མེད་པས་དེ་ལྟར་བཤད་པ་ཡིན། ད་སེམས་ཅན་བདེ་བ་རྒྱུ་འབྲས་གཉིས་དང་ལྡན་འདོད་བྱམས་པ་རེད། སེམས་ཅན་སྡུག་བསྔལ་རྒྱུ་འབྲས་གཉིས་དང་བྲལ་འདོད་སྙིང་རྗེ་ཡིན། སེམས་ཅན་ཐམས་ཅད་བདེ་བ་དང་མི་འབྲལ་བར་འདོད་པ་དགའ་བ། སེམས་ཅན་ཆགས་སྡང་གཉིས་དང་བྲལ་བར་འདོད་པ་བཏང་སྙོམས་རེད། དེ་དག་ནི་ཚད་མེད་བཞི་བོའི་རང་གི་ངོ་བོ་ཟེར་ན་མཚན་ཉིད་ཟེར་ན་རྣམ་པ་དེ་འདྲ་ཞིག་རེད།།

ང་། དམིགས་བཅས་དང་དམིགས་མེད་ཀྱིས་བསྒོམ་ལུགས།

བསྒོམ་དུས་དམིགས་བཅས་དམིགས་པ་ཅན་གྱི་བསྒོམ་རྒྱུའི་དཔྱད་པ་སྔོན་དུ་འགྲོ་བས་བསྒོམ་རྒྱུ་དང་། དམིགས་མེད་གང་ལ་ཡང་མི་འཛིན་ནས་འཇོག་རྒྱུའི་སྒོམ་ལུགས་གཉིས་ཀ་སྤེལ་མ་བྱས་ནས་བསྒོམ་ཆོག་རེད། དང་པོ་དམིགས་བཅས་ཀྱིས་བསྒོམ་རྒྱུ་དེ་རེད། དེ་དུས་དམིགས་རྣམ་སྤྲད་ནས་བསྒོམ་དགོས་ལ་མཐར་དམིགས་མེད་དུ་འཇོག་དགོས་པ་རེད། དེ་ཡང་སྟོང་རྟེན་འབྱུང་གཉིས་ཀ་དབྱེར་མེད་སྐྱེ་འགག་བྲལ་བའི་མཉམ་པ་ཆེན་པོའི་ངང་ལ་བཅས་བཅོས་མེད་པར་མཉམ་པར་འཇོག་པ་དེ་ནི་ཚད་མེད་བཞི་བོ་གང་བསྒོམ་ན་འདྲ་འདྲ་ཡིན།

བཏང་སྙོམས་དང་པོར་བཞག་ནས་མ་བསྒོམ་ན་བྱམས་སོགས་བཞི་པོ་ཕྱོགས་རིས་ཅན་དུ་གྱུར་སོང་དུས་ཚད་མེད་དུ་མི་འགྲོ་བས་ཞི་གནས་དང་ལྷག་མཐོང་ཟུང་འཇུག་གིས་བསྒོམ་དགོས། ཡིན་ན་ཡང་ལས་དང་པོ་བས་བཏང་སྙོམས་དང་བཏང་སྙོམས་ཀྱི་ཏིང་ངེ་འཛིན་བསྒོམ་དུས་གཙོ་ཆེར་ཞི་གནས་བསྒོམ་ལུགས་ཤས་ཆེ་རེད། སྤྱིར་ན་ཞི་གནས་དང་ལྷག་མཐོང་ཟེར་བའི་སྒྲ་གཅིག་ལ་དོན་གྱིས་ཐེག་པའི་རྣམ་གྲངས་ཀྱིས་ཁྱད་པར་དང་དབྱེ་བ་མང་བ་རེད་དེ། ཞི་གནས་ནི་བསམ་གཏན་གྱི་ངོ་བོ་ཏིང་ངེ་འཛིན་གྱི་བསླབ་པ་ཡིན་པ་དང་ནི་ལྷག་མཐོང་ནི་ཤེས་རབ་ཀྱི་ངོ་བོ་ཤེས་རབ་ཀྱི་བསླབ་པས་བསྡུས་པ་ཞིག་ཡིན། དེ་གཉིས་ཀ་རྟེན་ཚུལ་ཁྲིམས་རྣམ་པར་དག་པ་ཚུལ་ཁྲིམས་ཀྱི་བསླབ་པར་བརྟེན་ཡོད་ནི། དེ་གསུམ་པོའི་གྲོགས་ལ་གང་དགོས་ནི་རེད་ཟེར་ན་བརྩོན་འགྲུས་མེད་ཐབས་མེད་པ་རེད། བཏང་སྙོམས་བསྒོམ་དུས་བཏང་སྙོམས་བཟང་མེད་ངན་མེད། ཕན་མེད་གནོད་མེད་ཀྱི་གཏི་མུག་བཏང་སྙོམས་ཟེར་བར་ལོགས་མི་འགྲོ་བའི་ཆེད་དུ་དགྲ་དང་གཉེན་གཉིས་ཀ་དམིགས་སུ་བཀར་ནས་དེ་གཉིས་ཀ་ནས་འགོ་བཟུང་སྟེ་བསྒོམ་རྒྱུ་དེ་མན་ངག་གི་ལུགས་རེད། ཐུན་གྱི་དངོས་གཞིར་རང་གི་གཡས་ས་ན་དགྲ་སྡང་བ་དེའི་སྡུག་མེད་པ་བོ། གཡོན་ས་ན་གཉེན་དགའ་མཛའ་དེའི་དགའ་མེད་ནི་བོ་གཉིས་ཀ་ཡོད་པར་བསམ་ནས། དགྲ་ལ་སྡང་སེམས་དང་གཉེན་ལ་ཆགས་སེམས་གཉིས་ཀ་ཡར་ལ་བསླངས་ཡག་བྱས་ནས་དེའི་འཕྲོར་བསམ་བློ་ནང་ལ་ཚུར་བསྐོར་ནས་སྔ་ཕྱི་བར་གསུམ་ལ་འདིང་བརྒྱབ་ནས། འདི་གཉིས་ཀ་དང་ནི་ངེད་གསུམ་པོ་འཁོར་ཚེ་ཐོག་མེད་ནས་ད་ལྟའི་བར་ལ་སྐྱེ་བ་གྲངས་མེད་རྩིས་གྲངས་མི་ཐེབས་པ་ཞིག་བླངས་པ་ཡིན་ན། དེ་དུས་འདི་གཉིས་ཀས་ཕན་བཏགས་པའི་རྣམ་གྲངས་ཅི་འདྲ་མང་། དེ་ཡང་ད་ལྟའི་སྐབས་སུ་ཡིན་ན་ང་མེད་ན་དགྲ་འདིས་དགྲ་སུ་ལ་བྱེད། ཁོ་རང་གིས་བསམ་ན་ངས་ཕར་ལ་ཁོ་བོར་དགྲ་བྱས་པ་རེད་ལོས་བསམ། ངས་ཕར་ལ་དགྲར་མ་བཟུང་ན་ཁོས་དགྲ་སུ་ཞིག་འཛིན། འདི་དང་པོ་ནས་དགྲ་མ་རེད། འབྲེལ་བ་མེད་ན་འགལ་བ་ཅི་ལ་ཡོང་། སྔར་མཐུན་ཚབས་ཆེ་སོང་བའི་ཚད་ལ་བསླེབས་རྒྱུ་ཕྱིས་སུ་འདི་ལྟར་གྱུར་སོང་པ་རེད། འདི་འཇིག་རྟེན་གྱི་འཁོར་བའི་ཆོས་ཉིད་ཡིན་རེད། དགྲ་གཉེན་དུ་གྱུར་བ་ཡང་མྱི་བསད་ཀྱི་རྔ་མ་གཉེན། རྟ་དེད་ཀྱི་རྔ་མ་ཤག ཟེར་རྒྱུ་ཅི་འདྲའི་མང་གི། ཆོས་ཕྱོགས་ནས་བསམ་ན་ནི། དགྲས་ལོག་སྒྲུབ་བྱས་ཀྱང་ཐུགས་དམ་གྱི་བོགས་འདོན། །གཏམ་མ་ཉེས་ཁ་ཡོག་དགེ་བསྐུལ་གྱི་ལྕག་འདེབས། འདི་ཆགས་ཞེན་འཇིག་པའི་བླ་མ་རུ་མཐོང་ནས། །ཁོའི་དྲིན་ལན་འཁོར་ཐབས་མེད་པ་རུ་འདུག་གོ །གསུངས་ལྟ་བུ་ཡིན་རེད། ཆོས་སྒྲུབ་པ་ལ་གཉེན་ལས་ཀྱང་ད་རུང་དགྲ་བཀའ་དྲིན་ཆེ་ནི་རེད། གཉེན་འདིས་ནི་གནོད་མ་སྐྱེལ་གྱི་རིམ་པ་གྲངས་མེད། རྩྭ་ཡིས་མེ་འཛིན། འདམ་གྱི་བྱ་འཛིན། ནམ་མཁའི་བྱ་རྙི་ཡིས་བཟུང་བ་བཞིན། འཁོར་བའི་སྡུག་བསྔལ་གྱི་དྲྭ་རྒྱ་བཙོན་ཁང་ཞིག་དང་འདྲ་བའི་ནང་ལ་ཚུད་རྒྱུ་འདི། གཉེན་ལ་ཆགས་སེམས་ཀྱི་ཁོངས་ནས་ཡོང་བ་རེད་བསམ་ནས་དེ་ལྟར་བསྒོམ། དེ་ནས་དགྲ་གཉེན་བར་མ་ལ་སོགས་པ་བསྒོམ། དེ་རྒྱབ་རྒྱུས་ཡོད་མེད་མང་པོར་བསྒོམ་དུས། བར་གཅིག་ཚང་མ་ལ་ཞེན་ཁ་འདྲ་ཞིག་ལོག་ནས་དགྲ་གཉེན་ལ་སོགས་པ་ཚང་མ་ཕར་སྐྱུར་ཞོག་བསམ་རྒྱུ་ཞིག་གི་སྟེང་ལ་བརྒྱབ་ན། དེ་ནི་གོང་ནས་བཤད་པའི་བཏང་སྙོམས་སྐྱོན་ཅན་གཏི་མུག་བཏང་སྙོམས་རེད་གྲབ་རེད། དེས་ཅི་ཡང་མི་ཕན། དེ་ལ་ནམ་མཁའི་གར་ཁྱབ་ཀྱི་སེམས་ཅན་ཞིག་ཡོད་པ་ཐམས་ཅད་ཕ་མ་བྱས་ནས། དེ་ཡང་ལན་གཅིག་ཙམ་གྱིས་མི་ཚད་པར་ས་ཆེན་པོའི་རྡུལ་གྱི་གྲངས་ཀྱིས་མི་ཚད་པའི་ཕ་མ་ཞིག་བྱས་ཡོད། དེ་དུས་དྲིན་གྱིས་བསྐྱང་ལུགས་ལ་ད་ལྟའི་མ་དང་ཁྱད་པར་ཅི་ཡོད་བསམ་ནས། སྐྱེ་བ་ཚེ་འདིའི་མ་རྒན་དྲིན་ཆེན་མ་མིག་སྔར་ཤར་དུ་བཅུག་ནས་དྲིན་གྱིས་བསྐྱང་ལུགས་ལ་འདང་རྒྱབ། མཐའ་ཡས་སེམས་ཅན་ཐམས་ཅད་དེ་དང་འདྲ་འདྲ་ཡིན་པས་ཁྱད་པར་དབྱེ་བ་ཕྱེ་ཡོང་རྒྱུ་ཞིག་མེད་བསམ་ནས། དེ་ལ་མར་ཤེས་དྲིན་དྲན་དྲིན་ལན་གསབ་འདོད་སྐྱེས་ཏེ་ཁམས་གསུམ་སྲིད་པ་གསུམ་ན་གནས་པའི་སེམས་ཅན་གཅིག་ཀྱང་མ་ལུས་པར་བཏང་སྙོམས་ཚད་མེད་ཞིག་བསྒོམ་དགོས་ནི་རེད། དེ་ལ་དམིགས་བཅས་མཚན་མ་ཅན་གྱི་དཔྱད་སྒོམ་ཟེར། དེ་བརྟགས་ཤིང་དཔྱད་ནས་སྒོམ་དགོས་པ་རེད། དེ་ནས་ཐང་ཆད་དེ་སེམས་འཕྲོ་མི་བསམ་ནི་རེད་ཡོང་དུས་འདས་པའི་རྣམ་རྟོག་གི་རྗེས་ལ་མི་འདེད། མ་འོངས་རྣམ་རྟོག་གི་སྔོན་མི་བསུ། ད་ལྟའི་རྣམ་རྟོག་གི་འཕྲོར་མཐུད་ཀི་མི་འདུག་པར་བཅས་བཅོས་མེད་པར་ཁོ་རང་ཇི་ལྟ་བུ་ཡིན་པ་དེའི་སྟེང་ལ་བཞག་བཞག་ན། དེ་ནི་བཏང་སྙོམས་ཀྱི་ཏིང་ངེ་འཛིན་དེ་དང་ཆབ་ཅིག་ཏུ་འདི་ལྟར་སྣང་བ་ཐམས་ཅད་སྟོང་ཉིད་ཅི་ཡང་མ་ཡིན་པ་ལས་ཐ་སྙད་དུ་ཅིར་ཡང་སྣང་བ་རེད་དེ། དོན་དམ་ལ་རང་བཞིན་གྱིས་མ་གྲུབ་པ་ཡིན་ནི་རེད་བསམ་རྒྱུའི་སྣང་སྟོང་འཛིན་པ་བྲལ་བའི་ངེས་ཤེས་ཀྱི་ངང་ལ་བཞག་ན་ལྷག་མཐོང་སྐྱེ་རྒྱུའི་དགོས་པ་དང་ལྡན་པ་རེད། དེ་ནས་དུས་ཚོད་གང་མཚམས་ཞིག་སོང་ནས་ཐུན་གྱི་རྗེས་ཕྱོགས་སུ་ད་སེམས་ཅན་ཐམས་ཅད་དམིགས་ཡུལ་དུ་བྱས་ནས་འདི་དག་གི་རྒྱུད་ཀྱི་ཆགས་སྡང་གཉིས་པོ་ཐམས་ཅད་བྲལ་བར་གྱུར་ཅིག་བྲལ་ན་ཅི་མ་རུང་བྲལ་བ་ཞིག་ངས་བྱ་བསམ་རྒྱུའི་འབྲེལ་བ་སུམ་ལྡན་དང་ནི་དེ་ལྟར་བྲལ་བ་ཞིག་བླ་མ་དཀོན་མཆོག་གིས་ཐུགས་རྗེའི་གཟིགས། ཞེས་གསོལ་འདེབས་དང་འབྲེལ་བ་བཞི་ལྡན་བྱས་ནས་ཐུན་མཇུག་ལ་བསྔོ་བ་དང་བཅས་ཐུན་གྲོལ་བ་ཡིན་ན། ཐུན་མཚམས་ལ་ཐོན་ན་ཡང་གོང་གི་ལྟ་བ་དེའི་ངང་དང་མ་བྲལ་བ་ཞིག་བྱས། བཏང་སྙོམས་ཚད་མེད་དྲང་སྲོང་གི་མགྲོན་འགྱེད་པ་ལྟ་བུའི་ཡོངས་ལ་སྙོམས་པ་ཞིག་དགོས་གསུངས་པ་རེད། དེས་དང་པོར་ང་རང་ཚོའི་བཏང་སྙོམས་བཤད་པ་རེད།།

གཉིས་པ་བྱམས་པ་བསྒོམ་དགོས་པ་རེད། འདི་རང་གི་ཚེ་འདིའི་རྩ་བའི་མ་ནས་བརྩམས་ཏེ་དམིགས་པ་དང་རྣམ་པ་ནི། དམིགས་པ་ཡུལ་སྡུག་བསྔལ་ཏག་ཏག་ལ་སྤྱོད་པས་བདེ་བ་རྒྱུ་འབྲས་གཉིས་ཀ་དང་མི་ལྡན་པའི་མ་ལ་སོགས་པ་དང་། རྣམ་པའི་བློ་དེ་ཅི་འདྲ་ཞིག་ཡིན་ན། མ་རྒན་སེམས་ཅན་ཐམས་ཅད་བདེ་བའི་རྒྱུ་དད་པ། ངེས་འབྱུང་། བྱང་ཆུབ་ཀྱི་སེམས་གསུམ་པོ་དང་ལྡན་པར་གྱུར་ཅིག དེ་གསུམ་བསམ་དགོས་པ་ཅི་རེད་ཟེར་ན་དད་པ་མཐོ་རིས་ཀྱི་རྒྱུ་དང་ངེས་འབྱུང་ཐར་བའི་རྒྱུ་རེད། བྱང་ཆུབ་ཀྱི་སེམས་རྫོགས་པའི་སངས་རྒྱས་ཀྱི་རྒྱུ་ཡིན་པས་དེ་འདྲ་བྱས་ནས་བྱམས་པ་དང་ནི་བྱམས་པའི་ཏིང་ངེ་འཛིན་བསྒོམ་པའི་མཐའ་ལ། དམིགས་མེད་འཁོར་གསུམ་སྣང་ལ་རང་བཞིན་མེད་པའི་ངེས་པ་དྲངས་ནས་ཐུན་གྲོལ་དུས་ཡིན་ན། བསམ་པས་བྱམས་པ་བསྒོམ་ཞོར་ལ། བྱམས་པའི་ལུས་ངག་གི་ལས་མིག་གིས་སེམས་ཅན་ཞིག་རིག་བཞག་ནའང་དེ་ལ་དྲང་ཞིང་བྱམས་པའི་སེམས་ཀྱིས་བལྟ། དགའ་ཞིང་འཛུམ་པའི་ཚུལ་གྱིས་ཁ་བརྡ་བྱེད་རྒྱུ་དེ་འདྲ་དགོས་པ་རེད། བྱམས་པ་ཚད་མེད་བྱ་མས་བྱེའུ་ཕྲུག་གསོས་པ་དེ་འདྲ་སེམས་ཅན་ཐམས་ཅད་ལ་ཡོང་དུས་རེད་ཡོད་པ་རེད།།

གསུམ་པ་ནི་སྙིང་རྗེ་རེད། བཏང་སྙོམས་དང་བྱམས་པ་གཉིས་ཀ་སོང་ནས་སྙིང་རྗེ་དེ་གསུམ་པ་རེད། དེ་ཡང་རང་གི་རྩ་བའི་མ་ཇི་མ་ཇི་བཞིན་དུ་བསྒོམ་ན་ཡང་ཆོག་པ་རེད། མིན་ན་བཤས་ཟོག་བཤས་ལུག་ལྟ་བུ་ཞིག་ད་བསད་འགྲོ་ཀི་ཡོད་པ་དང་ནི། དེ་ཉིད་རང་གི་མའམ་ཡང་ན་རང་ཉིད་ཡིན་པར་བསྒོམ་ན་ཆོག་རེད། མ་རུ་བསྒོམ་ན་མདུན་གྱི་བཤའ་ཟོག་གྲི་ཁ་ན་ཡོད་པ་དེ་ཚེ་འདིའི་ཨ་མ་རེད། མ་དྲིན་ཆེན་མ་འདིས་འདོད་པ་བདེ་བ་འདོད་པ་རེད་དེ། དེའི་རྒྱུ་དགེ་བ་སྒྲུབ་ཤེས་ནི་མ་རེད། མི་འདོད་སྡུག་བསྔལ་ཡིན་ཡང་། དེ་ནི་ངམ་ངམ་ཤུགས་ཀྱིས་སྒྲུབ་ཀི་ཡོད་ནི་རེད། བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུགས། །ཞེས་གསུངས་པ་ཅན་པོ་ཡིན་རེད། འདི་ད་ལྟ་ཤན་པ་གཤེད་མས་གསོད་པས་མི་ཚད་ཕྱི་མ་ངན་སོང་གི་སྡུག་བསྔལ་མྱོང་དགོས་པ་རེད་བསམ་ནས། དེ་ལ་ཤ་ཚ་བཟོད་བརླག་མེད་པའི་སྙིང་རྗེའི་དམིགས་པའི་ཡུལ་ལ་བཟུང་ནས་དེའི་རྣམ་པའི་བློ་དེ་ཅི་འདྲ་ཞིག་རེད་ཅེ་ན། འདི་སྡུག་བསྔལ་རྒྱུ་འབྲས་གཉིས་དང་བྲལ་བར་ཤོག་ཅིག་ལ་སོགས་པ་གོང་ནས་བཤད་པ་བཞིན་དུ་བསམ། དེ་བཞིན་དུ་གཉེན་དགའ་མཛའ་ནས་བཟུང་སེམས་ཅན་ཐམས་ཅད་ལ་བསམ་ནས། འབྲེལ་བ་སུམ་ལྡན་ནམ་བཞི་ལྡན་གྱིས་ཁ་ཞེ་གཉིས་མེད་དུ་བསྒོམ་པའི་མཐར། དམིགས་མེད་ཀྱི་ངང་ལ་མཉམ་པར་བཞག་ནས་ཐུན་མཚམས་ལ་ཡིན་ནའང་སེམས་ཅན་ཐམས་ཅད་ལ་སྙིང་རྗེ་བསྒོམ། སེམས་ཅན་མིག་གིས་མཐོང་ན་སྙིང་རྗེ་ཤུགས་ཀྱིས་སྐྱེས་ནས་མིག་ནས་མཆི་མ་འབྱུང་བ་ཞིག་བྱུང་ན་སྙིང་རྗེ་འབྱུང་བའི་ཚད་ཡིན། སྙིང་རྗེ་བསྒོམ་པ་ནི་མ་ལག་ལྡུམ་མའི་བུ་ཆུས་ཁྱེར་བ་ལྟར་གྱི་སེམས་ཤིག་དགོས་གསུངས་པ་རེད།།

ཚད་མེད་བཞིའི་ནང་གི་བཞི་བ་ནི་དགའ་བ་རེད། འདི་ཡང་རྩ་བའི་མ་ནས་ཡང་སེམས་ཅན་ཐམས་ཅད་ལ་རྒྱུ་དགེ་བ་དང་འབྲས་བུ་བདེ་བ་ཅུང་ཟད་ཅིག་ཡོད་པ། དེ་མི་ཉམས་པའི་ཐོག་ནས་བདེ་བའི་རྒྱུ་དང་བཅས་པ་གོང་ནས་གོང་དུ་འཕེལ་བར་གྱུར་ཅིག་སོགས་གོང་ནས་བཤད་པ་ལྟ་བུའི་འབྲེལ་བ་བཞི་ལྡན་གྱིས་བསམ། དམིགས་བཅས་ཀྱི་དགའ་བ་དང་དགའ་བའི་ཏིང་འཛིན་བསྒོམ་པ་ནས་དམིགས་མེད་ཀྱི་མཉམ་བཞག་གོང་ལྟར་བྱས། ཐུན་གྲོལ་རྒྱབ་ལ་ཡིན་ནའང་། སེམས་ཅན་གཞན་ལ་དགའ་བ་དང་བདེ་བ་བྱུང་ན་དེ་ལ་ཕྲག་དོག་དང་གནོད་སེམས་མེད་པའི་སྟེང་ནས་དགའ་བ་བསྒོམ། དེ་བས་ཀྱང་ད་རུང་བཟང་ཞིག་དང་ཡག་ཅིག་རེད་པར་ཤོག བསམ་པའི་དགའ་བ་ཚད་མེད་དང་ལྡན་པ་རྔ་མོང་གི་རྔེའུ་ཕྲུག་བོར་ནས་རྙེད་ནི་འདྲ་ཞིག་གསུངས་ཡོད་པ་ཡིན་ན། རྔ་མོང་ནི་བུ་ལ་ལྷག་པར་དུ་བརྩེ་བའི་སེམས་ཅན་ཞིག་ཡིན། དེ་ལྟ་བུའི་ཚད་མེད་བཞི་བསྒོམ་རྒྱུ་ནི་བྱང་ཆུབ་སྒྲུབ་པར་ཐོག་མཐའ་བར་གསུམ་ལ་གནད་ཆེན་རེད།།

འདི་ལ་སེམས་ཅན་ལ་དམིགས་པ་དང་ཆོས་ལ་དམིགས་པ། དམིགས་པ་མེད་པ་དང་གསུམ་གྱི་སྟེང་ནས་བཤད་རྒྱུ་ཡོད་པ་རེད། སེམས་ཅན་ལ་དམིགས་པ་རྐྱང་བ་ཞིག་གི་ཐོག་ནས་བཤད་ན་མུ་སྟེགས་ཅན་དང་ཐུན་མོང་བ་འདྲ་འདྲ་རེད། ཆོས་ལ་དམིགས་པ་ཙམ་ཡང་ཉན་རང་དང་ཐུན་མོང་བ་ཡིན་པ་རེད། དམིགས་པ་མེད་པ་དེ་ནི་ཐམས་ཅད་དང་ཐུན་མོང་མ་ཡིན་པ་ཡིན། དེ་བས་ང་ཚོའི་ལམ་ལོག་པ་ལས་ལྡོག་པའི་སྐྱབས་འགྲོའི་རྨང་གཞིའི་སྟེང་ལ་ལམ་དམན་པ་ལས་ལྡོག་པའི་སེམས་བསྐྱེད་བཤད་པ་རེད།།

དེ་ཡང་གཙོ་བོ་སྨོན་དང་འཇུག་པའི་བདག་ཉིད་ཅན་གྱི་ཀུན་རྫོབ་བྱང་ཆུབ་ཀྱི་སེམས། དེ་ལས་ཀྱང་སྨོན་སེམས་གཙོ་བོར་བྱས་ཏེ་བཤད་པ་ཡིན་ན། ཚད་མེད་བཞི་འདི་ཡང་རྩ་བ་བསམ་པ་བཟང་པོ་ནས་མགོ་བཙུགས་ཏེ་སྦྱང་རྒྱུ་ཅན་ཡིན། བྱང་ཆུབ་སེམས་དཔའི་བྱ་དཀའི་སྤྱོད་པ་ཐམས་ཅད་བྱང་ཆུབ་སེམས་དཔའ་ངོ་མ་དག་གིས་ཀྱང་དང་པོའི་སྐབས་ལ་ཉམས་སུ་བཞེས་ཐུབ་དཀའ་དཀའ་ཡིན་པ་རེད། དེ་གནད་ཆེ་བར་དགོངས་སྟེ་སྨོན་པའི་ཡུལ་ཚུན་ཆད་དུ་བྱས་ནས་བསྒོམ་ཞིང་གོམས་ཁ་བཞག་དུས་ནམ་ཞིག་འབད་པ་ཆེན་པོ་མི་དགོས་པར་ཇེ་སླ་རེད་དུས། རང་གིས་ངང་གིས་འཇུག་པ་ཞིག་ཡོང་རྒྱུ་ཡོད་ནི་རེད། ཨེ་ལོབ་ཞིག་ཀྱང་མ་བལྟས་པར་ང་འདྲ་བས་ཐུབ་མ་རེད་བསམ་ནས་བློ་ཁ་གོམས་པར་མ་བྱས་དུས། ལམ་དེར་ཐག་ཇེ་རིང་མ་གཏོགས་པར་ཇེ་ཉེར་ཚེ་གཅིག་ལ་འགྲོ་རྒྱུ་ཡོད་པ་མ་རེད། འཇུག་པའི་བསླབ་བྱ་ཕར་ཕྱིན་དྲུག་དང་བསྡུ་དངོས་བཞི་སོགས་ཀྱང་མན་ངག་གི་གཞུང་ལྟར་དུ་ལག་ལེན་ལ་ཅི་ཐེབས་བྱས་ན། རྒྱལ་བའི་བཀའ་འདི་ཐམས་ཅད་དྲང་ངེས་ཀྱི་དབྱེ་བ་ཕྱེས་པའི་ཐོག་ནས་ཉམས་ལེན་གྱི་གནད་དང་སྦྱར་དགོས་པ་ཞིག་རེད། དང་པོ་དྲང་དོན་ཀུན་རྫོབ་བྱང་ཆུབ་ཀྱི་སེམས་དེ་བསྒོམ་ཞིང་བར་དུ་དྲང་ངེས་འདྲེས་མའམ་ངེས་དོན་ཙམ་གྱི་བདེན་གཉིས་བྱང་ཆུབ་ཀྱི་སེམས་ཟུང་འཇུག་ཏུ་བསྒོམས་ནས། མཐར་ངེས་དོན་མཐར་ཐུག་དོན་དམ་བྱང་ཆུབ་ཀྱི་སེམས་བསྐྱེད་དགོས་པ་རེད།།

སྤྱིར་ན་མདོ་དང་སྔགས་ཀྱི་ཆོས་ཚུལ་ལ་ཐུན་མོང་དང་ཐུན་མིན་གྱི་ཁྱད་པར། རིང་ལམ་དང་ཉེ་ལམ་མྱུར་ལམ་ཤིན་ཏུ་མྱུར་ལམ་སོགས་ཀྱི་ཁྱད་པར་ཡོད་པ་དེ་ཐབས་ལ་མཁས་ན་ཚོགས་གཉིས་མཉམ་དུ་རྫོགས་ནས་བསྐལ་བའི་ཚོགས་དེ་སྐད་ཅིག་གིས་འདུམ་ནུས་པ་དང་། དེ་ལྟ་བུའི་མྱུར་བའི་ལམ་དེ་ཉིད་མདོ་ནས་ཀྱང་བཤད་ན། སྔགས་ལམ་ཁྱད་པར་ཅན་ཚེ་གཅིག་ལུས་གཅིག་གིས་གྲོལ་བ་ཐོབ་པ་དེ་ལས་ཀྱང་འགྲོས་མྱུར་བ་ཡིན་པར་གྲུབ་པས་ན། རང་རེ་དེ་ལ་ཞུགས་ཡོད་དུས་དེ་ལ་འབད་པ་བྱས་ན་གྲོལ་བ་མྱུར་དུ་ཐོབ་པ་རེད། དེ་ལྟར་ཡང་ཐེག་པ་འོག་མའི་ལམ་ལ་སྦྱངས་བགྲོད་མི་དགོས་པ་མ་ཡིན་པར། ཡོན་ཏན་ཡར་ལྡན་གྱིས་ཚང་ཞིང་རྫོགས་པའི་མན་ངག་གནད་དྲིལ་ཡིན་པས་ན་རྫོགས་པ་ཆེན་པོ་ཞེས་པ་ཡིན། ཀུན་མཁྱེན་རོང་ཟོམ་པ་ཚང་གིས་རྫོགས་པ་ཆེན་པོའི་ངེས་ཚིག་འགྲེལ་སྐབས། ཚོགས་གཉིས་རྫོགས་པའི་ཕྱིར་ན་རྫོགས་པ་ཆེན་པོ་ཞེས་གསུངས་ཡོད། དེས་ན་སེམས་ཀྱི་ཞུམ་པ་ཐམས་ཅད་སྤངས་ཏེ། ཐོག་མ་ཉིད་ནས་མདོ་སྔགས་གཉིས་ཀྱི་ལམ་གྱི་གཞུང་ཤིང་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་པ་ཞིག་བྱེད་པ། དེ་ནི་དལ་འབྱོར་ཐེངས་གཅིག་ཐོབ་པའི་དོན་སྒོ་ཉག་གཅིག་ཡིན་པ་རེད། འུ་བུ་ཅག་གིས་དེ་རིང་ཡང་དེ་རིང་གི་སྐལ་བ་ཡན་ལག་བདུན་པ་ལྷག་སོང་བས། ད་དོམ་པ་སྡུག་པོས་དོམ་བླངས་པ་ལྟར་ཡང་ཕྱི་ལ་ལྷག་སོང། གང་ལྟར་གནང་ཉིན་ཚར་དགོས་པ་རེད། དེ་ཚུན་ཆད་ལ་འདོན་ལུགས་རྒྱས་བསྡུས་ཅི་བྱེད་རང་ལག་ཡིན། དེ་རིང་གི་ཆོས་ཁྲིད་འདི་ན་འཇོག །

འདི་ནས་དོན་གཞན་ཞིག་བཤད་རྒྱུ་ཞིག་ལ། རྫོགས་ཆེན་རིན་པོ་སྐུ་ཕྲེང་དྲུག་པ་ཨོ་རྒྱན་འཇིགས་བྲལ་བྱང་ཆུབ་རྡོ་རྗེའི་སྐུ་གདུང་གདུང་རྟེན་འདི། དུས་རབས་འདིའི་རྫོགས་ཆེན་གདན་ས་འདིའི་དམིགས་བསལ་གྱི་རྟེན་སྐལ་གཙོ་བོ་འདྲ་ཞིག་ལ་བབས་བསྡད་ཡོད་པ་རེད། དེ་ཡིན་ན་དུས་རབས་སྔོན་མའི་དུས་སྐེད་ཀྱི་ང་དགུའི་དུས་འགྱུར་ཆེན་མོའི་སྐབས་ལ་བོད་སྟོད་སྨད་བར་གསུམ་གྱི་དགོན་སྡེ་སྟོང་ཚོ་མང་བོ་བརླགས་སོང་བ་རེད། བླ་སྤྲུལ་སྐྱེས་ཆེན་དམ་པ་གྲངས་མང་ཞིག་དབུ་ཉེས་ལ་སོང་བ་ཡིན་ཡང་། སྐུ་གདུང་ལ་བདག་ཐུབ་ཡོད་པའི་གྲངས་ཀ་ཉུང་ཉུང་ཡིན་པ་རེད། འཇིགས་བྲལ་བྱང་ཆུབ་རྡོ་རྗེ་ཚང་འདི་དགུང་ལོ་ཉི་ཤུ་རྩ་བཞིའི་ལོ་མཇུག་གི་གནམ་གང་། སང་ཉིན་ཚེས་གཅིག་ཚེས་དུས། དགུང་ལོ་ངོ་གྲངས་ཉི་ཤུ་རྩ་ལྔའི་དགུང་ཀེག་ལ་ཕེབས་དུས་ཀྱི་གནམ་གང་གི་དགོང་མོ་དེར། གཡུལ་འཁྲུག་དྲག་པོ་ཞིག་གི་སྐབས་སྐུ་ལ་མཚོན་བཞེས་པ་རེད། གནའ་སྔོན་མ་ཨ་ཁྲི་གཏེར་སྟོན་ནམ་འབྲུ་གུང་སྐྱུ་ར་གཏེར་སྟོན་ཟེར་རྒྱུ་ཞིག་ཡོད་པ་རེད། གཏེར་སྟོན་ཚད་མ་དེའི་ལུང་བསྟན་ཞིག་ཏུ་ཉི་ཤུ་རྩ་ལྔའི་ཐོག་རྒྱ་ཚའི་སྲི་ཀེག་ཀྱི་སྟེང་འཚུབ་ངོ་ཆེ་ཞེས་པའི་ལུང་བསྟན་ཞིག་ཡོད་པའི་སྐུ་ཀེག་བཟློག་རྒྱུ་མ་ཡོད་སོང་བ་རེད། དེ་ཡང་རྫོགས་ཆེན་རིན་པོ་ཆེ་འཇིགས་བྲལ་བྱང་ཆུབ་རྡོ་རྗེ་ཚང་དེ་སྐུ་ལུས་ལ་མཚོན་བཞེས་ནས་བ་ཁོག་གི་གདོང་ཆེན་ལུང་བའི་སྟོད་དེ་ནས་དགོངས་པ་རྫོགས་སོང་བ་ཡིན་ན། དེའི་རྗེས་ནས། རྫ་ཕར་རིའི་ཁྲོམ་བཟའ་འགབ་མའི་ས་ཐོག་ནས། ཡོངས་འཛིན་མཁན་པོ་ཚང་གིས་སྐུ་གདུང་ཞུགས་འབུལ་ཞུས་ཏེ་གདུང་བཞུས་ནས་ཉི་མ་ཁ་ཤས་ཀྱི་མཚམས། རྫ་ཕར་ནང་གི་རྫ་ཆུ་ཁ་བའི་ས་ཐོག་ཨ་སག་ཁ་ཟེར་སའི་ས་དེར་སྒར་ཁ་གཏོར་ནས། དེ་དུས་གདུང་རུས་དེ་མྱི་ལག་མང་པོ་བརྒྱུད་མཐར་འདིའི་རྫོགས་ཆེན་གྱི་བཀྲ་ལ་ལ་ཁའི་རྫ་གསེང་ཞིག་ལ་བསྐུང་བཞག་པ་རེད། ང་དེ་དུས་རང་ལོ་བཅོ་ལྔ་བཅུ་དྲུག་ཁ་སང་བཤད་པ་དེ་རེད། རྫོགས་ཆེན་ནས་འཁྲུག་འཛིང་བྱེད་པའི་སྐབས་ལ་ང་སྡེ་དགེའི་བཙོན་ཁང་ནང་ན་ཡོད། དང་པོ་ང་སྡེ་དགེ་ལ་དེད་དུས་ཆེད་གཏད་ཀྱིས་རྫོང་ཁྲིམས་ཁང་གིས་དེད་སོང་བ་མ་རེད། བྱིས་པ་ཞིག་རེད། ལོ་བཅོ་བརྒྱད་ཀྱི་ཁྲིམས་ཀྱི་ལོ་ཚོད་ཚང་ཡོད་པ་མ་རེད་དེ། རིན་པོ་ཆེ་ཁོང་རིག་གིས་ད་རེས་ཡིན་ན་མིན་ན་འགྲོ་དགོས་གསུངས་པ་རེད། ཁྲིད་སོང་རུང་དང་པོ་སློབ་སྦྱོང་རེད། བར་དུ་དོ་དམ་རེད། མཐའ་མར་སྐེ་རགས་ལྷམ་སྒྲོག་བཅིངས་ན་མི་ཆོག་པའི་སྒོ་རབ་གསལ་ལ་འཛེར་ནག་བསྡམས་ནས་བཙོན་ཁང་དུ་ལོག་ཐལ། ཡར་ལ་འཛུལ་དུས་སླ་བ་རེད། མར་ལ་འབུད་རྒྱུ་དེ་འདྲའི་སླ་མོ་ཞིག་ཡིན་མ་རེད། ལོ་གཅིག་ཙམ་ཞིག་ལ་མར་ལ་མངག་མ་ཐལ། མྱི་ཟེར་རྒྱུ་དེའི་སྡུག་ཐེག་ནི་རེད། ཅི་ཡིན་རུང་གོམས་འགྲོ་རྒྱུ་ཡོད་དར་ཟིག ཕྱིར་ལ་མངག་ཡོང་དུས་ཉི་མ་གཉིས་གསུམ་ཞིག་ལ་རྗེས་འདེད་བོའུ་བཟུང་གི་སྲུང་བ་མེད་དུས་འགྲོ་ཡང་མི་ཤེས་པ་དེ་འདྲ་རེད་ཡོད་ཀི དེ་ནས་རྫོགས་ཆེན་ལ་ཚུར་ཡོང་དུས་གནའ་འདྲ་བ་ཞིག་ག་ལ་ཡིན། མི་ལ་རས་པ་ཕ་ཡུལ་ལ་ཡོང་བ་དང་འདྲ་བོ་རེད། དེ་དུས་འཇིག་རྟེན་གྱི་སྤྱི་ཚོགས་ཁ་སང་དེ་རིང་དང་འདྲ་མ་རེད། སློབ་མས་བླ་མར་བརྡུང་། བུ་རྒྱུད་ངན་པས་ཕ་མར་འཐབ་རྩོད་རྒྱག་པའི་དུས་ཚོད་ཡིན། ཆོས་པ་རབ་བསད། འབྲིང་སྤྱུགས། ཐ་མ་བྲན་དུ་བཀོལ་བའི་ལུང་བསྟན་ཐོག་ལ་སྔར་ནས་འགྲོ་ཚར་བ་རེད། འུ་ཚོ་རང་གི་ཆུ་ཚ་རང་གིས་བསྐོལ་བ་གོམས་མྱོང་ལོབས་ཡོད་པ་མ་རེད། ལག་པ་གཉིས་དང་ལུས་པོ་ཧྲིལ་བོ་དེ་འཚོ་ཐབས་དེ་བས་ཀྱང་གོམས་ཆ་ཡོད་མ་རེད་མོད། དེ་ཡང་བླ་མ་དཀོན་མཆོག་གི་ཐུགས་རྗེས་སྲོག་འཚོ་བའི་ཐོག་ཏུ་དགེ་བློ་མ་དོར་ནས་དཀའ་སྡུག་ཅན་གྱི་ལོ་ཟླ་མང་པོ་བརྒལ་བ་རེད། དེའི་སྐབས་ལ་དམིགས་ཡུལ་འདུན་པའི་གཙོ་བོ་དེ་ཅི་ཞིག་ལ་བཟུང་བ་རེད་ཅེ་ན་སྐུ་གདུང་དེ་ལག་ལ་ཐོན་ཐབས་ཞིག་ལ་འབད་པས་མཐའི་མཐའ་གཞུག་ལ་ལག་ཏུ་འོང་བཞག་པ་རེད། དེ་ནས་ཡུན་རིང་མ་འགོར་བར་རིག་གནས་གསར་བརྗེའི་འགུལ་བསྐྱོད་ཟེར་བ་དེ་སྤྱིར་ན་རིག་གསར་ལོ་བཅུ་རེད་མོད། དེའི་ནང་གི་གཅིག་རྡུང་སུམ་རྒོལ་ཟེར་བའི་ལོ་གསུམ་གྱི་ཆབ་སྲིད་ཀྱི་འགུལ་བསྐྱོད་ཚབས་ཆེན་དེའི་ནང་ནས་ས་འདིའི་གཏད་སའི་འབེན་འདྲ་བོ་དེ་ང་ལ་བཙུགས་ནས་དགག་པ་བརྒྱབ་ཐལ། སྐུ་གདུང་ངའི་ལག་ན་ཡོད་པ་དེ་ངོས་བུད་རྟགས་ཤར་ཡིན་པ་རེད། དེ་ལ་མྱི་ངས་ཁྱོད་ཀྱི་ལག་ཏུ་འདི་འདྲ་བྱས་ནས་འདིའི་ཉིན་མོར་ས་ཆ་འདི་ནས་བཞག་ཡོད་ཟེར་བཞིན་མྱི་ངོ་ཕར་བལྟ་ཚུར་བལྟ་བྱས་ནས་ངོ་ལ་མཛུབ་མོ་བཙུགས་ཀྱང་། ད་ཞེ་ས་ཆེ་ལགས་མ་སྤྲད་ན་གསོན་གྲང་ང་ཁམས་ལ་ཡོད་དུས་ཤི་དུར་ས་མཉམ་འདེབས་བྱེད་རྒྱུའི་སྐལ་བ་མ་ལྡན་ཐལ་ཏེ། ད་མ་ཤི་ཤུལ་དུ་སྡོད་པ་པོ། ད་དེ་ལྟར་ཞུ་རུང་ས་མི་འདུག་ཀྱང་། ཐ་མར་གྲོང་ཚིག་གི་སྐད་ཆ་བཤད་བཤད་བྱས་ན། གསོན་པོའི་མྱི་བདག་མ་ཐུབ་རུང་། ཤི་བོའི་རོ་བདག་ཞིག་ཐུབ་དགོས་ཁི་བསམ་རྒྱུའི་འདང་འདུན་པ་དེ་ལ་གཏད་ནས། ལམ་དཀར་ནག་གཉིས་ཀྱི་གདམ་ཁ་ཁྱོད་ལ་སྟེར། ཤི་སའི་ལམ་ལ་ཨེ་འགྲོ་ཁྱེད་རང་གིས་ཤེས། ནག་ཉེས་ངོས་ལེན་བྱས་ན་ཁོག་ཡངས་ཡོད། ལྟ་བ་མཁྲེགས་བཟུང་བྱས་ན་འགྲོ་ས་གཅིག་མ་གཏོགས་མེད་ཟེར་ཡང་། སྲོག་དམར་བོ་འབེན་ལ་བཞག་ནས་མ་སྤྲད་པ་ཡིན། སྲ་མཁྲེགས་གྱོང་གསུམ་འཛོམས་པའི་གསར་བརྗེ་ངོ་ལོག་པ་རྩ་མེད་གཏོང་དགོས་ཟེར་ནས་མྱི་སྐད་ཆེན་རེ་ལ་སྐད་འབོད་བྱེད་དུ་བཅུག་དུས། དེའི་རྗེས་སུ་མྱི་མང་མི་རྒྱུགས་ཁག་མེད་ཀྱིས་སྐད་སྒྲའི་ཟིལ་ཤུགས་ཀྱིས། ར་སྐྲག་ལུག་འདར་དེ་འདྲ་བྱེད་དུ་བཅུག་དར། དེ་འདྲའི་དགག་པ་དང་འཐབ་འཛིང་ཐེངས་མང་པོར་མྱོང་བ་རྒན་པ་ཚོས་ཤེས་པ་རེད། དེ་འདྲ་ཐེངས་གཅིག་ཐེངས་གཉིས་མ་རེད། ལོ་ནས་ལོ་གྲངས་རེད། ད་མྱི་མང་ཆེ་བ་འགའ་རེ་ཞིག་སེམས་འགྱུར། འགའ་རེ་སེམས་ཤི་ནས་དེའི་གནས་སྐབས་དེར་ཤི་རྒྱུ་མ་གཏོགས་པ། དུས་སྐལ་བའི་འགྱུར་འགྲོའི་བཟང་པོ་འདི་འདྲ་ཞིག་ཡོང་རྒྱུའི་རེ་བ་བཞག་མཁན་ཉུང་བ་རེད། ངེད་ཚོས་གན་རྒྱ་བྲིས་ནས། སྐེ་འབའ་སྲོག་ཐུག་བཞག་པའི་ཁ་གྲངས་རྩི་ཚོད་མེད། རྗེས་མར་ཁྱོད་ལ་སྐེ་དུ་ཡོད་ཟེར་རྒྱུ་ཅན་རེད་སོང་བ་རེད། འུ་ཚོའི་འཇིག་རྟེན་པའི་གཏམ་དཔེ་ལ། ན་ནིང་ཤི་བོ་བསོད་ཆེན་རེད། །རྩིག་གསེབ་ཨབ་བྲ་སངས་རྒྱས་རེད། །ཟེར་རྒྱུ་ཅན་པོ་རེད་སོང་བ་རེད། དེ་འདྲ་བྱས་ནས་མདོར་ན་མྱི་ཚེ་ཕྱེད་ཀ་བརྒལ་སོང་བ་རེད། དེ་ཡང་རིག་གསར་མཇུག་སྒྲིལ་ནས་ལོ་ཁ་ཤས་མཚམས་ནས་གུ་ཡངས་ཞིག་ཐོབ་འགྲོ་རྒྱུའི་མགོ་འདྲ་ཞིག་ཚུགས་ན། སྐུ་གདུང་གི་གདུང་རུས་དེ་ཆ་བཞི་ལ་བསྒོས་པའི་བཞི་ཆ་གཅིག་རྒྱ་གར་ལ་ཁྱེར་ནས། མཐའ་མཚམས་ཀྱི་འགག་སྒོ་ནས་ངའི་མ་ཡི་རུས་པ་བལ་ཡུལ་གྱི་གནས་ཆེན་དག་ལ་གཏོར་རྒྱུ་ཁྱེར་འགྲོ་བ་ཡིན་ཞེས་ཤོབ་བཤད། དེ་དུས་ཀྱི་འགྲོ་ལམ་དེང་སང་ལྟ་བུ་མ་ཡིན་པར་རྐང་ཐང་རྐྱང་རྐྱང་གིས་ས་མཚམས་ནས་ཡུན་རིང་དུ་འགྲོ་དགོས་པ་རེད། བལ་ཡུལ་བརྒྱུད་ནས་རྒྱ་གར་ལ་ཨེ་ཐར་བལྟ་དགོས་པ་རེད། དེ་ཡང་རྐང་ཡང་ལག་བདེ་ཞིག་ཡིན་ན་དེ་ལུགས་བྱས་ཆོག་མོད། ང་རང་ལམ་ནས་རླངས་འཁོར་གྱིས་བརྡབ་སྟེ་བླ་དུམ་བུ་བཞི་ལ་འཕངས་ནས་ལག་རྟེན་གཉིས་ཀྱི་སྟེང་ནས་འགྲོ་དགོས་པ་རེད། སྐུ་གདུང་གི་ཆ་ཤས་ཞིག་དེ་ལྟར་བསྐྱལ་འགྲོ་དགོས་དོན་ཅི་རེད་ཅེ་ན། ད་མྱི་སྐྲག་ལ་མཐའ་མེད་ཁྱི་སྐྲག་ལ་རྔ་མ་མེད་ཟེར་ནི་རེད། ཉིན་གཅིག་ཡང་འགུལ་བསྐྱོད་ཅིག་ཐོན་བཏང་ན་ཅི་རེད་འགྲོ་ཅི་ཤེས། ངས་མ་སྤྲད་པའི་མཚམས་སུ་ང་བཙོན་ཁང་ནང་ལ་བསྡད་དུས་མནར་གཅོད་ཀྱི་འོག་ནས་ཤི་འདྲ་སོང་ན། མཐའ་མེད་ཕོ་རོག་ཤ་སྐུང་རེད་འགྲོ་ས་ཡོད་ཀི དེ་བས་ཕྱི་ཕྱོགས་ནས་ཅུང་དྲག་རྒྱུ་ཨེ་ཡིན་ན་བསམ་པ་རེད། དེ་དུས་ཇི་ལྟར་ཡིན་ན། ནང་ནས་ཧ་ཅང་ཡུན་རིང་དུ་མནར་བསྡད་དུས་ཕྱིའི་ཡུལ་ཁམས་ཞིག་བཤད་དུས་ཞིང་ཁམས་ཞིག་དང་། ཕྱི་ན་ཡོད་པའི་མྱི་དེ་དག་ཚང་མ་ལྷ་ཡིན་པའི་སྣང་བ་འདྲ་ཞིག་ཐམས་ཅད་ལ་ཡོད་པ་རེད། རྗེས་ནས་གཅིག་དགུ་བརྒྱད་ཅུ་གྱ་གྲངས་ཀྱི་ལོ་ནས་གུ་ཡངས་ལ་སོང་བ་རེད། དགོན་པའི་མཚན་དེ་བསྐྱར་དུ་བཏགས་ཆོག་སོང་དུས། སྐུ་གདུང་གི་གདུང་རྟེན་དེ་བཞེངས་ནས། སྡེ་པ་འདི་ལ་གཏོགས་ཚད་ཀྱི་གང་ལ་མེ་ཏོག་ཕོག་པའི་ལྷ་སྐལ་གྲུབ་དབང་སྐུ་ཕྲེང་དྲུག་པའི་སྐུ་གསོན་པོར་ཞལ་མཇལ་རྒྱུའི་སྐལ་བ་མ་ལྡན་ན་ཡང་། སེམས་བསམ་པའི་འདུན་པ་གཏད་སའི་དྲོད་ཐིག་འདྲ་བོ་འདི་ལ་བཅོལ་བ་ཡིན། དེ་ལ་སྡེ་ཡུལ་དགོན་གསུམ་ཆོས་བརྒྱུད་དང་བཅས་པའི་ཚོགས་གསོག་བསོད་ནམས་ཀྱི་ཞིང་ལ་བཞུགས་སུ་གསོལ་ཐུབ་པ་ཡིན། དེ་ལ་འདི་ནམ་ཡར་ལང་མིག་གིས་ལྟ་ས། ས་མ་རུབ་སེམས་ཀྱི་འཁོར་ས། འདིའི་རྟེན་སྐལ་གཅིག་པོ་རེད་སོང་བ་རེད། ངས་བསམ་ན་ང་མ་ཤི་ནས་ཤུལ་དུ་ལྷག་པའི་དོན་པོ། གནའ་དེ་དུས་ཚེ་དབང་ལོ་གྲངས་ཞིག་བསྐུར་ནས་ཐུགས་གཏད་པའི་དོན་སྒོ་དེ་འདི་ཡིན་ས་ཡོད་ཀི་དོན་གོ་ཆོད་ཐལ་བསམ་པ་ཡིན། ཡང་དེའི་རྗེས་ནས་རྟེན་གཞིི་བཞེངས་བསྐྲུན་ལ་ཐུག་དུས་ཨེ་ངས་ད་རུང་འདིའི་ཕྱོགས་ཀྱི་གོ་རེ་བཅད་ནུས་པ་རེ་འདོན་དགོས་པ་ཡིན་རྒྱུ་རེད་བསམ་མྱོང་། རྟེན་གཞིའི་བཞེངས་བསྐྲུན་མེད་ན་ཐབས་མེད་རེད། ས་ར་རྡོ་ཁང་སྔར་ཡང་ཉི་མ་ཆ་ཤས་ཀྱིས་མགོ་རྔ་ཤུལ་མེད་ལ་བཏང་བས། ད་ཡང་དེ་འདྲ་ཡོང་བ་ཡིན་ན་དེ་ལས་མ་འདས་པས་བསྟན་པ་གང་ཟག་གི་རྒྱུད་ནས་ཚུགས་རྒྱུ་དེ་གལ་ཆེ་འདུག སྔར་བསྟན་པ་སྔ་དར་ཉམས་ཉེས་ལ་སོང་ནས་ཕྱི་དར་གྱི་དབུ་ཚུགས་དུས་བསྟན་པའི་མེ་རོ་ཡང་གང་ཟག་གི་རྒྱུད་ནས་བསླངས་བ་རེད་བསམ་སྟེ། འདིའི་དཔེ་ཁྲིད་རེའི་ནུས་པ་འདོན་ཨེ་མི་ཐུབ་བསམ་པ་ཐམས་ཅད་གང་ལ་གང་འོས་ཀྱི་ངོ་རེ་བླངས་ནས། རིག་གནས་ཀྱི་རྒྱུན་རེ་སྤེལ་བ་ཡིན། ཡང་རྗེས་ནས་བལྟས་ཡོང་དུས་རང་ལུགས་ཀྱི་སྨིན་གྲོལ་དོན་གྱི་བསྟན་པའི་རྒྱུན་འཁྲུལ་མེད་ཅིག་མེད་དུས། གཞན་ཅི་ཞིག་ཡོད་རུང་ཡང་སྲོག་མེད་པའི་ཟོབ་ཞིག་རེད་བསམ་ས་ལ་ཐུག་དུས། ཡང་ཆོས་དུང་རེ་རང་གིས་བུས་ནས་འདི་ལྟར་རི་ཁྲོད་དུ་ཡོང་བ་ཕན་ཆད་ཀྱི་འདས་པའི་དུས་ཀྱི་རྐང་རྗེས་ལག་རྗེས་ལ་དེང་སང་ཕྱིར་བལྟས་ཞིག་བྱས་ན། དེ་ཡང་སོ་སོའི་སྐྱེ་བོའི་བྱ་བཞག་ཐམས་ཅད་མངོན་ཤེས་མེད་པའི་ལས་ཀ སྨག་མུན་ནག་གི་ནང་ནས་ལག་སྙོབ་བྱས་པ་དང་འདྲ་འདྲ་ཞིག་ལོས་ཡིན་ད་ཡིན་འདུག་བསམ་རྒྱུ་དེའི་སྟེང་ནས་ཕྱེད་རང་གིས་ལས་ལམ་དང་ཕྱེད་མྱི་ལ་བསྟུན་ཡོད་པ་རེད། ད་གང་ལྟར་འཇིག་རྟེན་མི་ཡུལ་འདི་ནས་མ་འོངས་བསྟན་སྲིད་སྤྱི་ལ་ཕན་ཐོགས་ཅན་གྱི་བྱ་ལས་ཆེ་བ་ཞིག་གི་མིག་རྒྱང་གིས་བྱ་བ་དེ་ལ་འཐམ་དུས། དཀའ་ངལ་སྣ་ཚོགས་ཀྱི་བརྒྱུད་རིམ་ཉམས་སུ་མྱོང་ཐུབ་དགོས་པ། དེའི་དོན་ལ་གསོན་པོའི་སྲོག་ཤོར་ནའང་ཕྱི་བཀྱེད་མི་བྱེད་བསམ་པའི་ཆོད་སེམས་བརྟན་དགོས་རྒྱུ་དེ། བཟང་བོ་མཐོང་ནས་ཆེ་བ་བརྗོད་རྒྱུ་ཞིག་མ་ཡིན་ཡང་ངན་པ་མྱོངས་ནས་ཉམས་མྱོང་གི་མཐའ་སྡོམ་ཞིག་ཡིན། དེ་ལ་སྤྱིར་དཀའ་ངལ་མེད་ན་འབད་པ་ཅི་ཞིག་ལ་བྱེད་དགོས། འཐབ་ཡ་མེད་ན་རྣམ་པར་སུ་ལས་རྒྱལ། དོན་ལྷག་བསམ་རྣམ་དག་ལ་ལྷད་མ་ཞུགས་དུས་གང་བྱུང་འགྱོད་མེད་བློ་བདེ་ཕྱོགས་སྡོམ་ཡིན་རྒྱུ་རེད་བསམ་པ་རེད། ད་ནི་སྐབས་དོན་གཙོ་བོ་ཅི་ཞིག་བཤད་བཞིན་ཡོད་ན། དེ་ལ་རྫོགས་ཆེན་ཡིད་བཞིན་ནོར་བུའི་སྐུ་གདུང་མཐོང་གྲོལ་ཆེན་མོ་འདི་དུ་ལོ་ལྷ་སར་གྱི་ཁང་ཐོག་ལ་མཐོང་གྲོལ་ལྷ་ཁང་ཞེས་པའི་སྒོ་བྱང་ཞིག་སྦྱར་ནས་དེ་ལ་བཞུགས་སུ་གསོལ་ནི་ཡིན། དེ་དུས་གླིང་འདིར་ལྷ་ཁང་དེ་མ་གཏོགས་མ་ཡོད་པ་རེད། དེ་ཡང་གནའ་བོའི་ས་ཁང་གྱང་ཞིག་ཡར་ལ་གསོས་ནས་ཀླད་བཀབ་པ་རེད་། ལོ་ཅིག་ལ་ལྷ་ཁང་མེ་ཡིས་ངན་པ་ཞིག་འཚིག། རྗེས་སུ་ཐིགས་ཆུ་ཡང་མི་ཚོགས་པས་ཞིག་རལ་ལ་འགྲོ་ཉེན་ཡོད་དུས་ཞིག་ལ། པདྨ་ཐང་དུ་གནས་སྐབས་རིང་ལ་གདན་འདྲེན་ཞུས་པ་རེད། ད་དེང་སང་ལ་བསྡུར་ན། རྒྱུ་སྤུས་ཀྱི་ཐད་ནས་ཟངས་གསེར་གྱིས་བཞེངས་ནི་ཙམ་ཞིག་རེད་ད། གཟི་བྱུར་རྙིང་བའི་ཕྲ་རྒྱན་མང་བ་རེད། དེ་ཡང་བོད་ཁུལ་གྱི་དགོན་སྡེ་མང་བོའི་རྟེན་རྙིང་རྩ་ཆེན་མྱིང་ཆེན་རབ་ཞིག་ཕྱི་ནང་སུས་ཁྱེར་ངོས་མི་འབྱེད་ནས། ཁྲམ་པ་གཉེན་ཉེ་བར་ནས་ཤ་གཞོང་བོར་མཁན་མང་བ་རེད། གཙོ་བོ་དབུ་ཐོན་རྒྱུར་བསམ་བློ་བཏང་ན་ནི། དགོན་ཨ་མའི་ནང་ན་བཞུགས་ས་བཟང་གི འདི་ན་རྟེན་གཙོ་བོ་ངོ་མ་བོ་ཇོ་བོ་རྒྱ་ནག་མ་བཞུགས་པ་འདི་རེད། དེའི་འཕྲོར་ཐུབ་པ་གྲོང་ཁྱེར་མ་ལ་སོགས་པའི་མདོ་ཚང་གི་རྟེན་རྫས་ཡང་མང་བ་རེད། དེ་མིན་རུང་ཕྱོགས་སོ་སོ་ནས་ལག་ལ་ཡོང་གི་བསྡད་པའི་རྟེན་རྩ་ཆེན་མང་བོ་ཡོད། དེ་ལ་འདིར་ཞབས་ཞུ་བྱེད་པའི་བརྒྱད་སྡེ་གྲྭ་ཚང་ལ་མཚོན་ན། ས་འདིའི་གཞི་གྲྭ་གཅིག་པོ་མ་གཏོགས་དགོན་གྱི་སྤྱི་སྒྲིག་གིས་མ་ཡོད་ནི་རེད། དེ་ལ་ངའི་ཁོར་ཡུག་གི་མྱི་རེ་དང་ཕྱོགས་སོ་སོའི་ཐོར་འདུ་རུག་གསུམ་གྱི་མྱི་སྣ་བརྗེ་འགྲོ་བ་ཞིག་རེད། སྐུ་གདུང་འདི་ནས་རྟེན་གྱི་གཙོ་བོ་ངོ་མ་འདྲ་ཞིག་མི་རེད་པར་འདུག་པས། ད་རེས་འདིའི་བདེ་ཆེན་ཞིང་དབང་གི་ཕྱི་ཉིན་ཕྱིར་དགོན་པའི་ནང་ལ་གདན་འདྲེན་ཞུ་འགྲོ་དགོས་བསམ་གྱིན་ཡོད། དེའི་ཉིན་པར་མང་པོ་ཞིག་རུབ་དགོས་མ་གཏོགས་ལྗིད་མོ་རེད། ཐབས་བློ་བཀོད་པ་འཐེན་ནས་གདན་འདྲེན་ཞུ་ཐབས་ཞིག་བྱེད་དགོས། འདིའི་ཚེ་འབར་གྱི་ཐེབས་རྩ་ལ་སྔར་ཡོད་ཀྱི་ཕྱུགས་ཟོག འབྲོག་ས་རྩྭ་ཐང་དང་བཅས་པ་དང་། དེའི་སྟེང་ལ་པདྨ་ཐང་གི་འཚོ་རྟེན་ཕྱུག་ཟོག་དང་བཅས་པ། དེ་དང་མཉམ་དུ་ཡར་ལ་འབུལ་བ་ཡིན། སྐུ་གདུང་གི་དཀར་ཆག་དང་འབྲོག་ས་རྟེན་བརྟེན་པ་བཅས་པ་རྩིས་སྤྲད། མ་ཡིག་དང་བཅས་པ་པདྨ་ཐང་གི་འགན་བཞེས་པ་ཚོས་འབུལ་ཡོང་རྒྱུ་རེད། དེ་ལ་སྐུ་གདུང་རིན་པོ་ཆེ་གདན་ས་ལ་བཞུགས་སུ་གསོལ་ནས་ད་ཕྱིན་ཆད་ཡུལ་དགོན་སྐྱ་སེར་ཐམས་ཅད་ཀྱིས་སྐུ་གདུང་གི་དར་ཐག་ལ་འཇུས་ནས། སྔར་བཞིན་དུ་དགེ་སྒྲུབ་སྡིག་སྤོངས་ཀྱི་རྣམ་དཀར་གྱི་བྱ་བཞག་སྔར་ལུགས་བཞིན་དུ་གོང་འཕེལ་ཡོང་བའི་སྨོན་འདུན་ཡང་དེ་དང་མཉམ་དུ་ཞུས་པ་ཡིན། དེ་བས་དེ་རིང་གི་ཆོས་ཁྲིད་ཀྱི་མཚམས་འདི་ནས་འཇོག་རྒྱུ་བྱེད། དེ་ཡང་ད་ལོ་ང་ཡར་མར་ལ་སོང་གི་བསྡད་པ་ཡིན། ཡིན་རྒྱུ་རི་ཁྲོད་ཀྱི་ཆོས་པ་བྱ་དང་རི་དྭགས་ལ་འགྲོགས་ནས་དབེན་པའི་གནས་སུ་འདུག་པ་ཡིན་ཞུས་མོད། མ་བསམ་ས་ནས་ཡར་མར་ལ་འགྲོ་དགོས་ཐུག་ནས་ཆོས་ཁྲིད་རེ་བཤད་ཁི་བསྡད་ནི་ཡིན། ས་འདི་ནས་སྡེ་མང་ཚོགས་ཀྱི་ཆོས་ཉན་ནི་འདྲ་འདྲའི་དོན་གཉེར་ཅན་ཧ་ཅང་དཀོན་འདུག མྱི་སྟོང་ཚོ་ཁྲི་ཚོའི་ཁ་བུད་ནིའི་ཆོས་རའི་ནང་ནས་དབུགས་ཆེན་ཞིག་ལེན་མཁན་གོ་རྒྱུ་མེད་པ་འདི། དགོན་པ་སྒྲིག་ཡོད་ང་ཡིན་ཟེར་བ་ཞིག་གིས་ཀྱང་ཐུབ་དཀའ་བ་རེད་བསམ་བཞིན་ཡོད། དེས་ན་ཁྱེད་ཐམས་ཅད་ཀྱིས་ཆོས་ཉན་པའི་ཉན་ཚུལ་བཟང་བས་ངས་རྗེས་སུ་ཡི་རངས་ཞུ་བ་ཡིན། དེའི་མཚམས་ནས་མགུར་འཐེན་ནས་དེ་རིང་གི་བསྔོ་བ་འདོན་རྒྱུ་བྱེད།

རྫོགས་ཆེན་ཤྲཱི་སེང་ཆོས་གྲྭའི་བསྟན་འཛིན་བློ་གྲོས་ནས། རྗེ་བཙུན་ཆེན་པོ་མི་ལ་རས་པས་ཁོང་གི་སློབ་མ་རྣམས་ལ་མགུར་འདི་གསུང་པ།

རྗེ་བླ་མའི་སྐུ་ལ་གསོལ་བ་འདེབས།།

སྤྲང་རི་ཁྲོད་ཟིན་པར་བྱིན་གྱིས་རློབས།།

ང་སྐྱིད་པ་གཉེན་གྱིས་མ་ཚོར་ཞིང་།།

སྡུག་པ་དགྲ་ཡིས་མ་ཚོར་བར།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

རྒས་པ་གྲོགས་ཀྱིས་མ་ཚོར་ཞིང་།།

ན་བ་སྲིང་མོས་མ་ཚོར་བར།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

ཤི་བ་མི་ཡིས་མ་ཚོར་ཞིང་།།

རོ་རུལ་བྱ་ཡིས་མ་མཐོང་བར།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

ཤ་རུལ་སྦྲང་མས་འཇིབ་པ་དང་།།

རྩ་རྒྱུས་འབུ་ཡིས་ཟ་བ་རུ།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

ང་སྒོ་ན་མི་རྗེས་མེད་པ་དང་།།

ནང་ན་ཁྲག་རྗེས་མེད་པ་རུ།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

རོ་ལ་འཁོར་མི་མེད་པ་དང་།།

ཤི་ན་ངུ་མི་མེད་པ་རུ།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

ང་གར་སོང་འདྲི་མི་མེད་པ་དང་།།

འདིར་སོང་གཏད་སོ་མེད་པ་རུ།།

རི་ཁྲོད་འདི་རུ་འཆི་ནུས་ན།།

རྣལ་འབྱོར་བསམ་པ་རྫོགས་པ་ཡིན།།

མི་མེད་ལུང་པའི་བྲག་ཕུག་ཏུ།།

སྤྲང་པོ་འཆི་བའི་སྨོན་ལམ་འདི།།

འགྲོ་བའི་དོན་དུ་ཐེབས་པར་ཤོག།

ཐེབས་ན་བསམ་པ་རྫོགས་པ་ཡིན།།

དེ་ནས་ཡང་རྫོགས་ཆེན་ཤྲཱི་སེང་ཆོས་གྲྭའི་བསྟན་འཛིན་དགེ་ལེགས་ནས། རྡོ་གྲུབ་ཆེན་འབྱུང་འགྱུར་ལུང་བསྟན་གསལ་བའི་མེ་ལོང་ལས། མདོ་ཁམས་ཡུལ་ནས་པད་མའི་མཚན་ཅན་གྱིས།།

ནགས་ཁྲོད་གངས་འདབས་པདྨ་ཐང་ཆེན་དུ། །སྔར་མེད་གནས་སུ་རྟེན་བཞེངས་འགྲོ་བ་འདྲེན། །ཞེས་གསུང་བ་ནང་བཞིན་དུ་བདག་ཅག་གི་བླ་མ་རིན་པོ་ཆེ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲས་ན་སྐྱབས་རྗེ་པདྨ་སྐལ་བཟང་ངམ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་གང་ཉིད་ཀྱིས་ཞལ་གདམས་གྱི་ཚིག་ཁ་ཤས་གསུང་བ་འདི་ལྟར།

