ཆོས་འབྱུང་མཁས་པའི་དགའ་སྟོན།

དཔའ་བོ་གཙུག་ལག་ཕྲེང་བ།

Nitartha Publication

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ཡན་ལག་དང་པོ་འཇིག་རྟེན་གྱི་ཁམས་སྤྱིར་བསྟན་པ་དང་ཡན་ལག་ལག་གཉིས་པ་རྒྱ་གར་གྱི་སྐབས།

[Full Size]

དམ་པའི་ཆོས་ཀྱི་འཁོར་ལོས་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བའི་ལེགས་པར་བཤད་པ་ལ་ཡན་ལག་ཆེན་པོ་ལྔ་ལས་ཡན་ལག་དང་པོ་འཇིག་རྟེན་ཀྱི་ཁམས་སྤྱིར་བསྟན་པ་དང༌། ཡན་ལག་གཉིས་པ་རྒྱ་གར་གྱི་སྐབས་ལ་ལེའུ་བཞི་ལས་དང་པོ་སྟོན་པའི་མཛད་པ་བཤད་པ། གཉིས་པ་བཀའ་བསྡུ་བ་ཁྱད་པར་དུ་བཤད་པ། གསུམ་པ་དཀོན་མཆོག་གསུམ་གྱི་རྟེན་བྱུང་ཚུལ་བཞི་པ་རྒྱ་གར་གྱི་རྒྱལ་རབས་རྣམས་བཞུགས་སོ། །(ཀ༡བ)

[Full Size]

དམ་པའི་ཆོས་ཀྱི་འཁོར་ལོས་སྒྱུར་རྒྱལ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བའི་ལེགས་པར་བཤད་པ། ཐམས་ཅད་མཁྱེན་པ་སྲས་དང་སློབ་མར་བཅས་པ་ལ་ཕྱག་འཚལ་ལོ། །དོན་ཀུན་རབ་གྲུབ་སྐྱེ་འགྲོའི་རྟེན་གནས་གཅིག་པོ་གང༌། །ཐེག་གསུམ་དམ་པའི་ཆོས་ཀྱི་འཁོར་ལོས་མངའ་སྒྱུར་བ། །སྟོན་པ་མཆོག་དང་དེ་སྲས་སློབ་མར་བཅས་ཀུན་ལ། །བྱང་ཆུབ་བར་དུ་སྤྱི་བོས་འདུད་ཏོ་རབ་འདུད་ཏོ། །རབ་མཆོག་གཙོ་བོ་རྣམས་ཀྱི་ངོ་མཚར་གཏམ། །ཐོས་ཚེ་བདག་འདྲ་གྱི་ནའི་སྐྱེ་བོ་ཡང༌། །ལུས་ཀྱི་སྤུ་ལྡང་མཆི་མ་ཁོང་ནས་འཁྲུག །དད་པའི་ཤུགས་དྲག་ཟློག་པར་དཀའ་གྱུར་ན། །སྐལ་བཟང་བློ་གསལ་དཔྱོད་ལྡན་སྐྱེ་བོ་རྣམས། །ཅི་ཕྱིར་དད་པའི་དབང་སྟོབས་རྒྱས་མི་འགྱུར། །མཚན་ཐོས་ཙམ་ཡང་དོན་ཆེན་ལྡན་འགྱུར་ན། །མོས་ཤིང་གུས་པར་གྱུར་རྣམས་ལྟ་ཅི་སྨོས། །དེ་ཕྱིར་དམ་པ་རྣམས་ཀྱི་ཡོན་ཏན་ལ། །གཅིག་དུ་དད་པས་ཡིད་རབ་དྲང་བ་དང༌། །བདག་དང་སྐལ་མཉམ་གཞན་ལའང་ཕན་བྱའི་ཕྱིར། །ཆོས་རྒྱལ་རྣམས་ཀྱི་མཛད་པའི་ཚུལ་བཟང་འབྲི། །རྒྱ་མཚོའི་ཆུ་བོ་སྔོན་ནས་མང་བཅུས་མོད། །ད་དུང་སུ་ཡིས་བླངས་ཀྱང་མི་ཟད་ལྟར། །འདི་ཚུལ་སྔོན་རབས་མཁས་པས་མང་སྦྱར་མོད། །ད་དུང་ལེགས་(ཀ༢ན)

[Full Size]

བཤད་མཁས་པའི་སྤྱི་ནོར་ཡིན། །འོན་ཀྱང་དོན་རྒྱས་ཚིག་ཉུང་མཐའ་རྒྱ་ཆོད། །ཀུན་ལ་གཟུར་གནས་ངེས་པའི་ཁུངས་དང་འབྲེལ། །ཆོས་ཉིད་ལ་འཇུག་མཚན་མར་མི་སྨྲ་བ། །དེ་ནི་ལེགས་བཤད་འདི་ཡི་ཁྱད་ཆོས་སྟེ། །དེ་བས་བློ་ལྡན་རྣམས་ཀྱིས་མཉན་པར་གྱིས། །ཆོས་ཀུན་རང་བཞིན་གཟོད་ནས་རྣམ་དག་ཉིད། །འགག་པ་མེད་པའི་རང་རྩལ་མཐའ་ཡས་ནི། །གནས་སྐབས་དག་དང་མ་དག་སྣ་ཚོགས་པའི། །རྟེན་འབྲེལ་སྣང་བ་སྒྱུ་མ་ཙམ་དུ་འཆར། །ཇི་ལྟར་མེ་ལོང་ངོས་ལ་བཞིན་སྣང་ལྟར། །འཇིག་རྟེན་ཞེས་བྱ་ཕྱི་ན་ཡོད་མིན་ཡང༌། །བྱིས་རྣམས་ཇི་ལྟར་སྣང་བ་དེ་ཙམ་ལ། །བདེན་པར་ཞེན་སྟེ་སོ་སོར་ཨ་ཐང་ཆད། །ཇི་ལྟར་རྨི་ལམ་སྣང་བ་སྣ་ཚོགས་དེ། །སྣང་དང་མི་བདེན་གཉིས་ཀ་ཡིན་པ་ལྟར། །འཁོར་འདས་སྣང་བ་སྣ་ཚོགས་ཐམས་ཅད་ཀྱང། །བདེན་རྫུན་བྲལ་བ་དེ་ལྟར་ཤེས་པར་གྱིས། །དེ་བས་གདུལ་བྱའི་སྣང་བ་ཇི་བཞིན་དུ། །མངོན་པ་གོང་འོག་འཇིག་རྟེན་གདགས་པ་དང༌། །དྲན་པ་ཉེར་བཞག་སངས་རྒྱས་ཕལ་པོ་ཆེ། །མཁའ་འགྲོ་རྒྱ་མཚོ་དུས་ཀྱི་འཁོར་ལོ་སོགས། །མདོ་རྒྱུད་བསྟན་བཅོས་ཆེན་པོ་མང་ཞིག་དུ། །འཇིག་རྟེན་གནས་ཚུལ་མི་འདྲ་མང་གསུངས་ཀྱང༌། །རྒྱལ་བས་འཇིག་རྟེན་ཞེན་པས་མ་གཟིགས་ཕྱིར། །གར་ཡང་མི་གནས་གང་དུའང་འགལ་བ་མེད། །དེ་ཕྱིར་ཆོས་ཀྱི་རྣམ་གྲངས་ཐམས་ཅད་ལའང༌། །མ་ཆགས་མི་ཞེན་མི་གནས་མི་འདོར་བ། །བུང་བས་མེ་ཏོག་རྩི་བཅུད་ལེན་ཚུལ་གྱིས། །བདག་གིས་ཆོས་ཀྱི་རྣམ་གྲངས་འདི་བཤད་བྱ། །གླིང་བཞི་རི་རབ་ལྷ་གནས་དང་བཅས་པ། །རྒྱ་མཚོའི་ཕྱི་རོལ་ཁོར་ཡུག་གཅིག་གིས་བསྐོར། །འོག་གཞི་རླུང་གི་དཀྱིལ་འཁོར་ལ་ཐུག་པ། །འདི་ནི་གླིང་བཞིའི་འཇིག་རྟེན་ཁམས་གཅིག་ཡིན། །མཆུ་ཞེང་དེ་ཡི་ན་མཁའ་འདས་པ་ན། །སླར་ཡང་གླིང་བཞིའི་འཇིག་རྟེན་གཞན་ཞིག་ཡོད། །འདི་ལྟ་གཅིག་ནས་གཉིས་སུ་བརྒྱུད་པ་ཡིས། །སྟོང་དུ་ཚང་ཚེ་རྒྱ་མཚོ་གཅིག་གིས་བརྟེན། །ཕྱི་རོལ་ཁོར་ཡུག་གཅིག་གིས་བསྐོར་(ཀ༢བ)

[Full Size]

བ་ནི། །སྤྱི་ཕུད་སྟོང་གི་འཇིག་རྟེན་ཁམས་ཞེས་བྱ། །དེ་འདྲ་གཅིག་ནས་གཉིས་སུ་བགྲངས་པ་ནི། །སྟོང་དུ་ཚང་ཚེ་སྟོང་གཉིས་བར་མ་ཡི། །འཇིག་རྟེན་ཁམས་ཟེར་རྒྱ་མཚོ་གཅིག་ལ་བརྟེན། །ཕྱི་ནས་ཁོར་ཡུག་འབྲིང་པོས་བསྐོར་བ་ཡིན། །སྟོང་གཉིས་བར་མའི་འཇིག་རྟེན་ཁོ་ན་ནི། །སྟོང་ཕྲག་གཅིག་དུ་ལོངས་ཚེ་སྟོང་གསུམ་གྱི། །སྟོང་ཆེན་པོ་ཡི་འཇིག་རྟེན་ཁམས་ཞེས་བྱ། །གངས་ཆེན་མཚོ་ཡི་རྒྱ་མཚོ་ཆེན་པོས་བརྟེན། །ཕྱི་རོལ་ཁོར་ཡུག་ཆེན་པོས་ཡོངས་སུ་བསྐོར། །གླིང་བཞི་རེ་རེའང་བྱེ་བ་ཕྲག་བརྒྱ་ཡོད། །འདི་ཙམ་མཉམ་དུ་ཆགས་ཅིང་འཇིག་པ་རུ། །ཐུན་མོང་མངོན་པའི་བསྟན་བཅོས་དག་ལས་བཤད། །མཆོག་གི་སྤྲུལ་སྐུ་གཅིག་གི་ཞིང་དུ་འདོད། །ཐེག་ཆེན་ལྟར་ན་སྟོང་གསུམ་འཇིག་རྟེན་ཉིད། །བྱེ་བ་ཕྲག་བརྒྱས་རབ་འབྱམས་མཚམས་སྦྱར་སྟེ། །དེ་ཉིད་བྱེ་བ་ཕྲག་བརྒྱར་ལོངས་པ་ན། །རབ་འབྱམས་རྒྱུད་ཅེས་བྱ་བའི་འཇིག་རྟེན་ཁམས། །དེ་ཡང་བྱེ་བ་ཕྲག་བརྒྱར་བརྩིས་པ་ན། །རབ་འབྱམས་རྒྱ་མཚོའམ་བར་མའི་རྒྱུད་ཅེས་བྱ། །དེ་ཡང་བྱེ་བ་ཕྲག་བརྒྱར་ལོངས་པའི་ཚེ། །གཞི་དང་སྙིང་པོ་མེ་ཏོག་གིས་བརྒྱན་པའི། །འཇིག་རྟེན་ཁམས་སྟེ་སྤྲུལ་སྐུ་གཅིག་གི་ཞིང༌། །རེ་རེའང་རང་རང་རྒྱ་མཚོ་ཁོར་ཡུག་བཅས། །འདི་ཙམ་ཆགས་འཇིག་སྟོངས་གནས་མཉམ་དུ་བྱེད། །གཞི་དང་སྙིང་པོ་མེ་ཏོག་གིས་བརྒྱན་པའི། །ཞིང་ཁམས་དེ་ནི་རྣམ་སྣང་གངས་ཆེན་མཚོའི། །སྤུ་ཁུང་རེ་ནའང་བྱེ་བ་ཕྲག་བརྒྱར་གནས། །སྐུ་ཡི་རྡུལ་ཕྲ་རེ་ལའང་དེ་འདྲ་སྟེ། །ཞིང་དེའི་རྡུལ་རེ་ལ་ཡང་དེ་སྙེད་གནས། །རྣམ་སྣང་དེ་ནི་རྒྱལ་བ་ཤཱཀ་ཐུབ་འདིའི། །ལོངས་སྤྱོད་ཡོངས་སུ་རྫོགས་པའི་སྐུ་ཡིན་སྟེ། །དེ་ཡི་སྐུ་དང་ཞིང་ལ་གང་གནས་པའི༌། །ཞིང་ཁམས་དེ་ཀུན་གཅིག་དུ་བསྡོམས་བྱས་པ། །ལོངས་སྤྱོད་རྫོགས་སྐུ་རེ་རེའི་ཞིང་དུ་གསུངས། །ཚུལ་འདིས་ན་མཁས་ཇི་སྲིད་ཁྱབ་གྱུར་པ། །དེ་སྙེད་རྒྱལ་བའི་ཞིང་དང་སྐུ་ཡང་གནས། །ཤིན་དུ་ངེས་པའི་དོན་དུ་སྐུ་དང་ཞིང༌། །ཚད་མེད་ཕ་མཐའ་བཟུང་བར་མི་ནུས་སོ། །དེ་ལྟར་(ཀ༣ན)

[Full Size]

འཇིག་རྟེན་རྒྱ་མཚོ་མཐའ་ཡས་པ། །ལ་ལ་ཉོན་མོངས་ལ་ལ་ཡོངས་སུ་དག །ལ་ལ་ཀུན་ནས་ཉོན་མོངས་དག་པར་ལྡན། །ལ་ལ་དག་ཞིང་ཀུན་ནས་ཉོན་མོངས་སྟེ། །ལ་ལ་སྤྱིའུ་ཚུགས་ལ་ལ་སྣྲེལ་ཞིའི་ཞིང༌། །རྒྱུ་དབྱིབས་རྒྱན་དང་འགྲོ་བའང་ཐ་དད་ཉིད། །དེ་ལྟར་ཕ་མཐའ་ཡས་པར་གནས་པ་ལས། །ཁོ་བོ་ཅག་གི་རྟེན་གནས་ཞིང་འདི་ནི། །རྣམ་པར་སྣང་མཛད་གངས་ཆེན་མཚོ་རྒྱལ་དེའི། །ཕྱག་གི་ལྷུང་བཟེད་ནང་ན་པདྨ་ཡི། །སྡོང་པོ་ཡལ་ག་མེ་ཏོག་རབ་རྒྱས་པའི། །ཟེའུ་འབྲུ་ཉེར་ལྔ་བརྩེགས་མར་གནས་པ་ལས། །བཅུ་གསུམ་པ་ཡི་སྟེང་ན་གནས་པ་ཡི། །དབུས་མའི་སྙིང་པོ་མེ་ཏོག་གིས་བརྒྱན་ཞིང༌། །དེ་ལས་དབུས་ཀྱི་རབ་འབྱམས་རྒྱ་མཚོའི་ཞིང༌། །དེ་ལས་དབུས་ཀྱི་རབ་འབྱམས་རྒྱུད་ཀྱི་ཞིང༌། །དེའི་ཡང་དབུས་ཀྱི་རབ་འབྱམས་མཚམས་སྦྱོར་ཞིང༌། །དེ་དབུས་གླིང་བཞི་རི་རབ་བྱེ་བ་ནི། །ཕྲག་བརྒྱས་བརྒྱན་པ་མི་མཇེད་འཇིག་རྟེན་ཁམས། །འགྲོ་རྣམས་ཉོན་མོངས་ལས་མི་འབྱེད་པའི་ཕྱིར། །ཞིང་གི་སྐྱོ་ནས་སྨད་པར་བྱ་བ་དང༌། །ཞིང་འདིའི་སེམས་དཔའ་རྣམས་ནི་ལྷག་པར་ཡང༌། །བཟོད་དང་ལྡན་པའི་ཡོན་ཏན་བསྔགས་པའི་ཕྱིར། །འཇིག་རྟེན་ཁམས་འདི་མི་མཇེད་ཅེས་སུ་བརྗོད། །དེ་ལས་སྤྱི་ཕུང་སྟོང་གི་འཇིག་རྟེན་དབུས། །གླིང་བཞིའི་འཇིག་རྟེན་བཅོམ་པ་དང་ལྡན་པ། །རྡོ་རྗེ་རིན་པོ་ཆེ་ལས་ལེགས་པར་གྲུབ། །གཞལ་མེད་ཁང་དབྱིབས་སྤོས་ཆུའི་མཚོ་ལ་གནས། །ཀུན་ནས་ཉོན་མོངས་རྣམ་པར་དག་ལྡན་པར། །རྒྱལ་བས་ཕལ་པོ་ཆེ་ཡི་མདོ་ལས་གསུངས། །རྡོ་རྗེའི་གཞི་དང་རི་རབ་ཁོར་ཡུག་དུ། །ལྡན་པར་དུས་ཀྱི་འཁོར་ལོ་ལས་ཀྱང་གསལ། །འཇིག་རྟེན་བཞག་པ་དང་མཛོད་པའི་ལུགས་ཀྱིས། རླུང་དཀྱིལ་དཔངས་དཔག་ཚད་ས་ཡ་དྲུག་འབུམ་རྒྱར་གྲངས་མེད། དེའི་སྟེང་དུ་ཆུ་དཀྱིལ་འབུམ་ཕྲག་བརྒྱད། གསེར་གྱི་ས་གཞི་སུམ་འབུམ་ཉི་ཁྲི། འདི་གཉིས་ཟླུམ་པོ་ཐད་ཀར་འབུམ་ཕྲག་ཉི་ཤུ་སུམ་སྟོང་དང་བརྒྱ་ཕྲག་ཕྱེད་དང་ལྔར་མཉམ་མོ། །དེའི་སྟེང་ཆུས་གང་བ་ལ་དབུས་སུ་རི་རབ་རིན་པོ་ཆེ་བཞི་ལས་གྲུབ་པ་ཞེང་དཔག་ཚད་བརྒྱད་ཁྲི། ཆུར་བརྒྱད་ཁྲི་ནུབ་ཅིང་བརྒྱད་ཁྲི་སྟེང་དུ་འཕགས་པ། (ཀ༣བ)

[Full Size]

རི་རབ་དང་གཉའ་ཤིང་འཛིན་གྱི་བར་གྱི་རོལ་མཚོ་ཡང་དཔག་ཚད་བརྒྱད་ཁྲིའོ། །རི་གཞན་བརྒྱར་དཔངས་དང་ཞེང་ནང་མའི་ཕྱེད་དེ་བ་ཚྭའི་མཚོ་ཆེན་མ་གཏོགས་རོལ་མཚོ་རྣམས་ཀྱང་ནང་མའི་ཕྱེད་དེ། གཉའ་ཤིང་འཛིན་རྒྱ་དཔངས་བཞི་ཁྲི། གཤོལ་མདའ་འཛིན་ཉི་ཁྲི། སེང་ལྡེང་ཅན་ཁྲི། ལྟ་ན་སྡུག་ལྔ་སྟོང། རྟ་རྣ་ཉིས་སྟོང་ལྔ་བརྒྱ། རྣམ་སྡུད་སྟོང་ཉིས་བརྒྱ་ལྔ་བཅུ། མུ་ཁྱུད་འཛིན་རི་དྲུག་བརྒྱ། ལྕགས་རི་སུམ་བརྒྱ་ཕྱེད་དང་བཅུ་གསུམ། ཕྱིའི་རྒྱ་མཚོ་སུམ་འབུམ་དང་སྟོང་ཕྲག་ཉེར་གཉིས། ཤར་ལུས་འཕགས་པོ་ཟླ་གམ་ངོས་གསུམ་ལ་ཉིས་སྟོང་རེ་དང་བཅད་ཁམ་ལ་སུམ་བརྒྱ་ལྔ་བཅུ། འཛམ་གླིང་ཤིང་རྟ་འཁོར་ལོ་གཉིས་པ་ལྟ་བུ་ངོས་གསུམ་ལ་ཉིས་སྟོང་རེ་དང་གཅིག་ལ་སྟོང་ཕྲག་ཕྱེད་དང་བཞི། ནུབ་བ་ལང་སྤྱོད་ཟླུམ་པོ་ཐད་ཀར་བདུན་སྟོང་ལྔ་བརྒྱ། བྱང་སྒྲ་མི་སྙན་གྲུ་བཞི་དཔག་ཚད་བརྒྱད་ཁྲི། ལྕགས་རི་ལྕགས། རི་རབ་རིན་པོ་ཆེ་སྣ་བཞི། གཞན་རྣམས་གསེར་དུ་འདོད་དོ། །ཐུན་མོང་མདོ་དང་མངོན་པ་ལྟར་བཤད་ན། །འགྲོ་བའི་སྤྱི་མཐུན་ལས་དང་བསྐལ་བཟང་འདིའི། །བྱང་སེམས་རྣམས་ཀྱིས་ཞིང་ཡོངས་སྦྱངས་པའི་མཐུས། །སྟོངས་བསྐལ་བར་བསྐལ་ཉི་ཤུ་འདས་འོག་དུ། །ཕྱོགས་བཅུ་ནས་ནི་རླུང་གཡོས་ཕན་ཚུན་དུ། །འཕུལ་བས་རླུང་གི་དཀྱིལ་འཁོར་རྒྱ་གྲམ་དབྱིབས། །སྲ་ཞིང་འཐས་པ་རྔམས་སུ་དཔག་ཚད་ནི། །ས་ཡ་དྲུག་འབུམ་རྒྱ་རུ་གྲངས་མེད་ཆགས། །དེ་ཡི་ན་མཁར་འགྲོ་བའི་ལས་དང་ནི། །བྱང་ཆུབ་སེམས་དཔའི་མཐུ་ལས་གྲུབ་པ་ཡི། །སྤྲིན་ཆེན་གསེར་གྱི་གཉའ་ཤིང་སྟུག་པོ་ཆགས། །དེ་ལས་ཤིང་རྟའི་འཕང་ལོ་སྲོག་ཤིང་དང༌། །གཉའ་ཤིང་མདའ་སྨྱུག་ཙམ་དང་ཆར་ཐིགས་ནི། །སྦོམ་པོའི་ཆར་རྒྱུན་རིང་དུ་བབ་པ་ཡིས། །ཆུ་ཡི་ཕུང་པོ་ཚངས་པའི་འཇིག་རྟེན་ལ། །འཐུག་པར་ཆགས་སྟེ་དེ་དབུས་འཛམ་གསེར་གྱི། །པདྨ་སྟོང་ཤར་གནས་གཙང་ལྷ་ཡིས་མཐོང༌། །སངས་རྒྱས་སྟོང་ཞིག་འབྱུང་བའི་ལྟས་སུ་ཤེས། །བསྐལ་པ་འདི་ནི་བཟང་པོའོ་ཞེས་བརྗོད། །དེ་ཕྱིར་བསྐལ་པ་པདྨ་སྟོང་མཐོང་ངམ། །བཟང་པོའི་བསྐལ་པ་ཞེས་བྱར་གྲགས་པ་ཡིན། །ཆུ་ཡི་ཕུང་པོ་རླུང་གིས་བསྲུབས་པ་ལས། །སྤྲིས་མའི་ཚུལ་དུ་གསེར་གྱི་ས་གཞི་ཆགས། །ཆུ་ཡི་ཕུང་པོ་དཔག་ཚད་སུམ་འབུམ་དང༌། །ཉི་ཁྲི་ཞོམ་སྟེ་རྔམས་སུ་འབུམ་(ཀ༤ན)

[Full Size]

ཕྲག་བརྒྱད། །གསེར་གཞི་དཔག་ཚད་སུམ་འབུམ་བཞི་ཁྲིར་ལྡན། །དེ་དབུས་ལྷུན་པོ་བང་རིམ་བཞིར་ལྡན་པ། །ཤར་དངུལ་ལྷོ་ནི་བཻཌཱུརྻ་སྔོན་པོ། །ནུབ་ནི་པད་རཱག་བྱང་ཕྱོགས་གསེར་ལས་བྱས། །དཔག་ཚད་བརྒྱད་ཁྲི་ཕྲག་གཉིས་ཕྱེད་མཚོར་ནུབ། །གཉའ་ཤིང་འཛིན་དང་གཤོལ་འཛིན་སེང་ལྡེང་ཅན། །ལྟ་ན་སྡུག་རི་རྟ་རྣ་རྣམ་སྡུད་དང༌། །མུ་ཁྱུད་འཛིན་རི་ཞེས་བྱ་གསེར་རི་བདུན། །ནང་མའི་ཕྱེད་དུ་ཕྱི་མའི་རྩེས་སླེབས་པར། །རི་རབ་ཕྱི་ནས་རིམ་བཞིན་གྲུ་བཞིར་བསྐོར། །བར་བར་ན་ནི་རོལ་པའི་མཚོ་བདུན་དང༌། །ལོངས་སྤྱོད་ས་པའི་གླིང་གཞན་དུ་མའང་ཡོད། །དེ་ཡི་ཕྱི་རོལ་བ་ཚྭའི་རྒྱ་མཚོའི་ནང༌། །གླིང་བཞི་གླིང་ཕྲན་བརྒྱད་དང་ལྡན་པ་ཆགས། །ཤར་གླིང་གསུམ་པོ་ཟླ་བ་ཕྱེད་པའི་དབྱིབས། །ལྷོ་གླིང་ཤིང་རྟའི་དབྱིབས་སམ་སོག་ཀ་འདྲ། །ནུབ་གསུམ་ཟླུམ་པོ་བྱང་གསུམ་གྲུ་བཞི་སྟེ། །རྒྱུ་ནི་སོ་སོའི་ཕྱོགས་ཀྱི་རི་རབ་མཚུངས། །འོན་ཀྱང་རྩོད་པར་ལྡན་པའི་དུས་བྱུང་ཚེ། །རིན་ཆེན་ནུབ་སྟེ་ས་གཞི་ཕལ་པར་སྣང༌། །མི་ཡི་བཞིན་དབྱིབས་རང་རང་གླིང་དང་འདྲ། །རྒྱན་འདོགས་ཚུལ་དང་ལོངས་སྤྱོད་ཐ་དད་དེ། །རྒྱས་པར་དྲན་པ་ཉེར་བཞག་མདོ་རུ་ལྟོས། །རྒྱ་མཚོའི་ཕྱི་རོལ་ལྕགས་ཀྱི་རི་བོ་ཡིས། །མུ་ཁྱུད་ལྟ་བུར་བསྐོར་བས་གནས་པ་ཡིན། །འཛམ་གླིང་འོག་ན་དམྱལ་བ་ཡི་དྭགས་ཡོད། །རྔ་ཡབ་གླིང་ན་སྲིན་པོ་གནས་པ་སྟེ། །གླིང་བཞི་གླིང་ཕྲན་གཞན་རྣམས་མི་ཡི་གནས། །རི་རབ་ནང་གི་ཁོང་སེང་ལྷ་མིན་གནས། །ལོགས་ཀྱི་ཕྱེད་མན་རྒྱལ་ཆེན་བཞི་པའི་ལྷ། །གཞན་ཡང་གཞལ་མེད་ཁང་པའི་ལྷ་རྣམས་ནི། །མཁའ་ལ་རྒྱུ་བས་ཉི་ཟླ་གཟའ་སྐར་ཟེར། །དེ་ཡན་སུམ་བཅུ་རྩ་གསུམ་ལྷ་རྣམས་ཀྱི། །སྲུང་མའི་རིམ་པ་དུ་མ་ལོགས་ན་གནས། །རྩེ་མོར་སུམ་བཅུ་རྩ་གསུམ་ལྷ་གནས་དངོས། །བརྒྱ་བྱིན་ཕོ་བྲང་རྣམ་རྒྱལ་ཁང་བཟང་དང༌། །ལ་བ་དཀར་པོ་ལྟ་བུའི་རྡོ་ལེབ་དང༌། །ཆོས་བཟང་ལྷ་ཡི་འདུན་ས་སྐྱེད་ཚལ་བཞི། །ཡོངས་འདུའི་ཤིང་སོགས་འབྱོར་བ་དཔག་ལས་འདས། །(ཀ༤བ)

[Full Size]

འཐབ་བྲལ་དགའ་ལྡན་འཕྲུལ་དགའ་གཞན་འཕྲུལ་སྟེ། །ལྷ་གནས་བཞི་པོ་མཚོ་ནས་རང་རང་བར། །ཇི་ཙམ་ཡོད་པ་དེ་སྲིད་སྟེང་དུ་ཡང༌། །གཞལ་བའི་མཁའ་ལ་སྤྲིན་བཞིན་སོ་སོར་ཆགས། །གཟུགས་ཚེ་ལོངས་སྤྱོད་རིམ་པས་གོང་མ་འཕགས། །ཀུན་ཀྱང་འདོད་པའི་འདོད་ཆགས་ལྡན་པའི་ཕྱིར། །འདི་མན་འདོད་པའི་ཁམས་སུ་བརྗོད་པ་ཡིན། །དེ་སྟེང་གཟུགས་ཁམས་གནས་རིས་བཅུ་བདུན་དང༌། །གཟུགས་མེད་བཞི་སྟེ་སྲིད་པའི་རྩེ་མོར་ཐུག །དེ་ཀུན་ཆགས་བྲལ་ཏིང་ངེ་འཛིན་གྱིས་འཚོ། །འདོད་གཟུགས་ཀུན་ནའང་རང་རང་རྒྱལ་པོ་གནས། །གཟུགས་མེད་ན་ནི་རང་ལས་གཞན་མི་སྣང༌། །དེ་ལྟར་ཁམས་གསུམ་ཀུན་གྱི་ནང་ན་ཡང༌། །འཁོར་ལོས་སྒྱུར་དང་རང་རྒྱལ་རྫོགས་སངས་རྒྱས། །འབྱུང་ཞིང་དགེ་སྡིག་ལས་ཀུན་མཐུ་ཆེ་བས། །ལྷ་ལས་ལྷག་པ་མི་ཡི་འགྲོ་བར་གསུངས། །དེར་ཡང་སྒྲ་མི་སྙན་པ་ལོངས་སྤྱོད་ཀྱི། །ས་སྟེ་སྔར་མེད་དམ་ཆོས་སྒྲུབ་པ་མེད། །གླིང་གསུམ་འདི་ནི་ལས་ཀྱི་ས་སྟེ་མཆོག །དེ་ལས་ཀྱང་ནི་སངས་རྒྱས་འབྱུང་བའི་གནས། །འཛམ་བུའི་གླིང་ཉིད་ཁྱད་དུ་འཕགས་པ་ཡིན། །གསེར་གླིང་སིངྒྷ་ལ་དང་ཙནྡྲ་གླིང༌། །ལ་སོགས་གླིང་བྲན་མང་མོད་འདི་རུ་འདུ། །དེ་ཡང་ཡུལ་དབུས་རྒྱ་གར་རྒྱལ་ཁམས་ནི། །ཟ་འོག་བླ་རེས་ཕུབ་འདྲ་རིན་ཆེན་གླིང༌། །དེ་ལ་ཡུལ་འཁོར་ཆེན་པོ་བཅུ་དྲུག་དང༌། །ཁྱད་པར་མཉན་ཡོད་གནས་བཅས་ཡངས་པ་ཅན། །ཙམྤ་ཝ་ར་ཎ་སི་མ་ག་དྷ། །དེ་རྣམས་གྲོང་ཁྱེར་ཆེན་པོ་དྲུག་དུ་བཤད། །སོག་པོ་ལི་ཡུལ་ཤིང་རྟའི་དབྱིབས་འདྲ་སྟེ། །སྣ་ཚོགས་འདོད་དགུ་དགོས་འདོད་འབྱུང་བའི་གླིང༌། །ཧོར་དང་རྒྱ་ནག་མེ་ཏོག་པདྨ་ནི། །ཁ་བྱེ་འདྲ་སྟེ་ངོ་མཚར་ཆེ་བའི་གླིང༌། །ཁ་བ་ཆགས་པ་བོད་ཀྱི་རྒྱལ་ཁམས་ནི། །སྲིན་མོ་གན་རྐྱལ་འགྱེལ་འདྲ་ངམ་གྲོག་ཆེ། །འདྲེ་སྲིན་གདུག་པ་མང་ཞིང་རི་ནག་རྩུབ། །མུན་པའི་སྨག་རུམ་ལྟ་བུར་གནས་པ་ཡིན། །གཞན་ཡང་ཡུལ་འཁོར་ཆེན་པོ་མཐའ་ཡས་སྟེ། །རང་རང་དཔལ་འབྱོར་ལོངས་སྤྱོད་ལྡན་པས་གནས། །དེ་ལྟར་(ཀ༥ན)

[Full Size]

སྣོད་ཀྱི་འཇིག་རྟེན་མས་རིམ་ཆགས། །རྫོགས་ཚེ་བསམ་གཏན་གཉིས་པའི་ལྷ་ཞིག་ན། །ཤི་འཕོས་ཚངས་ཆེན་གནས་སུ་བརྫུས་སྟེ་སྐྱེས། །དེ་ཡིས་བདག་ལ་གྲོགས་གཞན་ཡོད་ན་སྙམ། །དེ་ཡི་མོད་ལ་ལྷ་གཞན་བརྫུས་སྟེ་བྱུང༌། །དེ་ཕྱིར་འཇིག་རྟེན་པ་རྣམས་ཚངས་ཆེན་ནི། །སྣོད་བཅུད་བྱེད་པོ་ཡིན་སྙམ་འཁྲུལ་པ་སྐྱེས། །དེ་ལྟར་བཅུད་ཀྱི་སེམས་ཅན་ཡས་རིམ་བཞིན། །ཆགས་ནས་ལྷ་གནས་མ་ལུས་ཚང་བའི་ཚེ། །འོད་གསལ་ལྷ་ཞིག་ཤི་འཕོས་སྐད་ཅིག་གིས། །འཛམ་བུའི་གླིང་དུ་མི་རུ་བརྫུས་སྟེ་སྐྱེས། །དེ་བཞིན་གཞན་ཡང་བརྫུས་སྐྱེས་མང་བྱུང་སྟེ། །ཚེ་ཚད་དཔག་ཡས་བསམ་གཏན་ཟས་ཀྱིས་འཚོ། །ལུས་ལ་འོད་ལྡན་རྫུ་འཕྲུལ་མཁའ་ལ་འགྲོ། །གཟུགས་ཀྱི་ཡོན་ཏན་མཐའ་ཡས་ལྡན་པ་ཡིན། །དེ་ཚེ་ས་འདི་བདུད་རྩི་ས་ཡི་བཅུད། །དཀར་ཞིང་སྦྲང་རྩིའི་རོ་ལྡན་འཇམ་ལ་བཞུན། །མར་སར་གོང་བུ་ལྟ་བུ་ཁོ་ནར་གནས། །དེ་ལ་སྲེད་པས་ཟོས་པས་བསམ་གཏན་གྱི། །ཟས་ཉམས་ལུས་ཀྱི་རྫུ་འཕྲུལ་ནུབ་པར་གྱུར། །སྲེད་པའི་དབང་གིས་ས་བཅུད་གཏིང་དུ་ནུབ། །ས་མོ་ཞག་ཅེས་ཁ་དོག་དམར་སེར་ལ། །སྦྲང་རྩིའི་རོ་ལྡན་བྱུང་སྟེ་ཟོས་པ་ཡིས། །ལྕི་བའི་ཕྱིར་ན་ལུས་ཀྱི་འོད་ཀྱང་ཉམས། །དེ་ནས་མཁའ་ལ་ཉི་ཟླ་གཟའ་སྐར་བྱུང༌། །ས་ཞག་ས་འོག་ནུབ་སྟེ་བདུད་རྩི་ཡི། །མྱུ་གུའི་ཚལ་བྱུང་དེ་ཡང་ཟོས་པས་ནུབ། །མ་རྨོས་སཱ་ལིའི་འབྲས་བྱུང་དེ་ཟོས་པས། །ཤིན་དུ་རགས་ཕྱིར་རྙིགས་མ་བཤང་གཅི་བྱུང༌། །འདི་ཡན་རྫོགས་ལྡན་བསྐལ་པ་ཅེས་བྱར་གྲགས། །རྒྱུ་དེས་ཕོ་མོའི་དབང་པོ་ཐ་དད་དོད། །ལྟ་དང་རྒོད་དང་ལག་བཅང་འཁྲིག་པ་བྱུང༌། །གཞན་གྱིས་བལྟས་ནས་ས་རྡོས་བཏབ་ཅིང་གཤེས། །ངོ་ཚ་སྐྱོབ་ཕྱིར་ཁྱིམ་བྱས་མངལ་སྐྱེས་བྱུང༌། །མི་ཚངས་སྤྱོད་གྱུར་གཞན་གསུམ་མ་ཉམས་ཕྱིར། །གསུམ་ལྡན་བསྐལ་པ་ཞེས་བྱར་གྲགས་པ་ཡིན། །སཱ་ལིའི་འབྲས་དེ་ནམ་ཟ་ལེན་པ་ལས། །ལེ་ལོ་ཅན་ཞིག་གིས་ནི་གསོག་འཇོག་བྱས། །དེ་མཐོང་ཀུན་ཀྱང་(ཀ༥བ)

[Full Size]

སོག་འཇོག་བྱེད་པར་གྱུར། །སྲེད་པའི་རྒྱུ་དང་སེར་སྣའི་སྐྱོན་དེ་ཡིས། །སཱ་ལིའི་འབྲས་ཀྱང་སྦུན་པ་སྲ་བས་གཡོགས། །བརྔས་མ་ཐག་དུ་སྐྱེ་བ་ཡང་མེད་ནས། །མཛངས་ཤིང་ཕན་པར་དགའ་བའི་མི་ཅིག་གིས། །ཆ་མཉམ་ཞིང་བགོས་རང་གི་སྐལ་བ་ཆད། །ཀུན་གྱིས་ཅུང་ཟད་ཙམ་རེ་བྱིན་པ་ཡིས། །སྐལ་བ་ཤིན་དུ་རྒྱལ་ཕྱིར་རྒྱལ་པོར་ཐོགས། །གཅིག་གི་སྐལ་པ་ཅིག་ཤོས་ཀྱིས་བརྐུས་པས། །དེ་ནས་གཉིས་ལྡན་བསྐལ་པ་ཅེས་བྱར་གྱུར། །རྐུ་བ་སྲུང་ཕྱིར་སྔར་གྱི་རྒྱལ་པོ་དེ། །ཞིང་རྣམས་སྲུང་བསྐོས་དྲུག་ཆ་གླར་བྱིན་པས། །ཞིང་དཔོན་དུ་གྲགས་དཔྱ་ཁྲལ་ཐོག་མ་ཡིན། །རྐུ་བ་བྱུང་ཚེ་ཞི་བས་མ་བཟློག་ནས། །ལུས་ལ་བསྣུན་སྟེ་བསད་པས་སྲོག་གཅོད་བྱུང༌། །གསོད་པས་སྐྲག་རྣམས་རྫུན་དུ་སྨྲ་བར་བྱེད། །དེ་ལྟར་རྩ་བ་བཞི་ག་སྤྱད་པའི་ཕྱིར། །རྩོད་པར་ལྡན་པའི་དུས་སུ་གྱུར་པ་ཡིན། །འདི་ནི་ཐུབ་བསྟན་སྐྱོན་མེད་ལོ་བཅུ་གཉིས། །གནས་དང་སྔོན་གྱི་རྫོགས་ལྡན་བསྐལ་པ་སྦྱར། །དེ་ནས་ཆུ་བུར་དང་པོ་བྱུང་བའི་ཚེ། །ཕམ་པར་བཅས་དང་གསུམ་ལྡན་སྦྱར་བ་སོགས། །འདུལ་བའི་ལུང་ལས་ཇི་སྐད་བཤད་བཞིན་སྟེ། །ཆོས་ཀྱི་དབང་དུ་བྱས་པའི་དུས་བཞི་ཡིན། །མདོ་སྡེ་ལྟར་ན་རྩོད་ལྡན་འཆར་བ་དང༌། །ཞིང་དེའི་སངས་རྒྱས་ཐོག་མ་དུས་མཚུངས་འབྱུང༌། །ལོངས་སྤྱོད་མཐའ་དག་ཚང་བ་རྫོགས་ལྡན་སྟེ། །རྐང་པ་གཅིག་ཉམས་གསུམ་ལྡན་ལ་སོགས་སྦྱར། །ལོངས་སྤྱོད་དབང་དུ་བྱས་པའི་དུས་བཞི་སྟེ། །རྩོད་ལྡན་དུས་སུ་འཁོར་སྒྱུར་མི་འབྱུང་ཞེས། །བཤད་པའང་མདོ་སྡེའི་ལུགས་ཀྱི་དུས་བཞི་ཡིན། །སྔགས་ལས་དུས་བཞིའི་རྣམ་གཞག་གཞན་མང་བཤད། །ཁ་ཅིག་འདས་པའི་སངས་རྒྱས་གསུམ་པོ་དང༌། །རྫོགས་ལྡན་ལ་སོགས་རེ་རེ་བཞིན་སྦྱར་སྟེ། །རྩོད་ལྡན་དུས་སུ་ཤཱཀྱའི་ཏོག་བྱོན་ཞེས། །འཆད་ནི་འཇིག་རྟེན་གནའ་གཏམ་ཙམ་ཞིག་སྟེ། །བསྟན་ལས་བྱུང་བའི་དུས་བཞིའི་རྣམ་གཞག་མིན། །ཁ་ཅིག་དུར་སྒྲ་སྒྲོག་པའི་ལྗོན་ཤིང་ལས། །རྒྱལ་བའི་སྐུ་གདུང་ཟླུམ་(ཀ༦ན)

[Full Size]

ཞིང་ཆེ་བ་བྱུང༌། །དེ་ཡི་ནང་ནས་བརྫུས་སྐྱེས་ཁྱེའུ་ནི། །ལྟ་བས་མི་ངོམས་བྱུང་དེ་མང་བཀུར་ཡིན། །དེ་བས་གདུང་གི་བརྒྱུད་པར་འཇོག་ཅེས་དང༌། །དེ་བཞིན་ཡར་འདེད་ལྷ་བདུད་ཞེས་ཟེར་མོད། །ཚད་ལྡན་གཞུང་ལས་བཤད་པ་མ་མཐོང་ངོ༌། །ལོངས་སྤྱོད་ཉམས་ཤིང་གསོད་པའི་བར་བྱུང་བས། །སྐྱོ་སྟེ་ནགས་སུ་གནས་པས་བསམ་གཏན་ཐོབ། །མངོན་ཤེས་ལྡན་ལ་དྲང་སྲོང་ཞེས་བྱར་གྲགས། །བསམ་གཏན་མ་ཐོབ་སྐྱོ་བས་གྲོང་དུ་འོངས། །སྙན་ངག་སོགས་ཀྱིས་འཚོ་ལ་བྲམ་ཟེར་ཐོགས། །དཔྱ་ཁྲལ་གྱིས་འཚོ་རྒྱལ་རིགས་ཅེས་སུ་གྲགས། །ཚོང་དཔོན་སོགས་བྱེད་དེ་རྣམས་རྗེ་འུའི་རིགས། །ཞིང་གི་ལས་ཀྱི་འཚོ་བ་དམངས་རིགས་སྟེ། །གསོད་སོགས་ངན་ལས་ཀྱིས་འཚོ་གདོལ་པའི་རིགས། །མདོར་ན་བྱེད་ལས་སོ་སོ་ཐ་དད་ལས། །རྒྱལ་རིགས་ལ་སོགས་བཟང་ངན་རིགས་ལྔར་བཞག །འདི་ཡན་རིགས་ལ་ཁྱད་པར་ཡོད་མ་ཡིན། །དེ་བཞིན་དུད་འགྲོ་ཡི་དྭགས་དམྱལ་བ་པ། །རིམ་པར་ཆགས་ཤིང་དམྱལ་བ་མནར་མེད་དུ། །སེམས་ཅན་གཅིག་གཅིག་སྐྱེས་པར་གྱུར་པ་ན། །ཆགས་བསྐལ་བར་བསྐལ་ཉི་ཤུ་རྫོགས་པ་སྟེ། །དེ་ནས་གནས་པའི་བསྐལ་པ་རྩོམ་པ་ཡིན། །ཁ་ཅིག་མང་བཀུར་མ་དྲོས་མཚོར་ཁྲུས་བྱས། །ཁུ་བ་ལྷུང་ལས་དུད་འགྲོའི་སྐྱེ་གནས་བྱུང༌། །བརྐུས་པའི་མི་གཉིས་གཅིག་བསད་གཅིག་སྤྱུགས་པས། །བསད་དེ་སྨོན་ལམ་ལོག་པས་ལྷ་མིན་གྱུར། །སྤྱུགས་པ་ཤི་འཕོས་ཡི་དྭགས་ཐོག་མར་སྐྱེས། །མང་བཀུར་འདས་ནས་ལྷ་དབང་བརྒྱ་བྱིན་གྱུར། །སྨོན་ལམ་མཐུ་དེས་ལྷ་དང་ལྷ་མིན་རྩོད། །དགེ་མཆོག་སྡིག་སྤྱད་དམྱལ་བར་སྐྱེས་གྱུར་སྟེ། །དེ་ཚེ་འགྲོ་བ་རིགས་དྲུག་ཚང་ངོ་ཞེས། །བོད་གཞུང་སྔ་རབས་འགའ་ལས་འཆད་པར་སྣང༌། །ཞིང་དཔོན་དེ་ཡིས་མི་རྣམས་ཆ་མཉམ་དུ། །ལེགས་པར་བསྐྱངས་པས་ཀུན་ཀྱང་དགའ་གྱུར་སྟེ། །མང་པོས་དཔོན་དུ་བཀུར་ཕྱིར་མང་བཀུར་གྲགས། །ཞིང་བདག་ཕོངས་པ་སྐྱོབ་པ་(ཀ༦བ)

[Full Size]

རྒྱལ་རིགས་སྟེ། །ཆོས་དང་ཚུལ་ཁྲིམས་ཤེས་རབ་ཀུན་སྤྱོད་ཀྱིས། །འཁོར་རྣམས་མགུ་བར་བྱེད་ཕྱིར་རྒྱལ་པོར་བཏགས། །བསྐལ་བཟང་འདི་ལ་འཛམ་བུའི་གླིང་འདི་ན། །མི་ཡི་རྒྱལ་པོ་ཀུན་གྱི་ཐོག་མ་ཡིན། །དེ་ཚེ་མི་ལ་སེམས་ཅན་ཞེས་སུ་གྲགས། །དེ་སྲས་འོད་མཛེས་མི་ལ་ཚུར་ཤོག་ཟེར། །དེ་སྲས་དགེ་བ་མི་ལ་རྨེ་བ་ཅན། །དེ་སྲས་དགེ་མཆོག་མི་ལ་སྤྲིན་མགྲིན་ཟེར། །དེ་སྲས་གསོ་སྦྱོང་འཕགས་སྟེ་དེ་རྣམས་ལ། །སྔོན་གྱི་རྒྱལ་པོ་སྡེ་ལྔ་ཞེས་སུ་གྲགས། །འདི་ཚེ་མི་ལ་ཏ་ལའི་རྐང་ཞེས་འབོད། །མིང་དེ་རྣམས་ནི་འདོད་རྒྱལ་ཁོ་ན་ཡིན། །གསོ་སྦྱོང་འཕགས་ཀྱི་སྤྱི་བོར་ཤ་རྨེན་ནི། །འཇམ་པོ་ལས་བྱུང་ཁྱེའུ་ང་ལས་ནུ། །གླིང་བཞིར་དབང་བྱས་གསེར་གྱི་འཁོར་ལོས་སྒྱུར། །ལྷ་དབང་བརྒྱ་བྱིན་སྟན་ཕྱེད་བསྟབས་པ་ཡིན། །ཚེ་ཚད་བརྒྱ་བྱིན་བརྒྱ་དང་སོ་དྲུག་ཐུབ། །འདི་དུས་མི་ཡི་ཚེ་ཚད་དཔག་དུ་མེད། །དེ་ཡི་བརླ་གཡས་ལས་སྐྱེས་མཛེས་པ་སྟེ། །གླིང་གསུམ་དབང་བྱེད་དངུལ་གྱི་འཁོར་སྒྱུར་ཡིན། །དེ་ཡི་བརླ་གཡོན་ལས་སྐྱེས་ཉེ་མཛེས་ནི། །གླིང་གཉིས་དབང་བྱེད་ཟངས་ཀྱི་འཁོར་ལོས་སྒྱུར། །དེ་ཡི་རྐང་བོལ་ལས་སྐྱེས་མཛེས་ལྡན་ནི། །གླིང་གཅིག་དབང་བ་ལྕགས་ཀྱི་འཁོར་ལོས་སྒྱུར། །དེ་ཡི་རྐང་མཐིལ་ལས་སྐྱེས་ཉེས་མཛེས་ལྡན། །འཛམ་གླིང་ལ་དབང་སྟོབས་ཀྱི་འཁོར་སྒྱུར་སྟེ། །འདི་རྣམས་འཁོར་ལོས་སྒྱུར་བ་སྡེ་ལྔ་ཟེར། །ང་ལས་ནུ་ཚེ་རིགས་པའི་གནས་རྣམས་ལ། །དཔྱོད་ཕྱིར་མི་རྣམས་ཀྱི་མིང་དཔྱོད་པ་ཅན། །དེ་བཞིན་སེམས་པ་ཅན་དང་ཉེར་རྟོག་ཅན། །ཤེད་བུ་ཤེད་ལས་སྐྱེས་སོགས་ད་ལྟའི་བར། །དུ་མར་བརྗོད་ཅིང་བདག་དང་གང་ཟག་སོགས། །བྱེད་པའི་སྐྱེས་བུའི་རྣམ་གྲངས་གཞན་དུའང་རྟོག །ཉེ་མཛེས་ལྡན་གྱིས་འཛམ་གླིང་སྐྱོང་བའི་ཚེ། །སྐྱེ་དགུའི་ཚེ་ལོ་བཞི་ཁྲི་ཐུབ་པ་སྟེ། །དེ་ཚེ་བསྐལ་བཟང་སངས་རྒྱས་ཐོག་མ་ནི། འཁོར་བ་འཇིག་བྱོན་མཛད་པ་བཅུ་གཉིས་བསྟན། །(ཀ༧ན)

[Full Size]

འདི་ཡན་སྡེ་སྣོད་གསུམ་པ་ཕལ་ཆེར་མཚུངས། །ཉེ་མཛེས་ལྡན་སྲས་བཟང་པོའམ་རྒྱས་བྱེད་ཡིན། །དེ་ནས་སྲེད་པ་སྲེད་དང་བཏང་བ་དང༌། །བཏང་བཟུང་ལུས་ཐུལ་ཤེས་ལྡན་ངན་སྤོང་དང༌། །ཤིང་རྟ་སྡུག་གུ་དུག་ཅན་དུག་ཅན་ཆེ། །ཤངྐུ་ནི་དང་ཤངྐུ་ནི་ཆེན་པོ། །ཀུ་ཤི་ཉེ་བའི་ཀུ་ཤི་ཀུ་ཤི་ཆེ། །རྒྱས་བྱེད་རྒྱས་བྱེད་ཆེན་པོ་ལེགས་མཐོང་དང༌། །ལེགས་མཐོང་ཆེན་པོ་གནོད་སེལ་ཉེ་གནོད་སེལ། །རྨ་བྱ་ངེས་འགྲོ་བདེ་བྱེད་རབ་འདུལ་དང༌། །རབ་ཏུ་སྒྲ་བསྒྲགས་རབ་གདུང་ལྡན་འོད་བྱེད། །ལྷུན་པོ་རི་རབ་ལྷུན་ལྡན་མེ་ལྕེ་དང༌། །མེ་ལྕེའི་ཕྲེང་དང་མེ་ལྕེ་ལྡན་པའི་བརྒྱུད། །འབུམ་དུ་ཚང་བ་གྲོང་ཁྱེར་གྲུ་འཛིན་བྱུང༌། །དགྲ་རྣམས་འདུལ་ཕྱིར་དགྲ་འདུལ་རྒྱལ་པོའི་བརྒྱུད། །ལྔ་ཁྲི་བཞི་སྟོང་དམག་མི་ཚུགས་སུ་བྱུང༌། །དེ་སྲས་རྒྱལ་པོ་མ་ཕེབས་འབེབས་ཀྱི་བརྒྱུད། །དྲུག་ཁྲི་སུམ་སྟོང་ཝ་ར་ཎཱ་སིར་བྱུང༌། །བཟོད་དཀའི་རྒྱུད། བརྒྱད་ཁྲི་བཞི་སྟོང་འདར་འཛིན་གྲོང་དུའོ། །ཚངས་བྱིན་རྒྱུད། སུམ་ཁྲི་ཉིས་སྟོང་གླང་ཆེན་གནས་སུ་སྟེ། །གླང་པོས་བྱིན་རྒྱུད། གྲོང་ཁྱེར་རྡོ་མཆོག་དུ་ནི་སྟོང་ཕྲག་ལྔ། །བལ་བུའི་རྒྱུད། གྲོང་གི་རྡལ་དུ་སུམ་ཁྲི་ཉིས་སྟོང་སྟེ། །ཚན་ཆེན་ཐུབ་རྒྱུད། གཞན་ལས་རྒྱལ་དུ་སུམ་ཁྲི་ཉིས་སྟོང་ཉིད། །རྒྱལ་བ་པོའི་རྒྱུད། ཀ་ནྱ་ཀུཔ་ཛའི་གྲོང་དུ་ཁྲི་ཉིས་སྟོང༌། །རྒྱལ་བའི་སྡེའི་རྒྱུད། ཙམ་པའི་གྲོང་དུ་ཁྲི་དང་སྟོང་ཕྲག་བརྒྱད། །ཀླུའི་ལྷ་རྒྱུད། ཏཱ་ལའི་ཕྲེང་བར་ཉི་ཁྲི་ལྔ་སྟོང་དང༌། །སླར་ཡང་མི་ཡི་ལྷ་རྒྱུད་ཁྲི་ཉིས་སྟོང༌། །དུག་ཅན་པའི་ལྷ་རྒྱུད། བ་སོའི་གྲོང་དུ་ཁྲི་དང་སྟོང་ཕྲག་བརྒྱད། །བློ་བཟང་རྒྱུད། ཉི་ཁྲི་ཆིག་སྟོང་རྒྱལ་པོའི་ཁབ་ཏུ་བྱུང༌། །ཝ་ར་ཎཱ་སིར་མུན་སེལ་རྒྱུད་པ་བརྒྱ། །དབང་ཆེན་སྡེའི་རྒྱུད། རྩྭ་ཅན་དུ་ནི་བརྒྱད་ཁྲི་བཞི་སྟོང་སྟེ། །གྲུ་འཛིན་དུ་ནི་མཚོ་ལྷའི་རྒྱུད་པ་སྟོང༌། །དཀའ་ཐུབ་སྤྱོད་རྒྱུད། བརྒྱད་ཁྲི་བཞི་སྟོང་གྲོང་ཁྱེར་རྩྭ་ཅན་སྟེ། །ས་གཙོའི་རྒྱུད་སྟོང་ཝ་ར་ཎཱ་སིར་བྱུང༌། །དེ་ཡི་ཐ་མ་རྒྱལ་(ཀ༧བ)

[Full Size]

པོ་གཉེན་ལྡན་སྟེ། །དེ་ཚེ་སྐྱེ་རྒུའི་ཚེ་ལོ་སུམ་ཁྲི་ཐུབ། །རྫོགས་པའི་སངས་རྒྱས་གསེར་ཐུབ་འཇིག་རྟེན་བྱོན། །ས་བདག་རྒྱུད། དེ་ནས་དམག་མི་ཚུགས་པར་སྟོང་ཡིན་སྟེ། །ས་འཛིན་རྒྱུད། བརྒྱད་ཁྲི་བཞི་སྟོང་འདྲེས་པའི་གྲོང་དུ་བྱུང༌། །དེ་ཡི་ཐ་མ་རྒྱལ་པོ་ལྷ་ཆེན་སྟེ། །ཨ་སྨྲའི་ཚལ་དུ་རྒྱལ་པོའི་དྲང་སྲོང་མཛད། །དེ་རྒྱུད་བརྒྱད་ཁྲི་བཞི་སྟོང་ཡང་དེ་བཞིན། །རྒྱལ་པོའི་དྲང་སྲོང་ཚངས་པར་སྤྱད་པ་སྤྱོད། །དེ་ནས་དེས་འཕེན་མུ་ཁྱུད་མུ་ཁྱུད་བརྟེན། །ཚན་ཆེན་པོ་དང་ཟ་བ་ཉེར་ཟ་དང༌། །ཟ་ཆེན་ཟ་ལྡན་གྱ་ནོམ་སྣང་བ་དང༌། །མཉམ་ལྟ་ཐོས་པའི་སྡེ་དང་ཆོས་ཀྱི་སྡེ། །རྟོགས་པ་རྟོགས་ཆེན་རྟོགས་སྡེ་མྱ་ངན་མེད། །མྱ་ངན་བྲལ་དང་མཚམས་བརྟན་རྒན་མཚམས་དང༌། །དུནྡུ་མ་ར་སྐྱ་རེངས་ཕྱོགས་བདག་དང༌། །རྡུལ་བཟང་བདེ་བྱེད་ཀུན་དགའ་མེ་ལོང་གདོང༌། །སྐྱེད་པོ་རྒྱལ་བ་ཁྱུ་མཆོག་བཟའ་བཏུང་ལྡན། །བཟའ་བཏུང་མོད་དང་ཐུབ་མེད་གཞན་ལས་རྒྱལ། །བརྟན་པོ་རབ་བརྟན་སྟོབས་ཆེན་གཞོན་པ་མང༌། །བློ་བཟང་བརྟན་པར་ཞོན་དང་གཞུ་བཅུ་པ། །གཞུ་བརྒྱ་དགུ་བཅུའི་གཞུ་དང་རྣམ་རྒྱལ་གཞུ། །གཞུ་བཀྲ་གཞུ་སྲ་གཞུ་བརྟན་ཤིང་རྟ་བཅུ། །ཤིང་རྟ་བརྒྱ་པ་དགུ་བཅུ་སྣ་ཚོགས་པ། །ཤིང་རྟ་རྣམ་པ་སྣ་ཚོགས་ཤིང་རྟ་བརླིང༌། །ཤིང་རྟ་བརྟན་རྒྱུད་བདུན་ཁྲི་བདུན་སྟོང་ནི། །ལེགས་པར་སྣང་བའི་གྲོང་ཁྱེར་ཆེན་པོར་བྱུང༌། །ནམ་མཁའི་བདག་དང་མུས་ཐུད་རྒྱུད། ཝ་ར་ཎཱ་སིར་བརྒྱ་ཕྲག་གཅིག་གི་མཐར། །རྒྱལ་པོ་ཀྲྀ་ཀྲི་ཚེ་ལོ་ཉི་ཁྲི་སྟེ། །རྫོགས་པའི་སངས་རྒྱས་འོད་སྲུང་འཇིག་རྟེན་བྱོན། །ཀྲྀ་ཀྲིའི་སྲས་པོ་ལེགས་པར་སྐྱེས་ཀྱི་རྒྱུད། །བརྒྱ་ཕྲག་གཅིག་ནི་གྲོང་ཁྱེར་གྲུ་འཛིན་བྱུང༌། །དེ་ནས་རྒྱལ་པོ་རྣ་བ་ཅན་གྱི་བུ། །ཆེ་བ་གཽ་ཏ་མ་རབ་ཏུ་བྱུང༌། །ཆུང་བ་བ་ར་དྷྭ་ཛར་རྒྱལ་ས་གཏད། །དེ་ཚེ་གཡོན་ཅན་པདྨའི་རྩ་ལག་གིས། །མིག་སེར་དབང་གིས་སྨད་ཚོང་བཟང་མོ་བསད། །རལ་གྲི་གཽ་ཏ་མའི་སྤྱིལ་པོར་བོར། །(ཀ༨ན)

[Full Size]

གཤེད་མས་གཽ་ཏམ་བཟུང་སྟེ་གོ་རར་བཅུག །རྒྱལ་པོས་རང་གི་ཕུ་བོ་ཡིན་པ་དང༌། །དེ་ལ་ཉེས་པ་མེད་པའང་མ་ཤེས་ནས། །བསད་ཤིང་ལ་བཙུགས་འཆི་ཁར་མཁན་པོ་ནི། །དྲང་སྲོང་མདོག་ནག་གིས་མཐོང་རྒྱུ་དྲིས་པས། །གཽ་ཏ་མས་རང་གིས་མ་ཉེས་པའི། །བདེན་པ་བརྗོད་པས་མཁན་པོ་གསེར་མདོག་གྱུར། །བདག་ནི་འདི་ནས་འགྲོ་བ་གར་སྐྱེ་དྲིས། །རྒྱལ་རྒྱུད་ཆད་ན་མི་རུང་བར་ཤེས་ནས། །མཁན་པོས་བྲམ་ཟེའི་སྨྲེང་ལས་བུ་མེད་པ། །དེ་ལ་ཕྱི་མའི་འགྲོ་བ་མེད་ཟེར་གྱིས། །ཁྱོད་ཀྱིས་རིགས་རྒྱུད་འཇོག་པར་ནུས་སམ་དྲིས། །བདག་ལ་བུད་མེད་རྒྱུས་ཀྱང་མི་འཚལ་ན། །ད་ལྟ་གནད་རྣམས་འཆད་ཚེ་ག་ལ་ཞིག །མཁན་པོས་རྫུ་འཕྲུལ་གྱིས་ནི་རྫི་ཆར་སྤྲུལ། །སྡུག་བསྔལ་ཅུང་ཟད་ཞི་བར་བྱས་ནས་ཀྱང༌། །ཆགས་པ་ཡིད་ལ་བྱེད་དུ་བཅུག་པ་ཡིས། །ཁྲག་དང་ས་བོན་འདྲེས་པ་ས་ལ་ཟགས། །བསད་ཤིང་རྩ་བར་སྒོང་ང་གཉིས་སུ་གྱུར། །མཁན་པོས་ཁྱེར་སྟེ་བུར་ཤིང་ཚལ་དུ་བཞག །ཉི་མའི་ཟེར་གྱིས་སྨིན་ཞིང་བརྡོལ་བ་ལས། །ཁྱེ་འུ་རེ་བྱུང་གཅིག་ནི་ཉི་མའི་གཉེན། །ཅིག་ཤོས་བུ་རམ་ཤིང་པར་བཏགས་སྟེ་གསོས། །རྒྱལ་པོ་དེ་འདས་སྲས་ཀྱང་མེད་པའི་ཚེ། །དྲང་སྲོང་གཽ་ཏ་མ་བཙལ་བ་དང༌། །མཁན་པོས་སྔོན་གྱིས་ཚུལ་བརྗོད་ཁྱེའུ་གཉིས། །བཏང་ནས་ཕུ་བོ་རྒྱལ་པོར་བསྐོས་པ་དང༌། །དེ་ཡང་རྒྱལ་བུ་མེད་པ་ཉིད་དུ་འདས། །དེ་ནས་བུ་རམ་ཤིང་པ་རྒྱལ་པོར་བསྐོས། །འདི་གཉིས་བུ་རམ་ཤིང་པའི་སྟེངས་ཞེས་ཟེར། །སྲས་རྒྱུད་བརྒྱ་ནི་གྲུ་འཛིན་ཡུལ་དུ་བྱུང༌། །དེ་ནས་རྒྱལ་པོ་འཕགས་སྐྱེས་པོ་ཅེས་པ། །དེ་ལ་སྲས་བཞི་སྐར་མདའི་གདོང་དང་ནི། །ལག་ན་གླང་འདུལ་རྐང་གདུབ་ཅན་ཞེས་བྱུང༌། །བཙུན་མོ་ཤི་ནས་རྒྱལ་པོ་གཞན་ཞིག་གི །བུ་མོ་བསླངས་པས་དེ་ལས་སྐྱེས་པའི་བུ། །རྒྱལ་སར་འབྱིན་པའི་གཙིགས་ཡིག་བཟུང་ནས་བྱིན། །དེ་ལ་ཁྱེ་འུ་རྒྱལ་སྲིད་དགའ་ཞེས་བྱུང༌། །བློན་པོའི་གཡོ་ཡིས་ཕུ་བོ་བཞི་པོ་(ཀ༨བ)

[Full Size]

རྣམས། །སྲིང་མོ་གཉེན་བཅས་གངས་རི་དང་ཉེ་བ། །ཆུ་བོ་སྐལ་ལྡན་ཤིང་རྟ་འབབ་པའི་འགྲམ། །དྲང་སྲོང་སེར་སྐྱའི་གནས་དང་ཉེ་བར་སྤྱུགས། །དེ་དག་གནས་དེར་ལོ་མའི་སྤྱིལ་པོ་བྱས། །རི་དྭགས་ཤ་དང་རྩ་བ་འབྲས་བུས་འཚོ། །དྲང་སྲོང་དེ་ལ་ཕ་བཞིན་ལྟ་བར་གྱུར། །ལང་ཚོ་རྒྱགས་ཆེས་འདོད་པས་ཉེན་པ་ཡིས། །ལུས་རིད་གྱུར་པ་དྲང་སྲོང་ལ་སྨྲས་པས། །རང་རང་སྲིང་མོ་སྤོངས་ལ་མས་དབེན་གྱི། །སྲིང་མོ་དག་དང་ལྷན་ཅིག་འགྲོགས་པར་གྱིས། །རྒྱལ་རིགས་རྒྱལ་སྲིད་ཉམས་ལ་འདི་རུང་ཞེས། །སྨྲས་པ་ཚད་མར་བཟུང་སྟེ་མིང་སྲིང་འགྲོགས། །དེ་ལས་ཁྱེའུ་བུ་མོ་མང་དུ་འཕེལ། །དྲང་སྲོང་དེ་ཡིས་ཡངས་པའི་ས་ཞིག་དུ། །རིལ་བའི་ཆུ་བྲིམས་གྲོང་ཁྱེར་བཀོད་པ་བྱས། །རྒྱལ་རིགས་དེ་དག་ཐམས་ཅད་དེར་གནས་བཅས། །སེར་སྐྱས་བསྟན་ཕྱིར་སེར་སྐྱའི་གཞི་ཞེས་གྲགས། །ཕྱིས་ནས་མང་དུ་འཕེལ་བས་དེར་མ་ཤོང༌། །འབབ་ཆུ་རོ་ཧི་ཀ་ཡི་ཕར་ངོས་སུ། །ལྷ་ཡིས་བསྟན་པའི་ས་རུ་གྲོང་བཅས་པས། །གྲོང་ཁྱེར་ལྷས་བསྟན་ཞེས་བྱར་གྲགས་པ་བྱུང༌། །ཡབ་ཀྱིས་རྒྱལ་བུ་བཞི་ཡི་གཏམ་དྲིས་པས། །མིང་སྲིང་འགྲོགས་པར་ཐོས་ཚེ་ངོ་མཚར་ནས། །རྒྱལ་པོས་ལག་པ་བརྐྱངས་སྟེ་གཞོན་ནུ་རྣམས། །ཕོད་པ་ཡིན་ནོ་ཞེས་སྨྲས་དབང་ཆེན་གྱིས། །སྨྲས་ཕྱིར་དེ་ཕྱིན་ཤཱཀྱ་ཞེས་པར་གྲགས། །ཡབ་འདས་རྒྱལ་སྲིད་འགའ་ནི་རྒྱལ་པོར་གྱུར། །དེ་ཡང་བུ་མེད་འདས་ནས་ཕུ་བོ་བཞི། །རིམ་པས་བསྐོས་པས་དང་པོ་གསུམ་པོ་ནི། །རྒྱལ་པོར་གྱུར་པའི་སྲས་མེད་བཞིན་དུ་འདས། །བཞི་པ་རྐང་གདུབ་ཅན་གྱི་བུ་གནས་འཇིག །དེ་སྲས་བ་ལང་གནས་སྟེ་དེ་ཡི་སྲས། །སེང་གེའི་འགྲམ་དང་སེང་གེའི་སྒྲ་ཞེས་གཉིས། །འཛམ་བུའི་གླིང་ན་གནམ་རུ་ཐོགས་པའི་མཆོག །སེང་གེའི་འགྲམ་ལ་སྲས་བཞི་ཟས་གཙང་མ། །ཟས་དཀར་བྲེ་བོ་ཟས་དང་བདུད་རྩི་ཟས། །རྒྱལ་པོ་གཙང་མའི་ཟས་ལ་སྲས་གཉིས་སྟེ། །སྒྱུ་འཕྲུལ་ཆེ་ལས་བཅོམ་ལྡན་(ཀ༩ན)

[Full Size]

འདས་བལྟམས་ཤིང༌། །སྒྱུ་འཕྲུལ་ལས་ནི་གཅུང་པོ་མཛེས་དགའ་བོ། །ཟས་དཀར་སྲས་པོ་རྒྱལ་དང་བཟང་ལྡན་གཉིས། །བྲེ་བོ་ཟས་ལ་མིང་ཆེན་མ་འགགས་པ། །བདུད་རྩི་ཟས་ལ་ལྷས་བྱིན་ཀུན་དགའ་བོ། །དོན་ཀུན་གྲུབ་པའི་སྲས་གཅིག་དགྲ་གཅན་ཟིན། །དེ་ཡིས་ཤཱཀྱ་ཆེན་པོའི་རྒྱུད་པ་རྫོགས། །སྲིད་པའི་རྒྱུན་བཅད་ཡང་སྲིད་མེད་ཏོ་ཅེས། །ཤཱཀྱ་རྣམས་ཀྱིས་ཆོ་འབྲང་ཞུས་པའི་ཚེ། །མུ་སྟེགས་པ་རྣམས་གཽ་ཏ་མ་ནི། །རང་རིགས་སྒྲོག་ཞེས་འཕྱ་བ་སྤང་བའི་ཕྱིར། །ང་ནི་རེ་ཞིག་སྐུ་རྒྱབ་བསྙུན་པ་བསལ། །ཁྱོད་ཀྱིས་སྟོན་ཞེས་བསྒོས་ནས་གཟིམས་པར་བསྟན། །རྫུ་འཕྲུལ་ལྡན་མཆོག་མོངྒལ་བུ་ཡིས་ནི། །མཉམ་པར་བཞག་སྟེ་ཏིང་འཛིན་ལས་ལངས་ནས། །རྒྱ་ཆེར་བཤད་ཅེས་འདུལ་བའི་ལུང་ལས་གསུངས། །མངོན་པར་བྱུང་བའི་མདོ་སྡེ་ལས་བཤད་དང༌། །མངོན་པའི་འཇིག་རྟེན་བཞག་པར་བཤད་པ་སྟེ། །གསུམ་པོ་གྲངས་དང་གོ་རིམ་མི་འདྲ་བ། །སྡེ་སྣོད་གསུམ་གྱི་འཆད་ཚུལ་ཐ་དད་ཡོད། །ཆོས་ཀྱི་རྒྱལ་པོའི་བཀའ་ཆེམས་ཀ་བཀོལ་མར། །འཕགས་སྐྱེས་པོ་ཡི་སྲས་གསུམ་སྲིང་མོར་བཅས། །སྤྱུགས་པའི་ཆེ་རྒྱུད་ཤཱཀྱ་ཆེན་པོ་སྟེ། །བར་མའི་རྒྱུད་ལ་ཤཱཀྱ་ལི་ཙཱ་བཱི། །ཆུང་བའི་རྒྱུད་ལ་རི་བྲག་པ་ཅེས་གསུངས། །དང་པོའི་རྒྱུད་པ་གནས་འཇོག་ས་ཁྱིམ་ནས། ཁྲི་དང་ལྔ་སྟོང་གྲོང་ཁྱེར་སེར་སྐྱར་བྱུང༌། །དེ་ཡི་ཐ་མ་ཤིང་རྟ་བཅུ་པ་ནས། །རྒྱལ་རབས་བཅུ་གཅིག་པ་ལ་གཞུ་བརྟན་བྱུང༌། །དེ་ཡི་བུ་ནི་སེང་གེའི་འགྲམ་ཞེས་གསུངས། །ཁ་ཅིག་རྒྱལ་པོ་ཤིང་རྟ་བཅུ་པའི་སྲས། །གསུམ་ལས་ཤཱཀྱ་ཆེ་སོགས་རིགས་གསུམ་བྱས། །ཆེན་པོ་ནས་བཟུང་ཉེར་བརྒྱད་འདས་པ་ན། །སེང་གེའི་ཟ་འགྲམ་བྱུང་བར་འཆད་པ་དང༌། །ཁ་ཅིག་དྲང་སྲོང་གཽ་ཏ་མ་ཡི། །སྒོ་ང་གསུམ་ལས་རིགས་གསུམ་གྱེས་སྨྲ་སོགས། །(ཀ༩བ)

[Full Size]

བཤད་པའི་རྣམ་གྲངས་དུ་མ་བྱེད་པར་སྣང༌། །གནས་བསྐལ་ཡ་ཐོག་མ་ཐོག་རིང་མོ་གཉིས། །དེ་ཡི་བར་དུ་ཁུག་པ་བཅོ་བརྒྱད་དེ། །གསུམ་གྱིས་གནས་བསྐལ་བར་བསྐལ་ཉི་ཤུ་ཡིན། །ད་ལྟ་ཡ་ཐོག་རིང་མོའི་མཇུག་ཡིན་སྟེ། །ཚེ་ལོ་བཅུ་པ་རྫོགས་པའི་ཡར་འཕེལ་ནས། །བར་གྱི་ཁུག་པ་བཅོ་བརྒྱད་འགོ་རྩོམ་བྱེད། །དེ་ཡང་ད་ལྟར་གནས་པའི་མི་རྣམས་ཀྱིས། །ཕ་མ་དགེ་སྦྱོང་བྲམ་ཟེ་རྒན་རབས་སོགས། །བརྙས་ཤིང་མི་དགེའི་ལས་ལམ་སྤྱད་པའི་རྒྱུས། །ཚེ་དང་ལོངས་སྤྱོད་རིམ་པས་བྲི་གྱུར་སྟེ། །ཚེ་ཡི་རིང་ཚད་ལོ་བཅུ་ཐུབ་པར་འགྱུར། །དེ་ཚེ་གོས་མཆོག་སྐྲ་ཡི་ལ་བ་སྟེ། །ཟས་མཆོག་ཀོ་ཊ་རྒྱན་མཆོག་མཚོན་ལ་བྱེད། །གབ་ཙེ་རུས་གོང་ཐུར་མས་འཚོ་བ་ཡིས། །བརྗུད་དེ་འཆི་བ་མུ་གེའི་བསྐལ་པ་ནི། །ལོ་བདུན་ཟླ་བདུན་ཞག་བདུན་བར་དུ་འབྱུང༌། །དེ་ནས་ནད་ཀྱི་བསྐལ་པ་འཇིགས་རུང་བ། །ཟླ་བ་བདུན་དང་ཞག་བདུན་བར་དུ་འབྱུང༌། །དེ་ནས་མཐོང་ཚད་གཅིག་གིས་གཅིག་གསོད་པ། །མཚོན་ཆའི་བསྐལ་པ་ཞག་བདུན་ཁོ་ན་འབྱུང༌། །དེ་ནས་ལྷག་མར་ལུས་པའི་མི་རྣམས་ནི། །སྡིག་པས་སྐྱོ་སྟེ་སྲོག་གཅོད་སྤོང་བར་འགྱུར། །དེ་ཡིས་ཚེ་ལོ་ཉི་ཤུ་ཐུབ་པར་འཕེལ། །གཟུགས་མདོག་ལོངས་སྤྱོད་སྔོན་ལས་ལྷག་པར་གྱུར། །དེ་བཞིན་མ་བྱིན་ལེན་སོགས་དགུ་རིམ་བཞིན། །དེ་ནས་ཆགས་དང་འདོད་དང་ལོག་ཆོས་སྤངས། །ཕ་མ་དགེ་སྦྱོང་བྲམ་ཟེ་རྒན་རབས་ལ། །བཀུར་དང་བྱས་ཤེས་དྲིན་གཟོ་ལ་གནས་པས། །སྔོན་ལས་ཚེ་དང་གཟུགས་མདོག་ལོངས་སྤྱོད་རྣམས། །རིམ་པས་ཉིས་འགྱུར་འཕེལ་སྟེ་བརྒྱད་ཁྲིར་ཐུག །མི་ཡི་ཚེ་ལོ་བརྒྱ་པར་གྱུར་པའི་ཚེ། །འཕགས་པའི་གནས་བརྟན་བཅུ་དྲུག་འཛམ་གླིང་དུ། །དགྲ་བཅོམ་འཁོར་མང་ལྡན་པ་གཤེགས་ནས་ནི། །སྐལ་ལྡན་རབ་ཏུ་འབྱིན་ཞིང་ཤཱཀྱའི་བསྟན། །སླར་ཡང་སྐྱེ་རྒུ་རྣམས་(ཀ༡༠ན)

[Full Size]

ཀྱི་ཚེ་ལོ་ནི། །བརྒྱ་ཕྲག་དྲུག་པར་འཕེལ་བ་དེ་སྲིད་གནས། །མི་རྣམས་ཚེ་ལོ་བདུན་བརྒྱ་ཐུབ་པའི་ཚེ། །གནས་བརྟན་བཅུ་དྲུག་གིས་ནི་སྟོན་པའི་བཀའི། །གླེགས་བམ་ཀུན་བསྡུས་རིན་ཆེན་མཆོད་རྟེན་བྱས། །བསྐོར་ནས་སྟོན་པར་ཕྱག་མཛད་མྱ་ངན་འདའ། །དེ་ཡིས་ཤཱཀྱའི་བསྟན་པ་མཐར་ཐུག་ཅེས། །དགའ་བའི་བཤེས་ཀྱི་རྟོགས་པ་བརྗོད་ལས་བྱུང༌། །ཀུན་མཁྱེན་བུས་དགའ་བའི་བཤེས་གཉེན་གྱི་རྟོགས་བརྗོད་ལས་ཚེ་ལོ་དྲུག་བརྒྱ་པའི་བར་བསྟན་པ་གནས་པར་བཤད་པ་ནི་སྐུ་གདུང་གི་མཆོད་རྟེན་སོགས་ལ་དགོངས་པ་ཡིན་ནོ་ཞེས་གསུངས་ཀྱང་དེ་ནི་མ་ཡིན་སྟེ་འཁོར་བ་འཇིག་ལ་སོགས་པ་འདས་པའི་སངས་རྒྱས་གསུམ་གྱི་ཡང་སྐུ་གདུང་དང་གཙུག་ཕུད་སོགས་ཀྱི་མཆོད་རྟེན་ད་ལྟ་བཞུགས་པས་དེ་དག་གི་བསྟན་པའང་གནས་པར་འགྱུར་བའི་ཕྱིར་རོ། །དེས་ན་རྟོགས་བརྗོད་དེ་ཉིད་ལས། སྟོན་པ་མྱ་ངན་ལས་འདས་ནས་ལོ་བརྒྱད་ན་ཡུལ་ཤི་པི་ཀའི་གྲོང་ཁྱེར་བྱིན་གྱིས་བརླབས་ཞེས་བྱ་བ་རྒྱལ་པོ་རིགས་པའི་སྡེའི་ཡུལ་ན་དགྲ་བཅོམ་པ་དགའ་བའི་བཤེས་གཉེན་ཞེས་བྱ་བ་མངོན་པར་ཤེས་པ་དྲུག་དང་ལྡན་པ་དེ་མྱ་ངན་ལས་འདའ་ཁར་དགེ་སློང་རྣམས་ཀྱིས་བསྟན་པ་ཇི་སྲིད་གནས་དྲིས་པས། ཁྱེད་རྣམས་མྱ་ངན་མ་བྱེད་ཅིག །ཅིའི་ཕྱིར་ཞེ་ན་བཅོམ་ལྡན་འདས་མྱ་ངན་ལས་འདའ་ཁར་གནས་བརྟན་ཆེན་པོ་བཅུ་དྲུག་གི་ལག་དུ་དམ་པའི་ཆོས་གཏད་དེ་སྦྱིན་བདག་རྣམས་ཀྱི་སྦྱིན་པ་ཡོངས་སུ་དག་པར་བྱ་བའི་ཕྱིར་རོ། །དེ་ཡང་གནས་བརྟན་དང་པོ་བ་ར་དྷྭ་ཛ་བསོད་སྙོམས་ལེན་ཞེས་བྱ་སྟེ་འཁོར་དགྲ་བཅོམ་པ་སྟོང་དག་ལྷན་ཅིག་བ་ལང་སྤྱོད་ཀྱི་གླིང་ན་གནས་སོ། ༡ །གསེར་གྱི་བུ་འཁོར་ལྔ་སྟོང་དང་བྱང་ཕྱོགས་ཁ་ཆེའི་ཡུལ་ནའོ། ༢ །བ་ར་དྷྭ་ཛ་དྲུག་སྟོང་དང་ཤར་ལུས་འཕགས་གླིང་ནའོ། ༣ །མི་ཕྱེད་པ་བདུན་སྟོང་དང་འཛམ་གླིང་ནའོ། ༤ །བཀྐུ་ལ་དྲུག་སྟོང་དང་སྒྲ་མི་སྙན་ནའོ། ༥ །བཟང་པོ་དགུ་སྟོང་དང་ཟངས་གླིང་ནའོ། ༦ །ནག་པོ་སྟོང་དང་སིངྒྷ་གླིང་ནའོ། ༧ །བད་སའི་བུ་སྟོང་ཕྲག་བཅུ་གཅིག་དང་པན་སའི་གླིང་ནའོ། ༨ །བ་ལང་སྐྱོང་ནི་བརྒྱད་སྟོང་དང་རི་སྤོས་ངད་ལྡང་ནའོ། ༩ །ལམ་བ་ནི་སྟོང་ཕྲག་བཅུ་གསུམ་དང་སུམ་ཅུ་རྩ་གསུམ་ནའོ། ༡༠ །དགྲ་གཅན་ཟིན་ནི་སྟོང་དང་པྲྀ་ཡངྐུའི་གླིང་ནའོ། ༡༡ །ཀླུའི་སྡེ་ནི་སྟོང་ཕྲག་བཅུ་གཉིས་དང་རི་སྐྱ་བོ་ནའོ། ༡༢ །ཟུར་གྱིས་ཤེས་ནི་སྟོང་ཕྲག་བཅུ་གསུམ་དང་རི་ངོས་(ཀ༡༠བ)

[Full Size]

ཡངས་ནའོ། ༡༣ །ནགས་ན་གནས་ནི་སྟོང་ཕྲག་བཅུ་བཞི་དང་ལུས་འཕགས་ཀྱི་རི་ལའོ། ༡༤ །མི་ཕམ་པ་ནི་སྟོང་ཕྲག་བཅོ་ལྔ་དང་བྱ་རྒོད་ཕུང་པོའི་རི་ལའོ། ༡༥ །གཙུག་གི་ལམ་ནི་སྟོང་ཕྲག་བཅུ་དྲུག་དང་རི་བོ་གཉའ་ཤིང་འཛིན་ལ་གནས་སོ། ༡༦ །གནས་བརྟན་དེ་དག་གིས་མ་ཤེས་པའམ་མ་མཐོང་བའམ་མི་ཐོས་པའམ་མངོན་དུ་མ་བྱས་པ་ཅུང་ཟད་ཀྱང་མེད་ཏོ། །དགེ་འདུན་གྱི་བྱ་བའམ་སྤྱན་དྲངས་པའམ་བཅོ་ལྔ་སྟོན་ནམ་གཙུག་ལག་ཁང་དུ་དབུལ་བའམ་གཎྜིའི་རབ་གནས་སམ་གང་ཡང་ཅུང་ཟད་མི་ཤེས་པ་མེད་དེ་དེ་དག་དུ་གནས་བརྟན་བཅུ་དྲུག་པོ་དེ་དག་དང་འཁོར་དུ་བཅས་པ་གཞན་དང་གཞན་གྱིས་དེ་དང་དེར་བྱོན་ཞིང་གནས་སྟེ་དེ་ལྟར་སྦྱིན་པ་ཡོངས་སུ་དག་པར་བྱེད་ཏོ། །མ་འོངས་པ་ན་མཚོན་གྱི་བསྐལ་པ་བྱུང་བ་འདས་ནས་མི་རྣམས་དགེ་བ་བཅུ་དང་ལྡན་པས་ཚེ་སླར་འཕེལ་སྟེ་ལོ་བརྒྱ་ཐུབ་པ་ན་སྟོན་པའི་ཉན་ཐོས་དེ་དག་ཀྱང་ཕྱིར་ལ་ཛམྦུའི་གླིང་དུ་བྱོན་ནས་དམ་པའི་ཆོས་ཡང་དག་པར་སྟོན་པར་བྱེདཅིང་རབ་ཏུ་འབྱིན་པར་བྱེད་དེ་ཇི་སྲིད་སྐྱེ་རྒུ་རྣམས་ཀྱི་ཚེ་ལོ་དྲུག་བརྒྱ་པར་གྱུར་པ་དེ་སྲིད་ཀྱི་བར་དུ་བཅོམ་ལྡན་འདས་ཤཱཀྱ་ཐུབ་པའི་བསྟན་པ་དམ་པའི་ཆོས་གནས་པར་འགྱུར་སྟེ་མི་རྣམས་ཀྱིས་ཚེ་ལོ་བདུན་བརྒྱ་ཐུབ་པར་གྱུར་པ་ན་ཉན་ཐོས་དེ་དག་གིས་གང་སའི་སྟེང་འདི་ན་བཅོམ་ལྡན་འདས་ཤཱཀྱ་ཐུབ་པའི་བསྟན་པའི་ཚོགས་ཇི་སྙེད་པ་དེ་དག་གཅིག་དུ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་གཅིག་བྱས་སྟེ་ཀུན་ནས་བསྐོར་ནས་སྐྱིལ་མོ་ཀྲུང་བཅས་སྟེ་འདུག་ནས་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་འདུད་པས་ཕྱག་འཚལ་ལོ་ཞེས་བརྗོད་དེ་ཕྱག་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་རོ། །མཆོད་རྟེན་དེ་ཡང་ནུབ་ནས་འོག་གི་གསེར་གྱི་ས་གཞི་གང་ཡིན་པ་དེ་ལ་གནས་སོ། །དེར་བཅོམ་ལྡན་འདས་ཤཱཀྱ་ཐུབ་པའི་བསྟན་པ་དམ་པའི་ཆོས་ནུབ་པར་འགྱུར་རོ་ཞེས་གསུངས་ཤིང་དེ་ཕྱིན་རང་རྒྱལ་འབྱུང་བ་དང་བྱམས་པའི་སྐབས་ལུང་དུ་བསྟན་ནོ། །དེ་ཕྱིན་ཚེ་ལོ་ཡར་འཕེལ་དེ་སྲིད་ཏུ། །ཤཱཀྱའི་བསྟན་ལ་ཐེག་འབྲིང་དུ་ཞུགས་པའི། །རང་རྒྱལ་བྱེ་བ་ཕྲག་བདུན་འབྱུང་འགྱུར་སྟེ། །སློབ་དཔོན་མེད་པར་ཡེ་ཤེས་མངོན་བྱས་ནས། །(ཀ༡༡ན)

[Full Size]

རྫུ་འཕྲུལ་གྱིས་འདུལ་བསོད་སྙོམས་སྤྱོད་པ་ཡིས། །གཞན་གྱི་དགེ་བའི་རྩ་བ་དཔེལ་བར་མཛད། །དེ་བཞིན་རང་སངས་རྒྱས་པ་ཐམས་ཅད་ཀྱང༌། །བསྟན་པ་མེད་པའི་སྟོངས་ལ་འབྱུང་བ་ཡིན། །མི་རྣམས་ཚེ་ལོ་བརྒྱད་ཁྲིར་འཕེལ་བའི་ཚེ། །གཟུགས་སྟོབས་ཁ་དོག་ལོངས་སྤྱོད་མཐའ་ཡས་སྟེ། །ས་བོན་གཅིག་ལས་འབྲས་བུ་ལན་བདུན་འཕེལ། །ཆེ་ཞིང་བཅུད་དང་ལྡན་པའི་འབྲུ་རྣམས་ནི། །སྙེ་མ་རེ་ལས་བྲེ་བོ་བཞི་རེ་འབྱུང༌། །ཕྱོགས་རེར་རྒྱ་མཚོ་དཔག་ཚད་གཉིས་བསྐམས་སྟེ། །འཛམ་གླིང་ཡངས་ཤིང་གཡང་ས་ངམ་གྲོག་མེད། །མཉམ་ཞིང་འཇམ་པ་རིན་ཆེན་ཀུན་གྱིས་བརྡལ། །བྱ་གག་འཕུར་སྟབས་ཆོད་པར་གྲོང་གིས་ཁྱབ། །མི་རྣམས་ནད་ནི་ཟས་མི་ཟ་བ་དང༌། །འདོད་དང་རྒ་བ་གསུམ་ཡིན་ནད་གཞན་མེད། །དེ་ཚེ་རིན་ཆེན་བདུན་དང་ལྡན་པ་ཡི། །གླིང་བཞིའི་འཁོར་ལོས་སྒྱུར་རྒྱལ་དུང་དང་ནི། །རྫོགས་པའི་སངས་རྒྱས་བྱམས་པ་འབྱུང་འགྱུར་སྟེ། །དཀོན་མཆོག་རྣམ་གཉིས་ཅིག་ཅར་འབྱུང་བ་ནི། །སྨོན་ལམ་མཐུ་རུ་མཆོད་སྡོང་གླིང་བཞིར་བཤད། །ལུང་འདི་ལས་མཁན་ཆེན་པདྨ་བཟང་པོས་མདོ་སྡེ་སྤྱི་རྣམ་དུ་བྱམས་པ་གཉིས་ལ་བསྟན་པ་གཅིག་དུ་བཤད་པ་དེ་ནི་མ་ཡིན་སྟེ། སྤྱིར་སངས་རྒྱས་རྣམས་རྩོད་ལྡན་ཁོ་ན་ལ་འབྱུང་བ་དང༌། རྩོད་ལྡན་ལ་འཁོར་ལོས་སྒྱུར་བ་མི་འབྱུང་བར་གསུངས་ཀྱང་འདིར་སངས་རྒྱས་དང་འཁོར་ལོས་སྒྱུར་བ་སྟེ་དཀོན་མཆོག་གཉིས་ཅིག་ཅར་དུ་འབྱུང་བ་ནི་སྨོན་ལམ་གྱི་མཐུ་ཡིན་པའོ། །ད་ལྟར་ཤཱཀྱའི་རྒྱལ་པོའི་བསྟན་འདི་ལ། །རྒྱལ་བའི་སྐུ་དང་མཆོད་རྟེན་བཞེང་བ་དང༌། །ཉམས་པ་གསོ་སོགས་བྱེད་པའི་མི་དེ་རྣམས། །བྱམས་པའི་འདུས་པ་དང་པོར་གྲོལ་བར་འགྱུར། །རྒྱལ་བའི་གསུང་རབ་འབྲི་ཞིང་བཞེང་བ་རྣམས། །འདུས་པ་གཉིས་པར་རྣམ་པར་གྲོལ་བ་འཐོབ། །ད་ལྟར་དགེ་སློང་དགེ་འདུན་མཆོད་བྱེད་པ། །འདུས་པ་གསུམ་པར་རྣམ་པར་གྲོལ་འགྱུར་ཞེས། །མདོ་དང་དགའ་བའི་བཤེས་གཉེན་གྱིས་ལུང་བསྟན། །དེ་ཡང་འཁོར་ལོས་སྒྱུར་བའི་རྒྱལ་པོ་དུང་གི་མདུན་ན་འདོན་བྲམ་ཟེ་ཚངས་པའི་ཚེའི་བཙུན་མོ་ཚངས་རབ་ལ་ཁྱེའུ་ཞིག་བཙས་པ་ན་འདི་མངལ་དུ་ཞུགས་པ་ནས་ནང་མི་ཐམས་ཅད་བྱམས་པ་དང་ལྡན་པར་གྱུར་ཏོ་ཞེས་མཚན་བྱམས་པར་བཏགས། དེ་ཆེར་སྐྱེས་ནས་ཕས་བྲམ་ཟེའི་ཁྱེའུ་ལྔ་བརྒྱ་བཏང་སྟེ་རིག་བྱེད་ཀློག །དེའི་ཚེ་རྒྱལ་ཆེན་བཞིས་པདྨ་དང་པདྨ་ཆེན་པོ་(ཀ༡༡བ)

[Full Size]

དུང་དང་དུང་ཆེན་པོ་སྟེ་གཏེར་ཆེན་པོ་བཞི་ཕྱུང་ནས་རྒྱལ་པོ་དུང་ལ་ཕུལ་ཞིང་སྔོན་རྒྱལ་པོ་སྒྲ་སྒྲོགས་ལ་བརྒྱ་བྱིན་གྱིས་མཚན་མར་བྱིན་པའི་ལྷའི་རིན་པོ་ཆེ་སྣ་བདུན་ལས་བྱས་པའི་མཆོད་སྡོང་སྤོམས་སུ་ཕོ་འདོམ་དྲུག་བཅུ་པ་ལྟ་བས་མི་ངོམས་པ་དེ་གངྒཱའི་འགྲམ་ནས་ཕྱུང་སྟེ་ཕུལ་ཞིང་དེ་རྒྱལ་པོ་དུང་གིས་མདུན་ན་འདོན་དང་དེས་ཁྱེའུ་བྱམས་པ་དང་དེས་ཁྱེའུ་ལྔ་བརྒྱ་ལ་བྱིན། དེ་དག་གིས་དུམ་བུ་ལྔ་བརྒྱར་བགོས་པ་མཐོང་བས་ཁྱེའུ་བྱམས་པ་སྐྱོ་སྟེ་ཁྱིམ་ནས་རབ་ཏུ་བྱུང་ཞིང་སྔོན་རིང་མོ་ནས་ལམ་དང་འཇུག་པ་དང་ཐེག་པ་བདེ་བས་ཞུགས་པའི་ཕྱིར་དཀའ་བ་སྤྱོད་པ་མེད་པར་དེ་ཉིད་ཀྱི་མཚན་མོ་མངོན་པར་རྫོགས་པར་འཚང་རྒྱ་ཞིང་རྒྱལ་པོ་དུང་གི་རིན་པོ་ཆེ་སྣ་བདུན་ཡང་ནུབ་པར་འགྱུར་རོ། །དེ་ནས་རྒྱལ་པོས་ལོ་ཉི་ཁྲི་ལྷག་པར་ཡོ་བྱད་ཐམས་ཅད་ཀྱིས་བསྙེན་བཀུར་ཞིང་མཐར་རྒྱལ་པོ་བུ་སྟོང་བཙུན་མོ་བརྒྱད་ཁྲི་བཞི་སྟོང་བློན་པོ་དེ་སྙེད་དང་བཅས་པ་དང་ཡབ་བྲམ་ཟེའི་འཁོར་དེ་སྙེད་དང་བཅས་པ་རབ་ཏུ་བྱུང་ཞིང་འཁོར་འདུས་པ་གསུམ་འབྱུང་ལ་དེ་རྣམས་བཅོམ་ལྡན་འདས་བྱམས་པས་རི་བོ་བྱ་རྐང་ལ་ཁྲིད་དེ་རིའི་གཡོགས་བསལ་ནས་འོད་སྲུང་ཆེན་པོའི་སྐུ་གདུང་ཕྱག་མཐིལ་དུ་བཞག་ནས་འདི་ནི་ཚེ་ལོ་བརྒྱ་པའི་ཚེ་སངས་རྒྱས་ཤཱཀྱ་ཐུབ་པ་བྱོན་པའི་ཉན་ཐོས་ཀྱི་མཆོག་འོད་སྲུང་ཆེན་པོའི་སྐུ་གདུང་ངོ་ཞེས་བསྟན་པས་ལུས་ཆུང་ངུ་འདི་ལྟ་བུས་ཡོན་ཏན་གྱི་ཚོགས་དེ་འདྲ་བ་ཐོབ་པ་ཞེས་སྐྱོ་བའི་ཚེ་གདུང་དེ་ལས་སྣམ་སྦྱར་ཕྲལ་སྟེ་འདི་ནི་བཅོམ་ལྡན་འདས་དེའི་ཕྱགས་བདར་ཁྲོད་པའི་སྣམ་སྦྱར་རོ་ཞེས་བསྟན་པའི་མོད་ལ་འཁོར་དེ་ཐམས་ཅད་དགྲ་བཅོམ་པ་འཐོབ་པར་གྱུར་ལ། དེའི་མཐར་གདུང་དེ་ཡང་ན་མཁའ་ལ་འཕགས་ནས་འབར་བ་དང་གསལ་བ་དང་འོད་འབྱིན་པ་དང་ཆར་དང་གློག་དང་ཡ་མ་ཟུང་ལ་སོགས་པའི་ཆོ་འཕྲུལ་དུ་མ་བསྟན་སྟེ་ཐུགས་ཀ་ནས་རང་བྱུང་བའི་མེས་འཚིག་སྟེ་རིང་སྲེལ་ལྷུང་བ་རྣམས་མཆོད་རྟེན་དུ་བྱེད་པར་གསུངས་ཤིང༌། ཤཱཀྱའི་བསྟན་པ་ལ་སྐུ་གཟུགས་བཞེང་པ་སོགས་སངས་རྒྱས་ལ་བྱ་བ་བྱས་པ་རྣམས་འདུས་པ་དང་པོར་གྲོལ། གསུང་རབ་འབྲི་ཀློག་བཞེངས་པ་སོགས་ཆོས་ལ་བྱ་བ་བྱས་པ་རྣམས་འདུས་པ་གཉིས་པར་གྲོལ། དགེ་སློང་རེ་རེ་ལ་གདུགས་ཚོད་སྟོབ་པ་ཡན་ནས་དགེ་འདུན་ལ་མཆོད་པ་བྱས་པ་དང་འདུ་བའི་སྒོ་སྦྱར་བ་རྣམས་འདུས་པ་གསུམ་པར་གྲོལ་བར་བྱམས་པ་ལུང་བསྟན་གྱི་མདོ་གསུམ་དང་དགའ་བའི་བཤེས་གཉེན་གྱི་རྟོགས་བརྗོད་ལས་བཤད་ཏོ། །ཚེ་ལོ་དྲུག་(ཀ༡༢ན)

[Full Size]

ཁྲིར་རྒྱལ་བ་སེང་གེ་སྟེ། །དེ་སོགས་དགུ་བརྒྱ་གོ་དགུ་ཚང་བར་འགྱུར། །རྒྱལ་བ་བཞི་བཅུ་གཅིག་པ་དགྲ་གཅན་ཆེ། །ས་གཞི་རིན་ཆེན་བདུན་ཡིན་ངན་སོང་མེད། །མི་རྣམས་མེ་ཏོག་པདྨར་བརྫུས་སྟེ་སྐྱེ། །སྔོན་གྱི་རྒྱལ་བ་བཞི་བཅུའི་འཕྲིན་ལས་མཛད། །སངས་རྒྱས་ཉིས་བརྒྱ་བཞི་བཅུ་རྩ་གཉིས་པ། །མེ་ཏོག་བྱིན་དང་གཞན་ཡང་ཕལ་ཆེན་བྱིན། །ཡེ་ཤེས་ཉི་མ་ཚེ་དཔག་མེད་པ་དང༌། །རིན་ཆེན་གྲགས་པ་དགེ་བ་སྨྲང་འདོན་པ། །མི་འཁྲུགས་མདོག་དང་འདམ་བརྒལ་དྲན་པའི་འོད། །དགེ་འོད་དགྲ་ལས་རྒྱལ་དང་དུས་མཁྱེན་འོད། །བཤེས་གཉེན་བཟང་པོ་སྨན་བདག་མདངས་མངའ་བ། །དགའ་སྟོབས་འཁྲུལ་མེད་བློ་དང་ལྷ་བདག་དང༌། །ནམ་མཁའི་དབྱངས་དང་ལྷ་ཡི་རྒྱལ་པོ་རྣམས། །ཐེག་པ་ཆེན་པོ་འབའ་ཞིག་སྟོན་པ་སྟེ། །ཉན་ཐོས་རང་སངས་རྒྱས་ཀྱི་མིང་ཡང་མེད། །ཁྱད་པར་སངས་རྒྱས་དྲུག་བརྒྱ་བཅུ་གཅིག་པ། །གསེར་འོད་ཚེ་ན་ཞིང་དེའི་སེམས་ཅན་ཀུན། །ཕྱིར་མི་ལྡོག་པའི་བྱང་སེམས་ཤ་སྟག་འབྱུང༌། །རྒྱལ་བ་གཞན་རྣམས་ཐེག་པ་གསུམ་གྱིས་འདུལ། །མངོན་པའི་མཛོད་ལས་ཚེ་ལོ་མར་འགྲིབ་ཀྱི། །བརྒྱད་ཁྲི་པ་ནས་བརྒྱ་པའི་བར་ལས་གཞན། །དེ་བཞིན་གཤེགས་པ་མི་འབྱུང་གསུངས་པ་ནི། །ཐེག་པ་ཆུང་ངུའི་རྣམ་གཞག་ཕྱོགས་གཅིག་སྟེ། །བརྒྱ་དང་གཅིག་པ་ཡོན་ཏན་འོད་འཕྲོ་ནི། །སྐུ་ཚེ་བྱེ་བ་ཉིས་སྟོང་ཐུབ་པ་དང༌། །ཉིས་བརྒྱ་གསུམ་པ་རྒྱལ་བ་རིན་ཆེན་ཏོག །ལོ་གྲངས་བྱེ་བ་འབུམ་དུ་ཚང་བར་བཞུགས། །ཉིས་བརྒྱ་སོ་གཅིག་ཚོགས་ཆེན་གཙོ་བོ་ནི། །སྐུ་ཚེ་ཉིན་གཅིག་བཞུགས་པ་ལ་སོགས་སྟེ། །ཡུལ་རིགས་འོད་གདུང་ཡབ་ཡུམ་སྲས་དང་ནི། །རིམ་གྲོ་བ་དང་མཆོག་ཟུང་འདུས་པའི་ཚད། །སྐུ་ཚེ་བསྟན་པའི་གནས་ཚད་སྐུ་གདུང་དང། །མཆོད་རྟེན་ཐུགས་བསྐྱེད་ཚུལ་རྣམས་ཐ་དད་པར། །བསྐལ་པ་བཟང་པོའི་མདོ་ལས་རྒྱས་པར་གསུངས། །མ་ཐོག་རིང་མོར་སངས་རྒྱས་མོས་པ་སྟེ། །དེ་ཡན་སངས་རྒྱས་ཀུན་(ཀ༡༢བ)

[Full Size]

གྱི་འཕྲིན་ལས་མཛད། །རྒྱལ་བ་དགུ་བརྒྱ་གོ་དགུ་པོ་ཀུན་གྱི། །འཁོར་དང་སྐུ་ཚེ་བསྟན་པའི་གནས་ཚད་རྣམས། །གཅིག་དུ་བསྡོམས་པ་རྒྱལ་བ་སྣང་མཛད་འདིའི། །འཁོར་དང་སྐུ་ཚེ་བསྟན་པའི་ཚད་དུ་འགྱུར། །ཞིང་འདིའི་འགྲོ་ཀུན་ཐེག་གསུམ་སོ་སོ་ལས། །ཕྱིར་མི་ལྡོག་ཐུལ་གནས་བསྐལ་རྫོགས་པ་ཡིན། །མནར་མེད་དམྱལ་བར་སེམས་ཅན་མ་ལུས་པ། །དེ་ཚེ་འཇིག་པའི་བསྐལ་པའི་ཐོག་མ་སྟེ། །ཆགས་བསྐལ་གནས་བསྐལ་འཇིག་བསྐལ་སྟོངས་བསྐལ་བཞི། །ཡུན་ནི་བར་བསྐལ་ཉི་ཤུ་རེ་རེར་མཚུངས། །དེ་ལྟར་བར་བསྐལ་བརྒྱད་བཅུ་བསྡོམས་པ་ལ། །བསྐལ་པ་ཆེན་པོ་གཅིག་དུ་བརྗོད་པ་ཡིན། །འཇིག་བསྐལ་ཚུལ་ཡང་ཅུང་ཟད་བཤད་བྱས་ན། །ངན་སོང་གསུམ་དུ་སེམས་ཅན་མ་ལུས་ཚེ། །མི་ཞིག་གིས་ནི་ཆོས་ཉིད་ཀྱིས་ཐོབ་པའི། །བསམ་གཏན་དང་པོའི་ཏིང་འཛིན་འགྲུབ་གྱུར་སྟེ། །དེ་ལས་ལངས་ནས་ཀྱེ་མ་དབེན་པ་ལས། །བྱུང་བའི་དགའ་བདེ་འདི་ནི་དམ་པ་ཞེས། །ཆེད་དུ་བརྗོད་པས་སྒྲ་དེ་མོད་ཁོ་ནར། །སོ་སོའི་གླིང་གི་མི་རྣམས་ཀུན་གྱིས་ཐོས། །ཀུན་ཀྱང་བསམ་གཏན་དང་པོའི་དངོས་གཞི་ཐོབ། །ཤི་འཕོས་གཟུགས་ཀྱི་ཁམས་ཀྱི་ཚངས་རིས་དང༌། །ཚངས་པའི་མདུན་འདོན་ཚངས་ཆེན་གསུམ་དུ་སྐྱེས། །དེ་བཞིན་འདོད་པའི་ལྷ་རིས་དྲུག་ག་ཡང༌། །ཁམས་གོང་འཕོས་སྟེ་འདོད་ཁམས་མ་ལུས་སྟོངས། །བསམ་གཏན་དང་པོའི་ལྷ་རིས་གསུམ་ག་ཡང༌། །རྟོག་དཔྱོད་སྤངས་པའི་བསམ་གཏན་གཉིས་པ་ཐོབ། །ཤི་འཕོས་འོད་ཆུང་ལ་སོགས་གནས་གསུམ་དུ། །སྐྱེས་སྟེ་ཚངས་ཆེན་མན་ཆད་སྟོངས་པར་འགྱུར། །དེ་ཚེ་ཉི་མའི་གཞལ་མེད་ཁང་སྟོང་པ། །གཉིས་པ་ཤར་བས་ཆུ་མིག་ལྟེང་ཀ་སྐེམ། །གསུམ་པས་ཆུ་ཕྲན་མ་ལུས་སྐེམ་པར་བྱེད། །བཞི་པས་ཆུ་བོ་ཆེ་རྣམས་སྐེམ་པར་འགྱུར། །ལྔ་པས་རྒྱ་མཚོ་ཆེན་པོ་དཔག་ཚད་སོགས། །རིམ་པས་སྐེམ་ཞིང་མི་འགྲེང་བདུན་ནས་ནི། །མི་འགྲེང་གང་དང་བ་ལང་རྨིག་རྗེས་ཙམ། །(ཀ༡༣ན)

[Full Size]

ཐ་མར་ཟིལ་པ་ཙམ་ཡང་མེད་པར་སྐེམ། །དྲུག་པ་ཤར་བས་ས་ཀུན་དུ་བར་འཐུལ། །བདུན་པས་རི་རབ་ཁོར་ཡུག་བཅས་པའི་བར། །གཅིག་དུ་འབར་སྟེ་ཚངས་པའི་འཇིག་རྟེན་མན། །མེ་ལྕེ་གཅིག་དུ་གྱུར་པས་སྲེག་པར་བྱེད། །མེ་དེ་རང་ཞི་ཐལ་བའང་མ་ལུས་པ། །དེ་ཚེ་འཇིག་པའི་བསྐལ་པའི་མཐར་ཐུག་ཅེས། །ཉི་མ་བདུན་ལུང་བསྟན་པའི་མདོ་དྲངས་ནས། །འཇིག་རྟེན་བཞག་པར་མཽངྒལ་བུ་ཡིས་བཤད། །སྟོངས་བསྐལ་བར་བསྐལ་ཉི་ཤུ་འདས་པ་ནས། །སླར་ཡང་ཆགས་པའི་བསྐལ་པ་སྔོན་བཞིན་འབྱུང༌། །འོན་ཀྱང་སྒྲོན་མེའི་བསྐལ་པ་ཅེས་བྱ་བ། །སངས་རྒྱས་འབྱུང་བསྐལ་ཨུ་དུམ་ཝ་ར་ཡི། །མེ་ཏོག་ལྟ་བུར་བརྒྱ་ལ་སྲིད་པ་ཙམ། །ཕལ་ཆེར་དཀོན་མཆོག་གསུམ་གྱི་སྒྲོན་མེ་ཡིས། །དབེན་པ་མུན་པའི་བསྐལ་པ་ཤ་སྟག་ཡིན། །མེ་ཡིས་འཇིག་པ་ལན་བདུན་ཚང་བའི་ཚེ། །བསམ་གཏན་གཉིས་པ་མན་ཆད་ཆུས་གཅིག་འཇིག །རིམ་པ་འདི་ཡིས་ཆུ་ཡིས་འཇིག་ཐེབས་བདུན། །ཚང་ཚེ་བསམ་གཏན་གསུམ་པའི་དགེ་རྒྱས་མན། །རླུང་ཆེན་རབ་ཏུ་གཡོ་བས་འཇིག་པ་ཉིད། །ཡང་ནི་མེ་ཡིས་འཇིག་སོགས་སྔར་བཞིན་སྟེ། །མེད་བཞིན་སྣང་བའི་རྟེན་འབྲེལ་རྒྱུན་མི་ཆད། །འདུ་བྱེད་རླུང་ལྡང་དགའ་བདེ་ཆུ་ལྟར་གཡོ། །རྟོག་དཔྱོད་མེ་འདྲ་ནང་གི་བསམ་གཏན་སྐྱོན། །རྟེན་འབྲེལ་མཐུ་ལས་ཕྱི་རོལ་འཇིག་པར་སྣང༌། །བསམ་གཏན་བཞི་པ་སྣོད་བཅུད་ལྷན་ཅིག་དུ། །སྐྱེ་འཇིག་སྣང་གི་འབྱུང་བའི་མཐུར་མི་ལྟོས། །དེ་དག་ཀྱང་བསྐལ་པ་བཟང་པོ་འདིའི་རྣམ་གཞག་དུ་ཟད་དེ་གཞན་དུ་ན་ཕལ་ཆེན་ལས་འཇིག་རྟེན་གྱི་ཁམས་མི་འབྱེད་འདིའི་བསྐལ་པ་གང་ཡིན་པ་དེ་ནི་བདེ་བ་ཡོད་པའི་ཞིང་ཁམས་ཀྱི་ཉིན་ཞག་གཅིག་གོ །བདེ་བ་ཡོད་པའི་ཞིང་ཁམས་ཀྱི་བསྐལ་པ་དེ་ནི་དེ་བཞིན་གཤེགས་པ་རྡོ་རྗེ་རབ་འཇོམས་ཀྱི་ཞིང་དུར་མིག་གིས་མཚན་པའི་ཉིན་ཞག་གཅིག་གོ །དེ་བཞིན་དུ་སྔ་མའི་བསྐལ་པ་ཕྱི་མའི་ཉིན་ཞག་དུ་བསྒྲེས་སྟེ་ཤིན་དུ་སྐུའི་པདྨ་རྒྱས་པའི་ཞིང་ཕྱིར་མི་ལྡོག་པའི་འཁོར་ལོ་རབ་ཏུ་སྒྲོག་པ་དང༌། ཆོས་རྒྱལ་མཚན་གྱི་ཞིང་རྡུལ་མེད་དང༌། སེང་གེའི་ཞིང་སྒྲོན་མ་བཟང་དང༌། རྣམ་སྣང་སྙིང་པོའི་ཞིང་འོད་བཟང་དང༌། ཆོས་འོད་སྐུའི་པདྨ་རྒྱས་པའི་ཞིང་འདའ་བར་དཀའ་བ་དང༌། མངོན་མཁྱེན་ཀུན་འོད་རྒྱན་ལྡན་གྱི་ཞིང་ཐུགས་ཟླའི་མེ་ལོང་དཀྱིལ་འཁོར་མདོག་ནས་གྲངས་མེད་ས་ཡ་གཅིག་བགྲངས་པའི་ཐ་མའི་བསྐལ་པ་ནི་རྒྱལ་བ་དཔལ་བཟང་གི་ཞིང་པདྨའི་དཔལ་གྱི་ཉིན་ཞག་དུ་བཤད་པས་མདོར་ན་ཚད་ཀྱིས་གཞལ་བར་བྱ་བ་མིན་ནོ། །བསྐལ་པ་བཟང་པོ་འདི་ཡི་འོག་རོལ་དུ། །མུན་བསྐལ་ཆེན་པོ་དྲུག་བཅུ་འདས་པའི་རྗེས། །སྒྲོན་བསྐལ་སྙན་པ་ཆེན་པོ་ཞེས་བྱ་བ། །དེ་ལ་སངས་རྒྱས་ཁྲི་ཕྲག་གཅིག་(ཀ༡༣བ)

[Full Size]

འབྱུང་ངོ། །དེ་ནས་མུན་བསྐལ་ཆེན་པོ་ཁྲི་འདས་ནས། །སྐར་མ་བཀྲམ་པ་ཞེས་བྱའི་སྒྲོན་བསྐལ་ལ། །རྫོགས་པའི་སངས་རྒྱས་བརྒྱད་ཁྲི་ཚང་བར་འབྱུང༌། །ཡང་ནི་མུན་བསྐལ་སུམ་བརྒྱ་འདས་པའི་འོག །སྒྲོན་མེའི་བསྐལ་ཆེན་ཡོན་ཏན་བཀོད་པ་ལ། །རྒྱལ་བ་བརྒྱད་ཁྲི་དང་ནི་བཞི་སྟོང་འབྱུང༌། །དེ་ཙམ་མདོ་ལས་རྒྱལ་བས་ལུང་དུ་བསྟན། །དེ་བཞིན་ན་མཁའ་ཇི་སྲིད་གནས་ཀྱི་བར། །བསྐལ་པའི་ཕྱི་མཐའ་ཐུག་པ་ཡོད་མ་ཡིན། །འདི་ནི་འཇིག་རྟེན་ཁམས་འདིའི་རྣམ་གཞག་སྟེ། །དེ་བཞིན་ཕྱོགས་བཅུའི་ན་མཁས་གར་ཁྱབ་པར། །དག་དང་མ་དག་ཞིང་ཁམས་རྒྱ་མཚོ་རྣམས། །ཁ་ཅིག་སྟོངས་ཤིང་ལ་ལ་འཇིག་དང་ཆགས། །གཞན་དག་གནས་སོགས་རྒྱ་མཚོའི་ལྦུ་བ་ལྟར། །གོ་མཚམས་མེད་ཅིང་རྒྱུན་མི་ཆད་པར་སྣང༌། །ཞིང་ཁམས་མཐའ་དག་མཐོང་བའི་མིག་དག་པ། །འཕགས་མཆོག་རྣམས་ཀྱི་གཟིགས་ཡུལ་ལྟད་མོར་ཆེ། །ངེས་པའི་དོན་དུ་ཞིང་འདི་འཇིག་པ་མེད། །རྒྱལ་བས་བསྟེན་པའི་རྩ་ཡི་སྟན་ཙམ་ཡང༌། །ཁམས་གསུམ་འབྱུང་བ་ཀུན་གྱིས་གཞིག་མི་ནུས། །རྡོ་རྗེའི་གདན་དང་བྱ་རྒོད་ཕུང་རི་སོགས། །སྔོན་གྱི་རྒྱལ་བ་བགྲང་ཡས་རྒྱ་མཚོའི་ཡང༌། །རྫོགས་སངས་རྒྱས་པའི་གནས་དང་ཤེས་ཕྱིན་གྱི། །ཆོས་ཀྱི་འཁོར་ལོ་བསྐོར་གནས་ཡིན་ཞེས་གསུངས། །མེ་ཡིས་འཇིག་པར་སྣང་ཚེའང་ཞིང་འདི་ནི། །ཅུང་ཟད་མ་ཉམས་རྒྱལ་སྲས་རྣམས་ཀྱིས་གང༌། །འོན་ཀྱང་འཇིག་རྟེན་བྱེད་པོར་རློམ་པ་ཡི། །ཚངས་སོགས་དྲེགས་དང་ང་རྒྱལ་གཞོམ་པ་དང༌། །སྐྱོ་བ་བསྐྱེད་ཅིང་རྟག་འཛིན་ལྡོག་པའི་ཆེད། །མེ་ཆུ་རླུང་གིས་འཇིག་པའི་བསྐལ་པ་སྟོན། །དེ་ཚེ་ཞིང་དེ་སྟོངས་པར་གྱུར་པ་ཡིས། །སེམས་ཅན་གཅིག་གི་སྲོག་ལའང་མི་གནོད་པ། །འདི་ནི་རྒྱལ་བའི་འཕྲིན་ལས་མཆོག་ཅེས་གསུངས། །ལེགས་པར་བཤད་པ་མཁས་པའི་དགའ་སྟོན་ལས། །འཇིག་རྟེན་གྱི་ཁམས་སྤྱིར་བསྟན་པའི་ཡན་ལག་སྟེ་དང་པོའོ།། །།

[Full Size]

༈ ད་ནི་སྟོན་པའི་མཛད་པ་བརྗོད་པར་བྱ། །བདག་ཅག་རྣམས་ཀྱི་སྟོན་པ་ཐུབ་པའི་མཆོག །འདིས་ནི་བླ་མེད་བྱང་ཆུབ་ཐུགས་བསྐྱེད་དེ། །རྒྱལ་སྲས་གཞན་ལས་ཆེས་ཆེར་རྨད་བྱུང་བའི། །བྱམས་བརྩེ་སྤྲོ་དང་རྩོམ་པ་རྒྱ་ཆེན་པོས། །བྱང་ཆུབ་ལམ་བཟང་བདེ་བླག་གིས་བགྲོད་ནས། །མཐའ་ཡས་བསྐལ་མང་སྔོན་ནས་སངས་རྒྱས་ཀྱང༌། །སྔོན་གྱི་སྨོན་ལམ་ཆེན་པོ་ལྔ་བརྒྱའི་མཐུས། །འཛམ་གླིང་སྐྱེ་རྒུ་ཚེ་ལོ་བརྒྱ་པའི་ཚེ། །རྙིགས་མ་ལྔ་ལྡན་ལྷག་པར་གདུལ་དཀའ་བའི། །འགྲོ་རྣམས་གདུལ་ཕྱིར་དགའ་ལྡན་ལྷ་གནས་ན། །ལྷ་ཡི་སྟོན་པ་དམ་པ་ཏོག་དཀར་ཞེས། །སངས་རྒྱས་འོད་སྲུང་གི་ནི་རྒྱལ་ཚབ་ཏུ། །བཞུགས་པ་ལས་བབ་འཛམ་གླིང་གཤེགས་པར་དགོངས། །ད་ལྟ་འཛམ་གླིང་རྙིགས་མ་ལྔ་བདོ་སྟེ། །རྟོག་གེ་པ་དྲུག་རྗེས་སུ་སྒྲོགས་པ་དྲུག །སྙོམས་པར་འཇུག་པ་དྲུག་སྟེ་མུ་སྟེགས་ཀྱི། །སྟོན་པ་བཅོ་བརྒྱད་ཀྱིས་ནི་མ་རུང་བྱས། །གཤེགས་པའི་དུས་མིན་བཞུགས་པར་གསོལ་འདེབས་ཞེས། །ལྷ་རྣམས་ཀུན་གྱིས་གསོལ་བ་བཏབ་པའི་ཚེ། །རོལ་མོ་ཐམས་ཅད་དུས་གཅིག་དཀྲོལ་ཅིག་གསུངས། །བྱང་ཆུབ་སེམས་དཔའས་དུང་དཀར་བླངས་སྟེ་བུས། །རོལ་མོའི་སྒྲ་ཡི་ནང་ན་མཆོག་ཅི་དྲིས། །ཀུན་ཀྱང་དུང་གི་སྒྲ་ཡིས་ཟིལ་མནན་གསོལ། །དེ་བཞིན་བདུད་དང་མུ་སྟེགས་མ་ལུས་པ། །ང་ཡིས་ཟིལ་མནན་འགྲོ་ཀུན་དྲང་ངོ་གསུངས། །ཚེ་ལོ་བརྒྱ་པའི་དུས་དང་གོ་ཏམ་གདུང༌། །སེར་སྐྱའི་གྲོང་མཆོག་དག་པའི་ཡབ་ཡུམ་སྟེ། །གཟིགས་པ་ལྔ་ལ་རྣམ་པར་གཟིགས་ནས་ནི། །གླང་ཆེན་ཐལ་ཀར་གསེར་གྱི་དྲ་བ་ཡིས། །གཡོགས་པའི་རྣམ་པས་གྲོང་ཁྱེར་སེར་སྐྱ་རུ། །ཟས་གཙང་བཙུན་མོ་སྒྱུ་འཕྲུལ་ཆེན་མོ་ཞེས། །ལྷས་བསྟན་རྒྱལ་པོ་ལེགས་པར་རབ་སད་སྲས། །དུས་གསུམ་རྒྱལ་བ་མཐའ་ཡས་མང་པོ་ཡི། །ཡུམ་དུ་སྨོན་པ་གྲུབ་པའི་འཕགས་མ་དེ། །གསོ་སྦྱོང་དག་པར་སྤྱོད་པའི་ལྷུམས་སུ་ཞུགས། །དེར་ཡང་མངལ་གྱི་དྲི་མས་མ་གོས་པར། །ཙན་དན་སྦྲུལ་གྱི་སྙིང་པོའི་ཁང་བཟང་ནང༌། །(ཁ༡༤བ)

[Full Size]

བཞུགས་ནས་ཕྱོགས་བཅུའི་བྱང་སེམས་མཐའ་ཡས་བཏུལ། །ཆོས་ཀྱི་རྣམ་གྲངས་རྒྱ་མཚོ་དུ་མ་བསྟན། །འཛམ་གླིང་ཀུན་དུ་སངས་རྒྱས་འབྱུང་བའི་ལྟས། །ཡ་མཚན་དཔག་མེད་མཐའ་ཡས་སྣང་བར་གྱུར། །གླིང་གི་དབུས་སུ་བྱང་ཆུབ་ལྗོན་ཤིང་སྐྱེས། །སེར་སྐྱའི་གྲོང་ཀུན་རིན་ཆེན་ལས་བྱས་གྱུར། །གངས་རིའི་ངོས་ནས་སེང་གེའི་ཕྲུ་གུ་དག །འོངས་ནས་སྲང་ན་གནོད་པ་མེད་པར་རྩེ། །ལུམྦིའི་ཚལ་ཀུན་རིན་ཆེན་ལྗོན་པས་ཁྱབ། །དེ་ཚེ་ཟླ་དགུ་ངོ་བཅུ་ཚང་བའི་ཚེ། །ལྷུམས་སུ་ཟླ་བ་བཅུར་ཞག་བདུན་གྱིས་མ་ཆོག་པ་བཞུགས་པ་ལ། མདོར་ཟླ་བ་བཅུ་ཚང་བའི་ཐ་སྙད་གྱིས་བརྗོད་ཅིང་འདིར་ཟླ་དགུ་ངོ་བཅུར་བརྗོད་པ་ཡིན་ནོ། །ངོ་མཚར་ལྟས་ཆེན་སོ་གཉིས་བྱུང་བ་ལས། །རྩ་གསུམ་ལྷ་ཡི་འབྱོར་པ་ལྟ་བུ་ཡིས། །ཡུམ་གྱིས་ལུམྦིའི་ཚལ་གྱི་སྐྱེད་ཚལ་བྱོན། །རྒྱུ་སྐར་རྒྱལ་དང་ལྡན་ཚེ་ཡུམ་གྱི་ཕྱག །པ་ལ་ཀྵ་ཡི་ལྗོན་པ་ལ་འཇུས་སྟེ། །བྱ་རྨྱང་མཛད་པའི་རྩིབ་ལོགས་གཡས་པ་ནས། །ཡུམ་ལ་གནོད་པ་མེད་ཅིང་ནག་ནོག་གིས། །མ་གོས་གསེར་གོང་ཕྱིས་པ་ལྟ་བུ་རུ། །བལྟམས་ཚེ་ལྷ་ཡི་དབང་པོ་བརྒྱ་བྱིན་གྱིས། །བྲན་མོ་རྒན་མོའི་རྣམ་པས་བླངས་པའི་ཚེ། །ཐེག་པར་མ་གྱུར་སྟོབས་ཀྱི་ང་རྒྱལ་བཅོམ། །ཀླུ་དབང་རྣམས་ཀྱིས་བདུད་རྩིས་སྐུ་ཁྲུས་གསོལ། །ཕྱོགས་ཀུན་གོམ་པ་བདུན་བདུན་བོར་བ་ལས། །གསེར་གྱི་པདྨ་འདབ་སྟོང་པ་རེ་བྱུང༌། །སྐྱེ་རྒ་ན་འཆི་ཀུན་ལས་འདའ་བྱེད་ཅིང༌། །འགྲོ་བའི་ཁ་ལོ་གྱེན་དུ་བསྒྱུར་རོ་གསུངས། །བསིལ་བའི་འོད་ཀྱིས་འཇིག་རྟེན་སྣང་བར་བྱས། །ངོ་མཚར་ལྟས་ཆེན་བཅོ་བརྒྱད་བྱུང་བའི་ཚེ། །ཡབ་ཀྱིས་ཕྱག་དང་བསྟོད་པ་དང་པོ་མཛད། །ཚངས་པས་བདུད་རྩིའི་ཟིལ་མངར་བླངས་སྟེ་ཕུལ། །ཞག་བདུན་ལོན་ཚེ་ཡུམ་གྱི་སྤྲུལ་པ་བསྡུས། །ཡུམ་གྱིས་སྐྱེད་པའི་བྱ་བ་རྫོགས་ཟིན་ཞིང༌། །སྐྱེ་བོ་ཕལ་པའི་སྐྱེད་མར་མི་རིགས་ལ། །ཁྱིམ་ནས་བྱུང་བ་ཡུམ་གྱིས་མི་བཟོད་པ། །སྤང་དང་ཡུམ་གྱི་ཕྱག་ཀྱང་མི་བཞེད་ཕྱིར། །འཁྲུངས་ནས་ཞག་བདུན་ཡུམ་གྱི་ཚེ་ལུས་པའི། །ཚེ་ན་ལྷུམས་སུ་འཇུག་པར་མཛད་པའི་ཕྱིར། །འདི་ཡང་རྒྱལ་བ་ཕལ་གྱི་ཐུན་མོང་ཡིན། །སྐྱེ་རྒུའི་(ཁ༡༥ན)

[Full Size]

བདག་མོ་ཆེན་མོ་སྒྱུ་འཕྲུལ་སོགས། །མ་མ་སུམ་བཅུ་གཉིས་ཀྱིས་ཞམ་རིང་བྱེད། །གཞན་ཡང་ཤཱཀྱའི་ཁྱེ་འུ་ལྔ་བརྒྱ་དང༌། །གྲགས་འཛིན་མ་སོགས་བུ་མོ་བརྒྱད་ཁྲི་དང༌། །བྲན་ཕོ་བྲན་མོ་ལྔ་བརྒྱ་ཕྲག་རེ་དང༌། །གླང་ཆེན་རྟ་དང་མ་ཧེ་བ་གླང་སོགས། །ལྔ་བརྒྱ་ཕྲག་རེ་དུས་གཅིག་ཉིད་དུ་བཙས། །རིན་ཆེན་གཏེར་ཀུན་ས་ལས་རང་བྱུང་གྱུར། །ཕྱོགས་བཞིར་མཉན་ཡོད་རྒྱལ་པོ་ཚངས་བྱིན་བུ། །གསལ་རྒྱལ་དང་ནི་གྲོང་ཁྱེར་རྒྱལ་པོའི་ཁབ། །པད་སྙིང་སྲས་པོ་གཟུགས་ཅན་སྙིང་པོ་དང༌། །ཀཽ་ཤམྦིར་ནི་དམག་བརྒྱའི་བུ་ཤར་པ། །འཕགས་རྒྱལ་དུ་ནི་མུ་ཁྱུད་མཐའ་ཡས་བུ། །རབ་སྣང་ཞེས་བྱ་རྒྱལ་ཕྲན་བཞི་ཡང་བཙས། །དང་པོར་དོན་ཀུན་གྲུབ་པར་མཚན་གསོལ་ཏོ། །ཤཱཀྱ་དྲེགས་ལྡན་རྣམས་ཀྱང་དུལ་གྱུར་ནས། །ཐུབ་ལྟར་གནས་ཕྱིར་ཤཱཀྱ་ཐུབ་པ་དང༌། །གནོད་སྦྱིན་ཤཱཀྱ་འཕེལ་སོགས་ཀྱིས་བཏུད་པས། །ལྷ་ཡི་ལྷ་སྟེ་མཚན་གསུམ་རིམ་པར་བཏགས། །ཁྱིམ་དུ་གནས་ན་གླིང་བཞིའི་འཁོར་སྒྱུར་དང༌། །རབ་ཏུ་བྱུང་ན་རྫོགས་འཚང་རྒྱ་འོ་ཞེས། །མཚན་མཁན་རྣམས་ཀྱིས་མགྲིན་གཅིག་ལུང་སྟོན་གྱུར། །དྲང་སྲོང་ཉོན་མོངས་མེད་ཀྱིས་ཕྱག་བྱས་སྟེ། །ངེས་པར་རྫོགས་འཚང་རྒྱ་བར་ལུང་བསྟན་ནས། །རང་གི་སྣག་ཚ་བྲམ་ཟེ་མེས་བྱིན་ལ། །དགུང་ལོ་སོ་ལྔ་ལོན་ནས་འཚང་རྒྱ་ཡིས། །དེ་ཚེ་སློབ་མར་བྱོས་ཞེས་བསྟན་ནས་འདས། །རོ་བརྒྱ་ལྡན་པའི་འབྲས་ཆན་མང་བཞེས་ཚེ། །མཛུབ་མོ་གཅིག་གིས་གསེར་གཞོང་བཟུང་བ་ནི། །གླང་ཆེན་ལྔ་བརྒྱས་དབྲོག་པར་མ་ནུས་ཕྱིར། །གླང་ཆེན་སྟོང་གི་སྟོབས་ཅན་ཞེས་མཚན་བཏགས། །བྱིས་པའི་སློབ་དཔོན་ཀུན་གྱི་བཤེས་གཉེན་ལས། །ཡི་གེ་སློབ་པའི་གྲྭར་བྱོན་ཡི་གེའི་རིགས། །དྲུག་བཅུ་རྩ་བཞི་སློབ་དཔོན་ལ་བསྟན་པས། །ཡ་མཚན་གྱུར་སྟེ་བསྟོད་ཕྱག་བྱས་པར་གྱུར། །སངས་རྒྱས་སམ་ནི་འཁོར་ལོས་སྒྱུར་བྱུང་ཚེ། །ཡི་གེ་འདི་འབྱུང་གཞན་(ཁ༡༥བ)

[Full Size]

དུ་མི་འབྱུང་ཞེས། །བྲིས་སྟེ་བསྟན་པས་མཁའ་ལས་ཚངས་པ་ཡིས། །མཐུན་གྱུར་བརྗོད་ཕྱིར་ཚངས་པའི་ཡི་གེར་གྲགས། །རྩིས་ཀྱི་ཕ་མཐར་སོན་པ་སྲིད་སྒྲུབ་ཀྱིས། །མི་འཁྲུགས་པ་ལས་གོང་དུ་བགྲང་མ་ནུས། །གཞོན་ནུས་སྙིང་པོ་མཆོག་གི་བར་དུ་བརྩིས། །ཛམ་བུའི་ཤིང་གྲིབ་ཏིང་འཛིན་མཛད་པ་ན། །ཕྱི་དྲོར་གྱུར་ཀྱང་གྲིབ་མས་སྐུ་མ་བཏང༌། །འདི་ཚེ་ཡབ་ཀྱིས་བསྟོད་ཕྱག་གཉིས་པ་མཛད། །དྲང་སྲོང་ལྔ་ཡིས་མཁའ་ལ་འགྲོ་མ་ནུས། །ཞབས་ལ་གཏུགས་ཤིང་བསྟོད་ནས་སོང་བར་གྱུར། །དེ་ནས་བུད་མེད་རྣམས་ཀྱི་དོན་མཛད་ཕྱིར། །གྲགས་འཛིན་མ་ལ་རྒྱལ་བའི་རུ་མཚོན་བྱས། །ལྷས་བྱིན་མཛེས་དགའ་ལག་ན་བེ་ཅོན་ཅན། །ལ་སོགས་ཚན་པོ་ཆེ་དང་སྲེད་མེད་བུའི། །སྟོབས་ལྡན་ཤཱཀྱའི་ཁྱེ་འུ་ལྔ་བརྒྱ་དང༌། །འཕོང་དང་འདེགས་དང་གཅོད་པ་ལ་སོགས་པ། །སྒྱུ་རྩལ་འགྲན་པས་དེ་དག་ཐམས་ཅད་ཀྱི། །དྲེགས་པ་ཚར་བཅད་འཇིག་རྟེན་ཟིལ་གྱིས་མནན། །ལག་ན་བེ་ཅོན་བུ་མོ་གྲགས་འཛིན་མ། །དྲིལ་བུ་སྒྲ་ཡི་བུ་མོ་ས་འཚོ་མ། །ཤཱཀྱ་དུས་ལེགས་བུ་མོ་རི་དྭགས་སྐྱེས། །ལ་སོགས་བཙུན་མོ་དྲུག་ཁྲི་ཁབ་ཏུ་བཞེས། །འཇིག་རྟེན་མཐུན་པར་འཇུག་པའི་སྤྱོད་པ་ཡིས། །སྐྱེ་བོ་མགུ་བར་མཛད་ནས་སྲིད་པ་ལས། །ངེས་པར་འབྱུང་བ་ཆེན་པོ་བསྟན་པའི་སླད། །སེར་སྐྱའི་སྒོ་བཞིར་རྒ་ནད་ཤི་བ་དང༌། །སྤྲུལ་པའི་དགེ་སློང་གཟིགས་པའི་རྐྱེན་དང་ནི། །བཙུན་མོས་སྦྱར་བའི་རོལ་མོའི་སྒྲ་དབྱངས་ལས། །ཚིགས་སུ་བཅད་པ་དུ་མས་བསྐུལ་བ་ཡིས། །ཁྱིམ་ལས་ངེས་པར་འབྱུང་བ་ཉིད་དུ་དགོངས། །མ་ནིང་ཡིན་ཞེས་སྐུར་པ་སྤང་བའི་ཕྱིར། །བུད་མེད་འགྲོགས་པའི་ཐ་མ་འདི་ཡིན་ཞེས། །གྲགས་འཛིན་མ་ལ་སྲས་ཀྱི་ས་བོན་བཞག །རྒྱལ་པོས་ར་བ་ལྕགས་རི་སྒོ་འཕར་དང༌། །དམག་དཔུང་མང་པོས་བསྐོར་སྟེ་སྲུང་ལ་བརྩོན། །མཚན་མོ་ཡབ་གཅིག་མནལ་གྱིས་ནོན་པ་ལ། །གསོལ་བ་བཏབ་པས་(ཁ༡༦ན)

[Full Size]

མནལ་གྱིས་མྱོས་པ་དང༌། །ནམ་ཡང་བླ་མའི་གནས་རྣམས་ཀུན་གྱི་ངག །མ་བཅག་བདེན་པའི་ཚིག་གི་མཐར་ཕྱིན་པ། །དེ་ཡི་ངག་ཚིག་སུས་ཀྱང་མི་ཟློག་ཕྱིར། །ཁྱོད་ཀྱི་བསམ་པ་རྫོགས་པར་གྱུར་ཅིག་ཅེས། །གནང་བ་བྱིན་སྟེ་རྒྱུ་སྐར་རྒྱལ་ཤར་བ། །མཚན་ཕྱེད་ཚེ་ན་བསྔགས་ལྡན་ལ་བཅིབས་སྟེ། །རྒྱལ་ཆེན་བཞི་ཡིས་ཆིབས་ཀྱི་རྐང་ལག་བཏེག །ཚངས་དང་བརྒྱ་བྱིན་འོད་ཀྱིས་ལམ་སྣ་བྱས། །གནས་གཙང་ལྷས་བསྐོར་སྟེང་གི་མཁའ་ལ་བྱོན། །ཤཱཀྱ་ཁྱེ་འུ་གྱང་ཡུལ་ལས་འདས་པ། །བྱང་ཕྱོགས་ཀཱ་མ་རཱུ་པའི་ཡུལ་དུ་བབ། །ཉིད་ཀྱིས་ཉིད་ཀྱི་གཙུག་ཕུད་དོར་བ་ཡིས། །རྣམ་དག་ཅེས་བྱ་གཙུག་ཕུད་མཆོག་རྟེན་བྱུང༌། །འདས་པའི་སངས་རྒྱས་གསུམ་གྱི་གཙུག་ཕུད་ཀྱི། །མཆོད་རྟེན་ཀྱང་ནི་ཕྱོགས་འདིར་ལྷན་ཅིག་གནས། །མ་བྱོན་རྣམས་ཀྱང་གཙུག་ཕུད་འདི་རུ་འདོར། །རྔོན་པར་སྤྲུལ་པའི་ལྷ་ཡིས་ངུར་སྨྲིག་ཕུལ། །བླངས་སར་འདུན་པས་ངུར་སྨྲིག་མཆོད་རྟེན་བརྩེགས། །གཙུག་ཕུད་དུས་སྟོན་གོས་ཀྱི་དུས་སྟོན་ཞེས། །ལྷ་ཡུལ་ན་ཡང་དུས་སྟོན་རེ་རེ་ཡོད། །རྟ་དང་རྒྱན་བསྐུར་འདུན་པ་སླར་ལོག་སར། །འདུན་པ་སླར་ལོག་པ་ཡི་མཆོད་རྟེན་བྱས། །འདུན་པས་སེར་སྐྱར་རྒྱལ་འབངས་མྱ་ངན་བསལ། །བཙུན་མོ་རྣམས་ཀྱིས་བསྔགས་ལྡན་མགུལ་ནས་འཇུས། །རྟ་མཆོག་ཁྱོད་ཀྱིས་མི་མཆོག་གར་བསྐྱལ་ཞེས། །ངུས་པས་བསྔགས་ལྡན་ཅང་ཤེས་མྱ་ངན་སྐྱེས། །ཟས་བཅད་དབུགས་ཀྱིས་བརྣངས་སྟེ་གུམ་པ་ལས། །ཁྱིམ་བདག་བུར་སྐྱེས་ཕྱིས་ནས་དགྲ་བཅོམ་བཀོད། །རྒྱན་རྣམས་གཞོན་ནུ་གཞན་ལ་གཡོགས་པ་ན། །ལྷ་ཕྲན་གཞན་གྱིས་བརྒྱ་བྱིན་རྒྱན་ཐོགས་ལྟར། །སུས་ཀྱང་མ་ཐེག་སྐྱེ་རྒུའི་བདག་མོ་ཡིས། །རྒྱན་ཆ་མཐོང་བའི་མྱ་ངན་སྤང་བའི་ཕྱིར། །རྫིང་དུ་དོར་བས་རྒྱན་གྱི་རྫིང་བུ་བྱུང༌། །དེ་ནས་བྱང་ཆུབ་སེམས་དཔའ་རང་བྱུང་གིས། །བསྙེན་པར་རྫོགས་སྟེ་ཆུ་བོ་(ཁ༡༦བ)

[Full Size]

དབྱིག་ལྡན་སོགས། །བརྒལ་ནས་ཡུལ་དབུས་མ་ག་དྷ་རུ་ཆས། །དྲང་སྲོང་ངན་སྤོང་བུ་ཡི་བསྟི་གནས་བྱོན། །ཁོ་བོའི་བསོད་ནམས་མཐུ་ཡིས་སྔོན་གྱི་ཚེ། །ལྗོན་ཚོགས་འདི་ཀུན་ཛམ་བུའི་གསེར་ལས་གྲུབ། །ལོ་འདབ་མེ་ཏོག་འབྲས་བུ་རྟག་རྒྱས་ཀྱང༌། །ད་ནི་ཕལ་བའི་ཤིང་གྱུར་བརྙིང་བསྐམས་པས། །ཁོ་བོ་འཆི་བར་ངེས་ཅེས་བྲམ་ཟེ་དེ། །མྱ་ངན་བྱེད་པ་གཟིགས་ནས་སླར་གསུངས་པ། །དེ་ནི་ཁྱོད་ཀྱི་མཐུ་མིན་གངས་རི་དང༌། །ཉེ་སར་ཤཱཀྱའི་གཞོན་ནུ་ཞིག་བྱུང་བ། །ཁྱིམ་དུ་གནས་ན་འཁོར་ལོས་སྒྱུར་འགྱུར་ལ། །འདི་ནི་དེ་ཡི་སྐྱེད་མོས་ཚལ་དུ་འགྱུར། །དེ་མཐུས་སྔོན་ཚེ་འབྱོར་པ་རྒྱས་པ་ཡིན། །གཞོན་ནུ་དེ་ནི་ཁྱིམ་སྤངས་རབ་བྱུང་བས། །དེ་བས་བསྐམས་པར་ཟད་ཅེས་གསུངས་པ་ན། །དེ་ཡིས་བརྟགས་ནས་འོ་ན་གཞོན་ནུ་དེ། །ཁྱོད་ཉིད་ཁོ་ནར་ངེས་ཞེས་མཆོད་པ་བྱས། །མ་ག་དྷ་རུ་བསོད་སྙོམས་མཛད་པའི་ཚེ། །སྐྱེ་བོ་ཀུན་གྱིས་དགེ་སྦྱོང་མཛེས་པར་བསྒྲགས། །རྒྱལ་པོ་གཟུགས་ཅན་སྙིང་པོས་མཐོང་ནས་ནི། །འདི་ལྟའི་གཟུགས་དང་ན་ཚོད་དཀའ་ཐུབ་འཕངས། །རྒྱལ་པོར་འོས་ཞེས་རྒྱལ་སྲིད་ཕྱེད་བསྟབས་པ། །མ་བཞེས་རྒྱལ་པོས་སློབ་མར་ཁས་ལེན་བྱས། །མེ་ལྔ་པ་དང་ཉི་མའི་བརྟུལ་ཞུགས་དང༌། །རྐང་པ་གཅིག་གིས་འགྲེང་སོགས་སྣ་ཚོགས་པའི། །དཀའ་ཐུབ་སྤྱོད་པའི་མུ་སྟེགས་གནས་སུ་ཞུགས། །དེ་དག་རྣམས་དང་མཐུན་པའི་དཀའ་བ་ནི། །ཉིས་འགྱུར་ལ་སོགས་སྤྱད་པས་དེ་ཀུན་དང༌། །དགེ་སྦྱོང་ཆེན་པོ་ཅེས་བྱར་མཚན་དུ་བརྗོད། །དེ་ནས་སྙོམས་པར་འཇུག་པ་དྲུག་པོ་ཡི། །ནང་ནས་སྒྱུ་རྩལ་ཞེས་བུ་རིང་འཕུར་ལས། །ཅི་ཡང་མེད་པའི་སྐྱེ་མཆེད་མངོན་དུ་མཛད། །སླར་ཡང་རངས་བྱེད་བུ་ནི་ལྷག་སྤྱོད་ཀྱི། །སློབ་མར་མཛད་དེ་སྲིད་རྩེའི་སྐྱེ་མཆེད་ནོས། །དེ་དག་མགུ་བས་སློབ་མའི་ཚོགས་ཕུལ་ཀྱང༌། །དེ་ཀུན་ཐར་པའི་ལམ་དུ་མ་གཟིགས་ནས། །ཆུ་བོ་ནཻ་རཉྫ་རའི་འགྲམ་དུ་བྱོན། །དཀའ་ཐུབ་(ཁ༡༧ན)

[Full Size]

ཙམ་གྱིས་གྲོལ་འདོད་དགའ་བའི་ཕྱིར། །རྒྱ་ཤུག་འབྲུ་རེ་སཱ་ལུ་འབྲུ་རེ་དང༌། །ཆུ་ཐིགས་ཙམ་གྱིས་འཚོ་དང་ཅུང་ཟད་ཀྱང༌། །མི་གསོལ་སོགས་ཀྱི་དཀའ་བ་ལོ་དྲུག་སྤྱད། །ཚོར་བ་ཟིལ་མནན་དབུགས་ཀྱི་དབྱུང་རྔུབ་སྤངས། །ལྷར་བཅས་སྐྱེ་བོ་གཞན་གྱིས་མ་ཞུགས་པ། །མཁའ་ཁྱབ་ཅེས་བྱའི་ཏིང་འཛིན་མཛད་པར་གྱུར། །དེ་ཚེ་ཡབ་དང་ཞང་པོས་མི་ལྔ་བརྒྱ། །འཁོར་དུ་བཞག་པའི་བརྒྱ་ཕྲག་རེ་རེ་ནས། །མི་རེ་བསྡད་ནས་གཞན་རྣམས་ལོག་པ་ལ། །ལྔ་སྡེ་ཞེས་བྱ་འཁོར་གྱི་དང་པོ་བྱུང༌། །མདོ་གཞན་དག་ལས་རིང་འཕུར་ལྷག་སྤྱོད་ཀྱི། །སློབ་མ་ལྔ་ཞིག་ཞབས་ཕྱིར་འབྲངས་པ་ནི། །ལྔ་སྡེ་བཟང་པོ་ཡིན་པར་བཤད་པའང་ཡོད། །གསང་སྔགས་ཡོ་ག་ལྟར་ན་དཀའ་ཐུབ་ཀྱི། ཁོག་པ་མི་ཡུལ་དུ་བཞག་འོག་མིན་ནམ། །རི་རབ་རྩེར་བྱོན་ལོངས་སྐུར་སངས་རྒྱས་སྟེ། །སླར་ཡང་དཀའ་ཐུབ་སྦྱོང་བའི་ལུས་ལ་ཞུགས། །སྤྲུལ་སྐུར་འཚང་རྒྱ་ཚུལ་དུ་སྟོན་པར་གསུངས། །ཐུན་མོང་སྣང་ངོར་ཤིན་དུ་རིད་པའི་སྐུ། །གྲོང་གི་བྱིས་པའི་རྩེད་མོའི་གནས་སུ་གྱུར། །ངལ་དུབ་མཐའ་ཡིས་གྲོལ་བར་མ་གཟིགས་ནས། ཁ་ཟས་རགས་པ་བཟའ་འོ་ཞེས་གསུངས་པས། །ལྔ་སྡེ་མ་དད་ཝ་ར་ཎ་སིར་སོང༌། །འདི་ཡང་བྱང་ཆུབ་སེམས་དཔའ་འཚང་རྒྱ་བ། །མི་ཡི་སྐྱེ་བོས་བསྙེན་པར་མི་ནུས་པས། །ཉིད་ཀྱིས་བྱིན་གྱིས་བརླབས་པའི་མཐུ་རུ་བཤད། །དེ་ཚེ་གྲོང་པའི་བུ་མོ་དགའ་མོ་དང༌། །དགའ་སྟོབས་མ་ཞེས་བྱ་བས་མཚན་མཁན་གྱིས། །བུ་མོ་གང་གིས་ལོ་ནི་བཅུ་གཉིས་སུ། །ཚངས་པར་སྤྱད་དེ་དཀའ་ཐུབ་རྫོགས་པའི་ཚེ། །མ་ཧེ་སྟོང་གི་འོ་མའི་ཉིང་ཁུ་ཡིས། །བྲམ་ཟེ་མཆོད་སྟེ་སྨོན་ལམ་བཏབ་པ་ན། །དོན་ཀུན་གྲུབ་པའི་བཙུན་མོར་འགྱུར་རོ་ཞེས། །བསྟན་ཐོས་ལོ་ནི་བཅུ་གཉིས་ཚངས་པར་སྤྱད། །དཀའ་ཐུབ་གྲུབ་ནས་མ་ཧེ་མོ་སྟོང་བཞོས། །འོ་མ་དེ་དག་རྣམས་ལ་བླུད་ནས་ནི། །སླར་ཡང་བཞོས་སྟེ་ལྔ་བརྒྱ་ལ་ནི་བླུད། །(ཁ༡༧བ)

[Full Size]

དེ་ལྟར་མ་ཧེ་ཉི་ཤུ་རྩ་ལྔའི་བར། །ལན་བདུན་ཉིང་ཁུར་བྱས་པའི་འོ་ཐུག་བསྐོལ། །ཤ་ཁ་ར་དང་སྦྲང་རྩིའི་དྭངས་མ་བཏབ། །སཱ་ལིའི་འབྲས་བླུག་བསྐོལ་བས་བཀྲ་ཤིས་པའི། །རྟགས་ཀྱི་རི་མོ་དུ་མ་ཤར་བ་ནི། །མཚན་མཁན་གྱིས་མཐོང་འདི་ནི་སུས་འཐུངས་པ། །དེ་རིང་བསམ་པ་འགྲུབ་པར་འགྱུར་རོ་ཟེར། །སྦྱིན་ཡུལ་བྲམ་ཟེ་འབོད་པར་བྲན་མོ་བསྐུལ། །བརྒྱ་བྱིན་མཐུ་ཡིས་དགེ་སྦྱོང་བྲམ་ཟེ་གཞན། །གཅིག་ཀྱང་མི་སྣང་བརྒྱ་བྱིན་ཚངས་པ་གཉིས། །བྲམ་ཟེར་སྤྲུལ་པ་མཐོང་ནས་བོས་པ་ན། །ང་བས་རྣམ་པ་དུ་མས་འདི་ལྷག་གིས། །འདི་ལ་ཕུལ་ཞེས་བརྒྱ་བྱིན་གྱི་ཚངས་པ། །དེ་ཡིས་བྱང་ཆུབ་སེམས་དཔའ་བསྟན་པར་གྱུར། །འོ་ཐུག་དེ་ཡིས་གསེར་གྱི་གཞོང་པ་བཀང༌། །ཕུལ་ནས་བྱང་ཆུབ་སེམས་དཔའི་ཞབས་ལ་གཏུགས། །ཤཱཀྱའི་གཞོན་ནུ་གངས་རིའི་འགྲམ་བྱུང་བ། །དོན་གྲུབ་དེ་ཡི་བཙུན་མོར་སྨོན་ལམ་བཏབ། །བྱང་ཆུབ་སེམས་དཔས་དེ་ནི་ཁྱིམ་ནས་བྱུང༌། །འདོད་པ་སྤངས་ཀྱིས་སྨོན་ལམ་གཞན་ཐོབ་གསུངས། །དེ་གཉིས་མཛའ་ཞིང་གཅུགས་པའི་ཡིད་ཀྱི་རྒྱུས། །འོ་ན་དེ་བསམ་འགྲུབ་པར་གྱུར་ཅིག་ཞེས། །བསྔོས་སྟེ་བྱང་ཆུབ་སེམས་དཔས་མཐུན་གྱུར་མཛད། །གཞོང་པ་འདི་ཡང་བཏང་ངམ་ཞེས་གསུངས་པས། །ཁོ་མོ་ཅག་ནི་སྣོད་དང་བཅས་པ་ཡིས། །བྱིན་སྟེ་སྣོད་མ་མཆིས་པར་མ་ཡིན་ཟེར། །འདི་གཉིས་བསྐལ་བཟང་སངས་རྒྱས་ཐམས་ཅད་ལ། །རྫོགས་འཚང་རྒྱ་ཀར་བསོད་སྙོམས་འབུལ་བ་པོར། །སྨོན་ལམ་བཏབ་སྟེ་འགྲུབ་པར་གྱུར་པ་ཡིན། །བྱང་ཆུབ་སེམས་དཔས་ཆུ་བོའི་འགྲམ་དུ་བསྣམས། །ཁྲུས་མཛད་སྦྲང་རྩི་ལྟ་བུར་མངར་བ་ཡི། །འོ་ཐུག་བཞེས་པས་སྐུ་ཡི་མཐུ་སྟོབས་རྒྱས། །གསེར་གཞོང་ཆུར་དོར་ཀླུ་རྒྱལ་རྒྱ་མཚོས་ཁྱེར། །བརྒྱ་བྱིན་གྱིས་ནི་མཁའ་ལྡིང་དུ་སྤྲུལ་སྟེ། །ཕྲོགས་ནས་ལྷ་ཡུལ་དུ་ཁྱེར་མཆོད་པ་བྱས། །དེང་སང་ན་ཡང་(ཁ༡༨ན)

[Full Size]

སྣོད་ཀྱི་དུས་སྟོན་ཡོད། །བྲན་མོ་གྲུབ་མ་ཞེས་པའི་རོ་དཀྲིས་པའི། །གསོ་རས་བླངས་སྟེ་བཀྲུས་ཤིང་ཁ་བསྒྱུར་ནས། །ཕྱགས་བདར་ཁྲོད་པའི་སྣམ་སྦྱར་མཛད་པར་གྱུར། །དེ་ཚེ་འཛམ་གླིང་རྩི་ཤིང་ལྡུམ་བུ་ཀུན། །རང་རང་ལོ་འདབ་མེ་ཏོག་འབྲས་བུ་རྒྱས། །ཀུན་ཀྱང་རྩེ་ཀུན་རྡོ་རྗེའི་གདན་དུ་ཕྱོགས། །བུར་ཤིང་ལ་སོགས་རང་རང་བཅུད་རྣམས་འཛག །ས་ཆེན་འདི་ནི་འཁོར་བ་ལས་བྱས་ལྟར། །རེག་ན་འཁྲོལ་ཞིང་སྒྲ་སྙན་འབྱིན་པར་གྱུར། །སྲོག་ཆགས་ཀུན་ཀྱང་བྱང་ཆུབ་སྙིང་པོའི་ཕྱོགས། །རང་བཞིན་གྱིས་འདུད་མགོ་བོ་སྟོན་པར་བྱེད། །བྱང་ཆུབ་ཤིང་མཆོག་རབ་ཏུ་རྒྱས་ཤིང་མཛེས། །བྱ་རྣམས་སྙན་པའི་སྒྲ་འབྱིན་ཉི་འོད་གསལ། །འགྲོ་ཀུན་མི་དགེའི་བསམ་པ་ནུབ་པས་གནས། །བྱང་ཆུབ་སེམས་དཔའ་སྐྱེས་བུ་ཆེན་པོའི་སྟོབས། །མཐའ་ཡས་ལྡན་པས་སེང་གེའི་སྟབས་ཀྱིས་ཆས། །ནགས་ཚལ་མེ་ཏོག་བཀྲ་བའི་སྤོ་ཅིག་གཟིགས། །འདི་རུ་འདུག་ནས་འཚང་རྒྱ་ཞེས་དགོངས་ཚེ། །རི་དེ་ཉིལ་ཞིང་ཞིག་པར་གྱུར་པ་ན། །ཅིས་ཉེས་དགོངས་ཚེ་གནས་གཙང་ལྷ་རྣམས་ཀྱིས། །མཚམས་མེད་སྤྱད་དང་སྲིད་པ་ཐ་མ་པའི། །བྱང་སེམས་གཉིས་ནི་ས་གཞི་ཕལ་པ་ཡིས། །བསྟེན་མི་ནུས་ཀྱིས་ཧ་ཅང་མི་རིང་བར། །རྡོ་རྗེའི་གདན་ཡོད་དེ་རུ་གཤེགས་ཞེས་བསྟན། །བརྒྱ་བྱིན་གྱིས་སྤྲུལ་རྩྭ་ཚོང་བཀྲ་ཤིས་ལས། །རྨ་བྱའི་མགྲིན་མདོག་རེག་ན་འཇམ་པ་ཡི། །ལྷ་ཡི་རྩྭ་བླངས་བྱང་ཆུབ་ཤིང་དྲུང་བྱོན། །རྩྭ་རྣམས་གཡས་སྐོར་ཉིད་དུ་ངང་གིས་འཁྱིལ། །དེ་སྟེང་བཞུགས་སྟེ་བྱང་ཆུབ་མ་ཐོབ་བར། །ནམ་ཡང་འདི་ལས་ལྡང་བར་མི་བྱ་ཞེས། །དམ་བཅས་རྡོ་རྗེའི་སྐྱིལ་མོ་ཀྲུང་གིས་བཞུགས། །འོད་ཟེར་བཀྱེ་བས་བདུད་ཀྱི་བདག་པོ་སྦྲན། །བདུད་ཀྱི་དཔུང་ཚོགས་མི་འཁྲུགས་ཕྲག་གཅིག་ནི། །འཇིགས་པའི་གཟུགས་ཅན་ལྷགས་སྟེ་མཚོན་ཆར་ཕབ། །དེ་ཀུན་མེ་ཏོག་ཆར་གྱུར་འཁྱིལ་(ཁ༡༨བ)

[Full Size]

ཞིང་འབབ། །བདུད་ཀྱི་བུ་མོ་རྣམས་ཀྱིས་ཆགས་པ་ཡིས། །བསླུ་བར་བརྩམས་པ་རྒན་མོར་བྱིན་བརླབས་སྟེ། །སླར་ཡང་རྒྱལ་སྲས་ཉིད་ལ་སྐྱབས་སུ་སོང༌། །ཁྱོད་ཀྱིས་བསགས་པའི་ཚོགས་གཉིས་དེ་ཙམ་གྱིས། །འཚང་རྒྱ་རིགས་པ་མིན་ཞེས་བདུད་ཀྱིས་རྒོལ། །བྱང་ཆུབ་སེམས་དཔས་སྡིག་པ་ཅན་ཁྱོད་ཀྱིས། །གཏན་མེད་མཆོད་སྦྱིན་གཅིག་ཅིག་བྱས་པ་ཡིས། །འདོད་པའི་ཁམས་ཀྱི་དབང་ཕྱུག་དུ་གྱུར་ན། །ང་ཡིས་གཏན་མེད་མཆོད་སྦྱིན་དཔག་ཡས་བྱས། །གསུངས་ཚེ་བདུད་ཀྱིས་དཔང་པོ་སུ་ཡོད་ཟེར། །ཕྱག་གཡས་བརྐྱངས་པ་ས་གཞི་ལ་བསྣུན་སྟེ། །ཀུན་ལ་སྙོམས་ཤིང་ཉེ་ཁོན་མེད་པ་ཡི། །ས་འདི་ང་ཡི་དཔང་ཞེས་གསུངས་པའི་མོད། །ས་ཆེན་རྣམ་པ་དྲུག་དུ་གཡོས་པ་ལས། །ས་ཡི་ལྷ་མོ་བརྟན་མས་ལུས་ཕྱེད་ཐོན། །ཇི་སྐད་བཀའ་བསྩལ་དེ་བཞིན་ཁོ་ན་སྟེ། །འདི་ནི་བདག་ལ་མངོན་སུམ་ཉིད་ཡིན་ནོ། །དེ་ལྟ་མོད་ཀྱིས་ལྷར་བཅས་འཇིག་རྟེན་གྱི། །དཔང་པོ་ཚང་མ་ཁྱོད་ཉིད་ཡིན་ནོ་ཞེས། །བརྗོད་པ་ཐོས་པས་བདུད་ཚོགས་སྐྲག་ཅིང་བྱེར། །མང་ཞིག་སྟོན་པ་ཉིད་ལ་སྐྱབས་སུ་སོང༌། །དེ་ལྟར་བྱམས་པ་ཆེན་པོ་གཅིག་ཁོ་ནས། །གཡོ་བ་མེད་བཞིན་བདུད་སྡེ་ཀུན་བཏུལ་སྟེ། །བདེན་པ་བཞི་དང་ལུགས་འབྱུང་ལུགས་ཟློག་གི །རྟེན་ཅིང་འབྲེལ་བར་འབྱུང་བ་ཀུན་མཁྱེན་པས། །སྤྱན་དང་མངོན་པར་ཤེས་པ་མངོན་དུ་མཛད། །སྐད་ཅིག་གཅིག་དང་ལྡན་པའི་ཤེས་རབ་ཀྱིས། །སྐྱ་རེངས་ཤར་ཚེ་མངོན་པར་རྫོགས་སངས་རྒྱས། །དེ་ཚེ་མཁའ་ལ་ཟླ་བ་གཟའ་ཡིས་ཟིན། །གྲགས་འཛིན་མ་ལ་དགྲ་གཅན་ཟིན་སྲས་བཙས། །རྒྱལ་པོས་གཞོན་ནུའི་སྲས་མིན་ཞེས་དོགས་ཚེ། །ཡུམ་གྱིས་གཞོན་ནུའི་པང་ཚང་རྡོ་བ་དང༌། །ལྷན་ཅིག་དམོད་བོར་རྒྱན་གྱི་རྫིང་བུར་འཕངས། །ལྷན་ཅིག་བལ་འདབ་བཞིན་དུ་ཆུ་སྟེང་འཕྱོ། །སྐྱེ་བོ་ཡིད་འཆེས་བཙས་སྟོན་རྒྱ་ཆེར་བྱས། །དེ་ཚེ་བདུད་རྩི་ཟས་ཀྱི་བུ་བཙས་པས། །(ཁ༡༩ན)

[Full Size]

ཀུན་དགའ་བོ་ཞེས་དུས་ལས་མིང་དུ་བཏགས། །དེ་ལྟར་མངོན་པར་རྫོགས་པར་སངས་རྒྱས་ནས། །སྐྱིལ་ཀྲུང་ཉིད་ཀྱིས་ཏཱ་ལ་བདུན་སྲིད་ཀྱི། །ཚད་དུ་ལན་བདུན་འཕགས་སྟེ་ཆེད་དུ་བརྗོད། །ལྷ་རྣམས་ཀུན་གྱིས་རྒྱ་ཆེར་མཆོད་པར་གྱུར། །སངས་རྒྱས་མ་བྱུང་དུས་སུ་དམུས་ལོང་ཞིང༌། །སངས་རྒྱས་བྱུང་དུས་མིག་རབ་རྙེད་པ་ཡི། །ཀླུ་ཡི་རྒྱལ་པོ་ནག་པོས་ཀུན་ནས་བསྟོད། །བདུན་ཕྲག་ཞག་དུ་སྐྱིལ་ཀྲུང་མ་གཤིག་བཞུགས། །གཉིས་པར་བྱང་ཆུབ་ཤིང་ལ་མི་འཛུམས་གཟིགས། །གསུམ་པར་སྟོང་གསུམ་རྒྱང་རིང་བར་དུ་འཆག །བཞི་པར་ཤར་ནུབ་རྒྱ་མཚོའི་བར་དུ་འཆག །ལྔ་པར་བཏང་བཟུང་ཀླུ་ཡི་གནས་ན་བཞུགས། །དྲུག་པར་ནྱ་གྲོ་དྷ་ཡི་ཤིང་དྲུང་བཞུགས། །བདུན་པར་སྒྲོལ་རྒྱུའི་ཤིང་གི་ཚལ་ན་བཞུགས། །དེ་ཚེ་བསྐལ་བཟང་སངས་རྒྱས་ཐམས་ཅད་ལ། །ཐོག་མའི་བསོད་སྙོམས་འབུལ་པོའི་སྨོན་ལམ་ཅན། །ཚོང་པ་ག་གོན་དང་ནི་བཟང་པོ་ཡིས། །ཟོང་མང་ཁལ་དེད་ལྷོ་ནས་བྱང་བགྲོད་ཚེ། །ལེགས་སྐྱེས་དང་ནི་གྲགས་པ་ཅེས་བྱ་བ། །གླང་བུའི་དམ་པ་ཅང་ཤེས་གཉིས་ཀྱིས་ནི། །མགྲོན་པོ་རྣམས་ཀྱི་ལམ་གྱི་སྣ་འདྲེན་ཞིང༌། །ལམ་དུ་འཇིགས་པ་ཡོད་ན་མི་འགྲོ་བས། །དེ་ཚེ་གླང་བུ་ཅང་ཤེས་དེ་གཉིས་ཀྱིས། །ལམ་དུ་མ་ཕྱིན་དེད་ཀྱང་ལམ་གཞན་ཞུགས། །ནགས་ཀུན་མྱུལ་བས་འཇིགས་པ་མ་མཐོང་སྟེ། །གླང་བུའི་ཕྱིར་ཕྱིན་བྱང་ཆུབ་ཤིང་དྲུང་ན། །རྒྱལ་བ་བཞུགས་མཐོང་གླང་བུ་སྐོར་བ་བྱེད། །ལྷས་ཀྱང་སྦྲན་པས་ཚོང་པ་དད་གྱུར་སྟེ། །སྐྱོ་མ་ལྡེ་གུ་སྦྲང་རྩི་བུར་ཤིང་སོགས། །བསོད་སྙོམས་ཕུལ་ཚེ་རྒྱལ་བས་དགོངས་པ་མཛད། །ལག་གིས་བླངས་ན་མུ་སྟེགས་ཅན་བཞིན་འགྱུར། །སྔོན་གྱི་རྒྱལ་བའི་བཞེས་སྣོད་གང་ཡིན་དགོངས། །ལྷུང་བཟེད་དུ་མཁྱེན་གནས་གཙང་ལྷས་ཀྱང་གསོལ། །འཇིག་རྟེན་སྐྱོང་བ་བཞི་ཡིས་རིན་ཆེན་ཚོགས། །(ཁ༡༩བ)

[Full Size]

དུ་མའི་ལྷུང་བཟེད་ཕུལ་བ་མ་བཞེས་ནས། །རྡོ་ཡི་ལྷུང་བཟེད་རེ་རེ་ཕུལ་བ་བཞེས། །གཅིག་དུ་བྱིན་རླབས་བསོད་སྙོམས་བཞེས་ནས་ནི། །ཚོང་པ་རྣམས་ལ་བདེ་ལེགས་ཚིགས་བཅད་གསུངས། །ལྷུམས་སུ་ཞུགས་ནས་མཛད་པ་འདི་ཡི་བར། །ཕལ་ཆེར་ཐུན་མོང་སྐྱེ་བོའི་མཐོང་བ་ཡི། །དབང་བྱས་ལུང་དང་མངོན་བྱུང་རྒྱ་རོལ་ལྟར། །ཉུང་ངུར་བསྡུས་ནས་ཅུང་ཟད་བརྗོད་པ་ཡིན། །འཕགས་ཆེན་རྣམས་ཀྱི་གཟིགས་པའི་དབང་བྱས་ཚེ། །བྱང་ཆུབ་ཤིང་གི་རྒྱན་དང་བཀོད་པ་ཚད། །སེང་གེའི་ཁྲི་ཆེན་བསམ་ཡས་ལྡན་པ་སྟེ། །བྱིས་པའི་འགྲོ་བས་བསྐལ་པར་བགྲང་མི་ནུས། །དེར་བཞུགས་སྐལ་མཉམ་སེམས་དཔའི་འཁོར་མཐའ་ཡས། །དབུས་སུ་སངས་རྒྱས་རྡོ་རྗེའི་གདན་སྤོ་ལས། །གཡོ་བ་མེད་བཞིན་རི་རབ་རྩེ་མོ་དང༌། །འཐབ་བྲལ་དགའ་ལྡན་ལ་སོགས་འོག་མིན་བར། །སོ་སོའི་གནས་སུ་སྐུ་ཡི་བཀོད་པ་སྣང༌། །ཕྱོགས་བཅུའི་ཞིང་ནས་བྱང་སེམས་ཚོགས་འདུས་སྟེ། །ཕལ་པོ་ཆེ་ཡི་མདོ་སྡེ་གསུངས་པ་ཉིད། །དེ་བཞིན་རྡོ་རྗེ་ཐེག་པའི་རྒྱུད་འགའ་ལས། །གསང་སྔགས་མཐུ་ཡིས་བདུད་བཏུལ་སངས་རྒྱས་ཚུལ། །དུ་མར་བཤད་རྣམས་མ་ལུས་བརྗོད་མི་ལང༌། །ཐམས་ཅད་གདུལ་བྱའི་སྣང་ཆ་ཐ་དད་དེ། །གཅིག་རྗེས་གཅིག་མཐུད་བྱུང་བར་མ་འཁྲུལ་ཞིག །དེ་ནས་དམ་ཆོས་དཀོན་པར་སྟོན་པ་དང༌། །སྐྱེ་རྒུ་ཚངས་ལ་དད་རྣམས་གདུལ་བའི་ཕྱིར། །ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུ་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་འདབ་གནས་བྱ་ཞེས་དགོངས་ཚེ། །འཇིག་རྟེན་དུ་ནི་མི་རུང་སྣ་ཚོགས་བྱུང༌། །ལྷ་ཡིས་ཤེས་ནས་ཀུན་གྱིས་གསོལ་བ་བཏབ། །ཚངས་པས་གསེར་གྱི་འཁོར་ལོ་རྩིབས་སྟོང་པ། །ཕུལ་སྟེ་མ་ག་ངྷ་འདིར་མ་དག་ཆོས། །དྲི་མར་བཅས་པར་སེམས་པའི་སྨྲ་བ་བྱུང༌། །དེ་སླད་ཐུབ་པ་བདུད་རྩིའི་སྒོ་དབྱེ་གསོལ། །(ཁ༢༠ན)

[Full Size]

དེ་སྐད་བསྐལ་བཟང་རྒྱལ་བ་ཐམས་ཅད་ཀྱི། །ཆོས་ཀྱི་འཁོར་ལོ་བསྐོར་བར་སྐུལ་བ་པོ། །ཚངས་པས་གསོལ་བའི་མོད་ལ་ཞལ་གྱིས་བཞེས། །གཞན་གྱིས་གསོལ་བ་བཏབ་ལ་ང་མི་ལྟོས། །སྐྱེ་བོ་འདི་ཀུན་ཚངས་ལ་དད་པ་སྟེ། །དེ་ཡིས་གསོལ་བཏབ་འཁོར་ལོ་བསྐོར་རོ་གསུངས། །སྔོན་གྱི་སློབ་དཔོན་རིང་འཕུར་ལྷག་སྤྱོད་གཉིས། །དྲང་བར་དགོངས་ཚེ་འདས་མ་ཐག་པར་མཁྱེན། །ཐོག་མའི་གདུལ་བྱ་ལྔ་སྡེ་ཡིན་མཁྱེན་ནས། །ཝ་ར་ཎཱ་སིར་གཤེགས་པར་གྱུར་པའི་ཚེ། །གངྒཱའི་མཉན་པས་གྲུ་བཙས་བླངས་པ་ན། །གྲུ་བཙས་མེད་གསུང་མཁའ་ལ་བྱ་བཞིན་གཤེགས། །རྒྱལ་པོས་དེ་ཐོས་རབ་བྱུང་གྲུ་བཙས་བཀག །ཁོར་མོ་འཇིག་ཅེས་ཝ་ར་ཎཱ་སིའི་ཡུལ། །དྲང་སྲོང་ལྷུང་བ་རི་དགས་ནགས་ཚལ་དུ། །ལྔ་སྡེས་མ་གུས་པ་ཡི་ཁྲིམས་བཅས་ཀྱང༌། །ཐུབ་དབང་གཟི་བརྗིད་མ་བཟོད་ངང་གིས་བྲལ། །གདུང་དང་རིགས་ནས་བོད་པར་མ་བྱེད་ཅིག །ད་ནི་མངོན་པར་རྫོགས་སངས་རྒྱས་སོ་གསུངས། །རིན་ཆེན་ཁྲི་སྟོང་ས་ལས་རང་བྱུང་བའི། །དང་པོ་གསུམ་ལ་ཕྱག་དང་སྐོར་བ་མཛད། །བཞི་པར་བསྙེངས་པ་མེད་པར་བཞུགས་ནས་ནི། །བདེན་བཞིའི་ངོ་བོ་བྱ་བ་འབྲས་བུ་སྟེ། །བཟླས་པ་གསུམ་གྱིས་རྣམ་པ་བཅུ་གཉིས་ཀྱི། །ཆོས་འཁོར་ལོ་གྲངས་མི་ཉུང་བ་རུ་བསྐོར། །དང་པོས་ཀཽཎྜི་ནྱས་ནི་མཐོང་ལམ་ཐོབ། །སྟོན་པས་ཁྱོད་ཀྱིས་ཆོས་ཀུན་ཤེས་སམ་ཞེས། །ལན་གསུམ་རྨེད་པས་ཀུན་ཤེས་མཚན་དུ་གྱུར། །གཉིས་པར་ཀཽཎྜི་ནྱས་ནི་དགྲ་བཅོམ་སྟེ། །སྣམ་སྦྱར་རྒྱལ་མཚན་འཛིན་པའི་མཆོག་དུ་བསྟན། །རྟ་ཐུལ་རླངས་པ་བཟང་ལྡན་མིང་ཆེན་བཞེས། །མཐོང་བའི་ལམ་དང་གསུམ་པར་དགྲ་བཅོམ་གྱུར། །འདི་ལྔ་ཡེ་ཤེས་ཁོང་ཆུད་ཀྱིས་བསྙེན་རྫོགས། །འདོད་གཟུགས་ལྷ་ནི་བརྒྱད་ཁྲིས་ཆོས་མིག་ཐོབ། །ལྷ་ཀུན་ལྷུང་ལྷུང་ལྡེགས་ལྡེགས་(ཁ༢༠བ)

[Full Size]

སྒྲ་འབྱིན་སྟེ། །སྔོན་ཚེ་ལྷ་མི་སུས་ཀྱང་མ་བསྐོར་བའི། །ཆོས་འཁོར་བསྐོར་བ་མཐོང་ཞེས་ཆེད་ཏུ་བརྗོད། །ཐེག་དམན་ལུགས་ལ་ཆོས་འཁོར་གཞན་མི་འདོད། །ཐེག་ཆེན་ལུགས་ཀྱི་ཆོས་འཁོར་དང་པོ་ཡིན། །གྲགས་པ་ཁྱིམ་ན་གནས་བཞིན་དགྲ་བཅོམ་བཀོད། །མི་སློབ་ཁྱིམ་གནས་སྲིད་པ་མིན་ཞེས་གསུངས། །དེ་སོགས་ཉེ་བའི་ལྔ་སྡེ་རབ་ཏུ་བྱུང༌། །རིགས་གཙོའི་བུ་ནི་ལྔ་བཅུ་དགྲ་བཅོམ་བཀོད། །དྲུག་བཅུའི་ཚོགས་ལྡན་བཟང་སྡེས་བདེན་པ་མཐོང༌། །ཆོ་འཕྲུལ་ལྔ་བརྒྱས་སྟེང་རྒྱས་འོད་སྲུང་བཏུལ། །རལ་པ་ཅན་སྟོང་ཟག་པ་ཟད་པར་བཀོད། །གང་ཞིག་མཐོང་བས་གླང་ཆེན་སྨྱོན་པ་ཡང༌། །དུལ་བྱེད་རྟ་ཐུལ་གྱི་ནི་སྤྱོད་ལམ་གྱིས། །འཛམ་གླིང་སྨྲ་བའི་མཆོག་གྱུར་ཉེ་རྒྱལ་དང༌། །འདུན་འདོན་བྲམ་ཟེའི་དམ་པ་པང་ནས་སྐྱེས། །འཁོར་བཅས་བཏུལ་སྟེ་ཤེས་རབ་རྫུ་འཕྲུལ་དུ། །ལྡན་པའི་དམ་པ་མཆོག་གི་ཟུང་དུ་བསྟན། །དེ་དག་ལ་སོགས་སྲིད་པ་ཐ་མ་པ། །ཕལ་ཆེར་དགེ་སློང་ཚུར་ཤོག་ཚངས་སྤྱོད་བྱོས། །ཅེས་གསུངས་མོད་ལ་ཆོས་གོས་སྣམ་སྦྱར་བསྒོས། །སྐྲ་དང་ཁ་སྤུ་བྲེགས་ནས་ཞག་བདུན་ཙམ། །རིལ་བ་ཐོགས་གྱུར་བསྙེན་པར་རྫོགས་ནས་ཀྱང༌། །ལོ་བརྒྱ་ལོན་པའི་སྤྱོད་ལམ་ལྟར་གནས་པ། །དགེ་སློང་དངོས་པོ་ལྡན་པར་གྱུར་པའི་ཕྱིར། །ཚུར་ཤོག་གིས་ནི་བསྙེན་པར་རྫོགས་པ་ཡིན། །སེར་སྐྱ་བཟང་མོ་ལྷ་ཡི་ལུས་ཐོབ་དང༌། །ཛམྦུའི་གསེར་ནས་མ་གའི་ཁལ་བརྒྱ་པའི། །བང་བ་བརྒྱད་བཅུ་ལ་སོགས་སྤངས་ནས་ནི། །རབ་བྱུང་ངང་གིས་འདོད་ཆགས་བྲལ་གྱུར་པ། །བྲམ་ཟེའི་ཁྱེ་འུ་ནྱ་གྲོ་དྷ་སྐྱེས་ཀྱིས། །མཐོང་བའི་མོད་ལ་ཁྱོད་ནི་སྟོན་པ་སྟེ། །ཁོ་བོ་ཁྱོད་ཀྱི་ཉན་ཐོས་ལགས་སོ་ཞེས། །ལན་གསུམ་གསོལ་བས་བསྙེན་པར་རྫོགས་གྱུར་པ། །འོད་སྲུང་ཆེན་པོ་སྟོབས་བཅུ་པ་ཅེས་གྲགས། །འོད་སྲུང་ཆེན་པོ་དང་འོད་སྲུང་སྟོབས་བཅུ་པ་གཉིས་སུ་མདོ་ཁ་ཅིག་ལས་འབྱུང་ལ་མཛད་པ་འཁྲུལ་མེད་ཏུ་འོད་སྲུང་སྟོབས་བཅུ་པ་ནི་མ་ག་དྷ་པ་ཡིན་པར་སེམས་ཞེས་བྲིས་མོད་ཀྱང་འོད་སྲུང་ཆེན་པོ་ཉིད་ཀྱི་མཚན་གྱི་རྣམ་གྲངས་ཡིན་པ་འདྲ་སྙམ་དུ་རང་ལ་ཡང་ཡང་ཤར་བས་འདི་ལྟར་བྲིས་པ་ཡིན་ནོ། །གཞོན་ནུའི་དཔེ་ཡི་མདོ་སྡེས་གསལ་རྒྱལ་བཏུལ། །རྒྱལ་པོ་གཟུགས་(ཁ༢༡ན)

[Full Size]

ཅན་སྙིང་པོ་དད་པར་མཛད། །མགོན་མེད་ཟས་བྱིན་དད་དང་བདེན་པ་ལ། །བཞག་སྟེ་རྒྱལ་བྱེད་ཚལ་གྱི་ཀུན་ར་བཞེས། །རྫོགས་སངས་རྒྱས་ནས་ལོ་བདུན་ལོན་པའི་ཚེ། །ཡབ་ཀྱི་ཕོ་ཉ་མདུན་ན་འདོན་འཆར་ཀ །དེ་ལྟའི་ཆོ་གས་བསྙེན་པར་རྫོགས་སུ་བཅུག །རྫུ་འཕྲུལ་བཀོད་པས་སེར་སྐྱའི་གྲོང་དུ་གཤེགས། །ཡབ་ཀྱིས་བསྟོད་ཕྱག་གསུམ་པ་མཛད་པར་གྱུར། །ཆོས་གསུང་ཚེ་ན་ཁྱེ་འུ་ཀུན་དགའ་བོ། །རྔ་ཡབ་ཐོགས་སྟེ་སྟོན་པའི་སྐུ་ལ་གཡོབ། །དེ་ལས་གཞན་དུ་འགྲོ་བར་མ་འདོད་ནས། །ཞམ་རིང་བགྱིས་སྟེ་ཐོས་པ་འཛིན་པར་གྱུར། །ཉིད་གཅུང་འདོད་ཆགས་དྲག་པོ་རབ་ཟློག་ནས། །དགྲ་བཅོམ་དབང་པོ་བསྡམས་པའི་མཆོག་དུ་བསྟན། །རྒྱལ་པོ་ཟས་གཙང་དྲེགས་དང་ཞུམ་པ་ཡིས། །བདེན་པ་མ་རྟོགས་མཁྱེན་ནས་མཽངྒལ་བུས། །རྫུ་འཕྲུལ་བསྟན་པས་བདག་གི་བུ་འབའ་ཞིག །རྫུ་འཕྲུལ་ལྡན་སྙམ་དྲེགས་པ་དེ་དང་བྲལ། །ལྷ་ཡི་གཞལ་མེད་ཁང་པར་རྒྱལ་ཆེན་བཞིས། །སྒོ་བསྲུངས་ཚངས་དང་བརྒྱ་བྱིན་ལ་སོགས་ལ། །དམ་ཆོས་སྟོན་པ་མཐོང་བས་ལྷ་རྣམས་ཆོས། །མི་ཉན་སྙམ་པའི་ཞུམ་པ་དང་བྲལ་སྟེ། །རྒྱུན་དུ་ཞུགས་པའི་འབྲས་བུའི་གནས་ལ་བཀོད། །ང་ཡི་བསྟན་ལ་རིགས་རུས་མི་གཙོ་ཞེས། །འབྲེག་མཁན་ཉེ་འཁོར་ཚུར་ཤོག་གིས་བསྙེན་རྫོགས། །ཤཱཀྱའི་རྒྱལ་པོ་བཟང་ལྡན་ལྷས་བྱིན་སོགས། །རིགས་གཟུགས་མཆོག་ཐོབ་ལྔ་བརྒྱ་རབ་བྱུང་སྟེ། །དེ་ལས་ཕལ་གྱིས་སྟོན་པ་མཉེས་པར་བྱས། །གྲགས་འཛིན་མངལ་ཁུང་ལོ་དྲུག་འཛིན་པ་དང༌། །དགྲ་གཅན་ཟིན་ནི་དེ་སྲིད་མངལ་གནས་པའི། །རྒྱུ་ནི་འདི་ཞེས་སྔོན་གྱི་ལས་འབྲས་གསུངས། །གྲགས་འཛིན་མ་ཡིས་སྟོན་པ་དབང་བྱེད་ཕྱིར། །སྔགས་ཀྱིས་བཏབ་པའི་ལ་དུ་སྲས་ལ་བསྐུར། །སྟོན་པར་ཕུལ་བས་སླར་གནང་ཟོ་ཞིག་གསུངས། །ཡབ་ཀྱི་ཕྱིར་འབྲངས་རབ་ཏུ་འབྱིན་པའི་ཕྱིར། །ཤཱ་རིའི་བུར་བཏད་དེ་ཡི་(ཁ༢༡བ)

[Full Size]

དགེ་ཚུལ་གྱུར། །སྔོན་གྱི་དྲང་སྲོང་མས་བྱིན་དགྲ་བཅོམ་བཀོད། །རུས་ལས་ཀ་ཏྱ་ཡཱ་ན་ཞེས་པར་གྲགས། །མཐའ་ཁོབ་འདུལ་བར་བྱེད་པའི་མཆོག་དུ་བསྟན། །དེ་ཡིས་གཏུམ་པོ་རབ་སྣང་འཁོར་བཅས་བཏུལ། །ལྷོ་ཕྱོགས་གསེར་སའི་རྒྱལ་པོ་ཀབ་ཕི་ན། །དམག་ཚོགས་ཁྲི་རེར་ལྡན་པའི་བློན་པོ་ནི། །བརྒྱད་ཁྲི་བཞི་སྟོང་ལྡན་པ་བཏུལ་བྱས་ནས། །རབ་བྱུང་དགེ་སློང་བསོད་སྙོམས་སྤྱོད་པར་གྱུར། །སྒྲ་སྒྲོགས་རྒྱལ་པོ་ཨུ་ཏ་ཡ་ན་ནི། །བྲིས་སྐུས་བཏུལ་སྟེ་ཐུབ་པའི་འཁོར་དུ་གྱུར། །སྡིག་གྲོགས་ཀྱིས་ཟིན་རྒྱལ་པོ་གཙུག་ཕུད་ཅན། །འཁོར་དང་བཅས་ལ་མཐོང་ཆོས་ལས་འབྲས་བསྟན། །བུ་རམ་ཤིང་འཕེལ་སློ་མའི་གྲོང་ལ་སོགས། །དཔག་ཚད་བརྒྱ་ཕྲག་ཕ་རོལ་སྤྱན་དྲངས་ཚེ། །དགྲ་བཅོམ་ལྔ་བརྒྱའི་འཁོར་བཅས་ཐ་དད་པའི། །རྫུ་འཕྲུལ་ལྡན་པས་གཤེགས་སྟེ་དུལ་བར་མཛད། །རྫོགས་བྱེད་གནག་ལྷས་སྐྱེས་དང་རྒྱལ་བ་ཅན། །གཉེན་གྱི་བུ་དང་ནོག་ཅན་སྐྲའི་ལ་ཅན། །དེ་ལྟར་མུ་སྟེགས་རྟོག་གེ་པ་དྲུག་གིས། །ཆོ་འཕྲུལ་འགྲན་ཕྱིར་ཡང་ཡང་བསྐུལ་བ་ཡིས། །ཆོ་འཕྲུལ་ཆེན་པོ་བསྟན་པས་ཐམས་ཅད་བཏུལ། །འདི་ཡང་ཉན་ཐོས་ལྟར་ན་ཆོ་འཕྲུལ་གྱི། །ཞིང་སྦྱངས་ནས་ནི་ཆོ་འཕྲུལ་ཉིན་གཅིག་ཡིན། །དེ་ལའང་ཐུན་མོང་ཐུན་མོང་མིན་པ་གཉིས། །འདི་ནི་འདུལ་བའི་ལུང་ལས་བཤད་པ་ལྟོས། །ཐེག་ཆེན་ལྟར་ན་གཅིག་ནས་བཅོ་ལྔའི་བར། །སྦྱིན་བདག་ཆོ་འཕྲུལ་ཐ་དད་རེ་བསྟེན་སྟེ། །བརྒྱད་ཡན་འགྲན་ཟླར་བཅས་པའི་ཆོ་འཕྲུལ་སྟེ། །དེ་ཕྱིན་འགྲན་ཟླ་མེད་པའི་ཆོ་འཕྲུལ་ཡིན། །འདི་ནི་མདོ་སྡེ་མཛངས་བླུན་ནང་ན་གསལ། །མི་དགེའི་བཤེས་གཉེན་ལྷས་བྱིན་གྱིས་བསྐུལ་བའི། །མ་སྐྱེས་དགྲ་ཡིས་གླང་ཆེན་ནོར་སྐྱོང་ནི། །རྦད་པ་བཏུལ་སྟེ་ལྷ་དང་བདེན་པར་བཀོད། །མ་སྐྱེས་མངལ་གནས་ཁྱེ་འུ་ཉིད་འགྱུར་ཞིང༌། །ལྷ་མིའི་དཔལ་ཐོབ་པ་ཡི་བསྟན་ལ་ཞུགས། །དགྲ་བཅོམ་འགྱུར་(ཁ༢༢ན)

[Full Size]

ཞེས་ལུང་བསྟན་དགག་པའི་ཕྱིར། །བླུན་པོ་དུ་མས་འབད་ཀྱང་དགག་མ་ནུས། །ཇི་སྐད་ལུང་བསྟན་གཡོ་བ་མེད་པར་གྱུར། །དཔལ་སྦས་ཀྱིས་ནི་སྒོ་དྲུང་མེ་དོང་བཤམས། །དུག་ཅན་ཟས་སྦྱར་མགྲོན་དུ་སྤྱན་དྲངས་ཚེ། །ཞབས་བཞག་ཙམ་གྱིས་མེ་དོང་པདྨའི་མཚོ། །བུང་བའི་ཁྱུ་མང་སྒྲ་འབྱིན་ལྡན་པར་གྱུར། །པདྨར་ཞབས་བཀོད་ནང་དུ་སྟན་ལ་བཞུགས། །དཀོན་མཆོག་གསུམ་ལ་དུག་གསུམ་མི་མངའ་བའི། །བདེན་པའི་ཚིག་གིས་ཟས་ཀུན་དུག་མེད་གྱུར། །དད་པར་མཛད་དེ་བདེན་པ་མཐོང་ལ་བཀོད། །སྐྱེ་རྒུའི་བདག་མོ་རབ་ཏུ་འབྱིན་པ་རུ། །ཀུན་དགའ་བོ་ཡིས་ཞུས་ཚེས་བསྟན་པ་ལ། །བུད་མེད་འཇུག་པར་ཞུ་བ་མ་བྱེད་ཅིག །བསྟན་པ་ལོ་གྲངས་ལྔ་བརྒྱས་སྔར་ནུབ་འགྱུར། །ཞེས་གསུངས་ལན་གསུམ་གསོལ་བའི་ཐ་མར་གནང༌། །ལྕི་བའི་ཆོས་བརྒྱད་ཁས་བླངས་ཀྱིས་བསྙེན་རྫོགས། །དེ་སོགས་བུད་མེད་དགྲ་བཅོམ་མང་དུ་བྱུང༌། །སེར་སྐྱའི་གྲོང་དུ་ཡབ་ཀྱི་མཆོད་རྟེན་མཛད། །སྔོན་ནས་ཕ་མར་གུས་ཞེས་སྔོན་བྱུང་གསུངས། །སངས་རྒྱས་སྟོང་གི་ངེས་པའི་འཕྲིན་ལས་ནི། །ལས་ཀྱི་རྒྱུ་བ་ལུང་སྟོན་མཛད་པའི་ཕྱིར། །ཏི་སིའི་གངས་འགྲམ་མ་དྲོས་མཚོར་བྱོན་སྟེ། །རིན་ཆེན་སྣ་ཚོགས་པདྨ་ལ་བཞུགས་ནས། །སྔོན་ཚེ་མི་ནག་མདུང་ཐུང་ཅན་བསད་པས། །ཞབས་ལ་སེང་ལྡེང་ཚལ་པ་ཟུག་པ་དང༌། །ཁྱེ་འུ་བླ་མས་སངས་རྒྱས་འོད་སྲུང་ཚེ། །མགོ་རེག་ལ་ནི་བྱང་ཆུབ་ག་ལ་ཡོད། །བྱང་ཆུབ་ཐོབ་པར་དཀའ་འོ་ཞེས་སྨྲས་པས། །ལོ་གྲངས་དྲུག་དུ་དཀའ་བ་སྤྱད་པ་དང༌། །དེ་བཞིན་ཨུཏྤལ་བཀྲུ་སྨན་མནམས་པ་དང༌། །ཀུན་དུ་རྒྱུ་མོ་ཙན་ཙས་སྐུར་བ་དང༌། །མུ་སྟེགས་མཛེས་མ་རྒྱལ་བྱེད་ཚལ་བསད་དང༌། །མུ་གེའི་གྲོང་དུ་བསོད་སྙོམས་སྤྱད་པ་ལས། །མ་རྙེད་ལྷུང་བཟེད་སྟོང་པར་བྱོན་པ་དང༌། །སྐུ་སྟོད་བསྙུང་བ་བསལ་ཕྱིར་གཟིམས་པ་དང༌། །བྲམ་ཟེ་བ་ར་དྷྭ་(ཁ༢༢བ)

[Full Size]

ཛས་མི་སྙན་ཚིག །ལྔ་བརྒྱ་བརྗོད་པས་སྤྱོས་ཤིང་དམད་པ་དང༌། །དགྲ་མཐའི་གྲོང་དུ་དབྱར་གནས་མཛད་པ་ན། །རྟ་ཆས་ནས་རུལ་གསོལ་བར་བསྟན་པ་དང༌། །སེར་སྐྱ་བཅོམ་ཚེ་དབུ་བསྙུན་གྱུར་པ་སྟེ། །ལས་ཀྱི་རྣམ་པ་བཅུ་པོ་ལུང་བསྟན་མཛད། །གཞན་ཡང་དགེ་འདུན་དབེན་གྱིས་བྱེ་བ་དང༌། །ལྷས་བྱིན་གྱིས་འཕངས་རྡོ་བས་རྨ་དོད་སོགས། །ལས་ཀྱི་རྒྱུ་ནི་འདི་ཞེས་གསལ་བར་བསྟན། །འཁོར་ཀུན་གྱིས་ཀྱང་རང་རང་ལས་ཀུན་བཤད། །མཆོག་ཟུང་དེ་ཚེ་ངོ་མཚར་རྫུ་འཕྲུལ་རྩེ། །ལྷས་བྱིན་ལུས་འདིས་མནར་མེད་དམྱལ་བར་ལྷུང༌། །ཐ་མར་རང་སངས་རྒྱས་སུ་ལུང་བསྟན་མཛད། །མ་སྐྱེས་དགྲ་ནི་རྩ་བ་མེད་པ་ཡི། །དད་པ་ལ་བཀོད་སྦྱིན་བདག་མཆོག་དུ་གྱུར། །དེ་བཞིན་གདུལ་བྱའི་ཐ་མ་འདུལ་གྱི་བར། །ངོ་མཚར་མཛད་པས་འགྲོ་མང་བཏུལ་བ་སྟེ། །ལུང་དང་ལས་བརྒྱ་རྟོགས་བརྗོད་བརྒྱ་པ་དང༌། མངོན་པར་བྱུང་བའི་མདོ་སྡེ་རྣམས་ལས་གསལ། །འདི་རྣམས་ཐུན་མོང་གདུལ་བྱའི་སྣང་བ་ཡིན། །ཐུན་མོང་མིན་པ་ཐེག་ཆེན་གདུལ་བྱའི་ངོར། །བྱ་རྒོད་ཕུང་པོའི་རི་བོ་ལ་སོགས་པར། །ཕྱོགས་བཅུའི་རྒྱལ་སྲས་མཐའ་ཡས་འདུས་པ་ལ། །རྣམ་པར་ཐར་པའི་སྒོ་གསུམ་ཇི་བཞིན་སྒྲས། །མཚན་ཉིད་མེད་པའི་ཆོས་ཀྱི་འཁོར་ལོ་ནི། །ཟབ་པ་ཤེར་ཕྱིན་མདོ་སྡེ་མཐའ་ཡས་གསུངས། །དཔག་མེད་བྱང་ཆུབ་མཆོག་དུ་ལུང་བསྟན་མཛད། །ལྷ་ཡི་གནས་དང་ཀླུ་དང་མི་ཅིའི་གནས། །རྩྭ་ཅན་གྲོང་སོགས་མཐའ་ཡས་གནས་རྣམས་སུ། །བྱང་ཆུབ་སེམས་དཔའི་འདུས་པ་དཔག་ཡས་ལ། །ལ་ལར་དྲང་ངེས་རྣམ་པར་ཕྱེ་བ་དང༌། །ལ་ལར་དགོངས་དང་ལྡེམ་དགོངས་སྒྲ་གཞན་དང༌། །ལ་ལར་ཇི་བཞིན་སྒྲ་སོགས་རྣམ་མང་གིས། །ཆོས་ཀྱི་དབྱིངས་ཉིད་ཁོ་ན་ལས་བརྩམས་སྟེ། །རྒྱ་ཆེན་ཐབས་ཀྱི་ཕ་རོལ་ཕྱིན་པ་ཡི། །ཆོས་འཁོར་མཐའ་ཡས་བགྲང་ལས་འདས་(ཁ༢༣ན)

[Full Size]

པར་གསུངས། །དེ་ཚེ་ལས་ལམ་རྣམ་པ་བཅུ་སོགས་ཀྱང༌། །དེས་འདུལ་འགྲོ་ལ་ཐབས་ཀྱི་མཛད་པ་སྟེ། །རྫོགས་སངས་རྒྱས་ལ་མི་དགེའི་ལས་མེད་ཅེས། །གསང་ཆེན་ཐབས་ལ་མཁས་པའི་མདོ་རུ་གསུངས། །ལྷས་བྱིན་འཁོར་དང་བཅས་དང་དྲུག་སྡེ་དང༌། །བདུད་དང་མུ་སྟེགས་ཇི་སྙེད་སྣང་བ་ཡང༌། །སྟོན་པ་ཉིད་ཀྱི་ཐབས་ཀྱི་མཛད་པ་ཡིས། །རྒྱལ་བའི་ཆེ་བ་དབྱུང་བར་བྱེད་པ་སྟེ། །རྒྱལ་ལ་ཐོ་འཚམ་ནུས་པ་མི་སྲིད་ཅེས། །ཟབ་རྒྱས་མདོ་སྡེ་དུ་མ་དག་ལས་བཤད། །མ་སྐྱེས་དགྲ་ཡི་འགྱོད་བསལ་མདོ་སྡེ་ནི། །སྟོན་པ་མྱ་ངན་འདས་ཚེ་འཇམ་དཔལ་མཐུས། །རྒྱལ་པོའི་རྨི་ལམ་ནང་དུ་སྣང་བ་རུ། །འཇམ་དཔལ་རྩ་བའི་རྒྱུད་ལས་ལུང་དུ་བསྟན། །འདི་དག་ཐུན་མོང་ཕར་ཕྱིན་ཐེག་པ་ཡི། །སྣོད་གྱུར་རྒྱལ་སྲས་རྣམས་ལ་སྣང་བ་ཡིན༌། །ཤིན་དུ་སྐལ་བ་མཆོག་གི་གདུལ་བྱའི་ངོར། །གསང་བ་མཆོག་གི་དགྱེས་པའི་འཁོར་ལོ་ཆེ། །ཨེ་ཝཾ་གཉིས་མེད་མི་ཕྱེད་རྟག་པའི་གནས། །རྡོ་རྗེ་བཙུན་མོའི་བ་གར་སྙོམས་ཞུགས་སྟེ། །ཧེ་རུ་ཀ་དཔལ་ཁ་སྦྱོར་བདུན་ལྡན་པས། །རྡོ་རྗེ་ཐེག་པའི་རྒྱུད་སྡེ་རྒྱ་མཚོ་ནི། །ནམ་ཡང་ནུབ་པ་མེད་པའི་དུས་སུ་བསྟན། །རྣལ་འབྱོར་དབང་ཕྱུག་བྱེ་བ་བརྒྱད་བཅུ་དང༌། །རི་རབ་སུམ་བཅུ་དྲུག་གི་རྡུལ་མཉམ་པའི། །རྣལ་འབྱོར་མ་ཚོགས་སྐད་ཅིག་གིས་སྨིན་གྲོལ། །འདུས་པའི་རྒྱུད་ཆེན་གཉིས་མེད་རྣམ་རྒྱལ་དང༌། །འགྲེལ་པ་སྒྲོན་མ་གསལ་བ་ལ་སོགས་པར། །ཟས་གཙང་འཇམ་དཔལ་ཡུམ་ནི་སྒྲོལ་མ་སྟེ། །གྲགས་འཛིན་མ་ནི་ལྷ་མོ་དཔལ་ཆེན་མོ། །དགྲ་གཅན་ཟིན་སྲས་རྡོ་རྗེ་སེམས་དཔའ་སོགས། །དཀྱིལ་འཁོར་ཆེན་པོ་ཉིད་དུ་གནས་པར་བཤད། །ཆོས་ཀུན་སྐད་ཅིག་གཅིག་གི་སྣང་བ་སྟེ། །བདེན་རྫུན་སྔ་ཕྱི་ཐོག་མཐའ་ལ་སོགས་པ། །བཏགས་པས་ཡིན་གྱི་རང་གི་ངོ་བོས་མིན། །འདི་འདྲའི་ཆོས་ཉིད་ཟབ་མོ་ལ་སྐྲག་པས། །ཐེག་ཆེན་ཐེག་དམན་(ཁ༢༣བ)

[Full Size]

མདོ་སྔགས་འདི་ཐམས་ཅད། །ཇི་ལྟར་འཁྲུལ་ལྡན་སྐྱེ་བོའི་ངག་བཞིན་དུ། །གཅིག་རྗེས་གཅིག་མཐུད་ཁོ་ནར་མ་འཁྲུལ་ཞིག །ཚད་བཟུང་མེད་པའི་ཡུལ་གྱི་ཚད་འཛིན་ན། །མཁས་པར་གྲགས་ཀྱང་བྱིས་ལས་བྱིས་པར་གོ །ཇི་ལྟར་འགྲོ་མང་དུས་གཅིག་གཉིད་ལོག་ན། །སོ་སོའི་ཁམས་དང་རྐྱེན་དང་བག་ཆགས་ལས། །རྨི་ལམ་སྣང་བ་ཐ་དད་འབྱུང་མོད་ཀྱི། །ཀུན་ལ་བདེན་རྫུན་ཐོག་མཐའ་ཡོད་མ་ཡིན། །དེ་བཞིན་གདུལ་བྱའི་མོས་ཁམས་དབང་པོ་དང༌། །བག་ཉལ་ཐ་དད་མོས་པ་སྣ་ཚོགས་དང༌། །ཡེ་ཤེས་སྒྱུ་འཕྲུལ་བྱིན་གྱི་བརླབས་པའི་མཐུས། །གང་འདུལ་སྐུ་དང་དུས་དང་འཁོར་དང་ཞིང༌། །མཛད་པ་དམ་ཆོས་མཐའ་ཡས་ཅིག་ཆར་སྣང༌། །ཀུན་ཀྱང་ཡེ་ཤེས་སྒྱུ་མའི་སྣང་བར་ཟད། །བདེན་རྫུན་མེད་དེ་ཆོས་དབྱིངས་གཅིག་གི་ངང༌། །དམ་ཆོས་པདྨ་དཀར་པོ་གསུང་བའི་རིང༌། །བར་གྱི་བསྐལ་པ་ལྔ་བཅུ་འདས་པ་ནི། །དུས་བྱིན་བརླབས་པས་ཕྱི་དྲོ་གཅིག་གོ་སྙམ། །དེ་ནས་སངས་རྒྱས་འདུས་པ་ཐམས་ཅད་ནི། །ལྗགས་ཀྱི་ཆོ་འཕྲུལ་མཛད་རིང་དེ་སྙེད་འདས། །དུས་བྱིན་བརླབས་ཕྱིར་ཡུད་ཙམ་གཅིག་གོ་སྙམ། །འདི་འདྲ་དཔག་ཡས་གསུངས་པ་རྣམས་ལྟོས་ལ། །སངས་རྒྱས་བྱིས་པའི་ཆོས་སུ་མ་སྡུད་ཅིག །དེ་བཞིན་སྐུ་ཚེའི་ཚད་ཀྱང་སྣ་ཚོགས་སུ། །སྣང་སྟེ་བསྐལ་ཆེན་གྲངས་མང་བདུན་བརྒྱ་ནི། །ཤཱཀྱ་ཐུབ་པའི་སྐུ་ཚེའི་ཚད་ཡིན་ཞེས། །སེང་གེའི་སྒྲ་ཆེན་བསྒྲགས་པའི་མདོ་ལས་བཤད། །གཞན་ཡང་གདུལ་བྱ་དཔག་ཡས་དུ་མ་ཡིས། །ཅིག་ཅར་ཉིད་དུ་རང་རང་སྐལ་བ་ལྟར། །ལ་ལས་དགའ་ལྡན་གནས་ནས་འཕོ་བར་མཐོང༌། །དེ་བཞིན་ལྷུམས་ཞུགས་བལྟམས་གཟོ་རོལ་རྩེད་མཛད། །ཁབ་ནས་བྱུང་དང་དཀའ་སྤྱོད་འཚང་རྒྱ་དང༌། །ཆོས་གསུང་མྱ་ངན་འདས་དང་རིང་སྲེལ་འགྱེད། །བཀའ་སྡུད་བསྟན་པའི་གྱེས་པ་སྟོན་ལ་སོགས། །མཐའ་ཡས་བསམ་མི་ཁྱབ་པ་ཅིག་ཅར་སྣང༌། །ཇི་ལྟར་བྱང་ཆུབ་སེམས་དཔའ་ནོར་བཟང་གིས། །བྱམས་(ཁ༢༤ན)

[Full Size]

པའི་རྣམ་པར་ཐར་པ་མཐོང་བཞིན་ནོ། །ཐེག་ཆེན་དབང་བྱས་མྱང་འདས་མཛད་པ་ཡང༌། །སྙིང་རྗེ་པད་དཀར་མྱ་ངན་འདས་མདོ་དང༌། །ཁྱེ་འུ་བཞི་ཡི་མདོ་སོགས་ལས་གསུངས་ལྟར། །དཔག་ཡས་བསྟན་རྣམས་སྐྱེ་བོས་དཔག་མི་ནུས། །ཐུན་མོང་བྱིས་པའི་གདུལ་བྱའི་སྣང་ངོ་རུ། །ཀུན་དགའ་བོ་ཡིས་ཞམ་རིང་བྱས་ནས་ནི། །ཡུལ་གྱི་དབུས་དང་བྱང་ཕྱོགས་ཕལ་མོ་ཆེ། །ཞབས་ཀྱིས་བཅགས་སྟེ་སྔོན་བྱུང་དུ་མ་བསྟན། །ཁ་ཆེ་ལི་ཡུལ་བོད་སོགས་ལུང་བསྟན་མཛད། །སླར་ཡང་ལག་ན་རྡོ་རྗེས་ཞམ་རིང་བྱས། །ཡུལ་ཁམས་མཐའ་ཡས་མྱུལ་ཞིང་དུལ་བར་མཛད། །མདོར་ན་དགུང་ལོ་ཉེར་དགུ་ཁབ་ཏུ་བཞུགས། །ལོ་དྲུག་དཀའ་སྤྱད་རྫོགས་སངས་རྒྱས་གྱུར་ནས། །ཝ་ར་ཎཱ་སི་ཡངས་པ་ཅན་དང་ནི། །ས་དཀར་ཅན་དང་ལྷ་གནས་བྱིས་པ་གསོད། །ཀཽ་ཤམྦི་དང་འབྲོག་གནས་མཆོད་རྟེན་གནས། །བྱ་རྒོད་ཕུང་རི་འོད་མ་ཅན་གྱི་གྲོང༌། །སྒྲ་བཅས་དང་ནི་སེར་སྐྱའི་གྲོང་ཁྱེར་སྟེ། །བཅུ་གཉིས་པོ་རུ་ལོ་རེ་ལོ་རེ་བཞུགས། །མཉན་དུ་ཡོད་པར་ལོ་གྲངས་ཉི་ཤུ་བཞི། །སྨན་གྱི་ནགས་ཚལ་དུ་ནི་ལོ་བཞི་སྟེ། །འབར་བའི་ཕུག་གི་གནས་སུ་ལོ་ལྔ་བཞུགས། །དེ་ལྟར་དགུང་ལོ་བརྒྱད་བཅུ་བཞེས་པའི་ཚེ། །གང་གིས་རྫུ་འཕྲུལ་རྐང་པ་བཞི་པོ་ལ། །བསྟེན་ཞིང་གོམས་པ་མང་དུ་བྱས་པ་དེ། །འདོད་ན་བསྐལ་པའམ་དེ་བས་ལྷག་པར་ཡང༌། །འཚོ་ཞིང་སྡོད་ཏོ་དེ་བཞིན་གཤེགས་པ་ཡིས། །རྫུ་འཕྲུལ་རྐང་བཞི་བསྟེན་གོམས་མང་མཛད་ཕྱིར། །བཞེད་ན་བསྐལ་པའམ་དེ་བས་ལྷག་པར་ཡང༌། །བཞུགས་ཞེས་ཀུན་དགའ་བོ་ལ་ལན་གསུམ་དུ། །མྱ་ངན་མི་འདར་གསོལ་བ་འདེབས་བསྐུལ་ཀྱང༌། །བདུད་ཐིབས་ཀྱིས་ནོན་ཅི་ཡང་མི་སྨྲར་གྱུར། །སྡིག་ཅན་བདུད་ཀྱིས་འདའ་བར་གསོལ་བ་བཏབ། །སྐྱོ་བ་སྐྱེད་ཕྱིར་སྐུ་ཚེའི་ལྔ་ཆ་བཏང༌། །སྐུ་ཚེའི་འདུ་བྱེད་ཟླ་གསུམ་བྱིན་གྱིས་བརླབས། །ས་གཡོས་ཕྱོགས་འཚིག་སྐར་(ཁ༢༤བ)

[Full Size]

མདའ་ལྷུང་བར་གྱུར། །མཆོག་ཟུང་ལ་སོགས་ཉན་ཐོས་ཆེན་པོ་ནི། །མང་ཞིག་ཕུང་པོའི་ལྷག་སྤངས་མྱ་ངན་འདས། །གྲོང་ཁྱེར་ཆེན་པོ་རྩྭ་ཅན་དུ་གཤེགས་སྟེ། །ལམ་དུ་རྡོ་བ་འཕངས་པའི་མདོ་སྡེ་ཡིས། །གྱང་རྣམས་བཏུལ་སྟེ་སཱ་ལའི་ཚལ་གྱི་དབུས། །ཐ་མའི་གཟིམས་ཁྲི་ལ་བཞུགས་མགར་བའི་བུ། །ཙུནྡ་ཞེས་བྱ་སངས་རྒྱས་སྡོང་པོ་ཡི། །ཐ་མའི་བསོད་སྙོམས་འབུལ་པོར་སྨོན་པ་ལས། །བསོད་སྙོམས་བཞེས་སྟེ་ང་ནི་འདས་པའི་འོག །འོད་སྲུང་གིས་ནི་སྟོན་པའི་བྱ་བ་བྱེད། །ང་ཡི་བཀའ་རྣམས་ལེགས་པར་བསྡུ་བར་གྱིས། །འདི་སྐད་བདག་གིས་ཐོས་པའི་དུས་གཅིག་ན། །ཞེས་པས་གནས་དུས་འཁོར་སོགས་གླེང་གཞི་དང༌། །བར་དུ་མཚམས་སྦྱོར་ཐ་མར་ཐུན་གྱུར་བརྗོད། །མེས་པ་རལ་པ་ཅན་དང་ཤཱཀྱ་ལས། །གཞན་པའི་མུ་སྟེགས་རབ་ཏུ་འབྱིན་མི་བྱ། །བསླབ་པ་ཕྲན་ཚེགས་འདོད་ན་བག་ཡངས་བྱོས། །རྒན་པས་གཞོན་པ་ཕན་པས་བསྡུ་བྱ་ཞིང༌། །གཞོན་པས་རྒན་ལ་མིང་ནས་བོད་མི་བྱ། །ཞེས་གསུངས་དགྲ་གཅན་ཟིན་དང་ཀུན་དགའ་བོ། །དགེ་འདུན་ལ་བཏང་སྐུ་ཡི་སྟོད་གཡོགས་བསལ། །དགེ་སློང་དག་རྣམས་བདེ་གཤེགས་སྐུ་ལ་ལྟོས། །དེ་ལ་འདི་ནི་བདེ་གཤེགས་སྐུ་ལྟ་བའི། །ཐ་མ་ཡིན་ནོ་རེ་ཞིག་ཅང་མ་སྨྲ། །བདེན་པ་བཞི་དང་རྟེན་ཅིང་འབྲེལ་འབྱུང་དང༌། །བསླབ་པ་གསུམ་ལ་ཐེ་ཚོམ་ཡོད་ན་ཞུས། །འདུས་བྱས་ཐམས་ཅད་མི་རྟག་པ་ཡིན་ནོ། །ཟག་བཅས་སྡུག་བསྔལ་མྱང་འདས་ཞི་བ་སྟེ། །ཆོས་ཀུན་བདག་མེད་པ་འོ་དེ་ལ་འདི། །དེ་བཞིན་གཤེགས་པའི་གསུང་གི་ཐ་མའོ། །ཞེས་གསུངས་བསམ་གཏན་བཞི་དང་གཟུགས་མེད་དང༌། །འགོག་སྙོམས་རྣམས་ལ་ལུགས་འབྱུང་ལུགས་ཟློག་གིས། །ཡང་ཡང་སྙོམས་ཞུགས་བསམ་གཏན་བཞི་པ་ལས། །ཐ་མར་ཟག་མེད་དབྱིངས་སུ་མྱ་ངན་འདས། །ཉན་ཐོས་ཆེ་རྣམས་ཆོས་ཉིད་ལ་རྟོག་བྱེད། །ཚངས་སོགས་ལྷ་མིའི་འཁོར་(ཁ༢༥ན)

[Full Size]

ཚོགས་རྒྱ་མཚོ་ཀུན། །མྱ་ངན་སྨྲེ་སྔགས་སྡུག་བསྔལ་སྣ་ཚོགས་བྱེད། །ལྷ་རྫས་མཆོད་པ་དཔག་ཡས་འཛམ་གླིང་གང༌། །སྐུ་གདུང་དམ་པ་སྣམ་སྦྱར་ལྔ་བརྒྱ་དང༌། །རས་ཟུང་ལྔ་བརྒྱས་དཀྲིས་སྟེ་འཁོར་སྒྱུར་གྱི། །གདུང་ལྟར་ལྕགས་སྣོད་འབྲུ་མར་གྱིས་བཀང་བར། །བཞུགས་སྟེ་དྲི་ཞིམ་ཤིང་སྤུངས་ཞུགས་ལ་ནི། །བཞེན་པར་བརྩམས་ཚེ་མེ་སྦར་མ་ནུས་ནས། །ལྷ་མིག་ལྡན་པའི་མཆོག་གྱུར་མ་འགགས་པས། །བལྟས་སྟེ་འོད་སྲུང་ཆེན་པོ་སྟོབས་བཅུ་པ། །སྐུ་གདུང་མ་ཉམས་པ་ལ་ཕྱག་དགྱིད་འདོད། །དེ་མཐུས་ཡིན་གྱི་དེ་སྲིད་ཞོག་ཅིག་ཟེར། །འོད་སྲུང་ཆེན་པོས་ལྟས་ཆེན་རྣམས་མཐོང་བས། །སྟོན་པ་འདས་པར་ཤེས་སྟེ་ཀྱེ་མ་འོ། །འདུས་བྱས་རྣམས་ཀྱི་ཆོས་ཉིད་འདིར་ཟད་མོད། །མཆོག་དུ་དད་ལྡན་རྒྱལ་པོ་མ་སྐྱེས་དགྲས། །ཐོས་ན་ཁྲག་སྐྱུགས་མོད་ལ་འཆི་འགྱུར་བས། །དེ་ཟློག་པ་ཡི་ཐབས་ཤིག་བྱ་འོ་སྙམ། །མདུན་ན་འདོན་པ་བྲམ་ཟེ་དབྱར་བྱེད་ལ། །ཐབས་བསྟན་རིངས་པར་སཱ་ལའི་ཚལ་དུ་བྱོན། །བསོད་ནམས་ཆེན་པོ་དེ་ཡིས་མ་ཉམས་པའི། །གདུང་ལ་ཕྱག་བྱས་ཆོས་གོས་རས་ཟུང་གཞན། །ལྔ་བརྒྱ་ཕྲག་རེས་སར་དུ་ཡང་དཀྲིས་ནས། །དྲི་ཞིམ་ཙན་དན་ལ་སོགས་ཤིང་སྤུངས་ཚེ། །ཐུགས་ཀའི་དབུས་ནས་རང་བྱུང་ཡེ་ཤེས་མེས། །སྐུ་གདུང་བསྲེགས་སྟེ་ཡུངས་འབྲུ་ལྟ་བུ་ཡི། །རིང་བསྲེལ་གྱིས་ནི་ཀུན་ནས་གཏམས་པར་གྱུར། །དེ་ལ་རས་ཟུང་གཉིས་ནི་མ་ཚིག་པ། །ནང་མ་ཤོས་དང་ཕྱི་མ་ཤོས་ཡིན་ནོ། །དེ་ཚེ་མ་སྐྱེས་དགྲ་ཡི་མདུན་ན་འདོན། །དབྱར་བྱེད་ཀྱིས་ནི་འོད་སྲུང་གིས་བསྟན་ལྟར། །རྒྱལ་པོ་སྐྱེད་མོས་ཚལ་དུ་སྤྱན་དྲངས་སྟེ། །སྟོན་པའི་མཛད་པ་བྲིས་པའི་ཐང་སྐུ་བསྟན། །འདི་ནི་དགའ་ལྡན་གནས་ནས་གླང་ཆེན་གྱི། །རྣམ་པས་བབ་སྟེ་ལྷུམས་སུ་ཞུགས་པ་འོ། །ཞེས་སོགས་གོ་རིམ་བཞིན་དུ་བརྡ་སྤྲད་དེ། །ཐ་མར་འདི་ནི་གྲོང་ཁྱེར་རྩྭ་ཅན་གྱི། །སཱ་ལ་ཟུང་གི་ཚལ་དུ་ཤིང་ཟད་པའི། །(ཁ༢༥བ)

[Full Size]

མེ་ལྟར་མྱ་ངན་འདས་ཤིང་ཙནྡན་གྱི། །ཞུགས་ཀྱིས་སྐུ་གདུང་སྦྱོང་བའི་མཛད་པ་འོ། །དེ་སྐད་སྨྲས་པས་རྒྱལ་པོ་སྐྲག་གྱུར་སྟེ། །ཅི་ག་སྟོན་པ་མྱ་ངན་འདས་གྱུར་ཏམ། །དབྱར་བྱེད་ཀྱིས་ནི་ལྷ་ཉིད་དེ་སྐད་གསུངས། །བདག་ནི་དེ་སྐད་བརྗོད་པར་མི་སྤྲོ་འོ། །ཞེས་སྒྲས་ཐོས་པས་རྒྱལ་པོ་ས་ལ་འགྱེལ། །ཡུན་རིང་བརྒྱལ་ཚེ་སྔ་ནས་བཤམས་པ་ཡི། །ཏིལ་མར་གཞོང་པ་བདུན་ལས་རིམ་པས་དྲངས། །ཐ་མར་ཙནྡན་ས་མཆོག་གི་ཁུ་བའི། །གཞོང་པའི་ནང་ནས་དྲངས་པས་སོས་པར་གྱུར། །དེ་ནས་སྡིག་ཅན་ཡུལ་གྱི་གྱད་རྣམས་དང༌། །རྟོག་གཡོའི་ཡུལ་གྱི་རྒྱལ་རིགས་པུ་ལུ་ཀ །གྲོང་ཁྱེར་སྒྲ་སྒྲོགས་ཀྱི་ནི་ཀྲོ་དྷ་དང༌། །ཁྱབ་འཇུག་གླིང་ན་གནས་པའི་བྲམ་ཟེ་དང༌། །སེར་སྐྱའི་ཤཱཀྱ་ཡངས་པ་ཅན་པ་ཡི། །ལི་ཙཱ་ཝིར་བཅས་སྐུ་གདུང་ལེན་དུ་ལྷགས། །རྒྱལ་པོ་མ་སྐྱེས་དགྲས་ཀྱང་གླང་ཆེན་བཞོན། །དཔུང་ཚོགས་བཅས་པས་འགྲོ་བར་ཆས་པའི་ཚེ། །སྟོན་པ་དྲན་པས་བརྒྱལ་སྟེ་ལྷུང་གྱུར་ནས། །འགྲོ་བར་མ་ནུས་དབྱར་བྱེད་དཔུང་བཅས་བཏང༌། །གདུང་སྐལ་ལེན་པའི་སྡེ་ཚན་བདུན་ལྷགས་སྟེ། །རེ་རེ་ཞིང་ནས་རྩྭ་ཅན་གྱད་རྣམས་ལ། །སྟོན་པ་འདི་ནི་ངེད་ལ་རིང་མོ་ནས། །འཕངས་ཤིང་སྡུག་ལ་བླ་མར་གྱུར་པ་ཡིན། །དེ་ནི་ཁྱེད་ཀྱི་ཉེ་འཁོར་དུ་འདས་ཀྱིས། །ངེད་ལ་སྐུ་གདུང་སྐལ་བ་བྱིན་པར་གྱིས། །ངེད་ཀྱིས་རིན་ཆེན་མཆོད་རྟེན་བྱས་ནས་ནི། །མཆོད་པ་དགྱིད་ཅེས་སྨྲས་ཚེ་གྱད་རྣམས་ཀྱིས། །ངེད་ཀྱང་དེ་ལྟར་བྱེད་ཀྱིས་སྐུ་གདུང་ནི། །ཁྱེད་ལ་མི་སྦྱིན་ཞེས་སྨྲས་དེ་རྣམས་ཀྱིས། །འོ་ན་དམག་གིས་དབྲོག་ཞེས་དམག་དཔུང་སྡུད། །གྱད་རྣམས་ཀྱང་ནི་གཡུལ་དུ་ཆས་པར་གྱུར། །དེ་ཚེ་བྲམ་ཟེ་བྲེ་བོ་དང་མཉམ་པས། །སྟོན་པ་དེ་ནི་བཟོད་པའི་བསྔགས་པ་གསུང༌། །བཟོད་ལ་དགྱེས་ན་དེ་ཡི་སྐུ་གདུང་ཕྱིར། །གཅིག་གིས་གཅིག་ནི་གསོད་པར་མི་རིགས་ཀྱིས། །བདག་གི་སྐུ་གདུང་ཆ་བརྒྱད་(ཁ༢༦ན)

[Full Size]

མཉམ་པར་བགོ །བུམ་པ་འདི་ནི་བདག་གིས་མཆོད་པར་བྱ། །ཞེས་སྨྲས་ཀུན་ཀྱང་དགའ་ཞིང་མཐུན་གྱུར་ནས། །ཆ་བརྒྱད་བགོས་པས་ཡུངས་འབྲུ་ལྟ་བུ་ཡི། །རིང་བསྲེལ་མ་ག་དྷ་ཡི་ཁལ་རེ་བྱུང༌། །སོ་སོར་བྱིན་ནས་གདུང་གི་སོལ་བ་རྣམས། །བྲམ་ཟེ་ནྱ་གྲོ་དྷ་སྐྱེས་ཀྱིས་བླངས་སྟེ། །བཅུ་པོ་སོ་སོའི་ཡུལ་དུ་མཆོད་རྟེན་བྱས། །འོན་ཀྱང་མ་སྐྱེས་དགྲ་ཡི་སྐལ་བ་ནི། །མདོ་སྡེ་འདི་དང་ལྷན་ཅིག་གྲོང་ཁྱེར་གྱི། །ཕྱི་རོལ་ས་གཞིར་ཟ་མ་ཏོག་བཅུག་ནས། །རྒྱལ་པོ་མྱ་ངན་མེད་པའི་དོན་དུ་སྦས། །དེ་འདས་ནས་ནི་ལོ་བརྒྱ་ལོན་པ་ན། །མྱ་ངན་མེད་ཅེས་བྱ་བའི་རྒྱལ་པོ་འབྱུང༌། །དེ་ཚེ་དགེ་སློང་དབང་པོའི་སྡེ་ཞེས་པས། །ཕྱུང་སྟེ་མདོ་སྡེ་འདི་ཡིས་རྒྱལ་པོ་འདུལ། །དེ་ནས་མདོ་འདི་བྱང་གི་ཕྱོགས་རོལ་ཏུ། །འཇོག་ཀྱང་སུ་ཡིས་ཤེས་པར་མི་འགྱུར་རོ། །མྱ་ངན་མེད་ཀྱིས་རིང་སྲེལ་དེ་བླངས་སྟེ། །འཛམ་གླིང་ཁྱབ་པར་རིང་སྲེལ་ལྡན་པ་ཡི། །མཆོད་རྟེན་བརྒྱད་ཁྲི་བཞི་སྟོང་བྱེད་འགྱུར་ཞེས། །བྱང་ཆུབ་སེམས་དཔའི་ཐབས་ཀྱི་སྤྱོད་ཡུལ་གྱི། །རྣམ་འཕྲུལ་བསྟན་པའི་མདོ་ལས་ལུང་དུ་བསྟན། །སྒྲ་སྒྲོགས་པ་ཡི་རིང་སྲེལ་སྐལ་པ་ནི། །ཀླུ་ཡི་རྒྱལ་པོས་ཁྱེར་སྟེ་མཆོད་པ་བྱེད། །ཐུབ་པའི་དབང་པོའི་ཚེམས་ཀྱི་མཆེ་བ་བཞིའི། །གཅིག་ནི་བརྒྱ་བྱིན་གྱིས་ཁྱེར་ལྷ་ཡུལ་མཆོད། །གཉིས་པ་ཚིག་འཛིན་གྲོང་ཁྱེར་ཡིད་འོང་ན། །གསུམ་པ་ཀ་ལིང་རྒྱལ་པོའི་ཡུལ་ན་སྟེ། །བཞི་པ་སྒྲ་སྒྲོགས་ཀླུ་ཡི་རྒྱལ་པོས་མཆོད། །དེ་བཞིན་ཚེམས་དང་རིང་སྲེལ་སྐུ་གདུང་གཞན། །དུ་མས་ལྷ་ཀླུ་གནོད་སྦྱིན་སྲིན་པོ་དང༌། །མིའམ་ཅི་དང་མི་སོགས་འགྲོ་བའི་རིས། །དཔག་མེད་གནས་ན་སོ་སོའི་དོན་ཆེན་མཛད། །ཆོས་འབྱུང་མཁས་པའི་དགའ་སྟོན་གྱི་ཡན་ལག་གཉིས་པ་རྒྱ་གར་གྱི་སྐབས་ལས་སྟོན་པའི་མཛད་པ་ཁྱད་པར་དུ་བཤད་པའི་སྐབས་སྟེ་དང་པོའོ། །

[Full Size]

གང་ཚེ་མཆོག་ཟུང་མྱ་ངན་འདས་པའི་ཚེ། །དགྲ་བཅོམ་བརྒྱད་ཁྲི་དང་ནི་བདུན་ཁྲི་འདས། །སྟོན་པ་མྱ་ངན་འདས་ཚེ་དགྲ་བཅོམ་པ། །ཁྲི་དང་བརྒྱད་སྟོང་ཕུང་པོའི་ལྷག་མ་སྤངས། །དབང་ཐོབ་དགེ་སློང་ཉུང་ངུར་གྱུར་པ་ཡིས། །ཚེ་ཚད་བསྐལ་མང་ཐུབ་པའི་ལྷ་རྣམས་ནི། །དབང་ཡོད་དགེ་སློང་རྣམས་ཀྱང་འདས་པའི་ཕྱིར། །སྟོན་པའི་གསུང་རབ་དུད་པ་ཙམ་དུ་གྱུར། །དཀོན་མཆོག་གསུམ་པོ་སྒྲོག་པར་མི་བྱེད་ཅེས། །འཕྱ་ཞིང་མྱ་ངན་བྱེད་པ་བསལ་བའི་ཕྱིར། །ཐུབ་པའི་རྒྱལ་ཚབ་འོད་སྲུང་ཆེན་པོ་ཡིས། །བསྒོས་སྟེ་ལྷ་མིག་ལྡན་མཆོག་མ་འགགས་པས། །སྨོན་ནས་ཤེས་པའི་ཏིང་འཛིན་ལ་ཞུགས་སྟེ། །སྲིད་རྩེའི་བར་དུ་བལྟས་ནས་གཎྜི་བརྡུངས། །དགྲ་བཅོམ་ལྔ་བརྒྱར་གཅིག་གིས་མ་ཚང་འདུས། །བ་ལང་བདག་ནི་རྩ་གསུམ་ལྷ་ཡི་གནས། །ཤི་རི་ཤི་ཀའི་གཞལ་ཡས་སྟོང་པ་ན། །འགོག་སྙོམས་ལ་གནས་དེ་ཡིས་ཐོས་མ་གྱུར། །དེ་ནས་འོད་སྲུང་ཆེན་པོས་ཀུན་དགའ་བོ། །ཆུ་ཡི་ཞལ་ལྟ་པར་བསྐོས་སློབ་པ་གཞན། །ལྡོག་སྟེ་དང་པོའི་ལམ་ནས་ཡུལ་དབུས་སོང༌། །དགེ་འདུན་དང་ནི་ཀུན་དགའ་བོར་བཅས་པ། །ལྗོངས་རྒྱུ་བཞིན་པས་མ་ག་དྷ་རུ་བྱོན། །རྒྱལ་པོ་མ་སྐྱེས་དགྲ་ཡི་ཀུན་སྤྱོད་ནི། །རྟ་དང་ཤིང་རྟ་གླང་ཆེན་ལ་སོགས་པ། །ཞོན་ཚེ་སྟོན་པའི་ཉན་ཐོས་མཐོང་བ་ན། །ཅིག་ཅར་འཕྱོངས་སྟེ་ཞབས་ལ་མགོས་ཕྱག་བྱེད། །འོན་ཀྱང་བདེ་བར་གཤེགས་པས་རྟག་དགོངས་པས། །མི་གནང་དལ་བུས་ས་ལ་བབ་ལྟར་གྱུར། །དེ་ལྟར་རྒྱལ་བའི་བསྟན་ལ་གུས་པ་ཡིན། །སྐབས་འདིར་འོད་སྲུང་ཆེན་པོས་མ་ག་དྷར། །བྱོན་པ་རྒྱལ་པོ་གླང་ཆེན་བཞོན་པས་མཐོང༌། །སྟེང་ནས་འཕྱོངས་པས་འོད་སྲུང་ཆེན་པོའི་མཐུས། །མཁའ་ལས་བཟུང་སྟེ་དལ་བུས་ས་ལ་བཞག །སྟོན་པ་རྟག་དུ་མཉམ་པར་བཞག་པ་སྟེ། །བསྙེལ་བ་མི་མངའི་ཕྱིར་ན་སྔོན་གྱི་དུས། །ཁྱོད་ལ་ལྷུང་བའི་ཉེས་པར་མ་གྱུར་ཏོ། །སྟོན་པ་དེ་ནི་མྱ་ངན་འདས་ཟིན་ཞིང༌། །(ག༢༧ན)

[Full Size]

དགེ་འདུན་ལ་ནི་སྐྱེ་འཕགས་གང་ཡང་ཡོད། །དགྲ་བཅོམ་རྣམས་ཀྱང་རྟག་དུ་མཉམ་བཞག་མིན། །དེ་བས་ཕྱིན་ཆད་འཕྱོང་བར་མ་བྱེད་ཅེས། །འོད་སྲུང་ཆེན་པོས་དམ་བཅའ་བྱིན་ནས་ནི། །ལྷ་ཡི་གནས་འདིར་དམ་ཆོས་བགྲོ་བྱ་ཞེས། །བསྐུལ་བས་རྒྱལ་པོ་དགའ་ཞིང་མགུ་གྱུར་ནས། །ཡོ་བྱད་མ་ལུས་ལེགས་པར་སྦྱར་ནས་ནི། །ནྱ་གྲོ་དྷ་ཡི་ཕུག་དུ་ལྔ་བརྒྱ་ཡི། །དགེ་སློང་འདུས་པའི་དགེ་འདུན་བཞུགས་ནས་ནི། །དབྱར་གྱི་སྔ་མར་རལ་དང་འགྲུམས་པ་བཅོས། །ཕྱི་མའི་དབྱར་གྱི་ཞལ་བཞེས་མཛད་པར་གྱུར། །ཀུན་དགའ་བོ་ནི་རྒྱུན་ཞུགས་འབྲས་གནས་སྟེ། །གཞན་ཀུན་དགྲ་བཅོམ་རྣམ་ཐར་བརྒྱད་ལྡན་ཡིན། །དེ་ཚེ་འོད་སྲུང་ཆེན་པོས་ཀུན་དགའ་བོ། །སྤྱོ་བས་འདུལ་བར་མཁྱེན་ནས་ཉེས་པ་བརྒྱད། །གླེངས་སྟེ་ཇི་སྲིད་དགྲ་བཅོམ་མ་ཐོབ་བར། །དགེ་འདུན་གནས་ནས་ཕྱུང་སྟེ་བྲི་ཛའི་གྲོང༌། །བྱོན་ཚེ་རང་གི་སློབ་མའི་གདམས་ངག་ལས། །དགྲ་བཅོམ་ཐོབ་སྟེ་དགེ་འདུན་གནས་སུ་བྱོན། །མ་འགགས་པ་ནི་འཕགས་པ་བ་ལང་བདག །འབོད་པར་བསྒོས་སྟེ་རི་རབ་རྩེར་སོང་ནས། །འགོག་སྙོམས་ལས་ལངས་ཞི་བར་འདུག་པ་ལ། །འོད་སྲུང་ལ་སོགས་དགེ་འདུན་གྱིས་འབོད་ཅེས། །བསྐུལ་ཚེ་སྟོན་པ་འདས་སམ་ཞེས་དྲིས་ནས། །ཆོ་འཕྲུལ་སྣ་ཚོགས་བསྟན་སྟེ་མྱ་ངན་འདས། །རང་བྱུང་མེ་ཡིས་ལུས་ཚིག་མེ་ཕུང་གི །ཕྱོགས་བཞི་ནས་ནི་ཚིགས་བཅད་རེ་རེ་གྲག །ལྷུང་བཟེད་ཆོས་གོས་ཁྱེར་ནས་དགེ་འདུན་ལ། །ཕུལ་སྟེ་དེ་ཡི་བསམ་པ་བཟོད་གསོལ་བྱས། །འོད་སྲུང་ཆེན་པོས་བཀའ་བསྡུ་མ་ཟིན་བར། །སུ་ཡང་མྱ་ངན་འདའ་བར་མི་བྱེད་པའི། །ཁྲིམས་བཅས་དང་པོར་འཕགས་པ་ཀུན་དགའ་བོ། །གསོལ་གཉིས་ལས་ཀྱིས་བསྐོས་ནས་སེང་གེའི་ཁྲིར། །དགྲ་བཅོམ་ལྔ་བརྒྱས་སྣམ་སྦྱར་བཏིང་བ་ལ། །བཞུགས་སྟེ་བྱང་ཆུབ་སྙིང་པོར་ཁ་བལྟས་ནས། །སྟོན་པ་ཡིད་ལ་དྲན་པས་སྐྱོ་བཞིན་དུ། །འདི་སྐད་བདག་གིས་ཐོས་(ག༢༧བ)

[Full Size]

པའི་དུས་གཅིག་ན། །ཞེས་པ་བརྗོད་པ་ཙམ་གྱིས་ལྷ་རྣམས་ནི། །མྱ་ངན་ལྡང་གྱུར་ཀྱེ་མ་བཅོམ་ལྡན་འདས། །ད་ནི་ཐོས་པའི་ལམ་དུ་གཤེགས་པར་གྱུར། །སྔོན་ཚེ་ཆོས་སྟོན་བདག་གིས་མངོན་སུམ་མཐོང༌། །ད་ནི་འདི་སྐད་བདག་གིས་ཐོས་ཅེས་གླེང༌། །འདི་ཡང་དེང་དུས་ཐོས་པ་ཙམ་དུ་ཟད། །ཀྱེ་མ་འདུས་བྱས་ཐམས་ཅད་འདི་འདྲ་ཞེས། །ཤུགས་འབྱིན་མཆོད་པའི་ལས་ལ་བརྩོན་པར་གྱུར། །དགྲ་བཅོམ་ལྔ་བརྒྱར་གཅིག་གིས་མ་ཚང་བའང༌། །འདི་ལྟར་ཐམས་ཅད་མི་རྟག་པར་མཚུངས་ཞེས། །སྐྱོ་སྟེ་རང་རང་ཁྲི་ལས་བབ་སྟེ་འཁོད། །སྟོན་པས་དགེ་སློང་ལྔ་ལས་བཀའ་བསྩལ་པ། །ཅེས་སོགས་བཟླས་པ་རྣམ་པ་གསུམ་བཟློས་པས། །མདོ་སྡེའི་སྡེ་སྣོད་ལེགས་པར་བསྡུ་བར་བྱས། །ཁོ་བོས་བཟུང་བའི་མདོ་སྡེ་འདི་ལགས་ཀྱིས། །ཁྱེད་ཅག་རྣམས་ཀྱི་དེ་ཙམ་ཡིན་ནམ་དྲིས། །ཀུན་གྱིས་ངེད་ཀྱི་མདོ་སྡེ་དེ་ཙམ་སྟེ། །ཚེ་དང་ལྡན་པའི་དེ་ཙམ་ཡིན་ནམ་གསུངས། །འདི་ཁོ་ན་སྟེ་དེ་བས་ལྷག་པ་མེད། །ཅེས་སྨྲས་སེང་གེའི་ཁྲི་ལས་བབ་སྟེ་འདུག །དེ་བཞིན་ཉེ་བ་འཁོར་གྱིས་འདུལ་བ་བསྡུས། །བསླབ་གཞི་དང་པོ་གར་བཅས་སུ་ལ་བཅས། །ཞེས་སོགས་དྲིས་ལན་ཚུལ་གྱིས་གཏན་ལ་ཕབ། །དེ་ནས་འོད་སྲུང་མ་བསྐོས་རང་འཛེགས་སྟེ། །མ་མོ་ཞེས་བྱ་བདག་ཉིད་ཁོ་ནས་སྨྲ། །ཞེས་བརྗོད་མངོན་པའི་སྡེ་སྣོད་བསྡུ་བར་བྱས། །གཞུང་གི་ཚད་ནི་འབུམ་ཕྲག་རེ་རེ་ཡིན། །དགྲ་བཅོམ་རེ་རེའི་ཐུགས་ལ་ཡོད་པའི་གཞུང༌། །ཐམས་ཅད་མཐུན་ནམ་མི་མཐུན་བརྟག་པའི་ཕྱིར། །འདོན་ལ་བཀའ་ཡི་བསྡུ་བར་གྲགས་པ་སྟེ། །འདི་ནི་ཐུབ་པའི་བཀའ་བསྡུ་དང་པོ་ཡིན། །སྦྱངས་ཡོན་ལྡན་དང་དགོན་པར་གནས་པའི་མཆོག །སྟོན་པ་ཉིད་ཀྱིས་སྟན་ཕྱེད་བསྟབས་པའི་ཕྱིར། །སྔོན་ནས་སྟོན་པ་གཉིས་པར་གྲགས་པ་ཡི། །སྟོབས་བཅུའི་སྟོབས་ལྡན་འོད་སྲུང་ཆེན་པོ་དེ། །བདག་གིས་སྡེ་སྣོད་གསུམ་པོ་བསྡུས་པ་ན། །(ག༢༨ན)

[Full Size]

ཚངས་པ་མཚུངས་སྤྱོད་སུས་ཀྱང་མ་ལྡོག་ཅིང༌། །མཐུན་པར་བཀའ་ཡི་གནང་བ་བྱིན་པའི་ཕྱིར། །འདི་ནི་ཆོས་སོ་འདི་ནི་འདུལ་བའོ། །འདི་ནི་སྟོན་པའི་བསྟན་པ་འོ་ཞེས་དགོངས། །སྙིང་རྗེ་པདྨ་དཀར་པོའི་མདོ་ལས་ནི། །འོད་སྲུང་དང་ནི་ཀུན་དགའ་བོ་ཁྱོད་གཉིས། །ང་འདས་ལོ་ནི་བཞི་བཅུ་ལྷག་ཅིག་དུ། །སྟོན་པའི་མཛད་པ་བྱེད་ཅེས་ལུང་བསྟན་ལྟར། །ལོ་འགར་བསྟན་པའི་བྱ་བ་རྒྱ་ཆེན་མཛད། །སྟོན་པ་དེ་ལ་བྱས་པ་གཟོ་བྱས་སྟེ། །དེའི་གསུང་ཅི་ནུས་ཙམ་ཞིག་བསྒྲུབས་ཟིན་གྱིས། །མ་ལུས་སྒྲུབ་པར་སུས་ཀྱང་མི་ནུས་ལ། །རྣག་གི་ལུས་འདིས་སྐྱོ་ཕྱིར་མྱ་ངན་ལས། །འདའ་འོ་ཞེས་དགོངས་ཀུན་དགའ་བོ་བོས་སྟེ། །སྟོན་པས་བདག་ལ་བསྟན་པ་ཡོངས་སུ་གཏད། །བདག་གིས་ཀྱང་ནི་ཁྱོད་ལ་གཏད་པར་བྱ། །ཁྱོད་ཀྱིས་ཤ་ནའི་གོས་ཅན་རྒྱ་མཚོ་ལས། །འོངས་སྟེ་རབ་ཏུ་ཕྱུང་ལ་གཏོད་ཅིག་གསུངས། །འོད་སྲུང་མྱ་ངན་འདའ་ཚེ་མ་སྐྱེས་དགྲ། །སྦྲོན་པར་སྔོན་ཚེ་ཞལ་གྱིས་བཞེས་པའི་ཕྱིར། །ཕོ་བྲང་མདུན་བྱོན་ཆབ་སྒོ་བ་ལ་བོས། །འོད་སྲུང་རྒྱལ་པོ་ལྟ་འོ་ཞེས་སྨྲོས་ཤིག །དེ་ཡིས་རྒྱལ་པོ་གཉིད་ཀྱིས་ལོག་གྱུར་སྟེ། །གཏུམ་པས་གཉིད་ལས་སློང་མི་ནུས་ཞེས་ཞུས། །འོ་ན་གཉིད་ལས་སད་ཚེ་འོད་སྲུང་ནི། །མྱ་ངན་འདའ་ཕྱིར་སྦྲོན་ཞེས་སྨྲོས་ཤིག་གསུངས། །སྟོན་པའི་མཆོད་རྟེན་མཆེ་བར་བཅས་རྣམས་ལ། །ཐ་མའི་ཕྱག་མཛད་ལྷོ་ཡི་ཕྱོགས་ཀྱི་རི། །བྱ་གག་རྐང་གི་སྦོ་ལ་འཛེགས་བྱས་སྟེ། །རི་གསུམ་དབུས་སུ་རྩྭ་ཡི་གདིང་བ་ལ། །སྟོན་པའི་སྣམ་སྦྱར་ཕྱགས་བདར་ཁྲོད་པ་བསྒོས། །སེང་གེའི་སྟབས་བཞིན་གཡས་ངོས་ཕབ་སྟེ་གཟིམས། །བདག་ཉིད་ཆེན་པོ་བྱམས་པ་དེར་གཤེགས་ནས། །བྱེ་བ་དགུ་བཅུའི་འཁོར་ཚོགས་མ་བཏུལ་བར། །སྐུ་གདུང་ཉམས་པ་མེད་པར་བྱིན་བརླབས་སྟེ། །མྱ་ངན་འདས་ཚེ་ས་ཆེན་རིར་བཅས་གཡོས། །ལྷ་ཡི་མེ་ཏོག་ཆར་གྱིས་སྐུ་གདུང་ཡོག །གནོད་སྦྱིན་རྣམས་(ག༢༨བ)

[Full Size]

ཀྱིས་རི་བོ་གསུམ་གྱི་དབུས། །བཀབ་སྟེ་སྟེང་ནས་བྱིལ་པོར་བྱས་པར་གྱུར། །མ་སྐྱེས་དགྲ་ཡིས་རྨི་ལམ་དོན་མཐོང་ནས། །སད་ནས་སྦྲོན་པར་ཐོས་ཚེ་ས་ལ་འགྱེལ། །གལ་སྟེ་སྐུ་གདུང་དངོས་སུ་མ་མཐོང་ན། །རྒྱལ་པོ་ཁྲག་དྲོན་བསྐྱུགས་སྟེ་འཆིར་རིག་ནས། །ཀུན་དགའ་བོ་ཡིས་བྱ་རྐང་རི་ལ་ཁྲིད། །གནོད་སྦྱིན་རྣམས་ཀྱིས་རི་བསལ་སྐུ་གདུང་བསྟན། །ཞབས་ལ་ཕྱག་བྱས་སྲེག་པར་བརྩམས་པ་ན། །ཀུན་དགའ་བོ་ཡིས་འདི་ནི་འདི་ལྟར་དུ། །བྱིན་གྱིས་བརླབས་ཕྱིར་བསྐལ་མེས་ཀྱང་མི་འཇིག །མ་འོངས་རྒྱལ་བ་བྱམས་པ་སངས་རྒྱས་ནས། །དགེ་སློང་བྱེ་བ་དགུ་བཅུས་ཡོངས་བསྐོར་སྟེ། །ཚེ་ལོ་བརྒྱ་པའི་དུས་སུ་བྱུང་བ་ཡི། །རྒྱལ་བ་ཤཱཀྱ་ཐུབ་པའི་ཉན་ཐོས་མཆོག །འོད་སྲུང་ཆེན་པོའི་སྐུ་གདུང་འདི་ཡིན་སྟེ། །འདི་ལྟའི་ཡོན་ཏན་ཐོབ་པ་འཁོར་འདིར་མེད། །ཅེས་གསུངས་ཕྱག་གི་མཐིལ་དུ་བཞག་ནས་སྟོན། །ལུས་འདིས་དེ་ལྟའི་ཡོན་ཏན་ཐོབ་པ་ཞེས། །འཁོར་དེ་ཀུན་ནས་སྐྱོ་ཞིང་ཡིད་འབྱུང་འགྱུར། །འདི་ནི་སྟོན་པ་དེ་ཡིས་སྣམ་སྦྱར་ཞེས། །བསྟན་པའི་མོད་ལ་འཁོར་ཚོགས་དེ་ཐམས་ཅད། །དགྲ་བཅོམ་འཐོབ་འགྱུར་སྟོན་པའི་བྱ་བ་བྱེད། །དེ་ལྟར་གདུལ་བའི་བྱ་བ་བྱས་ཟིན་ཚེ། །སྐུ་གདུང་འདི་ཉིད་མཁར་འཕགས་སྣ་ཚོགས་པའི། །ཆོ་འཕྲུལ་བསྟན་ནས་རང་བྱུང་མེ་ཡིས་འཚིག །དེ་བས་མཆོད་པ་གྱིས་ལ་ཞོག་ཅིག་གསུངས། །སྔར་བཞིན་རི་བཀབ་སྟེང་དུ་མཆོད་རྟེན་བྱས། །རྩ་བ་མེད་པའི་དད་ལྡན་རྒྱལ་པོ་དེ། །ཀུན་དགའ་བོ་ཡི་ཞབས་ལ་མགོས་གཏུགས་ནས། །སྟོན་པས་བདག་མ་སྦྲན་པར་མྱ་ངན་འདས། །འོད་སྲུང་འདའ་བའང་བདག་གིས་མ་མཐོང་གིས། །ཁྱོད་ཀྱིས་བདག་མ་སྦྲན་པར་མྱ་ངན་ལས། །མི་དར་གསོལ་ཞེས་ཞུས་ཤིང་ཞལ་གྱིས་བཞེས། །ཐོས་པ་འཛིན་པའི་མཆོག་གྱུར་ཀུན་དགའ་བོས། །སྟོན་པ་ཉིད་ལྟར་བསྟན་པའི་བྱ་བ་མཛད། །ཁྱེ་འུ་གསེར་མདོག་མཛངས་(ག༢༩ན)

[Full Size]

ཤིང་བག་ལྡན་པ། །རབ་གཏུམ་བློན་པོའི་གཡོ་རྒྱུས་བསད་ཤིང་ལ། །བསྐྱོན་ཚེ་འཕགས་པའི་རྫུ་འཕྲུལ་བྱིན་རླབས་ཀྱིས། །བསད་ཤིང་སྟེང་དུ་ཟླ་བའི་དཀྱིལ་འཁོར་བྱུང༌། །དགྲ་བཅོམ་མཐའ་ཡས་མང་པོའི་འཁོར་ལྡན་པ། །ཟླ་བ་ཁམ་པ་ལྟ་བུར་མཁའ་ལ་གཤེགས། །ཁྱེ་འུ་དེ་ནི་རབ་བྱུང་དགྲ་བཅོམ་གྱུར། །⁽1763⁾འདི་ལ་གསེར་མདོག་གི་རྟོགས་བརྗོད་ཅེས་པ་ཡོད། སྐྱེ་བོའི་ཚོགས་མང་བྱང་ཆུབ་གསུམ་ལ་བཀོད། །ཤ་ནའི་གོས་ཅན་རྒྱ་མཚོའི་དོན་གྲུབ་པས། །དགྲ་བཅོམ་ཁྲི་ཕྲག་མང་པོའི་འཁོར་བཅས་ལ། །ལོ་ལྔའི་བར་དུ་དུས་སྟོན་ཆེན་པོ་བྱས། །ཁྱོད་ཀྱིས་བསྟན་ལ་ཟང་ཟིང་གིས་བསྡུ་བྱས། །ད་ནི་ཆོས་ཀྱིས་བསྡུ་བར་གྱིས་ཤིག་གསུངས། །རབ་བྱུང་རིག་གྲོལ་ལྡན་པའི་དགྲ་བཅོམ་བཀོད། །ཁྱོད་ཀྱིས་སྤོས་ཚོང་སྦས་པ་ཞེས་བྱའི་བུ། །ཉེ་སྦས་ལ་ནི་བསྟན་པ་གཏད་པར་བྱོས། །སྟོན་པ་གཉིས་པར་རྒྱལ་བས་ལུང་བསྟན་ནོ། །ཞེས་གསུངས་བསྟན་པ་གཏད་དེ་རྒྱལ་པོ་སྦྲན། །མྱ་ངན་འདའ་ཕྱིར་གངྒཱའི་ཆུ་དབུས་བྱོན། །རྒྱལ་པོས་གདུགས་ཀྱིས་ཡུ་བ་ཆག་རྨིས་ནས། །སད་ཚེ་སྦྲན་པར་ཐོས་ནས་དཔུང་དང་བཅས། །གངྒཱའི་ལྷོ་ཡི་འགྲམ་དུ་ཕྱིན་སྟེ་འཁོད། །ཡངས་པ་ཅན་པ་རྣམས་ལ་ལྷས་སྦྲན་ནས། །དེ་དག་དཔུང་བཅས་གངྒཱའི་བྱང་འགྲམ་འཁོད། །གཉིས་ཀས་ལུས་ཕྱེད་འཐོབ་པར་འགྱུར་བའི་ཕྱིར། །འཕགས་པའི་མཆོག་དེ་གངྒཱའི་དབུས་ན་གནས། །དེ་ཚེ་དྲང་སྲོང་རྫུ་འཕྲུལ་ལྡན་པ་ཞིག །ལྔ་བརྒྱའི་འཁོར་ལྡན་རབ་ཏུ་བྱུང་ཕྱིར་འོངས། །ཆུ་དབུས་གླིང་སྤྲུལ་ཉིན་གུང་བསྙེན་རྫོགས་ཚེ། །གསོལ་བ་བྱས་པས་ཕྱིར་མི་འོང་བ་ཐོབ། །བརྗོད་པ་གསུམ་པའི་ཐ་མར་དགྲ་བཅོམ་གྱུར། །ཆུ་དབུས་པ་འམ་ཉི་མའི་གུང་པར་གྲགས། །མཁན་པོའི་སྔུན་དུ་འདའ་བར་ཞུས་པ་ན། །བཅོམ་ལྡན་འདས་ཀྱིས་སྔོན་ནས་ཁྱོད་ལུང་བསྟན། །ཁ་ཆེའི་ཡུལ་སོང་བསྟན་པ་ཞོག་ཅིག་གསུངས། །མྱ་ངན་འདའ་ཕྱིར་ནམ་མཁའི་དབྱིངས་སུ་འཕགས། །ཆོ་འཕྲུལ་སྣ་ཚོགས་སྟོན་པ་མཛད་པ་ན། །(ག༢༩བ)

[Full Size]

མ་ག་དྷ་པ་རྣམས་དང་ཡངས་ཅན་པ། །གཉིས་ཀ་ཕན་ཚུན་སྙིང་རྗེར་ངུ་ཞིང་འབོད། །མགོན་པོ་ཚུར་གཤེགས་སྐུ་གདུང་འདིར་འོད་ཟེར། །ཡེ་ཤེས་མཚོན་གྱིས་སྐུ་གདུང་ཕྱེད་དུ་བཏང༌། །གཉི་གས་སོ་སོར་ཐོབ་པར་བྱིན་བརླབས་ནས། །ཞི་བའི་དབྱིངས་སུ་མྱ་ངན་འདས་པར་གྱུར། །གཉི་གས་གདུང་གི་མཆོད་རྟེན་བྱས་ནས་མཆོད། །ཉི་མ་གུང་པ་འཁོར་དང་བཅས་པ་ཡིས། །ཁ་ཆེའི་ཡུལ་ནི་མཚོ་རུ་གནས་པར་བྱོན། །ཉི་མའི་རྫུ་འཕྲུལ་བསྟན་པས་མཚོ་དེ་བསྐམས། །ཀླུ་རྣམས་འཁྲུགས་ནས་ཕྱགས་བདར་མཚོན་ཆ་ཡི། །ཆར་ཕབ་ལྷ་ཡི་མེ་ཏོག་ཆར་དུ་གྱུར། །མཚོན་དུག་མེ་ཡིས་གནོད་པར་མ་ནུས་ཚེ། །ངོ་མཚར་སྐྱེས་ནས་ཅི་བཞེད་དྲིས་པ་ན། །སྟོན་པས་གནས་འདི་ང་ཡི་ལུང་དུ་བསྟན། །སྐྱིལ་ཀྲུང་གང་གི་ས་ཞིག་སློང་ངོ་གསུངས། །སྐྱིལ་ཀྲུང་གཅིག་གིས་ལུང་པ་དགུ་ནོན་སྟེ། །འཁོར་ཚོགས་ཇི་སྙེད་མངའ་ཞེས་ཞུས་པ་ན། །དགྲ་བཅོམ་ལྔ་བརྒྱ་ཡོད་གསུངས་ཀླུ་ཡིས་ཀྱང༌། །དེ་ལས་དགྲ་བཅོམ་གཅིག་དུ་མ་ཚང་ཡང༌། །ཡུལ་འདི་སླར་ལ་དབྲོག་ཅེས་དམ་བཅས་ཕུལ། །གང་ན་གཏོང་པོ་ཡོད་ན་ལེན་པོ་ཡོད། །དེ་ཕྱིར་ཁྱིམ་བདག་གཞུག་པར་བྱ་འོ་གསུངས། །རང་གིས་གྲོང་ཁྱེར་བཀོད་ནས་མི་རྣམས་བཅུག །འཕེལ་ཕྱིར་སྤོས་ངད་ལྡང་བའི་རི་བོ་ནས། །གུར་གུམ་ས་བོན་བླངས་པས་རི་དེ་ཡི། །ཀླུ་རྣམས་འཁྲུགས་པ་བཏུལ་ནས་ཇི་སྲིད་དུ། །སྟོན་པའི་བསྟན་པ་གནས་པ་དེ་སྲིད་བར། །གུར་གུམ་ཕུལ་སྟེ་ཡུལ་དེར་བསྐྲུན་པར་བྱས། །དེ་ཕྱིར་ཀསྨི་རའམ་ཁ་ཆེར་གྲགས། །དགྲ་བཅོམ་ལྔ་བརྒྱ་རྟག་དུ་བཞུགས་པ་ཡིན། །འཛམ་གླིང་སྟོན་པའི་བསྟན་པ་ནུབ་པ་ན། །ཡུལ་དེའི་གུར་གུམ་སྐྱེ་བ་རྒྱུན་ཆད་ཅིང༌། །དགྲ་བཅོམ་ལྔ་བརྒྱ་གཅིག་གིས་མ་ཚང་ཚེ། །ཡུལ་དེ་སླར་ཡང་མཚོ་རུ་འགྱུར་བ་ཡིན། །ཤ་ནའི་གོས་ཅན་གྱིས་ཀྱང་བསྟན་པ་ཡི། །བྱ་བ་རྒྱ་ཆེར་མཛད་དེ་ཉེར་སྦས་ཀྱིས། །སྡེ་སྣོད་གསུམ་རིག་དགྲ་བཅོམ་ཐོབ་གྱུར་ཚེ། །བསྟན་པ་(ག༣༠ན)

[Full Size]

གཏད་ནས་མྱ་ངན་འདས་པར་གྱུར། །སྔོན་ཚེ་སྟོན་པའི་དྲུང་དུ་བྲམ་ཟེ་ནི། །སྨྲ་བའི་མཆོག་ཞིག་འོངས་སྟེ་འདི་སྐད་དུ། །གལ་སྟེ་ཤཱ་རིའི་བུ་དང་མཚུངས་པ་རུ། །ལུང་སྟོན་མཛད་ན་བདག་ནི་རབ་བྱུང་བགྱིད། །ཅེས་གསོལ་སྟོན་པས་རྫོགས་པའི་སངས་རྒྱས་རྣམས། །ཇི་ལྟར་བཀའ་བསྩལ་གཞན་དུ་འགྱུར་མི་སྲིད། །ཤེས་རབ་ལྡན་མཆོག་གཉིས་པ་མི་འབྱུང་ཞེས། །གསུངས་པས་རབ་ཏུ་མ་བྱུང་ལོག་པར་གྱུར། །སྟོན་པའི་ཞལ་ནས་ད་ལྟའི་བྲམ་ཟེ་དེ། །མ་འོངས་དུས་སུ་ང་འདས་ལོ་བརྒྱ་ན། །ཉེར་སྦས་ཞེས་འགྱུར་བསྟན་ལ་རབ་བྱུང་ནས། །སྟོན་པ་གཉིས་པའི་བྱ་བ་བྱེད་ཏོ་གསུངས། །འདི་ནི་ཁྱིམ་ན་གནས་པའི་དུས་སུ་ཡང༌། །གཟུགས་ཚོང་བཟང་མོས་བསླུ་བར་མ་ནུས་སྟེ། །ཕྱི་ནས་རྒྱལ་པོའི་ཆད་པས་སྨད་ཚོང་དེ། །རྐང་ལག་རྣ་བ་སྣ་བཏུབས་འཆི་ཀའི་ཚེ། །བདག་གིས་ཁྱོད་བལྟའི་དུས་ནི་འདི་ཡིན་ཞེས། །ཆོས་བསྟན་རྒྱུན་ཞུགས་གནས་ལ་བཀོད་པ་ཡིན། །དགྲ་བཅོམ་གྱུར་ནས་འཁོར་ཚོགས་རྒྱ་མཚོ་ལ། །ཆོས་སྟོན་ཚེ་ན་བདུད་ཀྱིས་དཀྲུག་པའི་ཕྱིར། །རེས་འགའ་མེ་ཏོག་རེས་འགའ་རིན་ཆེན་སོགས། །ཆར་ཕབ་པ་ཡིས་ཡིད་རབ་གཡེངས་པར་བྱས། །དེ་ཕྱིར་སློབ་མ་རྣམས་ཀྱིས་ཆོས་མ་རྟོགས། །ཕྱི་ནས་ལྷ་ཡི་བུད་མེད་མཛེས་མ་དག །སྤྲུལ་པས་གཡེངས་ཚེ་འཕགས་པས་བུད་མེད་དེ། །ལྷུང་བས་ཤི་ནས་ལུས་མྱགས་རུལ་བ་དང། ཁ་ཅིག་ནང་རོལ་ལ་སོགས་མི་གཙང་བ། །ཕྱི་ནས་ཤེལ་ལྟར་མཐོང་བར་བྱིན་བརླབས་པས། །འཁོར་རྣམས་སྐྱོ་ཞིང་མི་སྡུག་འདུ་ཤེས་ཐོབ། །དགྲ་བཅོམ་ཟག་པ་ཟད་པ་ཉིད་དུ་བཀོད། །འཕགས་པའི་ཕྱིར་འབྲང་ལྷུང་བཟེད་ལྷག་མ་ཟ། །དམ་ཆོས་ཉན་པའི་ཁྱི་ཞིག་ཡོད་པ་དེ། །ཤི་ཚེ་ཆོས་ཐོས་པ་ཡི་དགེ་བ་དེས། །སྡིག་ཅན་བདུད་ཀྱི་སྟན་ཕྱེད་དབང་བར་སྐྱེས། །ཁྱི་ཡང་(ག༣༠བ)

[Full Size]

བདག་དང་མཉམ་པར་བཀོད་པ་འདིས། །བླ་ན་མ་མཆིས་བདག་ལ་བརྙས་སོ་སྙམ། །འཕགས་པ་ལ་ནི་མཐོ་འཚམ་དགྱིད་བློ་སྐྱེས། །བདུད་ཀྱིས་ཁྱོད་ལ་མཆོད་པར་བྱ་འོ་ཞེས། །དབུ་ལ་མེ་ཏོག་ཕྲེང་བ་བཅིངས་པ་ལས། །བདག་གིས་ལན་དུ་མེ་ཏོག་སྦྱིན་ནོ་ཞེས། །ཁྱི་རོ་མེ་ཏོག་ཕྲེང་བར་སྤྲུལ་ནས་ནི། །བདུད་ཀྱི་མགུལ་བཏགས་སྤྲུལ་པ་བཤིག་པ་ཡིས། །ལྷ་ལུས་གཙང་ཞིང་དག་པའི་མགུལ་པ་རུ། །ཁྱི་རོ་རུལ་མྱགས་འབུས་གཞིགས་དྲི་ང་བ། །ཐོགས་པས་སྡུག་བསྔལ་མི་བཟད་ལྡན་པར་གྱུར། །རང་གི་ནུས་པ་རྫུ་འཕྲུལ་ལྟ་ཞོག་གི །ཚངས་དང་དབང་ཕྱུག་ཆེན་པོ་ལ་སོགས་པ། །ལྷ་གཞན་ཀུན་ལ་གསོལ་བ་བཏབ་གྱུར་ཀྱང༌། །སུས་ཀྱང་དེ་ནི་འདོར་བར་ཡོང་མ་ནུས། །དགྲ་བཅོམ་བྱིན་བརླབས་གཞིག་པར་མི་ནུས་ཀྱིས། །དེ་ཉིད་ལ་ནི་གསོལ་བ་ཐོབ་ཅིག་སྐད། །འཕགས་པའི་དྲུང་འོངས་འདོར་བར་གསོལ་བ་བཏབ། །བདག་གིས་སྔོན་ཚེ་རྫོགས་སངས་རྒྱས་དེ་ལ། །གནོད་མང་བགྱིས་ཀྱང་ནམ་ཡང་ལན་མ་མཛད། །ཉན་ཐོས་ཁྱེད་རྣམས་འདི་ལྟར་གདུག་པ་སྟེ། །རྩེད་མོའི་ལན་ཀྱང་འདི་ལྟར་དགྱིད་ལ་ལྟོས། །འཕགས་པས་སྨྲས་པ་བདག་དང་སྟོན་པར་ནི། །རྡུལ་དང་རི་རབ་ལྟ་བུར་བསྐྲུན་མི་ནུས། །དེ་ལྟ་མོད་ཀྱི་བདག་གིས་སྟོན་པ་དེའི། །ཆོས་ཀྱི་སྐུ་ཡི་ཕྱོགས་ནི་མཐོང་མོད་ཀྱི། །གཟུགས་ཀྱི་སྐུ་ཡང་བདག་གིས་མ་མཐོང་ངོ༌། །སྡིག་ཅན་ཁྱོད་ཀྱིས་རྒྱལ་བའི་སྐུ་གཟུགས་སུ། །སྤྲུལ་པར་ནུས་ཞེས་གྲག་གིས་བདག་ལ་སྟོན། །འཕགས་པས་ཕྱག་མི་འཚལ་བར་དམ་བཅས་ནས། །བདུད་ཀྱིས་ཐུབ་པའི་སྐུ་གཟུགས་སུ་སྤྲུལ་སྟེ། །གསེར་གྱི་རི་བོ་ལྟ་བུར་ལྷང་ངེ་འདུག །འཕགས་པས་སྟོན་པ་དངོས་སུ་འདུ་ཤེས་སྟེ། །ཕྱག་འཚལ་བརྩམས་ཚེ་སྤྲུལ་པ་མི་སྣང་གྱུར། །ཕྱིན་ཆད་དགེ་ལ་བར་ཆོད་མི་བྱེད་ན། །འདི་ནི་མེ་ཏོག་ཕྲེང་བར་བྱིན་གྱིས་རློབ། །གདུག་པའི་བསམ་པ་ནམ་སྐྱེས་ཁྱི་ཡི་རོ། །(ག༣༡ན)

[Full Size]

རུལ་པར་གྱུར་ཅིག་ཅེས་ནི་བདེན་སྟོབས་བརྗོད། །དེ་ཕྱིན་སྐྲག་པས་སངས་རྒྱས་བསྟན་པ་ལ། །བདུད་ཀྱིས་བར་དུ་གཅོད་པར་མི་ནུས་སྐད། །ཨུ་ཤི་རི་ཡི་བྲག་གི་ཕུག་པ་ནི། །མཆུ་ཞེང་དཔངས་ཟབ་གཞུ་འདོམ་ཉི་ཤུ་པར། །སློབ་མ་དགྲ་བཅོམ་ཐོབ་པ་རེ་རེ་ཡིས། །སོ་ཤིང་སོར་བཞི་པ་རེ་འཕངས་པ་ཡིས། །སོ་ཤིང་ཚོགས་ཀྱིས་ཕུག་དེ་བྱུར་བུ་རུ། །གང་ཚེ་མྱ་ངན་འདས་སྟེ་དགྲ་བཅོམ་པའི། །སོ་ཤིང་ཚོགས་དེས་གདུང་ཞུས་ལྷ་ཡིས་མཆོད། །དེ་ཡིས་དྷི་དྷི་ཀ་ལ་བསྟན་པ་གཏད། །དེ་ཡིས་ནག་པོ་དེ་ཡིས་ལེགས་མཐོང་ཆེ། །བསྟན་པའི་གཏད་རབས་བདུན་ཞེས་ལུང་ལས་བཤད། །སྟོན་པ་འདས་ནས་ལོ་གྲངས་བརྒྱ་དང་བཅུ། །ལོན་ཞིང་རྒྱལ་པོ་མྱ་ངན་མེད་པ་ཡིས། །རྒྱལ་སྲིད་བྱས་ནས་ལོ་བཅུ་འདས་པའི་འོག །ལྔ་བརྒྱའི་འཁོར་ལྡན་དགྲ་བཅོམ་གྲགས་པ་ཡིས། །ཡངས་པ་ཅན་གྱི་གཙུག་ལག་ཁང་བྱོན་ཚེ། །དེ་ན་གཉུག་མར་གནས་པའི་དགེ་སློང་ཚོགས། །རབ་མང་རྙེད་པ་བགོད་པའི་སྐལ་བ་བྱུང༌། །དྲིས་པས་རུང་མིན་གཞི་བཅུ་སྤྱོད་པར་ཤེས། །ཐུབ་པའི་བསྟན་ལ་ཆུ་བུར་བྱུང་བ་འདི། །བདག་གིས་ཡལ་བར་དོར་ན་མི་རུང་སྙམ། །ཐམས་ཅད་འདོད་དང་ནོར་ལྡན་ལ་སོགས་པ། །དགྲ་བཅོམ་མཁས་པ་དུ་མ་གྲོགས་སུ་བཙལ། །ཟླ་སྦུར་འགོག་སྙོམས་ལས་ནི་ལངས་མ་ཐག །ལྷས་སྦྲན་འོངས་སྟེ་འཕགས་པ་ཀུན་དགའ་བོའི། །སློབ་མ་ཤ་སྟག་དགྲ་བཅོམ་བདུན་བརྒྱ་འདུས། །ཆོས་རྒྱལ་མྱ་ངན་མེད་ཀྱིས་སྦྱིན་བདག་བྱས། །ཨ་ལ་ལ་ཡིས་རུང་བ་རུང་ངམ་ཅི། །མི་རུང་ཙམ་པར་དྲུག་སྡེ་ལ་བཅས་སོ། །ཞེས་སོགས་དྲིས་ལན་ཚུལ་གྱིས་གཏན་ལ་ཕབ། །རུང་མིན་གཞི་བཅུ་དེ་དག་སུས་སྤྱོད་པ། །བདག་ཅག་རྣམས་ཀྱིས་དོར་ཞེས་མཐུན་པར་སྨྲས། །སྡེ་སྣོད་གསུམ་པོ་ལྷག་ཆད་མེད་པར་བཏོན། །འདི་ནི་བདུན་བརྒྱས་ཡང་དག་བརྗོད་པའམ། །བཀའ་ཡི་བསྡུ་བ་གཉིས་པ་ཞེས་པར་གྲགས། །(ག༣༡བ)

[Full Size]

