ཡན་ལག་དང་པོ་འཇིག་རྟེན་གྱི་ཁམས་སྤྱིར་བསྟན་པ་དང་ཡན་ལག་ལག་གཉིས་པ་རྒྱ་གར་གྱི་སྐབས།
དམ་པའི་ཆོས་ཀྱི་འཁོར་ལོས་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བའི་ལེགས་པར་བཤད་པ་ལ་ཡན་ལག་ཆེན་པོ་ལྔ་ལས་ཡན་ལག་དང་པོ་འཇིག་རྟེན་ཀྱི་ཁམས་སྤྱིར་བསྟན་པ་དང༌། ཡན་ལག་གཉིས་པ་རྒྱ་གར་གྱི་སྐབས་ལ་ལེའུ་བཞི་ལས་དང་པོ་སྟོན་པའི་མཛད་པ་བཤད་པ། གཉིས་པ་བཀའ་བསྡུ་བ་ཁྱད་པར་དུ་བཤད་པ། གསུམ་པ་དཀོན་མཆོག་གསུམ་གྱི་རྟེན་བྱུང་ཚུལ་བཞི་པ་རྒྱ་གར་གྱི་རྒྱལ་རབས་རྣམས་བཞུགས་སོ། །(ཀ༡བ)
དམ་པའི་ཆོས་ཀྱི་འཁོར་ལོས་སྒྱུར་རྒྱལ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བའི་ལེགས་པར་བཤད་པ། ཐམས་ཅད་མཁྱེན་པ་སྲས་དང་སློབ་མར་བཅས་པ་ལ་ཕྱག་འཚལ་ལོ། །དོན་ཀུན་རབ་གྲུབ་སྐྱེ་འགྲོའི་རྟེན་གནས་གཅིག་པོ་གང༌། །ཐེག་གསུམ་དམ་པའི་ཆོས་ཀྱི་འཁོར་ལོས་མངའ་སྒྱུར་བ། །སྟོན་པ་མཆོག་དང་དེ་སྲས་སློབ་མར་བཅས་ཀུན་ལ། །བྱང་ཆུབ་བར་དུ་སྤྱི་བོས་འདུད་ཏོ་རབ་འདུད་ཏོ། །རབ་མཆོག་གཙོ་བོ་རྣམས་ཀྱི་ངོ་མཚར་གཏམ། །ཐོས་ཚེ་བདག་འདྲ་གྱི་ནའི་སྐྱེ་བོ་ཡང༌། །ལུས་ཀྱི་སྤུ་ལྡང་མཆི་མ་ཁོང་ནས་འཁྲུག །དད་པའི་ཤུགས་དྲག་ཟློག་པར་དཀའ་གྱུར་ན། །སྐལ་བཟང་བློ་གསལ་དཔྱོད་ལྡན་སྐྱེ་བོ་རྣམས། །ཅི་ཕྱིར་དད་པའི་དབང་སྟོབས་རྒྱས་མི་འགྱུར། །མཚན་ཐོས་ཙམ་ཡང་དོན་ཆེན་ལྡན་འགྱུར་ན། །མོས་ཤིང་གུས་པར་གྱུར་རྣམས་ལྟ་ཅི་སྨོས། །དེ་ཕྱིར་དམ་པ་རྣམས་ཀྱི་ཡོན་ཏན་ལ། །གཅིག་དུ་དད་པས་ཡིད་རབ་དྲང་བ་དང༌། །བདག་དང་སྐལ་མཉམ་གཞན་ལའང་ཕན་བྱའི་ཕྱིར། །ཆོས་རྒྱལ་རྣམས་ཀྱི་མཛད་པའི་ཚུལ་བཟང་འབྲི། །རྒྱ་མཚོའི་ཆུ་བོ་སྔོན་ནས་མང་བཅུས་མོད། །ད་དུང་སུ་ཡིས་བླངས་ཀྱང་མི་ཟད་ལྟར། །འདི་ཚུལ་སྔོན་རབས་མཁས་པས་མང་སྦྱར་མོད། །ད་དུང་ལེགས་(ཀ༢ན)
བཤད་མཁས་པའི་སྤྱི་ནོར་ཡིན། །འོན་ཀྱང་དོན་རྒྱས་ཚིག་ཉུང་མཐའ་རྒྱ་ཆོད། །ཀུན་ལ་གཟུར་གནས་ངེས་པའི་ཁུངས་དང་འབྲེལ། །ཆོས་ཉིད་ལ་འཇུག་མཚན་མར་མི་སྨྲ་བ། །དེ་ནི་ལེགས་བཤད་འདི་ཡི་ཁྱད་ཆོས་སྟེ། །དེ་བས་བློ་ལྡན་རྣམས་ཀྱིས་མཉན་པར་གྱིས། །ཆོས་ཀུན་རང་བཞིན་གཟོད་ནས་རྣམ་དག་ཉིད། །འགག་པ་མེད་པའི་རང་རྩལ་མཐའ་ཡས་ནི། །གནས་སྐབས་དག་དང་མ་དག་སྣ་ཚོགས་པའི། །རྟེན་འབྲེལ་སྣང་བ་སྒྱུ་མ་ཙམ་དུ་འཆར། །ཇི་ལྟར་མེ་ལོང་ངོས་ལ་བཞིན་སྣང་ལྟར། །འཇིག་རྟེན་ཞེས་བྱ་ཕྱི་ན་ཡོད་མིན་ཡང༌། །བྱིས་རྣམས་ཇི་ལྟར་སྣང་བ་དེ་ཙམ་ལ། །བདེན་པར་ཞེན་སྟེ་སོ་སོར་ཨ་ཐང་ཆད། །ཇི་ལྟར་རྨི་ལམ་སྣང་བ་སྣ་ཚོགས་དེ། །སྣང་དང་མི་བདེན་གཉིས་ཀ་ཡིན་པ་ལྟར། །འཁོར་འདས་སྣང་བ་སྣ་ཚོགས་ཐམས་ཅད་ཀྱང། །བདེན་རྫུན་བྲལ་བ་དེ་ལྟར་ཤེས་པར་གྱིས། །དེ་བས་གདུལ་བྱའི་སྣང་བ་ཇི་བཞིན་དུ། །མངོན་པ་གོང་འོག་འཇིག་རྟེན་གདགས་པ་དང༌། །དྲན་པ་ཉེར་བཞག་སངས་རྒྱས་ཕལ་པོ་ཆེ། །མཁའ་འགྲོ་རྒྱ་མཚོ་དུས་ཀྱི་འཁོར་ལོ་སོགས། །མདོ་རྒྱུད་བསྟན་བཅོས་ཆེན་པོ་མང་ཞིག་དུ། །འཇིག་རྟེན་གནས་ཚུལ་མི་འདྲ་མང་གསུངས་ཀྱང༌། །རྒྱལ་བས་འཇིག་རྟེན་ཞེན་པས་མ་གཟིགས་ཕྱིར། །གར་ཡང་མི་གནས་གང་དུའང་འགལ་བ་མེད། །དེ་ཕྱིར་ཆོས་ཀྱི་རྣམ་གྲངས་ཐམས་ཅད་ལའང༌། །མ་ཆགས་མི་ཞེན་མི་གནས་མི་འདོར་བ། །བུང་བས་མེ་ཏོག་རྩི་བཅུད་ལེན་ཚུལ་གྱིས། །བདག་གིས་ཆོས་ཀྱི་རྣམ་གྲངས་འདི་བཤད་བྱ། །གླིང་བཞི་རི་རབ་ལྷ་གནས་དང་བཅས་པ། །རྒྱ་མཚོའི་ཕྱི་རོལ་ཁོར་ཡུག་གཅིག་གིས་བསྐོར། །འོག་གཞི་རླུང་གི་དཀྱིལ་འཁོར་ལ་ཐུག་པ། །འདི་ནི་གླིང་བཞིའི་འཇིག་རྟེན་ཁམས་གཅིག་ཡིན། །མཆུ་ཞེང་དེ་ཡི་ན་མཁའ་འདས་པ་ན། །སླར་ཡང་གླིང་བཞིའི་འཇིག་རྟེན་གཞན་ཞིག་ཡོད། །འདི་ལྟ་གཅིག་ནས་གཉིས་སུ་བརྒྱུད་པ་ཡིས། །སྟོང་དུ་ཚང་ཚེ་རྒྱ་མཚོ་གཅིག་གིས་བརྟེན། །ཕྱི་རོལ་ཁོར་ཡུག་གཅིག་གིས་བསྐོར་(ཀ༢བ)
བ་ནི། །སྤྱི་ཕུད་སྟོང་གི་འཇིག་རྟེན་ཁམས་ཞེས་བྱ། །དེ་འདྲ་གཅིག་ནས་གཉིས་སུ་བགྲངས་པ་ནི། །སྟོང་དུ་ཚང་ཚེ་སྟོང་གཉིས་བར་མ་ཡི། །འཇིག་རྟེན་ཁམས་ཟེར་རྒྱ་མཚོ་གཅིག་ལ་བརྟེན། །ཕྱི་ནས་ཁོར་ཡུག་འབྲིང་པོས་བསྐོར་བ་ཡིན། །སྟོང་གཉིས་བར་མའི་འཇིག་རྟེན་ཁོ་ན་ནི། །སྟོང་ཕྲག་གཅིག་དུ་ལོངས་ཚེ་སྟོང་གསུམ་གྱི། །སྟོང་ཆེན་པོ་ཡི་འཇིག་རྟེན་ཁམས་ཞེས་བྱ། །གངས་ཆེན་མཚོ་ཡི་རྒྱ་མཚོ་ཆེན་པོས་བརྟེན། །ཕྱི་རོལ་ཁོར་ཡུག་ཆེན་པོས་ཡོངས་སུ་བསྐོར། །གླིང་བཞི་རེ་རེའང་བྱེ་བ་ཕྲག་བརྒྱ་ཡོད། །འདི་ཙམ་མཉམ་དུ་ཆགས་ཅིང་འཇིག་པ་རུ། །ཐུན་མོང་མངོན་པའི་བསྟན་བཅོས་དག་ལས་བཤད། །མཆོག་གི་སྤྲུལ་སྐུ་གཅིག་གི་ཞིང་དུ་འདོད། །ཐེག་ཆེན་ལྟར་ན་སྟོང་གསུམ་འཇིག་རྟེན་ཉིད། །བྱེ་བ་ཕྲག་བརྒྱས་རབ་འབྱམས་མཚམས་སྦྱར་སྟེ། །དེ་ཉིད་བྱེ་བ་ཕྲག་བརྒྱར་ལོངས་པ་ན། །རབ་འབྱམས་རྒྱུད་ཅེས་བྱ་བའི་འཇིག་རྟེན་ཁམས། །དེ་ཡང་བྱེ་བ་ཕྲག་བརྒྱར་བརྩིས་པ་ན། །རབ་འབྱམས་རྒྱ་མཚོའམ་བར་མའི་རྒྱུད་ཅེས་བྱ། །དེ་ཡང་བྱེ་བ་ཕྲག་བརྒྱར་ལོངས་པའི་ཚེ། །གཞི་དང་སྙིང་པོ་མེ་ཏོག་གིས་བརྒྱན་པའི། །འཇིག་རྟེན་ཁམས་སྟེ་སྤྲུལ་སྐུ་གཅིག་གི་ཞིང༌། །རེ་རེའང་རང་རང་རྒྱ་མཚོ་ཁོར་ཡུག་བཅས། །འདི་ཙམ་ཆགས་འཇིག་སྟོངས་གནས་མཉམ་དུ་བྱེད། །གཞི་དང་སྙིང་པོ་མེ་ཏོག་གིས་བརྒྱན་པའི། །ཞིང་ཁམས་དེ་ནི་རྣམ་སྣང་གངས་ཆེན་མཚོའི། །སྤུ་ཁུང་རེ་ནའང་བྱེ་བ་ཕྲག་བརྒྱར་གནས། །སྐུ་ཡི་རྡུལ་ཕྲ་རེ་ལའང་དེ་འདྲ་སྟེ། །ཞིང་དེའི་རྡུལ་རེ་ལ་ཡང་དེ་སྙེད་གནས། །རྣམ་སྣང་དེ་ནི་རྒྱལ་བ་ཤཱཀ་ཐུབ་འདིའི། །ལོངས་སྤྱོད་ཡོངས་སུ་རྫོགས་པའི་སྐུ་ཡིན་སྟེ། །དེ་ཡི་སྐུ་དང་ཞིང་ལ་གང་གནས་པའི༌། །ཞིང་ཁམས་དེ་ཀུན་གཅིག་དུ་བསྡོམས་བྱས་པ། །ལོངས་སྤྱོད་རྫོགས་སྐུ་རེ་རེའི་ཞིང་དུ་གསུངས། །ཚུལ་འདིས་ན་མཁས་ཇི་སྲིད་ཁྱབ་གྱུར་པ། །དེ་སྙེད་རྒྱལ་བའི་ཞིང་དང་སྐུ་ཡང་གནས། །ཤིན་དུ་ངེས་པའི་དོན་དུ་སྐུ་དང་ཞིང༌། །ཚད་མེད་ཕ་མཐའ་བཟུང་བར་མི་ནུས་སོ། །དེ་ལྟར་(ཀ༣ན)
འཇིག་རྟེན་རྒྱ་མཚོ་མཐའ་ཡས་པ། །ལ་ལ་ཉོན་མོངས་ལ་ལ་ཡོངས་སུ་དག །ལ་ལ་ཀུན་ནས་ཉོན་མོངས་དག་པར་ལྡན། །ལ་ལ་དག་ཞིང་ཀུན་ནས་ཉོན་མོངས་སྟེ། །ལ་ལ་སྤྱིའུ་ཚུགས་ལ་ལ་སྣྲེལ་ཞིའི་ཞིང༌། །རྒྱུ་དབྱིབས་རྒྱན་དང་འགྲོ་བའང་ཐ་དད་ཉིད། །དེ་ལྟར་ཕ་མཐའ་ཡས་པར་གནས་པ་ལས། །ཁོ་བོ་ཅག་གི་རྟེན་གནས་ཞིང་འདི་ནི། །རྣམ་པར་སྣང་མཛད་གངས་ཆེན་མཚོ་རྒྱལ་དེའི། །ཕྱག་གི་ལྷུང་བཟེད་ནང་ན་པདྨ་ཡི། །སྡོང་པོ་ཡལ་ག་མེ་ཏོག་རབ་རྒྱས་པའི། །ཟེའུ་འབྲུ་ཉེར་ལྔ་བརྩེགས་མར་གནས་པ་ལས། །བཅུ་གསུམ་པ་ཡི་སྟེང་ན་གནས་པ་ཡི། །དབུས་མའི་སྙིང་པོ་མེ་ཏོག་གིས་བརྒྱན་ཞིང༌། །དེ་ལས་དབུས་ཀྱི་རབ་འབྱམས་རྒྱ་མཚོའི་ཞིང༌། །དེ་ལས་དབུས་ཀྱི་རབ་འབྱམས་རྒྱུད་ཀྱི་ཞིང༌། །དེའི་ཡང་དབུས་ཀྱི་རབ་འབྱམས་མཚམས་སྦྱོར་ཞིང༌། །དེ་དབུས་གླིང་བཞི་རི་རབ་བྱེ་བ་ནི། །ཕྲག་བརྒྱས་བརྒྱན་པ་མི་མཇེད་འཇིག་རྟེན་ཁམས། །འགྲོ་རྣམས་ཉོན་མོངས་ལས་མི་འབྱེད་པའི་ཕྱིར། །ཞིང་གི་སྐྱོ་ནས་སྨད་པར་བྱ་བ་དང༌། །ཞིང་འདིའི་སེམས་དཔའ་རྣམས་ནི་ལྷག་པར་ཡང༌། །བཟོད་དང་ལྡན་པའི་ཡོན་ཏན་བསྔགས་པའི་ཕྱིར། །འཇིག་རྟེན་ཁམས་འདི་མི་མཇེད་ཅེས་སུ་བརྗོད། །དེ་ལས་སྤྱི་ཕུང་སྟོང་གི་འཇིག་རྟེན་དབུས། །གླིང་བཞིའི་འཇིག་རྟེན་བཅོམ་པ་དང་ལྡན་པ། །རྡོ་རྗེ་རིན་པོ་ཆེ་ལས་ལེགས་པར་གྲུབ། །གཞལ་མེད་ཁང་དབྱིབས་སྤོས་ཆུའི་མཚོ་ལ་གནས། །ཀུན་ནས་ཉོན་མོངས་རྣམ་པར་དག་ལྡན་པར། །རྒྱལ་བས་ཕལ་པོ་ཆེ་ཡི་མདོ་ལས་གསུངས། །རྡོ་རྗེའི་གཞི་དང་རི་རབ་ཁོར་ཡུག་དུ། །ལྡན་པར་དུས་ཀྱི་འཁོར་ལོ་ལས་ཀྱང་གསལ། །འཇིག་རྟེན་བཞག་པ་དང་མཛོད་པའི་ལུགས་ཀྱིས། རླུང་དཀྱིལ་དཔངས་དཔག་ཚད་ས་ཡ་དྲུག་འབུམ་རྒྱར་གྲངས་མེད། དེའི་སྟེང་དུ་ཆུ་དཀྱིལ་འབུམ་ཕྲག་བརྒྱད། གསེར་གྱི་ས་གཞི་སུམ་འབུམ་ཉི་ཁྲི། འདི་གཉིས་ཟླུམ་པོ་ཐད་ཀར་འབུམ་ཕྲག་ཉི་ཤུ་སུམ་སྟོང་དང་བརྒྱ་ཕྲག་ཕྱེད་དང་ལྔར་མཉམ་མོ། །དེའི་སྟེང་ཆུས་གང་བ་ལ་དབུས་སུ་རི་རབ་རིན་པོ་ཆེ་བཞི་ལས་གྲུབ་པ་ཞེང་དཔག་ཚད་བརྒྱད་ཁྲི། ཆུར་བརྒྱད་ཁྲི་ནུབ་ཅིང་བརྒྱད་ཁྲི་སྟེང་དུ་འཕགས་པ། (ཀ༣བ)
རི་རབ་དང་གཉའ་ཤིང་འཛིན་གྱི་བར་གྱི་རོལ་མཚོ་ཡང་དཔག་ཚད་བརྒྱད་ཁྲིའོ། །རི་གཞན་བརྒྱར་དཔངས་དང་ཞེང་ནང་མའི་ཕྱེད་དེ་བ་ཚྭའི་མཚོ་ཆེན་མ་གཏོགས་རོལ་མཚོ་རྣམས་ཀྱང་ནང་མའི་ཕྱེད་དེ། གཉའ་ཤིང་འཛིན་རྒྱ་དཔངས་བཞི་ཁྲི། གཤོལ་མདའ་འཛིན་ཉི་ཁྲི། སེང་ལྡེང་ཅན་ཁྲི། ལྟ་ན་སྡུག་ལྔ་སྟོང། རྟ་རྣ་ཉིས་སྟོང་ལྔ་བརྒྱ། རྣམ་སྡུད་སྟོང་ཉིས་བརྒྱ་ལྔ་བཅུ། མུ་ཁྱུད་འཛིན་རི་དྲུག་བརྒྱ། ལྕགས་རི་སུམ་བརྒྱ་ཕྱེད་དང་བཅུ་གསུམ། ཕྱིའི་རྒྱ་མཚོ་སུམ་འབུམ་དང་སྟོང་ཕྲག་ཉེར་གཉིས། ཤར་ལུས་འཕགས་པོ་ཟླ་གམ་ངོས་གསུམ་ལ་ཉིས་སྟོང་རེ་དང་བཅད་ཁམ་ལ་སུམ་བརྒྱ་ལྔ་བཅུ། འཛམ་གླིང་ཤིང་རྟ་འཁོར་ལོ་གཉིས་པ་ལྟ་བུ་ངོས་གསུམ་ལ་ཉིས་སྟོང་རེ་དང་གཅིག་ལ་སྟོང་ཕྲག་ཕྱེད་དང་བཞི། ནུབ་བ་ལང་སྤྱོད་ཟླུམ་པོ་ཐད་ཀར་བདུན་སྟོང་ལྔ་བརྒྱ། བྱང་སྒྲ་མི་སྙན་གྲུ་བཞི་དཔག་ཚད་བརྒྱད་ཁྲི། ལྕགས་རི་ལྕགས། རི་རབ་རིན་པོ་ཆེ་སྣ་བཞི། གཞན་རྣམས་གསེར་དུ་འདོད་དོ། །ཐུན་མོང་མདོ་དང་མངོན་པ་ལྟར་བཤད་ན། །འགྲོ་བའི་སྤྱི་མཐུན་ལས་དང་བསྐལ་བཟང་འདིའི། །བྱང་སེམས་རྣམས་ཀྱིས་ཞིང་ཡོངས་སྦྱངས་པའི་མཐུས། །སྟོངས་བསྐལ་བར་བསྐལ་ཉི་ཤུ་འདས་འོག་དུ། །ཕྱོགས་བཅུ་ནས་ནི་རླུང་གཡོས་ཕན་ཚུན་དུ། །འཕུལ་བས་རླུང་གི་དཀྱིལ་འཁོར་རྒྱ་གྲམ་དབྱིབས། །སྲ་ཞིང་འཐས་པ་རྔམས་སུ་དཔག་ཚད་ནི། །ས་ཡ་དྲུག་འབུམ་རྒྱ་རུ་གྲངས་མེད་ཆགས། །དེ་ཡི་ན་མཁར་འགྲོ་བའི་ལས་དང་ནི། །བྱང་ཆུབ་སེམས་དཔའི་མཐུ་ལས་གྲུབ་པ་ཡི། །སྤྲིན་ཆེན་གསེར་གྱི་གཉའ་ཤིང་སྟུག་པོ་ཆགས། །དེ་ལས་ཤིང་རྟའི་འཕང་ལོ་སྲོག་ཤིང་དང༌། །གཉའ་ཤིང་མདའ་སྨྱུག་ཙམ་དང་ཆར་ཐིགས་ནི། །སྦོམ་པོའི་ཆར་རྒྱུན་རིང་དུ་བབ་པ་ཡིས། །ཆུ་ཡི་ཕུང་པོ་ཚངས་པའི་འཇིག་རྟེན་ལ། །འཐུག་པར་ཆགས་སྟེ་དེ་དབུས་འཛམ་གསེར་གྱི། །པདྨ་སྟོང་ཤར་གནས་གཙང་ལྷ་ཡིས་མཐོང༌། །སངས་རྒྱས་སྟོང་ཞིག་འབྱུང་བའི་ལྟས་སུ་ཤེས། །བསྐལ་པ་འདི་ནི་བཟང་པོའོ་ཞེས་བརྗོད། །དེ་ཕྱིར་བསྐལ་པ་པདྨ་སྟོང་མཐོང་ངམ། །བཟང་པོའི་བསྐལ་པ་ཞེས་བྱར་གྲགས་པ་ཡིན། །ཆུ་ཡི་ཕུང་པོ་རླུང་གིས་བསྲུབས་པ་ལས། །སྤྲིས་མའི་ཚུལ་དུ་གསེར་གྱི་ས་གཞི་ཆགས། །ཆུ་ཡི་ཕུང་པོ་དཔག་ཚད་སུམ་འབུམ་དང༌། །ཉི་ཁྲི་ཞོམ་སྟེ་རྔམས་སུ་འབུམ་(ཀ༤ན)
ཕྲག་བརྒྱད། །གསེར་གཞི་དཔག་ཚད་སུམ་འབུམ་བཞི་ཁྲིར་ལྡན། །དེ་དབུས་ལྷུན་པོ་བང་རིམ་བཞིར་ལྡན་པ། །ཤར་དངུལ་ལྷོ་ནི་བཻཌཱུརྻ་སྔོན་པོ། །ནུབ་ནི་པད་རཱག་བྱང་ཕྱོགས་གསེར་ལས་བྱས། །དཔག་ཚད་བརྒྱད་ཁྲི་ཕྲག་གཉིས་ཕྱེད་མཚོར་ནུབ། །གཉའ་ཤིང་འཛིན་དང་གཤོལ་འཛིན་སེང་ལྡེང་ཅན། །ལྟ་ན་སྡུག་རི་རྟ་རྣ་རྣམ་སྡུད་དང༌། །མུ་ཁྱུད་འཛིན་རི་ཞེས་བྱ་གསེར་རི་བདུན། །ནང་མའི་ཕྱེད་དུ་ཕྱི་མའི་རྩེས་སླེབས་པར། །རི་རབ་ཕྱི་ནས་རིམ་བཞིན་གྲུ་བཞིར་བསྐོར། །བར་བར་ན་ནི་རོལ་པའི་མཚོ་བདུན་དང༌། །ལོངས་སྤྱོད་ས་པའི་གླིང་གཞན་དུ་མའང་ཡོད། །དེ་ཡི་ཕྱི་རོལ་བ་ཚྭའི་རྒྱ་མཚོའི་ནང༌། །གླིང་བཞི་གླིང་ཕྲན་བརྒྱད་དང་ལྡན་པ་ཆགས། །ཤར་གླིང་གསུམ་པོ་ཟླ་བ་ཕྱེད་པའི་དབྱིབས། །ལྷོ་གླིང་ཤིང་རྟའི་དབྱིབས་སམ་སོག་ཀ་འདྲ། །ནུབ་གསུམ་ཟླུམ་པོ་བྱང་གསུམ་གྲུ་བཞི་སྟེ། །རྒྱུ་ནི་སོ་སོའི་ཕྱོགས་ཀྱི་རི་རབ་མཚུངས། །འོན་ཀྱང་རྩོད་པར་ལྡན་པའི་དུས་བྱུང་ཚེ། །རིན་ཆེན་ནུབ་སྟེ་ས་གཞི་ཕལ་པར་སྣང༌། །མི་ཡི་བཞིན་དབྱིབས་རང་རང་གླིང་དང་འདྲ། །རྒྱན་འདོགས་ཚུལ་དང་ལོངས་སྤྱོད་ཐ་དད་དེ། །རྒྱས་པར་དྲན་པ་ཉེར་བཞག་མདོ་རུ་ལྟོས། །རྒྱ་མཚོའི་ཕྱི་རོལ་ལྕགས་ཀྱི་རི་བོ་ཡིས། །མུ་ཁྱུད་ལྟ་བུར་བསྐོར་བས་གནས་པ་ཡིན། །འཛམ་གླིང་འོག་ན་དམྱལ་བ་ཡི་དྭགས་ཡོད། །རྔ་ཡབ་གླིང་ན་སྲིན་པོ་གནས་པ་སྟེ། །གླིང་བཞི་གླིང་ཕྲན་གཞན་རྣམས་མི་ཡི་གནས། །རི་རབ་ནང་གི་ཁོང་སེང་ལྷ་མིན་གནས། །ལོགས་ཀྱི་ཕྱེད་མན་རྒྱལ་ཆེན་བཞི་པའི་ལྷ། །གཞན་ཡང་གཞལ་མེད་ཁང་པའི་ལྷ་རྣམས་ནི། །མཁའ་ལ་རྒྱུ་བས་ཉི་ཟླ་གཟའ་སྐར་ཟེར། །དེ་ཡན་སུམ་བཅུ་རྩ་གསུམ་ལྷ་རྣམས་ཀྱི། །སྲུང་མའི་རིམ་པ་དུ་མ་ལོགས་ན་གནས། །རྩེ་མོར་སུམ་བཅུ་རྩ་གསུམ་ལྷ་གནས་དངོས། །བརྒྱ་བྱིན་ཕོ་བྲང་རྣམ་རྒྱལ་ཁང་བཟང་དང༌། །ལ་བ་དཀར་པོ་ལྟ་བུའི་རྡོ་ལེབ་དང༌། །ཆོས་བཟང་ལྷ་ཡི་འདུན་ས་སྐྱེད་ཚལ་བཞི། །ཡོངས་འདུའི་ཤིང་སོགས་འབྱོར་བ་དཔག་ལས་འདས། །(ཀ༤བ)
འཐབ་བྲལ་དགའ་ལྡན་འཕྲུལ་དགའ་གཞན་འཕྲུལ་སྟེ། །ལྷ་གནས་བཞི་པོ་མཚོ་ནས་རང་རང་བར། །ཇི་ཙམ་ཡོད་པ་དེ་སྲིད་སྟེང་དུ་ཡང༌། །གཞལ་བའི་མཁའ་ལ་སྤྲིན་བཞིན་སོ་སོར་ཆགས། །གཟུགས་ཚེ་ལོངས་སྤྱོད་རིམ་པས་གོང་མ་འཕགས། །ཀུན་ཀྱང་འདོད་པའི་འདོད་ཆགས་ལྡན་པའི་ཕྱིར། །འདི་མན་འདོད་པའི་ཁམས་སུ་བརྗོད་པ་ཡིན། །དེ་སྟེང་གཟུགས་ཁམས་གནས་རིས་བཅུ་བདུན་དང༌། །གཟུགས་མེད་བཞི་སྟེ་སྲིད་པའི་རྩེ་མོར་ཐུག །དེ་ཀུན་ཆགས་བྲལ་ཏིང་ངེ་འཛིན་གྱིས་འཚོ། །འདོད་གཟུགས་ཀུན་ནའང་རང་རང་རྒྱལ་པོ་གནས། །གཟུགས་མེད་ན་ནི་རང་ལས་གཞན་མི་སྣང༌། །དེ་ལྟར་ཁམས་གསུམ་ཀུན་གྱི་ནང་ན་ཡང༌། །འཁོར་ལོས་སྒྱུར་དང་རང་རྒྱལ་རྫོགས་སངས་རྒྱས། །འབྱུང་ཞིང་དགེ་སྡིག་ལས་ཀུན་མཐུ་ཆེ་བས། །ལྷ་ལས་ལྷག་པ་མི་ཡི་འགྲོ་བར་གསུངས། །དེར་ཡང་སྒྲ་མི་སྙན་པ་ལོངས་སྤྱོད་ཀྱི། །ས་སྟེ་སྔར་མེད་དམ་ཆོས་སྒྲུབ་པ་མེད། །གླིང་གསུམ་འདི་ནི་ལས་ཀྱི་ས་སྟེ་མཆོག །དེ་ལས་ཀྱང་ནི་སངས་རྒྱས་འབྱུང་བའི་གནས། །འཛམ་བུའི་གླིང་ཉིད་ཁྱད་དུ་འཕགས་པ་ཡིན། །གསེར་གླིང་སིངྒྷ་ལ་དང་ཙནྡྲ་གླིང༌། །ལ་སོགས་གླིང་བྲན་མང་མོད་འདི་རུ་འདུ། །དེ་ཡང་ཡུལ་དབུས་རྒྱ་གར་རྒྱལ་ཁམས་ནི། །ཟ་འོག་བླ་རེས་ཕུབ་འདྲ་རིན་ཆེན་གླིང༌། །དེ་ལ་ཡུལ་འཁོར་ཆེན་པོ་བཅུ་དྲུག་དང༌། །ཁྱད་པར་མཉན་ཡོད་གནས་བཅས་ཡངས་པ་ཅན། །ཙམྤ་ཝ་ར་ཎ་སི་མ་ག་དྷ། །དེ་རྣམས་གྲོང་ཁྱེར་ཆེན་པོ་དྲུག་དུ་བཤད། །སོག་པོ་ལི་ཡུལ་ཤིང་རྟའི་དབྱིབས་འདྲ་སྟེ། །སྣ་ཚོགས་འདོད་དགུ་དགོས་འདོད་འབྱུང་བའི་གླིང༌། །ཧོར་དང་རྒྱ་ནག་མེ་ཏོག་པདྨ་ནི། །ཁ་བྱེ་འདྲ་སྟེ་ངོ་མཚར་ཆེ་བའི་གླིང༌། །ཁ་བ་ཆགས་པ་བོད་ཀྱི་རྒྱལ་ཁམས་ནི། །སྲིན་མོ་གན་རྐྱལ་འགྱེལ་འདྲ་ངམ་གྲོག་ཆེ། །འདྲེ་སྲིན་གདུག་པ་མང་ཞིང་རི་ནག་རྩུབ། །མུན་པའི་སྨག་རུམ་ལྟ་བུར་གནས་པ་ཡིན། །གཞན་ཡང་ཡུལ་འཁོར་ཆེན་པོ་མཐའ་ཡས་སྟེ། །རང་རང་དཔལ་འབྱོར་ལོངས་སྤྱོད་ལྡན་པས་གནས། །དེ་ལྟར་(ཀ༥ན)
སྣོད་ཀྱི་འཇིག་རྟེན་མས་རིམ་ཆགས། །རྫོགས་ཚེ་བསམ་གཏན་གཉིས་པའི་ལྷ་ཞིག་ན། །ཤི་འཕོས་ཚངས་ཆེན་གནས་སུ་བརྫུས་སྟེ་སྐྱེས། །དེ་ཡིས་བདག་ལ་གྲོགས་གཞན་ཡོད་ན་སྙམ། །དེ་ཡི་མོད་ལ་ལྷ་གཞན་བརྫུས་སྟེ་བྱུང༌། །དེ་ཕྱིར་འཇིག་རྟེན་པ་རྣམས་ཚངས་ཆེན་ནི། །སྣོད་བཅུད་བྱེད་པོ་ཡིན་སྙམ་འཁྲུལ་པ་སྐྱེས། །དེ་ལྟར་བཅུད་ཀྱི་སེམས་ཅན་ཡས་རིམ་བཞིན། །ཆགས་ནས་ལྷ་གནས་མ་ལུས་ཚང་བའི་ཚེ། །འོད་གསལ་ལྷ་ཞིག་ཤི་འཕོས་སྐད་ཅིག་གིས། །འཛམ་བུའི་གླིང་དུ་མི་རུ་བརྫུས་སྟེ་སྐྱེས། །དེ་བཞིན་གཞན་ཡང་བརྫུས་སྐྱེས་མང་བྱུང་སྟེ། །ཚེ་ཚད་དཔག་ཡས་བསམ་གཏན་ཟས་ཀྱིས་འཚོ། །ལུས་ལ་འོད་ལྡན་རྫུ་འཕྲུལ་མཁའ་ལ་འགྲོ། །གཟུགས་ཀྱི་ཡོན་ཏན་མཐའ་ཡས་ལྡན་པ་ཡིན། །དེ་ཚེ་ས་འདི་བདུད་རྩི་ས་ཡི་བཅུད། །དཀར་ཞིང་སྦྲང་རྩིའི་རོ་ལྡན་འཇམ་ལ་བཞུན། །མར་སར་གོང་བུ་ལྟ་བུ་ཁོ་ནར་གནས། །དེ་ལ་སྲེད་པས་ཟོས་པས་བསམ་གཏན་གྱི། །ཟས་ཉམས་ལུས་ཀྱི་རྫུ་འཕྲུལ་ནུབ་པར་གྱུར། །སྲེད་པའི་དབང་གིས་ས་བཅུད་གཏིང་དུ་ནུབ། །ས་མོ་ཞག་ཅེས་ཁ་དོག་དམར་སེར་ལ། །སྦྲང་རྩིའི་རོ་ལྡན་བྱུང་སྟེ་ཟོས་པ་ཡིས། །ལྕི་བའི་ཕྱིར་ན་ལུས་ཀྱི་འོད་ཀྱང་ཉམས། །དེ་ནས་མཁའ་ལ་ཉི་ཟླ་གཟའ་སྐར་བྱུང༌། །ས་ཞག་ས་འོག་ནུབ་སྟེ་བདུད་རྩི་ཡི། །མྱུ་གུའི་ཚལ་བྱུང་དེ་ཡང་ཟོས་པས་ནུབ། །མ་རྨོས་སཱ་ལིའི་འབྲས་བྱུང་དེ་ཟོས་པས། །ཤིན་དུ་རགས་ཕྱིར་རྙིགས་མ་བཤང་གཅི་བྱུང༌། །འདི་ཡན་རྫོགས་ལྡན་བསྐལ་པ་ཅེས་བྱར་གྲགས། །རྒྱུ་དེས་ཕོ་མོའི་དབང་པོ་ཐ་དད་དོད། །ལྟ་དང་རྒོད་དང་ལག་བཅང་འཁྲིག་པ་བྱུང༌། །གཞན་གྱིས་བལྟས་ནས་ས་རྡོས་བཏབ་ཅིང་གཤེས། །ངོ་ཚ་སྐྱོབ་ཕྱིར་ཁྱིམ་བྱས་མངལ་སྐྱེས་བྱུང༌། །མི་ཚངས་སྤྱོད་གྱུར་གཞན་གསུམ་མ་ཉམས་ཕྱིར། །གསུམ་ལྡན་བསྐལ་པ་ཞེས་བྱར་གྲགས་པ་ཡིན། །སཱ་ལིའི་འབྲས་དེ་ནམ་ཟ་ལེན་པ་ལས། །ལེ་ལོ་ཅན་ཞིག་གིས་ནི་གསོག་འཇོག་བྱས། །དེ་མཐོང་ཀུན་ཀྱང་(ཀ༥བ)
སོག་འཇོག་བྱེད་པར་གྱུར། །སྲེད་པའི་རྒྱུ་དང་སེར་སྣའི་སྐྱོན་དེ་ཡིས། །སཱ་ལིའི་འབྲས་ཀྱང་སྦུན་པ་སྲ་བས་གཡོགས། །བརྔས་མ་ཐག་དུ་སྐྱེ་བ་ཡང་མེད་ནས། །མཛངས་ཤིང་ཕན་པར་དགའ་བའི་མི་ཅིག་གིས། །ཆ་མཉམ་ཞིང་བགོས་རང་གི་སྐལ་བ་ཆད། །ཀུན་གྱིས་ཅུང་ཟད་ཙམ་རེ་བྱིན་པ་ཡིས། །སྐལ་བ་ཤིན་དུ་རྒྱལ་ཕྱིར་རྒྱལ་པོར་ཐོགས། །གཅིག་གི་སྐལ་པ་ཅིག་ཤོས་ཀྱིས་བརྐུས་པས། །དེ་ནས་གཉིས་ལྡན་བསྐལ་པ་ཅེས་བྱར་གྱུར། །རྐུ་བ་སྲུང་ཕྱིར་སྔར་གྱི་རྒྱལ་པོ་དེ། །ཞིང་རྣམས་སྲུང་བསྐོས་དྲུག་ཆ་གླར་བྱིན་པས། །ཞིང་དཔོན་དུ་གྲགས་དཔྱ་ཁྲལ་ཐོག་མ་ཡིན། །རྐུ་བ་བྱུང་ཚེ་ཞི་བས་མ་བཟློག་ནས། །ལུས་ལ་བསྣུན་སྟེ་བསད་པས་སྲོག་གཅོད་བྱུང༌། །གསོད་པས་སྐྲག་རྣམས་རྫུན་དུ་སྨྲ་བར་བྱེད། །དེ་ལྟར་རྩ་བ་བཞི་ག་སྤྱད་པའི་ཕྱིར། །རྩོད་པར་ལྡན་པའི་དུས་སུ་གྱུར་པ་ཡིན། །འདི་ནི་ཐུབ་བསྟན་སྐྱོན་མེད་ལོ་བཅུ་གཉིས། །གནས་དང་སྔོན་གྱི་རྫོགས་ལྡན་བསྐལ་པ་སྦྱར། །དེ་ནས་ཆུ་བུར་དང་པོ་བྱུང་བའི་ཚེ། །ཕམ་པར་བཅས་དང་གསུམ་ལྡན་སྦྱར་བ་སོགས། །འདུལ་བའི་ལུང་ལས་ཇི་སྐད་བཤད་བཞིན་སྟེ། །ཆོས་ཀྱི་དབང་དུ་བྱས་པའི་དུས་བཞི་ཡིན། །མདོ་སྡེ་ལྟར་ན་རྩོད་ལྡན་འཆར་བ་དང༌། །ཞིང་དེའི་སངས་རྒྱས་ཐོག་མ་དུས་མཚུངས་འབྱུང༌། །ལོངས་སྤྱོད་མཐའ་དག་ཚང་བ་རྫོགས་ལྡན་སྟེ། །རྐང་པ་གཅིག་ཉམས་གསུམ་ལྡན་ལ་སོགས་སྦྱར། །ལོངས་སྤྱོད་དབང་དུ་བྱས་པའི་དུས་བཞི་སྟེ། །རྩོད་ལྡན་དུས་སུ་འཁོར་སྒྱུར་མི་འབྱུང་ཞེས། །བཤད་པའང་མདོ་སྡེའི་ལུགས་ཀྱི་དུས་བཞི་ཡིན། །སྔགས་ལས་དུས་བཞིའི་རྣམ་གཞག་གཞན་མང་བཤད། །ཁ་ཅིག་འདས་པའི་སངས་རྒྱས་གསུམ་པོ་དང༌། །རྫོགས་ལྡན་ལ་སོགས་རེ་རེ་བཞིན་སྦྱར་སྟེ། །རྩོད་ལྡན་དུས་སུ་ཤཱཀྱའི་ཏོག་བྱོན་ཞེས། །འཆད་ནི་འཇིག་རྟེན་གནའ་གཏམ་ཙམ་ཞིག་སྟེ། །བསྟན་ལས་བྱུང་བའི་དུས་བཞིའི་རྣམ་གཞག་མིན། །ཁ་ཅིག་དུར་སྒྲ་སྒྲོག་པའི་ལྗོན་ཤིང་ལས། །རྒྱལ་བའི་སྐུ་གདུང་ཟླུམ་(ཀ༦ན)
ཞིང་ཆེ་བ་བྱུང༌། །དེ་ཡི་ནང་ནས་བརྫུས་སྐྱེས་ཁྱེའུ་ནི། །ལྟ་བས་མི་ངོམས་བྱུང་དེ་མང་བཀུར་ཡིན། །དེ་བས་གདུང་གི་བརྒྱུད་པར་འཇོག་ཅེས་དང༌། །དེ་བཞིན་ཡར་འདེད་ལྷ་བདུད་ཞེས་ཟེར་མོད། །ཚད་ལྡན་གཞུང་ལས་བཤད་པ་མ་མཐོང་ངོ༌། །ལོངས་སྤྱོད་ཉམས་ཤིང་གསོད་པའི་བར་བྱུང་བས། །སྐྱོ་སྟེ་ནགས་སུ་གནས་པས་བསམ་གཏན་ཐོབ། །མངོན་ཤེས་ལྡན་ལ་དྲང་སྲོང་ཞེས་བྱར་གྲགས། །བསམ་གཏན་མ་ཐོབ་སྐྱོ་བས་གྲོང་དུ་འོངས། །སྙན་ངག་སོགས་ཀྱིས་འཚོ་ལ་བྲམ་ཟེར་ཐོགས། །དཔྱ་ཁྲལ་གྱིས་འཚོ་རྒྱལ་རིགས་ཅེས་སུ་གྲགས། །ཚོང་དཔོན་སོགས་བྱེད་དེ་རྣམས་རྗེ་འུའི་རིགས། །ཞིང་གི་ལས་ཀྱི་འཚོ་བ་དམངས་རིགས་སྟེ། །གསོད་སོགས་ངན་ལས་ཀྱིས་འཚོ་གདོལ་པའི་རིགས། །མདོར་ན་བྱེད་ལས་སོ་སོ་ཐ་དད་ལས། །རྒྱལ་རིགས་ལ་སོགས་བཟང་ངན་རིགས་ལྔར་བཞག །འདི་ཡན་རིགས་ལ་ཁྱད་པར་ཡོད་མ་ཡིན། །དེ་བཞིན་དུད་འགྲོ་ཡི་དྭགས་དམྱལ་བ་པ། །རིམ་པར་ཆགས་ཤིང་དམྱལ་བ་མནར་མེད་དུ། །སེམས་ཅན་གཅིག་གཅིག་སྐྱེས་པར་གྱུར་པ་ན། །ཆགས་བསྐལ་བར་བསྐལ་ཉི་ཤུ་རྫོགས་པ་སྟེ། །དེ་ནས་གནས་པའི་བསྐལ་པ་རྩོམ་པ་ཡིན། །ཁ་ཅིག་མང་བཀུར་མ་དྲོས་མཚོར་ཁྲུས་བྱས། །ཁུ་བ་ལྷུང་ལས་དུད་འགྲོའི་སྐྱེ་གནས་བྱུང༌། །བརྐུས་པའི་མི་གཉིས་གཅིག་བསད་གཅིག་སྤྱུགས་པས། །བསད་དེ་སྨོན་ལམ་ལོག་པས་ལྷ་མིན་གྱུར། །སྤྱུགས་པ་ཤི་འཕོས་ཡི་དྭགས་ཐོག་མར་སྐྱེས། །མང་བཀུར་འདས་ནས་ལྷ་དབང་བརྒྱ་བྱིན་གྱུར། །སྨོན་ལམ་མཐུ་དེས་ལྷ་དང་ལྷ་མིན་རྩོད། །དགེ་མཆོག་སྡིག་སྤྱད་དམྱལ་བར་སྐྱེས་གྱུར་སྟེ། །དེ་ཚེ་འགྲོ་བ་རིགས་དྲུག་ཚང་ངོ་ཞེས། །བོད་གཞུང་སྔ་རབས་འགའ་ལས་འཆད་པར་སྣང༌། །ཞིང་དཔོན་དེ་ཡིས་མི་རྣམས་ཆ་མཉམ་དུ། །ལེགས་པར་བསྐྱངས་པས་ཀུན་ཀྱང་དགའ་གྱུར་སྟེ། །མང་པོས་དཔོན་དུ་བཀུར་ཕྱིར་མང་བཀུར་གྲགས། །ཞིང་བདག་ཕོངས་པ་སྐྱོབ་པ་(ཀ༦བ)
རྒྱལ་རིགས་སྟེ། །ཆོས་དང་ཚུལ་ཁྲིམས་ཤེས་རབ་ཀུན་སྤྱོད་ཀྱིས། །འཁོར་རྣམས་མགུ་བར་བྱེད་ཕྱིར་རྒྱལ་པོར་བཏགས། །བསྐལ་བཟང་འདི་ལ་འཛམ་བུའི་གླིང་འདི་ན། །མི་ཡི་རྒྱལ་པོ་ཀུན་གྱི་ཐོག་མ་ཡིན། །དེ་ཚེ་མི་ལ་སེམས་ཅན་ཞེས་སུ་གྲགས། །དེ་སྲས་འོད་མཛེས་མི་ལ་ཚུར་ཤོག་ཟེར། །དེ་སྲས་དགེ་བ་མི་ལ་རྨེ་བ་ཅན། །དེ་སྲས་དགེ་མཆོག་མི་ལ་སྤྲིན་མགྲིན་ཟེར། །དེ་སྲས་གསོ་སྦྱོང་འཕགས་སྟེ་དེ་རྣམས་ལ། །སྔོན་གྱི་རྒྱལ་པོ་སྡེ་ལྔ་ཞེས་སུ་གྲགས། །འདི་ཚེ་མི་ལ་ཏ་ལའི་རྐང་ཞེས་འབོད། །མིང་དེ་རྣམས་ནི་འདོད་རྒྱལ་ཁོ་ན་ཡིན། །གསོ་སྦྱོང་འཕགས་ཀྱི་སྤྱི་བོར་ཤ་རྨེན་ནི། །འཇམ་པོ་ལས་བྱུང་ཁྱེའུ་ང་ལས་ནུ། །གླིང་བཞིར་དབང་བྱས་གསེར་གྱི་འཁོར་ལོས་སྒྱུར། །ལྷ་དབང་བརྒྱ་བྱིན་སྟན་ཕྱེད་བསྟབས་པ་ཡིན། །ཚེ་ཚད་བརྒྱ་བྱིན་བརྒྱ་དང་སོ་དྲུག་ཐུབ། །འདི་དུས་མི་ཡི་ཚེ་ཚད་དཔག་དུ་མེད། །དེ་ཡི་བརླ་གཡས་ལས་སྐྱེས་མཛེས་པ་སྟེ། །གླིང་གསུམ་དབང་བྱེད་དངུལ་གྱི་འཁོར་སྒྱུར་ཡིན། །དེ་ཡི་བརླ་གཡོན་ལས་སྐྱེས་ཉེ་མཛེས་ནི། །གླིང་གཉིས་དབང་བྱེད་ཟངས་ཀྱི་འཁོར་ལོས་སྒྱུར། །དེ་ཡི་རྐང་བོལ་ལས་སྐྱེས་མཛེས་ལྡན་ནི། །གླིང་གཅིག་དབང་བ་ལྕགས་ཀྱི་འཁོར་ལོས་སྒྱུར། །དེ་ཡི་རྐང་མཐིལ་ལས་སྐྱེས་ཉེས་མཛེས་ལྡན། །འཛམ་གླིང་ལ་དབང་སྟོབས་ཀྱི་འཁོར་སྒྱུར་སྟེ། །འདི་རྣམས་འཁོར་ལོས་སྒྱུར་བ་སྡེ་ལྔ་ཟེར། །ང་ལས་ནུ་ཚེ་རིགས་པའི་གནས་རྣམས་ལ། །དཔྱོད་ཕྱིར་མི་རྣམས་ཀྱི་མིང་དཔྱོད་པ་ཅན། །དེ་བཞིན་སེམས་པ་ཅན་དང་ཉེར་རྟོག་ཅན། །ཤེད་བུ་ཤེད་ལས་སྐྱེས་སོགས་ད་ལྟའི་བར། །དུ་མར་བརྗོད་ཅིང་བདག་དང་གང་ཟག་སོགས། །བྱེད་པའི་སྐྱེས་བུའི་རྣམ་གྲངས་གཞན་དུའང་རྟོག །ཉེ་མཛེས་ལྡན་གྱིས་འཛམ་གླིང་སྐྱོང་བའི་ཚེ། །སྐྱེ་དགུའི་ཚེ་ལོ་བཞི་ཁྲི་ཐུབ་པ་སྟེ། །དེ་ཚེ་བསྐལ་བཟང་སངས་རྒྱས་ཐོག་མ་ནི། འཁོར་བ་འཇིག་བྱོན་མཛད་པ་བཅུ་གཉིས་བསྟན། །(ཀ༧ན)
འདི་ཡན་སྡེ་སྣོད་གསུམ་པ་ཕལ་ཆེར་མཚུངས། །ཉེ་མཛེས་ལྡན་སྲས་བཟང་པོའམ་རྒྱས་བྱེད་ཡིན། །དེ་ནས་སྲེད་པ་སྲེད་དང་བཏང་བ་དང༌། །བཏང་བཟུང་ལུས་ཐུལ་ཤེས་ལྡན་ངན་སྤོང་དང༌། །ཤིང་རྟ་སྡུག་གུ་དུག་ཅན་དུག་ཅན་ཆེ། །ཤངྐུ་ནི་དང་ཤངྐུ་ནི་ཆེན་པོ། །ཀུ་ཤི་ཉེ་བའི་ཀུ་ཤི་ཀུ་ཤི་ཆེ། །རྒྱས་བྱེད་རྒྱས་བྱེད་ཆེན་པོ་ལེགས་མཐོང་དང༌། །ལེགས་མཐོང་ཆེན་པོ་གནོད་སེལ་ཉེ་གནོད་སེལ། །རྨ་བྱ་ངེས་འགྲོ་བདེ་བྱེད་རབ་འདུལ་དང༌། །རབ་ཏུ་སྒྲ་བསྒྲགས་རབ་གདུང་ལྡན་འོད་བྱེད། །ལྷུན་པོ་རི་རབ་ལྷུན་ལྡན་མེ་ལྕེ་དང༌། །མེ་ལྕེའི་ཕྲེང་དང་མེ་ལྕེ་ལྡན་པའི་བརྒྱུད། །འབུམ་དུ་ཚང་བ་གྲོང་ཁྱེར་གྲུ་འཛིན་བྱུང༌། །དགྲ་རྣམས་འདུལ་ཕྱིར་དགྲ་འདུལ་རྒྱལ་པོའི་བརྒྱུད། །ལྔ་ཁྲི་བཞི་སྟོང་དམག་མི་ཚུགས་སུ་བྱུང༌། །དེ་སྲས་རྒྱལ་པོ་མ་ཕེབས་འབེབས་ཀྱི་བརྒྱུད། །དྲུག་ཁྲི་སུམ་སྟོང་ཝ་ར་ཎཱ་སིར་བྱུང༌། །བཟོད་དཀའི་རྒྱུད། བརྒྱད་ཁྲི་བཞི་སྟོང་འདར་འཛིན་གྲོང་དུའོ། །ཚངས་བྱིན་རྒྱུད། སུམ་ཁྲི་ཉིས་སྟོང་གླང་ཆེན་གནས་སུ་སྟེ། །གླང་པོས་བྱིན་རྒྱུད། གྲོང་ཁྱེར་རྡོ་མཆོག་དུ་ནི་སྟོང་ཕྲག་ལྔ། །བལ་བུའི་རྒྱུད། གྲོང་གི་རྡལ་དུ་སུམ་ཁྲི་ཉིས་སྟོང་སྟེ། །ཚན་ཆེན་ཐུབ་རྒྱུད། གཞན་ལས་རྒྱལ་དུ་སུམ་ཁྲི་ཉིས་སྟོང་ཉིད། །རྒྱལ་བ་པོའི་རྒྱུད། ཀ་ནྱ་ཀུཔ་ཛའི་གྲོང་དུ་ཁྲི་ཉིས་སྟོང༌། །རྒྱལ་བའི་སྡེའི་རྒྱུད། ཙམ་པའི་གྲོང་དུ་ཁྲི་དང་སྟོང་ཕྲག་བརྒྱད། །ཀླུའི་ལྷ་རྒྱུད། ཏཱ་ལའི་ཕྲེང་བར་ཉི་ཁྲི་ལྔ་སྟོང་དང༌། །སླར་ཡང་མི་ཡི་ལྷ་རྒྱུད་ཁྲི་ཉིས་སྟོང༌། །དུག་ཅན་པའི་ལྷ་རྒྱུད། བ་སོའི་གྲོང་དུ་ཁྲི་དང་སྟོང་ཕྲག་བརྒྱད། །བློ་བཟང་རྒྱུད། ཉི་ཁྲི་ཆིག་སྟོང་རྒྱལ་པོའི་ཁབ་ཏུ་བྱུང༌། །ཝ་ར་ཎཱ་སིར་མུན་སེལ་རྒྱུད་པ་བརྒྱ། །དབང་ཆེན་སྡེའི་རྒྱུད། རྩྭ་ཅན་དུ་ནི་བརྒྱད་ཁྲི་བཞི་སྟོང་སྟེ། །གྲུ་འཛིན་དུ་ནི་མཚོ་ལྷའི་རྒྱུད་པ་སྟོང༌། །དཀའ་ཐུབ་སྤྱོད་རྒྱུད། བརྒྱད་ཁྲི་བཞི་སྟོང་གྲོང་ཁྱེར་རྩྭ་ཅན་སྟེ། །ས་གཙོའི་རྒྱུད་སྟོང་ཝ་ར་ཎཱ་སིར་བྱུང༌། །དེ་ཡི་ཐ་མ་རྒྱལ་(ཀ༧བ)