ད་རེས་སྔར་བསགས་བསོད་ནམས་བྱེ་བའི་མཐུས།།

ཆོས་ལྡན་ལྷ་བས་ལྷག་པའི་ལུས་ཐོབ་ཀྱང་།།

རྟེན་འདི་ཕྱི་ནས་ཡང་ཡང་ཐོབ་དཀའ་བས།།

དལ་འབྱོར་རྙེད་དཀར་བསམ་ནས་ཡིག་དྲུག་སྒྲོངས།།

ཚེ་འདི་མི་རྟག་ནམ་མཁའི་གློག་དང་འདྲ།།

ནོར་ནི་མི་རྟག་རྩྭ་ཁའི་ཟིལ་བར་མཚུངས།།

འཆི་བདག་ཞགས་པ་ནམ་ཐེབས་མི་ཤེས་པས།།

མི་རྟག་འཆི་བ་དྲན་ནས་ཡིག་དྲུག་སྒྲོངས།།

ཚེ་འདིར་བསྐྱངས་བའི་དྲིན་ཆེན་ཕ་མ་དང་།།

ལས་ཀྱིས་འབྲེལ་བའི་སྤུན་སྲིང་བུ་ཚ་སོགས།།

ཤི་ནས་ངན་འགྲོར་སྐྱེས་པའི་སེམས་ཅན་གྱི།།

ངན་སོང་སྡུག་བསྔལ་དྲན་ནས་ཡིག་དྲུག་སྒྲོངས།།

དགེ་བས་མཐོ་རིས་ཐར་བར་བགྲོད་བྱེད་ཅིང་།།

སྡིག་པའི་ལས་ཀྱིས་ངན་སོང་ངན་འགྲོར་འཁྱམས།།

དཀར་ནག་དགེ་སྡིག་ལས་འབྲས་བསླུ་བ་མེད།།

རྒྱུ་འབྲས་བསླུ་མེད་བསམ་ནས་ཡིག་དྲུག་སྒྲོངས།།

ཉིན་གསུམ་པའི་ཆོས་ཁྲིད།

ལོ་གཅིག་གི་ནང་ནས་ཐེངས་གཅིག་ལ་ཆོས་ར་གཅིག་གི་ནང་ལ་རང་རེ་ཆོས་མཐུན་ཆོས་ཀྱི་གྲོགས་པོ་མཆོད་ཡོན་སྐྱ་སེར་ཐམས་ཅད་པོ་མཉམ་དུ་ཐེངས་རེར་འཛོམས་ཀྱིན་ཡོད་ན། སྤྱིར་ན་མགོ་ནག་བོད་ཀྱི་མྱི་ཆོས་ལྡན་ཆོས་ཀྱི་ཡུལ་གྲུར་སྐྱེས་ཚད་ལ་ཆོས་དད་ཡོད་པ་གཞིར་བཞག་གི་ཐོག་ནས། རང་རེ་འདིར་ཡོད་ཚང་མ་ལ་མཚོན་ན་ཡང་ལས་སྨོན་ལམ་གཅིག་གིས་སྦྲེལ་ནས། ཆོས་བརྒྱུད་འདིའི་བསྟན་པའི་ལྷག་ཞབས་སུ་སྐྱེས་པའམ་ཆོས་བརྒྱུད་འདིར་ཞུགས་པའི་ཆོས་མཐུན་གྱི་མཆེད་གྲོགས་ཡིན་ན། ཆོས་རའི་ནང་ལ་ཡོང་རྒྱུ་དེ་དམ་ཆོས་དོན་གཉེར་གྱི་ཆེད་དུ་ཡོང་བ་ཡིན་པ་བཤད་མི་དགོས། ཆོས་ཚུལ་བཞིན་དུ་ཉན་གི་ཡོད་པའི་ཀུན་སྤྱོད་རྐྱང་བས་ཀྱང་ཤེས་ཐུབ་ཀི དེ་ལྟར་བྱས་པ་ཞིག་ཡིན་ན་ཆོས་བཤད་མཁན་གྱིས་ཀྱང་མདོ་དོན་གནད་དུ་དྲིལ་ནས་སྙིང་པོར་བཟུང་ནས་བཤད་དགོས་པ་རེད། དེ་བས་ན་ད་སྔ་ཡང་ཐེངས་གྲངས་མང་པོར་བཟླས་ཏེ་བསྟན་པ་བཞིན། ཀུན་མཁྱེན་རྒྱལ་བ་ཀློང་ཆེན་པས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་དེ། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར། ཐེག་ཆེན་མདོ་སྔགས་ཀྱི་ཆོས་དང་འབྲེལ་བའི་དགེ་རྩ་ཐམས་ཅད་པོར་སྦྱོར་དངོས་རྗེས་ཀྱི་དམ་པ་རྣམ་གསུམ་པོ་ཚང་དགོས་པ་རེད། དེ་གསུམ་ཐར་ལམ་རྣམ་དག་སྒྲུབ་པའི་གཅེས་པ་རྣམ་གསུམ་ཡིན་གསུངས་ནས་སྒྲུབ་ཕྱོགས་ནས་གདམས་པའི་ཤུགས་ལ། གལ་ཏེ་དེ་གསུམ་མ་ཚང་བཞག་ན་ཐར་ལམ་རྣམ་དག་སྒྲུབ་པའི་རྒྱུ་རུ་མི་འགྲོ་བ་དེ་དགག་ཕྱོགས་ནས་བསྟན་ཡོད་པ་དེ་རེད། ད་ཐེངས་འདིའི་ཆེད་དུ་བྱ་ཡུལ་འདིར་ཡོད་ཁྱིམ་པ་ཕོ་མོ་ལ་དམིགས་ཀྱིས་བཀར་ནས་བཤད་ན། ཆོས་ཞུ་བའི་སྐབས་སུ་འཆད་པ་པོས་ཐེག་པ་ཆེན་པོའི་ཆོས་ཐེག་ཆེན་རང་གི་ལུགས་བཞིན་དུ་བཤད་ཀྱང་། ཉན་པ་པོས་ཉན་ལུགས་བསམ་པའི་ཁྱད་པར་གྱིས་ཆོས་ཞུས་པ་ཐམས་ཅད་འདྲ་འདྲ་བྱས་ནས་ཐེག་ཆེན་ཐར་བ་ཆ་མཐུན་གྱི་དགེ་རྩ་སངས་རྒྱས་ཐོབ་བྱེད་ཀྱི་ཕྱོགས་ལ་འགྲོ་ལུགས་གཅིག་འདྲ་ཡིན་ཟེར་དཀའ་མོ་རེད། དེ་ཅིའི་ཕྱིར་ཞེ་ན། ཉན་རྒྱུའི་ཆོས་གཅིག་ལ་ཉན་པ་པོས་ཉན་ལུགས་ཀྱིས་ཁྱད་པར་རྒྱུག་གི་ཡོད་པ་རེད། དེ་ཡང་རྣ་བས་ཉན་ལུགས་གོ་ལུགས་ཀྱི་སྒྲ་འདྲ་འདྲ་ཡིན་ནའང་བསམ་པའི་ཀུན་སློང་གི་ཁྱད་པར་གྱིས། དེའི་གོ་ཆོད་ཞན་མི་འདྲ་བ་རིན་ཐང་ཆེ་ཆུང་གི་ཁྱད་པར་ཞིག་ཤོར་འགྲོ་བ་རེད། དེས་ན་ཐོག་མར་ཆོས་རའི་ནང་ལ་ཐོན་ནས་སར་བསྡད་པ་དང་རང་སེམས་ནང་དུ་ཚུར་ལ་གཅིག་བསྐོར་ནས། རང་གི་བསམ་པའི་ཀུན་སློང་ལ་བརྟག་དཔྱད་ཞིབ་བཤེར་ཞིག་རང་གིས་རང་ལ་བྱས་པ་ཡིན་ན། ང་དེ་རིང་འདིར་ཡོང་དོན་ཆོས་ཞུ་རུ་ཡོང་བ་ཡིན། ཆོས་ཞུ་དོན་གྱིད་ཐད་ནས་དེའི་ཕྱོགས་ལ་བསམ་བློ་ཞིག་བཏང་ནས། དེ་ཡང་ཆོས་ཞུ་དུས་མིན་རུང་དགེ་བསྙེན་ཆོས་པ་རབ་གྱི་གྲལ་ལ་འགྲོ་ནི་ཚོས་འབུམ་ལྔ་བསོག་ནས་ཐུན་རེ་བཅད་པ་དང་། བསྐྱེད་རྫོགས་ཀྱི་ཆོ་ག་རེ་དང་སྦྲེལ་ནས་མ་ཎི་སིདྡྷི་དུང་ཕྱུར་བསོག་མཁན། དེ་མིན་ཡིག་བརྒྱ་ས་ཏྭ་འོད་མཚན་སོགས་ཀྱི་བཟླས་གྲངས་འདྲ་མིན་རེ་འགྲོ་བཞིན་པ་ཡང་ཡོད་ནི་རེད། ཕྱག་སྐོར་སྒྲིབ་སྦྱངས་ཚོགས་བསགས་མཆོད་འབུལ་གྱི་རྣམ་དཀར་གྱི་དགེ་ལས་རེ་ལ་སེམས་ཕྱོགས་ཀྱི་འདུག་པ་ཚང་མས་དགེ་རྩ་དེ་ཉིད་བསྒྲུབ་པའི་སྐབས་ལ། དངོས་དོན་དོན་ལ་བསྐོར་ནའམ་དོན་དངོས་པོའི་ཐོག་ནས་ཅི་ཞིག་བསམ་ནས་ཆོས་འདི་སྒྲུབ་ཀྱིན་འདུག་ཅེས། རང་གིས་རང་ལ་བལྟ་ཞིབ་ཅིག་བྱེད་དགོས་པ་རེད། དེ་ལ་མ་གཞི་བཤད་ན་རང་གི་བསམ་རྒྱུ་ལས་རྒྱུ་བོ་དག་དག ཡང་དག་པ་ཡིན་རྒྱུ་མི་བྱེད་པར། མཚམས་རེར་རང་ཉིད་ཀྱི་བསམ་སྤྱོད་ཐད་དུ་བཞག་ནས་དེ་ལ་མི་གཞན་གྱིས་ཚོར་སྣང་མཐོང་ཕྱོགས་ཅི་འདྲ་ཞིག་ཡོད་ས་རེད་བསམ་ནས་བལྟས་ཏེ། རང་ཉིད་མི་གསུམ་པ་ཞིག་བྱས་ནས་ཟུར་ལ་བུད་ནས་ལན་དེ་ཡིས་རྒྱག་དགོས་པ་རེད། རང་ཉིད་མ་ཡིན་པ་གཞན་ཡང་མ་ཡིན་པར་རང་ཉིད་རང་ཉིད་ལ་ལན་རྒྱག་མཁན་ཞིག་ཟུར་ལ་བུད་བཏང་དུས། ད་སྔར་མ་མཐོང་པ་ཞིག་རིག་པ་དང་ད་སྔར་མ་ཤེས་པ་ཤེས་རྒྱུ་ཡོད་པ་རེད། དཔེ་བཞག་ན་རང་གི་མགོའི་ལྟག་རིས་རྒྱབ་རང་གིས་མི་རིག་ན། དེ་ལ་བལྟ་བསམ་ན་ཤེལ་སྒོའི་ངོ་བལྟ་ཞིག་ལྟག་རྒྱབ་ནས་ཚུར་ལ་ཚད། དེ་སྔུན་གྱི་ངོ་ལྟ་གཞན་གཅིག་གི་ནང་ལ་ཤར་གི་བཞག་ན་རང་གིས་རང་གི་ལྟག་རྒྱབ་བལྟ་ཐུབ་པ་རེད། མྱི་ཞིག་ཡིན་དུས་སེམས་ཞིག་ཡོད་པ་རེད། སེམས་ཞིག་ཡོད་དུས་དེ་ལ་ཤར་རྒྱུ་ཞིག་ནི་ཡོད། དེ་ཡོད་ན་སེམས་ཀྱི་བསམ་བློ་གཏང་རྒྱུ་དེ། ཡང་མིན་ན་མི་དགེ་ཆགས་སྡང་རྨོངས་གསུམ་ཞིག ཡང་མིན་ན་དད་དང་ངེས་འབྱུང་བྱང་སེམས་ཀྱི་རྟོགས་པ་ཞིག དེ་མིན་ན་དེ་གཉིས་ལ་མི་ཐེ་བའི་ལུང་མ་བསྟན་ཞིག དེ་གསུམ་པོ་གཅིག་མིན་པས་འགྲོ་ས་ཡོད་ནི་མ་རེད། དེ་བས་ཆོས་ཞུ་དུས་སམ་ཡང་ན་སྒྲུབ་དུས་གང་གི་སྐབས་ཡིན་ནའང་། མི་དགེ་བ་ཉོན་མོངས་དུག་གསུམ་སྟེ་ཆགས་སྡང་རྨོངས་གསུམ་དང་། དེ་གསུམ་གྱི་ཀུན་ནས་བསླང་བའི་རྟོག་ཚོགས་དང་འདྲེས་སོང་ན་སྣོད་དུག་ཅན་གྱི་ནང་ལ་བཅུད་བཟང་པོ་ཞིག་བླུགས་པ་ལྟ་བུ་ཡིན་ནི་རེད། ཉན་རྒྱུ་ཆོས་ཡིན་རུང་ཉན་པའི་གང་ཟག་གི་ཉན་ལུགས་སྡུག་ནས་ཆོས་རྣམ་དག་མ་རེད་རེད། ཆོས་ཀྱི་དོན་ལ་སེམས་མ་གཏད་ན་དཔེ་བཞག་ན་སྣོད་ཁ་སྦུབ་ཀྱི་ཐོག་ལ་ཆུ་ཇི་འདྲ་ཞིག་གཤར་ཀྱིན་བསྡད་རུང་ནང་ལ་མི་འབབ་པ་འདྲ་འདྲ་རེད། སེམས་ཐོག་ལ་མི་འབབ། ཐོས་པ་དེ་སེམས་ལ་མ་བཞག་ན་སྣོད་ཐེད་པོ་ཞིག་གི་ནང་ལ་བཅུད་བླུག་པ་ལྟར་ཟག་འགྲོ་ནི་རེད། ཆོས་ར་ལས་མར་ཅུང་ཙམ་སོང་དུས་བྱེའུས་ཆུ་མྱིད་ནི་འདྲ་འདྲ་གར་སོང་འདིར་སོང་མེད་པ་རྣ་རྒྱབ་ཀྱི་རླུང་རེད་རྒྱུ། ཡང་ཚེ་འདིའི་བདེ་སྐྱིད་དམ་ཚེ་ཕྱི་མ་ལྷ་མིའི་བདེ་འབྲས་རྐྱང་བ་ཞིག་བསམ་ནས་ཆོས་ཞུས་པ་དང་། གཞན་གྱི་བལྟ་སར་ཚུགས་ཀ་ཞིག་བཏོད་ནི་ཙམ་ཡང་འཇིགས་སྐྱོབ་དང་ལེགས་སྨོན་ཆོས་ཀྱི་གཟུགས་བརྙན་ཙམ་ལས་དགེ་བའི་ཀུན་སློང་ཡང་དག་གི་གྲབས་ལ་འགྲོ་མ་རེད། དམིགས་ཡུལ་འཁོར་བ་སྒྲུབ་པའི་ལས་དེས་ཐེག་དམན་ཐར་བ་ཆ་མཐུན་གྱི་དགེ་རྩ་ཞིག་ཀྱང་མི་འགྲུབ་པ་དང་། དེ་མ་དགོས་འཁོར་བ་ལས་ངེས་འབྱུང་སྐྱེས་ནས་ཁམས་གསུམ་འཁོར་བའི་གནས་འདི་གང་ལ་སྐྱེས་རུང་སྡུག་བསྔལ་ཡིན་པ་ཤེས། ཕྱིན་ཆད་འཁོར་བ་ལས་གཏན་དུ་ཐར་བའི་ཐར་བ་ཐོབ་པའི་ཆེད་དུ་ཡིན་བསམ་ཡང་རང་འདོད་སྒྲུབ་པའི་བློ་དང་འབྲེལ་སོང་ན། ཐར་ལམ་རྣམ་དག་སྒྲུབ་པའི་གཅེས་པ་རྣམ་གསུམ་མ་ཚང་བས་ཐེག་དམན་ཐར་བ་ཆ་མཐུན་གྱི་ལམ་དམན་པ་ཞིག་ལས་ལྡོག་མེད་དུས། ཐེག་ཆེན་མདོ་དང་སྔགས་ཀྱི་ཆོས་ཀྱི་ཕྱོགས་ལ་ཐོན་པ་དང་འགྲོ་བ་གཉིས་ཀ་མེད་པ་རེད། དེས་ན་རང་རེའི་ཆོས་རྣམ་དག་བརྒྱ་གོ་གཅིག་གིས་ཆོད་པ་དེ་གང་སྒྲུབ་རྒྱུ་རེད་ཅེ་ན། དེ་ལ་སྦྱོར་དངོས་རྗེས་ཀྱི་དམ་པ་རྣམ་གསུམ་ཚང་པ་ཞིག། དེའི་ནང་གི་སྦྱོར་བ་སེམས་བསྐྱེད་དམ་པ་ཅི་འདྲ་ཞིག་རེད་ཅེ་ན། ཁ་སང་ཞིག་ལ་བཤད་མ་ཐག་པའི་སྨོན་དང་འཇུག་པའི་བདག་ཉིད། མ་ནམ་མཁའ་དང་མཉམ་པའི་སེམས་ཅན་ཐམས་ཅད་སྡུག་བསྔལ་རྣམ་པ་གསུམ་གྱིས་མནར་བཞིན་ཡོད་པ་འདི་དག་ཐམས་ཅད་གཅིག་ཀྱང་མ་ལུས་པར་འཁོར་བའི་རྒྱ་མཚོ་ཆེན་པོའི་སྡུག་བསྔལ་གྱི་གནོད་པ་སྣ་ཚོགས་ཅན་འདི་ལས། ཕ་རོལ་ཐར་བ་ཡང་དག་པ་རྫོགས་པའི་སངས་རྒྱས་ཀྱི་གོ་འཕང་དམ་པར་འགོད་པ་ཡིན། དེའི་ཆེད་དུ་དགེ་བའི་བཤེས་གཉེན་བསྟེན། དེ་ལས་དམ་པའི་ཆོས་ཉན། དེའི་མན་ངག་བཞིན་དུ་དེ་དོན་སྒྲུབ་བསྡད་ནས་སྟོབས་བཅུའི་སྟོབས་མངའ་དབང་བཅུའི་དབང་དང་ལྡན་པའི། གཉིས་ལ་མི་གནས་པའི་རྫོགས་པའི་བྱང་ཆུབ་ཀྱི་གོ་འཕང་ཚེ་འདི་ལ་བསྒྲུབ་ནས་འགྲུབ་པ་ཞིག་བྱེད་རྒྱུ་ཡིན་བསམ་པའི་དོན་གཉིས་ལྡན་པའི་སེམས། དགེ་རྩ་ཐབས་ཀྱིས་ཟིན་པ་ད་ཞག་ལོ་རིང་ལ་དཔེ་འཇོག་འདུག་རྒྱུའི་ལྕགས་གསེར་ལ་བསྒྱུར་བ་འདྲ་འདྲའི་ཡོན་ཏན་དང་ལྡན་པའི་སྦྱོར་བ་སེམས་བསྐྱེད་དམ་པ་དང་ནི། ད་དངོས་གཞིའི་སྐབས་ལ་ཡིན་ན། ཕྱག་རྒྱ་ཆེན་པོ་དང་རྫོགས་པ་ཆེན་པོའི་སེམས་ཁྲིད་རེ་ཐོབ་པ་དང་ནི། དེ་མིན་ན་སྔར་ཐོས་པའི་བག་ཆགས་རེ་བཞག་མྱོང་ནས་སྤྲོས་བྲལ་དབུ་མ་ཆེན་པོའི་ལྟ་བའི་གོ་དོན་རེར་སེམས་ཕྱོགས་པ་ཚོས་དེའི་དོན་ལ་སེམས་འཇོག་པའམ། མིན་རུང་འདི་ལྟར་སྣང་བའི་ཆོས་ཐམས་ཅད་བདེན་པར་གྲུབ་པ་གཅིག་ཀྱང་མེད་པར་སྒྱུ་མ་རྨི་ལམ་སྨིག་རྒྱུ་མིག་ཡོར་དྲི་ཟའི་གྲོང་ཁྱེར་ལ་སོགས་པ། སྒྱུ་མའི་དཔེ་བརྒྱད་གསུངས་པ་བཞིན་དུ་སྣང་ལ་རང་བཞིན་གྱིས་མ་གྲུབ་པ་ཆགས་བཞག་ན་ཁ་སང་དང་མདང་གི་རྨི་ལམ་གཉིས་ཀ་དེ་རིང་མེད་ལུགས་གཅིག་པ་འདྲ་འདྲ། དེ་རིང་གི་བྱ་གཞག་དང་དོ་དགོང་གི་རྨི་ལམ་གཉིས་ཀ་སང་ཉིན་མེད་ལུགས་གཅིག་པ། དཔེ་དེ་བཞིན་དུ་འཁོར་འདས་སྣང་གྲགས་ཀྱི་ཆོས་ཐམས་ཅད་པོ་འདི་རྨི་ལམ་སྒྱུ་མ་སོགས་བཞིན་ཡིན་པའི་ངེས་ཤེས་དང་མ་བྲལ་ན་དེ་ལ་དངོས་གཞིའི་དམིགས་མེད་རྗེས་མཐུན་པ་དང་། དེ་ལ་བསྟེན་ནས་རིམ་བཞིན་སྦྱངས་པ་ནར་སོན་གྱི་རིམ་པ་དེ་བརྒྱུད་ན། སྟོང་ཉིད་ཀྱི་ལྟ་བའི་དོན་ལ་ཕྱོགས་མཐུན་པར་མ་ཚད་དེ་ཙམ་གྱིས་ཀྱང་ཆགས་སྡང་ཁོང་ཁྲོ་ལ་སོགས་པའི་རྟོག་ངན་འགོག་ཐུབ་པ་ཡིན་པས་ཀྱང་། དགེ་རྩ་རྐྱེན་གྱིས་མི་བཤིག་པར་བྱེད་པའི་ཡོན་ཏན་དང་ལྡན་པའི་དངོས་གཞི་དམིགས་མེད་ཀྱི་གྲས་སུ་འགྲོ་རྒྱུ་རེད། རྗེས་ལ་ཇི་ལྟར་བྱ་བ་དེ་ནི་ཆོས་ཐུན་གཅིག་ཞུས་པའི་དགེ་རྩ་དེ་ཡང་ད་སྔར་འགོ་ནས་སེམས་བསྐྱེད་པ་ནང་བཞིན་གྱིས། མ་སེམས་ཅན་ཐམས་ཅད་རྫོགས་པའི་བྱང་ཆུབ་ཆེན་པོ་ཐོབ་པའི་བླ་ན་མེད་པའི་དགེ་རྩ་དམ་པ་དེ་ལ་བསྔོ་དགོས་པ་རེད། བསྔོ་ཟེར་བ་ནི་མ་སེམས་ཅན་ཐམས་ཅད་བདེ་བའི་དོན་ལ་དགེ་རྩ་འདི་བྱིན་པ་ཡིན་ཞེས་པ་ལྟ་བུ་རེད། དེ་རང་གར་བྱིན་ནས་བསྔོ་བ་ཞིག་གིས་བསྔོ་བ་དུག་མེད་ལ་འགྲོ་རྒྱུ་ཡོད་མ་རེད། ད་དགེ་རྩའི་ནང་ལ་ཅི་ཞིག་གི་དུག་ཡོད་པ་རེད་ཟེར་བ་ཡིན་ན། དགེ་རྩ་དེ་དང་འབྲེལ་བའི་འཁོར་གསུམ་དུ་གཏོགས་པའི་འཛིན་ཞེན་ཅིག་ཡོད་ན་དེའི་མིང་ལ་དུག་ཟེར་བ་རེད། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་གསུངས་སོ། གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་དམིགས་མེད་འཁོར་གསུམ་དག་པས་ཟིན་དགོས་པས། དྲི་མས་མ་སྦགས་པའི་དགེ་རྩ་ཞིག་སོ་སོ་སྐྱེ་བོའི་ས་ནས་ཅུང་དཀའ་བ་ཡིན་པས། དངོས་གཞི་དམིགས་མེད་ཀྱི་ཉམས་ལེན་གྱི་རྩི་དང་མ་བྲལ་བཞིན་དུ་འཕགས་ཆེན་འཇམ་པའི་དབྱངས་དང་ནི་བྱང་ཆུབ་སེམས་དཔའ་ཀུན་ཏུ་བཟང་པོ་སོགས་ཀྱིས་འགྲོ་བའི་དོན་ལ་ཇི་ལྟར་བསྔོས་པ་བཞིན་དུ། བསྔོ་རྒྱུའི་འདུན་པ་ངག་འདོན་ཁྱད་པར་བ་དང་སྦྲེལ་བས་བསྔོ་བ་དུག་མེད་ཀྱི་གོ་ཆོད་རྒྱུ་གསུངས་ཡོད་པ་རེད། བསྔོ་བ་ཚུལ་བཞིན་བྱས་པ་དེ་ལ་དགེ་རྩ་གོང་ནས་གོང་དུ་རྒྱུན་མི་ཆད་པར་འཕེལ་བར་བྱེད་པའི་ཡོན་ཏན་དང་ལྡན་རེད། ད་དེ་ལྟ་བུའི་སྦྱོར་དངོས་རྗེས་གསུམ་ཚང་ཞིང་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་ལྡན་པས། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་དག་སྣང་མོས་པ་རྣམ་དག་དང་མ་བྲལ་བ་དང་བཅས་པའི་ཐེག་ཆེན་གསང་སྔགས་ཀྱི་ཆོས་འཆད་ཉན་ལ་ཞུགས་དགོས་པ་དེ་སྔར་ཡང་ལན་གཅིག་མིན་པར་ཐེངས་མང་པོར་བཤད་པ་ལྟར་དུ་རེད།།

དེ་ལ་སྐབས་སུ་བབས་པ་གང་ཞིག་འཆད་ཉན་བྱ་བཞིན་པ་ངས་བྲིས་པའི་ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས་འདི་ཉིད་ཡིན་ན། འདིའི་མགོ་ཡི་ཚིག་ཁ་གསུམ།

ཕྱོགས་བཅུའི་སངས་རྒྱས་བྱང་སེམས་བླ་མ་དགོངས།།

དཀོན་མཆོག་གསུམ་ལ་སྙིང་ནས་སྐྱབས་སུ་འཆི།།

སེམས་ཅན་དོན་དུ་བྱང་ཆུབ་སེམས་མཆོག་བསྐྱེད།།

ཅེས་པ་ཡན་ཆད་ཀྱིས་ལམ་ལོག་པ་ལས་ལྡོག་པའི་སྐྱབས་འགྲོ་དང་ནི་ལམ་དམན་པ་ལས་ལྡོག་པའི་སེམས་བསྐྱེད་གཉིས་ཀ་སོང་བ་རེད། དེ་སོང་ནས་ད་དེ་རིང་ནི་ཁ་སང་གི་བཤད་སྐལ་ལྷག་སོང་བའི་ཚོགས་བསག་སྒྲིབ་སྦྱོང་གི་གནད་བསྡུས་པ། ཡན་ལག་བདུན་པ་དང་ནི་བླ་མའི་རྣལ་འབྱོར་བཤད་པའི་ཉི་མ་རེད།

ཏྲཱཾ། རྣམ་མཁྱེན་རྫོགས་བྱང་དུ་བགྲོད་བྱེད་ཚོགས་གཉིས་ཤིང་རྟའི་འཁོར་ལོ།

ཀ བསོད་ནམས་ཀྱི་ཚོགས་བསོག་པ་ཡན་ལག་བདུན་པ།

དང་པོར་ཡན་ལག་བདུན་པ་བཤད་ན།

ཕྱག་འཚལ་མཆོད་འབུལ་སྡིག་ལྟུང་ཐམས་ཅད་བཤགས།།

དགེ་ལ་ཡི་རངས་ཆོས་འཁོར་བསྐོར་བར་བསྐུལ།།

མི་འདའ་བཞུགས་གསོལ་དགེ་ཀུན་བྱང་ཆུབ་བསྔོ།།

ཞེས་བྲིས་ཡོད་ན། དེ་ལྟར་སྨོས་པའི་ཡན་ལག་བདུན་གྱི་དང་པོ་ཕྱག་འཚལ་བ་རེད།

༡ ང་རྒྱལ་གྱི་གཉེན་པོར་ཕྱག་འཚལ་བ།

ཕྱག་འཚལ་བ་ནི་ང་རྒྱལ་གྱི་གཉེན་པོ་ཡིན་ལ། སྤྱིར་ན་ང་རྒྱལ་ཅན་ལ་ཡོན་ཏན་ཆེན་པོ་མེད་རྟགས་རེད། ཆགས་བཞག་ན་ཆུ་ཟོམ་ཕྱེད་ཅིག་ཁུར་ན་ཁུར་མི་བདེ་ནི་འདྲ་བ་སྦྱངས་པའི་ཡོན་ཏན་གྱི་ཁ་མ་གང་ནིའི་ཡོན་ཏན་སྣ་རེ་སྣ་གཉིས་ཡོད་པ་བདུད་དུ་ལྡང་ནས་རྒྱན་ལ་མ་སོང་མཚང་ལ་སོང་། མེད་པོ་རྟ་ཐོག་ལ་ཐོན་ན་སྐེ་སྐེ་སྐེ། །སྲན་མ་རྔ་ཐོག་ལ་བཞག་ན་རིལ་ལུ་ལུ། །ཟེར་བ་ལྟར་རང་ཉིད་ང་རྒྱལ་གྱིས་སྦོས་ནས་འདུག་མི་བདེ་བ། རྒྱུད་ང་རྒྱལ་ཅན་གྱི་མི་དེ་གཞན་དང་འགྲོགས་ན་ཡང་འགྲོགས་ཁ་མི་བདེ་བ་ཕུག་གི་གནུར་གི་འདུག་པ་རེད། དེ་དང་འགྲོགས་ན་ཕན་མེད་གནོད་དུ་ལོག་པར་མ་ཟད་ང་རྒྱལ་ཅན་ཁོ་རང་རང་ཉིད་ལ་ཡང་ཡོན་ཏན་གསར་པ་སྐྱེས་ཐུབ་པ་མ་རེད། ང་རྒྱལ་བཅག་པ་དེ་ཅི་འདྲ་ཞིག་དགོས་ཞེས་ན། ཁྱུ་མཆོག་རྭ་བཅད་པ་ལྟར་རམ་ཟོ་ཐུག་ལ་ཕྱེ་མར་བཏབ་པ་ལྟར་གསུངས་པའི་དཔེ་བཞག་ཡོད་པ་རེད། དེ་ཡང་ཟོ་ཐུག་ཅི་ཡིན་ནི་རེད་ཅེ་ན། དེ་རྩམ་པའི་ཐུག་པ་བསྐོལ་རྒྱུ་པོ་རེད། སྡེ་དགེ་ཁམས་ཕྱོགས་འདི་ཡར་མར་གྱིས་འབའ་ཧུབ་བསྐོལ་ཟེར་དར་ཡིན་ན། འབའ་ཧུབ་ཁོལ་ལོང་མི་སྟེར་བར་ཕག་སྒྲ་གྲགས་ནས་འཕྱུར་དེ་ཕྱིར་ལ་བརྒྱབ་འཇོག་པ་རེད། དེའི་སྟེང་ལ་མར་ཞིག་འཕངས་བཞག་ན་ཟོ་ཐུག་ལ་ཕྱེ་མར་བཏབ་པའི་དཔེ་འཇོག་པ་ལས་ཕྱེ་མར་ནི་མར་ལ་གསུངས་པ་རེད། དེའི་རྩམ་ཐུག་དེའི་ནང་ལ་མར་ཞིག་འཕངས་ན་ལྷོད་ཆགས་ཀེར་གྱུར་འགྲོ་བའི་དཔེ་བཞག་པ་རེད། དེ་ཡིན་པས་ན་ཕྱག་འཚལ་བ་ནི་ང་རྒྱལ་གྱི་གཉེན་པོ་ཡིན་པས་ཕྱག་འཚལ་དུས་སྒོ་ལུས་ངག་ཡིད་གསུམ་པོས་གུས་ཞིང་དད་པའི་སྒོ་ནས་ཕྱག་འཚལ་བས་ཅི་ཞིག་གི་ཕན་ཡོན་ཡོད་ནི་རེད་ཅེ་ན། སྦྱངས་བྱ་སྡིག་པའི་སྒོ་དྲུག་གི་ནང་ནས། མི་དགེ་སྡིག་པ་ཟེར་དུས་བཤགས་བྱ་སྡིག་པའི་སྒོ་དྲུག་ལ་བརྟེན་ནས་ཡོང་བ་ཡིན་ན། དེའི་ནང་ནས་ལུས་ངག་ཡིད་གསུམ་ནི་སྒོ་གསུམ་སྡིག་པའི་སྣ་འདྲེན་གྱི་བྱེད་པོ་རྟེན་གཞིས་བྱེད་ལས་ཅན་གྱི་ཡོང་སའི་སྒོ་ངོ་མ་གསུམ་དེ་དེ་རེད། དེ་གསུམ་གྱི་སྒོ་ནས་བསགས་པའི་སྡིག་སྒྲིབ་དག་ཅིང་བྱང་བར་བྱེད་པ་རེད། སྡིག་སྒྲིབ་དག་ཅིང་བྱང་ཟེར་དུས་དག་དང་བྱང་གཉིས་ལ་ཅི་ཞིག་གི་ཁྱད་པར་ཡོད་ན་བསམ་ན། རགས་པ་དག་ཅིང་ཕྲ་བ་ཡང་དག་སོང་ན་བྱང་ཟེར་ན་ཆོག་གི།

ད་ནི་འདི་ཕྱག་འཚལ་བཤད་པའི་སྐབས་རེད། ཕྱག་འཚལ་བ་ནི་ཡན་ལག་བདུན་པོའི་ནང་གི་དང་པོ་རེད་མོ། ཕྱག་ཟེར་བ་འདི་ལ་དབྱེ་བ་ཕྱེ་ན། ནང་གསེས་ཀྱིས་རབ་ལྟ་བ་མཇལ་ཕྱག འབྲིང་བསྒོམ་པ་གོམས་ཕྱག ཐ་མར་བ་སྤྱོད་པ་མོས་གུས་ཀྱི་ཕྱག་གི་རྣམ་གྲངས་སོགས་ཡོད་ཀྱང་། དགེ་སྦྱོར་གང་བྱས་དམ་པ་གསུམ་དང་འབྲེལ་བ་གོང་ནས་བཤད་མ་ཐག་པ་ལྟར་དུ་སྒོ་ལུས་ངག་ཡིད་གསུམ་པོ་ཆུན་གཅིག་ལ་དྲིལ་ནས་ཕྱག་འཚལ་དགོས་པ་རེད། ཕྱག་འཚལ་བའི་སྐབས་ལ་ལུས་གུས་པས་མ་ལྔ་ས་ལ་ཕབས། ངག་གུས་པས་བསྟོད་ཚིག་དབྱངས་སུ་སྒྲོགས། ཡིད་གུས་པས་དད་དང་མོས་གུས་བཅོས་མིན་གྱིས་འཚལ་དགོས། ང་མྱི་གཅིག་གིས་ཕྱག་འཚལ་སར་ལྷ་རྟེན་གཅིག་གམ་སངས་རྒྱས་གཅིག་ལ་ཕྱག་འཚལ་གྱིན་ཡོད་པར་བསམ་ནས་འཚལ་ན་ཁྱབ་ཆུང་རེད། གོ་ཆེན་པོ་ཞིག་ཆོད་པ་མ་རེད། ཕྱག་འཚལ་ཡུལ་ནི་ཕྱོགས་བཅུའི་ཞིང་ཁམས་རབ་འབྱམས་ཀྱི་དུས་གསུམ་བྱོན་བཞུགས་འབྱོན་འགྱུར་རྒྱལ་བ་སྲས་དང་བཅས་པ། ནམ་མཁའ་གང་བའི་མཆོག་གསུམ་རྩ་གསུམ་གྱི་ལྷ་ཚོགས་ཕར་ལ་སྤྲོས་ན་བསམ་ཡས་ཞིང་ཁམས་རྒྱ་མཚོའི་རྡུལ་སྙེད་ཀྱི་གྲངས་ཀ་བློས་གཞལ་དུ་མི་བཏུབ་པ་གཞལ་མེད་ཡིན་པ། ཚུར་ལ་བསྡུས་ཡོང་ན་ཐམས་ཅད་བསྡུས་ཏེ་གཅིག་ལ་འདུས་པའི་སྤྲོ་བསྡུའི་བྱེད་པོ་དེ་གང་ཡིན་ན། དཀྱིལ་འཁོར་ཀུན་གྱི་གཙོ་མཆོག་བླ་མ་ཧེ་རུ་ཀ་དཔལ་དང་རྒྱལ་དབང་མཚོ་སྐྱེས་རྡོ་རྗེ། ཡང་ན་དེ་དང་གཉིས་སུ་མ་མཆིས་པའི་མགོན་པོ་འོད་དཔག་མེད་ལ་དམིགས་དེ་ཕྱག་འཚལ་དགོས་པ་རེད། ཕྱག་འཚལ་མཁན་རང་ཉིད་ཀྱང་། ང་མྱི་གཅིག་པོ་ཁེར་མ་ཡིན་རྒྱུའི་བསམ་བློ་མི་གཏོང་པར་རང་གི་ལུས་པོ་འདི་ཉིད་ཞིང་ཁམས་རྒྱ་མཚོའི་རྡུལ་སྙེད་ཀྱི་གྲངས་སུ་སྤྲུལ། དེ་དང་མཉམ་དུ་མཐའ་ཡས་ཕ་མ་སེམས་ཅན་དང་བཅས་པས་ཕྱག་འཚལ་གྱིན་ཡོད་པར་བསམ་ནས་འཚལ་ན། རྟེན་གཅིག་ལ་གང་ཟག་གཅིག་གིས་ཀུན་སློང་སེམས་བསྐྱེད་དེ་འདྲ་རྒྱ་མི་ཆེ་བ་ཞིག་གིས་འཚལ་ནའང་ཕན་ཡོན་ཆེན་པོ་ཡོད་ན། ཇི་སྙེད་ཕྱག་གི་ཡུལ་དུ་གྱུར་ཚད་ལ་དེ་སྙེད་ཀྱི་ལུས་སུ་སྤྲུལ་ནས་སེམས་ཅན་ཐམས་ཅད་ཀྱི་དོན་དུ་ཕྱག་འཚལ་ན། དེའི་ཕན་ཡོན་གྱི་ཚད་ནི་སུ་གཅིག་གིས་གཞལ་མི་ནུས་པ་རེད།།

སྔར་བཅོམ་ལྡན་འདས་འཁོར་དང་བཅས་པ་ནམ་མཁའ་ནས་འཕུར་ནས་བྱོན་གྱིན་ཡོད་དུས་ཞིག་ལ། དགེ་སློང་ཞིག་གིས་བདེ་བར་གཤེགས་པའི་དབུ་སྐྲ་སེན་མོའི་མཆོད་རྟེན་ཞིག་ལ་ཕྱག་འཚལ་གྱིན་ཡོད་པ་ལ། དེའི་ཕན་ཡོན་ཅི་འདྲ་ཞིག་ཡིན་ཞེས་ཀུན་དགའ་བོས་སངས་རྒྱས་བཅོམ་ལྡན་འདས་ལ་དྲིས་པས། འདིའི་ཕྱག་ལན་གཅིག་ཁེར་མ་ཅིག་འཚལ་བའི་ཕན་ཡོན་གྱིས་དགེ་སློང་རང་ཉིད་ཀྱི་ལུས་པོའི་ཁ་འོག་གི་ས་ཆེན་པོའི་རྡུལ་གྱི་ཁ་གྲངས་ཅི་འདྲ་ཞིག་ཡོད་ན། དེའི་གྲངས་ཀྱི་འཁོར་ལོས་སྒྱུར་བའི་རྒྱལ་པོའི་སྐྱེ་བ་འཛིན་ནོ། ཞེས་སངས་རྒྱས་བཅོམ་ལྡན་འདས་ཀྱིས་ཉེ་གནས་ཀུན་དགའ་བོ་ལ་དྲིས་ལན་དེ་ལྟར་གསུངས་པ་ལྟར་ཕྱག་གི་ཕན་ཡོན་ཐུན་མོང་བ་དེས་མཚོན་ནས་བཤད་ཐུབ་རེད།།

ད་ནི་ཐུན་མོང་མ་ཡིན་པ་ལ་བསམ་བློ་བཏང་ན། གསང་སྔགས་དང་འབྲེལ་ན་དེ་བས་ཀྱང་གཞལ་དུ་མེད་པའི་བསགས་སྦྱངས་ཀྱི་གནད་དུ་འགྲོ་བ་ནི་ཐབས་མང་དཀའ་བ་མེད་ཅིང་མྱུར་ལམ་ཡིན་པས་ཀྱང་ཤེས་ཐུབ་རེད། ང་ཚོའི་སྔོན་འགྲོའི་འབུམ་ལྔ་བསག་དུས་སྐྱབས་སེམས་གཉིས་སྐྱབས་འགྲོ་སེམས་བསྐྱེད་གཉིས་རེད། དེའི་འཕྲོར་ཡིག་བརྒྱ་མཎྜལ་གཉིས་ཀྱིས་འབུམ་བཞི་རེད། ཡན་ལག་བདུན་པ་དང་འབྲེལ་བའི་ཕྱག་འབུམ་གྱིས་འབུམ་ལྔ་བརྩི་པ་རེད།།

༢ འདོད་ཆགས་ཀྱི་གཉེན་པོར་མཎྜལ་འབུལ་བ།

དེས་ཕྱག་འཚལ་བ་སོང་ནས་ཡན་ལག་གཉིས་པ་ནི་མཆོད་པ་འབུལ་བ་ཡིན། མཆོད་པ་འདི་ལ་འཇིག་རྟེན་འདས་དང་མ་འདས་ཀྱི་མཆོད་པའི་རྣམ་གྲངས། དེ་ལ་ཡང་ཕྱི་ནང་གསང་བ་གསུམ་གྱི་རྣམ་གཞག །ཐུན་མོང་དང་ཐུན་མིན་ལ་སོགས་པའི་དབྱེ་བ་མང་།།

སྐབས་དོན་ཚོགས་གསོག་པའི་སྒོ་ཐམས་ཅད་ཚུར་འདུ་ཞིང་བྱ་སླ་ཁྱེར་བདེ་ཡིན་པས་ན། མཎྜལ་དང་སྦྱར་ནས་བཤད་རྒྱུ་ཡིན་ན། ད་གང་ལ་འབུལ་ཡུལ་ནི་མཆོག་གསུམ་རྒྱལ་བ་སྲས་བཅས་ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་བདེ་གཤེགས་རྒྱལ་བ་འོད་དཔག་མེད་ལ་འདུས་པ་དང་། རྒྱལ་བ་འོད་དཔག་མེད་ཀྱི་སྐུ་གསུང་ཐུགས་ལ་ཕྱོགས་བཅུའི་རྒྱལ་བ་སྲས་བཅས་ཀྱི་མཁྱེན་པའི་ཡོན་ཏན་ཚང་མ་འདུ་པ་རེད། དེའི་ཐུགས་སྤྲུལ་ཨོ་རྒྱན་པད་འབྱུང་རེད། དེ་དང་གཉིས་སུ་མེད་པ་དྲིན་ཆེན་རྩ་བའི་བླ་མ་ལ། མཚོན་བྱེད་རྫས་ཀྱི་མཎྜལ་འདི་དམིགས་པའི་རྟེན་ཞིག་རེད། དམིགས་རྟེན་དེ་ལ་བརྟེན་ནས་དམིགས་པ་གང་ཞིག་དམིགས་དགོས་རེད་ཅེ་ན། ཅི་ཞིག་འབུལ་བ་རྒྱལ་བ་སྐུ་གསུམ་གྱི་ཞིང་ཁམས་སུ་འབུལ་དགོས་པ་རེད། རྒྱལ་བ་སྐུ་གསུམ་གྱི་ཞིང་ཁམས་ཟེར་ན། སྐུ་གསུམ་ནི་ཆོས་སྐུ་ལོངས་སྐུ་སྤྲུལ་སྐུ་གསུམ་རེད། ནང་གསལ་ཆོས་སྐུའི་དུས་ན་འོད་གསལ་རྡོ་རྗེའི་སྙིང་པོའི་ཞིང་ཁམས། རང་སྣང་ལོངས་སྐུའི་དུས་ན་ཚངས་པ་རྔ་སྒྲའི་ཞིང་ཁམས། གཞན་སྣང་སྤྲུལ་སྐུའི་དུས་ན་ཚངས་ཆེན་གྱི་བསྐལ་བའི་ཞིང་ཁམས་དེ་འདྲ་གསུང་གི་ཡོད་པ་རེད། ཞིང་ཁམས་དེ་དག་གི་བཀོད་པ་དེ་བློ་ཡིས་བླངས་ནས་འབུལ་དགོས་པ་རེད། དེ་ཡང་ཅི་ལྟར་འབུལ་དགོས་རེད་ཅེ་ན། རང་ལུགས་ཆོས་བརྒྱུད་འདིའི་བཞེད་སྲོལ་མཁན་ཆེན་པདྨ་བཛྲ་ཡིས་རྩལ་དུ་བཏོན་པ་ལྟར་དུ་བཤད་ན། སྣང་ཚུལ་སྤྲུལ་སྐུའི་མཎྜལ་དང་གནས་ཚུལ་ལོངས་སྐུའི་མཎྜལ། ཁྱབ་བྱེད་ཆོས་སྐུའི་མཎྜལ་གསུངས་ཡོད་པ་རེད།།

༡༽སྣང་ཚུལ་སྤྲུལ་སྐུའི་མཎྜལ།

སྣང་ཚུལ་སྤྲུལ་སྐུའི་མཎྜལ་དེ་ནི་སྤྲུལ་སྐུའི་ཞིང་ཁམས་ཚངས་ཆེན་གྱི་བསྐལ་བས་གར་ཁྱབ་དེ་ཡིན་ནི་རེད།།

ཚངས་ཆེན་གྱི་བསྐལ་བ་ཟེར་ན། འབྱུང་བ་ལྔ་ཡིས་གར་ཁྱབ་ལ་གསུངས་ཀྱི་ཡོད་པ་རེད། རྣམ་པར་སྣང་མཛད་གངས་ཅན་མཚོའི་དབུའི་གཙུག་ཏོར་ནས་ཕྱག་མཉམ་བཞག་གི་ལྷུང་བཟེད་བར་གྱི་མེ་ཏོག་པདྨ་ཉི་ཤུ་རྩ་ལྔ་བརྩེགས་མར་ཡོད་པའི་ནང་གི་བཅུ་གསུམ་པ། སྐུའི་ཐུགས་ཀའི་ཐད་ཀྱི་པདྨའི་ཟེའུ་འབྲུ་དབུས་མའི་སྟེང་ན་ཡོད་པའི་མི་མཇེད་འཇིག་རྟེན་གྱི་ཁམས་བྱེ་བ་ཕྲག་བརྒྱ་དེ་སྤྲུལ་སྐུ་གཅིག་གི་གདུལ་ཞིང་ཡིན་པ་རེད། དེ་ཡིན་ན། དེས་མཚོན་པའི་རིགས་ལྔ་གངས་ཅན་མཚོ། དེ་རེ་རེ་ལ་ཡང་རིགས་ལྔའི་རིགས་གཅིག་གི་དབྱེ་བ་ཅན། དེ་རེ་རེའི་སྐུའི་རྡུལ་ཕྲན་རེ་རེ་ལ་ཡང་ཞིང་ཁམས་རྒྱ་མཚོ་ལྟ་བུར་རྣམ་པར་བཀོད་པའི་ཞིང་ཁམས། དེ་དག་གི་ལྷ་དང་མི་ཡི་དཔལ་འབྱོར་ལོངས་སྤྱོད་དེའི་སྟེང་ལ་རང་ཉིད་ཀྱི་ལུས་ལོངས་སྤྱོད་དང་ཁ་རྗེ་དབང་ཐང་། དུས་གསུམ་བསགས་པའི་དགེ་ཚོགས་དང་བཅས་པ་ལྟོས་མེད་དུ་འབུལ་བ་དེ་ནི་སྤྲུལ་སྐུའི་མཎྜལ་རེད། དེ་ནི་སྣང་ཚུལ་གྱི་ངོ་ནས་གཞལ་བས་བཤད་པ་ཡིན་པས་ན་སྣང་ཚུལ་སྤྲུལ་སྐུའི་མཎྜལ་ཞེས་པ་རེད།།

༢༽གནས་ཚུལ་ལོངས་སྐུའི་མཎྜལ།

གནས་ཚུལ་ཅི་འདྲ་ཞིག་ཡིན་སྙམ་ན། གནས་ཚུལ་དག་པ་རབ་འབྱམས་ངེས་པ་ལྔ་ལྡན་གྱི་ལོངས་སྐུའི་ཞིང་ཁམས་ཡིན་པ་རེད། གནས་ངེས་པ། དུས་ངེས་པ། སྟོན་པ་ངེས་པ། འཁོར་ངེས་པ། ཆོས་ངེས་པ་སྟེ། དེ་ཡང་གནས་ངེས་པ་འོག་མིན་སྟུག་པོ་བཀོད་པ་སོགས་ཡེ་ཤེས་རང་སྣང་ལས་ཤར་བའི་ཞིང་ཁམས་མཐའ་ཡས་མུ་མེད་པ། དུས་ངེས་པ་རྟག་པ་རྒྱུན་གྱི་འཁོར་ལོའི་རང་བཞིན་ཅན་དུས་གསུམ་གྱི་དུས་ལས་འདས་པའི་དུས། སྟོན་པ་ངེས་པ་རང་མདངས་ལོངས་སྐུའི་སྣང་བརྙན་དུ་ཤར་བའི་རིགས་ལྔ་གངས་ཆེན་མཚོ། འཁོར་ངེས་པ་ས་བཅུ་ལ་གནས་པའི་བྱང་ཆུབ་སེམས་དཔའ། ཁྱད་པར་དུ་ས་བཅུའི་རྒྱུན་མཐའ་ལ་གནས་པའི་བྱང་ཆུབ་སེམས་དཔའ། ཆོས་ངེས་པ་ཐེག་པ་ཆེན་པོའི་ཆོས་བརྗོད་མེད་བརྡ་ཡིས་སྟོན་པ། དེ་ལྟ་བུའི་རྒྱལ་བ་ཀུན་གྱི་ལོངས་སྐུའི་ཞིང་ཁམས་གཞི་དང་གཞལ་ཡས་ཁང་། རྒྱན་དང་བཀོད་པ་ཚད་མེད་པའི་མཆོད་པའི་རིགས་ཐམས་ཅད་ཀྱི་མཆོད་པའི་སྤྲིན་ཆེན་པོ་འཁྲིགས་པ། དེའི་སྟེང་དུ་རང་ཉིད་ཀྱི་ནང་རང་ལུས་རྡོ་རྗེའི་ཕུང་པོ་རྩ་རླུང་ཐིག་ལེ་ཡེ་ཤེས་སུ་ཡེ་ནས་དག་པ་དང་བཅས་པ་འབུལ་བ་ནི་གནས་ཚུལ་ལོངས་སྐུའི་མཎྜལ་རེད།།

༣༽ཁྱབ་བྱེད་ཆོས་སྐུའི་མཎྜལ།

ཁྱབ་བྱེད་ཆོས་སྐུའི་མཎྜལ་ནི། དེ་ཡང་གཟུགས་སྐུ་གཉིས་ཀྱི་འཕྲོ་གཞི་དེ་ཆོས་སྐུ་རེད། གཟུགས་སྐུ་གཉིས་ཟེར་ན་ལོངས་སྐུ་དང་སྤྲུལ་སྐུ་གཉིས་ཀ་རེད། དེ་ལྟ་བུའི་ལོངས་སྤྲུལ་གཉིས་སམ་གཟུགས་སྐུ་གཉིས་ཀྱི་འཕྲོ་གཞི་ཆོས་སྐུ་ཡིན་པ་དང་། ཆོས་སྐུའི་གདངས་དང་རོལ་རྩལ་དེ་ནི་གཟུགས་སྐུ་ཡིན་པས་ན། ཆོས་སྐུ་ཀུན་ཁྱབ་ནམ་མཁའ་ལྟ་བུའི་ངང་ལས་རང་སྣང་འགག་མེད་ལོངས་སྐུ་ཉིད་ལ་ཤར་བ། རོལ་རྩལ་ཐུགས་རྗེ་གདུལ་བྱའི་མོས་ངོ་ལྟར་དུ་དཔེ་བཞག་ན་ཉི་མའི་ཚ་ཟེར་དང་ཟླ་བའི་བསིལ་ཟེར་ཤར་བ་ལྟ་བུས་སྤྲུལ་སྐུར་ཤར་བ་ཡིན། ཁྱབ་བྱེད་ཆོས་སྐུའི་དགོངས་པ་དེ་ལྟ་བུ་ཞིག་ཡིན་པས་འཁོར་འདས་ཀྱི་རྒྱ་མ་ཆད། ཡོད་མེད་ཀྱི་ཕྱོགས་སུ་མ་ལྷུང་བའི་འོད་གསལ་རྡོ་རྗེ་སྙིང་པོའི་ཞིང་ཁམས་རེད། དེ་ནི་གདོད་ནས་དག་པ་ཀ་དག་སྟོང་ཆེན་གྱི་དབྱིངས་ལ་ལྷུན་གྲུབ་སྣང་སྟོང་མ་འགགས་སྣ་ཚོགས་ཀྱི་རོལ་བར་འཆར་དུ་རུང་བ། དབྱིངས་རིག་དབྱེར་མེད་འཁོར་འདས་མཉམ་པར་བརྡལ་བའི་ཆོས་ཆེན་པོ་སྨྲ་བསམ་བརྗོད་པ་དང་བྲལ་བ་ཡིན་ན། དེའི་སྟེང་དུ་རང་སེམས་སྐྱེ་མེད་ཀྱི་རྩལ་ལས་འགགས་མེད་དུ་ཤར་བའི་རྟོག་ཚོགས་མ་སྤངས་རང་གྲོལ་ཡེ་ཤེས་སུ་དག་པ་བཀོད་པ་འཛིན་མེད་ཆེན་པོར་འབུལ་བ་དེ་ཆོས་སྐུའི་མཎྜལ་རེད། །ད་འདི་ལྟར་བྱས་ནས་བཤད་ཡོང་དུས་འགའ་ཞིག་ཁ་སྐད་ཐ་མལ་གྲོང་ཚིག་ཟ་སྐད་འཐུང་སྐད་ཀྱིས་མཚོན་ཐབས་མེད་དུས། ཚིག་ཆ་རེ་ཁྱིམ་པ་ཕོ་མོའི་མི་གོ་རྒྱུ་ཡོད་མོད། དད་དང་མོས་གུས་གཙོར་འདོན་གྱིས་རིམ་བཞིན་འབད་པ་བྱས་ན་དྲག་རེད། བསྟན་བཅོས་ཀྱི་ཆོས་སྐད་དེ་བཞིན་དུ་མ་བྱས་དུས་ཐ་མལ་གྲོང་ཚིག་གིས་བཤད་ཐུབ་མ་རེད། ཐ་མལ་གྲོང་ཚིག་གི་ཁ་སྐད་ཀྱིས་ཆོས་བཤད་ཐུབ་ན་བསྟན་བཅོས་ཀྱི་སྐད་དེ་དགོས་དོན་ཡོད་མ་རེད། ད་དེང་སང་ཆོས་དང་རིག་གཞུང་མི་རིགས་གཞན་གྱི་སྐད་ཡིག་ལ་བསྒྱུར་མཁན་མང་བ་རེད་མོད། དེ་བསྒྱུར་བའི་སྐབས་སུ་གཞུང་སྡེ་སྣོད་གང་ཡིན་ནའང་དེའི་ཆོས་སྐད་ཀྱི་ཐོག་ལ་ཐིག་ཐོག་ནས་ཞོག་གི་ལོས་ཡོད་མ་གཏོགས། ཆོས་སྤེལ་རེད་དང་ཆོས་སྤོང་རེད་ཤེས་མ་རེད། གཟབ་དགོས་སའི་ཡུལ་གཅིག་ཡིན་པ་རེད། དེ་བས་ན་ཁྱིམ་པ་ཕོ་མོ་ཚོས་ཆོས་སྐད་འདི་འདྲ་བྱས་ནས་བཤད་ཡོང་དུས་དེ་ཙམ་ཞིག་གོ་རྒྱུ་མ་རེད་དང་ནི། དད་དང་མོས་གུས་གཙོར་འདོན་གྱིས་རིམ་བཞིན་འབད་པ་བྱས་ན་དྲག་རྒྱུ་རེད་ཅེས་ངས་བཤད་པ་རེད། མོས་གུས་དཀར་བོ་ཆིག་ཐུབ་ཀྱི་ལག་ཁྱེར་དེ་རང་གི་ལག་ན་ཡོད་དུས་ས་མི་ཆོད་ས་ཞིག་ཡོད་མ་རེད།།

ད་ནི་ཆོས་སྒྲུབ་ནས་འགྲུབ་ཟེར་བ་དེ་ཅི་འདྲ་ཞིག་ཡིན་རེད་ཅེ་ན། གློག་གི་འཕྲུལ་སྒོ་ཕྱེས་བཏང་བ་ལྟར་སླ་མོ་ཞིག་ག་ལ་ཡིན་མོད། དུས་རིང་བོའི་བསྐལ་བ་མང་པོའི་མཐའ་དང་སྐྱེ་བ་མང་པོ་བྱས་ནས་སྒུག་མི་དགོས་པའི་ཟབ་ཆོས་འདི་འདྲ་བར་བལྟས་ཡོང་ན། ཁྱིམ་གཅིག་གི་གཞི་ཆས་འཁོར་བའི་འདུག་ཆས་ཞིག་མི་ཚེ་ཕྱེད་ཀའི་རིང་ལ་འགྲུབ་མི་འགྲུབ་ཡིན་ན། དེ་ཚོར་བསྡུར་ཡོང་ན་རང་གཞན་འདི་ཕྱིའི་བདེ་སྐྱིད་བརྩོན་པ་མ་ཞན་ན་ལོ་དང་ཟླ་བས་ཡང་འགྲུབ་རྒྱུ་འདི་གཅིག་བྱས་ན་གློག་གི་འཕྲུལ་སྒོ་ཕྱེས་པ་ལས་སླ་ཞིག་རེད། དེ་ཡིན་དུས་འཕགས་པའི་ལམ་ཟེར་བ་ནི་སྐྱེས་བུའི་རང་གིས་བསྒྲུབ་ཏེ་འགྲུབ་པ་ཞིག་རེད་མ་གཏོགས། དང་པོ་ནས་ཤེས་ཤེས་ཁ། གྲུབ་གྲུབ་ཁ། འགྲུབ་འགྲུབ་ཁ་ཡོད་པ་ཞིག་ཡིན་ནི་མ་རེད། ཆར་བ་བཞིན་དུ་གནམ་ནས་རང་བབས་རེད་ཡོང་རྒྱུ་ཞིག་དང་ལོ་ཏོག་བཞིན་དུ་ས་ནས་རང་རྡོལ་རེད་ཡོང་པ་ཞིག་མ་རེད། །དེ་སོ་སོ་སྐྱེས་བོ་ཐ་མལ་བ་ཡིན་རུང་། དགེ་བའི་བཤེས་དང་དགེ་གྲོགས་ལ་བསྟེན་ནས་འབད་པ་ཞིག་བྱས་ན། ཉོན་མོངས་པའི་ཆུ་བོ་ལས་བརྒལ་ནས་སྲིད་པའི་གྲོང་ལས་རིང་དུ་འདའ་ཐུབ་པར་མ་ཚད། མཐའ་གཉིས་ལ་མི་གནས་པའི་བྱང་ཆུབ་ཆེན་པོ་ཡང་འབད་ན་རང་གི་ལག་ན་ཡོད་པ་རེད། འགའ་རེས་བཤད་ན་དོན་དམ་འབྲས་བུའི་ཟབ་གནད་ལ་ཐད་ཀར་འཇུག་ན་མ་གཏོགས་ཀུན་རྫོབ་མཚན་མའི་ཆོས་ཀྱིས་སངས་མི་རྒྱ་ཟེར་མཁན་ཡོད་རྒྱུ་རེད། རེད་དེ། ཇི་སྲིད་རྣམ་རྟོག་བག་ལ་ཉལ་འདི་སྐྱེ་བ་མེད་པའི་དབྱིངས་སུ་བྱང་མ་ཆུབ་པའི་རིང་ལ། ད་རུང་ལས་ཀྱི་ཕྱི་བཞིན་དུ་འབྲང་བ་མ་གཏོགས་ཐབས་མེད་པ་ཡིན་དུས། ཚོགས་གཉིས་ཤིང་རྟའི་འཕང་ལོ་ཟུང་དུ་སྦྲེལ་ནས་བྱ་ཁྱུང་ཆེན་གཤོག་པ་གཉིས་ལྡན་གྱིས་མཁའ་ལམ་གཅོད་པ་མ་གཏོགས། བྱ་གཤོག་ཡ་མ་ཞིག་འཕུར་དགོས་ཟེར་ན་འཕུར་ཐུབ་པ་མ་རེད། སྟོང་བཤད་རེད།།

ད་མཎྜལ་འདི་དང་སྒོ་བསྟུན་ནས་དངོས་སུ་འབྱོར་བ་དང་ཡིད་ཀྱིས་སྤྲུལ་བ། བདག་པོས་ཡོངས་སུ་བཟུང་བ་དང་མ་བཟུང་བ། ཐ་ན་ཆུ་གཙང་དལ་འབབ་ཞིག་དང་སྤང་གི་མེ་ཏོག་རྐང་གཅིག་ཚུན་ཆད་ཡིན་ཡང་ཡིད་དུ་འོང་བའི་དངོས་པོ་ཅི་ཡོད་མཆོད་པའི་རྫས་སུ་འབུལ་ཆོག་གི དམིགས་རྟེན་དངོས་འབྱོར་ལ་བྱས་ནས་ཡིད་སྤྲུལ་ཀུན་ཏུ་བཟང་པོའི་མཆོད་སྤྲིན་ཟད་པ་མེད་པར་ཡིད་ནས་སྤྲོ་ཆོག་རེད། དེ་ཡང་ངའི་དངོས་འབྱོར་ཐབས་ཆག་པོ་དེ་དང་། དེའི་སྟེང་ལ་ངས་ཅིག་སྒོམ་ཁུལ་བྱས་པ་དེས་རྒྱལ་བ་སྲས་བཅས་མཉེས་བྱེད་ཅིག་ཨེ་ཡོང་ན་བསམ་དགོས་ནི་མ་རེད། བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་གྱིས་ནི། །བདག་གི་དོན་སླད་ཉིད་ཀྱི་མཐུས་བཞེས་ཤིག །གསུངས་པ་ལྟར་དུ། རྒྱལ་བ་སྲས་བཅས་མཆོད་རྫས་ལ་ཞེན་པ་ཡོད་པ་མ་རེད། མཉེས་དང་མི་མཉེས་པའི་ཐ་སྙད་དོན་ལ་མེད་ཀྱང་། འབུལ་བ་བོ་སེམས་ཅན་རང་ཉིད་ཀྱི་བསོད་ནམས་གསོག་ཆེད་དུ་རྒྱལ་བ་སྲས་བཅས་ཀྱིས་སྙིང་རྗེའི་སྟོབས་ཀྱིས་བཞེས་ཀྱིན་ཡོད་པ་རེད།།

མཆོད་པ་འདི་ཕུལ་བའི་ཕན་ཡོན་ལ་བསམ་ན། གནའ་སྔོན་མ་ཞིག་ལ་རྒྱལ་པོ་གསལ་རྒྱལ་ཟེར་བ་དེའི་སྐྱེ་བ་སྔོན་མ་ཞིག་ལ། ཁོ་རང་མྱི་དབུལ་བོ་སྤྲང་པོ་ཞིག་ཏུ་སྐྱེས་པའི་སྐབས་ལ་རང་སངས་རྒྱས་ཞིག་ལ། སྤྲང་བོ་ཡིན་པས་ཆ་རྐྱེན་མེད་རུང་ཟན་དྲོན་པོ་ལན་ཚྭ་མེད་པ་ཞིག་དད་པས་ཕུལ་བའི་སྟོབས་ཀྱིས་སྐྱེ་བ་བརྗེ་མ་ཐག་སུམ་ཅུ་རྩ་གསུམ་གྱི་བདག་པོར་ལན་དྲུག་ལ་སྐྱེས་པ་རེད། དེའི་མཚམས་ནས་རྒྱ་གར་གྱི་ཡུལ་མཉན་ཡོད་ཀྱི་གྲོང་ཁྱེར་ཆེན་པོ་དེའི་རྒྱལ་པོ་གསལ་རྒྱལ་དུ་གྱུར་ནས་སངས་རྒྱལ་བཅོམ་ལྡན་འདས་ཀྱི་སྦྱིན་པའི་བདག་པོ་རེད་སོང་རེད། ཡང་བྱིས་པ་ཞིག་གིས་སངས་རྒྱས་ལ་ས་སྤར་བ་གང་དགའ་ཞིང་དད་པས་ཕུལ་བ་དེ་ཆོས་རྒྱལ་མྱ་ངན་མེད་དུ་གྱུར་སོང་བ་རེད། ད་རུང་སྔོན་རྒྱལ་པོ་ཀྲི་ཀྲིས་སངས་རྒྱས་འོད་སྲུང་མྱ་ངན་ལས་འདས་པའི་སྐུ་གདུང་ལ་རིན་པོ་ཆེ་སྣ་བཞི་ལས་གྲུབ་པའི་མཆོད་པ་ཁོར་ཡུག་དཔག་ཚད་རེར་ཡོད་པ། གྱེན་ལ་དཔག་ཚད་ཕྱེད་ཡོད་པ་དེ་འདྲ་ཞིག་བརྩིགས་པ་དེར་རྒྱལ་པོའི་སྲས་འབྲིང་བས་གདུགས་འབྲིང་བོ་ཞིག་བཏགས་པའི་བསོད་ནམས་ཀྱི་སྟོབས་ཀྱིས་འཁོར་ལོས་སྒྱུར་བའི་རྒྱལ་སྲིད་ཉིས་སྟོང་ལྔ་བརྒྱ་བྱས་པའི་མཐའ་མ་ལ། སངས་རྒྱས་བཅོམ་ལྡན་འདས་ཀྱི་སྐུ་མཆེད་ཆུང་བ་གཅུང་དགའ་བོར་སྐྱེ་བ་བཞེས་པ་རེད། ཡང་བྲམ་ཟེ་བཟའ་མི་གཉིས་ནས་རང་སངས་རྒྱས་ཞིག་ལ་ཆོས་སྟོན་ཞིག་དྲངས་པས་དེའི་སྟེང་ནས་བསོད་ནམས་སྟོབས་ཀྱིས་ཁོ་ཚོའི་ཞིང་ནང་ལ་གསེར་གྱི་སྙེ་མ་འཁྲུངས་རབས་གསུངས་ཡོད། དེ་བས་ན་མཆོད་པ་ཕུལ་བའི་ཕན་ཡོན་ནི་བསམ་གྱིས་མི་ཁྱབ་པ་བཤད་ན་ཚར་རྒྱུ་མེད་པ་ཞིག་རེད།།

༣ ཞེ་སྡང་གི་གཉེན་པོར་རྡོར་སེམས་བསྒོམ་བཟླས་ཀྱི་བཤགས་པ།

ད་ཡན་ལག་གསུམ་པ་དེ་ནི་བཤགས་པ་ཡིན། བཤགས་པ་འདི་གཙོ་བོ་ཞེ་སྡང་གི་གཉེན་པོར་གསུངས་པ་ཡིན། གཙོ་བོར་ཞེ་སྡང་རེད་ཟེར་དུས། གཙོ་བོ་ཞེས་པའི་སྒྲ་ལས་ཅི་ཞིག་གོ་རྒྱུ་ཡོད་པ་རེད་ཅེ་ན། དེས་ཀྱང་མཚོན་པ་མིན་པའི་ཉོན་མོངས་དུག་གསུམ་དུག་ལྔས་ཀུན་ནས་བསླང་པའི་ཉེས་འགལ་སྡིག་སྒྲིབ་ཉེས་ལྟུང་ཐམས་ཅད་པོ་བཤགས་བྱ་རེད། དེས་ན་སྡིག་སྒྲིབ་ནི་སྡིག་པ་དང་སྒྲིབ་པ་གཉིས་སྦྲེལ་གྱི་ཚིག་གཉིས་མཉམ་པོར་སྦྱར་བ་ཞིག་རེད། འདི་གཉིས་ཀ་ངོ་བོ་དང་བྱེད་ལས་ཀྱི་ཆ་ནས་གསུངས་རྒྱུའི་གོ་བ་ལེན་དགོས་པ་རེད། ངོ་བོ་ནི་བཅས་དང་རང་བཞིན་གྱི་སྡིག་པའམ་ཉེས་ལྟུང་། དེས་གང་ལ་ཇི་ལྟར་སྒྲིབ་ན། ལས་ཉོན་བག་ཆགས་དང་བཅས་པ་ལ་བཤད་ན། ལས་ཀྱིས་སྒྲིབ་པས་མཐོ་རིས་ལྷ་མིའི་གོ་འཕང་ལ་སྒྲིབ་པ་རེད། ཉོན་མོངས་པའི་སྒྲིབ་པས་ཐར་བ་ཉན་རང་གི་གོ་འཕང་ལ་བསྒྲིབས། ཉོན་མོངས་ཟེར་ན། རྣམ་གྲངས་ལ་བརྒྱད་ཁྲི་བཞི་སྟོང་། རྩ་བ་དུག་ལྔ་དུག་གསུམ། དེ་ཡང་འདྲེན་བྱེད་ངོ་མ་དེ་གང་ཡིན་ནི་རེད་ཅེ་ན། ཚུལ་མིན་ཡིད་བྱེད་ཀྱི་ཀུན་རྟོག་ངན་པ་གཅིག་ལ་ཐུག་ཡོད་པ་རེད། སྡིག་སྒྲིབ་བག་ཆགས་དང་བཅས་ཟེར་ཡོང་དུས་ཤེས་སྒྲིབ་ཤིན་ཏུ་ཕྲ་བའམ་ཡང་ན་བག་ཆགས་ཀྱིས་སྒྲིབ་པས་རྣམ་པ་ཐམས་ཅད་མཁྱེན་པའི་གོ་འཕང་ལ་བསྒྲིབས་པ་རེད། ང་ལ་སྡིག་པ་དེ་འདྲ་མི་ཆེ་བསམ་རྒྱུ་ཡོད་པ་མ་རེད། ཐོག་མེད་ནས་བསགས་པའི་ལས་ཀྱི་མཐའ་ནི་དེ་བཞིན་གཤེགས་པ་མ་གཏོགས་གཅིག་གིས་ཀྱང་དཔོག་ཐུབ་པ་མ་རེད། དེ་འདྲ་ཡིན་པས་ན། རྣམ་རྟོག་འགྱུ་ལུགས་རེའི་ཁྱད་པར་གྱིས་སྡིག་པའི་ལས་ལྷ་ཁང་གི་ནང་དུ་འདུག་བཞིན་པ་ཡིན་རུང་། བལྟར་མི་མངོན་པར་ཡོང་རྒྱུ་དེ་ནི་སེམས་ཀྱི་ཉེས་པ་ཡིན་པས་ན། སྡིག་པ་དང་སྒྲིབ་པ་གང་ནས་བྱུང་དང་ཅི་ལྟར་ཡོད་ཇི་འདྲས་གསོག་ཤེས་མ་རེད། བསམ་བློ་གཏོང་ལུགས་ཀྱི་དབུགས་སྔ་ཕྱིའི་བར་ནས་འདི་བྱེད་སླ་བ་རེད། མི་ལ་ལས་ལས་ཀྱིས་བསྐོས་པ་རེད་ཟེར། དེ་ཟེར་ནས་སྒུག་འདུག་ཁུལ་བྱས་པ་ལས། ལས་ཟེར་བ་ནི་ལས་བཞག་པ། མྱིང་དང་དོན་མཚུངས། དང་པོ་ཚུར་ལ་ལས་ཡོང་བ་ཞིག་ད་ལས་ནས་ཕར་ལ་བཅོས་རྒྱུ་མེད་དོན་ཅི་ཡོད། འདུས་བྱས་ཀྱི་དངོས་པོ་ཐམས་ཅད་དང་པོ་བྱར་བཏུབ་པ་དེ་ནི་མཐའ་མར་བཤིགས་སུ་ཅི་ལ་མི་ཐུབ། དེ་ནི་སྡིག་པ་ལ་ཡོན་ཏན་མེད་ཀྱང་བཤགས་ན་དག་པ་སྡིག་པའི་ཡོན་ཏན་ཡིན་གསུངས་པ་ལྟར་རོ།།