བཀའ་བསྡུ་གསུམ་པ་ལུང་ན་མེད་པའི་ཕྱིར། །འདོད་ཚུལ་མི་འདྲ་དུ་མ་སྣང་མོད་ཀྱང༌། །རྟོག་གེ་ལ་འབར་དབུ་མའི་གཞུང་ལུགས་ལས། །དེ་བཞིན་གཤེགས་པས་མདོ་ལས་ལུང་བསྟན་ལྟར། །རྒྱལ་པོ་དགའ་བོ་དང་ནི་པད་ཆེན་དུས། །སྡིག་ཅན་བདུད་ཀྱིས་བཟང་པོ་ཞེས་བྱ་བ། །དགེ་སྦྱོང་ཆ་བྱད་འཛིན་པ་ཅིག་དུ་བྱས། །རྫུ་འཕྲུལ་དུ་མས་སྐྱེ་བོའི་ཡིད་བསྒྱུར་ནས། །རྒྱལ་བའི་བཀའ་དང་དགེ་འདུན་རྣམས་དཀྲུགས་ཤིང༌། །དེ་ཡི་སློབ་མ་ཀླུ་དང་ཡིད་བརྟན་གྱིས། །དར་བར་བྱས་པས་ལྟ་སྤྱོད་མ་མཐུན་སྟེ། །ཉན་ཐོས་སྡེ་པ་བཅོ་བརྒྱད་གྱེས་པར་བཤད། །འདི་ཚུལ་ཅུང་ཟད་བདག་གིས་བརྗོད་པར་བྱ། །དེ་ཡང་དབྱིག་བཤེས་ཀྱིས་མཛད་པ། །སྡེ་པ་ཐ་དད་བཀླག་པ་ཡི། །འཁོར་ལོ་ཞེས་བྱའི་གཞུང་ཆེན་བྱུང༌། །ཕྱི་ནས་མཁས་མཆོག་དུལ་བའི་ལྷས། །དེ་དོན་བསྡུས་པའི་བསྟན་བཅོས་བརྩམས། །དེ་ལས་ཇི་སྐད་བྱུང་བ་ནི། །ཤར་དང་ནུབ་དང་གངས་རི་དང༌། །བཏགས་པར་སྨྲ་བའི་སྡེ་པ་དང༌། །འཇིག་རྟེན་འདས་པར་སྨྲ་བ་སྟེ། །ལྔ་ཚན་དགེ་འདུན་ཕལ་ཆེན་པ། །གཞི་ཀུན་པ་དང་འོད་སྲུང་སྡེ། །ས་སྟོན་པ་དང་ཆོས་སྲུང་སྡེ། །མང་ཐོས་གོས་དམར་སློབ་མ་དང༌། །རྣམ་པར་ཕྱེ་སྟེ་སྨྲ་བའི་སྡེ། །ཐམས་ཅད་ཡོད་པར་སྨྲ་བ་ཡིན། །རྒྱལ་བྱེད་ཚལ་ནགས་འཇིགས་བྱེད་གནས། །གཙུག་ལག་ཁང་ཆེན་གནས་པ་སྟེ། །གནས་བརྟན་པ་ཡི་སྡེ་པ་གསུམ། །ས་སྒྲོག་རི་དང་སྲུང་བ་པ། །གནས་མ་བུ་ཡི་སྡེ་པ་སྟེ། །ཀུན་གྱིས་བཀུར་བ་རྣམ་པ་གསུམ། །ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་ཉིད། །ཅེས་བཤད་མཐའ་འཁོབ་འདུལ་བའི་མཆོག །ཀ་ཏྱཱ་ན་ཡི་རྗེས་བཞིན་དུ། །དགེ་སློང་ཕལ་མོ་ཆེ་འདུས་པས། །ཕལ་ཆེན་པ་ཡི་སྡེ་པར་གྲགས། །རང་བཞིན་སྐད་ཀྱིས་མདོ་སྡེ་འདོན། །སྣམ་ཕྲན་ཉི་ཤུ་རྩ་ལྔ་ནས། །བདུན་གྱི་བར་འདོད་དུང་གིས་མཚན། །ཀ་ར་ལ་སོགས་མིང་མཐར་བྱེད། །(ག༣༢ན)

[Full Size]

འདི་ལ་སྡེ་ཚན་ལྔ་ཡོད་པའི། །འཇིག་རྟེན་འདས་པར་སྨྲ་བ་ཡི། །གྲུབ་པའི་མཐའ་ནི་འདི་སྐད་བརྗོད། །ཐུབ་པ་འཇིག་རྟེན་ལས་འདས་སྟེ། །རྫས་ཡོད་སྐུ་དང་ཚེ་མཐའ་ཡས། །མཉམ་གཞག་སྐད་ཅིག་གིས་ཀུན་མཁྱེན། །ཟད་མི་སྐྱེ་བློ་རྟག་དུ་མངའ། །ཆོས་འཁོར་བསྐོར་བ་ཚིག་ཡིན་ནོ། །བྱང་སེམས་རྣམས་ལ་ཉོན་མོངས་དང༌། །ནུར་ནུར་སོགས་ལས་སྐྱེ་བ་མེད། །བདེན་པ་རྣམས་ནི་ཅིག་ཅར་མཐོང༌། །མིག་ལ་སོགས་པའི་སེམས་ཀྱིས་ཀྱང༌། །འདོད་ཆགས་བྲལ་བར་འགྱུར་བ་ཡིན། །ཁམས་གོང་གཉིས་ནའང་དབང་ཤེས་ཡོད། །འོན་ཀྱང་དབང་པོས་ཡུལ་མི་འཛིན། །མཉམ་པར་བཞག་ཚེའང་ཚིག་སྨྲའོ། །སེམས་ནི་གཟུགས་ཅན་རང་རིག་པའོ། །དགྲ་བཅོམ་རྣམས་ལའང་མི་ཤེས་དང༌། །སོམ་ཉི་ཡོད་སྟེ་བསྟན་དགོས་སོ། །འབྲས་བུ་གཞན་གྱིས་བརྡ་སྤྲད་དགོས། །སྡུག་བསྔལ་སྒྲོས་ཙམ་གྱིས་ལམ་སྐྱེ། །དེ་བཞིན་དུ་ནི་འཇིག་པའང་ཡོད། །བརྒྱད་པ་ལ་ཡང་རིང་གནས་དང༌། །ཆོས་མཆོག་ལས་ཀྱང་ཉམས་པ་ཡོད། །རྒྱུན་ཞུགས་དགྲ་བཅོམ་ཉམས་མི་སྲིད། །རྒྱུན་ཞུགས་མཚམས་མེད་མ་གཏོགས་པའི། །མི་དགེ་བཅུ་ཀ་བྱེད་པ་སྲིད། །འཇིག་རྟེན་པ་ལ་ཡང་དག་པའི། །ལྟ་བའི་དབང་པོ་ཡོད་མ་ཡིན། །མ་སྲུངས་པ་ལ་བཅོས་སུ་མེད། །དྲང་བའི་དོན་ཞེས་བྱ་བ་མེད། །གཟུགས་མེད་པ་ཡི་སྐྱེ་མཆེད་བཞི། །འདུས་མ་བྱས་གསུམ་ལམ་རྟེན་འབྲེལ། །དེ་ལྟར་རྣམ་པ་དགུ་ཡོད་ཏོ། །སངས་རྒྱས་མང་པོ་ཅིག་ཅར་འབྱུང༌། །སེམས་གཉིས་ལམ་དང་ཉོན་མོངས་དང༌། །ས་མྱུག་ཅིག་ཅར་འབྱུང་བའང་ཡོད། །ལུས་ནི་སེམས་ཀྱིས་ཁྱབ་པ་སྟེ། །སེམས་ནི་འོད་གསལ་བ་ཡིན་ནོ། །ཕྲ་རྒྱས་མི་ལྡན་པ་ཡིན་སྟེ། །ཀུན་དཀྲིས་མཚུངས་པར་ལྡན་པ་ཡིན། །ཞིག་པ་དང་ནི་མ་སྐྱེས་དང༌། །བར་དེའི་སྲིད་པ་ཞེས་བྱ་མེད། །རྒྱུན་དུ་ཞུགས་པས་བསམ་གཏན་ཐོབ། །(ག༣༢བ)

[Full Size]

དྲུག་པ་ཤེས་དང་ཤེས་བྱ་མིན། །དེ་ལྟར་གཞན་དང་མི་མཐུན་པའི། །གྲུབ་མཐའ་མང་ཕྱིར་དང་པོར་བཤད། །འཇིག་རྟེན་རྣམས་དང་མི་མཐུན་ཕྱིར། །འཇིག་རྟེན་འདས་པར་སྨྲ་བ་ཟེར། །གཉིས་པ་བཏགས་པར་སྨྲ་བ་རྣམས། །སྐྱེས་བུ་བྱེད་པའི་རྩལ་དང་ནི། །དུས་མ་ཡིན་པར་འཆི་བ་མེད། །ལམ་ནི་མི་འཇིག་བསྒོམ་བྱ་མིན། །དེ་ནི་བསོད་ནམས་ཀྱིས་ཐོབ་སྨྲ། །ཤར་གྱི་རི་དང་ནུབ་ཀྱི་རིར། །གནས་པའི་སྡེ་པ་རྣམ་གཉིས་ནི། །བྱང་སེམས་ངན་འགྲོ་ལས་མ་གྲོལ། །མཆོད་རྟེན་མཆོད་པས་འབྲས་བུ་ནི། །མཆོག་དུ་འགྱུར་བ་མ་ཡིན་ཟེར། །ལྔ་པ་གངས་རིར་གནས་པ་རྣམས། །ཕྱི་རོལ་པ་ལ་མངོན་ཤེས་དང༌། །ལྷ་རྣམས་ལམ་སྒོམ་མེད་ཅེས་སྨྲ། །ཕྱི་མ་བཞི་པོ་ཐུན་མོང་དུ། །ཐུབ་པའི་དབང་པོ་ཀུན་བཏགས་པའི། །སྒོ་ནས་སློབ་པ་མིན་ཞེས་མཐུན། །འདུལ་འཛིན་མཆོག་གྱུར་ཨུ་པ་ལིའི། །རྗེས་འབྲང་ཤེས་བྱའི་གཞི་ཀུན་ནི། །རྫས་ཀྱི་གཞི་ལྔར་ཡོད་ཏོ་ཞེས། །སྨྲ་ཕྱིར་ཐམས་ཅད་ཡོད་སྨྲར་གྲགས། །མདོ་སྡེ་ལེགས་སྦྱར་སྐད་དུ་འདོན། །སྣམ་ཕྲན་དགུ་ནས་ཉེར་ལྔའི་བར། །རིན་ཆེན་ཨུཏྤལ་པདྨ་དང། །ཤིང་ལོ་ཡིས་ནི་མཚན་པར་བྱེད། །དཔལ་ལམ་བཟང་པོའམ་སྲུང་བའི་མིང༌། །འདི་ལ་སྡེ་ཚན་རྣམ་པ་བདུན། །དང་པོར་གཞི་ཡོད་སྨྲ་བ་རྣམས། །འདུས་བྱས་ཐམས་ཅད་མིང་གཟུགས་དང༌། །དུས་གསུམ་གྱིས་ནི་རྣམ་པར་བསྡུས། །འདུས་མ་བྱས་ནི་རྣམ་གསུམ་འདོད། །མི་ལྡན་པ་དང་འདུས་བྱས་རྣམས། །ཤེས་བྱ་རྣམ་པར་ཤེས་བྱའང་ཡིན། །ཉོན་མོངས་རྣམས་ནི་མཚུངས་ལྡན་སྟེ། །ཐུབ་པ་རྣམ་པ་གཉིས་སུ་འདོད། །དེ་ཡི་གཟུགས་དང་དབང་རྣམས་ནི། །གཟུགས་ཅན་ལ་ཡོད་གཞན་ལ་མིན། །མཆོད་རྟེན་མཆོད་པ་འབྲས་བུ་ཆེ། །བྱང་སེམས་ངན་འགྲོ་སྤངས་པ་ནི། །རྣམ་པ་གཉིས་སུ་འདོད་པ་ཡོད། །བསོད་ནམས་ཚོགས་སུ་འགྱུར་མི་འདོད། །(ག༣༣ན)

[Full Size]

གཉིས་པ་འོད་སྲུང་སྡེ་པ་རྣམས། །ཡོངས་སུ་ཤེས་པ་གང་ཡིན་དེ། །མ་སྤངས་པ་དང་མ་འོངས་པའི། །རྒྱུ་ལས་འབྱུང་བ་འགར་ཡང་མེད། །ཐོབ་པ་རྣམ་པར་འཇོག་པ་ནི། །ཆོས་ཀུན་རྣམ་སྨིན་ཡོད་ཏོ་ཞེས། །གསུངས་པའི་གཞུང་ལ་བསྟེན་ཏོ་ཟེར། །གསུམ་པ་ས་སྟོན་སྡེ་པ་རྣམས། །མ་འོངས་པ་དང་འདས་པ་མེད། །བདེན་པ་ཅིག་ཅར་ཁོ་ན་མཐོང༌། །ཕྱི་རོལ་ཉོན་མོངས་ཟད་པ་མེད། །ལྷ་ཡུལ་པ་ལ་ལམ་མེད་ཅིང༌། །བར་མ་དོ་ཡི་སྲིད་པ་མེད། །དགྲ་བཅོམ་བསོད་ནམས་སྐྱེ་བ་མེད། །ཕྲ་རྒྱས་སེམས་ལས་ཐ་དད་ཏོ། །འདུས་མ་བྱས་དངོས་དགུ་ཡིན་སྟེ། །མི་གཡོ་བ་དང་ལྡན་པ་གསུམ། །དགེ་སོགས་གསུམ་དང་གཉིས་པ་དང༌། །ལམ་དང་རྟེན་ཅིང་འབྲེལ་འབྱུང་སྟེ། །འདི་རྣམས་རྟག་དུ་གནས་པ་ཡིན། །དགེ་འདུན་ནང་དུ་སྟོན་པ་འདུས། །དེ་ཕྱིར་དགེ་འདུན་མཆོད་པ་མཆོག །སངས་རྒྱས་དང་ནི་ཉན་ཐོས་རྣམས། །ལམ་གཅིག་རྣམ་གྲོལ་གཅིག་པར་སྨྲ། །བཞི་པ་ཆོས་སྲུང་སྡེ་རྣམས་ནི། །རྒྱལ་བ་དགེ་འདུན་ནང་མི་འདུ། །དེ་ཕྱིར་རྒྱལ་བ་མཆོད་པ་མཆོག །རྒྱལ་དང་ཉན་ཐོས་ལམ་ཐ་དད། །ཕྱི་རོལ་པ་ལ་མངོན་ཤེས་མེད། །དགྲ་བཅོམ་ལུས་ནི་ཟག་མེད་ཟེར། །ལྔ་པ་མང་ཐོས་སྡེ་པ་རྣམས། །མི་རྟག་བདག་མེད་སྟོང་པ་དང༌། །ལམ་དང་མྱ་ངན་འདས་པ་རྣམས། །ཐུབ་པའི་འཇིག་རྟེན་འདས་ཆོས་ཡིན། །ལྷག་མ་རྣམས་ནི་འཇིག་རྟེན་པའོ། །དགྲ་བཅོམ་ལ་ཡང་སོམ་ཉི་ཡོད། །ཅེས་སོགས་རྒྱ་ཆེར་སྨྲ་བར་བྱེད། །དྲུག་པ་གོས་དམར་སློབ་མ་རྣམས། །ཁོ་ན་འཕོ་བར་སྨྲ་བ་སྟེ། །སེམས་ཅན་རྣམས་ནི་འཕོ་བ་འོ། །ཕུང་པོ་བཞི་ནི་རང་བཞིན་གཅིག །ལམ་གྱིས་ཕུང་པོ་བཀག་གོ་ཟེར། །བདུན་པ་རྣམ་པར་ཕྱེ་ནས་ནི། །སྨྲ་བའི་སྡེ་རྣམས་འདི་སྐད་དུ། །གང་ཟག་དོན་དམ་ཉིད་དུ་ཡོད། །འབྲས་བུར་མ་སྨིན་པ་ལས་གཞན། །འདས་པ་ཞེས་བྱ་ཡོད་མ་ཡིན། །འབྲས་བུ་ལས་(ག༣༣བ)

[Full Size]

གཞན་མ་འོངས་མེད། །རིགས་མི་མཐུན་པའི་ཆོས་རྣམས་ནི། །དེ་མ་ཐག་པའི་རྒྱུར་མི་འགྱུར། །གཟུགས་ནི་འདྲ་བའི་རྒྱུ་མ་ཡིན། །གཟུགས་ཀྱི་འདྲ་བའི་རྒྱུ་ཡང་མེད། །དེ་སྐད་སྨྲ་ཞིང་ལྟ་བར་བྱེད། །སྟོན་པ་གཉིས་པ་སྟོབས་བཅུ་ལྡན། །འོད་སྲུང་ཆེན་པོའི་རྗེས་ཞུགས་སྟེ། །གནས་བརྟན་རྒན་རབས་དག་འདུས་པས། །གནས་བརྟན་པ་ཡི་སྡེ་པར་གྲགས། །མདོ་སྡེ་ཤ་ཟའི་སྐད་དུ་འདོན། །སྣམ་ཕྲན་ལྔ་ནས་ཉེར་གཅིག་པར། །རྟགས་ནི་མེ་ཏོག་སོ་ཙི་ཀ །སྐྱོང་བ་ལ་སོགས་མིང་གི་མཐའ། །འདི་ལ་སྡེ་ཚན་རྣམ་པ་གསུམ། །རྒྱལ་བྱེད་ཚལ་དང་འཇིགས་བྱེད་རི། །གཙུག་ལག་ཁང་ཆེན་གནས་པ་སྟེ། །གནས་ཀྱི་དབང་གིས་ཐ་དད་ཀྱིས། །གསུམ་ག་ལྟ་བའི་རྣམ་པ་མཐུན། །ཐུབ་པ་ལེགས་སྦྱར་ཚིག་མི་གསུང༌། །བྱང་སེམས་བསྐལ་པ་གྲངས་མེད་པ། །བཅུ་ནས་སུམ་བཅུའི་བར་གྱིས་འགྲུབ། །ཐར་པ་འབའ་ཞིག་འདུས་མ་བྱས། །ཡིན་གྱིས་འདུས་མ་བྱས་གཞན་མེད། །མི་ཤེས་པ་དང་ལོག་ཤེས་མེད། །ཕྲ་རྒྱས་སེམས་ལས་ཐ་དད་ཏོ། །འགོག་སྙོམས་ན་ཡང་སེམས་ཡོད་ཅེས། །མཐུན་པར་གྲུབ་པའི་མཐའ་སྨྲ་འོ། །བསླབ་ལ་གུས་མཆོག་སྟོན་པའི་སྲས། །དགྲ་གཅན་ཟིན་གྱི་རྗེས་ཞུགས་སྟེ། །རྒྱལ་རིགས་བྲམ་ཟེའི་རིགས་ལ་སོགས། །རིགས་མཐོན་འདུས་ཕྱིར་མང་པོ་ཡིས། །བཀུར་བའི་སྡེ་པ་ཞེས་གྲགས་པ། །མདོ་སྡེ་ཟུར་ཆག་སྐད་དུ་འདོན། །སྣམ་ཕྲན་གནས་བརྟན་པ་དང་མཚུངས། །རྟགས་ནི་དཔལ་གྱི་བེ་འུ་སྟེ། །སྦས་པ་ལ་སོགས་མིང་གི་མཐའ། །འདི་ལ་སྡེ་ཚན་རྣམ་པ་གསུམ། །ཀུ་རུ་ཀུལླེའི་ཕུག་གནས་ཕྱིར། །ས་སྒྲོགས་རིགས་ཀྱི་སྡེ་ཞེས་གྲགས། །སློབ་དཔོན་སྲུང་བ་པ་དང་ནི། །གནས་མ་བུ་ཡི་རྗེས་འབྲང་ཕྱིར། །སོ་སོའི་སྡེ་པའི་མིང་དུ་གྲགས། །གསུམ་ག་གྲུབ་པའི་མཐའ་མཐུན་སྟེ། །གང་ཟག་ཕུང་པོ་མ་ཡིན་ལ། །ཕུང་པོ་ལས་གཞན་ཀྱང་མ་ཡིན། །ཕུང་པོ་རྣམས་ནི་བརྟེན་པར་འདུག །(ག༣༤ན)

[Full Size]

སྒོ་ལྔའི་རྣམ་པར་ཤེས་པ་ཡིས། །འདོད་ཆགས་སྐྱེ་བར་མི་འགྱུར་ལ། །བྲལ་བར་ཡང་ནི་མི་འགྱུར་རོ། །མཐོང་ལམ་སེམས་ཀྱི་སྐད་ཅིག་མ། །བཅུ་གཉིས་ཚུན་ནོ་དེ་ཕན་ཆད། །འབྲས་བུ་དང་ནི་བཅས་པར་གནས། །ཤེས་བྱ་བརྗོད་དུ་ཡོད་པ་དང༌། །མེད་པ་གཉིས་སུ་གནས་སོ་ཟེར། །ཁ་ཅིག་དོན་དང་ལ་ལ་གནས། །གཞན་དག་སློབ་དཔོན་ཐ་དད་ཕྱིར། །སྡེ་ཚན་རྣམ་པ་བཅོ་བརྒྱད་གྱུར། །འདི་ནི་སྡེ་པ་ཐ་དད་པ། །བསྟན་པ་བསྡུས་པ་ཇི་བཞིན་བཤད། །སློབ་དཔོན་པདྨ་འབྱུང་གནས་ཀྱི། །དགེ་ཚུལ་ལོ་དྲིར་གྱེས་པའི་ཚུལ། །རྣམ་པ་གཞན་དུ་ཡང་བཤད་དེ། །འོད་སྲུང་ས་སྟོན་ཆོས་སྲུང་དང༌། །གཞི་ཀུན་པ་སྟེ་ཡོད་སྨྲ་བཞི། །ཤར་ནུབ་དབུས་གནས་རྣམ་པར་ཕྱེ། །བཏགས་དང་འཇིག་རྟེན་འདས་སྨྲ་སྟེ། །ཕལ་ཆེན་སྡེ་པ་རྣམ་པ་དྲུག །ས་སྒྲོགས་གོས་དམར་སྲུང་བ་ལ། །མང་ཐོས་གནས་མ་བུ་པ་སྟེ། །མང་པོས་བཀུར་བ་རྣམ་པ་ལྔ། །རྒྱལ་བྱེད་ཚལ་གནས་འཇིགས་བྱེད་རི། །གཙུག་ལག་ཁང་སྟེ་གནས་བརྟན་པའི། །སྡེ་ཚན་གསུམ་སྟེ་བཅོ་བརྒྱད་བཤད། །གྱེས་ཚུལ་རྣམ་པ་གཞན་དུ་ཡང༌། །བཤད་པ་ཡོད་སྟེ་འདིར་མ་བརྗོད། །ཁ་ཅིག་ཡོད་སྨྲ་སྡེ་པ་གཞན། །འབྱུང་བའི་གཞི་ཡིན་སྟོན་པའི་སྲས། །དགྲ་གཅན་ཟིན་གྱིས་རྗེས་སུ་འཇུག །འོད་སྲུང་རྗེས་འཇུག་ཕལ་ཆེན་པ། །མང་བཀུར་ཉེ་བ་འཁོར་རྗེས་འབྲང༌། །འཕགས་པའི་རིགས་སྨྲ་གནས་བརྟན་པ། །ཀ་ཏྱ་ཡ་ནའི་རྗེས་འབྲང་ཟེར། །བྲམ་ཟེ་རྒྱ་མཚོའི་རྡུལ་གྱུར་ཚེ། །མྱ་ངན་འདས་པའི་འོག་ཏུ་ཡང༌། །གདུལ་བྱའི་དོན་ཕྱིར་བསྟན་པ་ནི། །རྣམ་པ་བཅོ་བརྒྱད་གྱེས་གྱུར་ཅེས། །སྨོན་ལམ་ཆེན་པོ་ལྔ་བརྒྱ་ཡི། །རྣམ་པ་གཅིག་ནི་འདི་ཡིན་ཕྱིར། །སྟོན་པའི་འཕྲིན་ལས་ངེས་པ་ཡིན། །འདི་ཚུལ་བདག་གིས་མདོར་བསྡུས་ནས། །བརྗོད་དགེས་ཐུབ་བསྟན་དར་རྒྱས་ཤོག །དེ་ལྟར་རྣམ་པ་བཅོ་བརྒྱད་གྱེས་པའི་ཚེ། །(ག༣༤བ)

[Full Size]

འདི་ནི་བསྟན་པ་ཡིན་གྱི་གཞན་མིན་ཞེས། །སོ་སྐྱེའི་མཁས་པ་རྣམས་ནི་རྩོད་པར་གྱུར། །སྟོན་པ་མྱ་ངན་འདས་ནས་ལོ་ཡི་གྲངས། །སུམ་བརྒྱ་འདས་ཚེ་ཁ་ཆེའི་ཡུལ་ཁམས་སུ། །རྒྱལ་པོ་ཀ་ནི་ལྷ་ཡིས་སྦྱིན་བདག་བྱས། །དགྲ་བཅོམ་བྱང་སེམས་ལྔ་བརྒྱ་ཕྲག་རེ་དང༌། །སོ་སྐྱེའི་པཎ་ཆེན་ཁྲི་དང་དྲུག་སྟོང་འདུས། །རྒྱལ་བའི་བཀའ་ཡི་བསྡུ་བ་གསུམ་པ་བྱས། །ཀྲྀ་ཀྲིའི་རྨི་ལམ་ལུང་བསྟན་མདོ་དྲངས་ནས། །གྱེས་པ་བཅོ་བརྒྱད་ཀུན་ཀྱང་བསྟན་པར་བསྡུས། །དེ་ཡང་ཁྱིམ་བདག་མགོན་མེད་ཟས་སྦྱིན་གྱི། །བུ་མོ་མ་ག་དྷ་ཡི་བཟང་མོ་ཡིས། །གྲོང་ཁྱེར་ཆེན་པོ་བུ་རམ་ཤིང་འཕེལ་དུ། །སྟོན་པ་སྤྱན་དྲངས་མུ་སྟེགས་ཕམ་བྱས་ཚེ། །ད་ལྟར་མ་ཟད་སྔོན་ཡང་བུ་མོ་འདིས། །མུ་སྟེགས་ཐབས་ཀྱིས་བཏུལ་བ་ཉོན་ཞིག་གསུངས། །སྐྱེ་རྒུའི་ཚེ་ལོ་ཉི་ཁྲིའི་དུས་ཀྱི་ཚེ། །རྫོགས་པའི་སངས་རྒྱས་འོད་སྲུང་ཞེས་པ་བྱུང༌། །དེ་ཡི་སྦྱིན་བདག་རྒྱལ་པོ་ཀྲྀ་ཀྲི་ལ། །རྨི་ལམ་ངོ་མཚར་རྣམ་པ་བཅུ་རྨིས་པ། །བྲམ་ཟེ་མཚན་མཁན་རྣམས་ལ་དྲིས་པ་དང༌། །དེ་དག་རྣམས་ཀྱིས་དེ་དོན་མ་ཤེས་ཀྱང༌། །རྒྱལ་པོའི་བུ་མོ་གསེར་ཕྲེང་ཅན་ཞེས་པ། །རྣམ་དཔྱོད་ལྡན་ཞིང་སངས་རྒྱས་བསྟན་ལ་གུས། །དེ་ལ་མུ་སྟེགས་ཅན་རྣམས་སྤ་གོང་བས། །འདི་ལན་གླན་པའི་དུས་ནི་འདི་ཡིན་སྙམ། །རྒྱལ་པོའི་གཡར་ལམ་དེ་དག་ཤིན་དུ་ངན། །རྒྱལ་པོ་ཉིད་ཀྱི་ཐུགས་ལྟར་གཅེས་པ་ཅིག །སྲོག་གི་བླུད་དུ་བཏང་ན་ཟློག་གོ་ཟེར། །སྙིང་ལྟར་གཅེས་པ་གསེར་ཕྲེང་ཅན་ཡིན་མོད། །འདི་ནི་བླུད་དུ་གཏོང་བར་མི་ཕོད་ཟེར། །འདི་ཉིད་སྲོག་གི་བླུད་མར་མ་བཏང་ན། །འགྲོངས་སམ་རྒྱལ་སྲིད་འཇིག་པར་ངེས་སོ་ཞེས། །སྨྲས་པ་བདག་ཉིད་གཅེས་ཕྱིར་ཁས་ལེན་བྱས། །བུ་མོས་ཤེས་སྟེ་ཡབ་ལ་འདི་སྐད་སྨྲས། །ཡབ་ལ་ཕན་ན་བདག་སྲོག་འདོར་སྤྲོ་ཡང༌། །འདི་དག་རྣམས་ལ་ཤེས་པ་འགའ་ཡང་མེད། །དེ་བཞིན་གཤེགས་པའི་དྲུང་དུ་ཞུས་ཤིག་ཟེར། །(ག༣༥ན)

[Full Size]

རྒྱལ་པོས་ཐུབ་པའི་གཙོ་ལ་ཞུས་པའི་ཚེ། །རྒྱལ་བའི་ཞལ་ནས་རྨི་ལམ་དེ་དག་ནི། །ཁྱོད་ལ་ངན་པར་འགྱུར་པ་མ་ཡིན་སྟེ། །མ་འོངས་སྐྱེ་རྒུའི་ཚེ་ལོ་བརྒྱ་པའི་ཚེ། །ཤཱཀྱ་ཐུབ་པ་ཞེས་བྱའི་སངས་རྒྱས་འབྱུང། །དེ་ཡི་བསྟན་པ་ཐ་མར་གྱུར་པའི་ཚེ། །ཇི་ལྟར་འབྱུང་བའི་མཚན་མ་ཡིན་གྱིས་ཉོན། །སྡོམ་ནི། གླང་གཉིས་སྤྲེའུ་གཉིས་ཙནྡན་ཕྱེ། །ལྡུམ་ར་ཁྲོན་པ་ཐབ་མོ་རས། །གླང་པོ་ཆེ་ཞིག་སྐར་ཁུང་ནས་བྱུང་སྟེ། །ལུས་ཐོན་མཇུག་མ་ཐོགས་པར་མཐོང་བ་ནི། །དེ་ཚེ་རབ་བྱུང་རྣམས་ནི་ཁྱིམ་སྤངས་ཀྱང༌། །གཙུག་ལག་ཁང་ལ་ཁྱིམ་གྱི་འདུ་ཤེས་ཀྱིས། །འདོར་བར་མི་ནུས་ཆགས་པར་འགྱུར་བའི་ལྟས། །གླང་ཆེན་ཕལ་པས་སྤོས་ཀྱི་གླང་པོ་ཆེ། །གནས་ནས་སྐྲོད་པ་མཐོང་བ་དེ་ཡང་ནི། །ཁྲིམས་འཆལ་རྣམས་ཀྱིས་བསླབ་གསུམ་པ་དག་མཆོག །གནས་ནས་འབྱིན་པར་འགྱུར་བའི་སྔ་ལྟས་ཡིན། །སྤྲེ་འུས་སྤྲེ་འུའི་ཚོགས་ལ་དབང་བསྐུར་བ། །རྨི་ལམ་ནང་དུ་མཐོང་བ་དེ་ཡང་ནི། །མཁན་སློབ་ལ་སོགས་བླ་མའི་གནས་རྣམས་ཀྱི། །མཚན་ཉིད་མི་ལྡན་བཞིན་དུ་བླ་མའི་གནས། །བྱེད་ཅིང་སློབ་མ་སྡུད་པར་འགྱུར་བའི་ལྟས། །མི་གཙང་བ་ཡིས་གོས་པའི་སྤྲེ་འུ་ཞིག །སྤྲེ་འུ་ཀུན་ལ་མི་གཙང་སྐུད་བྱེད་པ། །དེ་ནི་ཚུལ་འཆལ་རྣམས་ཀྱི་ཚུལ་ལྡན་ལ། །ཉེས་པ་གླེང་ཞིང་བསྒོ་བར་འགྱུར་བའི་ལྟས། །ཙན་དན་གོརྴཱིཥ་ཡི་སྡོང་པོ་དང༌། །ཕལ་པའི་ཤིང་སྡུམ་མགོ་སྙོམ་བྱེད་པ་ནི། །སྒྲ་ཚད་རྩིས་སོགས་མུ་སྟེགས་གཞུང་རྣམས་དང༌། །རྒྱལ་བའི་བཀའ་རྣམས་མགོ་སྙོམ་བྱེད་པའི་ལྟས། །ཕྱེ་བྲེ་གང་དང་མུ་ཏིག་བྲེ་གང་ཞིག །བརྗེ་བར་མཐོང་བ་དེ་ནི་མ་འོངས་ཚེ། །ཟང་ཟིང་ངན་ངོན་ཕྱི་ཕྱེ་དང་འདྲ་བའི་ཆེད། །མུ་ཏིག་ལྟ་བུའི་དམ་ཆོས་འཚོང་བའི་ལྟས། །དགེ་འདུན་རྣམས་ཀྱི་ལྡུམ་ར་ཕུན་ཚོགས་རྣམས། །ཁྱིམ་པ་མང་པོས་སྤྱོད་པ་མཐོང་བ་དེ། །མ་འོངས་དེ་ཚེ་དགེ་འདུན་འདུ་བའི་སྒོ། །(ག༣༥བ)

[Full Size]

ཕལ་ཆེར་གཉེན་དང་ཡུལ་ཕྱོགས་ལ་སོགས་པས། །བསྡུས་པའི་ཁྱིམ་པས་སྤྱོད་པར་འགྱུར་བའི་ལྟས། །རབ་ཏུ་སྐོམ་པའི་མི་ཞིག་ཆུ་འཚོལ་ཕྱིར། །མྱ་ངམ་ཐང་ལ་རབ་ཏུ་རྒྱུག་བྱེད་ཅིང༌། །ཡན་ལག་བརྒྱད་ལྡན་ཆུས་གང་ཁྲོན་པ་ཅིག །མི་དེའི་རྗེས་སུ་འབྲེང་ལ་མི་དེས་ཀྱང༌། །མཐོང་བཞིན་མི་འཐུང་འོན་ཀྱང་ཆུ་འཚོལ་བར། །ཁྱོད་ཀྱིས་རྨི་ལམ་ནང་དུ་མཐོང་བ་དེ། །མ་འོངས་དེ་ཚེ་ཆོས་འདོད་ཆོས་འཚོལ་ཞིང༌། །དམ་ཆོས་བསྟན་ན་དོན་དུ་མི་གཉེར་ལ། །འོན་ཀྱང་འཚོལ་བར་བྱེད་རྣམས་འབྱུང་བའི་ལྟས། །གཞན་ཡང་རྒྱལ་པོ་ཁྱོད་ཀྱི་རྨི་ལམ་ན། །མི་རྣམས་སྡེ་ཚན་སྡེ་ཚན་བཅད་ནས་ནི། །རྩོད་ཅིང་འགྱེད་ལ་འཁྲུག་པར་མཐོང་བ་དེ། །དེ་ཚེ་ལྟ་དང་གྲུབ་མཐའ་སྣ་ཚོགས་པ། །སོ་སོར་སྡེ་སྡེར་བཅད་ནས་རྩོད་པའི་ལྟས། །རྒྱལ་པོ་ཁྱོད་ཀྱི་རྨི་ལམ་ནང་རོལ་ན། །མི་ནི་བཅོ་བརྒྱད་ཀྱིས་ནི་རས་ཡུག་གཅིག །བགོས་པས་མི་རེས་རས་ཡུག་རེ་རེ་ཐོབ། །འོན་ཀྱང་རྩ་བའི་རས་ཡུག་མ་ཉམས་པར། །མཐོང་བ་དེ་ནི་ཤཱཀྱ་ཐུབ་པ་དེའི། །བསྟན་པ་རྣམ་པ་བཅོ་བརྒྱད་དུ་གྱེས་འགྱུར། །རེ་རེས་བསྟན་པ་ཡོངས་རྫོགས་རེ་རེ་འཐོབ། །རྣམ་པར་གྲོལ་བའི་རས་ཀྱང་ཉམས་པ་མེད། །དེ་ལྟར་ཁྱོད་ཀྱི་རྨི་ལམ་རྣམ་པ་བཅུ། །མ་འོངས་དེ་ཚེ་འབྱུང་བའི་ལྟས་ཡིན་གྱི། །ཁྱོད་ལ་གནོད་པར་འགྱུར་བ་མེད་ཅེས་གསུངས། །དེ་ལྟར་གསེར་ཕྲེང་ཅན་གྱི་རྟོགས་བརྗོད་མདོ། །དྲངས་སྟེ་གྱེས་པ་བཅོ་བརྒྱད་བཀའ་རུ་བསྡུས། །འདི་ནི་རྒྱལ་བའི་བཀའ་བསྡུ་གསུམ་པ་ཡིན། །འདི་ལ་གནས་བརྟན་པ་ཁོ་ན་སྡེ་པའི་རྩ་བར་འདོད་པ་དང་ཐམས་ཅད་ཡོད་སྨྲ་རྩ་བར་འདོད་པ་སོགས་བཤད་ལུགས་མང་དུ་ཡོད་ཀྱང་གསང་སྔགས་སུ་དགྱེས་རྡོར་དང་སམྦྷུ་ཊར་རྩ་འཁོར་ལོ་བཞི་ལ་སྡེ་པ་བཞིའི་མིང་དུ་གསུངས་པ་དང་དུས་འཁོར་དུ་ཞལ་བཞི་ལས་སྡེ་པ་བཞི་སྤྲོས་པ་སོགས་ཡོད་པས་རྩ་བའི་སྡེ་པ་བཞི་ཁོ་ནར་འཐད་པ་ཡིན་ནོ། །མཁས་པ་ཆེན་པོ་ས་སྐྱ་པཎྜི་ཏས། །ལྷ་ཆེན་ཞེས་བྱ་མཚམས་མེད་གསུམ་བྱས་པས། །རང་ཞུགས་རྟགས་བླངས་དགྲ་བཅོམ་དུ་གྲགས་སྟེ། །འཁོར་མང་བསྡུས་པས་བསྟན་པ་དཀྲུགས་བྱས་སྟེ། །སངས་རྒྱས་འདས་འོག་སོ་སྐྱེས་འཁོར་བསྡུས་པ། །འདི་ལས་མང་བ་མེད་ཅེས་བཤད་སྣང་བ། །འདི་ཡི་ཁུངས་ནི་གང་ཡིན་དཔྱད་པར་འོས། །རྗེས་འབྲང་(ག༣༦ན)

[Full Size]

འགའ་ཡིས་རྟོག་གེ་འབར་བ་ལས། །བཤད་པའི་བཟང་པོ་དང་ནི་གཅིག་པ་སྟེ། །དེ་ཡིས་བཟང་པོ་ཡིན་པར་ཁས་བླངས་སོ། །ཞེས་སོགས་ཐོབ་པའི་ཕྱིར་ཞེས་བྲིས་མོད་ཀྱང༌། །བདུད་ཀྱིས་སྤྲུལ་པ་བཟང་པོའི་མིང་ཅན་དེས། །ཆོ་འཕྲུལ་སྣ་ཚོགས་བསྟན་ནས་སོ་སྐྱེ་རྣམས། །ཡིད་བསྒྱུར་མགུ་ཚེ་ལམ་གཞན་སྟོན་པར་བཤད། །ལྷ་ཆེན་དེ་ལ་རྫུ་འཕྲུལ་མི་ལྡན་ཕྱིར། །ད་ནང་རྫུ་འཕྲུལ་ཉམས་ཞེས་རྫུན་རིབ་ཀྱིས། །འཁོར་རྣམས་བསླུས་པར་རབ་དབྱེ་ཉིད་ལས་བྱུང༌། །སྤྲུལ་པ་ལ་ནི་སེམས་མེད་པར་གསུངས་ཕྱིར། །སྤྲུལ་པ་ཡིན་ན་སོ་སྐྱེར་ཡང་མི་རིགས། །དེས་ན་རྫུ་འཕྲུལ་མེད་པའི་ལྷ་ཆེན་དེ། །རྫུ་འཕྲུལ་ལྡན་པའི་བཟང་པོ་མ་ཡིན་ནོ། །དེ་ལྟར་བཀའ་བསྡུ་རིམ་པ་གསུམ་པོ་ནི། །ཐུན་མོང་ཐེག་པའི་བཀའ་ཡི་བསྡུ་བ་སྟེ། །འདི་ལ་བཀའ་བསྡུ་གསུམ་པ་ཕན་མ་གྲགས། །ཐེག་ཆེན་ཁོ་ནའི་བཀའ་ཡི་བསྡུ་བ་ནི། །གྲོང་ཁྱེར་རྒྱལ་པོའི་ཁབ་ཀྱི་ལྷོ་ཕྱོགས་རི། །བི་མ་ལ་སྭ་བྷཱ་ཝ་ཞེས་བྱ་བར། །རྒྱལ་བའི་སྲས་པོ་འབུམ་ཕྲག་བཅུ་འདུས་སྟེ། །འཇམ་དཔལ་བྱམས་པ་ཕྱག་རྡོར་རྣམ་གསུམ་གྱིས། །མདོ་སྡེ་འདུལ་བ་མ་མོ་བསྡུས་པར་གྲགས། །འདི་ཚེ་སྡེ་སྣོད་རེ་རེ་ལྟ་ཅི་སྨོས། །ཆོས་ཀྱི་རྣམ་གྲངས་རེ་རེའང་ཚད་མེད་དེ། །ཆོས་ཀྱི་རྣམ་གྲངས་ཀུན་ནས་མིག་གཅིག་བུའི། །ཚད་ཀྱང་གཟུང་མི་ནུས་པར་གསུངས་ཕྱིར་རོ། །འདི་ལ་བསྡུ་བ་གཉིས་པ་སོགས་མ་གྲགས། །རྡོ་རྗེ་ཐེག་པའི་རྒྱུད་སྡེ་རྒྱ་མཚོ་རྣམས། །ཞུ་བ་པོ་དང་མཁའ་འགྲོའི་ཚོགས་རྣམས་ཀྱིས། །བསྡུས་སྟེ་ཨོ་ཌྱན་སྤྲུལ་པའི་ཞིང་ལ་སོགས། །ནུབ་པ་མེད་པའི་ཞིང་ན་རྟག་པར་གནས། །དྲང་བའི་དོན་གྱིས་གདུལ་བྱའི་སྣང་བ་བཞིན། །བཀའ་ཡི་སྡུད་པོའང་དུ་མར་སྣང་བ་སྟེ། །ཅུང་ཟད་ངེས་པའི་དོན་དུ་བཀའ་མ་ལུས། །སྡུད་པོ་གསང་བདག་ཕྱག་རྡོར་ཁོ་ན་སྟེ། །མདོ་ལས་སྨོན་ལམ་མཐུ་ཡིས་ཡིན་པར་བཤད། །དུས་ཀྱི་འཁོར་ལོར་རྒྱལ་(ག༣༦བ)

[Full Size]

བ་ཀུན་གྱི་སྙན། །གཅིག་བསྡུས་སེམས་དཔའ་ཕྱག་རྡོར་ཡིན་པར་གསུངས། །ཤིན་དུ་ངེས་པའི་དོན་དུ་སྟོན་པོ་དང༌། །སྡུད་པོ་བསྟན་བྱའི་ཆོས་རྣམས་ཐམས་ཅད་ཀྱང༌། །ཡེ་ཤེས་གཅིག་ལས་རྣམ་དབྱེར་མེད་པ་སྟེ། །ཐམས་ཅད་ལྷན་ཅིག་སྐྱེས་དངོས་གཅིག་དུ་བསྟན། །དེ་ལྟར་བསྡུ་བྱའི་བསྟན་པ་རིན་ཆེན་ནི། །རྫོགས་སངས་རྒྱས་ཀྱིས་འོད་སྲུང་ཆེན་པོར་གཏད། །ཀུན་དགའ་ཤ་ནའི་གོས་ཅན་ཉེར་སྦས་དང༌། །དྷི་དྷི་ཀ་དང་དེ་ནས་བྷི་བྷི་ཀ །བུ་ཧ་ནནྟི་བུདྡྷ་མེ་ཏ་དང༌། །རྩིབས་དང་སུ་ན་ཤ་ཏ་རྟ་སྐད་དང༌། །ཤི་བ་ལ་དང་ཀླུ་སྒྲུབ་འཕགས་པ་ལྷ། །རཱ་ཧུ་ལ་དང་སངྒྷ་ནནྟི་དང༌། །དགྲ་བཅོམ་ག་ཡ་ཤ་དང་ཀུ་མ་ར། །ཤ་ཡ་ཏ་དང་བ་སུ་བནྡུ་དང། །མ་ནེ་ཏ་དང་ཧ་ཀ་ལི་ཀ་ནེ། །སེང་གེའི་བར་དུ་རིམ་གྱིས་གཏད་ཏོ་ཞེས། །ལངྐར་གཤེགས་པའི་མདོ་ཡི་འབྲེལ་པར་བྱུང༌། །ཐུན་མོང་ཐེག་པའི་བསྟན་པའི་གཏད་རབས་ཡིན། །ཐེག་ཆེན་ཐུན་མོང་མིན་པའི་བསྟན་པ་ནི། །འཇམ་དཔལ་གྱིས་ནི་འཕགས་མཆོག་ཀླུ་སྒྲུབ་དང༌། །བྱམས་པས་ཐོགས་མེད་རྗེས་སུ་བཟུང་མཛད་དེ། །ཟབ་མོ་ལྟ་དང་རྒྱ་ཆེན་སྤྱོད་པའི་རྒྱུད། །དཔལ་ལྡན་ཨ་ཏི་ཤ་ཡི་བར་ཉིད་དུ། །འཕགས་པའི་འབྱུང་གནས་རྒྱ་གར་དེ་ཉིད་དུ། །བསྟན་པའི་གཏད་རབས་རྒྱུན་མ་ཆད་པ་སྟེ། །ཇོ་བོའི་རྣམ་ཐར་ལམ་ཡིག་ཆེན་མོ་ལས། །དཔལ་ལྡན་ན་རོ་པ་ཡིས་ཇོ་བོ་ལ། །བསྟན་པ་གཏད་ནས་ལྷོ་ཕྱོགས་བྱོན་ཞེས་བཤད། །ན་རོ་ཞབས་ཀྱིས་མངའ་བདག་མར་པ་ལ། །ཁ་བ་ཅན་གྱི་རྒྱལ་ཁམས་འདུལ་བའི་ཕྱིར། །ལུང་བསྟན་རྒྱལ་ཚབ་བསྐོས་ཞེས་གསལ་བར་བྱུང༌། །དེ་ཕྱིར་དཔལ་ལྡན་ན་རོའི་ཞབས་དེ་ཡིས། །ཐུབ་པའི་བསྟན་པ་རྣམ་པ་གཉིས་ཕྱེ་སྟེ། །ཐུན་མོང་ཐེག་པའི་བསྟན་པ་རྒྱ་མཚོ་ནི། །ཇོ་བོ་ཨ་ཏི་ཤ་ཡི་ཕྱག་དུ་གཏད། །ཡང་སྙིང་རྡོ་རྗེ་ཐེག་པའི་སྒྲུབ་པའི་བསྟན། །མར་པ་ཆོས་ཀྱི་བློ་གྲོས་ལ་གཏད་ནས། །གཉི་གས་བྱང་ཕྱོགས་(ང༣༧ན)

[Full Size]

འདུལ་བར་ལུང་བསྟན་མཛད། །རྒྱལ་བས་ཤེས་ཕྱིན་མདོ་ལས་ཟབ་མོའི་དོན། །བྱང་གི་ཕྱོགས་སུ་རྒྱས་པར་ལུང་ཡང་བསྟན། །བཀའ་ཕྱག་གཉིས་ཀའི་བརྒྱུད་པའི་ཆུ་བོ་ནི། །ཏིང་འཛིན་རྒྱལ་པོའི་མདོ་ལས་ལུང་བསྟན་པའི། །དཔལ་ལྡན་སྒམ་པོ་པ་ལ་གཅིག་དུ་འདྲེས། །དེ་ལས་བྱུང་བའི་བསྟན་པ་རིན་ཆེན་ནི། །དངོས་དང་ཡན་ལག་དུ་མར་བཅས་པ་ཡིས། །དེང་སང་དུ་ཡང་ཅུང་ཟད་ཙམ་ཞིག་གནས། །བཀའི་བསྡུ་བ་ཁྱད་པར་དུ་བཤད་པའི་སྐབས་སྟེ་གཉིས་པའོ།། །།བསྐལ་བཟང་སངས་རྒྱས་བཞི་པ་ཤཱཀྱའི་ཏོག །འདི་ཡི་སྐུ་གསུམ་རྟེན་མཆོག་བྱུང་ཚུལ་ནི། །སྒྲ་སྒྲོགས་རྒྱལ་པོ་ཨུ་ཏྲ་ཡ་ན་དང༌། །གཟུགས་ཅན་སྙིང་པོ་ཕན་ཚུན་མ་མཐོང་བའི། །མཛའ་བོར་བྱས་སྟེ་སྐྱེས་ཀྱིས་འགྲུལ་བའི་ཚེ། །རིན་ཐང་མེད་པའི་ནོར་བུའི་ཁྲབ་བསྐུར་བས། །གཟུགས་ཅན་སྙིང་པོས་སྐྱེས་ལན་མ་རྙེད་ནས། །སྟོན་པར་གསོལ་བས་རས་ལ་རྒྱལ་བའི་སྐུ། །མདོར་བསྡུས་བཀར་བཅས་བྲིས་ལ་སྐུར་ཞིག་གསུངས། །སྟོན་པའི་གཟི་བྱིན་ཉི་འོད་ལྟར་འབར་བས། །གཟོ་བོ་རྣམས་ཀྱི་འབྲི་བར་མ་ནུས་ནས། །ཁྲུས་རྫིང་སྟེང་བཞུགས་ཆུ་ནང་ཤར་བ་ཡི། །སྐུ་གཟུགས་ཇི་བཞིན་རས་ལ་རི་མོར་བྲིས། །སྟེང་དང་འོག་དུ་རྟེན་འབྲེལ་ལུགས་འབྱུང་ལྡོག །གསུམ་ལ་སྐྱབས་འགྲོ་བསླབ་པའི་གཞི་ལྔ་དང༌། །ཕན་ཡོན་བཅས་བྲིས་གསེར་དངུལ་ཟངས་མ་ཡི། །དོང་བུར་བཅུག་སྟེ་གླང་ཆེན་སྟེང་བཞག་ནས། །འདི་ནི་འཇིག་རྟེན་གསུམ་ལས་འདས་པའི་སྐྱེས། །ཤེད་མཐུན་དགྱེས་པ་ཁྱོད་ལ་བདག་གིས་བསྐུར། །ཁྱོད་ཀྱིས་དཔུང་ཚོགས་ཡན་ལག་རྣམ་བཞིས་གསུས། །གོ་སྐབས་ཡངས་པར་སྤོས་ཆུ་མེ་ཏོག་གཏོར། །གདུགས་བཅས་སེང་གེའི་ཁྲི་ལ་བཞུགས་གསོལ་ནས། །དད་ཅིང་གུས་པས་(ང༣༧བ)

[Full Size]

འདུད་དེ་ཞལ་ཕྱེ་ཞེས། །ཕྲིན་ཡིག་བསྲིངས་སྟེ་རྒྱལ་པོས་ཞལ་ཕྱེ་ཚེ། །ཚོང་པ་ཀུན་གྱིས་སངས་རྒྱས་ཕྱག་འཚལ་ཞེས། །ཐོས་པས་རྒྱལ་པོ་སྤུ་ལངས་མཆི་མ་གཡོས། །བཀའ་ཡི་ཚིགས་སུ་བཅད་པ་རྣམས་བཀླགས་པས། །སྐྱབས་སུ་སོང་སྟེ་དགེ་བསྙེན་ཉིད་དུ་གྱུར། །བདེན་པ་མཐོང་སྟེ་ཆོས་མིག་ཐོབ་པར་གྱུར། །ཐུབ་པའི་བྲིས་སྐུ་ཆུ་ལོན་མ་ཞེས་གྲགས། །ཡང་ནི་སེར་སྐྱར་དམ་ཆོས་གསུང་བའི་ཚེ། །ཤཱཀྱ་མིང་ཆེན་གྱི་ནི་མཆིས་བྲང་གིས། །བྲན་མོ་མུ་ཏིག་དོ་ཤལ་ལེན་པར་བསྐུལ། །ཀྱེ་མ་བྲན་མོའི་དངོས་པོ་སྡུག་བསྔལ་སྟེ། །དམ་ཆོས་འདི་འདྲ་ཉན་པའི་སྐལ་མེད་སྙམ། །དད་ཅིང་གདུང་ཤུགས་བཅས་པས་ལ་གོར་སོང༌། །སྟོན་པས་དེ་ཡི་དད་པ་དགོངས་ནས་ནི། །དམ་ཆོས་ཚིགས་བཅད་གཅིག་ཅིག་བྲིས་སྟེ་བསྐུར། །དགའ་མགུ་དང་བའི་སེམས་ཀྱིས་སོང་བ་དེ། །ལམ་དུ་བ་དྲུས་ཤིག་གིས་བརྡུངས་སྟེ་ཤི། །དེ་མ་ཐག་དུ་སིངྒྷ་ལ་ཡི་ཡུལ། །རྒྱལ་པོའི་བཙུན་མོ་མཆོག་གི་མངལ་དུ་ཞུགས། །བཙས་ཚེ་མཁའ་ལས་མུ་ཏིག་ཆར་པ་བབ། །མིང་ཡང་མུ་ཏིག་ཅན་ཞེས་བྱ་བར་གྱུར། །ཆེར་སྐྱེས་ཚེ་ན་ཡུལ་དབུས་ཚོང་པ་ཡིས། །རྒྱལ་བའི་བཀའ་ལ་ཁ་ཏོན་བྱས་པ་ཐོས། །བཟང་པོའི་གླུ་དེ་ད་དུང་ལོང་ཞིག་སྐད། །འདི་ནི་གླུ་མིན་སངས་རྒྱས་བཀའ་ཡིན་སྨྲས། །སངས་རྒྱས་ཞེས་བྱ་ཐོས་པ་ཙམ་གྱིས་ནི། །བ་སྤུ་ལྡང་ཞིང་མཆི་མ་འཁྲུག་པ་ཡིས། །སླར་དྲིས་ཚོང་པས་ཡོན་ཏན་ཅི་ནུས་བརྗོད། །བདག་ནི་སྲིད་པའི་གནས་ལས་དྲང་གསོལ་ཞེས། །རང་གིས་ལག་བདར་འཕྲིན་ཡིག་བྲིས་སྟེ་བསྐུར། །སྟོན་པས་བཞེས་ནས་རས་ཀྱི་ངོས་ལ་ནི། །འོད་ཟེར་བཏང་བཞིན་རིག་བྱེད་པ་ཡིས་བྲིས། །བཀའ་ཡི་ཚིགས་སུ་བཅད་པ་དང་བཅས་བསྐུར། །མཐོང་བའི་མོད་ལ་བུ་མོས་བདེན་པ་རྟོགས། །གླིང་དེའི་མི་ཀུན་རྒྱལ་བའི་བསྟན་ལ་བཙུད། །དྲིན་ལན་དཀོན་མཆོག་གསུམ་ལ་མུ་ཏིག་མཆོག །མ་ག་དྷ་ཡི་(ང༣༨ན)

[Full Size]

བྲེ་ཆེན་རེ་རེ་ཕུལ། །ཐུབ་པ་འོད་ཟེར་མ་ཞེས་གྲགས་པ་ཡིན། །འདི་དག་བསྟན་འདིའི་བྲིས་སྐུའི་ཐོག་མ་ཡིན། །ཁྱིམ་བདག་དད་ལྡན་རྣམས་ཀྱིས་གདུགས་ཚོད་ལ། །དགེ་འདུན་སྤྱན་དྲངས་སྟོན་པ་མ་གཤེགས་ཚེ། །གྲལ་གྱི་ཐོག་མ་མི་བརྗིད་གྱུར་མཐོང་ནས། །ཁྱིམ་བདག་ཆེན་པོ་མགོན་མེད་ཟས་སྦྱིན་གྱིས། །སྟོན་པས་གནང་ན་བདག་གིས་རིན་ཆེན་ལས། །སྟོན་པའི་སྐུ་བགྱིས་གྲལ་གྱི་ཐོག་མ་ལ། །བཞུགས་སུ་གསོལ་ཞེས་གསོལ་བཏབ་གནང་བ་ཐོབ། །རང་ཉིད་གཏེར་ཀུན་མཐོང་བའི་མིག་ལྡན་ཡང༌། །སྙིང་རྗེས་གཞན་དོན་ཁོ་ནར་ཞུགས་པ་དེས། །གླང་ཆེན་ལ་བཞོན་གདུགས་དང་རྒྱལ་མཚན་བསྒྲེངས། །དུང་དཀར་ལ་སོགས་རོལ་མོར་ལྡན་པ་ཡིས། །དབུལ་པོའི་སྲང་སོགས་གྲོང་ཁྱེར་ཀུན་ཞུགས་སྟེ། །སྐུ་གཟུགས་ཕྱིར་དུ་ཀུན་ལས་སློང་མོ་བསླངས། །རྒྱལ་བའི་སྐུ་གཟུགས་མང་དུ་བྱས་པར་གསུངས། །དེ་རྣམས་སྐུ་གཟུགས་འབུར་དོད་ཐོག་མ་ཡིན། །དེ་དག་འདུལ་བའི་ལུང་ལས་ཡང་དག་བཤད། །གསུང་རྟེན་ཐོག་མ་འཁོར་ལོ་བར་པའི་ཚེ། །བརྒྱ་བྱིན་གྱིས་ནི་གསེར་གྱི་གླེགས་བུ་ལ། །བཻ་དཱུརྻ་སྔོན་བཞུས་པས་ཤེས་ཕྱིན་བྲིས། །ལྷ་ཡི་གནས་སུ་མཆོད་ཅིང་བཀུར་བར་གསུངས། །གཞན་ཡང་རྒྱལ་མཚན་རྩེ་མོའི་དཔུང་རྒྱན་སོགས། །གླེགས་བམ་བྱས་སྟེ་རྒྱལ་མཚན་རྩེར་བཏགས་པས། །ལྷ་མ་ཡིན་གྱི་གཡུལ་ལས་རྒྱལ་བ་སོགས། །གཟུངས་སྔགས་ཆེན་པོ་དུ་མ་དག་ལས་བྱུང༌། །ཁྱིམ་བདག་མགོ་རེག་ཤི་བའི་བདོག་པ་ཀུན། །དགེ་འདུན་རྣམས་ལ་ཕུལ་ནས་བཞེས་པའི་ཚེ། །རྒྱལ་བའི་བཀའ་ཡི་གླེགས་བམ་འཚོང་མི་གནང༌། །མུ་སྟེགས་ཅན་གཞུང་འཚོང་དུ་གནང་ངོ་ཞེས། །གསུངས་ཕྱིར་བཀའ་ཡི་གླེགས་བམ་ཡོད་པར་གྲུབ། །བཀའ་བསྡུའི་ཚེ་ན་སྡུད་པ་པོ་རྣམས་ཀྱིས། །རང་རང་ཡུལ་དུ་སོ་སོའི་སྐད་རྣམས་ཀྱིས། །བྲིས་ཞེས་དུས་ཀྱི་འཁོར་ལོའི་འགྲེལ་པར་བཤད། །ཨུ་པ་ཞེས་(ང༣༨བ)

[Full Size]

བྱ་མ་སྐྱེས་དགྲ་ཡི་བུས། །ང་ཡི་བཀའ་ཀུན་གླེགས་བམ་འབྲི་འགྱུར་ཞེས། །སྟོན་པ་ཉིད་ཀྱིས་སྔོན་དུ་ལུང་ཡང་བསྟན། །སེར་སྐྱའི་གྲོང་དུ་སྐུ་བལྟམས་མཆོད་རྟེན་དང༌། །མ་ག་དྷ་རུ་བྱང་ཆུབ་ཆེན་པོ་ཉིད། །ཝ་ར་ཎ་སིར་ཆོས་འཁོར་མཆོད་རྟེན་སྟེ། །མཉན་དུ་ཡོད་པར་ཆོ་འཕྲུལ་མཆོད་རྟེན་དང༌། །ཀ་ཤིའི་གྲོང་དུ་ལྷ་ལས་བབས་པ་ཉིད། །རྒྱལ་པོའི་ཁབ་ཏུ་དགེ་འདུན་དབྱེན་བསྡུམས་དང༌། །ཛེ་ཏའི་ཚལ་དུ་སྐུ་ཚེ་བརྟན་པ་ཉིད། །རྩྭ་ཅན་གྲོང་དུ་མྱང་འདས་མཆོད་རྟེན་སྟེ། །མཛད་པ་སོ་སོའི་སྐབས་སུ་རིམ་པར་བྱུང། །འདི་དག་མདོ་ལས་ཞར་བྱུང་ཙམ་དུ་གསལ། །ད་ནི་བོད་ཡུལ་སྤྲུལ་པའི་ཆོས་རྒྱལ་གྱི། །བཀའ་ཆེམས་ཀ་བཀོལ་མ་ལས་བྱུང་རྣམས་འཆད། །སྟོན་པ་མྱ་ངན་འདའ་བར་ཉེ་བའི་ཚེ། །འཇམ་དཔལ་གཞོན་ནུར་གྱུར་པས་འདི་སྐད་གསོལ། །ད་ལྟ་ཁྱོད་ཞལ་ལྟ་ཞིང་དམ་ཆོས་ཉན། །མུ་སྟེགས་འདུལ་ཞིང་བསོད་ནམས་ཞིང་མཛད་ན། །མྱ་ངན་འདས་ནས་དེ་རྣམས་སུས་དགྱིད་འགྱུར། །སྟོན་པས་བཀའ་བསྩལ་ཉན་ཐོས་མཆོག་རྣམས་ཀྱིས། །བཀའ་རྣམས་སྡུད་བྱེད་ཐེ་ཚོམ་དེ་ཡིས་གཅོད། །བསོད་ནམས་ང་ཡི་དགེ་འདུན་རྣམས་ལ་སོགས། །དྲུག་སྡེ་རྒྱལ་བའི་སྤྲུལ་ཡིན་ངང་གིས་དུལ། །བསྟན་པ་གནས་ཅིང་མུ་སྟེགས་འདུལ་བའི་ཕྱིར། །ང་ཡི་སྐུ་ཚབ་བཞེང་བར་གྱིས་ཤིག་གསུངས། །ཞལ་གྱི་སྒོ་ནས་འོད་ཟེར་གསུམ་སྤྲོས་སྟེ། །ཚངས་དང་བརྒྱ་བྱིན་རཱ་ཧུ་ལ་ལ་ཕོག །སོ་སོར་སྤོབས་པ་སྐྱེས་ནས་ཕྱག་བཙལ་སྟེ། །སོ་སོས་སྐུ་གསུམ་རྟེན་མཆོག་བཞེང་བར་ཞུས། །བི་ཤྭ་ཀརྨས་གཟོ་བོར་ཁས་བླངས་ཤིང༌། །བྱམས་པས་དཀོན་གཉེར་ཕྱག་རྡོར་སྐུ་སྲུང་དང། །གཙང་རིས་བདུན་བཅུས་སྲུང་མར་ཁས་ལེན་བྱས། །ཚངས་པས་ལྷ་ཡི་རིན་ཆེན་སྣ་ཚོགས་སྤུངས། །བཞུ་བཏུལ་བླུག་པས་མཆོད་རྟེན་ཟླུམ་པོ་ནི། །ཚངས་པའི་འདོམ་གང་ཁ་དོག་དུ་བ་འདྲ། །ཕྱི་ནས་རྒྱལ་བའི་རིང་སྲེལ་གྱིས་(ང༣༩ན)

[Full Size]

བཀང་སྟེ། །ཨོ་ཌྱན་མཁའ་འགྲོའི་ཡུལ་དུ་སྤྱན་དྲངས་བཞུགས། །ལན་བདུན་བསྐོར་བས་མཆོག་དངོས་འགྲུབ་བོ་སྐད། །ཆོས་སྐུའི་རྟེན་འདིས་ལྷ་དང་མཁའ་འགྲོ་འདུལ། །རཱ་ཧུ་ལ་ཡིས་ཀླུ་ཡི་རིན་ཆེན་ཚོགས། །སྤུངས་པ་བཞུ་བཏུལ་བླུག་པས་ལོངས་སྐུའི་རྟེན། །རྣམ་སྣང་གངས་ཆེན་མཚོ་རྒྱལ་ཞེས་བྱ་བ། །དཔག་ཚད་བརྒྱད་བཅུ་མཆུ་ཞེང་གབ་པའི་སྐུ། །སྐུ་མདོག་མཐིང་ཀ་ཕྱག་གཉིས་མཉམ་བཞག་ཅན། །དབུ་གཙུག་ཟླ་བའི་ཆུ་ཤེལ་གྱིས་སྤྲས་གྲུབ། །བཞུགས་ནས་ཕྱི་ཡི་རྒྱ་མཚོའི་ནང་དུ་བཞུགས། །ལྟེ་བ་མན་ཆད་ཆུ་ཡི་ནང་དུ་ནུབ། །དེ་ཡིས་ཆུ་ནང་གནས་པའི་འགྲོ་དོན་མཛད། །ལྟེ་བ་ཡན་གྱིས་ལྷ་དང་དྲི་ཟ་སོགས། །སྐམ་དང་བར་སྣང་གནས་པའི་འགྲོ་དོན་མཛད། །བྱ་རྣམས་དབུ་ཡི་སྟེང་དང་དཔུང་ཁར་སྡོད། །བྱ་ཐལ་བདལ་ནས་གངས་རི་ལྟ་བུར་བཞུགས། །བཅོ་ལྔའི་མཚན་མོ་ཆུ་ཤེལ་ཟླ་འོད་ཀྱིས། །རེག་པའི་ཆུ་རྒྱུན་མཚན་མ་མེད་པ་ཡིས། །སྐུ་ཁྲུས་གསོལ་སྟེ་བཻ་ཌཱུརྻ་མདོག་འགྱུར། །ཁྲུས་ཆབ་དེ་འཐུངས་ཕན་ཡོན་མཐའ་ཡས་འཐོབ། །ནོར་བུ་ལེན་པའི་གཟིངས་ཆེན་བསྐྱོད་པ་ན། །རྒྱབ་མདུན་རེ་ལ་དྲོ་སྐད་རེ་རེ་དགོས། །གྲུ་མོའི་ནང་ལ་གཟིངས་བཅུག་མཆོད་པ་ཕུལ། །དེ་ཡིས་ཅི་འདོད་ནོར་བུ་ལོན་པར་འགྱུར། །གསོལ་བ་བཏབ་ན་སཱ་ལིའི་འབྲས་ཀྱི་ཆར། །ཉིན་མཚན་བར་མེད་བཅུ་གཉིས་འབེབས་སོ་སྐད། །ལོངས་སྤྱོད་རྫོགས་པའི་སྐུ་ཡི་རྟེན་མཆོག་ཡིན། །དེ་ནས་བརྒྱ་བྱིན་ལྷ་ཡི་དབང་པོ་ཡིས། །ཨིནྡྲ་ནཱི་ལ་མ་ར་ཏ་ཀ་དང། །མཐོན་ཀ་མཐོན་ཀ་ཆེ་དང་བཀོད་མཛེས་སྟེ། །སུམ་བཅུ་རྩ་གསུམ་ལྷ་ཡི་རིན་ཆེན་ལྔ། །གསེར་དངུལ་མུ་ཏིག་མུ་མེན་བྱུ་རུ་སྟེ། །འཛམ་གླིང་མི་ཡི་རིན་ཆེན་རྣམ་པ་ལྔ། །བར་མའི་མཆིང་བུ་ལྔ་བརྒྱ་རྩ་གཅིག་སོགས། །སྤུངས་པ་བཞུ་བཏུལ་བླུག་ནས་སྐུ་ཡི་ཚད། །བཞེང་བར་རྩོམ་ཚེ་སྟོན་པའི་སྐུ་ཚད་ལ། །ལྷ་དང་མི་རྣམས་(ང༣༩བ)

[Full Size]

མཐུན་པར་མ་གྱུར་ནས། །བི་ཤྭ་ཀརྨས་ཞབས་ཀྱི་ཐེའུ་ཆུང་ལ། །ཐིག་སྐུད་བཏགས་ནས་འཇལ་བར་བརྩམས་པའི་ཚེ། །ཇི་ཙམ་བསྲིངས་ཀྱང་ཚད་ལོན་མ་གྱུར་ནས། །འོད་མདངས་དགའ་བ་ཞེས་བྱའི་འཇིག་རྟེན་ན། །སངས་རྒྱས་དགའ་དཔལ་བཞུགས་པའི་དྲུང་དུ་སླེབས། །ད་དུང་དབུ་ཡི་གཙུག་དང་མ་མཉམ་ཚེ། །འདི་ནས་མི་འབྱེད་ཞིང་དུ་ཙམ་མཆི་ཞེས། །གསོལ་བས་རྒྱལ་བ་དེ་ཡིས་འདི་སྐད་དུ། །ལྷ་ཡི་རྫུ་འཕྲུལ་ལྟ་ཞོག་ཉན་རང་དང༌། །བྱང་སེམས་ཀུན་གྱི་རྫུ་འཕྲུལ་གཅིག་བསྡོམས་ཀྱང༌། །རྫོགས་སངས་རྒྱས་ཀྱི་སྐུ་ཡི་ཚད་མི་རྟོགས། །འདི་ནས་མི་འབྱེད་བར་དུ་འཇིག་རྟེན་ཁམས། །གངྒའི་བྱེ་སྙེད་དུ་མ་ཡོད་པ་སྟེ། །སྟོན་པས་བྱིན་གྱིས་བརླབས་པའི་མཐུ་ཡིས་ནི། །ཁྱོད་ཉིད་སྐད་ཅིག་ཙམ་གྱིས་འདིར་ཕྱིན་མོད། །གཞན་དུ་ཁྱེད་ཀྱི་རྫུ་འཕྲུལ་མཐུས་ཕྱིན་པས། །ཤིན་དུ་དམའ་བ་མ་གིར་ཚེ་འཛད་འགྱུར། །དེ་བས་སྐུ་ཡི་ཚད་ལ་རྟོག་པ་ཞོག །རང་གི་སྟོན་པ་ཡིད་ལ་གྱིས་ཤིག་གསུངས། །སྐད་ཅིག་དེ་ལ་སྟོན་པའི་དྲུང་དུ་སླེབ། །ངོ་མཚར་ཆེན་པོ་བསམ་གྱིས་མི་ཁྱབ་པའི། །སྐུ་ལ་ཚད་འཛིན་བརྩམས་པ་བཤགས་སོ་ཞེས། །ཡ་མཚན་གཏམ་གྱིས་འཁོར་རྣམས་མགུ་བར་བྱས། །སྟོན་པས་ཞིང་འདིའི་གདུལ་བྱའི་སྣང་བ་ལྟར། །དགུང་ལོ་བརྒྱད་དང་བཅུ་གཉིས་ཉེར་ལྔ་པའི། །ཚད་ཀྱི་སྐུ་གཟུགས་རྣམ་གསུམ་གྱིས་ཤིག་གསུངས། །སྔོན་གྱི་མ་མ་གཉིས་ཤིག་འཁོར་དུ་འཁོད། །དེ་ལ་སྤྱན་གྱིས་གཟིགས་པས་སྤོབས་བྱུང་སྟེ། །པང་དུ་འཚོ་བའི་མ་མས་འདི་སྐད་དུ། །རྒྱལ་བུ་ལོ་བརྒྱད་ལོན་ཚེ་ལུམྦི་ནིའི། །ཚལ་གྱི་གྲི་དང་མཐོ་དམན་མཉམ་མོ་ཟེར། །རྒྱན་འདོགས་མ་མས་རྒྱལ་བུ་བཅུ་གཉིས་ཚེ། །ང་ཡིས་རྩེ་བའི་དོན་དུ་དེད་པ་ན། །སེར་སྐྱའི་སྒོ་མོ་ཆེ་ཡི་སྒོ་སྐྱེས་དང༌། །མཐོ་དམའ་མེད་པར་གཅིག་དུ་མཉམ་མོ་ཟེར། །ཉེར་ལྔ་པ་ནི་མི་རྣམས་ཐུན་མོང་དུ། །(ང༤༠ན)

[Full Size]

སྣང་བའི་སྐུ་ཚད་དངོས་དང་མཚུངས་པར་བྱས། །གསུམ་གའང་རྫོགས་སངས་རྒྱས་པའི་ཚུལ་དང་བསྟུན། །ས་གནོན་མཉམ་བཞག་སྤྱན་གྱིས་འཁོར་ལ་གཟིགས། །ཕྱག་ཞབས་འཁོར་ལོ་གཙུག་ཏོར་རིན་ཆེན་སྤྲས། །ཁ་དོག་སྣ་ཚོགས་འཇའ་འོད་ལྟ་བུར་འདུག །སྙན་ཁུང་ཁྲོ་བོ་བདུད་རྩི་འཁྱིལ་པས་བརྒྱན། །ཁྲི་སྟན་སེང་གེ་བརྒྱ་རྩ་བརྒྱད་ཀྱིས་བཏེག །རྒྱབ་ཡོལ་མཛད་པ་བཅུ་གཉིས་འབུར་དུ་བྱས། །འོད་སྐོར་བདེ་གཤེགས་སུམ་བཅུ་རྩ་ལྔ་བཀོད། །ཟིན་ནས་སྟོན་པའི་དྲུང་དུ་ཕུལ་བའི་ཚེ། །འཁོར་གྱི་དཀྱིལ་འཁོར་རྒྱ་མཚོ་ཚོགས་པའི་དབུས། །སྟོན་པའི་ཞལ་ནས་འོད་ཟེར་སྣ་ཚོགས་བཀྱེ། །འཇིག་རྟེན་ཀུན་བཀང་སངས་རྒྱས་བྱང་སེམས་ཀུན། །སྣང་བར་བྱས་ཤིང་བསྐུལ་ནས་ཐུགས་དགོངས་བཀང༌། །སླར་ལོག་སྐུ་གསུམ་འོད་ཀྱིས་ཁྱབ་པར་མཛད། །དབང་བསྐུར་བྱིན་རླབས་རབ་ཏུ་གནས་གྱུར་སྟེ། །འོད་དེ་སྟོན་པའི་ཞལ་གྱི་སྒོ་རུ་ནུབ། །སྟོན་པས་ཆེད་དུ་བརྗོད་དེ་བཀའ་བསྩལ་པ། །སྐུ་གསུམ་རྟེན་འདི་གང་དུ་བཞུགས་པ་དེར། །དགྲ་བཅོམ་དང་ནི་ས་ཐོབ་སེམས་དཔའི་ཚོགས། །ཉི་ཟེར་རྡུལ་ཙམ་རྟག་དུ་བཞུགས་ནས་ནི། །མཆོད་ཅིང་བཀུར་སྟི་རིམ་གྲོ་ཕུ་དུད་བྱེད། །འདི་རྣམས་གང་ན་བཞུགས་པའི་ས་ཕྱོགས་དེར། །ཐེག་པ་ཆེན་པོའི་བསྟན་པ་འབྱུང་བ་སྟེ། །ང་ཡི་བསྟན་པ་ཐ་མར་བབ་པའི་ཚེ། །བྱང་ཕྱོགས་གངས་ཅན་སྲིན་པོ་གདོང་དམར་ཡུལ། །སྤྱན་རས་གཟིགས་དང་སྐུ་གཟུགས་གཉིས་ཀྱིས་འདུལ། །དེ་སྐད་བཀའ་བསྩལ་ཉེར་ལྔའི་སྐུ་ཚད་ནི། །བརྒྱ་བྱིན་ཉིད་ཀྱིས་ལྷ་ཡུལ་སྤྱན་དྲངས་མཆོད། །བརྒྱད་པ་དང་ནི་བཅུ་གཉིས་པ་ཡི་སྐུ། །ལྷ་ཡི་ཡུལ་དང་ནུབ་ཕྱོགས་ཨོ་ཌྱན་དུ། །ལྔ་བརྒྱ་ཕྲག་རེ་བཞུགས་ནས་འགྲོ་དོན་མཛད། །དེ་ནས་ས་འོག་བདག་པོས་སྤྱན་དྲངས་སྟེ། །གདེངས་ཅན་ཀླུ་རྒྱལ་རྣམས་ཀྱིས་མཆོད་པར་གྱུར། །དེ་ཚེ་མ་ག་དྷ་ཡི་རྒྱལ་པོ་ནི། །ཧེ་མནྟ་ཞེས་བྱ་བའི་མཆོད་གནས་སུ། །(ང༤༠བ)

[Full Size]

ཕྱག་རྡོར་སྤྲུལ་པ་ཤུ་ལན་བྷ་ཏི་དང༌། །བྱམས་པ་གྲུབ་པ་དཀར་རྒྱལ་བྱ་བ་ཡོད། །གཉིས་པོས་ཕྱག་རྡོར་དང་ནི་བྱམས་པར་སྤྲུལ། །བྱམས་པས་ཀླུ་རྣམས་བདུད་རྩིའི་ཆར་གྱིས་བྲིད། །ཕྱག་ན་རྡོ་རྗེས་ཀླུ་རྣམས་གཟིར་ཞིང་བསྡིགས། །བྱམས་པས་བསྐྱབས་སྟེ་སྟོན་པའི་ཁྲུས་རྫིང་ནས། །སྐུ་གཉིས་སྤྱན་དྲངས་མ་འོངས་འཛམ་གླིང་གི །བསྟན་པ་ནུབ་ཚེ་སྐུ་གཉིས་གཙོར་བྱས་པའི། །སྐུ་གསུང་ཐུགས་ཀྱི་རྟེན་ཀུན་ཀླུ་ཡུལ་དུ། །སྤྱན་འདྲེན་དགྱིད་པའི་གཙིགས་ཆད་བཟུང་བར་གྱུར། །ལོ་གྲངས་ལྔ་བརྒྱར་རྡོ་རྗེའི་གདན་དུ་བཞུགས། །དེ་ནས་ལོ་གྲངས་ལྔ་བརྒྱ་ལྷག་འདས་པ། །རྒྱ་གར་རྒྱལ་པོ་དེ་ཝ་པ་ལའི་དུས། །དགུང་ལོ་བཅུ་གཉིས་པ་ཡི་སྐུ་ཚད་ཀྱི། །རྒྱབ་ཡོལ་བཞག་པའི་ཁྲིར་བཅས་རྒྱ་ནག་གི །རྒྱལ་པོའི་བསོད་ནམས་སོག་པའི་རྟེན་དུ་བསྐུར། །བརྒྱད་པའི་སྐུ་ཚད་བལ་པོའི་རྒྱལ་པོ་ཡིས། །རིན་ཐང་མེད་པའི་སྐྱེས་བསྐུར་གསོལ་བཏབ་པས། །བལ་པོའི་རྒྱལ་པོའི་མཆོད་པའི་ཞིང་དུ་བྱིན། །ཡུལ་གྲུ་དེ་གཉིས་རབ་ཏུ་བཏུལ་མཛད་ནས། །སྤྱན་རས་གཟིགས་དབང་སྲོང་བཙན་སྒམ་པོའི་དུས། །སྐུ་གཉིས་བོད་ཀྱི་ཡུལ་དུ་བྱོན་པ་ཡིན། །བཀའ་ཆེམས་གཞན་ལས་བརྒྱད་པའི་སྐུ་ཚད་ནི། །སྔོན་ཚེ་མི་རྣམས་ཚེ་ལོ་ཉི་ཁྲིའི་དུས། །སངས་རྒྱས་འོད་སྲུང་བྱོན་ཚེ་སྦྱིན་བདག་མཆོག །རྒྱལ་པོ་ཀྲྀ་ཀྲིས་དད་པའི་རྟེན་དུ་བཞེངས། །སངས་རྒྱས་འོད་སྲུང་ཉིད་ཀྱིས་བྱིན་བརླབས་ནས། །ད་ལྟར་ང་ཡི་སྐུ་ཚབ་བཞེངས་པ་འདི། །མ་འོངས་ཚེ་ལོ་བརྒྱ་པའི་དུས་ཚོད་དུ། །སངས་རྒྱས་ཤཱཀྱ་ཐུབ་པ་འབྱུང་བ་དེའི། །དགུང་ལོ་བརྒྱད་པ་ཡི་ནི་ཚད་འགྱུར་ཞེས། །ལུང་བསྟན་མཛད་པ་དེ་ཉིད་ཡིན་ཞེས་སྣང༌། །དེང་སང་ཇོ་བོ་མི་བསྐྱོད་རྡོ་རྗེར་གྲགས། །བཅུ་གཉིས་པ་ཡི་སྐུ་ཚད་འདི་ཉིད་ཀྱང༌། །བྱམས་པས་བཞེངས་པར་འཆད་པའི་ལུགས་ཀྱང་སྣང༌། །སེར་སྐྱར་ཤཱཀྱའི་རྒྱལ་པོ་གཞུ་བརྟན་ཚེ། །རྒྱ་ནག་ཅི་འུ་རྒྱལ་པོ་ཞེས་པ་བྱུང༌། །དེ་ནས་གདུང་རབས་བཞི་འདས་(ང༤༡ན)

[Full Size]

ལྔ་པ་ནི། །ཅི་འུ་དབང་རྒྱལ་རྒྱལ་སྲིད་བྱེད་པའི་ཚེ། །ནུབ་ཀྱི་ཕྱོགས་ནས་སྒྲ་དང་འོད་ཟེར་སོགས། །རྫོགས་པའི་སངས་རྒྱས་བལྟམས་པའི་ལྟས་རྣམས་མཐོང༌། །རྩིས་པས་རྩིས་བྱས་ནུབ་ཕྱོགས་རྒྱ་གར་དུ། །གང་ཟག་རླ་མེད་གཅིག་ནི་སྐྱེས་པར་འདུག །ལོ་སྟོང་འདས་ནས་དེ་ཡིས་ཆོས་ལུགས་ནི། །རྒྱ་ནག་ཡུལ་དུ་འོང་ཞེས་ལུང་བསྟན་སྐད། །དེ་ལྟར་ཅི་འུའི་རྒྱལ་པོ་སོ་དྲུག་སོགས། །རིགས་རུས་ཐ་དད་ལྔ་ལས་རྒྱ་ནག་གི །རྒྱལ་པོ་དྲུག་བཅུ་རྩ་གཉིས་འདས་པའི་འོག །པྲི་ཏི་ཛ་ཡ་སི་ཆོན་རྒྱལ་པོའི་དུས། །ཇོ་བོ་ཤཱཀྱ་རྒྱ་ནག་ཡུལ་དུ་ཕེབས། །དེ་ནས་རྒྱལ་རབས་བཞི་ཡི་འོག་རོལ་དུ། །རྒྱ་ནག་ཡུལ་དུ་ཐང་གི་རྒྱལ་པོ་དང༌། །བོད་རྒྱལ་གནམ་རི་སྲོང་བཙན་དུས་མཉམ་སྟེ། །དེ་སྲས་ཆོས་རྒྱལ་སྲོང་བཙན་སྒམ་པོ་ཡིན། །དེ་ལྟར་སྐུ་གསུམ་རྟེན་མཆོག་གྲུབ་བྱིན་བརླབས། །མཛད་པ་རྫོགས་ནས་ཐུབ་དབང་མྱ་ངན་འདས། །དེ་ནས་ལོ་གྲངས་བརྒྱད་བཅུར་ཉེ་བའི་ཚེ། །སྔོན་ཚེ་བུ་མོའི་དུས་ན་སྟོན་པའི་ཞལ། །མཐོང་ཞིང་ཆོས་ཉན་བསོད་སྙོམས་ཕུལ་བ་ཞིག །བྲམ་ཟེ་ཆེན་པོ་ཞིག་གི་མཆིས་བྲང་གྱུར། །དེ་ལས་མཚན་དང་ལྡན་པའི་བུ་གསུམ་བཙས། །ཆེ་བ་གཉིས་ནི་ཕྱི་རོལ་པ་ལ་མོས། །ཐ་ཆུང་ནང་པའི་ཆོས་ལ་རབ་ཏུ་དད། །ཆོས་ལུགས་གང་བཟང་མི་འཆམ་རྟག་ཏུ་རྩོད། །མ་ཡིས་ཁྱེད་གསུམ་ཟས་གོས་ཕོངས་པ་མེད། །ཅི་ཕྱིར་རྩོད་ཅེས་དྲིས་པས་ཕྱི་ནང་གི །ཆོས་ལུགས་གང་བཟང་མ་འཆམ་གང་བདེན་ཟེར། །མ་ཡིས་བྱང་ཕྱོགས་ཏི་སེའི་གངས་རི་ལ། །ལྷ་ཆེན་དབང་ཕྱུག་ཡོད་ཀྱིས་དེར་དྲིས་ཟེར། །ལྷམ་ལ་རྐང་མགྱོགས་རྫས་བྱུགས་བཏང་བ་ལས། །སྐད་གཅིག་གིས་སླེབས་མ་དྲོས་མཚོ་འགྲམ་ན། །ཁྱུ་མཆོག་བཟས་ལ་ཡན་ཅིང་བུ་མོའི་ཚོགས། །རིན་ཆེན་སྣོད་དུ་མེ་ཏོག་འཐུ་བ་མཐོང༌། །ཁྱོད་སུ་མེ་ཏོག་ཅི་ཕྱིར་འཐུ་དྲིས་པས། །ངེད་ཅག་ལྷ་མོ་ཨུ་མའི་བྲན་མོ་ཡིན། །(ང༤༡བ)

[Full Size]

མེ་ཏོག་དགྲ་བཅོམ་མཆོད་ཕྱིར་འཐུ་འོ་སྐད། །ཁྱེ་འུ་གསུམ་གྱིས་འགྲོགས་སྟེ་ཕོ་བྲང་ཕྱིན། །བཅོ་ལྔའི་ཚེས་ཉིན་གདུགས་ཚོད་ལ་བབ་ཚེ། །མ་དྲོས་མཚོ་ནས་དགྲ་བཅོམ་དགེ་འདུན་རྣམས། །བྱོན་སྟེ་ཕོ་བྲང་ནང་དུ་སྟན་ལ་བཞུགས། །ལྷ་ཆེན་འཁོར་བཅས་ཀྱིས་མཆོད་མཆོད་སྟོན་གསོལ། །མེ་ཏོག་གིས་གཏོར་ཞབས་ལ་ཕྱག་བྱས་ནས། །ཆོས་ཉན་སྨོན་ལམ་མང་པོ་བཏབ་པར་གྱུར། །དེ་ནས་འཕགས་པའི་ཚོགས་རྣམས་མཁའ་ལ་གཤེགས། །ཆོས་ལུགས་ནང་པ་བཟང་བར་གསུམ་གས་གོ །འོན་ཀྱང་ཐེ་ཚོམ་བཅད་ཕྱིར་དྲིས་པ་ན། །དབང་ཕྱུག་ན་རེ་ནང་པ་བཟང་བ་ཡིན། །ཕྱི་རོལ་པ་ལ་ཐར་པའི་ལམ་མ་མཆིས། །ཕྱི་པའི་འབྲས་བུ་མཐར་ཐུག་ང་ཡིན་མོད། །གནས་སྐབས་དངོས་གྲུབ་འདོད་ན་ང་མྱུར་ཡང༌། །ང་ཡང་ཐར་པ་འདོད་ཕྱིར་ནང་པ་ལ། །བརྟེན་ནས་དགྲ་བཅོམ་མཆོད་པ་ཡིན་ནོ་ཟེར། །ཐེ་ཚོམ་སེལ་སྟེ་མ་ཡི་དྲུང་དུ་ལོག །གསུམ་ག་ནང་པའི་བསྟན་ལ་འཇུག་པར་ཞུས། །ལེགས་ཀྱིས་ལྷ་ཁང་རེ་རེ་རྩིགས་ཤིག་ཟེར། །རྩིག་པའི་གནས་དང་རྒྱུ་རྣམས་སོ་སོར་བསྟན། །ཆོས་འཁོར་བསྐོར་གནས་ཝ་ར་ཎ་སི་རུ། །ཆེ་བ་མ་ཧཱ་མ་སས་ལྷ་ཁང་བརྩིགས། །རིན་ཆེན་རིགས་ཀྱི་རྡོ་ལས་སྐུ་གཟུགས་བྱས། །བསྟོད་པའི་དམ་པ་ཁྱད་པར་འཕགས་པ་བརྩམས། །སློབ་དཔོན་མཐོ་བཙུན་གྲུབ་རྗེ་ཞེས་སུ་གྲགས། །འབྲིང་པོས་རྒྱལ་པོའི་ཁབ་ཀྱི་འོད་མའི་ཚལ། །ཀ་ལནྟ་ཀའི་གནས་སུ་ལྷ་ཁང་བརྩིགས། །གནས་ཆེན་བརྒྱད་ཀྱི་ས་ལས་སྐུ་གཟུགས་བྱས། །ཐ་ཆུང་བདེ་ཕྱེད་བདག་པོས་རྡོ་རྗེ་གདན། །བྱང་ཆུབ་ཤིང་དྲུང་ཕྱི་དབྱིབས་མཆོད་རྟེན་ལ། །ནང་དབྱིབས་ལྷ་ཁང་གཎྜྷོ་ལ་རུ་བྱས། །གངྒཱའི་འགྲམ་གྱི་སྟོན་པའི་ཁྲུས་རྫིང་འགྲམ། །ཙན་དན་གོ་རྴཱི་ཥ་ཡི་སྡོང་པོ་ནི། །འགྱེལ་བ་ས་འོག་ནས་བླངས་རིགས་བཙུན་ཞིང༌། །འདོད་པས་མ་གོས་བུ་མོ་བཞི་ཡིས་བདར། །རིན་ཆེན་ཕྱེ་མ་དང་བསྲེས་ཕུང་པོར་གྲུབ། །དེ་ཚེ་དེད་དཔོན་རྒན་པོ་ཞིག་གི་བུ། །རྒྱ་མཚོར་འཇུག་ལ་ཕ་ཡིས་བུ་ཁྱོད་ཀྱིས། །མི་གཞན་མི་ཉོའི་ཟོང་ཞིག་ཉོས་ཤོག་སྐད། །རྒྱ་མཚོར་གྲུ་ཡི་ནང་དུ་མི་སྔོན་པོ། །(ང༤༢ན)

[Full Size]

སྔོན་མེད་ཅིག་བྱུང་ཀུན་གྱིས་གསོད་པའི་ཚེ། །དེད་དཔོན་གྱིས་ནི་ནོར་གྱིས་ཀླུས་སྟེ་བཏང༌། །མི་དེ་རྒྱ་མཚོའི་ནང་དུ་ཅབ་ཀྱིས་སོང༌། །གྲུ་ཐོན་ཚེ་ན་ང་ནི་ཀླུ་ཞིག་ཡིན། །བདག་སྲོག་བསྐྱབས་པའི་ལན་དུ་འདི་འབུལ་ཞེས། །རིན་ཆེན་མརྐ་ཏ་ཡི་སྡོང་པོ་ནི། །ལྗང་ཞིང་སྔོ་ལ་གནག་པའི་འོད་འཚེར་བ། །དབྱིབས་ནི་ཉ་ཡི་ལྟོ་འདྲ་ཞིག་བྱིན་ནོ། །དེད་དཔོན་དེ་ནི་འདི་འདྲ་གཉིས་ཡོད་ན། །སྐུ་དེའི་སྤྱན་འབྲས་དགྱིད་སྙམ་ལོངས་པའི་ཚེ། །ལག་ནས་ལྷུང་སྟེ་གཉིས་སུ་གས་ནས་བྱེ། །སྤྱན་འབྲས་དགྱིད་པའི་དོན་དུ་ཕུལ་བར་གྱུར། །ཇི་སྐད་མ་ཡིས་ལུང་བསྟན་དེ་བཞིན་དུ། །ཙན་དན་ལྡེ་གུ་རིན་ཆེན་མརྐ་ཏ། །གཟོ་བོར་བཅས་པ་ལྷ་ཁང་ནང་དུ་བཅུག །སྒོ་ལ་ལྕགས་ཀྱི་གཟེར་བཏབ་ཟླ་དྲུག་དང༌། །ཞག་དྲུག་བར་དུ་འཇོག་པར་བྱས་པ་ལས། །ཟླ་བ་དྲུག་དང་ཞག་ལྔ་ལོན་པའི་ཚེ། །མ་དེ་བྱུང་ནས་ལྟ་འོ་སྒོ་ཕྱེ་ཟེར། །ད་དུང་ཞག་གཅིག་མ་ཐེམ་ཞེས་སྨྲས་པས། །སངས་རྒྱས་བཞུགས་དུས་དངོས་སུ་མཐོང་བའི་མི། །ད་ལྟ་འཛམ་བུའི་གླིང་ན་ང་བས་མེད། །ང་ནི་སང་གི་གདུགས་ལ་འཆི་བར་འགྱུར། །ང་ཡིས་འདྲ་འམ་མི་འདྲ་བལྟ་དགོས་ཀྱི། །ད་ལྟ་ཕྱེ་ཟེར་ལྕགས་གཟེར་བཀྲོལ་བ་ན། །གཟོ་བོ་དེ་ནི་ནམཁར་འཕགས་སྟེ་ཡལ། །སྟོན་པ་དགུང་ལོ་སོ་ལྔ་ལོན་པའི་ཚེ། །མངོན་པར་རྫོགས་སངས་རྒྱས་པའི་སྐུ་ཡི་ཚད། །རིན་ཆེན་མརྐ་ཏ་ཡིས་སྤྱན་འབྲས་བྱས། །ལྟ་བས་མི་ངོམས་མཚན་དཔེས་བརྒྱན་པར་གྲུབ། །མ་ཡིས་སྨྲས་པ་རྫོགས་པའི་སངས་རྒྱས་ལ། །ལྗགས་ཀྱིས་གདོང་ཁེབས་ཚངས་པའི་གསུང་དབྱངས་ལྡན། །ན་བཟའ་སྐུ་ལ་སོར་བཞིས་མི་རེག་ཅིང༌། །འོད་ཟེར་འདོམ་གང་ཁོར་ཡུག་འབར་བ་ཡོད། །དེ་དག་སྐུ་གཟུགས་འདི་ལ་མི་སྣང་ངོ༌། །སྟོན་པ་སྤྱོད་ལམ་རྣམ་བཞིས་འགྲོ་དོན་མཛད། །འདི་ལ་བཞུགས་པའི་སྤྱོད་ལམ་གཅིག་པུ་ཡོད། །སྟོན་པའི་དབུ་གཙུག་ལྟ་བར་མི་མངོན་ལ། །འདི་ཡི་དབུ་ཡི་གཙུག་འཁྱིལ་ལྟ་བར་ནུས། །སྟོན་པའི་དབུ་སྐྲ་བུང་བ་ལྟ་བུར་གནག །(ང༤༢བ)

[Full Size]

འདི་ནི་ཅུང་ཟད་སྔོ་བའི་མདངས་དང་ལྡན། །སྟོན་པའི་མཛོད་སྤུ་སུམ་བཅུ་རྩ་གཉིས་ནི། །དཀར་ཞིང་འོད་ལྡན་ངང་གིས་གཡས་སུ་འཁྱིལ། །འདི་ནི་དེ་བས་ཅུང་ཟད་མི་གསལ་ཙམ། །ཁྱད་པར་བརྒྱད་པོ་འདི་དག་མ་གཏོགས་པ། །སྟོན་པ་དངོས་དང་ཁྱད་པར་མི་སྣང་ངོ༌། །མ་འོངས་ཕྱི་རོལ་པ་དང་རྟེན་འགྲན་ཚེ། །ཡོན་ཏན་བརྒྱད་ཀྱང་འདི་ལ་སྣང་བར་འགྱུར། །སུས་མཐོང་དབང་མེད་ཕྱག་འཚལ་ལྟར་མི་ངོམས། །ཟས་སྐོམ་བརྗེད་ཅིང་དུས་རིང་ཐུང་ངུར་ཚོར། །རྒྱབ་ཀྱིས་ལྟ་བར་མི་ཕོད་ཕྱི་འགྲོས་བྱེད། །མཐོང་བ་ཙམ་གྱིས་ནད་སོས་སྡུག་བསྔལ་བརྗེད། །གདོན་དང་བྲལ་ཞིང་ཉོན་མོངས་ངང་གིས་ཞི། །གནས་སྐབས་མཐར་ཐུག་ཡོན་ཏན་དཔག་མེད་འབྱུང༌། །ཞེས་སྨྲས་མ་དེ་ཕྱི་ནང་ཚེ་དུས་བྱས། །རིང་སྲེལ་ཕུང་པོ་བུ་ཡིས་མཆོད་རྟེན་བཞེངས། །སྔོན་ཚེ་ཞག་གཅིག་མ་ཐིམ་ཉེས་པ་ནི། །ཞབས་གཡས་ཐེ་ཆུང་མ་ཚང་ཕྱིས་བཅོས་ཟེར། །ད་ལྟ་རྒྱ་གར་ཡུལ་ན་གྲགས་པ་ནི། །ཞག་གཅིག་མ་ཐིམ་པ་ལས་དབུ་སྐྲའི་ཚོགས། །ཚོམ་བུར་གཡས་སུ་འཁྱིལ་བ་མ་ཚང་སྐད། །དེང་སང་འཛམ་བུ་གླིང་ན་རྟེན་གྱི་མཆོག །རྡོ་རྗེ་གདན་གྱི་མ་ཧཱ་བོ་དྷི་ཞེས། །འགྲན་མེད་མཁའ་ལ་ཉི་མ་ལྟ་བུར་སྣང༌། །འདི་སྔོན་གྱི་གྲགས་པ་ལྟར་བྲིས་པ་ཡིན་ཀྱང་བསྟོད་འགྲེལ་གཉིས་ལ་བརྟགས་ན་བསྟོད་པ་མཛད་པོ་གཉིས་ཕུ་བོ་གཉིས་སུ་སྣང་ལ། རྡོ་རྗེ་གདན་བཞེང་བ་པོ་འདིའི་མཚན་དང་རབ་ཏུ་བྱུང་མ་བྱུང་སོགས་གསལ་བར་མི་སྣང་ངོ༌། །ཕྱི་ནས་ཆོས་རྒྱལ་མྱ་ངན་མེད་སོགས་ཀྱིས། །སྐུ་གཟུགས་མཆོད་རྟེན་གཙུག་ཁང་མཐའ་ཡས་མཛད། །སྟོན་པའི་རྟེན་ཇི་ལྟར་བྱུང་ཚུལ་མདོ་ཙམ་བསྟན་པའི་སྐབས་སྟེ་གསུམ་པའོ།། །།ཡི་གེ་པ་ནི་ཚེ་དབང་བསྟན་པས་བྲིས། །རྐོས་ཀྱི་རིག་བྱེད་སྨྱལ་གྱི་སྒང་རྒྱུད་ནས། །ཚེ་དབང་དར་པོ་བཀྲ་ཤིས་ཚེ་དབང་བརྐོས། །དགེ་བས་བླ་མེད་བྱང་ཆུབ་ཐོབ་པར་ཤོག །

[Full Size]

སྟོན་པ་མཆོག་ལ་སླར་ཡང་གུས་བསྡུས་ནས། །དེ་ཡི་བསྟན་ལ་བྱ་བ་བྱེད་པ་ཡི། །འཕགས་པའི་ཡུལ་དུ་ས་སྐྱོང་མང་བྱུང་བ། །དེ་ལས་ཇི་ཙམ་ཐོས་པ་བརྗོད་པར་བྱ། །རྩ་བ་མེད་པའི་དད་པར་ལྡན་པ་ཡི། །བསྟན་པའི་སྦྱིན་བདག་རྒྱལ་པོ་མ་སྐྱེས་དགྲས། །མ་ག་དྷ་དང་ཨངྒ་ཡངས་པ་ཅན། །ཀོ་ས་ལ་ཡི་རྒྱལ་ཁམས་ཆེན་པོ་དང༌། །ཝ་ར་ཎ་སི་ལ་སོགས་དབང་བྱས་སྟེ། །ཐམས་ཅད་གདུགས་དཀར་གཅིག་གིས་ཁེབས་པ་ལྟར། །སྟོན་པའི་བསྟན་ལ་གཅིག་དུ་མཆོད་པར་གྱུར། །དེ་སྲས་ཨུ་པ་ཞེས་པས་རྒྱལ་བའི་བཀའ། །མཐའ་དག་ཡི་གེར་བྲིས་སྟེ་གླེགས་བམ་བྱས། །རྒྱས་པར་བྱེད་ཅིང་ཤི་འཕོས་ལྷ་ཡུལ་འགྲོ། །ངེས་པར་བྱང་ཆུབ་ཐོབ་ཅེས་ལུང་དུ་བསྟན། །མ་སྐྱེས་དགྲས་རྒྱལ་ས་བྱས་ནས་ལོ་ལྔ་ན་སྟོན་པ་མྱ་ངན་ལས་འདས། སྤྱིར་རྒྱལ་ས་ལོ་སོ་གཉིས་བྱས། དེ་ནས་རྒྱལ་པོ་བཅུ་འདས་པ་ན་ཆོས་རྒྱལ་མྱ་ངན་མེད་བྱོན་པར་ལི་ཡུལ་གྱི་རྒྱལ་རབས་ལས་བཤད། སྟོན་པ་མྱ་ངན་འདས་ནས་ལོ་བརྒྱ་ན། །འཛམ་གླིང་བདག་པོ་མྱ་ངན་མེད་པ་བྱུང༌། །ཤཱཀྱ་རི་བྲགས་པ་ཡི་རྒྱུད་ཡིན་ཞེས། །བོད་རྗེའི་བཀའ་ཆེམས་འགའ་ཞིག་དག་ལས་བྱུང༌། །སྤྲིན་ཆེན་པོ་ལས། སྔོན་སངས་རྒྱས་ཀླུ་རིགས་སྒྲོན་མའི་དྲུང་དུ་བློན་པོ་དམ་ཆོས་དཀྱིལ་འཁོར་གྱི་མཛོད་ཀྱིས་ཤཱཀྱའི་བསྟན་པ་འབྱིན་པའི་རྒྱལ་པོར་སྨོན་ལམ་བཏབ་པ་དེ་ནི་ད་ལྟ་བྲམ་ཟེ་ཀཽཎྜི་ནྱ་འདི་ཡིན་སྟེ་ང་འདས་ནས་ལོ་བརྒྱ་ཉི་ཤུ་ན་མཽ་རྻའི་རིགས་སུ་རྒྱལ་པོ་མྱ་ངན་མེད་ཅེས་ཕྱེད་ཀྱི་འཁོར་སྒྱུར་དུ་འགྱུར་རོ་ཞེས་ལོ་བརྒྱ་ཉི་ཤུ་ན་འབྱུང་བར་ལུང་བསྟན་ཡང་སྙིང་རྗེ་ཆེན་པོ་པད་དཀར་དུ། ང་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་ན་གྲོང་ཁྱེར་སྐྱ་སྣར་གྱི་བུར་རྒྱལ་པོ་མྱ་ངན་མེད་པ་ཞེས་བྱ་བ་མཽརྻའི་རིགས་སུ་སྐྱེས་པ་ཆོས་ཅན་ཆོས་ཀྱི་རྒྱལ་པོ་ཞིག་འབྱུང་སྟེ་ཞེས་དང༌། དེས་དུས་གཅིག་དུ་ཉིན་གཅིག་ལ་ངའི་སྐུ་གདུང་གི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་རོ་ཞེས་དང༌། མདོ་གཞན་ལས་ཀྱང་ལོ་བརྒྱ་ན་འབྱུང་བར་གསུངས་པ་དུ་མ་ཡོད་པ་དང༌། འཇམ་དཔལ་རྩ་རྒྱུད་ལས། ང་ནི་ས་སྟེང་མྱ་ངན་འདས། །ལོ་བརྒྱ་(ཅ༤༣བ)

[Full Size]

དག་ནི་འདས་པ་ན། །སྣང་བ་མེད་ཅིང་ཉེས་པར་བཅས། །མི་ཤེས་མུན་པས་རབ་ཏུ་བསྒྲིབས། །དེ་ཚེ་ས་ནི་སྟོང་པ་སྟེ། །རྒྱལ་བ་རྣམས་ཀྱི་སྤངས་པ་ཉིད། །དེ་ཚེ་མི་བཟང་ཆེན་པོའི་དུས། །གྲོང་ཁྱེར་མེ་ཏོག་ཅན་དུ་ནི། །མྱ་ངན་མེད་ཅེས་བྱ་བ་ཡི། །རྒྱལ་པོ་ས་ནི་སྐྱོང་བྱེད་པ། །སོགས་དང༌། དེ་ལྟར་རྫུ་འཕྲུལ་ཆེ་བདག་ཉིད། །དེ་ཚེ་སྟོབས་ཀྱི་འཁོར་སྒྱུར་འབྱུང༌། །ཞེས་དང། འཛམ་བུའི་གླིང་འདི་མ་ལུས་པ། །མཆོད་རྟེན་གྱིས་ནི་བརྒྱན་པ་དང༌། །ཞེས་མཆོད་རྟེན་གྱི་གྲངས་མ་གསུངས་ཤིང༌། ལོ་ནི་བརྒྱ་དང་ལྔ་བཅུར་འཚོ། །ཞེས་ཚེ་ཚད་དང༌། ལོ་ནི་བརྒྱད་བཅུ་རྩ་བདུན་དུ། །ས་སྟེང་མཆོད་རྟེན་མཆོད་པར་འགྱུར། །ཞེས་གསུངས་ཤིང༌། བཀའ་བསྡུ་བར་པའི་སྦྱིན་བདག་ཡིན་ལ་དེ་ལོ་བརྒྱ་དང་བཅུ་མ་བྱུང་བར་གསུངས་པས་རྒྱལ་པོ་མྱ་ངན་མེད་ཀྱིས་དགུང་ལོ་དྲུག་བཅུ་རྩ་གསུམ་གྱི་བར་དུ་སྡིག་པ་སྤྱོད་པ་གཏུམ་པོ་མྱ་ངན་མེད་ཀྱིས་དུས་དང༌། རེ་གསུམ་ནས་དགེ་བའི་བཤེས་གཉེན་གྱིས་རྗེས་སུ་བཟུང་བ་ཕྱིན་ཆོས་རྒྱལ་མྱ་ངན་མེད་དུ་གྲགས་པ་ཡིན་ནོ། །མཽརྻའི་རིགས་ཞེས་སྟོན་པས་ལུང་དུ་བསྟན། །སྔོན་ཚེ་སྟོན་པ་གྲོང་ཁྱེར་གཤེགས་པའི་ཚེ། །ཁྱེ་འུ་གཉིས་ཤིག་རྒྱལ་བློན་ཚུལ་དུ་རྩེ། །བྱེ་མའི་ཚོགས་ལས་ཕོ་བྲང་བང་མཛོད་བྱས། །དེ་ཡིས་སྟོན་པ་གཤེགས་མཐོང་དད་གྱུར་སྟེ། །བང་མཛོད་དུ་བསྔོས་བྱེ་མའི་ཕུང་པོ་ལས། །སྙིམ་པ་གང་ཞིག་ཁྱེའུ་རྒྱལ་པོས་བཅུས། །ཐུབ་པའི་ལྷུང་བཟེད་ནང་དུ་དབུལ་བར་བརྩམས། །མ་སྙོབས་གྱུར་པས་ཁྱེ་འུ་ཅིག་ཤོས་ཀྱིས། །སྒུར་པོར་བྱས་པའི་སྟེང་དུ་འཛེགས་ནས་ཕུལ། །སྟོན་པས་དེ་ཡི་དད་པའི་བསམ་པ་དགོངས། །ཕྱག་གི་ལྷུང་བཟེད་དཔངས་དམད་གྱུར་པས་བཟེད། །མ་ཡིས་རྒྱལ་ལ་འདི་འདྲ་འབུལ་བ་ཞེས། །སྤྱོས་པ་སྟོན་པས་ཟློག་པར་མཛད་ནས་ནི། །ཀུན་དགའ་བོ་ལ་བསམ་པ་བཟང་པོ་ཡིས། །ཕུལ་འདི་ཆུད་མ་ཟོས་པར་བྱ་བའི་ཕྱིར། །ས་སྦྱིན་བ་བྱུང་དྲི་དང་སྦྱར་བ་ཡིས། །སྟོན་པའི་དྲི་ཡི་གཙང་ཁང་སྐུས་ཤིག་གསུངས། །ང་འདས་ནས་ནི་ལོ་བརྒྱ་ལོན་པ་ན། །ཁྱེ་འུ་སྟེང་མ་འདི་ནི་འཛམ་གླིང་གི །(ཅ༤༤ན)

[Full Size]

རྒྱལ་པོ་མྱ་ངན་མེད་ཅེས་བྱ་བར་འགྱུར། །བྱེ་མ་ཕུལ་འདིའི་འབྲུ་གྲངས་དང་མཉམ་པའི། །ང་ཡི་རིང་སྲེལ་ལྡན་པའི་མཆོད་རྟེན་ནི། །འཛམ་བུའི་གླིང་ཀུན་ཁྱབ་པར་བྱེད་པར་འགྱུར། །ཁྱེ་འུ་གཅིག་ཤོས་དེ་ཡི་བློན་པོར་འགྱུར། །འཛམ་གླིང་རྣལ་དུ་འགོད་པར་བྱེད་ཏོ་གསུངས། །སྔོན་ཚེ་བྱེ་མ་ཕུལ་བའི་ས་ཡིན་ཞེས། །ནཱ་ལེནྡ་ན་དེ་ཡི་མཆོད་རྟེན་ཡོད། །སྟོན་པ་འདས་ནས་ལོ་ནི་སོ་བདུན་ན། །རྒྱལ་པོ་ཅིག་ལ་རྒྱལ་བུ་བཅུ་བདུན་དང༌། །བྲན་མོར་བཙས་པ་གཅིག་སྟེ་བཅོ་བརྒྱད་ཡོད། །ཡབ་ཀྱིས་རྒྱལ་བུ་ཀུན་བསྡུས་རྒྱལ་པོའི་མཚན། །སུ་ལ་ལྡན་པ་མཚན་མཁན་གྱིས་རྟོག་ཚེ། །བཅུ་བདུན་པོ་ནི་ཟས་གོས་རྒྱན་བཟང་པོས། །བསྙེམས་ཤིང་སོ་སོར་ཁྲི་སྟན་དག་ལ་འཁོད། །ནམ་ཡང་རྒྱལ་སྲིད་མི་འཐོབ་བསམ་པ་ཡིས། །བྲན་མོའི་བུ་ནི་མ་སོང་འདུག་པ་ལ། །བློན་པོས་ངེས་པ་མེད་ཀྱིས་སོང་ཞིག་སྐད། །རས་རྙིང་གྱོན་ཞིང་འབྲས་ཆན་ཁེངས་པ་ཅིག །ཟོས་སྟེ་ས་གཞི་ཉིད་ལ་འཁོད་པར་གྱུར། །བྲམ་ཟེས་འདི་དག་རྣམས་ལས་ཟས་མཆོག་ཟོས། །གོས་མཆོག་གྱོན་སྟེ་སྟན་མཆོག་ལ་འདུག་པ། །དེ་ནི་རྒྱལ་པོར་འགྱུར་རོ་ཞེས་ལུང་བསྟན། །སོ་སོར་བདག་གི་འདི་མཆོག་ཟེར་ཞིང་སོང༌། །བློན་པོས་མཆོག་དེ་གང་ཡིན་དྲིས་པ་ན། །ཟས་མཆོག་འབྲས་ཆན་གོས་མཆོག་རས་གོས་སྟེ། །སྟན་གྱི་མཆོག་ནི་ས་གཞི་ཡིན་ནོ་ཟེར། །ཐ་ཆུང་བྲན་མོའི་བུ་དེ་ལུང་བསྟན་ནོ། །རྒྱལ་པོ་ནད་ཀྱིས་འཆི་བར་ཉེ་བའི་ཚེ། །རྒྱལ་བུ་གཞན་ཀུན་དམག་གིས་གཡུལ་དུ་སོང༌། །བློན་པོས་བསྐུལ་བས་ཐ་ཆུང་ཨ་ཤོ་ཀར། །ཅོད་པན་བཅིངས་སྟེ་རེ་ཞིག་འདི་བྱོས་ལ། །དེ་ནས་ཕུ་བོ་ཞིག་ནི་སྐོས་ཤིག་སྐད། །ཕུ་བོ་བཅུ་བདུན་གཡུལ་ངོར་ཤི་ནས་ནི། །ཨ་ཤོ་ཀ་ཉིད་གཏན་གྱི་རྒྱལ་པོར་གྱུར། །དམྱལ་བའི་གཅོད་བཏུབ་ཡི་དྭགས་བཀྲེས་སྐོམ་དང། །དུད་འགྲོའི་བཀོལ་སྤྱོད་མི་ཡི་བྲེལ་ཕོངས་དང། །(ཅ༤༤བ)

[Full Size]

ལྷ་མིན་འཐབ་རྩོད་ལྷ་ཡི་ལོངས་སྤྱོད་དེ། །ཀུན་ལ་རེ་མོས་ཚུལ་གྱིས་འབངས་རྣམས་སྦྱར། །མིང་ཡང་གཏུམ་པོ་མྱ་ངན་མེད་ཅེས་གྲགས། །དེ་ཚེ་ཤར་ཕྱོགས་བྱ་གག་ཀུན་ར་ན། །འཕགས་པ་ཀུན་དགའ་བོ་ཡི་སློབ་མ་ནི། །དགེ་སློང་དབང་པོའི་སྡེའམ་གྲགས་པ་ཞེས། །དགྲ་བཅོམ་རྣམ་ཐར་བརྒྱད་དང་ལྡན་པ་བཞུགས། །དེ་ཡི་སློབ་མ་དགེ་ཚུལ་གཞོན་ནུ་ཞིག །བསོད་སྙོམས་སྤྱོད་མཐོང་རྒྱལ་པོས་བཟུང་ནས་ནི། །འདི་འདྲའི་ཆ་ལུགས་སྔོན་ཆད་གསོད་མ་མྱོང༌། །གཤེད་མ་རྣམས་ཀྱིས་ཟངས་སུ་ཚོས་ཤིག་ཟེར། །བདག་གིས་རབ་ཏུ་བྱུང་བའི་དོན་མ་གྲུབ། །ཞག་བདུན་སྒོམ་དུ་ཆུག་ཅེས་ཞུས་པས་གནང༌། །ཞག་ལྔའི་བར་དུ་ཅི་ཡང་མ་རྟོགས་ཚེ། །རྒྱལ་པོའི་བཙུན་མོ་ཞིག་ལ་ཆད་པ་ཕོག །དགེ་ཚུལ་དེ་ཡི་མདུན་དུ་བསད་ཅིང་བཏུབས། །ལུས་མཛེས་སྐྱེ་བོ་དགའ་བར་བྱེད་དེ་ཉིད། །རྒྱུ་ལྟོ་འཇན་འཇིན་རབ་ཏུ་མི་གཙང་བ། །འདི་ལྟར་གྱུར་སྙམ་མི་སྡུག་འདུ་ཤེས་ཐོབ། །སྐྱོ་བས་སྐད་ཅིག་དེ་ལ་དགྲ་བཅོམ་གྱུར། །ཞག་བདུན་ལོན་ཚེ་ཁ་སྦྱར་ཟངས་ཀྱིས་ནང༌། །ཡུངས་མར་བླུག་པར་ཉིན་གཅིག་བཙོས་ནས་ཕྱེ། །ཅི་ཡང་མ་ཉེས་ཟིལ་པ་ཕྲོམ་མེ་འདུག །ངོ་མཚར་སྐྱེས་སྟེ་དེ་ཡི་རྒྱུ་དྲིས་པས། །ཞག་བདུན་བསྒོམས་པས་དགྲ་བཅོམ་ཐོབ་ཅེས་ཟེར། །དུས་རིང་སྡིག་པ་མང་པོ་བསགས་སྙམ་ནས། །རྒྱལ་པོ་འགྱོད་དེ་སྡིག་སྦྱོང་གསོལ་བ་བཏབ། །ང་ནི་དགེ་ཚུལ་ཅང་མི་ཤེས་པ་སྟེ། །མཁན་པོའི་དྲུང་དུ་གསོལ་བ་ཐོབ་ཅིག་ཟེར། །ཆོ་འཕྲུལ་སྣ་ཚོགས་བསྟན་སྟེ་མྱ་ངན་འདས། །ས་དེར་དེ་ཡི་གདུང་གི་མཆོད་རྟེན་བཞེངས། །རྒྱལ་པོ་ཉིད་ཀྱི་གྲོང་ཁྱེར་དངོས་དེ་ནི། །རྡོ་རྗེའི་གདན་ནས་ཤར་དུ་དཔག་ཚད་བཅུ། །འདས་པ་གངྒཱའི་ཆུ་དང་ཉེ་བར་ཡོད། །དགྲ་བཅོམ་གྲགས་པའི་དྲུང་དུ་ཕོ་ཉ་བཏང༌། །བདག་གི་སྡིག་པ་སྦྱང་བའི་ཐབས་འཚོལ་ཕྱིར། །བདག་དེར་མཆི་འམ་འཕགས་པ་འདིར་གཤེགས་ཞེས། །གསོལ་བས་(ཅ༤༥ན)

[Full Size]

གཞན་ལ་གནོད་པར་གྱུར་དོགས་ནས། །འཕགས་པས་རྒྱལ་པོའི་དྲུང་དུ་མྱུར་བར་བྱོན། །སྡིག་པ་སྦྱོང་ཕྱིར་རིང་སྲེལ་ལྡན་པ་ཡི། །མཆོད་རྟེན་བྱེ་བ་ཕྲག་གཅིག་གྱིས་ཤིག་གསུང༌། །རྒྱལ་པོས་དེ་ཙམ་མི་འགྲུབ་ཅེས་སྨྲས་པས། །ཁྱོད་ནི་རྒྱལ་བས་སྔོན་དུ་ལུང་བསྟན་གྱི། །མི་དང་མི་མིན་ཀུན་ལ་བཀའ་སྒོས་དང༌། །རིང་པོར་མ་ཐོགས་འགྲུབ་པར་ངེས་སོ་གསུངས། །རྒྱལ་པོ་མ་སྐྱེས་དགྲ་ཡི་གདུང་སྐལ་གྱི། །རིང་སྲེལ་བྲེ་བོ་ཆེ་ཡི་ཁལ་གཅིག་ནི། །འོད་མའི་ཚལ་ན་གཏེར་དུ་སྦས་སོ་ཞེས། །གསུངས་ནས་དེ་ཡི་ས་གཞི་བྲུས་པ་ན། །མཚོན་ཆའི་འཁོར་ལོ་བྱུང་སྟེ་བཙལ་མ་ནུས། །བུད་མེད་ཅིག་གིས་གངྒཱའི་ཆུ་ཕྲན་ཞིག །དྲངས་ནས་ཡོད་ཅེས་ཐོས་ཀྱིས་ཆོད་ཅིག་ཟེར། །རྙེད་དེ་ཆུ་རྒྱུན་བཀག་པས་འཁོར་འཕྲོ་ཆད། །སྐུ་གདུང་བྲུས་པས་མ་འོངས་རྒྱལ་པོ་ནི། །དབུལ་པོ་ཞིག་གིས་གཏེར་འདི་རྙེད་འགྱུར་ཞེས། །རིན་ཆེན་ཡི་གེ་བྱུང་བས་མ་རངས་སྟེ། །ང་ལྟ་བུ་ལ་དབུལ་པོ་ཞེས་ཟེར་བ། །མི་རིགས་ཟེར་སྟེ་སྐུ་གདུང་འཚོལ་འཕྲོ་བཅད། །རྒྱལ་བའི་གདུང་ཕྱིར་ང་རྒྱལ་མ་བྱེད་ཅེས། །བསྐུལ་ནས་སླར་བཙལ་རིན་ཆེན་སྒྲོམ་བུར་བཞུགས། །ཕྱོགས་བཞིར་ནོར་བུ་རིན་ཆེན་རེ་རེ་བཞག །དེ་ཡིས་རྟག་དུ་མར་མེའི་བྱ་བ་བྱེད། །རྒྱལ་པོ་ཨ་ཤོ་ཀ་ཡི་རྒྱལ་སྲིད་ཀྱིས། །ནོར་བུ་རེ་རེའི་རིན་དུའང་མ་ཆོག་ནས། །རྒྱལ་པོའི་ང་རྒྱལ་ཆག་ཅིང་དུལ་བར་གྱུར། །དེ་ནས་རིང་སྲེལ་བྲེ་ཆེན་བཞི་སྤྱན་དྲངས། །བྲེ་འུ་ཆུང་གི་ཁལ་གཅིག་ཚད་དུ་བྱུང༌། །ལྷག་མ་སྔར་བཞིན་རྒྱས་བཏབ་སྦས་སྟེ་བཞག །སྟེང་དུ་མཆོད་རྟེན་ངོ་མཚར་ལྡན་པ་བྱས། །ཛམྦྷ་ལ་དང་གནོད་སྦྱིན་ཤིང་རྟ་གྲུབ། །རྫུ་འཕྲུལ་སྟོབས་ཆེན་ལྡན་པའི་གནོད་སྦྱིན་ཞིག །བྱ་བ་ཐོགས་མེད་སྒྲུབ་པའི་བློན་པོར་གྱུར། །དེ་ཡིས་གྲོགས་བྱས་འཛམ་གླིང་རྣལ་དུ་ཕབ། །མི་དང་མི་མ་ཡིན་པ་ཀུན་བསྐུལ་ནས། །ས་སྟེང་ཀུན་དུ་རྡོ་ཡི་སྲོག་ཤིང་བསྒྲེངས། །འཛམ་གླིང་ཁྱབ་པར་རྒྱལ་བའི་མཆོད་རྟེན་བྱས། །མཆོད་རྟེན་(ཅ༤༥བ)

[Full Size]

གྲངས་ནི་བྱེ་བ་སྙེད་ཡོད་ཕྱིར། །དེང་སང་བྱེ་བ་མཆོད་རྟེན་ཞེས་སུ་གྲགས། །གསུམ་དང་བརྒྱད་དང་བྱེ་བ་ལ་སོགས་པ། །བདེ་གཤེགས་མཆོད་རྟེན་རྣམས་ལ་ཕྱག་འཚལ་ཞེས། །ཀླུ་སྒྲུབ་ཞབས་ཀྱིས་བཤད་པའང་འདི་ཉིད་ཡིན། །ཀུན་ན་རྒྱལ་བའི་རིང་སྲེལ་རེ་རེ་བཞུགས། །མདོ་ལས་མཆོད་རྟེན་བརྒྱད་ཁྲི་བཞི་སྟོང་ཞིག །བྱེད་པར་འགྱུར་ཞེས་ལུང་བསྟན་ཁོ་ན་སྣང༌། །སངས་རྒྱས་བསྟན་ལ་བྱ་བ་རྒྱ་ཆེན་བྱས། །མཚན་ཡང་ཆོས་རྒྱལ་ཨ་ཤོ་ཀ་ཞེས་བརྗོད། །གཞན་ཡང་གནས་ཆེན་བརྒྱད་ལ་སོགས་པ་རུ། །གཙུག་ཁང་མང་བྱས་དགེ་འདུན་མཐའ་ཡས་མཆོད། །བཀའ་ཡི་བསྡུ་བ་བར་པའི་སྦྱིན་བདག་བྱས། །རྒྱལ་པོ་དེ་སྲས་ཀུ་ན་ལ་ཡི་མིག །ཡབ་ཀྱི་བཙུན་མོ་སྐར་རྒྱལ་སྲུང་བ་ཡིས། །འདོད་ཅིང་ཆགས་པས་བསླུ་བར་མ་ནུས་ཚེ། །གྱ་གྱུས་མིག་ཕྲོགས་སློང་མོས་འཚོ་བའི་ཚེ། །ཁྲོ་བ་མེད་པའི་བདེན་པས་མིག་རབ་སོས། །བསྟན་ལ་རབ་བྱུང་དགྲ་བཅོམ་དམ་པར་གྱུར། །འདི་ལ་ཀུ་ན་ལའི་མིག་གི་རྟོགས་བརྗོད་ཅེས་པ་ཡོད། འཛམ་བུའི་གླིང་ནས་རྒྱ་མཚོར་འདོང་བ་ཡི། །ཚོང་པའི་ཚོགས་ཤིག་ལན་ལྔར་གྲུ་ཆེན་ཞིག །ནོར་རྫས་ཆུར་ཤོར་རང་རང་རྐྱལ་སྟེ་ཐར། །མི་དེ་རྣམས་ཀྱིས་རྒྱལ་པོའི་སྤྱན་སྔར་འདུས། །ཁྱོད་ཀྱི་བཀའ་ལུང་ཀུན་གྱིས་ནོད་ན་ཡང༌། །རྒྱ་མཚོའི་ཀླུ་ཡིས་ཁྱོད་ཀྱི་བཀའ་མ་ཉན། །བདག་ཅག་ལན་ལྔར་ནོར་རྫས་ཀུན་དང་ཕྲལ། །དེ་བས་ཁྱོད་ཀྱིས་རྫས་རྣམས་དགུག་དུ་གསོལ། །དེ་སྐད་མགྲིན་གཅིག་བརྗོད་དེ་ངུད་མོ་འབྱིན། །རྒྱལ་པོ་གདོང་དམར་ངོ་ཚ་ལྡན་གྱུར་སྟེ། །འདི་ལ་ཇི་ལྟར་བྱ་སྙམ་ཐེ་ཚོམ་གྱུར། །དགྲ་བཅོམ་གྲགས་པ་ལ་ནི་ཞུས་པ་ན། །ཟངས་མའི་གླེགས་བུར་རྒྱལ་པོའི་བཀའ་ཡིག་བཀོད། །རྒྱ་མཚོ་ཆེན་པོའི་ནང་དུ་དོར་ཞིག་གསུངས། །དེ་ལྟར་བྱས་པས་ཀླུ་ཡིས་མ་བླངས་སྟེ། །རླབས་ཀྱིས་ཚུ་རོལ་རྒྱང་རིང་ཞིག་དུ་འཕངས། །དེ་ཚེ་དགྲ་བཅོམ་གྲགས་པའི་(ཅ༤༦ན)

[Full Size]

ཞལ་ན་རེ། །འཛམ་བུ་ཆུ་བོའི་གསེར་ལས་རྒྱལ་པོ་ཡི། །གཟུགས་དང་ཀླུ་ཡི་གཟུགས་ཤིག་ཚར་མཉམ་གྱིས། །ལྷན་ཅིག་ཁྲུས་ཀྱི་རྫིང་བུར་དོར་ཅིག་གསུངས། །དེ་ཚེ་ཀླུ་ཡི་གཟུགས་ནི་གཟི་འོད་འབར། །ཆུ་ལ་མ་བྱིངས་སྟེང་དུ་འཕགས་ཤིང་གསལ། །རྒྱལ་པོའི་སྐུ་གཟུགས་མོག་ཞིང་ཆུར་བྱིངས་ནས། །དེ་ཡི་མདུན་དུ་ཕྱག་བྱེད་ཚུལ་གྱིས་བུབ། །དགྲ་བཅོམ་ཞལ་ནས་ད་ལྟ་རྒྱལ་པོ་བས། །ཀླུ་རྒྱལ་བསོད་ནམས་ལྷག་པར་ལྡན་གྱུར་གྱིས། །རྒྱལ་པོ་ཆེན་པོ་བསོད་ནམས་གྱིས་ཤིག་གསུངས། །དགྲ་བཅོམ་འབུམ་ཕྲག་མང་པོ་སྤྱན་དྲངས་སྟེ། །རྒྱ་ཆེན་བསྙེན་ཞིང་བཀུར་བས་རབ་ཏུ་མཆོད། །རྒྱལ་བའི་སྐུ་གསུང་ཐུགས་རྟེན་རྒྱ་ཆེར་བྱས། །ཁ་ན་མ་ཐོ་མེད་པའི་མཆོད་སྦྱིན་ཚེ། །སྤོ་གཏན་མ་བཅུག་རྒྱུན་མི་འཆད་པར་བྱེད། །ཞག་བདུན་ལོན་ཚེ་རྒྱལ་པོའི་སྐུ་གཟུགས་དེ། །མི་ནུབ་ཕྱེད་ཙམ་ཆུ་བོའི་སྟེང་དུ་བྱུང༌། །བདུན་གཉིས་ལོན་ཚེ་གཟུགས་གཉིས་མཐོ་དམན་དང༌། །བཟང་ངན་མེད་པར་ཆུ་སྟེང་མཉམ་པར་འདུག །ཞག་གྲངས་ཉེར་གཅིག་ལོན་ཚེ་རྒྱལ་པོའི་གཟུགས། །གསལ་ཞིང་འོད་འབར་ཆུ་བོའི་སྟེང་དུ་འཕགས། །ཀླུ་གཟུགས་ལྕགས་ལས་བྱས་ལྟར་འོད་མི་གསལ། །ཕྱག་བྱེད་ཚུལ་གྱིས་བུབ་སྟེ་ཆུ་བོར་ནུབ། །འཕགས་པའི་ཞལ་ནས་འཕྲིན་ཡིག་སྲིངས་ཤིག་གསུངས། །ཟངས་མའི་གླེགས་བུར་བཀོད་པའི་བཀའ་ཡིག་ནི། །རྒྱ་མཚོར་འཕངས་པས་དབུ་བའི་ཕུང་པོས་བཏེག །སྒྲ་ཆེན་སྒྲོག་ཅིང་རྒྱ་མཚོའི་དབུས་སུ་ནུབ། །ཀླུ་དང་གནོད་སྦྱིན་སྲུལ་པོ་ལུས་སྲུལ་སོགས། །མི་མ་ཡིན་པའི་འགྲོ་བ་མང་པོ་ཡིས། །ཚོང་པ་རྣམས་ཀྱི་ཟོང་རྣམས་མ་ལུས་དང༌། །ཀླུ་ཡི་རིན་ཆེན་དཔག་མེད་ཁྱེར་ནས་ནི། །ཀུན་གྱིས་མཐོང་བར་རྒྱལ་པོའི་མདུན་དུ་ཕུལ། །སྲི་ཞུ་ཕུ་དུད་མཆོད་བསྟོད་རྒྱ་ཆེར་བྱས། །མི་སྐྱེའི་བཟོད་ཐོབ་བྱང་ཆུབ་ལུང་བསྟན་པའི། །ཀླུ་རྒྱལ་རྒྱ་མཚོའི་བསོད་ནམས་ཟིལ་(ཅ༤༦བ)

[Full Size]

ནོན་པའི། །མི་ཡི་རྒྱལ་པོ་མྱ་ངན་མེད་པ་དེ། །ལྷག་པར་བསོད་ནམས་མཐུ་ལ་ཡིད་འཆེས་སྟེ། །དགེ་འདུན་ལ་ནི་གསེར་སྲང་བྱེ་བ་བརྒྱ། །འབུལ་བའི་ཡི་དམ་བརྟེན་པོ་བཟུང་བར་གྱུར། །འདི་ལ་ཆོས་རྒྱལ་མྱ་ངན་མེད་ཀྱིས་ཀླུ་བཏུལ་བའི་ལེའུ་ཞེས་བྱ་བའི་རྟོགས་བརྗོད་ཡོད་ཅིང་དཔག་བསམ་འཁྲི་ཤིང་གི་ཡལ་འདབ་དོན་གསུམ་པ་ཡང་འདི་ཡིན། རྒྱལ་པོ་དེ་ཡི་ཀུན་ཏུ་སྤྱོད་པ་ནི། །དགེ་སློང་དགེ་འདུན་མཐའ་ཡས་ཉིན་རེ་ཞིང༌། །ཕོ་བྲང་སྤྱན་འདྲེན་མཆོད་པ་རྒྱ་ཆེན་བྱེད། །གདུགས་ཚོད་རྙེད་པ་བསྟབས་ནས་དམ་ཆོས་ཉན། །དེ་ལྟར་རྟག་དུ་རྒྱལ་བའི་བསྟན་ལ་མཆོད། །གསེར་སྲང་བྱེ་བ་གོ་དྲུག་ཕུལ་ཟིན་ནས། །བྱེ་བ་བཞི་ཡིས་མ་ལོངས་གྱུར་པའི་ཚེ། །རྒྱལ་པོ་དུས་ཀྱི་བསྙུན་ནད་དྲག་པོས་ཟིན། །རྒྱལ་པོའི་ཚ་བོ་རྒྱལ་ཚབ་བྱེད་པ་ལ། །བཀའ་ཡིས་བསྒོས་ཀྱང་འགྲོངས་པར་ཤེས་པ་ཡིས། །མཛོད་ལ་སེར་སྣ་བྱས་སྟེ་གསེར་མ་ཕུལ། །དགེ་འདུན་རྣམས་ཀྱང་རྒྱལ་པོར་ཐུགས་རྗེ་བས། །སྤྱན་མ་དྲངས་ཀྱང་ཉིན་རེ་བཞིན་དུ་བྱོན། །རྒྱལ་ཚབ་དེ་ཡིས་གདུགས་ཚོད་མ་སྦྱར་ནས། །དམ་ཆོས་བསྟན་ནས་ལྷུང་བཟེད་སྟོང་པ་ཡིས། །ཕོ་བྲང་ཕྱིར་བྱོན་བསོད་སྙོམས་སྤྱོད་པར་བྱེད། །རྒྱལ་པོས་རང་གི་སྨན་དང་གསོལ་ཟས་དང༌། །གོས་དང་རྒྱན་ལས་ཕྲི་སྟེ་ཅི་ནུས་འབུལ། །དེ་དག་རྣམས་ཀྱང་རྒྱལ་བུས་སྲུང་བཅུག་པས། །ཐ་མའི་ཉིན་པར་དབུལ་བྱ་གཞན་མ་འབྱོར། །ཁྲུས་རྩིའི་སྐྱུ་རུ་ར་ཡི་ཕྱེ་མ་ནི། །ཕུལ་གང་བདོག་པ་དེ་ཉིད་ཁོ་ན་བུལ། །དེ་ཚེ་རྒྱལ་པོའི་ཆོས་བློན་ཆེན་པོ་ཅིག །སྐྱོ་བར་གྱུར་སྟེ་རྒྱལ་པོ་ཆེན་པོ་ལགས། །ཁྱོད་ལ་ཡོ་བྱད་གཞན་དག་མི་བདོག་ཀྱང༌། །ས་གཞི་བདོག་གིས་འདི་ཉིད་འབུལ་བར་གྱིས། །གསེར་སྲང་བྱེ་བ་བཞི་ཡིས་བླུ་རུ་ཆུག །ཁྱོད་ཀྱི་ཐུགས་དགོངས་རྫོགས་པར་འགྱུར་རོ་ཞེས། །གསོལ་བས་རྒྱལ་པོ་ཆེན་པོ་རབ་ཏུ་མཉེས། །ས་གཞི་མ་ལུས་དགེ་འདུན་རྣམས་ལ་ཕུལ། །རྒྱལ་ཚབ་དེ་ཡིས་བྱེ་བ་བཞི་ཡིས་བླུས། །དེ་ནས་རྒྱལ་པོ་དུས་(ཅ༤༧ན)

[Full Size]

ཀྱི་ཆོས་ལྡན་པས། །དགའ་ལྡན་ལྷ་ཡི་རིགས་སུ་གཤེགས་པར་གྱུར། །མཐར་ནི་རྫོགས་འཚང་རྒྱ་བར་ལུང་དུ་བསྟན། །གཞན་ཡང་འཇམ་དཔལ་རྩ་བའི་རྒྱུད་ཆེན་ལས། །རྒྱལ་པོ་ལུང་བསྟན་མདོར་བསྡུས་བརྗོད་བྱས་ན། །མྱ་ངན་མེད་འོག་མྱ་ངན་བྲལ་ཞེས་འབྱུང༌། །གོས་དཀར་མོ་གྲུབ་ཆོས་ཀྱི་ངང་ཚུལ་ཅན། །ལོ་ནི་བདུན་བཅུ་རྩ་དྲུག་མཆོད་རྟེན་མཆོད། །དེ་ཡི་འོག་དུ་དཔའ་བོའི་སྡེ་ཞེས་འབྱུང༌། །དཔལ་ཆེན་མོ་གྲུབ་གཙུག་ལག་ཁང་ཆེན་བྱེད། །རྒྱ་མཚོའི་མཐར་ཐུག་མཆོད་རྟེན་དུ་མས་བརྒྱན། །ལོ་ནི་བདུན་བཅུར་ཆོས་ཀྱིས་རྒྱལ་ཐབས་བྱེད། །གཉི་གའང་ལྷར་སྐྱེ་བྱང་ཆུབ་ཆེ་འཐོབ་འགྱུར། །དེ་འོག་རྒྱལ་པོ་དགའ་བོ་ཞེས་བྱ་འབྱུང༌། །ཤ་ཟ་པི་ལུའི་སྔགས་གྲུབ་ལོངས་སྤྱོད་ལྡན། །དེ་ཡི་གྲོགས་པོ་བྲམ་ཟེ་པཱ་ཎི་ཞེས། །སྤྱན་རས་གཟིགས་ཀྱི་སྔགས་གྲུབ་བརྡ་སྤྲོད་བྱེད། །བྲམ་ཟེ་མཆོག་སྲིད་ཅེས་བྱའང་དེ་ཚེ་འབྱུང༌། །རྒྱལ་པོའི་ཚེ་ཚད་ལྔ་བཅུ་རྩ་དྲུག་སྟེ། །གྲོགས་བཅས་ཉན་ཐོས་བྱང་ཆུབ་འཐོབ་པར་འགྱུར། །དེ་ནས་རྒྱལ་པོ་ཟླ་བ་སྦས་པ་ཞེས། །ཛམྦྷ་ལ་གྲུབ་རྒྱལ་སྲིད་ལོངས་སྤྱོད་རྒྱས། །ཤི་འཕོས་ལས་ཀྱིས་ཡི་དྭགས་འཇིག་རྟེན་སོང༌། །དེ་ནས་ལྷར་སྐྱེ་ཉན་ཐོས་བྱང་ཆུབ་འཐོབ། །དེ་ཡི་བུ་ནི་སྙིང་པོ་ཐིག་ལེ་ཞེས། །སྔོན་དུས་བྱིས་པར་གྱུར་ཚེ་རྩེད་མོའི་ཕྱིར། །རྒྱལ་བའི་མཆོད་རྟེན་བྱེ་མ་ལས་བྱས་མཐུས། །སྐྱེ་བ་ལྔ་བརྒྱར་ལྷ་ཡི་བདེ་མྱོང་ནས། །དེ་ནས་ཤི་འཕོས་མི་ཡི་རྒྱལ་པོར་གྱུར། །བྱིས་པའི་དུས་ནས་རྒྱལ་པོར་ཅོད་པན་བཅིངས། །འཇམ་དཔལ་དང་ནི་སྒྲ་ཡི་རིག་པ་གྲུབ། །ཆོས་བཞིན་རྒྱལ་སྲིད་ལོ་ནི་བདུན་བཅུར་བྱེད། །དེ་ཡི་བློན་པོ་བྲམ་ཟེ་ཙ་ན་ཀས། །གཤིན་རྗེའི་གཤེད་གྲུབ་ཁྲོ་བས་ཟིལ་མནན་སྟེ། །རྒྱལ་པོ་གསུམ་གྱི་རིང་ལ་མངོན་སྤྱོད་ཀྱིས། །ཤིན་དུ་མི་བཟད་སྡིག་ཆེན་བྱས་པར་འགྱུར། །སྔགས་ཀྱི་མཐུ་ཡིས་ལྷ་མ་ཡིན་བཀུག་ནས། །(ཅ༤༧བ)

[Full Size]

ལུས་དེས་ལྷ་མིན་བསྟེན་སྟེ་ཡུན་རིང་འཚོ། །ཤི་འཕོས་མནར་མེད་དམྱལ་བའི་གནས་སུ་སྐྱེ། །སྡུག་བསྔལ་མི་བཟད་མཐའ་ཡས་མྱོང་བར་འགྱུར། །དེ་ནས་ཤི་འཕོས་ཀླུ་ཡི་རྒྱལ་པོར་སྐྱེ། །འཇིགས་པའི་གཟུགས་ཅན་མ་རུངས་དུག་འཛིན་པ། །མི་བཟད་སྡིག་པའི་ལས་ལམ་བྱེད་པར་འགྱུར། །དེ་ནས་ཤི་འཕོས་རྫུ་འཕྲུལ་ཆེན་པོ་ཡི། །ཡི་དྭགས་གཤིན་རྗེའི་རྒྱལ་པོར་རབ་ཏུ་འགྲོ། །དེ་ལྟར་སྡུག་བསྔལ་སྟོང་ཕྲག་ཡང་ཡང་མྱོང༌། །མཐར་གྱིས་མིར་སྐྱེས་ཡོན་གནས་མཆོག་གྱུར་པའི། །རང་སངས་རྒྱས་ལ་བསོད་སྙོམས་ཕུལ་ནས་ནི། །སྨོན་ལམ་བཏབ་ནས་ཤི་འཕོས་མཐོ་རིས་སོང༌། །མཐར་གྱིས་དམན་པའི་བྱང་ཆུབ་ཐོབ་པར་འགྱུར། །དེ་བས་སྔགས་སྒྲུབ་མངོན་སྤྱོད་ཡོང་མི་བྱ། །རྒྱལ་དང་རྒྱལ་སྲས་རྣམས་ཀྱིས་མངོན་སྤྱོད་བཀག །སྙིང་རྗེ་མཆོག་དང་རྫུ་འཕྲུལ་ཆེ་ལྡན་པའི། །སྲས་བཅས་རྒྱལ་བས་སྔགས་ཀྱི་ལས་རྣམས་ནི། །མཐུ་བསྟན་ཆེད་དུ་གསུངས་ཀྱི་གསང་ཕྱིར་མིན། །དེ་བས་མངོན་སྤྱོད་མི་བྱ་ཞེས་ལུང་བསྟན། །འདི་དུས་དགེ་སློང་མ་ཁོལ་འབྱུང་བར་གསུངས། །དགེ་སློང་དགའ་བོའི་འོག་དུ་ས་ཡི་བདག །ཙནྡན་སྐྱོང་འབྱུང་ལོ་ནི་སུམ་བརྒྱར་འཚོ། །གེགས་མེད་བྱང་ཆུབ་ཆེན་པོ་བདེ་བླག་འཐོབ། །དེ་ནས་མི་དགེའི་བཤེས་གཉེན་གོ་མི་ཤན། །བདག་ཉིད་ངན་པས་ཡོངས་སུ་བསླུས་པ་ཡི། །སྡིག་པའི་རྒྱལ་པོ་བཙུན་པ་ཞེས་བྱ་བ། །ནག་པོའི་རྩ་ལག་ཞིག་གིས་ཤར་ཕྱོགས་ནས། །ཁ་ཆེའི་བར་དུ་ལྷ་ཁང་མཆོད་རྟེན་འཇིག །རབ་བྱུང་རྣམས་གསོད་དེ་ཚེ་དཀར་ཕྱོགས་ཀྱི། །ལྷ་ཀུན་འཁྲུགས་ནས་བྱང་ཕྱོགས་ལ་བརྟེན་པར། །རྒྱལ་པོ་དེ་ནི་རི་ཡིས་བཅོམ་སྟེ་འཆི། །འོག་ནས་འོག་འགྲོ་མནར་མེད་དམྱལ་བར་འཚེད། །ནམ་ཞིག་སངས་རྒྱས་བསྟན་ལ་འཇུག་པར་འགྱུར། །དེ་འོག་རྒྱལ་པོ་སངས་རྒྱས་ཕྱོགས་ཞེས་པ། །གྲགས་ཆེན་གཏོང་བ་ཆེ་ཞིང་བསྟན་ལ་གུས། །དེ་ནས་རྒྱལ་པོ་ཐམས་ཅད་མངོན་དགའ་ཞེས། །པདྨ་འཆང་(ཅ༤༨ན)

[Full Size]

གྲུབ་སྟོན་པའི་བསྟན་གཙོར་བྱེད། །ཀུན་དགའ་ར་བ་མཆོད་རྟེན་གནས་དང་ནི། །མཚེ་འུ་རྫིང་ཁྲོན་མཚོ་དང་ལུ་མ་སོགས། །ཀུན་དུ་སྟོན་པའི་གཟུགས་བརྙན་རྒྱ་ཆེར་བྱེད། །སྔགས་ཀྱི་མཐུ་ཡི་ལོ་ནི་སུམ་བརྒྱར་མཚོ། །ལྷ་ཡི་གནས་སྐྱེ་མྱུར་དུ་བྱང་ཆུབ་འཐོབ། །གྲོང་ཁྱེར་ལྔ་ལེན་དུ་ནི་དེ་ཡི་བུ། །ཟབ་མོའི་ཕྱོགས་ཅེས་བྱ་བའི་རྒྱལ་པོ་འབྱུང༌། །འཇམ་དཔལ་དབྱངས་ཀྱི་ཡི་གེ་དྲུག་པ་གྲུབ། །མཆོད་རྟེན་གཙུག་ཁང་གནས་ཁང་རྒྱ་ཆེར་བྱེད། །སྔགས་ཀྱི་མཐུ་ཡིས་ལོངས་སྤྱོད་རྒྱ་ཆེན་ལྡན། །རྒྱལ་བའི་བསྟན་ལ་རྣམ་པ་སྣ་ཚོགས་ཀྱིས། །བྱ་བ་ཆེར་བྱས་མྱུར་དུ་བྱང་ཆུབ་འཐོབ། །སྐབས་འདིར་བོད་དང་རྒྱ་ཡི་རྒྱལ་པོ་སོགས། །ལུང་དུ་བསྟན་མོད་སོ་སོའི་སྐབས་སུ་འཆད། །བྱང་ཕྱོགས་རྒྱལ་པོ་ཏུ་རུཥྐ་ཞེས་འབྱུང༌། །སྐྲ་ཅན་མ་གྲུབ་སྡེ་ཆེན་བརྩོན་འགྲུས་ལྡན། །ཤིང་ཤུན་གྱོན་ཡུལ་མ་གཏོགས་ཁ་ཆེ་དང༌། །ཀ་ཤིའི་མཐར་ཐུག་དཔག་ཚད་བདུན་བརྒྱ་དང༌། །འབུམ་ཕྲག་གཉིས་ཀྱི་ས་སྐྱོང་བསྟན་ལ་མཆོད། །རྒྱལ་བའི་མཆོད་རྟེན་སྟོང་དང་བརྒྱད་ཁྲི་བྱེད། །དེ་ཡི་ཡུལ་དུ་ཐེག་ཆེན་ཤེས་ཕྱིན་རྒྱས། །ལོ་ནི་སུམ་བརྒྱར་སྔགས་ཀྱི་མཐུ་ཡིས་འཚོ། །ལུས་ཞིག་མཐོ་རིས་འགྲོ་ཞིང་སངས་རྒྱས་འགྱུར། །དེ་འོག་མང་བསྐུར་ཏུ་རུཥྐ་ཞེས་འབྱུང༌། །སྒྲོལ་མའི་སྔགས་གྲུབ་ཕྱོགས་ཆེན་དཔུང་ཆེན་པོ། །གྲགས་ཆེན་གཉེན་དང་རྒྱལ་པོ་ཀུན་གྱིས་བསྐུར། །རྩ་བརྒྱད་སྟོང་གི་གཙུག་ལག་ཁང་བྱེད་ཅིང༌། །ཆོས་ཀྱི་བདག་ཉིད་དེ་མཐར་རྫོགས་འཚང་རྒྱ། །དེ་ཡི་ཡུལ་དུ་གསུང་རབ་མང་གནས་པར། །སྔོན་གྱི་རྒྱལ་བ་དག་གིས་ཀྱང་ལུང་བསྟན། །དགྲ་བཅོམ་དང་ནི་ཀླུ་དང་འཇིག་རྟེན་སྐྱོང༌། །བསྟན་སྲུང་གནོད་སྦྱིན་མང་པོ་དེ་ཚེ་འབྱུང༌། །ནུབ་ཕྱོགས་འཕགས་རྒྱལ་ཕ་རོལ་ལ་ཊའི་ཡུལ། །པུ་ཊིའི་རྒྱལ་རིགས་ངང་ཚུལ་ཞེས་བྱ་བ། །དགེ་སློང་ཞིག་ལས་ཤི་འཕོས་(ཅ༤༨བ)

[Full Size]

རྒྱལ་པོ་འབྱུང༌། །མཆོད་རྟེན་སྐུ་གཟུགས་མཆོད་ཅིང་གཙུག་ཁང་བྱེད། །ཆོས་རྒྱལ་ཆོས་ལ་གཉེན་གཤིན་སྔགས་ཀྱང་གྲུབ། །ལོ་ནི་སུམ་བཅུར་སྲིད་བསྐྱངས་དགའ་ལྡན་དུ། །བྱམས་པའི་མདུན་འགྲོ་མཐར་གྱིས་བྱང་ཆུབ་འཐོབ། །དེ་ནས་གཡོ་བ་ཞེས་བྱའི་རྒྱལ་པོ་ནི། །ལོ་གྲངས་ང་ལྔ་ཟླ་བ་ལྔ་རུ་འཚོ། །དེ་ཡི་ནུ་བོ་བསྟན་ཞེས་སྐྱེ་རྒུ་སྐྱོང༌། །ངང་ཚུལ་འོག་དུ་ཟླ་མཛེས་གཞུ་དང་ཏོག །མེ་ཏོག་གཞུ་དང་འོད་ཆེན་སྟོབས་རྣམས་ལྡན། །ཁྱབ་འཇུག་བར་དུ་བ་ལའི་གྲོང་དང་ནི། །རེས་ལྡན་གྲོང་དུ་རྒྱལ་པོ་མཐའ་ཡས་འབྱུང༌། །དེ་ནས་དྲང་སྲོང་དམོད་པས་བཅོམ་གྱུར་སྟེ། །ལ་ཊའི་ཡུལ་ཀུན་ཆུ་ཡིས་གང་བར་འགྱུར། །བྱང་ཕྱོགས་རི་དང་རི་ཞོལ་སྣ་ཚོགས་པར། །ཉི་ཤུ་གཅིག་དང་སུམ་བཅུ་ལ་སོགས་པ། །སྔགས་གྲུབ་རྒྱལ་པོ་མང་དུ་འབྱུང་བར་གསུངས། །ལྷོ་ཕྱོགས་མཚོའི་འགྲམ་ཀཉྩི་པུ་རའི་གནས། །དཀར་དང་ས་བདག་སཱ་ལའི་ལྗོན་པ་སོགས། །རྒྱལ་པོ་སྟོང་ཕྲག་བགྲངས་པ་འབྱུང་བར་བསྟན། །དཔལ་གྱི་རི་བོའི་ཕྱོགས་དང་འབིགས་བྱེད་ཞོལ། །ཀ་ལིངྒ་དང་ཡོན་ཏན་གསུམ་པ་དང༌། །ཀླ་ཀློ་རྒྱ་མཚོའི་ནང་དང་འགྲམ་དག་དང༌། །ཀཱ་མ་རཱུ་དང་ཨོ་ཊའི་ཡུལ་སོགས་སུ། །རྒྱལ་པོ་བསྟན་ལ་དད་པ་མཐའ་ཡས་འབྱུང༌། །དེ་བཞིན་ཤར་གྱི་ཕྱོགས་སུ་རྒྱ་མཚོ་དང༌། །རྣམ་གནོན་དབང་ཆེན་ལ་སོགས་བསྟན་པ་ལ། །དད་པའི་རྒྱལ་པོ་དུ་མ་ལུང་དུ་བསྟན། །གཽ་ཊའི་ཡུལ་དུ་གཞོན་ནུ་ཞེས་བྱ་སོགས། །མཆོག་དམན་རྒྱལ་པོ་སྣ་ཚོགས་འབྱུང་བར་བསྟན། །ཁྱད་པར་ཤར་ཕྱོགས་མཚོར་བརྟེན་འབྲོག་གི་བར། །བྱང་དུ་ལོ་ཧི་ཏ་ཀླུང་ཁ་བ་ཅན། །ནུབ་ཏུ་ཀ་ཤིའི་གྲོང་ལ་ཐུག་པའི་བར། །དབང་བྱེད་རྒྱལ་པོ་སེང་གེ་ལྔ་པར་གསུངས། །འདི་རྔོག་ལོ་ཆེན་པོའི་ལུང་བསྟན་དུ་གྲགས་ཀྱང་དེ་མིན། གཞན་ཡང་ཡུལ་དུས་མ་ངེས་རྒྱལ་པོའི་ཚོགས། །མང་དུ་གསུངས་མོད་མདོར་བསྡུས་བརྗོད་པ་སྟེ། །རྒྱས་པར་འཇམ་དཔལ་རྩ་བའི་རྒྱུད་ཉིད་ལྟོས། །(ཅ༤༩ན)

[Full Size]

སྔོན་བྱུང་གཏམ་གྱི་གྲགས་པ་ལྟར་བཤད་ན། །ཆོས་རྒྱལ་མྱ་ངན་མེད་འདས་རིང་ཞིག་ན། །རྒྱལ་པོ་ཙནྡྲ་བདུན་རྒྱུད་ཅེས་པ་བྱུང༌། །ཧ་རི་ཙནྡྲ། དེ་ཝ་ཙནྡྲ། ཤྲི་ཙནྡྲ། ཨ་ཁེ་ཙནྡྲ། །དྷརྨ་ཙནྡྲ། བི་ཀྲ་མ་ཙནྡྲ། བདུན་པ་གོ་མི་ཙནྡྲ་ཞེས་བྱ་བ། །ཛཱ་ལནྡྷ་ར་པ་ཡི་སློབ་མ་སྟེ། །ཐུན་མོང་དངོས་གྲུབ་བརྙེས་པར་གྱུར་པ་ཡིན། །དེ་འདས་འོག་དུ་བཙུན་མོ་མཛེས་མ་ཞིག །ཀླུ་བདུད་གདུག་པ་ཅིག་གིས་བདག་གིར་བྱས། །རྒྱལ་པོར་གང་བསྐོས་དང་པོ་ལོ་གཅིག་དང༌། །དེ་འོག་ཟླ་གཅིག་དེ་ཕྱིན་ཞག་རེ་ལ། །རེ་རེ་ཟོས་སྟེ་གྲོང་གི་སྐྱེས་པ་ཀུན། །རེ་མོས་ཀྱིས་བསྐོ་ཐམས་ཅད་སྡུག་བསྔལ་ལྡན། །དེ་ཚེ་འོད་ཟེར་ཅན་མ་གྲུབ་པ་ཡི། །རྒྱལ་རིགས་རྣལ་འབྱོར་པ་ཅིག་དེར་འོངས་ནས། །བ་ལང་རྫི་བོ་ཞིག་ལ་གནས་བཅས་འདུག །དེ་དག་ངུ་ཞིང་དོ་ནུབ་རྒྱལ་པོ་ཡི། །རེ་མོས་བབ་པས་སང་ནི་མི་ལྡོག་ཟེར། །སྙིང་རྗེས་ང་ཡིས་ཚབ་མ་བྱའོ་སྨྲས། །རྒྱལ་པོར་བསྐོས་སྟེ་རིན་ཆེན་ཁྲི་ལ་བསྡད། །སྲོད་ལ་དུག་སྦྲུལ་ནམ་གུང་སྟག་དང་ནི། །ཐོ་རངས་དུས་སུ་སེང་གེར་བྱས་ནས་ནི། །སྐྱེས་བུ་དམན་འབྲིང་མཆོག་ལ་གནོད་བྱེད་པ། །དེ་དག་ལྷ་ཡི་ང་རྒྱལ་གྱིས་ཚར་བཅད། །མཛེ་མོ་མི་བཟད་འཇིགས་པ་ཅིག་སྣང་བ། །ནད་བྲལ་ལྷ་ཡི་ལུས་ལྟར་གྱུར་ནས་ནི། །ཁྱོད་ནི་ཀུན་ལ་བཀའ་དྲིན་མཚུངས་པ་མེད། །བདག་གི་ལུས་ཀྱང་རྟག་དུ་ཁྱོད་ལ་འབུལ། །སྙིང་རྗེས་རྒྱལ་སྲིད་མཛོད་ཅེས་ཞབས་ལ་གཏུགས། །ནང་པར་གྲོང་ཁྱེར་པ་རྣམས་ཁྱོགས་ལ་སོགས། །ཁྱེར་སྟེ་རྒྱལ་པོའི་སྐུ་གདུང་དུར་ཁྲོད་དུ། །སྤྱན་འདྲེན་འོངས་ཚེ་རྒྱལ་པོ་མ་ཉམས་མཐོང༌། །ཀླུ་བདུད་གདུག་པ་དེ་ནི་ངས་བཏུལ་གྱིས། །ད་ནི་རྒྱལ་པོ་སུས་བྱས་ཉམ་ང་མེད། །སུ་འདོད་སྐོས་ཤིག་ཟེར་སྟེ་ཁྲི་ལས་ལངས། །ཀུན་གྱིས་དེ་ཉིད་གཏན་གྱི་རྒྱལ་པོར་ཞུས། །སྙིང་རྗེས་ཁས་བླངས་རྒྱལ་སྲིད་ཆོས་བཞིན་མཛད། །བ་ལང་རྫི་བོའི་ཚབ་མ་ཡིན་པའི་ཕྱིར། །བ་ལང་སྐྱོང་དང་གོ་པཱ་ལ་ཞེས་གྲགས། །ཁ་ཅིག་(ཅ༤༩བ)

[Full Size]

ཕྱུགས་རྫི་མོ་ལ་ཤིང་གི་ལྷས། །སྤྱད་པས་བ་ལང་སྐྱོང་བྱུང་བ་དེ་ཡིས། །ནོར་བུ་བྱིན་པས་ས་ལ་དབང་བསྒྱུར་སྟེ། །ནཱ་ལེནྡ་ཡི་གཙུག་ཁང་བཞེངས་ཞེས་ཟེར། །སྔོན་ཚེ་འཕགས་པ་ཤཱ་རིའི་བུ་ཡི་ཡུལ། །ནཱ་ལནྡ་ཡི་གྲོང་ཞེས་གྲགས་པ་སྟེ། །འདམ་བུ་ཅན་ཞེས་ནཱ་ལནྡ་རུ་བརྗོད། །ཁ་ཅིག་མི་ཡི་དབང་པོའི་གཙུག་ཁང་ཞེས། །ནཱ་རེནྡྲ་ཞེས་བྱ་བར་འདོད་པ་དང༌། །རིན་ཆེན་ནལ་གྱིས་ཁེབས་པའི་ས་ཡིན་ཕྱིར། །ནཱ་ལེནྡྲ་ཞེས་བྱ་བར་སྒྲོག་པའང་ཡོད། །རྒྱན་དྲུག་མཆོག་གཉིས་ལ་སོགས་བྱོན་པའི་ས། །སངས་རྒྱས་བསྟན་པའི་འབྱུང་ཁུངས་ཆེན་པོ་ཡིན། །རྒྱལ་པོ་ཆེན་པོ་གོ་པཱ་ལ་དེ་ནི། །ཤར་ཕྱོགས་བྷཾ་ག་ལ་ཙམ་མངའ་རིས་འདུས། །བཙུན་མོ་ལྔ་བརྒྱ་རེ་རེ་ལ་ཡང་ནི། །དགེ་སློང་མ་ཚོགས་ལྔ་བརྒྱའི་མཆོད་གནས་ཡོད། །བཙུན་མོ་ཐ་ཆུང་རྒྱལ་པོར་མ་ཕྲད་ནས། །དགེ་སློང་མ་ཞིག་གིས་ནི་དབང་བྱེད་ཀྱི། །སྨན་སྦྱར་རྒྱལ་པོའི་ཞལ་དུ་མ་ཐོངས་ནས། །རིགས་ལད་དོགས་པས་མཚོ་ཡི་ནང་དུ་ཕོ། །མཚོ་དེའི་ཀླུ་རྒྱལ་དབང་དུ་གྱུར་ནས་ནི། །རྒྱལ་པོར་སྤྲུལ་སྟེ་བཙུན་མོའི་གམ་དུ་འོངས། །རྒྱལ་པོས་ཐོས་ནས་ཀླུ་དེ་འཛིན་བཅུག་པས། །བདག་ལ་དབང་མེད་སྨན་དེའི་ནུས་པ་ཡིན། །བཙུན་མོའི་བུ་འདི་རྒྱལ་པོ་ཉིད་ལ་འབུལ། །སྨན་དེ་བཏོན་ན་ཕྱིན་ཆད་མི་འོང་ཟེར། །བུ་དེ་བསོད་ནམས་ལྡན་པར་རྟོགས་ནས་ནི། །རྒྱལ་པོས་མངའ་མཛད་དྷརྨ་པཱ་ལར་བཏགས། །རྒྱལ་པོ་འདས་ནས་རྒྱལ་སྲིད་མངའ་དབང་བསྐུར། །ས་བདག་ཆེན་པོ་དཔལ་ལྡན་ཆོས་སྐྱོང་དེས། །གཙུག་ཁང་བཞེང་ཕྱིར་ལྟས་མཁན་ལ་དྲིས་པས། །དཀའ་ཐུབ་ལྷ་གནས་ནས་བླངས་ཀོང་བུ་རུ། །བྲམ་ཟེའི་རས་ལ་སྡོང་བུས་བྱས་ནས་ནི། །ཚོང་དཔོན་ལས་བླངས་མར་ལ་མེ་སྤར་ནས། །མཆོད་རྟེན་གང་དུ་ཕུལ་ན་ཆོས་སྐྱོང་གི །སྤྲུལ་པས་ཀོང་བུ་གང་དུ་བསྐྱུར་པ་དེར། །བརྩིགས་ཞེས་རྨི་ལམ་ནང་དུ་བསྟན་མཐོང་ནས། །དཀོན་མཆོག་མཆོད་དང་(ཅ༥༠ན)

[Full Size]

སྦྱིན་པ་རྒྱ་ཆེར་བྱས། །མར་མེ་ཕུལ་ཚེ་ཀོང་བུ་བྱ་རོག་གིས། །ཁྱེར་སྟེ་མཚོ་ཆེན་ཞིག་དུ་དོར་བར་གྱུར། །རྒྱལ་པོ་ཡི་ཆད་སྡུག་བསྔལ་ལྡན་པ་ན། །ཀླུ་རྒྱལ་སྦྲུལ་མགོ་ལྔ་པ་ཅིག་འོངས་སྟེ། །ང་ནི་ཁྱོད་ཀྱི་ཕ་ཡིན་མཚོ་བསྐམས་ལ། །རྩིག་དུ་གཞུག་གིས་ཞག་ནི་བདུན་རེ་ཞིང༌། །དཀོན་མཆོག་མཆོད་སྦྱིན་རྒྱ་ཆེར་གྱིས་ཤིག་ཟེར། །བདུན་གསུམ་འདས་ཚེ་མཚོ་དེ་བསྐམས་གྱུར་ནས། །གཙུག་ལག་ཁང་བྱས་མཚོ་ཡི་ཤུལ་ཡིན་ཕྱིར། །རྒྱ་མཚོ་སྦས་པའི་གཙུག་ལག་ཁང་ཞེས་བྱ། །གཉུག་མར་གནས་པའི་དགེ་སློང་རྣམས་ལ་ནི། །གྲང་བའི་ནད་ཀྱིས་བཏབ་པ་ཞི་བྱའི་ཕྱིར། །ཤིང་རྟས་ཚ་བ་གསུམ་གྱི་སྨན་བསྐྱས་ནས། །ཁྲོན་པར་བླུག་པས་ཏྲཱི་ཀསྟུ་ཀ་འམ། །ཚ་བ་གསུམ་པའི་གཙུག་ལག་ཁང་དུ་གྲགས། །སེང་གེ་བཟང་པོའི་བརྒྱད་སྟོང་འགྲེལ་ཆེན་ཡང༌། །སྦྱིན་བདག་དཔལ་ལྡན་ཆོས་སྐྱོང་གིས་བྱས་ནས། །ཏྲཱི་ཀསྟུ་ཀའི་གནས་སུ་སྦྱར་བར་གསུངས། །ཁ་ཅིག་འདི་ཨོ་ཏྱནྟ་པུ་རི་ཡིན་ཟེར་ཡང༌། ཨོ་ཏྱནྟ་པུ་རི་ནི་མུ་སྟེགས་ཀྱི་རིག་འཛིན་གྱིས་རོ་ལངས་གསེར་དུ་གྲུབ་པ་ལས་བྱས་པ་དེ་ཡིན་ནོ། །དེ་ཚེ་ཤར་ཕྱོགས་བ་རེནྡྲ་ཡི་ཡུལ། །མུ་སྟེགས་ལྷ་རྟེན་མང་དུ་ཡོད་པ་ལ། །ཉིན་བཞིན་སྲོག་ཆགས་མང་བསད་མཆོད་པ་བྱེད། །སྒྲོལ་མའི་རྣལ་འབྱོར་པ་ཅིག་མཆིས་པ་དེས། །སྙིང་རྗེས་ཕྱི་པའི་རྟེན་རྣམས་འཇིག་པར་བསམས། །རྒྱལ་པོ་དེ་ལ་ཞུས་ཞེས་ཡི་དམ་གྱིས། །ལུང་བསྟན་ཐོབ་ནས་ས་ཏེ་བཙུགས་ཏེ་ཞུས། །རྒྱལ་པོས་གནང་ནས་དཔུང་ཚོགས་རྣམ་བཞིས་ཆས། །དེ་ཚེ་མི་ནག་འཇིགས་ཤིང་ཆེ་བ་ཞིག །ཧ་ཅང་མི་རིང་སྔུན་དུ་འགྲོ་མཐོང་ནས། །དྲིས་པས་མགོན་པོ་མ་ཧཱ་ཀཱ་ལ་ཡིན། །མུ་སྟེགས་རྟེན་རྣམས་ཁྱེད་ཀྱིས་མི་ཤིགས་སྐད། །དེ་ལ་གྲོགས་སུ་གསོལ་བ་བཏབ་པ་ན། །འོ་ན་བྱེ་མའི་ཕུང་པོ་འདི་སོལ་ལ། །འོག་ན་སྔོན་གྱི་སངས་རྒྱས་འོད་སྲུང་གི །གཙུག་ལག་ཁང་ཡོད་དེ་ལ་མཆོད་པ་གྱིས། །ང་ནི་གཙུག་ལག་ཁང་འདིའི་བསྟན་སྲུང་ཡིན། །ལྷ་རྟེན་འཇིག་(ཅ༥༠བ)

[Full Size]

ཚེ་རོལ་མོའི་སྒྲ་ཆེན་སྒྲོགས། །དེ་ནས་ང་ཡིས་གདོང་གྲོགས་བྱའོ་སྐད། །བྱེ་མ་བསལ་བས་འོད་སྲུང་གཙུག་ལག་ཁང༌། །མ་ཉམས་པ་ཅིག་བྱུང་སྟེ་མཆོད་པ་བྱས། །སྔོན་ཚེ་དུས་ཀྱི་འཕེན་པ་མ་བཏང་བར། །འགོག་པར་ཞུགས་པའི་དགྲ་བཅོམ་ཞིག་ཀྱང་ལངས། །སྟོན་པ་འོད་སྲུང་གང་ན་བཞུགས་ཞེས་ཟེར། །དེ་འདས་འདི་ནི་དེ་ཡི་བསྟན་ཡང་མིན། །ཤཱཀྱའི་རྒྱལ་པོའང་འདས་ཞེས་བརྗོད་པ་ན། །མཁར་འཕགས་ཆོ་འཕྲུལ་བསྟན་སྟེ་མྱ་ངན་འདས། །རྒྱལ་པོས་གཙུག་ལག་ཁང་དེ་རྒྱ་ཆེར་བརྒྱན། །སོ་མ་པུ་རིའི་གཙུག་ལག་ཁང་ཞེས་གྲགས། །བསྟན་པའི་འབྱུང་ཁུངས་ཆེན་པོ་ཞིག་དུ་གྱུར། །མཆོག་གི་དངོས་གྲུབ་ཐོབ་པའི་པཎ་ཆེན་བཞིའང༌། །སྒོ་སྲུང་ཚུལ་དུ་རྟག་པར་གནས་སོ་སྐད། །དེ་ནས་དབང་ཕྱུག་ཆེན་པོའི་ལྷ་རྟེན་རྣམས། །དམག་གིས་བསྐོར་སྟེ་རོལ་མོ་སྣ་ཚོགས་པའི། །སྒྲ་ཆེན་བསྒྲགས་པའི་མོད་ལ་རང་ཞིག་གྱུར། །བ་རེནྡྲ་ཀུན་རྒྱལ་པོའི་ཆབ་འོག་གྱུར། །རྒྱ་གར་རྒྱལ་པོ་དྷརྨ་པཱ་ལའི་དུས། །བོད་རྒྱལ་མཇིང་ཡོན་སད་ན་ལེགས་བཞུགས་པར། །ཡར་ལུང་བང་སོའི་རྡོ་རིང་ཡི་གེ་ལ། །ཡོད་ཅེས་ཨོ་ཌྱན་པ་ཡིས་གསུངས་པར་སྣང༌། །དེ་ཚེ་ནཱ་ལེནྡ་ཡི་གཙུག་ཁང་ན། །སློབ་དཔོན་ཆེན་པོ་ཀམ་པ་ལ་ཞེས་པ། །མཆོག་དངོས་གྲུབ་ངེས་གངྒཱའི་ཆུ་འགྲམ་ན། །བྲག་རི་དེ་འུ་ཞིག་ཡོད་དེ་སྟེང་དུ། །གཙུག་ལག་ཁང་བྱས་ན་བསྟན་ལ་ཕན་པར་དགོངས། །དེ་ཡང་རྒྱལ་པོའི་ལུས་ཀྱིས་འགྲུབ་པར་མཁྱེན། །དྷརྨ་པཱ་ལའི་སྲས་སུ་འཁྲུངས་པར་བཞེད། །རྒྱལ་པོའི་བཙུན་མོ་དམ་པའི་རྨི་ལམ་དུ། །རྣམ་སྦྱར་ལྷུང་བཟེད་མཁར་སིལ་ལྡན་པ་ཡི། །དགེ་སློབ་ཞིག་འོངས་ང་ལ་གནས་གཡར་ཞེས། །མཚན་མོ་དྲུག་རྨིས་རྒྱལ་པོ་ལ་བཟླས་པས། །དོ་ནུབ་བྱུང་ན་གཏོང་བར་ཁས་ལོང་ཟེར། །ལྷུམས་ཞུགས་བཙས་ནས་དེ་ཝ་པཱ་ལར་བཏགས། །རྒྱལ་སྲིད་ཆེ་ལ་མངའ་དབང་(ཅ༥༡ན)

[Full Size]

བྱས་པར་གྱུར། །སྔོན་གྱི་གངྒཱའི་འགྲམ་གྱི་བྲག་སྟེང་དེར། །གཙུག་ཁང་ཆེན་པོ་ངོ་མཚར་ལྡན་པ་བྱས། །རྩ་བའི་སྡེ་བཞིའི་སྡེ་པ་རེ་རེ་ལ། །རབ་བྱུང་ཉི་ཤུ་བདུན་རེའི་ས་ཏྲ་བཙུགས། །སྒྲ་དང་ཚད་མ་གཏོར་མའི་ས་ཏྲ་སོགས། །གཉུག་མར་གནས་པའི་ས་ཏྲ་དུ་མ་དང༌། །གློ་བུར་ལྷགས་པ་བཅུ་ཕྲག་གཉིས་རེ་ཡི། །ས་ཏྲ་ལ་སོགས་འཚོ་བའི་ཡོ་བྱད་སྦྱར། །དེ་ལ་ཕྱོགས་བཞིར་མིང་བཞི་གྲགས་སོ་སྐད། །བྱང་ཕྱོགས་པ་རྣམས་བི་ཀྲ་མ་ཤཱི་ལ། །ཞེས་གྲགས་རྣམ་པར་གནོན་པའི་ཚུལ་ཁྲིམས་ཡིན། །ལ་ལ་གནོད་སྦྱིན་མནན་པའི་གཙུག་ཁང་ཟེར། །ཁ་ཅིག་རྣམ་པར་གནོན་པའི་རྡོ་ཅན་ཞེས། །སྔོན་གྱི་བྲག་རིའི་མིང་དུ་འདོད་པ་ཡོད། །ཁ་ཅིག་རྒྱུན་སྟེར་གྱི་གཙུག་ལག་ཁང་ཟེར། མཁས་པའི་པཎ་ཆེན་ཤ་སྟག་གིས་གང་བ། །སངས་རྒྱས་བསྟན་པའི་འབྱུང་ཁུངས་ཆེན་པོར་གྱུར། །རྒྱལ་པོ་དེ་སྲས་ཏ་མ་པཱ་ལ་སྟེ། །དེ་དུས་པ་ཚབ་ལོ་ཙཱ་ཚུལ་རྒྱལ་གྱིས། །མདོ་སྡེ་དྲན་ཉེའི་འགྱུར་ཆད་བསབས་སྟེ་བསྒྱུར། །དེ་འོག་ཧི་མ་པཱ་ལ་ཞེས་བྱ་བྱུང༌། །དེ་སྲས་རྒྱལ་པོ་མ་ཧཱ་པ་ལ་ཡིས། །རྡོ་རྗེ་གདན་ནས་ཇོ་བོ་ཨ་ཏི་ཤ། །བི་ཀྲ་མ་ནི་པུ་རིར་སྤྱན་དྲངས་སྟེ། །བསྟན་པའི་བྱ་བ་རྒྱ་ཆེན་མཛད་པར་གྱུར། །དེ་སྲས་ནཱིརྻ་པཱ་ལའི་རྒྱལ་སྲིད་ཚེ། །ཇོ་བོ་བོད་ཡུལ་འགྲོ་བ་འདུལ་ཕྱིར་བྱོན། །ཇོ་བོས་ཞལ་གདམས་འཕྲིན་ཡིག་མཛད་པ་ཡོད། །ཙནྡྲ་བདུན་དང་པཱ་ལ་བདུན་གྱི་རིང༌། །རྒྱ་གར་མཁས་པ་ཕལ་ཆེར་བྱུང་བ་སྟེ། །རྒྱལ་པོ་དེ་ཀུན་ཙནྡྲའི་གྲུབ་ཐོབ་ཡིན། །དེ་ནས་བློན་པོ་རྒྱལ་པོར་གྱུར་པ་ན། །སེ་ན་བཞི་རྒྱུད་ཅེས་པ་བྱུང་བར་གྲགས། །པཱ་ལ་སེ་ན། ཀ་ས་ར་སེ་ན། མ་ཎི་སེ་ན། མ་ཧེནྡྲཱ་སེ་ནའོ། །གཞན་ཡང་ཀམ་པོ་ཙེ་གླིང་མགོན་པོའི་རྒྱུད། །བཞུགས་ལས་ལོ་ནི་སྟོང་དང་བརྒྱད་བརྒྱ་ན། །རྒྱལ་པོ་མ་ཎི་དེ་ཝ་ཞེས་བྱ་བ། །ཏི་ར་ཧུ་ཏིའི་གྲོང་དུ་འབྱུང་བར་གསུངས། །དེ་ནས་རྒྱལ་རབས་དྲུག་ན་རམ་ཤིང་སྟེ། །བརྒྱད་པ་གྷ་ཁར་ཁ་ཏིའི་དུས་སུ་ནི། །ཀམ་པོ་ཙེ་ཡི་གླིང་དུ་འཁྲུངས་པ་ཡི། །ནག་པོ་(ཅ༥༡བ)

[Full Size]

སྤྱོད་པས་རལ་གྲི་གྲུབ་གྱུར་སྟེ། །ཝ་ར་ཎ་སིར་ཕོ་བྲང་བཅས་ནས་ནི། །འཛམ་གླིང་དབང་བྱེད་རྡོ་རྗེ་ཐེག་པ་དར། །གྲུབ་ཐོབ་ནམ་མཁའི་སྐར་ཚོགས་ཙམ་འབྱུང་བར། །རྒྱ་གར་འཕགས་པའི་ཡུལ་ན་སྒྲོག་གོ་ཞེས། །ཨོ་ཌྱན་གྲུབ་ཐོབ་རིན་ཆེན་དཔལ་གྱིས་གསུངས། །མགོན་པོའི་རྒྱུད་ཀྱི་ལུང་བསྟན་གྱི་རྒྱལ་པོ་དེ་སྔར་བྱུང་ཟིན་པའམ་ད་ཙམ་ཡོད་དགོས་པར་སྣང༌། དེ་དང་རམ་ཤིང་རྒྱལ་པོ་མཇལ་བར་སྣང༌། །དེ་དག་ལ་སོགས་དབུས་འགྱུར་འཆང་དང་ནི། །ཧ་རི་པུཉྫ་ཧཾ་ས་བ་ཏི་དང༌། །པུཀྐཾ་ལ་སོགས་ཤར་དང་དེ་བཞིན་ལྷོ། །ཀསྨི་ར་དང་ཀཱ་མ་རཱུ་པ་སོགས། །ནུབ་དང་བྱང་སྟེ་རྒྱ་གར་ཡུལ་ཁམས་སུ། །བསོད་ནམས་ལྡན་པའི་ས་སྐྱོང་མང་བྱུང་སྟེ། །སངས་རྒྱས་བསྟན་པའི་ཉིན་བྱེད་རབ་བརྡལ་བས། །རྒྱ་མཚོའི་མཐར་ཐུག་ས་ཆེན་ཁྱབ་པར་བྱས། །དེབ་སྔོན་ན་རྒྱ་གར་གྱི་རྒྱལ་རབས་གཅིག་ནས་གཅིག་དུ་བརྒྱུད་པ་ནི་སུ་ལའང་ཡོད་པར་མ་ཐོས་ལ་ཞེས་སྣང་བ་ནི་མཛེས་པ་མ་ཡིན་ནོ། །ཆོས་བྱུང་མཁས་པའི་དགའ་སྟོན་གྱི་ཡན་ལག་གཉིས་པ་རྒྱ་གར་གྱི་སྐབས་ལས་རྒྱ་གར་གྱི་རྒྱལ་རབས་ཀྱི་སྐབས་སྟེ་བཞི་པའོ།། །།པར་འདིའི་སྦྱིན་བདག་ལྷོ་རྒྱུད་བྱ་ཡུལ་ནས། །ནོར་འཛིན་དབང་མོ་ཚོགས་གཉིས་གྲུབ་མ་ཡིས། །བསྒྲུབས་པའི་དགེ་ཚོགས་བྱང་ཆུབ་མཆོག་དུ་སྔོ། །མཾ་ག་ལ། །

བོད་ཀྱི་སྐབས།

[Full Size]

༄། ཆོས་བྱུང་མཁས་པའི་དགའ་སྟོན་གྱི་ཡན་ལག་གསུམ་པ་བོད་ཀྱི་སྐབས་ལ་ལེའུ་བཅུ་ལས་དང་པོ་ཐུགས་རྗེ་ཆེན་པོས་བོད་བདག་གིར་མཛད་ཚུལ་བཞུགས།

[Full Size]

རྒྱལ་དང་རྒྱལ་སྲས་ཀུན་གྱི་བརྩེ་ཆེན་ནི། །མངོན་སུམ་གཟུགས་ཀྱིས་ཞིང་ཀུན་ན་གསལ་བས། །འགྲོ་ཀུན་ཕན་བདེར་བྱེད་པོ་སྤྱན་རས་ཀྱིས། །རྟག་པར་ཀུན་ནས་གཟིགས་ལ་གུས་ཕྱག་འཚལ། །འཛམ་གླིང་བྱང་ཕྱོགས་མཐའ་འཁོབ་གངས་རིའི་ཁྲོད། །ཐེག་ཆེན་དར་བ་གདོང་དམར་བོད་ཀྱི་ཡུལ། །ཆུ་བོ་ལོ་ཧི་ཏ་ཡི་རྒྱུད་འདི་རུ། །རྒྱལ་བསྟན་བྱུང་ཚུལ་ད་ནི་བརྗོད་པར་བྱ། །སྟོན་པས་བྱང་ཆུབ་བརྙེས་ནས་སྟོང་གསུམ་དང༌། །ཤར་ནུབ་རྒྱ་མཚོའི་བར་དུ་ཞབས་ཀྱིས་བཅགས། །ཏི་སེའི་ཕྱོགས་བཞིར་སྟོན་པའི་ཞབས་རྗེས་ཡོད། །དེ་ཕྱིར་ལྷ་སོགས་མཆོག་གི་སྣང་བ་རུ། །བོད་ཡུལ་འདི་ཡང་སྟོན་པའི་ཞབས་ཀྱིས་བཅགས། །ཚུ་རོལ་མཐོང་བ་མི་ཡི་མཐུན་སྣང་དུ། །དངོས་སུ་གཤེགས་པའི་མཛད་པ་མ་བསྟན་ཕྱིར། །སྟོན་པའི་ཞབས་ཀྱིས་མ་བཅགས་འོད་ཀྱིས་ཁྱབ། །བྱིན་གྱིས་བརླབས་པའི་ཡུལ་ཞེས་གྲགས་པ་ཡིན། །རི་མཐོ་ས་གཙང་ཆུ་བསིལ་ཚད་པ་མེད། །སྦྲུལ་གདུག་སྟག་གཟིག་ཅེ་སྤྱང་དུག་སྦྲང་མེད། །འཛམ་གླིང་(ཆ༢ན)

[Full Size]

ཆུ་བཞིའི་མགོ་བོ་གངས་ཅན་གནས། །ས་ལས་ལྕགས་རིས་རིན་ཆེན་སྣ་ལྔ་འབྱུང༌། །སྤང་ལྗོངས་མཚོ་དང་ཆུ་རྒྱུན་རབ་ཏུ་མང༌། །མུ་སྟེགས་མི་རྒྱུ་མི་ཀུན་ཐེག་ཆེན་མོས། །སྤྲུལ་པའི་ཆོས་རྒྱལ་ལྷ་ཡིས་མི་རྗེ་མཛད། །ལོངས་སྤྱོད་དམན་ཡང་འཛམ་གླིང་ཡུལ་གཞན་ལས། །དེ་ལྟའི་ཁྱད་ཆོས་དུ་མས་ཁྱད་པར་འཕགས། །འདས་པའི་སངས་རྒྱས་གསུམ་གྱིས་མ་ཐུལ་ཞིང༌། །ད་ལྟ་རྒྱལ་བས་ཆོས་འཁོར་མ་བསྐོར་བའི། །ཡུལ་འདི་སྤྱན་རས་གཟིགས་ཀྱི་གདུལ་བར་བསྟན། །སྔོན་ཚེ་སྟོན་པ་འོད་མའི་ཚལ་བཞུགས་ཚེ། །འཛུམ་པ་མཛད་པའི་འོད་ཀྱིས་བོད་ཡུལ་བཀང༌། །སྒྲིབ་སེལ་གྱིས་ནི་འཛུམ་པའི་རྒྱུ་ཞུས་ཚེ། །དུས་གསུམ་རྒྱལ་བའི་གདུལ་བྱར་མ་གྱུར་པ། །འདྲེ་སྲིན་གདུག་པ་དུ་མས་གང་བའི་ཡུལ། །མཐའ་འཁོབ་ཁ་བ་ཅན་གྱི་རྒྱལ་ཁམས་དེར། །མ་འོངས་དམ་ཆོས་ཉི་མ་ཤར་ལྟར་རྒྱས། །སེམས་ཅན་དེ་རྣམས་ཐར་པ་འཐོབ་པར་འགྱུར། །མཐའ་འཁོབ་དེ་ཡི་འདུལ་བའི་གཉེན་པོ་ནི། །སྤྱན་རས་གཟིགས་ཀྱི་དབང་ཕྱུག་ཁོ་ན་ཡིན། །སྔོན་ཚེ་སངས་རྒྱས་སྟོང་གི་སྤྱན་སྔ་རུ། །མཐའ་འཁོབ་གདུལ་དཀའི་སེམས་ཅན་དེ་དག་ཀུན། །བདག་གིས་ཐར་པའི་ལམ་དུ་འདུལ་གྱུར་ཅིག །འདྲེ་སྲིན་གདུག་པའི་སེམས་ཅན་དེ་རྣམས་ཀྱི། །སྐྱོབ་པའི་ཕ་མ་སྒྲོལ་བའི་དེད་དཔོན་དང༌། །མུན་པ་སེལ་བའི་སྒྲོན་མེར་བདག་གྱུར་ཅིག །དུས་གསུམ་རྒྱལ་བའི་དམ་ཆོས་གསུང་རབ་ཀུན། །མཐའ་འཁོབ་ཡུལ་དེར་དར་རྒྱས་གནས་གྱུར་ཅིག །སེམས་ཅན་དེ་རྣམས་རྒྱལ་བའི་མཚན་ཐོས་པས། །ལྷ་མིའི་ལུས་ཐོབ་དད་ཅིང་སྐྱབས་སུ་སོང༌། །དམ་པའི་ཆོས་ལ་ལོངས་སྤྱོད་(ཆ༢བ)

[Full Size]

ཉིད་གྱུར་ཅིག །བདག་གིས་གང་ལ་གང་འདུལ་ཐབས་རྒྱ་མཚོས། །སེམས་ཅན་དེ་ཀུན་སྨིན་ཞིང་གྲོལ་བྱས་ནས། །མཐའ་འཁོབ་དེ་ནི་རིན་ཆེན་གླིང་ལྟ་བུར། །དམ་པའི་ཆོས་ཀྱིས་ཀུན་ནས་འབྱོར་བར་ཤོག །དེ་ཁོ་ན་ལྟར་ཤོག་ཅེས་སྨོན་ལས་བཏབ། །དེ་ཕྱིར་རྒྱལ་བ་གཞན་གྱིས་མ་ཐུལ་བ། །སྤྱན་རས་གཟིགས་ཀྱིས་ཐུལ་བའི་རྒྱུ་དེ་ཡིན། །དེ་ཚེ་རྒྱལ་བའི་ཐུགས་ཀ་ནས། །པད་དཀར་ལྟ་བུའི་འོད་ཟེར་བྱུང༌། །བདེ་བ་ཅན་གྱི་ཞིང་སོང་སྟེ། །འོད་དཔག་མེད་ཀྱི་ཐུགས་ཀར་ཐིམ། །དེ་ནས་བྱུང་སྟེ་བདུད་རྩིའི་མཚོ། །པད་མ་ཅན་དུ་ཞུགས་པར་གྱུར། །བདེ་བ་ཅན་གྱི་ཞིང་དེ་ནི། །མཉམ་ཞིང་ཤིན་དུ་རྣམ་པར་དག །བཻ་ཌུརྻ་ཡི་ས་གཞི་ལ། །གསེར་གྱིས་མིག་མང་རིས་སུ་བྲིས། །བདུད་རྩིའི་ཆུ་རྒྱུན་འཁྱིལ་ཞིང་འབབ། །ཡེ་ཤེས་གསལ་བའི་མེ་འོད་འབར། །རིན་ཆེན་བྱང་ཆུབ་ཤིང་གིས་གཏམས། །པདྨའི་སྦུབས་ལས་བརྫུས་སྟེ་སྐྱེ། །བསམ་གཏན་ཟས་ཀྱིས་རྟག་དུ་འཚོ། །ཚུལ་ཁྲིམས་དག་པའི་གོས་ཀྱིས་བཀླུབས། །རང་ལུས་འོད་ཀྱིས་འཇིག་རྟེན་སྣང༌། །ཐམས་ཅད་བཟོད་པའི་སྟོབས་དང་ལྡན། །ཀུན་ཀྱང་མྱང་འདས་བདེ་བ་ཆེ། །རྡོ་རྗེའི་ཚེ་ལ་མངའ་དབང་ཐོབ། །དེ་ཕྱིར་ཕལ་པའི་འབྱུང་བཞི་དང༌། །རྩི་ཤིང་གཞན་གྱི་མིང་ཡང་མེད། །མ་དག་སྐྱེ་བ་རྣམ་བཞིས་དབེན། །བཀྲེས་སྐོམ་འཐབ་རྩོད་ག་ལ་ཡོད། །ཉི་ཟླ་སྒྲོན་མེས་ཅི་ཞིག་བྱ། །ན་ཚ་སྡུག་བསྔལ་རྒ་ཤི་མེད། །ཁམས་གསུམ་འཁོར་བའི་ཉོན་མོངས་བྲལ། །སངས་རྒྱས་སྣང་བ་མཐའ་ཡས་ཀྱི། །ཆོས་ཀྱི་ལོངས་སྤྱོད་རྒྱུན་མི་ཆད། །དེ་ཚེ་པད་ཅན་མཚོ་དབུས་ནས། །པདྨ་གཞན་ཀུན་ཟིལ་གནོན་པའི། །པདྨའི་རྒྱལ་པོ་གཟི་འོད་ནི། །ཉི་ཟླ་འབུམ་ཕྲག་བསྡོམས་འདྲ་བྱུང༌། །ཀུན་ནས་བྱེ་ཞིང་རྒྱས་པའི་ཁོངས། །མཆོག་གི་སྤྲུལ་པའི་སེམས་དཔའ་ནི། །གངས་རིའི་ཕུང་པོ་བྱེ་བ་ལྟར། །དཀར་ཞིང་འོད་འཕྲོ་འཛུམ་བག་ཅན། །(ཆ༣ན)

[Full Size]

ཞལ་གཅིག་ཕྱག་བཞི་རྒྱན་ཀུན་ལྡན། །ཞབས་གཉིས་རྡོ་རྗེའི་སྐྱིལ་ཀྲུང་མཛད། །རྩ་བའི་ཕྱག་གཉིས་ཐུགས་ཀའི་དབུས། །ཐལ་མོ་སྦྱར་ཞིང་ཞི་བར་གཟིགས། །གཡས་ཀྱི་འོག་མས་ཤེལ་དཀར་གྱི། །ཕྲེང་བ་འདྲེན་ཞིང་སྐྱེ་འགྲོ་འདུལ། །གཡོན་གྱི་འོག་མས་པད་དཀར་འཛིན། །སྙན་གྱི་ཐད་ཏུ་བྱེ་ཞིང་རྒྱས། །མཚན་དང་དཔེ་བྱད་མ་ལུས་བཀྲ། །ཨེ་ནྱའི་ལྤགས་པས་ཕྲག་གཡོན་བཀབ། །རལ་པའི་ཟུར་ཕུད་ལྔ་དང་ལྡན། །འགྲོ་ཀུན་སྙིང་རྗེའི་གསུང་དབྱངས་འབྱིན། །རྒྱལ་བའི་འོད་ཟེར་མ་གཏོགས་པ། །འོད་གཞན་མ་ལུས་ཟིལ་གནོན་པའི། །འོད་དང་འོད་ཟེར་འཕྲོ་བ་ཞིག །སྤྲིན་རུམ་ཕྱེ་བའི་ཉི་བཞིན་བྱུང༌། །རྒྱལ་པོ་བཟང་པོའི་མཆོག་གིས་བླངས། །དེ་ཚེ་འོད་དཔག་མེད་མགོན་གྱིས། །འདི་ནི་མི་འབྱེད་འཛམ་གླིང་གི །མཐའ་འཁོབ་ཁ་བ་ཅན་གྱི་ཡུལ། །འདུལ་བའི་སྤྲུལ་པའི་སྐུ་མཆོག་ཅེས། །སྤྱི་བོར་ཕྱག་གིས་བྱུགས་མཛད་དེ། །དུས་གསུམ་རྒྱལ་བའི་གདུལ་བྱར་མ་གྱུར་པ། །མཐའ་འཁོབ་ཁ་བ་ཅན་གྱི་སེམས་ཅན་རྣམས། །སྨོན་ལམ་མཐུ་ཡིས་ཁྱོད་ཀྱིས་འདུལ་འགྱུར་བ། །ལེགས་སོ་ལེགས་སོ་རིགས་ཀྱི་བུ་ཁྱོད་ལེགས། །ཁ་བ་ཅན་གནས་འགྲོ་ཀུན་གྱིས། ཁྱོད་མཐོང་ཡིག་དྲུག་སྒྲ་ཐོས་ནས། །མོད་ལ་ངན་སོང་ལས་ཐར་སྟེ། །མཐོ་རིས་ལུས་མཆོག་ཐོབ་གྱུར་ཅིག །འདྲེ་སྲིན་གདོན་བགེགས་ཤ་ཟའི་ཚོགས། །གཞན་གྱི་མདངས་འཕྲོག་སྲོག་གཅོད་པ། །ཀུན་གྱིས་ཁྱོད་མཐོང་ཡིག་དྲུག་ཐོས། །མོད་ལ་ཁྲོ་སྤངས་བྱམས་ལྡན་གྱུར། །གཅན་གཟན་མ་རུངས་གདུག་ཅིང་གཏུམ། །གཞན་གྱི་ཤ་ཁྲག་གིས་འཚོ་རྣམས། །ཁྱོད་མཐོང་ཡིག་དྲུག་ཐོས་པའི་མོད། །བུ་ལ་མ་ལྟར་བྱམས་ལྡན་འགྱུར། །བཀྲེས་སྐོམ་གྱིས་གཟིར་ཉམ་ཐག་རྣམས། །ཁྱོད་མཐོང་ཡིག་དྲུག་ཐོས་ཙམ་གྱིས། །བདུད་རྩིའི་ཆར་གྱིས་ལུས་(ཆ༣བ)

[Full Size]

སེམས་ཚིམ། །ཏིང་འཛིན་ཟས་མཆོག་ཐོབ་པར་འགྱུར། །དབང་པོ་མ་ཚང་ནད་ཀྱིས་མནར། །མགོན་མེད་རྣམས་ཀྱིས་ཁྱོད་དྲན་པས། །ནད་བྲལ་དབང་ལུས་ཕུན་ཚོགས་པ། །མཐུ་སྟོབས་ལྡན་པའི་ལུས་གྱུར་ཅིག །ཁྱོད་ལུས་མཐོང་བ་ཙམ་གྱིས་ཀྱང༌། །འཆི་བ་རྣམས་ཀྱི་ཚེ་སྲིང་ཞིང༌། །ནད་ལྡན་ནད་ལས་ཐར་གྱུར་ཅིག །མགོན་མེད་རྣམས་ལ་སྐྱབས་མཆོག་གྱུར། །མཐའ་འཁོབ་ཁ་བ་ཅན་གྱི་ཡུལ་ཁམས་དེར། །ཡི་དམ་ལྷ་ཡི་སྐལ་བ་ཁྱོད་ཡིན་སྟེ། །ཡི་དམ་ཁྱོད་ལ་བརྟེན་ནས་མ་འོངས་དུས། །ཡུལ་དེར་སངས་རྒྱས་བྱང་སེམས་དཔག་མེད་འབྱུང༌། །སངས་རྒྱས་བསྟན་པ་དར་ཞིང་རྒྱས་པར་འགྱུར། །ཆོས་སྐལ་སྙིང་པོ་ཡིག་དྲུག་འདི་ཡིན་སྟེ། །སྙིང་པོ་འདི་ལ་བརྟེན་ནས་མ་འོངས་དུས། །ཤཱཀྱའི་རྒྱལ་པོའི་གསུང་རབ་དམ་ཆོས་ཀུན། །ཡུལ་དེར་དར་རྒྱས་མི་ཀུན་ཆོས་སྤྱོད་འགྱུར། །ཨོཾ་མ་ཎི་པདྨེ་ཧཱུྃ། གཟུང་སྔགས་རྒྱལ་པོ་ཡིག་དྲུག་འདི། །སངས་རྒྱས་ཀུན་གྱི་དགོངས་པའི་མཆོག །གཅིག་དུ་བསྡུས་པའི་བདག་ཉིད་ཡིན། །ཆོས་ཕུང་བརྒྱད་ཁྲི་བཞི་སྟོང་པོ། །གཅིག་དུ་བསྡུས་པའི་སྙིང་པོ་ཡིན། །བདེ་གཤེགས་རྒྱལ་བ་རིགས་ལྔ་དང༌། །གསང་བདག་རྡོ་རྗེ་འཛིན་རྣམས་ཀྱི། །ཡང་རྙིང་བསྡུས་པའི་གཟུངས་སྔགས་ཡིན། །ཡོན་ཏན་ཐམས་ཅད་འབྱུང་བའི་གནས། །དངོས་གྲུབ་ཀུན་གྱི་རྩ་བ་སྟེ། །མཐོ་རིས་ཐར་པའི་ལམ་ཆེན་ཡིན། །ཨོཾ་མ་ནི་པདྨེ་ཧཱུྃ། ཆོས་ཀུན་སྙིང་པོ་ཡིག་དྲུག་འདི། །ལན་གཅིག་མཐོང་བ་ཙམ་གྱིས་ཀྱང༌། །ཕྱིར་མི་ལྡོག་པའི་ས་འཐོབ་སྟེ། །འགྲོ་ཀུན་སྒྲོལ་བའི་དེད་དཔོན་འགྱུར། །ངན་སོང་གསུམ་དུ་ལྷུང་བས་ཀྱང༌། །ཐོས་ན་ལུས་དེ་བོར་མ་ཐག །བདེ་བ་ཅན་དུ་སྐྱེ་བར་འགྱུར། །ལན་གཅིག་ཙམ་ཞིག་དྲན་པས་ཀྱང༌། །གངས་ལ་ཉི་འོད་ཕོག་པ་ལྟར། །ལས་ངན་སྡིག་སྒྲིབ་སྲབ་མོར་བྱེད། །རེག་ན་རྒྱལ་བ་སྲས་བཅས་ཀུན། །(ཆ༤ན)

[Full Size]

གཅིག་བསྡུས་དབང་བསྐུར་འཐོབ་པ་ཡིན། །ལན་གཅིག་རྣལ་འབྱོར་བྱས་པས་ཀྱང༌། །ཆོས་ཀུན་རྣམ་སངས་རྒྱས་རྟོགས་སྟེ། །འགྲོ་བ་སྒྲོལ་བའི་འཕྲིན་ལས་བྱེད། །བྲིས་སྟེ་ལུས་ལ་བཅངས་པ་ན། །དེ་ལུས་རྒྱལ་བའི་རིང་སྲེལ་ཡིན། །ནད་གདོན་ཀུན་ལས་རྣམ་པར་རྒྱལ། །གཟུངས་སྔགས་རྒྱལ་པོ་ཡིག་དྲུག་འདི། །རིན་པོ་ཆེ་དང་དར་ཟབ་ནས། །ཐ་ན་རྡོ་བའི་བར་བྲིས་ཀྱང༌། །ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་མ་ལུས་བྲིས་པ་སྟེ། །ཚེ་གཅིག་གིས་ཀྱང་བྱང་ཆུབ་འཐོབ། །རི་རབ་སྲང་ལ་གཞལ་བས་གྲངས་ཀྱང་ཆོད། །རྒྱ་མཚོའི་བྱེ་མ་འབྲུ་ནས་བགྲང་བར་ནུས། །རྒྱ་མཚོ་སྐྲ་རྩེས་གཏོར་བས་ཟད་ནུས་མོད། །འདི་ལན་གཅིག་བཟླས་བསོད་ནམས་བགྲང་མི་ནུས། །མཆུ་ཞེང་དཔག་ཚད་ལྔ་བརྒྱ་ཏིལ་གྱིས་བཀང༌། །ལོ་བརྒྱར་ཏིལ་རེ་ཕྱུང་ཡང་ཟད་པར་འགྱུར། །ཁོར་ཡུག་ནང་ཁོངས་ཞིང་གཅིག་དུ་གྱུར་པའི། །འབྲུ་ཀུན་རེ་རེ་ནས་ཀྱང་བགྲང་བར་ནུས། །འཛམ་གླིང་ཆུ་བོ་ལྔ་བརྒྱ་ཆུ་བྲན་བཅས། །རྒྱ་མཚོར་འབབ་བཞིན་འདི་ཡི་དགེ་བ་འཕེལ། །ཆུ་བོ་དེ་ཀུན་ཐིགས་པས་བགྲང་ནུས་མོད། །ལན་གཅིག་བརྗོད་པའི་བསོད་ནམས་ཚད་མི་ཟིན། །དུད་འགྲོ་ཀུན་གྱི་སྤུ་ཚོགས་རེ་རེར་འགྲོངས། །ཀ་ཤིའི་རས་ཀྱིས་རྡོ་རྗེའི་རི་རབ་ལ། །བསྐལ་རེར་ལན་རེ་ཕྱིས་ཀྱང་འཛད་འགྱུར་མོད། །འདི་ལན་གཅིག་བརྗོད་མཐུ་ཡང་དེ་ལྟ་མིན། །སྐྲ་རྩེའི་བརྒྱ་ཆས་རྒྱ་མཚོ་འཆིང་གནམ་ཆེ། །ཐིགས་པར་བྱས་པའི་ཚད་ཀྱང་གྲངས་ཀྱིས་ཟིན། །ལོ་གཅིག་ཆར་བབ་ཆར་ཐིགས་གྲངས་ཀྱིས་ཆོད། །ཡིག་དྲུག་ལན་གཅིག་བཟླས་པའི་མཐུ་མི་རྟོགས། །གླིང་བཞིའི་མི་རྣམས་རིང་སོང་ས་ཐོབ་པ། །དེ་ཀུན་བསོད་ནམས་ཕུང་པོ་གཅིག་བྱས་པ། །དེ་ལས་གང་གིས་ཡིག་དྲུག་ལན་གཅིག་ཙམ། །བརྗོད་པའི་བསོད་(ཆ༤བ)

[Full Size]

ནམས་ཆེས་ཆེར་ཁྱད་པར་འཕགས། །སངས་རྒྱས་བྱེ་བ་འདུས་པས་བསྐལ་པའི་བར། །བསྟན་ཡང་ཕན་ཡོན་ཕྱོགས་རེའང་མི་རྫོགས་ན། །བདེ་བར་གཤེགས་པ་རེ་རེས་ལྟ་ཅི་སྨོས། །སྙིང་པོའི་དམ་པ་ཡི་གེ་དྲུག་འདི་ཡིས། །འགྲོ་རིགས་དྲུག་གི་སྡུག་བསྔལ་སོ་སོར་སེལ། །དྲི་མ་དྲུག་བསལ་ཕ་རོལ་ཕྱིན་དྲུག་རྫོགས། །སངས་རྒྱས་ཀུན་གྱི་སྙིང་པོ་གཅིག་གྱུར་པའོ། །དེ་ཚེ་སངས་རྒྱས་ཐམས་ཅད་ཀུན། །འདུས་སྟེ་དབང་སྐུར་དམ་པ་ཡིས། །སྤྱན་རས་གཟིགས་མཆོག་དེ་དབང་བསྐུར། །འགྲོ་ཀུན་འདུལ་བའི་འཕྲིན་ལས་ལ། །དབང་ཕྱིར་སྣང་མཐའ་འོད་དཔག་མེད། །གཙུག་གི་ནོར་བུ་ལྟ་བུར་མཛེས། །ཕྱོགས་བཅུའི་སངས་རྒྱས་ཐམས་ཅད་ཀྱིས། །མགྲིན་གཅིག་བསྔགས་ཤིང་ཤིས་པ་བརྗོད། །རྒྱལ་སྲས་ཀུན་གྱིས་འདུད་ཅིང་མཆོད། །སླར་ཡང་འོད་དཔག་མེད་མགོན་གྱིས། །ཕན་ཡོན་དཔག་དུ་མ་མཆིས་ཤིང༌། །དུས་གསུམ་སངས་རྒྱས་ཐམས་ཅད་ཀྱི། །འཕྲིན་ལས་གཅིག་དུ་གནས་པ་ཡི། །སྙིང་པོ་ཡི་གེ་དྲུག་པ་འདིས། །ཁ་བ་ཅན་གྱི་མཐའ་འཁོབ་དེར། །འགྲོ་ཀུན་སྨིན་ཞིང་གྲོལ་བར་གྱིས། །དམ་ཆོས་དར་ཞིང་རྒྱས་པར་འགྱུར། །དེ་ལྟར་དབུགས་དབྱུང་ལུང་བསྟན་ཚེ། །སྤྱན་རས་གཟིགས་ཀྱི་དབང་ཕྱུག་དེ། །པུས་བཙུགས་ཐལ་སྦྱར་འདི་སྐད་དུ། །གསོལ་ཞིང་རང་དམ་རང་གིས་བཅས། །བདག་གིས་སེམས་ཅན་གཅིག་ཀྱང་མ་ལུས་པར། །བླ་མེད་བྱང་ཆུབ་མཆོག་དུ་གཟུང་བར་བགྱི། །འགྲོ་ཀུན་བྱང་ཆུབ་ཆེ་ལ་མ་འཁོད་པར། །རང་ཉིད་ཞི་བདེའི་བསམ་པ་སྐྱེས་པ་ན། །སངས་རྒྱས་མ་ལུས་བདག་གིས་བསླུས་པའི་ཕྱིར། །མགོ་བོ་ཨ་རྫྷ་ཀ་ཡི་དོག་པ་ལྟར། །ཚལ་པ་བཅུར་གས་པད་མའི་འདབ་མ་ལྟར། །ལུས་ཀྱང་རྣམ་པ་སྟོང་དུ་བྱེ་གྱུར་ཞེས། །སྙིང་རྗེས་བདེན་ཚིག་སྨོན་ལམ་མཛད་པར་གྱུར། །དེ་ཡི་འཕྲིན་ལས་ནམ་མཁའི་མཐའ། །དཔོག་ནུས་འཇིག་(ཆ༥ན)

[Full Size]

རྟེན་ཀུན་ན་མེད། །འོན་ཀྱང་རང་གི་དད་པའི་རྒྱུས། །མདོ་སྡེའི་རྒྱལ་པོ་ཟ་མ་ཏོག །བཀོད་པ་ལས་བྱུང་ཕྱོགས་འགའ་ཞིག །མདོར་བསྡུས་ཅུང་ཟད་བརྗོད་པར་བྱ། །མནར་མེད་དམྱལ་བའི་ལྕགས་ཀྱི་ཁང༌། །འབར་བའི་མེ་སྤུང་གཅིག་གྱུར་ཀྱང༌། །མུན་པའི་རང་བཞིན་སྣང་བ་མེད། །འགྲོ་ཚོགས་གྲངས་མེད་སྲེག་ཅིང་འཚེད། །ལྷུན་པོའང་ཐལ་བར་བྱེད་པ་དེར། །ལྷ་རྣམས་དགའ་བའི་ཚལ་འཇུག་ལྟར། །སྤྱན་རས་གཟིགས་ཀྱི་དབང་པོ་ནི། །སྙིང་རྗེས་ཚམ་ཚོམ་མེད་པར་ཞུགས། །ཡི་གེ་དྲུག་པའི་སྒྲ་ཆེན་བསྒྲགས། །དེ་ནི་ཉེ་བར་སོང་ཙམ་གྱིས། །དམྱལ་བའི་མེ་རྣམས་རང་སར་ཞི། །ཙནྡན་ལྟ་བུར་བསིལ་བར་གྱུར། །ཆུ་གཙང་ཡན་ལག་བརྒྱད་ལྡན་རྫིང༌། །པདྨ་ཨུཏྤ་ལ་ཡིས་ཁེབས། །དམྱལ་བའི་སྣོད་རྣམས་གས་ཤིང་ཞིག །དམྱལ་བ་པ་རྣམས་སྡུག་བསྔལ་ཞི། །དེ་ནས་ལུས་སེམས་ཚིམ་བཞིན་དུ། །ལྟོས་ཤིག་སྐྱེས་བུ་འདོད་པའི་གཟུགས། །ལྟ་བས་མི་ངོམས་འདི་མཐོང་བས། །བདག་ཅག་དབུགས་ཕྱིན་གྱུར་ཏོ་ཞེས། །ཕན་ཚུན་སྨྲ་ཞིང་སྐད་ཅིག་གིས། །རྩ་གསུམ་ལྷ་ཡི་ནང་དུ་སྐྱེས། །ཕྱིར་མི་ལྡོག་པ་ཐོབ་པར་གྱུར། །དམྱལ་སྲུང་གཤིན་རྗེའི་སྐྱེས་བུ་ཀུན། །སྐྲག་ཅིང་འཇིགས་པས་མཚོན་བོར་ནས། །གཤིན་རྗེའི་རྒྱལ་པོའི་དྲུང་སོང་སྟེ། །ལྷ་གཅིག་དམྱལ་བའི་གནས་འདིར་ནི། །སྔོན་མེད་མི་དགེའི་ལྟས་བྱུང་བ། །སྐྱེས་བུ་ལྟ་ན་འདོད་པའི་གཟུགས། །རྒྱན་ཀུན་གྱིས་བརྒྱན་ཅོད་པན་འཕྱང༌། །དེ་འདྲ་ཞིག་ནི་འོངས་མ་ཐག །དམྱལ་བའི་ཟ་མ་ཏོག་རྣམས་གས། །མེ་ཞི་བསིལ་བའི་རྫིང་བུར་གྱུར། །སྲོག་ཆགས་དེ་རྣམས་མི་སྣང་སྟེ། །བདག་ཅག་རྣམས་ཀྱི་ལས་ཀྱི་ས། །འདི་པ་མཁྱེན་བར་མཛོད་ཅེས་སོ། །གཤིན་རྗེའི་རྒྱལ་པོས་འདི་ལྟ་བུ། །སུ་ཡི་མཐུ་སྙམ་བརྟགས་པ་ན། །ཚངས་སོགས་ལྷ་རྣམས་ཀུན་གྱི་ནང༌། །དེ་འདྲའི་མཐུ་ཡོད་(ཆ༥བ)

[Full Size]

མ་མཐོང་ནས། །དམྱལ་བའི་ནང་དུ་བལྟས་པ་ན། །སྤྱན་རས་གཟིགས་དབང་བཞུགས་པར་མཐོང༌། །གཤིན་རྗེའི་རྒྱལ་པོས་ལུས་བཏུད་དེ། །དེ་ཞབས་ཡང་ཡང་གཙུག་བླངས་ནས། །ཡོན་ཏན་མཆོག་གིས་རྒྱ་ཆེར་བསྟོད། །སྤྱན་རས་གཟིགས་ཀྱི་དབང་པོ། དབང་ཕྱུག་ཆེན་པོ། དམ་པ་ལ་དགྱེས་པ། དམ་པ་སྩོལ་བ་དབང་དུ་མཛད་པ། སའི་སྤྱན་དམ་པ་མཛད་པ། དབུགས་འབྱིན་པར་མཛད་པ། ཕྱག་བརྒྱ་ཕྲག་སྟོང་བ། སྤྱན་བྱེ་བ་ཕྲག་བརྒྱ་སྟོང་པ། དབུ་བཅུ་གཅིག་པ་རྒོད་པའི་བཞིན། ལྟ་བའི་མཐར་ཕྱིན་པའི་ཆོས་ལ་དགྱེས་པ། སེམས་ཅན་ཐམས་ཅད་ཡོངས་སུ་ཐར་བར་མཛད་པ། རུས་སྦལ་དང་ཆུ་སྲིན་དང་ཉ་རྣམས་དབུགས་འབྱིན་པར་མཛད་པ། ཡེ་ཤེས་ཀྱི་ཕུང་པོ་དམ་པ་ལ་མངའ་མཛད་པ། དགའ་བ་སྩོལ་བ་རིན་པོ་ཆེའི་དཔལ་དམ་པ། མནར་མེད་པ་ཀུན་སྐེམ་པར་མཛད་པ། ཡེ་ཤེས་ཀྱི་དཔལ་གྱིས་བརྒྱན་པ་ཡེ་ཤེས་ལ་དགྱེས་པ། ལྷ་ཐམས་ཅད་ཀྱི་མཆོད་པ་ཕྱག་འཚལ་བ་བཀུར་སྟི་དགྱིད་པ། མི་འཇིགས་པ་སྩོལ་བ་ཕ་རོལ་ཏུ་ཕྱིན་པ་དྲུག་སྟོན་པར་མཛད་པ། ཉི་མ་ལྟ་བུའི་སྤྱན་མཆོག་མཛད་པ། ཆོས་ཀྱི་སྒྲོན་མེ་མཛད་པ། ཇི་ལྟར་དགྱེས་པའི་གཟུགས་ཀྱི་གཟུགས་མཆོག་དྲི་ཟའི་གཟུགས་དང་ལྡན་པ། གསེར་གྱི་རིའི་གཟུགས་དང་མཚུངས་པ། རྒྱ་མཚོ་འཆིང་གནམ་གྱི་ཁོངས་བཞིན་དུ་ཟབ་པ། དོན་དམ་པའི་རྣལ་འབྱོར་རྗེས་སུ་ཐོབ་པ་བདག་གི་ཞལ་སྟོན་པར་མཛད་པ། ཏིང་ངེ་འཛིན་བརྒྱ་སྟོང་དུ་མ་དང་ལྡན་པ་མངོན་པར་དགྱེས་པར་མཛད་པ། སྐུ་བརྒྱན་པ་སྐྱེས་བུ་ཁྱུ་མཆོག །ཁུང་སྒོ་དང་ཁོང་སྒྲིལ་དང་འཕྲུལ་འཁོར་གྱི་ལམ་ལས་ཡོངས་སུ་ཐར་བར་མཛད་པ། སྲིད་པ་ཐམས་ཅད་དང་མ་འབྲེལ་བ། འཁོར་མང་པོ་འབྱུང་བར་འགྱུར་བའི་ཕྲིན་ལས་བསགས་པ། ཡིད་བཞིན་གྱི་ནོར་བུ་རིན་པོ་ཆེ་མཛད་པ། མྱ་ངན་ལས་འདས་པའི་ལམ་སྟོན་པར་མཛད་པ། (ཆ༦ན)

[Full Size]

ཡི་དྭགས་ཀྱི་གྲོང་ཁྱེར་སྐེམ་པར་མཛད་པ། སྐྱེ་བོ་ལ་གདུགས་སུ་གྱུར་པ། ནད་ལས་ཡོངས་སུ་ཐར་བར་མཛད་པ། ཀླུའི་རྒྱལ་པོ་དགའ་བོ་དང་བསྙེན་དགའ་བོས་མཆོད་ཕྱིར་ཐོགས་བྱས་པ། དོན་ཡོད་པར་འགྱུར་བའི་ཞགས་པ་སྟོན་པར་མཛད་པ། སྔགས་བརྒྱ་ཕྲག་དུ་མ་དང་ལྡན་པ། ལག་ན་རྡོ་རྗེ་སྐྲག་པར་མཛད་པ། འཇིག་རྟེན་གསུམ་པོ་སྐྲག་པར་མཛད་པ། གནོད་སྦྱིན་དང་སྲིན་པོ་དང་འབྱུང་པོ་དང་ཤ་ཟ་དང་ཕྲ་མེན་ཕོ་དང་ཕྲ་མེན་མོ་དང་རོ་ལངས་དང་གྲུལ་བུམ་དང་རྗེད་བྱེད་རྣམས་སྐྲག་པར་མཛད་པ། སྤྱན་ཨུཏྤལ་སྔོན་པོ་ལྟ་བུ། རིག་པའི་རྒྱལ་པོ་ཉོན་མོངས་པ་ཐམས་ཅད་ལས་གྲོལ་བར་མཛད་པ། ལམ་སྣ་ཚོགས་ལས་ཟློག་པ་ཐར་པ་དམ་པ་ལ་གཞུག་པ་སྐུ་ལ་བྱང་ཆུབ་ཀྱི་ལམ་བསགས་པ་ཡི་དྭགས་ཡོངས་སུ་ཐར་བར་མཛད་པ། ཏིང་ངེ་འཛིན་རྡུལ་ཕྲ་རབ་ལྟ་བུ་བརྒྱ་སྟོང་དང་ལྡན་པ་ལ་ཕྱག་འཚལ་ལོ། །སྤྱན་རས་གཟིགས་དབང་མཆོག་དེ་ཡང༌། །ཡི་དྭགས་གྲོང་ཁྱེར་ཆེན་པོར་སོང༌། །ཀེང་རུས་བསྒྲེངས་འདྲ་མགལ་དུམ་ལུས། །ལྟོ་ཆེན་མགྲིན་པ་ཕྲ་བ་ཡི། །ཡི་དྭགས་དཔག་མེད་མདུན་ན་རྒྱུག །འབར་བའི་གྲོང་ཁྱེར་གསིལ་གྱུར་ཞིང༌། །རྡོ་རྗེའི་སེར་བ་རབ་ཏུ་ཞི། །སྲུང་མ་རྣམས་ཀྱང་བྱམས་པ་ཐོབ། །ཕྱག་སོར་ཞབས་སོར་ཉི་ཤུ་ལས། །བདུད་རྩིའི་ཆུ་བོ་རེ་རེ་ཕབ། །བ་སྤུའི་ཁུང་བུ་ཀུན་ནས་ཀྱང༌། །ཡན་ལག་བརྒྱད་ལྡན་ཆུ་བྱུང་སྟེ། །ཡི་དྭགས་ཀུན་གྱིས་འཐུངས་ཙམ་གྱིས། །ཁ་དང་མགྲིན་པ་ཡངས་པར་གྱུར། །ལུས་ཡོངས་རྫོགས་ཤིང་བཀྲེས་སྐོམ་ཞི། །ཡི་གེ་དྲུག་པའི་ཆོས་ཐོས་པས། །འཇིག་ལྟའི་རི་བོ་བཅོམ་ནས་ནི། །བདེ་བ་ཅན་དུ་སོང་བར་གྱུར། །དེ་ལྟར་སྐད་ཅིག་རེ་རེས་ཀྱང༌། །ངན་འགྲོའི་གནས་ཀུན་སྟོངས་པར་མཛད། །དེ་ཚེ་ཤཱཀྱའི་དབང་པོས་བསྔགས་མཛད་དེ། །སྤྱན་རས་གཟིགས་ཀྱི་དབང་པོའི་སྤོབས་པ་གང༌། །དེ་འདྲ་དེ་(ཆ༦བ)

[Full Size]

བཞིན་གཤེགས་པ་རྣམས་ལའང་མེད། །སྔོན་ཚེ་རྫོགས་པའི་སངས་རྒྱས་ལྷག་མཐོང་ལས། །ང་ནི་ཁྱེ་འུ་སྤོས་ཀྱི་བཞིན་གྱུར་པས། །སྤྱན་རས་གཟིགས་ཀྱི་ཡོན་ཏན་བརྗོད་པ་ཐོས། །མིག་གཉིས་ལས་ནི་ཉི་མ་ཟླ་བ་བྱུང༌། །དཔྲལ་བའི་དབྱེས་ནས་ལྷ་ཆེན་དབང་ཕྱུག་སྟེ། །ཕྲག་པའི་ལྷུན་ལས་ཚངས་པ་ཆེན་པོ་བྱུང༌། །སྙིང་ལས་ཁྱབ་འཇུག་མཆེ་བ་ལས་ལྷ་མོ། །ཁ་ལས་རླུང་ལྷ་རྐང་ལས་ས་ཡི་ལྷ། །ལྟོ་བ་ལས་ནི་ཆུ་ཡི་ལྷ་བྱུང་ཚེ། །རྒྱལ་བ་དེ་ཡིས་དབང་ཕྱུག་ཆེ་བོས་ནས། །མ་འོངས་པ་ན་ངན་པའི་དུས་བྱུང་ཚེ། །ཁྱོད་ནི་འཇིག་རྟེན་བྱེད་པོར་གྲགས་པར་འགྱུར། །སེམས་ཅན་དེ་དག་བྱང་ཆུབ་ལམ་སྤངས་སྟེ། །ནམ་མཁའི་འདི་ནི་དབང་ཕྱུག་ཆེན་པོའི་རྟགས། །ས་ནི་ཁྲི་ཡིན་སེམས་ཅན་ཀུན་གྱི་གནས། །དེ་ནི་ཞི་ཞིང་རྟག་ཅེས་ལྟ་ངན་འཛིན། །བྱིས་པ་བླུན་པོ་དུ་མ་བསླུ་འགྱུར་གསུངས། །གཞན་ཡང་རྒྱལ་བ་གཙུག་ཏོར་ཅན་གྱི་ཚེ། །ང་ནི་བྱང་སེམས་སྦྱིན་པའི་དཔལ་དུ་འགྱུར། །ཞིང་དེ་གཞན་འཕྲུལ་དབང་བྱེད་ལྟ་བུར་འགྱུར། །ས་ཆེན་གཡོ་ཞིང་པདྨའི་ཆར་མང་འབབ། །བདེ་བ་ཅན་གྱི་འོད་དཔག་མེད་དྲུང་ནས། །སྤྱན་རས་གཟིགས་དབང་ཞིང་འདིར་འོང་བའི་ལྟས། །སེམས་དཔའ་ཆེ་དེ་གང་དུ་འོང་བར་ཡང༌། །ཆོས་ཉིད་ཀྱིས་ནི་འདི་ལྟར་སྣང་ངོ་གསུངས། །དེ་ནས་དཀར་ཞིང་ཞི་བའི་གཟུགས་ཅན་ཞིག །གསེར་གྱི་པདྨ་རྒྱས་པ་འཛིན་པས་ལྷགས། །རྒྱལ་ལ་ཕུལ་ནས་བསྙུན་གསོལ་སྨེད་པར་བྱེད། །མནར་མེད་ལ་སོགས་ཚ་བའི་དམྱལ་བ་བརྒྱད། །ཤལ་མ་ལི་སོགས་ཉེ་འཁོར་གནས་པ་དང༌། །གྲང་དམྱལ་བརྒྱད་དང་ཡི་དྭགས་འགྲོ་བ་ཀུན། །བདག་གི་ལས་ཀྱི་ས་སྟེ་དེར་སྐྱེས་རྣམས། །སྒྲོལ་ཞིང་སྨིན་བྱེད་བྱང་ཆུབ་ཆེར་འགོད་ཅེས། །མཆིད་ལན་གསོལ་སྟེ་གློག་བཞིན་མི་སྣང་གྱུར། །སྤྱན་རས་གཟིགས་དེའི་བསོད་ནམས་ཕ་མཐའ་ཡས། །(ཆ༧ན)

[Full Size]

དེ་འདྲ་དེ་བཞིན་གཤེགས་པ་རྣམས་ལའང་མེད། །རྒྱལ་བ་ཀུན་གྱིས་བགྲང་བར་ཡོང་མི་ནུས། །དེ་ཡི་མཚན་ཙམ་རྗེས་སུ་དྲན་བྱེད་ནའང༌། །དེ་དག་བདེ་བ་ཀུན་དང་ལྡན་པ་ཡིན། །རྒ་ནད་འཆི་བའི་སྡུག་བསྔལ་ཀུན་ལས་ཐར། །དེ་དག་ལུས་དེ་འཁོར་བའི་མཐའ་མ་ཡིན། །གོས་གཙང་དཀར་ལྟར་ཡོན་ཏན་ཚོན་གྱིས་འཛིན། །ངང་པའི་རྒྱལ་པོ་རབ་ཏུ་མགྱོགས་པ་དང༌། །རླུང་གི་ཤུགས་ལྟར་བདེ་བ་ཅན་དུ་འགྲོ། །དེ་བཞིན་གཤེགས་པ་སྣང་བ་མཐའ་ཡས་མཐོང༌། །དངོས་སུ་ཆོས་ཐོས་འཁོར་བའི་སྡུག་བསྔལ་སྤོང༌། །དུག་གསུམ་མི་འགྱུར་རྒ་ཤིར་མི་འགྱུར་རོ། །བཀྲེས་སྐོམ་མི་འབྱུང་ཕྱིན་ཆད་མངལ་མི་གནས། །ཆོས་ཀྱི་རོས་བསྐྱོད་ཞིང་མཆོག་དེ་ཉིད་དུ། །སྤྱན་རས་གཟིགས་ཀྱི་ཡི་དམ་བརྟན་པོ་ནི། །ཡོངས་སུ་རྫོགས་དང་འགྲོ་ཀུན་མ་ཐར་བར། །དག་པའི་འཇིག་རྟེན་དེ་ན་འཛིན་ཞིང་གནས། །སྤྱན་རས་གཟིགས་ཀྱི་དབང་པོ་དམ་པ་དེ། །འཁོར་བའི་སེམས་ཅན་རྒྱ་མཚོ་མ་ལུས་པ། །ཡོངས་སུ་སྨིན་བྱེད་བྱང་ཆུབ་ལམ་རབ་སྟོན། །གང་གང་གཟུགས་ཀྱིས་དེ་དེ་འདུལ་འགྱུར་བ། །དེ་དང་དེ་ལ་གཟུགས་དེས་ཆོས་སྟོན་སྟེ། །རྫོགས་སངས་རྒྱས་ཀྱིས་འདུལ་ལ་སངས་རྒྱས་གཟུགས། །དེ་བཞིན་རང་རྒྱལ་དགྲ་བཅོམ་བྱང་སེམས་དང༌། །དབང་ཕྱུག་ཆེན་པོ་མཐུ་ཆེན་ཚངས་བརྒྱ་བྱིན། །ཉི་མ་ཟླ་བ་མེ་དང་རླུང་གི་ལྷ། །ཆུ་ལྷ་ཀླུ་དང་བགེགས་རྒྱལ་གནོད་སྦྱིན་དང༌། །ངལ་སོས་པོ་དང་རྒྱལ་པོ་ཕ་མ་སོགས། །ཇི་ལྟར་འདུལ་བའི་གཟུགས་དེས་ཆོས་སྟོན་ཏོ། །དེར་ཡང་སེམས་ཅན་ཡོངས་སུ་སྨིན་བྱས་ནས། །མྱ་ངན་འདས་པའི་ས་རབ་སྟོན་པར་བྱེད། །རེ་ཞིག་འཛམ་བུའི་གླིང་འདི་ཉིད་ན་ཡང༌། །རྡོ་རྗེའི་མངལ་ཞེས་བྱ་བའི་ཕུག་པ་ཡོད། །ལྷ་མིན་བྱེ་བ་ཁྲག་ཁྲིག་བརྒྱ་སྟོང་གནས། །དེ་ན་སྤྱན་རས་གཟིགས་ཀྱི་དབང་པོ་ནི། །ལྷ་མིན་གཟུགས་ཀྱིས་ཐེག་པ་ཆེན་པོའི་མདོ། །དཀོན་མཆོག་རྒྱལ་པོ་ཟ་མ་ཏོག་འདི་འཆད། །དེ་དག་(ཆ༧བ)

[Full Size]

བྱམས་དང་ཞི་བས་དམ་ཆོས་ཉན། །མདོ་སྡེའི་དམ་པ་འདི་ཐོས་བདེ་དང་ལྡན། །ཐོས་པས་མཚམས་མེད་ལྔ་དག་ཟད་པར་བྱེད། །འཆི་བའི་ཚེ་ཡང་སངས་རྒྱས་བཅུ་གཅིག་འབྱོན། །རིགས་ཀྱི་བུ་ཁྱོད་ཚུར་ཤོག་མ་འཇིགས་ཤིག །ཁྱོད་ཀྱིས་ཟ་མ་ཏོག་གི་མདོ་སྡེ་ཐོས། །བདེ་བ་ཅན་གྱི་ལམ་ཡང་ལྟ་གོན་བྱས། །གདུགས་དང་རྒྱལ་མཚན་རྣ་ཆ་སེ་མོ་དོའི། །རྣམ་གྲངས་དག་ཀྱང་འདིར་ནི་ལྟ་གོན་བྱས། །ཚུར་ཤོག་ཅེས་གསུངས་དབུགས་འབྱིན་མཛད་པར་འགྱུར། །དེ་ལྟའི་ལྟས་འབྱུང་འཆི་བའི་དུས་ཀྱི་ཚེ། །བར་ཆད་མེད་པར་བདེ་བ་ཅན་དུ་འགྲོ། །དེ་ལྟར་ལྷ་མིན་ཆོས་ཀྱིས་འདུལ་བ་ཡོད། །གཙུག་ཏོར་ཅན་གྱི་རྒྱལ་བ་དེ་འདས་ནས། །ཐམས་ཅད་སྐྱོབ་ཅེས་བྱ་བའི་སངས་རྒྱས་བྱུང༌། །དེ་ཚེ་ང་ནི་བཟོད་པ་སྨྲ་བར་གྱུར། །རྒྱལ་བ་ཐམས་ཅད་སྐྱོབ་དེས་སྤྱན་རས་གཟིགས། །དབང་པོའི་ཡོན་ཏན་རྒྱ་ཆེར་བརྗོད་པ་ཐོས། །དེ་ནི་གསེར་གྱི་ས་གཞིར་སོང༌། །སེམས་ཅན་སྤྱིའུ་ཚུགས་རྣམས་ལ། །འཕགས་ལམ་ཡན་ལག་བརྒྱད་པ་བསྟན། །དངུལ་གྱི་ས་གཞིར་སོང་ནས་ཀྱང༌། །སྐྱེས་བུ་རྐང་བཞི་པ་རྣམས་ལ། །མདོ་སྡེ་ཟ་མ་ཏོག་བསྟན་པས། །ཕྱིར་མི་ལྡོག་པའི་ས་ལ་བཀོད། །གང་ན་ལྕགས་ཀྱི་ས་གཞི་ནི། །ལྷ་མིན་སྟོབས་ལྡན་གནས་པར་སོང༌། །རྒྱལ་ལ་བསོད་སྙོམས་ཕུལ་བ་ཡི། །བསོད་ནམས་ཕུང་པོའི་ཆོས་སྒོ་བཤད། །དེ་ཚེ་ལྷ་མིན་དབང་པོ་དེ། །ངུད་མོ་འབྱིན་བཞིན་གསོལ་བར་བྱེད། །སྟོབས་ལྡན་བདག་ནི་སླས་བཅས་པས། །དུས་མིན་སྦྱིན་པ་བྱས་པ་ཡིས། །ཚེ་འདི་ཉིད་དུ་བཅིངས་པ་ཐོབ། །ཐམས་ཅད་མཁྱེན་པ་ལ་དམིགས་ནས། །སྙིམ་པ་གང་གི་ས་གཏོར་ཡང༌། །འབྲས་བུ་འདུད་རྩིར་འགྲུབ་གྱུར་ན། །བདག་གིས་ཞིང་ངན་ལ་བྱིན་པའི། །འབྲས་བུ་མྱོང་འདི་ལགས་པ་ལྟ། །བདག་གིས་མཆོད་སྦྱིན་བཀང་ས་བཤམས། །ཤིང་རྟ་བ་ལང་རྟ་ཡི་ཐེག །(ཆ༨ན)

[Full Size]

རིན་ཆེན་དཔག་མེད་ཀྱིས་གཡོགས་པ། །རེ་རེའང་སྟོང་ཕྲག་དུ་མ་བཤམས། །བུ་མོ་གཞོན་ནུ་རེ་རེ་ཡང༌། །རིན་ཐང་མེད་པའི་རྒྱན་འཆང་བ། །ལྟ་ན་མཛེས་པ་སྟོང་ཕྲག་བཀོད། །རིན་ཆེན་ཁྲི་དང་ཁྲི་འུ་དང༌། །སྣ་ཚོགས་རིན་ཆེན་གོས་དང་རྒྱན། །རེ་རེའང་རི་ལྟར་སྤུངས་པ་བཀོད། །ལྷ་ཡི་ཟས་སྐོམ་རྒྱ་ཆེར་སྦྱར། །བྲམ་ཟེ་འབུམ་ཕྲག་དུ་མ་དང༌། །རྒྱལ་རིགས་འབུམ་ཕྲག་འདུས་གྱུར་སྟེ། །ས་ཆེན་འདི་ནི་གདུགས་གཅིག་བཞིན། །བདག་གིས་རྒྱལ་པོ་བགྱིས་པར་གྱུར། །བདག་གིས་སྡིག་པར་མ་འཚལ་ནས། །རྒྱལ་པོ་ཡི་ནི་ཆུང་མ་རྣམས། །སྙིང་གར་དྲལ་སྟེ་ཁྱེ་འུ་དང༌། །བུ་མོ་གཞོན་ནུ་མང་སྲོག་བཅད། །ཁ་ཤ་བན་དྷ་པ་ལ་སོགས། །རྒྱལ་རིགས་ཆེ་རྣམས་ཁུང་སྒོ་དང༌། །ལྕགས་སྒྲོག་གིས་ནི་ཡན་ལག་བཅིངས། །རྒྱལ་རིགས་འབུམ་ཕྲག་དུ་མ་རྣམས། །ཟངས་ཀྱི་བྲག་ཕུག་ནང་དུ་བསྩལ། །དེ་ལ་ཆབ་སྒོ་བདུན་མཆིས་སྟེ། །དང་པོ་ཤིང་ལས་བགྱིས་པ་ལགས། །དེ་བཞིན་སེང་ལྡེང་འཁར་བ་དང༌། །ཟངས་ལྕགས་དངུལ་དང་གསེར་ལས་བགྱིས། །སྒོ་འཕར་དེ་དག་ཀུན་བཅད་དེ། །གསེར་གྱི་སྒོ་དེར་རི་བོ་བདུན། །བརྩེགས་སྟེ་བཞག་པས་རྣམ་པར་བཀག །ཐོག་མའི་སྒྲིབ་པ་དེ་ཀུན་ནི། །ཁྱེད་ཀྱི་སྤྱན་སྔར་མཐོལ་ཞིང་བཤགས། །ད་དུང་བདག་གིས་མཐུ་བོ་ཆེ། །ཤིང་རྟ་བཅུ་པའི་བུ་འཚོལ་ཕྱིར། །གདུགས་རེ་ཞིང་དུ་སྦྲང་བུ་དང༌། །བོང་བུ་ཕག་དང་མི་སོགས་སུ། །གཟུགས་བསྒྱུར་འཇིག་རྟེན་ཀུན་བཙལ་ཡང༌། །དེ་ནི་མཐོང་བར་མ་གྱུར་ནས། །མཆོད་སྦྱིན་དགྱིད་པར་བརྩམས་པའི་ཚེ། །ཤིང་རྟ་བཅུ་པའི་བུ་འོངས་ནས། །སྒོ་རྣམས་དྲལ་སྟེ་རི་བདུན་བོར། །རྒྱལ་རིགས་བཙོན་དུ་བཅིངས་རྣམས་བཀྲོལ། །བདག་ནི་ཕོ་བྲང་ཁྲིར་འཁོད་ཚེ། །ཟླ་བའི་གླིང་ནས་སློང་བའི་ཕྱིར། །འོངས་ཞེས་བྲམ་ཟེ་མི་འུ་ཐུང༌། །སྨྱིག་མའི་འཁར་བ་ཅན་ཞིག་འོངས། །དེ་ཚེ་དྲང་སྲོང་པ་བ་སངས། །(ཆ༨བ)

[Full Size]

བདག་གི་མཁན་པོར་གྲགས་པས་གནས། །པ་བ་སངས་ཀྱིས་བདག་བོས་ནས། །འདིར་ནི་དུས་ཀྱི་སྐྱེས་བུ་འོངས། །ཁྱོད་ཀྱིས་ཤེས་པར་གྱིས་ཤིག་ཟེར། །བྲམ་ཟེ་དེས་ཀྱང་དེ་མ་ཐག །བདག་ཁར་སྭ་ར་སྭ་སྟི་བཅུག །ཅི་འདོད་སློངས་ཞེས་བརྗོད་པའི་ཚེ། །ས་ནི་གོམ་པ་གཉིས་གསོལ་ཟེར། །ཁྱོད་ཀྱིས་གོམ་པ་གཉིས་བསླངས་ན། །བདག་གིས་གོམ་པ་གསུམ་སྦྱིན་སྨྲས། །དེས་ཀྱང་བདག་གིས་བསླང་བ་བསླངས། །བཀྲ་ཤིས་སོ་ཞེས་བརྗོད་བྱས་ནས། །ཆུ་རྒྱུན་ཏིལ་དང་གསེར་བཅས་བསླངས། །པ་སངས་བདག་ལ་འདི་སྐད་དུ། །རྒྱལ་པོ་དྲང་སྲོང་ཁྱོད་ཀྱིས་ནི། །བདག་གི་ཚིག་ལ་མ་ཉན་པས། །ལས་དེའི་འབྲས་བུ་མྱོང་གྱིས་ཟེར། །དེ་མ་ཐག་དུ་ཁྱབ་འཇུག་དེས། །མི་འུ་ཐུང་གཟུགས་མི་སྣང་བྱས། །ལུས་ནི་ཆེན་པོར་བསྒྱུར་བ་དང༌། །ཉི་ཟླ་དེ་ཡི་ཕྲག་པར་གནས། །ལག་ན་མཚོན་མང་ཐོགས་པར་མཐོང༌། །དེ་ཡིས་གོམ་པ་གཉིས་བོར་བས། །ས་ཆེན་འདི་ནི་རབ་ཏུ་མནན། །གོམ་པ་གཉིས་ནི་འདི་ཡིས་ཚང༌། །ད་ནི་གསུམ་པ་བྱིན་ཅིག་ཟེར། །གསུམ་པ་མ་མཆིས་ཞེས་སྨྲས་པས། །ཁོ་བོས་བསླང་བ་བསླངས་ཟིན་གྱིས། །ང་ཡིས་གང་དུ་བཞག་པ་དེར། ལྷ་མིན་ཁྱོད་ནི་འདུག་ཅིག་ལོ། །བདག་ནི་སྡུག་བསྔལ་དྲན་ཉམས་སྟེ། །བཀའ་བསྩལ་དེ་བཞིན་དགྱིད་ཅེས་སྨྲས། །ཁྱབ་འཇུག་མཐུ་བོ་ཆེ་དེ་ཡིས། །བདེན་པའི་ཞགས་པས་བདག་བཅིངས་སྟེ། །འཇིག་རྟེན་གྱི་ནི་བྱེད་པོ་བཞིན། །བདག་ནི་ས་ཡི་འོག་དུ་བཞག །མཆོད་སྦྱིན་གནས་བཤིག་ཡོ་བྱད་རྣམས། །རྒྱལ་རིགས་དེ་དག་རྣམས་ཀྱིས་སྤྱད། །དེ་བས་ལྷ་མིན་སྟོབས་ལྡན་བདག །ཐབས་མ་འཚལ་བས་གནས་མིན་གྱི། །སྦྱིན་པས་བཅིངས་པ་ཐོབ་པར་གྱུར། །ཀྱེ་མ་ལས་ལ་ཕྱག་འཚལ་སྙམ། །རང་གི་ལས་ལ་སེམས་ཤིང་འདུག །དེ་བས་བདག་གིས་ངན་པ་ཡི། །ཞིང་ལ་བྱིན་ཞེས་གསོལ་ལགས་སྟེ། །ཕྱག་ན་པདྨ་བཟང་པོ་ཐོགས་པས་སྐྱབས་མཛོད་ཅིག །(ཆ༩ན)

[Full Size]

པདྨའི་དཔལ་གྱིས་བརྒྱན་པ་རལ་པའི་ཅོད་པན་ཅན། །ཐམས་ཅད་མཁྱེན་པས་དབུ་བརྒྱན་འགྲོ་ཀུན་དབུགས་འབྱིན་མཛད། །དམན་དང་ཕོངས་ལ་ཐུགས་བརྩེ་པད་མའི་སྤྱན་བཟང་པོ། །ས་ཡི་སྤྱན་མཆོག་སྨན་པའི་རྒྱལ་པོའི་མཆོག་གྱུར་པ། །སེམས་ཅན་ཤིན་དུ་དག་པ་རྣལ་འབྱོར་རབ་ཐོབ་ཅིང༌། །ཐར་མཆོག་ཐར་པ་ལ་དགྱེས་ཡིད་བཞིན་ནོར་བུ་འདྲ། །ཆོས་མཛད་ཡོངས་སུ་སྐྱོང་མཛད་ཕ་རོལ་ཕྱིན་དྲུག་སྟོན། །བསམ་པ་ལེགས་པར་བྱེད་པ་ཁྱོད་ལ་བདག་ཕྱག་འཚལ། །སྤྱན་རས་གཟིགས་དབང་ཁྱོད་མཚན་གང་གིས་དྲན་བྱེད་པའི། །སེམས་ཅན་དེ་དག་བདེ་བ་དམ་པར་ལྡན་པ་ལགས། །དམྱལ་བ་ཀུན་དང་ཡི་དྭགས་གྲོང་ཁྱེར་དུ་སྐྱེས་པ། །གང་དག་ཁྱོད་མཚན་རྗེས་སུ་དྲན་བྱེད་དེ་དག་ནི། །ངན་སོང་སྡུག་བསྔལ་ཆེ་ལས་ཡོངས་སུ་ཐར་བ་ལགས། །ཁྱོད་མཚན་རྗེས་སུ་དྲན་བྱེད་སེམས་ཅན་དེ་དག་ནི། །བསམས་པ་ལེགས་ལྡན་བདེ་བ་ཅན་གྱི་འཇིག་རྟེན་འགྲོ། །དེ་བཞིན་གཤེགས་པ་འོད་མཐའ་ཡས་ལས་ཆོས་ཉན་འགྱུར། །དེ་ལྟར་བསྟོད་ཅིང་འདུད་པ་ཡི། །ལྷ་མིན་དབང་པོ་དབུགས་འབྱིན་ཕྱིར། །སྤྱན་རས་གཟིགས་ཀྱིས་ལུང་བསྟན་པ། །ཁྱོད་ནི་བདེ་གཤེགས་རྫོགས་སངས་རྒྱས། །ལྷ་མིན་དབང་པོའི་དཔལ་ཞེས་འགྱུར། །ལྷ་མིན་ཐམས་ཅད་བྱང་ཆུབ་འདུལ། །ཁྱོད་འཚང་རྒྱ་བའི་ཞིང་དེ་ན། །དུག་གསུམ་སྒྲ་མེད་ཡིག་དྲུག་གི །རིག་པའི་རྒྱལ་པོ་འཐོབ་པར་འགྱུར། །དེ་ལྟར་ལུང་བསྟན་ལྷ་མིན་དབང་པོ་ཡིས། །ཆོས་ཀྱི་དགབ་པར་མུ་ཏིག་སེ་མོ་དོ། །སྟོང་ཕྲག་འདོམ་ལྡན་རིན་ཐང་མེད་པ་དང༌། །ཅོད་པན་རིན་ཆེན་ཀུན་གྱིས་བརྒྱན་པ་ཕུལ། །སླར་ཡང་སྤྱན་རས་གཟིགས་ཀྱིས་ཆོས་བསྟན་པ། །ལྷ་མིན་རྒྱལ་པོ་ཆེན་པོ་ཁྱོད་ཉོན་ཞིག །མི་རྟག་པ་ཡི་རང་བཞིན་དངོས་རྣམས་ལ། །རྟག་དུ་ལེན་སེམས་ལོངས་སྤྱོད་ཡིད་ལ་བྱེད། །བྲན་དང་བྲན་མོ་ལས་མི་ནོར་དང་འབྲུ། །མཛོད་དང་བང་བ་(ཆ༩བ)

[Full Size]

བུ་དང་བུ་མོ་དང༌། །ཆུང་མ་དང་ནི་ཕ་མར་ཞེན་པ་ཡི། །སེམས་ཅན་དེ་དག་མི་ཤེས་གཏི་མུག་སྟེ། །དེ་དག་རྨི་ལམ་མི་ཤེས་འཁྲུལ་བ་འདྲ། །འཆི་བའི་ཚེ་ཡང་སྐྱབས་བྱེད་སུ་ཡང་མེད། །སྲོག་བྲལ་ཚེ་ཡང་འཛམ་གླིང་ལོག་པར་མཐོང༌། །ཆུ་ཆེན་པོ་ཡང་རྣག་ཁྲག་གིས་གང་མཐོང༌། །ལྗོན་ཤིང་ལ་ཡང་འབར་བའི་ཕུང་པོར་སྣང༌། །མཐོང་ནས་སྐྲག་འགྱུར་གཤིན་རྗེའི་སྐྱེས་བུ་ཡིས། །ཞགས་པས་བཅིངས་ནས་ངན་འགྲོར་འཁྲིད་པར་འགྱུར། །སྤུ་གྲིའི་སོ་ཡི་ལམ་གྱིས་རྐང་པ་ཆད། །བཏེག་ཚེ་རྐང་པ་སར་པ་གཞན་འབྱུང་འགྱུར། །བྱ་རོག་བྱ་རྒོད་ཀུ་ར་ར་དང་ཁྱི། །དུ་མས་ཟ་ཞིང་དམྱལ་བའི་སྡུག་བསྔལ་མྱོང༌། །སྤུ་གྲིའི་སོ་ཡི་ལམ་ཆེན་དེ་འདས་ནས། །རྐང་པ་རེ་རེ་ལ་ཡང་བཅུ་དྲུག་གི །སོར་ཚད་ལྕགས་ཀྱི་ཚེར་མ་ལྔ་བརྒྱ་འཛུག །བདག་གིས་སྡིག་པ་ཅི་ཞིག་བྱས་ཞེས་འཁང༌། །དེ་ཚེ་གཤིན་རྗེ་རྣམས་ཀྱིས་འདི་སྐད་སྒྲོག །སྔོན་ཚེ་རྒྱལ་ལ་མཆོད་པ་མ་བྱས་ཤིང༌། །ཡོན་གནས་རྣམས་ལ་བསོད་སྙོམས་མ་ཕུལ་ལོ། །གཎྜི་བརྡུང་བའི་སྒྲ་ཡང་མ་ཐོས་སོ། །སྐུ་གཟུགས་མཆོད་རྟེན་སྐོར་བ་མ་བྱས་ཞེས། །སྤྱོས་ཤིང་བརྒྱད་བཀག་སླར་ཞིང་སྡུག་བསྔལ་བས། །ཀྱེ་མ་བདག་ཅག་མ་དད་སྡིག་པ་ཅན། །དཀོན་མཆོག་གསུམ་གྱིས་སྤངས་པར་གྱུར་ཏོ་ཅེས། །སྨྲེ་སྔགས་འདོན་ཚེ་གཤིན་རྗེའི་སྐྱེས་བུ་ཡིས། །ལས་དེའི་འབྲས་བུ་འདི་ཡིན་མྱོང་གྱིས་ཞེས། །གཤིན་རྗེའི་རྒྱལ་པོའི་དྲུང་དུ་ཁྲིད་པའི་ཚེ། །དེང་ལ་ལས་ཀྱི་ས་རྣམས་འདི་ལ་སྟོན། །རྣམ་པར་སྨིན་པ་ཡོད་མེད་ལྟོས་ཤིག་བསྒོ། །དེ་ནས་ཐིག་ནག་དམྱལ་བ་ཆེན་པོར་བཅུག །ཤག་ཏི་བརྒྱ་དང་སུམ་བརྒྱ་བཏབ་པས་ཀྱང༌། །ཤི་བར་མ་གྱུར་དེ་ཚེ་མེ་འོབས་འཛུད། །དེ་ནས་ལྕགས་ཐོ་བསྲེགས་པ་ཁར་བཅུག་པས། །མཆུ་ཚིག་སོ་ཆག་རྐན་གས་ནང་རོལ་ཀུན། །འུར་འུར་གཅིག་དུ་འབར་ཞིང་ལུས་ཀུན་འཚིག །དེ་བས་རྒྱལ་པོ་འཇིག་རྟེན་འདི་ན་ནི། །སྐྱབས་སུ་གྱུར་པ་གཞན་ཡོད་མ་ཡིན་སྟེ། །ནན་(ཆ༡༠ན)

[Full Size]

ཏན་དུ་ནི་བསོད་ནམས་གསག་པར་གྱིས། །དེ་ལྟར་བསྟན་ནས་སྤྱན་རས་གཟིགས་དབང་དེ། །གང་ན་ས་ཕྱོགས་མུན་པ་མུན་ནག་གནས། །ལྷ་དང་མི་རྣམས་མི་རྒྱུའི་ཕྱོགས་སུ་སོང༌། །གླིང་དེར་ཉི་མ་ཟླ་བ་མི་སྣང་སྟེ། །ནོར་བུ་མཆོག་སྦྱིན་ཞེས་བྱས་སྣང་བ་བྱེད། །དེ་ན་གནོད་སྦྱིན་སྲིན་པོ་བརྒྱ་སྟོང་གནས། །དེ་དག་ཟ་མ་ཏོག་གི་མདོ་སྡེས་བཏུལ། །མདོ་འདིའི་ཚིགས་སུ་བཅད་པ་གཅིག་ཁོ་ན། །ཉན་འཛིན་སེམས་པའི་བསོད་ནམས་གཞལ་དུ་མེད། །རྒྱ་མཚོའི་ཆུ་ཐིགས་ས་གཞིའི་ཕྲ་རབ་རྡུལ། །གྲངས་ཀྱིས་ཟིན་མོད་མདོ་སྡེ་འདི་འཛིན་པའི། །བསོད་ནམས་དམ་པ་གཞལ་དུ་ཡོད་མ་ཡིན། །གླིང་བཞིའི་ཁྱིམ་གྱི་རྣམ་པ་ཇི་སྙེད་པ། །དེ་སྙེད་ལྷ་རྫས་གཙུག་ལག་ཁང་བྱས་སྟེ། །རེ་རེར་རིན་ཆེན་མཆོད་རྟེན་རིང་སྲེལ་ཅན། །སྟོང་སྟོང་ཉིན་རེར་བགྱིས་པའི་དགེ་བ་ནི། །མདོ་སྡེ་འཛིན་པའི་བསོད་ནམས་ཆ་གཅིག་འགྱུར། །གངྒཱ་བཅུ་གཉིས་བྱེ་སྙེད་རྒྱལ་བ་ཡིས། །བཅུ་གཉིས་བསྐལ་པར་མདོ་སྡེ་འདི་འཛིན་པའི། །བསོད་ནམས་ཕུང་པོ་རྗོད་ཀྱིས་མི་ལང་ན། །ང་གཅིག་འདི་ན་གནས་པས་སྨོས་ཅི་དགོས། །མདོ་འདི་ཡི་གེར་བྲིས་སམ་འབྲིར་བཅུག་པ། །ཆོས་ཕུང་བརྒྱད་ཁྲི་བཞི་སྟོང་བྲིས་པ་སྟེ། །འཁོར་ལོས་སྒྱུར་བའི་བདེ་བ་དུ་མར་མྱོང༌། །མདོ་འདིའི་མིང་ཙམ་འཛིན་ཡང་སྲིད་ལས་ཐར། །ག་ལ་ག་ལར་སྐྱེ་བ་དེ་ཀུན་དུ། །ཚེ་རབས་དྲན་འགྱུར་དེ་ཡི་ལུས་ལ་ནི། །ཙནྡན་རྒྱལ་པོ་ས་མཆོག་དྲི་ངད་ལྡང༌། །ཁ་ནས་ཨུཏྤལ་སྔོན་པོའི་དྲི་བསུང་སྤྲོ། །ལུས་ཡོངས་རྫོགས་ཤིང་སྟོབས་ཆེན་ཤུགས་ལྡན་འགྱུར། །དེ་ལྟར་བསྟན་པས་མུན་ཁམས་འགྲོ་དེ་ཀུན། །ཕྱིར་འོང་དང་ནི་ཕྱིར་མི་འོང་ལ་བཀོད། །སྤྱན་རས་གཟིགས་དེ་སྐད་ཅིག་ཡུད་ཙམ་གྱིས། །གནས་གཙང་ལྷ་ཡི་གནས་སུ་སོང་བར་གྱུར། །(ཆ༡༠བ)

[Full Size]

དེ་ན་རྣ་ཆའི་མཆོག་ཅེས་ལྷ་ཡི་བུ། །ཤིན་དུ་དབུལ་བ་ཞིག་གནས་དེ་དྲུང་དུ། །བྲམ་ཟེའི་གཟུགས་ཀྱིས་བསོད་སྙོམས་སློང་མོ་སྤྱད། །དེ་ཡིས་བདག་ལ་ཅང་མ་མཆིས་ཞེས་སྨྲས། །བདག་ལ་ཅུང་ཟད་སྩོལ་ཞེས་སྨྲས་པ་ན། །ལྷ་དེས་བདག་གི་གཞལ་མེད་ཁང་སོང་སྟེ། །ཅི་བདོག་ལྟ་བར་བརྩམས་ཚེ་སྣོད་ཐམས་ཅད། །ལྷ་ཡི་ནོར་བུ་རིན་ཐང་མེད་པས་གང༌། །སྣོད་གཞན་རོ་མཆོག་ལྡན་པའི་བདུད་རྩིས་གཏམས། །གཡོན་ཕྱོགས་ཁང་པ་གོས་རྒྱན་གྱིས་གང་མཐོང༌། །བདག་གིས་དེང་དུས་འདི་ལྟའི་དཔལ་ཐོབ་པས། །བདག་གི་སྒོ་ན་སྣོད་བཟང་བདོག་གོ་སྙམ། །བྲམ་ཟེ་བོས་སྟེ་བདུད་རྩིའི་ཟས་མཆོག་བྱིན། །ལྷ་ཡི་རིན་ཆེན་དུ་མ་བསྟབས་པ་ལས། །དེ་ཡིས་བདེ་ལེགས་བཀྲ་ཤིས་བྱས་པར་གྱུར། །ལྷ་དེས་བྲམ་ཟེ་ཁྱོད་ནི་ག་ལས་འོངས། །ས་དེ་ཅི་འདྲ་ཁྱོད་ནི་སུ་ཞིག་དྲིས། །ང་ནི་ཛེ་ཏའི་ཚལ་ནས་འོངས་པ་སྟེ། །ས་དེ་དགའ་བྱེད་ཡོན་ཏན་དཔག་དུ་མེད། །རྒྱལ་བ་ཐམས་ཅད་སྐྱོབ་པ་ཞེས་བྱ་བཞུགས། །ང་ནི་ལྷ་མིན་མི་དང་ལྷ་མིན་མིན། །ཕོངས་དང་དབུལ་ལ་ལྷག་པར་བརྩེ་ལྡན་པ། །བྱང་ཆུབ་ལམ་སྟོན་བྱང་ཆུབ་སེམས་དཔའ་ཡིན། །ལྷ་དེས་ནོར་བུའི་ཅོད་པན་དང༌། །རྣ་ཆ་ཕུལ་སྟེ་ཆེད་བརྗོད་པ། །ཨེ་མ་ཧོ་ཡོན་ཏན་དག་གི་ཞིང༌། །ཉེས་པ་ཐམས་ཅད་རྣམ་པར་སྤངས། །དེ་རིང་ཉིད་དུ་ས་བོན་བཏབ། །དེ་རིང་ཉིད་དུ་འབྲས་བུ་གྲུབ། །སྤྱན་རས་གཟིགས་དབང་དེ་ཡང་ནི། །སྲིན་མོ་གནས་པའི་གླིང་ཞིག་སོང༌། །སྐྱེས་བུ་ལྟ་ན་མི་ངོམས་པ། །འདོད་པའི་གཟུགས་སུ་བསྟན་བྱས་པས། །སྲིན་མོ་དེ་རྣམས་རབ་ཆགས་སྟེ། །བདག་ཅག་ལུས་དང་ལོངས་སྤྱོད་ཀུན། ཁྱོད་ལ་དབུལ་གྱིས་བཞེས་སུ་གསོལ། །བདག་ཅག་མགོན་སྐྱབས་དཔུང་གཉེན་གླིང༌། །རྟེན་གནས་མཛོད་ཅེས་གསོལ་བ་འདེབས། །(ཆ༡༡ན)

[Full Size]

དེས་ཀྱང་བདག་གིས་བསྒོ་བ་བཞིན། །བྱེད་ན་དང་དུ་བླང་ངོ་བརྗོད། །དེ་དག་བཀའ་བཞིན་སྒྲུབ་པར་བྱས། །ཡན་ལག་བརྒྱད་ལྡན་ལམ་བསྟན་ཞིང༌། །ཞལ་ནས་གསུངས་པའི་གཞི་དག་ཀྱང༌། །ཁ་ཐོན་བྱེད་དུ་བཅུག་པ་ཡིས། །དེ་དག་འབྲས་བུའི་གནས་ལ་བཀོད། །ཕྱིན་ཆད་སྲིན་མོའི་ཚུལ་སྤངས་སྟེ། །དམ་པའི་སྡོམ་པས་བསྡམས་སྟེ་གནས། །དེ་ནས་ཝ་ར་ན་སིའི་འགྲམ། །བཤང་གཅིའི་གནས་ན་སྲིན་བུའི་རིགས། །བརྒྱ་སྟོང་དུ་མ་གནས་པར་སོང༌། །བུང་བའི་གཟུགས་སུ་སྤྲུལ་ནས་ནི། །སྒྲ་ནི་བུང་བུང་ཕྱུང་བ་ལས། །སངས་རྒྱས་ཕྱག་འཚལ་ལོ་ཞེས་བརྗོད། །དེ་དག་རྣ་བར་ཐོས་ཙམ་གྱིས། །སངས་རྒྱས་རྗེས་སུ་དྲན་གྱུར་སྟེ། །འཇིག་ལྟའི་རི་བོ་བཅོམ་ནས་ནི། །བདེ་བ་ཅན་གྱི་འཇིག་རྟེན་སོང༌། །སྤོས་དྲི་ཞིམ་པ་ཞེས་བྱ་བའི། །བྱང་ཆུབ་སེམས་དཔར་མིང་མཐུན་གྱུར། །དེ་ནས་མ་ག་ངྷ་འདས་པ། །དགོན་པ་ཆེན་པོའི་གནས་སུ་སོང༌། །དེ་ན་ལོ་གྲངས་ཉི་ཤུའི་བར། །དགོན་པར་གནས་པའི་སེམས་ཅན་ཚོགས། །གཅིག་གིས་གཅིག་ཟ་མང་གཟིགས་སྟེ། །ཐོག་མར་ལྷ་ཡི་ཆུ་ཡི་ཆར། །ཕབ་པས་རབ་ཏུ་ངོམས་པར་བྱས། །ལྷ་ཡི་ཟས་ཀྱི་ཆར་ཕབ་པས། །ཚིམ་ཚེ་འབྲུ་དང་འདོད་རྒུའི་ཆར། །ཕབ་པས་རབ་ཏུ་ཚིམ་པའི་ཚེ། །དེ་དག་འདུས་ནས་གཅིག་ལ་གཅིག །འདི་འདྲ་ལྷ་གང་ཞིག་གི་མཐུ། །དེ་ཚེ་དེ་ན་ཆེས་རྒན་པ། །རྒུར་པོ་བ་ལང་སྣ་ལྟར་གྱུར། །བརྒྱ་སྟོང་ལོ་ལོན་ཞིག་གནས་པས། །བཅོམ་ལྡན་སྤྱན་རས་གཟིགས་ཀྱི་དབང༌། །མ་གཏོགས་ལྷ་གཞན་གང་གི་ཡང༌། །མཐུ་འདི་འདྲ་བར་མི་འགྱུར་རོ། །མུན་པར་གྱུར་ལ་སྒྲོན་མེ་ཉི་མས་འཚིག་ལ་གདུགས། །སྐོམ་གྱིས་གདུངས་ལ་ཆུ་སྟེ་སྐྲག་པའི་དབུགས་འབྱིན་མཛད། །ནད་ཀྱིས་གདུངས་ལ་སྨན་པ་ཉམ་ངའི་ཕ་མར་གྱུར། །མནར་མེད་སྐྱེས་པ་རྣམས་ལ་མྱ་(ཆ༡༡བ)

[Full Size]

ངན་འདས་ལམ་སྟོན། །སྤྱན་རས་གཟིགས་དེའི་ཡོན་ཏན་རྒྱ་ཆེན་དེ་ལྟ་ཡིན། །དེ་ཡི་མཚན་ཙམ་སུས་དྲན་པ། །དེ་ནི་འཇིག་རྟེན་འདི་ན་དཀོན། །དེ་ནི་འཁོར་བའི་མཐའ་མ་ཡིན། །བཅོམ་ལྡན་འདས་དེ་ལ་དམིགས་ནས། །རྟག་དུ་མེ་ཏོག་སྤོས་འབུལ་བ། །དེ་ནི་བྱང་ཆུབ་སེམས་དཔར་འགྱུར། །མནྜལ་ཕུལ་ན་འཁོར་སྒྱུར་འཐོབ། །མེ་ཏོག་ཕུལ་བས་དྲི་ཞིམ་ཞིང༌། །མདངས་བཟང་ལུས་ཡོངས་རྫོགས་པར་འགྱུར། །དེ་ལྟར་བསྟན་སྟེ་རང་གནས་སོང༌། །སྤྱན་རས་གཟིགས་དབང་དམ་པ་ཡང༌། །འོང་བའི་ལྟས་ཆེན་ངོ་མཚར་བ། །རྒྱལ་སྲས་གཞན་ལ་མེད་པའི་ཆོས། །དཔག་ཡས་ཕུལ་བྱུང་ངོ་མཚར་གྱིས། །ཛེ་ཏའི་ཚལ་ཀུན་བཀང་བྱས་ནས། །རྒྱལ་བ་ཐམས་ཅད་སྐྱོབ་དྲུང་སོང༌། །རྒྱལ་བས་བསྔགས་ཤིང་རླབས་ཆེན་གྱི། །སྤྱོད་པ་རྒྱ་མཚོ་དེ་ཐོས་པས། །རྒྱལ་སྲས་མ་ལུས་ངོ་མཚར་གྱུར། །འདི་ནི་རྣམ་པར་སྣང་བྱེད་འདོད་བྱེད་ལ་སོགས་པ། །ཏིང་འཛིན་མཐའ་ཡས་གཞལ་དུ་མེད་པ་ལྡན་པ་སྟེ། །སྤུ་ཁུང་རེ་ནའང་ཏིང་འཛིན་བརྒྱ་སྟོང་དུ་མ་གནས། །འདི་ཡི་བསོད་ནམས་ཡེ་ཤེས་དེ་ལྟར་དཔག་དུ་མེད། །ཚོགས་ཆེན་དེ་ལྟ་དེ་བཞིན་གཤེགས་ལའང་མ་མཆིས་ན། །བྱང་ཆུབ་སེམས་དཔར་གྱུར་པ་དག་ལ་ལྟ་ཅི་སྨོས། །ལེགས་པར་ཉོན་ཞིག་སྔོན་བྱུང་ཚེ། །ང་ནི་ཚོང་དཔོན་ཞིག་དུ་གྱུར། །དེ་ཚེ་ཚོང་པ་ལྔ་བརྒྱར་བཅས། །སིངྒྷའི་གླིང་དུ་ཚོང་ལ་སོང༌། །ཟོང་མང་བཞོན་པས་བསྐྱས་བྱས་སྟེ། །གྲོང་དང་གྲོང་ཁྱེར་གྲོང་བརྡལ་ལྗོངས། །ཚོང་འདུས་མང་པོ་རྣམས་བརྒྱུད་ནས། །རྒྱ་མཚོའི་གྲུ་བོ་ཆེ་ལ་ཞུགས། །གྲུ་ཡི་གདོས་པ་འཛིན་པ་ལ། །ཅི་ཀོ་རིན་ཆེན་གླིང་ལོགས་སམ། །ནས་ཀྱི་གླིང་ངམ་སིངྒྷའི་གླིང༌། །འོན་སྟེ་སྲིན་མོའི་གླིང་དུའམ། །གང་གི་ཕྱོགས་སུ་རླུང་ལངས་དྲིས། །དེས་ཀྱང་སིངྒྷའི་གླིང་ལོགས་སུ། །(ཆ༡༢ན)

[Full Size]

གསེར་མ་ལངས་ཀྱིས་ལྷ་ཁྱོད་ཀྱིས། །མཁྱེན་པར་མཛོད་ཅེས་བདག་ལ་སྨྲས། །དེ་ནས་གྲུ་ཆེན་དུ་ཞུགས་སྟེ། །དར་ཆེན་རབ་ཏུ་འཕྱར་ནས་སོང༌། །འདིར་གཞན་དག་གིས་སྨྲས་པ། །གནམ་སྔོན་ཞུ་བ་འཁྱིལ་འདྲ་བཻ་ཌཱུརྻ། །སྔོན་པོའི་གུར་གྱིས་ཕྱོགས་ཀུན་གཏམས་པ་བཞིན། །དབུ་བའི་དོ་ཤལ་ཆིལ་ཆིལ་སྒྲ་ལྡན་པ། །མུ་ཏིག་དོ་ཤལ་ཀུན་ནས་བཀྲམ་པ་བཞིན། །ཉ་ཆེན་སྣ་ཚོགས་འཕྱོང་ཞིང་འཁྱུག་པ་ནི། །སྒྱུ་མའི་མཁན་པོས་སྤྲུལ་པ་བྱས་པ་བཞིན། །མི་བརྟན་པ་རྣམས་འདི་ཀོ་རྨི་ལམ་མམ། །མངོན་སུམ་ཉིད་ཅེས་སོམ་ཉིའི་ཁྱོགས་ལ་འཕྱང༌། །རབ་ཡངས་ཕ་མཐའ་མི་མངོན་མཚོ་ཆེན་དེ། །ཡངས་པའི་མཁའ་དང་དབྱེར་མེད་གྱུར་པའི་ནང༌། །ཉི་ཟླ་གཟའ་སྐར་འཁོར་བ་སྙམ་དུ་བྱེད། །དེ་སྟེང་གྲུ་ཆེན་ནང་ན་གཞལ་མེད་ཁང༌། །རྒྱན་མང་གིས་སྤྲས་རྒྱལ་མཚན་བ་དན་འཕྱར། །རྟ་མཆོག་མཚོ་ཆེན་བརྒལ་བའི་དབྱིབས་ཀྱིས་འགྲོ། །རེས་འགའ་རླབས་ཀྱི་རི་བོའི་རྩེར། །ནམ་མཁའི་དབྱིངས་སུ་ཕྱིན་པ་སྙམ། །རེས་འགའ་རླབས་ཀྱི་གཤོང་བུ་རུ། །གཏིང་དུ་ནུབ་པ་སྙམ་དུ་བྱེད། །རེས་འགའ་ཉ་ཆེན་རུས་སྦལ་ཆེ། །རི་བོ་འདྲ་བས་འདེགས་པ་སྙམ། །འདིས་ནི་འཁོར་བའི་རྒྱ་མཚོའི་ནང༌། །མི་ཡི་གྲུ་བཟང་རྙེད་དཀའ་བ། །རྙེད་པའང་སྣ་ཚོགས་རྐྱེན་མང་པོས། །མི་བརྟན་གཡོ་འདི་མཚོན་ནམ་སྙམ། །བར་སྐབས་ཀྱི་ཚིགས་བཅད་དོ། །དེ་ཚེ་སིངྒྷའི་གླིང་གནས་པའི། །སྲིན་མོ་གདུག་སེམས་ལྡན་རྣམས་ཀྱི། །རེ་བའི་རྒྱལ་མཚན་གཡོས་པ་ལས། །འཛམ་གླིང་ཚོང་པ་འོང་ངོ་ཞེས། །དུས་མིན་རླུང་ཆེན་བཏང་བ་ཡིས། །གྲུ་དེ་དུམ་བུ་དུམ་བུར་ལྷགས། །ཚོང་པ་དེ་རྣམས་བརྐྱལ་བ་ཡིས། །ཆུ་ཡི་འགྲམ་སུ་ཕྱིན་པར་གྱུར། །དེ་ཚེ་སྲིན་མོ་ལྔ་བརྒྱ་ཞིག །བུད་མེད་གཞོན་ནུར་གཟུགས་བསྒྱུར་ནས། །དེར་འོངས་ཅ་ཅོའི་སྒྲ་འབྱིན་ཞིང༌། །(ཆ༡༢བ)

[Full Size]