པོ་གཉེན་ལྡན་སྟེ། །དེ་ཚེ་སྐྱེ་རྒུའི་ཚེ་ལོ་སུམ་ཁྲི་ཐུབ། །རྫོགས་པའི་སངས་རྒྱས་གསེར་ཐུབ་འཇིག་རྟེན་བྱོན། །ས་བདག་རྒྱུད། དེ་ནས་དམག་མི་ཚུགས་པར་སྟོང་ཡིན་སྟེ། །ས་འཛིན་རྒྱུད། བརྒྱད་ཁྲི་བཞི་སྟོང་འདྲེས་པའི་གྲོང་དུ་བྱུང༌། །དེ་ཡི་ཐ་མ་རྒྱལ་པོ་ལྷ་ཆེན་སྟེ། །ཨ་སྨྲའི་ཚལ་དུ་རྒྱལ་པོའི་དྲང་སྲོང་མཛད། །དེ་རྒྱུད་བརྒྱད་ཁྲི་བཞི་སྟོང་ཡང་དེ་བཞིན། །རྒྱལ་པོའི་དྲང་སྲོང་ཚངས་པར་སྤྱད་པ་སྤྱོད། །དེ་ནས་དེས་འཕེན་མུ་ཁྱུད་མུ་ཁྱུད་བརྟེན། །ཚན་ཆེན་པོ་དང་ཟ་བ་ཉེར་ཟ་དང༌། །ཟ་ཆེན་ཟ་ལྡན་གྱ་ནོམ་སྣང་བ་དང༌། །མཉམ་ལྟ་ཐོས་པའི་སྡེ་དང་ཆོས་ཀྱི་སྡེ། །རྟོགས་པ་རྟོགས་ཆེན་རྟོགས་སྡེ་མྱ་ངན་མེད། །མྱ་ངན་བྲལ་དང་མཚམས་བརྟན་རྒན་མཚམས་དང༌། །དུནྡུ་མ་ར་སྐྱ་རེངས་ཕྱོགས་བདག་དང༌། །རྡུལ་བཟང་བདེ་བྱེད་ཀུན་དགའ་མེ་ལོང་གདོང༌། །སྐྱེད་པོ་རྒྱལ་བ་ཁྱུ་མཆོག་བཟའ་བཏུང་ལྡན། །བཟའ་བཏུང་མོད་དང་ཐུབ་མེད་གཞན་ལས་རྒྱལ། །བརྟན་པོ་རབ་བརྟན་སྟོབས་ཆེན་གཞོན་པ་མང༌། །བློ་བཟང་བརྟན་པར་ཞོན་དང་གཞུ་བཅུ་པ། །གཞུ་བརྒྱ་དགུ་བཅུའི་གཞུ་དང་རྣམ་རྒྱལ་གཞུ། །གཞུ་བཀྲ་གཞུ་སྲ་གཞུ་བརྟན་ཤིང་རྟ་བཅུ། །ཤིང་རྟ་བརྒྱ་པ་དགུ་བཅུ་སྣ་ཚོགས་པ། །ཤིང་རྟ་རྣམ་པ་སྣ་ཚོགས་ཤིང་རྟ་བརླིང༌། །ཤིང་རྟ་བརྟན་རྒྱུད་བདུན་ཁྲི་བདུན་སྟོང་ནི། །ལེགས་པར་སྣང་བའི་གྲོང་ཁྱེར་ཆེན་པོར་བྱུང༌། །ནམ་མཁའི་བདག་དང་མུས་ཐུད་རྒྱུད། ཝ་ར་ཎཱ་སིར་བརྒྱ་ཕྲག་གཅིག་གི་མཐར། །རྒྱལ་པོ་ཀྲྀ་ཀྲི་ཚེ་ལོ་ཉི་ཁྲི་སྟེ། །རྫོགས་པའི་སངས་རྒྱས་འོད་སྲུང་འཇིག་རྟེན་བྱོན། །ཀྲྀ་ཀྲིའི་སྲས་པོ་ལེགས་པར་སྐྱེས་ཀྱི་རྒྱུད། །བརྒྱ་ཕྲག་གཅིག་ནི་གྲོང་ཁྱེར་གྲུ་འཛིན་བྱུང༌། །དེ་ནས་རྒྱལ་པོ་རྣ་བ་ཅན་གྱི་བུ། །ཆེ་བ་གཽ་ཏ་མ་རབ་ཏུ་བྱུང༌། །ཆུང་བ་བ་ར་དྷྭ་ཛར་རྒྱལ་ས་གཏད། །དེ་ཚེ་གཡོན་ཅན་པདྨའི་རྩ་ལག་གིས། །མིག་སེར་དབང་གིས་སྨད་ཚོང་བཟང་མོ་བསད། །རལ་གྲི་གཽ་ཏ་མའི་སྤྱིལ་པོར་བོར། །(ཀ༨ན)
གཤེད་མས་གཽ་ཏམ་བཟུང་སྟེ་གོ་རར་བཅུག །རྒྱལ་པོས་རང་གི་ཕུ་བོ་ཡིན་པ་དང༌། །དེ་ལ་ཉེས་པ་མེད་པའང་མ་ཤེས་ནས། །བསད་ཤིང་ལ་བཙུགས་འཆི་ཁར་མཁན་པོ་ནི། །དྲང་སྲོང་མདོག་ནག་གིས་མཐོང་རྒྱུ་དྲིས་པས། །གཽ་ཏ་མས་རང་གིས་མ་ཉེས་པའི། །བདེན་པ་བརྗོད་པས་མཁན་པོ་གསེར་མདོག་གྱུར། །བདག་ནི་འདི་ནས་འགྲོ་བ་གར་སྐྱེ་དྲིས། །རྒྱལ་རྒྱུད་ཆད་ན་མི་རུང་བར་ཤེས་ནས། །མཁན་པོས་བྲམ་ཟེའི་སྨྲེང་ལས་བུ་མེད་པ། །དེ་ལ་ཕྱི་མའི་འགྲོ་བ་མེད་ཟེར་གྱིས། །ཁྱོད་ཀྱིས་རིགས་རྒྱུད་འཇོག་པར་ནུས་སམ་དྲིས། །བདག་ལ་བུད་མེད་རྒྱུས་ཀྱང་མི་འཚལ་ན། །ད་ལྟ་གནད་རྣམས་འཆད་ཚེ་ག་ལ་ཞིག །མཁན་པོས་རྫུ་འཕྲུལ་གྱིས་ནི་རྫི་ཆར་སྤྲུལ། །སྡུག་བསྔལ་ཅུང་ཟད་ཞི་བར་བྱས་ནས་ཀྱང༌། །ཆགས་པ་ཡིད་ལ་བྱེད་དུ་བཅུག་པ་ཡིས། །ཁྲག་དང་ས་བོན་འདྲེས་པ་ས་ལ་ཟགས། །བསད་ཤིང་རྩ་བར་སྒོང་ང་གཉིས་སུ་གྱུར། །མཁན་པོས་ཁྱེར་སྟེ་བུར་ཤིང་ཚལ་དུ་བཞག །ཉི་མའི་ཟེར་གྱིས་སྨིན་ཞིང་བརྡོལ་བ་ལས། །ཁྱེ་འུ་རེ་བྱུང་གཅིག་ནི་ཉི་མའི་གཉེན། །ཅིག་ཤོས་བུ་རམ་ཤིང་པར་བཏགས་སྟེ་གསོས། །རྒྱལ་པོ་དེ་འདས་སྲས་ཀྱང་མེད་པའི་ཚེ། །དྲང་སྲོང་གཽ་ཏ་མ་བཙལ་བ་དང༌། །མཁན་པོས་སྔོན་གྱིས་ཚུལ་བརྗོད་ཁྱེའུ་གཉིས། །བཏང་ནས་ཕུ་བོ་རྒྱལ་པོར་བསྐོས་པ་དང༌། །དེ་ཡང་རྒྱལ་བུ་མེད་པ་ཉིད་དུ་འདས། །དེ་ནས་བུ་རམ་ཤིང་པ་རྒྱལ་པོར་བསྐོས། །འདི་གཉིས་བུ་རམ་ཤིང་པའི་སྟེངས་ཞེས་ཟེར། །སྲས་རྒྱུད་བརྒྱ་ནི་གྲུ་འཛིན་ཡུལ་དུ་བྱུང༌། །དེ་ནས་རྒྱལ་པོ་འཕགས་སྐྱེས་པོ་ཅེས་པ། །དེ་ལ་སྲས་བཞི་སྐར་མདའི་གདོང་དང་ནི། །ལག་ན་གླང་འདུལ་རྐང་གདུབ་ཅན་ཞེས་བྱུང༌། །བཙུན་མོ་ཤི་ནས་རྒྱལ་པོ་གཞན་ཞིག་གི །བུ་མོ་བསླངས་པས་དེ་ལས་སྐྱེས་པའི་བུ། །རྒྱལ་སར་འབྱིན་པའི་གཙིགས་ཡིག་བཟུང་ནས་བྱིན། །དེ་ལ་ཁྱེ་འུ་རྒྱལ་སྲིད་དགའ་ཞེས་བྱུང༌། །བློན་པོའི་གཡོ་ཡིས་ཕུ་བོ་བཞི་པོ་(ཀ༨བ)
རྣམས། །སྲིང་མོ་གཉེན་བཅས་གངས་རི་དང་ཉེ་བ། །ཆུ་བོ་སྐལ་ལྡན་ཤིང་རྟ་འབབ་པའི་འགྲམ། །དྲང་སྲོང་སེར་སྐྱའི་གནས་དང་ཉེ་བར་སྤྱུགས། །དེ་དག་གནས་དེར་ལོ་མའི་སྤྱིལ་པོ་བྱས། །རི་དྭགས་ཤ་དང་རྩ་བ་འབྲས་བུས་འཚོ། །དྲང་སྲོང་དེ་ལ་ཕ་བཞིན་ལྟ་བར་གྱུར། །ལང་ཚོ་རྒྱགས་ཆེས་འདོད་པས་ཉེན་པ་ཡིས། །ལུས་རིད་གྱུར་པ་དྲང་སྲོང་ལ་སྨྲས་པས། །རང་རང་སྲིང་མོ་སྤོངས་ལ་མས་དབེན་གྱི། །སྲིང་མོ་དག་དང་ལྷན་ཅིག་འགྲོགས་པར་གྱིས། །རྒྱལ་རིགས་རྒྱལ་སྲིད་ཉམས་ལ་འདི་རུང་ཞེས། །སྨྲས་པ་ཚད་མར་བཟུང་སྟེ་མིང་སྲིང་འགྲོགས། །དེ་ལས་ཁྱེའུ་བུ་མོ་མང་དུ་འཕེལ། །དྲང་སྲོང་དེ་ཡིས་ཡངས་པའི་ས་ཞིག་དུ། །རིལ་བའི་ཆུ་བྲིམས་གྲོང་ཁྱེར་བཀོད་པ་བྱས། །རྒྱལ་རིགས་དེ་དག་ཐམས་ཅད་དེར་གནས་བཅས། །སེར་སྐྱས་བསྟན་ཕྱིར་སེར་སྐྱའི་གཞི་ཞེས་གྲགས། །ཕྱིས་ནས་མང་དུ་འཕེལ་བས་དེར་མ་ཤོང༌། །འབབ་ཆུ་རོ་ཧི་ཀ་ཡི་ཕར་ངོས་སུ། །ལྷ་ཡིས་བསྟན་པའི་ས་རུ་གྲོང་བཅས་པས། །གྲོང་ཁྱེར་ལྷས་བསྟན་ཞེས་བྱར་གྲགས་པ་བྱུང༌། །ཡབ་ཀྱིས་རྒྱལ་བུ་བཞི་ཡི་གཏམ་དྲིས་པས། །མིང་སྲིང་འགྲོགས་པར་ཐོས་ཚེ་ངོ་མཚར་ནས། །རྒྱལ་པོས་ལག་པ་བརྐྱངས་སྟེ་གཞོན་ནུ་རྣམས། །ཕོད་པ་ཡིན་ནོ་ཞེས་སྨྲས་དབང་ཆེན་གྱིས། །སྨྲས་ཕྱིར་དེ་ཕྱིན་ཤཱཀྱ་ཞེས་པར་གྲགས། །ཡབ་འདས་རྒྱལ་སྲིད་འགའ་ནི་རྒྱལ་པོར་གྱུར། །དེ་ཡང་བུ་མེད་འདས་ནས་ཕུ་བོ་བཞི། །རིམ་པས་བསྐོས་པས་དང་པོ་གསུམ་པོ་ནི། །རྒྱལ་པོར་གྱུར་པའི་སྲས་མེད་བཞིན་དུ་འདས། །བཞི་པ་རྐང་གདུབ་ཅན་གྱི་བུ་གནས་འཇིག །དེ་སྲས་བ་ལང་གནས་སྟེ་དེ་ཡི་སྲས། །སེང་གེའི་འགྲམ་དང་སེང་གེའི་སྒྲ་ཞེས་གཉིས། །འཛམ་བུའི་གླིང་ན་གནམ་རུ་ཐོགས་པའི་མཆོག །སེང་གེའི་འགྲམ་ལ་སྲས་བཞི་ཟས་གཙང་མ། །ཟས་དཀར་བྲེ་བོ་ཟས་དང་བདུད་རྩི་ཟས། །རྒྱལ་པོ་གཙང་མའི་ཟས་ལ་སྲས་གཉིས་སྟེ། །སྒྱུ་འཕྲུལ་ཆེ་ལས་བཅོམ་ལྡན་(ཀ༩ན)
འདས་བལྟམས་ཤིང༌། །སྒྱུ་འཕྲུལ་ལས་ནི་གཅུང་པོ་མཛེས་དགའ་བོ། །ཟས་དཀར་སྲས་པོ་རྒྱལ་དང་བཟང་ལྡན་གཉིས། །བྲེ་བོ་ཟས་ལ་མིང་ཆེན་མ་འགགས་པ། །བདུད་རྩི་ཟས་ལ་ལྷས་བྱིན་ཀུན་དགའ་བོ། །དོན་ཀུན་གྲུབ་པའི་སྲས་གཅིག་དགྲ་གཅན་ཟིན། །དེ་ཡིས་ཤཱཀྱ་ཆེན་པོའི་རྒྱུད་པ་རྫོགས། །སྲིད་པའི་རྒྱུན་བཅད་ཡང་སྲིད་མེད་ཏོ་ཅེས། །ཤཱཀྱ་རྣམས་ཀྱིས་ཆོ་འབྲང་ཞུས་པའི་ཚེ། །མུ་སྟེགས་པ་རྣམས་གཽ་ཏ་མ་ནི། །རང་རིགས་སྒྲོག་ཞེས་འཕྱ་བ་སྤང་བའི་ཕྱིར། །ང་ནི་རེ་ཞིག་སྐུ་རྒྱབ་བསྙུན་པ་བསལ། །ཁྱོད་ཀྱིས་སྟོན་ཞེས་བསྒོས་ནས་གཟིམས་པར་བསྟན། །རྫུ་འཕྲུལ་ལྡན་མཆོག་མོངྒལ་བུ་ཡིས་ནི། །མཉམ་པར་བཞག་སྟེ་ཏིང་འཛིན་ལས་ལངས་ནས། །རྒྱ་ཆེར་བཤད་ཅེས་འདུལ་བའི་ལུང་ལས་གསུངས། །མངོན་པར་བྱུང་བའི་མདོ་སྡེ་ལས་བཤད་དང༌། །མངོན་པའི་འཇིག་རྟེན་བཞག་པར་བཤད་པ་སྟེ། །གསུམ་པོ་གྲངས་དང་གོ་རིམ་མི་འདྲ་བ། །སྡེ་སྣོད་གསུམ་གྱི་འཆད་ཚུལ་ཐ་དད་ཡོད། །ཆོས་ཀྱི་རྒྱལ་པོའི་བཀའ་ཆེམས་ཀ་བཀོལ་མར། །འཕགས་སྐྱེས་པོ་ཡི་སྲས་གསུམ་སྲིང་མོར་བཅས། །སྤྱུགས་པའི་ཆེ་རྒྱུད་ཤཱཀྱ་ཆེན་པོ་སྟེ། །བར་མའི་རྒྱུད་ལ་ཤཱཀྱ་ལི་ཙཱ་བཱི། །ཆུང་བའི་རྒྱུད་ལ་རི་བྲག་པ་ཅེས་གསུངས། །དང་པོའི་རྒྱུད་པ་གནས་འཇོག་ས་ཁྱིམ་ནས། ཁྲི་དང་ལྔ་སྟོང་གྲོང་ཁྱེར་སེར་སྐྱར་བྱུང༌། །དེ་ཡི་ཐ་མ་ཤིང་རྟ་བཅུ་པ་ནས། །རྒྱལ་རབས་བཅུ་གཅིག་པ་ལ་གཞུ་བརྟན་བྱུང༌། །དེ་ཡི་བུ་ནི་སེང་གེའི་འགྲམ་ཞེས་གསུངས། །ཁ་ཅིག་རྒྱལ་པོ་ཤིང་རྟ་བཅུ་པའི་སྲས། །གསུམ་ལས་ཤཱཀྱ་ཆེ་སོགས་རིགས་གསུམ་བྱས། །ཆེན་པོ་ནས་བཟུང་ཉེར་བརྒྱད་འདས་པ་ན། །སེང་གེའི་ཟ་འགྲམ་བྱུང་བར་འཆད་པ་དང༌། །ཁ་ཅིག་དྲང་སྲོང་གཽ་ཏ་མ་ཡི། །སྒོ་ང་གསུམ་ལས་རིགས་གསུམ་གྱེས་སྨྲ་སོགས། །(ཀ༩བ)
བཤད་པའི་རྣམ་གྲངས་དུ་མ་བྱེད་པར་སྣང༌། །གནས་བསྐལ་ཡ་ཐོག་མ་ཐོག་རིང་མོ་གཉིས། །དེ་ཡི་བར་དུ་ཁུག་པ་བཅོ་བརྒྱད་དེ། །གསུམ་གྱིས་གནས་བསྐལ་བར་བསྐལ་ཉི་ཤུ་ཡིན། །ད་ལྟ་ཡ་ཐོག་རིང་མོའི་མཇུག་ཡིན་སྟེ། །ཚེ་ལོ་བཅུ་པ་རྫོགས་པའི་ཡར་འཕེལ་ནས། །བར་གྱི་ཁུག་པ་བཅོ་བརྒྱད་འགོ་རྩོམ་བྱེད། །དེ་ཡང་ད་ལྟར་གནས་པའི་མི་རྣམས་ཀྱིས། །ཕ་མ་དགེ་སྦྱོང་བྲམ་ཟེ་རྒན་རབས་སོགས། །བརྙས་ཤིང་མི་དགེའི་ལས་ལམ་སྤྱད་པའི་རྒྱུས། །ཚེ་དང་ལོངས་སྤྱོད་རིམ་པས་བྲི་གྱུར་སྟེ། །ཚེ་ཡི་རིང་ཚད་ལོ་བཅུ་ཐུབ་པར་འགྱུར། །དེ་ཚེ་གོས་མཆོག་སྐྲ་ཡི་ལ་བ་སྟེ། །ཟས་མཆོག་ཀོ་ཊ་རྒྱན་མཆོག་མཚོན་ལ་བྱེད། །གབ་ཙེ་རུས་གོང་ཐུར་མས་འཚོ་བ་ཡིས། །བརྗུད་དེ་འཆི་བ་མུ་གེའི་བསྐལ་པ་ནི། །ལོ་བདུན་ཟླ་བདུན་ཞག་བདུན་བར་དུ་འབྱུང༌། །དེ་ནས་ནད་ཀྱི་བསྐལ་པ་འཇིགས་རུང་བ། །ཟླ་བ་བདུན་དང་ཞག་བདུན་བར་དུ་འབྱུང༌། །དེ་ནས་མཐོང་ཚད་གཅིག་གིས་གཅིག་གསོད་པ། །མཚོན་ཆའི་བསྐལ་པ་ཞག་བདུན་ཁོ་ན་འབྱུང༌། །དེ་ནས་ལྷག་མར་ལུས་པའི་མི་རྣམས་ནི། །སྡིག་པས་སྐྱོ་སྟེ་སྲོག་གཅོད་སྤོང་བར་འགྱུར། །དེ་ཡིས་ཚེ་ལོ་ཉི་ཤུ་ཐུབ་པར་འཕེལ། །གཟུགས་མདོག་ལོངས་སྤྱོད་སྔོན་ལས་ལྷག་པར་གྱུར། །དེ་བཞིན་མ་བྱིན་ལེན་སོགས་དགུ་རིམ་བཞིན། །དེ་ནས་ཆགས་དང་འདོད་དང་ལོག་ཆོས་སྤངས། །ཕ་མ་དགེ་སྦྱོང་བྲམ་ཟེ་རྒན་རབས་ལ། །བཀུར་དང་བྱས་ཤེས་དྲིན་གཟོ་ལ་གནས་པས། །སྔོན་ལས་ཚེ་དང་གཟུགས་མདོག་ལོངས་སྤྱོད་རྣམས། །རིམ་པས་ཉིས་འགྱུར་འཕེལ་སྟེ་བརྒྱད་ཁྲིར་ཐུག །མི་ཡི་ཚེ་ལོ་བརྒྱ་པར་གྱུར་པའི་ཚེ། །འཕགས་པའི་གནས་བརྟན་བཅུ་དྲུག་འཛམ་གླིང་དུ། །དགྲ་བཅོམ་འཁོར་མང་ལྡན་པ་གཤེགས་ནས་ནི། །སྐལ་ལྡན་རབ་ཏུ་འབྱིན་ཞིང་ཤཱཀྱའི་བསྟན། །སླར་ཡང་སྐྱེ་རྒུ་རྣམས་(ཀ༡༠ན)
ཀྱི་ཚེ་ལོ་ནི། །བརྒྱ་ཕྲག་དྲུག་པར་འཕེལ་བ་དེ་སྲིད་གནས། །མི་རྣམས་ཚེ་ལོ་བདུན་བརྒྱ་ཐུབ་པའི་ཚེ། །གནས་བརྟན་བཅུ་དྲུག་གིས་ནི་སྟོན་པའི་བཀའི། །གླེགས་བམ་ཀུན་བསྡུས་རིན་ཆེན་མཆོད་རྟེན་བྱས། །བསྐོར་ནས་སྟོན་པར་ཕྱག་མཛད་མྱ་ངན་འདའ། །དེ་ཡིས་ཤཱཀྱའི་བསྟན་པ་མཐར་ཐུག་ཅེས། །དགའ་བའི་བཤེས་ཀྱི་རྟོགས་པ་བརྗོད་ལས་བྱུང༌། །ཀུན་མཁྱེན་བུས་དགའ་བའི་བཤེས་གཉེན་གྱི་རྟོགས་བརྗོད་ལས་ཚེ་ལོ་དྲུག་བརྒྱ་པའི་བར་བསྟན་པ་གནས་པར་བཤད་པ་ནི་སྐུ་གདུང་གི་མཆོད་རྟེན་སོགས་ལ་དགོངས་པ་ཡིན་ནོ་ཞེས་གསུངས་ཀྱང་དེ་ནི་མ་ཡིན་སྟེ་འཁོར་བ་འཇིག་ལ་སོགས་པ་འདས་པའི་སངས་རྒྱས་གསུམ་གྱི་ཡང་སྐུ་གདུང་དང་གཙུག་ཕུད་སོགས་ཀྱི་མཆོད་རྟེན་ད་ལྟ་བཞུགས་པས་དེ་དག་གི་བསྟན་པའང་གནས་པར་འགྱུར་བའི་ཕྱིར་རོ། །དེས་ན་རྟོགས་བརྗོད་དེ་ཉིད་ལས། སྟོན་པ་མྱ་ངན་ལས་འདས་ནས་ལོ་བརྒྱད་ན་ཡུལ་ཤི་པི་ཀའི་གྲོང་ཁྱེར་བྱིན་གྱིས་བརླབས་ཞེས་བྱ་བ་རྒྱལ་པོ་རིགས་པའི་སྡེའི་ཡུལ་ན་དགྲ་བཅོམ་པ་དགའ་བའི་བཤེས་གཉེན་ཞེས་བྱ་བ་མངོན་པར་ཤེས་པ་དྲུག་དང་ལྡན་པ་དེ་མྱ་ངན་ལས་འདའ་ཁར་དགེ་སློང་རྣམས་ཀྱིས་བསྟན་པ་ཇི་སྲིད་གནས་དྲིས་པས། ཁྱེད་རྣམས་མྱ་ངན་མ་བྱེད་ཅིག །ཅིའི་ཕྱིར་ཞེ་ན་བཅོམ་ལྡན་འདས་མྱ་ངན་ལས་འདའ་ཁར་གནས་བརྟན་ཆེན་པོ་བཅུ་དྲུག་གི་ལག་དུ་དམ་པའི་ཆོས་གཏད་དེ་སྦྱིན་བདག་རྣམས་ཀྱི་སྦྱིན་པ་ཡོངས་སུ་དག་པར་བྱ་བའི་ཕྱིར་རོ། །དེ་ཡང་གནས་བརྟན་དང་པོ་བ་ར་དྷྭ་ཛ་བསོད་སྙོམས་ལེན་ཞེས་བྱ་སྟེ་འཁོར་དགྲ་བཅོམ་པ་སྟོང་དག་ལྷན་ཅིག་བ་ལང་སྤྱོད་ཀྱི་གླིང་ན་གནས་སོ། ༡ །གསེར་གྱི་བུ་འཁོར་ལྔ་སྟོང་དང་བྱང་ཕྱོགས་ཁ་ཆེའི་ཡུལ་ནའོ། ༢ །བ་ར་དྷྭ་ཛ་དྲུག་སྟོང་དང་ཤར་ལུས་འཕགས་གླིང་ནའོ། ༣ །མི་ཕྱེད་པ་བདུན་སྟོང་དང་འཛམ་གླིང་ནའོ། ༤ །བཀྐུ་ལ་དྲུག་སྟོང་དང་སྒྲ་མི་སྙན་ནའོ། ༥ །བཟང་པོ་དགུ་སྟོང་དང་ཟངས་གླིང་ནའོ། ༦ །ནག་པོ་སྟོང་དང་སིངྒྷ་གླིང་ནའོ། ༧ །བད་སའི་བུ་སྟོང་ཕྲག་བཅུ་གཅིག་དང་པན་སའི་གླིང་ནའོ། ༨ །བ་ལང་སྐྱོང་ནི་བརྒྱད་སྟོང་དང་རི་སྤོས་ངད་ལྡང་ནའོ། ༩ །ལམ་བ་ནི་སྟོང་ཕྲག་བཅུ་གསུམ་དང་སུམ་ཅུ་རྩ་གསུམ་ནའོ། ༡༠ །དགྲ་གཅན་ཟིན་ནི་སྟོང་དང་པྲྀ་ཡངྐུའི་གླིང་ནའོ། ༡༡ །ཀླུའི་སྡེ་ནི་སྟོང་ཕྲག་བཅུ་གཉིས་དང་རི་སྐྱ་བོ་ནའོ། ༡༢ །ཟུར་གྱིས་ཤེས་ནི་སྟོང་ཕྲག་བཅུ་གསུམ་དང་རི་ངོས་(ཀ༡༠བ)
ཡངས་ནའོ། ༡༣ །ནགས་ན་གནས་ནི་སྟོང་ཕྲག་བཅུ་བཞི་དང་ལུས་འཕགས་ཀྱི་རི་ལའོ། ༡༤ །མི་ཕམ་པ་ནི་སྟོང་ཕྲག་བཅོ་ལྔ་དང་བྱ་རྒོད་ཕུང་པོའི་རི་ལའོ། ༡༥ །གཙུག་གི་ལམ་ནི་སྟོང་ཕྲག་བཅུ་དྲུག་དང་རི་བོ་གཉའ་ཤིང་འཛིན་ལ་གནས་སོ། ༡༦ །གནས་བརྟན་དེ་དག་གིས་མ་ཤེས་པའམ་མ་མཐོང་བའམ་མི་ཐོས་པའམ་མངོན་དུ་མ་བྱས་པ་ཅུང་ཟད་ཀྱང་མེད་ཏོ། །དགེ་འདུན་གྱི་བྱ་བའམ་སྤྱན་དྲངས་པའམ་བཅོ་ལྔ་སྟོན་ནམ་གཙུག་ལག་ཁང་དུ་དབུལ་བའམ་གཎྜིའི་རབ་གནས་སམ་གང་ཡང་ཅུང་ཟད་མི་ཤེས་པ་མེད་དེ་དེ་དག་དུ་གནས་བརྟན་བཅུ་དྲུག་པོ་དེ་དག་དང་འཁོར་དུ་བཅས་པ་གཞན་དང་གཞན་གྱིས་དེ་དང་དེར་བྱོན་ཞིང་གནས་སྟེ་དེ་ལྟར་སྦྱིན་པ་ཡོངས་སུ་དག་པར་བྱེད་ཏོ། །མ་འོངས་པ་ན་མཚོན་གྱི་བསྐལ་པ་བྱུང་བ་འདས་ནས་མི་རྣམས་དགེ་བ་བཅུ་དང་ལྡན་པས་ཚེ་སླར་འཕེལ་སྟེ་ལོ་བརྒྱ་ཐུབ་པ་ན་སྟོན་པའི་ཉན་ཐོས་དེ་དག་ཀྱང་ཕྱིར་ལ་ཛམྦུའི་གླིང་དུ་བྱོན་ནས་དམ་པའི་ཆོས་ཡང་དག་པར་སྟོན་པར་བྱེདཅིང་རབ་ཏུ་འབྱིན་པར་བྱེད་དེ་ཇི་སྲིད་སྐྱེ་རྒུ་རྣམས་ཀྱི་ཚེ་ལོ་དྲུག་བརྒྱ་པར་གྱུར་པ་དེ་སྲིད་ཀྱི་བར་དུ་བཅོམ་ལྡན་འདས་ཤཱཀྱ་ཐུབ་པའི་བསྟན་པ་དམ་པའི་ཆོས་གནས་པར་འགྱུར་སྟེ་མི་རྣམས་ཀྱིས་ཚེ་ལོ་བདུན་བརྒྱ་ཐུབ་པར་གྱུར་པ་ན་ཉན་ཐོས་དེ་དག་གིས་གང་སའི་སྟེང་འདི་ན་བཅོམ་ལྡན་འདས་ཤཱཀྱ་ཐུབ་པའི་བསྟན་པའི་ཚོགས་ཇི་སྙེད་པ་དེ་དག་གཅིག་དུ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་གཅིག་བྱས་སྟེ་ཀུན་ནས་བསྐོར་ནས་སྐྱིལ་མོ་ཀྲུང་བཅས་སྟེ་འདུག་ནས་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་འདུད་པས་ཕྱག་འཚལ་ལོ་ཞེས་བརྗོད་དེ་ཕྱག་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་རོ། །མཆོད་རྟེན་དེ་ཡང་ནུབ་ནས་འོག་གི་གསེར་གྱི་ས་གཞི་གང་ཡིན་པ་དེ་ལ་གནས་སོ། །དེར་བཅོམ་ལྡན་འདས་ཤཱཀྱ་ཐུབ་པའི་བསྟན་པ་དམ་པའི་ཆོས་ནུབ་པར་འགྱུར་རོ་ཞེས་གསུངས་ཤིང་དེ་ཕྱིན་རང་རྒྱལ་འབྱུང་བ་དང་བྱམས་པའི་སྐབས་ལུང་དུ་བསྟན་ནོ། །དེ་ཕྱིན་ཚེ་ལོ་ཡར་འཕེལ་དེ་སྲིད་ཏུ། །ཤཱཀྱའི་བསྟན་ལ་ཐེག་འབྲིང་དུ་ཞུགས་པའི། །རང་རྒྱལ་བྱེ་བ་ཕྲག་བདུན་འབྱུང་འགྱུར་སྟེ། །སློབ་དཔོན་མེད་པར་ཡེ་ཤེས་མངོན་བྱས་ནས། །(ཀ༡༡ན)
རྫུ་འཕྲུལ་གྱིས་འདུལ་བསོད་སྙོམས་སྤྱོད་པ་ཡིས། །གཞན་གྱི་དགེ་བའི་རྩ་བ་དཔེལ་བར་མཛད། །དེ་བཞིན་རང་སངས་རྒྱས་པ་ཐམས་ཅད་ཀྱང༌། །བསྟན་པ་མེད་པའི་སྟོངས་ལ་འབྱུང་བ་ཡིན། །མི་རྣམས་ཚེ་ལོ་བརྒྱད་ཁྲིར་འཕེལ་བའི་ཚེ། །གཟུགས་སྟོབས་ཁ་དོག་ལོངས་སྤྱོད་མཐའ་ཡས་སྟེ། །ས་བོན་གཅིག་ལས་འབྲས་བུ་ལན་བདུན་འཕེལ། །ཆེ་ཞིང་བཅུད་དང་ལྡན་པའི་འབྲུ་རྣམས་ནི། །སྙེ་མ་རེ་ལས་བྲེ་བོ་བཞི་རེ་འབྱུང༌། །ཕྱོགས་རེར་རྒྱ་མཚོ་དཔག་ཚད་གཉིས་བསྐམས་སྟེ། །འཛམ་གླིང་ཡངས་ཤིང་གཡང་ས་ངམ་གྲོག་མེད། །མཉམ་ཞིང་འཇམ་པ་རིན་ཆེན་ཀུན་གྱིས་བརྡལ། །བྱ་གག་འཕུར་སྟབས་ཆོད་པར་གྲོང་གིས་ཁྱབ། །མི་རྣམས་ནད་ནི་ཟས་མི་ཟ་བ་དང༌། །འདོད་དང་རྒ་བ་གསུམ་ཡིན་ནད་གཞན་མེད། །དེ་ཚེ་རིན་ཆེན་བདུན་དང་ལྡན་པ་ཡི། །གླིང་བཞིའི་འཁོར་ལོས་སྒྱུར་རྒྱལ་དུང་དང་ནི། །རྫོགས་པའི་སངས་རྒྱས་བྱམས་པ་འབྱུང་འགྱུར་སྟེ། །དཀོན་མཆོག་རྣམ་གཉིས་ཅིག་ཅར་འབྱུང་བ་ནི། །སྨོན་ལམ་མཐུ་རུ་མཆོད་སྡོང་གླིང་བཞིར་བཤད། །ལུང་འདི་ལས་མཁན་ཆེན་པདྨ་བཟང་པོས་མདོ་སྡེ་སྤྱི་རྣམ་དུ་བྱམས་པ་གཉིས་ལ་བསྟན་པ་གཅིག་དུ་བཤད་པ་དེ་ནི་མ་ཡིན་སྟེ། སྤྱིར་སངས་རྒྱས་རྣམས་རྩོད་ལྡན་ཁོ་ན་ལ་འབྱུང་བ་དང༌། རྩོད་ལྡན་ལ་འཁོར་ལོས་སྒྱུར་བ་མི་འབྱུང་བར་གསུངས་ཀྱང་འདིར་སངས་རྒྱས་དང་འཁོར་ལོས་སྒྱུར་བ་སྟེ་དཀོན་མཆོག་གཉིས་ཅིག་ཅར་དུ་འབྱུང་བ་ནི་སྨོན་ལམ་གྱི་མཐུ་ཡིན་པའོ། །ད་ལྟར་ཤཱཀྱའི་རྒྱལ་པོའི་བསྟན་འདི་ལ། །རྒྱལ་བའི་སྐུ་དང་མཆོད་རྟེན་བཞེང་བ་དང༌། །ཉམས་པ་གསོ་སོགས་བྱེད་པའི་མི་དེ་རྣམས། །བྱམས་པའི་འདུས་པ་དང་པོར་གྲོལ་བར་འགྱུར། །རྒྱལ་བའི་གསུང་རབ་འབྲི་ཞིང་བཞེང་བ་རྣམས། །འདུས་པ་གཉིས་པར་རྣམ་པར་གྲོལ་བ་འཐོབ། །ད་ལྟར་དགེ་སློང་དགེ་འདུན་མཆོད་བྱེད་པ། །འདུས་པ་གསུམ་པར་རྣམ་པར་གྲོལ་འགྱུར་ཞེས། །མདོ་དང་དགའ་བའི་བཤེས་གཉེན་གྱིས་ལུང་བསྟན། །དེ་ཡང་འཁོར་ལོས་སྒྱུར་བའི་རྒྱལ་པོ་དུང་གི་མདུན་ན་འདོན་བྲམ་ཟེ་ཚངས་པའི་ཚེའི་བཙུན་མོ་ཚངས་རབ་ལ་ཁྱེའུ་ཞིག་བཙས་པ་ན་འདི་མངལ་དུ་ཞུགས་པ་ནས་ནང་མི་ཐམས་ཅད་བྱམས་པ་དང་ལྡན་པར་གྱུར་ཏོ་ཞེས་མཚན་བྱམས་པར་བཏགས། དེ་ཆེར་སྐྱེས་ནས་ཕས་བྲམ་ཟེའི་ཁྱེའུ་ལྔ་བརྒྱ་བཏང་སྟེ་རིག་བྱེད་ཀློག །དེའི་ཚེ་རྒྱལ་ཆེན་བཞིས་པདྨ་དང་པདྨ་ཆེན་པོ་(ཀ༡༡བ)
དུང་དང་དུང་ཆེན་པོ་སྟེ་གཏེར་ཆེན་པོ་བཞི་ཕྱུང་ནས་རྒྱལ་པོ་དུང་ལ་ཕུལ་ཞིང་སྔོན་རྒྱལ་པོ་སྒྲ་སྒྲོགས་ལ་བརྒྱ་བྱིན་གྱིས་མཚན་མར་བྱིན་པའི་ལྷའི་རིན་པོ་ཆེ་སྣ་བདུན་ལས་བྱས་པའི་མཆོད་སྡོང་སྤོམས་སུ་ཕོ་འདོམ་དྲུག་བཅུ་པ་ལྟ་བས་མི་ངོམས་པ་དེ་གངྒཱའི་འགྲམ་ནས་ཕྱུང་སྟེ་ཕུལ་ཞིང་དེ་རྒྱལ་པོ་དུང་གིས་མདུན་ན་འདོན་དང་དེས་ཁྱེའུ་བྱམས་པ་དང་དེས་ཁྱེའུ་ལྔ་བརྒྱ་ལ་བྱིན། དེ་དག་གིས་དུམ་བུ་ལྔ་བརྒྱར་བགོས་པ་མཐོང་བས་ཁྱེའུ་བྱམས་པ་སྐྱོ་སྟེ་ཁྱིམ་ནས་རབ་ཏུ་བྱུང་ཞིང་སྔོན་རིང་མོ་ནས་ལམ་དང་འཇུག་པ་དང་ཐེག་པ་བདེ་བས་ཞུགས་པའི་ཕྱིར་དཀའ་བ་སྤྱོད་པ་མེད་པར་དེ་ཉིད་ཀྱི་མཚན་མོ་མངོན་པར་རྫོགས་པར་འཚང་རྒྱ་ཞིང་རྒྱལ་པོ་དུང་གི་རིན་པོ་ཆེ་སྣ་བདུན་ཡང་ནུབ་པར་འགྱུར་རོ། །དེ་ནས་རྒྱལ་པོས་ལོ་ཉི་ཁྲི་ལྷག་པར་ཡོ་བྱད་ཐམས་ཅད་ཀྱིས་བསྙེན་བཀུར་ཞིང་མཐར་རྒྱལ་པོ་བུ་སྟོང་བཙུན་མོ་བརྒྱད་ཁྲི་བཞི་སྟོང་བློན་པོ་དེ་སྙེད་དང་བཅས་པ་དང་ཡབ་བྲམ་ཟེའི་འཁོར་དེ་སྙེད་དང་བཅས་པ་རབ་ཏུ་བྱུང་ཞིང་འཁོར་འདུས་པ་གསུམ་འབྱུང་ལ་དེ་རྣམས་བཅོམ་ལྡན་འདས་བྱམས་པས་རི་བོ་བྱ་རྐང་ལ་ཁྲིད་དེ་རིའི་གཡོགས་བསལ་ནས་འོད་སྲུང་ཆེན་པོའི་སྐུ་གདུང་ཕྱག་མཐིལ་དུ་བཞག་ནས་འདི་ནི་ཚེ་ལོ་བརྒྱ་པའི་ཚེ་སངས་རྒྱས་ཤཱཀྱ་ཐུབ་པ་བྱོན་པའི་ཉན་ཐོས་ཀྱི་མཆོག་འོད་སྲུང་ཆེན་པོའི་སྐུ་གདུང་ངོ་ཞེས་བསྟན་པས་ལུས་ཆུང་ངུ་འདི་ལྟ་བུས་ཡོན་ཏན་གྱི་ཚོགས་དེ་འདྲ་བ་ཐོབ་པ་ཞེས་སྐྱོ་བའི་ཚེ་གདུང་དེ་ལས་སྣམ་སྦྱར་ཕྲལ་སྟེ་འདི་ནི་བཅོམ་ལྡན་འདས་དེའི་ཕྱགས་བདར་ཁྲོད་པའི་སྣམ་སྦྱར་རོ་ཞེས་བསྟན་པའི་མོད་ལ་འཁོར་དེ་ཐམས་ཅད་དགྲ་བཅོམ་པ་འཐོབ་པར་གྱུར་ལ། དེའི་མཐར་གདུང་དེ་ཡང་ན་མཁའ་ལ་འཕགས་ནས་འབར་བ་དང་གསལ་བ་དང་འོད་འབྱིན་པ་དང་ཆར་དང་གློག་དང་ཡ་མ་ཟུང་ལ་སོགས་པའི་ཆོ་འཕྲུལ་དུ་མ་བསྟན་སྟེ་ཐུགས་ཀ་ནས་རང་བྱུང་བའི་མེས་འཚིག་སྟེ་རིང་སྲེལ་ལྷུང་བ་རྣམས་མཆོད་རྟེན་དུ་བྱེད་པར་གསུངས་ཤིང༌། ཤཱཀྱའི་བསྟན་པ་ལ་སྐུ་གཟུགས་བཞེང་པ་སོགས་སངས་རྒྱས་ལ་བྱ་བ་བྱས་པ་རྣམས་འདུས་པ་དང་པོར་གྲོལ། གསུང་རབ་འབྲི་ཀློག་བཞེངས་པ་སོགས་ཆོས་ལ་བྱ་བ་བྱས་པ་རྣམས་འདུས་པ་གཉིས་པར་གྲོལ། དགེ་སློང་རེ་རེ་ལ་གདུགས་ཚོད་སྟོབ་པ་ཡན་ནས་དགེ་འདུན་ལ་མཆོད་པ་བྱས་པ་དང་འདུ་བའི་སྒོ་སྦྱར་བ་རྣམས་འདུས་པ་གསུམ་པར་གྲོལ་བར་བྱམས་པ་ལུང་བསྟན་གྱི་མདོ་གསུམ་དང་དགའ་བའི་བཤེས་གཉེན་གྱི་རྟོགས་བརྗོད་ལས་བཤད་ཏོ། །ཚེ་ལོ་དྲུག་(ཀ༡༢ན)
ཁྲིར་རྒྱལ་བ་སེང་གེ་སྟེ། །དེ་སོགས་དགུ་བརྒྱ་གོ་དགུ་ཚང་བར་འགྱུར། །རྒྱལ་བ་བཞི་བཅུ་གཅིག་པ་དགྲ་གཅན་ཆེ། །ས་གཞི་རིན་ཆེན་བདུན་ཡིན་ངན་སོང་མེད། །མི་རྣམས་མེ་ཏོག་པདྨར་བརྫུས་སྟེ་སྐྱེ། །སྔོན་གྱི་རྒྱལ་བ་བཞི་བཅུའི་འཕྲིན་ལས་མཛད། །སངས་རྒྱས་ཉིས་བརྒྱ་བཞི་བཅུ་རྩ་གཉིས་པ། །མེ་ཏོག་བྱིན་དང་གཞན་ཡང་ཕལ་ཆེན་བྱིན། །ཡེ་ཤེས་ཉི་མ་ཚེ་དཔག་མེད་པ་དང༌། །རིན་ཆེན་གྲགས་པ་དགེ་བ་སྨྲང་འདོན་པ། །མི་འཁྲུགས་མདོག་དང་འདམ་བརྒལ་དྲན་པའི་འོད། །དགེ་འོད་དགྲ་ལས་རྒྱལ་དང་དུས་མཁྱེན་འོད། །བཤེས་གཉེན་བཟང་པོ་སྨན་བདག་མདངས་མངའ་བ། །དགའ་སྟོབས་འཁྲུལ་མེད་བློ་དང་ལྷ་བདག་དང༌། །ནམ་མཁའི་དབྱངས་དང་ལྷ་ཡི་རྒྱལ་པོ་རྣམས། །ཐེག་པ་ཆེན་པོ་འབའ་ཞིག་སྟོན་པ་སྟེ། །ཉན་ཐོས་རང་སངས་རྒྱས་ཀྱི་མིང་ཡང་མེད། །ཁྱད་པར་སངས་རྒྱས་དྲུག་བརྒྱ་བཅུ་གཅིག་པ། །གསེར་འོད་ཚེ་ན་ཞིང་དེའི་སེམས་ཅན་ཀུན། །ཕྱིར་མི་ལྡོག་པའི་བྱང་སེམས་ཤ་སྟག་འབྱུང༌། །རྒྱལ་བ་གཞན་རྣམས་ཐེག་པ་གསུམ་གྱིས་འདུལ། །མངོན་པའི་མཛོད་ལས་ཚེ་ལོ་མར་འགྲིབ་ཀྱི། །བརྒྱད་ཁྲི་པ་ནས་བརྒྱ་པའི་བར་ལས་གཞན། །དེ་བཞིན་གཤེགས་པ་མི་འབྱུང་གསུངས་པ་ནི། །ཐེག་པ་ཆུང་ངུའི་རྣམ་གཞག་ཕྱོགས་གཅིག་སྟེ། །བརྒྱ་དང་གཅིག་པ་ཡོན་ཏན་འོད་འཕྲོ་ནི། །སྐུ་ཚེ་བྱེ་བ་ཉིས་སྟོང་ཐུབ་པ་དང༌། །ཉིས་བརྒྱ་གསུམ་པ་རྒྱལ་བ་རིན་ཆེན་ཏོག །ལོ་གྲངས་བྱེ་བ་འབུམ་དུ་ཚང་བར་བཞུགས། །ཉིས་བརྒྱ་སོ་གཅིག་ཚོགས་ཆེན་གཙོ་བོ་ནི། །སྐུ་ཚེ་ཉིན་གཅིག་བཞུགས་པ་ལ་སོགས་སྟེ། །ཡུལ་རིགས་འོད་གདུང་ཡབ་ཡུམ་སྲས་དང་ནི། །རིམ་གྲོ་བ་དང་མཆོག་ཟུང་འདུས་པའི་ཚད། །སྐུ་ཚེ་བསྟན་པའི་གནས་ཚད་སྐུ་གདུང་དང། །མཆོད་རྟེན་ཐུགས་བསྐྱེད་ཚུལ་རྣམས་ཐ་དད་པར། །བསྐལ་པ་བཟང་པོའི་མདོ་ལས་རྒྱས་པར་གསུངས། །མ་ཐོག་རིང་མོར་སངས་རྒྱས་མོས་པ་སྟེ། །དེ་ཡན་སངས་རྒྱས་ཀུན་(ཀ༡༢བ)
གྱི་འཕྲིན་ལས་མཛད། །རྒྱལ་བ་དགུ་བརྒྱ་གོ་དགུ་པོ་ཀུན་གྱི། །འཁོར་དང་སྐུ་ཚེ་བསྟན་པའི་གནས་ཚད་རྣམས། །གཅིག་དུ་བསྡོམས་པ་རྒྱལ་བ་སྣང་མཛད་འདིའི། །འཁོར་དང་སྐུ་ཚེ་བསྟན་པའི་ཚད་དུ་འགྱུར། །ཞིང་འདིའི་འགྲོ་ཀུན་ཐེག་གསུམ་སོ་སོ་ལས། །ཕྱིར་མི་ལྡོག་ཐུལ་གནས་བསྐལ་རྫོགས་པ་ཡིན། །མནར་མེད་དམྱལ་བར་སེམས་ཅན་མ་ལུས་པ། །དེ་ཚེ་འཇིག་པའི་བསྐལ་པའི་ཐོག་མ་སྟེ། །ཆགས་བསྐལ་གནས་བསྐལ་འཇིག་བསྐལ་སྟོངས་བསྐལ་བཞི། །ཡུན་ནི་བར་བསྐལ་ཉི་ཤུ་རེ་རེར་མཚུངས། །དེ་ལྟར་བར་བསྐལ་བརྒྱད་བཅུ་བསྡོམས་པ་ལ། །བསྐལ་པ་ཆེན་པོ་གཅིག་དུ་བརྗོད་པ་ཡིན། །འཇིག་བསྐལ་ཚུལ་ཡང་ཅུང་ཟད་བཤད་བྱས་ན། །ངན་སོང་གསུམ་དུ་སེམས་ཅན་མ་ལུས་ཚེ། །མི་ཞིག་གིས་ནི་ཆོས་ཉིད་ཀྱིས་ཐོབ་པའི། །བསམ་གཏན་དང་པོའི་ཏིང་འཛིན་འགྲུབ་གྱུར་སྟེ། །དེ་ལས་ལངས་ནས་ཀྱེ་མ་དབེན་པ་ལས། །བྱུང་བའི་དགའ་བདེ་འདི་ནི་དམ་པ་ཞེས། །ཆེད་དུ་བརྗོད་པས་སྒྲ་དེ་མོད་ཁོ་ནར། །སོ་སོའི་གླིང་གི་མི་རྣམས་ཀུན་གྱིས་ཐོས། །ཀུན་ཀྱང་བསམ་གཏན་དང་པོའི་དངོས་གཞི་ཐོབ། །ཤི་འཕོས་གཟུགས་ཀྱི་ཁམས་ཀྱི་ཚངས་རིས་དང༌། །ཚངས་པའི་མདུན་འདོན་ཚངས་ཆེན་གསུམ་དུ་སྐྱེས། །དེ་བཞིན་འདོད་པའི་ལྷ་རིས་དྲུག་ག་ཡང༌། །ཁམས་གོང་འཕོས་སྟེ་འདོད་ཁམས་མ་ལུས་སྟོངས། །བསམ་གཏན་དང་པོའི་ལྷ་རིས་གསུམ་ག་ཡང༌། །རྟོག་དཔྱོད་སྤངས་པའི་བསམ་གཏན་གཉིས་པ་ཐོབ། །ཤི་འཕོས་འོད་ཆུང་ལ་སོགས་གནས་གསུམ་དུ། །སྐྱེས་སྟེ་ཚངས་ཆེན་མན་ཆད་སྟོངས་པར་འགྱུར། །དེ་ཚེ་ཉི་མའི་གཞལ་མེད་ཁང་སྟོང་པ། །གཉིས་པ་ཤར་བས་ཆུ་མིག་ལྟེང་ཀ་སྐེམ། །གསུམ་པས་ཆུ་ཕྲན་མ་ལུས་སྐེམ་པར་བྱེད། །བཞི་པས་ཆུ་བོ་ཆེ་རྣམས་སྐེམ་པར་འགྱུར། །ལྔ་པས་རྒྱ་མཚོ་ཆེན་པོ་དཔག་ཚད་སོགས། །རིམ་པས་སྐེམ་ཞིང་མི་འགྲེང་བདུན་ནས་ནི། །མི་འགྲེང་གང་དང་བ་ལང་རྨིག་རྗེས་ཙམ། །(ཀ༡༣ན)
ཐ་མར་ཟིལ་པ་ཙམ་ཡང་མེད་པར་སྐེམ། །དྲུག་པ་ཤར་བས་ས་ཀུན་དུ་བར་འཐུལ། །བདུན་པས་རི་རབ་ཁོར་ཡུག་བཅས་པའི་བར། །གཅིག་དུ་འབར་སྟེ་ཚངས་པའི་འཇིག་རྟེན་མན། །མེ་ལྕེ་གཅིག་དུ་གྱུར་པས་སྲེག་པར་བྱེད། །མེ་དེ་རང་ཞི་ཐལ་བའང་མ་ལུས་པ། །དེ་ཚེ་འཇིག་པའི་བསྐལ་པའི་མཐར་ཐུག་ཅེས། །ཉི་མ་བདུན་ལུང་བསྟན་པའི་མདོ་དྲངས་ནས། །འཇིག་རྟེན་བཞག་པར་མཽངྒལ་བུ་ཡིས་བཤད། །སྟོངས་བསྐལ་བར་བསྐལ་ཉི་ཤུ་འདས་པ་ནས། །སླར་ཡང་ཆགས་པའི་བསྐལ་པ་སྔོན་བཞིན་འབྱུང༌། །འོན་ཀྱང་སྒྲོན་མེའི་བསྐལ་པ་ཅེས་བྱ་བ། །སངས་རྒྱས་འབྱུང་བསྐལ་ཨུ་དུམ་ཝ་ར་ཡི། །མེ་ཏོག་ལྟ་བུར་བརྒྱ་ལ་སྲིད་པ་ཙམ། །ཕལ་ཆེར་དཀོན་མཆོག་གསུམ་གྱི་སྒྲོན་མེ་ཡིས། །དབེན་པ་མུན་པའི་བསྐལ་པ་ཤ་སྟག་ཡིན། །མེ་ཡིས་འཇིག་པ་ལན་བདུན་ཚང་བའི་ཚེ། །བསམ་གཏན་གཉིས་པ་མན་ཆད་ཆུས་གཅིག་འཇིག །རིམ་པ་འདི་ཡིས་ཆུ་ཡིས་འཇིག་ཐེབས་བདུན། །ཚང་ཚེ་བསམ་གཏན་གསུམ་པའི་དགེ་རྒྱས་མན། །རླུང་ཆེན་རབ་ཏུ་གཡོ་བས་འཇིག་པ་ཉིད། །ཡང་ནི་མེ་ཡིས་འཇིག་སོགས་སྔར་བཞིན་སྟེ། །མེད་བཞིན་སྣང་བའི་རྟེན་འབྲེལ་རྒྱུན་མི་ཆད། །འདུ་བྱེད་རླུང་ལྡང་དགའ་བདེ་ཆུ་ལྟར་གཡོ། །རྟོག་དཔྱོད་མེ་འདྲ་ནང་གི་བསམ་གཏན་སྐྱོན། །རྟེན་འབྲེལ་མཐུ་ལས་ཕྱི་རོལ་འཇིག་པར་སྣང༌། །བསམ་གཏན་བཞི་པ་སྣོད་བཅུད་ལྷན་ཅིག་དུ། །སྐྱེ་འཇིག་སྣང་གི་འབྱུང་བའི་མཐུར་མི་ལྟོས། །དེ་དག་ཀྱང་བསྐལ་པ་བཟང་པོ་འདིའི་རྣམ་གཞག་དུ་ཟད་དེ་གཞན་དུ་ན་ཕལ་ཆེན་ལས་འཇིག་རྟེན་གྱི་ཁམས་མི་འབྱེད་འདིའི་བསྐལ་པ་གང་ཡིན་པ་དེ་ནི་བདེ་བ་ཡོད་པའི་ཞིང་ཁམས་ཀྱི་ཉིན་ཞག་གཅིག་གོ །བདེ་བ་ཡོད་པའི་ཞིང་ཁམས་ཀྱི་བསྐལ་པ་དེ་ནི་དེ་བཞིན་གཤེགས་པ་རྡོ་རྗེ་རབ་འཇོམས་ཀྱི་ཞིང་དུར་མིག་གིས་མཚན་པའི་ཉིན་ཞག་གཅིག་གོ །དེ་བཞིན་དུ་སྔ་མའི་བསྐལ་པ་ཕྱི་མའི་ཉིན་ཞག་དུ་བསྒྲེས་སྟེ་ཤིན་དུ་སྐུའི་པདྨ་རྒྱས་པའི་ཞིང་ཕྱིར་མི་ལྡོག་པའི་འཁོར་ལོ་རབ་ཏུ་སྒྲོག་པ་དང༌། ཆོས་རྒྱལ་མཚན་གྱི་ཞིང་རྡུལ་མེད་དང༌། སེང་གེའི་ཞིང་སྒྲོན་མ་བཟང་དང༌། རྣམ་སྣང་སྙིང་པོའི་ཞིང་འོད་བཟང་དང༌། ཆོས་འོད་སྐུའི་པདྨ་རྒྱས་པའི་ཞིང་འདའ་བར་དཀའ་བ་དང༌། མངོན་མཁྱེན་ཀུན་འོད་རྒྱན་ལྡན་གྱི་ཞིང་ཐུགས་ཟླའི་མེ་ལོང་དཀྱིལ་འཁོར་མདོག་ནས་གྲངས་མེད་ས་ཡ་གཅིག་བགྲངས་པའི་ཐ་མའི་བསྐལ་པ་ནི་རྒྱལ་བ་དཔལ་བཟང་གི་ཞིང་པདྨའི་དཔལ་གྱི་ཉིན་ཞག་དུ་བཤད་པས་མདོར་ན་ཚད་ཀྱིས་གཞལ་བར་བྱ་བ་མིན་ནོ། །བསྐལ་པ་བཟང་པོ་འདི་ཡི་འོག་རོལ་དུ། །མུན་བསྐལ་ཆེན་པོ་དྲུག་བཅུ་འདས་པའི་རྗེས། །སྒྲོན་བསྐལ་སྙན་པ་ཆེན་པོ་ཞེས་བྱ་བ། །དེ་ལ་སངས་རྒྱས་ཁྲི་ཕྲག་གཅིག་(ཀ༡༣བ)