དེ་འདྲ་ཡིན་དུས་ན་འགལ་ཉེས་གཏན་ནས་མི་ཤོར་པ་དེ་སྐྱེས་བུ་དམ་པ་ཡིན། འགལ་ནས་བཤགས་ཤེས་པ་དེ་ཡང་རིན་ཆེན་བུམ་བཟང་གི་ལུགས་བྱེད་ཤེས་པའི་སྐྱེས་བུ་དམ་པ་ཡིན་གསུངས་པ་རེད།།

གཉེན་པོ་སྟོབས་བཞིའི་སྒོ་ནས་བཤགས་ཚུལ།

༡༽རྟེན་གྱི་སྟོབས།

འདི་ཡང་རྡོར་སེམས་སྒོམ་བཟླས་ལ་སྦྱར་ནས་བཤད་ན། ཡང་གོང་ནས་ཕྱག་འཚལ་དུས་སྐབས་ལ་བཤད་པ་ལྟར་དུ། ང་མྱི་གཅིག་གིས་དེ་ཉིན་གཡག་རྒན་ཞིག་བཤས་པ་ལྟ་བུའི་སྡིག་པ་ཁེར་རུ་མ་ཞིག་སངས་རྒྱས་གཅིག་གི་མདུན་དུ་ཉེས་པ་ངོས་ལེན་བྱས་ནས་སངས་རྒྱས་སམ་སངས་རྒྱས་ཀྱི་སྐུ་འདྲ་གཅིག་གི་མདུན་ནས་བཤགས་ཀྱིན་ཡོད་པ་འདྲ་བའི་སེམས་རྒྱ་ཆུང་ཆུང་མ་ཡིན་པར། ཕྱོགས་བཅུའི་རྒྱལ་བ་སྲས་བཅས་ལ་སོགས་པའི་བཤགས་ཡུལ་ནམ་མཁའ་གང་བའི་ལྷ་ཚོགས། དེ་ཡང་ཀུན་འདུས་ནོར་བུའི་ལུགས་བཞིན་དུ་བླ་མ་རྡོ་རྗེ་སེམས་དཔའི་གསང་གསུམ་ལ་འདུས་པ་ཞིག་ངག་འདོན་རྒྱས་པ་ལྟར་དུ་གསལ་སྣང་སྣང་སྟོང་ཆུ་ཟླའི་རོལ་བར་བསྒོམ་པ་རྟེན་གྱི་སྟོབས་རེད།།

༢༽ཉེས་བྱས་སུན་འབྱིན་པའི་སྟོབས།

སྔར་བྱས་ཀྱི་སྡིག་པའི་ལས་ལ་ཁོང་དུ་དུག་སོང་བ་འདྲ་བའི་འགྱོད་པ་དྲག་པོ་བྱེད་རྒྱུ་དེ་ཉེས་བྱས་སུན་འབྱིན་པའི་སྟོབས། དེ་ཡང་བཤས་ཟིན་པའི་གཡག་རྒན་དེ་གཡག་རྒན་རང་ཡིན་པ་ཙམ་གྱིས་བསམ་བློ་ལས་ཅུང་ཟད་རྒྱ་ཆེ་རུ་བཏང་ནས། དེ་ནི་ངའི་མའི་སྐྱེ་བ་ཡིན་པ་དང་། དེ་ཡང་མའི་སྐྱེ་བ་ལན་གཅིག་མིན་པར་ལན་གྲངས་མང་པོར་ཐེངས་གྲངས་རྩི་རྒྱུ་མེད་པའི་བསམ་གྱིས་མི་ཁྱབ་པ་བྱས་མྱོང་བ་ཞིག་ཡིན་པས། དེ་ལ་བསམ་ནས་འགྱོད་པ་སྐྱེས། ད་ཕྱིན་ཆད་དེ་དང་དེ་ལྟ་བུའི་ཉེས་འགལ་གྱི་རིགས་སྲོག་དམར་བོ་འདི་ལ་བབས་རུང་མི་བྱེད་བསམ་པའི་སྡོམ་སེམས་ཡོད་རྒྱུ་དེ་ནི་སྡོམ་པའི་སྟོབས་གསུངས་པ་རེད།།

༣༽གཉེན་པོ་ཀུན་ཏུ་སྤྱོད་པའི་སྟོབས།

མི་དགེའི་གཉེན་པོར་འགྲོ་བའི་དགེ་བ་དེ་ལ་དོན་གཉེར་གྱི་འདུན་པ་བསྐྱེད་རྒྱུ་དེ་གཉེན་པོ་ཀུན་ཏུ་སྤྱོད་པའི་སྟོབས་རེད། སྤྱིར་ན་དགེ་བ་གང་སྒྲུབ་སྡིག་པ་བཤགས་བྱེད་ལ་འགྲོ་བ་རེད། དེ་ལ་གསང་སྔགས་ཀྱི་ཆོ་གའི་སྐབས་སུ་རུ་བཞིའི་བཤགས་པ་དང་ཟུང་བཞིའི་བསྐང་བ་སོགས་འབྱུང་རྒྱུ་དེ་ནི་སྡིག་སྒྲིབ་བཤགས་ཐབས་དང་ཉམས་ཆག་སྐོང་ཐབས་རེད། དམ་ཚིག་ཉམ་ཆག་བཤགས་རྒྱུ་དེ་སྒོམ་སྒྲུབ་ལ་འབྲས་བུ་འབྱུང་དང་མི་འབྱུང་གི་གནད་ལ་ཐུག་ས་ངོ་མ་དེ་ཡིན་རེད། དམ་ཚིག་ཅེས་པའི། དམ་པ་སྐུ་གསུང་ཐུགས་ཡིན་ཏེ། །ཉམས་པ་དེ་ལས་འདས་པའོ། །ཞེས་གསུངས། ད་རང་ཉིད་ཀྱི་ངོས་ནས། རྩ་བ་བླ་མའི་སྐུ་གསུང་ཐུགས་ལ་འགལ་བ་འདི་སོང་ཡོད་བསམ་རྒྱུ་མེད་ཀྱང་། ཟླས་ཉམས་གྲོགས་ཀྱིས་གནོད་བསྐྱལ་བ། ཞོར་ཉམས་མ་ཤེས་ནས་ཤོར་བ་ཇི་འདྲ་མེད། སྦལ་བ་རྨ་ཅན་གཅིག་གིས་སྦལ་བ་བརྒྱ་རྨ་ཅན་དུ་བྱེད་པ་བཞིན་དུ་ཉམས་དང་ཚོགས་འདྲེས་སོགས་ཀྱང་གཟབ་དགོས་སའི་ཡུལ་ཡིན། ལོག་ལྟ་ཅན་གྱི་གང་ཟག་དང་འདྲེས་པར་བྱས་ན་ཁོ་རང་ནི་ལོག་པའི་བློ་ཅན་ཡིན་པ་དང་ངན་འགྲོའི་ས་མཁན་ཡིན་པ། གཡང་སའི་ཕྱོགས་ལ་སྔ་འགྲོ་བྱེད་པ་པོ་ཡིན་པས་ན་རང་གི་ཆ་ནས་ཉེས་པ་མེད་ཀྱང་དེ་དང་དེ་འདྲར་འགྲོགས་པ་སྤོང་དགོས། སྔགས་ཀྱི་རྩ་ལྟུང་ཟེར་བ་ཞིག་ཡོད་པ་དེ་ལྗོན་ཤིང་གི་རྩ་བ་ཕུད་བཞག་ན། སྡོང་བོ་དང་ཡལ་ག་ནས་འབྲས་བུའི་བར་དུ་མེད་པ་རེད་འགྲོ་བ་བཞིན་དུ། ཡོན་ཏན་ཐམས་ཅད་བསྐྱེད་པའི་དམ་ཚིག་གི་རྩ་བ་དེ་ཕུད་བཞག་ན་གོང་མའི་ཆ་བསྐྱེད་ཅིང་འཕེལ་བ་ལ་སྒྲིབ་ཅིང་འོག་མར་གཏོང་བར་འགྱུར་བས་ན་རྩ་ལྟུང་གསུངས་པ་རེད། དབང་བསྐུར་རྒྱུད་བཤད་མན་ངག་བསྟན་པའི་བཀའ་དྲིན་སུམ་ལྡན་གྱི་བླ་མ་ལ་འགལ་སོང་ན། དེས་རྩ་ལྟུང་བསྐྱེད་ཀྱིན་ཡོད་པ་རེད། རྟེན་གྱི་གང་ཟག་སྡོམ་པས་རྒྱུད་མ་བསྡམས་ཤིང་དམ་ཚིག་ཁས་མ་བླངས་པ། གསང་སྔགས་ཀྱི་དཀྱིལ་འཁོར་གཅིག་ལ་ཞུགས་མ་མྱོང་བའི་སྐྱེས་བུ་ཞིག་ལ་དངོས་གྲུབ་དང་ལྟུང་ཉམས་གཉིས་ཀ་ཡོད་པ་མ་རེད། དེ་ནི་སློང་མོས་འཚོ་བའི་སྤྲང་བོ་ཞིག་ལ་མངའ་ཐང་ཡོད་ནི་མ་རེད་ལ་ཁྲལ་ཡང་འཇལ་དགོས་མ་རེད། མངའ་ཐང་དང་དཔྱ་ཁྲལ་གཉིས་ཀ་མེད་པ་འདྲ་བ་ལ་དཔེ་བཞག་ཡོད་པ་རེད། རེད་ད། རང་རེ་ལ་མཚོན་ན་དབང་མ་ཞུས་དམ་ཚིག་ཁས་མ་བླངས་བསམ་རྒྱུ་ཡོད་པ་མ་རེད། དེ་བས་བཤགས་པ་ཐམས་ཅད་ཀྱི་མཆོག་ཀྱང་བྱང་ཆུབ་ཀྱི་སེམས་སྒོམ་པ་དེ་ཡིན། དེའི་ཡན་གྱི་བཤགས་ཐབས་ཤིག་དང་ཚོགས་རྫོགས་ཐབས་ཤིག་དགོས་པ་མ་རེད། བྱང་ཆུབ་སེམས་ཀྱིས་སྡིག་པ་ཆུང་ཆུང་ཉི་ཟེར་གྱི་བ་མོ་བཞིན་དུ་རྐང་མེད་བྱེད་པ་དང་། སྡིག་པ་ཆེན་པོ་ཡིན་ཡང་ཉི་མས་ཁ་བ་བཞིན་དུ་ཇེ་སྲབ་ཇེ་སྲབ་ནས་དམིགས་མེད་དུ་གཞོམ་པ་རེད། དེ་ཡང་དོན་དམ་བྱང་ཆུབ་ཀྱི་སེམས་དང་འབྲེལ་ན། དེ་བས་ཀྱང་བཤད་མ་དགོས་པ་སེམས་ཉིད་འོད་གསལ་བའི་གཤིས་ལ་དྲི་མས་གོས་པ་ཞིག་ཡིན་པ་མི་སྲིད་པའི་ཤེས་བྱ་ཡིན་དུས། རང་བཞིན་རྣམ་དག་གློ་བུར་བྲལ་དག་གིས་སྒྲིབ་གཉིས་བག་ཆགས་དང་བཅས་པ་དག་པ་གཉིས་ལྡན་གྱི་ཡེ་ཤེས་མངོན་དུ་གྱུར་པ་རེད། སྒྲིབ་པ་དག་ན་རྟོགས་པ་ཁྱད་པར་ཅན་ངང་གིས་འཆར་རྒྱུ་དང་། རྟོགས་པ་ཁྱད་པར་ཅན་རྒྱུད་ལ་སྐྱེས་པས་སྒྲིབ་པ་ངང་གིས་དག་རྒྱུ་ནི་ཚོགས་བསགས་སྒྲིབ་སྦྱངས་གཉིས་ཀ་མཐར་དེད་ན་གནད་གཅིག་ལ་འབབ་པ་རེད། ལས་དང་པོ་བ་གཉིས་འཛིན་གྱི་བློ་ཅན་གྱིས་ཚོགས་བསགས་པ་ལས་ཀྱང་སྡིག་པ་བཤགས་རྒྱུ་དང་པོར་གནད་ཆེ་བས་ན། འགལ་རྐྱེན་སྡིག་སྒྲིབ་བཤགས་པ་དེ་སྔོན་ལ་བཞག །དེའི་འཕྲོར་མཐུན་རྐྱེན་ཚོགས་བསགས་པ་འཇུག་དགོས་རྒྱུ། དཔེར་ན། སྐྱེས་བུ་གང་ཟག་ཅིག་གིས་དང་པོར་རང་ལུས་ཁྲུས་གཙང་མ་བྱས་ནས། དེའི་རྗེས་ཐོག་ལ་གོས་ཀྱིས་བཀླུབས་ནས་རྒྱན་གྱིས་བརྒྱན་ན་དེའི་རིམ་པ་འདྲ་བོ་མགོ་རྔ་མ་ནོར་བའི་བྱ་ལས་ཞིག་ཡིན་པ་ལྟར་དུ་དེ་བཞིན་མཚུངས་པ་རེད།།

༤ ཕྲག་དོག་གི་གཉེན་པོར་རྗེས་སུ་ཡི་རངས།

དེ་ནས་ཡན་ལག་བཞི་པ་ལ་ཐུག་པ་རེད། ཡན་ལག་བཞི་པ་དེ་གང་རེད་ཅེ་ན། རྗེས་སུ་ཡི་རང་གི་ཡན་ལག་རེད། རྗེས་སུ་ཡི་རང་གི་ཡན་ལག་འདི་ཕྲག་དོག་གི་གཉེན་པོར་གསུངས་པ་རེད། ཕྲག་དོག་ཅེས་པའི་ཉོན་མོངས་པ་དེའི་ངོ་བོ་ཅི་འདྲ་ཞིག་ཡིན་རེད་ཅེ་ན། གཞན་གྱི་ཕུན་ཚོགས་དང་བདེ་འབྱོར་སོགས་གཞན་གྱི་ལེགས་པའི་ཕྱོགས་ཐམས་ཅད་ལ་མི་དགའ་ཞིང་མནར་སེམས་པ་ཞིག་ཡིན། གཞན་གྱི་བདེ་འབྱོར་ལ་མ་དགའ་དུས་གཞན་རྒུད་པ་མཐོང་ན་དགའ་བ་རེད། དེ་ཡིན་དུས་གཞན་གྱི་རྒུད་པ་དེ་ནི་ཁོ་རང་གི་དགའ་བའི་དངོས་པོར་མཐོང་གིན་ཡོད་པ་ཞིག་ཡིན་རེད། གལ་ཏེ་ཕ་རོལ་པོ་དེ་མར་ལ་ཅིག་ཉམས་སོང་ན། རང་ཉིད་ལ་དེའི་ཕུན་ཚོགས་བདེ་འབྱོར་སྙན་གྲགས་ལོངས་སྤྱོད་ལ་སོགས་པ་ཐོབ་ཡོང་རྒྱུ་ཞིག་ཡིན་ན་དེ་ལ་ཁག་མི་འདུག་མོད། དོན་དག་མེད་ས་ནས་གཞན་གྱི་ལེགས་པ་ལ་ཕྲག་དོག་ཞིག་བྱས་པའི་འབྲས་བུ་རང་ཉིད་ལ་ཚུར་སྨིན་ནས། རང་ཉིད་ཀྱི་བསོད་ནམས་དབང་ཐང་དེ་མར་ལ་དམའ་ནས་ཉམས་འགྲོ་བས་མ་ཟད་ཕྲག་དོག་ཅན་དང་ཡུན་གྱིས་འགྲོགས་ན། དེའི་ངན་གཤིས་དང་རང་གི་ངན་ལམ་བསྙེགས་ལོབ་མའི་རྒྱུད་མ་རུང་པའི་སེམས་དེས་ཚེ་འདིར་སེམས་བདེ་བ། ལུས་སྐྱིད་དུས་ཞིག་ཡོད་པ་མ་རེད། དེ་བས་ཆེ་ན་འཁོན་རྩོད་འཁྲུག་སློང་འགྲན། ཆུང་ན་ངན་སྨྲས་དང་བླ་བཙག་གིས་རང་གཞན་གཉིས་ཀ་མི་བདེ་པ་ཞིག་བྱས། ཚེ་ཕྱི་མའི་གནས་སྐབས་ན་ཆེ་ན་དམྱལ་བར་སྐྱེས་པ་དང་ཆུང་ན་ལྷ་མ་ཡིན་དུ་སྐྱེས་པའི་རྒྱུ་དེས་བྱེད་པ་རེད། ད་དེའི་ལྡོག་ཟླར་གྱུར་བ་དེ་གང་ཡིན་ན། གཞན་གྱི་བདེ་བ་དང་དགེ་བར་རྗེས་སུ་ཡི་རངས་བྱེད་དགོས་པ་རེད། །དེ་ལྟར་རྗེས་སུ་ཡི་རངས་བྱེད་པ་དེ་ཉིད་བྱམས་པ་དང་རྗེས་སུ་མཐུན་པའི་དགེ་རྩ་ཡིན། འདི་ལམ་དུ་ཁྱེར་ཤེས་ན་དགེ་བ་སྒྲུབ་ཐབས་ཕུལ་དུ་བྱུང་བ་ཞིག་ཡིན།།

ད་བསྔོ་བ་དང་ཡི་རངས་འདི་གཉིས་ཀ་རྒྱུ་ཚེགས་དཀའ་ལས་གཅིག་ཀྱང་མི་དགོས་པར་སེམས་ཀྱི་བསམ་བློ་གཏོང་སྟངས། རྣམ་རྟོག་འགྱུ་ལུགས་ཞིག་གིས་དགེ་རྩ་རླབས་ཆེན་རང་ལ་ཐོབ་པའི་མན་ངག་ཁྱད་པར་ཅན་ཞིག་ཀྱང་རེད། རྗེས་སུ་ཡི་རངས་ཀྱི་ཕན་ཡོན་གསུང་དུས། སྟོང་གསུམ་རི་རབ་དང་བཅས་པ་སྲང་དང་རྒྱ་མ་བྱས་ནས་བཀྱག་ན་ཚད་འཇལ་ཐུབ་རྒྱུ་ཞིག་ཡིན་ནའང་། རྗེས་སུ་ཡི་རངས་ཀྱི་དགེ་བའི་ཚད་ནི་སུས་ཀྱང་བཟུང་བར་མི་ནུས་པ་ཞིག་ཡིན་གསུངས་རེད། དེ་ལྟར་གསུངས་པའི་རྗེས་སུ་ཡི་རངས་ཀྱི་དགེ་བ་གང་རེད། དེ་ཇི་འདྲ་ཞིག་ཡིན་ཐལ་བསམ་ན། དཔེར་ན་མྱི་གཅིག་གིས་མ་ཎི་བྱེ་ཆེན་ཞིག་བཏོན་ཚར་བ་དང་། ཡང་ག་གེ་མོ་ཞིག་གིས་མར་མེ་ཁྲི་མཆོད་དང་ནི་ཇོ་དར་སྟོང་དར་ཞིག་སྒྲུབ་འདུག་ཟེར་ན། དེ་དག་ཐམས་ཅད་ལ་ངོ་སོ་བསྟོད་བསམ་ན་དེ་ཚོ་ཡི་རངས་རེད། ཅི་ཞིག་གི་ཐད་ཀི་ཡིན་ནའང་། ཁྱབ་ཆེ་ཞིང་རྒྱ་མི་ཆུང་བ་ཞིག་ལ་འདང་རྒྱོབ་དང་། དེ་ཡང་ཕྱོགས་བཅུའི་རྒྱལ་བ་སྲས་དང་བཅས་པ། སོ་སོའི་སྐྱེ་བོ་དང་བཅས་པའི་སྐྱེས་འཕགས་ཐམས་ཅད་ཀྱིས། དུས་གསུམ་ཀུན་ཏུ་བསགས་པའི་ཟག་བཅས་ཟག་མེད་ཀྱི་དགེ་རྩ་ཐམས་ཅད་ལ་དགའ་ཞིང་མོས་པས་རྗེས་སུ་ཡི་རངས་པ་རང་གིས་དེ་ལྟར་དུ་བྱེད་དགོས་པ་ཡིན། དེ་ལྟར་བཤད་ན་ཁྱིམ་པ་ཕོ་མོ་ལས་དང་པོ་བས་ཟག་བཅས་ཟག་མེད་ཟེར་ན་ཅི་ཞིག་རེད་བསམ་རྒྱུ་རེད། ད་ཟག་བཅས་ཟེར་ན། ཀུན་ནས་ཉོན་མོངས་པ་དང་བཅས་པའི་ལས་ཀྱིས་ཁམས་གསུམ་འཁོར་བའི་གནས་ལ་མར་ལ་ཟག་ཅིང་འཕོ་བའམ་ལྟུང་བར་བྱེད་པས་ན་ཟག་བཅས་གསུངས་རེད། གང་གིས་འཁོར་བར་ཟག་བྱེད་པ། །ཉོན་མོངས་རྣམས་ཡིན་དེ་དག་ནི། །གང་ལ་འཕྲད་ཅིང་རྒྱས་རུང་བ། །དེ་ལ་ཟག་བཅས་ཆོས་ཞེས་བྱ། །ཞེས་ཟག་བཅས་གསུངས་ཡོད་པ་རེད། སྔགས་ཀྱི་སྐབས་ནས་འདི་ཚོགས་སྦྱོར་མཐོང་སྒོམ་གྱི་ལམ་བཞི་ལ་རིག་འཛིན་བཞིའི་འགྲོས་དང་སྦྱར་ནས་ཟག་ལྡོག་ཡོད་མེད་མུ་བཞིའི་རྩི་ལུགས་ལ་སོགས་པ་ཡོད་རུང་། འདི་ངོ་བོའི་དབང་དུ་བྱས་ནས་བཤད་ཡོང་དུས། ཀུན་རྫོབ་དང་དོན་དམ་གྱི་བདེན་གཉིས་ཀྱིས་བསྡུས་པའི་དགེ་རྩའི་ཁྱད་པར་གྱིས་ཕྱེ་སྟེ། ཀུན་རྫོབ་ཀྱི་དགེ་རྩ་ཟག་བཅས་དང་། དོན་དམ་གྱི་དགེ་རྩ་ཟག་མེད། ལམ་གྱི་དབང་དུ་བྱས་ནས་བཤད་ཡོང་ན། ཚོགས་ལམ་དང་ནི་སྦྱོར་ལམ་གཉིས་ཀ་ལ་ཟག་བཅས་ཟེར་ལ། མཐོང་ལམ་སྒོམ་ལམ་གཉིས་ཀ་ལ་ཟག་མེད། དེའི་སྟེང་ནས་ཚོགས་གཉིས་ཀྱིས་བསྡུས་པའི་དགེ་རྩའི་དབང་དུ་བྱས་ནས་བཤད་ན། བསོད་ནམས་ཀྱི་ཚོགས་ཐམས་ཅད་ཟག་བཅས་དང་ཡེ་ཤེས་ཀྱི་ཚོགས་ཐམས་ཅད་ཟག་མེད། དེ་བཞིན་དུ་ཡང་མཉམ་བཞག་དང་རྗེས་ཐོབ་ཀྱི་ཁྱད་པར་ལ་སོགས་པ་བཤད་ལུགས་མང་པོ་ཡོད་ཀི མདོར་ན་གང་ལ་ཡི་རངས་བྱེད་ས་བོ་བདེན་པ་གཉིས་ཀྱིས་བསྡུས་པའི་དགེ་ཚོགས་ཐམས་ཅད་ལ་རྗེས་སུ་ཡི་རངས་བྱེད་དུས་རེད་ཡོད་པ་རེད།།

༥ གཏི་མུག་གི་གཉེན་པོར་ཆོས་འཁོར་བསྐོར་བར་བསྐུལ་བ།

ད་ཡན་ལག་ལྔ་པ་ནི་ཆོས་འཁོར་བསྐོར་བར་བསྐུལ་བའི་ཡན་ལག་རེད། འདི་གཏི་མུག་གི་གཉེན་པོར་གསུངས་ཡོད་པ་རེད། ཆོས་གསུང་རྒྱུ་དེ་ཆོས་ཀྱི་འཁོར་ལོ་དེ་ཅི་ལྟར་ཡིན་རེད་ཅེ་ན། འདི་ནི་འཁོར་ལོས་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་དང་ཆོས་མཚུངས་སྦྱར་ནས་གསུང་བཞིན་ཡོད་པ་རེད། ད་འདི་གཅོད་ཅིང་བསྐྱོད་པར་བྱེད་པའི་མཚན་ཉིད་ཅན་རེད། ཇི་ལྟར་གཅོད་ཅིང་བསྐྱོད་པར་བྱེད་པའི་མཚན་ཉིད་ཅན་ཡིན་ཞེ་ན། འདི་བྱེ་བྲག་སྨྲ་བ་ལ་སོགས་པ་ཁ་ཅིག་གིས་མྱུར་བར་འགྲོ་བ། སྔ་མ་འདོར་བ། ཕྱི་མར་འཇུག་པ། མཐོ་བར་འཕུར་བ། དམའ་བར་འབབ། མ་རྒྱལ་བ་ལས་རྒྱལ་བ། རྒྱལ་བ་རྣལ་དུ་འགོད་པ་དག་མཐོང་ལམ་དང་ཆོས་མཐུན་སྦྱར་བ་རེད་མོ། ཡང་འགའ་རེས་འཕགས་ལམ་ཡན་ལག་བརྒྱད་པོ་ཆོས་འཁོར་ལ་འཇོག་ཡོད། ཡོད་ན་ཐེག་ཆེན་སྤྱི་ལུགས་ལ་བསམ་བློ་བཏང་ན་ལུང་དང་རྟོགས་པའི་ཆོས་ཐམས་ཅད་ཆོས་འཁོར་ལ་བཞེད་པ་རེད། དེ་ཡང་ཇི་ལྟར་རེད་ཅེ་ན། དེ་དག་ཐམས་ཅད་དམ་པའི་ཆོས་ཀྱི་ངོ་བོ་ཡིན་པ་དང་རྫོགས་པའི་སངས་རྒྱས་བཅོམ་ལྡན་འདས་ནས་ད་ལྟའི་གང་ཟག་གི་བར་དུ་གཅིག་ནས་གཅིག་ཏུ་བརྒྱུད་ཅིང་འཁོར་བའི་ཕྱིར་ན་ཆོས་འཁོར་དུ་བཞེད་རེད། དོན་བསྡུས་ནས་བཤད་ཡོང་ན། ཆོས་ཀྱི་འཁོར་ལོས་སྒྲིབ་པ་དང་ནི་ལོག་རྟོག་རྩད་ནས་གཅོད་ཅིང་ལམ་གོང་མར་བགྲོད་དེ་སྐྱོད་པར་བྱེད་པས་ན། གཅོད་ཅིང་སྐྱོད་པར་བྱེད་པའམ་བསྐྱོད་ཅིང་གཅོད་པར་བྱེད་པ་གང་ཞུས་རུང་གཅིག་རེད། ཆོས་འཁོར་གྱི་བྱེད་ནུས་གཏི་མུག་གི་མུན་པ་གཞོམས་ཤིང་ཤེས་རབ་ཀྱི་འོད་སྣང་འཆར་བར་བྱེད་པ་དང་ཆབ་གཅིག་ཏུ། སོ་སོ་ཡང་དག་རིག་བཞིར་མངའ་དབང་འབྱོར་བར་བྱེད་པ་ཞིག་ཡིན་པས་ན། དེ་ལྟ་བུའི་ཆོས་ཀྱི་འཁོར་ལོ་དེ་ནི་ཕྱོགས་བཅུ་ན་བཞུགས་པའི་སངས་རྒྱས་སྲས་དང་བཅས་པའམ་དེའི་སྤྲུལ་བ་བླ་མ་དགེ་བའི་བཤེས་གཉེན་ཆོས་འཁོར་མི་བསྐོར་བར་དུས་དང་གདུལ་བྱའི་ཡུལ་ལ་གཟིགས་བཞིན་པ་དག་ལ། གདུལ་བྱའི་བློ་དང་འཚམས་པར་སྔར་མེད་ཀྱི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་དགོས་པ་ཞིག། ཆོས་འཁོར་ཟེར་དུས་ཚངས་པ་དང་བརྒྱ་བྱིན་གྱིས་གསེར་གྱི་འཁོར་ལོ་རྩིབས་སྟོང་ལྡན་པ་དང་དུང་དཀར་པོ་གཡས་སུ་འཁྱིལ་བ་ཕུལ་ནས་རྒྱལ་བས་ཆོས་འཁོར་རིམ་གསུམ་བསྐོར་བ་དེ་ཞེ་ལ་འཆར་བ་རེད། བཀའ་དང་པོ་བདེན་བཞིའི་ཆོས་འཁོར། བར་བ་མཚན་ཉིད་མེད་པ། ཐ་མར་ལེགས་པར་རྣམ་པར་ཕྱེས་པའམ་ཕྱིར་མི་བཟློག་པའི་འཁོར་ལོ་བསྟན་པའི་ཆོས་འཁོར་བསྐོར་བ་ཡིན་ན། འདི་ལ་དྲང་ངེས་ཀྱི་བཞེད་ཚུལ་མང་བ་ཡིན་ཡང་། རང་ལུགས་ལ་ངེས་དོན་བདེ་བར་གཤེགས་པའི་སྙིང་པོའི་རང་བཞིན། མ་བསྟན་པ་དང་ནི་གསལ་བར་མ་བསྟན་པ། རྫོགས་པར་བསྟན་པ་བཅས་ཀྱི་ཆ་ནས། འཁོར་ལོ་ཐ་མ་ངེས་དོན་བསྟན་པའི་མདོ་རྣམས་ནི་བླ་ན་མ་མཆིས་པ། སྐབས་མ་མཆིས་པ་སོགས་ཀྱིས་བསྔགས་པ་མཛད་པ་རེད། དེ་ཚོ་རྒྱས་པར་དབྱེ་དགོས་པའི་སྐབས་མ་རེད།།

༦ ལོག་ལྟའི་གཉེན་པོར་མྱ་ངན་ལས་མི་འདའ་བར་གསོལ་བ་འདེབས་པ།

ད་ནི་ཡན་ལག་དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ་རེད། འདི་ལོག་ལྟའི་གཉེན་པོར་གསུང་གི་ཡོད་པ་རེད། ལོག་ལྟ་རང་རྒྱུད་ལ་ཡོད་བཞག་དུས་དགེ་བའི་བཤེས་གཉེན་གྱིས་མི་ཚད་སྟོན་པ་བཅོམ་ལྡན་འདས་ཟུར་འདི་ན་ད་བྱོན་རུང་། དེ་ལ་ཕལ་བའི་གང་ཟག་ཞིག་དང་ཁྱད་པར་འདི་ཡོད་ཀི་བསམ་རྒྱུ་ཞིག་རྒྱུད་ལོག་ལྟས་བསླད་པས་རིག་ཐུབ་པ་མ་རེད། ཡང་དག་པའི་བློ་མིག་ལྡོང་སོང་བས་དམ་པའི་ཡོན་ཏན་ཇི་བཞིན་མཐོང་ཐུབ་རྒྱུ་ཞིག་མ་རེད། བདེ་བར་གཤེགས་པ་སངས་རྒྱས་བཅོམ་ལྡན་འདས་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་འཇིག་རྟེན་འདིར་འབྱོན་དཀའ་བ་ཡིན་པར་མ་ཤེས། དེའི་ཁྱད་འཕགས་ཀྱི་ཡོན་ཏན་ཚུལ་བཞིན་དུ་མ་རྟོགས། ཚིག་ལ་མཁས་པ་ཙམ་གྱིས་གོ་མ་ཆོད་པས་སྡེ་སྣོད་བཅུ་གཉིས་བློ་ནས་འཆད་ཤེས་པའི་དགེ་སློང་ལེགས་སྐར་ལྟ་བུར་གྱུར་བ་ཡང་ལོག་ལྟའི་དབང་གིས་བྱུང་བ་ཡིན་པས་ན། དམ་པའི་ཆོས་ཀྱི་ཡོན་ཏན་ལོག་པར་ལྟ་བ་ལས་ལྡོག་སྟེ་ལེགས་པ་ལ་ལེགས་པར་མཐོང་དུས། དེ་བཞིན་གཤེགས་པ་དེ་ཉིད་ཡུན་དུ་འཇིག་རྟེན་གྱི་ཁམས་ལ་སྐྱེ་དགུའི་དཔུང་གཉེན་དུ་བཞུགས་པར་གསོལ་བ་འདེབས་ཤེས་པ་རེད། རྒྱལ་བ་ཤཱཀྱ་སེང་གེ་སྐུ་མྱ་ངན་ལས་འདས་པའི་ཕྱི་ལོར་བཀའ་བསྡུ་དང་པོ་བྱེད་པའི་སྐབས་ལ། དགྲ་བཅོམ་པ་ལྔ་བརྒྱ་ལ་གཅིག་གིས་མ་ཚང་བར་བཀའ་བསྡུ་བྱེད་མ་ཏུབ་པར་ལྷག་བསྡད་ཡོད་དུས། འཕགས་པ་འོད་སྲུང་གིས་ཀུན་དགའ་བོ་ལ་སྤྱོ་བ་རྣམ་པ་བརྒྱད་མཛད་པ་རེད། སྤྱོ་བ་ཟེར་བ་ཅི་ཡིན་ནི་རེད་ཅེ་ན། སྤྱོ་བ་ནི་བཀའ་བཀྱོན་དང་སྡིགས་མོ་མཛད་པ་ལ་ཟེར། དེའི་ནང་འོད་སྲུང་གིས་གསུངས་པ། བདུད་ཀྱིས་སངས་རྒྱས་བཅོམ་ལྡན་འདས་ལ་མྱ་ངན་ལས་འདའ་བར་གསོལ་ནས་ཁྱེད་མྱ་ངན་ལས་འདའ་རོགས་ཞུས་དུས། བཅོམ་ལྡན་འདས་ཀྱིས་ཁྱོད་ལ་དྲིས་ཙ་ན་ཁྱོས་ཀྱིས་མྱ་ངན་ལས་མི་འདའ་བར་གསོལ་བ་འདེབས་མ་ཤེས་པ་དེ་ཁྱོད་ཀྱི་ཉེས་པ་ཡིན་གསུངས་དུས། ཀུན་དགའ་བོ་ན་རེ། ཁོང་ལ་དེ་དུས་བདུད་ཀྱི་འོད་ཟེར་གྱིས་ཁྱབ་ནས་ཅི་དྲན་འདི་དྲན་མེད་པ་ཞིག་རེད་ཐལ། དྲན་འཛིན་ཉམས་པའི་སྐྱོན་གྱིས་ཞུ་མ་ཐུབ་པ་རེད་ཅེས་ཞུས་ཀྱང་། འོད་སྲུང་གིས། དེ་ནི་ཁྱེད་རང་གིས་མ་འཇོན་པ་མ་གཏོགས་བདེ་བར་གཤེགས་པ་རྫུ་འཕྲུལ་གྱི་རྐང་བ་དང་ལྡན་པ་ཡིན་པས། འདོད་ན་བསྐལ་བའམ་བསྐལ་བ་ལས་ལྷག་པར་ཡང་བཞུགས་པ་རེད་གསུངས་པ་འདྲ་བོ་རེད། དེ་ཡང་དོན་ངོ་མའི་ཐོག་ནས་བདེ་བར་གཤེགས་པས་གཟིགས་པ་ལྔ་གཟིགས་ནས་དུས་ལ་གཟིགས་པ་ཚེ་ལོ་བརྒྱ་བ། དེ་བས་མ་སྔ་བ། དེ་བས་མ་འཕྱི་བའི་དུས་ཞིག་ལ་གཟིགས་པ་རེད་མོད། འདི་ཚོ་སྤྲུལ་བའི་ཉན་ཐོས་དག་དག་ཡིན་པས། དགོས་པའི་དབང་གིས་དེ་ལྟར་སྤྱོ་བ་རྣམ་པ་བརྒྱད་མཛད་ནས་མཐར་ཀུན་དགའ་བོ་ལ་མཆིལ་ལྷམ་གྱིས་བརྒྱབ་སྟེ་ཕུད་བཞག་དུས། ཀུན་དགའ་བོ་ཡུལ་གཞན་ཞིག་ལ་བྱོན་ནས་སློབ་མ་མང་པོར་རབ་བྱུང་གནང་ནས་གདམས་ངག་མང་པོ་བྱིན་དུས། དེ་དག་དགྲ་བཅོམ་པ་ཐོབ་པས་མངོན་ཤེས་ཀྱིས་བལྟས་ཡོང་དུས་མཁན་པོ་དགྲ་བཅོམ་པ་མིན་པ་ཤེས་ཏེ། ཁྱེད་འདི་ལྟར་འགྲོ་བ་མང་པོ་ཐར་བར་སྒྲོལ་པའི་གྲུ་གཟེངས་ལྟ་བུའི་བཤེས་གཉེན་ཆེན་པོ་ཞིག་གིས་ཅིའི་ཕྱིར་དགྲ་བཅོམ་པ་མངོན་དུ་མ་མཛད་པ་ཡིན་ཞེས་ཞུས་དུས། དེ་ངོ་མས་བདེན་གི་དགོངས་ནས་ཤེས་རབ་ཅན་ཇི་ལྟར་བྱས་ཀྱང་གྲོལ་བ་ཐོབ་སླ་བ་རེད། མཉམ་བཞག་སྒོམ་ཐུན་གཅིག་གིས་དགྲ་བཅོམ་པའི་འབྲས་བུ་ཐོབ་པ་དང་མངོན་ཤེས་ཀྱིས་བརྟག་ཡོང་དུས། འོད་སྲུང་གིས་བྱམས་པའི་སེམས་དང་དགོས་པའི་དབང་གིས་སྤྱོ་བ་མཛད་པ་དང་སྡིགས་མོ་མཛད་པ་ཡིན་པ་མཁྱེན་ནས། སླར་དགེ་འདུན་གྱི་གནས་སུ་ཕར་བྱོན་པས་དགྲ་བཅོམ་པ་ལྔ་བརྒྱ་ཁ་གང་ནས་བཀའ་བསྡུ་དང་པོ་མཛད་པ་རེད། ད་ང་ཚོས་དགེ་བའི་བཤེས་གཉེན་སངས་རྒྱས་ཀྱི་སྤྲུལ་བའམ་སངས་རྒྱས་ཀྱི་རྒྱལ་ཚབ་རང་རེའི་གདུལ་བྱ་མིའི་སྣང་ངོར་མཐུན་པས་མཐུན་པ་འདུལ་ཆེད་དུ་གདུལ་བྱ་རང་ཉིད་དང་རྣམ་པ་འདྲ་མོ་འདྲ་འདྲ། །ཀུན་མཁྱེན་ཆེན་པོས་གསུངས་པ་ལྟར། ཀུན་དང་མཐུན་ཞིང་ཀུན་ལས་ཁྱད་དུ་འཕགས། །གསུངས་པ་བཞིན་བྱོན་ཡང་། སྐབས་འགའ་རེ་ལ་རྒྱལ་བའི་འཕྲིན་ལས་གདུལ་བྱའི་ཡུལ་ལ་མི་འཇུག་ཀྱང་། མཉམ་པོར་འགྲོགས་པའི་བདུད་ཅེས་བརྗོད་རུང་མ་བརྗོད་རུང་ལོག་ལྟས་མིག་སྒྲིབ་ནས་དམ་པ་དམ་པ་ཡིན་པར་ངོ་མ་ཤེས་པ་རེད། ད་བླ་མ་འདས་ཚར་དུས། ཤི་བའི་མྱི་དང་བོར་བའིི་རྟ་ཟེར་བ་ལྟར། ཧ་བོ་ཁ་རྗེའི་ལྕོགས་མ་ཐལ། བསོད་ནམས་ཀྱིས་ཆུམས་མ་ཐལ་འདྲ་ཅི་ཞིག་ཟེར་ནའང་འདྲ། མདོར་ན་དེའི་སྐབས་སུ་ཕྱིས་སྐྱོན་ཆེ་བ་རེད། དེ་བས་ད་ལྟ་ཞལ་བཞུགས་དུས་ཆོས་ཀྱི་འཁོར་ལོ་བསྐོར་བར་བསྐུལ་བས་མ་ཟད། མྱ་ངན་ལས་མི་འདའ་བར་གསོལ་བ་འདེབས་དགོས་པ་རེད་ལ། དེ་ཡང་ཁ་གསོལ་འདེབས་ཙམ་མ་ཡིན་པར་དོན་གསོལ་འདེབས་བླ་མའི་བཀའ་བཞིན་བསྒྲུབ་ནས་དམ་ཚིག་སྲུང་རྒྱུ་དེ་ཞབས་བརྟན་བརྟན་བཞུགས་ཐམས་ཅད་ཀྱི་མཆོག་རེད། བླ་མ་ཟེར་དུས་བླ་མ་དེང་སང་མང་པོ་ཡོད་པ་རེད། གཅིག་འདས་ན་གཅིག་ཡོད་ཀི། མིན་ནའང་བླ་མ་ཚུར་ལ་འཁྲུངས་ལོས་ཡོང་། དེ་ཡང་གཅིག་གིས་མི་ཚད་གཉིས་གསུམ་འཁྲུངས་ཡོང་ན་མི་ཤེས་ཟེར་ནས་ཁ་བརྒྱག་བཤད་ཆོག་རེད་དེ། ཕྱོགས་གཅིག་ནས་བདེན་ཡང་བདེན་པ་རེད། དེ་ཚུར་ལ་དུས་སྙིགས་མའི་གདུལ་བྱའི་བསོད་ནམས་ཀྱིས་མི་ཆུམས་ནི་ཡིན་ན། དེ་མིན་ངོ་མས་མཐུན་པས་མཐུན་པ་བོ་འདི་ཡིན་ས་ཡོད་ཀི་བསམ་རྒྱུ་ཀུན་དང་མཐུན་ཞིང་། ཀུན་ལས་ཁྱད་པར་འཕགས་གསུང་པ་ལས། ཀུན་དང་མཐུན་ཞིང་ཀུན་ལས་དམན་པར་གསུངས་མེད་ཀི་མ་གཏོགས། དེ་ཡོད་ན་ཡང་ད་ནོར་མེད་བསམ་རྒྱུའི་རང་རྟགས་རང་གིས་ངོམས་ནི་ཡང་དེང་སང་མང་བའི་དུས་ཚོད་ཡིན་ན། འདི་ཡང་ན་ངོས་འཛིན་བླ་མས་ནོར་བ་ཨེ་ཡིན། དེ་མིན་ན་སྦྱིན་བདག་ནོར་ལྡན་གྱིས་ཞུ་སྟབས་མཁས་པའི་དབང་དུ་ཤོར་ནི་འདྲ་ཨེ་ཡིན་ན། འདིའི་མི་དགེ་སྡིག་ལས་སྣ་ཚོགས་བྱ་ལུགས་ཀྱིས་ཁྱིམ་པ་དགེ་བསྙེན་བཟང་ཤོས་ཤིག་ལ་མི་དོ་ཀི་བསམ་རྒྱུ་མཐོང་ཆོས་ལ་ཡང་མེད་པ་མ་རེད། ཡོད་པ་རེད། དེས་ན་དེའི་བཟང་ངན་དེ་ཇི་འདྲ་བྱས་ནས་དཔོག་དགོས་བསམ་ན། བརྟག་པའི་ཐབས་ལམ་གཞན་རྒྱུད་ཤེས་རྒྱུ་མ་རེད་མོད། སངས་རྒྱས་ཁོང་རང་གིས་ཞལ་ཆེམས་བཞག་པ་དེས་བརྟག་དགོས་པ་རེད། ཅི་ལྟར་གསུང་བ་ཡིན་ཞེ་ན། མདོ་སྡེ་དང་མི་མཐུན། འདུལ་བ་ལ་མི་སྣང་། ཆོས་ཉིད་དང་འགལ་ན་ཁོང་གི་བཀའ་མིན་གསུངས་བཞག་ཡོད། སངས་རྒྱས་ཀྱི་སྤྲུལ་བ་སངས་རྒྱས་ཀྱི་མཛད་པ་བཅུ་དང་ཁྱད་པར་གསུང་གི་འཕྲིན་ལས་བསྐྱངས་རྒྱུའི་དོན་ཡིན་ན། ཁོང་དགེ་བའི་བཤེས་སུ་སྤྲུལ་ནས་བྱོན་ཡོང་གསུངས་པ་མ་གཏོགས། མི་དགེ་བའི་བཤེས་སུ་སྤྲུལ་ཡོང་གསུངས་པ་མ་རེད། མདོ་འདུལ་གཉིས་དང་མཐུན་ཞིང་ཆོས་ཉིད་དང་མི་འགལ་བར་སྤྱོད་ཅིང་སྨྲ་བ་དེ་སངས་རྒྱས་ཀྱི་སྤྲུལ་བ་རེད། ད་རུང་སངས་རྒྱས་ཀྱིས་ནོར་སོ་ཡོད་ན་མི་ཤེས་དགོངས་ནས། ང་མིན་ང་འདྲ་ཁོང་གི་ཆས་ཆ་ལུགས་འཛིན་མཁན་ནམ། ཁོང་གི་རྗེས་འཇུག་ཡིན་པའི་བསྟན་འཛིན་གྱི་མིང་བཟུང་ནས་ཁོང་གི་བསྟན་པ་འདི་མཐར་འཇིག་པར་བྱེད་ཡོང་གསུངས་ཡོད་པ་རེད། དེ་བས་ན། སངས་རྒྱས་ཀྱི་སྤྲུལ་བ་ནི་སངས་རྒྱས་རང་གི་མཛད་པ་སྒྲུབ་མཁན་ཞིག་ཡིན་ངེས་རེད། ཡང་སྒོས་དུས་འདི་ལ་གསུང་གི་འཕྲིན་ལས་ཀྱིས་གདུལ་བྱའི་སེམས་རྒྱུད་ལ་ཕན་འདོགས་སླ་བས་ན་རང་རྒྱུད་དུལ་ཞིང་གཞན་རྒྱུད་སྦྱོང་བ་ལ་མཁས་པ་ཞིག་ཡིན་དགོས་པའི་ཆ་ནས། ཚུར་བསྡུས་ནས་བརྟག་དཔྱད་ཀྱི་ཐབས་བཤད་ན། ཐོས་རྟགས་ཞི་ཞིང་དུལ་བ་དང་སྒོམ་རྟགས་ཉོན་མོངས་མེད་པས་བཤེས་གཉེན་བརྟག་ཐབས་རབ་གཅིག་མཚོན་རེད། མྱ་ངན་ལས་མི་འདའ་བར་གསོལ་བ་འདེབས་ས་ཡང་དེ་ལྟ་བུ་དག་ཡིན།།

ད་སྤྲུལ་སྐུ་འདི་ཚོ་ནོར་ཡོད་མེད་ཀྱི་སྐད་ཆ་དེང་སང་བཤད་རྒྱུ་མང་པོ་རེད། ནོར་ཡོད་མེད་དེ་སྐུ་སྔོན་མའི་ལས་ལུགས་དང་ཨེ་འདྲ་གི དེས་ཀྱང་མང་དག་ཅིག་ཤེས་ས་ཡོང་གི། ཡོད་རུང་སྐུ་སྔོན་མ་ཁོ་རང་སོ་སྐྱེས་ཞིག་ཡིན་ན། ལུས་སྒྱུ་མ་འཁྲུལ་བའི་ལུས་ཞིག་མ་གཏོགས་ཡོད་ཐབས་མེད་དུས་སེམས་རྣམ་ཤེས་སོ་སྐྱེས་ཤེས་རྒྱུན་ཞིག་མིན་པས་ཡོང་ཐབས་མེད་དུས། དེ་ཅན་པོ་སྤྲུལ་ཡོང་བའི་སྐུ་མ་རེད་འཁྲུལ་ཡོང་བའི་ལུས་ཅན་པོ་རེད། ངོ་མས་ཡིན་ན་དེའི་སྐྱེ་བ་ཟེར་བ་མ་གཏོགས་དེའི་སྤྲུལ་སྐུ་ཟེར་རྒྱུ་མ་རེད་མོད། ད་ང་རང་ཚོས་སྲོལ་བཏོད་ལུགས་ཤིག་གམ་ལམ་ལུགས་ཀྱིས་ཞེ་ས་སྦྱར་ནས་དེ་དག་ལ་སྐྱེས་སྤྲུལ་ཟེར་ཁ་བྱེད་ནི་རེད། སྤྲུལ་སྐུ་བརྟག་དུས་སྤྲུལ་སྐུའི་སྐུ་ཕྲེང་འདིའི་མི་ཚད་སྐུ་གོང་མ་ལ་ཡང་བརྟག་པར་བྱ་བ་ཞིག་རེད། ངན་སྐྱོན་ཚང་མ་སྐྱེ་བ་རྗེས་མ་ལ་འགེལ་རྒྱུ་མེད་ཀི། སྐྱེ་བ་སྔོན་མ་ལ་ཡང་བརྟག་དཔྱད་བྱེད་འོས་ཞིག་རེད། །གང་ལྟར་མྱི་ང་ལ་མཚོན་ཁུལ་བྱས་ན། མི་ཚེ་ཕྱེད་་ཀ་ལས་མང་ཆེ་བ་བསྟན་སྲིད་སླར་གསོ་ལ་བུད་སོང་བ་རེད། དེང་སང་ཆོས་སྐྱོང་བའི་ཉམས་ལེན་ལ་ཅུང་ཟད་རེ་འཇུག་གི་ཡོད་ཀྱང་མི་ཚེར་ཕྱོགས་བསྡོམས་བརྒྱབ་ཡོང་ན། སྔར་གྱི་བསྟན་སྲིད་བྱ་གཞག་དང་འབྲེལ་བའི་དོན་དང་འབྲེལ་ཡོང་རྒྱུ་ཞིག་ཡིན་ན། འདི་ནས་ཟུར་འདོན་གྱིས་བཤད་རྒྱུ་ཞིག་ལ། དུས་དང་རྣམ་པ་ཀུན་ཏུ་བླུན་པོ་དབང་བསྒྱུར་ཅན་གྱིས་དབང་ཤུགས་ལ་མི་ཤོར་པར། མཁས་པ་ཡོན་ཏན་ཅན་གོང་དུ་བཀུར་རྒྱུ་ནི་རྣམ་པ་ཀུན་ཏུ་གལ་ཆེ། དེ་ངས་སྔར་ནས་བཤད་ཀི་བསྡད་པ་རེད། དེ་བཤད་དུས་གོ་མྱོང་མཁན་ཆ་གས་ཁྱེད་ཀྱིས་ཁ་འབོད་དེ་བསྒྲགས་ནས་མྱི་ལོ་བཅུ་ཕྲག་གཉིས་གསུམ་ཞིག་སོང་བར་མི་ཚད་དུས་རབས་གསར་རྙིང་ཞིག་ཀྱང་བརྗེ་ནས་བུད་སོང་རུང་། ཁྱེད་རང་གི་ལག་ལེན་གྱི་ཐོག་ནས་ཇི་འདྲ་ཞིག་ཡིན་ཐའོ་བསམ་ནི་ཡོད་ཆོག་རྒྱུ་རེད། རེད་ད། སྤྱིར་སོ་སོའི་སྐྱེ་བོའི་བསམ་སྤྱོད་ལ་ནོར་བ་མེད་ནི་གང་ན་སྲིད། རིག་པ་དང་ཞབས་སུ་ལྡན་པ་དེ་བདེ་བར་གཤེགས་པ་འདྲ་མིན་ན། སུས་ཀྱང་བཤད་ཚད་ཐིག་གིས་མི་གཟུར། བསམ་ཚད་ས་ལ་མི་ལྷུང་པ་ཞིག་དཀའ་རྒྱུ་རེད། སྒོས་ང་ལ་མཚོན་ན་ཡང་དེ་ལས་གང་ན་འདའ་མོད། སྤྱི་ཚོགས་མུན་ནག་གི་དུས་རབས་ཚེས་ནས་སྐྱ་ཆད་སྔོ་སྡུག་གི་དུས་ཁ་གང་དུ་འཁོར་ངོ་མི་ཟིན་པའི་སྐབས་ལ། སྤྱིའི་ཁ་ལོ་བསྐོར་ཕྱོགས་དེ་མ་ནོར་བར་ཆོས་སྲིད་ལུགས་གཉིས་གང་ཐད་ནས་ཁོར་ཡུག་ཁ་རྒྱ་ཆེ་ཆུང་གང་མཚམས་ཞིག་ལ། ཤེས་རབ་ཀྱི་མིག་ཅིག་ཕྱེས། ཐར་ལམ་གྱི་སྣང་བ་ཞིག་བསྟན་ནས་ཕྱི་ནང་གསང་བའི་ལམ་འཕྲང་འགག་སྒོ་མང་བོ་ཞིག་བརྒྱུད་ནས་ལམ་ཞིག་བཏོད་བཞག་པ་ཡིན་ན། དེའི་དུས་རབས་དང་མཐུན་པའི་ཤེས་ཡོན་ཅན་ལ་གོང་བཀུར་བྱས་པའི་ཐད་ནས། རྟ་ཞོན་བརྒྱ་ཐམ་པའི་ནང་ན་དྲེལ་ཞོན་རེ་རེ་གཉིས་རེ་ཡོད་ན། རྟ་བ་ཁྱུ་གཅིག་གི་མྱིང་ཐོབ་ནི་ཅན་པོ། ཐམས་ཅད་གྲབས་གཅིག་གིས་རྒྱུགས་ནི་འདྲ་ཞིག་མི་ཐོན་པ་བཟོ་གྲྭ་གཅིག་གིས་ཐོན་རྫས་ལ་བཟང་ངན་ཡོད་སྲིད་པ་རེད། དེ་ཡིན་ནའང་། འགའ་རེ་གཞུང་ཡོན་ཏན་སྣེ་རེ་དེའི་དུས་སྐབས་དང་བསྟུན་ན་ཅང་ཟད་ཆོག་གི་བསྡད་ཀྱང་ལྷན་སྐྱེས་མྱི་གཤིས་ཀྱི་ཡོན་ཏན་གྱིས་མ་སླེབ་པ་ལོས་ཡོད། མཁས་བཙུན་བཟང་གསུམ་གྱི་ཡོན་ཏན་ཚོགས་དུས་དམ་པའི་ཚུལ་དགུའི་ཡོན་ཏན་དེའི་ནང་ལ་འདུས་པ་ཡང་བཤད་ཐུབ་པ་དེ་འདྲ་ཞིག་རེད། འདི་བཤད་དོན་གང་ནས་འཕྲོས་པ་ཡིན་ན། དུས་དང་རྣམ་པ་ཀུན་ཏུ་མི་སོ་སོའི་ས་གང་ནས་ཡིན་ཡང་བླུན་པོ་དབང་འབྱོར་ཅན་གྱི་དབང་ཤུགས་ལ་མ་ཤོར། མཁས་པ་ཡོན་ཏན་ཅན་གོང་དུ་བཀུར་བ་རྣམ་པ་ཀུན་ཏུ་གལ་ཆེ་དེ་ཟེར་བ་དེ་ཡིན། ཡོན་ཏན་ཅན་གྱིས་ལུང་བ་གང་། ཡོན་ཏན་ཅན་གྱིས་དབང་ཆ་འཛིན་རྒྱུ་དེ་ཡར་འགྲོ་ཤར་བའི་སྔ་ལྟས་ཡིན། དེ་ལྟ་ན་དེའི་ཡོན་ཏན་ཟེར་བ་གང་ལ་ངོས་འཛིན་དགོས་པ་རེད་ཅེ་ན། ད་ཁ་སང་ཁེ་ཉིན་ཞིག་ལ་མང་པོ་བཤད་མྱོང་བ་ལྟར་དུ་ལྷན་སྐྱེས་ཀྱི་མི་བཟང་། ཕན་སེམས་དང་ནི་སྤྱི་སེམས་ཡོད་པ། མཁས་བཙུན་བཟང་གསུམ་གྱི་ཡོན་ཏན་དེ་ངས་གོ་ལྡོག་ནས་བཤད་བཞིན་ཡོད་པ་རེད། དེ་ཡོད་དུས་ལྷན་སྐྱེས་ཀྱི་མི་བཟང་པོ་ཕན་སེམས་དང་སྤྱི་སེམས་ཡོད་པ། སྒེར་སེམས་དང་ནི་རང་དོན་ཆུང་བ་དེ་འདྲའི་བཟང་པོའི་ཡོན་ཏན་ཅན་གཙོ་བོར་འཛིན་རྒྱུ་ཡིན། དེའི་སྟེང་ལ་ཅི་ཞིག་དགོས་ན། བསྟན་འཛིན་གྱི་སྐྱེས་བུ་ཞིག་ཡིན་དུས་བསྟན་རྩ་དམ་ཆོས་འདུལ་བ་ཡིན་པས། བསྟན་པ་གཙོ་བོར་འཛིན་པ་ཞིག་གིས་ཚུལ་ཁྲིམས་གཙང་མ་ཅན་གྱི་དགེ་སྦྱོང་རྣམ་དག་ཅིག་ངེས་པར་ཡིན་དགོས་པ་རེད། དེ་ཡིན་བཞག་དུས་རིགས་མི་གཙོ་རུས་མི་གཙོ། དཔེ་བཞག་ན་འདྲེག་མཁན་ཉེ་བ་འཁོར་གྱི་རྐང་བ་ལ། ཤཱཀྱའི་རྒྱལ་པོ་བཟང་ལྡན་ནས་མགོས་གཏུག་པ་རེད་ཟེར་རྒྱུ་ཅན་པོ་དེ་དཀོན་པའི་རྒྱུ་ཆ་རིན་ཐང་ཅན་ཡིན་པའི་ཕྱིར་ན། མགོ་སྤྱི་བོའི་གཙུག་ལ་མི་བཀུར་ཁ་མེད་རེད་ལ་བཀུར་ཡང་དགོས་པ་རེད། དེ་འདྲ་བ་བཀུར་རྒྱུ་ཡོད་དུས་ཆོག་པ་རེད། འཇིག་རྟེན་མྱི་ལུགས་མ་ཤེས། མཁས་པའི་ཡོན་ཏན་མེད་ན་ཡང་སྐྱོར་བསྡད་ན་ཁོ་རང་སྐྱོར་ས་དེ་ནས་འདུག་འདུག་པ་རེད། བྱེ་མ་སྤར་ནང་བཟུང་ན་བཙིར་བའམ་ཟག་ནས་ཤོར་བ་འདྲ་འདྲའི་ཟག་མི་འགྲོ་བ་བརྟན་པོ་ཞིག་ཡིན་ན་ཅིག་འགྲིག་གི་ཡོད་པ་རེད། དེ་ཡིས་བཟང་པོའི་ཡོན་ཏན་དང་ནི་བཙུན་པའི་ཡོན་ཏན་གཉིས་སོང་། འདི་ནས་གོང་ལ་བཀུར་རྒྱུའི་ཡོན་ཏན་གྱི་ངོས་འཛིན་ཚུལ་བཤད་ཀི་ཡོད་དུས། གསུམ་པར་མཁས་པའི་ཡོན་ཏན་བཞག་པ་ཡིན་ན། དེ་ཡང་དོན་ལ་མཁས་པ་དང་ཚིག་ལ་མཁས་པ་སོགས་ཀྱི་མཁས་ཚུལ་མི་འདྲ་བའི་རྣམ་གྲངས། བཟང་ངན་མཆོག་ཕལ་གྱི་དབྱེ་འབྱེད་ཡོད་པ་རེད། ཡོད་རུང་མཁས་པ་ཡོན་ཏན་ཅན་གོང་དུ་བཀུར་དགོས་རྒྱུའི་མཁས་པ་དང་ཡོན་ཏན་ཅན་ཟེར་རྒྱུའི་ཐ་སྙད་གཉིས་འཕྲོ་འཕྲོར་བསྟུད་མར་སྦྱོར་བ་ལ་བཤད་ན། རྣམ་དབྱེ་མང་རུང་ཚིག་དོན་གང་ལ་མཁས་པའི་མཁས་པ་ཡིན་ནའང་། གཞན་ཕན་ལྷག་སེམས་དང་ལྡན་པ་ཞིག་ཡིན་དུས་གོང་དུ་བཀུར་ཡུལ་རེད། དེ་ལས་ལྡོག་སོང་ན་ཅུང་ཟད་ཐོས་ནི་བོ་ཁ་ཕྱིར་བལྟས་ལ་ཤོར། བཤད་དགོས་རྒྱུའི་སྡེ་སྣོད་གསུམ་གྱི་དྲི་མ་ཞིག་མ་འགོས་པ། དེ་ཅན་པོ་རྗེས་མ་ཞིག་ལ། དུས་རབས་བརྒལ་ཚར་ནས་སྲིད་དོན་གྱི་རྙིང་རོ་སྙིགས་རོ་འཛམ་གླིང་མྱི་ཡི་མི་འདོད་རྒྱུའི་གད་སྙིགས་རྙིང་བའི་སྒམ་ནང་ལ། ཕྱག་དར་ཁྲོད་དུ་གནའ་ནས་འཕངས་ཚར་བའི་རིག་གནས་གསར་བརྗེ་བསྐྱར་འཛུགས་ཤིག་བྱེད་དམ་བསམ་རྒྱུ་མཚམས་མཚམས་ལ་ཡོད་སྲིད་མོད། དེ་དུས་ཀྱི་བསྟན་བཤིག་ཚུར་ལ་འཁྲུངས་ཡོང་པ་རེད་ཅེས་འགའ་རེས་བཤད་ཀྱིན་ཡོད། དེ་ཡང་མངོན་སུམ་མྱོང་གྲུབ་ཀྱི་ཚད་མའི་སྒྲུབ་བྱེད་མེད་པར་རང་ང་གཡམ་རྒྱུགས་ཀྱི་ཀུ་ཅོ་མི་འདོན། ཁྱད་པར་དུ་ཡོན་ཏན་ཅན་དང་ཐབས་མཁས་ཅན་གྱི་དགོས་པའི་དབང་གིས་ཕྱོགས་འགའ་ཞིག་ལ་དམིགས་པའི་དགོས་གནད་ཀྱི་དགོངས་པ་འགྲོལ་རྒྱུ་ཡང་ཡོད་རྒྱུ་རེད་བསམ་པ་རེད། རེད་ད། ཡང་རང་ཉིད་གྲགས་འདོད་ཀྱི་འུར་རྒྱག་པ་ཡང་མེད་མི་སྲིད་པ་ཞིག་མིན་པ་དང། ཕྱོགས་གར་འགྲོ་རང་གིས་ངོ་མི་ཟིན་པར་གཡམ་རྒྱུགས་འུར་སྒྲོག་པ་ཐལ་ཚུབ་བྱེད་མཁན་ཡང་ཡོད་ཆོག་རེད། མདོར་ན་རང་མ་ཞན་དུས་གཞན་གྱིས་རང་ལ་མི་གནོད་པས་གཞན་སྐྱོན་བརྗོད་པ་གདམས་ངག་འདྲ་གནང་བ་མིན་ན་ཡོན་ཏན་ལ་བརྩི་པ་མ་རེད། བདག་བསྟོད་གཞན་སྨོད་ལར་བྱང་སེམས་སྐབས་ཀྱི་བསླབ་བྱ་ཞིག་དང་འགལ་བ་ཡིན། མྱི་ལ་ལེ་བདའ་བྱེད་རྒྱུ་ཡོད་པ་མ་རེད། དེ་ནི་དུས་སྙིགས་མའི་རྒུད་པའི་རང་གཤིས་རེད།

གུ་རུ་རིན་པོ་ཆེས། དུས་ནི་མི་འགྱུར་མི་རྣམས་འགྱུར་བ་ཡིན། །གསུངས་པ་ལྟར། མྱིའི་བསོད་ནམས་དམན་དུས་སྣོད་བཅུད་ཀྱི་རྟེན་འབྲེལ་འཆུག་ནས་འབྱུང་བ་སྒང་གཤོང་ཡོང་བ་དེ་མ་གཏོགས་དབྱར་དགུན་སྟོན་དཔྱིད་ཀྱི་དུས་བཞི་ཅང་འགྱུར་འགྲོ་མ་རེད། མྱིའི་བསམ་སྤྱོད་འགྱུར་དུས། དུས་འགྱུར་ཟེར་བ་རེད། དེའི་བདེན་ཚིག་ལུང་བསྟན་གྱི་ཐོག་ལ་ཐོན་སོང་བ་རེད། དེ་འདྲའི་སྐབས་ལ་རང་ངོས་ནས་གསོལ་བ་འདེབས་བྱེད་དགོས། གསོལ་འདེབས་བྱས་ན་མ་མཐར་ཡང་རང་གི་གཤིས་རྒྱུད་བགེགས་ཀྱིས་མི་བརླམས་རྒྱུའི་ཕན་ཐོག་དེ་འབྱུང་བ་རེད། བསྟན་འཛིན་དམ་པར་ཆོས་འཁོར་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པ་འཕྲོས་དོན་ཞོར་འབྱུང་དུ་བཤད་པ་དང་བཅས་པ་སོང་།།

༧ ཐེ་ཚོམ་གྱི་གཉེན་པོར་བསྔོ་བ།

ད་ནི་ཡན་ལག་ཐམས་ཅད་ཀྱི་རྗེས་མ་བདུན་པ་བསྔོ་བ་ཡིན་རེད། བསྔོ་བ་ནི་ཐེ་ཚོམ་གྱི་གཉེན་པོར་གསུངས་རེད། བསྔོ་ཡུལ་གྱི་དཔང་པོར་རྒྱལ་བ་སྲས་བཅས་ཀྱིས་མཁྱེན་ཅིང་གཟིགས་ས་ནས། བསྔོ་ཡོང་རྒྱུའི་དགེ་རྩ་ཞིག་མེད་ན་ཅི་བསྔོ་ཡོང་། དེས་ན་བསྔོ་རྒྱུའི་དངོས་པོ་རང་ཉིད་ཀྱིས་དུས་འདིར་བསག་པའི་དགེ་རྩས་གཙོ་བྱས་ཏེ་དུས་གསུམ་དུ་བསགས་པའི་དགེ་རྩ་ཐམས་ཅད་རྒྱལ་བ་སྲས་བཅས་ཀྱི་ཟག་མེད་ཀྱི་དགེ་རྩ་དང་ནི། སེམས་ཅན་ཐམས་ཅད་ཀྱིས་བསགས་པའི་ཟག་བཅས་ཀྱི་དགེ་རྩ་ཞིག་ཡོད་པ་ཐམས་ཅད་བློས་ཡོངས་སུ་བཟླུམས་ཤིང་གཅིག་ཏུ་བསྡུས་ཏེ། གང་ལ་བསྔོ་ན། སེམས་ཅན་ཐམས་ཅད་རྫོགས་པའི་བྱང་ཆུབ་ཐོབ་པའི་དོན་ལ། ཇི་ལྟར་བྱས་ཏེ་བསྔོ་ན། དམིགས་མེད་འཛིན་པ་དང་བྲལ་བའི་བསྔོ་བ་མཚན་ཉིད་པ་གང་བསྔོ་བྱ་བསྔོ་བྱེད་བསྔོ་ཡུལ་དང་བཅས་པ། སྣང་ལ་རང་བཞིན་མེད་པ། རྣམ་པ་ཀུན་གྱི་མཆོག་དང་ལྡན་པའི་སྟོང་བ་ཉིད་དུ་བསྔོ་བ་དང་སྨོན་ལམ་གྱི་རྣམ་པར་ཤར་བ་དང་། དེ་ཙམ་མིན་རུང་སྣང་ལ་རང་བཞིན་མེད་པའི་ངེས་ཤེས་ཀྱིས་དྲངས་པའི་བསྔོ་བ་རྗེས་མཐུན་པ། གོང་ནས་དམ་པ་གསུམ་གྱི་སྐབས་ནས་བཤད་པ་བཞིན་དུ་དགེ་བ་གང་སྒྲུབ་ཀྱི་རྗེས་ནས་བསྔོ་བ་ཚུལ་དང་མཐུན་པ་ཞིག་བྱེད་དགོས། མ་གཞི་དགེ་རྩ་ཐབས་ཀྱིས་ཟིན་པ་དང་གཅིག དགེ་རྩ་རྐྱེན་གྱིས་མི་ཤིགས་པར་བྱེད་པ་དང་གཉིས། དགེ་རྩ་གོང་ནས་གོང་དུ་སྤེལ་བ་གསུམ་པོས་བྱེད་པ་ཅན་གྱི་སྦྱོར་དངོས་རྗེས་གསུམ་པོ་ནི་ཡན་ལག་བདུན་པ་ལ་ཡང་ཁྱབ་པ་རེད། སྦྱོར་དངོས་རྗེས་གསུམ་པོ་དེ་དག་རེ་རེ་ལ་ཡང་དེ་གསུམ་པོའི་གནད་ཚང་བ་རེད་ལ། །དོན་ངོ་མ། དོན་དམ་འདུས་མ་བྱས་ཀྱི་དགེ་རྩ་བསྟན་པ་དེ་བཞིན་ཉིད་ཀྱི་དབྱིངས་ལ་སྦྱོར་བར་བྱེད་པ། ས་གཞིའི་ཆུ་ཕྲན་ཐམས་ཅད་མཐའ་ཡས་རྒྱ་མཚོ་ཆེན་པོར་གཞོལ་ཞིང་འབབ་པ་ལྟ་བུ་ཞིག་ཡིན། ད་ཁྱིམ་པ་ཕོ་མོས་ཤེས་དགོས་པ་ཞིག་ལ། དགེ་རྩ་རླབས་ཆེན་བསག་རྒྱུ་དེ་ནུས་པ་སྟོབས་ཤུགས་ཆེན་པོ་ཞིག་བསྐྲུན་བཞག་ཡིན་པས། དེའི་ནུས་པ་དང་སྟོབས་ཤུགས་དེའི་ཁོ་རང་གི་ངོ་བོ་ལུང་མ་བསྟན་ཞིག་ཡིན་པ་རེད། དེ་ནི་བཟང་ངན་གང་གི་ཕྱོགས་ལ་བེད་སྤྱད་བཏང་བཞག་ན། བཏང་ཆོག་རྒྱུའི་ནུས་པ་ཆེན་པོ་དེ་ཕྱོགས་གང་ལ་ཐིངས་འགྲོ་རྒྱུ་ནི་གཙོ་ཆེ་བ་བསྔོ་བ་དང་སྨོན་ལམ་ལ་རག་ལས་པ་རེད། བསྔོ་བ་དང་སྨོན་ལམ་གྱིས་འདུན་པའི་ཁ་བསྒྱུར་ལུགས་ཀྱི་བཟང་ངན་གྱིས་འབྲས་བུ་དེ་བཞིན་དུ་སྨིན་པ་རེད། བསྔོ་བ་ཡོད་ཚད་སྨོན་ལམ་དང་འབྲེལ་བ་རེད་དེ། སྨོན་ལམ་ཡོད་ཚད་བསྔོ་བ་དང་འབྲེལ་བ་དག་དག་ཡིན་མ་རེད། དགེ་རྩ་སྔོན་སོང་ཡོད་པ་བསྔོ་བ་དང་དགེ་རྩ་སྔོན་སོང་ཡོད་མེད་ལ་མ་ལྟོས་པར་འབྲས་བུ་ལ་སྨོན་པར་བྱེད་པ་སྨོན་ལམ་ཡིན་ནི་རེད། སྤྱིར་ན་དགེ་རྩ་སྔོན་སོང་ཡོད་པའི་ཐོག་ནས་སྨོན་ལམ་བཏབ་ན་མ་གཏོགས་རྒྱུ་མེད་ཀྱི་འབྲས་བུ་སྨོན་ལམ་བཟང་ངན་གང་བཏབ་རུང་འགྲུབ་དཀའ་རེད། དེ་ལྟར་བཤད་ན། བསམ་པ་བཟང་པོས་སྨོན་ལམ་འགྲུབ་ཟེར་བ་དང་རྟེན་ཁྱད་པར་ཅན་གྱི་མདུན་ནས་སྨོན་ལམ་བཏབ་ན་འགྲུབ་ཞེས་པ་དེ་དག་ནི། བསམ་པ་བཟང་པོ་དང་དད་པ་མོས་གུས་ཁོ་རང་གི་དགེ་རྩ་ཡིན་པས་རེད། དེ་བཞིན་དུ་སྨོན་ལམ་འགྲུབ་པའི་རྒྱུ་དེ་ནི་ཚུལ་ཁྲིམས་རྣམ་དག་དགོས་པར་གསུངས་ཡོད། དེ་ཡང་ཚུལ་ཁྲིམས་རྣམ་པར་དག་པ་དེ་དགེ་རྩ་མཆོག་ཏུ་གྱུར་བ་ཡིན་པའི་སྟབས་ཀྱིས་རེད། དེ་ཡང་ཅིའི་ཕྱིར་མཆོག་ཏུ་གྱུར་བ་ཡིན་ཅེ་ན། བསླབ་པ་གསུམ་གྱི་གཞི་མ་འདྲ་བོ་དེ་ཚུལ་ཁྲིམས་རེད། རང་ག་བར་བསམ་པ་ངན་པ་དེ་ཤི་བར་ཤོག་བསམ་པ་ཙམ་གྱིས་གན་ཤི་ནི་མ་དགོས། བསམ་པ་ངན་པ་གཞན་ལ་བརྩམས་ན་སྦྱོར་བ་རྩུབ་མོ་རང་ཉིད་ལ་ཨེ་འཁོར་ཤེས་རྒྱུ་མ་རེད། བསམ་པ་ངན་པས་མྱི་ལ་གནོད་ཅིག་ཨེ་ཐིངས་བསམ་ནས། དེ་ལ་རྔ་བརྡུང་གཏོར་མ་འཕེན་ཁུལ་བྱས་པ་ཙམ་པོས་ཕར་ཐུབ་མ་དགོས་ཚུར་རང་གཤེད་རང་ལ་འབབ་པ་དང་། གནོད་པ་ཚུར་རང་ལ་ལོག་རྒྱུའི་ངན་སེམས་ཀྱི་འབྲས་བུ་རང་ཉིད་ལ་སྨིན་པ་ནི་མཐོང་ཆོས་མངོན་འགྱུར་གྱིས་ཡོད་པ་དེ་ལྟར་རེད། མདོར་ན་བསྔོ་བ་ཡང་དག་དེ་དགེ་བ་རྨི་ལམ་ལྟ་བུ། བསག་པ་པོ་རྨི་ལམ་ལྟ་བུ། དེ་ལེན་པ་པོ་རྨི་ལམ་ལྟ་བུ། སྣང་ཚུལ་མ་འགག་ཀྱང་དོན་དུ་བདེན་པར་མི་འཛིན་པ་ཞིག་ལ་འཁོར་གསུམ་ཡང་དག་གི་བསྔོ་བ་གསུངས་ཡོད་པ་རེད།།