རས་ཀྱི་བླ་གོས་བྱིན་སྟེ་བླངས། །ཚོང་པ་དེ་དག་རང་རང་གི །གོས་བཙིར་སྐམ་པར་གྱུར་པའི་ཚེ། །ཙམ་པ་ཀ་ཡི་ཤིང་དྲུང་གནས། །འདིར་སྨྲས་པ། དུས་མིན་རླུང་ཆེན་མུན་པ་འཁྱིལ་འདྲ་དྲག་དུ་འཚུབ་པ་ཀུན་ནས་ལངས། །རྒྱ་མཚོའི་ཆུ་ཀུན་སྲོག་ཆགས་བཅས་པ་ནམཁར་སྐས་ལ་འཛེག་པ་སྙམ། །ཆིལ་ཆིལ་འུར་འུར་ཆེམ་ཆེམ་སྒྲ་ལྡན་དབུ་བར་བཅས་པའི་ཆུའི་ཕུང་པོ། །ཀེ་ལ་ཤ་ཡི་རི་བོར་འགྲན་པས་གྲུ་ཆེན་མཁར་འདེགས་གཏིང་དུ་འདོར། །ཚོང་པའི་ཚོགས་རྣམས་ཅི་བྱ་གཏོལ་བྲལ་ཕ་མ་ཕུ་ནུ་གཉེན་བཤེས་འབོད། །བརྟན་པོར་འདོད་རྣམས་ཚངས་དང་བརྒྱ་བྱིན་ཕྱུགས་བདག་སོགས་ལ་འབོད་ཅིང་གསོལ། །དེ་ཚེ་སྐྱོབ་པ་སུ་ཡང་མེད་དེ་གྲུ་ཆེན་ཚལ་པ་ཚལ་པར་ལྷགས། །འདི་ནི་མི་ལུས་གྲུ་བཟང་འདི། །མཐོ་རིས་ཡོན་ཏན་རྒྱན་དུ་མས། །མཛེས་ཤིང་སྲ་བར་བྱས་ན་ཡང༌། །འཆི་བདག་སྲིན་མོས་བཏང་བ་ཡི། །རྒ་ནད་རླུང་དམར་དྲག་གཡོ་བས། །ལུས་ཀྱི་གྲུ་དང་སེམས་ཀྱི་མི། །སོ་སོར་འབྱེད་པ་མཚོན་ནམ་སྙམ། །སྐྱབས་མིན་སྐྱབས་སུ་འཁྲུལ་བ་རྣམས། །རི་ཤིང་མཚོ་དང་གཉེན་དང་ནི། །རྒྱལ་པོ་ལྷ་དང་ལྷ་མིན་སོགས། །སྐྱབས་སུ་གསོལ་མོད་རང་ཉིད་ཀྱང༌། །མཚོར་ལྷུང་དེ་ཡིས་སུ་ཞིག་སྐྱོབ། །རྒ་ནད་ཤི་བའི་འཇིགས་ཆེན་ལ། །སྐྱབས་གྱུར་དམ་ཆོས་ལས་གཞན་མེད། །གཏིང་མཐའ་མི་མངོན་ཆུ་གཏེར་དུ་ནུབ་མི་དེ་རྣམས། །བརྐྱལ་བའི་ཤུགས་ཀྱིས་ཕ་རོལ་འགྲམ་ངོགས་ཕྱིན་པར་གྱུར། །དེ་ཚེའང་སྲིན་མོའི་ཚོགས་ལ་སྡུག་པའི་འདུ་ཤེས་འཛིན། །ལྕགས་ཀྱུས་ཉ་བཞིན་གཡོ་ཡིས་བསླུས་ལ་ཕན་པར་འཁྲུལ། །འདིས་ནི་ལྔ་པར་གྱུར་རྣམས་ཀྱང༌། །ཕ་མཐའ་མི་མངོན་བར་མ་དོའི། །སྲིད་པར་འཁྱམས་ཤིང་ལས་ཀྱིས་བརྐྱལ། །དེ་ཚེའང་སྲིད་པའི་བཙོན་ར་ལ། །ཆགས་དང་སྲིད་པས་བཅིངས་པ་ཡིས། །སྐྱེ་བའི་(ཆ༡༣ན)

[Full Size]

འདམ་དུ་འཚུད་གྱུར་པ། །འདི་ཉིད་མཚོན་པར་བྱེད་དམ་སྙམ། །བར་སྐབས་ཀྱི་ཚིགས་བཅད་ཏོ། །དེ་ནས་ཚོང་པ་དེ་རྣམས་ཀྱིས། །བདག་ཅག་འཛམ་བུའི་གླིང་ཕྱིན་པའི། །ཐབས་ཅི་ཡོད་ཅེས་དྲིས་པ་ན། །བུད་མེད་དེ་དག་བདག་ཅག་ལ། །ཐབས་མ་མཆིས་ཞེས་ཁ་རོག་འཁོར། །སླར་ཡང་བཞིན་གྱི་མདངས་ཕྱུང་སྟེ། །ཟུར་མིག་གཡོ་བས་བསླུ་བཞིན་པར། །བདག་ཅག་བུད་མེད་གཞོན་ནུ་སྟེ། ཁྱིམ་ཐབ་དང་ནི་གནས་རྟེན་མཛོད། །འདི་རྣམས་ཁྱེད་ཅག་རྣམས་ཀྱི་ནི། །ཁབ་དང་སྐྱེད་མོས་ཚལ་ལོ་ཞེས། །ཟེར་ཞིང་ཚོང་པ་རེ་རེ་ཁྲིད། །དེ་དག་རྣམས་ཀྱི་གཙོ་མོ་དེས། །བདག་ཁྲིད་ལྷ་ཡི་ཁ་ཟས་ཀྱི། །རོ་ཡི་མཆོག་གིས་ཚིམ་པར་བྱས། །དེ་ནས་རྩེ་བར་རྩོམ་པ་ལ། །མི་ཡི་རེག་པས་ཚིམ་བྱས་སྟེ། །དེ་ལྟར་ཞག་བདུན་འདས་པར་གྱུར། །དེ་ནས་རེ་ཞིག་བུད་མེད་དེ། །གཉིད་ཀྱིས་ལོག་བཞིན་གད་མོའི་སྒྲ། །རབ་ཏུ་སྙན་པ་རྒོད་པ་ཐོས། །ངོ་མཚར་སྐྱེས་ནས་དྲིས་པ་དང༌། །དེ་ཡིས་འདི་ནི་སིངྒྷ་ལའི། །གླིང་གི་སྲིན་མོའི་གནས་ལགས་སྟེ། ཁྱོད་སྲོག་བཅད་པར་གྱུར་ཏ་རེ། །ཞེས་ཟེར་རྒྱུ་མཚན་ཅི་ཞེས་དྲིས། །དེས་ཀྱང་ཁྱོད་ཐུགས་མི་འཆེས་ན། །གཡས་ཀྱི་ལམ་སྲང་ཟུང་ལ་བཞུད། །དེ་ན་ལྕགས་ཀྱི་གྲོང་ཁྱེར་ནི། །མཐོ་ཞིང་ར་བས་བསྐོར་བ་ལ། །སྐར་ཁུང་རྟ་བབས་མེད་པ་ཅིག །མཆིས་པར་ཚོང་པ་བརྒྱ་སྟོང་ནི། །བསྩལ་ཞིང་བོར་ནས་ལ་ལ་གསོན། །ལ་ལ་གུམ་སྟེ་གནས་ཀྱིས་གཟིགས། །ཞེས་ཟེར་ངས་ཀྱང་གླེན་པ་ཡི། །དྲ་བ་ཞེས་བྱའི་གཉིད་སྟུག་གིས། །བུད་མེད་དེ་ནི་ནོན་བྱས་ནས། །བདག་ཉིད་འཚོ་བར་བྱེད་པ་ཡི། །རལ་གྲི་ཟླ་བ་ལྟར་སྣང་ཐོགས། །གཡས་ཕྱོགས་ལམ་སྲང་བཟུང་སྟེ་ཕྱིན། །ལྕགས་ཀྱི་གྲོང་ཁྱེར་ཆེན་པོ་དེ། །ཁོ་ར་ཁོར་ཡུག་དུ་བསྐོར་ཡང༌། །(ཆ༡༣བ)

[Full Size]

དེ་ལ་བུ་ག་ཡོད་མ་མཐོང༌། །དེ་དྲུང་མེ་ཏོག་ཙམ་པ་ཀའི། །སྡོང་པོ་ཅིག་ནི་འདུག་པ་ལ། །འཛེགས་སྟེ་ལུ་བའི་སྒྲ་བྱས་པས། །ཚོང་པ་མང་པོ་དེ་ཀུན་གྱིས། །ཚོང་དཔོན་ཆེན་པོ་མཁྱེན་པར་མཛོད། །འདི་ནི་སྲིན་མོའི་གླིང་ཡིན་སྟེ། །བདག་ཅག་ལྕགས་ཀྱི་ཁང་པར་བསྩལ། །འཛམ་གླིང་ཚོང་པ་འོངས་པ་རྣམས། །ཕྱི་མ་རྩེ་དགས་བྲིད་བྱེད་ཅིང༌། །སྔ་མ་ལྕགས་ཁང་འདི་རུ་འཛུད། །ཉིན་རེ་བཞིན་ཡང་མི་བརྒྱ་བརྒྱ། །ཁྲིད་དེ་ཟོས་ནས་རུས་པ་རྣམས། །ལྕགས་ཀྱི་གྲོང་ཁྱེར་འདི་རུ་འདོར། །ཞེས་སྟེ་སྔོན་བཞིན་སྨྲས་པར་གྱུར། །ངས་ཀྱང་མྱུར་བར་སླར་ལོག་ཚེ། །སྙན་པར་རྒོད་ཅིང་དེ་ན་རེ། །གཟིགས་སམ་རྟགས་ལ་བབ་བམ་ཟེར། །ཐབས་ནི་གང་གིས་ཐར་ཞེས་དྲིས། །རྟ་མཆོག་རྒྱལ་པོ་བཱ་ལ་ཧ། །ཞེས་བྱ་སྙིང་རྗེར་ལྡན་པ་ཅིག །བཅོ་ལྔའི་ཟླ་བ་ཉ་ཚེ་འབྱུང༌། །རྟ་མཆོག་ཅང་ཤེས་དམ་པ་དེས། །བེ་ཏ་ཐམས་ཅད་ཅེས་བྱ་བའི། །སྨན་གྱི་རྒྱལ་པོ་ཟོས་ནས་ནི། །བཻཌཱུརྻ་ཡི་བྱེ་མའི་དབུས། །ཆུ་རྒྱུན་ཡན་ལག་བརྒྱད་པ་འཐུངས། །གསེར་གྱི་བྱེ་མའི་ངོས་ལ་ནི། །ཕན་ཚུན་འགྲེ་ཞིང་སྤྲུག་པར་བྱེད། །འདི་ནས་ཕ་རོལ་སུ་འགྲོ་ཞེས། །མི་ཡི་སྐད་དུ་སྨྲ་ཞིང་འཚེར། །དེ་ཚེ་ཁྱོད་ཀྱིས་རྟ་རྒྱལ་མཆོག །བདག་ནི་ཕ་རོལ་འགྲོ་ཞེས་སྨྲོས། །དེ་སྐད་བསྒོ་བ་མཉན་བྱས་ནས། །མལ་དུ་ལྷན་ཅིག་ཉལ་བ་དང༌། །བུད་མེད་དེ་ཡང་སད་གྱུར་སྟེ། །འཕགས་པའི་སྲས་ཁྱོད་ལུས་རེ་གྲང༌། །ཞེས་ཟེར་གྲོང་གི་ཕྱི་རོལ་དུ། །བཤང་གཅིའི་ཆེད་དུ་ཕྱིན་ཞེས་བརྗོད། །དེ་ནས་གདུགས་ཤར་གྱུར་པའི་ཚེ། །ཚོང་པའི་ཚོགས་རྣམས་གྲོང་ཁྱེར་གྱི། །ཕྱིར་ཁྲིད་དབེན་པར་སོང་ནས་ནི། །མཆིས་བྲང་ཇི་ལྟར་མཛའ་ཞེས་དྲིས། །ཁ་ཅིག་བདག་ལ་མཛའ་ཞིང་གུས། །རྩེ་དགས་ཡོངས་སུ་འཛིན་ཏོ་ཟེར། །དེ་བཞིན་ལྷ་ཡི་ཟས་སྐོམ་དང༌། །གོས་དང་རྒྱན་དང་དྲི་སོགས་ཀྱིས། །ཡིད་རབ་འཛིན་ཞེས་སོ་སོར་སྨྲས། །ཁ་ཅིག་བདག་ལ་ཅི་(ཆ༡༤ན)

[Full Size]

ཡིས་ཀྱང༌། །བྲེལ་བ་མེད་པས་སྐྱིད་དོ་ཟེར། །ང་ཡིས་བདག་ཅག་སྲིན་མོ་ལ། །ཆགས་པར་བྱ་བ་མི་རིགས་སྨྲས། །དེ་དག་མྱོས་ནས་ཅི་ལགས་ཀོ། སྲིན་མོ་ལགས་པ་མང་ཏམ་ཟེར། །ངས་ཀྱང་དཀོན་མཆོག་གསུམ་བདེན་ན། །ངེས་པར་སྲིན་མོ་འོ་ཞེས་སྨྲས། །དེ་ཀུན་ད་ནི་སྐྱབས་སུ་ཡོད། །ཅི་ཡིས་ཐར་པར་འགྱུར་ཞེས་འདྲི། །རྟ་མཆོག་རྒྱལ་པོའི་ཚུལ་བརྗོད་དེ། །ད་ནི་བཅོ་ལྔའི་མཚན་མོའི་ཚེ། །བུད་མེད་དེ་རྣམས་མྱོས་བྱེད་ཀྱི། །སྨན་གྱིས་སོ་སོར་མྱོས་པར་གྱིས། །མྱོས་ཚེ་གསེར་གྱི་བྱེ་མའི་སྟེང༌། །རྟ་མཆོག་དྲུང་དུ་འདུས་ཞེས་སྨྲས། །དེ་ནས་བཅོ་ལྔའི་ཟླ་བ་ནི། །རབ་གསལ་དཀར་བའི་འོད་བཀྱེ་ཚེ། །རྟ་མཆོག་དེ་ནི་ཟླ་བ་ཡི། །ཟེར་དང་འགྲོགས་སྟེ་གླིང་དེར་འོངས། །སྨན་ཟོས་ཆུ་འཐུངས་འགྲེ་ཞིང་སྤྲུགས། །དེ་ཚེ་སིངྒྷའི་གླིང་ཀུན་འགུལ། །འཛམ་བུའི་གླིང་དུ་སུ་འགྲོ་ཞེས། །ལན་གསུམ་སྨྲས་ཚེ་བདག་ཅག་ནི། །སྒྲོལ་བར་མཛོད་ཅེས་ཀུན་གྱིས་སྨྲས། །ཁྱེད་ཅག་སུས་ཀྱང་གླིང་འདི་ལ། །ཕྱི་མིག་ལྟ་བར་མི་བྱའོ། །གང་ལའང་ཆགས་པར་མ་བྱེད་ཅིག །ཅེས་སྨྲས་ཐོག་མར་ང་ཡིས་བཞོན། །དེ་ནས་གཞན་ཀུན་བཞོན་བྱས་སྟེ། །ཉི་ཟླ་བཞིན་དུ་མཁའ་ལ་ཆས། །དེ་ཚེ་སྲིན་མོ་དེ་དག་རྣམས། །སད་དེ་ཕྱི་བཞིན་བསྙེགས་བྱས་ནས། །སྙིང་རྗེའི་སྐད་དུ་སྨྲེ་སྔགས་བཏོན། །དེ་ཚེ་ང་ཡི་ཚོང་ཕྲུག་རྣམས། །ཆགས་སྟེ་སླར་ལོག་བལྟས་པ་དང༌། །ཁ་བུབ་ལྷུང་སྟེ་ཆུ་ནང་ནུབ། །བུད་མེད་དེ་རྣམས་སྤྲུལ་པ་བཤིག །རལ་པ་གཟིངས་ཅིང་མིག་དམར་ལ། །མཆེ་བའི་དཔལ་ཅན་སྲིན་མོ་ཡི། །རང་གཟུགས་བསྟན་སྟེ་མི་དེ་རྣམས། །ཆུ་ནས་དྲངས་སྟེ་ཡུད་ཀྱིས་ཟོས། །ཁྲག་ཐིགས་པོ་བའི་ས་རྣམས་ཀྱང༌། །མཛུབ་མོས་དྲུད་ཅིང་ཟ་བར་བྱེད། །རྟ་མཆོག་འཛམ་བུའི་གླིང་ཕྱིན་ཚེ། །ལྷུང་བའི་ཚོང་ཕྲུག་རྣམས་ལ་ནི། །མྱ་ངན་བྱེད་ཅིང་མཆི་མ་ཕྱུང༌། །ང་ལ་ལན་གསུམ་བསྐོར་བྱས་ནས། །རྟ་(ཆ༡༤བ)

[Full Size]

མཆོག་དེ་ནི་མི་སྣང་གྱུར། །ངས་ཀྱང་རིམ་གྱིས་ཁྱིམ་དུ་ཕྱིན། །ཕ་མ་གཉིས་ནི་མྱ་ངན་གྱིས། །མིག་ལྡོངས་གྱུར་པས་བདག་འོངས་པར། །ཤེས་སྟེ་མགུལ་ནས་འཇུས་སྟེ་ངུས། །བསླངས་པས་མིག་ཀྱང་དག་པར་གྱུར། །བདག་ཅག་ནོར་ནི་མི་དགོས་ཀྱི། །བུ་ཁྱོད་གསོན་པར་རྙེད་ཏོ་ཟེར། །ཉེ་དུར་བཅས་པ་ཀུན་དགའ་གྱུར། །འདིར་སྨྲས་པ། སྲིན་མོས་མཛེས་པར་བསྒྱུར་བ་ཡི། །གཟུགས་དང་ལང་ཚོ་བཟའ་བཏུང་དང༌། །རྒྱན་དང་རྩེ་དགས་བྲིད་པ་ལྟར། །ཚེ་འདིར་འདོད་པའི་ཡོན་ཏན་གྱི། །སྣང་བ་ཡུད་ཙམ་འདི་ཡིས་འབྲིད། །མཐའ་མར་སྲིན་མོས་རང་གཟུགས་ཉིད། །བསྟན་ནས་ཟ་བར་བྱེད་པ་ལྟར། །འདུས་བྱས་རང་སོར་མཛེས་ན་ཡང༌། །མཐའ་མར་མི་རྟག་འཇིག་པ་དང༌། །སྡུག་བསྔལ་ལས་ཀྱང་སྡུག་བསྔལ་བའི། །རང་གཟུགས་མངོན་སུམ་གསལ་བར་འགྱུར། །ཇི་ལྟར་སྲིན་མོའི་གཙོ་སོ་དེས། །གྱ་གྱུས་བསླུ་བར་བརྩོན་ན་ཡང༌། །གཉིད་ནི་འཐིབས་པོས་ནོན་པའི་ཚེ། །རང་མཚང་རང་གིས་བསྒྲགས་པ་ལྟར། །འདུས་བྱས་སྣང་བ་འདི་ཀུན་ཡང༌། །བརྟགས་ན་རང་མཚང་རང་གིས་སྟོན། །ལྕགས་ཁང་བོར་བའི་ཚོང་པ་ཡིས། །སྲིན་མོའི་ངང་ཚུལ་མངོན་སུམ་དུ། །རིག་ལྟར་གཤིན་རྗེའི་རྒྱལ་པོའི་དྲུང༌། །བགྲོད་ཚེ་ཀུན་གྱིས་ལས་འབྲས་མཐོང༌། །ལྕགས་ཁང་སྲ་བ་དེར་འཚུད་ནས། །ཤེས་ཀྱང་བྱ་བའི་ཐབས་ཟད་ལྟར། །དམྱལ་བའི་ས་གཞིར་བཟོས་པའི་ཚེ། །ལས་འབྲས་གོ་ཡང་འཕྱིས་པ་ཡིན། །སྲིན་མོས་ཟིན་རྣམས་འདོན་པའི་ཕྱིར། །རྟ་མཆོག་རྒྱལ་པོས་བརྩོན་པ་ལྟར། །སངས་རྒྱས་བྱང་ཆུབ་སེམས་དཔའ་རྣམས། །འགྲོ་ཀུན་གནས་ན་གཞན་དོན་བརྩོན། །འོན་ཀྱང་ཟླ་བ་ཉ་ཚེ་ལས། །གཞན་དུ་རྟ་རྒྱལ་མི་སྣང་ལྟར། །དགེ་བའི་ཆ་ཤས་མ་རྫོགས་པར། །བཤེས་གཉེན་དམ་པ་འཕྲད་མི་འགྱུར། །གཏིང་ཟབ་རྒྱ་མཚོའི་ནང་གནས་པའི། །ཉམ་ང་སྲིན་མོའི་གླིང་དེ་ནས། །གཞན་གྱིས་(ཆ༡༥ན)

[Full Size]

ཐར་བར་མི་ནུས་ཀྱང༌། །རྟ་རྒྱལ་སྟོབས་ཆེན་ལ་བརྟེན་ནས། །ཡུད་ཀྱིས་འཛམ་གླིང་བགྲོད་པ་ལྟར། །འཇིགས་རུང་སྲིད་པའི་རྒྱ་མཚོ་ནི། །གཏིང་མཐའ་མི་མངོན་ཕྱོགས་འཁྲུལ་བ། །འདི་ལས་ཐར་ཐབས་གཞན་མེད་ཀྱང༌། །དགེ་བའི་གཤེས་གཉེན་དམ་པ་ལ། །བསྟེན་ན་ཐར་པར་ཡུད་ཀྱིས་བགྲོད། །རྟ་རྒྱལ་ཕན་པར་དགའ་བ་དེའི། །ཚིག་བཞིན་མ་བྱས་སྲིན་མོ་ཡི། །ལུས་དང་ལོངས་སྤྱོད་ལ་ཆགས་པས། །ཕྱི་མིག་ལྟ་བའི་ཚོང་པ་རྣམས། །བཞོན་ཡང་ལྷུང་ནས་སྲིན་མོ་ཡིས། །ཟོས་ལྟར་ཡོངས་འཛིན་བསྟེན་གྱུར་ཀྱང༌། །དེ་ཡིས་བསྟན་པའི་གདམས་ངག་བཞིན། །བླང་དོར་ལེགས་པར་མ་བྱས་སྟེ། །སྲིད་པའི་འབྱོར་པ་ལ་ཞེན་ན། །ལྷུང་སྟེ་ངན་འགྲོར་ཐུག་མེད་འགྲོ། །བློ་གྲོས་བརྟན་ཞིང་རབ་ཏུ་ཟབ། །རྟ་རྒྱལ་ཚིག་ལ་ཡིད་འཆེས་པ། །སྲིན་མོའི་གླིང་གི་ཚུལ་རིག་པས། །ངེས་པར་འཛམ་གླིང་འགྲོ་འདོད་པའི། །དེད་དཔོན་བདེ་བླག་ཐར་བ་ལྟར། །སྲིད་པའི་ངང་ཚུལ་ཡོངས་རིག་པས། །ཐར་པའི་གྲོང་དུ་འགྲོ་འདོད་པ། །ཡོངས་འཛིན་སྲོག་ལྟར་བསྟེན་པ་རྣམས། །བྱང་ཆུབ་མཆོག་དུ་བདེ་བླག་འགྲོ། །དེད་དཔོན་དེས་ཀྱང་ཕ་མ་ཡི། །མྱ་ངན་བསལ་ཞིང་མིག་ཕྱེ་ནས། །ཉེ་དུ་དགའ་བར་བྱས་པ་ལྟར། །བྱང་ཆུབ་ཐོབ་ནས་མར་གྱུར་པའི། །འགྲོ་ཀུན་བདེ་བའི་གནས་ལ་འགོད། །དེ་ལྟར་སྔོན་བྱུང་གཏམ་འདི་ཡིས། །ཆོས་ཚུལ་རྒྱ་ཆེར་བསྟན་པ་སྙམ། །བར་སྐབས་ཀྱི་ཚིགས་སུ་བཅད་པའོ། །སྒྲིབ་པ་རྣམ་སེལ་ཉོན་ཞིག་ང་ནི་དེད་དཔོན་ཚེ། །དེ་ལྟའི་སྡུག་བསྔལ་འཇིགས་རུང་མི་བཟད་མྱོང་བ་ལས། །བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་ནི། །རྟ་མཆོག་སྟོབས་ཆེན་གྱུར་པས་འཆི་བའི་འཇིགས་ལས་བསྒྲལ། །སྤྱན་རས་གཟིགས་དེའི་བསོད་ནམས་ཀྱི། །ཚོགས་ནི་ང་ཡིས་བགྲང་མི་ནུས། །བ་སྤུའི་ཁུང་བུ་རེ་རེའི་གཏམ། །(ཆ༡༥བ)

[Full Size]

ཅུང་ཟད་བཤད་ཀྱིས་ཉན་པར་གྱིས། །གསེར་ཞེས་བྱ་བའི་སྤུ་ཁུང་ན། །དྲི་ཟ་ཁྲག་ཁྲིག་བརྒྱ་སྟོང་གནས། །ཀུན་ཀྱང་འཕགས་པའི་ཆོས་ལ་གནས། །སྣང་བའི་ཡིད་བཞིན་ནོར་བུ་ལས། །དགོས་འདོད་ཇི་ལྟར་བསམས་པ་འགྲུབ། །ནག་པོ་ཞེས་བྱའི་སྤུ་ཁུང་ན། །མངོན་པར་ཤེས་ལྡན་དྲང་སྲོང་ཚོགས། །གསེར་གྱི་རི་དང་རིན་ཆེན་གྱི། །ལྗོན་པ་ལ་བརྟེན་མཐའ་ཡས་གནས། །སྤུ་ཁུང་རིན་ཆེན་རྣ་ཆ་ན། །ཆགས་བྲལ་དྲི་ཟའི་བུ་མོའི་ཚོགས། །གཟུགས་མཆོག་ལྡན་པ་མཐའ་ཡས་གནས། །སྤུ་ཁུང་དེ་ཀུན་ན་མཁའ་བཞིན། །བཟུང་དང་རེག་པར་མི་ནུས་སོ། །ཀུན་དུ་བཟང་པོས་ལོ་བཅུ་གཉིས། །སོང་ཡང་སྤུ་ཁུང་དེ་མ་མཐོང༌། །བ་སྤུའི་ཁུང་བུ་རེ་རེ་ན། །གནས་པ་དེས་ཀྱང་མ་མཐོང་ན། །རྒྱལ་སྲས་གཞན་གྱིས་ལྟ་ཅི་སྨོས། །ང་ནི་གཡོ་མེད་སྒྱུ་སྤངས་ཕྲ་བར་སྣང་ཞིང་བལྟ་རུ་མེད། །གཟུགས་མེད་གཟུགས་ཆེ་ལག་པ་བརྒྱ་སྟོང་དབུ་ནི་བཅུ་གཅིག་ལྡན། །བྱེ་བ་བརྒྱ་སྟོང་སྤྱན་མངའ་རྣལ་འབྱོར་ཆེན་པོ་རྣལ་འབྱོར་མཆོག །མྱ་ངན་འདས་པའི་ལམ་གནས་དཔེ་མེད་ཐུགས་མངའ་ཤེས་རབ་ཆེ། །སྲིད་ལས་གྲོལ་བྱེད་དབང་པོ་ལྟར་མི་སྣང་ཞིང་ཆོས་སྟོན་མཁས། །ཆོས་རྣམས་ཐམས་ཅད་ཀུན་དུ་སྒྲིབ་པ་མེད་པར་གྱུར་པའོ། །དེ་བཞིན་སྤྱན་རས་གཟིགས་ཀྱི་དབང་པོ་སུས་ཀྱང་མི་མཐོང་སྟེ། །དེ་ཡི་རང་བཞིན་ཉིད་ཀྱི་ལུས་ནི་རྒྱལ་བས་མི་གཟིགས་ན། །ཀུན་དུ་བཟང་སོགས་བྱང་ཆུབ་སེམས་དཔའ་རྣམས་ཀྱིས་ལྟ་ཅི་སྨོས། །སྤྱན་རས་གཟིགས་དབང་དེ་ནི་ཆོ་འཕྲུལ་བསམ་གྱིས་མི་ཁྱབ་སྟོན། །བྱེ་བ་ཁྲག་ཁྲིག་བརྒྱ་སྟོང་དུ་མའི་སེམས་ཅན་ཡོངས་སྨིན་བྱེད། །དེ་ཀུན་བྱང་ཆུབ་ལམ་འཇོག་བདེ་བ་ཅན་གྱི་འཇིག་རྟེན་འགྲོ། །དེ་བཞིན་གཤེགས་པ་འོད་དཔག་མེད་མཐོང་དམ་ཆོས་ཉན་པ་འཐོབ། །གཞན་ཡང་བ་སྤུའི་ཁུང་བུ་ནི། །བདུད་རྩིའི་ཐིགས་པ་ཅེས་བྱ་(ཆ༡༦ན)

[Full Size]

ཡོད། །སར་གནས་ལྷ་སྲས་ཚོགས་ཀྱིས་གང༌། །དྲི་ཟའི་གླུ་དབྱངས་ཀྱིས་གང་བའི། །རིན་ཆེན་རི་བོར་ངལ་གསོ་ལ། །ཐེག་ཆེན་ཆོས་ཀྱི་གཏམ་བགྲོ་ཞིང༌། །བྱམས་ལྡན་འཆག་པར་བརྩོན་པས་གང༌། །དེ་ནས་སྤུ་ཁུང་རྡོ་རྗེའི་སྒོར། །རིན་ཆེན་རི་དང་ལྗོན་པ་དང༌། །རྫིང་བུ་ཁང་བཟང་བསམ་ལས་འདས། །རྒྱལ་སྲས་ཡོན་ཏན་ཆེ་ལྡན་པའི། །མི་འམ་ཅི་ཚོགས་དེ་ན་གནས། །ཕར་ཕྱིན་དྲུག་གི་གཏམ་བྱེད་ཅིང༌། །རིན་ཆེན་འཆགས་ས་རྣམས་ན་འཆག །རྟག་པར་སྤྱན་རས་གཟིགས་ཀྱི་མཚན། །རྗེས་སུ་དྲན་པར་བྱེད་པ་སྟེ། །དེ་ཚེ་ཡོ་བྱད་མ་ལུས་འབྱུང༌། །དེ་འདས་ནས་ནི་བ་སྤུའི་ཁུང༌། །ཉི་མའི་འོད་ཅེས་བྱ་བ་ཡོད། །རེ་རེའང་རྩེ་མོ་ཁྲི་ཉིས་སྟོང༌། །ལྡན་པའི་གསེར་གྱི་རི་བོ་ཁྲི། །རེ་རེའི་ངོས་ཀྱང་ལྷ་རྫས་ཀྱི། །སྐྱེད་ཚལ་ཁང་བཟང་རྫིང་ལྗོན་ཤིང༌། །བརྒྱ་སྟོང་བྱེ་བ་དུ་མས་བརྒྱན། །རིན་ཆེན་ཤ་རི་ཏི་ག་ལས། །ཡོ་བྱད་མ་ལུས་ཐམས་ཅད་འབྱུང༌། །རྒྱལ་སྲས་བྱེ་བ་བརྒྱ་སྟོང་ནི། །ཡིག་དྲུག་རྗེས་སུ་དྲན་པའི་མོད། །མྱ་ངན་འདས་པའི་ས་རྟོགས་ཤིང༌། །རྒྱལ་བ་བདུན་དང་སྤྱན་རས་གཟིགས། །ཀུན་ནས་གཤེགས་སྟེ་དབུགས་འབྱིན་མཛད། །གཞན་ཡང་བ་སྤུའི་ཁུང་བུ་ནི། །དབང་པོའི་རྒྱལ་པོ་ཞེས་བྱ་ཡོད། །རྒྱལ་སྲས་ཕྱིར་མི་ལྡོག་ཤ་སྟག །བྱེ་བ་བརྒྱ་སྟོང་མང་པོ་གནས། །འཁོར་བའི་དུ་ཁའི་མིང་ཡང་མེད། །ལྷ་ཡི་གསེར་ཁྲི་བརྒྱད་ཁྲིར་འཁོད། །པདྨ་ལྟར་སྣང་ནོར་བུ་ལས། །ཇི་ལྟར་བསམས་པ་བཞིན་དུ་འགྲུབ། །དེ་ནས་བ་སྤུའི་ཁུང་བུ་ནི། །རྩི་སྨན་ཆེན་པོ་ཞེས་བྱ་ཡོད། །ཐོག་མའི་སེམས་བསྐྱེད་ལྡན་པ་ཡི། །རྒྱལ་སྲས་ཁྲག་ཁྲིག་མཐའ་ཡས་གནས། །སྲིད་པའི་དུ་ཁས་ཡིད་སྐྱོ་ཞིང༌། །རྣམ་པར་ཐར་པའི་སྒོ་གསུམ་ལ། །མཉམ་པར་འཇོག་པས་འདའ་བར་བྱེད། །དེ་ནས་སྣ་ཚོགས་རྒྱལ་ཞེས་པའི། །སྤུ་ཁུང་ན་ནི་རང་སངས་རྒྱས། །བྱེ་བ་ཁྲག་(ཆ༡༦བ)

[Full Size]

ཁྲིག་བརྒྱ་སྟོང་གནས། །ཆོ་འཕྲུལ་སྣ་ཚོགས་སྟོན་པར་བྱེད། །རིན་ཆེན་རི་རྒྱལ་སྣ་ཚོགས་ལ། །གནས་ཅིང་རྟེན་ཅིང་འབྲེལ་འབྱུང་གི །ཆོས་ཀྱི་གཏམ་ཆེན་བགྲོ་བར་བྱེད། །དེ་སོགས་བརྗོད་དུ་མེད་པ་ཡི། །བ་སྤུའི་ཁུང་བུ་འདས་ནས་ནི། །ཀུན་གྱི་མཐའ་མར་སྤུ་ཁུང་ནི། །རྒྱལ་མཚན་རྒྱལ་པོ་ཞེས་བྱ་ཡོད། །འདི་ནི་རྡོ་རྗེའི་རང་བཞིན་སྟེ། །དཔག་ཚད་བརྒྱད་ཁྲི་བཞི་སྟོང་ལྡན། །རིན་ཆེན་རི་དང་ནོར་བུ་ཡི། །ལྗོན་ཤིང་ཁང་བརྩེགས་ཚོགས་ཀྱིས་གཏམས། །ཟླ་ལྟར་བཟང་བའི་རིན་ཆེན་གྱིས། །རྟག་དུ་སྣང་བའི་བྱ་བ་བྱེད། །ཁང་བརྩེགས་རྣམས་ན་རྒྱལ་བའི་སྐུ། །འཛམ་གླིང་འདི་ལ་ཞལ་ཕྱོགས་ནས། །ཕར་ཕྱིན་དྲུག་གི་ཆོས་སྟོན་པ། །རེ་རེ་བཞུགས་ཤིང་འགྲོ་བ་འདུལ། །དེ་ནས་སྤྱན་རས་གཟིགས་དབང་གི །རྐང་པ་གཡས་པའི་མཐེ་བོང་ལས། །རྒྱ་མཚོ་ཆེན་པོ་བཞི་བྱུང་སྟེ། །རེ་རེའང་གཏིང་དཔག་མི་ནུས་སོ། །རྒོད་མའི་ཁ་ཡི་གདོང་འདྲར་འབབ། །དེ་ཚེ་ཐལ་བའི་ལྷག་མ་ལྟར། །སྐད་ཅིག་གིས་ནི་མི་སྣང་འགྱུར། །སྤྱན་རས་གཟིགས་ཀྱི་དབང་ཕྱུག་གི །ཡོན་ཏན་རྣམ་འཕྲུལ་དེ་འདྲ་འོ། །སྤྱན་རས་གཟིགས་དེའི་མཚན་ཙམ་ཞིག །གང་གིས་འཛིན་པར་བྱེད་པ་དང༌། །ཡི་གེ་དྲུག་པའི་རིག་སྔགས་ཀྱི། །རྒྱལ་མོ་རྗེས་སུ་དྲན་བྱེད་པ། །དེ་དག་བ་སྤུའི་ཁུབ་བུ་ཡི། །ཞིང་མཆོག་དེ་དག་རྣམས་སུ་སྐྱེ། །སླན་ཆད་སྲིད་པར་མི་འཁོར་སྟེ། །བ་སྤུའི་ཁུང་ནས་བ་སྤུ་ཡི། །ཁུང་བུ་གཞན་དུ་འགྲོ་བར་འགྱུར། །མྱ་ངན་འདས་པའི་མཐའ་ཡི་བར། །ཞིང་མཆོག་དེ་དག་རྣམས་སུ་གནས། །དེ་ལྟར་སྟོན་པས་བཀའ་བསྩལ་ཏོ། །རྒྱལ་སྲས་སྒྲིབ་པ་རྣམ་སེལ་གྱིས། །ཡི་གེ་དྲུག་པའི་རིག་སྔགས་ཀྱི། །རྒྱལ་མོ་ཇི་ལྟར་བཙལ་གསོལ་པས། །སླར་ཡང་རྒྱལ་བས་བཀའ་བསྩལ་པ། །འདི་ནི་སངས་རྒྱས་ཀྱིས་ཀྱང་མི་མཁྱེན་ན། །བྱང་ཆུབ་སེམས་དཔར་གྱུར་པས་ལྟ་ཅི་སྨོས། །སྤྱན་རས་གཟིགས་དབང་སྙིང་པོ་རབ་མཆོག་སྟེ། །གང་གིས་སྙིང་པོ་འདི་ཤེས་ཐར་(ཆ༡༧ན)

[Full Size]

པ་ཤེས། །རྣལ་འབྱོར་དཔག་དུ་མེད་ཕྱིར་སྒྲུབ་པར་དཀའ། །ཡི་གེ་དྲུག་པའི་རིག་སྔགས་འདི་ཡི་ཕྱིར། །དེ་བཞིན་གཤེགས་རྣམས་བསྐལ་པ་བཅུ་དྲུག་དུ། །འཇིག་རྟེན་ཁམས་རྣམས་ཀུན་དུ་གཤེགས་མཛད་ན། །བྱང་ཆུབ་སེམས་དཔར་གྱུར་པས་སྨོས་ཅི་དགོས། །སུ་ཞིག་ཡིག་དྲུག་རིག་སྔགས་ཆེན་མོ་འདི། །རྟག་དུ་འཛིན་ཞིང་ཟློས་པར་བརྩོན་པ་ཡི། །སེམས་ཅན་དེ་དག་བསོད་ནམས་ཕ་མཐའ་ཡས། །ཡིག་དྲུག་རིག་སྔགས་གང་དུ་ཟླ་བ་དེར། །སངས་རྒྱས་གངྒཱའི་ཀླུང་གི་བྱེ་མ་སྙེད། །དགུ་བཅུ་རྩ་དགུ་དེ་རུ་འདུ་བར་འགྱུར། །ཕྲ་རབ་རྡུལ་གྲངས་སྙེད་ཀྱི་རྒྱལ་སྲས་འདུ། །ཕར་ཕྱིན་དྲུག་གི་སྒོ་ན་གནས་པར་འགྱུར། །ལྷ་ཡི་སྡེ་རིས་སུམ་བཅུ་རྩ་གཉིས་ཀྱི། །ལྷ་ཡི་བུ་རྣམས་འདུ་ཞིང་མཆོད་པར་བྱེད། །རྒྱལ་པོ་ཆེན་པོ་བཞི་ཡིས་ཕྱོགས་བཞི་སྲུང༌། །ཀླུ་ཡི་རྒྱལ་པོ་རྒྱ་མཚོ་མཆིང་ནམ་དང༌། །མ་དྲོས་འཇོག་པོ་ལ་སོགས་བྱེ་བ་ནི། །ཁྲག་ཁྲིག་བརྒྱ་སྟོང་དུ་མས་ཡོངས་སུ་སྲུང༌། །དེ་ནི་བླ་གབ་མེད་པར་གནས་ཚེ་ཡང༌། །ས་བླའི་གནོད་སྦྱིན་དག་གིས་སྲུང་བར་བྱེད། །དེ་ཡི་བ་སྤུའི་ཁུང་བུ་རེ་རེ་ལའང༌། །དེ་བཞིན་གཤེགས་པ་བྱེ་བ་ཕྲག་རེ་བཞུགས། །དེ་དག་ཀུན་གྱིས་ཁྱོད་ཀྱིས་འདི་འདྲ་བའི། །ཡིད་བཞིན་ནོར་མཆོག་ཐོབ་པ་ཐོབ་གྱུར་སྟེ། །ཁྱོད་ཀྱིས་རུས་ཀྱི་རིགས་ཀྱང་བདུན་བརྒྱུད་ཚུན། །ཐར་པར་བྱས་ཀྱིས་ལེགས་སོ་ལེགས་པར་བྱས། །ཁྱོད་ཀྱི་ལྟོར་གནས་སྲོག་ཆགས་ཐམས་ཅན་ཀྱང༌། །ཕྱིར་མི་ལྡོག་པའི་བྱང་ཆུབ་སེམས་དཔའ་འཐོབ། །ལེགས་སོ་ལེགས་ཞེས་མགྲིན་གཅིག་གསུང་བར་འགྱུར། །ཡི་གེ་དྲུག་པའི་རིག་སྔགས་ཆེན་མོ་འདི། །ལ་ལ་ཞིག་གི་ལུས་ལ་འཆང་བྱེད་ན། །དེ་ལུས་རྡོ་རྗེའི་ལུས་སུ་རིགས་པར་འགྱུར། །དེ་ནི་རྒྱལ་བའི་རིང་སྲེལ་མཆོད་རྟེན་ཉིད། །རྒྱལ་བའི་ཡེ་ཤེས་གནས་པར་རིག་པར་བྱ། །སུ་ཞིག་རིག་སྔགས་ཆེན་མོ་འདི་ཟློས་པ། །དེ་ཡི་སྤོབས་པ་ཟད་པ་མེད་པར་འགྱུར། །(ཆ༡༧བ)

[Full Size]

ཡེ་ཤེས་ཕུང་པོ་རྣམ་པར་དག་པ་འཐོབ། །བྱམས་པ་དང་ནི་སྙིང་རྗེ་ཆེན་པོར་འགྱུར། །དེ་ནི་ཉི་མ་རེ་རེ་བཞིན་དུ་ཡང༌། །ཕ་རོལ་ཕྱིན་པ་དྲུག་པོ་ཡོངས་རྫོགས་འགྱུར། །རིག་འཛིན་འཁོར་ལོས་སྒྱུར་བའི་དབང་ཕྱུག་འཐོབ། །ཡི་གེ་དྲུག་པའི་རིག་སྔགས་འདི་འཛིན་པ། །སུ་ཞིག་བྱམས་སམ་ཞེ་སྡང་གིས་ཀྱང་རུང༌། །དབུགས་ཕྱིར་འབྱུང་དང་ནང་དུ་རྔུབ་པས་ཀྱང༌། །རྒྱལ་བའི་སྲས་པོ་ཕྱིར་མི་ལྡོག་པར་འགྱུར། །བླ་མེད་བྱང་ཆུབ་མངོན་རྫོགས་མྱུར་འཚང་རྒྱ། །རིག་པའི་རྒྱལ་པོ་འདི་ལ་སུ་ཞིག་གིས། །ལག་གིས་རེག་ཀྱང་སྲིད་མཐའི་སེམས་དཔར་འགྱུར། །སྐྱེས་པ་བུད་མེད་ཁྱེའུ་བུ་མོ་དང༌། །བྱ་དང་རི་དགས་ལ་སོགས་སུས་ཀྱང་རུང༌། །ཡི་གེ་དྲུག་པའི་རིག་སྔགས་འདི་མཐོང་ན། །དེ་ཀུན་ཐམས་ཅད་རྒྱལ་སྲས་སྲིད་མཐའ་འཛིན། །མི་ཡི་སྡུག་བསྔལ་བརྒྱད་པོ་མེད་པར་འགྱུར། །དེ་ཡིས་རྣལ་འབྱོར་བསམ་གྱིས་མི་ཁྱབ་འཐོབ། །དེ་ལྟར་ཡི་གེ་དྲུག་པའི་རིག་སྔགས་འདི། །ཟློས་པར་བྱེད་ན་བསྐུལ་བར་འགྱུར་རོ་གསུངས། །སྒྲིབ་སེལ་གྱིས་ནི་འདི་སྐད་གསོལ། །དེ་ལྟར་ཕན་ཡོན་ཚད་མེད་པའི། །རིག་སྔགས་དམ་པའི་རྒྱལ་པོ་དེ། །བདག་གིས་གང་ལས་འཐོབ་པར་འགྱུར། །ཡི་གེ་དྲུག་པའི་རིག་སྔགས་གང༌། །བདག་ལ་སུ་ཞིག་སྩོལ་བྱེད་པ། །དེ་ལ་རིན་ཆེན་སྣ་བདུན་གྱིས། །འཛམ་གླིང་བཀང་སྟེ་དབུལ་བར་བགྱི། །འབྲི་བའི་ཡོ་བྱད་ཀྱིས་འཕོངས་ན། །བདག་གིས་ལྤགས་པ་ཤོག་བུར་བྱས། །རྐང་གི་རུས་པས་སྨྱུ་གུ་དང༌། །ཁྲག་གིས་གནག་ཚར་བྱས་ནས་ནི། །རིག་སྔགས་དེ་ནི་འབྲི་བར་བགྱིད། །བཅོམ་ལྡན་འདས་ཀྱིས་སླར་ཡང་བཀའ་བསྩལ་པ། །ཡི་གེ་དྲུག་པའི་རིགས་སྔགས་འདི་ཡི་ཕྱིར། །འཇིག་རྟེན་ཁམས་ཀྱི་ཕྲ་རབ་རྡུལ་སྙེད་ཀྱི། །འཇིག་རྟེན་ཁམས་སུ་སོང་བར་ངས་དྲན་སྟེ། །དེ་བཞིན་གཤེགས་པ་བྱེ་བ་ཁྲག་ཁྲིག་ཚོགས། །བརྒྱ་སྟོང་དུ་མ་བསྙེན་ཅིང་བཀུར་བྱས་ཀྱང༌། །རིག་སྔགས་མཆོག་འདི་མ་ཐོས་མ་ཐོབ་ནས། །སངས་རྒྱས་དམར་པོའི་(ཆ༡༨ན)

[Full Size]

མཆོག་གི་སྤྱན་སྔ་རུ། །ང་ཡིས་མཆི་མ་ཕྱུང་སྟེ་ངུས་པ་དང༌། །རྒྱལ་བ་དེ་ཡིས་བདག་གི་དབུགས་ཕྱུང་སྟེ། །དེ་ལྟར་སྙིང་རྗེར་མཆི་མ་མ་འབྱིན་པར། །བདེ་གཤེགས་པདྨའི་དམ་པ་ཞེས་བྱ་བ། །དེ་ཡིས་རིག་སྔགས་ཆེན་མོ་འདི་མཁྱེན་གྱིས། །རྒྱལ་བ་དེ་ཡི་སྤྱན་སྔར་སོང་ཞིག་གསུངས། །ངས་ཀྱང་ཕྱིན་སྟེ་གུས་པར་གསོལ་བ་བཏབ། །མིང་ཙམ་དྲན་ཀྱང་སྡིག་པ་ཀུན་འབྱང་ཞིང༌། །བྱང་ཆུབ་དམ་པ་རྙེད་དཀའ་འཐོབ་འགྱུར་བ། །ཡི་གེ་དྲུག་པའི་རིག་སྔགས་འཚོལ་བའི་ཆེད། །འཇིག་རྟེན་དུ་མར་བདག་ཕྱིན་ཉོན་མོངས་ཀྱང༌། །དོན་མ་མཆིས་ཀྱིས་ཁྱོད་ཀྱིས་བདག་ལ་སྩོལ། །དེ་བཞིན་གཤེགས་པ་པདྨའི་མཆོག་དེ་ཡིས། །རྡུལ་ཀུན་རེ་རེས་བགྲང་བར་ནུས་པ་སོགས། །བཅུ་གཉིས་དཔེ་ཡིས་ཡོན་ཏན་རྒྱ་ཆེར་བཤད། །ཡི་གེ་དྲུག་པའི་ཕན་ཡོན་བགྲང་མི་ལང༌། །བསམ་གཏན་སྤྱོད་ཡུལ་བསམ་གྱིས་མི་ཁྱབ་སྟེ། །ང་ནི་སྒོམ་པར་ནན་ཏན་བརྩོན་མ་ཡིན། །སྤྱན་རས་གཟིགས་ཀྱི་དབང་པོའི་ཆོས་དེ་ཡང༌། །ཕྲ་ཞིང་མི་གསལ་ཤིན་དུ་སྙིང་པོའི་ཆོས། །དེ་ནི་དགེ་བ་ལ་གནས་དེ་བཞིན་དུ། །རིག་སྔགས་ཆེན་མོ་འདི་ནི་ཐབས་མཁས་པའོ། །ངས་ཀྱང་ཡི་གེ་དྲུག་པའི་རིག་སྔགས་ཆེད། །ཞིང་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག །དུ་མར་འཁྱམས་ཤིང་སོང་ཡང་མ་རྙེད་ནས། །དེ་བཞིན་གཤེགས་པ་སྣང་བ་མཐའ་ཡས་ཀྱི། །སྤྱན་སྔར་ཐལ་སྦྱར་ཆོས་ལ་གུས་པ་ཡི། །ཤུགས་ཀྱིས་མཆི་མ་ཕྱུང་སྟེ་སངས་རྒྱས་དེས། །ཡིག་དྲུག་རིག་སྔགས་ཆེན་མོའི་རིག་པའི་རྒྱལ། །སྒོམ་པའི་བརྩོན་འགྲུས་བྱ་བར་བཞེད་དམ་གསུངས། །བཅོམ་ལྡན་འདས་འཚལ་བདེ་གཤེགས་བདག་འཚལ་སྟེ། །སྐོམ་པ་ཆུ་འཚོལ་ཇི་བཞིན་ཞིང་མང་མཆིས། །སངས་རྒྱས་ཁྲག་ཁྲིག་བརྒྱ་སྟོང་བསྙེན་བཀུར་ཀྱང༌། །རིག་སྔགས་རྒྱལ་མོ་འདི་ནི་མ་ཐོབ་ཀྱིས། །བཅོམ་ལྡན་འདས་ཁྱོད་མགོན་སྐྱབས་རྟེན་དང་གནས། །དབང་(ཆ༡༨བ)

[Full Size]

པོ་ཉམས་ལ་མིག་དང་ལམ་སྟོར་ལམ། །ཉི་མས་གདུངས་པ་རྣམས་ལ་སྐྱོབ་པའི་གདུགས། །ལམ་གྱི་བཞི་མདོར་གནས་ཀྱི་སཱ་ལ་སྟེ། །ཆོས་ཀྱིས་ཕོངས་པ་རྣམས་ལ་མཐའ་ཡས་སྟོན། །སེམས་རབ་བརྟན་པའི་གོ་ཆ་ཉིད་གྱུར་ཅིག །དེ་ནས་སངས་རྒྱས་སྣང་བ་མཐའ་ཡས་དེས། །ཀ་ལ་པིངྐའི་དབྱངས་སྙན་གསུང་ཕྱུང་བས། །སྤྱན་རས་གཟིགས་དབང་བོས་སྟེ་བཀའ་བསྩལ་པ། །རིགས་ཀྱི་བུ་ཁྱོད་ལྟོས་ཤིག་ལེགས་པར་ལྟོས། །དེ་བཞིན་གཤེགས་པ་པདྨའི་མཆོག་འདི་ནི། །དེ་བཞིན་གཤེགས་པ་ཉིད་དུ་གྱུར་བཞིན་དུ། །ཡི་གེ་དྲུག་པའི་སྔགས་ཆེན་འཚོལ་བའི་སླད། །བྱེ་བ་ཁྲག་ཁྲིག་བརྒྱ་སྟོང་དུ་མ་ཡི། །ཞིང་ཁམས་དུ་མར་ཀུན་ནས་གཤེགས་མཛད་ཀྱིས། །ཡི་གེ་དྲུག་པའི་རིག་སྔགས་དབུལ་བར་གྱིས། །དེ་ནས་སྤྱན་རས་གཟིགས་ཀྱི་དབང་པོ་དེས། །རས་བྲིས་ཆོ་ག་དཀྱིལ་འཁོར་འཇུག་ཚུལ་དང༌། །གསང་བར་གདམས་པ་ལ་སོགས་རྒྱ་ཆེར་བསྟན། །ཨོཾ་མ་ཎི་པདྨེ་ཧཱུྃ། རིག་པའི་མཆོག་འདི་སྤྱན་རས་གཟིགས་དབང་གིས། །དེ་བཞིན་གཤེགས་པ་ང་ལ་བྱིན་མ་ཐག །ས་ཆེན་གཡོས་ཤིང་རྒྱ་མཚོ་རྣམ་པར་འཁྲུགས། །བགེགས་རྣམས་སྐྲག་ཅིང་འགྲོ་ལ་འཚེ་བྱེད་པའི། །གནོད་སྦྱིན་ཆེན་པོ་ཤ་ཟ་དུ་མ་དང༌། །ནག་པོ་ཆེན་པོ་བུད་མེད་བཅས་པར་བྲོས། །ངས་ཀྱང་མུ་ཏིག་མཆོག་གི་སེ་མོ་དོ། །བརྒྱ་སྟོང་རི་བ་སྤྱན་རས་གཟིགས་ལ་ཕུལ། །དེས་ཀྱང་སྤྱི་བོར་བླངས་སྟེ་བདེ་བར་གཤེགས། །སྣང་བ་མཐའ་ཡས་དེ་ལ་གུས་པས་ཕུལ། །དེ་ཡིས་བླངས་ནས་སླར་ཡང་ང་ལ་བྱིན། །ང་ཡིས་རིག་སྔགས་རྒྱལ་པོ་འདི་རྙེད་ནས། །པདྨའི་ཞིང་ཁམས་ཉིད་དུ་གཤེགས་སོ་ཞེས། །བདེ་གཤེགས་པདྨའི་མཆོག་ལས་ང་ཡིས་ཐོས། །གང་གིས་རིག་སྔགས་མཆོག་འདི་འབྲི་འམ་འབྲིར་བཅུག་ན། །དེ་ཡིས་ཆོས་ཕུང་བརྒྱད་ཁྲི་བཞི་སྟོང་བྲིས་པར་འགྱུར། །རྒྱལ་སྐུ་ཕྲ་རབ་རྡུལ་མཉམ་ལྷ་ཡི་གསེར་ལས་བྱེད། །བྱས་ནས་རིང་སྲེལ་བཅུག་པ་ཉིན་རེ་བཞིན་(ཆ༡༩ན)

[Full Size]

བྱེད་ན། །དེ་ཡི་རྣམ་སྨིན་ཡི་གེ་དྲུག་པའི་རིག་སྔགས་འདིའི། །ཡིག་འབྲུ་གཅིག་གི་འབྲས་བུའི་རྣམ་པར་སྨིན་པ་ཙམ། །ཡོན་ཏན་བསམ་གྱིས་མི་ཁྱབ་ཐར་པར་ཤིན་དུ་གནས། །རིགས་ཀྱི་བུ་འམ་བུ་མོ་གང་ཞིག་འདི་ཟློས་ན། །དེས་ནི་ཏིང་འཛིན་དམ་པ་འདི་དག་ཐོབ་པར་འགྱུར། །ནོར་བུ་རིན་ཆེན་འཛིན་དང་དམྱལ་དང་བྱོལ་སོང་སྐེམ། །རྡོ་རྗེའི་གོ་ཆ་རྐང་པ་རབ་གནས་ཀུན་ཐབས་མཁས། །འཐོར་དང་ཆོས་རྣམས་ཀུན་ལ་འཇུག་པ་བསམ་གཏན་རྒྱུན། །ཆོས་ཀྱི་ཤིང་རྟ་ལ་འདུག་མཐའ་ཡས་པེ་འུ་དང༌། །འདོད་ཆགས་ཞེ་སྡང་ཀུན་ལས་ཡོངས་སུ་ཐར་བར་བྱེད། །ཕ་རོལ་ཕྱིན་དྲུག་འཆང་དང་རི་རབ་ཆེན་པོ་འཛིན། །སེམས་ཅན་སྲིད་པ་ལས་འགྲོལ་སངས་རྒྱས་ཞིང་ཀུན་སྟོན། །དེ་བཞིན་གཤེགས་ཀུན་གཟིགས་དང་ཤིན་དུ་གནས་པའི་གནས། །དེ་དག་ལ་སོགས་ཏིང་འཛིན་དམ་པ་བརྒྱ་རྩ་བརྒྱད། །ཡི་གེ་དྲུག་པའི་རིག་སྔགས་འཛིན་དེས་ཐོབ་པར་འགྱུར། །དེ་བས་སྒྲིབ་པ་རྣམ་སེལ་ཁྱོད། །འཁོར་མོ་འཇིག་གི་གྲོང་ཁྱེར་ན། །རིག་སྔགས་ཆེན་མོ་འདི་འཛིན་པའི། །ཆོས་སྨྲ་ཡོད་ཀྱིས་དེའི་གན་སོང༌། །རིག་སྔགས་མཆོག་འདི་འཛིན་པའི་ཆོས་སྨྲ་དེ་དག་དཀོན། །དེ་དག་དེ་བཞིན་གཤེགས་དང་མཉམ་པར་བལྟ་བར་བྱ། །འགྲོ་བའི་བསོད་ནམས་ཆེན་པོའི་གྲོང་དང་ཕུང་པོ་དང༌། །ཕྱིན་ཅི་མ་ལོག་གསུང་དང་རིན་ཆེན་ཕུང་པོ་བཞིན། །འདོད་རྒུ་སྦྱིན་བྱེད་ཡིད་བཞིན་ནོར་བུ་ལྟ་བུ་དང༌། །ཆོས་ཀྱི་མཛོད་དང་འགྲོ་བ་སྒྲོལ་བའི་མཉན་པ་བཞིན། །ལྟ་བར་བྱ་ཡི་དམ་ཆོས་སྨྲ་བ་དེ་དག་གི །སྤྱོད་པ་མཐོང་ནས་ཐེ་ཚོམ་སྐྱེ་བར་མི་བྱའོ། །རིགས་ཀྱི་བུ་ཁྱོད་བྱང་ཆུབ་སེམས་དཔའི་ས་བོར་ནས། །ངན་སོང་སྡུག་བསྔལ་མི་བཟད་ནང་དུ་སྐྱེ་ས་རེ། །ཆོས་སྨྲ་དེ་ནི་ཚུལ་ཁྲིམས་ཞིག་ཅིང་སྤྱོད་པ་ཉམས། །ཆུང་མ་དང་ནི་བུ་དང་བུ་མོས་ཡོངས་སུ་བསྐོར། །ངུར་སྨྲིག་གོས་ཀྱང་བཤང་དང་གཅི་བས་(ཆ༡༩བ)

[Full Size]

གོས་གྱུར་པ། །སྤྱོད་ལམ་མ་བསྡམས་པ་ཡིན་ཁྱོད་ཀྱིས་ཤེས་པར་གྱིས། །དེ་ལྟར་འཚལ་ལོ་ཞེས་གསོལ་ནས། །རྒྱལ་སྲས་སྒྲིབ་པ་རྣམ་སེལ་དེ། །རབ་ཏུ་བྱུང་དང་ཁྱིམ་པ་དང༌། །ཁྱེ་འུ་དང་ནི་བུ་མོ་ཡི། །གཟུགས་ཅན་བྱང་ཆུབ་སེམས་དཔའི་ཚོགས། །བརྒྱ་ཕྲག་དུ་མས་བསྐོར་སྟེ་སོང༌། །ལྷ་ཡི་གདུགས་དང་ཅོད་པན་དང༌། །རྒྱན་ཆ་གོས་བཟང་མེ་ཏོག་སོགས། །མཐའ་ཡས་མཆོད་པའི་ཚོགས་ཁྱེར་སྟེ། །ཝ་ར་ཎ་སིའི་གྲོང་དུ་སོང༌། །སྤྱོད་ལམ་མ་བསྡམས་པ་དེ་ལ། །ཐེ་ཚོམ་མེད་པའི་དད་པ་ཡིས། །རྐང་པར་མགོ་བོས་ཕྱག་འཚལ་ནས། །མཆོད་པ་དེ་དག་ཀུན་གྱིས་མཆོད། །མདུན་དུ་ཐལ་མོ་སྦྱར་ནས་བསྟོད། །ཨེ་མ་ཧོ། ཆོས་གཏེར་མྱོང་བྱེད་བདུད་རྩིའི་གཏེར་བསགས་པ། །རྒྱ་མཚོ་ཆེ་དང་མཉམ་པ་ཁྱོད་ལ་དཔག་མི་ནུས། །མིར་གྱུར་ཀུན་དང་ལྷ་ལ་སོགས་པའི་འགྲོ་བ་ཀུན། །ཁྱོད་ལས་ཆོས་ཉན་དེ་ཀུན་ཐམས་ཅད་འཁོར་དུ་འདུ། །ཁྱོད་ནི་རྡོ་རྗེ་ཆེ་མཚུངས་ཆོས་ཀྱི་རྣམ་གྲངས་འཆང༌། །སེམས་ཅན་འཁོར་བས་བཅིངས་པ་མང་པོ་ཡོངས་ཐར་མཛད། །གྲོང་ཁྱེར་འདིར་གནས་ཁྱོད་ཀྱིས་རྟག་དུ་ཡོངས་སྡུད་ཅིང༌། །ཁྱོད་མཐོང་དེ་དག་བསོད་ནམས་དམ་པ་ལྡན་པ་ལགས། །མཐོང་མ་ཐག་དུ་སྡིག་པ་ཀུན་འཕྲོག་མཛད། །ཞུགས་ཀྱིས་ནགས་ཚལ་མྱུར་བར་སྲེག་པ་བཞིན། །ཁྱོད་ནི་བདེ་གཤེགས་ཀུན་གྱིས་རབ་ཏུ་མཁྱེན། །བྱང་སེམས་བྱེ་བ་ཁྲག་ཁྲིག་བརྒྱ་སྟོང་མང༌། །ཚངས་དང་ཁྱབ་འཇུག་དབང་ཕྱུག་ཉི་ཟླ་རླུང༌། །ཆུ་བདག་མེ་ལྷ་ཆོས་རྒྱལ་གཤིན་རྗེ་དང༌། །རྒྱལ་ཆེན་བཞི་མདོ་ཁྱོད་ལ་མཆོད་ཕྱིར་བརྩོན། །ཆོས་སྨྲ་དེ་ཡིས་སླར་སྨྲས་པ། །གྲོགས་པོ་ཉོན་མོངས་པ་རྣམས་ནི། །འཕགས་པ་མིན་པར་སྤྱོད་པའོ། །དེ་ནི་འཁོར་བའི་མཚན་མ་སྟེ། །སྐྱེ་རྒུའི་འཁོར་ལོ་སྐྱེད་པར་བྱེད། །ཡིག་དྲུག་རིག་སྔགས་སུས་ཤེས་པ། །དུག་གསུམ་དག་གིས་མི་གོས་སྟེ། །འཛམ་བུ་(ཆ༢༠ན)

[Full Size]

ཆུ་བོའི་གསེར་བཟང་པོ། །ནམ་ཡང་དྲི་མས་མི་གོས་བཞིན། །རིག་སྔགས་རྒྱལ་མོ་འདི་ནི་དཀོན་པའི་ཚིག་ཡིན་སྟེ། །རྡོ་རྗེའི་ཚིག་དང་མི་ཕྱེད་བླ་མེད་ཡེ་ཤེས་ཚིག །མི་ཟད་པ་ཡི་ཡེ་ཤེས་ལྟག་ན་མེད་པའི་ཚིག །ཐར་པར་འཇུག་བྱེད་བདེ་གཤེགས་ཡེ་ཤེས་རྣམ་དག་ཚིག །དུག་གསུམ་དང་ནི་འཁོར་བའི་སྡུག་བསྔལ་ཡོངས་སྤོང་ཚིག །ཐབས་མཁས་ཀུན་ལྡན་ཆོས་རྣམས་ཀུན་ལ་འཇུག་བྱེད་ཚིག །བསམ་གཏན་རྣམ་ཐར་ཏིང་འཛིན་ཀུན་ལ་འཇུག་པའི་ཚིག །རྟག་དུ་ལྷ་རྣམས་འདོད་པར་བྱེད་པའི་ཚིག་ཡིན་ནོ། །འདི་ན་གང་ཞིག་ཐར་འདོད་ཀྱང༌། །ཐར་པའི་ཐབས་ལ་རྨོངས་པ་རྣམས། །དབང་པོའི་སྒོ་དང་དཀར་པོའི་སྒོ། །དེ་བཞིན་སྙན་པའི་བསྒོ་བ་སོགས། །གོས་ཀྱི་བསྒོ་བ་སྣ་ཚོགས་དང༌། །ཉི་མ་རྒྱུ་སྐར་བརྟགས་བྱས་ནས། །དབང་ཕྱུག་འཇུག་སྲེད་ན་མཁའ་ལྡིང༌། །གཅེར་བུ་པ་དང་རི་མི་སོགས། །སྣ་ཚོགས་གནས་ལས་རབ་འབྱུང་ཡང༌། །དེ་དག་ལ་ཡང་ཐར་པ་མེད། །མགོན་མིན་བརྟུལ་ཞུགས་ཅན་ཡང་མིན། །ཚངས་དང་ཁྱབ་འཇུག་དབང་ཕྱུག་དང༌། །ལྷ་དབང་ཉི་ཟླ་རླུང་ལྷ་ཆུ། །མེ་དང་གཤིན་རྗེ་རྒྱལ་ཆེན་བཞི། །དེ་སོགས་ལྷ་རྣམས་མང་པོ་ཡང༌། །རྟག་དུ་ཡི་གེ་དྲུག་པ་ཡི། །རིག་སྔགས་རྒྱལ་མོ་འདི་ཉིད་སློང༌། །ཇི་ལྟར་ཤེས་རབ་ཕ་རོལ་ཕྱིན་མ་ནི། །རྒྱལ་བ་ཀུན་སྐྱེད་ཡུམ་དུ་གྲགས་མོད་ཀྱི། །དེ་ཡང་རིག་སྔགས་རྒྱལ་མོ་འདི་ཉིད་ལ། །ཐལ་མོ་སྦྱར་ནས་ཕྱག་འཚལ་འདུད་བྱེད་ན། །སངས་རྒྱས་བྱང་སེམས་བཅས་པ་སྨོས་ཅི་དགོས། །འདི་ནི་འབྲས་ལྟར་སྙིང་པོར་གྱུར་པ་སྟེ། །འདི་ལ་ཅུང་ཟད་ཙམ་ཞིག་བཟླས་པས་ཀྱང༌། །ཐེག་མཆོག་གསུང་རབ་ཡན་ལག་བཅུ་གཉིས་དང༌། །ཞི་དང་ཐར་པ་དམ་པ་ཐོབ་པར་འགྱུར། །རྣལ་འབྱོར་གཞན་ཀུན་ཕུབ་མ་ལྟ་བུ་སྟེ། །འདི་ནི་འབྲས་ཀྱི་རྨེ་འུ་(ཆ༢༠བ)

[Full Size]

ལྟ་བུ་ཡིན། །རྒྱལ་བའི་སྲས་རྣམས་ཕར་ཕྱིན་དྲུག་པོ་ལས། །རེ་རེའི་ཕྱིར་ཡང་དཀའ་ཚེགས་ཆེར་འབྱིན་མོད། །འདི་ཉིད་གཅིག་པོ་བཟླས་པས་ཕར་ཕྱིན་དྲུག །ལྷན་ཅིག་དཀའ་བ་མེད་པར་ཡོངས་སུ་རྫོགས། །ལ་ལ་འདི་ལ་ལག་གིས་རེག་བྱེད་ཀྱང༌། །དེ་ཡང་ཕྱིར་མི་ལྡོག་པ་ཐོབ་པར་འགྱུར། །དེ་ཡི་མིང་ཙམ་འཛིན་པའང་དཀོན་པ་སྟེ། །འདི་མིང་ལན་གཅིག་བཟུང་ཡང་རྒྱལ་ཀུན་ལ། །ཡོ་བྱད་ཀུན་གྱིས་རྟག་པར་བསྟབས་པར་འགྱུར། །དེ་ནས་ཆོས་ཀྱི་མཁན་པོ་དེ། །ཅུང་ཟད་སེམས་ཤིང་འདུག་པ་ལས། །སྟེང་གི་མཁའ་ལས་ཡིག་དྲུག་གི །རིག་སྔགས་བྱིན་ཞེས་སྒྲ་བྱུང་ངོ༌། །སྒྲ་འདི་གང་ལས་བྱུང་སེམས་ཚེ། །སླར་ཡང་མཁའ་ལས་རྒྱལ་སྲས་འདིས། །དཀའ་བ་དུ་མས་བརྩོན་བྱས་ཀྱི། །ཡིག་དྲུག་བྱིན་ཞིག་ཞེས་ཐོས་ནས། །སྟེང་གི་མཁའ་ལ་བལྟས་པ་དང༌། །འདམ་བུའི་མདོག་ལྟར་ཀུན་ནས་དཀར། །རལ་པའི་ཅོད་པན་མཛེས་པ་འཆང༌། །ཐམས་ཅད་མཁྱེན་པ་དབུར་བཞག་པ། །ཕྱག་ན་པདྨ་བཟང་པོ་ཐོགས། །པདྨའི་དཔལ་གྱིས་བརྒྱན་བྱས་པ། །དེ་འདྲའི་གཟུགས་བཟང་མཐོང་གྱུར་ནས། །སྤྱན་རས་གཟིགས་ཀྱི་དབང་པོ་ཡིས། །ཡི་གེ་དྲུག་པ་བྱིན་པར་གནང༌། །ཚུར་ཤོག་གུས་པར་བླང་བར་གྱིས། །ཨོཾ་མ་ཎི་པད་མེ་ཧཱུྃ། འདི་ནི་བྱིན་པར་གྱུར་མ་ཐག །ས་ཆེན་གཡོས་ཤིང་རྒྱ་མཚོ་འཁྲུགས། །མོད་དེར་སྒྲིབ་པ་རྣམ་སེལ་གྱིས། །མི་ཟད་པ་ཡི་ཆོས་ཉིད་དང༌། །བྱམས་དང་སྙིང་རྗེ་དགའ་བ་དང༌། །རྣལ་འབྱོར་སྤྱོད་དང་ཐར་པར་འཇོག །ཐམས་ཅད་སྣང་བྱེད་བཀོད་པའི་རྒྱལ། །ཆོས་འཛིན་པ་སོགས་ཏིང་འཛིན་ནི། །མཐའ་ཡས་དུ་མ་ཐོབ་པར་གྱུར། །རིན་ཆེན་བདུན་གྱིས་གླིང་བཞི་ནི། །བཀང་ནས་ཡོན་དུ་དབུལ་རྩོམ་ཚེ། །ཆོས་ཀྱི་མཁན་པོ་དེས་སྨྲས་པ། །འདིས་ནི་ཡི་གེ་གཅིག་ཉིད་ཀྱི། །ཡོན་གྱི་ཆར་ཡང་(ཆ༢༡ན)

[Full Size]

ཡོང་མེད་ན། །དྲུག་གི་ཡོན་ཏུ་ལྟ་ཅི་སྨོས། །འོན་ཀྱང་ང་ནི་ཁྱོད་ཅག་ལས། །ཅི་ཡང་ལེན་པར་འདོད་པ་མེད། །ཁྱོད་ཀྱང་བྱང་ཆུབ་སེམས་དཔའ་སྟེ། །ཁྱོད་ནི་འཕགས་ཀྱིས་མི་འཕགས་མིན། །ཁྱོད་ནི་ང་ཡིས་འདུལ་བྱ་ཉིད། །དེ་ནས་རྒྱལ་སྲས་སྒྲིབ་སེལ་གྱིས། །བརྒྱ་སྟོང་རི་བའི་མུ་ཏིག་གི །ཕྲེང་བ་དེ་ལ་ཕུལ་བ་དང༌། །མཁན་པོ་འདི་ནི་ངའི་ཚིག་གིས། །དེ་བཞིན་གཤེགས་པ་རྫོགས་སངས་རྒྱས། །ཤཱཀྱ་ཐུབ་ལ་ཕུལ་ཞིག་གསུངས། །རྒྱལ་སྲས་སྒྲིབ་པ་རྣམ་སེལ་གྱིས། །ཆོས་སྨྲའི་རྐང་པར་ཕྱག་བྱས་ནས། །དེ་ནི་རྙེད་པའི་དམ་པ་རྙེད། །བསམ་པ་ཡོངས་སུ་རྫོགས་པ་ཡིས། །སྟོན་པའི་སྤྱན་སྔར་གུས་པས་སོང༌། །མཁན་པོའི་ཚིག་གིས་སྐྱེས་ཀྱང་ཕུལ། །སྟོན་པས་ཀུན་ནས་དགའ་བར་མཛད། །དེ་ནས་སྒྲིབ་པ་རྣམ་སེལ་གྱིས། །སྤྱན་རས་གཟིགས་དབང་ལྟར་འཚལ་ཞེས། །གསོལ་ཚེ་ཛེ་ཏའི་ཚལ་འདི་རུ། །ང་ལ་ལྟ་དང་མཆོད་པ་དང༌། །དབང་ཕྱུག་ཆེན་པོ་ལུང་སྟོན་ཕྱིར། །མྱུར་དུ་འོང་བར་འགྱུར་རོ་གསུངས། །དེ་ནས་བདེ་བ་ཅན་གྱིས་ཞིང༌། །སྤྱན་རས་གཟིགས་དབང་བཞུགས་པ་དེས། །འོད་ཟེར་སྣ་ཚོགས་བཀྱེ་བ་ཡིས། །ཛེ་ཏའི་ཚལ་ཀུན་སྣང་བྱས་སྟེ། །ལན་གསུམ་བསྐོར་ནས་འོད་དེ་ནི། །དམྱལ་བའི་གནས་སོང་གསལ་བར་བྱས། །ཛེ་ཏའི་ཚལ་ཀུན་ལྷ་ཡི་གསེར། །ལས་བྱས་བཀོད་པ་མཐའ་ཡས་སྣང༌། །སྐར་ཚོགས་དབུས་ན་ཟླ་བ་ལྟར། །རྒྱལ་སྲས་ཀུན་ལས་ཕུལ་བྱུང་བ། །སྤྱན་རས་གཟིགས་ཀྱི་དབང་པོ་དེ། །སྤྲིན་ཕུང་ནང་ནས་གློག་ཕྲེང་ལྟར། །སྐད་ཅིག་ཙམ་གྱིས་དེར་འོངས་སྟེ། །སྟོན་པའི་འོད་ཟེར་མ་གཏོགས་པ། །འོད་གཞན་ཐམས་ཅད་ཟིལ་གྱིས་མནན། །བསྟོད་ཅིང་ཕྱག་འཚལ་གཡས་སུ་བསྐོར། །སྟོན་པས་བཀའ་བསྩལ་རིགས་གྱིས་བུ། །ངལ་ལམ་ཆད་དམ་ཉོན་མོངས་སམ། །འགྲོ་མང་ཡོངས་སུ་སྨིན་བྱས་སམ། །དེས་ཀྱང་བདག་གིས་སེམས་ཅན་རྣམས། །སྨིན་པར་བྱེད་པའི་ལས་བསྒྲུབས་སོ། །ཞེས་གསོལ་སླར་ཡང་ལེགས་སོ་ཞེས། །རྒྱལ་བས་དབུགས་འབྱིན་དམ་པ་མཛད། །དེས་ཀྱང་གསེར་(ཆ༢༡བ)

[Full Size]

གྱི་པདྨ་མཆོག །དེ་བཞིན་གཤེགས་ལ་ཕུལ་ནས་ནི། །སངས་རྒྱས་སྣང་བ་མཐའ་ཡས་ཀྱིས། །མེ་ཏོག་འདི་དག་སྐྱེས་སུ་བསྐུར། །སྐུར་གསོལ་གསུང་བར་མཛད་ཅེས་གསོལ། །སྟོན་པས་ཕྱག་གིས་བཞེས་ནས་ནི། །སྐུ་ཡི་གཡོན་ལོགས་སུ་བཞག་གོ །དེ་ནས་དབང་ཕྱུག་ཆེན་པོ་ཡིས། །སྟོན་པའི་ཞབས་ལ་ཕྱག་འཚལ་ནས། །བྱང་ཆུབ་ལུང་བསྟན་སྩོལ་ཞེས་གསོལ། །སྟོན་པའི་ཞལ་ནས་སྤྱན་རས་གཟིགས། །འདི་ཡིས་ཁྱོད་ལ་ལུང་སྟོན་འགྱུར། །ཞེས་གསུང་དབང་ཕྱུག་ཆེན་པོ་ཡིས། །འཕགས་པའི་ཞབས་ལ་མགོས་བཏུད་ནས། །སྤྱན་རས་གཟིགས་ཀྱི་དབང་པོ་དམ་པ་དབང་ཕྱུག་ཆེན་པོ་ཆོས་འཛིན་ལ། །པདྨའི་ཞབས་མངའ་པདྨ་ལ་དགྱེས་ཕྱག་ན་པདྨ་བཟང་པོ་མངའ། །པདྨའི་དཔལ་དང་ལྡན་པ་ཡོངས་སུ་བསྐོར་བ་འགྲོ་བའི་དབུགས་འབྱིན་མཛད། །ས་ཡི་སྤྱན་མཆོག་མཛད་པ་ཚིམ་པར་མཛད་ལ་གུས་པས་ཕྱག་འཚལ་ལོ། །སྤྱན་རས་གཟིགས་ཀྱི་དབང་པོས་བཀའ་བསྩལ་པ། །ཁྱོད་ནི་འཇིག་རྟེན་ཆེ་བ་ཞེས་བྱ་བར། །རྫོགས་པའི་སངས་རྒྱས་ལྷ་མིའི་སྟོན་པ་ནི། །དབང་ཕྱུག་ཞེས་བྱར་རྫོགས་འཚང་རྒྱ་བར་འགྱུར། །དེ་ནས་ལྷ་མོ་ཨུ་མ་ཡོང་ནས་ནི། །ཞབས་ལ་ཕྱག་འཚལ་བསྟོད་པས་བསྟོད་པར་བརྩོན། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་མཆོག །སྲོག་སྦྱིན་མཛད་པ་ས་ཡི་སྤྱན་མཆོག་ལྡན་པ་པདྨ་བཟང་པོ་མངའ། །པདྨའི་དཔལ་དང་ལྡན་པས་ཡོངས་སུ་བསྐོར་བ་མྱང་འདས་ས་སྟོན་པ། །ལེགས་པར་དགང་བར་མཛད་པ་ཆོས་སྦྱིན་པ་ལ་གུས་པས་ཕྱག་འཚལ་ལོ། །བུད་མེད་དམད་པའི་ལུས་ལས་ཡོངས་སུ་ཐར་བར་མཛོད། །མངལ་ན་གནས་ཅིང་ཤ་མས་གང་བའི་སྡུག་བསྔལ་དང༌། །རྟག་དུ་འཛིན་པ་ལས་ནི་བདག་ཡོངས་ཐར་བར་མཛོད། །བླ་མེད་བྱང་ཆུབ་མཆོག་ཏུ་(ཆ༢༢ན)

[Full Size]

དབུགས་འབྱིན་མཛད་དུ་གསོལ། །སྤྱན་རས་གཟིགས་ཀྱི་དབང་པོས་བཀའ་བསྩལ་པ། །སྲིང་མོ་ཁྱོད་ནི་འཇིག་རྟེན་གངས་རི་ཡི། །གཡས་ལོགས་ཕྱོགས་སུ་ཨུ་མའི་དབང་ཕྱུག་ཅེས། །མངོན་པར་རྫོགས་འཚང་རྒྱ་ཞེས་ལུང་བསྟན་ཏོ། །སྟོན་པའི་ཞལ་ནས་སྒྲིབ་པ་རྣམ་སེལ་ལྟོས། །སྤྱན་རས་གཟིགས་འདིས་འདི་རྣམས་ལུང་བསྟན་སྟེ། །དབང་ཕྱུག་ཆེན་པོའི་ལེའུ་འདི་བཤད་ཏོ། །སྒྲིབ་སེལ་དགའ་ཞིང་རངས་པ་ཡིས། །སྟོན་པའི་གཙོ་ལ་འདི་སྐད་གསོལ། །སྤྱན་རས་གཟིགས་དབང་མཐོང་བ་ཡིས། །ལོང་བ་ཡིས་ནི་མིག་ཐོབ་ལྟར། །དེ་རིང་བདག་གསོན་འབྲས་བུ་མཆིས། །བསམ་གྲུབ་བསམ་རྫོགས་བྱང་ཆུབ་ཀྱི། །ལམ་ལ་བར་ཆད་མེད་པར་གྱུར། །ལེགས་པར་དགོངས་པ་ཆོས་ཀྱི་སྐུ། །མྱ་ངན་འདས་པ་ད་སྟོན་ཏོ། །སྤྱན་རས་གཟིགས་ཀྱི་ཡོན་ཏན་ཚོགས། །སླར་ཡང་ཉན་པར་འཚལ་ལོ་ཞེས། །སྟོན་པའི་སྤྱན་སྔར་གསོལ་བར་གྱུར། །རྒྱལ་བས་བཀའ་བསྩལ་དཔེར་ན་རི་རྒྱལ་ཁོར་ཡུག་དང༌། །ཁོར་ཡུག་ཆེ་དང་མུཉྩི་ལི་ང་ནག་པོ་ཆེ། །གསུས་གཞོལ་མི་སྟོན་ཀུན་དུ་གཏོགས་དང་འབར་བའི་ཁ། །རྩེ་མོ་བརྒྱ་པ་ཁང་པའི་རི་དང་ནོར་བུ་ཆེ། །སྟོན་པའི་རི་དང་དུས་མ་ཡིན་པར་སྟོན་པ་སོགས། །རི་རྒྱལ་དེ་ཀུན་སྲང་གཅིག་ལ་ནི་ཚད་གཞལ་ན། །སྲང་གི་གྲངས་དེ་མ་ལུས་ང་ཡིས་གཞལ་ནུས་ཀྱིས། །སྤྱན་རས་གཟིགས་དབང་བསོད་ནམས་ཕུང་པོ་བགྲང་མི་ནུས། །ཕྲ་རབ་རྡུལ་ཚད་བཟུང་ནུས་རྒྱ་མཚོ་ཐིགས་པས་དྲོངས། །ཤྲི་ཤའི་ཚལ་གྱི་འདབ་མ་རེ་རེ་ནས་བགྲང་ནུས། །སྤྱན་རས་གཟིགས་དབང་བསོད་ནམས་ཚོགས་ནི་བགྲང་མི་ནུས། །གླིང་བཞིའི་མི་ཀུན་ཡིག་མཁན་གྱུར་པས་རི་རབ་ནི། །གྲོ་གའི་ཕུང་པོར་གྱུར་ལ་རྒྱ་མཚོ་མཆིང་ནམ་ཆེ། །གནག་ཚར་བྱས་པས་ཟད་པའི་བར་དུ་བྲིས་བྱས་པའི། །(ཆ༢༢བ)

[Full Size]

ཡིག་འབྲུ་རེ་རེ་ནས་ནི་ང་ཡིས་བགྲང་ནུས་མོད། །རྒྱལ་སྲས་འདི་ཡི་བསོད་ནམས་ཚད་ནི་ཟིན་མ་ཡིན། །དེ་བཞིན་གཤེགས་པ་གངྒའི་བྱེ་སྙེད་བཅུ་གཉིས་ལ། །ཡོ་བྱད་ཀུན་གྱིས་བསྐལ་མང་མཆོད་པའི་བསོད་ནམས་དེ། །སྤྱན་རས་གཟིགས་ཀྱི་དབང་པོའི་སྐྲ་རྩེ་གཅིག་ལ་གནས། །རྒྱལ་སྲས་འདི་ནི་ཏིང་འཛིན་བརྒྱ་ཕྲག་མང་ལྡན་སྟེ། །རབ་འཇོམས་རྒྱན་བྱེད་རྒྱན་མི་བྱེད་དང་གློག་གི་སྦྱིན། །བཟོད་བྱེད་གཟི་ཆེན་རྣམ་བྱེད་རྡོ་རྗེའི་ཕྲེང་མཆོག་སྦྱིན། །མཐུ་བརྒྱ་བཀོད་པ་མཐའ་ཡས་སྤོབས་པའི་ཕུང་པོ་དང༌། །རྒྱལ་དབང་རྣམ་མང་རྡོ་རྗེའི་སྒོ་དང་རྟག་མཆོག་སྦྱིན། །དབང་ཡོངས་ཐར་བྱེད་ཞེ་སྡང་ཡོངས་ཐར་དབང་མཆོག་མིག །ཉིན་བྱེད་མཆོག་སྤྱན་ཆོས་མངོན་དང་ནི་རྡོ་རྗེའི་མངལ། །ཤིན་དུ་སྟོན་པ་མྱ་ངན་འདའ་བྱེད་འོད་མཐའ་ཡས། །རྣལ་འབྱོར་བྱེད་དང་འཐོར་བ་འཛམ་གླིང་དག་པའི་མིག །རྒྱལ་ཞིང་མཆོག་སྤྱན་བྱམས་དང་འགྲོ་གནས་མི་ཟད་བྱེད། །མནར་མེད་སྐེམ་དང་རྒྱ་མཚོ་ལྟར་ཟབ་འཁོར་བརྒྱ་པ། །དེ་སོགས་ཏིང་འཛིན་གཞན་ཡང་བརྒྱ་སྟོང་མང་ལྡན་ཉིད། །སྔོན་ཚེ་རྒྱལ་བ་ལོག་པར་དད་སེལ་བྱུང་བའི་དུས། །ང་ནི་བྱང་ཆུབ་སེམས་དཔར་གྱུར་པས་རྒྱལ་དེ་ལས། །སྤྱན་རས་གཟིགས་ཀྱི་ཡོན་ཏན་བརྗོད་པ་དེ་ལྟ་ཐོས། །བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་དང༌། །འདི་འདྲའི་ཚུལ་དུ་ཏིང་ངེ་འཛིན་གྱིས་འགྱེད་པའང་མཐོང༌། །གང་ཚེ་ཀུན་བཟང་རྡོ་རྗེ་གྱེན་འཕགས་ཏིང་འཛིན་ཞུགས། །དེ་ཚེ་སྤྱན་རས་གཟིགས་དབང་མཐོང་བའི་ཏིང་འཛིན་འཇུག །ཀུན་བཟང་ཟླ་བ་མཆོག་ཅན་ཏིང་འཛིན་ལ་ཞུགས་ཚེ། །སྤྱན་རས་གཟིགས་དབང་ཉི་མ་དམ་པའི་སྤྱན་ལ་འཇུག །གང་ཚེ་ཀུན་བཟང་བྱུག་པའི་ཏིང་ངེ་འཛིན་ཞུགས་ཚེ། །སྤྱན་རས་གཟིགས་དབང་ནམ་མཁའི་འཛོད་ལ་སྙོམས་པར་འཇུག །ཀུན་དུ་བཟང་པོ་རྣམ་པར་བྱེད་ལ་སྙོམས་འཇུག་ཚེ། །སྤྱན་རས་གཟིགས་ཀྱི་དབང་ཕྱུག་(ཆ༢༣ན)

[Full Size]

རྡོ་རྗེའི་ལྕགས་ཀྱུར་གནས། །གང་ཚེ་ཀུན་བཟང་བཟང་པོའི་འགྲོས་ལ་སྙོམས་ཞུགས་ཚེ། །སྤྱན་རས་གཟིགས་དབང་རྒྱ་མཚོ་ལྟར་ཟབ་ཏིང་འཛིན་གནས། །ཀུན་དུ་བཟང་པོ་སེང་གེའི་གླལ་གྱིས་རྩེ་བའི་ཚེ། །སྤྱན་རས་གཟིགས་དབང་སེང་གེ་རྣམ་རོལ་གྱིས་ཟིལ་གནོན། །ཀུན་བཟང་མཆོག་སྦྱིན་ཏིང་ངེ་འཛིན་ལ་མཉམ་བཞག་ཚེ། །སྤྱན་རས་གཟིགས་དབང་མནར་མེད་སྐེམ་པའི་ཏིང་འཛིན་བྱེད། །ཀུན་དུ་བཟང་པོ་བ་སྤུའི་ཁུང་བུ་ཀུན་འབྱེད་ཚེ། །སྤྱན་རས་གཟིགས་དབང་སྤུ་ཁུང་མ་ལུས་འབྱེད་པར་བྱེད། །དེ་ནས་ཀུན་དུ་བཟང་པོ་ངོ་མཚར་ཐོབ་གྱུར་སྟེ། །སྤྱན་རས་གཟིགས་དབང་ཁྱོད་ཀྱི་སྤོབས་པ་ཕུལ་བྱུང་བ། །དེ་ལྟ་ལེགས་སོ་ལེགས་སོ་ཞེས་སྨྲས་སངས་རྒྱས་དེས། །ཀུན་བཟང་ཁྱོད་ཀྱིས་སྤྱན་རས་གཟིགས་དབང་སྤོབས་པ་ནི། །ཅུང་ཟད་ཙམ་ཞིག་མཐོང་དུ་ཟད་དེ་རྒྱལ་སྲས་འདིའི། །སྤོབས་པ་ཅི་འདྲ་དེ་འདྲ་དེ་བཞིན་གཤེགས་ལའང་མེད། །དེ་སྐད་སངས་རྒྱས་དེ་ལས་ང་ཡིས་ཡོངས་སུ་ཐོས། །དེ་ལྟར་ཡོན་ཏན་རྒྱ་ཆེན་བཀའ་བསྩལ་ནས། །མདོ་འདི་ཡོངས་སུ་གཏད་པར་བྱ་བའི་ཕྱིར། །སུ་ཞིག་ཐེག་ཆེན་མདོ་སྡེ་ཟ་མ་ཏོག །བཀོད་པའི་རྒྱལ་པོ་འདི་ཡི་མིང་ཐོས་ཀྱང༌། །དེ་དག་སྔོན་གྱི་ལས་ཀྱི་སྒྲིབ་པ་འབྱང༌། །མཚམས་མེད་ལྔ་སོགས་དམད་པའི་ལས་བྱེད་པའི། །སྡིག་ཅན་རྣམས་ཀྱང་མདོ་སྡེ་འདི་འཛིན་ན། །མི་ཟད་སྡིག་པ་ཀུན་ལས་ཡོངས་སུ་ཐར། །འདི་ན་རི་རབ་རི་ཡི་རྒྱལ་པོའི་གཡས་ངོས་ན། །སྔོན་གྱིས་བདེ་གཤེགས་དྲུག་གིས་དྲི་མ་མེད་པ་ཡི། །མཐར་རུ་(ཆ༢༣བ)

[Full Size]

བརྟགས་པ་ཡོད་སྟེ་ད་ལྟར་ངས་ཀྱང་བརྟགས། །གང་ཞིག་གོས་དཀར་ཁ་དོག་སྔོན་པོར་འགྱུར་བ་དང༌། །སྔོན་པོའི་གོས་ནི་ཁ་དོག་དཀར་པོར་འགྱུར་བའོ། །དེ་ལས་སྔ་མ་ཤོས་ནི་སྡིག་པའི་ཕུང་པོ་སྟེ། །ཕྱི་མ་ཤོས་ནི་ཆོས་ཀྱི་ཕུང་པོར་བལྟ་བར་བྱ། །དེ་བཞིན་མདོ་སྡེ་རྒྱལ་པོ་ཟ་མ་ཏོག་བཀོད་འདིས། །སྡིག་པའི་ཕུང་པོ་ཐམས་ཅད་སྲེག་ཞིང་དཀར་པོར་བྱེད། །དབྱར་དུས་ཙ་དང་ནགས་ཚལ་ཤིན་དུ་སྔོ་གྱུར་པ། །དེ་ཚེ་ཁ་བརྒྱ་པ་ཞེས་ཀླུ་ཡི་རྒྱལ་པོ་ཅིག །གནས་ནས་ལངས་སྟེ་དེ་དག་ཐམས་ཅད་སྲེག་པར་བྱེད། །དེ་བཞིན་མདོ་འདི་སྡིག་པའི་ནགས་ཚལ་སྲེག་བྱེད་ཡིན། །མདོ་སྡེ་འདི་ཐོས་སེམས་ཅན་དེ་དག་བདེ་དང་ལྡན། །དེ་ཀུན་སོ་སོའི་སྐྱེ་བོ་མིན་པར་རིག་པར་བྱ། །བྱང་ཆུབ་སེམས་དཔའ་ཕྱིར་མི་ལྡོག་དང་འདྲ་བར་ལྟོས། །འཆི་བའི་ཚེ་ན་སངས་རྒྱས་བཅུ་གཅིག་མངོན་གཤེགས་སྟེ། །མ་འཇིགས་མ་འཇིགས་ཁྱོད་ཀྱིས་མདོ་སྡེའི་རྒྱལ་པོ་ཐོས། །སླན་ཆད་མི་འཁོར་སྐྱེ་རྒ་ན་འཆི་མཐོང་མི་འགྱུར། །མི་སྡུག་མི་འཕྲད་སྡུག་ཅིང་འདོད་པ་མཐོང་བར་འགྱུར། །རིགས་ཀྱི་བུ་ཁྱོད་བདེ་བ་ཅན་གྱིས་ཞིང་དུ་སོང༌། །བདེ་གཤེགས་སྣང་མཐའ་ཡས་ལས་དམ་ཆོས་ཐོས་འགྱུར་ཞེས། །དབུགས་འབྱིན་མཛད་མཐོང་དེ་དག་བདེ་ནས་བདེ་བར་འགྲོ། །བཀའ་ཆེམས་ཁ་ཅིག་ལས་སྤྱན་རས་གཟིགས་ཛེ་ཏའི་ཚལ་ཏུ་འོངས་ནས་སྟོན་པ་མྱ་ངན་ལས་མི་འདའ་བར་གསོལ་བ་བཏབ་པའི་ཚེ་ངའི་གདུལ་བྱ་རྫོགས་སོ་ཞེས་གསུང་བ་ན་ད་དུང་ཁ་བ་ཅན་གྱི་སེམས་(ཆ༢༤ན)

[Full Size]

ཅན་མ་ཐུལ་ལོ། །ཞེས་ཞུས་པས་དེ་ནི་ཁྱོད་ཀྱིས་གདུལ་བར་བྱ་བ་ཡིན་ནོ་ཞེས་ཁ་བ་ཅན་དུས་དེར་གཏད་པར་ཡང་གསུངས་སོ། །དེ་ལྟར་རྒྱལ་དང་རྒྱལ་སྲས་ཀུན་གྱི་བླ། །སྤྱན་རས་གཟིགས་ཀྱི་དབང་པོའི་རྒྱལ་པོ་དེས། །བོད་ཡུལ་འདི་ནི་ཐུགས་རྗེས་བདག་གིར་མཛད། །ཡུལ་འདིའི་འགྲོ་རྣམས་ལོངས་སྤྱོད་དམན་ན་ཡང༌། །ལྷ་སྐལ་ཐུགས་རྗེ་ཆེན་པོ་སྤྱན་རས་གཟིགས། །ཆོས་སྐལ་སྙིང་པོ་ཡི་གེ་དྲུག་མ་སྟེ། །དེ་ཕྱིར་ཡུལ་གྲུ་གཞན་ལས་ཁྱད་པར་འཕགས། །བོད་ཡུལ་དུ་ཆོས་བྱུང་ཚུལ་གྱི་སྐབས་ལས་ཟ་མ་ཏོག་བཀོད་པའི་མདོ་ལས་བྱུང་བའི་འཕགས་པ་སྤྱན་རས་གཟིགས་ཀྱི་རྣམ་པར་ཐར་པ་ཕྱོགས་ཙམ་དང་དེས་བོད་ཡུལ་ཇི་ལྟར་བདག་གིར་མཛད་པའི་ཚུལ་བཀའ་ཆེམས་ལྟར་བསྟན་པའི་སྐབས་སྟེ་དང་པོའོ།། །།སྭ་སྟི། ལྗོན་ཤིང་ངོས་ལ་སྤྲུལ་པའི་གཟུགས་འཆར་འདི། །རིག་པའི་འབྱུང་གནས་གཉལ་གྱི་སྒང་རྒྱུད་ནས། །རིག་བྱེད་པ་ནི་ཚེ་དབང་དར་པོས་གཙོས། །དཔོན་སློབ་དགུ་ཡིས་ལེགས་པར་བཟབས་སྟེ་བརྐོས། །མཐུན་རྐྱེན་ཕུན་སུམ་ཚོགས་པའི་སྦྱིན་བདག་ནི། །བྱ་ཡུལ་དཔོན་ས་ཚོགས་གཉིས་གྲུབ་མས་མཛད། །དགེ་ཚོགས་མ་ལུས་བྱང་ཆུབ་འཐོབ་ཕྱིར་སྔོ།། །།

བོད་ཀྱི་རྒྱལ་རབས།

[Full Size]

ཆོས་བྱུང་མཁས་པའི་དགའ་སྟོན་གྱི་ཡན་ལག་གསུམ་པ་བོད་ཀྱི་སྐབས་ལ་ལེའུ་བཅུ་ལས་སྐབས་གཉིས་པ་བོད་ཀྱི་རྒྱལ་རབས་བཞུགས། །

[Full Size]

ན་མོ་ལོ་ཀེ་ཤྭ་ར་ཡ། །དེ་ལྟར་རྒྱལ་དང་རྒྱལ་སྲས་མ་ལུས་ལས། །ཐུགས་རྗེ་རྨད་བྱུང་སྤྱན་རས་གཟིགས་དབང་དེས། །མཐའ་འཁོབ་བོད་ཁམས་འདུལ་བའི་ཁུར་བསྣམས་སྟེ། །ཁ་བ་ཅན་གྱི་རྒྱལ་ཁམས་འདིར་བྱོན་ཚེ། །སྟོད་ཀྱི་མངའ་རིས་བསྐོར་གསུམ་རྫིང་གི་ཚུལ། །བར་དུ་དབུས་གཙང་རུ་བཞི་ཡུར་བ་འདྲ། །སྨད་དུ་མདོ་ཁམས་སྒང་གསུམ་ཞིང་ལྟ་བུ། །ཀུན་ཀྱང་ཆུ་ཡི་རྒྱ་མཚོར་གྱུར་བའི་ནང༌། །མཐའ་ཡས་སྲོག་ཆགས་སྡུག་སྔལ་སྤྱོད་པར་གཟིགས། །ཀུན་ལ་ཡི་གེ་དྲུག་པའི་ཆོས་བསྟན་ནས། །མ་འོངས་གདུལ་བྱར་འགྱུར་བར་བྱིན་གྱིས་བརླབས། །དེ་ནས་ཁ་བ་ཅན་གྱི་ཡུལ་གྱི་དབུས། །དབུ་རུ་ཤོད་ཆེན་དམར་པོའི་རི་རྩེར་བྱོན། །མཐིལ་ཀུན་ཆུས་གང་ངན་སོང་འགྲོ་མང་གནས། །ལོགས་ཀུན་མུན་པ་སྲོས་འདྲའི་ནགས་ཚལ་སྟུག །ཁྲོ་གཏུམ་གཅན་གཟན་སྣ་ཚོགས་གསོད་གཅོད་བྱེད། །ཁྱད་པར་འོ་ཐང་མཚོ་ནི་མནར་མེད་ཀྱི། །དམྱལ་བའི་སྒོར་གཟིགས་སྡུག་བསྔལ་བཟོད་ཐབས་མེད། །རང་བྱས་ལས་ཀྱི་འབྲས་བུ་སྤྱོད་གཟིགས་པས། །ཐུགས་རྗེའི་ཤུགས་དྲག་མི་བཟོད་རབ་ཏུ་གཡོས། །པད་མ་ལྟ་བུའི་སྤྱན་རས་གཡས་གཡོན་ལས། །སྤྱན་ཆབ་བདུད་རྩིའི་ཐིགས་པ་རེ་རེ་ལྷགས། །ཇོ་མོ་ཁྲོ་གཉེར་ཅན་དང་སྒྲོལ་མར་གྱུར། །བུ་ཁྱོད་མཐའ་འཁོབ་འགྲོ་རྣམས་འདུལ་བ་ལ། །སྒྱིད་ལུག་སྡུག་བསྔལ་ལྡན་པར་མ་བྱེད་ཅིག །ཁོ་མོ་གཉིས་ཀྱིས་འགྲོ་དོན་གྲོགས་བྱེད་ཅེས། །(ཇ༢ན)

[Full Size]

གསུང་སྟེ་སྤྱན་འབྲས་སོ་སོ་ཉིད་ལ་ཐིམ། །དེ་ནས་དམྱལ་མཚོའི་དབུས་སུ་བྱོན་ནས་ནི། །ཡི་གེ་དྲུག་པའི་ཆོས་བཤད་ཚད་མེད་པའི། །སྙིང་རྗེས་བདེན་ཚིག་སྨོན་ལམ་འདི་སྐད་བཏབ། །ཐོག་མེད་དུས་ནས་ལས་ངན་བསགས་པའི་མཐུས། །གཏིང་མཐའ་མེད་པའི་དམྱལ་བ་ཆེན་པོ་འདིར། །བཟོད་དཀའི་སྡུག་བསྔལ་བྱེ་བས་གཙེས་པ་རྣམས། །རྣམ་གྲོལ་ཐར་པའི་གླིང་ལ་འཁོད་པར་ཤོག །དུག་མཚོ་འཁོལ་མའི་ནང་དུ་འཚེད་བྱེད་ཅིང༌། །དམྱལ་བའི་མེ་ཡིས་རྟག་དུ་བསྲེགས་པ་ཡིས། །སྐྱབས་མེད་ཉམ་ཐག་སྨྲེ་སྔགས་འདོན་པ་རྣམས། །ཕན་བདེའི་ཆར་གྱིས་རྟག་དུ་བསིལ་བར་ཤོག །ཚ་གྲང་བཀྲེས་སྐོམ་དུ་ཁས་གཟིར་བ་ཡི། །ཁྲི་ཕྲག་དཔག་མེད་མཚོ་འདིར་གནས་པ་རྣམས། །ལུས་འདི་བོར་ནས་བདག་གི་ཞིང་ཁམས་སུ། །རིགས་བཟང་ཆོས་ལྡན་རྣམས་སུ་སྐྱེ་བར་ཤོག །ཨོཾ་མ་ཎི་པདྨེ་ཧཱུྃ། ཞེས་གསུངས་མཐའ་ཡས་འོད་ཟེར་བཀྱེ་བ་ཡིས། །དམྱལ་བའི་སེམས་ཅན་དེ་རྣམས་སྡུག་བསྔལ་ཞི། །བདེ་བས་རྒྱུད་བརླན་ཐར་པའི་ལམ་འཁོད་གྱུར། །མཚོ་དེ་འཁོལ་བ་ཞི་ཞིང་རབ་ཏུ་བསིལ། །ཀོང་གི་ཆུ་བརླག་ཞེས་བྱའི་ཟོམས་བྱེ་བས། །རུ་བཞི་ཆུ་ཡིས་གང་བ་དེ་རུ་ཐིམ། །ཆུ་གཞན་དག་ཀྱང་དེ་ལྟར་ཐིམ་པ་ཡིས། །བོད་ཁམས་ཡུལ་གྱི་རྣམ་པ་གསལ་པོར་དོད། །མངའ་རིས་སྐོར་གསུམ་ཤ་རྐྱང་རི་དྭགས་གླིང༌། །བར་གྱི་རུ་བཞི་སྟག་གཟིག་གཅན་གཟན་གླིང༌། །སྨད་ཀྱི་སྒང་དྲུག་འདབ་ཆགས་བྱ་ཡི་གླིང༌། །ཀུན་ལ་ཆོས་བསྟན་དཔག་མེད་སྨིན་གྲོལ་མཛད། །དེ་ལྟར་དུས་རིང་མཐའ་ཡས་རྒྱུན་མི་འཆད། །སྣ་ཚོགས་ཐབས་ཚུལ་བགྲང་བར་མི་ནུས་པས། །མཐའ་ཡས་འགྲོ་རྣམས་སྨིན་གྲོལ་མཛད་པ་ཡིས། །དུབ་པ་བསལ་ཕྱིར་འཛམ་གླིང་ལྷོ་ཡི་ཕྱོགས། །པོ་ཊ་ལ་ཞེས་གྲུ་འཛིན་རི་བོའི་སྤོར། །སེམས་ཉིད་ངལ་གསོའི་ཏིང་འཛིན་མཛད་པར་གྱུར། །དེ་ལས་བཞེངས་ནས་(ཇ༢བ)

[Full Size]

ཁམས་གསུམ་སེམས་ཅན་དང༌། །ཁྱད་པར་ཁ་བ་ཅན་པ་ལ་གཟིགས་པས། །སེམས་ཅན་བྱེ་བ་ཁྲག་ཁྲིག་བརྒྱ་སྟོང་གི །ཆ་ཤས་ཙམ་ཡང་གྲོལ་བར་མ་གྱུར་ཞིང༌། །ཁྱད་པར་མ་རུངས་རྒྱུད་རྩུབ་གདུལ་དཀའ་བ། །རྙིགས་ལས་རབ་ཏུ་རྙིགས་མར་གྱུར་གཟིགས་ནས། །ཞི་བདེའི་བསམ་པ་སྐད་ཅིག་སྐྱེས་པའི་མོད། །སྔོན་གྱི་དམ་བཅས་དམོད་པ་བོར་བ་ཡིས། །དབུ་ནི་ཚལ་པ་བཅུ་རུ་གས་ཅིང་གྱེས། །སྐུ་ལུས་དུམ་བུ་སྟོང་དུ་བྱེ་བར་གྱུར། །འོད་དཔག་མེད་མགོན་སྐད་ཅིག་གིས་བྱོན་ནས། །དབུ་དང་སྐུ་ལུས་ཞིག་ཞིང་བྱེ་བ་རྣམས། །ཆུན་པོར་ཕྱག་གིས་བཅིངས་ནས་འདི་སྐད་གསུང༌། །ཆོས་རྣམས་ཐམས་ཅད་རྐྱེན་བཞིན་སྟེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་ལྟ་ཉིད་ཏུ་འགྱུར། །གང་གི་སྨོན་ལམ་མཐུ་བཙན་པས། །སངས་རྒྱས་ཀུན་གྱི་རབ་ཏུ་བསྔགས། །བདེན་པ་དེ་ཡིས་སྐད་ཅིག་ལ། །ངེས་པ་ཉིད་ཏུ་འབྱུང་བར་འགྱུར། །རིགས་ཀྱི་བུ་ཁྱོད་སྡུག་བསྔལ་མ་བྱེད་ཅིག །ཁྱོད་ཀྱི་དབུ་ནི་ཚལ་པ་བཅུར་གས་པ། །འདི་ནི་ཞལ་རས་བཅུ་རུ་བྱིན་གྱིས་བརླབ། །ཁྱོད་ལུས་རྣམ་པ་སྟོང་དུ་བྱེ་བ་ནི། །ཕྱག་སྟོང་སྤྱན་སྟོང་ལྡན་པར་བྱིན་གྱིས་བརླབ། །སླར་ཡང་འགྲོ་དོན་སྙིང་སྟོབས་སྐྱེད་ཅིག་གསུང༌། །དེ་ཚེ་ཕྱོགས་བཅུའི་རྒྱལ་སྲས་ཀུན་འདུས་ནས། །ཞལ་རས་བཅུ་པོ་ཕ་རོལ་ཕྱིན་པ་བཅུ། །བཅུ་གཅིག་དབུ་ལ་འོད་དཔག་མེད་པ་བཞུགས། །ཞི་རྒྱས་དབང་དྲག་ལས་རྣམས་ཀུན་མཛད་པ། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ཕྱག་སྟོང་འཁོར་ལོས་བསྒྱུར་བའི་རྒྱལ་པོ་སྟོང༌། །སྤྱན་སྟོང་བསྐལ་པ་བཟང་པོའི་སངས་རྒྱས་སྟོང༌། །གང་ལ་གང་འདུལ་དེ་ལ་དེར་སྟོན་པའི། །བཙུན་པ་སྤྱན་རས་གཟིགས་ལ་ཕྱགས་འཚལ་ལོ། །དུས་གསུམ་སངས་རྒྱས་ཀུན་གྱིས་རབ་ཏུ་བསྔགས། །མཐའ་འཁོབ་འདུལ་བར་རྒྱལ་བས་ལུང་(ཇ༣ན)

[Full Size]

བསྟན་ནས། །གང་ལ་གང་འདུལ་འགྲོ་བའི་དོན་མཛད་པ། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ཞེས་བསྟོད་མཆོད་ཅིང་ཤིས་པ་མཛད་པར་གྱུར། །བོད་ཁམས་ཡུལ་དུ་རུང་བར་གྱུར་ནས་ཀྱང༌། །དང་པོར་མི་མ་ཡིན་གྱི་ཡུལ་དུ་གྱུར། །གནོད་སྦྱིན་ལ་སོགས་བཅུ་ཡིས་དབང་བྱས་སྐད། །ལོ་རྒྱུས་ཆེན་མོ་སོགས་ལས། དང་པོར་གནོད་སྦྱིན་ནག་པོས་དབང་བྱས་སྟེ། །ཡུལ་གྱི་མིང་ཡང་བཟང་ཡུལ་རྒྱན་མེད་ཟེར། །མཚོན་ཆ་མདའ་གཞུ་དེ་ཡི་དུས་སུ་བྱུང༌། །དེ་ནས་རེ་སྟེ་མགོ་གཡག་བདུད་ཀྱིས་བྱས། །མིང་ཡང་བདུད་ཡུལ་ཁ་རག་རོང་དགུར་བཏགས། །སྟ་རེ་དགྲ་སྟ་དེ་ཡི་དུས་སུ་བྱུང༌། །དེ་ནས་སྲིན་པོ་གཉའ་རེངས་ཁྲག་མིག་བྱས། །ཡུལ་མིང་སྲིན་པོ་ནག་པོ་དགུ་ཡུལ་ཟེར། །སྲིན་མོ་རྐང་དང་རྒྱོགས་གཉིས་ལག་ཆར་བྱུང༌། །བཞི་པ་དམར་འཇམ་ལྷ་ཡིས་དབང་བྱས་སྟེ། །ལྷ་ཡུལ་གུང་ཐང་ལག་ཆར་ཆུ་གྲི་བྱུང༌། །ལྔ་པར་རྨུ་རྒྱལ་ཁོ་རྗེ་ཞེས་བྱས་བཟུང༌། །ད་འཕྲང་ཅང་འཕྲང་ལག་ཆར་ཞགས་པ་འཕེན། །དྲུག་པར་ཀྲོག་ཀྲོག་འདྲེ་ཡིས་དབང་བྱས་སྟེ། །ལང་ཏང་ལིང་ཏང་བེར་ཁ་འུར་རྡོ་འཕེན། །བདུན་པ་མ་སངས་རུས་དགུས་དབང་བྱས་སྟེ། །གཉའ་གཡའ་སྤང་སྐྱེ། ༡ གར་ཏིང་ནམ་ཚ། ༢ གླེ་ངན་ལམ་ཙང་སྐྱེས། ༣ རུ་ཐོ་གར་སྐྱེས། ༤ ཤེ་དོ་ཀེར་ཏིང་ནས། ༥ མེ་པདྨ་སྐྱེས། ༦ གསང་གེ་འཕྲུལ་པོ་ཆེ། ༧ དྲང་བ་དྲངས་མ་མགུར། ༨ བཀོད་སྟོར་ནམ་ཚ། ༩ ཡུལ་གྱི་མིང་ནི་བོད་ཁ་ཉ་དྲུག་ཟེར། །ལག་ཆར་དོང་རལ་གོ་ཆ་ཕུབ་ཆུང་བྱུང༌། །བརྒྱད་པ་ཀླུས་བཟུང་བོད་ཁམས་གླིང་དགུ་བཏགས། །དགུ་པ་རྒྱལ་པོས་དབང་བྱས་ངམ་པོ་ཅེ། །བཅུ་པོ་འགོང་པོ་དཔུན་དགུས་དབང་བྱས་སྟེ། །ཡུལ་གྱི་མིང་ཡང་སྟོང་སྡེ་བཅོ་བརྒྱད་ཟེར། །ཞེས་གྲག་གོ །དེ་ནས་མི་ཡི་འགྲོ་བ་བྱུང་ཚུལ་ནི། །ཐུགས་རྗེའི་དབང་ཕྱུག་སྤྱན་རས་གཟིགས་དབང་དེས། །བོད་ཡུལ་ཡི་དྭགས་དུད་འགྲོའི་འགྲོ་བ་ཀུན། །མི་ལུས་ཐོབ་ཏུ་རུང་བའི་དུས་གཟིགས་ནས། །པོ་ཊ་ལ་ཡི་རི་ལ་གནས་པ་ཡི། །སྤྲེའུ་ཞིག་སྤྲུལ་ཡོངས་རྫོགས་དགེ་བསྙེན་བྱིན། །ཏིང་འཛིན་རྫུ་འཕྲུལ་ལྡན་པར་བྱིན་བརླབས་ནས། །ཁ་བ་ཅན་གྱི་ཡུལ་འདིར་སྒོམ་དུ་བཏང༌། །དེ་ཡིས་བྲག་རི་རོག་པོ་ཅིག་དུ་བསྒོམས། །བྱམས་དང་སྙིང་རྗེ་བྱང་ཆུབ་སེམས་སྐྱེད་སྦྱངས། །སྟོང་པ་ཉིད་ལ་མོས་པས་སྤྱོད་པའི་ཚེ། །ལྷ་མོ་(ཇ༣བ)

[Full Size]

སྒྲོལ་མས་སྤྲུལ་པ་བྱས་པ་ཡི། །བྲག་སྲིན་མོ་ཞིག་དེར་འོངས་ཆགས་པའི་བརྡ། །ཉིན་ཞག་འགའ་བྱས་སྤྲེའུའི་སེམས་མ་གཡོས། །ཕྱི་ནས་མི་མོ་མཛེས་མར་ལུས་བསྒྱུར་ནས། །བདག་གི་ཁྱིམ་ཐབ་མཛོད་ཅེས་གསོལ་བ་བཏབ། །སྤྲེའུས་ང་ནི་འཕགས་པའི་དགེ་བསྙེན་ཡིན། །དེ་ལྟར་མི་རུང་སོང་ཞིག་ཞེས་སྨྲས་པས། །ཐ་མར་སྙིང་རྗེར་ངུ་ཞིང་སྨྲེ་སྔགས་འདོན། །བདག་ནི་ལས་ཀྱིས་སྲིན་མོའི་རིགས་སུ་སྐྱེས། །ཁྱོད་ལ་ཆགས་ཤིང་ཞེན་པས་གསོལ་བ་འདེབས། །ཁྱོད་ཀྱིས་བདག་གི་ཁྱིམ་ཐབ་མི་བྱེད་ན། །ཐ་མར་སྲིན་པོ་ཅིག་དང་འགྲོགས་ནས་ནི། །ཉིན་ཞག་རེ་ལའང་སྲོག་ཆགས་ཁྲི་ཕྲག་གསོད། །སྲིན་པོའི་ཕྲུ་གུ་འཕེལ་བས་གང་གྱུར་སྟེ། །ཁ་བ་ཅན་འདི་སྲིན་པོའི་གླིང་དུ་འགྱུར། །འཛམ་གླིང་སྐྱེ་བོ་མ་ལུས་ཟ་བར་བྱེད། །དེ་བས་བདག་ལ་དགོངས་མཛོད་ཟེར་ཞིང་ངུས། །སྤྲེའུ་སྙིང་རྗེས་བརླན་གྱུར་ཅི་བྱ་སྙམ། །སྐད་ཅིག་ཙམ་གྱིས་པོ་ཊ་ལ་རུ་སོང༌། །བདག་གིས་དགེ་བསྙེན་སྡོམ་པ་སྲོག་བཞིན་བསྲུངས། །བདུད་རིས་སྲིན་མོས་བདག་ལ་འདི་ལྟར་གཙེས། །དེ་ལས་ཐབས་གང་གིས་ནི་སྲུང་བར་དགྱིད། །བྱམས་མགོན་ཐུགས་རྗེ་ཅན་གྱིས་གཟིགས་སུ་གསོལ། །འཕགས་པའི་ཞལ་ནས་དེ་ཡི་ཁྱིམ་ཐབ་གྱིས། །ཁྱོད་ཀྱི་གཞན་དོན་རླབས་ཆེན་འགྱུར་རོ་གསུང༌། །འཕགས་མ་ཁྲོ་གཉེར་ཅན་དང་སྒྲོལ་མ་ཡིས། །དེ་ནི་ཤིན་དུ་ལེགས་ཅེས་མཐུན་གྱུར་མཛད། །བོད་ཁམས་ཁ་བ་ཅན་གྱི་ཡུལ་འདི་རུ། །ཐུབ་བསྟན་དར་རྒྱས་ཡུན་རིང་གནས་པ་དང༌། །དགེ་བའི་བཤེས་གཉེན་རྒྱུན་མི་འཆད་པ་དང༌། །རིན་ཆེན་གཏེར་ཁ་དུ་མ་བྱེ་བ་སྟེ། །ཡོན་ཏན་གསུམ་དང་ལྡན་པར་བྱིན་གྱིས་བརླབས། །སྤྲུལ་པའི་སྤྲེའུ་བྲག་སྲིན་འདུས་པ་ལས། །རིས་དྲུག་ནས་འཕོས་སྤྲེའུ་ཕྲུག་དྲུག་ཞིག་བྱུང༌། །གཅིག་ནི་དམྱལ་བའི་གནས་ནས་ཚེ་འཕོས་པས། །ངོ་ནག་མི་སྡུག་སྡུག་(ཇ༤ན)

[Full Size]

སྲན་ཆེ་བར་སྣང༌། །ཡི་དྭགས་ནས་འཕོས་ཟས་སྲེད་སེར་སྣ་ཆེ། །དུད་འགྲོའི་སྐྱེ་བ་གླེན་ལ་གཟུགས་བྱད་ངན། །ལྷ་མིན་ནས་འཕོས་ཐུ་ལ་ཕྲག་དོག་ཆེ། །མི་ནས་འཕོས་དེ་སེམས་ཆུང་ཤེས་རིག་རྒྱས། །ལྷ་ལས་འཕོས་དེ་རྒྱུད་དགེ་བྱད་བཞིན་བཟང༌། །དེ་ཀུན་ཕ་ཡིས་ཤིང་ཏོག་གིས་གང་བ། །ནགས་མ་བྱ་ཚོགས་ཅན་ཞེས་བྱ་བར་བསྐྱལ། །ལོ་འགའ་ལོན་ནས་བལྟ་རུ་ཕྱིན་པའི་ཚེ། །དེ་ལས་མི་མིན་སྤྲེའུ་མིན་བཞི་བརྒྱར་འཕེལ། །ཤིང་ཐོག་ཟད་ཅིང་བཀྲེས་པས་འཐབ་ཅིང་རྩོད། །ཡི་དྭགས་ལྟ་བུ་སྙིང་རྗེའི་གནས་སུ་མཐོང༌། །རང་གིས་གསོས་པས་མ་སོས་རབ་ཏུ་ངལ། །ཀ་བཀོལ་མ་ལས་དང་པོ་ཕྲུ་གུ་གཅིག་དུ་བཤད་ལ་བཀའ་ཆེམས་སྤྱི་ལས་དྲུག་དུ་སྣང་ཞིང་གང་ནའང་ཕྱིས་མང་དུ་འཕེལ་བ་དུམ་བུ་བཞིར་ཆད་དེ་རྩོད་པས་བོད་ཀྱི་མི་བུ་རིགས་བཞི་ཞེས་སེ་དང་རྨུ་ལྡོང་དང་སྟོང་གི་རུས་ཚན་བཞི་བྱུང་བར་གྲགས་ཤིང་ཡང་དབྲ་དང་འདྲུ་བསྣན་ནས་མི་བུ་རིགས་དྲུག་དུའང་གྲག་གོ །རྫུ་འཕྲུལ་མཐུ་ཡིས་པོ་ཊ་ལ་རུ་སོང༌། །འཕགས་པའི་དྲུང་དུ་ཐལ་སྦྱར་གསོལ་བཏབ་པ། །ཀྱེ་མ་ཁྱིམ་ཐབ་འཁོར་བའི་བཙོན་ར་དང༌། །བུད་མེད་བདུད་ཀྱི་ཕོ་ཉར་མ་ཤེས་ལ། །འདོད་པ་དུག་གི་ལོ་མར་མ་རྟོགས་པས། །བུ་ཚ་འཁོར་བའི་འདམ་དུ་བདག་ཚུད་ཏོ། །སྙིང་རྗེས་ཆགས་པར་གྱུར་པས་བདག་བསླུས་སྟེ། །འདོད་པས་བསྡམས་ཅིང་སྡུག་བསྔལ་རི་ཡིས་ནོན། །ཉོན་མོངས་དུག་ཟོས་ལས་ངན་རིམས་ཀྱིས་བཏབ། །སྡུག་བསྔལ་ཕུང་པོས་བདག་ཉིད་བསླུས་པར་གྱུར། །ཀྱེ་ཧུད་ད་ནི་བུ་ཚ་ཇི་ལྟར་གསོ། །འཕགས་པའི་བཀའ་བསྒྲུབས་བདག་ནི་འདི་ལྟར་གྱུར། །ད་ལྟ་ཡི་དྭགས་གྲོང་ཁྱེར་དངོས་སུ་འདུག །ཕྱི་མ་དམྱལ་བར་སྐྱེ་བར་ཐེ་ཚོམ་མེད། །བྱམས་མགོན་བདག་ལ་སྐྱོབ་པར་མཛོད་ཅེས་གསོལ། །སྤྱན་རས་གཟིགས་དབང་ཞལ་ནས་རིགས་ཀྱི་བུ། །སྡུག་བསྔལ་མི་དགོས་ཁྱོད་ཀྱི་སྤྱོད་པ་ལེགས། །(ཇ༤བ)

[Full Size]

ཁྱོད་ཀྱི་རིགས་བརྒྱུད་དེ་རྣམས་མིར་གྱུར་ནས། །སངས་རྒྱས་བསྟན་པ་དར་ཞིང་རྒྱས་པར་འགྱུར། །དེ་ཀུན་ང་ཡིས་ཆོས་དང་ཟང་ཟིང་གིས། །ཀུན་ནས་སྐྱོང་ཞེས་བཞེངས་སྟེ་བོད་ཡུལ་གཟིགས། །རི་རབ་ཟོམ་ནས་འབྲུ་སྣ་ལྔ་ནས་གྲོ་སྲན་བྲ་སོ་བླངས་སྟེ། །བོད་དུ་གཏོར་བས་མ་རྨོས་ལོ་ཏོག་བྱས། །རིན་ཆེན་སྣ་ལྔ་གསེར་དངུལ་ཟངས་ལྕགས་བཤའ་ཕྱག་གིས་བཅུས་ནས་གཏོར། །སྨོན་ལམ་མཛད་པས་མ་འོངས་སྐབས་སྐབས་སུ། །རིན་ཆེན་གཏེར་ཀུན་ས་ལས་རིམ་གྱིས་འབྱུང༌། །བྱང་ཆུབ་སེམས་དཔའས་རང་གི་རིགས་བརྒྱུད་རྣམས། །ཁྲིད་དེ་མ་རྨོས་པ་ཡི་ལོ་ཏོག་བསྟན། །འདི་ཟོ་དང་ཞེས་སྨྲས་པས་ཟོ་དང་གོང་པོ་རི་དང༌། འདིར་རྩེ་མོ་རྩེས་དང་བྱས་པས་རྩེད་དང་དུ་མིང་ཆགས་ཅེས་གྲག་གོ །ལོ་ཏོག་ཟོས་པས་དེ་ཀུན་མི་ཉིད་གྱུར། །མ་རྨོས་འབྲུ་ཟ་གོས་སུ་ཤིང་ལོ་གྱོན། །ནགས་ན་རི་དྭགས་ལྟ་བུར་གནས་པ་ཡི། །ཀློ་དང་མོན་ལྟར་སྤྱོད་པས་བོད་ཡུལ་གང༌། །ཀུན་ཀྱང་ཕ་རིགས་མ་རིགས་གཉིས་སུ་གནས། །སྤྲེ་འུ་བྱང་སེམས་ཕ་ཡི་རིགས་བྱུང་རྣམས། །དད་བརྩོན་བརྩེ་ལྡན་གཏོང་ཕོད་དག་ལ་དགའ། །རྒྱུད་འཇམ་ཚིག་བཙུན་སྨྲ་མཁས་ངང་ཚུལ་བཟང༌། །འོན་ཀྱང་སེམས་ཆུང་ལུས་སེམས་ཡང་བ་ཡིན། །བྲག་སྲིན་མ་ཡི་རིགས་གྱུར་གཙོ་ཆེ་རྣམས། །ཉོན་མོངས་ཆེ་ཞིང་འགྲན་སེམས་ཕྲག་དོག་རྒྱས། །ཟས་ནོར་ལ་སྲེད་ཁྲོ་གཏུམ་གཞན་སྐྱོན་སྒྲོག །འོན་ཀྱང་ལུས་ཤེད་སྙིང་སྟོབས་ཆེ་བ་ཡིན། །གཉིས་ག་སྤྲུལ་པ་ཡིན་པས་མི་ཀུན་ཀྱང༌། །ཆོས་ཀྱི་སྣོད་ཏུ་རུང་བ་མང་བ་ཡིན། །དེ་ལྟར་བོད་ཡུལ་མི་ཡི་འགྲོ་བ་དར། །དེ་ཚེ་རྒྱལ་ཕྲན་སིལ་མ་བཅུ་གཉིས་དང༌། །མཐའ་མར་རྒྱལ་ཕྲན་བཞི་བཅུས་མངའ་དབང་བྱས། །མཆིམས་ཡུལ་གྲུ་ཤུལ་ན། མཆིམས་རྗེ་ནི་གུ་ཡོད། བློན་པོ་སྣང་དང་དེང༌། ༡ ཞང་ཞུང་ཡུལ་ན་ནི། རྒྱལ་པོ་ལེགས་སྙ་ཤུར། རྨ་དང་ར་སངས་བློན། ༢ དེ་བཞིན་དུ་མྱང་རོ་ཕྱོང་དཀར་ན་གཙང་རྗེ་ཐོད་དཀར་བློན་པོ་གནང༌། ༣ གནུབས་ཡུལ་གླིང་དགུ་ན་སྣུབས་རྗེ་དམིགས་པ་བློན་པོ་རྨེའུ་དང་འབྲོ། ༤ ཉང་རོ་ཤམ་བོར་ལོ་རྔམ་རྗེ་འབྲོམ་བློན་པོ་ཤེ་སུག་གཉིས། ༥ ཀྱི་རི་ལྗོན་སྔོན་ན་ཀྱི་རྗེ་རྨད་པོ་བློན་པོ་ངམ་དང་འབྲོ། ༦ དམ་ཤོད་ཁྲ་སྣར་ཟིངས་རྗེ་ཁྲི་འཕྲང་གསུམ་བློན་པོ་(ཇ༥ན)

[Full Size]

མགར་དང་གཉན། ༧ འོལ་ཕུ་སྤང་མཁར་དུ་ཟིང་རྗེ་ཐོན་ཕྲེང་བློན་པོ་རྔོག་དང་སྦས། ༨ ཀྲྀཥྞ་རོལ་མོ་གོང་དུ་བྲང་རྗེ་གོང་ནམ་བློན་པོ་སྤྲད་དང་ཞུགས། ༩ ཀོང་ཡུལ་བྲེ་སྣ་ཀོང་རྗེ་ཀར་པོ་ཏུག་དང་མཁར་བ་བློན། ༡༠ ཉང་ཡུལ་རྣམ་གསུམ་ན་ཉང་བཙུན་གླང་རྒྱལ་བློན་པོ་བུག་དང་ངོ་རྗེ། ༡༡ དྭགས་ཡུལ་གྲུ་བཞི་ན་དགས་རྗེ་མང་པོ་རྒྱལ་བློན་པོ་རླངས་སྐམ་གཉིས། ༡༢ སིལ་མ་བཞི་བཅུ་ནི། ཡུལ་ནི་འབྲོག་མོ་རྣམ་གསུམ་ན། །རྒྱལ་པོ་སེ་མི་ར་ཁྲིད་བཞུགས། །དེ་ཡི་བློན་པོ་ཀ་རེ་ན། །ཞེས་སོགས་སྟེ། གཡེ་མོ་ཡུལ་དྲུག་ན་གཡེ་རྗེ་མཁར་བ་བློན་པོ་རྦ་དང་སྟུག །སེ་མོ་གྲུ་བཞི་ན་གཉགས་རྗེ་གྲུ་འཕྲང་སེ་དང་ཉང་གཉིས་བློན། །ཞེས་སོགས་གྲག་གོ །རྒྱལ་ཕྲན་དེ་རྣམས་འཐབ་རྩོད་གསོད་གཅོད་དགའ། །ལེགས་ཉེས་མི་རྩི་བཀྱོན་འབེབས་བཙོན་རར་འཛུད། །མཐའ་བཞིའི་རྒྱལ་པོས་རྟག་དུ་མནར་ཞིང་གཙེ། །རྒྱ་ནག་རྒྱལ་པོ་ཤིང་ལ་སྦྲུལ་ལྟར་འཁྲི། །རྒྱ་གར་རྒྱལ་པོ་ལུག་ལ་སྤྱང་ལྟར་འཇབ། །སྟག་གཟིག་རྒྱལ་པོ་བྱ་ཁྱུར་ཁྲ་ལྟར་རྒྱུག །གེ་སར་རྒྱལ་པོ་ཤིང་ལ་རྟ་ལྟར་འཚབ། །ཅེས་སྐད་ཏོ། །འཐབ་ཏུ་མི་ཐུབ་བོད་ལ་དམག་གྲངས་ཉུངས། །ཡུལ་གཞན་འགྲོ་རུ་རྒྱལ་ཕྲན་གྱིས་མི་སྟེར། །ཐང་ལ་མི་ཆགས་བྲག་རི་བཙན་པོ་འཛིན། །བཟའ་བཏུང་མི་རྙེད་བཀྲེས་སྐོམ་སྡུག་བསྔལ་ཆེ། །བོད་ཡུལ་མི་རྣམས་རབ་ཏུ་སྡུག་བསྔལ་ཆེ། །འཕགས་པའི་ཐུགས་རྗེས་བྱིན་གྱིས་བརླབས་པ་ཡིས། །གཉའ་ཁྲི་བཙན་པོ་བོད་ཡུལ་རྗེར་གཤེགས་ནས། །བོད་འབངས་བདེ་ཞིང་སྐྱིད་པར་མཛད་པ་ཡིན། །འདི་ཉིད་མི་ཡི་ཡུལ་དུ་བྱོན་ཚུལ་ནི། །གནམ་གྱི་རིམ་པ་བཅུ་གསུམ་སྟེང་ཞེས་པ། །གཟུགས་ཁམས་འོད་གསལ་གྱི་ནི་ལྷ་རིས་ནས། །སྤྱན་རས་གཟིགས་ཀྱིས་བྱིན་གྱིས་བརླབས་པའི་མཐུས། །ཐུགས་རྗེས་ས་སྟེང་གཤེགས་སྟེ་མི་རྗེ་མཛད། །འདི་ལ་བསྒྲགས་པ་བོན་ལུགས་ཅེས་གྲགས་ཀྱང༌། །ཕྱྭ་དང་གནམ་ལ་དགའ་ཞིང་བླུན་པ་ཡི། །བོད་ཡུལ་གནའ་མི་སྤྱི་མཐུན་གཟུང་ཕྱིར་བསྟན། །སྤྱིར་ཡོ་ག་ལྷ་གྱེས་ཅན་གྱི་ལུགས་ལ་རྩིབས་ཀྱི་ལྷ་ཀརྨ་ཡོལ་སྡེས་སྤྱན་དྲངས་པ་དང༌། ལྷ་གླང་རུ་དཀར་སོགས་དཀོན་ནོར་བརྫངས་ཚུལ་སོགས་དང༌། སྲིད་པའི་ལྷ་ཕལ་(ཇ༥བ)

[Full Size]

ཆེར་གྱི་བྱུང་ཚུལ་དང་བཅས་པ་སྣང་ངོ༌། །མི་རྗེ་ལྷས་མཛད་འཛམ་གླིང་ཡུལ་གཞན་ལས། །ཁྱད་དུ་འཕགས་པར་འཆད་ཕྱིར་དམད་མི་བྱ། །ཡང་གསང་མི་མིན་ལུགས་ཞེས་ཟེར་བ་ནི། །མཐོང་སྣང་ཐ་དད་ཙམ་ལ་འགལ་བ་མེད། །གཞན་དུ་རིགས་མཐོན་རྣམས་ཀྱི་རིགས་མི་དམད། །གསང་བ་ཆོས་ལུགས་འཇམ་དཔལ་རྩ་རྒྱུད་ལས། །ལི་ཙྭ་ཝི་ཡི་རིགས་བྱུང་ཞེས་གསུངས་ཕྱིར། །རིགས་མཆོག་གཽ་ཏམ་ཤཱ་ཀྱའི་བརྒྱུད་པར་གསལ། །འདི་དག་དུ་ལི་ཙཱ་ཝིའི་བརྒྱུད་པ་གཟུགས་ཅན་སྙིང་པོ་དང་ཀོ་ས་ལའི་རྒྱལ་པོ་གསལ་རྒྱལ་ཡིན་བྱ་བ་དང༌། གཏུམ་པོ་རབ་སྣང་གི་བུ་ཤར་པ་ཞེས་བྲིས་པ་དང༌། སྟོན་པ་ཤཱ་ཀྱའི་རྒྱལ་པོ་བྱོན་པའི་འོག་དུ་སྐྱ་སེང་བུ་ལྔ་སོགས་བྱུང་བར་བྱས་ནས་རུ་པ་ཏི་ལུང་བསྟན་གྱིས་མདོ་ཡོད་བྱ་བ་དང༌། ཀུན་མཁྱེན་བུས་སྟོད་འགྲེལ་གྱི་ལུང་གིས་བོད་སྤྱི་མི་རྣམས་རུ་པ་ཏི་ལས་མཆེད་པ་དང༌། བོད་ས་ལའི་རྒྱལ་པོ་འཆར་བྱེད་དམ། ཀོ་ས་ལའི་རྒྱལ་པོ་གསལ་རྒྱལ་ལམ། གཟུགས་ཅན་སྙིང་པོའི་སྲས་ཆུང་བ་སྟོབས་ཆུང་གི་སྲས་ལྔ་ཚིགས་ཅིག་སོར་མོ་དྲ་བས་འབྲེལ་པ་སོགས་མཚན་ལྡན་ཞིག་བྱུང་བ་ལྟས་ངན་དུ་དོགས་པས་ཟངས་སུ་བཅུག་ཆུར་བསྐྱུར་བ་ཞིང་པར་བརྙེད་ནས་གསོས་པ་ཕྱིས་སྐྱོ་བས་བྲོས་པ་བོད་ཀྱི་རྗེར་བཅོལ་ཞེས་སོགས་མང་དུ་སྣང་ཡང་དག་པར་མ་མཐོང་སྟེ་སྐྱ་སེང་བུ་ལྔ་ནི་སྟོན་པ་ལས་ཆེས་སྔ་སྟེ་སྟོན་པ་དགའ་ལྡན་ནས་གཤེགས་ཚེ་འཛམ་གླིང་གི་གང་དུ་སྐྱེ་བར་རིགས་ཞེས་ལྷ་རྣམས་འགྲོ་བ་ན་ལྷའི་བུ་ཁ་ཅིག་གིས་སྐྱ་སེང་གི་རྒྱུད་གླང་པོའི་གྲོང་གི་རྒྱལ་པོ་འདི་འོས་སོ་ཞེས་ཟེར་བ་ལ་གཞན་རྣམས་ཀྱིས་འདི་ནི་རྒྱུད་རྣམ་པར་འཁྲུགས་པ་ཡིན་སྟེ་འདི་ལྟར་གཡུལ་ངོར་བརྟན་པ་ཆོས་ཀྱི་བུ། འཇིག་སྡེ་ལ་རླུང་གི་བུ། སྲིད་སྒྲུབ་ལ་དབང་པོའི་བུ། རིས་མེད་དང་ལྷར་བཅས་ལ་ཐ་སྐར་གྱི་བུ་ཞེས་ཟེར་སྟེ་རྒྱུད་རྣམ་པར་འཁྲུགས་པས་ན་མི་རིགས་སོ་ཞེས་བསྒྲགས་པར་རྒྱ་རོལ་ལས་བཤད་ཏོ། །གཟུགས་ཅན་སྙིང་པོ་སོགས་ཀྱང་ཤཱཀྱའི་རིགས་སུ་མདོ་ལས་བཤད་པ་མ་མཐོང་ལ། སྤྱིར་གཟུགས་ཅན་སྙིང་པོ། གསལ་རྒྱལ། རབ་སྣང༌། ཤར་པ་བཞི་པོ་སྟོན་པའི་དགུང་མཉམ་བཞིའི་རེ་རེ་ཡིན་ཞིང་ཕལ་ཆེར་སྟོན་པའི་གོང་དུ་འདས་པར་འདུལ་བ་ལུང་ལས་གསུངས་པས་སྟོན་པ་འདས་ནས་བྱུང་བ་འདྲ་བའི་ལོ་རྒྱུས་དེ་རྣམས་མི་འགྲིག་ཅིང༌། སྤྱིར་རྒྱལ་པོ་དེ་རྣམས་ཀྱི་ཚེ་བྲམ་ཟེ་རིག་བྱེད་ཀྱི་སྨྲེང་དང་མཚན་བརྟག་པ་ལ་མཁས་པའི་མདུན་ན་འདོན་སོགས་མང་ཞིང་སྐྱེ་བོ་གྲམ་རྣམས་ཀྱང་སྒྱུ་རྩལ་དྲུག་བཅུ་རྩ་བཞི་པོ་སློབ་པའི་ཕྱིར་བུ་མཚན་དཔེ་(ཇ༦ན)

[Full Size]

དང་ལྡན་པ་བཙས་ན་ལྟས་ངན་དུ་དོགས་པ་ག་ལ་སྐྱེ། ལྷ་ལས་ཕུལ་བྱུང་གི་བསྟོད་འགྲེལ་ཤེས་རབ་གོ་ཆས་མཛད་པར་སྔོན་སྐྱ་སེང་གི་བུ་ལྔ་དང་སྒྲ་ངན་དཔུང་ཚོགས་བཅུ་གཉིས་འཐབ་པ་ན་རྒྱལ་པོ་རུ་པ་ཏི་ཅེས་པ་འཁོར་བརྒྱ་དང་བཅས་ལ་བུད་མེད་ཀྱི་ཆས་སུ་ཞུགས་ནས་རི་ཁ་བ་ཅན་གྱི་ཁྲོད་དུ་བྲོས་པ་འཕེལ་བ་ལ་དེང་སང་ཡང་བོད་ཅེས་གྲགས་སོ། །ཞེས་བྱུང་བ་ཡང་བོད་མི་མཐའ་དག་གི་ཁུངས་ནི་མ་ཡིན་སྟེ་རུ་པ་ཏི་གཉའ་ཁྲི་བཙན་པོར་བྱེད་ན་དེའི་གོང་དུ་མི་མང་དུ་ཡོད་པར་གྲགས་པ་དང་འགལ་བའི་ཕྱིར་དང༌། མིན་ན་ཡང་བོད་ཡུལ་ན་ཤཱཀྱའི་རྒྱལ་བརྒྱུད་གཞན་ཡོད་པར་ཐལ་བའི་ཕྱིར་རོ། །དེས་ན་དེ་དག་ནི་བོད་དང་ཉེ་བ་མོན་ཡུལ་ཁ་ཅིག་ལ་བོད་ཀྱི་སྒྲར་བྱས་པ་དུ་མ་སྣང་བའི་དེ་ལྟ་བུ་ཞིག་དུ་ཟད་ཏོ། །ཡང་སྔོན་རབས་པ་མང་པོ་ཞིག་རྒྱལ་པོ་སྐྱབས་སེང་དང་དམག་བརྒྱ་པ་གཉིས་དུས་གཅིག་ལ་སྐྱེས་ཕྱིས་རྒྱལ་སྲིད་རྩོད་པ་ན་དམག་བརྒྱ་པ་ལ་བུ་བརྒྱ་ཡོད་པས་དམག་བརྒྱ་པར་གྲགས་ཤིང་སྐྱ་སེང་གིས་ལྷ་མཆོད་པས་དྲང་སྲོང་ཞིག་གིས་མི་མ་ཡིན་གྱི་བུ་ལྔ་བྱིན། དེ་རྣམས་ལ་ཡོན་ཏན་ཅི་ཡོད་དྲིས་པས་སོ་སོར་སྨྲས་ཅིང་སྲིད་སྒྲུབ་ཀྱིས་དམག་བརྒྱ་ཐམ་པ་ཐུབ་བྱས་པས། ཉམ་སད་པའི་ཕྱིར་འོ་ན་དམག་བརྒྱ་པ་ཐུལ་ཞིག་བྱས་པས་དེས་ཕ་དང་གོ་དགུ་པོ་བསད། ཐ་ཆུང་རུ་པ་ཏི་མཚན་དང་ལྡན་པ་དེ་བརྩོན་དུ་ཁྲིད་ནས་འོངས། སྐྱ་སེང་གིས་གསོད་པར་འཕངས་ནས་ཟངས་ནང་དུ་ཟས་སྐོམ་དང་གོས་དང་བཅས་སྟེ་ཆུར་བསྐྱུར་བ་ཞིང་པས་རྙེད་ནས་གསོས། ཕྱིས་བོད་ཡུལ་དུ་བྱོན་ནས་རྗེ་མཛད་ཟེར་ཡང་ལྷ་སའི་བཀའ་ཚིགས་ཆེན་མོར་གཉའ་ཁྲི་བཙན་པོ་ནས་ཐོ་ཐོ་རིའི་བར་ལོ་ལྔ་བརྒྱ་སོང༌། ཐོ་ཐོས་བརྒྱ་དང་ཉི་ཤུ་ཐུབ། དེ་ནས་སྲོང་བཙན་གྱི་བར་གྱི་བཞི་ལ་བརྒྱ་དང་བཅུ་གཅིག་སོང་བར་བཤད་པས་སྟོན་པ་འདས་ནས་ལོ་མང་ཞིག་ན་བོད་རྗེ་བྱོན་པར་གསལ་ལ། དམག་བརྒྱ་པའི་བུ་རུ་པ་ཏི་སོགས་སྟོན་པ་མ་བྱོན་པའི་གོང་དུ་བྱུང་བར་ངེས་སོ། །དེས་ན་སངས་རྒྱས་མྱ་ངན་ལས་འདས་ནས་རིང་ཞིག་ལོན་པ་ན་ཤཱ་ཀྱ་ལི་ཙྭ་ཝིའི་རྒྱུད་པ་མཚན་དཔེ་དང་ལྡན་པ་ཅིག་བོད་དུ་བྱོན་ནས་རྗེ་མཛད་པར་གསལ་ལ་དེ་མཚན་རུ་པ་ཏིར་གཅིག་པ་ཙམ་བྱུང་བ་ནི་མི་འགལ་ལོ། །འོན་ཀྱང་དེ་ཉིད་ཀྱི་ལོ་རྒྱུས་ངེས་པ་ཅན་བོད་དུ་སྔོན་གྲགས་པ་མི་སྣང་ངོ༌། །ཀ་བཀོལ་མ་ལས་ཤཱཀྱ་རི་བྲགས་པའི་རྒྱུད་པ་ཅེས་སྣང་ཡང༌། འཇམ་དཔལ་རྩ་རྒྱུད་ལས། ལི་ཙཱ་ཝི་རྣམས་རིགས་སུ་བྱུང༌། །ཞེས་ལུང་བསྟན་པས་ཡི་གེ་ཉམས་པར་ཟད་སྟེ་ཀ་བཀོལ་མའི་ཕྱི་མོ་ནུབ་ནས་ཕྱིས་ལྷ་སའི་དཀོན་གཉེར་གྱི་ངག་ལས་བྲིས་ཟེར་བ་སོགས་དུ་མ་སྣང་བའི་ཕྱིར་རོ། །སྤྱན་རས་གཟིགས་ཀྱིས་བྱིན་བརླབས་རྣམ་པར་(ཇ༦བ)

[Full Size]

སྤྲུལ། །ཤཱ་ཀྱ་ལི་ཙཱ་ཝི་ལས་འཕེལ་བ་ནི། །མཚན་དཔེ་རྫོགས་པ་སྐྱེས་བུ་ཆེན་པོ་ཅིག །ལྷ་ཡིས་སྤྱན་དྲངས་བོད་རྗེའི་ཐོག་མ་མཛད། །འོད་གསལ་ལྷ་ལས་བབ་དང་ཤཱཀྱ་ཡི། །རྒྱལ་རྒྱུད་ཡིན་པའང་འགལ་བ་མ་ཡིན་སྟེ། །ཟས་གཙང་སྲས་དང་དགའ་ལྡན་ལྷ་གནས་ནས། །བབས་པ་འགལ་བ་མེད་པ་ཇི་བཞིན་ནོ། །དང་པོར་ལྷ་རི་གྱང་ཐོའི་རྩེ་ལ་བབ། །ལྷ་རི་རོལ་པོ་བཙན་ཐང་སྒོ་བཞིར་བྱོན། །དེ་ཚེ་བོད་མི་སྐལ་ལྡན་འགའ་ཡིས་མཐོང༌། །བཙན་པ་ལྷོ་དང་གཉགས། བཙུན་པ་ཁྱུང་དང་སྣུབས། གཉན་པ་སེ་དང་སྲོ་སྟེ་ཡབ་འབངས་རུས་དྲུག་དང་ལྷ་བོ་ལྷ་སྲས། སེ་བོན་རྨ་བོན། ཅོག་ལ་བོན། ཞང་ཞུང་བོན། ཚེ་མི་བོན་སོགས་ཤེས་པ་ཅན་བཅུ་གཉིས་ཀྱིས་མཇལ། ལྟ་བས་མི་ངོམས་གཟུགས་ལ་ངོ་མཚར་སྐྱེས། །དྲིས་པས་ཕན་ཚུན་མ་གོ་བརྡ་མ་འཇལ། །མཛུབ་མོ་ནམཁར་ཀེར་བ་མཐོང་བ་ཡིས། །ལྷ་ཡུལ་གནམ་ནས་འོངས་པའི་བཙན་པོར་འདུག །འདི་ལ་བདག་ཅག་རྗེ་བོ་ཞུ་དགོས་ཟེར། །གཉའ་བར་ཁྲི་ལ་བཏེག་ནས་སྤྱན་དྲངས་པས། །མཐོང་ཐོས་ཐམས་ཅད་འདུད་ཅིང་ངོ་མཚར་སྐྱེས། །མཚན་དུ་གཉའ་ཁྲི་བཙན་པོ་ཞེས་བྱུང་གྲགས། །སྐུ་མཁར་ཐོག་མ་ཡུམ་བུ་བླ་སྒང་མཛད། །སུམ་པའི་བོན་པོ་ཨོ་ཡོང་རྒྱལ་བ་བཏུལ། །སྣུབས་ཇི་སྲིད་པ་རྒྱལ་ཕྲན་འབངས་སུ་འདུས། །རྒྱལ་པོ་དེ་སྲས་མུ་ཁྲི་བཙན་པོ་སྟེ། །དེ་ནས་དིང་ཁྲི་སོ་ཁྲི་མེར་ཁྲི་དང༌། །གདགས་ཁྲི་སྲིབས་ཁྲི་བཙན་པོ་ཅེས་བྱ་བ། །འདི་རྣམས་གནམ་ལ་ཁྲི་བདུན་ཞེས་སུ་གྲགས། །ཡུམ་གྱི་མཚན་གནམ་མུག་མུག་ཟེར། དེ་ལས་སྐྱེས་པས་མུག་ཁྲི་བཙན་པོ། དེ་བཞིན་དུ་ས་དིང་དིང༌། སོ་ཐམ་ཐམ། དོག་མེར་མེར། གདགས་ལྷ་དཀར་མོ། སྲིབས་ལྷ་སྔོན་མོ་རྣམས་ཡུམ་ཡིན་པས་སོ་སོའི་མཚན་བཏགས་ཅེས་ཀྱང་གྲག་གོ །རི་བྲག་མི་ཐོགས་མཁའ་ལ་གཤེགས་བཞུད་བྱེད། །ཉིན་བཞིན་སར་བྱོན་མཚན་བཞིན་མཁའ་ལ་གཤེགས། །སྲས་ཀྱིས་ཆིབས་ཁ་ཐུབ་པར་གྱུར་པ་ན། །རྨུ་ཐག་ལ་འཇུས་ནམཁར་གཤེགས་སོ་སྐད། །ལྷ་ལ་རོ་མེད་འཇའ་ཚོན་ལྟར་ཡལ་བས། །(ཇ༧ན)

[Full Size]

གྲོངས་ཀྱི་བང་སོ་གནམ་ལ་བཏབ་ཅེས་གྲགས། །དེ་ཡི་བཙུན་མོ་ས་བཙུན་ཀླུ་རྗེའི་སྲས། །འདི་འཁྲུངས་ཚེ་ཨ་ཕྱི་བདགས་ལྷ་དཀར་མོ་ལ་མཚན་ཅིར་གསོལ་དྲིས་པས་བླ་སྤང་དང་མ་དིང་མེས་མ་ཚིག་གམ་བླ་མཚོ་སྔོན་མོ་མ་སྐམས་སམ་བླ་བྲག་དཀར་པོ་མ་ཉིལ་ལམ། ཟེར་བ་ལ་དེ་རྣམས་མ་ཉམས་སྨྲས་ཀྱང་རྒན་མོ་རྒན་ཆེས་དབང་པོ་ཉམས་པས་ལོག་པར་གོ་སྟེ་འོ་ན་རྒྱལ་ས་མི་ཟིན་ཟེར་ནས་མཚན་ལོག་པར་བཏགས་ཅེས་གྲག །ཕྱི་མོས་མཚན་དུ་གྲི་གུམ་བཙན་པོར་གསོལ། །དེ་ཡི་བཙུན་མོ་གླུ་སྲིང་མེར་ལྕམ་ལ། །ཤ་ཁྲི་ཉ་ཁྲི་བྱ་ཁྲི་གསུམ་ཡང་བལྟམས། །དེ་ཚེ་རྒྱ་གར་ཡུལ་དང་སྟག་གཟིག་མཚམས། །གུ་རུ་ཝ་ཏ་ཅེས་བྱའི་ཡུལ་ཁམས་ནས། །མུ་སྟེགས་བོན་པོ་འ་ཞ་ཞེས་པ་བྱུང༌། །གནམ་ལ་འཕུར་ཞིང་ཁ་ནས་མངོན་ཤེས་སྨྲ། །ཤིང་ལ་འབྲེང་འདྲ་རྡོ་ལ་ལྷུ་གཟུག་འདྲལ། །རྟག་དུ་ཤ་ཆང་གིས་ནི་འདྲེ་མཆོད་བྱེད། །དེ་ལ་རྒྱལ་པོས་བླ་མཆོད་བཀུར་སྟི་མཛད། །གཡུ་ཡི་གཡུང་དྲུང་དཔའ་བའི་སྟག་སློག་དང༌། །འགིང་བའི་རལ་ཁས་བསྟོད་ཅིང་མངའ་ཐང་སྦར། །ཁུ་དང་ནུ་བས་ཆེ་ཞེས་ཨ་ཡང་བོས། །མུ་སྟེགས་ལྟ་ལོག་བོན་གྱི་བྱིན་རླབས་ཆུངས། །རྒྱལ་པོའི་ཐུགས་སུ་བདུད་རིས་གདོན་གསོལ་གྱུར། །ང་ལ་གྲི་གུམ་དུ་འདོགས་པ་ཙུག་ཡིན་ཟེར་བ་ལ་མཐར་གྲིར་གུམ་ཟེར་ནས་བཏགས་བྱས་པས་ཅིས་ཀྱང་གྲིར་འགུམ་ན་ང་གཞན་དང་འཐབ་ཟེར་ནས་འབངས་ལོ་ངམ་རྟ་རྫི་ལ་འཐབ་ཟླར་བཅོལ་ཡང་ཟེར། ཀ་བཀོལ་མ་ལས་ཁ་ཆེའི་རྒྱལ་པོ་དང་གཡུལ་སྤྲད་ནས་བོད་རྒྱལ་ནས་ལོག་པའི་ལམ་དུ་ཁ་ཆེའི་མི་ལུས་པ་ཅིག་ན་རེ། བོད་ཀྱི་དཔའ་བོས་གཞུ་ཀ་བ་ཙམ་ལ་མདའ་ཕྱ་མ་ཙམ་འཕེན་པ་བྱུང༌། ཕ་ཀི་ན་ཟེར་ནས་ཕ་བོང་ལ་ལྡེམ་མེ་འདུག་པ་དམག་མི་ཚོས་མཐོང་བས་ལ་ལ་ན་རེ་རྒྱལ་པོ་ཡིན་ཟེར། ལ་ལ་ན་རེ་འབངས་ལོ་ངམ་རྟ་རྫི་ཡིན་ཟེར་བས་དེ་གཉིས་གང་ཡིན་བརྟག་པའི་སྙན་ཕྲ་བཅུག་པས་རྒྱལ་པོས་རྩལ་འགྲན་ཟེར་བ་ལ་ལོ་ངམ་གྱིས་ངས་མ་ཐུབ་ན་ང་ལ་ཆད་པ་འོང་སྙམ་ནས་གྱ་ལོག་སྨྲས་ཟེར། གང་ནའང་ཉང་རོ་རྩིབས་ཀྱི་ཐལ་བ་ཚལ་དུ་སྐར་མ་ས་རི་ས་ག་ལ་འཐབ་དུས་བཏབ། རྒྱལ་པོས་ཁྱི་མོ་ཉན་གྱི་རྣ་གསང་བྱ་བ་ཉན་པོ་བྱེད་དུ་བཏང་བ་ཁོས་གོ་ནས། རྒྱལ་པོ་དབུ་ལ་དར་ནག་གི་ཐོད་བཅིངས་དཔྲལ་བར་མེ་ལོང་བཏགས། (ཇ༧བ)

[Full Size]

ཕྲག་པ་གཡས་ལ་ཝ་རོ་དང༌། གཡོན་ལ་ཁྱི་རོ་བཀལ། བ་དམར་གླང་དམར་བརྒྱ་ལ་ཐལ་སྒྲོ་སུམས་པ་བཀལ། རལ་གྲི་གླང་བྱ་ཕོ་ཀླད་ལ་སྐོར་ཞིང་བྱུང་ན་མི་ཐུབ་ཅེས་སྨྲས་པས་རྒྱལ་པོས་དེ་ཐམས་ཅད་བྱས། འཐབས་པས་ས་རི་ས་ག་རླུང་སྐར་དུ་སོང་བས་རླུང་དམར་ཆེན་པོ་བྱུང༌། བསོ་བཏབ་པས་བ་ལང་འདྲོགས་སྟེ་ཐལ་སྒྲོ་རྣམས་རལ་ཐལ་ཚུབ་ཀྱིས་མིག་འགྲིབས། དར་ནག་གི་ཐོད་དང་ཝ་རོ་དང་ཁྱི་རོས་རྗེའི་མགུར་ལྷ་དང་དགྲ་ལྷ་ཕོ་ལྷ་གསུམ་པོ་ཡལ། རལ་གྲི་བསྐོར་བས་རྨུ་ཐག་དང་རྨུ་སྐས་ཆད། ལོ་ངམ་གྱིས་དཔྲལ་བའི་མེ་ལོང་ལ་མདའ་འཕངས་ནས་བཀྲོངས་སྐད། རྒྱལ་ཕྲན་ལོ་ངམ་རྟ་རྫི་བྱ་བ་ལ། །འཐབ་ཟླ་བཅོལ་སྟེ་འཐབས་པས་གྲི་རུ་བཀྲོངས། །ཟངས་ཀྱི་ག་འུར་སྤུར་བཅུག་ལྕགས་གཟེར་བཏབ། །ཉང་ཆུ་སྐྱ་མོའི་ནང་དུ་བོར་བར་གྱུར། །རྒྱང་མཁར་པ་ཚབ་ཡུལ་དུ་དགུང་བདུན་ཆགས། །ཁྲི་འཐང་དགུར་མོར་དགུང་ཞག་བཅུ་གསུམ་ཆགས། །ཀོང་པོར་ཁྱེར་སྟེ་ཀླུ་སྲིན་ཧོ་སྟེ་རེའི། །བྲན་མོ་བྱེ་མ་ལག་རིང་ཞེས་པས་ཟིན། །མཛོད་ནང་དཀོར་གྱི་དམ་པ་བྱས་ཅེས་གྲག །ལྷ་སྲས་མཆེད་གསུམ་ཡབ་ཀྱི་དཀོར་མཛོད་ནས། །ལྷ་ཡི་གླང་བུ་ཅེ་འུ་རུ་དཀར་ཞེས། །འཕུར་ཤེས་བཞོན་ནས་ཀོང་པོའི་ཡུལ་དུ་བྲོས། །གཅེན་པོ་ཤ་ཁྲིས་ཀོང་གི་རྗེ་བོ་མཛད། །འབྲིང་པོ་བྱ་ཁྲིས་པོ་བོའི་མངའ་དབང་མཛད། །ཆུང་བ་ཉ་ཁྲིས་ཉང་པོའི་རྗེ་མཛད་སྐད། །ལོ་ངམ་གྱིས་ནི་ལྷ་གཅིག་ཆུང་མར་བཟུང༌། །ལྕམ་སྲིང་བཞི་ཡི་ཡུམ་ལ་རྟ་རྫི་བཅོལ། །རྟ་འཚོར་ཕྱིན་སྟེ་གཉིད་ལོག་རྨི་ལམ་དུ། །མི་དཀར་མཛེས་པ་ཅིག་དང་བཤོས་པ་རྨིས། །སད་ཚེ་གཡག་དཀར་ཞིག་ནི་སོང་བ་མཐོང༌། །ཟླ་བ་ཚང་ནས་ཁྲག་རླངས་འགུལ་བ་བཙས། །འབྲོང་རུ་དྲོན་མོར་བཅུག་ནས་འོ་མས་བྲན། །དྲོད་ཀྱིས་བཙོས་པས་དེ་ཡི་ནང་ནས་ནི། །ཁྱེ་འུ་མཛེས་ཅིང་ལྟ་ན་སྡུག་པ་བྱུང༌། །རུ་ལས་སྐྱེས་དང་ངར་སོས་པོ་ཅེས་བཏགས། །ལོ་བཅུ་ལོན་ཚེ་ཕ་དང་ཕུ་བོ་འདྲི། །རྒྱལ་པོའི་གདུང་དང་དཔུན་ཟླ་འཚོལ་དུ་ཕྱིན། །རྒྱལ་པོའི་སྐུ་གདུང་ཀོང་ནས་རྙེད་ན་ཡང༌། །བསླངས་པས་མ་སྟེར་རྐུ་བར་མ་ཐོབ་ནས། །སྤུར་འདིས་ཀླུ་རྣམས་མཁའ་ལྡིང་འཇིགས་ལས་བསྐྱབས། །(ཇ༨ན)

[Full Size]

དེ་ཕྱིར་ནོར་གྱི་དམ་པ་ཡིན་མོད་ཀྱང༌། །མི་མོ་བཅུ་དྲུག་ལོན་པ་བྱ་མིག་ཅན། །དེ་མར་བྱུང་ན་བླུ་རུ་བཏང་ངོ་སྐད། །དེ་བཙལ་བས་གཡེའི་གངས་བར་ཡུར་གོང་ནས་བུ་མོ་དགེ་ཡུམ་བྱ་བ་ཞིག་རྙེད་སྟེ་ཕ་ན་རེ་གསེར་བུ་མོ་ཙམ་ཞིག་འདོད་ཟེར། མ་ན་རེ་སྲིད་ཀྱི་བུ་ཡོང་བའི་ཐབས་སུ་སྤུར་དེ་ལ་མཚར་གྱི་ལྕག་བརྒྱ་དང་མཚལ་གྱི་ཐིག་བརྒྱད་བཅུ་འདེབས་སུ་ཆུག་ཟེར་ནས་དེས་བླུས་སྐད། བོན་ཚེ་ཅོ་གཉིས་ཀྱིས་གྲི་བརྟུལ་ཡང་མ་ཐུལ་ནས་པ་རའི་བུ་སྐྱི་རྒྱལ་མང་པོ་རྗེས་གྲི་སྲིད་བརྟུལ་སྟེ་སྤུར་ཡར་ལུངས་སུ་སྤྱན་དྲངས་སྐད། བླུས་ནས་སྤྱན་དྲངས་སྤུར་ཟངས་ཕྱེ་པའི་ཚེ། །སྤུར་དེས་ང་ར་ར་ཞེས་སྒྲ་བསྒྲགས་པས། །ཡུལ་དེའི་མིང་ཡང་ངར་པ་ཐང་དུ་ཐོགས། །འབངས་བསྐོར་ཞག་ནི་སུམ་བརྒྱ་དྲུག་བཅུ་བྱས། །དྲང་མོ་དྲང་ཆུང་རི་ཡི་ཟོམ་དུ་བཞུགས། །དེ་ཚེ་གནམ་ནས་གསེར་གྱི་ཐིག་གུ་བྱུང༌། །སྤུར་ལ་ཐིམ་པས་གནམ་ལྷ་གསེར་ཐིག་གྲག །དེང་སང་ཡུལ་དེའི་ལྷ་རུ་བཞུགས་སོ་སྐད། །རུ་ལས་སྐྱེས་ཀྱི་འཕྲུལ་དང་མཐུ་སྟོབས་ཀྱིས། །ལོ་ངམ་འཁོར་བཅས་བརྟུལ་ཞིང་ཚར་གཅོད་བྱས། །རུ་ལས་སྐྱེས་ཀྱིས་ལོ་ངམ་གྱི་ནང་མིར་ཞུགས་སྟེ་ཤ་ཁྱི་དཀར་མོའི་སྤུ་རྩར་དུག་བྱུགས་པ་བཀོར་དུ་ཕུལ་བ་ལ་ལོ་ངམ་གྱིས་བྱིལ་བྱིལ་བྱས་པས་དེ་མ་ཐག་དུ་ལུས་ཐམས་ཅད་སྲངས། གཡོག་རྣམས་ཁོ་ན་བའི་སར་འདུས་པའི་བར་ལ་ཉང་རོ་ཤམ་པོ་མཁར་གྱི་ཕ་རི་ལ་བྱ་རྒོད་ཀྱི་ཚང་ཡོད་པས་བྱ་རྒོད་ཀྱི་གསེབ་ཏུ་ཞུགས་སྟེ་ཉང་རོ་ཤམ་པོ་མཁར་རྩེ་ནས་ཕབ། ལོ་ངམ་ཕོ་བརྒྱ་མོ་བརྒྱ་བསད་སྐད། སྲས་རྣམས་རྒྱལ་སར་སྤྱན་འདྲེན་བྱས་པའི་ཚེ། །ཐོག་མཐའ་གཉིས་ནི་གཤེགས་སུ་མ་བཞེད་ནས། །པོ་བོའི་ཡུལ་ནས་འབྲིང་པོ་བྱ་ཁྲིས་བྱོན། །རྒྱལ་སར་བཏོན་ཚེ་ཡུམ་གྱིས་སྲས་ལ་འཇུས། །བུ་ཁྱོད་རྒྱལ་བརྒྱུད་མ་ཉམས་ཡིན་ངེས་ན། །རྒྱལ་སྲིད་བརྟན་ཞིང་རྒྱས་པར་ཤོག་ཞེས་སྨྲས། །དེ་ཚེ་བར་སྣང་གནས་པའི་ལྷ་རྣམས་ཀྱིས། །ཁྱོད་ཀྱི་བུ་དེ་ཀུན་ལས་རྒྱལ་འགྱུར་ཞེས། །བརྗོད་པ་ཐོས་པས་དེ་ཉིད་མཚན་དུ་ཆགས། །འབངས་ཀྱིས་སྒྲ་ཉམས་བུ་དེ་གུང་རྒྱལ་གྲགས། །རྒྱལ་པོའི་སྐུ་མཁར་འཆིང་བ་སྟག་རྩེ་བརྩིགས། །ཤམ་པོ་མཁར་གྱི་རྩི་ཕབ་ནས་(ཇ༨བ)

[Full Size]

རྨང་རྡོ་བྱས། ལྷ་གཅིག་གིས་ངའི་ལུས་ལ་ལོ་ངམ་གྱི་བུ་ཡོད་པ་རྨང་དུ་གནོན་ཞིག་ཟེར་ནས་སྲོག་དོར་བས་ཡུལ་དེའི་ལྷ་སྨན་ཞིག་བྱུང་བར་གྲགས། རྒྱལ་པོས་མི་མཆོག་རུ་ལས་སྐྱེས་ཁྱོད་ཀྱིས། །ང་ཡི་ཡབ་ཀྱི་གོ་བགྱིས་རྒྱལ་སར་བཏོན། །སྲས་ཀྱི་གོ་བགྱིས་ཡབ་ཀྱི་སྐུ་མཚལ་གཉེར། །ཆེ་ཆུང་མེད་པའི་མི་ཀུན་ཁྱོད་ལ་སྨོན། །མིང་ཡང་ཁུ་བོ་ལྷ་བུ་སྨོན་གཟུང་ཞེས། །བཏགས་ཤིང་དྲིན་དུ་གཟོ་བ་རྒྱ་ཆེར་བྱས། །རྒྱལ་པོས་ཁུ་བོར་ཁུར་བས་ཁུའི་རུས་སུ་ཐོགས་སྐད། བོད་ཡུལ་འཕྲུལ་བློན་མཛངས་པའི་མི་བདུན་གྱི། །ཐོག་མར་གྱུར་པ་རུ་ལས་སྐྱེས་འདི་ཡིན། །མཛངས་པའི་ལས་སུ་ཤིང་བསྲེགས་སོལ་བ་བྱུང༌། །དེ་ཡིས་རྡོ་བཞུ་གསེར་དངུལ་ཟངས་ལྕགས་ཕྱུང༌། །ཤིང་ལ་མིག་ཕུག་གཤོལ་དང་གཉའ་ཤིང་བྱས། །ས་གཞི་བརྐོས་ནས་ཕུ་ཆུ་ཡུར་དུ་དྲངས། །རྨོན་པ་དོར་བསྡེབས་སྤང་ཐང་ཞིང་དུ་རྨོས། །བརྒལ་བས་མི་ཐར་ཆུ་ལ་ཟམ་པ་བཙུགས། །རྨོས་པའི་ལོ་ཏོག་ཐོག་མར་འདི་ནས་བྱུང༌། །མ་འོངས་སྔགས་དང་འདུལ་བ་འབྱུང་བའི་ལྟས། །གནམ་བོན་གཤེན་པོ་ཆེ་དང་བོན་གཞུང་བྱུང༌། །གཤེན་ཡུལ་བོན་མོ་ལུང་རིང་ཞེས་ཟེར་བ་དབུས་ཀྱི་འོན་དུ་རུས་གཤེན་གྱི་བྱིས་པ་བོང་བུའི་རྣ་བ་ཅན་བྱུང་བ་ལོ་བཅུ་གཉིས་ལོན་ཚེ་འདྲེས་ཁྲིད་ནས་ལོ་བཅུ་གཉིས་སུ་མི་ཁྱུར་མ་ཚུད། ལོ་བཅུ་གཉིས་འདས་ནས་ལོག་བྱུང་ཚེ་ཡུལ་འདི་ན་འདྲེ་འདི་ཡོད་པ་འདི་ལྟར་མཆོད་ཐམས་ཅད་ཤེས་པ་ཅིག་བྱུང་ནས་བོང་བུའི་རྣ་བ་སྒྲིབ་པའི་ཕྱིར་བལ་ཐོད་བཅིངས་སྟེ་འདྲེ་མཆོད་པའི་རྡོལ་བོན་དར་ཞིང་གཞན་ཡང་འབྲས་བུའི་བོན་རིགས་ལྔ་གཡུང་དྲུང་བླ་མེད་ཀྱི་ཐེག་པ་ཞེས་འབྲས་བུ་བདེ་འགྲོ་མཐོ་རིས་ཐོབ་པར་འདོད་པ་དང༌། རྒྱུའི་བོན་རིགས་བཞི་སྐད་པ་སྣང་གཤེན་བལ་ཐོད་ཅན་གྱིས་ཕྱ་གཡང་འགུགས་མི་ནོར་རྒྱས་པར་བྱེད། འཕྲུལ་གཤེན་བལ་མཚོན་ཅན་གྱིས་ཡས་དང་མདོས་གཏོང་འགལ་རྐྱེན་སེལ། ཆ་གཤེན་ཇུ་ཐིག་ཅན་གྱིས་ལེགས་ཉེས་སྟོན་ཟག་བཅས་ཀྱི་མངོན་ཤེས་འཆད། དུར་གཤིན་མཚོན་ཆ་ཅན་གྱིས་གསོན་གཤིན་གྱི་རྩིས་བྱེད། ཐམས་ཅད་རྔ་གཤང་གི་སྒྲ་འཁྲོལ། འཇིམ་པའི་ཤ་བ་ན་མཁའ་ལ་འགྲོ་བ་དང༌། རྔ་ལ་བཞོན་ནས་འགྲོ་བ་སོགས་ཟག་བཅས་ཀྱི་རྫུ་འཕྲུལ་མང་པོ་ཡོད་སྐད། མདོ་སྡེ་འབྱུང་བའི་ལྟས་སུ་སྒྲུང་རྣམས་དར། །རོ་ལངས་གསེར་སྒྲུབ་ཀྱི་སྒྲུང་དང༌། མ་སངས་(ཇ༩ན)

[Full Size]

ཀྱི་སྒྲུང་དང༌། མཆིལ་པའི་སྒྲུང་སོགས་ཉན་བཤད་དང༌། མངོན་པའི་སྡེ་སྣོད་འབྱུང་ལྟས་ལྡེ་འུ་སྤྲོད། །སྲང་ལ་ཐེམ་གཉེར་ཝ་བ་ཆེ་ཅི་ཡིན། པོར་མགོ་མགོ་ཅན་སྐྱེད་ཅིང་རྒྱགས་ཅི་ཡིན་ཞེས་འདྲི་བ་སོགས་སྟེ་བོན་སྒྲུང་ལྡེའུ་གསུམ་གྱི་ཚུལ་ལྷ་སའི་གདུང་རྣམས་ལ་བྲིས་ནས་ཡོད་སྐད། དེ་ཡིས་བོན་རྣམས་ཅུང་ཟད་བློ་ཁ་བྱེ། །རྒྱལ་པོ་ཡབ་སྲས་འདི་གཉིས་སྟོད་ཀྱི་སྟེངས། །སྟེངས་གཉིས་བང་སོ་རྫ་དང་གཡའ་ལ་བཏབ། །དེ་དང་བཙུན་མོ་འོམ་ཐང་སྨན་མཚོའི་སྲས། །ལེགས་དྲུག་ཐོག་མ་ཨི་ཤོ་ལེགས་ཅེས་བྱ། །དེ་ཡི་བློན་པོ་ལྷ་བུ་མགོ་དཀར་ཞེས། །ཁུ་ཁུ་རུ་ལས་སྐྱེས་ཀྱི་བུ་ཡིས་བྱས། །འཕྲུལ་བློན་མཛངས་མི་བདུན་གྱི་གཉིས་པ་ཡིན། །མཛངས་པའི་ལས་སུ་ཞིང་ལ་དོར་ཁ་བརྩིས། །འབྲོག་ལ་ཐུལ་རྩིས་ཕུ་ཆུ་ཡུར་དུ་དྲངས། །མདའ་རུ་ཆུ་མ་རྨོ་བ་འདི་ནས་དར། །རྒྱལ་པོ་དེ་ཤོགས་ལེགས་དང་ཐི་ཤོ་ལེགས། །གོང་རུ་ལེགས་དང་ལྔ་པ་འབྲོང་གཞེར་ལེགས། །ཤོ་ལེགས་རྣམས་ནི་ས་ལ་ལེགས་དྲུག་ཟེར། །ཡུམ་རྨུ་ལྕམ་བྲ་མ། ཀླུ་ལྕམ་མེར་མ། མཚན་མོ་གུང་སྨན། མཚོ་སྨན་འབྲོངས་མ། གནམ་སྨན་བུ་མོ་རྣམས་ཡུམ་ཡིན་ཟེར། འདི་དྲུག་རིང་ལ་འཆིང་བ་རྩེ་དྲུག་བརྩིགས། །སྟག་རྩེ། རྒོད་རྩེ། ཡང་རྩེ། ཁྲི་རྩེ། རྩེ་མོ་ཁྱུང་རྒྱལ། ཁྲི་བརྩིགས་འབུམ་གདུགས་དྲུག་ཡིན། ལེགས་དྲུག་བང་སོ་གཡའ་སྤང་མཚམས་སུ་བཏབ། །སྤང་ལ་འཇའ་ཚོན་རྒྱས་པ་འདྲ་འོ་སྐད། །དེ་ནས་རྒྱལ་པོ་ལྡེ་བརྒྱད་ཅེས་པ་བྱུང༌། །ཡུམ་རྨུ་ལྕམ་རྨང་ལེགས། མཚོ་སྨན་ཁྲི་དཀར། སེ་གཉན་མེར་མོ། ཀླུ་མོ་མེར་མོ། འོ་ཐ་ཏེ་མོ་མཚོ། ཁྲི་སྨན་རྗེ་མོ། ཁྲི་སེ་བཙུན་གཉན་མོ། སྨན་བཙུན་ལུག་སྐོང་རྣམས་ཀྱི་སྲས། ཟ་ནམ་ཟིན་ལྡེ། འཕྲུལ་ནམ་གཞུང་བཙན་ལྡེ། སེ་སྣོལ་ནམ་ལྡེ། སེ་སྣོལ་པོ་ལྡེ། ལྡེ་སྣོལ་ནམ། ལྡེ་སྣོལ་པོ། ལྡེ་རྒྱལ་པོ། ལྡེ་སྤྲིན་བཙན་སྟེ་བརྒྱད་ཏོ། །ལྡེ་བརྒྱད་བང་སོ་ཆུ་བོའི་གཞུང་ལ་བཏབ། །མཚོ་ལ་ཁ་བ་བབ་པ་འདྲ་འོ་སྐད། །བཙན་ལྔའི་ཐོག་མ་ཏོ་རེ་ལོང་བཙན་ཡིན། །ཡུམ་ཉེ་བཙུན་མང་མ་རྗེ། བློན་པོ་ཐོན་མི་འབྲིང་པོ་རྒྱལ། སྣུབས་སྨན་ད་རེ། སྟོང་འདར་རྗེ་རྣམས་ཀྱིས་བྱས་སྐད། འདི་ཡན་ཡུམ་རྣམས་ལྷ་མོ་ཀླུ་མོ་ཡིན། །བཙུན་མོའི་རྟེན་དོག་ལ་མི་འཚེར་ཞེས་སྤུར་མི་ཡོང་སྐད། དེ་ཕྱིར་ལྷ་སྲས་ལྡེ་སྲས་ཅེས་པར་(ཇ༩བ)

[Full Size]

གྲགས། །འབངས་དང་གཉེན་བསྲེས་མན་ཆད་ལྡེ་སྲས་བཞག །དེ་ཡི་དོད་དུ་ལྷ་སྲས་བཙན་པོ་ཟེར། །དེ་དང་འོ་མ་ལྡེ་ཟ་ཁྲི་བཙུན་བྱང་མའི་སྲས་ཁྲི་བཙན་ནམ། བློན་པོ་སྣུབས་གཉའ་དོར་གཙུག་བློན་དང་སྲས་ཁྲི་ཟུང་མོང་ཁོང་གིས་བྱས། རྗེ་དེ་དང་སྨན་ཟ་ཁྲི་དཀར་གྱི་སྲས་ཁྲི་སྒྲ་སྤུངས་བཙན། བློན་པོ་མགར་སྒྲ་ཛི་མུན་དང་ཐོན་མི་གླུ་མང་དྲེད་པོས་བྱས། རྗེ་དེ་དང་སྨན་གསུམ་ཀླུ་སྟེང་གི་སྲས་ཁྲི་ཐོག་རྗེ་ཐོག་བཙན། བློན་པོ་མགར་གཉའ་བཙན་ལྡེམ་བུ་དང་སྣུབས་སྐྱེས་ཐོག་རྗེ་མོར་བཙན་གྱིས་བྱས། བཞི་པ་ཐོག་རྗེ་ཐོག་བཙན་སྐུ་རིང་ལ། །ལྷ་ཡི་རོལ་མོ་གླིང་བུ་ཅག་པར་བྱུང༌། །འདི་ཡན་གདུང་རབས་ཉི་ཤུ་རྩ་བདུན་དུ། །ཆབ་སྲིད་སྒྲུང་དང་ལྡེའུ་བོན་གྱིས་བསྐྱངས། །དེ་ནས་དམ་པའི་ཆོས་ཀྱི་དབུ་བརྙེས་པ། །རྒྱལ་སྲས་ཀུན་དུ་བཟང་པོའི་རྣམ་སྤྲུལ་ནི། །སྤྲུལ་པའི་རྒྱལ་པོ་ཐོ་ཐོ་རི་གཉན་བཙན། །ཡབ་ཐོག་རྗེ་ཐོག་བཙན་དང་ཡུམ་རུ་ཡོང་ཟ་སྟོང་རྒྱལ་མོ་མཚོའི་སྲས་སྟེ་ཕྱག་རྡོར་གྱི་སྤྲུལ་པར་བཤད་པའང་ཡོད་ཀྱང་མི་འགལ་སྟེ་ཀུན་དུ་བཟང་པོ་སྔགས་སུ་དབང་བསྐུར་བ་ནི་ཕྱག་ན་རྡོ་རྗེ་ཡིན་པར་ཕྱག་རྡོར་དབང་བསྐུར་གྱི་རྒྱུད་ལས་བཤད་པའི་ཕྱིར་རོ། །ལྡེ་སྟོན་གྱི་ཆོས་བྱུང་དུ་ས་སྙིང་གི་སྤྲུལ་པ་ཅེས་ཀྱང་སྣང༌། དགུང་ལོ་དྲུག་བཅུ་བཞེས་པ་སྐུ་མཁར་ཆེ། །ཡུམ་བུ་བླ་སྒང་རྩེ་ལ་བཞུགས་པའི་ཚེ། །ནམཁར་འཇའ་ཚོན་ཁ་དོག་སྣ་ཚོགས་བཀྲ། །མེ་ཏོག་ཆར་དང་ལྷ་ཡི་རོལ་མོ་བྱུང༌། །གདུགས་ཤར་ཚེ་ན་ཉི་ཟེར་དང་འགྲོགས་ནས། །གསེར་ཤོག་ངོས་ལ་བཻ་ཌཱུ་རྻས་བྲིས་པའི། །པང་ཀོང་ཕྱག་རྒྱ་མདོ་སྡེ་ཟ་མ་ཏོག །ཡིད་དུ་འོང་བའི་གླེགས་བམ་རྣམ་གཉིས་དང༌། །གསེར་གྱི་མཆོད་རྟེན་མུ་དྲའི་ཕྱག་རྒྱ་དང༌། །ཙིནྡ་མ་ཎིའི་སྐོས་ཕོར་རྣམ་དྲུག་བབ། །འདི་ལ་གཡུའི་མཆོད་རྟེན་བང་རིམ་བཞི་པ་ཅེས་ཀྱང་འབྱུང༌། ཙིནྡ་མ་ཎིའི་སྐོས་ཕོར་ཞེས་པའི་བཅུ་གཅིག་ཞལ་ཡིད་བཞིན་ནོར་བུའི་གཟུགས་ཀྱི་སྐོས་ཕོར་ཞིག་དང༌། མུ་དྲའི་ཕྱག་རྒྱ་ཞེས་ཚད་ཁྲུ་གང་ཙམ་གྱི་ནོར་བུའི་རིགས་ཀྱི་རྡོ་ལ་ཡིག་དྲུག་རང་བྱུང་ཅན་ཡོད་སྐད། དེའི་ཕྱིར་མདོ་ལ་སྔ་བ་ཟ་མ་ཏོག །གཟུངས་ལ་སྔ་བ་ཙིནྡ་མ་ཎི་ཞེས་བོད་དུ་གྲགས་པ་ཡིན་ནོ། །ཀ་བཀོལ་མར་ཆོས་རྒྱལ་མྱ་ངན་མེད་གྱི་གདུང་རྒྱུད་རྒྱལ་པོ་ཛ་ཞེས་བྱ་བས་མ་ག་དྷར་སྔོན་མེས་(ཇ༡༠ན)

[Full Size]

པོ་མྱ་ངན་མེད་ཀྱིས་སྐུ་དང་ཐུགས་ཀྱི་རྟེན་རྒྱ་ཆེར་བྱས་འདུག་ཀྱང་གསུང་གི་རྟེན་མ་བྱས་པར་འདུག་པས་ངས་གསུང་གི་རྟེན་བྱེད་ཟེར་བ་ལ་བློན་པོ་ཅིག་གིས་ཆོས་རྒྱལ་མྱ་ངན་མེད་ཀྱིས་བྱས་པ་ལྟར་ཁྱེད་རང་ཡང་ལུང་བསྟན་གྱི་རྒྱལ་པོ་ཡིན་སྲིད་པས་དཀོན་མཆོག་ལ་གསོལ་བ་བཏབ་པའི་དམོད་ཚུགས་ཟེར་ནས་དེ་ལྟར་བྱས་པས་རྡོ་རྗེ་སེམས་དཔའས་ན་མཁའ་ནས་གླེགས་བམ་གྱི་ཆར་ཕབ། དེ་རྣམས་རྒྱལ་མཚན་གྱི་རྩེ་ལ་སོ་སོར་བཏགས་སྟེ་མཆོད་པ་བྱས་པས་རླུང་གཡོས་པས་རྒྱལ་མཚན་གཅིག་མི་སྣང་བར་ཁྱེར་བ་དེ་བོད་ཏུ་བབས་པ་ཡིན་ཞེས་བཤད་ནས་མདོ་གཉིས་མ་གཏོགས་གཞན་ཕྱག་རྒྱ་བཞི་པོ་མ་བཤད། འདི་ཡང་མ་ག་དྷ་ནི་ཡི་གེ་ཉམས་པར་ཟད་པས་སྤྱིར་ཟ་ཧོར་གྱི་ཡུལ་དུ་བྱུང་བར་སྣང་ལ། སྔ་རབས་པ་རྣམས་ཀྱིས་བདེ་མཆོག་སྡོམ་འབྱུང་གི་རྒྱུད་ཕྱི་མའི་ལུང་ཡིན་ཟེར་བ། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །བསྟན་པའི་སྙིང་པོ་དམ་པ་ཅིག །ལྷ་གནས་གསུམ་དུ་གྲགས་པ་སྟེ། །འཛམ་གླིང་ཤར་ལྷོའི་ཕྱོགས་མཚམས་ན། །དཔལ་དང་ལྡན་པའི་རི་བོ་ལ། །ཐུགས་རྗེ་མཐུན་པའི་བྱིན་རླབས་ཀྱིས། །རྒྱལ་པོ་རྗེ་ཞེས་བྱ་བ་ལ། །ལག་ན་རྡོ་རྗེ་སྣང་བར་བྱེད། །ཅེས་འདྲེན་པར་སྣང་ཞིང༌། བོད་དུ་ཆོས་བྱུང་བ་ནི་ལྷ་མོ་དྲི་མ་མེད་པའི་འོད་ལུང་བསྟན་པའི་མདོར། ལོ་སྟོང་དང་ལྔ་བརྒྱ་ན་དམ་པའི་ཆོས་གདོང་དམར་ཅན་གྱི་ཡུལ་ཞེས་པ་བོད་དུ་འབྱུང་བར་བཤད་པས་དུས་མི་མཚུངས་པར་སྣང་མོད། ཛའི་ཁང་ཐོག་ནས་མི་སྣང་བར་གྱུར་པ་དག་པའི་ཞིང་དུ་གནས་ནས་ཕྱིས་བོད་ཏུ་བབ་པ་ལྟ་བུ་ལ་ནི་འགལ་བ་མེད་ཏོ། །བོད་དུ་ཆོས་འབྱུང་ཚུལ་འདི་ལའང་ལོ་ཉིས་སྟོང་ལྔ་བརྒྱ་ཞེས་ཟེར་བ་མང་བར་སྣང་ཡང་སྟོང་དང་ལྔ་བརྒྱ་འཆད་པ་རྣམས་འགྲིག་པར་སྣང་ཞིང་འདི་ནི་ཆོས་རྒྱལ་ཁྲི་སྲོང་ལྡེ་བཙན་གྱི་དུས་ལ་དགོངས་སོ། །ཀུན་མཁྱེན་བུས་རྦ་བཞེད་ནས་གདོང་དམར་གྱི་ཡུལ་རྒྱ་ནག་ལ་བཤད་གསུངས་ཀྱང་རྦ་བཞེད་ན་སང་ཤི་རྒྱ་ནག་དུ་ཆོས་ལེན་པར་བཏང་དུས་ཇུ་ཞག་མཁན་མཁས་པས་བྱང་ཆུབ་སེམས་དཔའི་སྤྲུལ་པ་བྱེད་འདི་འདྲ་བ་ཕོ་ཉར་འོང་ཞེས་འབག་བྱས་ནས་སླེབ་པའི་ཚེ་རྒྱལ་པོས་བྱ་དགའ་ཆེར་བྱིན། གདོང་དམར་ཅན་ཡུལ་དུ་ཆོས་ཀྱི་ཁུངས་འབྱིན་པའི་བྱང་ཆུབ་སེམས་དཔའ་འབྱུང་བར་ལུང་བསྟན་པ་དེ་ཁྱོད་ཡིན་ངེས་ཅེས་ཆོས་བམ་པོ་སྟོང་ཙམ་བསྐུར་ཞེས་གདོང་དམར་ཅན་གྱི་ཡུལ་བོད་ལ་ངོས་བཟུང་བ་ཆེས་གསལ་པོར་ཡོད་ཏོ། །ཁ་ཅིག་དུ་(ཇ༡༠བ)

[Full Size]

ལོ་དང་པོ་ལ་གསེར་གྱི་ལྗང་པ་ལ་བཻ་ཌཱུརྻ་ཞུན་མས་བྲིས་པའི་གླེགས་བམ་གཉིས་པོ་བབ། གསེར་སྐྱེམས་དང་གཡུ་སྔོན་གྱིས་མཆོད་པས་སང་ཕོད་ལོ་དུས་སུ་ཕྱག་རྒྱ་གཞན་རྣམས་བྱུང་ཞེས་ཀྱང་སྣང༌། སྤྱིར་ཐེག་ཆེན་གྱི་མདོ་སྔགས་གཉིས་དང་ལྟ་བ་བཀར་བཏགས་ཀྱི་ཕྱག་རྒྱ་བཞི་མཚོན་བྱེད་ཏུ་རྟེན་དེ་རྣམས་བྱུང་ལ་གསང་བ་ཆོས་ལུགས་ལ་ལར་མཁན་པོ་ཞི་བ་འཚོ་བོད་ཀྱི་དོན་དུ་འཁྲུངས་པ་དེས་ཁྲི་སྲོང་ལྡེ་བཙན་ཡིན་ནམ་སྙམ་ནས་མདོ་སྡེ་གཉིས་པོ་བོད་རྗེ་ལ་སྐྱེལ་དུ་བཏང་བ་རྒྱལ་པོ་ཐུགས་སྒམ་པས་བོན་བློན་རྣམས་གནམ་ལ་དགའ་བ་གདུལ་ཕྱིར་གནམ་ནས་བབ་བོ་ཞེས་གསུངས་བར་ཡང་བཤད། དེ་ནས་རྒྱལ་པོའི་སྐུ་གཤེན་རྨུ་བོན་སྐྱོ་ངོ་མཚར་བྱ་བས་འདི་བོན་དར་བའི་རྟགས་ཡིན་པས་བོན་ལུགས་ལྟར་མཆོད་ཅིག་ཟེར་ནས་ཤ་ཁྲག་གིས་མཆོད་པས་ནད་དང་ཐན་པ་བྱུང༌། རྒྱལ་པོའི་རྨང་ལམ་དུ་འདི་ཆོས་དར་བའི་རྟགས་ཡིན་པས་སྤོས་དང་མེ་ཏོག་དང་མར་མེས་མཆོད་ཅིག །མི་རབས་ལྔ་ནས་འདིའི་དོན་ཤེས་པར་འགྱུར་རོ་ཞེས་བྱུང་ནས་ཆོས་བཞིན་མཆོད་པས་བཀྲ་ཤིས་སྐད། ཆོས་སམ་བོན་དུ་མཁྱེན་ཚུལ་མ་བསྟན་ཡང༌། །གསེར་སྐྱེམས་གཡུ་སྔོན་ལ་སོགས་ཀྱིས་མཆོད་དེ། །གསེར་སྐྱེམས་ཞེས་བཏུང་བར་གསེར་བླུག་པ་དང༌། གཡུ་སྔོན་སྒོག་པ་ཡིན་ཟེར་ཡང་མ་དག་པ་སྟེ་བཟའ་བའི་སྟེང་དུ་གཡུ་བཟང་པོ་བཞག་པར་སྣང་ངོ༌། །གཉན་པོ་གསང་བ་ཞེས་པར་མཚན་གསོལ་ནས། །རྒྱལ་པོས་ཕྱག་བསྐོར་བཀུར་སྟི་རྒྱ་ཆེར་བྱས། །ཚེ་གཅིག་སྐྱེ་བ་གཉིས་ལ་མངའ་བརྙེས་ཞེས། །དགུང་ལོ་བཅུ་དྲུག་ལོན་པའི་གཞོན་ཤར་གྱུར། །སླར་ཡང་དགུང་ལོ་དྲུག་བཅུར་སྐུ་ཚེ་སྲིངས། །མི་ལོ་བརྒྱ་དང་ཉི་ཤུའི་བར་དུ་བཞུགས། །ང་ཡི་ཐུགས་དམ་གཉན་པོ་གསང་བ་ལ། །མཆོད་པ་གྱིས་ཤིག་བསམས་དགུ་འགྲུབ་བོ་ཞེས། །བོད་འབངས་སྤྱི་ལ་ཡང་ཡང་ཞལ་ཆེམས་གསུངས། །བཙན་ལྔ་མན་ཆད་བང་སོ་འཕྱིང་ཡུལ་བཏབ། །བཙན་ལྔའི་མཆད་པ་ས་ཕུང་སྦྲ་(ཇ༡༡ན)

[Full Size]

འདྲར་ཡོད། །ཁ་ཅིག་བཙན་གསུམ་ལས་མི་འདོད་པ་དང༌། བཙན་ལྔ་མ་དག་ཞེས་འཆད་པ་ལ་སྙིང་པོ་ཅི་ཡང་མེད་དེ་གསང་བ་ཡང་ཆུང་སོགས་ལས། བཙན་ལྔའི་མཆད་པ་ས་ཕུང་སྦྲ་འདྲ་ཡོད། །ཕུལ་མེད་མཆད་པ་གྲུ་བཞི་མི་ཤེས་སྐད། ཞེས་སོགས་སྔོན་ནས་ཆེར་གྲགས་པའི་ཕྱིར་རོ། །ཁ་ཅིག་ཕྱིས་ལྷའི་སྙན་ཤལ་ལྟར་སྙན་རིང་པོར་གྱུར་པས་ཐོ་ཐོ་རི་སྙན་ཤལ་བྱུང་ཟེར་བའང་བླུན་སྐད་བཅོས་མ་སྟེ་གཉན་པོ་གསང་བ་ཞེས་པ་ལྟ་བུ་བཀའ་གཉན་པའི་དོན་ཡིན་གྱི་རྣ་བ་ལ་ཞེ་ས་བཅུག་པའི་སྙན་མིན་ནོ། །དེས་ན་ཐོ་ཐོ་རི་གཉན་བཙན་ཡན་ལ་བཙན་ལྔ་ཟེར་རོ། །དེ་ཡི་བཙུན་མོ་རྣོ་ཟ་མང་དགར་ལ། །ལྷ་སྲས་ཁྲི་གཉན་གཟུངས་བཙན་ཞེས་པ་འཁྲུངས། །སྲས་ཀྱིས་རྣོ་ལ་ཞང་དུ་བོས་པ་ཡིས། །ཞང་དུ་རྣོ་ལྔ་རུས་ལ་དེར་མིང་ཆགས། །དེ་ཡན་ལ་ཞང་པོ་ལ་ཇོ་བོ་ཞེས་འབོད་སྐད། རྒྱལ་པོ་འདིའི་བློན་པོ་སྦས་སྣང་གཞེར་ལྷ་བཙན་དང་མགར་ཁྲི་འབྲིང་གིས་བྱས། ཁྲི་གཉན་མཆད་པ་དོན་མཁར་མདའ་རུ་བརྩིགས། །དེ་ཡང་ཕུལ་མེད་ས་ཕུང་བརྡལ་པ་འདྲ། །རྗེ་དེ་དང་ཡུམ་འབྲོ་ཟ་མོ་དུར་ཡང་བཞིན་གྱི་སྲས། དེ་ནས་རྒྱལ་པོ་འབྲོང་གཉན་ལྡེ་རུ་སྟེ། །རྟོག་པའི་ནད་ཀྱིས་སྐུ་ལ་སྙུན་འཛེ་བྱུང༌། །དྭགས་པོ་ནས་མཆིམས་ཟ་ཀླུ་རྒྱལ་བྱ་བ་མཛེས་པ་ཅིག་ཁབ་ཏུ་བཞེས། ཕྱིས་མི་མཛེས་པར་གྱུར་ནས་རྒྱུ་དྲིས་པས་ང་རང་གི་ཡུལ་ན་ཟས་ཤིག་ཡོད་པ་དེ་མེད་པས་ལན་ནམ་ཟེར་ནས་ལེན་བཅུག་པས་གཡོག་མོས་སྦལ་པ་མར་བཙོས་མང་དུ་སླངས་སྟེ་མཛད་དུ་སྤྲས་ནས་ཟོས་པས་མཛེས་པར་གྱུར་ནས་རྒྱལ་པོས་ང་རང་ཡང་བཟའོ་སྙམ་ནས་ལྡེ་ཚབ་ཀྱིས་སྒོ་ཕྱེ་བས་སྦལ་རོ་མཐོང་བས་རྟོག་པ་ཟོས་སྟེ་བསྙུན་ནད་བྱུང༌། དེ་དུས་བོད་གཞན་ན་ཉ་མི་ཟ་བར་དྭགས་པོ་སྦལ་ཟན་གྱི་ཡུལ་ཞེས་དེ་ན་ཉ་ཟ་ཞིང་ཉ་ལ་སྦལ་པར་གྲགས་པ་ཡིན་སྐད། དྭགས་མོས་སྲས་དམུས་ལོང་ཞིག་བལྟམས་པ་ལ་ཁྱོད་འ་ཞའི་ཡུལ་ནས་སྨན་པ་བོས་ལ་མིག་ཕྱིས་རྒྱལ་ས་གྱིས། མིག་མ་བྱུང་བའམ་གདུང་ཆད་པ་འདྲ་ན་སུམ་པའི་ཡུལ་ན་བོན་པོའི་ཆུང་མ་རྒྱ་མོ་རྒྱ་ལྕམ་བྱ་བ་ལ་ངའི་བུ་སུམ་རི་རིང་པོ་བྱ་བ་ཡོད་བོས་ལ་ཁྱོད་རང་གཤེགས་རྫུ་ཐོབ་ལ་རྒྱལ་སར་ཆུག་ཟེར་ནས་ཡབ་ཡུམ་གཉིས་བློན་པོ་སྙགས་ཐང་པ་ཡར་རྗེ་དང་བཅས་པ་གདུང་རྒྱུད་ལ་བསྙུན་མི་འབྱུང་བའི་ཕྱིར་གསོན་པོར་དུར་དུ་ཞུགས་སྐད། མི་ཆོས་རྟོག་པས་ཕུང་གིས་རྟོག་པ་བསྐྱུངས། །བཟང་པོའི་གྲོས་ནི་བདུད་རྩི་ཡིན་གྱིས་ཉོན། །ངན་པ་རྣམས་ཀྱང་མེ་དང་འདྲ་བར་གསོས། །(ཇ༡༡བ)

[Full Size]

རྒྱལ་སྲིད་ཟུངས་ཞེས་སྲས་ལ་ཞལ་ཆེམས་མཛད། །རྗེ་འབངས་གསུམ་ནི་གསོན་བཞིན་བང་སོར་གཤེགས། །ཞང་མདའི་བང་སོ་གསོན་མཆད་ཟླུམ་པོར་གྲགས། །ལྷ་སྲས་དམུས་ལོང་བཀོན་པ་བཀྲ་དེ་ཡིས། །གཉན་པོ་གསང་བ་མཆོད་པའི་བྱིན་རླབས་དང༌། །འ་ཞའི་ཡུལ་གྱི་སྨན་པས་སྤྱན་ཕྱེ་སྟེ། །སྟག་མོའི་རི་ལ་རི་དྭགས་གཉན་གཟིགས་པས། །མཚན་ཡང་སྟག་རི་གཉན་གཟིགས་བཙན་དུ་ཐོགས། །རྒྱལ་ཕྲན་འ་ཞ་རྗེ་བྱ་བ་སྨན་པ་མཁས་པ་ཅིག་བོས་པས་སྤྱན་ཕྱེ། རྒྱལ་བུའི་ཕྱགས་སྒོ་ཀླད་དུ་བཏགས་པའི་འོག་དུ་འ་ཞ་རྗེས་འཛུལ། ལོག་ནས་མས་གཏམ་དྲིས་པས། བོད་ཀྱི་རྒྱལ་པོ་ནི་མ་མཐོང་སྒོ་དགོན་གཡུའི་ལྷམ་ཆུང་ཞིག་བཏགས་འདུག་པའི་འོག་ལ་ཕྱིན་པས་བྱིས་པ་དམུས་ལོང་ཞིག་འདུག་པའི་མིག་ཕྱེ་ནས་ལོག་གོ་སྨྲས་པས་མ་ན་རེ། གཏམ་ཆེས་སོད་ནི་བོད་ཀྱི་ཆབ་འོག་དུ་ཚུད་པས་ཐབས་ཅི་ཡང་མེད་ཏོ་ཟེར། རྒྱལ་ཕྲན་རྣམས་ཀྱི་སུམ་གཉིས་མངའ་འོག་འདུས། །བན་པ་རྗེ། འུ་ཞ་རྗེ་དྲང་གར་རྗེ། ཟིན་པོ་རྗེ། ཞང་ཞུང་རྗེ་རྣམས་བཏུལ། ཉང་སྦས་གནོན་གསུམ་འབངས་སུ་ཆུད་སྐད། འདི་དུས་ཁྲི་དོར་སྣང་བཙུན་མོང་གི་བུས། །བྲེ་ཕུལ་སྲང་བཅོས་འབྲུ་མར་ཚད་ཀྱིས་བཅལ། །དགའ་གཉིས་ཚོང་བྱས་མཐུན་གཉིས་ལ་ལུང་བསྡེབས། །དེ་གོང་བོད་ན་ཚོང་དང་བྲེ་སྲང་མེད། །དེ་ཕྱིར་མཛངས་མི་བདུན་གྱི་གསུམ་པར་གྲགས། །གཞན་ཡང་སྣ་ནམ་མང་གཉའ། སྤྲ་ཁྲི་ཟུང་ལན་པ་རྣམས་ཀྱིས་བློན་པོ་བྱས། ཡབ་སྲས་འདི་གཉིས་བར་གྱི་སྟེངས་ཞེས་གྲགས། །སྲས་སྤྱན་མ་བྱེ་བའི་བར་ཞག་ཉེར་གཅིག་རྒྱལ་པོ་མེད་པས་གདུང་སྟེངས་སྐད། གདུང་གི་བང་སོ་དོན་མཁར་མདའ་རུ་བརྩིགས། །གྲལ་ནི་ཁྲི་གཟུངས་བང་སོའི་གཡོན་ན་ཡོད། །དེ་ཡང་ཕུལ་མེད་ས་ཕུང་བརྡལ་བ་འདྲ། །དེ་ཡི་འོག་ན་བཙུན་མོ་འབྲོ་ཟ་སྨུན་བཙན་དང་མོན་བུ་རྒྱལ་མཚན་གཉིས་ཀྱི་བང་སོས་ཕུང་གཉིས་ཡོད། དེ་སྲས་རྒྱལ་པོ་གནམ་རི་སྲོང་བཙན་ཡིན། །ཡུམ་སྟོང་བཙུན་འབྲོ་དཀར་ལས་འཁྲུངས། བློན་པོ་དབས་སྣང་བཞེད། ཚེ་སྤོང་ན་གནག་སེར། ཉང་ཙོང་གུ། གནོན་འཕན་ལྔ་སུམ་རྣམས་ཀྱིས་བྱས། །(ཇ༡༢ན)

[Full Size]

རྒྱ་ནག་ཡུལ་ནས་རྩིས་དང་སྨན་དཔྱད་བླངས། །མཐའ་ཡི་རྒྱ་དང་གྲུ་གུ་འོག་དུ་བཏུལ། །ལོ་སར་སྒང་ལ་ལུག་ཤའི་ལག་པ་རློན་པ་བརྩིགས་པ་ལ་འཛེགས་ནས་རྒྱའི་མཁར་ཕབ། མཆིལ་པའི་སྐེ་ལ་སྦ་མེ་བཏགས་པ་བཏང་བས་རྒྱ་ཡུལ་མེར་བཏང་སྐད། དེ་བས་བོད་ལ་བཀའ་དྲིན་ཆེ་བར་གྲགས། །སྐུ་མཁར་ཁྲི་བརྩིགས་འབུམ་གདུགས་བྱ་བ་བ་དམར་མོའི་འོ་མའི་འཇིམ་པས་བརྩིགས། དམུས་སྟེ་ལོང་བ་ཁྲིད་ནས་བྲག་གསུམ་དེང་མའི་མཚོ་འགྲམ་ནས་རྟ་མདོ་བ་ཅང་ཤེས་རྙེད་ནས་རྒྱལ་པོའི་ཆིབས་པ་བྱས། སྦྲང་དགའ་བོ་དང་རྨུ་དཔུང་རི་བྱ་བའི་གྱད་གཉིས་ཀྱིས་ཞབས་ཏོག་བྱས་སྟེ་ཕུང་གཡག་ཐལ་ཀ་རུ་རིང་བྱ་བའི་བྱང་འབྲོང་སྨྱོན་པ་བསད་ནས་ཤ་རྟ་སྒ་ལ་བཏགས་པ་ལྷུང་བ་ལ་ཚྭ་འགོས་པའི་བྲོ་བ་ཚོར་བས་ལན་ཚྭ་ངོ་ཤེས་སྟེ་བྱང་གི་ཚྭ་ལེན་པའི་སྲོལ་བྱུང་སྐད། བང་སོ་གྲུ་བཞིར་བརྩིག་པ་དེ་ནས་བྱུང༌། །གྲལ་ནི་ཁྲི་གཟུང་བང་སོའི་གཡས་ན་ཡོད། །ཕུལ་ཆེ་དབྱིབས་ནི་གྲུ་བཞི་སོག་ཀ་རིས། །མིང་དུ་གུང་རི་སོག་ཀར་བཏགས་སོ་སྐད། །དེ་ལྟར་བོད་རྗེ་གཉའ་ཁྲི་བཙན་པོ་ནས། །ཐོག་མའི་གདུང་རབས་ཉི་ཤུ་རྩ་བདུན་ལ། །མི་ལོ་དྲུག་བརྒྱ་དང་ནི་དྲུག་བཅུ་སོང༌། །དེ་ནས་ཐོ་ཐོ་རི་སོགས་གདུང་རབས་ལྔར། །ལོ་ནི་བརྒྱ་དང་ལྔ་བཅུ་ལོན་ནོ་ཞེས། །བཀའ་བཙིགས་ལ་སོགས་ཡིག་རྙིང་དུ་མར་བཤད། །དེ་ཚེ་བོད་ཡུལ་འགྲོ་རྣམས་སྨིན་གཟིགས་ནས། །སྤྲུལ་པའི་རྒྱལ་པོའི་མཛད་པ་དངོས་སུ་བསྟན། །དེ་ཡང་འཇམ་དཔལ་རྩ་བའི་རྒྱུད་ཆེན་ལས། །དེ་བཞིན་གཤེགས་པའི་བསྟན་འདི་ལ། །རྣམ་པ་སྣ་ཚོགས་བྱ་བ་བྱེད། །བྱང་གི་ཕྱོགས་ལ་བརྟེན་ནས་ནི། །དེ་ཡི་ཚེ་ན་འབྱུང་བར་འགྱུར། །ལྷ་ལྡན་ཡུལ་ཞེས་བྱ་བ་ཡི། །གངས་ཅན་རི་ཡི་ནང་གནས་པར། །རྒྱལ་པོ་མི་ཡི་ལྷ་ཞེས་བྱ། །ལི་ཙཱ་ཝི་རྣམས་རིགས་སུ་འབྱུང༌། །དེ་ཡང་སྔགས་ཀྱི་དོན་གྲུབ་སྟེ། །ལོངས་སྤྱོད་ཆེ་དང་ལྡན་པར་འགྱུར། །རིག་པ་ལོངས་སྤྱོད་ཆེ་ལྡན་ཞེས། །མི་ཡིས་བདག་པོས་དེ་ཡང་གྲུབ། །ལོ་ནི་བརྒྱད་བཅུར་རྒྱལ་སྲིིད་བྱེད། །དེས་ནི་(ཇ༡༢བ)

[Full Size]

རྐུན་མ་རྣམ་པར་སྤངས། །རྒྱལ་པོ་དེ་ཡི་སྲོག་སྤངས་ནས། །དེ་ཡིས་སྔགས་ནི་མྱུར་གྲུབ་སྟེ། །ཞི་དང་རྒྱས་པའི་ལས་བྱེད་པའོ། །འཇིག་རྟེན་སྒྲོལ་མ་ཞེས་གྲགས་དང༌། །ལྷ་མོ་གོས་དཀར་མོ་དང་ནི། །དཀར་མོ་ཆེན་མོ་གཞན་དོན་བརྩོན། །རྟག་དུ་ཡིད་ནི་མི་སྐྱོ་བའོ། །དེ་ལ་སོགས་པ་གསུངས་པ་ཡི། །དེ་བཞིན་རྒྱལ་པོ་མང་པོ་ནི། །རྣམ་པ་དུ་མ་མང་པོ་དག །ཁ་དོག་སྣ་ཚོགས་སྣ་ཚོགས་གཟུགས། །ཁ་བ་ཅན་རྣམས་ཀླ་ཀློའི་རྒྱལ། །དེར་ཡང་སྟོན་པ་མཆོད་བྱེད་པ། །ཁྱུ་མཆོག་ཁྱུ་མཆོག་བཟང་པོ་དང༌། །ས་འོག་དེ་བཞིན་ས་འོག་བཟང༌། དེ་བཞིན་ཕ་རོལ་གནོན་ཉིད་དང༌། །རྐང་པའི་འགྲེས་ཞེས་བསྟན་པ་ཡིན། །ས་སྲུང་དང་ནི་བེ་འུ་དང༌། །འོད་ལྡན་ཉིད་ནི་ཕྱི་མ་ཡིན། །མཐའ་མར་འཚང་རྒྱའི་ངང་ཚུལ་སྟེ། །ཀླ་ཀློ་རྣམ་པ་སྣ་ཚོགས་ཡིན། །དེ་འོག་ལུགས་ནི་རྣམ་གཅིག་ཅིང༌། །ཕྱི་རོལ་སྐྱེ་རྒུས་ཉེ་བར་སྤྱོད། །ཅེས་ལུང་བསྟན་པའི་ལྷ་ལྡན་གྱི་ཡུལ་སྐྱི་ཤོད་ལྷ་ས། རྒྱལ་པོ་མིའི་ལྷ་ཆོས་རྒྱལ་སྲོང་བཙན་སྒམ་པོ། སྒྲོལ་མ་དང་གོས་དཀར་དང་དཀར་ཆེན་མོ་སོགས་བཙུན་མོ་རྣམས། ཁྱུ་མཆོག་མང་སྲོང་མང་བཙན། ཁྱུ་མཆོག་བཟང་འདུས་སྲོང་མང་པོ་རྗེ། ས་འོག་མེས་ཨག་ཚོམས། ས་འོག་བཟང་ཁྲི་སྲོང་ལྡེ་བཙན། ཕ་རོལ་གནོན་མུ་ནི་བཙན་པོ། རྐང་པའི་འགྲོས་སད་ན་ལེགས། ས་སྲུང་ཁྲི་རལ། བེའུ་གླང་དར། འོད་ལྡན་འོད་སྲུང་གི་བར་དང༌། དེ་ཕལ་ཆེར་འཚང་རྒྱ་བ་དང༌། དེ་ནས་ཀླ་ཀློ་རྣམ་པ་སྣ་ཚོགས་ཡིན། ཞེས་པའི་སྨད་སིལ་ཆད། དེ་འོག་ཕྱི་རོལ་སྐྱེ་རྒུས་སྤྱོད་པ་མཐར་མི་ཉག་ཧོར་རྒྱ་ལྗང་ཏུ་རུཥྐ་རྣམས་ཀྱིས་རིམ་པས་དབང་བྱེད་པའོ། །དེ་ཚེ་བལ་ཡུལ་བདག་པོ་ནི། །མཚོན་གྱིས་མཐའ་མ་རྣམ་པར་འཇིག །ས་བདག་དུ་མ་གསུངས་པ་རྣམས། །སྣ་ཚོགས་ལྷ་དང་བྲམ་ཟེར་དགའ། །ཞེས་བལ་རྗེ་འོད་ཟེར་གོ་ཆས་ཤིང་ཀུན་མཆོད་རྟེན་གྱི་རྨང་ཁོང་སེང་ལྷ་ཁང་དུ་ཡོད་པའི་ནང་དུ་གྲུབ་ཐོབ་མང་པོ་ཚོགས་འཁོར་ལ་སྤྱན་དྲངས་སྟེ་བདེ་མཆོག་དྲུག་བཅུ་རྩ་གཉིས་ཀྱི་ལྷ་ཚོགས་དངོས་སུ་སྤྲུལ་ནས་ཚོགས་འཁོར་མཛད་པ་ན་བདག་མ་འོངས་ཀྱི་བར་དུ་རྣམ་སྤྲུལ་མི་བསྡུ་བར་བཞུགས་སུ་གསོལ་ཞེས་གསོལ་བ་(ཇ༡༣ན)

[Full Size]

བཏབ་ནས་ཕོ་བྲང་དུ་བྱོན་སྟེ་སྲས་ལ་འདིར་གླང་དམར་པོ་ཅིག་འོང་བ་སོད་ཅིག་ཞེས་བསྒོས་ནས་གླང་དུ་གཟུགས་བསྒྱུར་བ་བསད་པས་གདུང་ཕལ་ཆེར་བདེ་མཆོག་གི་ལྷ་ཚོགས་སུ་གྱུར་སྟེ་གྲུབ་ཆེན་རྣམས་ཀྱང་ད་ལྟ་སྤྲུལ་པ་མ་བསྡུས་པར་དངོས་སུ་བཞུགས་ཞེས་གྲག་ཅིང་དེའི་སྒོ་ཤནྟ་པུ་རི་ཞེས་དེང་སང་ལྷ་ཁང་གཉན་པོ་ཡོད་པ་དང༌། དེ་འདས་པ་ན་རལ་གྲིའི་འཁོར་ལོ་ཡོད་ཅེས་འགྲོ་མི་ནུས་པ་ཡོད་སྐད་པས། བལ་ཡུལ་གྱི་བདག་པོ་མཚོན་གྱིས་འཇིག་པ་ནི་འདི་དང༌། དེ་ཕྱིན་ཕྱི་རོལ་པ་སོགས་ལུགས་རྣ་ཚོགས་པ་འཛིན་པའི་བལ་རྗེ་འབྱུང་བར་ལུང་བསྟན་ནམ་སྙམ་མོ། །ལུང་བསྟན་འདི་བདག་གིས་མཐོང་ནས་འདི་སྐབས་སུ་བྲིས་པ་ཡིན་ཡང་འདི་བརྩམས་ནས་ཟླ་བ་ལྔ་དྲུག་ཞིག་ལོན་པའི་ཚེ་འགོས་ལོ་ཙཱ་བའི་དེབ་ཐེར་སྔོན་པོ་མཐོང་བ་ནི་བྲིས་འདུག་ཅིང༌། མཐའ་མར་འཆར་རྒྱལ་ངང་ཚུལ་ཅན། ཞེས་བཏོན་ནས་ཧོར་རྒྱལ་པོའམ་ཉང་སྟོད་ཤར་ཁ་བར་འབྲུ་བསྣན་དུ་རུང་ཟེར་བ་འདུག་ཀྱང་དཔེ་མ་དག་པ་ཅིག་གཟིགས་པ་འདྲ་སྟེ་བདག་གིས་འདི་ལྟར་བྲིས་པ་ཁོ་ན་མཐོང་ལ། འཇམ་དཔལ་རྩ་རྒྱུད་ཀྱི་ལུང་བསྟན་དེ་རྣམས་ལ་གང་ཟག་དེ་མཐར་ཐེག་གསུམ་གང་དུ་ངེས་པ་དེ་བསྟན་པ་ཁོ་ན་སྣང་བས་བོད་རྒྱལ་རྣམས་ཕལ་ཆེར་ཐེག་ཆེན་དུ་རིགས་ངེས་པར་བསྟན་པ་ཡིན་ལ། ཧོར་རྒྱ་སོགས་ནི་ཕྱི་རོལ་སྐྱེ་རྒུས་ཉེ་བར་སྤྱོད། །ཅེས་བསྟན་པས་ཟློས་མི་དགོས་ཅིང་ཤར་ཁ་སོགས་བརྗོད་པ་ནི་བརྗོད་བྱ་དཀའ་བས་འཚོལ་དགོས་པ་ཅིག་བྱུང་བར་སྣང་ངོ། །དེ་སོགས་རྒྱལ་བས་གསལ་བར་ལུང་དུ་བསྟན། །དེ་ཡང་འཕགས་མཆོག་སྤྱན་རས་གཟིགས་དབང་གིས། །བོད་ཀྱི་མི་རྣམས་གདུལ་བའི་དུས་གཟིགས་ནས། །སྐུ་ལུས་འོད་ཟེར་རྣམ་བཞི་དུས་གཅིག་སྤྲོས། །ངན་འགྲོའི་ཁམས་རྣམས་རྣམ་པར་སྦྱངས་ནས་ནི། །སྤྱན་རས་གཡས་ཀྱི་འོད་ཟེར་བལ་པོར་སོང༌། །གྲོང་ཁྱེར་ཁོ་ཕོམ་ཀླུ་ཡི་ཕོ་བྲང་དུ། །འོད་ཟེར་གོ་ཆའི་བཙུན་མོའི་ལྷུམས་སུ་ཞུགས། །སྤྱན་གཡོན་འོད་ཟེར་རྒྱ་ནག་ཟིམ་ཤིའི་ཡུལ། །ཐ་ཡི་ཛུང་གི་བཙུན་མོའི་ལྷུམས་སུ་ཞུགས། །ཞལ་གྱི་འོད་ཟེར་བོད་ཡུལ་དབུ་རུའི་ལྗོངས། །གྱེ་རེའི་ཡར་ཕྲེང་བྲག་ལ་ཕོག་པ་ཡིས། །ཆོས་སྐུའི་སྙིང་པོ་(ཇ༡༣བ)

[Full Size]

ཡིག་དྲུག་རང་བྱུང་ཤར། །ཐུགས་ཀའི་འོད་ཟེར་ཡར་སྣྲོན་སྦྲ་སྟོད་ཚལ། །ཕོ་བྲང་བྱམས་པ་མི་འགྱུར་གླིང་ཞེས་པར། །རྒྱལ་པོ་གནམ་རི་སྲོང་བཙན་འཁོར་བཅས་ཀུན། །འོད་ཀྱིས་ཁྱབ་པར་མཛད་དེ་སླར་འདུས་ནས། །བཙུན་མོ་འབྲི་བཟའ་ཐོད་དཀར་ལྷུམས་སུ་ཞུགས། །སྔོན་མེད་དགའ་དང་བདེ་བས་ལུས་ཚིམ་སྟེ། །བཀྲ་ཤིས་ལྟས་ཀྱིས་ཕྱོགས་ཀུན་ཁྱབ་པར་གྱུར། །ལྷུམས་སུ་འགྲོ་མང་སྨིན་དང་གྲོལ་མཛད་ནས། །མེ་མོ་གླང་ལོ་རྒྱུ་སྐར་རྒྱལ་གྱི་ཚེ། །སྤྲུལ་པའི་ཆོས་ཀྱི་རྒྱལ་པོ་ཡབ་ཡུམ་གསུམ། །སོ་སོའི་ཕོ་བྲང་ཆེན་པོར་དུས་གཅིག་བལྟམས། །བོད་ཡུལ་ཕོ་བྲང་བྱམས་པ་མི་འགྱུར་དུ། །ཁྱད་དུ་འཕགས་པ་འགྲན་ཟླ་མེད་པའི་སྲས། །གསེར་མདོག་དབུ་སྐྲ་ཐོན་མཐིང་ལྟར་མི་ངོམས། །ཕྱག་ཞབས་འཁོར་ལོས་བཀྲ་བ་མཚན་དཔེ་རྫོགས། །དབུ་གཙུག་འོད་དཔག་མེད་ཞལ་དངོས་སུ་བཞུགས། །ཉི་མའི་དཀྱིལ་འཁོར་སྤྲིན་ལས་གྲོལ་བ་ལྟར། །བལྟམས་ཚེ་སངས་རྒྱས་ཀུན་གྱིས་བྱིན་རླབས་མཛད། །བྱང་སེམས་ཀུན་གྱིས་ཤིས་པའི་ཚིགས་བཅད་བརྗོད། །ལྷ་རྣམས་ཐམས་ཅད་མཆོད་པའི་ལས་ལ་བརྩོན། །ལྷ་རྫས་མེ་ཏོག་ན་མཁའ་ཡོག་པར་གྱུར། །དེ་ལ་མཐོང་ལུགས་རྣམ་པར་གསུམ་དུ་བྱུང༌། །རྒྱལ་བ་རྣམས་ཀྱིས་སྤྱན་རས་གཟིགས་དབང་ནི། །བོད་ཡུལ་མཛད་པ་བཅུ་གཉིས་སྟོན་པར་གཟིགས། །བྱང་སེམས་རྣམས་ཀྱི་སྤྱན་རས་གཟིགས་དབང་ནི། །རྒྱལ་པོར་སྤྲུལ་ནས་གང་ལ་གང་འདུལ་གྱིས། །བོད་ཡུལ་འགྲོ་རྣམས་སྨིན་གྲོལ་མཛད་པར་གཟིགས། །བོད་འབངས་སྐྱེ་བོས་འགྲན་ཟླ་བྲལ་བ་ཡི། །ལྷ་སྲས་དམ་པ་ཅིག་ནི་འཁྲུངས་པར་མཐོང༌། །ཡབ་ཀྱིས་ཨ་མི་ཏཱ་བྷའི་ཞལ་སྦེད་ཕྱིར། །ལེབ་རྒན་དར་གྱིས་དབུ་ལ་ཐོད་དུ་མཛད། །ནང་འཁོར་ལས་སྒྲིབ་སྲབ་པ་རྣམས་ཀྱིས་ནི། །རིགས་ལྔས་དབུ་བརྒྱན་བཅུ་གཅིག་ཞལ་དུ་མཐོང༌། །མགར་དང་ཐོན་མི་བྱ་བའི་ཁྱེ་ཆུང་གཉིས། །བློན་པོ་ཞེ་ས་(ཇ༡༤ན)

[Full Size]

འབུལ་བའི་ཕྱིར་འབྲེངས་པས། །ཨ་མི་ཏཱ་བྷའི་ཞལ་མཐོང་ཕྱིར་བསྙད་པས། །རྒྱལ་བུ་དབུ་གཉིས་ལྡན་པར་གྲགས་སོ་སྐད། །དགའ་སྟོན་དཔག་ཡས་ལོ་ཟླ་དུ་མར་བྱས། །ཁྲི་སྲོང་བཙན་ཞེས་མཚན་དུ་གསོལ་བ་ལས། །ཡོན་ཏན་ཀུན་ལྡན་ཤིན་དུ་ཐུགས་སྒམ་པས། །མཚན་ཡང་སྲོང་བཙན་སྒམ་པོར་ཆགས་པར་གྱུར། །བལ་ཡུལ་དང་ནི་རྒྱ་ནག་ཕོ་བྲང་དུ། །ལྷ་གཅིག་ཁྱད་དུ་འཕགས་པ་རེ་རེ་འཁྲུངས། །བལ་པོའི་ལྷ་གཅིག་ཁྲོ་གཉེར་ཅན་མ་དངོས། །དཀར་དམར་མདངས་ལྡན་ཙན་དན་དྲི་ངད་བྲོ། །བསྟན་བཅོས་ཀུན་མཁས་ལྷ་གཅིག་ཁྲི་བཙུན་བཏགས། །རྒྱ་རྗེའི་སྲས་མོ་སྒྲོལ་མའི་སྤྲུལ་པ་སྟེ། །སྔོ་དམར་མདངས་ལྡན་ཨུཏྤལ་དྲི་ངད་བྲོ། །རིག་པའི་གནས་མཁས་འཇིག་རྟེན་ཐམས་ཅད་ལས། །རྨད་བྱུང་ཞིག་འཁྲུངས་འུན་ཤིང་ཀོང་ཇོ་ཞེས། །བོད་སྐད་མཚོ་ཡི་པདྨ་ཟེར་རོ་སྐད། །ལྷ་སྲས་དགུང་ལོ་བཅུ་གསུམ་བཞེས་པའི་ཚེ། །ཡབ་ཀྱིས་རྒྱལ་པོའི་ཆབ་སྲིད་མངའ་དབང་ཕུལ། །བཅུ་གསུམ་ལོན་དུས་ཡབ་གཤེགས་ནས་སྲས་རྒྱལ་སར་བསྐོས་ཅེས་གྲགས་ཀྱང་ཞལ་གདམས་ཀྱི་སྐོར་ལས་ཡབ་གནམ་རི་སྲོང་བཙན་གྱིས་རྒྱལ་སྲིད་ཕུལ་ནས་ཞུས་པ་སོགས་གསུངས་པའི་ཡབ་བཞུགས་དུས་རྒྱལ་སྲིད་ཕུལ་བར་ངེས་སོ། །རིན་པོ་ཆེ་ཡི་ཁྲི་ལ་བཞུགས་པའི་ཚེ། །ནམ་མཁའི་མཐོངས་ནས་དབང་གི་ལྷ་རྣམས་བྱོན། །སྒྲིབ་པ་རྣམ་པར་སེལ་བས་ཅོད་པན་བཅིངས། །ཀུན་དུ་བཟང་པོས་བུམ་པའི་ཆུས་དབང་བསྐུར། །འོད་དཔག་མེད་པས་སྤྱི་བོར་ཕྱག་བཞག་ཞིང༌། །ལྷ་རྣམས་ཀུན་གྱིས་མཆོད་པའི་སྤྲིན་ཚོགས་སྤྲོས། །དེ་ཚེ་རྒྱལ་པོའི་སྐུ་ལས་འོད་ཟེར་ཚོགས། །དཔག་མེད་བྱུང་སྟེ་ཕྱོགས་བཅུའི་ཁམས་ཀུན་ཁྱབ། །འོད་རེའི་རྩེ་ལ་ལོངས་སྐུའི་ཞིང་རེ་ཆགས། །ཞིང་རེའི་རྣམ་སྣང་དྲུང་རེར་རྒྱལ་པོ་རེ། །རྣམ་སྣང་ཀུན་གྱིས་རྒྱལ་པོའི་སྤྱི་བོ་ལ། །ཕྱག་གིས་བྱུགས་ཚེ་རྒྱལ་པོ་རེ་རེ་ལས། །འོད་ཟེར་ཚོགས་སྤྲོས་འོད་རེའི་རྩེ་མོ་ལ། །(ཇ༡༤བ)

[Full Size]

རྒྱལ་པོ་རྟ་མཆོག་ཆིབས་པ་རེ་རེ་བྱུང༌། །དེ་རེ་ལས་ཀྱང་འོད་ཟེར་དཔག་མེད་སྤྲོས། །འོད་རེའི་རྩེ་ལ་སྤྲུལ་སྐུའི་ཞིང་རེ་ཆགས། །ཞིང་ཁམས་རེ་ན་རྒྱལ་བ་ཤཱཀ་ཐུབ་རེ། །རེ་རེའི་མདུན་ན་སྲོང་བཙན་སྒམ་པོ་རེ། །ཐུབ་པའི་དབང་པོས་རང་རང་དྲུང་འཁོད་པའི། །རྒྱལ་པོའི་དབུ་ལ་ཕྱག་གིས་རེག་མ་ཐག །རྒྱལ་པོ་རེ་ལས་འོད་ཟེར་མཐའ་ཡས་སྤྲོས། །འོད་རེའི་རྩེ་ལ་སྤྱན་རས་གཟིགས་དབང་རེ། །དེ་རེ་ལས་ཀྱང་འོད་ཟེར་སྤྲིན་གྱི་ཚོགས། །རེ་རེས་ན་མཁའ་ཐམས་ཅད་ཁྱབ་པ་སྤྲོས། །འོད་རེའི་རྩེ་ལ་ཕྱག་སྟོང་སྤྱན་སྟོང་ཅན། །ཐུགས་རྗེ་ཆེན་པོ་ཡིད་བཞིན་ནོར་བུ་རེ། །རེ་རེས་ཀྱང་ནི་སེམས་ཅན་མ་ལུས་པ། གང་ལ་གང་འདུལ་སྤྲུལ་པས་འདུལ་བར་གྱུར། །སངས་རྒྱས་བྱང་སེམས་རྣམས་ཀྱིས་རྒྱལ་པོ་དབང་བསྐུར་བའི་ཚུལ་འདི་ཁྲ་འབྲུག་གི་རྒྱལ་པོའི་ལྷ་ཁང་ན་གསེར་གྱིས་བྲིས་ནས་ཡོད་སྐད། དེ་ལྟར་ཆོས་ཀྱི་རྒྱལ་པོར་དབང་བསྐུར་ནས། །བོད་འབངས་ལྷར་བཅས་ཀུན་ལ་མངའ་དབང་བསྒྱུར། །ཡང་མེས་ཐོ་ཐོ་གཉན་བཙན་གྱིས་བསྟན་པ། །དབུ་རུ་ཤོད་ཆེན་ལྷ་ས་དམར་པོ་རི། །གནས་དེར་བདག་གི་འགྲོ་དོན་འབྱུང་ངོ་ཞེས། །དགོངས་ནས་ཕོ་བྲང་ནས་ནི་གདན་བཏེག་སྟེ། །ནང་པར་གྱེ་རེའི་ཡར་ཕྲེང་གྲོ་བཏབ་ཚེ། །ཞང་བློན་འཕྲུལ་གྱི་སྣ་ཚོགས་ཞེས་བྱ་བས། །ཆུ་ནང་འོད་ཟེར་སྣ་ཚོགས་ཁྲ་ཆེམ་མཐོང༌། །ངོ་མཚར་སྐྱེས་ནས་འདི་རྒྱུ་ཅི་ལགས་ཞུས། །རྒྱལ་པོའི་ཞལ་ནས་ཞང་བློན་ཆེན་པོ་ཉོན། །མཐའ་འཁོབ་ཁ་བ་ཅན་གྱི་ཡུལ་འདི་རུ། །སེམས་ཅན་ཐམས་ཅད་སྨིན་གྲོལ་འགོད་པའི་ལམ། །སངས་རྒྱས་ཀུན་གྱི་དགོངས་པ་གཅིག་བསྡུས་པ། །ཕན་བདེ་ཡོན་ཏན་མ་ལུས་འབྱུང་བའི་གནས། །མཐའ་འཁོབ་སྐྱེ་བོ་འདུལ་བའི་གཉེན་པོ་མཆོག །བོད་ཡུལ་ཁ་བ་ཅན་པའི་ཆོས་སྐལ་ནི། །རྒྱལ་བ་ཀུན་གྱི་ཡང་སྙིང་འདུས་པའི་མཆོག །གསང་བ་འབྲུ་དྲུག་ཆོས་སྐུ་ཡིག་འབྲུའི་ཚུལ། །བྲག་གི་ངོས་འདིར་ཡིག་དྲུག་རང་བྱུང་ཡོད། །འདིས་ཀྱང་སེམས་ཅན་མང་པོའི་དོན་བྱེད་གསུངས། །མཆོད་(ཇ༡༥ན)

[Full Size]

པ་མཛད་པས་བྲག་ལས་འོད་ཟེར་འཕྲོས། །ཕ་རིའི་བྲག་ལ་ཕོག་པས་ཕན་ཚུན་ཀུན། །འཇའ་ཚོན་བཀྲ་བའི་མདངས་ཀྱིས་གཅིག་དུ་འབྲེལ། །གྲོང་གི་མིང་ཡང་འཇའ་མདངས་སུ་ཆགས་སྐད། སྤྱན་རས་གཟིགས་དབང་ཁཱརྶ་པ་ཎི་དང༌། །འཕགས་མ་སྒྲོལ་མ་དཔལ་ཆེན་རྟ་མགྲིན་སོགས། །རང་བྱུང་བྱོན་པ་བལ་པོའི་གཟོ་བོ་ཡིས། །རྣམ་པ་གསལ་གཏོང་ལྷ་ཁང་ཚུལ་དུ་མཛད། །དེ་ནས་དམར་པོ་རི་ལ་ཕོ་བྲང་བཏབ། །ཆོས་རྒྱལ་འགྲོ་བའི་དོན་ལ་གཡེལ་མེད་བཞུགས། །ཀ་བཀོལ་མ་ལས་ཁྲིམས་བཅས་རྟེན་སྤྱན་དྲངས་པའི་འོག་དུ་དམར་པོ་རི་ཐིགས་པ་འདྲ་བར་སྣང༌། དེ་ཚེ་རྒྱ་གར་རྒྱ་ནག་ཁྲོམ་གེ་སར། །སྟག་གཟིག་ལ་སོགས་མཐའ་ཡི་རྒྱལ་པོ་ཀུན། །སྤྲུལ་པའི་རྒྱལ་པོ་ཤིན་དུ་གཞོན་ནུ་ཡིས། །རྒྱལ་སྲིད་ཆོས་བཞིན་སྐྱོང་བའི་ངོ་མཚར་ཐོས། །རེ་རེ་བཞིན་ནས་དཔྱ་སྐྱེས་ལོ་ཏང་དུ། །འབུལ་ཞིང་དཀོར་སྒྲོམ་ཕྲིན་ཡིག་རྒྱ་ཆེར་ཕུལ། །ཀ་བཀོལ་མར་མཐའི་རྒྱལ་པོ་ལོ་བཞི་ལོན་པ་ཅིག་གིས་རྒྱལ་སྲིད་ཆོས་བཞིན་དུ་སྐྱོང་ཞེས་ཐོས་ནས་མཐའ་བཞིའི་རྒྱལ་པོས་དཔྱ་དང་སྐྱེས་ལོ་ཏང་དུ་འབུལ་བ་ལ་ཞབས་ཏོག་འདི་དང་འདི་ཡོད་ཏོ་ཞེས་ཡི་གེ་ཕུལ་བ་ལ། བོད་ཀྱིས་སྐྱེས་ལན་ལ་ངག་ཕྲིན་ལས་ཡི་གེ་མི་ཤེས་ཅེས་སྣང་ཞིང་ཀ་བཀོལ་མའི་དངོས་བསྟན་དགུང་ལོ་བཞི་ལ་ཡབ་གཤེགས་ནས་རྒྱལ་ས་མཛད་པ་འདྲ་བར་སྣང༌། ཡུལ་གྲུ་གཞན་གྱི་ཡི་གེར་མ་ལྟོས་པ། །བོད་ལ་རང་གི་ཡི་གེ་དགོས་པར་གཟིགས། །བློན་པོ་བློ་གསལ་དུ་མ་རྒྱ་གར་དུ། །བཏང་ཡང་ཡི་གེའི་བཞེད་པ་མ་འགྲུབ་ནས། །བོད་ཀྱི་བློན་པོ་བློ་རྣོ་བ་བཅུ་དྲུག་ལ་གསེར་བསྐུར་ནས་རྒྱ་གར་དུ་ཡི་གེ་སློབ་ཏུ་བཏང་བས་ལ་ལ་ཐང་འདྲེ་ཅན་རྣམ་པ་གསུམ་ལ་བརྡུགས་ནས་འགྲོ་མ་ནུས། ལ་ལ་ཚད་པས་ཤི། ལ་ལ་རྒྱ་སྐད་མ་ཤེས་པར་ལོག་སྐད། དེ་ནས་བློན་ཆེན་ཐོན་མི་ཨ་ནུའི་བུ། །ཐོན་མི་སམྦྷོ་ཊ་ཞེས་མཁས་ཤིང་མཛངས། །ཡིད་གཞུངས་བློ་རྣོ་དབང་པོ་སྐྱེ་མཆེད་གསལ། །ཡོན་ཏན་དུ་མར་ལྡན་པ་ཅིག་ལ་ནི། །བཀའ་བསྒོས་གསེར་དང་ཡོ་བྱད་བསྐུར་སྟེ་བཏང༌། །ཐོན་གྱི་ལུག་ར་ཁ་ནས་ཐོན་མི་(ཇ༡༥བ)

[Full Size]

ཨ་ནུ་ར་ག་ཏའི་བུ་ཐོན་མི་སམྦྷོ་ཊ་བྱ་བའི་མི་ཆུང་བློ་གསལ་བ་ཞིག་ལ་གསེར་ཕྱེ་བྲེ་གང་བསྐུར་སྟེ་བཏང་སྐད། དེ་ཡིས་རྒྱ་གར་ཀུན་མྱུལ་ལྷོ་ཕྱོགས་ཕྱིན། །སྒྲ་དང་ཡི་གེར་མཁས་པ་ཕུལ་བྱུང་བ། །བྲམ་ཟེ་ཆེན་པོ་ལི་བྱིན་ཡིན་པར་ཐོས། །དེར་ཕྱིན་གུས་པས་བཏུད་ཅིང་གསེར་ཕུལ་ནས། །བདག་ནི་མཐའ་འཁོབ་བོད་ཀྱི་བློན་པོ་ཡིན། །བདག་གི་རྒྱལ་པོ་ཐུགས་རྗེ་ཆེན་པོ་ལགས། །འབངས་རྣམས་ཆོས་ཀྱིས་ཚིམ་པར་མཛད་པ་དང༌། །དགེ་བ་བཅུ་ཡི་རྒྱལ་ཁྲིམས་འཆའ་བ་ལ། བདག་གི་ཡུལ་ན་ཡི་གེའི་སྲོལ་མེད་པས། །རྒྱ་གར་ཡུལ་དུ་ཡི་གེ་སློབ་ཏུ་མཆིས། །སྒྲ་ཚད་ཡི་གེའི་བཀའ་དྲིན་མཛོད་ཅེས་ཞུས། །མཁས་པ་ལི་བྱིན་དགྱེས་པས་ལན་གསུངས་པ། །བདེན་གཉིས་དོན་རྟོགས་བློན་ཆེན་རིག་པ་ཅན། །ཁྱོད་ལ་ཡི་གེ་སྒྲ་དང་སྙན་ངག་སོགས། །ཡོན་ཏན་ངོ་མཚར་ཅན་ཀུན་སློབ་བོ་ཞེས། །ཡི་གེའི་རིགས་རྣམས་ཀུན་ལ་མ་རྨོངས་བསྟན། །རིག་པའི་རྩལ་ཕྱེ་ཤེས་རབ་སྒྲོན་མེ་བཏེག །རྣམ་མང་དུ་མའི་ཡི་གེ་ཁོང་དུ་ཆུད། །ལྷ་རིག་སེང་གེ་ལ་སོགས་པཎྜི་ཏ། །མཁས་པ་གཞན་ཡང་བསྟེན་ནས་སྒྲ་ཚད་དང༌། །རིག་པའི་གནས་མང་ཁོང་དུ་ཆུད་པར་བྱས། །ཐེག་པ་ཆེན་པོའི་གསུང་རབ་མང་དུ་སྦྱངས། །བོད་ཏུ་འབྱོན་ཚེ་མཁན་པོ་ལི་བྱིན་གྱིས། ཁྱོད་ནི་རིག་གནས་ཀུན་ལ་རྩེ་མོར་སོན། །ད་ནི་སྤྲུལ་པའི་རྒྱལ་པོའི་དགོངས་པ་སྒྲུབས། །བོད་ཡུལ་འགྲོ་ཀུན་ཡི་གེ་སྒྲ་ཚད་དང༌། །ལུང་རིགས་མན་ངག་རྣམས་ཀྱིས་ཚིམ་པར་མཛོད། །ཐོན་མིས་ཡོན་ཕུལ་གཏང་རག་ཚིག་བརྗོད་པ། །ཐུགས་ལ་བཏགས་སོ་རྒྱལ་བའི་སྲས། །བཀའ་དྲིན་ཆེ་འོ་ངོ་མཚར་ཆེ། །བྱིན་གྱིས་རློབས་ཤིག་ཐུགས་རྗེ་ཅན། །རིག་པ་དྲི་མེད་ཀྱི་ན་མཁའ་ལ། །ཐབས་ཤེས་གཉིས་ཀྱི་རྒྱུ་སྐར་ཤར། །སྨོན་ལམ་དག་པའི་རླུང་གིས་དྲངས། །སྒྲ་ཚད་ཡི་གེའི་ཉི་ཟླ་ཤར། །འགྲོ་བའི་མ་རིག་མུན་པ་སེལ། །བདེ་གསལ་ཡིད་ཀྱི་རྒྱ་མཚོ་ལ། །(ཇ༡༦ན)

[Full Size]

རིག་པ་བློ་ཡི་ཆུ་ཕྲན་འཁོར། །སྨོན་ལམ་དག་པའི་ཆུ་བྱ་ལྡིང༌། །སྒྲ་ཚད་ཡི་གེའི་ནོར་བུ་བཞུགས། །འགྲོ་བའི་དབུལ་ཕོངས་སེལ་བར་བྱེད། །སྒྱུ་ལུས་དྲི་མེད་ཀྱི་སྡོང་པོ་ལ། །ཐབས་ཤེས་གཉིས་ཀྱི་ཡལ་ག་རྒྱས། །བསླབས་ཤེས་ཡོན་ཏན་གྱི་མེ་ཏོག་ཤར། །སྒྲ་ཚད་ཡི་གེའི་འབྲས་བུ་སྨིན། །བདག་བོད་ཀྱི་བློན་པོ་ཐོན་མི་ལ། །མ་ལུས་གནང་བ་ཐུགས་ལ་བཏགས། །རྒྱ་གར་ཡུལ་དུ་ཕྱིན་པ་ཡིན། །མཁས་གྲུབ་ཁྱེད་དང་མཇལ་བ་ཡིན། །ཡོན་ཏན་གཞི་མ་ཡི་གེ་ཡིན། །མ་ལུས་ཁོང་དུ་ཆུད་པ་ཡིན། །བོད་ཡུལ་དབུས་སུ་འགྲོ་བ་ཡིན། །རྒྱལ་པོས་དགའ་སྟོན་མཛད་པ་ཡིན། །རྒྱལ་སྲིད་ཆོས་བཞིན་སྐྱོང་བ་ཡིན། །རྒྱལ་པོས་དབུ་མཛད་བློན་འབངས་ལ། །སྒྲ་ཚད་ཡི་གེ་དཔེལ་བ་ཡིན། །ཀུན་ལ་རྒྱས་པར་བྱེད་པ་ཡིན། །ཐུགས་ལ་བཏགས་སོ་རྒྱལ་བའི་སྲས། །ཞེས་གསོལ་ཞབས་མཐིལ་གཙུག་དུ་བླངས་ནས་ནི། །ཐེག་ཆེན་དམ་ཆོས་དུ་མ་དང་བཅས་སྟེ། །བོད་ཡུལ་དུ་ཕེབས་གུས་པ་དགའ་སྟོན་མཛད། །ནཱ་ག་ར་དང་ཁ་ཆེའི་ཡི་གེ་ལ། །དཔེ་བླངས་སྐུ་མཁར་མ་རུར་ཡིག་གཟུགས་བརྩམས། །ལྷ་ཡིག་ལཉྪ་དཔེ་བྱས་དབུ་ཅན་དང༌། །ཀླུ་ཡི་ཝརྟུ་ལ་ལྟར་ཟུར་ཅན་བྱས། །རྒྱ་སྐད་ཡི་གེ་ལྔ་བཅུ་ཡོད། །དེ་ཡི་དབྱངས་ཡིག་བཅུ་དྲུག་པོ། །ཨི་ཨུ་ཨེ་ཨོ་བཞི་རུ་བསྡུས། །ལོག་པའི་སྡེ་དང་ཐུག་པོ་བོར། །ཅ་ཆ་ཇ་དང་ཞ་ཟ་འ། །རྒྱ་ན་མེད་པ་དེ་དྲུག་བསྣན། །དབྱངས་གསལ་ཐུན་མོང་ཨི་ཡིག་བཅས། །གསལ་བྱེད་ཡི་གེ་སུམ་བཅུར་བསྡུས། །གཙོ་བོ་མིང་གཞི་ཉི་ཤུ་དང༌། །ཀུན་ལ་འཇུག་པ་མཐའ་རྟེན་བཅུ། །མེད་དུ་མི་རུང་སྔོན་འཇུག་ལྔ། །མེད་ཀྱང་རུང་བ་ཝ་ཡིག་གཅིག །ར་ལ་ས་གསུམ་འདོགས་པའི་མ། །ན་རོ་གུ་གུ་འབྲེང་པོ་གསུམ། །ཀུན་གྱི་སྟེང་ན་ཞྭ་ལྟར་ལྡིང༌། །ཞབས་ཀྱུ་ཀུན་གྱི་གདན་དུ་མཛེས། །ཕོ་མོ་མ་ནིང་ཡི་གེར་ཕྱེ། །རྣམ་དབྱེ་བདུན་དང་འབྱེད་སྡུད་སྒྲ། །ལྷག་(ཇ༡༦བ)

[Full Size]

བཅས་ལ་དོན་དགར་བསྣན་དང༌། །དགག་སྒྲུབ་ལ་སོགས་སྒྲ་སྣ་ཚོགས། །ཚིག་ཟུར་བསྒྱུར་བས་ཐོན་པར་མཛད། །ཐོན་མི་མདོ་རྫིའི་སྒྲ་མདོ་དང༌། །སུམ་རྟགས་ལ་སོགས་བརྡ་སྤྲོད་ཀྱི། །བསྟན་བཅོས་བརྒྱད་ཀྱང་མཛད་ཅེས་གྲགས། །ལེགས་སྦྱར་རྐྱེན་དང་རྣམ་དབྱེ་སོགས། །སྒྲ་རེའང་དུ་མས་སྒྲུབ་དགོས་པས། །རྟོགས་དཀའ་རྒྱ་ཆེ་གྲངས་མང་ཡང༌། །བོད་ཀྱི་སྒྲ་ལ་དེ་རྣམས་ཀུན། །བྱིངས་རྐྱེན་གཞན་ལ་མི་ལྟོས་པར། །ཚིག་ཟུར་བསྒྱུར་བས་གྲུབ་པའི་ཕྱིར། །རྟོགས་སླ་ཉུང་ཞིང་ཁྱད་པར་འཕགས། །འདི་གཟིགས་རྒྱ་གར་པཎ་ཆེན་རྣམས། །ངོ་མཚར་ཆེར་མཛད་འཇམ་པའི་དབྱངས། །དངོས་ཞེས་བསྟོད་བཀུར་མཛད་ཏོ་སྐད། །དུས་ཀྱི་འཁོར་ལོའི་འགྲེལ་ཆེན་ལས། །བཀའ་ཡི་སྡུད་པོ་རྣམས་ཀྱིས་ནི། །ཐེག་པ་གསུམ་པོ་བོད་ཡུལ་དུ། །བོད་ཀྱི་སྐད་ཀྱིས་བྲི་ལ་སོགས། །ཡུལ་གྲུ་སོ་སོར་རང་རང་གི །སྐད་ཀྱིས་བྲིས་ཞེས་གསུངས་པའི་ཕྱིར། །འདི་ནི་བོད་ཀྱིས་སྡུད་པོར་གསལ། །བོད་ཕྲུག་མཛངས་པའི་མི་བདུན་གྱི། །བཞི་པར་ཐོན་མི་བགྲངས་མོད་ཀྱང༌། །དེ་ཀུན་མཚུངས་པ་མ་ཡིན་སྟེ། །མཁན་པོ་ལོ་ཙཱའི་ཐོག་མ་འདིའི། །བཀའ་དྲིན་བོད་ཀྱིས་ཇི་ལྟར་ཁྱེར། །གསུང་གི་དབང་ཕྱུག་འཇམ་པའི་དབྱངས། །མངོན་སུམ་མི་ཡི་ཚུལ་འཛིན་པས། །བོད་ཡུལ་རྒྱལ་བའི་བཀའ་སྡུད་པོ། །སམྦྷོ་ཊ་ལ་གུས་ཕྱག་འཚལ། །དེ་ནས་རྒྱལ་པོ་དགའ་སྟོན་ཁྲི་ལ་ཕེབས། །དབྱངས་ཡིག་ངེས་པ་བྱ་དཀའི་སྒྲ་རྒྱན་དུ། །སྦྱར་ནས་ཐོན་མིས་ཡིག་ཕུད་ཕུལ་བ་ནི། །ཞལ་རས་གསལ་ལ་རང་མདངས་གང་བ་བཟང༌། །གདམས་ངག་ཟབ་ལམ་མ་ཆད་ཐ་དད་རང༌། །ལས་ངན་བག་ཆགས་ཐམས་ཅད་བསལ་མཛད་པ། །འཕགས་པ་མ་ཕམ་ཡང་དག་དམ་པ་ལགས། །བདེ་གཤེགས་བདེན་ངེས་ཡེ་ཤེས་སྟེ། །ཏིང་འཛིན་ཞི་ཉིད་རིག་ཅིང་གཟིགས། །ཉོན་མོངས་ཚོགས་བཅོམ་མགོན་པོ་མཆོག །དུག་གསུམ་བདུད་འདུལ་ཀུན་དུ་ཐུལ། །སྤྱན་རས་གཟིགས་དབང་(ཇ༡༧ན)

[Full Size]

ཐུགས་ཀྱི་སྲས། །སྲོང་བཙན་སྒམ་པོར་མཚན་གསོལ་བའི། །ཆོས་རྒྱལ་ཁྱེད་ལ་ཕྱག་འཚལ་ལོ། །ཐོན་མིའི་ཡིག་ཕུད་འདི་འབུར་སྟོང་ཇེན་ཁོག་སྣང་རྡོའི་ལྷ་ཁང་གི་བྲག་ལ་བརྐོས་སྐད། ཅེས་ཕུལ་རབ་ཏུ་དགྱེས་པའི་བྱ་དགའ་བསྩལ། །སྒྲ་དང་ཡི་གེ་རིག་པའི་གནས་རྣམས་ལ། །བོད་འབངས་གཟུང་ཕྱིར་སྤྲུལ་པའི་རྒྱལ་པོ་ཉིད། །ལོ་བཞིར་བསླབ་སྦྱངས་ནན་ཏན་མཛད་ཏོ་སྐད། །བློན་འབངས་ཀུན་ཀྱང་ཡི་གེ་འབྲི་ཀློག་དར། །ཐམས་ཅད་བློ་གྲོས་པདྨ་རབ་ཏུ་རྒྱས། །དེ་ཚེ་མཁས་པ་ཆེན་པོ་ཐོན་མི་ལ། །རྒྱལ་པོས་བཀུར་སྟེ་སྲི་ཞུ་ཆེར་མཛད་པས། །བློན་པོ་འགའ་ཡི་ཡིད་དུ་མ་བབ་ནས། །རྒྱལ་པོས་འབངས་ལ་འདི་ལྟར་མི་འོས་ཞེས། །བསྒྲགས་ཚེ་ཐོན་མིས་ང་རྒྱལ་གླུ་བླངས་པ། །ང་དྲིན་ཅན་གྱི་བློན་པོ་ཐོན་མི་ངས། །ལམ་བགྲོད་པར་དཀའ་བའི་རྒྱ་གར་དུ། །ལུས་ཚ་གྲང་ཆེ་ཡང་དཀའ་བ་སྤྱད། །ཁོང་མཁས་པ་བྲམ་ཟེ་ལི་བྱིན་ལ། །ཡིད་གུས་པའི་ཚུལ་གྱིས་མོས་གུས་བྱས། །ནོར་རིན་ཆེན་གསེར་གྱི་ཕྱག་རྟེན་ཕུལ། །དོན་རྙེད་པར་དཀའ་བའི་ཡིག་འབྲུ་བསྟན། །བློ་ཐེ་ཚོམ་སེལ་བའི་མཛུབ་ཁྲིད་བྱས། །ཚིག་དབྱངས་ཡིག་རྣམས་ལ་མཁས་པར་སྦྱངས། །རྒྱ་ཡིག་ལྔ་བཅུ་ཐམ་པ་དེ། །བོད་ཡིག་སུམ་བཅུར་གཏན་ལ་ཕབ། །རང་མཁས་པའི་ངེས་ཤེས་བློ་ལ་ཤར། །འཕྲལ་ཡོན་ཏན་ཐམས་ཅད་ཁོང་དུ་ཆུད། །དུས་ད་ལྟ་དགའ་ལ་ཕྱི་མ་སྐྱིད། །ཡུལ་མཐའ་འཁོབ་བོད་ཀྱི་རྒྱལ་ཁམས་འདིར། །མི་མཁས་པས་སླེབ་པའི་སྔོན་མ་ཡིན། །ང་མུན་པ་སེལ་བའི་སྒྲོན་མེ་ཡིན། །རྗེ་རྒྱལ་པོ་ཉི་ཟླའི་ཚུལ་དུ་བཞུགས། །གྲོགས་བློན་པོའི་ཁྲོད་ན་ང་ཙམ་མེད། །བོད་ཁ་བ་ཅན་པའི་མི་རྣམས་ལ། །ང་ཐོན་མི་བཀའ་དྲིན་མི་ཆེའམ། །དེ་སྐད་བླངས་པས་འགྲན་སེམས་ཕྲག་དོག་ཞི། །བློན་འབངས་ཀུན་གྱིས་གཙུག་དུ་བཀུར་བར་གྱུར། །རྒྱ་བལ་མཁས་པ་དུ་མ་སྤྱན་དྲངས་སྟེ། །གསུང་རབ་དུ་མ་བསྒྱུར་ཅིང་དར་བར་མཛད། །(ཇ༡༧བ)

[Full Size]

རྒྱ་གར་གྱི་སློབ་དཔོན་ཀུ་ས་ར་དང་བྲམ་ཟེ་ཤང་ཀ་ར་དང༌། ཁ་ཆེ་ཏ་ནུ་དང༌། བལ་པོ་ཤཱི་ལ་མཉྫུ་དང༌། རྒྱ་ནག་ཧ་ཤང་མ་ཧ་དེ་ཝ་ཆེ་རྣམས་བྱོན། ལོ་ཙཱ་བ་ཐོན་མི་སམྦྷོ་ཊ་དང༌། དེའི་མཆན་བུ་དྷརྨ་ཀོ་ཥ་དང་ལྷ་ལུང་རྡོ་རྗེ་དཔལ་སོགས་ཀྱིས་འདུས་པ་རིན་པོ་ཆེ་ཏོག་གི་གཟུངས། ཟླ་བ་སྒྲོན་མ། དཀོན་མཆོག་སྤྲིན་སོགས་བསྒྱུར་ཅིང་ཤེར་ཕྱིན་སྟོང་ཕྲག་བརྒྱ་པ་ཡང་བསྒྱུར་བར་གྲགས། གཙོ་བོར་ཐུགས་རྗེ་ཆེན་པོའི་མདོ་རྒྱུད་ཉི་ཤུ་རྩ་གཅིག་བསྒྱུར་སྟེ་བཀའ་ཆེམས་ཀྱི་ལོ་རྒྱུས་ཆེན་མོ་ལས། ཟ་མ་ཏོག་བཀོད་པ། ༡ ཕྱག་སྟོང་སྤྱན་སྟོང་གི་གཟུངས། ༢ པདྨ་སྙིང་པོའི་མདོ། ༣ ཞལ་བཅུ་གཅིག་པའི་མདོ། ༤ བཅུ་གཅིག་ཞལ་གྱི་གཟུངས། ༥ དོན་ཡོད་ཞགས་པ། ༦ དོན་ཞགས་ཕྱི་མ། ༧ པདྨ་མཆོག ། ༨ དབང་བསྒྱུར་འཁོར་ལོ། ༩ ཆོ་ག་སྔགས་ཀྱི་རྒྱུད། ༡༠ ཡིད་བཞིན་ནོར་བུའི་གཟུངས། ༡༡ སྙིང་རྗེ་ཆེན་པོ་མི་གཤོལ་བ། ༡༢ འོད་ཟེར་རྣམ་བཀོད། ༡༣ པདྨ་ཅོད་པན་གྱི་རྒྱུད། ༡༤ ཡི་གེ་དྲུག་པའི་མདོ། ༡༥ དམ་ཆོས་པད་དཀར། ༡༦ པུཎྜ་རི་ཀའི་མདོ། ༡༧ ཆུ་ཀླུང་སྣ་ཚོགས་པའི་མདོ། ༡༨ སྣང་བ་རོལ་བའི་མདོ། ༡༩ མཚན་བརྒྱ་རྩ་བརྒྱད་པ། ༢༠ མཚན་རབ་ཡོངས་སུ་བསྟན་པའི་མདོ་སྟེ། ༢༡ ཉེར་གཅིག་པོ་ཡིན་ལ་འདི་ལས་དོན་འདི་ལྟར་བཤད་པའང་བཀའ་ཆེམས་ལོ་རྒྱུས་ན་ཡོད་ཏོ། །འདི་ལས་འོད་ཟེར་རྣམ་བཀོད། ཆུ་ཀླུང་སྣ་ཚོགས། སྣང་བ་རོལ་པ། མཚན་རབ་ཡོངས་སུ་བསྟན་པ་རྣམས་དེང་སང་གི་བཀའ་འགྱུར་ན་མི་སྣང་ལ་གཞན་དོན་ཞགས་ཆོ་ག་ཞིབ་མོ་ལ་ཆོ་ག་སྔགས་ཀྱི་རྒྱུད་ཅེས་པ་ལྟ་བུ་འགྱུར་ཁྱད་མ་གཏོགས་དེང་སང་བཞུགས་ལ་མདོ་རྒྱུད་ཉེར་གཅིག་པོ་འདི་སྤྱན་རས་གཟིགས་ཀྱི་ཡོན་ཏན་བརྗོད་པའི་ཆོས་ཀྱི་རྣམ་གྲངས་ཁོ་ན་ཡིན་ནོ། །ཡང་རྒྱལ་པོས་ཐོན་མི་ལ་ཐུགས་དམ་གཉན་པོ་གསང་བ་དེར་ཅི་འདུག་ཀློགས་དང་གསུངས་པས་པང་ཀོང་ཕྱག་རྒྱ་དང་མདོ་སྡེ་ཟ་མ་ཏོག་བྱུང་སྐད། ལ་ལ་ནས་ཙིནྡྷ་མ་ཎིའི་གཟུངས། ཟ་མ་ཏོག་པང་ཀོང༌། མདོ་སྡེ་ལས་རྣམ་འབྱེད་དེ་བཞི་བྱུང་ཞེས་ཀྱང་སྣང༌། དེ་ལྟར་སྤྲུལ་པའི་ཆོས་ཀྱི་རྒྱལ་པོ་དེས། །ཡོན་ཏན་ཀུན་གྱི་གཞི་མ་བྲིས་ཀློག་གིས། །བོད་ཡུལ་རྨོངས་པའི་མུན་པ་ཀུན་བསལ་སྟེ། །ཆོས་དང་སྲིད་ཀྱིས་རྒྱལ་ཁམས་བདེ་བར་མཛད། །(ཇ༡༨ན)

[Full Size]

བཀའ་ཡི་བློན་པོ་ཆེན་པོ་བརྒྱ་ཕྲག་གསུམ། །ཀུན་གྱི་གཙོ་བོ་འཕྲུལ་བློན་བཅུ་དྲུག་གིས། །རྒྱལ་པོའི་བཀའ་སྒྲུབ་རྒྱལ་སྲིད་བདེ་བར་སྐྱོང༌། །དེ་ཡང་ཐང་ཡིག་ཆེན་མོ་ལས། འཕྲུལ་གྱི་གནའ་ཆེན་རིགས་བཟང་དང༌། །ཞང་པོ་རྒྱལ་གྱི་ཁྲོམ་བཟང་དང༌། །ཅོག་རོ་རིག་པའི་ཀོང་བཟང་དང༌། །ལྷ་གཟིགས་ཤོག་པོ་བསྟན་བཟང་དང༌། །ཀ་ཡི་སྙག་སྟོན་འཕེལ་བཟང་དང༌། །སྦས་ཅང་དཔལ་གྱི་ལེགས་བཟང་སྟེ། །ནང་བློན་བཟང་པོ་རྣམ་དྲུག་ཟེར། །དེ་ལ་སོགས་པ་བརྒྱ་ཕྲག་གཅིག །རྒྱལ་པོའི་སྐུ་ཡི་ཞབས་ཏོག་དང༌། །ནང་གི་བྱ་བ་ཐམས་ཅད་བྱེད། །བྱང་གི་ཁྱུང་པོ་པུན་ཟུང་བཙན། །ལམ་ཁྲི་བདེ་བླག་ཁྲི་བཙན་དང༌། །མུ་ཁྲི་རྡོ་རྗེ་རྣམས་བཙན་དང༌། །ཐིང་གི་བྱང་ཆུབ་མཆོག་བཙན་དང༌། །ཐར་པ་ཀླུ་ཡི་དཔལ་བཙན་དང༌། །རོང་པོ་འཕྲུལ་གྱི་ལྡེ་བཙན་སྟེ། །ཕྱི་བློན་བཙན་པོ་རྣམ་དྲུག་ཟེར། །དེ་ལ་སོགས་པ་བློན་པོ་བརྒྱས། །ཕྱི་ཡི་བྱ་བ་ཐམས་ཅད་བྱེད། །ཤར་ཕྱོགས་རྒྱ་དང་མི་ཉག་ནས། །གཟོ་དང་རྩིས་ཀྱི་དཔེ་རྣམས་ལེན། །ལྷོ་ཕྱོགས་དཀར་པོའི་རྒྱ་གར་ནས། །དམ་པའི་ཆོས་ཀྱི་སྒྲ་རྣམས་བསྒྱུར། །ནུབ་ཕྱོགས་སོག་པོ་བལ་པོ་ནས། །ཟས་ནོར་ལོངས་སྤྱོད་གཏེར་ཁ་འབྱེད། །བྱང་ཕྱོགས་ཧོར་དང་ཡུ་གུར་ནས། །ཁྲིམས་དང་ལས་ཀྱི་དཔེ་རྣམས་ལེན། །དེ་ལྟར་ཕྱོགས་བཞིར་དབང་བསྒྱུར་ནས། །མཐའ་ཡི་ལོངས་སྤྱོད་དབང་དུ་སྡུད། །འཛམ་གླིང་ཕྱེད་ལ་ཁ་ལོ་བསྒྱུར། །མཁས་པ་ཐོན་མི་སམྦྷོ་ཊ། །མགར་གྱི་སྟོང་བཙན་ཡུལ་བཟུང་དང༌། །འབྲི་ཡི་སི་རུ་གུང་སྟོན་དང༌། །ཉང་གི་ཁྲི་བཟང་ཡང་སྟོན་སྟེ། །མེད་ཐབས་མེད་པའི་བློན་པོ་བཞི། །དེ་ལ་སོགས་པའི་བློན་པོ་བརྒྱས། །བར་གྱི་ཁོད་སྙོམ་ཁྲིམས་གཉིས་སྐྱོང༌། །ཞེས་བཤད་ཏོ། །ཐོན་མིས་བོད་ཡིག་ཐོག་མ་མཛད་པའི་ཕྱིར། །བོད་ཕྲུག་མཛངས་མི་བདུན་གྱི་བཞི་པར་གྲགས། །གཞན་ཡང་ཁྲི་བཟང་ཡང་སྟོན་སྙགས་ཀྱི་བུས། །མཛངས་པའི་ལས་སུ་རི་ཁྱིམ་ཀླུངས་སུ་ཕབ། །སྤོ་མཐོན་མཁར་དུ་བརྩིགས་ནས་གྲོང་ཁྱེར་བཅོས། །འདི་ཡན་བོད་ཀྱི་ཁང་ཁྱིམ་རི་ལ་ཡོད། །(ཇ༡༨བ)

[Full Size]

དེ་ཕྱིར་བོད་ཀྱི་མཛངས་མི་ལྔ་པ་ཡིན། །དེ་ནས་རྒྱལ་པོས་བོད་འབངས་ཀུན་བསྡུས་སྟེ། །ལུགས་གཉིས་བཀའ་ཁྲིམས་ཆེན་པོ་བཅའ་བར་བཞེད། །རྒྱལ་པོས་ལོ་བཞིར་མཚམས་མཛད་ནས་ཡི་གེ་ལ་སོགས་པའི་རིག་གནས་སྦྱངས་པའི་འབངས་རྣམས་ན་རེ་རྒྱལ་པོ་ལོ་བཞིར་ཕོ་བྲང་ནས་ཕྱིར་མི་འབྱོན་པ་གླེན་པ་ཅིག་ཡོད་པར་འདུག །བོད་བདེ་བ་བློན་པོ་རྣམས་ཀྱིས་བྱས་ཟེར་བ་གསན་པས་ང་གླེན་པར་བརྩིས་ན་བོད་མི་ཐུལ་དགོངས་སྟེ་འབངས་རྣམས་བསགས་ནས་ང་འཕོ་བསྐྱས་མ་བྱས་པར་ཕོ་བྲང་གཅིག་ན་འདུག་ན་འབངས་རྣམས་བདེ་བ་ཡིན་སྟེ་རྒྱལ་པོ་གླེན་པར་འདུག །རྒྱལ་ཁམས་བདེ་བ་བློན་པོས་བྱས་ཟེར་བ་འདུག་པ་དེ་མ་ཡིན། བློན་པོ་ངས་བསྒོ་བ་ཡིན། ད་ནི་ངས་རྒྱལ་ཁྲིམས་ཆེན་པོ་བཅའ་དགོས། སྔོན་ཡང་ཁྲིམས་མེད་པས་རྒྱལ་ཕྲན་རྣམས་སོ་སོར་འཁྱར་བ་ཡིན། ད་དུང་ཁྲིམས་མེད་ན་ཉེས་བྱེད་དར་ཞིང་ངའི་འབངས་རྣམས་སྡུག་བསྔལ་བར་འགྱུར་བས་ཁྲིམས་བཅའ་བར་བྱའོ་གསུངས་ནས་བཅས་སྐད། བཀའ་ཡི་ཁྲིམས་ཡིག་ཆེན་པོ་རྣམ་དྲུག་མཛད། །ཐོག་མར་བོད་ཡུལ་རུ་ཆེན་ལྔ་རུ་ཕྱེ། །ཡུལ་གྱི་དབང་རིས་རྣམ་པ་བཅོ་བརྒྱད་བཅད། །རྒོད་ཀྱི་སྟོང་སྡེ་དྲུག་བཅུ་རྩ་གཅིག་ཕྱེ། །གཡུང་གི་མི་སྡེ་ཁེང་དང་ཡང་ཁེང་འབྱེད། །ཞང་གསུམ་བློན་བཅས་དབུས་ཀྱི་འདུན་ས་འཛིན། །དཔའ་སྡེ་གསུམ་གྱིས་མཐའ་ཡི་སོ་ཁ་སྲུང༌། །དེ་ལ་བོད་ཀྱི་ཁོས་དྲུག་ཞེས་སུ་གྲགས། །དེ་ཡང་ཁྲིམས་ཡིག་དྲུག་ནི། ཁྲི་རྩེ་འབུམ་བཞེར་གྱི་ཁྲིམས། ༡ འབུམ་གསེར་ཐོག་ཤ་བ་ཅན་གྱི་ཁྲིམས། ༢ རྒྱལ་ཁམས་དཔེར་བླངས་ཀྱི་ཁྲིམས། ༣ མདོ་ལོན་ཞུ་བཅད་ཀྱི་ཁྲིམས། ༤ དབང་ཆེན་བཅད་ཀྱི་སྤྱི་ཁྲིམས། ༥ ཁབ་སོ་ནང་པའི་ཁྲིམས་ཏེ་དྲུག་གོ །དང་པོ་ཁྲི་རྩེ་འབུམ་བཞེར་ནས་སྲིད་པ་དང་ཁོས་སྟོན་པ་ལས་རྒྱལ་པོས་བློན་པོ་རྣམས་སོ་སོར་བཀས་བསྒོས་སྟེ་བོད་ཀྱི་ཁོས་དཔོན་མགར་སྟོང་བཙན་ཡུལ་བཟུང༌། ཞང་ཞུང་གི་ཁོས་དཔོན་ཁྱུང་པོ་བུན་ཟུང་ཙེ། སུམ་པའི་ཁོས་དཔོན་ཧོར་བྱ་ཞུ་རིང་པོ། ཆིབས་ཀྱི་ཁོས་དཔོན་དབང་བཙན་བཟང་དཔལ་ལེགས། མཐོང་ཁྱབ་ཀྱི་ཁོས་དཔོན་ཅོག་རོ་རྒྱལ་མཚན་(ཇ༡༩ན)

[Full Size]