འབྱུང་ངོ། །དེ་ནས་མུན་བསྐལ་ཆེན་པོ་ཁྲི་འདས་ནས། །སྐར་མ་བཀྲམ་པ་ཞེས་བྱའི་སྒྲོན་བསྐལ་ལ། །རྫོགས་པའི་སངས་རྒྱས་བརྒྱད་ཁྲི་ཚང་བར་འབྱུང༌། །ཡང་ནི་མུན་བསྐལ་སུམ་བརྒྱ་འདས་པའི་འོག །སྒྲོན་མེའི་བསྐལ་ཆེན་ཡོན་ཏན་བཀོད་པ་ལ། །རྒྱལ་བ་བརྒྱད་ཁྲི་དང་ནི་བཞི་སྟོང་འབྱུང༌། །དེ་ཙམ་མདོ་ལས་རྒྱལ་བས་ལུང་དུ་བསྟན། །དེ་བཞིན་ན་མཁའ་ཇི་སྲིད་གནས་ཀྱི་བར། །བསྐལ་པའི་ཕྱི་མཐའ་ཐུག་པ་ཡོད་མ་ཡིན། །འདི་ནི་འཇིག་རྟེན་ཁམས་འདིའི་རྣམ་གཞག་སྟེ། །དེ་བཞིན་ཕྱོགས་བཅུའི་ན་མཁས་གར་ཁྱབ་པར། །དག་དང་མ་དག་ཞིང་ཁམས་རྒྱ་མཚོ་རྣམས། །ཁ་ཅིག་སྟོངས་ཤིང་ལ་ལ་འཇིག་དང་ཆགས། །གཞན་དག་གནས་སོགས་རྒྱ་མཚོའི་ལྦུ་བ་ལྟར། །གོ་མཚམས་མེད་ཅིང་རྒྱུན་མི་ཆད་པར་སྣང༌། །ཞིང་ཁམས་མཐའ་དག་མཐོང་བའི་མིག་དག་པ། །འཕགས་མཆོག་རྣམས་ཀྱི་གཟིགས་ཡུལ་ལྟད་མོར་ཆེ། །ངེས་པའི་དོན་དུ་ཞིང་འདི་འཇིག་པ་མེད། །རྒྱལ་བས་བསྟེན་པའི་རྩ་ཡི་སྟན་ཙམ་ཡང༌། །ཁམས་གསུམ་འབྱུང་བ་ཀུན་གྱིས་གཞིག་མི་ནུས། །རྡོ་རྗེའི་གདན་དང་བྱ་རྒོད་ཕུང་རི་སོགས། །སྔོན་གྱི་རྒྱལ་བ་བགྲང་ཡས་རྒྱ་མཚོའི་ཡང༌། །རྫོགས་སངས་རྒྱས་པའི་གནས་དང་ཤེས་ཕྱིན་གྱི། །ཆོས་ཀྱི་འཁོར་ལོ་བསྐོར་གནས་ཡིན་ཞེས་གསུངས། །མེ་ཡིས་འཇིག་པར་སྣང་ཚེའང་ཞིང་འདི་ནི། །ཅུང་ཟད་མ་ཉམས་རྒྱལ་སྲས་རྣམས་ཀྱིས་གང༌། །འོན་ཀྱང་འཇིག་རྟེན་བྱེད་པོར་རློམ་པ་ཡི། །ཚངས་སོགས་དྲེགས་དང་ང་རྒྱལ་གཞོམ་པ་དང༌། །སྐྱོ་བ་བསྐྱེད་ཅིང་རྟག་འཛིན་ལྡོག་པའི་ཆེད། །མེ་ཆུ་རླུང་གིས་འཇིག་པའི་བསྐལ་པ་སྟོན། །དེ་ཚེ་ཞིང་དེ་སྟོངས་པར་གྱུར་པ་ཡིས། །སེམས་ཅན་གཅིག་གི་སྲོག་ལའང་མི་གནོད་པ། །འདི་ནི་རྒྱལ་བའི་འཕྲིན་ལས་མཆོག་ཅེས་གསུངས། །ལེགས་པར་བཤད་པ་མཁས་པའི་དགའ་སྟོན་ལས། །འཇིག་རྟེན་གྱི་ཁམས་སྤྱིར་བསྟན་པའི་ཡན་ལག་སྟེ་དང་པོའོ།། །།
༈ ད་ནི་སྟོན་པའི་མཛད་པ་བརྗོད་པར་བྱ། །བདག་ཅག་རྣམས་ཀྱི་སྟོན་པ་ཐུབ་པའི་མཆོག །འདིས་ནི་བླ་མེད་བྱང་ཆུབ་ཐུགས་བསྐྱེད་དེ། །རྒྱལ་སྲས་གཞན་ལས་ཆེས་ཆེར་རྨད་བྱུང་བའི། །བྱམས་བརྩེ་སྤྲོ་དང་རྩོམ་པ་རྒྱ་ཆེན་པོས། །བྱང་ཆུབ་ལམ་བཟང་བདེ་བླག་གིས་བགྲོད་ནས། །མཐའ་ཡས་བསྐལ་མང་སྔོན་ནས་སངས་རྒྱས་ཀྱང༌། །སྔོན་གྱི་སྨོན་ལམ་ཆེན་པོ་ལྔ་བརྒྱའི་མཐུས། །འཛམ་གླིང་སྐྱེ་རྒུ་ཚེ་ལོ་བརྒྱ་པའི་ཚེ། །རྙིགས་མ་ལྔ་ལྡན་ལྷག་པར་གདུལ་དཀའ་བའི། །འགྲོ་རྣམས་གདུལ་ཕྱིར་དགའ་ལྡན་ལྷ་གནས་ན། །ལྷ་ཡི་སྟོན་པ་དམ་པ་ཏོག་དཀར་ཞེས། །སངས་རྒྱས་འོད་སྲུང་གི་ནི་རྒྱལ་ཚབ་ཏུ། །བཞུགས་པ་ལས་བབ་འཛམ་གླིང་གཤེགས་པར་དགོངས། །ད་ལྟ་འཛམ་གླིང་རྙིགས་མ་ལྔ་བདོ་སྟེ། །རྟོག་གེ་པ་དྲུག་རྗེས་སུ་སྒྲོགས་པ་དྲུག །སྙོམས་པར་འཇུག་པ་དྲུག་སྟེ་མུ་སྟེགས་ཀྱི། །སྟོན་པ་བཅོ་བརྒྱད་ཀྱིས་ནི་མ་རུང་བྱས། །གཤེགས་པའི་དུས་མིན་བཞུགས་པར་གསོལ་འདེབས་ཞེས། །ལྷ་རྣམས་ཀུན་གྱིས་གསོལ་བ་བཏབ་པའི་ཚེ། །རོལ་མོ་ཐམས་ཅད་དུས་གཅིག་དཀྲོལ་ཅིག་གསུངས། །བྱང་ཆུབ་སེམས་དཔའས་དུང་དཀར་བླངས་སྟེ་བུས། །རོལ་མོའི་སྒྲ་ཡི་ནང་ན་མཆོག་ཅི་དྲིས། །ཀུན་ཀྱང་དུང་གི་སྒྲ་ཡིས་ཟིལ་མནན་གསོལ། །དེ་བཞིན་བདུད་དང་མུ་སྟེགས་མ་ལུས་པ། །ང་ཡིས་ཟིལ་མནན་འགྲོ་ཀུན་དྲང་ངོ་གསུངས། །ཚེ་ལོ་བརྒྱ་པའི་དུས་དང་གོ་ཏམ་གདུང༌། །སེར་སྐྱའི་གྲོང་མཆོག་དག་པའི་ཡབ་ཡུམ་སྟེ། །གཟིགས་པ་ལྔ་ལ་རྣམ་པར་གཟིགས་ནས་ནི། །གླང་ཆེན་ཐལ་ཀར་གསེར་གྱི་དྲ་བ་ཡིས། །གཡོགས་པའི་རྣམ་པས་གྲོང་ཁྱེར་སེར་སྐྱ་རུ། །ཟས་གཙང་བཙུན་མོ་སྒྱུ་འཕྲུལ་ཆེན་མོ་ཞེས། །ལྷས་བསྟན་རྒྱལ་པོ་ལེགས་པར་རབ་སད་སྲས། །དུས་གསུམ་རྒྱལ་བ་མཐའ་ཡས་མང་པོ་ཡི། །ཡུམ་དུ་སྨོན་པ་གྲུབ་པའི་འཕགས་མ་དེ། །གསོ་སྦྱོང་དག་པར་སྤྱོད་པའི་ལྷུམས་སུ་ཞུགས། །དེར་ཡང་མངལ་གྱི་དྲི་མས་མ་གོས་པར། །ཙན་དན་སྦྲུལ་གྱི་སྙིང་པོའི་ཁང་བཟང་ནང༌། །(ཁ༡༤བ)
བཞུགས་ནས་ཕྱོགས་བཅུའི་བྱང་སེམས་མཐའ་ཡས་བཏུལ། །ཆོས་ཀྱི་རྣམ་གྲངས་རྒྱ་མཚོ་དུ་མ་བསྟན། །འཛམ་གླིང་ཀུན་དུ་སངས་རྒྱས་འབྱུང་བའི་ལྟས། །ཡ་མཚན་དཔག་མེད་མཐའ་ཡས་སྣང་བར་གྱུར། །གླིང་གི་དབུས་སུ་བྱང་ཆུབ་ལྗོན་ཤིང་སྐྱེས། །སེར་སྐྱའི་གྲོང་ཀུན་རིན་ཆེན་ལས་བྱས་གྱུར། །གངས་རིའི་ངོས་ནས་སེང་གེའི་ཕྲུ་གུ་དག །འོངས་ནས་སྲང་ན་གནོད་པ་མེད་པར་རྩེ། །ལུམྦིའི་ཚལ་ཀུན་རིན་ཆེན་ལྗོན་པས་ཁྱབ། །དེ་ཚེ་ཟླ་དགུ་ངོ་བཅུ་ཚང་བའི་ཚེ། །ལྷུམས་སུ་ཟླ་བ་བཅུར་ཞག་བདུན་གྱིས་མ་ཆོག་པ་བཞུགས་པ་ལ། མདོར་ཟླ་བ་བཅུ་ཚང་བའི་ཐ་སྙད་གྱིས་བརྗོད་ཅིང་འདིར་ཟླ་དགུ་ངོ་བཅུར་བརྗོད་པ་ཡིན་ནོ། །ངོ་མཚར་ལྟས་ཆེན་སོ་གཉིས་བྱུང་བ་ལས། །རྩ་གསུམ་ལྷ་ཡི་འབྱོར་པ་ལྟ་བུ་ཡིས། །ཡུམ་གྱིས་ལུམྦིའི་ཚལ་གྱི་སྐྱེད་ཚལ་བྱོན། །རྒྱུ་སྐར་རྒྱལ་དང་ལྡན་ཚེ་ཡུམ་གྱི་ཕྱག །པ་ལ་ཀྵ་ཡི་ལྗོན་པ་ལ་འཇུས་སྟེ། །བྱ་རྨྱང་མཛད་པའི་རྩིབ་ལོགས་གཡས་པ་ནས། །ཡུམ་ལ་གནོད་པ་མེད་ཅིང་ནག་ནོག་གིས། །མ་གོས་གསེར་གོང་ཕྱིས་པ་ལྟ་བུ་རུ། །བལྟམས་ཚེ་ལྷ་ཡི་དབང་པོ་བརྒྱ་བྱིན་གྱིས། །བྲན་མོ་རྒན་མོའི་རྣམ་པས་བླངས་པའི་ཚེ། །ཐེག་པར་མ་གྱུར་སྟོབས་ཀྱི་ང་རྒྱལ་བཅོམ། །ཀླུ་དབང་རྣམས་ཀྱིས་བདུད་རྩིས་སྐུ་ཁྲུས་གསོལ། །ཕྱོགས་ཀུན་གོམ་པ་བདུན་བདུན་བོར་བ་ལས། །གསེར་གྱི་པདྨ་འདབ་སྟོང་པ་རེ་བྱུང༌། །སྐྱེ་རྒ་ན་འཆི་ཀུན་ལས་འདའ་བྱེད་ཅིང༌། །འགྲོ་བའི་ཁ་ལོ་གྱེན་དུ་བསྒྱུར་རོ་གསུངས། །བསིལ་བའི་འོད་ཀྱིས་འཇིག་རྟེན་སྣང་བར་བྱས། །ངོ་མཚར་ལྟས་ཆེན་བཅོ་བརྒྱད་བྱུང་བའི་ཚེ། །ཡབ་ཀྱིས་ཕྱག་དང་བསྟོད་པ་དང་པོ་མཛད། །ཚངས་པས་བདུད་རྩིའི་ཟིལ་མངར་བླངས་སྟེ་ཕུལ། །ཞག་བདུན་ལོན་ཚེ་ཡུམ་གྱི་སྤྲུལ་པ་བསྡུས། །ཡུམ་གྱིས་སྐྱེད་པའི་བྱ་བ་རྫོགས་ཟིན་ཞིང༌། །སྐྱེ་བོ་ཕལ་པའི་སྐྱེད་མར་མི་རིགས་ལ། །ཁྱིམ་ནས་བྱུང་བ་ཡུམ་གྱིས་མི་བཟོད་པ། །སྤང་དང་ཡུམ་གྱི་ཕྱག་ཀྱང་མི་བཞེད་ཕྱིར། །འཁྲུངས་ནས་ཞག་བདུན་ཡུམ་གྱི་ཚེ་ལུས་པའི། །ཚེ་ན་ལྷུམས་སུ་འཇུག་པར་མཛད་པའི་ཕྱིར། །འདི་ཡང་རྒྱལ་བ་ཕལ་གྱི་ཐུན་མོང་ཡིན། །སྐྱེ་རྒུའི་(ཁ༡༥ན)
བདག་མོ་ཆེན་མོ་སྒྱུ་འཕྲུལ་སོགས། །མ་མ་སུམ་བཅུ་གཉིས་ཀྱིས་ཞམ་རིང་བྱེད། །གཞན་ཡང་ཤཱཀྱའི་ཁྱེ་འུ་ལྔ་བརྒྱ་དང༌། །གྲགས་འཛིན་མ་སོགས་བུ་མོ་བརྒྱད་ཁྲི་དང༌། །བྲན་ཕོ་བྲན་མོ་ལྔ་བརྒྱ་ཕྲག་རེ་དང༌། །གླང་ཆེན་རྟ་དང་མ་ཧེ་བ་གླང་སོགས། །ལྔ་བརྒྱ་ཕྲག་རེ་དུས་གཅིག་ཉིད་དུ་བཙས། །རིན་ཆེན་གཏེར་ཀུན་ས་ལས་རང་བྱུང་གྱུར། །ཕྱོགས་བཞིར་མཉན་ཡོད་རྒྱལ་པོ་ཚངས་བྱིན་བུ། །གསལ་རྒྱལ་དང་ནི་གྲོང་ཁྱེར་རྒྱལ་པོའི་ཁབ། །པད་སྙིང་སྲས་པོ་གཟུགས་ཅན་སྙིང་པོ་དང༌། །ཀཽ་ཤམྦིར་ནི་དམག་བརྒྱའི་བུ་ཤར་པ། །འཕགས་རྒྱལ་དུ་ནི་མུ་ཁྱུད་མཐའ་ཡས་བུ། །རབ་སྣང་ཞེས་བྱ་རྒྱལ་ཕྲན་བཞི་ཡང་བཙས། །དང་པོར་དོན་ཀུན་གྲུབ་པར་མཚན་གསོལ་ཏོ། །ཤཱཀྱ་དྲེགས་ལྡན་རྣམས་ཀྱང་དུལ་གྱུར་ནས། །ཐུབ་ལྟར་གནས་ཕྱིར་ཤཱཀྱ་ཐུབ་པ་དང༌། །གནོད་སྦྱིན་ཤཱཀྱ་འཕེལ་སོགས་ཀྱིས་བཏུད་པས། །ལྷ་ཡི་ལྷ་སྟེ་མཚན་གསུམ་རིམ་པར་བཏགས། །ཁྱིམ་དུ་གནས་ན་གླིང་བཞིའི་འཁོར་སྒྱུར་དང༌། །རབ་ཏུ་བྱུང་ན་རྫོགས་འཚང་རྒྱ་འོ་ཞེས། །མཚན་མཁན་རྣམས་ཀྱིས་མགྲིན་གཅིག་ལུང་སྟོན་གྱུར། །དྲང་སྲོང་ཉོན་མོངས་མེད་ཀྱིས་ཕྱག་བྱས་སྟེ། །ངེས་པར་རྫོགས་འཚང་རྒྱ་བར་ལུང་བསྟན་ནས། །རང་གི་སྣག་ཚ་བྲམ་ཟེ་མེས་བྱིན་ལ། །དགུང་ལོ་སོ་ལྔ་ལོན་ནས་འཚང་རྒྱ་ཡིས། །དེ་ཚེ་སློབ་མར་བྱོས་ཞེས་བསྟན་ནས་འདས། །རོ་བརྒྱ་ལྡན་པའི་འབྲས་ཆན་མང་བཞེས་ཚེ། །མཛུབ་མོ་གཅིག་གིས་གསེར་གཞོང་བཟུང་བ་ནི། །གླང་ཆེན་ལྔ་བརྒྱས་དབྲོག་པར་མ་ནུས་ཕྱིར། །གླང་ཆེན་སྟོང་གི་སྟོབས་ཅན་ཞེས་མཚན་བཏགས། །བྱིས་པའི་སློབ་དཔོན་ཀུན་གྱི་བཤེས་གཉེན་ལས། །ཡི་གེ་སློབ་པའི་གྲྭར་བྱོན་ཡི་གེའི་རིགས། །དྲུག་བཅུ་རྩ་བཞི་སློབ་དཔོན་ལ་བསྟན་པས། །ཡ་མཚན་གྱུར་སྟེ་བསྟོད་ཕྱག་བྱས་པར་གྱུར། །སངས་རྒྱས་སམ་ནི་འཁོར་ལོས་སྒྱུར་བྱུང་ཚེ། །ཡི་གེ་འདི་འབྱུང་གཞན་(ཁ༡༥བ)
དུ་མི་འབྱུང་ཞེས། །བྲིས་སྟེ་བསྟན་པས་མཁའ་ལས་ཚངས་པ་ཡིས། །མཐུན་གྱུར་བརྗོད་ཕྱིར་ཚངས་པའི་ཡི་གེར་གྲགས། །རྩིས་ཀྱི་ཕ་མཐར་སོན་པ་སྲིད་སྒྲུབ་ཀྱིས། །མི་འཁྲུགས་པ་ལས་གོང་དུ་བགྲང་མ་ནུས། །གཞོན་ནུས་སྙིང་པོ་མཆོག་གི་བར་དུ་བརྩིས། །ཛམ་བུའི་ཤིང་གྲིབ་ཏིང་འཛིན་མཛད་པ་ན། །ཕྱི་དྲོར་གྱུར་ཀྱང་གྲིབ་མས་སྐུ་མ་བཏང༌། །འདི་ཚེ་ཡབ་ཀྱིས་བསྟོད་ཕྱག་གཉིས་པ་མཛད། །དྲང་སྲོང་ལྔ་ཡིས་མཁའ་ལ་འགྲོ་མ་ནུས། །ཞབས་ལ་གཏུགས་ཤིང་བསྟོད་ནས་སོང་བར་གྱུར། །དེ་ནས་བུད་མེད་རྣམས་ཀྱི་དོན་མཛད་ཕྱིར། །གྲགས་འཛིན་མ་ལ་རྒྱལ་བའི་རུ་མཚོན་བྱས། །ལྷས་བྱིན་མཛེས་དགའ་ལག་ན་བེ་ཅོན་ཅན། །ལ་སོགས་ཚན་པོ་ཆེ་དང་སྲེད་མེད་བུའི། །སྟོབས་ལྡན་ཤཱཀྱའི་ཁྱེ་འུ་ལྔ་བརྒྱ་དང༌། །འཕོང་དང་འདེགས་དང་གཅོད་པ་ལ་སོགས་པ། །སྒྱུ་རྩལ་འགྲན་པས་དེ་དག་ཐམས་ཅད་ཀྱི། །དྲེགས་པ་ཚར་བཅད་འཇིག་རྟེན་ཟིལ་གྱིས་མནན། །ལག་ན་བེ་ཅོན་བུ་མོ་གྲགས་འཛིན་མ། །དྲིལ་བུ་སྒྲ་ཡི་བུ་མོ་ས་འཚོ་མ། །ཤཱཀྱ་དུས་ལེགས་བུ་མོ་རི་དྭགས་སྐྱེས། །ལ་སོགས་བཙུན་མོ་དྲུག་ཁྲི་ཁབ་ཏུ་བཞེས། །འཇིག་རྟེན་མཐུན་པར་འཇུག་པའི་སྤྱོད་པ་ཡིས། །སྐྱེ་བོ་མགུ་བར་མཛད་ནས་སྲིད་པ་ལས། །ངེས་པར་འབྱུང་བ་ཆེན་པོ་བསྟན་པའི་སླད། །སེར་སྐྱའི་སྒོ་བཞིར་རྒ་ནད་ཤི་བ་དང༌། །སྤྲུལ་པའི་དགེ་སློང་གཟིགས་པའི་རྐྱེན་དང་ནི། །བཙུན་མོས་སྦྱར་བའི་རོལ་མོའི་སྒྲ་དབྱངས་ལས། །ཚིགས་སུ་བཅད་པ་དུ་མས་བསྐུལ་བ་ཡིས། །ཁྱིམ་ལས་ངེས་པར་འབྱུང་བ་ཉིད་དུ་དགོངས། །མ་ནིང་ཡིན་ཞེས་སྐུར་པ་སྤང་བའི་ཕྱིར། །བུད་མེད་འགྲོགས་པའི་ཐ་མ་འདི་ཡིན་ཞེས། །གྲགས་འཛིན་མ་ལ་སྲས་ཀྱི་ས་བོན་བཞག །རྒྱལ་པོས་ར་བ་ལྕགས་རི་སྒོ་འཕར་དང༌། །དམག་དཔུང་མང་པོས་བསྐོར་སྟེ་སྲུང་ལ་བརྩོན། །མཚན་མོ་ཡབ་གཅིག་མནལ་གྱིས་ནོན་པ་ལ། །གསོལ་བ་བཏབ་པས་(ཁ༡༦ན)
མནལ་གྱིས་མྱོས་པ་དང༌། །ནམ་ཡང་བླ་མའི་གནས་རྣམས་ཀུན་གྱི་ངག །མ་བཅག་བདེན་པའི་ཚིག་གི་མཐར་ཕྱིན་པ། །དེ་ཡི་ངག་ཚིག་སུས་ཀྱང་མི་ཟློག་ཕྱིར། །ཁྱོད་ཀྱི་བསམ་པ་རྫོགས་པར་གྱུར་ཅིག་ཅེས། །གནང་བ་བྱིན་སྟེ་རྒྱུ་སྐར་རྒྱལ་ཤར་བ། །མཚན་ཕྱེད་ཚེ་ན་བསྔགས་ལྡན་ལ་བཅིབས་སྟེ། །རྒྱལ་ཆེན་བཞི་ཡིས་ཆིབས་ཀྱི་རྐང་ལག་བཏེག །ཚངས་དང་བརྒྱ་བྱིན་འོད་ཀྱིས་ལམ་སྣ་བྱས། །གནས་གཙང་ལྷས་བསྐོར་སྟེང་གི་མཁའ་ལ་བྱོན། །ཤཱཀྱ་ཁྱེ་འུ་གྱང་ཡུལ་ལས་འདས་པ། །བྱང་ཕྱོགས་ཀཱ་མ་རཱུ་པའི་ཡུལ་དུ་བབ། །ཉིད་ཀྱིས་ཉིད་ཀྱི་གཙུག་ཕུད་དོར་བ་ཡིས། །རྣམ་དག་ཅེས་བྱ་གཙུག་ཕུད་མཆོག་རྟེན་བྱུང༌། །འདས་པའི་སངས་རྒྱས་གསུམ་གྱི་གཙུག་ཕུད་ཀྱི། །མཆོད་རྟེན་ཀྱང་ནི་ཕྱོགས་འདིར་ལྷན་ཅིག་གནས། །མ་བྱོན་རྣམས་ཀྱང་གཙུག་ཕུད་འདི་རུ་འདོར། །རྔོན་པར་སྤྲུལ་པའི་ལྷ་ཡིས་ངུར་སྨྲིག་ཕུལ། །བླངས་སར་འདུན་པས་ངུར་སྨྲིག་མཆོད་རྟེན་བརྩེགས། །གཙུག་ཕུད་དུས་སྟོན་གོས་ཀྱི་དུས་སྟོན་ཞེས། །ལྷ་ཡུལ་ན་ཡང་དུས་སྟོན་རེ་རེ་ཡོད། །རྟ་དང་རྒྱན་བསྐུར་འདུན་པ་སླར་ལོག་སར། །འདུན་པ་སླར་ལོག་པ་ཡི་མཆོད་རྟེན་བྱས། །འདུན་པས་སེར་སྐྱར་རྒྱལ་འབངས་མྱ་ངན་བསལ། །བཙུན་མོ་རྣམས་ཀྱིས་བསྔགས་ལྡན་མགུལ་ནས་འཇུས། །རྟ་མཆོག་ཁྱོད་ཀྱིས་མི་མཆོག་གར་བསྐྱལ་ཞེས། །ངུས་པས་བསྔགས་ལྡན་ཅང་ཤེས་མྱ་ངན་སྐྱེས། །ཟས་བཅད་དབུགས་ཀྱིས་བརྣངས་སྟེ་གུམ་པ་ལས། །ཁྱིམ་བདག་བུར་སྐྱེས་ཕྱིས་ནས་དགྲ་བཅོམ་བཀོད། །རྒྱན་རྣམས་གཞོན་ནུ་གཞན་ལ་གཡོགས་པ་ན། །ལྷ་ཕྲན་གཞན་གྱིས་བརྒྱ་བྱིན་རྒྱན་ཐོགས་ལྟར། །སུས་ཀྱང་མ་ཐེག་སྐྱེ་རྒུའི་བདག་མོ་ཡིས། །རྒྱན་ཆ་མཐོང་བའི་མྱ་ངན་སྤང་བའི་ཕྱིར། །རྫིང་དུ་དོར་བས་རྒྱན་གྱི་རྫིང་བུ་བྱུང༌། །དེ་ནས་བྱང་ཆུབ་སེམས་དཔའ་རང་བྱུང་གིས། །བསྙེན་པར་རྫོགས་སྟེ་ཆུ་བོ་(ཁ༡༦བ)
དབྱིག་ལྡན་སོགས། །བརྒལ་ནས་ཡུལ་དབུས་མ་ག་དྷ་རུ་ཆས། །དྲང་སྲོང་ངན་སྤོང་བུ་ཡི་བསྟི་གནས་བྱོན། །ཁོ་བོའི་བསོད་ནམས་མཐུ་ཡིས་སྔོན་གྱི་ཚེ། །ལྗོན་ཚོགས་འདི་ཀུན་ཛམ་བུའི་གསེར་ལས་གྲུབ། །ལོ་འདབ་མེ་ཏོག་འབྲས་བུ་རྟག་རྒྱས་ཀྱང༌། །ད་ནི་ཕལ་བའི་ཤིང་གྱུར་བརྙིང་བསྐམས་པས། །ཁོ་བོ་འཆི་བར་ངེས་ཅེས་བྲམ་ཟེ་དེ། །མྱ་ངན་བྱེད་པ་གཟིགས་ནས་སླར་གསུངས་པ། །དེ་ནི་ཁྱོད་ཀྱི་མཐུ་མིན་གངས་རི་དང༌། །ཉེ་སར་ཤཱཀྱའི་གཞོན་ནུ་ཞིག་བྱུང་བ། །ཁྱིམ་དུ་གནས་ན་འཁོར་ལོས་སྒྱུར་འགྱུར་ལ། །འདི་ནི་དེ་ཡི་སྐྱེད་མོས་ཚལ་དུ་འགྱུར། །དེ་མཐུས་སྔོན་ཚེ་འབྱོར་པ་རྒྱས་པ་ཡིན། །གཞོན་ནུ་དེ་ནི་ཁྱིམ་སྤངས་རབ་བྱུང་བས། །དེ་བས་བསྐམས་པར་ཟད་ཅེས་གསུངས་པ་ན། །དེ་ཡིས་བརྟགས་ནས་འོ་ན་གཞོན་ནུ་དེ། །ཁྱོད་ཉིད་ཁོ་ནར་ངེས་ཞེས་མཆོད་པ་བྱས། །མ་ག་དྷ་རུ་བསོད་སྙོམས་མཛད་པའི་ཚེ། །སྐྱེ་བོ་ཀུན་གྱིས་དགེ་སྦྱོང་མཛེས་པར་བསྒྲགས། །རྒྱལ་པོ་གཟུགས་ཅན་སྙིང་པོས་མཐོང་ནས་ནི། །འདི་ལྟའི་གཟུགས་དང་ན་ཚོད་དཀའ་ཐུབ་འཕངས། །རྒྱལ་པོར་འོས་ཞེས་རྒྱལ་སྲིད་ཕྱེད་བསྟབས་པ། །མ་བཞེས་རྒྱལ་པོས་སློབ་མར་ཁས་ལེན་བྱས། །མེ་ལྔ་པ་དང་ཉི་མའི་བརྟུལ་ཞུགས་དང༌། །རྐང་པ་གཅིག་གིས་འགྲེང་སོགས་སྣ་ཚོགས་པའི། །དཀའ་ཐུབ་སྤྱོད་པའི་མུ་སྟེགས་གནས་སུ་ཞུགས། །དེ་དག་རྣམས་དང་མཐུན་པའི་དཀའ་བ་ནི། །ཉིས་འགྱུར་ལ་སོགས་སྤྱད་པས་དེ་ཀུན་དང༌། །དགེ་སྦྱོང་ཆེན་པོ་ཅེས་བྱར་མཚན་དུ་བརྗོད། །དེ་ནས་སྙོམས་པར་འཇུག་པ་དྲུག་པོ་ཡི། །ནང་ནས་སྒྱུ་རྩལ་ཞེས་བུ་རིང་འཕུར་ལས། །ཅི་ཡང་མེད་པའི་སྐྱེ་མཆེད་མངོན་དུ་མཛད། །སླར་ཡང་རངས་བྱེད་བུ་ནི་ལྷག་སྤྱོད་ཀྱི། །སློབ་མར་མཛད་དེ་སྲིད་རྩེའི་སྐྱེ་མཆེད་ནོས། །དེ་དག་མགུ་བས་སློབ་མའི་ཚོགས་ཕུལ་ཀྱང༌། །དེ་ཀུན་ཐར་པའི་ལམ་དུ་མ་གཟིགས་ནས། །ཆུ་བོ་ནཻ་རཉྫ་རའི་འགྲམ་དུ་བྱོན། །དཀའ་ཐུབ་(ཁ༡༧ན)
ཙམ་གྱིས་གྲོལ་འདོད་དགའ་བའི་ཕྱིར། །རྒྱ་ཤུག་འབྲུ་རེ་སཱ་ལུ་འབྲུ་རེ་དང༌། །ཆུ་ཐིགས་ཙམ་གྱིས་འཚོ་དང་ཅུང་ཟད་ཀྱང༌། །མི་གསོལ་སོགས་ཀྱི་དཀའ་བ་ལོ་དྲུག་སྤྱད། །ཚོར་བ་ཟིལ་མནན་དབུགས་ཀྱི་དབྱུང་རྔུབ་སྤངས། །ལྷར་བཅས་སྐྱེ་བོ་གཞན་གྱིས་མ་ཞུགས་པ། །མཁའ་ཁྱབ་ཅེས་བྱའི་ཏིང་འཛིན་མཛད་པར་གྱུར། །དེ་ཚེ་ཡབ་དང་ཞང་པོས་མི་ལྔ་བརྒྱ། །འཁོར་དུ་བཞག་པའི་བརྒྱ་ཕྲག་རེ་རེ་ནས། །མི་རེ་བསྡད་ནས་གཞན་རྣམས་ལོག་པ་ལ། །ལྔ་སྡེ་ཞེས་བྱ་འཁོར་གྱི་དང་པོ་བྱུང༌། །མདོ་གཞན་དག་ལས་རིང་འཕུར་ལྷག་སྤྱོད་ཀྱི། །སློབ་མ་ལྔ་ཞིག་ཞབས་ཕྱིར་འབྲངས་པ་ནི། །ལྔ་སྡེ་བཟང་པོ་ཡིན་པར་བཤད་པའང་ཡོད། །གསང་སྔགས་ཡོ་ག་ལྟར་ན་དཀའ་ཐུབ་ཀྱི། ཁོག་པ་མི་ཡུལ་དུ་བཞག་འོག་མིན་ནམ། །རི་རབ་རྩེར་བྱོན་ལོངས་སྐུར་སངས་རྒྱས་སྟེ། །སླར་ཡང་དཀའ་ཐུབ་སྦྱོང་བའི་ལུས་ལ་ཞུགས། །སྤྲུལ་སྐུར་འཚང་རྒྱ་ཚུལ་དུ་སྟོན་པར་གསུངས། །ཐུན་མོང་སྣང་ངོར་ཤིན་དུ་རིད་པའི་སྐུ། །གྲོང་གི་བྱིས་པའི་རྩེད་མོའི་གནས་སུ་གྱུར། །ངལ་དུབ་མཐའ་ཡིས་གྲོལ་བར་མ་གཟིགས་ནས། ཁ་ཟས་རགས་པ་བཟའ་འོ་ཞེས་གསུངས་པས། །ལྔ་སྡེ་མ་དད་ཝ་ར་ཎ་སིར་སོང༌། །འདི་ཡང་བྱང་ཆུབ་སེམས་དཔའ་འཚང་རྒྱ་བ། །མི་ཡི་སྐྱེ་བོས་བསྙེན་པར་མི་ནུས་པས། །ཉིད་ཀྱིས་བྱིན་གྱིས་བརླབས་པའི་མཐུ་རུ་བཤད། །དེ་ཚེ་གྲོང་པའི་བུ་མོ་དགའ་མོ་དང༌། །དགའ་སྟོབས་མ་ཞེས་བྱ་བས་མཚན་མཁན་གྱིས། །བུ་མོ་གང་གིས་ལོ་ནི་བཅུ་གཉིས་སུ། །ཚངས་པར་སྤྱད་དེ་དཀའ་ཐུབ་རྫོགས་པའི་ཚེ། །མ་ཧེ་སྟོང་གི་འོ་མའི་ཉིང་ཁུ་ཡིས། །བྲམ་ཟེ་མཆོད་སྟེ་སྨོན་ལམ་བཏབ་པ་ན། །དོན་ཀུན་གྲུབ་པའི་བཙུན་མོར་འགྱུར་རོ་ཞེས། །བསྟན་ཐོས་ལོ་ནི་བཅུ་གཉིས་ཚངས་པར་སྤྱད། །དཀའ་ཐུབ་གྲུབ་ནས་མ་ཧེ་མོ་སྟོང་བཞོས། །འོ་མ་དེ་དག་རྣམས་ལ་བླུད་ནས་ནི། །སླར་ཡང་བཞོས་སྟེ་ལྔ་བརྒྱ་ལ་ནི་བླུད། །(ཁ༡༧བ)
དེ་ལྟར་མ་ཧེ་ཉི་ཤུ་རྩ་ལྔའི་བར། །ལན་བདུན་ཉིང་ཁུར་བྱས་པའི་འོ་ཐུག་བསྐོལ། །ཤ་ཁ་ར་དང་སྦྲང་རྩིའི་དྭངས་མ་བཏབ། །སཱ་ལིའི་འབྲས་བླུག་བསྐོལ་བས་བཀྲ་ཤིས་པའི། །རྟགས་ཀྱི་རི་མོ་དུ་མ་ཤར་བ་ནི། །མཚན་མཁན་གྱིས་མཐོང་འདི་ནི་སུས་འཐུངས་པ། །དེ་རིང་བསམ་པ་འགྲུབ་པར་འགྱུར་རོ་ཟེར། །སྦྱིན་ཡུལ་བྲམ་ཟེ་འབོད་པར་བྲན་མོ་བསྐུལ། །བརྒྱ་བྱིན་མཐུ་ཡིས་དགེ་སྦྱོང་བྲམ་ཟེ་གཞན། །གཅིག་ཀྱང་མི་སྣང་བརྒྱ་བྱིན་ཚངས་པ་གཉིས། །བྲམ་ཟེར་སྤྲུལ་པ་མཐོང་ནས་བོས་པ་ན། །ང་བས་རྣམ་པ་དུ་མས་འདི་ལྷག་གིས། །འདི་ལ་ཕུལ་ཞེས་བརྒྱ་བྱིན་གྱི་ཚངས་པ། །དེ་ཡིས་བྱང་ཆུབ་སེམས་དཔའ་བསྟན་པར་གྱུར། །འོ་ཐུག་དེ་ཡིས་གསེར་གྱི་གཞོང་པ་བཀང༌། །ཕུལ་ནས་བྱང་ཆུབ་སེམས་དཔའི་ཞབས་ལ་གཏུགས། །ཤཱཀྱའི་གཞོན་ནུ་གངས་རིའི་འགྲམ་བྱུང་བ། །དོན་གྲུབ་དེ་ཡི་བཙུན་མོར་སྨོན་ལམ་བཏབ། །བྱང་ཆུབ་སེམས་དཔས་དེ་ནི་ཁྱིམ་ནས་བྱུང༌། །འདོད་པ་སྤངས་ཀྱིས་སྨོན་ལམ་གཞན་ཐོབ་གསུངས། །དེ་གཉིས་མཛའ་ཞིང་གཅུགས་པའི་ཡིད་ཀྱི་རྒྱུས། །འོ་ན་དེ་བསམ་འགྲུབ་པར་གྱུར་ཅིག་ཞེས། །བསྔོས་སྟེ་བྱང་ཆུབ་སེམས་དཔས་མཐུན་གྱུར་མཛད། །གཞོང་པ་འདི་ཡང་བཏང་ངམ་ཞེས་གསུངས་པས། །ཁོ་མོ་ཅག་ནི་སྣོད་དང་བཅས་པ་ཡིས། །བྱིན་སྟེ་སྣོད་མ་མཆིས་པར་མ་ཡིན་ཟེར། །འདི་གཉིས་བསྐལ་བཟང་སངས་རྒྱས་ཐམས་ཅད་ལ། །རྫོགས་འཚང་རྒྱ་ཀར་བསོད་སྙོམས་འབུལ་བ་པོར། །སྨོན་ལམ་བཏབ་སྟེ་འགྲུབ་པར་གྱུར་པ་ཡིན། །བྱང་ཆུབ་སེམས་དཔས་ཆུ་བོའི་འགྲམ་དུ་བསྣམས། །ཁྲུས་མཛད་སྦྲང་རྩི་ལྟ་བུར་མངར་བ་ཡི། །འོ་ཐུག་བཞེས་པས་སྐུ་ཡི་མཐུ་སྟོབས་རྒྱས། །གསེར་གཞོང་ཆུར་དོར་ཀླུ་རྒྱལ་རྒྱ་མཚོས་ཁྱེར། །བརྒྱ་བྱིན་གྱིས་ནི་མཁའ་ལྡིང་དུ་སྤྲུལ་སྟེ། །ཕྲོགས་ནས་ལྷ་ཡུལ་དུ་ཁྱེར་མཆོད་པ་བྱས། །དེང་སང་ན་ཡང་(ཁ༡༨ན)
སྣོད་ཀྱི་དུས་སྟོན་ཡོད། །བྲན་མོ་གྲུབ་མ་ཞེས་པའི་རོ་དཀྲིས་པའི། །གསོ་རས་བླངས་སྟེ་བཀྲུས་ཤིང་ཁ་བསྒྱུར་ནས། །ཕྱགས་བདར་ཁྲོད་པའི་སྣམ་སྦྱར་མཛད་པར་གྱུར། །དེ་ཚེ་འཛམ་གླིང་རྩི་ཤིང་ལྡུམ་བུ་ཀུན། །རང་རང་ལོ་འདབ་མེ་ཏོག་འབྲས་བུ་རྒྱས། །ཀུན་ཀྱང་རྩེ་ཀུན་རྡོ་རྗེའི་གདན་དུ་ཕྱོགས། །བུར་ཤིང་ལ་སོགས་རང་རང་བཅུད་རྣམས་འཛག །ས་ཆེན་འདི་ནི་འཁོར་བ་ལས་བྱས་ལྟར། །རེག་ན་འཁྲོལ་ཞིང་སྒྲ་སྙན་འབྱིན་པར་གྱུར། །སྲོག་ཆགས་ཀུན་ཀྱང་བྱང་ཆུབ་སྙིང་པོའི་ཕྱོགས། །རང་བཞིན་གྱིས་འདུད་མགོ་བོ་སྟོན་པར་བྱེད། །བྱང་ཆུབ་ཤིང་མཆོག་རབ་ཏུ་རྒྱས་ཤིང་མཛེས། །བྱ་རྣམས་སྙན་པའི་སྒྲ་འབྱིན་ཉི་འོད་གསལ། །འགྲོ་ཀུན་མི་དགེའི་བསམ་པ་ནུབ་པས་གནས། །བྱང་ཆུབ་སེམས་དཔའ་སྐྱེས་བུ་ཆེན་པོའི་སྟོབས། །མཐའ་ཡས་ལྡན་པས་སེང་གེའི་སྟབས་ཀྱིས་ཆས། །ནགས་ཚལ་མེ་ཏོག་བཀྲ་བའི་སྤོ་ཅིག་གཟིགས། །འདི་རུ་འདུག་ནས་འཚང་རྒྱ་ཞེས་དགོངས་ཚེ། །རི་དེ་ཉིལ་ཞིང་ཞིག་པར་གྱུར་པ་ན། །ཅིས་ཉེས་དགོངས་ཚེ་གནས་གཙང་ལྷ་རྣམས་ཀྱིས། །མཚམས་མེད་སྤྱད་དང་སྲིད་པ་ཐ་མ་པའི། །བྱང་སེམས་གཉིས་ནི་ས་གཞི་ཕལ་པ་ཡིས། །བསྟེན་མི་ནུས་ཀྱིས་ཧ་ཅང་མི་རིང་བར། །རྡོ་རྗེའི་གདན་ཡོད་དེ་རུ་གཤེགས་ཞེས་བསྟན། །བརྒྱ་བྱིན་གྱིས་སྤྲུལ་རྩྭ་ཚོང་བཀྲ་ཤིས་ལས། །རྨ་བྱའི་མགྲིན་མདོག་རེག་ན་འཇམ་པ་ཡི། །ལྷ་ཡི་རྩྭ་བླངས་བྱང་ཆུབ་ཤིང་དྲུང་བྱོན། །རྩྭ་རྣམས་གཡས་སྐོར་ཉིད་དུ་ངང་གིས་འཁྱིལ། །དེ་སྟེང་བཞུགས་སྟེ་བྱང་ཆུབ་མ་ཐོབ་བར། །ནམ་ཡང་འདི་ལས་ལྡང་བར་མི་བྱ་ཞེས། །དམ་བཅས་རྡོ་རྗེའི་སྐྱིལ་མོ་ཀྲུང་གིས་བཞུགས། །འོད་ཟེར་བཀྱེ་བས་བདུད་ཀྱི་བདག་པོ་སྦྲན། །བདུད་ཀྱི་དཔུང་ཚོགས་མི་འཁྲུགས་ཕྲག་གཅིག་ནི། །འཇིགས་པའི་གཟུགས་ཅན་ལྷགས་སྟེ་མཚོན་ཆར་ཕབ། །དེ་ཀུན་མེ་ཏོག་ཆར་གྱུར་འཁྱིལ་(ཁ༡༨བ)
ཞིང་འབབ། །བདུད་ཀྱི་བུ་མོ་རྣམས་ཀྱིས་ཆགས་པ་ཡིས། །བསླུ་བར་བརྩམས་པ་རྒན་མོར་བྱིན་བརླབས་སྟེ། །སླར་ཡང་རྒྱལ་སྲས་ཉིད་ལ་སྐྱབས་སུ་སོང༌། །ཁྱོད་ཀྱིས་བསགས་པའི་ཚོགས་གཉིས་དེ་ཙམ་གྱིས། །འཚང་རྒྱ་རིགས་པ་མིན་ཞེས་བདུད་ཀྱིས་རྒོལ། །བྱང་ཆུབ་སེམས་དཔས་སྡིག་པ་ཅན་ཁྱོད་ཀྱིས། །གཏན་མེད་མཆོད་སྦྱིན་གཅིག་ཅིག་བྱས་པ་ཡིས། །འདོད་པའི་ཁམས་ཀྱི་དབང་ཕྱུག་དུ་གྱུར་ན། །ང་ཡིས་གཏན་མེད་མཆོད་སྦྱིན་དཔག་ཡས་བྱས། །གསུངས་ཚེ་བདུད་ཀྱིས་དཔང་པོ་སུ་ཡོད་ཟེར། །ཕྱག་གཡས་བརྐྱངས་པ་ས་གཞི་ལ་བསྣུན་སྟེ། །ཀུན་ལ་སྙོམས་ཤིང་ཉེ་ཁོན་མེད་པ་ཡི། །ས་འདི་ང་ཡི་དཔང་ཞེས་གསུངས་པའི་མོད། །ས་ཆེན་རྣམ་པ་དྲུག་དུ་གཡོས་པ་ལས། །ས་ཡི་ལྷ་མོ་བརྟན་མས་ལུས་ཕྱེད་ཐོན། །ཇི་སྐད་བཀའ་བསྩལ་དེ་བཞིན་ཁོ་ན་སྟེ། །འདི་ནི་བདག་ལ་མངོན་སུམ་ཉིད་ཡིན་ནོ། །དེ་ལྟ་མོད་ཀྱིས་ལྷར་བཅས་འཇིག་རྟེན་གྱི། །དཔང་པོ་ཚང་མ་ཁྱོད་ཉིད་ཡིན་ནོ་ཞེས། །བརྗོད་པ་ཐོས་པས་བདུད་ཚོགས་སྐྲག་ཅིང་བྱེར། །མང་ཞིག་སྟོན་པ་ཉིད་ལ་སྐྱབས་སུ་སོང༌། །དེ་ལྟར་བྱམས་པ་ཆེན་པོ་གཅིག་ཁོ་ནས། །གཡོ་བ་མེད་བཞིན་བདུད་སྡེ་ཀུན་བཏུལ་སྟེ། །བདེན་པ་བཞི་དང་ལུགས་འབྱུང་ལུགས་ཟློག་གི །རྟེན་ཅིང་འབྲེལ་བར་འབྱུང་བ་ཀུན་མཁྱེན་པས། །སྤྱན་དང་མངོན་པར་ཤེས་པ་མངོན་དུ་མཛད། །སྐད་ཅིག་གཅིག་དང་ལྡན་པའི་ཤེས་རབ་ཀྱིས། །སྐྱ་རེངས་ཤར་ཚེ་མངོན་པར་རྫོགས་སངས་རྒྱས། །དེ་ཚེ་མཁའ་ལ་ཟླ་བ་གཟའ་ཡིས་ཟིན། །གྲགས་འཛིན་མ་ལ་དགྲ་གཅན་ཟིན་སྲས་བཙས། །རྒྱལ་པོས་གཞོན་ནུའི་སྲས་མིན་ཞེས་དོགས་ཚེ། །ཡུམ་གྱིས་གཞོན་ནུའི་པང་ཚང་རྡོ་བ་དང༌། །ལྷན་ཅིག་དམོད་བོར་རྒྱན་གྱི་རྫིང་བུར་འཕངས། །ལྷན་ཅིག་བལ་འདབ་བཞིན་དུ་ཆུ་སྟེང་འཕྱོ། །སྐྱེ་བོ་ཡིད་འཆེས་བཙས་སྟོན་རྒྱ་ཆེར་བྱས། །དེ་ཚེ་བདུད་རྩི་ཟས་ཀྱི་བུ་བཙས་པས། །(ཁ༡༩ན)
ཀུན་དགའ་བོ་ཞེས་དུས་ལས་མིང་དུ་བཏགས། །དེ་ལྟར་མངོན་པར་རྫོགས་པར་སངས་རྒྱས་ནས། །སྐྱིལ་ཀྲུང་ཉིད་ཀྱིས་ཏཱ་ལ་བདུན་སྲིད་ཀྱི། །ཚད་དུ་ལན་བདུན་འཕགས་སྟེ་ཆེད་དུ་བརྗོད། །ལྷ་རྣམས་ཀུན་གྱིས་རྒྱ་ཆེར་མཆོད་པར་གྱུར། །སངས་རྒྱས་མ་བྱུང་དུས་སུ་དམུས་ལོང་ཞིང༌། །སངས་རྒྱས་བྱུང་དུས་མིག་རབ་རྙེད་པ་ཡི། །ཀླུ་ཡི་རྒྱལ་པོ་ནག་པོས་ཀུན་ནས་བསྟོད། །བདུན་ཕྲག་ཞག་དུ་སྐྱིལ་ཀྲུང་མ་གཤིག་བཞུགས། །གཉིས་པར་བྱང་ཆུབ་ཤིང་ལ་མི་འཛུམས་གཟིགས། །གསུམ་པར་སྟོང་གསུམ་རྒྱང་རིང་བར་དུ་འཆག །བཞི་པར་ཤར་ནུབ་རྒྱ་མཚོའི་བར་དུ་འཆག །ལྔ་པར་བཏང་བཟུང་ཀླུ་ཡི་གནས་ན་བཞུགས། །དྲུག་པར་ནྱ་གྲོ་དྷ་ཡི་ཤིང་དྲུང་བཞུགས། །བདུན་པར་སྒྲོལ་རྒྱུའི་ཤིང་གི་ཚལ་ན་བཞུགས། །དེ་ཚེ་བསྐལ་བཟང་སངས་རྒྱས་ཐམས་ཅད་ལ། །ཐོག་མའི་བསོད་སྙོམས་འབུལ་པོའི་སྨོན་ལམ་ཅན། །ཚོང་པ་ག་གོན་དང་ནི་བཟང་པོ་ཡིས། །ཟོང་མང་ཁལ་དེད་ལྷོ་ནས་བྱང་བགྲོད་ཚེ། །ལེགས་སྐྱེས་དང་ནི་གྲགས་པ་ཅེས་བྱ་བ། །གླང་བུའི་དམ་པ་ཅང་ཤེས་གཉིས་ཀྱིས་ནི། །མགྲོན་པོ་རྣམས་ཀྱི་ལམ་གྱི་སྣ་འདྲེན་ཞིང༌། །ལམ་དུ་འཇིགས་པ་ཡོད་ན་མི་འགྲོ་བས། །དེ་ཚེ་གླང་བུ་ཅང་ཤེས་དེ་གཉིས་ཀྱིས། །ལམ་དུ་མ་ཕྱིན་དེད་ཀྱང་ལམ་གཞན་ཞུགས། །ནགས་ཀུན་མྱུལ་བས་འཇིགས་པ་མ་མཐོང་སྟེ། །གླང་བུའི་ཕྱིར་ཕྱིན་བྱང་ཆུབ་ཤིང་དྲུང་ན། །རྒྱལ་བ་བཞུགས་མཐོང་གླང་བུ་སྐོར་བ་བྱེད། །ལྷས་ཀྱང་སྦྲན་པས་ཚོང་པ་དད་གྱུར་སྟེ། །སྐྱོ་མ་ལྡེ་གུ་སྦྲང་རྩི་བུར་ཤིང་སོགས། །བསོད་སྙོམས་ཕུལ་ཚེ་རྒྱལ་བས་དགོངས་པ་མཛད། །ལག་གིས་བླངས་ན་མུ་སྟེགས་ཅན་བཞིན་འགྱུར། །སྔོན་གྱི་རྒྱལ་བའི་བཞེས་སྣོད་གང་ཡིན་དགོངས། །ལྷུང་བཟེད་དུ་མཁྱེན་གནས་གཙང་ལྷས་ཀྱང་གསོལ། །འཇིག་རྟེན་སྐྱོང་བ་བཞི་ཡིས་རིན་ཆེན་ཚོགས། །(ཁ༡༩བ)
དུ་མའི་ལྷུང་བཟེད་ཕུལ་བ་མ་བཞེས་ནས། །རྡོ་ཡི་ལྷུང་བཟེད་རེ་རེ་ཕུལ་བ་བཞེས། །གཅིག་དུ་བྱིན་རླབས་བསོད་སྙོམས་བཞེས་ནས་ནི། །ཚོང་པ་རྣམས་ལ་བདེ་ལེགས་ཚིགས་བཅད་གསུངས། །ལྷུམས་སུ་ཞུགས་ནས་མཛད་པ་འདི་ཡི་བར། །ཕལ་ཆེར་ཐུན་མོང་སྐྱེ་བོའི་མཐོང་བ་ཡི། །དབང་བྱས་ལུང་དང་མངོན་བྱུང་རྒྱ་རོལ་ལྟར། །ཉུང་ངུར་བསྡུས་ནས་ཅུང་ཟད་བརྗོད་པ་ཡིན། །འཕགས་ཆེན་རྣམས་ཀྱི་གཟིགས་པའི་དབང་བྱས་ཚེ། །བྱང་ཆུབ་ཤིང་གི་རྒྱན་དང་བཀོད་པ་ཚད། །སེང་གེའི་ཁྲི་ཆེན་བསམ་ཡས་ལྡན་པ་སྟེ། །བྱིས་པའི་འགྲོ་བས་བསྐལ་པར་བགྲང་མི་ནུས། །དེར་བཞུགས་སྐལ་མཉམ་སེམས་དཔའི་འཁོར་མཐའ་ཡས། །དབུས་སུ་སངས་རྒྱས་རྡོ་རྗེའི་གདན་སྤོ་ལས། །གཡོ་བ་མེད་བཞིན་རི་རབ་རྩེ་མོ་དང༌། །འཐབ་བྲལ་དགའ་ལྡན་ལ་སོགས་འོག་མིན་བར། །སོ་སོའི་གནས་སུ་སྐུ་ཡི་བཀོད་པ་སྣང༌། །ཕྱོགས་བཅུའི་ཞིང་ནས་བྱང་སེམས་ཚོགས་འདུས་སྟེ། །ཕལ་པོ་ཆེ་ཡི་མདོ་སྡེ་གསུངས་པ་ཉིད། །དེ་བཞིན་རྡོ་རྗེ་ཐེག་པའི་རྒྱུད་འགའ་ལས། །གསང་སྔགས་མཐུ་ཡིས་བདུད་བཏུལ་སངས་རྒྱས་ཚུལ། །དུ་མར་བཤད་རྣམས་མ་ལུས་བརྗོད་མི་ལང༌། །ཐམས་ཅད་གདུལ་བྱའི་སྣང་ཆ་ཐ་དད་དེ། །གཅིག་རྗེས་གཅིག་མཐུད་བྱུང་བར་མ་འཁྲུལ་ཞིག །དེ་ནས་དམ་ཆོས་དཀོན་པར་སྟོན་པ་དང༌། །སྐྱེ་རྒུ་ཚངས་ལ་དད་རྣམས་གདུལ་བའི་ཕྱིར། །ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུ་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་འདབ་གནས་བྱ་ཞེས་དགོངས་ཚེ། །འཇིག་རྟེན་དུ་ནི་མི་རུང་སྣ་ཚོགས་བྱུང༌། །ལྷ་ཡིས་ཤེས་ནས་ཀུན་གྱིས་གསོལ་བ་བཏབ། །ཚངས་པས་གསེར་གྱི་འཁོར་ལོ་རྩིབས་སྟོང་པ། །ཕུལ་སྟེ་མ་ག་ངྷ་འདིར་མ་དག་ཆོས། །དྲི་མར་བཅས་པར་སེམས་པའི་སྨྲ་བ་བྱུང༌། །དེ་སླད་ཐུབ་པ་བདུད་རྩིའི་སྒོ་དབྱེ་གསོལ། །(ཁ༢༠ན)