ཁ ཡེ་ཤེས་ཀྱི་ཚོགས་བསོག་པ་སྒོམ་ལ་བསླབ་པ།

༡ བྱིན་རླབས་བཙན་ཐབས་སུ་འཕོ་བ་བླ་མའི་རྣལ་འབྱོར།

དེའི་ཡན་ཆད་ཀྱིས་བསགས་སྦྱངས་གཉིས་ཀའི་གནད་བསྡུས་པ་ཡན་ལག་བདུན་པ་བཤད་ནས། ད་དེ་རིང་གི་བཤད་སྐལ་ངོ་མ་བོ་བླ་མའི་རྣལ་འབྱོར་ཡིན། དེ་རིང་སང་ཉིན་གཉིས་ཀར་ཡིན་གཅིག་མིན་གཉིས་ཀྱིས་ཉི་མ་གཉིས་པོའི་བཤད་སྐལ་ཚར་དགོས་པ་རེད། དེ་ནས་ཕྱིར་ལ་འཇོག་ས་ཡོད་པ་མ་རེད། རི་ཁྲོད་ཀྱི་ཆོས་པས་ངག་བཅད་བྱས་ནས་བཤད་སྐལ་ལས་སྐལ་ཚང་མ་ཚར་བ་ཡིན་བསམས་རུང་། ཡང་ཡུལ་སྡེ་བའི་མྱི་དང་ཐུག སྐྱིད་སྡུག་སྣོད་གཅིག་གི་ཆུ་ཐབ་ཀ་ལ་བརྟེན་པ་འདྲ་ཞིག་བྱས་པའི་མྱི་འབྲེལ་ཡོད་ཕྱོགས་ཀྱི་མྱི་སྣ་དང་བཅས་པ་ཡུལ་དགོན་གད་པ་སྟེང་ཤོད། བེའུ་ལུག་དཔུང་ཤ་མགོ་འབྲེལ་བྱས་ནས་བསྡད་ཡོད་དུས། མཚམས་རེར་འཇིག་རྟེན་མྱི་ཞིག་གི་བསམ་སྤྱོད་ཕལ་བ་དང་བསྟུན་པའི་འཕྲོས་དོན་རེ་ཡང་བུད་འགྲོ་རྒྱུ་ཞིག་རེད། དེ་འདྲ་ཡིན་དུས་ཉི་མ་བཞི་ཡི་ཆོས་ཁྲིད་ཀྱི་དུས་ཚོད་དེ་ཡང་རིང་བའི་སྣང་བ་མེད་རྒྱུ་ཞིག་རེད། གང་ལྟར་ང་རང་ཚོས་མར་ལ་བཤད་ཀི་འདུག བླ་མའི་རྣལ་འབྱོར་གྱི་ཉམས་ལེན་འདིའི་ཐོག་མ་ཉིད་དུ་བླ་མའི་རྣལ་འབྱོར་བསྒོམ་ནས་དེ་ཉིད་ཉམས་སུ་བླངས་པའི་དགོས་པ་དེ་ཤེས་དགོས་པ་རེད། བླ་མའི་རྣལ་འབྱོར་གནད་ཆེན་རེད་ཟེར་བ་ཙམ་མིན་པར་སྔོན་འགྲོ་དངོས་གཞི་ཐམས་ཅད་ཀྱི་གནད་ཇི་ལྟར་འདུས་ཚུལ་རང་གིས་ཤེས་དགོས། དེ་མ་ཤེས་ན་ངེས་ཤེས་ནང་ནས་མི་རྙེད། བླ་མ་མི་ཕམ་ཚང་གིས་ངེས་ཤེས་སྒྲོན་མེའི་ནང་ན། དཔྱད་པ་བཟང་པོས་མ་དྲངས་ན། །ངེས་ཤེས་བཟང་པོ་ག་ལ་དྲོངས། །ངེས་ཤེས་བཟང་པོ་མ་སྐྱེས་ན། །སྒྲོ་འདོགས་ངན་པ་ག་ལ་ནུབ། །ཅེས་པ་ལ་སོགས་པ་གསུངས་ན། ད་རུང་དེས་མ་ཚད་པར་ངེས་ཤེས་སྒྲོན་མེའི་དབུའི་ཕྱོགས་ཤིག་ན། གཞི་ལམ་འབྲས་བུའི་ཆོས་རྣམས་ལ། །ངེས་པའི་ཡིད་ཆེས་འདྲོང་པ་དང་། །ཐོས་པས་དད་པར་བྱེད་པ་གཉིས། །ལམ་དང་དེ་ཡི་གཟུགས་བརྙན་བཞིན། །ཞེས་གསུངས་ཡོད་པ་ལྟར་དུ། ངེས་ཤེས་རང་གིས་མ་རྙེད་དུས་གཞན་གྱི་རྗེས་སུ་འབྲང་པའི་བླུན་པོའི་དད་པ་གཅིག་པུའི་རྟ་བརྒྱུག་རུང་རྒྱུག་སའི་ཕྱོགས་མ་རྙེད་པ་དང་འདྲ་འདྲ་རེད། ཡིག་སྐད་དུ་རྟ་བརྒྱུག་སའི་དཀྱུས་ས་མ་རྙེད་པ་ཞེས་ཟེར། གཏིང་གི་ཐེ་ཚོམ་མི་ཆོད། ཐེ་ཚོམ་གཏིང་ནས་མ་ཆོད་དུས་ངོ་མས་བཤད་ན་རྒྱུ་མཚན་ཤེས་པའི་དབང་རྣོན་གྱི་དད་པ་ཞིག་སྙིང་ནས་འཁྲུངས་ཐབས་ཡོད་མ་རེད། དད་དང་མོས་གུས་བཅོས་མིན་བླ་མའི་རྣལ་འབྱོར་གྱི་དགོས་ཆོས་ངོ་མ་དེ། མ་ཚོགས་དུས་བླ་མའི་ཐུགས་རྒྱུད་ཀྱི་དགོངས་པ་ཇི་ལྟར་འཕོ། དེའི་སྐབས་སུ་བླ་མའི་རྣལ་འབྱོར་ཁ་ཙམ་དང་གཟུགས་བརྙན་ཙམ་དུ་འགྱུར་འགྲོ་རེད། རྟོགས་པའི་ཡེ་ཤེས་རང་རྒྱུད་ལ་བསྐྱེད་པར་བྱེད་པའི་ཐབས་ཐམས་ཅད་ཀྱི་མཐར་ཐུག་པ་ལམ་ཟབ་བླ་མའི་རྣལ་འབྱོར་གྱི་ཁྲིད་ཡིན་གསུངས་པ་རེད། རྟོགས་པའི་ཡེ་ཤེས་ཁྱད་པར་ཅན་རང་རྒྱུད་ལ་འདྲེན་པ་ལས་གཞན་དུ་གྱུར་བ་ཞིག་རྫོགས་པའི་སངས་རྒྱས་མངོན་སུམ་དུ་མཇལ་རུང། ཞུ་ཡོང་རྒྱུ་ཞིག་ཀྱང་མེད་ལ། ཐོབ་ཡོང་རྒྱུ་ཡང་དེའི་ཡན་ཞིག་དགོས་པ་མ་རེད། རྫོགས་པའི་སངས་རྒྱས་ཞལ་དངོས་སུ་མཇལ་རུང་ཁྱེད་ཀྱི་དགོངས་བརྒྱུད་ཀྱི་རྟོགས་པ་ང་ལ་འཕོས་ནས། ཁྱེད་ཨ་ན་མ་ན་ཞིག་གྱིས་ལ་ཐོངས་ཞུ་བ་ལས་གཞན་ཅི་ཞིག་ཞུ་ཡོང་། དེ་ལས་ཞུ་རྒྱུ་མེད་ལ་ཐོབ་ཡོང་རྒྱུ་ཡང་དེ་ལས་གཞན་ཞིག་མི་དགོས་ཀི། ད་བླ་མ་བསྟེན་པ་འདིའི་ཐད་ནས་ཐུན་མོང་ཐེག་ཆེན་སྤྱིའི་ལྟར་དུ་བྱས་ན། སྐྱེས་བུ་ཆུང་འབྲིང་ཆེ་གསུམ་གྱི་ལམ་དང་ནི་ཐུན་མིན་སྔ་འགྱུར་རང་ལུགས་ཀྱིས་ཐེག་རིམ་དགུ་ཡི་རྣམ་གཞག་བཤད་པ་རེད། དེའི་རྣམ་བཞག་ལྟར་དུ་བཤད་སོང་ན་ཡང་། ཐམས་ཅད་ཀྱིས་བླ་མ་མཉེས་པ་དེ་བརྒྱུད་ནས་རང་འབྲས་ཐུན་མོང་མ་ཡིན་པ་ཐོབ་པ་ཙམ་ཞིག་ལ་གཅིག་ཅིང་། དེ་ཐམས་ཅད་ཀྱིས་རྫོགས་པ་ཆེན་པོའི་ལུགས་བཞིན་དུ་ལམ་རྐྱེན་གཞན་གཅིག་ལ་ལྟོས་མི་དགོས་པར། བླ་མར་མོས་གུས་གཅིག་པུས་དགོངས་བརྒྱུད་ཀྱི་བྱིན་རླབས་འཕོ་བར་གསུང་ས་ཞིག་ཡོད་ནི་མ་རེད། ཆ་བཞག་ན་ཐེག་དམན་ཉན་རང་གི་ལམ་ནས་མཁན་སློབ་མཚན་ཉིད་དང་ལྡན་པ་ཞིག་བཙལ་ནས། ངེས་པར་འབྱུང་བའི་ཀུན་ནས་བསླང་སྟེ་དད་པས་སྒོ་ཕྱེས་ནས་སོ་ཐར་གྱི་སྡོམ་པ་བླངས་བའི་སྟེང་ལ་རང་ལམ་གྱི་ལམ་ལྷག་པའི་བསླབ་པ་གསུམ་པོ་ཉམས་སུ་བླངས་ཏེ། བདེན་བཞི་བསྒོམ་པ་བརྒྱུད་ནས་ལམ་བདེན་བདག་མེད་རྟོགས་པའི་ཤེས་རབ་འཁོར་ཚུལ་ཁྲིམས་དང་ཏིང་འཛིན་གྱི་ཉམས་ལེན་ལ་བསྟུན་ཏེ་འབྲས་བུ་ཉན་རང་གི་དགྲ་བཅོམ་ཐོབ་ཀྱིན་ཡོད་པ་རེད། དོན་དམ་པ་ནི་དད་པས་རྟོགས་པར་བྱ་བ་ཡིན་པར་འདོད་པ་རེད་དེ། དད་པས་སྒོ་ཕྱེས་ནས་ཤེས་རབ་ཀྱིས་རང་འབྲས་ཐོབ་ཀྱི་ཡོད་པ་རེད། བྱང་སེམས་ཀྱི་སྐབས་ལ་ཡང་དེ་བཞིན་དུ་ཡོངས་འཛིན་བསྟེན་དགོས་པ་རེད། ཕྱིའི་ཡོངས་འཛིན་བླ་མ་དགེ་བའི་བཤེས་གཉེན། ནང་གི་ཡོངས་འཛིན་བྱམས་སྙིང་རྗེ་བྱང་ཆུབ་ཀྱི་སེམས་གསུམ་བསྟེན་ནས་དེ་དག་ལ་བློ་མ་འབྱོང་ན་མཐོང་ལམ་ཆོས་ཉིད་ཀྱི་བདེན་པ་མི་མཐོང་བ། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་བརྩོན་བཅས་ལྷག་པར་ལུང་གིས་ཕྱུག །དེ་ཉིད་རབ་ཏུ་རྟོགས་པར་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །གསུངས་ཡོད་པ་རེད། དེ་ལྟ་བུའི་མཚན་ཉིད་ཀུན་ཚང་གི་བཤེས་གཉེན་དད་པས་བསྟེན་ཏེ་དེའི་མདུན་ནས་བྱང་ཆུབ་མཆོག་ཏུ་སེམས་བསྐྱེད་དགོས་པ་རེད། གལ་ཏེ་བླ་མ་བྱང་སེམས་དེ་ལ་དད་ལོག་བྱས་ན་སྔར་བསག་གི་དགེ་རྩ་ཐམས་ཅད་འཇོམས་འགྲོ་གསུངས་ཡོད་མོད། ཕར་ཕྱིན་དྲུག་གི་རྫོགས་སྨིན་སྦྱངས་པ་རྒྱ་མཚོ་ལྟ་བུ་ཞིག་མཐར་ཕྱིན་པ་མ་གཏོགས། བླ་མར་སངས་རྒྱས་དངོས་མཐོང་གི་དད་པ་ཞོག་ལ་མོས་གུས་གྱིས་གསོལ་བ་རྐྱང་རྐྱང་ཐོབ་ལ་སྡོད་དང་། རྟོགས་པའི་ཡེ་ཤེས་རང་རྒྱུད་ལ་འདྲེན་ཡོང་རྒྱུ་ཞིག་ཡོངས་སུ་གྲགས་པར་མ་གསུང་བ་རེད། སྔགས་ལ་བསམ་བློ་ཞིག་བཏང་ནའང་། སྔགས་ཕྱི་རྒྱུད་ཀྲི་ཡོཀ་སྡེ་གསུམ་གྱིས་སོར་བྱང་གི་སྡོམ་པ་ཐོབ་པ་སྔོན་དུ་འགྲོ་བའི་རིག་པ་འཛིན་པ་ཞིག་ལ་མཚོན་ན་ཡང་། རང་ལམ་གྱི་རྡོ་རྗེ་སློབ་དཔོན་མཚན་ཉིད་དང་ལྡན་པ་ཞིག་གི་མདུན་ནས་རང་ལམ་གྱིས་སྨིན་པར་བྱེད་པའི་དབང་ཚུལ་བཞིན་དུ་ཐོབ་ནས། དམ་ཚིག་མ་ཉམས་པའི་ཐོག་དེ་ནས་མཚན་བཅས་དང་མཚན་མ་མེད་པའི་རྣལ་འབྱོར་བསྒོམ་ན། ཐུན་མོང་གི་དངོས་གྲུབ་འདོད་གཟུགས་ཀྱི་ལྷ་དང་སྐལ་བ་མཉམ་པའི་རིག་འཛིན་ཐོབ་རྒྱུ་ཡོད་པ་རེད་གསུངས་མོད། མཚན་བཅས་མཚན་མེད་ཀྱི་རྣལ་འབྱོར་དེ་ཚོ་མ་བསྒོམ་པར། བླ་མ་སངས་རྒྱས་དངོས་མཐོང་གི་མོས་གུས་རྐྱང་བ་བྱས་ནས་དེ་ལ་གསོལ་བ་ཐོབ་དང་། རྟོགས་པའི་ཡེ་ཤེས་རང་རྒྱུད་ལ་འཕོས་ནས་མཆོག་གི་དངོས་གྲུབ་ཐོབ་ཡོང་མ་གསུངས་པ་ཡིན། དེ་ནས་ནང་རྒྱུད་སྡེ་གསུམ་ལ་བསམ་བློ་བཏང་ན་མ་ཧཱ་ཨ་ནུ་ཨ་ཏི་གསུམ་རེད། མ་ཧཱ་ཡོ་གས་དེ་ཉིད་བཅུ་འམ་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་བསྟེན་དགོས་གསུངས་པ་རེད། ལམ་གྱི་འཇུག་སྒོ་དབང་ཡིན་པར་གསུངས་པ་རེད། ཕྱི་ཕན་པའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་པོ་ཐོབ། དབང་སྲོག་དམ་ཚིག་གིས་རྒྱུད་བསྡམས་ནས་བསྐྱེད་རྫོགས་རིམ་གཉིས་ཀྱི་ལམ་དང་། ཁྱད་པར་དུ་རྫོགས་རིམ་ལ་བསམ་བློ་བཏང་ན་རླུང་གི་རྣལ་འབྱོར་གྱི་སྟེང་ནས་དཔེ་དང་དོན་གྱི་འོད་གསལ་ཉམས་སུ་ལེན་དགོས་གསུང་བཞིན་ཡོད་པ་རེད། བླ་མ་རྡོ་རྗེ་སློབ་དཔོན་དང་འགལ་སོང་བ་ཡིན་ན། མགོ་ཆད་ན་གསོ་རྒྱུ་མེད་པ་ལྟ་བུ། ཚེ་འདིར་དངོས་གྲུབ་ཐོབ་པར་གེགས་བྱེད། ཕྱི་མ་རྡོ་རྗེའི་དམྱལ་བ་ནས་ཐར་དཀའ་གསུངས་ཀྱང་། དེ་ཡང་རྡོ་རྗེའི་སློབ་དཔོན་ལ་སངས་རྒྱས་དངོས་མཐོང་གི་དད་པ་ཞོག མོས་གུས་ཀྱིས་གསོལ་བ་རྩེ་གཅིག་གིས་བཏབ་ན་དེ་རྐྱང་བས་རྟོགས་པའི་ཡེ་ཤེས་རང་རྒྱུད་ལ་དྲངས་ནས་མཆོག་གི་དངོས་གྲུབ་ཐོབ་པར་རྩལ་དུ་བཏོན་ནས་མ་གསུངས། དེ་བཞིན་དུ་ཨ་ནུ་ཡོ་ག་འདྲ་ཞིག་ལ་བསམ་བློ་ཞིག་བཏང་ནའང་རང་ལམ་གྱི་བླ་མ་མཚན་ཉིད་དང་ལྡན་པ་ཞིག་བསྟེན་ནས། ཕྱི་དབང་རྒྱུད་ཀྱི་ཆུ་བོ། ནང་དབང་འབྱུང་བའི་ཆུ་བོ་། གསང་དབང་རྫོགས་པའི་ཆུ་བོ། སྒྲུབ་དབང་གྲགས་པའི་ཆུ་བོ་ཚོ་བསྐུར་ཐོབ་བརྒྱུད་ནས་དབང་ཆོག་སུམ་ཅུ་རྩ་དྲུག་གི་བསྐུར་ཐབས་བརྒྱུད་བསྡད་ནས། དམ་ཚིག་རྣམ་པར་དག་པས་རྒྱུད་བསྡམས་པའི་ཐོག་དེར་བསྐྱེད་རྫོགས་གཉིས་ཀ་དང་། གཙོ་བོར་རྫོགས་རིམ་ཐིག་ལེའི་རྣལ་འབྱོར་ལ་བསྟེན་ནས་དཔེ་དོན་གྱི་འོད་གསལ་ལ་རིམ་གྱིས་སྦྱོར་བ་མ་གཏོགས་པར་ཡང་བླ་མའི་མོས་གུས་དག་དག་གིས་འགྲུབ་པར་མ་གསུངས་བ་ཡིན་ན། དངོས་གྲུབ་སྒྲུབ་པ་སློབ་དཔོན་ལ་ལྟོས་པ་སྔགས་བླ་མེད་གསར་རྙིང་གཉིས་ཀས་བཞེད་པ་ཡིན་མོད། བླ་མ་ལྷའི་ངོ་བོར་བསྒྲུབས་ནས་འགྲུབ་ན་བྱིན་རླབས་ཆེ་ཞིང་འགྲུབ་ཐག་ཉེ་གསུངས་ཡོད། ཡི་དམ་དང་མཁའ་འགྲོའི་དངོས་གྲུབ་ཀྱང་དེ་ལ་བསྟེན་ནས་ཐོབ་པར་གསུངས་ཡོད་པ་རེད། ཨ་ཏི་རྫོགས་པ་ཆེན་པོའི་སྐབས་དང་ཁྱད་པར་དུ་མན་ངག་སྡེའི་ལུགས་ལ། སྤྲོས་བཅས་སྤྲོས་མེད་ལ་སོགས་པའི་དབང་བཞི་ཐོབ། སྲུང་དུ་ཡོད་པ་རིམ་གྱིས་པའི་དམ་ཚིག་དང་སྲུང་དུ་མེད་པ་ཅིག་ཅར་བའི་དམ་ཚིག་སོགས་ཀྱིས་རྒྱུད་བསྡམས་ནས་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ཉམས་ལེན་ལ་འབད་བཞག་དུས། དང་པོ་རྟོགས་པ་མ་སྐྱེ་བ་སྐྱེས་པར་བྱེད་པ། བར་དུ་སྐྱེས་ན་མི་ཉམས་པར་བརྟན་པར་བྱེད་པ། མཐར་ཉམས་རྟོགས་ཀྱི་ཡོན་ཏན་གོང་ནས་གོང་དུ་འཕེལ་བ་ལ་བླ་མར་སངས་རྒྱས་དངོས་མཐོང་གི་མོས་གུས་ཀྱིས་གསོལ་བ་བཏབ་ན། གཡོ་མེད་མོས་གུས་ཟླ་དྲུག་གིས་ཀྱང་རྡོ་རྗེ་འཆང་གི་ས་ཐོབ་པར་འགྱུར་བ་གསུངས་པ་རེད། དེ་བས་ལམ་འོག་མའི་དོན་རྟོགས་དགོས་ན་ཅི་འདྲའི་རྟོགས་པར་དཀའ་བ་ཡིན་རུང་། དེ་ཐམས་ཅད་རྫོགས་པ་ཆེན་པོ་ལ་ཐུག་དུས་ཇེ་སླ་རེད་སོང་བ་མ་རེད། ཇེ་ཟབ་དུ་གྱུར་སོང་བ་རེད། དེ་ཡིན་དུས་ཉན་རང་གི་སྐབས་ལ་བླ་མ་ཟེར་བའི་ཐ་སྙད་འབྱུང་བ་རེད་དེ། དེ་ཉན་རང་འཕགས་པ་མིན་ནའང་སོ་སྐྱེས་ཡོན་ཏན་ཅན་ཞིག་ལ་དེ་ཡོན་ཏན་ཅན་དུ་མཐོང་བས་ཆོག་པ་རེད། བྱང་སེམས་ཀྱི་སྐབས་ལ་སློབ་དཔོན་ཟེར་རྒྱུ་དེ་ནི་སངས་རྒྱས་སྤྲུལ་བའི་སྐུའམ་ཡང་ན་འཕགས་པ་ས་ཆེན་གྱི་སེམས་དཔའ་ཞིག དེ་མིན་ན་ཚོགས་ལམ་ཆེན་པོ་ཡན་ཆད་ཀྱིས་བྱང་སེམས་ཡོན་ཏན་ཅན་དུ་མཐོང་ན་དེའི་ཆོག་གི་ཡོད་པ་རེད། འོན་ཀྱང་རྫོགས་པ་ཆེན་པོའི་སྐབས་ལ་བླ་མ་དེ་སོ་སྐྱེས་པཎྜི་ཏ་ཞིག་ཡིན་པ་མཐོང་བས་མི་ཆོག་གི་འཕགས་པ་དགྲ་བཅོམ་པ་དང་བྱང་སེམས་འཕགས་པ་མ་དགོས་སངས་རྒྱས་སྤྲུལ་བའི་སྐུ་དང་ལོངས་སྤྱོད་རྫོགས་སྐུ་རུ་མཐོང་ན་ཡང་མི་ཆོག་གི དེས་ན་ཅི་ཞིག་ལ་མཐོང་དགོས་པ་རེད་ཅེ་ན། བླ་མ་སངས་རྒྱས་ཆོས་སྐུར་མཐོང་བའི་མོས་གུས། དེ་ཡང་ལྟེམ་རྐྱང་མེད་པ་གསུངས་འདུག་པས། ལྟེམ་རྐྱང་མེད་ཟེར་དུས་ཅི་ཟེར་བ་རེད་ཅེ་ན། དེ་ནི་རེས་ཡོད་རེས་མེད་ཀྱི་བཏང་ལྷོད་ཅན་མ་ཡིན་པར་གསུངས་པ་རེད། དད་གུས་གདུང་བས་སྙིང་ནས་གསོལ་བ་འདེབས་ཐུབ་མཁན་ཞིག་ཡིན་ན་ལམ་རྐྱེན་གཞན་ལ་མི་ལྟོས་པར་དེའི་ཐུགས་རྒྱུད་ཀྱི་རྟོགས་པའི་ཡེ་ཤེས་རང་རྒྱུད་ལ་འདྲེན་ནུས་པ་རེད། དེ་ལྟར་བླ་མ་སངས་རྒྱས་སུ་ཤེས་པ་ལ་ཤེས་པ་རྣམ་པ་ལྔ་ཚང་དགོས་པ་རེད། བླ་མ་སངས་རྒྱས་ཡིན་པ་རེད་ཟེར་བ་དང་གྲགས་པ་ལ་བསམ་ནས་བལྟས་བསྡད་པ་ཙམ་གྱིས་ཆོག་པ་མ་རེད། ཤེས་པ་ལྔ་བོ་ནི། བླ་མ་སངས་རྒྱས་སུ་ཤེས་པ་དང་གཅིག ཅི་མཛད་སངས་རྒྱས་ཀྱི་མཛད་པར་ཤེས་པ་དང་གཉིས། དེའི་སྟེང་ལ་རང་ངོས་ནས་སངས་རྒྱས་ལས་ཀྱང་བཀའ་དྲིན་ཆེ་བར་ཤེས་པ་དང་གསུམ། དེའི་སྟེང་ལ་བླ་མ་ནི་སྐྱབས་གནས་ཀུན་འདུས་ཀྱི་ངོ་བོ་ཡིན་པར་ཤེས་པ་དང་བཞི། དེ་ལྟར་ཤེས་ན་ལམ་རྐྱེན་གཞན་ལ་རག་མ་ལས་པར་རྟོགས་པའི་ཡེ་ཤེས་ཁྱད་པར་ཅན་རང་རྒྱུད་ལ་སྐྱེས་པར་ཤེས་པ་དང་ལྔ་བོ་ངེས་པར་དུ་ཚང་དགོས་པ་རེད། དེ་ཡང་དེའི་ནང་གི་དང་པོ་བླ་མ་སངས་རྒྱས་སུ་མཐོང་བའི་དད་མོས་བཅོས་མིན་ཞིག་ཡོད་ན། གཞན་བཞི་བོ་རང་ཤུགས་ཀྱིས་ཚང་ཡོང་རེད། བླ་མར་དགའ་རྒྱུ་བོ་དགའ། དད་རྒྱུ་ཞིག་དད། བཀའ་དྲིན་གྱི་ངོས་ནས་བཤད་ན་ཐར་བའི་ལམ་སྟོན་པ་རེད། སོར་བྱང་སྔགས་གསུམ་གྱི་སྡོམ་པ་བྱིན་ཐལ། སངས་རྒྱས་ཀྱི་མཛད་པ་བསྒྲུབས་པ་རེད། བཀའ་དྲིན་མི་ཆེ་ཟེར་བ་མིན་ཡང་སངས་རྒྱས་ངོ་མར་མཐོང་ཞེ་ན་སུ་ཡིན་རུང་དཀའ་མོ་རེད་ཡིན་ན། དེ་དཀའ་བས་བླ་མ་མི་རུ་བཟུང་བའི་ལོག་ལྟ་སྤང་ཆེད་དུ་རྣམ་པ་མཚོ་སྐྱེས་རྡོ་རྗེ་སོགས་ལ་ཞལ་བསྒྱུར་འདུག་དགོས་པ་རེད། བླ་མ་སངས་རྒྱས་ཡིན་པའི་ཡིན་ལུགས་དེ་ཅི་འདྲ་ཞིག་རེད་ཟེར་ན། བླ་མ་སངས་རྒྱས་ཡིན་མིན་དེ་དྲང་དོན་དང་ངེས་དོན་གཉིས་ཀའི་ཐད་ནས་དབྱེ་ཞིབ་བྱེད་རྒྱུ་ཡོད་པ་རེད། དྲང་དོན་ལྟར་དུ་བཤད་ན་བླ་མ་དེ་སངས་རྒྱས་སྤྲུལ་བའི་སྐུ་དངོས་རེད་ཟེར་ཆོག་པ་རེད། དེ་ལྔ་བརྒྱའི་ཐ་མ་ཤར་དུས་ང་ཉིད་དགེ་བའི་བཤེས་སུ་སྤྲུལ་ནས་ཁྱོད་ལ་སོགས་པའི་དོན་བྱེད་ཅེས། བཅོམ་ལྡན་འདས་ཁོང་རང་ཉིད་ཀྱིས་གསུང་ས་ཀུན་དགའ་བོ་ལ་གསུངས་པ་རེད་ལ། སངས་རྒྱས་ཀྱིས་གདུལ་བྱའི་དོན་ལ། གང་འདུལ་སྤྲུལ་བའི་གཟུགས་སྐུར་འདུས་བྱས་གློ་བུར་བ་སངས་རྒྱས་ཀྱི་ཐུགས་རྗེ་དང་གདུལ་བྱའི་བསོད་ནམས་ཀྱི་སྟོབས་ཀྱིས་སྣང་ཆོག་པ་དཔེར་ན། ཆུ་སྣོད་ཟླ་གཟུགས་ཀྱི་དཔེ་ལྟར་ཡིན་པས། གསོལ་བ་སྙིང་ནས་བཏབ་ན་མོས་གུས་ཀྱི་སྟོབས་ཀྱིས་བྱིན་རླབས་འཇུག་པ་ཆོས་ཉིད་རེད། ཡིན་ཡང་། གཟུགས་སྐུ་མངོན་མཚན་ཅན་དུ་བཟུང་ན། དེ་ཡང་མ་དག་པའི་སྣང་ཞེན་རང་རྒྱུད་པ་རེད་འགྲོ་བས་རྡོ་རྗེ་གཅོད་པ་ལས། གང་དག་ང་ལ་གཟུགས་སུ་མཐོང་། །ལ་སོགས་པ་གསུངས་པའི་ལུང་དོན་ལྟར། ཡེ་ཤེས་སྐྱེས་པའི་ཉེར་ལེན་ལ་མཚན་འཛིན་གྱི་བདེན་ཞེན་ཡོད་མི་ཉན། བླ་མ་མི་རུ་མི་འཛིན་པར་བླ་མ་སངས་རྒྱས་སུ་དེ་ལྟར་སྒྲུབ་རྒྱུ་དེ་ནི་མདོ་སྔགས་ཐུན་མོང་གི་ལུགས་རེད་ཟེར་རྒྱུ་ཅན་པོ་རེད། དེ་ནི་ངེས་དོན་ཐུན་མིན་ལྟར་དུ་བཤད་ན་ཡང་། བླ་མ་སངས་རྒྱས་དངོས་ཡིན་པར་ལུང་དང་རིགས་པ་གཉིས་ཀས་གྲུབ་པ་རེད། ལུང་གིས་ངེས་པ་མེད་ན་རིགས་དཔྱད་ཀྱིས་མཐའ་གཅིག་ཏུ་ཁ་ཚོན་གཅོད་དཀའ་བ་ཡང་ཡོད་མོད་ཀྱང་། ལུང་གླ་པགས་གཉིས་ཀ་གར་འཐེན་རེད་ཟེར་ནས། འགའ་རེས་ལུང་གིས་དབེན་པའི་རིགས་པའི་རྩེད་འཇོ་ལ་མཚར་དུ་འཛིན་མཁན་ཡང་དེང་སང་ཡོད་པས། དེ་དག་དང་སྒོ་བསྟུན་ནས་རིགས་པས་སྒྲུབ་པ་ལྟར་དུ་བཤད་ཡོང་ན་ཡང་། བླ་མའི་ཐུགས་ཟབ་གསལ་གཉིས་མེད་གཞི་གནས་ཀྱི་ཡེ་ཤེས་མངོན་དུ་གྱུར་ནས་རྟོགས་ཡོད་ན་འདྲ། རྟོགས་མེད་ནའང་འདྲ། ངོ་བོ་ཡེ་དག་གི་སངས་རྒྱས་འགྱུར་མེད་འདུས་མ་བྱས་པའི་ཆོས་སྐུ་ཡིན་པར་ཁས་ལེན་དགོས་པ་རེད། དེའི་གཞི་འབྲས་དབྱེར་མེད་ཀྱི་སངས་རྒྱས་ཆོས་སྐུ་དེའི་རྩལ་ལམ་རྣམ་རོལ་དུ་ཤར་བ་ནི་གཟུགས་སྐུ་དངོས་ཡིན་དགོས་པ་དང་གཟུགས་སྐུའི་ངོ་བོ་ཆོས་སྐུ་རེད། ཆོས་སྐུའི་རྣམ་རོལ་གཟུགས་སྐུ་མིན་པའི་ཐབས་མེད་སོང་བ་རེད། དེའི་སྟེང་ལ་ནང་མཚོན་བྱ་དོན་གྱི་བླ་མ་བླ་མའི་ཐུགས་ཡེ་ཤེས་ཆེན་པོ་ཡིན་པ་གང་ཞིག་ལ། དེ་མཚོན་བྱེད་རྟགས་ཀྱི་བླ་མ་ཉིད་རྒྱལ་བའི་མཛད་པ་ཅི་བཞིན་དུ་སྒྲུབ་པའི་སྐུ་གསུང་ཐུགས་ཀྱི་རྣམ་པར་ཤར་བ་ཡིན་པས་ན། དངོས་པོ་སྟོབས་སུ་ཞུགས་པའམ་ཆོས་ཉིད་ཀྱི་རིགས་པས་བླ་མ་སངས་རྒྱས་སུ་དེ་ལྟར་སྒྲུབ་པ་རེད། ལུང་གི་ཐད་ནས་བསམ་བློ་ཞིག་བཏང་ན། འདི་ནི་རང་བྱུང་བཅོམ་ལྡན་འདས། །ཞེས་དང་། ལུས་ནི་གང་ཟག་ལྷ་མི་ཡང་། །དགོངས་པ་དམ་པ་སངས་རྒྱས་དངོས། །སོགས་མང་བ་བསྐྱར་ཟློས་མང་བོ་ཞིག་མི་དགོས། དེའི་ཕྱིར་ན་རྒྱུད་རང་གི་ནང་ནས་ཀྱང་། གང་གིས་བསྐལ་བ་བྱེ་བ་རུ། །ལྷ་སྐུ་འབུམ་ཕྲག་བསྒོམ་པ་ལས། །བླ་མ་སྐད་ཅིག་དྲན་པ་མཆོག །ཞེས་གསུངས་པ་རེད། ལུང་དེས་བླ་མའི་རྣལ་འབྱོར་གྱི་དགོས་པ་བསྟན་པ་ཡིན་ན། བླ་མ་སངས་རྒྱས་དངོས་ཡིན་པ་དང་བླ་མའི་རྣལ་འབྱོར་གྱི་དགོས་པ་ཡང་དེ་ལྟར་ཤེས་སོང་ཡང་། དང་པོ་བླ་མ་ཇི་ལྟར་བརྟག་ལུགས། སོ་སོའི་སྐྱེ་བོའི་མཐོང་ཡུལ་བླ་མ་མཚན་ཉིད་ཀུན་ལྡན་དང་ལྟར་སྣང་བ་གཉིས་ཀའི་དབྱེ་མཚམས་འབྱེད་དཀའ་བ་ཡིན་པས། འདི་ནས་དང་པོ་བླ་མ་ཇི་ལྟར་བརྟག་ལུགས་དང་། བར་དུ་བླ་མ་ཇི་ལྟར་བསྟེན་ནས། མཐའ་མར་བླ་མའི་དགོངས་སྤྱོད་ལ་ཇི་ལྟར་བསླབ་ཚུལ་དེ་ཤེས་པ་གལ་ཆེ་སྙམ།།

༡༽ དང་པོ་བླ་མ་ཇི་ལྟར་བརྟག་ལུགས།

དེ་ཡང་རྒྱ་མཚོ་ཆེན་པོ་ལས་ཕ་རོལ་གྱི་འགྲམ་ངོགས་ལ་ཐོན་དགོས་ན། དེད་དཔོན་མཁས་པ་ཞིག་བསྟེན་ནས་དེའི་གྲུ་གཟིངས་ཀྱི་ཁ་ལོ་བསྒྱུར་ནས་ཕ་རོལ་ཏུ་ཐོན་དགོས་པ་ལྟར་དུ། འཁོར་བ་སྡུག་བསྔལ་གྱི་མཚོ་ཆེན་འདི་ལས་བརྒལ་ནས། ཐར་བ་དམ་པ་གཏན་བདེའི་སངས་རྒྱས་ཀྱི་གོ་འཕང་ལ་བདེ་བླགས་ཀྱིས་ཐོན་དགོས་ན། དགེ་བའི་བཤེས་གཉེན་དང་དགེ་བའི་གྲོགས་པོ་ལ་མ་བསྟེན་པར་ཐོན་ཐབས་ཡོད་མ་རེད། དེ་བཞིན་དུ་ནད་པས་སྨན་པ་མཁས་པ་དང་ནི་མགྲོན་པོས་སྐྱེལ་མ་དཔའ་བོ་བསྟེན་པ་འདྲ་རེད། འཁོར་བས་འཇིགས་ནས་བྲོས་མཁན་ཞིག་གིས་ཐར་བའི་ལམ་ཁྲིད་མ་བསྟེན་ཐབས་མེད་ཡིན། དེའི་ཕྱིར་ན་འཇིག་རྟེན་གྱི་བྱ་བ་ཆེ་བ་ཞིག་ཉེས་སོང་ན་ཚེ་འདིའི་དོན་དག་ཞིག་རྐྱང་པ་རེད། བླ་མ་བརྟག་མ་ཐུབ། བརྟག་པ་ལ་མ་མཁས་པར་བསྟེན་ཉེས་རེད་སོང་ན། ད་རེས་ཀྱི་རྟེན་བཟང་རྙེད་དཀའ་བ་འདི་བརླག་པར་མ་ཚད། སྐྱེ་བ་ཚེ་རབས་མང་པོའི་དོན་ཆེན་བརླག་འགྲོ་བ་རེད། བརྟག་ཅིང་དཔྱད་པ་མེད་པར་ཁྱི་དང་གློ་བ་འཕྲད་པ་ལྟར་བསྟེན་སྔ་བྱེད་མི་ཉན་ཚུལ། བླ་མར་མ་བརྟག་དུག་འཐུང་འདྲ། །སློབ་མར་མ་བརྟག་གཡང་མཆོང་འདྲ། །ཞེས་གསུངས་པ་ལྟར་རོ། །དེ་ཡིན་ན་སྤྱིར་གསང་སྔགས་སྟོན་པའི་བླ་མ་དེ་གསང་སྔགས་ཀྱི་ཟབ་དོན་ལ་མཁས་ཤིང་བསྙེན་སྒྲུབ་ཡན་ལག་བཞིའི་རྟགས་ཐོན་པ་ཞིག བྱེ་བྲག་ཏུ་རྫོགས་ཆེན་སྟོན་པའི་བླ་མ་དེ་ནི་ལྟ་སྒོམ་སྤྱོད་འབྲས་བཞི་བོའི་ཐད་ནས། རྟོགས་ཤིང་ལྟ་བ་ལ་མཁས་པ། །བསྒོམས་ཤིང་གོམས་པ་ལ་མཁས་པ། །གཉིས་མེད་སྤྱོད་པ་ལ་མཁས་པ། །མཐར་ཕྱིན་འབྲས་བུ་ལ་མཁས་པ། །དེ་འདྲ་ཞིག་དགོས་པ་རེད། ལྟ་བས་ཆོས་ཉིད་མངོན་སུམ་གྱི་དྲོད་ཚད་ཐོབ་ཡོད་པ་ཞིག བསྒོམ་པས་རྟག་ཏུ་དགོངས་སྤྱོད་ཆོས་ཉིད་ལས་མི་འདའ་མཁན་ཞིག སྤྱོད་པ་གཟུང་འཛིན་བྲལ་བས་བླང་དོར་ལས་རིང་དུ་འདས་སོང་པ་ཞིག འབྲས་བུ་རེ་དོགས་དང་འབད་རྩོལ་ཞིག་ནས་གྲོལ་ཚད་ཀྱི་རྟགས་དང་ལྡན་པ་ཞིག་ཡིན་དགོས་ཀྱང་། དེ་རིང་ཁ་སང་དུས་སྙིགས་མའི་སྐབས་རེད། དམ་པའི་ཡོན་ཏན་རྫོགས་པ་ཉུང་ཉུང་རེད། གལ་ཏེ་རེ་རེ་གཉིས་གཉིས་ཡོད་ཀྱང་རྒྱུད་སྦས་ཚུལ་གྱིས་བཞུགས་པ་ཤས་ཆེ་བ་ཡིན་པས། དམ་པའི་ཡོན་ཏན་དེ་དངོས་སུ་མཐོང་བ་ལ། ལས་དག་པའམ་ཡང་ན་རང་དང་སྤྱོད་ཡུལ་མཐུན་པ་ཞིག་ཡིན་དགོས་པ་རེད། རང་སེམས་རྣམ་པར་ཐར་བའི་སྒོ་གསུམ་མ་གྲོལ་སྣང་བ་དག་པ་རབ་འབྱམས་སུ་ཤར་བའི་ཉེར་ལེན་མེད་པ་ཞིག་གིས། སྐུ་གསུང་ཐུགས་ཀྱི་གསང་བ་ཤིན་ཏུ་སྦས་ཏེ་གབ་པའི་རིགས་དེ་དག་འཁྲུལ་སྣང་རང་རྒྱུད་པས་སྒྲིབ་ནས་བལྟར་མི་མངོན་པ་རེད། གོང་ནས་བཤད་པ་ལྟར་དགེ་སློང་ལེགས་སྐར་གྱིས་མདོ་སྡེ་བཅུ་གཉིས་བློ་ལ་འགྲོ་བར་མ་ཚད། བསམ་གཏན་དང་པོའི་ཏིང་ངེ་འཛིན་ཐོབ་ཡོད་ཀྱང་ཕན་མ་ཐོགས་པ་ལྟ་བུ་རེད། རྨོངས་པར་གྲགས་པའི་ཕྱི་བཞིན་འབྲང་ས་ནས་ལྟར་སྣང་འཁྲུལ་བས་བསླུ་བའི་བླ་མ་ངན་པ་དང་འཕྲད་ན། དལ་བ་བརྒྱད་དང་རང་འབྱོར་ལྔ་བོ་རང་ཉིད་ཀྱི་བདག་རྐྱེན་ལས་བྱུང་བ་ཡིན་པས་རང་ཉིད་ལ་ཡོད་པ་གཞིར་བཞག་རེད། གཞན་འབྱོར་གྱི་ཡན་ལག་ལྔ་བོའི་ཐད་ནས་མི་ཚང་པར་གྱུར་བས། ལན་གཅིག་ཐོབ་པའི་མི་ལུས་རིན་པོ་ཆེའི་རྟེན་རྙེད་པར་དཀའ་བ་དེ་ཡང་འཕྲོ་བརླག་ལ་སུས་བྱས་པ་རེད་ཅེ་ན། དམ་པ་མ་ཡིན་པའི་བཤེས་གཉེན་གྱིས་བྱས་པ་རེད། དེང་སང་རྒྱུད་ནས་གསུངས་པ་ལྟར་དུ། བླ་མའི་མཚན་ཉིད་ཐམས་ཅད་ཚང་པ་ཞིག་སྙིགས་མའི་སྐྱེ་བོའི་བསོད་ནམས་དམན་པས་རྙེད་ཐུབ་དཀའ་མོ་ཡིན་ཡང་། དུས་ཚོད་སྡུག་རྒྱུར་ཁག་བཞག་ནས་བླ་མ་ས་ཁུངས་མི་སྟོང་ཙམ་གྱི་སུ་ལོན་གང་བདེ་རེ་མྱིང་བཏགས་ས་ཞིག་ལོན་པས་ཀྱང་མི་ཕན། གསང་སྔགས་ཀྱི་བླ་མ་དེ་ནི་སྡོམ་པ་གསུམ་གྱི་གནས་ལ་ཉེས་འགལ་མ་སོང་བས་རྒྱུད་གཙང་། རང་བཞིན་མཛངས་ཤིང་མདོ་རྒྱུད་བསྟན་བཅོས་ཐམས་ཅད་ལ་མ་རྨོངས་པ་། སྙིང་རྗེའི་ཐུགས་རྒྱུད་བརླན་ཞིང་མཛད་པ་བསྟན་དང་འགྲོ་བར་སྨན་པའི་གཞན་དོན་འབའ་ཞིག་ལ་བརྩོན་པ། རྟོགས་པས་བདག་རྒྱུད་གྲོལ་བས་ཐུགས་རྗེས་གཞན་རྒྱུད་གྲོལ་བའམ་སྨིན་པར་བྱ་ནུས་པ་ཞིག་ངེས་པར་ཡིན་དགོས། རང་གིས་ཆོས་བཞིན་དུ་བྱེད་ཅིང་གཞན་དག་ཀྱང་དགེ་ལ་སྦྱོར་བ་ཞིག་མིན་དུས། བླ་མ་མ་དགོས་དགེ་བའི་བཤེས་གཉེན་ཙམ་གྱི་མིང་ཡང་འཇུག་པ་མ་རེད། རྒྱལ་བའི་ཕྲིན་ལས་ནི་བསམ་གྱིས་མི་ཁྱབ་པ་རེད། སངས་རྒྱས་སྐུ་དངོས་ཀྱིས་འདུལ་དགོས་པའི་སྐབས་གཙུག་ཏོར་དང་ལྡན་པའི་སངས་རྒྱས་མཆོག་གི་སྤྲུལ་བའི་སྐུར་སྣང་ནས་ཐེག་གསུམ་དམ་པའི་ཆོས་བསྟན་ནས་གདུལ་བྱའི་རྒྱུད་གྲོལ་བར་བྱས་པ་རེད། པཎྜི་ཏར་སྣང་དགོས་དུས་ཡང་དེ་བཞིན་དུ་པཎྜི་ཏར་སྣང་ནས་བཀའི་བསྡུ་བ་དང་དགོངས་འགྲེལ་གྱི་བསྟན་བཅོས་མཛད་པ་རེད། སྙིགས་མའི་དུས་ལ་བཤེས་གཉེན་གྱི་རྣམ་པར་བསྟན་དགོས་དུས། དེའི་རྣམ་པར་བསྟན་ནས་ཐར་བ་དང་ཐམས་ཅད་མཁྱེན་པའི་ལམ་སྟོན་པ་ཡིན་པའི་ཕྱིར་ན། བླ་མ་དམ་པ་ནི་ངོ་བོའི་ཆ་ནས་སངས་རྒྱས་དང་མཉམ། རྣམ་པའི་ཆ་ནས། སངས་རྒྱས་དངོས་ཀྱི་འདུལ་སྐལ་མེད་པའི་འུ་ཅག་འཁོར་བའི་སེམས་ཅན་ལས་ཉོན་གྱི་གཞན་དབང་ཅན་ལ་ཕན་པ་ལྷུར་མཛད་པའི་གང་ཟག་དམ་པ་ཞིག་ལ་སྣང་བར་མཛད་པ་ཡིན་ན། བདག་ཉིད་ཀྱི་ངོས་ནས་སངས་རྒྱས་ལས་ཀྱང་ལྷག་པའི་བཀའ་དྲིན་ཆེ་བ་ཞིག་རེད། ཡིན་ཡང་དགོས་པས་ནོར་བུ་དང་འཆིང་བུ་མ་ནོར་པ་བཞིན་དུ། སྤྱིར་བླ་མའི་ཡོན་ཏན་དང་མཚན་ཉིད་ཚང་པ། སྒོས་རང་ལ་ལས་འབྲེལ་ཡོད་པ་མཚན་ཙམ་ཐོས་པས་ཀྱང་མོས་གུས་ཀྱི་མཆི་མ་འཁྲུག་པ། དད་པའི་སྤུ་ལོང་གཡོ་བ་ཞིག་ངེས་པར་དུ་རྙེད་དགོས་པ་རེད། བླ་མ་བརྟག་ཐབས་ཐམས་ཅད་མདོར་བསྡུས་ན། ཐུགས་རྒྱུད་བྱང་ཆུབ་སེམས་ཀྱིས་བརླན། ཅི་མཛད་གཞན་དོན་ལས་མེད་པ་ཞིག་ཡིན་དུས་ཁྱད་པར་དུས་འདིར་སངས་རྒྱས་དངོས་བྱོན་དང་མཚུངས་ཟེར་ཆོག་པ་རེད། ཡོན་ཏན་དེ་དག་ལས་ལྡོག་པ་ཞིག་ཡིན་དུས་ཕྱི་ཚུལ་ཅི་འདྲ་བཟང་ཞིང་མིང་དང་གྲགས་པ་ཆེ། ཐོབ་དང་གོ་ས་ཅི་ཙམ་མཐོ་ཡང་། བདུད་ཀྱི་བཤེས་གཉེན་ལོག་པའི་ལམ་སྟོན་མཁན་ཞིག་མིན་རུང་། གཡོ་སྒྱུའི་རྫུན་བག་གིས་རང་དོན་ཕུགས་སུ་བཅུག་པ་ཅན། ངན་གཡོ་གཤིས་ལ་གོམས་སོང་བའི་ཁྲམ་པ་ཆོས་བརྫུས་མཁན་ཞིག་ཡིན་ཆོག་རྒྱུ་རེད། དེ་ལྟ་བུའི་ལོག་པའི་ལམ་སྟོན་ཁ་ཐུར་འཁོར་གྱི་རིགས་ལས་ཐག་རིང་དུ་ཡོད་ནའང་ད་རུང་རྒྱང་ཕར་བཀྱེད། ཐག་ཉེ་ལ་ཡོད་ན་རང་ཉིད་དེ་ལས་བྲོས་ནས་རང་ཐར་ཐབས་བྱས་ན་རང་ཉིད་ལ་ཚེ་འདི་ཕྱི་གཉིས་ཀའི་གནོད་པ་ཆུང་བ་རེད།།

༢༽ བར་དུ་བླ་མ་ཇི་ལྟར་བསྟེན་ལུགས།

བར་དུ་བླ་མ་བསྟེན་ཚུལ་ལ་བསམ་བློ་བཏང་ན། དཔེ་བཞག་ན་ནད་པས་སྨན་པར་བསྟེན་པ་བཞིན་དང་མགྲོན་པོས་སྐྱེལ་མར་བསྟེན་པ་བཞིན་དུ་སྙིང་སྟོབས་ཆེ་བས་སྲོག་ལ་བབས་ཀྱང་བླ་མའི་ཐུགས་འགལ་མི་སྒྲུབ་པ། བློ་སྣ་བརྟན་པས་རྐྱེན་གང་ལ་འཕྲད་རུང་འགྱུར་ལྡོག་མེད་པ། བླ་མའི་ཞབས་ཏོག་སྒྲུབ་དུས་རང་ཉིད་སྲུང་རྒྱུ་གཙོ་བོར་མི་བྱེད་པའི་སློབ་མ་དེ་ལ། གཞན་འདི་ཡོད་བསམ་རྒྱུའི་ཡོན་ཏན་ཞིག་མཐོང་རྒྱུ་མེད་ཀྱང་མོས་གུས་ཁོ་ནས་གྲོལ་བ་ཐོབ་གསུངས་པ་རེད། འདིའི་ཐད་ནས། གོ་ཆ་ཆེ་ལ་བློ་གྲོས་ཤིན་ཏུ་བརྟན། །ལུས་དང་སྲོག་ལ་མི་བལྟ་རིམ་གྲོ་བགྱིད། །ཅི་གསུང་བཀའ་སྒྲུབ་བདག་ཉིད་མི་སྲུང་བའི། །སྐྱེས་བུ་དེ་ནི་མོས་གུས་ཁོ་ནས་གྲོལ། །ཞེས་གསུངས་པ་ལྟར་ཡིན་པས་ན། བླ་མ་བསྟེན་དུས་བླ་མའི་ཞབས་ཏོག་སྒྲུབ་དགོས་པ་རེད། ཞབས་ཏོག་རྣམ་གསུམ་གྱི་ནང་ནས་རབ་སྒྲུབ་པའི་མཆོད་པ་ཡིན། འབྲིང་ལུས་ངག་གི་ཞབས་ཏོག་དང་། ཐ་མ་ནི་ཟང་ཟིང་གི་འབུལ་བས་བླ་མ་མཉེས་པར་བྱེད་པ་དང་། བླ་མར་སྨོད་ཅིང་རྡུང་བར་བྱེད་པ་པོ་ལ་ལྡོག་རྒོལ་གྱི་ནུས་པ་མེད་ཀྱང་དེ་དག་ལ་རང་ཉིད་ཀྱི་མཛའ་བཤེས་སུ་མི་བྱ་བ་དང་། བླ་མའི་འཁོར་དང་རྡོ་རྗེ་སྤུན་གྲོགས་རྣམས་ལ་ཡང་གུས་ཤིང་བརྩེ་བ་དང་ལྡན་པ་དང་། སྐྱོ་ངལ་བཟོད་ལ་འགྲོགས་བདེ་བ་ཡིན་དགོས་པ། ཀུན་མཁྱེན་འཇིགས་མེད་གླིང་བའི་ཡོན་ཏན་མཛོད་ཀྱི་ནང་ན། འགྲོགས་པར་བདེ་བ་སྐ་རགས་ལྟ་བུ་དང་། །འཇུག་པར་བདེ་བ་ལན་ཚྭ་ལྟ་བུ་དང་། །བཟོད་བསྲན་ཆེ་བ་ཀ་བ་ལྟ་བུ་ཡིས། །བླ་མའི་འཁོར་དང་རྡོ་རྗེ་སྤུན་ལ་བསྟེན། །ཞེས་གསུངས་པ་ལྟར་བསྟེན་དགོས།།

༣༽ མཐའ་མར་བླ་མའི་དགོངས་སྤྱོད་ལ་ཇི་ལྟར་བསླབ་ཚུལ།

ཐ་མར་དགོངས་སྤྱོད་ལ་བསླབ་པའི་བསླབ་ཚུལ་ནི། འཕགས་པ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་བསྟེན་པ་འདྲ། ནཱ་རོ་པས་ཏེ་ལོ་པ་བསྟེན་པ་འདྲ། རྗེ་མི་ལས་ལྷོ་བྲག་མར་པར་བསྟེན་པ་འདྲ་ཞིག་དགོས་གསུངས་ཡོད་པ་རེད། དེ་ཡང་འཕགས་པ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་བསྟེན་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འཚོལ་དུས་རང་གི་ལུས་བཙོང་། ལུས་ཀྱི་ཤ་བཅད། ལུས་ཀྱི་ཁྲག་གིས་ཆོས་སྨྲ་བའི་ཁོར་ཡུག་གི་ས་ལ་ཆག་ཆག་བཏབ། ཆོས་ཞུ་ཕྱིར་ལོ་བདུན་ལ་འགྲེང་བ་དང་འཆག་པའི་སྤྱོད་ལམ་འབའ་ཞིག་གིས་ཆོས་གསུང་རྒྱུར་བསྒུག་ནས་ཆོས་ཕྱིར་དཀའ་བ་སྤྱད་རབས་དང་ནི། ནཱ་རོ་པས་ཏེ་ལོ་པར་བསྟེན་དུས། བླ་མའི་བཀའ་ཡི་ཟུར་ཙམ་ལ་བརྟགས་ནས་མཁར་རྩེགས་དགུ་ཅན་གྱི་མཐོན་པོ་ཞིག་གི་སྟེང་ནས་མར་ལ་ཐེ་ཚོམ་ཞིག་ཀྱང་མ་བྱས་པར་མཆོངས་བཏང་བ་རེད། བླ་མའི་བཀའ་བཞིན་སྒྲུབ་པའི་སློབ་མ་ཐུ་མོ་ཡོད་ན་འདི་ནས་མར་མཆོངས་ནི་ཨེ་ཡོད་གསུངས་དུས། དེ་ཁོང་ལ་ཟེར་བའི་བརྡ་རེད་བསམ་ནས་མཆོང་བཏང་བ་ལ། སར་ལྷུང་དུས་མ་ཤི་ཙམ་གྱི་བརྡབ་རྡུང་ཡོང་དུས། བླ་མ་ཚུར་བྱོན་ཡོང་ནས་ན་ཨེ་ཐལ་གསུང་དུས། ནཱ་རོ་པས་ན་བས་མི་ཚད་རོ་བཞིན་དུ་གྱུར་ཐལ་ཞེས་ཞུས་པ་རེད། ཡང་ཐེངས་ཤིག་ལ། སློབ་མས་བླ་མར་བསྟེན་དུས་འདི་འདྲ་ཡང་དགོས་གསུངས་ནས། སྙུག་མ་མང་པོ་ཞིག་སྙུག་གཤགས་བྱས་ནས་རྩེ་རྣོན་པོ་སྣུམ་བསྲེག་བྱས་པ། རྐང་ལག་གི་ཤ་དང་སེན་མོ་གཉིས་ཀྱི་བར་ནས་ལུས་ཀྱི་གསེང་ལ་དྲངས་ཏེ། ན་ཚ་གཟེར་ཟུག་གཏད་དུས། ཅི་འདྲའི་ན་ཚ་གཟེར་ཟུག་མྱངས་རུང་དད་ལོག་ཞིག་ཀྱང་མ་ཤོར་བར་བླ་མར་བསྟེན་པ་རེད། ཡང་ཉིན་ཞིག ཏེ་ལོ་པས་ནཱ་རོ་པ་ལ་དེ་རིང་ཁོ་བོ་ལྟོག་གིན་འདུག ཁྱོད་སོང་ལ་ཟ་མ་ཞིག་སློངས་ཤོག་གསུངས་པར། ནཱ་རོ་པ་ཟ་མ་ཞིག་སློང་གི་སོང་དུས། ཞིང་པ་ལས་གྲལ་བ་མང་པོས་ཇ་འཐུང་གི་ཡོད་ས་ཞིག་ནས་ཐུག་པ་ཐོད་ཕོར་གང་སློང་རྒྱུ་རྙེད། དེ་ཁྱེར་ཡོང་ནས་བླ་མ་ལ་དྲངས་དུས། བླ་མས་ཞིམ་ཞིམ་བྱས་བཞེས་རབས་ཀུན་བཟང་བླ་མའི་ཞལ་ལུང་ན་གསུངས་ཡོད། དེ་རིང་འདྲ་བའི་བླ་མའི་ཐུགས་མཉེས་པ་ཞིག་རིག་མ་མྱོང་། ད་རུང་ཅུང་ཨེ་ལོན་བལྟ་དགོས་དགོངས་ནས་ཕྱིར་སློང་མོར་སོང་བ་ལ། ལས་གྲ་བ་ཚང་མ་ལས་ཀ་ལས་སར་སོང་ཚར་ནས། ཐུག་པ་ལྷག་མོ་སྣོད་ཀྱི་ནང་ན་ཤུལ་ལ་བཞག་ཡོད་པ་རིག་དུས། ད་ནི་བརྐུ་དགོས་བསམ་ནས། ཐུག་པ་གང་བླུག་ཅིང་བརྐུས་ནས་ཕྱིར་ལ་ཁ་འཁོར་ནས་ཡོང་དུས། ཐམས་ཅད་ཀྱིས་བདའ་ཡོང་དུས་བྲོས་རུང་བྲོས་རྒྱུ་མ་ལོན་པར་ཟིན་ནས། རོ་འདྲ་ཞིག་བརྡུངས་ནས་འཕངས་པ་ལ། ཡང་བླ་མ་བྱོན་ནས། ཁྱོད་ན་ཨེ་ཐལ་གསུང་དུས། ན་བས་མི་ཚད་རོ་འདྲ་ཞིག་རེད་ཐལ་ཞུས། ཡང་སྐབས་ཅིག བླ་མས་ཁོ་བོར་རྒྱུ་རྫས་ཞིག་མཁོ་གི ཁྱོད་རྐུ་རུ་སོང་ན་རྒྱུ་རྫས་ཨེ་ལོན་ན་གསུང་པ་ལ། ཁོང་གིས་འོ་ཡ་ཞུས་ནས། ཕྱུག་པོ་ཚང་ཞིག་ལ་འཇབ་ནས་བརྐུ་བར་སོང་དུས། ཁྱིམ་ཕུག་ཅིག་ནས་ལོན་ལ་ཁད་པར་དེ་ཚང་གིས་ཤེས་ཏེ་མྱི་མང་ཞོགས་ཡོང་ནས་གཅར་རྡུང་ཚབ་ཆེན་བྱས་མཐར་ཕྱིར་དྲུད་ནས་འཕངས་པས། ཡང་ན་ཞོར་དུ་ནཱ་རོ་པ་ཕྱིར་བླ་མའི་མདུན་ལ་སོང་བ་ལྟ་བུ། དེ་འདྲ་རྐྱང་རྐྱང་གིས་དཀའ་ཆེན་དཀའ་ཆུང་གཉིས་ཀ་མང་པོ་སྤྱད་སྤྱད་པའི་རྗེས་ལ། ཉིན་ཞིག རྣམ་པ་གཉིས་ཀྱིས་ཇ་བསྐོལ་གྲབས་བྱས་ནས་ད་ཁྱོད་ཆུ་ལེན་དུ་སོང་དང་ཁོ་བོས་མེ་ཞིག་སྦར་ཡོང་གསུངས། ནཱ་རོ་པས་ཆུ་ཁྱེར་ནས་ཐབ་རྩ་ལ་ཐོན་པ་ན། ཏེ་ལོ་པ་ཡར་བཞེངས་ནས། ཕྱག་གཡོན་པས་ན་རོའི་ཐོང་རྩ་ནས་བཟུང་སྟེ་ཕྱག་གཡས་པས་མཆིལ་ལྷམ་གྱིས་ནཱ་རོའི་ཐོད་པའི་དཀྱིལ་གྱི་དཔྲལ་བར་བརྒྱབ་པ། ནཱ་རོ་པ་ནག་ཐོམ་མེར་བརྒྱལ་སོང་པ་རེད། དེ་བརྒྱལ་བ་ཡར་ལ་སོས་སྐབས། ནམ་ལངས་ཉི་མ་ཤར་འདྲ་ཞིག་རེད་ནས་བླ་མའི་ཐུགས་རྒྱུད་ཀྱི་ཡོན་ཏན་ཐམས་ཅད་སློབ་མའི་ཐུགས་རྒྱུད་ལ་འཕོས་ནས་དཔོན་སློབ་དགོངས་པ་དབྱེར་མེད་དུ་གྱུར་སོང་བ་རེད། ཕྱག་རྡོག་མ་གཅིག་མ་འཚལ། ཆོས་ཚིག་རྐང་གཅིག་མ་ཞུས་མ་གསུང་བར། དད་དང་མོས་གུས་རྐྱང་བའི་སྟོབས་ཀྱིས་ཅི་གསུང་བཀའ་བཞིན་བསྒྲུབས་ནས་སྡིག་སྒྲིབ་དག་པ་དང་དགོངས་པ་འཕོས་པ་དུས་གཅིག་རེད་སོང་བ་རེད། ཡང་དེ་བཞིན་དུ། རྗེ་མི་ལ་རས་པས་མར་པར་བསྟེན་ཚུལ་ཡང། མི་ལའི་སྲས་མཁར་དགུ་ཐོག་དེང་སང་མཇལ་རྒྱུ་ཡོད་པ་དེ་བཞེངས་པ་ལ་སོགས་པ་ཇི་ལྟ་བུའི་དཀའ་བ་ཞིག་སྤྱད་ནས་མཐར་ཐུག་གྲུབ་པ་ཐོབ་ཡོད། ང་ཚོའི་ཆོས་བརྒྱུད་འདི་ལ་བསམ་བློ་བཏང་ན་ཡང་། བླ་མ་གཞན་དགའ་ཚང་ངེད་ཚོའི་བླ་མའི་བླ་མ་རེད། གཞན་ཕན་ཆོས་ཀྱི་སྣང་བ་ཞུ་བ་རེད། ཁོང་གི་རྣམ་ཐར་ལ་བསམ་བློ་རེ་བཏང་ན། དགུང་ལོ་ཉི་ཤུའི་ནང་ཞིག་ལ་སྔ་བས་ངེས་པར་འབྱུང་སྟེ་ཁྱིམ་ནས་ཁྱིམ་མེད་པར་རབ་ཏུ་བྱུང་། ཨོ་རྒྱན་བསྟན་འཛིན་ནོར་བུའི་ཞབས་པད་བསྟེན་ཏེ། ཐོས་བསམ་སྒོམ་གསུམ་གྱིས་སྒྲུབ་ལ་དཀའ་སྤྱད་མཛད་ནས། ཉིན་མཚན་གཉིས་ལ་བརྩོན་འགྲུས་ཐང་ལྷོད་མེད་པ་མཛད་པ་རེད། མཚན་མོར་སྤོས་ཐུར་གྱི་མེ་འོད་ལ་བརྟེན་ནས་དཔེ་ཆ་གཟིགས། མཚམས་རེར་ཟླ་བའི་འོད་ལ་བསྟེན་ནས་དཔེ་ཆ་གཟིགས་ཏེ་ཟླ་བ་ནུབ་སོང་དུས། ཟླ་འོད་ཀྱི་རྗེས་དེད་ནས་དེ་འདྲའི་དཀའ་སྤྱད་ཀྱིས་དཔེ་གཟིགས་མཛད་རབས་དེ་འདྲ་གསུང་རྒྱུ་ཡོད་པ་རེད། གཞན་ཡང་ངའི་བླ་མ་འཇིགས་མེད་ཡོན་ཏན་མགོན་པོ། ང་མིན་ཡང་དུས་ཕྱི་མའི་བསྟན་འཛིན་གྱི་སྐྱེས་ཆེན་ཐམས་ཅད་ཀྱི་བླ་མ་ཡིན་ཡང་། མྱི་ཐོག་བརྗེ་བའི་ཆོས་ར་འདིའི་ནང་ལ་ང་མིན་པའི་བརྒྱུད་འཛིན་གྱི་སློབ་མ་ཅང་ལྷག་མེད་པའི་ཚོད་ལ་བརྒྱབ་པ་རེད། དེ་བས་ངའི་བླ་མ་ཞེས་སྨོས་པ་ཡིན། འཇིགས་མེད་ཡོན་ཏན་མགོན་པོ་ཚང་གིས་གཞན་ཕན་ཆོས་ཀྱི་སྣང་བ་བླ་མར་བསྟེན་ནས་མྱི་ལོ་ཉི་ཤུ་ལྷག་ལ། བླ་མའི་ཉེ་གནས་ཀྱི་ཞབས་ཞུ་འབའ་ཞིག་བསྒྲུབས་ནས་རྒྱ་བོ་རི་ཁྲོད་དུ་བཞུགས་པ་རེད། དེ་བཞིན་དུ་ངའི་ཆོས་གྲོགས་རྒན་པ་རྟོགས་ལྡན་བླ་མ་བློ་གྲོས་རྒྱ་མཚོ་ཚང་དགུན་ཁ་རྐང་རྗེན་མ་ཁ་བའི་ནང་ནས་འགྲོ་དགོས་པ་རེད། ཨ་ཅོ་ཡིན་པས་ལྷམ་གོན་རྒྱུ་ཡོད་མ་རེད། ཆོས་ཕྱིར་དཀའ་སྤྱད་མཛད་དགོས་པ་རེད། ནངས་མོ་ཚེ་རིང་ལྗོངས་ནས་ཡོང་སྟེ་མཁན་པོ་པདྨ་ཚེ་དབང་ཚང་གི་མདུན་ནས་ཆོས་ཁྲིད་ཞུས་ཚར་བ་དང་། དེ་ནས་སྒྲུབ་གྲྭ་དང་ནགས་ཆུང་མའི་ཁར་རྩིབ་བརྒྱུད་སོང་ནས། ཕར་རྒྱབ་དམ་ཅན་སྒང་གི་ངག་དབང་ནོར་བུ་ཚང་གི་ཆོས་ཁྲིད་ཞུས། དེ་ནས་དགོན་ནང་མར་བབས་ནས། རྫོགས་ཆེན་ཚང་གི་ཕོ་བྲང་གི་ཡང་སྟེང་ནས། ཡོངས་འཛིན་རྡོ་རྗེ་འཆང་འཇིགས་མེད་ཡོན་ཏན་མགོན་པོའི་མདུན་ནས་ཟབ་ཁྲིད་ཞུས་ཏེ། དགོང་མོ་ཚེ་རིང་ལྗོངས་ལ་ཡར་འཁོར། ཡུན་རིང་པདྨའི་ཐང་གི་ད་ལྟ་པདྨའི་ཡང་རྫོང་ཞུ་ས། གནའ་འདི་ལ་སྨན་མོ་ཕུག་ཟེར་བ་འདིའི་ནང་ལ་རབས་རེ་བཞུགས་པ་རེད། སྒོ་སྐར་ཁུང་གཅིག་ཀྱང་མེད་པའི་རང་བཞིན་བྲག་ཞབས་ཤིག་རེད། དེ་མིན་ང་ཚོའི་ཉེ་སྐོར་གྱི་ཁ་ཕྱོགས་འདི་ཚོ་ནས་བསམ་བློ་རེ་བཏང་ན། དུས་འདིར་བསྟན་ལ་བཀའ་དྲིན་འགྲན་ཟླ་དང་བྲལ་བའི་མཁན་ཆེན་འཇིགས་མེད་ཕུན་ཚོགས་འབྱུང་གནས་རིན་པོ་ཆེ། གྱི་ལང་པདྨ་སིདྡྷི་མཇལ་བར་སོང་དུས། ལམ་ནས་ཁ་བ་ཆེན་པོ་ཞིག་གིས་བཀག་ནས་འོ་བརྒྱལ་མྱོང་རབས་ཁོང་ཉིད་ཀྱི་གསུང་གི་ནང་ནས་བྱོན་པ་ཡིན། དེ་བཞིན་དུ། རྫ་ལྕང་མའི་མཁན་ཆེན་ཐུབ་བསྟན་ཆོས་འཕེལ་ལམ་ཐུབ་དགའ་ཚང་ཞུ་བ་དེའི་ཞབས་པད་བསྟེན་ནས་ལོ་མང་པོ་ཞིག་ལ་ཆོས་ཕྱིར་དཀའ་སྤྱད་བསྟེན་མཛད་པ་རེད། ཁོང་རྣམ་པ་དཔེ་ཆ་པ་ཡིན་སྐབས། ངེད་ཚོ་ལྕང་མ་སྒར་གྱི་བྱིས་པ་ཡིག་འདོན་པ་ཡིན། དེ་བཞིན་དུ། ང་ཚོས་དུས་རྒྱུན་ཡ་ཆེན་ཆོས་སྒར་ཕྱག་འདེབས་པ་པོ་གྲུབ་དབང་ལུང་རྟོགས་རྒྱལ་མཚན་ནམ་བླ་མ་ཨ་ཁྱུག་རིན་པོ་ཆེ་ཚང་གིས་ཁྲོམ་དགེ་ཨ་རིག་ཚང་བསྟེན་ནས། ཅི་འདྲ་འདྲའི་ལོ་མང་ཞིག་ལ་སྐུའི་ཉེ་གནས་མཛད་རྒྱུ་ལ་སོགས་པ་མཉེས་པ་གསུམ་གྱིས་ཞབས་ཏོག་བསྒྲུབས། མཐར་བླ་མའི་རྟོགས་པ་སློབ་མ་ལ་འཕོས་ནས་དགོངས་པ་སངས་རྒྱས་དང་མཉམ། འགྲོ་དོན་ཕྲིན་ལས་ཀྱི་འཇུག་པ་ཕྱི་མའི་མཐར་ཡང་ཉམས་པ་མེད་པ་འདི་ལྟ་བུའི་སངས་རྒྱས་ཀྱི་མཛད་རྒྱུན་བསྐྱངས་པ་མཇལ་མྱོང་མཁན་ཡང་མང་བཞིན་པ་ལྟར་དུ་རེད། །དེས་ན་ཁྱེད་ཀྱིས་ཀྱང་ཆོས་བཤད་ཀྱིན་ཡོད་ན་ཁྱོད་ཅི་འདྲ་ཞིག་ཡིན་ཟེར་ན། ང་ཅི་ཞིག་གི་ཐད་ནས་མ་འདང་པ་ཡིན་ན་མདོར་ན་རྒྱུད་འདི་ན་ཕྱི་ནང་གསང་གསུམ་གྱི་ཡོན་ཏན་མི་གཞན་དང་མ་འདྲ་པ་སྣ་གཅིག་མེད། སོ་སོའི་སྐྱེ་བོའི་རང་བཞིན་ལས་མ་འདས་པ་རང་བློ་རང་ལ་ལྐོག་ཏུ་མ་གྱུར་པ་རེད་མོད། འོན་ཀྱང་བླ་མ་ལ་དད་དང་མོས་གུས་ཀྱི་སྟེང་ནས་འགྱུར་བ་སྐད་ཅིག་ཙམ་ཡང་སོང་མ་མྱོང་། འཇིགས་མེད་ཡོན་ཏན་མགོན་པོ་དང་འཇིགས་བྲལ་བྱང་ཆུབ་རྡོ་རྗེ་རྣམ་གཉིས་ཀྱིས་ཐུགས་ཀྱི་དགོངས་པ་གཏད་ནས། འདའ་ཁའི་ཞལ་ཆེམས་ཞིག་བཞག་པའི་དགོངས་དོན་བཟང་བ་ཞིག་འགྲུབ་ཨེ་སོང་སྙམ་པའི་བློ་ཙམ་ལས། ངས་བཅོ་བརྒྱད་ཞིག་བཀད་ཡོད་སྙམ་པའི་འུད་བཤད་རྩ་བ་ནས་མེད། དཀའ་སྤྱད་ཀྱི་ཐད་ནས་ངའི་ལོ་གྲངས་བདུན་ཅུ་དོན་གསུམ་གྱི་ཚེ་ལ་རྨ་ཆུས་གྱེན་ན་དེད་ཡོད་པ་རེད། འབྲི་ཆུས་ཐུར་ལ་ཁུར་ཡོད་པ་རེད། ལུས་འདིའི་ཐོག་ནས་འདི་མ་མྱོང་བསམ་པ་ཡོད་མ་རེད་དེ། ཁ་ལ་ཟས་ཟོས་པ་དང་རྒྱབ་ལ་གོས་ཞིག་གྱོན་པ་ཚུན་ཆད་བསྟན་དོན་ཡིན་ཟེར་མི་ཤེས་མ་གཏོགས། ཕྱོགས་ཞེན་ཆོས་བརྒྱད་ཀྱི་འཁྲུལ་བ་རེ་དང་འདྲེས་ཡོད་ན་ཅི་ཤེས་ཏེ། གང་ལ་མེ་ཏོག་ཕོག་པའི་ལྷ་སྐལ་ལ་བསྐོས་པའི་ཆོས་བརྒྱུད་བསྟན་པའི་ལྷག་ཞབས་ལ་སྐྱེས་ས་དེའི་དོན་དུ། ལས་སྐྱིད་སྡུག་ལེགས་ཉེས་ཅི་བྱུང་ལ་ཕྱིར་བཀྱེད་མེད་པའི་ཆོད་སེམས་དེ་ལོ་བདུན་ཅུ་བརྒྱད་ཅུ་ལ་ཐོན་དུས། ད་རུང་འགྱུར་མེད་པ་འདི་ཚོ་དགོངས་བརྒྱུད་ཀྱི་བྱིན་རླབས་འཕོས་པ་རེད་ཅེས་བཤད་མི་ཤེས་རུང་། ལྷག་བསམ་སྙིང་སྟོབས་ལ་ཞུམ་པ་མེད་པ་འདི་དམིགས་བསལ་གྱི་བྱིན་རླབས་རེ་འཇུག་པའི་མཐུ་ནུས་རེད་བསམ་ནས་སྒྲིབ་པ་དེའི་ཚོད་ཅིག་དག་གི་ཡོད་པའི་སྣང་བ་ང་ལ་ཡོད། ཡིན་ན་ཡང་། ངས་ཆོས་དུང་རེ་བུས་ནས་ཁྲིད་རེ་བཤད་པ་དང་། དུས་རབས་སྔ་ཕྱིའི་མྱི་ཐོག་གི་བར་ལ་བསྟན་རྒྱུན་མཐུད་པའི་ཟམ་པ་ཞིག་གི་འདུ་ཤེས་བཟུང་ནས་ཆོས་བཤད་གྱིན་ཡོད་པས། བླ་མའི་རྣལ་འབྱོར་བཤད་དུས་ང་སྒོམས། ངའི་ཁར་ཉོན་ཟེར་བ་ལྟ་བུ་ཞིག་ལ་གོ་ནོར་རེ་ཐེབས་ཨེ་འགྲོ་སྙམ་ནས་འདི་ལྟར་རྒྱས་ཙམ་བཤད་འདུག་པ་ཡིན། དང་པོ་བླ་མ་བརྟགས་ནས་མཚན་ཉིད་དང་ལྡན་པ་ཞིག་རྙེད་དུས། བར་དུ་བླ་མར་སྐྱོ་ངལ་མེད་པར་བསྟེན། ཐ་མར་དགོངས་སྤྱོད་བསླབ་དུས། བླ་མའི་ཐུགས་རྒྱུད་ཀྱི་ཡོན་ཏན་ཚྭ་ཚྭ་བརྐོས་ཕོར་ནས་བླངས་པ་འདྲ་བ་ཞིག་མ་ཡིན་ནའང་སྣམ་བུ་ཚོས་ནང་ལ་འཕངས་པ་ལྟ་བུས་རྒྱུད་འགྱུར་ནས་སྔར་མེད་ཉམས་རྟོགས་ཀྱི་ཡོན་ཏན་ཞིག་སྐྱེས་དགོས་པ་རེད།།