གཡང་གོང་རྣམས་བསྐོས། སྐྱི་ཤོད་ཤོ་མ་ར། ཁྱུང་ལུང་རྔུལ་མཁར། ནམ་ར་ཞ་དོན་གྲམ་པ་ཚལ། རི་བོ་གཡའ་དམར་རྣམས་སུ་བཅད་སྐད། མགར་གྱིས་བོད་ཀྱི་ཁོད་བཅའ་བའི་ཕྱིར་རྡེའུ་དང་ཤིང་བུ་གཙིགས་སུ་གསོལ་སྟེ་བྱང་བུ་མཛོ་ཁལ་དྲུག་ལྡང་བར་བྲིས་པས་བྱང་ཁྲམ་མ་ཐེབས་པ་འཁྲུགས་ནས་འཕན་ཡུལ་དར་རྒྱལ་ན་བྱིས་པ་མང་པོ་རྗེ་བྱ་བ་འཕྲུལ་ཆེ་བར་ཐོས་ནས་བློན་པོ་བཞིས་འཚོལ་དུ་ཕྱིན་པས་ནེ་གསིང་ཆེན་པོ་གཅིག་གི་མཐར་བྱིས་པ་དང་ཕྲད། ན་འདིའི་གཞུང་གཅོད་དམ་མཐའ་བསྐོར་དྲིས་པས་དལ་ན་གཞུང་ཆོད་རིངས་ན་མཐའ་བསྐོར་ཟེར། བློན་པོ་བཞིས་གཞུང་བཅད་པས་འདམ་དུ་ཚུད་ནས་ཡུན་རིང་འགོར། བྱིས་པ་དེ་ལ་ཕ་མ་གར་སོང་དྲིས་པས་ཕ་གཏམ་འཚོལ་དུ་སོང་མ་མིག་འཚོལ་དུ་སོང་ཟེར། དར་ཅིག་ན་ཕས་ཆང་ཁྱེར་མས་མེ་ཁྱེར་བྱུང་སྐད། བྱིས་པ་དེ་ཁྲིད་ནས་ཁོད་ཤོམ་བཅུག་པས་ཀྱང་མ་ཤོམས། དར་རྒྱལ་མང་པོ་རྗེས་མཆིམས་མང་བཞེར་ངན་པ་བྱ་བ་མཛངས་པར་ཐོས་ནས་བློ་རྐུ་བའི་ཕྱིར་རི་ལ་ཆང་སྦས། ཤ་སྐམ་ཚྭ་ཆུ་བྱུགས་པ་ཁྱེར་ནས་མཆིམས་ལུག་རྫིའི་རེས་བྱེད་པའི་ཕྱིན་ཡར་ཕྱིན་སྟེ་བོད་ཀྱི་ཁོད་དར་རྒྱལ་མང་པོ་རྗེས་བཤོམ་སྐད་ན་ཤོམས་སམ་བྱས་པས་རྩོམ་པ་དེས་མི་ཤོམས། ང་མིན་པ་ཤོམས་པ་མེད་དེ་ང་མི་ཤོམ་ཟེར། ཤ་སྐམ་བྱིན་པས་ཁ་སྐོམ་སྟེ་ད་ལྟ་སྐོམ་སྟེར་བ་བྱུང་ན་ཅི་ཟེར་ཉན་པར་བྱས་ནས་ཆང་གིས་གཟིར་བཅུག་ནས་དྲིས་པས་རུ་མཚམས་འབྱེད་པ། ཡུལ་བགོད་པ། རྒོད་གཡུང་གི་སྡེ་འབྱེད་པ་སོགས་ཞིབ་པར་སྨྲས་ནས་ཁོ་གཉིད་དུ་བཏང་ནས་བྲོས་སྟེ་ཁོས་ཟེར་བ་བཞིན་མགར་དང་དར་རྒྱལ་གྱིས་བཤམས་སྐད། དེ་ཡང་དང་པོར་རུ་མཚམས་ཕྱེ་སྟེ། ཤར་འོལ་ཁའི་ཤུག་པ་སྤུན་བདུན་ལྷོ་རྨ་ལ་ལ་བརྒྱུད་ནུབ་གཞུ་སྙེ་མོ་བྱང་པྲགས་ཀྱི་གླང་མ་གུར་ཕུབ་དབུས་ཚད་ལྷ་ས་ར་མོ་ལ་བྱས་པ་དབུ་རུ། ཤར་ཀོང་ཡུལ་བྲེས་སྣ་ལྷོ་ཤ་འུག་སྟག་སྒོ་ནུབ་ཁ་རག་གངས་རྩེ་བྱང་རྨ་ལ་ལ་བརྒྱུད་དབུས་ཚད་ཡར་ལུངས་ཁྲ་འབྲུག་(ཇ༡༩བ)

[Full Size]

ལ་བྱས་པ་གཡོ་རུ། ཤར་པྲགས་ཀྱི་གླང་མ་གུར་ཕུབ་ལྷོ་གཉའ་ནི་གཡག་པོའི་སྣ་ནུབ་བྱེ་མ་ལ་དགུ་བྱང་སྨྲི་ཏི་ཆུ་ནག་ཤངས་ཀྱི་ཞོང་པ་ཚལ་ལ་ཕྱས་པ་གཡས་རུ། ཤར་འཇམ་ན་བཀྲ་ལྷོ་བལ་པོ་གླང་སྣ་ནུབ་ལ་ཀེམ་གཡག་མིག་བྱང་བྱེ་མ་ལ་སྔོན་དབུས་བྲད་ཀྱི་དུར་པ་སྣ་ལ་བྱས་པ་རུ་ལག །ཤར་གཉེ་ཡུལ་བུམ་ནག་ལྷོ་སྨྲི་ཏི་ཆུ་ནག་ནུབ་ཡེལ་ཞབས་སྡིངས་པོ་ཆེ་བྱང་ནགས་ཤོད་གཟི་འཕྲང་དབུས་ཚད་རྒྱ་ཤོད་སྟག་པ་ཚལ་ལ་བྱས་པའི་སུམ་པའི་རུ་སྟེ་གཙང་ལ་གཡས་རུ་དང་རུ་ལག །དབུས་ལ་དབུ་རུ་དང་གཡོ་རུ། ཡན་ལག་གསུམ་པའི་རུ་སྟེ་ལྔར་ཕྱེའོ། །དེ་རྣམས་ལ་ཡུལ་གྱི་དབང་རིས་ནི། དབུ་རུ་ཤོད་ཆེན་བཙན་པོ་མངའ་བདག་ཡུལ། །ཕོ་བྲང་སྣེ་ཆེ་བཙན་པོ་རྒྱལ་འབངས་ཡུལ། །ཡར་ལུངས་སོགས་ཁ་ཁུ་དང་གཉགས་ཀྱི་ཡུལ། །ཡ་འབྲོག་གངས་ཁྱིམ་ཀུ་རིངས་སྡེ་ལྔའི་ཡུལ། །འཆིང་ང་འཆིང་ཡུལ་མགོས་དང་སྣུབས་ཀྱི་ཡུལ། །བྱ་འུག་ས་ཚིགས་དྲང་རྗེ་ཕ་ལྔའི་ཡུལ། །བྲད་དང་ཞོང་པ་སྣ་ནམ་ཡུལ་དུ་བཅད། །བྲག་རུམ་སྟོད་སྨད་ཆེ་སྤོང་ཡུལ་དུ་བྱས། །གཙང་སྟོད་གཙང་སྨད་འབྲོ་དང་ཁྱུང་པོའི་ཡུལ། །ཀླུངས་ཤོད་ནམ་པོ་འདྲུ་དང་ཕྱུགས་མཚམས་ཡུལ། །འཕན་ཡུལ་སྟོང་སྡེ་སྒྲོ་དང་རྨ་ཡི་ཡུལ། །ཉང་རོ་གྲོམ་པ་འབྲེ་དང་ལྕེ་ཡི་ཡུལ། །ཤངས་དང་གླེ་ཕྱི་རི་དང་གླེ་ཡི་ཡུལ། །ཡུང་བ་ཆེ་ཆུང་བྲན་ཀའི་ཡུལ་དུ་བཅད། །ཞ་གད་སྡེ་གསུམ་བློན་པོ་སྦས་ཀྱི་ཡུལ། །ནམ་ར་ཆག་གོང་འབྲིང་དང་ཆག་གི་ཡུལ། །འདམ་ཤོད་དཀར་མོ་ཕྱ་དང་རྭ་ཡི་ཡུལ། །མདོ་ཁམས་མདོ་ཆེན་རྒོད་སྟོང་སྡེ་བརྒྱད་ཡུལ། །ཞེས་བཅོ་བརྒྱད་དུ་ཕྱེའོ། །རྒོད་ཀྱི་སྟོང་སྡེ་ནི། རུ་རེ་ལ་སྟོང་སྡེ་བརྒྱད། སྟོང་བུ་ཆུང་རེ། སྐུ་སྲུང་གི་སྟོང་སྡེ་རེ་དང་བཅུར་ཕྱེ་སྟེ། དོར་སྡེ་སྡེ་མཚམས་གཉིས། ཕྱུགས་མཚམས་འབྲང་མཚམས་གཉིས། ཅོམ་པ་འབྲི་མཚམས་གཉིས། སྐྱིད་སྟོད་སྐྱིད་སྨད་གཉིས། ཡེལ་རབ་སྟོང་བུ་ཆུང་སྐུ་སྲུང་ཤར་ཕྱོགས་པ་དང་བཅུ་ནི་དབུ་རུའི་སྟོང་སྡེ་བཅུའོ། །ཡར་ལུང་འཕྱིང་ལུང་གཉིས། ཡར་མཚམས་གཡུ་འབངས་གཉིས། དྭགས་པོ་ཉ་གཉི་གཉིས། དམྱལ་དང་ལྷོ་བྲང་གཉིས། ལོ་རོ་སྟོང་བུ་ཆུང༌། སྐུ་སྲུང་བྱང་ཕྱོགས་པ་རྣམས་གཡོ་རུའི་སྟོང་སྡེ་བཅུའོ། །སྟོང་ཆེན་ཤངས་ཆེན་གཉིས། ལང་མི་(ཇ༢༠ན)

[Full Size]

ཕོད་དཀར་གཉིས། ཉེན་གར་འབྲང་མཚམས་གཉིས། སྤོ་རབ་གཟོང་སྡེ་གཉིས། ཞངས་སྟོང་བུ་ཆུང༌། སྐུ་སྲུང་ནུབ་ཕྱོགས་པ་རྣམས་གཡས་རུའི་སྟོང་སྡེ། མང་ཀར་ཁྲི་ཕོམ་གཉིས། གྲོམ་པ་ལྷ་རྩེ་གཉིས། མྱང་རོ་ཁྲི་འཐད་གཉིས། ཁང་སར་གད་ཕྲམ་གཉིས། མཚོ་ངོས་སྟོང་བུ་ཆུང༌། སྐུ་སྲུང་ལྷོ་ཕྱོགས་པ་སྟེ་རུ་ལག་གི་སྟོང་སྡེ་བཅུའོ། །བོད་དང་གྲུ་གུའི་མཚམས་ན་འོ་ཅོ་མང་མ་གཉིས། གཉེ་མ་ཙ་མོ་གཉིས། བ་ག་སྟོང་བུ་ཆུང་སྟེ་ཞང་ཞུང་སྟོད་ཀྱི་སྟོང་སྡེ་ལྔ། བོད་དང་སུམ་པའི་མཚམས་ན་གུག་གེ་ཅོག་ལ་གཉིས། སྤྱི་གཙང་ཡར་གཙང་གཉིས། ཅི་དེ་སྟོང་བུ་ཆུང་སྟེ་ཞང་ཞུང་སྨད་ཀྱི་སྟོང་སྡེ་ལྔ་སྟེ་ཞང་ཞུང་གི་སྟོང་སྡེ་བཅུའོ། །རྩེ་མཐོན་ཕོ་མཐོན་གཉིས། རྒོད་ཚང་སྟོད་སྨད་གཉིས། འཇོང་སྟོད་འཇོང་སྨད་གཉིས། དྲེ་སྟོད་དྲེ་སྨད་གཉིས། ཁ་རོ་ཁ་ཟངས་གཉིས། ནགས་ཤོད་སྟོང་བུ་ཆུང་སྟེ་སུམ་པའི་རུ་སྟོང་ཁྱབ་རྒྱ་ལྡན་གྱི་སྟོང་སྡེ་བཅུ་གཅིག་གོ །དེ་རྣམས་ལ་རྒོད་ཀྱི་སྟོང་སྡེ་དྲུག་བཅུ་རྩ་གཅིག་ཟེར་སྟེ་རྒོད་ནི་འབངས་རབ་ཚན་དམག་གི་ལས་བྱེད་པའི་མིང་སྟེ་དེ་རྣམས་ལ་སྟོང་དཔོན་ཡང་དྲུག་བཅུ་རྩ་གཅིག་གོ །དབུ་རུ་སྟོད་སྨད་ཀྱི་དམག་དཔོན་སྣ་ནམ་རྒྱལ་རྒན་དང་སྦས་སྐྱེས་བཟང་སྟག་སྣ། དེའི་དཔའ་ཟླ་གནོན་འཕན་གསུམ་དང་ཤོད་བུ་ཁོད་བཙན། རུ་རྟ་ཟེ་དཀར་རྟ་སྐྱ་དང་མཚལ་བུ་གཟིག་རིང༌། རུ་དར་དམར་པོ་ལྕེ་ཁྲ་དང་དཔལ་དར་དམར་པོ། དམག་གི་བཞེད་ནི་མཚོ་ལ་གངས་བབ་འདྲ་སྐད། གཡོ་རུ་སྟོད་སྨད་ལ་རུ་དཔོན་མྱང་སྟག་གཟིག་གཡུ་བཙན་དང་མཆིམས་རྒྱལ་གཟིགས་ཤུད་རིང༌། དཔའ་ཟླ་གཡས་མང་བཞེར་དང་སོ་གད་གཉེན་བཞེར་རུ་རྟ་མོག་རོ་བུན་བུན་དང་མཚལ་བུ་རྟིང་དཀར་རུ་དར་སེང་གེ་དམར་པོ་དང་དར་དཀར་སྙིང་ནག །མཚོ་ལ་སྦྲང་ཆར་བབ་པ་བཞིན་དུ་འགྲིམ་སྐད། རུ་ལག་སྟོད་སྨད་ལ་རུ་དཔོན་འབྲོ་རྒྱལ་མཚན་སེང་གེ་དང་ཁྱུང་པོ་གཡུའི་ཟུར་ཕུད། དཔའ་ཟླ་གནམ་སྡེ་གུར་ཚབ་དང་མཆིམས་བཙན་ཞེར་ལྷ་གཟིགས། རུ་དར་སེང་དཀར་གནམ་འཕྱོང་དང་དཔལ་དར་ནག་པོ། རུ་རྟ་ངང་པ་ཕུད་དམར་དང་རག་པ་རྔོག་ནག །གངས་ལ་སེར་བ་འགྲིམ་པ་བཞིན་དུ་འགྲོ་སྐད། གཡས་རུ་སྟོད་སྨད་ལ་རུ་དཔོན་ཁྱུང་པོ་(ཇ༢༠བ)

[Full Size]

སྟག་བཟང་སྟོང་དང་མགོས་ཁྲི་གཉེན་ཡང་འཕྱོས། དཔའ་ཟླ་བ་ཚབ་མཚོ་ཞེར་ཙད་ལོད་དང་ལང་པ་མགོན་ནེ། རུ་རྟ་མཚལ་བུ་མེ་སྟག་དང་སྔོན་པོ་གཡུ་རྟ། རུ་དར་དར་ནག་སྙིང་དཀར་བྱ་ཁྱུང་བྲིས་པ་དང་སྐྱར་ཁ་གོང་ཁྲ། སྤང་ལ་མེ་མཆེད་པ་ལྟ་བུར་འགྲིམ་སྐད། གཡུང་གི་མི་སྡེ་འབྱེད་པ་ནི་གཡུང་ངམ་ཁེང་ཞེས་པ་འབངས་ལས་བྱེད་ཀྱི་མིང་ཡིན་ལ་ཡང་ཁེང་ཞེས་པ་ཡང་བྲན་དང་ཉིང་གཡོག་གི་མིང་ཡིན་ནོ། །དེ་ལ་ཡང་སྣུབས་རྗེ་སྲིས་པ་ལ་སོགས་རྗེ་དགུ། ལོ་ངམ་རྟ་རྫི་སོགས་རྫི་བདུན། ག་རོད་སྒ་མཁན་སོགས་མཁན་དྲུག །རྒྱ་ཇ་ཚོང་པ་ལ་སོགས་ཚོང་པ་ལྔ། གདགས་སྤྲ་འཛིན་སོགས་འཛིན་གསུམ་སྟེ་འདི་རྣམས་ཁེང་དང་ཡང་ཁེང་དང་ཉིང་ཁེང་དུ་ཕྱེ་བས་དགོས་པ་ཐམས་ཅད་སྒྲུབ་ལ། ནམ་པ་ལྡེ་རྒྱལ། བལ་པོ་ལི་རྒྱལ། སུམ་པ་ལྕགས་རྒྱལ། མོན་རྩེ་རྒྱལ་ཞེས་ཕྱོགས་ཀྱི་རྒྱལ་པོ་བཞིས་དཔྱ་བསྡུས་ནས་འབུལ་བས་འབངས་ལ་གཏོགས་སོ། །སྟོད་ན་འབྲོ་སྨད་ན་མཆིམས་བར་ན་སྣ་ནམ་བློན་པོ་སྦས་རྣམས་ལ་ཞང་གསུམ་བློན་དང་བཞི་ཞེས་སྐུ་ཞང་དང་བློན་ཆེན་གྱི་བྱ་བ་བྱེད་དོ། །དཔའ་བའི་སྡེ་གསུམ་ནི་རི་བྲང་སྟག་པ་གོང་ཡན་ཆད་མོན་འབྲལ་ཁ་བཞི་མན་ཆད་ན་འབྲོ་ཁྱུང་མགར་སྣུབས་གཉན་སྟེ་གུག་ཅོག་སྡེ་ལྔས་དཔོན་བྱས། གྲུ་གུ་གསེར་མིག་ཅན་གྱི་ཆུང་མ་ཧོར་མོ་བང་མདུང་ཅན་ནུ་མ་གཡས་པ་མེ་བཙས་བསྲེགས་ནས་མདའ་པར་གསུམ་ལྡེའུ་ཁྱི་མགོ་ཙམ་རྡོ་ལེབ་ལ་ཅུར་འབྱིན་པ་འཕེན་པ་ལ་ཁ་བལྟས་ནས། དཔའ་མཚན་དུ་སྟག་གི་སྤྱིལ་པོ་ཕུབ། འོག་རྟ་གཡུལ་དུ་བསད། གདོང་ཁྲག་གིས་བྱུགས་སྟེ་སླར་མི་ལྡོག་པའི་རྩིས་སུ་བྱས་ནས་རྒོལ་བས་གྲུ་གུ་བཏུལ་བའོ། །བར་གྱི་དཔའ་སྡེ་ནི་རི་པེ་ནམ་ལུང་ཡན་ཆད་ཆ་སྐོར་དར་བས་མན་ཆད་ཡུལ་དེ་ན་སྦས་རྒྱ་སྡེ་བཅུ་གཉིས་གནས་པས་ནགས་ཤོད་ཀྱི་དཔོན་བྱས་སྟེ་ལྗང་མོ་ཐག་མདུང་གི་རྩེ་མོ་བཙུགས་ནས་དམག་གསེབ་ཏུ་རྒྱུག་པ་ལ་རྒོལ་བའི་ཚེ་དཔའ་མཚན་དུ་རལ་གྲི་ལ་རི་མོ་བྲིས་དུར་རྒྱགས་ལྟོར་ཟོས་ཚེ་སློག་རྒྱབ་ཏུ་གོན་སྟེ་མི་སྡུག་པའི་ཆས་སུ་བྱས་ན་རྒོལ་པས་ལྗང་བཏུལ་ལོ། །སྨད་ཀྱི་དཔའ་སྡེ་ནི་རྨ་པོམ་ར་མན་ཆད་ཀ་ཐང་ཀླུ་ཚེས་ཡན་ཆད་ན་མཐོང་ཁྱབ་སྲིད་སྡེ་དགུ་དང་འ་ཞ་སྟོང་སྡེ་དྲུག་གནས་པ་ལ། རྒྱའི་སོ་མཁར་གྱི་ལྕགས་རིའི་སྟེང་དུ་རྟ་པ་དགུ་བསྒྲིགས་རྒྱུག་པའི་ནང་ནས་མི་(ཇ༢༡ན)

[Full Size]

མཁར་ཐུང་ཙམ་གྱིས་དགྲ་སྟའི་ཁ་ཁྲུ་རེ་ཙམ་པ་ཐོགས་པ་ལ་རྒོལ་པའི་ཚེ། ལྟོང་ལྟོང་གི་བུ་ཕྱུགས་མཚམས་ཀྱིས་དཔོན་བྱས་དཔའ་མཚན་དུ་རལ་གྲིའི་ཤུབས་བཅག་ཁ་ཆེམས་ཉེ་བ་ལ་ཕོག་བུ་སྨད་ཉེ་དྲུང་ལ་བཅོལ་ནས་མི་ལྡོག་པའི་རྩིས་ཀྱིས་རྒོལ་པས་རྒྱ་ཐུལ་བས་སྨད་ཀྱི་དཔའ་སྡེའོ། །གཞན་ཡང་དཔོན་བདུན་ལ་ཡུལ་དཔོན་གྱི་ལས་སུ་ཡུལ་ཆུང་ཁྲིམས་ཀྱིས་འཚོ། དམག་དཔོན་གྱི་ལས་སུ་དགྲ་འདུལ། ཆིབས་དཔོན་གྱིས་གཤེགས་པའི་བཤུལ་མཚོན། རྔན་དཔོན་གྱིས་འབྲུ་དང་གསེར་དངུལ་གྱི་གཉེར་བྱེད་པ་ལ་རྔན་བགྲང་བ་མང་བས་རྔན་དཔོན་དུ་ཐོགས། ཕྲུ་དཔོན་གྱིས་འབྲི་མཛོ་ཕྲུ་མའི་གཉེར་བྱེད། དྲང་དཔོན་གྱིས་ཞལ་ལྕེ་གཅོད་པས་དཔོན་བདུན་ནོ། །གཞན་ཡང་བཀའ་གྲོས་ཆེན་པོ་དྲུག་ཡིག་ཚངས་དྲུག་བཀའི་ཕྱག་རྒྱ་དྲུག་རྐེན་དྲུག་དཔའ་མཚན་དྲུག་དེ་རྣམས་ཀྱི་སྟེང་དུ་ཁྲིམས་ཡིག་དྲུག་པོ་བསྣན་པས་བོད་ཀྱི་ཁོས་སུམ་བཅུ་རྩ་དྲུག་ཞེས་བྱ་སྟེ་རྗེའི་སྐུ་འཚོལ་ཞིང་ཞོ་ཤ་སླར་དབུལ། རྒོད་ཀྱི་གཉའ་མནན་ཞིང་ཡང་ཁེང་གི་རྒྱབ་བརྟེན་ཁེང་རྒོད་དུ་མི་བཏང་ཞིང་མོ་བཙུན་བཀའ་ལ་མི་གདགས། སོ་མཚམས་སྲུང་ཞིང་འབངས་ཀྱི་ཚལ་ཞིང་རྟ་དཀྱུས་ཀྱིས་མི་བཅད། དགྲ་འདུལ་ཞིང་འབངས་བསྐྱང༌། དགེ་བཅུ་སྒྲུབ་ཅིང་མི་དགེ་བ་བཅུ་སྤང་བ་རྣམས་བཀའ་གྲོས་ཆེན་པོ་དྲུག་གོ །ཡིག་ཚངས་ནི་རབ་གསེར་གཡུ་གཉིས་འབྲིང་དངུལ་དང་ཕྲ་མེན་ཐ་མ་ཟངས་ཡིག་ལྕགས་ཡིག་སྟེ་དྲུག་པོ་རེ་རེ་ལ་ཆེ་ཆུང་གཉིས་ཕྱེ་བས་བཅུ་གཉིས་སོ། །དེ་ཡང་གུང་བློན་ཆེན་པོ་ལ་གཡུ་ཡིག་ཆེན་མོ་གནང༌། གུང་བློན་འབྲིང་དང་ནང་བློན་ཆེན་པོ་ལ་གཡུ་ཡིག་ཆུང་ངུ་གུང་བློན་ཐ་ཆུང་དང་ནང་བློན་འབྲིང་བཀའ་ཡོ་གལ་འཆོས་པ་ཆེན་པོ་གསུམ་ལ་གསེར་ཡིག་ཆེན་པོ། ནང་བློན་ཐ་ཆུང་དང་བཀའ་བློན་འབྲིང་ལ་གསེར་ཡིག་ཆུང་ངུ༌། བཀའ་བློན་ཐ་ཆུང་ལ་ཕྲ་མེན་གྱི་ཡི་གེ་གནང༌། གཞན་ཡང་ཆོས་གྲའི་སློབ་དཔོན་སྐུའི་སྔགས་མཁན་སྟོད་སྨད་ཀྱི་དབང་བློན་རྣམས་ལ་དངུལ་གྱི་ཡི་གེ་ཆེན་པོ་བྱིན། སྐུ་འཚོ་བའི་བོན་པོ་གཟིམས་མལ་བརྩིགས་ཁབ་བྱང་ཐང་གི་ས་མཁན་མཐའི་སོ་ཁ་སྲུང་བ་དང་སྐུ་མཁར་གྱི་རྩེ་སྲུང་སོགས་ལ་དངུལ་ཡིག་ཆུང་བ། ཡབ་འབངས་རུས་དྲུག་སོགས་ལ་འཁར་བའི་ཡི་གེ །སྟོང་དཔོན་རུ་དཔོན་སོགས་ལ་ཟངས་ཡིག །གཡུལ་དུ་དཔའ་(ཇ༢༡བ)

[Full Size]

བ་ལ་ལྕགས་ཡིག །ཡང་ཐ་ཤིང་སྐྱ་ཆུ་རིས་ཀྱི་ཡི་གེ་ནི་འབངས་ཕལ་པ་རྣམས་ལ་གནང་སྐད། ཕྱག་རྒྱ་དྲུག་ནི་བཀའ་བཏགས་ཀྱི་ཕྱག་རྒྱ་སྒྲོམ་བུ་ཁྲོམ་རྟགས་ཀྱི་ཕྱག་རྒྱ་རུ་མཚོན་ཡུལ་རྟགས་ཀྱི་ཕྱག་རྒྱ་སྐུ་མཁར་ཆོས་རྟགས་ཀྱི་ཕྱག་རྒྱ་ལྷ་ཁང་དཔའ་རྟགས་ཀྱི་ཕྱག་རྒྱ་སྟག་སློག་མཛངས་རྟགས་ཀྱི་ཕྱག་རྒྱ་ཡིག་ཚངས་སུ་བཅད་དོ། །རྐྱེན་དྲུག་ནི་དཔའ་བའི་རྐྱེན་དུ་གུང་དང་སྟག་སྡར་མའི་རྐྱེན་དུ་ཝ་ཞུ་ཡ་རབས་ཀྱི་རྐྱེན་དུ་ལྷ་ཆོས། གཡུང་པོའི་རྐྱེན་དུ་ཐགས་དང་བོན། མཛངས་པའི་རྐྱེན་དུ་ཡིག་ཚངས། ངན་པའི་རྐྱེན་དུ་རྐུན་མའོ། །དཔའ་མཚན་དྲུག་ནི་སྟག་སྟོད་སྟག་སྨད་གཉིས་ཟེར་ཆེན་ཟེར་ཆུང་གཉིས་གམ་རས་སྟག་སློག་དང་དྲུག་གོ །གཞན་ཡང་གུང་བློན་ཆེ་འབྲིང་ཆུང་གསུམ་ནང་བློན་གསུམ་བཀའ་ཡོ་གལ་འཆོས་པའི་མི་གསུམ་སྟེ་དགུ་པོ་ལ་བློན་པོ་ཆེ་དགུར་མཛད་སྟེ་གུང་བློན་གྱི་ལས་ཐབས་ཁྱོ་དང་འདྲ་བར་ཕྱི་རྒྱ་རླབས་ཀྱིས་གཅོད་ནང་བློན་གྱིས་བུད་མེད་མཛངས་མ་ལྟར་ནང་གི་ཆིས་བྱེད། བཀའ་ཡོ་གལ་འཆོས་པས་ལེགས་ན་དགྲའི་བུས་ལེགས་ཀྱང་བྱ་དགའ་གསོལ་ཉེས་ན་རང་གི་བུས་ཉེས་ཀྱང་ཆད་པས་གཅོད་པའོ། །དེ་རྣམས་ཁྲི་རྩེ་འབུམ་བཞེར་ཞེས་བྱ་བ། །བཀའ་ཡི་ཁྲིམས་ཡིག་དྲུག་ལས་དང་པོ་ཡིན། །བྲེ་སྲང་ཕུལ་ཁྱོར་ཞོ་ནམ་སེ་སྲན་སོགས། །བཀའ་ལ་བཏགས་པ་ཁྲིམས་ཡིག་གཉིས་པ་སྟེ། །འབུམ་གྱི་གསེར་ཐོག་ཤ་བ་ཅན་ཞེས་གྲགས། །གསུམ་པ་རྒྱལ་ཁམས་དཔེར་བླངས་ཁྲིམས་ཞེས་པ། །བྱ་བར་འོས་དང་མི་འོས་སྟོན་པ་སྟེ། །དགྲ་བཏུལ་རྒྱལ་ཁམས་བདེ་བར་མཛད། །ནང་གི་ཆིས་མཛད་འབངས་འཁོར་སྐྱོང༌། །ཕྱི་མར་ཕན་ཕྱིར་དམ་ཆོས་བྱ། །ཡ་རབས་རྒྱུ་རྐྱེན་ལྷ་ཆོས་ནི། །སྣོད་མིན་ཁེང་པོ་ལ་མི་བཤད། །གསང་སྔགས་རྫོགས་འཚང་རྒྱ་བའི་རྒྱུ། །ནོར་དུ་མི་བཙོང་སྙིང་ལ་བཅང༌། །ངན་པ་བསྟོད་ན་གཉི་ག་ཕུང༌། །དེ་བས་ཁེང་པོ་རྗེར་མི་དབྱུང༌། །དཔའ་ལ་སྟག་གིས་མ་བསྟོད་ན། །དཔའ་ངར་བྱས་པའི་རུ་མ་མེད། །མཛངས་ལ་ཡིག་ཚངས་མ་བསྟོད་ན། །ཕྱིན་ཆད་མཛངས་ངན་ཤན་མི་ཕྱེད། །ལེགས་ལ་བྱ་དགས་མ་བསྟོད་ན། །སླན་ཆད་ལེགས་པ་སུ་ཡིས་བྱེད། །(ཇ༢༢ན)

[Full Size]

སྡར་མ་ཝ་ཞུས་མ་དམད་ན། །དཔའ་དང་སྡར་མ་ཤན་མི་ཕྱེད། །ངན་ལ་ནན་ཏུར་མ་བྱས་ན། །ནམ་ཡང་དྲན་ཤེས་རེམ་མི་འགྱུར། །ཉེས་ལ་ཆད་པ་མ་བཅད་ན། །ཕྱི་ནས་ཉེས་བྱེད་རྒྱུན་མི་ཆད། །ལུས་སྐྱེད་ཕ་མ་མནར་བ་ན། །འཕྲལ་ཕུགས་གཉིས་ཀར་ལ་ཡོགས་སྡིག །རང་གི་མཆན་གྱི་བུ་མནར་ན། །ཕྱི་རོལ་དགྲས་ཀྱང་ཞེ་ཁ་འབྱེད། །བཟའ་གྲོགས་མནར་ན་ཕྱི་ནང་གི །ཚུས་དང་སོ་ནམ་ཡལ་བར་འཆོར། །དེ་རྣམས་ལ་མཛད་པ་གསུམ་མི་མཛད་པ་གསུམ་བསྟོད་པ་གསུམ་དམད་པ་གསུམ་མི་མནར་བ་གསུམ་སྟེ་རྒྱལ་ཁྲིམས་བཅོ་ལྔར་གྲགས་ལ་གཡུལ་དུ་དཔའ་བ་ལ་དཔའ་མཚན་དྲུག་གིས་བསྟོད་སྡར་མ་ལ་ཝ་ཞུ་བཀོན་སྟེ་དམད་སྐད། མི་ཆོས་ཆེན་པོ་གཙང་མ་བཅུ་དྲུག་དང༌། །ཁྱད་པར་མི་དགེ་བཅུ་སྤོང་བཀའ་ཁྲིམས་མཛོད། །དེ་ཡང་སྲོག་མི་གཅོད་པའི་ཁྲིམས་གཤིན་སྟོང་དང་གསོན་སྟོང༌། མ་བྱིན་པར་མི་ལེན་པའི་ཁྲིམས་དཀོན་མཆོག་གི་ནོར་བརྐུས་ན་བརྒྱ་འཇལ་རྒྱལ་པོའི་ནོར་ལ་བརྒྱད་བཅུ་འཇལ་འབངས་ཀྱི་ནོར་ལ་བརྒྱད་འཇལ་དུ་བཅས། ལོག་པར་མི་གཡེམ་པའི་ཁྲིམས་སྨད་འཇལ་དང་བྱི་ཆད། བརྫུན་སྤོང་བའི་ཁྲིམས་ལྷ་སྲུང་དཔང་དུ་བྱས་ནས་མནའ་སྤོབ་པ། ཆང་ལ་ཚོད་ཟིན་པ་སྟེ་ཆོས་ཀྱི་གཏན་ཁྲིམས་ལྔ་ལ་དཔེ་བྱས་པ་ལྔའི་སྟེང་དུ་ཁེང་མི་ལྡོག་པ་དང་བང་སོ་མི་འདྲུ་བ་བསྣན་པས་ཁྲིམས་ཆེན་དྲུག་གམ་བདུན་དུ་ཡང་གྲགས་ཅིང༌། སྤྱིར་མི་དགེ་བ་བཅུ་སྤོང་བའི་སྟེང་དུ་མ་ལ་མར་འཛིན་པ་ཕ་ལ་ཕར་འཛིན་པ་དགེ་སྦྱོང་དང་བྲམ་ཟེ་ལ་དགེ་སྦྱོང་དང་བྲམ་ཟེར་འཛིན་པ་རིགས་ཀྱི་རྒན་རབས་བཀུར་བ་བྱས་པ་དྲིན་དུ་གཟོ་བ་གཞན་ལ་ངན་གཡོ་སྤང་བ་སྟེ་མི་ཆོས་གཙང་མ་བཅུ་དྲུག་ཁྲིམས་སུ་བཅས། གཞན་ཡང༌། དཀོན་མཆོག་སྐྱབས་བཟུང་དད་ཅིང་གུས་པས་མཆོད། །ཕ་དང་མ་ལ་དྲིན་གཟོ་བཀུར་སྟི་བྱ། །དྲིན་ཅན་ཡི་མི་གཅོད་ཅིང་བཟང་ལན་འཇལ། །མཐོན་པོ་རྣམས་ལ་མི་རྒོལ་སྨྲས་ན་ཉན། །ལས་སྤྱོད་ཐམས་ཅད་ཡ་རབས་རྗེས་སུ་འབྲང༌། །ཆོས་དང་ཡི་གེར་བློ་འཇུག་དོན་ཤེས་བྱ། །རྒྱུ་འབྲས་ཡིད་ཆེས་སྡིག་པའི་ལས་ལ་འཛེམ། །གཞན་ལ་བསམ་ངན་མི་བྱ་ཕན་པ་གདགས། །ཅི་བྱེད་རང་སེམས་དཔང་བཞག་དྲང་པོར་བྱ། །ཟས་དང་ཆང་ལ་ཚོད་ཟིན་ཁྲེལ་འཛེམ་སྐྱེད། །(ཇ༢༢བ)

[Full Size]

སྐྱིན་པ་བུ་ལོན་ལ་སོགས་དུས་སུ་གཞལ། །བྲེ་དང་སྲང་ལ་སོགས་ལ་གཡོ་ཟོལ་སྤང༌། །མ་བཅོལ་ལས་ལ་དོན་མེད་ཁ་གཏོགས་སྤང༌། །རང་ཚུགས་བཟུང་ནས་བསྒྱུར་ཁ་ལྕི་བར་བྱ། །མནའ་དང་དམ་བཞག་སྲོག་ལྟར་གཅེས་པར་འཛིན། །དེ་ལ་སོགས་པ་བཀའ་ཡི་དྲིལ་བསྒྲགས་སྟེ། །ཡ་རབས་བཟང་པོའི་ལུགས་ཀྱི་བསྟན་བཅོས་དང༌། །ཕྱི་མར་ཕན་བདེའི་གོ་འཕང་དམ་པ་ལ། །བོད་འབངས་ཐམས་ཅད་བཀོད་དེ་བདེ་ཞིང་སྐྱིད། །ཁྲིམས་ཡིག་གསུམ་ནི་བདེན་རྫུན་ཞལ་ལྕེ་སྟེ། །ཁ་དྲག་རྣམས་ལ་མ་སྐྱེངས་ཙམ་དུ་བཅད། །གཉི་གས་ལན་ལ་དབྱུག་པ་ཅན་བཞིན་དང༌། །གཉི་ག་བདེན་ལ་རིགས་གཉིས་པ་ལྟར་བཅད། །ཁ་དྲག་ཞན་གཉིས་རྩོད་ན་བདེན་རྫུན་བརྟགས་པའི་མཐར་ཁ་དྲག་པ་མ་སྐྱེངས་ཅིང་ཞན་པ་ཡི་མི་འཆད་པར་གཅོད་པ་མདོ་ལོན་ཞུ་ཆད་ཀྱི་ཁྲིམས་ཡིག་གཉི་གས་ལན་པ་ལ་བྲམ་ཟེ་དབྱུག་པ་ཅན་གྱིས་ཁྱིམ་བདག་གི་གླང་གཡར་ནས་གཏོད་ཏུ་ཕྱིན་པས་གླང་ཁྱིམ་བདག་གི་ར་བར་བཏང་སྟེ་ཅི་ཡང་མ་སྨྲས་པར་ལོག་ཁྱིམ་བདག་གིས་གླང་བསྐྱལ་བྱུང་བ་མཐོང་ཡང་མ་བཏགས་པར་བཞག་པས་གླང་ཕུགས་ཀྱི་སྒོ་ནས་ཐོན་སྟེ་སྟོར་བ་རྒྱལ་པོ་མེ་ལུང་གདོང་ལ་ཞལ་ལྕེ་ཞུས་པས་བྲམ་ཟེས་གླང་བཏང་ཡོད་ཏོ་ཅེས་མ་སྨྲས་པས་ལྕེ་ཆོད། ཁྱིམ་བདག་གིས་མཐོང་ཡང་མ་བཏགས་པས་ལག་པ་བྲེགས་ཅེས་ཞལ་ལྕེ་བཅད་པ་ལ་དཔེ་བྱས་ནས་ཆད་པ་གཉིས་མཉམ་དུ་གཅོད་པ་དབང་ཆེན་བཅད་ཀྱི་སྤྱི་ཁྲིམས། གཉི་ག་བདེན་ན་ཁྱིམ་བདག་ཞིག་གི་བུ་སྐྱེས་མ་ཐག་ཆུར་ལྷུང་བ་ཉ་ཞིག་གིས་མིད་པ་རིའི་འོག་གི་གྲོང་ན་གནས་པའི་ཁྱིམ་བདག་གཞན་ཞིག་གི་གཡོག་གིས་ཉ་དེ་ཟིན་ནས་བཤས་པས་ཁྱེ་འུ་ཞིག་མ་ཤི་བར་བྱུང་བ་ཁྱིམ་བདག་དེས་བུར་གསོས་པ་ཁྱིམ་བདག་གོང་མས་ཐོས་ནས་རྩོད་དེ་རྒྱལ་པོ་ལ་ཞལ་ལྕེ་ཞུས་པས་གཉི་གས་ཁྱེ་འུ་རེ་མོས་སུ་གསོས་ལ་བུད་མེད་རེ་རེ་ལོང༌། བུ་བྱུང་ན་ཁྱིམ་བདག་སོ་སོས་ཁྱེར་ཞིག་ཞེས་བྱུང་ནས་ཁྱེ་འུ་རིགས་གཉིས་པར་མིང་ཆགས། བུ་རེ་རེ་སོ་སོས་ཁྱེར་ཕྱིས་རབ་ཏུ་བྱུང་བས་དགེ་སློང་རིགས་གཉིས་པར་གྲགས་པ་དེ་ལ་དཔེ་བླངས་ནས་གཉིས་བདེན་དང་དགའ་གསུམ་དུ་གཅོད་པ་ཁབ་སོ་ནང་པའི་ཁྲིམས་ཡིག་དུ་གྲགས་སྐད། དེ་ལྟར་ཤར་རྩ་མི་ཤིང་མི་ལྷོ་ནས་ཀློ་དང་མོན་ནུབ་ནས་ཞང་ཞུང་དང་གྲུ་གུ་བྱང་ནས་ཧོར་དང་ཡུ་གུར་རྣམས་འབངས་སུ་འདུས། འཛམ་གླིང་གི་ཕྱེད་ལ་ཁ་ལོ་བསྒྱུར། དགེ་བཅུའི་ཁྲིམས་བཙན་བདེ་སྐྱིད་ལྷ་དང་མཉམ་(ཇ༢༣ན)

[Full Size]

པ་ཡིན་ནོ། །དེ་ལྟར་འདི་ཕྱི་ཀུན་དུ་ཕན་པ་ཡི། །བཟང་པོའི་བཙན་ཁྲིམས་གཉའ་ཤིང་དམ་པར་བསྡམས། །རི་དྭགས་རྣམས་ནི་རྒྱལ་པོའི་དཀོར་ནོར་མཛད། །ར་ལུག་བེའུ་ལ་སོགས་རང་ཡིན་གཏོང༌། །ལ་ལ་བཙས་བརྩིགས་ཆུ་ཆེན་གྲུ་ཡིས་བཅད། །རྗེ་ཡི་བཀའ་བཙན་འབངས་རྣམས་བདེ་ཞིང་སྐྱིད། །རྒྱལ་པོའི་ཆབ་སྲིད་དབྱར་གྱི་མཚོ་ལྟར་འཕེལ། །ཕོ་དཔའ་རྟག་མགྱོགས་ལོངས་སྤྱོད་ལྷ་དང་མཉམ། །བློ་གཏད་ཚོས་ལ་བྱས་པས་འདི་ཕྱིར་སྐྱིད། །ཐམས་ཅད་ཕ་མར་ཤེས་པས་འཐབ་རྩོད་མེད། །བྲི་ཀློག་དར་བས་མི་ཀུན་ཆོས་ལ་འཇུག །སྡིག་པའི་གྲོགས་མེད་དགེ་བཅུའི་ནོར་བུ་རྙེད། །སྤྲུལ་པའི་མཛད་པས་ཁྲལ་དང་འུ་ལག་མེད། །ཆར་ཆུ་དུས་འབབ་རྩི་བཅུད་འབྲུ་ཚོགས་འཕེལ། །ལྗོན་ཤིང་ཐམས་ཅད་ཡལ་ག་ལོ་འདབ་རྒྱས། །བྱ་རྣམས་བག་ཕེབས་སྙན་པའི་སྒྲ་དབྱངས་འབྱིན། །བོད་ཡུལ་མི་རྣམས་བདེ་སྐྱིད་ལྷ་དང་མཚུངས། །དེ་ཚེ་བཀྲ་ཤིས་ཉམས་དགའ་བྲག་ལྷའི་ཚལ། །ལྗོན་ཤིང་ཏར་ཀ་སྡོང་པོའི་གྲིབ་གསིལ་ལ། །ཆོས་ཀྱི་རྒྱལ་པོ་གསེར་ཁྲིའི་སྟེང་དུ་བཞུགས། །དཔའ་མཛངས་འཕྲུལ་ལྡན་བློན་པོའི་ཚོགས་ཀྱིས་བསྐོར། །བོད་འབངས་སྐྱེ་བོ་རྒྱ་མཚོ་ལྟ་བུར་འཁྱིལ། །ཁ་དོག་སྣ་ཚོགས་བཀྲ་བ་འཇའ་ཡི་གུར། །རྒྱལ་པོ་བཞུགས་པའི་མཁའ་ལ་གདུགས་ལྟར་འཁྱིལ། །ལྷ་རྣམས་མེ་ཏོག་ཆར་པ་རབ་ཏུ་འབེབས། །རོ་བརྒྱ་ལྡན་པ་ལྷ་ཡི་ཞལ་ཟས་ཚོགས། །ན་མཁའི་མཛོད་བཞིན་ཟད་པ་མེད་པར་སྤྱོད། །འབག་དང་སེང་གེ་སྟག་གསེང་གཡག་གསེང་དང༌། །རྔ་བྲོ་བདུང་དང་ཟློས་གར་མཁན་ལ་སོགས། །སྐུ་ཡི་སྐྱོ་གསང་ཚོགས་ནི་བལྟར་མི་ལང༌། །ལྷ་ཡི་རྔ་ཆེན་ན་མཁའི་དབྱིངས་ནས་གྲག །པི་ཝང་གླིང་བུ་རོལ་མོའི་ཚོགས་ཀྱིས་མཆོད། །དྲི་ཞིམ་བདུག་སྤོས་སྤྲིན་གྱིས་བར་སྣང་གང༌། །གདུགས་དང་རྒྱལ་མཚན་བ་དན་ལྷབ་ལྷུབ་དང༌། །དར་འཕན་ཚོགས་ཀྱིས་ན་མཁའི་ཁྱོན་ཀུན་ཁྱབ། །ཡིད་འོང་མཛེས་པའི་ན་ཆུང་གཞོན་ནུ་རྣམས། །མཛེས་པའི་(ཇ༢༣བ)

[Full Size]

རྒྱན་ལྡན་མཆོད་རྫས་ཐོགས་པ་ཡི། །གླུ་དང་གར་གྱི་ཀུན་ནས་མཆོད་པར་བྱེད། །དགའ་བདེ་སྐྱིད་པའི་བཀའ་ཁྲིམས་དྲིལ་ཆེན་སྒྲོགས། །དམ་པའི་ཆོས་ཀྱི་རྔ་ཆེན་རབ་ཏུ་བརྡུང༌། །དེ་ཚེ་བློན་འབངས་རྣམས་ཀྱིས་རྒྱལ་པོ་ཡི། །ཡོན་ཏན་རྒྱ་མཚོ་མཐོང་བས་བསྟོད་ཅིང་བསྔགས། །སོ་སོར་དགའ་བདེའི་དགའ་སྟོན་བསམ་ལས་འདས། །བོད་ཡུལ་བདེ་སྐྱིད་ཕུན་སུམ་ཚོགས་པར་གྱུར། །དགེ་བཅུའི་ཁྲིམས་ལ་མི་ཀུན་གནས་གྱུར་པས། །དམ་པའི་ཆོས་ཀྱི་སྣོད་དུ་གྱུར་པར་གཟིགས། །དེ་ལ་བོད་འབངས་བསོད་ནམས་གསོག་པ་དང༌། །བྱིན་གྱིས་རློབ་ཕྱིར་ཡི་དམ་རྟེན་ཞིག་བྱ། །དེ་རྒྱུ་ཅི་ལས་བྱ་ཞེས་དགོངས་པའི་ཚེ། །མཁའ་ལས་ལྷ་ཚོགས་རྣམས་ཀྱིས་ལུང་བསྟན་སྟེ། །ཙནྡན་སྦྲུལ་སྙིང་མཆོག་ལས་རང་བྱུང་བའི། །སྤྱན་རས་གཟིགས་དབང་སྤྱན་འདྲེན་དགྱིད་པར་བསྐུལ། །ཆོས་ཀྱི་རྒྱལ་པོས་སྨིན་མཚམས་མཛོད་སྤུ་ནས། །འོད་ཟེར་རྩེ་ལ་སྤྲུལ་པའི་དགེ་སློང་སྤྲུལ། །སིངྒྷའི་གླིང་དང་ཡུལ་དབུས་བལ་པོ་ནས། །ངོ་མཚར་རྟེན་མཆོག་རྣམ་མང་སྤྱན་དྲངས་གྱུར། །དེ་ཡང་རྒྱལ་པོའི་དགོངས་པ་ལ་བོད་འབངས་འདུལ་ཕྱིར་གསོལ་བ་གདབ་པའི་རྟེན་ངའི་ཡི་དམ་ཞིག་བྱ་དགོས་པ་རྒྱུ་རིན་པོ་ཆེ་ལས་བྱས་ན་མ་འོངས་པ་མི་རྣམས་ལོངས་སྤྱོད་ཉམས་པའི་དུས་སུ་བཤིག་འགྲོ་ས་རྡོ་ལས་བྱས་ན་ངན་གྲགས། ཤིང་ལས་བྱས་ན་འགས་པས་ཅི་ལས་བྱ་དགོངས་ཚེ་གནས་གཙང་མའི་ལྷ་རྣམས་ཀྱིས་ན་མཁར་སྤྲིན་གྱི་དབུས་ནས་རྒྱལ་པོ་ལ་མཆོད་ནས་མགྲིན་གཅིག་དུ། སྤྲུལ་པའི་རྒྱལ་པོ་བྱང་ཆུབ་སེམས། །མགོ་ནག་ཡོངས་ཀྱི་རྗེ་ཁྱེད་ཀྱི། །མོས་གུས་བསོད་ནམས་གསོག་པའི་རྟེན། །ཡི་དམ་ལྷ་ཞིག་སྤྱན་འདྲེན་ན། །རྒྱ་གར་ཡུལ་གྱི་ལྷོ་ཕྱོགས་སུ། །སིངྒྷ་ལ་ཡི་རྒྱ་མཚོའི་འགྲམ། །རང་བྱུང་ཁཱརྶཔཱ་ཎའི་རྒྱབ། །གླང་ཆེན་ཉལ་བའི་བྱེ་མའི་འོག །ཙནྡན་སྦྲུལ་གྱི་སྙིང་པོ་ལས། །གྲུབ་པའི་རང་བྱུང་སྤྱན་རས་གཟིགས། །ངོ་མཚར་ཅན་ཞིག་དེ་ན་བཞུགས། །དེ་ནི་རྒྱལ་པོའི་ཡི་དམ་ཡིན། །ཞེས་ཟེར་རོ། །དེ་ལྟ་བུ་མིས་མི་རྙེད་པས་སྤྲུལ་པ་ཅིག་བཏང་བར་དགོངས་མ་ཐག་སྨིན་མཚམས་ནས་འོད་ཀྱི་རྩེ་ལ་སྤྲུལ་པའི་དགེ་སློང་ཨ་ཀར་མ་ཏི་ཤཱི་ལ་ཞེས་པ་དབུ་གཙུག་ན་ཨ་མི་ཏཱ་བྷ་(ཇ༢༤ན)

[Full Size]

བཞུགས་པ་ཅིག་བྱུང་སྟེ་རྒྱལ་པོ་ཆེན་པོའི་དགོངས་པ་བདག་གིས་སྒྲུབ་བོ་ཅེས་གསུངས་ནས་འོད་ཟེར་དང་འགྲོགས་ནས་རྒྱ་གར་དུ་སོང་སྟེ་ཤར་ཕྱོགས་གྲོང་ཤིང་ཐགས་ཅན་དུ་སོང་སྟེ་ཨ་མི་ཏཱ་བྷའི་ཞལ་བསྟན་བྱམས་སྙིང་རྗེའི་ཆོས་བསྟན་ནས་སྨིན་པར་བྱས་པས་མདུན་དུ་ས་ལས་ཇོ་བོ་ཡི་གེ་དྲུག་མ་ཞིག་འབུར་གྱིས་རང་བྱུང་དུ་བྱུང་བས་ཡིག་དྲུག་འཁོར་ལོ་བསྐོར་བའི་སར་གྲགས། དེ་ནས་སིངྒྷ་ལའི་གླིང་ཕོ་བྲང་ཀེ་ཏུ་བྱ་བར་རྒྱལ་པོ་ཨུ་མ་ཏ་ཀེ་སར་ཞེས་པ་མེས་རྣམས་ནང་པའི་སྦྱིན་བདག་ཡིན་པ་ལ་དེས་ཕྱི་རོལ་པ་བྱས་སྟེ་ཆོས་བསྣུབས་གཙུག་ཁང་མང་པོ་བཤིག །མི་དགེ་བའི་ཁྲིམས་བཅས། རའི་རྐེ་བཅད་པའི་ཁྲག་གིས་དབང་ཕྱུག་མཆོད་པ་ཅིག་འདུག་པ་འདུལ་བའི་ཕྱིར་དེའི་ཕོ་བྲང་གི་དྲུང་ན་མཆོད་རྟེན་པདྨའི་འཁོར་ལོ་ཅན་བྱ་བ་སངས་རྒྱས་འོད་སྲུང་གིས་རབ་གནས་མཛད་པ་ཅིག་ཡོད་པའི་བུམ་པའི་ཐད་ཀྱི་མཁའ་ལ་སྐོར་བ་མཛད་པ་རྒྱལ་པོས་མཐོང་བས་དད་དེ་ཅི་གསུང་ཉན་པར་ཁས་བླངས་ནས་མཆོད་གནས་སུ་སྤྱན་དྲངས། རྒྱལ་པོས་དགེ་སློང་ལ་མེ་ཏོག་གཏོར་བས་དབུའི་ན་མཁའ་ལ་གཞལ་ཡས་ཁང་དུ་ཆགས། ལྷག་པར་དད་པས་མཆོད་གནས་སུ་གསོལ་བ་བཏབ་པས་ཞལ་གྱིས་བཞེས་སྟེ་སླར་སངས་རྒྱས་པ་གྱིས་ལྷ་ཁང་བརྒྱ་རྩ་བརྒྱད་དུ་སྦྲུལ་སྙིང་དང་གོརྴཱི་ཥ་ལས་བྱས་པའི་སངས་རྒྱས་ཀྱི་སྐུ་གཟུགས་བརྒྱ་རྩ་བརྒྱད་གྱིས། དགེ་བཅུའི་ཁྲིམས་ཆོད་ཅིག་གསུངས་པས་གཞན་བཀའ་བཞིན་བགྱིད། ཙནྡན་སྦྲུལ་སྙིང་འོག་མིན་ལས་གཞན་ན་མེད་ཅིང་གོརྴཱི་ཥ་མ་ལ་ཡ་དུག་སྦྲུལ་གྱིས་གཏགས་པ་ལས་གཞན་ན་མེད་པས་བླང་མི་ནུས་ཟེར། དགེ་སློང་གིས་སྦྲུལ་གྱི་སྙིང་པོ་རྒྱ་མཚོའི་འགྲམ་ན་ཡོད། གོརྴཱི་ཥ་པོ་ན་ལའི་བྱང་ཕྱོགས་ཤུག་པའི་གསེང་ན་ཚེས་བཅོ་ལྔའི་མཚན་མོ་མེ་ཏོག་དམར་པུང་གིས་འཆར་བ་དེ་ཡིན་ནོ། །དེ་ཡང་དོན་ཆེན་པོ་འགྲུབ་པ་ལ་བསོད་ནམས་དགོས། དེ་ལ་ཚོགས་བསག་དགོས་པས་ཐོག་མར་མཆོད་རྟེན་པདྨའི་འཁོར་ལོ་ཅན་ལ་མཆོད་པ་གྱིས་ཅིག་གསུངས་ནས་མཆོད་པ་ཆེར་བྱས། རྒྱལ་པོ་འཁོར་བཅས་ཁྲིད་དེ་རྒྱ་མཚོའི་འགྲམ་བྱེ་མའི་གླིང་ན་ཁཱརྶ་པཱ་ཎི་རང་བྱུང་ཆེ་བ་ཞིག་བཞུགས་པའི་རྒྱབ་ན་གླང་པོ་ཆེའི་ཁྱུ་ཞིག་ཉལ་འདུག་པའི་དབུས་ན་གླང་པོ་ཆེ་ཤིན་དུ་ཆེ་བ་མཆེ་བ་དྲུག་པ་སྣ་ལི་ཁྲི་ལྟར་དམར་ཞིང་གི་ཝང་གི་ཟར་བུ་འཛག་པ་འདིའི་འོག་ན་ཡོད་ཀྱིས་རྐོས་ཅིག་གསུངས་སྐད། གླང་པོ་ཆེ་བརྐོགས་ནས་བསྐོས་པ་ཙནྡན་སྦྲུལ་སྙིང་གི་སྡོང་པོ་ཆེན་པོ་ཅིག་བྱུང༌། དེ་ལ་བུ་ག་གཉིས་སམ་(ཇ༢༤བ)

[Full Size]

སྲུབས་བཞིར་འདུག་པ་ལས་དྲི་བསུང་དང་འོད་ཟེར་མཐའ་ཡས་པ་བྱུང་ནས་དྲི་བསུང་གིས་དཔག་ཚད་བཅུ་གཉིས་སུ་ཁྱབ་ཅིང་འོད་ཟེར་གྱིས་འཇིག་རྟེན་ཐམས་ཅད་ཁྱབ་པ་སླར་འདུས་སྟེ་ཐིམ་པ་རང་དལ་བུས་ཆོད་ཅིག་ཞེས་ནང་ནས་སྒྲ་བྱུང་ངོ༌། །དལ་བུས་བཅད་ཅིང་གཤགས་པས་ནང་ནས་ཙནྡན་དེ་ཉིད་ལས་གྲུབ་པའི་ཐུགས་རྗེ་ཆེན་པོ་ཞལ་བཅུ་གཅིག་རྩ་ཕྱག་བཅུ་པ་འོད་དང་ལྡན་པ་སྣུམ་ལྷང་ངེ་བ་ཞིག་བྱུང་སྐད། རྒྱལ་པོས་ཙནྡན་མི་ཡུལ་འདིར་འབྱུང་བ་ཅི་ཙུག་ཡིན་ཞུས་པ་སྔོན་སངས་རྒྱས་འཁོར་བ་འཇིག་ཀླུའི་ཡུལ་ན་ཆོས་སྟོན་ཚེ་འོག་མིན་གྱི་རིག་འཛིན་མང་པོས་མཆོད་པ་བྱེད་དུ་འོངས་པས་ལམ་ཁར་རང་བྱུང་ཁཱརྶ་པཱ་ཎ་ལ་མཆོད་པའི་ཕྱིར་ཙནྡན་སྦྲུལ་སྙིང་གི་མེ་ཏོག་ཞིག་ཕུལ། དེ་སར་ལྷུང་པའི་སྟེང་དུ་ཕྲ་མེན་མས་ཁཱརྶ་པཱ་ཎིའི་ཕྱག་གི་བདུད་རྩི་ལ་སུས་ཐོབ་བྱས་པ་ནས་ཐིགས་པ་གཅིག་ཕོག་པས་དེའི་ཚེ་མྱུ་གུ་སྐྱེས། སངས་རྒྱས་གསེར་ཐུབ་བྱོན་ཚེ་ལོ་འདབ་རྒྱས། འོད་སྲུང་བྱོན་ཚེ་མེ་ཏོག་ཤར། སངས་རྒྱས་ཤཱཀྱ་ཐུབ་པ་བྱོན་ཚེ་འབྲས་བུ་སྨིན། མྱ་ངན་ལས་འདས་ཚེ་རྩ་བ་འགྱེལ་ནས་བྱེ་མར་ནུབ་པ་ཡིན་ལ་གླང་པོ་ཆེ་ཚད་པས་འཇིགས་པས་ཙནྡན་ཡོད་སར་ཉལ་བ་ཡིན་གསུང༌། ཀ་བཀོལ་མར་འདི་ལྟར་བཤད་ལ་གཞན་དུ་འཁོར་བ་འཇིག་གི་ཉན་ཐོས་དགྲ་བཅོམ་པ་ཅིག་གིས་འོག་མིན་ནས་ཙནྡན་གྱི་འབྲུ་གང་བུ་ཞིག་ཁྱེར་བ་ན་འབྲུ་བཞི་འདུག་པའི་གསུམ་སངས་རྒྱས་དང་གཅིག་ཁཱརྶ་པཱ་ཎིའི་དབུ་ཐོག་དུ་བཞག་པ་ལས་བྱུང་ཞེས་ཀྱང་སྣང༌། གླང་པོ་ཆེའི་གཙོ་བོ་དེ་ཁྲོས་པས་སྨོན་ལམ་ལོག་པར་བཏབ་པས་ཕྱིས་གླང་དར་བྱུང་བར་གྲགས། པོ་ཊ་ལ་ནས་གོརྴཱི་ཥ་ཡང་བླངས་ཅིང་ལྷ་ཁང་བརྒྱ་རྩ་བརྒྱད་དུ་སྐུ་རྣམས་བཞེངས། ཡུལ་ཁམས་དེ་ཆོས་ལ་བཀོད་ནས་དགེ་སློང་གིས་དེར་སྤྲུལ་པ་ཅིག་བཞག་སྟེ་རང་བྱུང་བཅུ་གཅིག་ཞལ་དང་ཙནྡན་གཉིས་ཀྱི་ཚལ་པ་རེ་བསྣམས། རྒྱ་མཚོའི་གླིང་གི་བྱེ་མ་དང་འཇག་མ་ཐམས་ཅད་རིན་པོ་ཆེའི་སྦུ་གུ་ཅན་དེའི་སྟེང་ན་ལྷ་མོ་འབུམ་འབུམ་ཆོས་ལ་སྤྱོད་པ་སྤྲུལ་སྐུ་དངོས་དང་འདྲ་བར་མཁྱེན་ནས་བྱེ་མ་བྲེ་གང་དང་འཇག་མ་ཕོན་གཅིག་བསྣམས། མཆོད་རྟེན་པདྨའི་འཁོར་ལོ་ཅན་གྱི་ནང་ནས་སངས་རྒྱས་རབས་བདུན་ནས་གསུམ་གྱི་གདུང་མཁའ་འགྲོ་མའི་སྐལ་བ་རྣམས་སྦས་སྟེ་རྒྱ་རིམ་པ་བདུན་གྱིས་བཏབ་པ་སུས་ཀྱང་མི་རྙེད་པར་བྱས་པ་མཁྱེན་ནས་རྒྱ་བཀྲོལ། གསེར་གྱི་བང་མིག་བདུན་(ཇ༢༥ན)

[Full Size]

ནམ་གསུམ་ཁ་ཕྱེ་སྟེ་རིན་པོ་ཆེའི་སྒྲོམ་བུ་སོ་སོ་ནས་གདུང་ཁྱོར་བ་རེ་རེ་སྤྱན་དྲངས་སྟེ་ལྷག་མ་སྔར་བཞིན་རྒྱས་བཏབ། དེ་ནས་རྒྱ་གར་གྱི་ཡུལ་དབུས་མ་ག་དྷར་བྱོན་པས་རྒྱལ་པོ་དད་དེ་བསུས་ཅིང་རྒྱལ་པོའི་ལྷ་གཅིག་གཉིས་ཀྱིས་གླུ་གར་གྱི་བསུས། བྱང་ཆུབ་ཤིང་ལ་སྤྱང་མོ་ཉུག་བྱས་པས་ཡལ་ག་མེ་ཏོག་ཅན་ཆག་སྟེ་ཕུལ་བ་དེའི་མེ་ཏོག་གི་ཕྲེང་བ་བསྣམས། ཡལ་ག་དེ་ལ་མཆོད་སྡོང་རེ་རེ་བྱས་པས་སངས་རྒྱས་ཀྱི་གདུང་སོ་སོ་བཞུགས། བྱང་ཆུབ་ཤིང་གི་རྩེ་མོ་ནས་འདོམ་གང་བ་ཅིག་ཀྱང་བསྣམས། གནས་ཆེན་པོ་བརྒྱད་ཀྱི་སྙིང་པོའི་བྱེ་མ་འབྲུ་རེའི་སྟེང་ན་སྤྲུལ་སྐུ་འཁོར་རྒྱ་མཚོ་དང་བཅས་པ་རེ་བཞུགས་པ་སྤྲུལ་པའི་སྐུ་དངོས་དང་འདྲ་བར་གཟིགས་སྟེ་བྱེ་མ་བྲེ་བརྒྱད་ཀྱང་བསྣམས། ཆུ་བོ་ནཻ་རཉྫ་རའི་འགྲམ་བདེ་བར་གཤེགས་པས་ལྷུང་བཟེད་ཀྱིས་ཆུ་གསོལ་བའི་ས་ན་བྱང་ཆུབ་སེམས་དཔའ་འབུམ་བཞུགས་པར་གཟིགས་སྟེ་དེའི་བྱེ་མ་བྲེ་གང་ཡང་སྤྱན་དྲངས། དེ་ལྟར་མཆོད་གནས་ངོ་མཚར་ཅན་བཅུ་སྤྱན་དྲངས་སྟེ་རྒྱལ་པོའི་ཕྱག་དུ་ཕུལ་བས་ད་ནི་གཞན་དོན་ཇི་ལྟར་བསམ་པ་བཞིན་འགྲུབ་བོ་ཅེས་དགོངས་སྟེ་ཤིན་དུ་མཉེས་སྟེ་མཆོད་པ་རྒྱ་ཆེན་པོ་མཛད་པ་ན་རང་བྱུང་ཐུགས་རྗེ་ཆེན་པོའི་ཐུགས་ཀ་ནས་འོད་ཟེར་ཁ་དོག་ལྔ་འཕྲོས་སྟེ་བལ་པོའི་ཡུལ་དུ་སོང་བ་ལ་གཟིགས་པས་ནགས་ཚལ་ཆེན་པོའི་དབུས་ཙནྡན་གྱི་སྡོང་པོའི་ནང་ན་ཐུགས་རྗེ་ཆེན་པོ་མཆེད་ལྔ་བཞུགས་པར་གཟིགས་སྟེ་སྤྲུལ་པའི་དགེ་སློང་དེ་བཏང་བས་གྲོང་ཁྱེར་ཆེན་པོ་བཞི་ན་ཡམས་ནད་དང་འཛེ་ནད་དང་སྟེན་གདོན་དང་གདོན་དྲག་པོས་བློ་བུར་དུ་འཆི་བའི་འཇིགས་པ་སོ་སོ་ཡོད་པར་གཟིགས། མ་ཧེ་མོ་ཞིག་ཉིན་རེ་བཞིན་ནགས་ཚལ་དེར་ཕྱིན་ནས་འོ་མ་ཟད་པར་བྱས་ནས་འོང་བ་རྫི་བོས་རྗེས་བསྙེགས་པས་ཙནྡན་གྱི་སྡོང་པོ་འོད་ཟེར་འཕྲོ་བ་ཞིག་ལ་སྐོར་བ་བྱེད་ཅིང་འོ་མ་གཏོར་བས་ལམ་ཡང་འོ་མའི་དྲེག་པས་ཁེབས་སྟེ་འདུག་པ་ངོ་མཚར་དུ་བཟུང་ནས་གདའ་སྐད། སྤྲུལ་པའི་དགེ་སློང་གིས་ཙནྡན་དེ་བཅད་པས་གནས་ལྔ་ནས་འོད་ཟེར་ཆེན་པོ་བྱུང་སྟེ་མ་སྣང་བར་དལ་བུས་ཆོད་ལ་དང་པོས་ང་མང་ཡུལ་གྱི་རོང་དུ་ཞོག་ཞིག་བྱ་བ་སོགས་སོ་སོར་གསུང་བྱུང་སྟེ་ཙནྡན་བཀས་པའི་ནང་ནས་ཐུགས་རྗེ་ཆེན་པོ་གཞེངས་པ་གཡས་མཆོག་སྦྱིན་མཛད་པ་ལྔ་བྱུང་སྟེ་གནས་སོ་སོར་བཞག་པས་འཕགས་པ་ཝ་ཏི་དང་ཨུ་ཁང་བྷུ་ཀཾ་འཇའ་མ་ལི་དཀར་པོ་ཅེས་གྲགས་སྟེ་དུས་མིན་དུ་འཆི་(ཇ༢༥བ)

[Full Size]

བའི་འཇིགས་པ་དེ་རྣམས་ཞི་བར་གྱུར་སྟེ་དེང་སང་གི་བར་བཞུགས། ལྔ་པ་དེས་ང་ནི་བོད་ཀྱི་རྒྱལ་པོའི་ཡི་དམ་དུ་འགྲོའི་ཞེས་གསུངས་ནས་སྤྱན་དྲངས་སྟེ་རྒྱལ་པོ་ལ་ཕུལ་ནས་སྤྲུལ་པའི་དགེ་སློང་ཡང་རྒྱལ་པོའི་སྨིན་མཚམས་སུ་ཐིམ་པར་གྱུར་ཏོ། །སྟོན་པའི་དགུང་ལོ་བརྒྱད་དང་བཅུ་གཉིས་པའི། །སྐུ་ཚད་གར་བཞུགས་ཐེག་ཆེན་དར་བའི་ཕྱིར། །དེ་དག་བོད་ཀྱི་ཡུལ་དུ་སྤྱན་འདྲེན་སླད། །རང་བྱུང་རྟེན་ལ་མཆོག་ཅིང་གསོལ་བཏབ་ཚེ། །ཐུགས་ཀ་ནས་ནི་འོད་ཟེར་རྣམ་གཉིས་བྱུང༌། །རྒྱ་ནག་དང་ནི་བལ་པོའི་ཡུལ་དུ་སོང༌། །སྤྲུལ་པའི་ལྷ་གཅིག་རྣམ་གཉིས་བཞུགས་པར་གཟིགས། །དེ་གཉིས་ཁབ་ཏུ་བཞེས་ན་སྐུ་གཟུགས་གཉིས། །དམ་ཆོས་དང་བཅས་སྤྱན་འདྲེན་ནུས་པར་དགོངས། །ནང་པར་བློན་འབངས་ཕྱག་བྱེད་བསྙུན་རྨེད་ཚེ། །བརྣལ་བའི་གཡར་ལམ་སྐད་དུ་ཟུར་གྱིས་བསྟན། །བློན་པོའི་མཆོག་རྣམས་བློ་གྲོས་གཅིག་དུ་མཐུན། །བསླང་ཐབས་ཇི་ལྟར་བགྱི་བ་གསོལ་བའི་ཚེ། །ཐོག་མར་བལ་པོའི་ལྷ་གཅིག་སྤྱན་འདྲེན་ཕྱིར། །ཐོན་མི་མགར་སོགས་བློན་པོའི་མཆོག་བརྒྱ་ལ། །རིན་དང་བཀའ་ཡི་སྒྲོམ་བུ་རྣམ་གསུམ་བསྐུར། །ཁྲོ་གཉེར་ཅན་ལ་གསོལ་བ་འདེབས་ཅིང་སོང༌། །ཁྱོད་ཀྱི་འདོད་དོན་འགྲུབ་པར་འགྱུར་རོ་གསུངས། །བལ་པོའི་རྗེ་ལ་སྐྱེས་དང་རིན་ཕུལ་ནས། །ལྷ་གཅིག་སློངས་པས་བཀའ་འཕྲིན་གསུམ་གསུངས་པའི། །ལན་དུ་བཀའ་ཡི་སྒྲོམ་བུ་རེ་རེ་བྱིན། །མངོན་ཤེས་ཐོགས་མེད་རྫུ་འཕྲུལ་མཐའ་ཡས་པར། །ཤེས་པས་འཇིགས་དང་དད་པ་དུས་གཅིག་གྱུར། །སྟོན་པའི་དགུང་ལོ་བརྒྱད་པའི་སྐུ་ཚད་དང༌། །བྱམས་པ་ཆོས་འཁོར་ཙནྡན་སྒྲོལ་མ་དང༌། །བཻཌཱུརྻ་ཡི་ལྷུང་བཟེད་ལ་སོགས་པ། །གཞལ་དུ་མེད་པའི་སྐལ་རྫོངས་དང་བཅས་པ། །སྤྲུལ་པའི་ཆོས་ཀྱི་རྒྱལ་པོ་མཆོད་ཕྱིར་ཕུལ། །བོད་དུ་ཕེབས་སྟེ་དགའ་སྟོན་རྒྱལ་སར་མཇལ། །བཙུན་མོའི་དམ་པ་མཆོག་དུ་མངའ་དབང་བསྐུར། །དེ་ཡང་རྒྱལ་པོའི་དགོངས་པ་ལ་སངས་རྒྱས་ཤཱཀྱ་ཐུབ་པའི་སྐུ་ཚད་(ཇ༢༦ན)

[Full Size]

གསུམ་པོ་གར་བཞུགས་པར་བསྟན་པ་སྤྱི་དང་ཁྱད་པར་ཐེག་ཆེན་དར་བ་ཡིན་ལ་སོ་ལྔ་པའི་སྐུ་ཚད་སྤྱན་མི་འདྲོངས་ཀྱང་བརྒྱད་པ་དང་བཅུ་གཉིས་པའི་སྐུ་ཚད་སྤྱན་དྲང་དགོས་དགོངས་སྟེ་རྟེན་རང་བྱུང་ལ་གསོལ་བ་བཏབ་པས་ཐུགས་ཀ་ནས་འོད་ཟེར་སྒྲ་དང་བཅས་པ་བྱུང་སྟེ་བོད་ཀྱི་སེམས་ཅན་རྣམས་སྤྲེའུ་དང་བྲག་སྲིན་ལས་མཆེད་པས་འདུལ་དཀའ་བས་སྤྲུལ་སྐུ་གཉིས་སྤྱན་དྲངས་ལ་འདུལ་དགོས་ཅེས་པའི་སྒྲ་བྱུང༌། ཡང་སྤྲུལ་སྐུ་གང་ནས་སྤྱན་འདྲེན་ཞེས་ཞུས་པས་ཐུགས་ཀ་ནས་འོད་ཟེར་གཉིས་བྱུང་བ་བལ་པོ་དང་རྒྱ་ནག་དུ་རེ་རེ་སོང་སྟེ་སྤྲུལ་པའི་ལྷ་མོ་རེ་བཞུགས་པར་གཟིགས་སྟེ་དེ་གཉིས་སྤྱན་དྲངས་ན་སྐུ་ཚད་གཉིས་དང་རྒྱ་བལ་གྱི་ཆོས་ཐམས་ཅད་བོད་དུ་འབྱོན་པར་མཁྱེན་ནས་ནང་པར་བློན་པོ་རྣམས་ཕྱག་འབུལ་དུ་འོངས་ནས་བཀའ་མཆིད་མཛད་པའི་ཚེ་ཡེངས་མ་གཏམ་དུ་རྒྱལ་པོའི་ཞལ་ནས་མདང་ངའི་རྨི་ལམ་དུ་ནུབ་ཕྱོགས་བལ་པོའི་ཡུལ་ན་བུ་མོ་དཀར་མོ་སྙིང་དུ་སྡུག་པ་ཅིག་དང་ཤར་རྒྱ་ནག་གི་ཡུལ་ན་བུ་མོ་སྔོན་མོ་ཡིད་དུ་འོང་བ་ཞིག་འདུག་པ་ལ་རྨིས་གསུངས་པ་དང༌། གཡས་ནས་མགར་སྟོང་བཙན་ཡུལ་སྲུང་དང་གཡོན་ནས་ཐོན་མི་སམྦྷོ་ཊ་མི་ཆུང་གཉིས་འབྲས་ཆང་བཻ་ཌཱུརྻའི་ཕོར་པ་རེ་རྒྱལ་པོ་ལ་སྟོབ་ཅིང་མནལ་ལམ་དེ་སུ་ལ་ཡང་མི་གསུང་བར་ཞུ། དེ་གཉིས་ངེད་རྣམས་ཀྱིས་ཁབ་ཏུ་བསུའོ་ཞེས་ཟེར་ནས་སོང་སྟེ་དེ་ཁབ་ཏུ་བསུའམ་ཞེས་གླེངས་པས་གྲོང་ཁྱེར་བདུན་ནས་གཙོ་བོ་མི་བདུན་ལ་གྲོས་འདྲི་བར་ཁ་འཆམ་སྟེ་ནང་པར་འཚོག་རྐྱེན་རེ་ཁྱེར་ལ་འོ་ཐང་གི་མཚོ་འགྲམ་ནེ་སིང་དང་གླ་བའི་ཚལ་ཏར་ཁ་སྡོང་པོའི་རྩར་འདུས་ཅིག་ཅེས་བྱས་སྟེ་བློན་པོ་རྣམས་དང་གཙོ་བོ་མི་བདུན་ཚོགས་པའི་མི་བདུན་གྱི་འཚོག་ཆས་བསྡུས་པས་ཤ་ཁོག་མ་ཉམས་པ་གཅིག་དུ་འགྲིག་སྟེ་ཐོན་མི་ན་རེ་འདུན་མ་འདུན་རྐྱེན་གྱིས་བཅད་པ་བྱ་བ་ཤིན་ཏུ་བཀྲ་ཤིས་ཅི་བསམ་འགྲུབ་པས་འདུན་མ་རྒྱ་མ་ཆུང་ཞིག་ཅེས་ཟེར། མགར་གྱིས་རྒྱ་བལ་གྱི་རྒྱལ་པོའི་སྲས་མོ་མཆོག་གཉིས་ཡོད་པར་འདུག་པ་རྗེའི་བཙུན་མོར་བསུའམ་ཞེས་བགྲོས་པས་ལེགས་དེར་གྱིས་བྱུང༌། སློང་བའི་ཐབས་དྲིས་པས་རྒྱལ་པོ་ཉིད་ཐུགས་ཟབ་ལ་རྒྱ་ཆེ་གཞན་གྱིས་ཁོང་དུ་མི་ཆུད་པས་རྒྱལ་པོ་ཉིད་ལ་ཞུ་བར་ཁ་འཆམ། བློན་པོ་རྣམས་ཀྱིས་ཕྱིན་སྟེ་མགར་གྱིས་ཇི་ལྟར་སྤྱན་དྲང་ཞུས་པས་(ཇ༢༦བ)

[Full Size]

ཐོན་མིས་སྣ་དྲངས་པའི་བློན་པོ་རྟ་པ་བརྒྱ་སྟོན་ཟླ་ར་བའི་ཚེས་བརྒྱད་སྐར་མ་རྒྱལ་དང་ལྡན་པ་ལ་ཕོ་བྲང་དམར་པོ་རི་ལ་ཉི་མ་ཤར་བ་དང་སོང༌། ལམ་ཐམས་ཅད་དུ་ཇོ་མོ་ཁྲོ་གཉེར་ཅན་ལ་གསོལ་བ་ཐོབ། བལ་རྗེ་ལ་ཕྱག་རྟེན་དུ་གསེར་གྱི་དོང་རྩེ་སྟོང༌། ཞུ་རྟེན་གསེར་ཕྱེ་བྲེ་གང༌། རིན་དུ་མིའི་རིན་པོ་ཆེ་ལ་ལྷའི་རིན་པོ་ཆེའི་ཕྲ་བཏབ་པའི་དྲ་བ་གཅིག་རྣམས་ཁྱེར། རྒྱལ་པོ་དེ་བཀའ་ལུང་མི་འདྲ་བ་གསུམ་བསྟུད་མར་འོང་གིས་དེའི་ལན་དུ་སྒྲོམ་བུ་འདི་རྣམས་གོ་རིམ་མ་ནོར་བར་གཏོད་ཅིག་གསུང་སྐད། བློན་པོ་རྣམས་ཀྱིས་དེ་ལྟར་དུ་ཕྱིན་སྟེ་ཕྱག་རྟེན་ཕུལ་ནས་ཕྱག་བྱས། ཞུ་རྟེན་མདུན་དུ་བཞག །རིན་པོ་ཆེའི་དྲ་བ་སྐུ་ལ་གསོལ་སྟེ་ངེད་བོད་ཡུལ་ན་སྤྱན་རས་གཟིགས་ཀྱི་སྤྲུལ་པ་ཆོས་ཀྱི་རྒྱལ་པོ་ཅིག་བཞུགས་པའི་བློན་པོ་ཡིན། ཁྱེད་ཀྱི་སྲས་མོ་ལྷ་གཅིག་ཁྲི་བཙུན་དེ་ངེད་ཀྱི་རྒྱལ་པོའི་བཙུན་མོར་ཞུའོ་བྱས་པས་རྒྱལ་པོ་ཡུན་རིང་དུ་མིག་བཙུམ་ནས་མ་ཕྱེ། ཅི་ཞིག་ནས་བོད་མཐའ་འཁོབ་ཀྱི་རྒྱལ་པོ་ངའི་གཉེན་ཟླར་མི་འོས། ང་སངས་རྒྱས་འོད་སྲུང་གི་དུས་ནས་དམ་པའི་ཆོས་རྒྱུན་མ་ཆད་སྐུ་གསུང་ཐུགས་ཀྱི་རྟེན་ཡོད། ཁྱེད་ལ་དེ་ལྟ་མེད། འོན་ཀྱང་ཐག་རིང་པོ་ནས་འོངས་སྟེ་འདུག་པས་བོད་ཀྱི་རྒྱལ་པོས་དཀོན་མཆོག་གསུམ་གྱི་རྟེན་བཞེང་ནུས་སམ་དེ་ནུས་ན་སྟེར་བས་དེ་དྲིས་ལ་ཤོག་ཟེར་བས་མགར་གྱིས་འཕྲིན་རེའི་བར་དུ་བོད་བལ་དུ་ཕར་ཚུར་འགྲོ་དགོས་ན་ལྷ་གཅིག་སྤྱན་མི་འདྲོངས། དེའི་ལན་དུ་སྒྲོམ་བུ་དང་པོ་འདི་བསྐུར་བ་གཟིགས་ཤིག་བྱས་ནས་གསེར་གྱི་སྒྲོམ་བུ་གཏད་པས་མཐིང་ཤོག་ལ་གསེར་གྱིས་བྲིས་པ་བལ་པོའི་ཡི་གེར་བྱུང་སྟེ། མཐའ་འཁོབ་བོད་ཀྱི་རྒྱལ་པོ་སྲོང་བཙན་གྱིས་བལ་པོའི་རྒྱལ་པོ་ལ་བཀའ་བསྩལ་པ། ཁྱོད་ལྷོ་བལ་ན་ཆོས་ཡོད། ང་ལ་ཆོས་དང་མཆོད་གནས་མེད་དེ་དེ་ལ་དགའ་བས་ལྷ་གཅིག་སྟེར་ན་ངས་ཉིན་གཅིག་ལ་སྐུ་ལུས་ཀྱི་བཀོད་པ་ལྔ་སྟོང་སྤྲུལ་ནས་ལྷ་ཁང་བརྒྱ་རྩ་བརྒྱད་བརྩིགས་སྟེ་སྒོ་ཐམས་ཅད་བལ་པོའི་ཡུལ་དུ་བསྟན་ལ་བཞག་གིས་དེ་ངོ་མཚར་མི་ཆེའམ་བྱ་བ་བྱུང༌། ཡང་བལ་རྗེ་ན་རེ་དགེ་བཅུའི་ཁྲིམས་འཆའ་ནུས་ན་བྱིན་གྱིས་དེ་དྲིས་ལ་ཤོག་ཟེར་བ་ལ་དངུལ་གྱི་སྒྲོམ་བུ་གཏད་པས། དེ་ལྟ་ན་སྐུ་ལུས་ཀྱི་བཀོད་པ་ལྔ་སྟོང་སྤྲུལ་ནས་ཉིན་གཅིག་ལ་དགེ་བཅུའི་ཁྲིམས་འཆའ་ཡི། ཟེར་བ་བྱུང་བ་ཅུང་ཟད་སྐྲག་སྟེ་སྟེར་བར་སེམས་ཀྱིས་བསམས་ཀྱང་ད་དུང་སྒམ་པའི་(ཇ༢༧ན)

[Full Size]

ཕྱིར། བོད་རྒྱལ་ཁ་ཚོ་ཆེ་བར་འདུག་སྟེ་ང་སངས་རྒྱས་འོད་སྲུང་ཚུན་ནས་ཐབ་དུ་བ་མ་ཆད་པའི་ལོངས་སྤྱོད་ཡོད་པ་ཡིན། འདོད་ཡོན་གྱི་ལོངས་སྤྱོད་ང་དང་མཉམ་པ་བྱེད་ནུས་ན་སྟེར་བས་དྲིས་ཤོག་ཟེར་བ་ལ་ཟངས་ཀྱི་སྒྲོམ་བུ་གཏད་པས། ངས་སྤྲུལ་པ་ལྔ་སྟོང་གིས་སྒོ་ལྔའི་ཡུལ་རེ་རེར་གཟུགས་སྒྲ་དྲི་རོ་རེག་བྱ་མི་འདྲ་བ་སྟོང་སྟོང་ལ་སྤྱོད་དུ་ཡོད་པར་བྱ། རིན་པོ་ཆེའི་ཁུང་ཐམས་ཅད་ཁ་ཕྱེ། ཕྱོགས་ཀྱི་ལས་སྒོ་རྣམས་ཕྱེ་སྟེ་ཁྱེད་ལྷོ་བལ་གྱི་གསེར་ཐམས་ཅད་ངའི་རྒྱལ་ཁམས་ལ་རག་ལུས་པར་བྱའི་དེ་ངོ་མི་མཚར་རམ། དེས་ཀྱང་མི་སྟེར་ན་སྤྲུལ་པའི་དམག་ཁྲི་ཕྲག་ལྔ་བཏང་ནས་བལ་ཡུལ་བརླག་པར་བྱས་སྟེ་ལྷ་གཅིག་འཁྱེར་རོ་ཞེས་བྱུང་བས་ཤིན་དུ་སྐྲག་ཅིང་སྤྲུལ་པའི་རྒྱལ་པོར་ཡང་ཤེས་པས་ཅུང་ཟད་དད་པར་ཡང་གྱུར་སྟེ་སྦྱིན་པར་ཞལ་གྱིས་བཞེས་སོ། །དེ་ནས་རྒྱལ་པོས་ལྷ་གཅིག་ཁྲི་བཙུན་ལ་ཁྱོད་བོད་ཀྱི་རྒྱལ་པོའི་བཙུན་མོར་འགྲོ་དགོས་གསུངས་པས་ལྷ་གཅིག་ན་རེ་ཡབ་ཀྱི་བཀའ་མི་ཆོགས་པས་འགྲོ་དགོས་ན། བོད་ཀྱི་རྒྱལ་པོ་དེ་དད་པ་ཅན་ཞིག་ཡོད་པར་འདུག་ཀྱང་མཆོད་གནས་ཀྱི་རྟེན་ཙམ་མེད་ཟེར་བས་མཆོད་གནས་སུ་ཇོ་བོ་མི་སྐྱོད་རྡོ་རྗེ། བྱམས་པ་ཆོས་ཀྱི་འཁོར་ལོ། ཙནྡ་གྱི་སྒྲོལ་མ་རང་བྱུང་དང་གསུམ་པོ་སྐུར་ཞིག །བོད་ཡུལ་ལོངས་སྤྱོད་ཆུང་ཟེར་བས་རིན་པོ་ཆེ་གླང་པོ་ཆེའི་རྒྱབ་ཁལ་བདུན་ཡང་སྐུར་ཞིག །ཞེས་ཞུས་སོ། །ཡབ་རྒྱལ་པོས་ཀྱང་ཞལ་གྱིས་བཞེས་སྟེ་སྐུ་ངོ་མཚར་ཅན་གསུམ། རིན་པོ་ཆེ་སྟག་ཤ་དེ་ཝ་རཏྣ་དེ་ཝ་བཻཌཱུརྻའི་ལྷུང་བཟེད་རྣམས་དང་རིན་པོ་ཆེ་གཞན་གླང་པོ་ཆེའི་རྒྱབ་ཁལ་བདུན་རྣམས་གནང༌། བོད་བློན་རྣམས་ལ་དགའ་སྟོན་ཆེར་མཛད། བསླབ་བྱ་སྙིང་གཏམ་དུ་བསྙད་ནས་གླང་པོ་ཆེ་མཆོག་ཞིག་གི་ཟེ་བར་ལྷ་གཅིག་གིས་ཙནྡ་གྱི་སྒྲོལ་མ་རང་བྱུང་ཕྱག་དུ་བསྣམས། རྟེན་གཞན་གཉིས་གླང་པོ་ཆེའི་རྒྱབ་ཏུ་གསིལ་ཁང་ལ་སྤྱན་དྲངས། རིན་པོ་ཆེ་གླང་རྒྱབ་བདུན་དང་བཅས་སྟེ་རྒྱལ་བློན་རྣམས་ཀྱིས་བལ་ཡུལ་དང་མང་ཡུལ་གྱི་བར་ལྗོན་ཤིང་གི་ཚལ་ཡངས་པའི་བར་དུ་བསྐྱལ་ནས་བོད་ཀྱི་རྒྱལ་ཁམས་སུ་བདེ་སྐྱིད་ཕུན་སུམ་ཚོགས་པ་འབྱུང་བར་གྱུར་ཅིག་ཞེས་སྨོན་ལམ་བཏབ་ནས་རྒྱལ་བློན་རྣམས་ལོག་གླང་པོ་ཆེ་རྣམས་འཕྲང་ལ་མི་ཐར་བས་ཕྱིར་སློག །འཕྲང་བགྲོད་དཀའ་བ་རྣམས་ལ་རིན་པོ་ཆེ་རྣམས་(ཇ༢༧བ)

[Full Size]

འབྲེང་སྐྱེད་བྱས། ལྷ་གཅིག་དང་སྐུ་གཉིས་ཀྱང་ཞབས་ཀྱིས་བྱོན་སྐད། མང་ཡུལ་ནས་སྐུ་གཉིས་མཛོ་མོ་དཀར་མོ་རེས་གདན་དྲངས། ལྷ་གཅིག་དྲེའུ་དཀར་མོ་ཞིག་བཅིབས། རིན་པོ་ཆེ་རྣམས་རྟ་བརྒྱ་པོ་ལ་བཀལ་སྟེ་ལྷ་མོ་ཁྲོ་གཉེར་ཅན་གྱི་མཚན་ནས་བརྗོད་ཅིང་འོང་པས་ཤིང་ཕོ་རྟའི་ལོ་ལ་ཕོ་བྲང་དུ་ཕེབས། རྒྱལ་པོ་དང་མཇལ་སྟེ་བཙུན་མོར་མངའ་གསོལ་ལོ། །བཀའ་ཆེམས་གཞན་ལས་དྲིས་ལན་གྱི་ཚིགས་བཅད་སོགས་ཡོད་ཀྱང་ཀ་བཀོལ་མར་འདི་ཙམ་སྣང་ངོ༌། །ལྷ་ཀླུ་གནོད་སྦྱིན་ཚོགས་རྣམས་བྲན་དུ་བསྐོལ། །ཕོ་བྲང་ཁྲི་རྩེ་དམར་པོ་ཅེས་བྱ་བ། །འཛམ་བུ་གླིང་ན་འགྲན་ཟླ་བྲལ་བ་བཞེངས། །དེ་ཡང་རྒྱལ་པོ་དུས་རྟག་དུ་ཡི་དམ་གྱི་དྲུང་དུ་བཞུགས་ནས་མཆོད་པ་དང་ཏིང་ངེ་འཛིན་མཛད། སྐྱོ་སང་དང་རྩེ་དགའ་མི་མཛད་པ་ལ་བལ་མོ་བཟའ་འདི་སྙམ་དུ་རྒྱལ་པོ་འདི་གཟུགས་དང་ཡོན་ཏན་རྨད་དུ་བྱུང་བ་ཞིག་འདུག་པ་ལ་ཕོ་བྲང་གི་ཕྱིར་མི་འབྱོན་པ་འདི་ཕ་རོལ་གྱི་དམག་ཚོགས་ཤིག་ལ་འཇིགས་པ་ཡིན་སྟེ་འོང་བས་དམག་གིས་མི་བརྫི་བའི་ཕོ་བྲང་ཞིག་བྱ་དགོས་སྙམ་ནས་བཻ་ཌཱུརྻའི་ལྷུང་བཟེད་ལ་གསོལ་བ་བཏབ་པས་ཟས་སྐོམ་ཟད་པ་མེད་པ་བྱུང་བ་དང་རིན་པོ་ཆེ་རྣམས་ལ་ཆ་རྐྱེན་བྱས་སྟེ་གནོད་སྦྱིན་ཕོ་མོ་སོགས་བྲན་དུ་བསྐོལ་སྟེ་དམར་པོ་རི་ཁོངས་སུ་བཅུག་སོ་ཕག་གི་ལྕགས་རི་ལོགས་རེར་རྒྱང་གྲགས་རེ་རེ་དཔངས་གྱང་ཕྲེང་སུམ་བཅུ་རྩ་དྲུག་གི་ཚད་བསྐོར། སྒོ་བཞི་སྒོ་སྤེ་རྟ་བབ་དང་བཅས་པ་དང་སྒོ་ཆུང་ཁང་པ་ཤར་བུ་མདའ་ཡབ་སོགས་རིན་པོ་ཆེ་སྣ་ཚོགས་ལས་བྱས་པ་དང་དངུལ་གྱི་བང་ཆུང་གིས་བསྐོར། མུ་ཏིག་གི་དྲ་བ་དང་དྲ་ཕྱེད་ལས་དྲིལ་བུ་གཡེར་ཁ་འཁྲོལ་པ་རྔ་ཡབ་དང་བ་དན་གྱིས་བརྒྱན་པ་བྱས། དེའི་ནང་དུ་མཁར་དགུ་བརྒྱ་དང་དགུ་བཅུ་རྩ་དགུ་ཡང་རྩེ་དང་མཁར་དམར་སྟོང་དུ་ཚང་བ། དེའི་རྩེར་ཡང་དར་དམར་རྐེད་ཁྲ་ཅན་བཏགས་པའི་མདུང་དམར་བཅུ་རེ་བཙུགས་ཅིང་མཚོན་ཆ་སྣ་ཚོགས་པ་གཟིངས་པ་དར་གྱི་ཆུན་འཕྱང་སྣ་ཚོགས་པ་བྲེས་པ་བྱས། ལྷོའི་ལྕགས་རིའི་ནང་དུ་སོག་པོའི་མཁར་ལ་དཔེ་བླངས་སྟེ་བྲག་ལྷ་བཀྲ་ཤིས་ཀྱི་གཞལ་ཡས་ཁང་བྱ་བ་ཐོག་དགུར་བརྩིགས་པས་རྒྱལ་པོའི་སྐུ་མཁར་དང་མཉམ་པའི་བཙུན་མོའི་ཕོ་བྲང་བརྩིགས་སྟེ་རྒྱལ་པོའི་སྐུ་མཁར་དང་དེ་གཉིས་ཀྱི་བར་དངུལ་ཟམ་སྐར་ཁུང་བཀྲ་(ཇ༢༨ན)

[Full Size]

ཞིང་རྒྱན་མཐའ་ཡས་པ་ཅན་གྱིས་དཔེལ་བ་ལ་ཡབ་ཡུམ་ཕན་ཚུན་དུ་གཤེགས་བཞུད་མཛད་པ། དམག་དུང་ཕྱུར་ལྷགས་ཀྱང་སྲུང་མ་མི་ལྔའི་ཐུབ་པ་རྣམ་པར་རྒྱལ་བའི་ཁང་བཟང་ལྟར་ལེགས་ཅིང་ལྟར་མི་ངོམས་པ་ཉི་མའི་དཀྱིལ་འཁོར་ལྟར་འོད་ཟེར་འབར་ཞིང་ལྟར་མི་བཟོད་པ། སྲིན་ཡུལ་ལངྐ་པུ་རི་ལྟར་འཇིགས་ཅིང་རྔམ་པ་ཅིག་བརྩིགས་སོ། །དེའི་ཤར་སྒོའི་ཕྱིར་རྒྱལ་པོའི་ཆིབས་དཀྱུས་ཀྱི་ས་འདོམ་དགུ་བརྒྱར་རིང་ཞིང་ཞེང་འདོམ་བཅོ་བརྒྱད་པ་ཟབ་འདོན་དོ་བྲུས་པར་ཤིང་དང་སོ་ཕག་གིས་ཕུབ་སྟེ་སྟེང་ཟངས་མས་གཡོགས་པ། ལོགས་ལ་དྲ་བ་དྲ་ཕྱེད་དང་བཀྲ་ཤིས་ཀྱི་རི་མོ་སྣ་ཚོགས་པ་བྲིས་ཅིང་འབུར་དུ་བཏོད་པ་ཚོན་སྣ་ཚོགས་པས་བྱུགས་སྟེ་ཕྱི་ནང་གསེར་ལྟ་བུར་འདུག་པ། དེའི་ནང་དུ་རྒྱལ་པོས་ཆིབས་དཀྱུས་པའི་རྨིག་སྒྲ་རེ་རེ་ལ་ཡང་རྟ་པ་འབུམ་གྱི་རྨིག་སྒྲ་དང་འུར་ཐུག་དང་སིལ་ཁྲོལ་གྱི་སྒྲ་སྐད་རོལ་མོ་སྣ་ཚོགས་པར་གྲག་ཞིང་བདེན་བཞིའི་ཚིགས་བཅད་དང་བཀའ་བཏགས་ཀྱི་ཕྱག་རྒྱ་བཞིའི་ཆོས་ཀྱི་ཚིག་འབྲུ་བྱུང་བ་དེ་ལྟ་བུ་ཞིག་བྱས་སོ། །ཕོ་བྲང་བརྩིགས་ཚུལ་འདི་ར་སའི་ཀླུ་ཁང་གི་ནུབ་ལོགས་ལ་བྲིས་ནས་ཡོད་སྐད། སླར་ཡང་སྤྲུལ་པའི་ཆོས་ཀྱི་རྒྱལ་པོ་ཡི། །བཀའ་ལུང་ལྕི་ཞིང་གཉན་པའི་ཟིལ་དང་ནི། །བློན་པོ་རིག་པ་ཅན་གྱི་འཕྲུལ་ཐབས་ཀྱིས། །སྒྲོལ་མའི་སྤྲུལ་པ་ལྷ་གཅིག་ཀོང་ཇོ་ནི། །འཛམ་གླིང་རྟེན་མཆོག་ཤཱཀྱ་མུ་ནིར་བཅས། །རྒྱ་ནག་ཡུལ་ན་སྤྱན་དྲངས་བོད་ཏུ་ཕེབས། །ཕྱོགས་བཞིའི་མི་རྣམས་སོ་སོའི་སྣང་བ་རུ། །རང་རང་ཕྱོགས་ནས་གཤེགས་མཐོང་བསུ་ཞིང་སྐྱེལ། །འོ་ཐང་མཚོ་འགྲམ་ནགས་ཚལ་བྱེད་མའི་དབུས། །ཤིང་རྟ་བྱིང་ཞིང་ས་གཡོས་ཁལ་རྣམས་ཉལ། །གྱད་ཆེན་ལྷ་དགའ་ཀླུ་དགས་སྟོབ་བསྐྱེད་ཀྱང༌། །ཐུབ་པའི་སྐུ་གཟུགས་གཡོ་བར་མ་ནུས་ཚེ། །ཀླུ་ཡི་ཕོ་བྲང་མནན་པོར་གཟིགས་ནས་ནི། །ས་གཞི་དེ་ཉིད་དུ་བཞུགས་མཆོད་པ་མཛད། །སྤྲུལ་པའི་ལྷ་མོ་འུན་ཤིང་ཀོང་ཇོ་ནི། །བཙུན་མོའི་དམ་པ་གཉིས་པར་མངའ་གསོལ་སྟེ། །དགའ་སྟོན་རྒྱ་ཆེན་ན་མཁའ་མཉམ་པར་སྤྱད། །དེ་ཡང་མགར་གྱིས་སྣ་(ཇ༢༨བ)

[Full Size]

དྲངས་པའི་བློན་པོ་བརྒྱས་ཕྱག་རྟེན་དོང་རྩེ་བརྒྱ། ཞུ་རྟེན་གསེར་པང་མིག་བདུན། རིན་དུ་ལྷའི་གོས་རིན་ཐང་མེད་པ་འདི་ཁྱེར་ལ་བྱ་ཁ་ཏའི་སྐད་ཀྱིས་མ་ནོན་པར་ཕར་ཚུར་དུ་སྒྲོལ་མ་ལ་གསོལ་བ་འདེབས་ཀྱིན་སོང་ཞིག་གསུངས་ནས་བློན་པོ་རྣམས་ཕྱིན་སྟེ་རྒྱ་ནག་ཟིམ་ཤིང་བཀྲ་ཤིས་ཁྲི་སྒོར་སླེབས་སྟེ་རྒྱལ་པོ་ཐང་ཐའི་ཛུང་ངམ་ཀོང་ཙེ་འཕྲུལ་རྒྱལ་ཞེས་པ་དེ་དང་མཇལ། ཕྱག་རྟེན་ཞུ་རྟེན་བཏང་རིན་ཕུལ་སྟེ་ལྷ་ཅིག་ཞུས་པས་རྒྱལ་པོ་དགྱེས་སྟེ་གནང་བར་དགོངས་པ་ལ་སྲས་རྒྱལ་བུ་ཐེ་བ་ན་རེ་བོད་ཀྱིས་རྒྱའི་ཡུལ་མང་པོ་བཅོམ། རྒན་པོ་རྣམས་བསད་པས་བོད་ལ་མི་སྟེར་ཁྲོམ་གེ་སར་དམག་དཔུང་ཆེ་བས་དེ་ལ་སྟེར་ཟེར། ཡུམ་གྱིས་བོད་ལོངས་སྤྱོད་ཆུང་བས་མི་སྟེར་སྟག་གཟིག་གི་རྒྱལ་པོ་ལོངས་སྤྱོད་ཆེ་བས་དེ་ལ་སྟེར་ཟེར། ལྷ་གཅིག་རང་རྒྱ་གར་དམ་པའི་ཆོས་དར་བས་རྒྱ་གར་ལ་འགྲོ་ཟེར་སྟེ་གཉེ་པོ་རྟ་པ་བཞི་བརྒྱ་ཡང་ཚོགས་སྐད། དེར་བོད་ཀྱིས་ངེད་ཁ་སྔ་བས་ངེད་ལ་ཞུ་ཟེར། ཁྲོམ་དང་སྟག་གཟིགས་དང་རྒྱ་གར་རྣམས་རིམ་པ་ལྟར་ངེད་ལ་མི་སྟེར་ན་དམག་འདྲེན། མེས་བསྲེག་རྒྱ་ཡུལ་ཆུས་འགེངས་ཟེར་སྐད། དེར་རྒྱ་ནག་ཁྲིམས་དམ་པས་གང་རུང་ལ་སྦྱིན་དབང་མེད་དེ་རྒྱལ་པོའི་ཞལ་ནས་གཉེ་བོ་རྣམས་རིགས་པ་སུ་རྣོ་བ་ཞིག་ལ་སྟེར་ཟེར་སྟེ་གཉེ་བོ་བརྒྱ་རེ་ལ་ལུག་བརྒྱ་རེ་དང་ཆང་ཚོད་བརྒྱ་རེ་བཏང་སྟེ་ཉིན་གཅིག་ལ་ཤ་ཆང་ཡོག་བ་པགས་པ་ཐུལ་བ། ཁང་པ་གཙང་མར་སུ་བྱུང་བ་དེ་ལ་སྟེར་བྱ་བ་དང༌། ཡང་གཡུ་འོད་ཆེན་ཕུབ་ཆུང་ཙམ་པ་མིག་གཅིག་དབུས་དང་གཅིག་མཐའ་ན་ཡོད་པ་བར་གྱི་མིག་ཕུབ་ཀྱི་སྤ་སྒོར་བཞིན་ཡོད་པ་ཅིག་དང་དར་ཡུག་ཅིག་གཏད་ནས་གཡུ་མིག་དུ་དར་ཡུག་སུས་ཚུད་དེ་ལ་སྟེར་ཟེར་བ་དང༌། བྱ་མ་བརྒྱ་བུ་བརྒྱ་དང༌། རྟ་མ་བརྒྱ་བུ་བརྒྱ་མ་བུ་སོ་སོར་སུས་ཤེས་པ་ལ་སྟེར་བ་དང༌། ཤིང་སྡུམ་བརྒྱ་བཏང་བའི་རྩ་རྩེ་སུས་ཤེས་ལ་སྟེར་བ་དང༌། ཕྱི་དྲོ་ཕོ་བྲང་དུ་སྟོན་མོ་བྱས་ནས་བཟི་བ་དང་སྲོད་ལ་བཏང་སྟེ་སྒོ་མ་འཁྲུལ་བར་རང་གི་གནས་ཁང་སུས་རྙེད་ལ་སྟེར་བར་བྱས་པ་ལ་གཞན་རྣམས་ཀྱིས་གང་ཡང་མ་བྱུང༌། བློན་པོ་མགར་གྱིས་ལུག་རྣམས་གུད་དུ་བསད། ཤ་གཟུགས་རེ་ནས་བྲིམས་སྟེ་ཏིག་ག་ཆུང་ཆུང་རེ་བཅད་ཅིང་ཚྭ་ལ་བསྒྲེས་སྟེ་ཟོས་ནས་བསྐོར་ཆང་ཧུབ་སྐོར་དུ་བྱས། པགས་པ་གྲལ་ལ་འགྲིམས་སྟེ་(ཇ༢༩ན)

[Full Size]

ཕུར་ཙམ་རེ་བྱས་པས་ཤ་ཆུང་ཡོག་པགས་པ་འཐུལ། མ་བཟི་མ་སྐྱུགས་སྟེ་ཁང་པ་གཙང་མར་བྱུང༌། རྒྱ་གྲོག་ཞིག་ཟན་དང་འོ་མས་གསོས་སྟེ་དར་སྐུད་ཀྱིས་དར་ཡུག་གི་སྣ་བསྡུས་སྟེ་བཙེམས། དར་སྐུ་གྲོག་མའི་རྐེད་པ་ལ་བཏགས་སྟེ་མཐའི་མིག་ནས་བཅུག་ཕུ་བཏབ་པས་དབུས་སུ་ཐོན་སྟེ་གཡུ་མིག་དུ་དར་ཡུག་ཚུད། ཐང་ལ་སྦང་སྐམ་གཏོར་ནས་བྱ་རྣམས་བཏང་བས་མ་བུ་གཉིས་གཉིས་སྟབས་སུ་ཟོས་སྟེ་རྐེའི་འོག་ནས་ཟ་ཞིང་སྤྱོད་པ་འཚུབ་པ་འདི་བུ་ཡིན་ཞེས་ངོ་ཤེས། རྟ་རྣམས་རྟེའུ་ཕྱོགས་གཅིག་དུ་བཟུང་སྟེ་ཞག་གཅིག་ཆུ་མ་བྱིན་པར་གསོས་སྟེ་སྐོམ་དུ་བཅུག་ནས་ནང་པར་མ་ཁྱུའི་གསེབ་ཏུ་བཏང་བས་རང་རང་གི་མ་བཙལ་སྟེ་འོ་མ་འཐུངས་པས་མ་བུ་སོ་སོར་ཤེས། ཤིང་སྡུམ་རྣམས་ཆུ་ལ་བསྐྱུར་བས་རྩ་བ་ཐུར་དུ་བྱིང་སྟེ་ངོ་ཤེས། མར་མེའི་ཆས་སྦས་སྟེ་ཁྱེར་ཁར་རམས་དང་མཚལ་བཅུག་ནས་སྒོ་སུམ་བརྒྱ་དྲུག་བཅུ་ཙམ་ཡོད་པ་ལ་མཚན་མ་འདེབས་ཀྱིན་ཕྱིན། ཆང་ལ་ཚོད་ཟིན་པར་བྱས་ནས་སྲོད་དུས་མར་མེ་སྤར་མཚན་མ་ལྟ་གིན་ཡོང་བས་གནས་ཁང་དུ་མ་འཁྲུལ་བར་སླེབས་པས་དེ་ཐམས་ཅད་ལ་རིག་པ་བོད་རྣོ་ཡང་བརྙས་པ་བྱས་ནས་མ་བྱིན་སྐད། ད་ནི་སང་ཉིན་ལྷ་གཅིག་བུ་མོ་བརྒྱའི་གསེབ་ཏུ་གཏོང་བས་སུས་ངོ་ཤེས་པ་ལ་སྟེར་རོ་ཟེར་བས་མགར་གྱིས་གནས་མོ་དེ་སྔ་ནས་ཟས་ཆང་གིས་བྲིད་མཛའ་བར་བྱས་ནས་ལྷ་གཅིག་དེ་ཁྱོད་རང་མཛའ་བར་ཡོད་འདུག་པས་སྟོན་དགོས་བྱས་པས། མོས་རྐེ་ལ་འབྲས་ཀྱི་སོག་མ་བཙུགས་སྟེ་ཆད་པ་ཡོང་ཟེར་བའི་བརྡ་བྱས། མགར་གྱིས་རྩིས་ཀྱིས་མི་ཐིག་པ་ཤེས་ཟེར་བའི་བརྡ་བྱས་པས་འཛུམ་མུལ་བྱུང་སྟེ་འོ་ན་སྨྲ་ཡིས་ཟེར་སྐད། དེར་སྒྱེད་པོ་གསུམ་གྱི་ཁར་ཟངས་ཆུས་བཀང་བ་བཞག །ཁ་ཕུབ་ཀྱིས་བཅད་པའི་སྟེང་དུ་བུ་མོ་དེ་བཞག་སྟེང་དུ་རྫ་ཞིག་གཡོགས་པ་དྲ་བས་བཀབ། རྫའི་བུག་པ་ནས་ཁ་ལ་ལྕགས་མཆུ་གཏད་དེ་སྨར་བཅུག་པས། ཀོང་ཇོ་ལ་གཡོག་མོ་བཅུ་དྲུག་ཡོད་པའི་ཐུགས་ཆེས་པ་གཅིག་ང་ཡིན། སང་ཉིན་ལྔ་བཅུ་ཕར་ཐལ་ཞེ་དགུ་ཚུར་ལུས་པའི་དབུས་མ་དེ་ལེགས་པ་མི་ཆེ་མི་ཆུང་བ། ཁ་ནས་ཨུཏྤ་ལའི་དྲི་སྣམ་པ། བེར་བདུན་བརྩེགས་ཀྱི་ཕྱི་(ཇ༢༩བ)

[Full Size]

མ་དྲི་མ་ཆགས་ཙམ་གསོལ་བ། གཡུའི་སྦྲང་མ་ཐེ་བོང་ཙམ་ཞིག་ན་མཁའ་མདའ་གང་གི་སར་ལྡིང་བ་ཞིག་ཡོད། དེས་ཀྱང་དཔྲལ་མཚམས་ལ་མཚལ་གྱི་གཡུང་དྲུང་རིས་ཅིག་བྲིས་ལ་འཐག་གི་ཟེར། ནང་པར་གཉེ་པོ་གཞན་རྣམས་སྒོ་ན་བསྒུགས། བུ་མོ་བརྒྱ་པོ་རིམ་པར་བྱུང་བ་ལ་གཉེ་པོ་གཞན་རྣམས་ཀྱིས་གང་མཛེས་དང་ཆས་གང་བཟང་གཉིས་གཉིས་ཁྲིད་ནས་ལྷ་གཅིག་ངེས་ཀྱིས་ཐོབ་པོ་ཟེར་ནས་སོང༌། བློན་པོ་མགར་གྱིས་ལག་པ་དར་གྱིས་དྲིལ་མདའ་རྒོད་སྒྲོ་མ་གཅིག་ཐོགས་ནས་སྒོ་བར་དུ་བསྡད་དེ་ལྷ་གཅིག་བྱུང་བ་དང་མདའ་ལྟོང་གིས་གོང་པ་ནས་དྲིལ་སྟེ་འཐེན་པ་དང་ཧེ་ཟེར་སྟེ་ཁ་ལོག་བྱས་བྱུང་བས་ཨུཏྤལ་ལའི་དྲི་ངད་ཆིལ་གྱིས་བྱུང༌། གཡུའི་སྦྲང་མ་དང་མཚལ་གྱི་གཡུང་དྲུང་ཡང་གདའ་སྐད། དེ་ནས་གཉེ་པོ་གཞན་རྣམས་སོ་སོས་བདམ་པའི་བུ་མོ་བསྐུར་སྟེ་ཕྱིར་ལོག །ལྷ་གཅིག་ལ་བོད་ལ་འགྲོ་དགོས་གསུངས་པས། འོ་ན་གསེར་གྱི་ལྷ་ཤཱཀྱ་མུ་ནི་ངའི་མཆོད་པའི་རྟེན་དུ་ཞུ། གཟོ་སྣ་བཅོ་བརྒྱད་ཀྱི་དཔེ། སྨན་དཔྱད་ཆེན་མོ། རྩིས་ཀྱི་པོར་ཐང་བརྒྱད་བཅུ་རྣམས་བསྐུར་བར་ཞུས་སྟེ་རྒྱལ་པོས་ཀྱང་དེ་རྣམས་དང་རིན་པོ་ཆེ་དང་དར་ཟབ་སོགས་མཐའ་ཡས་པར་བརྫངས། ལྷ་གཅིག་གིས་མགར་ལ་བོད་ན་ལ་ཉུངས་དང༌། ས་ཁམས་པ། རྩ་དྲེས་མ། རྡོ་སྲིན་ཟན། ཤིང་སེ་བ་རྣམས་ཡོད་ཏམ་དྲིས་པས་གཞན་ཡོད་ལ་ཉུང་མེད་ཟེར་བས་འོ་ན་ཡུལ་བཟུང་དུ་བཏུབ་ཀྱི་ཟེར་སྟེ་ལ་ཉུང་གི་ས་བོན་ཁྱེར། བློན་པོ་མགར་གྱིས་ལྷ་གཅིག་རིང་དུ་མ་བྱིན་པ་ལ་སྙིང་ན་ནས་ལུག་ནག་པོའི་མཆེར་ཁྲག་བྲེ་གང༌། དར་ཟབ་ཀྱི་ཐལ་བ་བྲེ་གང༌། སོལ་བའི་མདུང་ཤིང་འདོམ་གང་རྣམས་རྫོངས་སུ་བསྐུར་ན་བོད་རྣམས་ངོ་མཚར་སྐྱེ་སྟེ་འོང་བྱས་པས་ལུག་ཐམས་ཅད་བསད། དར་ཟབ་བསྲེགས། ནགས་ལ་མེ་བཏང་ཡང་དེ་རྣམས་མ་བྱུང༌། རྒྱ་ཡུལ་ངན་པོར་སོང་སྐད། སྐྱེལ་ཐུང་གི་སར་འབྲི་སེ་རུ་གུང་སྟོན་གིས་མགར་ལ་ཕྲག་དོག་བྱས་སྟེ་ལྷ་གཅིག་གི་ཚབ་དུ་བློན་པོ་རིག་པ་ཅན་ཞིག་རྒྱ་ནག་དུ་བསྡད་ན་བོད་རྒྱ་མཛའ་བར་འོང་སྟེ་ཅེས་མགར་ལ་ཆེར་བལྟས་པས་རྒྱ་རྗེས་བློན་པོ་རིག་པ་ཅན་མི་ཚབ་ཏུ་སྡོད་དགོས་གསུངས། བློན་པོས་ཀྱང་འབྲི་སེ་རུ་གུང་སྟོན་གྱི་ཕྲག་དོག་དུ་གོ་ནས་ངས་བསྡད་ལ་བོད་རྒྱ་མཛའ་བར་(ཇ༣༠ན)

[Full Size]

བྱའོ་ཞེས་ཟེར་སྟེ་བསྡད། ལྐོག་དུ་བོད་བློན་གཞན་རྣམས་ལ་ངས་རྒྱ་ནག་དུ་གནོད་པ་བསྐྱལ་ལ་མྱུར་དུ་འོང་གིས་བརྫུས་མའི་སྤྲང་པོ་ཅིག་ངའི་རྩར་ཐོང་ཞིག་ཟེར། ཇོ་བོ་ཤཱཀྱ་ཤིང་རྟ་ལ་བཞུགས་སྟེ་གྱད་ལྷ་དགའ་དང་ཀླུ་དགས་ཤིང་རྟ་དྲངས། ཀོང་ཇོ་དྲེའུ་དཀར་མོ་ཞིག་ལ་བཅིབས་སྟེ་དར་རྒྱལ་མང་པོ་རྗེས་སྣ་ཁྲིད། རིགས་བཟང་གི་བུ་མོ་བཅུ་དྲུག་གྱད་རྩལ་ཅན་མི་བརྒྱ། བོད་བློན་གོ་དགུ་དང་བཅས་པ་བོད་ལ་ཆས་སོ། །དེ་ཡང་བྱ་ཁྭ་ཏའི་སྐད་ཀྱིས་མ་ནོན་པ་ལ་གདན་བཏེག་སྔ་དྲོ་ས་ཕྱོགས་བདེ་བར་གདན་ཕབ། དར་དཀར་གི་གུར་དུ་རིན་པོ་ཆེའི་ཁྲི་དང་ཟ་འོག་གི་འབོལ་ལ་ཇོ་བོ་ཤཱཀྱ་བཞུགས་སྟེ་འབྲས་ཆན་དང་མཆོད་པ་སྣ་ལྔས་མཆོད་ཅིང་ལྷ་གཅིག་གིས་དངུལ་དཀར་གྱི་པི་ཝང་དང་ཏམྦུ་ར་བསྒྲེང་བས་རམ་བཏེག་སྟེ། རྣམ་དག་སྐུ་མངའ་མཆོག་དུ་གཟུགས་བཟང་བ། །སོགས་ཀྱིས་བསྟོད་ཅིང་ལྷ་ལ་གསང་བུ་འདྲེན། ཕམ་བབས་གཡོག་མོ་བཅུ་དྲུག་དང་གཞན་རྣམས་ལ་སྟེར། ལ་ལ་མཆོད་པ་དང་བསྟོད་པ་བྱེད། ལ་ལ་རྩེ་དགའ་དང་གླུ་བྲོ་སོགས་འདོད་ཡོན་ལྔ་སྤྱོད། དེ་ལྟ་བུ་སྔ་དྲོ་བཞིན་ལན་རེ་བྱེད་ཅིང་འོངས་སྐད། དེ་ནས་ལྷ་གཅིག་གི་སྨ་མཆུ་བ་སུ་ཡིན་བརྟག་པའི་རྩིས་བྱས་པས་རི་ཆེན་པོ་གསུམ་གྱི་སྟེང་ན་མཚོ་སྟེང་ཐང་གིས་ཆོད་པ་བར་ནས་མེ་འབར་བ་ཐང་གི་སྟེང་ན་བུད་མེད་རྫ་མའི་དབྱིབས་ལ་མིག་གིས་ཁེངས་པ་ལྕགས་ཀྱི་མཆུ་རིང་པོ་བྱས་པ་ཅིག་གིས་བཤད་འདུག་ཞེས་ཁ་མཐུན་པས་རྒྱལ་བུ་ཐེ་བ་ཁྲོས་སྟེ་དེ་ལྟ་བུ་མི་སྲིད་ཟེར་ནས་སྤོར་ཐང་སུམ་བརྒྱ་པོ་མེར་བསྲེགས་པས་རྒྱ་ཡུལ་གྱི་རྩིས་ཉམས། མགར་གྱིས་རྒྱལ་པོ་ལ་བོད་ན་ས་བོན་ཅུང་ཟད་བརྔོས་སྟེ་བཏབ་པས་ལྗང་པ་ལེགས་བྱས་པས་ས་བོན་ཐམས་ཅད་དེ་ལྟར་འདེབས་སུ་བཅུག་དེའི་མནའ་ཆད་སྲུང་ཟེར་ནས་ད་ལྟ་ལྷ་སར་སྟག་གི་ཟླ་བ་ལ་བོང་བུས་རྨོད་ཅིང་ས་བོན་ཡོས་འདེབས་སྐད། མགར་གྱིས་ན་རྫུ་ཆེན་པོ་བྱས་སྟེ་ནད་འདི་ལྟ་བུས་ཤི་ན་ཤུལ་དུ་ལྟས་ངན་པ་བཅོ་བརྒྱད་འོང་བ་ཡིན། ང་ཞག་བདུན་ན་ཤི་བ་བཟོད་དེ་ཤུལ་དུ་རྒྱ་ཡུལ་འཕུང་བ་འདི་མ་ལེགས་བྱས་པས་ངེད་ཀྱི་རྩིས་ཡིག་རྣམས་བསྲེགས་ཟིན། ཁྱེད་རང་རིག་(ཇ༣༠བ)

[Full Size]

པ་ཅན་ཡིན་པས་ཐབས་ཅི་ཡོད་ཟེར་བ་ལ། དེ་ན་ང་ལ་རོ་རྟ་རོ་གོས་རོ་ཟས་དང་བཅས་སྟེ་ཁྱེད་རང་གི་དགྲ་སྙིང་ན་བ་བོད་ཀྱི་ཕྱོགས་སུ་སྐྱོལ་ལ་ཕྱི་མིག་མི་ལྟ་བར་ལོགས་ན་མི་ལ་ཉེས་པ་མི་འབྱུང༌། ལོ་ཏོག་ལ་གནོད་པ་ཅིག་འབྱུང་ཡང་ཁམ་ཆུང་ཞིག་ཟེར་ནས་བསྐྱལ་སྐད། འདི་རྣམས་ཀ་བཀོལ་མ་ལས་ཇི་ལྟར་བྱུང་བ་ཙམ་ཡིན་ལ། ཐང་ཡིག་སོགས་ལས་བ་ཏ་ཧོར་གྱི་རྒྱལ་པོ་དང་བཅས་པའི་གཉེ་བོ་བརྒྱ་ཚན་བཞི་བོད་ཀྱི་བློན་པོ་དང་ལྔ་བརྒྱར་འཚོགས། བོད་ལ་རྒྱ་ནག་གིས་བརྙས་སྟེ་རིང་དུ་མ་མཇལ། མཐར་ཕྱི་རོལ་ཏུ་བྱོན་པའི་ཞར་ལ་མཇལ་ནས་རིན་དུ་བཻཌཱུརྻའི་ཁྲབ་ཕུལ། བལ་པོ་དང་འདྲ་བའི་བཀའི་སྒྲོམ་བུ་གསུམ་རིམ་པར་གཏད། རིག་པ་འགྲན་ནས་མཐར་བུ་མོ་སུམ་བརྒྱའི་གསེབ་ཏུ་ཐང་ལ་བསྒྲིགས་ནས་འཇོག་པས་སུས་ངོ་ཤེས་པ་ལ་སྟེར་ཟེར་བ་ལ་ལྷ་གཅིག་གི་ཁོལ་མོ་ལ་གསེར་བྲེ་གང་བྱིན་སྟེ་ཐབས་ཀྱིས་དྲིས་པས། ལྷ་གཅིག་འཕྲུལ་གྱི་ཀོང་ཇོ་དེ། །བུ་མོ་གཞན་པས་ཆེ་རྒྱུ་མེད། །སྐྱེ་གཟུགས་གཞན་པས་ལེགས་རྒྱུ་མེད། །དེ་ལ་མོ་ཡི་ཁྱད་ཆོས་ནི། །སྐུ་མདོག་སྔོ་ལ་དམར་མདངས་ཆགས། །ཞལ་ནས་ཨུཏྤལ་དྲི་ངད་བྲོ། །གཡུ་སྦྲང་ཞིག་ནི་སྟེང་ན་འཁོར། །ཁུར་ཚོས་གཡས་སྟེང་ཆོ་ལོ་རིས། །གཡོན་ན་མེ་ཏོག་པདྨ་རིས། །དཔྲལ་དབུས་ལི་ཁྲིའི་ཐིག་ལེའི་སྟེང༌། །ཨཱརྻ་ཏཱ་རེ་ནས་ཙམ་ཡོད། །སོ་དཀར་ཚགས་དམ་སོ་ཞོ་ཡོད། །ལྐོག་མ་འཇམ་ལེགས་ཨོག་ཞོ་ཡོད། །བུ་མོ་སུམ་བརྒྱ་བསྒྲིགས་པ་ཡི། །གཡས་དང་ཐ་མར་མི་འོང་སྟེ། །གཡོན་ནས་བསྒྲིགས་པའི་བུ་མོ་བདུན། །བཞག་པའི་གོང་དུ་ལྷ་གཅིག་ཡོང༌། །ཞེས་སོགས་བསླབས་པ་དང༌། མགར་གྱིས་གཡོན་གྱི་མཐའ་ནས་མདའ་ལྟོང་བཙུགས་སྟེ། འདི་ནི་བཤན་པའི་བུ་མོ་འདྲ། །ལག་པ་འདི་ཡི་དམར་ལུགས་སམ། །ཞེས་སོགས་རྫ་མཁན་དང༌། ཤིང་མཁན་དང༌། གཡོས་མཁན་དང༌། ཕྱེས་མཁན་དང༌། མགར་བ་དང༌། དར་འཐག་རྣམས་སུ་ངོས་བཟུང་ནས་བརྒྱད་པ་ལ། ལྷ་གཅིག་ཀོང་ཇོ་ཡིན་པ་འདྲ། །སྐུ་མདོག་སྔོ་ལ་དམར་མདངས་ཆགས། །ཅེས་སོགས་བརྗོད་ནས་མདའ་ལྟོང་གིས་བཟུང་སྟེ་ཐེན་པས་ངུ་ཞིང་རྗེས་སུ་འབྲངས་པ་(ཇ༣༡ན)

[Full Size]

ལ་འབྲི་སེ་རུ་དང་དར་རྒྱལ་གྱིས་རམ་བཏེག་ནས་མགར་གྱིས། ཨེ་མ་ངོ་མཚར་ཆེ། །ལྷ་གཅིག་ཀོང་ཇོ་ཁྱེད། །བདག་གི་ཚིག་ལ་གསོན། །བཀྲ་ཤིས་ཉམས་སུ་དགའ། །བོད་ཀྱི་རྒྱལ་ཁམས་ན། །རིན་ཆེན་སྣ་ལས་གྲུབ། །རྒྱལ་པོའི་ཕོ་བྲང་ན། །མི་རྗེ་ལྷ་ཡིས་མཛད། །སྲོང་བཙན་སྒམ་པོ་དེ། །རིགས་གཟུགས་དཔལ་གྱིས་བརྗིད། །མཐོང་ནས་སེམས་ཡིད་འཕྲོག །ཐུགས་རྗེ་ཆེན་པོ་ལགས། །ཅེས་སོགས་རྒྱལ་པོ་དང་ཡུལ་གྱི་ཡོན་ཏན་བརྗོད་པའི་གླུ་བླངས་པས་ཅུང་ཟད་དགའ་སྟེ་ཕྱིར་འབྲངས། རྒྱ་རྗེས་ཀྱང་བློན་པོ་དེའི་འཕྲུལ་ལ་ལྟོས། རྒྱལ་པོ་དེ་མངོན་ཤེས་དང་རྫུ་འཕྲུལ་དུ་ལྡན་པར་འདུག །ཁྱོད་མ་བྱིན་ན་སྤྲུལ་པའི་དམག་གིས་ཁྱོད་འཕྲོགས་ཡུལ་འཇོམས་པར་འདུག་པས་འགྲོ་དགོས་ཅེས་བཀའ་གནང༌། ཕན་བདེ་ཀུན་འབྱུང་ཇོ་བོ་རིན་ཆེན་དང༌། །རིན་ཆེན་བང་མཛོད་མང་པོ་ནོར་གྱི་གཏེར། །གསེར་གཡུ་བརྩེགས་པའི་ཡིག་ཚངས་ཆེན་མོ་དང༌། །གཙུག་ལག་ཡི་གེ་སུམ་བརྒྱ་དྲུག་བཅུར་བཅས། །གཅེས་པའི་རིན་ཆེན་གསེར་གཡུ་རྒྱན་གྱི་ཚོགས། །གཡོས་སྣ་ཟས་སྐོམ་སྦྱོར་ཐབས་དཔག་མེད་དང༌། །གསེར་ཀ་གཡུ་ཡི་ཀ་ལེབ་ཅན་དང་ནི། །ཟ་འོག་གོས་སྟན་སེང་གེ་བྱ་བརྒྱད་མ། །ལྗོན་ཤིང་ཆོ་ལོང་ནོར་བུ་རིས་ལ་སོགས། །ཁྱད་ནོར་དཔག་མེད་ངོ་མཚར་ལྡན་པ་རྣམས། །རྒྱལ་པོ་ཡ་མཚན་སྐྱེད་ཕྱིར་ཁྱོད་ལ་བརྫང༌། །གཟོ་ཡི་རིག་བྱེད་དྲུག་བཅུ་ཐམ་པ་དང༌། །བརྟག་ཐབས་བརྒྱད་དང་དཔྱད་ལྔ་སྦྱོངས་དྲུག་དང༌། །སྦྱོར་སྡེ་བཞི་སོགས་སྨན་དཔྱད་མ་ལུས་བསྐུར། །རྒྱན་གོས་ཁྱད་འཕགས་སྟོང་ཕྲག་ཉི་ཤུ་དང༌། །ལྟར་མཛེས་སེམས་མཐུན་བུ་མོ་ཉེར་ལྔ་བརྫང༌། །ཁྱོད་ཀྱི་བྱ་བ་སྤྱོད་ལམ་འདི་བཞིན་གྱིས། །ལྟ་བ་ཡངས་ཅིང་སྤྱོད་པ་ཞིབ་པར་མཛོད། །ཕྱི་ནང་བྱ་བ་ཀུན་ལ་མཁས་པར་མཛོད། །ངག་འཇམ་སྨྲ་མཁས་གཞི་མ་ལེགས་པར་མཛོད། །རྗེ་ལ་གུས་ཅིང་འཁོར་ལ་བྱམས་པར་མཛོད། །ཁྲེལ་ཡོད་ངོ་ཚ་བག་དང་ལྡན་པར་མཛོད། །ཅེས་སོགས་གདམས་ཅིང་མགར་མི་ཚབ་ཏུ་བསྡད་པ་ལ་གཞིས་རབ་བུད་(ཇ༣༡བ)

[Full Size]

མེད་དང་བཅས་པ་བྱིན་ཡང༌། མགར་སེམས་གནག་པ་མ་སེལ་ནས་ནད་རྫུ་བྱས་པ་ལ་སྨན་པ་བཏང་བས་མཚན་མོ་མགོ་མཇུག་ལྡོག་པར་བསྡད་པ་དང་བྱི་ལ་ཁྱིམ་བྱ་རང་འཐག་རྣམས་ལ་ཐག་གུ་བཏགས་སྟེ་ཐག་གུ་ལ་རྩ་བལྟར་བཅུག་པས་རྩ་ཐམས་ཅད་འཁྲུགས་འདུག་བྱ་བ་དང་གཅན་གཟན་ཐ་ཆུང་དང༌། བྱ་ཐ་ཆུང༌། རྡོའི་རྩ་ལས་མི་འདུག་ཞེས་བྱུང་བས་རྒྱལ་པོ་ཐུགས་མ་བདེ་ནས་ཁོང་རང་ལ་དྲིས་དུས་ང་ཤི་ནས་རྒྱ་ཡུལ་དུ་མི་ཤིས་པ་ཆེན་པོ་འོང༌། བོད་རྒྱལ་པོས་མངོན་པར་མཁྱེན་སྟེ་སྤྲུལ་པའི་དམག་འོང་ཞེས་སོགས་ཀྱིས་སྐྲག་པར་བྱས་སྟེ་རིམ་གྲོར་ལུག་གི་མཚེར་ཁྲག་སོགས་གསུམ་དང༌། རོ་རྟ་མོག་རོ་མགོ་དམར་དང་བཅས་བོད་ཀྱི་རི་མཐོང་སར་ལྷ་གསོལ་དུ་འགྲོ་ཟེར་ནས་བློན་པོ་བྲོས་ཀྱི་དྭོགས་གྱད་མི་བཞི་དང་བཅས་བཏང་སྟེ་གྱད་རྣམས་བཟིར་བཅུག་ནས་མཚོན་བཅག་རྟའི་རྨིག་པ་བཅད་ནས་བློན་པོ་བྲོས། གྱད་རྣམས་ཆད་པ་ལ་སྐྲག་པས་ལྡོག་མ་ནུས་པར་བློན་པོའི་རྗེས་སུ་འབྲངས་པ་ལས་རྒྱའི་རུས་བྱུང༌། བློན་པོས། དར་ཟབ་མེ་ལ་བསྲེགས་པའི་ཐལ་བ་དེ། །རྒྱལ་པོ་ཉེ་རིང་ཅན་དེའི་ན་བཟའ་མཛོད། །སྙེ་མ་འབྲུ་མེད་ཐལ་བ་ནག་པོ་དེ། །བཙུན་མོ་སེར་སྣ་ཅན་དེའི་རྒྱགས་ཕྱེ་མཛོད། །ཙནྡན་ནགས་བསྲེགས་སོལ་བའི་མདུང་ཤིང་དེ། །རྒྱལ་བུ་དམག་ལ་དཔའ་དེའི་ལག་ཆ་མཛོད། །ལུག་ལ་མཚེར་ཁྲག་མེད་པར་བསད་པ་དེ། །ཡི་དམ་ལྷ་ཡི་དྲུང་དུ་གཤགས་པ་བྱེད། །ཅེས་གླུ་བླངས་པ་སོགས་བཤད་ལ། རྒྱལ་རབས་ལ་ལར་རྒྱལ་པོས་ཇོ་བོ་ཤཱཀྱ་བཞུགས་པའི་ལྷ་ཁང་དུ་བྱོན་པས་ཞལ་སྔར་ཤར་དུ་གཟིགས་པ་ནུབ་ཏུ་འགྱུར་འདུག་པས་གཤེགས་པར་གོ་སྟེ་སྟེར་བར་ཁས་བླངས་བྱ་བ་དང༌། ཀོང་ཇོས་བདག་བོད་ཏུ་ཕྱིན་ན་ལེགས་ཅིང་ཇོ་བོ་གདན་འདྲོངས་ན་བདག་གི་མཛུབ་མོའི་རྩེ་ལ་སྤྱོན་ཞིག་ཞེས་དམོད་བོར་བས་མཛུབ་མོ་གཡས་པའི་རྩེ་ལ་ཡེལ་གྱིས་བྱོན་པས་ཡིད་ཆེས་སྟེ་ཀོང་ཇོ་བོད་དུ་བྱོན་བྱ་བ་སོགས་སྣང་ངོ༌། །སྤྱིར་ཀོང་ཇོ་བོད་ཀྱི་དོན་ཁོ་ནར་བྱོན་པ་ཡིན་ཞིང་སྤྲུལ་པའི་ལྷ་མོའི་ཡབ་ཡུམ་མཆེད་ཟླའང་བྱང་ཆུབ་སེམས་དཔའ་ཡིན་པས་འཁྲུལ་བ་མི་འབྱུང་ནའང༌། བུ་ལ་ནུས་པ་ཅི་ཡོད་མི་ཤེས་པས། །གཞན་ལ་བརྙས་པ་མི་བྱ་སེམས་མི་སྲེག །ནམ་ཞིག་སུ་ལ་རེ་དགོས་ཆ་མེད་པས། །སུའི་ཡང་སེམས་སུན་མི་དབྱུང་དགྲར་(ཇ༣༢ན)

[Full Size]

མི་སློང༌། །རྫུན་པའི་རྒྱབ་རྟེན་ལྷས་ཀྱང་མི་ཐུབ་པས། །ཅི་བྱེད་ཀུན་ལ་དྲང་ཞིང་ཕན་བདེ་སྒྲུབ། །ཅེས་པའི་ཡ་རབས་ཀྱི་ལུགས་སྒྲུབ་དགོས་ཀྱི། ཧ་ཅང་བརྙས་པ་དང་ཉེ་རིང་ཆེས་ན་འདི་ལྟ་བུ་འབྱུང་ངོ་ཞེས་ཕྱི་རབས་ལ་བསྟན་པའི་ཕྱིར་རྒྱལ་པོས་ཉེ་རིང་བྱེད་པ་དང་བློན་པོའི་འཕྲུལ་གྱིས་རྒྱ་ཡུལ་འཕུང་པར་བྱས་པ་ལྟར་བསྟན་ལ། དཀོན་པའི་འདུ་ཤེས་སྐྱེད་པའི་ཕྱིར་སྤྱན་འདྲོངས་དཀའ་བར་བསྟན་གྱིས་རང་རྒྱུད་པ་ནི་མ་ཡིན་ནོ། །དེ་ནས་ཀོང་ཇོ་དཔོན་གཡོག་གིས་ཁམས་སུ་ཕེབས་ནས་མགར་སྒུག་པའི་ཕྱིར་བྲག་ལོགས་ལ་རྒྱས་པའི་དབུ་དུམ་དང་བཟང་སྤྱོད་བརྐོས། རྡོ་སྐུ་ཁྲུ་བརྒྱད་བཅུ་པ་བརྐོས། ཤ་བ་བཟུང་ནས་ཞིང་རྨོས། ཆུ་སྐོར་བཙུགས། ནགས་ཁྲོད་ལ་བརྡུགས་པ་ལྟར་བྱས། རྒྱ་མོ་འཕྲེད་ལམ་བཅོས་ཤིང་སེ་བ་སོགས་བལྟར་འགྲོ་ཟེར་ནས་ཀོང་ཇོས་ཡུལ་ཐམས་ཅད་ཏུ་བྱོན་པས་བློན་པོ་མ་དག་པ་ལ་ལས་ལམ་དུ་ཅི་འགོར་བྱེད་པར་མཐོང༌། ཐ་མལ་པ་རྣམས་ཀྱིས་ཤིང་སེ་བ་སོགས་བལྟ་བར་མཐོང༌། བྱང་ཆུབ་སེམས་དཔའ་རྣམས་ཀྱིས་སྒྲོལ་མ་དང་ཐུབ་པའི་སྐུས་བོད་ཐམས་ཅད་ཞབས་ཀྱིས་བཅགས་སྟེ་བྱིན་གྱིས་རློབ་པར་གཟིགས་སོ། །དེ་ནས་སྒོ་དོང་སྒོ་མོའི་རྩར་ཕེབས་ཚེ་རྒྱ་ནག་གི་ཕྱྭ་གཡང་ཉམས་པས་རྒྱའི་ལྷ་སྲུང་འཁྲུགས་སྟེ་ཁ་བ་ཚད་མེད་དུ་བབ་པས་ནགས་ཐམས་ཅད་ཕན་ཚུན་འཇིངས་པ་ལྟར་བསྒྱེལ་བས་ལམ་འགགས་སྟེ་ཟླ་བ་གཉིས་ལུས་པའི་ཚེ་བློན་པོས་སླེབས་སྟེ་བསངས་དང་ཕུད་གཏོར་སྟེ་རྒྱའི་ལྷ་ལ་མཆོད་པས་ཁ་བ་ཆད། ནགས་མ་རྣམས་ལངས་སྟེ་ལམ་དོད་པ་ལ་བྱོན། བོད་ཏུ་ཉེ་བར་སླེབས་ཚེ་ཕོ་ཉ་མངགས་ནས་བསུ་བ་དང་དགའ་སྟོན་ཞུས་པས་རྒྱལ་པོའི་ཞལ་ནས་སྒྲོལ་མའི་སྤྲུལ་པ་ལྷ་གཅིག་དེ་ཡིན་པར་འདུག་པས་འཕྲུལ་ཆེ་བས་གང་ནས་འོང་མི་ཤེས་ཀྱིས་ཕྱོགས་བཞི་ཀར་དུ་བསུ་བའི་དྲིལ་སྒྲོགས་ཅིག་གསུངས། མེ་ཕོ་སྤྲེའུའི་ལོ་དབྱར་ཟླ་འབྲིང་པོའི་ཚེས་བརྒྱད་ཀྱི་ཉིན་ཕྱོགས་བཞིའི་བསུ་བ་པ་རྣམས་ལ་ཀོང་ཇོ་ཤཱཀྱ་མུ་ནི་བོད་བློན་བརྒྱ་གྱད་མི་རྟ་བརྒྱ་དང་བཅས་པ་ཕྱོགས་སོ་སོ་ནས་བྱོན་པའི་སྣང་བ་བྱུང་སྟེ་ཤར་ཕྱོགས་པ་རྣམས་ཀྱིས་མཁར་སྣ་གདོང་གི་རབ་བརྒལ་ནས་བྱོན་པས་རྒྱ་མོ་རབ་ཁར་བཏགས། ལྷོ་ཕྱོགས་པ་རྣམས་ཀྱིས་(ཇ༣༢བ)

[Full Size]

གྲིབ་སེ་སྒྲོལ་གྱི་ཕུ་ནས་བྱོན་སྟེ་ཁྱག་པ་ལ་དངུལ་གྱི་རྟ་ལྕག་གཙུགས་ནས་དུང་གཡས་སུ་འཁྱིལ་བ་འདྲ་སྟེ་བཟང་གསུང་བ་དེ་དུས་བྱུང་ཟེར། ནུབ་ཕྱོགས་པ་རྣམས་རྐྱང་ཐང་གི་མགོ་ནགས་ཚལ་གྱི་དཀྱིལ་ནས་རྒྱལ་པོའི་ཕོ་བྲང་ལ་ས་དགྲའི་གནོད་པ་གནམ་སྒོ་བྱེ་བ་རལ་གྲི་ཤུབས་ནས་ཕྱུང་སྟེ་ན་མཁའ་ལ་འཕངས་པ་འདྲ་བ་ཡོད། ས་སྒོ་བྱེ་བ་སྦལ་པ་ཚལ་གྱི་བྲག་ཕག་སྣ་འདྲ་བ་ལ་མགོན་པོ་ལྕམ་དྲལ་བྲིས་ལ་གནོན་ཞིག་གསུངས་སྟེ་རྒྱ་ནག་གི་གཟོ་བོས་འབུར་དུ་བརྐོས་པས་ཕག་གདོང་སྣར་གྲགས་སོ། །བྱང་ཕྱོགས་པ་རྣམས་ཀྱིས་སྒོ་ལ་ལ་བྱོན་པ་ལ་ལྷ་ལ་བསུ་བ་བྱས་པས་ལྷ་བསུ་གདོང་དུ་མིང་ཆགས་སྟེ་ཕྱོགས་བཞི་ཀའི་མི་ལ་དུས་གཅིག་དུ་མཐོང་སྣང་ཤར་སྟེ་འོ་ཐང་གི་མཚོ་འགྲམ་ནགས་ཚལ་དང་བྱེ་མའི་གླིང་ནེ་ཆུང་གི་སྟོད་ན་ཆུ་མིག་ཡོད་པར་ཕེབས་ཚེ་ཇོ་བོའི་ཤིང་རྟ་བྱིང༌། ས་གཡོས། ཁལ་ཐམས་ཅད་ཉལ། གྱད་ལྷ་དགའ་ཀླུ་དགས་བཏེག་ཀྱང་མ་ཐག་པའི་ཚེ་སྤོར་ཐང་བཏིང་ནས་བརྩིས་པས་སྤྱིར་ཛམྦུའི་གླིང་ན་ཡུལ་གྲུ་ཆེན་པོ་བཞི་སྟེ་རི་བོ་འབིགས་བྱེད་ཀྱིས་ཤར་དུ་བཅད་པའི་བྱང་ན་གླང་པོ་ཆེའི་རྒྱལ་ཁམས་པདྨ་ཁ་ཕྱེ་བ་འདྲ། རི་གངས་ཅན་གྱིས་ཤར་དུ་བཅད་པའི་བྱང་ན་བོད་ཁ་བ་ཅན་ཡོད་སྟེ་སྲིན་མོ་གན་རྐྱལ་དུ་བསྒྱེལ་བ་འདྲ། མ་ལ་ཡའི་ཚལ་གྱིས་བཅད་པའི་བྱང་ན་ཡུལ་དབུས་ཡོད་སྟེ་རིན་པོ་ཆེའི་གླིང་འདྲ། ཆུ་བོ་མཛེས་ལྡན་གྱིས་བཅད་པའི་བྱང་ན་གླང་ཆེན་གྱི་གླིང་ཡོད་སྟེ་མེ་ཏོག་གི་གླིང་འདྲའོ། །དེ་ནས་ཁ་བ་ཅན་གྱི་ཡུལ་སྲིན་མོ་གན་རྐྱལ་དུ་འགྱེལ་བ་འདྲ་བའི་དབུས་ན་སྲིན་མོའི་སྙིང་ག་ཡོད་སྟེ་འོ་ཐང་གི་མཚོ་སྙིང་ཁྲག་དུ་མཁྱེན། ཐང་གི་རི་བོགས་ཆད་གཉིས་འདུག་པའི་སྲིན་མོའི་སྙིང་གི་རུས་པས་སེམས་ཅན་གྱི་སྲོག་ཟ་བར་འདུག་སྟེ་རྒྱལ་པོའི་ཕོ་བྲང་གིས་ནོན་ནས་འདུག །དེའི་ཕྱོགས་བཞི་ན་རི་རུས་སྦལ་ལམ་སྡིགས་པ་འདྲ་བ་རེ་འདུག་པ་སྲིན་མོའི་འཁོར་དུ་མཁྱེན། རི་སྣ་དེ་ཐམས་ཅད་དབུས་སུ་ཟུག་པས་ལྷ་ས་དེ་ཇག་རྐུན་གྱིས་གང་བ་མི་སྤྱོད་ངན་པ་འོང་བར་གཟིགས། ས་དགྲ་རྣམ་པ་ལྔ་འདུག་པའི་ཀླུའི་ཕོ་བྲང་དེ་ཇོ་བོ་ཤཱཀྱ་མུ་ནིས་མནན་པར་མཁྱེན་ནས་ཕྱོགས་(ཇ༣༣ན)

[Full Size]

བཞིར་ཀ་བ་བཙུགས་དར་དཀར་གྱི་ཡོལ་བ་བྲེས་སྟེ་གྱད་མི་བཞིས་བསྲུངས་སྟེ་དེ་ཉིད་ཏུ་བཞུགས་སུ་གསོལ་ལོ། །ཕོ་བྲང་དུ་དགའ་སྟོན་གྱི་རྔ་བོ་ཆེ་བརྡུངས༌། མི་ཐམས་ཅད་རྒྱན་གྱིས་བརྒྱན་ནས་འཕྲུལ་གྱི་སྲང་ཁའི་སྟེང་ན་ཕར་འུར་སྒྲ་ས་གཡོ་པ་ཙམ་བྱས་སྟེ་རྒྱུག་ཀོང་ཇོ་འཁོར་བཅས་ཕོ་བྲང་གི་ཤར་སྒོར་ཕེབས་ཕོ་བྲང་སོག་པོ་མཁར་ནས་ཁྲི་བཙུན་གྱིས་གཟིགས་པས་ཇོ་བོ་ཤཱཀྱ་བཞུགས་ས་ཡ་གིའི་གནད་ཀྱིས་ལྷ་ཁང་ཞིག་རྩིག་པར་ངེས། རྒྱ་ནག་ས་དཔྱད་ལ་མཁས་ལྷ་ཁང་གཞན་ཡང་རྩིག་དུ་འོང༌། ང་ཆེན་མ་ལ་ལྷ་ཁང་མེད་པར་མོ་ལ་ལྷ་ཁང་སྔོན་ལ་རྩིག་དུ་འཇུག་པ་མི་འོང་སྙམ་ནས་ཀོང་ཇོ་བོས་སྟེ། ཁྱེད་ལ་ལྷ་འདུག་སྟེ་ང་ལ་ཡང་རྟེན་ངོ་མཚར་ཅན་གསུམ་ཡོད། ང་ཆེན་མ་ཡང་ཡིན་ཆོས་ཀྱི་འབྱུང་གནས་ནས་ཀྱང་འོངས། ལག་རིས་སུ་ཕོ་བྲང་ཆེན་པོ་འདི་ལྟ་བུ་ཡང་བྱས་པས་ངས་ལྷ་ཁང་མ་བརྩིགས་པར་ཁྱོད་ཀྱིས་མ་རྩིག་ཞིག་ཞེས་བཀའ་ནན་ཆེ་བར་བྱས་པས་ཀོང་ཇོ་ན་རེ། དེ་ཙུག་ལགས་སོ། །ཁྱེད་ལྷ་ཁང་རྩིག་ན་མཚོ་མ་གིའི་ཁར་རྩིགས་ཅིག་ཐང་ཁོད་སྙོམས་ཡ་གི་འདྲ་བ་ལ་ངས་ཀྱང་ལྷ་ཁང་འབྱོངས་མཆི་ཞེས་དངུལ་དཀར་གྱི་རྟ་ལྕག་འོ་ཐང་གི་མཚོ་དང་ཇོ་བོ་བཞུགས་ས་ལ་བཙུགས་པས་ཁྲི་བཙུན་སྐྱེངས་པས་ལན་མ་བྱུང་སྟེ་རྒྱལ་པོ་དང་ཀོང་ཇོ་མཇལ་དུ་མ་སྟེར་ཞེས་ཀ་བཀོལ་མར་བཤད་ལ། གཞན་ལས། ང་དང་ཁྱེད་གཉིས་ཁྱད་པར་ཆེ། །ང་ནི་ཐེམ་པ་སྔ་བརྒལ་ཡིན། །བལ་རྗེའི་སྲས་མོ་ང་ཡང་ཡིན། །ཆེན་མ་རྒྱལ་པོའི་བཙུན་མོ་ཡིན། །ཆུན་མ་བཙུན་མོའི་གཡོག་མོ་ཡིན། །ཞེས་སོགས་ཀྱི་གླུ་དང༌། ཁོ་མོས་སྡོད་པའི་གནས་ཀྱང་མ་རྙེད་ཅིང༌། །ཐེམ་པ་མ་བརྒལ་རྗེ་དང་མ་མཇལ་བར། །བཙུན་མོ་ཁྱེད་ཀྱི་འགྲན་ཚིག་སྔས་པ་ཡིན། །ཆེན་ཆུན་བྱུང་བ་མིང་གི་ཁྱད་པར་ཡིན། །མཐུན་པོར་འགྲོགས་ན་ཚེ་འདིའི་སྲུན་ལས་ལྷག །ཆགས་སྡང་བྱེད་ན་རང་མགོ་སུ་གྲུང་ཡིན། །ཞེས་སོགས་ལན་གྱི་གླུ་དང༌། མགར་གྱིས་ཀོང་ཇོ་སྤྱན་འདྲེན་དཀའ་བའི་སྙིང་ནད་དུ་ཡོ་བྱད་སོགས་མ་བསྐྱལ། རྗེ་དང་(ཇ༣༣བ)

[Full Size]

མཇལ་དུ་མ་བཅུག་པར་ཟླ་བ་གཅིག་བཞུགས་པས་ཀོང་ཇོ་ཕྱིར་ལྡོག་པར་དགོངས་པ་མགར་གྱིས་གྲོས་བཏབ་བྱ་བ་སོགས་སྣང་ངོ༌། །དེ་ནས་རྒྱལ་པོ་དགའ་སྟོན་གྱི་ཁྲི་ལ་ཕེབས། ཀོང་ཇོ་བཙུན་མོར་དབང་བསྐུར། དེ་ལྟར་སྤྲུལ་པའི་ལྷ་མོ་གཉིས་ཕེབས་ཚེ། །རྒྱལ་བ་རྣམས་ཀྱིས་སྤྱན་རས་གཟིགས་དབང་དང༌། །ཁྲོ་གཉེར་ཅན་དང་སྒྲོལ་མའི་སྐུ་ལས་ནི། །འོད་ཟེར་བྱེ་བ་ཁྲག་ཁྲིག་མཐའ་ཡས་འཕྲོས། །ན་མཁའི་མཐས་ཀླས་འགྲོ་ཀུན་ལ་ཕོག་པས། །ཉོན་མོངས་མ་ལུས་སྐད་ཅིག་གིས་གཅོད་པའི། །རྡོ་རྗེའི་ཏིང་འཛིན་བདེ་བ་ཐོབ་པར་གཟིགས། །རྒྱལ་སྲས་རྣམས་ཀྱིས་སྤྲུལ་པའི་སྐུ་གསུམ་པོས། །བོད་ཁམས་ཐམས་ཅད་བྱིན་གྱིས་རློབ་པ་དང༌། །མཐའ་ཡས་ཏིང་ངེ་འཛིན་ལ་འཇུག་པར་གཟིགས། །བོད་འབངས་ཕལ་པ་རྣམས་ཀྱི་མཐུན་སྣང་དུ། །འཇིག་རྟེན་མཐུན་འཇུག་སྤྱོད་པ་སྟོན་པར་མཐོང༌། །བླ་བོན་གྱིས་ཕྱྭ་གཡང་འགུགས། རྒྱལ་པོ་དང་བཙུན་མོ་དབུ་སྐྲ་སྦྲེལ་སྐུད་ཁེལ་སྙོད་མཛད། ཤ་ཁུ་དང་སྐྱེམས་གསོལ་རེས་དང་གཡང་རིལ་དང་མར་ཁུའི་སྐྱུ་རྗེ་ལེན་བྱེད་སྐད། གཞན་ཡང་གཙུག་ལག་ཁང་བཞེངས་པ་དང་ལྷ་སྲས་སྐྱེད་པའི་ཕྱིར་ཞང་ཞུང་གི་རྒྱལ་པོའི་མིག་སྐྱའི་སྲས་མོ་ཞང་ཞུང་བཟའ་ལི་ཐིག་དམན་དང༌། མི་ཉག་གི་རྒྱལ་པོའི་བུ་མོ་རུ་ཡོངས་བཟའ་རྒྱལ་མོ་བཙུན་དང༌། སྟོད་ལུངས་མོང་ནས་ཞང་བློན་གྱི་བུ་མོ་མོང་བཟའ་ཁྲི་ལྕམ་སྟེ་སྤྱིར་བཙུན་མོ་ལྔ་ཁབ་ཏུ་བཞེས་སོ། །དེ་ནས་ལྷ་གཅིག་ཀོང་ཇོས་ས་དཔྱད་མཛད། །བོད་ཡུལ་སྲིན་མོ་གན་རྐྱལ་འགྱེལ་བ་འདྲ། །དེ་ཡི་ཚིགས་ཆེན་བརྒྱད་དང་མཐིལ་བཞི་པོ། །གནོན་པའི་ལྷ་ཁང་རེ་རེ་དང་པོར་ཐོབ། །འོ་ཐང་མཚོ་འདི་སྲིན་མོའི་སྙིང་གི་ཁྲག །ངན་སོང་སྒོ་ཡིན་བསུབས་ལ་ལྷ་ཁང་རྩིགས། །ས་དགྲ་བརྒྱད་ལ་རང་རང་གཉེན་པོས་གནོན། །དེ་རྗེས་ས་གཞི་པདྨ་འདབ་བརྒྱད་ཚུལ། །(ཇ༣༤ན)

[Full Size]

དགུང་གི་ན་མཁའ་འཁོར་ལོ་རྩིབས་བརྒྱད་དབྱིབས། །ཕྱོགས་མཚམས་བརྒྱད་ལ་བཀྲ་ཤིས་རྟགས་བརྒྱད་ཚང༌། །དཔྱད་བཞི་མ་ཉམས་རིན་ཆེན་སྣ་བཞིར་ལྡན། །ཡོན་ཏན་ཐམས་ཅད་དུས་གཅིག་འཆར་རོ་གསུངས། །རྒྱལ་པོའི་ཐུགས་ཀའི་འོད་ཟེར་མཚོར་ཕོག་པས། །དབུས་སུ་འོད་ཀྱི་མཆོད་རྟེན་ཆགས་པ་ལྟར། །བྱིན་གྱིས་རླབས་དང་འཕྲུལ་ལས་རྡོ་སྒོ་བྱས། །རྡོ་རྗེ་ཀླུ་འབྱིམ་བྱུགས་པའི་ཤིང་གིས་ཕུབ། །ཁྲོ་ཆུའི་གཞི་ལ་སོ་ཕག་བཀྲམ་པས་གཡོགས། །རྡོ་རྗེའི་ས་གཞི་ལྟ་བུར་གྲུབ་པའི་སྟེང༌། །རྩིག་རྨང་གཏིང་བ་མི་མ་ཡིན་གྱིས་བཤིག །དེ་ཚེ་རྒྱལ་པོ་ཉིད་ཀྱི་སྐུ་འབག་ཞིག །ཐོག་མར་བཞེངས་ཞེས་མཁའ་ལས་སྒྲ་བྱུང་བས། །ཁྱད་པར་འཕགས་པའི་རྫས་མཆོག་དུ་མ་དེར། །ཙནྡན་སྦྱར་བའི་ལྡེ་གུ་ཕུང་པོར་བྱས། །རྒྱལ་པོའི་དབུ་སྔས་སུ་བཞག་གཟིམས་པ་ན། །སངས་རྒྱས་བྱང་སེམས་ཉི་ཟེར་རྡུལ་ཙམ་ལྷགས། །ཐིམ་པར་གཟིགས་ནས་ནང་པར་དགུང་སངས་ཚེ། །སྤྱན་རས་གཟིགས་ཀྱི་དབང་པོ་བཅུ་གཅིག་ཞལ། རྩ་བའི་ཞལ་གསུམ་དཀར་པོ་རབ་ཏུ་འཛུམ། །དེ་སྟེང་ཞལ་གསུམ་སེར་མདོག་བཞད་པ་ཡི། །ཁྲོ་ཞལ་རྒྱས་པའི་ཕྲིན་ལས་མཛད་པ་ཡིན། །དེ་སྟེང་ཞལ་གཉིས་བྱེ་རུའི་མདོག་འདྲ་བ། །གཙིགས་པའི་ཁྲོ་ཞལ་དབང་གི་ཕྲིན་ལས་མཛད། །དེ་སྟེང་ཞལ་གཉིས་ཁྲོ་ཞལ་ནག་པོ་ནི། །ཁྲོས་ཅིང་གདངས་པ་དྲག་པོའི་ཕྲིན་ལས་མཛད། །དེ་སྟེང་ཨ་མི་ཏཱ་བྷ་ལི་ཁྲིའི་མདོག །དེ་མན་རྒྱལ་པོའི་སྐུ་ཚད་ཉིད་དང་མཉམ། །ཆོས་སྐུ་རྩ་བའི་ཕྱག་བཅུའི་དང་པོ་གཉིས། །ཐུགས་ཀའི་དབུས་སུ་ཐལ་མོ་མཉམ་པར་སྦྱར། །བགྲང་ཕྲེང་འཁོར་ལོ་མཆོག་སྦྱིན་འོད་དཔག་མེད། །གཡས་ཀྱི་ལྷག་མ་བཞི་ན་རིམ་པས་འཛིན། །པད་དཀར་རིལ་བ་སྤྱི་བླུགས་རིན་པོ་ཆེ། །མདའ་གཞུ་ལྷན་ཅིག་གཡོན་པ་བཞི་ན་འཛིན། །ཕྱག་ཞབས་གསེར་(ཇ༣༤བ)

[Full Size]

གདུབ་དང་ནི་སྤྲུལ་གྱིས་བརྒྱན། །རིན་ཆེན་རྒྱན་མཛེས་འོད་ཟེར་ཉི་ལྟར་འབར། །སྐུ་སྟོད་རི་དྭགས་པགས་པས་ནུ་གཡོན་བཀབ། །མཚན་དཔེ་ཀུན་ལྡན་རང་བྱུང་ཉིད་དུ་བྱོན། །སླར་ཡང་འོད་ཟེར་དུ་མ་འཕྲོས་པ་ཡིས། །ཙནྡན་རང་བྱུང་སྐུ་དང་རིང་སྲེལ་སོགས། །སྤྱན་དྲངས་ཕྱག་གིས་དར་ཤམ་ཅུང་ཟད་ཙམ། །བརྫེས་པ་ནས་ཞུགས་ཐུགས་ཀའི་དབུས་སུ་ནི། །ཡེ་ཤེས་སེམས་དཔའི་ངོ་བོར་བཞུགས་པར་གྱུར། །ལོངས་སྤྱོད་རྫོགས་སྐུའི་ཡན་ལག་སོ་བརྒྱད་དང༌། །སྤྲུལ་སྐུའི་ཉིང་ཕྱག་སྟོང་ཕྲག་སྤྱན་སྟོང་ཅན། །ཕྱི་ནས་བལ་པོའི་གཟོ་བོས་ཕུལ་བར་གྲགས། །འཇིག་རྟེན་དབང་ཕྱུག་ལ་སོགས་འཁོར་བརྒྱད་བྱས། །བོད་ཏུ་བཞེངས་པའི་རྟེན་གྱི་ཐོག་མ་ཡིན། །རང་བྱུང་སྐུ་ལས་མེ་ཡི་འོད་ཟེར་དང༌། །ཁྲོ་བོ་གཉིས་བྱུང་ཐོག་ལྟར་བབས་པ་ཡིས། །ཟླ་བ་ཚལ་གྱི་འདྲེ་ཡི་འདུན་ཕུང་གཏོར། །ཉེ་བའི་ས་དགྲ་གཞན་རྣམས་སོ་སོར་མནན། །དཔུང་མགོ་དཔྱི་གཉིས་གནོན་པའི་མཐའ་འདུལ་བཞི། །གྲུ་མོ་པུས་མོ་གནོན་པའི་ཡང་འདུལ་བཞི། །ཡན་ལག་མཐིལ་བཞི་གནོན་པའི་རུ་གནོན་བཞི། །ཤར་དུ་ཉི་ཟླ་གཟའ་སྐར་གཏན་འབེབས་གསུམ། །མེ་ཆུ་རླུང་གི་ཁ་གནོན་གཉིས་གཉིས་སྟེ། །ས་གཞི་གནོན་པའི་ལྷ་ཁང་ཐམས་ཅད་མཛད། །བོད་ཀྱི་གཙུག་ལག་ཁང་ལ་སྔ་བ་ཡི། །ཁྲ་འབྲུག་གྲུབ་ཚེ་རབ་བྱུང་གཏམ་གསན་པས། །དེ་ལྟར་རྒྱལ་བའི་རྗེས་འཇུག་ངུར་སྨྲིག་གི །རྟགས་འཛིན་ཙམ་ལའང་གུས་ཕྱག་འཚལ་ལོ་གསུངས། །དེ་ཚེ་བནྡྷེ་ཧྲུལ་པོ་ཅིག་གཟིགས་ལ། །གུས་ཕྱག་མཛད་དེ་ངོ་མཚར་ཆེའམ་གསུངས། །དེས་ཀྱང་མཆོད་རྟེན་རྩེ་ལྔ་མཁའ་ལ་བཏེག །རྒྱལ་པོས་ཐོད་ཕུད་ཨ་མི་ཏཱ་བྷ་བསྟན། །དེས་ཀྱང་རང་གི་སྙིང་གའི་སྒོ་ཕྱེ་སྟེ། །འདུས་པའི་ལྷ་ཚོགས་བཅུ་དགུ་གསལ་བར་བྱས། །རབ་བྱུང་ཧྲུལ་ཡང་ཡོན་ཏན་འདི་འདྲ་ཡིས། །ཕྱིན་(ཇ༣༥ན)

[Full Size]

ཆད་ཕྱག་མཆོད་བཀུར་སྟི་བྱོས་ཅིག་ཞེས། །བོད་འབངས་ཀུན་ལ་བཀའ་ཡི་དྲིལ་ཆེན་བསྒྲགས། །བོད་ཡུལ་རྡོ་རྗེའི་ལྟེ་བ་ལྷ་ས་ཡི། །སྲོག་རྩ་ལྷ་རི་རང་བྱུང་ཡེར་པ་རུ། །ས་རྡོའི་ཕུད་ལས་ལྷ་ཁང་མཆོད་རྟེན་མཛད། །ལྷ་སའི་རྟེན་འབྲེལ་ཡེར་པར་སྒྲིགས་ཅེས་གསུངས། །དེ་ཡང་ཁྲི་བཙུན་གྱིས་དངུལ་ཟམ་ལ་བྱོན་ནས་ཁོ་མོ་ལྷ་ཁང་རྩིག་པའི་ས་གཞི་ཞིག་ཞུའོ་བྱས་པས་རྒྱལ་པོའི་ཞལ་ནས་ཁྱེད་རང་གང་འདོད་པར་རྩིགས་ཤིག་གསུངས། དེར་ཁྲི་བཙུན་གྱིས་རྟ་པ་མང་པོའི་ཁྲོམ་ཁྲིད། གནོད་སྦྱིན་ཕོ་མོ་བྲན་དུ་བཀོལ་སྟེ་ལ་དོང་གི་ནེ་ཐང༌། བ་རག་ཕུག་ཡར་ལུངས་སོགས་ཡུལ་བཟང་བ་ཐམས་ཅད་དུ་རྨང་བཏིང་ཡང་ལྷ་ཁང་བརྒྱ་རྩ་བརྒྱད་ཀྱི་བར་ནུབ་མོ་ལྷ་འདྲེས་རྗེས་མེད་དུ་བཤིག་པས་ས་དཔྱད་བརྟག་དགོས་པར་གོ་སྟེ་གཡོག་མོ་ལ་གསེར་ཕྱེ་བྲེ་གང་བསྐུར་སྟེ་ཀོང་ཇོ་ཇོ་བོ་ཤཱཀྱ་ལ་མཆོད་པ་བྱེད་པའི་རྩར་བཏང་སྟེ་ན་ནིང་གི་དེ་སྐད་མ་གསུང་བར་ངའི་ལྷ་ཁང་རྩིག་པའི་ས་དཔྱད་ལེགས་པར་སྟོན་པར་ཞུ། ངའི་ལྷ་ཁང་ཟིན་ནས་ཁྱེད་ཀྱི་ཡང་རྩིག་དུ་གཞུག་གིས་ཅེས་འཕྲིན་བསྲིངས། ཀོང་ཇོས་སྤོར་ཐང་བཀྲམ་སྟེ་བརྩིས་པས་བོད་ཡུལ་འདིར་ལྷ་ཁང་གི་ས་གཞི་བཙལ་ན་སྤྱིར་སའི་དབྱེ་བ་སུམ་བརྒྱ་དྲུག་བཅུ། ས་བརྟག་པ་བརྒྱ་རྩ་བརྒྱད། ངོས་བཟུང་བ་བདུན་བཅུ་དོན་གཉིས། ནོར་ར་རེ་བཞི་བཅུ་རྩ་ལྔ། ས་དགྲ་ངོས་བཟུང་བ། དེའི་སྐྱོན་བསལ་བ། ཡོན་ཏན་གྱི་འབྲས་བུ་ཆུད་མི་འཛའ་བ་རྣམས་སྟོན་པ་ལས་མདོར་བསྡུ་ན་སྐྱེ་བོ་མང་པོ་འདུ་བ་གྲོང་དང་གྲོང་ཁྱེར་གྱི་ས། དབང་ཕྱུག་དང་མངའ་ཐང་འཕེལ་བ་རྒྱལ་པོའི་ཆེན་པོའི་ས། དྲང་སྲོང་འདུ་བའི་གནས་དགོན་པ་བས་མཐའི་ས། རེ་ཞིག་བདེ་བར་གནས་པ་སྐྱེ་བོ་ཐ་མལ་བའི་ས་སྟེ་བཞི་ལས་འདི་རྒྱལ་པོའི་ས་དང་གཅིག་པ་ཡིན། དེ་ཡང་བོད་ཀྱི་རྒྱལ་ཁམས་འདི་སྲིན་མོ་གན་རྐྱལ་དུ་འགྱེལ་བའི་གཟུགས་སུ་འདུག་པས་དཔུང་མགོ་གཉིས་དཔྱི་གཉིས་གྲུ་མོ་གཉིས་པུས་མོ་གཉིས་ཐིལ་བཞི་རྣམས་གནོན་པའི་ལྷ་ཁང་རེ་རེ་དགོས། མ་གྲུབ་ཀྱང་ལྕགས་ཀྱི་ཕུར་པ་རེ་ཐོབ། འོ་ཐང་གི་མཚོ་འདི་སྲིན་མོའི་སྙིང་ཁྲག་ཡིན་ངན་སོང་གི་སྒོ་ཞིག་ཡང་འདུག་པས་བསུབས་ནས་ལྷ་ཁང་རྩིག་དགོས། ས་དགྲ་བརྒྱད་འདུག་སྟེ་ལྷོ་ནུབ་ན་(ཇ༣༥བ)

[Full Size]

འདྲེའི་འདུན་ས་འདུག་པ་གཏོར་ཞིག་ནུབ་བྱང་ན་ཀླུ་བདུད་ནག་པོའི་ཉལ་ས་འདུག་པ་ཕྲོགས་ལ་ལྷ་ཁང་རྩིགས་ཅིག་ལྷོ་བྱང་ན་བཙན་གྱི་འགྱུ་སྲང་འདུག་པ་མཆོད་རྟེན་གྱིས་ཆོད་ཅིག་ར་མོ་ཆེའི་ཀླུའི་ཕོ་བྲང་ཇོ་བོ་བཞུགས་པ་འདིས་ནོན་འདུག །ཤར་ན་བ་ལམ་གྲུམ་པ་རི་ཆུ་སྲིན་དེའུའི་ཁར་ཐོན་པ་འདྲ་བ་ལ་དུང་དཀར་སྟོན། ཤར་ལྷོར་བྱང་སྟོད་སེ་ཕུག་སྲིན་མོ་འདོམས་བཟེད་བ་འདྲ་བ་ལ་དབང་ཕྱུག་ཆེན་པོ་སྟོན། ལྷོ་ནུབ་ཡུག་མའི་ཤར་རི་སྡིགས་ནག་གཟན་ལ་རུབ་བ་འདྲ་བ་ལ་བྱ་ཁྱུང་ག་རུ་ཊ་སྟོན། ནུབ་ན་ཤུན་གྱི་བྲག་བདུད་ནག་པོ་བྱ་ར་བྱེད་པ་ལྟ་བུ་དང་རི་སྲིན་མོ་རལ་པ་གཟིངས་པ་འདྲ་བ་འདུག་པ་ལ་རྡོའི་མཆོད་རྟེན་ཞིག་སྟོན། བྱང་ན་ཉང་བྲན་དོག་སྡེའི་དབུས་རི་གླང་ཆེན་གཡུལ་དུ་ཞུགས་པ་འདྲ་བ་ལ་རྡོ་ཡི་སེང་གེ་ཞིག་སྟོན། ས་དགྲ་དེ་རྣམས་ནོན་པ་དང་ཡོན་ཏན་ཐམས་ཅད་དུས་གཅིག་ལ་འཆར་སྟེ། ཤར་ན་བན་ཁོས་གུང་བུ་རི་མཆོད་རྟེན་ལྟ་བུ། ལྷོ་ན་གྲིབ་རི་རིན་པོ་ཆེ་སྤུངས་པ་ལྟ་བུ། ནུབ་ན་སྟོད་ལུང་བྲང་ཕུའི་རི་ན་མཉྫིའི་ཁར་དུང་ཕོར་བཞག་པ་ལྟ་བུ། བྱང་དུ་དོག་སྡེ་ལྷ་རི་པདྨ་ཁ་བྱེ་བ་ལྟ་བུ་སྟེ་ཡོན་ཏན་གྱི་རི་བཞི་འདུག་པས་ཕྱོགས་ཐམས་ཅད་ནས་དད་པ་ཅན་གྱི་སྐྱེ་བོ་འདུ་ཞིང་སྟོན་པའི་རིང་སྲེལ་ལ་མཆོད་པ་རྒྱས་ཆོས་བྱར་བཏུབ། རང་བཞིན་གྱི་ཡོན་ཏན་མང་པོ་འབྱུང་བའི་ས་ཡིན། གནམ་འཁོར་ལོ་རྩིབས་བརྒྱད་ཀྱི་ས་དབྱིབས་པདྨ་འདབ་བརྒྱད། ཉང་བྲན་འཕན་དཀར་གྱི་རི་ལ་དབུ་གདུགས། མལ་གྲོང་གི་རྒྱབ་རིར་སྤྱན་ཉ། གདོང་མཁར་གྱི་བྲག་ལ་ལྗགས་པདྨ། གྲིབ་ཕུའི་ཆབ་རོམ་ལ་གསུང་དུང༌། རྫོང་བཙན་གྱི་རི་ལ་མགུལ་བུམ་པ། ཡུག་མའི་རི་ལ་ཐུགས་དཔལ་བེ། འཕན་དར་གྱི་རི་ལ་སྐུ་རྒྱལ་མཚན། བྲང་ཕུའི་སྤང་ལ་ཕྱག་ཞབས་འཁོར་ལོ་སྟེ་ལོགས་བཀྲ་ཤིས་རྟགས་བརྒྱད་དུ་ཚང༌། གར་བའི་ཇོ་མོ་ཟེ་ཟེ་ལ་ལྕགས། ར་ཁ་ལ་དོང་ལ་ཟངས་དང་དངུལ། ལྕགས་ཀ་རི་ལ་གསེར་སྟེ་རིན་ཆེན་སྣ་བཞིའི་གཏེར་ཡོད། ཤར་གྱི་སྟག་སྐྱ་བོ་དགའ་གདོང་འོག་མ། ལྷོའི་གཡུ་འབྲུག་སྔོན་མོ་སྐྱི་ཆུ། ནུབ་ཀྱི་བྱ་དམར་པོ་ཤུན་གྱི་བྲག་དམར་སྟེ་གདོང༌། བྱང་གི་རུས་སྦལ་ནག་པོ་ཉང་བྲན་ཕ་བོང་ཁ་སྟེ་དཔྱད་བཞི་ཚང་བས་བཀྲ་ཤིས། (ཇ༣༦ན)

[Full Size]

དེ་ལྟར་ས་དགྲ་རྣམས་མནན་པ་དང་ཡོན་ཏན་ཐམས་ཅད་ཀྱི་ནུས་པ་དོད་འབྱུང༌། གཏེར་རྣམས་ཁ་འབྱེ། ཐུགས་དམ་གྱི་ལྷ་ཁང་ཡང་དོད་རྩིག་དུ་བཏུབ་པས་ར་དཀར་མོ་ལ་འཕན་ཡུལ་ནས་ས་བཀལ་བས་རྟེན་འབྲེལ་དུ་མཚོ་གསུབས་ལ་དེར་ལྷ་ཁང་བརྩིགས་ན་ལེགས་རྒུ་ཅོག་ཀྱང་དོད་འབྱུང་ཉེས་རྒུ་ཅོག་འགྲིབ་པར་འགྱུར་རོ་ཞེས་ལན་བསྐུར་རོ། །དེར་བྲན་མོས་ཕྲིན་གོ་རིམ་ནོར་སྟེ་དང་པོར་ར་ལ་ས་ཁོལ་ལ་མཚོ་གསུབས་བྱ་བ་སྨྲས་པས་ཁྲི་བཙུན་གྱིས་དེ་ལྟར་མཛད་ཀྱང་མཚོ་རྙོག་ལོང་གིས་སོང་སྟེ་བྱེ་བའི་ཆ་ཡང་མ་སུབས་ནས་ཡིད་མ་ཆེས་སྟེ་རྒྱལ་པོ་ལ་ཞུས་པས་ངས་ཡི་དམ་ལ་འདྲི་ཡི་གསུངས་སྟེ་ཐུགས་དམ་རང་བྱུང་ལ་མཆོད་པ་མཛད་གསོལ་བ་བཏབ་པས་སྐུ་དེའི་ཞབས་མཐེབ་གཡས་པ་ནས་འོད་ཟེར་བྱུང་བ་འོ་ཐང་གི་མཚོར་ཐིམ་མོ། །དེར་ནང་རེ་བཞིན་རྒྱལ་པོ་ཆིབས་དཀྱུས་སུ་འཆག་པའི་འུར་ཁྲོལ་གྱི་སྒྲ་བྱུང་ཚེ་སྐྱེ་བོ་རྣམས་བལྟ་བ་ལས་དེའི་ནང་པར་ཁྲི་བཙུན་གྱིས་སྣ་དྲངས་ཆིབས་དཀྱུས་སུ་གཤེགས་སྟེ་འོ་ཐང་གི་མཚོ་ཁར་བཏོལ་བ་ན་རྒྱལ་པོས་སོར་གདུབ་ཕུད་སྟེ་འདི་གར་ལྷུང་བ་དེར་རྩིགས་ཅིག་ཞེས་མཁའ་ལ་འཕངས་པས་མཚོ་ནང་དུ་སོང་བ་དང་རྒྱལ་པོས་ཀྱང་ཀོང་ཇོ་དང་གྲོས་མཛད་ཏོ་སྙམ་ནས་ཁྲི་བཙུན་སྤྱན་མཆི་མས་གང༌། རྒྱལ་པོས་མཆི་མ་ཕྱིས་ལ་ལྟོས་ཅིག་གསུངས་པས་རྒྱལ་པོའི་ཐུགས་ཀ་ནས་འོད་ཟེར་བྱུང་བ་མཚོ་ནང་དུ་སོང་བ་མཐོང༌། ཀོང་ཇོ་ཡང་ཕྲག་དོག་མིན་པར་ང་ལ་ཆ་ཡོད། འདིར་རྩིགས་ཅིག་ངས་གྲོགས་བྱའོ་གསུངས་པས་ཁྲི་བཙུན་རབ་ཏུ་དགྱེས་སྟེ་བཀའ་བཞིན་དུ་ཉན་ནོ་ཟེར་རོ། །རྒྱལ་པོའི་ཞལ་ནས་མཚོ་འགྲམ་འདིར་ངའི་ཕོ་བྲང་ཞིག་རྩིགས་ཅིག་གསུངས་སྟེ་ཕོ་བྲང་གསུམ་ཐོག་ཞིག་བརྩིགས་པར་ཕོ་བྲང་གི་བསྐྱས་མཛད་དེ་མཆོད་གནས་རྣམས་ཀྱང་སྤྱན་དྲངས་སྟེ་མཆོད་པ་ཆེན་པོ་མཛད། ཁྲི་བཙུན་གྱིས་ཀླུ་ནག་པོ་ཀློང་རྡོལ་དང༌། རྒྱུན་བརྡལ་དང༌། ཟུར་ཕུད་རྐྱང་ཚལ་གྱི་ཀླུ་སོགས་ལ་ལས་བཅོལ་སྟེ་སྐྱི་ཆུ་ལྷོ་ངོས་དཀར་ཆུང་ལྦུ་བ་གདོང་དུ་བསྒྱུར་བས་མཚོ་གུད་དུ་ལུས། མཚོ་ནང་གི་ཕྱོགས་བཞིར་རྡོ་སྤེ་བྱས་སྟེ་གླ་(ཇ༣༦བ)

[Full Size]

བའི་ཤིང་གིས་ཕུབ་པས་དབུས་སུ་མ་སླེབས་ནས་རྒྱལ་པོས་རྟེན་རང་བྱུང་ལ་མཆོད་པ་ཕུལ་ནས་གསོལ་བ་བཏབ་པས་སྐུའི་བ་སྤུ་ནས་འོད་ཟེར་བྱུང་བ་མཚོ་ལ་དྲ་ཕྱེད་དུ་བྲེས། རྩ་ཞལ་ནས་འོད་ཟེར་བྱུང་བ་མཚོ་སྟེང་དུ་སྤྲིན་ལྟར་འཁྲིགས་པ་ལས་འོད་ཞགས་པ་ལྟ་བུ་མཚོ་ལ་ཆར་པ་ལྟར་བབ་པས་མཚོ་ནང་དུ་འོད་ཏམ་ལྦུ་བ་མཆོད་རྟེན་བང་རིམ་གསུམ་པའི་རྣམ་པར་ཆགས་པའི་ཚེ་རྡོ་རྣམས་མཚོ་དཀྱིལ་གྱི་འོད་ཟེར་ལ་རྒྱོབ་ཅིག་གསུངས་སྟེ་བལ་པོའི་རྡོ་གཟོ་བས་གསང་ཕུ་ནས་རྡོ་དྲངས་པ་ལ་གཟོ་བྱས་སྟེ་བློན་པོ་རྣམས་ཀྱིས་ཡིག་དྲུག་གི་སྒྲ་དང་བཅས་སྟེ་དབུས་སུ་བསྐུར་བས་མཁར་གྱི་རྣམ་པ་གྲུ་བཞི་པ་ཅིག་བྱུང༌། དེའི་དཀྱིལ་དུ་གཏེར་བཅུག །དེ་ལ་སྣ་གཏད་དེ་ཕུབ་པས་མཚོ་མི་མངོན་པར་སུབས་སྟེ་ལྟེ་བ་དེ་དེང་སང་གི་དཀྱིལ་འཁོར་ཡིན་ནོ། །ཀླུའི་ཡུལ་ནས་རྡོ་རྗེའི་འདག་པ་བླངས་སྟེ་ཤིང་ཐམས་ཅད་ལ་བྱུགས་པས་ཤིང་ཐམས་ཅད་མི་བངས་མི་རུལ་བ་རྡོ་རྗེ་ཕ་ལམ་ལྟར་བྱས། དེའི་སྟེང་དུ་ཁྲོ་ཆུའི་ཕ་གུ་བཏིང་བ་ཁྲོ་ཞུན་གྱིས་བསྡམས། སླར་སོ་ཕག་དང༌། སྤང་ལེབ་དང་རྡོ་ལེབ་དང༌། བྱེ་མ། ས་བཟང་པོ་རྣམས་བཏིང་བས་ས་གཞི་དང་དབྱེར་མེད་པར་བྱས་སྟེ་རྩིག་རྨང་བཏིང་བས་མཚན་མོ་ལྷ་འདྲེས་བཤིག །དེ་ནས་ན་མཁའ་ལས་རྒྱལ་པོ་ཉིད་ཀྱི་སྐུ་འབག་ཞིག་ཐོག་མར་བཞེངས་ན་བར་ཆད་མི་འབྱུང་ངོ་ཞེས་སྒྲ་བྱུང་བས་བལ་པོའི་ལྷ་གཟོ་བ་ལ་ཁྱོད་ཀྱིས་ངའི་སྐུ་འབག་དུ་མིང་བཏགས་པའི་སྤྱན་རས་གཟིགས་ཀྱི་སྐུ་ཞིག་བཞེང་ཤེས་སམ་གསུངས་པས་ཁོ་བོ་སྤྲུལ་པའི་གཟོ་བོ་ཡིན་པས་ཤེས་མཆི་ཟེར་སྟེ་སྔོན་སྤྲུལ་པའི་དགེ་སློང་གིས་སྤྱན་དྲངས་གནས་ཆེན་པོ་བརྒྱད་ཀྱིས་རྒྱ་མཚོའི་འགྲམ་དང་ནཻ་རཉྫ་རའི་བྱེ་མ་དང་ཙནྡན་སྦྲུལ་སྙིང་དང་ས་མཆོག་བུ་མོ་གཙང་མ་དུ་མས་བ་སྤོས་ཟན་མའི་འོ་མ་དང་དར་བའི་ལྡེ་གུ་དང་བསྲེས། རིན་པོ་ཆེ་སྣ་ཚོགས་པའི་ཕྱེ་མ་བཏབ་པའི་ལྡེ་གུ་རྒྱལ་པོའི་དབུ་སྔས་སུ་སྤུངས། བྱང་ཆུབ་ཤིང་གི་སྲོག་ཤིང༌། ཙནྡན་སྦྲུལ་སྙིང་གི་ཞབས་དར། སྐུའི་དབྱིབས་གཏོད་པའི་ཕྱིར་རྒྱ་མཚོའི་གླིང་གི་འཇག་མ། ཟེ་མ་རུའི་གཟེར། རིན་པོ་ཆེའི་སྤྱན་འབྲས། འཇམ་བྱེད་པའི་ལྡེ་པན། (ཇ༣༧ན)

[Full Size]

ཁ་བསྒྱུར་བའི་ཚོན་རྣམས་སྟ་གོན་བྱས་སྟེ་དབུ་སྔས་ཀྱི་མགོར་བཞག་གོ །ཐོ་རེངས་ཀྱི་དུས་མཐོངས་ཀ་ན་མར་སངས་རྒྱས་དང་བྱང་ཆུབ་སེམས་དཔའ་ཉི་ཟེར་གྱི་རྡུལ་ཙམ་བྱོན་སྟེ་འཇིམ་པ་ལ་ཐིམ་པར་གཟིགས་པས་བྱིན་རླབས་ཅན་ཞིག་འོང་བར་འདུག་ཕྱག་སྟོང་སྤྱན་སྟོང་ཞིག་བྱའམ། ཞལ་བཅུ་གཅིག་པ། ཡི་གེ་དྲུག་པ། འཇིག་རྟེན་དབང་ཕྱུག་ཡིད་བཞིན་འཁོར་ལོ། དོན་ཡོད་ཞགས་པ། ཧྱ་གྲཱྀ་བ། ཁཱརྶཔ་ཎི་ཞིག་བྱའམ་ཞེས་སྤྱན་རས་གཟིགས་ཀྱི་བྱེ་བྲག་ལྔ་བཅུ་རྩིས་ལ་བཏབ་ནས་གཟིམས་པ་ལས་ནམ་ལངས་པའི་ཚེ་དབུ་སྔས་ན་རྒྱུ་དེ་རྣམས་ཀྱི་ཤུལ་ན་བཅུ་གཅིག་ཞལ་ཡིད་བཞིན་ནོར་བུ་ཆོས་སྐུའི་རྩ་ཕྱག་བཅུ་གཅིག་དུ་ཁྲོང་ངེ་བྱོན་པར་གཟིགས་སོ། །དེ་མ་ཐག་ལྷ་གཟོ་ཡང་ལྷ་གཟོ་བའི་ཆེད་དུ་འོངས་པ་ལ་རྒྱལ་པོས་ལྷ་མྱུར་ཞིང་ལེགས་པར་ཟིན་འདུག་ཀྱང་ཙནྡན་སྦྲུལ་སྙིང་གི་སྐུ་རང་བྱུང་དང་མཆོད་སྡོང་གསུམ་པོ་འདི་ནང་རྫོངས་ཡང་སྙིང་དུ་བཞུགས་རྒྱུ་ཡིན་སྟེ་གསུངས་པས་གཟོ་བོ་ན་རེ་བདག་ནི་ལྷ་བཞེང་དགོས་སྙམ་ནས་ང་གདོད་མཆིས་པ་ལགས་སྟེ་འདི་ནི་རང་བྱུང་དུ་བྱོན་གདའོ་ཟེར། དེ་མ་ཐག་དུ་སྐུ་དེ་གཡོས་ནས་ཕྱག་གཡས་ཀྱིས་དར་ཤམ་པུས་གོང་དུ་བརྫེས་སྟེ་ཞབས་གཡས་ནས་འོད་ཟེར་བྱུང་བས་རྟེན་དེ་རྣམས་སྤྱན་དྲངས་སྟེ་ཐུགས་ཀར་ཆགས་པས་སྐུ་ཤིན་དུ་སྦྲུམ་པར་གྱུར་ལ་གཡོན་དུ་ཅུང་ཟད་འགྱིང་བ་དེ་དུས་བྱུང་ལ་དར་ཤམ་པུས་གོང་དུ་ལུས་པ་ད་དུང་དུ་ཡོད་དོ། །འདི་ལ་རྒྱས་པའི་ཞལ་མཐིང་ག་གསུམ། དབང་གི་ཞལ་ཁམ་པ་གཉིས། མངོན་སྤྱོད་ཀྱི་ཞལ་དམར་པོ་གཉིས། ཅེས་དང༌། ཕྱག་མཚན་གཡས་ལྷག་མ་བཞིས་སྤྲུལ་སྐུ་མདའ་འཁོར་ལོ་ས་གནོན། གཡོན་བཞིས་ཕྲེང་བ། ནོར་བུ། གཞུ། བུམ་པ་ཅེས་བྲིས་པ་ཡང་སྣང་ངོ༌། །དེ་ནས་བར་ཆུ་ཁར་མཆོད་རྟེན་ཀེ་རུ་བརྩིགས་སྟེ་བོད་ཀྱི་སྔགས་བཙུན་དང་སྒྲུབ་པ་ལ་མི་གནོན་པའི་ཕྱིར་གྲིབ་ནས་ཉང་བྲན་གྱི་ཕུར་བཙན་གྱི་འགྱུ་སྲང་ཡོད་པ་བཅད། རང་བྱུང་ཐུགས་རྗེ་ཆེན་པོའི་ཐུགས་ཀ་ནས་འོད་ཟེར་འཕྲོས་པ་བྲག་ལོགས་ལ་ཕོག་པས་བྲག་ལྷ་ཀླུ་ཕུག་གི་ཀླུ་བདུད་དང་མ་མོའི་ཉལ་(ཇ༣༧བ)

[Full Size]

ས་ཕྲོགས་སྟེ་རྣམ་སྣང་ཀུན་དུ་ཞལ་དང་འཇམ་དཔལ་ཁྲོ་བོ་སོགས་བྲག་ལ་རང་བྱོན་དུ་བྱུང༌། རྒྱལ་པོ་གནམ་སྟོང་གི་ནུབ་མོ་འོ་ཐང་གི་ཆུ་ལ་ཁྲུས་མཛད་ཚེ་ལྷོ་ནུབ་ཟླ་བ་ཚལ་གྱི་བྲག་རྩ་ན་མེ་འབར་བ་ཞིག་འདུག་ནས་དེར་བྱོན་པས་ཁ་བ་ཅན་གྱི་འདྲེ་ཐམས་ཅད་དུག་ཤིང་གི་སྡོང་པོ་རྐང་གཅིག་གི་རྩར་འདུས་སྟེ་གྲོས་བྱེད་པ་གསན་པས་འདྲེ་རྒན་པོ་ཅིག་ན་རེ་ཁ་བ་ཅན་གྱི་རྒྱལ་ཁམས་འདི་སངས་རྒྱས་ཀྱི་ཞབས་ཀྱིས་མ་བཅགས་གསུང་གིས་མ་ཁྱབ་པས་ངེད་རང་མི་མ་ཡིན་རྣམས་ལ་དབང་བ་ཡིན་པ་ལ་རྒྱལ་པོ་མགོ་གཉིས་པ་འདིས་ལམ་བཅད། ཉལ་ས་ཕྲོགས། ཆོས་ཁྲིམས་བྱས། ད་ངེད་རང་རྣམས་ཀྱང་ནུས་པ་སྐྱེད་ལ་དཀོན་མཆོག་སུམ་ལ་དད་པ་བྱེད་པའི་སྲོག་ཆོད། དགེ་བ་བྱེད་པ་ལ་མི་རུང་བ་ཐོང༌། ལྷ་ཁང་རྩིག་པ་ལ་རྡོ་ཆར་ཕོབ་ལས་ཤིག །དེ་སྔ་ཡང་བལ་བཟས་ལྷ་ཁང་བརྒྱ་རྩ་བརྒྱད་ཀྱི་རྨང་བཏིང་བ་བཤིག་པ་དེ་ཡང་ལེགས་སོ་ཟེར་ནས་གྱེས་སོང༌། ཕྱི་ནུབ་རྒྱལ་པོས་རྟེན་རང་བྱུང་ལ་གསོལ་བ་བཏབ་པས་ཁྲོ་ཞལ་ལས་འོད་དམར་ལྗང་གཉིས་ཀྱི་རྩེ་ལ་ཁྲོ་བོ་རྟ་མགྲིན་དང་བདུད་རྩི་འཁྱིལ་བ་གཉིས་བྱུང༌། དེ་གཉིས་ཀྱི་ཞལ་ནས་མེ་ཕུང་བྱུང་སྟེ་གནམ་ལྕགས་ཀྱི་ཐོག་ལྟར་འདྲེའི་འདུན་སའི་དུག་ཤིང་གི་སྡོང་པོ་ལ་ཕོག་པས་འགྱེལ་ཞིང་འཐོར། དུག་ཁོལ་བ་རླུང་གིས་གཏོར་སྟེ་འདྲེའི་འདུན་ཕུང་ཐམས་ཅད་འཐོར་ཞིང་བརྒྱལ། ཁྲོ་བོ་གཉིས་དང་བསྐལ་པའི་མེས་དེད་སྟེ་རྒྱ་མཚོའི་མཐར་བསྐྱལ། ཁྲོ་བོ་གཉིས་དང་མེ་ཕུང་ཟླ་བའི་བྲག་ལ་ཕོག་པས་འོད་དཔག་མེད། ཁཱརྶ་པཱ་ཎི། དཔལ་རྟ་མགྲིན་གསུམ་རང་བྱུང་དུ་ཤར། སང་ཉིན་རྒྱལ་པོས་དེར་བྱོན་སྟེ་མཆོད་པ་མཛད། སྤྱན་རས་གཟིགས་དབང་འཇིག་རྟེན་མགོན། །ཐུབ་པའི་དབང་པོས་སྤྱི་གཙུག་བརྒྱན། །སྐུ་མདོག་དཀར་གསལ་གངས་རི་འདྲ། །ཉོན་མོངས་མ་གོས་པདྨ་བཞིན། །ཐུགས་རྗེ་ཆེ་ཞིང་མཐུ་ལྡན་པ། །སེམས་ཅན་ཉམ་ཐག་ཕོངས་གུ་ཡི། །ནད་དང་སྡུག་བསྔལ་ཞི་མཛད་པ། །མགོན་དུ་གྱུར་ལ་ཕྱག་འཚལ་ལོ། །ཞེས་བསྟོད་ནས་སྐུ་རང་བྱུང་འོད་ཀྱི་རྣམ་པ་དེ་སླར་བལ་པོའི་གཟོ་བོས་འབུར་དོད་དུ་གསལ་བར་བརྐོས་པ་བྲག་ལྷ་(ཇ༣༨ན)

[Full Size]

བཙན་གདོང་དུ་གྲགས་སོ། །རྒྱལ་པོའི་ཞལ་ནས་འོད་ཟེར་གྱི་སྣེ་ལ་བྱུང་བའི་ཁྲོ་བོ་དེ་གཉིས་ཁྱོད་ཀྱིས་མཐོང་ངམ་ཞེས་གཟོ་བོ་ལ་དྲིས་པས་མཐོང་ལགས་ཟེར། དེ་གཉིས་ཀྱི་གཟུགས་གྱིས་ཅིག་གསུངས་སྟེ་རྟ་མགྲིན་དང་བདུད་རྩི་འཁྱིལ་བ་གཉིས་བྱས། ཐུགས་རྗེ་ཆེན་པོའི་འཁོར་ཉུང་བས་ད་དུང་གྱིས་ཅིག་གསུངས་ནས་འཇིག་རྟེན་དབང་ཕྱུག་དང༌། ཁཱརྶ་པཱ་ཎི། སྒྲོལ་མ་ཁྲོ་གཉེར་ཅན། འོད་ཟེར་ཅན། དབྱངས་ཅན་མ་རྣམས་བྱས། རང་བྱུང་ཐུགས་རྗེ་ཆེན་པོ་ལ་ལོངས་སྐུ་ཡན་ལག་གི་ཕྱག་སོ་བརྒྱད་ཀྱི་གཡས་བཅུ་དགུ་ན། རིན་ཆེན་ཞགས་པ་ལྷུང་བཟེད་དང༌། །རལ་གྲི་རྒྱ་གྲམ་མན་ཤེལ་དང༌། །ཆུ་ཤེལ་མདའ་ཞུ་ལྕུག་མ་དང༌། །རྔ་ཡབ་ཕུབ་བུམ་དགྲ་སྟ་ཕྲེང༌། །པད་སྔོན་སྤྱི་བླུགས་ཉི་མ་དང༌། །པད་དཀར་འབྲས་ཀྱི་སྙེ་མ་འོ། །གཡོན་བཅུ་དགུ་ན། སྤྲིན་དཀར་སྤྱི་བླུགས་པདྨ་སེར། །གྲི་མདུང་དབྱུག་པ་ཕྲེང་དྲིལ་བུ། །རྡོ་རྗེ་ལྕགས་ཀྱུ་འཁར་སིལ་དང༌། །སྤྲུལ་སྐུ་ལྷ་ཁང་གླེགས་བམ་དང༌། །འཁོར་ལོ་སྐུ་གཟུགས་ཤིང་ཐོག་དང༌། །པད་སྔོན་རིན་ཆེན་འཛིན་པ་འོ། །སྤྲུལ་སྐུའི་ཉིང་ཕྱག་སྟོང་མཆོག་སྦྱིན་གྱི་རྣམ་པའི་མཐིལ་དུ་སྤྱན་སྟོང་དང་བཅས་པ་ཡང་ཕྱིས་ཕུལ་ལོ། །ནུབ་ཕྱོགས་སུ་མཆོད་རྟེན་ཀྲེ་རུ་བརྩིགས་ནས་ནུབ་ཀྱི་ས་དགྲ་གནོན་པ་སོགས་ས་དགྲ་བཞི་མནན། དེ་རྗེས་ལྷ་ཁང་གི་རྨང་བཏིང་པས་ཡང་ཞིག་ནས་སྲིན་མོའི་དཔུང་པ་གཡོན་གནོན་པའི་ཕྱིར་ཡར་ལུངས་སུ་བྱོན་སྟེ་མཚོ་སོགས་ཁ་མི་ཆེ་བ་ཞིག་ལ་ཀླུ་གདུག་པ་ཅན་གནས་པ་དེ་སྐམ་པའི་ཤུལ་དུ་རྩིག་དགོས་པར་དགོངས་སྟེ་བོད་འབངས་བསགས་ནས་ཀླུ་འདི་སུས་འདུལ་ནུས་པ་ལ་བྱ་དགའ་ཆ་ཐང་དུ་སྟེར་རོ་ཞེས་བཀའ་བསྩལ་བས་སྔགས་པ་ཅོག་ལ་ཙུག་སྒྲ་ཙུག་སྣང་དང་བོན་པོ་ཚེ་མི་སྣང་གྲགས་འབྱུང་གྲགས་བྱ་བ་གཉིས་ཀྱིས་འདུལ་བར་ཞུས། ཟོ་དང་གོང་པོ་རི་ལ་དགྲ་བཅོམ་པ་འགོག་པ་ལ་ཞུགས་པ་བརྒྱ་རྩ་བརྒྱད་ཡོད་པས་དེར་ཁོང་གཉིས་ཀྱིས་ན་མཁའ་ལྡིང་བསྒྲུབས་ནས་རྒྱལ་པོ་ལ་ཞུས་སྟེ་མི་ཀུན་ཡང་ཀླུ་འདུལ་བའི་ཐབས་ལྟ་ཟེར་ནས་ཚོགས་པའི་ཚེ་བོན་པོ་ན་རེ་སྔོན་ལ་ངས་བཏུལ་གྱི་གལ་སྟེ་(ཇ༣༨བ)

[Full Size]

མ་ཐུལ་ན་ཁྱོད་ཀྱིས་བརྩོན་པ་སྐྱེད་ཅིག་ཟེར་སྟེ་ཆོ་ག་བྱས་མཉམ་པར་བཞག་པ་དང་དེ་མ་ཐག་བྱ་ཁྱུང་ཆེན་པོ་ཅིག་བྱུང་སྟེ་མཚོ་སྟེང་དུ་ལྡིང་བ་དང་མཚོ་འཁོལ་ཀླུ་སྦྲུལ་མགོ་ལྔ་པ་ཅིག་རོང་བྱུང་བས་བོན་པོ་ན་རེ་ངས་ནི་མ་འཐུལ་ལོ་ཅོག་ལ་ཁྱོད་ཀྱིས་བརྩོན་འགྲུས་སྐྱེད་ཅིག་ཟེར་སྟེ་སྔགས་པས་ཆོ་ག་བྱས་མཉམ་པར་བཞག་པ་དང་གནམ་རལ་པ་སྐད་ས་གྲུམ་པ་སྐད་དུ་སྒྲ་ཆེན་པོ་གྲག་སྐྱེ་བོ་ཐམས་ཅད་བྱེར། ས་གཞི་འགུལ། འདབ་ཆགས་ཐམས་ཅད་ཀྱང་འཕུར་སྟེ་ན་མཁའ་ནས་བྱ་ཁྲ་འདྲ་བ་ལ་སྐད་འབྲུག་ལྟར་འདོན་པ་ཅིག་བྱུང་ནས་བྱ་དེའི་གཤོག་པ་སྤུ་གྲི་ལྟ་བུས་སྦྲུལ་མགོ་ལྔ་སྐད་ཅིག་གིས་བཅད་དེ་མཚོ་ཁྲག་དུ་ཉོག་སོང་ནས་བྱེ་མ་ལ་ཆུ་ཕོ་བ་ལྟར་སྐམ་པའི་ཤུལ་ན་རིན་པོ་ཆེའི་ཁྲོན་པ་འདུག་པའི་དབུས་སུ་རིན་པོ་ཆེ་དབང་གི་རྒྱལ་པོ་སྦས། བཅོམ་ལྡན་འདས་འོད་དཔག་དུ་མེད་པ་ལ་མཆོད་པ་ཕུལ། གཙང་ཁང་ཁྲོ་ཆུའི་ཕ་གུས་ཕུབ། ཕྱོགས་བཞིར་གསང་ཁུང་བཞི་སྒྲོམ་དུ་བྱས་པའི་སྒྲོམ་ཁར་མཆོད་རྟེན་བརྩིགས། གནོད་སྦྱིན་ཕོ་མོ་བྲན་དུ་བཀོལ་སྟེ་དེའི་སྟེང་དུ་བརྩིགས་སྟེ་གསང་བ་འདུས་པའི་ལྷ་བཅུ་དགུ་པའི་ལུགས་སུ་བཞེངས། གཙོ་བོ་གསུམ་ནི་རྡོ་སྐུ་རང་བྱུང་ཟོ་དང་གོང་པོ་རི་ནས་སྤྱན་དྲངས་པ་སླར་གཟོ་བོས་རྣམ་པ་དོད་པར་བརྐོས་པས་རྡོ་ཕྱེ་རྣམས་རིང་སྲེལ་དུ་སོང་སྐད། འཁོར་སེམས་དཔའ་རྣམས་ལི་ཡུལ་གྱི་སྤྲུལ་པའི་གཟོ་བོས་ལི་ལས་ལུགས་སུ་བླུག་པ་རིན་པོ་ཆེའི་ཕྲ་ཅན་བལ་ཡུལ་ནས་ཞབས་ཀྱིས་བྱོན། འཇམ་དཔལ་ཆོས་དབྱིངས་གསུང་དབང་བལ་ཡུལ་དུ་བཞུགས་པའི་ཚབ་རྡོ་སྐུ་རང་བྱུང་ཞིག་བྱོན། གསེར་བྱེ་བརྒྱད། བདུན། དྲུག་ལྔ། བཞི་རྣམས་ལ་གནོད་སྦྱིན་གྱི་གཟོ་བོས་བླུག་སྟེ་རིམ་པར་རྣམ་སྣང༌། རྡོར་སེམས། རིན་འབྱུང༌། སྣང་མཐའ། དོན་གྲུབ་རྣམས་ཆ་ལུགས་མི་འདྲ་བར་བཞེངས་སྟེ་འོད་དཔག་མེད་རིན་པོ་ཆེའི་གཏེར་ཁང་ན་བཞུགས། གཞན་བཞི་དང་རྒྱལ་པོའི་སྐུ་འབག་གཙང་ཁང་ན་བཞུགས། བོད་འབངས་ཀྱི་དུས་མ་ཡིན་པའི་འཆི་བ་ཟློག་པའི་ཕྱིར་ལྷ་མོ་ཡིད་བཞིན་འཁོར་ལོ་དང༌། རིན་པོ་ཆེའི་གཏེར་(ཇ༣༩ན)

[Full Size]

ཁ་དབྱེ་བ་དང་ལས་སྒོ་རྣམས་འདུ་བའི་ཕྱིར་གནོད་སྦྱིན་ཆུ་དབང་གི་སྐུ་བྱས། རྒྱལ་པོའི་དཀོར་མཛོད་ཆེན་པོ་གཅིག་ཡང་གཏེར་ཁང་དུ་སྦས། ཚངས་པ་དུང་གི་ཐོར་ཚུགས་ཅན་ལ་གཉེར་དུ་གཏད། སྔགས་པའི་སྒྲིབ་པ་སྦྱོང་བ་དང་ཀླུ་དེའི་དོན་དུ་མཆོད་རྟེན་རྩེ་ལྔ་པ་བཞེངས་སྟེ་ཀླུ་དེ་ལྷར་སྐྱེས། བྱམས་པ་མི་འགྱུར་བའི་ལྷ་ཁང་ཞེས་མཚན་བཏགས་ལ་ཀླུ་བཏུལ་བའི་བྱའི་མིང་གིས་སྤྱིར་ཁྲ་འབྲུག་དུ་གྲགས་སྟེ་བོད་ཀྱི་ལྷ་ཁང་བརྩིག་པ་ལ་སྔ་ཞིང་འཇིག་པ་ལ་འཕྱི་བ་ཡིན་ལ་རྒྱལ་པོའི་ཐུགས་དམ་གྱི་སྙིང་པོ་གཙུག་ལག་ཁང་ཐམས་ཅད་ཀྱི་རྩ་བ་ཡིན་ནོ། །ཚེ་སྤོང་བཙན་འདྲ་དོང་ཆུང་བྱ་བ་བློན་པོ་ཅིག་གིས་ཀྱང་ལྷ་ཁང་གློ་འབུར་ཞིག་བྱས་སོ། །དེར་རྒྱལ་པོའི་ཞལ་ནས་ངའི་ཐུགས་དམ་གྱི་ལྷ་ཁང་འདི་འཛམ་གླིང་ན་བྱིན་ཆེ་བ་ཡིན། འདི་ལ་དད་ཅན་གྱིས་མཆོད་པ་ཕུལ་སྟེ་གསོལ་བ་བཏབ་ན་ཅི་འདོད་ཀྱང་མི་འགྲུབ་པ་མི་སྲིད། ལྷ་ཁང་ཐམས་ཅད་ཀྱི་ཡང་སྙིང་ཡིན་ཡང་འདི་ལ་རྒྱན་སྲུངས་པ་ཅིག་མེད་ཅེས་བཀའ་བསྩལ་བས་བལ་པོའི་གཟོ་བོ་ན་རེ་ངེད་ཀྱི་ལྷོ་བལ་ན་བྷ་དནྟ་ཅེས་བྱ་བ་དབུ་རེག་ཞབས་རྗེན་ངུར་སྨྲིག་གི་ན་བཟའ་ཅན་དེ་བཞིན་གཤེགས་པའི་ཆ་ལུགས་སུ་བཞུགས་པ་ལྷ་མིའི་མཆོད་གནས་མང་པོ་ཡོད། དེ་ལྟ་བུ་ཡོད་ན་རྒྱན་སྲུང་བ་འོང་པ་ལ་ཟེར་བས་རྒྱལ་པོ་ཕྱག་ཐལ་མོ་སྦྱར་སྟེ་རབ་ཏུ་བྱུང་བ་དེ་ལྟ་བུའི་གཟུགས་འཆང་བ་ཙམ་ལ་ཡང་ང་སྤྱི་བོས་བཏུད་དེ་བྱའོ་ཞེས་ཕྱག་འཚལ་བར་མཛད་ཏོ་ཅེས་དམ་བཅའ་མཛད་ཏོ། །སང་ཉིན་རྒྱལ་པོ་འཁོར་བཅས་ཕྱི་རོལ་ཏུ་བྱོན་པ་དང་མཆོད་རྟེན་རྩེ་ལྔའི་འགྲམ་ན་དགེ་སློང་གི་ཆ་བྱད་ཅན་མགོ་བོ་ཆེ་བ་དཔྲལ་བ་འབུར་བ་སྣ་ཉག་ཞིང་མིག་ཚག་པ་སྟོད་ཆུང་ཞིང་སྨད་ཆེ་ལ་ཚང་ར་འབུར་བ་ཞིག་ཚེམ་བུ་འཚེམ་ཞིང་འདུག་པ་གཟིགས་པས་ངས་རབ་བྱུང་གི་རྟགས་ཙམ་འཛིན་པ་ལ་ཡང་ཕྱག་འཚལ་བར་དམ་བཅས་ན་འདི་རབ་ཏུ་བྱུང་བ་དངོས་ལ་ཅིའི་ཕྱིར་མི་བྱ་དགོངས་ལ། འོན་ཡང་འདི་གཟུགས་བྱད་ངན་པས་བློན་པོ་རྣམས་དད་པ་ལྡོག་སྟེ་འོང་དགོངས་ནས་མཆོད་རྟེན་གྱི་ཕག་དུ་དེའི་ཞབས་ལ་བཏུགས་སྟེ་ཕྱག་མཛད་(ཇ༣༩བ)

[Full Size]

ནས་བཞེངས་སྟེ། ང་ས་བདག་གི་རྒྱལ་པོས་ཁྱེད་དགེ་སྦྱོང་གི་ཞབས་ལ་མགོས་བཏུགས་ནས་ཕྱག་བྱས་པ་འདི་ངོ་མཚར་མི་ཆེའམ་གསུངས་པས་དགེ་སྦྱོང་དེ་ན་རེ། དེ་ངོ་མཚར་ཆེ་སྟེ་ངའི་རྫུ་འཕྲུལ་འདི་ཡང་ངོ་མཚར་མི་ཆེའམ་ཟེར་ནས་མཆོད་རྟེན་རྩེ་ལྔ་ལག་པ་གཡས་པས་ན་མཁའ་ལ་ཡེར་གྱིས་བཏེག །རྒྱལ་པོས་དེ་ཡང་ངོ་མཚར་ཆེ་སྟེ་ང་སྐྱེ་བོ་ཐ་མལ་པའི་མགོ་ལ་སངས་རྒྱས་བཞུགས་པ་འདི་ངོ་མཚར་མི་ཆེའམ་ཞེས་ལ་ཐོད་ཕུད་དེ་ཨ་མི་ཏཱ་བྷའི་ཞལ་བསྟན་པས་དེ་ན་རེ་རྒྱལ་པོ་ལ་ལྷ་གཅིག་ལས་མི་འདུག་ང་ལ་འདི་ཙམ་ཡོད་ཟེར་ནས་ལྷན་པ་འདྲ་བའི་གྲི་གུས་བྲང་ཁ་ཕྱེ་སྟེ་འདུས་པའི་ལྷ་ཚོགས་བཅུ་དགུ་ལམ་གྱིས་བསྟན་པས་རྒྱལ་པོ་རབ་ཏུ་དགྱེས་སྟེ་རབ་ཏུ་བྱུང་བ་རྣམས་ལ་ཡོན་ཏན་འདི་ལྟ་བུ་ཡོད་ཀྱིས་ངའི་འབངས་ཐམས་ཅད་ཀྱིས་རབ་བྱུང་གི་རྟགས་འཛིན་ཙམ་མཐོང་ནའང་ཞབས་སྤྱི་བོར་ལོང་ཞིག་ཞེས་དྲིལ་བསྒྲགས་སོ། །འདིས་ནི་དགེ་སྦྱོང་ཟུགས་བྱད་ངན་ཡང་ཡོན་ཏན་བསམ་གྱིས་མི་ཁྱབ་པས་བརྙས་པ་སྤང་དགོས་པ་དང་རྒྱལ་པོས་ཀྱང་སྤྱན་རས་གཟིགས་སུ་དོན་གྱིས་ཞལ་བཞེས་པ་དང་སྤྲུལ་པའི་དགེ་སློང་དེས་ཀྱང་རྒྱལ་པོའི་ལྷ་ཁང་དང་ང་མཉམ་བྱ་བར་བསྟན་པ་ཡིན་ནོ། །ཁྲ་འབྲུག་གི་ཡན་ལག་དུ་ཙམ་ཐང་བཏབ། སྲིན་མོའི་དཔུང་མགོ་གཡས་གནོན་པ་ལ་ཙེ་ནེ་གདོང་དུ་སྒྲུབ་པ་བྱས་ནས་དབུ་རུ་ཀ་ཚལ་དང་ཡན་ལག་དུ་གསེར་ཤང་གིར་སྟེ་བཞེངས། དཔྱི་གཡས་གཡོན་གནོན་པ་ལ་རྩེ་ཕུག་དང་བརྒྱད་ཕུག་དུ་སྒྲུབ་པ་བྱས་སྟེ་གཡས་རུར་གཙང་འགྲམ་དང་ཡན་ལག་དུ་དགེ་དྲུང་གི་ལྷ་ཁང༌། རུ་ལག་དུ་གྲོམ་པ་རྒྱང་དང་ཡན་ལག་དུ་འབྲི་ལྷ་ཁང་རྣམས་བཞེངས་སྟེ་མཐའ་འདུལ་གྱི་གཙུག་ལག་ཁང་བཞིའོ། །གྲུ་མོ་གཡས་པ་ལ་ཤར་སྟག་གི་མགོར་ཀོང་པོ་བུ་ཆུ། གཡོན་པ་ལ་ལྷོ་འབྲུག་གི་ཟེ་སྟེང་དུ་ལྷོ་བྲག་ཁོ་ཐིང༌། པུས་མོ་གཡས་པ་ལ་ནུབ་བྱ་དམར་པོའི་སྐས་སྟེང་དུ་དགེ་རྒྱས། གཡོན་པ་ལ་བྱང་རུས་སྦལ་གྱི་དཔྲལ་སྟེང་དུ་པྲ་དན་ཙེའི་ལྷ་ཁང་བཏབ་སྟེ་ཡང་འདུལ་བཞིའོ། །ལག་མཐིལ་གཡས་གནོན་པ་ལ་མི་ཉག་གིས་ལག་དཔོན་བྱས་སྟེ་ཁམས་ཀློང་ཐང་སྒྲོན་མ། གཡོན་(ཇ༤༠ན)

[Full Size]

ལ་ཐོ་གར་གྱིས་ལག་དཔོན་བྱས་སྟེ་མོན་སྐྱེར་ཆུ། རྐང་མཐིལ་གཡས་ལ་ཧོར་གྱིས་ལག་དཔོན་བྱས་སྟེ་མཚལ་རིགས་སྒྲོན་མ། གཡོན་ལ་བལ་པོས་ལག་དཔོན་བྱས་སྟེ་ཚངས་པ་རླུང་གནོན་གྱི་ལྷ་ཁང་བཞེངས་སྟེ་རུ་གནོན་གྱི་གཙུག་ལག་ཁང་བཞིའོ། །ཤར་དུ་སའི་ཁ་གནོན་ཉི་ཟླ་གཟའ་སྐར་གཏན་ལ་འབེབས་པའི་ཕྱིར་ཀ་ཆུ་ཀམ་ཆུ་གླིང་ཆུ་གསུམ། ལྷོར་མེའི་ཁ་གནོན་སྣང་གྲོ་དང་གློང་ཐང་གཉིས། ནུབ་ཏུ་ཆུའི་ཁ་གནོན་གུ་ལང་དང་ཤིང་ཀུན་གཉིས། བྱང་དུ་རླུང་གི་ཁ་གནོན་དགེ་རི་དང་དཔལ་རི་གཉིས་སྟེ་འབྱུང་བའི་ཁ་གནོན་གྱི་གཙུག་ལག་ཁང་དགུའོ། །ཡེར་པའི་དཀར་ཆག་ལ་སྟོད་དམར་པོའི་གཏེར་མ་ལས། རྒྱལ་པོའི་ཞལ་ནས་བོད་མུན་པའི་སྨག་རུམ་གདོང་དམར་སྲིན་པོའི་ཡུལ་ལྷ་འདྲེ་མཐུ་ཆེ་བས་ས་རྡོ་ཐམས་ཅད་བདག་དུ་བཟུང༌། ཁ་བ་དང་སེར་བ་མོད། བཙའ་དང་མུ་གེ་བཟན། ཉོན་མོངས་ཆེ། ཚེ་ཐུང༌། ལེགས་པ་སློབ་པ་ལ་དགྲར་བལྟ། ཉེས་པ་སློབ་པ་ལ་ངོ་སོ་བསྟོད། འདི་འདྲ་བའི་ས་ཕྱོགས་ཡ་ང་བར་བདག་གི་ལྷ་ཐུགས་རྗེ་ཆེན་པོ་མ་གཏོགས་གཞན་གྱིས་མི་སྐྱོབ་པས་ཁྱོད་རང་ངའི་རྗེས་འཇུག་ཀུན་དར་ཅིག་གསན་དང་ཨ་པི་གསུངས་པས་བལ་མོ་བཟའས་ཀྱེ་ཧོ་ལྷ་ཐུགས་རྗེ་ཆེན་པོ་ཁྱེད་རང་མ་ལགས་སམ། སེམས་ཅན་གྱི་དོན་ལ་ཅང་སུན་ནམ། སེམས་ཅན་རྣམས་དྲོངས། དམ་ཆོས་ཀྱི་སྒྲོན་མེ་སྦོར། ལྷ་ཁང་བརྒྱ་རྩ་བཞེངས། བདག་ཡང་གཞན་དོན་ལས་ཡེངས་པ་མེད་ཀྱིས་གང་མོས་ཀྱི་ཐབས་ཀྱིས་འདུལ་ལོ་གསུངས། ཀོང་ཇོའི་ཞལ་ནས་ཀྱེ་ཧོ་ལྷ་ཐུགས་རྗེ་ཆེན་པོ་ཀ་ཁྱེད་རང་ལགས་མོད། འགྲོ་དོན་ལ་ཐུགས་མ་གཡེལ། བདག་གིས་ཀྱང་འཕྲིན་ལས་ཐམས་ཅད་སྒྲུབ་བོ་ཅེས་སྒྲོལ་མ་ཕྱག་སྟོང་སྤྱན་སྟོང་དུ་གྱུར་ནས་བོད་འོད་ཟེར་གྱིས་བཀང༌། བདུད་རྩིའི་ཆར་ཕབ་པས་རྩི་ཐོག་སྨིན། མེ་ཏོག་ཐམས་ཅད་ཁ་བྱེ། རྩི་ཤིང་ནགས་ཚལ་ནེ་གསིང་ཆུ་བོ་ཐམས་ཅད་རྒྱས། ཐམས་ཅད་ལུས་སེམས་བདེ་བ་རྙེད་དོ། །དེ་ནས་ར་ས་རྩིག་པར་བརྩམས་པས་ལྷ་འདྲེས་རྩིག་(ཇ༤༠བ)

[Full Size]

དུ་མ་སྟེར། ས་རྡོ་བཞག་ཚད་ན་མཁའ་ལ་འཕངས། རླུང་གིས་བརྡབས། ས་གཞི་གཡོས། མི་ཐམས་ཅད་དཔའ་འཁུམས། ལྷ་སྲིན་ཐམས་ཅད་སོ་སྒྲ་དང་ཆ་སྒྲ་སྒྲོག་པའི་ཚེ་སྤྲུལ་པའི་རྒྱལ་པོས་ཡི་དམ་ལ་མཆོད་པ་བཤམས། དཔང་བཙུགས་དམ་བརྡར་བས་སྤྱན་རས་གཟིགས་ཕྱག་སྟོང་སྤྱན་སྟོང་ཞིག་ན་མཁའ་ལ་བྱོན་ནས་སྤྱན་ཡེར་པའི་རི་ལ་གཟིགས་ཐུགས་ཡེར་བའི་བྲག་ལ་གཏད། ཁྲོ་གཉེར་ཅན་དང་སྒྲོལ་མས་ཡེར་པ་ཞབས་ཀྱིས་བཅགས། ཆོས་སྐྱོང་རྣམས་ཀྱིས་འཕྲིན་ལས་སྒྲུབ་པར་ཞལ་གྱིས་བཞེས། ལྷ་འདྲེ་ཐམས་ཅད་ཀྱིས་རྒྱལ་པོ་ལ་ཕྱག་འཚལ་སྟེ་བཀའ་འབངས་སུ་ཁས་བླངས། ལྷའི་མེ་ཏོག་དང་སྤོས་ཀྱི་ཆར་བྱུང༌། ཡེར་པར་བྲག་ལྷ་མགོན་པོ་རང་བྱུང་དུ་བྱོན། བདུད་རྩིའི་ཆུ་རྒྱུན་རྣམས་རང་བྱུང་དུ་བརྡོལ་བས་ལྷ་སའི་ས་ཕུད་ཤིང་ཕུད་རྡོ་ཕུད་སོགས་ལས་ཡེར་པའི་བྲག་རྡོ་རྗེ་རྩེ་ལྔ་རང་བྱུང་གི་རྨང་དུ་སྐུའི་རྟེན་སྤེའུ་དམར་སེར་གཉིས། གསུང་གི་རྟེན་ཡིག་དྲུག་འབུམ། ཐུགས་ཀྱི་རྟེན་མཆོད་རྟེན་གསུམ་བཞེངས། ཆོས་སྐྱོང་གི་རྟེན་ཤུག་པའི་ནགས་ཚལ་བཙུགས། ཏིང་ངེ་འཛིན་སྒོམ་པ་ལ་འོད་ཀྱི་བྲག་ཕུག་བརྒྱ་རྩ་བརྒྱད་སྤྲུལ། འཕྲིན་ལས་ཀྱི་རྟེན་དུ་རི་བོ་སྒྲོལ་མའི་སྐུར་སྤྲུལ། དབང་དུ་སྡུད་པའི་ཕྱིར་སྤང་རི་ཁྲོ་མོར་སྤྲུལ། ནད་སེལ་བའི་ཕྱིར་ཆུ་རྣམས་བདུད་རྩིར་བསྒྱུར། དེའི་ཚེ་རྒྱལ་པོ་ཉིད་སྤྱན་རས་གཟིགས་ཕྱག་སྟོང་སྤྱན་སྟོང་པར་གྱུར་ནས་འོད་ཟེར་གྱིས་སྔགས་ཕྱི་ནང་གི་ལྷ་ཚོགས་སངས་རྒྱས་བྱང་སེམས་ཐམས་ཅད་སྤྱན་དྲངས་ནས་བསྟན་པས་ས་རྡོ་ཐམས་ཅད་ལྷར་བྱིན་གྱིས་བརླབས། ཁྲོ་གཉེར་ཅན་དང་སྒྲོལ་མའི་ཐུགས་ཀ་ནས་མེ་ཏོག་གི་ཆར་ཕབ། ན་མཁའ་ནས་བཀྲ་ཤིས་ཀྱི་སྒྲ་སྒྲོག་རོལ་མོ་རྣམས་ལ་དཀྲོལ་བར་སྒྲ་འབྱིན། ལྷ་འདྲེ་རྣམས་ཀྱིས་བཀའ་སྲུང་དུ་ཁས་བླངས། དེར་འདུས་པ་ཐམས་ཅད་བདེ་བ་ཅན་དུ་སྐྱེ་བར་ལུང་བསྟན་ཏོ། །གཞན་ཡང་མཐའ་འདུལ་སོགས་ཀྱི་ལྷ་ཁང་ཐམས་ཅད་ཀྱི་ས་ཕུད་ཀྱང་ཡེར་པར་བསྐྱལ་ལོ། །ཞེས་(ཇ༤༡ན)

[Full Size]

བྱུང་ངོ༌། །དེ་ལྟར་བོད་ཡུལ་ས་གཞི་བྱིན་རླབས་ནས། །སྤྲུལ་པའི་གཙུག་ལག་ཁང་ཆེན་རྨང་བཏིང་སྟེ། །དགེ་རྩ་ཡོངས་སུ་རྫོགས་ཕྱིར་གྲུ་བཞི་པ། །བྱང་ཆུབ་ཕྱོགས་ཆོས་རེ་མིག་སུམ་བཅུ་བདུན། །ཆོས་ཉིད་མི་འགྱུར་བརྟན་པས་གཡུང་དྲུང་རིས། །མཐར་ཐུག་འབྲས་བུ་སྟོན་ཕྱིར་དབུས་དཀྱིལ་འཁོར། །རྒྱ་ཡི་ཧེན་ཁང་བི་ཧར་ཇི་ལྟ་བར། །རྒྱ་མཚོའི་གྲུ་གཟིངས་འབྲིང་པོའི་ཚད་དུ་བཏིང༌། །རྒྱལ་པོས་སྐུ་ཡི་བཀོད་པ་ལྔ་སྟོང་སྤྲུལ། །རྩིག་པ་ཤིང་གཟོ་ཐོག་དབུབ་ལ་སོགས་པ། །འོག་ཁང་ཉིན་ཞག་གཉིས་ཀྱིས་ཚར་བར་མཛད། །བོད་འབངས་སྣང་ངོར་ཆར་ཟིམ་འབབ་པ་ཡི། །ན་བུན་གསེབ་ན་སྐྱེ་བོ་ལས་བྱེད་ཀྱི། །སྒྲ་སྐད་སྣ་ཚོགས་སྒྲོག་པ་ཙམ་དུ་སྣང༌། །མ་མགོན་ཀླུ་སྲིན་གནོད་སྦྱིན་དྲི་ཟ་ཡིས། །གཙུག་ལག་ཁང་གི་སྲུང་མར་ཁས་བླངས་ཅིང༌། །སོ་སོའི་གཟུགས་ཀྱང་དགྱིད་པར་གསོལ་བ་བཏབ། །སྒོ་ནི་ནུབ་ཕྱོགས་བལ་པོའི་ཡུལ་དུ་གཏད། །དགའ་བཞི་འཕྲུལ་གྱི་ལྷ་ཁང་ར་སར་གྲགས། །རྒྱལ་པོའི་ཐུགས་དམ་རང་བྱུང་བཅུ་གཅིག་ཞལ། །གང་དུ་བཞུགས་ཅེས་གཙང་ཁང་རྣམས་གཟིགས་ཚེ། །གཙང་ཁང་དབུས་མར་འགྲོ་སྐྱོབ་གཙོ་འཁོར་བཅུ། །ཁྲོ་བོ་གཉིས་དང་བཅས་སྟེ་བཞུགས་པར་གཟིགས། །གཡས་མར་སྣང་མཐའ་གཙོ་འཁོར་བཅུ་གཅིག་དང༌། །གཡོན་ན་བྱམས་པ་མཆོད་པའི་ལྷ་མོས་བསྐོར། །གཙང་ཁང་ལྷོ་ན་ཐུབ་དབང་གཙོ་འཁོར་དགུ། །ཀུན་ཡང་དམ་ཆོས་སྟོན་ཞིང་བགྲོ་བར་གཟིགས། །གཙང་ཁང་བྱང་མ་ལེགས་ཅིང་ངོ་མཚར་བ། །དེ་ན་ལྷ་གཞན་སུ་ཡང་མི་སྣང་བས། །ནང་པར་ཡི་དམ་རང་བྱུང་གཙོ་འཁོར་རྣམས། །སྤྱན་དྲངས་དགོངས་པའི་ནུབ་མོ་ལྷ་རྣམས་ཀུན། །རང་རང་ཞབས་ཀྱིས་གཤེགས་སྟེ་དེ་ན་བཞུགས། །རི་མོ་བྲི་བར་བཀའ་ཡིས་བསྒོས་པའི་ཚེ། ཁཱརྶ་པཱ་(ཇ༤༡བ)

[Full Size]

ཎི་འཇིགས་པ་བརྒྱད་སྐྱོབ་དང༌། །གང་ལ་དེས་འདུལ་གླིང་གཉིས་རང་བྱུང་ཤར། །ལྷག་མ་བེ་བུམ་བརྒྱ་རྩའི་ཚུལ་བཞིན་བྲིས། །དེ་ནས་སྤྲུལ་པའི་ལྷ་གཅིག་ཁྲི་བཙུན་གྱིས། །སྐུ་གཟུགས་རྣམས་དང་ར་སའི་སྟེང་ཁང་མཛད། །སྒྲོལ་མའི་ངོ་བོ་ལྷ་གཅིག་ཀོང་ཇོ་ཡིས། །རྒྱ་སྟག་ར་མོ་ཆེ་ཡི་ལྷ་ཁང་བཞེངས། །གཞན་ཡང་བཙུན་མོ་གསུམ་གྱིས་རང་རང་གི །ཐུགས་དམ་ལྷ་ཁང་རེ་རེ་སོ་སོར་བརྩིགས། །དེ་ཚེ་སྤྲུལ་པའི་རྒྱལ་པོས་བོད་འབངས་ཀུན། །བསོད་ནམས་བསག་ཞིང་སྔོན་ཚེ་རྒྱ་བལ་ལ། །ཞལ་གྱིས་བཞེས་པའི་ཆད་མདོ་བཙན་པའི་ཕྱིར། །སྐུ་ཡི་སྤྲུལ་པ་ལྔ་སྟོང་སོ་སོར་བཀྱེ། །ཤར་ནུབ་སྒོ་བསྟན་ལྷ་ཁང་བརྒྱ་རྩ་རེ། །ཐ་མ་ཡོངས་རྫོགས་རབ་དགའི་ལྷ་ཁང་བར། །བོད་འབངས་ཡུལ་གྲུ་ཕལ་ཆེར་ཁྱབ་པར་མཛད། །དགེ་བཅུའི་བཀའ་ཁྲིམས་བཙན་ཞིང་དམ་པར་བསྡམས། །རིན་ཆེན་གཏེར་ཕྱུང་ས་རྡོ་བཞིན་དུ་སྤྱོད། །འདོད་ཡོན་རྩེ་དགའ་ལྷ་དང་འདྲ་བར་གྱུར། །དེ་ཡང་རྒྱལ་པོ་ཡབ་ཡུམ་གསུམ་དགུང་ལོ་བཅུ་དྲུག་ལོན་པ་ཆུ་ཕོ་འབྲུག་ལོ་ལ་བལ་བཟའ་ཕེབས། ཉི་ཤུ་པ་མེ་སྤྲེ་ལ་རྒྱ་བཟའ་ཕེབས། ཉེར་གཉིས་པ་ས་ཁྱི་ལ་འོ་ཐང་གི་མཚོ་བསུབས། ཉེར་གསུམ་པ་ས་མོ་ཕག་ལོ་ལ་རྨང་བཏིང་བ་སྟེ། དེ་ཡང་རྒྱལ་པོའི་ཞལ་ནས་བོད་འབངས་རྣམས་ངའི་གཙུག་ལག་ཁང་བཞེང་བའི་གྲོགས་བྱ་དགོས་སོ་ཞེས་བཀའ་བསྩལ་བས་ཐམས་ཅད་ཡུལ་གྲུ་སོ་སོར་འདུས་ནས་ལྷ་ཁང་རྩིག་པའི་འདུན་མ་བྱེད་དོ། །དེའི་ཚེ་རྒྱལ་པོས་སྐུའི་བཀོད་པ་ལྔ་སྟོང་བཀྱེ་ནས་རྒྱའི་ཧེན་ཁང་བི་ཧར་ལ་དཔེ་བླངས་རྒྱ་མཚོའི་གྲུ་གཟིངས་འབྲིང་གི་ཚད་དུ་རྨང་བཏིང་སྟེ་རབ་བྱུང་གི་དོན་དུ་འདུལ་བའི་ལུགས་དྲི་གཙང་ཁང་དང་བཅས་པ་བྱང་ཕྱོགས་སོ་བདུན་མཚོན་པའི་རེ་མིག་སོ་བདུན་དུ་མཛད། སྐྱེ་བོ་སྤྱིའི་དོན་དུ་ཆོས་གང་བྱེད་ལམ་གྱི་སྒྲོས་ཚང་བར་བྱེད་དགོས་པའི་བརྡར་ཕྱི་གྲུ་བཞིར་མཛད། བོན་པོའི་དོན་དང་ཆོས་ཉིད་མི་འགྱུར་བ་མཚོན་ཕྱིར་ཟུར་བཞི་གཡུང་དྲུང་རིས། སྔགས་པའི་དོན་དང་འབྲས་བུ་སངས་རྒྱས་ཀྱི་ས་མཚོན་པའི་ཕྱིར་དབུས་སུ་ངག་གི་དབང་(ཇ༤༢ན)

[Full Size]

ཕྱུག་དྲག་པོའི་དཀྱིལ་འཁོར་གྱི་ཚུལ་དུ་མཛད་སྟེ་སྐྱེ་བོ་སྤྱིས་མི་མཐོང་བའི་ཕྱིར་ན་བུན་འཁྲིག་ཅིང་ཆར་ཟིམ་བུ་འབབ་པའི་གསེབ་ན་ཅོ་འདྲེན་པ་སོགས་ཁུ་དི་རི་རི་མང་པོ་བྱུང་བ་གཞན་རྣམས་ཀྱིས་ཐོས་སྟེ་སྤྲུལ་པ་རྣམས་ཀྱིས་སོ་ཕག་གིས་ར་སའི་འོག་ཁང་ཉིན་གཅིག་ལ་བརྩིགས་སྟེ་ན་བུན་སངས་ནས་བློན་འབངས་རྣམས་ཀྱིས་རྩིག་དུ་ཕྱིན་པ་ན་རྩིག་པ་ཟིན་འདུག་སྐད། རྒྱལ་པོའི་ཞལ་ནས་ནང་པར་བོད་འབངས་རྣམས་ཀྱིས་ངའི་ལྷ་ཁང་གི་ཤིང་ཆོད་ཅིག་གསུངས་ནས་དེའི་འདུན་མ་བྱེད་པའི་ཚེ་སྤྲུལ་པ་ལྔ་སྟོང་གིས་ནུབ་མོ་དེ་ཀ་ལ་ལྷ་ཁང་ཤིང་གིས་བཀང་ནས་འདུག །ནང་པར་གཟོ་བོ་སྤྲུལ་པ་སུམ་བརྒྱ་བཀྱེ་སྟེ་ཤིང་གཟོ་རྣམས་མཛད་པའི་ཚེ་ལྷ་གཅིག་ཁྲི་བཙུན་སྐྲ་འཁྲུ་བས་རྒྱལ་པོའི་བསང་བུ་འདྲེན་མ་ཁོམ་སྟེ་བྲན་མོ་ལ་དངུལ་གཞོང་དུ་ཤ་སར་དང་མར་སར་ལ་སོགས་པ་གཡོས་སྣ་བཅུ་གསུམ་དང་འབྲས་ཆན་དང་རྒུན་ཆང་སོགས་ཀྱི་བསང་བུ་འདྲེན་དུ་བཏང་བས་ངོ་མི་ཤེས་པའི་གཟོ་བོ་སུམ་བརྒྱ་གཟོ་བྱེད་པ་མཐོང་བས་རྒྱལ་པོ་ངོ་མ་ཤེས་སྟེ་ལོག །དེར་ལྷ་གཅིག་ཁྲི་བཙུན་རང་འདྲེན་དུ་སོང་བའི་ཕྱིར་གཡོག་མོས་བལྟར་ཕྱིན་པས་ལྷ་གཅིག་སྤྲུལ་པའི་གཟོ་བོ་རྣམས་ལ་འགོངས་ཅིང་སོང་སྟེ་དབུས་ཀྱི་དཀྱིལ་འཁོར་སྟེང་ན་རྒྱལ་པོ་བེར་ནག་གྱོན་པ་ལ་ཐོད་དམར་པོ་ཅན་འཕྲུལ་ཐིག་གི་སྣ་ནས་ཕྱག་གིས་བཟུང་བ་ཞིག་ལ་དྲངས། དེས་བསང་བུ་བླངས་པས་འཕྲུལ་ཐིག་ལྷོད་སོང་སྟེ་གཟོ་བོ་སུམ་བརྒྱ་པོ་འགྱེལ་ནས་འཇག་མ་ཉུག་ཉུག་ཐི་གུ་ཟིང་ངེ་བྱུང་བ་མཐོང་ནས་བྲན་མོས་རྒྱལ་པོའི་གཟོ་བོ་འཕྲུལ་དུ་སྣང་བ་བྱས་བགད་པས་རྒྱལ་པོ་སྤྱན་ཡངས་པས་སྟེའུ་གཅིག་ཐལ། གསོར་ཁ་གཅིག་ཐལ། སོག་ལེ་གཅིག་ཐལ་བས་གཟོ་བོ་བརྒྱས་སེང་གེ་བརྒྱའི་སྣ་ཆད། བུག་པ་བརྒྱ་ཕུག་ཀ་བ་བརྒྱའི་ཟུར་ཉམས་སོ། །དེར་རྒྱལ་པོའི་ཞལ་ནས་འབངས་མོ་མ་ཚུགས་པས་ངའི་སྤྲུལ་པ་ངོ་ཤེས་སོ་གསུངས་ནས་སྤྲུལ་པ་བཤིག་པས་གཞན་རྣམས་ཀྱིས་རྒྱལ་པོས་ཤིང་དང་འདག་པའི་མི་ལ་སྟ་རེ་བརྒྱབ་པས་ཤི་བར་མཐོང༌། བློན་པོ་རྣམས་ཀྱིས་ཤིང་གཟོ་བོ་རྣམས་རྩིག་ཕུག་ན་ཕར་རྐང་པ་ཉུག་ཉུག་སོང་བར་མཐོང༌། ཐུན་མོང་དུ་ཤིང་གཟོ་དང་བརྐོས་དང་ཚོན་རྩི་ཐམས་ཅད་ཚར་བར་མཐོང་ངོ༌། །དེར་ཉི་མ་རྒས་ས་སྲོས་པ་ན་བློན་པོ་མགར་ན་རེ་སྤྲིན་འཁྲིགས་གློག་འགྱུ་ཆར་ཆེན་པོ་འབབ་པར་སྣང་བས་ཤིང་རྩི་(ཇ༤༢བ)

[Full Size]

རྣམས་བྱི་དོགས་པའི་ཁེབས་དགོས་ཟེར་ནས་ལས་ཀྱི་རྔ་བོ་ཆེ་བརྡུངས་པས་གྲོང་ཁྱེར་བ་རྣམས་རྒྱལ་པོས་དེ་ཙམ་བརྩིག་པ་ལ་ལས་རྔ་མ་བརྡུངས་ན་ད་མཚན་མོ་བརྡུང་བ་ཅི་ཡིན་ཟེར། དེར་གྲོང་བའི་རེ་ཕྱར་ཐམས་ཅད་བསྡུས་ནས་ཤིང་ལ་འགེབས་སུ་ཕྱིན་པས་སྲོད་སྟེ་ཀ་ལ་སྤྲུལ་པ་ལྔ་སྟོང་གིས་ར་སའི་ཐོག་ཕུབ་ཟིན་འདུག་སྟེ་སྟེང་ན་སྤྲུལ་པའི་མི་ལག་ན་ཕ་གུ་ཐོགས་པ་ཡད་ཡུད་འདུག་པ་བློན་པོ་རྣམས་ཀྱིས་མཐོང་བས་ངོ་མཚར་སྐྱེས་སྟེ་རེ་ཕྱར་རྣམས་མཐོངས་ཀ་ལ་བཀབ་ནས་ལོག་གོ །དེ་ལྟར་ཞག་གཉིས་པོས་ར་སའི་འོག་ཁང་གི་ཕྱི་ཐམས་ཅད་ལེགས་པར་ཟིན་ནས་ནང་པར་གཙང་ཁང་དེ་རྣམས་གང་ལེགས་པ་ཅིག་དུ་ངའི་ཡི་དམ་རང་བྱུང་ཐུགས་རྗེ་ཆེན་པོ་གཙོ་འཁོར་དགུ་པོ་བཞུགས་དགོས་དགོངས་ནས་གཟིགས་སུ་བྱོན་པས་གཙང་ཁང་དབུས་མའི་སྒོ་ཕྱེ་བས་གུང་ལ་སངས་རྒྱས་མར་མེ་མཛད་ལ་འཁོར་ཉེ་བའི་སྲས་བརྒྱད་བཞེངས་པས་བསྐོར་བ་ཁྲོ་བོ་གཉིས་ཀྱིས་སྒོ་སྲུང་བ། དབུས་ན་མི་འཁྲུགས་པ་སྐྱབས་སྦྱིན་ཅན་བཞུགས་པ་གཟིགས། གཙང་ཁང་གཡས་ན་འོད་དཔག་མེད་ལ་བྱང་སེམས་བརྒྱས་སྐྱིལ་ཀྲུང་ཅན་གྱིས་བསྐོར་བ་དང༌། སྒོ་འགྲམ་ཕྱིའི་གཡས་ན་ཕྱག་རྡོར་དང་གཡོན་ན་རྨེ་བརྩེགས་བྱེ་རུའི་མདོག་ཅན་གྲིབ་སེལ་གྱི་ཕྱག་རྒྱ་མཛད་པ་བཞུགས་པར་གཟིགས། གཙང་ཁང་གཡོན་ན་བྱམས་པ་ཆོས་ཀྱི་འཁོར་ལོ་ཆོས་འཁོར་བསྐོར་བའི་ཕྱག་རྒྱ་ཅན་ལ་སྒྲོལ་མ་བརྒྱད་ཀྱིས་བསྐོར་ནས་ཆོས་ཀྱི་བགྲོ་བ་མཛད་པར་གཟིགས། གཙང་ཁང་ལྷོ་མ་ན་ཇོ་བོ་མི་བསྐྱོད་རྡོ་རྗེ་ལ་འཁོར་སྟོང་ཆེན་རབ་འཇོམས་ཕྱག་བཞི་མ་དང་སོ་སོར་འབྲང་མ་ཕྱག་དྲུག་པ། གཤིན་རྗེ་མཐར་བྱེད་ཞལ་དྲུག་ཕྱག་དྲུག་ཞབས་དྲུག་པ་མཐིང་ནག །ཤེས་རབ་མཐར་བྱེད་དཀར་པོ་ཞལ་བཞི་ཕྱག་བརྒྱད། པདྨ་མཐར་བྱེད་དམར་པོ་ཕྱག་བཞི། བགེགས་མཐར་བྱེད་མཐིང་ག་ཕྱག་བཞི་པ་རྣམས་དང་གནོད་སྦྱིན་གྱིས་བསྐོར་ནས་ཁ་བ་ཅན་གྱི་འདྲེ་སྲིན་འདུལ་ཐབས་སྟོན་ཞིང་བཞུགས། དེ་ན་རྣམ་སྲས་དང་ཛམྦྷ་ལ་གཏེར་གྱི་བུམ་པ་སྟོབ་པ་ཅིག་ཀྱང་འདུག་གོ །གཙང་ཁང་བྱང་མ་ཤིན་དུ་ལེགས་ཅིང་ཉམས་དགའ་བར་གཟིགས་ནས་དེ་ན་ལྷ་སུ་ཡང་མི་སྣང་བས་ངའི་ལྷ་རྣམས་འདིར་བཞུགས་པར་བྱའོ་དགོངས་(ཇ༤༣ན)

[Full Size]

ནས་ཕྱིར་བྱོན་པ་དང་ཕྱི་སྒོའི་རྩེར་ཀླུའི་རྒྱལ་པོ་སངས་རྒྱས་བཅོམ་ལྡན་འདས་དཀར་པོ་མིག་གསུམ་པ་སྤྲུལ་མགོ་ཉི་ཤུ་རྩ་གསུམ་པ་ཅིག་གིས་ཞབས་ལ་བཏུགས་ནས་ཕྱག་བྱས་སྤྲུལ་ཞགས་དཀར་པོ་ཅིག་ཕུལ་ནས་རྒྱལ་པོ་ཆེན་པོ་ཁྱོད་ཀྱི་ལྷ་ཁང་འདི་སྟོང་གསུམ་གྱི་སྟོང་ཆེན་པོར་ངས་རྒྱས་པར་བསྐྱང་གིས་ངའི་གཟུགས་ཅིག་ཀྱང་མཛོད་ཅིག་ཟེར་མི་སྣང་བར་གྱུར། དེ་བཞིན་དུ་ཀླུ་དགའ་བོ་དམར་པོ་སྦྲུལ་མགོ་དགུ་པ་སྟོང་གཉིས་བར་མའི་བར་དང༌། ཀླུ་ཉེར་དགའ་དམར་སེར་སྦྲུལ་མགོ་བདུན་པས་སྟོང་ཆུང་ངུའི་བར་བསྐྱང་ངོ་ཟེར། དེ་བཞིན་དུ་གནོད་སྦྱིན་ནཱ་ག་ཀུ་བེ་ར་དམར་པོ་ཞལ་གསུམ་ཕྱག་བཞི་པས་གསེར་གྱི་ཐག་བཟང་ཞིག་ཕུལ་ནས་ངས་མེའི་འཇིགས་པ་ལས་སྲུང་ཟེར། དྲི་ཟ་ཟུར་ཕུད་ལྔ་པ་དེ་འདྲ་བས་མེ་ཏོག་ཕུལ་སྟེ་མི་མ་ཡིན་གྱི་གནོད་པ་ལས་སྲུང་ངོ་ཟེར། སྲིན་པོ་ལང་ཀ་མགྲིན་བཅུ་ཐིང་ག་མགོ་དགུ་སྟེང་ན་རྟ་མགོ་དཔངས་བསྟོད་པ་ཅིག་གིས་གསེར་གཞོང་པ་གང་ཕུལ་སྟེ་མིའི་གནོད་པ་ལས་སྲུང་ངོ་ཟེར། དཔལ་ལྷ་མོས་ལྕགས་ཀྱི་བྲེ་སོ་ཞིག་ཕུལ་ནས་ཆུའི་འཇིགས་པ་ལས་སྲུང་ངོ་ཟེར། དཔལ་མགོན་པོས་མཐའ་དམག་གི་འཇིགས་པ་ལས་སྲུང་ངོ་ཞེས་ཁས་བླངས་སྟེ་ཐམས་ཅད་ཀྱིས་གུས་པས་ཞབས་ལ་བཏུགས་སྟེ་རང་རང་གི་གཟུགས་མཛོད་ཅིག་པར་གསོལ་བ་བཏབ། རྒྱལ་པོས་ཀྱང་ཞལ་གྱིས་བཞེས་སོ། །རྒྱལ་པོས་འཁོར་རྣམས་ལ་ནང་པར་རྟེན་སྤྱན་དྲང་བའི་བཀའ་བསྒོས་སྟེ་ལྷ་གཅིག་ཁྲི་བཙུན་གྱིས་དགའ་སྟོན་གྱི་ཡོ་བྱད་སྦྱར། བློན་པོ་རྣམས་ཀྱིས་ཤིང་རྟ་སོགས་སྟ་གོན་བྱས་སྟེ་ནང་པར་བུ་མོ་བཅུ་དྲུག་པོས་མཆོད་པ་བྱེད་དུ་འོངས། བློན་པོ་རྣམས་དང་བཙུན་མོ་རྟེན་སྤྱན་འདྲེན་དུ་འོངས་ཚེ་ལྷ་རྣམས་མི་བཞུགས་པར་སྤོས་དང་མེ་ཏོག་ཐོ་རེ་འདུག །ཁོང་རྣམས་བྲང་སྟེ་ཏབ་དི་རི་རི་བྱས་པས་ཡང་ཐོག་ན་ནེ་ཙོ་སྨྲ་མཁན་ཞིག་ཡོད་པ་ན་རེ་ཁྱེད་རྣམས་ཐུགས་ཅི་ལ་ཏབ་པར་བྱེད་ཟེར། ལྷ་རྣམས་གར་གཤེགས་ཆ་མེད་པར་གཤེགས་བྱས་པས་ནེ་ཙོ་ན་རེ་མདང་ནམ་ཕྱེད་ཙམ་ན་ལྷ་རྣམས་གཅིག་ལ་གཅིག་ཕྱག་བྱས་སྤོས་དང་མེ་ཏོག་གིས་མཆོད་ནས་ཕོ་བྲང་གི་མཐོངས་ན་ཡར་སོང་ནས་བྱང་ཕྱོགས་(ཇ༤༣བ)

[Full Size]

བྱེ་མའི་གླིང་ན་ཕར་ཞལ་གཏད་ནས་སོང་བས་ང་ཡང་རེ་མ་དགའ་ཞིག་བྱུང་ཟེར། ཁོང་རྣམས་ཀྱིས་བལྟར་ཕྱིན་པས་བྱེ་མའི་གླིང་ལ་ལྷ་རྣམས་ཀྱི་ཞབས་རྗེས་ལ་པདྨ་དམར་ལམ་ལམ་འདུག །དེར་རླུང་འཚུབ་བྱུང་བས་ཞབས་རྗེས་རྣམས་མ་གསལ། མིག་རྡུལ་གྱིས་གང་སྟེ་ཕར་ཅམ་ཚུར་ཅམ་བྱེད་པའི་ཚེ་དྲེའུ་དཀར་མོ་དེ་ར་ས་ལ་སྐོར་བ་བྱེད་ཅིང་སྐད་འདོན་སྣ་ས་ལ་སྣོམ་ཞིང་སོང་བའི་ཕྱིར་ཕྱིན་པས་གཙང་ཁང་བྱང་མ་ན་ཐུགས་རྗེ་ཆེན་པོ་གཙོ་འཁོར་དགུ་གདན་ཁྲི་མེད་པར་གྲལ་བྱས་སྟེ་བཞེངས་ནས་འདུག་པས་རྒྱལ་པོ་དགྱེས་ཅིང་བློན་པོ་རྣམས་ངོ་མཚར་ཆེ་ཟེར་ནས་ཕན་ཚུན་གཅིག་ལ་གཅིག་བལྟ་ཞིང་ཐལ་མོ་སྦྱར་ནས་མོས་གུས་བྱེད། བུ་མོ་བཅུ་དྲུག་པོས་མཆོད་པ་དང་བསྟོད་པ་བྱེད་དོ། །དེ་ནས་རྒྱལ་པོས་བལ་པོའི་ལྷ་གཟོ་བ་ལ་བཀའ་བསྒོས་སྟེ་ཀ་བ་ཤིང་ལོ་ཅན་གྱི་འགྲམ་དུ་ཚོན་རྩི་དང་པིར་སོགས་སྟ་གོན་བྱས་སྟེ་སང་ཉིན་ལྷ་ཇི་ལྟར་བྲི་བ་བགྲོ་བའི་ཕྱིར་རྒྱལ་བློན་དང་གཟོ་བོར་བཅས་པ་ལྷ་ཁང་དུ་བྱོན་པ་དང་ལྷོ་ངོས་ཀྱི་ལོགས་ལ་ཁཱརྶ་པཱ་ཎི་འཇིགས་པ་བརྒྱད་སྐྱོབ་ཀྱི་གླིང་དང་གང་ལ་གང་འདུལ་དེར་སྟོན་གྱི་གླིང་དང་གཉིས་ཁ་དོག་རྫོགས་པ་བྲིས་པ་ལས་ལྷག་པར་རང་བྱུང་དུ་བྱོན་ནས་འདུག་སྟེ་ཐམས་ཅད་ངོ་མཚར་སྟེ་ཕྱག་མཆོད་མཛད། དེ་ནས་སྤྲུལ་པའི་གཟོ་བོ་དེས་གཞན་རྣམས་བྲིས་སོ། །དེ་ནས་ཆོས་ཀྱི་རྒྱལ་པོས་ལྷ་གཅིག་ཁྲི་བཙུན་ལ་བཀའ་བསྩལ་བ། ཁྱོད་ཀྱིས་ང་དང་ཡབ་ཀྱི་ཐུགས་དགོངས་བཀོང་བ་དང་ཆད་བཙན་པའི་ཕྱིར་སྤྱིར་སེམས་ཅན་ཐམས་ཅད་དང་ཁྱད་པར་ཁ་བ་ཅན་པའི་མི་དང་མི་མ་ཡིན་པ་ཐམས་ཅད་ཀྱི་ཕྱག་དང་མཆོད་པའི་རྟེན་མང་དུ་བཙུགས། ངའི་ཆོས་ཀྱི་བཀའ་སྲོལ་གཏོད་པའི་བྱ་བ་ཡང་ཐོག་མར་ཁྱོད་ཀྱིས་བྱས། སླར་ཡང་ནག་པོའི་ཕྱོགས་འགྲིབ་ཅིང་དཀར་པོའི་ཕྱོགས་དར་བའི་ཕྱིར་ལྷ་ཁང་འདི་ཚར་བར་གྱིས་ཅིག་ལྷ་གཅིག་ཁྱོད་ཀྱི་ཡབ་རྒྱལ་པོ་དང་གཉེ་བོ་རྣམས་ཆད་བྱས་ནས་ངས་བོད་ཡུལ་དུ་ལྷ་ཁང་བརྒྱ་རྩ་བརྒྱད་བཞེངས་པའི་སྒོ་བལ་ཡུལ་དུ་སྟོན་པར་ཆད་པས་ང་དེ་རྣམས་བཞེང་བའི་ཕྱིར་འགྲོའོ་ཞེས་བཀའ་བསྩལ་བས་ལྷ་གཅིག་མཉེས་སྟེ་བཀའ་བཞིན་འཚལ་ཞེས་གསོལ་ནས་བར་ཁང་(ཇ༤༤ན)

[Full Size]

སོགས་ལྷག་མ་ཐམས་ཅད་མཛད། དེ་ཡང་ཐིལ་ཞལ་ཐམས་ཅད་བཻ་ཌཱུརྻ་སྔོན་པོ་ལྟར་ངང་པ་ཆུའི་རི་མོ་ཅན་ལ་སྟེང་གི་ཉ་དང་ཆུ་སྲིན་དང་བྱ་ལ་སོགས་པའི་རི་མོ་དང་འཕྲུལ་གྱི་གཟུགས་སྣང་བ། ཀ་བ་ཐམས་ཅད་རྡོ་རྗེ་ཕུར་བུའི་དབྱིབས། ཀ་གཞུ་གདུང་གདུང་ཁེབས་སོགས་བརྩེགས་ལེགས་ཅིང་དབྱིབས་སྣ་ཚོགས་པ་ཅན། སྟེང་འོག་གི་མཐོངས་ཀའི་ཕྱམ་སྣ་ཐམས་ཅད་ལ་སེང་གེ་དཀར་མོ་གཡུ་རལ་ཅན་བརྒྱ་རྩ་བརྒྱད་འཕྱོང་བ་ལྟར་གནས་ལ། རྩིག་པ་ཐམས་ཅད་ཀྱི་སོ་ཕག་ཁ་དོག་ལྔས་བར་ཁྲུ་རེ་ལྷག་ཙམ་དུ་བཞག་ནས་ཕྱི་ནང་ལྔ་རིམ་དུ་བརྩིགས་སྟེ་སྐབས་སུ་ཐོག་ཕུབ་ཅིང་ཡང་བརྩིགས་པས་གཞལ་ཡས་ཁང་གི་ཚུལ་ཅན། སྟེང་དུ་ཕ་གུ་དང་མུ་ཏིག་གི་དྲ་བ་དྲ་ཕྱེད་དང་གཡུ་བད་སྔོན་པོ་ཤིན་དུ་མཛེས་པ་མདའ་ཡབ་དང་ཤར་བུ་ཅན། ཐམས་ཅད་ལ་རིན་པོ་ཆེས་བརྒྱན་པ། དར་གྱི་ཅོད་པན་དང༌། གདུགས་དང་རྒྱལ་མཚན་དང༌། རྔ་ཡབ་དང་ཁོར་ཡུག་ལྕགས་ཐག་གིས་བསྐོར་བ་དང་བཅས་པ་ལས་དྲིལ་བུའི་ཚོགས་ཆོས་ཀྱི་སྒྲ་ཆེན་འཁྲོལ་བ། གསེར་གྱི་གཎྜི་ར་འོད་འབར་བས་སྤྲས་པ་བྱས་སོ། །གཙང་ཁང་གི་ལྷ་རྣམས་ཙནྡན་གྱི་ལྡེ་གུ་དང་རིན་པོ་ཆེ་སྣ་ཚོགས་པའི་ཕྱེ་མ་དང་དར་ཟབ་སྦྱར་ནས་རྒྱལ་པོས་ཇི་ལྟར་ཞལ་གཟིགས་པ་བཞིན་སོ་སོར་བཞེངས་སྟེ་སྒོ་དཀྱིལ་འཁོར་རིས་ཀྱི་སྒོ་འགྲམ་གཡས་སུ་གནོད་སྦྱིན་ཁང་པ་དང་གཡོན་དུ་ཀླུའི་ཁང་པ་མཛད། ཤར་ལྷོའི་གཡུང་དྲུང་ཁུགས་སུ་ལྕོག་སྟེང་ཁང་གྲུ་སྐས་དང་བཅས་པ་བྱས་སྟེ་དཔལ་ལྡན་ལྷ་མོའི་རྟེན་བཙུགས། ལྷོ་ཕྱོགས་ལ་རང་བྱུང་གི་རི་མོའི་གླིང་གཉིས་ཀྱི་ཁར་འཇམ་དབྱངས་དང་བདེ་བ་ཅན་གྱི་ཞིང་བཀོད། ལྷོ་ནུབ་ཏུ་རིགས་གསུམ་མགོན་པོ། ནུབ་ཕྱོགས་ལ་རིགས་ལྔ་དང་སྤྲུལ་པའི་རྒྱལ་པོའི་རྣམ་ཐར། ནུབ་བྱང་དུ་དུས་གསུམ་སངས་རྒྱས། བྱང་དང་བྱང་ཤར་ལ་ཐུབ་པའི་མཛད་པ་རྣམས། ཤར་ལོགས་ལ་སྒྲོལ་མ་སྤྱན་རས་གཟིགས་ཐུབ་པ་བདུད་འདུལ་སེམས་དཔའི་ཚོགས་བཅས། ཤར་ལྷོར་སྨན་པའི་རྒྱལ་པོའི་ལྷ་ཚོགས། བར་ཁང་དུ་རྟ་མགྲིན་དཀར་པོ་དང་ཇོ་མོ་སྒྲོལ་མ་སོགས་བྲིས། གདུང་རྣམས་(ཇ༤༤བ)

[Full Size]

ལ་མངོན་པའི་རྒྱུད་རིས། གདུང་རྩར་མདོ་སྡེའི་རྒྱུད་རིས། ཀ་བ་ལ་འདུལ་བའི་རྒྱུད་རིས་སྟེ་མ་འོངས་པའི་དབོན་སྲས་དང་རབ་བྱུང་གི་དོན་དུ་སྡེ་སྣོད་གསུམ་གྱི་རྒྱུད་རིས་བྲིས། ཕྱི་རབས་རྣམས་ཀྱིས་རིག་པའི་ཆོས་གོ་བར་བྱ་བའི་ཕྱིར་གག་སྤང་དང་ཀ་གཞུ་དང་གདུང་ཕྲན་སོགས་ལ་སྒྲུང་དང་ལྡེའུ་དང་བོན་ཤ་བ་ན་མཁའ་ལ་འགྲོ་བ་སོགས་བྲིས། བོན་གྱི་དཔེ་ཕལ་ཆེར་ཀ་བའི་འོག་དུ་སྦས་རི་མོ་རྣམས་མ་འོངས་པ་ཉམས་པ་གསོ་བའི་ཆེད་དུ་ཕྱི་མོ་བེ་བུམ་དུ་བྱས་སྟེ་དཀོར་མཛོད་དང་ཀེའུ་ཚང་དུ་བཞག་གོ །ར་སའི་ལྷ་ཁང་རྨང་མ་ཐིངས་ཀྱི་བར་ཀོང་ཇོ་ལ་ལྷ་ཁང་རྩིག་པའི་དབང་མེད་ནས་ར་མོ་ཆེར་ཀ་བའི་བར་ཤིང་དང་ལ་མས་བརྩིགས་ནས་སྒོ་ཤར་དུ་ཕྱེ་བས་ཞལ་དང་པོ་ནུབ་ཏུ་གཟིགས་པ་དེ་ཤར་དུ་རང་འགྱུར་དུ་བྱུང༌། ཕྱིས་ས་ཕག་གིས་ལེགས་པར་བརྩིགས་སྟེ་རྒྱ་ཕིབས་སྟག་ལྟར་བཀྲ་བས་རྒྱ་སྟག་ར་མོ་ཆེའི་ལྷ་ཁང་དུ་གྲགས། ཞང་ཞུང་བཟའ་ལི་ཐིག་སྨན་གྱིས་ཐེམ་བུ་བཀོག་པའི་ལྷ་ཁང་བཞེངས། དེའི་ཚེ་སུམ་པ་ཀི་ཀང་རྡོས་ངན་སྔགས་ཀྱིས་ཤིག་ལིད་ཕྱ་ར་ཙམ་བཏང་བས་ཤིག་ཕུག་རོན་ཙམ་བྱུང་བ་རྒྱལ་པོའི་མཐུས་མ་ཚུགས་སྐད། རུ་ཡོངས་བཟས་བྲག་ལྷ་ཀླུ་ཕུག་གི་རང་བྱུང་རྣམས་གསལ་བར་བརྐོས་སྟེ་ཚྭ་ལ་བརྒྱད་བཅུ་སྡེའི་དུས་བྲག་ཕྱེ་བྲེ་རེ་ཕེད་པ་ལ་ཚྭ་བྲེ་རེ་བྱིན་ནས་བྲག་ལ་སྐོར་ཁང་བརྐོས། མོང་བཟའ་ཁྲི་ལྕམ་གྱིས་ཡེར་པའི་གཙུག་ལག་ཁང་བཞེངས། ཁ་ཅིག་དུ་རུ་ཡོངས་བཟས་མིག་མང་ཚལ་གྱི་ལྷ་ཁང་བཞེངས། མི་ཉག་བཟས་ལྷ་ས་མཁར་བྲག་བཞེངས་ཅེས་སོགས་སྣང་ཡང་བཙུན་མོ་ལྔ་ཞེས་ཡང་ཡང་བཤད་པས་མི་ཉག་བཟའ་དང་རུ་ཡོངས་བཟའ་གཅིག་པར་སྣང་ལ་མཁར་བྲག་ནི་འདི་ནས་རྒྱལ་རབས་བཞིའི་འོག་དུ་བྱུང་བ་ཡིན་ནོ། །དེ་ནས་སྤྲུལ་པའི་རྒྱལ་པོས་བློན་པོ་ཆེན་པོ་བཅུ་དྲུག་དང་བཅས་སྟེ་བོད་ཡུལ་ཐམས་ཅད་དུ་སྐུའི་སྣང་བ་སོ་སོར་བསྟན་སྟེ་ནུབ་ཕྱོགས་བལ་པོའི་ཡུལ་དུ་སྒོ་བསྟན་པའི་ལྷ་ཁང་བརྒྱ་རྩ་བརྒྱད་དང༌། རྒྱའི་སོ་ཁ་ཕྱིར་འཕུལ་བ་དང་རྒྱ་རྗེ་ལ་ཞལ་གྱིས་བཞེས་པ་ཆད་བཙན་པར་བྱ་བའི་ཕྱིར་རྒྱ་ནག་རི་བོ་རྩེ་ལྔའི་བར་དུ་(ཇ༤༥ན)

[Full Size]

ལྷ་ཁང་བརྒྱ་རྩ་བརྒྱད་སྒོ་རྒྱ་ནག་ལ་བསྟན་པ་མཛད་ཅིང་ཐམས་ཅད་ཀྱི་མཐའ་མར་མི་ཉག་རབ་སྒང་དུ་ཡོངས་རྫོགས་རབ་དགའི་ལྷ་ཁང་མཛད་དེ་མཐའ་འདུལ་ནས་འདིའི་བར་གྱི་ལྷ་ཁང་རེ་རེ་ལ་ཡང་ངོ་མཚར་བའི་ལོ་རྒྱུས་མང་དུ་ཡོད་པར་སྣང་ངོ༌། །དེ་རྣམས་ལོ་བཅུ་གསུམ་གྱིས་ཐིམ་སྟེ་རྒྱལ་པོ་ཕོ་བྲང་དུ་ཕེབས། ར་སར་སྤྱན་དྲངས་པས་མཐིལ་ཞལ་ཆུ་འདྲ་བའི་ནང་ན་འཕྲུལ་གྱི་གཟུགས་བརྙན་རྣམས་གཡོ་བ་གཟིགས་སྟེ་མཚོ་དེ་བརྡོལ་ནས་སྣང་བ་གསུང་སྐད། བལ་བཟས་མཚོ་མ་ལགས་བྱས་པས་སླར་རྒྱལ་པོས་ཆིབས་ལྕག་བོར་བས་ཀྱང་ཆུ་སྟེང་ན་ལྡིང་བ་འདྲ་བ་ཞིག་བྱུང་ནས་ཐུགས་མ་ཆེས། དེར་ཁྲི་བཙུན་གྱིས་རིན་པོ་ཆེའི་སོར་གདུབ་བོར་བས་སིང་ཁྲ་ལ་ལ་དཀྱིལ་འཁོར་གྱི་རྩར་སོང་བས་དོད་ཐུགས་ཆེས་སྟེ་ལྷ་ཁང་རྣམས་སུ་བྱོན་སྟེ་གཟིགས་པས་སྤྲུལ་པའི་སྐུ་དངོས་སུ་མཁྱེན། སྟེང་ཁང་དུ་གཟིགས་ནས་ཁྱོད་ཀྱི་ཤིང་གཟོ་ལ་སོགས་པ་འདི་རྣམས་ཤིན་དུ་ལེགས་སྟེ་ངའི་འཕྲུལ་གྱི་གཟོ་དང་ཁྱད་མི་སྣང་གསུངས་པས་འཕྲུལ་སྣང་དུ་མཚན་ཐོགས་ཅིང་དང་པོར་ར་ལ་ས་བསྐྱལ་པས་ར་ས་འཕྲུལ་སྣང་དུ་མཚན་ཆགས་ཅིང་ལྷ་ཀླུ་མི་གནོད་སྦྱིན་དགའ་བས་དགའ་བཞི་འཕྲུལ་གྱི་ལྷ་ཁང་ཞེས་ཀྱང་གྲགས་སོ། །ཀོང་ཇོས་ཀྱང་ར་མོ་ཆེར་སྤྱན་དྲངས་སྟེ་རབ་ཏུ་དགྱེས་པ་ཐོབ། བཙུན་མོ་གཞན་གསུམ་གྱིས་ཀྱང་རང་རང་གི་ཐུགས་དམ་གྱི་ལྷ་ཁང་གཟིགས་སུ་ཕུལ་ལོ། །དེ་ནས་མཆོད་པའི་ཡོ་བྱད་རྒྱ་ཆེར་བཤམས། །རྒྱལ་པོ་དཀྱིལ་འཁོར་སྟེང་བྱོན་མེ་ཏོག་བཟུང༌། །ཕྱག་གཉིས་ཐལ་སྦྱར་བདེན་པའི་ཚིག་བརྗོད་པ། །རྐང་གཉིས་གཙོ་བོ་ཐུབ་དབང་ཤཱཀྱའི་སྲས། །གྲངས་མེད་སྤྲུལ་པས་འགྲོ་བའི་དོན་མཛད་པ། །སྟོན་པ་བདེ་བར་གཤེགས་པ་ལ་སོགས་པ། །ཕྱོགས་བཅུའི་སངས་རྒྱས་རྣམས་ཀྱིས་བདེ་ལེགས་སྩོལ། །ཐབས་མཁས་ཐུགས་རྗེར་ལྡན་པའི་ཆུ་རྒྱུན་གྱིས། །གང་ལ་གང་འདུལ་སྨིན་ཞིང་གྲོལ་བར་མཛད། །རྗེ་བཙུན་སྤྱན་རས་གཟིགས་དབང་ལ་སོགས་པ། །བྱང་ཆུབ་(ཇ༤༥བ)

[Full Size]

སེམས་དཔའ་རྣམས་ཀྱིས་བདེ་ལེགས་སྩོལ། །རྣམ་དག་དྲི་མ་མེད་པ་རྒྱལ་བའི་བཀའ། །བསྡུ་བ་ནམ་བཞིས་དམ་ཆོས་རྒྱས་པར་མཛད། །རྒྱལ་སྲས་གནས་བརྟན་རབ་འབྱོར་ལ་སོགས་པ། །འཕགས་པའི་གནས་བརྟན་རྣམས་ཀྱིས་བདེ་ལེགས་སྩོལ། །གཞན་ཡང་ཕྱོགས་བཅུའི་ཞིང་ཁམས་ཐམས་ཅད་ཀྱི། །འདས་དང་མ་བྱོན་ད་ལྟར་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱིས། །གནས་འདིར་དབང་བསྐུར་བྱིན་གྱིས་བརླབ་ཏུ་གསོལ། །དེ་ལྟར་སྤྲུལ་པའི་ཆོས་ཀྱི་རྒྱལ་པོ་ཡིས། །བདེན་པའི་སྟོབས་བརྗོད་ཤིས་པ་མཛད་པའི་ཚེ། །རྒྱལ་བ་རྒྱལ་སྲས་ཡི་དམ་ཆོས་སྐྱོང་ཀུན། །ཉི་ཟེར་རྡུལ་ཙམ་སྤྲིན་དང་ན་བུན་ལྟར། །འཐིབས་སྟེ་སངས་རྒྱས་ཀུན་གྱིས་མེ་ཏོག་གཏོར། །བྱིན་བརླབས་རྒྱལ་སྲས་རྣམས་ཀྱིས་ཤིས་པ་བརྗོད། །ཚངས་སོགས་ལྷ་ཡིས་མེ་ཏོག་ཆར་ཆེན་ཕབ། །ལྷ་མོ་རྣམས་ཀྱིས་མཆོད་རྫས་ཀུན་གྱིས་མཆོད། །ལྷ་ཡི་རོལ་མོའི་ཚོགས་ཀུན་མཁའ་ལ་འཁྲོལ། །དྲི་ཞིམ་སྤོས་ངད་གོ་མཚམས་མེད་པར་ཁྱབ། །ན་མཁའ་ཁྱབ་པའི་ཡེ་ཤེས་སེམས་དཔའི་ཚོགས། །དམ་ཚིག་པ་ལ་དབྱེར་མེད་བརྟན་པར་གྱུར། །ལྷ་རྣམས་བསྟོད་པའི་དབྱངས་སྙན་རྣམ་མང་གིས། །ཆོས་ཀྱི་རྒྱལ་པོ་མངོན་པར་བསྟོད་དེ་སོང༌། །དེ་ལྟར་གཙུག་ལག་ཁང་མཆོག་རྣམ་གཉིས་ལ། །རབ་གནས་བཀྲ་ཤིས་ལྷུན་གྱིས་གྲུབ་པར་མཛད། །མེ་ལོང་གཟུགས་བརྙན་བཞིན་དུ་ཀུན་གྱིས་མཐོང༌། །གླུ་གར་ལྟད་མོ་ལ་སོགས་བོད་འབངས་དང༌། །མཐུན་པའི་དགའ་སྟོན་ལོ་ཟླ་དུ་མར་སྤྱད། །དེ་ཚེ་རྒྱལ་པོས་དགྱེས་པའི་གླུ་གསུངས་པ། །ཐུགས་རྗེའི་བདག་ཉིད་དཀོན་མཆོག་གསུམ། །ཐར་པའི་ལམ་སྟོན་སྤྱན་རས་གཟིགས། །གུས་པའི་ཡིད་ཀྱིས་གསོལ་བ་འདེབས། །བཀྲ་ཤིས་པའི་གླུ་ལ་དགོངས་སུ་གསོལ། །དེ་རིང་མདུན་གྱི་ན་མཁའ་ལ། །སངས་རྒྱས་བྱང་ཆུབ་སེམས་དཔའ་རྣམས། །སྤྲིན་ཕུང་ལྟ་བུར་བཞུགས་པ་མཐོང༌། །བཀྲ་ཤིས་(ཇ༤༦ན)