དེ་སྐད་བསྐལ་བཟང་རྒྱལ་བ་ཐམས་ཅད་ཀྱི། །ཆོས་ཀྱི་འཁོར་ལོ་བསྐོར་བར་སྐུལ་བ་པོ། །ཚངས་པས་གསོལ་བའི་མོད་ལ་ཞལ་གྱིས་བཞེས། །གཞན་གྱིས་གསོལ་བ་བཏབ་ལ་ང་མི་ལྟོས། །སྐྱེ་བོ་འདི་ཀུན་ཚངས་ལ་དད་པ་སྟེ། །དེ་ཡིས་གསོལ་བཏབ་འཁོར་ལོ་བསྐོར་རོ་གསུངས། །སྔོན་གྱི་སློབ་དཔོན་རིང་འཕུར་ལྷག་སྤྱོད་གཉིས། །དྲང་བར་དགོངས་ཚེ་འདས་མ་ཐག་པར་མཁྱེན། །ཐོག་མའི་གདུལ་བྱ་ལྔ་སྡེ་ཡིན་མཁྱེན་ནས། །ཝ་ར་ཎཱ་སིར་གཤེགས་པར་གྱུར་པའི་ཚེ། །གངྒཱའི་མཉན་པས་གྲུ་བཙས་བླངས་པ་ན། །གྲུ་བཙས་མེད་གསུང་མཁའ་ལ་བྱ་བཞིན་གཤེགས། །རྒྱལ་པོས་དེ་ཐོས་རབ་བྱུང་གྲུ་བཙས་བཀག །ཁོར་མོ་འཇིག་ཅེས་ཝ་ར་ཎཱ་སིའི་ཡུལ། །དྲང་སྲོང་ལྷུང་བ་རི་དགས་ནགས་ཚལ་དུ། །ལྔ་སྡེས་མ་གུས་པ་ཡི་ཁྲིམས་བཅས་ཀྱང༌། །ཐུབ་དབང་གཟི་བརྗིད་མ་བཟོད་ངང་གིས་བྲལ། །གདུང་དང་རིགས་ནས་བོད་པར་མ་བྱེད་ཅིག །ད་ནི་མངོན་པར་རྫོགས་སངས་རྒྱས་སོ་གསུངས། །རིན་ཆེན་ཁྲི་སྟོང་ས་ལས་རང་བྱུང་བའི། །དང་པོ་གསུམ་ལ་ཕྱག་དང་སྐོར་བ་མཛད། །བཞི་པར་བསྙེངས་པ་མེད་པར་བཞུགས་ནས་ནི། །བདེན་བཞིའི་ངོ་བོ་བྱ་བ་འབྲས་བུ་སྟེ། །བཟླས་པ་གསུམ་གྱིས་རྣམ་པ་བཅུ་གཉིས་ཀྱི། །ཆོས་འཁོར་ལོ་གྲངས་མི་ཉུང་བ་རུ་བསྐོར། །དང་པོས་ཀཽཎྜི་ནྱས་ནི་མཐོང་ལམ་ཐོབ། །སྟོན་པས་ཁྱོད་ཀྱིས་ཆོས་ཀུན་ཤེས་སམ་ཞེས། །ལན་གསུམ་རྨེད་པས་ཀུན་ཤེས་མཚན་དུ་གྱུར། །གཉིས་པར་ཀཽཎྜི་ནྱས་ནི་དགྲ་བཅོམ་སྟེ། །སྣམ་སྦྱར་རྒྱལ་མཚན་འཛིན་པའི་མཆོག་དུ་བསྟན། །རྟ་ཐུལ་རླངས་པ་བཟང་ལྡན་མིང་ཆེན་བཞེས། །མཐོང་བའི་ལམ་དང་གསུམ་པར་དགྲ་བཅོམ་གྱུར། །འདི་ལྔ་ཡེ་ཤེས་ཁོང་ཆུད་ཀྱིས་བསྙེན་རྫོགས། །འདོད་གཟུགས་ལྷ་ནི་བརྒྱད་ཁྲིས་ཆོས་མིག་ཐོབ། །ལྷ་ཀུན་ལྷུང་ལྷུང་ལྡེགས་ལྡེགས་(ཁ༢༠བ)
སྒྲ་འབྱིན་སྟེ། །སྔོན་ཚེ་ལྷ་མི་སུས་ཀྱང་མ་བསྐོར་བའི། །ཆོས་འཁོར་བསྐོར་བ་མཐོང་ཞེས་ཆེད་ཏུ་བརྗོད། །ཐེག་དམན་ལུགས་ལ་ཆོས་འཁོར་གཞན་མི་འདོད། །ཐེག་ཆེན་ལུགས་ཀྱི་ཆོས་འཁོར་དང་པོ་ཡིན། །གྲགས་པ་ཁྱིམ་ན་གནས་བཞིན་དགྲ་བཅོམ་བཀོད། །མི་སློབ་ཁྱིམ་གནས་སྲིད་པ་མིན་ཞེས་གསུངས། །དེ་སོགས་ཉེ་བའི་ལྔ་སྡེ་རབ་ཏུ་བྱུང༌། །རིགས་གཙོའི་བུ་ནི་ལྔ་བཅུ་དགྲ་བཅོམ་བཀོད། །དྲུག་བཅུའི་ཚོགས་ལྡན་བཟང་སྡེས་བདེན་པ་མཐོང༌། །ཆོ་འཕྲུལ་ལྔ་བརྒྱས་སྟེང་རྒྱས་འོད་སྲུང་བཏུལ། །རལ་པ་ཅན་སྟོང་ཟག་པ་ཟད་པར་བཀོད། །གང་ཞིག་མཐོང་བས་གླང་ཆེན་སྨྱོན་པ་ཡང༌། །དུལ་བྱེད་རྟ་ཐུལ་གྱི་ནི་སྤྱོད་ལམ་གྱིས། །འཛམ་གླིང་སྨྲ་བའི་མཆོག་གྱུར་ཉེ་རྒྱལ་དང༌། །འདུན་འདོན་བྲམ་ཟེའི་དམ་པ་པང་ནས་སྐྱེས། །འཁོར་བཅས་བཏུལ་སྟེ་ཤེས་རབ་རྫུ་འཕྲུལ་དུ། །ལྡན་པའི་དམ་པ་མཆོག་གི་ཟུང་དུ་བསྟན། །དེ་དག་ལ་སོགས་སྲིད་པ་ཐ་མ་པ། །ཕལ་ཆེར་དགེ་སློང་ཚུར་ཤོག་ཚངས་སྤྱོད་བྱོས། །ཅེས་གསུངས་མོད་ལ་ཆོས་གོས་སྣམ་སྦྱར་བསྒོས། །སྐྲ་དང་ཁ་སྤུ་བྲེགས་ནས་ཞག་བདུན་ཙམ། །རིལ་བ་ཐོགས་གྱུར་བསྙེན་པར་རྫོགས་ནས་ཀྱང༌། །ལོ་བརྒྱ་ལོན་པའི་སྤྱོད་ལམ་ལྟར་གནས་པ། །དགེ་སློང་དངོས་པོ་ལྡན་པར་གྱུར་པའི་ཕྱིར། །ཚུར་ཤོག་གིས་ནི་བསྙེན་པར་རྫོགས་པ་ཡིན། །སེར་སྐྱ་བཟང་མོ་ལྷ་ཡི་ལུས་ཐོབ་དང༌། །ཛམྦུའི་གསེར་ནས་མ་གའི་ཁལ་བརྒྱ་པའི། །བང་བ་བརྒྱད་བཅུ་ལ་སོགས་སྤངས་ནས་ནི། །རབ་བྱུང་ངང་གིས་འདོད་ཆགས་བྲལ་གྱུར་པ། །བྲམ་ཟེའི་ཁྱེ་འུ་ནྱ་གྲོ་དྷ་སྐྱེས་ཀྱིས། །མཐོང་བའི་མོད་ལ་ཁྱོད་ནི་སྟོན་པ་སྟེ། །ཁོ་བོ་ཁྱོད་ཀྱི་ཉན་ཐོས་ལགས་སོ་ཞེས། །ལན་གསུམ་གསོལ་བས་བསྙེན་པར་རྫོགས་གྱུར་པ། །འོད་སྲུང་ཆེན་པོ་སྟོབས་བཅུ་པ་ཅེས་གྲགས། །འོད་སྲུང་ཆེན་པོ་དང་འོད་སྲུང་སྟོབས་བཅུ་པ་གཉིས་སུ་མདོ་ཁ་ཅིག་ལས་འབྱུང་ལ་མཛད་པ་འཁྲུལ་མེད་ཏུ་འོད་སྲུང་སྟོབས་བཅུ་པ་ནི་མ་ག་དྷ་པ་ཡིན་པར་སེམས་ཞེས་བྲིས་མོད་ཀྱང་འོད་སྲུང་ཆེན་པོ་ཉིད་ཀྱི་མཚན་གྱི་རྣམ་གྲངས་ཡིན་པ་འདྲ་སྙམ་དུ་རང་ལ་ཡང་ཡང་ཤར་བས་འདི་ལྟར་བྲིས་པ་ཡིན་ནོ། །གཞོན་ནུའི་དཔེ་ཡི་མདོ་སྡེས་གསལ་རྒྱལ་བཏུལ། །རྒྱལ་པོ་གཟུགས་(ཁ༢༡ན)
ཅན་སྙིང་པོ་དད་པར་མཛད། །མགོན་མེད་ཟས་བྱིན་དད་དང་བདེན་པ་ལ། །བཞག་སྟེ་རྒྱལ་བྱེད་ཚལ་གྱི་ཀུན་ར་བཞེས། །རྫོགས་སངས་རྒྱས་ནས་ལོ་བདུན་ལོན་པའི་ཚེ། །ཡབ་ཀྱི་ཕོ་ཉ་མདུན་ན་འདོན་འཆར་ཀ །དེ་ལྟའི་ཆོ་གས་བསྙེན་པར་རྫོགས་སུ་བཅུག །རྫུ་འཕྲུལ་བཀོད་པས་སེར་སྐྱའི་གྲོང་དུ་གཤེགས། །ཡབ་ཀྱིས་བསྟོད་ཕྱག་གསུམ་པ་མཛད་པར་གྱུར། །ཆོས་གསུང་ཚེ་ན་ཁྱེ་འུ་ཀུན་དགའ་བོ། །རྔ་ཡབ་ཐོགས་སྟེ་སྟོན་པའི་སྐུ་ལ་གཡོབ། །དེ་ལས་གཞན་དུ་འགྲོ་བར་མ་འདོད་ནས། །ཞམ་རིང་བགྱིས་སྟེ་ཐོས་པ་འཛིན་པར་གྱུར། །ཉིད་གཅུང་འདོད་ཆགས་དྲག་པོ་རབ་ཟློག་ནས། །དགྲ་བཅོམ་དབང་པོ་བསྡམས་པའི་མཆོག་དུ་བསྟན། །རྒྱལ་པོ་ཟས་གཙང་དྲེགས་དང་ཞུམ་པ་ཡིས། །བདེན་པ་མ་རྟོགས་མཁྱེན་ནས་མཽངྒལ་བུས། །རྫུ་འཕྲུལ་བསྟན་པས་བདག་གི་བུ་འབའ་ཞིག །རྫུ་འཕྲུལ་ལྡན་སྙམ་དྲེགས་པ་དེ་དང་བྲལ། །ལྷ་ཡི་གཞལ་མེད་ཁང་པར་རྒྱལ་ཆེན་བཞིས། །སྒོ་བསྲུངས་ཚངས་དང་བརྒྱ་བྱིན་ལ་སོགས་ལ། །དམ་ཆོས་སྟོན་པ་མཐོང་བས་ལྷ་རྣམས་ཆོས། །མི་ཉན་སྙམ་པའི་ཞུམ་པ་དང་བྲལ་སྟེ། །རྒྱུན་དུ་ཞུགས་པའི་འབྲས་བུའི་གནས་ལ་བཀོད། །ང་ཡི་བསྟན་ལ་རིགས་རུས་མི་གཙོ་ཞེས། །འབྲེག་མཁན་ཉེ་འཁོར་ཚུར་ཤོག་གིས་བསྙེན་རྫོགས། །ཤཱཀྱའི་རྒྱལ་པོ་བཟང་ལྡན་ལྷས་བྱིན་སོགས། །རིགས་གཟུགས་མཆོག་ཐོབ་ལྔ་བརྒྱ་རབ་བྱུང་སྟེ། །དེ་ལས་ཕལ་གྱིས་སྟོན་པ་མཉེས་པར་བྱས། །གྲགས་འཛིན་མངལ་ཁུང་ལོ་དྲུག་འཛིན་པ་དང༌། །དགྲ་གཅན་ཟིན་ནི་དེ་སྲིད་མངལ་གནས་པའི། །རྒྱུ་ནི་འདི་ཞེས་སྔོན་གྱི་ལས་འབྲས་གསུངས། །གྲགས་འཛིན་མ་ཡིས་སྟོན་པ་དབང་བྱེད་ཕྱིར། །སྔགས་ཀྱིས་བཏབ་པའི་ལ་དུ་སྲས་ལ་བསྐུར། །སྟོན་པར་ཕུལ་བས་སླར་གནང་ཟོ་ཞིག་གསུངས། །ཡབ་ཀྱི་ཕྱིར་འབྲངས་རབ་ཏུ་འབྱིན་པའི་ཕྱིར། །ཤཱ་རིའི་བུར་བཏད་དེ་ཡི་(ཁ༢༡བ)
དགེ་ཚུལ་གྱུར། །སྔོན་གྱི་དྲང་སྲོང་མས་བྱིན་དགྲ་བཅོམ་བཀོད། །རུས་ལས་ཀ་ཏྱ་ཡཱ་ན་ཞེས་པར་གྲགས། །མཐའ་ཁོབ་འདུལ་བར་བྱེད་པའི་མཆོག་དུ་བསྟན། །དེ་ཡིས་གཏུམ་པོ་རབ་སྣང་འཁོར་བཅས་བཏུལ། །ལྷོ་ཕྱོགས་གསེར་སའི་རྒྱལ་པོ་ཀབ་ཕི་ན། །དམག་ཚོགས་ཁྲི་རེར་ལྡན་པའི་བློན་པོ་ནི། །བརྒྱད་ཁྲི་བཞི་སྟོང་ལྡན་པ་བཏུལ་བྱས་ནས། །རབ་བྱུང་དགེ་སློང་བསོད་སྙོམས་སྤྱོད་པར་གྱུར། །སྒྲ་སྒྲོགས་རྒྱལ་པོ་ཨུ་ཏ་ཡ་ན་ནི། །བྲིས་སྐུས་བཏུལ་སྟེ་ཐུབ་པའི་འཁོར་དུ་གྱུར། །སྡིག་གྲོགས་ཀྱིས་ཟིན་རྒྱལ་པོ་གཙུག་ཕུད་ཅན། །འཁོར་དང་བཅས་ལ་མཐོང་ཆོས་ལས་འབྲས་བསྟན། །བུ་རམ་ཤིང་འཕེལ་སློ་མའི་གྲོང་ལ་སོགས། །དཔག་ཚད་བརྒྱ་ཕྲག་ཕ་རོལ་སྤྱན་དྲངས་ཚེ། །དགྲ་བཅོམ་ལྔ་བརྒྱའི་འཁོར་བཅས་ཐ་དད་པའི། །རྫུ་འཕྲུལ་ལྡན་པས་གཤེགས་སྟེ་དུལ་བར་མཛད། །རྫོགས་བྱེད་གནག་ལྷས་སྐྱེས་དང་རྒྱལ་བ་ཅན། །གཉེན་གྱི་བུ་དང་ནོག་ཅན་སྐྲའི་ལ་ཅན། །དེ་ལྟར་མུ་སྟེགས་རྟོག་གེ་པ་དྲུག་གིས། །ཆོ་འཕྲུལ་འགྲན་ཕྱིར་ཡང་ཡང་བསྐུལ་བ་ཡིས། །ཆོ་འཕྲུལ་ཆེན་པོ་བསྟན་པས་ཐམས་ཅད་བཏུལ། །འདི་ཡང་ཉན་ཐོས་ལྟར་ན་ཆོ་འཕྲུལ་གྱི། །ཞིང་སྦྱངས་ནས་ནི་ཆོ་འཕྲུལ་ཉིན་གཅིག་ཡིན། །དེ་ལའང་ཐུན་མོང་ཐུན་མོང་མིན་པ་གཉིས། །འདི་ནི་འདུལ་བའི་ལུང་ལས་བཤད་པ་ལྟོས། །ཐེག་ཆེན་ལྟར་ན་གཅིག་ནས་བཅོ་ལྔའི་བར། །སྦྱིན་བདག་ཆོ་འཕྲུལ་ཐ་དད་རེ་བསྟེན་སྟེ། །བརྒྱད་ཡན་འགྲན་ཟླར་བཅས་པའི་ཆོ་འཕྲུལ་སྟེ། །དེ་ཕྱིན་འགྲན་ཟླ་མེད་པའི་ཆོ་འཕྲུལ་ཡིན། །འདི་ནི་མདོ་སྡེ་མཛངས་བླུན་ནང་ན་གསལ། །མི་དགེའི་བཤེས་གཉེན་ལྷས་བྱིན་གྱིས་བསྐུལ་བའི། །མ་སྐྱེས་དགྲ་ཡིས་གླང་ཆེན་ནོར་སྐྱོང་ནི། །རྦད་པ་བཏུལ་སྟེ་ལྷ་དང་བདེན་པར་བཀོད། །མ་སྐྱེས་མངལ་གནས་ཁྱེ་འུ་ཉིད་འགྱུར་ཞིང༌། །ལྷ་མིའི་དཔལ་ཐོབ་པ་ཡི་བསྟན་ལ་ཞུགས། །དགྲ་བཅོམ་འགྱུར་(ཁ༢༢ན)
ཞེས་ལུང་བསྟན་དགག་པའི་ཕྱིར། །བླུན་པོ་དུ་མས་འབད་ཀྱང་དགག་མ་ནུས། །ཇི་སྐད་ལུང་བསྟན་གཡོ་བ་མེད་པར་གྱུར། །དཔལ་སྦས་ཀྱིས་ནི་སྒོ་དྲུང་མེ་དོང་བཤམས། །དུག་ཅན་ཟས་སྦྱར་མགྲོན་དུ་སྤྱན་དྲངས་ཚེ། །ཞབས་བཞག་ཙམ་གྱིས་མེ་དོང་པདྨའི་མཚོ། །བུང་བའི་ཁྱུ་མང་སྒྲ་འབྱིན་ལྡན་པར་གྱུར། །པདྨར་ཞབས་བཀོད་ནང་དུ་སྟན་ལ་བཞུགས། །དཀོན་མཆོག་གསུམ་ལ་དུག་གསུམ་མི་མངའ་བའི། །བདེན་པའི་ཚིག་གིས་ཟས་ཀུན་དུག་མེད་གྱུར། །དད་པར་མཛད་དེ་བདེན་པ་མཐོང་ལ་བཀོད། །སྐྱེ་རྒུའི་བདག་མོ་རབ་ཏུ་འབྱིན་པ་རུ། །ཀུན་དགའ་བོ་ཡིས་ཞུས་ཚེས་བསྟན་པ་ལ། །བུད་མེད་འཇུག་པར་ཞུ་བ་མ་བྱེད་ཅིག །བསྟན་པ་ལོ་གྲངས་ལྔ་བརྒྱས་སྔར་ནུབ་འགྱུར། །ཞེས་གསུངས་ལན་གསུམ་གསོལ་བའི་ཐ་མར་གནང༌། །ལྕི་བའི་ཆོས་བརྒྱད་ཁས་བླངས་ཀྱིས་བསྙེན་རྫོགས། །དེ་སོགས་བུད་མེད་དགྲ་བཅོམ་མང་དུ་བྱུང༌། །སེར་སྐྱའི་གྲོང་དུ་ཡབ་ཀྱི་མཆོད་རྟེན་མཛད། །སྔོན་ནས་ཕ་མར་གུས་ཞེས་སྔོན་བྱུང་གསུངས། །སངས་རྒྱས་སྟོང་གི་ངེས་པའི་འཕྲིན་ལས་ནི། །ལས་ཀྱི་རྒྱུ་བ་ལུང་སྟོན་མཛད་པའི་ཕྱིར། །ཏི་སིའི་གངས་འགྲམ་མ་དྲོས་མཚོར་བྱོན་སྟེ། །རིན་ཆེན་སྣ་ཚོགས་པདྨ་ལ་བཞུགས་ནས། །སྔོན་ཚེ་མི་ནག་མདུང་ཐུང་ཅན་བསད་པས། །ཞབས་ལ་སེང་ལྡེང་ཚལ་པ་ཟུག་པ་དང༌། །ཁྱེ་འུ་བླ་མས་སངས་རྒྱས་འོད་སྲུང་ཚེ། །མགོ་རེག་ལ་ནི་བྱང་ཆུབ་ག་ལ་ཡོད། །བྱང་ཆུབ་ཐོབ་པར་དཀའ་འོ་ཞེས་སྨྲས་པས། །ལོ་གྲངས་དྲུག་དུ་དཀའ་བ་སྤྱད་པ་དང༌། །དེ་བཞིན་ཨུཏྤལ་བཀྲུ་སྨན་མནམས་པ་དང༌། །ཀུན་དུ་རྒྱུ་མོ་ཙན་ཙས་སྐུར་བ་དང༌། །མུ་སྟེགས་མཛེས་མ་རྒྱལ་བྱེད་ཚལ་བསད་དང༌། །མུ་གེའི་གྲོང་དུ་བསོད་སྙོམས་སྤྱད་པ་ལས། །མ་རྙེད་ལྷུང་བཟེད་སྟོང་པར་བྱོན་པ་དང༌། །སྐུ་སྟོད་བསྙུང་བ་བསལ་ཕྱིར་གཟིམས་པ་དང༌། །བྲམ་ཟེ་བ་ར་དྷྭ་(ཁ༢༢བ)
ཛས་མི་སྙན་ཚིག །ལྔ་བརྒྱ་བརྗོད་པས་སྤྱོས་ཤིང་དམད་པ་དང༌། །དགྲ་མཐའི་གྲོང་དུ་དབྱར་གནས་མཛད་པ་ན། །རྟ་ཆས་ནས་རུལ་གསོལ་བར་བསྟན་པ་དང༌། །སེར་སྐྱ་བཅོམ་ཚེ་དབུ་བསྙུན་གྱུར་པ་སྟེ། །ལས་ཀྱི་རྣམ་པ་བཅུ་པོ་ལུང་བསྟན་མཛད། །གཞན་ཡང་དགེ་འདུན་དབེན་གྱིས་བྱེ་བ་དང༌། །ལྷས་བྱིན་གྱིས་འཕངས་རྡོ་བས་རྨ་དོད་སོགས། །ལས་ཀྱི་རྒྱུ་ནི་འདི་ཞེས་གསལ་བར་བསྟན། །འཁོར་ཀུན་གྱིས་ཀྱང་རང་རང་ལས་ཀུན་བཤད། །མཆོག་ཟུང་དེ་ཚེ་ངོ་མཚར་རྫུ་འཕྲུལ་རྩེ། །ལྷས་བྱིན་ལུས་འདིས་མནར་མེད་དམྱལ་བར་ལྷུང༌། །ཐ་མར་རང་སངས་རྒྱས་སུ་ལུང་བསྟན་མཛད། །མ་སྐྱེས་དགྲ་ནི་རྩ་བ་མེད་པ་ཡི། །དད་པ་ལ་བཀོད་སྦྱིན་བདག་མཆོག་དུ་གྱུར། །དེ་བཞིན་གདུལ་བྱའི་ཐ་མ་འདུལ་གྱི་བར། །ངོ་མཚར་མཛད་པས་འགྲོ་མང་བཏུལ་བ་སྟེ། །ལུང་དང་ལས་བརྒྱ་རྟོགས་བརྗོད་བརྒྱ་པ་དང༌། མངོན་པར་བྱུང་བའི་མདོ་སྡེ་རྣམས་ལས་གསལ། །འདི་རྣམས་ཐུན་མོང་གདུལ་བྱའི་སྣང་བ་ཡིན། །ཐུན་མོང་མིན་པ་ཐེག་ཆེན་གདུལ་བྱའི་ངོར། །བྱ་རྒོད་ཕུང་པོའི་རི་བོ་ལ་སོགས་པར། །ཕྱོགས་བཅུའི་རྒྱལ་སྲས་མཐའ་ཡས་འདུས་པ་ལ། །རྣམ་པར་ཐར་པའི་སྒོ་གསུམ་ཇི་བཞིན་སྒྲས། །མཚན་ཉིད་མེད་པའི་ཆོས་ཀྱི་འཁོར་ལོ་ནི། །ཟབ་པ་ཤེར་ཕྱིན་མདོ་སྡེ་མཐའ་ཡས་གསུངས། །དཔག་མེད་བྱང་ཆུབ་མཆོག་དུ་ལུང་བསྟན་མཛད། །ལྷ་ཡི་གནས་དང་ཀླུ་དང་མི་ཅིའི་གནས། །རྩྭ་ཅན་གྲོང་སོགས་མཐའ་ཡས་གནས་རྣམས་སུ། །བྱང་ཆུབ་སེམས་དཔའི་འདུས་པ་དཔག་ཡས་ལ། །ལ་ལར་དྲང་ངེས་རྣམ་པར་ཕྱེ་བ་དང༌། །ལ་ལར་དགོངས་དང་ལྡེམ་དགོངས་སྒྲ་གཞན་དང༌། །ལ་ལར་ཇི་བཞིན་སྒྲ་སོགས་རྣམ་མང་གིས། །ཆོས་ཀྱི་དབྱིངས་ཉིད་ཁོ་ན་ལས་བརྩམས་སྟེ། །རྒྱ་ཆེན་ཐབས་ཀྱི་ཕ་རོལ་ཕྱིན་པ་ཡི། །ཆོས་འཁོར་མཐའ་ཡས་བགྲང་ལས་འདས་(ཁ༢༣ན)
པར་གསུངས། །དེ་ཚེ་ལས་ལམ་རྣམ་པ་བཅུ་སོགས་ཀྱང༌། །དེས་འདུལ་འགྲོ་ལ་ཐབས་ཀྱི་མཛད་པ་སྟེ། །རྫོགས་སངས་རྒྱས་ལ་མི་དགེའི་ལས་མེད་ཅེས། །གསང་ཆེན་ཐབས་ལ་མཁས་པའི་མདོ་རུ་གསུངས། །ལྷས་བྱིན་འཁོར་དང་བཅས་དང་དྲུག་སྡེ་དང༌། །བདུད་དང་མུ་སྟེགས་ཇི་སྙེད་སྣང་བ་ཡང༌། །སྟོན་པ་ཉིད་ཀྱི་ཐབས་ཀྱི་མཛད་པ་ཡིས། །རྒྱལ་བའི་ཆེ་བ་དབྱུང་བར་བྱེད་པ་སྟེ། །རྒྱལ་ལ་ཐོ་འཚམ་ནུས་པ་མི་སྲིད་ཅེས། །ཟབ་རྒྱས་མདོ་སྡེ་དུ་མ་དག་ལས་བཤད། །མ་སྐྱེས་དགྲ་ཡི་འགྱོད་བསལ་མདོ་སྡེ་ནི། །སྟོན་པ་མྱ་ངན་འདས་ཚེ་འཇམ་དཔལ་མཐུས། །རྒྱལ་པོའི་རྨི་ལམ་ནང་དུ་སྣང་བ་རུ། །འཇམ་དཔལ་རྩ་བའི་རྒྱུད་ལས་ལུང་དུ་བསྟན། །འདི་དག་ཐུན་མོང་ཕར་ཕྱིན་ཐེག་པ་ཡི། །སྣོད་གྱུར་རྒྱལ་སྲས་རྣམས་ལ་སྣང་བ་ཡིན༌། །ཤིན་དུ་སྐལ་བ་མཆོག་གི་གདུལ་བྱའི་ངོར། །གསང་བ་མཆོག་གི་དགྱེས་པའི་འཁོར་ལོ་ཆེ། །ཨེ་ཝཾ་གཉིས་མེད་མི་ཕྱེད་རྟག་པའི་གནས། །རྡོ་རྗེ་བཙུན་མོའི་བ་གར་སྙོམས་ཞུགས་སྟེ། །ཧེ་རུ་ཀ་དཔལ་ཁ་སྦྱོར་བདུན་ལྡན་པས། །རྡོ་རྗེ་ཐེག་པའི་རྒྱུད་སྡེ་རྒྱ་མཚོ་ནི། །ནམ་ཡང་ནུབ་པ་མེད་པའི་དུས་སུ་བསྟན། །རྣལ་འབྱོར་དབང་ཕྱུག་བྱེ་བ་བརྒྱད་བཅུ་དང༌། །རི་རབ་སུམ་བཅུ་དྲུག་གི་རྡུལ་མཉམ་པའི། །རྣལ་འབྱོར་མ་ཚོགས་སྐད་ཅིག་གིས་སྨིན་གྲོལ། །འདུས་པའི་རྒྱུད་ཆེན་གཉིས་མེད་རྣམ་རྒྱལ་དང༌། །འགྲེལ་པ་སྒྲོན་མ་གསལ་བ་ལ་སོགས་པར། །ཟས་གཙང་འཇམ་དཔལ་ཡུམ་ནི་སྒྲོལ་མ་སྟེ། །གྲགས་འཛིན་མ་ནི་ལྷ་མོ་དཔལ་ཆེན་མོ། །དགྲ་གཅན་ཟིན་སྲས་རྡོ་རྗེ་སེམས་དཔའ་སོགས། །དཀྱིལ་འཁོར་ཆེན་པོ་ཉིད་དུ་གནས་པར་བཤད། །ཆོས་ཀུན་སྐད་ཅིག་གཅིག་གི་སྣང་བ་སྟེ། །བདེན་རྫུན་སྔ་ཕྱི་ཐོག་མཐའ་ལ་སོགས་པ། །བཏགས་པས་ཡིན་གྱི་རང་གི་ངོ་བོས་མིན། །འདི་འདྲའི་ཆོས་ཉིད་ཟབ་མོ་ལ་སྐྲག་པས། །ཐེག་ཆེན་ཐེག་དམན་(ཁ༢༣བ)
མདོ་སྔགས་འདི་ཐམས་ཅད། །ཇི་ལྟར་འཁྲུལ་ལྡན་སྐྱེ་བོའི་ངག་བཞིན་དུ། །གཅིག་རྗེས་གཅིག་མཐུད་ཁོ་ནར་མ་འཁྲུལ་ཞིག །ཚད་བཟུང་མེད་པའི་ཡུལ་གྱི་ཚད་འཛིན་ན། །མཁས་པར་གྲགས་ཀྱང་བྱིས་ལས་བྱིས་པར་གོ །ཇི་ལྟར་འགྲོ་མང་དུས་གཅིག་གཉིད་ལོག་ན། །སོ་སོའི་ཁམས་དང་རྐྱེན་དང་བག་ཆགས་ལས། །རྨི་ལམ་སྣང་བ་ཐ་དད་འབྱུང་མོད་ཀྱི། །ཀུན་ལ་བདེན་རྫུན་ཐོག་མཐའ་ཡོད་མ་ཡིན། །དེ་བཞིན་གདུལ་བྱའི་མོས་ཁམས་དབང་པོ་དང༌། །བག་ཉལ་ཐ་དད་མོས་པ་སྣ་ཚོགས་དང༌། །ཡེ་ཤེས་སྒྱུ་འཕྲུལ་བྱིན་གྱི་བརླབས་པའི་མཐུས། །གང་འདུལ་སྐུ་དང་དུས་དང་འཁོར་དང་ཞིང༌། །མཛད་པ་དམ་ཆོས་མཐའ་ཡས་ཅིག་ཆར་སྣང༌། །ཀུན་ཀྱང་ཡེ་ཤེས་སྒྱུ་མའི་སྣང་བར་ཟད། །བདེན་རྫུན་མེད་དེ་ཆོས་དབྱིངས་གཅིག་གི་ངང༌། །དམ་ཆོས་པདྨ་དཀར་པོ་གསུང་བའི་རིང༌། །བར་གྱི་བསྐལ་པ་ལྔ་བཅུ་འདས་པ་ནི། །དུས་བྱིན་བརླབས་པས་ཕྱི་དྲོ་གཅིག་གོ་སྙམ། །དེ་ནས་སངས་རྒྱས་འདུས་པ་ཐམས་ཅད་ནི། །ལྗགས་ཀྱི་ཆོ་འཕྲུལ་མཛད་རིང་དེ་སྙེད་འདས། །དུས་བྱིན་བརླབས་ཕྱིར་ཡུད་ཙམ་གཅིག་གོ་སྙམ། །འདི་འདྲ་དཔག་ཡས་གསུངས་པ་རྣམས་ལྟོས་ལ། །སངས་རྒྱས་བྱིས་པའི་ཆོས་སུ་མ་སྡུད་ཅིག །དེ་བཞིན་སྐུ་ཚེའི་ཚད་ཀྱང་སྣ་ཚོགས་སུ། །སྣང་སྟེ་བསྐལ་ཆེན་གྲངས་མང་བདུན་བརྒྱ་ནི། །ཤཱཀྱ་ཐུབ་པའི་སྐུ་ཚེའི་ཚད་ཡིན་ཞེས། །སེང་གེའི་སྒྲ་ཆེན་བསྒྲགས་པའི་མདོ་ལས་བཤད། །གཞན་ཡང་གདུལ་བྱ་དཔག་ཡས་དུ་མ་ཡིས། །ཅིག་ཅར་ཉིད་དུ་རང་རང་སྐལ་བ་ལྟར། །ལ་ལས་དགའ་ལྡན་གནས་ནས་འཕོ་བར་མཐོང༌། །དེ་བཞིན་ལྷུམས་ཞུགས་བལྟམས་གཟོ་རོལ་རྩེད་མཛད། །ཁབ་ནས་བྱུང་དང་དཀའ་སྤྱོད་འཚང་རྒྱ་དང༌། །ཆོས་གསུང་མྱ་ངན་འདས་དང་རིང་སྲེལ་འགྱེད། །བཀའ་སྡུད་བསྟན་པའི་གྱེས་པ་སྟོན་ལ་སོགས། །མཐའ་ཡས་བསམ་མི་ཁྱབ་པ་ཅིག་ཅར་སྣང༌། །ཇི་ལྟར་བྱང་ཆུབ་སེམས་དཔའ་ནོར་བཟང་གིས། །བྱམས་(ཁ༢༤ན)
པའི་རྣམ་པར་ཐར་པ་མཐོང་བཞིན་ནོ། །ཐེག་ཆེན་དབང་བྱས་མྱང་འདས་མཛད་པ་ཡང༌། །སྙིང་རྗེ་པད་དཀར་མྱ་ངན་འདས་མདོ་དང༌། །ཁྱེ་འུ་བཞི་ཡི་མདོ་སོགས་ལས་གསུངས་ལྟར། །དཔག་ཡས་བསྟན་རྣམས་སྐྱེ་བོས་དཔག་མི་ནུས། །ཐུན་མོང་བྱིས་པའི་གདུལ་བྱའི་སྣང་ངོ་རུ། །ཀུན་དགའ་བོ་ཡིས་ཞམ་རིང་བྱས་ནས་ནི། །ཡུལ་གྱི་དབུས་དང་བྱང་ཕྱོགས་ཕལ་མོ་ཆེ། །ཞབས་ཀྱིས་བཅགས་སྟེ་སྔོན་བྱུང་དུ་མ་བསྟན། །ཁ་ཆེ་ལི་ཡུལ་བོད་སོགས་ལུང་བསྟན་མཛད། །སླར་ཡང་ལག་ན་རྡོ་རྗེས་ཞམ་རིང་བྱས། །ཡུལ་ཁམས་མཐའ་ཡས་མྱུལ་ཞིང་དུལ་བར་མཛད། །མདོར་ན་དགུང་ལོ་ཉེར་དགུ་ཁབ་ཏུ་བཞུགས། །ལོ་དྲུག་དཀའ་སྤྱད་རྫོགས་སངས་རྒྱས་གྱུར་ནས། །ཝ་ར་ཎཱ་སི་ཡངས་པ་ཅན་དང་ནི། །ས་དཀར་ཅན་དང་ལྷ་གནས་བྱིས་པ་གསོད། །ཀཽ་ཤམྦི་དང་འབྲོག་གནས་མཆོད་རྟེན་གནས། །བྱ་རྒོད་ཕུང་རི་འོད་མ་ཅན་གྱི་གྲོང༌། །སྒྲ་བཅས་དང་ནི་སེར་སྐྱའི་གྲོང་ཁྱེར་སྟེ། །བཅུ་གཉིས་པོ་རུ་ལོ་རེ་ལོ་རེ་བཞུགས། །མཉན་དུ་ཡོད་པར་ལོ་གྲངས་ཉི་ཤུ་བཞི། །སྨན་གྱི་ནགས་ཚལ་དུ་ནི་ལོ་བཞི་སྟེ། །འབར་བའི་ཕུག་གི་གནས་སུ་ལོ་ལྔ་བཞུགས། །དེ་ལྟར་དགུང་ལོ་བརྒྱད་བཅུ་བཞེས་པའི་ཚེ། །གང་གིས་རྫུ་འཕྲུལ་རྐང་པ་བཞི་པོ་ལ། །བསྟེན་ཞིང་གོམས་པ་མང་དུ་བྱས་པ་དེ། །འདོད་ན་བསྐལ་པའམ་དེ་བས་ལྷག་པར་ཡང༌། །འཚོ་ཞིང་སྡོད་ཏོ་དེ་བཞིན་གཤེགས་པ་ཡིས། །རྫུ་འཕྲུལ་རྐང་བཞི་བསྟེན་གོམས་མང་མཛད་ཕྱིར། །བཞེད་ན་བསྐལ་པའམ་དེ་བས་ལྷག་པར་ཡང༌། །བཞུགས་ཞེས་ཀུན་དགའ་བོ་ལ་ལན་གསུམ་དུ། །མྱ་ངན་མི་འདར་གསོལ་བ་འདེབས་བསྐུལ་ཀྱང༌། །བདུད་ཐིབས་ཀྱིས་ནོན་ཅི་ཡང་མི་སྨྲར་གྱུར། །སྡིག་ཅན་བདུད་ཀྱིས་འདའ་བར་གསོལ་བ་བཏབ། །སྐྱོ་བ་སྐྱེད་ཕྱིར་སྐུ་ཚེའི་ལྔ་ཆ་བཏང༌། །སྐུ་ཚེའི་འདུ་བྱེད་ཟླ་གསུམ་བྱིན་གྱིས་བརླབས། །ས་གཡོས་ཕྱོགས་འཚིག་སྐར་(ཁ༢༤བ)
མདའ་ལྷུང་བར་གྱུར། །མཆོག་ཟུང་ལ་སོགས་ཉན་ཐོས་ཆེན་པོ་ནི། །མང་ཞིག་ཕུང་པོའི་ལྷག་སྤངས་མྱ་ངན་འདས། །གྲོང་ཁྱེར་ཆེན་པོ་རྩྭ་ཅན་དུ་གཤེགས་སྟེ། །ལམ་དུ་རྡོ་བ་འཕངས་པའི་མདོ་སྡེ་ཡིས། །གྱང་རྣམས་བཏུལ་སྟེ་སཱ་ལའི་ཚལ་གྱི་དབུས། །ཐ་མའི་གཟིམས་ཁྲི་ལ་བཞུགས་མགར་བའི་བུ། །ཙུནྡ་ཞེས་བྱ་སངས་རྒྱས་སྡོང་པོ་ཡི། །ཐ་མའི་བསོད་སྙོམས་འབུལ་པོར་སྨོན་པ་ལས། །བསོད་སྙོམས་བཞེས་སྟེ་ང་ནི་འདས་པའི་འོག །འོད་སྲུང་གིས་ནི་སྟོན་པའི་བྱ་བ་བྱེད། །ང་ཡི་བཀའ་རྣམས་ལེགས་པར་བསྡུ་བར་གྱིས། །འདི་སྐད་བདག་གིས་ཐོས་པའི་དུས་གཅིག་ན། །ཞེས་པས་གནས་དུས་འཁོར་སོགས་གླེང་གཞི་དང༌། །བར་དུ་མཚམས་སྦྱོར་ཐ་མར་ཐུན་གྱུར་བརྗོད། །མེས་པ་རལ་པ་ཅན་དང་ཤཱཀྱ་ལས། །གཞན་པའི་མུ་སྟེགས་རབ་ཏུ་འབྱིན་མི་བྱ། །བསླབ་པ་ཕྲན་ཚེགས་འདོད་ན་བག་ཡངས་བྱོས། །རྒན་པས་གཞོན་པ་ཕན་པས་བསྡུ་བྱ་ཞིང༌། །གཞོན་པས་རྒན་ལ་མིང་ནས་བོད་མི་བྱ། །ཞེས་གསུངས་དགྲ་གཅན་ཟིན་དང་ཀུན་དགའ་བོ། །དགེ་འདུན་ལ་བཏང་སྐུ་ཡི་སྟོད་གཡོགས་བསལ། །དགེ་སློང་དག་རྣམས་བདེ་གཤེགས་སྐུ་ལ་ལྟོས། །དེ་ལ་འདི་ནི་བདེ་གཤེགས་སྐུ་ལྟ་བའི། །ཐ་མ་ཡིན་ནོ་རེ་ཞིག་ཅང་མ་སྨྲ། །བདེན་པ་བཞི་དང་རྟེན་ཅིང་འབྲེལ་འབྱུང་དང༌། །བསླབ་པ་གསུམ་ལ་ཐེ་ཚོམ་ཡོད་ན་ཞུས། །འདུས་བྱས་ཐམས་ཅད་མི་རྟག་པ་ཡིན་ནོ། །ཟག་བཅས་སྡུག་བསྔལ་མྱང་འདས་ཞི་བ་སྟེ། །ཆོས་ཀུན་བདག་མེད་པ་འོ་དེ་ལ་འདི། །དེ་བཞིན་གཤེགས་པའི་གསུང་གི་ཐ་མའོ། །ཞེས་གསུངས་བསམ་གཏན་བཞི་དང་གཟུགས་མེད་དང༌། །འགོག་སྙོམས་རྣམས་ལ་ལུགས་འབྱུང་ལུགས་ཟློག་གིས། །ཡང་ཡང་སྙོམས་ཞུགས་བསམ་གཏན་བཞི་པ་ལས། །ཐ་མར་ཟག་མེད་དབྱིངས་སུ་མྱ་ངན་འདས། །ཉན་ཐོས་ཆེ་རྣམས་ཆོས་ཉིད་ལ་རྟོག་བྱེད། །ཚངས་སོགས་ལྷ་མིའི་འཁོར་(ཁ༢༥ན)
ཚོགས་རྒྱ་མཚོ་ཀུན། །མྱ་ངན་སྨྲེ་སྔགས་སྡུག་བསྔལ་སྣ་ཚོགས་བྱེད། །ལྷ་རྫས་མཆོད་པ་དཔག་ཡས་འཛམ་གླིང་གང༌། །སྐུ་གདུང་དམ་པ་སྣམ་སྦྱར་ལྔ་བརྒྱ་དང༌། །རས་ཟུང་ལྔ་བརྒྱས་དཀྲིས་སྟེ་འཁོར་སྒྱུར་གྱི། །གདུང་ལྟར་ལྕགས་སྣོད་འབྲུ་མར་གྱིས་བཀང་བར། །བཞུགས་སྟེ་དྲི་ཞིམ་ཤིང་སྤུངས་ཞུགས་ལ་ནི། །བཞེན་པར་བརྩམས་ཚེ་མེ་སྦར་མ་ནུས་ནས། །ལྷ་མིག་ལྡན་པའི་མཆོག་གྱུར་མ་འགགས་པས། །བལྟས་སྟེ་འོད་སྲུང་ཆེན་པོ་སྟོབས་བཅུ་པ། །སྐུ་གདུང་མ་ཉམས་པ་ལ་ཕྱག་དགྱིད་འདོད། །དེ་མཐུས་ཡིན་གྱི་དེ་སྲིད་ཞོག་ཅིག་ཟེར། །འོད་སྲུང་ཆེན་པོས་ལྟས་ཆེན་རྣམས་མཐོང་བས། །སྟོན་པ་འདས་པར་ཤེས་སྟེ་ཀྱེ་མ་འོ། །འདུས་བྱས་རྣམས་ཀྱི་ཆོས་ཉིད་འདིར་ཟད་མོད། །མཆོག་དུ་དད་ལྡན་རྒྱལ་པོ་མ་སྐྱེས་དགྲས། །ཐོས་ན་ཁྲག་སྐྱུགས་མོད་ལ་འཆི་འགྱུར་བས། །དེ་ཟློག་པ་ཡི་ཐབས་ཤིག་བྱ་འོ་སྙམ། །མདུན་ན་འདོན་པ་བྲམ་ཟེ་དབྱར་བྱེད་ལ། །ཐབས་བསྟན་རིངས་པར་སཱ་ལའི་ཚལ་དུ་བྱོན། །བསོད་ནམས་ཆེན་པོ་དེ་ཡིས་མ་ཉམས་པའི། །གདུང་ལ་ཕྱག་བྱས་ཆོས་གོས་རས་ཟུང་གཞན། །ལྔ་བརྒྱ་ཕྲག་རེས་སར་དུ་ཡང་དཀྲིས་ནས། །དྲི་ཞིམ་ཙན་དན་ལ་སོགས་ཤིང་སྤུངས་ཚེ། །ཐུགས་ཀའི་དབུས་ནས་རང་བྱུང་ཡེ་ཤེས་མེས། །སྐུ་གདུང་བསྲེགས་སྟེ་ཡུངས་འབྲུ་ལྟ་བུ་ཡི། །རིང་བསྲེལ་གྱིས་ནི་ཀུན་ནས་གཏམས་པར་གྱུར། །དེ་ལ་རས་ཟུང་གཉིས་ནི་མ་ཚིག་པ། །ནང་མ་ཤོས་དང་ཕྱི་མ་ཤོས་ཡིན་ནོ། །དེ་ཚེ་མ་སྐྱེས་དགྲ་ཡི་མདུན་ན་འདོན། །དབྱར་བྱེད་ཀྱིས་ནི་འོད་སྲུང་གིས་བསྟན་ལྟར། །རྒྱལ་པོ་སྐྱེད་མོས་ཚལ་དུ་སྤྱན་དྲངས་སྟེ། །སྟོན་པའི་མཛད་པ་བྲིས་པའི་ཐང་སྐུ་བསྟན། །འདི་ནི་དགའ་ལྡན་གནས་ནས་གླང་ཆེན་གྱི། །རྣམ་པས་བབ་སྟེ་ལྷུམས་སུ་ཞུགས་པ་འོ། །ཞེས་སོགས་གོ་རིམ་བཞིན་དུ་བརྡ་སྤྲད་དེ། །ཐ་མར་འདི་ནི་གྲོང་ཁྱེར་རྩྭ་ཅན་གྱི། །སཱ་ལ་ཟུང་གི་ཚལ་དུ་ཤིང་ཟད་པའི། །(ཁ༢༥བ)
མེ་ལྟར་མྱ་ངན་འདས་ཤིང་ཙནྡན་གྱི། །ཞུགས་ཀྱིས་སྐུ་གདུང་སྦྱོང་བའི་མཛད་པ་འོ། །དེ་སྐད་སྨྲས་པས་རྒྱལ་པོ་སྐྲག་གྱུར་སྟེ། །ཅི་ག་སྟོན་པ་མྱ་ངན་འདས་གྱུར་ཏམ། །དབྱར་བྱེད་ཀྱིས་ནི་ལྷ་ཉིད་དེ་སྐད་གསུངས། །བདག་ནི་དེ་སྐད་བརྗོད་པར་མི་སྤྲོ་འོ། །ཞེས་སྒྲས་ཐོས་པས་རྒྱལ་པོ་ས་ལ་འགྱེལ། །ཡུན་རིང་བརྒྱལ་ཚེ་སྔ་ནས་བཤམས་པ་ཡི། །ཏིལ་མར་གཞོང་པ་བདུན་ལས་རིམ་པས་དྲངས། །ཐ་མར་ཙནྡན་ས་མཆོག་གི་ཁུ་བའི། །གཞོང་པའི་ནང་ནས་དྲངས་པས་སོས་པར་གྱུར། །དེ་ནས་སྡིག་ཅན་ཡུལ་གྱི་གྱད་རྣམས་དང༌། །རྟོག་གཡོའི་ཡུལ་གྱི་རྒྱལ་རིགས་པུ་ལུ་ཀ །གྲོང་ཁྱེར་སྒྲ་སྒྲོགས་ཀྱི་ནི་ཀྲོ་དྷ་དང༌། །ཁྱབ་འཇུག་གླིང་ན་གནས་པའི་བྲམ་ཟེ་དང༌། །སེར་སྐྱའི་ཤཱཀྱ་ཡངས་པ་ཅན་པ་ཡི། །ལི་ཙཱ་ཝིར་བཅས་སྐུ་གདུང་ལེན་དུ་ལྷགས། །རྒྱལ་པོ་མ་སྐྱེས་དགྲས་ཀྱང་གླང་ཆེན་བཞོན། །དཔུང་ཚོགས་བཅས་པས་འགྲོ་བར་ཆས་པའི་ཚེ། །སྟོན་པ་དྲན་པས་བརྒྱལ་སྟེ་ལྷུང་གྱུར་ནས། །འགྲོ་བར་མ་ནུས་དབྱར་བྱེད་དཔུང་བཅས་བཏང༌། །གདུང་སྐལ་ལེན་པའི་སྡེ་ཚན་བདུན་ལྷགས་སྟེ། །རེ་རེ་ཞིང་ནས་རྩྭ་ཅན་གྱད་རྣམས་ལ། །སྟོན་པ་འདི་ནི་ངེད་ལ་རིང་མོ་ནས། །འཕངས་ཤིང་སྡུག་ལ་བླ་མར་གྱུར་པ་ཡིན། །དེ་ནི་ཁྱེད་ཀྱི་ཉེ་འཁོར་དུ་འདས་ཀྱིས། །ངེད་ལ་སྐུ་གདུང་སྐལ་བ་བྱིན་པར་གྱིས། །ངེད་ཀྱིས་རིན་ཆེན་མཆོད་རྟེན་བྱས་ནས་ནི། །མཆོད་པ་དགྱིད་ཅེས་སྨྲས་ཚེ་གྱད་རྣམས་ཀྱིས། །ངེད་ཀྱང་དེ་ལྟར་བྱེད་ཀྱིས་སྐུ་གདུང་ནི། །ཁྱེད་ལ་མི་སྦྱིན་ཞེས་སྨྲས་དེ་རྣམས་ཀྱིས། །འོ་ན་དམག་གིས་དབྲོག་ཞེས་དམག་དཔུང་སྡུད། །གྱད་རྣམས་ཀྱང་ནི་གཡུལ་དུ་ཆས་པར་གྱུར། །དེ་ཚེ་བྲམ་ཟེ་བྲེ་བོ་དང་མཉམ་པས། །སྟོན་པ་དེ་ནི་བཟོད་པའི་བསྔགས་པ་གསུང༌། །བཟོད་ལ་དགྱེས་ན་དེ་ཡི་སྐུ་གདུང་ཕྱིར། །གཅིག་གིས་གཅིག་ནི་གསོད་པར་མི་རིགས་ཀྱིས། །བདག་གི་སྐུ་གདུང་ཆ་བརྒྱད་(ཁ༢༦ན)
མཉམ་པར་བགོ །བུམ་པ་འདི་ནི་བདག་གིས་མཆོད་པར་བྱ། །ཞེས་སྨྲས་ཀུན་ཀྱང་དགའ་ཞིང་མཐུན་གྱུར་ནས། །ཆ་བརྒྱད་བགོས་པས་ཡུངས་འབྲུ་ལྟ་བུ་ཡི། །རིང་བསྲེལ་མ་ག་དྷ་ཡི་ཁལ་རེ་བྱུང༌། །སོ་སོར་བྱིན་ནས་གདུང་གི་སོལ་བ་རྣམས། །བྲམ་ཟེ་ནྱ་གྲོ་དྷ་སྐྱེས་ཀྱིས་བླངས་སྟེ། །བཅུ་པོ་སོ་སོའི་ཡུལ་དུ་མཆོད་རྟེན་བྱས། །འོན་ཀྱང་མ་སྐྱེས་དགྲ་ཡི་སྐལ་བ་ནི། །མདོ་སྡེ་འདི་དང་ལྷན་ཅིག་གྲོང་ཁྱེར་གྱི། །ཕྱི་རོལ་ས་གཞིར་ཟ་མ་ཏོག་བཅུག་ནས། །རྒྱལ་པོ་མྱ་ངན་མེད་པའི་དོན་དུ་སྦས། །དེ་འདས་ནས་ནི་ལོ་བརྒྱ་ལོན་པ་ན། །མྱ་ངན་མེད་ཅེས་བྱ་བའི་རྒྱལ་པོ་འབྱུང༌། །དེ་ཚེ་དགེ་སློང་དབང་པོའི་སྡེ་ཞེས་པས། །ཕྱུང་སྟེ་མདོ་སྡེ་འདི་ཡིས་རྒྱལ་པོ་འདུལ། །དེ་ནས་མདོ་འདི་བྱང་གི་ཕྱོགས་རོལ་ཏུ། །འཇོག་ཀྱང་སུ་ཡིས་ཤེས་པར་མི་འགྱུར་རོ། །མྱ་ངན་མེད་ཀྱིས་རིང་སྲེལ་དེ་བླངས་སྟེ། །འཛམ་གླིང་ཁྱབ་པར་རིང་སྲེལ་ལྡན་པ་ཡི། །མཆོད་རྟེན་བརྒྱད་ཁྲི་བཞི་སྟོང་བྱེད་འགྱུར་ཞེས། །བྱང་ཆུབ་སེམས་དཔའི་ཐབས་ཀྱི་སྤྱོད་ཡུལ་གྱི། །རྣམ་འཕྲུལ་བསྟན་པའི་མདོ་ལས་ལུང་དུ་བསྟན། །སྒྲ་སྒྲོགས་པ་ཡི་རིང་སྲེལ་སྐལ་པ་ནི། །ཀླུ་ཡི་རྒྱལ་པོས་ཁྱེར་སྟེ་མཆོད་པ་བྱེད། །ཐུབ་པའི་དབང་པོའི་ཚེམས་ཀྱི་མཆེ་བ་བཞིའི། །གཅིག་ནི་བརྒྱ་བྱིན་གྱིས་ཁྱེར་ལྷ་ཡུལ་མཆོད། །གཉིས་པ་ཚིག་འཛིན་གྲོང་ཁྱེར་ཡིད་འོང་ན། །གསུམ་པ་ཀ་ལིང་རྒྱལ་པོའི་ཡུལ་ན་སྟེ། །བཞི་པ་སྒྲ་སྒྲོགས་ཀླུ་ཡི་རྒྱལ་པོས་མཆོད། །དེ་བཞིན་ཚེམས་དང་རིང་སྲེལ་སྐུ་གདུང་གཞན། །དུ་མས་ལྷ་ཀླུ་གནོད་སྦྱིན་སྲིན་པོ་དང༌། །མིའམ་ཅི་དང་མི་སོགས་འགྲོ་བའི་རིས། །དཔག་མེད་གནས་ན་སོ་སོའི་དོན་ཆེན་མཛད། །ཆོས་འབྱུང་མཁས་པའི་དགའ་སྟོན་གྱི་ཡན་ལག་གཉིས་པ་རྒྱ་གར་གྱི་སྐབས་ལས་སྟོན་པའི་མཛད་པ་ཁྱད་པར་དུ་བཤད་པའི་སྐབས་སྟེ་དང་པོའོ། །