དོན་ངོ་མས་བཤད་ན། མཚོན་བྱེད་རྟགས་ཀྱི་བླ་མ་མིའི་གཟུགས་འདི་མ་ཡིན་པར་ཐུགས་ཡིད་དབྱེར་མེད་འདྲེས་ས་དེ་མཚོན་བྱ་དོན་གྱི་བླ་མ་དུས་གསུམ་སངས་རྒྱས་ཀྱི་ཐུགས་དང་གཉིས་སུ་མེད་པ། རང་གི་སེམས་ཀྱི་ཆོས་ཉིད་དང་ཐ་དད་པ་མ་ཡིན་པ་དེའི་ངང་ལ་མཉམ་པར་འཇོག་དགོས་པ་རེད། དེ་རིང་ཡང་དུས་ཚོད་ཅི་ལྟར་བྱས་རུང་རབ་ཅིག་སོང་ཚར་ཐལ། བླ་མའི་རྣལ་འབྱོར་མ་སོང་རུང་སང་ཉིན་ཡིན། ཤོབ་རྐྱལ་ཚང་ལ་སང་ཉིན་མང་ཟེར་བ་ཡིན། སང་ཉིན་གང་ལྟར་ཡིན་རུང་མཚམས་མ་བཞག་རང་བཞག་གི་དུས་ཚོད་ཀྱི་སྟེང་ལ་ཐོན་པ་རེད། འདིའི་མཚམས་ནས་རྣམ་པ་གཉིས་ཀྱིས་མགུར་དབྱངས་ཤིག་འཐེན། དེ་ནས་སང་ཉིན་ཆོས་ཁྲིད་ཐམས་ཅད་ཀྱི་རྗེས་མ་ལ་ཐེངས་གཅིག་མཇལ་ཡོང་། །འདིའི་མཚམས་ནས་མགུར་དབྱངས་འཐེན་མཛོད།

དེ་ནས་རྫོགས་ཆེན་དགོན་པའི་གྲྭ་བ་ཐུབ་བསྟན་ནས། རྗེ་བཙུན་གྱིས་རས་ཆུང་པ་ལ་སྐྱོ་ཤས་དང་ངེས་འབྱུང་ཉམས་དང་རྟོགས་པ་ཅི་འདུག་གཟིགས་པའི་ཕྱིར། རྐྱེན་མེད་དུ་བསླུ་བསླུ་འདྲ་བཅུ་གཉིས་འདི་མགུར་དུ་གསུངས་སོ།།

ལར་འཇིག་རྟེན་ཆོས་ཀྱིས་བསླུ་བསླུ་འདྲ།།

ང་ནི་ཡང་དག་དོན་དུ་གཉེར།།

ཟང་ཟིང་གཡེང་བས་བསླུ་བསླུ་འདྲ།།

ང་ནི་གཉིས་མེད་ཉམས་སུ་ལེན།།

འཁོར་དང་གཡོག་གིས་བསླུ་བསླུ་འདྲ།།

ང་ནི་གཅིག་པུར་རི་ཁྲོད་འགྲིམ།།

ནོར་དང་རྫས་ཀྱིས་བསླུ་བསླུ་འདྲ།།

ང་ནི་ཡོད་ན་ཆོས་ཕྱིར་བཏང་།།

ཕྱི་སྣང་བའི་ཡུལ་གྱིས་བསླུ་བསླུ་འདྲ།།

ང་ནི་ནང་གི་སེམས་ལ་བལྟ།།

རྣམ་པར་རྟོག་པས་བསླུ་བསླུ་འདྲ།།

ང་ནི་ཡེ་ཤེས་རྗེས་སུ་འབྲང་།།

ཆོས་དྲང་བའི་དོན་གྱིས་བསླུ་བསླུ་འདྲ།།

ང་ནི་ངེས་དོན་གཏན་ལ་འབེབས།།

ཡིག་ནག་དཔེ་ཆས་བསླུ་བསླུ་འདྲ།།

ང་ནི་སྙན་རྒྱུད་ཀྱི་གདམས་ངག་བསྒོམ།།

ཐ་སྙད་བཤད་པས་བསླུ་བསླུ་འདྲ།།

ང་ནི་མ་བཅོས་ལྷུག་པར་འཇོག།

ལར་སྐྱེ་འཆི་གཉིས་ཀྱིས་བསླུ་བསླུ་འདྲ།།

ང་ནི་སྐྱེ་མེད་དོན་ལ་བལྟ།།

ཐ་མལ་ཤེས་པས་བསླུ་བསླུ་འདྲ།།

ང་ནི་རིག་པའི་རང་རྩལ་སྤྱོད།།

སེམས་འཛིན་སྤྲོས་པས་བསླུ་བསླུ་འདྲ།།

ང་ནི་གནས་ལུགས་ངང་དུ་འཇོག །ཅེས་གསུངས་སོ།།

ཉིན་བཞི་པའི་ཆོས་ཁྲིད།

ད་འདི་ན་བཞུགས་པའི་བསྟན་འཛིན་གྱི་སྐྱེས་ཆེན་མཁན་སྤྲུལ་རྣམ་པ་དང་། སྡེ་སྣོད་འཛིན་པའི་དགེ་འདུན་གྱི་སྡེ་ཡར་ཕུད་ཤུལ་གྱི། དགེ་བསྙེན་ཕོ་མོ་ལ་སོགས་པ་འདི་ན་ཆོས་གཅིག་གི་དོན་དུ་ཆོས་ར་གཅིག་གི་ནང་ལ་མཉམ་དུ་འཚོགས་པ་ཐམས་ཅད་ཀྱི་སྤྱི་མྱིང་ལ་ངས་ཆོས་གྲོགས་རྣམ་པ་ཟེར་གི་ཡོད། དེ་ཅིའི་ཕྱིར་ཡིན་ཞེ་ན། སངས་རྒྱས་བྱང་སེམས་ཀྱི་སྤྲུལ་བ་སྦས་པའི་ཚུལ་གྱིས་གང་ན་ལུས་ཅི་འདྲ་ཞིག་བཟུང་ནས་བཞུགས་ཡོད་སུས་ཤེས། འོན་ཀྱང་། ཐམས་ཅད་སོ་སྐྱེས་ཡིན་པའི་དབང་དུ་བཏང་དུས། འུ་བུ་ཅག་དབང་མེད་བར་དོའི་སེམས་ཅན་རྣམ་ཤེས་འཁྱམས་པོ་འདྲ་བ་ཁ་ཤས་ལས་དབང་གཅིག་གིས་བསྡུས་ནས། གནས་སྐབས་ཙམ་ལ་མཉམ་དུ་འདི་ལྟར་རུག་རུག་བྱས་ནས། ཆོས་བཤད་ཟེར་ན་ཡང་འདྲ་སྐྱིད་སྡུག་གི་ཁ་བརྡ་རེས་གྲོས་འགོ་ཞིག་བཟུང་ནས་འདི་ལྟར་ཚིག་ཁ་ཤས་བཤད་ལོང་ཡོད་ཙམ་བྱས་པ་ཞིག་རེད། ཡིན་ན་ཡང་ཆུ་ཚོད་གཅིག་ཙམ་གྱི་རྗེས་ནས་རང་རང་སོ་སོའི་ལས་རླུང་གིས་དེད་ནས་ཕྱོགས་མི་འདྲ་བ་གང་ཞིག་ལ་དེད་འགྲོ་ཆ་མེད་རེད། དེ་བཞིན་དུ་འུ་ཅག་གིས་སྐྱེས་པའི་ཡར་མཐའ་དེད་ན་རང་རང་རང་གིས་ང་ཡིན་བསམ་རྒྱུའི་ངའི་རྣམ་ཤེས་རྟེན་འདིར་མ་འཁྲི་གོང་། ལུས་ཤ་ཁྲག་རྡོས་བཅས་ཀྱི་གཟེབ་འདིར་མ་ཚུད་པའི་སྔར་ཉིན་ལ། ང་ཟེར་བ་ཞིག་ཡུལ་འདི་ན་མེད་པ་རེད། དེ་བཞིན་དུ་ཕྱིར་འོངས་ལ་འདང་ཞིག་རྒྱག་ཁུལ་བྱས་ན། ད་སྔ་ས་འདིའི་སྟེང་ལ་རྐང་རྗེས་ལག་རྗེས་བཞག་ཚད་དང་མཚུངས་པར། ལུས་འཕྲུལ་འཁོར་གྱི་ལྷུ་ལག་བསྒྲིགས་པ་འདྲ་བོ་འདི་རྙིང་ནས་ཟད་ལོང་ཡོང་ན་འདྲ། ཆག་ཀྲུག་ལ་སོང་ནས་གློ་བུར་དུ་ཞིག་རལ་ལ་འགྲོ་དགོས་པ་ཡིན་ན་འདྲ། མདོར་ན། འཇིག་པའི་དུས་ཚོད་དེ་ཚང་སོང་དུས། ང་ཡོད་སའམ་འདོགས་སའི་གཞི་འཐོར་སོང་བ་རེད། དུས་ཚོད་གང་འཚམས་ཞིག་སོང་ན་མྱི་མ་དགོས་མྱིང་ཡང་ཡོད་ས་མེད་རྒྱུ་ཞིག་ཡིན་ན། དེའི་བར་གྱི་ད་ལྟའི་འཁྲུལ་སྣང་རྨི་ལམ་ཚབ་ཚུབ་རྨིས་པ་འདྲ་བོ་འདིར་བློ་གཏད་མེད་པའི་ཡུལ་ཁ། རང་རོགས་ཐམས་ཅད་ཀྱི་སྔོན་ན་ཡོད་པ་རེད། འདི་ལྟར་བྱས་ནས་རང་གིས་རང་ལ་ཞིབ་བལྟ་ཞིག་བྱས་དུས། ངོ་མས་བཤད་ན་ང་སུ་ཡིན་ང་རང་གིས་ཀྱང་ཤེས་ཀྱི་ཡོད་པ་མ་རེད། ད་སྔ་གང་ནས་ཡོང་། ད་གང་དུ་འགྲོ། དེ་བས་ཀྱང་མི་ཤེས་ལུགས་ལ་བསམ་བློ་ཞིག་བཏང་ན་ཉི་ཤུ་དགུའི་མཚན་མོའི་སྨག་གི་ནང་ནས་སོང་བསྡད་པ་འདྲ་ཞིག་རེད། ལོ་གྲངས་ཉི་ཤུ་རྩ་གསུམ་བཞི་སོགས་ལ་ཡོད་པའི་ཕོ་གསར་མོ་གསར་འཆི་བ་ཡིད་ལ་མ་ཤར། ཤི་སྣང་ཞེ་ལ་མེད་མཁན་ཚོས་བསམ་བློ་ཞིག་བཏང་ན། མྱི་ཚེ་རིང་བོ་རྗེས་ནས་ཡོད་སྣང་ཤར། སྐྱིད་ཟེར་བ་ཞིག་རྗེས་ན་ཡོང་རྒྱུ་ཡོད་འདང་། ཚེ་འདིར་སྐྱིད་པོ་ཞིག་འོང་ན་དེའི་ཕན་ཆད་ཀྱི་འདང་རྒྱག་མེད་མདོག་བྱེད་རྒྱུ་རེད། ཚེ་རིང་པོ་ལ་འདུག་རྒྱུའི་བློ་གཏད་བྱེད་རྒྱུ་མེད། ལམ་རིང་པོ་ཡོད་རྒྱུའི་སྔ་ཆག་འཇོག་རྒྱུ་ཡོད་མ་རེད། རྟག་འཛིན་ཅན་གྱི་བློ་ཉེས་དེས་འཕུང་ནས་ཁྱིམ་ཕ་མ་གཉེན་གྲོགས་མ་དགོས་ང་རེད་བསམ་ནས་བདག་འཛིན་བྱེད་ས། ངའི་རེད་བསམ་ནས་གཅེས་སྐྱོང་བྱེད་སའི་རང་ལུས་རང་ལ་མི་དབང་པར་ལུས་སེམས་གཉིས་ཀྱི་བེམ་རིག་ཁ་བྲལ་བའི་དུས་སུ་འགྱོད་པ་སྐྱེ་པ་ཞིག་འོང་། དེ་དུས་འགྱོད་གདུང་གིས་མཆི་མ་ཐིག་གཅིག་དྲུད་ནས་འབྲལ་མི་ཕོད་བཞིན་དུ་གཉེན་བཤེས་དང་ཁ་བྲལ་ཏེ། མི་འདོད་ཕྱི་མའི་ཡུལ་ལ་དབང་མེད་དུ་འགྲོ་དགོས་ཐུག་རྒྱུ་དེ་སྔ་འཕྲོ་ཕྱི་འཕྲོ་རང་རོགས་རྒན་གཞོན་ཚང་མའི་མདུན་ན་ཡོད་པའི་རྒྱ་ལམ་རེད། དེ་ཡིན་དུས་ངས་ནམ་ཡིན་ན་ཟེར་འདུག་རྒྱུའི་འུ་ཅག་གི་བར་ན་མཚའ་མཚུངས་བྱེད་ཡོང་ས་ཞིག་ཡོད་མ་ཐལ། ས་ཆ་འདིའི་སྐད་ལུགས་ཡིན་ན་འུ་ཅག་གི་བར་ལ་མཛེས་མཛེས་བཟོ་ཡོང་ས་ཡོད་མ་ཐས་ཅན་པོ་རེད། ད་མ་འཆུགས། མ་སྔ་མ་འཕྱིའི་ཚེ་འདི་ཕྱི་གཉིས་ཀའི་མིག་རྒྱང་ཞིག་འཚོལ་ནས་ཐར་ལམ་འདི་ཡིན་བསམ་རྒྱུ་རེ་རང་ཉིད་ཀྱིས་རྙེད་པ་ཞིག་གྱིས་མ་གཏོགས། དེ་དུས་འུ་ཅག་འདིར་འཚོགས་འཚོགས་བྱས་ནས་ཁྱུ་ལ་ཁྱུ་རྒྱག་གིས་ག་ཤེད་ཅིག་རེད་ཨེ་འགྲོ། ར་ཡོད་བརྒྱ་ཐམ་པ་ཐར་ས་ནས་ཡུ་ལུ་མ་རེ་རེ་གཉིས་རེ་ལྷག་མི་འགྲོ་བསམ་རྒྱུ་ཡོད་མ་རེད། སྤུ་ཉག་མར་གྱི་གསེང་ནས་ཤབ་པ་ལྟར་རེ་རེ་བཞིན་དུ་འགྲོ་དགོས། དེ་ཡང་མཐར་མའི་མཐའ་ཞིག་མ་རེད། དོ་དགོང་སང་ཉིན་ཨེ་ཡིན་སུས་ཤེས། ད་ལྟའི་ཇ་བར་ཞིག་གི་དུས་ཡུན་ལ་འུ་ཅག་ཆོས་གཅིག་ལ་བརྟེན་ཏེ་ཐར་བའི་ལམ་དེད་ནས་འདི་ལྟར་འགྲོ་བཞིན་ཡོད་དུས། ས་ངོ་ལམ་རྒྱུས་རེ་ཤེས་པར་བླ་རྒན་འདི་ཚོའི་དགའ་ལོས་བསམ། འོན་ཀྱང་བླ་རྒན་ཡང་དེ་མཚུངས་མུན་ནག་ནང་ནས་ལག་རྙོབ་བྱས་ཏེ་རྡོག་ལམ་བཙལ་ཞོར་ཨེ་ཐར་བལྟ་གི་ཡོད་པ་ཞིག་རེད། འདིའི་ལམ་སྣེ་རིག་སྔ་ཕྱིའི་ཁྱད་པར་ཞིག་མེད་ཀྱང་ཡོད་དགོས་པའི་ཁྱད་ཐང་འདྲ་ཞིག་གིས། ཨ་རོགས་ཆོས་གྲོགས་ཚོ་ཟེར་ནས་འབོད་ཞོར་དུ། ཁ་མར་ལ་དེ་ཙམ་མ་འཁོར་ཡར་ལ་འཁོར། ཡར་ལ་ཡོང་ཞོར་དུ་འདི་ནས་གོམ་ཁ་གཟོབ་མ་གཏོགས་རྡོག་འཁྱལ་ན་མཐའ་མེད་ཀྱི་གཡང་ས་ལ་ལྷུང་ཉེན་ཆེ་འདུག རིག་རིག་བལྟས་བལྟས་ཁར་མང་པོ་ཞིག་འདི་ནས་ཐུར་ལ་ལྕེབས་ཐལ། དེ་བས་འདིའི་ཡར་ཡར་དེད་ནས་ཤོག ཁ་འདི་ཕྱོགས་ལ་གཏོད་དང་ལམ་ཐག་འདི་ནས་ཉེ་བར་འདུག སྔར་སོང་གི་རྗེས་ཤིག་ཀྱང་རྙེད་གྲབས་རེད། ནམ་སྐྱ་མོ་ལང་གི་སྔོན་རྟགས་ལ་སྐྱ་རེངས་ཤར་བའི་ཟེར་མདའ་ཞིག་ཀྱང་ཡར་ཕྱོགས་ན་ཡོད་ན་ཆོག་གི ལེ་ལོ་སྒྱིད་ལུག་མ་བྱེད། མ་འཆུགས་ཡར་ལ་རེམ་ནས་ཤོག་ཟེར་གྱིན་ཡོད་པ་རེད། དེས་ན་ཆོས་རའི་ནང་ནས་མིན་རུང་དུས་དང་རྣམ་པ་ཀུན་ཏུ། ཚེ་ནི་འགྲོ་བའི་ཆོས་ཅན་སྐད་ཅིག་ཀྱང་མི་སྡོད་པ། འབྱོར་བ་ནི་རྒུད་པའི་མཐའ་ཅན་རྟག་བརྟན་མེད་པ། ལང་ཚོ་ཡང་མི་རྟག་པའི་རང་བཞིན་ད་ལྟ་ལོ་ཉུང་ཡིན་ནའང་དུས་གང་ལ་གང་འཚམ་གྱི་ཐོག་ནས་རྒས་འཁོགས་ལ་འགྱུར་འགྲོ་བ། ད་ལྟའི་རྒས་འཁོགས་འདི་ཚོ་སྔར་དང་པོ་ནས་རྒས་རྒས་ཁ་མེད། གཉེན་གྲོགས་འབྲལ་བའི་ཆོས་ཉིད་ལས་མ་འདས་པས་ཚེ་གཅིག་ལ་རྟག་མི་ཐུབ་པར་ཤེས། ཤེས་པར་མི་ཚད་ནམ་ཡང་སེམས་ནས་མི་བརྗེད་པར་སྒོམ་དགོས། འདི་ལ་མི་རྟག་པ་སྒོམ་ཟེར་བ་རེད། མི་རྟག་པ་སྒོམ་རྒྱུ་འདིས་དང་པོ་ཆོས་ལ་འཇུག་པའི་རྒྱུ་བྱེད། བར་དུ་ཆོས་ཉམས་སུ་ལེན་པའི་རྐྱེན་བྱེད། ཐ་མར་འཆི་བར་མི་སྐྲག་པའི་གདེང་དང་ཐག་ཉེ་བར་བྱེད། ཡང་མཐར་འཆི་བ་འོད་གསལ་ཉམས་སུ་མྱོང་བའི་གྲོགས་ཀྱང་མི་རྟག་པ་སྒོམ་པ་འདིས་བྱེད་ཀྱིན་ཡོད། དེ་ཟེར་དུས། ཡ་འུ་ཅག་ཐེག་ཆེན་མདོ་སྔགས་ཀྱི་ཆོས་སྒོར་ཞུགས་པ་ཡིན་ན། ཐོག་མ་ཉིད་ནས་སྦྱོར་བ་སེམས་བསྐྱེད་ཀྱིས་ཟིན་པ་དོན་གཉིས་ལྡན་པའི་སེམས་བསྐྱེད་དགོས་པ་མིན་ནམ། ང་ཤི་དུས་མི་སྐྲག་བྱེད་དང་ཁྱོད་ཤི་དུས་ངན་སོང་ལ་མི་ལྷུང་རྒྱུ་ཏག་ཏག་བསམ་བསྡད་ན་ཐེག་པ་ཆེན་པོའི་ཆོས་གྲབས་ལ་ཨེ་འགྲོ་སྙམ་ན། དེ་ལྷག་པར་དུ་འགྲོ་རེད། སེམས་ཅན་ལ་དམིགས་པའི་སྙིང་རྗེ་ཙམ་ཞིག་ཕྱི་རོལ་པ་འགའ་ཞིག་དང་ཡང་ཐུན་མོང་རེད། དེའི་གོ་མི་ཆོད་པས་མ་ལག་ལྡུམ་མའི་བུ་ཆུས་ཁྱེར་བ་ལྟ་བུ་བསྐྱབ་བསམ་ཡང་སྐྱོབས་ཐབས་མེད་པའི་རྒན་མོ་བསམ་བཟང་ལྟ་བུ་མིན་པར། ཕ་དཔའ་བོའི་བུ། དགྲ་སྔོན་ལ་ལུས་པ་ལྟར། མི་བསྐྱུར་བའི་སྤོབས་པ་དང་ཆོད་སེམས་ཡོད་པ་མ་ཟད་དེ་ལ་དཔོག་པའི་ནུས་པ་ཡོད་དགོས་པས། ནུས་པ་རང་གིས་བསྐྱེད་དགོས་པ་རེད། མྱི་རང་གིས་རང་མགོ་མི་ཐོན་པ་ཞིག་གིས་གཞན་སྐྱོབ་འཇོག་ཟེར་ན་ཧམ་བཤད་སྐད་ཆ་སྟོང་པ་ཞིག་རེད། རང་ཤི་དུས་རང་མགོ་མི་ཐོན་མཁན་ཞིག་གིས་མྱི་གཞན་གྱི་འདྲེན་སྟོན་མི་ཡོང་གི་ཡིན་ན། དེའི་ཆེད་དུ་འུ་བུས་བླ་མའི་རྣལ་འབྱོར་བཤད་ནས། ཐར་བའི་ལམ་སྟོན་འདྲེན་པའི་བཤེས་གཉེན་བཟང་པོ་ཞིག་རྙེད་ན་དེ་དུས་གོང་ནས་ངས་བཤད་པ་ལྟར། ཡར་ལ་ཤོག དེའི་ཕན་ལ་མ་འགྲོ དེ་ནས་གོམ་པ་རིང་ལེན་ཞིག་གྱིས། དེའི་འཕྲོར་འདི་ལ་གཏོད་ནས་ཤོག་ཅེས་ལོང་བ་ཞིག་ལ་ཟེར་བ་ལྟར་བཤད་ཨེ་དགོས་ཤེས་མ་རེད། ཐད་འཕུར་གནམ་གྲུ་ཟེར་བའི་གནམ་གྲུ་ཞིག་ཡོད་པ་དེས་ས་ཐོག་གི་མྱི་སྐྱབས་ནས་འཐེན་འགྲོ་བ་ལྟར་སྐད་ཅིག་ཡིད་ཙམ་གྱི་བྱ་ལམ་བཅད་ནས་ས་གཞིའི་གཡང་ས་ནས་ལྷུང་དོག་དང་འཁྱར་དོགས་ཀྱི་ཉམ་ང་མི་དགོས་པ་རེད་འགྲོ་རྒྱུ་ཡོད། དེས་ན་ཤིན་ཏུ་མྱུར་ལམ་འོད་གསལ་རྫོགས་པ་ཆེན་པོའི་གསེང་ལམ་ནས་ཚེ་འདི་ལ་གྲོལ་བ་ཐོབ་པ་དེ་དཔེ་དེ་འདྲ་ཞིག་དང་མཚུངས་པ་རེད། ཐད་འཕུར་གནམ་གྲུས་འཐེན་སོང་དུས་གནམ་གྲུའི་ནང་ནས་རྩལ་ཆེན་ཞིག་གིས་ཐག་པ་ཞིག་བསྣར་པའམ་མིན་ན། མར་ལ་ལག་པ་བསྲིངས་ཡོང་ནས་ཡར་ལ་འཐོམ་ཟེར་ན། འཐམ་ཐུབ་མཁན་ཞིག་དང་འཐམ་ཤེས་མཁན་ཞིག་ཡིན་དགོས། མིན་ན་འཐེན་ཐབས་དཀའ་བ་རེད། ཐུགས་རྗེའི་ལྕགས་ཀྱུས་བཟུང་ས་དེ་ལ་དད་པའི་ཨ་ལོང་དགོས་དོན་ཡང་རྒྱུ་མཚན་དེས་གསུངས་པ་རེད། དེ་མིན་ན་སངས་རྒྱས་དགེ་བའི་བཤེས་གཉེན་གྱི་ཚུལ་དུ་བྱོན་པ་གཙུག་ཏོར་ཡོད་མེད་ཀྱི་ཁྱད་པར་མ་གཏོགས་སངས་རྒྱས་དངོས་རེད། སངས་རྒྱས་ཀྱི་མཛད་པ་སེམས་ཅན་གྱི་དོན་རེད། དད་པ་མེད་པའི་སེམས་ཅན་ཁོ་ལ་ང་རྒྱལ་ཆེན་པོར་འདུག་པས་བསྐྱུར་ལ་ཤོག་ཅེས་ཕྱོགས་མེད་སྙིང་རྗེ་ཆེན་པོའི་བདག་ཉིད་ཅན་གྱིས་དེ་ལྟར་མི་དགོངས་ཀྱང་། མོས་གུས་མེད་ན་དེ་ལ་ཐུགས་རྒྱུད་ཀྱི་བྱིན་རླབས་འཇུག་ཐབས་མེད། རྫོགས་པ་ཆེན་པོའི་མྱུར་ལམ་ནས་མོས་གུས་ལྡན་པ་མྱུར་དུ་གྲོལ་བར་ཟབ་ལམ་བླ་མའི་རྣལ་འབྱོར་འདི་ཉིད་བསྟན་པ་ཡིན། མོས་གུས་ཀྱིས་སྡིག་སྒྲིབ་དག་པ་དང་ཚོགས་རྫོགས་པ་རེད། དེ་མིན་ན་ནཱ་རོ་པས་རྐུ་བྱེད་ས་ནས་རྡུང་ངན་ཞིག་ལོན་པ་དང་ནི་སྙུག་གཤགས་ཁ་ཤས་ཤ་གསེང་ལ་དྲངས་པ་རྐྱང་བས་དེའི་ལས་མྱོང་སྟོབས་ཀྱིས་ཟད་ཟེར་ན་དཀའ་བ་རེད། དམྱལ་བ་ཚ་གྲང་གི་སྡུག་བསྔལ་ནི་དེའི་ཁྲི་འགྱུར་འབུམ་འགྱུར་གྱིས་སྡུག་བསྔལ་བསྐལ་བ་མང་པོ་རུ་མྱོང་རུང་། ད་རུང་ཟད་མཐའ་མི་མངོན་རྒྱུ་ནི། གཙོ་བོ་ཐབས་དང་གདམས་པའི་གནད་ལ་ཐུག་འགྲོ་པ་རེད། སེམས་ཅན་ཐམས་ཅད་ལ་སངས་རྒྱས་ཀྱི་ཐུགས་རྗེའི་བརྩེ་བ་ཡོངས་སྙོམས་ཀྱིས་ཐམས་ཅད་ལ་འཇུག་ཡོད་ཀྱང་། སེམས་ཅན་ཐམས་ཅད་ལམ་ལ་མ་བརྟེན་པར་རང་གྲོལ་ལ་མི་འགྱུར་བ་ཅི་རེད་ཅེ་ན། སེམས་ཅད་ཡིན་ཚད་ཀྱིས་དམ་པའི་བླ་མ་བསྟེན་རྒྱུ་མ་ལོན། སྨིན་བྱེད་དབང་གིས་སྨིན་པར་མ་བྱས། གྲོལ་བྱེད་ཁྲིད་ཀྱིས་གྲོལ་བར་མ་བྱས། ལར་གཞི་ཐབས་ཀྱི་འཇུག་སྒོ་གང་ན་ཡོད་ཇི་ལྟར་ཡིན་པ་ཙམ་ཡང་མ་ཤེས། དེའི་སྟེང་ནས་ལམ་གྱི་སྔོན་འགྲོ་ལ་ལྟོས་པའི་དེ་ཁོ་ན་ཉིད་ཀྱི་ཡེ་ཤེས་རྟོགས་ཐབས་དང་། སྒྲིབ་པ་སྦྱངས་ཐབས་དང་ནི་ཚོགས་བསགས་ཐབས་ཤེས་མ་མྱོང་། དངོས་གཞི་ལ་ལྟོས་པའི་གནད་ཟབ་མོའི་མན་ངག་རྣམས་གོ་མ་མྱོང་། མོས་གུས་ལ་ལྟོས་པའི་བླ་མའི་བྱིན་རླབས་ཞུགས་ཐབས་མེད་སོང་དུས། སོ་ནམ་ཀྱི་ཚོད་ཀྱིས་ལོ་ཏོག་ཞིག་ལས་སྨིན་ཡོང་རྒྱུ་ཅི་ལ་ཡོད། དེའི་དབང་གིས་མི་ལ་སྔར་ཡང་སྐྱབས་མེད་ད་ཡང་མགོན་བྲལ་དུ་ལམ་ཁའི་རྡོ་བཞིན་བདག་མེད་ལ་ལུས་ཡོད་པ་རེད། མདོར་ན། བདུད་བཞིའི་འཇིགས་པ་དང་མ་བྲལ་བས་བདུད་ཀྱི་གནོད་པས་ཚུགས་པ་ཡིན། དེ་ཇི་འདྲ་རེད། བདུད་བཞི་ཟེར་བ་གང་རེད་ཅེ་ན། ཉོན་མོངས་པའི་བདུད། ལྷའི་བུའི་བདུད། འཆི་བདག་གི་བདུད། ཕུང་པོའི་བདུད་དེ་དག་རེད། ཉོན་མོངས་པའི་བདུད་ནི་རང་རྒྱུད་དང་ལྷན་ཅིག་འགྲོགས་ནས་ཡོད་པས་དང་པོ་ངེས་འབྱུང་མི་སྐྱེས་སྐྱེར་མི་འཇུག ཆོས་དང་བླ་མར་དད་དང་མོས་གུས་བྱེད་དུ་མི་འཇུག ཅུང་ཟད་རེ་ཡོད་ཀྱང་། བར་དུ་ཆོས་དང་བཤེས་གཉེན་གྱིས་སུན་ནས་བག་མེད་ཀྱི་དབང་དུ་ཤོར། ཐ་མར་ཕྱི་ཚུལ་ལ་ཆོས་པ་ཞིག་དང་འདྲ་བའི་ཚུལ་འཆོས་བྱས་ཀྱང་། དེས་གོ་མ་ཆོད་པར་ཤི་དུས་གཅེར་བུ་ལག་སྟོང་ལ་འགྲོ་དགོས་ཐུག་པ་རེད། ཕུང་པོའི་བདུད་ཀྱིས་ཅི་བྱེད་ན། ལམ་བདེན་ལ་དངོས་པོར་འཛིན་དུ་འཇུག་པ་རེད། ལྷའི་བུའི་བདུད་ཀྱིས་འདིར་སྣང་གི་འདོད་ཡོན་ལ་ཞེན་ཆགས་བྱེད་དུ་འཇུག་པ་རེད། འཆི་བདག་གི་བདུད་ཀྱིས་གློ་བུར་ཚེ་ཡི་བར་ཆད་བྱས་ནས་ཆོས་ལམ་མཐའ་རུ་ཕྱིན་དུ་མི་འཇུག་པའི་གནོད་པ་ཆེན་པོ་དེ་ལྟར་བདུད་བཞིས་བྱས་པ་ཡིན། བདུད་བཞི་དེ་གང་ནས་ཡོང་ན། རང་ཁོང་ནས་དགྲ་རུ་སྡང་གི་ཡོད་པ་རེད། དོན་བསྡུས་ནས་བཤད་ན། དོན་ཆེན་ཆོས་ལམ་ལ་གནོད་པའི་འགལ་རྐྱེན་རང་གིས་སེལ་བར་བྱས་ནས། ཅི་ཞིག་ཇི་ལྟར་ཉམས་སུ་ལེན་རྒྱུ་གལ་ཆེ་བ་དེ་ངའི་ངག་འདོན་བསྡུས་པ་དེ་ལ་བརྟེན་ཏེ་ཁ་སང་ཚུན་ཆད་ལ་བླ་མའི་རྣལ་འབྱོར་བཤད་ཀྱིན་ཡོད་པའི་སྐབས་ཡིན།།

༢ ཁྱིམ་པ་ཕོ་མོ་ཁྱད་མེད་དུ་སྒོམ་རྒྱག་སྟངས་ལ་བསླབ་པ།

སྤྱིར་བླ་མ་སྒྲུབ་ཚུལ་ལ་བསམ་བློ་བཏང་ན། དེ་ལ་ཕྱི་ནང་གསང་གསུམ་གྱིས་སྒྲུབ་ཚུལ་ཡོད། ཕྱི་སྤྲུལ་སྐུའི་སྒྲུབ་པ་དང་ནི་ནང་ལོངས་སྐུའི་སྒྲུབ་པ། གསང་བ་མཁའ་འགྲོའི་སྒྲུབ་པ་རེད།

མོས་གུས་ཀྱི་སྒོ་ནས་བླ་མ་སྒྲུབ་རྒྱུ་ལ་འདུས་ཡོད་པ་རེད།

དེ་ལས་ཀྱང་བླ་མའི་རྣལ་འབྱོར་ཉམས་ལེན་བྱེད་པའི་དགོས་པ། བླ་མ་ནི་ཇི་ལྟ་བུ་ཞིག་ཡིན། བླ་མ་བསྟེན་ན་དང་པོ་བླ་མ་བརྟག་ཐབས། བར་དུ་བླ་མ་བསྟེན་ལུགས། བླ་མ་བསྟེན་ནས་ཐ་མར་དགོངས་སྤྱོད་བསླབ་ཚུལ་སོགས་ཀྱི་ཐད་ནས་ཁ་བརྡ་དང་འདྲེས་མར་བྱས་ནས་འགའ་ཞིག་བཤད་པ་སོང་ནི་རེད།

དེ་རིང་བླ་མའི་རྣལ་འབྱོར་སྒོམ་ཚུལ་དངོས་བཤད་རྒྱུ་ལ་ཐུག་ཡོད། འདི་ལ་ཚོགས་ཞིང་གསལ་འདེབས་པ་དང་། ཡན་ལག་བདུན་པ་འབུལ་བ་དང་། གསོལ་བ་ཕུར་ཚུགས་སུ་བཏབ་ཏེ་དབང་བཞི་ལེན་པ་དང་གསུམ་གྱིས་བཤད་རྒྱུ་ཞིག་རེད།

སྤྱིར་བླ་མ་སྒྲུབ་ཚུལ་ལ་བསམ་བློ་བཏང་ན། དེ་ལ་ཕྱི་ནང་གསང་གསུམ་གྱིས་སྒྲུབ་ཚུལ་ཡོད། ཕྱི་སྤྲུལ་སྐུས་སྒྲུབ་པ་དང་ནང་ལོངས་སྐུས་སྒྲུབ་པ། གསང་བ་མཁའ་འགྲོས་སྒྲུབ་པ་རེད། ཡང་གསང་ཡེ་ཤེས་བླ་མ་མཉམ་བཞག་གིས་སྒྲུབ་པ་དང་བཅས་པའི་ནང་ནས་འུ་ཅག་གིས་སྒྲུབ་རྒྱུ་འདི་ཅི་ལྟ་བུ་ཞིག་ཡིན་རེད་ཅེ་ན། ཡང་གསང་ཡེ་ཤེས་བླ་མ་མཉམ་བཞག་གིས་སྒྲུབ་རྒྱུ་ཅན་པོ་དེ་ཡིན་པ་དང་། ཡང་རྫོགས་པ་ཆེན་པོ་ཀློང་ཆེན་སྙིང་ཐིག་གི་ལུགས་ཡིན་ན། ཕྱི་སྒྲུབ་བླ་མའི་རྣལ་འབྱོར། ནང་སྒྲུབ་རིག་འཛིན་འདུས་པ། གསང་སྒྲུབ་ཐུགས་རྗེ་ཆེན་པོ། ཡང་གསང་ཐིག་ལེའི་རྒྱ་ཅན་ཞེས་གསུང་རྒྱུ་ཡང་ཡོད་ཀྱང་། དོན་གྱི་གནད་གཅིག་པ་རེད། རྩ་བ་ངོ་མ་དེ་བླ་མ་སྒྲུབ་པའི་ཐབས་ཀྱི་མན་ངག་ཐམས་ཅད་ཀྱི་མཆོག་ཏུ་གྱུར་པ་གང་ཡིན་ཞེ་ན། མོས་གུས་ཀྱི་སྒོ་ནས་བླ་མ་སྒྲུབ་རྒྱུ་ལ་འདུས་ཡོད་པ་རེད།

བླ་མ་སྒོམ་དུས་སྐྱབས་འགྲོའི་ཚོགས་ཞིང་ལྟར་དུ་སྒོམ་པ་ནི་ཕྱི་ལྟར་སྒྲུབ་པ། སྤྱི་བོར་སངས་རྒྱས་ཀུན་འདུས་སུ་སྒོམ་པ་ནི་ནང་ལྟར་སྒྲུབ་པ། བྱིན་རླབས་ཅིག་ཅར་དུ་འཇུག་པ་སྙིང་ཁར་སྒོམ་པ་གསང་བ་ལྟར་དུ་སྒྲུབ་པ། བླ་མ་ཡི་དམ་གྱི་རྣམ་པར་བཞེངས་ནས་ཐུགས་ཡིད་དབྱེར་མེད་དུ་སྒོམ་པ་ཡང་གསང་དུ་སྒྲུབ་ཚུལ་དེ་ལྟར་གསུངས་ཡོད། དེ་ལ་གསུང་ཚུལ་གྱི་རྣམ་གྲངས་འདྲ་མི་འདྲ་ཡོད་ནའང་དོན་གྱིས་གཅིག་པ་འདྲ་བོ་རེད། བླ་མ་ཡི་དམ་གྱི་རྣམ་པར་བཞེངས་པ་མིན་རུང་ཐུགས་ཡིད་དབྱེར་མེད་དུ་སྒོམ་པ་ནི་ཡང་གསང་ལྟར་དུ་སྒྲུབ་པ་ངོ་མ་དེ་རེད། གང་ལྟར་ཡང་རྫོགས་རིམ་ཐམས་ཅད་ཀྱི་མཐར་ཐུག་པ་དེ་ཆོས་ཉིད་རྣམ་པར་མི་རྟོག་པའི་ཡེ་ཤེས་ལ་རྣལ་དུ་འབྱོར་རྒྱུ་དེ་ཡིན། དེ་ནི་རྟོགས་ལྡན་བླ་མའི་ཐུགས་ཀྱི་ངོ་བོ་ཡིན་པས་ན། བླ་མ་དང་ཐུགས་ཡིད་འདྲེས་པ་གཅིག་པུས་རྟོགས་པའི་ཡོན་ཏན་རྒྱུད་ལ་སྐྱེས་ཐུབ་པ་རེད། །བླ་མ་སྒོམ་ལུགས་འདིའི་ཐད་ནས་ཁ་སང་ཞིག་ལ་བཤད་པ་བཞིན། བླ་མར་སངས་རྒྱས་དངོས་མཐོང་གི་དད་པ་ཡོད་ན་རྣམ་པ་བསྒྱུར་མི་དགོས་པ་དང་། རྣམ་པ་མི་རུ་བཟུང་བའི་གོམས་པ་ཤུགས་དྲག་ནས་བླ་མ་སངས་རྒྱས་ཡིན་པར་བསམ་མི་ཐུབ་པར་སྐབས་གཅིག་ལ་མི་ཡིན་པའི་སྣང་བ་ལྡོག་མ་ཐུབ་ན། བླ་མ་མི་རུ་བཟུང་བའི་ལོག་ལྟ་སྤོང་ཆེད་རྣམ་པ་གུ་རུ་མཚོ་སྐྱེས་རྡོ་རྗེ་སོགས་ལ་སྒོམ་རྒྱུ་དེ་འདྲ་གསུངས་ཡོད་པ་རེད། སྐབས་འདིར་ཚོགས་ཞིང་གསལ་འདེབས་པའི་ངག་འདོན་རྒྱས་པའི་ལུགས་ཀྱིས་ཕྱག་སྲོལ་ལྟར་དུ་ཀུན་འདུས་ནོར་བུའི་ལུགས་བླ་མ་གཅིག་པུ་སྒོམ་པ་དང་། བརྒྱུད་པ་ཐམས་ཅད་ཐོ་བརྩེགས་སུ་སྒོམ་པ་དང་། ཁྲོམ་ཚོགས་སུ་སྒོམ་པ་དག་གི་ནང་ནས་ཁྲོམ་ཚོགས་སུ་སྒོམ་རྒྱུ་དེ་གསུངས་ཡོད་པ་རེད། དམིགས་པ་ལ་ཤིན་ཏུ་མ་གོམས་པའི་ལས་དང་པོ་བས་སྒོམ་མི་བདེ་ན་ངེད་ཆ་གའི་ངག་འདོན་བསྡུས་པ་འདི་ལྟར་ཀུན་འདུས་ནོར་བུ་ལུགས་ལྟར་དུ་བླ་མ་གཅིག་པུ་སྒོམ་པ་གང་བདེ་རང་ཉིད་ཀྱི་མོས་པ་གསལ་འདེབས་ཀྱི་ནུས་པ་དང་བསྟུན་དགོས་པ་རེད། རང་ཉིད་ཀྱང་ཐ་མལ་བ་ལྟར་དང་ཡི་དམ་ལ་སྒོམ་རྒྱུ་དང་རྡོ་རྗེ་རྣལ་འབྱོར་མར་གསལ་རྒྱུ་སོགས་རིམ་པ་མི་འདྲ་པ་ཡོད་པའི་ནང་གི་དམིགས་པ་ལ་གོམས་སོང་བ་ཞིག་ཡིན་ན་རྡོ་རྗེ་རྣལ་འབྱོར་མར་གསལ་དགོས་ཀྱང་། དབང་པོ་ཅུང་ཟད་རྟུལ་པོ་དེ་ཡང་ཅུང་ཟད་གསལ་དཀའ་བའི་རིགས་ཀྱིས་ངག་འདོན་འདི་ལ་བསྟུན་ནས་གང་བདེ་ན་དེ་བྱ་ཆོག བཤད་དུས་རྒྱས་པ་ལྟར་དུ་བཤད་གོས།

༡༽ ཚོགས་ཞིང་གསལ་འདེབས་པ།

ཚོགས་ཞིང་གསལ་འདེབས་པ་འདི་ནི་དག་པའི་ཞིང་ཁམས་སྦྱོང་བ་ཡིན་དུས། སེམས་སྟོབས་ཆེན་པོའི་སྤྱོད་ཡུལ་ཡིན་པས་དེ་ལྟར་དུ་བཤད་དགོས། ད་ལྟའི་སྣང་བ་འདི་བཞིན་དུ་ཁོར་ཡུག་མ་དག་པའི་སྣོད་བཅུད་ཅིག་ལ་བསམ་བློ་མི་གཏང་། དེ་ཡང་རྒྱ་ཆུང་ཆུང་ཞིག་ལ་བསམ་བློ་འཁོར་མི་འདུག་པར། སྣང་བས་གར་ཁྱབ་ཐམས་ཅད་ཞིང་ཁམས་ཀྱིས་ཁྱབ་ནས་བསྡད་ཡོད་པ་ཞིག་བསྒོམ། རང་ཉིད་དབང་གི་སྣོད་རུང་དུ་འགྱུར་བའི་དགོས་པ་དང་བདེ་སྟོང་གི་ཡེ་ཤེས་བསྐྱེད་ཅིང་རྗེས་སུ་འཛིན་པའི་རྟེན་འབྲེལ་གྱི་ཁྱད་པར་གྱིས། ངོ་བོ་མཁའ་འགྲོ་ཡེ་ཤེས་མཚོ་རྒྱལ་ཌ་ཀའི་གཙོ་མོ་མཐིང་འོད་འབར་མ་ཡིན་པ་ལ། རྣམ་པ་རྡོ་རྗེ་རྣལ་འབྱོར་མ་རུ་གསལ་འདེབས་དགོས། འུ་བུའི་ཆོས་ར་འདིའི་ནང་ན་ངག་འདོན་རྒྱས་པའི་འགྲོས་དེད་ནས་འབུམ་ལྔ་བསོགས་མཁན་དང་རྣམ་མཁྱེན་ལམ་བཟང་རྒྱུན་འཁྱེར་ལ་གསུང་མཁན་ཡོད་ཀྱི་རེད། འདི་ཚོ་དམིགས་པ་གསལ་འདེབས་ཀྱི་ཚུལ་དུ་དེ་ཙམ་མ་བསྡུས་ནས་བཤད་ན། རྡོ་རྗེ་རྣལ་འབྱོར་མར་གསལ་འདེབས་པ་ན་སྔོན་འགྲོའི་ངག་འདོན་གཞུང་ནས་གསུང་བ་ལྟར་དུ་སྐུ་མདོག་དམར་མོ། ཞལ་གཅིག་ཕྱག་གཉིས། ཕྱག་གཉིས་ཀྱིས་གྲི་གུག་དང་ཐོད་པའམ་ཡང་ན་ཀུན་བཟང་ཞལ་ལུང་ནང་ནས་གསུངས་པ་ལྟར་དུ་ཕྱག་གཡས་པས་མ་རིག་གཏི་མུག་གི་གཉིད་ལས་སློང་བའི་རྟེན་འབྲེལ་དུ་ཐོད་པའི་ཌ་མ་རུ་ནམ་མཁའི་དབྱིངས་སུ་འཁྲོལ་བ། གཡོན་པས་དུག་གསུམ་རྩད་ནས་གཅོད་པའི་གྲི་གུག་དཀུར་བརྟེན་པ། གོང་དུ་མ་རིག་གཏི་མུག་གིས་གསུང་བའི་མ་རིག་དང་གཏི་མུག་གཉིས་ཀ་ལ་ཅི་ཞིག་གི་ཁྱད་པར་ཡོད་རེད་བསམ་ན། གཏི་མུག་དུག་གསུམ་གྱི་ཡ་གྱལ་ཞིག་དང་མ་རིག་པ་དུག་གསུམ་གའི་ཁྱབ་བྱེད་ཡིན་པ་སྔར་ཡང་བཤད་མྱོང་། གྲི་གུག་དཀུར་བརྟེན་གསུངས་རྒྱུ་འདི་སྐུ་ལུས་ཀྱི་སྐུ་ནི་མ་རེད། འདི་སྐེད་པ། སྐུའི་རྟ་ཟུར་གྱི་ཕྱོགས་ལ་གོ་བ་རེད། བརྡ་ལ་མ་བྱང་བ་གསར་བ་ངོ་མ་ཚོ་ལ་བཤད་པ་ཡིན། དེ་ལྟ་བུའི་རྡོ་རྗེ་རྣལ་འབྱོར་མ་དེ་ཉིད་གསལ་འདེབས་དུས་སྐུ་མདོག་དམར་གསལ་གཅེར་མོ་རུས་པའི་རྒྱན་ལྡན། ཞབས་གཉིས་ཀྱང་འདོར་སྟབས་སམ་ཡང་ན་གཡས་བསྐུམས་ཀྱི་སྟབས་གང་བྱས་ཀྱང་འགལ་བ་མེད། རིག་འཛིན་ཡུམ་ཀའི་ནང་ན་མཉམ་སྟབས་ཀྱིས་བཞེངས་པ་ཡིན་པ་དང་། འདི་ནས་རྣམ་པ་རྡོ་རྗེ་རྣལ་འབྱོར་མ་ཇི་བཞིན་དུ་གསལ་འདེབས། སྐུ་ལ་མེ་ཏོག་སྣ་ཚོགས་ཀྱི་ཆུན་འཕྱང་གིས་མཛེས་པར་བརྒྱན་ཡོད་པ་རེད། དེ་ལྟར་སྒོམ་པ་དེ་ཡང་། རང་གི་ད་ལྟའི་ཤ་ཁྲག་རྡོས་བཅས་ཀྱི་ལུས་མི་གཙང་པ་འདི་མ་ཡིན་པར་སྣང་ལ་རང་བཞིན་མེད་པ། ནམ་མཁར་འཇའ་ཚོན་ཤར་བ་འདྲ་ཞིག་ལ་བསྒོམ་དགོས་པ་རེད། ང་རང་ཚོའི་རྩ་བའི་ཚིག་དེད་ན་འདི་རེད། དཔེ་ཆ་དེབ་ཆུང་ལ་ལྟོས་དང་།

མདུན་མཁར་འདབ་སྟོང་པདྨའི་དབུས་བཞུགས་པའི།།

སྐྱབས་གནས་ཀུན་འདུས་བླ་མ་རྡོ་རྗེ་འཆང་།།

ངོ་བོ་སངས་རྒྱས་ཀུན་དང་དབྱེར་མེད་པ།།

རྣམ་པ་མཚོ་སྐྱེས་རྡོ་རྗེ།

ཞེས་པ་འདི་ཡན་ཆད་ཀྱིས་ཚོགས་ཞིང་གསལ་འདེབས་པའམ། འདིའི་དངོས་བསྟན་ཚོགས་ཞིང་ཀུན་འདུས་སྐྱབས་ཡུལ་ཐམས་ཅད་བླ་མ་མཚོ་སྐྱེས་རྡོ་རྗེ་གཅིག་ལ་ཚང་བ། ཀུན་འདུས་ནོར་བུའི་ལུགས་བཞིན་དུ་སྒོམ་པ་དེ་བསྟན་པ་ཡིན། ཅུང་ཟད་སྤྲོས་པ་ལ་དགའ་ཞིང་དམིགས་པར་གོམས་པོ་ཡོད་ན། ཚོགས་ཞིང་གསལ་འདེབས་རྒྱས་པ་ལྟར་དུ་བྱེད་ཆོག་གི ཡང་བྱིན་རླབས་ཀྱི་འཇུག་པ་མྱུར་དགོས་ཀི་བསམ་དུས་ཀུན་འདུས་ནོར་བུའི་ལུགས་བཞིན་དང་། ཡང་གསོལ་འདེབས་དང་ཚོགས་བསག་གི་སྐབས་ལ། མོས་པའི་རྟེན་ལ་བརྒྱུད་པ་ཐོར་བརྩེགས་དང་ཁྲོམ་ཚོགས་སུ་གསལ་འདེབས་པ་དག དམིགས་པ་ཅི་བདེ་གང་བདེར་བསྒྱུར་ཀྱང་འགལ་བ་མི་ཆེ། བསྐྱེད་རིམ་གྱི་རིགས་འདི་ཐམས་ཅད་གསལ་བརྟན་གྱི་ཚད་བརྒྱད་བཤད་པ་ལ་སོགས་པ་ལྟར། དམིགས་པའི་རྩལ་སྦྱངས་ལ་ཡུན་གྱིས་བརྒྱུད་ན་གསལ་བདེ་བ་རེད། གོམས་ཕྱིན་གོམས་ན་སླ་འོང་བ་རེད། ཡིན་ན་ཡང་། བསྐྱེད་རིམ་འཛིན་ཞེན་ཅན་དང་རྫོགས་རིམ་དངོས་མཚན་ཅན་དུ་མི་འགྲོ་བ་ནམ་ཡང་གལ་ཆེ། རྩ་རྒྱུད་པད་སྡོང་བརྩེགས་པའི་ནང་ན། དེ་ཉིད་ལྡན་པའི་རྣལ་འབྱོར་པས། །དུར་ཁྲོད་འདྲེ་ངན་བསྒྲུབ་གྱུར་ཀྱང་། །མཆོག་དང་ཐུན་མོང་འབྲས་བུ་གང་། །མི་འདོད་རང་བྱུང་ལྷུན་གྲུབ་འབྱུང་། །ཞེས་དང་། དེ་ཉིད་མ་རྟོགས་ཨ་འཐས་བློས། །ཡེ་ཤེས་སེམས་དཔའ་བསྒྲུབ་གྱུར་ཀྱང་། །གནས་སྐབས་བདེ་འབྲས་ཕྲན་བུ་ལས། །ཡང་དག་འབྲས་བུ་སྲིད་མཐའ་ཙམ། །ཞེས་ཞེན་འཛིན་དང་ཨ་འཐས་ཀྱི་བློ་ཡོད་མི་ཉན་གསུངས་པ་རེད།

རང་གི་སྤྱི་བོའི་གཙུག་གི་མདའ་གང་གི་ཐད་མདུན་གྱི་ནམ་མཁའ་ལ་བསྒོམ་ན་ཆོག་གི རིན་པོ་ཆེ་སྣ་ཚོགས་ལས་གྲུབ་པའི་མེ་ཏོག་པདྨ་འདབ་མ་སྟོང་ལྡན་ཞིག་སྒོམ་དགོས། འདིའི་སྟོང་ནི་སྟོང་ཕྲག་གཅིག་ཁེར་རྩིས་ཉིས་རྩིས་ཀྱིས་རྩི་རྒྱུའི་སྟོང་མ་རེད། མང་ཚིག་རེད། པདྨ་འདབ་མ་འབུམ་བརྡལ་གསུང་རྒྱུ་དེ་ཚོ་མང་ཚིག་རེད། དེ་ལྟ་བུའི་འདབ་སྟོང་པདྨའི་སྟེང་ན། ཐབས་དང་ཤེས་རབ་མཚོན་བྱེད་ཀྱི་ཉི་གདན་དང་ཟླ་གདན་རྒྱས་པའི་སྟེང་ན། སྐྱབས་གནས་ཀུན་འདུས་བླ་མ་རྡོ་རྗེ་འཆང་རིགས་ཀུན་འདུས་པའི་ངོ་བོ། ཁྱབ་བདག་རིགས་དྲུག་པ་རྒྱལ་བ་རྡོ་རྗེ་འཆང་། རིགས་བརྒྱ་རིགས་སྟོང་རིགས་རྣམས་མཐའ་ཡས་པ། བསམ་ཡས་དཔག་མེད་སྒྱུ་འཕྲུལ་གྱི་ལྷ་ཚོགས་ཐམས་ཅད་རིགས་གཅིག་ལ་འདུས་པ། མཆོག་གསུམ་སྐུ་གསུམ་རྩ་གསུམ་ཀུན་འདུས་ཀྱི་བླ་མ་དེ་ཉིད། ངོ་བོ་ཕྱོགས་བཅུ་དུས་གསུམ་གྱི་བྱོན་བཞུགས་འབྱོན་འགྱུར་གྱི་སངས་རྒྱས་ཀུན་དང་དབྱེར་མེད་པ། རྒྱལ་བ་ཐམས་ཅད་ཡེ་ཤེས་ཀྱི་ཀློང་དུ་གཅིག་པ་ཡིན་པ་ལ། རྣམ་པ་གུ་རུ་མཚོ་སྐྱེས་རྡོ་རྗེའི་སྐུ་རུ་གསལ་འདེབས་དགོས་པ་རེད། གུ་རུ་རིན་པོ་ཆེ་སློབ་དཔོན་པདྨ་འབྱུང་གནས་གཅིག་ལ་སྐུ་གཅིག་མཚན་བརྒྱད་འཕྲུལ་མཚན་ཉི་ཤུ་རྩ་ལྔ་ལ་སོགས་པའི་དཔག་ཡས་སྒྱུ་འཕྲུལ་གྱི་བཀོད་པ་ལ་ཚད་བཟུང་རིས་སུ་བཅད་པ་མེད་ཀྱང་། ཡོངས་གྲགས་ཀྱིས་ཟ་ཧོར་གྱི་ཡུལ་ནས་མེ་དཔུང་མཚོ་རུ་བསྒྱུར་བའི་རྫུ་འཕྲུལ་བསྟན་དུས། ཟ་ཧོར་རྒྱལ་པོས་རང་གི་སྐུ་ཆས་ཕུལ་བས་ཆ་ལུགས་མཛད་པ་ལ་ཨོ་རྒྱན་ཟ་ཧོར་མ་ཞུ་བ་རེད། དེ་དང་ནིཨོ་རྒྱན་སངས་རྒྱས་གཉིས་པ་འདི་ཡང་། དང་པོ་འཁྲུངས་པ་ན་ཕ་ཡི་རྒྱུ་ལས་མ་བསྐྱེད་པ། མ་ཡི་རྐྱེན་ལས་མ་གྲུབ་པར། ལྷོ་ནུབ་འོ་མ་ཅན་གྱི་རྒྱ་མཚོ་ལ་མེ་ཏོག་པདྨའི་སྡོང་པོའི་གེ་སར་གྱི་རྩེ་མོ་ལ། རིག་པ་ཐོལ་སྐྱེས་ཀྱིས་བརྫུས་ཏེ་འཁྲུངས་པ་དང་། མེ་དཔུང་མཚོ་རུ་བསྒྱུར་བའི་མཚོ་དཀྱིལ་པད་སྡོང་གི་སྟེང་ན་སྐུ་ཅི་ཡང་མ་ཉེས་པར་ཟིལ་བ་ཁྲོམ་མེར། འཇའ་ཚོན་འོད་དུ་འབར་ཏེ་བཞུགས་པ་གཉིས་ཀ་རྣམ་པ་འདྲ་བའི་ཚུལ་ཅན་དུ་བསྒོམས་ནས། ལྷ་ལྕམ་མནྡ་ར་བས་གུ་རུའི་བརྡ་བསྟོད་ཀྱི་ནང་ནས་གསུངས་པ་ལྟར་དུ། སྐུ་མདོག་དུང་ལ་ཕོ་ཚོས་བསྐུས་པ་ལྟར་དཀར་ལ་དམར་བའི་མདངས་ཆགས་པ། ཞལ་གཅིག་ཕྱག་གཉིས་ཕྱག་གཡས་པས་གསེར་གྱི་རྡོ་རྗེ་ཐུགས་ཀར་སྡིག་མཛུབ་བྱས་པའམ། ཡང་ན་ནམ་མཁར་གདེངས་པའི་ཚུལ་གྱིས་བསྣམས་པ། ཕྱག་གཡོན་མཉམ་བཞག་གི་སྟེང་ན། ཀ་པ་ལ་འཆི་མེད་ཡེ་ཤེས་ཀྱི་བདུད་རྩིས་བཀང་བ་ཚེ་བུམ་དཔག་བསམ་ཤིང་གི་ཁ་རྒྱན་དང་བཅས་འཛིན་པ། མཆན་ཁུང་གཡོན་ན་ཁ་ཊྭཱཾ་ག་འཆང་ཞིང་ཞབས་གཉིས་རྒྱལ་པོ་རོལ་སྟབས་སུ་བཞུགས་པ། དེ་ཡང་སྐུ་ལ་ན་བཟའ་ཟ་འོག་གི་བེར་དང་ཆོས་གོས་དམར་བོ་གསེར་གྱི་རི་མོ་ཅན། ཕོད་ཁ་གསུངས་ཡོད་པའི་ཕོད་ཁ་བེར་ལ་གསུངས་ས་ཡོད་པ་རེད་ལ། བརྩེགས་མར་གསོལ་བའི་ན་བཟའ་གཞན་ཞིག་གི་མིང་ལ་ཟེར་དུས་ཡང་ཡོད། ཀུན་གྱི་ནང་ན་གསང་གོས་དཀར་པོ་མནབས་ཡོད་པ། དབུ་ཞྭ་པདྨ་མཐོང་གྲོལ་འདབ་ལྡན་རིགས་ལྔ། དེའི་རྒྱན་ཆ་ལ་ཐབས་ཤེས་མཚོན་པའི་ཉི་ཟླ་དང་ཏིང་འཛིན་བརྟན་པའི་རྡོ་རྗེའི་ཏོག ལྟ་བའི་ཡང་རྩེ་བརྙེས་པའི་རྒོད་ཀྱི་རྩེ་སྒྲོ། དེ་ཡང་སྐུ་གསུམ་མཚོན་པའི་རྩེ་གསུམ་ཅན་དང་། སྐུ་ལྔ་མཚོན་པའི་དར་སྣ་ལྔའི་བརྒྱན་པ་ཅན་མནབས་པ། དེ་ཡང་གུ་རུ་རིན་པོ་ཆེའི་སྐུ་ལས་ཡེ་ཤེས་ཀྱི་འོད་ཟེར་ཁ་དོག་སྣ་ལྔའི་འཇའ་འོད་མུ་མེད་དུ་འཕྲོ་བཞིན་ཡོད་པ། དེའི་དབུ་གཙུག་ན་བརྒྱུད་གསུམ་བླ་མ་ཐོ་བརྩེགས་སུ་བཞུགས་པ། མཐའ་སྐོར་ན་རྫོགས་ཆེན་རིག་འཛིན་བརྒྱུད་པའི་བླ་མ། རྩ་གསུམ་དམ་ཅན་རྒྱ་མཚོ་དང་བཅས་པ་དཔའ་བོ་མཁའ་འགྲོའི་ཚོགས་བསམ་གྱིས་མི་ཁྱབ་པས་བསྐོར་བཞིན་དུ་བཞུགས་པར་བསྒོམ་དགོས་པ་རེད། རང་ཉིད་རྡོ་རྗེ་རྣལ་འབྱོར་མ་རུ་གསལ་ཡོད་པ་དེ་ལ་དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས་པ་མངོན་སུམ་བཞིན་དུ་གསལ་འདེབས་དགོས། སྐྱབས་ཡུལ་གྱི་ལྷ་ཚོགས་གསལ་འདེབས་ཚེ་འདག་སྐུ་ལྟར་སྲ་མོ་འགུལ་རྒྱུ་མེད་པ་དང་། ཐང་སྐུ་ལྟར་ལེབ་ལེབ་རྒྱབ་མེད་པ་མ་ཡིན་པར་འོད་ཀྱི་ལུས་ལ་ཡེ་ཤེས་སྙིང་པོ་ཅན། སྣང་ལ་རང་བཞིན་མེད་པ་ཞིག་སྒོམ་དགོས་པ་རེད། སྐྱབས་ཡུལ་གྱི་ཚོགས་ཞིང་གསལ་འདེབས་ཀྱི་རིགས་འདི་ཚོར་སྣང་ངོ་དང་ངེས་ངོ་གཉིས་ཀྱི་ཐད་ནས་བཤད་རྒྱུ་ཡོད།།