[Full Size]

རབ་གནས་ལྷུན་གྱིས་གྲུབ། །ཚངས་པ་ལ་སོགས་ལྷ་རྣམས་ཀྱིས། །སིལ་སྙན་རོལ་མོའི་སྒྲ་ཡང་འཁྲོལ། །མེ་ཏོག་མནྡྷའི་ཆར་ཕབ་པས། །བཀྲ་ཤིས་རབ་གནས་ལྷུན་གྱིས་གྲུབ། །སངས་རྒྱས་བསྟན་པའི་རྒྱལ་མཚན་བཙུགས། །ནག་པོའི་ཕྱོགས་ལས་རྣམ་པར་རྒྱལ། །བདུད་དཔུང་བཅོམ་པའི་མཐུ་དཔལ་གྱིས། །བཀྲ་ཤིས་རབ་གནས་ལྷུན་གྱིས་གྲུབ། །དམ་པའི་ཆོས་ཀྱི་རྔ་ཆེན་བརྡུངས། །དུག་ལྔ་གཏི་མུག་རང་སར་ཞི། །དཀོན་མཆོག་གསུམ་གྱི་རྔ་སྒྲ་ཡིས། །བཀྲ་ཤིས་རབ་གནས་ལྷུན་གྱིས་གྲུབ། །དེ་རིང་སྐྱིད་པའི་ཉི་མ་ཤར། །རང་དབང་མེད་པའི་དགའ་སེམས་སྐྱེས། །འདོད་དགུའི་ལོངས་སྤྱོད་ཆར་བཞིན་བབ། །བཀྲ་ཤིས་རབ་གནས་ལྷུན་གྱིས་གྲུབ། །ཡི་དམ་ལྷ་ཡི་བཀྲ་ཤིས་ཀྱིས། །སྲོང་བཙན་སྒམ་པོ་བཀྲ་ཤིས་པ། །བཀྲ་ཤིས་གླུ་རུ་བླངས་པ་ཡིན། །ངའི་བོད་འབངས་རྣམས་ལ་བཀྲ་ཤིས་ཤོག །དེ་ལྟར་ཚངས་པའི་དབྱངས་ཀྱིས་དགྱེས་གླུ་གསུངས། །ལྷ་མིར་བཅས་པའི་འགྲོ་ཀུན་ཡི་རངས་གྱུར། །དེ་ཚེ་ལྷ་མོ་ཡི་གེ་དྲུག་མ་དངོས། །བཙུན་མོ་ཆུང་མ་མོང་བཟའ་ཁྲི་ལྕམ་ལས། །ལྷ་སྲས་གུང་སྲོང་གུང་བཙན་ཞེས་བྱ་བ། །ནོར་བུ་འཛིན་དབང་མངོན་སུམ་མི་གཟུགས་སུ། །བྲག་ལྷ་བཀྲ་ཤིས་གཞལ་ཡས་ཁང་དུ་འཁྲུངས། །བཙས་སྟོན་ཆེར་མཛད་བོད་འབངས་དགའ་མགུར་གྱུར། །དེ་ལྟར་ཐུགས་དམ་ལྷ་ཁང་མཐར་ཕྱིན་ནས། །དགེ་བཅུའི་རྒྱལ་ཁྲིམས་བཙན་ཞིང་བརྟན་པའི་ཕྱིར། །སྤྲུལ་པའི་ཁྲིམས་ར་དངངས་ཤིང་འཇིགས་པ་བཅས། །མི་དགེ་བཅུ་ལ་སྤྱོད་ཅིང་མི་ལྡོག་པ། །དེ་དག་གཤེད་མ་འཇིགས་རུང་གིས་བཟུང་སྟེ། །མགོ་དང་ཡན་ལག་ཉིང་ལག་གཅོད་ཅིང་བཏུབ། །ལྕེ་དང་མིག་འབྲུ་ཁྲོ་ཆུས་པགས་པ་བརྙིལ། །མགོ་དང་ཡན་ལག་མིག་སོགས་ཕུང་པོར་སྤུངས། །དེ་ལྟའི་ཁྲིམས་ར་མཐོང་བས་སྐྱི་གཡའ་བ། །ལྷ་ས་ཁྲ་འབྲུག་ལ་སོགས་བོད་ཡུལ་གྱི། །ཡུལ་ལྗོངས་(ཇ༤༦བ)

[Full Size]

ཕོ་བྲང་ཀུན་ན་ཅིག་ཆར་སྣང༌། །ཡེ་ཤེས་སྒྱུ་མའི་འཕྲུལ་ཐབས་དྲག་པོ་ཡིས། །མི་དགེ་སྤྱོད་ནུབ་ཀུན་ཀྱང་དགེ་བཅུར་གནས། །དེ་ཚེ་ལི་ཡི་ཡུལ་གྱི་དགེ་ཚུལ་གཉིས། །བོད་ཡུལ་སྤྱན་རས་གཟིགས་དབང་དྲུང་སོང་ཞེས། །འཇམ་པའི་དབྱངས་ཀྱིས་མངོན་སུམ་ལུང་བསྟན་ནས། །བོད་ཡུལ་འོངས་པའི་མི་མོས་ཟློག་པའི་ཕྱིར། །དེ་ཀུན་སྤྲུལ་པའི་ཁྲིམས་ར་ཡིན་ནོ་ཞེས། །སེ་གོལ་བརྡབས་པའི་མོད་ལ་མི་སྣང་གྱུར། །སྤྱི་བོའི་འོད་དཔག་མེད་ཞལ་མངོན་སུམ་བསྟན། །སྐལ་པར་འཚམས་པའི་ཆོས་ཀྱིས་སྨིན་མཛད་སྟེ། །སྐད་ཅིག་ལི་ཡུལ་ཕྱིན་པར་བྱིན་གྱིས་བརླབས། །ཕྱི་མར་དགྲ་བཅོམ་གོ་འཕང་ཉིད་ལ་བཀོད། །དེ་ཡང་ལི་ཡུལ་དུ་དགེ་ཚུལ་གཉིས་ཀྱིས་སྤྱན་རས་གཟིགས་བསྒྲུབས་པས་ན་མཁའ་ལ་འཕགས་པ་འཇམ་དཔལ་བྱོན་དེ་ཁྱེད་གཉིས་སྤྱན་རས་གཟིགས་ལྟ་བར་འདོད་ན་ད་ལྟ་བོད་ཀྱི་ཡུལ་ན་རྒྱལ་པོར་སྤྲུལ་ནས་བཞུགས་ཀྱི་དེར་སོང་ལ་ལྟོས་ཅིག་ཞེས་ལུང་བསྟན་སྟེ་མི་སྣང་བར་གྱུར། དེ་མ་ཐག་དུ་གསེག་ཤང་དང་ལྷུང་བཟེད་ཐོགས་སྟེ་བོད་དུ་འོངས། ཐོག་མར་ཁྲ་འབྲུག་དུ་ཕྱིན་པས་ཆད་པ་གཅོད་པ་སྔ་མ་དང་ཐུག་སྟེ་མགོའི་ར་བ་དང་མིག་གི་ཕུང་པོ་སོགས་འདུག་པས་འདི་ལྟ་བུ་ཅི་ཡིན་སུས་བྱས་དྲིས་པས་རྒྱལ་པོས་ཁྲིམས་མཛད་པ་ཡིན་ཟེར་བས་མ་དད་སྟེ་འཕགས་པ་འཇམ་དཔལ་མ་ཡིན་བདུད་འདུག་པ་ཟེར་ནས་ལོག་སྟེ་མགོའི་ར་བ་ལ་དབུ་རར་མིང་ཆགས། ཡང་ལྷ་ས་དང་ཉེ་བར་སླེབ་སྟེ་བོན་པོ་ཞར་བ་རྟ་ཞོན་པ་ཅིག་བྱུང་བ་ལ་ལི་ཡུལ་དུ་འགྲོ་བའི་ལམ་དྲིས་པས་ང་རྒྱལ་པོའི་ལྷ་ཁང་རྩིག་པའི་ཕོ་ཉ་ལ་རིངས་པར་ཡོད། སྟོན་མི་ཁོམ་ཟེར་ནས་སོང༌། སྟོད་ལུང་མདའི་ཆུ་འགྲམ་ན་མི་རོ་མགོ་མེད་དང་མིག་མེད་སོགས་མང་དུ་འདུག་ལྷ་སར་སླེབས་པས་ནུབ་ཕྱོགས་ཀྱི་ལྕགས་རིའི་ཁ་ན་ཆད་པ་གཅོད་པ་རྒྱུན་མི་འཆད་པར་མཐོང་བས་སྤྱན་རས་གཟིགས་ག་ལ་ཡིན་ཟེར་ནས་ཕྱིར་ལོག་དན་འབག་གི་ཐང་ལ་སླེབས་ཚེ་རྒྱལ་པོས་མཁྱེན་སྟེ་བློན་པོ་ཅིག་ལ་རྟ་གུ་རུབ་ནག་པོ་བསྐྱོན་ནས་དན་འབག་གི་ཐང་ལ་མི་ངེད་རང་དང་ཆ་བྱད་མི་འདྲ་བ་སྐྲ་བྲེགས་པ་(ཇ༤༧ན)

[Full Size]

གོས་ངུར་སྨིག་གྲུ་བཞི་གྱོན་པ་གཉིས་འགྲོ་ཞིང་ཡོད་སྟེ་ཁྲིད་ལ་ཤོག་གསུངས་སྟེ་སྤྱན་སྔར་ཁྲིད་ཕྱིན་པས་རྒྱལ་པོས་དེ་གཉིས་ཀྱི་ཞབས་ལ་ཕྱག་མཛད་དེ་ཁྱེད་གཉིས་གང་ནས་འདིར་ཅི་བྱེད་དུ་འོངས་གསུངས་པས་དེ་གཉིས་ན་རེ་བདག་ཅག་གཉིས་འཕགས་པ་འཇམ་དཔལ་གྱིས་ལུང་བསྟན་ནས་སྤྱན་རས་གཟིགས་བལྟར་མཆིས་པ་ལགས་སྟེ་ཟེར། འོ་ན་ཁྱེད་གཉིས་སྤྱན་རས་གཟིགས་བལྟ་བར་འདོད་དམ་གསུངས་པས་དེ་དང་འཚལ་དེ་ཟེར། དེར་ནུབ་ཕྱོགས་བྱེ་མའི་གླིང་ལ་ཁྲིད་དེ་ལ་ཐོད་ཕུད་ནས་ཨ་མི་ཏཱ་བྷའི་ཞལ་བསྟན་ཞལ་བཅུ་གཅིག་པ་དངོས་སུ་བསྟན་ཡང་ཟེར། ཁྱེད་སྤྱན་རས་གཟིགས་སེམས་ཅན་འདི་ཙམ་གསོད་པ་ཙུག་ལགས་ཞུས་པས་བོད་མི་འདི་རྣམས་ཞི་བས་མི་འཐུལ་བས་སྤྲུལ་པ་བྱས་པ་ཡིན་གསུངས་སྟེ་སེ་གོལ་བརྡབས་པས་ཁྲིམས་ར་དང་གཤེད་མ་སོགས་མི་སྣང་བར་གྱུར། དེ་གཉིས་ཡིད་ཆེས་ནས་གདམ་པ་ཞུས་པས། ལུས་ཀྱི་མི་དགེ་བ་གསུམ་སྤོངས་ལ་ཕྱག་དང་སྐོར་བ་བྱེད་ཅིང་མཐོ་རིས་ཀྱི་གཞི་རྟེན་ཚུལ་ཁྲིམས་བསྲུངས་ལ་བསླབ་གསུམ་དང་མི་འབྲལ་བར་གྱིས་ཅིག །ངག་གི་མི་དགེ་བ་བཞི་སྤོངས་ལ་སངས་རྒྱས་དང་དམ་ཆོས་ཐམས་ཅད་ཀྱི་སྙིང་པོ་ཡི་གེ་དྲུག་པ་ཟློས་ཅིག །ཡིད་ཀྱི་མི་དགེ་བ་གསུམ་སྤོངས་ལ་དཀོན་མཆོག་གསུམ་ལ་སྐྱབས་སུ་སོང་སྟེ་བྱམས་པ་དང་སྙིང་རྗེ་དྲག་པོས་བདག་གཞན་བརྗེ་བའི་བློ་སྒོམས་ཅིག་ཆོས་བཟང་པོ་ལས་བསམ་པ་བཟང་པོ་ལྷག་པ་ཡིན་ནོ། །འདི་གསུམ་དང་ལྡན་ན་བྱང་ཆུབ་འགྲུབ་ལ་མི་ལྡན་ན་མདོ་རྒྱུད་མན་ངག་ཐམས་ཅད་བློ་ནས་འདོན་དུ་ཡོད་ཀྱང་སྙིང་པོ་མེད་ཏོ་ཅེས་གདམས་ཤིང་གཞན་ཡང་ཐུགས་རྗེ་ཆེན་པོའི་ཆོས་སྐོར་དུ་མ་གསུངས་སོ། །དེ་ནས་དེ་གཉིས་ཀྱིས། ཀྱེ་མ་ཆོས་རྒྱལ་སྤྲུལ་པའི་སྐུ། །ཨཱརྻ་པ་ལོ་ཐུགས་རྗེ་ཅན། །ཡུལ་དུ་འགྲོ་བས་སྐྱེལ་མ་ཞུ། །ཞེས་ཞུས་པས་ཁྱེད་གཉིས་ཡུད་ཙམ་གྱིས་ཕྱིན་པར་འདོད་དམ་གསུངས། འཚལ་ལོ་ཞུས་པས་ཐུ་བར་བྱེ་མ་བྲེ་རེ་བླུག་སྟེ་སྤྱི་བོར་ཕྱག་བཞག་ནས་བྱིན་གྱིས་བརླབས་པའི་མདོ་ལ་རང་ཡུལ་དུ་སླེབས་སྟེ་བྱེ་མ་གསེར་དུ་གྱུར་ནས་སྣང༌། དེ་ཕྱིན་(ཇ༤༧བ)

[Full Size]

ལི་ཡུལ་ཐམས་ཅད་དུ་བོད་ཀྱི་རྒྱལ་པོ་ནི་སྤྱན་རས་གཟིགས་དངོས་སོ་ཞེས་གྲགས། དེ་གཉིས་ཕྱི་མར་དགྲ་བཅོམ་པ་ཐོབ་སྟེ་ཐེ་ཚོམ་ཟོས་པས་དངོས་གྲུབ་ཕྱི་མར་འགྱངས་པའོ། །འདི་ལ་འཇམ་དཔལ་བསྒྲུབས་པས་ང་དང་ལས་འབྲེལ་མེད་ཀྱིས་སྤྱན་རས་གཟིགས་ཀྱི་དྲུང་དུ་སོང་ཞེས་ཀྱང་སྣང་ངོ༌། །གུང་རི་གུང་བཙན་རྒྱལ་སར་དབང་བསྐུར་སྟེ། །དེ་ཡི་ལྷ་སྲས་མང་སྲོང་མང་བཙན་འཁྲུངས། །གུང་སྲོང་ཆབ་སྲིད་ལོ་ལྔར་མངའ་མཛད་ནས། །བཅོ་བརྒྱད་བཞེས་ཚེ་པོ་ཊ་ལ་རུ་གཤེགས། །གུང་སྲོང་འདི་ཡབ་ཀྱིས་ང་གསུམ་བཞེས་པ་ལྕགས་མོ་སྦྲུལ་ལ་འཁྲུངས། ལོ་བཅུ་གསུམ་ན་རྒྱལ་སར་བསྐོས། བཙུན་མོ་འ་ཞ་བཟའ་མོང་རྗེ་ཁྲི་དཀར་ཁབ་ཏུ་བཞེས་པ་ལ་མེ་ཁྱི་ལ་སྲས་མང་སྲོང་མང་བཙན་འཁྲུངས། བློན་པོ་མྱང་མང་པོ་རྗེ་ཞང་སྣང་དང་སྣུབས་བཙན་ཏོ་རེས་བྱས། ཆབ་སྲིད་ལོ་ལྔ་མཛད་དེ་བཅོ་བརྒྱད་ལ་གཤེགས། གུང་སྲོང་བང་སོ་དོན་མཁར་མདའ་རུ་བརྩིགས། །གྲལ་ནི་གནམ་རི་སྲོང་བཙན་གཡོན་ན་ཡོད། །མིང་ནི་གུང་ཆེན་གུང་རི་ལགས་སོ་སྐད། །སླར་ཡང་ཡབ་ཀྱིས་རྒྱལ་སྲིད་ཆོས་བཞིན་མཛད། །བོད་ཡུལ་བདེ་སྐྱིད་ཕུན་ཚོགས་འབྱུང་བའི་སླད། །དགོས་འདོད་སྩོལ་བའི་གཏེར་མང་སྦས་པ་ནི། །ཀ་བ་བུམ་པ་ཅན་དང་ཉེ་བར་སར། །དམ་ཆོས་གཏེར་སྦས་དེ་ཡི་ཕན་ཡོན་གྱིས། །སངས་རྒྱས་བསྟན་པ་ཉི་མ་ཤར་འདྲ་འབྱུང༌། །ཐམས་ཅད་དམ་པའི་ཆོས་ལ་སྤྱོད་པར་འགྱུར། །ཤིང་ལོ་ཅན་ལ་གསེར་དངུལ་རིན་ཆེན་སྦས། །རིན་ཆེན་ལ་སྤྱོད་མཐའ་ནོར་མ་ལུས་འདུ། །སྦྲུལ་མགོ་ཅན་ལ་དྲག་སྔགས་མཐུ་གཏེར་སྦས། །མཐའ་དམག་བགེགས་དང་ལོག་འདྲེན་ཞི་བར་འགྱུར། །སེང་མགོ་ཅན་ལ་ཕྱུགས་ཀྱི་གཡང་ཡིག་སྦས། །བཞོན་ཕྱུགས་འཕེལ་ཞིང་དཀར་ཐོག་བཅུད་ལྡན་འགྱུར། །རཏྣ་དེ་ཝ་ཛམ་ལའི་འོག་དུ་སྦས། །རྒྱན་གོས་ནོར་འབྲུ་གང་ལ་ཅི་འདོད་འབྱུང༌། །སྟག་ཤ་དེ་ཝ་ཀླུ་ཁང་ནང་དུ་སྦས། །ལོ་ལེགས་ཆར་འབབ་ཀླུ་ཡི་གནོད་པ་འཇིལ། །(ཇ༤༨ན)

[Full Size]

བཻ་ཌཱུར་ལྷུང་བཟེད་ཟས་སྣའི་ཚོགས་ཀྱིས་བཀང༌། །གནོད་སྦྱིན་ཁང་སྦས་བཟའ་བཏུང་མ་ལུས་འབྱུང༌། ཁ་ཟས་ལྷག་པར་བཅུད་དང་ལྡན་པ་ཡིན། །ཟངས་ཆེན་གསེར་དང་རིན་ཆེན་ཚོགས་ཀྱི་བཀང༌། །དཀྱིལ་འཁོར་འོག་སྦས་མཆོད་དང་ཞིག་གསོའི་རྒྱུར། །སྐལ་བ་ཅན་ལ་སྨོན་ལམ་བཏབ་སྟེ་སྦས། །གཞན་ཡང་རིན་ཆེན་སྣ་ཚོགས་དུ་མ་རྣམས། །ནང་སྐོར་དུ་མར་དཔག་མེད་སྦས་པ་ཡིས། །ས་ཕྱོགས་འོད་ལྡན་ཆར་ཆུ་དུས་སུ་འབབ། །ཐན་པ་སད་སེར་བཙའ་དང་མུ་གེ་མེད། །ནད་དང་མཐའ་དམག་མི་འབྱུང་བཀྲ་ཤིས་ཤིང༌། །བདེ་ལེགས་ཡོན་ཏན་དཔག་མེད་འབྱུང་བར་འགྱུར། །ཅུང་ཟད་ཞིབ་པར་བཀའ་ཡི་ཐང་ཡིག་བལྟ། །ཐང་ཡིག་ནས་འདི་ལྟར་བཤད་ཅིང་གཏེར་སྒོ་སོགས་རེ་ཞིག་སྣང་ལ་ཀ་བཀོལ་མར་ཤིང་ལོ་ཅན་ལ་ཆོས་གཏེར། སེང་མགོ་ཅན་ལ་ཕྱིར་ལྡོག །བུམ་པ་ཅན་ལ་རིན་པོ་ཆེའི་གཏེར། དཀྱིལ་འཁོར་གྱི་འོག་དུ་སྟག་ཤ་དེ་ཝ། ཀླུ་ཁང་དུ་རཏྣ་དེ་ཝ། བཻ་ཌཱུ་རྻའི་ལྷུང་བཟེད་ཐེམ་པ་ལ་སྦས་ཅེས་ཀྱང་སྣང་ཞིང་སྤྱིར་ཁ་བྱང་སོགས་ཤིན་ཏུ་རྒྱས་པར་ཡོད་འདུག་པ་མ་དཔེ་ལ་ལར་སྣང་ངོ༌། །ཀོང་ཇོས་ཀྱང་ས་དཔྱད་ལེགས་པར་མཛད་པས་བོད་འབངས་ལ་དྲིན་ཆེའོ་ཞེས་རྒྱལ་པོ་དང་ཁྲི་བཙུན་གྱིས་དྲིན་དུ་གཟོ་བར་མཛད་ཏོ། །རྒྱལ་པོའི་ཞལ་ནས་ང་ཡི་ལྷ་ཁང་འདིར། །རྒྱལ་བའི་རྟེན་མཆོག་རྨད་དུ་བྱུང་བ་རྣམས། །རིན་ཆེན་དཔག་མེད་དང་བཅས་བཞུགས་པའི་མཐུས། །ཇི་སྲིད་སངས་རྒྱས་བསྟན་པ་གནས་ཀྱི་བར། །རིན་ཆེན་གླིང་ལྟར་ཡོན་ཏན་དཔག་མེད་ལྡན། །མཆོག་གི་སྤྲུལ་སྐུ་དངོས་སུ་བཞུགས་པའི་ཕྱིར། །ས་བཅུའི་བྱང་ཆུབ་སེམས་དཔའ་སྐྱེས་ཆེན་རེ། །ཟག་པ་ཀུན་ཟད་འཕགས་པ་དགྲ་བཅོམ་རེ། །ཡེ་ཤེས་མཆོག་དངོས་གྲུབ་པའི་དབང་པོ་རེ། །རང་བཞིན་ལྷན་ཅིག་སྐྱེས་མའི་མཁའ་འགྲོ་རེ། །ནམ་ཡང་རྒྱུན་མི་འཆད་(ཇ༤༨བ)

[Full Size]

པར་རྟག་དུ་བཞུགས། །སྣ་ཚོགས་གཟུགས་འཛིན་ཕལ་གྱིས་རྟོགས་པར་དཀའ། །བོད་ཡུལ་ལྷ་ཁང་ཀུན་ལས་མངོན་པར་མཐོ། །ཡོན་ཏན་ཀུན་ལྡན་ལོངས་སྤྱོད་ཟད་པ་མེད། །མཐའ་བཞི་ལས་རྒྱལ་གྲགས་པས་གླིང་བཞི་ཁྱབ། །ཛམྦུའི་གླིང་ན་འགྲན་ཟླ་བྲལ་ལོ་གསུང༌། །འདི་ལ་འདུལ་བྱ་ཞབས་ཏོག་མཐའ་ནས་རྒྱས། །མཐའ་མི་དབང་འདུས་དཔལ་འབྱོར་མཁའ་དང་མཉམ། །མ་འོངས་དུས་ན་ང་ཡི་དབོན་སྲས་སོགས། །བོད་ཡུལ་ལྷ་ཁང་བཞེང་བར་འདོད་པ་རྣམས། །ས་ཕུད་རྡོ་ཕུད་ར་སའི་གནས་འདིར་སྐྱོལ། །རབ་གནས་ལྷུན་གྲུབ་བགེགས་དང་བར་ཆད་མེད། །བཀྲ་ཤིས་ཡོན་ཏན་ཀུན་ལྡན་འགྱུར་རོ་གསུང༌། །དེ་ནས་ཆོས་རྒྱལ་སྤྲུལ་པའི་སྐུ་དེ་ཡིས། །དབོན་སྲས་མང་སྲོང་དབུ་ལ་ཕྱག་བཞག་ནས། །པང་སྐོང་ཕྱག་རྒྱ་པད་དཀར་ཟླ་བ་སྒྲོན། །ཐུགས་རྗེ་ཆེན་པོའི་ཆོས་སྐོར་བཤད་རྒྱུད་དང༌། །སྒྲུབ་སྐོར་དོན་རྒྱུད་ཐམས་ཅད་རྫོགས་པར་གནང༌། །འོག་མིན་གནས་མཆོག་ར་སའི་གཙུག་ཁང་ལ། །མཆོད་དང་སྐོར་བ་མཐོང་ཐོས་དྲན་རེག་དང༌། །རགས་དང་ཞིག་གསོའི་ཕན་ཡོན་བྱ་ཐབས་སོགས། །རྒྱ་ཆེར་བསྩལ་བ་ཆུ་དར་ལ་བྲིས་ནས། །གནོད་སྦྱིན་ཁང་པ་ལ་སོགས་དུ་མར་སྦས། །མ་འོངས་སྐལ་བར་ལྡན་ལ་སྨོན་ལམ་བཏབ། །གཞན་ཡང་ང་ནས་གདུང་རབས་ལྔ་པ་ན། །ང་ཡི་མིང་ལ་ལྡེ་བཏགས་རྒྱལ་པོ་འབྱུང༌། །དེ་དུས་པཎ་ཆེན་མང་པོ་བོད་དུ་འབྱོན། །གཙུག་ཁང་མང་བཞེང་བསྟན་པ་རྒྱས་པར་འགྱུར། །ངུར་སྨྲིག་གོས་འཛིན་རབ་བྱུང་མང་འབྱུང་བས། །ང་ཡི་དབོན་སྲས་རྣམས་ཀྱིས་སྤྱི་བོར་ཁུར། །མཆོད་པའི་གནས་ཀྱིས་འཚོ་བ་བླ་ནས་སྦྱོར། །ཕན་བདེ་དགེ་ལེགས་མ་ལུས་འབྱུང་ངོ་གསུངས། །དེ་འཕྲལ་མགར་གྱིས་ཟངས་ཀྱི་གླེགས་བུར་བྲིས། །མཆིམས་ཕུའི་དཀོར་མཛོད་ནང་དུ་བཞག་(ཇ༤༩ན)

[Full Size]

པར་གྱུར། །གཞན་ཡང་བཙུན་མོ་ཕྱི་བློན་ནང་བློན་དང༌། །བོད་འབངས་བྱིས་པ་ཡན་ལ་ཞལ་གདམས་གསུངས༌། །ཐམས་ཅད་ཡི་གེ་དྲུག་པའི་ཆོས་ལ་བཀོད། །དེ་རྣམས་ཐོན་མི་སོགས་ཀྱིས་ཡི་གེར་བྲིས། །མ་འོངས་སྐལ་ལྡན་དོན་དུ་གཏེར་དུ་བཞག །སྤྲུལ་པའི་རྒྱལ་པོའི་ངོ་མཚར་མཛད་པ་རྣམས། །ཀ་བ་བུམ་པ་ཅན་ལ་ཉེ་བར་སྦས། །བཀའ་ཆོས་ཟབ་མོའི་གདམས་པ་དེ་རྣམས་ཀྱིས། །མ་འོངས་བོད་ཡུལ་འགྲོ་བའི་དོན་བྱེད་པར། །བདེན་པའི་སྟོབས་ཀྱིས་བྱིན་བརླབས་སྨོན་ལམ་མཛད། །དེ་ཡང་གབ་པ་མངོན་ཕྱུང་ལས། བཀའ་ཆོས་རྣམས་རིན་པོ་ཆེའི་གཏེར་དུ་བཞུགས་ནས་མ་འོངས་པའི་དུས་འགྲོ་བ་ལ་ཕན་པར་གྱུར་ཤོག་གི་སྨོན་ལམ་བཏབ་པར་འཚལ་ནས་དཀོན་མཆོག་ལ་མཆོད་པ་མཛད། འཁོར་འབངས་ལ་བཟའ་བཏུང་བཀྱེ། ཆོས་སྐྱོང་དཔང་དུ་གསོལ་ནས་ད་ལྟ་བདག་གིས་དཀོན་མཆོག་ལ་མཆོད་པ་དང་སྐྱེ་བོ་ལ་བཟའ་བཏུང་བྱིན་པ་འདི་ལ་བརྟེན་ནས་བདག་གི་བཀའ་ཆོས་ཀྱི་ཤོག་དྲིལ་དུས་ཀྱི་ཕྱི་མ་ལ་དགོངས་པ་འདི་རྣམས་རྙིགས་མའི་དུས་སུ་སྐལ་ལྡན་ལས་འཕྲོ་ཅན་རྣམས་དང་འཕྲད་ནས་བྱང་ཕྱོགས་ཁ་བ་ཅན་གྱི་རྒྱལ་ཁམས་ཐམས་ཅད་འཕགས་པའི་བཀའ་ལ་ཐོགས་པར་གྱུར་ཅིག །ཐོགས་ནས་ཀྱང་རིས་དྲུག་གི་དུ་ཁ་ཐམས་ཅད་དེ་ཉིད་དུ་ཟད་ནས་བདེ་བ་ཕུན་སུམ་ཚོགས་པ་དང་ལྡན་པར་གྱུར་ཅིག །དེའི་ཚེ་བདག་གི་གཙུག་ལག་ཁང་འདི་རྣམས་སུ་འཕགས་པ་རྣམས་འཁུར་ཞིང་ཞབས་ཏོག་གི་འོས་མང་བར་གྱུར་ཅིག །དེའི་བྱིན་རླབས་ཀྱིས་བོད་འབངས་ཐམས་ཅད་བདེ་སྐྱིད་ཕུན་སུམ་ཚོགས་པ་དང་ལྡན་པར་གྱུར་ཅིག །དེ་ཁོ་ན་འགྲུབ་པར་གྱུར་ཅིག །ཅེས་བཀའ་བསྩལ་པ་དང་ཐམས་ཅད་དགའ་བདེས་ཁྱབ་སྟེ་ཅ་ཅོ་དང་རྩེ་འཇོ་མང་པོ་བྱས་པ་དང་རྒྱལ་པོའི་ཞལ་ནས། འཁོར་འདས་ཀྱི་ཆོས་ཐམས་ཅད་རང་སྣང་གཞི་མེད་དུ་འདུག་གོ །བློ་འདས་བྱར་མེད་ཅིག་འདུག་གོ །ཇི་བཞིན་པའི་ངང་ལས་མ་བཅོས་པར་གློད་ལ་ཞོག་ཞིག་ཞེས་གསུངས་པ་དང་ཐམས་ཅད་ཀྱི་རྒྱུད་ལ་གཉིས་འཛིན་ཞིག་སྟེ་ཇི་བཞིན་པའི་ངང་ལ་གནས་པར་གྱུར་ཏོ། །ཅེས་བྱུང་ངོ༌། །(ཇ༤༩བ)

[Full Size]

ཁྱད་པར་དབོན་སྲས་དམ་པ་མང་སྲོང་ལ། །ཐུགས་ཀྱི་གསང་མཛོད་གབ་པ་མངོན་དུ་ཕྱུང༌། །གཞན་ཡང་མ་འོངས་རྒྱ་ཆེར་ལུང་བསྟན་མཛད། །དེ་ནས་ནང་པར་ཉི་མ་ཤར་བ་དང་དབོན་སྲས་ཀྱིས་དབུ་རྩེའི་ཡང་ཐོག་དུ་རང་གི་ན་བཟའ་ལ་སྟན་བྱས་སྟེ་ཞལ་ཟས་མང་པོ་དྲངས་སྟེ་ཕྱག་བྱས་ནས། སངས་རྒྱས་ཀུན་གྱི་འཕྲིན་ལས་དང༌། །སྣང་བ་མཐའ་ཡས་ཐུགས་རྗེ་ལས། །བདེ་བ་ཅན་ནས་ཕོ་ཉར་བྱོན། །བོད་འབངས་ཡོངས་ཀྱི་སྐྱབས་གནས་མཛད། །བདག་ཅག་ཀུན་ལ་ཐུགས་རྗེས་གཟིགས། །རྒྱལ་བའི་སྐུ་དང་ཐ་མལ་མཇལ། །ཟབ་མོའི་ཐུགས་དགོངས་གནང་མོད་ཀྱང༌། །ཆོས་ཉིད་དོན་གྱི་ཐུགས་རྗེ་དེ། །རྒྱལ་བའི་ཐུགས་ལ་མི་གབ་པར། །གབ་པ་མངོན་དུ་ཕྱུང་ནས་ནི། །རང་སྣང་ཡུལ་མེད་བསྟན་དུ་གསོལ། །བློ་འདས་བྱར་མེད་བསྟན་དུ་གསོལ། །མ་བཅོས་ངང་ནས་བསྟན་ནས་ཀྱང༌། །བྱར་མེད་ངང་ལ་གནས་པ་ལས། །སྐུ་གསུམ་ཤུགས་ལས་འཆར་པའི་ཚུལ། །དངོས་ཅག་བློ་ལ་སྦྱར་དུ་གསོལ། །ཞེས་ཞུས་པས་རྒྱལ་པོས་བཀའ་སྩལ་པ། ལྷ་སྲས་ཆེན་པོ་ཉོན་ཞིག །བདག་ནི་སངས་རྒྱས་ཀུན་གྱི་འཕྲིན་ལས་ཡིན། །སྣང་བ་མཐའ་ཡས་དྲུང་དུ་དམ་ཡང་བཅས། །བྱང་ཆུབ་སེམས་ཀྱིས་བོད་འབངས་དོན་ལ་ཡོང༌། །ང་དང་རྒྱལ་བ་གཉིས་སུ་མེད། །འགྲོ་ཀུན་ང་ཡིས་འདུལ་བ་ཡིན། །ཁྱེད་ཀུན་འཕགས་པའི་བྱིན་བརླབས་ཡིན། །རྒྱལ་བའི་དགོངས་རྒྱུད་ཟབ་མོ་རྣམས། །འཕགས་པའི་ལམ་སྟེགས་ཡིན་མོད་ནའང༌། །ཆོས་ཉིད་དོན་གྱི་ཐུགས་རྗེ་དེ། །བློ་དམན་རྣམས་ལ་བསྟན་མི་འོས། །བརྩེ་བས་གབ་པ་མངོན་ཕྱུང་འདི། །མ་རྟོགས་སྒྲོ་དང་སྐུར་བའི་གཞི། །སྐལ་མེད་རྣམས་ལ་ཡེ་གསང་ཆོད། །ཙིཏྟ་སྙིང་གི་དཀྱིལ་དུ་ཆོངས། །ཆོས་ཉིད་ཟད་སར་སྐྱོལ་བ་ཡང༌། །ང་ཡིས་བསྟན་གྱིས་ལེགས་པར་ཉོན། །སྣ་ཚོགས་དག་ཀྱང་རང་སྣང་ཡིན། །ཡུལ་མེད་དེ་ནི་བློ་ལས་འདས། །བློ་འདས་དེ་ནི་བྱར་མེད་ཡིན། །ཇི་བཞིན་པ་ཡི་ངང་གནས་ཡིན། །གནས་པ་མེད་པ་གློད་པའི་མཆོག །དེ་ལྟར་གོ་བའི་གང་ཟག་གིས། །མཐའ་བྲལ་སྤྲོས་པ་ཆོད་པ་ལ། །ལྟ་བའི་མིང་དུ་བཏགས་པ་ཡིན། །རང་གསལ་འཛིན་པ་སྟོར་བ་ལ། །སྒོམ་པའི་མིང་དུ་བཏགས་པ་ཡིན། །དོན་དང་འབྲལ་བ་མེད་པ་ལ། །སྤྱོད་པའི་མིང་དུ་བཏགས་པ་ཡིན། །སྤང་བླང་འཛིན་པ་ཅིག་པ་ལ། །(ཇ༥༠ན)

[Full Size]

འབྲས་བུའི་མིང་དུ་བཏགས་པ་ཡིན། །རྩོལ་མེད་འགྲོ་དོན་བྱེད་པ་ལ། །ཐུགས་རྗེའི་མིང་དུ་བཏགས་པ་ཡིན། །དེ་ལ་སྐྱོ་དུབ་མེད་པ་ལ། །ཆེན་པོའི་མིང་དུ་བཏགས་པ་ཡིན། །འགྲོ་དོན་མཛད་ཀྱང་སྐྱོན་མ་གོས། །འཕགས་པའི་མིང་དུ་བཏགས་པ་ཡིན། །སྙིང་རྗེས་དབང་དུ་འདུས་པ་ལ། །རྒྱལ་པོའི་མིང་དུ་བཏགས་པ་ཡིན། །འགྲོ་བའི་ཁ་ལོ་སྙོམས་པ་ལ། །སྲོང་བཙན་མིང་དུ་བཏགས་པ་ཡིན། །བློ་ལ་གང་ཕན་བཤད་པ་ལ། །གདམས་ངག་མིང་དུ་བཏགས་པ་ཡིན། །རྗེད་ཐོར་ཤུལ་དུ་བཞག་པ་ལ། །བཀའ་རྒྱུད་མིང་དུ་བཏགས་པ་ཡིན། །འགྲོ་བ་དང་བ་འདྲེན་པ་ལ། །གཙུག་ཁང་མིང་དུ་བཏགས་པ་ཡིན། །རྣམ་རྟོག་རང་སར་གྲོལ་བ་ལ། །སངས་རྒྱས་མིང་དུ་བཏགས་པ་ཡིན། །འགྲོ་བ་ལམ་དུ་འཇུད་པ་ལ། །དམ་ཆོས་མིང་དུ་བཏགས་པ་ཡིན། །བྱར་མེད་བློ་ལ་འབྱོར་བ་ལ། །དགེ་འདུན་མིང་དུ་བཏགས་པ་ཡིན། །རྩོལ་མེད་རང་ལུགས་གློད་པ་ལ། །བྱར་མེད་མིང་དུ་བཏགས་པ་ཡིན། །ཐ་མལ་རྟོག་པ་བསྒྱུར་པ་ལ། །སྐྱེད་རིམ་མིང་དུ་བཏགས་པ་ཡིན། །བློ་ཡི་འཁྲིད་ཐབས་སྣ་ཚོགས་ལ། །ཆོས་སྤྱོད་མིང་དུ་བཏགས་པ་ཡིན། །རྩ་བྲལ་ནང་དུ་ཤེས་པ་ལ། །རྟོགས་པའི་མིང་དུ་བཏགས་པ་ཡིན། །དོན་གོ་གཅིག་ལས་མེད་པ་ལ། །ཉག་གཅིག་མིང་དུ་བཏགས་པ་ཡིན། །དུ་མ་ངོ་བོ་གཅིག་པ་ལ། །ཆོས་སྐུའི་མིང་དུ་བཏགས་པ་ཡིན། །རང་སྣང་ལྷ་རུ་ཤར་བ་ལ། །ལོངས་སྐུའི་མིང་དུ་བཏགས་པ་ཡིན། །སྣ་ཚོགས་ཐབས་ཀྱིས་འདྲེན་པ་ལ། །སྤྲུལ་སྐུའི་མིང་དུ་བཏགས་པ་ཡིན། །རྟོག་མེད་རང་ས་ཟིན་པ་ལ། །མངོན་འགྱུར་མིང་དུ་བཏགས་པ་ཡིན། །བཏགས་པ་ཐམས་ཅད་མིང་ཡིན་གྱི། །མིང་གི་འཛིན་པ་མེད་པར་ཞོག །བསམས་པ་ཐམས་ཅད་བློ་ཡིན་གྱི། །བློ་ཡི་བྱེད་པ་ཞོག་ལ་ཐོང༌། །ཞོག་ཅེས་བྱ་བ་ཚིག་ཡིན་གྱི། །ཚིག་གི་འཛིན་པ་བོར་ལ་ཐོང༌། །ཐོང་ཞེས་བྱ་བ་བློ་ཡིན་གྱི། །བློ་ཡི་བྱེད་པ་དབྱིངས་སུ་སྦོས། །སྦེད་པ་བྱ་བ་བཟང་རྟོག་ཡིན། །བཟང་ངན་མེད་པར་ཁད་དེ་བ། །གབ་སྦས་མེད་པར་ལྷང་ངེ་བ། །འགྲོ་འོང་མེད་པར་ས་ལེ་བ། །སྤང་བླང་མེད་པར་ལྷུག་གེ་བ། །ཕྱོགས་རིས་མེད་པར་ཆམ་མེ་བ། །བཏང་བཟུང་མེད་པར་ཁྱིལ་ལེ་བ། །གསལ་འགྲིབ་མེད་པར་ལྷན་ནེ་བ། །བརྗེད་ཡེངས་མེད་པར་ཆ་ལེ་བ། །བཏང་བཞག་མེད་པར་(ཇ༥༠བ)

[Full Size]

ཝལ་ལེ་བ། །བློ་ལས་འདས་པའི་ཡུལ་ལ་ལྟོས། །ཚིག་ལས་འདས་པའི་དོན་ལ་ལྟོས། །བཟང་ངན་མེད་པའི་དབྱིངས་ལ་ལྟོས། །ཕྱི་ནང་མེད་པའི་སེམས་ལ་ལྟོས། །ཕོ་མོ་མེད་པའི་རྒྱུད་ལ་ལྟོས། །གཉིས་འཛིན་བྲལ་བའི་དོན་ལ་ལྟོས། །དོན་ཞེས་བྱ་བ་བློ་ལས་འདས། །འདས་པའི་རྗེས་སུ་མ་འབྲང་བར། །བརྗོད་ཚིག་བྲལ་བའི་ངང་ལ་ལྟོས། །བལྟས་པས་མཐོང་བའི་ཡུལ་མེད་ཀྱི། །མ་བལྟས་བཞག་པས་ཆོས་ཉིད་མཐོང༌། །མ་བསྒྲུབས་བཞག་པས་སེམས་ཉིད་འགྲུབ། །མ་བཟུང་གློད་པས་རང་སར་གྲོལ། །དེ་ལྟར་མཐོང་བའི་གང་ཟག་ལ། །འཁོར་འདས་གཉིས་སུ་ངས་མ་མཐོང༌། །དགེ་སྡིག་བཟང་ངན་རྟག་ཆད་དང༌། །ཕོ་མོ་བདེ་སྡུག་ཡིན་མིན་དང༌། །ཉེ་རིང་མཐོ་དམན་གཉིས་མ་མཐོང༌། །གསལ་འགྲིབ་གཉིས་སུ་ངས་མ་མཐོང༌། །མཐོང་བ་མེད་པའི་ངང་ཉིད་ནས། །སྣ་ཚོགས་ཤར་བ་རང་ཉིད་ཡིན། །སྣ་ཚོགས་འགག་པ་མེད་པར་ཞོག །འཛིན་མེད་སྤང་བླང་མེད་པར་ཞོག །སྣ་ཚོགས་འཛིན་བྲལ་ཆོས་སྐུ་ཡིན། །མ་འགགས་གསལ་བ་ལོངས་སྐུ་ཡིན། །སྣ་ཚོགས་གྲོལ་བ་སྤྲུལ་སྐུ་ཡིན། །ཐ་མལ་རྟོག་མེད་ཆོས་སྐུ་ཡིན། །ཆོས་ཉིད་འདོད་པ་ཐ་མལ་ཡིན། །བློ་ལས་འདས་པ་དེ་ཉིད་ཡིན། །འདོད་པ་བྲལ་ན་དོན་དང་འཕྲད། །གཉིས་འཛིན་གྲོལ་ན་གནས་སུ་གཏོལ། །སྤང་བླང་མེད་ན་དངོས་གྲུབ་ཐོབ། །འགྲོ་དོན་བྱེད་ན་འཕྲིན་ལས་རྫོགས། །བློ་ཐག་ཆོད་ན་འགྲོ་སར་ཕྱིན། །ཕྱིན་ས་མེད་ན་གཏོལ་བ་ཡིན། །དེ་ལྟ་བུ་ཡི་གང་ཟག་ལ། །རིག་པ་ཐམས་ཅད་རང་རིག་ཡིན། །ཤེས་པ་ཐམས་ཅད་རང་ཤེས་ཡིན། །གྲོལ་བ་ཐམས་ཅད་རང་གྲོལ་ཡིན། །གསལ་བ་ཐམས་ཅད་རང་གསལ་ཡིན། །སྟོང་པ་ཐམས་ཅད་རང་སྟོང་ཡིན། །འདུག་པ་ཐམས་ཅད་རང་འདུག་ཡིན། །གནས་པ་ཐམས་ཅད་རང་གནས་ཡིན། །བདེ་བ་ཐམས་ཅད་རང་བདེ་ཡིན། །སྡུག་བསྔལ་ཐམས་ཅད་རང་སྡུག་ཡིན། །ཐམས་ཅད་རང་རིག་རང་སྣང་ཡིན། །སྒོམ་དུ་མེད་པས་བསམ་དུ་མེད། །རྒྱུད་ལ་བྱར་མེད་ཡོངས་སུ་མེད། །བཞག་རྒྱུ་མེད་དེ་བཏང་རྒྱུ་མེད། །བརྗེད་རྒྱུ་མེད་དེ་ནོར་རྒྱུ་མེད། །ཡེ་ཤེས་དེ་ལ་རྒྱུན་ཆད་མེད། །ཏིང་ངེ་འཛིན་ལ་ཐུན་མཚམས་མེད། །དམིགས་པ་ལ་ཡང་བཏང་བཟུང་མེད། །རྣམ་པར་རྟོག་པ་བཟང་ངན་མེད། །ཡིད་ཀྱི་(ཇ༥༡ན)

[Full Size]

ཡུལ་ལ་ཕྱི་ནང་མེད། །དངོས་པོ་མེད་ལ་ཕོ་མོ་མེད། །རེ་དྭོགས་སྤངས་པས་སྐྱོན་དང་བྲལ། །འདོད་པ་མེད་པས་ཐོབ་པ་མེད། །རྩོལ་བ་མེད་པར་སྐྱོན་རྣམས་སྤངས། །འབྲས་བུ་ལ་རེ་བ་མེད་པས་སངས་རྒྱས་ཀྱི་འདོད་པ་ཅིག །བསམ་བརྗོད་བློ་ལས་འདས་པས་སྨྲ་བའི་ངག་དང་བྲལ། །དེ་ལྟར་དུ་རང་དབང་ཐོབ་ཙམ་ན་རྒྱུད་པ་རང་གིས་ཟིན། གྲོལ་ཆ་ནང་ནས་རྙེད། གཟུང་འཛིན་མཚན་མ་ཞིག །སྣང་སྲིད་བཀའ་རྒྱུད་དུ་ཤེས། བྱེད་སྤྱོད་ཆོས་སུ་འགྲོ། མཐོང་ཐོས་སྐུ་གསུམ་དུ་བྱོན། ཡེ་ཤེས་ནང་ནས་བརྡོལ། ཉོན་མོངས་རང་སར་དག །དད་གུས་རང་ལ་ཚུད། འཁོར་འདས་ཀྱི་རྩ་བ་རང་རིག་དུ་ཤེས། སྐྱིད་སྡུག་གསལ་འདེབས་སུ་ཤེས། བདག་འཛིན་ཆོས་སྐུར་གྲོལ་ལོ། །གཞི་མཐོང་བས་ལྟ་བ་མེད། རྩད་ཆོད་པས་སྒོམ་དུ་མེད། རང་ས་ཟིན་པས་སྒྲུབ་ཏུ་མེད། རང་སེམས་ངོ་ཤེས་པས་སངས་རྒྱས་མེད་ཏོ། །ཤེས་རབ་རང་རྡོལ་དུ་བྱོན་པས་ཝལ་པོ་རྗེས་མེད་དུ་འདུག་པ། སྣ་ཚོགས་འགག་མེད་དུ་གྲོལ་བས་ཚོར་བ་རྗེས་མེད་དུ་སངས་པ། རིག་པ་བསླན་སར་ཆགས་པས་ཆོས་སྐུ་གཅེར་མཐོང་དུ་གྲོལ་བ། རིག་པ་རྐྱང་འདེད་དུ་འདུག་པས་གཉིས་སུ་མེད་པའི་སྐུ་རང་སྣང་ཆེན་པོའི་ངང་ལ་ལུས་སོ། །རང་བྱུང་ཡིན་པས་ལྷུན་གྲུབ་ཏུ་བྱུང༌། རང་གསལ་ཡིན་པས་གཏིང་གསལ་དུ་ཤར། རང་སྣང་ཡིན་པས་འོད་གསལ་དུ་སྣང༌། རང་རིག་ཡིན་པས་ཆོས་སྐུར་བྱུང༌། རང་གྲོལ་ཡིན་པས་ཟང་ཐལ་དུ་བྱུང་ངོ༌། །དེ་ཡང་རང་གིས་མ་བྱས་པར་གཞན་གྱིས་བྱེད་དམ། རང་ལ་བསམ་དུ་མེད་པར་གཞན་ལ་མཚོན་པས་རྙེད་དམ། རང་མ་རིག་པར་སེམས་ཅན་ཐུལ་ལམ། འདུ་འབྲལ་མེད་པ་བཙལ་བས་རྙེད་དམ། ཕྱིན་པ་མེད་པ་བདས་པས་ཟིན་ནམ། དངོས་པོ་མེད་པ་ལག་དུ་ལོན་ནམ། བསྟན་རྒྱུ་མེད་པ་མིག་གིས་མཐོང་ངམ། རང་ལ་ཡོད་པ་གཞན་ལ་འཚོལ་ལམ། གསལ་བའི་རྟིང་ལ་ལྟའམ། གྲོལ་བའི་རྟིང་ལ་བཤིག་གམ། དག་པའི་རྟིང་ལ་འཁྲུའམ། འགྲངས་པའི་རྟིང་ལ་ཟའམ། ངོམས་ཀྱི་རྟིང་ལ་འཐུང་ངམ། དྲོས་པའི་རྟིང་ལ་གོན་ནམ། ཤེས་པའི་རྟིང་ལ་འཐོམས་སམ། དེ་ལྟར་སེམས་ལ་རྒྱུ་རྐྱེན་བྲལ་བས་རྩོལ་སྒྲུབ་ཀྱི་བློ་དང་བྲལ་སྟེ་དངོས་མེད་ལ་གཉེན་པོས་བཅོས་སུ་འདུག་གམ། ཡོད་མེད་ཀྱི་བློ་དང་བྲལ་(ཇ༥༡བ)

[Full Size]

བས་རྟག་ཆད་རང་སར་དག །གཉིས་འཛིན་རང་སར་གྲོལ་བས་རེ་དོགས་ཀྱི་མཐའ་སྤངས། ཞེན་འཛིན་རང་སར་གྲོལ་བས་སྐྱེ་མེད་རང་སར་ཟིན། རྟོག་མེད་ནང་ནས་མཐོང་བས་དགྲ་བགེགས་རང་སར་འཐུལ། འོ་འདི་ལྟར་རིག་པ་རྒྱ་ཡན་གཉེན་པོ་མེད་པ་ལ་ཡེ་ཤེས་རང་སྣང་གི་སྤྱོད་པ་ཟེར་བ་ཡིན་ནོ། །རྟོག་མེད་རང་ལུགས་གནས་པ་ལ་སྤང་བླང་མེད་པ་ཟེར་བ་ཡིན་ནོ། །ཡེ་ཤེས་ནང་ནས་ཤར་བ་ལ་རྣམ་རྟོག་རང་གྲོལ་ཟེར་བ་ཡིན་ནོ། །ཡིན་མིན་བློ་ལས་འདས་པ་ལ་དགག་སྒྲུབ་བྲལ་བ་ཟེར་བ་ཡིན་ནོ། །འབད་རྩོལ་མེད་པར་ཟིན་པ་ལ་ཆོས་ཉིད་ཀློང་རྡོལ་ཟེར་བ་ཡིན་ནོ། །ལྷུན་གྲུབ་སྐྱེ་བ་མེད་པ་ལ་འབྲས་བུ་རང་ཤར་ཟེར་བ་ཡིན་ནོ། །དེ་ལྟར་གོ་བ་དང་རྟོགས་པ་དུས་མཉམ། ཤེས་པ་དང་གྲོལ་བ་དུས་མཉམ། གསལ་བ་དང་མཐོང་བ་དུས་མཉམ། འབྱར་བ་དང་རེག་པ་དུས་མཉམ། བརླན་པ་དང་གཤེར་བ་དུས་མཉམ། འོ་དེ་ལྟར་ཤེས་པའི་གང་ཟག་གིས་ལྟ་བ་ལ་ཕྱོགས་རིས་མེད་ཀྱིས་ན་མཁའ་གོན། སྒོམ་པ་ལ་གསལ་འགྲིབ་མེད་ཀྱིས་ཉི་ཟླ་ཁུར། སྤྱོད་པ་ལ་ཐོགས་བརྡུགས་མེད་ཀྱིས་རླུང་ལ་ཞོན། འབྲས་བུ་ལ་བླང་དོར་མེད་ཀྱིས་གསེར་གླིང་ལྟོས། དེ་ལྟར་རྟོགས་པའི་གང་ཟག་གིས་ལྟ་བ་ལ་བལྟ་རྒྱུ་གདའ་ཡེ། སྒོམ་པ་ལ་སྒོམ་རྒྱུ་ལྟར་གདའ་ཡེ། སྤྱོད་པ་ལ་སྤྱོད་རྒྱུ་གདའ་ཡེ། འབྲས་བུ་ལ་སྒྲུབ་རྒྱུ་གདའ་ཡེ། རིག་པ་གཤིས་ཐོག་དུ་སྐྱོལ་མཚན་མ་རང་གྲོལ་དུ་ཐོང་ཕྱི་ནང་གི་འཛིན་པ་ཤིག་བཟང་ངན་གྱི་བླང་དོར་སྤོངས་ཆགས་ཞེན་གྱི་འཛིན་པ་ཁྲོལ་བཟང་འདོད་ཀྱི་ང་རྒྱལ་ཆོག་འགྲན་སེམས་ཀྱི་ཕྲག་དོག་ཤོལ་ཞེ་སྡང་གི་མེ་ཆེན་སོད་གཏི་མུག་གི་མུན་པ་སོལ། བྱར་མེད་ཀྱི་ངང་ལ་ཡེངས་མེད་ཏུ་ཞོག་གཉིས་འཛིན་གྱི་བློ་ནམ་མཁའི་དབྱིངས་སུ་རྒྱས་ཐོབ། དོན་ལ་སྒོམ་རྒྱུ་མེད་ཀྱིས་རིག་པ་རང་སར་ཞོག །འོ་དེ་ལྟ་བུའི་གང་ཟག་གིས། སྐྱེད་རིམ་བསྒོམས་ན་སྣང་སྲིད་ལྷ་རུ་འགྱུར། །རྫོགས་རིམ་དྲན་ན་གཉིས་འཛིན་མཚན་མ་ཞིག །ཟུང་འབྲེལ་འདོད་ན་བར་སྣང་འཇའ་ཚོན་ལྟོས། །དོན་གོ་མཐོང་ན་ཐ་མལ་ཆོས་མེད་སྡོད། །མ་མཐོང་བར་དུ་བླ་མ་བཀའ་རྒྱུད་བསྟེན། །ཆོས་སྤྱོད་བྱེད་ན་རང་འདོད་ཞེན་པ་སྤོངས། །མི་འཇིགས་གོ་ཆ་འདོད་ན་སྒོ་གསུམ་ལྷ་རུ་བསྒྱུར། །གཞན་དོན་བྱེད་ན་འགྲོ་ལ་ཕན་སེམས་སྐྱེད། །རང་དོན་སྒྲུབ་ན་འདུ་འཛི་གཡེང་བ་སྤོངས། །དགྲ་བགེགས་(ཇ༥༢ན)

[Full Size]

འདུལ་ན་རྩ་བྲལ་སྙིང་རྗེ་སྐྱེད། །ཕྱི་མ་བདེ་འབྲས་འདོད་ན་ད་ལྟ་དཀའ་བ་ཆོད། །འགྲོ་བ་དབང་དུ་སྡུད་ན་བདག་པས་གཞན་གཅེས་གྱིས། །སྙོམ་ལས་ལེ་ལོ་དྲན་ན་འཆི་བ་མི་རྟག་སྒོམས། །ཆགས་ཞེན་འཛིན་པ་བྱུང་ན་རྨི་ལམ་སྒྱུ་མར་སྦྱོངས། །བར་ཆད་བདུད་ཀྱིས་བྲེད་ན་རང་སེམས་གཏན་ལ་ཕོབ། །ལྷ་ཆོས་ཚུལ་བཞིན་བྱེད་ན་ཆོས་མིན་ཐམས་ཅད་སྤོངས། །ང་དང་ཡུན་དུ་འགྲོགས་ཀྱང་དེ་ལས་མེད། །སངས་རྒྱས་གཞན་དང་མཇལ་ཡང་དེ་ལས་མེད། །ཅེས་ཆོས་ཀྱི་རྒྱལ་པོས་ཐུགས་ཀྱི་བརྣག་པ་གབ་པ་མངོན་དུ་ཕྱུང་བ་དང་དབོན་སྲས་དུས་དེ་ཉིད་དུ་ཆོས་ཐམས་ཅད་ཆོས་ཉིད་རང་ཤར་རང་གྲོལ་ཆེན་པོའི་ཀློང་དུ་འབད་པ་དང་རྩོལ་བ་མེད་པར་གྲོལ་ལོ། །དུས་དེ་ཉིད་དུ་བདེ་སྡུག་ལ་སྤང་བླང་མེད། འཁོར་འདས་ལ་བཟང་ངན་མེད། འདི་ཕྱི་ལ་གདམ་ཀ་མེད་པར་འཕགས་པ་རྣམས་ཀྱི་ཞལ་མཐོང་བྱ་མཐོང་བྱེད་མེད་པར་མི་ལ་མི་ལྟ་བ་བཞིན་དུ་གཟིགས་སོ། །འཁོར་ཐམས་ཅད་ཀྱང་རིག་པ་རང་གསལ་གྱི་དགོངས་པ་ལ་གཞག་བྱ་འཇོག་བྱེད་མེད་པར་གྱུར་ཏོ། །དབོན་སྲས་རྗེས་སུ་ཐུགས་རངས་སྟེ་ཕྱི་ནང་གི་མཆོད་པ་རྒྱ་ཆེན་པོས་མཆོད་ཅིང་བཀའ་དྲིན་ཆེས་གཟོ་ཡང་འཇིགས་པ་ཅི་ཡང་མི་མངའ་འོ། །དེ་ནས་རྒྱལ་པོ་དར་ཅིག་དགོངས་པ་ལ་བཞུགས་སྟེ་ཅི་ཡང་མི་གསུང་ངོ༌། །དེ་ནས་སྤྱན་ན་མཁའ་ལ་ཁྲལ་ཁྲལ་མཛད་ནས། ཨེ་མ་རྒྱལ་སྲས་ཆེན་པོ་པ། །ང་ཡི་ལྷ་སའི་གནས་གཞི་འདི། །ཉ་འདྲ་ལྗོང་འདྲ་སྦལ་འདྲ་པིར་ཡང་འདྲ། །རིམ་པ་བཞིན་དུ་ཆུ་ཡིས་གཅོད་པར་བྱེད། །ཉ་འདྲ་རྒྱལ་བ་ཡུལ་གྱི་རང་བཞིན་ཡིན། །རས་བྲིས་ཕྱོགས་བཅུའི་སངས་རྒྱས་དངོས་དང་འདྲ། །རྒྱལ་བས་རྒྱལ་བའི་ཞབས་ཏོག་བྱེད་པ་ཡིན། །ཉ་འདྲའི་ཁ་རུ་སེམས་ཅན་སུས་འོངས་པ། །རྒྱལ་བའི་ཡུལ་ལ་རེག་དང་ཁྱད་པར་མེད། །དེ་ཡང་སྔར་སྦྱངས་ལས་འཕྲོ་ཡོང་བ་ཡིན། །འཁོར་བའི་དུ་ཁ་མཐའ་རུ་ཕྱིན་པ་ཡིན། །འབད་པ་དོན་ཅན་ཡིན་ནོ་བོད་འབངས་རྣམས། །ས་འམ་རྡོ་འམ་འབྱིམ་པ་བྱ་སྒོང་ཙམ། །གང་གིས་དེ་ཡི་ཕྱོགས་སུ་སྤུངས་བྱེད་པ། །སངས་རྒྱས་རྣམས་ལ་སྨན་པ་བྱེད་པ་ཡིན། །དེ་ཡང་བདེ་བའི་ལམ་ལ་ཚུད་པ་ཡིན། །ང་ཡི་རིགས་ཅན་རྣམས་ལ་བསྐུལ་བ་ནི། །ཉ་འདྲའི་དུས་སུ་ཤོག་ལྟར་སྦྲོན་པ་ཡིན། །ལྗོང་འདྲའི་དུས་སུ་ཞྭ་ལྟར་བཀོན་པ་ཡིན། །སྦལ་འདྲའི་དུས་སུ་གདན་ལྟར་འདིངས་པ་ཡིན། །པིར་འདྲའི་དུས་(ཇ༥༢བ)

[Full Size]

སུ་གྱུར་ཙ་ན། །རྒྱ་ཆེན་མཆོད་པ་བཤམས་ནས་ནི། །མོས་གུས་གསོལ་འདེབས་གཅེས་པ་ཡིན། །དེ་ལྟར་བྱེད་ན་ཅུང་ཞིག་གནས་པར་གྱུར། །ནང་གི་ལྷ་སོས་ཕྱི་ཡི་རགས་ལ་ཕན། །ཕྱི་ཡི་རགས་སོས་ནང་གི་ལྷ་རྣམས་རྒྱས། །མཆོད་པ་བཤམས་ཤིང་གསོལ་བ་བཏབ་པ་ན། །བོད་འབངས་བསམ་པ་ཐམས་ཅད་འགྲུབ་པར་འགྱུར། །དུས་ཀྱི་མཐའ་ལ་སྡིག་སྤྱོད་མང་འབྱུང་ཡང༌། །ང་ཡི་ལྷ་ས་མཐོང་ཐོས་རེག་པ་ཡི། །འགྲོ་བ་ཕལ་ཆེར་འཁོར་བའི་གནས་ལས་ཐར། །དེ་ཡང་འཕགས་པ་རྣམས་ཀྱི་ཐུགས་རྗེ་སྟེ། །ང་ཡི་བོད་འབངས་རྣམས་ཀྱི་བསོད་ནམས་ཡིན། །དེ་ཕྱིར་ང་ཡི་སྐྱབས་གནས་ཕོ་མོ་རྣམས། །རྩོལ་བ་མ་ཞན་སྙིང་སྟོབས་སྐྱེད་མཛོད་ལ། །ང་ཡི་ར་ས་མཐོང་ཐོས་རིག་པར་མཛོད། །དེ་ཡང་ཐར་པའི་ལམ་ལ་ཚུད་པ་ཡིན། །སྐྱོན་རྣམས་སེལ་ཞིང་ཡོན་ཏན་སྒྲུབ་འདོད་ན། །ང་ཡི་ར་སར་ཞབས་ཏོག་མོས་པ་གྱིས། །བསམ་པ་ཐམས་ཅད་ཡིད་བཞིན་འགྲུབ་པར་འགྱུར། །ཇི་ལྟར་འདོད་པ་རྒྱལ་བ་རྣམས་ལ་ཞུས། །ཅེས་བཀའ་བསྩལ་ཞིང༌། ངའི་ལྷ་སའི་གནས་འདི་ཆུས་ཉེན་གསོ་དགོས་པའི་སྐབས་ཅིག་འོངས་པས་དེའི་ཆ་རྐྱེན་རྣམས་གཏེར་དུ་སྦོས་ཅིག་གསུངས་སྟེ་ལྷ་སྲས་ཀྱིས་ཀྱང་ཞབས་ཏོག་བྱ་ཐབས་དང་དཀོར་ནོར་མང་པོ་དུས་དེ་ཉིད་དུ་གཏེར་དུ་སྦས་སྟེ་སྐལ་ལྡན་ལ་སྨོན་ལམ་བཏབ་བོ། །གཞན་ཡང་ད་སྟེ་གདུང་རབས་ལྔ་ན་རྒྱལ་པོ་ལྡེ་ཞེས་བྱ་བའི་རིང་ལ་དམ་པའི་ཆོས་རྒྱས་པར་འབྱུང༌། དེའི་ཚེ་སངས་རྒྱས་ཀྱི་རྗེས་སུ་རབ་ཏུ་བྱུང་བ་དབུ་རེག་ཞབས་རྗེན་ངུར་སྨྲིག་གི་ན་བཟའ་གསོལ་བ་ལྷ་མིའི་མཆོད་གནས་མང་དུ་འབྱུང་གིས་དེ་ལས་རང་བཞིན་གྱི་འདི་ཕྱིའི་བདེ་བ་ཐམས་ཅད་འབྱུང་བས་ངའི་དབོན་སྲས་རྗེ་བློན་རྣམས་ཀྱིས་འཚོ་བ་བླ་ནས་སྦྱོར། ཆབ་འོག་ནས་ཕྱུང་ལ་བདེ་བ་བྱིན། དབུའི་མཆོད་གནས་སུ་ཁུར་ཞིག་ཞེས་བཀའ་བསྩལ་སྟེ་དེ་མ་ཐག་མགར་གྱིས་ཟངས་ཀྱི་བྱང་བུ་ལ་བྲིས་སྟེ་མཆིམས་ཕུའི་དཀོར་མཛོད་དུ་བཞག་གོ །དེ་ལྟའི་ཆོས་ཀྱི་རྒྱལ་པོས་རྗེས་བཟུང་བས། །དུས་དེའི་འགྲོ་བའི་བསོད་ནམས་གཞལ་དུ་མེད། །སྟོན་པས་མཛད་བཅུ་བསྟན་པའི་ས་མིན་ཡང༌། །འཕགས་པ་སྤྱན་རས་གཟིགས་དབང་དངོས་སུ་བཞུགས། །རི་བོ་པོ་ཏ་ལ་དང་ཁྱད་པར་མེད། །སོ་སྐྱེ་ངུར་སྨྲིག་རྟགས་འཛིན་མེད་ན་ཡང༌། །སར་གནས་བྱང་ཆུབ་སེམས་དཔའས་བོད་ཡུལ་གང༌། །འོག་མིན་(ཇ༥༣ན)

[Full Size]

ཆོས་ཀྱི་ཕོ་བྲང་གཉིས་པ་ཡིན། །ཉན་ཐོས་རང་རྒྱལ་དམན་པའི་སྒྲ་མེད་ཀྱང༌། །ཐེག་ཆེན་ལམ་ལ་སྐྱེ་བོ་ཐམས་ཅད་སྤྱོད། །དེ་ཕྱིར་ཀུན་གཟིགས་རྒྱལ་པོའི་ཞིང་ཁམས་དངོས། །རྟོག་གེས་དྲེགས་པའི་མཁས་རློམ་མེད་ན་ཡང༌། །ཆོས་ཀུན་རྟོགས་པའི་འཕགས་པ་བགྲང་ལས་འདས། །དེ་བས་བདེ་བ་ཅན་གྱི་ཞིང་ཁམས་འདྲ། །གསང་སྔགས་བོན་གྱེར་ཟས་འཚོལ་མེད་ན་ཡང༌། །སྐྱེད་རྫོགས་དངོས་གྲུབ་ཐོབ་པ་བགྲང་ལས་འདས། །དེ་བས་ལྕང་ལོ་ཅན་གྱི་ཞིང་ཁམས་དངོས། །དགེ་བཅུའི་ཁྲིམས་ལ་སྐྱེ་བོ་ཐམས་ཅད་གནས། །གསེར་གྱི་འཁོར་ལོས་བསྒྱུར་བའི་ཆབ་འོག་བཞིན། །ཅི་དགོས་ལོངས་སྤྱོད་འབད་པ་མེད་པར་གྲུབ། །དེ་ཕྱིར་རྫོགས་ལྡན་དུས་ཀྱི་བསྐལ་བ་འདྲ། །ཐམས་ཅད་ཡི་གེ་དྲུག་པའི་ཆོས་སྒྲ་སྒྲོག །སྐྱེད་རྫོགས་དབྱེར་མེད་འཁྱེར་སོ་གསུམ་ལ་སྤྱོད། །ཐ་ན་སྲིན་བུ་གྲོག་མའི་བར་དག་ཀྱང༌། །འདི་ནས་ཤི་འཕོས་ངན་སོང་འགྲོ་མི་སྲིད། །བསྟན་པའི་སྙིང་པོ་རབ་མཆོག་དེ་དུས་དར། །དུས་དེའི་བོད་ཀྱི་བསོད་ནམས་ཨ་ལ་ལ། །འཛམ་གླིང་ཀུན་ལས་ལྷག་པའི་ངོ་མཚར་ལྟོས། །ཡ་མཚན་རྒྱས་པའི་གཏམ་གྱི་ཆ་ཤས་ཙམ། །དུས་ངན་དེང་ཡང་རྣ་བའི་དགའ་སྟོན་གྱུར། །ངོ་མཚར་གཏམ་ལ་རངས་ཤིང་ཡིད་ཆེས་པ། །འདི་ཡང་ཆོས་རྒྱལ་དེ་ཡི་འཕྲིན་ལས་ཀྱི། །ལྷག་མར་ངེས་སྙམ་མི་བཟོད་གུས་པ་འཕེལ། །དེས་ན་ལྷ་ས་བསམ་ཡས་སོགས་ལ་བཀྲ་ཤིས་ཙམ་ལ་རབ་གནས་སུ་བཏགས་པ་ལས་ཆོ་ག་མེད་པར་རབ་གནས་མེད་ལ་ཇོ་བོ་རྗེས་རབ་གནས་ཀྱི་སྲོལ་གཏོད་པས་རྟེན་རབ་གནས་མེད་པ་ལ་རབ་གནས་མཛད་ཅེས་བཀའ་དྲིན་དུ་བྱེད་དོ་ཅེས་དང༌། དེ་དུས་ཉན་ཐོས་ཀྱི་སྡོམ་ཁྲིམས་མེད་པས་སངས་རྒྱས་ཀྱི་བསྟན་པ་མེད་ཅིང་དགེ་བ་རྣམས་ཀྱང་ལེགས་སྤྱད་ཙམ་གྱི་བར་མའི་དགེ་བ་མ་གཏོགས་སྡོམ་པས་བསྡམས་པའི་དགེ་བ་མེད་ཏོ་ཅེས་ཟེར་བ་སོགས་ནི་འཕགས་པ་ལ་སྐུར་པ་འདེབས་པ་སྟེ་སྤྱན་རས་གཟིགས་ཀྱིས་རབ་གནས་མི་ནུས་སོ་ཞེས་སྨྲ་ནུས་པ་ནི་སྙིང་སྟོབས་ཆེ་ལ་སྤྱིར་གླང་དར་གྱིས་བསྟན་པ་བསྣུབས་པས་(ཇ༥༣བ)

[Full Size]

སྲོལ་ཉམས་པ་རྣམས་སླར་ཇོ་བོས་གསལ་བར་མཛད་པ་ཡིན་གྱི་སྔོན་མེད་པ་ག་ལ་ཡིན་སྟེ་ཇོ་བོ་ཉིད་ཀྱང་ཁྲི་སྲོང་ལྡེ་བཙན་གྱི་དུས་ཀྱི་བསྟན་པ་ལྟ་བུ་རྒྱ་གར་དུ་ཡང་མ་བྱུང་བར་འདུག་ཅེས་ཡི་རངས་མཛད་པར་བཤད་ཅིང་དམན་ལམ་གྱི་སྡོམ་པས་མ་ཟིན་པས་སྡོམ་པའི་དགེ་བ་མེད་པར་འདོད་ན་ཐེག་ཆེན་ཁོ་ན་སྟོན་པའི་སངས་རྒྱས་ཀྱི་ཞིང་ཐམས་ཅད་ན་སྡོམ་པའི་དགེ་བ་མེད་པར་འདོད་དགོས་ལ་སྔོན་ནས་ཐེག་ཆེན་དུ་རིགས་ངེས་པ་ནི་མཆོག་ཡིན་གྱི་དམན་ལམ་སྔོན་དུ་སོང་བའི་རྒྱལ་སྲས་ནི་དེ་ལ་ལྟོས་སྟེ་དབང་བརྟུལ་དུ་བཤད་པ་ཡིན་ནོ། །དེས་ན་ལོག་རྟོག་ལ་རྣམ་དཔྱོད་ཏུ་འཁྲུལ་པ་རྣམས་ཀྱི་གཏམ་རྣ་བར་བཞག་པར་མི་བྱའོ། །དེ་ལྟར་ཆོས་རྒྱལ་སྤྱན་རས་གཟིགས་དབང་དེས། །རྒྱལ་སྲིད་དཀར་པོའི་ཆོས་ཀྱིས་རིང་དུ་བསྐྱངས། །སོ་སོར་ཕན་བདེའི་ཞལ་ཆེམས་བཀའ་བསྒོས་སྟེ། །གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས། །དེ་ཚེ་རབ་ཀྱིས་མཁའ་འགྲོས་སྤྱན་དྲངས་སྟེ། །ཤར་ཕྱོགས་པདྨའི་གླིང་དུ་གཤེགས་པར་མཐོང༌། །ནང་འཁོར་རྣམས་ཀྱིས་སྤྲུལ་པའི་ལྷ་གཅིག་གཉིས། །པདྨ་དང་ནི་ཨུཏྤ་ལར་གྱུར་སྟེ། །རྒྱལ་པོའི་སྐུར་ཐིམ་རྒྱལ་པོ་འོད་དུ་ཞུ། །རང་བྱུང་བཅུ་གཅིག་ཞལ་ལ་ཐིམ་པར་མཐོང༌། །བོད་འབངས་ཐ་མལ་ཡིད་ཆེས་བྱ་བའི་ཕྱིར། །བསྙུན་དང་གཤེགས་པ་སྐད་དུ་དྲིལ་བསྒྲགས་སྟེ། །སྐུ་ཡི་སྣང་བརྙན་ཤིང་རྟར་སྤྱན་དྲངས་ནས། །ཡར་ལུངས་འཕྱོང་པོའི་ནང་དུ་བང་སོ་བརྩིགས། །ཆེ་ཆུང་ཚད་ནི་དཔག་ཚད་མདའ་རྒྱང་གང༌། །ནང་ན་ལྷ་ཁང་ལྔ་ཡང་བཞུགས་སོ་སྐད། །བང་སོ་ནང་རྒྱན་ཅན་ཞེས་ཀྱང་གྲགས་ཤིང༌། །སྤྱིར་དུ་སྨུ་རི་སྨུག་པོ་ཟེར་རོ་སྐད། །བང་སོ་གྲུ་བཞིར་རྩིག་པ་དེ་ནས་བྱུང༌། །དེ་ཡང་སངས་རྒྱས་བྱང་སེམས་རྣམས་ཀྱིས་སྤྱན་རས་གཟིགས་གཙོ་འཁོར་གསུམ་མཛད་པ་མཐར་ཕྱིན་ནས་ཤར་ཕྱོགས་མེ་ཏོག་པདྨའི་གླིང་དུ་མཁའ་འགྲོས་སྤྱན་དྲངས་སྟེ་གཤེགས་པར་གཟིགས། ནང་འཁོར་རྣམས་ཀྱི་སྣང་བ་ལ་སྤྲུལ་པའི་རྒྱལ་པོ་དེས་དགུང་ལོ་བཅུ་གསུམ་ལ་ཆབ་སྲིད་མངའ་མཛད་པ་ནས་ལོ་དོན་གཉིས་སུ་ཆབ་སྲིད་ཆོས་བཞིན་དུ་བསྐྱངས་སྟེ་དགུང་ལོ་བརྒྱད་བཅུ་རྩ་གཉིས་བཞེས་པ་ས་ཕོ་ཁྱི་ལོའི་སྨིན་དྲུག་གི་ཟླ་བའི་ཚེས་བཅུའི་(ཇ༥༤ན)

[Full Size]

ཉིན་དབོན་སྲས་མང་སྲོང་གི་སྤྱི་བོར་ཕྱག་བཞག་སྟེ་བཀའ་བསྩལ་པ། རིགས་ཀྱི་བུ། ངས་ནི་རྒྱལ་ཁྲིམས་ཆོས་ཁྲིམས་སུ་བསྒྱུར་ནས་སངས་རྒྱས་ཀྱི་བསྟན་པ་དར་བར་བྱས། བོད་འབངས་དགེ་བ་ལ་བཀོད་པ་ཡིན་ནོ། །ཁྱོད་ཀྱིས་ཀྱང་ངའི་རྒྱལ་སྲིད་འདི་མ་ཉམས་པར་ཆོས་བཞིན་དུ་སྐྱོངས་ཅིག །ངའི་གཙུག་ལག་ཁང་འདི་གཉིས་ཀྱི་ཞབས་ཏོག་ཁྱོད་ཀྱིས་གྱིས་ལ་དར་དུ་ཆུག་ཞིག་ངའི་ཕོ་བྲང་ལྷའི་གནས་དང་འདྲ་བ་འདིའི་འཛིན་སྐྱོང་གྱིས་ཅིག །ངའི་བཙུན་མོ་དང་བློན་པོ་དང་བོད་འབངས་རེ་ཞིང་གཏད་པའི་ཕ་མ་ལྟ་བུ་གྱིས་ལ་ཕན་པ་དང་བདེ་བས་ཁྱབ་པར་གྱིས་ཅིག །ད་ནས་གདུང་རབས་ལྔ་པ་ན། །ང་ཡི་མིང་ལ་ལྡེ་བཏགས་པ། །ཆོས་སྐྱོང་བ་ཡི་རྒྱལ་པོ་འབྱུང༌། །འཇམ་དཔལ་དབྱངས་ཀྱི་སྤྲུལ་པ་སྟེ། །དེ་ཡིས་དམ་ཆོས་རྒྱས་པར་བྱེད། །མཐའ་མར་མངོན་པར་འཚང་ཡང་རྒྱ། །དེ་ནས་གདུང་རབས་གཉིས་པ་ལ། །ཕྱག་ན་རྡོ་རྗེའི་སྤྲུལ་པ་སྟེ། །རྒྱལ་པོ་ཁྲི་ཞེས་བྱ་བ་འབྱུང༌། །དེས་ཀྱང་དམ་ཆོས་རྒྱས་པར་བྱེད། །དེ་ནས་བདུད་ཀྱིས་བྱིན་བརླབས་པ། །རྒྱལ་པོ་དུད་འགྲོའི་མིང་ཅན་འབྱུང༌། །དམ་ཆོས་མ་ལུས་སྣུབ་པར་བྱེད། །ཐ་མ་མནར་མེད་དམྱལ་བར་འཚེད། །དེ་ནས་ཡེར་པའི་བྲག་ཁུང་ནས། །ཕྱག་ན་རྡོ་རྗེའི་སྤྲུལ་པ་སྟེ། །དཔལ་ཞེས་བྱ་བའི་དགེ་སློང་གིས། །སྡིག་ཅན་རྒྱལ་པོ་དགྲོལ་བར་འགྱུར། །དེ་ནས་ལོ་སྐོར་བརྒྱད་ཀྱི་བར། །སངས་རྒྱས་བསྟན་པ་མེད་པར་འགྱུར། །དེ་ནས་ལྔ་བརྒྱ་མཐའ་མ་ལ། །སངས་རྒྱས་བསྟན་པའི་མེ་རོ་ཞིག །མདོ་ཁམས་སྒང་ནས་ལངས་པར་འགྱུར། །ཁ་བ་ཅན་གྱི་རྒྱལ་ཁམས་སུ། །དད་ཅན་མང་པོ་འབྱུང་བར་འགྱུར། །སྐུ་གསུང་ཐུགས་ཀྱི་གཟུགས་བརྙན་ཡང༌། །རང་བྱུང་ཉིད་དུ་འབྱུང་བར་འགྱུར། །སྟོན་པའི་རིང་སྲེལ་མཆོད་པར་བྱེད། །ང་ཡང་མ་འོངས་སངས་རྒྱས་འགྱུར། །ཁ་བ་ཅན་པའི་སེམས་ཅན་ལ། །མར་མེ་འཆི་ཀར་གསལ་བ་བཞིན། །བསྟན་པ་ཤིན་ཏུ་རྒྱས་པར་འགྱུར། །ཟབ་མོའི་ཆོས་རྣམས་ཤིན་ཏུ་དར། །ངའི་དམ་ཆོས་ཟླ་བ་སྒྲོན་མེ་དང༌། དཀོན་མཆོག་སྤྲིན་དང༌། པང་ཀོང་ཕྱག་རྒྱ་དང༌། མྱ་ངན་ལས་འདས་པ་དང༌། ལས་རྣམ་པར་འབྱེད་པ་དང་ལྔ་པོ་འདི་ཁྱོད་ལ་གཏད་ཀྱིས་ཁྱོད་ཀྱིས་ཆོས་སྐྱོང་བའི་རྒྱལ་པོ་ཁྲི་སྲོང་ལྡེ་བཙན་ལ་རིམ་པར་གཏོད་དུ་ཆུག་ཞིག་ཞེས་ཞལ་ཆེམས་སུ་མཛད་ཏོ། །ཀ་བཀོལ་མར་ལུང་བསྟན་གྱི་ཞལ་(ཇ༥༤བ)

[Full Size]

ཆེམས་འདི་རྟེན་ལ་ཐིམ་ཀར་བློན་པོ་སྣ་ཆེན་པོ་ལ་གསུངས་པར་བཤད་ལ་ཀ་བཀོལ་མ་ཐང་ཡིག་གབ་པ་མངོན་ཕྱུང་མྱ་ངན་འདས་ཆུང་རྣམས་ན་ཚིག་ཟུར་དང་མང་ཉུང་མི་འདྲ་བར་སྣང་ངོ༌། །དེ་ནས་རྒྱལ་པོ་ཆེན་པོ་འཕྲུལ་སྣང་དུ་གཤེགས་སྟེ་དཀྱིལ་འཁོར་གྱི་སྟེང་དུ་ཁྲི་ལ་བཞུགས་ནས་ཁྱེད་བློན་པོ་བཅུ་དྲུག་པོ་ལས་བཞིས་མགྲོན་བོས་ཅིག །བཞིས་ཤ་འཚོལ་བཞིས་ཆང་འཚོལ་བཞིས་གཡོག་གྱིས་ཅིག་སྣ་ཆེན་པོ་ངའི་སྐུ་སྲུང་ལ་སྡོད་ཅིག་གསུངས་སྟེ་བློན་པོ་གཞན་རྣམས་སོང་བའི་ཚེ་བཙུན་མོ་གསུམ་བྱོན་སྟེ་ལྷ་གཅིག་ཁྲི་བཙུན་གྱིས་གསེར་ཕྱེ་བལ་སྡེར་གང༌། ཀོང་ཇོས་གསེར་དངུལ་གཞོང་པ་གང༌། མོང་བཟའ་ཁྲི་ལྕམ་གྱིས་གསེར་ཕྱེ་བྲེ་གང་རྣམས་ཕུལ་སྟེ་ཕྱག་བྱེད་བསྙུན་རྨེད་ཅིང་རྗེ་བློན་ལྔ་པོ་བཀའ་མཆིད་འབེལ་བར་མཛད་པ་ལས་རེ་ཞིག་ན་རྒྱལ་པོ་བཞེངས་སྟེ་འོ་ཅག་རྗེ་བློན་རྣམས་ངའི་ལྷ་ཐུགས་རྗེ་ཆེན་པོ་ལ་ཕྱག་དང་མཆོད་པ་བྱའོ་ཞེས་གསུངས་ནས་ཐུགས་རྗེ་ཆེན་པོའི་གཙང་ཁང་དུ་བྱོན། ཕྱག་དང་མཆོད་པ་མཛད། རྒྱལ་པོ་ཉིད་ཐུགས་རྗེ་ཆེན་པོའི་མདུན་ན་བཞེངས་པའི་གཡས་སུ་ཁྲི་བཙུན། གཡོན་ན་ཀོང་ཇོ། སྐུ་རྒྱབ་ན་མོང་བཟའ་རྣམས་བཞེངས། བློན་པོ་སྣ་ཆེན་པོ་ཐེམ་པ་ཁ་ན་རྐང་པ་ཕྱི་ན་བཞག་ལག་པ་སྒོའི་སྐྱེས་བུ་གཉིས་ལ་བརྒྱངས། གློ་ལ་རལ་གྲི་བཏགས། མགོ་བོ་ནང་དུ་བཅུག་ནས་འདུག་པའི་ཚེ་རྒྱལ་པོ་ཞལ་ཕྱིར་ལོག་མཛད་ནས། སྣ་ཆེན་པོ་བོད་ཀྱི་བློན་འབངས་བློ་ཉེ་བ་དད་པ་ཆེ་བ་རྣམས་ན་རེ་ངེད་རྒྱལ་པོ་དང་མ་མཇལ་ཟེར་ནས་འོང་གི་དེ་རྣམས་ལ་ང་ལ་དད་གུས་བྱེད་ན་ངའི་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་བསམ་པ་ཐམས་ཅད་འགྲུབ་པ་དང་ཕྲད་པ་དང་ཁྱད་པར་མེད་ཏོ་གསུང་ངོ༌། །ལྷ་གཅིག་ཁྲི་བཙུན་ཞལ་ཕྱིར་ལོག་མཛད་ནས་བོད་འབངས་ཉེ་བ་རྣམས་ངེད་ལྷ་གཅིག་ཁྲི་བཙུན་དང་མ་མཇལ་ཟེར་ན་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་གསུང༌། ཡང་ཀོང་ཇོ་ཞལ་ཕྱིར་ལོག་མཛད་ནས་རྒྱ་དམག་གིས་སྤྱན་མི་འདྲེན་པའི་ཕྱིར་ལྷ་གཉིས་བརྗེས་ལ་ཇོ་བོ་ཤཱཀྱ་ལྷོ་སྒོ་མེ་ལོང་ཅན་དུ་བཞུགས། སྒོ་བརྩིགས་ཞལ་བ་གྱིས་ལ་འཇམ་དབྱངས་ཀྱི་སྐུ་བྲིས་ཅིག །བོད་འབངས་བློ་ཉེ་བ་རྣམས་ལྷ་གཅིག་ཀོང་ཇོ་དང་མ་མཇལ་ཟེར་ན་ངའི་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་གསུང་ངོ༌། །ཀ་བཀོལ་མ་དང་གབ་པ་མངོན་ཕྱུང་ལས་འདི་སྐད་བྱུང་ལ་གཞན་ལས་ཇོ་མོ་གཉིས་ཀྱིས་ཁྲོ་གཉེར་ཅན་དང་སྒྲོལ་མ་ལ་གསོལ་བ་ཐོབ་ཅིག་ངེད་དང་(ཇ༥༥ན)

[Full Size]

ཕྲད་པ་དང་ཁྱད་པར་མེད་ཏོ་ཅེས་བྱུང་ངོ༌། །དེ་ནས་རྒྱལ་པོས་ལྷ་གཅིག་གཉིས་ཀྱི་སྤྱི་བོར་ཕྱག་བཞག་པ་དང་བལ་མོ་བཟའ་ཁྲི་བཙུན་པདྨ་དཀར་པོ་འདབ་མ་བརྒྱད་པ་ཧཱུྃ་ཡིག་གིས་མཚན་པ་ཅིག་དུ་གྱུར། རྒྱ་མོ་བཟའ་ཀོང་ཇོ་ཨུཏྤལ་སྔོན་པོ་འདབ་མ་བཅུ་དྲུག་པ་ཧཱུྃ་ཡིག་གིས་མཚན་པ་ཅིག་དུ་གྱུར་སྟེ་རྒྱལ་པོའི་ཕྲག་པ་གཡས་གཡོན་ལ་ཐིམ་རྒྱལ་པོས་དབུའི་ཐོད་ཕུད་དེ་སྤྱན་ན་མཁའ་ལ་ཆེར་གཟིགས་ནས་རང་བྱུང་ཐུགས་རྗེ་ཆེན་པོའི་དྲུང་དུ་ཉེ་བར་གཤེགས་པ་ན་དབུའི་ཨ་མི་ཏཱ་བྷ་གཉིས་པོ་མཐོ་དམན་མེད་པར་མཉམ་སྐད་སྟེ་གདའ་སྐད། དེ་ནས་ཕྱག་ཐལ་མོ་སྦྱར་སྟེ་བསྟོད་པ་མཛད་པ། ཆོས་སྐུ་སྟོང་པའི་ངང་ཉིད་ལས། །འགྲོ་བའི་དོན་དུ་བཞེངས་པའི་སྐུ། །ཞི་བའི་ཞལ་བཞི་ཁྲོ་ཞལ་བདུན། །བཅུ་གཅིག་ཞལ་ལ་ཕྱག་འཚལ་ལོ། །རྩ་བའི་ཞི་ཞལ་དཀར་པོ་གསུམ། །རབ་ཏུ་འཛུམ་ཞིང་མཛེས་པ་སྟེ། །ལས་དང་ཉོན་མོངས་ཞི་མཛད་པ། །ཆོས་སྐུའི་ཞལ་ལ་ཕྱག་འཚལ་ལོ། །དེ་སྟེང་བཙོ་མའི་གསེར་མདོག་ཅན། །རྔམ་ཞིང་བཞད་པའི་ཞལ་གསུམ་པོས། །ཚེ་དང་བསོད་ནམས་དཔལ་འབྱོར་གསུམ། །རྒྱས་པར་མཛད་ལ་ཕྱག་འཚལ་ལོ། །དེ་སྟེང་བྱུ་རུ་ལྟར་དམར་བ། །དབང་གི་ལས་མཛད་ཞལ་གཉིས་པོ། །རྣམ་པར་གཙིགས་པའི་ཁྲོ་གཉེར་ཅན། །ལོངས་སྐུའི་ཞལ་ལ་ཕྱག་འཚལ་ལོ། །དེ་སྟེང་དྲག་པོའི་ལས་མཛད་པ། །དུད་སྤྲིན་མདོག་འདྲ་ཞལ་གཉིས་པོ། །འཇིགས་ཤིང་རྔམ་པའི་སྤྱན་གསུམ་བགྲད། །སྤྲུལ་སྐུའི་ཞལ་ལ་ཕྱག་འཚལ་ལོ། །དེ་སྟེང་བླ་མ་སྤྲུལ་པའི་སྐུ། །སངས་རྒྱས་ཀུན་འདུས་ལི་ཁྲིའི་མདོག །འོད་དཔག་མེད་མགོན་རྒྱལ་བ་ཡིས། །གཙུག་རྒྱན་མཛད་ལ་ཕྱག་འཚལ་ལོ། །པདྨའི་འདབ་འདྲ་དང་པོ་ཡི། །ཕྱག་གཉིས་ཐུགས་ཀར་ཐལ་སྦྱར་ནས། །སངས་རྒྱས་ཀུན་གྱི་ཐུགས་རྗེ་རྣམས། །བསྐུལ་བར་མཛད་ལ་ཕྱག་འཚལ་ལོ། །གཡས་ཀྱི་ཕྱག་བཞི་རིམ་པ་བཞིན། །བགྲང་ཕྲེང་འཁོར་ལོ་མཆོག་སྦྱིན་དང༌། །དུས་གསུམ་སངས་རྒྱས་འོད་དཔག་མེད། །ལེགས་པར་བསྣམས་ལ་ཕྱག་འཚལ་ལོ། །གཡོན་གྱི་ཕྱག་བཞི་རིམ་པ་བཞིན། །པད་དཀར་སྤྱི་བླུགས་རིན་པོ་ཆེ། །ཐབས་ཤེས་ཟུང་འཇུག་མདའ་དང་གཞུ། །ལེགས་པར་བསྣམས་ལ་ཕྱག་འཚལ་ལོ། །གཡས་ཀྱི་ཡན་ལག་བཅུ་དགུ་ན། །རིན་ཆེན་ཞགས་པ་ལྷུང་བཟེད་(ཇ༥༥བ)

[Full Size]

གྲི། །རྡོ་རྗེ་མེ་ཤེལ་ཆུ་ཤེལ་གཞུ། །ལྕུག་མ་བསྣམས་ལ་ཕྱག་འཚལ་ལོ། །རྔ་ཡབ་ཕུབ་དང་བུམ་པ་བཟང༌། །དགྲ་སྟ་ཕྲེང་བ་པདྨ་སྔོ། །སྤྱི་བླུགས་ཉི་མ་ཆུ་སྐྱེས་དཀར། །སྙེ་མ་བསྣམས་ལ་ཕྱག་འཚལ་ལོ། །གཡོན་གྱི་ཡན་ལག་བཅུ་དགུ་ན། །སྤྲིན་དཀར་སྤྱི་བླུགས་པདྨ་གྲི། །དུད་ཐོད་ཕྲེང་བ་དྲིལ་བུ་དང༌། །རྡོ་རྗེ་བསྣམས་ལ་ཕྱག་འཚལ་ལོ། །ལྕགས་ཀྱི་འཁར་སིལ་སྤྲུལ་པའི་སྐུ། །ཁང་བཟང་གླེགས་བམ་འཁོར་ལོ་དང༌། །སྐུ་གཟུགས་ཤིང་ཐོག་ཀེ་ས་ར། །རིན་ཆེན་བསྣམས་ལ་ཕྱག་འཚལ་ལོ། །ཆོས་སྐུའི་རྩ་ཕྱག་རྣམ་པ་བཅུ། །ལོངས་སྐུའི་ཡན་ལག་སུམ་བཅུ་བརྒྱད། །སྤྲུལ་སྐུའི་ཉིང་ཕྱག་སྟོང་མངའ་བ། །ནམ་མཁའི་རྒྱལ་པོ་ཁྱོད་ལ་འདུད། །པདྨ་ལྟ་བུའི་ཕྱག་མཐིལ་ལ། །ཨུཏྤལ་ལ་འདྲའི་སྤྱན་མིག་ནི། །རྒྱུ་སྐར་བཞིན་དུ་རྣམ་བཀྲ་བའི། །ན་མཁའི་རྒྱལ་པོ་ཁྱོད་ལ་འདུད། །དབུ་ལ་རྒྱལ་བའི་གཙུག་རྒྱན་ཅན། །ཕྱག་ཞབས་གསེར་གྱི་གདུབ་བུ་འཁྲོལ། །སྐུ་ལུས་དྲི་ཞིམ་སྤོས་ངད་ལྡང༌། །ནམ་མཁའི་རྒྱལ་པོ་ཁྱོད་ལ་འདུད། །སྣ་ཚོགས་དར་གྱི་ན་བཟའ་གསོལ། །རིན་ཆེན་དུ་མའི་རྒྱན་གྱིས་སྤྲས། །ལྟ་བས་མི་ངོམས་མཛེས་པའི་སྐུ། །ན་མཁའི་རྒྱལ་པོ་ཁྱོད་ལ་འདུད། །རི་དྭགས་པགས་པས་ནུ་མ་བཀབ། །ཡན་ལག་རིགས་བཞིའི་སྦྲུལ་གྱིས་བརྒྱན། །མཚན་དཔེ་གཟི་བརྗིད་འབར་བའི་སྐུ། །ན་མཁའི་རྒྱལ་པོ་ཁྱོད་ལ་འདུད། །གངས་རིའི་ངོས་ལྟར་མཛེས་པ་ལ། །ཅུང་ཟད་དམར་བའི་མདངས་དང་ལྡན། །ཐུགས་རྗེའི་འོད་དཀར་འཕྲོ་བའི་སྐུ། །ན་མཁའི་རྒྱལ་པོ་ཁྱོད་ལ་འདུད། །ལྷ་རྒྱལ་གཙུག་གི་ནོར་བུ་ནི། །ལེགས་པར་བཞེངས་པའི་ཞབས་གཉིས་པོ། །པད་ཟླའི་སྟེང་དུ་མཛེས་པའི་སྐུ། །ན་མཁའི་རྒྱལ་པོ་ཁྱོད་ལ་འདུད། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་སྤྲུལ་པ་རིན་པོ་ཆེ། །ཐབས་མཁས་ཐུགས་རྗེ་ལྡན་པ་ཁྱོད། །སེམས་ཅན་རྣམས་ལ་གཟིགས་སུ་གསོལ། །འགྲོ་བ་དུ་མའི་སྐྱབས་གནས་ཁྱོད། །སྡུག་བསྔལ་དུ་མས་རྣམ་གཙེས་པའི། །ཉམ་ཐག་ཕོངས་པའི་སེམས་ཅན་ལ། །ཐུགས་རྗེའི་སྤྱན་གྱིས་གཟིགས་སུ་གསོལ། །མ་རིག་འཁྲུལ་པའི་སེམས་ཅན་རྣམས། །ལས་ངན་བསགས་པས་ལུས་ངན་བླངས། །ངན་སོང་གསུམ་དུ་ལྷུང་བ་རྣམས། །(ཇ༥༦ན)

[Full Size]

ཐུགས་རྗེའི་ལྕགས་ཀྱུས་བཟུང་དུ་གསོལ། །ཞེས་གསུངས་ནས་ཐུགས་ཀར་དབུ་བཏུགས་སྟེ། འཕགས་པ་ཁམས་གསུམ་འཁོར་བ་ན་འཁྱམས་པའི་སེམས་ཅན་ཉམ་ཐག་པ་རྣམས་ལ་གཟིགས་ཅིག་ཞེས་ཐུགས་རྗེ་དྲག་དུ་གཡོས་པའི་རླབས་འབྱིན་ཞིང་གསོལ་བ་དྲག་དུ་བཏབ་པའི་མོད་ལ་རྒྱལ་པོ་འོད་ཀྱི་གོང་བུར་གྱུར་སྟེ་བྱེ་མ་ལ་ཆུ་ཐིམ་པ་ལྟར་རང་བྱུང་བཅུ་གཅིག་ཞལ་གྱི་ཐུགས་ཀར་ཐིམ་པས་ཕྱག་ཐལ་མོ་སྦྱར་བ་ཅུང་ཟད་ཁ་བྱེ་བ་དང་སྐུ་ཅུང་ཟད་ཡོ་བ་དེའི་དུས་བྱུང་ངོ༌། །དེ་ནས་བློན་པོ་སྣ་ཆེན་པོ་དང་ཇོ་མོ་མོང་བཟའ་ཁྲི་ལྕམ་གྱིས་རྒྱལ་པོ་ཡབ་ཡུམ་གསུམ་བསྟངས་ཞན་ནོ་ཁ་བ་ཅན་གྱི་སེམས་ཅན་རྣམས་སུ་ལ་རེ་ཇི་ལྟར་བགྱི་ཟེར་ཞིང་གསོལ་བ་བཏབ་པས་རྒྱལ་པོ་ཡབ་ཡུམ་ཨ་ཙ་མ་འདི་རྣམས་མི་བདེན་པ་ལ་བདེན་པར་འཛིན་མི་རྟག་པ་ལ་རྟག་པར་འཛིན་སྙམ་ནས་ཐུགས་ཀ་ནས་རྒྱལ་པོ་དབུ་ཉུག་མཛད་དེ། ཁ་བ་ཅན་གྱི་སེམས་ཅན་རྣམས་སྔར་སྐྱེས་པ་ལ་མ་ཤི་བ་མེད་པ་དང་གཅིག་ལུས་འདུས་བྱས་ཡིན་པས་འཆི་ངེས་པ་དང་གཉིས་ཚེ་སྐད་ཅིག་ཀྱང་མི་སྡོད་པར་མྱུར་དུ་འཆི་བ་དང་གསུམ་ཡིན་ནོ་ད་ལྟའི་སྤྱོད་པ་འདི་རྣམས་རྨི་ལམ་ལྟ་བུར་ཤེས་པར་གྱིས་ཅིག་གསུངས་སོ། །ནུ་མ་གཡས་ནས་ལྷ་གཅིག་ཁྲི་བཙུན་དབུ་ཉུག་བྱུང་སྟེ་ཚེ་ལ་ངེས་པ་མེད་པས་ནམ་འཆི་ཆ་མེད་པ་དང་གཅིག་འཆི་བའི་རྐྱེན་མང་བས་ནམ་འཆི་མི་ཤེས་པ་དང་གཉིས་ལུས་ལ་སྙིང་པོ་མེད་པས་ནམ་འཆི་མི་ཤེས་པ་དང་གསུམ་ཡིན་ནོ་ད་ལྟའི་ལུས་འདི་མེ་ལོང་ནང་གི་གཟུགས་བརྙན་ལྟར་ཤེས་པར་གྱིས་ཅིག་ཞེས་དང༌། ཀོང་ཇོ་ནུ་མ་གཡོན་ནས་དབུ་ཉུག་མཛད་ནས་འཆི་བ་ལ་ནོར་གྱིས་མི་གཏོངས་པ་དང་གཅིག་གཉེན་གྱིས་མི་ཕན་པ་དང་གཉིས། རང་གི་ལུས་ཀྱི་མི་གཏོངས་པ་དང་གསུམ་ཡིན་ནོ། །ད་ལྟའི་ལུས་འདི་སྒྱུ་མ་ལྟ་བུར་ཤེས་པར་གྱིས་ཅིག་གསུངས་སོ། །ཡང་བློན་པོ་སྣ་ཆེན་པོས་རྒྱལ་པོ་ཡབ་ཡུམ་བསྟངས་ཞན་ནོ་ཁྱོད་དེ་ལྟར་བཞུད་དུ་བཞེད་ན་ངེད་ཤུལ་ན་ཡོད་པ་རྣམས་ཇི་ལྟར་བགྱི་ཞུས་པས་རྒྱལ་པོའི་ཞལ་ནས། སེར་སྣའི་ས་གཞི་བརྡལ་ཡང་སྦྱིན་པའི་རྒྱགས་དང་མ་བྲལ་བར་གྱིས་ཅིག །ཕྲག་དོག་གི་རླུང་དམར་འཚུབས་ཀྱང་ཚུལ་ཁྲིམས་ཀྱི་རྒྱན་དང་མ་བྲལ་བར་གྱིས་ཤིག །ལེ་ལོའི་སྒྲོག་དུ་ཚུད་ཀྱང་བརྩོན་འགྲུས་ཀྱི་རྟ་དང་མ་བྲལ་བར་གྱིས་ཅིག །(ཇ༥༦བ)

[Full Size]

གཡེང་བའི་དམག་གིས་བསྐོར་ཡང་བསམ་གཏན་གྱི་མཁར་དང་མ་བྲལ་བར་གྱིས་ཅིག །དུག་ལྔའི་ཇག་པ་བཀྱེ་ཡང་བཟོད་པའི་གོ་ཆ་དང་མ་བྲལ་བར་གྱིས་ཅིག །མ་རིག་པའི་མུན་པ་འཐིབས་ཀྱང་ཡེ་ཤེས་ཀྱི་སྤྱན་དང་མ་འབྲལ་བར་གྱིས་ཅིག །དེ་ལྟར་བྱས་ན་ཐུགས་རྗེ་ཆེན་པོ་དང་རྟག་དུ་འགྲོགས་པ་ལགས་སོ། །ཞེས་གསུངས་ནས་མི་སྣང་བར་གྱུར་ཏོ། །ཇོ་མོ་མོང་བཟའ་ས་ལྷ་གཅིག་གཉིས་ཀྱིས་བདག་ལ་ཞལ་ཆེམས་རེ་ཞུ་དང་བྱས་པས་ཡང་དབུ་ཉུག་སྟེ་ཁྲི་བཙུན་གྱི་ཞལ་ནས། མཁའ་ལ་ཉི་མ་ཤར་ཙ་ན། །མུན་པ་དག་ལ་སྡོད་དབང་མེད། །སངས་རྒྱས་ཀྱི་བྱིན་རླབས་ཞུགས་ཙ་ན། །དུག་ལྔ་དག་ལ་སྡོད་དབང་མེད། །སེམས་ལ་རྟོགས་པ་ཤར་ཙ་ན། །མ་རིག་པ་ལ་སྡོད་དབང་མེད། །སངས་རྒྱས་ཀྱི་ཐུགས་རྗེས་བསྐུལ་ཙ་ན། །འཇིག་རྟེན་དག་ན་སྡོད་དབང་མེད། །རང་ལུས་དངོས་མེད་དུ་འདོད་ན་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་གསུངས་ནས་མི་སྣང་ངོ༌། །ཀོང་ཇོའི་ཞལ་ནས་དེ་ལྟར་གོ་ཙ་ན་འཕགས་པའི་ཐུགས་རྗེ་མི་བདེན་ངན་སོང་གི་སྡུག་བསྔལ་མི་བདེན་སེམས་ཅན་གྱི་ལས་མི་བདེན་རང་སེམས་སངས་རྒྱས་ལ་ཚེ་འདིའི་སྣང་བ་མི་བདེན་རང་ལུས་དངོས་མེད་དུ་འདོད་ན་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་གསུངས་ནས་མི་སྣང་ངོ༌། །དེ་ནས་ཇོ་མོ་མོང་བཟས་རྒྱལ་པོ་སྤྲུལ་པའི་སྐུ་ཡབ་ཡུམ་བདག་ཅག་ཁ་བ་ཅན་པའི་སེམས་ཅན་ལ་ཐུགས་རྗེས་མི་སྐྱོབ་པར་དེ་ལྟར་གཤེགས་ནས་བདག་ཅག་རྒྱལ་སྲས་མ་ཚར་ཡང་ཚེའི་དུས་བྱེད་ཀར་ཁྱེད་ལྟར་བཞུད་པ་ཅིག་ཞུ་འཚལ་ཞེས་སྨྲེ་སྔགས་བཏོན་པས། རྒྱལ་པོ་ཡབ་ཡུམ་གསུམ་སྐུ་མི་སྣང་བར་འཕགས་པའི་སྐུ་སྟོད་དང་ནུ་མ་སོ་སོའི་ཐད་ལས་གསུང་བྱུང་སྟེ། ཨག་སམ་སེམས་ཅེས་ནང་དུ་མ་འཛིན་སྣང་བ་ཞེས་ཕྱིར་མ་འབོར། སེམས་སྣང་བདག་མེད་ཡིན་གྱིས་སྣང་སེམས་དབྱིངས་སུ་ཞོག །གཟུང་འཛིན་རོལ་པ་ཡིན་གྱིས་ཆོས་ཉིད་རྩལ་སྦྱོང་གྱིས། འཁོར་འདས་གཉིས་མེད་དུ་འདུག་པས་ང་དང་ཁྱོད་ལ་དབྱེ་བ་མེད་གྱིས་འདི་ཕྱི་གཉིས་སུ་མེད་པར་འགྲོགས་ཅེས་གསུངས། ཁྲི་བཙུན་གྱིས་ཁྱོད་ནང་དུ་མ་འཛིན་ང་ཕྱི་རུ་མ་འཛིན་རྒྱལ་པོ་དབྱིངས་སུ་མ་སྒོམ་ང་དང་ཁྱོད་དང་རྒྱལ་པོ་དབྱེར་མེད་ཡིན། ཁྱེད་ནི་ངེད་ཀྱི་དབྱིངས་ན་ཡོད། ངེད་ཀྱི་(ཇ༥༧ན)

[Full Size]

སེམས་ཉིད་ཆོས་ཉིད་གཉིས་མེད་དང༌། དུས་གསུམ་གཅིག་པར་རང་ལ་གནས། ནང་ཐོང་ཕྱི་ཤིག་གཉིས་མེད་ཤེས་པ་ཆོས་སྐུ་ཡིན་ནོ་ཨག་སམ་གསུང་ངོ༌། །ཀོང་ཇོའི་ཞལ་ནས་རིག་པ་ནང་དུ་མ་འཛིན་ཚོགས་དྲུག་ཕྱིར་མ་སྤྲོ་གཉིས་འཛིན་མུན་པར་མ་གཞུག་དགག་སྒྲུབ་བྲལ་བ་ཆོས་སྐུ་གསལ་ལ་འཛིན་མེད་ལོངས་སྐུ་སྣ་ཚོགས་འགག་མེད་སྤྲུལ་སྐུ་ང་གསུམ་གཅིག་སྟེ་མ་ལྟ་མ་སྒོམ་འགག་དུ་གནས་མེད་ཞོག་ཨག་སམ་གསུངས་སོ། །དེར་ཇོ་མོ་མོང་བཟའ་ཁྲི་ལྕམ་གྱིས་རྒྱལ་པོ་ཡབ་ཡུམ་དང་སངས་རྒྱས་ཐམས་ཅད་ཀྱི་ཞལ་དུས་དེ་ཉིད་དུ་མཐོང་སྟེ་སྐྱེ་བ་ལ་མི་འཇིགས་འཆི་བ་ལ་མི་དྭོགས་པའི་ཆོས་ལ་མངའ་བརྙེས་པར་གྱུར་ཏོ། །བསྟོད་པ་མཛད་པ་ཐང་ཡིག་ལས་བྱུང་ལ་གཞན་ཞལ་ཆེམས་འདི་རྣམས་ཀ་བཀོལ་མ་གབ་པ་མངོན་ཕྱུང་མྱ་ངན་འདས་ཆུང་གསུམ་ཚིག་མཐུན་པར་སྣང་ངོ༌། །དེ་ནས་བློན་འབངས་ཀྱིས་གསོལ་བ་བཏབ་པའི་ཚུལ་རྒྱས་པ་ནི་མྱ་ངན་འདས་ཆུང་ལས་ད་ལྟར་ཡབ་ཡུམ་གྱིས་བཀའ་ཆོས་ཀྱི་གདམས་པ་མང་དུ་གསུངས་ནས་མི་སྣང་བར་གྱུར་པས་བློན་པོ་སྣ་ཆེན་པོ་མ་དགའ་ནས་སྨྲེ་སྔགས་བཏོན་པ། ཀྱེ་མ་ཀྱེ་ཧུད་འདི་འདྲའི་དུས་བྱུང་ངོ༌། །ཆོས་སྐྱོང་རྒྱལ་པོ་ཆེན་པོ་ནི། །ལྟ་བའི་མིག་པས་འཕངས་པའི་རྒྱལ་པོ་དེ། །ཅུང་ཟད་སྙུང་ཡང་ཀུན་གྱིས་མི་བཟོད་ན། །ཉི་མ་དེ་རིང་འདི་འདྲའི་དུས་བྱུང་ངོ༌། །རྨི་ལམ་ཡིན་ནམ་བདེན་རྫུན་ངོ་མ་ཤེས། །རང་གི་སྙིང་ལས་གཅེས་པའི་རྒྱལ་པོ་དེ། །ན་བཟའ་རྒྱན་རྣམས་མོས་པའི་རྟེན་དུ་བཞག །འདི་འདྲ་མཐོང་བས་བདག་ནི་འོ་དོད་འབོད། །ཆོས་ཉིད་ཞི་བའི་ངང་ནས་ཐུགས་རྗེས་གཟིགས། །ཀྱེ་མ་རྒྱལ་པོ་མཉམ་མེད་རིན་པོ་ཆེ། །ཐུགས་རྗེའི་མངའ་བདག་འཛམ་གླིང་རྒྱན་གཅིག་པོ། །སངས་རྒྱས་བསྟན་པ་འཛིན་སྐྱོང་མི་མཛད་པར། །ཐུབ་པའི་རྒྱལ་ཚབ་སྲོང་བཙན་གང་དུ་གཤེགས། །བོད་འབངས་ལམ་སྣ་དྲོངས་ཤིག་བསྟན་པའི་བདག །ཆོས་ཉིད་འོད་གསལ་ངང་དུ་མ་གཡོས་ཀྱང༌། །གཟུགས་སྐུ་མཐུན་སྣང་སྣ་ཚོགས་དཔག་མེད་ཀྱིས། །སྣང་བ་དབང་བའི་བྱེ་བྲག་སྟོན་མཛད་པ། །འགྲོ་མགོན་སྲོང་བཙན་སྒམ་པོ་གང་དུ་གཤེགས། །(ཇ༥༧བ)

[Full Size]

མིག་མེད་མུན་པར་མ་བཏང་རྒྱལ་བའི་སྲས། །མི་མངོན་ནམ་མཁའི་དབྱིངས་ནས་ཐུགས་རྗེས་གཟིགས། །ཆོས་དབྱིངས་ཟབ་ཅིང་སྤྲོས་བྲལ་རྩི་སྨན་གྱིས། །མཚན་མའི་ཟུག་རྔུ་མ་ལུས་སེལ་མཛད་ཅིང༌། །མཐར་ཐུག་ཉམས་རྟོགས་རྒྱུད་ལ་སྐྱེད་མཛད་པ། །སྨན་པའི་རྒྱལ་པོ་སྲོང་བཙན་གང་དུ་གཤེགས། །བུ་རྣམས་འཁོར་བར་འཁྱམས་སོ་སྤྲུལ་པའི་སྐུ། །མཉམ་ཉིད་ངང་ནས་ཐུགས་རྗེས་བསྐྱབ་ཏུ་གསོལ། །མ་རིག་མུན་པར་འཐོམས་པའི་སེམས་ཅན་རྣམས། །དམིགས་མེད་ཐུགས་རྗེ་ཆེན་པོའི་འོད་ཟེར་གྱིས། །གཉིས་སྣང་འཁྲུལ་བའི་མུན་པ་སེལ་མཛད་པ། །ཐུགས་རྗེའི་ཉི་མ་རྒྱལ་པོ་གང་དུ་གཤེགས། །མ་རིག་མུན་པའི་གྲོང་དུ་ཉི་མ་ནུབ། །བུ་རྣམས་ལོང་ཁྲིད་མཛོད་ཅིག་རྒྱལ་བའི་བཤེས། །ཆུ་ཆེན་བཞི་ཡི་རྦ་རླབས་ཆེན་པོ་ལས། །ཐབས་དང་ཤེས་རབ་གྲུ་ཆེན་རབ་བཅས་ནས། །སྐྱེ་འཆི་མེད་པའི་སྐམ་སར་འདྲེན་མཛད་པ། །མཉན་པའི་རྒྱལ་པོ་ཁྱོད་ནི་གང་དུ་གཤེགས། །ཉམ་ཐག་མགོན་མེད་གྱུར་ཏོ་ཆོས་ཀྱི་རྗེ། །ཆོས་སྐུ་ཞི་བའི་ངང་ནས་བསྐྱབ་ཏུ་གསོལ། །ཆོས་དབྱིངས་ཟབ་མོའི་རྒྱ་མཚོ་ཆེན་པོ་ལ། །ཐབས་མཆོག་མི་གཡོའི་གཟིངས་ཆེན་རབ་བཅས་སྟེ། །གཉིས་མེད་ནོར་བུ་རིན་ཆེན་ལེན་པ་ཡི། །འགྲོ་བའི་དེད་དཔོན་རྒྱལ་པོ་གང་དུ་གཤེགས། །ངམ་གྲོག་གཡང་སར་ལྷུང་ངོ་ཆོས་ཀྱི་རྗེ། །འགག་མེད་ཀློང་ནས་ཐུགས་རྗེས་བསྐྱབ་ཏུ་གསོལ། །མཚན་ཙམ་ཐོས་པས་ཀུན་གྱི་དོན་མཛད་པ། །གང་འདོད་བསམ་པ་ཐམས་ཅད་རེ་འདོད་སྐོང༌། །མཆོག་དང་ཐུན་མོང་དངོས་གྲུབ་མ་ལུས་འབྱུང༌། །དབང་གི་རྒྱལ་པོ་སྲོང་བཙན་གང་དུ་གཤེགས། །ལམ་སྟོར་མགོན་མེད་སྨག་རུམ་གྱུར་པ་ལ། །ཐུགས་རྗེ་ཉི་མའི་འོད་ཀྱིས་དྲང་དུ་གསོལ། །དུས་གསུམ་མཉམ་ཉིད་འོད་གསལ་ཆེན་པོ་ལ། །སྐྱེ་འགག་སྤྲོས་པའི་མཚན་མ་མ་མཆིས་ཀྱང༌། །ཐུགས་རྗེའི་ཆོ་འཕྲུལ་དཔག་མེད་རབ་སྟོན་པའི། །འཕྲིན་ལས་བསམ་མི་ཁྱབ་དེ་གང་དུ་གཤེགས། །སྲིད་པའི་ཟོ་ཆུན་ཁྱུད་མོར་འཁྱམས་པ་ཡི། །གུས་པའི་སེམས་ཅན་བདག་ལ་ཐུགས་རྗེས་གཟིགས། །དཔེ་དང་བྲལ་བའི་རང་སེམས་ངོ་བོ་ཉིད། །(ཇ༥༨ན)

[Full Size]

ཅིར་ཡང་གྲུབ་པ་མེད་ཅིང་ཀུན་ལ་ཁྱབ། །མཚོན་དུ་མེད་པའི་ངེས་པ་སྐྱོང་མཛད་པའི། །བྱིན་རླབས་མཆོག་གྱུར་རྒྱལ་པོ་གང་དུ་གཤེགས། །བུ་འབངས་ཀྱེ་ཧུད་མྱ་ངན་དྲན་པ་སྟོར། །ཕ་ཐུགས་རྗེས་གཟིགས་ཅིག་ཆོས་རྒྱལ་སྤྲུལ་པའི་སྐུ། །ཚོགས་ཀྱི་ཁྱད་པར་དབང་གི་བྱེ་བྲག་ལས། །གང་ལ་གང་འདུལ་དེ་ལ་དེ་ཉིད་ཏུ། །ཡི་གེ་དྲུག་མས་ཐམས་ཅད་བདེ་ལ་བཀོད། །ཟབ་མོའི་ལམ་སྟོན་རྒྱལ་པོ་གང་དུ་གཤེགས། །སྟོང་ཉིད་འོད་གསལ་ཆེན་པོའི་ངང་ཉིད་ནས། །གཟུང་དང་འཛིན་པའི་ཆོ་འཕྲུལ་ངོ་བོ་ཉིད། །གཉིས་མེད་ཡེ་ཤེས་འཁོར་ལོ་རབ་སྟོན་པའི། །མཐར་ཐུག་ལམ་སྟོན་རྒྱལ་པོ་གང་དུ་གཤེགས། །ཁྲོ་གཏུམ་ཆེ་བ་མཐའ་ཡི་རྒྱལ་པོས་ཀྱང༌། །མཚན་ཐོས་ཙམ་གྱིས་གདུག་སེམས་རབ་ཞི་ཞིང༌། །རང་དོན་བརྗེད་ནས་གུས་པའི་སེམས་དང་ལྡན། །ཞེ་སྡང་མེ་དཔུང་ཞི་མཛད་གང་དུ་གཤེགས། །རི་རབ་ལྷུན་པོ་ཙམ་གྱི་སྒྲོན་མེ་ཐོགས། །ཞིང་ཁམས་མུ་མཐའ་མེད་པར་བཙལ་གྱུར་ཀྱང༌། །ཁྱོད་འདྲའི་རྒྱལ་པོ་ཀུན་གྱིས་མི་རྙེད་ན། །མཉམ་མེད་རྩོལ་བ་བྲལ་དེ་གང་དུ་གཤེགས། །ཀྱེ་མ་ཀྱེ་ཧུད་དྲིན་ཅན་ཆོས་ཀྱི་རྗེ། །ཀྱེ་ཧུད་ཉམ་ཐག་སྡུག་བསྔལ་མགོན་མེད་ཏོ། །ཀྱེ་ཧུད་བདག་ཅག་བོད་འབངས་འགྲོ་བ་རྣམས། །ཀྱེ་མ་ཀྱེ་ཧུད་འདི་འདྲའི་དུས་བྱུང་ངོ༌། །འགྱུར་མེད་རྡོ་རྗེའི་སྐུ་མཆོག་བརྒྱད་བརྙེས་ཀྱང༌། །བསྙུང་དང་འདས་གྲོངས་གཞི་ནས་སྟོན་པ་དེ། །འཇིག་རྟེན་མཐུན་པར་འཇུག་པ་ལགས་མོད་ཀྱང༌། །བདག་ཅག་མགོན་སྐྱབས་སུ་ཞིག་མཛད་པར་འགྱུར། །ཐེག་པ་རིམ་དགུ་རྒྱུད་སྡེ་ཆེན་པོ་བཞི། །བཀའ་དང་བསྟན་བཅོས་དགོངས་འགྲེལ་མན་ངག་ཀུན། །དོན་བསྡུས་གསུང་བའི་རྒྱལ་པོ་མི་བཞུགས་ན། །གཟུང་འཛིན་གཉིས་སྣང་གང་གིས་སེལ་བར་འགྱུར། །རང་སེམས་རིག་པའི་ངང་དུ་འབྲལ་མེད་ཀྱང༌། །ཆུ་བུར་མིག་གི་ཡུལ་དུ་མི་སྣང་བས། །སྒྱུ་མའི་དཔེ་དང་མཚུངས་པར་བྱུང་འགྱུར་ན། །ཐུགས་ཀྱིས་བཟོད་དམ་ཆོས་རྒྱལ་བརྩེ་བ་ཅན། །བདག་ཅག་རྒྱལ་པོ་བརྗེད་པར་མ་མཆིས་སོ། །སྐྱེ་མེད་མངོན་སུམ་སྟོན་པའི་རིན་པོ་ཆེ། །བསམས་(ཇ༥༨བ)

[Full Size]

ཀྱིན་ཚུགས་པ་མེད་ཏོ་ཇི་ལྟར་བགྱི། །རང་གཞན་བདེ་བ་སྟེར་བའི་རིན་པོ་ཆེ། །ཆོས་ཀྱི་རྒྱལ་པོ་ཁྱོད་དང་བདག་ཅག་རྣམས། །འཆུག་མེད་ལྷན་ཅིག་རྟེན་འབྲེལ་འཛོམ་གྱུར་ནས། །རྟག་དུ་མི་འབྲལ་ཅི་གསུང་བཀའ་སྒྲུབ་ཅིང༌། །སྐུ་གསུང་ཐུགས་དང་ཡོན་ཏན་འཕྲིན་ལས་རྣམས། །རྒྱལ་པོ་ཁྱོད་དང་དབྱེར་མེད་གཅིག་པར་ཤོག །རྒྱལ་བའི་བསྟན་པ་ན་མཁའ་གར་ཁྱབ་ཏུ། །མི་མཐུན་རྐྱེན་གྱིས་གཡོ་བ་མ་མཆིས་པར། །འཁོར་བ་མ་སྟོངས་བར་དུ་གནས་པར་ཤོག །ཞེས་སྨྲེ་སྔགས་བཏོན་སྟེ་གསོལ་བ་བཏབ་པས་ཐུགས་རྗེ་ཆེན་པོའི་ཐུགས་ཀ་ན་ཚུར་རྒྱལ་པོ་ཡབ་ཡུམ་གསུམ་དབུ་ཉུག་གིས་བྱོན་པ་ལ་ཇོ་མོ་མོང་བཟའ་དང་བློན་པོ་སྣ་ཆེན་པོས་བཞུགས་པར་ཞུས་པས་མ་གནང་ངོ༌། །དེར་བློན་པོ་སྣ་ཆེན་པོས་རྗེ་ཉིད་མི་བཞུགས་ན་སྤྱིར་སངས་རྒྱས་ཀྱི་བསྟན་པ་ཇི་ཙམ་གནས། ནུབ་པའི་སྔ་ལྟས་ཇི་ལྟར་འགྱུར། ཁྱད་པར་བོད་ཡུལ་དུ་བསྟན་པ་འཛིན་པའི་བྱང་སེམས་དང་རྒྱལ་པོ་ལ་སོགས་པ་ཇི་ལྟར་འབྱུང༌། དམ་ཆོས་ཇི་ཙམ་དུ་གནས། རྒྱལ་པོ་གང་གི་རིང་ལ་ཆོས་ལུགས་གང་དང་གང་ནུབ་དེའི་རྐྱེན་ཅིས་བྱེད། མི་རྣམས་དང་ཆོས་པའི་སྤྱོད་པ་དང་ཉམས་ལེན་ཇི་ལྟ་བུ། རབ་བྱུང་དང་སྔགས་པ་རྣམས་ཀྱི་དར་གུད་སྤྱོད་ལམ་དང་བུད་མེད་རྣམས་ཀྱི་སྤྱོད་པ་ཇི་ལྟ་བུ་མཆིས། གཙུག་ལག་ཁང་ཇི་ལྟ་བུ་འབྱུང༌། ཕྱི་རབས་ཀྱི་རྒྱལ་བློན་ཇི་ལྟ་བུས་བསྟན་པ་སྐྱོང༌། རྒྱལ་པོ་གང་དུ་འཚང་རྒྱ་བློན་པོ་རྣམས་སྐྱེ་བ་འདིའི་འོག་རོལ་དུ་ཇི་ལྟ་བུར་འགྱུར། དུས་ཇི་ཙམ་ན་བྱང་ཆུབ་འཐོབ། ལྷ་སྲས་དང་བཙུན་མོ་རྣམས་ཇི་ལྟར་འགྱུར། བསྟན་པའི་མཇུག་དུ་ཆོས་གང་དར། ཆོས་མཇུག་གང་གིས་སྡུད། ཅེས་སོགས་ཞིབ་ཏུ་ཞུས་པས། རྒྱལ་པོའི་ཞལ་ནས་ཨེ་མ་ཧོ། །བོད་ཡུལ་ཁ་བ་ཅན་གྱི་རྒྱལ་ཁམས་འདི། །ཡང་དག་སངས་རྒྱས་རྣམས་ཀྱིས་རབ་ཏུ་བསྔགས། །ཁྱད་པར་ཅན་གྱི་གནས་སུ་བསྟན་པ་སྟེ། །བྱང་ཆུབ་སེམས་དཔའ་མང་པོ་འབྱུང་བར་འགྱུར། །དེ་ནས་གདུང་རབས་བཞི་ན་རྒྱལ་པོ་ནི། །སོ་སོ་སྐྱེ་བོའི་བྱང་ཆུབ་སེམས་དཔའ་འབྱུང༌། །དེ་ཡི་སྲས་པོ་བྱང་ཆུབ་སེམས་དཔའ་ནི། །འཕགས་པའི་རིགས་ཅན་གང་(ཇ༥༩ན)

[Full Size]

ཟག་རྒྱལ་པོ་འབྱུང༌། །ཆོས་གཞི་གཙུག་ལག་ཁང་ནི་མང་དུ་རྩིག །མཐའ་འཁོབ་རྒྱལ་ཁམས་མང་པོ་དབང་དུ་སྡུད། །ཕྱོགས་མཚམས་བརྒྱད་ནས་དཔྱ་ཁྲལ་མང་པོ་སྡུད། །རྒྱ་གར་གསང་མཛོད་དམ་ཆོས་མང་པོ་བསྒྱུར། །སྤྲུལ་པའི་རྒྱལ་པོ་བྱང་ཆུབ་སེམས་དཔའ་དེས། །ལོ་པཎ་སྤྱན་དྲངས་དམ་ཆོས་རྒྱས་པར་བྱེད། །སྦྱངས་པ་ཅན་གྱི་སྐྱེས་བུ་མང་དུ་འབྱོན། །དེ་ལྟར་ཆོས་སྐྱོང་བ་ཡི་རྒྱལ་པོ་དེས། །བོད་འབངས་བདེ་སྐྱིད་དགའ་བདེའི་ལམ་ལ་སྦྱོར། །རྒྱལ་པོའི་མཛད་སྤྱོད་ཕུན་སུམ་ཚོགས་པ་དེས། །འབངས་རྣམས་བདེ་སྐྱིད་ཕུན་སུམ་ཚོགས་པར་འབྱུང༌། །ཞེས་ཁྲི་སྲོང་ལྡེ་བཙན་གྱི་དུས་དང༌། །དེ་ཡི་དབོན་སྲས་བྱང་ཆུབ་སེམས་དཔའ་གཉིས། །གཅིག་ནི་བདུད་རིས་རྒྱལ་པོ་དག་དུ་འགྱུར། །དེ་ལྟར་བདུད་རིས་རྒྱལ་པོ་དེ་ཡིས་ནི། །བོད་འབངས་ཡོངས་ཀྱི་བསོད་ནམས་ཟད་པ་དང༌། །སངས་རྒྱས་བསྟན་པ་ཉམས་པར་གྱུར་པ་ཡིས། །ནག་པོའི་རིས་ཀྱི་ལྷ་འདྲེ་རྒྱལ་གྱུར་ནས། །གནམ་ཐེ་དཀར་པོའི་སྤྲུལ་པ་བློན་པོར་འབྱུང༌། །བོད་ལ་གནོད་པ་བྱ་ཕྱིར་འགོང་པོ་དང༌། །དེ་ནས་གནམ་ཐེ་དཀར་པོའི་སྤྲུལ་པ་དང༌། །འདྲེ་ཡི་སྤྲུལ་པས་སྔགས་པ་གསོད་པར་འགྱུར། །དེ་ནས་དཀར་པོའི་ཕྱོགས་ཀྱི་ལྷ་འདྲེ་འཁྲུགས། །ནག་པོའི་ཕྱོགས་ཀྱི་ལྷ་འདྲེ་ཐམས་ཅད་ཀྱིས། །བདུད་རིས་རྒྱལ་པོ་དེ་ཡི་དཔུང་བྱས་ནས། །བྱང་ཆུབ་སེམས་དཔའ་གཉིས་ནི་དེ་དག་གིས། །གཅིག་ནི་སྤྲུགས་ཞིང་གཅིག་ནི་གསོད་པར་བྱེད། །དེ་ཚེ་ནག་པོའི་ཕྱོགས་རྣམས་དར་གྱུར་ནས། །སངས་རྒྱས་བསྟན་པ་འདི་ནི་ནུབ་པར་བྱེད། །གཙུག་ལག་ཁང་འཇིག་ཕན་ཚུན་ཆད་པས་གཅོད། །དགེ་སྦྱོང་རྣམས་ལ་ལོག་པའི་བཀའ་ཆད་འབེབས། །སྡིག་པ་སྤྱོད་ལ་ལོག་པའི་བྱ་དགའ་སྟེར། །དགོན་གནས་རྣམས་སུ་རི་དྭགས་རྔོན་པ་བྱེད། །གཙུག་ལག་ཁང་དུ་ར་ལུག་ཕྱུགས་རྣམས་འཛུད། །དགེ་སྦྱོང་རྣམས་ལ་ཁུར་པོ་བསྐུར་ནས་འཁོལ། །སྔགས་པ་རྣམས་ནི་ལས་བྱེད་རྔོན་པར་བཀོལ། །ཀྱེ་མ་ཀྱེ་ཧུད་སངས་རྒྱས་བསྟན་པ་ཉམས། །ནག་པོའི་ཕྱོགས་རྣམས་ཤིན་ཏུ་དར་བར་འགྱུར། །སངས་རྒྱས་བསྟན་པ་རིན་ཆེན་ཉམ་(ཇ༥༩བ)

[Full Size]

དམས་པས། །ང་ཡི་ཡི་དམ་སྐུ་གཟུགས་གཏེར་དུ་སྦེད། །རྒྱལ་པོ་དེ་ཡང་གྲི་རུ་བཀུམ་པར་འགྱུར། །དེ་ནི་བཀྲ་མི་ཤིས་པར་ཤེས་ནས་སུ། །བདེ་གཤེགས་སྐུ་གཟུགས་དེ་ཡང་གཏེར་ནས་འདོན། །དེ་སྲས་རིང་ལ་བཀའ་ཆད་དབུ་ཡོགས་ཀྱིས། །རྗེ་རྒྱལ་རྣམས་ལ་འབངས་ཀྱིས་ཁེང་ལོག་བྱེད། །དུས་མཐའ་ངན་པའི་མུ་ཡང་དེ་ནས་ཟུག །ས་ཡི་བཅུད་ཉམས་སྨན་གྱི་ནུས་པ་ཆུང༌། །རོ་རྣམས་མི་ཞིམ་དུས་ལོག་སད་སེར་མང༌། །འབྲུ་རྣམས་སྐྱེ་ཞན་ཕྱུགས་རྣམས་ཞོ་ཤེ་ཆུང༌། །ས་གཞི་སྒང་གཤོང་མང་ཞིང་ཚེར་མ་རྩུབ། །གཡང་ས་ངམ་གྲོག་ལ་སོགས་མ་རུངས་འབྱུང༌། །ཅོང་རོང་ཆུ་བྲག་མི་བདེ་ཉམ་ང་ཞིང༌། །རྩི་ཤིང་སྐམ་ཅིང་ས་རྡོ་རི་བྲག་ཉིལ། །གཟའ་སྐར་རྒྱུ་ལོག་ཆར་ཆུ་མི་སྙོམ་ཅིང༌། །ནད་མང་ཚེ་ཐུང་མུ་གེ་མང་དུ་འབྱུང༌། །འདྲེ་གདོན་མང་ཞིང་འདྲེ་ཆོས་མང་དུ་འབྱུང༌། །འབྱུང་པོ་སྤུན་དགུ་མི་ཡུལ་བབ་པ་ཡིས། །ཕྱུགས་ཀྱི་གཡང་ཉམས་འབྲུ་རྣམས་སྲིས་མི་རྨེ། །འཐབ་རྩོད་མང་ཞིང་ཞེ་འགྲས་མང་དུ་འབྱུང༌། །གོ་ཆ་དར་ཞིང་རྒྱན་ཆ་མཚོན་ལ་བྱེད། །དགྲ་རྐུན་དང་ནི་སློང་འཕྲོག་མང་བར་འགྱུར། །རྒྱལ་ཁམས་འདིར་ནི་མི་བདེ་སྣ་ཚོགས་ཡོང༌། །རྒྱལ་ཁྲིམས་དང་ནི་ཆོས་ཀྱི་ཁྲིམས་ཀྱང་ཉམས། །བོད་ཁམས་ཐམས་ཅད་མཐའ་ནས་མི་བདེ་ཞིང༌། །མི་དགེའི་སྤྱོད་པ་རྣམ་པ་སྣ་ཚོགས་འབྱུང༌། །ཞེས་གླང་དར་གྱི་དུས་དང་སྨད་སིལ་ཆད། །དེ་ནས་བྱང་སེམས་སྤྲུལ་པ་བྱུང་ནས་སུ། །ཆོས་ཀྱི་མེ་རོ་མདོ་ཁམས་སྨད་ནས་སློང༌། །དེ་ནས་དགེ་འདུན་སྡེ་པ་མང་དུ་འཕེལ། །དེར་ཡང་བྱང་ཆུབ་སེམས་དཔའ་མང་པོ་ཡིས། །ང་ཡི་ར་སའི་སྐུ་གཟུགས་འདི་དག་ལ། །མཆོད་དང་ཞབས་ཏོག་མང་པོ་བྱེད་པར་འགྱུར། །ཕྱོགས་རྣམས་ཀུན་དུ་གཙུག་ལག་ཁང་སྐྱོང་ཞིང༌། །དམ་པའི་སྤྱོད་པ་ཚུལ་བཞིན་བྱེད་པར་འགྱུར། །ཞེས་དབུས་གཙང་གི་མི་བཅུའི་བསྟན་པ་དང༌། །དེ་ནས་བདུད་རིས་སྤྲུལ་པ་མང་པོ་ཡིས། །སྡེ་རྩོད་བྱས་ནས་སྡེ་པ་ཉམས་དམས་འགྱུར། །གནས་དགོན་འཐབ་ར་དགེ་སློང་མདུང་ཁ་བྱེད། །གཙུག་ལག་ཁང་(ཇ༦༠ན)

[Full Size]

ལ་འཕྲོག་འཇོམས་བྱེད་པ་འབྱུང༌། །མཆོད་ཆ་རྣམས་ལ་ཐོབ་ཤ་བྱེད་པར་འགྱུར། །ཀྱེ་ཧུད་སངས་རྒྱས་བསྟན་པ་ཐལ་བར་བརླགས། །དེ་ཚེ་ནག་པོའི་ཕྱོགས་རྣམས་དར་འགྱུར་ཞིང༌། །གང་ཟག་རྣམས་ཀྱི་ཤེས་པ་འགྱུར་ནས་ཀྱང༌། །མི་དགེའི་སྤྱོད་པ་སྣ་ཚོགས་བྱེད་པར་འགྱུར། །འཚོ་བ་ལྷ་འདྲེ་རྣམས་དང་ཐུན་མོང་བྱེད། །ས་གཞི་དེ་ཡང་ཤིན་ཏུ་རྩུབ་པར་འགྱུར། །ཆོམ་རྐུན་མི་རྒོད་མང་པོ་འབྱུང་བ་དང༌། །འདྲེ་དང་འདྲ་བའི་མི་ངན་མང་དུ་འབྱུང༌། །འདི་ལ་མཆོད་བྱེད་ཀུན་ལ་འཚེ་བར་བྱེད། །ཅེས་བསྟན་པ་བར་དར་གྱི་སྡེ་ཉམས་པའི་ཚུལ་དང༌། དེ་ཚེ་ནུབ་ཕྱོགས་དག་དུ་སྐུ་བལྟམས་པ། །དགེ་སློང་བྱ་ཡི་གདོང་པ་ཅན་ཞིག་འབྱུང༌། །བྱང་ཆུབ་སེམས་དཔའ་བློ་གྲོས་སྒྲུབ་པར་ལྡན། །རཏྣ་བྷ་དྲ་ཞེས་སུ་གྲགས་པ་ཡིན། །འདི་ལ་མཆོད་བསྟོད་བསྙེན་བཀུར་མང་དུ་བྱེད། །བསྐོར་བ་ཕུ་དུད་རིམ་གྲོ་བྱེད་པར་འགྱུར། །ཞེས་ལོ་ཙཱ་བ་རིན་ཆེན་བཟང་པོ་དང༌། །དེ་ཚེ་རྒྱལ་པོ་འོད་ཀྱི་མིང་ཅན་ནི། །བྱང་ཆུབ་སེམས་ལྡན་བློ་གྲོས་ཅན་ཞིག་འབྱུང༌། །ཞེས་ལྷ་བླ་མ་ཁུ་དབོན། དེ་ཡིས་བྱང་ཆུབ་སེམས་དཔའ་པཎྜི་ཏ། །རྣམ་དག་ཚུལ་ཁྲིམས་གསུམ་དང་རབ་ལྡན་ཞིང༌། །མཁས་ཤིང་སྒྲུབ་ལ་མངོན་པར་བརྩོན་པ་ནི། །རིགས་གསུམ་ཡོན་ཏན་ལྡན་པ་སྤྱན་དྲངས་ནས། །སྐུ་གཟུགས་འདི་ལ་མཆོད་ཅིང་ཕྱག་མང་བྱེད། །བསྙེན་བཀུར་བསྔགས་པ་ཕུན་སུམ་ཚོགས་པར་བརྗོད། །དེ་ཡིས་བསྟན་པ་ཤིན་ཏུ་རྒྱས་པར་བྱེད། །ཅེས་ཇོ་བོ་རྗེ་དང༌། དེ་ཡི་སློབ་མ་ཚུལ་བཞིན་རབ་ཞུགས་པ། །དགེ་སློང་དམ་པ་བསྟན་པའི་མངའ་བདག་ནི། །འདི་ལ་བཀུར་སྟི་ཕུ་དུད་བྱེད་པར་འགྱུར། །འཁོར་ནི་སྟོང་ཕྲག་ཕྱེད་དང་གསུམ་དང་ལྡན། །བྱོན་ནས་འདི་ལ་བཀུར་སྟི་བྱེད་པར་འགྱུར། །ཞེས་རྒྱ་མའི་སངས་རྒྱས་དབོན་སྟོན་དང༌། །བྱང་ཆུབ་སེམས་ལྡན་སྟོན་པ་མང་པོ་སྐྱོང༌། །རིགས་པར་སྨྲ་བ་རྣམ་དག་མང་དུ་འབྱུང༌། །ཨེ་མ་ཧོ། ང་ཡི་ལྷ་སའི་རྟེན་དང་བརྟེན་པ་ལ། །བྱང་ཆུབ་སེམས་ལྡན་སྐྱེས་བུ་དུ་མ་ཡིས། །ལོ་ནི་ཉིས་བརྒྱར་བསྟི་བསྟང་བྱེད་(ཇ༦༠བ)

[Full Size]

པར་འགྱུར། །དེ་ལྟར་སངས་རྒྱས་བསྟན་པའི་སྒྲོན་མེ་ནི། །སྟོན་པ་རྣམས་ཀྱིས་གསལ་བར་བྱེད་པར་འགྱུར། །ཞེས་པོ་ཏོ་བ་དང་རྔོག་ལོའི་བཤད་རྒྱུད་རྣལ་མ་རྣམས་དང༌། དེ་ནས་བསྟན་པའི་སྙིང་པོ་སྒྲུབ་པ་པོ། །བྱང་ཆུབ་སེམས་དང་ལྡན་པའི་དགེ་སློང་ནི། །ཡོན་ཏན་ལྡན་པའི་དམ་པ་དཔག་མེད་འབྱུང༌། །གསང་སྔགས་མངོན་པར་གྲུབ་པའི་དགེ་སློང་ནི། །དམ་པ་མང་པོས་འདི་ལ་བསྙེན་བཀུར་བྱེད། །ཅེས་སོགས་དྭགས་པོའི་བཀའ་རྒྱུད་སྤྱི་དང༌། དེ་ནས་ཁྱད་པར་བསྙེན་བཀུར་བྱེད་པ་ནི། །བྱང་ཆུབ་སེམས་དཔའ་ཤར་ལྷོར་སྐུ་བལྟམས་པ། །གསང་སྔགས་འཛིན་པའི་རྣལ་འབྱོར་ཆེན་པོ་ནི། །སྙིང་པོའི་མཐའ་ཅན་སྐྱེས་བུ་དམ་པ་དེས། །ཞལ་ཡང་བསྒྱུར་ཞིང་བསྙེན་བཀུར་དམ་པ་མཛད། །ཅེས་ཁྱད་པར་དུ་དྭགས་པོ་སྒོམ་པ་ཚུལ་ཁྲིམས་སྙིང་པོས་ལྷ་སར་བྱ་བ་མཛད་པ་དང༌། དེ་ནས་རིགས་པ་ཚུལ་བཞིན་སྨྲ་བ་ཡི། །སྟོན་པ་རྣམས་ཀྱང་ནམ་ལངས་སྐར་སྐྱ་འདྲ། །དེ་ཚེ་དཀར་པོའི་ཕྱོགས་རྣམས་མཐུ་ཆུང་ཞིང༌། །བདུད་ཀྱི་ཚོགས་རྣམས་རྒྱས་པར་གྱུར་པ་ཡིས། །བདུད་ཀྱིས་བྱིན་རླབས་གང་ཟག་མང་པོ་འབྱུང༌། །གཟི་བརྗིད་ཆེ་ཞིང་སྟོབས་ཀྱང་ཆེ་བ་དང༌། །ནུས་པ་ཆེ་ཞིང་མཐུ་ཡང་ཆེ་བ་དང༌། །མངོན་ཤེས་ཕྲ་མོས་བདེན་ཚིག་དག་སྒྲུབ་ཅིང༌། །དེ་རྣམས་རྟོག་ཆོས་མང་པོ་བྱེད་པར་འགྱུར། །ཞེས་མཁས་པར་གྲགས་པ་དུ་མས་སྔོན་སུས་ཀྱང་མ་ཤེས་པའི་ལྟ་བ་ཡིན་ཞེས་རང་གཟོའི་རྟོག་ཆོས་ལ་ངོ་མཚར་དུ་བྱེད་པ་དང༌། སངས་རྒྱས་བསྟན་པ་ལྷ་འདྲེ་མང་པོས་དཀྲུགས། །འདྲ་མིན་ཆོས་ལུགས་མང་པོ་སྟོན་བྱེད་ཅིང༌། །བློ་གྲོས་ཕྱིན་ཅི་ལོག་དུ་སྒྱུར་བར་བྱེད། །མེད་པར་ལྟ་བའི་ཕྱོགས་ཀྱི་ཆ་བཟུང་ནས། །ཀུན་རྫོབ་རྒྱུ་འབྲས་ཁྱད་དུ་གསོད་པར་བྱེད། །ལུས་ངག་ཆོས་སྤྱོད་འགོད་པར་བྱེད་པ་འབྱུང༌། །ཕྱོགས་མེད་རིས་མེད་བྱར་མེད་ཟེར་བ་དང༌། །རྒྱུ་ཟད་རྐྱེན་ཟད་ལྷུན་གྲུབ་ཟེར་བ་དང༌། །ལུང་མ་བསྟན་གྱི་ལྟ་བ་མང་དུ་འབྱུང༌། །རྒྱལ་བས་མ་གསུངས་མཁས་པས་མ་བགྱིས་པ། །ད་ལྟ་ལྷ་ཡིས་བསྟན་ཞེས་འདྲེ་ཆོས་བྱེད། །དེ་རྣམས་འབྱུང་(ཇ༦༡ན)

[Full Size]

པོའི་འདྲེ་ཡི་ཆས་གུ་གྱོན། །ར་སླག་ཁྱི་སླག་རེ་བ་ཟེ་མོན་གོས། །རྩིད་ཞྭ་འབེ་ལོག་གོས་ངན་ལུས་ལ་གྱོན། །བེར་ཀ་དབྱུག་པ་སྣ་ཚོགས་ཐོགས་པ་འབྱུང༌། །བསོད་སྙོམས་པ་ཅེས་གྲོང་ཁ་འགྲིམ་པར་བྱེད། །ལྟོ་རྒྱབ་ཆེད་ཏུ་བཀའ་ཐུབ་དྲག་པོ་ཡིས། །རང་གི་ལུས་ལ་གནོད་པ་བྱེད་པ་འབྱུང༌། །མངོན་མཚན་ཅན་གྱི་གྲགས་པ་འདོད་ཕྱིར་དུ། །སྔགས་ཀྱི་ཐེག་པ་གླུ་རུ་ལེན་རུ་འབྱུང༌། །དགེ་བའི་ཆོས་སྤྱོད་གླུ་དང་བྲོ་ལ་བྱེད། །བསམ་གཏན་དྲན་པ་ཉམས་ལ་བྱེད་པ་འབྱུང༌། །མེད་པར་ལྟ་ལ་ལྟ་བ་རྟོགས་པར་བྱེད། །སྨྱོན་ཐབས་ཅན་ལ་རྟོགས་ལྡན་བྱེད་པ་འབྱུང༌། །ཐེ་ཚོམ་ཅན་ལ་དམ་པར་འཛིན་པ་འབྱུང༌། །སྨྲ་བ་མཁས་ལ་གདམས་ངག་ཅན་དུ་བྱེད། །རྨོངས་པ་རྣམས་ལ་ཞིག་པོ་ཟེར་བ་འབྱུང༌། །ལོག་སྤྱོད་མཁན་ལ་རྣལ་འབྱོར་པ་ཅེས་ཟེར། །ལུང་མ་བསྟན་ལ་ཆོས་ཀྱི་སྐུ་ཅེས་ཟེར། །སྙན་གྲགས་འདོད་ལ་ཆོས་བཤད་མཁས་ཅེས་ཟེར། །ཆོས་ལུགས་ཡིན་ཞེས་བབ་ཅོལ་མང་པོ་སྨྲ། །འདྲེ་ཡིས་བརླམས་ལ་ཡེ་ཤེས་ཕེབས་ཅེས་ཟེར། །བདུད་ཀྱི་སྤྲོ་སྐྱེད་བྱིན་རླབས་ཆེ་ཞེས་ཟེར། །གདམས་ངག་ཟེར་ཞིང་ལོག་ཆོས་མང་དུ་སྨྲ། །གདམས་པ་ཟེར་ནས་མུ་སྟེགས་གསང་ཚིག་སྟོན། །དེ་སོགས་ལོག་པའི་ལྟ་བ་རྒྱུད་ལ་ཞུགས། །བུད་མེད་ཕོ་སྤྱོད་ཐོ་ཅོ་བྱེད་པ་འབྱུང༌། །རང་ལུགས་མང་ཞིང་འཇིག་རྟེན་ཆོས་ལུགས་ཉམས། །དེ་ཡིས་རང་ཉིད་ངན་འགྲོར་འཁྲིད་པར་བྱེད། །རྒྱུ་འབྲས་བདེན་པར་མི་ཤེས་མི་དགེ་སྣ་ཚོགས་སྤྱོད། །ཆོས་དང་ཆོས་མིན་མི་ཤེས་ངོ་ཚ་མེད་པར་སྤྱོད། །ལོག་ཆོས་རྣམས་ལ་ཤིན་ཏུ་དད་པར་འགྱུར། །བྱས་པའི་ཆོས་ཀྱིས་བྱང་ཆུབ་མི་འཐོབ་པས། །མ་བྱས་ལྷུན་གྲུབ་ཆོས་ཤིག་དངོས་ཞེས་ཟེར། །བྱེད་མི་ནུས་རྣམས་དེ་ལ་དད་པར་འགྱུར། །དགེ་བའི་བཤེས་ལྟར་སྣང་བ་ཡིད་འཕྲོག་འཁྲིད། །སྔགས་པ་ཁ་ཅིག་སྔགས་ལ་རྩིང་ཆོས་བྱེད། །དམ་ཆོས་ཡོན་གྱི་ཆེད་དུ་གསང་བ་སྒྲོག །གསེར་ཆོས་ཟེར་ཞིང་ཆོས་ལ་རིན་ཐང་གཅོད། །འགའ་ཞིག་མ་ཐོས་རྒྱུད་ཀྱང་འཆད་པར་བྱེད། །(ཇ༦༡བ)

[Full Size]

ལ་ལ་དབང་མ་ཐོབ་པར་དབང་བསྐུར་བྱེད། །ལ་ལ་དབང་བསྐུར་ཟེར་ནས་ཡོན་ཡང་སྡུད། །ལ་ལ་རྙེད་བཀུར་ཆགས་ཤིང་འདོད་ལ་ཞེན། །རང་གི་རླུང་སེམས་དབང་དུ་མ་འདུས་པར། །གསང་དབང་ཤེས་རབ་ཡེ་ཤེས་མངོན་སུམ་སྟོན། །དེ་དག་སྨད་འཚོང་བསྟེན་དང་ཁྱད་པར་མེད། །ལ་ལ་དགེ་སློང་ཤེས་རབ་ཡེ་ཤེས་ནི། །བུད་མེད་དང་སྦྱོར་དབང་ནི་སྐུར་བར་བྱེད། །སྡོམ་ཁྲིམས་གཞིག་ནས་དམྱལ་བའི་གནས་སུ་འཕེན། །དེ་དག་ལོག་པའི་ཆོས་ལ་སྤྱོད་པ་ཡིན། །རྙེད་བཀུར་གྲགས་འདོད་དམ་ཆོས་འཆད་པར་བྱེད། །ཐོས་བསམ་སྒོམ་པ་བྱེད་པ་དེ་རྣམས་ཀྱང༌། །འདུ་ཤེས་ཕྱིན་ཅི་ལོག་དུ་བཏང་ནས་ནི། །ཆོས་དང་གང་ཟག་འཛོལ་ནས་ངན་སོང་འགྲོ། །ཚུལ་ཁྲིམས་ཉམས་དང་དམ་ཚིག་ཉམས་པ་དང༌། །ཆོ་ག་ཉམས་དང་སྤྱོད་པ་ཉམས་པ་རྣམས། །ལོག་པའི་ལམ་ཞུགས་དེ་ནི་ངན་འགྲོར་སྐྱེ། །བཙུན་པ་ལ་ལ་ཆོས་གོས་ཙམ་འཛིན་ཞིང༌། །བསླབ་པ་ཉམས་ཤིང་ཚུལ་འཆོས་བྱེད་པ་དང༌། །དད་རྫས་ལོངས་སྤྱོད་བྱས་ནས་རང་གཞན་བསླུ། །རང་གིས་རང་ཉིད་ངན་སོང་གནས་སུ་འཁྲིད། །ལ་ལ་དགེ་འདུན་དཀོར་འབགས་ངན་སོང་འགྲོ། །ལ་ལ་གནས་བཞིའི་དཀོར་འབགས་ངན་འགྲོར་ལྷུང༌། །འགའ་ཞིག་སྔགས་བཙུན་ཟེར་ནས་ཁྱིམ་ཐབ་བྱེད། །ལ་ལ་བཙན་གཟུགས་ཚུལ་གྱིས་ཁེ་བོགས་བྱེད། །ཆ་ལུགས་བཟང་པོས་ཆོས་བརྐུ་རྫུན་ཆོས་བྱེད། །ཀྱེ་མ་ཀྱེ་ཧུད་སངས་རྒྱས་བསྟན་པ་ལ། །བསྟེན་ནས་རང་ཉིད་ངན་འགྲོར་ལྷུང་བྱེད་པ། །དེ་འདྲའི་བཅོས་མ་བབ་ཅོལ་མང་དུ་འབྱུང༌། །སངས་རྒྱས་བསྟན་པ་རིམ་གྱིས་འཇིག་པར་འགྱུར། །ད་ནི་རིང་པོར་མི་ཐོགས་དེ་དག་འབྱུང༌། །ཞེས་སྟོང་པའི་ཚིག་ཙམ་ཁ་ཆོས་སུ་ཁྱེར་ནས་རྒྱུ་འབྲས་ཁྱད་ཏུ་གསོད་པ་དང༌། ཚེ་འདིའི་རྙེད་བཀུར་གྱི་ཆེད་ཏུ་གྲུབ་རྫུ་དང་ཞིག་རྫུ་དང་མཁས་རྫུ་འདེབས་པ་དང༌། ཆོས་ཀྱི་གསང་བའི་མཐར་ཐུག་དགའ་རབ་དབང་ཕྱུག་ལ་སོགས་པའི་དབང་སྡུད་ལ་བྱེད་པ་དང༌། སྔགས་ཀྱི་སྣོད་མིན་འདུས་པའི་དཔོན་སློབ་ཀྱིས་(ཇ༦༢ན)

[Full Size]

གསང་སྔགས་སྐད་དུ་འཆོས་པ་དང༌། རབ་བྱུང་གི་གཟུགས་བརྙན་ཆོས་མིན་སྤྱོད་པའི་ཚུལ་ལ་སོགས་ད་ལྟ་ཇི་ལྟར་སྣང་བ་འདི་རྣམས་ལུང་བསྟན་པའོ། །ཨེ་མ་ཧོ། མ་འོངས་དལ་འབྱོར་ཐོབ་པའི་ལུས་ཅན་ཀུན། །སེམས་སྟོབས་སྐྱེད་ལ་རྩོལ་པ་མ་ཞན་མཛོད། །ཡང་དག་དགེ་བའི་བཤེས་གཉེན་དམ་པ་བསྟེན། །དེ་ཡི་ངག་ལ་ངེས་པར་ཚད་མར་ཟུངས། །ཐུགས་ཀྱི་དགོངས་པ་ལོང་ལ་ལེགས་པར་དཔྱོད། །མི་རྟག་འཆི་བར་ངེས་ཀྱིས་དམ་ཆོས་སྒྲུབ་པར་མཛོད། །ནམ་འཆི་ངེས་པ་མེད་ཀྱིས་བརྩོན་འགྲུས་མྱུར་བར་རྩོམས། །འཆི་ཚེ་ཅིས་ཀྱང་མི་གཏོངས་དམ་ཆོས་སྙིང་ནས་མཛོད། །རྒྱུ་རྐྱེན་རྟེན་འབྲེལ་ཡིན་པས་དགེ་བའི་ལས་ལ་འབད། །སྡུག་བསྔལ་སྡིག་ལས་བྱུང་བས་མི་དགེའི་ལས་རྣམས་སྤོངས། །ཀུན་རྫོབ་རྒྱུ་འབྲས་ཡིན་གྱི་ཚུལ་ཁྲིམས་གཙང་མ་སྲུངས། །འཁོར་རྒྱུ་ཉོན་མོངས་སྤོངས་ལ་ངེས་འབྱུང་སེམས་བསྟེན་བྱ། །ལུས་དང་སྲོག་གི་ཕྱིར་ཡང་སྡིག་སྤོངས་དགེ་བ་སྒྲུབས། །འཁོར་བའི་ཉེས་དམིགས་སོམས་ལ་ངེས་འབྱུང་སྐྱོ་ཤས་སྐྱེད། །སེམས་ཅན་རྣམས་ལ་བྱམས་དང་སྙིང་རྗེ་སྐྱེད། །དེ་དག་དོན་དུ་བྱང་ཆུབ་སེམས་སྐྱེད་ལ། །བྱང་ཆུབ་སེམས་དཔའི་བསླབ་པ་མ་ཉམས་སྲུངས། །ཆོས་ཀུན་རང་བཞིན་སྤྲོས་བྲལ་བདག་མེད་སྒོམས། །དོན་དམ་ཀུན་རྫོབ་བདེན་གཉིས་ཟུང་འཇུག་གིས། །བླ་མེད་བྱང་ཆུབ་ལམ་དུ་ཆུད་པར་མཛོད། །ཁྱིམ་པ་དང་ནི་རབ་ཏུ་བྱུང་བ་ཀུན། །རང་རང་སྤྱོད་ཚུལ་ཉམས་པ་མེད་པར་བྱ། །དེ་ཉིད་མ་བཅོས་འགྱུར་མེད་རྣལ་མ་ལྟོས། །མངོན་ཚན་མུ་སྟེགས་སྤྱོད་པ་དང་བྲལ་བས། །རང་སེམས་རང་གིས་བརྟགས་ལ་དཔང་དུ་ཚུགས། །སྟོང་པའི་ཚིག་ལ་མ་ཞེན་བདེན་གཉིས་སྲོལ་དུ་ཆུད། །དམ་ཆོས་ཁ་ལ་མ་གཡེང་དེ་ཉིད་རྣལ་མར་སྤྱོད། །གཞན་ལ་སྒྲོ་སྐུར་མ་འདེབས་རང་སེམས་དཔང་པོར་ཚུགས། །ཆོས་ལ་བཟང་ངན་མེད་ཀྱིས་ཐམས་ཅད་གཅིག་དུ་སློབས། །དེ་ལྟར་བྱས་ན་འདི་ཕྱི་ཀུན་དུ་བདེ་བར་འགྱུར། །ཅེས་བསླབ་བྱ་དང༌། གཞན་ཡང༌། ང་ཡི་ར་སའི་གཙུག་ལག་ཁང་(ཇ༦༢བ)

[Full Size]

འདི་ལ། །བསྙེན་བཀུར་མཆོད་བསྟོད་བྱེད་པ་དེ་དག་ནི། །འཕགས་པའི་གང་ཟག་དམ་པ་ཤ་སྟག་གོ །དེ་ཕྱིར་དེ་དག་ཀུན་ལ་གུས་པ་སྐྱེད། །དེ་དག་ཅི་ཕྱིར་འཕགས་པ་ཡིན་ཞེ་ན། །སངས་རྒྱས་རྣམས་ཀྱི་མཛད་པ་ཆེན་པོ་མཛད། །དེ་ཕྱིར་དེ་དག་འཕགས་པའི་གང་ཟག་རྣམས་འབྱུང་ཞིང༌། །འཁོར་ནི་ལེགས་གནས་སྟོན་པའི་གསུང་རབ་དང༌། །སྟོན་པའི་སྐུ་གཟུགས་དངོས་སུ་ཞུགས་པ་དང༌། །རི་བོ་ཡོན་ཏན་ཅན་ཡང་འདི་ལ་ཡོད། །ཙཱ་རི་ཙཱ་གོང་བདེ་མཆོག་རང་བྱུང་གནས། །རྡོ་ཆུ་རིན་པོ་ཆེ་ཡང་དེ་ན་ཡོད། །ཏི་སེའི་གངས་ལ་དགྲ་བཅོམ་ལྔ་བརྒྱ་བཞུགས། །བདུད་རྩིའི་ཆུ་ཡང་རི་བོ་དེ་ན་ཡོད། །གྱེ་རེའི་བྲག་ལ་ཡིག་དྲུག་རང་བྱུང་བཞུགས། །མཁའ་འགྲོའི་ཕྱག་རྒྱ་རི་བོ་དེ་ན་ཡོད། །མ་ཕམ་མཚོ་ལ་ཀླུ་རྒྱལ་བྱང་ཆུབ་སེམས། །ཆུ་བོ་ཡོན་ཏན་ཅན་ཡང་དེ་ན་ཡོད། །ཁྲི་ཤོད་རྒྱལ་མོའི་ཀླུ་སྨན་བྱང་ཆུབ་སེམས། །ཆུ་བོ་ཆེན་པོ་ཀུན་ལ་ཕན་པར་མཛད། །གནམ་མཚོ་ཕྱུག་མོའི་ནང་ན་བྱང་ཆུབ་སེམས། །ཐང་ལྷའི་བྲག་ལ་དགྲ་བཅོམ་ལྔ་བརྒྱ་ཡོད། །སྣུབས་མཚོའི་གླིང་ན་ཀླུ་རྒྱལ་བྱང་ཆུབ་སེམས། །ཧ་བོའི་གངས་ལ་དགྲ་བཅོམ་ལྔ་བརྒྱ་ཡོད། །རི་མཐོ་ས་གཙང་གངས་རི་གཉན་གྱིས་བསྐོར། །སྒྲ་དག་སྐད་སྙན་སམ་སྐྲྀ་ཏ་དང་མཚུངས། །མི་སྐད་ཆོས་ལ་སྦྱར་དུ་བཏུབ་པའི་ས། །ཡངས་ཤིང་མཐའ་ལེགས་ཡོན་ཏན་ཀུན་ལྡན་པ། །དེ་ལྟར་ཁ་བ་ཅན་གྱི་ཡུལ་དབུས་སུ། །སྐྱེས་པའི་དལ་འབྱོར་མི་ལུས་ཐོབ་པ་ཀུན། །ཡོན་ཏན་སློབ་ལ་རྩོལ་བ་མ་ཞན་ཞིག །སྔོན་གྱི་སྨོན་ལམ་དག་པས་ཞིང་འདིར་སྐྱེས། །དད་གུས་མོས་པ་ཡོད་པར་གྱུར་པ་ཡིས། །གཞན་བྱ་མི་དགོས་འདི་ལ་མོས་པས་ཆོག །ཕྱག་མཆོད་སྐོར་བ་དག་ལ་འབད་པ་གྱིས། །མཆོད་ཅིང་གུས་པར་བྱེད་པ་ཐམས་ཅད་ནི། །ཕྱིར་མི་ལྡོག་པར་རྒྱལ་བས་ལུང་བསྟན་པས། །འདི་ལ་གུས་པར་མཛོད་ཅིག་བོད་འབངས་རྣམས། །བདག་ནི་ཁྱོད་ལ་དེ་སྐད་འདོམས་བྱེད་པ། །རྙེད་ཕྱིར་མ་ཡིན་གྲགས་པའི་ཕྱིར་མ་ཡིན། །སྙིང་རྗེས་ཀུན་ནས་(ཇ༦༣ན)

[Full Size]

བླངས་པའི་ཚིག་ཡིན་པས། །གུས་པས་ཡིད་ཀྱིས་སྤྱི་བོར་བླང་བར་མཛོད། །ཅེས་གསུངས་ནས་ཐུགས་ཀར་ཐིམ་མོ། །སྤྱིར་ལུང་བསྟན་རྒྱས་པར་ཡོད་འདུག་པ་གཏེར་དུ་སླར་ཟློག་ནས་མ་དཔེ་ལ་གསལ་བར་སྣང་ངོ༌། །དེ་མ་ཐག་རང་བྱུང་ཐུགས་རྗེ་ཆེན་པོའི་ཐུགས་ཀ་ནས་འོད་ཟེར་ཚེས་བཅོ་ལྔའི་ཟླ་བ་ཙམ་ཞིག་བྱུང་སྟེ་འཕྲུལ་སྣང་གི་ཕྱི་ནང་ཐམས་ཅད་ཁྱབ་ཅིང་ཁྱད་པར་དུ་བྱམས་པ་ཆོས་ཀྱི་འཁོར་ལོ་དང་ཇོ་བོ་མི་བསྐྱོད་རྡོ་རྗེ་སྟེ་ལི་མ་གཉིས། གཙང་ཁང་དབུས་ཀྱི་མི་འཁྲུགས་པ། གཡས་ཀྱི་མར་མེ་མཛད་ཁྲོ་བོ་རྨེ་བརྩེགས་སྟེ་དར་སྐུ་གསུམ། ཤར་ལྷོའི་གཡུང་དྲུང་ཁུགས་ཀྱི་སྨན་རྒྱལ། བར་ཁང་ནུབ་ལོགས་ཀྱི་རྟ་མགྲིན་དཀར་པོ་དང་ལྷོ་ངོས་ཀྱི་སྒྲོལ་མ་སྟེ་བྲིས་སྐུ་གསུམ་སྟེ་བརྒྱད་ཀྱི་ཐུགས་ཀར་ཕོག་པས་འོད་ཟེར་ཕོག་པའི་ལྷ་བརྒྱད་ཅེས་གྲགས་ཤིང་དེའི་མོད་ལ་བར་ཁང་གི་རྟ་མགྲིན་དཀར་པོའི་ཐུགས་ཀ་ནས་འོད་ཟེར་དུང་གི་ཕྲེང་བ་ལྟ་བུ་བྱུང༌། བར་ཁང་གི་སྒྲོལ་མ་ལས་འོད་ཟེར་ལྗང་གུ་རིན་པོ་ཆེའི་མདོག་འདྲ་བ་བྱུང༌། བྱམས་པ་ཆོས་ཀྱི་འཁོར་ལོ་ལས་འོད་ཟེར་གྱེན་ལ་ཁྱབ་པ་ཉི་མ་འདྲ་བ་བྱུང༌། ཇོ་བོ་མི་བསྐྱོད་རྡོ་རྗེ་ལས་འོད་ཟེར་གསེར་གྱི་མདོག་ལྟ་བུ་བྱུང༌། སྨན་རྒྱལ་ལས་འོད་ཟེར་བཻ་ཌཱུརྻའི་མདོག་ལྟ་བུ་བྱུང༌། ཁྲོ་བོ་རྨེ་བརྩེགས་ལས་འོད་ཟེར་ལྕགས་ཀྱི་རལ་གྲི་ལྟ་བུའི་སྣ་ལ་ཁྲོ་ཆུང་དཔག་དུ་མེད་པ་བྱུང༌། མར་མེ་མཛད་ལས་འོད་ཟེར་འཇའ་ཚོན་ལྟ་བུར་བྱུང༌། མི་འཁྲུགས་པ་ལས་གསེར་བཙོ་མ་ལྟ་བུ་བྱུང་སྟེ་དེ་རྣམས་ལ་འོད་ཟེར་འཕྲོས་པའི་ལྷ་བརྒྱད་ཏུ་ཡང་གྲགས། འོད་ཟེར་དེ་རེ་རེས་ཀྱང་ར་སའི་ཕྱི་ནང་ཐམས་ཅད་ཁྱབ་ཅིང་འོད་ཀྱི་དྲ་བར་འབྲེལ། ནམ་མཁའི་ཁམས་ཐམས་ཅད་དཔའ་བོ་མཁའ་འགྲོས་གང་སྟེ་གླུ་གར་དང་རོལ་མོས་མཆོད། ལྷའི་མེ་ཏོག་དང་རོལ་མོའི་མཆོད་པས་ཀུན་ནས་གང་ཞིང་ས་གཞི་དང་ནམ་མཁའི་འཇའ་འོད་ཀྱི་རང་བཞིན་དུ་གྱུར་སྟེ་ལྷ་ས་གཉིས་ཀྱི་གསང་བའི་རབ་གནས་ལྷུན་གྲུབ་ཏུ་བྱུང་ངོ༌། །དེར་གྲོང་ཁྱེར་པ་རྣམས་ར་ས་ཐམས་ཅད་འོད་ཀྱིས་ཁྱབ་པའི་ལྟས་འདི་ལྟ་བུ་ར་སའི་(ཇ༦༣བ)

[Full Size]

མངའ་གསོལ་མཛད་པར་ངེས་ཅེས་དགའ་སྤྲོ་བྱེད། བློན་པོ་བཅུ་དྲུག་པོས་ཀྱང་ཡོ་བྱད་དང་བཅས་སྟེ་སླེབས་ནས་ཕྱག་བྱེད་པར་ཕྱིན་ཙ་ན་རྒྱལ་པོ་ཡབ་ཡུམ་མི་སྣང་བར་ན་བཟའ་རྒྱན་གོས་ཕུད་དེ་མཐོང༌། མོང་བཟའ་དང་སྣ་ཆེན་པོ་ངོམ་ཟུང་གནག་པར་མཐོང་ནས་དར་རྒྱལ་སྣ་ཆེན་པོ་ཁྱོད་རྒྱལ་པོའི་སྐུ་སྲུང་ལ་བཞག་པ་ཡིན་པ་རྒྱལ་པོ་ཡབ་ཡུམ་གསུམ་གར་གཤེགས་ཅེས་ལན་གསུམ་དྲིས་ཀྱང་སྣ་ཆེན་པོས་ལྷ་ལ་ཐིམ་བྱས་ཀྱང་ཡིད་ཆེས་མི་སྐྱེའོ་སྙམ་ནས་སྨྲ་མ་ནུས། ཁ་རོག་བསྡད་པ་དང་སྤས་སྒྱིད་ཐག་རིང་མོ་ན་རེ་ཞང་བློན་ཆེན་པོ་འདིས་ལན་གསུམ་དུ་དྲིས་ཀྱང་ལན་མི་སྟེར་བ་སྣ་ཆེན་པོ་ཁྱོད་ཀྱི་རྐེ་གཅོད་ཟེར་ནས་རལ་གྲི་ཕྱུང་བ་དང་བཙུན་མོས་སྣ་ཆེན་པོ་བསད་ན་དབོན་སྲས་ཆུང་བས་བོད་ནང་འཁྲུག་གིས་འཇིག་སྙམ་ནས་རྒྱལ་པོ་ཡབ་ཡུམ་གསུམ་ཐུགས་རྗེ་ཆེན་པོ་ལ་ཐིམ་མོ་ཞེས་སྨྲས་པ་དང་སྣ་ཆེན་པོས་ད་ནི་སྨྲས་པས་ཆོག་སྙམ་ནས་ངས་སྐུ་སྲུང་བྱས་པ་ཡིན་སྟེ་རྒྱལ་པོས་ལྷ་གཅིག་གཉིས་ཀྱི་སྤྱི་བོར་ཕྱག་བཞག་པདྨ་དང་ཨུཏྤ་ལར་བྱས་སྟེ་ངེད་རྣམས་དང་མ་མཇལ་ཟེར་ན་ངའི་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་འདོད་པའི་དོན་ཐམས་ཅད་འགྲུབ་བོ་གསུངས་ནས་ལྷ་ལ་ཐིམ་ནས་ཐལ་ལོ། །རྒྱལ་པོ་སངས་རྒྱས་ཀྱི་སྤྲུལ་པ་དངོས་ཡིན། ང་ལ་ཆད་པ་བཅད་པར་མི་རིགས་སོ་བྱས་པས་ཁོང་རྣམས་ན་རེ་དཔང་པོ་སུ་ཡོད་ཟེར། སྣ་ཆེན་པོས་རྒྱལ་པོའི་ན་བཟའ་བེར་ནག་དང་ཇོ་མོ་གསུམ་གྱི་ཕྱག་རྟེན་ཡང་མངོན་སུམ། ཇོ་མོ་མོང་བཟའ་ཡང་མངོན་སུམ་མོ་བྱས་པས་ཐམས་ཅད་ཡིད་ཆེས་སྟེ་ངོ་མཚར་རེ་ཆེ་ན་རྒྱལ་པོ་ནི་སངས་རྒྱས་ཀྱི་སྤྲུལ་པ་ཡིན་ངེས་པར་འདུག །སྔོན་རྒྱ་རྗེ་དང་བལ་རྗེས་ཇི་སྐད་ཟེར་བ་ཡང་ཁོང་གིས་ཤེས་ནས་བཀའ་འཕྲིན་གྱི་སྒྲོམ་བུ་བསྐུར་ཟེར། ཐོན་མི་ན་རེ་རྒྱལ་པོ་ནི་སྤྱན་རས་གཟིགས་དབང་ཕྱུག་དངོས་ཡིན་སྟེ་དབུ་ལ་འོད་དཔག་མེད་དངོས་སུ་བཞུགས། ལིའི་ཡུལ་ནས་ཀྱང་སྤྱན་རས་གཟིགས་སུ་ལུང་བསྟན་ཞེས་ཁྲ་འབྲུག་གི་བནྡྷེའི་དང་ལི་ཡུལ་གྱི་བནྡྷེའི་བྱུང་བ་བརྗོད་པས་ཐམས་ཅད་དད་པ་སྐྱེས་(ཇ༦༤ན)

[Full Size]

སྟེ་སྤྱན་རས་གཟིགས་དངོས་སུ་བྱོན་འདུག་པ། རྒྱལ་པོ་ཡབ་ཡུམ་གསུམ་བཞུགས་དུས་མོས་གུས་ཆུང་འདུག་པ། ཨཱརྻ་པ་ལོ་ཞེས་འབོད་ཅིང་ལ་ལ་ནི་ངུ་ལ་ལ་ནི་ལུས་ས་ལ་རྡེབ་ཅིང་འགྲེ་ལྡོག་ལ་ལ་ནི་མོས་གུས་ཀྱི་གསོལ་བ་འདེབས་སོ། །དེའི་ཚེ་ཐོན་མི་སམྦྷོ་དྲས་གདུང་ཤུགས་ཀྱིས་གསོལ་བ་བཏབ་པ། ཀྱེ་མ་ཀྱེ་ཧུད་སྡུག་བསྔལ་ལོ། །རྒྱལ་པོ་སྲོང་བཙན་སྤྲུལ་པའི་སྐུ། །ཁ་བ་ཅན་གྱི་རྒྱལ་ཁམས་སུ། །སྤྱན་རས་གཟིགས་ཀྱིས་ཐུགས་རྗེས་གཟིགས། །སྤྲུལ་པའི་རྒྱལ་པོར་དངོས་སུ་བྱོན། །གདུལ་བྱ་རྣམས་ཀྱི་སྣང་ངོ་རུ། །འདའ་ཚུལ་སྟོན་པར་མཛད་པ་དེ། །ཆོས་ཉིད་མི་འགྱུར་སྤྲུལ་པའི་བརྡ། །ལྷ་ས་སྐྱོང་བར་བསྐོས་ནས་ཀྱང༌། །རྒྱལ་པོ་གཤེགས་པ་ཇི་ལྟར་ཡིན། །ཐུགས་རྗེས་གཞན་དོན་མི་མཛད་པར། །ཐུགས་མཁྱེན་པ་ཅན་དེ་ཅི་དགོངས་ན། །སྐུ་མཛེས་པའི་ཕྱག་རྒྱ་ནམ་ཡོལ་ན། །འཕྲུལ་སྣང་སྟོངས་ཀྱིས་མི་དྭོགས་སམ། །ཕ་རིན་པོ་ཆེ་དེ་ཅི་དགོངས་ན། །བཅོམ་ལྡན་སངས་རྒྱས་ཤཱཀ་ཐུབ་ཀྱི། །ཞིང་ཁམས་མི་མཇེད་འཇིག་རྟེན་འདིར། །ཁྱད་པར་ཁ་བ་ཅན་གྱི་ལྗོངས། །སངས་རྒྱས་གཉིས་པ་ལྟར་གྲགས་པའི། །སྲོང་བཙན་རྒྱལ་པོ་སྤྲུལ་པའི་སྐུ། །ར་ས་འཕྲུལ་སྣང་ཕོ་བྲང་དུ། །འགྲོ་བའི་དོན་ལ་མི་བཞུགས་པར། །རྒྱལ་པོ་ཆེན་པོ་ཅི་ལགས་པ། །ཕ་རིན་པོ་ཆེ་དེ་གར་གཤེགས་ན། །བོད་འབངས་སུ་ལ་རེ་ལགས་པ། །ཀྱེ་ཧུད་ཀྱེ་ཧུད་འཇིག་རྟེན་སྟོངས། །བསམ་གྱིས་མི་ཁྱབ་ཕྱག་རྒྱ་ཆེ། །འོད་གསལ་ཆེན་པོའི་དོན་རྟོགས་པ། །འགྲོ་འོང་མེད་པར་གཟིགས་ནས་ཀྱང༌། །རྒྱལ་པོ་གཤེགས་པ་ཇི་ལྟར་ལགས། །ཕ་རིན་པོ་ཆེ་དེ་གར་གཤེགས་ན། ཁྱབ་རྡལ་ཆེན་པོ་ཆོས་ཀྱི་སྐུ། །གཉུག་མའི་ངང་ལས་མ་གཡོས་ཀྱང༌། །ཐུགས་རྗེས་གཞན་དོན་མཛད་པ་ཡི། །དུས་ལ་མི་གཟིགས་ཅི་དགོངས་པ། །སྐུ་གཟི་མདངས་ཅན་དེ་གར་གཤེགས་ན། །ཀྱེ་ཧུད་སངས་རྒྱས་བསྟན་པ་ཉམས། །རྩ་བ་གནད་ཀྱི་གདམས་ངག་གིས། །སྐལ་ལྡན་འགྲོ་བ་(ཇ༦༤བ)

[Full Size]

མི་འདྲེན་པར། །བོད་འབངས་གདུལ་བྱ་མི་གཟིགས་སམ། །རྗེ་རིན་པོ་ཆེ་དེ་ཅི་དགོངས་ན། །ཞལ་མཛེས་པའི་དཀྱིལ་འཁོར་ནམ་ཡོལ་ན། །ཀྱེ་ཧུད་རྒྱལ་པོ་གཤེགས་པས་བརླག །མཛེས་པའི་སྐུ་ལུས་རིན་པོ་ཆེ། །དངོས་སུ་འགྲོ་དོན་མི་མཛད་པར། །རྒྱལ་པོ་གཤེགས་པ་ཇི་ལྟར་ལགས། །ཀྱེ་ཧུད་བོད་འབངས་ཇི་ལྟར་བགྱི། །བྱིན་རླབས་བརྡ་ཡི་རྒྱུད་པ་དང༌། །བརྟུལ་ཞུགས་སྤྱོད་པ་རྟེན་འབྲེལ་གྱིས། །འགྲོ་བའི་མུན་པ་མི་སེལ་བར། །རྒྱལ་པོ་གཤེགས་པ་ཇི་ལྟར་ལགས། །ཐུགས་མཁྱེན་པ་ཅན་དེ་གར་གཤེགས་ན། །ཀྱེ་མ་བོད་འབངས་སུ་ལ་རེ། །སྐལ་ལྡན་བོད་འབངས་ཕོ་མོ་ཀུན། །རྟག་དུ་འཆི་བ་རྗེས་སུ་དྲན། །མོས་གུས་དམ་ཚིག་ལྡན་པ་ཡི། །སྤྱི་བོའི་རྒྱན་དུ་མི་བཞུགས་པར། །བརྒྱད་བཅུ་རྩ་གཉིས་རྒྱལ་པོའི་ལོ། །ལོན་ནས་རྒྱལ་པོ་འགྲོ་གསུངས་སྟེ། །ད་ལྟ་འཇིག་རྟེན་སྟོང་པར་བཞག །ཀྱེ་ཧུད་བོད་འབངས་སྟོང་པས་ལུས། །དུས་ཁ་སང་གདུགས་ཀྱི་སྔ་དྲོ་ལ། །བརྡ་དང་ཆོ་འཕྲུལ་བཀྱེ་ནས་ཀྱང༌། །བོད་ཀྱི་རྒྱལ་ཁམས་མ་ལུས་ཚོགས། །ཀུན་ཡང་བྲོད་ནས་འོངས་ཙ་ན། །སྒྲ་དང་རོལ་མོ་འཇའ་དང་གུར། །མཁའ་འགྲོའི་ཚོགས་ཀྱིས་ཡོངས་སུ་ཁེངས། །བོད་འབངས་གླིང་བཞི་སྟོང་པར་བཞག །ཉི་མའི་འོད་ཟེར་མཁའ་ལ་བསྡོགས། །བོད་འབངས་མི་རིག་གླིང་དུ་ཚུད། །ཆོས་ཀྱི་རྒྱལ་པོ་མི་བཞུགས་པས། །སངས་རྒྱས་བསྟན་པ་ལན་གཅིག་ནུབ། །ལྷ་སའི་བསྟན་པའི་སྲོག་ཤིང་ཆག །ཀྱེ་མ་རྒྱལ་པོ་རིན་པོ་ཆེ། །འབངས་གདུང་བའི་སྨྲེ་སྔགས་གསན་ལགས་སམ། །ལུས་འདྲེ་ལྡོག་བྱེད་པ་གཟིགས་ལགས་སམ། །གཟིགས་ནས་བྱིན་གྱིས་བརླབ་ཏུ་གསོལ། །མ་རིག་མུན་པས་གཏིབས་པ་ཡི། །འཁྲུལ་པ་རྩད་ནས་བཅད་དུ་གསོལ། །ཚེ་འདི་དང་ཕྱི་མ་བར་དོ་གསུམ། །ཕ་ཁྱོད་དང་རྟག་དུ་མི་འབྲལ་ཤོག །ཞེས་གསོལ་བ་བཏབ་པས་རྒྱལ་པོ་དངོས་སུ་བྱོན་སྟེ། །ཨེ་མ་ཧོ། སྐུ་གསུམ་མི་ཟད་རྒྱན་གྱི་འཁོར་ལོ་ལས། །འབད་མེད་འཁོར་འདས་ཐོགས་མེད་ཅིར་ཡང་(ཇ༦༥ན)

[Full Size]

འཆར། །འདས་གྲོངས་གཤེགས་པ་བདག་ལ་མེད་པས་ན། །འབྲལ་མེད་རྒྱུན་དུ་གུས་པས་གསོལ་བ་ཐོབ། །སེམས་ཅན་ཀུན་ལ་ཐུགས་རྗེས་རྟག་དུ་གཟིགས། །ང་ཡི་ཞལ་མཐོང་གསུང་ཐོས་སྨོས་ཅི་དགོས། །ཀུན་གྱིས་གསོལ་བ་ཐོབ་ཅིག་བོད་འབངས་རྣམས། །ཅེས་གསུང་བའི་སྣང་བ་བྱུང་ངོ༌། །དེར་ཐོན་མི་འོ་སྐོལ་གྱི་རྒྱལ་པོ་འདི་ནི་ཐུགས་རྗེ་ཆེན་པོ་དངོས་ཡིན་སྟེ་ད་ལྟར་རྒྱལ་པོས་གསུང་བྱོན་པ་དང་མཁའ་ལ་འཇའ་འོད་འཁྲུག་ཞིང་ལྷ་དང་མཁའ་འགྲོ་འདུས་པ་འདི་དང༌། སྐུ་བལྟམས་པ་ན་ཞལ་བཅུ་གཅིག་པ་སོགས་དུ་མར་མཐོང་བ་དང༌། བོད་འབངས་ལ་ཆོས་སྟོན་པའི་ཚེ་ཁོ་བོ་སྐུ་གསུམ་གྱི་བདག་ཉིད་ཡིན་ཞེས་དང༌། སངས་རྒྱས་ཀྱི་ཞིང་ཁམས་དུ་མའི་བཀོད་པ་གསུང་ཞིང་ངའི་འཕྲིན་ལས་དང་རྣམ་འཕྲུལ་ཁྱེད་རྣམས་ཀྱིས་མཐོང་ཐོས་དྲན་ཚོད་འདི་ལས་མེད་པ་མ་ཡིན་གྱི་ཐམས་ཅད་ཀྱང་ངའི་འཕྲིན་ལས་སོ་ཞེས་བཀའ་སྩལ་བ་སོགས་ཀྱིས་ཨཱརྻ་པ་ལོ་ཡིན་པ་མངོན་སུམ་གྱིས་ཡིད་ཆེས་པས་བཙུན་མོ་མོང་བཟའ་དང་བློན་པོ་སྣ་ཆེན་པོ་ལ་ཐེ་ཚོམ་མ་ཟ་ཞིག་ཞེས་སྨྲས་པས་ཐམས་ཅད་ཡིད་ཆེས་སྟེ་རྩེ་གཅིག་དུ་གསོལ་བ་འདེབས་སོ། །དེའི་ཚེ་བློན་པོ་མགར་རྒྱའི་སོ་ཁ་སྲུང་བའི་དཔོན་ལ་ཡོད་པའི་སེམས་ཀྱིས་ཚོར་སྟེ་བོད་ཡུལ་དུ་མྱུར་བར་འོངས་པ་ན་རྒྱལ་པོ་གཤེགས་པ་ཐོས་སྟེ་འཕྲུལ་སྣང་དུ་གདུང་བའི་སྨྲེ་སྔགས་བཏོན་པ། ཆོས་ཀྱི་རྒྱལ་པོ་སྲོང་བཙན་ཁྱོད། །སྐུ་མྱ་ངན་འདས་པའི་འོག་རོལ་དུ། །འབངས་འཁང་བའི་སྨྲེ་སྔགས་ཅུང་ཟད་མཆིས། །རྗེ་མི་མངོན་དབྱིངས་ནས་སྙན་གསོན་འཚལ། །ཡོང་ཕྱི་སྐོར་ལྷོ་ཡི་ཛམྦུའི་གླིང༌། །ནང་སྐོར་པུར་རྒྱལ་བོད་ཀྱི་ཡུལ། །རུ་བཞི་ས་བཅད་མཆིམས་ཡུལ་སྨད། །ཡུལ་ལ་གཡང་བབས་དབུས་ཀྱི་མཐིལ། །ཆུ་ལོ་ཧི་ཏ་ཡི་བྱང་ཕྱོགས་ན། །དཔལ་གཙུག་ལག་བཀྲ་ཤིས་ལྷ་ས་རུ། །རྗེ་སངས་རྒྱས་དངོས་ཤིག་བཞུགས་པ་ནི། །མཚན་ལ་སྲོང་བཙན་སྒམ་པོ་ཟེར། །མཚན་ཐོས་པ་ཙམ་གྱིས་མོས་གུས་སྐྱེ། །ཞལ་མཐོང་བ་ཙམ་གྱིས་སྒྲིབ་པ་འབྱང༌། །རྗེ་དེ་ལྟ་བུ་(ཇ༦༥བ)

[Full Size]

ཡི་སྤྲུལ་སྐུ་དེ། །སྙན་པ་རྒྱ་གར་ཡུལ་དུ་སྒྲོགས། །བ་རའི་རྒྱལ་པོ་ཤིང་རྟ་ཅན། །ཐལ་མོ་སྦྱར་སྟེ་སཏྭ་བརྗོད། །ཁྱོད་ཀྱིས་ཆེ་བའི་ཡོན་ཏན་རྣམས། །རྒྱ་ནག་ཡུལ་གྱི་རྒྱལ་པོས་གསན། །ཕྱོགས་སུ་ཞལ་གཟིགས་འདུད་པར་མཛད། །མི་ཉག་ཙ་མིའི་རྒྱལ་པོ་ཡང༌། །ཁྱོད་ཀྱི་མཚན་ཐོས་རྐྱང་ཕྱག་འཚལ། །མཚན་བརྗོད་མཁན་དེ་ལ་བྱ་དགའ་སྟེར། །གེ་སར་དམག་གི་རྒྱལ་པོ་ཡང༌། །ཁྱོད་ཀྱི་མཚན་ཐོས་དད་གུས་བྱེད། །ཞབས་དྲུང་སྐྱེ་བར་སྨོན་ལམ་འདེབས། །མི་རྗེ་བྱང་ཆུབ་སེམས་དཔའི་བརྒྱུད། །ཁོང་དེ་ལྟ་བུ་ཡི་རྒྱལ་པོ་དེ། །སྐུ་འཁྲུངས་ས་དབུས་ཀྱི་ལུང་པར་འཁྲུངས། །ཆོས་ཉིད་བདེན་པའི་དོན་རྟོགས་ཤིང༌། །ཐུགས་དམ་ཞལ་གཟིགས་སྤྲུལ་པའི་སྐུ། །དང་ཡན་ཆད་དངོས་སུ་ཞལ་བཞུགས་པ། །སྤྲུལ་སྐུས་འགྲོ་དོན་མཐར་ཕྱིན་མཛད། །དུས་རྙིགས་མའི་སེམས་ཅན་བསོད་ནམས་ཆུང༌། །བདེ་གཤེགས་སྤྲུལ་སྐུ་མྱ་ངན་འདས། །རྗེ་མཉམ་མེད་རྒྱལ་པོ་རིན་པོ་ཆེ། །གྲངས་མེད་བསྐལ་པར་ཚོགས་བསགས་ནས། །སྨོན་འཇུག་སེམས་སྐྱེད་འཕན་པ་ཡིས། །མ་དག་རྙིགས་མ་ལྔ་དུས་ལྡན། །གདུལ་བྱའི་རྟོག་པ་ཐ་དད་ལ། །སྣ་ཚོགས་ཐེག་པའི་དོན་བསྟན་ནས། །སེམས་ཉིད་གཏན་ལ་འབེབས་མཛད་པ། །སྤྲུལ་པའི་རྒྱལ་པོ་གར་གཤེགས་ན། །མཉམ་ཉིད་ཐུགས་རྗེ་ཆེན་པོ་དེ། །འགྲོ་བའི་དེད་དཔོན་མི་མཛད་དམ། །བྱིན་རླབས་ཡེ་ཤེས་འཁོར་ལོ་དེ། །སྣོད་ལྡན་སེམས་ལ་མི་བསྐོར་རམ། །རྗེ་སྤྲུལ་པའི་སྐུ་དེ་གར་གཤེགས་ན། །ཀྱེ་ཧུད་ཀྱེ་ཧུད་རྒྱལ་བའི་སྐུ། །མཛེས་པའི་སྐུ་ལུས་རིན་པོ་ཆེ། །ཞལ་མཐོང་བ་ཙམ་གྱིས་དད་མོས་སྐྱེད། །གསུང་རྒྱང་ནས་ཐོས་ཀྱང་བྱིན་རླབས་འཇུག །ཕྱག་སྐོར་བ་བྱས་ན་ཚོགས་རྫོགས་ཕྱིར། །གདུལ་བྱའི་དོན་དུ་མི་བཞུགས་པར། །སྐུ་ཡལ་བར་དོར་བ་ཅི་ལགས་པ། །གུ་ལིང་དར་ཟབ་ཀྱི་ན་བཟའ་དེ། །ཟིན་ཆུ་རྒྱ་ཡི་ཚོང་དུས་སུ། །དར་གཞན་པས་ཁྱད་པར་རིན་ཐང་ཆེ། །རྒྱལ་པོ་དབང་(ཇ༦༦ན)

[Full Size]

བསྐུར་གྱི་ཐོད་ཏུ་འཆིང༌། །དེ་རྒྱལ་པོའི་སྐུ་ལ་མི་གསོལ་བར། །བཅོམས་ནས་འཇོག་པ་ཇི་ལྟར་ལགས། །ཀྱེ་ཧུད་བོད་འབངས་སྟོང་པར་བཞག །ཆིབས་རྟ་ནག་པོ་ཁྱུང་གཤོག་དེ། །བྱང་ཕྱོགས་ཙ་མའི་ཡུལ་ནས་བཏོན། །བྱོལ་སོང་གི་ལུས་ལ་མི་ཡི་སེམས། །གྱི་ལིང་གི་ཡག་ཚངས་ཁོ་ལ་རྫོགས། །བཤུལ་རིང་དུ་གཤེགས་ན་མི་ཆིབས་པར། །གསོས་ནས་འཇོག་པ་ཇི་ལྟར་ལགས། །ཡང་དབེན་གྱི་བཞུགས་གནས་ར་ས་དེ། །ཕྱི་ལྟར་མཛེས་པ་གདུགས་ཀྱི་དབྱིབས། །ནང་ཉམས་སུ་དགའ་བའི་གཙུག་ལག་ཁང༌། །གནས་བྱིན་གྱིས་བརླབས་པའི་འཕྲུལ་སྣང་དེར། །སྐྱེ་མེད་ངང་ལ་མི་བཞུགས་པར། །དྲུང་དུ་འཚོགས་པའི་བོད་འབངས་རྣམས། །ཁྱོད་མིན་མགོན་སྐྱབས་སུ་ལ་བགྱི། །བོད་འབངས་དབང་པོ་རབ་འབྲིང་ལ། །ཡི་གེ་དྲུག་པའི་གདམས་ངག་གི །གསུང་དོན་བདུད་རྩི་མི་གསུང་བར། །འབངས་ཡལ་བར་དོར་བ་ཇི་ལྟར་ལགས། །ཐུགས་མཁྱེན་པ་ཅན་དེ་ཅི་དགོངས་ན། །ཐག་རིང་གི་འབངས་པོ་ཡུལ་སྲུང་བདག །དགྲ་ཡུལ་སོ་མཚམས་གཤགས་གཤགས་ནས། །ཤ་ལྦུ་བར་སོང་ཞིང་ཁོང་ཁྲག་སྐམས། །ཚ་གྲང་གི་དཀའ་བ་སྤྱད་དཔྱད་ནས། །དུས་ད་ལྟ་གདོང་དུ་མི་བཞུགས་པ། །འབངས་ཡི་ཐག་གཅོད་པ་ཇི་ལྟར་ལགས། །ཕ་རིན་པོ་ཆེ་དེ་གར་གཤེགས་ན། །སྐུ་མཛེས་པའི་ཕྱག་རྒྱ་ནམ་བསྡུས་ན། །ཞལ་གཟི་མདངས་ཅན་དེ་གར་ཡོལ་ན། །གསུང་ཚངས་པའི་དབྱངས་དེ་ནམ་ཆད་ན། །ཀྱེ་ཧུད། ཡིད་བཞིན་གྱི་ནོར་བུ་འདམ་དུ་བྱིང༌། །ད་དགོས་འདོད་རེ་བ་སུ་ལ་སློང༌། །ཡན་ལག་དང་པོ་མགོ་བོ་ཆད། །མགོ་མེད་ལུས་པོ་ཇི་ལྟར་བགྱི། །དབང་པོའི་དྭངས་མ་མིག་ཡོང་ལོང༌། །མིག་མེད་མདོངས་པར་གྱུར་པ་ལ། །ལོང་ཁྲིད་མཛོད་ཅིག་རྒྱལ་བའི་སྲས། །རི་བོ་མཆོག་རབ་རྩེ་ནས་ཉིལ། །སུམ་བཅུ་གསུམ་པ་དངངས་ཤིང་སྐྲག །རྒྱལ་ཆེན་བཞི་ཡི་ཕོ་བྲང་ཞིག །གསེར་གྱི་རི་བདུན་རྨང་ནས་འགྱེལ། །རོལ་པའི་(ཇ༦༦བ)

[Full Size]

མཚོ་བདུན་གཏིང་ནས་སྐམ། །ཀླུ་ཆེན་བརྒྱད་པོ་གང་དུ་སྡོད། །ལྕགས་རི་ནག་པོ་མཐའ་ནས་ཞིག །སྐྱེ་འགྲོའི་སེམས་ཅན་དུད་མོར་སོང༌། །ཉི་མ་ནམ་མཁའི་མཐོངས་སུ་ནུབ། །དུས་ཀྱི་སོ་ནམ་ཇི་ལྟར་བྱེད། །བཅོ་ལྔའི་ཟླ་བ་གཟའ་ཡིས་ཟིན། །མཚན་འགྲོས་པ་ལ་ཅི་མ་སྲིད། །རྒྱ་མཚོའི་གླིང་དུ་གཟིངས་ཐག་ཆད། །དེད་དཔོན་ཚོང་པ་ཇི་ལྟར་བགྱི། །ལྡུམ་རའི་མེ་ཏོག་ཧ་ལོ་སྐམ། །བུང་བའི་སྦྲང་རྩི་གང་ནས་འཚོལ། །རྒྱལ་པོ་འོག་མིན་གནས་སུ་གཤེགས། །ངེད་བོད་འབངས་ཀྱི་མགོན་སྐྱབས་སུ་ལ་རེ། །ཁོ་བོ་རྒྱ་ནག་གི་སོ་མཚམས་སུ། །རྨི་ལམ་ངན་ཞིང་རྒྱལ་པོ་དྲན། །ཞལ་མཐོང་བར་འདོད་ནས་ཡར་ལ་འོངས། །ལམ་དུ་ཞུགས་ནས་འོངས་ཙ་ན། །ཆོས་སྐྱོང་རྒྱལ་པོ་དགུང་དུ་གཤེགས། །མྱ་ངན་འདས་སོ་སྐད་པ་ལ། །འབངས་ད་དུང་བདེན་རྫུན་ངོ་མ་ཤེས། །མི་སུ་ལ་དྲིས་ཀྱང་བདེན་ནོ་ཟེར། །གཏམ་ཐོས་པ་ཙམ་གྱིས་གློ་སྙིང་འདར། །སྐམ་སར་ཐོན་པའི་ཉ་བཞིན་དུ། །ལུས་འགྲེ་ལྡོག་བྱེད་པ་གཟིགས་ལགས་སམ། །འབངས་ད་དུང་ཡི་ཐག་མ་གཅོད་ཅིག །ཀྱེ་ཧུད་འཇིག་རྟེན་སྟོང་པར་བཞག །ཐར་པ་ཆོས་ཀྱི་རྒྱལ་མཚན་ནུབ། །མངའ་རིས་བོད་ལ་ཅི་མ་སྲིད། །དགོས་འདོད་འབྱུང་བའི་རེ་ས་གཤེགས། །བོད་ཀྱི་རྒྱལ་ཁམས་སུ་ལ་རེ། །སྡུག་ཕོངས་ཀྱི་ཕ་མ་གྲོངས་ལགས་པས། །བདག་དྭ་ཕྲུག་རྣམས་ལ་ཅི་མ་སྲིད། །རྗེ་སངས་རྒྱས་གཉིས་པ་མྱ་ངན་འདས། །ངེད་བོད་འབངས་རྣམས་ཀྱི་དྲན་པ་སྟོར། །དུས་ཁ་སང་རྒྱལ་པོའི་ཁབ་ཏུ་སླེབས། །གནས་དབུ་རུ་ལྷ་ས་ཡེར་གྱིས་མཐོང༌། །རྗེ་རྒྱལ་པོ་དྲན་སྟེ་ཅུང་ཟད་བརྒྱལ། །འབངས་རང་དབང་མེད་པར་མཆི་མ་ཤོར། །སྙིང་ཡང་མ་དགའ་ཕྱད་མ་ཕྱོད། །ལུས་ཀྱང་བྱེ་ཕྲུག་བཞིན་དུ་འདར། །དྲན་པ་རེས་གསལ་རེས་མ་གསལ། །གདུང་པའི་ཤུགས་ཀྱིས་མྱ་ངན་བགྱིད། །འབངས་ལ་ཐུགས་རྗེས་བཟུང་དུ་གསོལ། །འགྲོ་དྲུག་འཁོར་བའི་འདམ་ནས་དྲོངས། །གདུང་བའི་(ཇ༦༧ན)

[Full Size]

སེམས་ཀྱིས་གསོལ་བ་འདེབས། །འབངས་བཞིན་མདངས་ལོག་པ་གཟིགས་ལགས་སམ། །སྨྲེ་སྔགས་འདོན་པ་གསན་ལགས་སམ། །རྗེ་འབངས་ལ་ཐུགས་ཐག་མ་བཅད་ཅིག །མི་མངོན་དབྱིངས་ནས་ཐུགས་རྗེས་གཟིགས། །ཀྱེ་ཧུད་འདི་འདྲའི་དུས་ཅིག་བྱུང༌། །ཆོས་ཀྱི་རྒྱལ་པོ་གཤེགས་པས་བརླག །གནམ་ས་གཉིས་ཀྱི་ཀ་གདུང་འགྱེལ། །མི་ཡུལ་གླིང་བཞི་སྟོང་པར་བཞག །ལྷ་ཡུལ་ན་མཁའ་འོད་ཀྱིས་བཀང༌། །མི་འགྱུར་ཆོས་ཀྱི་བསྟན་པ་ཅིག །ཤཱཀྱ་ཐུབ་པའི་གདུང་རབས་ཆད། །མགོན་པོ་བྱམས་པའི་བསྟན་པ་སྟོངས། །བོད་འབངས་གནམ་ས་སླར་གྱིས་འཁྲིགས། །མུན་པའི་གླིང་ལ་མར་མེ་བརྣལ། །ཆུ་བོའི་གཞུང་དུ་གྲུ་གཟིངས་ཆག །འཇིགས་པའི་འཕྲང་ལ་སྐྱེལ་མས་བོར། །ཀྱེ་ཧུད་མི་ཡུལ་སྟོང་པར་བཞག །ལར་བསམ་གྱིན་ཆོས་ཀྱི་རྒྱལ་པོ་དྲན། །རྗེ་དྲན་པས་ཅི་ཕན་དགུང་དུ་གཤེགས། །གཏམ་མི་སྙན་ཐོས་པས་སྙིང་རླུང་འཇུག །འབངས་མཆི་མའི་སྔས་ལ་མཆི་མའི་སྟན། །ཟས་ཟ་བ་མ་དྲན་ལུས་སྟོབས་ཤོར། །གོས་གོན་པས་མ་དྲན་ངོ་ཚ་ཤོར། །གདོང་ལ་མཆི་མ་རྒྱུན་ཆད་མེད། །ངག་སྨྲེ་སྔགས་བཏོན་པས་གྲེ་བ་འཛེར། །འབངས་དུས་ཀྱི་ཉེས་པས་བསྒྲིབས་པའི་ཕྱིར། །ཞལ་དངོས་སུ་མཇལ་བའི་སྐལ་མེད་ཀྱང༌། །དུས་དོ་ནུབ་གཉིད་ཀྱི་རྨི་ལམ་དུ། །ཕྱག་བཞེས་ཙམ་ཞིག་མཇལ་བར་ཞུ། །གསུང་ལན་ཚིག་གཅིག་གནང་བར་ཞུ། །འགྲོ་བའི་མགོན་པོས་ཐུགས་རྗེས་གཟིགས། །ཀྱེ་ཧུད་དྲིན་ཅན་ཆོས་ཀྱི་རྗེ། །རྗེ་སྤྲུལ་པའི་ཕྱག་རྒྱ་བརྟུལ་བ་དེས། །སྤྱིར་འཛམ་གླིང་བྱང་ཕྱོགས་སྨག་དུ་སྲོས། །སྒོས་དབུ་རུ་ལྷ་ས་འོད་དང་བྲལ། །ལས་ཅན་གྱིས་བྱང་ཆུབ་ཇི་ལྟར་སྒྲུབ། །ལར་བོད་འབངས་རྣམས་ཀྱི་ཐུག་ས་འདས། །ཚོགས་གཉིས་གསོག་པའི་ཞིང་ས་འདས། །ཡོད་འབྱོར་ཕྱུག་པོའི་འབུལ་ས་འདས། །ཁ་དྲག་པོ་ལ་གཉའ་གནོན་མེད། །ཁ་ཞན་པོ་ལ་རྒྱབ་རྟེན་མེད། །རྗེ་སྤྲུལ་སྐུ་དབྱིངས་སུ་(ཇ༦༧བ)

[Full Size]

གཤེགས་པ་དེས། །ཁ་སང་དུས་ཀྱི་རྒྱལ་པོ་ལ། །ཕྱི་རབས་བྲོད་པའི་སྐྱེད་པའི་ཕྱིར། །འོད་དང་འཇའ་དང་སྒྲ་ལ་སོགས། །དཔའ་བོ་མཁའ་འགྲོའི་ཚོགས་རྣམས་ཀྱང༌། །ནམ་མཁའི་ཁམས་སུ་ཁེངས་པར་བྱོན། །རྒྱལ་པོའི་མཛད་སྤྱོད་ཏུར་གྱིས་དྲན། །འབངས་སེམས་ཀྱི་ཚ་གྲང་བཟོད་བླགས་མེད། །འབངས་ཡི་ཐག་མ་གཅོད་སྤྲུལ་པའི་སྐུ། །ལུས་ལ་ཆགས་སྙམ་མི་བགྱི་ཞིང༌། །འབངས་འདི་ཙམ་གདུང་སེམས་ཆེ་བ་ལ། །རྗེས་འབངས་ལ་ཐུགས་རྗེས་མི་གཟིགས་སམ། །ཕས་བུ་ལ་ཕྱི་ཐག་མི་ལྟའམ། །ལར་རྒྱལ་པོ་སྤྲུལ་སྐུའི་རང་བཞིན་ལ། །སྐུ་འདས་དང་མ་འདས་མི་མངའ་ཡང༌། །ངེད་བོད་འབངས་ཀྱི་ཉི་མ་སྒོས་སུ་ནུབ། །བྱང་ཁོག་སྟོད་ཀྱི་ཁོང་སྙིང་བཏོན། །རྗེ་ཆོས་ཉིད་ངང་དུ་གཤེགས་པ་དེ། །སྟོང་ཉིད་ངང་དུ་ཆ་ལ་ལ། །ཟག་མེད་ཀྱི་བདེ་བར་ཕྲི་ལི་ལི། །བྱིན་རླབས་ཀྱི་ཆུ་རྒྱུན་ན་ར་ར། །འོད་གསལ་གྱི་ཉི་མ་ཏ་ལ་ལ། །རྗེ་སྐུ་དང་གསུང་དང་ཐུགས་དང་གསུམ། །འབངས་མོས་པའི་ལུས་ངག་བྱིན་གྱིས་རློབས། །ཚེ་འདི་ལ་མི་མཇལ་ཁོ་ཐག་ཆོད། །དུས་སྐྱེ་བ་འདི་ཡི་འོག་རོལ་དུ། །རྗེ་རྒྱལ་པོ་བཞུགས་པའི་ཞབས་དྲུང་དུ། །མཛེས་པའི་སྤྱོད་ལམ་སྣ་ཚོགས་ཀྱིས། །རྒྱལ་པོ་ཤིན་ཏུ་མཉེས་གྱུར་ནས། །རྟག་དུ་ཞབས་ཏོག་བྱེད་པར་ཤོག །ཞེས་སྨྲེ་སྔགས་དྲག་པོས་གསོལ་བ་བཏབ་པས་དེར་འཁོད་པ་རྣམས་ལ་ལས་དག་མ་དག་གི་བྱེ་བྲག་གིས་སྣང་བ་དུ་མ་བྱུང་སྟེ་ལ་ལས་རྒྱལ་པོ་ལ་མཁའ་འགྲོ་དང་ལྷའི་ཚོགས་ཀྱིས་མཆོད་ཅིང་སྤྱན་འདྲེན་པར་མཐོང༌། སྣ་ཆེན་པོས་རྒྱལ་པོ་ཤིན་ཏུ་སྐུ་ཆེ་བ་ཞིག་གི་ཕྲག་གོང་གཡས་གཡོན་ལ་སྣང་བ་མཐའ་ཡས་དང་སྤྱན་རས་གཟིགས་བཞུགས་པར་མཐོང༌། མོང་བཟས་མེ་ཏོག་གིས་ར་ས་གང་བར་མཐོང༌། བློན་པོ་མགར་གྱིས་རྒྱལ་པོ་རྡོ་རྗེ་དང་དྲིལ་བུ་བསྣམས་ནས་དེར་འཁོད་པ་རྣམས་ལ་བྱིན་རླབས་མཛད་ཅིང་ཁྱོད་སྨྲེ་སྔགས་མ་འདོན་པར་གསོལ་བ་ཐོབ་ཅིག་མཐོང་སྣང་གི་བྱེ་བྲག་བཟང་པོ་འབྱུང་ངོ་གསུང་བར་མཐོང་ངོ༌། །དེ་ནས་(ཇ༦༨ན)

[Full Size]

བློན་པོ་མགར་ན་རེ་རྒྱལ་ཁམས་གཞན་གྱི་མིས་བོད་ཀྱི་བློན་པོ་གདུག་པ་ཅན་རྣམས་ཀྱིས་རྒྱལ་པོ་ཡབ་ཡུམ་གར་གཤེགས་མེད་པ་བྱས་ཟེར་དུ་འོང་གིས་སྤུར་སྦྱོང་བའི་ཚུལ་མ་བྱས་ན་མི་རུང་ངོ་ཞེས་བགྲོས་སྟེ་ལྷ་ལ་ཐིམ་པ་གསངས་ནས་འཕན་ཡུལ་ཟལ་མོའི་སྒང་འོད་ཟེར་དམ་པའི་ཕོ་བྲང་དུ་བཞུགས་པ་ན་མགུར་ཆམ་བྱུང་བ་ལོག་སྟེ་ཚད་པར་ཤོར་ཞབས་ཏོག་ལྷ་གཅིག་གཉིས་ཀྱིས་མཛད་པས་ལྷ་གཅིག་གཉིས་ཀྱང་བསྙུང་སྟེ་སྐུ་འདས་སོང་བར་བསྒྲགས་ནས་དར་སྨན་དང་ས་སྦྱིན་ལ་རྒྱལ་པོ་ཡབ་ཡུམ་གསུམ་གྱི་སྐུ་བཅོས་ན་བཟའ་གསོལ་སྟེ་སྐུ་འབག་སྟག་པགས་ཀྱི་སྟེང་དུ་བཞག་ནས་ཤིང་རྟ་ལ་གདན་དྲངས། ཡར་ལུངས་འཕྱོང་པོའི་ནང་དུ་བང་སོ་བཏབ་སྟེ་རེ་མིག་དབུས་མར་བཞུགས་སུ་གསོལ་སྟེ་ཙནྡན་གྱི་མེས་སྦྱངས་པས་འདུས་པ་རྣམས་ལ་མཐོང་སྣང་གི་བྱེ་བྲག་དཔག་དུ་མེད་པ་བྱུང་སྟེ་བློན་པོ་མགར་གྱིས་དུ་བའི་གསེབ་ནས་རྒྱལ་པོ་ཉིད་བྱོན་སྟེ་ཁྲི་ལ་བཞུགས་ནས་ཆོས་སྟོན་པར་མཐོང༌། སྣ་ཆེན་པོས་མེའི་ནང་ནས་འོད་དཀར་པོ་ཅིག་བྱུང་ནས་དེར་འཁོད་པ་རྣམས་ལ་ཐིམ་པ་དང་རྒྱལ་པོའི་སྐུའི་བཀོད་པ་མང་པོ་དང་ཐུགས་རྗེ་ཆེན་པོ་དང་ཨ་མི་ཏཱ་བྷ་མཐོང༌། དར་རྒྱལ་མང་པོ་རྗེས་རྒྱལ་པོ་དངོས་སུ་བྱོན་པ་དང་བསྟན་པའི་བདག་པོར་མཐོང༌། ཐོན་མིས་རྒྱལ་པོ་ཡབ་ཡུམ་རིན་པོ་ཆེའི་ཁྲི་ལ་བཞུགས་པ་དང་འཁོར་ལོ་བདེ་མཆོག་དུ་མཐོང༌། འབྲི་སེ་རུ་གུང་སྟོན་གྱིས་བསྟན་པའི་བདག་པོ་ལ་བྱང་ཆུབ་སེམས་དཔའ་མང་པོས་བསྐོར་བར་མཐོང༌། སྦས་སྒྱིད་ཐག་རིང་མོས་ཐུགས་རྗེ་ཆེན་པོའི་ལྷ་ཚོགས་དཔག་མེད་དུ་མཐོང༌། དབོན་སྲས་མང་སྲོང་གིས་བསྟན་པའི་བདག་པོ་ལ་དགྲ་བཅོམ་པ་མང་པོས་བསྐོར་བར་གཟིགས། ཇི་མོ་རུ་ཡོངས་བཟས་སྒྲོལ་མའི་ལྷ་ཚོགས་སུ་མཐོང༌། གཞན་ཡང་སངས་རྒྱས་དང་བྱང་ཆུབ་སེམས་དཔའས་གང་བ་དང༌། ཀུན་དུ་བཟང་པོའི་མཆོད་སྦྱིན་གྱིས་ན་མཁའ་གང་བ་དང༌། མཁའ་འགྲོའི་ཚོགས་ཀྱིས་རྒྱལ་པོ་སྤྱན་དྲངས་སྟེ་འགྲོ་བ་དང་(ཇ༦༨བ)

[Full Size]

སེང་གེའི་ཁྲི་ལ་རྒྱལ་པོ་དངོས་སུ་བཞུགས་པ་དང༌། གཡས་གཡོན་དུ་གཟིགས་པ་དང་ཆོས་གསུང་པ་དང་སྤུར་སྒྲོམ་གཞལ་མེད་ཁང་དུ་གྱུར་པའི་ཟུར་བཞིར་དཔལ་མགོན་བདུན་བཅུ་རྩ་གཉིས་དང་མཆོད་པའི་ལྷ་མོ་མང་པོས་མཆོད་པ་དང༌། སྒྲ་དང་འོད་དང་ས་གཡོ་བ་དང་སྤོས་ཀྱི་ངད་ལྡན་ན་མཁའ་འོད་ཀྱིས་གུར་དུ་འཁྲིག་ཅིང་མེ་ཏོག་དང་རིང་སྲེལ་ཆར་དུ་འབབ་པ་དང༌། འདོད་གཟུགས་ཀྱི་ལྷ་རྣམས་ཀྱིས་མཆོད་ཅིང་མེ་ཏོག་གི་ཆར་འབེབས་པ་དང༌། དཔའ་བོ་རྣམས་གར་བྱེད་ཅིང་མཁའ་འགྲོ་མ་རྣམས་གདུང་དབྱངས་ལེན་པ་དང༌། སངས་རྒྱས་དང་བྱང་སེམས་སྤྲིན་ལྟར་འཐིབས་པ་དང༌། མེའི་དབུས་ན་སངས་རྒྱས་ཀྱི་སྐུ་འཇའ་ཚོན་གྱིས་བསྐོར་བ་ལ་ཐབ་ཀའི་མི་རྣམས་དཔའ་བོ་མཁའ་འགྲོ་གླུ་གར་བྱེད་པར་སྣང་བ་དང༌། རྒྱལ་པོའི་དབུའི་གཙུག་ཏོར་གྱེན་དུ་འཕགས་ཅིང་གསེར་མདོག་ས་གནོན་དང་མཉམ་བཞག་མཛད་པ་དང༌། སྤྱན་རས་གཟིགས་ཕྱག་བཞི་པ་བྱུ་རུ་ལྟར་དམར་བ་དང༌། ལོངས་སྐུ་རིགས་ལྔའི་ཚོགས་སུ་སྣང་བ་དང༌། མེའི་སྒྲ་ལས་ཆོས་ཐམས་ཅད་བདག་མེད་ཏོ་ཅེས་པའི་སྒྲ་གྲག་པ་དང༌། ན་མཁའ་ཐམས་ཅད་དཔའ་བོ་མཐིང་ནག་གྲི་ཐོད་དང་ཁ་ཊཾ་ཅན་གྱིས་གང་བའི་འོད་ཀྱིས་སེམས་ཅན་ཐམས་ཅད་འོད་དུ་ཞུ་ནས་བདག་མེད་མར་གྱུར་སྟེ་ཆོས་ཐམས་ཅད་བདག་མེད་ཅིང་རང་བཞིན་གྱིས་རྣམ་པར་དག་གོ་ཞེས་སྒྲོག་པ་དང༌། གདུང་ཁང་ཞལ་ཡས་ཁང་གི་དབུས་ན་རྒྱལ་པོ་འཛུམ་ཞིང་འགྱིང་བར་བཞུགས་པའི་ཐུགས་པདྨ་ཁ་བྱེ་བའི་སྟེང་ན་དགྱེས་རྡོར་ལྷ་དགུ་བཞུགས་པ་དང༌། པད་ཉི་ལ་འཇིགས་བྱེད་དང་དུས་མཚན་བསྣོལ་བའི་སྟེང་ན་རྒྱལ་པོ་ཆོས་འཆད་ཅན་རིག་མ་བཅུ་དྲུག་གིས་བསྐོར་བ་འོད་ཀྱི་རྣམ་པ་ཅན་དང༌། རྒྱལ་པོས་ཕྱག་ན་བདུད་རྩིའི་བུམ་པ་བསྣམས་སྟེ་ཨ་བྷི་ཥཱི་ཉྩ་ཅེས་དེར་ཚོགས་པ་ཐམས་ཅད་ལ་དབང་བསྐུར་བ་དང༌། མེ་ལས་འོད་ཟེར་དཔག་མེད་འཕྲོས་པའི་འོད་རེ་རེའི་རྩེ་ལ་མཁའ་འགྲོའི་(ཇ༦༩ན)

[Full Size]

ཚོགས་དཔག་མེད་གར་བསྒྱུར་ཞིང་ན་མཁའ་སྤྲིན་བཞིན་དུ་འཁྲིགས་ནས་སྐྱེ་མེད་རྡོ་རྗེའི་གླུ་ལེན་པ་དང༌། རྒྱལ་པོའི་བ་སྤུའི་བུ་ག་ཐམས་ཅད་ནས་བདེ་མཆོག་ལྷན་སྐྱེས་ཀྱི་ཚོགས་འཕྲོ་བ་དང༌། སྤྱན་རས་གཟིགས་ཞི་ཁྲོ་དང་མཁའ་འགྲོའི་ཚོགས་ཀྱིས། ཆོས་ཀུན་གདོད་ནས་ལྷན་ཅིག་སྐྱེས། །ཐམས་ཅད་བདེ་སྟོང་ཟུང་འཇུག་ལ། །སྤང་བླང་འདུག་པ་མ་མཐོང་ངོ༌། །ཞེས་སྒྲོག་པ་དང༌། སྤྲིན་གསེབ་ནས་ལུས་སྟོད་ཐོན་པའི་ལྷའི་བུ་མེ་ཏོག་གི་ཆར་འབེབས་པས་ན་མཁའ་གང་བ་དང༌། རྒྱལ་པོ་ལ་འཁོར་སངས་རྒྱས་ལོངས་སྐུ་དཔག་མེད་བཞུགས་ནས་བསྟོད་ཅིང་འདུད་པ་དང༌། བྱང་ཆུབ་སེམས་དཔའ་ཁྱེའུ་དང་བུ་མོའི་གཟུགས་སུ་གནས་པ་མང་པོས་མཆོད་པ་ཐོགས་སྟེ་སྤྱན་འདྲེན་པ་དང༌། མེ་ལྕེ་དཔའ་བོ་མཁའ་འགྲོ་དུ་བ་ལྷའི་བུར་སྣང་བ་དང༌། མེའི་དབུས་ན་པད་སྡོང་ཡལ་ག་གྲངས་མེད་པའི་དབུས་མའི་སྟེང་ན་རྒྱལ་པོ་མཆོག་གི་སྤྲུལ་སྐུར་བཞུགས་ཤིང་ཡལ་ག་རྣམས་ལ་སངས་རྒྱས་བྱང་སེམས་དཔག་མེད་བཞུགས་ནས་བསྟོད་ཅིང་འདུད་པ་དང༌། སྤུར་ཁང་ནས་རྒྱལ་པོ་བྱོན་སྟེ་ཁྲི་ལ་བཞུགས་པའི་སྨིན་མཚམས་ནས་འོད་ཟེར་བཀྱེ་བས་ས་དང་ན་མཁའ་ཐམས་ཅད་འོད་གཅིག་དུ་འཁྲིགས་པ་དང༌། རྩི་ཤིང་ནགས་ཚལ་དང་ས་རྡོ་རི་བྲག་ཐམས་ཅད་སྤུར་ཁང་ལ་སྐོར་བ་བྱེད་པ་དང༌། ཟིན་པ་དང་མ་ཟིན་པའི་སྒྲ་ཐམས་ཅད་སྐྱེ་བ་མེད་པའི་ཆོས་ཀྱི་སྒྲར་གྲགས་པ་ཞག་བདུན་དུ་བར་མ་ཆད་པ་དང༌། མེ་ལྕེ་རྡོ་རྗེ་རྣལ་འབྱོར་མ་དང་སྤྱན་རས་གཟིགས་དང་རྒྱལ་པོ་ཉིད་སྙན་ཤལ་ཤིན་ཏུ་རིང་བ་ལ་ཤཱཀྱ་ཐུབ་པ་དང་སྤྱན་རས་གཟིགས་བཞུགས་པར་མཐོང་བ་དང༌། རྒྱལ་པོ་དང་སངས་རྒྱས་རྣམས་ཆོས་ཀྱི་དགོངས་པ་བསྡུར་བ་དང༌། བྱམས་འཇམ་དབྱངས་ཆོས་བགྲོ་བ་དང༌། སྤུར་ཁང་ནས་རྗེ་བཙུན་མ་གསུམ་དུ་མཛད་ནས་ན་མཁའ་ལ་གཤེགས་པ་དང༌། རྒྱལ་པོའི་བ་སྤུ་རེ་རེ་བཞིན་སངས་རྒྱས་མང་པོ་ཆོས་ཀྱི་འཁོར་ལོ་བསྐོར་བ་དང༌། རུས་རྒྱན་(ཇ༦༩བ)

[Full Size]

ཅན་གྱི་མཁའ་འགྲོས་བསྐོར་བ་དང༌། གསང་འདུས་འཇམ་རྡོར་གྱི་དཀྱིལ་འཁོར་དང༌། རྣལ་འབྱོར་ན་མཁའ་དང༌། ཡེ་ཤེས་མཁའ་འགྲོ་དང༌། མ་ཧཱ་མཱ་ཡ་དང༌། སངས་རྒྱས་མཁའ་འགྲོ་དང༌། སྒྲོལ་མ་འཇིགས་པ་བརྒྱད་སྐྱོབ་དང༌། ཕྱག་རྡོར་ཞི་ཁྲོ་དང༌། སྨན་བླ་མཆེད་བརྒྱད་དང༌། ཞི་ཁྲོ་རིགས་བརྒྱའི་ལྷ་དང༌། པདྨ་དབང་ཆེན་དང༌། བཛྲ་ཧེ་རུ་ཀ་ཀེ་སིང་གིས་བསྐོར་བ་དང༌། གཤིན་རྗེའི་གཤེད་དང༌། ཆེ་མཆོག་དང༌། ཕུར་བ་ལ་སོགས་པའི་དཀྱིལ་འཁོར་སོ་སོར་སྣང་བ་དང༌། ཀུན་བཟང་ལ་རིག་འཛིན་གྱིས་བསྐོར་ནས། ཆོས་རྣམས་རང་བཞིན་ཉིད་ཀྱིས་དག །བཟུང་འཛིན་རང་བཞིན་དག་པའོ། །ཞེས་ཆོས་འཆད་པ་དང༌། མ་མགོན་དང་ཕྱོགས་སྐྱོང་བཅུས་བསྐོར་ནས་བསྟན་པའི་བྱ་ར་མཛད་པ་སོགས་བོད་འབངས་རྣམས་ལ་སྣང་བ་ཐ་དད་དུ་བྱུང་ཞིང་ཞི་གནས་དང་ལྷག་མཐོང་གི་བདེ་བས་ཚིམ་སྟེ་ཐམས་ཅད་སྡུག་བསྔལ་དང་བྲལ་ཞིང་དབུགས་ཕྱིན་པར་གྱུར་ཏོ། །དེ་ནས་བང་སོའི་ནང་དུ་ལྷ་ཁང་ལྔ་བྱས་སྟེ་ཕྱི་རི་བོ་ལྟར་བྱིབས་ནས་ལོ་གཅིག་དུ་རྒྱལ་བློན་འབངས་དང་བཅས་པས་སྐོར་བ་བྱས་ཅིང་ཕྱིས་ཀྱང་ལོ་དུས་སུ་མཆོད་པ་དང་སྐོར་བ་མཛད་དོ། །མང་སྲོང་བཅུ་གསུམ་བཞེས་པས་རྒྱལ་ས་མཛད། །རྒྱ་དམག་བོད་དུ་འོང་ཞེས་གཏམ་གསན་ནས། །སྟོན་པའི་སྐུ་ཚད་དགུང་ལོ་བཅུ་གཉིས་པ། །ར་སའི་ལྷོ་སྒོ་མེ་ལོང་ཅན་དུ་བཞུགས། །སྒོ་ལ་ཞལ་བ་བྱས་སྟེ་འཇམ་དབྱངས་བྲིས། །བཙུན་མོ་འབྲོ་བཟའ་ཁྲི་ལོང་ཁབ་ཏུ་བཞེས། མགར་སྟོང་བཙན་ཡུལ་སྲུང་དང་མཆིམས་མང་གཉེར་གྱིས་བློན་པོ་བྱས། ལོ་ནི་བཅོ་ལྔ་རྒྱལ་སྲིད་ཆོས་བཞིན་བསྐྱངས། །དགུང་ལོ་ཉི་ཤུ་རྩ་བདུན་བཞེས་པ་ན། །གཙང་གི་བར་སྣང་སྒང་དུ་འདས་པར་གྱུར། །དེ་ཡི་བང་སོ་སྔ་མའི་གཡོན་དུ་བརྩིགས། །རིན་ཆེན་ནོར་བཀང་སྔོ་(ཇ༧༠ན)

[Full Size]

ཞེར་ཧྲལ་པོར་གྲགས། །དེ་ཚེ་རྒྱ་དམག་ལྷ་སའི་བར་ལྷགས་པ། །ཁྲོ་རྒྱལ་རྨེ་བརྩེགས་ཐུགས་ཀ་ཕྱེ་བ་ཡིས། །སྤྲུལ་པའི་དམག་ཚོགས་བཀྱེ་བས་ཟློག་པར་མཛད། །མགར་གྱིས་རྒྱ་ཡུལ་ཕུང་པར་བྱས་པའི་ཞེ་གནད་དུ་ཆོས་རྒྱལ་སྲོང་བཙན་གཤེགས་མ་ཐག་དུ་དམག་མང་དུ་བརྩམས་ཀྱང་བློན་པོ་མགར་གྱིས་དམག་དཔོན་བྱས་ནས་ལན་མང་དུ་ཕམ་པར་བྱས། ཕྱིས་བློན་པོ་ཡང་དམག་ཐོག་དུ་འདས། རྒྱལ་པོ་མང་སྲོང་གཤེགས་ཚེ་རྒྱ་དམག་འབུམ་ཕྲག་ལྔ་བོད་དུ་བྱུང༌། ཕོ་བྲང་ཁྲི་རྩེ་དམར་པོ་བསྲེགས། ཇོ་བོ་ཤཱཀྱ་དང་པོ་མ་རྙེད་ཕྱིས་དེ་ན་བཞུགས་པར་ཤེས་ཀྱང་འཇམ་དབྱངས་ཀྱི་སྐུ་བྲིས་པ་འཇིག་མ་ནུས། ཇོ་བོ་མི་སྐྱོད་རྡོ་རྗེ་ཁྱེར། དེའི་ཚེ་ར་སའི་རྨེ་བརྩེགས་ཕྱག་གཉིས་ཁུ་ཚུར་བསྣོལ་བ་གྲིབ་སེལ་གྱི་ཕྱག་རྒྱར་བཞུགས་པའི་ཁུ་ཚུར་གྱིས་ཐུགས་ཀ་ཁ་ཕྱེ་བས་སྤྲུལ་པའི་དམག་དཔུང་འཐོན་སྟེ་རྒྱ་དམག་རྣམས་ཤིན་ཏུ་སྐྲག་པས་འཐོར། ཇོ་བོ་མི་བསྐྱོད་རྡོ་རྗེ་ཤར་ཕྱོགས་འོ་མའི་ཐང་དུ་ཞག་བདུན་ལུས་པས་ཇོ་བོ་འོ་བརྒྱལ་ཐང་དུ་གྲགས། རྒྱའི་དེབ་ཐེར་ནས་བློན་པོ་མགར་གྱི་བུ་ཆེ་བས་དམག་དཔོན་བྱས་སྟེ་རྒྱ་ཕམ་པར་བྱས་ཅེས་བྱུང་བས་ཁོང་རང་རྣམས་ལ་མིའི་དམག་གི་མཐོང་སྣང་བྱུང་བར་གདའ། ཡབ་འདས་ཞག་བདུན་ལོན་པ་ཆུ་བྱིའི་ལོར། །འདུས་སྲོང་མང་རྗེ་རླུང་ནམ་འཕྲུལ་གྱི་རྒྱལ། །སྦྲགས་ཕུར་འཁྲུངས་སྟེ་དེ་འཕྲལ་རྒྱལ་པོར་གསོལ། །བཙུན་མོ་མཆིམས་བཟའ་བཙན་མོ་ཏོག །བློན་པོ་མགར་གྱི་བུ་གཉའ་བཙན་ལྡེམ་བུ་དང་དབས་ཏ་ར་ཁོང་ལོད་ཀྱིས་བློན་པོ་བྱས། རྩལ་པོ་ཆེ་ཡི་བློན་འབངས་མི་བདུན་བྱུང༌། །རྔོག་རིང་ལ་ནག་པོས་གླང་པོ་ཆེ་ཐེག །རྔོག་གླིང་ཁམས་ཀྱིས་གཡག་བྲུས་པོ་ཆེ་ཐེག །གནོན་རྒྱལ་མཚན་གྱིས་མདའ་སྟེ་ཁ་མས་བྱ་ཁྲ་རྐེད་པར་བཅད། སྤས་རྒོད་མདོངས་ཅན་གྱིས་མིག་རྒྱང་གསུམ་(ཇ༧༠བ)

[Full Size]

ལ་མདའ་རྒྱང་རེས་སླེབ། མགོས་གཡག་ཆུང་གིས་ཤ་བའི་བླུད་བུ་བྱེ་མས་བཀང་སྟེ་ཀླད་ལ་སྐོར། ཅོག་རོ་འབྲོང་གཤོར་གྱིས་འབྲོང་འཐུར་དུ་རྒྱུག་པ་གྱེན་དུ་འཐེན་ནུས། གནོན་ཁྲི་བདུན་གཡུ་བྱིན་གྱིས་རྟ་བཟང་པོ་གཡང་ལ་འཕྱོངས་བ་གྱེན་ལ་འདྲེན་ནུས་པ་རྣམས་བྱུང་སྟེ་ཕྱིས་རྔ་དང་རོལ་མོའི་རྣམ་གྲངས་མང་དུ་འབྱུང་བའི་ལྟས་ཡིན་སྐད། མངའ་ཐང་ལྷ་འདྲ་མཐུ་རྩལ་ཕ་མཐའ་ཡས། །མཐའ་ཡི་རྒྱལ་པོ་དབང་དུ་འདུས་པར་གྱུར། །ལྷ་སར་མེས་ཀྱི་དགོངས་དུས་མཆོད་པ་བཙུགས། །སྔ་གོང་བོད་རྒྱལ་བྱོན་ལས་མངའ་ཐང་ཆེ། །བྱང་ཕྱོགས་སྐར་མ་སྨིན་བདུན་འཆར་བའི་མཐའ་སྔོན་ནགས་ཤོད་གཟིག་ཕྲེང་ལས་མ་མཆིས་པ་ལ་ག་གོན་དང༌། ཧོར་དང༌། སོག་པོ་བཏུལ་སྟེ་ད་ཤབ་ཧབ་ཀྱི་ལ་རྒྱུད་ལ་གཏུགས་པར་མངའ་མཛད་དོ། །དགུང་ལོ་ཉི་ཤུ་རྩ་དགུར་སྲིད་བསྐྱངས་སྟེ། །ལྗང་གི་ཡུལ་དུ་གནམ་དུ་གཤེགས་པར་གྱུར། །དེ་ཡི་བང་སོ་ཡབ་ཀྱི་གཡོན་དུ་བཏབ། །བང་སོ་ལྷ་རི་ཅན་ཞེས་གྲགས་པ་སྟེ། །ལྕགས་རིས་བསྐོར་བ་ཧོར་གྱི་མི་སྡེས་བརྩིགས། །དེ་སྲས་ཁྲི་ལྡེ་གཙུག་བརྟན་ཞེས་བྱ་བ། །ལྕགས་ཕོ་འབྲུག་ལ་ཕོ་བྲང་ལྡན་དཀར་འཁྲུངས། །བཙུན་མོ་ལྗང་མོ་ཁྲི་བཙུན། བློན་པོ་སྦས་སྐྱེས་བཟང་སྟོང་བཙན། མཆིམས་རྒྱལ་གཟིགས་ཤུ་ཏིང༌། འབྲོ་ཆུ་བཟང་འོར་མ་གསུམ་གྱིས་བྱས། སྨ་ར་དང་བགྲེས་ཉམས་ཆེ་བས་རྒྱལ་པོ་མེས་ཨག་ཚོམས་སུ་གྲགས་སོ། །ལྷ་ཁང་ལྔ་བཞེངས་མདོ་སྡེ་དུ་མ་དང༌། །སྨན་དཔྱད་སོགས་བསྒྱུར་ཕོ་བྲང་འཕང་ཐང་བརྩིགས། །ལྷ་སྲས་ལྗང་ཚ་ལྷ་དབོན་འཁྲུངས་པ་ལ། །རྒྱ་རྗེའི་སྲས་མོ་བླངས་ཚེ་ལྷ་སྲས་འདས། །མེས་ཀྱི་བང་སོའི་དྲུང་དུ་ཟླུམ་པོར་བརྩིགས། །དེ་ཡང་རྦ་བཞེད་ལས་མེས་སྲོང་བཙན་གྱི་བཀའ་ཆེམས་ཀྱི་ཡི་གེ་མཆིམས་ཕུའི་དཀོར་མཛོད་ནས་བློན་པོ་མགར་གྱིས་ཟངས་ཀྱི་བྱང་བུ་(ཇ༧༡ན)

[Full Size]

ལ་བྲིས་ནས་སྦས་པ་དེ་བལྟས་པས། ངའི་དཔོན་སྲས་རྒྱལ་པོ་ཁྲི་དང་དེ་ཞེས་བྱ་བའི་རིང་ལ་དམ་པའི་ལྷ་ཆོས་འབྱུང་སྟེ་དེ་བཞིན་གཤེགས་པའི་རྗེས་སུ་རབ་ཏུ་བྱུང་བ་དབུ་རེག་ཞབས་རྗེན་སྐུ་ལ་ངུར་སྨྲིག་གི་ན་བཟའ་གསོལ་བ་ལྷ་དང་མིའི་མཆོད་གནས་མང་དུ་འབྱུང་གིས་དེ་ལས་རང་དང་གཞན་གྱི་ཚེ་འདི་དང་ཕྱི་མའི་མཐོ་རིས་དང་ཐར་བའི་བདེ་བ་ཐམས་ཅད་འབྱུང་བས་ངའི་དབོན་སྲས་རྗེ་བློན་རྣམས་ཀྱིས་འཚོ་བ་བླ་ནས་སྦྱོར་ལ་ཆབ་འོག་ནས་ཕྱུང་ལ་བདེ་བ་བྱིན་དབུའི་མཆོད་གནས་སུ་ཁུར་ཞིག་བྱ་བ་འདུག་པ་གཟིགས་པས་ལྡེ་ཞེས་བྱ་བ་དེ་ང་ཡིན་སྙམ་དུ་དགོངས་ནས་བྲན་ཀ་མུ་ལེ་ཀ་ཥ་དང་གཉགས་ཛྙཱ་ན་ཀུ་མ་ར་གཉིས་རྒྱ་གར་དུ་ཆོས་འཚོལ་དུ་བཏང་བས་པཎྜི་ཏ་སངས་རྒྱས་གསང་བ་དང་སངས་རྒྱས་ཞི་བ་གཉིས་གངས་ཏི་སེ་ལ་སྒོམ་མོ་ཞེས་ཐོས་སྟེ་སྤྱན་དྲངས་པས་མ་འདྲོངས། དེ་གཉིས་ཀྱི་ཐུགས་ནས་མདོ་སྡེ་ལས་རྣམ་འབྱེད་དང༌། གསེར་འོད་དམ་པ་དང༌། ཀྲི་ཡ་དང་ཨུ་པ་ཤས་ཙམ་ཞུས། གླེགས་བམ་སྤྱན་དྲངས་ནས་རྒྱལ་པོའི་མཆོད་གནས་སུ་ཕུལ་བས་དེའི་བཞུགས་ཁང་དུ་ལྷ་ཁང་ལྔ་བཞེངས་སྟེ་ལྷ་ས་མཁར་བྲག་བྲག་དམར་མགྲིན་བཟང༌། མཆིམས་ཕུ་ནམ་རལ། བྲག་དམར་ཀ་རུ། མ་ས་གོང་གི་གནས་སྟེ་ལྔ་བཞེངས། ཆོས་མཛད་པའི་བྱིན་རླབས་ཀྱིས་ནུབ་ཕྱོགས་ཟླ་བ་ཚེས་པའི་མཐའ་སྔོན་ལ་ཀེམ་གཡག་མིག་ལས་མ་མཆིས་པ་ལ་ཏང་ཏང་དང་སི་གུར་བཏུལ་སྟེ་སྤ་སྟག་ཤད་དུང་གི་སྒོ་མོ་ལ་གཏུགས་པར་མངའ་མཛད་དོ། །དེའི་ཚེ་ཞང་བློན་ཀུན་རྩེ་བྲོ་ཆག་བྲེལ་བས་མ་དགའ་ནས་ངེད་ཀྱི་བཙན་པོ་འདི་ནི་དད་པ་ཆེ་བ་ཆོས་ལ་དགའ་བྱད་མི་མཚར་བས་བྲམ་ཟེ་ཡིན་ནམ་ཞེས་གླེང་དེ་རྗེའི་སྙན་དུ་གསོལ་བས་ང་བྲམ་ཟེ་ཡིན་པར་གྱུར་ན་ངའི་ཁབ་ལྗང་མོ་ཁྲི་བཙུན་འདི་ལ་བུ་ང་བས་དད་པ་ཆེ་བ་བྱད་མི་སྡུག་པ་ཅིག་ཤོག་ཞིག །ང་བཙན་པོ་མ་ནོར་བ་ཡིན་ན་བུ་ཞང་བློན་རྣམས་ཀྱིས་བཅས་མི་ཐོགས་པ་ཤོག་ཞིག་ཞེས་དམོད་བཙུགས་པས་ཁྲི་བཙུན་ལ་སྲས་ལྷའི་བུ་འདྲ་བ་(ཇ༧༡བ)

[Full Size]

སྣའི་གཟེངས་མཐོ་བ་དཔྲལ་བའི་དབྱེས་ཆེ་བ་ཤིན་ཏུ་མཛེས་པ་གཅིག་བཙས་པས་ཞང་བློན་རྣམས་ན་རེ་བོད་ཀྱི་བཙན་པོ་ཡང་དག་པ་ཟེར། སྲས་ལ་མི་མིན་ལྷའི་དབོན་པོ་ཡིན་ནོ་ཟེར་ནས་མིང་ཡང་ལྗང་ཚ་ལྷ་དབོན་དུ་གསོལ་ལོ། །དེ་ལ་ཁབ་རན་པ་ན་བོད་ཀྱི་མི་སྤྲེའུ་བྲག་སྲིན་གྱི་རྒྱུད་པ་འདི་ཇོ་མོར་མི་འོས། མེས་སྲོང་བཙན་སྒམ་པོའི་ལུགས་སུ་བྱ་ཟེར་ནས་རྒྱ་རྗེ་ལི་ཁྲི་བཞེར་མང་མའི་སྲས་མོ་གྱིམ་ཤང་ཀོང་ཇོ་བྱ་བ་ཡོད་ཟེར་བ་དེ་བླང་བར་འཆམ། གཉགས་ཁྲི་བཟང་ཡང་སྟོན་ལ་འཁོར་སུམ་བཅུ་དང་བཅས་ནས་གཉེ་བོར་བཏང་ནས་རྒྱ་རྗེ་ལ་སྒྲོམ་བུ་ཕུལ་བས་རྒྱ་རྗེས་བུ་མོ་ལ་བསྒོ་བས་བུ་མོས་རང་གི་འཕྲུལ་གྱི་མེ་ལོང་སྲིད་གསུམ་མཐོང་བ་ཞིག་ཡོད་པ་ལ་བལྟས་པས་གྲོགས་སྐལ་བོད་ན་ཡོད་པར་ཤེས། རྒྱལ་བུ་ལྷའི་བུ་འདྲ་བ་མཐོང་ནས་འགྲོ་བར་བྱས་ནས་བོད་ཏུ་འོངས། ཤུལ་དུ་རྒྱལ་བུས་མཚན་ལ་རྟ་བཅགས་པས་འཕང་ཐང་དགེ་རར་སྔགས་པའི་ཟོར་མདའ་འཕངས་པས་ཕོག་སྟེ་གྲོངས། ཅེས་བཤད་ལ། ཁ་ཅིག་དུ་གཙུག་ལག་ཁང་བརྒྱད་ཙམ་བཞེངས་ཟེར་ཡང་ཁུངས་མ་རྣམས་ལས་ལྔ་ཁོ་ན་བཤད། ལ་ལར་གཉགས་ཁྲི་བཟང་ཡང་སྟོན་གྱིས་ཁོ་རང་གི་བུ་མོ་མ་བླངས་པས་ཁྲོས་ནས་རྒྱལ་བུ་བཀྲོངས་ཅེས་ཀྱང་སྣང༌། རྒྱའི་དེབ་ལས་རྒྱ་རྗེ་འཁོར་དང་བཅས་པས་ཀོང་ཇོ་ལ་མཁར་ཆེན་པོ་ཞིང་ཕེང་ཧེན་གྱི་བར་དུ་སྐྱེལ་ཐུང་མཛད། མཁར་དེའི་ཉེས་པ་ཅན་ཐར་དུ་བཅུག་དམག་དང་ལྡབ་ནོར་ལོ་གཅིག་མེད་པར་བྱས། རྒྱལ་བུས་བོད་དུ་རྟ་བརྒྱུགས་པས་རྟས་བསྐྱུར་སྟེ་འདས། ཅེས་སྣང་ངོ། །ཀོང་ཇོ་ཡབ་ཀྱི་བཙུན་མོར་མངའ་གསོལ་སྟེ། །ཇོ་མོ་སྤྱན་དྲངས་ཞལ་མཐོང་མཆོད་པ་དང༌། །གཤིན་པོའི་དོན་དུ་དགེ་བའི་སྲོལ་བཟང་བཙུགས། །ལྕགས་ཕོ་རྟ་ལ་སྤྲུལ་པའི་རྒྱལ་བུ་བལྟམས། །ཆེན་མ་སྣ་ནམ་བཟའ་ཡིས་ཕྲོགས་ནས་བསྙོན། །ཕྱི་ལོ་རྒྱལ་བུ་ཞབས་འཛུགས་དགའ་སྟོན་ཆེ། །སྤྲུལ་པའི་རྒྱལ་པོ་ཁྲི་སྲོང་ལྡེ་བཙན་ཞེས། །རང་མཚན་རང་གིས་བཏགས་སྟེ་ཡུམ་ངོས་བཟུང༌། །རྒྱལ་རབས་གཞན་ལས་ཀོང་(ཇ༧༢ན)

[Full Size]

ཇོ་རྒྱ་བོད་ཀྱི་མཚམས་སུ་སླེབས་ཚེ་བློ་བུར་དུ་སེམས་ལ་ཟུག་རྔུ་ཆེན་པོ་བྱུང་ནས་མེ་ལོང་བལྟས་པས་རྒྱལ་བུ་དེ་མེད་པར་རྒན་པོ་བཞིན་མི་མཛེས་པ་བྱད་སྤུས་ཁེངས་པ་ཅིག་མཐོང་ནས་སྡུག་བསྔལ་བའི་ཚེ་བོད་རྒྱལ་པོས་ཕོ་ཉ་མངགས་ནས་ཁྱོད་ཀྱི་སྐྱེས་པའི་འོས་ངའི་བུ་ལྷ་འདྲ་བ་དེ་འདས། ཁྱོད་རང་ང་ལ་བལྟས་ནས་འོང་ངམ་ཕྱིར་ལྡོག་པ་གང་མོས་གྱིས་ཅིག་ཞེས་བྱུང་བས་བུ་མོའི་འདུན་མ་ལན་ཅིག་ཡིན་ཟེར་ནས་བོད་དུ་འོངས་ཅེས་བྱུང་ལ། རྦ་བཞེད་ལས་ལྗང་ཚའི་བང་སོ་ཀྱི་འུ་ཅན་རྩིག་པའི་ཚེ་ཀོང་ཇོ་ཕོ་བྲང་འཕང་ཐང་དུ་བྱོན་པས་རྒྱལ་པོ་ཡིན་ཟེར་བའི་རྒན་པོ་ཨག་ཚོམས་ཅན་ཞིག་ལས་མི་གདའ་ནས་ཉིན་བཞིན་དངུལ་གྱི་ཏམྦུ་རས་རམ་བཏེག་མཚན་བཞིན་མཆུ་སྦྲང་གིས་རམ་བཏེག་ནས་ཡིད་མ་དགའ་བའི་གླུ་ལེན་པ་རྗེ་ལ་གསོལ་བས་འོ་ན་མོ་རང་སྐྱེས་ཆེར་བསྐུར་ལ་ཕ་ཡུལ་དུ་སྐྱོལ་གསུངས། དེ་སྐད་ཀོང་ཇོ་ལ་གསོལ་བས་རྒྱལ་བུ་བྱད་ལེགས་པ་ཅིག་ཡོད་པ་དེ་ང་རང་དང་ལས་མ་མཐུན་པ་ཡིན། ང་ཕ་ཡུལ་དུ་མཆི་བར་མི་སྤྲོ་ཡིས་མེས་དང་འདུ་འོ་ཟེར་ནས་བཙུན་མོར་མངའ་གསོལ། ངའི་ནེ་ནེ་མོ་ཀོང་ཇོའི་ལྷ་གསེར་གྱི་ཤཱཀྱ་མུ་ནི་ལྟ་ཟེར་ནས་ལྷ་སར་བྱོན་པས་ར་མོ་ཆེ་ན་ཇོ་བོ་མི་བཞུགས་པར་འདུག་མཆོད་པ་བྱེད་ཅིང་ཐམས་ཅད་ཏུ་བཙལ་བས་མ་རྙེད་ནས་འཕྲུལ་སྣང་དུ་མཆོད་པ་ལ་བྱོན་པས་ཀོང་ཇོའི་ཞལ་ནས་གཙང་ཁང་སྒོ་ལྔའི་བཅོས་རབས་འདུག་པ་ལ་བཞི་ལས་མེད་འདི་ན་གཙང་ཁང་ཞིག་ཡོད་པར་འདུག་ཟེར་ནས་གློ་འབུར་ལྷའི་ཡ་ཀླད་ཀྱི་འོག་དུ་ཕྱག་གིས་བརྡུངས་པས་སེར་ཀ་ཅིག་བྱུང༌། དེ་བརྐོས་ནས་སྒོ་ཕྱེ་བས་ཤཱཀྱ་མུ་ནི་བཞུགས་པར་མཐོང་ནས་ནེ་ནེ་མོའི་ལྷ་ཞལ་ཀུན་ལ་བསྟན་དུ་གསོལ་ཞེས་ཞལ་མཐོང་གི་མཆོད་པ་བཙུགས། སྔར་བློན་པོ་ཤི་བ་ལ་ཟན་སྐལ་མེད་པས་ངེད་རྒྱ་ནག་ཆོས་དར་བས་མི་ཤི་བ་ལ་བདུན་ཚིགས་ཡོད་བོད་ཆོས་མ་དར་བས་བློན་པོ་སྙིང་རེ་རྗེ་ཟེར་ནས་མི་ཤི་མ་ཐག་དུ་ལྷ་མི་སྟོང་ལ་འཚལ་མ་བསྩལ་སྟེ་བོད་ཀྱི་ཚེ་ཞེས་བྱ་བ་གཤིན་དགེའི་སྲོལ་བཙུགས་ཅེས་བྱུང་ངོ༌། །དེ་ནས་ཆོས་རྒྱལ་ཁྲི་སྲོང་ལྡེ་བཙན་སྐུ་བལྟམས་པའི་ཚུལ་ལ་རྦ་བཞེད་ལས་ཡོས་ལོ་ལ་བལྟམས་ནས་ལོ་(ཇ༧༢བ)

[Full Size]

བརྒྱད་ལ་རྒྱལ་ས་མཛད་པར་བཤད་ཀྱང་ཡབ་ལྕགས་འབྲུག་ལ་འཁྲུངས་ནས་ལོ་དྲུག་བཅུ་རྩ་གསུམ་ལ་འདས་པའི་ཚེ་སྲས་ཀྱི་མེ་ཡོས་ལ་འཁྲུངས་ན་ལོ་བཅུ་དྲུག་ས་ཡོས་ལ་འཁྲུངས་ན་ལོ་བཞི་ལས་མི་འགྲོ་ཞིང་བརྒྱད་སོང་བ་དག་ན་ཤིང་ཕག་ལ་འཁྲུངས་དགོས་པས་ཡི་གེ་ནོར་བ་ཞིག་བྱུང་ཡོད་པར་སྣང་ལ། ཡིག་ཚངས་ཤས་ཆེ་བར་ལྕགས་ཕོ་རྟ་ལ་འཁྲུངས་ནས་ལོ་བཅུ་གསུམ་ན་རྒྱལ་ས་མཛད་པ་ཤས་ཆེར་སྣང་བས་འདི་དག་པ་སྙམ་ལ་བུ་སྟོན་གྱིས་ས་རྟ་ལ་འཁྲུངས་པར་མཛད་ཀྱང་ལོ་བཅུ་གསུམ་གྱིས་སྔས་པར་སྣང་ངོ༌། །རྦ་བཞེད་ལས་ནི་ཀོང་ཇོ་ལ་ཡོས་བུའི་ལོ་ལ་རྒྱལ་བུ་ཆགས་དེའི་དུས་ན་རྒྱལ་པོ་ཕོ་བྲང་བྲག་དམར་འོམ་བུ་ཚལ་ན་བཞུགས། ཡོས་བུའི་ལོ་དཔྱིད་ཟླ་ར་བའི་ཚེས་གསུམ་ལ་བབ་པ་ན་རྒྱའི་ཧྭ་ཤང་མངོན་ཤེས་ཅན་ཞིག་ན་རེ་རྒྱལ་པོ་ཁྱོད་ཀྱི་བཙུན་མོ་ལ་སྲས་བྱང་ཆུབ་སེམས་དཔའ་ཞིག་བཙའ་བར་ངེས་པས་དེ་ལ་རིམ་གྲོ་སྐྱེད་ཅིག་ཞེས་ཟེར། རིམ་གྲོ་ལ་མཆོད་རྟེན་བརྒྱ་རྩ་བརྒྱད་བཞེངས་འཇིམ་པ་ལྷག་མ་ལ་ངའི་སྐུ་ཚབ་བྱེད་གསུང་ནས་མཆོད་རྟེན་དྲེས་ཐག་ཅན་ཡང་བརྩིགས། ནང་པར་ཕོ་ཉ་བྱུང་སྟེ་ཀོང་ཇོ་ལ་སྲས་ཅིག་བལྟམས་སོ་ཞེས་ཟེར། རྒྱལ་པོ་ཡར་ལུང་འཕང་ཐང་དུ་སྲས་བལྟམས་པ་གཟིགས་སུ་བྱོན་པའི་ཚེ་ཀོང་ཇོའི་བུ་སྣ་ནམ་བཟའ་ཞི་སྟེང་གིས་ཕྲོགས་ནས་ང་ལ་སྐྱེས་པ་ཡིན་ཟེར། དེར་བློན་པོ་ཀུན་གྱིས་བརྟག་པ་བྱ་བའི་ཕྱིར་ཐང་ཞིག་གི་བུག་པར་བུ་བཞག་ནས་སུས་ཐོབ་བྱེད་དུ་བཅུག་པས་ཀོང་ཇོས་སྔོན་ལ་ཟིན་པ་སྣ་ནམ་བཟས་ཤི་ནའང་ཤི་སྙམ་ནས་ཕྲོགས་པས་ཀོང་ཇོས་བུ་ཤི་དྭོགས་ནས་ལྷོད་ཀྱིས་བཏང་སྟེ་ཡིན་དང་ངའི་ཡིན་སྟེ་གྲི་མོ་ཁྱོད་ཁྱེར་ཟེར་ནས་བཏང་བས་བུ་ཀོང་ཇོའི་ཡིན་པར་ཤེས། ལོ་གཅིག་ལོན་ཙ་ན་ཞབས་འཛུགས་པའི་དགའ་སྟོན་བྱས་སྟེ་སྣ་ནམ་པ་རྣམས་བེར་ཆུང་རེ་ལག་ན་ཐོགས་ནས་ཞང་པོའི་པང་དུ་ཤོག་ཟེར་བས་རྒྱལ་བུ་ན་རེ། ཁྲི་སྲོང་ལྡེ་བཙན་རྒྱ་ཚ་ལགས། །སྣ་ནམ་ཞང་གིས་ཅི་དགྱི་འཚལ། །གསུངས་ནས་རྒྱའི་པང་དུ་སོང་བས་མིང་ཡང་རང་གིས་བཏགས་ཅེས་བྱུང་ལ། སྐུ་རིམ་གྱི་མཆོད་རྟེན་བརྒྱ་རྩ་བཞེངས་ནས་ད་དུང་(ཇ༧༣ན)

[Full Size]

འཇིམ་པ་ལྷག་མ་ལ་མཆོད་རྟེན་ཆེ་བ་གཅིག་བྱས་པས་འཇིམ་པས་གཟུགས་མ་ཐུབ་ནས་སྲེས་ཐག་གིས་བཅིངས་པས་གླང་པོར་ཤོར་བས་བཞད་གད་དུ་གྱུར་སྟེ་གླེང་པོ་སྲེས་ཐག་ཅན་ཞེས་མིང་ཆགས་ཤིང་རྒྱལ་བུ་སྐུ་ཚེ་རིང་བར་རྟོགས་སྣང༌། ཐང་ཡིག་སོགས་ལས་ཀོང་ཇོའི་སྲས་ཕྲོགས་པའི་ཚེ་སྨྲེ་སྔགས་བཏོན་ནུ་མ་བསྟན་ཡང་སྣ་ནམ་བཟས་ནུ་མ་ལ་རྫས་བྱུགས་ནས་འོ་མ་ཕབ་པས་ངོ་མ་ཤེས་སྟེ་རྒྱལ་བུ་སྣ་ནམ་བཟའ་ལ་ཤོར། ཡུམ་གྱིས་བུ་འདིས་བདག་ལ་ད་ནི་མི་ཕན་པས་བོད་ཡུལ་ཕུང་བར་བྱ་དགོས་སྙམ་ནས་རྗེའི་གདུང་རབས་འཆད་པའི་ཕྱིར་བླ་རི་སེང་གེ་གནམ་དུ་འཕྱོང་བ་འདྲ་བའི་རྩེ་མོར་མངལ་ཁྲག་གིས་འཁོར་ལོ་བྲིས་སྟེ་མཆོད་རྟེན་གྱིས་མནན། བློན་པོ་རིག་པ་ཅན་རྒྱུན་འཆད་པའི་ཕྱིར་བློན་པོའི་བླ་རི་སོག་པོ་ཁྲོས་པ་འདྲ་བའི་སྣ་བཅད། བོད་ནང་འཁྲུག་འབྱུང་བའི་ཕྱིར་སྟག་རི་སེང་རི་མཇུག་མ་འབྲེལ་བ་བཅད། མུ་གེ་འབྱུང་བའི་ཕྱིར་མི་སྣའི་རི་འབྲས་ཀྱི་ལྗང་པ་འདྲ་བའི་རྩ་བ་བཅད། ཀླུའི་གནོད་པ་འབྱུང་བའི་ཕྱིར་མོང་མཁར་གྱི་རི་ཁྱུང་ན་མཁའ་ལ་ལྡིང་བ་འདྲ་བའི་མཆུ་བཅད། དེ་ནས་སྲས་ཀྱིས་ལོ་འཁོར་ཞབས་འཛུགས་ཀྱི་དགའ་སྟོན་གྱི་ཚེ་རྒྱལ་པོ་གུང་ལ་གསེར་ཁྲི་ལ་བཞུགས། སྣ་ནམ་པ་རྣམས་གཡས་གྲལ་བྱས། རྒྱའི་བློན་པོ་རྣམས་གཡོན་གྲལ་བྱས། ཡབ་ཀྱིས་གསེར་སྐྱོགས་འབྲས་ཆང་གིས་བཀང་བ་སྲས་ལ་གཏད་དེ། མ་གཉིས་ལས་སྐྱེས་པའི་བུ་གཅིག་པོ། །ལུས་ཆུང་ཡང་ལྷ་ཡི་རྣམ་འཕྲུལ་ཅན། །སྣོད་གསེར་སྐྱོགས་ཆང་གིས་བཀང་བ་འདི། །བུ་ཁྱོད་རང་གི་ཞང་པོའི་ལག་དུ་གཏོད། །མ་གང་ཡིན་གྱི་ཡིད་ཆེས་དེ་ལ་བྱེད། །ཅེས་དམོད་བོར་ནས་བཏང་བས་སྣ་ནམ་པ་རྣམས་ཀྱིས་བྱིས་པ་དགའ་བའི་རྒྱན་གོས་བསྟན་སྟེ་བོས་ཀྱང་མ་འོངས་པར་སྔར་ལྟར་སྨྲས་སྟེ་སྲས་གོམ་པ་ཐུབ་ཙམ་དེས་གསེར་སྐྱོགས་རྒྱའི་བློན་པོ་ལ་གཏད་ནས་པང་དུ་སོང་བས་ཡུམ་དགྱེས་ཆེས་སྟེ་གླུ་བླངས་པ། ཚེ་སྔོན་མའི་ལས་ཀྱི་འཕེན་པ་ཡིས། །ང་རྒྱ་ནས་འོངས་པའི་བུ་མོ་ལ། །རྗེ་འགྲན་མེད་རྒྱལ་པོའི་སྲས་གཅིག་འཁྲུངས། །ལས་གང་ཡང་སྲིད་པའི་རྔན་ཆེན་ལ། །བུ་རང་ལས་སྐྱེས་པ་གཞན་གྱིས་ཕྲོགས། །གཏམ་བདེན་པའི་ཚིག་(ཇ༧༣བ)

[Full Size]

ལ་མ་ཉན་ཞིང༌། །བྲང་ནུ་མ་བསྟན་ཡང་མ་ཕན་པས། །ང་རྒྱ་མོའི་ལུས་སེམས་གཞོབ་ཏུ་ཐལ། །སེམས་ཁོང་ཁྲོའི་ན་ཚ་མ་བཟོད་པས། །ཡུལ་བོད་ཀྱི་རི་དཔྱད་ཉམས་སུ་བཅུག །དུས་དེ་རིང་ལྷ་ཡི་ཉི་མ་ལ། །བུ་ཁྱོད་ཀྱི་ཞང་ངོ་ཤེས་པ་ལེགས། །ཨ་མའི་ལུས་སེམས་མལ་དུ་བདེ། །ཡུལ་བོད་ཀྱི་རི་དཔྱད་ཉམས་པ་དེ། །རི་དེ་རྣམས་ལ་སྐྱོན་མེད་བཅོས་སུ་ཡོད། །ཅེས་སྨྲས་པར་བཤད་ལ། ཁ་ཅིག་དུ་མཚན་ཅིར་གདགས་བགྲོས་པས་སྲས་ཉིད་བཞེངས་སྟེ་གནམ་ལྷ་བབས་ཀྱི་བདག་པོ་ས་ལྷུན་གྲུབ་ཀྱི་མངའ་བདག་འགྲེང་མགོ་ནག་ཡོངས་ཀྱི་རྗེ་སྤྲུལ་པའི་རྒྱལ་པོ་ཁྲི་སྲོང་ལྡེ་བཙན་ཞེས་བྱ་བ་ལགས་སོ་ཞེས་རང་གིས་མཚན་བཏགས་ཅེས་ཀྱང་བྱུང་ངོ༌། །སྲས་ལོ་ལྔ་བཞེས་པ་ན་ཡུམ་གནམ་དུ་བྱོན་པས་ས་དཔྱད་རྣམས་ཕལ་ཆེར་གསོ་མ་ཐུབ་པར་ལུས། སྟག་རི་སེང་རིའི་བར་ཀག་ནི་ས་སྦྲེལ་པ་ཙམ་དང་མེ་སྣའི་རིའི་རྩ་བ་རྩིག་པ་ཅུང་ཟད་བྱས་འདུག་གོ །རྦ་བཞེད་ལས་དེ་ནས་རྒྱལ་བུས་ལོ་བཞི་བཞེས་པ་ཕོ་བྲང་འོམ་བུ་ཚལ་ན་བཞུགས་པའི་ཚེ་རྒྱ་རྗེས་རྒྱལ་པོ་ལ་སྐྱེས་ཆེན་པོ་བསྐུར་ཕོ་ཉ་བ་འབའ་དེའུ་ལ་བུ་རྒྱ་ཕྲུག་གར་མཁན་བྱ་བ་ཡོད་པ་རྒྱལ་བུའི་རྩེད་ཟླར་ཕུལ། ཡབ་རྒྱལ་པོ་དམ་པའི་ཆོས་མཛད་པ་བཞེད་ནས་སྐྱེས་དང་ཕོ་ཉ་བ་འབའ་དེའུ་རྒྱ་གར་དུ་བརྫངས་པས་བཤུལ་དོང་ཕབས་ཀྱི་འཕྲེང་དུ་ཁུ་འཕང་དགུང་བདུན་བབ་འཚོ་བ་ཆད་ནས་གནམ་དུ་བལྟས་པས་ཕྱག་གིས་ཕུག་རོན་ལྔ་འཕུར་བ་ལ་མདའ་བཞི་དུས་གཅིག་ལ་འཕངས་ནས་བཞི་དུས་གཅིག་ལ་བཀུམ། དེ་སྡིག་ཆེ་བར་ཀུན་གྱིས་གླེང་བ་དེ་རྒྱལ་བུ་བྲག་དམར་རྫིང་གོང་ན་རྩེ་བས་གསན། རྩེ་ཟླ་ཁྱུང་པོ་དུམ་ཚུགས། ཅོག་ལ་སྨོན་ལམ་འབད། རྒྱ་ཕྲུག་གར་མཁན་དང་ལྔ་རྫིང་ན་རྩེ་བའི་འདམ་ཁྲོད་རྐང་པའི་འོག་ནས་སྲིན་བུ་དམར་ནར་བྱུང་བས་རྒྱལ་བུའི་ཞལ་ནས་ཕོ་ཉ་བ་འབའ་དེའུས་ཕུག་རོན་བསད་པ་དེ་སྡིག་ཆེའོ་མཆི་ན་སྲིན་བུ་འདི་ཀུན་བསད་ན་སྡིག་ཆེའམ་མི་ཆེ་ཟེར། ཁྱུང་པོ་དུམ་ཚུགས་ཀྱི་མཆིད་ནས་འདི་ལྟ་བུའི་མ་ཉེས་པ་བསད་ན་ཤིན་ཏུ་སྡིག་ཆེ་ཚུར་ལ་གནོད་པ་བྱེད་པ་དང་ཉ་བསད་ན་ཕྱུགས་འཕེལ་ཟེར། རྒྱ་ཕྲུག་ན་རེ་རྒྱའི་ཧུར་བྱ་བའི་གཙུག་ལག་ལས་འདི་ལྟ་བུ་བཀུམ་ན་ཉེ་པོར་སྡིག་ཆེ་མཆི་ཟེར། ཧུར་ལས་ཇི་སྐད་འབྱུང་གསུངས་པས་རྒྱ་ཕྲུག་གིས་ཧུར་ལས་དགེ་བ་བཅུའི་ཆོས་ཡོད་(ཇ༧༤ན)

[Full Size]