གང་ཚེ་མཆོག་ཟུང་མྱ་ངན་འདས་པའི་ཚེ། །དགྲ་བཅོམ་བརྒྱད་ཁྲི་དང་ནི་བདུན་ཁྲི་འདས། །སྟོན་པ་མྱ་ངན་འདས་ཚེ་དགྲ་བཅོམ་པ། །ཁྲི་དང་བརྒྱད་སྟོང་ཕུང་པོའི་ལྷག་མ་སྤངས། །དབང་ཐོབ་དགེ་སློང་ཉུང་ངུར་གྱུར་པ་ཡིས། །ཚེ་ཚད་བསྐལ་མང་ཐུབ་པའི་ལྷ་རྣམས་ནི། །དབང་ཡོད་དགེ་སློང་རྣམས་ཀྱང་འདས་པའི་ཕྱིར། །སྟོན་པའི་གསུང་རབ་དུད་པ་ཙམ་དུ་གྱུར། །དཀོན་མཆོག་གསུམ་པོ་སྒྲོག་པར་མི་བྱེད་ཅེས། །འཕྱ་ཞིང་མྱ་ངན་བྱེད་པ་བསལ་བའི་ཕྱིར། །ཐུབ་པའི་རྒྱལ་ཚབ་འོད་སྲུང་ཆེན་པོ་ཡིས། །བསྒོས་སྟེ་ལྷ་མིག་ལྡན་མཆོག་མ་འགགས་པས། །སྨོན་ནས་ཤེས་པའི་ཏིང་འཛིན་ལ་ཞུགས་སྟེ། །སྲིད་རྩེའི་བར་དུ་བལྟས་ནས་གཎྜི་བརྡུངས། །དགྲ་བཅོམ་ལྔ་བརྒྱར་གཅིག་གིས་མ་ཚང་འདུས། །བ་ལང་བདག་ནི་རྩ་གསུམ་ལྷ་ཡི་གནས། །ཤི་རི་ཤི་ཀའི་གཞལ་ཡས་སྟོང་པ་ན། །འགོག་སྙོམས་ལ་གནས་དེ་ཡིས་ཐོས་མ་གྱུར། །དེ་ནས་འོད་སྲུང་ཆེན་པོས་ཀུན་དགའ་བོ། །ཆུ་ཡི་ཞལ་ལྟ་པར་བསྐོས་སློབ་པ་གཞན། །ལྡོག་སྟེ་དང་པོའི་ལམ་ནས་ཡུལ་དབུས་སོང༌། །དགེ་འདུན་དང་ནི་ཀུན་དགའ་བོར་བཅས་པ། །ལྗོངས་རྒྱུ་བཞིན་པས་མ་ག་དྷ་རུ་བྱོན། །རྒྱལ་པོ་མ་སྐྱེས་དགྲ་ཡི་ཀུན་སྤྱོད་ནི། །རྟ་དང་ཤིང་རྟ་གླང་ཆེན་ལ་སོགས་པ། །ཞོན་ཚེ་སྟོན་པའི་ཉན་ཐོས་མཐོང་བ་ན། །ཅིག་ཅར་འཕྱོངས་སྟེ་ཞབས་ལ་མགོས་ཕྱག་བྱེད། །འོན་ཀྱང་བདེ་བར་གཤེགས་པས་རྟག་དགོངས་པས། །མི་གནང་དལ་བུས་ས་ལ་བབ་ལྟར་གྱུར། །དེ་ལྟར་རྒྱལ་བའི་བསྟན་ལ་གུས་པ་ཡིན། །སྐབས་འདིར་འོད་སྲུང་ཆེན་པོས་མ་ག་དྷར། །བྱོན་པ་རྒྱལ་པོ་གླང་ཆེན་བཞོན་པས་མཐོང༌། །སྟེང་ནས་འཕྱོངས་པས་འོད་སྲུང་ཆེན་པོའི་མཐུས། །མཁའ་ལས་བཟུང་སྟེ་དལ་བུས་ས་ལ་བཞག །སྟོན་པ་རྟག་དུ་མཉམ་པར་བཞག་པ་སྟེ། །བསྙེལ་བ་མི་མངའི་ཕྱིར་ན་སྔོན་གྱི་དུས། །ཁྱོད་ལ་ལྷུང་བའི་ཉེས་པར་མ་གྱུར་ཏོ། །སྟོན་པ་དེ་ནི་མྱ་ངན་འདས་ཟིན་ཞིང༌། །(ག༢༧ན)
དགེ་འདུན་ལ་ནི་སྐྱེ་འཕགས་གང་ཡང་ཡོད། །དགྲ་བཅོམ་རྣམས་ཀྱང་རྟག་དུ་མཉམ་བཞག་མིན། །དེ་བས་ཕྱིན་ཆད་འཕྱོང་བར་མ་བྱེད་ཅེས། །འོད་སྲུང་ཆེན་པོས་དམ་བཅའ་བྱིན་ནས་ནི། །ལྷ་ཡི་གནས་འདིར་དམ་ཆོས་བགྲོ་བྱ་ཞེས། །བསྐུལ་བས་རྒྱལ་པོ་དགའ་ཞིང་མགུ་གྱུར་ནས། །ཡོ་བྱད་མ་ལུས་ལེགས་པར་སྦྱར་ནས་ནི། །ནྱ་གྲོ་དྷ་ཡི་ཕུག་དུ་ལྔ་བརྒྱ་ཡི། །དགེ་སློང་འདུས་པའི་དགེ་འདུན་བཞུགས་ནས་ནི། །དབྱར་གྱི་སྔ་མར་རལ་དང་འགྲུམས་པ་བཅོས། །ཕྱི་མའི་དབྱར་གྱི་ཞལ་བཞེས་མཛད་པར་གྱུར། །ཀུན་དགའ་བོ་ནི་རྒྱུན་ཞུགས་འབྲས་གནས་སྟེ། །གཞན་ཀུན་དགྲ་བཅོམ་རྣམ་ཐར་བརྒྱད་ལྡན་ཡིན། །དེ་ཚེ་འོད་སྲུང་ཆེན་པོས་ཀུན་དགའ་བོ། །སྤྱོ་བས་འདུལ་བར་མཁྱེན་ནས་ཉེས་པ་བརྒྱད། །གླེངས་སྟེ་ཇི་སྲིད་དགྲ་བཅོམ་མ་ཐོབ་བར། །དགེ་འདུན་གནས་ནས་ཕྱུང་སྟེ་བྲི་ཛའི་གྲོང༌། །བྱོན་ཚེ་རང་གི་སློབ་མའི་གདམས་ངག་ལས། །དགྲ་བཅོམ་ཐོབ་སྟེ་དགེ་འདུན་གནས་སུ་བྱོན། །མ་འགགས་པ་ནི་འཕགས་པ་བ་ལང་བདག །འབོད་པར་བསྒོས་སྟེ་རི་རབ་རྩེར་སོང་ནས། །འགོག་སྙོམས་ལས་ལངས་ཞི་བར་འདུག་པ་ལ། །འོད་སྲུང་ལ་སོགས་དགེ་འདུན་གྱིས་འབོད་ཅེས། །བསྐུལ་ཚེ་སྟོན་པ་འདས་སམ་ཞེས་དྲིས་ནས། །ཆོ་འཕྲུལ་སྣ་ཚོགས་བསྟན་སྟེ་མྱ་ངན་འདས། །རང་བྱུང་མེ་ཡིས་ལུས་ཚིག་མེ་ཕུང་གི །ཕྱོགས་བཞི་ནས་ནི་ཚིགས་བཅད་རེ་རེ་གྲག །ལྷུང་བཟེད་ཆོས་གོས་ཁྱེར་ནས་དགེ་འདུན་ལ། །ཕུལ་སྟེ་དེ་ཡི་བསམ་པ་བཟོད་གསོལ་བྱས། །འོད་སྲུང་ཆེན་པོས་བཀའ་བསྡུ་མ་ཟིན་བར། །སུ་ཡང་མྱ་ངན་འདའ་བར་མི་བྱེད་པའི། །ཁྲིམས་བཅས་དང་པོར་འཕགས་པ་ཀུན་དགའ་བོ། །གསོལ་གཉིས་ལས་ཀྱིས་བསྐོས་ནས་སེང་གེའི་ཁྲིར། །དགྲ་བཅོམ་ལྔ་བརྒྱས་སྣམ་སྦྱར་བཏིང་བ་ལ། །བཞུགས་སྟེ་བྱང་ཆུབ་སྙིང་པོར་ཁ་བལྟས་ནས། །སྟོན་པ་ཡིད་ལ་དྲན་པས་སྐྱོ་བཞིན་དུ། །འདི་སྐད་བདག་གིས་ཐོས་(ག༢༧བ)
པའི་དུས་གཅིག་ན། །ཞེས་པ་བརྗོད་པ་ཙམ་གྱིས་ལྷ་རྣམས་ནི། །མྱ་ངན་ལྡང་གྱུར་ཀྱེ་མ་བཅོམ་ལྡན་འདས། །ད་ནི་ཐོས་པའི་ལམ་དུ་གཤེགས་པར་གྱུར། །སྔོན་ཚེ་ཆོས་སྟོན་བདག་གིས་མངོན་སུམ་མཐོང༌། །ད་ནི་འདི་སྐད་བདག་གིས་ཐོས་ཅེས་གླེང༌། །འདི་ཡང་དེང་དུས་ཐོས་པ་ཙམ་དུ་ཟད། །ཀྱེ་མ་འདུས་བྱས་ཐམས་ཅད་འདི་འདྲ་ཞེས། །ཤུགས་འབྱིན་མཆོད་པའི་ལས་ལ་བརྩོན་པར་གྱུར། །དགྲ་བཅོམ་ལྔ་བརྒྱར་གཅིག་གིས་མ་ཚང་བའང༌། །འདི་ལྟར་ཐམས་ཅད་མི་རྟག་པར་མཚུངས་ཞེས། །སྐྱོ་སྟེ་རང་རང་ཁྲི་ལས་བབ་སྟེ་འཁོད། །སྟོན་པས་དགེ་སློང་ལྔ་ལས་བཀའ་བསྩལ་པ། །ཅེས་སོགས་བཟླས་པ་རྣམ་པ་གསུམ་བཟློས་པས། །མདོ་སྡེའི་སྡེ་སྣོད་ལེགས་པར་བསྡུ་བར་བྱས། །ཁོ་བོས་བཟུང་བའི་མདོ་སྡེ་འདི་ལགས་ཀྱིས། །ཁྱེད་ཅག་རྣམས་ཀྱི་དེ་ཙམ་ཡིན་ནམ་དྲིས། །ཀུན་གྱིས་ངེད་ཀྱི་མདོ་སྡེ་དེ་ཙམ་སྟེ། །ཚེ་དང་ལྡན་པའི་དེ་ཙམ་ཡིན་ནམ་གསུངས། །འདི་ཁོ་ན་སྟེ་དེ་བས་ལྷག་པ་མེད། །ཅེས་སྨྲས་སེང་གེའི་ཁྲི་ལས་བབ་སྟེ་འདུག །དེ་བཞིན་ཉེ་བ་འཁོར་གྱིས་འདུལ་བ་བསྡུས། །བསླབ་གཞི་དང་པོ་གར་བཅས་སུ་ལ་བཅས། །ཞེས་སོགས་དྲིས་ལན་ཚུལ་གྱིས་གཏན་ལ་ཕབ། །དེ་ནས་འོད་སྲུང་མ་བསྐོས་རང་འཛེགས་སྟེ། །མ་མོ་ཞེས་བྱ་བདག་ཉིད་ཁོ་ནས་སྨྲ། །ཞེས་བརྗོད་མངོན་པའི་སྡེ་སྣོད་བསྡུ་བར་བྱས། །གཞུང་གི་ཚད་ནི་འབུམ་ཕྲག་རེ་རེ་ཡིན། །དགྲ་བཅོམ་རེ་རེའི་ཐུགས་ལ་ཡོད་པའི་གཞུང༌། །ཐམས་ཅད་མཐུན་ནམ་མི་མཐུན་བརྟག་པའི་ཕྱིར། །འདོན་ལ་བཀའ་ཡི་བསྡུ་བར་གྲགས་པ་སྟེ། །འདི་ནི་ཐུབ་པའི་བཀའ་བསྡུ་དང་པོ་ཡིན། །སྦྱངས་ཡོན་ལྡན་དང་དགོན་པར་གནས་པའི་མཆོག །སྟོན་པ་ཉིད་ཀྱིས་སྟན་ཕྱེད་བསྟབས་པའི་ཕྱིར། །སྔོན་ནས་སྟོན་པ་གཉིས་པར་གྲགས་པ་ཡི། །སྟོབས་བཅུའི་སྟོབས་ལྡན་འོད་སྲུང་ཆེན་པོ་དེ། །བདག་གིས་སྡེ་སྣོད་གསུམ་པོ་བསྡུས་པ་ན། །(ག༢༨ན)
ཚངས་པ་མཚུངས་སྤྱོད་སུས་ཀྱང་མ་ལྡོག་ཅིང༌། །མཐུན་པར་བཀའ་ཡི་གནང་བ་བྱིན་པའི་ཕྱིར། །འདི་ནི་ཆོས་སོ་འདི་ནི་འདུལ་བའོ། །འདི་ནི་སྟོན་པའི་བསྟན་པ་འོ་ཞེས་དགོངས། །སྙིང་རྗེ་པདྨ་དཀར་པོའི་མདོ་ལས་ནི། །འོད་སྲུང་དང་ནི་ཀུན་དགའ་བོ་ཁྱོད་གཉིས། །ང་འདས་ལོ་ནི་བཞི་བཅུ་ལྷག་ཅིག་དུ། །སྟོན་པའི་མཛད་པ་བྱེད་ཅེས་ལུང་བསྟན་ལྟར། །ལོ་འགར་བསྟན་པའི་བྱ་བ་རྒྱ་ཆེན་མཛད། །སྟོན་པ་དེ་ལ་བྱས་པ་གཟོ་བྱས་སྟེ། །དེའི་གསུང་ཅི་ནུས་ཙམ་ཞིག་བསྒྲུབས་ཟིན་གྱིས། །མ་ལུས་སྒྲུབ་པར་སུས་ཀྱང་མི་ནུས་ལ། །རྣག་གི་ལུས་འདིས་སྐྱོ་ཕྱིར་མྱ་ངན་ལས། །འདའ་འོ་ཞེས་དགོངས་ཀུན་དགའ་བོ་བོས་སྟེ། །སྟོན་པས་བདག་ལ་བསྟན་པ་ཡོངས་སུ་གཏད། །བདག་གིས་ཀྱང་ནི་ཁྱོད་ལ་གཏད་པར་བྱ། །ཁྱོད་ཀྱིས་ཤ་ནའི་གོས་ཅན་རྒྱ་མཚོ་ལས། །འོངས་སྟེ་རབ་ཏུ་ཕྱུང་ལ་གཏོད་ཅིག་གསུངས། །འོད་སྲུང་མྱ་ངན་འདའ་ཚེ་མ་སྐྱེས་དགྲ། །སྦྲོན་པར་སྔོན་ཚེ་ཞལ་གྱིས་བཞེས་པའི་ཕྱིར། །ཕོ་བྲང་མདུན་བྱོན་ཆབ་སྒོ་བ་ལ་བོས། །འོད་སྲུང་རྒྱལ་པོ་ལྟ་འོ་ཞེས་སྨྲོས་ཤིག །དེ་ཡིས་རྒྱལ་པོ་གཉིད་ཀྱིས་ལོག་གྱུར་སྟེ། །གཏུམ་པས་གཉིད་ལས་སློང་མི་ནུས་ཞེས་ཞུས། །འོ་ན་གཉིད་ལས་སད་ཚེ་འོད་སྲུང་ནི། །མྱ་ངན་འདའ་ཕྱིར་སྦྲོན་ཞེས་སྨྲོས་ཤིག་གསུངས། །སྟོན་པའི་མཆོད་རྟེན་མཆེ་བར་བཅས་རྣམས་ལ། །ཐ་མའི་ཕྱག་མཛད་ལྷོ་ཡི་ཕྱོགས་ཀྱི་རི། །བྱ་གག་རྐང་གི་སྦོ་ལ་འཛེགས་བྱས་སྟེ། །རི་གསུམ་དབུས་སུ་རྩྭ་ཡི་གདིང་བ་ལ། །སྟོན་པའི་སྣམ་སྦྱར་ཕྱགས་བདར་ཁྲོད་པ་བསྒོས། །སེང་གེའི་སྟབས་བཞིན་གཡས་ངོས་ཕབ་སྟེ་གཟིམས། །བདག་ཉིད་ཆེན་པོ་བྱམས་པ་དེར་གཤེགས་ནས། །བྱེ་བ་དགུ་བཅུའི་འཁོར་ཚོགས་མ་བཏུལ་བར། །སྐུ་གདུང་ཉམས་པ་མེད་པར་བྱིན་བརླབས་སྟེ། །མྱ་ངན་འདས་ཚེ་ས་ཆེན་རིར་བཅས་གཡོས། །ལྷ་ཡི་མེ་ཏོག་ཆར་གྱིས་སྐུ་གདུང་ཡོག །གནོད་སྦྱིན་རྣམས་(ག༢༨བ)
ཀྱིས་རི་བོ་གསུམ་གྱི་དབུས། །བཀབ་སྟེ་སྟེང་ནས་བྱིལ་པོར་བྱས་པར་གྱུར། །མ་སྐྱེས་དགྲ་ཡིས་རྨི་ལམ་དོན་མཐོང་ནས། །སད་ནས་སྦྲོན་པར་ཐོས་ཚེ་ས་ལ་འགྱེལ། །གལ་སྟེ་སྐུ་གདུང་དངོས་སུ་མ་མཐོང་ན། །རྒྱལ་པོ་ཁྲག་དྲོན་བསྐྱུགས་སྟེ་འཆིར་རིག་ནས། །ཀུན་དགའ་བོ་ཡིས་བྱ་རྐང་རི་ལ་ཁྲིད། །གནོད་སྦྱིན་རྣམས་ཀྱིས་རི་བསལ་སྐུ་གདུང་བསྟན། །ཞབས་ལ་ཕྱག་བྱས་སྲེག་པར་བརྩམས་པ་ན། །ཀུན་དགའ་བོ་ཡིས་འདི་ནི་འདི་ལྟར་དུ། །བྱིན་གྱིས་བརླབས་ཕྱིར་བསྐལ་མེས་ཀྱང་མི་འཇིག །མ་འོངས་རྒྱལ་བ་བྱམས་པ་སངས་རྒྱས་ནས། །དགེ་སློང་བྱེ་བ་དགུ་བཅུས་ཡོངས་བསྐོར་སྟེ། །ཚེ་ལོ་བརྒྱ་པའི་དུས་སུ་བྱུང་བ་ཡི། །རྒྱལ་བ་ཤཱཀྱ་ཐུབ་པའི་ཉན་ཐོས་མཆོག །འོད་སྲུང་ཆེན་པོའི་སྐུ་གདུང་འདི་ཡིན་སྟེ། །འདི་ལྟའི་ཡོན་ཏན་ཐོབ་པ་འཁོར་འདིར་མེད། །ཅེས་གསུངས་ཕྱག་གི་མཐིལ་དུ་བཞག་ནས་སྟོན། །ལུས་འདིས་དེ་ལྟའི་ཡོན་ཏན་ཐོབ་པ་ཞེས། །འཁོར་དེ་ཀུན་ནས་སྐྱོ་ཞིང་ཡིད་འབྱུང་འགྱུར། །འདི་ནི་སྟོན་པ་དེ་ཡིས་སྣམ་སྦྱར་ཞེས། །བསྟན་པའི་མོད་ལ་འཁོར་ཚོགས་དེ་ཐམས་ཅད། །དགྲ་བཅོམ་འཐོབ་འགྱུར་སྟོན་པའི་བྱ་བ་བྱེད། །དེ་ལྟར་གདུལ་བའི་བྱ་བ་བྱས་ཟིན་ཚེ། །སྐུ་གདུང་འདི་ཉིད་མཁར་འཕགས་སྣ་ཚོགས་པའི། །ཆོ་འཕྲུལ་བསྟན་ནས་རང་བྱུང་མེ་ཡིས་འཚིག །དེ་བས་མཆོད་པ་གྱིས་ལ་ཞོག་ཅིག་གསུངས། །སྔར་བཞིན་རི་བཀབ་སྟེང་དུ་མཆོད་རྟེན་བྱས། །རྩ་བ་མེད་པའི་དད་ལྡན་རྒྱལ་པོ་དེ། །ཀུན་དགའ་བོ་ཡི་ཞབས་ལ་མགོས་གཏུགས་ནས། །སྟོན་པས་བདག་མ་སྦྲན་པར་མྱ་ངན་འདས། །འོད་སྲུང་འདའ་བའང་བདག་གིས་མ་མཐོང་གིས། །ཁྱོད་ཀྱིས་བདག་མ་སྦྲན་པར་མྱ་ངན་ལས། །མི་དར་གསོལ་ཞེས་ཞུས་ཤིང་ཞལ་གྱིས་བཞེས། །ཐོས་པ་འཛིན་པའི་མཆོག་གྱུར་ཀུན་དགའ་བོས། །སྟོན་པ་ཉིད་ལྟར་བསྟན་པའི་བྱ་བ་མཛད། །ཁྱེ་འུ་གསེར་མདོག་མཛངས་(ག༢༩ན)
ཤིང་བག་ལྡན་པ། །རབ་གཏུམ་བློན་པོའི་གཡོ་རྒྱུས་བསད་ཤིང་ལ། །བསྐྱོན་ཚེ་འཕགས་པའི་རྫུ་འཕྲུལ་བྱིན་རླབས་ཀྱིས། །བསད་ཤིང་སྟེང་དུ་ཟླ་བའི་དཀྱིལ་འཁོར་བྱུང༌། །དགྲ་བཅོམ་མཐའ་ཡས་མང་པོའི་འཁོར་ལྡན་པ། །ཟླ་བ་ཁམ་པ་ལྟ་བུར་མཁའ་ལ་གཤེགས། །ཁྱེ་འུ་དེ་ནི་རབ་བྱུང་དགྲ་བཅོམ་གྱུར། །⁽1763⁾འདི་ལ་གསེར་མདོག་གི་རྟོགས་བརྗོད་ཅེས་པ་ཡོད། སྐྱེ་བོའི་ཚོགས་མང་བྱང་ཆུབ་གསུམ་ལ་བཀོད། །ཤ་ནའི་གོས་ཅན་རྒྱ་མཚོའི་དོན་གྲུབ་པས། །དགྲ་བཅོམ་ཁྲི་ཕྲག་མང་པོའི་འཁོར་བཅས་ལ། །ལོ་ལྔའི་བར་དུ་དུས་སྟོན་ཆེན་པོ་བྱས། །ཁྱོད་ཀྱིས་བསྟན་ལ་ཟང་ཟིང་གིས་བསྡུ་བྱས། །ད་ནི་ཆོས་ཀྱིས་བསྡུ་བར་གྱིས་ཤིག་གསུངས། །རབ་བྱུང་རིག་གྲོལ་ལྡན་པའི་དགྲ་བཅོམ་བཀོད། །ཁྱོད་ཀྱིས་སྤོས་ཚོང་སྦས་པ་ཞེས་བྱའི་བུ། །ཉེ་སྦས་ལ་ནི་བསྟན་པ་གཏད་པར་བྱོས། །སྟོན་པ་གཉིས་པར་རྒྱལ་བས་ལུང་བསྟན་ནོ། །ཞེས་གསུངས་བསྟན་པ་གཏད་དེ་རྒྱལ་པོ་སྦྲན། །མྱ་ངན་འདའ་ཕྱིར་གངྒཱའི་ཆུ་དབུས་བྱོན། །རྒྱལ་པོས་གདུགས་ཀྱིས་ཡུ་བ་ཆག་རྨིས་ནས། །སད་ཚེ་སྦྲན་པར་ཐོས་ནས་དཔུང་དང་བཅས། །གངྒཱའི་ལྷོ་ཡི་འགྲམ་དུ་ཕྱིན་སྟེ་འཁོད། །ཡངས་པ་ཅན་པ་རྣམས་ལ་ལྷས་སྦྲན་ནས། །དེ་དག་དཔུང་བཅས་གངྒཱའི་བྱང་འགྲམ་འཁོད། །གཉིས་ཀས་ལུས་ཕྱེད་འཐོབ་པར་འགྱུར་བའི་ཕྱིར། །འཕགས་པའི་མཆོག་དེ་གངྒཱའི་དབུས་ན་གནས། །དེ་ཚེ་དྲང་སྲོང་རྫུ་འཕྲུལ་ལྡན་པ་ཞིག །ལྔ་བརྒྱའི་འཁོར་ལྡན་རབ་ཏུ་བྱུང་ཕྱིར་འོངས། །ཆུ་དབུས་གླིང་སྤྲུལ་ཉིན་གུང་བསྙེན་རྫོགས་ཚེ། །གསོལ་བ་བྱས་པས་ཕྱིར་མི་འོང་བ་ཐོབ། །བརྗོད་པ་གསུམ་པའི་ཐ་མར་དགྲ་བཅོམ་གྱུར། །ཆུ་དབུས་པ་འམ་ཉི་མའི་གུང་པར་གྲགས། །མཁན་པོའི་སྔུན་དུ་འདའ་བར་ཞུས་པ་ན། །བཅོམ་ལྡན་འདས་ཀྱིས་སྔོན་ནས་ཁྱོད་ལུང་བསྟན། །ཁ་ཆེའི་ཡུལ་སོང་བསྟན་པ་ཞོག་ཅིག་གསུངས། །མྱ་ངན་འདའ་ཕྱིར་ནམ་མཁའི་དབྱིངས་སུ་འཕགས། །ཆོ་འཕྲུལ་སྣ་ཚོགས་སྟོན་པ་མཛད་པ་ན། །(ག༢༩བ)
མ་ག་དྷ་པ་རྣམས་དང་ཡངས་ཅན་པ། །གཉིས་ཀ་ཕན་ཚུན་སྙིང་རྗེར་ངུ་ཞིང་འབོད། །མགོན་པོ་ཚུར་གཤེགས་སྐུ་གདུང་འདིར་འོད་ཟེར། །ཡེ་ཤེས་མཚོན་གྱིས་སྐུ་གདུང་ཕྱེད་དུ་བཏང༌། །གཉི་གས་སོ་སོར་ཐོབ་པར་བྱིན་བརླབས་ནས། །ཞི་བའི་དབྱིངས་སུ་མྱ་ངན་འདས་པར་གྱུར། །གཉི་གས་གདུང་གི་མཆོད་རྟེན་བྱས་ནས་མཆོད། །ཉི་མ་གུང་པ་འཁོར་དང་བཅས་པ་ཡིས། །ཁ་ཆེའི་ཡུལ་ནི་མཚོ་རུ་གནས་པར་བྱོན། །ཉི་མའི་རྫུ་འཕྲུལ་བསྟན་པས་མཚོ་དེ་བསྐམས། །ཀླུ་རྣམས་འཁྲུགས་ནས་ཕྱགས་བདར་མཚོན་ཆ་ཡི། །ཆར་ཕབ་ལྷ་ཡི་མེ་ཏོག་ཆར་དུ་གྱུར། །མཚོན་དུག་མེ་ཡིས་གནོད་པར་མ་ནུས་ཚེ། །ངོ་མཚར་སྐྱེས་ནས་ཅི་བཞེད་དྲིས་པ་ན། །སྟོན་པས་གནས་འདི་ང་ཡི་ལུང་དུ་བསྟན། །སྐྱིལ་ཀྲུང་གང་གི་ས་ཞིག་སློང་ངོ་གསུངས། །སྐྱིལ་ཀྲུང་གཅིག་གིས་ལུང་པ་དགུ་ནོན་སྟེ། །འཁོར་ཚོགས་ཇི་སྙེད་མངའ་ཞེས་ཞུས་པ་ན། །དགྲ་བཅོམ་ལྔ་བརྒྱ་ཡོད་གསུངས་ཀླུ་ཡིས་ཀྱང༌། །དེ་ལས་དགྲ་བཅོམ་གཅིག་དུ་མ་ཚང་ཡང༌། །ཡུལ་འདི་སླར་ལ་དབྲོག་ཅེས་དམ་བཅས་ཕུལ། །གང་ན་གཏོང་པོ་ཡོད་ན་ལེན་པོ་ཡོད། །དེ་ཕྱིར་ཁྱིམ་བདག་གཞུག་པར་བྱ་འོ་གསུངས། །རང་གིས་གྲོང་ཁྱེར་བཀོད་ནས་མི་རྣམས་བཅུག །འཕེལ་ཕྱིར་སྤོས་ངད་ལྡང་བའི་རི་བོ་ནས། །གུར་གུམ་ས་བོན་བླངས་པས་རི་དེ་ཡི། །ཀླུ་རྣམས་འཁྲུགས་པ་བཏུལ་ནས་ཇི་སྲིད་དུ། །སྟོན་པའི་བསྟན་པ་གནས་པ་དེ་སྲིད་བར། །གུར་གུམ་ཕུལ་སྟེ་ཡུལ་དེར་བསྐྲུན་པར་བྱས། །དེ་ཕྱིར་ཀསྨི་རའམ་ཁ་ཆེར་གྲགས། །དགྲ་བཅོམ་ལྔ་བརྒྱ་རྟག་དུ་བཞུགས་པ་ཡིན། །འཛམ་གླིང་སྟོན་པའི་བསྟན་པ་ནུབ་པ་ན། །ཡུལ་དེའི་གུར་གུམ་སྐྱེ་བ་རྒྱུན་ཆད་ཅིང༌། །དགྲ་བཅོམ་ལྔ་བརྒྱ་གཅིག་གིས་མ་ཚང་ཚེ། །ཡུལ་དེ་སླར་ཡང་མཚོ་རུ་འགྱུར་བ་ཡིན། །ཤ་ནའི་གོས་ཅན་གྱིས་ཀྱང་བསྟན་པ་ཡི། །བྱ་བ་རྒྱ་ཆེར་མཛད་དེ་ཉེར་སྦས་ཀྱིས། །སྡེ་སྣོད་གསུམ་རིག་དགྲ་བཅོམ་ཐོབ་གྱུར་ཚེ། །བསྟན་པ་(ག༣༠ན)
གཏད་ནས་མྱ་ངན་འདས་པར་གྱུར། །སྔོན་ཚེ་སྟོན་པའི་དྲུང་དུ་བྲམ་ཟེ་ནི། །སྨྲ་བའི་མཆོག་ཞིག་འོངས་སྟེ་འདི་སྐད་དུ། །གལ་སྟེ་ཤཱ་རིའི་བུ་དང་མཚུངས་པ་རུ། །ལུང་སྟོན་མཛད་ན་བདག་ནི་རབ་བྱུང་བགྱིད། །ཅེས་གསོལ་སྟོན་པས་རྫོགས་པའི་སངས་རྒྱས་རྣམས། །ཇི་ལྟར་བཀའ་བསྩལ་གཞན་དུ་འགྱུར་མི་སྲིད། །ཤེས་རབ་ལྡན་མཆོག་གཉིས་པ་མི་འབྱུང་ཞེས། །གསུངས་པས་རབ་ཏུ་མ་བྱུང་ལོག་པར་གྱུར། །སྟོན་པའི་ཞལ་ནས་ད་ལྟའི་བྲམ་ཟེ་དེ། །མ་འོངས་དུས་སུ་ང་འདས་ལོ་བརྒྱ་ན། །ཉེར་སྦས་ཞེས་འགྱུར་བསྟན་ལ་རབ་བྱུང་ནས། །སྟོན་པ་གཉིས་པའི་བྱ་བ་བྱེད་ཏོ་གསུངས། །འདི་ནི་ཁྱིམ་ན་གནས་པའི་དུས་སུ་ཡང༌། །གཟུགས་ཚོང་བཟང་མོས་བསླུ་བར་མ་ནུས་སྟེ། །ཕྱི་ནས་རྒྱལ་པོའི་ཆད་པས་སྨད་ཚོང་དེ། །རྐང་ལག་རྣ་བ་སྣ་བཏུབས་འཆི་ཀའི་ཚེ། །བདག་གིས་ཁྱོད་བལྟའི་དུས་ནི་འདི་ཡིན་ཞེས། །ཆོས་བསྟན་རྒྱུན་ཞུགས་གནས་ལ་བཀོད་པ་ཡིན། །དགྲ་བཅོམ་གྱུར་ནས་འཁོར་ཚོགས་རྒྱ་མཚོ་ལ། །ཆོས་སྟོན་ཚེ་ན་བདུད་ཀྱིས་དཀྲུག་པའི་ཕྱིར། །རེས་འགའ་མེ་ཏོག་རེས་འགའ་རིན་ཆེན་སོགས། །ཆར་ཕབ་པ་ཡིས་ཡིད་རབ་གཡེངས་པར་བྱས། །དེ་ཕྱིར་སློབ་མ་རྣམས་ཀྱིས་ཆོས་མ་རྟོགས། །ཕྱི་ནས་ལྷ་ཡི་བུད་མེད་མཛེས་མ་དག །སྤྲུལ་པས་གཡེངས་ཚེ་འཕགས་པས་བུད་མེད་དེ། །ལྷུང་བས་ཤི་ནས་ལུས་མྱགས་རུལ་བ་དང། ཁ་ཅིག་ནང་རོལ་ལ་སོགས་མི་གཙང་བ། །ཕྱི་ནས་ཤེལ་ལྟར་མཐོང་བར་བྱིན་བརླབས་པས། །འཁོར་རྣམས་སྐྱོ་ཞིང་མི་སྡུག་འདུ་ཤེས་ཐོབ། །དགྲ་བཅོམ་ཟག་པ་ཟད་པ་ཉིད་དུ་བཀོད། །འཕགས་པའི་ཕྱིར་འབྲང་ལྷུང་བཟེད་ལྷག་མ་ཟ། །དམ་ཆོས་ཉན་པའི་ཁྱི་ཞིག་ཡོད་པ་དེ། །ཤི་ཚེ་ཆོས་ཐོས་པ་ཡི་དགེ་བ་དེས། །སྡིག་ཅན་བདུད་ཀྱི་སྟན་ཕྱེད་དབང་བར་སྐྱེས། །ཁྱི་ཡང་(ག༣༠བ)
བདག་དང་མཉམ་པར་བཀོད་པ་འདིས། །བླ་ན་མ་མཆིས་བདག་ལ་བརྙས་སོ་སྙམ། །འཕགས་པ་ལ་ནི་མཐོ་འཚམ་དགྱིད་བློ་སྐྱེས། །བདུད་ཀྱིས་ཁྱོད་ལ་མཆོད་པར་བྱ་འོ་ཞེས། །དབུ་ལ་མེ་ཏོག་ཕྲེང་བ་བཅིངས་པ་ལས། །བདག་གིས་ལན་དུ་མེ་ཏོག་སྦྱིན་ནོ་ཞེས། །ཁྱི་རོ་མེ་ཏོག་ཕྲེང་བར་སྤྲུལ་ནས་ནི། །བདུད་ཀྱི་མགུལ་བཏགས་སྤྲུལ་པ་བཤིག་པ་ཡིས། །ལྷ་ལུས་གཙང་ཞིང་དག་པའི་མགུལ་པ་རུ། །ཁྱི་རོ་རུལ་མྱགས་འབུས་གཞིགས་དྲི་ང་བ། །ཐོགས་པས་སྡུག་བསྔལ་མི་བཟད་ལྡན་པར་གྱུར། །རང་གི་ནུས་པ་རྫུ་འཕྲུལ་ལྟ་ཞོག་གི །ཚངས་དང་དབང་ཕྱུག་ཆེན་པོ་ལ་སོགས་པ། །ལྷ་གཞན་ཀུན་ལ་གསོལ་བ་བཏབ་གྱུར་ཀྱང༌། །སུས་ཀྱང་དེ་ནི་འདོར་བར་ཡོང་མ་ནུས། །དགྲ་བཅོམ་བྱིན་བརླབས་གཞིག་པར་མི་ནུས་ཀྱིས། །དེ་ཉིད་ལ་ནི་གསོལ་བ་ཐོབ་ཅིག་སྐད། །འཕགས་པའི་དྲུང་འོངས་འདོར་བར་གསོལ་བ་བཏབ། །བདག་གིས་སྔོན་ཚེ་རྫོགས་སངས་རྒྱས་དེ་ལ། །གནོད་མང་བགྱིས་ཀྱང་ནམ་ཡང་ལན་མ་མཛད། །ཉན་ཐོས་ཁྱེད་རྣམས་འདི་ལྟར་གདུག་པ་སྟེ། །རྩེད་མོའི་ལན་ཀྱང་འདི་ལྟར་དགྱིད་ལ་ལྟོས། །འཕགས་པས་སྨྲས་པ་བདག་དང་སྟོན་པར་ནི། །རྡུལ་དང་རི་རབ་ལྟ་བུར་བསྐྲུན་མི་ནུས། །དེ་ལྟ་མོད་ཀྱི་བདག་གིས་སྟོན་པ་དེའི། །ཆོས་ཀྱི་སྐུ་ཡི་ཕྱོགས་ནི་མཐོང་མོད་ཀྱི། །གཟུགས་ཀྱི་སྐུ་ཡང་བདག་གིས་མ་མཐོང་ངོ༌། །སྡིག་ཅན་ཁྱོད་ཀྱིས་རྒྱལ་བའི་སྐུ་གཟུགས་སུ། །སྤྲུལ་པར་ནུས་ཞེས་གྲག་གིས་བདག་ལ་སྟོན། །འཕགས་པས་ཕྱག་མི་འཚལ་བར་དམ་བཅས་ནས། །བདུད་ཀྱིས་ཐུབ་པའི་སྐུ་གཟུགས་སུ་སྤྲུལ་སྟེ། །གསེར་གྱི་རི་བོ་ལྟ་བུར་ལྷང་ངེ་འདུག །འཕགས་པས་སྟོན་པ་དངོས་སུ་འདུ་ཤེས་སྟེ། །ཕྱག་འཚལ་བརྩམས་ཚེ་སྤྲུལ་པ་མི་སྣང་གྱུར། །ཕྱིན་ཆད་དགེ་ལ་བར་ཆོད་མི་བྱེད་ན། །འདི་ནི་མེ་ཏོག་ཕྲེང་བར་བྱིན་གྱིས་རློབ། །གདུག་པའི་བསམ་པ་ནམ་སྐྱེས་ཁྱི་ཡི་རོ། །(ག༣༡ན)
རུལ་པར་གྱུར་ཅིག་ཅེས་ནི་བདེན་སྟོབས་བརྗོད། །དེ་ཕྱིན་སྐྲག་པས་སངས་རྒྱས་བསྟན་པ་ལ། །བདུད་ཀྱིས་བར་དུ་གཅོད་པར་མི་ནུས་སྐད། །ཨུ་ཤི་རི་ཡི་བྲག་གི་ཕུག་པ་ནི། །མཆུ་ཞེང་དཔངས་ཟབ་གཞུ་འདོམ་ཉི་ཤུ་པར། །སློབ་མ་དགྲ་བཅོམ་ཐོབ་པ་རེ་རེ་ཡིས། །སོ་ཤིང་སོར་བཞི་པ་རེ་འཕངས་པ་ཡིས། །སོ་ཤིང་ཚོགས་ཀྱིས་ཕུག་དེ་བྱུར་བུ་རུ། །གང་ཚེ་མྱ་ངན་འདས་སྟེ་དགྲ་བཅོམ་པའི། །སོ་ཤིང་ཚོགས་དེས་གདུང་ཞུས་ལྷ་ཡིས་མཆོད། །དེ་ཡིས་དྷི་དྷི་ཀ་ལ་བསྟན་པ་གཏད། །དེ་ཡིས་ནག་པོ་དེ་ཡིས་ལེགས་མཐོང་ཆེ། །བསྟན་པའི་གཏད་རབས་བདུན་ཞེས་ལུང་ལས་བཤད། །སྟོན་པ་འདས་ནས་ལོ་གྲངས་བརྒྱ་དང་བཅུ། །ལོན་ཞིང་རྒྱལ་པོ་མྱ་ངན་མེད་པ་ཡིས། །རྒྱལ་སྲིད་བྱས་ནས་ལོ་བཅུ་འདས་པའི་འོག །ལྔ་བརྒྱའི་འཁོར་ལྡན་དགྲ་བཅོམ་གྲགས་པ་ཡིས། །ཡངས་པ་ཅན་གྱི་གཙུག་ལག་ཁང་བྱོན་ཚེ། །དེ་ན་གཉུག་མར་གནས་པའི་དགེ་སློང་ཚོགས། །རབ་མང་རྙེད་པ་བགོད་པའི་སྐལ་བ་བྱུང༌། །དྲིས་པས་རུང་མིན་གཞི་བཅུ་སྤྱོད་པར་ཤེས། །ཐུབ་པའི་བསྟན་ལ་ཆུ་བུར་བྱུང་བ་འདི། །བདག་གིས་ཡལ་བར་དོར་ན་མི་རུང་སྙམ། །ཐམས་ཅད་འདོད་དང་ནོར་ལྡན་ལ་སོགས་པ། །དགྲ་བཅོམ་མཁས་པ་དུ་མ་གྲོགས་སུ་བཙལ། །ཟླ་སྦུར་འགོག་སྙོམས་ལས་ནི་ལངས་མ་ཐག །ལྷས་སྦྲན་འོངས་སྟེ་འཕགས་པ་ཀུན་དགའ་བོའི། །སློབ་མ་ཤ་སྟག་དགྲ་བཅོམ་བདུན་བརྒྱ་འདུས། །ཆོས་རྒྱལ་མྱ་ངན་མེད་ཀྱིས་སྦྱིན་བདག་བྱས། །ཨ་ལ་ལ་ཡིས་རུང་བ་རུང་ངམ་ཅི། །མི་རུང་ཙམ་པར་དྲུག་སྡེ་ལ་བཅས་སོ། །ཞེས་སོགས་དྲིས་ལན་ཚུལ་གྱིས་གཏན་ལ་ཕབ། །རུང་མིན་གཞི་བཅུ་དེ་དག་སུས་སྤྱོད་པ། །བདག་ཅག་རྣམས་ཀྱིས་དོར་ཞེས་མཐུན་པར་སྨྲས། །སྡེ་སྣོད་གསུམ་པོ་ལྷག་ཆད་མེད་པར་བཏོན། །འདི་ནི་བདུན་བརྒྱས་ཡང་དག་བརྗོད་པའམ། །བཀའ་ཡི་བསྡུ་བ་གཉིས་པ་ཞེས་པར་གྲགས། །(ག༣༡བ)
བཀའ་བསྡུ་གསུམ་པ་ལུང་ན་མེད་པའི་ཕྱིར། །འདོད་ཚུལ་མི་འདྲ་དུ་མ་སྣང་མོད་ཀྱང༌། །རྟོག་གེ་ལ་འབར་དབུ་མའི་གཞུང་ལུགས་ལས། །དེ་བཞིན་གཤེགས་པས་མདོ་ལས་ལུང་བསྟན་ལྟར། །རྒྱལ་པོ་དགའ་བོ་དང་ནི་པད་ཆེན་དུས། །སྡིག་ཅན་བདུད་ཀྱིས་བཟང་པོ་ཞེས་བྱ་བ། །དགེ་སྦྱོང་ཆ་བྱད་འཛིན་པ་ཅིག་དུ་བྱས། །རྫུ་འཕྲུལ་དུ་མས་སྐྱེ་བོའི་ཡིད་བསྒྱུར་ནས། །རྒྱལ་བའི་བཀའ་དང་དགེ་འདུན་རྣམས་དཀྲུགས་ཤིང༌། །དེ་ཡི་སློབ་མ་ཀླུ་དང་ཡིད་བརྟན་གྱིས། །དར་བར་བྱས་པས་ལྟ་སྤྱོད་མ་མཐུན་སྟེ། །ཉན་ཐོས་སྡེ་པ་བཅོ་བརྒྱད་གྱེས་པར་བཤད། །འདི་ཚུལ་ཅུང་ཟད་བདག་གིས་བརྗོད་པར་བྱ། །དེ་ཡང་དབྱིག་བཤེས་ཀྱིས་མཛད་པ། །སྡེ་པ་ཐ་དད་བཀླག་པ་ཡི། །འཁོར་ལོ་ཞེས་བྱའི་གཞུང་ཆེན་བྱུང༌། །ཕྱི་ནས་མཁས་མཆོག་དུལ་བའི་ལྷས། །དེ་དོན་བསྡུས་པའི་བསྟན་བཅོས་བརྩམས། །དེ་ལས་ཇི་སྐད་བྱུང་བ་ནི། །ཤར་དང་ནུབ་དང་གངས་རི་དང༌། །བཏགས་པར་སྨྲ་བའི་སྡེ་པ་དང༌། །འཇིག་རྟེན་འདས་པར་སྨྲ་བ་སྟེ། །ལྔ་ཚན་དགེ་འདུན་ཕལ་ཆེན་པ། །གཞི་ཀུན་པ་དང་འོད་སྲུང་སྡེ། །ས་སྟོན་པ་དང་ཆོས་སྲུང་སྡེ། །མང་ཐོས་གོས་དམར་སློབ་མ་དང༌། །རྣམ་པར་ཕྱེ་སྟེ་སྨྲ་བའི་སྡེ། །ཐམས་ཅད་ཡོད་པར་སྨྲ་བ་ཡིན། །རྒྱལ་བྱེད་ཚལ་ནགས་འཇིགས་བྱེད་གནས། །གཙུག་ལག་ཁང་ཆེན་གནས་པ་སྟེ། །གནས་བརྟན་པ་ཡི་སྡེ་པ་གསུམ། །ས་སྒྲོག་རི་དང་སྲུང་བ་པ། །གནས་མ་བུ་ཡི་སྡེ་པ་སྟེ། །ཀུན་གྱིས་བཀུར་བ་རྣམ་པ་གསུམ། །ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་ཉིད། །ཅེས་བཤད་མཐའ་འཁོབ་འདུལ་བའི་མཆོག །ཀ་ཏྱཱ་ན་ཡི་རྗེས་བཞིན་དུ། །དགེ་སློང་ཕལ་མོ་ཆེ་འདུས་པས། །ཕལ་ཆེན་པ་ཡི་སྡེ་པར་གྲགས། །རང་བཞིན་སྐད་ཀྱིས་མདོ་སྡེ་འདོན། །སྣམ་ཕྲན་ཉི་ཤུ་རྩ་ལྔ་ནས། །བདུན་གྱི་བར་འདོད་དུང་གིས་མཚན། །ཀ་ར་ལ་སོགས་མིང་མཐར་བྱེད། །(ག༣༢ན)
འདི་ལ་སྡེ་ཚན་ལྔ་ཡོད་པའི། །འཇིག་རྟེན་འདས་པར་སྨྲ་བ་ཡི། །གྲུབ་པའི་མཐའ་ནི་འདི་སྐད་བརྗོད། །ཐུབ་པ་འཇིག་རྟེན་ལས་འདས་སྟེ། །རྫས་ཡོད་སྐུ་དང་ཚེ་མཐའ་ཡས། །མཉམ་གཞག་སྐད་ཅིག་གིས་ཀུན་མཁྱེན། །ཟད་མི་སྐྱེ་བློ་རྟག་དུ་མངའ། །ཆོས་འཁོར་བསྐོར་བ་ཚིག་ཡིན་ནོ། །བྱང་སེམས་རྣམས་ལ་ཉོན་མོངས་དང༌། །ནུར་ནུར་སོགས་ལས་སྐྱེ་བ་མེད། །བདེན་པ་རྣམས་ནི་ཅིག་ཅར་མཐོང༌། །མིག་ལ་སོགས་པའི་སེམས་ཀྱིས་ཀྱང༌། །འདོད་ཆགས་བྲལ་བར་འགྱུར་བ་ཡིན། །ཁམས་གོང་གཉིས་ནའང་དབང་ཤེས་ཡོད། །འོན་ཀྱང་དབང་པོས་ཡུལ་མི་འཛིན། །མཉམ་པར་བཞག་ཚེའང་ཚིག་སྨྲའོ། །སེམས་ནི་གཟུགས་ཅན་རང་རིག་པའོ། །དགྲ་བཅོམ་རྣམས་ལའང་མི་ཤེས་དང༌། །སོམ་ཉི་ཡོད་སྟེ་བསྟན་དགོས་སོ། །འབྲས་བུ་གཞན་གྱིས་བརྡ་སྤྲད་དགོས། །སྡུག་བསྔལ་སྒྲོས་ཙམ་གྱིས་ལམ་སྐྱེ། །དེ་བཞིན་དུ་ནི་འཇིག་པའང་ཡོད། །བརྒྱད་པ་ལ་ཡང་རིང་གནས་དང༌། །ཆོས་མཆོག་ལས་ཀྱང་ཉམས་པ་ཡོད། །རྒྱུན་ཞུགས་དགྲ་བཅོམ་ཉམས་མི་སྲིད། །རྒྱུན་ཞུགས་མཚམས་མེད་མ་གཏོགས་པའི། །མི་དགེ་བཅུ་ཀ་བྱེད་པ་སྲིད། །འཇིག་རྟེན་པ་ལ་ཡང་དག་པའི། །ལྟ་བའི་དབང་པོ་ཡོད་མ་ཡིན། །མ་སྲུངས་པ་ལ་བཅོས་སུ་མེད། །དྲང་བའི་དོན་ཞེས་བྱ་བ་མེད། །གཟུགས་མེད་པ་ཡི་སྐྱེ་མཆེད་བཞི། །འདུས་མ་བྱས་གསུམ་ལམ་རྟེན་འབྲེལ། །དེ་ལྟར་རྣམ་པ་དགུ་ཡོད་ཏོ། །སངས་རྒྱས་མང་པོ་ཅིག་ཅར་འབྱུང༌། །སེམས་གཉིས་ལམ་དང་ཉོན་མོངས་དང༌། །ས་མྱུག་ཅིག་ཅར་འབྱུང་བའང་ཡོད། །ལུས་ནི་སེམས་ཀྱིས་ཁྱབ་པ་སྟེ། །སེམས་ནི་འོད་གསལ་བ་ཡིན་ནོ། །ཕྲ་རྒྱས་མི་ལྡན་པ་ཡིན་སྟེ། །ཀུན་དཀྲིས་མཚུངས་པར་ལྡན་པ་ཡིན། །ཞིག་པ་དང་ནི་མ་སྐྱེས་དང༌། །བར་དེའི་སྲིད་པ་ཞེས་བྱ་མེད། །རྒྱུན་དུ་ཞུགས་པས་བསམ་གཏན་ཐོབ། །(ག༣༢བ)
དྲུག་པ་ཤེས་དང་ཤེས་བྱ་མིན། །དེ་ལྟར་གཞན་དང་མི་མཐུན་པའི། །གྲུབ་མཐའ་མང་ཕྱིར་དང་པོར་བཤད། །འཇིག་རྟེན་རྣམས་དང་མི་མཐུན་ཕྱིར། །འཇིག་རྟེན་འདས་པར་སྨྲ་བ་ཟེར། །གཉིས་པ་བཏགས་པར་སྨྲ་བ་རྣམས། །སྐྱེས་བུ་བྱེད་པའི་རྩལ་དང་ནི། །དུས་མ་ཡིན་པར་འཆི་བ་མེད། །ལམ་ནི་མི་འཇིག་བསྒོམ་བྱ་མིན། །དེ་ནི་བསོད་ནམས་ཀྱིས་ཐོབ་སྨྲ། །ཤར་གྱི་རི་དང་ནུབ་ཀྱི་རིར། །གནས་པའི་སྡེ་པ་རྣམ་གཉིས་ནི། །བྱང་སེམས་ངན་འགྲོ་ལས་མ་གྲོལ། །མཆོད་རྟེན་མཆོད་པས་འབྲས་བུ་ནི། །མཆོག་དུ་འགྱུར་བ་མ་ཡིན་ཟེར། །ལྔ་པ་གངས་རིར་གནས་པ་རྣམས། །ཕྱི་རོལ་པ་ལ་མངོན་ཤེས་དང༌། །ལྷ་རྣམས་ལམ་སྒོམ་མེད་ཅེས་སྨྲ། །ཕྱི་མ་བཞི་པོ་ཐུན་མོང་དུ། །ཐུབ་པའི་དབང་པོ་ཀུན་བཏགས་པའི། །སྒོ་ནས་སློབ་པ་མིན་ཞེས་མཐུན། །འདུལ་འཛིན་མཆོག་གྱུར་ཨུ་པ་ལིའི། །རྗེས་འབྲང་ཤེས་བྱའི་གཞི་ཀུན་ནི། །རྫས་ཀྱི་གཞི་ལྔར་ཡོད་ཏོ་ཞེས། །སྨྲ་ཕྱིར་ཐམས་ཅད་ཡོད་སྨྲར་གྲགས། །མདོ་སྡེ་ལེགས་སྦྱར་སྐད་དུ་འདོན། །སྣམ་ཕྲན་དགུ་ནས་ཉེར་ལྔའི་བར། །རིན་ཆེན་ཨུཏྤལ་པདྨ་དང། །ཤིང་ལོ་ཡིས་ནི་མཚན་པར་བྱེད། །དཔལ་ལམ་བཟང་པོའམ་སྲུང་བའི་མིང༌། །འདི་ལ་སྡེ་ཚན་རྣམ་པ་བདུན། །དང་པོར་གཞི་ཡོད་སྨྲ་བ་རྣམས། །འདུས་བྱས་ཐམས་ཅད་མིང་གཟུགས་དང༌། །དུས་གསུམ་གྱིས་ནི་རྣམ་པར་བསྡུས། །འདུས་མ་བྱས་ནི་རྣམ་གསུམ་འདོད། །མི་ལྡན་པ་དང་འདུས་བྱས་རྣམས། །ཤེས་བྱ་རྣམ་པར་ཤེས་བྱའང་ཡིན། །ཉོན་མོངས་རྣམས་ནི་མཚུངས་ལྡན་སྟེ། །ཐུབ་པ་རྣམ་པ་གཉིས་སུ་འདོད། །དེ་ཡི་གཟུགས་དང་དབང་རྣམས་ནི། །གཟུགས་ཅན་ལ་ཡོད་གཞན་ལ་མིན། །མཆོད་རྟེན་མཆོད་པ་འབྲས་བུ་ཆེ། །བྱང་སེམས་ངན་འགྲོ་སྤངས་པ་ནི། །རྣམ་པ་གཉིས་སུ་འདོད་པ་ཡོད། །བསོད་ནམས་ཚོགས་སུ་འགྱུར་མི་འདོད། །(ག༣༣ན)