༢༽ སྣང་ཚུལ་དང་གནས་ཚུལ་གྱི་ཁྱད་འབྱེད་རྒྱུ།

འདི་ལ་མ་དག་འཁྲུལ་བའི་སྣང་བ་དང་ནི་རྟེན་འབྲེལ་སྒྱུ་མའི་སྣང་བ། ཡང་དག་ཡེ་ཤེས་ཀྱི་སྣང་བ་གསུམ་ལ་ཕྱེས་ནས་བཤད་ན་འཆད་བདེ་བ་རེད།

མ་དག་སྒྱུ་མའི་སྣང་བ་ནི་ད་ལྟ་རང་རེའི་སེམས་ཅན་གྱི་འཁྲུལ་ཤེས་ལོག་པ་ཕྱིན་ཅི་ལོག་གི་ངོ་ཁར་སྣང་བའི་སྣོད་བཅུད་ཀྱི་སྣང་བ་འདི་ཡིན། རྟེན་འབྲེལ་སྒྱུ་མའི་སྣང་བ་ནི་ས་གནས་བྱང་སེམས་འཕགས་པའི་རྗེས་ཐོབ་ལ་སྒྱུ་མ་ཆུ་ཟླ་ལྟར་དུ་སྣང་བ་དེ་རེད། ཡང་དག་ཡེ་ཤེས་ཀྱི་སྣང་བ་ནི། ཆོས་ཐམས་ཅད་ཀྱི་གནས་ལུགས་སམ་ཡིན་ལུགས་ངོ་མ་དེ་ཁོ་ན་ཉིད་མངོན་དུ་གྱུར་སོང་བ་ཡང་དག་ཡེ་ཤེས་ཀྱི་སྤྱོད་ཡུལ་དུ་གྱུར་པ་དེ་ཡིན་པ། དེའི་ངོ་ལ་སྣང་སྲིད་དག་པ་ཕྱིར་སྣང་སྐུ་དང་ཡེ་ཤེས་ཀྱི་རོལ་བ་ལས་མ་འདས་པ་ཡིན། དེས་ན་མ་དག་འཁྲུལ་བའི་སྣང་བ་དང་རྟེན་འབྲེལ་སྒྱུ་མའི་སྣང་བ་ཀུན་རྫོབ་བདེན་པ་དང་ཀུན་རྫོབ་ཙམ་དུ་བཞག་ན། དེ་གཉིས་ཀ་གནས་སྣང་གི་ངོ་ནས་གཞལ་ན་སྣང་ཚུལ་ཡིན། ཡང་དག་ཡེ་ཤེས་ཀྱི་གཟིགས་ཚུལ་དེ་ནི་གནས་ཚུལ་དངོས་ཡིན། དེ་ལྟར་ཡིན་པའི་རྒྱུ་མཚན་གྱིས་སོ་སོའི་སྐྱེ་བོར་གནས་སྣང་མཐུན་པ་དངོས་སུ་འཆར་མི་ཐུབ་ཅིང་། འཕགས་པ་རྣམས་ལ་ཡང་ཅུང་ཟད་མཐུན་པར་འཆར་བ་ལས་མཚན་ཉིད་པ་འཆར་མི་ཐུབ། གནས་སྣང་མཐུན་པ་མཚན་ཉིད་པ་སུ་ལ་འཆར་ན། སངས་རྒྱས་ཀྱི་ས་ཁོ་ན་ལ་འཆར་བ་དེ་ལྟར་ཡིན་དགོས། དེས་ན་ང་རང་ཚོས་ཇི་ལྟ་བུའི་ཚུལ་གྱིས་བསྒོམ་ན་ཅི་འདྲ་ཞིག་རེད་ཡོང་སྙམ་ན། སྣང་སྲིད་གཞིར་བཞུགས་ཀྱི་དཀྱིལ་འཁོར་ཡེ་ནས་ཡིན་པ་ལ་དེ་ལྟར་ཡིན་པར་ཤེས་པའི་གཞི་བཞེངས་སུ་གསལ་འདེབས་པ་ཡིན། དག་གཟིགས་ཚད་མ་རྣམ་མཁྱེན་ཡེ་ཤེས་ཀྱི་ངོ་ཁར་སྣང་བ་དེ་ཁོ་ན་ཉིད་སྣང་སྲིད་དག་པ་རབ་འབྱམས་ཡིན་པ་གང་ཞིག རྣལ་འབྱོར་ལམ་གྱི་གནས་སྐབས་ན་སྣང་ཚུལ་དག་པའི་བསྐྱེད་རིམ་བཅོས་མའི་བློས་ཡིན་པ་ལ་ཡིན་པར་ངེས་ཤེས་ཀྱིས་གསལ་བཏབ་ན། རྒྱུ་འབྲས་གཉིས་ཀ་བྱེད་པ་གཅིག་མཚུངས་ཡིན་པས། མཐར་ཐུག་གོམས་པ་ཀློང་དུ་གྱུར་བའམ་བྱ་རྩོལ་བྱར་མེད་དུ་དག་སྟེ་དགོངས་ཀློང་དབྱེར་མེད་རོ་གཅིག་གི་དོན་བརྒྱུད་རྟོགས་པའི་བྱིན་རླབས་འཕོས་དུས། དཔེའི་ཡེ་ཤེས་དེ་དོན་གྱི་ཡེ་ཤེས་སུ་གོ་འཕོས་པ་དང་འདྲ་བར་གནས་ཚུལ་ཡིན་ལུགས་མ་བཅོས་པའི་དག་པ་མངོན་དུ་འགྱུར་བ་སྣང་ངོ་ཙམ་དུ་མ་ཡིན་པར། ངེས་ངོ་རུ་གསལ་ཐུབ་རྒྱུའི་གོ་དོན་དེ་འདྲ་རྙེད་དགོས་པ་རེད། བསྐྱེད་རྫོགས་ཟུང་འབྲེལ་གྱི་གོ་བའི་ཁུངས་སྣེ་འདི་ན་ཡོད། དེའི་སྟབས་ཀྱིས་སློབ་དཔོན་ཆེན་པོས་སྐྲའི་རྩེ་མོའི་ཆུ་ཐིག་གཅིག་མར་པང་ཐོག་ལྷུང་བའི་ཚེ་ལ་བླ་མའི་རྣལ་འབྱོར་བསྒོམ་ནས་བླ་མ་དང་ཐུགས་ཡིད་དབྱེར་མེད་དུ་བསྲེས་ན་ཡང་བསྐལ་བ་འབུམ་གཅིག་གི་ཚོགས་བསགས་འགྲོ་གསུངས་སོ། །བསྐལ་བ་འབུམ་ཞིག་ལ་ཐབས་གཞན་གྱིས་ཚོགས་བསགས་པ་དང་དེ་གཉིས་ཀ་མཉམ་གསུངས་པ་དེ། གནས་ལུགས་དོན་ལ་གཞལ་བའི་ཟག་མེད་རང་ངོ་ཤེས་པའི་དགེ་ཚོགས་འདུས་མ་བྱས་པ་དེའི་དབང་གིས་ཡིན། དེ་ཡིན་དུས་ཚོགས་ཞིང་སྤྲོས་པ་ཅན་དུ་བསྒོམ་ན་བླ་མའི་དཀྱིལ་འཁོར་གཅིག་གིས་བསྡུས་པའི་གཙོ་འཁོར་ཐམས་ཅད་སྣང་ཆ་མ་འདྲེས་ཐ་དད་དུ་སྣང་ཡང་། དོན་གྱི་ངོ་བོའི་ཆ་ནས་བླ་མའི་ཐུགས་ཡེ་ཤེས་ཆེན་པོ་གཅིག་གི་རང་བཞིན་ཡིན་པས། བླ་མ་གཅིག་ཏུ་བསྒོམ་ན་ཡང་ཀུན་འདུས་ཀུན་གྱི་བདག་ཉིད་དེ། སངས་རྒྱས་ཀུན་འདུས་ཨོ་རྒྱན་ཆེན་པོ་མཁྱེན། །དམ་ཆོས་ཀུན་འདུས་ཨོ་རྒྱན་ཆེན་པོ་མཁྱེན། །དགེ་འདུན་ཀུན་འདུས་ཨོ་རྒྱན་ཆེན་པོ་མཁྱེན། །ཞེས་གསུངས་པ་ལྟར་རོ། །ཨོ་རྒྱན་ཆེན་པོ་ཡང་བླ་མ་ལས་ངོ་བོ་ཐ་དད་མ་ཡིན་པའི་ངོ་ཤེས་དང་འབྲལ་མེད་དགོས་པ་ལྷག་པར་བཤད་མི་དགོས་ཀྱང་། འདི་ལྟར་བཤད་དུས་མྱི་འགའ་རེས། གསང་སྔགས་རྙིང་མ་པ་ཚང་གི་རྒྱུད་སྡེའི་ནང་ན་གྲགས་པའི་བླ་མ་ཡི་དམ་མཁའ་འགྲོ་ཆོས་སྐྱོང་དང་བཅས་པ་ཚོགས་ཞིང་གི་གཙོ་བོ་བླ་མ་གཅིག་ལ་འདུས་ཡོད་ས་ཡོད་ཀྱང་། སྔགས་གསར་མའི་རྩ་བ་གསུམ་གྱི་ལྷ་ཚོགས་དེ་དེའི་ནང་ལ་འདུས་ཡོད་རྒྱུ་ཨེ་ཡིན་ནམ་བསམ་སྲིད་ན། དེ་བསམ་མི་དགོས། མཆོག་གསུམ་སྐུ་གསུམ་གྱིས་མ་བསྡུས་པའི་ནང་པ་སངས་རྒྱས་པའི་གཞུང་རྒྱུད་སྡེའི་ལྷ་སྔགས་ཏིང་འཛིན་གཅིག་ཀྱང་ཡོད་མ་རེད། བསྐྱེད་རིམ་གྱི་ཐད་ནས་ཡིན་ན། རྒྱུད་སྡེ་སོ་སོའི་དཀྱིལ་འཁོར་གྱི་སྤྲོ་བསྡུས་ཁྱད་པར་མ་འདྲ་ཡང་། དོན་ངོ་མས་བཤད་ན་རང་ལུས་རྒྱལ་བའི་དཀྱིལ་འཁོར་གྱི་རྩ་རླུང་ཐིག་ལེ་དག་པ་ལ་འདུས་པ་རེད།

རྫོགས་རིམ་གྱི་ཐད་ནས་ཡིན་ན། གསལ་བདེ་མི་རྟོག་པ་ལ་སོགས་པའི་འོད་གསལ་གྱི་གནད་དུ་བསྣུན་ལུགས་ཀྱིས་ཕ་རྒྱུད་མ་རྒྱུད་ལ་སོགས་པའི་ཁྱད་པར་ཡོད་ཀྱང་། དོན་མཐར་ཐུག་ཟུང་འཇུག་དོན་གྱི་ཡེ་ཤེས་འོད་གསལ་རྫོགས་པ་ཆེན་པོའི་རྫོགས་རིམ་མཐར་ཐུག་ལ་སྦྱོར་རྒྱུར་གནད་གཅིག་རེད། སྔགས་གསར་རྙིང་བོད་དུ་འགྱུར་སྔ་ཕྱིའི་དུས་སྐབས་ཀྱི་ཁྱད་པར་གྱིས་མིང་བཏགས་ལུགས་ཙམ་རེད་མ་གཏོགས། དོན་ལ་ཆོས་སྐུ་ཀུན་ཏུ་བཟང་པོའམ་དྲུག་པ་རྡོ་རྗེ་འཆང་ཆེན་པོ་སྤྲུལ་སྐུའི་སྟོན་པ་ཤཱཀྱ་སེངྒེའི་སྐུའི་རྣམ་པ་དེ་ཉིད་ཀྱིས་གསུངས་པ་དང་། གཞན་དུ་བཞེངས་ནས་གསུངས་པ་ཞིག་གི་ཁྱད་ཙམ་མ་གཏོགས་མེད། སྔགས་རྒྱུད་སྡེ་བཞིའམ་དྲུག་གམ། མདོ་སྔགས་ཐེག་རིམ་དགུ་ཡི་སྐྱབས་ཡུལ་ཐམས་ཅད་བླ་མ་གཅིག་ལ་འདུས་ཅིང་། དེ་ཅིའི་ཕྱིར་འདུས་ནི་རེད་ཅེ་ན། ཕྱོགས་བཅུ་དུས་གསུམ་ལ་སོ་སོར་བྱོན་ནས་སངས་རྒྱས་གྲངས་ཀྱིས་གཞལ་དགོས་ན་ཚད་ལས་འདས་པ་ཞིག་ཡིན་པ་རེད། དེ་ཐམས་ཅད་ཀྱི་ཐུགས་རྒྱུད་ཀྱི་ཡེ་ཤེས་དེ་ཡང་དེ་བཞིན་དུ་བསམ་གྱིས་མི་ཁྱབ་པ་ཡིན་རུང་ཡུལ་ཆོས་ཀྱི་དབྱིངས་ལ་ཐ་དད་མེད་པས་ན། ཐམས་ཅད་ཀྱང་དཔལ་ལྡན་བླ་མའི་ཐུགས་ཡེ་ཤེས་ཀྱི་ཆོས་ཉིད་མཁའ་ལྟར་དག་པའི་ཀློང་དུ་ཆུ་ཀླུང་ཐམས་ཅད་རྒྱ་མཚོར་གཅིག་ཏུ་འདྲེས་པ་ལྟར་ཡིན་པས་ན། རྒྱལ་བ་ཐམས་ཅད་ཀྱི་དགོངས་ཀློང་ཡེ་ཤེས་ཀྱི་ངང་དུ་གཅིག་པ་རེད།

ལར་བོད་ཀྱི་ས་དགེ་བཀའ་རྙིང་གི་ཆོས་བརྒྱུད་ཆེན་པོ་ཁག་བཞི། བཤད་རྒྱུད་འདེགས་པའི་ཀ་ཆེན། སྒྲུབ་རྒྱུད་འདྲེན་པའི་ཤིང་རྟ་ཐམས་ཅད་ཀྱི་སྲོལ་འབྱེད་ཀྱི་ཤིང་རྟ་པ། རྒྱལ་བའི་རྒྱལ་ཚབ་གཉིས་པར་བྱོན་པ་ཐམས་ཅད་པོ་སློབ་དཔོན་ཆེན་པོ་གུ་རུ་རིན་པོ་ཆེའི་སྤྲུལ་བ་མིན་པ་མེད། དཔེ་མཚོན་ན། ཇོ་བོ་རྗེ་དཔལ་ལྡན་ཨ་ཏི་ཤ་གུ་རུའི་སྤྲུལ་བ་རེད། དེའི་སྤྲུལ་བ་རྗེ་ཙོང་ཁ་བ་ཡིན་པ་ལྟ་བུས། མདོར་ན། བླ་མར་མོས་གུས་བྱས་པས་ཡང་དག་ཡེ་ཤེས་མངོན་དུ་བརྙེས། ཐུགས་རྒྱུད་དགོངས་པའི་བྱིན་རླབས་འཕོས་ནས་གྲོལ་བ་ཐོབ་འགྲོ་རྒྱུ་དེ། རྒྱལ་ཀུན་འདུས་པའི་སྤྱི་གཟུགས་ཡིན་པས་དེ་ལྟར་ཡིན་པར་གྲུབ། དེས་བླ་མའི་རྣལ་འབྱོར་གྱི་ཚོགས་ཞིང་གསལ་འདེབས་ལུགས་དང་། དེ་ཡང་བླ་མ་གཅིག་ལ་འདུ་ལུགས་ཀྱི་སྐོར་བཤད་ནས། ད་ཡན་ལག་བདུན་པ་ཁ་སང་ཞིག་ནས་སེམས་བསྐྱེད་དང་། བླ་མའི་རྣལ་འབྱོར་བདེ་ཆེན་ཞིང་ཁྲིད་སོགས་ཐམས་ཅད་ལ་སྦྱོར་རྒྱུའི་ཐུན་མོང་གི་ལུགས་གཙོ་བོར་བྱས་ཏེ་འུ་ཅག་གིས་བཤད་ཚར་རེད།།

༣༽ གསོལ་བ་ཕུར་ཚུགས་སུ་བཏབ་ནས་དབང་བཞི་ལེན་པ།

འདིའི་མཚམས་ནས་གསོལ་བ་ཕུར་ཚུགས་སུ་བཏབ་ནས་དབང་བཞི་ལེན་པ་བཤད་དགོས། ད་གསོལ་བ་ཕུར་ཚུགས་སུ་འདེབས་གསུངས་ན། ཁ་ཙམ་ཚིག་ཙམ་གྱི་གསོལ་འདེབས་ཁ་རྒྱུགས་མ་མ་ཡིན་པར་ཞེ་གཏིང་ནས་འགྱུར་བ་མེད་པའི་ཁྱེད་ཤེས་ཀྱི་བློ་གཏད་བྱས་པ། དཔེ་བཞག་ན་སྤང་ལ་བེ་ཕུར་བཏབ་པ་བཞིན་དུ་གསུངས་ཡོད་ཀྱང་། སྤང་ལ་བེ་ཕུར་བཏབ་པ་བཞིན་གསུངས་རྒྱུ་དེ། སྤང་མཁྲེགས་མོ་ས་སྲ་ས་ཞིག་ལ་ཤིང་བེ་ལོ་ཟེར་བའི་སྲ་ཤིང་གི་ཕུར་བ་རིང་བོ་ཞིག་བརྡབ་བཞག་ན། བརྟན་པོ་བྱས་ནས་རྡེབ་ས་དེར་འདུག་པ་མ་གཏོགས་པར་འགུལ་བསྐྱོད་མེད་པ། དེ་བཞིན་དུ་དད་པ་འགྱུར་མེད་རྐྱེན་གྱིས་སྒུལ་རྒྱུ་མེད་པ་ཞིག་གིས་གསོལ་བ་ཕུར་ཚུགས་སུ་འདེབས་པ་ནི། བླ་མ་གཅིག་པོ་དེ་མ་གཏོགས་པའི་རེ་ས་སྐྱབས་གནས་མགོན་དང་དཔུང་གཉེན་གཞན་ནས་མི་འཚོལ་བར། བློ་ཁྱེད་ཤེས་ཀྱི་དད་པས་གསོལ་བ་རྩེ་གཅིག་ཏུ་འདེབས་དགོས་ལ་གསུང་གི་ཡོད། འདིའི་གསོལ་འདེབས་ངག་འདོན་རྒྱས་པ་དང་འབྲེལ་ནས་རྗེ་བཙུན་ཆེན་པོ་པད་འབྱུང་མཁྱེན་ལ་སོགས་པའི་ཚིག་མཚམས་ནས་སིདྡྷི་འབུམ་ཐེར་བཞི་གསོག་པ་སྤྱི་འགྲོས་ལྟར་དང་། འདི་ནས་ངག་འདོན་བསྡུས་པ་འདིས་མཇུག་ལ་གཟུངས་སྔགས་ཅི་རིགས་བཟླ་བའི་མཚམས་ནས། སིདྡྷི་བཟླ་བ་སོགས་གསོལ་འདེབས་ཐུགས་དམ་རྒྱུད་བསྐུལ་དང་འབྲེལ་ནས་སིདྡྷི་བསོག་དགོས་པ་རེད། རང་གིས་གསོལ་བ་འདེབས་ཐུབ་ན་གུ་རུའི་ཐུགས་རྗེ་ལ་ཉེ་རིང་མེད་པས། དུས་བསྐལ་བ་སྙིགས་ཕྱིན་གུ་རུའི་ཐུགས་རྗེའི་བྱིན་རླབས་ལྷག་ཏུ་མྱུར། ཆོས་བཀའ་མའི་བྱིན་རླབས་དུས་ཀྱི་དབང་གིས་ཡལ་ཕྱིན་ཡལ་ན་གཏེར་མའི་བྱིན་རླབས་ཀྱང་སྒོས་ལྷག་པར་ཆེ་ཡོང་བ་རེད། ཐུགས་རྗེ་གློག་ལྟར་མྱུར་བའི་ཐོད་ཕྲེང་རྩལ་ཞུ་བ་ལྟར། དད་ལྡན་མི་རེའི་མདུན་དུ་པད་འབྱུང་རེ་ཡོད་རབས་དང་། དད་པ་ཅན་ལ་པད་འབྱུང་སྒོ་ཉལ་ཡོད་ཅེས། ཨོ་རྒྱན་རིན་པོ་ཆེ་ཉིད་ཀྱིས་ལྷོ་ནུབ་སྲིན་ཡུལ་ལ་བྱོན་རན་ཁར་གསུངས་པ་རེད། དེ་ལ་བསླུ་བ་ཞིག་ག་ན་སྲིད། གནམ་ས་བླ་འོག་བསྒྱུར་སྲིད་པ་དང་། ཉི་ཟླའི་འཆར་ནུབ་ལ་འགྱུར་བ་ཡོད་སྲིད་པའི་དབང་དུ་བཏང་རུང་། བདེ་བར་གཤེགས་པའི་བཀའ་བདེན་པ་ལ་འགྱུར་བ་མི་སྲིད། སངས་རྒྱས་ཀྱི་ཐུགས་རྗེ་ཟེར་བ་དེ། རང་བཞིན་ཤུགས་ཀྱི་ཐུགས་རྗེ་ཉི་མ་ལས་འོད་ཟེར་འཕྲོས་པ་ལྟ་བུ། ཐུགས་རྒྱུད་བསྐུལ་བའི་ཐུགས་རྗེ་དབུལ་པོས་འབྱོར་ལྡན་གཏོང་ཕོད་ཅན་ལ་ནོར་བསླངས་པ་འདྲ་འདྲ། གདུལ་བྱ་དུས་བབས་ཀྱི་ཐུགས་རྗེའི་བུ་ཆུང་ནད་ཀྱིས་མནར་བའི་མ་བཞིན་དུ་སྐད་ཅིག་ཙམ་ཡང་གཡེལ་བ་མེད་པར་གཟིགས་པ་དེ་འདྲ་རེད། རྩ་བ་གསུམ་གང་བསྒྲུབ་གང་ཞིག་བསྟེན་ན་ཡང་བླ་མ་ལྟར་སྒྲུབ་རྒྱུར་གནད་འདུས་པ་བྱིན་རླབས་མྱུར་བའི་དགོས་པ་དང་། ཁྱད་པར་དུ། བོད་ཀྱི་བླ་མའི་སྐལ་བ་གུ་རུ་ཡིན། །གསུངས་པ་དག གུ་རུ་བླ་མ་དང་ངོ་བོ་གཅིག་པར་བླ་སྒྲུབ་ཀྱི་ཚུལ་དུ་སྒྲུབ་ན། ལྷག་པར་དུ་འགྲུབ་ཐག་ཉེ་རྒྱུར་དགོངས་པའི་དགོས་པ་རྒྱུ་མཚན་ཅན་གྱི་གསུང་རེད། བྱིན་རླབས་དངོས་གྲུབ་ཟེར་བ་ནི་ཕྱོགས་ག་ཤེད་ཅིག་ནས་གསར་དུ་ཐོན་ཡོང་རྒྱུ་ཡོད་མ་རེད། དབང་དང་བྱིན་རླབས་ཐམས་ཅད་བླ་མ་ལས་བྱུང་བ་རེད། བླ་མ་ཡང་ཕྱི་ན་མི་བཞུགས་ནང་ན་བཞུགས། ནང་རང་གི་སེམས་དང་བླ་མ་དབྱེར་མེད་ཀྱི་ངང་ནས་གདངས་མོས་གུས་སུ་ཤར་བ་དེ་ཉིད་བླ་མ་ཆོས་སྐུའི་རང་ཞལ་མཇལ་བ་ཟེར་དགོས་པ་རེད། རང་བཞིན་རྫོགས་པ་ཆེན་པོའི་གནས་ལུགས་གཞི་ཐོག་ལ་འཁྱོལ་བ་ན། བླ་མ་གཟུགས་སྐུར་བལྟ་བར་གོལ་སོང་ན་མོས་གུས་ལམ་དུ་མ་ལོངས་པ་རེད། བར་དོའི་གནས་སྐབས་ལ། བླ་མ་དང་ཡི་དམ་མཇལ་ནས་ལམ་སྣ་འདྲེན་ཟེར་བ་དེ་དག་མོས་གུས་དང་གསལ་སྣང་གི་དབང་གིས་དད་མོས་འདུན་པའི་སྟོབས་ཀྱིས། བྱིན་རླབས་ཀྱི་ནུས་མཐུ་བླ་མའི་རང་གཟུགས་སུ་ཤར་བ་མ་གཏོགས། བླ་མ་སྐུ་དངོས་པོ་བར་དོར་བྱོན་པ་ཞིག་མ་རེད་ལ། བྱོན་བཞག་པ་ཡང་མ་རེད། ཚེ་ཕྱི་མའི་ཡུལ་ནས་མཇལ་བར་ཤོག་ཟེར་ན་མཇལ་རྒྱུ་ལོས་ཡོད། ཚེ་ཕྱི་མའི་ལམ་སྣ་འདྲེན་པར་ཤོག་ཟེར་ན་འདྲེན་རྒྱུ་ཡོད་ལ་འདྲེན་ཡང་ཐུབ། འོན་ཀྱང་། རྩ་བ་ངོ་མ་རང་ཉིད་ཀྱི་དད་མོས་འདུན་པ་ལ་རག་ལས། ལམ་གྱི་རྟེན་འབྲེལ་དང་པོ་འགོ་ནས་མ་འཆུག་ན། ལས་འགོ་ཡག་ན་མཇུག་མ་ཡག་པའི་དཔེ་བཞིན་དུ། རྟེན་འབྲེལ་འགོ་ནས་འཆུགས་སོང་ན་ཚེས་གཅིག་གི་ཚེས་གྲངས་ནོར་སོང་ན་ཚེས་བཅོ་ལྔའི་བར་དུ་ནོར་མི་འགྲོ་ཐབས་མེད་ཡིན་པ་ལྟ་བུ་རེད།

དེ་ནས་ང་རང་ཚོའི་སྐབས་ཀྱི་འཆད་བྱ་ལམ་དབང་ལེན་པ་བཤད་ཀྱིན་ཡོད་ན། སྤྱིར་ན་སྔགས་རྒྱུད་སྡེ་བཞི་དྲུག་སོ་སོའི་སྐབས་ཀྱི་དབང་གི་རྣམ་གཞག་དང་དབྱེ་བསྡུ་མང་ཡང་། བླ་མེད་ཀྱི་དབང་བཞི་ལ་མ་འདུས་པ་ཞིག་མེད། དབང་བཞི་དེ་གང་རེད་ཅེ་ན། བུམ་པའི་དབང་། གསང་བའི་དབང་། ཤེས་རབ་ཡེ་ཤེས་ཀྱི་དབང་། ཚིག་དབང་རིན་པོ་ཆེ་དང་བཞི་རེད། གྲོང་ཆོག་པ་རྣམ་པར་ཁ་བྱང་གིས་མི་ཚད་བློ་འདོན་ཆུ་རྒྱུག་རྒྱུག་གིས་ཀར་གླིང་ཞི་ཁྲོའི་གནས་བརྒྱ་བསོག་རྒྱུ་དེང་སང་ཨེ་ཡོད་མི་ཤེས་ཀྱང་། སྐུ་གསུམ་དམ་ཚིག་དང་གསང་བ་ཡེ་ཤེས་ལེ་ཚན་གཉིས་ཀ་རེད། རྟ་རྒྱུག་མ་མི་བྱེད་ཐབས་མེད་ཉི་མས་མི་འདང་པ་རེད། གཏོར་དབང་ལ་ཐུག་དུས་དལ་མོ་འདྲ་ཞིག་བྱེད་དར་ཡིན་ན། དབང་ཟེར་བ་མདོ་ལམ་ནས་འོད་ཟེར་ཆེན་པོའི་དབང་བསྐུར་གསུང་རྒྱུ་ལ་སོགས་པ་ཚིག་སྣེ་ཙམ་ལས་ཆེན་པོ་ཞིག་མ་བུད་ཀྱང་། སྔགས་རྒྱུད་སྡེ་བཞི་དྲུག་གི་གང་ཡིན་ན། སོ་སོའི་དཀྱིལ་འཁོར་དང་ཆོ་ག་དང་མཐུན་པའི་དབང་གི་རིམ་པ་འབྱུང་རྒྱུ་དང་། ཁྱད་པར་དུ་སྔ་འགྱུར་ནང་རྒྱུད་ཡོ་ག་སྡེ་གསུམ་ལ་མཚོན་ན་སྔ་འགྱུར་བཀའ་བབས་ཀྱི་ཆུ་བོ་ཆེན་པོ་བཞིའི་ནང་གི་སྨིན་བྱེད་དབང་བཞིའི་ཆུ་བོ་བསྐུར་ཐབས་ངོ་སྤྲོད་དང་བཅས་པ་འདི་ནི། བཀའ་བབས་ཀྱི་ཆུ་བོ་ཆེན་པོ་བཞིའི་ཡ་གྱལ་དུ་བགྲངས་པ་ཡིན་ན། འདིར་ཐོག་མར་སྔགས་ལ་ཞུགས། བར་དུ་སྡོམ་དང་དམ་ཚིག་གིས་རྒྱུད་བསྡམས། མཐའ་མར་གཞི་འབྲས་དབྱེར་མེད་ཀྱི་ས་ལ་སྦྱོར་བ་ཚུན་ཆད་ལ་མེད་མི་རུང་བ་ཡིན། གསང་སྔགས་སྨིན་གྲོལ་གྱི་ལམ་ཐམས་ཅད་དབང་བཞིའི་སྒྲོམ་ལས་མ་འདས་པ་ཞིག་རེད།།

འོ་ན་དབང་གི་ངོ་བོ་ཇི་ལྟ་བུ་ཞིག་རེད་ཅེ་ན། རྒྱུ་གཉིས་རྐྱེན་བཞི་ལ་བརྟེན་ཏེ་རང་གནས་ཀྱི་ཡེ་ཤེས་མངོན་དུ་འཆར་བའམ་འཆར་རུང་གི་ནུས་པ་རྒྱུད་ལ་འཇོག་པ་ཞིག་རེད། འདིའི་དབྱེ་བ་ལ། གཞི་དབང་། ལམ་དབང་། འབྲས་བུའི་དབང་། དེ་རེ་རེ་ལ་ཡང་གཞི་ལམ་འབྲས་གསུམ་གྱི་དབྱེ་བ་ཡོད་པའི་ནང་གི ད་རེས་བླ་མའི་རྣལ་འབྱོར་གྱི་སྐབས་ཀྱི་དབང་བཞི་འདི་ལམ་དབང་གི་ལམ་དབང་རེད། གཞི་དབང་རང་ལ་ཡེ་ནས་སྐུ་གསུམ་རང་ཆས་སུ་ཡོད་པ་ཡིན་ན། དེའི་སྒྲིབ་པའི་དྲི་མ་བསལ་ཆེད་དུ་ལམ་དབང་གི་གཞི་དབང་། བླ་མས་དཀྱིལ་འཁོར་གཉན་པོའི་སྒོར་བཅུག་ནས་སྨིན་པར་བྱེད་པའི་དབང་བསྐུར་བ་ཐོབ་པ་དེ་བརྒྱུད་ནས། ལམ་དབང་གི་ལམ་དབང་རང་གིས་རྒྱུན་དུ་ལེན་རྒྱུ་དང་ཆབས་ཅིག་ཏུ་འབྲས་དབང་དྲི་མ་ཡོངས་དག་གི་ས་ལ་སྦྱོར་བ་ཡིན་ནོ།།

འདིའི་རྩ་བའི་ཚིག་འདི་རེད།

རྣམ་པ་མཚོ་སྐྱེས་རྡོ་རྗེའི་གནས་གསུམ་ལས།།

དཀར་དམར་མཐིང་ཁའི་འོད་ཟེར་སྒོ་གསུམ་ཐིམ།།

སླར་ཡང་ཐུགས་ཀའི་འོད་མཐིང་སྙིང་ལ་ཕོག།

སྒྲིབ་དག་དབང་ཐོབ་སྐུ་བཞིའི་ས་བོན་ཐེབས།།ཞེས་པ་ཡིན་ན།

བླ་མ་དང་གུ་རུ་དབྱེར་མེད་ཀྱི་སྤྱི་བོ་མགྲིན་པ་སྙིང་ཁ་ལྟེ་གནས་གསུམ་ལ་ཡི་གེ་འབྲུ་གསུམ་སྟེ། ཨོཾཿཨཱཿཧཱུྃ་གསུམ་ལ་དམིགས་པ་གཏད་ནས་དེ་ལས་འོད་ཟེར་དཀར་དམར་མཐིང་གསུམ་འཕྲོ་བའམ། ཡིག་འབྲུའི་དམིགས་པ་གསལ་དགོས་ན་དེ་ཡང་ལམ་དུ་འཁྱེར་མི་ཐུབ་པའམ་ཡིག་ངོ་མི་ཤེས་པས་ཡིག་འབྲུ་གསལ་མི་བདེ་པ་ཡོད་ན། ཁྱིམ་པ་ཕོ་མོ་ཚོར་བདེ་རྒྱུ་མ་རེད་བསམ་ནས་འདི་ནས་འོད་ཟེར་དཀར་དམར་མཐིང་གསུམ་གསལ་ན་འཐུས་རྒྱུ་བྱས་པ་རེད། དེ་ཡང་བླ་མའི་དཔྲལ་བ་ནས་འོད་ཟེར་དཀར་བོ་ཞིག་འཕྲོས་ནས་རང་གི་སྤྱི་བོ་ནས་ཞུགས། དེའི་རང་གི་ལུས་དང་རྩ་ཡི་སྒྲིབ་པ་ཐམས་ཅད་དག སངས་རྒྱས་ཀྱི་སྐུ་གསུང་ཐུགས་གསང་བ་གསུམ་གྱི་ནང་ནས་སྐུ་རྡོ་རྗེའི་བྱིན་རླབས་ཞུགས། དབང་བཞིའི་ནང་ནས་བུམ་པའི་དབང་ཐོབ། སྐུ་བཞིའི་ནང་ནས་སྤྲུལ་སྐུའི་གོ་འཕང་ཐོབ་པའི་སྐལ་བ་བཟང་པོ་རྒྱུད་ལ་བཞག་པར་བསམས། བླ་མ་གུ་རུ་དབྱེར་མེད་ཀྱི་མགྲིན་པ་ནས་འོད་ཟེར་དམར་པོ་བྱུང་། རང་གི་མགྲིན་པ་ལ་ཐིམ། དེའི་ངག་དང་རླུང་གི་སྒྲིབ་པ་དག གསུང་རྡོ་རྗེའི་བྱིན་རླབས་ཞུགས། གསང་བའི་དབང་ཐོབ། ལོངས་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག་པར་མོས། ཡང་བླ་མའི་ཐུགས་ཀ་ནས་འོད་ཟེར་མཐིང་ག་ཞེས་སྔོན་པོ་ཞིག་བྱུང་ནས་རང་གི་སྙིང་ཀ་ལ་ཞུགས། དེས་ཡིད་ཀྱི་ལས་དང་ཐིག་ལེའི་སྒྲིབ་པ་དག ཐུགས་རྡོ་རྗེའི་བྱིན་རླབས་ཞུགས། ཤེས་རབ་ཡེ་ཤེས་ཀྱི་དབང་ཐོབ། ཆོས་སྐུའི་གོ་འཕང་ཐོབ་པའི་སྐལ་བ་བཟང་བོ་རྒྱུད་ལ་བཞག་པར་བསམ་དགོས། སྔོན་འགྲོའི་ངག་འདོན་རྒྱས་པའི་ལམ་དབང་གི་ནང་ན་ཚིག་དེ་ཚོ་གཅིག་ཀྱང་མ་འཆུག་པར་ཡོད། སླར་ཡང་ཐུགས་ཀའི་ཧཱུྃ་ལས་ཧཱུྃ་ཡིག་ནམ་མཁའི་མདོག་ཅན་ནམ། ཡང་ཐུགས་ཀ་ནས་འོད་ཟེར་མཐིང་ག་གཅིག་བྱུང་ནས་རང་སེམས་དང་ཐ་དད་མེད་པར་འདྲེས། དེས་ཀུན་གཞིའི་ལས་དང་ཤེས་བྱའི་སྒྲིབ་པ་སྦྱངས། སྐུ་གསུང་ཐུགས་རྡོ་རྗེ་གསུམ་གྱི་བྱིན་རླབས་ཐོབ་པའི་སྟེང་ལ་ཡེ་ཤེས་རྡོ་རྗེའི་བྱིན་རླབས་ཞུགས། དབང་བཞི་བ་ཚིག་དབང་རིན་པོ་ཆེ་ཐོབ། སྐུ་བཞིའི་ནང་གི་ངོ་བོ་ཉིད་སྐུ་ཐོབ་པའི་སྐལ་བ་ཅན་ནམ་སྐལ་བ་བཟང་པོ་རྒྱུད་ལ་བཞག་པར་བསམ་དགོས་པ་རེད། ཆོས་སྐུ་ལོངས་སྐུ་སྤྲུལ་སྐུ་གསུམ་ངོ་བོ་ཉིད་སྐུ་དང་བཞི་ནི་སྐུ་བཞི་རེད། དེ་འདྲ་བྱས་ནས་དེའི་ངང་ལ་དལ་ཅིག་མཉམ་པར་བཞག་དགོས།།

མཐར་ནི་གུ་རུའི་ཐུགས་ཀའི་འོད་དམར་གྱིས།།

དྲངས་ནས་བདག་ཉིད་རྡོ་རྗེ་རྣལ་འབྱོར་མ།།

འོད་དམར་གྱུར་ཏེ་བླ་མའི་ཐུགས་ཀར་ཐིམ།།

ཐུགས་ཡིད་དབྱེར་མེད་ཆོས་སྐུའི་དགོངས་པར་འདྲེས།།

ཞེས་པ་ནི། གོང་གི་མཉམ་བཞག་ཐུན་གྱི་ཡུན་ཚད་ཚང་ནས་དེ་ལས་ལྡང་བའི་སྐབས་ལ། བླ་མར་མོས་གུས་དུངས་དུངས་པ་ཞིག་བྱས་ནས་གསོལ་བ་བཏབ་དུས། བླ་མ་གུ་རུ་དབྱེར་མེད་ཀྱིས་ཞལ་དགྱེས་འཛུམ་དང་བཅས་ཏེ་ཐུགས་ཀ་ནས་འོད་ཟེར་དམར་པོ་དྲོད་ཚ་ལམ་པ་ཅན་ཞིག་འཕྲོས་ཡོང་ནས། དེའི་འོད་དེས་རང་ཉིད་རྡོ་རྗེ་རྣལ་འབྱོར་མར་གསལ་པའི་སྙིང་གར་རེག་པ་ཙམ་གྱིས། རང་ཉིད་རྡོ་རྗེ་རྣལ་འབྱོར་མ་དེ་ཉིད་འོད་དམར་གྱི་གོང་བུ་ཞིག་ཏུ་གྱུར་ནས་དཔེ་བཞག་ན། མེ་ལས་མེ་སྟག་ཡལ་བའམ་མཁའ་ལས་སྐར་མདའ་ཆད་པ་བཞིན་བླ་མ་དང་གུ་རུ་རིན་པོ་ཆེ་དབྱེར་མེད་ཀྱི་ཐུགས་ཀར་ཐིམ་སྟེ། བླ་མའི་ཐུགས་དང་རང་སེམས་དབྱེར་མེད་ཆོས་སྐུའི་དགོངས་པ་ལ་ཆུ་ལ་ཆུ་བཞག་པའམ་མར་ལ་མར་གླན་པ་ལྟར་དབྱེར་མེད་རོ་གཅིག་ཏུ་འདྲེས་པར་བསམ་ནས་དེའི་ངང་ལ་མཉམ་པར་བཞག་དགོས་པ་རེད། དེ་ལྟར་བླ་མའི་ཐུགས་དང་རང་སེམས་དབྱེར་མེད་བསྲེས་ནས་མཉམ་པར་བཞག་པ་དེ་ཇི་འདྲ་ཞིག་རེད་ཅེ་ན།

རྒྱལ་ཚབ་བྱམས་པ་མགོན་པས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་འཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །དེ་ནི་འདྲེན་པ་རྣམས་ཀྱིས་སྤྱོད་ཡུལ་ལོ། །ཞེས་གསུང་པ་ལྟར་དུ། དག་པའི་སེམས་ཅན་ཟེར་ན་ས་ལ་བཞུགས་པའི་འཕགས་ཆེན་རྣམས་ཀྱིས་ཀྱང་དེ་བཞིན་གཤེགས་པའི་ཐུགས་ཇི་ལྟ་བུ་ཡིན་པ། བསམ་བྱ་དང་མཁྱེན་བྱའི་ཡུལ་དུ་མ་གྱུར་བ་ཡིན་པས། སོ་སོའི་སྐྱེས་བོའི་བློ་ཡུལ་ལས་འདས་ཤིང་སྒྲ་ཚིག་གིས་མཚོན་པར་བྱར་མེད་པ་དེ། འུ་ཅག་གིས་བཤད་ཐུབ་པ་ཞིག་མ་རེད། ཚིག་གི་ཡུལ་ལས་འདས་པ་ཞིག་རེད། སྒྲ་གཅན་འཛིན་གྱིས་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྟོད་པའི་སྐབས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མ་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ཞེས་གསུངས་པའི་དུས་གསུམ་རྒྱལ་བའི་ཡུམ་ཤེར་ཕྱིན་གྱི་དགོངས་དོན་དང་རྫོགས་པ་ཆེན་པོ་གཉིས་དོན་གཅིག་རེད། དེ་ནི་སོ་སོ་རང་གིས་རིག་བྱ་དེ་བཞིན་གཤེགས་པ་ཉིད་ཀྱི་སྤྱོད་ཡུལ་དུ་གྱུར་བ་འབའ་ཞིག་ཡིན་པས་ན། དེ་བཞིན་གཤེགས་པའི་ཐུགས་དེ་ནི་དེ་བཞིན་གཤེགས་པ་ཉིད་མ་གཏོགས་གཞན་གྱིས་མི་ཤེས་རྒྱུ་ཞིག་ཡིན་པ། གཞན་ཕལ་བས་བལྟ་ཐབས་མེད་ལ་བརྟག་ཐབས་ཀྱང་མེད་པ་རེད། བསམ་གྱིས་མི་ཁྱབ་པའི་ཆོས་ཉིད་སངས་རྒྱས་ཀྱི་དགོངས་པ་རྣལ་མ་ཡིན་པས་མཉམ་བཞག་དང་རྫས་མ་འགལ་བའི་ལྷག་མཐོང་གི་ཡེ་ཤེས་སོ་སོར་རྟོག་པའི་ཤེས་རབ་ཁྱད་པར་ཅན་གྱི་ཡུལ་ཡིན་ན། རྟོག་གེ་གཞན་དབང་ཅན་གྱི་ཡིད་དཔྱོད་དགག་སྒྲུབ་ཀྱི་ཐ་སྙད་ལས་འདས་སོང་བ་རེད། གང་དུ་ཐུགས་ཡིད་བསྲེས་སའི་ཆོས་སྐུའི་དགོངས་པ་དེ་ཡེ་ནས་སངས་རྒྱས་པའི་གནས་ལུགས་ཉག་གཅིག་རེད་ཟེར་རྒྱུ་བོ་འུ་ཅག་གིས་ཚིག་གིས་བཤད་ན་དེ་ལྟར་བཤད་རྒྱུ་ཞིག་རེད།།

སངས་རྒྱས་ཞུ་རྒྱུ་དེ་ཇི་འདྲ་ཞིག་རེད་ཅེ་ན། གཉིས་ཆོས་འཁྲུལ་བ་ལས་སངས་ནས་གཉིས་མེད་ཡེ་ཤེས་སུ་རྒྱས་སོང་པ་ལ་སངས་རྒྱས་ཞུ་བ་རེད། དེ་ལས་གཞན་དུ་སངས་རྒྱས་ཟེར་བ་ཞིག་མེད། དེ་ཡང་འཁྲུལ་བ་ཟེར་རྒྱུའི་དང་པོ་ཡོད་པ་ཞིག་རྗེས་ནས་མེད་པ་རེད་དེ་སངས་ཟེར་པ་དང་། གཉིས་མེད་ཡེ་ཤེས་ཟེར་བ་ཞིག་སྔར་མེད་གསར་དུ་ཐོན་ནས་དེ་རྒྱས་སོང་བ་མ་རེད། གཤིས་ལ་འཁྲུལ་བ་མ་གྲུབ་པ་གང་ཞིག ངོ་བོ་གཉིས་མེད་ཡེ་ཤེས་སུ་ཡེ་ནས་རྒྱས་ཡོད་པས་ཡེ་ནས་སངས་རྒྱས་པ་ཡིན། གཤིས་ལ་འཁྲུལ་བ་མེད་པས་སྤངས་པ་ཕུན་ཚོགས་ཡིན། ངོ་བོ་གཉིས་མེད་དུ་ཡོད་པ་དེ་ཉིད་རྟོགས་པ་ཕུན་ཚོགས་པ་རེད། དེ་ལྟར་ཡེ་ནས་སངས་རྒྱས་མིན་ན་བསྒོམ་ནས་སངས་རྒྱས་འགྲུབ་མི་ཐུབ། ས་ལེ་སྦྲམ་ཡེ་ནས་གསེར་མིན་ན་གསེར་ཡིན་ཞེས་པས་གསེར་དུ་མི་འགྲོ་བ་བཞིན་ནོ་ཞེས་གུ་རུ་རིན་པོ་ཆེས་དཔེ་དེ་བཞག་ནས་གསུངས་པ་རེད། དེ་ལྟར་བཤད་ཡོང་ན་ཁྱིམ་པ་ཕོ་མོ་ཚོས་ཅི་གོ་འདི་གོ་མེད་པར་མ་ཟད། བཤད་མཁན་རང་གི་ངོས་ནས་ཀྱང་རང་གིས་མྱོང་བ་ངེས་པའི་རྟགས་མེད་ན་བསམ་ཐབས་དང་བཤད་ཐབས་མེད་པའི་དོན་ཞིག་ཡོད་རེད་ཟེར་བ་དེ་གཞན་གྱི་ཁ་སྐད་རྗེས་ཟློས་བྱས་པ་ཙམ་ཞིག་རེད། ཁ་བའི་འོག་གི་འབའ་འབུར་ལ་བལྟས་ནས་འདི་ཚོ་ན་ཅིག་ཡོད་ཡོད་ཀི་ཞེས་པ་ལྟ་བུ་ལས་གཞན་དུ། འབའ་ར་འབུར་རེ་རིག་གི་འདུག་རུང་དངོས་པོ་ཅི་ཡིན་དངོས་སུ་མི་ཤེས་པ་རེད། ཉིན་ཁར་དཀར་མོ་གཟུགས་ལ་མིག་ཅན་གྱིས་བལྟས་པ་ལྟ་བུའི་མངོན་གྱུར་ཞིག་ཡོད་མ་རེད། འདི་ལྟར་བཤད་དུས། འགའ་རེས་བསམ་ན་ཅི་ཞིག་ཟེར་གྱིན་ཡོད་པ་རེད། ད་ནི་ཉན་ཡང་མི་ཤེས་ཀི ཐེངས་རེ་ལ་སེམས་ཅན་ཐམས་ཅད་སངས་རྒྱས་ཡིན་ཟེར། ཐེངས་རེར་སངས་རྒྱས་ཟེར་རྒྱུ་བོ་དེ་སེམས་ཅན་སླེབས་ས་ཞིག་ན་ཡོད་མ་རེད་ཟེར་གྱིན་ཡོད་པ་འདྲ་འདྲ། ཡང་ཐེངས་རེ་རེ་བཤད་དུས་ཁ་ཡར་འཁོར་བའི་ངེད་ཅག་ནས་བཟུང་སྟེ་སོ་ཐར་དགེ་བསྙེན་གྱི་སྡོམ་ལྡན། རྒྱལ་སྲས་བྱང་ཆུབ་སེམས་དཔའི་རིགས་ཅན། སྔགས་ཀྱི་རྣལ་འབྱོར་ཕོ་མོ། བསྒོམ་ན་ཚེ་འདིའི་སྟེང་ནས་འཁོར་བ་ལ་ཕྱི་ཕྱག་འཚལ་ཏེ། དེའི་རྗེས་ནས་འཁོར་བའི་སྡུག་བསྔལ་མྱོང་མི་དགོས་པ་ཞིག་བྱེད་ན་རང་ལག་རེད་ཟེར། ཡང་ཐེངས་རེར་བཤད་དུས་ཁ་ཡར་འཁོར་བའི་ངེད་ཚོ་མ་དགོས། ཁ་མར་ལ་འཁོར་བའི་བླ་རྒན་རང་ཉིད་ནས་བཟུང་སྟེ། སྨག་ནག་ནང་ནས་ལག་མྱང་མཉམ་དུ་བྱེད་ཀྱིན་ཡོད་དུས་མཉམ་ལྷུང་རེད་མི་འགྲོ་རྒྱུའི་ངེས་པ་མེད་པ་འདྲ་ཞིག གནའ་ཅིག་གིས་བཤད་པ་ལྟར་དགེ་བའི་ཕན་ཡོན་ཞིག་བཤད་ན། བླ་མ་ཁྱེད་མ་དགོས་རྒན་མོ་ང་ཡང་སངས་རྒྱས་འགྲོ་བར་འདུག་སྙམ་པ། སྡིག་པའི་ཉེས་དམིགས་རེ་རེ་བཤད་འོང་དུས། རྒན་མོ་ང་མ་དགོས་བླ་མ་ཁྱེད་ཀྱང་ཅི་རེད་འགྲོ་ན་སྙམ་པ་ཞིག་རེད་ཅེས་ཞུས་པ་ལྟར་བསམ་ན་ཆོག་རེད། ངོ་མས་བཤད་ན་བསམ་དགོས་ཀྱང་དགོས། དེ་འདྲ་ཞིག་ཀྱང་མ་བསམ་ནས་ཅི་བསམ་འདི་དྲན་མེད་པའི་ངང་ནས་མིག་བཙུམ་ཏེ་དར་ཤུད་འཐེན་སོང་ན། ཤུད་ཐེངས་གཅིག་གིས་ཚེ་མཐའ་ལ་གཏུགས། མིག་གྱེན་དུ་གཅིག་ཕྱེས་དུས་ཕྱི་མའི་ཡུལ་ལ་ཐོན་བསྡད་ཡོད་ན་ཅི་ཤེས་རེད། དང་པོ་ཐེ་ཚོམ་སྐྱེས་དགོས། དེ་ལ་བརྟེན་ནས་སྒྲོ་འདོགས་ཆོད་དགོས་པ་རེད། དེ་ལོག་ལྟའི་ལམ་སྣེར་ཕྱོགས་པའི་ཐེ་ཚོམ་མ་རེད། ལམ་གཉིས་ཀྱི་སུམ་མདོ་ལ་ཐོན་དུས་འགྲོ་ས་གང་ཡིན་གྱི་དབྱེ་བ་འབྱེད་བྱེད་དེ་རེད། འགྲོ་ས་གཡས་ཕྱོགས་རེད་དང་གཡོན་ཕྱོགས་རེད་བལྟ་ཡག་བྱེད་དགོས་པ་བཞིན་དུ་དང་པོར་ཐེ་ཚོམ་ཞིག་མི་སྐྱེས་ཐབས་མེད་རེད། ཐེ་ཚོམ་དེའི་རྐྱེན་གྱིས་འདྲི་རྩད་བཅད་པས་ད་རང་ལ་དགོས་པའི་དྲིས་ལན་ཞིག ལས་ལམ་དྲང་ན་ཚེ་གཅིག་གི་དོན་ཉིན་གཅིག་ལ་འགྲུབ་ནས་ཚེ་འདི་ཕྱི་ཚང་མ་ལ་འཚེངས་འགྲོ་བ། མི་ཟད་ཀྱི་ལོངས་སྤྱོད། རིན་ཆེན་གྱི་གཏེར་མཛོད། རང་ལ་དབང་བའི་སྒོ་འབྱེད་ཀྱི་ལྡེ་མིག་རྙེད་ན་ཅི་ཤེས་རེད། སངས་རྒྱས་ཟེར་བ་གནམ་འདྲ་ཞིག་ཡར་ལ་ཆད། སེམས་ཅན་ཟེར་བ་ས་འདྲ་ཞིག་མར་ལ་ཆད་ནས་དེ་གཉིས་ཀྱི་བར་ན་འབྲེལ་ཐག་ཞིག་མེད་ན། སེམས་ཅན་གྱིས་ལོ་བརྒྱའི་མི་ཚད་པར་ལོ་སྟོང་ལ་བསྒོམས་རུང་སངས་རྒྱས་ཡོང་རྒྱུ་ཞིག སངས་རྒྱས་ཀྱིས་དེ་བཞིན་དུ་མཁྱེན་པས་ཅི་ལྟར་གཟིགས་ཀྱང་སེམས་ཅན་ལ་ཐུགས་རྗེ་འཇུག་ཡོང་ཐབས་ཞིག་ཡོད་ས་མེད་ཀི་ཡིན་ན། ལ་ཁ་ཁ་ལུང་པ་སོ་སོ་རེད། ཤར་ནུབ་ཕྱེས་པ་འདྲ་ཞིག་རེད། དེ་ཡིན་ན་བཤད་པ་དོན་མེད་ཀི་བསྒྲུབས་ནས་འབྲས་བུ་མེད་པ་ཞིག བཤད་ནས་ཅི་བྱེད། ཡོང་རྒྱུ་མེད་པའི་སྐད་ཆ་སྐམ་པོ། ཁ་ན་བྱེད་ཅིག་དང་ཉི་མ་འཆོར་བྱེད་ཅིག་རེད། དེ་ལྟར་མིན་ན་མིན་ལུགས་འདི་ལ་འཐམ་ནས་ལོང་བས་བ་རྔ་ལ་འཇུས་པ་འདྲ་ཞིག་བྱས་ན། མཐའ་གཞུག་ལ་བལྟ་ས་འདི་ཡོད་ཀི་བསམ་རྒྱུ་ཞིག་ལོས་ཡོད། ང་རང་གིས་ཡིན་ན་དེ་བསམ་ཀི བྱིས་པ་ཞིག་གིས་ཟེར་བ་ལྟར། སངས་རྒྱས་གང་ན་བཞུགས་ཤེ་ན། ཤར་ཕྱོགས་ན་རྡོ་རྗེ་རིགས་ཀྱི་སངས་རྒྱས། ལྷོ་ཕྱོགས་ལ་རིན་ཆེན་རིགས་ཀྱི་སངས་རྒྱས། ནུབ་ཕྱོགས་ན་པདྨ་རིགས་ཀྱི་སངས་རྒྱས་ལ་སོགས་པ་ཕྱོགས་བཞི་དབུས་དང་ལྔ་ན་རིགས་ལྔའི་སངས་རྒྱས་བཞུགས་ཡོད་པ་རེད། གཞན་ཡང་ཕྱོགས་བཞི་མཚམས་བཞི་དང་བརྒྱད། སྟེང་འོག་གཉིས་དང་བཅུ་ན་ཡང་ཕྱོགས་བཅུའི་སངས་རྒྱས་བཞུགས་ཡོད་རེད་ཅེས་བཤད་ན། དེ་ངོ་མ་ཡོད་ཀྱང་ཡོད་པར་བསམ་ཡང་ཞིབ་ཅིང་ཕྲ་བས་བརྟགས་ཤིང་དཔྱད་པ་ཞིག་ཐོངས་དང་། ལར་ཤར་ཕྱོགས་ཟེར་བའི་ཕྱོགས་ཁོ་རང་ཡང་མི་འགྲུབ། ཤར་གྱི་ཕར་ལ་སོང་ན་ཤར་རེད། ཡང་ད་རུང་ཤར་ཕྱོགས་ལོས་ཡོད། དེའི་ཕར་ལ་སོང་ན་ཤར་ཕྱོགས་ལོས་ཡོད། དེས་ན་ཤར་ཕྱོགས་ལ་ཟད་པ་ཅི་ཡོད། འདི་ལྟོས་ནས་བཏགས་པ་ཙམ་རེད། ནུབ་ལ་ལྟོས་དེ་ཤར། ཤར་ལ་ལྟོས་ཏེ་ནུབ་ཅེས། ལྷོ་ལ་ལྟོས་ཏེ་བྱང་། བྱང་ལ་ལྟོས་ཏེ་ལྷོ་ཞེས་པ་རེད། འོན་ཀྱང་། སངས་རྒྱས་གྲངས་མེད་རྡུལ་གཅིག་གི་སྟེང་ན་རྡུལ་རྙེད་གྲངས་མཉམ་གྱི་སངས་རྒྱས་དང་དེའི་ཞིང་ཁམས་ཡོད་པར་གསུངས་པ་རེད། དེ་བས་ཟབ་ཅིག་བཤད་དུས་ཕྱོགས་མེད་ཕྱོགས་དང་བྲལ་བའི་ཕྱོགས་མཚམས་གསུངས་པ་རེད། གོང་ནས་ཤར་ཕྱོགས་ཀྱི་སངས་རྒྱས་ལ་སོགས་པ་བརྗོད་པ། ད་ཕྱོགས་མེད་ཕྱོགས་དང་བྲལ་བའི་ཕྱོགས་མཚམས་ཞེས་བརྗོད་ན། དུས་གསུམ་དུས་མེད་མཉམ་པ་ཆེན་པོ་ཚོ་བཤད་ཡོང་དུས་གར་ལྟ་འདིར་ཉན་མེད་ན་ཡང་། རྒྱལ་བའི་དགོངས་པ་དང་མཁས་པའི་བསྟན་བཅོས་དེ་ཇི་ལྟར་དཔོགས་དགོས་ན། མཐའ་དྲུག་ཚུལ་བཞིའི་མན་ངག་གི་ལྡེ་མིག་ཡོད་དགོས། དེ་མེད་ན་བཤད་ཐུབ་རྒྱུ་དང་བལྟ་ཤེས་རྒྱུ་ཅན་ཞིག་མེད། དེའི་ཕྱིར་ན་བླ་མའི་མན་ངག་གཙོ་ཆེ། བླ་མ་སངས་རྒྱས་ལས་ཀྱང་བཀའ་དྲིན་ཆེ་གསུངས་པའི་རྒྱུ་མཚན་དེ་ལ་ཐུག་པ་རེད། ད་ཆོས་བཤད་མཁན་གྱི་བླ་མ་དེས་ཆོས་ཚུལ་བཞིན་དུ་བཤད་ན། ལུང་རིགས་དང་མི་འགལ་བ། དྲང་དོན་དང་ངེས་དོན་མ་འཁྲུག་པ། ཐེག་པ་ཆེ་ཆུང་གི་ཆོས་ཀྱི་ཐད་ནས་མཐུན་པ་རྣམས་མི་འགལ་བ། མི་མཐུན་པ་མ་འདྲེས་པ་ཞིག ཕར་ཕྱིན་དང་གསང་སྔགས་དོན་གཅིག་ལ་བཤད་ཐུབ་རྒྱུ། སྔགས་རྒྱུད་སྡེ་དང་མཐུན་པར་བཤད་རྒྱུ། མདོར་ན་བཤད་སའི་སྣོད་ཀྱི་ཁྱད་པར། བཤད་བྱའི་ཆོས་ཀྱི་དབྱེ་བ། བཤད་པའི་འཆད་ཚུལ་ཤེས་རྒྱུ་དེ་དག་ངེས་པར་དུ་དགོས། དེ་དག་གི་ཆ་རྐྱེན་མ་ཚང་ན། ཉ་གེ་ཉོག་གེ་ཅི་ཞིག་བཤད་ཀི་བསྡད་རུང་དོན་གོ་ལ་མི་གོ་ལ། ཚིག་ཡིན་ལ་མིན་ལ། བཞག་ས་བསྡུ་ཁུངས་མི་རྙེད་པ་ཞིག་གི་ཕན་པ་ཡོང་རྒྱུ་ཡོད་ནི་མ་རེད། བདག་ལ་དེའི་ཆ་རྐྱེན་གཅིག་ཀྱང་མི་ལྡན་ཡང་། རིགས་མཐུན་སྐྱིད་སྡུག་གི་བགྲོ་གླེང་ཙམ་ཞིག་སྐབས་ཐོབ་ཉམས་ལ་ཕབས་པའི་སྐད་ཆ་བྱས་ནས་བཤད་ན། ཁ་སང་ད་ཞག་ཞིག་ལ་སྐྱབས་འགྲོའི་སྐབས་ནས་བཤད་པ་ལྟར། དོན་གྱི་སངས་རྒྱས་ཟེར་བ་དེ་ཕྱི་ནས་བཙལ་ཏེ་རྙེད་པ་མ་རེད། ནང་རང་གི་སེམས་ལ་བཞུགས་པ་ལྟར་བཤད་པ་ཡིན། ཆོས་ཅན་སེམས་ཀྱི་དབང་དུ་བྱས་ནས་སེམས་ཅན་ཞེས་མྱིང་བཏགས་པ་དང་། དེའི་ཆོས་ཉིད་ཡེ་ཤེས་ཀྱི་དབང་དུ་བྱས་པའི་སྐབས་ལ་སངས་རྒྱས་ཟེར་བའི་མྱིང་བཏགས་པ་རེད།།