ཅེས་གསོལ་པས་རྒྱལ་བུས་རྟག་དུ་དེ་གླེང་པ་ཞང་བློན་ཀུན་གྱིས་ཚོར་སྟེ་རྒྱལ་བུ་ཆོས་ལ་དགའམ་ཞེས་དྲིས་པར་ཤིན་ཏུ་དགའ་ཟེར། རྒྱལ་བུའི་ཕྱིར་ཡབ་ཀྱིས་སྒྲོམ་བུ་བསྐུར་ནས་སང་ཤི་དང་མི་བཞི་རྒྱའི་གཙུག་ལག་ལེན་དུ་ཕོ་ཉར་བཏང༌། བཀའ་བཞིན་བསྒྲུབས་ན་བྱ་དགའ་སྦྱིན་ནོ་མ་བསྒྲུབས་ན་གསོད་དོ་བྱས་སྟེ་བཏང༌། དེ་ནས་ཀེའུ་ལེའི་འཕྲང་ལ་ཕྱིན། དེའི་དུས་ན་རྒྱ་རྗེའི་བུམ་བཟང་དབང་པོའི་དྲུང་ན་ཇུ་ཞག་མཁས་པ་ཅིག་ན་རེ་ད་སྟེ་ཟླ་བ་གསུམ་ན་ནུབ་ཕྱོགས་བོད་ནས་འདིར་བྱང་ཆུབ་སེམས་དཔའ་ཞིག་ཕོ་ཉར་འོང༌། དེའི་ཤ་ཚུགས་དང་རྟགས་འདི་འདྲའོ་ཟེར་ནས་འབག་ཞིག་བྲིས། དབང་པོས་དེ་རྒྱ་རྗེའི་སྙན་དུ་བསྲིངས་པས་རྒྱ་རྗེས་ཕོ་ཉ་དེ་དེར་སྡོད་དུ་མ་འཇུག་པར་རིམ་གྲོ་སྐྱེད་ལ་ངའི་དྲུང་དུ་ཐོང་བྱ་བ་བྱུང༌། ཕོ་ཉ་དེ་དུས་སུ་བྱུང་ནས་རྒྱའི་ཧྭ་ཤང་གིས་ཕྱག་བྱས། བསྒོ་བ་བཞིན་མར་བཏང་པས་རྒྱ་རྗེ་དང་མཇལ་སྟེ་བཙན་པོའི་སྒྲོམ་བུ་ཕུལ། རྒྱ་རྗེ་ན་རེ་ཁྱོད་རྒྱ་དེའུའི་བུ་ཡིན་ན་འདིར་ངའི་ཞང་བློན་དགྱིར་མི་རུང་ངམ་གསུངས། དེ་ལ་བསམས་པས་ང་འདིར་འདུག་ན་ཚེ་འདི་ལ་སྐྱེད་ན་བོད་ཡུལ་དུ་ཆོས་བཟང་པོ་ཁུངས་འབྱུང་བའི་ཕྱིར་སངས་རྒྱས་ཀྱི་བསྟན་པའི་སྡེ་སྣོད་ཀྱི་དཔེ་ཙམ་ཞིག་བཙན་པོའི་ཕྱག་དུ་ཕུལ་ལ་སླད་ཀྱིས་ཐབས་བྱ་བར་སྙན་དུ་གསོལ་སྙམ་སྟེ། བདག་འདིར་སྡོད་པར་གནང་བ་ནི་བཀའ་དྲིན་ཆེ་ན་བོད་ཀྱི་བཙན་པོའི་བཀའ་ནན་ཆེར་བསྩལ་བས་བདག་གི་ཕ་ལས་ཀྱིས་བཀུམ་ན་གློ་བ་ལ་བཅགས། སླར་བོད་ཏུ་མཆིས་ལ་ཕ་དང་གྲོས་སུ་བགྱེས་སྟེ་ཐབས་ཀྱིས་འབངས་སུ་མཆིའོ་ཞེས་ཞུས་པས་རྒྱ་རྗེ་ན་རེ་ངའི་སྙིང་དུ་མི་ཁྱོད་ལས་སྡུག་པ་ནི་མ་བྱུང་ན་ཁྱོད་བྱ་དགའ་ཅི་འདོད་གསུངས། ཕོ་ཉའི་མཆིད་ནས་བྱ་དགའ་གནང་ན་སངས་རྒྱས་ཀྱི་གསུང་རབས་བམ་པོ་སྟོང་ཞུའོ་ཞུས་པ་དང་རྒྱ་རྗེ་ན་རེ། ཀེའུ་ལེ་གཅན་གཟན་གྱི་འཕྲང་སོང་ཙ་ནའང་གནོད་པ་མ་བྱས་པར་རིམ་གྲོ་ཆེར་བྱས་བྱུང༌། བུམ་སངས་དབང་པོའི་ཇུ་ཞག་མཁན་ན་རེའང་ཁྱོད་བྱང་ཆུབ་སེམས་དཔའི་སྤྲུལ་པར་འོང་ཟེར། ཧྭ་ཤང་མངོན་ཤེས་ཅན་གྱིས་ཀྱང་ཁྱོད་ལ་ཕྱག་བྱས། ཁྱོད་ཀྱི་སྤྱོད་པ་དང་སྦྱར་ནའང་སངས་རྒྱས་ཀྱི་ལུང་ན་ལྔ་བརྒྱའི་མཐའ་མ་ལ་གདོང་དམར་གྱི་ཡུལ་དུ་དམ་པའི་ཆོས་ཁུངས་འབྱིན་པའི་དགེ་བའི་བཤེས་གཉེན་(ཇ༧༤བ)

[Full Size]

འོང་བར་ལུང་བསྟན་པ་དེའང་ཁྱོད་ཡིན་པར་གོར་མ་ཆག་ངས་ཀྱང་གྲོགས་བྱ་ཡི་གསུངས་སྟེ་མཐིང་ཤོག་ལ་གསེར་ཆུས་བྲིས་པའི་ཆོས་བམ་པོ་སྟོང་གནང༌། བྱ་དགའ་གཞན་ཡང་ཆེ་ཐང་དུ་གནང་ནས་ཕོ་ཉ་ལྔ་སླར་བོད་ཡུལ་དུ་འགྲོ་བའི་ལམ་ན་ཕ་བོང་མགྲོན་པོ་རྒྱུ་མི་ཕོད་པ་སུས་མཐོང་བ་དེ་རྦབ་གྲིར་འཆི་བ་ཡོད་པ་དེ་གྲོང་ཁྱེར་ཨེག་ཆུའི་ཀི་ཡ་ཧྭ་ཤང་ནུས་པ་ཅན་སྟག་ལ་ག་ཤ་འགེལ་ནུས་པ་མངོན་ཤེས་ཡོད་པ་དེ་ལ་ཁོ་རང་གི་མཁན་པོས་བཀའ་བསྒོས་ནས་ཞག་གསུམ་བསྒོམས་པས་ཕ་བོང་བཀྲུམ་ནས་བཏུལ། ཤུལ་དུ་ལྷ་ཁང་ཞིག་བརྩིགས། ལུང་པ་དེ་ཡང་ཞིང་དུ་རྨོས། ལྷ་རིས་བཅད་དེ་ཨེག་ཆུར་འོངས་པ་ལ་བོད་ཀྱི་ཕོ་ཉ་བས་སྒོམ་ལུང་མནོས། ཅི་འགྱུར་གྱི་ལུང་ཞུས། ངའི་ཕ་དང་ཕྲད་དམ། ངས་བོད་དུ་སངས་རྒྱས་ཀྱི་ཆོས་ཚུགས་སམ། བོད་དུ་སངས་རྒྱས་ཀྱི་གསུང་རབ་བསྒྲགས་ན་བོད་ཀྱི་བགེགས་སྲིན་སྲོག་ལ་སྡོ་བ་མི་འབྱུང་ངམ། བཙན་པོ་ཡབ་སྲས་བདེའམ་ཞེས་དྲིས་པས། དེར་ཧྭ་ཤང་གིས་མངོན་ཤེས་ཀྱིས་བལྟས་པས་བཙན་པོ་སྐུ་གཤེགས། རྒྱལ་བུ་སྐུ་ནར་མ་སོན་པས་བློན་པོ་ནག་པོ་ལ་དགའ་བ་རྣམས་ཀྱིས་ཁྲིམས་བུ་ཆུང་བྱས་ནས་ཆོས་བཤིག་བྲག་དམར་མགྲིན་བཟང་བྱ་བའི་ཐུགས་དམ་ཞིག་འདུག་པ་རྨང་ནས་བསྒྱེལ། ད་ཆོས་དར་བར་བྱེད་ན་ཁྱོད་ཀྱིས་བཙན་པོའི་ཞམ་རིང་བ་མཛོད་ལ་སླད་ཀྱིས་རྒྱལ་བུ་དེ་སྐུ་ནར་སོན་པ་དང་དེའི་ཞལ་ནས་མུ་སྟེགས་རིག་བྱེད་ཀྱི་ཆོས་ཤིག་གླེང་དུ་འོང་གིས་དེ་ཙ་ན་འདི་སྙན་དུ་གསོལ་ཅིག་དང་དེས་རྒྱལ་བུ་དད་པ་སྐྱེའོ། །དེའི་རྗེས་ལ་འདི་སྙན་དུ་གསོལ་བས་དད་པ་ཆེར་སྐྱེའོ། །དེའི་རྗེས་ལ་འདི་སྙན་དུ་གསོལ་བས་རྒྱལ་བུ་ཆོས་བྱེད་པར་འགྱུར་རོ་ཞེས་གསུངས་སྟེ་གླེགས་བམ་གསུམ་བསྐུར། བོད་ལ་ཆོས་ཀྱི་སྐལ་བ་ཡོད། མཐར་ཆོས་རྒྱས་པར་འོང༌། དེའི་དགེ་བའི་བཤེས་གཉེན་ཟ་ཧོར་རྒྱལ་པོའི་བུ་དགེ་སློང་ཤཱནྟ་རཀྵི་ཏ་ཅེས་བྱ་བ་དེ་ཁྱོད་བོད་ཀྱི་འདུལ་སྐལ་ཡིན་ནོ་གསུང་ནས་ཟླ་བ་གཉིས་ཟན་དྲངས། དེ་ནས་ཉིན་ལམ་གཉིས་སུ་བསྐྱལ་ནས་གཅིག་ལ་གཅིག་རྐང་པ་ལ་ཕྱག་བྱས་སྟེ་གྱེས་སོ། །དེ་ནས་སང་ཤི་བྲག་དམར་མགྲིན་བཟང་བཤིག་པ་གློ་བ་ལ་ཆགས་སྟེ་ཕོ་ཉ་བ་མི་ལྔ་པོས་རྒྱའི་རི་དེའུ་ཤན་(ཇ༧༥ན)

[Full Size]

ཞེས་བྱ་བའི་རྩེ་ན་མི་མ་ཡིན་གྱིས་གཏིབས་པའི་ཁྲོད་དུ་ཞག་བདུན་གྱིས་ཚར་བར་བརྩིགས་པའི་ཨཱརྻ་མཉྫུའི་ཕོ་བྲང་ཡོད་པ་ལས་དཔེ་ལེན་དུ་མཆིས་པའི་ཚེ་མི་གཅིག་གིས་རི་ལ་འཛེགས་མ་ཤེས། གཅིག་གིས་རྩེ་ལ་ཕྱིན་ཡང་ཅི་ཡང་མ་མཐོང༌། གཅིག་གིས་ལྷ་ཁང་མཐོང་ཡང་སྒོ་མ་རྙེད། གཅིག་གིས་སྒོ་མཐོང་ཡང་དྲ་བ་འདྲ་བ་ཞིག་གིས་བཀབ་སྟེ་ནང་དུ་མ་ཏོལ། སང་ཤིས་ནང་དུ་ཕྱིན་ནས་འཕགས་པ་འཇམ་དཔལ་ལ་སོགས་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་མཆོད་པ་ཕུལ། དགྲ་བཅོམ་པ་ཀུན་ལའང་ཕྱག་མཆོད་བྱས། འཕགས་པ་ཀུན་དང་གཏམ་བྱས་སྟེ་དེའི་འདུག་ལུགས་དཔེར་བྱ་བའི་ཕྱིར་ཡིད་ལ་བཟུང་སྟེ་ཕྱིར་དོན་པ་དང་རི་དེའི་གཅན་གཟན་ཀུན་གྱིས་ཕྱག་བྱས་ནས་རི་སྒབ་ཏུ་བསྐྱལ་སྟེ་བོད་དུ་འོངས་སོ་ཞེས་བྱུང་ངོ༌། །རི་དེ་ནི་རི་བོ་རྩེ་ལྔར་གྲགས་པ་དེ་ཡིན་ནོ། །སྤྲུལ་པའི་རྒྱལ་བུ་སྐུ་ནར་མ་སོན་པར། །ཡབ་རྗེ་ཁྲི་ལྡེ་གཙུག་བརྟན་གནམ་དུ་གཤེགས། །དེ་ཡི་བང་སོ་མུ་ར་རི་ལ་བརྩེགས། །གྲལ་ནི་འཕྲུལ་གྱི་རྒྱལ་པོའི་གཡོན་ན་ཡོད། །མིང་ནི་ལྷ་རི་གཙུག་ནམ་བྱ་བ་ལགས། །དེ་མ་ཐག་དུ་རྒྱལ་བུ་དབང་བསྐུར་སྟེ། །བོད་ཡུལ་རྒྱལ་ཁམས་ཀུན་ལ་མངའ་དབང་བསྒྱུར། །འོན་ཀྱང་ནག་པོའི་སྡིག་བློན་འདུས་པ་ཡིས། །དམ་ཆོས་བྱར་མི་གནང་བའི་ཁྲིམས་ཆུང་བྱས། །ཇོ་བོ་སར་བཅུག་མཐའ་མར་མང་ཡུལ་བསྐྱལ། །དེ་ཚེ་བོད་ལ་མི་ཤེས་དུ་མ་བྱུང༌། །རྒྱལ་པོ་ནར་སོན་ཆོས་ཀྱི་བསམ་པ་འཁྲུངས། །མགོས་ཀྱི་བློན་ཆེན་པདྨ་གུང་བཙན་སོགས། །ཆོས་བློན་དུ་མས་རྒྱལ་པོའི་དགོངས་པ་བསྒྲུབས། །བསྟན་དགྲའི་སྡིག་བློན་འགའ་ལ་བཀའ་ཆད་ཕབ། །ཇོ་བོ་སྤྱན་དྲངས་གཙང་ཁང་ལྷོ་མར་བཞུགས། །དེ་ཡང་རྦ་བཞེད་ལས་ཡབ་རྒྱལ་པོ་ལོ་དྲུག་བཅུ་རྩ་གསུམ་བཞེས་པ་ན་ཡ་འབྲོག་སྦྲ་ཚལ་དུ་ཆིབས་སྒྲོན་པས་གྲོངས། རྒྱལ་བུ་(ཇ༧༥བ)

[Full Size]

ཆབ་སྲིད་བཞེས་མ་ཐག་དུ་སྐུ་ནར་མ་སོན་པར་ཞང་བློན་མ་ཞང་གྲོམ་པ་སྐྱེས་ན་རེ་རྒྱལ་པོ་སྐུ་ཚེ་ཐུང་བ་ཆོས་བྱས་པས་ལན་སྟེ་བཀྲ་མི་ཤིས། ཚེ་ཕྱི་མ་སྐྱེ་བ་ལེན་ཟེར་བ་རྫུན་ཡིན། ཚེ་འདིའི་རྐྱེན་ཟློག་བོན་གྱི་བྱེད། སུ་ཆོས་བྱེད་པ་ཕོ་རེང་དུ་མཐར་སྤྱུག་གོ་ཞེས་ཁྲིམས་བུ་ཆུང་བཅས། བློན་ཆེན་ཆོས་ལ་དགའ་བ་མང་འབལ་གཉིས་ལ་བཀྱོན་ཕབ་སྟེ་བོད་ནག་པོར་བཏང༌། ར་མོ་ཆེ་ན་གསེར་གྱི་ལྷ་ཤཱཀྱ་མུ་ནི་རྒྱའི་ལྷ་ཡིན་པས་སླར་རྒྱ་ཡུལ་དུ་བསྐྱལ་བར་བྱ་ཟེར་བ་ལས་ལྷ་དེ་དང་པོ་རྟ་པ་མི་གཅིག་གིས་བང་དུ་ཐེག་པ་ལས་མ་ཐེག་པར་འབྲེང་པའི་དྲ་བར་བཅུག་སྟེ་མི་སུམ་བརྒྱས་སྒོར་ཕྱུང༌། དེ་ནས་མི་སྟོང་གིས་མཁར་བྲག་གདོང་གི་ཐད་ཀར་ཕྱིན་པ་དང་མི་སྟོང་གིས་ཀྱང་མ་ཐེག་སྟེ་དེ་ཉིད་ཏུ་བྱེ་མའི་དོང་དུ་སྦས་ནས་རྦ་རྗེ་ཁོལ་ལ་གཏད་ནས་བཞག་རྒྱའི་ཧྭ་ཤང་རྒན་པོ་ཅིག་དགོན་གཉེར་བྱེད་ཅིང་ཡོད་པ་དེ་སླར་རྒྱ་ཡུལ་དུ་བསྐྲད་པས་ཧྭ་ཤང་གིས་རྒྱ་བོད་མཚམས་སུ་ཕྱིན་པ་དང་ཧྭ་ཤང་གི་མཆིད་ནས་ངའི་ལྷམ་ཡ་གཅིག་ཁར་སང་གི་འགྲོ་ལམ་དུ་ལུས་པས་ད་དུང་བོད་ཡུལ་དུ་དམ་པའི་ཆོས་མེ་སྟག་ཙམ་ཞིག་འབྱུང་ཟེར་སྐད། ཅེས་བྱུང་ངོ༌། །འདི་ལ་བརྟེན་ནས་རྦ་བཞེད་ལྷད་ཅན་ཁ་ཅིག་དུ་སྟོན་རྩེན་རྩོད་པའི་ཚེ་ཧྭ་ཤང་མ་ཧྭ་ཡ་ནའི་ལྷམ་ཡ་གཅིག་རྩོད་པའི་གྲྭར་ལུས་པས་ད་དུང་བོད་དུ་ངའི་ཆོས་ལུགས་འཛིན་པ་འོང་ཞེས་སྨྲས་ཤིང་ཕྱིས་ཀྱི་མཁས་པ་དག་ཧྭ་ཤང་དེ་ཆོས་མི་ཤེས་ཀྱང་རྟགས་མཚན་ཅུང་ཟད་ཤེས་པ་ཅིག་སྟེ་ཕྱིས་སེམས་ངོ་མཐོང་བས་འཚང་རྒྱ་ཟེར་བ་འདི་རྣམས་ཁོའི་ལུགས་སུ་འདུག་ཞེས་གསུང་ངོ་ཞེས་ལྷད་བཅུག་པ་འགའ་ཟུང་སྣང་ཞིང་རྟོག་གེ་པ་ཐེག་ཆེན་གྱི་ཆོས་རྒྱ་མཚོ་ལྟ་བུའི་རྒྱུས་མེད་པ་ལ་བློན་པོའི་ནང་དུ་མཁས་པའི་མིང་ཁྲལ་བབ་པ་དུ་མས་འདི་རྒྱུ་མཚན་ཆེ་ཆེ་སྐད་དུ་སྒྲོག་པར་སྣང་ཡང་རྦ་བཞེད་ཁུངས་མ་ལས་དེ་མེད་ཅིང་སར་དུ་བཅུག་པ་ཡིན་མིན་ཕྱིས་ཀྱི་མཁས་པ་དག་ཞེས་སོགས་ཀྱིས་གསལ་བར་ཤེས་ལ། སྤྱིར་བདེན་པ་མཐོང་བ་དང་ཆོས་མཐོང་བ་དང་སེམས་ངོ་མཐོང་བ་སོགས་ཧྭ་ཤང་གི་ཆོས་སུ་བྱེད་ན་སངས་རྒྱས་ཀྱི་ཆོས་ཕལ་ཆེར་ཧྭ་ཤང་གི་ལུགས་སུ་(ཇ༧༦ན)

[Full Size]

འགྱུར་ཞིང༌། སེམས་རྟོགས་ན་ཡེ་ཤེས་ཡིན་པས་སངས་རྒྱས་གཞན་དུ་མི་བཙལ་བའི་འདུ་ཤེས་བསྒོམ་པར་བྱའོ་ཞེས་སོགས་ལ་དངོས་སུ་རྒོལ་བ་ཡིན་པས་རྟོག་གེ་ལ་ཆོས་རྒྱུས་ཆུང་ལ་ཆགས་སྡང་ཆེ་བ་ཆོས་སྤོང་ལ་མཁས་ཉམས་རེ་བ་ངན་སོང་གི་ལམ་དུ་རྡོ་རྟ་འདྲེན་པ་རྣམས་ཀྱི་གཏམ་གྱི་བག་ཆགས་ཙམ་ཡང་རྣ་བར་བཞག་པར་མི་བྱའོ་ཞེས་པ་ནི་ཞར་ལས་འོངས་པའི་དྭོགས་དཔྱོད་དོ། །རྦ་བཞེད་དུ་སྔ་མའི་འཕྲོར། མཁར་བྲག་གི་ལྷ་ཁང་ནི་རྨང་ནས་བསྒྱེལ། མགྲིན་བཟང་གི་ལྷ་ཁང་ནི་བཤིག་སྟེ་ཅོང་ནི་མཆིམས་ཕུའི་གཡའ་ལ་བསྐྱལ་སྟེ་དེ་ཉིད་ཕྱིས་བསམ་ཡས་དགེ་རྒྱས་ཀྱི་ཅོང་ལགས། ལྷ་ས་བི་ཧར་དུ་བཟོ་གྲ་བགྱིས། བཤས་བྱས་ནས་ལྡེར་ཚོ་ལ་པགས་པ་གཡོགས། ཕྱག་ན་ནང་ཆ་དང་ལུག་ཁོག་བཀལ། ཕྱིན་ཆད་མི་ཤི་བ་ལ་ཚེ་དགྱིད་དུ་མི་གནང༌། རྒྱའི་ལྷ་ཆོས་དགྱིད་པ་མཆིས་ན་ཕོ་རེང་དུ་རྟག་དུ་སྤྱུག་གོ་ཞེས་པའི་ཁྲིམས་བུ་ཆུང་བཅས་པའི་ཚེ་ཞང་ཁྲི་ཐོག་རྗེ་ཐོག་ལ་འབར་ནི་ཐང་ལ་བརྒྱལ་བརྒྱལ་ནས་ཨཱ་ཨཱ་ཨཱ་ཞེས་ལན་གསུམ་འབོད་ཀྱིན་རྒྱབ་གས་ནས་ཤི། ཅོག་རོ་སྐྱེས་བཟང་རྒྱལ་འགོང་ནི་ལྕེ་རྐན་དང་རྐང་ལག་རིལ་གུ་གུ་ཐུལ་དུ་སོང་ནས་གུམ། བླ་འོག་གི་མི་དང་ལྟས་མཁན་ཀུན་མཐུན་པར་རྒྱའི་ལྷ་ས་ཐམས་སུ་བཅུག་པས་རྒྱ་ལྷ་ཁྲོས་ཟེར་ནས་རྒྱའི་ལྷའི་མེས་པོ་དང་པོ་རྒྱ་གར་ཡུལ་ནས་འོངས་པས་རྒྱ་གར་དང་ཉེ་བ་མང་ཡུལ་དུ་བསྐྱལ་བར་མོ་བཟང་ནས་བྱེ་སྟོངས་ནས་བཏོན་སྟེ་མང་ཡུལ་དུ་དྲེའུ་གཉིས་ཀྱིས་ཁྱོགས་བགྱིས་སྟེ་བསྐྱལ་བའི་དུས་སུ་ཡུལ་ངན་ཆེན་པོ་བྱུང༌། ཚེ་མི་དགྱིད་པའི་ཁྲིམས་བུ་ཆུང་བྱས་པའི་འོག་དུ་བ་ལམ་གླག་དུ་རྦ་གསལ་སྣང་གི་བུ་མིང་སྲིང་གཉིས་དུས་གཅིག་ལ་གུམ་པའི་ཚེ་ལྷའི་ཡབ་མེས་ཀུན་ན་རེ་ཆོས་བདེན་ཟེར་ཧྭ་ཤང་ལ་འདྲི་སྙམ་ནས་ཧེན་ཁང་ན་ཧྭ་ཤང་མངོན་ཤེས་ཅན་རྒན་པོ་ཅིག་ཡོད་པ་བོས་སྟེ་ཞུས་པས། ཚེ་སྔ་ཕྱི་ཡོད་ཆོས་བདེན་ཟེར་བས་སྒོར་ནི་བོན་དགྱིད་དུ་བསྩལ། ནང་དུ་ནི་གྱོད་དང་བསྡོས་སྟེ་ལྷ་མི་སྟོང་ལ་འཚལ་མ་བསྩལ་ནས་ཚེ་བགྱིས། ར་མོ་ཆེ་ནས་ཧྭ་ཤང་རྒན་པོ་དེ་བཀུག་ནས་བུ་མིང་སྲིང་གཉིས་ཀྱི་བདུན་ཚིགས་ཞུས་པས་ཧྭ་ཤང་ན་རེ་ལྷར་སྐྱེ་བ་དགའ་(ཇ༧༦བ)

[Full Size]

སླར་ཁྱེད་རང་གི་བུར་སྐྱེ་བ་དགའ་གསུང༌། ཕ་ནི་ལྷར་སྐྱེ་བ་དགའ། མ་ནི་རང་གི་བུར་སྐྱེ་བ་དགའ་ནས་ཧྭ་ཤང་གིས་བུའི་རུས་པུ་ལ་ཆོ་ག་བྱས་སྟེ་གདུང་ཤ་རི་རམ་དུ་སོང་བས་ལྷར་སྐྱེ་བར་ལུང་བསྟན། བུ་མོའི་ཁར་མུ་ཏིག་སྲན་མ་ཙམ་མཚལ་ཆུས་བསྐུས་པ་འདན་པ་གཡོན་དུ་བཅུག་སྟེ་ཡིད་ཆེས་པའི་རྟགས་སུ་ཆོ་ག་བྱས་ནས་རྫ་ཁོག་དུ་བཅུག་སྟེ་མའི་མལ་འོག་དུ་སྦས་ནས་སང་ཕོད་ཁྱོད་རང་གི་བུར་སྐྱེའོ་ཞེས་ལུང་བསྟན་པས་སང་ཕོད་གསལ་སྣང་གི་ཁབ་ལ་བུ་ཞིག་སྐྱེས་སྟེ་ཁ་ནས་མུ་ཏིག་འདན་ཡོན་དམར་པོ་བྱུང་བས་མལ་འོག་གི་རྫ་ཁ་ཕྱེ་བས་ཤུལ་ཉ་རེ་འདུག་བཙས་ནས་ལོ་གཅིག་ལོན་པ་དང་མ་བསླབས་པར་ཞིང་དང་ནེ་ནེ་མོ་ཡང་ངོ་ཤེས་སྟེ་སྔོན་བཞིན་དུ་འབད་པ་ལ་སོགས་པ་བྱུང་བས་ཚེ་ཕྱི་མ་ཡོད་པར་ཤེས། དེ་ནས་རྒྱའི་ཧྭ་ཤང་དེ་ལ་གསལ་སྣང་གིས་སྒོམ་ལུང་ནོད་དེ་གཞན་ལ་གསངས་ནས་རྟག་དུ་བསྒོམས་པའི་རྗེས་ལ་སངས་རྒྱས་ཀྱི་གསུང་རབ་འཚོལ་བའི་སླད་དུ་རྒྱ་གར་དང་བལ་ཡུལ་དུ་མཆི་མཆི་བར་རྗེའི་སྙན་དུ་གསོལ་བ་ལས། རྗེའི་ཐུགས་ལ་འདི་ཆོས་ལ་དཀར་བས་རྒྱ་གར་དང་བལ་ཡུལ་དུ་འགྲོ་བར་ངེས་སྙམ་དུ་ཐུགས་དཔག་མཛད་ནས་འོ་ན་ངས་མང་ཡུལ་གྱི་ཁ་བློན་དུ་བསྐོའོ་གསུངས་ནས་བསྐོས་སྟེ་མང་ཡུལ་དུ་མཆིས། ཞང་གིས་ཁྲིམས་བུ་ཆུང་བཅས་པའི་ལུང་བཅག་ནས་ཐལ་བྱུང་རྒྱ་གར་དུ་མཆིས། མ་ཧཱ་བོ་དྷི་དང་ནཱ་ལནྡཱ་མཆོད་པ་བྱས་ཡོན་ཕུལ་བས་དགུན་ཟླ་འབྲིང་པོ་ལ་ཆར་བབ། བྱང་ཆུབ་ཤིང་ལས་འོ་མ་བྱུང༌། བལ་ཡུལ་དུ་སྟོན་མོ་སརྦ་ཝ་སེ་བགྱིས། ཧེན་ཁང་དུ་ཡོན་ཕུལ་ནས་མཆོད་པའི་ཚེ་དགེའོ་ཞེས་པའི་སྒྲ་དང་འོད་བྱུང༌། བལ་ཡུལ་གྱི་རྗེ་ལ་ངོ་ཆེན་ཞུས་ནས་མཁས་ཤིང་གསལ་བ་ཡོན་ཏན་མང་པོ་མངའ་བའི་ཤཱནྟ་རཀྵ་ཏ་བོད་དུ་བོ་དྷི་ས་ཏྭ་ཞེས་གྲགས་པ་དེ་མང་ཡུལ་དུ་སྤྱན་དྲངས་ནས་གཙུག་ལག་ཁང་གཉིས་བརྩེགས། བལ་ཡུལ་དུ་བལ་རྗེའི་འབངས་བྱས་རྐྱེན་རིས་བཅད། རྒྱ་བལ་གྱི་མཁས་པ་ཀུན་ལས་ཆོས་བསླབས། གསལ་སྣང་གི་ཁྱིམ་དུ་བཤོས་གསོལ་སྟེ་ཡོན་ཕུལ་ཆོས་ཞུས་པའི་རྗེས་ལ། བོད་ཀྱི་རྒྱལ་པོའི་དགེ་བའི་བཤེས་(ཇ༧༧ན)

[Full Size]

གཉེན་མཛད་དེ་གཤེགས་པར་ཅི་གནང༌། བདག་ལ་སེམས་སྐྱེད་ཅིག་ཞུ་ཞེས་གསོལ་བ་ལས། མཁན་པོའི་ཞལ་ནས་སེམས་སྐྱེད་ཞུ་ན་ཡོན་ཕུལ་ཞིག་གསུང༌། དེར་གསེར་དངུལ་སོགས་རིན་པོ་ཆེ་དང༌། ཟོ་རིང་དང༌། ཟབ་དར་དང༌། བེར་དང༌། ཇ་སྐྱོགས་དང༌། གུ་རུབ་དང༌། སྣལ་གོས་སོགས་རུང་ངོ་འཚལ་མ་ལུས་པར་ཕུལ། ད་དུང་ཕུལ་ཞིག་གསུང་བས་ཅང་མེད་ཀྱང་ལུས་ལ་འཚལ་བའི་རྐེ་རགས་དང་རལ་ཀ་ཡང་ཕུལ་བས་སེམས་སྐྱེད་གནང་ནས་ང་བོད་ཀྱི་འདུལ་སྐལ་ཡིན་སྟེ་བོད་ཀྱི་རྒྱལ་པོ་ཤྲི་བཙན་པོ་དང་ཁྱོད་གཉིས་མ་སྐྱེས་པས་བོད་ཀྱི་རྒྱལ་པོ་གདུང་རབས་དགུ་བརྗེས་ཀྱི་བར་དུ་ང་རྒྱ་གར་ཟ་ཧོར་ཡུལ་དང་བལ་ཡུལ་གཉིས་ཕར་འགྲོ་ཚུར་འགྲོ་ལ་སྡོད་ཀྱི་འདུག་ད་ཤྲི་བཙན་པོ་དང་ཁྱོད་གཉིས་ནར་སོན་སྟེ་དུས་ལ་བབ་པས་ཡུལ་བྱན་དཀར་དུ་ཆུ་བོ་ལོ་ཧི་ཏའི་འགྲམ་ཧས་པོ་རིའི་དྲུང་དུ་ཡུལ་བྲག་དམར་དུ་བསམ་ཡས་ལྷུན་གྱིས་གྲུབ་པ་ཞེས་བྱ་བའི་གཙུག་ལག་ཁང་ཞིག་བརྩིགས་ཤིང་དགེ་བའི་བཤེས་གཉེན་བྱའོ། །ཁྱོད་ནི་ཚེ་འདི་ལ་ངོ་ཤེས་ཤིང་སེམས་སྐྱེད་པ་མ་ཡིན་སྟེ་ཚེ་རབས་དུ་མའི་སྔོན་རོལ་ནས་སེམས་བསྐྱེད་པའི་ཆོས་ཀྱི་བུ་རབ་ཡིན་སྟེ་མིང་ཡང་ཡེ་ཤེས་དབང་པོར་གདག་གོ་གསུངས་ནས་སྤྱི་བོར་ཕྱག་གིས་བྱུགས་སྟེ་བྱིལ་བྱིལ་མཛད། ཞུས་པ་རྣམས་བཀས་གནང༌། དེའི་ཚེ་ན་མཁའ་ལས་ཀྱང་དགེའོ་ཞེས་སྒྲ་ལན་གསུམ་དང་འོད་བྱུང༌། ཡོན་ཕུལ་བ་རྣམས་སླར་གནང་ནས་གཅིག་ཀྱང་མ་བཞེས་པར་མཁན་པོ་ནི་སླར་བལ་ཡུལ་དུ་གཤེགས། གསལ་སྣང་མར་འོངས། བཙན་པོའི་ཞལ་མཇལ་དུ་ཚེས་གཅིག་ལ་མཆི་བའི་ཕོ་ཉ་བ་བཏང་སྟེ་སྙན་དུ་གསོལ་བས་གནང་སྟེ་ཕོ་བྲང་རླུང་ཚུབས་སུ་མཆིས་ནས་རྗེ་ལ་ཞེ་ས་ཕུལ། རྗེའི་ཞལ་ནས་གསལ་སྣང་ཁྱོད་ལྷ་ཆོས་ཤ་སྟག་བྱེད་ཅིང་འདུག་ཟེར་ན་ཁོང་གིས་ཁྱོད་སྤྱུགས་མ་དྭོགས་སམ་ཞེས་བཀའ་བསྩལ་པ་དང་ལན་དུ་མང་ཡུལ་གྱི་སྟོད་ན་མཆིས་པས་སྤྱུགས་པ་དང་ཡང་འདྲ་ཞེས་གསོལ་ལོ། །བཞེས་པ་འདྲེན་པའི་ཚེ་ས་དབེན་པར་སོང་སྟེ་རྗེ་ལ་ལྷ་ཆོས་བཟང་པོ་མཛད་པར་རིགས་པ་དང༌། (ཇ༧༧བ)

[Full Size]

མཁན་པོ་བོ་དྷི་ས་ཏྭ་མཁས་པ་བཙུན་པ་མངོན་པར་ཤེས་པ་མངའ་བ་ལ་སོགས་ཡོན་ཏན་དུ་མ་ཡོད་པ་ཅིག་དགེ་བའི་བཤེས་གཉེན་དུ་ཞུ་བ་གསོལ་བ་ལས་མཁན་པོ་འདི་སྐད་དུ་གསུངས་ཞེས་ཞིབ་ཏུ་ཞུས་པས། རྗེས་ཞལ་ནས་ཞང་བློན་གྱིས་ཁྱོད་བསད་པར་འོང་གིས་ངས་ཞང་ཉེ་བཟང་ལ་ལྐོག་དུ་བསྒོ་སྟེ་ཞང་བློན་འདུན་སར་ཁད་ཀྱིས་སོལ་དུ་གཞུག་གོ་ཁྱོད་རེ་ཞིག་ཡུལ་དུ་སོང་ལ་ཡིབ་ལ་སྡོད་ཅིག་ཞེས་བཀའ་བསྩལ་ནས་གསལ་སྣང་ཡུལ་དུ་མཆིས་སྟེ་སྒོམ་མོ། །དེའི་ཚེས་སང་ཤིས་རྒྱ་ནག་དུ་ཕྱིན་པའི་ཕོ་ཉའི་སུག་ལས་གྲུབ་ནས་སླར་བོད་དུ་མཆིས་པ་དང་རྒྱ་རྗེའི་ལན་དང་སྐྱེས་བཙན་པོའི་ཕྱག་དུ་ཕུལ། བློན་ཆེན་པོའི་ཐབས་བསྩལ་མིང་ཡང་རྒྱ་ཕྲུག་མཛངས་པ་པོར་བཏགས། རྒྱལ་པོ་སྐུ་ནར་མ་སོན་པས་རྒྱའི་ཆོས་རྣམས་ཕུའི་རྫ་གསེབ་ཏུ་སྦས་སོ། །ཡང་རྒྱལ་པོས་ཞང་ཞུང་ཡུལ་གྱི་དཀོར་གཉན་པོ་ཡོད་པ་བླངས་སྟེ་དཀོར་མཛོད་དུ་བླུག་པའི་ཕྱིར་ཕོ་ཉ་མང་དུ་བཏང་བ་ལས་སྔ་ཕྱི་གཅིག་ཀྱང་མ་ལོག་པས་རྒྱ་ཕྲུག་འདི་བཏང་ན་ལོན་འོང་ཟེར་ནས་དཀོར་བླུག་པའི་ཕོ་ཉར་བཏང་བ་ལས་ལམ་དུ་ཞང་ཞུང་གི་ལྷ་མུ་ཙ་མེན་དང་མཇལ་སྟེ་ལྷ་མོ་དེ་རོ་སྨད་གཡུའི་ན་བུན་གྱིས་འཁྲིགས། རོ་སྟོད་མུ་ཏིག་གི་སེ་མོ་དོ་དང་རིན་པོ་ཆེས་བརྒྱན་པ་ཅིག་སང་ཤི་ལ་ཐལ་མོ་སྦྱར་ཕྱག་བྱས་སྟེ་རིན་པོ་ཆེའི་རྒྱན་གྱིས་མཆོད་སྟེ་སྨྲས་པ། བྱང་ཆུབ་སེམས་དཔའ་ཁྱོད་མཁར་ནག་པོའི་དཀོར་བླུག་དུ་གཤེགས་ན་བདག་གི་རྟ་སེར་པོ་རྔོག་ནག་འདི་ལ་བཅིབས་ལ་ཁྱུང་ལུང་གི་སྒོར་ཕྱིན་པ་དང་གྱ་རྟའི་ལྕག་འདི་སྔ་རུ་ཆིངས་ལ་དོད་ནང་དུ་དཀོར་བླུག་ཅིག་དང་ཉེ་ཞོ་མ་མཆིས་པར་འགྱུར་རོ་ཞེས་སྨྲས་ནས་མི་སྣང་བར་སོང༌། སང་ཤིས་དེ་ལྟར་བྱས་དཀོར་གཉན་པོ་རིལ་བླུག་སྟེ་མཁར་ནག་མཆིས་པའི་ཁང་པ་ཅིག་སྒོ་ཕྱེ་བས་ནང་ན་མི་འདོམ་བཅུ་གཉིས་པ་ཅིག་ཉལ་ནས་མཆིས་ན་སང་ཤི་གདའ་ནས་ལངས་སྟེ་ཐལ་མོ་སྦྱར་ཕྱག་འཚལ་སྟེ་སྔས་ན་གསེར་སྐྱོགས་བདུན་ཆང་གིས་བཀང་བ་དང་མདུན་ན་གཡུ་འོད་མེ་ལྟར་འབར་བ་ཞིག་འདུག་པས་སང་ཤི་ལ་ཕུལ། དེ་ནས་ཡང་གླན་གྱི་མཛོད་ན་གཡག་སྐད་(ཇ༧༨ན)

[Full Size]

ནི་ངུར། རྟ་སྐད་ནི་འཚེར། ར་སྐད་ནི་སྦྲེ་མི་དག་ཞིག་ཡང་ཡུད་གདའ། སྒྲོམ་བཞིའི་ནང་ན་གླན་གྱི་མེ་ལོང་མཆིས་པའི་ཟུར་མོ་ཁབ་ཀྱི་མིག་ཙམ་ཞིག་ཁ་ཕྱེ་བས་རྒྱལ་པོའི་ཕོ་བྲང་དང༌། སྣང་སྲིད་ཐམས་ཅད་དང༌། བདག་གི་གློ་སྙིང་ནང་རོལ་ཀུན་ཀྱང་དེ་ན་གདའ་ནས་སླར་སྦས་སྟེ་སྒོར་བྱུང་བ་ན་རྟ་ལྕག་ཕྱེད་ཚལ་དུ་གས་ནས་གདའ་སྐད། སང་ཤི་དངོས་བོད་ཡུལ་དུ་འཁོར་སྟེ། དེ་ནས་རྒྱལ་པོ་སྐུ་ནར་སོན་པ་དང་ཡབ་མེས་ཀྱི་ཡི་གེ་གཟིགས་ནས་ཞང་བློན་རྣམས་དང་གྲོས་མཛད་སྟེ། ངའི་ཡབ་མེས་ཀྱི་ཡི་གེ་ན་འབངས་བདེ་བའི་ཚིས་རྣའི་ལེའུ་ཚེ་དང་སྦྱར་ན་ངའི་ཡབ་མེས་ཀྱིས་རྫུ་འཕྲུལ་བརྙེས་པ་འདྲ་གསུངས། བློན་པོ་དག་ན་རེ་ཡབ་མེས་ཀྱི་ལེའུ་ཚེ་དེ་ཅི་འདྲ་བ་ཞིག་བདོག་ཟེར། དེར་བཙན་པོས་རྒྱ་བཟང་མེ་མགོ་ལ་གསུངས་པ། ངའི་ཡབ་ཀྱི་སྐུ་རིང་ལ་རྒྱའི་གཙུག་ལག་ལེའུ་ཀེ་ཙེ་ཅེས་བྱ་བ་ཞིག་བྱུང་ཞེས་གྲག་ན་དེ་ཇི་ལྟ་ཞེས་གསུངས་པ་དང༌། མེ་མགོས་ལེའུ་ཙེ་ཇི་ལྟར་ལགས་པ་ཡི་གེ་བཀླགས་པ་དང༌། བཙན་པོའི་ཞལ་ནས་གཙུག་ལག་དེ་ནི་ཏེ་པོར་བཟང་ངོ་ངའི་ཡབ་མེས་ཀྱི་ཆོས་ལུགས་བཟང་པོ་ཅིག་སྐུ་ཉམས་སུ་བཞེས་སོ། །ད་འཇིག་རྟེན་གྱི་སྤྱོད་པ་བཟང་པོ་ཅི་འབྱུང་ན་བལྟ་ཞེས་གསུངས་པ་དང་སང་ཤིས་བསམས་པ། ཧྭ་ཤང་མངོན་ཤེས་ཅན་གྱིས་ནམ་རྒྱལ་པོ་མུ་སྟེགས་ཀྱི་ཆོས་གླེང་བའི་དུས་སུ་ལྷ་ཆོས་སྙན་དུ་གསོལ་ཞིག་བྱ་བ་དེ་ནི་འདི་ཡིན་པ་འདྲ་ཞེས་བསམས་ནས་རྒྱའི་ལྷ་ཆོས་བཟང་པོ་བྱུང་ན་ལེའུ་ཙེ་དེ་དག་དེའི་ཕྲུ་མའི་སྒོར་ཡང་མི་ཚུད་དོ་ཅེས་གསོལ་བ་དང༌། བཙན་པོའི་ཞལ་ནས་རྒྱའི་ལྷ་ཆོས་བཟང་པོའི་གཏན་ཚིགས་ཁྱོད་ལ་ཡོད་ཏམ་ཞེས་བཀའ་གནང་བ་དང༌། བདག་ཅག་རྒྱ་ལ་མཆིས་སོ་ཞེས་གསོལ་ནས་རྗེ་འབངས་དབེན་པར་གསངས་སྟེ་དྷརྨ་མཆིམས་ཕུའི་རྫ་ལ་སྦས་པ་བླངས་སྟེ་ཀིམ་ཧྭ་ཤང་གི་ལུང་བཞིན་དུ་བྲིམས་པ་ནི། དང་པོར་དགེ་བ་བཅུའི་མདོ་བཀླགས། དེ་ལ་རྒྱལ་པོ་དད་པ་སྐྱེས་སྤྱོད་པ་དག་བར་གོ །དེ་ནས་རྡོ་རྗེ་གཅོད་པ་བཀླགས་དེས་ལྟ་བ་དག་པར་གོ་རྒྱལ་པོ་དད་པ་ཆེར་སྐྱེས། དེ་ནས་སཱ་ལི་ལྗང་པ་བཀླགས་ལྟ་སྤྱོད་ཟུང་འབྲེལ་དུ་གོ་(ཇ༧༨བ)

[Full Size]

ནས་ཆོས་ལ་ཡིད་ཆེས། ལ་ལ་ནས་དང་པོ་དགེ་བ་བཅུ་དང་ཕུང་པོ་ལྔ་སྤྱན་སྔར་བྲིམས་བཟང་རབ་ཅེས་གསུངས། དེ་ནས་སཱ་ལི་ལྗང་པ་བྲིམས་པས་ཆོས་ཐམས་ཅད་རྒྱུ་རྐྱེན་ལས་བྱུང་བར་ཐུགས་ཆེས་ནས་ཀྱང་ཟེར། བཙན་པོའི་ཞལ་ནས་འདི་ལྟ་བུའི་ཆོས་བཟང་པོ་འདི་ངའི་སྐུ་རིང་ལ་རྙེད་པ་གནམ་བྱམས་ས་བྱམས་ལྷ་ཐམས་ཅད་ལ་གཏང་རག་གཏང་ངོ༌། །གསལ་སྣང་ཡང་ང་ལ་ལྷ་ཆོས་མི་སྤྱད་དུ་མི་རུང་ཟེར་བ་ཡང་བདེན། ལྷ་ཆོས་འདི་ལྟ་བུ་ཕྱག་དུ་ཕུལ་བ་འདི་ལས་དགའ་བ་མེད་ཀྱི་གསལ་སྣང་ལ་དངུལ་གཡུང་དྲུང་གི་སྟེང་དུ་གསེར་ཆེན་པོ་སྦྱིན་ནོ། །སང་ཤི་ལ་ཕྲ་མེན་གཡུང་དྲུང་གི་སྟེང་དུ་གསེར་ཆུང་ངུ་སྦྱིན་ནོ། །ཁྱོད་ཀྱིས་སྤྱན་དྲངས་པའི་རྒྱ་ཡུལ་གྱི་དྷརྨ་ཀུན་དང་མང་ཡུལ་གྱི་ཆོས་རྣམས་རྒྱ་མེ་མགོ་དང༌། རྒྱ་གར་ཨཱ་ནནྟ་དང༌། རྒྱ་ལས་སྐད་མཁས་པ་སུ་ཡོད་པས་བསྒྱུར་ཞིག་ཞེས་བཀའ་བསྩལ་ནས་དེ་གསུམ་གྱིས་ཧས་པོ་རིའི་བྱ་ཁུང་དུ་ཆོས་བོད་སྐད་ཏུ་བསྒྱུར་བའི་དྲུང་དུ་གཞན་བློན་པོ་དམ་ཏ་ར་ཀླུ་གོང་དང༌། ཞང་མ་ཞང་སོགས་མཆིས་སྟེ་གྲི་བོ་ཁྱེད་གསུམ་དེ་ན་ཅི་བྱེད། མ་ཞང་གི་ཁྲིམས་བུ་ཆུང་ལས་མི་ཤི་བ་ལ་ཚེ་བྱེད་ན་ཕོ་རེང་དུ་གཏན་དུ་སྤྱུག་ལྷོ་བལ་གྱི་ལྷ་མཆོད་དུ་མི་གནང་བ་མ་ཐོས་སམ། བྱ་བ་མང་འདུག་མི་ཕོད་པ་དེ་ནི་ཆོས་ཀྱི་སྐད་འདྲ་ན་རྗེའི་སྙན་དུ་མ་གསོལ་བ་ལ་བྱེ་མའི་ནང་དུ་སུབས་ལ་ཞོག །ཕྱིས་ཁྲིམས་བུ་ཆུང་དང་སྦྱར་སྟེ་ཤགས་གདབ་བམ། ཞེས་བཀའ་ཡོ་གལ་འཆོས་པའི་མདུན་ས་ནས་མཆིད་ནན་དྲག་པོ་བརྡས་པ་དང༌། སང་ཤིས་རྗེ་ལ་གསོལ་བས་གསལ་སྣང་སླར་མ་འོངས་ཀྱི་བར་དུ་དར་ཅིག་མ་བསྒྱུར་ཞིག་གསུང༌། ཞང་བློན་ཆོས་ལ་དགའ་བ་རྣམས་ཀྱིས་རྗེ་ལ་སང་ཤི་སྟོད་ཀྱི་ཕོ་ཉར་གསལ་སྣང་གི་གྲོགས་སུ་བཏང་བར་ཞུས་པས་བཙན་པོའི་ཞལ་ནས་སང་ཤི་ལྟ་བུ་རྒྱ་ཕྲུག་མཛངས་པ་ཞོ་ཤ་ཕུལ་སྟེ་དམ་པའི་ཆོས་བླངས་པའི་སྟེང་དུ་སྟོད་དུ་མངགས་ནས་ཤི་ན་འཕངས་སོ་སྟོད་ནས་སླར་མ་ལོག་ན་བུ་ཡང་མེད་རབས་འཆད་དོ། །ཅེས་གསུངས་པས། སང་ཤིས་གསོལ་བ། རྗེ་ལྷ་སྲས་དང༌། བོ་དྷི་(ཇ༧༩ན)

[Full Size]

ས་ཏྭ་དང༌། སྦ་གསལ་སྣང་དང༌། བདག་ཅག་སྨོན་ལམ་གཅིག་པས་ཆོས་བཟུང་བ་ལ་བདག་ཀྱང་རྟེན་ཙམ་དུ་འཚལ་བར་བས་ཀྱི་བདག་རབས་མི་འགུམ། སྟོད་དུ་མཆིས་ཀྱང་རྒྱ་གར་ཡུལ་ནས་དགེ་སློང་ཁྲིམས་མ་ཉམས་པ་གཉིས་ཅིག་ཚེ་འདས་མ་ཐག་བདག་གི་བུར་མཆིའོ་ཞེས་གསོལ། དེ་ནས་རྗེ་བློན་ཞང་ཉ་བཟང་བློན་ཆེན་མགོས་སོགས་ཆོས་བློན་ཀུན་ཚོགས་ནས་ཆོས་བྱ་བར་མོལ་གཏམ་བྱས་པ་ལ་ཞང་ཉ་བཟང་གིས་སྙན་དུ་གསོལ་བ། མེས་སྲོང་བཙན་གྱིས་ལྷ་ཆོས་མཛད་པས་བོད་ལེགས་རྒུ་བྱུང་བ་དང་ལྷ་སྲས་ཡབ་ཀྱིས་ཀྱང་མཛད་པ་ལས་ཡབ་ནོངས་པའི་འོག་དུ་ཞང་མ་ཞང་གིས་བཤིག །རྒྱའི་ལྷ་དེ་དང་པོ་རྟ་པ་གཅིག་གིས་པང་དུ་ཐེག་པ་ལ་རྒྱ་ཡུལ་དུ་བསྐྱལ་བར་ཆད་པའི་ཚེ་མི་སྟོང་གིས་ཀྱང་མ་ཐེག །མང་ཡུལ་དུ་བསྐྱལ་བའི་ཚེ་དྲེའུ་གཉིས་ཀྱིས་ཐེག་ཆོས་བཤིག་པའི་ཞང་བློན་འགའ་ཞིག་ཡང་ཧད་པོར་གུམ། བླ་འོག་གི་ཕྱག་སྤྲིན་པ་དང་ལྟས་མཁན་ཀུན་ཀྱང་རྒྱའི་ལྷ་ཁྲོས་པ་ལས་བྱུང་ཟེར་བ་དང་སྦྱར་ན་སྐུ་དང་ཆབ་སྲིད་ལ་མི་གནོད་པར་བློ་བུར་ཆུད། རྒྱའི་ལྷ་ཡང་སླར་བླངས་ལ་མཆོད་ཅིང་སྔོན་ལྷ་སྲས་ཡབ་ཀྱིས་ཆོས་མཛད་པ་བཞིན་མཛད་ན་ལེགས་པ་འདྲ་ཡིས་ཀྱང་ཞང་མ་ཞང་རོ་ངན་ལ་ཆོས་ལ་མི་དགའ་བས་ཐུགས་དགོངས་མི་འགྲུབ་སྟེ་མཆི་ཞེས་གསོལ་བ་དང༌། བློན་པོ་མགོས་ན་རེ་དེ་ལ་ཐབས་བགྱི་བར་རྔོ་ཐོག་གིས་ཁོ་བོའི་རྗེས་སུ་རྟིང་གནོན་མཛོད་ཅིག་སླད་ཀྱིས་རྗེའི་དགོངས་པ་སྒྲུབ་པོ་ཅེས་ཆད་བྱས། མགོས་ཀྱིས་བླ་འོག་གི་ཕྱག་སྤྲིན་པ་དང་མོ་མ་དང་ལྟས་མཁན་ཀུན་ལ་ལྐོག་དུ་བྱ་དགའ་བསྩལ་ནས་རྒྱལ་པོ་སྐུ་ཆགས་ཆེ་ཆབ་སྲིད་ལ་གནོད་པ་འོང་བར་ལུང་མཐུན་པར་སྨྲ་བར་བསྩལ། དེ་ལ་ཇི་ལྟར་བྱ་བའི་ལུང་སྨྲར་བསྩལ་པ་ལ་རྗེའི་སྐུ་རིམ་དུ་ཞང་བློན་སུ་ཆེ་བ་ཟུང་གཅིག་དགུང་ལོ་གསུམ་མཆད་པའི་ནང་དུ་དལ་དུ་བཅུག་ན་རྗེའི་སྐུ་ཚེ་དང་ཆབ་སྲིད་འཕེལ་ལོ་ཞེས་ལུང་ཕོག །དེ་སྐྱེ་བོ་འདུ་བ་ཀུན་ན་མང་དུ་གླེང་བ་དང་ཡང་མགོས་ཀྱིས་བཤུལ་ལམ་འགྲིམ་པའི་མགྲོན་པོ་རྣམས་ལ་ཞང་(ཇ༧༩བ)

[Full Size]

མ་ཞང་ལ་བསྙུན་པོ་གདའ་པའི་གླེང་བ་དེ་བདེན་ནོ་ཞེས་ཐོས་ཙམ་དུ་སྨྲར་བཅུག་མ་ཞང་གིས་ཐོས་པས་གློ་བ་ལ་བཅགས་པར་གྱུར། ནུབ་ཕྱོགས་ཀྱི་རྒན་མོ་ཞིག་གིས་ཀྱང་མ་ཞང་གི་ངོ་ལ་ཅེར་བལྟས་སྟེ་ཞང་མ་ཞང་ནི་རྗེའི་གདུང་སོབ་པ་བོད་འབངས་ཡོངས་ལ་གཅེས་བསྙུན་ཆེན་པོས་ཐེབས་ཟེར་བ་བདེན་ནམ་ཟེར་བས་མ་ཞང་བདེན་ངེས་སྙམ་སྟེ་ཁྱིམ་དུ་བུབ་ཉལ་བྱས་ངུས་པས་ནང་འཁོར་བ་ན་རེ་ཅི་ཉེས་ཟེར་བ་ལ་ནད་ཆེན་པོ་བྱུང་ཞེས་རྒྱལ་ཁམས་ཀུན་ན་གླེང་ཟེར། རྒྱལ་ཁམས་ཀྱི་ཁ་ལ་གཏད་ར་མེད་མི་བདེན་ཟེར་ཡང་ཞང་གིས་མེ་ལོང་བལྟས་པས་རྒས་འདུག་པས་རྒྱལ་ཁམས་ཀྱི་ཁ་ལ་ཡེ་ཤེས་ཀྱི་སྤྱན་ཡོད་ཟེར་བ་བདེན་ཟེར་ནས་མྱ་ངན་ཆེར་བྱེད་དོ། །དེ་མགོས་ཀྱིས་ཐོས་ནས་རྗེ་འབངས་ཀུན་ཚོགས་པའི་དུས་སུ་ཞང་ཉ་བཟང་གིས་རྒྱལ་པོ་སྐུ་ཆགས་ཆེ་བའི་རིམ་གྲོ་བྱ་བར་རིགས་སོ་དེ་ལ་རྗེའི་ཞབས་ཏོག་པ་སུ་ཆེ་བ་ཁས་ལོང་ཟེར་བས་མགོས་རྒན་ལངས་སྟེ་རྗེའི་ཞབས་ཏོག་དུ་ང་ཆེ་བུ་ཚའི་དགེ་དང་ཡིག་ཚངས་སུ་དེ་ཆེ་བློན་ང་ལས་ཆེ་བ་སུ་ཡོད། གཅིག་ངས་བྱེད་ཟེར། མ་ཞང་ཡང་འགྲན་པས་ལངས་སྟེ་བློན་ང་ལས་ཆེ་བ་ནི་མེད་ན་རྗེའི་ཞབས་ཏོག་བ་གཅིག་ངས་བྱེད་ཟེར། ད་མཆད་པ་གར་བརྩིག་ཅེས་གླེངས་པས་མགོས་ན་རེ་ཕག་རིར་བྱའམ་ཡང་ན་འཇུའི་སྤང་བཟང་དུ་བྱ་ཟེར། མ་ཞང་ན་རེ་སྣ་ནམ་བྲང་བུར་རྩིག་གོ་ཟེར་ནས་རྨང་བྲེས་པས་མ་ཞང་གིས་འཕྲིགས་ནས་རྡོ་དགའ་མོ་སྣ་ནས་སྐྱེས་ཅིག་ཟེར། ཆུས་མི་བྲེལ་བའི་ཐབས་རཱ་འཐུད་པའི་ནང་དུ་ཆུ་འོངས་ནས་ཕྱིར་འགྲོ་བ་བྱས། མི་ལྟོགས་པའི་ཟས་མི་འཁྱག་པའི་གོས་མི་སུབས་པའི་གསེང་ལ་སོགས་པ་བྱས། མཆོད་པ་འབྱོངས་ནས་བློན་པོ་གཉིས་ནང་དུ་མཆིར་མི་རུང་བས་རྗེས་མགོས་རྒན་ཐོན་ཞིག་པར་བཀའ་བསྒོས། མགོས་དང་ལོ་ཏེ་གུ་སྣང་གོང་གཉིས་གྲོས་བྱས་ནས་མགོས་ཀྱིས་རྐང་པ་ལ་བྱ་རྒོད་ཀྱི་ལྷམ་གོན་ལུས་ལ་ཕ་བ་གོ་གོའི་ཐུལ་བ་གོན་ནས་བློན་ཆེན་པོ་དང་ཞང་མ་ཞང་ནང་དུ་ཆུད་པ་དང་འདིར་ཞང་གི་གཟིམས་མལ་བྱ། འདིར་(ཇ༨༠ན)

[Full Size]

ངའི་བྱ། འདིར་ཆུ་ཞོག་ཟེར་ཞིང་ཕར་འགྲོ་ཚུར་འགྲོ་བྱེད་པ་དང་མ་ཞང་ཡང་ཕྱིར་ཀྲི་ལེ་ལེ་འབྲ་འབྲེང༌། དེའི་འཕྲོ་ལ་མགོས་ཀྱིས་ཐལ་མོ་བརྡབས་ནས་ཕ་གི་ན་ཅི་ཡིན་ན་ཟེར་ནས་བྲོས་པའི་རྐང་པ་ནས་བཟུང་པས་རྒོད་སྤུ་སྦར་གང་ལག་ན་གདའ། ཕ་བ་གོ་གོ་འཐུལ་བས་མིག་གིས་ཅི་ཡང་མ་མཐོང༌། ལོ་ཏེ་གུས་སྒོ་ཕ་བོང་གིས་བཀག་མགོས་རྒན་གྱི་ལྟོ་འོག་དུ་སོང་བ་ཞེས་ནང་ན་འཁུན། རིང་ཞིག་ན་ཁྱིམ་བྱའི་སྐད་གྲག་ནས་ཆུ་ཤོར་སྙམ་དྲེའུ་ཡོས་ཟན་ལག་པ་བརྡུང་བའི་སར་བརྐོས་པས་ཆུས་མི་བྲེལ་བའི་རྭ་འཐུད་པ་མཐོང་ནས་བཤིག་ནང་ནས་མདའ་ལ་ཡི་གེ་བྲིས་ནས་སྣ་ནམ་པས་བྲུས་ཅེས་པ་ཕྱིར་འཐེན་སྐད། ཅེས་བྱུང་ངོ༌། །དེ་ཚེ་རྒྱ་གར་ཟ་ཧོར་རྒྱལ་པོའི་སྲས། །འཛམྦུའི་གླིང་ན་མཁས་ཤིང་བཙུན་པའི་མཆོག །ཤཱནྟ་རཀྵི་ཏ་ཞེས་ཞི་བའི་འཚོ། །བོད་ཡུལ་འདུལ་སྐལ་ཁོ་ནར་སྐུ་བལྟམས་པ། །ཡོན་ཏན་དཔག་ཡས་སེམས་དཔའ་ཆེན་པོ་དེ། །སྨོན་ལམ་དག་པའི་ཕོ་ཉས་སྤྱན་དྲངས་སྟེ། །རྒྱལ་པོས་གཙུག་གི་ནོར་བུ་མཆོད་དུ་བསྟེན། །དམ་པའི་ཆོས་ཀྱི་འཁོར་ལོ་བསྐོར་བ་ན། །བོད་ཡུལ་འདྲེ་སྲིན་གདུག་པ་ཀུན་ཁྲོས་སྟེ། །ནད་དང་མུ་གེ་མ་རུང་དུ་མ་བྱུང༌། །བོད་འབངས་རྣམས་ཀྱི་སེམས་སྲུང་བགྱི་བའི་སླད། །མཁན་པོ་སླར་ཡང་བལ་པོའི་ཡུལ་དུ་བྱོན། །ཨོ་ཌྱན་རྒྱལ་པོའི་སྲས་ལས་རབ་བྱུང་བ། །དགེ་སློང་པདྨ་སམྦྷ་ཝ་ཞེས་བྱ། །འཛམྦུ་གླིང་ན་ནུས་མཐུ་ཆེ་བ་ཡི། །སྔགས་མཁན་མཆོག་དེ་སྤྱན་འདྲེན་གྱིས་ཅིག་དང༌། །བོད་ཡུལ་ལྷ་སྲིན་འཐུལ་བར་འགྱུར་རོ་གསུང༌། །སླད་ནས་མཁན་པོ་རྣམ་གཉིས་སྤྱན་དྲངས་སྟེ། །པདྨའི་སྦུབས་ལས་བརྫུས་སྟེ་སྐུ་བལྟམས་ཅིང༌། །ཚེ་ཡི་རིག་འཛིན་མཐར་ཕྱིན་(ཇ༨༠བ)

[Full Size]

མཆོག་དངོས་གྲུབ། །སངས་རྒྱས་གཉིས་པ་པདྨ་འབྱུང་གནས་ཀྱིས། །བསྟན་མ་བཅུ་གཉིས་ཐང་ལྷ་ཤམ་པོ་སོགས། །ལྷ་སྲིན་དྲེགས་པ་ཅན་རྣམས་མ་ལུས་བཏུལ། །ཉི་ཚེའི་དམྱལ་བ་མང་དུ་སྟོངས་པར་དྲངས། །བྱེ་མ་ཐམས་ཅད་ཚལ་དང་ནེ་སིང་དང༌། །གྲམ་པ་ཐམས་ཅད་ཞིང་ས་གཤིན་པོར་བྱ། །རི་ཀུན་ནགས་དང་སྤང་དུ་བསྒྱུར་བ་ཡིས། །བོད་ཡུལ་ཤིན་ཏུ་བཟང་པོར་མཛད་དགོངས་ཚེ། །བོད་འབངས་བསོད་ནམས་དམན་པས་མ་ཐེག་སྟེ། །བློན་པོ་རྣམས་ཀྱི་བློ་བུར་ཆུད་མ་གྱུར། །དེ་ཡང་རྦ་བཞེད་ལས་མ་ཞང་ཆོས་ལ་མི་དགའ་བ་ལ་སྐྱོན་ཕབ་པའི་ལས་དེ་གྲུབ་པ་དང་རྗེ་བློན་ཚོགས་པའི་དུས་ཞང་ཉ་བཟང་གིས་སྔར་ལྟར་གསོལ་བ་དང༌། རྒྱལ་པོས་བཀའ་བསྩལ་པ་ཞང་ཟེར་བ་བདེན་ང་ཡང་དེ་ལྟར་དགོངས་པས་ཞང་བློན་དག་གྲོས་བྱའོ་ཞེས་བཀའ་བསྩལ་ནས་སླད་ཀྱིས་རྗེ་བློན་མང་པོ་ཚོགས་པ་དང་བཀའ་བསྩལ་པ། ངའི་ཡབ་མེས་ཀྱིས་ལྷ་ཆོས་མཛད་པ་མ་ཞང་གིས་བཤིག་པ་དེ་ཏེ་པོར་མ་ལེགས། ཞང་ཉ་བཟང་ཡང་འདི་སྐད་ཟེར་བས་རྒྱའི་ལྷ་ཡང་སླར་སྤྱན་དྲངས། དེར་རང་ཡང་ཆོས་བྱར་རུང་བས་བྱ་གསུངས་ནས་ཆོས་བྱ་བར་གྲོས་འཆམས། ད་ཆོས་བྱེད་པ་ལ་རྒྱ་གར་དང་བལ་པོའི་མཁན་པོ་ལས་ཆོས་མཁས་པའི་ལོ་རྒྱུས་ཅན་སུ་ཡོད་ཏམ་སྨྲ་དགོས་སོ་ཞེས་གླེངས་པ་དང༌། རྗེའི་ཞལ་ནས་བ་ལམ་གླག་ན་རྦ་གསལ་སྣང་ཡོད་སྟེ་ངའི་དྲུང་དུ་བོས་གསུངས་ནས་ཕོ་ཉ་བཏང་བས་སྦ་གསལ་སྣང་སྤྱན་སྔར་མཆིས་སྟེ་སྔར་བཞིན་བཀའ་བསྩལ་བས་གསལ་སྣང་གིས་གསོལ་བ། སྔོན་ནི་རྒྱ་གར་ཟ་ཧོར་ན་མཆིས་ད་ལྟ་ནི་བལ་ཡུལ་ན་མཆིས་སྟེ་ཟ་ཧོར་གྱི་རྒྱལ་པོའི་བུ་དགེ་སློང་ཤཱནྟ་རཀྵི་ཏ་ཅེས་བྱ་བ་གཙུག་ལག་ལ་མཁས་པ་ཅིག་མཆིས་ལགས་ཅེས་གསོལ་བ་དང༌། དེ་མི་དགུག་དུ་མི་རུང་གིས་ཁྱོད་ཡུལ་དུ་མ་འགྲོ་བར་བལ་ཡུལ་དུ་སོང་ལ་བལ་རྗེ་ལ་ངའི་བཀའ་འཕྲིན་དང་སྒྲོམ་བུ་བྱིན་ལ་ཟ་ཧོར་གྱི་བནྡྷེ་ཅི་ཁུགས་སུ་སྒྲུབས་ལ་ཁྱེར་ལ་ཤོག་ཞིག་ཞེས་བཀའ་བསྩལ་བ་དང༌། ཐལ་བྱུང་དུ་བལ་ཡུལ་དུ་མཆིས་སྟེ་བཀའི་སྒྲོམ་བུ་བལ་(ཇ༨༡ན)

[Full Size]

རྗེ་ལ་ཕུལ། གཉི་གས་མཁན་པོ་བོད་ཡུལ་དུ་གཤེགས་པར་ཞུས་པས་གནང་ནས་བལ་པོའི་ལོ་ཙཱ་བ་ཞམ་རིང་དུ་ཁྲིད་དེ་བྱོན། མང་ཡུལ་དུ་སྤྱན་དྲངས་ནས་ཕོ་བྲང་དུ་ཕོ་ཉ་བཏང་སྟེ་མཁན་པོ་སྐུ་དངོས་མཆིས་སྟེ་མང་ཡུལ་དུ་བཞུགས་ནས་མཆིས་ཞེས་གསོལ་བས། ནང་འཁོར་བ་ལང་གྲོ་སྣང་ར་དང༌། གཉེར་སྟག་བཙན་གདོང་གཟིགས་དང་སྦྲང་རྒྱས་ལེགས་ཟིགས་དང་གསུམ་མང་ཡུལ་དུ་བསུ་བར་བཏང་སྟེ་ཁྱེད་གསུམ་གྱིས་རིམ་གྲོ་གྱིས་ལ་ཧེན་ཁང་བི་ཧར་དུ་ཕྱགས་ཕོབ་ཅིག་ཞེས་བཀའ་ལས་བྱུང་བ་བཞིན་བསུས་ནས་མཁན་པོ་དང་ལང་གྲོ་ར་ས་བི་ཧར་དུ་བཞུགས་སུ་གསོལ། གསལ་སྣང་ཕོ་བྲང་དུ་མཆིས་སྟེ་སྐུ་གཉེར་ཁུམས་པར་གསོལ་བ་དང༌། ཞང་བློན་ཆེན་པོ་དག་གིས་ལྷོ་བལ་གྱི་བནྡྷེ་ཆོས་ལོག་པ་དང་ངན་སྔགས་ཕྲ་མེན་གྱི་དག་དགྱིད་དམ་མི་དགྱིད་ལ་རྟོག་དུ་གསོལ་བས་མཆིམས་མེ་ལྷ་དང་སེང་མགོ་ལྷ་ལུང་གཟིགས། སང་ཤི་དང་གསུམ་རྟོག་དུ་བཏང་བས་བརྟགས་ན་སྐད་མ་གོ་དར་ཆགས་སྒོ་གསེབ་ཀྱི་ཚོང་དུས་ན་ཁ་ཆེ་སྐྱེས་བཟང་གི་བུ་ཨཱ་ནནྟ་ལོ་ཙཱ་སློབ་འཕྲོ་ལ་ཆད་པ་བྱུང་ནས་ཚོང་བྱེད་པ་དེ་ལ་ལོ་ཙཱ་བཅོལ། ཨཱ་ཙཱརྻ་ཅི་འདྲ་དྲིས་པས། སྤྱོད་པ་ལེགས་སོ་ཅོག་ལ་མི་བྱ་བ་མེད། ཉེས་སོ་ཅོག་ལ་མི་བཏང་བ་མེད། ལྷར་དཀོན་མཆོག་གསུམ་མཆོད། གཙོ་བོར་སེམས་ཅན་ལ་ཕན་པ་བྱ་བར་མཆིས་ཅེས་སམ། ངན་སྔགས་ཕྲ་མིན་མི་མཐུན་པའི་ཕྱོགས་ནི་མི་བགྱིད། ཁོང་རང་གི་ལྷ་སངས་རྒྱས་ནི་སྲོག་ཆགས་ཀུན་ལ་ཕན་པར་དགྱིད་པ་ཅིག་མཁན་པོ་དངོས་ནི་སྤྱོད་ལམ་ཉེས་སོ་ཅོག་དང་གཞན་ལ་གནོད་པའི་བག་མི་བགྱིད། ལེགས་སོ་ཅོག་དང་སྲོག་ཆགས་ཀུན་ལ་ཕན་པ་ནི་ལྷུར་དགྱིད་པ་ཅིག་སྟེ་ཐུགས་འཕྲིག་བཞེས་པའི་བག་མ་མཆིས་ཞེས་གསོལ་བས་སྤྱན་དྲངས་སྟེ་ཕོ་བྲང་བྲག་དམར་དུ་ཞལ་སྔར་མཇལ་བ་དང་ལ་ཉེ་བརྟག་གོ་གསུང༌། བཙན་པོའི་གསེར་ཕྱེ་བྲེ་གང་གི་ཕྱག་རྟེན་བྱས་སྟེ་ཕྱག་འཚལ་བ་དང་མཁན་པོའི་ཞལ་ནས་ང་ངོ་མཁྱེན་ནམ་གསུང༌། བཙན་པོའི་ཞལ་ནས་བདག་གིས་དེ་སྔ་ཞལ་མ་མཇལ་གསུང༌། མཁན་པོའི་ཞལ་ནས་སངས་རྒྱས་འོད་སྲུང་གི་བསྟན་པ་ལ་གཙུག་ལག་ཁང་རྒྱན་སྲུང་གི་(ཇ༨༡བ)

[Full Size]

བྱིས་པ་གསུམ་མཆིས་པའི་ཚེ་བྱེ་མའི་མཆོད་རྟེན་བྱས་སྟེ་ངས་པཎྜི་ཏ་དང༌། ཁྱེད་ཀྱིས་རྒྱལ་པོ། གསལ་སྣང་གིས་ཕོ་ཉ་བྱས་སྟེ་མཐའ་འཁོབ་ཀྱི་རྒྱལ་ཁམས་སུ་དམ་པའི་ཆོས་དཔེལ་བར་སྨོན་ལམ་བཏབ་པ་མ་ངེས་སམ་ཞེས་གསུངས་པས་བཙན་པོས་སྒོམ་ཡུན་ཐུངས་པས་མ་དྲན་གསུང༌། རྒྱལ་པོས་ཨཱ་ཙཱརྻ་ལ་ཉེ་བརྟགས་སམ་ཞེས་ཞུས་པས་ཞལ་ནས་བརྟགས་ལགས་སྟེ་རྒྱལ་པོ་ཁྱེད་ཀྱི་དབུ་ལ་ཐོད་བཅིངས་པ་དང་སྦྱར་ན་སྟོད་དུ་མངའ་རིས་ཞྭ་ཙམ་ཞིག་འཆགས། ཞབས་ལ་ཕྱགས་གསོལ་བ་དང་སྦྱར་ན་སྨད་དུ་མངའ་རིས་ལྷམ་ཙམ་ཞིག་འཆགས། སྐུ་ལ་སྐེ་རགས་མ་བཅིངས་པ་དང་སྦྱར་ན་བར་འདིར་རྒྱལ་ཁྲིམས་མྱུར་དུ་འཇིག་ཉེན་ཡོད། འོན་ཡང་རིན་པོ་ཆེའི་ཕྱག་རྟེན་ཕུལ་བས་དམ་པའི་ཆོས་བྱར་བཏུབ་གསུངས། དེ་ནས་ཕོ་བྲང་རླུང་ཚུབས་སུ་ཨཱ་ནནྟས་ལོ་ཙཱ་བགྱིས་སྟེ་དགེ་བ་བཅུ་དང༌། ཁྲིམས་བཅོ་བརྒྱད་དང༌། རྟེན་འབྲེལ་བཅུ་གཉིས་ལ་སོགས་པའི་ཆོས་བཤད་དེ་ཟླ་བ་བཞིའམ་གཉིས་ལོན་པ་དང་འདྲེ་སྲིན་ནག་པོ་ལ་དགའ་བ་ཀུན་ཁྲོས་ནས་ཕོ་བྲང་འཕང་ཐང་ཆུས་ཁྱེར། དམར་པོ་རི་ལ་ཐོགས་རྒྱབ། མི་ནད་དང་ཕྱུགས་ནད་དང་ལོ་ཉེས་བྱུང་བས་བོད་འབངས་ཐམས་ཅད་ཁ་ལོག་ནས་བཙན་པོས་ཆོས་བྱས་པས་ལན་ཨཱ་ཙཱརྻ་ཡར་སྤྱུགས་ཅིག་ཟེར་སྟེ་ཆོས་དགྱིད་དུ་མ་སྟེར་རོ། །དེར་ཨཱ་ཙཱརྻ་རྔ་ཁང་སྟེང་ན་དར་དཀར་གྱི་ཡོལ་བའི་ནང་ན་སྒོམ་བྱེད་པ་ལ་རྒྱལ་པོས་རྦ་གསལ་སྣང་དང༌། སང་ཤི་དང༌། ཞང་ཉ་བཟང་དང༌། སེང་མགོ་དང༌། གཉེར་སྟག་བཙན་ལྔ་ཞམ་རིང་དུ་ཁྲིད་གསེར་ཕྱེ་བྲེ་གང་ཁྱེར་ནས་ཕྱག་དང་སྐོར་བ་ལན་བདུན་བྱས་སྟེ་སྤྱང་སློག་ནས་གསེར་ཐུམ་མཁན་པོའི་མདུན་དུ་བོར་སྟེ་བྱོན། དེ་ལྟ་བུ་ནུབ་གསུམ་མཛད་པའི་རྗེས་ལ་བཙན་པོས། བདག་སྐལ་པ་ཆུང་ལ་བོད་ནག་པོ་ལ་ཞེན་པའི་སྐབས་སུ་སྐྱེས་པས་དེ་ལས་ལྡོག་པར་དཀའ། ཐབས་མི་མཁས་ན་ལྷ་ཆོས་མི་འགྲུབ་པར་བློ་བུར་ཆུད། རེ་ཞིག་མཁན་པོ་སླར་བཞུད་ལ་བལ་ཡུལ་དུ་བཞུགས་ཤིག་སླད་ཀྱིས་ཐབས་བགྱིས་སྟེ་བཏུབ་མ་ཐག་དུ་སྤྱན་འདྲེན་བཏང་ངོ་ཞེས་ཞུས་པས་ཨཱ་ཅཱརྻས་བལ་རྗེ་དང་འཁོར་ལ་གསེར་(ཇ༨༢ན)

[Full Size]

ཕྱེ་ཁྱོར་གང་བསྣམས། གཞན་རྣམས་སླར་རྒྱལ་པོ་ཉིད་ལ་ཕུལ་སྟེ་མཁན་པོའི་ཞལ་ནས་སྔར་ཡབ་མེས་ཀྱི་སྐུ་རིང་ལ་ལྷ་ཀླུ་གདུག་པ་ཅན་དམ་འོག་དུ་མ་བསྩལ་བས་བོད་ཁམས་གདོན་མ་ནོན་པ་མཐུ་ཆེ་བ་ཆོས་ལ་མི་དགའ་བའི་དབང་དུ་སོང་བས་ཆོས་མཛད་པའི་ཚེ་གཟིགས་ལྟས་ངན་པ་བྱུང་བ་དང༌། ཆོས་མ་ཚུགས་པ་དང་རྒྱལ་པོའི་སྐུ་ཚེ་ཐུང་བ་ཡང་འདི་ལས་གྱུར་པས་སླད་ཀྱིས་ང་ཡང་ཆོས་མཛད་ན་ལྷ་ཀླུ་གདུག་པ་ཅན་རྣམས་དམ་འོག་དུ་བསྩལ་འཚལ་སྟེ་ཨོ་ཌྱན་གྱི་རྒྱལ་པོའི་སྲས་དགེ་སློང་པདྨ་སམྦྷ་ཝ་ཞེས་བགྱི་བ་འཛམྦུའི་གླིང་ན་སྔགས་མཁན་འདི་པས་མཐུ་ཆེ་བ་མི་བཞུགས་སྟེ་བདག་གིས་དེ་སྤྱན་དྲངས་ལ་བོད་ཁམས་སུ་ཆོས་འབྱུང་བ་ལྔ་བརྒྱའི་མཐའ་མ་ལ་བབ་པས་མུ་སྟེགས་ཀྱི་རྒོལ་བ་ནི་མི་མཆི་ན་ནང་པ་སངས་རྒྱས་པ་ཉིད་དམ་གཞན་ཞིག་འགྲན་ཟླ་འཚོལ་བ་ཞིག་བྱུང་ན་རྫུ་འཕྲུལ་ནི་པདྨ་སམྦྷ་ཝ་དང་འགྲན། གཏན་ཚིགས་ནི་བདག་དང་ཤགས་སུ་བཀྱེ་ལ་པདྨ་སམྦྷ་ཝས་དམ་འོག་དུ་བསྩལ་ན་རྒྱལ་པོའི་དགོངས་པ་ཡང་འགྲུབ། སངས་རྒྱས་ཀྱི་ཆོས་ཀྱང་སླད་ནས་རྗེས་སུ་བརྟན་པར་འགྱུར་བས་དེ་བཞིན་དགྱིད་པར་རྗེ་འབངས་དང་ཆད་བྱས། ཨཱ་ཅཱརྻ་བསྐྲད་པ་ལྟར་བྱས་ནས་ཡར་བཞུད་པའི་ཚེ་སེང་མགོ་ལྷ་ལུང་གཟིགས་སྔོན་ཤ་མི་འཚལ་བའི་སྡོམ་པ་བླངས་སྟེ་སྲུང་བ་ལས་སླན་ཆད་མར་འཚལ་པའི་སྡོམ་པ་བླངས་སྟེ་ཨཱ་ཅཱརྻ་གླང་སྣ་གྲུ་ཚུགས་སུ་བསྐྱལ། དེ་ནས་ལང་གྲོ་སྣང་བ་དང་གསལ་སྣང་གཉིས་ཀྱིས་མཁན་པོ་བལ་ཡུལ་དུ་བསྐྱལ། སླར་ཕོ་བྲང་དུ་ལོག་ནས་བཙན་པོས་རྒྱ་ཡུལ་དུ་ཕོ་ཉར་བཀའས་གནང་སྟེ་བླ་ནས་དགོངས་པ་འགྲུབ་ན་དངུལ་ཆེན་པོ་བླ་ཐབས་སུ་བུ་ཆེན་པོ་ལ་འཚལ་བར་གཙིགས་བཅས། བཙན་པོས་ཆོས་མཛད་པར་ཞང་བློན་མཐའ་དག་ལ་ཐབས་ཀྱིས་བཀའ་བསྩལ་བར་རྗེ་འབངས་ཆད་བྱས་སྟེ་ཕོ་ཉའི་ཁང་དཔོན་སྦྲན་གཙང་གཞེར་འོག་དཔོན་དུ་སང་ཤི་ཆོས་ཀྱི་སྤྱན་པ་རྦ་གསལ་སྣང་བསྐོས་དཔོན་གཡོག་སུམ་བཅུ་ཙམ་མཆི་བར་ཆས་པའི་ཚེ། རྒྱའི་ཕོ་ཉ་བུམ་སངས་དབང་པོའི་དྲུང་ན་ཇུ་ཞག་མཁན་མཁས་(ཇ༨༢བ)

[Full Size]

པ་ཉིན་བཞིན་ཇུ་ཞག་བརྩི་བ་ཞིག་མཆིས་པ་དེས་དབང་པོ་ལ་གསོལ་བ། ནུབ་ཕྱོགས་ནས་ཕོ་ཉ་བ་ཞིག་དེ་རིང་སང་ལམ་དུ་ཞུགས་སྟེ་ཟླ་བ་དྲུག་ཞག་དྲུག་གིས་བུམ་སངས་སུ་ཕྱིན་པར་མཆི། ཕོ་ཉའི་ནང་ན་བྱང་ཆུབ་སེམས་དཔའི་སྤྲུལ་པ་གཉིས་ཅིག་མཆིས་སྟེ་དེའི་རྟགས་དང་ཤ་ཚུགས་འདི་འདྲའོ་ཟེར་ནས་འབག་གཉིས་བྲིས། དབང་པོས་རྒྱ་རྗེ་ལ་ཕོ་ཉ་བཏང་སྟེ་གསོལ་བ་དང་བཀའ་ལན་དུ་བྱང་ཆུབ་སེམས་དཔའ་དེ་གཉིས་འོངས་པ་དང་རིམ་གྲོ་ཕུ་དུད་སྐྱེད་ལ་དེར་སྡོད་དུ་མ་གཞུག་པར་མར་ཐོང་ཞིག་ཞེས་བྱུང༌། ཟླ་བའི་དུས་བཞིན་ཕོ་ཉས་བུམ་སངས་སུ་ཕྱིན་ཚེ་སྤྱན་པ་དང་འོག་དཔོན་འབག་བྲིས་པ་དང་མཐུན་ནས་དར་གྱི་ལྡིང་ཁང་དུ་བཅུག་ནས་རིམ་གྲོ་དང་ཕུ་དུད་བསྐྱེད་དེ་ཤིང་རྟ་ལ་བསྐྱོན། ཕོ་ཉ་གཞན་རྣམས་རྟ་ལ་བསྐྱོན་ནས་ཀེག་ཤིར་ཕྱིན་པའི་ཚེ་སྔར་བྱང་ཆུབ་སེམས་དཔའི་སྤྲུལ་པ་གཉིས་མཆི་བར་གྲགས་པས་མིང་ཡང་དར་ཁང་དར་ཁང་ཟེར། བཤུལ་ཐོག་ཐོག་དུ་ཧྭ་ཤང་དང་རྒྱ་འབངས་དད་པ་ཅན་སྤྲིན་བཞིན་དུ་འདུས་སྟེ་ཕོ་ཉ་ལྡིང་ཁང་ཅན་གཉིས་ལ་མཆོད་པ་ཆེར་བགྱིས་ནས་ཀེག་ཤིར་བསྐྱལ། རྒྱ་རྗེས་ཀྱང་རྩིག་ངོས་དང་ན་མཁའ་ཀུན་དར་གྱིས་གཡོགས་སྟེ་བཀབ་ནས་བདུད་སྤོས་དང་རོལ་མོས་བསུས་སྟེ་མཆོད་ནས་ཅི་དགའ་བར་རང་ཉམས་སུ་གནང༌། རྦ་གསལ་སྣང་ཁྱོད་ནི་བྱང་ཆུབ་སེམས་དཔའ་ཡིན་ངེས་སྔར་འབག་བྲིས་པ་ཡང་འདི་ཡིན། ཧྭ་ཤང་མངོན་ཤེས་ཅན་ན་རེ་ཁྱོད་ནི་བྱང་ཆུབ་སེམས་དཔའ་རྟ་སྐད་བྱ་བའི་སྤྲུལ་པ་ཡིན་ནོ་ཡང་ཟེར། ངའི་ཐུགས་སུ་ཁྱོད་ལས་འཐད་པ་མ་བྱུང་ན་ཁྱོད་ལ་བྱ་དགའ་ཅི་འདོད་པ་བྱིན་ནོ་ཞེས་བཀའ་བསྩལ་བ་ལས་གསལ་སྣང་གིས་གསོལ་བ། རྗེའི་ཞལ་མཐོང་སྟེ་གློ་བ་དགའ་བའི་སྟེང་དུ་བཀའ་ལུང་སྙན་པ་དེ་ལས་བྱ་དགའ་ཆེ་བ་མ་མཆིས་ན་གཞན་ཅི་ཡང་མི་འཚལ་སྟེ་སྒོམ་ལུང་འབོགས་པའི་ཧྭ་ཤང་ཞིག་དང་སྤྲད་པར་ཅི་གནང་ཞེས་གསོལ་བ་དང་རྒྱལ་པོས་གནང་ཆེན་ཉུང་ངུ་ཞིག་རྒྱ་རྗེའི་གུ་རུབ་ལ་བསྐྱོན་ནས་བཏང་བ་ཨོག་ཆུར་ཕྱིན་སྟེ་ཧྭ་ཤང་བཀུག་སྟེ་མཆིས་པ་དེ་ལས་སྒོམ་ལུང་དང་མན་ངག་ནོད་དེ་འགྲོ་ཁར་གསལ་སྣང་ལ་རྒྱ་བྱེའུ་ཤོག་སྲང་བརྒྱ་པ་ཅིག་དང༌། དར་ཡུག་ལྔ་བརྒྱ། ཕྲ་མེན་(ཇ༨༣ན)

[Full Size]

གྱི་བྱ་དང་ཕྲ་མེན་གྱི་གཞོང་པ་སྲང་བརྒྱ་པ་ཅིག་མུ་ཏིག་སྲན་མ་ཙམ་འདོམ་གང་བ་ཕྲེང་བཅུ། ཟ་འོག་བེའུ་བེན་ཙེ་ཧྭན་ཡུག་གཅིག་སྟེ་བྱ་དགའ་གཞན་པས་ལྷག་པར་དཔགས་སྟེ་བཙལ། བོད་ཀྱི་བཙན་པོའི་བཀའ་ཤོག་གི་སྒྲོམ་བུ་དང་བསྟུན་པའི་ཆད་བྱས། བཙན་པོ་ལ་སྐྱེས་སུ་དར་ཡུག་ཁྲི། ཕྲ་མེན་གྱི་ཞྭ་དང་བླ་གོར་གྱི་སྡེར་མ་འདོམ་གང་པ་ཅིག་བསྐུར། ཕོ་ཉ་གཞན་རྣམས་ལའང་བྱ་དགའ་ཆེ་ཐང་དུ་བསྩལ་ནས་མཆིད་ལན་དང་བཅས་སྟེ་སླར་བོད་ཡུལ་དུ་མཆིས། བོད་ཡུལ་དུ་བཙན་པོས་ཞང་བློན་རྣམས་ལ་སངས་རྒྱས་ཀྱི་ཆོས་མཛད་པར་བཀའ་བགྲོས་མ་ཐག་དུ་གསལ་སྣང་སླེབས་སྟེ་སྐྱེས་ཚོ་ཕུལ་ནས་ཕྱག་བྱས་སྟེ་སུག་ལས་གྲུབ་པོ་ཅེས་གསོལ་ལོ་ཞེས་བྱུང་ངོ༌། །ཀུན་མཁྱེན་བུའི་ཆོས་བྱུང་དུ་ཧྭ་ཞང་མངོན་ཤེས་མཁན་གྱིས་ཕོ་ཉ་འོང་ཞེས་འབག་བྱས་ཅེས་སྣང་ཡང་ཇུ་ཞག་ནི་རྩིས་མཁན་ཡིན་གྱི་ཧྭ་ཤང་མིན་ལ་ཧྭ་ཤང་ནི་རྒྱ་ནག་གི་རབ་བྱུང་བསམ་གཏན་པའི་མིང་ཡིན་ནོ། །ཨོ་ཌྱན་གྱི་མཁན་པོ་སྤྱན་དྲངས་ཚུལ་ལ་མཁན་པོ་ཉིད་ཀྱི་རྣམ་ཐར་དང་ལོ་རྒྱུས་མང་དག་ལས། མཁན་པོ་བོདྷི་ས་ཏྭས་སྔོན་བྱ་རྫི་མའི་བུ་སྤུན་བཞིས་མཆོད་རྟེན་བྱ་རུང་ཁ་ཤོར་བལ་ཡུལ་དུ་བཞེངས་ནས་མཐའ་འཁོབ་ཀྱི་རྒྱལ་ཁམས་འདུལ་བའི་ཕྱིར་རྒྱལ་པོ་དང༌། འདུལ་འཛིན་དང༌། སྔགས་མཁན་དང༌། ཕོ་ཉར་སྨོན་ལམ་རིམ་བཞིན་བཏབ་སྟེ་ད་ལྟ་རྒྱལ་པོ་ཉིད་དང༌། ང་དང༌། པདྨ་སམྦྷ་ཝ་དང༌། རྦ་གསལ་སྣང་རྣམས་ཡིན་པས་སྨོན་ལམ་གྱི་མཐུས་སྤྱན་འདྲོངས་སོ་ཞེས་ལུང་བསྟན། རྒྱལ་པོ་ཐུགས་སྒམ་པས་རྨི་ལམ་དུ་བྱུང་བ་སྐད་བགྱིས་སྟེ་རྦ་གསལ་སྣང་དང་སེང་མགོ་ལྷ་ལུང་གཟིགས་གཉིས་ལ་གཡོག་དུ་རྣ་ནམ་རྡོ་རྗེ་བདུད་འཇོམས། ལྕེ་ཛྙ་ན་སིདྡྷི་མཆིམས་ཤཱཀྱ་བྲབྷ་བྲང་ཏི་ཛ་ཡ་རཀྵི་ཏ། ཤུད་བུ་དཔལ་གྱི་སེང་གེ་དང་ལྔ་སློབ་དཔོན་སྤྱན་འདྲེན་དུ་བཏང་བས་སློབ་དཔོན་གྱིས་མཁྱེན་སྟེ་བལ་ཡུལ་ཡང་ལེ་ཤོད་ནས་རྫུ་འཕྲུལ་གྱི་མང་ཡུལ་གུང་ཐང་དུ་བྱོན། ཕོ་ཉ་བ་རྣམས་ཀྱིས་མཇལ་བས་སྐུ་ལ་མོས་པ་ཐོབ། ཕྱག་རྟེན་གྱི་གསེར་ཕྱེ་བསྐུར་བ་ཕུལ་བ་(ཇ༨༣བ)

[Full Size]

གཏོར་ནས་མ་འོངས་པར་དེར་གསེར་ཁ་འབྱུང་བར་བྱིན་གྱིས་བརླབས། ཕོ་ཉ་རྣམས་འཕངས་སེམས་སྐྱེས་པས་རྡོ་དང་གསེག་མ་ལ་འཁར་སིལ་བསྣུན་པས་ཐམས་ཅད་གསེར་དུ་གྱུར། མང་ཡུལ་གྱི་རི་གཡས་གཡོན་སྤོ་བའི་རྫུ་འཕྲུལ་བསྟན་པས་དད་དེ་གཤེགས་པར་གསོལ་བས་ད་ལྟ་འདྲེ་རྣམས་འདུལ་ཞིང་ཕྱི་ལ་འོང༌། མངལ་སྐྱེས་ཀྱིས་ལྷ་འདྲེའི་ཟེར་མི་ཐུབ་པས་སྔོན་ལ་སོང་ཞིག་གསུངས་སྟེ་བྱིན་གྱིས་བརླབས་ནས་བཏང༌། ཞང་ཞུང་གི་ལྷ་མུ་ཙ་མེན་གྱིས་རི་བར་དུ་བཅར་བར་བྱས་པ་གསེག་ཤང་གི་ཡུ་བ་བསྣུན་པས་རི་ཕན་ཚུན་དུ་བྱེ་སྟེ་སློབ་དཔོན་སྟེང་གི་ན་མཁའ་ལ་བྱོན། ཁ་ལ་རོང་སྒོར་བསྟན་མ་བཅུ་གཉིས་ཀྱིས་ཐོག་ཕབ་པ་ཕྱག་མཐིལ་དུ་ཆུ་བླུག་པ་ལྟར་བཟེད་དེ་ཁྲག་གི་ཐིགས་པ་སྲན་མ་ཙམ་དུ་སོང༌། འུ་ཡུག་དུ་རྡོ་རྗེ་ལེགས་པས་བསུས་ཤིང་མཆོད། གངས་དཀར་མས་ཐོ་བཙམས་པ་སློབ་དཔོན་གྱིས་ལྟ་སྟངས་མཛད་པས་གངས་ཞུ་སྟེ་དཔལ་མཚོའི་ནང་དུ་བྲོས། སྡིགས་མཛུབ་བསྟན་པས་མཚོའི་ཁོལ་སྟེ་ཀེང་རུས་སུ་ལྷགས་སོང༌། མཚོ་ཁར་ཡེར་བྱུང་བ་ལ་རྡོ་རྗེ་བསྣུན་པས་མིག་གཅིག་ཞར་སྟེ་ཤ་མེད་གངས་དཀར་རྡོ་རྗེ་སྤྱན་གཅིག་མ་ཞེས་བཏགས། གཉན་ཆེན་ཐང་ལྷས་སྦྲུལ་ཆེན་པོའི་གཟུགས་ཀྱིས་ལམ་བཀག་པ་ཕྱག་འཁར་བསྣུན་པས་དྲི་ཟ་ཟུར་ཕུད་ལྔ་པར་བྱས་སྟེ་གདུགས་ཚོད་དྲངས། གནམ་སྨན་དཀར་མོ་དང་བྱང་སྨན་ཏིང་ལོ་བཙུན་གྱིས་སྐུ་ལ་ལྷགས་པ་བཏང་བས་མ་ཚུགས་པར་ཟིལ་གྱིས་མནན། གཡར་མོ་ཐང་ལ་སོགས་པར་རྫུ་འཕྲུལ་གྱིས་བྱོན་སྟེ་མདོ་ཁམས་ཀྱི་ལྷ་འདྲེ་བཏུལ། ཡར་ལྷ་ཤམ་པོས་གཡག་དཀར་པོ་རི་ཙམ་དུ་སྤྲུལ་སྟེ་ཐོ་བཙམས་པ་ལྕགས་ཀྱུའི་ཕྱག་རྒྱས་སྣ་ནས་བཟུང༌། ཞགས་པ་དང་ལྕགས་སྒྲོག་གི་ཕྱག་རྒྱས་བསྡམས། དྲིལ་བུའི་ཕྱག་རྒྱས་བཙོགས་པས་བཀའ་ཉན། རྨ་ཆེན་སྦོམ་ར་བཏུལ། ལྷ་འདྲེ་དེ་ཐམས་ཅད་ཀྱིས་སོ་སོར་སྲོག་སྙིང་ཕུལ་དམ་ལ་བཏགས། མལ་གྲོ་གཟི་ཅན་ལ་ཀླུ་གཏེར་བཅུག་ཤབ་སྨད་ཐང་ལྷའི་མཚོ་(ཇ༨༤ན)

[Full Size]

མལ་འགྲོའི་ནང་སོགས་ན་དམྱལ་བ་ཉི་ཚེ་བའི་གནས་ཆུ་ཐམས་ཅད་ཟངས་ཞུན་ལྟར་འཁོལ་ཞིང་ས་གཞི་ལྕགས་བསྲེགས་པ་འདྲ་བ་ན་མཁའ་ལ་བྱ་རྒྱུ་བ་ཡང་འཚིག་ཞིང་ལྷུང་བ་དེ་ལྟ་བུ་མང་དུ་ཡོད་པ་རྣམས་སུ་དཀྱིལ་འཁོར་གྱི་ཆོ་ག་མཛད་དེ་གཟུངས་ཆུ་དང་བྱེ་མ་གཏོར་བས་དམྱལ་བ་པ་རྣམས་དག་པའི་ཞིང་དུ་དྲངས། དམྱལ་བའི་མེ་ཞི་སྟེ་ས་གཞི་ཡུལ་དུ་རུང་བར་གྱུར། ཕོ་བྲང་རླུང་ཚུབས་སུ་བཙན་པོ་དང་མཇལ་སྟེ་ཞབས་ལ་བཏུགས། བསམ་ཡས་ཀྱི་སའི་དཔྱད་མཛད། ཕྱོགས་ཀྱིས་སྤོས་པ་བཞི་ལ་གཏེར་ཀ་དང་མཚམས་ཀྱི་འགྲམས་པ་བཞི་ལ་མེ་བཙའ་མཛད། ན་མཁར་རྡོ་རྗེའི་གར་མཛད་པའི་གྲིབ་མ་གང་བྱུང་དུ་བཙགས་པས་ལྕགས་རི་ཟུར་མང་རྡོ་རྗེ་འགྲོས་སུ་བྱུང༌། མི་མ་ཡིན་ཐམས་ཅད་བྲན་དུ་བསྐུལ་སྟེ་རྒྱལ་ཆེན་བཞིས་ལག་དཔོན་བྱས་ནས་བརྩིགས་པས་ཉིན་མོ་མིས་བརྩིགས་པ་ལས་མཚན་མོ་ལྷ་འདྲེས་བརྩིགས་པ་མཐོ་ཞིང་ཤིང་གཟོ་ལ་སོགས་པ་ཐམས་ཅད་ལེགས་པར་བྱུང༌། བསམ་ཡས་ཀྱི་གཙུག་ལག་ཁང་ཡོངས་སུ་རྫོགས་པ་རྒྱལ་པོའི་ཐུགས་དགོངས་མཐར་ཕྱིན་པར་མཛད་དོ། །འདི་དག་དུ་མཁན་པོ་བོ་དྷི་ས་ཏྭས་རྒྱལ་པོ་ལ་ཕྱག་བྱས་པ་དེ་བཞིན་དུ་སློབ་དཔོན་ཡང་མཛད་དེ་འོང་སྙམ་ནས་རྒྱལ་པོས་ཕྱག་མ་མཛད་པ་ལ་མགུར་བཞེངས་བྱ་བ་སོགས་འདུག་པ་ནི་ཕྱི་རབས་སུ་ལྷད་བཅུག་པར་དྭོགས་སྟེ་རབ་བྱུང་གི་གཟུགས་ཙམ་ལ་ཡང་འདུད་དགོས་པ་སོགས་སྔར་གྱི་བཀའ་ཁྲིམས་ཡིན་ལ། རྒྱ་གར་ན་སངས་རྒྱས་ཀྱི་རྗེས་སུ་ཞུགས་པའི་རབ་བྱུང་ལྟ་ཞོག་ཕྱི་རོལ་པའི་ཀུན་དུ་རྒྱུ་དང་བྲམ་ཟེ་སོགས་ཀྱང་རྒྱལ་པོ་ལ་ཕྱག་མི་བྱེད་དེ་རྒྱལ་པོ་དང་ཕྲད་ན་རྒྱལ་བ་དང་ཚེ་དཔེལ་བ་བྱས་ནས་ཕྱོགས་གཅིག་དུ་འདུག་པར་བྱེད་ལ། རྒྱལ་པོས་དེ་དག་ལ་ཕྱག་བྱེད་པར་བཤད་ཅིང༌། བོད་དུ་རབ་བྱུང་རྣམས་ཁྱིམ་པའི་དཔོན་ལ་ཕྱག་བྱེད་པ་ནི་རྗེ་ས་སྐྱ་པཎྜི་ཏ་ཧོར་གོ་དན་གྱི་ནད་སེལ་བ་ལ་འབྱོན་པའི་ཚེ་ས་སྐྱར་(ཇ༨༤བ)

[Full Size]

དཔོན་ཆེན་ཤཱཀྱ་བཟང་པོ་བསྐོས་ནས་འུ་ཡུག་པ་དང་ཤས་རིན་པ་མ་གཏོགས་དགེ་བའི་བཤེས་གཉེན་ཐམས་ཅད་ཀྱང་ཕྱག་འཚལ་དུ་བཅུག་པ་ཕྱིན་ནས་དར་བ་ཡིན་པས་ཕྱི་རབས་ཀྱི་འདྲ་བཟོ་བྱས་ནས་བཅུག་པར་སྣང་ལ། གཞན་ཡང་གཏེར་བཏོན་རེ། གངས་ཀྱི་སེང་གེ་རེ། ཁྱུང་རེ། ཨུ་དུམ་ཝ་རའི་མེ་ཏོག་རེ་རྣམས་དུས་མཉམ་སྐྱེ་ལ་གཏེར་བཏོན་རྒྱལ་རིགས་སོགས་རིགས་བཞི་པོ་གང་དུ་སྐྱེ་བར་ཨུ་དུམ་ཝ་རའི་མེ་ཏོག་དཀར་སེར་དམར་སྔོ་ཐ་དད་པ་རེར་སྐྱེ་བར་བྲིས་པ་སོགས་ལྷད་མང་དུ་བཅུག་སྣང་སྟེ་མདོ་ལས་ཨུ་དུམ་ཝ་རའི་མེ་ཏོག་ནི་རྫིང་བུ་དལ་འབབ་ཀྱི་འགྲམ་ན་ཨུ་དུམ་ཝ་རའི་ཚལ་ཡོད་པ་ལས་གཞན་དུ་མི་སྐྱེ་ལ་དེར་ཨུ་དུམ་ཝ་རའི་ཤིང་ལོ་མང་བ་ཅན་རྟག་དུ་སྐྱེ་ཡང་མེ་ཏོག་ནི་སངས་རྒྱས་དང་འཁོར་ལོས་བསྒྱུར་བ་ནམ་འབྱུང་བའི་ཚེ་མ་གཏོགས་མི་འབྱུང་ཞིང་དེ་འདས་པ་ན་མེ་ཏོག་དེ་བསྐམས་པར་གསུངས་ལ། འདུལ་བ་ལུང་ལས་ཀྱང་ཀུན་དུ་རྒྱུ་རབ་བཟང་གིས་ཚལ་དེར་རྟག་པར་གནས་པ་ལས་མེ་ཏོག་དེ་མཚན་མར་བཟུང་ནས་དེ་སྐབས་སུ་ཉེ་བར་མཐོང་བ་ན་སངས་རྒྱས་མྱ་ངན་ལས་འདའ་བར་ཤེས་སྟེ་ཕྱིན་ནས་རབ་ཏུ་བྱུང་བར་བཤད་ལ། སྔགས་ལས་ཀྱང༌། ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །ཞེས་འཆད་པ་ཡིན་ནོ། །དེས་ན་གཏེར་བཏོན་རེ་ལ་ཨུ་དུམ་ཝ་རའི་མེ་ཏོག་སྐྱེ་ན་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་སྐྱེས་བུ་ངོ་མཚར་བ་ཐམས་ཅད་ལ་ཡང་སྐྱེ་དགོས་པས་མདོ་སྔགས་གཉིས་ཀའི་སྒྲོམ་འཇིག་ཞིང་མི་ཤེས་པ་རྣམས་ཀྱིས་ལྷད་འདི་ལྟ་བུ་བཏབ་པས་ཆོས་ཀྱི་རྣམ་གྲངས་ཆུད་ཟོས་པར་བྱས་སྟེ་དཔྱོད་ལྡན་རྣམས་དྭོགས་པའི་གནས་སུ་གྱུར་ཅིང་ཆོས་སྤོང་ལ་ཇི་མི་སྙམ་པ་རྣམས་གསང་སྔགས་རྙིང་མ་མཐའ་དག་ལ་སྐུར་བ་འདེབས་པ་འདི་བྱུང་བ་ཡིན་ནོ། །རྦ་བཞེད་ལས་ནི་མཁན་པོ་བོ་དྷི་ས་ཏྭས་སྤྱན་དྲངས་པར་འདོད་པར་སྣང་སྟེ་དེ་ཉིད་ལས། གསལ་སྣང་རྒྱ་ནག་ནས་འཁོར་མ་ཐག་དུ་བཙན་པོས་ད་ནི་བོ་དྷི་ས་ཏྭ་སྤྱན་དྲོངས་ཅེས་བཀའ་བསྩལ་ནས་གསལ་སྣང་གིས་ཀྱང་བོ་དྷི་(ཇ༨༥ན)

[Full Size]

ས་ཏྭ་སྤྱན་འདྲེན་དུ་བལ་ཡུལ་དུ་མཆིས་པ་དང་བོ་དྷི་ས་ཏྭས་ཀྱང་པདྨ་སམྦྷ་ཝ་དང་ལྷ་ཁང་རྩིགས་པའི་ཕྱ་མཁན་དང་གཉིས་མང་ཡུལ་དུ་སྤྱན་དྲངས་སྟེ་བསྡོངས་འདུག་པས་མཁན་པོ་གཉིས་ཀ་གསལ་སྣང་གིས་མང་ཡུལ་ནས་གཟིངས་བཅས་ནས་ཆུ་ཀླུང་ན་སྤྱན་དྲངས་འུ་ཡུག་གི་ཐད་ཀར་གཤེགས་པ་དང་པདྨ་སམྦྷ་ཝའི་ཞལ་ནས་སང་གི་གྲོ་ལམ་ནི་ཉི་ཚེ་བའི་དམྱལ་ཁམས་ཅིག་ཡོད་ཀྱིས་སྙིང་རྗེ་ཞིག་བྱ་དགོས་གསུངས་ནས་གཟིངས་ལས་བབ་སྟེ་འུ་ཡུག་དུ་གཏོར་མ་དང་དགོངས་པ་མཛད་པས་ཆབ་འཇམ་ཙམ་དུ་གྱུར། དེ་ནས་གནམ་གྱི་ཆུ་ཁོལ་དུ་བྱོན་ནས་དེར་སྔ་དྲོ་གཅིག་དགོངས་པ་མཛད་པས་ཆུ་ཡང་འཇམ་ཙམ་རེད་སྟེ་རླངས་པ་ཆད་པ་ཡང་ཞག་གསུམ་ཙམ་བགྱིས། དེ་ནས་གལ་སྟེ་ལ་ཡང་ཟེར་གཤེ་ཆུ་ལ་བཤུལ་ཕྱུང་ནས་གཤེགས་པ་དང༌། བོད་ཁམས་སུ་ཆོས་མཛད་དུ་མི་སྟེར་བའི་ཀླུ་དཀར་པོའི་ཕྲུ་གུ་མི་སྲུན་པ་ཅིག་ཡོད་པ་དེ་དམ་འོག་དུ་གཞུག་ཅིང་འདུལ་དེའི་དྲུང་ན་ཡང་ཉི་ཚེ་བའི་དམྱལ་བ་ཞིག་ཡོད་པས་དེར་ཡང་སྙིང་རྗེ་ཞིག་བྱ་དགོས་གསུངས་ནས་འདམ་སྙིང་དྲུང་དུ་བྱོན་པ་དང༌། ཀླུ་ཚངས་པ་བྱ་བའི་མི་ཚན་གཅིག་ན་རེ་མཁན་པོ་ལ་གནོད་སྦྱིན་འདུལ་བའི་ཐབས་བལྟ་ཅེས་ཞུས་པ་དང་མཁན་པོས་ཟངས་ཁལ་ཚད་མ་ཞིག་ཕྱུང་ནས་དེར་ལུང་བོང་གི་རོ་ཞིག་བཅོས་ནས་ཟངས་ལ་ཞབས་བསྣུན་ནས་སྤུབ་པས་ཐང་ལྷ་ཁྲོས་སྟེ་དགུན་ཟླ་འབྲིང་པོ་ལ་གངས་རྩེ་ལ་ཏུག་ཅོམ་བྱུང༌། སྤྲིན་ནག་པོ་ཞིག་ཡང་ཆགས་ནས་སེར་བ་བབ། གློག་དང་འབྲུག་སྒྲ་དྲག་པོ་བྱུང༌། དེ་ཕྱིན་ཆད་ཡུལ་ཕྱོགས་དེ་དུལ་སྟེ་ཐབ་ཀྱང་སྔོན་པས་གཡུང་བར་གྱུར། དེ་ནས་དེ་ཉིད་ཏུ་དགོངས་པ་མཛད་པ་དང་སྙིང་དྲུག་གི་ཆུ་ཁོལ་བའི་རླངས་པ་ཅད་ནས་འཇམ་ཙམ་དུ་རེད་པ་ཟླ་བ་གཅིག་བགྱིས་སོ། །ཡང་ཐང་ལྷ་དམ་འོག་དུ་གཞུག་པར་དགོངས་པ་དང་ཐང་ལྷའི་གངས་ལ་སྤྲིན་ནག་པོ་ཆགས་གློག་དང་འབྲུག་དང་སེར་བ་བབ་པ་དང་མཁན་པོའི་ཞལ་ནས་ཀླུ་ཕྲུ་གུ་མི་སྲུན་པ་ཅིག་རྒྱ་མཚོར་བྲོས་གསུངས་ནས་ཞག་གསུམ་དགོངས་པ་མཛད་(ཇ༨༥བ)

[Full Size]

པས་ཐུག་ཆོམ་ཡང་མ་མཆིས། ཡུལ་ཡང་འཇམ་པར་གྱུར། ཀླུ་དམ་ལ་ཐོགས་སྟེ་ཐང་ལྷས་བཀའ་ཉན་དུ་ཁས་བླངས་གདུགས་ཚོད་དྲངས་སོ། །དེ་ནས་མ་ལེ་ཤོར་བྱོན་ནས་འཕན་ཡུལ་གཟིགས་པས་ཡུལ་ངན་རྟ་རོ་དམར་པོ་ཁ་ཕྱེ་བ་འདྲ་བ་འདི་ལ་མི་འགྲོ་གསུངས་ནས་སྟོད་ལུངས་ཡ་རལ་ན་ཡར་བྱོན། བཙུན་མོ་ཕྲེང་གི་བྲག་ལ་ཨ་ཙ་ར་འགྲོ་འཕྲོ་ལ་རེངས་པ་འདྲ་བ་འདིའི་གོང་མ་བཅད་ན་མུ་སྟེགས་ཅན་གྱི་རིགས་བོད་དུ་འཆོར་གསུངས་ནས་བཅད། གཞོང་པར་གྲོ་ཐོབ་གསུང་ནས་ཆུ་མ་མཆིས་བྱས་པས་ཆབ་དབྱུང་བར་བྱ་གསུང་ནས་གསེག་ཤང་གི་ཡུ་བ་ས་ལ་ཐམས་ཐམས་བརྒྱབ་པས་ཆུ་ཁ་བཅུ་བྱུང་སྟེ་གཞོང་པའི་ལྷ་ཆུར་གྲགས། སྙེ་འཕྲེང་དུ་ངའི་གྲོ་རན་གསུང་བ་དང་མཁར་ནག་གི་མཚོ་འདི་ལ་ཀླུ་བཙན་དྲག་པོ་འདུག་པས་འདུལ་ལོ་གསུངས། འདི་ཤིན་ཏུ་ཐུ་བ་ཞིག་འདུག་པས་འདུལ་བྱེད་ཅིག་བྱ་གསུངས་ནས་བྲག་ལ་བཅོམ་ལྡན་འདས་རྡོ་རྗེ་སེམས་པའི་སྐུ་ཅིག་བསྐྱེད་པས་རང་བྱུང་དུ་བྱུང༌། བལ་པོའི་རྡོ་མཁན་ན་རེ་བོད་ཀྱི་རྡོ་ལ་གཟོ་བཏུབ་མི་བཏུབ་བལྟའོ་ཟེར་ནས་བྲག་ལ་ཤ་བའི་གཟུགས་ཅིག་བརྐོས་སོ། །དེ་ནས་དམ་ཤོད་ལ་བྱོན་ཟུར་མཁར་འཕྲང་ལ་རྡོའི་མཆོད་རྟེན་ལྔ་མཛད། ཟ་ཧོར་གྱི་མཁན་པོ་ཕོ་བྲང་དུ་གཤེགས་ནས་བཙན་པོ་ལ་བརྡ་སྦྱར། བཙན་པོ་བསུས་སྟེ་ཕྱག་མཛད་པས་སློབ་དཔོན་གྱིས་བསྙུན་རྨེད། སློབ་དཔོན་གྱིས་ཕ་བང་ཞིག་ལ་ཕྱག་གཡས་པའི་ཐལ་མོ་ཕྱིར་མཛད་པས་ཕ་བང་ཤགས་ཀྱིས་གས། ད་ཕྱགས་གར་འབེབས་ཅེས་པ་ལ། སང་ཤིས་དེའི་བར་བྲག་དམར་མགྲིན་བཟང་འཁོར་ས་སྒོ་མ་མཆིས་པ་ཅིག་ལ་ནང་ལྷ་ཁང་རྒྱའི་དེའུ་ཤན་ལ་དཔེ་བླངས་པ་ཅིག་བཞེངས་ཚར་ནས་དེར་ཕྱགས་ཕེབས་པར་ཞུས། དེ་དུས་ཨཱ་ཅཱརྻ་བོདྷི་ས་ཏྭས་བཙན་པོ་ལ་གསོལ་བ། སྔོན་སངས་རྒྱས་འཇིག་རྟེན་ན་བཞུགས་པའི་ཚེ་ལྷ་མ་སྲིན་དམ་འོག་དུ་མ་ཚུད་པ་མ་མཆིས་པར་རིགས་པ་ལ་བོད་ཡུལ་ན་དམ་འོག་དུ་མ་ཚུད་པའི་ལྷ་འདྲེ་གདུག་པ་ཅན་མང་དུ་མཆིས་པས་བཙན་པོ་ཆོས་མཛད་དུ་མི་སྟེར་བ་ལ་ད་ལྟ་འདིར་འཛམ་བུའི་(ཇ༨༦ན)

[Full Size]

གླིང་ན་ནུས་པ་ཆེ་བའི་པདྨ་འབྱུང་གནས་ཅེས་བྱ་བ་འདི་སྤྱན་དྲངས་ནས་བཞུགས་པས་སྔོན་ཆོས་མཛད་དུ་མི་སྟེར་བར་འཕང་ཐང་དུ་ཆུ་བོ་ཆེ་གཏོང་བ་དང༌། ཤམ་པོའི་གངས་བསྙིལ། བོད་ཁམས་སུ་མི་ནད་ཕྱུགས་ནད་དང་མུ་གེ་ལོ་ལྔར་འབེབས་པ། ལྷ་སའི་མཁར་དུ་ཐོག་འབེབས་ཤིང་མེས་གཏོང་བ་སོགས་གཟིགས་ལྟས་ངན་པ་གཏོང་ཞིང་བར་ཆད་དགྱིད་པའི་བགེགས་རྣམས་རི་རབ་ངོས་ཀྱི་རྒྱལ་པོ་ཆེན་པོ་བཞི་མི་ལ་ཕབ་སྟེ་དེའི་ཐན་ལས་བྱུང་བ་བཞིན་དམ་ལ་འདོགས་པའི་ཆོ་ག་ནི་སྔགས་མཁན་འདིས་རྔོ་ཐོགས། བཙན་པོ་ཆོས་མཛད་པ་ལ་རྩོད་ཅིང་རྒོལ་བ་བྱུང་ན་ཕྱི་རྒོལ་གྱི་གཏན་ཚིགས་སྨྲ་བ་ནི་ཁོ་བོ་ལས་མཁས་པ་མ་མཆིས། གཙུག་ལག་ཁང་རྩིག་པའི་ལྟས་དང་བཀྲ་ཤིས་མི་ཤིས་དང་ཆོས་ཚུགས་མི་ཚུགས་རྟོག་པའི་ཕྱ་མཁན་མཁས་པ་འདི་ཙམ་དུ་གཞན་ན་མེད་པས་ཁྲིད་དེ་འོངས་པ་ཡིན། དེ་ལྟར་མཛད་ན་རྒྱལ་པོའི་དགོངས་པ་ཡང་འགྲུབ་བོ་ཅེས་གསུངས་སོ། །དེར་སང་ཤིས་མགྲིན་བཟང་གི་མངའ་གསོལ་བ་སློབ་དཔོན་པདྨ་ལ་ཞུའོ་ཞེས་ཞུས་སྟེ་རྒྱལ་པོའི་གནང་ཆེན་གཟིམས་མལ་བ་ཀུན་ཡང་མཆིས། སློབ་དཔོན་པདྨས་ལྷ་མངའ་གསོལ་བས་ལྷ་ཐམས་ཅད་ནས་ནང་ནས་བཀད་སར་བྱོན། ནམ་ཕྱེད་ན་བློན་པོ་རྣམས་ཀྱིས་མར་མེ་ཁྱེར་ནས་བལྟས་པས་ནང་ན་འཇིམ་གཟུགས་གཅིག་ཡང་མེད་དེ་སྟོང་བར་འདུག་ནང་པར་བལྟར་ཕྱིན་པས་འཇིམ་གཟུགས་ཐམས་ཅད་སྔ་མ་ཁོ་ན་བཞིན་ནང་ན་བཞུགས་ནས་སློབ་དཔོན་པདྨས་མཆོད་པ་བྱེད། ལྷ་རྣམས་གཏམ་སྨྲ་བ་དང་བཤོས་གསོལ་བ་མཐོང༌། མར་མེ་ཐམས་ཅད་རང་འབར་རོལ་མོ་ཐམས་ཅད་རང་འཁྲོལ་སྤོས་ཐམས་ཅད་རང་བསྲེགས་ཅིང་འཐུལ། འཕན་ལྔ་བཏགས་པ་ལྔ་བརྒྱར་འཕེལ། ཅོང་རང་བརྡུང་ཞིང་འཁྲོལ། རྒུན་འབྲུམ་རྡོག་པོ་སྙིམ་པ་ཙམ་པ་དེ་སུས་ཀྱང་འཚལ་བར་རྔོ་མ་ཐོགས། དེའི་ནང་པར་སློབ་དཔོན་པདྨས་དཀྱིལ་འཁོར་བྲིས་སྟེ་གཟིམས་མལ་བ་ལྷ་ལུང་འཚོ་བཞེར་སྙན་ལེགས་ལ་པྲ་རྟེན་བྱས་སྟེ་པྲ་སེ་ན་ཏ་ཕབ་སྟེ་སྨྲར་བསྩལ་བས་བོད་ཀྱི་ཀླུ་མི་སྲུན་པ་རིལ་གྱི་མིང་སྨྲས་སྟེ་འཕང་ཐང་དུ་(ཇ༨༦བ)

[Full Size]

ཆུ་ཕབ་པ་ཤམ་པོ། ལྷ་སར་ཐོག་འབེབས་པ་ཐང་ལྷ། མུ་གེ་དང་ལོ་ཉེས་དང་མི་ནད་གཏོང་བ་བསྟན་མ་བཅུ་གཉིས་ལ་སོགས་པ་ཀུན་སྨྲས། དེའི་སང་རིགས་བཟང་པོའི་བུ་ཚ་ཕ་མ་མེས་ཕྱི་ཚང་བ་བཅུ་ཙམ་བསགས་སྟེ་པྲ་རྟེན་བགྱིས་ནས་རྒྱལ་པོ་ཆེན་པོ་བཞིའི་པྲ་ཕབ། གནོད་སྦྱིན་མེ་ལྷས་ཞལ་མངོན་སུམ་དུ་བསྟན། ལྷ་ཀླུ་མ་རུངས་པ་དངོས་སུ་མི་ལ་ཕབ་ནས་པདྨ་སམྦྷ་ཝས་བསྡིགས་ཤིང་གཟེར། དཀར་པོ་ལ་ཆོས་བཤད་ནས་དམ་ལ་འདོགས་པ་ནི་བོ་དྷི་ས་ཏྭས་མཛད། དེས་མ་ཐུལ་བ་པདྨ་སམྦྷ་ཝས་སྦྱིན་སྲེག་མཛད་ནས་མ་མཆིས་པར་བྱས། དེ་འདྲ་བ་ལན་གཉིས་བགྱིས་སྟེ་སློབ་དཔོན་པདྨའི་ཞལ་ནས་ལྷ་ཀླུ་དམ་འོག་དུ་ཚུད་ལགས་སྟེ་ད་དུང་དེ་འདྲ་བ་ལན་གཅིག་དགྱིད་འཚལ། སླན་ཆད་ལྷ་ཆོས་ཅི་བདེར་མཛད་པ་དང་གཙུག་ལག་ཁང་དགོངས་པ་བཞིན་དུ་རྩིགས་ཅིག་གསུང༌། ཟུར་ཕུད་རྐྱང་དུ་ཚལ་དུ་ཀླུ་བཏུལ་བས་གཟི་ཅན་དངོས་སུ་བྱུང་ནས་སའི་སྟེང་ན་རྒྱལ་པོ་ཁྲི་སྲོང་ལྡེ་བཙན་ཆེ། སའི་འོག་ན་རྒྱལ་པོ་ང་ཆེ་བས་ངེད་ཅག་གྲོགས་པོ་བྱས་ལ་རྒྱལ་པོ་ལྷ་ཁང་རྩིག་པའི་གསེར་ཕྱེ་ཁལ་བཅུ་བཞི་བྱིན་གྱིས་གསེར་ཁུང་གླང་པོ་སྣར་ལེན་དུ་ཐོང་ཟེར་ནས་ཕུལ། ཤམ་པོ་བཏུལ་བས་སློབ་དཔོན་གྱི་ཐོག་དུ་ཆུ་ཕབ། སློབ་དཔོན་གྱི་སྦས་སྣ་ནས་རྡོ་རྗེ་གདེངས་པས་ཆུ་གྱེན་ལ་ལོག་སྟེ་ལྷ་རྫིང་དུ་མིང་ཆགས། རྡོ་རྗེ་བརྒྱབ་པས་ཆུ་ཁོལ། ཤམ་པོ་ཁོ་རང་གངས་ཞུ་བའི་རྩེ་ལ་བསྡད་ནས་སློབ་དཔོན་ང་ལ་དེ་ཙམ་དུ་ཐོ་འཚམ་ཟེར། སློབ་དཔོན་གྱི་ཞལ་ནས་ཁྱོད་ང་ལ་དེ་བས་དེ་ཙམ་དུ་ཐོ་འཚམ་པ། ད་ངའི་དམ་འོག་དུ་མ་ཞུགས་ན་ཁྱོད་སྲེག་གོ་གསུངས་པས། ང་ནག་པོའི་རིགས་ཡིན་ཆོས་བགྱི་བའི་སྐབས་མ་མཆིས་ད་མན་ཆད་གནོད་པ་མི་བྱའོ་ངའི་དྲུང་དུ་སེར་ཆགས་མ་བཏང་ཞིག་ཟེར་ནས་དམ་བཅས། དེ་ནས་ད་དུང་སྦྱིན་སྲེག་ཞིག་བགྱིའོ་གསུང་བ་དང༌། བཙན་པོ་དབུ་འཁྲུ་བར་བཞེད་པ་ལ་བོ་དྷི་ས་ཏྭའི་ཞལ་ནས་བོད་ཀྱི་བཙན་པོ་དབུ་བསིལ་ཟེར་ན་ཆབ་གང་ནས་ལེན་གསུངས་པས་བཞེང་བླ་ན་རེ་འོམ་བུ་ཚལ་ནས་ལེན་ཞེས་གསོལ། (ཇ༨༧ན)

[Full Size]

མཁན་པོའི་ཞལ་ནས་རི་རབ་ཀྱི་བྱང་ངོས་ན་ཆུ་མིག་རྟ་རྣ་བྱ་བ་ཡོད། དེ་ནས་ཆུ་བླངས་སྟེ་དབུ་བསིལ་ན་རྒྱལ་པོ་སྐུ་ཚེ་ཡང་རིང༌། ལྷ་སྲས་རིགས་རྒྱུད་ཀྱང་འཕེལ། ཆབ་སྲིད་ཀྱང་ཆེ། དགོས་རྒུ་ཡང་འགྲུབ་པས་ཆབ་དེ་སུས་ལེན་ནུས་གསུང་བ་རྒྱལ་པོའི་སྙན་དུ་གསན་ནས་བསྒྲགས་པའི་སར་མཁན་པོ་པདྨ་སམྦྷ་ཝའི་ཞལ་ནས་དེ་ངས་རྔོ་ཐོགས་གསུངས་ནས་ག་ཤའི་འོག་ནས་བཀྲ་ཤིས་ཀྱི་བུམ་པ་གསེར་ལས་བགྱིས་པ་ཅིག་ཕྱུང་བ་ལ་ཁ་དར་དཀར་གྱིས་བཅང་བཞིར་བླས་རྒྱས་བཏབ་སྟེ་མཁན་པོས་སྔགས་བཏབ་ནས་ན་མཁའ་ལ་འཕངས་པས་ཇེ་མཐོ་ཇེ་མཐོ་ལ་མི་སྣང་བར་སོང༌། དར་ཅིག་ནས་ཛབ་ཁུང་དུ་རྨ་བྱའི་སྒྲོས་བྱབས་པ་དང་ཟན་ཟ་ཡུན་ཙམ་ན་བུམ་པ་ན་མཁའ་ལ་སེར་རྒྱང་གིས་སློབ་དཔོན་གྱི་པང་དུ་བྱུང༌། ཁ་ཕྱེ་བས་ཆུ་འོ་མ་འདྲ་བས་གང་འདུག་དེས་དབུ་ཁྲུས་ཅེས་བློན་པོ་ཀུན་ལ་གཏད་ནས་འདུན་སར་བྲིམས་པ་ལས་འདུན་ས་ཆུང་ངུ་ནས་ལུང་གསལ་བ། འདི་མོན་གྱི་སྨྱོ་ཆུ་ཡིན་སྟེ་སྐུའི་རིམ་གྲོར་མི་སྨན་པས་ཕོ་ལ་ཐོང་ཞེས་མ་མཆིས་པར་བགྱིས། གཞན་ཡང་སློབ་དཔོན་པདྨའི་ཞལ་ནས་བོད་བྱིན་སྐྱིད་པར་བགྱི་བས་བཻ་ཤྲ་ཝ་ཎ་ལས་ནོར་བསླངས་སྟེ་ནོར་མེད་པ་ལ་ནོར་སྦྱིན། ཛམྦུ་གླིང་གི་དཀོར་ཁུང་སྲིད་དོ་ཅོག་ཀྱང་བོད་ཁམས་སུ་འབྱུང་བར་བྱ། དམ་ཤོད་གྲ་དོལ་སྟག་ལ་ཕུ་སོགས་ཆུ་དཀོན་པ་དང་ཆུང་བ་རྣམས་སུ་ཆུ་ཕྱུང་ལ་གྲམ་པ་ཐམས་ཅད་ཞིང་དུ་བྱས་ལ་ཞིང་གིས་བོད་ཀུན་འཚོ་བར་བྱ། གཙང་པོ་དང་མཚོ་ཀུན་སྒྲོམས་སུ་བཅུག་ལ་མིས་འཕྱོང་དུ་རུང་བར་བྱ། ངས་ཨོ་ཌྱན་དུ་གཙང་པོ་འདི་བས་ཆེ་བ་ཞིག་སྦུབས་སུ་བཅུག་གསུངས། དམ་ཤོད་ཀྱི་བྱེ་མ་ཐམས་ཅད་ཚལ་དང་ནེ་གསིང་དུ་བསྒྱུར། བོད་ཡུལ་ངན་པ་ཀུན་བཟང་པོར་བྱས་སྟེ་ཐམས་ཅད་ཉམས་དགའ་བར་བྱའོ་ཞེས་དེ་ལྟར་མཁན་པོས་རྒྱ་ཆེན་པོར་གསུངས་པ་དང༌། འགྲུབ་བམ་མི་འགྲུབ་འདུན་ས་ཆུང་ངུ་ནས་རྗེ་བློན་མོལ་སྟེ་བཀའ་གྲོས་མཛད་ནས་དེ་ལྟར་འོང་མི་འོང་ཉམ་སད་པ་ལས་ཨོ་ཌྱན་གྱི་མཁན་པོས་སྔ་དྲོ་གཅིག་བསྒོམས་པས་མཚོ་མོ་མགུར་གྱི་བྱེ་(ཇ༨༧བ)

[Full Size]

མའི་ཞབས་ནེ་གསིང་དུ་སྔོ་ཕྱུར་ལ་བཏང༌། དེའི་ཕྱི་འབྲེང་བྲག་དམར་གླ་བ་ཚལ་གྱི་སྨད་ནགས་སུ་བཏང༌། ཀླུ་རྫིངས་སུ་ཆུ་བྱུང༌། ད་དུང་ཉམ་སོད་དང་བྱས་ནས་སྔ་དྲོ་གཅིག་བསྒོམས་པས་ཟུར་མཁར་ནས་ཆུ་རྗེན་ནར་གྱིས་བྱུང་སྟེ་ཆུ་མིག་བྱུང་བ་དང་འོང་ངེས་པར་འདུག་པས་བློན་པོ་དག་ན་རེ་བོད་ཡུལ་བཟང་པོར་བྱས་པའི་སྔགས་མཁན་གྱི་མཐུ་དང་སྦྱར་ན་ཆབ་སྲིད་རྒྱ་གར་གྱིས་ཕྲོགས་སྟེ་འགྲོ་ཞེས་འདུན་ས་ཆུང་ངུར་གྲོས་བྱས་ནས་འཕྲོ་འགུམ་པར་ཆད་དེ་སློབ་དཔོན་གྱིས་ད་ཞིང་བྱའོ་གསུངས་པས་ཞིང་ཡར་ལུངས་ཀྱིས་ཆོག་ཟེར་སྟེ་སྔགས་མཁན་ལ་ཕྱག་བྱས་སྟེ་བྱ་དགའ་ཆེན་པོ་ཕུལ་ནས་སླར་རྒྱ་གར་དུ་བཞུད་པར་ཞུ་བ་ཕུལ་བས་རྒྱལ་པོ་མ་དགྱེས་ནས་སློབ་དཔོན་ལ་གསེར་ཕྱེ་བྲེ་གང་ཕུལ་ཕྱག་དང་བསྐོར་བ་བྱས་སྟེ་སྔར་ལྟར་ཞུས་པས་སློབ་དཔོན་གྱི་ཞལ་ནས་ང་གསེར་འདོད་པ་མ་ཡིན་སྟེ་བོད་མཐའ་འཁོབ་ཏུ་འདྲེ་སྲིན་གདུག་པ་ཅན་བཏུལ་ལ་བཙན་པོ་ཆོས་བྱར་བཏུབ་པར་བྱ། བོད་ཡུལ་བཟང་པོར་བྱས་ལ་འབངས་བདེ་བ་ལ་དགོད་པའི་ཕྱིར་འོངས་ཀྱི་གསེར་འདོད་ན་འདི་ཙུག་བྱས་པས་ཆོག་གསུངས་ནས་མཁན་པོས་རྡོ་དང་ཤིང་དང་རྩ་དང་བྱེ་མ་སོགས་ཕྱག་གིས་བཟུང་ཚད་རེག་ཚད་གསེར་ཕྱེར་རེད་དེ་བཙན་པོའི་ཐུགས་སྲུང་བའི་ཆེད་དུ་གསེར་ཕྱེ་ཁྱོར་གང་བསྣམས། ལྷག་མ་བཙན་པོ་རང་ལ་ཕུལ་སྟེ་བྲག་དམར་འོམ་བུ་ཚལ་དུ་རྗེ་འབངས་ཉི་ཤུ་རྩ་གཅིག་ལ་མན་ངག་ལྟ་བའི་ཕྲེང་བ་བཤད་ནས། རྒྱལ་པོ་ཆེན་པོ་ངའི་གསང་སྔགས་འདི་ལྟ་བ་ཆོས་ཀྱི་སྐུ་དང་བསྟུན། སྤྱོད་པ་བྱང་ཆུབ་ཀྱི་ཕྱོགས་དང་བསྟུན། ལྟ་བའི་ཕྱོགས་སུ་སྤྱོད་པ་མ་ཤོར་བར་མཛོད། ཤོར་ན་དགེ་མེད་སྡིག་མེད་དུ་སོང་ནས་ཆད་པར་ལྟ་བ་སྐྱེས་ནས་ཕྱིས་གསོར་མི་རུང༌། སྤྱོད་པའི་ཕྱོགས་སུ་ལྟ་བ་འབྲེངས་ནས་དངོས་པོའི་མཚན་མས་བཅིངས་ནས་གྲོལ་བར་མི་འགྱུར། ངའི་སྔགས་སེམས་ཕྱོགས་འདི་ལྟ་བ་ཤས་ཆེ་སྟེ་མ་འོངས་པ་ན་ཚིག་གི་དོན་མི་ཤེས། རྒྱུད་ལ་འཁེལ་བའི་ལྟ་བའི་གདེང་ནི་མེད་ཅིང་མ་རྙེད་ནས་མང་པོ་ཅིག་ངན་སོང་དུ་འགྲོ་བར་འགྱུར་རོ། །(ཇ༨༨ན)

[Full Size]

ལྟ་སྤྱོད་ཡ་མ་བྲལ་བ་འགའས་སེམས་ཅན་མང་པོའི་དོན་ཡང་བྱེད་པར་འགྱུར། སྤྱིར་གང་ཟག་གིས་བཅོས་སྟེ་འདྲ་མིན་མང་བས་བྱིན་རླབས་ཉམས་པས་རྟོགས་པ་ཅན་ཉུང༌། མ་བསླད་པ་འདི་ཀུན་སྦས་ན་ནམ་ཞིག་ལས་ཅན་འགའ་ཞིག་གི་དོན་དུ་འགྱུར་གསུངས་ནས་དཔེ་མང་པོ་ཅིག་རྫ་ལ་སྦས་སོ། །བཙན་པོ་ལ་དབང་རིམ་མཛད་ནས་ཐེག་པ་ཆེན་པོ་གསང་སྔགས་ཀྱི་ལུང་གནང༌། ཕུར་བུ་འབུམ་སྡེ་བཤད་ནས་སྨོན་ལམ་འོག་མིན་གྱི་གནས་སུ་གདབ་གསུང་སྟེ། བདག་དང་གཏན་པ་མེད་པའི་སྦྱིན་བདག་རྣམས། །ཚེ་རབས་འདི་དང་ཚེ་རྒྱུད་གར་སྐྱེས་ཀྱང༌། །འོག་མིན་ཞིང་མཆོག་དག་པར་ལྷན་ཅིག་དུ། །རྣལ་འབྱོར་ཐེག་ཆེན་འབྲས་བུ་སྤྱོད་པར་ཤོག །ཅེས་གསུངས་ནས་སྦྱིན་སྲེག་གི་འཕྲོ་མ་གྲུབ་པར་སླར་གཤེགས། སྐྱེལ་མིས་ཆིབས་ཁྲོད་ནས་ཡར་ལ་སྤྱན་དྲངས། མཁན་པོ་རྒྱ་གར་ཡུལ་དུ་སྐྱེལ་མི་བཏང་བ་དང༌། བློན་པོ་ཁ་ཅིག་ན་རེ་སྔགས་མཁན་དེ་མ་བསད་ན་དེ་ནུས་པ་ཆེ་བོད་ལ་བྱད་བྱས་པར་འོང་བས་འདུན་ས་ནས་བཅད་དེ་གསོད་མི་བཅོ་བརྒྱད་བཏང་ཟེར་ནས་དོང་ཕབས་ཀྱི་འཕྲང་ལ་བསྒུགས་པ་དང་སློབ་དཔོན་དཔོན་གཡོག་མང་ཡུལ་དུ་སླེབས་སྟེ་བྱོན་པའི་དགོངས་མོ་སང་ནི་འོ་ཅག་ལ་གནོད་འཚེ་བྱེད་པ་འོང་ངོ་ཞེས་སྐྱེལ་མི་རྣམས་ལ་གསུངས། འཕྲང་དུ་བྱོན་པ་དང་སྟག་སྣར་གསོད་མི་བཅོ་བརྒྱད་པོ་རྣམས་ཀྱིས་ལ་ལས་མདའ་བཀང༌། ལ་ལས་མདུང་མནན། ལ་ལས་གྲི་ཕྱུང་སྟེ་སློབ་དཔོན་ལ་རྡེག་པར་བྱས་པའི་ཚེ་སློབ་དཔོན་གྱིས་ཕྱག་རྒྱ་བཅིངས་པས་མི་བཅོ་བརྒྱད་པོས་སྨྲས་ཡང་མ་ཤེས་བརྡེག་པ་བས་འགུལ་ཡང་མ་ནུས་སྟེ་འཇིམ་གཟུགས་དང་གྱང་རིས་བཞིན་དུ་རེངས་པའི་ནང་ནས་གཤེགས་སྟེ་མང་ཡུལ་གྱི་ལ་ཁར་བྱོན་ནས་སྐྱེལ་མི་ཀུན་བརྫངས་པ་ལས་མཁན་པོའི་ཞལ་ནས་བོད་ཁམས་སུ་ལྷ་ཀླུ་འདྲེ་སྲིན་དམ་འོག་དུ་ལན་གསུམ་བཅུག་ན་བཙན་པོ་ཡང་སྐུ་ཚེ་རིང༌། དབོན་སྲས་ཆབ་སྲིད་ཆེ། སངས་རྒྱས་ཀྱི་ཆོས་ཀྱང་ཡུན་རིང་དུ་གནས་པ་ཅིག་ན་འཕྲོ་(ཇ༨༨བ)

[Full Size]

ལུས་པ་ཡིད་ལ་གཅགས། ཆོས་འཁོར་གཅིག་ནི་འབྱོངས་ནས་འོང་སྟེ་སྤྱིར་སངས་རྒྱས་ཀྱི་ཆོས་གང་བྱུང་སར་མུ་སྟེགས་ཀྱི་འགྲན་ཟླ་རེ་བྱུང་ནས་རྩོད་པ་བྱེད་དགོས་པ་ལ་བོད་ཁམས་སུ་ཆོས་བྱུང་བ་ལྔ་བརྒྱའི་ཐ་མ་ལ་བབ་པ་ལས་ཆོ་མ་བྱུང་བས་མུ་སྟེགས་ཀྱི་རྒོལ་བ་ནི་མི་འབྱུང་ན་སངས་རྒྱས་པ་ཉིད་ནང་རྩོད་པ་ཅིག་དུ་འགྱུར། ཆོས་ལ་ཡང་རྐེད་ཉག་ཕག་རེ་འོང༌། བོད་ཁམས་སུ་འཁྲུག་པ་ཆེན་པོ་ཅིག་ཀྱང་འབྱུང་ཞེས་བཀའ་བསྩལ་སྟེ་སྐྱེལ་མི་རྣམས་ལ་ཡུངས་དཀར་པར་གང་གཏད་ནས་ང་ལ་མདའ་འཕེན་པ་རྣམས་ལ་ཐོབ་ཅིག་དང་དོད་འགྲོ་ནུས་པར་འགྱུར་རོ་གསུངས་ནས་སྐྱེལ་མི་མར་ལ་ལྡོག །ད་རེ་ཞིག་མི་ཡུལ་ན་ང་ལ་གདུལ་བྱ་མེད་གསུངས་ནས་ལྷོ་ནུབ་མཚམས་སུ་སྲིན་པོ་འདུལ་དུ་འགྲོ་གསུངས་སྟེ་ཆིབས་ཁ་ནས་འཕུར་ནས་སྤྲིན་གྱི་གསེབ་ན་ཕར་ཆོས་གོས་སྤུར་རེ་གསེག་ཤང་ཁྲོལ་ལེ་བཞུད། སྐྱེལ་མིས་གསུང་བཞིན་དུ་དོང་ཕབས་ཀྱི་གསོད་མི་འབག་བྲིས་པ་བཞིན་སོང་བ་རྣམས་ལ་ཡུངས་དཀར་བཏབ་པ་དང་འགྲོ་ནུས་ཅིང་སྨྲ་ཤེས་པར་གྱུར་ཏོ། །སྐྱེལ་མི་རྣམས་ཕོ་བྲང་དུ་ཕྱིན་ནས་ཇི་སྐད་གསུང་བ་བཞིན་ལོ་རྒྱུས་སྙན་དུ་གསོལ་བས་བཙན་པོ་ཡང་ཐུགས་ལ་རབ་ཏུ་བཅགས་པར་གྱུར་ཏོ། །ཅེས་བྱུང་ངོ༌། །དེས་ན་རྦ་བཞེད་ལས་བསམ་ཡས་ཀྱི་རྨང་མ་བཏིང་བར་སློབ་དཔོན་སྲིན་ཡུལ་དུ་གཤེགས་པ་འདྲ་བ་ཞིག་སྣང་བ་འདི་ནི་སློབ་དཔོན་ཆེན་པོའི་ལོ་རྒྱུས་རྣམས་ཕྱོགས་གཅིག་དུ་བསྡེབས་ནས་བྲིས་པ་ཅིག་ཡིན་པ་སྙམ་སྟེ་བསམ་ཡས་རབ་གནས་ལ་སློབ་དཔོན་ཆེན་པོ་ངེས་པར་བཞུགས་པ་འཁོར་སའི་རི་མོ་ལ་གསལ་བ་དང༌། བཀའ་གཙིགས་ཆེན་མོར། སློབ་དཔོན་པདྨ་འབྱུང་གནས་ཀྱིས། །ལྷ་འདྲེ་ཟིལ་གནོན་ཞེས་པ་བླངས། །ཅེས་བྱུང་ངོ༌། །སྤྱིར་སློབ་དཔོན་ཆེན་པོས་བཙན་པོ་ལ་ནང་གི་སྐྱེད་རྫོགས་སྡེ་གསུམ་བསྟན་ནས་སྨིན་གྲོལ་དུ་མཛད། བཙན་པོས་ཀྱང་བཙུན་མོ་མཁར་ཆེན་བཟའ་འཚོ་རྒྱལ་དབང་ཡོན་དུ་ཕུལ་བས་བློན་པོ་རྣམས་མ་རངས་སྟེ་སྔོན་དུ་བཙུན་མོ་ཕྲོགས་ད་ནི་རྒྱལ་སྲིད་འཕྲོག་(ཇ༨༩ན)

[Full Size]

པར་ངེས་སོ་ཟེར་ནས་སླར་གཤེགས་པར་བགྲོ་བ་ཞིག་བྱུང་བར་སྣང་བས་བློན་པོ་རྣམས་ཀྱིས་ཞུས་པར་སླར་གཤེགས་པ་ལྟར་བྱས་ནས་རྒྱལ་པོ་དང་བཀའ་བགྲོས་སྟེ་བོད་ཀྱི་ཙཱ་རི་ཏྲ་དང་མཁར་ཆུ་ལ་སོགས་པའི་གནས་རྣམས་དང་གཡའ་ཁྲོད་དང་གངས་ཁྲོད་སོགས་མི་མ་ཡིན་གྱི་གནས་རྣམས་སུ་སྤྱན་དྲངས་སྟེ་གཙོ་བོར་མི་མ་ཡིན་གྱི་དོན་མཛད་ནས་སླར་བསམ་ཡས་སུ་གཤེགས་པར་སྣང་ལ་ས་སྐྱ་བླ་མ་དམ་པའི་ཆོས་བྱུང་ལས་ཀྱང་དེ་འདྲ་བར་བཤད་དོ། །ཆོས་དང་བོན་དུ་རྩོད་དེ་བོན་རྣམས་བསྣུབས། །ལྗི་ཞིང་བཙན་པའི་བཀའ་ཡི་འདེམས་ཁ་བོད། །ཀུན་གྱིས་ལྷ་ཁང་མཐར་ཕྱིན་སྒྲུབ་པར་ཞུས། །ས་གཞི་གསེར་གཞོང་གུར་གུམ་བཀང་འདྲ་བར། །ཡོས་བུའི་ལོ་ལ་ལྷ་ཁང་རྨང་བཏིང་ནས། །ཨོ་ཊྱནྤུ་རིའི་གནས་ལ་དཔེ་བླངས་སྟེ། །དབུ་རྩེ་རིགས་གསུམ་དབུས་ཀྱི་རི་རབ་མཆོག །ཕྱོགས་རེར་གླིང་གསུམ་གླིང་བཞི་གླིང་ཕྲན་བརྒྱད། །ཉི་ཟླའི་ཚུལ་དུ་ཡག་ཤ་ལྟག་འོག་གཉིས། །མཐིལ་ཀུན་དཀར་ཞལ་རྒྱ་མཚོའི་རོ་མོ་ཅན། །ཕྱི་རོལ་ཁོར་ཡུག་ཚུལ་དུ་ལྕགས་རིའི་རྩེར། །རིང་བསྲེལ་ཅན་གྱི་མཆོད་རྟེན་སྟོང་རྩ་བརྒྱད། །རི་རབ་ལྷུན་པོའི་རྭ་རྩེའི་ཚུལ་དུ་ནི། །འབྱུང་བའི་ཁ་གནོན་མཆོད་རྟེན་རྣམ་བཞིར་བཅས། །ཕྱི་ལྟར་གླིང་བཞིའི་འཇིག་རྟེན་ཁམས་ཀྱི་ཚུལ། །ནང་ལྟར་ཞིང་ཁམས་ཆེན་པོ་གཅིག་གི་ཚུལ། །གསང་བ་ཕོ་བྲང་དཀྱིལ་འཁོར་ཆེན་པོའི་ཚུལ། །བྱང་ཆུབ་ཕྱོགས་ཆོས་སོ་བདུན་ཡོངས་རྫོགས་པ། །ཛམྦུའི་གླིང་ན་འགྲན་ཟླ་བྲལ་བར་བཞེངས། །རང་བྱུང་མ་ཧཱ་བོ་དྷི་ལ་སོགས་པའི། །རྟེན་རྣམས་མཆོག་གི་སྤྲུལ་སྐུ་དངོས་སུ་བཞུགས། །བཙུན་མོ་གསུམ་གྱིས་ལྷ་ཁང་རེ་རེ་བཞེངས། །སྤྱི་ཡི་བཀའ་སྲུང་གང་འཐད་བགྲོས་པ་ན། །སངས་རྒྱས་གཉིས་པ་པདྨའི་ཞལ་སྔ་ནས། །རྗེ་ལ་ཞལ་(ཇ༨༩བ)

[Full Size]

ངོ་བདུད་ཀྱི་སྤྲུལ་པ་འབྱུང༌། །དམ་ཆོས་བསྣུབས་པའི་དབང་གིས་རྒྱལ་ཁྲིམས་འཇིག །དེ་ཚེ་གནམ་ཐེ་དཀར་པོའི་སྤྲུལ་པ་ཡི། །ཧོར་གྱིས་བོད་ཁམས་དབང་བྱེད་སྡུག་བསྔལ་འགོད། །དེ་བས་ཧོར་གྱི་ཕོ་ལྷ་ཤིང་བྱ་ཅན། །གནམ་ལྷ་བྱང་ཆུབ་སྲུང་མར་བསྐོས་པ་ན། །འཇིག་མི་ནུས་པས་དེ་ཉིད་དགུག་གོ་གསུང༌། །བི་ཧར་གླིང་དུ་རྒྱལ་པོའི་རྟེན་བཅས་སྟེ། །ཏ་ར་ཀླུ་གོང་ལ་སོགས་དམག་དཔུང་གིས། །ཧོར་གྱི་སྒོམ་གྲ་བཅོམ་ནས་རྟེན་རྣམས་ཁྱེར། །ཨོ་ཌྱན་ཆེན་པོ་ཕྱག་རྡོར་དངོས་སུ་བཞེངས། །རྒྱལ་ཆེན་རྣམ་སྲས་བྲན་དུ་བཀོལ་ནས་ནི། །དེ་ཡིས་གནོད་སྦྱིན་དམག་དཔུང་ཀུན་བསྐུལ་སྟེ། །ལྷ་ཡི་དགེ་བསྙེན་བདུད་ཀྱི་དམག་དཔོན་ཆེ། །སྡེ་བརྒྱད་དབང་བྱེད་སྐྱེ་འགྲོའི་དབུགས་ལེན་པ། །བི་ཧར་རྒྱལ་པོ་ལས་མཁན་བཅས་པ་བཀུག །དམ་ལ་བཏགས་སྟེ་ཆོས་འཁོར་གཉེར་དུ་བཏད། །འདི་ཡི་བཀོད་པའི་གསི་ཐང་འབྱུང་བ་ལ། །རྣམ་སྲས་འཇང་ཡུལ་མ་ཞེས་གྲགས་པ་ཡིན། །དེ་ལྟར་ཆོས་འཁོར་ཆེན་པོ་དཔལ་བསམ་ཡས། །མི་འགྱུར་ལྷུན་གྱིས་གྲུབ་པའི་གཙུག་ལག་ཁང༌། །ཡིད་ཀྱིས་དཔག་པར་དཀའ་བའི་བཀོད་པ་ཅན། །འཛམ་གླིང་ཙམ་ན་འགྲན་ཟླ་བྲལ་བ་དེ། །ཡོས་ཀྱི་ལོ་ལ་རྨང་བཏིང་ཡོས་ལོས་འབྱོངས། །ལོ་བསྐོར་གཅིག་གིས་རྫོགས་པར་ཚར་རོ་སྐད། །དེ་ཡང་བསམ་ཡས་ཀྱི་དཀར་ཆག་ཆེན་མོར་གྲགས་པ་རྦ་བཞེད་ལས། དེ་ནས་ཆོས་ཀྱི་འདུན་ས་ནི་བྲག་དམར་མཚོ་མོ་མགུར་དུ་ཕུབ། གསལ་སྣང་ནི་ཆོས་ཀྱི་ཚུགས་དབོན་བླར་བསྐོས་ནས་དུས་དེར་བོན་པོ་དང་བོན་བློན་རྣམས་ཁ་ལོག་སྟེ་ཆོས་མི་བྱེད་བོན་བྱའོ་ཟེར་བས་བོ་དྷི་ས་ཏྭའི་ཞལ་ནས་རྒྱལ་ཁམས་གཅིག་དུ་ཆོས་ལུགས་གཉིས་བྱུང་ན་ཤིན་ཏུ་སྡིག་ཆེ། འོ་ཅག་རྩོད་པ་བྱས་ལ་ཁྱེད་རྒྱལ་ན་ང་འགྲོ་བོན་སྤེལ། ཆོས་རྒྱལ་ན་བོན་བསྣུབས་ལ་དམ་པའི་ལྷ་ཆོས་བྱ་གསུང༌། སླད་ཀྱིས་ཆོས་དང་བོན་འགྲན་པར་ཆད་ན་དེ་ལ་དཔང་པོ་མེད། དེ་ནས་ཕག་གི་ལོ་ལ་ཕོ་བྲང་ཟུར་ཕུད་(ཇ༩༠ན)

[Full Size]

ཀྱང་བུ་ཚལ་ན་བཞུགས་པའི་ཚེ་ཆོས་ཀྱི་ཁ་འཛིན་ཞང་ཉ་བཟང་དང༌། གཉེར་སྟག་བཙན་གཤོང་གཟིགས་དང༌། སེང་མགོ་ལྷ་ལུང་གཟིགས་དང༌། ཉང་ཤོ་མ་དང་བཞི་བོ་དྷི་ས་ཏྭའི་ཁ་འཛིན་དང་ཤགས་འདེབས་སུ་བསྐོས། བོན་གྱི་ཁ་འཛིན་ངམ་ཏ་ར་ཀླུ་གོང༌། རྩིས་པ་ཆེན་པོ་ཁྱུང་པོ་དུམ་ཚུགས། ཁྱུང་པོ་རྩེ་བ་ཆེ་མི་དང་ཅོག་ལ་སོགས་བསྐོས་སྟེ་རྩོད་པ་ལས་བོན་ཁུངས་ངན་ལ་གཏན་ཚིགས་ཆུང༌། ལྷ་ཆོས་ཁུངས་བཟང་ལ་གཏན་ཚིགས་རྒྱ་ཆེ་ཟབ་ལ་གཏིང་རིང་གཤགས་བཟང་ལ་རྣོ་སྟེ་མ་ཐུབ་ནས་འཕན་ཡུལ་གྱི་བྱི་བོན་པོས་བསྒྱུར་བའི་གཤིན་ཁུགས་པ་ཐམས་ཅད་ཀྱང་བསེ་རགས་སུ་གྱུར་པས་ཕྱིན་ཆད་བོན་དགྱིད་དུ་མི་གནང་བར་ཆད། གཤིན་གྱི་ཕྱིར་གནག་རྟ་དང་སྲོག་ཆགས་གསོད་པ་དང་ཤ་འདེབས་སུ་མི་གནང༌། རྗེའི་སྐུ་རིམ་དང་བར་ཆད་སེལ་བ་ལ་འདྲེ་སྲིན་ལ་དུས་བོན་རེ་བྱེད་ན་ཚེ་མི་དང་ཞང་ཞུང་མ་གཏོགས་གཞན་དགྱིད་དུ་མི་གནང་བར་བཅང་སྟེ་བོན་གྱི་དཔེ་ཀུན་ཆུ་ལ་བསྐུར་ལྷག་མ་ཕྱིས་མཆོད་རྟེན་ནག་པོར་མནན་ནོ། །དེ་ནས་སླན་ཆད་ཆོས་བྱ་བ་དང་ལྷ་ཁང་རྩིག་པར་ཆད་པ་དང༌། བློན་པོ་མགོས་བཤུམས་པ་ལ་བཙན་པོས་བཀའ་བསྩལ་པ། ཁྱོད་ལྷ་ཆོས་བྱ་ཞིང་ལྷ་ཁང་རྩིག་པར་མི་དགའ་འམ། བློན་པོས་གསོལ་པ། ལྷ་ཆོས་ནི་བཟང་ན་ང་ཚོས་བྱེད་ཡོང་རྩ་ན་རྒས་གཏུགས་པས་མི་ལེན་སྟེ་བློ་བ་ལ་བཅགས་མོད། རྗེ་ལྷ་གཅིག་དམ་ཆོས། དེ་ཡང་གཏིང་རེ་ཟབ། མོན་བུ་དེ་ཡང་སྨྲ་རེ་མཁས། ཅེས་གསོལ་བ་དང་འོ་ན་བློན་ཆེན་འོར་ཆེ་གསུངས་ནས་ཤོ་ལ་གེས་སོ། །དེ་ནས་ཤཱཀྱ་མུ་ནི་སླར་མང་ཡུལ་ནས་སྤྱན་དྲང་བར་བྱས་སྟེ་རྟ་པ་གཅིག་གིས་པང་དུ་བླངས་ནས་སྤྱན་དྲངས་སྟེ་ར་མོ་ཆེར་བཞུགས་སོ། །དེ་ནས་ཡོས་བུའི་ལོའི་དཔྱིད་བསམ་ཡས་ཀྱི་རྨང་འདིངས་པར་ཆད་ཙམ་ན་གསལ་སྣང་གིས་བླའི་གཙུག་ལག་ཁང་མ་བརྩིགས་པར་སླས་ཀྱི་ལྷ་ཁང་བཞེངས་སུ་གསོལ། རྦ་ཕ་ཚན་བོན་དགྱིད་དུ་མི་གནང་བར་ཆོས་ལ་བཀོད། རྦ་ལྷ་གཟིགས་ཀྱིས་གྲོགས་པོ་ཉང་རོ་ཀོང་གི་དགེ་བའི་བཤེས་གཉེན་བྱས་ནས་ཆོས་བསླབས་དགེ་བསྙེན་གྱི་ཁྲིམས་ལྔ་ཕོག །(ཇ༩༠བ)

[Full Size]

ཉང་རོ་ཀོང་གིས་ཀྱང་ཕ་ཚན་ཕུ་ནུའི་དགེ་བའི་བཤེས་གཉེན་བྱས་སྟེ་ཉང་རིལ་དཀར་པོར་བསྒྱུར། དེ་ནས་ཡོས་བུའི་ལོ་དེ་ཉིད་ལ་བསམ་ཡས་རྩིག་པར་ཆད་དེ་བཀའ་བགྲོས་པ་ལས་བློན་པོ་མགོས་ཀྱི་མཆིད་ནས། རྗེ་གཅིག་ལགས་ཐབས་ཀྱིས་མ་མཛད་ན་བོད་འབངས་ཁ་ལོག་ནས་ཆོས་བགྱིར་མི་བཏུབ་ཐུགས་དམ་བཞེང་བའང་མི་འགྲུབ་པས་གདམ་ཀ་བོར་བ་ཞིག་བགྱི་བར་མཆི་ཞེས་ལྐོག་དུ་ཆད་ནས་བོད་འབངས་ཀུན་ཚོགས་སྟེ་འདུས་པ་ན་རྗེས་བཀའ་བསྩལ་བ། ཛམྦུ་གླིང་ན་བོད་ཀྱི་རྒྱལ་པོ་ཆེ། བོད་ཀྱི་རྒྱལ་པོ་ལ་ང་བས་ཆེ་བ་ནི་སྔར་མ་བྱུང་ན་ང་ལ་ཕྱག་རིས་མེད་པས་ད་ང་ཕྱག་རིས་ཆེ་བ་ཞིག་བྱེད་པས་ཁྱེད་བོད་འབངས་མཛངས་པ་རྣམས་གླེངས་ཅེས་གསུང་པས་བློན་ཆེན་མགོས་རྒན་ན་རེ། རྗེའི་བཀའ་བསྩལ་ནི་འདུད་པས་གཉན། ཁྲིམས་ཀྱི་ལ་རྩེ་ནི་དགུང་བས་མཐོ། ཕྱག་རྗེས་གང་མཛད་པ་བཀའ་ལུང་ཞུའོ་ཞེས་གསོལ་བ་དང་རྗེའི་ཞལ་ནས་ངའི་མཁར་པོ་ཆེ་ཞང་པོ་རྒྱའི་ཡུལ་མཐོང་བ་ཞིག་རྩིག་གམ། ཤེལ་གྱི་མཆོད་རྟེན་ཤར་རི་ཙམ་པ་ཅིག་རྩིག་གམ། ཝ་ལུང་གྲོག་པོ་གསེར་ཕྱེས་འགེངས་སམ། ཧས་པོ་རི་ཟངས་ཀྱིས་བཏུམས་ནས་གཟེར་མགོ་ཐམས་ཅད་ནང་དུ་བསྟན་པ་ཅིག་བྱའམ། གཙང་པོ་འདི་ཟངས་ཀྱི་སྦུབས་སུ་བཅུག་ལ་འཕྱོང་དུ་རུང་བ་ཞིག་བྱའམ། ཀ་ཆུའི་ཐང་ལ་ཁྲོན་པ་འདོམ་དགུ་བརྒྱ་དང་དགུ་བཅུ་རྩ་གཅིག་པ་འབྲུའམ། ལྷ་ཁང་བྲེ་ཙམ་པ་ཅིག་རྩིག་གམ་དེ་རྣམས་གང་བྱེད་འདོམས་ཤིག་ཅེས་བཀའ་བསྩལ་བས་རྗེའི་བཀའ་ལུང་ཆེ་ལ་སྒྲུབ་དཀའ་བས་གདམ་ཀ་གང་ཡང་ཁས་ལེན་པར་མ་ཕོད་དེ་འབངས་ཀུན་བྲེད་པ་དང༌། ཞང་ཉ་བཟང་ན་རེ། རྗེ་གཅིག་ལགས་མཁར་པོ་ཆེ་དེ་ལྟ་བུ་འཕྲོས་ན་འཇིག་ཆེ་ན་མི་འབྱོངས། ཤེལ་རིན་པོ་ཆེ་དཀའ་བས་མཆོད་རྟེན་དེ་ཙམ་ཡང་མི་འབྱོངས། ཝ་ལུང་གྲོག་པོ་གསེར་ཕྱེ་བས་བྱེ་མས་ཀྱང་མི་ཁེངས། ཧས་པོ་རི་བཟར་བུ་ཚུན་ཟངས་སུ་སོང་ཡང་མི་འཐུམས། གཙང་པོ་སྦུབས་སུ་དགུན་ཆུད་ཀྱང་དབྱར་འཁྱེར། ཀ་ཆུའི་ཐང་ལ་ཁྲོན་(ཇ༩༡ན)

[Full Size]

པ་འདོམ་གང་བྲུས་པས་ཆུ་རྡོལ་འོང་ན་དགུ་བརྒྱ་དང་དགུ་བཅུ་རྩ་གཅིག་ཇི་ལྟར་བྲུ། ལྷ་ཁང་བྲེ་ཙམ་པ་ཅིག་བྱ། དེ་ལས་འོས་ཅང་གདའ་འམ་ཟེར། བོད་འབངས་དགའ་ནས་དེ་ལ་འོར་ཆེ་བཏབ། ཏ་ར་ཀླུ་གོང་ཆོས་ལ་གནག་པས་སྦ་ལྕག་ས་ལ་བརྡབས་ནས་ལྷ་ཁང་རྩིག་པ་དེ་ཆོས་ཡིན་པས་ང་མི་དགའ་ངེད་རང་བོན་བྱ་ཟེར་བས། རྗེའི་ཞལ་ནས་ངའི་བཀའ་གཅོག་པ་ཏ་ར་བྱང་དུ་སྤྱུགས་ཅིག་གསུང་བས་འབངས་སྒབ་མི་གཉིས་ཀྱིས་རྩྭ་ཐག་གིས་བཏགས་སྟེ་ཚེར་ལྕག་གིས་འབྲབ་ཅིང་བྱང་དུ་སྤྱུགས་སོ། །དེས་འབངས་ཀུན་བྲེད་ནས་ཅང་མི་ཟེར་རོ། །དེ་ནས་ལྷ་ཁང་གི་ས་བརྟག་པའི་ཕྱིར་མཁན་པོ་དང༌། བཙན་པོ་དང༌། གསལ་སྣང་དང༌། གཉེར་གདོང་གཟིགས་སྟེ་བཞིས་ཧས་པོ་རིའི་རྩེར་ཕྱིན་སྟེ་བལྟས་པ་ལས། དེ་ཙམ་ལ་བསམ་ཡས་ཀྱི་གཞི་དེ་སྐྱ་བ་ཐོར་རེ་བ་རྩི་སྐྱ་ཅན་འཇག་སྐྱ་ཕྱོད་དེ་མཆིས་པ་ལས་གོང་བཅད་དེ་སློབ་དཔོན་གྱིས་ས་དཔྱད་མཛད་པ་ནི། ཤར་རི་རྒྱལ་པོ་གདན་ལ་བཞུགས་པ་འདྲ། ཧས་པོ་རི་བཙུན་མོ་དར་དཀར་གྱི་གོ་ཟུ་གྱོན་པ་འདྲ། རི་ནག་ལྕགས་ཕུར་བཏབ་པ་འདྲ། མེ་ཡར་དྲེའུ་ཆུ་འཐུང་བ་འདྲ་བས་བཟང༌། ས་གཞི་འདི་འཁར་གཞོང་གུར་གུམ་གྱིས་བཀང་བ་འདྲ་བས་ཐུགས་དམ་འདིར་བཞེངས་ན་བཟང་བར་ལུང་བསྟན། ཕྱག་འཁར་གྱིས་ཕྱག་བྲིས་མཛད། ཆིབས་བྲེས་ཀྱི་ར་བ་ཞིག་རྩིག་ཞེས་བསྙད་བཏགས་ནས་རྩྭའི་སྤྱི་བོ་བསྡུས་སྟེ་མདུད་པས་ཐོ་ཡོར་ལྟར་བསྐོར་ནས་ཕྱི་ར་སྔོན་ལ་བརྩིགས་ཅེས་བྱུང་ངོ༌། །རྒྱལ་རབས་གཞན་ལས་རྒྱའི་རྩིས་མཁན་གྱིས་སའི་དཔྱད་འདི་བྱས་པར་ཡང་བཤད་ལ། བཙན་པོས་ལྕགས་རི་ལ་ང་རང་གི་མདའ་རྒྱང་གང་བྱེད་གསུང་བ་ལ་བློན་པོ་རྣམས་ཀྱིས་དེ་ནི་ཕལ་པའི་མདའ་རྒྱང་གསུམ་ལས་རིང་བས་མདའ་དེ་བློན་པོའི་མདའ་ལ་མཛད་པར་ཞུ་དགོས་ཞེས་མདའི་ནང་དངུལ་ཆུས་བཀང་སྟེ་ཕུལ་བ་འཕངས་པས་སྔར་གྱི་སུམ་ཆ་ཙམ་དུ་ལུས། བློན་པོའི་འཕྲུལ་དུ་མཁྱེན་ནས་བོད་ཀྱི་བསོད་ནམས་ལ་དེ་བས་མ་ཤོང་གསུང་སྟེ་ཕལ་པའི་མདའ་རྒྱང་ཕྱེད་དང་(ཇ༩༡བ)

[Full Size]

གཉིས་ལོགས་རེ་ལ་ཡོད་དོ། །ཐོག་མར་ས་ཕུད་རྡོ་ཕུད་ཡེར་པར་ཕུལ་སྟེ་མཆོད་རྟེན་བཞེངས། ལྷ་སར་ས་ཕུད་ལ་འཕྲུལ་སྣང་གི་གཙང་ཁང་དབུས་མའི་སྒོ་སྲུང་རྒྱལ་ཆེན་བཞི་བྱས། ཤིང་གི་ཕུད་ལས་སྒོ་མོ་ཆེ་རྟ་བབས་ཀྱིས་བརྒྱན་པ་ཕུལ་ལོ། །བརྩིགས་ཚུལ་དངོས་ནི་རྦ་བཞེད་ལས། དེ་ལྟར་ས་བརྟག་པའི་ཆོ་ག་བགྱིས། དེ་ནས་ས་ཆོག་བྱས་སྟེ་ཡ་རབས་ཞང་བློན་གྱི་བུ་ཚ་ཕ་མ་མེས་ཕྱི་ཚང་བ་བཞི་བཙན་པོ་དང་ལྔའི་བཙན་པོས་གསེར་གྱི་ནན་རི་གསོལ་གསེར་གྱི་འབྱོར་ཕྱག་དུ་བསྣམས། བུ་ཚ་རྣམས་རྒྱན་གྱིས་བརྒྱན་སྟེ་རིན་པོ་ཆེའི་སྣོད་དུ་སྦོག་སྔོན་འཚལ་ཁ་རྒྱགས་སྨྲ་ཞིང་ཐིག་འཐེན། བཙན་པོས་ཐེབས་གསུམ་བརྐོས། དེ་ནས་བུ་ཚ་བཞིས་རེ་མོས་ཀྱིས་བརྐོས། ཁྲུ་གང་གྲུ་བཞིར་ཕྱིན་པ་དང་འབྲས་དཀར་མོ་དང་ནས་དཀར་མོ་ཕུལ་དོ་ཙམ་མ་འདྲེས་པར་འདུག་གྲམ་པ་དང་གྱོ་མོ་སོགས་ནི་མ་བྱུང༌། ས་ཞག་སྐྱ་ནར་ཞིག་བྱུང་ནས་འབྱོར་བཞག །དེ་ལ་བོ་དྷི་ས་ཏྭ་རབ་ཏུ་དགྱེས་སྟེ་བཙན་པོའི་དབུ་ལ་བྱུགས་སྟེ་ཕ་ལ་ཕ་ལ་སིདྡྷི་སིདྡྷི་གསུངས། དེ་བཙན་པོས་མ་གོ་ནས་ལོ་ཙཱ་བ་ལ་དྲིས་པས་བཟང་ངོ་བཟང་ངོ་གྲུབ་པོ་གྲུབ་པོ་གསུངས་ཟེར། གཞན་ཡང་བགེགས་མནན་དགོས་གསུངས་སྟེ་མཆོད་རྟེན་བཞིའི་བླ་ཕུར་བཏབ། དེ་ནས་རྨང་འདིངས་པར་ཞུས་པས་སློབ་དཔོན་གྱི་ཞལ་ནས། རྒྱལ་པོ་ཁྱེད་བྱང་ཆུབ་ཏུ་སེམས་བསྐྱེད་པ་ཡང་ཇོ་མོ་སྒྲོལ་མ་ལས་བསྐྱེད་པ་ཡིན། མཐར་སངས་རྒྱས་ནས་རྡོ་རྗེའི་གདན་དུ་ཆོས་འཁོར་བསྐོར་བར་བསྐུལ་བ་ཡང་ཇོ་མོ་སྒྲོལ་མས་བྱེད། ད་ལྟ་ཐུགས་དམ་བཞེང་པའི་བར་ཆད་ཀྱང་ཇོ་མོ་སྒྲོལ་མས་སེལ་བ་ཡིན་པས་སྔོན་ལ་ཇོ་མོའི་སྒྲུབ་ཁང་རྩིགས་ཅིག་པར་ལུང་ཕོག་སྟེ་རྒྱལ་པོས་ཀྱང་ཐོག་མར་ལྷོ་ངོས་སུ་ཨཱརྻ་པ་ལོའི་གླིང་བརྩིགས་སྟེ་ཐོག་ཕུབ་པ་དང༌། སློབ་དཔོན་ཁང་པ་ལེགས་སྟེ་གཟུགས་མཁན་མེད་ཅེས་བཙན་པོས་གཡོལ་བས་ཡོ་བྱད་སོགས་ཅིག་གཟུགས་མཁན་འོང་གིས་གསུང༌། ཧེན་ཁང་བི་ཧར་ན་ཚུར་ལ་རྒྱ་མཚལ་བུ་ཅན་ནམ་རྒྱ་མཚལ་ན་མཁན་ཡང་ཟེར་བ་ཞིག་ཚོན་རྩིའི་ཀོང་བུ་ཀོང་ཙེ་གང་(ཇ༩༢ན)

[Full Size]

ཁུར་པིར་ཆགས་གཅིག་ཐོགས་སྟེ་འཇིམ་གཟུགས་དང་རི་མོ་བྱེད་པ་ལ་འཛམྦུ་གླིང་ན་ང་མཁས་སྟེ་བོད་ཀྱི་རྒྱལ་པོ་ལྷ་ཁང་རྩིག་ཟེར་ན་ངས་གཟུགས་ཤེས་ཟེར་བ་དེ་བཀུག་ནས་ལྷ་བཟོ་ན་རེ་ལྷ་རྒྱ་གར་དང་རྒྱའི་ལུགས་གང་བགྱི་ཟེར། གྲོས་བགྱིས་པས་མཁན་པོའི་ཞལ་ནས་སངས་རྒྱས་རྒྱ་གར་དུ་བྱོན་པ་ཡིན་པས་རྒྱ་གར་ལུགས་སུ་གྱིས་གསུང༌། བཙན་པོའི་ཞལ་ནས་བོད་ཀྱི་ལུགས་སུ་བགྱིས་ན་བོད་ནག་པོ་ལ་ཞེན་པ་རྣམས་དད་པ་སྐྱེད་རེ་བ་ལགས་པས་ལྷ་བོད་ལུགས་སུ་བྱ་བར་ཅི་གནང་ཞེས་ཞུས་པས་འོ་ན་བོད་འབངས་ཀུན་བསྡུས་ཅིག་བོད་ལུགས་སུ་བྱའོ་གསུངས། བོད་མིའི་གཟུགས་སུ་དགྱིད་པའི་དཔེ་བོད་འབངས་ཚོགས་པ་ལས་དེའི་ནང་ནས་གཟུགས་བཟང་བ་ཁུ་སྟག་ཚབ་ལ་དཔེ་བགྱིས་སྟེ་གཙོ་བོ་ཨརྻ་པ་ལོ་ཁརྶ་པཱ་ཎི་བཞེངས། ཐང་བཟང་སྟག་ལོད་ལ་དཔེ་བྱས་སྟེ་ཡི་གེ་དྲུག་པ་གཡས་སུ་བྱས། རྨ་གསང་ཀོང་ལ་དཔེ་བྱས་སྟེ་རྟ་མགྲིན་སྒོ་སྲུང་དུ་བྱས། ལྷ་མོའི་དཔེ་བུད་མེད་ལ་མཛེས་པ་ཅོག་རོ་བཟའ་ལྷ་བུ་སྨན་ལ་དཔེ་བགྱིས་སྟེ་སྒྲོལ་མ་གཡས་སུ་བྱས། ཅོག་རོ་བཟའ་ནུ་ཆུང་ལ་དཔེ་བྱས་སྟེ་འོད་ཟེར་ཅན་མ་གཡོན་དུ་བྱས། ལྷ་ཀུན་ཆར་ནས་ཡོ་བྱད་སྟ་གོན་མཛད་དེ་ཉི་ཤུ་དགུའི་གདུགས་ལ་ཞལ་སྲོས་པའི་ཚེ་སློབ་དཔོན་གྱིས་མཆོད་པ་བཤམས་དེ་ནམ་སྲོས་པ་དང་ལྷ་ཁང་གི་སྟེང་ཨཱརྻ་པ་ལོའི་ཐོག་ནས་འོད་ཉི་མ་ཤར་བ་ཙམ་ཞིག་ཇེ་ཆེ་ཇེ་ཆེར་གྱུར་ནས་བྲག་དམར་ཕུ་མདའ་འོད་ཀྱིས་ཁྱབ། དེའི་རྒྱུ་ཞུས་པས་མཁན་པོའི་ཞལ་ནས་ཨ་མི་ཏཱ་བྷས་བོད་ལ་དགོངས་པའི་འོད་ཡིན་པས་སང་ཉིན་ལྷ་ཁང་དབུས་ཀྱི་སྟེང་དུ་ཨ་མི་ཏཱ་བྷའི་ལྷ་ཁང་ཡང་ཐོག་ཞིག་རྩིག་དགོས་གསུང་ནས་ཨ་མི་ཏཱ་བྷ་གཙོ་འཁོར་ལྔའི་ལྷ་ཁང་ཞིག་མོད་ལ་བརྩིགས་སྟེ་ཞལ་བསྲོས། ཨཱརྻ་པ་ལོའི་ཞལ་སྲོ་ཆེན་མོ་མཛད་པའི་ཚེ་གཟུགས་མཁན་ལ་བྱ་དགའ་བསྩལ་བར་བགྱིས་སྟེ་བེག་ཙེ་ཡང་དར་ལས་བྱས་པ་གཉིས་བཏིང་བས་གཟུགས་མཁན་གར་སོང་གཏོལ་མ་མཆིས་སྟེ་སྤྲུལ་པ་ཡིན་པ་འདྲ་ཞེས་སོ། །དེ་ནས་མཁན་པོའི་ཞལ་ནས་བཙན་པོ་ཁྱོད་ཀྱི་དགེ་བའི་བཤེས་གཉེན་ཇོ་མོ་སྒྲོལ་(ཇ༩༢བ)

[Full Size]

མ་ཡིན་པས་ཐོག་མར་སྒྲོལ་མ་ལ་གསོལ་བ་ཐོབ་བསྙེན་པ་གྱིས་ཅིག་གསུངས། སློབ་དཔོན་ལས་ལུང་ནོད་ནས་ཨཱརྻ་པ་ལོའི་གླིང་དུ་བསྒོམས་པས་རྟ་མགྲིན་གྱི་སྐུས་རྟ་སྐད་ཉིན་མཚན་ལན་གསུམ་དུ་ཕྱུང་བ་རྩེ་རྒོད་རྣམས་དང་ཞམ་རིང་ནང་པ་དང་ལྷ་ཁང་སྲུང་བ་ཀུན་གྱིས་ཐོས། སློབ་དཔོན་གྱི་ཞལ་ནས་རྒྱལ་པོས་གྲུབ་པ་བརྙེས་སྟེ་རྟ་མགྲིན་གྱིས་རྟ་སྐད་ལན་གསུམ་དུ་བཏོན་པ་དེ་ཛམྦུའི་གླིང་སུམ་གཉིས་སུ་ཐོས་སྟེ་རྒྱལ་པོའི་ཆབ་སྲིད་མངའ་རིས་ཀྱང་དེ་ཙམ་མོ་གསུང༌། དེ་ནས་ཡོས་བུའི་ལོ་ལ་དབུ་རྩེའི་རྨང་འདིངས་པར་ཞུས་པས་སློབ་དཔོན་གྱི་ཞལ་ནས་དཔལ་བསམ་ཡས་མི་འགྱུར་ལྷུན་གྱིས་གྲུབ་པ་ཛམྦུ་གླིང་ན་བྱིན་རླབས་ཆེ་བ་ཞིག་བྱེད་པས་མདོ་སྡེ་འདུལ་བ་མངོན་པ་སྟེ་མཚན་ཉིད་ཀྱི་སྡེ་སྣོད་ཐམས་ཅད་དང་གསང་སྔགས་ཀྱི་རྒྱུད་སྡེ་ཀུན་དང་མཐུན་ཞིང་མི་འགལ་བ་འགྲན་གྱི་དོ་མེད་ཅིག་བགྱི་འཚལ་གསུངས། སློབ་དཔོན་གྱིས་དེ་ལྟ་བུ་མཁྱེན་ཏམ་ཞུས་པས་ངས་ཤེས་སྟེ་དེ་ལྟ་བུ་ཞིག་ཨོ་ཏྱནྟ་པུ་རི་ན་ཡོད། དེ་ཅི་འདྲ་ཞུས་པས་དེ་ནི་སྔོན་མུ་སྟེགས་ཀྱི་རིག་འཛིན་སྒྲུབ་པ་པོས་རོ་སྒྲུབ་བྱེད་པ་ལ་དངོས་སྒྲུབ་ལེན་པའི་སྒྲུབ་གཡོག་མཚན་རྟགས་དང་ལྡན་པ་ཅིག་ཀུན་དུ་བཙལ་པས་མ་རྙེད་པ་ལ་མ་ག་དྷའི་དགེ་སློང་སྒྲུབ་པ་པོ་ལ་ཉེ་གནས་ཅིག་ཡོད་པ་དེ་དེའི་མཚན་རྟགས་དང་ལྡན་ནས་དགེ་སློང་ལ་གསེར་གྱི་མཎྜལ་ཉེ་འུ་བཀྲམ་པ་ཡང་ཡང་ཕུལ་བས་ཁྱོད་ང་ལས་གདམས་ངག་ནོད་དམ་ཟེར། རིག་འཛིན་གྱིས་སྨྲས་པ། ཁྱོད་ཀྱི་ཉེ་གནས་དཔའ་པོའི་རྟགས་ཅན་ཞུའོ་བྱས་པས་དེས་དེ་ལ་ཕུལ་ལོ། །དེ་ནས་སྒྲུབ་ཁང་དུ་ཕྱིན་པ་དང་རོ་སོག་ཕོན་ཙམ་པ་ཅིག་དཀྱིལ་འཁོར་གྱི་སྟེང་ན་འདུག་གོ །དགེ་ཚུལ་ཁྱོད་རོ་ལ་དཔའ་བའི་རྟགས་ཡོད་པས་མ་འཇིགས་པར་དེའི་ལྕེ་ཆོད་ཅིག་ལྕེ་དེ་གསེར་གྱི་རལ་གྲིར་སོང་བ་དེ་གར་གཏད་སར་འགྲོ་ནུས་པ་ཡིན་སྟེ་ང་འོག་མིན་དུ་རིག་འཛིན་སྒྲུབ་ཏུ་འགྲོ་བ་ཡིན། རོ་གསེར་དུ་གྱུར་པ་དེ་ཁྱོད་ལ་རྔན་པར་སྦྱིན་ནོ་ཟེར་ནས་དེས་མཉམ་པར་བཞག་དགེ་ཚུལ་རོ་ལ་ཞོན་ནས་ལྕེ་གཅོད་དུ་བཅུག་པ་དང་རོ་འགུལ་ཞིང་མིག་འཕྲུལ་ཁ་ཏབ་ཏབ་བྱེད་པ་དང་ལྕེ་དར་ཤམ་ཙམ་(ཇ༩༣ན)

[Full Size]

ཞིག་ཉུག་ཉུག་བྱུང་བ་ལན་གཉིས་སུ་མ་ཟིན་པ་དང༌། ད་རེས་ལྕེ་མ་ཟིན་ན་དང་པོར་ངེད་རང་གཉིས་གསོད། དེ་ནས་སྟོང་གསུམ་གྱི་སེམས་ཅན་གསོད་དུ་འོང་བ་བསྒྲིམས་ལ་ཆོད་ཅིག་ཟེར། དེ་ནས་རོ་དང་ཁ་སྤྲད་དེ་བསྒྲིམས་པ་དང་སོས་ལྕེ་ཟིན་ནས་བཅད་པ་དང་རལ་གྲིར་གྱུར་ནས་ན་མཁའ་ལ་གཡུགས་པས་དགེ་ཚུལ་ན་མཁའ་ལ་འཕུར་བ་ལ་རིག་འཛིན་ན་རེ་ཁྱོད་ནང་པ་སངས་རྒྱས་པ་ལ་ཕམ་པ་འོང་བ་ཡིན་པས་རལ་གྲི་འདི་ང་དཔང་ན་མར་ལ་ཤོག་ཞིག་ཟེར། དེ་ལྟ་ཡིན་མོད་ངས་ལྟད་མོ་ལྟ་ཡིས་ཟེར་ནས་རི་རབ་ཀྱི་ཁར་སོང༌། གླིང་བཞི་རི་རབ་ཉི་ཟླ་གཟའ་སྐར་ལྕོག་བཞི་སུམ་བཅུ་རྩ་གསུམ་བཀོད་པ་དང་བཅས་པ་བལྟས་པས་ལེགས་པར་མཐོང༌། དེ་ནས་མར་འཛམ་གླིང་ངོས་སུ་རལ་གྲི་གཡུགས་པས་རིག་འཛིན་གྱི་དྲུང་དུ་བྱུང༌། རིག་འཛིན་ན་རེ་རོ་ལས་གསེར་དུ་གྲུབ་པ་འདི་དགེ་ཚུལ་ཁྱོད་གྱིས་ཅིག །འདིས་དགེ་སློང་ལྔ་བརྒྱའི་འཚོ་བ་ལྡེང་སྟེ་རུས་པ་ལ་མ་བཅད་ཅིག །བཅད་ན་ལོག་འཚོར་འགྱུར་སྟེ་ཕྱིས་མི་སྐྱེའོ། །གཞན་དུ་ན་བཅད་ཀྱང་ནུབ་མོ་སྐྱེའོ། །ཞེས་ཟེར་སྟེ་རལ་གྲི་གཡུགས་ནས་འོག་མིན་དུ་སོང་ངོ༌། །དགེ་ཚུལ་དེས་སློབ་དཔོན་ལ་སྨྲས་པས་འོ་ན་དགེ་སློང་ལྔ་བརྒྱའི་བཞུགས་གནས་གཙུག་ལག་ཁང་ཞིག་དགོས་པས་མགོན་པོ་ལ་ས་གཞི་ཞུ་བའི་གཏོར་མ་བྱའོ་ཟེར་ནས་བ་ལིམ་བྱས་པས་བྱ་རོག་གིས་ཁྱེར་ནས་མཚོ་ཞིག་གི་དཀྱིལ་ན་དེའུ་ཡོད་པའི་ཁར་བཞག་གོ །དེ་འུ་དེའི་ཁར་གཙུག་ལག་ཁང་བརྩིགས་སྟེ་གླིང་བཞི་རི་རབ་གླིང་ཕྲན་ཉི་ཟླ་དང་བཅས་པ་ལ་དཔེ་བྱས་ནས་བཞེངས་པའི་གཙུག་ལག་ཁང་ཨོ་ཏྱནྟ་པུ་རི་བྱ་བ་ཡོད། དེ་ལ་དཔེ་བྱའོ་གསུང་ངོ༌། །དེ་ནས་སྟོད་བལ་ཡུལ་ནས་གཟུགས་མཁན་དང་ཕྱ་མཁན་བཀུག་སྟེ་ས་བརྟག་པའི་ཆོ་ག་སྔར་བགྱིས་པ་ལས་ཡང་ལན་གཅིག་བྱས་པའི་ཚེ་ཤར་རི་ཧས་པོ་རི་ནས་ཕ་བང་དྲངས་སྟེ་གཞི་དབུ་རྩེའི་རྨང་བཏིང༌། ས་ཡར་(ཇ༩༣བ)

[Full Size]

ལུངས་གད་པ་ཐོག་ནས་བླངས། ཤིང་ཤུག་པ་དང་ཙནྡན་ལས་བྱས་སྟེ་བརྩིགས་ནས་ཁང་པ་ནི་ཚར། སྐུ་གཟུགས་ཅི་ལྟ་བ་ཞིག་བགྱི་དགོངས་པ་ལས་བཙན་པོ་མནལ་བའི་རྨང་ལམ་དུ་མི་དཀར་པོ་ཅིག་ན་རེ། རྒྱལ་པོ་ཁྱོད་སངས་རྒྱས་ཀྱི་སྐུ་གཟུགས་ཅི་ལས་བྱ་བར་སེམས་ཟེར་སློབ་དཔོན་ལ་འདྲི་བྱས་པས། དེ་ན་རེ་ས་གཞི་འདི་ཇོ་མོ་སྒྲོལ་མས་བྱིན་གྱིས་བརླབས་ཏཱ་རེ་དངོས་ཀྱིས་ཞབས་ཀྱིས་བཅགས་པ་ཡིན། ཧས་པོ་རིའི་རྩེ་མོ་ལ་ཤཱཀྱ་ཐུབ་པ་གཙོ་འཁོར་བཅུ་གསུམ་སྔོན་བཅོམ་ལྡན་འདས་ཀྱིས་བྱིན་གྱིས་བརླབས་པ་ཡོད་ཀྱིས་དེ་སྤྱན་དྲོངས་ལ་གྱིས་ཟེར། དེ་ག་ན་ཡོད་སྟོན་དང་བྱས་པས་བ་དམར་པོ་འབུས་འདེབས་པའི་ས་ན་ཡོད། འདོང་ཞེས་ཁྲིད་དེ་ཧས་པོ་རིར་ཕྱིན་པ་དང་བྲག་ཀུན་བལྟར་བཅུག་ནས་འདི་ནི་སངས་རྒྱས་དང་བྱང་ཆུབ་སེམས་དཔའ་འདི་དང་འདི་ཞེས་ཀུན་གྱི་མཚན་ཡང་སྨོས་ནས་ལྷ་བཅུ་དགུ་འདུག་ཁྲོ་བོ་དང་བཅས་པ་ཀུན་བསྟན་སྟེ་རྒྱལ་པོ་དགྱེས་ཆེས་ནས་ཧེ་ཧེ་བྱས་པས་མནལ་སད་དེ་རྨི་ལམ་དུ་རེད་ནས་ནམ་ནངས་མ་ཐོག་དུ་བློན་པོ་གནོན་ཁམས་ཁྲིད་དེ་རྨང་ལམ་དུ་བསྟན་པའི་ས་དེར་གཤེགས་སྟེ་གཟིགས་པ་དང་ཅི་ཡང་མི་འདུག་འདི་ན་འདུག་པ་ཡིན་པ་ལ་བྱས་སྟེ་བཙན་པོས་བྱེ་མ་ལ་ཞབས་སུག་བྱས་པས་རྡེ་འུ་བྱ་མཆུ་ཙམ་ཞིག་འདུག་གོ །དེ་བསལ་བས་རྡོ་སྒུ་ཐེའུའི་རྗེས་མེད་པ་གཙུག་ཏོར་ནག་པོ་ལྡེམ་མེ་བ་སྤྱན་ཁྲ་ཧྲིག་གེ་བའི་བྱང་ཆུབ་ཆེན་པོ་ཅིག་གདའ། རྨང་ལམ་དུ་བྱུང་བ་དང་མཐུན་པར་བྲག་ལ་འོལ་བྱི་ཙམ་གདའ་བས་དགྱེས་ཆེས་ནས་བལ་པོ་རྡོ་མཁན་འགུགས་སུ་བཏང༌། སྐུ་གཟུགས་དེ་ཉིད་དུ་བགྱིས་ནས་ཤིང་རྟ་ལ་བཞག་པའི་ཚེ་ས་ལན་གཅིག་གཡོས། དྲི་གཙང་ཁང་གི་ནང་དུ་ཕྱིན་པའི་ཚེ་ས་ལན་གཅིག་གཡོས། དེ་ནས་ཁྲི་ལ་བཞུགས་པ་དང་བཙན་པོ་དགྱེས་སྟེ་མན་དྷི་དང་གསེར་རྐ་གསོལ་ན་བཟའ་དང་རྒྱལ་པོ་ཉིད་ཀྱི་གསེར་གྱི་རྐ་རགས་སྐུ་ལ་བཅིངས་སོ། །དེའི་སྟེང་འཇིམ་པས་གཡོགས། གཟུགས་མཁན་ན་རེ་བཙན་པོའི་ལྷ་ཁང་དང་སྦྱར་ན་(ཇ༩༤ན)

[Full Size]

ལྷ་ཆུང་ཟེར་ནས་འཇག་མ་བཀྲིས་ནས་གཡོགས་འདག་བ་བྱུགས། དེ་ལ་གསེར་གྱི་གྱིམ་བག་གསོལ་ནས་བཞག་གོ །རྒྱུ་རྡོ་ལས་བྱས་གཟོ་གོང་ལུགས་སུ་བྱས་པ་ལྷོ་ངོས་ཀྱི་གཡས་གྲལ་ལ་བྱང་ཆུབ་སེམས་དཔའ་ནམ་མཁའི་སྙིང་པོ། བྱམས་པ། སྤྱན་རས་གཟིགས། སའི་སྙིང་པོ། དགའ་བའི་དཔལ། ཁྲོ་བོ་ཁམས་གསུམ་རྣམ་རྒྱལ་དང་དྲུག་གོ །བྱང་ངོས་གཡོན་གྲལ་ལ་ཀུན་བཟང༌། ཕྱག་རྡོར། འཇམ་དཔལ། སྒྲིབ་པ་རྣམ་སེལ། དགེ་བསྙེན་ཆེན་པོ། དྲི་མ་མེད་པར་གྲགས་པ་ཁྲོ་བོ་མི་གཡོ་བ་དམར་པོ་དང་གཙོ་འཁོར་བཅུ་གསུམ་མོ། །གསང་འདུས་ལ་འགྲེལ་བ་བརྒྱ་རྩ་བརྒྱད་ཡོད་པ་ལས་སློབ་དཔོན་སངས་རྒྱས་ཡེ་ཤེས་ཞབས་ཀྱི་ལྷ་བཅུ་དགུ་ལ་དྲུག་མ་ཤོང་ནས་བྱང་ཆུབ་ཆེན་པོའི་རྒྱབ་ཏུ་གྱང་ལོགས་ལ་རི་མོར་བྲིས་ནས་ཡོད་དོ། །ལྟེ་བའི་རྒྱུད་རིས་ནི་སྐུ་གསུམ་འབྱུང་བའི་མདོ་བྲིས། ལྟེ་བའི་ཁ་ཕྱིར་བལྟ་ལ་མདོ་སྡེ་པདྨ་དཀར་པོའི་རྒྱུད་རིས་ནང་བལྟའི་སྐོར་ཁང་ལ་འདུས་པ་རིན་པོ་ཆེའི་ཏོག་གི་གཟུངས། རྔ་ཁང་ལ་རྗེའི་ཐུགས་དམ་མདོ་སྡེ་དཀོན་མཆོག་སྤྲིན་གྱི་རྒྱུད་རིས་བྲིས། འོག་ཁང་གི་སྲུང་མ་མཁའ་འགྲོ་མ་སེང་གེ་ཁྲིའི་རལ་པ་ཅན་ལ་གཏད་དོ། །བར་ཁང་གི་ཤིང་ཐམས་ཅད་གླ་པ་སེང་ལྡེང་ལས་བྱས་ལྡེར་ཚོའི་རྒྱུ་བ་མེན་གྱི་ཀོ་བ་བཟོ་རྒྱ་ནག་པོའི་ལུགས་སུ་བྱས། གཙོ་བོ་དཔལ་རྣམ་པར་སྣང་མཛད། གཡས་ན་འདས་པའི་སངས་རྒྱས་མར་མེ་མཛད། གཡོན་ན་མ་འོངས་པའི་སངས་རྒྱས་བྱམས་པ་མགོན་པོ། མདུན་ན་སྟོང་གི་ལྷ་ཤཱཀྱ་ཐུབ་པ། ཚེས་བརྒྱད་ཀྱི་ལྷ་སྨན་བླ་བཻ་ཌཱུརྻ། ཉའི་ལྷ་སྣང་བ་མཐའ་ཡས་བྱས། ཉི་ཤུ་གསུམ་གྱི་ལྷ་ཇོ་མོ་སྒྲོལ་མ་རི་མོར་བྲིས། གཡས་གཡོན་གྱི་ལྷ་བྱང་སེམས་ཉེ་བའི་སྲས་བརྒྱད་དགེ་བསྙེན་དྲི་མ་མེད་པ་དང་དགའ་བའི་དཔལ་ཁྲོ་བོ་ཀང་ཀིང་གཉིས་སྟེ་རྒྱ་ནག་གི་སྐད་ཡིན་དོན་འོག་ཁང་དང་མཐུན། ཀྲྀ་ཡའི་ལྷ་ཚོགས་བཅོ་ལྔ་དང་བསྟུན། ནང་ལ་ཡུམ་རྒྱས་པའི་གླེང་གཞིའི་རྒྱུད་རིས། གདོང་ལ་རྒྱལ་ཆེན་བཞི། སྐོར་ཁང་ཁ་ཕྱི་བལྟ་ལ་མཆོད་རྟེན་བརྒྱད་པ་མངོན་པར་བྱུང་བའི་མདོ། ནང་བལྟ་ལ་སྤྲིན་ཆེན་པོའི་(ཇ༩༤བ)

[Full Size]

མདོ། རྔ་ཁང་ལ་ཕྱོགས་བཅུའི་སངས་རྒྱས་དང་གཤིན་རྗེའི་གཤེད་ཀྱི་ལྷ་ཚོགས་དང་བསམ་ཡས་ན་གནས་པའི་ཆོས་སྐྱོང་རྣམས་ཀྱི་འབག །བར་ཁང་རྒྱལ་པོ་ཤིང་བྱ་ཅན་ལ་གཏད་དོ། །སྟེང་ཁང་གི་ཤིང་ཐམས་ཅད་ཐང་མ་དང་གསོམ། ལྡེར་ཚོའི་རྒྱུ་རས་དང་འཇག་མ། བཟོ་རྒྱ་གར་གྱི་ལུགས། གཙོ་བོ་རྣམ་སྣང་ཀུན་དུ་རིག་པ་ཞལ་བཞི་ངོ་བོ་གཅིག་པ་རེ་རེ་ལ་འཁོར་གཉིས་གཉིས་སྟེ་ཉེ་བའི་སྲས་བརྒྱད། རྡོ་རྗེ་རྒྱལ་མཚན་ལ་སོགས་ཕྱོགས་བཅུ་ནས་ལྷགས་པའི་བྱང་ཆུབ་སེམས་དཔའ་ཁྲོ་བོ་མི་གཡོ་བ་ལ་སོགས་པ་བཞི་ཕྱག་རྡོར་སོགས་བཞི་སྟེ་བུདྡྷའི་ལྷ་ཚོགས་བཞི་བཅུ་རྩ་གཉིས་སུ་བྱས། རྒྱུད་རིས་མདོ་སྡེ་ས་བཅུ་པ་བྲིས། རྒྱལ་པོ་ཟངས་མའི་འབེ་ལོག་ཅན་ལ་གཏད་དོ། །ཐོག་ཐམས་ཅད་རྒྱ་ཕུབས་ཟ་འོག་རིས། ལྕོག་བཞི་ན་སྟེང་གི་ཞིང་ཁམས་མདངས་དགའ་བ་ཅན་གྱི་སངས་རྒྱས་དགའ་བའི་དཔལ། འཁོར་བྱང་ཆུབ་སེམས་དཔའ་དགའ་བའི་བྱིན་པ་སོགས་པའི་རྒྱུད་རིས་བཞི། གནོད་སྦྱིན་ལག་ན་རྡོ་རྗེ་གོས་སྔོན་པོ་ཅན་བཞི་ལ་གཏད། གཎྜི་ར་གསེར་ལ་ཤེལ་གྱི་ཏོག་ཅན་བཙུགས། དེ་ནས་འཁོར་ས་བར་པ་བརྩིགས་སྟེ་ལྷོ་ཕྱོགས་རོལ་མོ་མཆོད་རྫས་ཀྱི་བང་མཛོད་གསུམ་ན་རོལ་ཆས་བཀང༌། གནོད་སྦྱིན་ལག་ན་དབྱུག་ཐོགས་མཆེད་གསུམ་ལ་གཏད། ནུབ་ངོས་མདོ་རྒྱུད་ཆོས་ཀྱི་བང་མཛོད་གསུམ་ན་རྒྱ་དཔེ་བོད་དཔེ་རྒྱ་ནག་གི་དཔེའི་གླེགས་བམ་རྣམས་ཀྱིས་བཀང་ཨ་ཙ་ར་ལག་ན་གྲི་ཐོགས་མཆེད་གསུམ་ལ་གཏད། བྱང་ངོས་རིན་ཆེན་གཏེར་གྱི་བང་མཛོད་གསུམ་ན་གསེར་དངུལ་ཟངས་ལྕགས་ལ་སོགས་པས་བཀང་སྟེ་གཤིན་རྗེ་ལག་ན་དབྱུག་ཐོགས་གསུམ་ལ་གཏད། རྒྱུད་རིས་མདོ་སྡེ་རྒྱ་ཆེར་རོལ་པ་བྲིས། བར་གྱི་སེ་རྒྱོངས་ལ་བསྐལ་བཟང་གི་སངས་རྒྱས་སྟོང་དང༌། དེ་ནས་མུན་བསྐལ་དྲུག་བཅུའི་རྗེས་ལ་སངས་རྒྱས་ཁྲི་འབྱུང་བ་བྲིས་སྟེ་མ་ཤོང་བ་གྲུ་སྐས་ཀྱི་རྩིག་ལོགས་ལ་བཀོད་ནས་ཡོད། དེ་ནས་འཁོར་ས་ཆེན་པོ་བསྐོར་སྟེ་རྣམ་སྣང་ངན་སོང་སྦྱོང་བའི་དཀྱིལ་འཁོར་དུ་བཞེངས། མདའ་ཡབ་ཀྱི་ངོས་གསུམ་ལ་རིགས་ལྔའི་ལྡེར་ཚོ་ཕྱིར་བལྟ་བ། ནང་དུ་སྡོང་པོས་བརྒྱན་པ་ཚོང་དཔོན་གྱི་བུ་ནོར་བཟང་གིས་(ཇ༩༥ན)

[Full Size]

དགེ་བའི་བཤེས་གཉེན་བརྒྱ་རྩ་བསྟེན་པ་བྲིས། དེས་མ་ཁེངས་པ་འཕགས་པ་སྣང་བརྒྱད་ཀྱིས་བཀང་ནས་ཡོད། ཆོས་སྐྱོང་ཀླུའི་རྒྱལ་པོ་ཨ་ནནྟ་ཨུ་ལི་ལ་གཏད་དོ། །རྒྱབ་ཏུ་རྡོ་རིང་པདྨ་ཅན་ལ་བཀའ་བཙིགས་རྡོ་ལ་བརྐོས། སྟེང་དུ་སེང་གེ་བཞག་ནས་ཆོས་སྐྱོང་སིངྷ་མུ་ཁ་ལ་བཏད། དབུ་རྩེའི་སྒོ་གསུམ་པྲཛྙཱ་པཱ་ར་མི་ཏ་རྣམ་པར་ཐར་པའི་སྒོ་གསུམ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་གསུམ་དང་བསྟུན། རྩིག་པ་དང་ཤིང་བཟོ་བརྐོས་སྟེ་རྨང་བཙུགས་ཆུ་ཁུང་གཏོད། ནང་དུ་ཀ་བའི་རྨང་བྱས། དེའི་སྟེང་དུ་ཀ་བ་ཀ་ལོ་གདུང་ཕྱམ་སྤང་ལེབ་སོ་ཕག་བཀྲམ། ཁ་ལན་ཀན་གྱིས་བསྐོར། ལོགས་ལ་སུམ་ཆའི་འོག་དུ་སྐར་ཁུང་ཕྱི་རུབ་ལ་ནང་ཡངས་པ་རྒྱ་མཚོ་ལྟ་བུ་བྱས། བྱ་མི་འཇུག་པའི་ཕྱིར་དྲ་བ། སྦྲང་བུ་མི་འཇུག་པའི་སྒོ་གླེགས། རླུང་གིས་མི་ཕྱེད་པའི་འཁོར་གཏན། དེ་འབྱེད་པའི་དབྱུག་གུ་སྐམ་ཁ་བྱས། སྟེང་དུ་འཛེག་པའི་གྲུ་སྐས་དྲུག་གི་འོག་མ་རྡོ་བར་མ་སོ་ཕག་སྟེང་མ་ཤིང་ལས་བྱས། ལག་འཛིན་གྱི་གདང་བུ་བྱས། མི་འགུལ་བའི་ལྕགས་གཟེར་བཏབ། དེ་ལྟར་བྱ་བ་འདུལ་བ་དང་བསྟུན་རྒྱུད་རིས་མདོ་སྡེ་དང་ལྡེར་ཚོ་གསང་སྔགས་དང་བསྟུན། ལྡེར་ཚོ་བདུན་བཅུ་དོན་བརྒྱད། མདོའི་རྒྱུད་རིས་བཅུ་བཞི། ཀ་བ་སྟོང་དང་རྩ་གཉིས། སྒོ་མོ་ཆེ་སུམ་བཅུ་སོ་དྲུག་སྒེའུ་ཆུང་བཞི་བཅུ་རྩ་གཉིས། གྲུ་སྐས་ཆེན་པོ་དྲུག་ཅོང་ཆེན་པོ་བརྒྱད་དང་དང་དང་ཆེན་པོ་གསུམ་གྱིས་བརྒྱན་པ་བྱས་སོ་ཞེས་བྱུང་ལ། སློབ་དཔོན་ཆེན་པོ་པདྨའི་རྣམ་ཐར་ལས་ནི་དབུ་རྩེའི་འོག་ཁང་རྒྱ་ནག་ལུགས། བར་ཁང་རྒྱ་གར་ལུགས། སྟེང་ཁང་ལིའི་ལུགས་སུ་བཞེངས་པར་གསུངས་ལ། སྤྱིར་བརྟེན་གཙོ་བྱང་ཆུབ་ཆེན་པོ་ནི་རྒྱ་གར་རྡོ་རྗེ་གདན་གྱི་བྱང་ཆུབ་ཆེན་པོ་དང་སྐུ་ཚད་མཉམ་པས་སྟོན་པ་སངས་རྒྱས་པའི་དུས་ཀྱི་ཐུན་མོང་གི་སྣང་ངོའི་སྐུ་ཚད་ཡིན་ཞིང་ཕྱིས་ཇོ་བོ་རྗེ་ལ་སོགས་པས་ཀྱང་མ་ཧ་བོ་དྷི་དང་ཁྱད་པར་མི་འདུག་ཞེས་གསུངས་པས་སྟོན་པ་དངོས་དང་ཁྱད་པར་མེད་ཏོ། །སྤྱིར་ཁྲ་འབྲུག་དང་བསམ་ཡས་གཉིས་ཀའི་གཙང་ཁང་གཙོ་བོ་གསང་འདུས་ཡེ་ཤེས་ཞབས་ལུགས་ལྷ་བཅུ་དགུ་པར་གསུངས་ཤིང་(ཇ༩༥བ)

[Full Size]

དེར་འཇམ་དཔལ་རྡོ་རྗེ་གཙོ་བོར་ཡོད་མོད་ཀྱང༌། གཙོ་བོ་འཕོས་ཤིང་གསང་བའི་ཁ་སྦྱོར་གྱི་སྐུ་སྦས་ནས་སྤྲུལ་སྐུ་དང་རྒྱན་ཅན་ཙམ་བསྟན་པར་སྣང་ངོ༌། །གླིང་གཞན་རྣམས་བཞེངས་ཚུལ་ནི་རྦ་བཞེད་ལས། མངོན་པ་དང་བསྟུན་པའི་གླིང་བཅུ་གཉིས་ཉི་ཟླ་དང་བཅས་པ་བཞེངས་སྟེ་དང་པོར་ཤར་ལུས་འཕགས་པོ་གླིང་གཡོག་དང་བཅས་པ་ལ་དཔེ་བྱས་སྟེ་ཟླ་གམ་དུ་བྱས། དབུས་སུ་རྣམ་དག་ཁྲིམས་ཁང་གླིང་ལྡེར་ཚོ་ཐུབ་པའི་སྐུ་གཙོ་འཁོར་ལྔ་ཟླ་འོད་གཞོན་ནུར་གྱུར་པའི་རྒྱུད་རིས་རྒྱལ་པོ་དུང་གི་ཐོར་ཚུགས་ཅན་ལ་གཏད། སྤྱིར་གླིང་བཅུ་གཉིས་པོ་ལ་ལྟེ་བ་ལ་སྒོ་རེ་དང་འཁོར་ས་ལ་སྒོ་གཉིས་རེ་ཡོད། གཡས་གཡོན་གྱི་གླིང་གཡོག་གཉིས་ལས་མཁྱེན་རབ་འཇམ་དཔལ་གླིང་ན་ཀོ་བ་ལས་བྱས་པའི་འཇམ་དཔལ་གཙོ་འཁོར་བདུན་སྒོ་སྲུང་གཤིན་རྗེའི་གཤེད་གཉིས་འཇམ་དཔལ་སངས་རྒྱས་པའི་ཞིང་བཀོད་དང་ཕལ་པོ་ཆེའི་རྒྱུད་རིས་གཤིན་རྗེ་མེའི་འཁོར་ལོ་ཅན་ལ་གཏད། བརྡ་སྦྱོར་ཚང་མང་གླིང་ན་ཐུབ་པ་གཙོ་འཁོར་བདུན་རྒྱུད་རིས་རིན་པོ་ཆེ་སྣ་ཚོགས་པ། ཕྱི་བཙུན་པའི་གཡོས་ས་རྒྱལ་པོ་འབྲུག་གི་སློག་པ་ཅན་ལ་གཏད། ལྷོའི་གླིང་སོགས་ཁ་གསུམ་ལས་བདུད་འདུལ་སྔགས་པའི་གླིང་ན་ཐུབ་པ་བདུད་འདུལ་ལུགས་འཁོར་ལྡེར་ཚོ་བཞི། ལྟེ་བ་ལ་མདོ་སྡེ་ས་བཅུ་པ། འཁོར་ས་ལ་གཙུག་ན་རིན་པོ་ཆེའི་མདོ་དབང་ཕྱུག་མ་ཉེར་བརྒྱད་གཏད། ཨཱརྻ་པ་ལོའི་གླིང་སྔར་ལྟར་ལས་གློ་འབུར་ན་སྐུའི་རྟེན་དུ་ཙནྡན་གྱི་རུས་པ་ལ་གུ་གུལ་གྱི་ཤ་དངུལ་གྱི་པགས་པས་གཡོགས་པའི་རྒྱལ་པོ་ཉིད་ཀྱི་སྐུ་འབག་ཞིག་བླ་འབུམ་ཡུམ་ཆེན་མོ་ཞིག་ཕྲ་མེན་གྱི་མཆོད་རྟེན་ཞིག་རྒྱུད་རིས་ཟ་མ་ཏོག་བཀོད་པ་བསེའི་ལྷ་མོ་སྟོང་རྩ་གཉིས་འཁོར་ས་ལ་ས་བཅུའི་པའི་མདོ་དྲང་སྲོང་དྷརྨ་ར་ཙ་འཁོར་སྡེ་བརྒྱད་དང་བཅས་པ་ལ་གཏད། རྒྱ་གར་གླིང་ན་ཇོ་བོ་ཤཱཀྱ་རྒྱ་གར་ལུགས་གཙོ་འཁོར་ལྔ། ཚེ་དཔག་མེད་དང་འདུས་པ་རྣམ་པར་དག་པའི་རྒྱུད་རིས། མདུན་ན་ལོ་པཎ་སྒྲ་བསྒྱུར་གྱི་ཁང་པ་སྒོ་སོ་སོར་ལྟ་བ་གནོད་སྦྱིན་རཱ་ཧུ་ལ་ལ་གཏད། ནུབ་ཀྱི་གླིང་ཟླུམ་པོ་གསུམ་ལས་བཻ་རོ་ཙ་ནའི་གླིང་ན་རྣམ་སྣང་ཟངས་ལས་(ཇ༩༦ན)

[Full Size]

བྱས་པ་འཁོར་གསང་བའི་ཡུམ་བཞི། རྒྱུད་རིས་རྣམ་སྣང་མངོན་བྱང༌། གནོད་སྦྱིན་གླང་མགོ་ཅན་ལ་གཏད། དགའ་ལྡན་བྱམས་པ་གླིང་ན་བྱམས་པ་གཙོ་འཁོར་བདུན། གཤིན་རྗེའི་གཤེད་གཉིས། རྒྱུད་རིས་མི་དགེ་བ་སྤྱད་པས་ཤཱ་ཀྱའི་བསྟན་པ་མར་འགྲིབ་པ་དང་ཚེ་ལོ་བཅུ་པ་ནས་བྱམས་པས་དགེ་བ་བྱེད་དུ་བཅུག་པས་ཡར་འཕེལ་བ་དང༌། སྒྲོལ་མ་ཕྱག་འཚལ་ཉེར་གཅིག །བསམ་ཡས་ཀྱི་དཔེ་རིས། ཞང་རྒྱལ་ཚ་ལྷ་སྣང་གིས་ལག་དཔོན་བྱས་པའི་ལས་ཐབས་དང་ལྟུང་བཤགས་ཀྱི་ལྷ་ཚོགས་བྲིས། མཁའ་འགྲོ་མ་གུང་གི་གོས་ཅན་ལ་གཏད། མི་གཡོ་བསམ་གཏན་གླིང་ན་རྣམ་སྣང་ཡབ་རྒྱལ་པོའི་ཐུགས་དམ་གཉན་པོ་བྱིན་རླབས་ཅན་རིགས་ལྔ། འཁོར་ཉན་ཐོས་བཅུ་དྲུག་རྒྱུད་རིས་གསེར་འོད་དམ་པ་ངེས་དོན་གྱི་ལུགས། རྒྱལ་པོ་དངུལ་གྱི་མགོ་ཅན་ལ་གཏད། བྱང་གི་གླིང་གྲུ་བཞི་གསུམ་ལས་རིན་པོ་ཆེ་སྣ་ཚོགས་གླིང་ན་ཐུབ་པ་གཙོ་འཁོར་ལ་རྒྱུད་རིས་དགའ་ལྡན་དུ་ཡུམ་ལ་ཆོས་བཤད་པ་དང༌། དྲིན་ལན་བསབ་པའི་མདོ། རྒྱལ་པོ་གཡིའི་སྦར་ཅན་ལ་གཏད། སེམས་སྐྱེད་བྱང་ཆུབ་གླིང་ན་ཕྱག་རྡོར་གྱི་ཕོ་བྲང་རི་བོ་མཆོག་རབ་ཀྱི་སྟེང་ན་ཕྱག་རྡོར། རྡོ་རྗེ་ཕུར་པ། བདུད་རྩི་འཁྱིལ་པ་གསུམ་གྱིས་བར་ཆད་སྲུང༌། སངས་རྒྱས་མ་ཆགས་པདྨ་ཅན་ན་མཁའ་ལ་བྱོན་པ་ལ་བྱང་སེམས་སྒྲིབ་པ་རྣམ་སེལ་གྱིས་ཞུས་སྟེ་ས་བཅུའི་བྱང་སེམས་རྡོ་རྗེ་སྙིང་པོ་ལ་སོགས་པ་བུདྡྷའི་ལྷ་བཞི་བཅུ་ཞེ་གཉིས་ཀྱིས་སེམས་ཀྱིས་ཞུས་པ་དེའི་བར་བར་ན་ཕྱོགས་བཅུའི་སངས་རྒྱས་ཀྱིས་དེ་དག་ལ་བྱིན་གྱིས་བརླབས་པ་བྲིས། རྒྱུད་རིས་དཀོན་མཆོག་སྤྲིན་འཁོར་ས་ལ་རྟག་དུ་ངུ་ཤེས་ཕྱིན་ཚོལ་བ་རྒྱལ་པོ་གསེ་གབ་དང་མཁའ་འགྲོ་མ་གསེའི་འགྲོས་ཅན་ལ་གཏད། དཀོར་མཛོད་བི་ཧར་གླིང་ན་ཐུབ་པ་གཙོ་འཁོར་དགུ། ཡབ་སྲས་མཇལ་བའི་མདོ། རྒྱུད་རིས་གློ་འབུར་རྣམས་ན་བསམ་ཡས་འབྱོངས་པའི་དཀོར་ལྷག་མ་འདི་ན་འདི་ཡོད་ཀྱི་རྩིས་ཡིག །སྲུང་མ་ཁྲམ་གང་གི་རྒྱལ་པོ། སྤྱི་རྒྱལ་པོ་པེ་ཀར་ལ་གཏད། ཡཀྵ་གོང་མ་གང་བ་བཟང་པོའི་ཁང་པ་ན་ཐུབ་པ་གཙོ་འཁོར་ལྔ། རྒྱུད་རིས་སངས་རྒྱས་སྟོང་རྩ། གང་བ་བཟང་པོ་ལ་གཏད། ཡཀྵ་འོག་མ་ནོར་བུ་བཟང་པོའི་ཁང་པ་ན་ལྡེར་ཚོ་(ཇ༩༦བ)

[Full Size]

དང་རྒྱུད་རིས་མཚུངས་ཤིང་ནོར་བུ་བཟང་པོ་ལ་གཏད་དེ་ཉི་ཟླའི་དོད་ཡིན་ནོ། །ཤར་ཕྱོགས་ཀྱི་ལོགས་གླིང་དང་བཅས་པ་ཁ་དོག་དཀར་པོ་ཤེལ། ལྷོ་མཐིང་ག་བཻ་ཌཱུརྻ། ནུབ་དམར་པོ་པདྨ་རཱ་ག་བྱང་སེར་པོ་གསེར་གྱི་རང་བཞིན་རྣམས་ལོགས་ཞལ་གཉེར་མ་ཆུ་གཉེར་འདྲ་བ། ཐང་ལ་དཀར་ཞལ་ཕྱིའི་རྒྱ་མཚོ་ལ་དཔེ་བྱས་པ་ཡང་བྱས་སོ། །གཞན་ཡང་ནུབ་ན་ཚང་མང་ཀེ་རུ་གླིང་གི་སྟེང་ཁང་སློབ་དཔོན་བོ་དྷི་ས་ཏྭའི་གཟིམས་མལ་དང་བ་སོ་ལྷ་ཁང༌། འོག་ཁང་དཀར་ཐབ་གནོད་སྦྱིན་མྱུ་གུ་ཐོགས་པ་ལ་གཏད། ལྷོར་དག་བྱེད་ཁྲུས་ཀྱི་ཁང་པ་ཙནྡན་གྱིས་གང་བ། འོག་སོ་ཕག་ལོགས་ལ་རབ་ཏུ་བྱུང་བ་སྐྱོ་བ་སྐྱེ་བའི་ཕྱིར་ཀེང་རུས་ཀྱི་རྣམ་པ་འདུལ་བ་ནས་གསུང་པ་ལྟར་བྲིས། གནོད་སྦྱིན་དབྱུག་ཐོགས་ལ་གཏད། བྱང་ན་མཐུ་རྩལ་གླིང་ན་སེ་བ་ཕུང་པོ་གཅིག་སྦྱིན་སྲེག་བྱས་པའི་ཡལ་ག་བརྒྱད་ལ་ཀླུ་ཆེན་པོ་བརྒྱད་བྱས། དབུས་ན་ཕྱག་རྡོར་དཀར་པོ་ཞི་བ་འདུལ་བྱེད་དུ་བཞེངས། རྒྱུད་རིས་ཉ་སྦལ་ཆུ་སྲིན་སོགས་བྲིས། སྲུང་མ་ས་བདག་རྒྱུན་འདལ་གཉན་བུ་རང་ཆས་སུ་ཡོད་ཅིང༌། ནང་ཆུ་ཤེལ་གྱིས་ཁྱབ་པ་སུས་ཀྱང་ལྟ་བར་རྔོ་མི་ཐོགས་པ་ཅིག་མཆིས། དེ་ནས་མཆོད་རྟེན་དཀར་པོ་བྱང་ཆུབ་ཆེན་པོའི་མཆོད་རྟེན་སེང་གེས་བརྒྱན་པ་ཉན་ཐོས་ཀྱི་ལུགས་སུ་བཞེངས། ཤུད་བུ་མི་རྒྱལ་ཏོ་རེས་ལག་དཔོན་བྱས་པ་གཉན་པས་ཤི་སྟེ་ཡང་ཤུད་བུ་ཁྲི་འབྲེང་ཁེང་བཙན་གྱིས་བྱས། གནོད་སྦྱིན་སྐར་མདའ་གདོང་ལ་གཏད། མཆོད་རྟེན་དམར་པོ་སྐུ་ཚེ་བརྟན་པ་བྱང་ཆུབ་སེམས་དཔའི་ལུགས་པདྨས་བརྒྱན་པ་སྣ་ནམ་རྒྱལ་ཚ་ལྷ་སྣང་གིས་བཞེངས། གཟའ་མིག་དམར་ལ་གཏད། མཆོད་རྟེན་ནག་པོ་དེ་བཞིན་གཤེགས་པའི་གདུང་གིས་བརྒྱན་པ་རང་སངས་རྒྱས་ཀྱི་ལུགས་ངན་ལམ་ཏ་ར་ཀླུ་གོང་གིས་བཞེངས། གནོད་སྦྱིན་ལྕགས་མཆུ་ཅན་ལ་གཏད། མཆོད་རྟེན་སྔོན་པོ་ཆོས་ཀྱི་འཁོར་ལོ་དེ་བཞིན་གཤེགས་པའི་ལུགས་སྒོ་བཅུ་དྲུག་གིས་བརྒྱན་པ་མཆིམས་རྡོ་རྗེ་སྤྲེ་ཆུང་གིས་བཞེངས། གནོད་སྦྱིན་ཉི་མའི་གདོང་ཅན་ལ་གཏད། དེའི་ཚེ་འདྲེ་མོ་འོད་ཅན་མས་མི་རྣམས་ཉལ་བའི་མགོ་མཇུག་ལྡོག་པ་སོགས་འཚེ་བ་མང་དུ་བྱས་པས་བྱམས་པ་གླིང་དུ་མཆོད་རྟེན་(ཇ༩༧ན)

[Full Size]

འོད་འབར་བརྩིགས་སྟེ་མནན། མཆོད་རྟེན་ལྔ་པོ་ལ་ནང་རྫོངས་མ་མཆིས་ནས་རྗེས་སློབ་དཔོན་ལ་ཞུས་པས་མ་ག་དྷའི་རྒྱལ་པོའི་ཁབ་ཀྱི་སྒོ་མདུན་ན་དྷ་རུ་ཙེ་དོ་བྱ་བའི་མཆོད་རྟེན་ཞིག་གི་ནང་ན་རྒྱལ་པོ་མ་སྐྱེས་དགྲའི་སྐལ་བ་དེ་བཞིན་གཤེགས་པའི་རིང་སྲེལ་མ་ག་དྷའི་བྲེའི་ཁལ་གཅིག་བཞུགས་པར་གྲགས་སོ་གསུངས། རྒྱལ་པོས་དེ་སྤྱན་དྲངས་པའི་ཕྱིར་བོད་ཀྱི་རྟ་རྔོག་ཆགས་སྒ་མནན་མ་ཐག་གཅིག་ཡན་ཆད་མ་ལུས་པར་ཆད་པ་ལ་བསྔོས་སྟེ་མགོས་ཀྱི་ཕག་རིར་དུས་བཏབ། སློབ་དཔོན་གྱིས་ལམ་རྒྱུས་མཛད་ནས་མཐའ་འཁོབ་བོད་ཀྱི་རྟ་པའི་དམག་ཕྱིན་ནས་དཔལ་མོ་དཔལ་ཐང་ལ་དམག་གྲང་བཏབ་པས་རྟ་པ་བྱེ་བ་ཕྲག་བཅུ་བཞི་བྱུང༌། རྒྱ་གར་མཐའ་འཁོབ་ཏུ་སླེབས་པ་དང་ཡུལ་དེའི་རྒྱལ་པོ་བྲེད་ནས་མཐའ་འཁོབ་ཀྱི་རྒྱལ་པོའི་རྟ་པ་འདི་འདྲ་ན་དཔུང་བུ་ཆུང་དང་ཤིང་རྟ་པ་དང་གླང་པོ་ཆེ་བའི་ཚོགས་ཅི་འདྲ་བར་འགྱུར་ཟེར་ནས་ཕོ་བྲང་གི་སྒོའི་ཡ་ཀླད་ལ་བོད་རྒྱལ་པོའི་ལྷམ་བཏགས་ནས་དེའི་འོག་ན་ཕར་འཁོར་དང་བཅས་པས་འཛུལ་སྟེ་ངའི་རྒྱལ་ཁམས་ནི་བཙན་པོ་ཁྱོད་ཀྱི་འོག་དུ་འཛུལ་ཞིང་དཔྱ་དང་སྐྱེས་ལོ་ཐང་དུ་འབུལ་ལོ་ཟེར་ཞིང་མངར་འདུས་སོ། །དེ་ནས་ཆུ་གངྒཱ་བརྒལ་ནས་མ་ག་དྷར་དམག་དྲངས་པས་མ་ག་དྷ་པ་ཐམས་ཅད་ནོར་རྣམས་ཨོ་དྱནྟ་པུ་རིར་བསྐྱས། མི་རྣམས་རྒྱ་གར་ཤར་ཕྱོགས་སུ་བྲོས་སྟེ་གཡུལ་སྤྲོད་མ་དགོས་པར་དཔལ་རྡོ་རྗེ་གདན་དང་བྱང་ཆུབ་ཀྱི་ཤིང་ལ་མཆོད་པ་བྱས། མཆོད་གནས་སྤྱན་དྲངས། དེ་ནས་མཆོད་རྟེན་ཁ་ཕྱེ་བའི་ནང་ནས། མཚོན་ཆའི་འཁོར་ལོ་འཁོར་བའི་དཀྱིལ་ན་རིན་པོ་ཆེའི་བུམ་པ་འདུག་པས་སུས་ཀྱང་བླང་བར་རྔོ་མ་ཐོགས། རྒྱ་གར་གྱི་རྒན་པོ་ཅིག་འདུག་པ་ན་རེ་ང་ལ་སྔོན་གྱི་མིས་གླེང་བའི་ལོ་རྒྱུས་ཡོད། མཆོད་རྟེན་འདིའི་བྱང་ངོས་ན་རྡོ་ལེབ་ཆེན་པོའི་དཀྱིལ་གྱི་བུག་པ་ན་མར་རྔ་མང་གི་ཐག་པ་ལ་བུམ་པ་བཏགས་སྟེ་བཏང་བས་བུམ་པ་དེ་ཆུས་གང་བ་འབྱུང༌། དེ་ནས་ཡར་ལ་གཞལ་བས་མཆོད་རྟེན་གྱི་རྐེད་པ་དང་ཐད་ཀར་མཉམ་པ་ན་རྫིང་བུའི་གསེང་ཁུང་གི་བར་ཆུ་འགྲོ་བ་རྩྭ་དང་བྱེ་མས་བཀག་སྟེ་ཆུ་བསྒགས་ན་ཆུ་ཆད་ནས་མཚོན་ཆའི་(ཇ༩༧བ)

[Full Size]

འཁོར་ལོ་རྡིག་ཟེར་སྟེ་འཁོར་འཕྲོ་ཆད་པ་ཡིན་ཟེར་ནས་དེ་ཇི་སྐད་ཟེར་བ་ལྟར་བྱས་པས་བདེན་པར་བྱུང་ནས་རིན་པོ་ཆེའི་བུམ་པ་ནས་སངས་རྒྱས་ཤཱཀྱ་ཐུབ་པའི་རིང་སྲེལ་བྲེ་དྲུག་སྤྱན་དྲངས། ཡང་སྔར་ལྟར་རྩི་ཤིང་བསལ་ཆུ་བཏང་བས་མཚོན་ཆའི་འཁོར་ལོ་སྔ་མ་ལྟར་འཁོར་སྟེ་སྔར་ལྟར་རྒྱས་བཏབ་པོ་དེ་ནས་ཚུར་བྱོན་སྟེ་ཆུ་བོ་གངྒཱའི་འགྲམ་དུ་བོད་ཀྱི་མི་བཞི་བསྐོས་ནས་འདི་ཚུན་ཆད་བོད་ཀྱི་ས་བཅད་ཡིན་པས་འདིར་རྡོ་རིང་གྱིས་ཅིག་ཞེས་བཀའ་བསྩལ། མི་མང་པོས་བྱེ་ཁུང་དུ་ལྕགས་ཀྱི་ཀ་བ་བཙུགས་སྟེ་ཕྱེས་བྲུ་ཤའི་དམག་གིས་དེ་བཤིག་པས་མ་ཤིགས་ནས་མེས་བཞུ་བའི་འཕྲོ་ཡོད་སྐད། དེའི་ལུ་འབུགས་ན་འཛུགས་མཁན་གྱི་མི་བཞི་པོ་ཆགས་པ་བྷོ་དྲ་ཋ་ཌྷུ་རའི་རིགས་བྱ་བའི་གྲོང་ཁྱེར་ཆེན་པོ་ཅིག་ཡང་ཡོད་དོ། །རྟ་དམག་རྣམས་བོད་དུ་ལོག་པ་ཤིན་ཏུ་ཉུང་ནས་རྒྱལ་པོ་ལ་ཞུས་པས་རྒྱ་གར་ཡུལ་བཟང་པས་བསྡད་པ་མིན་ནམ་གསུང་སྟེ་སློབ་དཔོན་ལ་ཞུས་པས་རྒྱ་གར་ཆམ་ལ་འབེབས་པའི་ཕྱིར་བཙན་པོས་སྤྲུལ་པ་མཛད་པ་ཡིན་གྱི་དམག་དང་པོ་ནས་འདི་བས་མེད་གསུངས་སྟེ་སྔོ་བགྲང་བྱས་པས་མི་གཅིག་ཀྱང་མ་ལུས་རྟ་གཅིག་ཀྱང་མ་ཆད་པར་ཚང་བས་བཙན་པོ་ཁྲི་སྲོང་ལྡེ་བཙན་སྤྲུལ་པ་གྲགས་སོ། །དེ་ནས་ཆོས་འཁོར་དུ་བྱོན་སྟེ་རིང་སྲེལ་གྱི་སྣོད་དང་ཟ་མ་ཏོག་བཞི་སྤྲུགས་པའི་བར་རིང་སྲེལ་འཕེལ་སྟེ་སྙིམ་པ་གང་མ་ཤོང་བ་མཆོད་རྟེན་གྱི་ཏོག་ལ་བཞུགས། མེས་ཐོ་ཐོའི་ཐུགས་དམ་གཉན་པོ་གསང་བ་དང་མེས་སྲོང་བཙན་གྱི་ཐུགས་དམ་ལྔ། ཡབ་ཀྱི་ཐུགས་དམ་གཉིས་རྣམས་བཞུགས་པས་མཆོད་རྟེན་དཀར་པོ་ལྷག་པར་བྱིན་རླབས་ཆེའོ། །ལྷོ་ཕྱོགས་ཀྱི་མཆོད་རྟེན་ལ་སྲོག་ཤིང་དང་ཐོན་ཀ་དཀར་པོའི་འཁོར་ལོ་བལ་པོའི་ཤིང་མཁན་དང༌། རྡོ་བཟོ་དང༌། མགར་བས་བགྱིས་སྟེ་ཧས་པོ་རིའི་རྒྱབ་ཏུ་བལ་པོ་བཟོ་བྱེད་པའི་དྲུང་དུ་བཞག་སྟེ་དྲངས་ནས་འཛུགས་པར་ཆད་བྱས། བློན་པོ་རྣམས་ཀྱིས་འབྲེང་ཞགས་དང་ཤིང་རྟ་གྲབས་སུ་བཙུད། བཟོ་བོས་དགུང་སངས་མ་ཐག་བཟོ་འཕྲོ་ལ་ཕྱིན་པས་སྲོག་ཤིང་སོགས་ཤུལ་ཧ་རེ་སྟོར། རྗེའི་སྙན་དུ་གསོལ། ཕོ་ཉ་བཏང་སྟེ་བལྟས་པས་སྲོག་ཤིང་མཆོད་རྟེན་ལ་(ཇ༩༨ན)

[Full Size]

བཙུགས་པ་མཐོང༌། ཕོ་ཉ་དེས་མཆོད་རྟེན་ཉིད་ལ་འཁོར་ལོ་བཙུགས་ལགས་ཅེས་གསོལ། ཤིང་མཁན་དང་མགར་བ་ཀུན་གྱིས་བལྟས་ན་བཙུགས་ལེགས་པར་མཐོང་སྟེ་སྙན་དུ་གསོལ་བ་དང༌། རྗེས་ཀུན་བསགས་སྟེ་ངའི་འབངས་ལ་སྟོབས་ཆེ་བ་འདི་སུ་ཡིན་བྱ་དགའ་ཆེར་གནང་ངོ་གསུངས་པས་ཁས་ལེན་པ་སུ་ཡང་མ་མཆིས། ཕྱ་མཁན་བལ་པོ་ན་རེ་མདང་ངའི་རྨི་ལམ་ན་མི་བཞིས་འཁོར་ལོ་ཁྱེར་ནས་འོངས་སྟེ་བཙུགས། ཁྱེད་ཀྱིས་མཆོད་རྟེན་བདུན་བཅུ་བཙུགས་ན་ལེགས་རབ། མཆོད་རྟེན་འདི་ཡང་ལེགས་རབ། མཆོད་རྟེན་འདི་ཛམྦུའི་གླིང་ན་བྱིན་ཆེ་བ་ཡིན་སྟེ་འདི་ལ་སུས་ཕྱག་དང་སྐོར་བ་བྱེད་པ་དེ་བསམ་པ་ཡིད་བཞིན་དུ་འགྲུབ་པས་བྱ་དགར་གསེར་གྱི་ཡ་ལད་ཅིག་བྱིན་སྟེ་འདི་ཁྱེར་ཞིག་ཟེར། གཉིད་སད་ཙ་ན་མི་བཞི་ནི་མི་གདའ། ཡ་ལད་ནི་འདི་ཡིན་ཟེར་ནས་གསེར་ཁྲབ་ཅིག་གདའ། དེ་གསོལ་བས་ཕྱ་མཁན་འཁོར་བཅས་ལ་བྱ་དགའ་ཆེ་ཐང་དུ་བསྩལ། སློབ་དཔོན་གྱི་ཞལ་ནས་དེ་སྐད་དུ་སྟོན་པ་རྒྱལ་པོ་ཆེན་པོ་བཞི་ཡིན་པས་དེའི་གཟུགས་ཀྱང་བྱ་གསུངས་ནས་བུམ་པའི་སྟེང་དུ་འབག་བཞི་བྱས་ནས་བཞག་གོ །དེ་ནས་མགོན་ཁང་བཞིའི་ནང་དུ་ཕུགས་ན་ཤཱཀྱ་ཐུབ་པ་གཙོ་འཁོར་གསུམ། མདོ་ན་མགོན་པོ་ལྕམ་དྲལ་གཉིས། དེའི་སྒོ་དྲ་བ་བྱས། སྒོའི་ཕྱི་ན་རྟ་བབ་ཀྱི་སྟེང་དུ་ཆོས་ཀྱི་འཁོར་ལོ་གསེར་ལས་བྱས་པ་དང༌། ཤ་རམྦྷ་དང༌། གདུགས་དང་རྒྱལ་མཚན་དང་བཅས་པ་བགྱིས་སྟེ་རྒྱལ་པོ་ཆེན་པོ་བཞི་ལ་གཏད། ལྕགས་རི་ཟུར་མང་རྡོ་རྗེའི་འགྲོས་ལ་མཆོད་རྟེན་སྟོང་རྩ་བརྒྱད་ཀྱིས་བསྐོར། རེ་རེ་ལ་སངས་རྒྱས་ཀྱི་རིང་སྲེལ་རེ་བཞུགས། རྒྱལ་པོ་སྡེ་བཅོ་བརྒྱད་ལ་གཏད། བསམ་ཡས་སྤྱིའི་ཆོས་སྐྱོང་དཔལ་མགོན་པོ་ལ་གཏད་དོ། །དེ་ལྟར་དཔལ་བྲག་དམར་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དེ་ནི་གཞི་ཆེ་ལ་དཔངས་མཐོ། རྒྱུ་བཟང་ལ་བཀོད་པ་ལེགས། དུང་ཕོར་གཟིས་བཀང་བ་འདྲ་བ། རྗེའི་ཐུགས་དམ། འབངས་ཀྱི་མཆོད་གནས། སངས་རྒྱས་དང་ཆོས་དཀོན་མཆོག་གི་ཞིང་ཁམས། དགེ་འདུན་གྱི་བཞུགས་གནས། (ཇ༩༨བ)

[Full Size]

དཀོན་མཆོག་གསུམ་གྱི་ཕོ་བྲང་དེ་ཡོས་བུའི་ལོ་ལ་རྨང་བྲུས་ནས་ཡོས་བུའི་ལོ་ལ་འབྱོངས་པ་ལགས་སོ། །བཙུན་མོ་ལྔ་ཁབ་ཏུ་བཞེས་པ་ལ་མཆིམས་བཟའ་ལྷ་མོ་བཙན་དང་མཁར་ཆེན་བཟའ་མཚོ་རྒྱལ་གཉིས་སྒྲུབ་པ་མཛད་པས་ཕྱག་རིས་མེད། འབྲོ་བཟའ་ཁྲི་རྒྱལ་མོ་བཙན་ཕྱིས་རབ་ཏུ་བྱུང་ནས་བྱང་ཆུབ་རྗེར་མཚན་གསོལ་བ་དེའི་ཕྱག་རིས་དགེ་རྒྱས་ཀྱི་གཙུག་ལག་ཁང་ལགས་སྟེ་སྣང་བ་མཐའ་ཡས་གཙོ་འཁོར་དགུ་གཞུང་གི་ལུགས་སྟོད་དུ་ལུགས་བཏབ་ནས་ཆབ་ལ་སྤྱན་དྲངས་པས་འཁོར་གཉིས་ཆབ་ལ་ཤོར། གཡས་ན་རིགས་གསུམ་མགོན་པོ་གཡོན་ན་སྨན་བླ་སངས་རྒྱས་ཀུན་དུ་བཟང་པོ་མི་གཡོ་བ་རྣམས་བཞུགས། སྲས་མི་མངའ། ཡབ་མིང་འབྲོ་ཡུལ་ཐག་རིང་བས་ཕྱིས་གསོ་མི་མི་འོང་ཞེས་མཆི་ནས་ལྷ་ལུགས་མ་བྱས། རྩིག་པ་སོ་ཕག་ཞ་ཉེའི་ཆུས་སྦྱར། ཟངས་ཀྱི་ཐོག་བཀལ། རོལ་མོར་ཅོང་བཏགས། ཡོན་ཆབ་ཙནྡན་གྱི་ཁྲོན་པ་བྱས། སྒྲོན་མེར་རིན་པོ་ཆེ་འོད་འབར་བ་གཙོ་བོའི་སྨིན་མཚམས་སུ་ཕྲར་བཏབ་བོ། །ཇོ་མོ་ཚེ་སྤོང་བཟའ་མེ་ཏོག་སྒྲོན་ལ་སྲས་མངའ་བས་ཁམས་གསུམ་ཟངས་ཁང་གླིང་ཡབ་ཀྱི་དབུ་རྩེ་ལ་དཔེ་བླངས་ནས་བཞེངས། འོག་ཁང་གི་ཀ་གདུང་རྣམས་ཟངས་ཀྱིས་བཏུམས་སོ། །ཕོ་ཡོངས་བཟའ་རྒྱལ་མོ་བཙུན་ཡུམ་ཚེ་འཕོས་པ་ཁབ་ཏུ་བཞེས་ན་ལན་ལོན་པར་སློབ་དཔོན་གིས་ལུང་བསྟན་པས་ཁབ་ཏུ་བཞེས་སྟེ་ལྷ་ལྕམ་ལ་སྲས་མི་མངའ་བས་ལྷ་ཁང་ཉིས་ཐོག་དུ་གནང་བས་བུ་ཚབ་གསེར་ཁང་རྡོ་རྗེ་དབྱིངས་ཀྱི་དཀྱིལ་འཁོར་བཞེངས་སུ་གསོལ་སྟེ་བཟོ་བོ་ལ་ཟས་སྣ་བཅུ་གསུམ་རེ་དྲངས་པས་བཟོ་ཁྱད་བཅུ་གསུམ་བྱས་སྟེ། སྟེང་ཁང་གི་ཕྱི་ལ་རྩིག་པ་མེད་པ། ནང་ན་ཀ་བ་མེད་པ། ས་གཞི་ར་གན་ལས་བྱས་པ། གཡུའི་གདུང་མ་ལ་གསེར་གྱི་རྟ་རྒྱུག་ཅིང་གསེར་གདུང་ལ་གཡུ་འབྲུག་རྒྱུག་པ། མཐིང་གི་རྒྱ་ཕུབས་ཕྱིར་བལྟ་ནང་བལྟ་གཉིས་ཡོད་པ། ཆུ་ཐམས་ཅད་འདྲིལ་ནས་སེང་གེའི་ཁ་ནས་རུས་སྦལ་གྱི་རྒྱབ་ཏུ་འབབ་པ། གོརྴཱཥིའི་སྒོ་ཡོད་པ། སྒོ་འབྱེད་གཅོད་ལ་གསེར་གྱི་(ཇ༩༩ན)

[Full Size]

བྱེ་ཆུང་འཕར་ཞིང་སྐད་འདོན་པ། ནང་གི་ཡོ་གའི་ལྷ་ཚོགས་ལ་སྤྱི་གདུགས་རེ་དང་སྒོས་གདུགས་རེ་ཕུབ་པ། ཁྱམས་ན་མཛད་པ་བཅུ་གཉིས་འབུར་དུ་དོད་པ། རྒྱུ་སྐར་གྱི་ལྷ་མོ་ཉེར་བརྒྱད་ཀྱིས་རྒྱ་ཕུབས་འདེགས་ཤིང་ནང་ཟུར་བཞི་ན་གསེར་གི་སེང་གེ་ལུག་ཐོང་ཙམ་བརྒྱད་ཡོད་པ། རྒྱ་ཕུབས་ཀྱི་ཤམ་བུ་ལ་མཆོད་པའི་ལྷ་མོ་ཉི་ཤུ་རྩ་བརྒྱད་འབུར་དུ་དོད་པ། ལྷའི་བུས་ཁྱུང་གི་སྒོ་ང་ལས་བདུད་རྩིའི་ཆུས་སྐུ་ཁྲུས་གསོལ་བ་སྟེ་བཅུ་གསུམ་དང་ལྡན་པའི་ངོ་མཚར་ཅན་ཞིག་བཞེངས་སུ་གསོལ་ལོ་ཞེས་བྱུང་ངོ༌། །ལོ་རྒྱུས་གཞན་ལས་བཙན་པོ་ཡབ་ཡུམ་གཉིས་ལ་ཐུགས་ཤིན་ཏུ་བཅགས་པས་སློབ་དཔོན་པདྨ་ལ་བདག་གི་ཕ་མ་གར་སྐྱེས་ཞུས་པས་ཡབ་ནི་རྒྱ་གར་ན་སྐྱེས་སྟེ་ད་ལྟ་སློབ་སྦྱངས་བྱེད། པཎྜི་ཏ་མཁས་པ་ཅིག་དུ་བྱས་སྟེ་ཁྱོད་ཀྱི་དབོན་སྲས་ཀྱི་དུས་སུ་བོད་དུ་བྱོན། ཡུམ་ནི་ཟུར་མཁར་ན་དབུལ་པོ་བཟའ་མིའི་བུ་མོར་སྐྱེས་སོ་ཞེས་གསུངས་པས་ཡུམ་ལ་ཐུགས་བརྩེ་པས་བཙུན་མོ་བཞེས་སྟེ་གསེར་གྱི་བདག་མོར་བསྐོས། ཡབ་ནི་ད་ན་ཤཱི་ལ་ཡིན་ཞེས་ཀྱང་བྱུང་ངོ༌། །རྦ་བཞེད་ན་དཀོར་བདག་སྤྱན་དྲངས་ཚུལ་མི་སྣང་ཡང་སློབ་དཔོན་པདྨས་མ་འོངས་པ་གནམ་ཐེ་དཀར་པོའི་སྤྲུལ་པ་ཧོར་ཡུལ་དུ་བྱུང་བས་བོད་ཁམས་དབང་བྱེད་ཅིང་ལྷ་ཁང་ཕལ་ཆེར་འཇིགས་པར་འགྱུར་བས་ཧོར་གྱིས་མི་འཇིག་པའི་ཕྱིར་རྒྱལ་པོ་གནམ་ལྷ་བྱང་ཆུབ་ལ་གཏད་དོ་གསུངས་ནས་རྒྱལ་པོས་ངན་ལམ་ཏ་ར་ཀླུ་གོང་དམག་དཔོན་དུ་བསྐོས་པས་ཧོར་གྱི་སྒོམ་གྲ་བཅོམ། རྟེན་རྫས་དང་ཡོ་བྱད་ཐམས་ཅད་ཁྱེར། སློབ་དཔོན་ཆེན་པོ་པདྨས་ཕྱག་རྡོར་གྱི་ཏིང་ངེ་འཛིན་མཛད་དེ་རྣམ་སྲས་འཁོར་བཅས་ཀྱི་དམག་གིས་བཀུག་སྟེ་པེ་ཀར་དཀོར་མཛོད་གླིང་གི་ལྕོག་དུ་རྟེན་བཙུགས་དམ་ལ་བཏགས་སྟེ་བསམ་ཡས་སྤྱིའི་བཀའ་སྲུང་དུ་བསྐོས་ཤིང་ཕྱིས་བོད་ཡུལ་གྱི་དཀོན་མཆོག་གསུམ་གྱི་རྟེན་ཕལ་ཆེར་ཡང་གཏད་པར་སྔོན་གྱི་ཡི་གེ་མང་པོ་ལས་བྱུང་ཞིང་སློབ་དཔོན་ཆེན་པོའི་རྣམ་ཐར་དང་རྒྱལ་པོ་ཉིད་ཀྱི་དམ་བཞག་རྣམས་ལས་གསལ་ལོ། །ཏ་ར་ཀླུ་(ཇ༩༩བ)

[Full Size]

གོང་ཤི་འཕོས་ནས་མི་མ་ཡིན་ཆེན་པོར་གྱུར་པ་རྒོད་པོ་ཏ་རར་གྲགས་སྟེ་མཆིམས་ཕུའི་བཀའ་སྲུང་དུ་བསྐོས་པར་གྲགས་སོ། །ཡིག་ཚངས་མང་པོ་ཞིག་ན་མེ་ཡོས་ལ་རྨང་བཏིང་ནས་ས་ཡོས་ཀྱིས་ཚར་ཞེས་པ་འདུག་ཀྱང་མེ་ཡོས་ནས་ལོ་བཞི་ལོན་པ་ལྕགས་རྟ་ལ་ཁྲི་སྲོང་འཁྲུངས་པའི་ཕྱིར་དགུང་ལོ་ཉེར་གཉིས་བཞེས་པ་ལྕགས་ཡོས་ལ་རྨང་བཏིང་ཉེར་དྲུག་པ་ཤིང་ལུག་ལ་སད་མི་རྣམས་རབ་ཏུ་ཕྱུང༌། སོ་བཞི་པ་ཆུ་ཡོས་ཀྱིས་བསམ་ཡས་ཚར་བ་འདི་ངེས་པར་སྣང་ངོ༌། །དེ་ལྟར་གཙུག་ལག་ཁང་ཆེན་ཡོངས་རྫོགས་ནས། །གསེར་གྱི་ཡོན་ཕུལ་རབ་ཏུ་གནས་པར་ཞུས། །བོ་དྷི་ས་ཏྭས་གསང་བ་འདུས་པ་ནི། །འཇམ་དཔལ་རྡོ་རྗེའི་སྒོ་ནས་བྱིན་གྱིས་བརླབས། །སློབ་དཔོན་པདྨས་ཡོ་ག་རྩ་བའི་རྒྱུད། །ཞི་བ་རྡོ་རྗེ་དབྱིངས་ཀྱི་ཏིང་འཛིན་མཛད། །གཉི་གས་རབ་ཏུ་གནས་ཅིང་སྤྱན་དབྱེ་བའི། །ཆོ་ག་རྨད་དུ་བྱུང་བ་ལན་བརྒྱད་མཛད། །རེ་རེ་ལ་ཡང་ངོ་མཚར་དཔག་མེད་བྱུང༌། །བྲག་དམར་མཚོ་མོ་མགུར་དུ་པད་སྡོང་སྐྱེས། །སྣ་ཚོགས་འཇའ་དང་འོད་ཟེར་སྤྲིན་དུ་འཁྲིགས། །ལྷ་དང་མཁའ་འགྲོའི་མེ་ཏོག་ཆར་དུ་འབབ། །དེ་ཚེ་བོད་ཡུལ་ལྷ་མི་ཐམས་ཅད་འདུས། །གླུ་གར་རྩེ་འཇོ་དགའ་སྟོན་བསམ་མི་ཁྱབ། །བོད་ཡུལ་བདེ་སྐྱིད་དགའ་ལྡན་ལྷ་ལས་ལྷག །སྐྱིད་པའི་དགའ་སྟོན་ལོ་སྐོར་གཅིག་དུ་བྱས། །དེ་ཡང་རྦ་བཞེད་ལས། དེ་ལྟར་ལོ་བཅུ་གཉིས་ན་ལྷ་ཁང་ཚར་བ་ལས་དེ་ནས་སློབ་དཔོན་ལ་མངའ་གསོལ་གྱི་གསེར་ཕྱེ་བྲེ་དྲུག་ཕུལ་ནས་ཞུས་པས་བོད་འབངས་མངའ་རིས་ཐམས་ཅད་ལ་དཔྱ་དང་ཁྲལ་བསྡུས་ལ་ཡོ་བྱད་སྟ་གོན་གྱིས་ཅིག་ཞེས་ལུང་གནང༌། སློབ་དཔོན་ཀེ་རུ་གླིང་ན་མཚམས་བཅད་ནས་སྒྲུབ་པ་ལ་བཞུགས་པ་ལས་རབ་གནས་མངའ་གསོལ་གྱི་ཐུགས་དམ་མཛད། བཙན་པོས་མངའ་འོག་གི་འབངས་ཀུན་བསྡུས་སྟེ་ཡོ་བྱད་(ཇ༡༠༠ན)

[Full Size]

ཚོགས་ནས་མངའ་གསོལ་བའི་དུས་བཟང་པོ་ལ་བབ་པའི་ཚེ་བྲག་དམར་སྐྱེ་བོའི་ཚོགས་ཀྱིས་ཁེངས། སློབ་དཔོན་གྱིས་ཀེ་རུ་གླིང་ནས་མཁར་གཞོང་མེ་ཏོག་གིས་བཀང་ནས་བྱོན་སྟེ་མཆོད་རྟེན་དཀར་པོའི་གོང་དུ་བྱོན་པ་དང་བཙན་པོས་འཇམ་པའི་རྡོ་རྗེ་ཞལ་གསུམ་ཕྱག་དྲུག་པ་ཕྱག་ན་རིན་པོ་ཆེའི་མེ་ཏོག་ཐོགས་པ་ཅིག་དུ་གཟིགས། སློབ་དཔོན་གྱིས་ཏིང་ངེ་འཛིན་གྱིས་དབུ་རྩེའི་ཐོག་གི་ལྷ་ཕྱིར་སྤྱན་དྲངས་ནས་མཆོད་རྟེན་དཀར་པོ་ལ་བསྐོར་བ་བྱས་སྟེ་ཞལ་ཤར་ཕྱོགས་སུ་གཟིགས་ནས་འཁོར་སའི་ལོགས་ན་ཕྲོག་ཞུ་ཟིང་ངེ་འདུག་པ་ལ་མེ་ཏོག་གཏོར། ལྷ་རྣམས་དུས་གཅིག་དུ་གཤེགས་སྟེ་སྔར་གྱི་གྲལ་རིམ་བཞིན་དུ་འཁོད། ཁྲོ་བོ་གཉིས་ཀྱིས་རྒྱབ་ནས་ཡེ་ཤེས་ཀྱི་མེ་འབར་བས་ས་གཞི་ཚིག་པ་ལ་སློབ་དཔོན་གྱིས་དྲི་ཆབ་ཀྱིས་བསད་གཏོར་མཛད་པས་མེ་ཤི་བའི་ཤུལ་སོར་ཆུད། བཙན་པོས་མེ་ཏོག་དུ་གསེར་གཞོང་པ་གང་ཕུལ་ལོ། །ཞལ་སྲོ་ཆེན་པོའི་དུས་ཕྱིའི་ལྕགས་རིའི་སྟེང་མཆོད་རྟེན་གྱི་བར་ཐམས་ཅད་བཞེས་པ་དང་ཐུད་རྐྱལ་གྱིས་བཀང་སྟེ་ལྟད་མོ་བ་རྣམས་ལ་འཚལ་མ་བསྩལ་བས་སྐལ་བ་གཉིས་གསུམ་རེ་ཐོབ། ཆད་པ་ནི་ཡེ་མ་མཆིས། དེའི་རྗེས་ལ་ཀུན་ལྟད་མོ་ཆེ་ཐང་རེ་བྱེད། སྨན་རིལ་ལན་ཀ་བྲག་ཆུང་ཉི་མ་འདེ་བའི་དྲུང་དུ་ཤ་བ་བྱུང་བ་ལ་ཞགས་པས་བཟུང་ནས་ཁྲོམ་བསྐོར། ལྟད་མོ་དང་པོ་བྱས་ལུགས་འཁོར་སའི་སྒོ་རྒྱབ་ཏུ་བྲིས་ནས་ཡོད་དོ། །སང་ནང་བར་ཡང་སློབ་དཔོན་ཀེ་རུ་གླིང་ནས་འཁར་གཞོང་མེ་ཏོག་གིས་བཀང་ནས་བྱོན་པས་བཙན་པོས་དགེ་སློང་རིགས་ལྔའི་དབུ་རྒྱན་ཅན་ཞིག་དུ་གཟིགས། སློབ་དཔོན་གྱིས་ཏིང་ངེ་འཛིན་གྱིས་དབུ་རྩེའི་བར་ཁང་གི་ལྷ་སྤྱན་དྲངས་སྟེ་འཁོར་སའི་ལོགས་ལ་ཞལ་ཤར་དུ་གཟིགས་པ་ལ་མེ་ཏོག་གཏོར། ལྷ་རྣམས་དུས་གཅིག་ལ་ནང་དུ་གཤེགས་སྟེ་སྔར་གྱི་གྲལ་བཞིན་དུ་འཁོད། གསེར་གཞོང་པ་གང་ཡོན་དུ་ཕུལ། ཞལ་སྲོའི་དུས་ལྟད་མོ་བ་ལ་འཚལ་མ་སྔར་བཞིན་དུ་བསྩལ། དེའི་རྗེས་ལ་ལྟད་མོ་ཆེ་ཐང་རེ་བྱེད། རྔོག་ཕ་ལ་བྱ་བས་རྔ་མོང་བདུན་ལ་ཞོན་རེས་བྱེད་ཅིང་བྱུང༌། ལ་ལ་གུ་རུབ་སྟེ་རྟ་རྒྱུག་(ཇ༡༠༠བ)

[Full Size]

པའི་སྟེང་ན་ཕར་ན་རལ་གྲིའི་སྒོང་འཕན། ལ་ལ་མི་ཉིས་བརྩེགས་ཀྱིས་འཕན་འཕྱར་བ་ལ་སོགས་ལྟད་མོ་བར་པའི་བྱས་ལུགས་འཁོར་སའི་སྒོ་རྒྱབ་ཏུ་བྲིས་ཡོད། ཡང་སློབ་དཔོན་གྱིས་ཀེ་རུ་གླིང་ནས་འཁར་གཞོང་མེ་ཏོག་གིས་བཀང་ནས་བྱོན་པ་དེ་བཙན་པོས་དགེ་སློང་འཇམ་པའི་རྡོ་རྗེའི་དབུ་རྒྱན་ཅན་ཞིག་དུ་གཟིགས། དབུ་རྩེའི་སྟེང་ཁང་གི་ལྷ་རྣམས་བང་སྨུག་པོའི་ཁར་ཏིང་ངེ་འཛིན་གྱིས་སྤྱན་དྲངས་ནས་མེ་ཏོག་གཏོར། ལྷ་རྣམས་དུས་གཅིག་ལ་ནང་དུ་གཤེགས་སྟེ་སྔར་གྱི་གྲལ་བཞིན་དུ་འཁོད། གསེར་གཞོང་པ་གང་ཡོན་དུ་ཕུལ། ཞལ་སྲོ་ཕྱི་མའི་དུས་སུ་ལྟད་མོ་བ་ལ་འཚལ་མ་སྔར་བཞིན་དུ་བསྩལ། རྗེས་ལ་ལྟད་མོ་ཆེ་ཐང་རེ་བྱེད། འཇང་དགའ་བོ་བྱ་བས་སེང་ལྡེང་གི་གདུང་བདུན་ཐོད་ལ་བཙུགས་ནས་དབུ་རྩེའི་ཐང་ལ་བང་བརྒྱུགས་སྟེ་ལྷོ་སྒོའི་ཐེམ་ཁར་པོར། དེ་རེ་རེ་ལ་ཡང་མི་རེས་མི་ཐེག་སོ་ཤིང་སྟག་ཤིང་རྩེ་ན་ཕར་རྒྱུག །ཤིང་རྩེ་ལ་སྒྱུ་མ་མཁན་ལུས་ལ་མེ་ཆེན་འབར། ཐང་ཤིང་ལ་བྱེ་ཆུང་སྤྱང་མོ་ཉུག་པ་སོགས་ལྟད་མོ་ཐ་མའི་བྱས་ལུགས་འཁོར་སའི་སྒོ་རྒྱབ་ན་བྲིས་ནས་ཡོད། སྤྱིར་སློབ་དཔོན་བོ་དྷི་ས་ཏྭས་བསམ་ཡས་ཀྱི་ཆོས་འཁོར་མ་བུ་ལ་མངའ་གསོལ་རབ་གནས་ལན་བརྒྱད་བྱས་སོ། །རབ་གནས་ལན་བདུན་བྱས་པའི་རྟེན་ནི་སྤྲུལ་པའི་སྐུ་དངོས་དང་བྱིན་རླབས་མཉམ་པ་ལགས་སོ། །དེའི་རྗེས་ལ་བཙུན་པོས་གསིལ་ཁང་གི་མཚོ་ནང་དུ་པདྨའི་སྡོང་པོ་སྐྱེས་པའི་སྟེང་དུ་བཞུགས་ནས་ཐུགས་དམ་ལྷ་ཁང་འབྱོངས་པ་ལ་གཟིགས་སྟེ་ཤིན་ཏུ་དགྱེས་ནས། ངའི་དབུ་རྩེ་རིགས་གསུམ་འདི་བརྩིགས་པ་མི་འདྲ་སྐྱེས་པ་འདྲ་སྟེ་ང་རེ་དགའ། བྱ་བ་ལ་སོགས་པའི་དགའ་གླུ་བཅུ་གསུམ་མགུར་དུ་བཞེངས་སོ། །བློན་པོ་རྣམས་ཀྱིས་ཀྱང་སོ་སོའི་ང་རྒྱལ་གྱི་གླུ་རེ་བླངས་སྟེ་མཆིམས་ཀྱི་ང་ཆེ་རྒྱང་གྲགས་ལ་སོགས་པའོ། །དེ་ལྟར་ལོ་བསྐོར་གཅིག་གི་བར་དུ་སྐྱིད་ཀྱི་བྲོ་མོ་ཆེ་བརྡུངས། མི་རེས་གླུ་རེ་བླངས། རྟ་རེས་བང་རེ་བརྒྱུགས། བྱ་རེས་སྐད་རེ་བཏོན། དུས་དེ་ཙམ་ན་བོད་བདེ་སྐྱིད་(ཇ༡༠༡ན)

[Full Size]

མངའ་ཐང་དར་བ་ལགས་སྟེ་དེ་ཡང་དབུ་རྩེའི་སྒོ་རྒྱབ་བྱང་ངོས་ན་བྲིས་ནས་ཡོད་དོ་ཅེས་བྱུང་ངོ༌། །སློབ་དཔོན་ཆེན་པོ་པདྨས་རབ་གནས་མཛད་པའི་ངོ་མཚར་རྦ་བཞེད་ན་མི་སྣང་ཡང་ཉིད་ཀྱི་རྣམ་ཐར་ལས་ཡ་མཚན་འདི་དང་མཚུངས་པ་ལ་རྡོ་རིང་གི་སེང་གེས་སྐད་ཕྱུང་བ་དང་པེ་ཀར་གྱིས་འཕྱམས་པ་སོགས་བཤད་ལ། བྲག་དམར་མགྲིན་བཟང་གི་རབ་གནས་ཀྱི་ངོ་མཚར་ལྟར་ན་དེ་བས་ཆེས་རྨད་དུ་བྱུང་བ་དུ་མ་ཡོད་རྒྱུར་སྣང་ཡང་ཡི་གེ་མ་མཐོང་ངོ༌། །དགའ་སྟོན་ཇི་ལྟར་བྱས་པ་ནི་བཀའི་ཐང་ཡིག་ཆེན་མོ་ལས་འདི་ལྟར་བཤད་སྟེ། དེ་ལྟར་དཔལ་གྱི་བསམ་ཡས་ལ། །རབ་གནས་དགའ་སྟོན་མཛད་པའི་དུས། །མཚོ་མོ་མགུར་གྱི་སྐྱིལ་ཀྲུང་དེར། །པདྨའི་སྡོང་པོ་སྐྱེས་པའི་གནས། །རྒྱལ་པོ་གསེར་ཁྲིའི་སྟེང་དུ་བཞུགས། །ཡིད་འོང་བཙུན་མོ་ལྔ་པོ་ཡང༌། །མཛེས་པའི་རྒྱན་དང་བཅས་སྟེ་བཞུགས། །མཆོད་གནས་ལོ་པཎ་ཐམས་ཅད་ཀྱང༌། །དགྱེས་ཤིང་ཆོས་ཀྱི་བགྲོ་གླེང་མཛད། །ཆོས་བློན་གཙོ་བོ་ཐམས་ཅད་ཀྱིས། །རྒྱལ་པོ་བཞུགས་པའི་ཐ་མ་བསྐོར། །དེ་ལྟར་མངའ་འོག་སྐྱིད་པའི་འབངས། །དབུས་གཙང་མངའ་རིས་ཐམས་ཅད་ནས། །མ་ཚོགས་བྱ་བ་གང་ཡང་མེད། །བཟའ་བཏུང་ལོངས་སྤྱོས་སྣ་ཚོགས་ཀྱིས། །གང་ལ་ཅི་འདོད་ཐམས་ཅད་ཚིམ། །དགའ་བའི་བྲོ་བརྡུང་སྐྱིད་པའི་གླུ། །ཉིན་རེ་བཞིན་དུ་རྒྱུན་ཆད་མེད། །གདུགས་དང་རྒྱལ་མཚན་བ་དན་སོགས། །དགུང་ལ་ཉི་མ་འགྲིབ་པ་ཙམ། །འདབ་ཆགས་བྱ་ལ་འཕུར་ས་མེད། །མགོ་ནག་མི་ཡིས་ས་གཞི་གང༌། །གྱི་གླིང་རྟ་ལ་རྒྱུག་ས་མེད། །སིལ་སྙན་རོལ་མོ་འབྲུག་ལྟར་ལྡིར། ཁྱེ་འུ་བུ་མོ་ཐམས་ཅད་ཀྱང༌། །ཆས་བརྒྱན་ལག་ན་རྔ་མ་ཐོགས། །རྔ་བརྡུང་གླུ་ལེན་གར་སྟབས་རྒྱུ། །གཡག་གསེང་དར་གསེང་སྟག་གསེང་དང༌། །འབག་དང་སེང་ཕྲུག་གར་མཁན་དང༌། །སྤ་མཛེས་རྔ་ཐོགས་འཕྱམ་པོ་སོགས། །རྒྱལ་པོའི་སྐུ་ལ་མཆོད་པར་འབུལ། །དེ་ལྟར་རྗེ་འབངས་ཐམས་ཅད་ཀྱི། །དགའ་བའི་ལུས་ལ་རང་དབང་མེད། །བྲོ་བརྡུང་ནམ་མཁའི་ཆར་པ་འདྲ། །(ཇ༡༠༡བ)

[Full Size]

སྐྱིད་པའི་སེམས་ལ་དྲན་འཛིན་མེད། །རང་རང་མོས་པའི་གླུ་རེ་ལེན། །དེ་ལྟར་མི་རྗེ་ལྷས་མཛད་པ། །ཆོས་རྒྱལ་ཁྲི་སྲོང་ལྡེ་བཙན་དེས། །རིན་ཆེན་ཁྲི་ལས་བཞེངས་ནས་ནི། །རྒྱལ་པོ་དགྱེས་པའི་གླུ་བླངས་པ། །ང་ཡི་དབུ་རྩེ་རིགས་གསུམ་འདི། །རིན་ཆེན་སྣ་ལས་གྲུབ་པ་སྟེ། །བརྩིགས་པ་མི་འདྲ་སྐྱེས་པ་འདྲ། །ང་ཡི་ལྷ་ཁང་ངོ་མཚར་ཆེ། །མཐོང་བ་ཙམ་གྱིས་ཉམས་རེ་དགའ། །དེ་ཕྱིར་བསམ་གྱིན་བློ་རེ་བདེ། །ལུས་འཕགས་གླིང་ལ་དཔེ་བླངས་ནས། །ཤར་གྱི་ལྷ་ཁང་གསུམ་པ་འདི། །རིན་ཆེན་སྣ་ལྔ་ལས་གྲུབ་སྟེ། །བརྩིགས་པ་མི་འདྲ་སྐྱེས་པ་འདྲ། །ཛམྦུའི་གླིང་ལ་དཔེ་བླངས་ནས། །ལྷོ་ཡི་ལྷ་ཁང་གསུམ་པོ་འདི། །རིན་ཆེན་སྣ་ལྔ་ལས་གྲུབ་སྟེ། །བརྩིགས་པ་མི་འདྲ་སྐྱེས་པ་འདྲ། །བ་ལང་སྤྱོད་ལ་དཔེ་བླངས་ནས། །ནུབ་ཀྱི་ལྷ་ཁང་གསུམ་པོ་འདི། །རིན་ཆེན་སྣ་ལྔ་ལས་གྲུབ་སྟེ། །བརྩིགས་པ་མི་འདྲ་སྐྱེས་པ་འདྲ། །སྒྲ་མི་སྙན་ལ་དཔེ་བླངས་ནས། །བྱང་གི་ལྷ་ཁང་གསུམ་པོ་འདི། །རིན་ཆེན་སྣ་ལྔ་ལས་གྲུབ་སྟེ། །བརྩིགས་པ་མི་འདྲ་སྐྱེས་པ་འདྲ། །ང་ཡི་ཡཀྵ་གོང་འོག་འདི། །མཁའ་ལ་ཉི་ཟླ་ཤར་བ་འདྲ། །ང་ཡི་བཙུན་མོ་གླིང་གསུམ་འདི། །གཡུ་ཡི་མཎྜལ་བརྒྱན་པ་འདྲ། །ང་ཡི་མཆོད་རྟེན་དཀར་པོ་འདི། །དུང་དཀར་གཡས་སུ་འཁྱིལ་པ་འདྲ། །ང་ཡི་མཆོད་རྟེན་དམར་པོ་འདི། །མེ་ལྕེ་གནམ་ལ་སྙེག་པ་འདྲ། །ང་ཡི་མཆོད་རྟེན་སྔོན་པོ་འདི། །གཡུ་ཡི་ཀ་བ་བཙུགས་པ་འདྲ། །ང་ཡི་མཆོད་རྟེན་ནག་པོ་འདི། །ལྕགས་ཕུར་ས་ལ་བཏབ་པ་འདྲ། །ང་ཡི་མཆོད་རྟེན་ངོ་མཚར་ཆེ། །དེ་ལ་སོགས་པ་དགྱེས་པའི་གླུ། །སུམ་བཅུ་རྩ་གསུམ་ལྷ་དབང་གི །ལྷ་ཡི་གླུ་ལ་དཔེ་བླངས་ནས། །གཡུ་ཁང་གསེར་ཁྲི་ཞེས་པ་བླངས། །ལྷ་སྲས་མུ་ནེ་བཙན་པོ་ཡིས། །འཇིག་རྟེན་སྒྲོན་མ་བྱ་བ་བླངས། །ལྷ་སྲས་མུ་ནེ་བཙན་པོ་ཡིས། །སེང་གེ་འགྱིང་བ་བྱ་བ་བླངས། །བཙུན་མོ་རྣམས་ཀྱིས་གླུ་བླངས་པ། །གཡུ་མཚོ་འཁྱིལ་པ་བྱ་བ་དང༌། །གཡུ་ལོ་ལྕུག་ཕྲན་བྱ་བ་བླངས། །མཆོད་གནས་རྣམས་ཀྱིས་གླུ་བླངས་པ། །མཁན་པོ་བོ་དྷི་ས་ཏྭ་ཡིས། །སྒོ་ཕྲེང་དཀར་པོ་ཞེས་པ་བླངས། །སློབ་དཔོན་པདྨ་འབྱུང་གནས་ཀྱིས། །ལྷ་འདྲེ་ཟིལ་གནོན་ཞེས་པ་བླངས། །མཁས་པ་བཻ་རོ་ཙ་ན་ཡིས། །དབྱངས་ཡིག་ཁུག་པ་བྱ་བ་བླངས། །སྣུབས་བན་ན་མཁའ་སྙིང་པོ་ཡིས། །མཁའ་ལ་ཁྱུང་ལྡིང་བྱ་བ་བླངས། །ངན་ལམ་རྒྱལ་བ་མཆོག་དབྱངས་ཀྱིས། །རྟ་མགྲིན་འགྱིང་དབྱངས་བྱ་བ་བླངས། །ཅོག་རོ་དཔལ་གྱི་བཟང་པོ་ཡིས། །སྐྱིད་པའི་དཔལ་དགུ། (ཇ༡༠༢ན)

[Full Size]