གཉིས་པ་འོད་སྲུང་སྡེ་པ་རྣམས། །ཡོངས་སུ་ཤེས་པ་གང་ཡིན་དེ། །མ་སྤངས་པ་དང་མ་འོངས་པའི། །རྒྱུ་ལས་འབྱུང་བ་འགར་ཡང་མེད། །ཐོབ་པ་རྣམ་པར་འཇོག་པ་ནི། །ཆོས་ཀུན་རྣམ་སྨིན་ཡོད་ཏོ་ཞེས། །གསུངས་པའི་གཞུང་ལ་བསྟེན་ཏོ་ཟེར། །གསུམ་པ་ས་སྟོན་སྡེ་པ་རྣམས། །མ་འོངས་པ་དང་འདས་པ་མེད། །བདེན་པ་ཅིག་ཅར་ཁོ་ན་མཐོང༌། །ཕྱི་རོལ་ཉོན་མོངས་ཟད་པ་མེད། །ལྷ་ཡུལ་པ་ལ་ལམ་མེད་ཅིང༌། །བར་མ་དོ་ཡི་སྲིད་པ་མེད། །དགྲ་བཅོམ་བསོད་ནམས་སྐྱེ་བ་མེད། །ཕྲ་རྒྱས་སེམས་ལས་ཐ་དད་ཏོ། །འདུས་མ་བྱས་དངོས་དགུ་ཡིན་སྟེ། །མི་གཡོ་བ་དང་ལྡན་པ་གསུམ། །དགེ་སོགས་གསུམ་དང་གཉིས་པ་དང༌། །ལམ་དང་རྟེན་ཅིང་འབྲེལ་འབྱུང་སྟེ། །འདི་རྣམས་རྟག་དུ་གནས་པ་ཡིན། །དགེ་འདུན་ནང་དུ་སྟོན་པ་འདུས། །དེ་ཕྱིར་དགེ་འདུན་མཆོད་པ་མཆོག །སངས་རྒྱས་དང་ནི་ཉན་ཐོས་རྣམས། །ལམ་གཅིག་རྣམ་གྲོལ་གཅིག་པར་སྨྲ། །བཞི་པ་ཆོས་སྲུང་སྡེ་རྣམས་ནི། །རྒྱལ་བ་དགེ་འདུན་ནང་མི་འདུ། །དེ་ཕྱིར་རྒྱལ་བ་མཆོད་པ་མཆོག །རྒྱལ་དང་ཉན་ཐོས་ལམ་ཐ་དད། །ཕྱི་རོལ་པ་ལ་མངོན་ཤེས་མེད། །དགྲ་བཅོམ་ལུས་ནི་ཟག་མེད་ཟེར། །ལྔ་པ་མང་ཐོས་སྡེ་པ་རྣམས། །མི་རྟག་བདག་མེད་སྟོང་པ་དང༌། །ལམ་དང་མྱ་ངན་འདས་པ་རྣམས། །ཐུབ་པའི་འཇིག་རྟེན་འདས་ཆོས་ཡིན། །ལྷག་མ་རྣམས་ནི་འཇིག་རྟེན་པའོ། །དགྲ་བཅོམ་ལ་ཡང་སོམ་ཉི་ཡོད། །ཅེས་སོགས་རྒྱ་ཆེར་སྨྲ་བར་བྱེད། །དྲུག་པ་གོས་དམར་སློབ་མ་རྣམས། །ཁོ་ན་འཕོ་བར་སྨྲ་བ་སྟེ། །སེམས་ཅན་རྣམས་ནི་འཕོ་བ་འོ། །ཕུང་པོ་བཞི་ནི་རང་བཞིན་གཅིག །ལམ་གྱིས་ཕུང་པོ་བཀག་གོ་ཟེར། །བདུན་པ་རྣམ་པར་ཕྱེ་ནས་ནི། །སྨྲ་བའི་སྡེ་རྣམས་འདི་སྐད་དུ། །གང་ཟག་དོན་དམ་ཉིད་དུ་ཡོད། །འབྲས་བུར་མ་སྨིན་པ་ལས་གཞན། །འདས་པ་ཞེས་བྱ་ཡོད་མ་ཡིན། །འབྲས་བུ་ལས་(ག༣༣བ)
གཞན་མ་འོངས་མེད། །རིགས་མི་མཐུན་པའི་ཆོས་རྣམས་ནི། །དེ་མ་ཐག་པའི་རྒྱུར་མི་འགྱུར། །གཟུགས་ནི་འདྲ་བའི་རྒྱུ་མ་ཡིན། །གཟུགས་ཀྱི་འདྲ་བའི་རྒྱུ་ཡང་མེད། །དེ་སྐད་སྨྲ་ཞིང་ལྟ་བར་བྱེད། །སྟོན་པ་གཉིས་པ་སྟོབས་བཅུ་ལྡན། །འོད་སྲུང་ཆེན་པོའི་རྗེས་ཞུགས་སྟེ། །གནས་བརྟན་རྒན་རབས་དག་འདུས་པས། །གནས་བརྟན་པ་ཡི་སྡེ་པར་གྲགས། །མདོ་སྡེ་ཤ་ཟའི་སྐད་དུ་འདོན། །སྣམ་ཕྲན་ལྔ་ནས་ཉེར་གཅིག་པར། །རྟགས་ནི་མེ་ཏོག་སོ་ཙི་ཀ །སྐྱོང་བ་ལ་སོགས་མིང་གི་མཐའ། །འདི་ལ་སྡེ་ཚན་རྣམ་པ་གསུམ། །རྒྱལ་བྱེད་ཚལ་དང་འཇིགས་བྱེད་རི། །གཙུག་ལག་ཁང་ཆེན་གནས་པ་སྟེ། །གནས་ཀྱི་དབང་གིས་ཐ་དད་ཀྱིས། །གསུམ་ག་ལྟ་བའི་རྣམ་པ་མཐུན། །ཐུབ་པ་ལེགས་སྦྱར་ཚིག་མི་གསུང༌། །བྱང་སེམས་བསྐལ་པ་གྲངས་མེད་པ། །བཅུ་ནས་སུམ་བཅུའི་བར་གྱིས་འགྲུབ། །ཐར་པ་འབའ་ཞིག་འདུས་མ་བྱས། །ཡིན་གྱིས་འདུས་མ་བྱས་གཞན་མེད། །མི་ཤེས་པ་དང་ལོག་ཤེས་མེད། །ཕྲ་རྒྱས་སེམས་ལས་ཐ་དད་ཏོ། །འགོག་སྙོམས་ན་ཡང་སེམས་ཡོད་ཅེས། །མཐུན་པར་གྲུབ་པའི་མཐའ་སྨྲ་འོ། །བསླབ་ལ་གུས་མཆོག་སྟོན་པའི་སྲས། །དགྲ་གཅན་ཟིན་གྱི་རྗེས་ཞུགས་སྟེ། །རྒྱལ་རིགས་བྲམ་ཟེའི་རིགས་ལ་སོགས། །རིགས་མཐོན་འདུས་ཕྱིར་མང་པོ་ཡིས། །བཀུར་བའི་སྡེ་པ་ཞེས་གྲགས་པ། །མདོ་སྡེ་ཟུར་ཆག་སྐད་དུ་འདོན། །སྣམ་ཕྲན་གནས་བརྟན་པ་དང་མཚུངས། །རྟགས་ནི་དཔལ་གྱི་བེ་འུ་སྟེ། །སྦས་པ་ལ་སོགས་མིང་གི་མཐའ། །འདི་ལ་སྡེ་ཚན་རྣམ་པ་གསུམ། །ཀུ་རུ་ཀུལླེའི་ཕུག་གནས་ཕྱིར། །ས་སྒྲོགས་རིགས་ཀྱི་སྡེ་ཞེས་གྲགས། །སློབ་དཔོན་སྲུང་བ་པ་དང་ནི། །གནས་མ་བུ་ཡི་རྗེས་འབྲང་ཕྱིར། །སོ་སོའི་སྡེ་པའི་མིང་དུ་གྲགས། །གསུམ་ག་གྲུབ་པའི་མཐའ་མཐུན་སྟེ། །གང་ཟག་ཕུང་པོ་མ་ཡིན་ལ། །ཕུང་པོ་ལས་གཞན་ཀྱང་མ་ཡིན། །ཕུང་པོ་རྣམས་ནི་བརྟེན་པར་འདུག །(ག༣༤ན)
སྒོ་ལྔའི་རྣམ་པར་ཤེས་པ་ཡིས། །འདོད་ཆགས་སྐྱེ་བར་མི་འགྱུར་ལ། །བྲལ་བར་ཡང་ནི་མི་འགྱུར་རོ། །མཐོང་ལམ་སེམས་ཀྱི་སྐད་ཅིག་མ། །བཅུ་གཉིས་ཚུན་ནོ་དེ་ཕན་ཆད། །འབྲས་བུ་དང་ནི་བཅས་པར་གནས། །ཤེས་བྱ་བརྗོད་དུ་ཡོད་པ་དང༌། །མེད་པ་གཉིས་སུ་གནས་སོ་ཟེར། །ཁ་ཅིག་དོན་དང་ལ་ལ་གནས། །གཞན་དག་སློབ་དཔོན་ཐ་དད་ཕྱིར། །སྡེ་ཚན་རྣམ་པ་བཅོ་བརྒྱད་གྱུར། །འདི་ནི་སྡེ་པ་ཐ་དད་པ། །བསྟན་པ་བསྡུས་པ་ཇི་བཞིན་བཤད། །སློབ་དཔོན་པདྨ་འབྱུང་གནས་ཀྱི། །དགེ་ཚུལ་ལོ་དྲིར་གྱེས་པའི་ཚུལ། །རྣམ་པ་གཞན་དུ་ཡང་བཤད་དེ། །འོད་སྲུང་ས་སྟོན་ཆོས་སྲུང་དང༌། །གཞི་ཀུན་པ་སྟེ་ཡོད་སྨྲ་བཞི། །ཤར་ནུབ་དབུས་གནས་རྣམ་པར་ཕྱེ། །བཏགས་དང་འཇིག་རྟེན་འདས་སྨྲ་སྟེ། །ཕལ་ཆེན་སྡེ་པ་རྣམ་པ་དྲུག །ས་སྒྲོགས་གོས་དམར་སྲུང་བ་ལ། །མང་ཐོས་གནས་མ་བུ་པ་སྟེ། །མང་པོས་བཀུར་བ་རྣམ་པ་ལྔ། །རྒྱལ་བྱེད་ཚལ་གནས་འཇིགས་བྱེད་རི། །གཙུག་ལག་ཁང་སྟེ་གནས་བརྟན་པའི། །སྡེ་ཚན་གསུམ་སྟེ་བཅོ་བརྒྱད་བཤད། །གྱེས་ཚུལ་རྣམ་པ་གཞན་དུ་ཡང༌། །བཤད་པ་ཡོད་སྟེ་འདིར་མ་བརྗོད། །ཁ་ཅིག་ཡོད་སྨྲ་སྡེ་པ་གཞན། །འབྱུང་བའི་གཞི་ཡིན་སྟོན་པའི་སྲས། །དགྲ་གཅན་ཟིན་གྱིས་རྗེས་སུ་འཇུག །འོད་སྲུང་རྗེས་འཇུག་ཕལ་ཆེན་པ། །མང་བཀུར་ཉེ་བ་འཁོར་རྗེས་འབྲང༌། །འཕགས་པའི་རིགས་སྨྲ་གནས་བརྟན་པ། །ཀ་ཏྱ་ཡ་ནའི་རྗེས་འབྲང་ཟེར། །བྲམ་ཟེ་རྒྱ་མཚོའི་རྡུལ་གྱུར་ཚེ། །མྱ་ངན་འདས་པའི་འོག་ཏུ་ཡང༌། །གདུལ་བྱའི་དོན་ཕྱིར་བསྟན་པ་ནི། །རྣམ་པ་བཅོ་བརྒྱད་གྱེས་གྱུར་ཅེས། །སྨོན་ལམ་ཆེན་པོ་ལྔ་བརྒྱ་ཡི། །རྣམ་པ་གཅིག་ནི་འདི་ཡིན་ཕྱིར། །སྟོན་པའི་འཕྲིན་ལས་ངེས་པ་ཡིན། །འདི་ཚུལ་བདག་གིས་མདོར་བསྡུས་ནས། །བརྗོད་དགེས་ཐུབ་བསྟན་དར་རྒྱས་ཤོག །དེ་ལྟར་རྣམ་པ་བཅོ་བརྒྱད་གྱེས་པའི་ཚེ། །(ག༣༤བ)
འདི་ནི་བསྟན་པ་ཡིན་གྱི་གཞན་མིན་ཞེས། །སོ་སྐྱེའི་མཁས་པ་རྣམས་ནི་རྩོད་པར་གྱུར། །སྟོན་པ་མྱ་ངན་འདས་ནས་ལོ་ཡི་གྲངས། །སུམ་བརྒྱ་འདས་ཚེ་ཁ་ཆེའི་ཡུལ་ཁམས་སུ། །རྒྱལ་པོ་ཀ་ནི་ལྷ་ཡིས་སྦྱིན་བདག་བྱས། །དགྲ་བཅོམ་བྱང་སེམས་ལྔ་བརྒྱ་ཕྲག་རེ་དང༌། །སོ་སྐྱེའི་པཎ་ཆེན་ཁྲི་དང་དྲུག་སྟོང་འདུས། །རྒྱལ་བའི་བཀའ་ཡི་བསྡུ་བ་གསུམ་པ་བྱས། །ཀྲྀ་ཀྲིའི་རྨི་ལམ་ལུང་བསྟན་མདོ་དྲངས་ནས། །གྱེས་པ་བཅོ་བརྒྱད་ཀུན་ཀྱང་བསྟན་པར་བསྡུས། །དེ་ཡང་ཁྱིམ་བདག་མགོན་མེད་ཟས་སྦྱིན་གྱི། །བུ་མོ་མ་ག་དྷ་ཡི་བཟང་མོ་ཡིས། །གྲོང་ཁྱེར་ཆེན་པོ་བུ་རམ་ཤིང་འཕེལ་དུ། །སྟོན་པ་སྤྱན་དྲངས་མུ་སྟེགས་ཕམ་བྱས་ཚེ། །ད་ལྟར་མ་ཟད་སྔོན་ཡང་བུ་མོ་འདིས། །མུ་སྟེགས་ཐབས་ཀྱིས་བཏུལ་བ་ཉོན་ཞིག་གསུངས། །སྐྱེ་རྒུའི་ཚེ་ལོ་ཉི་ཁྲིའི་དུས་ཀྱི་ཚེ། །རྫོགས་པའི་སངས་རྒྱས་འོད་སྲུང་ཞེས་པ་བྱུང༌། །དེ་ཡི་སྦྱིན་བདག་རྒྱལ་པོ་ཀྲྀ་ཀྲི་ལ། །རྨི་ལམ་ངོ་མཚར་རྣམ་པ་བཅུ་རྨིས་པ། །བྲམ་ཟེ་མཚན་མཁན་རྣམས་ལ་དྲིས་པ་དང༌། །དེ་དག་རྣམས་ཀྱིས་དེ་དོན་མ་ཤེས་ཀྱང༌། །རྒྱལ་པོའི་བུ་མོ་གསེར་ཕྲེང་ཅན་ཞེས་པ། །རྣམ་དཔྱོད་ལྡན་ཞིང་སངས་རྒྱས་བསྟན་ལ་གུས། །དེ་ལ་མུ་སྟེགས་ཅན་རྣམས་སྤ་གོང་བས། །འདི་ལན་གླན་པའི་དུས་ནི་འདི་ཡིན་སྙམ། །རྒྱལ་པོའི་གཡར་ལམ་དེ་དག་ཤིན་དུ་ངན། །རྒྱལ་པོ་ཉིད་ཀྱི་ཐུགས་ལྟར་གཅེས་པ་ཅིག །སྲོག་གི་བླུད་དུ་བཏང་ན་ཟློག་གོ་ཟེར། །སྙིང་ལྟར་གཅེས་པ་གསེར་ཕྲེང་ཅན་ཡིན་མོད། །འདི་ནི་བླུད་དུ་གཏོང་བར་མི་ཕོད་ཟེར། །འདི་ཉིད་སྲོག་གི་བླུད་མར་མ་བཏང་ན། །འགྲོངས་སམ་རྒྱལ་སྲིད་འཇིག་པར་ངེས་སོ་ཞེས། །སྨྲས་པ་བདག་ཉིད་གཅེས་ཕྱིར་ཁས་ལེན་བྱས། །བུ་མོས་ཤེས་སྟེ་ཡབ་ལ་འདི་སྐད་སྨྲས། །ཡབ་ལ་ཕན་ན་བདག་སྲོག་འདོར་སྤྲོ་ཡང༌། །འདི་དག་རྣམས་ལ་ཤེས་པ་འགའ་ཡང་མེད། །དེ་བཞིན་གཤེགས་པའི་དྲུང་དུ་ཞུས་ཤིག་ཟེར། །(ག༣༥ན)
རྒྱལ་པོས་ཐུབ་པའི་གཙོ་ལ་ཞུས་པའི་ཚེ། །རྒྱལ་བའི་ཞལ་ནས་རྨི་ལམ་དེ་དག་ནི། །ཁྱོད་ལ་ངན་པར་འགྱུར་པ་མ་ཡིན་སྟེ། །མ་འོངས་སྐྱེ་རྒུའི་ཚེ་ལོ་བརྒྱ་པའི་ཚེ། །ཤཱཀྱ་ཐུབ་པ་ཞེས་བྱའི་སངས་རྒྱས་འབྱུང། །དེ་ཡི་བསྟན་པ་ཐ་མར་གྱུར་པའི་ཚེ། །ཇི་ལྟར་འབྱུང་བའི་མཚན་མ་ཡིན་གྱིས་ཉོན། །སྡོམ་ནི། གླང་གཉིས་སྤྲེའུ་གཉིས་ཙནྡན་ཕྱེ། །ལྡུམ་ར་ཁྲོན་པ་ཐབ་མོ་རས། །གླང་པོ་ཆེ་ཞིག་སྐར་ཁུང་ནས་བྱུང་སྟེ། །ལུས་ཐོན་མཇུག་མ་ཐོགས་པར་མཐོང་བ་ནི། །དེ་ཚེ་རབ་བྱུང་རྣམས་ནི་ཁྱིམ་སྤངས་ཀྱང༌། །གཙུག་ལག་ཁང་ལ་ཁྱིམ་གྱི་འདུ་ཤེས་ཀྱིས། །འདོར་བར་མི་ནུས་ཆགས་པར་འགྱུར་བའི་ལྟས། །གླང་ཆེན་ཕལ་པས་སྤོས་ཀྱི་གླང་པོ་ཆེ། །གནས་ནས་སྐྲོད་པ་མཐོང་བ་དེ་ཡང་ནི། །ཁྲིམས་འཆལ་རྣམས་ཀྱིས་བསླབ་གསུམ་པ་དག་མཆོག །གནས་ནས་འབྱིན་པར་འགྱུར་བའི་སྔ་ལྟས་ཡིན། །སྤྲེ་འུས་སྤྲེ་འུའི་ཚོགས་ལ་དབང་བསྐུར་བ། །རྨི་ལམ་ནང་དུ་མཐོང་བ་དེ་ཡང་ནི། །མཁན་སློབ་ལ་སོགས་བླ་མའི་གནས་རྣམས་ཀྱི། །མཚན་ཉིད་མི་ལྡན་བཞིན་དུ་བླ་མའི་གནས། །བྱེད་ཅིང་སློབ་མ་སྡུད་པར་འགྱུར་བའི་ལྟས། །མི་གཙང་བ་ཡིས་གོས་པའི་སྤྲེ་འུ་ཞིག །སྤྲེ་འུ་ཀུན་ལ་མི་གཙང་སྐུད་བྱེད་པ། །དེ་ནི་ཚུལ་འཆལ་རྣམས་ཀྱི་ཚུལ་ལྡན་ལ། །ཉེས་པ་གླེང་ཞིང་བསྒོ་བར་འགྱུར་བའི་ལྟས། །ཙན་དན་གོརྴཱིཥ་ཡི་སྡོང་པོ་དང༌། །ཕལ་པའི་ཤིང་སྡུམ་མགོ་སྙོམ་བྱེད་པ་ནི། །སྒྲ་ཚད་རྩིས་སོགས་མུ་སྟེགས་གཞུང་རྣམས་དང༌། །རྒྱལ་བའི་བཀའ་རྣམས་མགོ་སྙོམ་བྱེད་པའི་ལྟས། །ཕྱེ་བྲེ་གང་དང་མུ་ཏིག་བྲེ་གང་ཞིག །བརྗེ་བར་མཐོང་བ་དེ་ནི་མ་འོངས་ཚེ། །ཟང་ཟིང་ངན་ངོན་ཕྱི་ཕྱེ་དང་འདྲ་བའི་ཆེད། །མུ་ཏིག་ལྟ་བུའི་དམ་ཆོས་འཚོང་བའི་ལྟས། །དགེ་འདུན་རྣམས་ཀྱི་ལྡུམ་ར་ཕུན་ཚོགས་རྣམས། །ཁྱིམ་པ་མང་པོས་སྤྱོད་པ་མཐོང་བ་དེ། །མ་འོངས་དེ་ཚེ་དགེ་འདུན་འདུ་བའི་སྒོ། །(ག༣༥བ)
ཕལ་ཆེར་གཉེན་དང་ཡུལ་ཕྱོགས་ལ་སོགས་པས། །བསྡུས་པའི་ཁྱིམ་པས་སྤྱོད་པར་འགྱུར་བའི་ལྟས། །རབ་ཏུ་སྐོམ་པའི་མི་ཞིག་ཆུ་འཚོལ་ཕྱིར། །མྱ་ངམ་ཐང་ལ་རབ་ཏུ་རྒྱུག་བྱེད་ཅིང༌། །ཡན་ལག་བརྒྱད་ལྡན་ཆུས་གང་ཁྲོན་པ་ཅིག །མི་དེའི་རྗེས་སུ་འབྲེང་ལ་མི་དེས་ཀྱང༌། །མཐོང་བཞིན་མི་འཐུང་འོན་ཀྱང་ཆུ་འཚོལ་བར། །ཁྱོད་ཀྱིས་རྨི་ལམ་ནང་དུ་མཐོང་བ་དེ། །མ་འོངས་དེ་ཚེ་ཆོས་འདོད་ཆོས་འཚོལ་ཞིང༌། །དམ་ཆོས་བསྟན་ན་དོན་དུ་མི་གཉེར་ལ། །འོན་ཀྱང་འཚོལ་བར་བྱེད་རྣམས་འབྱུང་བའི་ལྟས། །གཞན་ཡང་རྒྱལ་པོ་ཁྱོད་ཀྱི་རྨི་ལམ་ན། །མི་རྣམས་སྡེ་ཚན་སྡེ་ཚན་བཅད་ནས་ནི། །རྩོད་ཅིང་འགྱེད་ལ་འཁྲུག་པར་མཐོང་བ་དེ། །དེ་ཚེ་ལྟ་དང་གྲུབ་མཐའ་སྣ་ཚོགས་པ། །སོ་སོར་སྡེ་སྡེར་བཅད་ནས་རྩོད་པའི་ལྟས། །རྒྱལ་པོ་ཁྱོད་ཀྱི་རྨི་ལམ་ནང་རོལ་ན། །མི་ནི་བཅོ་བརྒྱད་ཀྱིས་ནི་རས་ཡུག་གཅིག །བགོས་པས་མི་རེས་རས་ཡུག་རེ་རེ་ཐོབ། །འོན་ཀྱང་རྩ་བའི་རས་ཡུག་མ་ཉམས་པར། །མཐོང་བ་དེ་ནི་ཤཱཀྱ་ཐུབ་པ་དེའི། །བསྟན་པ་རྣམ་པ་བཅོ་བརྒྱད་དུ་གྱེས་འགྱུར། །རེ་རེས་བསྟན་པ་ཡོངས་རྫོགས་རེ་རེ་འཐོབ། །རྣམ་པར་གྲོལ་བའི་རས་ཀྱང་ཉམས་པ་མེད། །དེ་ལྟར་ཁྱོད་ཀྱི་རྨི་ལམ་རྣམ་པ་བཅུ། །མ་འོངས་དེ་ཚེ་འབྱུང་བའི་ལྟས་ཡིན་གྱི། །ཁྱོད་ལ་གནོད་པར་འགྱུར་བ་མེད་ཅེས་གསུངས། །དེ་ལྟར་གསེར་ཕྲེང་ཅན་གྱི་རྟོགས་བརྗོད་མདོ། །དྲངས་སྟེ་གྱེས་པ་བཅོ་བརྒྱད་བཀའ་རུ་བསྡུས། །འདི་ནི་རྒྱལ་བའི་བཀའ་བསྡུ་གསུམ་པ་ཡིན། །འདི་ལ་གནས་བརྟན་པ་ཁོ་ན་སྡེ་པའི་རྩ་བར་འདོད་པ་དང་ཐམས་ཅད་ཡོད་སྨྲ་རྩ་བར་འདོད་པ་སོགས་བཤད་ལུགས་མང་དུ་ཡོད་ཀྱང་གསང་སྔགས་སུ་དགྱེས་རྡོར་དང་སམྦྷུ་ཊར་རྩ་འཁོར་ལོ་བཞི་ལ་སྡེ་པ་བཞིའི་མིང་དུ་གསུངས་པ་དང་དུས་འཁོར་དུ་ཞལ་བཞི་ལས་སྡེ་པ་བཞི་སྤྲོས་པ་སོགས་ཡོད་པས་རྩ་བའི་སྡེ་པ་བཞི་ཁོ་ནར་འཐད་པ་ཡིན་ནོ། །མཁས་པ་ཆེན་པོ་ས་སྐྱ་པཎྜི་ཏས། །ལྷ་ཆེན་ཞེས་བྱ་མཚམས་མེད་གསུམ་བྱས་པས། །རང་ཞུགས་རྟགས་བླངས་དགྲ་བཅོམ་དུ་གྲགས་སྟེ། །འཁོར་མང་བསྡུས་པས་བསྟན་པ་དཀྲུགས་བྱས་སྟེ། །སངས་རྒྱས་འདས་འོག་སོ་སྐྱེས་འཁོར་བསྡུས་པ། །འདི་ལས་མང་བ་མེད་ཅེས་བཤད་སྣང་བ། །འདི་ཡི་ཁུངས་ནི་གང་ཡིན་དཔྱད་པར་འོས། །རྗེས་འབྲང་(ག༣༦ན)
འགའ་ཡིས་རྟོག་གེ་འབར་བ་ལས། །བཤད་པའི་བཟང་པོ་དང་ནི་གཅིག་པ་སྟེ། །དེ་ཡིས་བཟང་པོ་ཡིན་པར་ཁས་བླངས་སོ། །ཞེས་སོགས་ཐོབ་པའི་ཕྱིར་ཞེས་བྲིས་མོད་ཀྱང༌། །བདུད་ཀྱིས་སྤྲུལ་པ་བཟང་པོའི་མིང་ཅན་དེས། །ཆོ་འཕྲུལ་སྣ་ཚོགས་བསྟན་ནས་སོ་སྐྱེ་རྣམས། །ཡིད་བསྒྱུར་མགུ་ཚེ་ལམ་གཞན་སྟོན་པར་བཤད། །ལྷ་ཆེན་དེ་ལ་རྫུ་འཕྲུལ་མི་ལྡན་ཕྱིར། །ད་ནང་རྫུ་འཕྲུལ་ཉམས་ཞེས་རྫུན་རིབ་ཀྱིས། །འཁོར་རྣམས་བསླུས་པར་རབ་དབྱེ་ཉིད་ལས་བྱུང༌། །སྤྲུལ་པ་ལ་ནི་སེམས་མེད་པར་གསུངས་ཕྱིར། །སྤྲུལ་པ་ཡིན་ན་སོ་སྐྱེར་ཡང་མི་རིགས། །དེས་ན་རྫུ་འཕྲུལ་མེད་པའི་ལྷ་ཆེན་དེ། །རྫུ་འཕྲུལ་ལྡན་པའི་བཟང་པོ་མ་ཡིན་ནོ། །དེ་ལྟར་བཀའ་བསྡུ་རིམ་པ་གསུམ་པོ་ནི། །ཐུན་མོང་ཐེག་པའི་བཀའ་ཡི་བསྡུ་བ་སྟེ། །འདི་ལ་བཀའ་བསྡུ་གསུམ་པ་ཕན་མ་གྲགས། །ཐེག་ཆེན་ཁོ་ནའི་བཀའ་ཡི་བསྡུ་བ་ནི། །གྲོང་ཁྱེར་རྒྱལ་པོའི་ཁབ་ཀྱི་ལྷོ་ཕྱོགས་རི། །བི་མ་ལ་སྭ་བྷཱ་ཝ་ཞེས་བྱ་བར། །རྒྱལ་བའི་སྲས་པོ་འབུམ་ཕྲག་བཅུ་འདུས་སྟེ། །འཇམ་དཔལ་བྱམས་པ་ཕྱག་རྡོར་རྣམ་གསུམ་གྱིས། །མདོ་སྡེ་འདུལ་བ་མ་མོ་བསྡུས་པར་གྲགས། །འདི་ཚེ་སྡེ་སྣོད་རེ་རེ་ལྟ་ཅི་སྨོས། །ཆོས་ཀྱི་རྣམ་གྲངས་རེ་རེའང་ཚད་མེད་དེ། །ཆོས་ཀྱི་རྣམ་གྲངས་ཀུན་ནས་མིག་གཅིག་བུའི། །ཚད་ཀྱང་གཟུང་མི་ནུས་པར་གསུངས་ཕྱིར་རོ། །འདི་ལ་བསྡུ་བ་གཉིས་པ་སོགས་མ་གྲགས། །རྡོ་རྗེ་ཐེག་པའི་རྒྱུད་སྡེ་རྒྱ་མཚོ་རྣམས། །ཞུ་བ་པོ་དང་མཁའ་འགྲོའི་ཚོགས་རྣམས་ཀྱིས། །བསྡུས་སྟེ་ཨོ་ཌྱན་སྤྲུལ་པའི་ཞིང་ལ་སོགས། །ནུབ་པ་མེད་པའི་ཞིང་ན་རྟག་པར་གནས། །དྲང་བའི་དོན་གྱིས་གདུལ་བྱའི་སྣང་བ་བཞིན། །བཀའ་ཡི་སྡུད་པོའང་དུ་མར་སྣང་བ་སྟེ། །ཅུང་ཟད་ངེས་པའི་དོན་དུ་བཀའ་མ་ལུས། །སྡུད་པོ་གསང་བདག་ཕྱག་རྡོར་ཁོ་ན་སྟེ། །མདོ་ལས་སྨོན་ལམ་མཐུ་ཡིས་ཡིན་པར་བཤད། །དུས་ཀྱི་འཁོར་ལོར་རྒྱལ་(ག༣༦བ)
བ་ཀུན་གྱི་སྙན། །གཅིག་བསྡུས་སེམས་དཔའ་ཕྱག་རྡོར་ཡིན་པར་གསུངས། །ཤིན་དུ་ངེས་པའི་དོན་དུ་སྟོན་པོ་དང༌། །སྡུད་པོ་བསྟན་བྱའི་ཆོས་རྣམས་ཐམས་ཅད་ཀྱང༌། །ཡེ་ཤེས་གཅིག་ལས་རྣམ་དབྱེར་མེད་པ་སྟེ། །ཐམས་ཅད་ལྷན་ཅིག་སྐྱེས་དངོས་གཅིག་དུ་བསྟན། །དེ་ལྟར་བསྡུ་བྱའི་བསྟན་པ་རིན་ཆེན་ནི། །རྫོགས་སངས་རྒྱས་ཀྱིས་འོད་སྲུང་ཆེན་པོར་གཏད། །ཀུན་དགའ་ཤ་ནའི་གོས་ཅན་ཉེར་སྦས་དང༌། །དྷི་དྷི་ཀ་དང་དེ་ནས་བྷི་བྷི་ཀ །བུ་ཧ་ནནྟི་བུདྡྷ་མེ་ཏ་དང༌། །རྩིབས་དང་སུ་ན་ཤ་ཏ་རྟ་སྐད་དང༌། །ཤི་བ་ལ་དང་ཀླུ་སྒྲུབ་འཕགས་པ་ལྷ། །རཱ་ཧུ་ལ་དང་སངྒྷ་ནནྟི་དང༌། །དགྲ་བཅོམ་ག་ཡ་ཤ་དང་ཀུ་མ་ར། །ཤ་ཡ་ཏ་དང་བ་སུ་བནྡུ་དང། །མ་ནེ་ཏ་དང་ཧ་ཀ་ལི་ཀ་ནེ། །སེང་གེའི་བར་དུ་རིམ་གྱིས་གཏད་ཏོ་ཞེས། །ལངྐར་གཤེགས་པའི་མདོ་ཡི་འབྲེལ་པར་བྱུང༌། །ཐུན་མོང་ཐེག་པའི་བསྟན་པའི་གཏད་རབས་ཡིན། །ཐེག་ཆེན་ཐུན་མོང་མིན་པའི་བསྟན་པ་ནི། །འཇམ་དཔལ་གྱིས་ནི་འཕགས་མཆོག་ཀླུ་སྒྲུབ་དང༌། །བྱམས་པས་ཐོགས་མེད་རྗེས་སུ་བཟུང་མཛད་དེ། །ཟབ་མོ་ལྟ་དང་རྒྱ་ཆེན་སྤྱོད་པའི་རྒྱུད། །དཔལ་ལྡན་ཨ་ཏི་ཤ་ཡི་བར་ཉིད་དུ། །འཕགས་པའི་འབྱུང་གནས་རྒྱ་གར་དེ་ཉིད་དུ། །བསྟན་པའི་གཏད་རབས་རྒྱུན་མ་ཆད་པ་སྟེ། །ཇོ་བོའི་རྣམ་ཐར་ལམ་ཡིག་ཆེན་མོ་ལས། །དཔལ་ལྡན་ན་རོ་པ་ཡིས་ཇོ་བོ་ལ། །བསྟན་པ་གཏད་ནས་ལྷོ་ཕྱོགས་བྱོན་ཞེས་བཤད། །ན་རོ་ཞབས་ཀྱིས་མངའ་བདག་མར་པ་ལ། །ཁ་བ་ཅན་གྱི་རྒྱལ་ཁམས་འདུལ་བའི་ཕྱིར། །ལུང་བསྟན་རྒྱལ་ཚབ་བསྐོས་ཞེས་གསལ་བར་བྱུང༌། །དེ་ཕྱིར་དཔལ་ལྡན་ན་རོའི་ཞབས་དེ་ཡིས། །ཐུབ་པའི་བསྟན་པ་རྣམ་པ་གཉིས་ཕྱེ་སྟེ། །ཐུན་མོང་ཐེག་པའི་བསྟན་པ་རྒྱ་མཚོ་ནི། །ཇོ་བོ་ཨ་ཏི་ཤ་ཡི་ཕྱག་དུ་གཏད། །ཡང་སྙིང་རྡོ་རྗེ་ཐེག་པའི་སྒྲུབ་པའི་བསྟན། །མར་པ་ཆོས་ཀྱི་བློ་གྲོས་ལ་གཏད་ནས། །གཉི་གས་བྱང་ཕྱོགས་(ང༣༧ན)
འདུལ་བར་ལུང་བསྟན་མཛད། །རྒྱལ་བས་ཤེས་ཕྱིན་མདོ་ལས་ཟབ་མོའི་དོན། །བྱང་གི་ཕྱོགས་སུ་རྒྱས་པར་ལུང་ཡང་བསྟན། །བཀའ་ཕྱག་གཉིས་ཀའི་བརྒྱུད་པའི་ཆུ་བོ་ནི། །ཏིང་འཛིན་རྒྱལ་པོའི་མདོ་ལས་ལུང་བསྟན་པའི། །དཔལ་ལྡན་སྒམ་པོ་པ་ལ་གཅིག་དུ་འདྲེས། །དེ་ལས་བྱུང་བའི་བསྟན་པ་རིན་ཆེན་ནི། །དངོས་དང་ཡན་ལག་དུ་མར་བཅས་པ་ཡིས། །དེང་སང་དུ་ཡང་ཅུང་ཟད་ཙམ་ཞིག་གནས། །བཀའི་བསྡུ་བ་ཁྱད་པར་དུ་བཤད་པའི་སྐབས་སྟེ་གཉིས་པའོ།། །།བསྐལ་བཟང་སངས་རྒྱས་བཞི་པ་ཤཱཀྱའི་ཏོག །འདི་ཡི་སྐུ་གསུམ་རྟེན་མཆོག་བྱུང་ཚུལ་ནི། །སྒྲ་སྒྲོགས་རྒྱལ་པོ་ཨུ་ཏྲ་ཡ་ན་དང༌། །གཟུགས་ཅན་སྙིང་པོ་ཕན་ཚུན་མ་མཐོང་བའི། །མཛའ་བོར་བྱས་སྟེ་སྐྱེས་ཀྱིས་འགྲུལ་བའི་ཚེ། །རིན་ཐང་མེད་པའི་ནོར་བུའི་ཁྲབ་བསྐུར་བས། །གཟུགས་ཅན་སྙིང་པོས་སྐྱེས་ལན་མ་རྙེད་ནས། །སྟོན་པར་གསོལ་བས་རས་ལ་རྒྱལ་བའི་སྐུ། །མདོར་བསྡུས་བཀར་བཅས་བྲིས་ལ་སྐུར་ཞིག་གསུངས། །སྟོན་པའི་གཟི་བྱིན་ཉི་འོད་ལྟར་འབར་བས། །གཟོ་བོ་རྣམས་ཀྱི་འབྲི་བར་མ་ནུས་ནས། །ཁྲུས་རྫིང་སྟེང་བཞུགས་ཆུ་ནང་ཤར་བ་ཡི། །སྐུ་གཟུགས་ཇི་བཞིན་རས་ལ་རི་མོར་བྲིས། །སྟེང་དང་འོག་དུ་རྟེན་འབྲེལ་ལུགས་འབྱུང་ལྡོག །གསུམ་ལ་སྐྱབས་འགྲོ་བསླབ་པའི་གཞི་ལྔ་དང༌། །ཕན་ཡོན་བཅས་བྲིས་གསེར་དངུལ་ཟངས་མ་ཡི། །དོང་བུར་བཅུག་སྟེ་གླང་ཆེན་སྟེང་བཞག་ནས། །འདི་ནི་འཇིག་རྟེན་གསུམ་ལས་འདས་པའི་སྐྱེས། །ཤེད་མཐུན་དགྱེས་པ་ཁྱོད་ལ་བདག་གིས་བསྐུར། །ཁྱོད་ཀྱིས་དཔུང་ཚོགས་ཡན་ལག་རྣམ་བཞིས་གསུས། །གོ་སྐབས་ཡངས་པར་སྤོས་ཆུ་མེ་ཏོག་གཏོར། །གདུགས་བཅས་སེང་གེའི་ཁྲི་ལ་བཞུགས་གསོལ་ནས། །དད་ཅིང་གུས་པས་(ང༣༧བ)
འདུད་དེ་ཞལ་ཕྱེ་ཞེས། །ཕྲིན་ཡིག་བསྲིངས་སྟེ་རྒྱལ་པོས་ཞལ་ཕྱེ་ཚེ། །ཚོང་པ་ཀུན་གྱིས་སངས་རྒྱས་ཕྱག་འཚལ་ཞེས། །ཐོས་པས་རྒྱལ་པོ་སྤུ་ལངས་མཆི་མ་གཡོས། །བཀའ་ཡི་ཚིགས་སུ་བཅད་པ་རྣམས་བཀླགས་པས། །སྐྱབས་སུ་སོང་སྟེ་དགེ་བསྙེན་ཉིད་དུ་གྱུར། །བདེན་པ་མཐོང་སྟེ་ཆོས་མིག་ཐོབ་པར་གྱུར། །ཐུབ་པའི་བྲིས་སྐུ་ཆུ་ལོན་མ་ཞེས་གྲགས། །ཡང་ནི་སེར་སྐྱར་དམ་ཆོས་གསུང་བའི་ཚེ། །ཤཱཀྱ་མིང་ཆེན་གྱི་ནི་མཆིས་བྲང་གིས། །བྲན་མོ་མུ་ཏིག་དོ་ཤལ་ལེན་པར་བསྐུལ། །ཀྱེ་མ་བྲན་མོའི་དངོས་པོ་སྡུག་བསྔལ་སྟེ། །དམ་ཆོས་འདི་འདྲ་ཉན་པའི་སྐལ་མེད་སྙམ། །དད་ཅིང་གདུང་ཤུགས་བཅས་པས་ལ་གོར་སོང༌། །སྟོན་པས་དེ་ཡི་དད་པ་དགོངས་ནས་ནི། །དམ་ཆོས་ཚིགས་བཅད་གཅིག་ཅིག་བྲིས་སྟེ་བསྐུར། །དགའ་མགུ་དང་བའི་སེམས་ཀྱིས་སོང་བ་དེ། །ལམ་དུ་བ་དྲུས་ཤིག་གིས་བརྡུངས་སྟེ་ཤི། །དེ་མ་ཐག་དུ་སིངྒྷ་ལ་ཡི་ཡུལ། །རྒྱལ་པོའི་བཙུན་མོ་མཆོག་གི་མངལ་དུ་ཞུགས། །བཙས་ཚེ་མཁའ་ལས་མུ་ཏིག་ཆར་པ་བབ། །མིང་ཡང་མུ་ཏིག་ཅན་ཞེས་བྱ་བར་གྱུར། །ཆེར་སྐྱེས་ཚེ་ན་ཡུལ་དབུས་ཚོང་པ་ཡིས། །རྒྱལ་བའི་བཀའ་ལ་ཁ་ཏོན་བྱས་པ་ཐོས། །བཟང་པོའི་གླུ་དེ་ད་དུང་ལོང་ཞིག་སྐད། །འདི་ནི་གླུ་མིན་སངས་རྒྱས་བཀའ་ཡིན་སྨྲས། །སངས་རྒྱས་ཞེས་བྱ་ཐོས་པ་ཙམ་གྱིས་ནི། །བ་སྤུ་ལྡང་ཞིང་མཆི་མ་འཁྲུག་པ་ཡིས། །སླར་དྲིས་ཚོང་པས་ཡོན་ཏན་ཅི་ནུས་བརྗོད། །བདག་ནི་སྲིད་པའི་གནས་ལས་དྲང་གསོལ་ཞེས། །རང་གིས་ལག་བདར་འཕྲིན་ཡིག་བྲིས་སྟེ་བསྐུར། །སྟོན་པས་བཞེས་ནས་རས་ཀྱི་ངོས་ལ་ནི། །འོད་ཟེར་བཏང་བཞིན་རིག་བྱེད་པ་ཡིས་བྲིས། །བཀའ་ཡི་ཚིགས་སུ་བཅད་པ་དང་བཅས་བསྐུར། །མཐོང་བའི་མོད་ལ་བུ་མོས་བདེན་པ་རྟོགས། །གླིང་དེའི་མི་ཀུན་རྒྱལ་བའི་བསྟན་ལ་བཙུད། །དྲིན་ལན་དཀོན་མཆོག་གསུམ་ལ་མུ་ཏིག་མཆོག །མ་ག་དྷ་ཡི་(ང༣༨ན)
བྲེ་ཆེན་རེ་རེ་ཕུལ། །ཐུབ་པ་འོད་ཟེར་མ་ཞེས་གྲགས་པ་ཡིན། །འདི་དག་བསྟན་འདིའི་བྲིས་སྐུའི་ཐོག་མ་ཡིན། །ཁྱིམ་བདག་དད་ལྡན་རྣམས་ཀྱིས་གདུགས་ཚོད་ལ། །དགེ་འདུན་སྤྱན་དྲངས་སྟོན་པ་མ་གཤེགས་ཚེ། །གྲལ་གྱི་ཐོག་མ་མི་བརྗིད་གྱུར་མཐོང་ནས། །ཁྱིམ་བདག་ཆེན་པོ་མགོན་མེད་ཟས་སྦྱིན་གྱིས། །སྟོན་པས་གནང་ན་བདག་གིས་རིན་ཆེན་ལས། །སྟོན་པའི་སྐུ་བགྱིས་གྲལ་གྱི་ཐོག་མ་ལ། །བཞུགས་སུ་གསོལ་ཞེས་གསོལ་བཏབ་གནང་བ་ཐོབ། །རང་ཉིད་གཏེར་ཀུན་མཐོང་བའི་མིག་ལྡན་ཡང༌། །སྙིང་རྗེས་གཞན་དོན་ཁོ་ནར་ཞུགས་པ་དེས། །གླང་ཆེན་ལ་བཞོན་གདུགས་དང་རྒྱལ་མཚན་བསྒྲེངས། །དུང་དཀར་ལ་སོགས་རོལ་མོར་ལྡན་པ་ཡིས། །དབུལ་པོའི་སྲང་སོགས་གྲོང་ཁྱེར་ཀུན་ཞུགས་སྟེ། །སྐུ་གཟུགས་ཕྱིར་དུ་ཀུན་ལས་སློང་མོ་བསླངས། །རྒྱལ་བའི་སྐུ་གཟུགས་མང་དུ་བྱས་པར་གསུངས། །དེ་རྣམས་སྐུ་གཟུགས་འབུར་དོད་ཐོག་མ་ཡིན། །དེ་དག་འདུལ་བའི་ལུང་ལས་ཡང་དག་བཤད། །གསུང་རྟེན་ཐོག་མ་འཁོར་ལོ་བར་པའི་ཚེ། །བརྒྱ་བྱིན་གྱིས་ནི་གསེར་གྱི་གླེགས་བུ་ལ། །བཻ་དཱུརྻ་སྔོན་བཞུས་པས་ཤེས་ཕྱིན་བྲིས། །ལྷ་ཡི་གནས་སུ་མཆོད་ཅིང་བཀུར་བར་གསུངས། །གཞན་ཡང་རྒྱལ་མཚན་རྩེ་མོའི་དཔུང་རྒྱན་སོགས། །གླེགས་བམ་བྱས་སྟེ་རྒྱལ་མཚན་རྩེར་བཏགས་པས། །ལྷ་མ་ཡིན་གྱི་གཡུལ་ལས་རྒྱལ་བ་སོགས། །གཟུངས་སྔགས་ཆེན་པོ་དུ་མ་དག་ལས་བྱུང༌། །ཁྱིམ་བདག་མགོ་རེག་ཤི་བའི་བདོག་པ་ཀུན། །དགེ་འདུན་རྣམས་ལ་ཕུལ་ནས་བཞེས་པའི་ཚེ། །རྒྱལ་བའི་བཀའ་ཡི་གླེགས་བམ་འཚོང་མི་གནང༌། །མུ་སྟེགས་ཅན་གཞུང་འཚོང་དུ་གནང་ངོ་ཞེས། །གསུངས་ཕྱིར་བཀའ་ཡི་གླེགས་བམ་ཡོད་པར་གྲུབ། །བཀའ་བསྡུའི་ཚེ་ན་སྡུད་པ་པོ་རྣམས་ཀྱིས། །རང་རང་ཡུལ་དུ་སོ་སོའི་སྐད་རྣམས་ཀྱིས། །བྲིས་ཞེས་དུས་ཀྱི་འཁོར་ལོའི་འགྲེལ་པར་བཤད། །ཨུ་པ་ཞེས་(ང༣༨བ)
བྱ་མ་སྐྱེས་དགྲ་ཡི་བུས། །ང་ཡི་བཀའ་ཀུན་གླེགས་བམ་འབྲི་འགྱུར་ཞེས། །སྟོན་པ་ཉིད་ཀྱིས་སྔོན་དུ་ལུང་ཡང་བསྟན། །སེར་སྐྱའི་གྲོང་དུ་སྐུ་བལྟམས་མཆོད་རྟེན་དང༌། །མ་ག་དྷ་རུ་བྱང་ཆུབ་ཆེན་པོ་ཉིད། །ཝ་ར་ཎ་སིར་ཆོས་འཁོར་མཆོད་རྟེན་སྟེ། །མཉན་དུ་ཡོད་པར་ཆོ་འཕྲུལ་མཆོད་རྟེན་དང༌། །ཀ་ཤིའི་གྲོང་དུ་ལྷ་ལས་བབས་པ་ཉིད། །རྒྱལ་པོའི་ཁབ་ཏུ་དགེ་འདུན་དབྱེན་བསྡུམས་དང༌། །ཛེ་ཏའི་ཚལ་དུ་སྐུ་ཚེ་བརྟན་པ་ཉིད། །རྩྭ་ཅན་གྲོང་དུ་མྱང་འདས་མཆོད་རྟེན་སྟེ། །མཛད་པ་སོ་སོའི་སྐབས་སུ་རིམ་པར་བྱུང། །འདི་དག་མདོ་ལས་ཞར་བྱུང་ཙམ་དུ་གསལ། །ད་ནི་བོད་ཡུལ་སྤྲུལ་པའི་ཆོས་རྒྱལ་གྱི། །བཀའ་ཆེམས་ཀ་བཀོལ་མ་ལས་བྱུང་རྣམས་འཆད། །སྟོན་པ་མྱ་ངན་འདའ་བར་ཉེ་བའི་ཚེ། །འཇམ་དཔལ་གཞོན་ནུར་གྱུར་པས་འདི་སྐད་གསོལ། །ད་ལྟ་ཁྱོད་ཞལ་ལྟ་ཞིང་དམ་ཆོས་ཉན། །མུ་སྟེགས་འདུལ་ཞིང་བསོད་ནམས་ཞིང་མཛད་ན། །མྱ་ངན་འདས་ནས་དེ་རྣམས་སུས་དགྱིད་འགྱུར། །སྟོན་པས་བཀའ་བསྩལ་ཉན་ཐོས་མཆོག་རྣམས་ཀྱིས། །བཀའ་རྣམས་སྡུད་བྱེད་ཐེ་ཚོམ་དེ་ཡིས་གཅོད། །བསོད་ནམས་ང་ཡི་དགེ་འདུན་རྣམས་ལ་སོགས། །དྲུག་སྡེ་རྒྱལ་བའི་སྤྲུལ་ཡིན་ངང་གིས་དུལ། །བསྟན་པ་གནས་ཅིང་མུ་སྟེགས་འདུལ་བའི་ཕྱིར། །ང་ཡི་སྐུ་ཚབ་བཞེང་བར་གྱིས་ཤིག་གསུངས། །ཞལ་གྱི་སྒོ་ནས་འོད་ཟེར་གསུམ་སྤྲོས་སྟེ། །ཚངས་དང་བརྒྱ་བྱིན་རཱ་ཧུ་ལ་ལ་ཕོག །སོ་སོར་སྤོབས་པ་སྐྱེས་ནས་ཕྱག་བཙལ་སྟེ། །སོ་སོས་སྐུ་གསུམ་རྟེན་མཆོག་བཞེང་བར་ཞུས། །བི་ཤྭ་ཀརྨས་གཟོ་བོར་ཁས་བླངས་ཤིང༌། །བྱམས་པས་དཀོན་གཉེར་ཕྱག་རྡོར་སྐུ་སྲུང་དང། །གཙང་རིས་བདུན་བཅུས་སྲུང་མར་ཁས་ལེན་བྱས། །ཚངས་པས་ལྷ་ཡི་རིན་ཆེན་སྣ་ཚོགས་སྤུངས། །བཞུ་བཏུལ་བླུག་པས་མཆོད་རྟེན་ཟླུམ་པོ་ནི། །ཚངས་པའི་འདོམ་གང་ཁ་དོག་དུ་བ་འདྲ། །ཕྱི་ནས་རྒྱལ་བའི་རིང་སྲེལ་གྱིས་(ང༣༩ན)
བཀང་སྟེ། །ཨོ་ཌྱན་མཁའ་འགྲོའི་ཡུལ་དུ་སྤྱན་དྲངས་བཞུགས། །ལན་བདུན་བསྐོར་བས་མཆོག་དངོས་འགྲུབ་བོ་སྐད། །ཆོས་སྐུའི་རྟེན་འདིས་ལྷ་དང་མཁའ་འགྲོ་འདུལ། །རཱ་ཧུ་ལ་ཡིས་ཀླུ་ཡི་རིན་ཆེན་ཚོགས། །སྤུངས་པ་བཞུ་བཏུལ་བླུག་པས་ལོངས་སྐུའི་རྟེན། །རྣམ་སྣང་གངས་ཆེན་མཚོ་རྒྱལ་ཞེས་བྱ་བ། །དཔག་ཚད་བརྒྱད་བཅུ་མཆུ་ཞེང་གབ་པའི་སྐུ། །སྐུ་མདོག་མཐིང་ཀ་ཕྱག་གཉིས་མཉམ་བཞག་ཅན། །དབུ་གཙུག་ཟླ་བའི་ཆུ་ཤེལ་གྱིས་སྤྲས་གྲུབ། །བཞུགས་ནས་ཕྱི་ཡི་རྒྱ་མཚོའི་ནང་དུ་བཞུགས། །ལྟེ་བ་མན་ཆད་ཆུ་ཡི་ནང་དུ་ནུབ། །དེ་ཡིས་ཆུ་ནང་གནས་པའི་འགྲོ་དོན་མཛད། །ལྟེ་བ་ཡན་གྱིས་ལྷ་དང་དྲི་ཟ་སོགས། །སྐམ་དང་བར་སྣང་གནས་པའི་འགྲོ་དོན་མཛད། །བྱ་རྣམས་དབུ་ཡི་སྟེང་དང་དཔུང་ཁར་སྡོད། །བྱ་ཐལ་བདལ་ནས་གངས་རི་ལྟ་བུར་བཞུགས། །བཅོ་ལྔའི་མཚན་མོ་ཆུ་ཤེལ་ཟླ་འོད་ཀྱིས། །རེག་པའི་ཆུ་རྒྱུན་མཚན་མ་མེད་པ་ཡིས། །སྐུ་ཁྲུས་གསོལ་སྟེ་བཻ་ཌཱུརྻ་མདོག་འགྱུར། །ཁྲུས་ཆབ་དེ་འཐུངས་ཕན་ཡོན་མཐའ་ཡས་འཐོབ། །ནོར་བུ་ལེན་པའི་གཟིངས་ཆེན་བསྐྱོད་པ་ན། །རྒྱབ་མདུན་རེ་ལ་དྲོ་སྐད་རེ་རེ་དགོས། །གྲུ་མོའི་ནང་ལ་གཟིངས་བཅུག་མཆོད་པ་ཕུལ། །དེ་ཡིས་ཅི་འདོད་ནོར་བུ་ལོན་པར་འགྱུར། །གསོལ་བ་བཏབ་ན་སཱ་ལིའི་འབྲས་ཀྱི་ཆར། །ཉིན་མཚན་བར་མེད་བཅུ་གཉིས་འབེབས་སོ་སྐད། །ལོངས་སྤྱོད་རྫོགས་པའི་སྐུ་ཡི་རྟེན་མཆོག་ཡིན། །དེ་ནས་བརྒྱ་བྱིན་ལྷ་ཡི་དབང་པོ་ཡིས། །ཨིནྡྲ་ནཱི་ལ་མ་ར་ཏ་ཀ་དང། །མཐོན་ཀ་མཐོན་ཀ་ཆེ་དང་བཀོད་མཛེས་སྟེ། །སུམ་བཅུ་རྩ་གསུམ་ལྷ་ཡི་རིན་ཆེན་ལྔ། །གསེར་དངུལ་མུ་ཏིག་མུ་མེན་བྱུ་རུ་སྟེ། །འཛམ་གླིང་མི་ཡི་རིན་ཆེན་རྣམ་པ་ལྔ། །བར་མའི་མཆིང་བུ་ལྔ་བརྒྱ་རྩ་གཅིག་སོགས། །སྤུངས་པ་བཞུ་བཏུལ་བླུག་ནས་སྐུ་ཡི་ཚད། །བཞེང་བར་རྩོམ་ཚེ་སྟོན་པའི་སྐུ་ཚད་ལ། །ལྷ་དང་མི་རྣམས་(ང༣༩བ)