འཁོར་བ་དང་ནི་མྱང་འདས། གྲོལ་བ་དང་འཁྲུལ་བའི་ཕུགས་དེ་གང་ལ་ཐུག་ཡོད་རེད་ཅེ་ན། རང་སེམས་སྐད་ཅིག་མ་འདིའི་སྟེང་ནས་ཕུགས་ཐག་ཆོད་དགོས། དེ་བས་གཞན་དུ་ཕུགས་ཐག་ཆོད་ཐབས་ཞིག་དང་ཕུ་ཐག་ཆོད་ཡོང་ས་ཞིག་མེད། གཞན་ནས་བཙལ་ཏེ་མྱི་ལོ་བརྒྱ་སོང་ནའང་རྙེད་རྒྱུ་ཡོད་མ་རེད། ཆོས་ཅན་སེམས་ནི་རྣམ་ཤེས་ཚོགས་བརྒྱད། ཆོས་ཉིད་དེའི་རང་བཞིན་གྱི་ཡེ་ཤེས་རེད། སེམས་རྣམ་ཤེས་ཚོགས་བརྒྱད་ཀྱི་བྱེད་ལས་ཀྱིས་ཉོན་མོངས་རྣམ་རྟོག་གང་ཤར་ཐམས་ཅད་འཁྲུལ་བ་ཡིན། དེའི་ཆོས་ཉིད་དམ་ཡེ་ཤེས་ཀྱི་རང་བཞིན་ནི་མ་འཁྲུལ་བ་རེད། དཔེ་མཚོན་ན། འདོད་ཆགས་ཉོན་མོངས་རེད། རྣམ་རྟོག་འཁྲུལ་བའི་དབང་ལས་བྱུང་བ་ཞིག་ཡིན་ནའང་དེའི་རང་བཞིན་དེད་ན་བདེ་སྟོང་སོར་རྟོག་ཡེ་ཤེས་མ་འཁྲུལ་བའི་ཆོས་ཉིད་རེད། དེ་བཞིན་དུ་ཞེ་སྡང་གསལ་སྟོང་མེ་ལོང་ཡེ་ཤེས་རེད། གཏི་མུག་དྲན་སྟོང་ཆོས་དབྱིངས་ཡེ་ཤེས་ཡིན་པ་ལ་སོགས་པ། ཉོན་མོངས་དུག་ལྔ་དོན་གྱི་ངོ་བོའི་ཐོག་ནས་བཤད་ན་ཡེ་ཤེས་ལྔ་ཡིན། ཆོས་ཅན་རྣམ་ཤེས་ཚོགས་བརྒྱད་དང་ཆོས་ཉིད་དེའི་རང་བཞིན་གྱི་ཡེ་ཤེས་གཉིས་ཀ་གཅིག་ཨེ་རེད་ཅེ་ན། ཐ་སྙད་དུ་གཅིག་མ་རེད། གཅིག་པོ་འཁྲུལ་བ། ཅིག་ཤོས་མ་འཁྲུལ་པ་རེད། དོན་དམ་པར་ཐ་དད་ཀྱང་མ་རེད། དོན་དམ་གཤིས་ཀྱི་གནས་ལུགས་དེ་གཅིག་ཐ་དད་སོགས་ཀྱི་སྤྲོས་པ་ལས་འདས་པའི་ས་རེད། དེ་ལྟར་ཡིན་པས་སེམས་ཅན་སངས་རྒྱས་ཡིན་ནི་རེད། དེ་ནི་ངས་བཤད་པ་མ་རེད། རྡོ་རྗེ་འཆང་གི་རྒྱུད་ཀྱི་ནང་དུ་གསུངས་ཡོད། རྒྱུད་བརྟག་གཉིས་ཀྱི་ནང་ན། སེམས་ཅན་རྣམས་ནི་སངས་རྒྱས་ཉིད། །ཅེས་གསུངས་སོ། །དེ་ལྟ་ན་དབུ་ལ་གཙུག་ཏོར་ལ་སོགས་པ་མེད་པ་ཅིའི་ཕྱིར་ཞེ་ན། འོན་ཀྱང་གློ་བུར་དྲི་མས་བསྒྲིབས། །གསུངས་པས་སོ། །སྣང་ཆ་གཟུགས་སྐུའི་ཡོན་ཏན་དང་སྟོང་ཆ་ཆོས་སྐུའི་ཡོན་ཏན་རྣམས་ད་ལྟ་སེམས་ཅན་ཡིན་དུས་ནས་རྫོགས་པར་ལྡན། ཡིན་ན་ཡང་སེམས་ཅན་ཡིན་པའི་སྐབས་འདིར་གློ་བུར་གྱི་དྲི་མས་བསྒྲིབས་ནས་ཡོན་ཏན་ཡོད་ཀྱང་མི་སྣང་། བསྒྲིབ་རྒྱུ་དེ་གང་སྒྲིབ་འདུག་པ་རེད་ཟེར་ན། བདེ་གཤེགས་སྙིང་པོ་མངོན་དུ་མི་སྣང་བར་སྒྲིབ་འདུག་པ་རེད། བདེ་གཤེགས་སྙིང་པོས་སེམས་ཅན་ཡོངས་ལ་ཁྱབ་ཡོད། ང་ལ་ཨེ་ཡོད་ན་བསམ་དགོས་མ་རེད། དེས་མ་ཁྱབ་པ་ཞིག་ཡོད་པ་མ་རེད། སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་ཡིན། ཡིན་ཡང་སྐབས་ཅིག་ལ་གློ་བུར་འཁྲུལ་བའི་དྲི་མས་བསྒྲིབས་ནས་དེའི་དྲི་མ་དེས་སྤྲིན་གྱིས་ཉི་མ་གཡོལ་བ་ལྟར་བསྒྲིབས་བསྡད་ཡོད་པའི་དུས་སུ། ཁམས་དང་རིགས་ཞེས་པའི་བདེ་གཤེགས་སྙིང་པོར་མྱིང་དེ་བཏགས་པ་རེད། སངས་རྒྱས་དུས་གློ་བུར་གྱི་དྲི་མ་སྤྲིན་འདྲ་དེ་སེལ་བས་བྱང་ཆུབ་ཞེས་བཏགས། དོན་ལ་སྤྲིན་གྱི་འོག་ཏུ་སོང་བ་མ་གཏོགས་སྤྲིན་ཉི་མའི་དཀྱིལ་འཁོར་ལ་ཞུགས་མ་མྱོང་པ་ལྟར། དྲི་མས་བདེ་གཤེགས་སྙིང་པོའི་གཤིས་ལ་གོས་མ་མྱོང་པ་མ་རེད། ནམ་མཁའ་གཅིག་སྣོད་ཀྱི་ཁྱད་པར་གྱིས་དབྱིབས་ཁ་ཁ་ཕྱེས་པ་ལྟར་རེད། འདི་མ་དག་མ་དག་དག་པ་དང་ཤིན་ཏུ་དག་པ་གསུམ་དུ་ཕྱེས་སོང་ན། མ་དག་སེམས་ཅན་གྱི་སྐབས་ལ་གནམ་སྔོན་པོ་སྤྲིན་ནག་གིས་བཏུམ་ཡག་བྱས་སོང་བ་འདྲ་འདྲ། གནམ་སྔོན་པོ་སྤྲིན་གྱིས་བཏུམ་ན་གནམ་སྔོན་པོ་ཟུར་ཙམ་ཡང་རིག་རྒྱུ་མེད། དེ་འཁྲུལ་བའི་སྐབས་འདྲ་འདྲ། མ་དག་དག་པ་ཟེར་བ་ཞིག་ཡོད། དག་མ་དག་གཉིས་ཀ་འདྲེས་སོང་པ་ཞིག་ཡོད། སློབ་ལམ་པ་འཕགས་པ་བྱང་སེམས་ཀྱི་ངོ་ཁར་སྤྲིན་ཐ་རེ་ཐོར་རེ་ཞིག་གི་གསེང་ནས་གནམ་སྔོན་པོའི་རང་མདོག་ཅུང་ཟད་རིག་འདུག གང་ལ་གང་འཚམས་རེ་རིག་བསྡད་པ་འདྲ་འདྲ། ཤིན་ཏུ་དག་པ་སངས་རྒྱས་ཀྱི་སྐབས་ལ་སྒྲིབ་པ་ཀུན་དག དེའི་དུས་སུ་སྟོན་ནམ་གཡའ་དག་དྭངས་གསལ་ལ་བལྟས་པ་ལྟ་བུ་རེད། དེ་དུས་རང་བཞིན་རྣམ་དག་ལ་གློ་བུར་བྲལ་དག་གི་དག་པ་གཉིས་ལྡན་མངོན་དུ་གྱུར་བ་རེད། སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་ནས་སངས་རྒྱས་སོང་བ་རེད། འདི་སྦྱང་གཞི་སྦྱང་བྱ་སྦྱོང་བྱེད་སྦྱངས་འབྲས་ཀྱི་སྟེང་ནས་སྔགས་རྒྱུད་ལྟར་དུ་བཤད་ཡོང་ན། སྦྱང་གཞི་བདེ་གཤེགས་སྙིང་པོ་གདོད་ནས་རང་ཆས་སུ་རང་ལ་ཡོད་པ་དེ་འདམ་གྱི་དབུས་ན་བཞུགས་པའི་ནོར་བུ་ལྟ་བུ་ཞིག་ཡིན་ན། སྦྱང་བྱ་དེའི་སྟེང་ལ་མེད་སྣང་གློ་བུར་གྱི་དྲི་མས་ནོར་བུ་འདམ་རྫབ་ཀྱིས་གཡོག་པ་ལྟར་གཡོགས་ཡོད་ན། སྦྱོང་བྱེད་སྨིན་གྲོལ་གྱི་ལམ་རྣམས་དྲི་མ་འཁྲུལ་བྱེད་ཀྱི་འདག་རྫས་འདྲ་བོ། སྦྱངས་བའི་སྦྱངས་འབྲས་གཞི་ལ་ཇི་ལྟར་ཡོད་པའི་ཡོན་ཏན་དེ་མངོན་དུ་གྱུར་བས་འདམ་ལས་གྲོལ་བའི་ཡིད་བཞིན་གྱི་ནོར་བུས་འདོད་དགུའི་ཆར་ཕབས་ནི་འདྲ་བོ་དེ་འདྲ་ཞིག་གི་གོ་དོན་ཡིན། སེམས་ཀྱི་ཆོས་ཉིད་བཤད་པ་ཡིན་ན། ཆོས་ཅན་དང་ཆོས་ཉིདཟེར་དུས་ཆོས་ཅན་སེམས། དེའི་ཆོས་ཉིད་ཡེ་ཤེས་ཡིན་པ་རེད། སེམས་ཀྱི་ཆོས་ཉིད་འདི་སེམས་ཅན་ཡིན་པའི་སྐབས་ལ་ངན་དུ་མ་སོང་། སངས་རྒྱས་ཡིན་པའི་སྐབས་ལ་བཟང་དུ་མ་སོང་བས་འགྱུར་བ་མེད་པ་རེད། ཁོ་རང་ཡེ་ནས་བཅིངས་པ་ཡོད་མ་མྱོང་དུས་གྲོལ་བ་ཟུར་ནས་བཙལ་མི་དགོས་པ་ཞིག་རེད། དཔེར་ན་ཐག་པས་བསྡམས་མ་མྱོང་པ་ཞིག་ཕར་ལ་བཤིག་མི་དགོས་པ་ལྟར་ཡིན། འདི་ཆོས་སྐད་ཀྱི་སྟེང་ནས་བཤད་ན། ཡེ་ནས་འཆིང་གྲོལ་ལས་འདས་པའི་རང་བཞིན། མཉམ་པ་ཉིད། ངོ་བོ་དུས་གསུམ་འཕོ་འགྱུར་དང་བྲལ་བའི་ཟག་མེད་འདུས་མ་བྱས་ཟེར་བ་རེད། སུས་ནམ་ཞིག་ལ་སེམས་ཀྱི་དེ་ཉིད་མངོན་དུ་གྱུར་ན། དེའི་ཐོག་ནས་སངས་རྒྱས་རེད་སོང་བ་རེད། དེ་དུས་སེམས་ཅན་མ་རེད་སངས་རྒྱས་རེད། དེའི་སྐབས་སྔོན་གྱི་འཁྲུལ་བ་ཅན་གྱི་སེམས་དེ་རོ་ཤི་རོ་གོས་འཕེན་འཕེན་བྱས་ནས་ག་ཤེད་ལ་གཡུག་བཏང་པ་མ་རེད། ཤུལ་ལ་ལྷག་བསྡད་ཡོད་པ་ཞིག་ཀྱང་མ་ཡིན། འཁྲུལ་བ་ནི་དགུན་ཁའི་འཁྱག་རོམ་འདྲ་ཞིག་ཡིན་ན། མ་འཁྲུལ་བ་ནི་དབྱར་ཁའི་ཆུ་རང་གི་ངོ་བོའི་གཤིས་ཐོག་ལ་ཐོན་དུས་འཁྱག་རོམ་ངན་པ་ཞིག་ཟུར་ཞིག་ལ་འཕངས་བཞག་མེད་པ་དང་འདྲ་འདྲ་རེད། སངས་རྒྱས་སེམས་ཅན་ལག་པའི་ལྟོ་རྒྱབ་འདྲ་འདྲ་རིག་དང་མ་རིག་ཤེས་དང་མ་ཤེས་ཀྱི་ཁྱད་པར་ཙམ་ཞིག་རེད། སངས་ཨེ་རྒྱས་མི་རྒྱས་རང་ལག་རེད། ཅེས་རྒྱུ་མཚན་དེ་ལྟ་བུས་བཤད་པ་རེད། ཐེག་ཆེན་མདོ་སྔགས་ཀྱི་ཆོས་གང་བཤད་ན་མཐར་ཐུག་ཆོས་དབྱིངས་དེ་བཞིན་ཉིད་མངོན་དུ་འགྱུར་ཐབས་བཤད་ཡོད་པ་རེད། ཐུབ་པས་བསྟན་པའི་སངས་རྒྱས་ཀྱི་ཆོས་སྒོ་མཐའ་དག་མཐར་ཐུག་རྒྱ་མཚོ་ཆེན་པོར་ཆུ་ཕྲན་འདུས་འདྲ་དེའི་ཕྱོགས་ལ་གཞོལ་ཞིང་འབབ་ཀྱིན་ཡོད་རུང་། དེར་བགྲོད་སའི་ལམ་ལ་རིང་ལམ་ཉེ་ལམ་མྱུར་ལམ་གྱི་ཐབས་དང་གདམས་པའི་ཁྱད་པར་ཡོད་པ་ཡིན་དུས། རང་རེ་འདྲ་ཞིག་ལ་མཚོན་ཁུལ་བྱས་ན། ཤིན་ཏུ་མྱུར་ལམ་འོད་གསལ་རྫོགས་པ་ཆེན་པོའི་ཟབ་པའི་ཉེ་ལམ་གཅིག་ཆོག་བླ་མའི་རྣལ་འབྱོར་སྒོམ་ཡོད་དུས། རྒྱུ་བསྒྲུབས་ནས་ཐག་རིང་རྒྱང་བསྐོར་བྱེད་མི་དགོས་པར་ཐད་ཀར་འབྲས་བུ་སྨིན་རྒྱུའི་སྟེང་ནས། བླ་མ་དང་གུ་རུ་རིན་པོ་ཆེ་དབྱེར་མེད་ཀྱི་ཐུགས་དང་། དུས་གསུམ་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པ་དེ་ལ་རང་གི་སེམས་ཀྱི་ཆོས་ཉིད་ཆོས་སྐུའི་ངོ་བོ་བསྲེས་ནས་སྒོམ་ན། གོམས་པ་མངོན་དུ་གྱུར་ཏེ་ངོ་མར་འདྲེས་འགྲོ་རྒྱུ་ཡོད་པ་རེད། དེ་འདྲེས་འགྲོ་བ་ཅིའི་ཕྱིར་རེད་ཅེ་ན། ཆོས་ཉིད་གཅིག་ལས་མ་འདས་པ་ཡིན་པས་ན་ཆུ་དང་ཆར་བ་གཉིས་ཀ་ངོ་བོ་གཅིག་ཡིན་པས་འདྲེས་སླ་བ་ལྟར་དུ་རེད། སངས་རྒྱས་ཀྱི་ཐུགས་དང་རང་གི་སེམས་ཉིད་འདྲེས་དུས་སངས་རྒྱས་སོང་བ་མིན་ན་ཅི་ཡིན། དེ་དུས་ཡེ་ནས་གཤིས་ལ་ཡོད་པའི་སངས་རྒྱས་ཀྱི་ཡོན་ཏན་ཐམས་ཅད་མངོན་དུ་གྱུར་ཡོང་བར་མ་ཟད། མཐའ་ཡས་སྙིང་རྗེའི་ཡུལ་གྱུར་མ་རྒན་སེམས་ཅན་ཐམས་ཅད་ཀྱི་དོན། ད་ལྟ་སེམས་བསྐྱེད་པ་བཞིན་དུ་རྟག་ཁྱབ་ལྷུན་གྲུབ་ལ་འབྱུང་རྒྱུ་ཞིག་རེད། དེས་ན་ཆོས་ཞུས་ནས་དོན་ཉམས་ལེན་བྱས་པའི་སྙིང་པོ་དེ། རབ་ན་ཚེ་འདིའི་སྟེང་ནས་ལུས་སེམས་ཅན་ཡིན་ཡང་སེམས་སངས་རྒྱས་ལ་འགྱུར་བ་ཞིག འབྲིང་ཙམ་ཡིན་ན། འཆི་ཁ་བར་དོ་དང་ཆོས་ཉིད་བར་དོ་ཚོར་རང་ངོ་ཤེས་ནས་གྲོལ་བ་ཐོབ་པ་ཞིག ཐ་མ་ཡིན་རུང་། སྲིད་པ་བར་དོའི་ཁ་འཁྱར་མིང་གཞི་འདུས་པའི་ཕུང་པོ་ལ་བདག་འཛིན་གྱིས་འཁྲུལ་དུས་གདམས་པ་འདི་ཚོ་དྲན་ནས་དག་ཞིང་ལ་འགྲོ་ཐུབ་པ་ཞིག ཡང་མཐའ་དེས་སྡུག་ན་མེད་རུང་། ངན་སོང་ངན་འགྲོའི་ཁར་མི་བརྒྱུད་པར་སྐྱེ་བ་ཕྱི་མ་ཚོར་ཆོས་འདི་དང་འཕྲད་དེ། ཉམས་ལེན་གྱི་གདེང་ཐོབ་ནས་གྲོལ་བ་ཐོབ་པ་ཞིག་རེ་བ་དང་པོ་མ་འགྲུབ་ནའང་གཉིས་པ། གཉིས་པ་མ་འགྲུབ་ནའང་། གསུམ་པ་དང་བཞི་བའི་མན་ན་མི་ལྷུང་བའི་བརྩོན་པ་སྙིང་རུས་རང་གིས་བསྐྱེད་དགོས། ཁྱིམ་པ་ཕོ་མོས་གཞིས་འཁོར་བའི་ལས་ཀ་ཆག་མི་ཉན། གཞིས་འཁོར་བའི་ལས་ཀ་མ་ལས་ན་འཚོ་ཐབས་ཡོད་མ་རེད། དེ་ཡང་རང་གི་རྣམ་དཔྱོད་ལ་བརྟེན་ནས་ཚེ་འདིའི་བདེ་འབྱོར་ཡར་མགོ་མ་ཞིག་སྒྲུབ་དགོས་པ་རེད། མངོན་མཐོའི་འབྱོར་བ་ཚོགས་དགོས། མངོན་མཐོ་ལྷ་མིའི་གནས་ལ་ཐོན་དུས་ལྷ་མིའི་བདེ་འབྱོར་ཕུན་སུམ་ཚོགས་དགོས་པ་རེད། དེ་དང་མཉམ་དུ་ཆོག་ཤེས་འཕགས་པའི་ནོར་ཡང་ཡོད་ན། གཞི་ནས་མི་ཚེ་སྐྱིད་ཀྱིས་སྐྱེལ་ཐུབ་རེད། ཆོས་ཀྱི་འཚོ་བ་མེད་ན་འབྱོར་བ་ཇི་ཙམ་རྒྱས་ཀྱང་དུད་འགྲོའི་འཚོ་བ་ཞིག་ལས་མི་འདའ། ཕོ་མོ་ཚང་མས་སྒོམ་རྒྱག་དགོས་རེད་སྒོམ་རྒྱོབ།།

༣ ལུས་སེམས་ཀྱི་བཞག་ཐབས་ལ་བསླབ་པ།

༡༽ལུས་ཀྱི་འདུག་སྟངས་ལ་བསླབ་པ།

མྱི་སྐྱ་ཕོ་མོ་སངས་རྒྱས་མི་ཆོག་རྒྱུའི་ཁྲིམས་འདྲ་མེད་ན་བསྒོམ་རྒྱག་དགོས་པ་རེད། མ་བསྒོམས་ནས་སངས་རྒྱས་པ་ཞིག་མི་སྲིད་པ་རེད། ཁྱིམ་པ་ཕོ་མོས་སྒོམ་རྒྱག་ཟེར་བ་ཞིག མི་རབས་བླ་རབས་སུ་དང་སུའི་རིང་ལ་གོ་མ་མྱོང་ཟེར་མཁན་ཡོད་ན། ཁྱེད་ཀྱིས་གོ་མ་མྱོང་བ་ཅི་ཡོད་དང་ཅི་མེད་ཟེར་བའི་ལན་རྒྱག་རྒྱུ་རེད། རང་ལམ་དྲང་མོ་རང་གིས་བླངས་ནས་འགྲོ་བ་མ་གཏོགས་ལམ་གྱི་ཁྱི་ལྡོམ་ལྟ་བུའི་ཁ་ཁོམ་ཚད་པོ་ཉོན་དང་། སྨྱོན་པ་མིན་ནའང་གཟའ་རོ་མ་ཞིག་ལ་བསྒྱུར་འགྲོ་རྒྱུ་རེད། ལས་ཀའི་བྲེལ་བ་ཅི་འདྲ་ཞིག་ཆེ་རུང་དུས་ཚོད་སྐར་མ་བཅོ་ལྔ་ཉི་ཤུར་སྒོམ་ལོངས་ལོས་ཡོད། ངག་འདོན་ཚིག་རྐང་དྲུག་བདུན་པོ་དང་སྦྲགས་ནས་བསྒོམ་ཆོག་རེད། ངོ་ཚ་མི་དགོས། ངོ་ཅི་ཚ་ཤི་ཆོས་སྒྲུབ་པ་རེད། སྐྱིལ་ཀྲུང་སྒམ་བུ་འདྲ་ཞིག་བཅས་ཏེ་ཟུར་དེ་ནས་ཀི་ཞིག་བཏབ་རུང་གོ་མི་འདུག་བསམ་རྒྱུ་ཞིག་བྱས་ནས་སྒོམ་དགོས་པ་རེད། ལར་སྒོམ་ཡིན་ཚད་དེ་འདྲའི་ཚབས་ཆེན་བསྙབ་ཐུག་གཉིས་ཀ་མི་ཕོད་རྒྱུ་ཞིག་ལར་ནས་མ་རེད། ཕྱི་རོལ་མི་སྟེགས་ཕུར་བུ་པའི་ལུགས་ལ་བསྒོམ་བསམ་གཏན་ལ་གནས་ཐབས་འདྲ་མི་འདྲ་བདུན་ཡོད་རབས་གསུངས་ཡོད་པ་རེད། བསྒོམས་ནས་སྲིད་རྩེ་མན་ཆད་ལ་སྐྱེས་ཐུབ་པའི་འཇིག་རྟེན་པའི་བསམ་གཏན་སྒོམ་རྒྱུ་ཡོད་པ་རེད། དེ་བཞིན་དུ་ཐེག་དམན་ཉན་རང་ཡན་ཆད་ནས་ཐེག་ཆེན་རྫོགས་ཆེན་གྱི་བར་ལ་སྒོམ་རྒྱག་རྒྱུ་ཡོད་པར་མ་ཚད། ཞི་གནས་དང་ལྷག་མཐོང་གི་བརྡ་ཆད་འདྲ་འདྲ་བྱས་ནས་ཡོད་ཀྱང་། ཞི་ལྷག་མྱིང་གཅིག་ཀྱང་དོན་གྱི་རྣམ་དབྱེ་སྒྲ་མཐུན་དོན་འཕགས་ཀྱི་ཁྱད་པར་ཡོད་པ་ཡང་ཤེས་དགོས་པ་རེད། ཞི་གནས་དང་ལྷག་མཐོང་ཟེར་ཚད་གཅིག་འདྲ་འདྲ་མ་རེད། སྟོང་ཉིད་རྟོགས་པའི་ཞི་གནས་ཡོད་ལ་སྟོང་ཉིད་མ་རྟོགས་པའི་ལྷག་མཐོང་ཡང་ཡོད་པ་རེད། ཡུལ་དེ་ཁོ་ན་ཉིད་ལ་བློ་ཁ་ཙམ་ཡང་ཕྱོགས་མ་མྱོང་བའི་བདེ་གསལ་མི་རྟོག་པའི་ཏིང་འཛིན་སྐྱེས་མཁན་ཡང་ཡོད་པ་རེད། ཞི་ལྷག་མཚན་ཉིད་པ་ཅི་འདྲ་ཞིག་རེད་ཟེར་ན། ཡང་དག་པའི་ཏིང་ངེ་འཛིན་ལ་བརྟེན་ནས་སེམས་མི་གཡོ་བར་འཇོག་པ་ཞི་གནས་ཡིན། ཆོས་རབ་རྣམ་འབྱེད་ཀྱི་ཤེས་རབ་ལ་ལྷག་མཐོང་ཞེས་རྗེ་བཙུན་བྱམས་པ་མགོན་པོས་གསུངས་པ་ལྟར་དུ་རེད། དེ་ཡིན་དུས་སྟོང་ཉིད་ལ་དམིགས་པའི་ཏིང་འཛིན་ཤེས་རབ་ཡིན་མིན་ལ་ཐུག་ཡོད་པ་རེད། དེ་ནི་ཡུལ་བདག་མེད་གང་ཡང་རུང་བ་ཞིག་བློ་དེའི་རྟོགས་དང་མ་རྟོགས་ཀྱི་སྟེང་ནས་ངོས་བཟུང་དགོས་པ་རེད། འདི་ཉན་མཁན་ཁྱིམ་པ་ཕོ་མོ་གཙོ་བོ་རེད།།

མང་བོ་བཤད་ན་མདོ་མེད། ཉོག་པོ་འབོག་ན་རབ་མེད། སྐྱིལ་ཀྲུང་སྒམ་སེ་འཆོས། སྒལ་ཚིགས་མདའ་ལྟར་དུ་ཡར་ལ་དྲང་མོར་གྱིས། དཔུང་བ་གཉིས་ཀ་ལྷོད་དེ་བརྒྱང་དགོས། ལག་པ་གཉིས་ཀས་མཉམ་བཞག་བྱས་ན་ཆོག མཉམ་བཞག་བྱས་དུས་ཕོ་ཡི་ལག་པ་གཡས་པ་དེ་ཐོག་དང་། མོ་ཡི་ལག་གཡོན་པ་དེ་ཐོག་ལ་འཇོག་རྒྱུ་རེད། འོན་ཀྱང་། རྫོགས་པ་ཆེན་པོའི་ཀློང་ཆེན་སྙིང་ཐིག་གི་ཆོས་ཞུས་ནས་སྒོམ་ཀི་ཡོད་དུས། འུ་ཅག་གིས་དེ་དང་འབྲེལ་བའི་སྒོམ་དེའི་རིགས་ལ་ལག་པ་གཉིས་ཀྱིས་པུས་མོ་གཡས་གཡོན་གཉིས་ཀ་བཀབ་ནས། དེ་ལྟར་བསྒོམ་ན་བྱིང་རྨུགས་སེལ་བ་དང་གསལ་བའི་ཉམས་ཐོན་རྒྱུའི་དགོས་པ་ཡོད་པ་རེད། མགྲིན་པ་ཨེན་ཙམ་སྒུར་དགོས། ཡིན་ན་མིན་ན་དགྱེ་དགོས་མ་རེད། ལྕེ་སྣེ་ཡ་རྐན་ལ་གཏད་ནས་ཁ་མི་གདངས་མི་བཙུམ་པར་དབུགས་ཁ་ནང་ནས་མངགས་ན་མི་རྟོག་པའི་ཉམས་སྐྱེས་པ་ལ་བཟང་གི་ཡོད་པ་རེད། མྱིག་ཕྱེ་མ་བཙུམ་གྱིས་མདུན་གྱི་བར་སྣང་ལ་གཏད་མེད་ཀྱིས་གཏད་ནས། དབང་པོ་སྒོ་ལྔ་ཡིད་དང་བཅས་པའི་ཡུལ་ལ་སེམས་མི་གཏད་པར་སྒོ་ལྔ་ཆ་མཉམ་དུ་བཞག ལུས་ཀྱི་འདུག་སྟངས་འདི་ཙམ་ཞིག་བྱས་པ་ཡང་ཕན་ཡོན་ཆེན་པོ་ཡོད་པར་གསུངས་ཡོད་པ་རེད།།

༢༽སེམས་ཀྱི་བཞག་ཐབས་ལ་བསླབ་པ།

སེམས་ཀྱིས་ཇི་ལྟར་བསྒོམ་དགོས་ཤེ་ན། སེམས་རྣམ་རྟོག་འདས་པའི་རྗེས་མི་གཅོད། ཁ་སང་ད་ཞག་ཡར་ལ་ཡོང་དུས་བསམ་མི་འདུག མ་འོངས་རྣམ་རྟོག་གི་སྔོན་མི་བསུ། ད་ཕྱིན་ཆད་ཀྱི་རྗེས་མའི་འདང་ཚུར་བསུ་མི་འདུག ད་ལྟའི་རྣམ་རྟོག་གི་སྐྱེ་འགག ལི་ལིས་ཙུ་གུ་སྒུག་པ་ལྟར་རྩིས་རྒྱག་གི་མི་འདུག་པར་ལུས་སེམས་གཉིས་ཀ་ལྷོད་དེ། ལུས་རི་རྒྱལ་བཞིན་དུ་བརྟན་ན། དབང་པོ་མཚོ་ལ་གཟའ་སྐར་ཤར་བ་འདྲ་ཞིག་གིས་འཛིན་མེད་ཀྱི་ངང་ལ། སེམས་རྒྱ་མཚོ་རླུང་གིས་མ་བསྒུལ་པ་འདྲ་ཞིག་གིས་ནམ་མཁའ་སྟོང་པའི་དཀྱིལ་དུ་གཏད་དེ་བཞག དེ་ལྟར་སེམས་རྒྱ་མཚོ་རླུང་གིས་མ་བསྒུལ་བ་དྭངས་མོ་དྭངས་གསལ་ལེར་ཞོག་དང་། དེ་ཙམ་ཞིག་གིས་ཀྱང་མི་རྟོག་པའི་ཏིང་འཛིན་དང་དགའ་བ་དང་བདེ་བ་སྔར་མེད་རང་ཤུགས་ཀྱིས་སྐྱེས་པ་རེད། དེ་ལྟར་བསྒོམས་ནས་ཡུན་གྱིས་གོམས་སོང་ན། ཞི་གནས་རྐྱང་བ་རེ་བསྒོམ་ནའང་མངོན་ཤེས་ཕྲ་མོ་འཆར་རྒྱུ་ཡོད་དར་བར་མི་ཚད། ཞི་གནས་གོམས་པ་དེ་ཙམ་གྱིས་ཉོན་མོངས་པ་རགས་པའི་མགོ་གནོན་རྒྱུ་དང་། གོམས་ཕྱིན་གོམས་ལ་གོང་དུ་འཕེལ་ནས་ཞི་ལྷག་ཟུང་འབྲེལ་གྱི་ཉམས་སྐྱེ་རྒྱུ་རེད། དེ་ཡང་ང་ཚོའི་གོང་ནས་བཤད་པའི་བླ་མའི་ཐུགས་སམ་སངས་རྒྱས་ཀྱི་དགོངས་པ་དེ་ཇི་འདྲ་ཞིག་ཡིན་ཟེར་ན། འདིའི་རྩ་བའི་ཚིག་གི་ནང་ན་འདི་ལྟར།

སྟོང་གསལ་མཐའ་དབུས་བྲལ་བའི་ཆོས་ཀྱི་དབྱིངས།།

འཛིན་མེད་འོད་གསལ་རིག་སྟོང་རྗེན་པའི་གཤིས།།

ཡེ་ཤེས་གཅིག་གི་ངོ་བོར་རོ་གཅིག་པའི།།

མ་བཅོས་མཉམ་པ་ཆེན་པོའི་ཀློང་དུ་ཨཿ

ཞེས་གསུངས་པས། སྟོང་གསལ་མཐའ་དབུས་བྲལ་བའི་ཆོས་ཀྱི་དབྱིངས་ཞེས་པས། ནང་གསལ་ཀ་དག་གི་ངོ་བོ་ཆོས་སྐུའི་ཡེ་ཤེས་རྟག་ཁྱབ་འཕོ་མེད་སྤྲོས་པ་ཐམས་ཅད་དང་བྲལ་བའི་ཆོས་ཀྱི་དབྱིངས་སངས་རྒྱས་ཀྱི་དགོངས་པ་བཤད་པ་རེད། འཛིན་མེད་འོད་གསལ་རིག་སྟོང་རྗེན་པའི་གཤིས་ཟེར་བ་འདིས། མདངས་ནང་གསལ་ལོངས་སྐུའི་ཡེ་ཤེས་གསལ་ལ་འཛིན་པ་མེད་པའམ་གསལ་སྟོང་འགག་པ་མེད་པའི་རང་བཞིན་བསྟན་པ་རེད། དེའི་འཕྲོར་རིག་སྟོང་རྗེན་པའི་གཤིས་ཞེས་པའི་རིག་སྟོང་རྗེན་པ་ནི། གདངས་ཕྱི་གསལ་ལྷུན་གྲུབ་ཐུགས་རྗེ་ཀུན་ཁྱབ་རིག་སྟོང་སྤྲུལ་སྐུའི་ཡེ་ཤེས་བསྟན་ནས། ཡེ་ཤེས་གཅིག་གི་ངོ་བོར་རོ་གཅིག་པས་ཞེས་པ་དབྱིངས་རིག་དབྱེར་མེད་ཟུང་འཇུག་མཉམ་པ་ཆེན་པོ་བསྟན། མ་བཅོས་མཉམ་པ་ཆེན་པོའི་ཀློང་དུ་ཨཿ་ཞེས་པས་དེ་ལྟ་བུའི་སྐུ་གསུམ་དགོངས་པ་གཅིག་འདུས། དབྱིངས་དང་ཡེ་ཤེས་དབྱེར་མེད་པ། བདེ་དང་སྟོང་པ་ཟུང་དུ་འཇུག་པ། ཤེས་དང་ཤེས་བྱ་རོ་གཅིག་པའི་མ་བཅོས་རང་གསལ་དུ་བཞག་ན། རང་ངོ་ནང་ནས་མཐོང་བའི་འཁོར་འདས་མཉམ་བརྡལ་ཆེན་པོ། རྫོགས་ཆེན་མན་ངག་སྡེའི་ཆོས་སྐད་ལྟར་ན། དམ་ཚིག་གི་མདོ་ཆིངས་ཆེན་པོ་བཞི། མེད་དང་ཕྱལ་བ་ལྷུན་གྲུབ་གསུམ་མཐར་གཅིག་པུ་གཉིས་སུ་བྱར་མེད་ཆོས་དབྱིངས་ཐིག་ལེ་ཉག་གཅིག སྐྱེ་མེད་ཆོས་སྐུའི་དགོངས་པ་ཨ་ཡིག་སྟོང་ཆེན་འགག་མེད་ཀྱི་རྒྱ་ཡིས་དམིགས་མེད་དུ་རྒྱས་བཏབ་པ་རེད། ཅེས་བརྗོད་མེད་མཉམ་པར་བཞག་ཅེས་པའི་མཐའ་མར་ཨཿཡིག་འདི་རྫོགས་ཆེན་སྐྱེ་འགག་གནས་མེད་འགྲོ་འོང་དང་བྲལ་བའི་ངང་ལ་རྒྱུན་དུ་མཉམ་པར་ཞོག་དང་། དུས་རིང་ཐོག་མེད་ནས་དཀའ་བ་བརྒྱ་ཕྲག་གིས་ངལ་ཞིང་དུབ་པའི་སེམས་ཀྱི་ངལ་གསོའི་བསྟི་གནས་ཤིག ཚེ་འདིའི་འདུག་རྟེན། ཕྱི་མའི་འགྲོ་རྟེན་རང་གཞན་དོན་གཉིས་འགྲུབ་པའི་རྙེད་པ་དོན་དང་ལྡན་པ་ཞིག་དེ་ན་ཡོད་ཅེས་པ་རེད། དེ་ཚོའི་གོ་དོན་ལ་དེ་ཙམ་མི་ཡོང་གི་བསམ་ན། ལས་དང་པོ་བ་དག་གིས་བླ་མའི་རྣལ་འབྱོར་གྱི་ཐུགས་ཡིད་དབྱེར་མེད་དུ་བསྲེས་སའི་སྐབས་ལ་ཐོན་དུས། འདུག་སྟངས་རྣམ་སྣང་ཆོས་བདུན་ཞིག་འཆོས་ལ། གོང་གི་ཚིག་དེ་དག་རྒྱ་ཆེན་རྒྱང་རིང་དེ་ཙམ་མི་གོ་གི་བསམ་ན། དད་པ་དང་གཅིག ཕྱོགས་རིས་མེད་པའི་སྙིང་རྗེ་དང་གཉིས། ཡེངས་པ་མེད་པའི་སྒོམ་སྟེ་འདས་པའི་རྣམ་རྟོག་གི་རྗེས་མ་བདའ། མ་འོངས་རྣམ་རྟོག་གི་སྔོན་མི་བསུ་པར་ལྷོད་དེ་འཇོག་པ་དང་། འདི་གསུམ་པོ་ཆུ་དང་འོ་མ་གཉིས་ཀ་བསྲེས་ན་ཁ་ཁ་རུ་ཕྱེ་རྒྱུ་མེད་པ་དེ་ལྟ་བུའི་ངང་ལ། ལུས་སེམས་གཉིས་ཀ་ལྷོད་ལ་ཕོབས་ཏེ་ཞོག་དང་རིམ་གྱིས་རེད་ཡོང་། དེའི་མིང་ལ་སྒོམ་རྒྱག་ཟེར་བ་རེད། དེའི་སྐབས་རྣམ་རྟོག་འདྲ་མི་འདྲ་ཤར་བ་རེད། མྱི་གསོན་པོ་རྣམ་རྟོག་མི་ཤར་བ་ཞིག་གང་ན་ཡོད། འོན་ཀྱང་། ཁོ་རང་ལྟོས་མེད་དུ་འཕངས་ནས་སྐྱུར་ཞོག་དང་སྔར་གྱི་ཉམས་ལེན་དེའི་རྒྱུན་སྐྱོང་དང་རིམ་གྱིས་རིམ་གྱིས་གོམས་སོང་ན། མཉམ་བཞག་ཐུན་གྱི་སྐབས་ལ་ནམ་མཁའ་སྤྲིན་དང་བྲལ་པ་ལྟ་བུའི་དྭངས་གསལ་གཡོ་མེད་སྒྲིབ་གཡོག་དང་བྲལ་བའི་ཉམས་ཞིག་དང་། རྗེས་ཐོབ་ཐུན་ལས་གྲོལ་དུས་སྣང་གྲགས་མཐོང་ཐོས་ཐམས་ཅད་སྒྱུ་མ་རྨི་ལམ་ལྟ་བུའི་ཉམས་སྣང་དང་མ་བྲལ་བ་ཞིག་ཡོང་ན། བར་སྐབས་ཞིག་ཉམས་དེ་རྟོགས་པ་ལ་འགྱུར་དུས། སྟོང་ཉིད་སྙིང་རྗེའི་སྙིང་པོ་ཅན། དད་དང་སྙིང་རྗེ་ཇེ་ཆེར་སོང་ཕྱིན་སོང་ན་ཉམས་ལེན་ནོར་འཆུག་མེད་པའི་རྟགས་རེད། གཙོ་བོ་དད་པ་དང་དག་སྣང་ཡོད་ན་ཉམས་ལེན་གཞན་ཅི་ཡང་མེད་རུང་སྐྱོན་མེད། རིག་འཛིན་མཁའ་སྤྱོད་གྲུབ་པའི་ཉེ་ལམ་ཟེར་བ་དེ། ཤི་རན་ཁར་སྣོད་བཅུད་ཐམས་ཅད་ཟངས་མདོག་དཔལ་རིར་གསལ་ཐུབ་ན་རབས་རེད། མ་ཐུབ་རུང་རང་ཉིད་རྡོ་རྗེ་རྣལ་འབྱོར་མ་གོང་ནས་བཤད་འདུག་པ་དེར་གསལ་བའི་སྤྱི་བོའི་གཙུག་གི་མདུན་གྱི་ནམ་མཁའི་ཁམས་ལ། བླ་མ་དང་གུ་རུ་རིན་པོ་ཆེ་དབྱེར་མེད་ཀྱི་ཐུགས་ཀར་ཐིམ་འགྲོ་བར་བསམ་ནས་ཐུགས་ཡིད་དབྱེར་མེད་དུ་བསྲེས་ནས་མཉམ་པར་བཞག་དགོས་པ་རེད། དེ་ལྟར་བྱས་ན་ཇི་འདྲ་སྡུག་རུང་ངན་སོང་གསུམ་ལ་མི་འགྲོ་བ་གུ་རུ་རིན་པོ་ཆེས་ཁོང་གིས་ཁག་ཁུར་གསུངས་འདུག

ཐུན་མཐར། དཔལ་ལྡན་རྩ་བའི་བླ་མ་སོགས་དང་ཞེས་བསྔོ་བ་སྨོན་ལམ་ཅི་རིགས་པ་སྦྱོར་བ་ནི་སྤྱི་འགྲོས་ལྟར་དུ་རེད། འདི་ན་དང་ཞེས་པའི་དང་སྒྲས་ཅི་ཞིག་བསྟན་ན་འོག་མའི་ཚིག་དེ་ཡར་ལ་དྲངས་ནས་མཚམས་སྦྱོར་གྱི་དོད་རེད། དེ་ཡན་ཆད་ཀྱིས་བླ་མའི་རྣལ་འབྱོར་བཤད་པ་སོང་ནས། འདིའི་འོག་གི་ཚིག་རྐང་བརྒྱད་འདི་ཀུན་མཁྱེན་འཇིགས་གླིང་གི་གསུང་བྱིན་རླབས་ཅན་རྒྱུན་གྱི་དགེ་སྦྱོར་ཅི་རིགས་པ་འདི་དང་སྦྱོར་བྱེད་ལ་འདི་ན་ཟུར་བཀོལ་དུ་དྲངས་པ་ཡིན།།

ཧྲཱིཿ བདེ་བ་ཅན་དུ་སྐྱེ་བའི་རྒྱུ་བཞི་མདོར་བསྟན་པ།

དེ་རིང་གི་བཤད་སྐལ་ངོ་མ་འདི་དང་སྦྲགས་ནས་བདེ་ཆེན་ཞིང་ཁྲིད་ཀྱི་དོད་ཐུབ་བྱས་ནས་བཤད་བསམ་པ་ཡིན་ཡང་། དུས་ཚོད་ཀྱིས་དེ་ཙམ་ཞིག་འདང་མ་ཐུབ་མོད། ད་རུང་ཆོས་འདི་འཛིན་ཅིང་ཕྱི་མ་ཕྱི་མའི་དུས་སུ་འདིའི་འཆད་ཁྲིད་དར་ཞིང་རྒྱས་པར་ཡོང་བའི་རྟེན་འབྲེལ་མཐའ་ཅན་བྱེད་པ་ལས་ཐབས་མ་ཡོད་པ་རེད།

ཆོས་ཉིད་མི་འགྱུར་སྣང་བ་མཐའ་ཡས་ནི།།

འགག་མེད་སྙིང་རྗེར་ལོངས་སྤྱོད་སྤྱན་རས་གཟིགས།།

ཨོ་རྒྱན་པཎ་ཆེན་རྫུས་སྐྱེས་སྤྲུལ་བའི་སྐུར།།

གསོལ་བ་འདེབས་སོ་ནད་གདོན་བར་ཆད་སོལ།།

འཆི་ཁར་གནད་གཅོད་སྡུག་བསྔལ་མི་འབྱུང་ཞིང་།།

ཚེ་འདིའི་སྣང་བ་ནུབ་པར་གྱུར་མ་ཐག།

བདེ་བ་ཅན་དང་རི་བོ་པོ་ཏ་ལ།།

ཟངས་མདོག་དཔལ་གྱི་རི་བོར་སྐྱེ་བར་ཤོག།

ཅེས་གསུངས་ཏེ། ཆོས་ཉིད་མི་འགྱུར་སྣང་བ་མཐའ་ཡས་ནི། །འགག་མེད་སྙིང་རྗེར་ལོངས་སྤྱོད་སྤྱན་རས་གཟིགས། །ཨོ་རྒྱན་པཎ་ཆེན་རྫུས་སྐྱེས་སྤྲུལ་བའི་སྐུ། །ཚིག་གསུམ་འདིས་བདེ་བ་ཅན་དུ་སྐྱེ་བའི་རྒྱུ་དང་པོ་རྟེན་ཞིང་ཁམས་སྣོད་བཅུད་དང་བཅས་པ་ཡིད་ལ་བྱ་བ་དེ་བསྟན།

བདེ་བ་ཅན་དུ་སྐྱེ་བའི་རྒྱུ་བཞི་མང་ཆེ་བས་ཤེས་ས་ཡོད། རྟེན་རྒྱུ་གྲོགས་རྐྱེན་ཟེར་བ་རེད། ༡རྟེན་ཞིང་ཁམས་ཡིད་ལ་བྱེད་པ་དང་། ༢རྒྱུ་ཚོགས་བསགས་སྒྲིབ་སྦྱངས། ༣གྲོགས་བྱང་ཆུབ་མཆོག་ཏུ་སེམས་བསྐྱེད་པ། ༤རྐྱེན་སྨོན་ལམ་དག་པས་མཚམས་སྦྱར་བ་དེ་དག་རེད། དེའི་ནང་གི་དང་པོ་དེ་བསྟན་པ་རེད། གསོལ་བ་འདེབས་སོ་ཞེས་པས་རྒྱུ་ཚོགས་བསགས་སྒྲིབ་སྦྱངས་བསྟན་པའི་ཤུགས་སམ་དེའི་ཞོར་དུ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་དང་བཅས་པས། ནད་གདོན་བར་ཆད་སོལ། །འཆི་ཁར་གནད་གཅོད་སྡུག་བསྔལ་མི་འབྱུང་ཞིང་། །ཚེ་འདིའི་སྣང་བ་ནུབ་པར་གྱུར་མ་ཐག །བདེ་བ་ཅན་དང་རི་བོ་པོ་ཏ་ལ། །ཟངས་མདོག་དཔལ་གྱི་རི་བོར་སྐྱེ་བར་ཤོག །ཅེས་པ་འདིས་རྐྱེན་སྨོན་ལམ་དག་པས་མཚམས་སྦྱར་བ་བསྟན་པར་བཀྲལ་ཆོག་རེད། སྤྱིར་རྒྱུ་གཉིས་པ་ཚོགས་བསགས་སྒྲིབ་སྦྱངས་ནི་ད་རེས་རྡོར་སེམས་སྒོམ་བཟླས་དང་། མཎྜལ་ལ་སོགས་ལ་སྦྲེལ་ནས་བསག་སྦྱངས་གཉིས་ཀྱི་གནད་ཐམས་ཅད་ཡན་ལག་བདུན་པར་བསྡུས་ཏེ་བསྟན་པ་རེད།།

རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཡང་དེ་བཞིན་དུ་སོང་བ་ཡིན་ན། ད་རེས་ངོ་མས་བཤད་ན། རྒྱུ་དང་པོ་རྟེན་ཡིད་ལ་བྱ་རྒྱུའི་སྐོར་དང་། ཚོགས་བསག་གི་ནང་ནས་མཆོད་བཤམས་བྱེད་ལུགས། ཕྱག་བསྐོར་གནས་མཇལ་བྱེད་ལུགས་ཀྱི་སྐོར་དང་། དེའི་སྟེང་དུ། རྒྱུ་བཞི་བ་རྐྱེན་སྨོན་ལམ་དག་པས་མཚམས་སྦྱོར་བའི་སྐོར་འདི་ཉིན་བཞི་བའི་ཞིང་ཁྲིད་ལ་རྒྱས་བཤད་འདྲ་ཞིག་བྱེད་དགོས་བསམ་ཡང་། དུས་ཚོད་ཀྱིས་ད་ཐེངས་མ་འདང་བ་རེད། ཡིན་ན་ཡང་ཉན་ཐུབ་མཁན་ཞིག་ལ། ད་སྔ་ཆགས་མེད་བདེ་སྨོན་གྱི་ཐོག་ནས་ཞིང་ཁྲིད་རྒྱས་པ་ཚར་གཉིས། ཡང་ངས་བྲིས་པའི་བདེ་སྨོན་ཐུང་ཐུང་གི་སྟེང་ནས་ན་ནིང་ཞིག་ལ་ཚར་གཅིག་བཤད་ཡོད། དེ་མིན་རུང་ད་ལོའི་ལོ་རིང་ལ་ས་ཆ་གཞན་ནས་བཤད་ཡོད་པས། རྗེས་མ་དེ་ཚོའི་སྒྲ་ཕབས་ཀྱི་འོད་ལྡེར་འདྲ་ཉན་རྒྱུ་ཡོད་ཡོང་དུས་ཉན་ཆོག་པ་རེད། མི་ཉན་པ་དང་ཞེ་ལ་མི་འཛིན་པ་ལ་ད་རེས་མི་ཚད་གཞན་དུ་ཐེངས་མ་བརྒྱ་ལ་རྣ་ལམ་དུ་བསྒྲགས་རུང་། ཁྱི་ལ་སྐར་མ་བསྟན་པ་ལྟ་བུའི་མྱི་ཡོད་པ་རེད། དེ་འདྲ་བ་དེ་ནི་ཆོས་ལ་དང་འདོད་མེད་པ་ཡིན་ཡང་། འདིའི་ནང་ན་དེ་འདྲ་ཡོད་རྒྱུ་མ་རེད་བསམ་བཞིན་ཡོད། འདིའི་ནང་ལ་གོམ་པ་ཞིག་སྤོས་ཚད་པོས་རྣམ་དཔྱོད་ཀྱི་བློ་མིག་རྒྱ་ཆེ་ཆུང་ལ་མ་ལྟོས་པར། རང་རང་ལ་ཆེ་ཚད་ཆུང་མིིན་གྱིས་བརྟག་དཔྱད་བྱེད་པའི་རྣམ་དཔྱོད་ཅིག་ཡོད་པའི་རྟགས་ཀྱིས་ཡོང་གི་འདུག་པ་རེད་མ་གཏོགས་མེད་ན་ཡོང་དོན་མེད།

འདིར་འདུས་ཚད་སྔར་བསགས་ལས་དང་སྨོན་ལམ་གྱིས་ཆོས་འདི་དང་ཆོས་བརྒྱུད་འདི་ལ་འབྲེལ་བའི་མྱི་རེད་ཟེར་ཆོག་རེད། དེ་ཡང་སྔོན་འགྲོའི་ངག་འདོན་གྱི་ཐད་ནས་ད་སྔ་ཀུན་བཟང་བླ་མའི་ཞལ་ལུང་ཐེངས་གཅིག་ལ་ཁྲིད་པ་རེད། རྣམ་མཁྱེན་ལམ་བཟང་གི་སྟེང་ནས་ཚར་གཅིག་བཏོན་པ་རེད། ཀུན་མཁྱེན་ཆེན་པོའི་གསུང་མཛོད་བདུན་གྱི་ནང་གི་མན་ངག་མཛོད་བློ་སྦྱོང་ལྟར་དུ་བཀྲལ་བ་གཙོར་འདོན་བྱས་ནས་ཐེངས་གཅིག་ལ་བཏོན་པ་ཡིན། དེ་ཡང་དགེ་བསྙེན་ཕོ་མོ་མང་པོས་ཉན་ཡོད་ས་ཡོད། ཀུན་བཟང་ཞལ་ལུང་ནང་གི་བློ་ལྡོག་རྣམ་བཞི་ཡང་ཟུར་བཀོལ་བྱས་ནས་ཐེངས་གཅིག་ལ་བཏོན་སྣང་ཡོད། སྤྱིར་ན་བློ་སྦྱོང་གི་སྐོར་འདི་ཆོས་དུང་ཞིག་མ་བོས་ན་མ་གཏོགས་མ་བཤད་པ་ཞིག་ཡོད་མ་རེད། དེ་ཚོ་ལ་ཁྱིམ་པ་ཕོ་མོ་ཚོས་ཞོར་དུ་ཉན་ན་ཕན་ཐོག་རེ་འབྱུང་སྲིད་རེད། རྒྱུན་གྱི་ཚོགས་བསགས་མཆོད་འབུལ། གནས་སྐོར་མཆོད་མཇལ་ལ་སོགས་པའི་དགེ་རྩ་ཆེ་ཆུང་ཅི་ཞིག་སྒྲུབ་ནའང་། སྦྱོར་དངོས་རྗེས་གསུམ་དམ་པ་རྣམ་གསུམ་དང་མི་འབྲལ་བ་གྱིས་དང་དེའི་ནང་ལ་འདུས་ཡོད་པ་རེད། དེ་མིན་ད་རེས་དུས་ཚོད་ཆེན་པོ་ཞིག་ཡོད་པ་མ་རེད། དུས་ཟེར་རྒྱུ་འདི་སྐད་ཅིག་ཐེངས་གཅིག་ལ་མི་འདུག་པར་རང་རེའི་མི་ཚེའི་དུས་ཚོད་རིན་ཐང་ཅན་པོ་དང་མཉམ་དུ་འགྲོ་བཞིན་ཡོད་ན། མིག་གཅིག་གི་སྟབས་བསྒྱུར་ལ་ཡང་ད་ལོའི་བདེ་ཆེན་ཞིང་སྒྲུབ་གྲོལ་རན་སོང་རེད། ཞིང་ཁྲིད་ཀྱི་ཆོས་ཁྲིད་ཉི་མ་བཞི་བོ་ཚང་ནས་ད་ནི་ཆུ་ཚོད་སྐར་ཆ་ཆ་ཤས་ཀྱི་འཕྲོ་ནས། རང་རེ་འདི་ན་འདུས་པ་ཐམས་ཅད་ཀྱང་ཕྱོགས་བཞི་མཚམས་བརྒྱད་ཀྱི་རང་གནས་སོ་སོ་ལ་འགྲོ་རན་པའི་དུས་ཐོག་ལ་ཐོན་སོང་རེད། འུ་ཅག་མཉམ་དུ་འདི་འདྲའི་ཞིང་ཁྲིད་ཅི་ཙམ་འཚོག་རྒྱུ་ཡོད་སུས་ཤེས། ལར་འཚོགས་རྒྱུ་ཨེ་ཡོད་ཀྱང་སུས་ཤེས། གཅིག་རྟག་ན་གཅིག་མི་རྟག་གི་ཡིན་ན། ན་ནིང་ཆོས་རའི་ནང་ན་ཡོད་ན་ད་ལོ་ཕྱི་མའི་ཡུལ་ལ་བུད་སོང་བ་གང་མང་མང་རེད། དེས་ཀྱང་རང་གཞན་གྱི་ཚེ་ལ་ཡིད་རྟོན་མེད་པའི་འདྲ་དཔེ་བསྟན་པ་རེད། དེ་རིང་ཆོས་ཁྲིད་གྲོལ་བ་དང་རང་རེ་སོ་སོར་འབྲལ་བ་འདི་བཞིན་དུ། འདུས་མཐའ་འབྲལ། བསགས་མཐའ་འཛད། མཐོ་མཐའ་ལྷུང་། འབྱོར་མཐའ་རྒུད་པའི་རང་བཞིན་ཅན་མི་རྟག་མཐའ་བཞིའི་བསྡུས་པའི་འཇིག་རྟེན་གྱི་ཆོས་ཉིད་ནི་དེ་འདྲ་ཞིག་ཡིན་པ་ཚང་མས་ཤེས་བཞིན་པ་ལྟར་དུ། ཁྱིམ་བཟའ་ཚང་དགའ་ཉེ་མཐུན་གྲོགས་དང་མཉམ་དུ་འགྲོགས་རྒྱུ་འདི་ཡང་། མཐའ་མར་དུས་ཚོད་ཚང་སོང་དུས་འདི་བཞིན་དུ་འབྲལ་བ་མ་གཏོགས་ཡུན་གྱིས་འགྲོགས་ཐབས་མེད། དེ་མ་དགོས་གཅེས་པར་བསྐྱངས་པའི་རང་ལུས་ཀྱང་གོང་ནས་བཤད་པ་ལྟར། ཉིན་གཅིག་བསྐྱུར་ནས་བེམ་རིག་འབྲལ་བའི་དུས་ཚོད་ནི་སྔ་ཕྱི་མ་གཏོགས་མྱི་གཅིག་གི་སྟེང་ལ་ཡོང་བ་འདྲ་ཞིག་ཚང་མའི་སྟེང་ལ་ཡོང་རྒྱུ་དེ། ཁ་སང་བླ་བདེ་ཡི་ཚབ་ལ་ཉིན་གཅིག་རང་ཉིད་ཀྱང་འགྲོ་རན་པ་གོམ་པ་སྔ་འཕྲོ་ཕྱི་འཕྲོ་ཞིག་རེད། གསོན་ཚེ་འདིའི་རིང་ལའང་རང་དབང་རང་ལ་ཡོད་པ་མ་རེད། ཅིའི་ཕྱིར་ཡོད་མ་རེད་ཅེ་ན། མི་ཤི་བསམ་ན་རང་དབང་མེད། མི་རྒས་བསམ་ནའང་རང་དབང་མེད་ཀི་མོ། མི་ན་བསམ་ནའང་རང་དབང་གཏན་ནས་མེད་ཀི་ཡིན་ན། མི་འདོད་པ་ཐོག་ལ་མ་བབས་ན་བསམ་ནའང་རང་དབང་གཏན་ནས་མེད་པར་བབས་ཡོང་གི འདོད་པ་ཞིག་ཐོག་ལ་ཨེ་ཁེལ་བལྟ་དུས་རང་དབང་མེད་ནས་བསམ་རྒྱུའི་འདོད་པ་ཐོག་ལ་གཏན་ནས་མི་ཁེལ་བ་ཡིན་ན། ཕྱི་མ་དམྱལ་བ་ཡི་དྭགས་དུད་འགྲོ་མ་དགོས་མྱིའི་ལུས་རྟེན་ནད་མེད་དབང་པོ་ཚང་། ཕྱིའི་རྒྱུ་ནོར་ནང་ཤེས་ཡོན་དམ་པའི་ཡོན་ཏན་མང་པོས་བརྒྱན་པ་ཞིག་བསམ་བསམ་ཡང་། བསམ་པ་རྐྱང་བས་རང་དབང་གཏན་ནས་མེད་པ། དབང་མེད་འཁོར་བའི་སྡུག་བསྔལ་འདིའི་ནང་ནས་རང་གཞན་ཐམས་ཅད་ཐར། ཚེ་འདིར་ཆོས་ནོར་འདོད་དང་ཐར་བའི་ཕུན་ཚོགས་སྡེ་བཞི་འཛོམས། ཕྱི་མ་བདེ་ནས་བདེ་བའི་ལམ་ལ་བསྐྱོད་དེ། ཟག་མེད་ཀྱི་བདེ་བ་ཆེན་པོའི་དགའ་སྟོན་ལ་ལོངས་སུ་སྤྱོད་རྒྱུའི་དོན་ལ་དམ་པའི་ལྷ་ཆོས་སྒྲུབ་དགོས་པ་རེད། དེས་ན་འདིའི་རང་དབང་མེད་པའི་ཕུགས་དེ་བཅད་ཡོང་ན། འདི་ག་ཤེད་ལ་གཅིག་གིས་བཙན་པོ་དབང་ཡོད་བྱས་ནས་ལས་མ་དྲང་བར་འཁོར་བའི་སེམས་ཅན་ལ་མནར་གཅོད་གཏོང་གི་འདུག་པའི་བྱེད་པོ་གཞན་དག་ཞིག་ཟུར་ན་ཡོད་པ་མ་རེད། འདི་གང་ལས་བྱུང་ཞེ་ན། སྲིན་བུ་རང་གི་ལུས་ནས་བུད་པའི་ཁ་ཆུ་དར་སྐུད་ཀྱིས་རང་གི་ལུས་པོ་འཆིང་གི་ཡོད་པ་འདྲ་བོ་འདི། གཞི་མ་འཁྲུལ་ཡང་། གཞི་མ་འཁྲུལ་བ་ལས་གཞི་སྣང་གིས་འཁྲུལ། རང་སྣང་གཞན་དུ་བཟུང་ཞིང་མ་རིག་པའི་དབང་དུ་སོང་ནས་ལས་དང་ཉོན་མོངས་ཀྱི་དྲྭ་བའི་འགོ་དེ་ནས་བཙུགས་ཏེ། ཐོག་མེད་ནས་ད་ལྟའི་བར་ལ་གཉིད་མ་བདེ་བའི་རྨི་ལམ་གྱི་སྣང་བ་སད་རྒྱུ་མེད་པ་འཁྲུལ་རྒྱུན་རིང་ལ་འཁྲུལ་ཚབ་ཆེ་བའི་སྣང་བ་འདི་བྱུང་བ་ཡིན། འདིའི་རྩ་བ་དེད་ནས་སོང་དུས་རང་ཉིད་ལ་དེ་ལྟར་ཐུག་ཡོད། ཁྱོད་ཡིན་པ་རྒྱལ་པོའི་རྒྱལ་སྲས་ཡིན། ཁྱོད་མྱི་རང་གིས་འཇོན་ན་རྒྱལ་སྲིད་མངའ་ཐང་དེ་བསྐྱངས་ཆོག་པ་ཅན་པོ། རང་ངོ་རང་གིས་མ་ཤེས་པར་ཐང་འཁྱམས་ལ་སོང་ནས། ཁྱོད་ཀྱིས་སློང་ཟས་གཞན་ལས་བསླངས་ནས་འཚོ་བ་གཞན་བསྟེན་གྱིས་སྐྱེལ་དགོས་པའི་ཉམ་ཆུང་བརྒྱ་ཡི་གྲལ་རྔ་ན། རང་དབང་རང་ལ་མེད་པར་ལྟོགས་སྐོམ་ཚ་གྲང་གི་སྡུག་བསྔལ་མྱོང་མི་བབས་རྒྱུ་བོ་རང་གིས་ཉོས་པ་རེད་ཟེར་རྒྱུའི་གོ་བའི་ཁྱེར་ཕྱོགས་འདྲ་ཞིག་ལ་འབབ་ཀྱིན་ཡོད་པ་རེད། ད་རེས་ཉི་མ་བཞི་པོའི་ཆོས་ཁྲིད་ཀྱི་གོ་དོན་ཚུར་ཕྱོགས་སྡོམ་ཞིག་བྱས་ན། འུ་ཅག་ས་འདིའི་སྟེང་ལ་འགྲོ་བ་མིའི་ལུས་རྟེན་ཞིག་བླངས་པ་ཡིན་ན། འདིར་འགྲེང་སྟེ་འགྲོ་བའི་རྐང་གཉིས་མི་ཟེར་བ་དེ་རེད། མཐོ་རིས་ཀྱི་ལུས་རྟེན་རྣམ་དཔྱོད་དང་བློ་གྲོས་སྲོག་ཆགས་གཞན་ལས་ལྷག་པ་ཞིག་ཡིན་དུས། དུད་འགྲོ་རྨོངས་པ་ལས་ལྷག་པའི་རང་གཞན་འདི་ཕྱིའི་བདེ་དོན་ལ་བསམ་བློ་ཞིག་གཏོང་ཤེས་པར་མ་ཚད་འདང་ཞིག་ཕོག ཚོད་ཅིག་ཐིག་དགོས་ཟེར་རྒྱུ་དེའི་གཏམ་གྱི་གླེང་གཞི་ནས་མགོ་བཟུང་སྟེ། དབང་མེད་ཉམ་ཆུང་གི་སྐྱེ་བོའི་ཚེ་སྲོག་འདི་ལ་ཡིད་བརྟན་མེད་པ། ཡིད་བརྟན་མེད་པའི་ཁར་ཚེ་འདིའི་བདེ་སྐྱིད་ཀྱང་ལུས་ཀྱི་བདེ་སྐྱིད་འདི་གཙོ་བོ་མ་རེད། སེམས་ཀྱི་བདེ་སྐྱིད་འདི་གཙོ་བོ་རེད་ཡོད་པས། འདི་སྒྲུབ་ཐབས་ཆོས་ལས་མ་གཏོགས་མི་རྙེད་པ། ཚེ་འདིའི་སྐྱིད་ཐབས་བདེ་ཐབས་རྐྱང་བའི་བྱ་བ་ཞིག་སྒྲུབ་དགོས་ན་ཡང་། མྱི་ནུས་པས་མ་འདང་ན། དེ་ལས་བརྒལ་བའི་ནུས་པ་ཅན་དཀོན་མཆོག་གསུམ་པོར་མི་བསྟེན་ཐབས་མེད་ཡིན་པས། ད་ནི་གང་ལ་བསམ་བློ་བཏང་ན་ཆོས་ཀྱི་འཚོ་བ་ནི་མྱིའི་འཚོ་བའི་ནང་ལ་མེད་པའི་ཐབས་མེད་ཅིག་རེད་བསྡད་ཡོད་པ། དེ་མེད་ན་དུད་འགྲོ་སྒོ་ཟོག་དང་ཁྱད་པར་མི་ཆེ་བ་བསམ་རྒྱུའི་ཕྱོགས་དེ་རིག་པ་རེད། དེ་རིག་ནས་ཆོས་སྒྲུབ་པའི་ཕན་ཐོག་སྤྱོད་སྒོ་ཅི་ཡིན་ཤེས་སོང་པ་རེད། ཆོས་ནི་ཇི་འདྲ་ཞིག་ཡིན་པ་རགས་རིམ་ཧ་ལམ་པ་ངེས་ཀྱང་། དེ་ཚོ་ཤེས་ནི་རྐྱང་བས་མི་ཆོག་པར་ཆོས་དངོས་སུ་སྒྲུབ་ན་གཞི་ནས་འབྲས་བུ་འབྱིན། ཆུ་རིག་ན་སྐོམ་མི་སོད། ཆུའི་ནུས་པ་ཤེས་ཀྱང་ཕན་ཐོགས་མེད། ཆུ་བཏུང་བཏང་ནས་ཁོག་པའི་ནང་ལ་བུད་སོང་ན་སྐོམ་སོད་པ་ལྟར་ཡིན། སྔར་ཡང་དེ་ལྟར་མང་བོ་བཤད་མྱོང་རེད། ཡང་ཆོས་སྒྲུབ་ས་ལ་ཐུག་དུས། སྐྱེས་བུ་ཆེ་འབྲིང་ཆུང་གསུམ་ཐེག་པ་གསུམ་གྱི་རྣམ་གཞག་མདོ་དང་སྔགས་ཀྱི་ཆོས་ཚུལ་ལ་སོགས་པ། སྐས་ཀྱི་བང་རིམ་འདྲ་བའི་རིམ་པ་བརྒྱུད་དགོས་རེད་བསམ་རྒྱུ་ཞིག་ཤེས་སོང་བ་རེད། དེ་ན་ཡང་ནད་དང་སྨན་སྤྲད་པ་འདྲ་བར་གདུལ་བྱ་སོ་སོ་ལ་གང་འཕྲོད་ལྟར་གྱི་ཆོས་བསྟན་པ་རེད་བསམ་རྒྱུ་ཡང་ཤེས་སོང་བ་རེད། ཐུབ་པ་སངས་རྒྱས་བཅོམ་ལྡན་འདས་ཀྱི་ཆོས་སྒོ་མཐའ་དག་མཐར་གདུལ་བྱ་ཐར་ལམ་ལ་འགོད་ཆེད་དང་། དེ་ལ་ཡང་ལམ་གྱི་མྱུར་ཞན་དང་གདམས་པའི་ཟབ་ཁྱད་ལ་གནམ་ས་འདྲ་རྒྱུག་པ་རེད་བསམ་པ་ཞིག་ཤེས་དུས། རབ་དང་སླ་མོ་མི་གདམ་པར་ངན་པ་དང་དཀའ་མོ་ཅི་ལ་གདམ་གི་འདུག། ཡུན་ཐུང་ཐུང་སྟབས་བདེ་མོ་ཡིས་བྱ་བ་དོན་ཆེན་འགྲུབ་མཁན། གདམ་རྒྱུ་རང་ལག་ལ་ཡོད་དུས་མ་གདམ་པའི་མྱི་དེ་ཚོ་མྱི་ཞིག་མ་རེད་གླེན་པ་ཞིག་རེད་ཅན་པོ་རེད། དེ་ནི་མྱི་ཀླད་མེད་ཀྱི་འདང་རྒྱག་རེད་ཡོད་ཀི། དེ་དག་ཐམས་ཅད་གཏན་ལ་ཕབས་ན་ལམ་ལོག་པ་ལས་ལྡོག་པའི་ཆེད་དུ་སྐྱབས་འགྲོ་དགོས། ལམ་དམན་པ་ལས་ལྡོག་པའི་ཆེད་དུ་སེམས་བསྐྱེད་དགོས། དེའི་སྟེང་ནས་ཚོགས་བསགས་སྒྲིབ་སྦྱངས་བྱ་རྒྱུ་འདི་མེད་ཐབས་མེད་པ། བསོད་ནམས་ཀྱི་ཚོགས་བསགས་པ་ལ་བསྟེན་ནས་ཡེ་ཤེས་ཀྱི་ཚོགས་རྫོགས་པ་རེད། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་དུས། ཚོགས་གཉིས་ཤིང་རྟ་ཞིག་ལ་མཚོན་ན་འཕང་ལོ་གཉིས་ལྡན་རེད། བྱ་ཞིག་ལ་མཚོན་ན་གཤོག་པ་གཉིས་ལྡན་འཕུར་ནས་གནམ་འཕངས་གཅོད་ཐུབ་པ་འདྲ་བ། རྣམ་མཁྱེན་རྫོགས་བྱང་གི་ས་ལ་བགྲོད་བྱེད་རེད་ཅེས་ཡན་ལག་བདུན་པ་བཤད་པ་རེད། ཚོགས་བསག་སྒྲིབ་པ་སྦྱང་བའི་ལག་རྗེས་དེ་ལ་བརྟེན་ནས་རྟོགས་ལྡན་བླ་མའི་དགོངས་བརྒྱུད་ཀྱི་བྱིན་རླབས། རྒྱལ་བ་ཐམས་ཅད་ཀྱི་ཐུགས་དང་གཉིས་སུ་མེད་པ་རང་རྒྱུད་ལ་བཙན་ཐབས་སུ་འཕོ་དགོས། གནད་ཡོངས་རྫོགས་དེའི་ནང་ལ་འདུས་ཡོད་ཅེས། མཐའ་གཞུག་བླ་མའི་རྣལ་འབྱོར་གྱི་ཁྲིད་བཤད་ནས་སྒོམ་རྒྱག་སྟངས་བསླབ་པ་ཡིན། དེ་ཡིན་ན་ཡང་། ཆོས་བཤད་རྒྱུ་གཅིག་དེ་ཆོས་ར་གཅིག་གི་ནང་དུ་མཉམ་པོར་ཉན་རུང་ཉམས་ལེན་ལག་ལེན་ལ་སྦྱོར་ས་ནས་ཐམས་ཅད་གཅིག་འདྲ་འདྲ་ཞིག་ཡོང་དཀའ་བ་རེད། ཚེ་འདིར་ལུས་འདིའི་སྟེང་ནས་གྲོལ་བ་ཐོབ་པའི་ཁྱིམ་པ་ཕོ་མོ་མེད་ཟེར་མི་ཤེས་ཀྱང་། ཐམས་ཅད་ཕྱམ་གཅིག་ལ་སྔོན་ཆད་རྒྱལ་པོ་ཨིནྡྲ་བྷུ་ཏི་འཁོར་ཚོམ་བུ་འབུམ་དང་བཅས་པ་གྲོལ་བ་འདྲ་ཞིག་དཀའ་བ་རེད། གལ་ཏེ་ཚེ་འདིར་མ་གྲོལ་ན་ད་ཅིའི་དགའ་ཟེར་ན། འཁོར་བ་འདི་ནས་སྐྱེ་བ་གཅིག་འདིའི་ཐོག་ནས་ཐར་བ་མ་ཐོབ་ནས་སྐྱེ་བ་གཞན་བརྒྱུད་དགོས་པས་བདེ་བ་ཅན་བས་དགའ་མེད། དག་ཞིང་གཞན་ཡིན་ན་ས་ཐོབ་ཀྱི་སེམས་དཔའ་མིན་ན་མི་ཐོན་ལ། བདེ་བ་ཅན་དག་པའི་ཞིང་ཁམས་ཁྱད་པར་ཅན་ཡིན་པ་བདེ་སྐྱིད་ལོངས་སྤྱོད། ཞིང་ཁམས་གཞན་སྟོང་ཕྲག་བརྒྱ་ཅུ་རྩ་གཅིག་གི་བདེ་སྐྱིད་བསྡོམས་ཡོད་ས། སངས་རྒྱས་འོད་དཔག་མེད་ཀྱི་ཐུགས་བསྐྱེད་དང་། སྨོན་ལམ་གྱིས་སོ་སོའི་སྐྱེ་བོ་ཡིན་རུང་ཐོན་ཐུབ་ས་ཅན་པོ། འདི་ལ་འདུན་པ་ཡིན་གཅིག་མིན་གཅིག་གཏད་དགོས་པ་རེད། བདེ་བ་ཅན་ལ་སྐྱེ་བའི་རྒྱུ་བཞི་ཚོགས་ན་ཅི་བཤད། རྒྱུ་བཞི་པོ་མ་ཚོགས་ན་ཡང་རྟེན་དང་རྒྱུ་སྨོན་ལམ་གསུམ་པོ་ཚོགས་ན་སྐྱེས་ཐུབ། རྟེན་ཞིང་ཁམས་ཡིད་ལ་བྱེད་པ་གཅིག་པོའི་ཀྱང་སྐྱེས་ཐུབ་གསུངས་ན་བློ་སྣ་འདུན་པ་དེ་ལ་གཏད་པ་ལས་དགའ་མེད། དེ་ནས་སྐྱེ་བ་གཅིག་བརྗེ་དུས་རྫོགས་པའི་བྱང་ཆུབ་ཀྱི་གོ་འཕང་རེད་འདུག དེ་མ་ཐོབ་ཀྱི་ཚེ་བདེ་སྐྱིད་ལ་སྤྱོད་བཞིན་ད་ལྟའི་སྐབས་ལ་བླ་སྤྲུལ་གྲྭ་ཚང་གི་སྡེ་དང་ཆོས་ར་གཅིག་གི་ནང་ལ་མཉམ་ཚོགས་བྱས་པ་ལྟར། དེ་དུས་བདེ་བ་ཅན་ནས་གྲོགས་ས་ཐོབ་ཀྱི་བྱང་སེམས་འཕགས་ཆེན་སོགས་དང་ལྷན་དུ་སངས་རྒྱས་འོད་དཔག་མེད་སྐུ་དངོས་ཀྱི་མདུན་ནས། ཆོས་ཉན་ཆོག་པར་མ་ཚད་ཞིང་ཁམས་གཞན་ལ་རྫུ་འཕྲུལ་གྱིས་སོང་སྟེ་སངས་རྒྱས་མང་པོའི་མདུན་ནས་ཀྱང་ཆོས་ཉན་ཆོག་གི་འདུག་ཅེས། འུ་ཅག་གིས་ཆོས་ཁྲིད་ཉིན་བཞི་བ་བདེ་ཆེན་ཞིང་ཁྲིད་ཀྱི་དོད་པོ་བྱས་ནས་བདེ་བ་ཅན་ལ་སྐྱེ་བའི་རྒྱུ་སྒྲུབ་དགོས་ཞེས་བདེ་ཆེན་ཞིང་ཁྲིད་དང་སྦྲེལ་བའི་མཚམས་འདི་ནས་ད་ལོའི་ཆོས་མཚམས་འཇོག་ས་ལ་ཐུག་པ་རེད། ད་སྐྱབས་འགྲོ་སེམས་བསྐྱེད་རྡོར་སེམས་བསྒོམ་བཟླས་མཎྜལ་བླ་མའི་རྣལ་འབྱོར། བདེ་ཆེན་ཞིང་ཁྲིད་བཅས་གང་ནས་བཤད་རུང་ཐམས་ཅད་པོའི་གནད་ཀྱི་འགག་མདོ་གཅིག་རེད། །འབབ་ས་གཅིག་ལ་བབས་པ་རེད། འབབ་ས་གཅིག་གང་རེད་ཅེ་ན། དད་པས་སྒོ་ཕྱེས་ནས་སྐྱབས་འགྲོ་གཞི་གདན་འཕང་། སེམས་བསྐྱེད་ཀྱི་ཐར་ལམ་ཡང་དག་ཞིག་བསྙེགས་ནས་ལམ་ཚོགས་བསག་སྒྲིབ་སྦྱངས་ཀྱི་རིམ་པ་བརྒྱུད་ནས། བླ་མའི་ཐུགས་སམ་སངས་རྒྱས་ཐམས་ཅད་ཀྱི་དགོངས་པ། མགོན་པོ་འོད་དཔག་མེད་དང་དབྱེར་མེད་ཀྱི་ཐུགས་ཀློང་དུ་ཚེ་འདི་ལ་གྲོལ་ན་རབ་རེད། མ་གྲོལ་ན་ཡང་བདེ་བ་ཅན་དུ་འགྲོ་བསམ་ན་བདེ་བ་ཅན་དང་། རི་བོ་པོ་ཏ་ལར་འཕགས་པ་སྤྱན་རས་གཟིགས་ཀྱི་ཞིང་ཁམས་ལ་འགྲོ་བསམ་ན་དེ་ལ། མིན་ན་འགའ་རེ་ཟངས་མདོག་དཔལ་རི་རིག་འཛིན་འདུས་པའི་ཚོགས་གྲལ་ལ་འགྲོ་བསམ་མཁན་ཡོད་ན། གང་དགའ་རང་ལག་ལ་ཡོད་པའི་རྡོ་རྗེའི་གསུང་བྱིན་རླབས་ཅན་གྱི་ངག་འདོན་གྱི་ལུང་རྒྱུན་ཁྲིད་རྒྱུན་ཡང་ཐོབ་པར་བྱས་པ་རེད། འཕགས་པ་སྤྱན་རས་གཟིགས། རྗེ་བཙུན་སྒྲོལ་མ། སློབ་དཔོན་པདྨ་ཚང་མ་སངས་རྒྱས་འོད་དཔག་མེད་ཀྱི་སྤྲུལ་བ་ཡིན་རེད། གང་གི་ཞིང་ཁམས་ལ་སྐྱེས་ན་གཅིག་པ་ཡིན་ཁྱད་པར་ཞིག་ཡོད་པ་མ་རེད། རྩ་བའི་ཡིག་ཆུང་ལ་ལྟོས་དང་། ཅེས་ཀུན་མཁྱེན་འཇིགས་གླིང་གི་གསུང་བྱིན་ཅན་ལས་དྲངས་པ་འདི་ཉིད་བཏོན་ལ་མ་ཎི་སིདྡྷི་སོགས་རྒྱུན་གྱི་དགེ་སྦྱོར་དང་ངག་འདོན་རིགས་ལ་འབད་དེ་བསྔོ་སྨོན་ཅི་ཤེས་བརྗོད། ཅེས་འཕགས་པ་སྤྱན་རས་གཟིགས་དང་གུ་རུ་རིན་པོ་ཆེའི་གཟུངས་སྔགས་མ་ཎི་སིདྡྷི་གཉིས་ལ་གསང་སྔགས་དང་ནི་རིག་སྔགས་ཀྱི་ནུས་པ་དང་བྱིན་རླབས་ཚང་བར་མི་ཚད། རྒྱལ་བ་རྫོགས་པའི་སངས་རྒྱས་ཀྱིས་གསུང་པའི་ཆོས་ཕུང་བརྒྱད་ཁྲི་བཞི་སྟོང་གི་སྙིང་པོ་ཐམས་ཅད་འདུས་པ་རེད། མ་ཎི་འདི་རྒྱ་གཞུང་གཙོ་བོར་བྱས་པའི་བཀའ་མའི་ནང་ན་ཡིག་དྲུག་ཨཱོཾ་མ་ཎི་པདྨེ་ཧཱུྃ་ཞེས་པ་འབྱུང་ཡང་། གཏེར་ཕྱོགས་ནས་ཡིག་བདུན་ཨོཾ་མ་ཎི་པདྨེ་ཧཱུྃ་ཧྲཱིཿཞེས་མཇུག་ན་ཧྲཱིཿཡོད་པ་ཅན་འདི་ཕར་ཆེར་འབྱུང་བས་ན། དུས་སྙིགས་མ་ལྔ་བདོ་འདི་ལ། ཉེ་བརྒྱུད་གཏེར་མའི་ཆོས་འདིའི་བྱིན་རླབས་ཀྱི་ཚན་ཁ་ལྷག་པར་མྱུར་བའི་སྟབས་ཀྱིས་སྤྱིར་ན་སྔ་འགྱུར་པ། ཁྱད་པར་དུ་རང་རེའི་ཆོས་རྒྱུན་གྱི་རྒྱུད་པ་འདིས་ཡིག་བདུན་གཙོ་བོར་མཛད་དེ། ཨཱོཾ་མ་ཎི་པདྨེ་ཧཱུྃ་ཧྲཱིཿཞེས་པ་བགྲང་པ་རེད། ཡིག་དྲུག་ཨཱོཾ་མ་ཎི་པདྨེ་ཧཱུྃ། ཞེས་བཏོན་ན་ཕན་ཡོན་ཆེན་པོ་ཡོད་པ་རེད། ཕྱི་ནི་སྲོག་བཟླས་ཞི་བའི་ཚུལ། །ཡི་གེ་དྲུག་པ་རྡོ་རྗེའི་སྒྲ། །ཞེས་གསུངས་པས། དེ་ལ་ཕན་ཡོན་ཡོད་མེད་ཅི་བཤད་ཡོང་། འོན་ཀྱང་། གསང་བ་སྲོག་གི་མཐའ་རྟེན་ཅན། །སྙིགས་མའི་དུས་སུ་སྲོག་མཐའ་རྟེན། །གསུངས་ནས་ཐུགས་སྲོག་གི་སྙིང་པོ་ཡི་གེ་གཅིག་ཏུ་བསྡུས་པ་ཧྲཱིཿཡིག་རེད། ཧྲཱིཿཡིག་གི་མཐའ་རྟེན་ཅན་འདི་སྙིགས་མའི་དུས་འདིར་ཐུགས་རྒྱུད་བསྐུལ་བར་ཐུགས་རྗེ་ལྷག་པར་མྱུར་གསུངས་པ་རེད། དེས་ན་མ་ཎི་རྡོ་ལ་བརྐོ་བ་དང་ཡང་མ་ཎི་རི་འབུར་བྱས་ནས་རི་ངོ་ལ་བརྐོ་དུས་ཨཱོཾ་དེ་འ་ཆུང་ཅན་ཡིན་དགོས། འ་ཆུང་ཅན་བརྐོས་ན་བཟང་། ཨཱོཾ་ཡེ་ཤེས་ལྔ་ལྡན་གྱི་གཟུགས་ཐམས་ཅད་ཆ་ཚང་ཡོང་བར་བྱེད་དགོས་པ་རེད། གུ་རུའི་གཟུངས་སྔགས་བཛྲ་གུ་རུ་འབྲུ་བཅུ་གཉིས་པ་ངག་འདོན་འདི་དང་སྦྲེལ་ནས་གསོག་ན། འདི་ལ་སྦྲེལ་ནས་ཚིག་བདུན་གསོལ་འདེབས་རེ་འགོ་ལ་བཏོན་ནས་བསག་ན། ཚིག་བདུན་གསོལ་འདེབས་འདི་ནི་མཁའ་འགྲོ་མ་འབུམ་ཕྲག་མང་པོས་གུ་རུ་རིན་པོ་ཆེ་ཚོགས་ཀྱི་འཁོར་ལོར་སྤྱན་འདྲེན་པའི་ཚིག གཏེར་ཁ་མང་པོ་ནས་འདི་མགྲིན་དབྱངས་གཅིག་གྱུར་གྱིས་བྱོན་པ། སྔར་རྒྱ་གར་ནས་དཔལ་ནཱ་ལེནྡྲའི་གཙུག་ལག་ཁང་མུ་སྟེགས་ཀྱི་སྟོན་པ་ལྔ་བརྒྱས་བཅོམ་ལ་ཉེ་བའི་སྐབས་སུ། མཁའ་འགྲོ་མ་ཞི་བ་མཆོག་གི་ལུང་བསྟན་ལྟར་པཎྜི་ཏ་ཐམས་ཅད་ཀྱིས་ཚིག་འདིས་གུ་རུ་རིན་པོ་ཆེ་སྤྱན་དྲངས་ཡོང་དུས། གུ་རུ་རིན་པོ་ཆེས་མཁའ་འགྲོ་མ་སེངྒེ་གདོང་བ་ཅན་ལ་བསེ་སྒྲོམ་གཏད་ནས་བཀའ་བསྒོས་པ་བཞིན་དུ་གནམ་ལྕགས་ཀྱི་ཐོག་ཕབས་ནས། མུ་སྟེགས་མ་རུང་པ་ཐམས་ཅད་ཚར་བཅད། ལྷག་མ་ཁ་ཤས་ལུས་པ་ནང་པའི་བསྟན་པ་ལ་བཙུད་པ་དེ་ལྟར་མཛད་པ་རེད། མ་ཎི་སིདྡྷིའི་ཚིག་འགྲེལ་དང་དོན་འགྲེལ་རྒྱ་ཆེན་ཡོད་ཀྱང་། ང་ཚོར་དུས་ཚོད་ཀྱིས་འདང་གི་མི་འདུག