བློན་པོ་རྣམས་ཀྱིས་གླུ་བླངས་པ། །ཆོས་བློན་ཆེན་པོ་མགོས་རྒན་གྱིས། །དྲང་ཤིང་དཀར་པོ༏ དེ་སྲས་ཁྲི་བཟང་ཡབ་ལྷག་གིས། །མཛངས་ཡིག་འཕྲུལ་གྱི་ལྡེ་མིག་བླངས། །ཤུད་བུ་དཔལ་གྱི་སེང་གེ་ཡིས། །དུང་ཆུང་གཡུ་རིང༌༏ དམག་དཔོན་ལྷ་བཟང་ཀླུ་དཔལ་གྱི། །ཟར་ཆེན་ཟར་ཆུང༌༏ ཉང་བཟང་ཞང་པོ་ཁྲི་རྒྱལ་གྱིས། །སེང་གེ་འགྲིལ་ཆེན༏ སྦས་ཀྱི་བརྟན་བཟང་དཔལ་ལེགས་ཀྱིས། །འདོད་པ་རེ་བརྒྱད༏ མགར་གྱི་ཁྱུང་པོ་དུམ་ཚུགས་ཀྱིས། །བྱ་རྒོད་ལྡིང་བ༏ མཆིམས་ཀྱི་རྡོ་རྗེ་སྤྲེ་ཆུང་གིས། །མཆིམས་ཀྱི་བརྗེད་གླུ༏ སྣ་ནམ་རྒྱལ་ཚ་ལྷ་སྣང་གིས། །ལྷ་ཤུག་གོང་མ༏ ཁྲི་འབྲིང་ལྷ་འོད་ཁུ་ལོད་ཀྱིས། །མདོ་ཆོད་རབ་འབྲིང་ཐ་གསུམ་བླངས། །གཉགས་ཀྱི་ཁྲི་བཟང་ཡང་སྟོན་གྱིས། །ཟླ་འོད་ཁྱབ་བརྡལ༏ ངན་ལམ་སྟག་ར་ཀླུ་གོང་གིས། །ལྕགས་སྦྲེལ་གདོང་དྲུག༏ གཙོ་བོ་རྣམས་ཀྱིས་གླུ་བླངས་པ། །ཡ་མཚན་གསེར་གྱི་མེ་ཏོག་བླངས། །སྟག་ཤར་རྣམས་ཀྱིས་གླུ་བླངས་པ། །སྟག་རི་དགུ་བརྩེགས༏ མོ་བཙན་རྣམས་ཀྱིས་གླུ་བླངས་པ། །མེ་ཏོག་ཕྲེང་བ༏ སྨན་ཤར་རྣམས་ཀྱིས་གླུ་བླངས་པ། །གྲོང་ཟེར་རིང་མོ་བྱ་བ་བླངས། །གཞན་ཡང་བརྗོད་ཀྱིས་མི་ལང་སྟེ། །ལོ་བསྐོར་གཅིག་གི་བར་དུ་ནི། །མི་རེས་གླུ་རེ་བླངས་པ་ཡིན། །རྟ་རེས་བང་རེ་བརྒྱུགས་པ་ཡིན། །ཤིང་རེའི་རྩེ་ལ་དར་རེ་ཕྱར། །སྐྱིད་པའི་དཔལ་གྱི་འདོམ་བརྐྱང་སྟེ། །དགའ་བདེའི་དཔལ་ལ་ལོངས་སྤྱོད་བྱས། །ཅེས་བྱུང་ངོ༌། །གཞན་ཡང་མངའ་བདག་རྒྱལ་པོས་བཀའ་བསྩལ་པ། །ཚེ་འདིའི་བདེ་སྐྱིད་རྨི་ལམ་ཙམ་འདིས་བསླུ། །དེ་བས་གཏན་འདུན་བྱང་ཆུབ་སྒྲུབ་དགོས་གསུངས། །ཁྱེ་འུ་བློ་གྲོས་རྣོ་ཞིང་གསལ་བ་རྣམས། །བརྡ་སྤྲོད་སྐད་གཉིས་ལོ་ཙཱ་སློབ་ཏུ་བཅུག །ཡོད་སྨྲའི་དགེ་སློང་བཅུ་གཉིས་སྤྱན་དྲངས་སྟེ། །དང་པོར་དད་པ་ཆེ་བའི་རྦ་ཁྲི་གཟིགས། །བོ་དྷི་ས་ཏྭས་མཁན་པོ་མཛད་ནས་ནི། །རབ་ཏུ་ཕྱུང་བས་མངོན་ཤེས་ལྔ་ལྡན་གྱུར། །(ཇ༡༠༢བ)

[Full Size]

བོད་ཀྱི་རིན་པོ་ཆེ་ཞེས་རྒྱལ་པོས་བཀུར། །བོད་མི་རབ་བྱུང་ཀུན་གྱི་ཐོག་མ་ཡིན། །དེ་སོགས་བོད་ལ་རབ་བྱུང་བཏུབ་བམ་ཞེས། །སད་པའི་མི་དྲུག་དང་པོར་བསྙེན་པར་རྫོགས། །ཕྱི་ནས་དགེ་སློང་དགེ་ཚུལ་རྒྱ་ཆེར་འཕེལ། །ཟ་ཧོར་ཁ་ཆེ་ཡུལ་དབུས་རྒྱ་སོགས་ནས། །པཎ་ཆེན་ཚད་ལྡན་མང་དུ་སྤྱན་དྲངས་སྟེ། །མཁས་པའི་ལོ་ཙཱ་དུ་མས་རྒྱ་གར་ནག །ལི་ཡུལ་སོགས་ནས་རྒྱལ་བའི་གསུང་རབ་ནི། །ཇི་སྙེད་བཞུགས་པ་ཕལ་ཆེར་བོད་དུ་བསྒྱུར། །རབ་བྱུང་རྣམས་ཀྱི་འཚོ་བ་བླ་ནས་སྦྱར། །ཆབ་འོག་ནས་ཕྱུང་དབུ་ཡི་གཙུག་དུ་བཀུར། །བསླབ་གསུམ་ཡོངས་དག་སྡེ་སྣོད་གསུམ་ལ་མཁས། །ཐེག་ཆེན་ཤིན་ཏུ་རྒྱས་པ་ཁོང་དུ་ཆུད། །རིག་གྲོལ་ལྡན་པའི་སྐྱེས་ཆེན་མཐའ་ཡས་བྱུང༌། །ཡེར་བའི་རི་ལ་གྲུབ་ཐོབ་བརྒྱ་རྩ་བརྒྱད། །ཆུ་བོ་རི་ལ་གྲུབ་ཐོབ་ཉེར་གཅིག་སོགས། །སྒོམ་གྲ་རྣམས་སུ་རིག་འཛིན་སྡེ་སྣོད་ལས། །མཆོག་ཐུན་དངོས་གྲུབ་ཐོབ་པ་རབ་ཏུ་མང༌། །གང་ལ་ཅི་འཚམས་དམ་ཆོས་སྟོན་པ་ཡིས། །བོད་འབངས་ཐམས་ཅད་དམ་པའི་ལམ་ལ་སྦྱར། །དེ་དུས་བོད་དུ་དར་བའི་ཐུབ་བསྟན་ལྟ། །འཛམ་གླིང་གཞན་དུ་སྔོན་ཆད་མ་བྱུང་སྟེ། །ཕྱི་དུས་རྒྱ་གར་པཎ་ཆེན་དུ་མས་བསྔགས། །དེ་ཡང་རྦ་བཞེད་ཆེ་བའི་དངོས་བསྟན་ལྟར་བསམ་ཡས་དགའ་སྟོན་ཚར་ནས་སད་མི་རྣམས་རབ་ཏུ་བྱུང་བ་ལྟར་བཤད་ཅིང་རྦ་བཞེད་འབྲིང་བ་ལས་བསམ་ཡས་ཚར་ནས་ཞལ་སྲོ་མ་བྱས་པའི་བར་དེར་རབ་ཏུ་བྱུང་བར་བཤད་ཟེར་ཡང་ལོ་རྒྱུས་རྣམས་སོ་སོ་སྡེ་ཚན་དུ་བསྒྲིགས་སྟེ་སྔ་ཕྱིའི་གོ་རིམ་ལ་མ་བརྩིས་པར་ཟད་ཀྱི་ཐང་ཡིག་ལས་དགའ་སྟོན་གྱི་དུས་བཻ་རོ་ཙ་ན་སོགས་གྲལ་དུ་བཞུགས་པར་གསུངས་ཤིང་གཞན་ཕལ་ཆེར་གྱི་མཁན་པོ་རྦ་རཏྣས་བྱས་པར་བཤད་ལ་བསྙེན་པར་རྫོགས་ནས་ལོ་བཅུ་མ་ལོན་ན་མཁན་པོར་མི་རུང་བའི་ཕྱིར་བོ་དྷི་ས་ཏྭ་བོད་དུ་ཕེབས་ནས་རིང་པོ་མ་ལོན་པར་སད་མི་རྣམས་(ཇ༡༠༣ན)

[Full Size]

རབ་ཏུ་བྱུང་བར་གསལ་ལོ། །དེས་ན་ལང་གྲོ་སྣང་བཞེར། གཉེར་སྟག་བཙན་གདོང་གཟིགས། སེང་མགོ་ལྷ་ལུང་གཟིགས། མཆིམས་མེ་ལྷ་རྣམས་མངགས་ནས་བྲྀ་ཀ་མ་ལ་ཤཱི་ལའི་གཙུག་ལག་ཁང་ནས་གཞི་ཐམས་ཅད་ཡོད་པར་སྨྲ་བའི་དགེ་སློང་བཅུ་གཉིས་སྤྱན་དྲངས། ལུག་གི་ལོ་དཔྱིད་ཟླ་ར་བའི་ཡར་ངོའི་ཚེས་བརྒྱད་ལ་ཕོ་བྲང་དུ་ཕེབས་སྟེ་བོ་དྷི་ས་ཏྭས་མཁན་པོ་མཛད་ནས་སད་མི་རྣམས་རབ་ཏུ་བྱུང་ཞིང་བསྙེན་པར་རྫོགས་སྟེ་རིམ་གྱིས་རབ་བྱུང་མང་དུ་འཕེལ་ལོ། །མཁན་རྒྱུད་ནི་ཤཱ་རིའི་བུ། དགྲ་གཅན་ཟིན། ཀླུ་སྒྲུབ། ལེགས་ལྡན་བྱེད། དཔལ་སྦས། ཡེ་ཤེས་སྙིང་པོ། བོ་དྷི་ས་ཏྭ་རྣམས་བསམ་ཡས་ཀྱི་གྱང་རིས་ལ་ཡོད་དོ། །རྦ་བཞེད་ཆེ་བ་ལས་ནི། དུས་དེར་རྗེ་བློན་རྣམས་རྩེ་བྲོ་ལ་གཡེངས་པ་དང་དེ་ཡན་ཆད་བོད་ལ་དགེ་སློང་མིང་ཡང་མེད་པ་ལས་བསམ་ཡས་ཀྱི་རྩིག་རྨང་ཐམས་ཅད་བྱི་ཁུང་བྱས་སྟེ་འདུག་ལྷ་ཁང་དང་རྟེན་རྣམས་ལ་མཆོད་པ་དང་ཞབས་ཏོག་བྱེད་པ་མེད་པས་བཙན་པོ་ཐུགས་མ་བདེ་ནས་འབངས་རྣམས་ལ་ཆོས་བྱ་བར་རིགས་སོ་གསུངས་ནས་ལུག་གི་ལོ་དཔྱིད་ཟླ་ར་བའི་ངོ་ལ་སློབ་དཔོན་གྱིས་ཐམས་ཅད་ཡོད་སྨྲའི་སྡེ་དབུས་པ་བྱེ་བྲག་དུ་སྨྲ་བའི་དགེ་སློང་བཅུ་གཉིས་སྤྱན་དྲངས་ནས་ཞང་བློན་གྱི་བུ་རྣམས་ལ་སློབ་དཔོན་གྱིས་རྒྱ་སྐད་བསླབས་པས་མཆིམས་ཨ་ནུའི་བུ་ཤཱཀྱ་པྲ་བྷ་དང༌། པ་གོར་ཧེན་འདོད་ཀྱི་བུ་བཻ་རོ་ཙ་ན་དང་རྦ་ཁྲི་བཞེར་གྱི་བུ་ཁྲི་གཟིགས་སམ་སང་ཤི་ཏ་དང༌། ཞང་ཉ་བཟང་གི་བུ་ལྷ་བུ་ལྷ་བཙན་དང༌། ཤུད་བུ་ཁོང་ལེབ་རྣམས་ཀྱིས་སྐད་ལོབས། མཆིམས་ལེགས་གཟིགས་སོགས་མང་ཞིག་གིས་མ་ཤེས་སོ། །བློན་པོ་མགོས་རྒན་ན་རེ་ངེད་བློན་པོ་རྣམས་ལ་ལོང་མ་མཆིས་པས་ཨ་ཙ་རའི་སྐད་སློབ་མི་ཁོམ་པས་རྒན་པོའི་ཆོས་ཞུའོ་ཟེར་བས་སློབ་དཔོན་གྱིས་ཨ་ཕ་དང་ཨ་མའི་སྐད་དོན་ཐོག་དུ་ཕེབས་སྟེ་རྒྱ་སྐད་དང་མཐུན་པར་བོད་སྐད་མཁྱེན་ཞིང་བྱང་བ་སཾ་ཀྲྀ་ཏའི་སྐད་མེད་ཀྱང་བོད་བྱང་ཆུབ་སེམས་དཔའི་སྤྲུལ་པའི་སྐད་ཡིན་པས་ཆོས་བྱར་བཏུབ་གསུངས་སྟེ་སྒོམ་ལུང་ཕོག་གོ །བཙན་པོའི་ཞལ་ནས་ངའི་བོད་ལ་དགེ་སློང་མེད་པས་ངའི་(ཇ༡༠༣བ)

[Full Size]

ཞང་བློན་དག་ལ་དགེ་སློང་བཏུབ་བམ་ཞུས་པས་སློབ་དཔོན་གྱིས་བཏུབ་བམ་སད་ཅིག་གསུངས་སྟེ་སྐད་བསླབས་པ་ཚོ་ལས་ཐོག་མར་བོད་ལ་དད་པ་ཆེ་བའི་རྦ་ཁྲི་གཟིགས་རབ་ཏུ་ཕྱུང་སྟེ་དགེ་སློང་བྱས། མཚན་དཔལ་དབྱངས་སུ་བཏགས། ལྔའི་མངོན་པར་ཤེས་པ་དང་ལྡན་པས་བཙན་པོ་དགྱེས་སྟེ་དེའི་ཞབས་སྤྱི་བོར་བླངས་སྟེ་ཁྱོད་བོད་ཀྱི་རིན་པོ་ཆེ་ཡིན་ཞེས་བཀའ་བསྩལ་མཚན་ཡང་རྦ་རཏྣ་ཞེས་ཐོགས། བོད་ཀྱི་རབ་བྱུང་ལ་སྔ་བ་དེ་ཡིན་ནོ། །ད་དུང་རབ་ཏུ་ཕྱུང་ཞིག་ཞུས་པས། སད་ཅིག་གསུངས་ནས་རྦ་གསལ་སྣང་དང༌། པ་གོར་བཻ་རོ་ཙ་ན་དང༌། ངན་ལམ་རྒྱལ་བ་མཆོག་དབྱངས་དང༌། རྨ་ཨཱ་ཙརྻ་རིན་ཆེན་མཆོག་དང༌། ལས་གསུམ་རྒྱལ་བ་བྱང་ཆུབ་དང་ལྔ་དགེ་སློང་བྱས་སྟེ་གསལ་སྣང་ལ་སྔར་སེམས་སྐྱེད་ཞུས་པའི་ཚེ་བཏགས་པའི་མིང་ཡེ་ཤེས་དབང་པོ་བཏགས། དེ་ལ་སོགས་པ་བཏགས་ནས་སད་མི་དྲུག་རབ་ཏུ་བྱུང་ངོ་ཞེས་བྱུང་ངོ༌། །འདི་དག་དུ་ཡི་གེ་མ་དག་པ་འཕེལ་བ་ལས་སྔར་གྱི་རྒྱ་ཕྲུག་གར་མཁན་དེ་ལ་ཡང་རྦ་སང་ཤི་ཞེས་བྲིས་པ་སོགས་སྣང་ཡང་རྦ་རཏྣ་ནི་རྦ་ཁྲི་བཞེར་གྱི་བུར་བཤད་ལ་རྒྱ་ཕྲུག་སང་ཤི་ནི་རྒྱ་ནག་གི་ཕོ་ཉའི་བུ་ཡིན་པས་རྦའི་རུས་སུ་མི་འོང་ལ། ཡང་བྱ་ཁྲི་གཟིགས་ཞེས་བྲིས་པ་དུ་མ་ཡོད་ཀྱང་ཡི་གེ་ཉམས་པ་སྟེ། རུས་དེ་གཉིས་ཀྱི་གཞི་མཐུན་མི་སྲིད་དོ། །བོ་དྷི་ས་ཏྭའི་མཚན་ཤཱནྟ་རཀྵི་ཏའི་ཟུར་གྱི་རཀྵི་ཏ་འདི་རྣམས་གྱི་མིང་མཐར་ལྡན་པ་སྟེ་བཻ་རོ་ཙ་ན་རཀྵི་ཏ་ཅེས་སོགས་ཡོད་པར་སྣང་ངོ༌། །ཁ་ཅིག་རྦ་བཞེད་ཀྱི་སད་མི་དྲུག་པོའི་ལེགས་གསུམ་གྱི་ཚབ་ཏུ་གཙང་ལེགས་གྲུབ་བརྗེས། ངན་ལམ་གྱི་འོག་དུ་ཁོན་ཀླུའི་དབང་པོ་བཅུག་པ་ལ་སད་མི་བདུན་བྱེད་པར་སྣང་ངོ༌། །བུ་སྟོན་ཆོས་བྱུང་དུའང་པར་བརྐོ་དུས་ཞུས་དག་པས་ཉམས་པ་ཡིན་ནམ་ཀུན་མཁྱེན་བུ་སྟོན་ལྟ་བུ་འདི་ཙམ་ལ་མི་འཁྲུལ་མོད་ཀྱང་ཐོག་མར་བྱ་ཁྲི་གཟིགས་རབ་ཏུ་ཕྱུང་བས་མངོན་ཤེས་ལྔ་དང་ལྡན་པར་གྱུར་ཏོ། །དེ་ནས་རྦ་གསལ་སྣང༌། རྦ་ཁྲི་བཞེར། སང་ཤི་ཏ། པ་གོར་བཻ་རོ་ཙ་ན། ངན་ལམ་རྒྱལ་མཆོག་ཁོན་ཀླུའི་དབང་པོ་སྲུང་བ། རྨ་རིན་ཆེན་མཆོག །གཙང་(ཇ༡༠༤ན)

[Full Size]

ལེགས་གྲུབ་དང་བདུན་རབ་ཏུ་བྱུང་བའི་མཚན་ཡེ་ཤེས་དབང་པོ་དང་དཔལ་དབྱངས་ལ་སོགས་པ་ཡིན། སད་མི་བདུན་ཡིན་ཟེར་རོ་ཞེས་རྦ་ཁྲི་གཟིགས་དང་པོ་དང་གསུམ་པ་གཉིས་ཀར་ལན་རེ་གྲངས། ཁྲི་བཞེར་གྱི་བུ་སང་ཤི་ཏ་ཅེས་པའི་བུ་དང་རྣམ་དབྱེ་ཆད། གཅོད་མཚམས་ཉམས་པས་མིང་གཉིས་སུ་སོང༌། དགུའམ་བརྒྱད་གྲངས་ནས་མི་བདུན་ཡིན་ཞེས་པ་དང༌། རྦ་རཏྣའི་མིང་ཡེ་ཤེས་དབང་པོ་ཡིན་པ་འདྲ་བ་སོགས་ནག་ནོག་ཆེ་བར་སྣང་ངོ༌། །སྔ་རབས་མང་པོ་ཞིག་ནི་རྦ་མཉྫུ་འཇམ་དཔལ་གོ་ཆ་ཤྲཱི་ཝརྨ། རྩངས་དེ་ཝེནྡྲ་ལྷ་དབང་སྲུང་བ་རཀྵི་ཏ། བྲན་ཀ་མུ་ཁེནྡྲ་སྒོའི་དབང་པོ་སྲུང་བ་རཀྵི་ཏ་སྟེ་རྒན་གསུམ། བར་པ་རླངས་ཁམས་པ་གོ་ཆ། གཞོན་པ་ཁོན་ནཱ་ཀླུའི་དབང་པོ་གེནྡྲ། པ་གོར་ནམ་སྣང་བཻ་རོ་ཙ་ན། རྨ་ཨཱ་ཙརྻ་རིན་ཆེན་མཆོག་སྟེ་གསུམ་རྣམས་སད་མི་བདུན་དུ་འཆད་དོ། །ཁ་ཅིག་རྦ་རཏྣ་མཆིམས་ཤཱཀྱ་པྲ་བྷ། གཙང་ལེགས་གྲུབ། བཻ་རོ་ཙ་ན། ཞང་ལྷ་བུ། ཤུད་བུ་ཁོང་ལེགས། ཡེ་ཤེས་དབང་པོ་དང་བདུན་ནོ་ཞེས་སོགས་འདོད་ལུགས་མང་དུ་སྣང་ཡང་རྦ་བཞེད་ཀྱི་ལུགས་གཙོ་བོར་བཟུང་སྟེ་ལོ་རྒྱུས་ཆེན་མོ་ལས་ཀྱང༌། དགེ་སློང་སྡོམ་པ་སྔ་བ་རྦ་ཡི་བནྡྷེ་གཉིས། །བཙུན་པའི་རབ་ནི་ངན་ལམ་ལྷ་ལུང་གཉིས། །བློ་རྣོ་རབ་མཆོག་རྨ་བན་རིན་ཆེན་མཆོག །ཐོས་པ་ཆེ་རབ་ལས་གསུམ་བྱང་ཆུབ་རྒྱལ། །མཁས་པའི་ཡང་རབ་བཻ་རོ་ཙ་ན་ཡིན། །ཞེས་རྦ་བཞེད་ཀྱི་དྲུག་པོའི་སྟེང་དུ་ལྷ་ལུང་རབ་འབྱོར་དབྱངས་བསྣན་པ་ལ་སད་མི་བདུན་དང༌། དེའི་ཁར་ན་སྐུ་མཐུའི་རབ་ནི་ན་མཁའ་སྙིང་པོ་སྟེ། །བསོད་ནམས་ཆེ་རབ་ཁྲི་སྲོང་ལྡེ་བཙན་ཡིན། །ཞེས་དེ་གཉིས་བསྣན་པས་བོད་ཡུལ་ན་རབ་ཀྱི་མི་དགུ་ཞེས་འཆད་པར་སྣང་བའི་ཕྱིར་རོ། །གཞན་ཡང་རྦ་བཞེད་ལས། དུས་དེར་བཙན་པོའི་ཞལ་ནས་སངས་རྒྱས་ཀྱི་བསྟན་པ་སྒྲུབ་པར་བྱེད་ན་རབ་ཏུ་འབྱུང་དགོས་པ་ཡིན་པས་ད་དུང་བཙུན་མོ་སྲིད་མ་ཟིན་པ་དང་ཞང་བློན་གྱི་བུ་དད་པ་ཅན་ཐམས་ཅད་རབ་ཏུ་ཕྱུང་ཞིག་ཞེས་གསུངས་པས་བློན་པོ་རྣམས་ན་རེ་རབ་ཏུ་བྱུང་ན་འཚོ་བ་མེད་ཏོ་ཞེས་མཆི་བས། བཙན་པོའི་ཞལ་ནས་ངས་(ཇ༡༠༤བ)

[Full Size]

འཚོ་བ་བླ་ནས་སྦྱར་ཞིག་གསུངས། དམག་དང་ཁྲལ་མ་བྱས་ན་ཆད་པ་འོང་ཟེར་བས། དེ་ལ་ངས་ཞབས་འོག་ནས་བཏོན་ལ་བདེ་བ་སྦྱིན་དབུའི་མཆོད་གནས་སུ་བྱའོ་གསུངས། སྡེ་སྣོད་གསུམ་ག་སློབ་མི་ནུས་ཟེར་བས་དགེ་བ་ཉམ་དང་དཔགས་ལ་སྤྱོད་ཅིག་ཞེས་བཀའས་གནང་ངོ༌། །དེ་ནས་ལུག་གི་ལོའི་དགུན་ཟླ་འབྲིང་པོའི་ངོ་ལ་བསམ་ཡས་བཞེངས་སུ་གསོལ་ཟིན་པའི་ཞལ་བསྲོས་ནས་པྲ་ཏི་ཧ་རའི་དུས་ཀྱི་མཆོད་པ་ཆེན་པོ་མཛད་པའི་ཚེ་ཇོ་མོ་གཅེན་ཁྲི་རྒྱལ་མོ་བཙན་དང་སྲུ་བཙན་མོ་རྒྱལ་ལ་སོགས་པ་བརྒྱ་རབ་ཏུ་བྱུང་བའི་མཁན་པོ་རྦ་རཏྣས་བགྱིས། སྤྱིར་དེ་དུས་སུ་མི་སུམ་བརྒྱ་རབ་ཏུ་བྱུང་ནས་དབུ་རྩེའི་བྱ་འདབ་དང་མཆོད་རྟེན་ཆེན་པོ་བཞིའི་རྩེ་མོ་ལྕགས་ཐག་གིས་སྦྲེལ། དེ་ལ་འཕན་མགོ་བཏགས་སྟེ་ན་མཁའ་དར་ལ་བགྱིས། ས་གཞི་གྱི་ལིང་གི་རྟས་ཁེངས། གསེར་ཕོར་དངུལ་ཕོར་ཐམས་ཅད་ཆབ་ཚ་དང༌། འབྲས་ཆང་དང༌། ནས་ཆང་གིས་བཀང༌། དུས་འདི་ཕན་ཆད་བཀའ་ཤོག་ཆེན་པོ་བཏང་སྟེ་ཆོས་ཁྲིམས་བཅས། སླན་ཆད་ཆབ་འོག་གི་འབངས་ལས་ཕོ་མིག་མི་དབྱུང་མོ་སྣ་མི་བཅད། མཚང་ཅན་མི་སྐུམ་པར་གནང༌། སྐྱེ་བོ་ཐམས་ཅད་ཀྱིས་རྗེའི་བཀའ་ཉན་ཞིང་རྗེ་འབངས་ཐམས་ཅད་ཀྱིས་རབ་ཏུ་བྱུང་བ་དབུའི་མཆོད་གནས་སུ་ཕྱུང་ནས་ཕྱག་དང་མཆོད་པ་དང་བཀུར་སྟིར་བྱ་བ་སོགས་ཆོས་ཀྱི་བཀའ་ཁྲིམས་ཆེན་པོ་བསྩལ་བ་བཀར་བཏགས། དེ་ལྟར་བྱ་བའི་ཆེད་དུ་བཙན་པོ་ཡབ་སྲས་དང་སྣ་ཆེན་པོ་མ་གཏོགས་པ་བློན་ཆེན་མན་ཆད་ནས་སྣ་ལ་གཏོགས་པ་རིལ་གྱིས་བྲོ་བོར་རོ། །ཆོས་གཙིགས་མཛད་བཀའ་གཙིགས་ཀྱི་རྡོ་རིང་བཙུགས། རབ་ཏུ་བྱུང་བའི་ཆོས་གྲྭའི་སློབ་དཔོན་དང་ཉ་མའི་སློབ་དཔོན་བསྐོས། དེང་ཕན་ཆད་དཀོན་མཆོག་གསུམ་དང་དགེ་འདུན་གྱི་བཤོས་ནི་ཁབ་སོ་ཆེན་མོ་ལས་སྦྱར། སྔར་ཡེ་ཤེས་དབང་པོ་དང་སློབ་དཔོན་བོ་དྷི་ས་ཏྭས་གསོལ་བ་བཞིན་ཆོས་ལ་འཇུག་པར་ཆད་ནས་སྒྲ་བསྒྱུར་བཙུགས་སྟེ་ལོ་ཙཱ་བ་ཆེན་པོས་ནི་རྒྱ་གར་གྱི་ལོ་ཙཱ་བྱས། རྒྱ་ནག་པོའི་ལོ་ཙཱ་བྲན་ཀ་ལེགས་(ཇ༡༠༥ན)

[Full Size]

ཀོང་དང༌། ལྷ་ལུང་གླུ་གོང་དང༌། འོག་གོམ་དབུས་གོང་དང༌། ཁྱུང་པོ་རྩེ་རྩེ་སོགས་ཀྱིས་བྱས། རྒྱའི་ཧྭ་ཤང་མ་ཀོ་ལེ་སྤྱན་དྲངས་ནས་ཆོས་བསྒྱུར་བ་ལས། རྦ་རཏྣས་ཤེས་རབ་འབུམ་ཐོག་མར་བསྒྱུར་བའི་ཚེ། བོད་ཁམས་སུ་འབུམ་སྡེ་རྒྱས་པར་འགྱུར། དེའི་བསོད་ནམས་དང་བྱིན་གྱི་འཇིག་རྟེན་གྱི་ཁམས་སུ་ཐེག་པ་ཆེན་པོ་སྤྱོད་པ་ཤ་སྟག་སྐྱེའོ་ཞེས་རྨི་ལམ་དུ་ལུང་བསྟན། རྦ་བྲན་མཁན་པོ་མཉྫུས་ཤེས་རབ་འབུམ་བཙན་པོ་ཁྲི་སྲོང་ལྡེ་བཙན་རྗེ་འབངས་ལ་བཤད་པའི་ཚེ་བཙན་པོ་མཉེས་ནས་ཕྱག་དབུ་ལ་བྱུགས་སྟེ་བྱ་དགའ་ཆེ་ཐང་དུ་གསོལ། རྒྱུད་ཀུན་ལས་བཏུས་པ་ཡང་མཉྫུས་བསྒྱུར། ཞམ་རིང་དགེ་སློང་དང་སྐྱེ་བོ་ཀུན་ན་རེ་ཆོས་མཁས་རབ་སྟེ་གསོལ་ཞེས་གྲགས། ཇོ་མོ་ལྷ་རྒྱལ་གྱི་ཞལ་ནས་ཀྱང་དེ་ལྟར་ཆོས་མཁས་པ་ཟས་སུ་ཅི་གསོལ་གསུངས། ནུས་པ་ཡོད་པ་ཀུན་གྱིས་རྒྱ་དཔེ་རྙེད་ཚད་བསྒྱུར། འཚོ་བ་ཐམས་ཅད་བླ་ཆེན་པོ་ནས་སྦྱར་སྟེ་ཚང་མང་ཀེ་རུ་གླིང་ནས་གཡོས་ས་བྱས་སྟེ་རབ་ཏུ་བྱུང་བ་སུམ་བརྒྱ་ལ་ཟས་སྣ་བཅུ་གསུམ་རེ་འདྲེན་པའི་ལག་དཔོན་ཇོ་མོ་བྱང་ཆུབ་རྗེས་མཛད། གདན་ནོན་པ་དང་རྒྱས་པ་བམ་པོ་རེ་ལ་ཤོག་དྲིལ་རེ་བྱས་ནས་འདོན་སྟེ་ན་མ་རེ་ལ་འབུམ་ཚར་རེ་བཀའ་སྒྲོག་གོ་ཞེས་བྱུང་ངོ༌། །ཆོས་བསྒྱུར་ཚུལ་གྱི་ན་ཡམས་ཀྱང་དུ་མ་ད་ལྟའི་རྦ་བཞེད་ན་འདི་ལྟར་བྲིས་སྣང་སྟེ། རྦ་བཞེད་རྒྱས་ཤོས་ལུགས་གཅིག་ལ་རྒྱ་ནག་པོའི་ཆོས་རྣམས་ཐོག་མར་བསྒྱུར། རྒྱ་དཀར་པོའི་ཆོས་ལ་ནང་རྒྱུད་སྡེ་གསུམ་ཤ་ཆང་ལ་ཡེངས་སྟེ་བོད་ལ་མི་འཚམས་པས་མ་བསྒྱུར། ཐམས་ཅད་ཡོད་སྨྲའི་སྡེ་བྱེ་བྲག་དུ་སྨྲ་བ་རྒྱུ་འབྲས་སྟོན་སྟེ་བོད་ལ་འཚམས་པར་མཁྱེན་ནས་བསྒྱུར། ཡེ་ཤེས་དབང་པོ་ལ་གསོལ་སྟེ་དང་པོ་ལུང་སྡེ་བཞི་ལས་ལུང་རིང་པོ་དང་གང་པོའི་རྟོགས་པ་བརྗོད་པ་ཉུང་ངུ་ཞིག་བསྒྱུར། མངོན་པ་ལ་ཉན་ཐོས་ཀྱི་ཀོ་ཥ་བསྒྱུར། ཁ་ཅིག་ན་རེ་འདུལ་བ་ལ་དགེ་འདུན་(ཇ༡༠༥བ)

[Full Size]

ཕལ་ཆེན་སྡེ་ནི་ཁྲིམས་ཡངས་ཆེས་པ་དང་གནས་བརྟན་པ་མང་བཀུར་བ་གསུམ་ནི་མ་བསྒྱུར། ཉན་ཐོས་ཀྱི་འདུལ་བ་དང་མདོ་སྡེ་དང་ཐེག་ཆེན་གྱི་མངོན་པའི་བསྟན་བཅོས་རིལ་བསྒྱུར། ཏནྟྲ་ལས་མ་ཧཱ་ཡོ་ག་མུ་སྟེགས་དགེ་བ་ལ་གཟུད་པའི་སླད་དུ་གཙང་དམེ་མེད་པར་བསྟན་པས་མ་བསྒྱུར། ཨ་ཏི་ཡོ་ག་ཆོས་ཀྱི་དབྱིག་ལྟ་བུ་ནི་མ་རྟོགས་པར་ལོག་པར་འཇུག་བར་འགྱུར་བས་མ་བསྒྱུར། སྔགས་ཡོ་ག་ནུས་པ་ཅན་ཡང་བོད་ལ་ནུས་པ་མི་འབྱུང་བས་མ་བསྒྱུར། ཀྲྀ་ཡ་བྲམ་ཟེ་རྣམས་དགེ་བ་ལ་གཟུད་པའི་ཕྱིར་གསུངས་པ་བོད་གཙང་སྦྲ་ཆུང་བས་མ་བསྒྱུར། ཨ་ནུ་ཡོ་ག་རྨེ་བག་ཅན་ལ་བསྟན་པ་བོད་རྟོག་ཆེ་བས་མ་བསྒྱུར། ཨུ་པ་ཡ་བོད་ལ་རན་པར་བརྩིས་ནས་ཡེ་ཤེས་དབང་པོས་བསྒྱུར། མདོ་སྡེ་དང་གཟུངས་རྒྱ་གར་དུ་མ་ལུས་པ་ཙམ་ཞིག་བསྒྱུར། བཙན་པོའི་ཞལ་ནས་རྒྱ་གར་དང་རྒྱ་ནག་གི་ཆོས་དཔེ་ཕལ་ཆེར་བསྒྱུར་བ་ལས་ཆོས་དཔེ་ཐམས་ཅད་ཤྲི་ནཱ་ལེནྡ་ན་ཡོད་པ་མེས་ཚིག །དེར་མ་ཚིག་པ་ཤས་ཅིག་མ་བསྒྱུར་བར་ཡོད་པ་ངའི་ཡིད་ལ་གཅགས་སོ་གསུངས་ཞེས་བྲིས་སྣང་མོད་དཔྱད་པའི་གཞིའོ། །བུ་སྟོན་ཆོས་བྱུང་ལས་ནི། གཞན་ཡང་རྒྱ་གར་གྱི་སློབ་དཔོན་བི་མ་ལ་མི་ཏྲ་དང་སངས་རྒྱས་གསང་བ་དང་ཤཱནྟི་གརྦ་དང་བི་ཤུདྡྷ་སིངྷ་ལ་སོགས་པ་དང༌། བོད་ཀྱི་ལོ་ཙཱ་བ་སད་མི་བདུན་དང༌། ཆོས་ཀྱི་སྣང་བ་དང༌། བནྡྷེ་ན་མཁའ་དང༌། སྒྲོ་རིན་ཆེན་སྡེ་དང༌། རྣམ་པར་མི་རྟོག་པ་དང༌། ཤཱཀྱ་འོད་ལ་སོགས་པས་ལོ་ཙཱ་བྱས་སྟེ་ཆོས་མང་པོ་བསྒྱུར། སྔགས་འཆང་དྷརྨ་ཀིརྟི་ཞེས་པ་སྤྱན་དྲངས་སྟེ་ཡོ་ག་རྡོ་རྗེ་དབྱིངས་ལ་སོགས་པའི་དཀྱིལ་འཁོར་དུ་བདུད་འདུལ་སྔགས་པ་གླིང་དུ་དབང་བསྐུར། ཁ་ཆེའི་པཎྜི་ཏ་ཛི་ན་མི་ཏྲ་དང་ད་ན་ཤཱི་ལ་ལ་སོགས་པས་རྣམ་དག་ཁྲིམས་ཁང་གླིང་དུ་ཁྲིམས་འབོགས། རྒྱའི་ཧྭ་ཤང་ལ་སོགས་པས་མི་གཡོ་བསམ་གཏན་གླིང་དུ་བསམ་གཏན་བྱེད། བརྡ་སྦྱོར་ཚངས་པའི་གླིང་དུ་བརྡ་སྦྱོར། དཀོར་(ཇ༡༠༦ན)

[Full Size]

མཛོད་པེ་ཀར་གླིང་དུ་ནོར་འཇོག །བཻ་རོ་ཙ་ནའི་གླིང་དུ་ཆོས་འཆད་པ་ལ་སོགས་པས་བསྟན་པ་ཡོངས་སུ་རྫོགས་པ་དར་བར་བྱས་སྟེ་འབྲུག་གི་ལོ་ལ་ཕོ་བྲང་ལྡན་དཀར་ན་བཞུགས་པའི་སྟོན་སྒྲ་བསྒྱུར་གྱི་བནྡྷེ་དཔལ་བརྩེགས་དང་བནྡྷེ་ཀླུའི་དབང་པོ་ལ་སོགས་པས་བོད་ཁམས་སུ་དམ་པའི་ཆོས་འགྱུར་རོ་འཚལ་གྱི་མཚན་བྱང་བམ་པོ་དང་ཤྩོ་ཀའི་གྲངས་སུ་མཆིས་པར་གཏན་ལ་བབ་ནས་དཀར་ཆག་དུ་བྲིས་སོ་ཞེས་བྱུང་ངོ༌། །གཞན་ཡང་ཡེར་པ་དང་ཆུ་བོ་རི་ལ་སོགས་ལ་སྒོམ་གྲ་ཆེན་པོ་བཙུགས་པ་ལ་གྲུབ་ཐོབ་མང་དུ་བྱུང་སྟེ་ཡེར་པའི་དཀར་ཆག་བླ་མ་ཟངས་རི་བས་ཡེར་པ་བསོས་པའི་སྤེའུ་སེར་པོ་ནས་ཐོན་པ་ལས། ལྷ་ལུང་དཔལ་གྱི་རྡོ་རྗེ་ནི་འབྲོམ་སྟོད་གུང་མོ་ཆེར་འཁྲུངས། སྐྱ་མིང་སྟག་ཉ་བཟང་ཟེར། རྒྱ་བོད་ཀྱི་མཚམས་བསྲུངས་སྟེ་རྒྱ་རྣམས་བཏུལ། ལན་གཅིག་གོ་ཆ་ཕུད་པའི་རྨོག་གི་ནང་ན་ཏོག་གི་གཟུངས་བཞུགས་པ་བཀླགས་པས། བྲ་ཉེ་ལ་ནི་གང་སྐྱེས་པ། །རྐང་མཐིལ་རྨེ་བ་དམར་པོ་ཅན། །ཤི་ནས་དམྱལ་བར་སྐྱེ་བར་འགྱུར། །ཟེར་བ་མཐོང༌། རྐང་མཐིལ་བལྟས་པས་རྨེ་བ་དམར་པོ་ཅིག་འདུག །ཀློག་མཁན་ལ་ཀློག་དུ་བཅུག་པས་ཀྱང་དེ་བཞིན་དུ་འདུག་ཟེར། དེར་ཡབ་མཆེད་གཉིས་ཁོང་རང་སྤུན་གསུམ་དང་བཅས་པ་བསམ་ཡས་སུ་པཎྜིཏ་བཞུགས་པའི་རྩར་ཕྱིན། བི་མ་ལ་མི་ཏྲ་ལས་རབ་ཏུ་བྱུང༌། པདྨ་སམྦྷ་ཝ་ལས་བྱང་ཆུབ་སེམས་དཔའི་སྡོམ་པ་བླངས། རབ་འབྱོར་དབང་པོ་དབྱངས། དཔལ་གྱི་རྡོ་རྗེ། བཙུན་པ་དཔལ་གྱི་དབྱངས་སྟེ་མཆེད་གསུམ་པོ་གྲིབ་ཀྱི་དཀར་མོ་རོང་དུ་བསྒོམས་པས་དཔལ་གྱི་རྡོ་རྗེའི་ཆོས་གོས་ལྷགས་པས་ཁྱེར་བ་བསྙེགས་པས་ཡེར་པ་ལྷ་རི་སྙིང་པོར་ཤུག་པ་བྱ་ཕོང་ཙམ་ཞིག་ལ་བཀྲིས་ནས་འདུག་ཁོང་ས་དཔྱད་ལ་མཁས་པས་རི་དེ་ཇོ་མོ་སྒྲོལ་མའི་བཞུགས་ཚུལ་འདྲ་བ་གཡས་བརྐྱངས་གཡོན་བསྐུམས་པ། ཤར་གྱི་རི་སྤུངས་པ་འདྲ་བ་ནུབ་རི་རིན་པོ་ཆེ་བསྟར་ལ་བརྒྱུས་པ་འདྲ་བ། ལྷོ་གཞོལ་བ་བྱང་བསྐྱབས་པ་བྲག་(ཇ༡༠༦བ)

[Full Size]

བྱ་རྒོད་སྤུངས་པ་འདྲ་བ། ཤུག་པའི་ནགས་སྨྱུག་ལོ་རྒྱས་པ་ལྟ་བུ། ཡར་གྱི་གནམ་སྒོ་བྱེ་བས་གྲུབ་པ་ཐོབ་པའི་གནས་སུ་བཟང་བར་གཟིགས་ནས་ཡབ་མཆེད་རྣམས་ཚུར་སྤྱན་དྲངས། བྲག་ལྷ་བྲག་ཕུག་བྲུས་པས་བྲག་སྲིན་མོ་ལངས་པ་དང་རྣལ་འབྱོར་ཕུག་གི་མཆོད་རྟེན་བཞེངས། མས་ཀྱི་ཀླུ་གཉན་ལངས་པས་ཞིང་ཁ་མཆོད་རྟེན་བཞེངས། ཕར་ནས་བྲག་སྲིན་ལངས་པས་བྲག་གུ་དཀར་པོའི་མཆོད་རྟེན་བཞེངས། འབངས་སྦལ་གཉོས་སོགས་བྱང་ཚྭ་ཁར་བཏང་སྟེ་དྲུག་བཅུ་སྡེའི་ཚྭ་དང་བྲག་ཕུག་བྲུས་པའི་བྲག་ཕྱེ་བརྗེས་ནས་བྱིན། ཆོས་དོན་དུ་གཉེར་བ་རྣམས་དེར་ཚོགས་སྟེ་མཆོད་གནས་ཚོ་གསུམ་གྱི་རབ་ལ་སོ་སོར་སྐྱེལ། འབྲིང་ལ་འབྱོན་པར་ཞུ། ཐ་མ་རྣམས་ཕུག་རོན་སྣ་ནས་དུང་བུས་སྟེ་ཁྱམས་ཁྲ་མོར་འཚོག་འབངས་རླངས་མི་ཆེ་ཆུང༌། སོག་མཐའ་བཞི། འ་ཞ་ཤ་ར། གཡེ་རྨ་སུམ་པ་རྣམས་ཀྱིས་སྒོམ་ཆེན་རྣམས་ཀྱི་གཡོག་བྱེད། དེ་ལྟར་རྩེ་གཅིག་དུ་སྒོམ་པའི་ཚེ་སྣུབས་ན་མཁའ་སྙིང་པོས་ན་མཁའ་ཕུག་དུ་གྲུབ་པ་ཐོབ་སྟེ་ཉི་ཟེར་ལ་ཆོས་གོས་བཀལ་ནང་གཅིག་ཉི་ཟེར་ལ་ཆིབས་ནས་བཞུད། བཙུན་པ་དཔལ་གྱི་དབྱངས་སེང་གེ་གདོང་སྔོན་ཞིག་དུ་བྱས་སྟེ་སྒང་ཁར་བབ་པས་སེང་གེ་སྒང་དུ་ཐོགས། མཆོད་རྟེན་བཞེངས་སྟེ་དབྱར་ཟླ་འབྲིང་པོ་ཉའི་ཉི་ཤར་ལ་ཏོག་གི་གྲིབ་སོ་ཕོག་སར་ཡབ་ཀྱི་སྤུར་བཞུགས། ཟླ་བ་ཕུག་དུ་རབ་ཟླ་བ་གྲགས་པས་ཟླ་ཟེར་ལ་ཆོས་གོས་བཀལ། ཟླ་བའི་ཟེར་ལ་འཆིབས་སྟེ་ལྷ་རི་སྙིང་པོའི་རྩེར་གཤེགས། སྨྱལ་དགེ་རིགས་ཀྱིས་ཐུན་མོང་གི་དངོས་གྲུབ་ཐོབ་ནས་ན་མཁའ་ལ་འཕུར་ནས་འཁར་བུམ་དང་ལྷ་ལ་ཆགས་པས་ས་ལ་ལྷུང༌། མཐུ་ཆེན་གྱིས་ན་མཁའ་ལ་འགྲོ་ཤེས། འདྲེ་འཕྲང་ཕུག་སྒྲུབ་ཆུའི་ཕུག་བྲག་རྩ་ཕུག་རྣམས་སུ་སྐྱེ་དམར་པོ། ཞང་སྲིད་རུམ། བག་ཡངས་སེང་གེ །གཡུང་དྲུང་རྣམས་ཀྱིས་གྲུབ་པ་ཐོབ། འབྲི་ཡས་བྱང་ཆུབ་གཞོན་ནུ། རྡོ་རྗེ་དཔལ་འབྱུང༌། གད་ལས་བྱང་ཆུབ་གཞོན་ནུ། ལྷ་ཀུན་དུ་བཟང་པོ། ལྕགས་རྡོ་རྗེ་(ཇ༡༠༧ན)

[Full Size]

སྙིང་པོ། སོ་རྡོ་རྗེ་སྙིང་པོ། དབྱིག་རྡོ་རྗེ་རྒྱལ་མཚན། ར་བྱིད་རྡོ་རྗེ་སྙིང་པོ། རྦས་རབ་མཆོག་ངན་ལམ་རྒྱལ་བ་མཆོག་དབྱངས། མྱང་ཏིང་འཛིན་བཟང་པོ། སོག་པོ་དཔལ་གྱི་གཞོན་ནུ། རྦས་རྡོ་རྗེ་བརྟན། འབྲོམ་དཔལ་གྱི་སྙིང་པོ། འཕྲུལ་སྣང་གནས་བརྟན། ཤིང་མི་གོ་ཆ། མཚུར་ནག་དཔལ་གྱི་ཡེ་ཤེས། རྣལ་འབྱོར་རྡོ་རྗེ་རྒྱལ་མཚན། ཧོར་ཤཱཀྱ་བྱང་ཆུབ་སོགས་སྐྱེས་བུ་དམ་པ་བརྒྱ་རྩ་བརྒྱད་ཀྱིས་གྲུབ་པ་ཐོབ་སྟེ་བཞུགས་གནས་ལ་འབྲི་ཡས་ཕུག་ནས་ཧོར་ཚང་ཕུག་གི་བར་སོ་སོའི་མཚན་ཐོགས། ཁོན་ཀླུའི་དབང་པོས་བདེ་མཆོག་དྲིལ་བུ་པའི་གྲུབ་པ་ཐོབ། ཕྱག་དྲིལ་ན་མཁའ་ལ་བཞག་པས་དྲིལ་བུ་ཕུག་དུ་ཐོགས། གཉགས་ཛྙ་ན་ཀུ་མར་དང་ངན་ལམ་རྒྱལ་བ་མཆོག་དབྱངས་གཉིས་ཀྱིས་སློབ་དཔོན་པདྨ་ལ་དབང་བསྐུར་དང་གདམས་ངག་ཞུས་ནས། ཉགས་ཀྱིས་གཉགས་ཕུག་དུ་བསྒོམས། གྲུབ་པ་ཐོབ་ནས་བྱ་རོག་དུ་བྱས་སྟེ་འཕུར་བས་བྱ་རོག་སྐྱབས་སུ་ཐོགས། ངན་ལམ་གྱི་རྩར་ཕྱིན་པས་ངན་ལམ་གྱིས་གྲོགས་པོར་ཤེས་སྟེ་སྟབས་སུ་བསྡད་པས་ཡང་རྔ་མོང་ཆུང་བ་ཞིག་དུ་བྱས་ནས་བསྐོར་བ་ལན་གསུམ་བྱས་ནས་ངན་ལམ་ལ་སྤྱང་རབ་འདུག་ཟེར་སྐད། དེ་ལྟར་གྲུབ་ཐོབ་བརྒྱ་རྩ་བརྒྱད་ལ་བཙུན་པ་དཔལ་གྱི་རྡོ་རྗེ་དང༌། འབངས་རྣམས་ཀྱིས་ཞབས་ཏོག་བྱེད། དེའི་ཚེ་འབངས་རྣམས་ཚང་མང་རིང་མོ་ལ་བད་གཡམ་གཏོང་ཙམ་ན་ལྷ་ལུང་རབ་འབྱོར་དབྱངས་བང་ས་ཕུག་ན་བཞུགས་པས་སོར་རྡོ་འཕངས་པ་བང་ལ་ཕོག་པ་དང༌། ལྷ་ལུང་དཔལ་རྡོར་གྱི་ཐུགས་དགོངས་ལ་རབ་འབྱོར་དབྱངས་འདི་ངེད་སྤུན་གསུམ་གྱིས་ཆེ་ཤོས་ཡིན། ངའི་དགེ་བའི་ལས་འདི་ཙམ་ལ་ཟ་མ་ཅིག་ཀྱང་མི་བྱེད་པར་སོར་རྡོ་འཕེན་པ་སྙམ་པ་དང༌། རབ་འབྱོར་དབྱངས་ཀྱིས་མཁྱེན་ནས་སྐད་ཅིག་དེ་ལ་མདུན་དུ་ཡེར་བྱུང་སྟེ་ཕྱག་ཡུག་མཛད་ཅིང་འོ་སྐོལ་སྒོམ་པར་ཆད་དམ་མཁར་ལས་བྱེད་པར་ཆད་གསུངས་པས་ལན་མ་ཐེབས། འོ་ན་ཁྱོད་ཀྱི་མཁར་ལས་ཇི་ཙམ་ཚར་གསུང་བས། མཁར་ལས་ཚར། རབ་གནས་(ཇ༡༠༧བ)

[Full Size]

དང་ལྷ་གཟོའི་རྫོངས་མ་ཚར་བས་འབངས་སྦལ་གཉོས་ཀྱིས་མགོ་བྱས་ཚྭ་ཁ་ལ་བཏང་སྙམ་བྱས་པས། འོ་ན་ཁྱོད་ང་ལ་ཟ་མ་རེ་བར་འདུག་པས་ཚྭ་ལ་མ་གཏོང་བར་སྣོད་རྙེད་ཚད་ཁྲུས་ལ་ཚེས་གཅིག་ནས་བརྒྱད་ཀྱི་བར་དུ་ཁ་མ་འབྱེད་པར་ཞོག་དེ་དུས་ལྷ་གཟོ་དང་ཡོན་བདག་རྣམས་ཀྱང་བོས། དཔལ་ཆེན་ཆུ་བོ་རི་ལ་གྲུབ་པ་ཐོབ་པའི་རྣལ་འབྱོར་པ་ཉི་ཤུ་རྩ་གཅིག་བཞུགས་པ་སྤྱན་དྲོངས་ལ་རབ་གནས་ཞུས། ཟ་མ་ངས་བྱེད་ཀྱི་གསུངས། དེ་བཞིན་བྱས་པས་ཚེས་བརྒྱད་ཀྱི་དྲོ་རན་རན་ཙཾ་ལ་ཅང་མེད། དེ་ནས་སྤྱན་སྔར་ཕྱིན་ནས་ཕྱག་བྱས་པས་ཏིང་ངེ་འཛིན་ལ་བཞུགས་ནས་སྤྱན་མ་ཕྱེད། ཡང་ཕྱག་གསུམ་བྱས་པ་དང་སྤྱན་ཧུར་མཛད་དེ་དེ་བཞིན་བྱས་སམ་གསུང༌། བགྱེས་ལགས་ཞུས་པས་ཆོས་གོས་སྨད་ལྔ་མནབས་ནས་ཡེ་ཤེས་ཕུག་ན་དབྱངས་མཛད་དེ། དད་པ་ཅན་ལ་གཏོང་བའི་ནོར་མི་ཕོངས། །རྒྱ་མཚོའི་ཆུ་ལ་བཅུས་ཀྱང་ཟད་པ་མེད། །དེ་ཕྱིར་དད་ལྡན་ཁྱོད་ལ་བསོད་སྙོམས་སློང༌། །གསུང་ནས་མཁར་སིལ་གྱིས་བྲག་བརྡུངས་པས་སྣོད་ཐམས་ཅད་ལྷའི་ཞལ་ཟས་དང་རིན་པོ་ཆེས་གང་སྟེ་དེ་ཚོ་ལ་ལོངས་སྤྱོད་ཅིག་གསུངས། ཁོ་བོ་ལྷོ་ཕྱོགས་དཔལ་གྱི་རི་ལ་འགྲོ་གསུངས་ནས་བཞུད། བརྗེད་པ་གཅིག་བྱུང་གསུངས་ནས་ཕྱི་ཕྱག་མཛད་པས་ཕྱག་འཚལ་སྒང་དུ་ཐོགས། དཔལ་གྱི་རྡོ་རྗེ་དང་གཡོག་པོ་གཉིས་ལ་ཁྱེད་རང་གཉིས་ཀྱང་དཔལ་གྱི་རི་ལ་འདོང་གསུངས་པས་མི་འགྲོ་ཟེར། ཡང་མི་འགྲོའམ་གསུངས་པས་ཀྱང་མ་ཉན། ཁམ་པའི་སྒྱིད་པོ་གསུམ་སྣོད་དུ་བཅུག་ནས་ཡེར་པར་མ་སླེབས་པར་མ་ལྟ་ཅིག་གསུངས། གཉིས་ཇོག་པོ་ཕུར་བལྟས་པས་ཁམ་པར་འདུག་གཅིག་ཡེར་པར་ཁ་ཕྱེ་བས་གསེར་དུ་འདུག་པས་དེ་ལས་གཡོག་པོས་མཆོད་རྟེན་གོང་ན་མེད་བཞེངས་སྟེ་རིང་སྲེལ་ལྷུང་བཟེད་གང་བཞུགས། ཆུ་བོ་རིའི་གྲུབ་ཐོབ་རྣམས་ཀྱིས་ལྷ་ལ་རབ་གནས་ལན་ཉི་ཤུ་རྩ་གཅིག་མཛད། བསམ་གྲུབ་དང་དཔལ་གྱི་ལྷ་མོར་ལན་གསུམ་གསུམ། བྲག་ལྷར་ལན་ཉི་ཤུ་རྩ་ལྔ་(ཇ༡༠༨ན)

[Full Size]

མཛད་དེ་སྤྲུལ་པའི་སྐུ་དངོས་དང་ཁྱད་པར་མེད་གསུངས་ནས་ནས་འབྲུ་དཀྱིལ་འཁོར་ལ་བཏབ། མི་གཞན་གྱི་རྡོག་པ་བཞག་དུ་མི་རུང་གསུངས་ནས་མ་སྐྱེད་མ་ཕྲི་བར་དཔལ་གྱི་རྡོ་རྗེ་ཉིད་ཀྱིས་སྒོམ་ཞིང་བཞུགས། ཐུགས་དམ་དུ་སྐུའི་རྟེན་ཤཱཀྱ་ཐུབ་པ། གསུང་རྟེན་བླ་འབུམ། སྨོན་ལམ་གྱི་རྟེན་ཕལ་ཆེན་མཚལ་ཡིག་ཅན་ཁཱརྶ་པཱ་ཎ་རྣམས་བཞེངས། དཔལ་གྱི་རྡོ་རྗེའི་སློབ་མ་སོག་པོ་དཔལ་གྱི་གཞོན་ནུ་དགེ་སློང་རྨ་ཤ་རི་བུདྡྷ་སོགས་བཅུ་གསུམ་གྱིས་གྲུབ་པ་བརྙེས་སོ། །དུས་ཐ་མ་ལ་སྨྱལ་གྱི་དགེ་རི་ཐེ་རང་གིས་དབང་བྱེད་དཔལ་ཆེན་ཆུ་བོ་རི་ཀླུས་དབང་བྱེད། ཡེར་པར་སངས་རྒྱས་ཀྱི་བསྟན་པ་ལ་ཞུགས་པ་རྣམས་ཀྱིས་སྒོམ་ས་ཡིན་ནོ། །ཞེས་བྱུང་ངོ༌། །གཞན་ཡང་མཁའ་འགྲོ་སྙིང་ཐིག་ལས་སློབ་དཔོན་ཆེན་པོ་པདྨའི་ཞལ་ནས་ད་ལྟ་ཁོ་བོ་ནི་གདུག་པ་འདུལ་བའི་དུས་ལ་བབ་པ་ཡིན། རང་བཞིན་རྫོགས་པ་ཆེན་པོ་མངོན་སུམ་སྙིང་ཐིག་གི་བསྟན་པ་ནི་བི་མ་ལ་མི་ཏྲའི་ཕྲིན་ལས་དུས་ལ་བབ་པ་ཡིན་ཞེས་མ་དཔེལ་བར་གཏེར་དུ་བཞག་པར་གསུངས་པ་ལྟར་བི་མ་ལ་མི་ཏྲ་སྤྱན་དྲངས་ནས་ཆོས་མང་དུ་གསུངས། རྒྱལ་པོ་དང་གཉགས་ཛྙཱ་ན་སོགས་ལ་སྣོད་བརྟགས་པས་སྙིང་ཐིག་གི་སྣོད་དུ་མ་རུང་ནས་མྱང་བན་ཏིང་འཛིན་བཟང་པོ་ལ་སྣོད་བརྟག་པའི་ཕྱིར་ཁོ་བོ་ཨ་ཙར་རྒྱ་གར་དུ་ལྡོག་པ་ལ་གསེར་མང་པོ་དགོས་པས་ཁྱོད་ཀྱིས་ཡུལ་གཞིས་སོགས་ཅི་ཡོད་གསེར་དུ་དྲིལ་ལ་ང་ལ་ཕུལ་ཞིག་གསུངས་པས་ཤིན་ཏུ་དགའ་སྟེ་གང་ཡོད་གསེར་དུ་ཕུལ་བས་མཉེས་ནས་ང་ལ་གསེར་གྱིས་དགོས་པ་མེད། ཁྱོད་ཀྱི་སྣོད་བརྟགས་པ་ཡིན་གསུངས་སྟེ་མཉེས་ནས་མན་ངག་རྫོགས་པར་གནང༌། དམ་ཅན་རྡོ་རྗེ་ལེགས་པ་བཀུག་སྟེ་ཁང་པའི་མཐོངས་ཁུང་ཆུང་ངུ་ཞིག་ལ་སྨྱུག་མའི་ཞྭ་མཐིལ་བཏོལ་བ་བཀབ་སྟེ་ཁྱོད་ཀྱིས་འདི་ནས་ཀྱིས་གང་བར་གྱིས་ཅིག་ཞེས་གསུངས་པས་ཡུལ་མང་པོར་སེར་བ་ཕབ་སྟེ་ནས་བླུག་པ་འོག་ཁང་ནས་ཕྱུང་སྟེ་ལྷ་ཁང་བརྩིགས་པས་དབུར་སྟོད་ཞྭའི་ལྷ་ཁང་(ཇ༡༠༨བ)

[Full Size]

ཞེས་གྲགས་ཤིང་ལེགས་པར་ཟིན་ནས་དམ་ཅན་ལ་གཏད། ཡུལ་གྲུ་དེ་ཡང་མྱང་བན་དབང་བར་རྡོ་རིང་ལ་བཀའ་གཙིགས་བརྐོས་སོ། །སྔོན་མ་ཞང་གྲོམ་པ་སྐྱེས་ལ་སོགས་པས་ཆོས་བཤིག་པ་ཐུགས་ལ་བཅགས་ནས་ཕྱིན་ཆད་དེ་ལྟ་བུ་མི་འབྱུང་བའི་ཕྱིར་བོད་སུས་ཀྱང་ཆོས་མི་བཤིག་པའི་བཀའ་གཙིགས་བཅས། དབུ་སྙུང་བཞེས་མནའ་བསྒགས་སྟེ་དེ་འདྲ་བ་ལན་གཉིས་མཛད་པའི་བཀའ་གཙིགས་དང་པོ་ནི། ༄། བཙན་པོ་ཁྲི་སྲོང་ལྡེ་བཙན་གྱི་སྐུ་རིང་ལ། ཤོག་བུ་མཐིང་ག་ལ་གསེར་གྱིས་བྲིས་ནས། གསེར་གྱི་སྒྲོམ་བུར་བསྩལ་བའི་བཀའ་གཙིགས་ཀྱི་ཡི་གེ་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་གི་དཀོར་མཛོད་དུ་བཞག་པ་ལས་དཔེ་བགྱིས་སྟེ་བྲིས་པ། ༄། དཀོནད་ཅོག་གསུམ་ནམ་དུ་ཡང་མི་བཏང་མ་ཞིག་བར་དགྱི་བའི་གཙིགས་སྒྲོམ་བུ་ནང་ན་མཆིས་པའི་དཔེ། དེ་བཞིན་གཤེགས་པའི་བཀའ་ལས་བྱུང་བ་དོན་ཐོག་དུ་སྦྱར་ན་ཡང་དག་པ་ཉིད་ཁོང་དུ་མ་ཆུད་པས་ཁམས་གསུམ་ཡང་སྡུག་བསྔལ་གྱི་གནས་སུ་གྱུར། ཐམས་ཅད་ཀྱང་གནའ་ནས་མ་སྐྱེས་པ་མེད། སྐྱེས་ནས་ནི་དོན་དང་དོན་མེད་པར་སྤྱོད། དེ་ནས་ཀྱང་ཤི་བར་འགྱུར། ཤི་ནས་ཀྱང་གནས་བཟང་ངན་དུ་ཕྱིར་སྐྱེ། དེ་ལ་ལེགས་སུ་སྟོན་པ་ནི་སངས་རྒྱས། མངོན་པར་དམིགས་པ་ནི་ཆོས་ཀྱི་ཡི་གེ །དགེ་བར་མཚོན་པ་ནི་དགེ་འདུན་རྣམས་སྟེ། གཏན་གྱི་སྐྱབས་དང་གླིང་དུ་བཟང་ངོ༌། །དཀོནད་ཅོག་གསུམ་ནི་བྱིན་དུ་ཆེར་ཆེ་སྟེ། ཡབ་མེས་སྔ་མ་ཀུན་གྱི་རིང་ལ་ཡང་གདུང་རབས་རེ་རེ་ཞིང་ལུགས་སུ་མཛད་དེ། གཙུག་ལག་ཁང་སར་རྙིང་དངོས་ཡོད་པ་ཡིན། བཙན་པོ་ཡབ་དགུང་དུ་གཤེགས་པའི་ཕྱི་ནས། པན་པུན་ཁྱེར་བའི་དཔེ་ཚུལ་ཡོད་པ་ནས། གཙུག་ལག་ཁང་ལྷུན་གྱིས་འགྲུབ་ཏུ་ལུག་གི་ལོ་ལ་དཔྱིད་ཟླ་ར་བའི་ཚེས་བཅུ་བདུན་ལ་རྟེན་བཙུགས་པའི་ཚེ། ད་ནས་ཕན་ཆད། བོད་ཡུལ་དུ་དཀོནད་ཅོག་གསུམ་རྟེན་བཅས་སྟེ། སངས་རྒྱས་ཀྱི་ཆོས་མཛད་པ་མི་གཞིག་པར་(ཇ༡༠༩ན)

[Full Size]

བཙན་པོ་ཡབ་སྲས་དང་སྲས་ཀྱི་ཡུམ་གྱིས་དབུ་སྙུང་བཟུང་ཞིང་ཡི་དམ་བཅས་པ་དང༌། ཕྱི་ནང་གི་བློན་པོ་ཆེ་ཕྲ་མཐའ་དག་བྲོ་སྩལ་བའི་གཙིགས་ཀྱི་ཡི་གེར་བྲིས་པའོ། །༄། ར་སའི་འཕྲུལ་སྣང་གཙུག་ལག་ཁང་དང༌། རྒྱ་བཏགས་ར་མོ་ཆེའི་གཙུག་ལག་ཁང་དང༌། བྲག་དམར་གྱི་བསམ་ཡས་ལྷུན་གྱིས་གྲུབ་ཀྱི་གཙུག་ལག་ཁང་དང༌། ཁམས་གསུམ་མི་ལྡོག་སྒྲོལ་གྱི་གཙུག་ལག་ཁང་ལ་སྩོགས་སྟེ། བོད་ཀྱི་རིགས་སུ་བླ་ནས། དཀོནད་ཅོག་གསུམ་གྱི་རྟེན་བཙུགས་སྟེ། བོད་ལས་ཀྱང་ཐར་པར་གཟུད་ཅིང༌། སངས་རྒྱས་ཀྱི་ཆོས་མཛད་པ་འདི་ནམ་དུ་ཡང༌། མི་གཏང་མ་ཞིག་བར་བགྱིའོ། །བོད་ལས་ཀྱང་ཐར་པར་གཟུད་དོ། ། ༄། གཙུག་ལག་ཁང་དེ་རྣམས་སུ་དཀོནད་ཅོག་གསུམ་གྱི་ཡོ་བྱད་སྦྱོར་བའི་རྐྱེནད་ཀྱང་རན་པ་འོང་བར་དཔགས་སྟེ་བླ་ནས་ཕུལ་བ་ལས། ནམ་ཞར་ཀྱང་མི་དབྲྀ་མི་བསྐྱུང་བར་བགྱིས་སོ། །ད་ཕྱིན་ཆད་གདུང་རབས་རེ་རེ་ཡང༌། བཙན་པོ་ཡབ་སྲས་འདི་བཞིན་དུ་ཡི་དམ་བཅའ་ཞིང་ཞལ་གྱིས་བཞེས་པར་བགྱིའོ། །བློན་པོ་ཐོག་ཐོག་ཀྱང་བྲོ་སྩལ་བར་བགྱིའོ། ། ༄། འདི་ལྟར་ཡི་དམ་བཅས་པ། ཕྱོགས་བཅུའི་སངས་རྒྱས་ཐམས་ཅད་དང༌། དམ་པའི་ཆོས་ཐམས་ཅད་དང༌། བྱང་ཆུབ་སེམས་དཔའི་དགེ་འདུན་ཐམས་ཅད་དང༌། རང་སངས་རྒྱས་དང་ཉན་ཐོས་ཐམས་ཅད་དང༌། གནམ་སའི་རིམ་པ་ལྷ་འོ་ཅོག་དང༌། བོད་ཡུལ་གྱི་སྐུ་ལྷ་དང༌། ལྷ་དགུ་ཐམས་ཅད་དང༌། ཀླུ་དང༌། གནོད་སྦྱིན་དང་མི་མ་ཡིན་པ་ཐམས་ཅད་དཔང་དུ་གསོལ་སྟེ། གཙིགས་འདི་ལས་མི་འགྱུར་བར་མཁྱེན་པར་བགྱིས་སོ། །དེ་ལ་གཙིགས་ལྟར་མ་བགྱིས་སྟེ། དཀོནད་ཅོག་གསུམ་གྱི་སྐུ་བསླུས་སམ་མནའ་ཁ་དཔུང་བགྱིས་ན། སེམས་ཅན་དམྱལ་བར་སྐྱེས་ཤིག །འདི་བཞིན་དུ་མཛད་ཅིང་བགྱིས་ན། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་(ཇ༡༠༩བ)

[Full Size]

རྒྱས་པར་ཤོག་ཅིག ། ༄། སངས་རྒྱས་ཀྱི་ཆོས་བོད་ཡུལ་དུ། སྔ་ཕྱིར་ཇི་ལྟར་བྱུང་བའི་བཀའ་མཆིད་ཀྱི་ཡི་གེ་གཅིག་ཀྱང་ཟླ་ལ་བཞག་གོ ། ༄། དཔེ་འདི་འདྲ་བ་བཅུ་གསུམ་བྲིས་སྟེ། གཅིག་ནི་ཕྱག་སྦལ་ན་བཞག་གོ །གཉིས་ནི་ཕྱག་རྒྱས་བཏབ་སྟེ། ར་སའི་འཕྲུལ་སྣང་གཙུག་ལག་ཁང་དང༌། བྲག་དམར་གྱི་བསམ་ཡས་ལྷུན་གྱིས་གྲུབ་ཀྱི་དགེ་འདུན་ལ་རེ་རེ་བཞག་གོ །བཅུ་ནི་མཐར་ཕྱག་རྒྱས་བཏབ་སྟེ། ར་སའི་འཕྲུལ་སྣང་གཙུག་ལག་ཁང་དང༌། བསམ་ཡས་ལྷུན་གྱིས་འགྲུབ་ཀྱི་གཙུག་ལག་ཁང་དང༌། ཁྲ་འབྲུག་གི་བཀྲ་ཤིས་ལྷ་ཡུལ་གཙུག་ལག་ཁང་དང༌། ཕོ་བྲང་འཁོར་གྱི་དགེ་འདུན་དང༌། ར་སའི་རྒྱ་བཏགས་ར་མོ་ཆེ་དང༌། བྲག་དམར་གྱི་ཁམས་གསུམ་མི་ལྡོག་སྒྲོལ་དང༌། བྲུ་ཤ་ཡུལ་དང༌། ཞང་ཞུང་ཡུལ་དང༌། མདོ་སྨད་དང༌། སྡེ་བློན་རིས་དང༌། འདི་རྣམས་ཀྱི་གཙུག་ལག་ཁང་གི་དགེ་འདུན་ལ་དཔེ་རེ་རེ་འཆང་དུ་སྩལད་ཏོ། ། ༄། བྲོ་སྩལད་པ་ལ། ༄། དབོན་འ་ཞ་རྗེ། ༄། ཞང་བློན་ཆེན་པོ་བཀའ་ལ་གཏོགས་པ་ལ། བློན་ཆེན་པོ་ཞང་རྒྱལ་གཟིགས་ཤུ་ཐེང༌། བློན་སྟག་སྒྲ་ཀླུ་གོང༌། ཞང་རྒྱལ་མཚན་ལྷ་སྣང༌། བློན་རྒྱལ་སྒྲ་ལེགས་གཟིགས། བློན་བཙན་བཞེར་མདོ་ལོད། ཞང་རྒྱལ་ཉེན་ཟླ་གོང༌། བློན་ཁྲི་གངས་རྒྱ་གོང༌། གཅེན་མཚོ་བཙན། ཞང་རྒྱལ་ཚན་ལེ་གོང༌། ༄། ནང་བློན་ལ། ༄། བློན་གྲ་འཛི་ཞང་རམས་ཤགས། ཞང་ཨ་སྲིན། ཞ་སྔ་ཁྲི་གཉེན། བློན་ཀླུ་གོང༌། འོང་ཀ་ལྷ་མཚོ། བློན་ཤང་བཙན། བློན་སྲིན་སྐྱུགས། བློན་འདུས་སྟོན། ཞང་སྟག་ཚབ། ཞང་ལེགས་འདུས། ༄། ཕྱི་བློན་ལ། ཞང་བལ་བུ་སྟང༌། ཞང་ལྷ་གཟིགས། བློན་ལ་ཀུན་རྩེ། བློན་སྤྲ་བཞིན། བློན་སྟོང་ཐུབ། བློན་ཟླ་གོང༌། བློན་གཙུག་ཁྱུང་སླིང༌། བློན་ལྷོས་པོ། ཞང་རྒྱལ་སྣང༌། བློན་བྱིན་བྱིན། བློན་ལོང་པོ། བློན་རྩང་ལོད། བློན་གཉན་ཀོང༌། (ཇ༡༡༠ན)

[Full Size]

སྟོད་སྨད་ཀྱི་དབང་པོ་དང་དམག་དཔོན་ལ། བློན་སྐྱེས་བཟང་སྟག་སྣང༌། བློན་སྣང་ཀོང༌། བློན་ཁྱི་ཆུང༌། བློན་ཀླུ་བཞེར། ཞང་མར་བུ། བློན་ལྷ་མཚོ། བློན་པར་མི། བློན་ཤང་རྫོང༌། བློན་མིག་ཁྱུང་ཆུད། བློན་ཏང་བུ། ཁུ་རྒྱ་བརྩན། ཁུ་གཡུ་བརྩན། བློན་མདོ་གཟིགས། བློན་ཁོང་ཁྲི། བློན་ཁོང་ལེགས། བློན་རྨང་ལ་སྐྱེས། བློན་མདོ་བཟང༌། བློན་ཁྲི་གོང༌། ཆོས་བོད་ཡུལ་དུ་སྔ་ཕྱིར་ཇི་ལྟར་བྱུང་བའི་བཀའ་མཆིད་ཀྱི་ཡི་གེ་གཅིག་ཀྱང་ཟླ་ལ་བཞག་གོ །བྲང་ཏི་ཤཱི་ལ་ཝརྨས་བྲིས། ཞེས་བྱུང་ངོ༌། །བཀའ་གཙིགས་གཉིས་པ་ནི། བཙན་པོ་ཁྲི་སྲོང་ལྡེ་བཙན་གྱི་སྐུ་རིང་ལ། ཆོས་འབྱུང་བའི་ལོ་དྲུང་གི་ཡི་གེ་ཟླ་ལ་བཞག་པ། ཕྲ་མྱེན་གྱིས་བྲིས་སྟེ་གསེར་གྱི་སྒྲོམ་བུར་བསྩལ་ནས། དཔལ་བསམ་ཡས་ཀྱི་དཀོར་མཛོད་དུ་བཞག་པ་ལས་དཔེ་བགྱིས་ནས་བྲིས་པ། ༄། གནའ་ད་འཆད་བོད་ཡུལ་དུ་དཀོནད་ཅོག་གསུམ་གྱི་རྟེན་བཅས་སྟེ། སངས་རྒྱས་ཀྱི་ཆོས་མཛད་པའི་ལོ་དྲུང་གི་ཡི་གེར་བྲིས་པ། སྒྲོམ་བུའི་ནང་ན་མཆིས་པའི་དཔེའ། ༄། བཙན་པོ་བཞི་མེས་ཁྲི་སྲོང་ལྡེ་བཙན་གྱི་རིང་ལ། ར་སའི་པེ་ཧར་བརྩིགས་སྟེ་སངས་རྒྱས་ཀྱི་ཆོས་ཐོག་མ་མཛད་ཚུན་ཆད། བཙན་པོ་ཡབ་ཁྲི་ལྡེ་གཙུག་བཙན་གྱི་རིང་ལ། བྲག་དམར་གྱི་ཀྭ་ཆུར་གཙུག་ལག་ཁང་བརྩིགས་སྟེ་སངས་རྒྱས་ཀྱི་ཆོས་མཛད་ཕནད་ཆད་གདུང་རབས་ལྔ་ལོན་ནོ། ། ༄། བཙན་པོ་ཡབ་དགུང་དུ་གཤེགས་ཀྱི་འོག་དུ་ཞང་བློན་ཁ་ཅིག་གིས་ཧུར་འདུམས་ཀྱི་བློ་ཞིག་ཕྱུང་སྟེ། ཡབ་མེས་ཀྱི་རིང་ཚུནད་ཆད། སངས་རྒྱས་ཀྱི་ཆོས་མཛད་པ་ཡང་བཤིག་གོ །དེ་ནས་ཡང་སྙད་ནི་ལྷོ་བལ་གྱི་ལྷ་དང་ཆོས་བོད་ཡུལ་དུ་བགྱི་བའི་མྱི་རིགས་ཤེས། གཞན་ཡང་ཕྱིནད་ཆད་དགྱིད་དུ་མི་གནང་བར་བཀའ་ཁྲིམས་བྲིས་སོ། ། ༄། དེ་ནས་བཙན་པོ་ཞ་སྔ་ནས་ལོ་ཉི་ཤུ་བཞེས་པ་ན། ཐོག་མ་ནི་ཕྱག་སྤྲིང་དང་ལྷས་ཤིག་ངན་སྟེ། ཆོ་ག་ཅི་མཛད་པས་བཤད་ཀྱང༌། དགུང་ཟླ་དུ་མར་ཕྱག་སྤྲིང་(ཇ༡༡༠བ)

[Full Size]

དང་ལྟས་ངན་ནས། སངས་རྒྱས་ཀྱི་ཆོས་དགྱིད་དུ་མི་གནང་བའི་བཀའ་ཁྲིམས་ཀྱང་ཁྲིམས་སུ་མི་བགྱི་བར་དོར། དཀོནད་ཅོག་གསུམ་གྱི་མཆོད་པ་ཡང་བགྱི་ཞེས་བགྱིས་ན་གཟོད་བཟང་པོར་གྱུརད་ཏོ། ། ༄། དེ་ནས་དགེ་བའི་བཤེས་གཉེན་གྱིས་བསྟངས་སྟེ་ཆོས་ཀྱང་གསན། ཡི་གེ་ཡང་སྤྱན་སྔར་བྲིམས་ནས། སངས་རྒྱས་ཀྱི་ཆོས་དཔེལ་ཞིང་མཛད་པར་སྒྲོམས་སོ། །དེ་ན་བོད་ཀྱི་ཆོས་རྙིང་པ་མ་ལགས་ལ། སྐུ་ལྷ་གསོལ་བ་དང་ཆོ་ག་མི་མཐུན་པས། ཀུན་ཀྱང་མ་ལེགས་སུ་དྭོགས་སྟེ། ལ་ལ་ནི་སྐུ་ལ་དམར་ཡང་དྭོགས། ལ་ལ་ནི་ཆབ་སྲིད་གོང་གིས་ཀྱང་དྭོགས། ལ་ལ་ནི་མི་ནད་ཕྱུགས་ནད་བྱུང་གིས་ཀྱང་དྭོགས། ལ་ལ་ནི་མུ་གེ་ལངས་བབ་ཀྱིས་ཀྱང་དྭོགས་སོ། ། ༄། ཆོས་ཉིད་ཀྱི་ནང་དུ་བརྟགས་ན། ཆོས་ལས་བྱུང་བ་ནི་འཇིག་རྟེན་གྱི་ཁམས་སུ་མེད་པ་ན། སེམས་ཅན་གྱི་ཁམས་གྲངས་མེད་པ། སྐྱེ་བ་རྣམ་བཞིའི་ནང་དུ་སྐྱེ་ཞིང་འཁོར་བ་ལ་གཏོགས་སོ་ཅོག་དང་པོའི་ཐོག་མ་མེད་པ་ནས། ཐ་མའི་མཐའ་མེད་པའི་བར་དུ། རང་གི་ལས་ཀྱིས་དེ་བཞིན་དུ་སྲིད་པ་ལས། ལུས་དང་ངག་དང་ཡིད་གསུམ་ནས་ལེགས་པར་སྤྱད་དོ་ཅོག་ནི་དགེ་བར་འགྱུར། ཉེས་པ་སྤྱད་དོ་ཅོག་ནི་སྡིག་པ་འགྱུར། ལེགས་ཉེས་མེད་པ་ནི་ལུང་དུ་མི་སྟོན་པར་འགྱུར། གཞན་ལ་ཕར་བྱས་པའི་འབྲས་བུ་ནི་བདག་ལ་སྨིནད་སྟེ། གནམ་གྱི་རིམ་པའི་ལྷར་སྐྱེ་བ་དང༌། སའི་སྟེང་གི་མྱི་དང༌། ལྷ་མ་ཡིན་དང༌། ཡི་དྭགས་དང༌། བྱོལ་སོང་དང༌། སའི་འོག་གི་སེམས་ཅན་དམྱལ་བ་དང༌། འདི་དྲུག་དུ་སྐྱེ་འོ་ཅོག་ཀྱང་རང་གི་ལས་ཀྱིས་འགྱུར་རོ། །འཇིག་རྟེན་ལས་འདས་སྟེ་སངས་རྒྱས་བཅོམ་ལྡན་འདས་སུ་འགྱུར་བ་དང༌། བྱང་ཆུབ་སེམས་དཔའ་དང༌། རང་བྱང་ཆུབ་དང༌། ཉན་ཐོས་ཀྱིས་རིམ་པར་འགྲུབ་པ་ཀུན་ཀྱང་བསོད་ནམས་དང་ཡེ་ཤེས་ཀྱི་ཚོགས་རང་གིས་བསགས་པ་ལས་འགྱུར་རོ་ཞེས་འབྱུང་ངོ༌། །དགེ་བ་གང་ཞེ་ན་དགེ་བ་བཅུ་ལ་བསྩོགས་པའོ། །མི་དགེ་བ་གང་ཞེ་ན། མི་དགེ་བཅུ་ལ་(ཇ༡༡༡ན)

[Full Size]

བསྩོགས་པའོ། །ལུང་དུ་མི་སྟོན་པ་གང་ཞེ་ན། སྤྱོད་ལམ་བཞི་ལ་བསྩོགས་པའོ། །འཇིག་རྟེན་ལས་འདས་པའི་བསོད་ནམས་དང་ཡེ་ཤེས་ཀྱི་ཚོགས་གང་ཞེ་ན། དགེ་བཅུའི་སྟེང་དུ་བདེན་པ་བཞི་དང༌། རྐྱེན་དང་འདུ་བ་ཚོགས་སྟེ་བྱུང་བའི་ཡན་ལག་བཅུ་གཉིས་དང༌། བྱང་ཆུབ་ཀྱི་ཕྱོགས་ཀྱི་ཆོས་སུ་བཅུ་རྩ་བདུན་དང་ཕ་རོལད་ཏུ་ཕྱིན་པ་བཅུ་ལ་བསྩོགས་པའོ། །དེའི་འབྲས་བུ་ནི་མི་འཇིགས་པ་བཞི་དང༌། སོ་སོ་ཡང་དག་པར་ཤེས་པ་བཞི་དང༌། སྟོབས་བཅུ་དང༌། མ་འདྲེས་པའི་ཆོས་བཅོ་བརྒྱད་དང༌། ཐུགས་རྗེ་ཆེན་པོ་སུམ་བཅུ་རྩ་གཉིས་ལ་བསྩོགས་པར་འགྱུར་སྟེ། གཏན་ཚིགས་ཞིབ་ཏུ་ནི་ཆོས་ཀྱི་ཡི་གེའི་ནང་ན་མཆིས་སོ། ། ༄། ཆོས་ཀྱི་ནང་ནས་བྱུང་བ་འདི་རྣམས་རྗེས་བཅད་ན། ཁ་ཅིག་ནི་ལེགས་ནོངས་ཀྱིས་དམྱིགས་འཕྲལ་དུ་མངོན་པ་ཡང་མཆིས། ཁ་ཅིག་འཕྲལ་དུ་མི་མངོན་པ་ཡང་མངོན་པར་གདའ་བ་རྣམས་ཀྱི་ཚུལ་ལས་དཔགས་ན། ངེས་པར་གཟུང་དུ་རུང་བ་ཡང་མཆིས་སྟེ། མདོ་དེ་རྣམས་དང་སྦྱར་ན། ཆོས་འདི་གཏང་ངམ་མཛད་དམ་ཅི་རིགས་ཞེས། འབངས་སུ་མངའ་བ་རྒྱལ་ཕྲན་འ་ཞ་རྗེ་ལ་བསྩོགས་པ་དང༌། ཕྱི་ནང་གི་བློན་པོ་རྣམས་ལ་བཀའས་རྨས། བཀའ་གྲོས་སུ་མཛད་ནས། གཅིག་དུ་ན་སངས་རྒྱས་བཅོམ་ལྡན་འདས་ཀྱི་བཀའ་ལུང་ལ་བསྟེན། གཉིས་སུ་ན་ཡབ་མེས་ཀྱི་དཔེ་ལུགས་ལ་འཚལ། གསུམ་དུ་ན་དགེ་བའི་བཤེས་གཉེན་གྱི་མཐུས་བསྟངས་པ་དང་ཡང་སྦྱར་ནས་མདོར་བརྟགས་ན། མྱི་དགེ་མ་ལེགས་པར་དྭོགས་པའི་རྣམས་ཀྱང་དེ་ལྟར་མི་འགྱུར་གྱི་སྟེང་དུ། ཆེད་ཆེ་བར་བཀའ་གྲོས་མཛད་དོ། །དེ་ལམ་ལེགས་པར་ནི་ཇི་ལྟར་མྱི་འགྱུར་ཆེད་ནི་ཇི་ལྟར་ཆེ་ཞེ་ན། ཆོས་ཀྱི་མདོ་ནི་ལེགས་སུ་བགྱི་བས། བླ་ན་མེད་པའི་དོན་བསྒྲུབ་པ་ལགས་སྟེ། ལེགས་པའི་མཐའ་ནོངས་པར་མི་འགྱུར་གྱིས་གཅིག་ཐམས་ཅད་ལ་ཡུན་དུ་དབེན་པ་འདི་ལྟའོ། །ཚོད་དཔགས་ཙམ་གྱིས་དགོས་པ་གཞིག་དུ་མྱི་རུང་གིས་གཉིས། ཡབ་མེས་གདུང་རབས་དུ་མའི་བར་དུ་མཛད་ཀྱང༌། མ་ལེགས་པ་མ་བྱུང་བ་དང་(ཇ༡༡༡བ)

[Full Size]

གསུམ་གྱིས་ད་ཡང་ནོངས་པར་མྱི་འགྱུར་ལ་ཆེད་ཆེའོ་ཞེས། མཛད་པར་བཀའ་གྲོས་བཏུལ་སྟེ་མཛད་དོ། །དེ་ལྟ་བས་ན་སངས་རྒྱས་ཀྱི་ཆོས་མཛད་པ་ཡང༌། གཅིག་དུ་ན་ཡོང་གིས་བཟང་ལ་གཅེས། གཉིས་སུ་ན་སྔོན་བཤིག་པའི་དཔེ་བྱུང་བས་ཐུགས་ཡིད་དྭོགས་སྟེ་བརྟན་དུ་མི་གཞིག་པར་དབུ་སྙུང་བྲོ་མནའ་བོར་བ་ཡང་ཡི་གེར་བྲིས་སོ། །ཕྱིན་ཆད་ཀྱང་གདུང་རབས་གཅིག་ཅིང༌། ཡི་དམ་མཛད་པ་དང་བློན་པོ་མན་ཆད་ཀྱང་བྲོ་སྩལ་བར་བགྱིས་སོ། །ཞེས་བྱུང་ངོ༌། །འདི་དག་ནི་རྒྱས་པ་དཀོར་མཛོད་དུ་བཞག་པ་ཡིན་ལ། མདོར་བསྡུས་བསམ་ཡས་ཀྱི་རྡོ་རིང་ལ་བརྐོས་པའི་གཙིགས་ཡིག་ནི། ༄། ར་ས་དང་བྲག་དམར་གྱི་གཙུག་ལག་ཁང་ལ་བསྩོགས་པར་དཀོནད་ཅོག་གསུམ་གྱི་རྟེན་བཙུགས་པ་དང༌། སངས་རྒྱས་ཀྱི་ཆོས་མཛད་པ་འདི་ནམ་དུ་ཡང་མྱི་གཏང་མ་ཞིག་པར་བགྱིའོ། །ཡོ་བྱད་སྦྱར་པ་ཡང༌། དེ་ལས་མྱི་དབྲྀ་མྱི་ཀྱུང་བར་བགྱིའོ། །ད་ཕྱིན་ཆད་གདུང་རབས་རེ་རེ་ཞིང་ཡང༌། བཙན་པོ་ཡབ་སྲས་ཀྱིས། འདི་བཞིན་ཡི་དམ་བཅའོ། །དེ་ལས་མནའ་ཁ་དབྱུང་པ་དག་ཀྱང་མྱི་བགྱི། མྱི་བསྒྱུར་བར་འཇིག་རྟེན་ལས་འདས་པ་དང་འཇིག་རྟེན་གྱི་ལྷ་དང་མྱི་མ་ཡིན་པ་ཐམས་ཅད་ཀྱང་ཕང་དུ་གསོལ་སྟེ། བཙན་པོ་ཡབ་སྲས་དང་རྗེ་བློན་ཀུན་གྱིས་དབུ་སྙུང་དང་བྲོ་བོར་རོ། །གཙིགས་ཀྱི་ཡི་གེ་ཞིབ་མོ་གཅིག་ནི་གུང་ན་མཆིས་སོ། །ཞེས་བྱུང་ངོ༌། །དེ་ལྟར་དམ་ཆོས་རབ་ཏུ་རྒྱས་མཛད་ནས། །དགུང་བློན་ཆེན་པོ་མགོས་ཀྱིས་གསོལ་བ་ལྟར། །རྗེའི་གདུང་རབས་འབངས་ཀྱི་ས་བཅད་དང༌། །ཡ་རབས་རྣམས་ལ་ཕྱག་དང་ཞེ་སའི་ཚུལ། །གཏམ་དང་ལོ་རྒྱུས་བཟང་པོའི་ལས་ཐབས་དང༌། །ཕ་མེས་དགེ་དང་ཡིག་ཚངས་ལ་སོགས་པ། །ཡ་རབས་བཟང་པོའི་ལུགས་ཀྱི་བསྟན་བཅོས་ལ། །བོད་འབངས་ཐམས་ཅད་བཀོད་དེ་བདེ་བར་མཛད། །ཤར་ཕྱོགས་རྒྱ་མཚོའི་བར་དུ་མངའ་མཛད་དེ། །རྒྱ་ནག་རྗེ་(ཇ༡༡༢ན)

[Full Size]

བསྐོས་ལོ་ཡི་མིང་ལ་སོགས། །བོད་ལྟར་བྱ་བའི་འཇའ་ས་ཆེན་པོ་བསྒྲགས། །ལྷོ་ཕྱོགས་སྐར་མ་མེ་བཞི་འཆར་བའི་མཐའ། །རྒྱ་གར་ཆུ་བོ་གངྒཱའི་འགྲམ་ལ་ཐུག །ཛམྦུ་གླིང་གི་སུམ་གཉིས་མངའ་དབང་མཛད། །མགོས་ཀྱི་བློན་ཆེན་ཁྲི་བཟང་ཡབ་ལྷག་གིས། །མཛངས་པའི་ལས་སུ་གསོས་ཐང་སྟོང་ཐང་བཅད། །ཕྱི་རབས་བློན་པོ་གཡར་ཁྲལ་ཆུང་བར་བྱས། །སྟག་བཙན་གདོང་གཟིགས་བློན་པོ་གཉེར་གྱི་བུས། །མཛངས་པའི་ལས་སུ་དབྱར་རྩ་དགུན་དུ་བསྐམས། །མཛངས་མི་བདུན་ལས་ཐ་མ་གཉིས་སུ་གྲགས། །གཞན་ཡང་ཞང་བློན་ཚེ་དགུར་གྲགས་པ་བྱུང༌། །རྗེ་ཡི་བཀའ་ལུང་ཁྲི་གདུགས་བརྡལ་བ་འདྲ། །བོད་འབངས་ཐམས་ཅད་བདེ་སྐྱིད་ཆོས་ལ་སྤྱོད། །དེ་ཡང་རྦ་བཞེད་ལས། དུས་དེར་བློན་པོ་མགོས་ཀྱི་མཆིད་ནས་ལྷ་ཆོས་ནི་རྒྱས་པར་མཛད་ལགས་སྟེ་ད་སྐྱེ་བོ་མི་ཆོས་ཀྱི་ལོ་རྒྱུས་ཀྱང་བྱ་བར་ཅི་གནང་ཞེས་ཞུས་པས། རྗེའི་གདུང་རབས་དང་འབངས་ཀྱི་ས་བཅད། དཀོནད་ཅོག་ལ་ཕྱག་དང་མཆོད་པ། བླ་དང་ཡ་རབས་ལ་ཞེ་ས། གཏམ་དང་ལོ་རྒྱུས། བཟང་པོའི་ལས་ཐབས་དང་ལག་རྗེས། ཕ་མེས་ཀྱི་དགེ་དང་ཡིག་ཚངས་སོགས་ཡ་རབས་ཀྱི་ལུགས་རྒྱས་པར་མཛད་དོ་ཅེས་བྱུང་ངོ༌། །གཞན་ཡང་དཔོན་ཞང་མ་དུམ་པར་ཞང་རྒྱལ་ཚ་ལྷ་སྣང་སོགས་ཀྱིས་དམག་དཔོན་བྱས་སྟེ་ཆུ་མོ་ཡོས་ཀྱི་ལོ་ལ་རྒྱ་ཆམ་ལ་ཕབ། ཐའི་རྫུང་རྒྱལ་པོ་ཤེན་ཆུར་བྲོས་ནས་རྒྱའི་རྒྱལ་ཁམས་ལ་དབང་མཛད། ཐང་གའུ་དབང་ཞེས་པ་གྱིམ་ཤིང་ཀོང་ཇོའི་མཆེད་ཟླ་ཞིག་རྒྱའི་རྒྱལ་པོར་བསྐོས། རྒྱ་ནག་གི་ལོའི་མིང་སྤོས་ཅིང་འཇའ་ས་བསྒྲགས་སྟེ་ཤར་སྐར་མ་སྨིན་དྲུག་འཆར་བའི་མཐའ་ཀེམ་ཤིང་ཁྲི་སྒོ་ལ་ཐུག་ལྷོ་མེ་བཞི་འཆར་བའི་མཐའ་ཆུ་བོ་གངྒཱའི་འགྲམ་དུ་རྡོ་རིང་བཙུགས་པ་ལ་ཐུག་སྟེ་ཛམྦུའི་གླིང་སུམ་གཉིས་ལ་མངའ་མཛད་དོ། །དེའི་ཚེ་བློན་ཆེན་མགོས་རྒན་གྱི་སྲས་མགོས་ཁྲི་བཟང་ཡབ་ལྷག་(ཇ༡༡༢བ)

[Full Size]

གིས་སྔར་ཞལ་ཅེ་དང་གསོས་ཐང་སྟོང་ཐང་ཁྲིགས་སུ་བཅད་པ་ལ་ཁྲིས་སུ་བཅད་ནས་བྱང་བུ་ཆ་དགུར་བཅོས་སྟེ། མི་སྟོང་སོགས་ཀྱི་ཞལ་ཅེའི་དུས་ཤགས་ཀྱི་མགོ་རྒྱངས་ལ་ཡིག་ཚངས་སྟོང་ཐང་བདེན་ཡུས་དང་བཅས་བྲིས་སྟེ་བླའི་གྲར་སྲིད་བ་ལ་བྱང་ཟས་ཟེར། དེའི་ལན་གྱི་བྱང་བུ་ལ་སྦྲུལ་མགོ་ཡང་ལོན་ལ་སྨིག་ནག་ཟེར་སྟེ་དེ་གསུམ་གསོས་དང་སྟོང་གི་བྱང་བུའོ། །གཉེན་བྱེ་བྲལ་གྱི་ཞལ་ཅེའི་དུས་གཉེན་སྡེབས་དང་དགྲ་སྡེབས་ཇི་ལྟར་བྱུང་བའི་མགོ་རྒྱངས་དང་བཅས་ཐོག་མར་བསྲིངས་པ་ལ་ཐེན་བྱང་ཟེར། སྨྱོན་ཐོལ་དཀར་མིའི་ཞལ་ཅེའི་དུས་བསྲིངས་པ་ལ་བྱང་བུ་མཆུ་སྨྱུང་ཟེར་སྟེ་སྤྱིར་བློ་ཡུས་ཀྱི་བྱང་བུ་ལྔའོ། །བློ་ཡུས་ཀྱི་ཤགས་དང་སྦྱར་ནས་དྲང་པོར་གཅོད་པ་ལ་ཟང་ཡག་ཟེར། ཡོན་པོར་གཅོད་པ་ལ་རྐེད་ཁྲེ་ཟེར། བདེན་རྫུན་གྱི་ཁ་དམར་འདོགས་པ་ལ་བྱང་བུ་ཁ་དམར་ཟེར་སྟེ་ཞལ་ཅེའི་བྱང་བུ་གསུམ་མོ། །ཉེས་པའི་སྐྱོན་ཐམས་ཅད་བཟང་པོའི་རྒྱས་བཏབ་ནས་བྱང་བར་བྱེད་པ་ལ་རྒྱ་བྱང་ཟེར་སྟེ་སྤྱིར་རྒྱུག་པའི་བྱང་བུའོ། །དེ་ཡང་དགུང་བློན་ཆེན་པོ་ནི་འགྲན་གྱི་ཟླ་མེད་དེ་བསད་ན་སྟོང་ཐང་ཁྲི་ཆིག་སྟོང༌། དགུང་བློན་འབྲིང་པོ་དང་ནང་བློན་ཆེན་པོ་གཉིས་མཉམ་སྟེ་ཁྲི། དགུང་བློན་ཆུང་ངུ་ནང་བློན་འབྲིང་པོ་བཀའ་ཡོ་གལ་འཆོས་པ་ཆེན་པོ་གསུམ་མཉམ་སྟེ་དགུ་སྟོང༌། ནང་བློན་ཐ་ཆུང་དང་བཀའ་ཡོ་གལ་འཆོས་པ་འབྲིང་མཉམ་སྟེ་བརྒྱད་སྟོང༌། བཀའ་བློན་ཆུང་ངུ་ལ་བདུན་སྟོང་ངོ། །དེ་བཞིན་དུ་འབངས་ཡང་ཐའི་བར་དུ་རིམ་པས་བཅད་དེ་ཁྲིམས་ཡིག་དུ་བཀོད་པས་བློན་པོ་ཕྱི་མ་རྣམས་ལ་ཤིན་ཏུ་དྲིན་ཆེ་བས་བོད་ཕྲུག་མཛངས་པའི་མི་བདུན་གྱི་དྲུག་པར་འདྲེན་ནོ། །གཉེར་སྟག་བཙན་གདོང་གཟིགས་ཀྱིས་ཀྱང་འབངས་མི་ཁྱིམ་རེ་ལ་རྟ་རེ་མཛོ་རེ་བ་རེ་གླང་རེ་ལ་སོགས་པ་བསྲེལ་བར་བཅས། དབྱར་གྱི་རྩྭ་སྔོན་དགུན་དུ་སྐེམ་པ་སོགས་བྱས་པས་མཛངས་པའི་མི་བདུན་པར་གྲགས་སོ། །ཡང་བཙུན་མོ་འབྲོ་བཟའ་བྱང་ཆུབ་ཀྱི་ཁྲིམས་བུ་ཆུང་ཞེས་སྐྱེས་པ་ལ་ཕོ་ཕྱག་བུད་མེད་ལ་མོ་ཕྱག་བསླབས། ཕྱུག་པོས་བུན་གཏོང་བ་ཞིང་ལ་མོ་རྡོ་བཙུགས་པ་སྟོན་(ཇ༡༡༣ན)

[Full Size]

དཔྱིད་ཀྱི་བར་ཁ་མཉམ་པ་རྣམས་བྱས་སྐད། གཞན་ཡང་ཞང་བློན་ཆེ་དགུ་ཞེས། སྦས་སྣང་བཞེར་ལྷ་བཙན་ལ་དཔའ་མཚན་དུ་སྟག་གི་གོང་སླག་ཡིག་ཚངས་གཡུ་ཡིག་དང་གཡུང་དྲུང་ཆེན་པོ་དཀོར་ནོར་ཀེ་ཀེ་རུ་རྣམས་ཀྱིས་ཆེ། འབྲི་ཁྲི་ཟུངས་ར་ཤགས་སེང་གེ་དཀར་མོའི་གོང་སླག་གིས་ཆེ། མཆིམས་རྒྱལ་གཟིགས་ཤུད་ཏིང་ཟ་འོག་གི་བྱེ་ཅན་དང་བྲན་དགུ་ཁྲི་ཡོད་པས་ཆེ། སྦྲང་གཡུ་པ་རྒྱ་ར་ལེགས་གཟིགས་གསེར་ཡིག་གིས་ཆེ། སྣ་ནམ་ཁྲི་བཟུངས་ཉ་བཟང་ཆོས་ཀྱི་བླ་མཁྱེན་ཡིན་པས་ཆེ། ཅོག་རོ་སྟག་ཅན་གཟིག་ཅན་མཐའི་སོ་ཁ་བསྲུངས་པས་ཆེ། ཅོག་རོ་ཁོང་བཙན་འབངས་དགུ་བརྒྱ་དགུ་བཅུ་ཡོད་པས་ཆེ། མྱང་ཞྭ་འོ་ཆེ་གཡུའི་ཞྭ་མདའ་གང་ཡོད་པས་ཆེ། སྣུབས་དཔལ་བོ་ཆེ་དངུལ་གྱི་འབོ་ཆེན་དགུ་འཕང་ཡོད་པས་ཆེ། དེ་རེ་རེ་ལ་ཡང་དཔའ་མཚན་རེ། ཡིག་ཚངས་གསེར་གཡུ་གང་རུང༌། དཀོར་ནོར་རེ། བྱས་པ་ལག་རིས་རེ་སོ་སོར་ཡོད་པས་རྒྱལ་པོས་དཔངས་བསྟོད་པ་སྟེ། ཞང་བློན་ཆེ་དགུ་བཙན་པོ་རིང་དང་བཅུ་ཞེས་གྲགས་སོ། །དེ་ནས་རིག་འཛིན་པདྨ་འབྱུང་གནས་ནི། །ལྷོ་ནུབ་སྲིན་པོའི་ཁ་གནོན་མཛད་དུ་གཤེགས། །མཁན་པོ་བྱང་ཆུབ་སེམས་དཔའ་ཞི་བ་འཚོས། །བོད་ཡུལ་སྲུང་བའི་བསྟན་མ་བཅུ་གཉིས་པོ། །སློབ་དཔོན་པདྨས་དམ་ལ་བཏགས་པས་ན། །བོད་དུ་མུ་སྟེགས་ཕྱི་པ་མི་འབྱུང་མོད། །ལོ་འགའ་ཞིག་ནས་དབུ་མའི་ལྟ་བ་ལ། །མི་མཐུན་རྩོད་པ་བྱེད་འགྱུར་དེ་ཡི་ཚེ། །ང་ཡི་སློབ་མ་ཀ་མ་ལ་ཤཱི་ལ། །སྤྱན་དྲོངས་རྩོད་པ་ཆོས་སུ་ཞི་འགྱུར་ཞེས། །གསུངས་ནས་མི་རྟག་མྱ་ངན་འདའ་བར་བསྟན། །སྐུ་གདུང་མཆོད་རྟེན་བྱས་སྟེ་རྒྱལ་པོས་མཆོད། །ཆོས་ཀྱི་རིང་ལུགས་ཡེ་ཤེས་དབང་པོར་བསྐོས། །རབ་བྱུང་རེ་ལ་འབངས་ཁྱིམ་གསུམ་གསུམ་སོགས། །དཀོནད་ཅོག་གསུམ་གྱི་ལྷ་འབངས་རྒྱ་ཆེར་བཅད། །ཡེ་ཤེས་དབང་པོ་མཁར་ཆུའི་བྲག་ལ་སྒོམ། །དཔལ་དབྱངས་(ཇ༡༡༣བ)

[Full Size]

ཆོས་ཀྱི་རིང་ལུགས་མཛད་པའི་ཚེ། །ཧྭ་ཤང་མ་ཧཱ་ཡ་ནའི་སློབ་མ་དར། །དགེ་བས་མཐོ་རིས་སྡིག་པས་ངན་འགྲོར་འཁོར། །ལུས་ངག་དགེ་སྡིག་ཡིད་བྱེད་ཀུན་བཀག་ནས། །ཅིག་ཆར་དྲན་མེད་འཇུག་པ་ལམ་དུ་སྨྲ། །བོ་དྷི་ས་ཏྭའི་རྗེས་འཇུག་འགའ་ཞིག་ཙམ། །གཞན་དག་ཕལ་ཆེར་ཧྭ་ཤང་ལུགས་སུ་སྤྱོད། །སྟོན་མིན་བརྩེ་མིན་གཉིས་ཅེས་རྩོད་པར་གྱུར། །དེ་ཚེ་ཡེ་ཤེས་དབང་པོ་སྤྱན་དྲངས་པས། །ང་ཡི་སྒྲུབ་པ་བར་ཆད་མ་བྱུང་ན། །བཙན་པོ་སྐུ་ཚེ་རིང་ཞིང་བོད་ཡུལ་དུ། །དམ་ཆོས་ཡུན་རིང་གནས་པར་འགྱུར་པ་ཅིག །ཞེས་གསུང་མཁན་པོའི་ཞལ་ཆེམས་མཉེལ་བསོས་སྟེ། །མཁས་པ་པདྨའི་ངང་ཚུལ་སྤྱན་དྲངས་ནས། །བཙན་པོས་དགུང་མནན་རྩོད་པའི་གྲ་བཤམས་ཚེ། །ལུང་དང་རིགས་པས་ཧྭ་ཤང་ཕམ་པར་མཛད། །རྩོད་པ་དམ་པའི་ཆོས་སུ་ཞི་བར་གྱུར། །ཕྱིན་ཆད་ལྟ་བ་ཀླུ་སྒྲུབ་ལུགས་སུ་ཟུང༌། །སྤྱོད་པ་དགེ་བཅུ་ཕར་ཕྱིན་དྲུག་ལྡན་སྤྱོད། །སྒོམ་པ་ཞི་ལྷག་ཟུང་དུ་འབྲེལ་བར་གྱིས། །ལོ་ཙཱས་མ་བསྒྱུར་པཎྜི་ཏས་མ་བཤད། །རྒྱལ་པོས་བཀའ་བཏགས་སྦྱིན་བདག་མ་བྱས་པའི། །ཆོས་ལ་སྤྱད་དུ་མི་གནང་བཀའ་ཁྲིམས་བསྒྲགས། །དེ་ཡང་ཨོ་ཌྱན་གྱི་སློབ་དཔོན་ཆེན་པོ་པདྨས་རྗེ་འབངས་ཉི་ཤུ་རྩ་གཅིག་ལ་སྒྲུབ་པ་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར། མན་ངག་ལྟ་བའི་ཕྲེང་བ་རྫོགས་པ་ཆེན་པོ་གསུངས། རྗེ་འབངས་ཉེར་གཅིག་པོས་དངོས་གྲུབ་རེ་རེ་ཐོབ་སྟེ་གྲུབ་པའི་མཚན་མ་རྫུ་འཕྲུལ་སྣང་རེ་བསྟན། གཞན་ཡང་སྣུབས་སངས་རྒྱས་ཡེ་ཤེས། རྒྱུས་ནག་བདེ་གཤེགས། མགོས་རྡོ་རྗེ་དབང་ཕྱུག་ལ་སོགས་པ་རྣལ་འབྱོར་གྱི་དབང་ཕྱུག་མང་དུ་སྨིན་པར་མཛད། བོད་ཡུལ་ཐམས་ཅད་བྱིན་གྱིས་བརླབས། གཏེར་ཁ་མང་དུ་སྦས་ཤིང་མ་འོངས་པ་དུས་དུས་སུ་ལས་ཅན་གྱི་སྐྱེས་བུ་རེས་ཐོན་ནས་འགྲོ་བའི་དོན་འབྱུང་བར་བྱིན་གྱིས་བརླབས་སྟེ་(ཇ༡༡༤ན)

[Full Size]

སླར་ལྷོ་ནུབ་རྔ་ཡབ་གླིང་དུ་སྲིན་པོའི་ཁ་གནོན་ལ་གཤེགས་སྟེ་མྱ་ངན་ལས་འདའ་བ་མེད་པར་བཞུགས་ཤིང་ཕྱིས་བླ་མ་རྡོ་རྗེ་གདན་པས་གྲུབ་ཐོབ་རྣམས་ཚོགས་འཁོར་ལ་སྤྱན་དྲངས་པས་གྲུབ་ཐོབ་བརྒྱད་བཅུ་རྩ་བཞི་བྱོན་པའི་ནང་དུ་གཤེགས་སྟེ། དགེ་སློང་ལུས་ལ་ཕྱག་རྒྱ་བསྟེན། །ལྷོ་ནུབ་སྲིན་པོའི་ཁ་གནོན་མཛད། །པདྨ་ཀཱ་ར་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་བསྟོད་པ་མཛད་དོ། །མཁན་པོ་གཤེགས་པ་དང་སྟོན་རྩེན་རྩོད་པའི་ཚུལ་ནི་རྦ་བཞེད་ལས། དེ་ནས་རིང་ཞིག་ན་མཁན་པོ་བོ་དྷི་ས་ཏྭ་ཕོ་བྲང་རིམ་དགུའི་འོག་དུ་རྟས་ཕྲ་བ་རྒྱབ་སྟེ་ཞལ་ཆེམས་ཡེ་ཤེས་དབང་པོ་ལ་བཞག་སྟེ་སྐུ་གཤེགས། དེའི་སྤུར་ཁང་ཧས་པོ་རིའི་རྒྱབ་ཏུ་བཞུགས་ནས་མཆོད་རྟེན་གཅིག་ཡང་བཞེངས། དེར་བཙན་པོས་ཡེ་ཤེས་དབང་པོ་ཆོས་ཀྱི་རིང་ལུགས་སུ་བསྐོས་སྟེ། སླད་ཀྱིས་ཡེ་ཤེས་དབང་པོ་མངོན་པར་ཤེས་པ་དང་ཡང་ལྡན། ངེད་རྗེ་འབངས་ཀྱི་དགེ་བའི་བཤེས་གཉེན་ལགས་པས་སངས་རྒྱས་ཀྱི་ཞལ་དང་འདྲ་བས་འདུན་ས་ཡང་བཅོམ་ལྡན་འདས་ཀྱི་རིང་ལུགས་སུ་བཀས་བསྐོས་སྟེ་བླའི་གོང་དུ་བཏོན། ཆོས་ཀྱི་བཀའ་ལ་བཏགས། ཡིག་ཚངས་གསེར་གྱི་ཡི་གེ་ཆེན་པོ་བྱིན་ནས་གྲལ་ཡང་ཞང་བློན་ཆེན་པོའི་གོང་དུ་འདུག་ཞིང༌། ལྷ་ཆོས་ཀྱི་འདུན་ས་ཡང་འདུན་ས་ཆུང་ངུའི་གོང་དུ་ཕུལ་ལ་བཅོམ་ལྡན་འདས་ཀྱི་རིང་ལུགས་ཀྱིས་ཞང་བློན་ཆེན་པོའི་འདུས་ས་ཆུང་ངུ་བ་གྱིས་ཅིག་ཞེས་རྗེ་བློན་ཚོགས་པའི་ཚེ་བཀའ་ཞལ་གྱིས་བསྩལ་སྟེ་བཅོམ་ལྡན་འདས་ཀྱི་རིང་ལུགས་སུ་བསྐོས། དཀོནད་ཅོག་གསུམ་གྱི་རྟེན་བརྟན་པ་ནམ་དུའང་མི་གཞིག་པའི་སླད་དུ་དཀོནད་ཅོག་གསུམ་དང་དགེ་འདུན་གྱི་བཤོས་ཆ་ལས་རྗེ་འབངས་རྣམས་ཀྱིས་མི་གསོལ་བར་རྐྱེན་རིགས་བཀུམ་ཁྲིམས་བཅས་ན་སླད་ནས་ལེགས་ཅེས་ཡེ་ཤེས་དབང་པོས་སྙན་དུ་གསོལ་སྟེ། བཙན་པོས་ནི་བན་དྷེ་གཅིག་ལ་འབངས་ཁྱིམ་བདུན་དུ་རྐྱེན་རིགས་བཅད་པར་དགོངས་པ་དང་ཡེ་ཤེས་དབང་པོས་གསོལ་བ། རིང་ལུགས་ལ་སྨྲ་ན་མི་ཕ་ཚན་འགའ་བརླག་པ་དང་ལུང་པ་རལ་འགའ་ཕུང་པ་དང་གནང་ཆེན་ཁ་ཅིག་སྣའུ་འཕྲང་(ཇ༡༡༤བ)

[Full Size]

གིས་བཏུགས་སྟེ་བསྩལ་བ་དང༌། མི་གཅིག་གི་སྒོར་བྲན་ཁྱིམ་དགུ་བརྒྱ་བསྩལ་པ་དང་སྦྱར་ན་སངས་རྒྱས་ཀྱི་ཆོས་བཟང་པོ་འདི་སྐུ་དང་ཆབ་སྲིད་ལ་སྨན་པར་འཚལ་སྟེ་མཐའ་ཡུན་དུ་རྗེ་འབངས་ཀྱིས་བཤུལ་བཟང་པོ་ཕྱེ་ངན་སོང་གསུམ་གྱི་སྒོ་ནི་བཀག་པ་ལ་སོགས་པ། ཡོན་ཏན་སྨོས་ཀྱིས་མི་ལང་བ་ཞིག་མཛད་པའི་རྐྱེན་བཀས་བསྐུལ་བ་བཞིན་མཛད་ན་མ་ནོངས་མོད་ཀྱང༌། སླད་རྗེས་སུ་ཐུགས་ནོངས་ཆེན་པོ་ཅིག་བསྟུད་མར་བྱུང་ངམ་མི་ཕྱུགས་ལ་ནད་ཆེན་པོ་བྱུང་ངམ་ཉི་འོག་གི་དགྲ་ཞིག་དབུས་སུ་བྱུང་ངམ་མུ་གེ་ཆེན་པོ་ཞིག་བསྟུད་མར་བྱུང་ན་དགོངས་པ་མཐར་མི་ཕྱིན་པ་དང་དཀོནད་ཅོག་གསུམ་གྱི་རྟེན་མི་གནས་པ་དང་དབོན་སྲས་རྗེ་འབངས་ལ་དངོས་སྡིག་ཆེན་པོར་འགྱུར་བ་ལ་སོགས་པ་མི་ལེགས་པ་མང་པོ་རིག་མཆི་བས་དཀོནད་ཅོག་གསུམ་ལ་འབངས་ཁྱིམ་ཉིས་བརྒྱ་གང་ཟག་བན་དྷེ་རེ་ལ་འབངས་ཁྱིམ་གསུམ་གྱི་ཐང་དུ་བཅད་དེ་དབང་དགེ་འདུན་ལ་བསྐུར་ནས་ལྷ་རིས་ཀྱི་འབངས་མི་ཞིང་ལ་བླ་ནས་དབང་མི་མཛད་པར་བགྱིས་ན་ནམ་དུ་ཡང་བརྟན་ཞིང་ལེགས་ཅེས་གསོལ་བ་དང༌། ཡེ་ཤེས་དབང་པོས་གསོལ་བ་བཞིན་དུ་བསྩལ་བས་བན་དྷེ་མྱང་གི་ཏིང་འཛིན་ལ་སོགས་པ་ཡེ་ཤེས་དབང་པོའི་གཡར་མི་ཉན་པ་ཀུན་མི་མཆི་དགུ་མཆི་མི་ཟེར་དགུ་ཟེར་སྐད། རྐྱེན་རིས་ཀྱི་འབངས་ནི་རྒོད་དང་རང་རྗེ་དང་ཁབ་སོའི་ནང་ཡིག་ཅན་དང་ཐུགས་གཉེན་དང་གཞི་བཟང་པོ་འཚལ་ལས་སུ་ས་བཟུང༌། རྗེའི་ཞིང་ནི་གང་ཟག་དོ་འཚལ་ལས་གནང་ཆེན་འབྲི་ཁྲི་འཇམ་གུང་སྟོན་གྱིས་བུས་བཟུང་བ་བཞིན་དུ་བཅད། དེ་ནས་མྱང་ལ་སོགས་པས་སྡིག་པ་བསགས་པ་དེས་ཡེ་ཤེས་དབང་པོ་སྒོམ་པར་གསོལ་སྟེ་བྲོས་ནས་དབེན་པ་ལྷོ་བྲག་མཁར་ཆུ་བཙན་གྱི་བྲག་ཕུག་དུ་མཆིས་པའི་སླད་ནས་ཤུལ་དུ་རྦ་དཔལ་དབྱངས་རིངས་ལུགས་སུ་བསྐོས། ཡེ་ཤེས་དབང་པོ་ལྷོ་བྲག་དུ་སྒོམ་པ་ལས་སྟག་ལ་ག་ཤ་བཀལ་བའི་འོག་དུ་སྦ་ཟམ་བཙུགས་སྟེ་བཙན་གྱི་བྲག་ཕུག་དུ་མཆིས་ནས་རི་བྱ་ལ་སོགས་པ་ཀུན་ཀྱང་རྡོ་དང་ཤིང་ལ་འབབ་པ་བཞིན་དུ་ཡེ་ཤེས་དབང་པོའི་ལུས་ལ་གནས། ཁྲིམས་ཟླ་དག་ལ་ནི་ཉེར་ཡང་མི་བཏུབ། དེའི་ཚེ་རྒྱ་ནག་གི་ཧྭ་ཤང་མ་ཧཱ་ཡ་ན་(ཇ༡༡༥ན)

[Full Size]

བྱ་བ་ཞིག་བྲག་དམར་དུ་མཆིས་པ་ལས། དེས་ལུས་ངག་གི་ཆོས་སྤྱོད་མི་དགོས། ལུས་ངག་གི་དགེ་བས་འཚང་མི་རྒྱ། དྲན་པ་མེད་ཅིང་ཡིད་ལ་བྱར་མེད་པ་བསྒོམས་པས་འཚང་རྒྱ་ཟེར་ནས་སྒོམ་བསླབས་པས་བོད་ཀྱི་བན་དྷེ་རིལ་པོ་ཐལ་གྱིས་ཁོའི་ཆོས་ལ་བསླབས་སྟེ་བསམ་ཡས་ཀྱི་གཙུག་ལག་ཁང་ལ་མཆོད་པ་འཕྲོ་ཆད། སློབ་གཉེར་དང་ལུས་ངག་གི་དགེ་བ་རྒྱུན་ཆད། རྦ་རཏྣ་དང་བཻ་རོ་ཙ་ན་ལ་སོགས་ཉུང་ཤས་ཅིག་བོ་དྷི་ས་ཏྭའི་ཆོས་སློབ་བོ། །དེར་ལྟ་བ་མ་མཐུན་ནས་རྩོད་དེ་འཁྲུགས་པས་བཙན་པོས་རྒྱའི་སྟོན་པའི་ཆོས་འདི་བག་ཙམ་མིན་ནམ་གསུངས་པས་སྟོན་མིན་པ་བྱ་བར་གྲགས། གཅིག་ཤོས་ན་རེ་དྲང་སྲོང་བཟོད་པར་སྨྲ་བས་ལུས་ལ་མེ་བཏང་ནས་ཀྱང་མཆོད་པ་ཕུལ་བས་སེམས་ཅན་ལ་བརྩེ་བའི་བསམ་པས་ཚོགས་བསག་པ་གལ་ཆེ་ཟེར་བས། རྒྱལ་པོ་ན་རེ་ལུས་ལ་མེ་གཏོང་བའི་བརྩེ་བ་དེ་ཡང་ཆོས་མིན་ནམ་བྱས་པས་བརྩེ་མིན་པ་བྱ་བར་གྲགས། སྤྱིར་ལྟ་བ་དང་སྤྱོད་པ་འཛོམ་པའི་ཆོས་ཅིག་ཡིན་པ་ལ་བརྩེ་མིན་པའི་ལྟར་ཡིན་གསུངས་པས་སྟོན་མིན་པ་ཡིད་ཆད་ནས་མ་ཧྭ་ཡ་ནའི་སློབ་མ་ཉང་ཤ་མིས་རང་གི་ཤ་བཏུབ། སྙགས་བྱེ་མ་ལ་དང་རྔོགས་རིན་པོ་ཆེས་རང་གི་ཕོ་མཚན་བརྡུངས། རྒྱའི་ཧྭ་ཤང་མ་མགོས་རང་གི་མགོ་ལ་མེ་བཏང་སྟེ་འདས། གཞན་མ་རྣམས་ཆུ་གྲི་རྣོན་པོ་རེ་བསྲེལ་ཞིང་བརྩེ་མིན་པ་རིལ་བསད་ལ་ངེད་ཀྱང་རིལ་ཕྲུ་མའི་ངོས་ལ་འཆིའོ་ཟེར་ནས་དེ་རྒྱལ་པོའི་སྙན་དུ་བདས་པས་གསན་སྟེ། རྒྱལ་པོས་བན་དྷེ་སྟོན་རྩེན་གཉིས་ཀྱི་བར་གཉའ་གཡོན་བསྐོར་བསྐོར་ནས་འདིར་བན་དྷེ་ཀུན་ལྟ་བ་མ་མཐུན་བར་འཁྲུགས་པ་ལ་ཇི་ལྟར་མཛད་ཀྱང་མ་མཁྱེན་པ་དང་ཇི་ལྟར་བྱ་ཞེས་ནི་བཀའ་ཕྲིན་སྤྲིངས་ནས་ཡེ་ཤེས་དབང་པོ་འཕྲལ་དུ་ཤོག་ཞིག་ཞེས་ཕོ་ཉ་དུ་མ་ཞིག་བརྫངས་པ་ལས་མ་ཁུགས་ནས་ནང་བློན་གནོན་ཁམས་པ་བཏང་སྟེ་ཁྱོད་ཀྱིས་ཡེ་ཤེས་དབང་པོ་ཁུགས་ན་ཁྱོད་ལ་ཟངས་ཆེན་པོ་བྱ་དགར་བྱིན། མ་ཁུགས་ན་ཁྱོད་གསོད་ཏོ་ཅེས་བཀའ་བསྩལ་སྟེ་སྒྲོམ་བུ་བསྐུར་ནས་བཏང་ངོ༌། །གནོན་ཁམས་(ཇ༡༡༥བ)

[Full Size]

པས་མཁར་ཆུར་ཕྱིན། བཀའི་སྒྲོམ་བུ་བྲག་ཕུག་དུ་བསྐུར་སྟེ་ཞལ་མཇལ་བར་ཅི་གནང་ཞེས་ཞུས་པས་མཇལ་ནས་བདག་དངོས་རྐང་བཙུགས་སྟེ་འོངས་ན་བྱོན་ན་ཤིན་ཏུ་ཐུགས་ལ་བཏགས་སྟེ་བདག་ལ་ཡང་བྱ་དགའ་གནང་བར་བདོག །མ་བྱོན་ན་བདག་གསོད་པར་ཡོད་པས་བྲག་གཡང་འདི་ལ་བདག་འཕྱོངས་སྟེ་འགུམ་མོ་ཞེས་ཞུས་པས་ཡེ་ཤེས་དབང་པོའི་ཞལ་ནས། འདི་ངའི་དགེ་སྦྱོར་ལ་བར་ཆད་བྱེད་པའི་བདུད་ཆེན་པོ་ཅིག་འོང་ན་འོན་ཡང་ཁྱོད་ཀྱི་སྲོག་དབྱུང་གིས་ང་འོང་བས་རྟ་ཁྲིད་དེ་ཤོག་ཞིག་གསུངས་ནས་དགའ་ཆེས་སྟེ་ཕོ་བྲང་དུ་ལོག །འཕྲལ་དུ་ཟངས་ཆེན་པོ་དང་བྱ་དགའ་ཆེ་ཐང་དུ་བསྩལ། ཆིབས་གུ་རུབ་བཅུ་དྲུག་བཏང་བས་ཡེ་ཤེས་དབང་པོ་ཕོ་བྲང་དུ་འོངས་ནས་སྤྱན་སྔར་མཆིས་པ་དང༌། བཙན་པོའི་ཞལ་ནས་བན་དྷེ་དག་འདི་ལྟར་འཁྲུགས་ན་ཞེས་ལོ་རྒྱུས་ཞིབ་ཏུ་གསུངས་ནས་ད་ཇི་ལྟར་བྱ་ཞེས་གསུངས་པ་དང༌། ཡེ་ཤེས་དབང་པོས་གསོལ་པ། དེ་ལ་བདག་འདིར་དགུག་མི་འཚལ། བདག་འདིར་མ་མཆིས་སྟེ་སྒོམ་པའི་བར་ཆད་མ་བྱུང་ན་བཙན་པོའི་སྐུ་ཚེ་དང་བདག་གི་ཚེ་ཡང་ཡུན་རིང་དུ་གནས། ལྷ་ཆོས་ཀྱང་བྱམས་པ་གཤེགས་ཀྱི་བར་དུ་གནས་པར་འགྱུར་བ་ཞིག་ན་བོད་སྐལ་བ་མ་མཆིས་པས་ལན། མཁན་པོ་འདའ་ཁར་འདི་སྐད་གསུངས་སྟེ་ཡོང་ནི་སངས་རྒྱས་ཀྱི་བསྟན་པ་གར་བྱུང་བར་མུ་སྟེགས་ཀྱི་རྒོལ་བ་རེ་འགྲན་ཟླར་འོང་ན་ཡང་བོད་ཡུལ་དུ་བསྟན་པ་ལྔ་བརྒྱའི་ཐ་མ་ལ་བྱུང་བས་མུ་སྟེགས་ཀྱི་རྒོལ་པ་ནི་མི་འབྱུང༌། སངས་རྒྱས་པ་ཉིད་ལྟ་བ་མ་མཐུན་སྟེ་རྩོད་པར་འགྱུར་གྱིས་དེ་ལྟ་བུ་བྱུང་ན་ངའི་སློབ་མ་ཀ་མ་ཤཱི་ལ་བྱ་བ་ཞིག་བལ་ཡུལ་ན་འདུག་པ་སྤྱན་དྲོངས་ལ་དེ་དང་ཤེས་པ་འགྱེད་དུ་ཆུག་ལ་རྒྱལ་པོས་བསྡུམས་གྱིས་ཅིག །རྩོད་པ་ཆོས་ཕྱོགས་སུ་འདུམ་པར་འགྱུར་རོ་ཞེས་གསུང་གི་དེ་ཡང་དེ་ལྟར་མཛད་དུ་གསོལ་ཞེས་གསོལ་པ་དང༌། བཙན་པོས་ཀ་མ་ལ་ཤཱི་ལ་འགུགས་སུ་ཕོ་ཉ་བཏང་བ་དང༌། སྟོན་མིན་པ་དཔོན་གཡོག་སུམ་(ཇ༡༡༦ན)

[Full Size]

བརྒྱས་ཤེས་རབ་འབུམ་བླངས་སྟེ་བསམ་གཏན་གླིང་སྒོ་བཅད་ནས་ཟླ་བ་བཞིའི་བར་དུ་ཤགས་བསླབས། ཆོས་བྱ་མི་དགོས་ཉལ་བས་ཆོག་ཞེས་སྟོན་པ་བསམ་གཏན་ཉལ་ཆོག་གི་འཁོར་ལོ། དེ་ལ་རྩོད་པ་སྤོང་བ་བསམ་གཏན་གྱི་ལོན་དང་ཡང་ལོན་གཉིས། རིགས་པས་སྒྲུབ་པ་ལྟ་བའི་རྒྱབ་ཤ་དང་ལུང་གིས་སྒྲུབ་པ་མདོ་སྡེ་བརྒྱད་བཅུ་ཁུངས་ལ་སོགས་པ་བྱས། མདོ་སྡེ་དགོངས་པ་ངེས་འགྲེལ་རྡོག་པས་དྲིལ་སྟེ་འདི་ཆོས་མིན་ཟེར་ནས་བོར། དེར་ཀ་མ་ལ་ཤཱི་ལ་མ་བྱོན་གྱི་བར་དུ་ཡེ་ཤེས་དབང་པོའི་ཧྭ་ཤང་གི་ལྟ་བ་དང་བོ་དྷི་ས་ཏྭའི་ལྟ་བ་རྩེན་མིན་གྱི་ལུགས་ཇི་ལྟར་ལགས་པ་རིལ་སྙན་དུ་གསོལ་བ་ལས་ལྷ་སྲས་ཀྱི་དགོངས་པ་ཡང་འཁྲོལ་སྟེ་དགྱེས་ཆེས་ནས་དབུ་བཏུད་དེ་ཡེ་ཤེས་དབང་པོ་ནི་ངའི་ཨཱ་ཙཱརྻ་ཞེས་ཡང་ཡང་གསུངས་སྟེ་ཡེ་ཤེས་དབང་པོའི་ཞབས་ལ་ཕྱག་འཚལ་ལོ། །དེ་ནས་ཕྱིས་ཀ་མ་ལ་ཤཱི་ལ་རླུང་ཚུབས་ཀྱི་གྲུ་ལ་འཐོན་ཞེས་ཕོ་ཉ་བ་བྱུང་སྟེ་རྗེ་བློན་ཡོས་ཆབ་ཁར་གསུ་བ་ལ་བྱོན་པས་ཧྭ་ཤང་འཁོར་དང་བཅས་པ་ཡང་ཆབ་ཁར་བྱོན། ཀ་མ་ལ་ཤཱི་ལས་ཧྭ་ཤང་ལ་སྒྲ་ཚད་འདྲི་གསུངས་ནས་ཁམས་གསུམ་དུ་ཅིས་འཁོར་བྱ་བའི་བརྡར་ཕྱག་ཤིང་དབུ་ལ་ལན་གསུམ་དུ་བསྐོར་བས་ཧྭ་ཤང་གིས་ཆུ་ཚུར་ཁ་ནས་གོ་སྟེ་གཟུང་འཛིན་གཉིས་ཀྱིས་ལན་བྱ་བའི་བརྡར་བེར་གྱི་ཐུ་བ་ནས་ལན་གཉིས་སྤྲུགས། ཧྭ་ཤང་ན་རེ་འཇིགས་པོ་ཞིག་འདུག་ཟེར་སྐད། དེ་ནས་ཀ་མ་ལ་ཤཱི་ལ་བྱོན་པ་དང་བྱང་ཆུབ་གླིང་དུ་སེང་གེའི་ཁྲི་བཅས་སྟེ་བཙན་པོ་དགུང་ལ་བཞུགས། ཧྭ་ཤང་གཡས་སུ་སེང་གེའི་ཁྲི་ལ་བཞག་མཇུག་ལ་སྟོན་མིན་གྱི་སློབ་མ་རྣམས་དངར་སྟེ་ཇོ་མོ་བྱང་ཆུབ་དང༌། སྲུ་ཡང་དག་དང༌། བནྡྷེ་ལངྐ་ལ་སོགས་པ་མང་སྟེ་གྲལ་རིང་པོ་བྱུང༌། ཀ་མ་ལ་ཤཱི་ལ་གཡོན་དུ་སེང་གེའི་ཁྲི་ལ་བཞག་རྗེས་ལ་བརྩེ་མིན་གྱི་སློབ་མ་རྦ་དཔལ་དབྱངས་དང༌། བཻ་རོ་ཙ་ན་དང༌། ཡེ་ཤེས་དབང་པོ་ལ་སོགས་པ་དགེ་སློང་མི་མང་བ་ཞིག་སྟེ་ཉུང་ཤས་ཅིག་ལས་(ཇ༡༡༦བ)

[Full Size]

མ་བྱུང༌། བཙན་པོས་མཁན་པོ་གཉིས་དང་སྟོན་རྩེན་གྱི་བནྡྷེ་ཀུན་ལ་མེ་ཏོག་དཀར་པོའི་ཕྲེང་བ་རེ་རེ་ལག་དུ་ཕུལ་ནས་བཀའ་བསྩལ་པ། ངའི་མངའ་རིས་ཀྱི་འབངས་བོད་ནག་པོ་ལ་ཞེན་པ་རྣམས་ཀྱི་དོན་དུ་རྒྱ་གར་ནས་བོ་དྷི་ས་ཏྭ་སྤྱན་དྲངས་སྟེ་བོད་མི་ཉུང་ཤས་ཅིག་ཆོས་ལ་བཀོད། དད་པ་ཅན་ཤས་ཅིག་རབ་ཏུ་བྱུང༌། ལྷ་ཁང་འགའ་ཟུང་བཞེངས་སྟེ་དཀོནད་ཅོག་གསུམ་གྱི་རྟེན་བཙུགས་ནས་འབངས་ཀུན་ལ་ལྷ་ཆོས་སློབ་ཏུ་བཅུག་པ་ལས་དད་པ་ཅན་ཉུང་ཤས་ཅིག་རབ་ཏུ་བྱུང་བའི་འོག་དུ་ཧྭ་ཤང་མ་ཧཱ་ཡ་ན་འདིར་མཆིས་པ་ལས་བོད་ཀྱི་བནྡྷེ་ཕལ་ཆེ་བ་ཅིག་ཧྭ་ཤང་ལ་སློབས། ཅིག་ནི་བོ་དྷི་ས་ཏྭའི་སློབ་མ་ཡིན་པས་ཧྭ་ཤང་གི་ལྟ་བར་སློབ་ཏུ་མ་བཏུབ་སྟེ་སྟོན་རྩེན་གཉིས་སུ་ཆད། དེ་གཉིས་མ་མཐུན་པར་འཁྲུགས་པ་ལ་ངའི་ཞལ་ཅེས་ཧྭ་ཤང་གི་སློབ་མ་རྣམས་མ་རངས་སྟེ་ཉང་ཤ་མི་རང་གི་ཤ་བཏུབས་ནས་ཤི། ཧྭ་ཤང་མེ་མགོ་ནི་རང་གི་མགོ་ལ་མེ་བཏང་ནས་ཤི། རྔོགས་རིན་པོ་ཆེ་དང་སྙགས་བྱེ་མ་ལས་ནི་རང་གི་ཕོ་མཚན་བརྡུངས་ནས་ཤི། གཞན་རྣམས་ཀྱང་ཆུ་གྲི་རེ་བསྲེལ་ཞིང་བརྩེ་མིན་པ་རིལ་གྱིས་བསད་ལ་བདག་ཅག་ཀྱང་ཕྲུ་མའི་ངོས་ལ་འཆི་ཟེར་སྟེ་ངས་དེ་ལྟར་བྱེད་ཏུ་མ་གནང་བར་གཉའ་གཡོན་བསྐོར་བ་ཡིན། བརྩེ་མིན་པའི་མཁན་པོ་བོ་དྷི་ས་ཏྭ་ཡིན། དེའི་སློབ་མ་ཀ་མ་ལ་ཤཱི་ལ་ཡིན་པས་ཁྱེད་འདིར་འོངས་པ་དང་ཧྭ་ཤང་དང་གཉིས་ཁ་བདུར་ལ་གཏན་ཚིགས་གང་བཟང་བ་ལ་སུ་གཏན་ཚིགས་ངན་པ་དེས་ང་རྒྱལ་མ་བྱེད་པར་ཆོས་ལུགས་བཞིན་དུ་མེ་ཏོག་ཕྲེང་བ་ཕུལ་ཞིག་ཞེས་བཀའ་བསྩལ་བ་དང༌། ཧྭ་ཤང་ན་རེ་ང་གཞི་ལ་སྔ་བས་ངས་དྲིའམ་ལན་གདབ་གསུངས་ཀ་མ་ལ་ཤཱི་ལའི་ཞལ་ནས་ཁྱོད་ཀྱི་དགོངས་པའི་ལྟ་བ་ལ་ཤགས་ཐོབ་ཅིག་གསུངས་པ་དང༌། ཧྭ་ཤང་ན་རེ། ཐམས་ཅད་སེམས་ཀྱི་རྣམ་པར་རྟོག་པས་བསྐྱེད་པས་ལས་དགེ་མི་དགེས་མཐོ་རིས་དང་ངན་སོང་གི་འབྲས་བུ་མྱོང་ཞིང་འཁོར་བ་ན་འཁོར་རོ། །གང་ཞིག་ཅི་ལ་ཡང་(ཇ༡༡༧ན)

[Full Size]

མི་སེམས་ཞིང་ཅི་ཡང་མི་བྱེད་པ་དེ་འཁོར་བ་ལས་ཡོངས་སུ་ཐར་བར་འགྱུར་རོ། །དེ་ལྟ་བས་ན་ཅི་ཡང་མི་བསམ་མོ། །སྦྱིན་པ་ལ་སོགས་པའི་ཆོས་སྤྱོད་རྣམ་པ་བཅུ་ལ་སྤྱོད་པ་ནི་སྐྱེ་བོ་དགེ་བའི་ལས་འཕྲོ་མེད་པ་བློ་ཞན་པ་དབང་པོ་བརྟུལ་བོ་རྣམས་ལ་བསྟན་པ་ཡིན། སྔོན་བློ་སྦྱངས་པ་དབང་པོ་རྣོན་པོ་དག་ལ་སྤྲིན་དཀར་ནག་གཉིས་གང་གིས་ཀྱང་ཉི་མ་སྒྲིབ་པ་ལྟར་དགེ་སྡིག་གཉིས་ཀས་ཀྱང་སྒྲིབ་པས་དེ་བས་ན་ཅི་ལ་ཡང་མི་སེམས། ཅི་ལ་ཡང་མི་རྟོག་ཅི་ལ་ཡང་མི་དཔྱོད་པ་ན་མི་དམིགས་པ་ཅིག་ཅར་དུ་འཇུག་པས་ས་བཅུ་པ་དང་འདྲའོ་ཞེས་སྨྲས་པ་དང༌། ཨཱ་ཙརྻ་ཀ་མ་ལས་གསུངས་པ། དེ་ལྟར་ཅི་ཡང་མི་བསམ་ཟེར་བ་དེ་ནི་སོ་སོར་རྟོག་པའི་ཤེས་རབ་སྤངས་པ་ཡིན་ནོ། །ཆོས་ཐམས་ཅད་ཀྱི་རང་བཞིན་ཆོས་དབྱིངས་རྣམ་པར་མི་རྟོག་པ་དེ་ནི་སོ་སོར་རྟོག་པའི་ཤེས་རབ་ཀྱིས་རྟོགས་དགོས་པ་ཡིན། ཡང་དག་པའི་ཡེ་ཤེས་ཀྱི་རྩ་བ་ནི་སོ་སོར་རྟོག་པའི་ཤེས་རབ་ཡིན་ན་དེ་སྤངས་པས་འཇིག་རྟེན་ལས་འདས་པའི་ཡེ་ཤེས་སམ་ཤེས་རབ་ཀྱང་སྤངས་པར་འགྱུར་སྟེ་སོ་སོར་རྟོག་པའི་ཤེས་རབ་མེད་པར་རྣལ་འབྱོར་པས་ཐབས་གང་གིས་རྣམ་པར་མི་རྟོག་པ་ལ་གནས་པར་འགྱུར། གལ་སྟེ་ཆོས་ཐམས་ཅད་དྲན་པ་མེད་ཅིང་ཡིད་ལ་བྱར་མེད་པ་ཡིན་ན་ཉམས་སུ་མྱོང་བ་རྣམས་མི་དྲན་ཞིང་ཡིད་ལ་མི་བྱ་བར་མི་ནུས་སོ། །གལ་སྟེ་བདག་གིས་ཆོས་གང་ཡང་དྲན་པ་མི་བྱ་ཡིད་ལ་མི་བྱའོ་སྙམ་ན་ནི་དེ་ཉིད་དྲན་པ་ཤིན་ཏུ་ཡིད་ལ་བྱས་པར་འགྱུར་རོ། །དྲན་པ་དང་ཡིད་ལ་བྱ་བ་མེད་པ་ཙམ་ལ་བྱེད་ན་མེད་པ་ནི་རྒྱུར་མི་རུང་སྟེ་དྲན་པ་མེད་པ་ཙམ་གྱིས་རྣམ་པར་མི་རྟོག་པར་འགྱུར་ན་བརྒྱལ་བ་དང་ར་རོ་བ་དང་བོག་པའི་དུས་སུ་ཡང་དྲན་པ་མེད་པས་རྣམ་པར་གྲོལ་བར་འགྱུར་རོ། །དེ་ལྟ་བས་ན་ཡང་དག་པའི་སོ་སོར་རྟོག་པ་མེད་པར་རྣམ་པར་མི་རྟོག་པ་ལ་འཇུག་པའི་ཐབས་མེད་ཏོ། །དྲན་པ་ཙམ་པོ་བཀག་ཀྱང་ཡང་དག་པའི་སོ་སོར་རྟོག་པ་མེད་ན་ཆོས་ཐམས་ཅད་ངོ་བོ་ཉིད་མེད་པ་ལ་ཇི་ལྟར་འཇུག་ནུས། (ཇ༡༡༧བ)

[Full Size]

ངོ་བོ་མེད་པ་སྟོང་པ་ཉིད་མ་རྟོགས་ན་སྒྲིབ་པ་སྤོང་བར་མི་འགྱུར་བ་ཁོ་ནའོ། །སྟོང་པ་ཉིད་མ་རྟོགས་ཀྱང་དྲན་པ་མེད་པ་ཙམ་གྱིས་ཐར་པ་ཐོབ་པ་དང་གྲོལ་བར་འགྱུར་ན་ཁམས་གོང་མའི་ལྷ་ཐམས་ཅད་ཐར་པ་ཐོབ་པ་དང་གྲོལ་བར་འགྱུར་རོ། །དྲན་པ་ཅི་ཡང་མེད་པའི་རྨོངས་པའི་སེམས་ཀྱིས་ཡང་དག་པའི་ལམ་རྣལ་འབྱོར་དུ་ཇི་ལྟར་འགྱུར། དེ་ནི་གཉིད་སྟུག་པོའི་རྨོངས་པའི་སེམས་དང་འདྲའོ། །དྲན་བཞིན་དུ་ཡང་མི་དྲན་བྱར་མི་རུང་ངོ༌། །དྲན་མེད་དང་ཡིད་ལ་བྱར་མེད་པས་སྔོན་གྱི་གནས་རྗེས་སུ་དྲན་པ་དང་ཐམས་ཅད་མཁྱེན་པར་ཇི་ལྟར་འགྱུར། ཉོན་མོངས་པ་ཡང་ཇི་ལྟར་སྤོང༌། དེ་བས་ན་ཡང་དག་པའི་སོ་སོར་རྟོག་པའི་ཤེས་རབ་ཀྱིས་ཕྱིན་ཅི་ལོག་གི་སྣང་བ་རྒྱང་སྲིང་བ་ཡིན་ནོ། །དེ་བསྲིངས་ཅིང་སྤངས་པས་ཡང་དག་པ་ཕྱིན་ཅི་མ་ལོག་པའི་སྣང་བ་རྣལ་མའི་དོན་ཇེ་གསལ་ཇེ་གསལ་རྟོགས་པར་འགྱུར་རོ། །དེ་ལྟ་བུའི་དོན་ངེས་པར་རྟོགས་པའི་རྣལ་འབྱོར་བས་དུས་གསུམ་ཕྱི་ནང་ཐམས་ཅད་སྟོང་པར་རྟོགས་སྟེ་རྟོག་པ་ཐམས་ཅད་ཉེ་བར་ཞི་བར་འགྱུར་ལྟ་བ་ངན་པ་སྤོང་བར་འགྱུར་རོ། །དེ་ལྟ་བུ་དེ་བརྟན་ཙ་ན་ཐབས་དང་ཤེས་རབ་གཉིས་ལ་མ་རྨོངས་པས་སྒྲིབ་པ་ཐམས་ཅད་དེ་ཉིད་ཏུ་བསལ་ནས་སྤངས་པ་དང་ཡེ་ཤེས་ཕུན་སུམ་ཚོགས་པ་སངས་རྒྱས་ཀྱི་ཆོས་ཐོབ་པར་འགྱུར་རོ་ཞེས་གསུངས་སོ། །དེར་བཙན་པོའི་ཞལ་ནས་སྟོན་ཆེན་ཤགས་གང་རྒྱལ་བའི་འཁོར་ཀུན་ཡང་མཆིད་ཤགས་ཐོབ་ཅིག་ཞེས་གསུངས་པ་དང་དཔལ་དབྱངས་ན་རེ། ཁྱེད་རྒྱའི་བཞེད་པ་ལྟར་ན་ཅིག་ཆར་དུ་འཇུག །ཅིག་རིམ་གྱིས་མཆི་ན་ཕ་རོལ་ཏུ་ཕྱིན་པ་དྲུག་མི་མཐུན་པའི་ཕྱོགས་ལས་གདགས་པར་གསུངས་སྟེ་འཛིན་པ་མ་མཆིས་པའི་སླད་དུ་སྦྱིན་པའི་མིང་བཏགས་སྟེ་བདོག་པ་བཏང་ནས་ཡོངས་སུ་འཛིན་པ་མེད་ན་སྦྱིན་པ་བཏང་བ་ཡིན། སྒོ་གསུམ་ཆགས་སྡང་བཀག་ན་ཚུལ་ཁྲིམས་ཡིན། ཁྲོ་བ་མེད་ན་བཟོད་པའི་མཆོག་ཡིན། ལེ་ལོ་འདོར་བ་ལ་བརྩོན་འགྲུས་ཀྱི་མིང་བཏགས། སེམས་ལ་གཡེང་བ་མ་མཆིས་(ཇ༡༡༨ན)

[Full Size]

ན་བསམ་གཏན། ཆོས་རང་དང་སྤྱིའི་མཚན་ཉིད་ཤེས་ན་ཤེས་རབ་ཡིན། སྟོན་པ་འདས་ནས་རིང་ཞིག་དུ་ལྟ་བ་ལ་མཐུན་པ་མ་མཆིས། སླད་ནས་དབུ་མ་རྣམ་གསུམ་མ་མཐུན་སྟེ་རྩོད་པར་གྱུར། ད་ལྟ་སྟོན་རྩེན་གཉིས་ལྟ་བ་མ་མཐུན་སྟོན་མིན་ཅིག་ཆར་དུ་འཇུག་ཟེར་སྟེ་ཡང་དག་པ་མ་རྟོགས་མ་འཇལ་བས་དེ་ལྟར་གྱུར། འཇུག་སྒོ་ཐ་དད་ཀྱང་སངས་རྒྱས་འཐོབ་པར་འདོད་པར་ཅིག་ཞེས་འབྲས་བུ་འདོད་པ་ལ་སྤྱི་མཐུན་པ་སྐད་དུ་སྨྲས། ཡེ་ཤེས་དབང་པོས་སྨྲས་པ། ཅིག་ཆར་འཇུག་བྱ་བ་དང་རིམ་གྱིས་འཇུག་བྱ་བ་གཉིས་དཔྱོད་དགོས་སྟེ་རིམ་གྱིས་འཇུག་ན་རྩོད་རྒྱུ་མ་མཆིས་སྟེ་ངེད་དང་འདྲའོ། །ཅིག་ཅར་དུ་འཇུག་ན་ཁྱེད་ད་དུང་ཅི་བྱེད་དང་པོ་ནས་སངས་རྒྱས་ན་ཅི་ཉེས། དེ་བས་ན་རི་ལ་འཛེག་པ་ཡང་གོམ་པ་རེ་རེ་ནས་འཛེག་དགོས་སྟེ་གོམ་པ་གཅིག་གིས་བགྲོད་མི་ནུས་པ་ལྟར་ས་དང་པོ་ཐོབ་པ་ཡང་རབ་ཏུ་དཀའ་ན་ཐམས་ཅད་མཁྱེན་པ་ཐོབ་པ་ལྟ་ཅི་སྨོས། ཅི་ཡང་མ་བྱས་པར་འཚང་རྒྱ་བ་ནི་ཁྱེད་ལ་བསྟན་པའི་ཁུངས་དགོས། སྟོན་རྩེན་མི་འདྲ་སྟེ་ངེད་བརྩེ་མིན་གྱི་ལུགས་ཀྱིས་གསུང་རབ་ཀུན་ལ་བསླབས། ཐོས་བསམ་སྒོམ་གསུམ་གྱི་ཤེས་རབ་རྣམ་གསུམ་ལ་བརྟེན་ནས་དོན་མ་ནོར་བར་ཤེས་ནས་ཆོས་སྤྱོད་བཅུ་ལས་བསླབས་སྟེ་བསྒོམས་པས་ས་དང་པོ་ལ་བཟོད་པ་ཡང་འཐོབ། ཡང་དག་པའི་སྐྱོན་མེད་པར་ཡང་འཇུག །དེ་ནས་ས་དགུར་ཡང་དག་པའི་ཤེས་རབ་རིམ་པར་སྦྱངས་ཕ་རོལ་ཏུ་ཕྱིན་པ་བཅུ་ལ་བསླབས། རྒྱུད་སྦྱངས་ཚོགས་གཉིས་རྫོགས་ནས་སངས་རྒྱས་བརྙེས་པ་ལགས་ན། ཁྱེད་ལྟར་གྱི་ཚོགས་མ་བསགས་བློ་མ་སྦྱངས་པའི་འཇིག་རྟེན་གྱི་བྱ་བ་ཡང་མི་ཤེས་ན་ཐམས་ཅད་མཁྱེན་པ་འཐོབ་པ་དང་ཤེས་བྱ་ཐམས་ཅད་ལ་འཇུག་པར་ཇི་ལྟར་འགྱུར། སངས་རྒྱས་རང་གཞན་གྱི་དོན་ཕུན་སུམ་ཚོགས་པ་དེའི་རྒྱུ་ཅི་ལས་གྲུབ་ན་ཚོགས་གཉིས་ལས་གྲུབ་པ་ཡིན། སྟོང་པ་གཅིག་པུས་རང་ལ་ཡང་མ་ཕན་ན་གཞན་གྱི་དོན་ག་ལ་འགྲུབ། ཐ་ན་ལུས་(ཇ༡༡༨བ)

[Full Size]

སྲོག་འཚོ་བ་ལ་ཡང་ཟས་དང་སྐོམ་དང་གོས་ལ་སོགས་པ་རྩོལ་སྒྲུབ་བྱ་དགོས་པ་ལ་བརྟེན་སྟེ་འཚོ་དགོས་ལ་དེ་དག་ལ་མ་བརྟེན་ན་འགུམ་སྟེ་ཟས་མ་མྱོང་ན་ཞག་བདུན་ན་ལྟོགས་སྟེ་འཆི་ན་ཐར་པ་སྒྲུབ་པ་ལ་ཆོས་སྤྱོད་རྣམ་པ་བཅུ་བྱ་དགོས་པ་ལྟ་ཅི་སྨོས། དེ་ལྟར་ཁུངས་མེད་ཅིང་ཐབས་ཤེས་ཡ་བྲལ་བའི་ཆོས་ཀྱིས་སངས་རྒྱས་ལ་སྐུར་སྟེ་བསླུས་པ་ཡིན། བྱང་ཆུབ་སེམས་དཔའ་ནི་སེམས་ཅན་གྱི་དོན་དུ་སེམས་བསྐྱེད་ནས་གཞན་དོན་ལྷུར་བྱས་བསོད་ནམས་ཀྱི་ཚོགས་བསགས་སྟེ་ཤེས་བྱ་ཐམས་ཅད་ལ་མཁས་པར་བསླབས། ཤེས་རབ་གསུམ་བློ་སྦྱངས་སྟེ་ཡེ་ཤེས་ཀྱི་ཚོགས་བསགས། སྒྲིབ་པ་གཉིས་སྦྱངས། བློའི་དྲི་མ་ཐམས་ཅད་སྤངས་ནས་མཐུ་རྫོགས་པ་དང་སངས་རྒྱས་ནས་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་མཛད་པའི་འཕྲིན་ལས་འཁོར་བ་མ་སྟོངས་ཀྱི་བར་དུ་འབྱུང་བ་ལྷུན་གྱིས་གྲུབ་པ་ཡིན་པར་ལུང་དུ་མ་ནས་གསུངས་སོ། །ཅི་ཡང་མི་སེམས་པ་ནི་སྒོ་ང་དང་འདྲའོ། །མ་བརྟགས་པར་གོམ་པ་བོར་ཡང་བརྡབ་འཆོས་སྟེ་འགྲོ་ན་ཆོས་ག་ལ་རྟོགས། ཅི་ཡང་མ་བྱས་པར་ཉལ་བས་ཟན་ཡང་མི་མྱོང་བར་ལྟོགས་སྟེ་འཆི་ནས་སངས་རྒྱས་ག་ལ་འགྲུབ། དེ་བས་ན་ནངས་ལ་མདོ་སྡེ་བྱང་ཆུབ་པར་བཀླགས། དབེན་པར་ཞི་གནས་དང་ལྷག་མཐོང་ཡིད་ལ་བྱས། རྟོགས་པས་ཡིད་ལ་མྱོང་བ་ཤར། དེ་ལྟར་མ་རྟོགས་པའི་དོན་དུ་ཚོགས་གསག་སྟེ་སེམས་ཇི་ལྟ་བུ་ཞེ་ན་ཀུན་རྫོབ་སྒྱུ་མ་ལྟ་བུ་ལ་དོན་དམ་པར་དེ་མ་སྐྱེས་པར་རྟོགས་སྟེ་ཆོས་ཐམས་ཅད་ཆུ་ཤིང་གི་སྙིང་པོ་ལྟ་བུར་མ་བཅོས་པར་རྟོགས་ན་དུས་གསུམ་མི་དམིགས་པར་འགྱུར་སྟེ་ཆོས་དང་གང་ཟག་ལ་བདག་མ་མཆིས་པར་རིག་པས་བྱིང་རྒོད་མ་མཆིས་པར་ཟུང་འབྲེལ་དུ་ངང་གིས་འཇུག་པ་ལགས་སྟེ་སྒོམ་པ་ཡང་དེ་ལྟར་ལགས། ཅེས་མཆི་བ་དང་སྟོན་མིན་པས་ཤགས་ལན་སྨྲ་བར་མ་སྤོབས་སྟེ་མེ་ཏོག་གཏོར་ནས་ཕམ་པར་ཁས་བླངས་སོ། །དེའི་ཚེ་གཟིམས་མལ་བ་ཅོ་རྨ་རྨ་རང་གི་དབང་པོ་བརྡུངས་ནས་ལྕེབས་སོ། །དེ་ནས་བཙན་(ཇ༡༡༩ན)

[Full Size]

པོའི་ཞལ་ནས། ཧྭ་ཤང་གི་ཆོས་སྟོན་མིན་པ་ཅིག་ཅར་དུ་འཇུག་ཟེར་བ་དེ་ནི་ཆོས་སྤྱོད་རྣམ་པ་བཅུ་ལ་སྐྱོན་བཀལ་སྟེ་མི་བགྱིད། སེམས་པ་ནི་བྱིང༌། བདག་དང་གཞན་གྱི་བློ་སྦྱོང་གི་སྒོ་བཀག་སྟེ་འཕྲོ་བཅད་ན་སེམས་བྱིང་ཞིང་ཆོས་ནུབ་པར་འགྱུར་བས་འཕྲོ་ཆོད་ལ་དེ་ལྟ་བུ་ནི་ཁྱེད་རང་སྒོམས་ཅིག་གཞན་ཁྱེད་ཀྱི་འཁོར་རྣམས་དང་བོད་རྣམས་ད་སླན་ཆད་ལྟ་བ་ནཱ་གརྫུ་ནའི་ལུགས་ཟུངས། སྤྱོད་པ་ཕ་རོལ་ཏུ་ཕྱིན་པ་དྲུག་ལ་གྱིས་ལ་ཆོས་སྤྱོད་རྣམ་པ་བཅུ་ཉམས་སུ་ལོངས། སྒོམ་པ་ཤེས་རབ་རྣམ་པ་གསུམ་ལ་བློ་སྦྱོངས་ལ་ཐབས་དང་ཤེས་རབ་ཟུང་དུ་ཆུད་ཅིང་འབྲེལ་བ་ཞི་གནས་དང་ལྷག་མཐོང་ལ་སྒོམས་ཅིག་ད་སླན་ཆད་འོ་སྐོལ་བོད་རྗེ་བློན་འབངས་བཅས་ཀྱིས་ཀྱང་ཆོས་བྱ་བ་རྣམས་ཀྱིས་འདི་ལྟར་བྱ་སྟེ། སྤྱིར་བོད་མཐའ་འཁོབ་ཏུ་གྱུར་པ་དང་རིག་པ་བླུན་ཞིང་རང་ག་བ་མང་ལ་ཆོས་འདི་རྟོགས་པར་དཀའ་ཞིང་ཟབ་པས། རྒྱ་གར་གྱི་མཁས་པ་རབ་ཏུ་གྱུར་པར་གྲགས་པ་རྒྱལ་པོས་སྤྱན་དྲངས་སྟེ་ཡོན་བདག་བྱས། ལོ་ཙཱ་བ་མཁས་པས་གཏན་ལ་ཕབ་པའི་ཆོས་དེ་ལ་འཇུག་པར་བྱའོ། །རྒྱལ་པོས་ཡོན་བདག་མ་བྱས་ལོ་ཙཱ་བ་མཁས་པས་གཏན་ལ་མ་ཕབ་པའི་ཆོས་ལ་འཇུག་པར་མི་བྱའོ། །ཞེས་བཀའ་ནན་དྲག་དུ་བསྩལ་ནས་བཀའ་གཙིགས་ཀྱི་ཡི་གེ་ཞིབ་མོ་གསུམ་ཏུ་མཆིས་སྟེ་གསེའི་སྒྲོམ་བུར་བཅུག་ཁ་ལ་སྒོ་ལྕགས་བསྩལ་སྟེ་རྗེའི་ཕྱག་དབལ་ན་མཆིས་སྟེ་གནོད་སྦྱིན་དམ་རྒྱ་ནག་པོ་ལ་གཏད། ཆེ་ལོང་ཞིག་ནི་ཞང་བློན་རྣམས་ལ་དར་བར་བྱས། དེ་ནས་ཧྭ་ཤང་མ་ཧྭ་ཡ་ན་གཙུག་ལག་ཁང་ཞིག་བཞེངས་ནས་སླར་རྒྱ་ནག་དུ་གཤེགས། སྔོན་རྒྱལ་པོ་གདུང་རབས་ལྔར་ཆོས་མ་ཚུགས་པ་ལྷ་སྲས་ཁྲི་སྲོང་ལྡེ་བཙན་དང༌། ཟ་ཧོར་རྒྱལ་པོའི་སྲས་བོ་དྷི་ས་ཏྭ་དང༌། རྦ་ཡེ་ཤེས་དབང་པོ་དང༌། སང་ཤི་ཏ་བཞིས་དཀོནད་ཅོག་གི་རྟེན་མཆོད་གནས་པ་བཙུགས། དམ་པའི་ཆོས་བོད་ཁམས་སུ་རྒྱ་ཆེར་བསྒྲགས་སོ། །(ཇ༡༡༩བ)

[Full Size]

དེར་རྗེ་བཙན་པོའི་ཐུགས་དགོངས་འགྲུབ་ནས་འབངས་ཐམས་ཅད་ཆོས་ལ་བཙུད་ཅིང་ལྷ་ཆོས་མི་དགྱིད་དུ་མི་གནང་བའི་ཕྱིར་དབུས་མཐའ་ཐམས་ཅད་དུ་སློབ་དཔོན་བསྐོས། ཞང་བློན་གྱི་བུ་ཚ་དང་བཙུན་མོ་ཐམས་ཅད་ཀྱང་ཀ་ཝ་ལི་རེ་རེ་ཐོགས་ནས་ཆོས་སློབ་ཏུ་བཅུག་གོ །དེ་ནས་སློབ་དཔོན་ཀ་མ་ལ་ཤཱི་ལ་ལ་བཙན་པོས་ཆོས་ཐམས་ཅད་ཐོས་བསམ་སྒོམ་གསུམ་གྱིས་བདག་མེད་པར་གཏན་ལ་ཕབ་པའི་ཆོས་དེ་ཇི་ལྟར་ལགས་པ་ཡི་གེར་འགོད་པར་ཞུས་པས་སྒོམ་རིམ་དང་པོ་བརྩམས་ནས་གནང༌། རྗེས་གཟིགས་པས་དོན་དགོངས་སྟེ་ད་དེའི་དོན་སྟན་ཐོག་གཅིག་དུ་སྒོམ་ན་ཇི་ལྟར་སྒོམ་ཞུས་པས་སྒོམ་རིམ་བར་པ་བརྩམས་ནས་གནང༌། དེ་ལ་འབྲས་བུ་ཇི་ལྟར་མཆི་ཞུས་པས་སྒོམ་རིམ་ཐ་མ་འབྲས་བུ་བསྟན་པ་བརྩམས་ནས་གནང༌། འབྲས་བུ་བསྟན་པའི་ཞར་ལ་ཧྭ་ཤང་གི་ལྟ་བ་ནོར་བ་དེ་སུན་ཕྱུང་ནས་སྣང༌། དེ་ལ་ཤིན་ཏུ་དགྱེས་པས་དེའི་དོན་འགྲེལ་དུ་བོ་དྷི་ས་ཏྭའི་དགོངས་པ་ལ་རྒོལ་བ་བྱུང་གིས་དྭོགས་པའི་དོན་དུ་ལུང་དང་རིགས་པ་འབྲེལ་བར་དབུ་མ་སྣང་བ་བརྩམས་ནས་བཙན་པོ་ལ་གནང་ངོ་ཞེས་རྦ་བཞེད་ཁུངས་ཐུབ་ལས་བྱུང་བ་ཇི་ལྟ་བ་བཀོད་པའོ། །བུ་སྟོན་ཆོས་བྱུང་ལས་ནི་སྟོན་མིན་བརྩེ་མིན་ནི་རྒྱ་ནག་གི་སྐད་དེ་ཅིག་ཆར་པ་དང་རིམ་སྐྱེས་པ་ཅེས་ཟེར་རོ་ཞེས་བྱུང་ངོ༌། །སྤྱིར་སངས་རྒྱས་ཀྱི་བསྟན་པ་ལ་ཆོས་དང་ཆོས་མ་ཡིན་པ་བྱ་བ་ན་གང་ཆོས་མ་ཡིན་པའི་ཕྱོགས་དེ་ནི་ཞེ་སྡང་དྲག་པོས་ཁྲོ་བ་དང་འཁྲུགས་པར་བྱེད་ཅིང་མཚོན་ཆའི་སྦྱོར་བས་ཕ་རོལ་གསོད་པའི་བར་དུ་བརྩོན་པར་བྱེད་ལ། གང་ཆོས་ཀྱི་ཕྱོགས་དེ་ནི་ཕ་རོལ་པོ་ཇི་ཙམ་དུ་འཁྲུག་ཤིང་ཁྲོ་བ་ཙམ་གྱིས་སྙིང་རྗེ་དང་བཟོད་པ་འཕེལ་ཞིང་དུས་ལ་བབ་ན་ལུང་རིགས་དང་ལྡན་པའི་འབེལ་བའི་གཏམ་གྱིས་ཕ་རོལ་གྱི་ལོག་རྟོག་ཟློག་པ་ལ་བརྩོན་པར་བྱེད་ཀྱི། སྲོག་དང་ཟང་ཟིང་འཇོམས་པ་ནི་གཞན་གྱིས་བྱེད་པ་ཡང་ཟློག་ན་རང་གིས་བགྱི་བ་ལྟ་ཅི་སྨོས་སྟེ་དེས་ན་དེང་སང་(ཇ༡༢༠ན)

[Full Size]

དང་མ་འོངས་པའི་དུས་ཀྱང་རུང་སྟེ་བསྟན་པ་བྱེ་བ་ན་གང་ཆོས་ཀྱི་ཕྱོགས་དང་གང་ཆོས་མ་ཡིན་པའི་ཕྱོགས་སུ་གནས་པ་ནི་འདི་ཁོ་ནས་ཤེས་པར་ནུས་སོ། །ཆོས་མ་ཡིན་པའི་ཕྱོགས་རྣམས་ནི་ལྟ་བ་དང་གྲུབ་མཐའ་ཡང་ཉ་འབྲིད་པ་ལ་ལྕགས་ཀྱུའི་རྩེའི་ཟས་ལྟར་སྐྱེ་བོ་ཆོས་ལྟར་སྣང་བས་སླུ་བའི་ཕྱིར་དང་པོར་སྨྲ་བ་ཙམ་དུ་ཟད་ཀྱི། གང་ཁས་ལེན་པའི་ལྟ་སྤྱོད་དེ་ལ་ཡང་རང་ཉིད་གནས་པ་མ་ཡིན་སྟེ་དཔེར་ན་ཧྭ་ཤང་འཁོར་བཅས་ཀྱང་ཅི་ཡང་དྲན་པར་མི་བྱ་ཞིང་དགེ་སྡིག་གཉིས་ཀ་མི་བྱེད་པ་རང་གི་ལྟ་གྲུབ་ཏུ་སྨྲས་མོད་ཀྱང་བརྩེ་མིན་གྱིས་དེ་ལྟར་མི་རིགས་སོ་ཞེས་སྨྲས་པ་ན་དེ་མ་ཐག་ཁྲོ་བོ་དང་འཁྲུག་པ་རྩ་ཉོན་དང་ཉེ་ཉོན་ཐམས་ཅད་དྲན་ཞིང་ཡིད་ལ་བྱེད་ལ་ཆུ་གྲི་བསྲེལ་ནས་གསོད་འདོད་ཀྱི་མི་དགེ་བ་དྲག་པོས་རྒྱུད་ཁེངས་ཅིང་ལྡོག་པར་མི་བྱེད་པས་དེ་མ་ཐག་རང་གི་ལྟ་གྲུབ་རང་གིས་བཤིག་པའི་ཕྱིར་རོ། །ཆོས་བཞིན་གྱི་ལྟ་བ་དང་གྲུབ་མཐའ་ནི་དེ་འདྲ་བ་མ་ཡིན་སྟེ། གནོད་བྱེད་སོགས་རྐྱེན་དྲག་པོ་དང་ཐུག་པ་ན་གོ་ཆ་ལྟར་རང་རྒྱུད་ལ་མི་གནོད་པ་དང་མཚོན་ཆ་ལྟར་ཉོན་མོངས་པ་འཇོམས་པའི་བྱེད་ལས་གཉིས་ཀ་ལྟ་བ་དེས་ལྷན་ཅིག་དུ་འགྲུབ་ཅིང་བུད་ཤིང་བསྣན་པའི་མེ་ལྟར་ལྟ་བའི་བསོས་འདེབས་པ་ཅིག་འབྱུང་བ་ཡིན་ནོ་ཞེས་བྱ་བ་ནི་འཕྲོས་པའི་དོན་ཏོ། །རྦ་བཞེད་ལ་ལར་སྔར་གྱི་མེ་ཏོག་གཏོར་ནས་ཕམ་པར་ཁས་བླངས་སོ་ཞེས་པའི་འོག་དུ་ཡང་ལུགས་གཅིག་ལ་རྒྱ་ནག་གི་དགེ་སློང་བྱུང་ནས་ཁོ་ན་རེ་ཚིག་ལ་སྙིང་པོ་མེད། ཐ་སྙད་ཀྱི་ཆོས་ཀྱིས་འཚང་མི་རྒྱ། སེམས་རྟོགས་ན་དཀར་པོ་ཆིག་ཐུབ་ཡིན་པས་དེས་ཆོག་ཟེར་ནས་དཀར་པོ་ཆིག་ཐུབ་འདི་བོད་ཐམས་ཅད་འཕེལ་ལོ་ཞེས་སོགས་དང༌། མཁན་པོའི་ཞལ་ཆེམས་ཀྱི་སྐབས་སུ་ང་འདས་པའི་འོག་དུ་རྒྱ་ནག་གི་མཁན་པོ་གཅིག་འབྱུང་སྟེ་དེས་ཐབས་དང་ཤེས་རབ་ལ་སྐུར་པ་འདེབས་པ་དཀར་པོ་ཆིག་ཐུབ་བྱ་བ་སེམས་རྟོགས་པ་འབའ་ཞིག་གིས་འཚང་རྒྱའོ་ཟེར་བ་འབྱུང་སྟེ་མདོ་ལས་(ཇ༡༢༠བ)

[Full Size]

རྙིགས་མ་ལྔའི་ནང་ནས་ལྟ་བའི་རྙིགས་མ་ཞེས་བྱ་བ་སྟོང་པ་ཉིད་ལ་དགའ་བ་ཡོང་བར་གསུངས་པས་བོད་ཁོ་ནར་མ་ཟད་རྙིགས་མ་ལྔ་བདོ་བའི་གང་ཟག་ཐམས་ཅད་དེ་ལ་དགའ་བ་ཆོས་ཉིད་ཡིན། དེའི་ཆོས་ལུགས་དེ་འཕེལ་ན་སངས་རྒྱས་ཀྱི་བསྟན་པ་སྤྱི་ལ་གནོད་པས་ཀ་མ་ལ་ཤཱི་ལ་སྤྱན་དྲོངས་ཅེས་དང༌། ཁྱེད་བརྩེ་མིན་པ་སྐྱབས་འགྲོ་སེམས་སྐྱེད་ནས་རིམ་པས་བྱེད་པ་སྤྲེའུ་ལྟར་མས་འཛེག་ཡིན། ངེད་བྱ་བྱེད་ཀྱི་ཆོས་ཀྱིས་འཚང་མི་རྒྱ་བས་སེམས་རྟོགས་པ་ཉིད་ཀྱིས་འཚང་རྒྱ་སྟེ་ཁྱུང་ཤིང་རྩེར་བབ་པ་ལྟར་ཡས་བབ་ཡིན་ཟེར་བ་ལ་ཀ་མ་ལས་དཔེ་མི་འཐད་དེ་ཁྱུང་དང་པོ་ནས་འདབ་གཤོག་རྫོགས་སམ་ཚར་ནས་རིམ་པར་རྫོགས་ནས་ཤིང་རྩེར་བབ། དང་པོ་མི་སྲིད་ལ་ཕྱི་མ་རིམ་གྱིས་པའི་དཔེར་རུང་གི་ཅིག་ཆར་བར་མི་རུང་ངོ༌། །དོན་མི་འཐད་དེ། རྣམ་པར་མི་རྟོག་པ་སྒོམ་པ་དེ་རྟོག་པ་ཕྱོགས་གཅིག་བཀག་པ་ཡིན་ནམ་ཐམས་ཅད་བཀག་པ་ཡིན། དང་པོ་ལྟར་ན་གཉིད་དང་བརྒྱལ་བ་སོགས་ཀྱང་སྒོམ་ཡིན་པར་འགྱུར། མཐའ་དག་བཀག་དགོས་ན་མི་རྟོག་པ་སྒོམ་པའི་ཚེ་སྒོམ་སྙམ་པའི་རྟོག་པ་སྔོན་དུ་བཏང་དགོས་སམ་མི་དགོས། མི་དགོས་ན་སེམས་ཅན་ཐམས་ཅད་ལ་སྒོམ་སྐྱེ་བར་ཐལ་སྟེ་སྒོམ་བློ་མེད་ཀྱང་སྒོམ་སྐྱེ་བའི་ཕྱིར། དགོས་ན་དེ་ཉིད་རྟོག་པ་ཡིན་པས་མི་རྟོག་པ་སྒོམ་པའི་དམ་བཅའ་ཉམས་སྟེ་སྨྲ་བཅད་བྱས་པ་ཡིན་ནོ་བྱས་ན་སྨྲ་བཅད་ཤོར་བ་བཞིན་ནོ་ཞེས་གསུངས་པས་རྒྱ་ནག་མཁན་པོས་མགོར་ཐོག་བརྒྱབ་པ་དང་མཚུངས་པས་ལན་མི་ཤེས་སོ་ཞེས་སྨྲས་སོ་ཞེས་དང༌། དེང་སང་ཆོས་རྣལ་མ་རྣམས་བོར་ནས་སེམས་ངོ་འཕྲོད་པས་འཚང་རྒྱ་བར་འདོད་པ་དཀར་པོ་ཆིག་ཐུབ་ཏུ་འགྲོ་བའི་རྒྱུ་མཚན་དེ་ཡིན་གསུང༌། ཞེས་སོགས་དང༌། ཅོ་རྨ་རྨ་ལྕེབས་པ་མན་སྔར་བཤད་པ་དང་མཐུན་ནོ། །དེ་ནས་ཡང་སྔར་གྱི་འཕྲོར་ཞུགས་སྟེ་བཙན་པོའི་ཞལ་ནས་ཧྭ་ཤང་གི་ཆོས་སྟོན་མིན་ཅིག་ཅར་དུ་འཇུག་ཞེས་ཟེར་བ་དེ་ནི་ཞེས་སོགས་བྲིས་སྣང་མོད། འདི་འདྲ་བ་མཁན་པོའི་གསུངས་དང་མཁས་པ་ཀ་མ་ལའི་རིགས་པ་ག་ལ་(ཇ༡༢༡ན)

[Full Size]

ཡིན་སྟེ་སྤྱིར་སངས་རྒྱས་ཕལ་ཆེར་རྙིགས་མའི་དུས་སུ་མི་འབྱུང་ཡང་འོ་སྐོལ་གྱི་སྟོན་པ་འདི་ཐུགས་རྗེ་རྨད་ཏུ་བྱུང་བས་བྱང་སེམས་གཞན་གྱིས་སྤངས་པའི་རྙིགས་མ་ལྔ་བདོའི་སེམས་ཅན་རྣམས་ཀྱི་ནང་དུ་འཚང་རྒྱ་བར་སྨོན་ལམ་མཛད་དེ་སྙིང་རྗེ་པད་དཀར་ལས་རྒྱ་མཚོའི་རྡུལ་གྱི་སྨོན་ལམ་ཆེན་པོ་ལྔ་བརྒྱའི་གཅིག་འདི་ཡིན་ལ། དུས་ཀྱི་རྙིགས་མ་རྩོད་ལྡན། ལྟ་བའི་རྙིགས་མ་འཇིག་ཚོགས་སུ་ལྟ་བ་དྲུག་བཅུ་རྩ་གཉིས་སོགས་ཚངས་པ་འདྲ་བའི་མདོ་ལས་བཤད་པའི་མུ་སྟེགས་ཀྱི་ལྟ་བ་རྒྱས་པ་ཉོན་མོངས་པའི་རྙིགས་མ་སེམས་ཅན་རྣམས་དུག་གསུམ་རབ་ཏུ་རྒྱས་པ། སེམས་ཀྱི་རྙིགས་མ་ཤིན་ཏུ་གདུལ་དཀའ་བ། ཚེའི་རྙིགས་མ་ཚེ་ལོ་བརྒྱ་པ་སྟེ་རྙིགས་མ་ལྔའི་དུས་ལ་གཟིགས་ནས་དགའ་ལྡན་ནས་འཕོ་བ་ནས་སངས་རྒྱས་པ་དང་ཆོས་འཁོར་བསྐོར་བར་བསྟན་སྟེ་ལྟ་བའི་རྙིགས་མ་བཅོམ་ནས་བྱང་གྲོལ་ལ་འགོད་པར་གསུངས་ཀྱི། སངས་རྒྱས་ཀྱིས་ཆོས་གསུངས་པས་ལྟ་བའི་རྙིགས་མ་བྱུང་ཟེར་བའི་སངས་རྒྱས་ལ་སྐུར་པ་འདི་འདྲ་བདུད་སྡིག་ཅན་གྱིས་ཀྱང་སྔོན་མ་བཏབ་བོ། །སྟོང་པ་ཉིད་ནི་སངས་རྒྱས་ཐམས་ཅད་ཀྱི་ཆོས་ཀྱི་མཛོད་ཡིན་སྟེ་མདོ་རྒྱུད་ཕལ་ཆེར་ལས་ཨ་ཞེས་བྱ་བ་ནི་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ་ཞེས་དང༌། ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་ཇི་སྙེད་གསུངས་པ་ཀུན། །སྟོང་པ་ཉིད་ལ་གཞོལ་ཞིང་འབབ། །ཅེས་དང༌། ཏིང་ངེ་འཛིན་རྒྱལ་པོ་ལས། སངས་རྒྱས་ཇི་སྙེད་ཐམས་ཅད་ཀྱིས། །ཆོས་རྣམས་མང་པོ་རབ་བཤད་པ། །ཆོས་རྣམས་ཐམས་ཅད་སྟོང་པ་ཉིད། །མི་གང་དོན་ལ་མཁས་པ་དག །ཚིག་འདི་བསླབས་པར་གྱུར་པ་ལ། །སངས་རྒྱས་ཆོས་རྣམས་དཀོན་མ་ཡིན། །ཞེས་དང༌། ན་མཁའ་མཛོད་ཀྱི་མདོ་ལས། ཚངས་པ། གནས་གཅིག་དུ་ཆོས་ཐམས་ཅད་ཡང་དག་པར་འདུའོ། །དེ་ཅིའི་ཕྱིར་ཞེ་ན་སྟོང་པ་ཉིད་ནི་གནས་སྟེ་སྟོང་པ་ཉིད་དུ་ཆོས་ཐམས་ཅད་ཡང་དག་པར་འདུའོ་ཞེས་སོ། །(ཇ༡༢༡བ)

[Full Size]

མདོ་སྡུད་པར། ཆོས་ཀུན་སྐྱེ་མེད་སྟོང་པའི་ཚུལ་དུ་རབ་ཤེས་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་སོགས་བགྲང་ལས་འདས་པར་གསུངས་ཤིང༌། །མཁན་པོ་བོ་དྷི་ས་ཏྭ་ནི་འཕགས་པ་ཀླུ་སྒྲུབ་ཀྱི་ལུགས་འཛིན་པ་ཡིན་ལ་དེས་ནི་དབུ་མ་རྩ་བར། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །ཞེས་སྟོང་ཉིད་ནི་ལྟ་བའི་རྙིགས་མ་སེལ་བའི་བཀྲུ་སྨན་ལྟ་བུར་གསུངས་ཅིང་རྒྱན་སྟུག་པོ་བཀོད་པའི་མདོ་ལས་ཀྱང༌། ལུས་ཅན་རྣམས་ལ་ཡོད་པ་ཡི། །ལྟ་བ་རྣམ་པར་སྤང་བའི་ཕྱིར། །སྟོང་པ་ཉིད་ཀྱི་ཚུལ་བསྟན་ཏོ། །ཅེས་བཤད་ཏོ། །འཕགས་པ་ཀླུའི་རྗེས་སུ་འབྲང་བ་རྒྱལ་སྲས་ཞི་བའི་ལྷས་ཀྱང༌། རྨོངས་པ་སྡུག་བསྔལ་ཅན་དོན་དུ། །འཁོར་བར་གནས་པ་འགྲུབ་འགྱུར་བ། །འདི་ནི་སྟོང་ཉིད་འབྲས་བུ་ཡིན། །དེ་བས་སྟོང་པ་ཉིད་ཕྱོགས་ལ། །སུན་འབྱིན་པ་ནི་འཐད་མ་ཡིན། །དེས་ན་ཐེ་ཚོམ་མི་ཟ་བར། །སྟོང་པ་ཉིད་ནི་བསྒོམ་པར་བྱ། །ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །མྱུར་དུ་ཐམས་ཅད་མཁྱེན་འདོད་པས། །དེ་ནི་ཇི་ལྟར་སྒོམ་མི་བྱེད། །དངོས་གང་སྡུག་བསྔལ་སྐྱེད་བྱེད་པ། །དེ་ལ་སྐྲག་པ་སྐྱེ་འགྱུར་མོད། །སྟོང་ཉིད་སྡུག་བསྔལ་ཞི་བྱེད་པ། །དེ་ལ་འཇིགས་པ་ཇི་ལྟར་སྐྱེ། །ཅེས་བཞེད་པ་ཡིན་ལ་སློབ་དཔོན་ཀ་མ་ལའི་སྒོམ་རིམ་གསུམ་དང་དབུ་མ་སྣང་བར་སྟོང་པ་ཉིད་ལྟ་བའི་རྙིགས་མ་ཡིན་ནོ་ཞེས་བྲིས་པ་འདུག་གམ་ལྟོས་ཅིག་དེས་ན་སྟོང་ཉིད་དང་སྒྱུ་མ་ལྟ་བུ་དང་སྤྲུལ་པ་ལྟ་བུ་སོགས་ལ་སྡང་ཞིང་སྨོད་པར་བྱེད་པ་དེ་ནི་དམིགས་པ་ཅན་ཞེས་བྱ་སྟེ་དད་པའི་རྫས་ཆུ་ཕོར་གང་ཡང་མ་གནང་ཞིང་དེ་ངའི་ཉན་ཐོས་མ་ཡིན་ང་ཡང་དེའི་སྟོན་པ་མ་ཡིན་ཞེས་འཇིག་རྟེན་འཛིན་གྱི་མདོ་དང་ཚུལ་ཁྲིམས་འཆལ་པ་ཚར་གཅོད་པའི་མདོ་ལས་རྒྱས་པར་གསུངས་སོ། །ཧྭ་ཤང་གི་ལུགས་དེ་(ཇ༡༢༢ན)

[Full Size]

ནི་འཁོར་བ་དངོས་པོར་ཞེན་པས་དེར་ལྷུང་གིས་དྭོགས་པས་དགེ་སྡིག་གཉིས་ཀ་མི་བྱེད་པ་དང་མྱང་འདས་དངོས་པོར་ཞེན་པས་ཅི་ཡང་མ་བྱས་པ་དེས་ཐོག་དུ་རེ་བའི་ཕྱིར་དམིགས་པར་ལྟ་བ་སྟུག་པོ་ཡིན་ནོ། །སེམས་ངོ་རྟོགས་ན་གྲོལ་བར་འཆད་པ་རྣམས་ཀྱང༌། ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། །ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། །ཞེས་དང༌། སེམས་ལས་གཞན་མེད་པར་ནི་བློས་རིག་ནས། །ཅེས་སོགས་བཤད་པ་ལྟར་མཐར་སྐད་ཅིག་གཅིག་དང་ལྡན་པའི་ཤེས་རབ་ཀྱིས་དེ་ཁོ་ན་ཉིད་མཐོང་བས་འཚང་རྒྱ་བར་གསུངས་པ་དང༌། སྦྱོར་ལམ་ཆོས་མཆོག་གི་མཐར་སྐད་ཅིག་གཅིག་དང་ལྡན་པའི་ཤེས་རབ་ཀྱིས་མཐོང་བའི་ལམ་རྟོགས་པ་དང༌། དེ་དང་རྗེས་སུ་མཐུན་པ་རང་སའི་ཤེས་རབ་ཀྱི་མཐོང་བས་དྲོད་རྩེ་བཟོད་མཆོག་གི་མཐོང་བསྐྱེད་པ་སོགས་ལ་སེམས་ངོ་རྟོགས་པ་ཅེས་མིང་བྱས་པར་ཟད་ལ་ཤེས་རབ་ཀྱི་མཐོང་བ་དེས་ཟིན་པའི་ཚོགས་གཉིས་ཟུང་འཇུག་དུ་སྤྱད་པས་འཚང་རྒྱ་བར་འདོད་པ་ཡིན་ལ་ཧྭ་ཤང་གི་སྒོམ་པ་དེ་ནི་འདུ་ཤེས་བཀག་པའི་སྒོམ་པ་སྟེ་འདུ་ཤེས་མེད་པ་པར་གོལ་བའི་ཆ་མཐུན་ཡིན་ཡང་དེའི་གོལ་ས་དངོས་ནི་མ་ཡིན་སྟེ་བསམ་གཏན་བཞི་པའི་དངོས་གཞི་ཐོབ་ནས་འདུ་ཤེས་དང་ཚོར་བ་བཀག་སྟེ་བསྒོམས་ན་དེར་འགྱུར་བ་ཡིན་ཡང་བསམ་གཏན་བཞི་པའི་དངོས་གཞི་ཡང་འཐོབ་དཀའ་བའི་ཕྱིར་རོ། །ཧྭ་ཤང་གི་དཔེ་དོན་དགག་པ་དེ་དག་ཀྱང་ནུས་པ་དམན་སྟེ་ན་མཁའ་ལྡིང་གཅིག་ཆར་དུ་འདབ་གཤོག་རྫོགས་པ་ལོས་ཡོང་སྟེ་འཇིག་རྟེན་གདགས་པ་ལས་ན་མཁའ་ལྡིང་བརྫུས་སྐྱེས་ཀྱིས་ཀླུ་སྐྱེ་གནས་བཞི་ཀ་ཟ་བ་སོགས་མཁའ་ལྡིང་བརྫུས་སྐྱེས་བཤད་པའི་ཕྱིར་དོན་ཡང་མ་ཁེགས་སྟེ་རྣམ་པར་མི་རྟོག་པ་སྒོམ་པ་ནི་རང་ལུགས་ལ་ཡང་འདོད་དགོས་ལ་དེའི་ཚེ་སྔར་གྱི་ཐལ་འགྱུར་ཚུར་ལྡོག་ན་འཁོར་གསུམ་ག་ལ་ལན་གྱིས་དབེན་པའི་ཕྱིར་རོ། །དེས་ན་རྒྱ་གར་གྱི་མཁས་པ་ཉི་ཟླ་ལྟ་བུ་ལ་དེ་འདྲའི་རིགས་པའི་མུ་གེ་གར་ལྡང༌། དེ་དག་ནི་ཕྱིས་ཀྱི་རྟོག་གེ་པ་ཟབ་དོན་ལ་སྡང་བ་ཆོས་སྤོང་ལ་མཁས་ཉམས་དང་ཕྲག་དོག་ལ་ཁྱད་ནོར་རེ་བ་(ཇ༡༢༢བ)

[Full Size]

རྣམས་ཀྱིས་བཅུག་པར་གོ་སླའོ། །སྟོན་རྩེན་གྱི་རྩོད་པ་ཞི་ནས་སླར་བསྟན་པ་ལ་བྱ་བ་མཛད་ཚུལ་ནི་རྦ་བཞེད་ལས། དེ་ནས་ཆོས་འཁོར་གྱི་རྐྱེན་ཉིས་བརྒྱ་ལྔ་བཅུ་བླ་ནས་གནང་སྟེ་བཅོམ་ལྡན་འདས་ཀྱི་རིང་ལུགས་ལ་ལོ་རེའི་ཟླ་བ་གཅིག་ལ་ནས་ཁལ་བདུན་བཅུ་རྩ་ལྔ། ན་བཟའ་ནི་མང་སྟེ་འཕན་གྱི་བྲུངས་ལ་སྦྱོར། ན་བཟའ་ཕྲུགས་རེ་རེ། སྤོད་མར་སྲང་སྟོང་དང་བརྒྱ། ཆིབས་དངོག་ཐེག་པ་རེ་རེ། ཤོག་བུ་དེབ་བཞི། གནག་ཚ་ཡུག་གསུམ། ལན་ཚྭ་ཟད་ལེན། མཆིམས་ཕུའི་སྒོམ་ཆེན་ཉི་ཤུ་རྩ་ལྔ་ལ་ནས་ཁལ་ལྔ་བཅུ་རྩ་ལྔ། སྤོད་མར་སྲང་བརྒྱད་བརྒྱ་རེ། ཆིབས་པ་རེ། ན་བཟའ་དྲུག་ཕྲུགས་རེ། ཆོས་གྲའི་སློབ་དཔོན་དུ་བསྐོ་བ་བཅུ་གསུམ་ལ་ནས་ཁལ་ལྔ་བཅུ་རྩ་ལྔ་ལྔ། ན་བཟའ་ཕྲུགས་རེ། ཆབ་མར་སྲང་བརྒྱད་བརྒྱ་རེ། མཚམས་ཀྱི་བནྡྷེ་རང་ག་མ་རྣམས་ལ་གང་ཟག་རེ་རེ་ལ་ནས་ཁལ་བརྒྱད་རེ། ཤོག་བུ་དེབ་གཉིས་རེ། སྣག་ཚ་ཡུག་རེ། སློབ་གཉེར་བ་ཉི་ཤུ་རྩ་ལྔ་ལ་རེ་རེ་ལ་གནས་ཁལ་ཉི་ཤུ་རྩ་ལྔ་རེ་གོས་སུམ་ཕྲུགས་རེ་རྒྱུན་དུ་གནང་ནས། དཀོནད་ཅོག་གསུམ་གྱི་རྟེན་ཡུན་རིང་དུ་གནས་པའི་ཆེད་དུ་དཀོན་མཆོག་གི་རྟེན་ལ་འབངས་མི་ཁྱིམ་བརྒྱ་བནྡྷེ་རེ་རེ་ལ་འབངས་མི་ཁྱིམ་གསུམ་གསུམ་དུ་བཅད། འབངས་ལྷ་རིས་ལ་བླ་ནས་དབང་མི་བྱ་བར་ཆད་ནས་དབང་དགེ་འདུན་ལ་བསྐུར། ལྷ་ཆོས་དར་བར་མཛད་པས་རྗེ་ལྷ་སྲས་བཀའ་དྲིན་ཆེ་བ་ལགས་སོ། །སླད་ཀྱིས་བཙན་པོ་སློབ་དཔོན་པདྨ་སམྦྷ་ཝའི་ཆོས་ཀྱང་འཕྲོ་ལ་ལུས་པས་ཐུགས་མ་ཚིམ་ནས་བཻ་རོ་ཙ་ན་དང་གཙང་བཙུན་ལེགས་གྲུབ་གཉིས་འཚོལ་དུ་བཏང༌། སླར་ལོག་པ་ལ་པཎྜི་ཏ་མ་བྱོན་པས་གོ་བ་མ་ཆེ་སྟེ་རྒྱ་གར་གྱི་སྙན་ཕྲའི་དབང་དུ་ཐལ་ནས་བཻ་རོ་ཙ་ན་ཚ་བ་རོང་དུ་བསྐྲད། ཀ་མ་ལ་ཤཱི་ལ་མུ་སྟེགས་ཀྱིས་གཤེད་མ་བཏང་ནས་ནུབ་མོ་སྒྲ་བསྒྱུར་གྱི་ཁང་པར་གཟིམས་མལ་དུ་མཁལ་མ་མཉེས་ནས་བཀྲོངས་སོ་ཞེས་བྱུང་ངོ༌། །དེ་ནས་ལྷ་སྲས་མུ་ཏིག་བཙན་པོ་ཡིས། །ཞང་བློན་དབུ་རིངས་བསད་པས་བྱང་དུ་སྤྱུགས། །མགོས་ཀྱིས་ཞལ་ལྕེ་དགའ་གསུམ་བྱ་བར་བཅད། །ཡེ་ཤེས་(ཇ༡༢༣ན)

[Full Size]

དབང་པོས་ཁམ་གྱི་ཟས་སྤངས་སྟེ། །འདས་ནས་རིང་སྲེལ་མཆོད་རྟེན་བརྒྱ་རྩ་བྱས། །སྤྲུལ་པའི་ཆོས་རྒྱལ་ཁྲི་སྲོང་ལྡེ་བཙན་དེས། །ལྷ་སྲས་ཐུ་བོ་མུ་ནེ་བཙན་པོ་ལ། །རྒྱལ་སྲིད་གཏད་སྟེ་ཆོས་ཀྱི་རྒྱལ་པོར་བསྐོས། །ཟུར་མཁར་སྨིག་མའི་ཚལ་དུ་སྒོམ་དུ་གཤེགས། །སྐུ་ཡི་བང་སོ་མུ་ར་རི་ལ་བརྩིགས། །གྲལ་ནི་ཡབ་ཀྱི་རྒྱབ་ངོས་གཡས་ན་ཡོད། །ཡབ་ཀྱི་འོད་པ་སྲུང་བ་ཡིན་ནོ་སྐད། །ནང་དུ་དཀོར་ནོར་རིན་ཆེན་སྣ་ཚོགས་བཀང༌། །མིང་དུ་འཕྲུལ་རི་གཙུག་སྣང་བྱ་བར་བཏགས། །རྩ་བར་རྡོ་རིང་ཡི་གེ་ཅན་ཞིག་བཙུགས། །འདི་ནི་བོན་བློན་རྣམས་ཀྱི་སེམས་སྲུང་ཕྱིར། །རྒྱལ་པོ་བཞུགས་དུས་ཉིད་དུ་བརྩིགས་སོ་སྐད། །མུ་ནེ་བཙན་པོས་མཆོད་ཆེན་བཞི་བཙུགས་ཅིང༌། །བོད་འབངས་ལྟོགས་ཕྱུག་ལན་གསུམ་བར་དུ་བསྙམས། །ལོ་གཅིག་ཟླ་དགུ་སྲིད་མཛད་ཡུམ་གྱིས་བཀྲོངས། །ཨག་ཚོམས་བང་སོའི་གཡས་ངོས་མདུན་དུ་བརྩིགས། །བང་སོའི་མིང་ལ་སྐྱ་རི་ལྡེམ་བུ་ཟེར། །མུ་ཏིག་བཙན་པོ་སྣ་ནམ་པ་ཡིས་བཀྲོངས། །དོན་མཁར་མདའ་རུ་བང་སོ་སྐྱ་ལྡེམ་བརྩིགས། །དེ་ཡང་རྦ་བཞེད་ལས། རྦ་རཏྣ་འདའ་ཀར་ཇོ་མོ་ཡིད་བཞིན་འཁོར་ལོས་བསྒྱུར་བའི་སྐུ་གཟུགས་ཀྱིས་སྤྱན་ཆབ་ཕྱུང༌། ཡེ་ཤེས་དབང་པོ་ཚེ་འདའ་ཀར་མི་མ་ཡིན་དག་གིས་བསུ་བའི་སྒྲ་བྱུང༌། ན་མཁའ་ལ་ཡང་མཆོད་པ་དཔག་མེད་བྱུང༌། འཕགས་པ་ལ་ཡེ་ཤེས་དབང་པོ་ཐེ་ཚོམ་ཞུ་ཞིང་མཆིས་པའི་དྲུང་དུ་བཙན་པོ་ལྷ་སྲས་གཤེགས་ནས་འབྲས་ཐུག་དྲངས་པ་གསོལ་ནས། རྗེ་ལྷ་གཅིག་གི་ཕམ་ཕབས་འདི་འཚལ་ནས་དེང་སླན་ཆད་ཁམ་གྱི་ཟས་སྤངས་སོ། །ཏིང་ངེ་འཛིན་དང་ཟས་སུ་བརྗེའོ། །ཆོས་དང་ཟས་སུ་བརྗེའོ་ཞེས་མཆིས་ནས་སྐུ་འདས་སོ། །དེའི་ཚེ་ན་མཁའ་ནས་སྒྲ་བྱུང༌། བྱ་ཐམས་ཅད་གདུང་བའི་སྐད་འདོན། གདུང་ཁང་ཧས་པོ་རིའི་ཡར་སྣར་བརྩིགས་ན་ལེགས་(ཇ༡༢༣བ)

[Full Size]

བྱ་བ་བྱུང་སྟེ་བརྩིགས། ཡེ་ཤེས་དབང་པོའི་བུ་མོ་སྤྱན་རས་གཟིགས་དང་དགེ་ལྡེམ་གཉིས་ལས་སྤྱན་རས་གཟིགས་ལ་ཕའི་མཆོད་རྟེན་རྩར་མཆོད་རྟེན་བརྩིག་པའི་ས་བཟང་པོ་ཀླུས་བསྟན་སྟེ་རྗེ་འབངས་མི་མང་པོའི་བསོད་ནམས་ཀྱི་རྟེན་དུ་བྲག་དམར་མས་གོང་དུ་མཆོད་རྟེན་བརྒྱ་རྩ་བརྒྱད་བརྩིགས། མཆོད་རྟེན་མ་ཚར་གྱི་བར་དུ་ཆུ་མིག་དང་ས་བཟང་པོ་ཀླུས་བཏང༌། རྡོ་བ་རྒྱ་གར་གྱི་ཡི་གེ་ཅན་བྱུང་སྟེ་བརྩིགས་པས་ལྷ་མོ་བཅོ་བཅོ་བརྒྱན་བརྒྱན་བ་གསུམ་གྱིས་བསྐོར་བ་བྱས་སྟེ་སུ་བདེ་བ་ཅན་དུ་འགྲོ་འདོད་པ་དེ་མཆོད་རྟེན་བརྒྱ་རྩ་བརྒྱད་པོ་འདི་ལ་བསྐོར་བ་གྱིས་ཅིག་ཟེར། སྤྱན་རས་གཟིགས་ཀྱི་རྨི་ལམ་དུ་ཁྱེད་སྤུན་སྣང་བ་མཐའ་ཡས་ཀྱི་ཞིང་ཁམས་སུ་འགྲོ་བར་འདོད་ན་མཆོད་རྟེན་འདི་ཞལ་སྲོས་ཅིག་ཞེས་པ་བྱུང༌། ཆབ་འོག་གི་འབངས་སུམ་པ་ལས་ཆོས་ལ་གནག་པ་མ་མཆིས་ནས་ཆོས་ལ་གནས་པར་དམིགས་ཀྱིས་བཏུལ་ནས་དགེ་བ་ལ་གཟུད་པའི་སླད་དུ་རྦ་བཟའ་ལྷ་ལྡེམ་ཞང་བློན་ཁྲི་སུམ་བརྩིགས་ལ་བསྩལ། བླའི་བཀའ་ལུང་བཞིན་སུམ་པ་ཁྲི་ལྡེ་བཞི་དགེ་བ་བཅུ་ལ་བཙུད། སློབ་མ་ཡང་བནྡྷེ་རླངས་སུ་ག་ཏ་དང༌། དཔལ་གྱི་སེང་གེ་དང༌། ཨཱརྻ་ལ་སོགས་པ་སྟེ་བླ་ནས་སློབ་མ་གང་བཟང་གང་མཁས་གང་མང་ཉང་ཤ་མི་དང་རིང་ལུགས་བསྒྲུན་པས་ལྷ་ལྡེམ་སྟངས་བཟང་ནས་བྱ་དགའ་ཆེ་ཐང་དུ་བྲན་ཁྱིམ་བཅུ་གཉིས་ལ་སོགས་པ་བསྩལ། རླངས་རིལ་དགེ་བ་ལ་བཙུད། རླངས་ཀླུ་རྒོད་དང་སྟག་ཚབ་ནི་ཆོས་དགྱིད་དུ་མ་ཉན་པས་སྟག་ཚབ་རྒྱས་མགོ་བཅད་སྟེ་བཀུམ། ཀླུ་རྒོད་ནི་རྦ་བཟའི་ནང་ན་དད་པ་ཆེ་བ་རྦ་བཟའ་ལེགས་བཙུན་བླངས་ནས་མནའ་མར་བསྩལ་སྟེ་བོན་བཅད་ལྷ་ཆོས་བགྱིས་དད་པ་སྐྱེས་པས་ཕྱིན་ཆད་ལེགས་པ་མང༌། དྷརྨ་མཛངས་བླུན་མཐོང་བས་ཀླུ་རྒོད་རབ་ཏུ་བྱུང་སྟེ་སུམ་པ་བློན་དཔོགས་འདི་ཕན་ཆད་ཆོས་ལ་དགའ་བར་གྱུར་ཏོ་ཅེས་བྱུང་ངོ༌། །མདོར་ན་སྤྲུལ་པའི་ཆོས་ཀྱི་རྒྱལ་པོ་ཁྲི་སྲོང་ལྡེ་བཙན་དེ་ནི་འཕགས་པ་འཇམ་དཔལ་གྱི་སྤྲུལ་པ་སྟེ་ཕྱག་ལ་ཨུཏྤ་ལའི་རི་མོ་མངའ། རྒྱ་གར་(ཇ༡༢༤ན)

[Full Size]

ནས་རིང་སྲེལ་ལན་དུས་རྟ་དམག་སྤྲུལ་པ་སོགས་རྫུ་འཕྲུལ་དང་ལྡན། གཙུག་ལག་ཁང་བརྒྱ་དང་རྩ་བརྒྱད་བཞེང་པའི་ཐུགས་དམ་བཅས་སྟེ་སྟོན་རྩེན་མ་མཐུན་པའི་དུས་ཅུང་ཟད་ཆག་ཀྱང་ཕྱིས་མཐར་ཕྱིན་པར་བཞེངས། སྔར་ཡབ་མེས་ཀྱི་རིང་བཀའ་ཁོན་བྱུང་བའི་རྒྱ་ཧོར་ལྗང་གསུམ་དང་འཐབ་པས་རྩང་མ་ཚོད་བསད་པས་མི་མ་ཟད་ནས་བློན་པོ་ཁྲི་སུམ་རྗེ་སྟག་སྣར་གྱིས་མཇལ་དུམ་བགྱི་བར་གླེངས་པས་རྒྱ་ན་རེ་ཉི་ཟླ་གཟའ་སྐར་ངའི་ཐོག་ནས་འཆར་སྟེ་གནམ་གྱི་མགོ་བོ་ང་དབང་བས་དུམ་ངའི་མདུན་དུ་བྱ་དགོས་ཟེར། ཧོར་ན་རེ་སྐར་མ་སྨིན་བདུན་གནམ་གྱི་གཞུང་ཕུར་ཡིན། དེའི་འོག་ན་ང་འདུག་སྟེ་གནམ་གྱི་གཞུང་ང་དབང་བས་སྡུམ་ངའི་གོ་ཁར་བྱ་དགོས་ཟེར། ལྗང་ན་རེ་དགུ་ཚིགས་སྐྱ་མོ་གནམ་གྱི་གཞུང་ཐིག་ཡིན། དེའི་འོག་ན་ང་འདུག་སྟེ་གནམ་གྱི་གཞུང་ཐིག་ང་དབང་བས་སྡུམ་ངའི་སར་བྱ་དགོས་ཟེར། སླད་ནས་མཇལ་བའི་དུས་བྱས་སྟེ་དེ་རེས་གྱེས། ཁྲི་སུམ་རྗེས་འཕྲུལ་བཤམས་སྟེ་དབྱར་མ་ཐང་དུ་ཚོགས་ཐིང་ཤུན་ཏུ་བཅུག་པའི་ཐག་པ་ན་མཁའ་ལ་བརྐྱངས་པ་ལ་ལྷང་ཚེར་གྱི་ཉི་ཟླ་གཟའ་སྐར་གྱི་གཟུགས་བཏགས། ཐིང་ཤུན་བསྐྱིལ་བའི་འོག་དུ་མེ་བུས་སྟེ་རླངས་པ་ན་བུན་དུ་ཆགས་པར་བྱས། ངང་པ་གསེར་གྱིས་བྱུགས་པ་རོལ་དུ་ཁྲིད་ནས། ཉིན་མོ་གནམ་ལ་སྐར་མ་འཆར་བའི་ཡུལ། །ཉི་ཟླ་གཟའ་སྐར་དུས་གཅིག་འཆར་བའི་ཡུལ། །ལོ་སར་སྒང་ལ་ན་བུན་ཆགས་པའི་ཡུལ། །གངས་རི་ཤེལ་གྱི་མཆོད་རྟེན་ཆགས་པའི་ཡུལ། །མི་རྗེ་ལྷས་མཛད་གསེར་བྱ་རོལ་དུ་ཁྲིད། །ཁྱེད་ཐམས་ཅད་ལས་ང་ཁྱད་ཏུ་འཕགས་པས་སྡུམ་ངའི་མདུན་དུ་བྱེད་དགོས་ཅེས་སྨྲས་པས་ལན་མ་ཐེབས་སྟེ་བོད་རྒྱལ་པོའི་དྲུང་དུ་མཇལ་དུ་མ་བྱས་སྐད། ཁྱད་པར་དུ་སངས་རྒྱས་ཀྱི་བསྟན་པ་ཉི་མ་ཤར་བ་བཞིན་མཛད་དེ་བཙན་པོ་ཉིད་ཀྱིས་ཀྱང་བཀའ་ཡང་དག་པའི་ཚད་མ་བམ་པོ་བདུན། དེ་མདོར་བསྟན་པ་བམ་པོ་གཅིག་དེ་བཞིན་གཤེགས་(ཇ༡༢༤བ)

[Full Size]

པའི་སྐད་བརྡ་བམ་པོ་ལྔ། བྱམས་པའི་བསྟོད་ཆེན་བམ་པོ་གཅིག་ལྷག་པ་སོགས་བསྟན་བཅོས་གཞུང་ཚན་ཆེ་བ་དང༌། གྲུབ་པའི་མཐའ་དགྲོལ་བ། དབུ་མའི་གཟེར་བུ། བསམ་གཏན་གྱི་དྭོགས་པ་བརྒྱད་བསལ་བ་ལྷ་བཙན་པོའི་བཀས་བཅད་སོགས་དང༌། འཕགས་པ་རྣམ་སྣང་དང༌། ཤཱཀྱ་ཐུབ་པ་དང༌། འཇམ་དཔལ་དང༌། བྱམས་པ་དང༌། མི་གཡོ་མགོན་དང༌། བྱང་ཆུབ་སེམས་དཔའ་བརྒྱ་ལ་བསྟོད་པ་སོགས་གཞུང་ཚད་ཆུང་བའི་བསྟན་བཅོས་དུ་མ་མཛད་དོ། །དཀར་ཆག་འཕང་ཐང་མར་ཡུམ་སྟོང་ཕྲག་བརྒྱ་པའི་འགྲེལ་ཆེན་བམ་པོ་དོན་བརྒྱད་པ་ཁྲི་སྲོང་གིས་མཛད་པར་བཤད་ཀྱང་དཀར་ཆག་མཆིམས་ཕུ་མ་དང་ལྡན་དཀར་མ་གཉིས་སུ་དེ་གཉིས་རྒྱ་གར་མར་བཤད་པས་དཾཥྚ་སེ་ནའི་འབུམ་ཊཱིཀ་དེ་ཡིན་ནོ་ཞེས་ཀུན་མཁྱེན་བུས་བཤད་དོ། །གཞན་ཡང་དགོངས་པ་ངེས་འགྲེལ་གྱི་མདོའི་འགྲེལ་པ་མུ་ཏིག་བཙན་པོས་མཛད་པ་དང༌། ཇོ་མོ་བྱང་ཆུབ་རྗེའི་སྨོན་ལམ་སོགས་ལྷ་སྲས་དང་བཙུན་མོས་མཛད་པ་དང༌། བཻ་རོ་ཙ་ནས་མཛད་པའི་དོན་གསལ་སྒྲོན་མེ། རིགས་པ་དྲུག་བཅུ་པ་ལས་བཏུས་སྟེ་མདོར་བཤད་པ། སྣང་མཐའི་མཚན་བརྗོད་ལ་སོགས་དང༌། དཔལ་དབྱངས་ཀྱིས་གཅེས་པ་བསྡུས་པའི་འཕྲིན་ཡིག །ཀ་བ་དཔལ་བརྩེགས་ཀྱིས་གསུང་རབ་རིན་པོ་ཆེའི་གཏམ། ཕྱིའི་ཡུལ་དྲན་རྒྱུད་དུ་ཡོད་པར་འདོད་པ་སེལ་བ། མཚན་ཉིད་གསུམ་མདོར་བསྟན། ཞང་ཡེ་ཤེས་སྡེས་ལྟ་བའི་ཁྱད་པར། བཟང་སྤྱོད་ཀྱི་འགྲེལ་པ་བཞིའི་དོན་བསྡུས། འཇིག་རྟེན་ཕ་རོལ་སྒྲུབ་པ། དགོངས་ལྡེམ་དགོངས་བཞིའི་བརྗེད་བྱང༌། ཅོག་རོ་ཀླུའི་རྒྱལ་མཚན་གྱིས་དགོངས་པ་ངེས་འགྲེལ་གྱི་རྒྱ་ཆེར་འགྲེལ་བམ་པོ་བཞི་བཅུ། ངེས་པའི་དོན་དབུ་མ། ཤེར་ཕྱིན་མདོར་བསྡུས། ཕྲེང་བའི་རྒྱན། ཆོས་གཏན་ལ་དབབ་པའི་གལ། དཔལ་བརྩེགས་དང་ཀླུའི་རྒྱལ་མཚན་གྱི་བརྒལ་ལན་བཞི་ཕྲུགས། སློབ་དཔོན་ཤེས་རབ་(ཇ༡༢༥ན)

[Full Size]

སྙིང་པོའི་དགོངས་འགྲེལ་བྱམས་ལེའི་བརྗེད་བྱང༌། པྲ་ཤ་སེ་ནའི་ཤེར་སྙིང་ཊཱི་ཀ །སློབ་དཔོན་བཀྲ་ཤིས་ཀྱི་དབུ་མ་རྒྱན་གྱི་བརྗེད་བྱང་བམ་པོ་བཅུ་དང་སྡོམ་པ་ཉི་ཤུ་པའི་འགྲེལ་པ། དཔལ་གྱི་ལྷུན་པོའི་དགེ་སློང་མའི་སོ་ཐར་གྱི་འགྲེལ་པ། ཨ་ཙརྻ་ཀ་ལ་ཡ་ན་དང༌། རིན་ཆེན་ཟླ་འབྱུང་དང༌། ཀོང་ཨུཏྤལ་ཀོ་ཥ་སོགས་ཀྱི་དྲིན་ལན། ལྕེ་ཁྱི་འབྲུག་གི་སྒྲའི་གནས་བརྒྱད་རྩ་འགྲེལ་དང༌། མ་བྱིན་ལེན་གྱི་སྐབས་ནས་མཁན་པོ་བཞིས་དཔྱད་པ་སོགས་ལོ་ཙཱ་བ་ཆེན་པོ་རྣམས་ཀྱིས་ཀྱང་བསྟན་བཅོས་མང་དུ་མཛད་ཅིང༌། བཻ་རོ་ཙ་ན། ལྡན་མ་རྩེ་མང༌། ཁ་ཆེ་ཨཱ་ནནྟ་སྟེ་ལོ་ཙཱ་བ་རྒན་གསུམ། གཉགས་ཛྙ་ན་ཀུ་མ་ར། འཁོན་ཀླུའི་དབང་པོ། རྨ་རིན་ཆེན་མཆོག་སྟེ་བར་པ་གསུམ། ཀ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ཞང་ཡེ་ཤེས་སྡེ་སྟེ་གཞོན་གསུམ་སྟེ་ལོ་ཙཱ་བ་རབ་དགུ་དང་ཕྱིས་བརྒྱ་རྩ་བརྒྱད་ཚང་བར་བྱུང་ཞིང་རབ་འབྲིང་ཐ་གསུམ་དུ་ཕྱེ་ནས་རབ་ཀྱིས་ཞུས་ཆེན། འབྲིང་གིས་བར་ཞུས། ཐ་མས་མཆན་བུའི་ལོ་ཙཱ་བ་བྱེད་སྐད། སྲས་ལ་ཆབ་སྲིད་བསྐོ་བ་སོགས་མཛད་ཚུལ་ནི་རྦ་བཞེད་ལས། ཡེ་ཤེས་དབང་པོ་འདས་པའི་ཚེ་བཙན་པོའི་ཞལ་ནས་ཨཱ་ཙརྻ་ཆེན་པོ་ཚེ་འདའ་བ་དང་སྦྱར་ན་ཁོ་བོའི་ཚེས་ཀྱང་རིང་པོ་མི་ཐུབ་བོ་གསུངས། ཡང་བཙན་པོའི་ཞལ་ནས། བར་དུ་སྟོན་མིན་གྱི་ཚིག་ཉན་སྟེ་ཆོས་སློབ་པ་དང་དྷརྨའི་དཔེ་ལེན་དུ་ཡང་མི་ཀུན་མ་བཏུབ། རྒྱ་གར་གྱི་ཆོས་དཔེ་ཡིད་ལ་མ་བཅགས་པ་ཙམ་དུ་བླངས་སྟེ་བསྒྱུར་ཟིན་ན་ཤྲི་ནཱ་ལེན་དར་རྒྱ་གར་གྱི་དྷརྨ་མེས་ཚིག་སྟེ་མ་ཚང་བ་རྒྱ་ཡུལ་དུ་ཆོས་བྱུང་ནས་ལོ་སྟོང་ཉིས་བརྒྱ་ལོན་སྟེ་གསུང་རབ་ཀྱི་དཔེ་ཚང་བར་བཞུགས་ན་རྒྱའི་ཆོས་མ་བསྒྱུར་བ་ཡིད་ལ་བཅགས་སོ་ཞེས་གསུངས་ནས་ཐུགས་ངན་མཛད། དགེ་འདུན་ལ་ཆོས་སློབ་ཀྱི་གྲ་བཙུགས་པ་ལས་ཡེ་ཤེས་དབང་པོ་འདས་ནས་བུ་མོ་སྤྱན་རས་གཟིགས་ཀྱིས་ཇོ་མོ་ཁྲོ་མོ་ལེགས་ལ་ཆོས་སློབ་ཀྱི་གྲ་གཟུགས་པར་གསོལ་བ་དང་ཇོ་མོས་བཙན་པོ་ལྷ་(ཇ༡༢༥བ)

[Full Size]

སྲས་ཀྱི་སྙན་དུ་གསོལ་སྟེ་བཙན་པོས་ཆོས་སློབ་ཀྱི་གྲ་བཙུགས་སོ། །དེ་ནས་བཙན་པོ་ལྷ་སྲས་ཀྱི་ཞལ་ནས། ཨ་ཙརྻའི་གསུང་དང་སྦྱར་ན་ཁོ་བོའི་ཚེས་ཀྱང་ཡུན་རིང་པོ་མི་ཐུབ་གསུངས་ནས་ཐུགས་ལས་ཆུང་ངུ་གཞོལ་བར་བཞེད་ནས་པཎྜི་ཏ་ཅིག་སྤྱན་འདྲེན་དུ་བཏང་བས་ཨ་ཙརྻ་བི་མ་ལ་མི་ཏྲ་བྱོན་པ་ལ་སློབ་དཔོན་པདྨ་སམྦྷ་ཝའི་ཆོས་འཕྲོ་ཞུས་ནས་སྒོམ་མཛད་པར་བཞེད་དེ། སྲས་མུ་ནེ་བཙན་པོ་ཆབ་སྲིད་ལ་བསྐོ་བ་དང༌། བློན་པོ་ཞང་དབུ་རིང་བློན་པོ་ལ་བསྐོ་བའི་གྲོས་དབུ་རྩེ་ན་བྱེད་ཅིང་བཞུགས་པ་ཇོ་མོ་མེ་སྒྲོན་གྱིས་མཐོང་སྟེ་ཐུགས་གཏུམ་པོས་ཆབ་སྲིད་སྣ་ནམ་པ་སྟེར་ངེས་སྙམ་སྟེ་མུ་ཏིག་བཙན་པོ་ལ་གསོལ་བས་ལྷ་སྲས་ཀྱིས་སྒོ་བར་དུ་ཆུ་གྲིས་བཀུམ། ཡབ་ཀྱིས་བཙུར་བཞེར་གར་སོང་ཞེས་གསུངས་པས་གྲི་ཁྲག་ཅན་དེ་བོར་ནས་དབུ་རིང་རྒྱང་རིང་པོར་སོང་ཟེར་སྟེ་བར་ཁང་དུ་བྲོས། རྗེའི་ཐུགས་ངམ་འགྱངས་ནས་གཡར་མཆུ་བྱུང་བར་དྭོགས་ཐུགས་མ་བདེ་བློན་མཛངས་བ་ཀུན་གྲོས་བྱས་སྟེ་བློན་ཆེན་པོ་མགོས་ཀྱིས་ཞལ་ཅེ་དགའ་གསུམ་དུ་བཅད། ཆབ་སྲིད་མུ་ནེ་བཙན་པོ་མངའ་བར་གྱིས་ཟེར་ནས། མི་ཆོས་ཐུན་བཙུགས་ལྟར་མཛད་ནས་བཏང༌། ཡབ་ཟུར་མཁར་དུ་སྒོམ་ཏུ་གཤེགས་སོ་ཞེས་བྱུང་ངོ༌། །ཡི་གེ་གཞན་ལས་འཛམ་གླིང་སུམ་གཉིས་མངའ་འོག་དུ་འདུས་ནས་སུམ་གཅིག་བསྡུ་བའི་ཕྱིར་ཞང་རྒྱ་ཚ་ལྷ་སྣང་གིས་དབུ་རྩེ་བར་ཁང་དུ་རྒྱལ་པོ་ལ་གྲོས་ཞུས། ཞང་གི་བུ་དབུ་རིང་སྒོ་སྲུང་བ་ན་ལྷ་སྲས་མུ་ཏིག་བཙན་པོ་ནང་དུ་འབྱོན་རིངས་པ་བཀག་པས་ཁྲོས་སྟེ་དབུ་རིང་བསད། དབུ་ངང་རིང་རིང་པོ་དེ་རྒྱང་རིང་རིང་པོར་བཏང་ཡོད་གསུངས་པས་ཞང་ལ་ངོ་ནག་པ་ཙམ་ཡང་མ་བྱུང་ཞེས་སྣང༌། ཞལ་ཅེ་དགའ་གསུམ་ནི་མགོས་ཀྱི་མཆིད་ནས་ཟུར་མཁར་མཆོད་རྟེན་གྱི་རྩར་ཞལ་ཅེ་ལེན་དུ་ཤོག་ཞིག་ཟེར་སྟེ་རྟ་བཞོན་ནས་སོང༌། དེར་ཕྱིན་པས་རྡོའི་མཆོད་རྟེན་འོག་མ་ལ་ཡི་གེ་བྲིས་ནས་རྗེས་འབངས་བསད་ན་མས་བུ་བརྡུང་བ་དང་འདྲ་སྟེ་ཐབས་མེད་ད་དུང་མཆོད་རྟེན་བར་མར་དྲིས་(ཇ༡༢༦ན)

[Full Size]

ཟེར་བ་བྱུང་བས་རྒྱལ་པོ་ཡབ་སྲས་མཉེས། བར་པ་ལ་འོན་ཡང་རེ་རེ་ནས་བསད་ན་འབངས་ཀྱིས་མི་ལང་རྒྱལ་པོ་འབངས་ལ་མིག་ཆེས་སྟེ་འགྲོ་ད་དུང་གོང་མར་དྲིས་ཅེས་པ་མཐོང་བས་འབངས་རྣམས་དགའ། གོང་མ་ལ་རྒྱལ་པོ་ཉིད་ཀྱིས་ཁྲིམས་མ་བསྲུངས་ན་འབངས་ལ་ཁྲིམས་མི་འཆགས་པས་ལྷ་སྲས་ལོ་དགུ་བྱང་དུ་སྤྱུགས་ལ་ཞང་ལ་སྟོང་དུ་ཡུལ་གྲུ་གཅིག་བྱིན་ཞེས་བྱུང་བས་སྣ་ནམ་པ་དགའ་སྟེ་དགའ་གསུམ་དུ་གྲགས་སྐད། རྗེ་ཁྲི་སྲོང་ལྡེ་བཙན་དེ་དང་བཙུན་མོ་ཚེས་སྤོང་བཟའ་མེ་ཏོག་སྒྲོན་གྱི་སྲས་བཞི་ལས་ཆེ་བ་མུ་ཁྲི་སྲོང་པོ་སྐུ་ཆུང་ངུ་ལ་གཤེགས་པས་བང་སོ་མེད། གཉིས་པ་མུ་ནེ་བཙན་པོ་ཡབ་ཀྱི་དགུང་ལོ་སོ་བཞི་པ་ཆུ་ཕོ་སྟག་ལ་འཁྲུངས། དེའི་ཕྱི་ལོ་ཆུ་ཡོས་ལ་མུ་ཏིག་བཙན་པོ་འཁྲུངས། དེའི་ཕྱིར་ལོ་ཤིང་འབྲུག་ལ་ཁྲི་ལྡེ་སྲོང་བཙན་རྣམས་རིམ་པར་འཁྲུངས། ཡབ་ཀྱིས་ང་ལྔ་བཞེས་པ་ཤིང་ཕོ་བྱི་བའི་ལོ་ལ་ཟུང་མཁར་སྨྱུག་མ་ཚལ་གྱི་ཕོ་བྲང་དུ་སྒོམ་པར་གཤེགས་སྟེ་སྲས་མུ་ནེ་དགུང་ལོ་ཉེར་གསུམ་པ་རྒྱལ་སར་བསྐོས། བཙུན་མོ་ཕོ་ཡོངས་བཟའ་ཡུམ་གྱི་སྐྱེ་བ་ཐུགས་བརྩེ་བས་སྲས་ལ་གཏད་གཉེར་མཛད། མུ་ནེས་བཙུན་མོ་རུ་ཡོངས་བཟའ་མདོ་རྒྱལ་ཁབ་ཏུ་བཞེས། བསམ་ཡས་སུ་དྲིལ་ཕྲེང་དང་བ་དན་དང་འཕན་ཆེན་པོ་མང་དུ་ཕྱར། ལྷ་ས་དང་ཁྲ་འབྲུག་དུ་འདུལ་བ་དང་མངོན་པའི་མཆོད་པ། བསམ་ཡས་སུ་མདོ་སྡེ་དང་མངོན་པར་བྱང་ཆུབ་པའི་མཆོད་པ་སྟེ་མཆོད་ཆེན་བཞི་བཙུགས། མཆོད་པའི་རྒྱུར་འབངས་རྣམས་ཀྱིས་ཡོ་བྱད་ཕུལ་ཞིག་གསུངས་པས་ལ་ལས་གསེར་གཡུ་དང་ཟབ་ཆེན་སོགས་ཕུལ། དབུལ་པོ་རྣམས་ཀྱིས་གོས་ཧྲུལ་སོགས་ཕུལ་བས་ངའི་འབངས་རྣམས་དད་པའི་ཁྱད་འདི་ལྟ་བུ་འོང་བ་ཅི་ཡིན་གསུངས་པས་བློན་པོ་རྣམས་ཀྱིས་འབྱོར་པ་ཆེ་ཆུང་གི་ཁྱད་པར་ཡིན་ཞུས་པས་ངའི་འབངས་ཕྱུག་དབུལ་མི་མཉམ་པ་མི་འོས་གསུང་ནས་ལྟོགས་ཕྱུག་(ཇ༡༢༦བ)

[Full Size]

བསྙམས། ཡང་དེ་མ་ཐག་སྔར་ལྟར་ཕྱུག་དབུལ་ཁྱད་ཞུགས་པས་ཡང་ལན་གཉིས་སུ་ལྟོགས་ཕྱུག་བསྙམས། ཡང་དེ་མ་ཐག་ཕྱུག་དབུལ་གྱི་ཁྱད་སྔར་ལྟར་ཞུགས་པས་འདི་ལྟ་བུ་འོང་བ་ཅི་ཡིན་གསུངས་པས་མཆོད་གནས་ལོ་པཎ་རྣམས་ཀྱིས་སྔར་གྱི་སྦྱིན་ཤུགས་ཡོད་མེད་ཀྱི་ཁྱད་ཡིན་ཞེས་རྒྱུ་འབྲས་སྙན་དུ་གསོལ་བས་ཤིན་ཏུ་ཐུགས་ཆེས་སྟེ་དཀོན་མཆོག་ལ་མཆོད་པ་ཆེར་མཛད། ཡབ་ཀྱི་བཙུན་མོ་ཕོ་ཡོངས་བཟའ་ལ་བྱམས་པར་མཛད་པས་ཡུམ་མེ་སྒྲོན་ཁྲོས་སྟེ་དུག་ཅན་གྱི་ཟས་དྲངས་པས་དགུང་ལོ་ཉེར་བཞི་པ་ཤིང་གླང་ལ་ཕོ་བྲང་ཡུམ་བུར་གཤེགས་སྟེ་ཆབ་སྲིད་ལོ་གཅིག་དང་ཟླ་བ་དགུ་བསྐྱངས་སོ། །དེ་ནས་ལྷ་སྲས་མུ་ཏིག་བཙན་པོ་ཆད་པ་འཁེལ་བ་བྱང་ནས་སྤྱན་དྲངས་སྟེ་བསྐོ་བར་བྱས་པ་ལམ་དུ་སྣ་ནམ་བས་ཆིབས་བཀྲོགས་སྟེ་ལྷུང་ནས་རྟ་གྲིར་འདས། རྒྱལ་རབས་ཁུངས་ཐུབ་སྔ་ཕྱི་ཐམས་ཅད་ལས་འདི་ཀ་བྱུང་ལ། སློབ་དཔོན་ཆེན་པོ་པདྨའི་རྣམ་ཐར་ཐང་ཡིག་ལེའུ་བརྒྱ་དང་གཅིག་པ་སོགས་ན། དོ་ཞག་དྲུག་བཅུ་རྩ་གཅིག་གླང་གི་ལོ། །རྒྱལ་པོ་ཉིད་ཀྱང་མི་རྟག་མྱ་ངན་འདའ། །ཞེས་སོགས་ཆོས་རྒྱལ་ཁྲི་སྲོང་ལྡེ་བཙན་གླང་ལོ་པ་དྲུག་བཅུ་རྩ་གཅིག་ལ་ལོ་སར་ལ་མཚན་མོ་རྟ་བརྒྱུགས་པས་ཆིབས་ཀྱིས་བསྐྱུར་ནས་འདས། དེ་གསངས་ནས་ལོ་གསུམ་སློབ་དཔོན་གྱིས་རྒྱལ་སྲིད་བཟུང་ནས་མུ་ཏིག་བཙན་པོ་བསྐོས། དེའི་དུས་སློབ་དཔོན་སྲིན་ཡུལ་དུ་གཤེགས་པ་ལ་ཐམས་ཅད་ཀྱིས་གཤེགས་སྐྱེལ་བྱས་ཅེས་སྣང་ཡང་འདི་སྐབས་ཕལ་ཆེར་ན་བོད་ཕྱི་རབས་ཀྱི་རྩོམ་རིགས་ཁོ་ན་སྣང་བས་ལྷད་བསྲེས་པ་ཅིག་ཡིན་པས་དྭོགས་ལ། རྒྱལ་སྲས་ལྷ་རྗེ་ཁྲིད་ཤོག་གསུངས་ནས་ལུང་བསྟན་མཛད་ཟེར་བ་ལ་དཔགས་ན་སད་ན་ལེགས་དང་མུ་ཏིག་བཙན་པོ་ནོར་བ་སོགས་ཀྱིས་དཔྱད་མི་བཟོད་པ་ཅིག་སྣང་ལ། གཏེར་མར་གྲགས་པ་ཁ་ཅིག་ལས་ཁྲི་སྲོང་གི་སྐུ་ཚེའི་ཚད་ལྔ་བཅུ་རྩ་ལྔ་ལས་མེད་པ་ལ་སློབ་དཔོན་གྱིས་ཚེ་སྒྲུབ་མཛད་པས་བཅུ་གསུམ་བསྲིངས་སྟེ་དྲུག་(ཇ༡༢༧ན)

[Full Size]

བཅུ་རྩ་དགུ་ལ་གཤེགས་ཅེས་ཀྱང་སྣང་ཞིང༌། བུ་སྟོན་ཆོས་བྱུང་ལས་ཀྱང་དྲུག་བཅུ་རྩ་དགུ་ལ་གཤེགས་པར་བྲིས་སོ། །རྒྱལ་རབས་སྔ་མ་ཕལ་དུ་ལྔ་བཅུ་རྩ་ལྔ་ལ་གཤེགས་པ་ཉིད་བྱུང་ལ་རྦ་བཞེད་ཏུ་ང་ལྔ་ལ་སྒོམ་དུ་གཤེགས་ཟེར་བ་ལས་མ་བྱུང་ཡང་ཨཱ་ཙརྻ་ཆེན་པོ་ཚེ་འདའ་བ་དང་སྦྱར་ན་ཁོ་བོའི་ཚེས་ཀྱང་རིང་པོ་མི་ཐུབ་གསུང་བ་སོགས་ཡེ་ཤེས་དབང་པོ་དང་རྒྱལ་པོ་སྐུ་ཚེ་ཚད་མཚུངས་པར་བཞེད་པ་ཡིན་པས་སྒོམ་དུ་གཤེགས་པའི་ལོ་དེ་ཉིད་ལ་གཤེགས་པར་དོན་གྱིས་གྲུབ་ལ་བང་སོ་ནི་སྔོན་ནས་བརྩིགས་ཟིན་པས་སྐུ་གདུང་མཆོད་རྟེན་ཞིག་དུ་སྦས་ཐབས་ཀྱིས་བཞུགས་པ་སྙམ་མོ། །མུ་ནེ་བཙན་པོ་ལོ་ཉེར་དགུ་བཞུགས་བྱ་བ་དང༌། བཅུ་བདུན་ལ་ཡུམ་གྱིས་བཀྲོངས་ཅེས་དང༌། སད་ན་ལེགས་ལོ་བཞི་པ་ལ་རྒྱལ་སར་བཏོན་ཞེས་བྲིས་པ་རྣམས་ཀྱང་དག་པར་མ་མཐོང་ངོ༌། །བཻ་རོའི་འདྲ་འབག་ཆེན་མོ་ལས་ནི་བཻ་རོ་ཙ་ན་ཚ་བ་རོང་དུ་སྤྱུགས་པའི་བཀའ་ཆད་ཀྱིས་དེ་ནས་ཟླ་བ་གསུམ་ལོན་པ། བི་མ་ལ་མི་ཏྲ་མ་ཕེབས་ཙམ་དེར་ཆོས་རྒྱལ་ཁྲི་སྲོང་སྐུ་གཤེགས། ཕྱི་ལོར་མུ་ནེ་བཙན་པོ་ཡང་གཤེགས་ནས་དེའི་གཤེད་ཀྱི་ཆོས་འཁོར་གྱི་དུས་གཡུ་སྒྲས་ལ་ཡོགས་དོར་དུ་འོངས་ནས་རྒྱལ་བློན་རྣམས་ཀྱིས་བཻ་རོ་ལ་ཡང་དག་བཅུ་གཅིག་གི་བསྟོད་པ་ཕུལ་སྟེ་སད་ན་ལེགས་ཀྱི་དུས་བཻ་རོ་བོད་དུ་བྱོན་པར་བཤད་དོ། །དེ་ནས་ཁྲི་ལྡེ་སྲོང་བཙན་རྒྱལ་སར་བསྐོས། །འཇིང་ཡོན་སད་ན་ལེགས་ཞེས་མཚན་དུ་གྲགས། །དཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། །ལོ་པཎ་མང་མཆོད་དམ་ཆོས་དུ་མ་བསྒྱུར། །ནམ་ཡང་སངས་རྒྱས་བསྟན་པ་མི་གཞིག་པར། །བྲོ་བོར་བ་ཡི་བཀའ་གཙིགས་ཡང་ཡང་བསྩལ། །ལོ་གྲངས་སུམ་བཅུ་རྩ་གཉིས་སྲིད་བསྐྱངས་སྟེ། །དགུང་ལོ་ང་བཞི་པ་ལ་སྦྲགས་ཕུར་འདས། །དེ་ཡི་བང་སོ་འཕྲུལ་རྒྱལ་མདུན་ན་ཡོད༌། །ཡུམ་གྱིས་ཆག་གང་བསྐོངས་(ཇ༡༢༧བ)

[Full Size]

པས་ནངས་ཀྱིས་མཐོ། །རིན་ཆེན་ནོར་བཀང་རྒྱལ་ཆེན་འཕྲུལ་རིང་གྲགས། །དེ་ཡང་སྲས་བཞི་པ་ཁྲི་ལྡེ་སྲོང་བཙན་ནམ་ལྡིང་ཁྲི་དགུང་ལོ་ཉེར་གསུམ་བཞེས་པ་མེ་ཕོ་སྟག་ལོ་ལ་རྒྱལ་སར་བསྐོས། བློན་པོ་རྣམས་ཀྱིས་དང་པོར་བཙན་པོ་ཐུ་ཆུང་འདིས་རྒྱལ་པོ་འོང་མི་འོང་སད་ན་ལེགས་ཅེས་བགྲོས་པ་དང་སྐུ་འགྱིང་བག་དུ་བཞུགས་པ་ཅིག་ཡོད་པས་སད་ན་ལེགས་འཇིང་ཡོན་ཞེས་མཚན་དུ་གྲགས། སྐབས་དེ་ཤེད་དུ་བསམ་ཡས་ཅུང་ཟད་ཉམས་པ་ཅིག་ཡང་བྱུང་བར་སྣང་སྟེ་རྦ་བཞེད་ལས། བར་དུ་བསམ་ཡས་ཀྱི་དགེ་འདུན་བཤོས་ཆད་ནས་ཁ་ཤུགས་སུ་བཏང་ཁབ་སོ་ནི་ཞིག་གཙུག་ལག་ཁང་གི་རྨང་བྱི་བྲུན་གྱིས་གང༌། གནས་ཁང་ཀུན་གྱི་སྒོ་ཡང་རྐུན་མས་ཁྱེར་སྐད། དེ་འགེམ་ཤཱནྟི་ཁམས་ན་འདུག་པས་ཐོས་ནས་མི་དགའ་སྟེ་གསོལ་བྱང་བྲིས་གསེག་ཤང་ཐོགས་ནས་བོད་དུ་མཆིས། ཇོ་མོ་ཁྲི་ལེགས་ཀྱི་སྙན་དུ་འདས་ནས་བྱང་བུ་སྤྱན་དར་བྲིམས་སྟེ་བཀའ་བསྩལ་པ། བནྡྷེ་སྤྱིར་དད་པ་ཆེ་ཞིང་ཆོས་གཟུགས་པར་དགོངས་པ་ནི་མ་ནོངས་ན་རླངས་ཆིགས་བསྡོས་པས་ཆད་པས་བཅད་ན་མ་ལེགས་སོ་ཞེས་བྱུང་བ་ཐོས་ནས་ཤཱནྟི་མ་དགའ་སྟེ་ཉལ་བའི་རྨི་ལམ་ན་བུད་མེད་དཀར་མོ་བཅོ་བཅོ་བ་ཞིག་ན་རེ། ཁྱོད་བསམ་ཡས་ཁབ་སོ་གཟུགས་པར་འདོད་ན་ཆོས་དང་པོ་བོད་ཁམས་སུ་རྦ་ཡེ་ཤེས་དབང་པོས་བཙུགས་སྟེ་དེའི་སྲས་མོ་གཉིས་ཅིག་ཧས་པོ་རིའི་དྲུང་ན་འདུག་གིས་དེ་དང་འཕྲོད་ལ་དཀོན་མཆོག་གི་མཆོད་པ་གྱིས་ཅིག་འོན་ཏང་བསམས་པ་འགྲུབ་པར་འགྱུར་རོ་ཞེས་ཐོས་ནས་བྲག་མར་དུ་མཆིས་ནས་བཙལ་བས་བུ་མོ་སྤྱན་རས་གཟིགས་ཤཱནྟི་ལ་ཕྱག་འཚལ་དུ་མཆིས་པ་དང་རྫིང་གོང་དུ་མཇལ་ནས་གཉི་ག་འགྲོགས་སྟེ་དགེ་ལྡེམ་བཙལ་སྟེ་ཤཱནྟིས་རྨི་ལམ་བཟླས་ནས་ཁབ་སོ་ཚུགས་ཞིང་ཚེས་བརྟན་པར་དགྱི་བའི་སླད་དུ་བྱམས་པ་དང་མངོན་པར་བྱང་ཆུབ་པ་གཟུགས་པའི་ཡོ་བྱད་ཤཱནྟིས་ནི་ཚོགས་ལ་བསླངས་དགེ་ལྡེམ་གྱིས་སྒོས་སུ་སྦྱར་སྟེ་མཆོད་པ་དགྱིད་པར་ཆད་པ་ལས། རིང་ལུགས་བནྡྷྱ་ལངྐའི་མཆིད་ནས་འདི་ལྟར་མཆོད་པ་བྱེད་ཅིང་དགེ་ལྡེམ་ཆ་བར་ནོས་ཀྱི་ཆད་པས་(ཇ༡༢༨ན)

[Full Size]

བཅད་དོ་ཅེས་བསྒོ་ནས་གནས་བརྟན་གཉིས་ཀྱང་སྐྲག་སྟེ་ཡོ་བྱད་འགའ་ཡང་གཡར་མ་སྟེར། ཤཱནྟི་དང་སྤྱན་རས་གཟིགས་སོགས་ཡོན་བདག་སྟོད་རིམ་ཀུན་སྐྲག་སྟེ་མཆོད་པ་གཏང་བར་བགྱི་བ་ལས་དགེ་ལྡེམ་གྱིས་ཇོ་མོ་བྱང་ཆུབ་རྗེ་ཡོན་བདག་དུ་གསོལ་ནས་ཇོ་མོས་ཀྲོ་ནས་ཁལ་བདུན་མར་ཕ་ལམ་གཅིག་འཐུད་ནས་མཆོད་པ་མ་ཤོར་བར་བགྱིས། བསམ་ཡས་ཀྱི་སྐུ་གཟུགས་ལྡེར་ཚོ་རེ་རེ་ལ་ལྷ་བཤོས་བྲེ་ཐག་པའི་རྐྱེན། བག་ཕྱེ་གསུམ་གསུམ་གྱི་རྐྱེན་ཐང་དུ་དྲངས་སྟེ་མཆོད། དགེ་འདུན་དང་སྐྱེ་བོ་ཀུན་ལ་ཆོས་སྟོན་གསོལ། ལྡེ་བློན་ཆེན་གླུ་མས་གསེར་སྲང་ཉི་ཤུ་རྩ་ལྔའི་སྐེ་རགས་གཡུས་སྤྲས་པ་གཅིག་དར་ཡུག་གཉིས། རས་ཡུག་གསུམ་ཕུལ། དགེ་ལྡེམ་གྱིས་འབྲུ་སྣ་ལྔ་ལས་ཁལ་སུམ་བཅུ་རྩ་གཉིས་ཕུལ། བནྡྷེ་སྤྱན་རས་གཟིགས་ཀྱིས་འབངས་ཁྱིམ་གཅིག་ཕུལ། རྒྱལ་བློན་ཀླུ་སྐྱེས་ཀྱིས་ནས་ཁལ་བཅུ་གཅིག་སོགས་བུས་པ་ཡན་གྱིས་རལ་གུ་ཡན་ཆད་ཕུལ། ཇོ་མོ་སྤལ་གྱིས་ཆིབས་གཅིག །གྲོ་ནས་ཁལ་ཉི་བརྒྱ། ཟ་འོག་ཡུག་གཅིག་དར་ཡུག་གཅིག་ཕུལ། དགེ་འདུན་གྱིས་ཀྱང་བྱམས་པ་དང་མངོན་པར་བྱང་ཆུབ་པ་ལ་ཡོན་བསྣན་ནས་ཇོ་མོ་ལྕམ་ཕོ་ཡོངས་བཟའ་མཆེད་དང་མཁན་པོ་ཤཱནྟི་དང་དགེ་ལྡེམ་རྣམས་ཀྱིས་བྱམས་པ་དང་མངོན་པར་བྱང་ཆུབ་པ་སྔ་མ་བཞིན་དུ་བཙུགས་སོ། །དེ་ནས་སྤྱན་རས་གཟིགས་རང་གིས་རང་འགུམ་བའི་དུས་བཙལ་སྟེ་མཆིམས་ཕུ་ན་སྒོམ་ཞིང་མཆིས་པ་ལས་ཚེ་འདས་སོ་ཞེས་བྱུང་ངོ༌། །འདི་རྦ་བཞེད་ཀྱི་དཀྱུས་ལ་རྗེ་ཁྲི་སྲོང་སྒོམ་དུ་མ་བྱོན་པའི་གོང་ན་འདུག་མོད་ཀྱང་མངོན་བྱང་གི་མཆོད་པ་མུ་ནེ་བཙན་པོས་བཙུགས་པ་དེ་ཉམས་ནས་སླར་བསོས་པར་སྣང་བས་སད་ན་ལེགས་ཀྱི་དུས་ཡིན་པར་གསལ་ལོ། །རྒྱལ་པོ་འདིས་རྒྱ་གར་གྱི་སློབ་དཔོན་བི་མ་ལ་མི་ཏྲ། ཛྙཱ་ན་སེ་ན། བལ་པོ་ཧཱུྃ་ཀ་ར་སོགས་སྤྱན་དྲངས། ཆོས་མང་དུ་བསྒྱུར། སྐྱི་ཤོད་དུ་དཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། བློན་འབངས་ཐམས་ཅད་ལ་དམ་པའི་ཆོས་མི་གཞིག་ཞིང་དཀོན་མཆོག་(ཇ༡༢༨བ)

[Full Size]

གསུམ་དབང་བཙན་པར་བྱ་བའི་བཀའ་ཁྲིམས་བསྒྲགས་ཤིང་མནའ་བོར་དུ་བཅུག་པའི་བཀའ་གཙིགས་ནི། སྲས་ཁྲི་ལྡེ་སྲོང་བཙན་གྱི་སྐུ་རིང་ལ་ཤོག་བུ་མཐིང་ག་ལ་གསེར་གྱིས་བྲིས་སྟེ་འཕྲ་མྱེན་གྱི་སྒྲོམ་བུར་བསྩལ་ནས། བསམ་ཡས་ལྷུན་གྱིས་འགྲུབ་ཀྱི་གཙུག་ལག་ཁང་དུ་ཡབ་ཀྱི་ཟླ་ལ་བཞག་པ་ལས་དཔེ་བགྱིས་སྟེ་བྲིས་པ། དམ་པའི་ཆོས་ནམ་དུ་ཡང་མི་གཞིག་པར། བཙན་པོ་ཁྲི་ལྡེ་སྲོང་བཙན་གྱིས་ཐུགས་དམ་བཤེས་སྟེ། དབུ་སྙུང་བོར་ནས། གཙིགས་ཀྱི་ཡི་གེར་བྲིས་པ། གཙིགས་ཇི་ལྟར་གནང་བའི་གཏན་ཚིགས་མགོ་ནན་ལ་བྲིས་པ། བླ་ན་མེད་པའི་སངས་རྒྱས་ཀྱི་ཆོས་འདི། བཟང་ཞིང་ཆེད་ཆེ་སྟེ། མི་མཛད་དུ་མི་རུང་ནི་ངན་རྟགས་དང་གཏན་ཚིགས། ཡབ་ཁྲི་སྲོང་ལྡེ་བཙན་གྱི་སྐུ་རིང་ལ། ཆོས་ནམ་དུ་ཡང་མྱི་གཞིག་པར་གཙིགས་མཛད་པའི་བླང་ནན་དང༌། ཆོས་ཇི་ལྟར་བརྙེས་པའི་གཏམ་གྱི་ཡི་གེ་ལས་སྨོས་ཅིང༌། ཆོས་ཀྱི་ཡི་གེ་ཉིད་ཞིབ་ཏུ་འབྱུང་བ་ཡིན་ནོ། །འདི་ལྟར་སངས་རྒྱས་ཀྱི་ཆོས་འདི་བཟང་ཞིང་ཆེར་ཆེ་སྟེ། མྱྀ་མཛད་ཏུ་མྱྀ་རུང་བར། དང་པོ་མེས་སྲོང་བཙན་གྱིས་མཁྱེན་ནས། ལྷ་སའི་དཔེ་ཧར་བརྩིགས་པ་ཚུན་ཆད། ཡབ་ཁྲི་སྲོང་ལྡེ་བཙན་གྱིས། ཆོས་རྒྱ་ཆེར་ཐུགས་སུ་ཚུད་ནས། བསམ་ཡས་ལྷུན་གྱིས་གྲུབ་པ་ལ་སྩོགས་སྟེ། བོད་ཁམས་སུ་གཙུག་ལག་ཁང་མང་པོ་བརྩིགས་པ་དང༌། བཙན་པོ་ཁྲི་སྲོང་ལྡེ་བཙན་ངའི་ཞ་སྔ་ནས། ཆོས་ཐུགས་སུ་ཆུད་དེ་མཛད་པ་ཕན་ཆད། གདུང་རབས་བདུན་གྱི་བར་དུ་མཛད་ཀྱིས་ཀྱང༌། མྱྀ་དགེ་བ་དང་མ་ལེགས་པ་མེད་པ་ལས། ཆོས་ཁོང་དུ་མ་ཆུད་པ་ཁ་ཅིག་གིས་མེས་ཁྲི་ལྡེ་གཙུག་བཙན་གྱི་རིང་ལ། བྲག་དམར་གྱི་ཀྭ་ཆུར་གཙུག་ལག་ཁང་བརྩིགས་ནས། ཆོས་མཛད་པ་ལས། ཡབ་ཁྲི་སྲོང་ལྡེ་བཙན་སྐུ་ཆུང་བའི་ཚེ་བཤིག་སྟེ། ཕྱིན་ཆད་ཆོས་བྱེད་དུ་མྱྀ་གནང་བར། བཀའ་ཁྲིམས་སུ་ཡང་བྲིས་པ་ལས། ཡབ་ཁྲི་སྲོང་ལྡེ་བཙན་གྱི་(ཇ༡༢༩ན)

[Full Size]

སྐུལ་དངོའ་བར་གྱུར་ནས། སླར་སངས་རྒྱས་ཀྱི་ཆོས་མཛད་པས་སྨན་པར་གྱུརད་སྟེ། ཆོས་ཀྱང་རྒྱ་ཆེར་མཛད་དེ། ནམ་དུ་ཡང་ཆོས་མྱྀ་གཞིག་པར། གཙིགས་ཀྱང་དམ་དུ་བྲིས་པ་ལས། ཕྱིས་ཡབ་དགུང་དུ་གཤེགས་པའི་རྗེས་ལ། ངེད་རྗེ་བློན་གྱི་སྙན་དུ་མོ་དང་རྨིས་ལྟས་ལས་དཀྲིས་སྟེ། ཆོས་མཛད་པ་འདི། བཙན་ཕོའི། སྐུ་དང་ཆབ་སྲིད་ལ་ཡང་དངོའ་སྟེ་མ་ལེགས་ཀྱིས། བཙན་ཕོའི། ཕོ་བྲང་ན་དཀོནད་ཅོག་གསུམ་གྱི་རྟེན་བཙུགས་པ་ཡང་གུད་དུ་སྤགས་སྟེ། བསྐང་ཞིང་ཆོས་མཛད་པའི་མྱྀ་རིགས་ཅེས་གསོལད་པ་དག་ཀྱང་བྱུང་ནས། མོ་དང་རྨིས་ལྟས་ལྟ་བུ་བརྫུན་པའི་ཚིག་གིས། དཀོནད་ཅོག་གསུམ་གྱི་རྟེན་དང་ཆོས་ལྟ་བུ་དོན་ཆེན་པོ་སྤངས་པར་གྱུརད་ན། མཐའ་ཡུན་དུ་ཡང་མྱྀ་དགེ་ཞིང་མ་ལེགས། རྗེ་བློན་སྔ་རབས་ཀྱིས་དམ་གཙིགས་བཞེས་པའི་དབུ་སྙུང་དང་ཡང་འགལ་ནས། སྔ་རབས་ཀྱི་རིང་ལ་གདུང་རབས་རེ་རེ་ཞིང་ཆོས་མྱི་གཞིག་པར་ཐུགས་དམ་བཞེས་སོ་ཞེས་འབྱུང་བ་དང་སྦྱརད་སྟེ། ཡབ་ཀྱི་རིང་ལ་དབུ་སྙུང་གཙིགས་མཛད་པའི་རྣམས་དང༌། ངའི་ཐུགས་ལ་དགོངས་སྟེ། གཙིགས་གསེར་དུ་བསྣན་ནས། ཡི་གེ་འདི་ལས་བྱུང་བའི་རྣམས། ནམ་ཞར་འདི་བཞིན་དུ་མྱྀ་མཛད་རེ་ཞེས། ངའི་ཞ་སྔ་ནས་དབུའ་སྙུང་པོར་སྟེ། ཐུགས་དམ་བཞེས། ཕྱི་ནང་གི་བློན་པོ་ཆེ་ཕྲས་ཀྱང་མནའ་བོར་སྟེ་གཙིགས་ཀྱི་ཡི་གེར་བྲིས་པའོ། །༄། ཐུགས་དམ་དང་དབུའ་སྙུང་བཞེས་སྟེ་གཙིགས་སུ་མཛད་པས། ཆོས་མཛད་པ་འདི་གཅེས་སྤྲས་ཅི་ལ་ཡང་སྡིག་གོ་ཞེ་ནམ། མ་ལེགས་སོ་ཞེས་མོ་དང་རྨིས་ལྟས་ལས་སོགས་སྟེ་ཅིའི་ཕྱིར་ཡང་རུང་སྟེ། དཀོནད་ཅོག་གསུམ་གཞིག་རེ་སྤང་རེ། དེ་སྐད་ཅེས་ཆེ་ཆུང་སུ་གསོལད་ཀྱིས་ཀྱང་དེ་ལྟར་མཛད་རེ། བཙན་ཕོ། དབོན་སྲས་སྐུ་ཆུང་ངུར་བཞུགས་པ་ཡན་ཆད། ཆབ་སྲིད་ཀྱི་(ཇ༡༢༩བ)

[Full Size]

མངའ་བདག་མཛད་པ་མན་ཆད་ཀྱང་དགེ་སློང་ལས་དགེ་བའི་བཤེས་གཉེན་བསྐོས་སྟེ། ཆོས་ཐུགས་སུ་ཅི་ཆུད་ཆུད་དུ་བསླབ་ཅིང༌། བོད་ཡོངས་ཀྱིས་ཀྱང་ཆོས་སློབ་ཅིང་སྤྱད་པའི་སྒོ་བཅད་དེ། ནམ་དུ་ཡང་བོད་ཡ་རབས་མནད་ཅད་བོད་འབངས་ལས་ཐརད་པར་གཟུང་བའི་སྒོ་མི་བགག་པར། དད་པའི་རྣམས་ལས་ཐར་པར་བཙུད་དེ། དེའི་ནང་ནས་ནུས་པ་ལས། བཅོམ་ལྡན་འདས་ཀྱི་རིང་ལུགས་རྟག་དུ་བསྐོ་ཞིང༌། བཅོམ་ལྡན་འདས་ཀྱི་རིང་ལུགས་བྱེད་པའི་རྣམས། ཆོས་འཁོར་ནས་བྱའོ་ཅོག་གི་བཀའ་ལ་ཡང་གཏོགས་སྟེ། ཆོས་འཁོར་གྱི་ལས་དང་དབང་བྱེད་ཅིང༌། དགེ་བའི་བཤེས་གཉེན་བྱེད་པར་མྱི་བསྐོ་རེ། རབ་ཏུ་བྱུང་བའི་རྣམས་གཞན་གྱི་བྲན་དུ་མི་སྦྱིན། ནན་གྱིས་མི་དབབ། ཁྱིམ་པའི་ཁྲིན་ལ་བཏགས་སྟེ་གྱོད་ལ་མི་གདགས་ཤིང༌། ངེད་ཡབ་སྲས་ཀྱིས་མཆོད་གནས་སུ་གནང་བ་བཞིན་དུ་བྱས་སྟེ། བཙན་ཕོའི། ཕོ་བྲང་ན་དཀོནད་ཅོག་གསུམ་གྱི་རྟེན་བཙུགས་ཅིང༌། མཆོད་པ་ཡང་གུད་དུ་སྤང་ཞིང་བསྐར་རེ། མཆོད་གནས་སུ་མྱི་བྱ་རེ། མདོར་ན། བཙན་ཕོའི། ཕོ་བྲང་དང་བོད་ཁམས་ན། དཀོནད་ཅོག་གསུམ་མྱེད་པ་དང་སྤང་བའི་ཐབས་ཅི་ཡང་བྱ་རེ། ཡབ་མེས་དབོན་སྲས་གང་གི་རིང་ལ་ཡང་རུང་སྟེ། དཀོནད་ཅོག་གསུམ་གྱི་རྐྱེན་བཅད་པའི་རྣམས་ཀྱང༌། མ་དམས་མ་ཞིག་པའི་ཆོས་སུ་མི་བྱ་རེ། འདི་ལྟར་རྗེ་བློན་མན་ཆད་ཀུན་གྱིས་མནའ་བོར་བ་ལས། བཙན་ཕོའི། གདུང་རྒྱུད་ལས་དབུའ་སྙུང་བཞེས་དགོས་པའམ། ཕྱིས་ཇོ་མོའམ། ཆབ་སྲིད་ཀྱི་བློན་པོ་ལ་སྩོགས་པ་སར་དུ་བསྐོས་ཤིང་ཆུད་པ་ཅིག་ཡོད་ལ། མནའས་བསྒག་པའི་རིགས་པ་ལས། མནའ་མ་བོར་བ་ཞིག་ཡོད་ན། དེ་བཞིན་དུ་མནའ་མྱྀ་བསྒག་རེ། ༄། ཇོ་མོ་མཆེད་བྲོ་སྩལད་པ། ཇོ་མོ་འབྲོ་བཟའ་ཁྲི་མོ་ལེགས། (ཇ༡༣༠ན)

[Full Size]

ཇོ་མོ་མཆིམས་རྒྱལ་བཟའ་ལེགས་མོ་བརྩན། ཇོ་མོ་ཅོག་རོ་བཟའ་བརྩན་རྒྱལ། ༄། རྒྱལ་ཕྲན་བྲོ་བསྩལད་པ། དབོན་འ་ཞ་རྗེ་དུད་ཀྱི་བུལ་ཞི་ཁུད་བོར་མ་ག་ཐོ་གོན་ཁ་གན། རྐོང་ཀར་པོ་མང་པོ་རྗེ། མྱང་བཙུན་ཁྲི་བོ། ཆབ་སྲིད་ཀྱི་བློན་པོ་མན་ཆད་བློན་པོ་ཆེ་ཕྲ་བྲོ་སྩལད་པ་ལ། བན་དེ་བཀའ་ཆེན་པོ་ལ་གཏོགས་པ། བན་དེ་བྲན་ཀ་ཡོན་ཏན། བན་དེ་མྱང་ཏིང་འཛིན། ༄། ཆབ་སྲིད་ཀྱི་བློན་པོ་བཀའ་ཆེན་པོ་ལ་གཏོགས་པ། བློན་ཆེན་པོ་ཞང་འབྲོ་ཁྲི་གཟུ་རམ་ཤགས། ཞང་མཆིམས་རྒྱལ་བཙན་བཞེར་ལེགས་ཟིགས། དབའ་བློན་མང་རྗེ་ལྟ་ལོད། དབའས་བློན་ཁྲི་སུམ་བཞེར་མདོ་བཙན། ཞང་མཆིམས་རྒྱལ་ལྷ་བཞེར་ནེ་ཤགས། རླང་བློན་ཁྲི་སུམ་རྗེ་སྤེག་ལྷ། ༄། ནང་བློན་ལ། ཞང་སྣ་ནམ་ཁྲི་སྒྲ་རྒྱལ། ཞང་ཚེ་སྤོང་མདོ་བཞེར་ཕེས་པོ། ཞང་ཚེ་སྤོང་ལྷ་བཟང་ཀླུ་དཔལ། ཞང་སྣ་ནམ་རྒྱལ་ལེགས་དགེ་ཚུག་ཞང་སྣ་ནམ་ལྷ་བཞེར་སྤེ་བཙན། བྲན་ཀ་བློན་རྒྱལ་བཟང་འདུས་ཀོང༌། མྱང་བློན་ཁྲི་བཟང་ལེགས་འདུས། ལེའུ་བློན་ལྷ་བཟང་བྱིན་བྱིན། ཏོང་བློན་སྟག་སླེབས། ཞང་མཆིམས་རྒྱལ་མདོ་གཟིགས། རང་བློན་བསམ་སྐྱེས། ཞང་ཚེ་སྤོང་ལྷ་ལུང་སྟོ། ཞང་སྣ་ནམ་གཉན་ལོད། འོང་ཀ་ལྷ་སྦྱིན། འབྲིང་ཡས་བློན་སྟག་རྨ། རྩང་རྗེ་བློན་ཁྱེའུ་ཅུང༌། འབལ་བློན་འབྲོ་མ། སྙ་ཤུར་བློན་ད་ཙུག་སྙམ། ༄། སྣམ་ཕྱི་པ་ལ། ཁར་བ་རྗེ་བློན་བཙན་སླེབས། ཁུ་སྟག་ཚབ། ཞ་སྔ་གཅན་སྟག་ལོད། བྱུང་བོ་བློན་རྒྱལ་འབྱུང༌། ཤུད་པུ་བློན་ཁོང་ཁྲི། ལེའུ་བློན་ཀླུ་གཞེར། ཞང་ཚེ་སྤོང་ཀླུ་མཚོ་སྟོ། པ་ཙབ་བློན་འཚོ་གཟིགས། མྱང་བློན་ལེགས་བཙན། རླང་བློན་གསས་སླེབས། དབང་བློན་ལྟ་བོ་བཙན། བྲན་ཀ་བློན་བསམ་པ། ཉི་བ་བློན་ལྡོན་ཀོང༌། ཤུད་བུ་བློན་སྟག་སླེབས། ཞ་སྔ་གསས་བཙན་(ཇ༡༣༠བ)

[Full Size]

ཁུ་ཐོག་བཙན། སྣ་ནམ་ལྷ་འབངས། ༄། དབང་པོ་དང༌། དམག་དཔོན་དང༌། ཕྱིས་བློན་བཀའ་ལ་གཏོགས་པ༌། ལྷོ་བློན་ཁྲི་བཟང་གཡུ་བརྩན། དབས་བློན་ཁྲོམ་བཞེར། ཞང་མཆིམས་རྒྱལ་སྟོང་སྙ་སྨོན་བཙན། ཞང་ཚེ་སྤོང་ཁྲི་གཟིགས་སྤུང་རེ་ཙུང༌། ཞང་མཆིམས་རྒྱལ་སྟག་བཞེར་རྒྱལ་སླེབས། ཞང་སྣ་ནམ་བཙན་སྒྲ་ཁྲི་སླེབས། འབྲོམ་བློན་རྒྱལ་བཞེར་ཁར་ཙི། ལྷ་ལུང་བློན་མང་པོ་རྗེ་སྐར་ཀོང༌། ཞང་འབྲོ་སྟག་བཞེར་པྲ་བལ་སྟང༌། དཔའས་རྒྱལ་ཏོ་རེ་སྟག་སྙ། ཅོག་རོ་བློན་ལྷོ་གོང༌། ལང་གྲོ་བློན་ཁྲོམ་ལེགས། དཔའ་བློན་མདོ་བཙན། ལེའུ་བློན་ཀུ་རྨ། ཞང་འབྲོ་སྟག་དང༌། མང་སྒྲ་བློན་ཀླུ་རྨ། ཞང་མཆིམས་རྨ་བཙན། རྩེ་འབྲོམ་བློན་སྒ་འགུ། ཁྱུང་པོ་བློན་མས་ཀོལ། པ་ཙབ་བློན་སྤེ་མ། འབྲོམ་སེ་རི་སྟང༌། དབའས་བློན་འཕན་ལེགས། དབས་བློན་ཁྲོམ་ལེགས། སྐ་བ་བློན་མཚོ་ལོད། ཅོག་རོ་བློན་གོང་ཀེང༌། དབས་བློན་མྱེ་སླེབས། ཁུ་མྱེ་གཟིགས། ཞ་སྔ་མུ་གཉེན། ཞང་འབྲོ་གུང་སྟང༌། ཞང་མཆིམས་རྒྱལ་མ་རྨྱན་བརྩེ། ཞང་ཚེ་སྤོང་མ་བཙན། ཅོག་རོ་བརྟན་ཀོང༌། གནང་ཡུལ་བཟུང༌། ཅོག་རོ་ཁྱི་བཙན། སྦྲང་མོ་རྨ། འབྲོ་ལྡོག་སྲོང་སྟོན། འབྲོམ་ཡང་གཟིགས། ཅེས་བྱུང་ངོ༌། །བཀའ་གཙིགས་གོང་འོག་འདི་རྣམས་སྡེབས་ཕུལ་རྟེན་སོགས་ཀྱང་རྙིང་པ་ངོས་བཤུས་ཡིན་ལ་དམ་པའི་ཆོས་ལ་བཀའ་བ་འདི་ལྟ་བུ་མཛད་དོ་ཅེས་ཆོས་ཀྱི་ཆེ་བ་དང༌། རྒྱལ་པོ་བྱང་ཆུབ་སེམས་དཔའ་རྣམས་ཀྱི་ཡོན་ཏན་ཤེས་ཤིང་རེས་དང་བ་འཕེལ་བའི་དགོས་པ་མཐོང་ནས་བྲིས་པ་ཡིན་ནོ། །དེ་ལྟར་ལོ་སུམ་བཅུ་སོ་གཉིས་རྒྱལ་ས་མཛད། རྒྱལ་ཁྲིམས་ཆོས་བཞིན་དུ་བསྐྱངས་པས་བོད་འབངས་བདེ་བ་ལ་བཀོད་དེ་དགུང་ལོ་ལྔ་བཅུ་ང་བཞི་པ་མེ་མོ་བྱའི་ལོ་ལ་སྦྲགས་ཀྱི་ཕུར་འདས་སོ། །ས་སྐྱ་(ཇ༡༣༡ན)

[Full Size]

དཔལ་ལྡན་བླ་མའི་ཆོས་བྱུང་དུ་སད་ན་ལེགས་ཀྱི་ལོ་བཅུ་དགུ་བཞེས་པ་ན་བཙུན་མོ་ལྷ་རྩེ་ལ་སྲས་ལྡེང་ཁྲི་བལྟམས། ལོ་བཅུ་གསུམ་ན་ཡབ་འདས་ནས་རྒྱལ་ས་མཛད་པའི་སྲས་གཙང་མ་མཆེད་ལྔ་ཡིན་ནོ་ཞེས་སད་ན་ལེགས་དང་རལ་པ་ཅན་གྱི་བར་དུ་ལྡེང་ཁྲི་གདུང་རབས་གཅིག་དུ་བྱས་པ་དང༌། རྒྱའི་དེབ་ལས་ཁྲི་སྲོང་ལྡེ་བཙན་ང་གཅིག་བཞེས་པ་ལྕགས་སྤྲེ་ལ་གཤེགས་ནས་མུ་ནེ་བཙན་པོ་བསྐོས། ལོ་བཅོ་བརྒྱད་སྲིད་བསྐྱངས་ནས་མེ་གླང་ལ་འདས་སྟེ་ཇུ་ཙེ་བཙན་པོ་བསྐོས། ལོ་བརྒྱད་སྲིད་མཛད་ནས་ཤིང་སྤྲེ་ལ་འདས་སྟེ་སད་ན་ལེགས་བསྐོས། ཞེས་མུ་ནེ་བཙན་པོ་དང་སད་ན་ལེགས་ཀྱི་བར་དུ་སྐུ་མཆེད་འབྲིང་པོ་ཇུ་ཙེ་བཙན་པོས་རྒྱལ་ས་བྱས་པ་སོགས་ཅུང་ཟད་མི་མཐུན་པར་སྣང་ཡང་བོད་ཀྱི་རྒྱལ་རབས་ཕལ་ཆེར་དང་ཚལ་བ་ལ་སོགས་ཡིག་ཚངས་ལ་མཁས་པ་རྣམས་ཀྱིས་བཤད་པ་ལྟར་བྲིས་སོ། །རྒྱལ་པོ་དེ་ལ་སྲས་ལྔ་སྟེ་ལྷ་སྲས་གཙང་མ། ཁྲི་གཙུག་ལྡེ་བཙན་རལ་པ་ཅན། ཁྲི་དར་མ་ཨུ་དུམ་བཙན། ལྷ་རྗེ། ལྷུན་གྲུབ་སྟེ་ལྔའོ། །ཀུན་མཁྱེན་བུས་ལྷ་རྗེ་ལྷུན་གྲུབ་ཅེས་གཅིག་དུ་བྱས་ཁྲི་ཆེན་པོ་བསྣན་ནས་ལྔར་མཛད་སྣང༌། འདི་རྣམས་བཙུན་མོ་ཆེ་བའི་སྲས་སྔ་མ་གསུམ་དང་ཆུན་མའི་སྲས་ཕྱི་མ་གཉིས་ཅེས་ཁ་ཅིག་འཆད་ལ། ཇི་ལྟར་ན་ཡང་སྲས་ཆུང་བ་གཉིས་སྐུ་ཆུང་ངུར་གཤེགས་པས་བང་སོ་ཡང་མེད་ཏོ། །ལྷ་སྲས་གཙང་མ་རྒྱལ་སྲིད་རྩ་ལྟར་སྤངས། །ཐུབ་པའི་བསྟན་ལ་རབ་ཏུ་བྱུང་བ་མཛད། །དར་མ་སྡིག་ལ་དགའ་བས་རྗེར་མ་འོས། །བར་པ་ཁྲི་གཙུག་ལྡེ་བཙན་རལ་པ་ཅན། །མེ་ཕོ་ཁྱི་ལ་སྐུ་འཁྲུངས་བཅུ་གཉིས་དུས། །ཡབ་འདས་ལོ་དེ་ཉིད་ལ་རྒྱལ་སར་བཏོན། །བཀའ་ཡི་བློན་པོ་བྲན་ག་དཔལ་ཡོན་ཡིན། །བཙུན་མོ་ཅོག་བཟའ་དཔལ་གྱི་ངང་ཚུལ་སོགས། །ཆེ་ཆུང་ལྔ་བཞེས་དགེ་བཅུའི་བཀའ་ཁྲིམས་བཙན། །འདི་ནི་ཕྱག་ན་རྡོ་རྗེའི་རྣམ་སྤྲུལ་ཡིན། །རྒྱ་ཡུལ་ཆམ་ལ་ཕབ་ནས་གཙིགས་བཟུང་སྟེ། །བོད་རྒྱའི་མཚམས་(ཇ༡༣༡བ)

[Full Size]

སུ་དབོན་ཞང་ལྷ་ཁང་བརྩིགས། །གནམ་ལ་ཆེ་བ་ཉི་ཟླ་ཟུང་གཅིག་སྟེ། །ས་ལ་ཆེ་བ་བཙན་པོ་དབོན་ཞང་གྲགས། །བཀའ་གཙིགས་ཡི་གེ་རྡོ་རིང་གསུམ་ལ་བརྐོས། །ཕྱིན་ཆད་བོད་རྒྱ་རང་རང་ཡུལ་ན་བདེ། །དམག་མི་བྱ་བར་གཙིགས་བཟུང་བྲོ་ཡིས་བསྩལ། །མ་འོངས་བོད་ཀྱི་རྒྱལ་ཁྲིམས་འཇིག་མཁྱེན་པས། །སྤྱན་རྒྱང་བསྲིངས་ནས་སྨན་ཡོན་མཛད་པ་སྟེ། །རྗེ་འདིའི་བཀའ་དྲིན་བོད་མི་སུ་ཡིས་ཁོར། །བཀའ་དྲིན་ཅན་གྱི་ལོ་པཎ་གསུམ་སོགས་ཀྱིས། སྔོན་ཆད་བསྒྱུར་བའི་དམ་ཆོས་མ་ལུས་པ། །ལྷག་ཆད་སྤང་ཕྱིར་དམ་ཆོས་དཀར་ཆག་བཀོད། །ཐམས་ཅད་སར་བཅད་སྐད་ཀྱིས་གཏན་ལ་ཕབ། །བཀའས་བཅད་ཆེན་པོ་རྣམ་པ་གསུམ་གྱིས་བསྡམས། །སྒོམ་གྲ་བཤད་གྲ་འདུལ་གྲ་སུམ་བཅུ་བཙུགས། །རྒྱལ་པོའི་དབུ་རལ་ཚན་གཉིས་བྱས་པ་ལ། །དར་ཡུག་བཏགས་སྟེ་གཡས་གཡོན་བཏིང་བའི་སྟེང༌། །དགེ་འདུན་བཞུགས་པས་དབུ་སྟེ་གཉིས་ཅེས་གྲགས། །ཐུགས་དམ་རྟེན་དུ་ལྷ་ཁང་འུ་ཞང་རྡོ། །དཔེ་མེད་བཀྲ་ཤིས་དགེ་འཕེལ་གཙུག་ལག་ཁང༌། །གཙང་ཁང་དགུ་ཐོག་བྱ་འདབ་དགུ་ཡིས་མཛད། །ཕ་གུ་དོ་ཤལ་ཤར་བུ་མདའ་ཡབ་དང༌། །རྟ་བབས་ལ་སོགས་རྒྱན་རྣམས་ཀུན་གྱིས་བཀྲ། །རྩེ་མོར་རྒྱ་ཕུབས་གསེར་འཕྲུ་གཡུ་འབྲུག་བཅས། །རླུང་གིས་བསྐྱོད་ཚེ་མཁའ་ལ་གདུགས་ལྟར་འཁོར། །གསེར་གྱི་གཎ་ཇི་ར་ཡི་ཏོག་གི་རྩེ། །རྒྱབ་རིའི་ལྕོག་དང་མཐོ་དམན་མེད་པར་མཉམ། །འཛམ་གླིང་ཙམ་ན་འགྲན་ཟླ་བྲལ་བར་བཞེངས། །ལུགས་གཉིས་བཀའ་ཁྲིམས་ཆོས་བཞིན་གཏན་ལ་ཕབ། །དགེ་བཅུའི་ཁྲིམས་དམ་སྡིག་སྤྱོད་མིང་མི་གྲག །མཁྱེན་པས་འཕྲུལ་ཆགས་མཛད་པ་ལྷ་ལས་ལྷག །མངའ་ཐང་དཔལ་འབྱོར་ས་ལ་བརྒྱ་བྱིན་བཞིན། །(ཇ༡༣༢ན)

[Full Size]