མཐུན་པར་མ་གྱུར་ནས། །བི་ཤྭ་ཀརྨས་ཞབས་ཀྱི་ཐེའུ་ཆུང་ལ། །ཐིག་སྐུད་བཏགས་ནས་འཇལ་བར་བརྩམས་པའི་ཚེ། །ཇི་ཙམ་བསྲིངས་ཀྱང་ཚད་ལོན་མ་གྱུར་ནས། །འོད་མདངས་དགའ་བ་ཞེས་བྱའི་འཇིག་རྟེན་ན། །སངས་རྒྱས་དགའ་དཔལ་བཞུགས་པའི་དྲུང་དུ་སླེབས། །ད་དུང་དབུ་ཡི་གཙུག་དང་མ་མཉམ་ཚེ། །འདི་ནས་མི་འབྱེད་ཞིང་དུ་ཙམ་མཆི་ཞེས། །གསོལ་བས་རྒྱལ་བ་དེ་ཡིས་འདི་སྐད་དུ། །ལྷ་ཡི་རྫུ་འཕྲུལ་ལྟ་ཞོག་ཉན་རང་དང༌། །བྱང་སེམས་ཀུན་གྱི་རྫུ་འཕྲུལ་གཅིག་བསྡོམས་ཀྱང༌། །རྫོགས་སངས་རྒྱས་ཀྱི་སྐུ་ཡི་ཚད་མི་རྟོགས། །འདི་ནས་མི་འབྱེད་བར་དུ་འཇིག་རྟེན་ཁམས། །གངྒའི་བྱེ་སྙེད་དུ་མ་ཡོད་པ་སྟེ། །སྟོན་པས་བྱིན་གྱིས་བརླབས་པའི་མཐུ་ཡིས་ནི། །ཁྱོད་ཉིད་སྐད་ཅིག་ཙམ་གྱིས་འདིར་ཕྱིན་མོད། །གཞན་དུ་ཁྱེད་ཀྱི་རྫུ་འཕྲུལ་མཐུས་ཕྱིན་པས། །ཤིན་དུ་དམའ་བ་མ་གིར་ཚེ་འཛད་འགྱུར། །དེ་བས་སྐུ་ཡི་ཚད་ལ་རྟོག་པ་ཞོག །རང་གི་སྟོན་པ་ཡིད་ལ་གྱིས་ཤིག་གསུངས། །སྐད་ཅིག་དེ་ལ་སྟོན་པའི་དྲུང་དུ་སླེབ། །ངོ་མཚར་ཆེན་པོ་བསམ་གྱིས་མི་ཁྱབ་པའི། །སྐུ་ལ་ཚད་འཛིན་བརྩམས་པ་བཤགས་སོ་ཞེས། །ཡ་མཚན་གཏམ་གྱིས་འཁོར་རྣམས་མགུ་བར་བྱས། །སྟོན་པས་ཞིང་འདིའི་གདུལ་བྱའི་སྣང་བ་ལྟར། །དགུང་ལོ་བརྒྱད་དང་བཅུ་གཉིས་ཉེར་ལྔ་པའི། །ཚད་ཀྱི་སྐུ་གཟུགས་རྣམ་གསུམ་གྱིས་ཤིག་གསུངས། །སྔོན་གྱི་མ་མ་གཉིས་ཤིག་འཁོར་དུ་འཁོད། །དེ་ལ་སྤྱན་གྱིས་གཟིགས་པས་སྤོབས་བྱུང་སྟེ། །པང་དུ་འཚོ་བའི་མ་མས་འདི་སྐད་དུ། །རྒྱལ་བུ་ལོ་བརྒྱད་ལོན་ཚེ་ལུམྦི་ནིའི། །ཚལ་གྱི་གྲི་དང་མཐོ་དམན་མཉམ་མོ་ཟེར། །རྒྱན་འདོགས་མ་མས་རྒྱལ་བུ་བཅུ་གཉིས་ཚེ། །ང་ཡིས་རྩེ་བའི་དོན་དུ་དེད་པ་ན། །སེར་སྐྱའི་སྒོ་མོ་ཆེ་ཡི་སྒོ་སྐྱེས་དང༌། །མཐོ་དམའ་མེད་པར་གཅིག་དུ་མཉམ་མོ་ཟེར། །ཉེར་ལྔ་པ་ནི་མི་རྣམས་ཐུན་མོང་དུ། །(ང༤༠ན)
སྣང་བའི་སྐུ་ཚད་དངོས་དང་མཚུངས་པར་བྱས། །གསུམ་གའང་རྫོགས་སངས་རྒྱས་པའི་ཚུལ་དང་བསྟུན། །ས་གནོན་མཉམ་བཞག་སྤྱན་གྱིས་འཁོར་ལ་གཟིགས། །ཕྱག་ཞབས་འཁོར་ལོ་གཙུག་ཏོར་རིན་ཆེན་སྤྲས། །ཁ་དོག་སྣ་ཚོགས་འཇའ་འོད་ལྟ་བུར་འདུག །སྙན་ཁུང་ཁྲོ་བོ་བདུད་རྩི་འཁྱིལ་པས་བརྒྱན། །ཁྲི་སྟན་སེང་གེ་བརྒྱ་རྩ་བརྒྱད་ཀྱིས་བཏེག །རྒྱབ་ཡོལ་མཛད་པ་བཅུ་གཉིས་འབུར་དུ་བྱས། །འོད་སྐོར་བདེ་གཤེགས་སུམ་བཅུ་རྩ་ལྔ་བཀོད། །ཟིན་ནས་སྟོན་པའི་དྲུང་དུ་ཕུལ་བའི་ཚེ། །འཁོར་གྱི་དཀྱིལ་འཁོར་རྒྱ་མཚོ་ཚོགས་པའི་དབུས། །སྟོན་པའི་ཞལ་ནས་འོད་ཟེར་སྣ་ཚོགས་བཀྱེ། །འཇིག་རྟེན་ཀུན་བཀང་སངས་རྒྱས་བྱང་སེམས་ཀུན། །སྣང་བར་བྱས་ཤིང་བསྐུལ་ནས་ཐུགས་དགོངས་བཀང༌། །སླར་ལོག་སྐུ་གསུམ་འོད་ཀྱིས་ཁྱབ་པར་མཛད། །དབང་བསྐུར་བྱིན་རླབས་རབ་ཏུ་གནས་གྱུར་སྟེ། །འོད་དེ་སྟོན་པའི་ཞལ་གྱི་སྒོ་རུ་ནུབ། །སྟོན་པས་ཆེད་དུ་བརྗོད་དེ་བཀའ་བསྩལ་པ། །སྐུ་གསུམ་རྟེན་འདི་གང་དུ་བཞུགས་པ་དེར། །དགྲ་བཅོམ་དང་ནི་ས་ཐོབ་སེམས་དཔའི་ཚོགས། །ཉི་ཟེར་རྡུལ་ཙམ་རྟག་དུ་བཞུགས་ནས་ནི། །མཆོད་ཅིང་བཀུར་སྟི་རིམ་གྲོ་ཕུ་དུད་བྱེད། །འདི་རྣམས་གང་ན་བཞུགས་པའི་ས་ཕྱོགས་དེར། །ཐེག་པ་ཆེན་པོའི་བསྟན་པ་འབྱུང་བ་སྟེ། །ང་ཡི་བསྟན་པ་ཐ་མར་བབ་པའི་ཚེ། །བྱང་ཕྱོགས་གངས་ཅན་སྲིན་པོ་གདོང་དམར་ཡུལ། །སྤྱན་རས་གཟིགས་དང་སྐུ་གཟུགས་གཉིས་ཀྱིས་འདུལ། །དེ་སྐད་བཀའ་བསྩལ་ཉེར་ལྔའི་སྐུ་ཚད་ནི། །བརྒྱ་བྱིན་ཉིད་ཀྱིས་ལྷ་ཡུལ་སྤྱན་དྲངས་མཆོད། །བརྒྱད་པ་དང་ནི་བཅུ་གཉིས་པ་ཡི་སྐུ། །ལྷ་ཡི་ཡུལ་དང་ནུབ་ཕྱོགས་ཨོ་ཌྱན་དུ། །ལྔ་བརྒྱ་ཕྲག་རེ་བཞུགས་ནས་འགྲོ་དོན་མཛད། །དེ་ནས་ས་འོག་བདག་པོས་སྤྱན་དྲངས་སྟེ། །གདེངས་ཅན་ཀླུ་རྒྱལ་རྣམས་ཀྱིས་མཆོད་པར་གྱུར། །དེ་ཚེ་མ་ག་དྷ་ཡི་རྒྱལ་པོ་ནི། །ཧེ་མནྟ་ཞེས་བྱ་བའི་མཆོད་གནས་སུ། །(ང༤༠བ)
ཕྱག་རྡོར་སྤྲུལ་པ་ཤུ་ལན་བྷ་ཏི་དང༌། །བྱམས་པ་གྲུབ་པ་དཀར་རྒྱལ་བྱ་བ་ཡོད། །གཉིས་པོས་ཕྱག་རྡོར་དང་ནི་བྱམས་པར་སྤྲུལ། །བྱམས་པས་ཀླུ་རྣམས་བདུད་རྩིའི་ཆར་གྱིས་བྲིད། །ཕྱག་ན་རྡོ་རྗེས་ཀླུ་རྣམས་གཟིར་ཞིང་བསྡིགས། །བྱམས་པས་བསྐྱབས་སྟེ་སྟོན་པའི་ཁྲུས་རྫིང་ནས། །སྐུ་གཉིས་སྤྱན་དྲངས་མ་འོངས་འཛམ་གླིང་གི །བསྟན་པ་ནུབ་ཚེ་སྐུ་གཉིས་གཙོར་བྱས་པའི། །སྐུ་གསུང་ཐུགས་ཀྱི་རྟེན་ཀུན་ཀླུ་ཡུལ་དུ། །སྤྱན་འདྲེན་དགྱིད་པའི་གཙིགས་ཆད་བཟུང་བར་གྱུར། །ལོ་གྲངས་ལྔ་བརྒྱར་རྡོ་རྗེའི་གདན་དུ་བཞུགས། །དེ་ནས་ལོ་གྲངས་ལྔ་བརྒྱ་ལྷག་འདས་པ། །རྒྱ་གར་རྒྱལ་པོ་དེ་ཝ་པ་ལའི་དུས། །དགུང་ལོ་བཅུ་གཉིས་པ་ཡི་སྐུ་ཚད་ཀྱི། །རྒྱབ་ཡོལ་བཞག་པའི་ཁྲིར་བཅས་རྒྱ་ནག་གི །རྒྱལ་པོའི་བསོད་ནམས་སོག་པའི་རྟེན་དུ་བསྐུར། །བརྒྱད་པའི་སྐུ་ཚད་བལ་པོའི་རྒྱལ་པོ་ཡིས། །རིན་ཐང་མེད་པའི་སྐྱེས་བསྐུར་གསོལ་བཏབ་པས། །བལ་པོའི་རྒྱལ་པོའི་མཆོད་པའི་ཞིང་དུ་བྱིན། །ཡུལ་གྲུ་དེ་གཉིས་རབ་ཏུ་བཏུལ་མཛད་ནས། །སྤྱན་རས་གཟིགས་དབང་སྲོང་བཙན་སྒམ་པོའི་དུས། །སྐུ་གཉིས་བོད་ཀྱི་ཡུལ་དུ་བྱོན་པ་ཡིན། །བཀའ་ཆེམས་གཞན་ལས་བརྒྱད་པའི་སྐུ་ཚད་ནི། །སྔོན་ཚེ་མི་རྣམས་ཚེ་ལོ་ཉི་ཁྲིའི་དུས། །སངས་རྒྱས་འོད་སྲུང་བྱོན་ཚེ་སྦྱིན་བདག་མཆོག །རྒྱལ་པོ་ཀྲྀ་ཀྲིས་དད་པའི་རྟེན་དུ་བཞེངས། །སངས་རྒྱས་འོད་སྲུང་ཉིད་ཀྱིས་བྱིན་བརླབས་ནས། །ད་ལྟར་ང་ཡི་སྐུ་ཚབ་བཞེངས་པ་འདི། །མ་འོངས་ཚེ་ལོ་བརྒྱ་པའི་དུས་ཚོད་དུ། །སངས་རྒྱས་ཤཱཀྱ་ཐུབ་པ་འབྱུང་བ་དེའི། །དགུང་ལོ་བརྒྱད་པ་ཡི་ནི་ཚད་འགྱུར་ཞེས། །ལུང་བསྟན་མཛད་པ་དེ་ཉིད་ཡིན་ཞེས་སྣང༌། །དེང་སང་ཇོ་བོ་མི་བསྐྱོད་རྡོ་རྗེར་གྲགས། །བཅུ་གཉིས་པ་ཡི་སྐུ་ཚད་འདི་ཉིད་ཀྱང༌། །བྱམས་པས་བཞེངས་པར་འཆད་པའི་ལུགས་ཀྱང་སྣང༌། །སེར་སྐྱར་ཤཱཀྱའི་རྒྱལ་པོ་གཞུ་བརྟན་ཚེ། །རྒྱ་ནག་ཅི་འུ་རྒྱལ་པོ་ཞེས་པ་བྱུང༌། །དེ་ནས་གདུང་རབས་བཞི་འདས་(ང༤༡ན)
ལྔ་པ་ནི། །ཅི་འུ་དབང་རྒྱལ་རྒྱལ་སྲིད་བྱེད་པའི་ཚེ། །ནུབ་ཀྱི་ཕྱོགས་ནས་སྒྲ་དང་འོད་ཟེར་སོགས། །རྫོགས་པའི་སངས་རྒྱས་བལྟམས་པའི་ལྟས་རྣམས་མཐོང༌། །རྩིས་པས་རྩིས་བྱས་ནུབ་ཕྱོགས་རྒྱ་གར་དུ། །གང་ཟག་རླ་མེད་གཅིག་ནི་སྐྱེས་པར་འདུག །ལོ་སྟོང་འདས་ནས་དེ་ཡིས་ཆོས་ལུགས་ནི། །རྒྱ་ནག་ཡུལ་དུ་འོང་ཞེས་ལུང་བསྟན་སྐད། །དེ་ལྟར་ཅི་འུའི་རྒྱལ་པོ་སོ་དྲུག་སོགས། །རིགས་རུས་ཐ་དད་ལྔ་ལས་རྒྱ་ནག་གི །རྒྱལ་པོ་དྲུག་བཅུ་རྩ་གཉིས་འདས་པའི་འོག །པྲི་ཏི་ཛ་ཡ་སི་ཆོན་རྒྱལ་པོའི་དུས། །ཇོ་བོ་ཤཱཀྱ་རྒྱ་ནག་ཡུལ་དུ་ཕེབས། །དེ་ནས་རྒྱལ་རབས་བཞི་ཡི་འོག་རོལ་དུ། །རྒྱ་ནག་ཡུལ་དུ་ཐང་གི་རྒྱལ་པོ་དང༌། །བོད་རྒྱལ་གནམ་རི་སྲོང་བཙན་དུས་མཉམ་སྟེ། །དེ་སྲས་ཆོས་རྒྱལ་སྲོང་བཙན་སྒམ་པོ་ཡིན། །དེ་ལྟར་སྐུ་གསུམ་རྟེན་མཆོག་གྲུབ་བྱིན་བརླབས། །མཛད་པ་རྫོགས་ནས་ཐུབ་དབང་མྱ་ངན་འདས། །དེ་ནས་ལོ་གྲངས་བརྒྱད་བཅུར་ཉེ་བའི་ཚེ། །སྔོན་ཚེ་བུ་མོའི་དུས་ན་སྟོན་པའི་ཞལ། །མཐོང་ཞིང་ཆོས་ཉན་བསོད་སྙོམས་ཕུལ་བ་ཞིག །བྲམ་ཟེ་ཆེན་པོ་ཞིག་གི་མཆིས་བྲང་གྱུར། །དེ་ལས་མཚན་དང་ལྡན་པའི་བུ་གསུམ་བཙས། །ཆེ་བ་གཉིས་ནི་ཕྱི་རོལ་པ་ལ་མོས། །ཐ་ཆུང་ནང་པའི་ཆོས་ལ་རབ་ཏུ་དད། །ཆོས་ལུགས་གང་བཟང་མི་འཆམ་རྟག་ཏུ་རྩོད། །མ་ཡིས་ཁྱེད་གསུམ་ཟས་གོས་ཕོངས་པ་མེད། །ཅི་ཕྱིར་རྩོད་ཅེས་དྲིས་པས་ཕྱི་ནང་གི །ཆོས་ལུགས་གང་བཟང་མ་འཆམ་གང་བདེན་ཟེར། །མ་ཡིས་བྱང་ཕྱོགས་ཏི་སེའི་གངས་རི་ལ། །ལྷ་ཆེན་དབང་ཕྱུག་ཡོད་ཀྱིས་དེར་དྲིས་ཟེར། །ལྷམ་ལ་རྐང་མགྱོགས་རྫས་བྱུགས་བཏང་བ་ལས། །སྐད་གཅིག་གིས་སླེབས་མ་དྲོས་མཚོ་འགྲམ་ན། །ཁྱུ་མཆོག་བཟས་ལ་ཡན་ཅིང་བུ་མོའི་ཚོགས། །རིན་ཆེན་སྣོད་དུ་མེ་ཏོག་འཐུ་བ་མཐོང༌། །ཁྱོད་སུ་མེ་ཏོག་ཅི་ཕྱིར་འཐུ་དྲིས་པས། །ངེད་ཅག་ལྷ་མོ་ཨུ་མའི་བྲན་མོ་ཡིན། །(ང༤༡བ)
མེ་ཏོག་དགྲ་བཅོམ་མཆོད་ཕྱིར་འཐུ་འོ་སྐད། །ཁྱེ་འུ་གསུམ་གྱིས་འགྲོགས་སྟེ་ཕོ་བྲང་ཕྱིན། །བཅོ་ལྔའི་ཚེས་ཉིན་གདུགས་ཚོད་ལ་བབ་ཚེ། །མ་དྲོས་མཚོ་ནས་དགྲ་བཅོམ་དགེ་འདུན་རྣམས། །བྱོན་སྟེ་ཕོ་བྲང་ནང་དུ་སྟན་ལ་བཞུགས། །ལྷ་ཆེན་འཁོར་བཅས་ཀྱིས་མཆོད་མཆོད་སྟོན་གསོལ། །མེ་ཏོག་གིས་གཏོར་ཞབས་ལ་ཕྱག་བྱས་ནས། །ཆོས་ཉན་སྨོན་ལམ་མང་པོ་བཏབ་པར་གྱུར། །དེ་ནས་འཕགས་པའི་ཚོགས་རྣམས་མཁའ་ལ་གཤེགས། །ཆོས་ལུགས་ནང་པ་བཟང་བར་གསུམ་གས་གོ །འོན་ཀྱང་ཐེ་ཚོམ་བཅད་ཕྱིར་དྲིས་པ་ན། །དབང་ཕྱུག་ན་རེ་ནང་པ་བཟང་བ་ཡིན། །ཕྱི་རོལ་པ་ལ་ཐར་པའི་ལམ་མ་མཆིས། །ཕྱི་པའི་འབྲས་བུ་མཐར་ཐུག་ང་ཡིན་མོད། །གནས་སྐབས་དངོས་གྲུབ་འདོད་ན་ང་མྱུར་ཡང༌། །ང་ཡང་ཐར་པ་འདོད་ཕྱིར་ནང་པ་ལ། །བརྟེན་ནས་དགྲ་བཅོམ་མཆོད་པ་ཡིན་ནོ་ཟེར། །ཐེ་ཚོམ་སེལ་སྟེ་མ་ཡི་དྲུང་དུ་ལོག །གསུམ་ག་ནང་པའི་བསྟན་ལ་འཇུག་པར་ཞུས། །ལེགས་ཀྱིས་ལྷ་ཁང་རེ་རེ་རྩིགས་ཤིག་ཟེར། །རྩིག་པའི་གནས་དང་རྒྱུ་རྣམས་སོ་སོར་བསྟན། །ཆོས་འཁོར་བསྐོར་གནས་ཝ་ར་ཎ་སི་རུ། །ཆེ་བ་མ་ཧཱ་མ་སས་ལྷ་ཁང་བརྩིགས། །རིན་ཆེན་རིགས་ཀྱི་རྡོ་ལས་སྐུ་གཟུགས་བྱས། །བསྟོད་པའི་དམ་པ་ཁྱད་པར་འཕགས་པ་བརྩམས། །སློབ་དཔོན་མཐོ་བཙུན་གྲུབ་རྗེ་ཞེས་སུ་གྲགས། །འབྲིང་པོས་རྒྱལ་པོའི་ཁབ་ཀྱི་འོད་མའི་ཚལ། །ཀ་ལནྟ་ཀའི་གནས་སུ་ལྷ་ཁང་བརྩིགས། །གནས་ཆེན་བརྒྱད་ཀྱི་ས་ལས་སྐུ་གཟུགས་བྱས། །ཐ་ཆུང་བདེ་ཕྱེད་བདག་པོས་རྡོ་རྗེ་གདན། །བྱང་ཆུབ་ཤིང་དྲུང་ཕྱི་དབྱིབས་མཆོད་རྟེན་ལ། །ནང་དབྱིབས་ལྷ་ཁང་གཎྜྷོ་ལ་རུ་བྱས། །གངྒཱའི་འགྲམ་གྱི་སྟོན་པའི་ཁྲུས་རྫིང་འགྲམ། །ཙན་དན་གོ་རྴཱི་ཥ་ཡི་སྡོང་པོ་ནི། །འགྱེལ་བ་ས་འོག་ནས་བླངས་རིགས་བཙུན་ཞིང༌། །འདོད་པས་མ་གོས་བུ་མོ་བཞི་ཡིས་བདར། །རིན་ཆེན་ཕྱེ་མ་དང་བསྲེས་ཕུང་པོར་གྲུབ། །དེ་ཚེ་དེད་དཔོན་རྒན་པོ་ཞིག་གི་བུ། །རྒྱ་མཚོར་འཇུག་ལ་ཕ་ཡིས་བུ་ཁྱོད་ཀྱིས། །མི་གཞན་མི་ཉོའི་ཟོང་ཞིག་ཉོས་ཤོག་སྐད། །རྒྱ་མཚོར་གྲུ་ཡི་ནང་དུ་མི་སྔོན་པོ། །(ང༤༢ན)
སྔོན་མེད་ཅིག་བྱུང་ཀུན་གྱིས་གསོད་པའི་ཚེ། །དེད་དཔོན་གྱིས་ནི་ནོར་གྱིས་ཀླུས་སྟེ་བཏང༌། །མི་དེ་རྒྱ་མཚོའི་ནང་དུ་ཅབ་ཀྱིས་སོང༌། །གྲུ་ཐོན་ཚེ་ན་ང་ནི་ཀླུ་ཞིག་ཡིན། །བདག་སྲོག་བསྐྱབས་པའི་ལན་དུ་འདི་འབུལ་ཞེས། །རིན་ཆེན་མརྐ་ཏ་ཡི་སྡོང་པོ་ནི། །ལྗང་ཞིང་སྔོ་ལ་གནག་པའི་འོད་འཚེར་བ། །དབྱིབས་ནི་ཉ་ཡི་ལྟོ་འདྲ་ཞིག་བྱིན་ནོ། །དེད་དཔོན་དེ་ནི་འདི་འདྲ་གཉིས་ཡོད་ན། །སྐུ་དེའི་སྤྱན་འབྲས་དགྱིད་སྙམ་ལོངས་པའི་ཚེ། །ལག་ནས་ལྷུང་སྟེ་གཉིས་སུ་གས་ནས་བྱེ། །སྤྱན་འབྲས་དགྱིད་པའི་དོན་དུ་ཕུལ་བར་གྱུར། །ཇི་སྐད་མ་ཡིས་ལུང་བསྟན་དེ་བཞིན་དུ། །ཙན་དན་ལྡེ་གུ་རིན་ཆེན་མརྐ་ཏ། །གཟོ་བོར་བཅས་པ་ལྷ་ཁང་ནང་དུ་བཅུག །སྒོ་ལ་ལྕགས་ཀྱི་གཟེར་བཏབ་ཟླ་དྲུག་དང༌། །ཞག་དྲུག་བར་དུ་འཇོག་པར་བྱས་པ་ལས། །ཟླ་བ་དྲུག་དང་ཞག་ལྔ་ལོན་པའི་ཚེ། །མ་དེ་བྱུང་ནས་ལྟ་འོ་སྒོ་ཕྱེ་ཟེར། །ད་དུང་ཞག་གཅིག་མ་ཐེམ་ཞེས་སྨྲས་པས། །སངས་རྒྱས་བཞུགས་དུས་དངོས་སུ་མཐོང་བའི་མི། །ད་ལྟ་འཛམ་བུའི་གླིང་ན་ང་བས་མེད། །ང་ནི་སང་གི་གདུགས་ལ་འཆི་བར་འགྱུར། །ང་ཡིས་འདྲ་འམ་མི་འདྲ་བལྟ་དགོས་ཀྱི། །ད་ལྟ་ཕྱེ་ཟེར་ལྕགས་གཟེར་བཀྲོལ་བ་ན། །གཟོ་བོ་དེ་ནི་ནམཁར་འཕགས་སྟེ་ཡལ། །སྟོན་པ་དགུང་ལོ་སོ་ལྔ་ལོན་པའི་ཚེ། །མངོན་པར་རྫོགས་སངས་རྒྱས་པའི་སྐུ་ཡི་ཚད། །རིན་ཆེན་མརྐ་ཏ་ཡིས་སྤྱན་འབྲས་བྱས། །ལྟ་བས་མི་ངོམས་མཚན་དཔེས་བརྒྱན་པར་གྲུབ། །མ་ཡིས་སྨྲས་པ་རྫོགས་པའི་སངས་རྒྱས་ལ། །ལྗགས་ཀྱིས་གདོང་ཁེབས་ཚངས་པའི་གསུང་དབྱངས་ལྡན། །ན་བཟའ་སྐུ་ལ་སོར་བཞིས་མི་རེག་ཅིང༌། །འོད་ཟེར་འདོམ་གང་ཁོར་ཡུག་འབར་བ་ཡོད། །དེ་དག་སྐུ་གཟུགས་འདི་ལ་མི་སྣང་ངོ༌། །སྟོན་པ་སྤྱོད་ལམ་རྣམ་བཞིས་འགྲོ་དོན་མཛད། །འདི་ལ་བཞུགས་པའི་སྤྱོད་ལམ་གཅིག་པུ་ཡོད། །སྟོན་པའི་དབུ་གཙུག་ལྟ་བར་མི་མངོན་ལ། །འདི་ཡི་དབུ་ཡི་གཙུག་འཁྱིལ་ལྟ་བར་ནུས། །སྟོན་པའི་དབུ་སྐྲ་བུང་བ་ལྟ་བུར་གནག །(ང༤༢བ)
འདི་ནི་ཅུང་ཟད་སྔོ་བའི་མདངས་དང་ལྡན། །སྟོན་པའི་མཛོད་སྤུ་སུམ་བཅུ་རྩ་གཉིས་ནི། །དཀར་ཞིང་འོད་ལྡན་ངང་གིས་གཡས་སུ་འཁྱིལ། །འདི་ནི་དེ་བས་ཅུང་ཟད་མི་གསལ་ཙམ། །ཁྱད་པར་བརྒྱད་པོ་འདི་དག་མ་གཏོགས་པ། །སྟོན་པ་དངོས་དང་ཁྱད་པར་མི་སྣང་ངོ༌། །མ་འོངས་ཕྱི་རོལ་པ་དང་རྟེན་འགྲན་ཚེ། །ཡོན་ཏན་བརྒྱད་ཀྱང་འདི་ལ་སྣང་བར་འགྱུར། །སུས་མཐོང་དབང་མེད་ཕྱག་འཚལ་ལྟར་མི་ངོམས། །ཟས་སྐོམ་བརྗེད་ཅིང་དུས་རིང་ཐུང་ངུར་ཚོར། །རྒྱབ་ཀྱིས་ལྟ་བར་མི་ཕོད་ཕྱི་འགྲོས་བྱེད། །མཐོང་བ་ཙམ་གྱིས་ནད་སོས་སྡུག་བསྔལ་བརྗེད། །གདོན་དང་བྲལ་ཞིང་ཉོན་མོངས་ངང་གིས་ཞི། །གནས་སྐབས་མཐར་ཐུག་ཡོན་ཏན་དཔག་མེད་འབྱུང༌། །ཞེས་སྨྲས་མ་དེ་ཕྱི་ནང་ཚེ་དུས་བྱས། །རིང་སྲེལ་ཕུང་པོ་བུ་ཡིས་མཆོད་རྟེན་བཞེངས། །སྔོན་ཚེ་ཞག་གཅིག་མ་ཐིམ་ཉེས་པ་ནི། །ཞབས་གཡས་ཐེ་ཆུང་མ་ཚང་ཕྱིས་བཅོས་ཟེར། །ད་ལྟ་རྒྱ་གར་ཡུལ་ན་གྲགས་པ་ནི། །ཞག་གཅིག་མ་ཐིམ་པ་ལས་དབུ་སྐྲའི་ཚོགས། །ཚོམ་བུར་གཡས་སུ་འཁྱིལ་བ་མ་ཚང་སྐད། །དེང་སང་འཛམ་བུ་གླིང་ན་རྟེན་གྱི་མཆོག །རྡོ་རྗེ་གདན་གྱི་མ་ཧཱ་བོ་དྷི་ཞེས། །འགྲན་མེད་མཁའ་ལ་ཉི་མ་ལྟ་བུར་སྣང༌། །འདི་སྔོན་གྱི་གྲགས་པ་ལྟར་བྲིས་པ་ཡིན་ཀྱང་བསྟོད་འགྲེལ་གཉིས་ལ་བརྟགས་ན་བསྟོད་པ་མཛད་པོ་གཉིས་ཕུ་བོ་གཉིས་སུ་སྣང་ལ། རྡོ་རྗེ་གདན་བཞེང་བ་པོ་འདིའི་མཚན་དང་རབ་ཏུ་བྱུང་མ་བྱུང་སོགས་གསལ་བར་མི་སྣང་ངོ༌། །ཕྱི་ནས་ཆོས་རྒྱལ་མྱ་ངན་མེད་སོགས་ཀྱིས། །སྐུ་གཟུགས་མཆོད་རྟེན་གཙུག་ཁང་མཐའ་ཡས་མཛད། །སྟོན་པའི་རྟེན་ཇི་ལྟར་བྱུང་ཚུལ་མདོ་ཙམ་བསྟན་པའི་སྐབས་སྟེ་གསུམ་པའོ།། །།ཡི་གེ་པ་ནི་ཚེ་དབང་བསྟན་པས་བྲིས། །རྐོས་ཀྱི་རིག་བྱེད་སྨྱལ་གྱི་སྒང་རྒྱུད་ནས། །ཚེ་དབང་དར་པོ་བཀྲ་ཤིས་ཚེ་དབང་བརྐོས། །དགེ་བས་བླ་མེད་བྱང་ཆུབ་ཐོབ་པར་ཤོག །
སྟོན་པ་མཆོག་ལ་སླར་ཡང་གུས་བསྡུས་ནས། །དེ་ཡི་བསྟན་ལ་བྱ་བ་བྱེད་པ་ཡི། །འཕགས་པའི་ཡུལ་དུ་ས་སྐྱོང་མང་བྱུང་བ། །དེ་ལས་ཇི་ཙམ་ཐོས་པ་བརྗོད་པར་བྱ། །རྩ་བ་མེད་པའི་དད་པར་ལྡན་པ་ཡི། །བསྟན་པའི་སྦྱིན་བདག་རྒྱལ་པོ་མ་སྐྱེས་དགྲས། །མ་ག་དྷ་དང་ཨངྒ་ཡངས་པ་ཅན། །ཀོ་ས་ལ་ཡི་རྒྱལ་ཁམས་ཆེན་པོ་དང༌། །ཝ་ར་ཎ་སི་ལ་སོགས་དབང་བྱས་སྟེ། །ཐམས་ཅད་གདུགས་དཀར་གཅིག་གིས་ཁེབས་པ་ལྟར། །སྟོན་པའི་བསྟན་ལ་གཅིག་དུ་མཆོད་པར་གྱུར། །དེ་སྲས་ཨུ་པ་ཞེས་པས་རྒྱལ་བའི་བཀའ། །མཐའ་དག་ཡི་གེར་བྲིས་སྟེ་གླེགས་བམ་བྱས། །རྒྱས་པར་བྱེད་ཅིང་ཤི་འཕོས་ལྷ་ཡུལ་འགྲོ། །ངེས་པར་བྱང་ཆུབ་ཐོབ་ཅེས་ལུང་དུ་བསྟན། །མ་སྐྱེས་དགྲས་རྒྱལ་ས་བྱས་ནས་ལོ་ལྔ་ན་སྟོན་པ་མྱ་ངན་ལས་འདས། སྤྱིར་རྒྱལ་ས་ལོ་སོ་གཉིས་བྱས། དེ་ནས་རྒྱལ་པོ་བཅུ་འདས་པ་ན་ཆོས་རྒྱལ་མྱ་ངན་མེད་བྱོན་པར་ལི་ཡུལ་གྱི་རྒྱལ་རབས་ལས་བཤད། སྟོན་པ་མྱ་ངན་འདས་ནས་ལོ་བརྒྱ་ན། །འཛམ་གླིང་བདག་པོ་མྱ་ངན་མེད་པ་བྱུང༌། །ཤཱཀྱ་རི་བྲགས་པ་ཡི་རྒྱུད་ཡིན་ཞེས། །བོད་རྗེའི་བཀའ་ཆེམས་འགའ་ཞིག་དག་ལས་བྱུང༌། །སྤྲིན་ཆེན་པོ་ལས། སྔོན་སངས་རྒྱས་ཀླུ་རིགས་སྒྲོན་མའི་དྲུང་དུ་བློན་པོ་དམ་ཆོས་དཀྱིལ་འཁོར་གྱི་མཛོད་ཀྱིས་ཤཱཀྱའི་བསྟན་པ་འབྱིན་པའི་རྒྱལ་པོར་སྨོན་ལམ་བཏབ་པ་དེ་ནི་ད་ལྟ་བྲམ་ཟེ་ཀཽཎྜི་ནྱ་འདི་ཡིན་སྟེ་ང་འདས་ནས་ལོ་བརྒྱ་ཉི་ཤུ་ན་མཽ་རྻའི་རིགས་སུ་རྒྱལ་པོ་མྱ་ངན་མེད་ཅེས་ཕྱེད་ཀྱི་འཁོར་སྒྱུར་དུ་འགྱུར་རོ་ཞེས་ལོ་བརྒྱ་ཉི་ཤུ་ན་འབྱུང་བར་ལུང་བསྟན་ཡང་སྙིང་རྗེ་ཆེན་པོ་པད་དཀར་དུ། ང་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་ན་གྲོང་ཁྱེར་སྐྱ་སྣར་གྱི་བུར་རྒྱལ་པོ་མྱ་ངན་མེད་པ་ཞེས་བྱ་བ་མཽརྻའི་རིགས་སུ་སྐྱེས་པ་ཆོས་ཅན་ཆོས་ཀྱི་རྒྱལ་པོ་ཞིག་འབྱུང་སྟེ་ཞེས་དང༌། དེས་དུས་གཅིག་དུ་ཉིན་གཅིག་ལ་ངའི་སྐུ་གདུང་གི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་རོ་ཞེས་དང༌། མདོ་གཞན་ལས་ཀྱང་ལོ་བརྒྱ་ན་འབྱུང་བར་གསུངས་པ་དུ་མ་ཡོད་པ་དང༌། འཇམ་དཔལ་རྩ་རྒྱུད་ལས། ང་ནི་ས་སྟེང་མྱ་ངན་འདས། །ལོ་བརྒྱ་(ཅ༤༣བ)
དག་ནི་འདས་པ་ན། །སྣང་བ་མེད་ཅིང་ཉེས་པར་བཅས། །མི་ཤེས་མུན་པས་རབ་ཏུ་བསྒྲིབས། །དེ་ཚེ་ས་ནི་སྟོང་པ་སྟེ། །རྒྱལ་བ་རྣམས་ཀྱི་སྤངས་པ་ཉིད། །དེ་ཚེ་མི་བཟང་ཆེན་པོའི་དུས། །གྲོང་ཁྱེར་མེ་ཏོག་ཅན་དུ་ནི། །མྱ་ངན་མེད་ཅེས་བྱ་བ་ཡི། །རྒྱལ་པོ་ས་ནི་སྐྱོང་བྱེད་པ། །སོགས་དང༌། དེ་ལྟར་རྫུ་འཕྲུལ་ཆེ་བདག་ཉིད། །དེ་ཚེ་སྟོབས་ཀྱི་འཁོར་སྒྱུར་འབྱུང༌། །ཞེས་དང། འཛམ་བུའི་གླིང་འདི་མ་ལུས་པ། །མཆོད་རྟེན་གྱིས་ནི་བརྒྱན་པ་དང༌། །ཞེས་མཆོད་རྟེན་གྱི་གྲངས་མ་གསུངས་ཤིང༌། ལོ་ནི་བརྒྱ་དང་ལྔ་བཅུར་འཚོ། །ཞེས་ཚེ་ཚད་དང༌། ལོ་ནི་བརྒྱད་བཅུ་རྩ་བདུན་དུ། །ས་སྟེང་མཆོད་རྟེན་མཆོད་པར་འགྱུར། །ཞེས་གསུངས་ཤིང༌། བཀའ་བསྡུ་བར་པའི་སྦྱིན་བདག་ཡིན་ལ་དེ་ལོ་བརྒྱ་དང་བཅུ་མ་བྱུང་བར་གསུངས་པས་རྒྱལ་པོ་མྱ་ངན་མེད་ཀྱིས་དགུང་ལོ་དྲུག་བཅུ་རྩ་གསུམ་གྱི་བར་དུ་སྡིག་པ་སྤྱོད་པ་གཏུམ་པོ་མྱ་ངན་མེད་ཀྱིས་དུས་དང༌། རེ་གསུམ་ནས་དགེ་བའི་བཤེས་གཉེན་གྱིས་རྗེས་སུ་བཟུང་བ་ཕྱིན་ཆོས་རྒྱལ་མྱ་ངན་མེད་དུ་གྲགས་པ་ཡིན་ནོ། །མཽརྻའི་རིགས་ཞེས་སྟོན་པས་ལུང་དུ་བསྟན། །སྔོན་ཚེ་སྟོན་པ་གྲོང་ཁྱེར་གཤེགས་པའི་ཚེ། །ཁྱེ་འུ་གཉིས་ཤིག་རྒྱལ་བློན་ཚུལ་དུ་རྩེ། །བྱེ་མའི་ཚོགས་ལས་ཕོ་བྲང་བང་མཛོད་བྱས། །དེ་ཡིས་སྟོན་པ་གཤེགས་མཐོང་དད་གྱུར་སྟེ། །བང་མཛོད་དུ་བསྔོས་བྱེ་མའི་ཕུང་པོ་ལས། །སྙིམ་པ་གང་ཞིག་ཁྱེའུ་རྒྱལ་པོས་བཅུས། །ཐུབ་པའི་ལྷུང་བཟེད་ནང་དུ་དབུལ་བར་བརྩམས། །མ་སྙོབས་གྱུར་པས་ཁྱེ་འུ་ཅིག་ཤོས་ཀྱིས། །སྒུར་པོར་བྱས་པའི་སྟེང་དུ་འཛེགས་ནས་ཕུལ། །སྟོན་པས་དེ་ཡི་དད་པའི་བསམ་པ་དགོངས། །ཕྱག་གི་ལྷུང་བཟེད་དཔངས་དམད་གྱུར་པས་བཟེད། །མ་ཡིས་རྒྱལ་ལ་འདི་འདྲ་འབུལ་བ་ཞེས། །སྤྱོས་པ་སྟོན་པས་ཟློག་པར་མཛད་ནས་ནི། །ཀུན་དགའ་བོ་ལ་བསམ་པ་བཟང་པོ་ཡིས། །ཕུལ་འདི་ཆུད་མ་ཟོས་པར་བྱ་བའི་ཕྱིར། །ས་སྦྱིན་བ་བྱུང་དྲི་དང་སྦྱར་བ་ཡིས། །སྟོན་པའི་དྲི་ཡི་གཙང་ཁང་སྐུས་ཤིག་གསུངས། །ང་འདས་ནས་ནི་ལོ་བརྒྱ་ལོན་པ་ན། །ཁྱེ་འུ་སྟེང་མ་འདི་ནི་འཛམ་གླིང་གི །(ཅ༤༤ན)
རྒྱལ་པོ་མྱ་ངན་མེད་ཅེས་བྱ་བར་འགྱུར། །བྱེ་མ་ཕུལ་འདིའི་འབྲུ་གྲངས་དང་མཉམ་པའི། །ང་ཡི་རིང་སྲེལ་ལྡན་པའི་མཆོད་རྟེན་ནི། །འཛམ་བུའི་གླིང་ཀུན་ཁྱབ་པར་བྱེད་པར་འགྱུར། །ཁྱེ་འུ་གཅིག་ཤོས་དེ་ཡི་བློན་པོར་འགྱུར། །འཛམ་གླིང་རྣལ་དུ་འགོད་པར་བྱེད་ཏོ་གསུངས། །སྔོན་ཚེ་བྱེ་མ་ཕུལ་བའི་ས་ཡིན་ཞེས། །ནཱ་ལེནྡ་ན་དེ་ཡི་མཆོད་རྟེན་ཡོད། །སྟོན་པ་འདས་ནས་ལོ་ནི་སོ་བདུན་ན། །རྒྱལ་པོ་ཅིག་ལ་རྒྱལ་བུ་བཅུ་བདུན་དང༌། །བྲན་མོར་བཙས་པ་གཅིག་སྟེ་བཅོ་བརྒྱད་ཡོད། །ཡབ་ཀྱིས་རྒྱལ་བུ་ཀུན་བསྡུས་རྒྱལ་པོའི་མཚན། །སུ་ལ་ལྡན་པ་མཚན་མཁན་གྱིས་རྟོག་ཚེ། །བཅུ་བདུན་པོ་ནི་ཟས་གོས་རྒྱན་བཟང་པོས། །བསྙེམས་ཤིང་སོ་སོར་ཁྲི་སྟན་དག་ལ་འཁོད། །ནམ་ཡང་རྒྱལ་སྲིད་མི་འཐོབ་བསམ་པ་ཡིས། །བྲན་མོའི་བུ་ནི་མ་སོང་འདུག་པ་ལ། །བློན་པོས་ངེས་པ་མེད་ཀྱིས་སོང་ཞིག་སྐད། །རས་རྙིང་གྱོན་ཞིང་འབྲས་ཆན་ཁེངས་པ་ཅིག །ཟོས་སྟེ་ས་གཞི་ཉིད་ལ་འཁོད་པར་གྱུར། །བྲམ་ཟེས་འདི་དག་རྣམས་ལས་ཟས་མཆོག་ཟོས། །གོས་མཆོག་གྱོན་སྟེ་སྟན་མཆོག་ལ་འདུག་པ། །དེ་ནི་རྒྱལ་པོར་འགྱུར་རོ་ཞེས་ལུང་བསྟན། །སོ་སོར་བདག་གི་འདི་མཆོག་ཟེར་ཞིང་སོང༌། །བློན་པོས་མཆོག་དེ་གང་ཡིན་དྲིས་པ་ན། །ཟས་མཆོག་འབྲས་ཆན་གོས་མཆོག་རས་གོས་སྟེ། །སྟན་གྱི་མཆོག་ནི་ས་གཞི་ཡིན་ནོ་ཟེར། །ཐ་ཆུང་བྲན་མོའི་བུ་དེ་ལུང་བསྟན་ནོ། །རྒྱལ་པོ་ནད་ཀྱིས་འཆི་བར་ཉེ་བའི་ཚེ། །རྒྱལ་བུ་གཞན་ཀུན་དམག་གིས་གཡུལ་དུ་སོང༌། །བློན་པོས་བསྐུལ་བས་ཐ་ཆུང་ཨ་ཤོ་ཀར། །ཅོད་པན་བཅིངས་སྟེ་རེ་ཞིག་འདི་བྱོས་ལ། །དེ་ནས་ཕུ་བོ་ཞིག་ནི་སྐོས་ཤིག་སྐད། །ཕུ་བོ་བཅུ་བདུན་གཡུལ་ངོར་ཤི་ནས་ནི། །ཨ་ཤོ་ཀ་ཉིད་གཏན་གྱི་རྒྱལ་པོར་གྱུར། །དམྱལ་བའི་གཅོད་བཏུབ་ཡི་དྭགས་བཀྲེས་སྐོམ་དང། །དུད་འགྲོའི་བཀོལ་སྤྱོད་མི་ཡི་བྲེལ་ཕོངས་དང། །(ཅ༤༤བ)
ལྷ་མིན་འཐབ་རྩོད་ལྷ་ཡི་ལོངས་སྤྱོད་དེ། །ཀུན་ལ་རེ་མོས་ཚུལ་གྱིས་འབངས་རྣམས་སྦྱར། །མིང་ཡང་གཏུམ་པོ་མྱ་ངན་མེད་ཅེས་གྲགས། །དེ་ཚེ་ཤར་ཕྱོགས་བྱ་གག་ཀུན་ར་ན། །འཕགས་པ་ཀུན་དགའ་བོ་ཡི་སློབ་མ་ནི། །དགེ་སློང་དབང་པོའི་སྡེའམ་གྲགས་པ་ཞེས། །དགྲ་བཅོམ་རྣམ་ཐར་བརྒྱད་དང་ལྡན་པ་བཞུགས། །དེ་ཡི་སློབ་མ་དགེ་ཚུལ་གཞོན་ནུ་ཞིག །བསོད་སྙོམས་སྤྱོད་མཐོང་རྒྱལ་པོས་བཟུང་ནས་ནི། །འདི་འདྲའི་ཆ་ལུགས་སྔོན་ཆད་གསོད་མ་མྱོང༌། །གཤེད་མ་རྣམས་ཀྱིས་ཟངས་སུ་ཚོས་ཤིག་ཟེར། །བདག་གིས་རབ་ཏུ་བྱུང་བའི་དོན་མ་གྲུབ། །ཞག་བདུན་སྒོམ་དུ་ཆུག་ཅེས་ཞུས་པས་གནང༌། །ཞག་ལྔའི་བར་དུ་ཅི་ཡང་མ་རྟོགས་ཚེ། །རྒྱལ་པོའི་བཙུན་མོ་ཞིག་ལ་ཆད་པ་ཕོག །དགེ་ཚུལ་དེ་ཡི་མདུན་དུ་བསད་ཅིང་བཏུབས། །ལུས་མཛེས་སྐྱེ་བོ་དགའ་བར་བྱེད་དེ་ཉིད། །རྒྱུ་ལྟོ་འཇན་འཇིན་རབ་ཏུ་མི་གཙང་བ། །འདི་ལྟར་གྱུར་སྙམ་མི་སྡུག་འདུ་ཤེས་ཐོབ། །སྐྱོ་བས་སྐད་ཅིག་དེ་ལ་དགྲ་བཅོམ་གྱུར། །ཞག་བདུན་ལོན་ཚེ་ཁ་སྦྱར་ཟངས་ཀྱིས་ནང༌། །ཡུངས་མར་བླུག་པར་ཉིན་གཅིག་བཙོས་ནས་ཕྱེ། །ཅི་ཡང་མ་ཉེས་ཟིལ་པ་ཕྲོམ་མེ་འདུག །ངོ་མཚར་སྐྱེས་སྟེ་དེ་ཡི་རྒྱུ་དྲིས་པས། །ཞག་བདུན་བསྒོམས་པས་དགྲ་བཅོམ་ཐོབ་ཅེས་ཟེར། །དུས་རིང་སྡིག་པ་མང་པོ་བསགས་སྙམ་ནས། །རྒྱལ་པོ་འགྱོད་དེ་སྡིག་སྦྱོང་གསོལ་བ་བཏབ། །ང་ནི་དགེ་ཚུལ་ཅང་མི་ཤེས་པ་སྟེ། །མཁན་པོའི་དྲུང་དུ་གསོལ་བ་ཐོབ་ཅིག་ཟེར། །ཆོ་འཕྲུལ་སྣ་ཚོགས་བསྟན་སྟེ་མྱ་ངན་འདས། །ས་དེར་དེ་ཡི་གདུང་གི་མཆོད་རྟེན་བཞེངས། །རྒྱལ་པོ་ཉིད་ཀྱི་གྲོང་ཁྱེར་དངོས་དེ་ནི། །རྡོ་རྗེའི་གདན་ནས་ཤར་དུ་དཔག་ཚད་བཅུ། །འདས་པ་གངྒཱའི་ཆུ་དང་ཉེ་བར་ཡོད། །དགྲ་བཅོམ་གྲགས་པའི་དྲུང་དུ་ཕོ་ཉ་བཏང༌། །བདག་གི་སྡིག་པ་སྦྱང་བའི་ཐབས་འཚོལ་ཕྱིར། །བདག་དེར་མཆི་འམ་འཕགས་པ་འདིར་གཤེགས་ཞེས། །གསོལ་བས་(ཅ༤༥ན)
གཞན་ལ་གནོད་པར་གྱུར་དོགས་ནས། །འཕགས་པས་རྒྱལ་པོའི་དྲུང་དུ་མྱུར་བར་བྱོན། །སྡིག་པ་སྦྱོང་ཕྱིར་རིང་སྲེལ་ལྡན་པ་ཡི། །མཆོད་རྟེན་བྱེ་བ་ཕྲག་གཅིག་གྱིས་ཤིག་གསུང༌། །རྒྱལ་པོས་དེ་ཙམ་མི་འགྲུབ་ཅེས་སྨྲས་པས། །ཁྱོད་ནི་རྒྱལ་བས་སྔོན་དུ་ལུང་བསྟན་གྱི། །མི་དང་མི་མིན་ཀུན་ལ་བཀའ་སྒོས་དང༌། །རིང་པོར་མ་ཐོགས་འགྲུབ་པར་ངེས་སོ་གསུངས། །རྒྱལ་པོ་མ་སྐྱེས་དགྲ་ཡི་གདུང་སྐལ་གྱི། །རིང་སྲེལ་བྲེ་བོ་ཆེ་ཡི་ཁལ་གཅིག་ནི། །འོད་མའི་ཚལ་ན་གཏེར་དུ་སྦས་སོ་ཞེས། །གསུངས་ནས་དེ་ཡི་ས་གཞི་བྲུས་པ་ན། །མཚོན་ཆའི་འཁོར་ལོ་བྱུང་སྟེ་བཙལ་མ་ནུས། །བུད་མེད་ཅིག་གིས་གངྒཱའི་ཆུ་ཕྲན་ཞིག །དྲངས་ནས་ཡོད་ཅེས་ཐོས་ཀྱིས་ཆོད་ཅིག་ཟེར། །རྙེད་དེ་ཆུ་རྒྱུན་བཀག་པས་འཁོར་འཕྲོ་ཆད། །སྐུ་གདུང་བྲུས་པས་མ་འོངས་རྒྱལ་པོ་ནི། །དབུལ་པོ་ཞིག་གིས་གཏེར་འདི་རྙེད་འགྱུར་ཞེས། །རིན་ཆེན་ཡི་གེ་བྱུང་བས་མ་རངས་སྟེ། །ང་ལྟ་བུ་ལ་དབུལ་པོ་ཞེས་ཟེར་བ། །མི་རིགས་ཟེར་སྟེ་སྐུ་གདུང་འཚོལ་འཕྲོ་བཅད། །རྒྱལ་བའི་གདུང་ཕྱིར་ང་རྒྱལ་མ་བྱེད་ཅེས། །བསྐུལ་ནས་སླར་བཙལ་རིན་ཆེན་སྒྲོམ་བུར་བཞུགས། །ཕྱོགས་བཞིར་ནོར་བུ་རིན་ཆེན་རེ་རེ་བཞག །དེ་ཡིས་རྟག་དུ་མར་མེའི་བྱ་བ་བྱེད། །རྒྱལ་པོ་ཨ་ཤོ་ཀ་ཡི་རྒྱལ་སྲིད་ཀྱིས། །ནོར་བུ་རེ་རེའི་རིན་དུའང་མ་ཆོག་ནས། །རྒྱལ་པོའི་ང་རྒྱལ་ཆག་ཅིང་དུལ་བར་གྱུར། །དེ་ནས་རིང་སྲེལ་བྲེ་ཆེན་བཞི་སྤྱན་དྲངས། །བྲེ་འུ་ཆུང་གི་ཁལ་གཅིག་ཚད་དུ་བྱུང༌། །ལྷག་མ་སྔར་བཞིན་རྒྱས་བཏབ་སྦས་སྟེ་བཞག །སྟེང་དུ་མཆོད་རྟེན་ངོ་མཚར་ལྡན་པ་བྱས། །ཛམྦྷ་ལ་དང་གནོད་སྦྱིན་ཤིང་རྟ་གྲུབ། །རྫུ་འཕྲུལ་སྟོབས་ཆེན་ལྡན་པའི་གནོད་སྦྱིན་ཞིག །བྱ་བ་ཐོགས་མེད་སྒྲུབ་པའི་བློན་པོར་གྱུར། །དེ་ཡིས་གྲོགས་བྱས་འཛམ་གླིང་རྣལ་དུ་ཕབ། །མི་དང་མི་མ་ཡིན་པ་ཀུན་བསྐུལ་ནས། །ས་སྟེང་ཀུན་དུ་རྡོ་ཡི་སྲོག་ཤིང་བསྒྲེངས། །འཛམ་གླིང་ཁྱབ་པར་རྒྱལ་བའི་མཆོད་རྟེན་བྱས། །མཆོད་རྟེན་(ཅ༤༥བ)