ཨཱཿ ཐ་མར་དགེ་བ་མཇུག་གི་དོན།

ཐ་མར་དགེ་བ་མཇུག་གི་དོན་ཅན་པོའི་ཚབ་ལ་ངས་འདི་ཇི་ལྟར་བྲིས་པའི་རྩོམ་བྱང་། ཅེས་ཁྱིམ་ན་གནས་པའི་དགེ་བསྙེན་ཕོ་མོ་ལས་ཁུར་གྱིས་བྲེལ་བ་འགའི་དགོས་མཁོར་སྔ་ཐུན་གྱི་ཞོགས་པའི་ཐུན་བར་ཞིག་ལ་བྲིས་ཞེས། པདྨ་སྐལ་བཟང་དེས། ཞེས་པ་རེད། ཆོས་སྡེ་གཞན་འགའ་རེ་ལ་དགེ་བསྙེན་གྱི་སྡེ་ཞེས་པའི་སྒར་ཁ་ཟུར་བ་ཡོད་ས་ཡོད། ས་ཆ་འདི་ནས་འབྲོག་རུ་བསོད་ནམས་ལྷ་སྡེ་སྡེ་བ་ཚོ་ཁག་བཅུ་གསུམ་པོའི་ཕོ་མོ་རྒན་གཞོན་ཐམས་ཅད་སྐྱབས་གསུམ་འཛིན་པའི་དགེ་བསྙེན་ཡན་ཆད་ཀྱི་ཁྱིམ་པའི་ཕྱོགས་ཀྱི་སོ་ཐར་གྱི་བསླབ་ཚིག་གང་ཡང་རུང་བ་བླངས་མཁན་ཏག་ཏག་ཡིན་པས། རྒན་པ་ཐམས་ཅད་ཀྱིས་ལ་ལས་འབུམ་ལྔ་བསོག་འགའ་རེས་ཡང་བཟླས་གྲངས་དུང་ཕྱུར་བསོག་གི་ཡོད་པས། མང་ཆེ་བས་ཆོ་ག་ངག་འདོན་མ་བསྡུས་པ་རེ་དང་འབྲེལ་གི་ཡོད་ཀྱི་རེད། འདི་ཧ་ཅང་ལས་བྲེལ་ཅན་ཞེས་པ་ལོ་ཉུང་ཚོའི་དགོས་མཁོར་བྲིས་པ་ཅན་པོ་རེད། ལོ་ལྟར་ང་ག་ཤེད་ནས་ཐོན་ཡོང་དུས་ཐམས་ཅད་པོ་བསུ་བར་ཡོང་ནས་སྒོར་བུད་འདུག་པ། དེ་འདྲའི་བསུ་བ་བྱེད་པའི་སྐོར་ཞིག་ལ་འབབ་སྐལ་གྱི་ཚུལ་འདྲ་ཞིག་བྱས་ནས། རང་གར་དེའི་དུས་སྔ་དྲོ་ཞིག་ལ་མགྱོག་བྲིས་བྱས་པ་ཅན་པོ་རེད། དེ་ནས་ང་ཚོས་ཉི་མ་བཞི་ཡི་ཆོས་ཁྲིད་འཆད་ཉན་བྱས་པའི་ཆོས་དེ་ཙམ་གྱིས་ཀྱང་ཚེ་འདིའི་རྐྱེན་དང་བར་ཆད་སེལ། བསམ་དོན་ཡིད་བཞིན་དུ་འགྲུབ། འཆི་ཁར་མནར་གཅོད་ཀྱི་སྡུག་བསྔལ་མེད། ཕྱི་མ་དག་པའི་ཞིང་ཁམས་ཞིག་ཏུ་ཕ་ཁྱིམ་ལ་བུ་འགྲོ་འགྲོ་བྱས་ནས་འགྲོ་ཆོག་པའི་ཆོས་གདམས་པ་ཐོབ་རྒྱུ་ཉན་རྒྱུའི་ཐད་ནས་འདང་འགྲོ་བ་རེད། གསེར་གྱི་ལྡེ་མིག་ཞིག་ལག་ལ་བཞག་པ་ཡིན་པས་མཛོད་སྒོ་ནང་མ་ཕྱེས་རྒྱུའི་དབང་ཆ་བྱིན་བཏང་བ་རེད། སྒོ་ཇི་ལྟར་ཕྱེ་རྒྱུའི་མན་ངག་ནས་བཟུང་སྟེ་སྤྲད་པ་ཡིན། ལྡེ་མིག་དེ་བཟུང་བསྡད་ནས་ཕྱི་དོན་མེད་དོན་ཆུང་དོན་ལོག་གི་ད་སྔར་འགྲུབ་རྒྱུ་མེད་པ་གཉིད་བཟླས་བྱེད་ཀྱིན་མི་འདུག་པར། ནང་རང་གི་སེམས་ཉིད་ཡིད་བཞིན་རིན་པོ་ཆེའི་མཛོད་སྒོ་དེ་ཕྱེས་ནས། རང་གཞན་ཚང་མ་འཚེངས་བའི་ཚེ་གཅིག་ཡུན་ལ་གང་འདོད་ཅི་བསམ་འགྲུབ་པའི་འདོད་དོན་སྒྲུབ་དང་མི་སྒྲུབ་རང་གི་ལག་ལ་ཐུག དེ་ལས་གཞན་དུ་དག་པའི་ཞིང་ལ་རྡོ་འཕེན་འཕེན་དང་ཐར་བའི་ལམ་ལ་སྐྲ་སྤུ་ནས་བཟུང་སྟེ་དྲུད་འགྲོ་རྒྱུ་ཡོད་མ་རེད། སྔར་བྱོན་སངས་རྒྱས་གྲངས་མེད་ཀྱིས་ཇི་འདྲ་མཛད་རུང་འུ་ཅག་འཁོར་བའི་སེམས་ཅན་ད་རུང་འཁོར་བའི་མཐིལ་ལ་སྙིགས་འདུག་རྒྱུ་འདིས་ཀྱང་ཤེས་རེད། འཇིག་རྟེན་ཁྱིམ་པ་བས་རྒྱུ་ནོར་བསོག་བསྐྲུན་དགོས་པ་རེད། འོན་ཀྱང་ཚོད་དང་བསྟུན་པ། ཚུལ་དང་མཐུན་པ་ཞིག་བྱས། བསོད་ནམས་ཀྱི་བསགས་རྒྱབ་མ་ཞན་ན་ནོར་ལོངས་སྤྱོད་རང་འཁོར་ལ་ཡོང་རྒྱུ་རེད། དེ་དང་མཉམ་དུ་གོང་ནས་བཤད་པ་ནང་བཞིན་གྱིས་ཆོག་ཤེས་འཕགས་པའི་ནོར་ཡོད་དགོས་མ་གཏོགས། ཅི་ཙམ་བསག་ན་དེ་ཙམ་གྱི་མེད་སྣང་ཤར་ནས་ཕྱུག་པོ་ཡི་དྭགས་ཀྱི་གཏེར་སྲུང་རེད་རྒྱུ་ཡོད། ཉིན་ཞིག་རང་གི་བསགས་པ་གཞན་གྱིས་སྤྱོད་འགྲོ་བ་རེད། ནོར་རབ་ནི་ཕྱི་མའི་ཡུལ་ལ་ཁྱེར་འགྲོ་ཆོག་པ་ཅན་པོ། སུ་གཅིག་གིས་བརྐུ་ཐབས་འཕྲོག་ཐབས་མེད་པ་ཅན་པོ་ཚོགས་བསོག་དགོས་པ་རེད། ཅི་ཞིག་ཐད་ནས་ཡིན་ན་རྣམ་དཔྱོད་རྩལ་དུ་འདོན་དགོས། དེའི་སྟེང་ནས་ཆོས་དང་རིག་གནས་ལ་སློབ་སྦྱོང་བྱོས། སློབ་ལ་བརྩོན་པའི་དཀའ་སྤྱད་ཡུད་ཙམ་དེ། །རྨོངས་པས་འཆིང་བའི་སྡུག་བསྔལ་ཇི་སྲིད་དོ། །གསུངས་པས་དུས་ཚོད་སྐར་ཆ་ཙམ་ཡང་དོན་མེད་ཆུད་ཟོས་འཕྲོ་བརླག་ལ་མ་མངག །རང་རེའི་ཆུད་ཟོས་སུ་བཏང་བཞིན་པའི་དེ་རིང་གི་དུས་འདི་ཁ་སང་གི་དུས་ལས་ཡོལ་སོང་བ་མྱི་རྣམས་ཀྱིས་མི་ཚེའི་རེ་འབོད་ཀྱི་སང་ཉིན་འདྲ་བོ་རེད། བྱུང་ནས་ཡལ་སོང་བའི་དུས་སྐད་ཅིག་གི་སྐར་ཆ་དེ། ད་ཕྱིར་ལ་ཕྱིར་དཀྲིས་ཕྱིར་ལོག་ཡོང་རྒྱུ་ཡོད་མ་རེད། དེ་ཡོད་པ་མི་སྲིད་པའི་ཤེས་བྱ་རེད། ད་འཕྱིས་ཚར་ཐལ་བསམ་རྒྱུའི་དུས་ཚོད་དེ་དམ་འཛིན་བྱོས་དང་རྗེས་ནས་ཡང་བལྟ་བྱས་ན་དེ་ནི་སྔ་བ་པོ་ཡིན་རེད། འཇིག་རྟེན་གྱི་མྱི་ལུས་ཞིག་བླངས་ནས་བྱ་བ་འདྲ་མིན་གྱི་སྣ་ལ་བསྡད་དུས་གཡོལ་ཐུབ་མེད་པའི་དཀའ་ངལ་ལ་ཐུག་རྒྱུ་ནི་རྒྱུན་ལྡན་ཡིན། དེ་མི་སྲིད་པ་ཞིག་མ་རེད། དེ་དུས་ཧ་ལས་སྙིང་ཤོར་ནས་བལྟས་མི་འདུག་པར་དཀའ་ངལ་ཁོ་རང་བེད་སྤྱད་ནས། དཀའ་ངལ་དེ་མཐུན་ཕྱོགས་ཀྱི་ལོངས་སྤྱོད་ཕུན་སུམ་ཚོགས་པའི་ཕྱོགས་ལ་བསྒྱུར་ཐབས་བྱེད་དགོས་པ་རེད། ངས་དུས་རྒྱུན་ཟེར་གྱིན་ཡོད། ལོངས་སྤྱོད་འབྱོར་བའི་ཐད་ནས་ཡར་ལ་མ་བལྟ་མར་ལ་ལྟོས། མྱི་བྱེད་པའི་ཆེད་དུ་རྒྱུ་བསོགས་པ་རེད་མ་གཏོགས་རྒྱུ་བསོག་རྒྱུའི་ཆེད་དུ་མྱི་ཞ་བཏང་རྒྱུ་མ་རེད། རིག་གནས་ཡོན་ཏན་གྱི་ཐད་ནས་མར་ལ་མ་བལྟ་ཡར་ལ་ལྟོས། ཡོན་ཏན་གྱི་རྒྱན་གྱིས་མཛེས་ཤིག་དང་ཡོན་ཏན་གྱི་འབྱོར་བ་ཡོད་པའི་མྱི་ཞིག་གི་སྐྱིད་ཅིག་འཇིག་རྟེན་འདི་ན་ཡོད་ནི་མ་རེད། སྐྱིད་མྱོང་རྒྱུ་ཕྱིས་བཞག་མ་བྱེད། ད་ལྟའི་སྐྱིད་ལ་སྐྱིད་ངོ་ཤེས་ན་སྐྱིད་མིག་གི་རིག་ཟེར་རྒྱུ་བོ་དེ་རེད། སྐྱིད་ངོ་མ་སྡུག་དང་མ་འདྲེས་པ་འཁོར་བའི་གནས་ན་མེད། ནང་སེམས་ཀྱིས་ཏིང་འཛིན་བསྒོམ་ན་རིམ་གྱིས་ཟག་མེད་ཀྱི་བདེ་བ་སྡུག་བསྔལ་དང་མ་འདྲེས་པ་ཞིག་མྱོང་ཐུབ།།

མདོར་ན་མཐའ་མའི་ཚིག་གཅིག་ནི་དྲན་དང་ཤེས་བཞིན་བག་ཡོད་གསུམ་དང་ཁ་མ་བྲལ། བླང་དོར་མི་བརྗེད་པའི་དྲན་པ། ཡེངས་པ་མེད་པའི་ཤེས་བཞིན། བཟོད་པ་ལྷུར་ལེན་པའི་བག་ཡོད་གསུམ་པོ་དང་མ་འབྲལ་བར་གྱིས། ཡ་རབས་དམ་པའི་རྗེས་ལ་སློབ་དང་མི་ཚེ་དོན་ལྡན་ལ་འགྱུར་བ་རེད་ཟེར་རྒྱུའི་མཐའ་མཇུག་གི་སྐད་ཆ་འདྲ་ཞིག་ཡིན།།

དོན་དག་གཞན་ཞིག་ལ། རང་རེའི་རྫོགས་པ་ཆེན་པོའི་ཀློང་ཆེན་སྙིང་ཐིག་གི་ཆོས་ལ་ཞུགས་ནས། ཆོས་སྒྲུབ་ཀྱིན་ཡོད་རྒྱུའི་རྫོགས་པ་ཆེན་པོ་ཀློང་ཆེན་སྙིང་ཐིག་ཞུ་རྒྱུ། རང་རེའི་ཉམས་ལེན་གྱི་སྙིང་བོར་འཛིན་པའི་ཆོས་འདིའི་བཀའ་བབས་བསྟན་པའི་ཤིང་རྟ་སྲོལ་འབྱེད་ཀྱི་སློབ་དཔོན་ནི་ཀུན་མཁྱེན་འཇིགས་མེད་གླིང་པ་རེད། དེའི་གདན་ས་དབུས་ཀྱི་བྱང་ཆུབ་ལྗོན་པའི་ནགས་ཁྲོད་ཚེ་རིང་ལྗོངས་གསུང་པ་ཡེ་ཤེས་བླ་མའི་མཇུག་གི་མཛད་བྱང་གི་ནང་ན་ཡོད་རྒྱུ་དེ་རེད། ཀུན་མཁྱེན་འཇིགས་གླིང་གི་སྐུ་གདུང་དམར་གདུང་བྱས་ནས་ཚེ་རིང་ལྗོངས་ན་ཟངས་ཀྱི་སྒྲོམ་རིན་པོ་ཆེའི་ཟ་མ་ཏོག་ཞིག་གི་ནང་ན་བཞུགས་སུ་གསོལ་བ། རིག་གནས་གསར་བརྗེ་སྐབས་ལ་གཏོར་སོང་བས། སྐུ་གདུང་གི་ཕྱག་ཁ་ཡ་མ་གཏོགས་སུ་གཅིག་གིས་ལོན་ཡོད་མ་རེད། དེའི་ཕྱག་གི་སྐུ་ཤ་ཚང་མ་རིག་གནས་གསར་བརྗེ་མཇུག་སྒྲིལ་མ་ཐག་པར་ང་ཨ་ཅོ་བྱས་ནས་དབུས་ཕྱོགས་དང་ལྷོ་གནས་ཚང་མར་མཇལ་བསྐོར་བྱས་ཏེ་སོང་དུས། ཚེ་རིང་ལྗོངས་ཀྱི་གདན་ས་ན་སྔར་གྱི་རྗེ་བཙུན་མ་བྱང་ཆུབ་སྒྲོལ་མ་དེ་དུས་སྐུ་བཞུགས་ཡོད་པ་རེད། སྐུ་ཤ་དེ་ཐམས་ཅད་ང་ལ་སྤྲད་བྱུང་། དེའི་དུམ་བུར་བགོས་པ་གཅིག་ན་ནིང་རྫོགས་ཆེན་ཚང་གི་ནང་རྟེན་གྱི་གྲལ་དུ་ཡར་འབུལ་རྒྱུ་དེ་རེད། སྐུ་ཤ་དེའི་གཏའ་སྤེལ་གྱི་སྙིང་བོ་བྱས་ནས་ངའི་ཐེལ་ཚེ་ཡི་རྟགས་ལྡན་གྱི་འཇིགས་མེད་གླིང་བའི་སྐུ་རེ། ད་ལོར་སྙིང་ཐིག་དུམ་གཉིས་ཀྱི་དབང་ཞུ་བ་ཡོད་ཚད་ལ་རེ་རེ་དང་ནི། དེའི་ཞོར་དུ་ད་སྔ་ཆོས་དོན་གྱི་བགྱི་བ་ཆེ་ཆུང་ཐམས་ཅད་ལ་མྱི་རྒྱུ་ཟས་གསུམ་གྱིས་ཞབས་ཞུ་སྒྲུབ་པའི་འབྲེལ་ཡོད། འབྲོག་རུ་བསོད་ནམས་ལྷ་སྡེའི་མྱི་ཆེ་ཆུང་རྒན་གཞོན་མེད་པར་རེ་རེ་ཐེམས་རྒྱུའི་འཆར་གཞི་རེད། སྤྱིར་ན་པདྨ་ཐང་འདིའི་ཕྱི་ནང་གསང་གསུམ་མུ་ར་སྤྲུལ་སྐུ་མྱི་གཅིག་གིས་བལྟ་ཡི་ཡོད་པ་རེད། ངས་འདི་བཞིན་ཆོས་ཁྲིད་རེ་བཤད་རྒྱུ་ལས་གཞན་དུ། དོན་དག་ཆེ་ཆུང་གཅིག་ལ་མ་བལྟས་ནས་ལོ་མང་པོ་རེད། ད་ཁང་སྒོ་བརྒྱབ་ནས་ནང་ལ་འཛུལ་འགྲོ་བ་རེད། ངའི་བསམ་པ་ལ་མྱི་མང་ཡོང་གི་མི་འཇོག མྱི་ལ་ཐུག་འབྲེལ་མི་བྱེད་ཅེས་མྱི་ཕར་ལ་ཕུད་ཀྱིན་ཡོད་བསམ་པ་ཡོད་མ་རེད། མྱི་ལོ་དྲུག་ཅུ་ཐམ་པ་ལ་མྱི་ལ་གཤིབ་པ་ཡིན། མྱི་ལ་བཤད་པ་ཡིན། མྱི་དང་མཉམ་པོར་ལས་ཀ་ལས་པ་ཡིན། ད་མྱི་མང་འབྲེལ་འདྲིས་ཀྱི་འདང་ཚར་ནས་ད་མྱི་གྲལ་ནས་ཚུར་ལ་བུད་དེ་རི་ཁུག་ལ་གཅར་ནས་བསྡད་ཡོད་སྙམ་གྱིན་ཡོད་ཀྱང་། ཕར་ལ་བལྟས་པ་དང་ཚུར་ལ་བལྟས་པ་གཉིས་ཀ་འདྲ་གི་ཨེ་ཡོད་ཤེས་མ་རེད། དེ་མེད་དུས་ཁ་སང་བཤད་པ་ཅན་པོ། རང་གཞན་གཉིས་ཀ་མིན་པའི་མྱི་གསུམ་པ་མིག་དམིགས་བསལ་བ་ཞིག་གིས་བལྟས་ན། ཡང་ལྟ་ཚུལ་དང་མཐོང་ཚུལ་གཞན་དག་ཀྱང་ཡོད་པ་རེད་བསམ་རྒྱུ་ཅན་པོ་དེ་འདྲ་རེད། དོན་ངོ་མ་ཅི་ཞིག་བཤད་རྒྱུ་ཡོད་ཟེར་ན། ད་རེས་ཀྱི་སྐུ་འདིའི་ཐོག་མཐའ་བར་གསུམ་ཚང་མའི་འཆར་འགོད་མུ་ར་སྤྲུལ་སྐུས་གནང་གིན་ཡོད་པར་མ་ཟད། འགྲོ་སོང་ཡང་མུ་ར་སྤྲུལ་སྐུས་སྒེར་གྱི་རྒྱུ་ཕུད་ནས་བཟོས་པ་རེད། འདི་ངའི་ལག་ནས་ཡོང་བའི་ནང་རྟེན་འཁྲུལ་མེད་འཇིགས་མེད་གླིང་པའི་སྐུ་ཤ་ངོ་མ་སེལ་ཉམས་ཆགས་ཅན་གྱི་ལག་ལ་མ་སོང་། མ་བརྒྱུད་པར་ཉམས་མེད་པའི་ནང་རྟེན་བྱིན་ཅན་ཡིན། སྐྱེ་བདུན་གྱི་སྐུ་ཤ་ཟེར་ན་སྐྱེ་བདུན་གྱི་སྐུ་ཤ་རེད་ལ། རྒྱལ་བའི་རིང་བསྲེལ་ཟེར་ན་རིང་བསྲེལ་གྱི་མཆོག་ཡིན་རེད། སང་གནང་ཚོགས་འཁོར་ཚུན་ཆད་ལ་ཕལ་ཆེར་ལག་ཏུ་ཡོང་རྒྱུ་རེད། དེའི་དོན་དག་སྡེ་བའི་དཔོན་བློན་ཚང་མས་མུ་ར་སྤྲུལ་སྐུ་ལ་འབྲེལ་འདྲིས་གྱིས། དེའི་འཕྲོར་སྔར་ཤྲཱི་སེང་གི་འབྲི་སྤྱི་ཁུར་མཁན་ཚང་མ་ལ་དྲན་རྟེན་ཞིག་བྱིན་ཡང་མ་འཕྲོད་པ་ཆ་རེ་ཡོད་ས་ཡོད། དེ་ཐམས་ཅད་ཀྱིས་ད་ལོ་གཞུང་ལས་ཁང་ནས་ལོངས་དང་ལེན་རྒྱུ་ཡོད་ས་ཡོད། ལྕགས་རྙིའི་དཔའ་དར་ཁ་སང་ད་ཞག་བཤད་འདུག་རྒྱུ་དེ་ཡང་གཞུང་ལས་ཁང་ནས་བླང་ན་ཆོག་རེད། རང་རེའི་ཆོས་ར་འདིའི་ནང་ན་ས་ཐག་རིང་གི་ཡོང་པའི་ཆོས་ཞུ་པ་མང་པོ་རེད། དེ་ཐམས་ཅད་ཀྱིས་ས་ཐག་རིང་པོའི་འགྲུལ་བཞུད་ཀྱི་དཀའ་ལས་བརྒྱབ་ནས་ཆོས་ཕྱིར་དཀའ་སྤྱད་དང་ལེན་བྱེད་ཀྱིན་ཡོད་པ་རེད། འཇིག་རྟེན་ཁྱིམ་པ་ལས་བྲེལ་སྣ་ཚོགས་ཀྱིས་མི་ཁོམ་པ་མང་ཡང་། འདི་ཕྱི་གཉིས་ཕན་གྱི་དམ་པའི་ཆོས་རེ་ཐོབ་ན་བསམ་ནས་དོན་ཆེན་གནད་ཀྱི་དང་པོར་ཆོས་སྒྲུབ་རྒྱུར་བསམ་ནས་ཡོང་པ་རེད། ཁྱད་པར་དུ། ས་ཆ་ཁ་ཤས་མྱི་འགའ་རེ་ས་ཐག་རིང་གི་དཀའ་ངལ་དང་ལམ་གྲོན་ཆུང་ཆུང་རེད། ཡུལ་ཁྲིམས་བཙན་པོའི་ཉེན་ཁ་ལ་ཡང་མ་འཛེམ་པར་སྐྲག་ཞོར་འདར་ཞོར་བྲོས་ཞོར་གབ་ཞོར་ལ་ཡོང་མཁན་ཡང་མི་ཉུང་བ་ཡོད་ན། ཁྱེད་ཐམས་ཅད་པོ་ད་རེས་འདི་ལ་ཡོང་ནས་བསམ་པ་རྣམ་དག་གིས་ཆོས་ཞུས་པ་ཡིན་ན། ཁྱེད་ཚོའི་རྒྱུད་ལ་ཐར་བའི་ས་བོན་ཞིག་ཐེབས་ནས་རང་རྒྱུད་ཀྱི་སྒྲིབ་གཉིས་བག་ཆགས་དང་བཅས་པ་དག་སྟེ། མཐོ་རིས་རིམ་བརྒྱུད་ཀྱི་ཐར་བ་མཆོག་གི་གོ་འཕང་ཐོབ་རྒྱུ་དང་ནི། ཁྱེད་ཅག་གི་ཁྱིམ་མི་ཉེ་འབྲེལ་ད་རེས་མ་ཐོན་པ་ཐམས་ཅད་ཀྱི་ཆོས་སྐལ་ཡང་ཁྱེད་ཚང་མས་གོ་ཆོད་རྒྱུ། དེ་བཞིན་དུ་ཁྱེད་ཅག་གི་ཁྱིམ་མི་ཉེ་འབྲེལ་འཇིག་རྟེན་ཕྱི་མའི་ཡུལ་དུ་སོང་ཚད་ལ་ཡང་། བདེ་འགྲོ་རིམ་བརྒྱུད་ཀྱིས་འཁོར་བའི་སྡུག་བསྔལ་ལས་གཏན་དུ་ཐར་བའི་སྨོན་ལམ་རྒྱག་གི་འདུག་ཟེར་རྒྱུ། ད་རུང་ཉི་མ་ཉིས་གསུམ་ལ་དབང་ཆོས་རེ་ལ་མཉམ་པོར་ཞུགས་ཆོག་ངས་ཀྱང་འདིའི་མཚམས་ནས་ཡང་ངག་བཅད་བྱེད་འགྲོ་བ་རེད། དེ་རིང་ནས་བཟུང་གཞིས་བྱེས་ཐམས་ཅད་ལ་སྐད་ཆ་བཤད་རྒྱུའི་གོ་སྐབས་ཡོད་ཀྱི་མ་རེད། ཁྱེད་ཐག་རིང་གི་ཆོས་ཞུ་པ་ཐམས་ཅད་ཀྱིས་ལམ་ནས་མགོ་ཐོན་འཚམས་པོར་བདེ་འཇགས་ཀྱི་ཐོག་ནས་ཁྱིམ་མི་དང་གཞི་བྱེས་ལྷན་འཛོམས་ཡོང་བར་གྱིས། ཡང་ས་འདིའི་ཡུལ་མི་ཡིན་རུང་གནས་སྐབས་ཐུག་རྒྱུ་མ་རེད། ཁྱེད་གཞི་བ་བྱེས་པ་ཐམས་ཅད་པོ་བློ་བདེ་བག་ཕེབས་ཀྱི་ངང་ནས་ཚེ་འདིའི་བྱ་གཞག་སྒྲུབ་ཞོར་ལ། འཆི་བ་གློ་བུར་དུ་ཐོན་བཞག་ན་འགྱོད་པ་མེད་པ་ཞིག་གིས་འདི་ཕྱི་རང་གཞན་གཉིས་ཕན་གྱི་ཆོས་རེ་སྒྲུབ་རྒྱུ་མ་འཆུགས། ཆོས་སེམས་ཀྱིས་སྒྲུབ་རྒྱུ་གཙོ་བོར་བྱས་ན། དུས་ཚོད་དང་ཆ་རྐྱེན་ལ་སོགས་པ་ལྷག་གི་སྒྲིག་འདུག་མི་དགོས་རྒྱུའི་སྐོར་ནས་མང་པོ་བཤད་ཚར་བ་དེ་ཡིན། འཇིག་རྟེན་གྱི་བྱ་ལས་ཤིག་ཡིན་ན་དབང་ཆེ་ཆུང་ཁས་དྲག་ཞན་འབྱོར་བ་ཡོད་མེད་འགའ་རེས་ལོན་རྒྱུ་འགའ་རེས་མི་ལོན་རྒྱུ་ཡོད་ཀྱང་། ཆོས་འཛམ་གླིང་གི་ཉི་མ་ཀླད་ལ་འདྲ་མཉམ་པར་ཤར་བ་ཡིན་དུས། འབད་པ་སུ་ཡིས་བྱས་ན་སངས་རྒྱས་རང་ལག་རེད། དེ་ལ་བཙན་ཕྱུག་འཕན་གསུམ་འཛོམས་པའི་ཁས་གྲགས་འབྱོར་ལྡན་གང་ཡིན་ན་སླེབས་པ་ཐམས་ཅད་ཀྱིས། ཚེ་འདི་ཕྱི་གཉི་གའི་དོན་དག་འགྲུབ་བསམ་པ་ཡོད་ཀྱི་རེད་ལ་འགྲུབ་ཀྱང་ངོ་མས་འགྲུབ་ཀྱི་རེད། ས་འདིས་གཙོས་པའི་ཉམ་ཆུང་ཕལ་བའི་ཁྱིམ་ཚང་ཐམས་ཅད་ལ་ང་པདྨ་སྐལ་བཟང་ལྷག་པར་དུ་དུངས་ཞེན་ཡོད། ཁྱེད་ཉམ་ཆུང་གི་བརྒྱ་སྟོང་ཁྲི་འབུམ་གྱི་ཁྱིམ་ཚང་ལ་ང་རི་ཁྲོད་ཀྱི་མཚམས་པ་མི་ཐོན་པ་རེད། ཐོན་རུང་ངག་བཅད་ཁ་མི་གྲགས་མཁན་གྱི་མྱི་ཞིག་ཐོན་ན་ཡང་ཡོང་བའི་མྱིང་ཡང་མེད་ལ། ད་ས་ཁ་ཐག་རིང་པོ་ལེ་དབར་ཁྲི་ཕྲག་གིས་འགྱང་ཡང་སེམས་ཁ་ཐག་ཉེ་མོ་ཁྱེད་ཅག་གི་ཁྱིམ་ཕུགས་མཆོད་ཁང་ཆུང་ཆུང་བོའི་ནང་ན་ང་པདྨ་སྐལ་བཟང་རྟག་ཏུ་ཡོད། ང་རང་ཚང་གི་བླ་རྒན་སྒེར་ཐོབ་ཡིན་སོམས་སྡོད་དང་། ངས་མཆོག་གསུམ་སྐྱབས་གནས་དམ་པར་གསོལ་བ་བཏབ་ནས་ཁྱེད་ཅག་གི་ལྷག་བསམ་དང་འདུན་པའི་སྟོབས་ཀྱིས་ཁྱེད་ཅག་ལ་སྐྱིད་སྡུག་ཡག་ཉེས་གང་བྱུང་ལ་སྐྱིད་ཀྱི་གོང་ནོན་དང་སྡུག་གི་སྐྱོ་གྲོགས། སེམས་གངས་དཀར་གྱི་དྲོད་ཐིག་གཅིག་ཡོང་རྒྱུའི་སྨོན་ལམ་ངས་འདེབས་ཀྱིན་འདུག མདོར་ན་ངས་དུས་རྒྱུན་ཡིག་ཐོག་ནས་བྲིས་ན་ངག་ཐོག་ནས་བཤད་ན། རྒྱལ་སྲས་ཞི་བ་ལྷའི་སྤྱོད་འཇུག་བསྔོ་བའི་ལེའུ་སྨོན་ལམ་ནང་བཞིན་གྱིས་རྒྱལ་བའི་སྲས་ཀྱི་སྤྱོད་པ་ལ་བསླབ་པའི་སྨོན་ལམ་རྒྱག་གིན་ཡོད་པ་བཞིན་དུ། བཟང་ངན་ལས་ཀྱི་འབྲེལ་ཚད་གཙོ་བོར་བྱས་པའི། ཐ་ན་ང་ལ་ཟས་ཀྱིས་འབྲེལ་བ་བཞག་པའི་འབུ་སྦྲང་ཕྲ་མོ་ཚུན་ཆད་པོ། ང་མཐོང་ཐོས་ཀྱི་འགྲོ་བ། ངའི་ལུས་པོའི་རླུང་གི་རྫི་ཕྱོགས་ཕོག་ཚད་ནས་བཟུང་སྟེ་སེམས་ཅན་ཐམས་ཅད་ངས་བདེ་ནས་བདེ་བར་འགོད་ཐུབ་པར་སྨོན་ལམ་བཟང་པོ་ངས་སྙིང་ནས་འདེབས་ཀྱིན་ཡོད། དེ་ཡང་བསམ་དཀར་སྨོན་པའི་རྗེས་འགྲོ་ཙམ་ཞིག་ལས་ཕྱིན་དྲུག་རླབས་ཆེན་གྱི་སྤྱོད་པ་རྒྱ་མཚོ་ལྟ་བུའིི་འགྲམ་ངོགས་ལ་ཡང་ཐོན་ཡོད་མ་རེད་ཀྱང་། མྱུར་ལམ་རྫོགས་པ་ཆེན་མོའི་ཆོས་ཟབ་མོའི་ཉེ་བརྒྱུད་ཀྱི་བྱིན་རླབས་དང་ཆོས་ཉིད་བདེན་པའི་སྟོབས། ཡང་ན་དམ་པ་གོང་མའི་ཐུགས་བསྐྱེད་ཀྱི་མཐུས། གཅིག་ཐང་ན་འབྲེལ་ཚད་དོན་ལྡན་རེ་འབྱུང་སྲིད་ཀྱི་རེད་བསམ་པའི་ཡིད་ཆེས་ཡང་བྱེད་ཀྱི་ཡོད། དེ་ནས་ཚང་མས་དགའ་དགའ་སྤྲོ་སྤྲོ་གྱིས། བློ་བདེ་བག་ཕེབས་བྱོས་ཟེར་རྒྱུ་དང་བཅས་ཏེ་འདིའི་མཚམས་ནས་རྣམ་པ་གཉིས་ཀྱིསམགུར་དབྱངས་ཤིག་འཐེན། དེའི་མཚམས་ནས་བསྔོ་བ་བྱེད། །རྫོགས་ཆེན་མཆོག་གླིང་གི་སྤྲུལ་སྐུ་གུར་དགའ་ནས། རྟོགས་ལྡན་བློ་གྲོས་རྒྱ་མཚོའི་ཆོས་བརྒྱུད་དང་བླ་མའི་ཆེ་བ་བརྗོད་པ་དང་འབྲེལ་བའི་ཞལ་གདམས་བཞུགས་སོ།།

གནས་ཟངས་མདོག་དཔལ་རིའི་ཕོ་བྲང་ནས།།

ཕ་དུས་གསུམ་ཀུན་མཁྱེན་པདྨ་འབྱུང་།།

བུ་མོས་གུས་གདུང་བས་གསོལ་བ་འདེབས།།

ཐུགས་དགོངས་པའི་ཀློང་ནས་ཐུགས་རྗེས་གཟིགས།།

དགོངས་བརྡ་སྙན་གསུམ་ནི་བརྒྱུད་པ་བཟང་།།

རིགས་འདུས་ཀྱི་པད་འབྱུང་སྒྲུབ་ཐག་ཉེ།།

ཆོས་རྫོགས་པ་ཆེན་པོ་ཟབ་གནད་ཆེ།།

ཚེ་གཅིག་གིས་སངས་རྒྱས་ཐོབ་པ་ཡིན།།

ཀློང་ཆེན་གྱི་བྱིན་རླབས་བསམ་མི་ཁྱབ།།

དོན་སྙིང་ཐིག་གི་ལྟ་བ་མཁའ་ལྟར་ཡངས།།

བསྟན་པ་དེ་ནམ་ལངས་ཉི་ཤར་འདྲ།།

དོན་ཐུགས་རྒྱུད་རིག་པ་འོད་གསལ་ཞིང་།།

གང་ཤར་ཀུན་དག་པ་རབ་འབྱམས་ལ།།

རྐྱེན་བཟང་ངན་རིག་པའི་ཀློང་དུ་ཟད།།

སྣང་བ་ཀུན་དཔེ་ཆར་ཤར་ཙ་ན།།

ཅི་ཤར་ཀུན་ཆོས་ཉིད་ངང་དུ་ཟད།།

ཐ་སྙད་ཀྱི་ཚིག་ལ་རེ་མ་དགོས།།

བློ་གཏད་མེད་ཀྱི་ངང་ནས་ས་ལམ་རྫོགས།།

རང་རིག་ལ་སྐྱེ་འཆི་མེད་པ་ཡིན།།

འཁོར་འདས་ལ་བཟང་ངན་བླང་དོར་མེད།།

གཞི་གནད་ལ་རྫོགས་པའི་རིག་པ་འདི།།

སྤྲིན་མེད་ཀྱི་ནམ་མཁའ་སྟོང་པ་འདྲ།།

ལམ་འདི་ལ་འཇུག་འདོད་སྐལ་ལྡན་རྣམས།།

ཚེ་འདི་ལ་མ་ཞེན་རི་ཁྲོད་འགྲིམས།།

རང་སེམས་ཀྱི་རིག་པ་སངས་རྒྱས་ཉིད།།

དུས་ད་ལྟ་མཐོང་བ་སྐལ་བ་བཟང་།།

འདིར་བྲིས་ཀྱི་ཚིག་སྣ་དུམ་ཆོད་འདི།།

མ་བརྗེད་ཡིད་ལ་དམ་དུ་ཟུངས།།

དོན་བསམ་བཞིན་འགྲུབ་པའི་བཀྲ་ཤིས་ཤོག།

རྫོགས་ཆེན་ཤྲཱི་སེང་ཆོས་གྲྭའི་བསྟན་འཛིན་དགེ་ལེགས་ནས། ཞབས་དཀར་ཚོགས་དྲུག་རང་གྲོལ་གྱི་གསུང་མགུར་ལས།

བླ་མ་དཀོན་མཆོག་གསུམ་ལ་གསོལ་བ་འདེབས།།

བདག་གཞན་དོན་གཉིས་འགྲུབ་པར་བྱིན་གྱིས་རློབས།།

ཡར་མར་ནས་འོང་སློབ་བུ་ཡོན་བདག་རྣམས།།

ཚོང་འདུས་མགྲོན་པོ་བཞིན་དུ་ཡུད་ཙམ་ཚོགས།

ད་ནི་སོ་སོར་གྱེས་ནས་འགྲོ་དུས་འདིར།།

ཕན་ཚུན་གཅིག་གིས་གཅིག་ལ་སེམས་འཕྲེང་ཡང་།

མཐུན་པར་འགྲོགས་ནས་སོ་སོར་གྱེས་པ་དེ།།

འཇིག་རྟེན་འཁོར་བའི་ཆོས་ལུགས་ཡིན་པས་ན།།

སེམས་ནི་འཁྲེང་བ་གྱུར་ཀྱང་བྱ་ཐབས་མེད།།

སྐལ་ལྡན་བུ་སློབ་དད་ལྡན་སྦྱིན་བདག་ཀྱང་།།

དེང་ནས་བཟུང་སྟེ་ཚེ་རབས་ཐམས་ཅད་དུ།།

བྱམས་པའི་སེམས་ཀྱིས་ནམ་ཡང་ངས་མི་བརྗེད།།

ད་ནི་ཁྱེད་ནམ་རང་རང་གནས་སུ་ཕེབས།།

འཆི་བ་ནམ་འོང་མི་ཤེས་ཆོས་ལ་འབུངས།།

ཚེ་འདིར་ད་དུང་མཇལ་བའི་སྨོན་ལམ་འདེབས།།

ས་ཡང་ཁ་ཐག་རིང་པོའི་བར་ཆོད་ནས།

ཚེ་འདིར་དངོས་སུ་མཇལ་བར་མ་གྱུར་ན།།

ཕྱི་མ་དག་པའི་ཞིང་ནས་མཇལ་བར་ཤོག།

དཔོན་སློབ་ཐམས་ཅད་གང་དུ་སོང་ན་ཡང་།།

གང་བསམ་དོན་རྣམ་ཡིད་བཞིན་འགྲུབ་པར་ཤོག།

དཀོན་མཆོག་བྱིན་རླབས་སེམས་ལ་འཇུག་པར་ཤོག།

དགེ་ཚོགས་སྣོད་བཅུད་ཡོངས་ལ་སྨིན་པར་ཤོག།

ཕྱི་སྣོད་ཐམས་ཅད་དག་པའི་ཞིང་དུ་ཤོག།

ནང་བཅུད་སེམས་ཅན་ལྷ་དང་ལྷ་མོར་ཤོག།

ཡུལ་ཕྱོགས་རྩྭ་མེད་རྣམས་ལ་རྩྭ་སྐྱེས་ཤོག།

ལུང་པ་ཆུ་མེད་རྣམས་ལ་ཆུ་རྡོལ་ཤོག།

ས་ཆ་ཤིང་མེད་རྣམས་ལ་ཤིང་སྐྱེས་ཤོག།

ཞིང་ས་ལོ་མེད་རྣམས་ལ་ལོ་ཡག་ཤོག།

རྨང་པོ་བུ་མེད་རྣམས་ལ་བུ་སྐྱེས་ཤོག།

དབུལ་བོ་ནོར་མེད་རྣམས་ཀྱིས་ནོར་འཐོབ་ཤོག།

གླེན་པ་གོ་མེད་རྣམས་ལ་བློ་བསྐྱེད་ཤོག།

བན་སྔགས་ཆོས་མེད་རྣམས་ལ་ཆོས་འཕེལ་ཤོག།

བླ་མ་སློབ་མ་ཡོན་བདག་མཇལ་བར་ཤོག།

བཀྲ་ཤིས་ཆོས་མཐུན་སྒོ་ནས་མཇལ་བར་ཤོག།

ཆོས་ལྡན་བྱ་བ་བྱེད་དུས་མཇལ་བར་ཤོག།

རང་གཞན་དོན་གཉིས་སྒྲུབ་དུས་མཇལ་བར་ཤོག།

མི་ཕྱུགས་རྒས་ཁར་སྐྱིད་དང་འཕྲད་པར་ཤོག།

ཕ་མ་རྒས་ཁར་ཆོས་དང་འཕྲད་པར་ཤོག།

ཐམས་ཅད་འཆི་ཁར་ལམ་སྣ་ཟིན་པར་ཤོག།

ཅི་བསམ་ཐམས་ཅད་ལྷུན་གྱིས་འགྲུབ་པར་ཤོག།

རྣམ་པ་གཉིས་ཀྱི་གསུང་མགུར་ཡག་སོང་བཀའ་དྲིན་ཆེ། རྗེས་མ་དེ་ད་རུང་བཀྲ་ཤིས་སྨོན་ལམ་སྐོར་གྱི་རྟེན་འབྲེལ་བཟང་པོའི་ཚིག་དོན་སྙན་མོ་ཅན་ཞིག་གསུངས་སོང་།

དེ་ལྟར་ཆོས་འཆད་ཉན་བྱས་པ་དང་། ཐེངས་འདིའི་བདེ་ཆེན་ཞིང་མཆོད་ཆེན་མོ་ཕུལ་བ་དང་ཞིང་སྒྲུབ་ཉིན་བདུན་ལ་འཚོགས་ཏེ་རྒྱལ་བ་འོད་སྣང་མཐའ་ཡས་ཀྱི་དཀྱིལ་འཁོར་ཞལ་ཕྱེས་ཏེ། དེ་ལ་བསྟེན་པའི་ལྷ་བསྒོམས་སྔགས་བཟླས་སྨོན་ལམ་བཏབས་པའི་དགེ་བ་སྤྱི་དང་། བྱེ་བྲག་ཉིན་འདི་དག་གི་རིང་ལ་ཇོ་བོར་གསེར་ཆབ་གསོལ་མཁན། ཞལ་གསེར་སྒྲོན་མཁན། ན་བཟའ་འབུལ་མཁན། གསོལ་ལྷུང་དང་གསེར་རྐོང་སྒྲོན་མཁན། དགེ་འདུན་པའི་གསོལ་ཚིགས་ལ་བསྙེན་བཀུར་གྱི་ལས་ཀའི་ཞབས་འདེགས་བསྒྲུབས་མཁན། གསོལ་ཞོ་དྲངས་མཁན། དེ་མིན་དགེ་སྒྲུབ་སྡིག་སྤང་གི་ཁས་ལེན་བྱེད་མཁན་སྤྱི་དང་། ཁྱད་པར་སྒོ་བཤས་སྤང་མཁན། དམར་ཟས་སྤོང་མཁན། སྲོག་སླུ་ཚེ་ཐར་གཏོང་མཁན། འདིའི་བདེ་ཆེན་ཞིང་སྒྲུབ་དང་སེམས་བསྐྱེད་འབུམ་མཆོད་ཆེན་མོའི་གྲ་བསྒྲིགས་ཀྱི་སྐོར་སོགས་སུ་མིའི་ཤུགས་དང་དངུལ་ཤུགས་ཀྱིས་ཞབས་ཞུ་རོགས་སྐྱོར་བྱེད་མཁན། རང་མོས་གདོང་མཆོང་གི་ཐོག་ནས་འདིའི་བྱེད་སྒོ་གལ་ཆེན་གྱི་ལས་ཁུར་དང་ལེན་བྱེད་མཁན། ཁོར་ཡུག་གཙང་སྦྲ་དང་ཕྱི་ནང་གི་མཆོད་བཤམས་བྱེད་ནི། ཐ་ན་སེམས་དྭངས་བའི་སྒོ་ནས་མེ་ཏོག་རྐང་གཅིག་ཕུལ་བ། ལྷག་པའི་བསམ་པས་ཤོག་ཉོབ་ཁེར་རུ་ཞིག་བསལ་བའི་མི། ཆོས་སྒྲ་རྣ་བས་ཐོས་པ། ཆོས་ར་རྡོག་པས་བརྫིས་ཚད། དྭངས་བའི་སེམས་ཀྱིས་ལག་ཐལ་མོ་ཡ་གཅིག་གི་ཕྱག་རྒྱ་བཅས་པ་ཚུན་ཆད། སེམས་དགའ་བའི་ཡི་རངས་སྐད་ཅིག་མ་ཞིག་འདིར་ཕྱོགས་སུ་བགྱིས་པ་ལ་སོགས་པ། གང་བསྔོ་བྱ་དགེ་བའི་རྩ་བ་འདི་དག་དུས་གསུམ་གཤེགས་བཞུགས་འབྱོན་འགྱུར་གྱི་ཕྱོགས་བཅུའི་སངས་རྒྱས་སྲས་དང་བཅས་པའི་ཟག་མེད་ཀྱི་དགེ་རྩ་དང་། མཐའ་ཡས་སེམས་ཅན་ཐམས་ཅད་ཀྱིས་དུས་གསུམ་ཀུན་དུ་བསགས་པའི་ཟག་བཅས་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བསྡུམ་ཏེ་བསྡོམས་ནས། གང་ལ་བསྔོ་བ། འདིར་ཡོད་རང་རེ་ཐམས་ཅད་ཀྱི་ཚེ་འདིའི་ཕ་མ་གཉིས་དང་དགྲ་བགེགས་ཀྱི་གཙོར་བྱས་པའི་མར་གྱུར་མཁའ་མཉམ་གྱི་འགྲོ་བ་སྤྱི་དང་། གནའ་དུས་རབས་སྔོན་མར་བསྟན་དོན་ལ་རང་སྲོག་བཅད་པ། དེའི་འཕྲོར་དགག་པ་འཐབ་རྩོད་ནད་མུག་མཚོན་གསུམ་གྱི་འོག་ནས་ཤི་བའི་ཤི་བོ་ཆོས་མེད། བྱེ་བྲག་གདན་ས་ཆོས་འཁོར་འདིའི་བསྟན་པ་སླར་གསོའི་ཐོག་མའི་སྐབས་ལ་ཤྲཱི་སེང་ཆོས་གྲྭའི་བཞེངས་བསྐྲུན་གྱི་ཆེད་དུ་གྲོངས་སོང་བ། སྟག་སྨུག་གཉིས་ཀྱི་སྡེ་དཔོན་ཆབ་མདོའི་ཐུབ་བསྟན་བློ་གསལ། རྒྱབ་ཤེས་འབྲུག་ཚང་སྡེ་བའི་གྲྭ་གཞོན་ཚོང་དཔོན་ཐུབ་རྡོ། ཡུལ་སྡེ་བའི་སྤྱི་དོན་ལ་རང་སྲོག་ཤོར་མཁན་འབྲུག་ཆུའི་བསོན་ནམས་ཡེ་ཤེས་ལ་སོགས་པ། དེའི་ཐོག་ལ་གནའ་ཤི་རྙིང་བ་ད་ཤི་གསར་བ། གྲི་ཤི་འགག་ཤི་རེད་སོང་བ། རང་གཞན་ཐམས་ཅད་དང་འབྲེལ་བའི་ཤི་ནས་བདེ་འགྲོ་མ་ཐོབ་པར་ངན་སོང་ན་གནས་པ། ཤི་བ་རང་ངོ་མ་ཤེས་ནས་བར་དོར་ལུས་མཁན། མཁའ་ལ་རྒྱུ་བའི་སྡེར་གཏོགས་ཀྱི་རྒྱལ་པོ། བཙན་དང་མ་མོ་སྨན་མོ་སོགས་ཀྱི་འཁོར་དུ་སྐྱེས་ཡོད་པའི་ཉིན་མཚན་གོ་ལོག་སྣང་བ་དགྲར་ལང་གིས་དུས་རྟག་ཏུ་འཚེ་བར་སྤྱོད་མཁན་ལ་སོགས་པ། མཁའ་མཉམ་འགྲོ་བ་རིགས་དྲུག་གི་སེམས་ཅན་གྱི་དོན་ལ། ཅིའི་ཕྱིར་གང་དུ་བསྔོ་བ་སེམས་ཅན་དེ་དག་ཐམས་ཅད་ཀྱིས་ཐོག་མེད་ནས་བསགས་པའི་སྡིག་སྒྲིབ་བག་ཆགས་ཉམས་ཆགས་ཉེས་ལྟུང་དང་བཅས་པ་ཐམས་ཅད་བྱང་ནས། རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པ་དང་། དེ་མ་ཐོབ་ཀྱི་ཚེ་ལ་མཐོ་རིས་ལྷ་མིའི་ལུས་རྟེན་ཆོས་ལ་སྤྱོད་པའི་སྐལ་བ་ཅན་ཐོབ་ནས་བདེ་སྐྱིད་འབྱོར་བ་ཕུན་སུམ་ཚོགས་པ་དང་ལྡན། སྐྱེ་རྒུའི་བདེ་སྐྱིད་ཀྱི་གཞི་རྩ་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་གང་ན་སུ་བཞུགས་ཐམས་ཅད་པོའི་སྐུ་ཚེའི་ཞབས་པད་ཡུན་རིང་དུ་བརྟན། ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་གྲུབ། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་། ལམ་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། ཡུལ་ཕྱོགས་འདི་ཉིད་ཀྱིས་གཙོས་པའི་ཡངས་པའི་རྒྱལ་ཁམས་མཐའ་དག་ལ་ས་གཡོས་མེ་དགྲ་ལ་སོགས་པའི་འབྱུང་བཞིའི་གནོད་པ་དང་། ནད་མུག་མཚོན་འཁྲུགས་སོགས་ཀྱི་སྐལ་བ་ངན་པ་ཞི། ལོངས་སྤྱོད་འབྱོར་བ་རྒྱས། མི་དང་མིའི་བར་དང་མི་དང་སྲོག་ཆགས་གཞན་གྱི་བར་ལ་འཚེ་བ་མེད་པར་ཕན་ཚུན་ཕ་མ་དང་སྤུན་སྲིང་ལྟ་བུའི་བརྩེ་བ་ནམ་ཡང་མི་ལྷོད་པར། མདོར་ན་སེམས་ཅན་ཐམས་ཅད་ཞི་བ་བྱང་ཆུབ་ཀྱི་སེམས་དང་ལྡན་པས་འཚོ་བའི་ཆེད་དུ། ཇི་ལྟར་བསྔོ་བ། གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་སྣང་ལ་རང་བཞིན་མ་གྲུབ་པ་དམིགས་མེད་འཁོར་གསུམ་དག་པའི་ཚུལ་གྱིས། སྔར་འཕགས་པ་འཇམ་པའི་དབྱངས་དང་བྱང་ཆུབ་སེམས་དཔའ་ཀུན་ཏུ་བཟང་པོ་སོགས་ཀྱིས་ཇི་ལྟར་བསྔོས་པ་བཞིན་དུ། བསྔོ་བ་དེ་ལྟ་བུའི་ཐུགས་འདུན་དང་བཅས་ཏེ་བསྔོ་བ་སྨོན་ལམ་གྱི་ཞལ་འདོན་ལྷན་དུ་གསུང་རྒྱུ་བྱེད།

བསོད་ནམས་འདི་ཡིས་ཐམས་ཅད་གཟིགས་པ་ཉིད།།

ཐོབ་ནས་ཉེས་པའི་དགྲ་རྣམས་ཕམ་བྱས་ཏེ།།

སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི།།

སྲིད་པའི་མཚོ་ལས་འགྲོ་ཀུན་སྒྲོལ་བར་ཤོག།

འཇམ་དཔལ་དཔའ་བོས་ཇི་ལྟར་མཁྱེན་པ་དང་།།

ཀུན་ཏུ་བཟང་པོ་དེ་ཡང་དེ་བཞིན་ཏེ།།

དེ་དག་ཀུན་གྱི་རྗེས་སུ་བདག་སློབ་ཅིང་།།

དགེ་བ་འདི་དག་ཐམས་ཅད་རབ་ཏུ་བསྔོ།།

ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན།།

ཕྱོགས་བཅུའི་མཐའ་གྲུབ་ཀུན་ཏུ་ཁྱབ་པ་དང་།།

བློ་གྲོས་པདྨོ་རབ་ཏུ་རྒྱས་བྱེད་ཅིང་།།

སངས་རྒྱས་བསྟན་པ་དར་ཞིང་རྒྱས་པར་ཤོག།

ཆོས་ཉིད་མི་འགྱུར་སྣང་བ་མཐའ་ཡས་ནི།།

འགག་མེད་སྙིང་རྗེར་ལོངས་སྤྱོད་སྤྱན་རས་གཟིགས།།

ཨོ་རྒྱན་པཎ་ཆེན་རྫུས་སྐྱེས་སྤྲུལ་བའི་སྐུ།།

གསོལ་བ་འདེབས་སོ་ནད་གདོན་བར་ཆད་སོལ།།

འཆི་ཁར་གནད་གཅོད་སྡུག་བསྔལ་མི་འགྱུར་ཞིང་།།

ཚེ་འདིའི་སྣང་བ་ནུབ་པར་གྱུར་མ་ཐག།

བདེ་བ་ཅན་དང་རི་བོ་པོ་ཏ་ལ།།

ཟངས་མདོག་དཔལ་གྱི་རི་བོར་སྐྱེ་བར་ཤོག།

དེབ་སེར་བྲིས་ནང་གི་སྨོན་ལམ་ཐེངས་གསུམ་འདོན།

ཧྲཱིཿ སྔོན་ཚེ་དེ་བཞིན་གཤེགས་པ་གཙུག་ཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རུ། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བ་འདེབས། །བསྟན་པ་ཡུན་རིང་གནས་པའི་བཀྲ་ཤིས་ཤོག །དཔལ་ལྡན་མཁས་གྲུབ་བྱེ་བའི་གཙུག་གི་རྒྱན། །མདོ་སྔགས་ལུང་རྟོགས་བསྟན་པའི་ཤིང་རྟ་ཆེ། །འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ། །ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག །ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ། །བཤད་སྒྲུབ་བསྟན་པའི་མངའ་བདག་འཇིགས་མེད་གླིང་། །མཚུངས་མེད་བླ་མའི་བསྟན་པ་སྲིད་མཐའི་བར། །བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག།

སྐར་མ་རབ་རིབ་མར་མེ་དང་། །སྒྱུ་མ་ཟིལ་བ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ།།

ཞེས་གསུངས་ཤིང་ཆོས་ཁྲིད་ཀྱི་མཇུག་ཡོངས་སུ་གྲུབ་པ་དང་མཉམ་དུ། སློབ་ཚོགས་ཡོངས་ལ་སྤྲུལ་སྐུའི་གཟིགས་སྟངས་བརྩེ་བའི་སྤྱན་རས་ཀྱིས་ཡང་དང་ཡང་དུ་གཟིགས་ཤིང་། ཕྱག་གཉིས་ཀྱིས་གྱེས་སྐུལ་གྱི་བརྡ་གནང་སྟེ་ཚོགས་དྲུག་རང་གྲོལ་གྱི་ལྟ་བའི་གདེང་དང་མ་བྲལ་བའི་ངང་ནས། སྤྱན་ཆོས་སྐུའི་གཟིགས་སྟངས་ཀྱིས་སྟེང་གི་བར་སྣང་ལ་གཏད་མེད་དུ་གཟིགས་བཞིན་བྱོན་པ་ན། སློབ་ཚོགས་ཀུན་དགའ་དད་སྐྱོ་བའི་མིག་ཆུ་དབང་མེད་འཐོར་བཞིན། སྐྱབས་རྗེ་བླ་མ་མཆོག་དང་ཐུགས་ཡིད་དབྱེར་མེད་ཀྱི་སྨོན་ལམ་སོགས་བར་མེད་དུ་སྒྲོགས་བཞིན་རྟེན་འབྲེལ་བཀྲ་ཤིས་བདེ་ལེགས་ཀྱི་ངང་ནས་ཆོས་ར་གྲོལ་བའོ།། །།

སྨྲས་པ།

ཆུ་བཟང་ཁྲི་སྟོང་འདུས་པའི་རྒྱ་མཚོ་ཆེ།།

འབྲི་བརྒྱའི་འོ་མཚོ་དཀྲུགས་པའི་མར་ལོ་གཅེས།།

ཆོས་ཕུང་བརྒྱད་ཁྲི་བཞི་སྟོང་གཅིག་འདུས་མཆོག།

མདོ་སྔགས་ཆོས་ཚུལ་རྒྱ་མཚོའི་སྙིང་པོའི་བཅུད།།

གཞུང་ལུགས་གཅིག་ཏུ་འཁྱིལ་བའི་གདམས་པ་ཆེ།།

བདེ་ཆེན་ཞིང་དུ་བགྲོད་པའི་གནམ་འཕུར་གྲུ།།

དཔལ་རིའི་གླིང་དུ་བགྲོད་པའི་གཟེངས་ཀྱི་གྲུ།།

གཡུ་ལོ་བཀོད་དུ་བགྲོད་པའི་གློག་གི་ཞགས།།

འདི་ན་སྲིད་ན་འབྱུང་དཀའི་གསང་སྔགས་བསྟན།།

རྙེད་དཀའ་རྟོགས་ལྡན་བྱིན་རླབས་བླ་མར་མཇལ།།

མོས་གུས་བུ་ཡི་ཐུགས་རྗེའི་བྱིན་རླབས་གཡོས།།

རྟོགས་པ་བཙན་ཐབས་འཕོ་བ་མན་ངག་ལུགས།།

ཐུན་མོང་ཐུན་མིན་སྔོན་འགྲོ་ཆེར་བསྡུས་པ།།

ཤིན་ཏུ་བསྡུས་པ་ཐུགས་རྗེ་གློག་ཞགས་འགྲེལ།།

ས་གསུམ་ལྷ་ཡི་རྒྱལ་རྔ་བརྡུང་བརྩོན་པ།།

བློ་ལྡན་སུ་ཞིག་རྣ་བ་འགེབ་པར་བྱེད།།

སུ་ཡིས་ཉན་ན་ཞི་བསིལ་དགེ་བ་སྟེར།།

གང་གིས་ཐོས་ན་མི་ཚེ་དོན་ཡོད་མཛད།།

གང་ཞིག་སྦྱངས་ན་གོམས་པས་རང་ངོ་མཐོང་།།

སུ་དང་གང་ལའང་ཕྱོགས་རིས་མེད་པ་ཡིས།།

གངས་རིའི་རྩེ་ནས་ཕ་རྒན་ཏི་སེ་ཡིས།།

གདམས་པའི་ཆུ་བོ་ཕྱོགས་བཞིར་ཁ་འབབ་པ།།

བགོ་སྐལ་ལེན་དུ་ཤོག་ཅེས་ངས་མཚམས་སྦྱར།།

བླ་མ་ཚད་མས་དམ་ཆོས་ཚད་མར་སྒྲུབ།།

དམ་ཆོས་ཚད་མས་ཉམས་ལེན་ཚད་མ་བྱས།།

ཉམས་ལེན་ཚད་མས་བྱིན་རླབས་ཚད་མར་གྱུར།།

ཡང་དག་ཚད་མ་འདི་ཀོ་གནད་དུ་འཁུམས།།

འདིར་འབད་ཚེ་རབས་གཏན་གྱི་མ་རྒན་རྣམས།།

དྲིན་ལ་ལན་དུ་འཇལ་བའི་རེ་བ་དང་།།

རྟོགས་ལྡན་བླ་མའི་བྱིན་རླབས་སྙིང་ལ་ཕོག།

འཇམ་དཔལ་སྨྲ་བའི་སེངྒེར་བདག་གྱུར་ཅིག།

འདི་ན་རྡོ་རྗེའི་མཆེད་ཀྱིས་བཀས་བསྐུལ་ཞིང་།།

རང་གི་བླ་མའི་མདུན་ནས་ཁས་ལེན་ཞིག།

མ་བསམ་མྱུར་མོར་བྱིན་རླབས་གློག་ཞགས་འཁྱུག།

ཞལ་ཆབ་དྲོན་མོའི་ཁ་རླངས་ཐོལ་ལེ་བ།།

རྡོ་རྗེ་ཆོས་སྲུང་དཀར་ཕྱོགས་སྐྱོང་རྣམས་ཀྱིས།།

ཕྱོགས་ཀྱི་ཐ་གྲུ་ཡངས་པོར་ཁྱབ་བྱས་ཏེ།།

འཛམ་གླིང་ཞི་བདེ་མ་གྱུར་ཆོས་ཀྱིས་ཚིམ།།

གངས་ལྗོངས་རྒུད་པའི་མུན་པ་སངས་པར་ཤོག།

དཔལ་ལྡན་བླ་མའི་སྐུ་ཚེ་བརྟན་པ་དང་།།

མཁའ་མཉམ་ཡོང་ལ་བདེ་སྐྱིད་འབྱུང་བ་དང་།།

བདག་གཞན་མ་ལུས་ཚོགས་བསག་སྒྲིབ་སྦྱངས་ནས།།

མྱུར་དུ་བླ་མེད་གོ་འཕང་ཐོབ་པར་ཤོག།

ཅེས་ངག་འདོན་བྱིན་རླབས་གློག་ཞགས་ཀྱི་བླ་རྣལ་རྒྱས་འགྲེལ་ཡེ་ཤེས་མཆོག་སྩོལ་ཞེས་བྱ་བ་ཟིན་བྲིས་སུ་འདེབས་པ་པོ་ནི། ཁོང་གི་སློབ་མའི་གྲལ་མཐའ་པ་གསེར་རྟ་མཁན་སློབ་དགོན་པའི་ཨ་སྐྱབས་རྒྱལ་སྲས་ཚང་སྐུ་ཕྲེང་བཞི་བའི་ཡང་སྲིད་ཀྱི་མིང་ཙམ་འཛིན་པ་རྒྱལ་སྲས་ནམ་མཁའ་ཀློང་ཡངས་ནས་ཕབས་པ་འདིས་ཀྱང་། རྒྱལ་བསྟན་སྙིང་པོ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པའི་རྒྱུ་རུ་གྱུར་ཅིག

སངས་རྒྱས་ཀུན་འདུས་ཕྱི་ཡི་བླ་མ་དང་།།

སེམས་ཉིད་འོད་གསལ་ནང་གི་བླ་མ་དང་།།

རང་བཞིན་སྤྲོས་བྲལ་དོན་གྱི་བླ་མ་གསུམ།།

དབྱེར་མེད་སྙིང་པོའི་བླ་མ་རྟོགས་པར་ཤོག།

དཔལ་ལྡན་བླ་མའི་སྐུ་ཚེ་བརྟན་པ་དང་།།

མཁའ་མཉམ་ཡོངས་ལ་བདེ་སྐྱིད་འབྱུང་བ་དང་།།

བདག་གཞན་མ་ལུས་ཚོགས་བསགས་སྒྲིབ་སྦྱངས་ནས།།

མྱུར་དུ་སངས་རྒྱས་གོ་འཕང་ཐོབ་པར་ཤོག།

ལྷ་རྒྱལ་ལོ། །བཀྲ་ཤིས་པར་ཤོག། དོན་འགྲུབ་པར་ཤོག། །།