གྲངས་ནི་བྱེ་བ་སྙེད་ཡོད་ཕྱིར། །དེང་སང་བྱེ་བ་མཆོད་རྟེན་ཞེས་སུ་གྲགས། །གསུམ་དང་བརྒྱད་དང་བྱེ་བ་ལ་སོགས་པ། །བདེ་གཤེགས་མཆོད་རྟེན་རྣམས་ལ་ཕྱག་འཚལ་ཞེས། །ཀླུ་སྒྲུབ་ཞབས་ཀྱིས་བཤད་པའང་འདི་ཉིད་ཡིན། །ཀུན་ན་རྒྱལ་བའི་རིང་སྲེལ་རེ་རེ་བཞུགས། །མདོ་ལས་མཆོད་རྟེན་བརྒྱད་ཁྲི་བཞི་སྟོང་ཞིག །བྱེད་པར་འགྱུར་ཞེས་ལུང་བསྟན་ཁོ་ན་སྣང༌། །སངས་རྒྱས་བསྟན་ལ་བྱ་བ་རྒྱ་ཆེན་བྱས། །མཚན་ཡང་ཆོས་རྒྱལ་ཨ་ཤོ་ཀ་ཞེས་བརྗོད། །གཞན་ཡང་གནས་ཆེན་བརྒྱད་ལ་སོགས་པ་རུ། །གཙུག་ཁང་མང་བྱས་དགེ་འདུན་མཐའ་ཡས་མཆོད། །བཀའ་ཡི་བསྡུ་བ་བར་པའི་སྦྱིན་བདག་བྱས། །རྒྱལ་པོ་དེ་སྲས་ཀུ་ན་ལ་ཡི་མིག །ཡབ་ཀྱི་བཙུན་མོ་སྐར་རྒྱལ་སྲུང་བ་ཡིས། །འདོད་ཅིང་ཆགས་པས་བསླུ་བར་མ་ནུས་ཚེ། །གྱ་གྱུས་མིག་ཕྲོགས་སློང་མོས་འཚོ་བའི་ཚེ། །ཁྲོ་བ་མེད་པའི་བདེན་པས་མིག་རབ་སོས། །བསྟན་ལ་རབ་བྱུང་དགྲ་བཅོམ་དམ་པར་གྱུར། །འདི་ལ་ཀུ་ན་ལའི་མིག་གི་རྟོགས་བརྗོད་ཅེས་པ་ཡོད། འཛམ་བུའི་གླིང་ནས་རྒྱ་མཚོར་འདོང་བ་ཡི། །ཚོང་པའི་ཚོགས་ཤིག་ལན་ལྔར་གྲུ་ཆེན་ཞིག །ནོར་རྫས་ཆུར་ཤོར་རང་རང་རྐྱལ་སྟེ་ཐར། །མི་དེ་རྣམས་ཀྱིས་རྒྱལ་པོའི་སྤྱན་སྔར་འདུས། །ཁྱོད་ཀྱི་བཀའ་ལུང་ཀུན་གྱིས་ནོད་ན་ཡང༌། །རྒྱ་མཚོའི་ཀླུ་ཡིས་ཁྱོད་ཀྱི་བཀའ་མ་ཉན། །བདག་ཅག་ལན་ལྔར་ནོར་རྫས་ཀུན་དང་ཕྲལ། །དེ་བས་ཁྱོད་ཀྱིས་རྫས་རྣམས་དགུག་དུ་གསོལ། །དེ་སྐད་མགྲིན་གཅིག་བརྗོད་དེ་ངུད་མོ་འབྱིན། །རྒྱལ་པོ་གདོང་དམར་ངོ་ཚ་ལྡན་གྱུར་སྟེ། །འདི་ལ་ཇི་ལྟར་བྱ་སྙམ་ཐེ་ཚོམ་གྱུར། །དགྲ་བཅོམ་གྲགས་པ་ལ་ནི་ཞུས་པ་ན། །ཟངས་མའི་གླེགས་བུར་རྒྱལ་པོའི་བཀའ་ཡིག་བཀོད། །རྒྱ་མཚོ་ཆེན་པོའི་ནང་དུ་དོར་ཞིག་གསུངས། །དེ་ལྟར་བྱས་པས་ཀླུ་ཡིས་མ་བླངས་སྟེ། །རླབས་ཀྱིས་ཚུ་རོལ་རྒྱང་རིང་ཞིག་དུ་འཕངས། །དེ་ཚེ་དགྲ་བཅོམ་གྲགས་པའི་(ཅ༤༦ན)
ཞལ་ན་རེ། །འཛམ་བུ་ཆུ་བོའི་གསེར་ལས་རྒྱལ་པོ་ཡི། །གཟུགས་དང་ཀླུ་ཡི་གཟུགས་ཤིག་ཚར་མཉམ་གྱིས། །ལྷན་ཅིག་ཁྲུས་ཀྱི་རྫིང་བུར་དོར་ཅིག་གསུངས། །དེ་ཚེ་ཀླུ་ཡི་གཟུགས་ནི་གཟི་འོད་འབར། །ཆུ་ལ་མ་བྱིངས་སྟེང་དུ་འཕགས་ཤིང་གསལ། །རྒྱལ་པོའི་སྐུ་གཟུགས་མོག་ཞིང་ཆུར་བྱིངས་ནས། །དེ་ཡི་མདུན་དུ་ཕྱག་བྱེད་ཚུལ་གྱིས་བུབ། །དགྲ་བཅོམ་ཞལ་ནས་ད་ལྟ་རྒྱལ་པོ་བས། །ཀླུ་རྒྱལ་བསོད་ནམས་ལྷག་པར་ལྡན་གྱུར་གྱིས། །རྒྱལ་པོ་ཆེན་པོ་བསོད་ནམས་གྱིས་ཤིག་གསུངས། །དགྲ་བཅོམ་འབུམ་ཕྲག་མང་པོ་སྤྱན་དྲངས་སྟེ། །རྒྱ་ཆེན་བསྙེན་ཞིང་བཀུར་བས་རབ་ཏུ་མཆོད། །རྒྱལ་བའི་སྐུ་གསུང་ཐུགས་རྟེན་རྒྱ་ཆེར་བྱས། །ཁ་ན་མ་ཐོ་མེད་པའི་མཆོད་སྦྱིན་ཚེ། །སྤོ་གཏན་མ་བཅུག་རྒྱུན་མི་འཆད་པར་བྱེད། །ཞག་བདུན་ལོན་ཚེ་རྒྱལ་པོའི་སྐུ་གཟུགས་དེ། །མི་ནུབ་ཕྱེད་ཙམ་ཆུ་བོའི་སྟེང་དུ་བྱུང༌། །བདུན་གཉིས་ལོན་ཚེ་གཟུགས་གཉིས་མཐོ་དམན་དང༌། །བཟང་ངན་མེད་པར་ཆུ་སྟེང་མཉམ་པར་འདུག །ཞག་གྲངས་ཉེར་གཅིག་ལོན་ཚེ་རྒྱལ་པོའི་གཟུགས། །གསལ་ཞིང་འོད་འབར་ཆུ་བོའི་སྟེང་དུ་འཕགས། །ཀླུ་གཟུགས་ལྕགས་ལས་བྱས་ལྟར་འོད་མི་གསལ། །ཕྱག་བྱེད་ཚུལ་གྱིས་བུབ་སྟེ་ཆུ་བོར་ནུབ། །འཕགས་པའི་ཞལ་ནས་འཕྲིན་ཡིག་སྲིངས་ཤིག་གསུངས། །ཟངས་མའི་གླེགས་བུར་བཀོད་པའི་བཀའ་ཡིག་ནི། །རྒྱ་མཚོར་འཕངས་པས་དབུ་བའི་ཕུང་པོས་བཏེག །སྒྲ་ཆེན་སྒྲོག་ཅིང་རྒྱ་མཚོའི་དབུས་སུ་ནུབ། །ཀླུ་དང་གནོད་སྦྱིན་སྲུལ་པོ་ལུས་སྲུལ་སོགས། །མི་མ་ཡིན་པའི་འགྲོ་བ་མང་པོ་ཡིས། །ཚོང་པ་རྣམས་ཀྱི་ཟོང་རྣམས་མ་ལུས་དང༌། །ཀླུ་ཡི་རིན་ཆེན་དཔག་མེད་ཁྱེར་ནས་ནི། །ཀུན་གྱིས་མཐོང་བར་རྒྱལ་པོའི་མདུན་དུ་ཕུལ། །སྲི་ཞུ་ཕུ་དུད་མཆོད་བསྟོད་རྒྱ་ཆེར་བྱས། །མི་སྐྱེའི་བཟོད་ཐོབ་བྱང་ཆུབ་ལུང་བསྟན་པའི། །ཀླུ་རྒྱལ་རྒྱ་མཚོའི་བསོད་ནམས་ཟིལ་(ཅ༤༦བ)
ནོན་པའི། །མི་ཡི་རྒྱལ་པོ་མྱ་ངན་མེད་པ་དེ། །ལྷག་པར་བསོད་ནམས་མཐུ་ལ་ཡིད་འཆེས་སྟེ། །དགེ་འདུན་ལ་ནི་གསེར་སྲང་བྱེ་བ་བརྒྱ། །འབུལ་བའི་ཡི་དམ་བརྟེན་པོ་བཟུང་བར་གྱུར། །འདི་ལ་ཆོས་རྒྱལ་མྱ་ངན་མེད་ཀྱིས་ཀླུ་བཏུལ་བའི་ལེའུ་ཞེས་བྱ་བའི་རྟོགས་བརྗོད་ཡོད་ཅིང་དཔག་བསམ་འཁྲི་ཤིང་གི་ཡལ་འདབ་དོན་གསུམ་པ་ཡང་འདི་ཡིན། རྒྱལ་པོ་དེ་ཡི་ཀུན་ཏུ་སྤྱོད་པ་ནི། །དགེ་སློང་དགེ་འདུན་མཐའ་ཡས་ཉིན་རེ་ཞིང༌། །ཕོ་བྲང་སྤྱན་འདྲེན་མཆོད་པ་རྒྱ་ཆེན་བྱེད། །གདུགས་ཚོད་རྙེད་པ་བསྟབས་ནས་དམ་ཆོས་ཉན། །དེ་ལྟར་རྟག་དུ་རྒྱལ་བའི་བསྟན་ལ་མཆོད། །གསེར་སྲང་བྱེ་བ་གོ་དྲུག་ཕུལ་ཟིན་ནས། །བྱེ་བ་བཞི་ཡིས་མ་ལོངས་གྱུར་པའི་ཚེ། །རྒྱལ་པོ་དུས་ཀྱི་བསྙུན་ནད་དྲག་པོས་ཟིན། །རྒྱལ་པོའི་ཚ་བོ་རྒྱལ་ཚབ་བྱེད་པ་ལ། །བཀའ་ཡིས་བསྒོས་ཀྱང་འགྲོངས་པར་ཤེས་པ་ཡིས། །མཛོད་ལ་སེར་སྣ་བྱས་སྟེ་གསེར་མ་ཕུལ། །དགེ་འདུན་རྣམས་ཀྱང་རྒྱལ་པོར་ཐུགས་རྗེ་བས། །སྤྱན་མ་དྲངས་ཀྱང་ཉིན་རེ་བཞིན་དུ་བྱོན། །རྒྱལ་ཚབ་དེ་ཡིས་གདུགས་ཚོད་མ་སྦྱར་ནས། །དམ་ཆོས་བསྟན་ནས་ལྷུང་བཟེད་སྟོང་པ་ཡིས། །ཕོ་བྲང་ཕྱིར་བྱོན་བསོད་སྙོམས་སྤྱོད་པར་བྱེད། །རྒྱལ་པོས་རང་གི་སྨན་དང་གསོལ་ཟས་དང༌། །གོས་དང་རྒྱན་ལས་ཕྲི་སྟེ་ཅི་ནུས་འབུལ། །དེ་དག་རྣམས་ཀྱང་རྒྱལ་བུས་སྲུང་བཅུག་པས། །ཐ་མའི་ཉིན་པར་དབུལ་བྱ་གཞན་མ་འབྱོར། །ཁྲུས་རྩིའི་སྐྱུ་རུ་ར་ཡི་ཕྱེ་མ་ནི། །ཕུལ་གང་བདོག་པ་དེ་ཉིད་ཁོ་ན་བུལ། །དེ་ཚེ་རྒྱལ་པོའི་ཆོས་བློན་ཆེན་པོ་ཅིག །སྐྱོ་བར་གྱུར་སྟེ་རྒྱལ་པོ་ཆེན་པོ་ལགས། །ཁྱོད་ལ་ཡོ་བྱད་གཞན་དག་མི་བདོག་ཀྱང༌། །ས་གཞི་བདོག་གིས་འདི་ཉིད་འབུལ་བར་གྱིས། །གསེར་སྲང་བྱེ་བ་བཞི་ཡིས་བླུ་རུ་ཆུག །ཁྱོད་ཀྱི་ཐུགས་དགོངས་རྫོགས་པར་འགྱུར་རོ་ཞེས། །གསོལ་བས་རྒྱལ་པོ་ཆེན་པོ་རབ་ཏུ་མཉེས། །ས་གཞི་མ་ལུས་དགེ་འདུན་རྣམས་ལ་ཕུལ། །རྒྱལ་ཚབ་དེ་ཡིས་བྱེ་བ་བཞི་ཡིས་བླུས། །དེ་ནས་རྒྱལ་པོ་དུས་(ཅ༤༧ན)
ཀྱི་ཆོས་ལྡན་པས། །དགའ་ལྡན་ལྷ་ཡི་རིགས་སུ་གཤེགས་པར་གྱུར། །མཐར་ནི་རྫོགས་འཚང་རྒྱ་བར་ལུང་དུ་བསྟན། །གཞན་ཡང་འཇམ་དཔལ་རྩ་བའི་རྒྱུད་ཆེན་ལས། །རྒྱལ་པོ་ལུང་བསྟན་མདོར་བསྡུས་བརྗོད་བྱས་ན། །མྱ་ངན་མེད་འོག་མྱ་ངན་བྲལ་ཞེས་འབྱུང༌། །གོས་དཀར་མོ་གྲུབ་ཆོས་ཀྱི་ངང་ཚུལ་ཅན། །ལོ་ནི་བདུན་བཅུ་རྩ་དྲུག་མཆོད་རྟེན་མཆོད། །དེ་ཡི་འོག་དུ་དཔའ་བོའི་སྡེ་ཞེས་འབྱུང༌། །དཔལ་ཆེན་མོ་གྲུབ་གཙུག་ལག་ཁང་ཆེན་བྱེད། །རྒྱ་མཚོའི་མཐར་ཐུག་མཆོད་རྟེན་དུ་མས་བརྒྱན། །ལོ་ནི་བདུན་བཅུར་ཆོས་ཀྱིས་རྒྱལ་ཐབས་བྱེད། །གཉི་གའང་ལྷར་སྐྱེ་བྱང་ཆུབ་ཆེ་འཐོབ་འགྱུར། །དེ་འོག་རྒྱལ་པོ་དགའ་བོ་ཞེས་བྱ་འབྱུང༌། །ཤ་ཟ་པི་ལུའི་སྔགས་གྲུབ་ལོངས་སྤྱོད་ལྡན། །དེ་ཡི་གྲོགས་པོ་བྲམ་ཟེ་པཱ་ཎི་ཞེས། །སྤྱན་རས་གཟིགས་ཀྱི་སྔགས་གྲུབ་བརྡ་སྤྲོད་བྱེད། །བྲམ་ཟེ་མཆོག་སྲིད་ཅེས་བྱའང་དེ་ཚེ་འབྱུང༌། །རྒྱལ་པོའི་ཚེ་ཚད་ལྔ་བཅུ་རྩ་དྲུག་སྟེ། །གྲོགས་བཅས་ཉན་ཐོས་བྱང་ཆུབ་འཐོབ་པར་འགྱུར། །དེ་ནས་རྒྱལ་པོ་ཟླ་བ་སྦས་པ་ཞེས། །ཛམྦྷ་ལ་གྲུབ་རྒྱལ་སྲིད་ལོངས་སྤྱོད་རྒྱས། །ཤི་འཕོས་ལས་ཀྱིས་ཡི་དྭགས་འཇིག་རྟེན་སོང༌། །དེ་ནས་ལྷར་སྐྱེ་ཉན་ཐོས་བྱང་ཆུབ་འཐོབ། །དེ་ཡི་བུ་ནི་སྙིང་པོ་ཐིག་ལེ་ཞེས། །སྔོན་དུས་བྱིས་པར་གྱུར་ཚེ་རྩེད་མོའི་ཕྱིར། །རྒྱལ་བའི་མཆོད་རྟེན་བྱེ་མ་ལས་བྱས་མཐུས། །སྐྱེ་བ་ལྔ་བརྒྱར་ལྷ་ཡི་བདེ་མྱོང་ནས། །དེ་ནས་ཤི་འཕོས་མི་ཡི་རྒྱལ་པོར་གྱུར། །བྱིས་པའི་དུས་ནས་རྒྱལ་པོར་ཅོད་པན་བཅིངས། །འཇམ་དཔལ་དང་ནི་སྒྲ་ཡི་རིག་པ་གྲུབ། །ཆོས་བཞིན་རྒྱལ་སྲིད་ལོ་ནི་བདུན་བཅུར་བྱེད། །དེ་ཡི་བློན་པོ་བྲམ་ཟེ་ཙ་ན་ཀས། །གཤིན་རྗེའི་གཤེད་གྲུབ་ཁྲོ་བས་ཟིལ་མནན་སྟེ། །རྒྱལ་པོ་གསུམ་གྱི་རིང་ལ་མངོན་སྤྱོད་ཀྱིས། །ཤིན་དུ་མི་བཟད་སྡིག་ཆེན་བྱས་པར་འགྱུར། །སྔགས་ཀྱི་མཐུ་ཡིས་ལྷ་མ་ཡིན་བཀུག་ནས། །(ཅ༤༧བ)
ལུས་དེས་ལྷ་མིན་བསྟེན་སྟེ་ཡུན་རིང་འཚོ། །ཤི་འཕོས་མནར་མེད་དམྱལ་བའི་གནས་སུ་སྐྱེ། །སྡུག་བསྔལ་མི་བཟད་མཐའ་ཡས་མྱོང་བར་འགྱུར། །དེ་ནས་ཤི་འཕོས་ཀླུ་ཡི་རྒྱལ་པོར་སྐྱེ། །འཇིགས་པའི་གཟུགས་ཅན་མ་རུངས་དུག་འཛིན་པ། །མི་བཟད་སྡིག་པའི་ལས་ལམ་བྱེད་པར་འགྱུར། །དེ་ནས་ཤི་འཕོས་རྫུ་འཕྲུལ་ཆེན་པོ་ཡི། །ཡི་དྭགས་གཤིན་རྗེའི་རྒྱལ་པོར་རབ་ཏུ་འགྲོ། །དེ་ལྟར་སྡུག་བསྔལ་སྟོང་ཕྲག་ཡང་ཡང་མྱོང༌། །མཐར་གྱིས་མིར་སྐྱེས་ཡོན་གནས་མཆོག་གྱུར་པའི། །རང་སངས་རྒྱས་ལ་བསོད་སྙོམས་ཕུལ་ནས་ནི། །སྨོན་ལམ་བཏབ་ནས་ཤི་འཕོས་མཐོ་རིས་སོང༌། །མཐར་གྱིས་དམན་པའི་བྱང་ཆུབ་ཐོབ་པར་འགྱུར། །དེ་བས་སྔགས་སྒྲུབ་མངོན་སྤྱོད་ཡོང་མི་བྱ། །རྒྱལ་དང་རྒྱལ་སྲས་རྣམས་ཀྱིས་མངོན་སྤྱོད་བཀག །སྙིང་རྗེ་མཆོག་དང་རྫུ་འཕྲུལ་ཆེ་ལྡན་པའི། །སྲས་བཅས་རྒྱལ་བས་སྔགས་ཀྱི་ལས་རྣམས་ནི། །མཐུ་བསྟན་ཆེད་དུ་གསུངས་ཀྱི་གསང་ཕྱིར་མིན། །དེ་བས་མངོན་སྤྱོད་མི་བྱ་ཞེས་ལུང་བསྟན། །འདི་དུས་དགེ་སློང་མ་ཁོལ་འབྱུང་བར་གསུངས། །དགེ་སློང་དགའ་བོའི་འོག་དུ་ས་ཡི་བདག །ཙནྡན་སྐྱོང་འབྱུང་ལོ་ནི་སུམ་བརྒྱར་འཚོ། །གེགས་མེད་བྱང་ཆུབ་ཆེན་པོ་བདེ་བླག་འཐོབ། །དེ་ནས་མི་དགེའི་བཤེས་གཉེན་གོ་མི་ཤན། །བདག་ཉིད་ངན་པས་ཡོངས་སུ་བསླུས་པ་ཡི། །སྡིག་པའི་རྒྱལ་པོ་བཙུན་པ་ཞེས་བྱ་བ། །ནག་པོའི་རྩ་ལག་ཞིག་གིས་ཤར་ཕྱོགས་ནས། །ཁ་ཆེའི་བར་དུ་ལྷ་ཁང་མཆོད་རྟེན་འཇིག །རབ་བྱུང་རྣམས་གསོད་དེ་ཚེ་དཀར་ཕྱོགས་ཀྱི། །ལྷ་ཀུན་འཁྲུགས་ནས་བྱང་ཕྱོགས་ལ་བརྟེན་པར། །རྒྱལ་པོ་དེ་ནི་རི་ཡིས་བཅོམ་སྟེ་འཆི། །འོག་ནས་འོག་འགྲོ་མནར་མེད་དམྱལ་བར་འཚེད། །ནམ་ཞིག་སངས་རྒྱས་བསྟན་ལ་འཇུག་པར་འགྱུར། །དེ་འོག་རྒྱལ་པོ་སངས་རྒྱས་ཕྱོགས་ཞེས་པ། །གྲགས་ཆེན་གཏོང་བ་ཆེ་ཞིང་བསྟན་ལ་གུས། །དེ་ནས་རྒྱལ་པོ་ཐམས་ཅད་མངོན་དགའ་ཞེས། །པདྨ་འཆང་(ཅ༤༨ན)
གྲུབ་སྟོན་པའི་བསྟན་གཙོར་བྱེད། །ཀུན་དགའ་ར་བ་མཆོད་རྟེན་གནས་དང་ནི། །མཚེ་འུ་རྫིང་ཁྲོན་མཚོ་དང་ལུ་མ་སོགས། །ཀུན་དུ་སྟོན་པའི་གཟུགས་བརྙན་རྒྱ་ཆེར་བྱེད། །སྔགས་ཀྱི་མཐུ་ཡི་ལོ་ནི་སུམ་བརྒྱར་མཚོ། །ལྷ་ཡི་གནས་སྐྱེ་མྱུར་དུ་བྱང་ཆུབ་འཐོབ། །གྲོང་ཁྱེར་ལྔ་ལེན་དུ་ནི་དེ་ཡི་བུ། །ཟབ་མོའི་ཕྱོགས་ཅེས་བྱ་བའི་རྒྱལ་པོ་འབྱུང༌། །འཇམ་དཔལ་དབྱངས་ཀྱི་ཡི་གེ་དྲུག་པ་གྲུབ། །མཆོད་རྟེན་གཙུག་ཁང་གནས་ཁང་རྒྱ་ཆེར་བྱེད། །སྔགས་ཀྱི་མཐུ་ཡིས་ལོངས་སྤྱོད་རྒྱ་ཆེན་ལྡན། །རྒྱལ་བའི་བསྟན་ལ་རྣམ་པ་སྣ་ཚོགས་ཀྱིས། །བྱ་བ་ཆེར་བྱས་མྱུར་དུ་བྱང་ཆུབ་འཐོབ། །སྐབས་འདིར་བོད་དང་རྒྱ་ཡི་རྒྱལ་པོ་སོགས། །ལུང་དུ་བསྟན་མོད་སོ་སོའི་སྐབས་སུ་འཆད། །བྱང་ཕྱོགས་རྒྱལ་པོ་ཏུ་རུཥྐ་ཞེས་འབྱུང༌། །སྐྲ་ཅན་མ་གྲུབ་སྡེ་ཆེན་བརྩོན་འགྲུས་ལྡན། །ཤིང་ཤུན་གྱོན་ཡུལ་མ་གཏོགས་ཁ་ཆེ་དང༌། །ཀ་ཤིའི་མཐར་ཐུག་དཔག་ཚད་བདུན་བརྒྱ་དང༌། །འབུམ་ཕྲག་གཉིས་ཀྱི་ས་སྐྱོང་བསྟན་ལ་མཆོད། །རྒྱལ་བའི་མཆོད་རྟེན་སྟོང་དང་བརྒྱད་ཁྲི་བྱེད། །དེ་ཡི་ཡུལ་དུ་ཐེག་ཆེན་ཤེས་ཕྱིན་རྒྱས། །ལོ་ནི་སུམ་བརྒྱར་སྔགས་ཀྱི་མཐུ་ཡིས་འཚོ། །ལུས་ཞིག་མཐོ་རིས་འགྲོ་ཞིང་སངས་རྒྱས་འགྱུར། །དེ་འོག་མང་བསྐུར་ཏུ་རུཥྐ་ཞེས་འབྱུང༌། །སྒྲོལ་མའི་སྔགས་གྲུབ་ཕྱོགས་ཆེན་དཔུང་ཆེན་པོ། །གྲགས་ཆེན་གཉེན་དང་རྒྱལ་པོ་ཀུན་གྱིས་བསྐུར། །རྩ་བརྒྱད་སྟོང་གི་གཙུག་ལག་ཁང་བྱེད་ཅིང༌། །ཆོས་ཀྱི་བདག་ཉིད་དེ་མཐར་རྫོགས་འཚང་རྒྱ། །དེ་ཡི་ཡུལ་དུ་གསུང་རབ་མང་གནས་པར། །སྔོན་གྱི་རྒྱལ་བ་དག་གིས་ཀྱང་ལུང་བསྟན། །དགྲ་བཅོམ་དང་ནི་ཀླུ་དང་འཇིག་རྟེན་སྐྱོང༌། །བསྟན་སྲུང་གནོད་སྦྱིན་མང་པོ་དེ་ཚེ་འབྱུང༌། །ནུབ་ཕྱོགས་འཕགས་རྒྱལ་ཕ་རོལ་ལ་ཊའི་ཡུལ། །པུ་ཊིའི་རྒྱལ་རིགས་ངང་ཚུལ་ཞེས་བྱ་བ། །དགེ་སློང་ཞིག་ལས་ཤི་འཕོས་(ཅ༤༨བ)
རྒྱལ་པོ་འབྱུང༌། །མཆོད་རྟེན་སྐུ་གཟུགས་མཆོད་ཅིང་གཙུག་ཁང་བྱེད། །ཆོས་རྒྱལ་ཆོས་ལ་གཉེན་གཤིན་སྔགས་ཀྱང་གྲུབ། །ལོ་ནི་སུམ་བཅུར་སྲིད་བསྐྱངས་དགའ་ལྡན་དུ། །བྱམས་པའི་མདུན་འགྲོ་མཐར་གྱིས་བྱང་ཆུབ་འཐོབ། །དེ་ནས་གཡོ་བ་ཞེས་བྱའི་རྒྱལ་པོ་ནི། །ལོ་གྲངས་ང་ལྔ་ཟླ་བ་ལྔ་རུ་འཚོ། །དེ་ཡི་ནུ་བོ་བསྟན་ཞེས་སྐྱེ་རྒུ་སྐྱོང༌། །ངང་ཚུལ་འོག་དུ་ཟླ་མཛེས་གཞུ་དང་ཏོག །མེ་ཏོག་གཞུ་དང་འོད་ཆེན་སྟོབས་རྣམས་ལྡན། །ཁྱབ་འཇུག་བར་དུ་བ་ལའི་གྲོང་དང་ནི། །རེས་ལྡན་གྲོང་དུ་རྒྱལ་པོ་མཐའ་ཡས་འབྱུང༌། །དེ་ནས་དྲང་སྲོང་དམོད་པས་བཅོམ་གྱུར་སྟེ། །ལ་ཊའི་ཡུལ་ཀུན་ཆུ་ཡིས་གང་བར་འགྱུར། །བྱང་ཕྱོགས་རི་དང་རི་ཞོལ་སྣ་ཚོགས་པར། །ཉི་ཤུ་གཅིག་དང་སུམ་བཅུ་ལ་སོགས་པ། །སྔགས་གྲུབ་རྒྱལ་པོ་མང་དུ་འབྱུང་བར་གསུངས། །ལྷོ་ཕྱོགས་མཚོའི་འགྲམ་ཀཉྩི་པུ་རའི་གནས། །དཀར་དང་ས་བདག་སཱ་ལའི་ལྗོན་པ་སོགས། །རྒྱལ་པོ་སྟོང་ཕྲག་བགྲངས་པ་འབྱུང་བར་བསྟན། །དཔལ་གྱི་རི་བོའི་ཕྱོགས་དང་འབིགས་བྱེད་ཞོལ། །ཀ་ལིངྒ་དང་ཡོན་ཏན་གསུམ་པ་དང༌། །ཀླ་ཀློ་རྒྱ་མཚོའི་ནང་དང་འགྲམ་དག་དང༌། །ཀཱ་མ་རཱུ་དང་ཨོ་ཊའི་ཡུལ་སོགས་སུ། །རྒྱལ་པོ་བསྟན་ལ་དད་པ་མཐའ་ཡས་འབྱུང༌། །དེ་བཞིན་ཤར་གྱི་ཕྱོགས་སུ་རྒྱ་མཚོ་དང༌། །རྣམ་གནོན་དབང་ཆེན་ལ་སོགས་བསྟན་པ་ལ། །དད་པའི་རྒྱལ་པོ་དུ་མ་ལུང་དུ་བསྟན། །གཽ་ཊའི་ཡུལ་དུ་གཞོན་ནུ་ཞེས་བྱ་སོགས། །མཆོག་དམན་རྒྱལ་པོ་སྣ་ཚོགས་འབྱུང་བར་བསྟན། །ཁྱད་པར་ཤར་ཕྱོགས་མཚོར་བརྟེན་འབྲོག་གི་བར། །བྱང་དུ་ལོ་ཧི་ཏ་ཀླུང་ཁ་བ་ཅན། །ནུབ་ཏུ་ཀ་ཤིའི་གྲོང་ལ་ཐུག་པའི་བར། །དབང་བྱེད་རྒྱལ་པོ་སེང་གེ་ལྔ་པར་གསུངས། །འདི་རྔོག་ལོ་ཆེན་པོའི་ལུང་བསྟན་དུ་གྲགས་ཀྱང་དེ་མིན། གཞན་ཡང་ཡུལ་དུས་མ་ངེས་རྒྱལ་པོའི་ཚོགས། །མང་དུ་གསུངས་མོད་མདོར་བསྡུས་བརྗོད་པ་སྟེ། །རྒྱས་པར་འཇམ་དཔལ་རྩ་བའི་རྒྱུད་ཉིད་ལྟོས། །(ཅ༤༩ན)
སྔོན་བྱུང་གཏམ་གྱི་གྲགས་པ་ལྟར་བཤད་ན། །ཆོས་རྒྱལ་མྱ་ངན་མེད་འདས་རིང་ཞིག་ན། །རྒྱལ་པོ་ཙནྡྲ་བདུན་རྒྱུད་ཅེས་པ་བྱུང༌། །ཧ་རི་ཙནྡྲ། དེ་ཝ་ཙནྡྲ། ཤྲི་ཙནྡྲ། ཨ་ཁེ་ཙནྡྲ། །དྷརྨ་ཙནྡྲ། བི་ཀྲ་མ་ཙནྡྲ། བདུན་པ་གོ་མི་ཙནྡྲ་ཞེས་བྱ་བ། །ཛཱ་ལནྡྷ་ར་པ་ཡི་སློབ་མ་སྟེ། །ཐུན་མོང་དངོས་གྲུབ་བརྙེས་པར་གྱུར་པ་ཡིན། །དེ་འདས་འོག་དུ་བཙུན་མོ་མཛེས་མ་ཞིག །ཀླུ་བདུད་གདུག་པ་ཅིག་གིས་བདག་གིར་བྱས། །རྒྱལ་པོར་གང་བསྐོས་དང་པོ་ལོ་གཅིག་དང༌། །དེ་འོག་ཟླ་གཅིག་དེ་ཕྱིན་ཞག་རེ་ལ། །རེ་རེ་ཟོས་སྟེ་གྲོང་གི་སྐྱེས་པ་ཀུན། །རེ་མོས་ཀྱིས་བསྐོ་ཐམས་ཅད་སྡུག་བསྔལ་ལྡན། །དེ་ཚེ་འོད་ཟེར་ཅན་མ་གྲུབ་པ་ཡི། །རྒྱལ་རིགས་རྣལ་འབྱོར་པ་ཅིག་དེར་འོངས་ནས། །བ་ལང་རྫི་བོ་ཞིག་ལ་གནས་བཅས་འདུག །དེ་དག་ངུ་ཞིང་དོ་ནུབ་རྒྱལ་པོ་ཡི། །རེ་མོས་བབ་པས་སང་ནི་མི་ལྡོག་ཟེར། །སྙིང་རྗེས་ང་ཡིས་ཚབ་མ་བྱའོ་སྨྲས། །རྒྱལ་པོར་བསྐོས་སྟེ་རིན་ཆེན་ཁྲི་ལ་བསྡད། །སྲོད་ལ་དུག་སྦྲུལ་ནམ་གུང་སྟག་དང་ནི། །ཐོ་རངས་དུས་སུ་སེང་གེར་བྱས་ནས་ནི། །སྐྱེས་བུ་དམན་འབྲིང་མཆོག་ལ་གནོད་བྱེད་པ། །དེ་དག་ལྷ་ཡི་ང་རྒྱལ་གྱིས་ཚར་བཅད། །མཛེ་མོ་མི་བཟད་འཇིགས་པ་ཅིག་སྣང་བ། །ནད་བྲལ་ལྷ་ཡི་ལུས་ལྟར་གྱུར་ནས་ནི། །ཁྱོད་ནི་ཀུན་ལ་བཀའ་དྲིན་མཚུངས་པ་མེད། །བདག་གི་ལུས་ཀྱང་རྟག་དུ་ཁྱོད་ལ་འབུལ། །སྙིང་རྗེས་རྒྱལ་སྲིད་མཛོད་ཅེས་ཞབས་ལ་གཏུགས། །ནང་པར་གྲོང་ཁྱེར་པ་རྣམས་ཁྱོགས་ལ་སོགས། །ཁྱེར་སྟེ་རྒྱལ་པོའི་སྐུ་གདུང་དུར་ཁྲོད་དུ། །སྤྱན་འདྲེན་འོངས་ཚེ་རྒྱལ་པོ་མ་ཉམས་མཐོང༌། །ཀླུ་བདུད་གདུག་པ་དེ་ནི་ངས་བཏུལ་གྱིས། །ད་ནི་རྒྱལ་པོ་སུས་བྱས་ཉམ་ང་མེད། །སུ་འདོད་སྐོས་ཤིག་ཟེར་སྟེ་ཁྲི་ལས་ལངས། །ཀུན་གྱིས་དེ་ཉིད་གཏན་གྱི་རྒྱལ་པོར་ཞུས། །སྙིང་རྗེས་ཁས་བླངས་རྒྱལ་སྲིད་ཆོས་བཞིན་མཛད། །བ་ལང་རྫི་བོའི་ཚབ་མ་ཡིན་པའི་ཕྱིར། །བ་ལང་སྐྱོང་དང་གོ་པཱ་ལ་ཞེས་གྲགས། །ཁ་ཅིག་(ཅ༤༩བ)
ཕྱུགས་རྫི་མོ་ལ་ཤིང་གི་ལྷས། །སྤྱད་པས་བ་ལང་སྐྱོང་བྱུང་བ་དེ་ཡིས། །ནོར་བུ་བྱིན་པས་ས་ལ་དབང་བསྒྱུར་སྟེ། །ནཱ་ལེནྡ་ཡི་གཙུག་ཁང་བཞེངས་ཞེས་ཟེར། །སྔོན་ཚེ་འཕགས་པ་ཤཱ་རིའི་བུ་ཡི་ཡུལ། །ནཱ་ལནྡ་ཡི་གྲོང་ཞེས་གྲགས་པ་སྟེ། །འདམ་བུ་ཅན་ཞེས་ནཱ་ལནྡ་རུ་བརྗོད། །ཁ་ཅིག་མི་ཡི་དབང་པོའི་གཙུག་ཁང་ཞེས། །ནཱ་རེནྡྲ་ཞེས་བྱ་བར་འདོད་པ་དང༌། །རིན་ཆེན་ནལ་གྱིས་ཁེབས་པའི་ས་ཡིན་ཕྱིར། །ནཱ་ལེནྡྲ་ཞེས་བྱ་བར་སྒྲོག་པའང་ཡོད། །རྒྱན་དྲུག་མཆོག་གཉིས་ལ་སོགས་བྱོན་པའི་ས། །སངས་རྒྱས་བསྟན་པའི་འབྱུང་ཁུངས་ཆེན་པོ་ཡིན། །རྒྱལ་པོ་ཆེན་པོ་གོ་པཱ་ལ་དེ་ནི། །ཤར་ཕྱོགས་བྷཾ་ག་ལ་ཙམ་མངའ་རིས་འདུས། །བཙུན་མོ་ལྔ་བརྒྱ་རེ་རེ་ལ་ཡང་ནི། །དགེ་སློང་མ་ཚོགས་ལྔ་བརྒྱའི་མཆོད་གནས་ཡོད། །བཙུན་མོ་ཐ་ཆུང་རྒྱལ་པོར་མ་ཕྲད་ནས། །དགེ་སློང་མ་ཞིག་གིས་ནི་དབང་བྱེད་ཀྱི། །སྨན་སྦྱར་རྒྱལ་པོའི་ཞལ་དུ་མ་ཐོངས་ནས། །རིགས་ལད་དོགས་པས་མཚོ་ཡི་ནང་དུ་ཕོ། །མཚོ་དེའི་ཀླུ་རྒྱལ་དབང་དུ་གྱུར་ནས་ནི། །རྒྱལ་པོར་སྤྲུལ་སྟེ་བཙུན་མོའི་གམ་དུ་འོངས། །རྒྱལ་པོས་ཐོས་ནས་ཀླུ་དེ་འཛིན་བཅུག་པས། །བདག་ལ་དབང་མེད་སྨན་དེའི་ནུས་པ་ཡིན། །བཙུན་མོའི་བུ་འདི་རྒྱལ་པོ་ཉིད་ལ་འབུལ། །སྨན་དེ་བཏོན་ན་ཕྱིན་ཆད་མི་འོང་ཟེར། །བུ་དེ་བསོད་ནམས་ལྡན་པར་རྟོགས་ནས་ནི། །རྒྱལ་པོས་མངའ་མཛད་དྷརྨ་པཱ་ལར་བཏགས། །རྒྱལ་པོ་འདས་ནས་རྒྱལ་སྲིད་མངའ་དབང་བསྐུར། །ས་བདག་ཆེན་པོ་དཔལ་ལྡན་ཆོས་སྐྱོང་དེས། །གཙུག་ཁང་བཞེང་ཕྱིར་ལྟས་མཁན་ལ་དྲིས་པས། །དཀའ་ཐུབ་ལྷ་གནས་ནས་བླངས་ཀོང་བུ་རུ། །བྲམ་ཟེའི་རས་ལ་སྡོང་བུས་བྱས་ནས་ནི། །ཚོང་དཔོན་ལས་བླངས་མར་ལ་མེ་སྤར་ནས། །མཆོད་རྟེན་གང་དུ་ཕུལ་ན་ཆོས་སྐྱོང་གི །སྤྲུལ་པས་ཀོང་བུ་གང་དུ་བསྐྱུར་པ་དེར། །བརྩིགས་ཞེས་རྨི་ལམ་ནང་དུ་བསྟན་མཐོང་ནས། །དཀོན་མཆོག་མཆོད་དང་(ཅ༥༠ན)
སྦྱིན་པ་རྒྱ་ཆེར་བྱས། །མར་མེ་ཕུལ་ཚེ་ཀོང་བུ་བྱ་རོག་གིས། །ཁྱེར་སྟེ་མཚོ་ཆེན་ཞིག་དུ་དོར་བར་གྱུར། །རྒྱལ་པོ་ཡི་ཆད་སྡུག་བསྔལ་ལྡན་པ་ན། །ཀླུ་རྒྱལ་སྦྲུལ་མགོ་ལྔ་པ་ཅིག་འོངས་སྟེ། །ང་ནི་ཁྱོད་ཀྱི་ཕ་ཡིན་མཚོ་བསྐམས་ལ། །རྩིག་དུ་གཞུག་གིས་ཞག་ནི་བདུན་རེ་ཞིང༌། །དཀོན་མཆོག་མཆོད་སྦྱིན་རྒྱ་ཆེར་གྱིས་ཤིག་ཟེར། །བདུན་གསུམ་འདས་ཚེ་མཚོ་དེ་བསྐམས་གྱུར་ནས། །གཙུག་ལག་ཁང་བྱས་མཚོ་ཡི་ཤུལ་ཡིན་ཕྱིར། །རྒྱ་མཚོ་སྦས་པའི་གཙུག་ལག་ཁང་ཞེས་བྱ། །གཉུག་མར་གནས་པའི་དགེ་སློང་རྣམས་ལ་ནི། །གྲང་བའི་ནད་ཀྱིས་བཏབ་པ་ཞི་བྱའི་ཕྱིར། །ཤིང་རྟས་ཚ་བ་གསུམ་གྱི་སྨན་བསྐྱས་ནས། །ཁྲོན་པར་བླུག་པས་ཏྲཱི་ཀསྟུ་ཀ་འམ། །ཚ་བ་གསུམ་པའི་གཙུག་ལག་ཁང་དུ་གྲགས། །སེང་གེ་བཟང་པོའི་བརྒྱད་སྟོང་འགྲེལ་ཆེན་ཡང༌། །སྦྱིན་བདག་དཔལ་ལྡན་ཆོས་སྐྱོང་གིས་བྱས་ནས། །ཏྲཱི་ཀསྟུ་ཀའི་གནས་སུ་སྦྱར་བར་གསུངས། །ཁ་ཅིག་འདི་ཨོ་ཏྱནྟ་པུ་རི་ཡིན་ཟེར་ཡང༌། ཨོ་ཏྱནྟ་པུ་རི་ནི་མུ་སྟེགས་ཀྱི་རིག་འཛིན་གྱིས་རོ་ལངས་གསེར་དུ་གྲུབ་པ་ལས་བྱས་པ་དེ་ཡིན་ནོ། །དེ་ཚེ་ཤར་ཕྱོགས་བ་རེནྡྲ་ཡི་ཡུལ། །མུ་སྟེགས་ལྷ་རྟེན་མང་དུ་ཡོད་པ་ལ། །ཉིན་བཞིན་སྲོག་ཆགས་མང་བསད་མཆོད་པ་བྱེད། །སྒྲོལ་མའི་རྣལ་འབྱོར་པ་ཅིག་མཆིས་པ་དེས། །སྙིང་རྗེས་ཕྱི་པའི་རྟེན་རྣམས་འཇིག་པར་བསམས། །རྒྱལ་པོ་དེ་ལ་ཞུས་ཞེས་ཡི་དམ་གྱིས། །ལུང་བསྟན་ཐོབ་ནས་ས་ཏེ་བཙུགས་ཏེ་ཞུས། །རྒྱལ་པོས་གནང་ནས་དཔུང་ཚོགས་རྣམ་བཞིས་ཆས། །དེ་ཚེ་མི་ནག་འཇིགས་ཤིང་ཆེ་བ་ཞིག །ཧ་ཅང་མི་རིང་སྔུན་དུ་འགྲོ་མཐོང་ནས། །དྲིས་པས་མགོན་པོ་མ་ཧཱ་ཀཱ་ལ་ཡིན། །མུ་སྟེགས་རྟེན་རྣམས་ཁྱེད་ཀྱིས་མི་ཤིགས་སྐད། །དེ་ལ་གྲོགས་སུ་གསོལ་བ་བཏབ་པ་ན། །འོ་ན་བྱེ་མའི་ཕུང་པོ་འདི་སོལ་ལ། །འོག་ན་སྔོན་གྱི་སངས་རྒྱས་འོད་སྲུང་གི །གཙུག་ལག་ཁང་ཡོད་དེ་ལ་མཆོད་པ་གྱིས། །ང་ནི་གཙུག་ལག་ཁང་འདིའི་བསྟན་སྲུང་ཡིན། །ལྷ་རྟེན་འཇིག་(ཅ༥༠བ)
ཚེ་རོལ་མོའི་སྒྲ་ཆེན་སྒྲོགས། །དེ་ནས་ང་ཡིས་གདོང་གྲོགས་བྱའོ་སྐད། །བྱེ་མ་བསལ་བས་འོད་སྲུང་གཙུག་ལག་ཁང༌། །མ་ཉམས་པ་ཅིག་བྱུང་སྟེ་མཆོད་པ་བྱས། །སྔོན་ཚེ་དུས་ཀྱི་འཕེན་པ་མ་བཏང་བར། །འགོག་པར་ཞུགས་པའི་དགྲ་བཅོམ་ཞིག་ཀྱང་ལངས། །སྟོན་པ་འོད་སྲུང་གང་ན་བཞུགས་ཞེས་ཟེར། །དེ་འདས་འདི་ནི་དེ་ཡི་བསྟན་ཡང་མིན། །ཤཱཀྱའི་རྒྱལ་པོའང་འདས་ཞེས་བརྗོད་པ་ན། །མཁར་འཕགས་ཆོ་འཕྲུལ་བསྟན་སྟེ་མྱ་ངན་འདས། །རྒྱལ་པོས་གཙུག་ལག་ཁང་དེ་རྒྱ་ཆེར་བརྒྱན། །སོ་མ་པུ་རིའི་གཙུག་ལག་ཁང་ཞེས་གྲགས། །བསྟན་པའི་འབྱུང་ཁུངས་ཆེན་པོ་ཞིག་དུ་གྱུར། །མཆོག་གི་དངོས་གྲུབ་ཐོབ་པའི་པཎ་ཆེན་བཞིའང༌། །སྒོ་སྲུང་ཚུལ་དུ་རྟག་པར་གནས་སོ་སྐད། །དེ་ནས་དབང་ཕྱུག་ཆེན་པོའི་ལྷ་རྟེན་རྣམས། །དམག་གིས་བསྐོར་སྟེ་རོལ་མོ་སྣ་ཚོགས་པའི། །སྒྲ་ཆེན་བསྒྲགས་པའི་མོད་ལ་རང་ཞིག་གྱུར། །བ་རེནྡྲ་ཀུན་རྒྱལ་པོའི་ཆབ་འོག་གྱུར། །རྒྱ་གར་རྒྱལ་པོ་དྷརྨ་པཱ་ལའི་དུས། །བོད་རྒྱལ་མཇིང་ཡོན་སད་ན་ལེགས་བཞུགས་པར། །ཡར་ལུང་བང་སོའི་རྡོ་རིང་ཡི་གེ་ལ། །ཡོད་ཅེས་ཨོ་ཌྱན་པ་ཡིས་གསུངས་པར་སྣང༌། །དེ་ཚེ་ནཱ་ལེནྡ་ཡི་གཙུག་ཁང་ན། །སློབ་དཔོན་ཆེན་པོ་ཀམ་པ་ལ་ཞེས་པ། །མཆོག་དངོས་གྲུབ་ངེས་གངྒཱའི་ཆུ་འགྲམ་ན། །བྲག་རི་དེ་འུ་ཞིག་ཡོད་དེ་སྟེང་དུ། །གཙུག་ལག་ཁང་བྱས་ན་བསྟན་ལ་ཕན་པར་དགོངས། །དེ་ཡང་རྒྱལ་པོའི་ལུས་ཀྱིས་འགྲུབ་པར་མཁྱེན། །དྷརྨ་པཱ་ལའི་སྲས་སུ་འཁྲུངས་པར་བཞེད། །རྒྱལ་པོའི་བཙུན་མོ་དམ་པའི་རྨི་ལམ་དུ། །རྣམ་སྦྱར་ལྷུང་བཟེད་མཁར་སིལ་ལྡན་པ་ཡི། །དགེ་སློབ་ཞིག་འོངས་ང་ལ་གནས་གཡར་ཞེས། །མཚན་མོ་དྲུག་རྨིས་རྒྱལ་པོ་ལ་བཟླས་པས། །དོ་ནུབ་བྱུང་ན་གཏོང་བར་ཁས་ལོང་ཟེར། །ལྷུམས་ཞུགས་བཙས་ནས་དེ་ཝ་པཱ་ལར་བཏགས། །རྒྱལ་སྲིད་ཆེ་ལ་མངའ་དབང་(ཅ༥༡ན)
བྱས་པར་གྱུར། །སྔོན་གྱི་གངྒཱའི་འགྲམ་གྱི་བྲག་སྟེང་དེར། །གཙུག་ཁང་ཆེན་པོ་ངོ་མཚར་ལྡན་པ་བྱས། །རྩ་བའི་སྡེ་བཞིའི་སྡེ་པ་རེ་རེ་ལ། །རབ་བྱུང་ཉི་ཤུ་བདུན་རེའི་ས་ཏྲ་བཙུགས། །སྒྲ་དང་ཚད་མ་གཏོར་མའི་ས་ཏྲ་སོགས། །གཉུག་མར་གནས་པའི་ས་ཏྲ་དུ་མ་དང༌། །གློ་བུར་ལྷགས་པ་བཅུ་ཕྲག་གཉིས་རེ་ཡི། །ས་ཏྲ་ལ་སོགས་འཚོ་བའི་ཡོ་བྱད་སྦྱར། །དེ་ལ་ཕྱོགས་བཞིར་མིང་བཞི་གྲགས་སོ་སྐད། །བྱང་ཕྱོགས་པ་རྣམས་བི་ཀྲ་མ་ཤཱི་ལ། །ཞེས་གྲགས་རྣམ་པར་གནོན་པའི་ཚུལ་ཁྲིམས་ཡིན། །ལ་ལ་གནོད་སྦྱིན་མནན་པའི་གཙུག་ཁང་ཟེར། །ཁ་ཅིག་རྣམ་པར་གནོན་པའི་རྡོ་ཅན་ཞེས། །སྔོན་གྱི་བྲག་རིའི་མིང་དུ་འདོད་པ་ཡོད། །ཁ་ཅིག་རྒྱུན་སྟེར་གྱི་གཙུག་ལག་ཁང་ཟེར། མཁས་པའི་པཎ་ཆེན་ཤ་སྟག་གིས་གང་བ། །སངས་རྒྱས་བསྟན་པའི་འབྱུང་ཁུངས་ཆེན་པོར་གྱུར། །རྒྱལ་པོ་དེ་སྲས་ཏ་མ་པཱ་ལ་སྟེ། །དེ་དུས་པ་ཚབ་ལོ་ཙཱ་ཚུལ་རྒྱལ་གྱིས། །མདོ་སྡེ་དྲན་ཉེའི་འགྱུར་ཆད་བསབས་སྟེ་བསྒྱུར། །དེ་འོག་ཧི་མ་པཱ་ལ་ཞེས་བྱ་བྱུང༌། །དེ་སྲས་རྒྱལ་པོ་མ་ཧཱ་པ་ལ་ཡིས། །རྡོ་རྗེ་གདན་ནས་ཇོ་བོ་ཨ་ཏི་ཤ། །བི་ཀྲ་མ་ནི་པུ་རིར་སྤྱན་དྲངས་སྟེ། །བསྟན་པའི་བྱ་བ་རྒྱ་ཆེན་མཛད་པར་གྱུར། །དེ་སྲས་ནཱིརྻ་པཱ་ལའི་རྒྱལ་སྲིད་ཚེ། །ཇོ་བོ་བོད་ཡུལ་འགྲོ་བ་འདུལ་ཕྱིར་བྱོན། །ཇོ་བོས་ཞལ་གདམས་འཕྲིན་ཡིག་མཛད་པ་ཡོད། །ཙནྡྲ་བདུན་དང་པཱ་ལ་བདུན་གྱི་རིང༌། །རྒྱ་གར་མཁས་པ་ཕལ་ཆེར་བྱུང་བ་སྟེ། །རྒྱལ་པོ་དེ་ཀུན་ཙནྡྲའི་གྲུབ་ཐོབ་ཡིན། །དེ་ནས་བློན་པོ་རྒྱལ་པོར་གྱུར་པ་ན། །སེ་ན་བཞི་རྒྱུད་ཅེས་པ་བྱུང་བར་གྲགས། །པཱ་ལ་སེ་ན། ཀ་ས་ར་སེ་ན། མ་ཎི་སེ་ན། མ་ཧེནྡྲཱ་སེ་ནའོ། །གཞན་ཡང་ཀམ་པོ་ཙེ་གླིང་མགོན་པོའི་རྒྱུད། །བཞུགས་ལས་ལོ་ནི་སྟོང་དང་བརྒྱད་བརྒྱ་ན། །རྒྱལ་པོ་མ་ཎི་དེ་ཝ་ཞེས་བྱ་བ། །ཏི་ར་ཧུ་ཏིའི་གྲོང་དུ་འབྱུང་བར་གསུངས། །དེ་ནས་རྒྱལ་རབས་དྲུག་ན་རམ་ཤིང་སྟེ། །བརྒྱད་པ་གྷ་ཁར་ཁ་ཏིའི་དུས་སུ་ནི། །ཀམ་པོ་ཙེ་ཡི་གླིང་དུ་འཁྲུངས་པ་ཡི། །ནག་པོ་(ཅ༥༡བ)
སྤྱོད་པས་རལ་གྲི་གྲུབ་གྱུར་སྟེ། །ཝ་ར་ཎ་སིར་ཕོ་བྲང་བཅས་ནས་ནི། །འཛམ་གླིང་དབང་བྱེད་རྡོ་རྗེ་ཐེག་པ་དར། །གྲུབ་ཐོབ་ནམ་མཁའི་སྐར་ཚོགས་ཙམ་འབྱུང་བར། །རྒྱ་གར་འཕགས་པའི་ཡུལ་ན་སྒྲོག་གོ་ཞེས། །ཨོ་ཌྱན་གྲུབ་ཐོབ་རིན་ཆེན་དཔལ་གྱིས་གསུངས། །མགོན་པོའི་རྒྱུད་ཀྱི་ལུང་བསྟན་གྱི་རྒྱལ་པོ་དེ་སྔར་བྱུང་ཟིན་པའམ་ད་ཙམ་ཡོད་དགོས་པར་སྣང༌། དེ་དང་རམ་ཤིང་རྒྱལ་པོ་མཇལ་བར་སྣང༌། །དེ་དག་ལ་སོགས་དབུས་འགྱུར་འཆང་དང་ནི། །ཧ་རི་པུཉྫ་ཧཾ་ས་བ་ཏི་དང༌། །པུཀྐཾ་ལ་སོགས་ཤར་དང་དེ་བཞིན་ལྷོ། །ཀསྨི་ར་དང་ཀཱ་མ་རཱུ་པ་སོགས། །ནུབ་དང་བྱང་སྟེ་རྒྱ་གར་ཡུལ་ཁམས་སུ། །བསོད་ནམས་ལྡན་པའི་ས་སྐྱོང་མང་བྱུང་སྟེ། །སངས་རྒྱས་བསྟན་པའི་ཉིན་བྱེད་རབ་བརྡལ་བས། །རྒྱ་མཚོའི་མཐར་ཐུག་ས་ཆེན་ཁྱབ་པར་བྱས། །དེབ་སྔོན་ན་རྒྱ་གར་གྱི་རྒྱལ་རབས་གཅིག་ནས་གཅིག་དུ་བརྒྱུད་པ་ནི་སུ་ལའང་ཡོད་པར་མ་ཐོས་ལ་ཞེས་སྣང་བ་ནི་མཛེས་པ་མ་ཡིན་ནོ། །ཆོས་བྱུང་མཁས་པའི་དགའ་སྟོན་གྱི་ཡན་ལག་གཉིས་པ་རྒྱ་གར་གྱི་སྐབས་ལས་རྒྱ་གར་གྱི་རྒྱལ་རབས་ཀྱི་སྐབས་སྟེ་བཞི་པའོ།། །།པར་འདིའི་སྦྱིན་བདག་ལྷོ་རྒྱུད་བྱ་ཡུལ་ནས། །ནོར་འཛིན་དབང་མོ་ཚོགས་གཉིས་གྲུབ་མ་ཡིས། །བསྒྲུབས་པའི་དགེ་ཚོགས་བྱང་ཆུབ་མཆོག་དུ་སྔོ། །མཾ་ག་ལ། །