སྟོབས་དང་མཐུ་ཡིས་དགའ་རབ་དབང་ཕྱུག་སྐྲག །མཐའ་བཞི་ཀུན་ལས་རྣམ་པར་རྒྱལ་གྱུར་སྟེ། །འཛམ་གླིང་གསུམ་གཉིས་ལས་ལྷག་མངའ་དབང་མཛད། །དེ་ཡང་གཅེན་ལྷ་སྲས་གཙང་མ་ནི་ཆོས་ལ་དགྱེས་ཆེས་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་དགེ་འདུན་གྱི་ནང་ན་བཞུགས། གཉིས་པ་ཁྲི་དར་མ་ཨུ་དམ་བཙན་སྡིག་ལ་དགའ་བས་རྗེར་མ་འོས་སྟེ། གསུམ་པ་ཁྲི་གཙུག་ལྡེ་བཙན་དགུང་ལོ་བཅུ་གཉིས་ལོན་པ་མེ་མོ་བྱའི་ལོ་ལ་རྒྱལ་སར་བསྐོས། རྒྱ་ནག་གི་རྒྱལ་པོ་དང་དབོན་ཞང་དུམས་བྱ་བར་མ་མཐུན་ནས་བོད་རུ་རེ་ནས་དམག་སྟོང་སྡེ་བཅོ་བརྒྱད་རེ་དར་ཚན་ཁྲིག་གེ་བ་ཁྲིད་སྟེ་རྒྱའི་གེན་པོ་རྣམས་བཀུམ། རྒྱ་ཆམ་ལ་ཕབ། དཔོན་པོ་མཉེས་པའི་སྐྱེས་ཕུལ། བོད་ཀྱི་མཆོད་གནས་ལོ་པཎ་རྣམས་དང་རྒྱའི་ཧ་ཤང་རྣམས་ཀྱིས་དཔང་པོ་མཛད། རྒྱའི་གོང་གུ་རྨེ་རུ་ཞེས་བྱ་བར་བོད་རྒྱའི་ས་མཚམས་བྱས་སྟེ་དེར་བཙན་པོའི་གཙུག་ལག་ཁང་ཞིག་དང་རྒྱ་རྗེའི་གཙུག་ལག་ཁང་ཞིག་བརྩིགས། གནམ་ལ་ཉི་ཟླ་ཟུང་གཅིག་ས་ལ་བཙན་པོ་དབོན་ཞང་ལས་མེད་ཏོ་བར་བགྲོས་ནས་ཕ་བོང་ལ་ཉི་ཟླའི་གཟུགས་བྱས། ཕྱིན་ཆད་བོད་བོད་ཡུལ་ན་བདེ། རྒྱ་རྒྱ་ཡུལ་ན་བདེ། སོ་མཚམས་རྨེ་རུ་མན་ལ་བོད་ཀྱི་དམག་མི་དྲང༌། གལ་སྟེ་དྲངས་ན་རྒྱ་རྗེའི་ཕོ་བྲང་གི་མདུན་གྱི་རྡོ་རིང་ཡི་གེ་ལན་གསུམ་ཀློག་པས་བོད་ཐམས་ཅད་འཕུང་བར་འགྱུར། རྨེ་རུ་ཡན་ལ་རྒྱའི་དམག་མི་དྲང༌། གལ་སྟེ་དྲངས་ན་ལྷ་སའི་རྡོ་རིང་གི་ཡི་གེ་ལན་གསུམ་ཀློག་པས་རྒྱ་ཐམས་ཅད་འཕུང་བར་གྱུར་ཅིག་ཅེས་བཙན་པོ་དབོན་ཞང་གིས་བདེན་པ་བཙུགས་སྟེ་དམོད་བོར། བོད་རྒྱའི་ཕོ་བྲང་གི་མདུན་སོ་མཚམས་རྨེ་རུ་དང་གསུམ་དུ་རྡོ་རིང་རེ་རེ་བཙུགས་སྟེ་ངོས་ཆེ་བ་གཉིས་ལ་བཙན་པོ་དབོན་ཞང་གི་གཙིགས་ཡིག་དང་བྲོ་ཚིག་ངོས་ཆུང་གཉིས་ལ་བོད་རྒྱའི་བློན་པོ་བཀའ་ལ་གཏོགས་པ་རྣམས་ཀྱི་གཙིགས་ཡིག་དང་བྲོ་ཚིག་བྲིས་སྟེ། དཀོན་ཅོག་གསུམ་ལྷ་ཀླུ་གཟའ་སྐར་སྐུ་ལྷ་ཐམས་ཅད་དཔང་དུ་བཙུགས་སྟེ་བཙན་པོ་དབོན་ཞང་གིས་དབུ་(ཇ༡༣༢བ)

[Full Size]

སྙུང་མཛད། བཙན་པོས་ལོ་བཅུ་བདུན་བཞེས་ཤིང་རྒྱ་རྗེ་མུ་ཛུང་གིས་རྒྱལ་ས་བྱས་ནས་ལོ་བཅུ་བཞི་པ་ཆུ་ཕོ་སྟག་གི་ལོ་ལ་ཆད་མལ་བྲོ་བོར་པ་རྣམས་བྱས་ཤིང་བོད་ཀྱི་མནའ་ཆད་ནི་ཆུ་ཕོ་སྟག་གི་ལོ་དབྱར་ཟླ་འབྲིང་པོའི་ཚེས་དྲུག་ལ་དཀྱིལ་འཁོར་ལ་འཛེགས་སྟེ་བོད་ཀྱི་གཙིགས་བཟུང་ངོ༌། །ལྷ་སའི་རྡོ་རིང་གི་ཡི་གེ་བཤུ་བར་ནུས་ན་བར་འདིར་ཆུག་ཅིག་སྔོན་ལྷ་སྲས་ཡབ་ཀྱི་རིང་ལ་ཆོས་ཀྱི་བརྡ་བོད་སྐད་ལ་མ་གྲགས་པ་མང་ཞིག་བྱུང་ཞིང་རྒྱ་ནག་དང་ལི་དང་ཡུལ་དབུས་དང་ཟ་ཧོར་དང་ཁ་ཆེ་སོགས་སྣ་ཚོགས་ནས་བསྒྱུར་བས་བརྡ་མི་འདྲ་བ་མང་པོས་མི་གོ་ཞིང་སློབ་དཀའ་བར་གཟིགས་ནས། ཉི་འོག་གི་མཁན་པོ་ཨ་ཙརྻ་ཛི་ན་མི་ཏྲ་དང༌། སུ་རེནྡྲ་བོ་དྷི་དང༌། ཤཱི་ལེནྡྲ་བོ་དྷི་དང༌། བོ་དྷི་མི་ཏྲ་དང༌། བོད་ཀྱི་མཁན་པོ་དྷརྨ་རཀྵི་ཏ་དང༌། དྷརྨ་ཏཱ་ཤཱི་ལ་དང༌། ལོ་ཙཱ་པ་མཁས་པ་ཛྙཱ་ན་སེ་ན་དང༌། ཛ་ཡ་རཀྵི་ཏ་དང༌། མཉྫུ་ཤྲི་ཝརྨ་དང༌། རཏྣེནྡྲ་ཤཱི་ལ་ལ་སོགས་པ་རྣམས་ལ་ཐེག་པ་ཆེ་ཆུང་ལས་བྱུང་བའི་ཆོས་རྣམས་རྒྱ་གར་གྱི་ཡུལ་དབུས་ལས་བྱུང་བའི་བརྡ་དང་མཐུན་པར་བསྒྱུར་ཞིང་ཀུན་གྱིས་སློབ་ཏུ་རུང་ལ་ནམ་དུ་ཡང་གཞུང་ལུགས་དེ་ལས་མི་བསྒྱུར་བ་དང༌། ཆད་ལྷག་སྤང་པའི་ཕྱིར་དཀར་ཆག་ཀྱང་བྲིས་ཅིག་ཞེས་བཀའ་བསྩལ་སྟེ། ལོ་པཎ་དེ་རྣམས་དང་ཁྱད་པར་དྲིན་ཅན་གྱི་ལོ་པཎ་གསུམ་ཞེས་གྲགས་པ་ཛི་ན་མི་ཏྲ་དང་ད་ན་ཤཱི་ལ་དང༌། ཞང་ཡེ་ཤེས་སྡེ་གསུམ་གྱིས་སྔར་བསྒྱུར་བ་ཐམས་ཅད་དག་པར་བྱས་ཤིང་སར་བཅད་ཀྱིས་གཏན་ལ་ཕབ་སྟེ་གནའི་བརྡ་གོ་དཀའ་བ་རྣམས་དོར་ནས་ཡུལ་དུས་དང་མཐུན་པའི་གོ་སླ་ཞིང་འདོན་བདེ་བར་བྱས། ཡི་གེ་ཉུང་བའི་ཆེད་དུ་མ་མྱ་ད་དྲག་རྐྱང་པའི་འ་བརྟེན་སོགས་དོར་སྟེ་གཞུང་ཚད་རྣམས་ཀྱང་བམ་གྲངས་སོགས་ངེས་པར་དཀར་ཆག་དུ་བསྣན་སྟེ་སྤྱིར་ཁྲི་སྲོང་གི་དུས་ཀྱི་དཀར་ཆག་ཕོ་བྲང་ལྡན་དཀར་མ་དང༌། ཕྱིས་མཆིམས་ཕུ་མ་དང་འཕང་ཐང་མ་སྟེ་གསུམ་དུ་བྱུང་ལ་དཀོར་མཛོད་དུ་བཀའ་གཙིགས་ཀྱི་ཟླ་ལ་གཅེས་སྤྲས་སུ་འཇོག་གོ །རྒྱལ་པོས་བཀས་བཅད་རྣམ་པ་གསུམ་མཛད། གཞི་ཐམས་ཅད་ཡོད་སྨྲ་ལས་གཞན་པའི་སྡེ་པ་མི་གཟུགས་ཤིང་དེ་དག་གི་སྡེ་སྣོད་མི་བསྒྱུར། སྔགས་(ཇ༡༣༣ན)

[Full Size]

མ་རྒྱུད་རྣམས་མ་སྒྱུར་ཞིག་ཅེས་བཀའ་བསྩལ། བྲེ་སྲང་དང་ཞོ་ཆ་ཚུན་རྒྱ་གར་གྱི་དབུས་འགྱུར་ཚལ་དང་མཐུན་པར་བཅོས། རབ་ཏུ་བྱུང་བ་རེ་རེ་ལ་འབངས་མི་ཁྱིམ་བདུན་བདུན་ཕུལ། དབུ་སྐྲ་གསིལ་བ་སོགས་ལ་མི་མཉེས་པས་དབུ་སྐྲ་རལ་པར་ཆགས་སྟེ་བཙན་པོ་རལ་པ་ཅན་དུ་མཚན་ཐོགས། རྒྱལ་པོ་དགུང་ལ་བཞུགས། གཡས་གཡོན་ལ་དགེ་འདུན་གྱི་སྟན་བཟང་པོ་བཤམས། དབུ་རལ་ཚན་གཉིས་སུ་བྱས་པའི་སྣ་ལ་དར་ཡུག་བཏགས་པ་དགེ་འདུན་གྱི་སྟན་གྱི་སྟེང་དུ་བཀྲམ་པ་ལ་དགེ་འདུན་བཞུགས་སྟེ་དབུ་གཙུག་དུ་འཁུར་བས་དགེ་འདུན་དབུ་སྡེ་གཉིས་ཅེས་གྲགས། ཐུགས་དམ་གྱི་རྟེན་དུ་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས་སྟེ། དེའི་ས་ཕུད་ལ་ལྷ་སར་བྱམས་པ་ཆོས་འཁོར་གྱི་སྒོ་སྲུང་ཚངས་པ་དང་བརྒྱ་བྱིན་བཞེངས། ཤིང་ཕུད་ལ་གནམ་ཡངས་ཀ་བ་བཞི་རིན་པོ་ཆེས་བརྒྱན་སྟེ་ཕུལ། བྲིས་ཕུད་དུ་བེ་བུམ་བརྒྱ་དང་རྩ་བརྒྱད་སོགས། ལུགས་མའི་ཕུད་ལ་ཅོང་དྲིལ་ཆེན་ཕུལ། ཡང་ཕུད་ལ་ཡེར་པར་མཆོད་རྟེན་བཞེངས། རྒྱ་བལ་གྱི་གཟོ་བོ་མཁས་པ་མང་པོས་ལྷ་ཁང་དངོས་ཐོག་དགུ་ལྡན་འཕྲུལ་སྣང་གི་ཚད་ཙམ་དུ་བཞེངས་སྟེ། འོག་གི་ཐོག་གསུམ་རྡོ་ལས་བརྩིགས་སྟེ་དེ་ན་རྗེ་བློན་རྣམས་བཞུགས། བར་ཐོག་གསུམ་སོ་ཕག་གིས་བརྩིགས་སྟེ་ལོ་པཎ་དགེ་འདུན་རྣམས་བཞུགས། སྟེང་ཐོག་གསུམ་ཤིང་གི་འཕྲུལ་གྱིས་བཏེག་སྟེ་ཐུགས་དམ་གྱི་རྟེན་རྣམས་བཞུགས། སྐུའི་རྟེན་ཐམས་ཅད་རྒྱ་གར་གྱི་ཡུལ་དབུས་ཀྱི་ལྷ་ལ་དཔེ་བྱས་ལི་དཀར་དམར་ལས་ལུགས་སུ་བླུག་པ་ཛམྦུ་ཆུ་བོའི་གསེར་གྱིས་གཡོགས་པ་འབའ་ཞིག་དུ་མཛད། ཐོག་རེ་རེ་ཞིང་མཐིང་གི་བྱ་འདབ་དང་ཕ་གུ་དྲ་ཕྱེད། ཤམ་བུ་མདའ་ཡབ་ཀྱིས་མཛེས་པ། བྱ་འདབ་ཀྱི་བར་རེ་རེ་ཞིང་ལོ་པཎ་རྣམས་ཀྱིས་ཆོས་བསྒྱུར་བ་དང་འཆད་རྩོམ་བྱེད་པ། ཐོག་རེ་རེ་ཞིང་གློ་འབུར་གྱི་སྒོ་དང༌། སྒོ་ཁྱམས་དང༌། རྟ་བབས་ཀྱིས་མཛེས་པ། ཡང་རྩེའི་བྱ་འདབ་ཀྱི་རྩེར་གསེར་གྱི་གྷཎྜི་ར་རྩེ་མོ་རྒྱབ་རི་མདུན་མའི་རྩེ་དང་མཉམ་པའི་གཡས་(ཇ༡༣༣བ)

[Full Size]

གཡོན་དུ་གཡུ་འབྲུག་གིས་སྤྲས་པ། ཡང་རྩེའི་རྒྱ་ཕུབས་རླུང་གིས་བསྐྱོད་པ་ན་མཁའ་ལ་གདུགས་ལྟར་དུ་འཁོར་བ། རླུང་ཧ་ཅང་ཆེ་བ་ན་ཟུར་བཞིར་ལྕགས་ཐག་གིས་རྡོའི་སེང་གེ་ལ་གཏོད་པའམ་མཆོད་རྟེན་ཆེན་པོ་བཞིའི་ངོས་སུ་འདོགས་ཀྱང་སྐད། རིན་པོ་ཆེའི་ཕྲེང་བ་དང༌། གདུགས་དང༌། རྒྱལ་མཚན་དར་འཕན་དང༌། གསེར་གྱི་དྲིལ་ཕྲེང་གིས་ཀུན་དུ་འཁྲོལ་བ། ལྟ་བས་ཆོག་མི་ཤེས་པ་ཛམྦུའི་གླིང་ཙམ་ན་འགྲན་ཟླ་དང་བྲལ་བར་བཞེངས་སོ། །སྤྱིར་འདི་ཡན་ལ་བོད་ཀྱི་རྒྱལ་པོ་རྣམས་ཀྱིས་གཙུག་ལག་ཁང་སྟོང་དང་བརྒྱད་བཞེངས་བར་འདོད་དོ། །གཞན་ཡང་དེའི་ཚེ་བློན་པོ་འགའ་དང་མྱང་བན་ཤའི་སྤྱན་ཅན་ལ་སོགས་པས་ལྷ་སར་ཤར་དུ་དཀར་རུ་དང་དམར་རུ་གཉིས། ལྷོར་དགའ་བ་དང་དགའ་བའི་འོད། ནུབ་ཏུ་བྲན་ཁང་དང་བྲན་ཁང་ཐ་མ་ལ་སོགས་པའི་ལྷ་ཁང་བྱས་སྟེ་བོད་འབངས་ཐམས་ཅད་དགེ་བཅུ་ལ་ལོངས་སྤྱོད་བདེ་སྐྱིད་ལྷ་དང་མཚུངས། ཆབ་འབངས་རྒྱ་ཆེ་སྟེ་སྔར་ཡབ་མེས་ཀྱི་སྐུ་རིང་ལ་མ་འདུས་པ་ཤར་སྐར་མ་སྨིན་དྲུག་འཆར་བའི་འོག་རྒྱ་ནག་སོ་ལོན་ཤན་གྱི་རི་རྒྱུད་དར་དཀར་གྱི་ཡོལ་བ་འདྲ་བ་ལ་གཏུགས། བྱང་ཧོར་གྱི་སོ་མཚམས་བྱེ་མ་སྒང་རིང་ཉ་རྨང་མའི་རྒྱབ་འདྲ་བ་ལ་གཏུགས། ནུབ་སྟག་གཟིག་གི་སོ་མཚམས་སྤ་སྟག་ཤ་དུང་གི་སྒོ་མོ་ལ་གཏུགས། ལྷོ་ཕྱོགས་བྲམ་ཟེའི་ཡུལ་ལས་བརྒལ་བར་གཏུགས་སྟེ། འཛམ་གླིང་སུམ་གཉིས་ལས་ཆེས་ལྷག་པར་མངའ་མཛད་དོ། །ལྷ་ཐོ་ཐོ་རི་ནས་རྒྱལ་པོ་འདིའི་བར་ལ་སྐྱིད་པའི་གདུང་རབས་ཕྱེད་དང་བཅུ་གསུམ་ཞེས་མུ་ནེ་བཙན་པོ་ཡུན་ཐུང་བས་ཕྱེད་དུ་བྱས། མང་སྲོང་མ་བགྲངས་པར་དེ་ལྟར་གྲགས་ལ། མེས་ཨག་ཚོམས་ནས་འདིའི་བར་ལ་ཤིན་ཏུ་སྐྱིད་པའི་གདུང་རབས་ལྔ་ཞེས་སྔ་རབས་གྲགས་སོ། །ལོ་ཙཱ་བ་ཀ་ཅོག་ཞང་གསུམ་ཡང་འུ་ཤང་རྡོ་ཚར་བའི་སྐབས་དེ་ཤེད་དུ་མྱ་ངན་ལས་འདས་ནས་མཆོད་རྟེན་ཧས་པོ་རིའི་སྐོར་དུ་བརྩིགས་སོ། །དེ་ལྟར་ཆོས་རྒྱལ་འགྲོ་ཀུན་གཉེན་གཅིག་རྣམས། །གཞན་གྱི་དོན་ལ་རྟག་དུ་བརྩོན་པ་ནི། །བྱིས་རྣམས་རང་གི་དོན་ལ་བརྩོན་པ་ཡིས། །བྱེ་བའི་(ཇ༡༣༤ན)

[Full Size]

ཆར་ཡང་བསྒྲུན་པར་མ་ནུས་སོ། །བླུན་ཞིང་ཤེས་ཞན་དུད་འགྲོའི་གནས་ལྟ་བུའི། །བོད་འབངས་རྣམས་ལ་ཆོས་ཀྱི་བློ་སྐྱེད་པ། །ངོ་མཚར་ནང་ན་ཤིན་ཏུ་རྨད་བྱུང་སྟེ། །རྒྱལ་ཀུན་ཕྲིན་ལས་གཅིག་བསྡུས་ཡིན་པར་གོ །ངན་འགྲོ་ལས་ལྡོག་མི་ཡི་སྐྱེ་བར་བཀོད། །ཐབས་ཀྱིས་བློ་སྦྱངས་ཡང་དག་ལམ་རབ་བསྟན། །ཆོས་རྒྱལ་བྱང་ཆུབ་སེམས་དཔའ་འདི་རྣམས་ཀྱི། །བཀའ་དྲིན་བདག་ཅག་བོད་མིས་ཇི་ལྟར་ཁོར། །བྱས་ཤེས་བྱས་གཟོ་བྱས་པའི་ནང་ན་དཀོན། །དམ་པ་རྣམས་ནི་ཕན་བཏགས་ལེན་མི་བཞེད། །བཀའ་དྲིན་དྲན་པའི་བོད་མི་ཡོད་སྲིད་ན། །དེ་དག་དགྱེས་པའི་དམ་པའི་ཆོས་ལ་འབུངས། །བར་སྐབས་ཀྱི་ཚིགས་བཅད་ཏོ། །དེ་ནས་བོད་ཡུལ་འགྲོ་བའི་བསོད་ནམས་ནི། །སོས་ཀའི་ཆབ་རོམ་བཞིན་དུ་ཞུ་ཞིང་གཏུགས། །བདུད་ཀྱི་བྲན་གྱུར་བློན་པོ་དུ་མ་བྱུང༌། །དགེ་བཅུའི་ཆོས་ཀྱི་ཁྲིམས་ཀྱིས་སྐྱོ་གྱུར་སྟེ། །ཆོས་ཁྲིམས་གཞིག་པར་ལྐོག་དུ་བགྲོས་ནས་ནི། །ལོག་པའི་ཐབས་དང་སྙན་ཕྲ་གསོལ་བ་ཡིས། །ལྷ་སྲས་གཙང་མ་སྤྱུགས་སྟེ་བཞུགས་མ་སྟེར། །བྲན་ཀ་དཔལ་ཡོན་ཉེས་མེད་སྐྱོན་ཕབ་བཀུམ། །རྒྱལ་པོའི་སྐུ་ལ་ནོངས་པ་བགྱིས་ནས་བཀྲོངས། །དོན་མཁར་མདའ་ཡི་གཡོན་ཕྱོགས་བང་སོ་བརྩིགས། །མིང་དུ་ཁྲི་སྟེང་རྨང་རེ་ལགས་སོ་སྐད། །དེ་ཡང་འབངས་ཀྱི་བུ་བྱིས་པ་སྤྲེའུའི་མགོ་འདྲ་བ་རྣ་བ་ལ་སྟག་རིས་ཡོད་པ་དབའས་རྒྱལ་ཏོ་ཞེས་པ་ཅིག་བྱུང་སྟེ་བྱིས་པ་མང་པོའི་ཁྲོད་ན་རྩེ་ཞིང་ཡོད་པའི་ཚེ་བློན་ཆེན་པོ་བྲན་ཀ་དཔལ་ཡོན་གྱིས་རྟ་ཞོན་སྟེ་ཕྱིན་པ་ན་བྱིས་པ་དེ་དག་རྩེ་པ་ལས་ཆར་བྱུང་བས་གཞན་ཐམས་ཅད་བྲོས། དེ་གོས་ཕུད་ནས་བྱེ་མའི་ཕུང་བོར་སྦས། གཅེར་བུར་ཆུ་ནང་དུ་ཞུགས། ཞིབ་མ་མགོ་ལ་བཀབ་སྟེ་བསྡད་པ་བློན་ཆེན་པོས་མཐོང་བས་མ་རུངས་པ་ཅིག་དུ་ཤེས་སྟེ་ནས་སུ་མ་སྨིན་པར་སྲུབས་སུ་བཅར་དགོས་པ་ཅིག་དེ་ན་འདུག་ཞེས་པ་ཁ་ནས་ཤོར་སྐད། ཕ་ཚད་སླེབས་པ་དང་དེ་སྐད་ངག་དུ་ཤོར་བ་བྱིས་པ་དེས་དྲན་(ཇ༡༣༤བ)

[Full Size]

ནས་བལྟ་དགོས་སྙམ་ནས་ཕྱིར་ལོག་སྟེ་རྟ་ལྕག་བོར་བ་ལྟར་བྱས་ནས་མཐོང་ངམ་དྲིས་པས་དེ་ན་རེ། ཁྱེད་རང་སྲུབས་གཅོར་ཟེར་ཙ་ན་ལག་ན་འདུག་ཟེར་སྐད་དེ་ཐེ་རང་གི་སྤྲུལ་པ་ཡིན་པས་ཤེས་ནས་ཞེ་བཞག་བྱས། ཕྱིས་དེ་བློན་པོར་ཚུད་ནས་དཔའས་སྟག་རྣ་ཅན་དུ་གྲགས། ཆོས་ཁྲིམས་ཤིན་ཏུ་དམ་པས་བློན་པོ་སྡིག་ལ་དགའ་བ་རྣམས་སྐྱོ་སྟེ་རང་ཅག་འདི་ཙམ་དུ་གུ་དོག་པ་ཅིས་ལན་ཟེར་བ་ལ་འགའ་ཞིག་གིས་རབ་ཏུ་བྱུང་བ་ལ་སྡང་མིག་བལྟས་མཛུབ་མོ་ཀེར་སྟེ་འདི་རྣམས་ཀྱིས་ལན་ཟེར་བ་རྒྱལ་པོས་གསན་ནས་དཀོན་མཆོག་ལ་དེ་ལྟར་བྱེད་པ་མི་རིགས་ཀྱིས་དེའི་མིག་ཕྱུང་མཛུབ་མོ་ཆོད་ཅེས་བཀའ་བསྩལ་ཏོ། །དེ་ནས་ནང་བློན་གདུག་པ་ཅན་འགའས་ཆོས་ཁྲིམས་བཤིག་པར་བགྲོས་པ་ལ་རྒྱལ་པོ་མ་བཀྲོངས་ན་ཆོས་ཁྲིམས་གཞིག་པར་མི་ནུས་ཟེར། ལ་ལ་ན་རེ་རྒྱལ་པོ་བཀྲོངས་ཀྱང་ལྷ་སྲས་གཙང་མ་དང་བཙུན་མོ་ངང་ཚུལ་མ་དང་བན་ཆེན་པོ་རྣམས་ཡོད་པས་བཤིག་མི་ནུས་ཟེར། དེར་དབའས་སྟག་རྣ་ཅན་གྱིས་སྔོན་དུ་དེ་དག་མེད་པར་བྱས་ལ་དེ་ནས་རྒྱལ་པོ་བཀྲོང་ཟེར་ནས་མོ་མ་ཕྱྭ་མཁན་རྣམས་ལ་རྔན་པ་བྱིན་སྟེ་ལྷ་སྲས་གཙང་མ་འདིར་བཞུགས་ན་རྒྱལ་ཁྲིམས་འཇིག་པས་སྤྱུག་དགོས་ཟེར་དུ་བཅུག་དེ་ཀུན་དུ་གྲགས་པའི་ཚེ་རྒྱལ་པོའི་སྙན་དུ་གསོལ་ནས་མོན་ཡུལ་དུ་སྤྱུག་པར་བྱས། དགེ་འདུན་ལོ་པཎ་རྣམས་ཀྱིས་གཙང་པོའི་ཆབ་ཁ་བར་བསྐྱལ་བས། རྒྱལ་བློན་ཐམས་ཅད་བཀའ་ཡིས་བགྲོས་པ་ལགས། །བདག་ལ་སྡོད་པའི་དབང་མེད་ས་མཐར་འགྲོ། །ཉེས་པ་མེད་པར་སྐྲོད་ལ་ཐབས་ཅི་ཡོད། །དགེ་འདུན་ཐུགས་བདེ་འདི་ནས་ལྡོག་པར་ཞུ། །སེམས་ཐག་ཆད་ཟིན་གྲུ་ཡི་ཉག་ཐག་ཐོང༌། །གསུང་ལྷོ་བྲག་ཁོ་ཐིང་གི་བར་དུ་བྱོན། །དེར་སྣ་ནམ་བཟའ་མང་རྗེས་དུག་གིས་བཀྲོངས་སྐད། དེ་ནས་བཙུན་མོ་ངང་ཚུལ་མ་དང་བྲན་ཀ་དཔལ་ཡོན་མཛའ་འོ་ཞེས་སྙན་ཕྲ་གསོལ་བས་ཁྲིམས་ལ་སྦྱོར་ཞིག་ཞེས་གསུང་བ་ན་བཙུན་མོ་ངང་ཚུལ་མ་ཤིན་ཏུ་སྡུག་བསྔལ་སྟེ་རང་ལྕེབས་ནས་ཤི། བློན་ཆེན་པོ་བྲན་ཀ་དཔལ་ཡོན་གྱིས་ཁོ་རང་བསད་ན་རྒྱལ་པོ་ཡང་དགྲོངས་ཀྱིས་དྭོགས་སྟེ་བྱང་དུ་བྲོས་ནས་ས་འོག་དུ་ལྕགས་ཀྱི་སྲོག་པ་རྩ་བསྒྲུབས། (ཇ༡༣༥ན)

[Full Size]

སྤྱི་བོར་སོར་བཞི་མ་གཏོགས་གྲུབ་པའི་ཚེ་དམུས་སྟེ་ལོང་བ་ཞིག་ལོང་ཁྲིད་དང་བཅས་པ་ས་ཕྱོགས་དེར་སླེབས་ནས་ལོང་བས་ཡུལ་འདི་གང་ཡིན་དྲིས་པས་ལོང་ཁྲིད་ཀྱིས་ལུང་སྟོང་ཡིན་ཞེས་སྨྲས་པས་འོ་ན་དུ་བའི་དྲི་བསྣམ་པས་མི་ཡོད་པར་ངེས་ཀྱིས་ཚོལ་ཟེར་ནས་ལོང་བས་ས་ལ་མནམས་ནས་འདི་ན་འདུག་ཟེར་བ་བལྟས་པས་སེར་ག་ལ་དུ་བ་བྱུང་བའི་རྗེས་མཐོང༌། ལོང་བས་དྲི་ལ་བརྟགས་པས་སྒོ་བརྙེད་ནས་ཟས་སྐོམ་སློང༌། མི་སྨྲ་བའི་རྔན་པར་གོས་རེ་བྱིན་པས་ལོང་བའི་གོས་རྩུབ་པར་ཤེས་ནས་ཁོས་སྨྲས་སྟེ་དབའས་སྟག་རྣ་ཅན་ལ་སོགས་པས་བློན་ཆེན་པོ་བཟུང་ནས་མཚོན་ཅི་བཏབ་ཀྱང་མ་ཕེད། ཤིན་ཏུ་སྡུག་ཡུན་རིང་བ་ན་སྐྱོ་སྟེ་སྤྱི་བོ་ན་སོར་བཞི་མ་གྲུབ་པར་ཡོད་པས་དེར་ཁབ་ཚུགས་ལ་སོང་ཞེས་ཁོང་རང་གིས་སྨྲས་པ་ལྟར་བྱས་པས་ལྟག་པ་སྒུར་གྱིས་སོང་སྟེ་ཤི། པགས་པ་བླུད་བུར་བཤུས་སྟེ་གསོབ་ཏུ་བརྒྱངས། ཉེ་དུ་རྣམས་ཀྱིས་རོ་ལྷག་མ་བསྡུས་སྟེ་ཡེར་པར་བསྲེགས་པས་དུ་བའི་ནང་ནས་འོད་དཀར་པོ་རྫ་མ་ཙམ་ཞིག་ན་མཁའ་ལ་རྗེ་མཐོ་རྗེ་མཐོར་སོང་བས་ཁོང་རང་གི་སྲིང་མོ་ཞིག་གིས་ངུས་ཤིང་བོས་སྟེ་བློན་ཆེན་པོ་ཁྱེད་གར་འབྱོན། དགྲས་ཉེས་མེད་དུ་བསད་པ་ལ་ལན་མི་འཇལ་ལམ་ཞེས་བོས། འོད་དེ་ཇེ་དམར་བབས་པ་དང་རླུང་དམར་ཆེན་པོ་ཞིག་དུ་གྱུར་སྟེ་ས་རྡོ་རི་བྲག་ལྡེག་པ་ཙམ་དུ་བྱུང་སྟེ་དེ་མ་ཐག་ལས་ཀྱི་གནོད་སྦྱིན་ཆེན་པོ་འཇིགས་སུ་རུང་བར་སྐྱེས་སྟེ་ཕྱིས་ཇོ་བོ་རྗེས་བཏུལ་ནས་ཡེར་པ་རྫི་ཁང་གི་སྲུང་མ་བྱེད་ཅིང་གསོབ་ཀྱང་སྙེ་ཐང་རྒྱ་རིང་ན་འཕྱམས་སྐུར་ཡོད་ཅིང་ཡུལ་ལྷ་བྱེད་དོ། །དེ་ནས་མངའ་བདག་ཁྲི་རལ་པ་ཅན་དགུང་ལོ་སོ་དྲུག་བཞེས་པའི་ལྕགས་མོ་བྱའི་ལོ་ལ་མལ་གྲོ་ཞམ་པའི་ཕོ་བྲང་ན་རྒུན་ཆང་མྱོས་པར་བཞེས་སྟེ་གསེར་ཁྲི་ལ་གཟིམས་པ་ལ་དབའས་སྟག་རྣ་ཅན་དང༌། ཅོག་རོ་ལྷ་ལོད་དང༌། ལེགས་སྡུག་བཙན་སྟེ་སྡིག་བློན་གསུམ་གྱིས་དབུ་ལྟག་དུ་བསྐོར་ནས་བཀྲོངས་སོ། །ཀྱེ་མ་སྲིད་པ་འདི་ན་ཅི་ཡང་སྣང༌། །འགྲོ་ཀུན་སྐྱོབ་པའི་ཕ་དང་སྐྱོང་བའི་མ། །སྣང་བྱེད་ཉི་མ་བརྟེན་པའི་ས་གཞི་བཞིན། །ཡིད་བཞིན་ནོར་ལས་སྲིད་པར་འབྱུང་དཀའ་བའི། །(ཇ༡༣༥བ)

[Full Size]

ཆོས་རྒྱལ་ཡོན་ཏན་ཀུན་ཚང་དེ་དག་ནི། །རང་སྲོག་ལན་སྟོང་བཏང་ནས་བསྟེན་འོས་ལ། །ཐུགས་སུ་བྱོན་པའི་ནང་འཁོར་པར་བྱས་པས། །མི་རིགས་གནོད་བྱེད་འདི་འདྲའི་དུས་ཀྱང་བྱུང༌། །བོད་འབངས་བདེ་སྐྱིད་ཐམས་ཅད་ཅིག་ཅར་བཤིག །སྤྲུལ་པའི་ཆོས་རྒྱལ་ཐོས་པའི་ལམ་དུ་བསྐྱལ། །བྱམས་པས་བསྐྱངས་པའི་དྲིན་ལན་ལོག་པར་གཞལ། །དེ་དག་མངོན་སུམ་མནར་མེད་ཅིས་མ་སོང༌། །ད་ལྟའི་སྐྱེ་བོའང་མི་ལྟུང་འཛིན་པའི་ཕྱིར། །ས་འདི་དཔྱོད་པ་མེད་པར་ད་གཟོད་གོ །དེ་ལྟའི་དུས་ཀྱང་ཡལ་བར་འདོར་བའི་ཕྱིར། །འཇིག་རྟེན་སྐྱོང་རྣམས་གཏམ་དུ་གྲགས་པར་ཟད། །སྡིག་བློན་དེ་དག་མཆིལ་མས་མི་འདེབས་པ། །བོད་འབངས་སྐྱེ་བོས་བླུན་པོའི་རྣམ་ཐར་བསྟན། །འཇིག་རྟེན་ལྷ་ལ་སྐྱོབ་པའི་ནུས་མེད་ཅེས། །སྐུ་ལྷ་རྣམས་ཀྱིས་རང་མཚང་བསྒྲགས་པ་སྙམ། །བཟོད་པར་དཀའ་བའི་ཡུལ་དུས་དེ་མཐོང་བའི། །དཔྱོད་ལྡན་རྣམས་ཀྱི་གནས་སྐབས་ཅི་ཞིག་འདྲ། །འོན་ཀྱང་ལེགས་པར་བརྟགས་ན་རང་རང་གི །མ་དག་པ་ཡི་ལས་སྣང་མཐོང་བར་ཟད། །ས་ཐོབ་ཙམ་ཡང་འཇིགས་པ་ལྔ་མེད་ན། །ཕྱག་ན་རྡོ་རྗེ་སུ་ཡིས་དགྲོང་བར་ནུས། །སྐྱེ་འཆི་བྲལ་ཡང་སྐྱེ་འཆི་ལྟར་སྟོན་པ། །རྒྱལ་སྲས་རྣམས་ཀྱི་ངོ་མཚར་སླར་ཡང་རྨད། །བར་སྐབས་ཀྱི་ཚིགས་སུ་བཅད་པའོ། །དེ་ནས་བོད་འབངས་ཡོངས་ཀྱི་བསོད་ནམས་ནི། །སྣུམ་ཟད་མར་མེ་ལྟ་བུར་ཡལ་ལ་ཐུག །རྗེ་ཡི་མངའ་ཐང་དགུན་ཁའི་ཆུ་བཞིན་བྲི། །རྒྱལ་ཁྲིམས་སོག་རུལ་ཕོན་ཐག་བཞིན་དུ་ཞིག །ཆབ་སྲིད་ཕན་བདེ་ནམ་མཁའི་འཇའ་བཞིན་ཡལ། །ནག་ཕྱོགས་སྤྱོད་པ་དཔྱིད་ཀྱི་རླུང་བཞིན་ལངས། །བཟང་བྱེད་བསམ་པ་རྨི་ལམ་བཞིན་དུ་བརྗེད། །ལོ་པཎ་མཆོད་གནས་རྣམས་ལ་ཞབས་ཏོག་(ཇ༡༣༦ན)

[Full Size]

མེད། །དམ་ཆོས་མང་ཞིག་བསྒྱུར་བའི་འཕྲོ་ལ་ལུས། །ལོ་པཎ་ཕལ་ཆེར་རང་རང་ཡུལ་དུ་བཞུད། །བློན་འབངས་དད་པ་ཅན་རྣམས་ཤུགས་རིང་འབྱིན། །དར་མ་ཨུ་དུམ་བཙན་ལ་རྒྱལ་སྲིད་གཏད། །ལོ་གཉིས་འདས་ནས་ཐུགས་སུ་གདོན་གསོལ་སྟེ། །སངས་རྒྱས་བསྟན་པ་མ་ལུས་འཇིག་པར་བརྩམས། །ཇོ་བོ་རྣམ་གཉིས་བྱམས་པ་ཆོས་འཁོར་བཅས། །ཆུ་བོར་འདོར་བརྩམས་བློན་པོས་ཐབས་ཀྱིས་སྦས། །ར་སའི་སྒོ་སྲུང་ཕྱག་རྡོར་གཞིག་པའི་ཕྱིར། །མགུལ་ལ་ཐག་པ་བཏགས་པས་འདོགས་མཁན་དེ། །ཁྲག་བསྐྱུགས་གུམ་པས་སྐྲག་སྟེ་འཇིག་འཕྲོ་བཅད། །ར་ས་འཇིག་པ་ལན་རེ་བསྐྱབས་པའི་ཕྱིར། །སྒོ་སྲུང་འདི་གཉིས་བྱིན་རླབས་ལྷག་པར་ཆེ། །བསམ་ཡས་གཞིག་ཕྱིར་མཆོད་རྟེན་ཆུང་ངུ་ཞིག །བཤིག་པའི་མོད་ལ་ཐོག་བབ་འཇིག་མཁན་ཤི། །སྐྲག་སྟེ་ལྷག་མ་མ་བཤིག་ལུས་པར་གྱུར། །ར་ས་བསམ་ཡས་ཝ་ཚང་སྤྱང་ཚང་བཅས། །སྐུ་གསུང་ཐུགས་རྟེན་ལྷ་ཁང་མང་དུ་བཤིག །གསུང་རབ་ཕལ་ཆེར་མེར་བསྲེགས་ཆུ་ལ་བསྐུར། །ཆོས་པ་རབ་བསད་འབྲིང་སྤྱུགས་ཐ་མ་བཀོལ། །བཙུན་པ་རྔ་གཤང་བསྐུར་ནས་ལིངས་ལ་གཏོང༌། །ལ་ལ་རྟ་ཡི་ཞོན་སྟེགས་འབབ་སྟེགས་བྱེད། །དེ་ཚེ་དཀར་ཕྱོགས་སྲུང་མ་ཀུན་ཁྲོས་སྟེ། །བོད་རྒྱའི་མཚམས་སུ་བོད་ཀྱི་བླ་རི་འགྱེལ། །ཀླུ་ཆུ་ཞག་གསུམ་བར་འཁྱིལ་ཆུ་ནང་ནས། །འོད་དང་སྒྲ་བྱུང་ཐོགས་བབ་ས་ཡང་གཡོས། །ཕྱོགས་ཚིག་སྐར་མདའ་སྣ་ཚོགས་འཁྲུག་ཅིང་ལྷུང༌། །རྒྱལ་ཁྲིམས་འཇིག་པའི་ལྟས་ངན་སྣ་ཚོགས་བྱུང༌། །དེ་ཚེ་སྣུབས་བན་སངས་རྒྱས་ཡེ་ཤེས་ཀྱི། །སྔགས་ཀྱི་ནུས་པས་རྒྱལ་པོ་སྐྲག་པར་བྱས། །དགེ་སློང་བྱང་ཆུབ་སེམས་(ཇ༡༣༦བ)

[Full Size]

དཔའ་རྩེ་གཅིག་དུ། །སྒྲུབ་པ་མཛད་པ་ལྷ་ལུང་དཔལ་རྡོར་གྱིས། །སྙིང་རྗེ་ཆེན་པོས་བྱང་ཆུབ་ཐུགས་བསྐྱེད་དེ། །རྒྱལ་པོ་ངན་འགྲོའི་གནས་ལས་ལྡོག་ཕྱིར་དང༌། །དམ་ཆོས་ལྷག་མ་གནས་པར་བྱ་བའི་ཕྱིར། །བདུད་ཀྱི་ཆས་ཞུགས་རྒྱལ་པོ་མཚོན་གྱིས་བཀུམ། །ལྷ་ཡི་ཆས་ཞུགས་བྲོས་པས་མ་ཟིན་སྟེ། །ཐ་དད་མཐོང་སྣང་སྤྲུལ་པ་རེ་རེ་བྱུང༌། །རྒྱལ་པོ་བསྒྲལ་ནས་མདོ་ཁམས་ཡུལ་དུ་བྱོན། །སྨར་གཡོ་གཙང་གསུམ་མདོ་ཁམས་སྨད་དུ་བྲོས། །དར་མའི་བང་སོ་འཕྲུལ་དང་རྒྱལ་ཆེན་བར། །བང་རིམ་འཁོར་ལོ་ཅན་བརྩིགས་རྩིག་འཕྲོར་ལུས། །རྒྱལ་པོ་འདི་ལ་སྨད་ཀྱིས་སྟེངས་ཅེས་ཟེར། །ཕྱི་ལོ་གདུང་བརྒྱུད་ཡུམ་བརྟན་འོད་སྲུང་བྱུང༌། །སྟག་རྣ་ཅན་ལ་སོགས་པའི་སྡིག་བློན་རྣམས། །དཀོན་མཆོག་བཀའ་ཆད་མི་འཚམ་དུ་མས་བརླག །དམ་ཆོས་བསྣུབས་པས་ལན་པར་ཁ་འཆམ་ནས། །ཇོ་བོ་མཆེད་དང་བྱམས་མགོན་ལ་སོགས་པ། །རང་རང་ཁྲིར་བཞུགས་ལྷ་ཁང་ཞིག་པ་བསོས། །བསྟན་པ་མེད་ཀྱང་མཆོད་པ་ཙམ་ཞིག་དར། །དགྲ་བཅོམ་གཙུག་ཕུད་ཅན་གྱི་ཆོས་ལུགས་དང༌། །སྔགས་ལ་སྒྲུབ་གཞུང་བོན་དུ་གྱེར་པ་བྱུང༌། །དཀའ་བས་བསྒྲུབས་པའི་དམ་ཆོས་བསྣུབས་པ་ལས། །རྗེ་འབངས་ཀུན་ལ་དཀོན་མཆོག་དབུ་ཡོགས་བྱུང༌། །ཡུམ་བརྟན་འོད་སྲུང་མངའ་རིས་གཉིས་སུ་ཆད། །དབུ་གཡོར་གཉིས་སོགས་བོད་ཡུལ་ཀུན་ན་རྩོད། །མཐའ་ཡི་སོ་ཤོར་འདུན་ས་ཆེ་ཆུང་ཞིག །རྒྱལ་ཁྲིམས་ཆག་ཞིང་ཆོས་ཁྲིམས་དར་མདུད་གྲོལ། །མི་ཀུན་རྟག་དུ་ཁྲལ་དང་འུ་ལག་རྩི། །གཙོ་བོ་ཐམས་ཅད་སྒྲིབ་ཤིང་མནའ་ལ་ཟ། །དེ་ཡི་ཆད་པས་ཕ་ཚན་སྡེར་བཅས་བརླག །སད་སེར་ཡམས་ནད་མུ་གེས་རྟག་དུ་མནར། །གསེར་ཁུང་ལ་སོགས་རིན་ཆེན་འབྱུང་(ཇ༡༣༧ན)

[Full Size]

ཁུངས་ནུབ། །དེ་ནས་བྲན་ཀ་དཔལ་ཡོན་སྨོད་པའི་མཐུས། །འབངས་རྣམས་ཀུན་གྱིས་རྗེ་ལ་ཁེང་ལོག་བྱས། །འོད་སྲུང་བང་སོ་འཕྲུལ་རྒྱལ་རྒྱབ་ན་ཡོད། །མིང་དུ་སྐྱེ་འུ་ལྷ་རྟེན་ལགས་སོ་སྐད། །དེ་ཕྱིན་བཙན་པོའི་བང་སོ་རྩིག་པ་ནུབ། །རྗེ་ཁེང་ཁྱད་མེད་བོད་ཁམས་སིལ་བུར་སོང༌། །བང་སོ་རྣམས་ཀྱང་བགོས་སྟེ་ཕལ་ཆེར་བྲུས། །རྗེ་ཡི་མགུར་ལྷ་རྣམས་ཀྱི་གཡར་ངོ་ལས། །རྗེ་ཚན་རྣམ་དགུ་རྗེ་ལྷུས་བཅུ་རུ་ཆགས། །དེ་ཡང་ཁྲི་རལ་འཁྲུངས་པ་ལས་ལོ་གསུམ་གྱིས་སྔ་བའི་ཆུ་མོ་ལུག་ལ་ཁྲི་དར་མ་ཨུ་དུམ་བཙན་འཁྲུངས། བ་ལང་གི་ཤ་ཚུགས་འདྲ་ཞིང་མཁྱེན་པ་ཆུང་ལ་རྒྱུད་གྱོང་བས་འབངས་རྣམས་ཀྱིས་གླང་དར་མར་བཏགས། སོ་དགུ་པ་ལྕགས་བྱ་ལ་རྒྱལ་སར་བཏོན། བཙུན་མོ་ཆེ་ཆུང་གཉིས་ཁབ་ཏུ་བཞེས། བློན་པོ་དབའས་སྟག་རྣ་ཅན་གྱིས་བྱས། དེའི་ཚེ་པཎྜི་ཏ་དཱ་ན་ཤཱི་ལས་ར་ས་དམེར་རུར་མཚམས་བཅད་ནས། ཛམྦྷ་ལ་བསྒྲུབས་པས་ཡུན་རིང་དུ་མ་གྲུབ་པས་པཎྜིཏ་ཁྲོས་ནས་ལྕགས་ཀྱི་རྡོ་རྗེ་ཡིན་ཡང་ཟེར་གསེག་ཤང་གི་བཤམ་ཡིན་ཡང་ཟེར་སྟེ་ཛམྦྷ་ལའི་འཇིམ་གཟུགས་ཀྱི་ལྟོ་བར་བསྣུན་པས་གསེར་དངུལ་གྱི་འོད་པ་ཆེན་པོ་བྱུང་སྟེ་དེས་རྒྱུ་བྱས་ནས་ཁཱརྶ་པཱ་ཎ་དང༌། གསེར་གྱི་ཉི་ཁྲི། དངུལ་བྱ་ཁུན་བུ་ཅན་ལ་སོགས་པ་མང་དུ་བཞེངས། དེའི་ཉེ་གནས་ཁ་ཆེ་ཨུཏྤ་ལས་གསེར་དངུལ་བྱམས་པ་མཆེད་བཞི་བཞེངས། དེའི་ཚེ་སད་སེར་དང་ཡམས་ནད་བྱུང་བས་ཆོས་བྱེད་པ་བཀྲ་མི་ཤིས་སོ་ཞེས་དེ་ལ་བསྙད་བཏགས་ནས་སངས་རྒྱས་ཀྱི་བསྟན་པ་བསྣུབས། ལྷ་ས་གཞིག་པའི་ཕྱིར་མར་མེ་མཛད་ཀྱི་སྒོ་སྲུང་ཕྱག་རྡོར་གྱི་མགུལ་ལ་ཐག་པ་བཏགས་པས་དེ་མ་ཐག་འདོགས་མཁན་ཁྲག་བསྐྱུགས་ནས་དེ་ཀར་ཤི་བས་འཇིག་མ་ནུས། དེས་ན་རྨེ་བརྩེགས་དང་འདི་གཉིས་ཀྱིས་ལྷ་ས་འཇིག་ཐེབས་རེ་བསྐྱབས་པས་བྱིན་རླབས་ལྷག་པར་ཆེའོ། །ཇོ་བོ་རྣམ་གཉིས་དང་བྱམས་པ་ཆོས་འཁོར་ཆུ་ལ་སྐྱུར་ཟེར་བ་ལ་བློན་པོ་ཆོས་ལ་དགའ་བ་འགས་བསྐྱུར་ཟིན་པ་སྐད་དུ་ཐབས་བྱས་ནས་སོ་སོའི་ཁྲི་འོག་དུ་སྦས། གཙང་ཁང་གི་སྒོ་བརྩིགས་ནས་བཙུན་པ་ཆང་འཐུང་བའི་རི་མོ་བྲིས་སྟེ་བཞག །བསམ་(ཇ༡༣༧བ)

[Full Size]

ཡས་གཞིག་པར་བསྒོས་ནས་མཆོད་རྟེན་འོད་འབར་ཡིན་ཡང་ཟེར། ཁམས་གསུམ་དང་དབུ་རྩེའི་བར་ན་མཆོད་རྟེན་ནག་པོ་ཆུང་ངུ་ཞིག་ཡོད་ཀྱང་ཟེར་སྟེ་དེ་བཞིག་པས་ཐོག་བབ་ནས་བཤིག་མཁན་རྣམས་ཤི་བས་འཇིག་འཕྲོ་བཅད། ལྷ་ས་བསམ་ཡས་གཉིས་ཀར་དང་པོར་བཤས་ཁང་བྱས། ཕྱིས་ཝ་ཚང་དང་སྤྱང་ཚང་བཅས། གཞན་ལྷ་ཁང་མང་དུ་བཤིག་གསུང་རབ་གང་རྙེད་མེར་བསྲེགས་ལ་ལ་ཆུར་བསྐྱུར། ལ་ལ་སའི་འོག་དུ་སྦས། པཎྜི་ཏ་བྲོས་མ་ཐར་བ་ལ་ལ་མོན་དུ་བཙོངས། རྨ་རིན་ཆེན་མཆོག་དང་མྱང་ཏིང་འཛིན་བཟང་པོ་སོགས་སྐྱེས་བུ་དམ་པ་མང་དུ་བཀྲོངས། རབ་ཏུ་བྱུང་བ་ཕལ་ཆེར་ས་མཐར་བྲོས་ཅིང་མ་ཐར་བ་རྣམས་ཁྱིམ་པར་ཕབ། མ་ཉན་པ་བསད། ལ་ལ་ཁྲིད་ནས་རྒྱལ་བློན་རྣམས་ཀྱི་རྟ་འབབས་འཛེག་གི་ཚེ་སྒུར་དུ་བཅུག་ནས་སྟེགས་བྱེད། ལ་ལ་རྔ་གཤང་བསྐུར་སྟེ་རྔོན་པ་ལ་གཏོང་སྐད། དེའི་ཚེ་ལྷ་སྲིན་ཐམས་ཅད་འཁྲུགས་ནས་རྒྱལ་ཁྲིམས་འཇིག་པའི་ལྟས་ངན་སྣ་ཚོགས་པ་བྱུང་སྟེ། ས་ཆེར་གཡོས། ཕྱོགས་ཚིག་སྟེ་ན་མཁའ་ཁྲག་མདོག་དུ་གྱུར། སྐར་མདའ་འཁྲུག་བོད་རྒྱའི་མཚམས་སི་ཧ་ཅི་འུ་ལ་ཐང་དཀྱིལ་ན་བོད་དབང་རི་བརྩིགས་ཡོད་པ་འགྱེལ་བས་ཀླུ་ཆུ་ཞག་གསུམ་འགགས་སྟེ་བསྐྱེལ་ནས་གྱེན་ཏུ་ལོག་ཆུ་ནང་ནས་འོད་དང་སྒྲ་ཆེན་པོ་དང་ཐོགས་འབབ་པ་བྱུང༌། དེའི་ཚེ་ལྷ་ལུང་དཔལ་གྱི་རྡོ་རྗེ་ཡེར་པ་བྲག་ལྷར་རྩེ་གཅིག་དུ་སྒོམ་པའི་ཚེ་འོད་དང་སྒྲ་དང་ས་གཡོས་མང་པོས་ཐེ་ཚོམ་དུ་གྱུར་སྟེ་ཕྱིར་གཟིགས་པས་བཙུན་པ་རྔ་གཤང་ཐོགས་སྟེ་ཁྱི་ཁྲིད་ནས་ལིངས་བྱེད་པ་མཐོང་བས་རྒྱལ་པོས་བསྟན་པ་བསྣུབས་པར་ཤེས་སྟེ་སྙིང་རྗེ་ཁྱད་པར་ཅན་སྐྱེས། དཔལ་མགོན་པོ་དང་མ་གཅིག་དཔལ་ལྷ་དང་གྲིབ་ཀྱི་རྫོང་བཙན་གསུམ་གྱིས་སངས་རྒྱས་ཀྱི་བསྟན་པ་སྲུང་བའི་ཕྱིར་རྒྱལ་པོ་སྡིག་ཅན་དགྲོལ་ཞིག་བདག་ཅག་གིས་གྲོགས་བྱའོ་ཞེས་ཡང་ཡང་དུ་བསྐུལ། ཕོད་ཀ་དང་ཞྭ་ནང་དཀར་ལ་ཕྱི་ནག་པོ་གྱོན། ཕུ་ཐུང་དུ་ལྕགས་མདའ་ལྕགས་གཞུ་བཅུག་རྟ་དཀར་སོལ་བ་བྱུགས་པ་ལ་ཞོན་ནས་ཕྱིན། དེའི་ཚེ་བློན་འབངས་ཆོས་ལ་དགའ་བ་ཐམས་ཅད་འདུས་(ཇ༡༣༨ན)

[Full Size]

ནས་ངུ་འབོད་དང་མྱ་ངན་བྱས། རྒྱལ་པོ་ཆེན་པོ་སངས་རྒྱས་ཀྱི་བསྟན་པ་རིན་པོ་ཆེ་ལ་འདི་ལྟ་བུ་མཛད་པར་མི་རིགས། ཡབ་མེས་ཐམས་ཅད་ཀྱི་ཡིག་ཚངས་དང་དཀོར་མཛོད་ཀྱི་སྒྲོམ་བུ་རྡོ་རིང་གི་ཡི་གེ་ཐམས་ཅད་གཟིགས་ཅིག་ཞེས་མགྲིན་གཅིག་ངུ་འབོད་ཆེན་པོ་བྱས། རྒྱལ་པོ་ནུབ་ཕྱོགས་གླ་བའི་ཚལ་ན་མིག་མང་རྩེ་ཞིང་ཡོད་པ་འབངས་རྣམས་ཀྱི་ངུ་འབོད་ཐོས་པ་སེམས་མ་བདེ་སྟེ་རྡོ་རིང་གི་ཡི་གེ་ཀློག་གིན་ཡོད་པས་མཐོང་སྟེ་མགོན་པོ་ནག་པོ་བྱུང་ཟེར་སྐད། དེར་རྟ་བབ་རྒྱལ་པོ་རྡོ་རིང་གི་རུས་སྦལ་ལ་སྒུ་སྟེགས་སུ་འདུག་པ་ལ་ཕྱག་བྱེད་པ་ལྟར་བཅོས་སྟེ་ཕྱག་དང་པོ་ལ་ཕུ་ཐུང་གི་ནང་དུ་མཐེབ་ལྟོང་སྤྲད་གཉིས་པ་ལ་མདའ་བཀང༌། གསུམ་པ་ལ་འཕངས་པས་སྨིན་མཚམས་སུ་ཕོག་སྟེ་མདེའུ་ལྟག་པར་ཕྱུང༌། ཡང་ན་ལོ་གསུམ་གྱིས་སྔས་ཡང་ན་ལོ་གསུམ་གྱིས་འཕྱིས་ཅེས་པ་ཁ་ནས་ཤོར་སྟེ་ཕྱག་གཉིས་མདའ་ལ་འཇུས་ནས་གྲོངས། དེར་རྟ་ལ་བཞོན་སྟེ་ང་བདུད་ཡབ་བཞེར་ནག་པོ་བྱ་བ་ཡིན། རྒྱལ་པོ་སྡིག་ཅན་གསོད་ན་དེ་ལྟར་གསོད་པ་ཡིན་ཟེར་ན་བྲོས། བློན་པོ་ཐམས་ཅད་ཀྱིས་རྗེས་བསྙེགས་པས་མི་ནག་མཚོ་ལ་རྟ་གཤན། བེར་དང་ཞྭ་ཕྱི་ནང་ཟློག་སྟེ་ང་ལྷ་གནམ་ཐེ་དཀར་པོ་བྱ་བ་ཡིན་ཟེར་ནས་བྲོས་པས་མི་མ་ཡིན་པར་དྭོགས་ནས་འདེད་མི་རྣམས་འཚོམས། འོན་ཡང་རྒྱང་དེ་ནས་དེད་པས་ཕྱོགས་བཞི་ཀར་འདེད་རྒྱུ་རེ་བྱུང་སྟེ་ཤར་ལ་འདེད་མི་རྣམས་དགའ་མོ་གདུང་ནས་ས་སྲོས་སྟེ་ཟིན་ལ་ཁད་ཙམ་ན་ཤོར་ཟེར་སྐད། ལྷོ་པ་རྣམས་གྲིབ་ཆུ་འགྲམ། ནུབ་པ་རྣམས་ཤུན་གྱི་འཕྲང༌། བྱང་པ་རྣམས་མོང་མཁར་གདོང་ནས་ས་སྲོས་སྟེ་ཤོར་ཟེར་སྐད། དེར་གྲོས་བགྲོས་པས་འདི་རྫུ་འཕྲུལ་དང་ལྡན་པར་འདུག་པས་ཡེར་པའི་ལྷ་ལུང་དཔལ་རྡོར་ཡིན་ངེས་ཟེར་ནས་བལྟ་བར་བྱས། ལྷ་ལུང་དཔལ་རྡོར་གྱིས་ཀྱང་ཡེར་པར་ལོག་སྟེ་སྒྲུབ་ཁང་དུ་ཕུག་རོན་གྱི་རྐང་པ་ནས་བཟུང་སྟེ་འཕུར་སྟངས་བྱེད་བཅུག་པས་རྡུལ་ཕབ། མུག་མ་སྤར་གང་གཏོར་སྟེ་འགྲོ་འོང་གི་རྗེས་མེད་པར་བྱས་ནས་བཞུགས་པས་ལྟ་མཁན་རྣམས་འདི་ལ་མིས་ཕར་ཚུར་དུ་མ་ཕྱིན་པར་འདུག་ཟེར་ནས་ལོག །མི་རིག་པ་ཅན་(ཇ༡༣༨བ)

[Full Size]

ཞིག་ནང་དུ་གོ་ལེ་བྱུང་ནས་ཁོང་གི་སྙིང་གར་ལག་པ་བཞག་པས་སྐྲག་སྟེ་སྙིང་འཕར་བ་ཤེས་ནས་ནག་ཅན་གྱི་མི་འདི་ན་འདུག་སྟེ་སྤྱིའི་ཐ་པ་ལ་སྒོས་ཀྱི་གཤོལ་མི་གཅོག་ཟེར་ནས་སོང་བས་སྐྲག་སྟེ་མདོ་ཁམས་སུ་བྲོས་ནས་སྒོམ་ཞིང་བཞུགས་སོ། །ཡིག་ཚངས་རྙིང་པ་ཁ་ཅིག་ལས་རྒྱལ་པོས་ད་ནི་ཆོས་ཐམས་ཅད་ངས་བསྣུབས་སོ་ཞེས་ང་རྒྱལ་དུ་མུ་ཅོར་སྨྲས་པས་བཙུན་མོ་ཆེན་མ་ན་རེ་ད་དུང་གཙང་རོང་སྣུབས་ཡུལ་ན་སྣུབས་སངས་རྒྱས་ཡེ་ཤེས་བྱ་བའི་སྔགས་པ་ནུས་པ་ཅན་འཁོར་ལྔ་བརྒྱ་དང་བཅས་པ་དང༌། ཡེར་པའི་བྲག་ཁུང་ན་ལྷ་ལུང་དཔལ་གྱི་རྡོ་རྗེ་ཞེས་བྱ་བའི་སྒྲུབ་པ་པོ་དངོས་གྲུབ་ཐོབ་པ་ཡོད་སྟེ་རྒྱལ་པོས་སྔར་བསད་སྤྱུགས་ཕབ་པ་ཐམས་ཅད་ལས་དེ་གཉིས་ལྷག་གོ་ཞེས་སྨྲས་པས་ཁྲོས་སྟེ་གཉི་ག་ལ་ཕོ་ཉ་བཏང་སྟེ་བཀུག་པས་སྣུབས་སངས་རྒྱས་ཡེ་ཤེས་བྱ་བ་ལ་ཁྱོད་སུ་ཡིན་ལས་སུ་ཅི་བྱེད་པ་ཡིན་དྲིས་པས། ང་དཀོན་མཆོག་སྔགས་པ་བྱ་བ་ལས་སུ་སངས་རྒྱས་ཀྱི་བསྟན་པ་སྲུང་བ་ཡིན་བྱས་པས། འོ་ན་བསྟན་པ་ངས་བཤིག་ཟིན་གྱིས་ཁྱོད་ལ་ད་ནུས་པ་ཅི་ཡོད་ཟེར་བས་ངས་སྔགས་ཙམ་བཟླས་པའི་ནུས་པ་འདི་ལ་གཟིགས་ཅིག་ཞེས་སྡིགས་མཛུབ་གནམ་དུ་འཕྱར་བས་སྡིགས་མཛུབ་ཀྱི་སྟེང་ན་ལྕགས་ཀྱི་སྡིག་པ་ནག་པོ་གཡག་གྲུས་པོ་ཙམ་དགུ་བརྩེགས་སུ་འདུག་པ་མཐོང་བས་རྒྱལ་པོ་སྐྲག་སྟེ་དཀོན་མཆོག་སྔགས་པའི་སྐུ་ལ་མི་བསྡོའོ་ཆོས་མཛོད་ཅིག་ཟེར། ད་དུང་ནུས་པ་འདི་ལ་གཟིགས་ཅིག་ཟེར་ནས་སྡིགས་མཛུབ་ཀྱིས་ཐོག་ཕབ་སྟེ་ཕ་རིའི་བྲག་ལ་བསྣུན་པས་ཚལ་བར་སོང༌། དེར་རྒྱལ་པོ་འཇིགས་ཤིང་སྐྲག་ནས་ཁྱེད་འཁོར་བཅས་ལ་གནོད་པ་མི་བྱེད་དོ་ཟེར་ནས་བཏང༌། ཁོང་གིས་ཡེར་པར་ཕྱིན་སྟེ་ངས་རྒྱལ་པོ་སྡིག་ཅན་སྐྲག་པར་བྱས་ཡོད་ཀྱིས་ཁྱོད་ཀྱིས་དགྲོལ་ཞིག་ཟེར་ནས་བསྐུལ་སྟེ་དགྲོལ་ཞེས་ཀྱང་བྱུང་ངོ༌། །ཡེར་པའི་དཀར་ཆག་ཕྱི་མ་ལས་ནི་དེའི་ཚེ་བསམ་ཡས་དང་ལྷ་ས་ཀུན་དུ་ཝ་ཚང་བཅས། ལྷ་ལུང་དཔལ་གྱི་རྡོ་རྗེ་ལ་ཁྱོད་མར་ཤོག་ལ་རྔོན་པ་དང་ཉ་པའི་དཔོན་གྱིས་ཟེར་ཞིང་འཕྲིན་བསྐུར་བྱུང་བ་ལ་མ་ཕྱིན་པར་ཡི་དམ་གྱི་(ཇ༡༣༩ན)

[Full Size]

གནང་བ་བྱུང་ནས་མར་གནོན་དུ་འབངས་གཡོག་ལྔ་ལ་རྒོད་མ་དཀར་མོ་ཞིག་དབྱར་རིལ་གྱིས་ལེགས་པར་གསོར་བཅུག་ཕྱེ་མར་སྒྱིའུ་གང༌། གཞུ་གཅིག་མདའ་བྱ་རྒོད་མ་གཉིས་བཟུང་ནས་ཕྱིན། དེ་རྣམས་སྦས་ནས་སྟོང་པར་ལྷ་སར་ཕྱིན་པས་ཁོལ་མོ་ཞིག་ཆུ་ལེན་པ་དང་འཕྲད་རྒྱལ་པོ་སྐུ་ཁམས་བདེ་འམ་ཕྱག་བྱེད་པ་ཡིན་སྟེ་བྱས་པས། ད་ལྟ་གྲོ་རྟིང་ལ་ཕྱིར་འབྱོན། ཡེར་པའི་དཔལ་གྱི་རྡོ་རྗེ་ཆབ་གསོལ་ཟེར། དེ་ནས་ལོག་སྟེ་མི་ནག་རྟ་ནག་ཅན་ཞིག་དུ་བྱས་ནས་ཡོང༌། ལྷ་སའི་ནེ་ཐང་དུ་རྒྱལ་པོ་གསུས་པ་ཉི་མ་ལ་བསྟན་ནས་བཞུགས་འདུག་པ་ལ་མདའ་སྔ་བསར་གཅིག་དང་ཕྱི་བསར་གཅིག་བརྒྱབ་པས་སྣ་བུག་ལ་ཟུག་སྟེ་དཀར་ལྷུག་གིས་བྱུང༌། སྔགས་པ་རྣམས་ཀྱིས་མཐུ་བྲུབས་པ་ཡིན་ནམ་ཡང་ཟེར། རྒྱལ་པོའི་ཆིབས་རྒོད་ཀྱི་བྱ་དམར་བྱ་བ་ཞོན་ནས་དེད་པས། མ་ཡོང་ང་བདུད་ཡབ་རྗེ་ནག་པོ་ཡིན་ནོ་བྱས་པས་ཅུང་ཟད་འཚོམས། གྲིབ་ཀྱི་མཚོ་ལ་རྟ་ཉལ་བྱས་པས་མི་དཀར་རྟ་དཀར་ཅན་དུ་སོང་བས་དེ་མི་མིན་ངེས་ཟེར་ནས་ལོག་རྒོད་མ་སྒྲགས་སུ་བསྐྱལ་བས་རྒོད་མ་ཐང་དུ་མིང་ཐོགས། དེ་ནས་མཆོག་གི་དངོས་གྲུབ་ཐོབ། སྤེའུར་བྱ་རྒོད་ཀྱི་ཐུལ་པ་རྡུལ་ཚོམ་མེ་གསོལ་ནས་བཞུགས་པས་མི་རྣམས་ཀྱིས་འདི་ལྷ་ལུང་དཔལ་གྱི་རྡོ་རྗེ་ཡིན་ངེས་ཟེར་ནས་སྔ་མས་ཡེར་པ་གང་ཙ་ན་ཕྱི་མ་མཇུག་མ་རྫོགས་པ་བྱུང་བ་ལ། ན་མཁའ་ནས་རྒྱལ་པོ་གླང་དར་མ་གྲུ་གུ་ཧོར་གྱིས་བཀྲོངས། ལྷ་ལུང་དཔལ་གྱི་རྡོ་རྗེ་སངས་རྒྱས་ཟང་མ་ཡིན་ནོ་བྱ་བའི་སྒྲ་བྱུང་བས་ལོག་ཞེས་སྣང་ངོ༌། །དེ་ལྟར་བཙན་པོ་གླང་དར་མས་རྒྱལ་ས་ལོ་དྲུག་བྱས་སྟེ་ཞེ་བཞི་པ་མེ་སྟག་ལ་འདས། སྤྱིར་ཆོས་རྒྱལ་སྲོང་བཙན་སྒམ་པོས་རྒྱལ་ས་ལན་གཉིས་མཛད་པ་སོ་སོར་བགྲངས་སྟེ་འདི་ཡན་ལ་རྒྱལ་པོ་བཞི་བཅུ་རྩ་གཉིས་སོང་ངོ༌། །འདི་མན་ལ་བོད་སྤྱི་ལ་དབང་བའི་རྒྱལ་པོ་མ་བྱུང་བས་སྨད་སིལ་ཆད་དུ་འཆད་པ་ཅེས་གྲགས་སོ། །ཕྱི་ལོ་མེ་མོ་ཡོས་ལ་བཙུན་མོ་ཆུན་མ་ཚེ་སྤོང་བཟའ་བཙན་མོ་འཕན་ལ་ལྟོ་བོར་གྱི་སྲས་གཅིག་བྱུང་བ་ཆེན་མས་བསད་(ཇ༡༣༩བ)

[Full Size]

དམ་ཕྲོགས་ཀྱིས་དྭོགས་ནས་འོད་དང་མ་བྲལ་བར་བསྲུངས་པས་གནམ་ལྡེ་འོད་སྲུང་དུ་ཐོགས། དེའི་ཚེ་ཆེན་མ་སྣ་ནམ་བཟས་ཀྱང་བུ་ཆུང་སོ་སྐྱེས་པ་ཅིག་ང་ལ་མདང་སྐྱེས་སོ་ཞེས་བསྟན་པས་བློན་པོ་རྣམས་ན་རེ་མདང་སྐྱེས་ཀྱི་བུ་ཆུང་སོ་ནི་ཙེག་གེ་ཙེག་འོན་ཡང་ཡུམ་གྱི་བཀའ་བརྟན་དུ་ཆུག་ཟེར་བས་ཁྲི་ལྡེ་ཡུམ་བརྟན་དུ་ཐོགས་ཅེས་ཡི་གེ་མང་པོ་ལས་འབྱུང་ཞིང་ཡུམ་བརྟན་གདུང་རྒྱུད་མ་ཡིན་པར་གྲགས་ནའང་རྗེ་ཚན་དགུ་པོ་ཕལ་ཆེར་ཡུམ་བརྟན་ཡིན་ལ་གདུང་རྒྱུད་མིན་ན་རྗེའི་སོ་ཁ་གཏོར་བར་མི་འགྱུར་བས་ཆེན་ཆུན་གྱི་སྲས་གཉིས་གདུང་རྒྱུད་ཁྱད་མེད་དུ་སྣང་ལ་ཡི་གེ་དེ་དག་ཀྱང་འོད་སྲུང་ལ་ཞེན་པ་རྣམས་ཀྱིས་བྲིས་པར་ཟད་དོ། །དེའི་ཚེ་མུ་གེ་དང་ཡམས་ནད་བྱུང༌། ཆོས་བཤིག་པའི་བློན་པོ་རྣམས་ཀྱང་བཀའ་ཆད་མི་འདྲ་བ་མང་པོས་གུམ་པས་ཆོས་བཤིག་པས་ལན་པར་ཁ་འཆམ་ནས་ཇོ་བོ་མཆེད་གཉིས་བྱམས་པ་ཆོས་འཁོར་རྣམས་ཁྲི་ཐོག་དུ་སྤྱན་དྲངས་ནས་མཆོད་པ་བྱས། རྟགས་རང་གིས་བླངས་ནས་ཤམ་ཐབས་གོང་པ་ཅན་གོན། སྐྲ་གཞན་བྲེགས་གཙུག་ཕུད་བཞག་པ་དབྱར་ཟླ་གསུམ་དབྱར་གནས་བྱེད་ཟེར་ནས་གཙུག་ལག་ཁང་དུ་བསྡད་ནས་གཏན་ཁྲིམས་ལྔ་སྲུང༌། དེ་ནས་དགག་དབྱེ་བྱེད་ཟེར་སྟེ་གྲོང་དུ་ཁྱིམ་ཐབ་བྱེད། མིང་དགྲ་བཅོམ་གཙུག་ཕུད་ཅན་ཟེར་བ་མང་པོ་བྱུང་ནས་སྐྱེ་བོའི་མཆོད་གནས་བྱེད། མི་དར་མ་ཤི་ན་འབུམ། གཞོན་པ་ལ་ཉི་ཁྲི། བྱིས་པ་ལ་བརྒྱད་སྟོང་པ་འདོན། ཀློག་མཁན་ཤེས་རབ་ཆེ་བ་འགའ་ཟུང་གིས་ཊཱིཀ་བཀླགས་ནས་དམར་པོ་འདི་དོན་བསྡུས་པ་དེ་ཡིན་པར་འདུག །ནག་པོ་འདིས་དེ་རྒྱས་སུ་འཆད་པར་འདུག །ཡིག་ཆུང་འདིས་དེ་ལ་དྭོགས་པ་དཔྱད་པར་འདུག་ཟེར་ནས་རྩལ་བཤད་བྱེད་པ་བག་རེ་བྱུང༌། སྔགས་པ་ཕལ་ཆེར་ཡང་སྒྲུབ་ཐབས་འཆད་པ་དང་སྒོམ་པ་མེད་པར་བོན་པོའི་ཆོ་ག་ལ་མིག་ལྟོས་བྱས་སྟེ་སྒྲུབ། གཞུང་ངག་འདོན་དུ་གྱེར་ནས་གྲོང་ཆོག་འགྲིམ། སྦྱོར་དགྲོལ་དང་བམ་སྒྲུབ་དར་བས་མི་ལ་གསོན་དགྲོལ་བྱེད་པ་ཅིག་(ཇ༡༤༠ན)

[Full Size]

བྱུང༌། དེ་ནས་བཙུན་མོ་གཉིས་སོ་སོའི་ཕྱོགས་བློན་འབངས་ཐ་དད་ཀྱིས་བཟུང་སྟེ་ཡུམ་བརྟན་གྱིས་དབུ་རུ། འོད་སྲུང་གིས་གཡོ་རུ་བཟུང་ནས་དབུ་གཡོར་འཁྲུག་པ་བྱས། དེའི་ཕྱོགས་བོད་ཡུལ་ཕལ་ཆེར་ལ་ཁྱབ་སྟེ་ཡུལ་གྲུ་རེ་རེར་ཡང་ཆེ་སྲིད་ཆུང་སྲིད་མང་ཚན་ཉུང་ཚན་གསེར་པ་གཡུ་པ་ཤ་ཟན་ཙམ་ཟན་ཞེས་སྡེ་གཉིས་གཉིས་སུ་ཆད་དེ་རྩོད། བཙན་པོ་གཉིས་ལོ་ཉེར་གསུམ་རེ་ལོན་པའི་ས་གླང་ནས་བཟུང་སྟེ་འབངས་ཀྱི་ཁེང་ལོག་རྣམས་རིམ་པར་བྱུང་སྟེ་དེ་ཡང་བར་སྣང་གི་བྱ་གཅིག་ལ་ཀུན་རུབ་པ་མཐོང་བ་ལ་དཔེ་བྱས་དང་པོ་དབའས་ཁོ་བཞེར་ལེགས་སྟོང་གིས་ལག་དཔོན་བྱས་སྟེ་མདོ་ཁམས་སུ་ཁེང་ལོག་བྱས། དེ་ནས་དབུ་རུར་འབྲོ་སྦས་འཁྲུགས་པ་ལ་བསྟེན་ནས་དཔའས་ལོ་ཕོ་ལོ་ཆུང་གིས་ལག་དཔོན་བྱས་སྟེ་ཁེང་ལོག་དེ་ནས་གཡོ་རུར་ཞང་རྗེ་གསས་སྣེ་བཙན་གྱིས་དབོན་གཡུ་སྣེ་བསད། རི་མགུལ་ལ་ཡུར་བ་བཅོས། འབེ་བཟའ་འ་མོ་སྐྱིད་བཙུན་མོར་མ་གསུས་པས་དེས་རི་མགུལ་ལས་མི་མགུལ་གཅོད་པ་སླ་ཞེས་སྨྲས་སྟེ་མཆིམས་ཀོང་མི་དྲུག་གིས་ལག་དཔོན་བྱས། ཏར་ཀའི་མེ་ཏོག་སྲོད་ལ་འཆར་པ་བལྟ་བར་བསྙད་ནས་འོད་འབར་ཁེང་ལྡོག་དུ་གྲགས་པ་བྱས། དེ་ནས་ཀོང་ཡུལ་བྲེས་སྣ་འབེ་མོའི་གཡོ་སྒྱུས་ཕབ་བོ། །དེ་ཐམས་ཅད་ཀྱང་གནོད་སྦྱིན་བྲན་ཀ་དཔལ་ཡོན་གྱིས་བྱས་སྐད་དེ། ཁེང་ལོག་བྱེད་པའི་ཕྱྭ་མཁན་མེས་པོ་ནི། །བྲན་ཀ་དཔལ་གྱི་ཡོན་ཏན་ཁོ་ཡིས་བྱས། །མི་བས་སས་ཀྱང་རྗེ་རུ་མ་ཐེག་ནས། སྤྱིར་ན་ལྷ་འདྲེ་ཕ་ཚན་ཀུན་གྱིས་བྱས། །མནའ་ཐོ་འུག་པ་ཐང་དུ་འདུན་མ་ཚོགས། །དེ་ཚེ་བྲན་ཀ་དཔལ་གྱི་ཡོན་ཏན་ཁོ། །ལྕགས་ཀྱི་སྤྱང་ཀི་སྔོན་པོ་བཞོན་ནས་ནི། །ལྕགས་ཀྱི་བེར་ཀས་ས་ལ་བརྡུང་བཞིན་དུ། །ལྷ་འདྲེ་ཀུན་ལ་ཞུ་བ་འདི་སྐད་གསོལ། །རྗེ་དཔོན་གཅིག་ཀྱང་མ་ལུས་བསད་པར་ཞུ། །ཡང་ན་སོ་ཁ་བརྒྱད་དུ་གཏོར་བར་ཞུས། །དེ་ཚེ་ཡར་ལྷ་ཤམ་པོ་ལ་སོགས་པས། །དཔལ་གྱི་ཡོན་ཏན་ཁོ་ལ་ཞུ་བ་ཕུལ། །ལྷ་རིའི་རྩེ་རུ་རྗེ་དཔོན་ཚན་རེ་ཞུས། །ལྷ་འདྲེ་ཕ་ཚན་འདུན་(ཇ༡༤༠བ)

[Full Size]

མ་དེ་ལ་འཆམ། །གཙང་ལྷ་བུ་དར་ལྷ་ཡིས་ཞུ་བ་བྱས། །གྲོམ་པ་ལྷ་རྩེ་བཙན་པའི་མཁར་ལ་བསྟེན། །འབྲོ་དང་ཅོག་རོ་གཉིས་ཀྱིས་མ་ཕྱར་བྱས། །གཙང་སྟོད་ཡུལ་དུ་རྗེ་དཔོན་ཚན་གཅིག་ཆགས། ༡ །ཁ་རག་ཁྱུང་བཙུན་ལྷ་ཡིས་ཞུ་བས་བྱས། །འབྲང་མཁར་བྱེ་བཙན་བཙན་པའི་མཁར་ལ་བསྟེན། །བྱང་དང་སྣང་གིས་མ་ཕྱར་བྱས་ནས་ནི། །རུ་མཚམས་གཞུ་སྙེར་རྗེ་དཔོན་ཚན་གཅིག་ཆགས། ༢ །ཐང་ལྷ་ཡ་བཞུར་ལྷ་ཡིས་ཞུ་བ་བྱས། །ཟྭ་དང་དོམ་པ་བཙན་པའི་མཁར་ལ་བསྟེན། །སྒྲོ་དང་རྨ་ཡིས་མ་ཕྱར་བྱས་ནས་ནི། །འཕན་ཡུལ་ཟ་གང་རྗེ་དཔོན་ཚན་གཅིག་ཆགས། ༣ །ཡར་ལྷ་ཤམ་པོ་ལྷ་ཡིས་ཞུ་བ་བྱས། །སྣ་མོ་ཡར་རྩེ་མར་རྩེ་གཉིས་ལ་བསྟེན། །མཆིམས་གཉགས་གཉིས་ཀྱིས་མ་ཕྱར་བྱས་ནས་སུ། །ཡར་ལུངས་སྟོད་དུ་རྗེ་དཔོན་ཚན་གཅིག་ཆགས། ༤ །གཏམ་ལྷ་སྤུན་དགུ་ལྷ་ཡིས་ཞུ་བ་བྱས། །བྱ་ཚང་གུང་སྣང་བཙན་པའི་མཁར་ལ་བསྟེན། །སྙེ་བ་ཤུད་པུས་མ་ཕྱར་བྱས་ནས་ནི། །གཏམ་ཤུལ་ལྷོ་བྲག་རྗེ་དཔོན་ཚན་གཅིག་ཆགས། ༥ །འཆོས་ལྷ་དཀོན་པ་ལྷ་ཡིས་ཞུ་བ་བྱས། །ཕུ་གུད་ཅོ་མཁར་བཙན་པའི་མཁར་ལ་བསྟེན། །ཁུ་གཉགས་གཉིས་ཀྱིས་མ་ཕྱར་བྱས་ནས་སུ། །འཆོས་སུ་རྗེ་དཔོན་ཚན་གཅིག་ཆགས་སོ་སྐད། ༦ །ཅེས་སོགས་ནས། དེ་ལྟར་རྗེ་དཔོན་རྗེ་ཚན་རྣམ་པ་དགུ། །ཆོས་འཁོར་རྐྱེན་དུ་རྗེ་ལྷུ་གཅིག་དང་བཅུ། །ལྷ་ཡིས་ཞུ་བ་བྱས་ནས་ཆགས་པ་ཡིན། །དེ་ནས་བྲན་ཀ་དཔལ་གྱི་ཡོན་ཏན་གྱིས། །སྙི་བ་བསམ་པོར་སྤྲུལ་ནས་རྗེ་འབངས་བསྡུམས། །ཅེས་ལོ་རྒྱུས་ཆེན་མོ་ལས་སྣང་ངོ༌། །ཁེང་ལོག་ན་ས་ལོ་དགུ་པ་མེ་བྱ་ལ་ཤུད་པུ་སྟག་རྩེ་སོགས་བཞིས་གྲོས་བྱས་ནས་བང་སོ་རྣམས་བགོ་བཤའ་བྱས་ཕལ་ཆེར་བྲུས་སྟེ། གཉགས་ཀྱིས་དོན་མཁར་མདའ་ཡི་བང་སོ་བྲུས། །ཤུད་པུས་སེང་གེ་ཅན་གྱི་བང་སོ་བྲུས། །འཕྲུལ་རྒྱལ་བང་སོ་གྲེང་འཕྱོས་ཁུ་ཡིས་བྲུས། །སྔོ་བཞེར་སྙི་བས་ཐོབ་སྟེ་འབྲུ་འཕྲོར་ལུས། །སྲོང་བཙན་འབྲོ་ཅོག་གཉིས་ཀྱིས་ཐོབ་སྟེ་ལུས། །(ཇ༡༤༡ན)

[Full Size]

ཅེས་སྣང་ངོ༌། །མངའ་བདག་འོད་སྲུང་སྲས་པོ་དཔལ་འཁོར་བཙན། །ལྷ་ཁང་འགའ་བཞེངས་སྟག་རྩེ་གཉགས་ཀྱིས་བཀྲོངས། །དེ་སྲས་མཆེད་གཉིས་སྟོད་ཀྱི་ཕྱོགས་སུ་བྱོན། །མངའ་རིས་བསྐོར་གསུམ་ལ་སོགས་མངའ་མཛད་དེ། །སྟོད་ཏུ་རྒྱལ་ཁྲིམས་ཞྭ་ཙམ་ཆགས་ཅེས་གྲགས། །དེ་ཡི་གདུང་རྒྱུད་འགའ་ཞིག་སྨད་དུ་ཆད། །མདོ་སྨད་ཙོང་ཁའི་ཡུལ་ཆེན་མངའ་མཛད་པས། །སྨད་དུ་རྒྱལ་ཁྲིམས་ལྷམ་ཙམ་ཆགས་སོ་སྐད། །བར་དུ་དབུས་གཙང་རུ་བཞི་སིལ་བུར་གྱུར། །ཡུམ་བརྟན་འོད་སྲུང་ལས་གྱེས་རྗེ་ཕྲན་ནི། །ཡུལ་གྲུ་རེར་ཡང་མང་དུ་གནས་པར་གྱུར། །འོན་ཀྱང་རྒྱལ་རྒྱུད་མ་ཉམས་ཡིན་ངེས་རྣམས། །གཟུགས་དང་བློ་གྲོས་གཞན་ལས་ཁྱད་པར་འཕགས། །ཡ་རབས་སྤྱོད་བཟང་སྐྱེ་བོ་མགུ་བར་བྱེད། །དེ་ཕྱིར་དམ་པ་རྣམས་ཀྱིས་བསྔགས་པའི་གནས། །དེ་ཡང་ཁྲི་ལྡེ་ཡུམ་བརྟེན་གྱི་སྲས་ཁྲི་ལྡེ་མགོན་མཉེན། དེའི་སྲས་ཁྲི་ལྡེ་རིག་པ་མགོན་དང་ཉི་མ་མགོན། ཉི་མགོན་གྱི་སྲས་ཉི་འོད་དཔལ་མགོན། དེའི་རྒྱུད་ཀླུང་ཤོད་འཕན་ཡུལ་མདོ་སྟོད་ན་མང་ངོ༌། །གཅེན་རིག་པ་མགོན་གྱི་སྲས་ལྡེ་བོ་རྡོ་རྗེ་འབར། ལྡེ་པོའི་སྲས་ལྷ་བུག་པ་ཅན་དང་ཐང་ལྷ་བྲག་པ་རྣམས་སོ། །རྡོ་རྗེ་འབར་གྱི་སྲས་ཁྲི་དབང་ཕྱུག་བཙན། དེའི་སྲས་ཚ་ལ་ཡེ་ཤེས་རྒྱལ་མཚན། དེའི་སྲས་ཁྲི་པ་ཡབ་སྲས་འདི་གཉིས་ཀྱིས་བསམ་ཡས་ཀྱི་ཞབས་ཏོག་མཛད། དེའི་དུས་དབུས་གཙང་གི་མི་བཅུ་ཁམས་ནས་བྱོན་ནོ། །ཁྲི་པའི་སྲས་ཨ་ཙ་ར། དགེ་སློང༌། བླ་མ་བོདྷི་རཱ་ཛཱའོ། །དང་པོའི་རྒྱུད་ཕྲེང་བོ་བ། ལྕང་རྒྱབ་པ། བླག་པ་ལམ་པ། གྲིབ་པ། སྙེ་ཐང་པ། ལུམ་པ་རྩད་པོ་སོགས་སོ། །དགེ་སློང་གི་རྒྱུད་དཔེལ་ཞི་བ། བོདྷི་རཱ་ཛཱའི་རྒྱུད་ལྷ་བཙུན་སྔོན་མོ། སྨྱུག་རུམ་པ། ལྷ་འབྲི་སྒང་པ་སོགས་སྟེ། འོན། རྡོ། ཆབ་ཐང༌། བསམ་ཡས་རྩང་པོ་སོགས་སྟེ་མང་དུ་འཕེལ་བ་ཡུམ་བརྟན་གྱི་རྒྱུད་དོ། །མངའ་བདག་གནམ་ལྡེ་འོད་སྲུང་(ཇ༡༤༡བ)

[Full Size]

ཞེས་བྱ་བ་རྒྱལ་རྒྱུད་རྩོད་པ་མེད་པ་དེ་ནི་ཕོ་བྲང་ཡུམ་བུ་བླ་སྒང་དུ་འཁྲུངས། སོ་དགུ་པ་ཤིང་སྤྲུལ་ལ་ཕོ་བྲང་འཕང་ཐང་དུ་འདས། དེའི་སྲས་མངའ་བདག་དཔལ་འཁོར་བཙན་ཡབ་ཀྱི་བཅུ་དགུ་པ་ཤིང་བྱ་ལ་འཁྲུངས། ལོ་ཉེར་གཅིག་ལ་ཡབ་འདས་ནས་རྒྱལ་ས་མཛད། སྨན་ལུང་ལ་སོགས་པ་ལྷ་ཁང་བརྒྱད་བཞེངས། སོ་གཅིག་ལ་འདས། དེའི་བཙུན་མོ་ཆེན་མའི་སྲས་སྐྱིད་ལྡེ་ཉི་མ་མགོན། ཆུན་མའི་སྲས་ཁྲི་བཀྲ་ཤིས་བརྩེགས་པ་དཔལ་ལོ། །འདི་གཉིས་ཀྱི་སྲིད་ཕལ་ཆེར་ཡུམ་བརྟན་གྱིས་ཁྱེར་བས་སྟོད་དུ་བྱོན་སྟེ་བཀྲ་ཤིས་བརྩེགས་པ་དཔལ་ལ་སྟོད་དུ་བཞུགས། ཉི་མ་མགོན་མངའ་རིས་སུ་བྱོན་པ་ན། བློན་པོ་ཞང་བ་ཚབ་རིན་ཆེན་སྡེ་དང་ཅོག་རོ་ལེགས་སྒྲ་ལྷ་ལེགས་གཉིས་ཀྱིས་བྱེ་མ་གཡུང་དྲུང་དུ་བསྐྱལ་ནས་པ་ཚབ་ཀྱིས་སྤྱང་ཐུལ་གྱི་ན་བཟའ་དང་ཅོག་རོས་དྲེའུ་གཅིག་ཕུལ་ནས་ངུས། རྗེས་ང་མངའ་རིས་སུ་རྒྱལ་སྲིད་འདྲ་ཟིན་སྲིད་ན་ཁྱེད་གཉིས་ཀྱི་བུ་མོ་རེ་བརྫང་པར་ཞུ་ཟེར་ནས་བྱོན། རིགས་ནི་སྤྱོད་པས་སྟོན་པར་བྱེད། །ཅེས་གྲགས་པ་ལྟར་སྤྱོད་པ་ལེགས་ཤིང་བློ་གྲོས་ཆེ་བས་མངའ་རིས་བསྐོར་གསུམ་གྱི་མི་རྣམས་མགུ་སྟེ་རྗེ་ཞུས། སྤུ་རངས་སུ་སྐུ་མཁར་ཉི་བཟུངས་བརྩིགས། བློན་པོ་གཉིས་ཀྱིས་བུ་མོ་རེ་བཙུན་མོར་ཕུལ། ཅོག་རོ་བཟའ་ལ་སྲས་སྟོད་ཀྱི་མགོན་གསུམ་དུ་གྲགས་པ་ལས་ཆེ་བ་དཔལ་གྱི་རིག་པ་མགོན་གྱིས་མང་ཡུལ་བཟུང༌། བར་པ་བཀྲ་ཤིས་ལྡེ་མགོན་གྱིས་སྤུ་རངས་བཟུང༌། ཆུང་བ་ལྡེ་གཙུག་མགོན་གྱིས་ཞང་ཞུང་བཟུང༌། ལྡེ་གཙུག་གི་སྲས་སྲོང་ངེ་དང་ཁོར་རེ་གཉིས། སྲོང་ངེ་དང་པོར་ཁབ་བཞེས་པའི་སྲས་ནཱ་ག་རཱ་ཛཱ་དང་དེ་ཝ་རཱ་ཛཱ་གཉིས་ཡིན། ཕྱིས་ཡབ་མེས་ཀྱི་ཡིག་ཚངས་གཟིགས་པས་ཐུགས་སྐྱོ་ནས་རབ་བྱུང་མཛད་པས་ལྷ་བླ་མ་ཡེ་ཤེས་འོད་དུ་གྲགས། མཐོ་ལིང་དཔལ་གྱི་ལྷ་ཁང་བཞེངས། ཁྱེའུ་བློ་རྣོ་བ་ཉེར་གཅིག་རྒྱ་གར་དུ་བརྫངས་པས་ལོ་ཆེན་རིན་བཟང་དང་ལོ་ཆུང་གྲགས་འབྱོར་ཤེས་རབ་གཉིས་ལོག་སྟེ་བསྟན་པ་ལ་ཤིན་ཏུ་ཕན། པཎྜིཏ་ཤཱི་ཀ་ར་ཝ་རྨ་དང༌། དྷརྨ་པཱ་ལ་དང༌། པྲཛྙཱ་པཱ་ལ་སྤྱན་དྲངས། དྷརྨ་པཱ་ལ་(ཇ༡༤༢ན)

[Full Size]

ནས་སྟོད་འདུལ་དང༌། ལྷ་བླ་མ་འདིས་ཇོ་བོ་རྗེ་སྤྱན་འདྲེན་པའི་ཕྱིར་སྐུ་ལུས་གར་ལོག་གི་རྒྱལ་པོ་ལ་བཏང་ནས་འདས། གཅུང་ཁོར་རེས་ཀྱང་ཁ་ཆར་གྱི་ལྷ་ཁང་བཞེངས། དེའི་སྲས་ལྷ་ལྡེས་པཎྜིཏ་སུ་བྷ་ཥི་ཏ་སྤྱན་དྲངས། དེའི་སྲས་འོད་ལྡེ་དང༌། ཕོ་བྲང་ཞི་བ་འོད། བཙུན་པ་བྱང་ཆུབ་འོད་གསུམ་ལས། ལྷ་བྱང་ཆུབ་འོད་ཀྱིས་ཇོ་བོ་རྗེ་སྤྱན་དྲངས། བློན་པོ་ས་འོག་གི་གཏེར་མཐོང་བའི་མིག་ཅན་ཞིག་ཀྱང་ཡོད་སྟེ་དེས་ཇོ་བོ་སྤྱན་འདྲེན་པའི་ཡོ་བྱད་གསེར་ལིང་བ་གཅིག་ལ་ཤིང་སྲང་བཅུ་དྲུག་ཡོད་པ་ཅིག་ལ་སོགས་པ་ཟད་མེད་དུ་ཕྱུང༌། སངས་རྒྱས་ཀྱི་བསྟན་པ་ཉམས་པ་གསོས་སྟེ་ཤིན་ཏུ་རྒྱས་པར་མཛད་དོ། །འོད་ལྡེས་ཁ་ཆེ་ཛྙཱ་ན་ཤྲཱི་སྤྱན་དྲངས། དེའི་སྲས་རྩེ་ལྡེས་པཎྜིཏ་ཞི་བ་བཟང་པོ་སོགས་སྤྱན་དྲངས། རྔོག་ལོ་ཙཱ་བ་བློ་ལྡན་རྒྱ་གར་དུ་བརྫངས་སྟེ་བསྟན་པར་ཤིན་ཏུ་རྒྱས་སོ། །རྩེ་ལྡེའི་སྲས་འབར་ལྡེ། དེ་ནས་རིམ་བཞིན་བཀྲ་ཤིས་ལྡེ། ལྷ་ལྡེ། ན་ག་དེ་ཝ་རྣམས་ནས་མངའ་རིས་ཀྱི་བཙན་པོ་ཕལ་ཆེར་བྱུང༌། ན་ག་དེ་ཝའི་སྲས་བཙན་ཕྱུག་ལྡེས་ཡ་ཙེའི་མངའ་བདག་མཛད་དེའི་སྲས་བཀྲ་ཤིས་ལྡེ། དེའི་སྲས་གྲགས་བཙན་ལྡེ། དེའི་སྲས་གྲགས་པ་ལྡེས་གསེར་བྲེ་བདུན་བཅུ་ལ་འཇམ་དབྱངས་ཀྱི་སྐུ་དང་དངུལ་བྲེ་སྟོང་ཕྲག་བཅུ་གཉིས་ཀྱིས་བྱམས་པ་སོགས་གསེར་དངུལ་གར་བླུགས་དང་ལྗང་བརྡུངས་ཀྱི་ལྷ་ཆེན་དང་མཆོད་རྟེན་དུ་མ་བཞེངས། དེའི་སྲས་ཨ་སོག་ལྡེས་རྒྱ་གར་རྡོ་རྗེ་གདན་དུ་ཆོས་རྒྱལ་མྱ་ངན་མེད་ཀྱིས་ཕུལ་བའི་གྲོང་བཞི་བཅུ་ཞེ་གཉིས་སོག་པོ་ལ་ཉོས་ནས་ཕུལ། དེའི་སྲས་འཛི་ཐར་སྨལ་དང་ཨ་ནན་སྨལ་གཉིས་ཀྱི་ཕུ་བོས་དངུལ་གྱི་དགྱེས་རྡོར་བཞེངས། ནུ་བོས་རྡོ་རྗེ་གདན་བསོས། འདི་ཡན་འབྲི་ཁུང་པའི་སྦྱིན་བདག་ཡིན། ཨ་ནན་སྨལ་གྱི་སྲས་རེའུ་སྨན་གྱིས་རྒྱ་གར་གྱི་རྒྱལ་ཁམས་མང་པོའི་བདག་བྱས། དངུལ་ལས་བདེ་གཤེགས་བརྒྱད་བཞེངས། ལྷ་སར་གཙང་ཁང་དབུས་མའི་གསེར་ཐོག་ཕུལ། དེའི་སྲས་སམ་གྷ་སྨལ་ཡིན། འཇི་ཐར་སྨལ་གྱི་བུ་ཨ་འཛིད་སྨལ་གྱིས་(ཇ༡༤༢བ)

[Full Size]

ས་སྐྱར་ལྷ་བཙུན་བྱས། ཕྱིས་རྒྱལ་ས་བྱས་ཤིང་གདུང་རབས་གཉིས་ནས་ཡ་ཙེའི་རྒྱལ་རྒྱུད་ཆད། སྤུ་རངས་ནས་བསོད་ནམས་ལྡེ་སྤྱན་དྲངས་པུ་ཎ་སྨལ་དུ་གྲགས། དེའི་བུ་པྲི་ཏི་སྨལ་དང་བློན་པོ་དཔལ་ལྡན་གྲགས་པས་ས་སྐྱའི་ཆོས་ཁྲི་དང༌། ལྷ་སར་བཅུ་གཅིག་ཞལ་ལ་གསེར་ཐོག་ཕུལ་ལོ། །འདི་རྣམས་བུ་སྟོན་ཆོས་བྱུང་དང་ཡར་ལུངས་ཇོ་བོའི་ཆོས་བྱུང་ལྟར་བྲིས་ཀྱི། གཞན་ལས་ལྡེ་གཙུག་མགོན་གྱིས་མང་ཡུལ་བཟུང་ཞེས་སོགས་དང༌། བཀྲ་ཤིས་མགོན་གྱི་སྲས་ཁོར་རེ་དང་སྲོང་ངེ་ཞེས་སོགས་སྣང་ངོ༌། །དཔལ་འཁོར་བཙན་གྱི་སྲས་ཁྲི་བཀྲ་ཤིས་བརྩེགས་པ་དཔལ་ལ་སྲས་དཔལ་ལྡེ་དང༌། འོད་ལྡེ། སྐྱིད་ལྡེ་སྟེ་སྨད་ཀྱི་ལྡེ་གསུམ་དུ་གྲགས། དཔལ་ལྡེའི་རྒྱུད་སྔོན་པོ་ཚོན་པོར་ཐུག་སྟེ་ཁབ་གུང་ཐང་པ། ཀླུ་རྒྱལ་པ། སྤྱི་པ་ལྷ་རྩེ་བ། གླང་ལུང་རྩད་སྐོར་བ་སོགས་ཡིན་ནོ། །གཅུང་སྐྱིད་ལྡེ་འཇད་རྟ་ནག་དུ་ཕོག་སྲས་དྲུག་ལས་ལྔ་བྱང་དུ་གཤེགས་སྟེ་གཡས་རུ་དང་རུ་ལག་གི་བཙན་པོ་རྣམས་ཡིན། འབྲིང་པོ་འོད་ལྡེ་ལ་སྲས་བཞི་ལས་ཕ་བ་དེ་སེའི་རྒྱུད་གཙང་རོང་སྣུབས་ཡུལ་དང་ཉང་སྟོད་སོགས་ན་ཡོད། གཉིས་པ་ཁྲི་ལྡེ་མདོ་ཁམས་སུ་བྱོན་སྟེ་ཙོང་ཁ་ཡུལ་ཆེན་བཅོ་བརྒྱད་ལ་སོགས་མདོ་སྨད་ཕལ་ཆེར་ལ་མངའ་མཛད་པས་སྨད་དུ་རྒྱལ་ཁྲིམས་ལྷམ་ཙམ་ཆགས་ཞེས་གྲགས་ཤིང་སྤྱན་སྔ་དོན་ཆེན་ལ་སོགས་པའི་རྒྱལ་རྒྱུད་བྱུང༌། གསུམ་པ་ཉག་ལྡེའི་རྒྱུད་གཡས་རུའི་སྐྱི་མཁར་བཙན་པོ་ལ་ཐུག་བཞི་པ་ཁྲི་ཆུང་གིས་ཡར་ལུངས་སུ་བྱོན། འབངས་ཀྱིས་ཕོ་བྲང་བརྩིགས་ནས་ཕུལ་བའི་འབངས་བརྩིགས་དང་སྐུ་མཁར་མཆིང་ང་སྟག་རྩེ་བཟུང༌། དེའི་སྲས་འོད་སྐྱིད་འབར། དེ་ལ་སྲས་བདུན་གྱི་གཅེན་ཞང་རྗེ་ཚ་ཁྲི་ལྡེ་འབར། གཅུང་གཙང་ཚ་སྤུན་དྲུག་ཞེས་པ་ལྷ་སྤྱན་གཡུ་སྤྱན་གཉིས། ད་ར་ལྷུན་པོ་གཉིས། འོད་བཙན་གུང་བཙན་གཉིས་སྟེ་དྲུག་གོ །གཅེན་ལ་སྲས་དྲུག་གི་གཡུ་ཐོག་གི་རྒྱུད་སྣ་མོ་བ། མཆིང་ང་བ། དོན་མཁར་བ། ཐང་ཁོར་བ་རྣམས་སོ། །བྱེ་ཆུང་ལྷ་སྒོམ། གུང་ལྡེ། ཁྲི་ཐོག་ཐག་གསུམ་གདུང་ཆད། ཟླ་བའི་རྒྱུད་(ཇ༡༤༣ན)

[Full Size]

རྟ་ཤགས་པ་དང་པྲ་སྣ་བའོ། །བཞེངས་ཅན་འབར་གྱི་རྒྱུད་མོན་མཁར་བ། ཞང་མདའ་བ། སྤུན་བདུན་ཐང་པ། ལྷ་སྟོན་དཀར་མོའི་རྒྱུད་བྱི་ཆུང་བའོ། །གཙང་ཚ་དྲུག་གི་ཕྱི་མ་བཞི་ལས་ཁྲ་འབྲུག་བྱིང་བྱར་གྱི་བཙན་པོ་རྣམས་འཕེལ་ལོ། །བཙན་པོ་གཡུ་ཅན་གར་མི་ཡོན་ཏན་གཡུང་དྲུང་གིས་བྱ་སར་སྤྱན་དྲངས། དེའི་སྲས་ཇོ་དགའ། དེའི་སྲས་གསུམ་གྱི་ཆེ་བ་བྱ་ས་ལྷ་ཆེན་གྱིས་བྱ་སའི་ལྷ་ཁང་སོ་མ་བཞེངས། རྒྱ་མའི་དབོན་སྟོན་གྱིས་རབ་གནས་མཛད། དཔལ་ཕག་མོ་གྲུ་པ་བླ་མར་བསྟེན། གཅུང་པོའང་རབ་ཏུ་བྱུང་སྟེ་ལྷ་ཞི་བར་གྲགས་སྟེ་ལོ་མོ་སྒོམ་ཁང་དུ་བཞུགས། བར་པ་ཁྲི་དར་མ་གཙུག་ལྡེ། ཁྲི་གཙུག་ལྡེ། རྣལ་འབྱོར། སྨོན་ལམ་སྟེ་སྲས་བཞི་ལས་ཁྲི་གཙུག་གིས་བྱ་ས་དང་དོ་སྔོན་སོགས་བཟུང་སྟེ་ཡར་མདའི་བཙན་པོ་རྣམས་བྱུང༌། སྨོན་ལམ་རབ་ཏུ་བྱུང་སྟེ་པུ་གུ་དོའི་གཟིམས་ཁང་དཀར་པོ་བརྩིགས་སྟེ་ཆོས་ཁྲིམས་དང་བསྟན་པའི་བྱ་བ་དུ་མ་མཛད། ཇོ་བོ་རྣལ་འབྱོར་གྱིས་འབངས་བརྩིགས་སུ་རྒྱལ་ས་བསྐྱངས་སྟེ་མཆེད་འདི་རྣམས་ཀྱིས་རྗེ་སྤྱན་སྔ་དང་རྒྱལ་བ་ཐོག་བརྡུགས་པའི་སྦྱིན་བདག་བྱས། རྣལ་འབྱོར་གྱི་སྲས་གསུམ་ལས་བར་པ་རབ་ཏུ་བྱུང་ནས་ལྕིལ་བུའི་གདན་ས་མཛད་དེ་ལྷ་ཆེན་པོའམ་ལྷ་ལུང་གི་དབང་ཕྱུག་དུ་གྲགས། གཅུང་པོ་འབྲི་ཁུང་གཅུང་རིན་པོ་ཆེ་ལས་ལྷ་བཙུན་མཛད་དེ་ལྷ་དམ་ཤོད་པར་གྲགས། གཅེན་ཇོ་འབག་གིས་རྒྱལ་ས་མཛད་པའི་སྲས་ལྔ་ལས་གཉིས་པ་རབ་ཏུ་བྱུང་སྟེ་ལྷ་འགྲོ་མགོན་དུ་གྲགས་སྟེ་ལྕིལ་བུའི་གདན་ས་མཛད་དེ་ངོ་མཚར་མཐའ་ཡས་པ་མངའ། གསུམ་པ་ལྡེ་བོས་འབངས་བརྩིགས་བཟུང་སྟེ་དེའི་སྲས་ཤཱཀྱ་རྒྱལ་གྱིས་གཡེ་ཆེ་ཆུང་ལ་དབང་མཛད། དེའི་སྲས་ཤཱཀྱ་དཔལ་གྱི་བློ་གྲོས་བཟང་པོ་བླ་མ་འཕགས་པ་ལས་རབ་ཏུ་བྱུང་སྟེ་ཉེ་གནས་མཛད། བཞི་པ་ལྡེ་ཆུང་གཞོན་ནུར་གཤེགས། ལྔ་པ་ཇོ་རྒྱལ་བུ་ལུར་ཕོག་དེའི་སྲས་ཇོ་འཕེལ། དེའི་སྲས་ཆབ་ལྷ་ཟུར་ཁང་པ་སྟེ་ལྕིལ་བུ་བཟུང༌། གཅུང་པོའི་(ཇ༡༤༣བ)

[Full Size]

རྒྱུད་ཁྲོམ་པོ་བ་རྣམས་ཡིན། ཇོ་འབག་གི་སྲས་ཆེ་བ་ཤཱཀྱ་མགོན་གཅུང་རྣམས་སོ་སོར་ཕོག་ཕོ་བྲང་གནས་ཆུང་བཏབ། ས་སྐྱ་པཎྜི་ཏའི་སྦྱིན་བདག་བྱས། དེ་སྲས་ཤཱཀྱ་བཀྲ་ཤིས་ཀྱི་ཕོ་བྲང་རྙིང་མ་བཏབ། དེའི་སྲས་ཆེ་བ་ལྕིལ་བུའི་ལྷ་བྲག་ཁ་བ་ཡིན། ཆུང་བ་གྲོགས་པ་རིན་ཆེན་གྱིས་རྒྱལ་བ་ཐོག་བརྡུགས་པའི་ཉེ་གནས་མཛད། ཕྱིས་བླ་མ་འཕགས་པའི་ཉེ་གནས་མཛད། སེ་ཆེན་གྱི་དམ་ཁ་བླངས་སྟེ་ཕོ་བྲང་བྲག་ཁ་སོགས་བཏབ། སྐུ་གསུང་ཐུགས་རྟེན་འགའ་བཞེངས། ཇོ་སྟོན་ཚོགས་པའི་ཆོས་བཞི་གཏན་དུ་འདེགས་པའི་སྲོལ་མཛད། དགུང་ལོ་ང་གསུམ་པ་ལ་སྲས་ཤཱཀྱ་མགོན་པོ་ལ་རྒྱལ་ས་གཏད་ནས་ཐུགས་དམ་མཛད་དེ་བདུན་བཅུ་རྩ་བཞི་ལ་གཤེགས། དེའི་སྲས་བཞིའི་ཆེ་བ་ལྕིལ་བུ་བློ་གྲོས་འོད་ཡིན། གསུམ་པ་ཕག་མོ་གྲུར་རབ་ཏུ་བྱུང་སྟེ་ལྷ་བཙུན་ཚུལ་ཁྲིམས་བཟང་པོར་ཐོགས། བཞི་པ་འབལ་གཞོན་ནུར་འདས། གཉིས་པ་ཤཱཀྱ་མགོན་པོས་རང་གི་སྲིད་བསྐྱངས་སྟེ་ཡར་ལུངས་ལོ་ཙཱ་བ་གྲགས་པ་རྒྱལ་མཚན་བསྟེན། ཕོ་བྲང་ཡུམ་བུ་བླ་སྒང་ལ་གཙུག་ལག་ཁང་བཞེངས། ཆོས་འཁོར་དུ་མའི་སྦྱིན་བདག་མཛད་ནས་བསྟན་པ་ལ་ཕན་པར་མཛད་དོ། །ཕྱི་མ་འདི་རྣམས་ཡར་ལུངས་ཇོ་བོས་བསྒྲིགས་པའི་ཆོས་བྱུང་ལས་བསྡུས་པ་སྟེ་འདི་ཕྱིན་ཡང་དཔྱོད་ལྡན་རྣམས་ཀྱིས་སྟོད་སྨད་བར་གསུམ་གྱི་རྒྱལ་བརྒྱུད་ལས་བསྟན་པ་ལ་བྱ་བ་བྱས་པ་དང་ཕན་བདེའི་སྲོལ་གཏོད་པ་མཐོང་ན་རང་རང་གི་ཕྱོགས་བཟུང་བ་མ་ཡིན་པར་གཟུ་བོར་གནས་པའི་བློས་འདི་སྐབས་སུ་བསྣན་པར་བྱོས་ཅིག །དེ་ལྟར་རྒྱལ་བརྒྱུད་སིལ་ཆད་འདི་རྣམས་རྗེའི་སྐུ་ལྷ་སོ་སོའི་བསྟེན་ཡུལ་དུ་བགོས་པས་རྗེ་ཆེན་རྣམ་པ་དགུ། ཆོས་འཁོར་བསམ་ཡས་ཀྱི་རྐྱེན་དུ་རྗེ་ལྷུ་གཅིག་དང་བཅུ་ཅེས་གྲགས་པ་ཡིན་ལ་རྒྱལ་བརྒྱུད་མ་ཉམས་པ་ཡིན་ཕྱིན་ཡོན་ཏན་དུ་མས་ཁྱད་པར་དུ་འཕགས་ལ། ཇོ་བོ་བོད་དུ་ཕེབས་དུས་ཀྱང་བོད་ཀྱི་རཱ་ཛཱ་བོ་དྷི་ས་ཏྭའི་བརྒྱུད་པ་གསུང་ནས་བཙན་པོ་ཐམས་ཅད་ལ་ལྡང་བ་དང་བཀུར་སྟི་ཆེར་མཛད་པས་འབངས་རྣམས་(ཇ༡༤༤ན)

[Full Size]

ཇོ་བོ་ལྟ་བུ་འདི་ལྟར་མཛད་ན་རང་ཅག་འབངས་རྣམས་བཀུར་སྟི་ཅིས་མི་བྱེད་ཟེར་ནས་གུས་པར་གྱུར་ཞེས་བཤད་པ་ལྟར་ཆོས་རྒྱལ་བྱང་ཆུབ་སེམས་དཔའ་དེ་རྣམས་ཀྱི་ཡོན་ཏན་དང་སྐུ་དྲིན་ལ་བསམས་ནས་མངའ་ཐང་ཡོད་ཏམ་མེད་ཀྱང་རུང་སྟེ་བཀུར་སྟི་དང་སྲི་ཞུ་ཆེར་བྱ་བའི་གནས་ཡིན་ནོ། །རིགས་ཀྱི་ནང་ན་དམ་པ་རྨད་བྱུང་བ། །འཁོར་ལོས་བསྒྱུར་དང་སངས་རྒྱས་བྱུང་བའི་རིགས། །གདུང་གི་དམ་པ་གཽ་ཏམ་ཤཱཀྱའི་བརྒྱུད། །བབས་པའི་ཁུངས་བཟང་འོད་གསལ་ལྷ་ལས་བབས། །ལོངས་སྤྱོད་རྨད་བྱུང་ནམ་མཁའི་མཛོད་ལ་དབང༌། །བློ་གྲོས་ཡངས་པས་ཇི་ལྟ་ཇི་སྙེད་མཁྱེན། །ཐུགས་རྗེ་ཁོ་ནས་སྤྲུལ་པའི་སྐུར་བསྟན་པ། །འཁོར་ལོས་བསྒྱུར་བའི་དཔལ་ལས་ཆེས་ལྷག་པར། །སྤྲུལ་པའི་ཆོས་རྒྱལ་གདུང་རབས་བཞི་བཅུར་བྱོན། །བོད་ཡུལ་སྐྱེ་འགྲོ་བྱུང་དང་འབྱུང་འགྱུར་ཀུན། །ཉེས་སྐྱོན་ཀུན་བསལ་གནས་སྐབས་མཐར་ཐུག་གི །ཡོན་ཏན་བདེ་ལེགས་ཀུན་ལ་བཀོད་པ་ཡི། །བཀའ་དྲིན་དེ་ལྟ་གཞལ་གྱིས་ག་ལ་འཁོར། །ལྷ་འམ་དྲང་སྲོང་ཕ་མ་མཛའ་བཤེས་སོགས། །འདི་ལྟའི་སྨན་ཡོན་སྦྱིན་མཛད་སུ་ཞིག་ཡོད། །བརྒྱ་བྱིན་གྱིས་ཀྱང་མི་བསྒྲུན་དབང་ཕྱུག་དེ། །དེང་སང་དུས་ན་མིང་གི་ལྷག་མ་ཙམ། །ཆོས་རྒྱལ་དེ་དག་རྣམས་ཀྱི་རིགས་སྲས་ཕལ། །ཕྱི་དུས་འདི་ན་འབངས་དང་ཡང་འབངས་སྤྱོད། །ཁེང་དང་ཡང་ཁེང་མང་པོ་དྲེགས་པས་འགྱིང༌། །རང་རང་རིགས་རུས་ཆེ་བ་སྨྲ་བཞིན་དུ། །ཀུན་གྱིས་རྩོད་མེད་རིགས་མཆོག་སྨད་པ་མཚར། །ཀྱེ་མ་སྲིད་པ་འདི་ཡི་ངང་ཚུལ་ལྟོས། །གྲོགས་དག་ཀུན་ལ་སྙིང་པོ་ཅི་འདུག་སོམས། །སྐྱེས་པའི་མཐའ་འཆི་འདུས་པའི་ཐ་མ་འབྲལ། །བསགས་པའི་མཐའ་མཛད་མཐོན་པོའི་མཐའ་ལྷུང་ཞེས། །མངོན་སུམ་ཉིད་དུ་བསྟན་པར་མི་གདའ་འམ། །འཁོར་ལོས་བསྒྱུར་ལྟའི་དཔལ་འབྱོར་དེ་དག་རྣམས། །སྦྲང་ཚང་ཞིག་ཤུལ་(ཇ༡༤༤བ)

[Full Size]

ལྟར་གྱུར་འདི་མཐོང་ནས། །གནག་རྫི་ཙམ་གྱི་ལོངས་སྤྱོད་ཀྱིས་འཚོ་བ། །རང་རང་དབང་ཕྱུག་འདི་ལ་སུ་ཞིག་ཆགས། །ཛམྦུ་གླིང་བདག་པོ་རྣམས་ཀྱི་མངའ་ཐང་ཡང༌། །མི་རྟག་སྙིང་པོས་དབེན་པ་འདི་འདྲ་ན། །དུས་ངན་ད་ལྟའི་སྐྱེ་བོ་འགའ་ཡི་དབུས། །ཚངས་ལྟར་བསྙེམས་པ་ངོ་ཚའི་གནས་མིན་ནམ། །ལྷ་དང་མཚུངས་པའི་ལོངས་སྤྱོད་དེ་རྣམས་ཀུན། །སྟོན་ཀའི་སྤྲིན་བཞིན་ཡལ་བ་འདི་མཐོང་བཞིན། །ད་ལྟའི་ཟང་ཟིང་ངན་ངོན་ཁམ་འགའི་ཕྱིར། །འདི་ཕྱི་ཀུན་འདོར་འདི་རྣམས་ཅི་ཞིག་དྲན། །སྲིད་པ་འདི་ཡིས་རང་གི་ངང་ཚུལ་རྣམས། །རབ་ཏུ་གསལ་བར་རྟག་དུ་བསྟན་ན་ཡང༌། །ད་དུང་ཚེ་འདིའི་རྙེད་གྲགས་ལྷུར་ལེན་པའི། །སྡེ་སྣོད་འཛིན་པར་ཁས་འཆེ་འདི་འདྲ་ཅི། །འདོད་པའི་རྣམ་རྟོག་ཅུང་ཟད་ཁ་མ་བྲི། །རྙེད་བཀུར་སྒྲུབ་ཕྱིར་མི་བྱེད་ཅི་ཡང་མེད། །དེ་དག་སྤྲུལ་པའི་ལུས་ཅན་ཡིན་པར་རློམ། །ས་སྟེང་འདི་འདྲས་གང་བས་རབ་ཏུ་སྐྱོ། །རང་སེམས་གདུལ་ཕྱིར་དམ་པའི་ཆོས་གསུངས་མོད། །དེང་དུས་ཆོས་ལ་བསྟེན་ནས་དྲེགས་ཅིང་ཁེངས། ཁྱིམ་པ་ཀུན་ལས་ལྷག་པར་ཆགས་སྡང་འཕེལ། །ཀྱེ་མ་འདི་ལྟའི་གནས་སྐབས་སྔོན་བྱུང་ངམ། །རྒྱལ་པོ་གླང་གིས་རབ་བྱུང་ཕབ་པ་སོགས། །བསྟན་ལ་གནོད་པར་ཀུན་གྱིས་ཤེས་མོད་ཀྱང༌། །ཕྱི་དུས་མཛའ་བ་ལྟར་བཅོས་རབ་བྱུང་ཀུན། །ཐབས་བརྒྱས་འབེབས་འདི་དེ་འདྲར་གོ་བ་མེད། །རབ་བྱུང་མ་ལུས་རྟག་དུ་དམག་ལ་འདེད། །རྟོག་ཆེན་རྫོང་བསླུ་དུག་སྟེར་སོགས་ཀྱི་གླར། །སྡིག་ཅན་རྣམས་ལས་དགེ་འདུན་གནས་བརྟན་བསྐོ། །ཁྱིམ་པས་ཆོས་པ་ཀུན་གྱི་ཕྱག་མཆོད་ལེན། །མཁས་པར་ཁས་ལེན་བླུན་པོ་ཁ་བརྡར་ཀུན། །ཇ་ཆང་གྲལ་གྱི་བཞད་གད་མཁན་པོར་འབེབས། །གསང་སྔགས་ཚིག་རེ་འཛིན་པ་ཡན་ཆད་ཀྱང༌། །ངན་སྔགས་མཐུ་གཏད་སེར་གསུམ་བྱེད་ལ་འགོད། །(ཇ༡༤༥ན)

[Full Size]

འདི་འདྲའི་ངང་ཚུལ་གཞན་ཡང་བགྲང་མི་ལང༌། །རྒྱལ་པོ་དར་མས་བསྟན་པ་བསྣུབས་པ་དེས། །བྱེ་བའི་ཆ་ཡང་འདི་དག་ལ་མི་ཕོད། །དེ་ཚེ་བསྟན་པ་མེད་པར་གོ་བ་ཡིས། །སླར་ཡང་བསྟན་པའི་མེ་རོ་བསླང་དུ་བྱུང༌། །དེང་སང་བསྟན་མིན་འདི་འདྲར་བསྟན་ཞེས་གྲགས། །འདི་འདྲར་འགོད་ལ་བསྟན་པ་འཛིན་པོ་དང༌། །བསྟན་པའི་སྦྱིན་བདག་ཅེས་བྱར་སྒྲོག་པའི་ཕྱིར། །འཕགས་པའི་གནས་བརྟན་བཅུ་དྲུག་བྱོན་ན་ཡང༌། །ད་ནི་བསྟན་པ་དངོས་ཅིག་ཇི་ལྟར་གཟུགས། །རྒྱལ་པོ་གླང་གི་དགོངས་པ་ད་རྫོགས་སམ། །ཀྱེ་མ་དཔྱོད་ལྡན་ཡོད་ན་དུས་འདིར་དཔྱོད། །སེམས་ཡོད་མཆིས་ན་སངས་རྒྱས་བསྟན་ལ་སོམས། །མཁས་པ་ཡོད་ན་དམ་ཆོས་གང་ཡིན་ལྟོས། །ཞིག་པོ་ཡོད་ན་འཁྲུལ་པའི་རྗེས་མ་འབྲང༌། །དད་ལྡན་ཡོད་ན་ཟོག་པོས་བསླུས་དོགས་གྱིས། །ཤེས་རབ་ཅན་འགའ་ཡོད་ན་རྒྱལ་བསྟན་དངོས། །གང་ཡིན་གཟུ་པོར་ལྟོས་ལ་གཙུག་དུ་ལོང༌། །ཐུབ་བསྟན་འདི་ལྟར་གྱུར་པའི་དུས་སྐྱེས་ཕྱིར། །བདག་ཅག་སྐལ་དམན་ཕྱོགས་གཅིག་འདུས་པར་གོ །དམ་པའི་དོན་དུ་དུས་ལ་བཟང་ངན་མེད། །རང་རྟོག་ཕྱི་རོལ་ཡུལ་དུ་འཁྲུལ་པ་སྐྱེས། །དེ་ལ་ཉིད་འཁྲུལ་བཟང་ངན་ཞེན་པས་བཅིངས། །སྒྱུ་མའི་དམག་དཔུང་བདེན་པར་ཞེན་ལྟར་ཟད། །མངའ་ཐང་ལོངས་སྤྱོད་རྨི་ལམ་ནོར་བརྙེད་འདྲ། །རིགས་རུས་མཆོག་དམན་ཞེན་པས་བཏགས་པ་ཙམ། །འདི་དག་ཐམས་ཅད་སྙིང་པོས་དབེན་ནོ་ཞེས། །སྤྲུལ་པའི་ཆོས་ཀྱི་རྒྱལ་པོ་དེ་རྣམས་ཀྱིས། །དམ་ཆོས་རྣམ་ཐར་ཚུལ་དུ་བསྟན་པ་ཉིད། །འདོད་པའི་འདམ་ན་པདྨ་ལྟར་མ་གོས། །བདག་གཞན་མ་དམིགས་འགྲོ་བ་སྒྲོལ་ལ་བརྩོན། །སྤྲུལ་པའི་ཆོས་ཀྱི་རྒྱལ་པོ་དེ་རྣམས་ཀྱི། །བཀའ་དྲིན་དྲན་པས་སླར་ཡང་ཕྱག་དགྱིད་དོ། །(ཇ༡༤༥བ)

[Full Size]

ཕྱི་དུས་འདིར་དམག་མི་ནམ་དགོས་འབྱུང་བ་ཁོ་ན་ལ་དམིགས་ནས་ཆོས་སྡེར་མིང་བཏགས་པ་རེ་འདེབས། དེ་དག་གི་བླ་མའི་གནས་རྣམས་ཀྱང་རྒྱལ་པོ་དང་བློན་པོ་དག་རྔན་པས་མགུ་བར་བྱས་པའམ། གཡུལ་གྱི་ཚེ་བྱ་མ་རྟ་དང་ཉན་སྣ་པ་དང་རྟོག་ཆེན་དུ་ཕྱིན་པའམ། གཞན་གྱི་རྫོང་སླུ་དུག་སྟེར་སོགས་བྱས་པའམ། ཐ་ནའང་ཁ་གསག་གིས་མགུ་བ་ཙམ་གྱི་སྐྱེ་བོ་ཞིག་བསྐོ། སྐྲ་བྲེགས་མིང་བརྗེས་རེ་མ་གཏོགས་སྡོམ་པ་འབོགས་པའི་སྲོལ་མེད། སློབ་དཔོན་དང་རྒན་པར་བྱས་པ་རྣམས་ཀྱིས་ཆགས་སྡང་དང་ཆོས་མིན་གྱི་མིག་ལྟོས་འགའ་ཞིག་བསླབས། སྔར་ཁྱིམ་པའི་དུས་ལས་བརྒྱ་སྟོང་གིས་སེམས་མ་རུངས་ཤིང་རྩུབ་པ། འཁོར་བའི་སྐྱོན་རྣམས་མཐོང་ཡང་སྐྱོ་བ་ཅུང་ཟད་མེད། །སངས་རྒྱས་ཡོན་ཏན་ཐོས་ཀྱང་དད་པ་ཅུང་ཟད་མེད། །ཁྲེལ་མེད་ངོ་ཚ་མེད་ཅིང་སྙིང་རྗེ་ཅུང་ཟད་མེད། །སྡིག་པ་ལྷག་པར་སྤྱོད་ལ་འགྱོད་པ་ཅུང་ཟད་མེད། །མེད་དྲུག་འཛོམ་ལ་སངས་རྒྱས་སྐལ་བ་མེད། །ཅེས་འཕགས་པ་ཐོགས་མེད་ཀྱི་རིགས་ཆད་ཀྱི་མཚན་ཉིད་དུ་གསུངས་པ་དེ་ཐམས་ཅད་ཚང་བ་བརྒྱ་སྟོང་སོགས་འདུས་ཤིང་ཐོས་པ་སྣ་རེ་བྱས་ཀྱང་ཤེས་ཚད་ང་རྒྱལ་དང་ཆགས་སྡང་གི་རྒྱུར་སོང༌། སྔགས་ཀྱི་ནུས་པ་ཕྲ་མོ་རེ་བརྙེད་ན་བྱིས་པས་བཙན་དུག་ཟོས་པ་ལྟར་སླར་ལ་སྡུག་བསྔལ་མཐའ་མེད་ཀྱི་རྒྱུ་བྱེད། ཆོས་ཀྱི་བསམ་པ་སྐད་ཅིག་ཡང་མི་སྐྱེ་བ་ཤ་སྟག་འདུས་པ་ལ་དགེ་འདུན་གྱི་སྡེར་གྲགས་ནས་ཉམ་ཆུང་ཐམས་ཅད་ལ་བརྙས་ཤིང་འཇོམས། དམག་གི་གཡུལ་དུ་འཇུག་པ་ལ་ཚམ་ཚོམ་ཅུང་ཟད་ཀྱང་མེད་པ་འདི་རྣམས་དང༌། རྗེ་དཔོན་རྣམས་ཀྱིས་ཀྱང་རབ་བྱུང་ཐམས་ཅད་ཚེ་འདིར་ཁྲལ་དམག་འུ་ལག་ཐམས་ཅད་ལ་སྦྱར་ནས་ཆོས་དང་ཕྲལ་སྟེ་ཕྱི་མར་ངན་འགྲོ་ལ་འགོད་པའི་གནོད་པ་དགྲ་བོ་འབུམ་ཕྲག་གིས་ཀྱང་མི་ནུས་པ་འདི་ལྟ་བུ་བྱས་སྟེ་འདི་ཕྱི་གཉིས་ཀའི་བདེ་པ་དང་ཕྲལ་བ་ལ་གནོད་པར་གོ་བ་ཡང་སུ་ཡང་མེད་ཀྱི། སྟེང་དུ་རྗེ་དཔོན་འདི་ངེད་ཀྱི་སྦྱིན་བདག་གོ་ཞེས་དེའི་ཆེད་དུ་སྲོག་དང་ཚམ་ཚོམ་མེད་པར་འདོར་བ་འདི་ལྟ་བུས་བོད་ཡུལ་ཐམས་ཅད་གང་ཞིང་དེ་དག་ལ་སངས་རྒྱས་(ཇ༡༤༦ན)

[Full Size]

ཀྱི་བསྟན་པར་གྲགས་པ་འདི་ལྟ་བུ་ནི་སྔོན་རྒྱལ་པོ་གླང་གིས་བསྟན་པ་བསྣུབས་པས་འབུམ་གྱི་ཆ་ཡང་དོ་བར་མི་སྣང་སྟེ་སྨན་མ་རྙེད་པ་ཙམ་ནི་སླའི་སྨན་གྱི་དོད་པོར་དུག་ཧ་ལ་ཧ་ལ་ཆེན་པོ་བྱིན་པ་ནི་དེ་ལྟ་མ་ཡིན་པ་བཞིན་ནོ། །རྒྱལ་སྲས་རིན་པོ་ཆེས་ཕག་གྲུའི་ཁྲི་དཔོན་ཆེན་པོ་བྱང་རྒྱལ་ལ་བནྡྷེ་རྣམས་ལ་ཁྲལ་དམག་འུ་ལག་འགེལ་བ་མི་འཐད་གསུངས་པས་ཁོང་ན་རེ་ཆོས་ཚུལ་བཞིན་བྱེད་པ་རྣམས་ལ་ནི་ཞབས་ཏོག་བྱེད་ཅིང་ཡོད། གཞན་ཕུར་འབྲོག་འཛིན་མདར་ཞིང་འདེབས་ཉོ་ཚོང་དང་ཁྱིམ་ཐབ་བྱེད་པ་འདི་རྣམས་ལ་ཁྲལ་དམག་འུ་ལག་མི་འགེལ་ན་གཞན་སུ་ལ་འགེལ་དུ་བཏུབ་པར་གདའ་ཟེར་བས་འོ་སྐོལ་གྱིས་ལན་མ་ཐེབས་ཟེར་བ་བྲིས་འདུག་ཡང་དེའི་ལན་སའི་སྙིང་པོ་འཁོར་ལོ་བཅུ་པའི་མདོ་ལས་སྟོན་པ་ཉིད་ཀྱིས་བཏབ་ཟིན་པ་ཡིན་སྟེ་མདོ་དེར་ཚངས་པ་ལྷའི་སྙིང་པོས་ཞུས་པའི་ལན་དུ་བཀའ་བསྩལ་པ། རྒྱལ་པོ་དང་བློན་པོ་སོགས་ཀྱིས་རབ་ཏུ་བྱུང་བ་ཚུལ་ཁྲིམས་སྣ་གཅིག་མེད་པ་ལ་ཡང་ཆད་པས་གཅོད་དུ་མི་གནང་སྟེ་གླང་ཆེན་དང་གླ་བའི་རོ་དང་ཙམ་པ་ཀ་བརྙིངས་པ་དང་སྤོས་ཚིག་པ་རྣམས་དངོས་པོ་ཉམས་ཀྱང་གི་ཝཾ་དང་གླ་རྩི་དང་དྲི་བསུང་ཡོད་པས་གཞན་ལས་ལྷག་པར་ལྟར་རབ་ཏུ་བྱུང་བའི་རྟགས་ཙམ་མཐོང་བས་ཀྱང་སངས་རྒྱས་དྲན་ཞིང་མུ་སྟེགས་ལ་མི་བསྟེན་པ་དང་ཚུལ་ཁྲིམས་དྲན་ནས་སྡིག་པ་སྤོང་པ་དང༌། སྦྱིན་པ་དང་བཟོད་པ་དང་བརྩོན་འགྲུས་དང་བསམ་གཏན་དང་ཤེས་རབ་དང་རབ་ཏུ་འབྱུང་བ་རྣམས་དྲན་ནས་དེ་ལ་སྦྱོར་ཞིང་དགེ་བ་བསྐྱེད་པའི་ཕྱིར་རོ་ཞེས་རྒྱས་པར་གསུངས་ཅིང༌། ཙམྤ་ཀ་ཡི་མེ་ཏོག་བརྙིངས་གྱུར་ཀྱང༌། །མེ་ཏོག་གཞན་པ་རྣམ་པས་ཤིན་ཏུ་ལྷག །དགེ་སློང་ཚུལ་ཁྲིམས་ཉམས་ཤིང་སྡིག་སྤྱོད་ཀྱང༌། །མུ་སྟེགས་ཅན་དག་ཐམས་ཅད་ཀུན་པས་མཆོག །ཞེས་སོགས་དང༌། བཅོམ་ལྡན་འདས་ཉིད་སྔོན་སློབ་པའི་ཚེ་གླང་པོ་ཆེའི་རྒྱལ་པོ་མཆེ་བ་དྲུག་པར་སྐྱེས་པ་ན་ལུས་འཕགས་ཀྱི་རྒྱལ་པོའི་བུ་མོས་དེའི་མཆེ་བ་དོན་དུ་གཉེར་ནས་རྒྱལ་པོས་རྔོན་པ་ཅིག་བཏང་སྟེ་དེས་གླང་པོ་ཆེ་དེ་རང་སངས་རྒྱས་རྣམས་ལ་བག་འབེབས་(ཇ༡༤༦བ)

[Full Size]

པ་མཐོང་ནས་ངུར་སྨྲིག་བསྒོས་མདའ་གཞུ་སྦས་སྟེ་གླང་པོ་ཆེ་དེ་མི་དོགས་པར་བག་ཕབ་པའི་གནད་ཏུ་བསྣུན་པ་ན་གླང་མོ་བཟང་མོ་སོགས་གླང་ཆེན་གྱི་ཁྱུ་ཐམས་ཅད་ཁྲོས་པ་ལས་མི་དེ་གླང་པོའི་རྒྱལ་པོས་རང་གི་བྲང་འོག་དུ་སྦས་ནས་བསྐྱབས། ཁྱུ་རྣམས་དོང་བའི་འོག་དུ་རྒྱུ་མཚན་དྲིས་པས་མཆེ་བའི་ཕྱིར་སྟེ་མ་རྙེད་ན་རྔོན་པ་ཐམས་ཅད་རྒྱལ་པོས་གསོད་ཏོ་ཅེས་སྨྲས་པས་དེ་རྣམས་བསྐྱབ་པའི་ཕྱིར་དང་ངུར་སྨྲིག་འདི་ནི་འཕགས་པ་ཐམས་ཅད་ཀྱི་རྒྱལ་མཚན་ནོ་ཞེས་ངུར་སྨྲིག་གི་གོས་ལ་གུས་པ་ལྷུར་བྱས་སྟེ་མཆེ་བ་དྲུག་རང་གིས་ཕྱུང་ནས་སྣ་ཞགས་ཀྱིས་བཟུང་སྟེ་བྱིན་པ་དང༌། ཡུལ་པཉྩ་ལར་རྒྱལ་པོ་དགྲ་ལས་རྒྱལ་བྱ་བའི་ཆད་པ་གཅོད་པའི་མི་ཐམས་ཅད་དུར་ཁྲོད་ཆེན་པོ་ཁ་ལམ་པ་ཅེས་པ་འཇིགས་སུ་རུང་བར་སྐྱེལ་ཞིང་སྲིན་མོས་ཟ་བ་ལས་ནམ་ཞིག་མི་ཞིག་ལ་ཉེས་པ་བྱུང་ནས་ཆད་པས་འཇིགས་སྟེ་སྐྲ་དང་ཁ་སྤུ་བྲེགས་ནས་ཆོས་གོས་ཀྱི་ཚལ་བུ་ཞིག་རྙེད་པ་མགུལ་དུ་བཏགས་པ་ལས་གཤེད་མས་དུར་ཁྲོད་དུ་ཤིང་ལ་བཅིངས་སྟེ་བཞག་པས་སྲིན་མོ་མཚོན་ཆའི་མིག་བུ་ལྔ་བརྒྱ་དང་བཅས་པ་ལྷགས་སྟེ་སྲིན་མོས་ཕྱག་དང་བསྐོར་བ་བྱས་སྟེ། སྐྱེས་བུ་ཁྱོད་ནི་མ་བསྙེངས་བདེ་བར་བཞུགས། །ཁྱོད་ལ་བདག་ཅག་གནོད་པ་མི་དགྱིད་ཏོ། །སྐྲ་བྲེགས་ཆོས་གོས་གྱོན་པ་ཁྱོད་མཐོང་ནས། །བདག་ཅག་སངས་རྒྱས་རྗེས་སུ་དྲན་པར་གྱུར། །ཞེས་བསྟོད་པ་བྱས། སྲིན་མོའི་བུ་རྣམས་ཀྱིས་མི་འདི་བདག་ཅག་བཟང་སྩོལ་ཞིག་ཞེས་སྨྲས་པས་མོ་ན་རེ། སངས་རྒྱས་གངྒཱ་ཀླུང་གི་བྱེ་སྙེད་ཀྱི། །རྣམ་པར་གྲོལ་བའི་རྒྱལ་མཚན་གོས་གྱོན་པ། །འདི་ལ་མི་དགེ་སྡིག་པའི་སེམས་བསྐྱེད་ན། །ངེས་པར་མཚམས་མེད་སེམས་ཅན་དམྱལ་བར་ལྷུང༌། །ཞེས་སོགས་སྨྲས་སྟེ་ཟློག །དེ་བཞིན་དུ་སྲིན་མོ་བོང་བུའི་སོ་དང་ཁྲོ་གཉེར་དཔྲལ་སྐྲ་ཅན་དང་མཚོན་ཆའི་གདོང་རྣམས་རེ་རེ་བཞིན་འཁོར་ལྔ་བརྒྱ་དང་བཅས་པ་རེ་ལྷགས་སྟེ་སྔ་མ་བཞིན་གནོད་པ་སྤངས་སྟེ་ཕྱག་བསྐོར་དང་ངུར་སྨྲིག་ལ་བསྟོད་པ་བྱས། ཐ་མ་དེས་བཅིངས་པ་ལས་བཀྲོལ་སྟེ་བཏང་བས་རྒྱལ་པོ་དེས་ཐམས་ཅད་(ཇ༡༤༧ན)

[Full Size]

ཏུ་རྟགས་ཅན་ལ་བཀུར་སྟི་བྱེད་པའི་དྲིལ་བསྒྲགས་པའི་སྔོན་བྱུང་དང༌། མ་འོངས་པ་རྒྱལ་པོ་གདོལ་པ་དང་བྲམ་ཟེ་གདོལ་པ་དང་བློན་པོ་གདོལ་པ་སོགས་ཀྱིས་དགེ་འདུན་གྱི་འདུ་བའི་སྒོ་འཕྲོག་རབ་ཏུ་བྱུང་བ་ལ་ཆད་པས་གཅོད་པ་སོགས་བྱེད་པ་དེ་རྣམས་ལྷས་མི་སྲུང་ཞིང་ཡན་ལག་ཆད་པ་དང་ལྕེ་ལྐུགས་པས་ཤི་སྟེ་མནར་མེད་པར་ལྷུང་བར་གསུངས་ཤིང་རྡོ་རྗེ་སྙིང་པོས་དེའི་རྒྱུ་མཚན་ཞུས་པ་ན་ལན་དུ། རབ་ཏུ་བྱུང་བ་ལ་ལ་ནི་ལྷག་པའི་སྤྱོད་པ་ཉམས་ལ་མོས་པ་མ་ཉམས་པ་ཡོད། ལ་ལ་ནི་མོས་པ་ཉམས་ལ་ལྷག་པའི་སྤྱད་པ་མ་ཉམས་པ་ཡོད། གཉིས་ཀ་ཉམས་པ་དང་གཉིས་ཀ་མ་ཉམས་པ་ཡང་ཡོད། ཚུལ་ཁྲིམས་ཉམས་ལ་ལྟ་བ་མ་ཉམས་པ་དང་ལྟ་བ་ཉམས་ལ་ཚུལ་ཁྲིམས་མ་ཉམས་པ་དང་གཉིས་ཀ་ཉམས་པ་དང་གཉིས་ཀ་མ་ཉམས་པ་དང༌། དེ་ཐམས་ཅད་མ་ཉམས་ཤིང་སྡིག་གྲོགས་ཀྱི་དབང་དུ་གྱུར་པ་དང༌། དགེ་བའི་བཤེས་གཉེན་ལ་བསྟན་ཡང་ལུག་ལྟར་ལྐུགས་པ་ཡང་ཡོད་ལ་དེ་དག་ལ་ཐབས་དེ་དང་དེས་གདུལ་བ་ཡིན་པར་རྒྱས་པར་གསུངས་ཅིང་མདོ་གཞན་ལས་ཀྱང་སེང་གེའི་རྒྱལ་པོ་ཡི་དམ་བརྟན་པས་རྔོན་པའི་ངུར་སྨྲིག་ལ་གུས་པ་བསྐྱེད་དེ་ཡིག་འབྲུ་བརྒྱད་སྨྲས་སྟེ་པགས་པ་བཏང་བ་དང༌། ངའི་བསྟན་པ་ལ་ངུར་སྨྲིག་ཙམ་གྱོན་སྟེ་བུ་དང་བུ་མོའི་ལག་པ་ནས་བཟུང་སྟེ་ཆང་སྐྱོགས་གང་གི་ཕྱིར་ཆང་མའི་ཁྱིམ་ནས་ཆང་མའི་ཁྱིམ་དུ་འཕྱན་པར་བྱེད་པ་དེ་རྣམས་ཀྱང་བསྐལ་པ་བཟང་པོ་འདི་ལ་ཡོངས་སུ་མྱ་ངན་ལས་འདའ་འོ་ཞེས་གསུངས་ཤིང་སྟོན་པ་ཉིད་ཀྱང་ལྷས་སྤྲུལ་བའི་རབ་བྱུང་གཟིགས་པས་རྐྱེན་བྱས་སྟེ་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གཤེགས་པའི་ཕྱིར་རོ། །དེས་ན་རྟགས་ཅན་གྱིས་ཉེས་པ་ཆེར་བྱས་ཀྱང་ཆད་པ་གཅོད་དུ་ཡང་མ་གནང་ན་དཔྱ་ཁྲལ་དང་དམག་དང་བྲན་དུ་བསྐུལ་བ་ནི་ག་ལ་རུང་སྟེ་རབ་བྱུང་ལ་འདི་ལྟར་བྱེད་པ་རྣམས་ནི་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ལ་བརྙས་པ་མི་(ཇ༡༤༧བ)

[Full Size]

བཟད་པ་ཡིན་ནོ། །གལ་སྟེ་རྒྱལ་པོ་ལ་སོགས་པ་དེ་དག་རང་ཉིད་ཀྱང་བྱང་ཆུབ་ཏུ་སེམས་བསྐྱེད་པ་ཅིག་ཡིན་ན་ནི། དཀོན་མཆོག་གསུམ་གྱི་དཀོར་འཕྲོག་པ། །ཕས་ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་ཐུབ་པས་གསུངས་པ་ཡིན། །ཚུལ་ཁྲིམས་འཆལ་པའི་དགེ་སློང་ལའང༌། །ངུར་སྨྲིག་འཕྲོག་དང་བརྡེག་པ་དང༌། །བཙོན་རར་འཇུག་པར་བྱེད་པ་དང༌། །རབ་ཏུ་བྱུང་ལས་འབེབས་པ་དང༌། །སྲོག་བྲལ་བྱེད་པ་གསུམ་པ་འོ། །མཚམས་མེད་ལྔ་པོ་བྱེད་པ་དང༌། །ལོག་པར་ལྟ་བ་འཛིན་པ་དང༌། །གྲོང་ལ་སོགས་པ་འཇོམས་པ་དག །སེམས་ཅན་དམྱལ་བ་ཆེན་པོའི་རྒྱུ། །ཞེས་བསླབ་བཏུས་ལས་རྒྱལ་པོ་དང་བློན་པོའི་རྟེན་ཅན་གྱི་བྱང་སེམས་ལ་རྩ་ལྟུང་དུ་བཤད་པ་དེ་རྣམས་ཕལ་ཆེར་ཅིག་ཅར་ཏུ་འབྱུང་བ་ཡིན་ལ་ངུར་སྨྲིག་གི་ཚལ་བུ་འཛིན་པ་ལའང་སྟོན་པའི་འདུ་ཤེས་སྐྱེད་ཅེས་པའི་སྐྱབས་འགྲོའི་བསླབ་བྱ་དང་ཡང་འགལ་བ་ཡིན་ནོ། །ཕུ་འབྲོག་མདའ་ཞིང་སོགས་འཛིན་པ་ཡང་ཐུན་མོང་གི་འདུལ་བ་ལས་གང་ཟག་ལ་དེ་ལྟ་བུ་མ་གནང་ཡང་དགེ་འདུན་གནང་ཞིང༌། ཐེག་ཆེན་གྱི་བྱང་ཆུབ་སེམས་དཔའ་དགེ་སློང་གི་རྟེན་ཅན་ལ་གཞན་དོན་དུ་གནང་བ་ཡང་ཡོད་པས་བསམ་པ་ཀུན་སློང་གཙོ་ཡི་ཡོ་བྱད་བསྙུངས་པ་ཙམ་གཙོ་བ་ཡང་མ་ཡིན་ནོ། །དེ་ལྟར་ཆད་པས་བཅད་དུ་མ་གནང་ཡང་ཚུལ་ཁྲིམས་དང་མི་ལྡན་པ་དེ་རྣམས་དགེ་འདུན་གྱི་ནང་དུ་བཞག་པར་བྱ་བ་ནི་མ་ཡིན་སྟེ་ལྔ་ཕྲུགས་དང་ལྡན་པའི་དགེ་སློང་གིས་དགེ་འདུན་གྱི་ནང་དུ་གནང་བ་དྲིས་སྟེ་བྱིན་ན་ཉེས་པ་གླེང་ཞིང་གནས་ནས་འབྱིན་པར་བྱ་ལ་དེ་རྒྱལ་པོ་སོགས་ལ་བརྟེན་པས་འབྱིན་མ་ནུས་ན་དགེ་འདུན་རྣམས་གནས་གཞན་དུ་འགྲོ་བར་གསུངས་ཤིང༌། དེས་ན་སོ་སྐྱེ་འཆིང་བ་ཀུན་ལྡན་རྒྱལ་པོ་དང་བློན་པོ་དང་དགེ་འདུན་གྱི་གནས་བརྟན་སོགས་བླ་མའི་གནས་དང་ཞལ་ཏ་པ་བཅུ་གཉིས་དང་ཁྱད་པར་དེང་སང་ཆོས་ཁྲིམས་པར་གྲགས་པའི་མཛེས་ཆོས་པ་རྣམས་བྱེད་པ་ནི་དཀོན་མཆོག་གི་དཀོར་ལེན་པ་དང༌། ཆོས་(ཇ༡༤༨ན)

[Full Size]

སྤོང་དང༌། གང་ཟག་དམ་པ་ལ་བརྙས་པ་སོགས་ཉེས་པ་དུ་མའི་འབྱུང་གནས་སུ་མཐོང་ནས་བྱང་ཆུབ་སེམས་དཔའ་མང་པོས་བདག་བཟོད་པ་མ་ཐོབ་ཀྱི་བར་དུ་ནམ་ཡང་རྒྱལ་པོར་མ་གྱུར་ཅིག་བློན་པོར་མ་གྱུར་ཅིག་སོགས་ནས་དགེ་འདུན་གྱི་གནས་བརྟན་སོགས་སུ་མ་གྱུར་ཅིག་ཅེས་སྨོན་ལམ་བཏབ་པར་སའི་སྙིང་པོ་འཁོར་ལོ་བཅུ་པ་ཉིད་ལས་རྒྱས་པར་བཤད་དོ། །བོད་ཀྱི་རྒྱལ་ཁྲིམས་སིལ་བུར་གྱུར་པའི་འོག །མཁས་གྲུབ་སྐྱེས་ཆེན་དཔག་མེད་བྱོན་གྱུར་སྟེ། །བསྟན་པའི་སྲོག་ཤིང་ར་ས་བསམ་ཡས་སོགས། །ཉམས་པ་བསོས་ཤིང་བསྟན་པ་དར་བར་མཛད། །དེ་ཡང་བསྟན་པ་ཕྱི་དར་གྱི་རྣམ་གཞག་གཞན་དུ་འཆད་ལ་སྐྱེས་བུ་དམ་པ་ཕྱིས་བྱོན་པས་ར་ས་བསམ་ཡས་ལ་བྱ་བ་བྱས་ཚུལ་ནི། ཁེང་ལོག་གི་འོག་དུ་ར་ས་གཉིས་ཞབས་ཏོག་མེད་པར་སྤྲང་ཚང་བཅས་སྟེ་ལྷ་ཁང་ཐམས་ཅད་ཏུ་ཐབ་བཅས་པས་དུ་བས་མོག་པོར་བྱས་པ་རིང་ཞིག་བྱུང༌། དེའི་ཚེ་ཟངས་དཀར་ལོ་ཙཱ་བ་འཕགས་པ་ཤེས་རབ་དང་མདོལ་ཆུང་བསྐོར་དཔོན་གྱིས་སྤྲང་ཁང་ཟུར་དུ་བརྩིགས། དམག་སྦས། ཕྱོགས་གཅིག་དུ་འགྱེད་སྟོན་བཏང་བ་ལ་སྤྲང་པོ་རྣམས་འདུས་པའི་ཤུལ་ཕྲོགས་སྟེ་སྤྲང་ཚང་བཏོན། གཙང་ཁང་དབུས་མའི་རྟེན་རྣམས་སྐུ་ཆུངས་པས་མི་མཛེས་པར་མཐོང་ནས་སྟེང་ཁང་དུ་གདན་དྲངས་པས་མི་འཁྲུགས་པའི་སྐུས་ཁོ་བོ་གཞན་དུ་མི་འགྲོ་གསུངས་པས་ཇོ་བོ་མི་འགྲོ་གསུང་འབྱོན་དུ་གྲགས། སླར་ཐུབ་པ་གངས་ཆེན་མཚོ་རྒྱལ་སེམས་དཔའ་སེམས་མ་སྒོ་སྲུང་དང་བཅས་པ་བཞེངས། ཞིག་གསོ་དང་ཞབས་ཏོག་ཆེར་མཛད། ཕྱིས་མདོལ་ཆུང་བསྐོར་དཔོན་གྱིས་ལུས་སྣུམ་རས་ཀྱིས་བཅིངས་པ་ལ་སྤྱི་བོ་ནས་རིམ་པས་མར་མེར་སྤར་སྟེ་ཇོ་བོའི་དྲུང་དུ་ཕུལ་ནས་འགྲེང་བཞིན་དུ་བཟང་སྤྱོད་སྨོན་ལམ་གཉིས་བཏོན་ནས་གསུམ་པའི་མགོན་པོ་ཀུན་གྱི་དྲུང་དུ་བདག་མཆིའོ། །ཞེས་པའི་སྐབས་སུ་ཉམས་འུར་ནས་བཀྲབས་སྟེ་སྐད་ཅིག་དེ་ལ་སྤྱི་བོ་ནས་ཐོད་པ་གོག་པའི་ཤུལ་ནས་འོད་ཆེན་པོ་རིག་ན་མཁར་སོང༌། དེ་མ་ཐག་ས་གཡོས་མེ་ཏོག་གི་ཆར་ཆེན་(ཇ༡༤༨བ)

[Full Size]

པོ་བབ་སྐད། ར་སར་ཀླུ་མེས་རྦ་རག་འབྲིང་ཚོ་སྟེ་སྨད་འདུལ་གྱི་སྡེ་བཞི་ཆགས་ནས་བཤད་ཉན་དར། ཕྱིས་རྦ་འབྲིང་གི་སྡེ་འཁྲུག་བྱུང་བས་གཙུག་ལག་ཁང་ཐམས་ཅད་དམག་གིས་ཞིག་ཉམ་རྨས་པའི་ཚེ་ཆོས་རྒྱལ་གྱི་ལུང་བསྟན་ལྟར་རྗེ་སྒོམ་པ་ཚུལ་ཁྲིམས་སྙིང་པོ་མ་མགོན་དང་རྫོང་བཙན་གྱིས་སྤྱན་དྲངས་སྟེ་བྱོན་ནས་སྡེ་འཁྲུག་བསྡུམས་པས་ཤིན་ཏུ་དཀའ་ནས་འབྱོན་པར་བརྩམས་པའི་ཚེ་ཇོ་བོ་ལས་སྤྱན་ཆབ་བྱུང༌། འཁྲུག་པ་འདི་ཁྱོད་ཀྱིས་མི་བསྡུམ་ན་སུས་བསྡུམ་ཞེས་གསུང་བ་སྐུ་འཁོར་ཐམས་ཅད་ཀྱིས་ཐོས། ཡང་ཤིན་ཏུ་དཀའ་བ་ན་བླ་མ་ལྷ་རྗེ་ཉིད་བྱོན་ནས་སྒོམ་ཚུལ་ཁྱོད་ཀྱིས་ང་འཇོག་ཕོད་དམ་གསུང་སྟེ་ཇོ་བོ་དང་རྗེ་སྒམ་པོ་པ་ཐ་མི་དད་པར་འདུག་གསུང་སྟེ་དེ་མ་ཐག་འཁྲུག་པ་དུམ། སླར་ཁྱམས་ཁྲ་བར་བསྐོར་སོགས་ཀྱི་ཐོག་རྩིག་པ་རི་མོ་སོགས་ཐམས་ཅད་གཞི་ནས་བཅོས། ཇོ་བོ་གཙང་ཁང་ལྷོ་མར་བཞུགས་པ་དབུས་མར་སྤྱན་དྲངས་སྟེ་སྔོན་ཞལ་བསྒྱུར་བར་ལུང་བསྟན་པ་དེ་ཡིན། མཆོད་པ་དཔག་མེད་མཛད། བསྟན་པ་བཞི་བཞེངས་སུ་བཏང༌། སྙིང་རྗེ་པད་དཀར་གྱི་མདོར། དགེ་སློང་འཚོ་བྱེད་དེས་ངའི་མཆོད་རྟེན་གསེར་གྱིས་བརྒྱན་པ་སོགས་ལོ་ལྔ་པ་བྱེད་ཏུ་འཇུག་པར་འགྱུར་ཞེས་ལུང་བསྟན་པ་དེ་རྗེ་སྒོམ་ཚུལ་ལོ་ལྔ་ལོན་པ་ཅིག་རྗེ་སྒོམ་པོ་པའི་ཞབས་ཕྱིར་བྱོན་པ་དེ་ལ་དགོངས་པ་ཡིན་ཞེས་དཔལ་མཁའ་སྤྱོད་དབང་པོས་གསུངས། དེ་ནས་ར་སའི་གཙུག་ལག་ཁང་གཉིས་སློབ་མ་དམ་པ་ཞང་རིན་པོ་ཆེ་ལ་གཏད། དེའི་ཉེ་གནས་ཚལ་དཔོན་དར་མ་གཞོན་ནུ་ལ་སོགས་པ་རིམ་པར་བྱུང་བ་རྣམས་དང་ཕྱིས་བློན་པོ་མགར་གྱི་མི་བརྒྱུད་ཚལ་དཔོན་སངས་རྒྱས་དངོས་གྲུབ་ཕྱིན་མི་བརྒྱུད་ལ་འཇགས་པ་རྣམས་ཀྱིས་ཆོས་རྒྱལ་ཡབ་ཡུམ་གྱི་སྐུ་བཞེང་པ་དང་སྒོ་ཁང་ཕྱི་མ་སྒོ་སྲུང་མ་མགོན་སེང་ལྡེང་གི་སྒོ་གླེགས་དང་བཅས་པ་ཕུལ། ཆུ་རགས་ཆེན་མོ་སོགས་ཞབས་ཏོག་དཔག་མེད་བྱས། གཞན་ཡང་ལྷ་རྗེ་དགེ་བ་འབུམ་དང་དེའི་ལྕམ་མོ་ཡེ་ཤེས་མཆོག་དང་ཞིག་པོ་བདུད་རྩི་ལ་སོགས་པ་མང་པོས་ཆུ་རགས་དང་ཞབས་ཏོག་མཛད། ཡ་ཙེའི་རྒྱལ་པོ་(ཇ༡༤༩ན)

[Full Size]

རེ་འུ་སྨལ་གྱིས་མཁས་ཤིང་ཡོན་ཏན་དང་ལྡན་པའི་སྟོན་པ་རིན་རྡོར་དང་མཛོད་པ་ཨར་ཛུ་ལ་སོགས་མངགས་སྟེ་ཟངས་ཁལ་བཅོ་བརྒྱད་ལ་དོས་རེར་བྱས་པའི་ཟངས་དོས་བརྒྱ་དང་བཞི་གསེར་སྲང་ལྔ་བརྒྱ་རྣམས་ལས་ལྕགས་ཕོ་ཁྱི་ལོ་ལ་ཇོ་བོའི་དབུ་ཐོག་དུ་གསེར་ཐོག་ཕུབ། ལྷག་མ་ལ་གསེར་ཐོག་ཆུང་ངུ་ཞིག་བཅུ་གཅིག་ཞལ་གྱི་དབུ་ཐོག་དུ་ཕུབ་པ་ཕྱིས་ཡ་ཙེའི་རྒྱལ་པོ་པུ་ཎ་སྨལ་གྱིས་གསེར་ཐོག་ཆེ་བར་བཀྱེད། དེ་ཕྱིན་ཡང་འགྲོ་མགོན་དུང་མཚོ་རས་པ། གྲུབ་ཐོབ་མགོན་ཡེ་ཤེས། སྣེལ་པ་ཡོན་མཆོད་ལ་སོགས་པ་མང་པོས་རྙིང་གསོ་སར་བཞེང་དུ་མ་བྱས། རྗེ་ཀརྨ་པ་རོལ་པའི་རྡོ་རྗེ་དང་རྗེ་དེ་བཞིན་གཤེགས་པས་མཆོད་པའི་ཁྱད་པར་མང་པོ་དང་ཇོ་བོའི་སྐུ་ལ་མུ་ཏིག་གི་སྣམ་སྦྱར་རིན་ཐང་མེད་པ་གསོལ་བར་མཛད་དོ། །དཔལ་བསམ་ཡས་ཀྱི་གཙུག་ལག་ཁང་ལ་ཕྱིས་ས་སྐྱ་དཔལ་ལྡན་བླ་མ་དམ་པ་ཁོ་ན་བཀའ་དྲིན་ཆེ་སྟེ་ཞིག་གསོ་དང་ཞབས་ཏོག་མཐའ་ཡས་པར་མཛད་དོ། །སྔོན་ཆོས་རྒྱལ་སྲོང་བཙན་ཉིད་ཀྱིས་ཐུགས་དམ་རྣམས་ལ་མདོ་སྐོར་དང་སྒྲུབ་སྐོར་དང་ཞལ་གདམས་ཀྱི་སྐོར་གསུམ་དུ་ཕྱེ་ཞིང་མདོ་སྐོར་གྱི་མདོ་རྒྱུད་ཉེར་གཅིག་པོ་དབོན་སྲས་ལ་དར་དུ་བཅུག་མཛད་པ་ལོ་རྒྱུས་ཀྱི་སྐོར་དུ་མ་དང་སྐྱེས་རབས་ཀྱི་ཚོགས་དང༌། སྒྲུབ་སྐོར་ཆེ་ཕྲ་བཅུ་གསུམ། ཞལ་གདམས་ཀྱི་སྐོར་ལས་བཀའ་ཆོས་ཐོག་ཐ་བར་གསུམ་གྱི་ཤོག་དྲིལ་བསྡོམས་པས་ཞལ་གདམས་ཆེ་ཚོའམ་རྒྱ་ཆེ་བ་གཞན་དོན་དུ་གདམས་པའི་ཆོས་སྐོར་བརྒྱད་བཅུ་རྩ་ལྔ། ཞལ་གདམས་ཆུང་ཚོའམ་ཟབ་པ་རང་དོན་དུ་གདམས་པའི་ཆོས་སྐོར་བདུན་བཅུ་དོན་བཞི་རྣམས་སྤྲུལ་པའི་རྒྱལ་པོས་གསུངས། ཐོན་མིས་ཡི་གེར་བྲིས་དབུ་རྩེ་བྱང་གི་རྟ་མགྲིན་གྱི་ཞབས་འོག་དང་གདུང་ཁོལ་དང་གནོད་སྦྱིན་ཁང་པ་རྣམས་སུ་སྦས། ཕྱིས་སློབ་དཔོན་པདྨས་གཏེར་ཁ་ཕྱེ་སྟེ་ཆོས་རྒྱལ་ཁྲི་སྲོང་ལ་བསྟན་ནས་སླར་རྒྱས་བཏབ། ཕྱིས་གྲུབ་ཐོབ་དངོས་གྲུབ་ཀྱིས་བཏོན་ནས་ཆོས་རྒྱལ་ཁྲི་སྲོང་གི་སྤྲུལ་པ་མྱང་ཉི་མ་འོད་ཟེར་ལ་གནང༌། ཐུགས་རྗེ་ཆེན་པོ་ན་མཁའ་རྒྱལ་པོའི་མངོན་རྟོགས་དང་གབ་པ་མངོན་དུ་ཕྱུང་(ཇ༡༤༩བ)

[Full Size]

ལ་སོགས་ལོགས་སུ་བཀའ་བརྒྱ་བཏབ་པ་ལྔ་པོ་གནོད་སྦྱིན་ན་ག་ཀུ་བེ་རའི་བརླ་གཡས་པའི་དར་ཤམ་འོག་དུ་སྦས་པ་གཏེར་བཏོན་ཤཱཀྱ་བཟང་པོས་ཕྱུང་སྟེ་ལྷ་རྗེ་དགེ་འབུམ་ལ་གནང༌། དེ་རྣམས་ནས་རིམ་པར་ལས་ཅན་མང་པོ་ལ་འཕེལ་ཞིང་རྒྱས་སྟེ་སྨིན་གྲོལ་གྱི་གཞིར་བྱས་སོ། །དེ་ལྟར་བོད་ཡུལ་སྐྱེ་འགྲོ་སྣོད་ལྡན་རྣམས། །དངོས་དང་བརྒྱུད་ནས་བྱང་ཆུབ་ལ་བཀོད་དེ། །འདི་ནས་མ་འོངས་རིང་ཞིག་འདས་པ་ན། །འགྲོ་བའི་རྟག་པར་འཛིན་བློ་ཟློག་པ་དང༌། །རྣམ་དག་རྫོགས་པའི་རིམ་པ་སྟོན་པའི་ཆད། །མཆོག་སྤྲུལ་མྱ་ངན་འདའ་སྟོན་ཇི་བཞིན་དུ། །ར་ས་འཕྲུལ་སྣང་སྤྲུལ་པའི་ཕོ་བྲང་གི །སྣོད་བཅུད་རྟེན་དང་བརྟེན་པར་བཅས་པ་ཡང༌། །རྣམ་འཕྲུལ་ཆོས་དབྱིངས་ཞི་བའི་དབྱིངས་སུ་སྡུད། །དེ་ཚེ་རབ་ཀྱིས་མཁའ་འགྲོས་སྤྱན་དྲངས་སྟེ། །འོག་མིན་སྟུག་པོའི་དབྱིངས་སུ་གཤེགས་པར་མཐོང༌། །ཐུན་མོང་མཐོང་སྣང་འཇའ་འོད་གུར་གྱིས་དཀྲིགས། །ལྷ་ཀླུ་ཀུན་གྱིས་མཆོད་པ་བྱེད་བཞིན་དུ། །ཆུ་བོའི་གཞུང་ལས་རྒྱ་མཚོར་གཤེགས་པར་སྣང༌། །ས་འོག་མུན་པ་མ་ལུས་སེལ་བར་མཛད། །བསམ་ཡས་ཕོ་བྲང་ཆེན་པོའི་སྤྲུལ་པ་ཡང༌། །ཡེ་ཤེས་མེ་ཡིས་བསྲེགས་པའི་ཚུལ་གྱིས་སྡུད། །དེ་བས་གཙུག་ལག་ཁང་ཆེན་འདི་རྣམས་ལ། །མེ་ཆུའི་གནོད་པ་བསྐྱབ་ཕྱིར་སུས་བརྩོན་པ། །དེ་ཡི་བསོད་ནམས་ནམ་མཁའི་ཁམས་ལས་བརྒལ། །རྡོ་རྗེའི་གདན་མཆོག་འབྱུང་བས་མི་ཤིགས་ཀྱང༌། །བྱིས་པའི་འཇིག་རྟེན་མཐུན་འཇུག་སྤྱོད་སྟོན་པ། །བདག་ཅག་བོད་འབངས་སྡིག་སྦྱོང་དགེ་སྐྱེད་པའི། །ཐབས་ཀྱི་མཛད་པ་ཐུགས་རྗེས་བསྟན་པ་ཉིད། །དེ་ཡང་ར་ས་འཕྲུལ་སྣང་དང་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་འདི་གཉིས་ནི་བདེ་བ་ཅན་གྱི་ཞིང་ཁམས་ལྟར་སྤྲུལ་པའི་རྟེན་བརྟེན་པ་དངོས་ཡིན་པས་མཐར་ཡང་མཆོག་གི་སྤྲུལ་པའི་སྐུ་མྱ་ངན་ལས་འདའ་བ་སྟོན་པ་ལྟར་སྤྲུལ་སྐུ་སྡུད་པའི་(ཇ༡༥༠ན)

[Full Size]

སྣང་བ་སྟོན་པ་སྟེ་སློབ་དཔོན་ཆེན་པོ་པདྨས་ལུང་བསྟན་པ་ཁོ་ཐིང་གི་གཏེར་མ་ལས། སློབ་དཔོན་གྱིས། གཙུག་ལག་ཁང་རྣམས་བཞེང་བའི་ཚེ། །སེམས་ཅན་བསོད་ནམས་ཡར་ལྡན་ཡིན། །གཙུག་ལག་ཁང་རྣམས་བསྐོར་བའི་ཚེ། །འགྲོ་བའི་བསོད་ནམས་འབྲིང་པོ་ཡིན། །གཙུག་ལག་ཁང་རྣམས་འཇིག་པའི་ཚེ། །འགྲོ་བའི་བསོད་ནམས་མར་འགྲིབ་ཡིན། །ཁྱེད་ཀྱི་གདུང་རབས་གསུམ་པ་ནས། །རྒྱལ་ས་སྟོངས་ཤིང་རྒྱལ་ཁྲིམས་འཇིག །བོད་འབངས་འཁྲུགས་པས་ལྷ་སྲིན་གཡོ། །ལྷ་སྲིན་གཡོས་པས་འབྱུང་བ་འཁྲུགས། །ནམ་ཞིག་དུས་ཀྱི་ཐ་མ་ལ། །ལྷ་ས་ཆུ་ཡིས་འཇིག་བྱེད་ཅིང༌། །བསམ་ཡས་མེ་ཡིས་འཇིག་པར་བྱེད། །ལར་ན་སེམས་ཅན་བསོད་ནམས་ཡིན། །ཐབས་ཀྱིས་ཅུང་ཟད་སྲིང་ཐབས་ཡོད། །ཅེས་གསུངས་པ་ལ། རྒྱལ་པོས། སྤྱིར་ནི་མཆོད་རྟེན་བསམ་ཡས་དང༌། །ལྷ་ས་བོད་ཀྱི་སྲོག་ཤིང་ཡིན། །འདི་ལ་ཞིག་ཐབས་ག་ལ་ཡོད། །ཀྱེ་ཧུད་བོད་འབངས་སྙིང་རེ་རྗེ། །ཐོས་པས་ཆོག་པའི་གཙུག་ཁང་ཡིན། །དྲན་པས་ཆོག་པའི་གཙུག་ཁང་ཡིན། །འདི་ལ་ཞིག་ཐབས་ག་ལ་ཡོད། །ཀྱེ་ཧུད་བོད་འབངས་ཉོན་རེ་མོངས། །མཁའ་ལ་ཉི་ཟླ་ལྟ་བུ་ཡིན། །འདི་ཞིག་མུན་པ་གང་གིས་སེལ། །གཤེད་མ་གྲི་ཐོགས་ལྟ་བུའི་དགྲ། །མེ་ཆུ་གཉིས་ལས་སྐྱབ་ཏུ་གསོལ། །ཞེས་གསོལ་བས་སློབ་དཔོན་གྱིས་བཀའ་བསྩལ་པ། ཀྭ་ཡེ་ཆོས་རྒྱལ་མ་བཤུམ་ཞིག །འཁོར་བ་སྒྱུ་མར་མཁྱེན་པར་མཛོད། །རྐྱེན་ངན་ལས་སུ་མཁྱེན་པར་མཛོད། །སྣང་ཞིང་སྲིད་པའི་ཆོས་རྣམས་ཀུན། །རྟག་པ་མ་ཡིན་ཐུགས་ཁྲལ་སྐྱུངས། །ཆད་པ་མ་ཡིན་ཐུགས་མ་མུག །དག་སྣང་ཅན་གྱི་གང་ཟག་ལ། །རྒྱལ་བ་མྱ་ངན་འདས་པ་མེད། །རྒྱལ་བའི་ཞིང་ཁམས་སྟོངས་པ་མེད། །སེམས་ཅན་འཁོར་བར་འཁྱམས་པ་མེད། །འཁོར་བ་བདེན་པར་གནས་པ་མེད། །འབྱུང་བཞི་རྩུབ་འགྱུར་སྣང་བ་མེད། །བསམ་ཡས་ལྷ་ས་འཇིག་མི་མངའ། །སྒྲིབ་གཡོགས་འཁྲུལ་པའི་(ཇ༡༥༠བ)

[Full Size]

སེམས་ཅན་རྣམས། །བསམ་ཡས་ལྷ་སའི་རྩར་སྐྱེས་ཀྱང༌། །དེ་ཡི་གཙུག་ཁང་མཐོང་བ་མེད། །འགྲོ་བ་ཚོགས་བསག་སྒྲིབ་སྦྱོང་ཕྱིར། །མེ་ཆུ་གཉིས་ནི་བརྩོན་འགྲུས་ལྷ། །ཐུགས་རྗེ་ཆེན་པོའི་རང་བཞིན་ཡིན། །འདི་དག་དགྲ་མིན་ལོག་ལྟ་སྤོངས། །ཆོས་རྒྱལ་ཆེན་པོ་ཐུགས་དགོངས་གློད། །ཐབས་ཀྱི་རྒྱལ་པོ་ང་ཡིས་བསྟན། །གསུངས་ནས་ལྕགས་ཀྱུའི་ཕྱག་རྒྱ་མཛད་པས་ཀླུ་རྒྱལ་འཇོག་པོ་བྱུང་སྟེ་རིན་པོ་ཆེ་ཆུ་ཤེལ་ཕུལ་བ་བསམ་ཡས་ཀྱི་སྲོག་ཤིང་དུ་བཅུག་ནས་འདི་དང་མ་བྲལ་གྱི་བར་དུ་གཙུག་ལག་ཁང་མེས་མི་འཚིག་པར་འོང༌། ནམ་ཞིག་འབྱུང་བ་བརྙིགས་ནས་གཙུག་ལག་ཁང་ཉམས་འོང་པས་དེའི་དུས་གསོ་བ་ལ་བརྩོན་འགྲུས་གྱིས་ཅིག །དེའི་ཚེ་འཁོར་ཞིང་ཞབས་ཏོག་བྱེད་པ་དང་མཆོད་ཅིང་བསྐོར་བ་དང་ཐ་ན་སེར་ཀལ་འདམ་ཕྲ་ཙམ་ཞིག་སྦྱར་ནས་གསོ་བ་ཐམས་ཅད་ཀྱང་དུས་གསུམ་གྱི་རྒྱལ་བ་ཐམས་ཅད་ལ་བསྟི་བསྟང་བྱས་པ་ཡིན། ཆོས་ཐམས་ཅད་བསྒྲུབས་པ་ཡིན། བདེ་བར་གཤེགས་པ་ཐམས་ཅད་ལ་བཀུར་སྟི་བྱས་པ་ཡིན། གཙུག་ལག་ཁང་སར་དུ་བརྩིགས་པའི་བསོད་ནམས་འཐོབ་པ་ཡིན་ནོ། །དེ་ཚེ་འཕོས་ནས་བདེ་བ་ཅན་དུ་པདྨའི་སྡོང་པོ་ལས་སྐྱེ་བར་འགྱུར་རོ་ཞེས་གསུངས་སྟེ་གཙུག་ལག་ཁང་གསོ་བའི་དཀོར་ནོར་དུ་མ་ཡང་གཏེར་དུ་སྦས་སོ། །ཡང་བཀའ་བསྩལ་པ། སྔོན་གྱི་རྒྱལ་པོ་སྲོང་བཙན་སྒམ་པོ་ནི་ཐུགས་རྗེ་ཆེན་པོ་དངོས་ཡིན་མངོན་པར་མཁྱེན་པ་དང་ལྡན་པས་ལྷ་སའི་གཙུག་ལག་ཁང་འདི་གཙང་པོའི་འགྲམ་དུ་བཞེངས་པ་ཡིན་ནོ། །གཙང་པོ་འདི་གཙུག་ལག་ཁང་གི་རྩར་འོང་པ་ཡིན་ཕྱི་མའི་དུས་ཀྱི་མི་རྣམས་དེའི་ཆེད་དུ་ཆུ་རགས་བྱེད་དོ། །དེས་ནི་འགྲོ་བ་རྣམས་ཀྱི་སྒོ་གསུམ་གྱི་སྒྲིབ་པ་སྦྱོང་ཞིང་བྱང་ཆུབ་ཀྱི་ས་བོན་འདེབས་སྟེ་དེའི་ཆེད་ཏུ་ཐུགས་རྗེ་ཆེན་པོའི་སྤྲུལ་པས་གཙང་པོ་འདི་སླར་ཉེ་བར་སྟོན་ཏོ། །དེའི་ཚེ་འགྲོ་བ་གང་ཆུ་ལ་རགས་བྱེད་ཅིང་གཙུག་ལག་ཁང་སྐྱོབ་པའི་ཕྱིར་ལུས་འཁོལ་བ་རྣམས་ནི་སྤྲུལ་པའི་སྐུ་ཐོབ་པར་འགྱུར་རོ། །ངག་གིས་ཁ་བཀོད་བྱེད་པ་རྣམས་ནི་གསུང་ལོངས་སྐུ་ཐོབ་པར་འགྱུར་རོ། །ཡིད་ཀྱིས་སེམས་ཁྲལ་བྱེད་ཅིང་གཙུག་ལག་ཁང་སྐྱོབ་པར་སེམས་པ་རྣམས་ནི་ཐུགས་ཆོས་སྐུ་ཐོབ་པར་(ཇ༡༥༡ན)

[Full Size]

འགྱུར་རོ། །དེའི་ཚེ་ལུས་ངག་ཡིད་གསུམ་གས་འབད་དེ་ཆུ་རགས་དང་བསྐོར་མཆོད་དང་ཡི་རང་སྐྱེས་པ་དེ་ཐམས་ཅད་སྒོ་གསུམ་གྱི་སྒྲིབ་པ་བྱང༌། ཐེག་པ་ཆེན་པོ་འཐོབ་པ་ལ་ཐེ་ཚོམ་མེད་ཏོ་ཅེས་གསུངས་སྟེ་ཕན་ཡོན་འདི་རྣམས་ནི་ཆོས་རྒྱལ་ཉིད་ཀྱིས་བཀའ་ཆེམས་ལས་བྱུང་བ་དང་ཡང་ཐ་དད་མི་སྣང་ངོ༌། །ཡང་བཀའ་བསྩལ་པ། ལྷ་སའི་གཙུག་ལག་ཁང་འདི་ཡང༌། །ཕྱི་ལྟར་འགྲོ་བ་དང་བ་འདྲེན། །ནང་ལྟར་ཐ་མལ་ཞེན་པ་ལྡོག །གསང་བ་རང་སྣང་རིག་པའི་རྩལ། །གཙུག་ཁང་འཇིག་རྐྱེན་གཙང་ཆབ་འདི། །ཕྱི་ལྟར་རྟེན་གསུམ་གདན་འདྲེན་ཀླུ། །ནང་ལྟར་འགྲོ་བའི་སྒྲིབ་སྦྱོང་ཆུ། །གསང་བ་རང་བྱུང་རྣམ་དག་ཁྲུས། །གཙུག་ཁང་སྐུ་སྐྱོབ་མཆོད་མེ་ཡང༌། །ཕྱི་ལྟར་ལམ་ལ་བརྩོན་འགྲུས་ཅན། །ནང་ལྟར་འཕགས་པའི་སྤྲུལ་པ་དངོས། །གསང་བ་བྱང་ཆུབ་ཐོབ་པའོ། །ཨེ་མ་ཧོ། མ་འོངས་དུས་ཀྱི་འགྲོ་བ་ཀུན། །སྐལ་ལྡན་གསན་འཚལ་ཐབས་མཆོག་བཤད། །ལྔ་བརྒྱའི་ཐ་མར་ཤཱཀ་ཐུབ་སྐུ། །མ་དྲོས་ཀླུ་དབང་གདན་འདྲེན་ཚེ། །གཙང་ཆབ་ས་རྒྱ་གཅོད་ཚུལ་ནི། །གཙང་ཆབ་གཡས་ལག་རྐྱོང་བའི་ཚེ། །འུར་ཐོག་སྟེང་དུ་རྡོ་བཞག་འདྲ། །ཀླུ་རྒྱལ་དུང་མགྲིན་ཞུ་འབུལ་དུས། །དེ་དུས་བསྙེན་རགས་བྱེད་པ་ཀུན། །འཁོར་བ་ངན་སོང་བདུད་རིས་ཀྱི། །གཡུལ་ངོ་བཟློག་པར་སྨོས་ཅི་དགོས། །གཙང་པོའི་གཡས་ལག་རགས་ཀྱིས་བཅད། །རགས་ཁར་མཆོད་རྟེན་སྒོ་མང་རྩིགས། །དེས་ནི་ཀླུ་རྒྱལ་དུང་མགྲིན་ཟློག །གཙང་ཆབ་ཕྱེད་དུ་གྱེས་པའི་ཚེ། །པགས་རློན་སྟེང་དུ་བྲེ་བཞག་འདྲ། །ཀླུ་རྒྱལ་གླང་སྣའི་གསུ་བ་ཡིན། །དེ་དུས་གཙུག་ཁང་རགས་བྱེད་ཀུན། །རྣམ་སྨིན་ལས་སྦྱངས་བདེ་ཆེན་ཐོབ། །ཆུ་རགས་གོང་སྐོར་ལྟ་བུར་རྩིག །སྟོབས་ལྡན་ཀག་ནི་ཟུར་གསུམ་པ། །རགས་ཁར་བརྩིགས་ན་གླང་སྣ་ཟློག །གཙང་ཆབ་སྐོར་བ་(ཇ༡༥༡བ)

[Full Size]

བྱེད་པའི་ཚེ། །རང་ཐག་ཕུབ་སྟེང་བཞག་པ་འདྲ། །ཀླུ་རྒྱལ་མ་དྲོས་གདན་འདྲེན་ཡིན། །དེ་ཚེ་མི་ཡི་གང་ཟག་གིས། །གཙུག་ཁང་མཆོད་སྐོར་རགས་བྱེད་ཀུན། །སྨོན་ལམ་ཅི་དང་ཅི་བཏབ་འགྲུབ། །ཆུ་རགས་གཙུག་ཁང་གྲུ་བཞིར་བསྐོར། །ཟུར་བཞི་ཀུན་དུ་མཐོ་རེ་རྩིགས། །ཁྲོ་བོ་གཤིན་རྗེའི་གཤེད་པོ་དང༌། །རྟ་མགྲིན་དང་ནི་བདུད་རྩི་འཁྱིལ། །སྟོབས་པོ་ཆེ་བཞིར་མངའ་གསོལ་བྱ། །དེ་ལྟར་བགྱིས་ན་ཅུང་ཟད་ཕན། །ཀླུ་རྒྱལ་གསུ་བ་བྱུང་བའི་ཚེ། །ཀོ་བ་མཚོ་ལ་བྱེད་འདྲའི་དུས། །རྒྱང་ནས་མཆོད་ཅིང་གསོལ་བ་གདབ། །སྨོན་ལམ་རྒྱ་ཆེན་དཔག་མེད་ཐོབ། །དེ་ཚེ་འདུས་ཚོགས་འགྲོ་བ་ཀུན། །ཐུགས་རྗེ་ཆེན་པོ་དངོས་ཡིན་ནོ། །དེ་སོགས་དག་དང་མ་དག་གི །མཐོང་སྣང་རབ་ཐ་འདི་ལྟར་འབྱུང༌། །དག་སྣང་ཅན་ལ་གཙུག་ལག་ཁང༌། །འོག་མིན་གནས་སུ་གཤེགས་མཐོང་སྲིད། །ཐ་མའི་སྣང་བར་གཙུག་ལག་ཁང༌། །སྦྲུལ་གྱིས་དཀྲིས་ནས་ཆབ་ལ་ནི། །འཇའ་འོད་གུར་བཅས་གཤེགས་མཐོང་འགྱུར། །ལར་ན་མཐོང་ཐོས་རེག་པ་ཀུན། །ཐར་པ་འཐོབ་པའི་གནས་ཡིན་ནོ། །ཞེས་གསུངས་ནས་རྫུ་འཕྲུལ་གྱིས་རྒྱལ་པོ་ཁྲིད་དེ་ལྷ་སའི་གཏེར་རྣམས་དངོས་སུ་བསྟན། གབ་པ་མངོན་ཕྱུང་སོགས་ཁ་ཅིག་ཐུགས་དམ་གྱི་རྟེན་དུ་བཤུས་ནས་ཕྱིས་བསམ་ཡས་སུ་རྣམ་སྣང་གི་ཕྱག་དུ་ཕུལ་ཞེས་བྱུང་ལ་འདི་དང་ཆོས་རྒྱལ་ཉིད་ཀྱིས་ལུང་བསྟན་པ་མཐུན་པ་སྟེ། གཙང་ཆབ་གཡས་ལག་བརྐྱང་པ་ལྷ་ས་གཉིས་ཀྱི་བར་ཆུ་རྒྱས་པ་ནི་སྐམ་ས་ཉ་འདྲ་བའམ་འུར་ཐོག་གི་མཐིལ་འདྲ་བ་ནར་མོར་གནས་པ་སྟེ་ཀླུ་དུང་མགྲིན་གྱི་སྤྱན་འདྲེན་ཡིན་ལ་དེའི་ཚེ་ཉ་འདྲའི་དུས་སུ་གཞོག་ལྟར་སྦྲོན་ཞེས་གཡས་ལག་རགས་ཀྱིས་བཅད་ནས་རགས་ཁར་མཆོད་རྟེན་བཀྲ་ཤིས་སྒོ་མང་བརྩིག་གོ །གཙང་པོ་ཕྱེད་དུ་གྱེས་ནས་སྐམ་ས་ཐུར་གསུམ་དུ་གནས་པ་ནི་འཇོང་འདྲའི་དུས་སྟེ་ཆུ་རགས་ཞྭ་ལྟར་བཀོན་ཞེས་གཉའ་ནས་ཟུར་གསུམ་དུ་བསྐོར་སྟེ་གཙུག་དུ་ཀག་ནི་ཟུར་གསུམ་དུ་བརྩིགས་པས་ཀླུའི་རྒྱལ་པོ་(ཇ༡༥༢ན)

[Full Size]

གླང་སྣའི་སྤྱན་འདྲེན་བཟློག་གོ །དེ་ནས་སྐམ་ས་གྲུ་བཞི་ཁོལ་བུར་སོང་ཞིང་ཆུ་བསྐོར་འཁོད་པ་ནི་ཀླུའི་རྒྱལ་པོ་མ་དྲོས་པ་ཉིད་སྤྱན་འདྲེན་དུ་འོངས་པ་སྟེ་དེའི་ཚེ་ཆུ་རགས་གདན་ལྟར་འདིངས་པ་ཞེས་ལྕགས་རི་ལྟ་བུ་གྲུ་བཞིར་བྱས་སྟེ་ཟུར་བཞིར་མཐོའམ་མཆོད་རྟེན་རེ་བརྩིགས་པ་ཁྲོ་བོ་བཞིར་བསྐྱེད་ཅིང་མངའ་གསོལ་ན་ཅུང་ཟད་ཕན་ལ་དེ་ནས་སྐམ་ས་གྲུ་བཞིའི་ཟུར་ཉམས་སྟེ་སྒོར་མོ་རྔ་འདྲ་བར་གྱུར་པ་ནི་པིར་འདྲའི་དུས་སྟེ་དེའི་ཚེ་མཆོད་པ་བཟང་པོ་བཤམས་ནས་གསོལ་བ་དྲག་དུ་བཏབ་ན་ཅུང་ཟད་བཞུགས་པ་སྲིད་དོ། །སྤྱིར་འདི་རྣམས་ལ་སོ་སོའི་བྱེད་པ་སྨོན་ལམ་གྱི་མཐུ་ཅན་རེ་ཡོང་བར་གསུངས་སོ། །དེ་ནས་ཀོ་བ་མཚོ་ལ་བྱིང་འདྲ་ནི་གཤེགས་པ་ཉིད་ཀྱི་དུས་སྟེ་སྣང་བ་ཐ་དད་པ་དུ་མ་འབྱུང་ཞིང་མི་རྣམས་རི་ལོགས་ནས་བལྟས་སྟེ་སྨོན་ལམ་འདེབས་སྐད་དོ། །ར་ས་བསམ་ཡས་སོགས་གཙུག་ལག་ཁང་ཕལ་ཆེར་ཉམས་པའི་འོག་དུ་ཁྲ་འབྲུག་གི་རིན་པོ་ཆེའི་གཏེར་ཁང་ཁ་འབྱེ་ཞིང་སྲོང་བཙན་བང་སོའི་སྒོ་བྱེ་ནས་ནང་གི་ལྷ་ཁང་ལྔ་པོ་རྣམས་དང་བཅས་པ་ལ་བསྐོར་མཆོད་བྱེད་ཅིང་རང་བྱུང་གི་རྟེན་ཁ་ཅིག་ཡང་སར་དུ་འོང་ཞེས་གཏམ་རྒྱུད་པ་ལས་ཐོས་སོ། །དེ་སླད་ཕྱིན་ཆད་དད་ལྡན་སྐྱེ་བོ་རྣམས། །བསྟན་པའི་སྲོག་རྩ་ལྷ་ས་བསམ་ཡས་སོགས། །ཉམས་པ་གསོ་ཞིང་མ་ཉམས་དཔེལ་བ་དང༌། །རྒྱལ་བློན་སྤྲུལ་སྐུ་རྣམས་ཀྱི་ཐུགས་དམ་རྟེན། །ལྷ་ཁང་ཀུན་ལ་མཆོད་ཅིང་དད་པར་གྱིས། །ཕྱག་དང་སྐོར་བ་མཎྜལ་བྱས་པ་དང༌། །མེ་ཏོག་སྤོས་དང་མར་མེ་ཕུལ་སོགས་ཀྱི། །ཕན་ཡོན་བསམ་མི་ཁྱབ་པར་མདོ་ལས་བཤད། །ལུས་ངག་ཡིད་གསུམ་དགེ་བར་མ་བཀོལ་ན། །མི་ལུས་ཐོབ་ཀྱང་མུན་བསྐལ་སྐྱེས་དང་མཚུངས། །དཀོན་མཆོག་མཆོད་དང་སྦྱིན་ལ་མི་འབད་ན། །ལོངས་སྤྱོད་འབྱོར་ཡང་མཛོད་སྲུང་ཁྱི་དང་མཚུངས། །དཀར་ནག་ལས་འབྲས་བདེན་པར་མི་(ཇ༡༥༢བ)

[Full Size]

ཤེས་ན། །འཕྲལ་དུ་བསྒྲིན་པར་སྣང་ཡང་སྤྲེའུ་བཞིན། །དགོས་པའི་དམ་ཆོས་རྒྱུད་ལ་མ་འཁེལ་ན། །མི་ལུས་ཐོབ་ཀྱང་དོན་མེད་སྟོང་ལོག་ཡིན། །སྒྱུ་མའི་ལོངས་སྤྱོད་སྐྱེ་འགྲོའི་སྤྱི་རྫས་ལས། །ནམ་ཞག་གཏན་རྒྱགས་སུས་ཐོབ་བྱེད་དུས་ཡིན། །སྙིང་པོ་མེད་པ་མི་གཙང་ཆུ་བུར་འདྲའི། །ལུས་ལ་སྙིང་པོ་ལེན་སྐབས་ད་ལྟ་ཙམ། །ཚེ་འདིའི་སྣང་བ་རྨི་ལམ་ཙམ་འདིས་སླུ། །གཏན་གྱི་འདུན་མ་དམ་པའི་ཆོས་ལ་དྲིལ། །ཐར་པ་དགེ་བའི་བཤེས་ལ་རག་ལས་ཀྱི། །ཚད་ལྡན་ཡོངས་འཛིན་འཚོལ་ལ་སྲོག་བཞིན་བསྟེན། །ཚིག་གི་ལོ་མ་མང་པོས་དགོས་དུས་སླུ། །གདམས་ངག་སྙིང་པོ་སེམས་ཀྱི་གནད་དུ་དྲིལ། །སང་བྱ་གནངས་བྱའི་ངང་ལ་འཆི་བས་སླེབ། །ད་ལྟ་ནམ་དྲན་དེ་ཀར་ཉམས་ལེན་འབུངས། །ཅི་བྱེད་དགེ་ལ་རང་འདོད་མི་འཁྲིས་པ། །མཁའ་ཁྱབ་ཕ་མའི་གཏན་དོན་ཁོ་ནར་གྱིས། །བདག་གཞན་འཁོར་འདས་ལ་སོགས་སྒྲོ་བཏགས་སྟེ། །ཤེས་རབ་དྲི་མེད་མདུན་ན་དེ་མི་གནས། །དེ་ལྟར་མ་ཤེས་རྨི་ལམ་ལྟར་འཁྲུལ་བའི། །མར་གྱུར་འགྲོ་འདི་སྙིང་བརྩེ་ལས་བརྩིའི་ཡུལ། །དེ་ལྟར་སྟོང་ཉིད་རྟོགས་པའི་ཤེས་རབ་དང༌། །མ་རྟོགས་འགྲོ་ལ་སྙིང་རྗེ་ཚད་མེད་ཐབས། །མི་ཕྱེད་རོ་མཉམ་ཟུང་དུ་ཆུད་པ་ཡིས། །རྫོགས་སྨིན་སྦྱང་ཕྱིར་ཕར་ཕྱིན་བཅུ་ལ་འབད། །ཆོས་ཀུན་གཟོད་ནས་རྣམ་པ་ཐམས་ཅད་དུ། །རྫོགས་བྱང་ཆུབ་པར་ཡང་དག་མཐོང་ནས་ནི། །སྲིད་ཞི་བདག་གཞན་ལ་སོགས་མི་དམིགས་བཞིན། །གང་འདུལ་འཕྲིན་ལས་མཁའ་མཉམ་རྒྱུན་མི་འཆད། །མཚན་ཙམ་གྱིས་ཀྱང་སྡུག་བསྔལ་ཀུན་སེལ་ཞིང༌། །རྒྱལ་བ་ཀུན་ལས་ལྷག་པའི་འཕྲིན་ལས་ཅན། །འཕགས་མཆོག་སྤྱན་རས་གཟིགས་ཀྱི་དབང་ཕྱུག་དེའི། །བཀའ་དྲིན་དྲན་ཆེད་གོ་འཕང་(ཇ༡༥༣ན)

[Full Size]

འཐོབ་པར་གྱིས། །དེས་ན་གཙུག་ལག་ཁང་ཡུན་དུ་གནས་པའི་ཕྱིར་བློ་གྲོས་ཅན་རྣམས་ཀྱིས་འབད་པར་བྱ་ཞིང༌། ནང་གི་ལྷ་དང་ཕྱིའི་རགས་གསོ་བ་ལ་འབད་པར་བྱ་ལ་ཁྱད་པར་ལྷ་སའི་སྲོག་ཤིང་ཡེར་པ་ཡིན་པས་དེར་རྟེན་འབྲེལ་སྒྲིག་པ་གལ་ཆེ་སྟེ་ཡེར་པའི་དཀར་ཆག་སྔ་མ་ལས། སྤྲུལ་པའི་རྒྱལ་པོའི་ཞལ་ནས། ངའི་སྒྲུབ་གནས་དང་རྟེན་མཆོད་ཀྱི་ཕྱོགས་སུ་འབུངས་པ་ནི་རྒྱལ་བའི་ཞབས་ཏོག་རྒྱལ་བས་བྱས་པ་ཡིན་ནོ། །སངས་རྒྱས་ཐམས་ཅད་ལ་རིམ་གྲོ་དང་བསྙེན་བཀུར་བྱས་པའོ། །སྟོང་གསུམ་མི་འབྱེད་ཀྱི་ཞིང་ཐམས་ཅད་ཁྱབ་པའི་མཆོད་རྟེན་བཞེངས་པ་བས་ཡེར་པའི་སཱ་ཚ་ཞིག་བྱས་པའམ་ཞིག་པ་བསོས་པ་སྟོབས་ཆེའོ། །སྟོང་གསུམ་གྱི་སངས་རྒྱས་ཐམས་ཅད་ལ་མཆོད་པ་འབུམ་ཕུལ་བ་བས་ཡེར་པར་མཆོད་པ་ཚར་གཅིག་བྱས་པ་སྟོབས་ཆེའོ། །གཞན་དུ་ལོ་བརྒྱ་བསྒོམས་པ་བས་ཡེར་པར་ཞག་གཅིག་བསྒོམས་པ་སྟོབས་ཆེའོ། །ལྷ་ས་བོད་ཀྱི་སྲོག་ཤིང་ཡིན། །ལྷ་སའི་སྲོག་ཤིང་ཡེར་པ་ཡིན། །ཡེར་པའི་མཆོད་རྟེན་མ་ཞིག་ན། །ལྷ་སར་བསྟན་པ་རྒྱུན་དུ་གནས། །ས་གཡོས་བྱི་བ་མེ་ཆུ་དང༌། །རླུང་གིས་ལྷ་སར་མི་གནོད་དོ། །ཡེར་པ་མི་ཞིག་ན་ལྷ་ས་གསོ་མཁན་རེ་ཡང་རྒྱུན་ཏུ་འོང༌། གསོ་མཁན་དེ་ཡང་རྒྱལ་བའི་ཞབས་ཏོག་རྒྱལ་བས་བྱས་པ་ཡིན་ནོ། །ཡེར་པ་མ་ཞིག་གི་བར་དུ་ལྷ་སའི་འདུན་མ་ཞིག་དྭོགས་མེད་ཏོ། །ལྷ་སར་གསོ་མཁན་དང་དཀོན་གཉེར་ཚེ་རིང་བར་འདོད་ན་ཡེར་པའི་རྟེན་དང་ཐིགས་ཚགས་དང་ཞལ་བ་གསོས་ཅིག་ཐིགས་ས་དང་ཞལ་བའི་གསེབ་ཏུ་སྤོས་དཀར་གཏོང་བ་གཅེས་སོ། །འདི་ཕྱིན་ལྷ་ས་དང་ཡེར་པ་ཞེས་སོ་སོར་སྦྱར་སྟེ་འདུན་མ་ཞིག་ན་ནས་ཕྱེས་སེར་ག་གསུབ་ཅིང་ཀ་བ་ཡོ་བ་སྲོང༌། ས་གཡོས་བྱུང་ན་མཎྜལ་ལ་རིན་པོ་ཆེས་ཆག་ཆག་གདབ། མེའི་གནོད་པ་བྱུང་ན་ཝ་ཆུ་གསོ་ཞིང་སེར་ག་དར་མཐིང་ནག་གིས་འཁྱིག །རླུང་གི་གནོད་པ་བྱུང་ན་སྒོ་གསོ་ཅིང་སྒོའི་སེར་ག་བ་དམར་མོའི་རྣམ་ལྔས་བསུབ། མིའི་ནད་བྱུང་ན་དམ་རྫས་བདུད་རྩི་ལྔས་དཀྱིལ་(ཇ༡༥༣བ)

[Full Size]

འཁོར་གསོ། ཕྱུགས་ནད་བྱུང་ན་བྲག་ལྷར་ཁྲུས་དང་ཆག་ཆག་འདེབས། མཐའ་དམག་དང་མཚོན་གྱིས་འཇིགས་ན་རྟེན་མཆོད་གསོ་ཞིང་དར་ལྕགས་ཁའི་ཅོད་པན་དང་མདའ་དར་འཛུགས། གཏིང་རྡོལ་དང་ཆུས་ཉེན་ན་མཆོད་ཁང་དང་སྤོས་ཁང་མེ་ཁང་གསོ། ཇོ་བོ་ལ་རྒྱལ་པོའི་གདན་འདྲེན་བྱུང་ན་ལྷ་དང་མཆོད་རྟེན་གྱི་གདན་ཁྲི་གསོ། རྒྱལ་པོའི་ཆད་པ་བྱུང་ན་རོལ་ཆ་དང་དྲིལ་བུ་དང་རྔ་གསོ། འཁྲུག་པ་བྱུང་ན་གཡག་ཤིང་གསོ་ཞིང་སྤྱིན་དང་ཐང་ཆུས་སྦྱོར། མི་སྨྱོན་དང་ཁྱི་སྨྱོན་བྱུང་ན་ཤིང་སྟག་པ་དང་ཤུག་པས་ཐོག་གསོ། མུ་གེ་བྱུང་ན་གཡོས་ཁང་གསོ་ཞིང་འབྲུ་སྣའི་ཕྱིའི་ཞལ་བ་བྱ། ཇག་པ་དང་ཆོམ་རྐུན་དང་མི་རྒོད་ཀྱི་གནོད་པ་བྱུང་ན་གྱང་རིས་ཀྱི་དབུ་དང་ཕྱག་གསོ། ལོ་ཐོག་དུས་སུ་མ་སྨིན་ན་ཆུ་མིག་གསོ་ཞིང་དཀར་གསུམ་དང་མངར་གསུམ་གྱི་གཏོར་མ་བཏང༌། འབྲུ་ཉུང་ན་ཁྲི་དང་གཏོར་སྣོད་གསོ་ཞིང་འབྲུའི་གཏོར་མ་བཏང༌། ཆར་མ་བབ་ན་ཀླུ་ཁང་གསོ་ཞིང་ཀླུ་གཏོར་གཏོང༌། ཚེ་ཐུང་ན་མཆོད་རྟེན་གྱི་སྲོག་ཤིང་ཤུག་པའི་སྡོང་པོ་ལ་རིན་པོ་ཆེ་ལྔ་སྨན་འབྲུ་ཙནྡན་ཨ་ག་རུ་སོགས་དང་དར་སྣ་དང་ཚོན་སྐུད་ཀྱིས་དཀྲིས་པས་གསོ། ནོར་མ་འཕེལ་ན་ནོར་ཁང་གི་སྒྲོམ་གསོ་ཞིང་སེར་ག་རིན་པོ་ཆེས་བསུབ་པ་དང་ཚོགས་འཁོར་གཏོང༌། བསྲིས་མ་རྨེ་ན་ཐབ་ཁུང་གསོ་ཞིང་རིན་པོ་ཆེ་དང་ཟས་སྣ་ཚོགས་ཀྱི་སྦྱིན་སྲེག་བྱ། གོས་སྟན་གྱིས་ཕོངས་ན་སྐུ་དཀར་དང་རྒྱབ་ཡོལ་གསོ་ཞིང་དར་སྣ་དང་རས་སྣམ་གྱིས་ཞལ་བ་བྱ། སྦྲང་བུ་ཆག་རས་ཉེན་ན་སྒོའི་གཟེར་དང་སྒོ་ལྕགས་དམ་ལ་འགྲིག་པར་གསོ། སྡོམ་སྡིགས་སྦལ་སྦྲུལ་གྱིས་ཉེན་ན་ཐེམ་པ་གས་ཆག་མེད་པར་གསོ། ཤིག་སྲོ་དང་མུག་མས་ཉེན་ན་གསུང་རབ་ཀྱི་སྐུ་རགས་སར་པར་གསོ། མིག་རིམས་ཀྱིས་ཉེན་ན་ལོགས་དཀར་དང་སྐར་ཁུང་གསོ་ཞིང་དཀར་རྩི་སྐྱ་ཧ་རེ་བ་བྱ། ཀླུ་དང་ས་བདག་གིས་ཉེན་ན་ཅོང་གསོ་ཞིང་དྲེག་པ་དང་གཙའ་མེད་པར་བྱ། ཕོ་གདོན་མོ་གདོན་གྱི་ཉེན་ན་ལམ་འཕྲང་མཁྲང་ལ་བརྟན་པར་གསོ། བྱིས་པའི་གདོན་བྱུང་(ཇ༡༥༤ན)

[Full Size]

ན་སྐས་ཀ་གྲུམ་མཐུད་མེད་པར་གསོ། འདུལ་ཁྲིམས་ཞིག་ན་དགེ་སློང་གཙང་མ་ངོ་ལྐོག་མེད་པའི་བཞི་སྡེ་གཟུགས། ཉན་བཤད་ཆད་ན་མཁས་བཙུན་དམ་ཚིག་གཙང་མའི་ཆོས་གྲ་གཟུགས། མི་རྣམས་ངང་རྒྱུད་རྩུབ་ན་མ་ཡེངས་སེམས་ལ་ལྟ་བའི་སྒོམ་གྲ་གཟུགས། བཀྲ་མི་ཤིས་ན་སྔགས་པ་དམ་ཚིག་གཙང་མའི་སྒྲུབ་པ་གཟུགས། ཞིག་གསོ་མཁན་གྱིས་ཉེན་ན་སྙིང་རུས་ཆེ་ཞིང་ངང་རྒྱུད་རིང་བས་ཞིག་གསོ་བྱ། ལྷ་སར་དཀོན་གཉེར་གྱིས་ཕོངས་ན་ཡེར་པར་གསུང་རབ་སྒྲོག་དེ་ཡང་གསལ་ལ་དག་པ་གཅེས། ལར་ན་ལྷ་སའི་གང་འདོད་ཀུན་ཡེར་པ་གསོས་པ་ལས་འབྱུང་ངོ༌། །འོན་ཀྱང་ལྷ་ཇོ་བོ་རྣམ་གཉིས་ཀྱི་ཐུགས་རྗེས་བསྐུལ་ནས་ཡེར་པ་གསོ་བ་ཡང་མང་དག་ཡོད། དེ་ཡང་རྒྱལ་བའི་ཞབས་ཏོག་རྒྱལ་བས་བྱེད་པ་ཡིན་ནོ། །ཞེས་སོགས་རྒྱལ་པོས་གསུངས་ནས་ཇོ་མོ་ཀོང་ཇོས་དཀར་ཆག་དུ་བཏབ་བོ་ཅེས་བྱུང་ངོ༌། །དེ་ལ་སོགས་པ་མཐའ་འདུལ་རུ་གནོན་སོགས་ཐམས་ཅད་ཀྱི་ཉམས་པ་གསོ་བ་གལ་ཆེ་ཞིང༌། དེ་ཐམས་ཅད་ལ་ཡང་མ་ཉམས་པ་མི་གཞིག་ཕན་ཚུན་མི་སྤོ། ཞིག་གསོའི་རྒྱུ་དང་ཆོས་གཏེར་འདོན་དགོས་ངེས་མ་གཏོགས་སྤྱིར་གཏེར་དང་ཁྱད་པར་ནོར་གཏེར་མི་དབྱུང༌། བགེགས་དང་དམ་སྲི་མནན་པ་མི་གདོན། ཐུགས་རྗེ་ཆེན་པོ་ལ་གསོལ་བ་བཏབ། མཆོད་པ་དང་ཚོགས་གསོག་བྱས་ནས་མ་བཀག་པར་ཤེས་ན་བྱ་བ་ཡིན་ཞིང༌། བསྟན་པ་དང་སེམས་ཅན་གྱི་སྤྱི་དོན་མ་གཏོགས་རང་གི་གྲགས་འདོད་དང་ས་འཛིན་པའི་ཆེད་སོགས་ཚེ་འདིའི་རང་འདོད་མ་ཞུགས་པ་ཁོ་ན་གལ་ཆེའོ། །དེ་ལྟར་འཕགས་མཆོག་སྤྱན་རས་གཟིགས་དབང་གིས། །ཐུན་མོང་མིན་པར་གདུལ་བའི་ཁུར་བསྣམས་ནས། །གང་ལ་གང་གིས་གདུལ་བའི་སྐུར་བསྟན་པ། །ཆོས་རྒྱལ་ལོ་པཎ་རིམ་པར་བྱོན་རྣམས་ཀྱི། །(ཇ༡༥༤བ)

[Full Size]

བཀའ་དྲིན་ཡང་ཡང་དྲན་པས་མ་བཟོད་དེ། །དད་པའི་གདུང་ཤུགས་ཟློག་པར་མ་ནུས་པའི། །རྐྱེན་གྱིས་བདག་རྒྱུད་རིང་མོ་ཞིག་ནས་བསྐུལ། །རྩོམ་པའི་འདུན་པ་ཡང་ཡང་འཕེལ་ན་ཡང༌། །ཀྱེ་མ་གཏམ་རྒྱུད་སྦུན་པས་ཅི་ཞིག་བྱ། །སྙིང་པོའི་དམ་ཆོས་རྒྱུད་ལ་སྒྲུབས་ཅིག་ཞེས། །རང་གིས་རང་ལ་གདམས་ནས་གནས་པའི་ཚེ། །ཚོགས་གཉིས་གཟི་འབར་བློ་གྲོས་ཡངས་པ་ཡི། །སྐལ་བཟང་དུ་མས་ལན་འགར་བསྐུལ་བ་ལས། །སངས་རྒྱས་བསྟན་པའི་ཆེ་བ་བརྗོད་པ་དང༌། །དམ་པའི་བཀའ་དྲིན་མི་བརྗེད་དྲན་ཕྱིར་དང༌། རྒྱལ་པོ་རྣམས་ལ་གདམས་པར་བྱ་བའི་ཆེད། །ལེགས་བཤད་ཀུན་ལས་བཏུས་པ་འདི་བརྩམས་སོ། །འདི་ནི་འཇིག་རྟེན་སྣང་བྱེད་ཉི་མ་སྟེ། །ཡང་དག་ལམ་རབ་སྟོན་པའི་སྣང་བ་ཡིན། །མཁས་རྣམས་དགའ་བྱེད་ལེགས་པར་བཤད་པའི་སྐྱེས། །ཡིད་ཀྱི་འདོད་པ་འཇོ་བའི་བུམ་བཟང་ཡིན། །གསེར་གྱི་རི་ལས་དུམ་བུ་བླངས་པ་ལྟར། །ཆ་ཤས་རེས་ཀྱང་ཡིད་ཀྱི་མུན་སེལ་ན། །རྫོགས་པར་ཁོང་དུ་ཆུད་ན་ལྟ་ཅི་སྨོས། །དེ་བས་འདི་ལྟའི་ལེགས་བཤད་རྙེད་པར་དཀའ། །འདི་ནི་རྙེད་དང་གྲགས་པའི་ཕྱིར་མ་ཡིན། །སྙན་ངག་མངོན་བརྗོད་སྡེབ་སྦྱོར་གྱིས་མ་བཅིངས། །ཡིད་འཆེས་ལུང་རྣམས་དཔང་པོར་བྱས་ནས་ནི། །སྐྱེ་བོ་ཀུན་གྱིས་གོ་བར་སླ་ཕྱིར་བཤད། །འདིའི་ཁུངས་ནི་ཆོས་རྒྱལ་སྲོང་བཙན་གྱི་བཀའ་ཆེམས་སྤྱི་དང་མྱ་ངན་འདས་ཆུང༌། གབ་པ་མངོན་ཕྱུང༌། ཇོ་བོའི་གཏེར་མ་ཀ་བཀོལ་མ། བསམ་ཡས་ཀྱི་དཀར་ཆག་ཆེན་མོའམ་རྒྱལ་རབས་དབའ་བཞེད་ཆེ་འབྲིང༌། ཁུ་སྟོན་བརྩོན་འགྲུས་གཡུང་དྲུང་གི་ལོ་རྒྱུས་ཆེན་མོའམ་ལོག་ནོན་ཆེན་མོར་གྲགས་པ། (ཇ༡༥༥ན)

[Full Size]

ལྡེ་སྟོན་གྱི་ཆོས་བྱུང༌། ཀུན་མཁྱེན་བུའི་ཆོས་བྱུང༌། ཡར་ལུངས་ཇོ་བོའི་རྒྱལ་རབས་དང་ཚལ་པའི་དེབ་དམར་དང་པོ་སོགས་དཔང་དུ་བྱས་སྟེ་ཕྱིས་ཡིག་ཆ་རེ་རེའང་རྙེད་དཀའ་བར་མཐོང་ནས་ཡིག་ཚོགས་ལ་མ་བསམས་པར་རང་སྐབས་ཀྱི་ལུང་དེ་ཚང་བར་བྲིས་པ་ཡིན་ནོ། །འདིར་འབད་དགེ་བ་མཁའ་ལྟར་ཡངས་པ་དེས། །རྙིགས་དུས་འགྲོ་བའི་ཡིད་མུན་ཀུན་བསལ་ནས། །ཐམས་ཅད་དམ་པའི་ལམ་ལ་རབ་གནས་པས། །སྤྱན་རས་གཟིགས་དབང་དགོངས་པ་ཡོངས་རྫོགས་ཤོག །དམ་པའི་ཆོས་ཀྱི་འཁོར་ལོས་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་ལེགས་པར་བཤད་པ་མཁས་པའི་དགའ་སྟོན་ཞེས་བྱ་བའི་བོད་ཡུལ་གྱི་སྐབས་ལས་ཆོས་རྒྱལ་རིམ་པར་བྱོན་པ་དང་ར་ས་བསམ་ཡས་ལས་འཕྲོས་པ་བསྟན་པ་སྔ་དར་གྱི་ཚུལ་རྒྱས་པར་བཤད་པའི་སྐབས་སྟེ་གཉིས་པའོ།། །།ཨོཾ་སྭ་སྟི། ཕན་བདེའི་འབྱུང་གནས་རྒྱལ་བསྟན་རིན་པོ་ཆེ། །ཇི་ལྟར་བྱོན་པའི་ལོ་རྒྱུས་ཆོས་ཀྱི་མཛོད། །དཔལ་ལྡན་གཙུག་ལག་ཕྲེང་བའི་གསུང་གི་རྒྱུན། །ཆོས་བྱུང་མཁས་པའི་དགའ་སྟོན་ཞེས་བྱ་བའི། །འཇིག་རྟེན་ཁམས་ཀྱི་རྣམ་གཞག་སྤྱིར་བསྟན་ནས། །བོད་ཡུལ་ཆོས་རྒྱལ་རྣམས་ཀྱི་མཛད་པའི་བར། །ཆོས་སྦྱིན་མི་ཟད་དཔེལ་བའི་ཆུ་རྒྱུན་འདི། །བསྟན་པའི་སྦྱིན་བདག་ལྷོ་སྟོད་ཡར་ཕྱིན་ནས། །ཆོས་ཀྱི་རྒྱལ་པོ་ཁུ་དབོན་ཡབ་སྲས་ཀྱིས། །ཐུགས་བསམ་རྣམ་པར་དག་པས་སྒྲུབ་པར་མཛད། །རྐོས་ལ་མཁས་པ་རྒང་རྒྱུད་སྤྲུལ་སྐུ་བ། །ཚེ་དབང་དར་པོ་ལ་སོགས་རྣམས་ཀྱིས་བསྒྲུབས། །ཞུས་དག་བྱེད་པོ་བྱམས་པ་དོན་གྲུབ་ཡིན། །འདི་ཡི་དགེ་བ་རྣམ་དཀར་དྲི་མེད་དེས། །གནས་སྐབས་འགལ་རྐྱེན་བར་ཆད་ཀུན་ཞི་ནས། །མཐར་ཐུག་རྣམ་མཁྱེན་སངས་རྒྱས་འཐོབ་པར་ཤོག །མངྒ་ལཾ།

འདུལ་བའི་ཆོས་ཀྱི་བྱུང་བ་བརྗོད་པ།

[Full Size]

དམ་པའི་ཆོས་ཀྱི་འཁོར་ལོས་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བ་ལས་ཡན་ལག་གསུམ་པ་བོད་ཀྱི་སྐབས་ལ་ལེའུ་བཅུ་ལས་གསུམ་པ་འདུལ་བའི་ཆོས་བྱུང་བཞུགས་སོ། །(ཉ༡བ)

[Full Size]

བོད་ཏུ་ཐུབ་བསྟན་ཕྱི་མ་དར་ཚུལ་ཡང༌། །དང་པོར་བསྟན་རྩ་འདུལ་བའི་སྡེ་སྣོད་ནི། །སྡོམ་བརྩོན་དུ་མ་ཁམས་སུ་བྲོས་པ་ལས། །མོས་པས་སྤྱོད་པའི་ས་ལ་གནས་པ་ཡི། །མུ་གཟུ་གསལ་འབར་རབ་ཏུ་བྱུང་བ་ནི། །བླ་ཆེན་དགོངས་པ་རབ་གསལ་ཞེས་བྱར་གྲགས། །དེ་ཡི་མཁན་བུ་སྡོམ་བརྩོན་མང་དུ་འཕེལ། ཁྱད་པར་དབུས་གཙང་མི་བཅུས་བཀའ་དྲིན་མནོས། །གཙང་ན་ལོ་ཚོ་ཚོང་ཚོ་རྣམ་པ་གཉིས། །དབུས་ན་ཀླུ་མེས་འབྲིང་ཚོ་རྦ་རག་གསུམ། །རེ་རེའང་ཡན་ལག་དུ་མར་བཅས་པ་ཡིས། །བོད་ཡུལ་ཀུན་ན་འདུལ་བསྟན་མཆོག་དུ་དར། །བསྟན་པའི་མེ་རོ་མདོ་ཁམས་ནས་གསོས་པ། །སྨད་འདུལ་ཞེས་བྱར་མཚན་དུ་གྲགས་པ་ཡིན། །དྲིན་ཅན་པཎ་ཆེན་གཉིས་ཀྱི་མཁན་བུ་ནི། །རྒྱ་གར་པཎ་ཆེན་དྷརྨ་པཱ་ལ་ལས། །ཞང་ཞུང་རྒྱལ་བའི་ཤེས་རབ་ཀྱིས་དྲིན་མནོས། །དེ་ཡི་སློབ་མ་དཔལ་འབྱོར་ལ་སོགས་བྱུང༌། །འདི་ལ་སྟོད་འདུལ་ཅེས་བྱར་གྲགས་པ་སྟེ། །རྣམ་པར་དག་ཀྱང་མང་དུ་(ཉ༢ན)

[Full Size]

མ་འཕེལ་སྐད། །ཕྱི་དུས་བསྐལ་བཟང་སངས་རྒྱས་བདུན་པ་གང༌། །རབ་གསལ་ཤཱཀྱའི་བསྟན་ལ་ཚངས་སྤྱོད་པ། །ཁ་ཆེའི་མཁས་པ་ཤཱ་ཀྱ་ཤྲཱི་ཞེས་པ། །འཕགས་པའི་ཡུལ་ན་རྩོད་མེད་སྡོམ་བརྩོན་པ། །ཁྲོ་ལོའི་དད་བརྩོན་མཁྱེན་པ་ཟླ་མེད་པས། །དབང་དུ་མཛད་དེ་བོད་ཡུལ་སྤྱན་དྲངས་པ། །དེ་ལས་བྱང་རྡོར་རྣམ་གཉིས་བསྙེན་རྫོགས་སྟེ། །རྩ་བའི་སྡེ་པ་རྣམ་བཞིའི་རྟེན་འབྲེལ་བཞིན། །འདུལ་བའི་སྡོམ་རྒྱུན་རབ་ཏུ་རྒྱས་པར་གྱུར། །དེ་ལྟར་སྐྱེས་བུ་དམ་པ་མང་པོ་ཡིས། །འདུལ་བའི་བཤད་རྒྱུན་སྒྲུབ་རྒྱུན་རྒྱ་ཆེར་སྤེལ། །ཁྱད་པར་མཁས་པ་ཆེན་པོ་མཚོ་སྣ་པ། །མགོན་པོ་ཊཀྴད་ཀྱིས་ནི་བསྐུལ་བ་ལས། །འདུལ་བའི་བསྟན་བཅོས་དུ་མ་མཛད་པ་ནི། །ཕྱི་དུས་བསྟན་པའི་མིག་འབྲས་ལྟ་བུར་གྱུར། །དེ་ལྟར་དམ་པ་རྣམས་ཀྱི་བཀའ་དྲིན་ལས། །ལྷག་པའི་ཚུལ་ཁྲིམས་དྲི་མེད་བསླབ་པ་དང༌། །འདུལ་བའི་སྡེ་སྣོད་དར་ཞིང་རྒྱས་པར་མཛད། །དེང་དུས་ཀྱང་ནི་གཟུགས་བརྙན་ཙམ་ཞིག་སྣང༌། །དགག་སྒྲུབ་བཅས་པ་རྒྱལ་བ་ཁོ་ནའི་ཡུལ། །སྟོན་དང་བསྟན་པ་གཅིག་གྱུར་སོ་སོར་ཐར། །ཇི་བཞིན་གང་གི་རྒྱུད་ལ་གནས་པ་ཡི། །བསྟན་རྩ་འདུལ་འཛིན་རྣམས་ལ་ཕྱག་འཚལ་ལོ། །དེ་ཡང་སངས་རྒྱས་ཉིད་རང་བྱུང་གིས་བསྙེན་པར་རྫོགས་ནས་སླར་ལྔ་སྡེ་ཡེ་ཤེས་ཁོང་ཆུབ་ཀྱིས་བཟང་སྡེའི་ཚོགས་དྲུག་བཅུ་སྐྱབས་སུ་འགྲོ་བས་འོད་སྲུང་ཆེན་པོ་སྟོན་པར་ཁས་བླངས་པས། ཕལ་ཆེར་ཞིག་ཚུར་ཤོག་གིས། ལེགས་བྱིན་དྲི་བས་མཉེས་པས། སྐྱེ་རྒུའི་བདག་མོ་ལྕི་བའི་ཆོས་བརྒྱད་ཁས་བླངས་པས་བསྙེན་པར་རྫོགས་པ་སོགས་སྔོན་(ཉ༢བ)

[Full Size]

གྱི་ཆོ་ག་སངས་རྒྱས་ཉིད་དང་གསོལ་བཞིས་བསྙེན་པར་རྫོགས་པ་དགེ་འདུན་དང་འབྲེལ་བའི་ལས་ཀྱིས་སྔོན་ཆོག་གི་ཡུལ་རྣམས་བསྙེན་རྫོགས་སུ་མཛད་ལ། སངས་རྒྱས་ནས་ལོ་བདུན་པའི་སྔོན་ནས་ད་ལྟར་གྱི་ཆོ་ག་གནང་ཞིང་བརྗོད་བྱ་དོན་གྱི་འདུལ་བའི་རྒྱུན་མ་ཆད་པའོ། །བརྗོད་བྱེད་ཀྱི་འདུལ་བ་སོ་སོ་ཐར་པའི་མདོ་གཉིས་ལུང་སྡེ་བཞི་ཕྱོགས་གཏོགས་དང་བཅས་པ་བཀའ་དང༌། བསྟན་བཅོས་ལ་ཉེར་སྦས་སོགས་དགྲ་བཅོམ་པ་མང་པོས་མཛད་པར་གྲགས་པ་བྱེ་བྲག་དུ་བཤད་པའི་ནང་ཚན་འདུལ་བ་བྱེ་བྲག་དུ་བཤད་པ་དང༌། དྲི་མེད་བཤེས་གཉེན། ཁྱད་པར་བཤེས་གཉེན་སོགས་ཀྱིས་སོ་ཐར་མདོ་བཀྲལ། སློབ་དཔོན་དགེ་ལེགས་བཤེས་གཉེན་གྱིས་ལུང་མ་མོའི་རྒྱ་ཆེར་འགྲེལ་དང༌། དུལ་ལྷས་རྣམ་འབྱེད་འགྲེལ་པ། དགེ་བའི་གཉེན་གྱིས་ལུང་ཞུ་བ། ཚུལ་ཁྲིམས་བསྐྱངས་ཀྱིས་ཕྲན་ཚེགས་རྣམས་བཀྲལ་ཞིང༌། ཕྱིས་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་ཡོན་ཏན་འོད་ཀྱིས་མདོ་རྩ་བ་དང་ལས་བརྒྱ་རྩ་གཅིག་པ་བསྡུས་རང་འགྲེལ་མཛད་ཅིང་ཆོས་བཤེས་ཀྱིས་རྒྱ་ཆེར་འགྲེལ་མཛད་པ་སོགས་ནས་གཞི་ཐམས་ཅད་ཡོད་སྨྲའི་སྡོམ་རྒྱུན་མཁན་པོ་ཞི་བ་འཚོའི་བར་འདུལ་བའི་བཤད་སྒྲུབ་ཀྱི་རྒྱུན་མ་ཆད་ཅིང་དེས་བོད་ཡུལ་དུ་དར་བར་མཛད་ཏོ། །དེ་ཡང་བསྟན་པའི་མེ་རོ་སྨད་ནས་ཇི་ལྟར་བསླང་བའི་ཚུལ་ལ་མི་མཐུན་པ་དུ་མ་སྣང་བ་ལས། ལོ་རྒྱུས་ཆེན་མོ་ལས་ནི། བསྟན་པ་བསྣུབས་པའི་དུས་དབུས་ནས་ཞང་མངའ་འཇམ་དཔལ་དང་ཡང་གོང་ཤེས་རབ་འབྱུང་གནས་གཉིས་ཁམས་སུ་བྱོན། དེའི་ཚེ་ཡང་གོང་གིས་ཁུངས་བསྟན་ནས་ཞང་མངའ་འཇམ་དཔལ་ལས་བླ་ཆེན་དགོངས་པ་རབ་གསལ་བསྙེན་པར་རྫོགས། དེའི་མཁན་བུ་ཅོག་རོ་དཔལ་གྱི་དབང་ཕྱུག་དང་གྲུམ་ཕྱིང་སླག་ཅན་གཉིས་ཡིན། དེ་ཚེ་གཙང་པ་ལོ་ཚོང་གཉིས་དབུས་པ་ཀླུ་མེས་དང་འབྲིང་སྟེ་བཞིས་ཅོག་གྲུམ་ལ་མཁན་སློབ་ཞུས་སྟེ་བླངས། མཁན་སློབ་ན་རེ་ལོ་སྟོན་མཐུ་ཆེ་བས་བསྟན་པ་སྲུངས། ཀླུ་མེས་བཙུན་པས་མཁན་པོ་གྱིས། ཚོང་གེ་བློ་རྣོ་བས་ཆོས་སྟོན། འབྲིང་ཕོ་སྦོ་མཐོ་བས་གནས་བརྟན་(ཉ༣ན)

[Full Size]

གྱིས་ལ་བཞི་གར་བསྡོམས་པས་གནས་གཞི་གཅིག་ཟུང་ཞིག་གསུངས་ཀྱང་མཁན་སློབ་ཀྱི་གསུང་བཅག་ནས་སོ་སོར་བཟུང་བས་སྡེ་བཞི་བྱུང༌། དེ་ཡང་གླང་དར་གྱིས་ཆོས་བསྣུབས་པའི་ལྕགས་བྱ་ནས་ལོ་ངོ་གསུམ་པ་ཆུ་མོ་གླང་ལ་ཁུ་གཞོན་ནུ་རིན་ཆེན། གཉས་ཡོན་ཏན་སྙིང་པོ། མཆིམས་ལྷུན་གྲགས་དང་མཆོག་གྲུབ་གཉིས་སྟེ་བཞིས་ཀླུ་མེས་མོན་མཁར་འབྲས་ཕུར་སྤྱན་དྲངས། ཕྱི་ལོ་སྟག་ལོ་ལ་ཀ་ཆུ་གསོས་སྟེ་བཟུང༌། སྤྱན་འདྲེན་བཞི་པོ་ཡང་རབ་ཏུ་བྱུང༌། དེ་ནས་ལོ་བཞི་པའི་མེ་སྦྲུལ་ལ་ཐང་པོ་ཆེ་བཏབ། དེའི་འོག་དུ་འབྲིང་ཡེ་ཤེས་ཡོན་ཏན་སྨྱལ་པ་དེ་བྱོན་སྟེ་བོ་དྷི་རཱ་ཛཱས་ཁམས་གསུམ་ཕུལ་ནས་བཞུགས་སྟེ་གངས་བར་ལྷ་ཁང་དང་གཉལ་གྱི་བཟང་རུ་སོགས་གྱང་སྐོར་དགུ་བཟུང༌། དེ་ནས་རག་ཤི་ཚུལ་འབྱུང་ཁམས་སུ་སྡོམ་པ་བླངས་ནས་བྱོན་སྟེ་སྣང་གསལ་ལྷ་ཁང་བཟུང༌། དེའི་གོང་ཙམ་དུ་རྦ་བཙུན་བློ་གྲོས་བྱོན་སྟེ་སྡོམ་པ་མ་བླངས་སྔོན་གྱི་དགྲ་བཅོམ་གཙུག་ཕུད་ཅན་ལ་གཙུག་ཕུད་རང་གིས་དོར་བ་ཡིན། དེས་ན་དབུས་ཀྱི་བསྟན་པ་ཕྱི་དར་གྱི་ཐོག་མ་ཀླུ་མེས་ཡིན་ལ་དེའི་གོང་དུ་དབུ་མ་མཛོད་མཁན་དང་གླན་སྟོན་ཤེས་རབ་རྡོ་རྗེ་བྱ་བ་ཁམས་ནས་བྱོན་ཡང་བསྟན་པ་མ་ཚུགས་ཅེས་བཤད་ཏོ། །ཡང་དཔོན་བི་ཅིས་བྲིས་པ་བདེ་སྔོན་ན་སྣང་བ་ནི། སྨར་གཡོ་གཙང་གསུམ་གྱིས་མདོ་སྨད་སྲོ་གུ་ལུང་དུ་བྱོན། དེའི་ཚེ་རྒྱལ་པོའི་ཆོས་བློན་འབྲོ་སྟག་སྣང་ཁྲི་གསུམ་རྗེས་བསྟན་པ་གསལ་ནུས་པར་སྨོན་ལམ་བཏབ་ནས་སོ་ལྔ་པ་ལྕགས་ཕག་ལ་ཚེ་འཕོས་སྟེ་ཙོང་ཁ་བདེ་ཁམས་སུ་ཆུ་བྱི་ལ་འཁྲུངས། ནར་སོན་ནས་ནོན་འཇམ་དཔལ་བཟླས་ལུང་བླངས། ཁང་རིན་རྡོར་ཞེས་སྤྱན་རས་གཟིགས་ཞལ་མཐོང་བ་ཞིག་ལ་སེམས་བསྐྱེད། སྐྱི་རྒྱལ་བའི་གཙུག་ཏོར་ལ་དབུ་ཚད། ནམ་དགའ་ལྡན་བྱང་ཆུབ་ལ་ཡོ་ག་གསན། འཁོར་བའི་སྡུག་བསྔལ་བསལ་ནས་ཐར་བ་ཡི། །བདུད་རྩིས་འགྲོ་བའི་སྡུག་བསྔལ་ཞི་བྱེད་པའི། །བསྟན་པ་(ཉ༣བ)

[Full Size]

ཕྱོགས་བཅུར་རྒྱས་པར་བྱ་བའི་ཕྱིར། །དང་པོར་བདག་གིས་རབ་ཏུ་བྱུང་བར་བྱ། །ཞེས་གཙང་གིས་མཁན་པོ། གཡོ་སྨར་གྱིས་སློབ་དཔོན་བྱས་སྟེ་རབ་བྱུང་བསྙེན་པར་རྫོགས། དེ་ནས་བྱང་ཕྱོགས་སུ་མི་ཉག་ལྷའི་ཡུལ་དུ་གོ་རོང་སེང་གེ་གྲགས་ལ་འདུལ་བ་གསན་པས་ལུང་སྡེ་བཞི་བསྟན་བཅོས་དང་བཅས་པ་བྱིན་ནས་བསྟན་པ་གསལ་བར་གྱིས་ཅིག་ཁོ་བོ་ནི་ཡུན་རིང་དུ་མི་འཚོའོ་གསུངས། དེ་ནས་དབུས་སུ་ཞང་ཆེན་པོ་དགེ་བ་ལ་ཆོས་ཉན་དུ་འབྱོན་བཞེད་པ་ན་ཀློང་ཐང་སྒྲོལ་མར་དབུས་ནས་རྒྱལ་པོའི་ཕོ་ཉ་བ་མངར་གཡུ་མཚོ་བྱ་བ་ཞིག་འདུག་པ་ན་རེ་དབུས་སུ་མུ་གེ་ཆེན་པོ་བྱུང་བས་བཙུན་པ་ཁྱོད་ཀྱིས་བཤུལ་ཡང་མི་ཕྱེད་བཀའ་འོད་མཆོག་གྲགས་པ་ལྷོ་བལ་ཏུ་ཆོས་བསླབས་ནས་ཁམས་སུ་བྱོན་ཟེར་བས་ལོག་སྟེ་ལྷ་རྩེ་བྷིག་ཏིག་གི་གནས་གཞིར་བཀའ་ལས་འབུམ་ཊཱིཀ་དང་ས་སྡེ་སོགས་མངོན་པའི་ཐེག་ཆེན་ལོ་བཅུ་གཉིས་གསན། རྨང་ལམ་ན་གླང་པོ་ཆེ་བཅིབས་ནོར་བུ་བསྣམས་ནས་ཚོང་འདུས་རྣམས་སུ་བྱོན་པས་མི་ཀུན་ན་རེ་བཙུན་པ་ཁྱོད་ཀྱི་ནོར་བུ་བཟང་སྟེ་རེ་ཞིག་ཉོ་བ་ཡང་མེད་རིན་ཡང་མི་ཐེག་ཟེར་བ་རྨིས་པས། བསྟན་པ་རིན་ཆེན་སྒྲོམ་ཕྱེ་སྟེ། །ཡོན་ཏན་མཆོག་གི་ནོར་བྱིན་ཡང༌། །དམན་རྣམས་དོན་དུ་མི་གཉེར་བས། །རེ་ཞིག་ནགས་སུ་གནས་པར་བྱ། །ཞེས་དགོངས་ཚེ་རི་དན་ཏིག་གི་ཐེའུ་རང་དཔུན་དགུས། བདག་ཅག་གིས་ཕྱོགས་གང་དང་གང་ན་དགོན་པ་ཆེན་པོ་དངོས་གྲུབ་བརྙེས་པ་མང་དུ་བྱུང་བ་རྩ་བ་དང་འབྲས་བུ་ལ་སོགས་པ་རྙེད་སླ་བ་དེར་འབྱོན་པར་ཅི་གནང༌། བདག་ཅག་གིས་ཀྱང་བྲན་དང་དགེ་བསྙེན་ཏུ་བགྱིའོ་ཞེས་ཞུས་སྟེ་དེར་བྱོན་ནས་མཆོད་གཏོར་རྒྱ་ཆེན་པོ་མཛད་དེ། བསྟན་པ་སྲུང་བ་སྐྱོབ་པའི་སྤྱན་སྔ་རུ། །ཐུགས་དམ་བཞེས་པ་རྒྱལ་སྲས་དཔའ་རྣམས་དང༌། །འཇིག་རྟེན་སྐྱོང་བ་རྫུ་འཕྲུལ་སྟོབས་ལྡན་པ། །སྐྱོབ་ལ་གུས་རྣམས་བདག་ལ་གདོང་གྲོགས་མཛོད། །ཅེས་འཕྲིན་ལས་བསྐུལ་ལོ། །དེ་ན་གཅིག་ཅར་འཇུག་པ་ཅེས་དགེ་བའི་(ཉ༤ན)

[Full Size]

ཕྱོགས་མི་བྱེད་པ་མང་བས་དེའི་ཆེད་དུ་ལྷ་ཁང་དང་མཆོད་རྟེན་མང་པོ་བཞེངས་པས་ཡུལ་དེར་ཚོན་རྩི་ཡང་བྱུང༌། གཟོ་ཡང་རང་གིས་མཛད། དེར་པ་གོང་ཡེ་ཤེས་གཡུང་དྲུང་འཁོར་མང་པོ་དང་བཅས་པ་དན་ཏིག་དུ་བྱོན་པ་ན་བླ་ཆེན་པོས་འདུལ་བའི་བསླབ་གཞི་བརྗོད་པས་དད་ཅིང་རང་གི་སྤྱོད་པས་འགྱོད་དེ་རབ་ཏུ་བྱུང༌། དེ་བཞིན་དུ་པར་གྲགས་པ། ཇ་པ་གྲགས་པ་དང་བཙུན་ཆེན་ཤེར་འབྱུང༌། གཞང་དཔལ་རྡོར་དང་སྲགས་རྒྱ་མཚོ། འལ་རྡོར་དབང་དང་སྣུབས་དཔལ་དབང༌། ཟོང་མཆོག་ཆོས་སྐྱོང་དང་མཚུར་ཤེས་རབ་མཆོག་སྟེ་གཉིས་རེ་ཉེ་བར་རབ་ཏུ་བྱུང་བས། པ་བར་གཉིས། ཇ་ཅོག་གཉིས། གཞང་གྲགས་གཉིས། འལ་སྣུབས་གཉིས། ཟོང་མཚུར་གཉིས་ཅེས་བྱ་ལ་མཚུར་གྱི་མཁན་བུ་ཀླུ་མེས་སོགས་དབུས་གཙང་པ་རྣམས་ཡིན་ནོ། །དེར་ཡང་དག་འཇོག་ལ་རྩེ་གཅིག་དུ་བརྩོན་པ་ལས་ཅི་ཞིག་ན་བརྒྱ་བྱིན་ལ་སོགས་པའི་ལྷ་རྣམས་མཚན་མོ་སྣང་བ་ཆེན་པོས་ཆོས་ཉན་པའི་ཕྱིར་ལྷགས་སྟེ་ཆོས་ཀྱི་གཏམ་གྱིས་ཡིད་ཚིམ་ནས་བཙུན་པ་ཁྱེད་ནི་བཟང་ན་མི་མ་ཡིན་པའི་འཁོར་འདི་དག་ནི་ངན་ནོ་ཟེར་ནས་སོང༌། འཁོར་རྣམས་ཀྱིས་མདང་སྣང་བ་འདི་ལྟ་བུ་གདའ་བ་ཁྱེད་ངེས་པར་སྤྲུལ་བ་ལགས་སམ་ཞུས་པས། ཁོ་བོ་ནི་སྤྲུལ་པ་མ་ཡིན་གྱི་ཐེག་ཆེན་སྦྱོར་ལམ་པ་སྣང་བ་ཐོབ་པའི་བན་ནྡྷེ་དགེ་བ་གསལ་ལོ་ཞེས་གསུངས། ཡང་སྐབས་གཞན་དུ། དང་པོ་བུད་མེད་སྒོག་ཚོང་མ། །བར་དུ་སྟག་སྣ་ཁྲི་སུམ་རྗེ། །ད་ལྟ་མུ་ཟུ་དགེ་བ་གསལ། །ཞེས་ཀྱང་གསུང་སྐད། དེ་ལྟ་བུའི་བླ་ཆེན་པོས་ལོ་ཞེ་དགུ་ལ་དན་ཏིག་དུ་བྱོན། སུམ་བཅུ་རྩ་ལྔ་དེར་བཞུགས། བརྒྱད་བཅུ་རྩ་བཞི་ཕག་ལ་གཤེགས། འཕགས་པ་ཐོགས་མེད་དང་བཙུན་པ་མཆེ་བའི་སྡེ་གཉིས་ཀྱིས་ཡུམ་དོན་མི་འདྲ་བར་བཀྲལ་བ་དེ་ཁོ་བོས་བྱམས་པ་ལ་ཞུ་དགོས་སློབ་དཔོན་དེ་གཉིས་ཀྱང་ད་ལྟ་དགའ་ལྡན་ན་བཞུགས་པ་ཡིན། ཡང་འཇིག་རྟེན་འདིར་ད་ལྟ་འཕགས་པ་འཇམ་དཔལ་བྱོན་ཡང་བསྐྲད་དེ་གཏོང་(ཉ༤བ)

[Full Size]

ནའང་ཁོ་བོ་ནི་བྱམས་པ་མ་བྱོན་གྱི་བར་དུ་འཛམ་གླིང་འདི་ཐམས་ཅད་ཏུ་སྐྱེ་བ་བརྒྱད་ཙམ་རེ་ལེན་དགོས་ཅེས་གསུངས་སྟེ་དགའ་ལྡན་དུ་གཤེགས། ཞེས་དཔོན་བི་ཅིས་བྲིས་པར་སྣང༌། ས་སྐྱ་བླ་མའི་ཆོས་བྱུང་ལས་ནི་བསྟན་པ་བསྣུབས་པའི་ཚེ་དང་པོར་སྨར་གཡོ་གཙང་གསུམ། དེ་ནས་བཀའ་འོད་མཆོག་གྲགས་པ་དང་རོང་པོ་ལྷུན་གྱི་དཔལ་གཉིས། དེ་ནས་ལྷ་ལུང་རྣམས་རིམ་པར་བྲོས། བོན་པོའི་བུ་སྨུ་གསལ་འབར་རབ་ཏུ་ཕྱུང་སྟེ་ཤཱཀྱ་དགེ་བ་གསལ་དུ་བཏགས་ནས་མཁས་པར་གྱུར། དེ་ནས་བལ་རྡོ་རྗེ་དབང་ཕྱུག་སྣུབས་དཔལ་གྱི་བྱང་ཆུབ། ཡང་གོང་ཡེ་ཤེས་གཡུང་དྲུང༌། སྦར་རིན་ཆེན། ལྕང་ཡེ་ཤེས་སེང་གེ་ཅོག་རོ་ཤེར་བྱང༌། ཤོད་ཆུང་པ་ཤེར་གྲགས། ཨན་འབར་བ་བྱང་ཆུབ། གྲུམ་ཡེ་རྒྱན། སྣུབས་དཔལ་བྱང༌། སྒྲོ་མཉྫུ་ཤྲཱི་སོགས་མཁས་བཙུན་མང་དུ་བྱོན། ཆོས་བསྣུབས་ནས་ལོ་དྲུག་བཅུ་ན་འཕན་ཡུལ་ཞོགས་པ་བོན་པོ་སྨུ་གསལ་གཤེན་འབར་གྱི་བུ་སྨུ་ཟ་འཕེན་བྱ་བའི་བྱིས་པས་སྣང་གསལ་ལྷ་ཁང་དུ་ཕྱིན་པས་གྱང་རིས་ལ་རབ་བྱུང་ཆོས་ཉན་བཤད་བྱེད་པའི་གཟུགས་མཐོང་ནས་དྲིས་པས་རྒན་མོ་ཞིག་ན་རེ་རབ་ཏུ་བྱུང་བ་བྱ་བའི་གཟུགས་ཡིན་ཟེར་བས་བྱིས་པ་དད་དེ་ངུས་ནས་ད་ག་ན་ཡོད་དྲིས་པས་ང་བུ་མོའི་དུས་ན་ཡོང་སྟེ་ཕྱིས་བསྣུབས་ནས་མེད། ད་ལྟ་ཁམས་ན་ཡོད་པར་འདུག་ཟེར་བས་བྱིས་པ་དེས་ལུས་སྲོག་ལ་མ་བལྟས་པར་ཕྱིན་སྟེ་རབ་ཏུ་བྱུང་བས་བླ་ཆེན་དགོངས་པ་གསལ་དུ་གྲགས། དབུས་གཙང་གི་མི་བདུན་ཞེས་ཀླུ་འབྲིང་ལོ་ཚོང་གི་སྟེང་དུ་སུམ་པ་ཡེ་བློ་རྒྱ་བན་བློ་ཤེ་གཞོན་བན་ཆོས་མཆོག་སྟེ་བདུན་ཕྱིན་པ་གྲུམ་དང་ཅོག་རོ་ལས་སྡོམ་པ་མནོས་ནས་ལོག །དེ་ནས་མཐའ་བཞི་རྒྱལ་འཕགས་རག་ཤི་ཚུལ་འབྱུང་རྦ་བཙུན་བློ་གྲོས་ཉང་བྲན་ཆོས་སྐྱབས་གྲུམ་ཤིང་ཤེར་སྨོན་སྟེ་ལྔས་དེའི་རྗེས་སུ་གྲུམ་ཅོག་ལས་བླངས་ཅེས་འཆད་པར་སྣང་ཡང་ཅུང་ཟད་མ་དག་པ་ཅིག་སྟེ། དེའི་ལུགས་ལ་(ཉ༥ན)

[Full Size]

བྱིས་པ་ཁམས་སུ་ཕྱིན་པ་དེ་ཁོ་ན་ལ་ཤཱཀྱ་དགེ་བ་གསལ་དུ་བཏགས་པ་ཕྱིས་མཁས་པར་གྱུར་ནས་དགོངས་པ་རབ་གསལ་དུ་གྲགས་པ་ཡིན་པས་ལན་གཉིས་སུ་བགྲང་མི་འོས་ལ་དབུས་གཙང་མི་བཅུ་སུས་ཀྱང་བླ་ཆེན་དང་དེའི་སློབ་མ་ལའང་མ་ཐུག་ན་དེས་བསྟན་པའི་མེ་རོ་གསོས་པར་ཇི་ལྟར་འཆད། དེས་ན་རྗེ་རང་བྱུང་རྡོ་རྗེ་དང་ཀུན་མཁྱེན་བུ་སྟོན་སོགས་བཞེད་པ་ནི་འདི་ཡིན་སྟེ། བསྟན་པ་བསྣུབས་པའི་ཚེ་འཇང་གི་གྱེལ་མི་གཙང་རབ་གསལ། བོ་དོང་པ་གཡོ་དགེ་འབྱུང༌། སྟོད་ལུགས་པ་སྨར་ཤཱཀྱ་མུ་ནི་དང་གསུམ་ཆུ་བོ་རི་ལ་སྒོམ་ཞིང་ཡོད་པས་བཙུན་པ་ཁྱི་ར་བྱེད་པ་མཐོང་ནས་དྲིས་པས་ཆོས་བསྣུབས་པར་ཤེས་ནས་འདུལ་བ་དྲེལ་ཁལ་གཅིག་བཀལ་ནས་སྐད་རིས་མི་གཅིག་པའི་སར་བསྟན་པ་དཔེལ་སྙམ་ནས་གར་ལོག་དང་ཧོར་ཡུལ་དུ་ཕྱིན་ཡང་དར་བར་མ་ནུས་སྟེ་མདོ་སྨད་ལྷོ་ངོས་ཀྱི་བེ་རོ་ཚ་ཆོན་ཚུར་ཐོན་རྨ་ཆུའི་རྒྱུད་རྨ་ལུང་རྡོ་རྗེ་བྲག་ར་ཨན་ཆུང་གནམ་རྫོང་ཡང་ཟེར་བ་དན་ཏིག་ཤེལ་གྱི་ཡང་དགོན་ན་སྒོམ་ཞིང་ཡོད་པ་རྨ་ཆུ་པའི་ཕྱུགས་རྫིས་མཐོང་སྟེ་མི་རྣམས་ལ་སྨྲས་པས་མོས་སྤྱོད་ཀྱི་ས་བ་མུ་ཟུ་གསལ་འབར་བྱ་བས་བལྟར་ཕྱིན་པས་དད་དེ་རབ་ཏུ་འབྱུང་བར་ཞུས་པས་འདུལ་བའི་པོ་ཏི་གཏད་ནས་འདི་ལྟོས་དད་ན་རབ་ཏུ་དབྱུང་ངོ་གསུངས་བལྟས་པས་ཆེར་དད་དེ་མཆི་མ་བྱུང༌། དེར་སྨར་གྱིས་མཁན་པོ་གཡོས་སློབ་དཔོན་བྱས་སྟེ་རབ་ཏུ་ཕྱུང༌། མཁན་སློབ་ལས་མིང་སྦྱར་སྟེ་ཤཱཀྱ་དགེ་བ་རབ་གསལ་ཏུ་བཏགས། ཕྱིས་ཐུགས་རབ་ཆེ་བས་དགོངས་པ་རབ་གསལ་དུ་གྲགས་སོ། །བསྙེན་རྫོགས་ཞུས་པ་དགེ་སློང་ལྔ་མ་ཚང་བས་མི་འོང་གསུངས་ནས་སྔར་ལྷ་ལུང་དཔལ་རྡོར་བ་གསུམ་ཀློང་ཐང་ན་འདུག་པར་ཐོས་ནས་བཙལ་བས་ཁོང་ན་རེ་ངས་རྒྱལ་པོ་བསད་པས་ཁ་སྐོང་མི་འོང་གཞན་བཙལ་གྱི་གསུངས་སྟེ་རྒྱའི་ཧྭ་ཤང་ཀེ་ཝ་ཇ་དང་གྱི་ཕན་གཉིས་བཏང་སྟེ་ལྔས་བསྙེན་པར་རྫོགས་ནས་འདུལ་བ་ལོ་བཅོ་ལྔ་གསན་ཞེས་རྗེ་རང་བྱུང་པ་བཞེད། རྫོགས་ནས་ལོ་ལྔ་ལོན་པ་དང་(ཉ༥བ)

[Full Size]

དབུས་ནས་གླག་པ་ལམ་པ་ཀླུ་མེས་ཚུལ་ཁྲིམས་ཤེས་རབ། སྨྱལ་པ་འབྲིང་ཡེ་ཤེས་ཡོན་ཏན། གཡོ་རུ་པ་ན་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་སྟེ་ལྔ༌། གཙང་ནས་མགུར་མོ་རབ་ཁ་བ་ལོ་སྟོན་རྡོ་རྗེ་དབང་ཕྱུག །ཤབ་སྒོ་ལྔའི་ཚོང་བཙུན་ཤེས་རབ་སེང་གེ །མངའ་རིས་པ་འོད་བརྒྱད་དཔུན་གཉིས། བོ་དོང་པ་ཨུ་དཀར་དེ་ཝ་དང་ལྔ་སྟེ་དབུས་གཙང་གི་མི་བཅུས་ཁམས་སུ་བྱོན། བསམ་ཡས་ཀྱི་མངའ་བདག་ཚན་ཡེ་ཤེས་རྒྱལ་མཚན་གྱིས་ཁམས་སུ་བརྫངས་ཅེས་ཀྱང་གྲགས། བཀའ་གདམས་ཀྱི་ཡི་གེ་འགའ་ལས་རྙེད་འཚོལ་ལ་ཕྱིན་པ་འདོད་པ་བཞིན་མ་འགྲུབ་ནས་རྒྱ་སྲང་ལ་ལྷུང་བའི་ཚེའུ་ཅག་རྣམས་ཟང་ཟིང་གི་ཆེད་དུ་འདི་ལྟར་དཀའ་བ་སྤྱོད་པ་བས་འདི་ཕྱི་ཐམས་ཅད་དུ་བདེ་བའི་ཆོས་བྱའམ་ཞེས་མོལ་ནས་རབ་ཏུ་འབྱུང་བར་འཆམས། ཕྱག་རྟེན་མེད་ཅེས་གླེངས་པས་ཁོང་རང་ཆོས་རྒྱུས་ཆེ་བ་འགས་གྲོས་བཏོན་མེ་ཏོག་མང་དུ་འཐུས་ནས་བླ་མ་འབྱོན་པའི་མདུན་དུ་མེ་ཏོག་གཏོར། ཕྱག་གུས་པར་བྱས་པས་ཁྱེད་རྣམས་ནི་ག་ནས་ཡིན་ནམ་མི་མཐོང་བ་ཅན་འགའ་འདུག་གསུངས་ནས་མཉེས་ཅེས་སྣང༌། བླ་ཆེན་ལ་མཁན་པོ་ཞུས་པས་ངས་བསྙེན་པར་རྫོགས་ནས་ལོ་ལྔ་ལས་མ་ལོན་པས་མི་བཏུབ་གསུངས། སྨར་གཡོ་གཙང་གསུམ་གྱིས་ངེད་རྒས་པས་མཁན་བུ་མི་འཁྱོངས་དམིགས་བསལ་ལ་གང་ཟག་ཁྱད་པར་ཅན་གྱིས་བཏུབ་པས་ཁྱོད་ཀྱིས་གྱིས་གསུངས་སྟེ་བླ་ཆེན་གྱིས་མཁན་པོ་མཛད་དེ་སྟན་ཐོག་གཅིག་དུ་ཚིགས་གསུམ་རིམ་ནོད་དུ་སྒྲུབ་པ་ཆིག་རྫོགས་སུ་བསྙེན་པར་རྫོགས། བྱིན་པོ་ཚོ་ཡར་འོངས། ཀླུ་མེས་ཀྱིས་གྲུམ་ལ་འདུལ་བ་ཉན་ཞིང་བསྡད་ཏོ། །དེའི་དུས་རག་ཤིའི་གཅུང་དང་རྦའི་གཅུང་ཕུ་བོ་བསུར་འོངས་པ་དང་ཀློང་ཐང་དུ་མཇལ་བས་གཅུང་གཉིས་དད་དེ་ལོས་མཁན་པོ་བྱས་ཕུ་བོ་གཉིས་ཀྱི་སློབ་དཔོན་བྱས་སྟེ་རབ་ཏུ་བྱུང་བས་དེ་ཕྱིན་རྦ་རག་གཉིས་གཅིག་དུ་སྡེབ་བོ། །དེ་ནས་ལོ་སྟོན་ན་རེ་ཁྱེད་རྣམས་འདིར་བཞུགས། (ཉ༦ན)

[Full Size]

ངས་ཚོང་པ་དང་འགྲོགས་སྟེ་དབུས་གཙང་དུ་ཕྱིན་ལ་བསྟན་པ་དར་བར་ནུས་ན་བསྡད་ཀྱི་ཁྱེད་རྣམས་ཡང་བྱོན། མི་ནུས་ན་ལོག་ལ་འོང་གསུངས་ནས་འདན་མའི་ཚོང་པ་དང་འགྲོགས་སྟེ་བྱོན་པས་ཚོང་པ་སྔར་སུམ་འཕྲང་ནས་ལྡོག་པ་ལ། ལོ་སྟོན་གྱིས་འདི་ནས་མ་ལྡོག་པར་གཙང་དུ་སོང་ཚོང་ལེགས་པར་འོང༌། མགུར་མོ་རབ་ཁ་ན་ལོ་ནད་གཙུག་ན་བྱ་བ་ཡོད། དེ་ལ་ཁྱོད་ཀྱི་བུ་རབ་ཏུ་བྱུང་ནས་དབུས་ན་ཡོད་གྱིས་ཅིག་བྱས་སྟེ་བཏང་བས་ཚོང་ལེགས་པར་བྱུང༌། དེ་ཕྱིན་མགུར་མོར་ཚོང་འདུས་ཆགས། ཕྱི་ལོ་ཀླུ་མེས་ཀྱིས་མཁན་པོ་ལ་ཁོ་བོ་དབུས་གཙང་དུ་འགྲོ་བས་མཆོད་གནས་ཅིག་ཞུ་བྱས་པས་བོན་པོའི་ཞྭ་འོབས་ཞུ་ཕོག་ནས་ས་སེར་བཏབ་པ་གསོལ་འཕྲོ་ཞིག་གནང་ནས་འདི་གོན་ལ་ང་རྗེས་སུ་དྲན་པར་གྱིས་གསུངས་སྟེ་གསོལ་ནས་ཕྱིས་དབུས་སུ་ཚད་པ་ཚབས་རྒྱབ་བལྟབ་སྟེ་གསོལ་བས་ཞྭ་སྣ་རིངས་སུ་གྲགས་པ་བྱུང་ལ་དབུས་གཙང་མི་བཅུ་ལས་མཆེད་པ་ཕལ་ཆེར་གྱི་ཞྭ་ཡིན། ཕྱིས་བཀའ་གདམས་ཀྱི་གཞུང་མན་ངག་པ་གཉིས་ལའང་འདི་ལས་གྱེས་པའི་ཞྭ་ཅུང་ཟད་མི་འདྲ་བ་རེ་ཡོད་ཅིང་དྭགས་པོ་སྒོམ་ཚུལ་གྱིས་འདིའི་རྒྱབ་བལྟབ་སྟེ་གསོལ་བས་སློབ་དཔོན་སྒོམ་ཚུལ་གྱི་ཞྭ་ཞེས་སྒོམ་ཞྭར་ཡང་གྲགས་སོ། །དེ་ནས་ཁོང་རྣམས་ཀྱིས་བསམ་ཡས་སུ་བྱོན་སྟེ་ཀླུ་མེས་ཀྱིས་ཀ་ཆུ་ཆེ་མཆེད་ཀྱིས་བུ་ཚལ་དང་དབུ་རྩེ། རག་ཤི་མཆེད་ཀྱིས་དགེ་རྒྱས། འབྲིང་གིས་ཟངས་ཁང་བཟུང༌། དེ་ནས་དབུས་པ་ལྔས་གནས་གཞི་སོ་སོ་རྩིག་པར་བྱས། ཀླུ་མེས་ཀྱི་དབུ་རུར་ལ་མོ་ཆག་དེའུ་བཏབ། མི་ཆོས་ཀྱི་ས་ཁུལ་དུ་བ་ལམ་གནས་བརྩིགས། ས་བྱ་ལ་མོར་འགྱེལ་བརྩིགས། ཕྱི་ལོ་གླན་རྡོག་རབ་ཏུ་ཕྱུང༌། དེའི་ཕྱི་ལོ་ཡེར་པ་བ་རང་བཏབ། གྲུ་མེར་སོགས་བཅོ་བརྒྱད་རབ་ཏུ་ཕྱུང༌། ཚོང་འདུས་གནས་བཞེངས། ཕྱིས་ཚེ་སྤོང་གི་སེ་ར་ཕུག་པར་བཞུགས་ནས་ཐང་དུ་བྱོན་པའི་ལམ་དུ་གྲོངས་སྟེ་ཀླུ་མེས་དང་གྲུ་མེར་གཉིས་ཀའི་གདུང་མཆོད་རྟེན་འོད་འབར་ན་མ་ཉམས་པར་(ཉ༦བ)

[Full Size]

བཞུགས། ཀླུ་མེས་ཀྱི་མཁན་བུ་ཞང་རྔོག་གླན་གྲུ་མེར་སྟེ་ཀ་བ་བཞི་ཡམ་ཤུད་སོགས་མང་དུ་བྱོན། དེ་ལ་ཞང་སྣ་ནམ་རྡོ་རྗེ་དབང་ཕྱུག་ནི་བྱམས་པའི་སྤྲུལ་པར་གྲགས། སྣ་ནམ་ཇོ་སྲས་དང་ཞང་ལྕམ་སྒྲོལ་མའི་སྲས་སུ་ཉམས་དགའ་མོར་འཁྲུངས། ལོ་བཅོ་བརྒྱད་པ་ལ་ར་བ་ཟླུམ་པོར་ཀླུ་མེས་ལས་རབ་ཏུ་བྱུང༌། དང་པོར་ར་ཆག་བཏབ། སོ་བདུན་པ་ཆུ་བྱི་ལ་རྒྱལ་ལུག་ལྷས་ཀྱི་ལྷ་ཁང་བཞེངས། རྒྱ་གར་དུ་བྱོན་རྡོ་རྗེ་གདན་པ་དང་མཇལ་ནས་འདུལ་བ་གསན་ཞིང་རྒྱ་གར་དུ་ཡང་འདུལ་བ་བཤད། གྱ་ལྔ་པ་ལྕགས་བྱི་ལ་གཤེགས། གདན་ས་གླན་ཚུལ་བྱང་གིས་བཟུང་སྟེ་པུ་ཏོ་བའི་མཁན་པོ་ཡིན། ཞང་ནས་མཁན་རབས་བཅུ་དྲུག་ལ་ལོ་ཉིས་བརྒྱ་ཉེར་བརྒྱད་འདས་པ་ན་ཧོར་དམག་གི་ཐོག་མ་དོར་ཏོག་གི་དམག་བྱུང་བས་རྒྱལ་ལྷ་ཁང་བསྲེགས། བཙུན་པ་སོ་སྟོན་སོགས་ལྔ་བརྒྱ་ཙམ་བཀྲོངས། སླར་དོར་ཏོག་གིས་གསེར་བྲེ་དངུལ་བྲེ་མང་པོ་རྒྱུར་སྦྱར་སྟེ་གསོས། འདི་ལས་མཆེད་པ་ཞང་སྐོར་ཞེས་གྲགས། རྔོག་བྱང་ཆུབ་འབྱུང་གནས་ཀྱིས་ཡེར་པ་བཟུང༌། གཡུ་སྒྲོ་ཁང་དམར། བཟད་ཀྱི་ལྡིང་པ། ཆུ་ཤུལ་ན་བོ། སྦུས་སྡེ་ལྷོ་གོང༌། ཡོལ་ཐང༌། ལབ་སོ། གྲལ་མ་ཐང༌། ཁ་རག་སོ་གཅིག་གཞུ་ཀུན་ར། ཚ་མིག་སོགས་བརྩིགས། རྔོག་གི་མཁན་བུ་ཞིག་གིས་ལྷོ་ནུབ་ཏུ་ལྷ་མདོ་བརྩིགས་པ་ལས་འབྲེ་ཆོ་ཞེས་མང་དུ་མཆེད། དེ་རྣམས་རྔོག་སྐོར་དུ་གྲགས། གླན་ཡེ་ཤེས་ཤེས་རབ་ཀྱིས་རྒྱ་སར་སྒང༌། བླག་མདའ། མཚལ་ཆུང་བཟུང་སྟེ་གླན་ཚོའོ། །ཐང་པོ་ཆེ་རྩིག་པ་ལ་ཁུའི་བནྡྷྱེ་མི་གསུམ་སོགས་ཕྱེད་དང་བརྒྱད་དུ་གྲགས་ཀྱང་གཙོ་བོར་གྲུ་མེར་ཚུལ་ཁྲིམས་འབྱུང་གནས་ཀྱིས་བཏབ་སྟེ་ཀླུ་མེས་ཉིད་ཀྱིས་ཀྱང་བཞུགས། འདི་ལས་མཆེད་པ་ལ་ཐང་སྐོར་དུ་གྲགས་ཤིང་གྲུ་མེར་གྱི་མཁན་བུ་ཁུ་སྟོན་བརྩོན་འགྲུས་གཡུང་དྲུང་གིས་བཟུང༌། དེ་ནས་ཁུ་འབྱུང་རྒྱན་ཁུ་ཤེར་བརྩོན་སོགས་ནས་ཁུ་རྒྱལ་ཚའི་བར་བྱོན། དེ་ནས་ཆག་ལོའི་སློབ་(ཉ༧ན)

[Full Size]

མ་བླ་བྲང་པ་གཞོན་ནུ་རྒྱལ་མཚན་ནས་བླ་བྲང་པ་དང༌། ལོ་པའི་སངས་རྒྱས་ཇོ་བོའི་སློབ་མ་གསེར་ཁང་པ་དང༌། ཁུ་མདོ་སྡེ་འབར་གྱི་ཆོས་བརྒྱུད་འཛིན་པ་ཁུ་པ་སྟེ་གསུམ་དུ་གྱེས་སོ། །ཡང་ཁུའི་བནྡྷྱེ་མི་གསུམ་གྱི་ཁུ་ཤུད་པུ་ཚ་གཞོན་ནུ་གྲགས་པས་ཁུ་ཚེས་ཀྱི་སོ་མཚམས་སུ་འཇུ་མ་བཞེངས། དེ་ནས་ཡུགས་ཀྱི་ཤུད་པུས་སྤྱན་དྲངས་སྟེ་བ་ཤི་བཏབ། རྒྱ་གར་གྱི་ཤིང་བ་ཤེ་རུ་ལས་བྱས་པའི་རྟེན་ཞིག་ཡོད་པའི་མིང་ཆགས་ནས་བ་ཤི་རུའི་ལྷ་ཁང་ཟེར། དེ་ནས་ཡར་སྟོད་དུ་བར་ཡུལ་བཞེངས་སོ། །ཡམ་ཤུད་རྒྱལ་བ་འོད་ཀྱིས་གཡུ་རྩེ་ལྷ་ཁང་ཁྲབ་ལ་ཁ་ཕུག་བོ་ཆེ་གད་པ་ཐོག་ལྕང་ཚགས་སོགས་བཟུང༌། དེའི་མཁན་བུ་མགར་སྲགས་གཉིས་གྲ་པ་མངོན་ཤེས་སོགས་ལས་སྨྱལ་པ་མགར་སྲགས་གཉིས་ཀྱི་བྱར་ཡུར་འོག་དང་རྩི་འོར་བཟུང་ནས་སྨྱལ་གྱི་ཀླུ་མས་རྣམས་བྱུང༌། གྲ་པ་མངོན་ཤེས་ནི་མངོན་པ་ལ་མཁས་པས་དེར་གྲགས། མཆིམས་རྡོ་རྗེ་སྤྲེ་ཆུང་གི་རྒྱུད་པ་ཡིན་ལ་བར་ཅིག་ནས་ཞང་དུ་འབོད། འཁྲུངས་ཡུལ་དག་ས་པོ་ལ་མཚན་དབང་ཕྱུག་འབར་དུ་དོད་པ་དང༌། འཁྲུངས་ཡུལ་གྲ་མཚན་ཤེས་རབ་རྒྱལ་བར་འདོད་པ་གཉིས་སྣང༌། ཁུ་བོ་ལས་ཞང་བློན་གྱི་སྒྲུབ་ལུང་བླངས་པ་ཙམ་གྱིས་ཞལ་མཐོང་སྟེ་ནུས་མཐུ་ཆེ་མཁས་པ་ཆེན་པོར་གྱུར་སྟེ་དམ་པ་རྒྱ་གར་ལས་ཞི་བྱེད་སྒྲོན་མ་དགུ་དང་ཁ་ཚ་ཟླ་མགོན་ལས་སྦྱོར་དྲུག་གསན་སྟེ་མཁྱེན་རྟོགས་འཛོམ། ལྷ་བུག་པ་ཅན་པ་ལ་བདེ་མཆོག་གི་དབང་བསྐུར་བས་ལོ་དུས་སུ་བུ་བྱུང་བས་འབུལ་བ་ཆེར་བྱས་ཤིང་སྐུ་བསོད་རྒྱས་སྟེ་གཡེ་ཡར་ལུངས་སོགས་སུ་གནས་གཞི་མང་དུ་མཛད། སྤྱན་ཡས་དང་གྲ་སྐྱིད་རུ་བཏབ། བཙུན་མོ་དཔལ་གྱི་ངང་ཚུལ་མའི་ལྷ་ཁང་རོང་སྐམ་གསོས་སྟེ་སྡེ་བཙུགས། སྐྱིད་རུ་ནས་མཁན་བུ་བཞིའི་ཤ་སྟོན་གྱིས་གནས་སྒོར། རྔན་ཆུང་སྟོན་པས་སྒ་འདྲ། ལྷབ་ཀྱིས་བསོ་ཐང་བནྡྷྱེ་བྱང་སེམས་ཀྱིས་རི་ཕུག་བཏབ། (ཉ༧བ)

[Full Size]

རྣ་ཤུད་ཀྱི་སོ་མཚམས་སུ་གནོད་སྦྱིན་གྱིས་ལུང་བསྟན་སྟེ་གྲ་ཐང་བརྩིགས། སྤྱིར་ལྷ་ཁང་བརྒྱ་རྩ་བརྩིགས་པར་གྲགས། དགུང་ལོ་དོན་དགུ་ལ་མཁན་བུ་ཅིག་གིས་སྙིང་ཐུར་བརྒྱབ་པ་ཐལ་ནས་གཤེགས། དབོན་པོ་འབྱུང་ཤེད་དང་འབྱུང་ཚུལ་གྱིས་ལྷག་རྣམས་བསྒྲུབས། གྲ་པའི་གདན་ས་དོན་སྟངས་པ་ཆོས་སྐྱབས་ཀྱིས་མཛད་དེ་ཁོང་རོག་དམར་ཞུར་བའི་སློབ་མ་ཡིན། སྤྱིར་འཇུག་པ་སེམས་སྐྱེད་ལ་བཀའ་དོག་ཡང་ཁོང་གི་རྨི་ལམ་ན་དགའ་ལྡན་དུ་བྱམས་པ་དང་མཇལ་ཙམ་པའི་མེ་ཏོག་སྙིམ་པ་གང་གཏོར་བས་དབུ་ཐོག་དུ་མེ་ཏོག་གི་ཁང་བརྩེགས་སུ་གྱུར། བྱམས་པའི་ཞལ་ནས་ཁྱོད་ཀྱིས་མི་ཡུལ་དུ་འགྲོ་བ་མཆོག་དམན་ཐམས་ཅད་ལ་འཇུག་པ་སེམས་སྐྱེད་མ་བྱིན་ན་ངའི་བཀའ་ལས་འགལ་ལོ་གསུང་བ་ཐོས་ནས་ཡངས་པར་མཛད་པ་ལ་རོག་གིས་བཀྱོན་པས་བདག་ལ་འདི་མི་བྱར་མ་བཏུབ་པ་ཡིན་ཞེས་ལུང་བསྟན་ཞུས་པས་འོ་ན་ཁྱོད་ཀྱི་དེ་ང་ལ་ཡང་གྱིས་དང་གསུངས་ནས་གསན་སེམས་སྐྱེད་རྨི་ལམ་མ་ཞེས་པ་དེ་ཡིན་ནོ། །སྤྱིར་ཐང་པོ་ཆེ་ལག་བཅས་ལ་མཚན་ཉིད་ཀྱི་སྡེ་ཟེར། ཕུག་པོ་ཆེ་གྲ་ཐང་སོགས་ལ་སྔགས་སྡེ་ཟེར། གྲ་པས་དབུ་ར་གོང་མ་བཟུང༌། ཁུ་སྟོན་བརྩོན་འགྲུས་གཡུང་དྲུང་སྦར་གྲ་པའི་སློབ་མ་ཡིན་ནའང་ཕྱིས་ཕྲག་དོག་གིས་མཐུ་རྒྱས་བྱས། གྲ་པས་རོག་པ་རྩའི་གཅེས་ཕྱུག་མི་བཞི་རབ་ཏུ་ཕྱུང་ནས་བྱེ་མ་ལྷ་ཁང་གི་འཁྲིས་སུ་མ་བཀོད་ལྷ་ཁང་བཏབ། ཉེ་གནས་རྒ་བྲན་ནག་པོས་ཁུ་སྟོན་ཟུར་ཕུད་ཀྱི་ཀླུ་ལ་གཏད་ཚེ་སྔགས་མཚན་ཉིད་ཀྱི་རྩོད་པ་བྱུང༌། དེ་སྡུམ་ཚེ་མ་བཀོད་མདའ་རྒྱང་དུ་བསྣུར་བྱ་བ་སོགས་བྱུང་བས་བསྣུར་སྟེ་བྱེ་ལུང་བཏབ་ནས་རྩོད་པ་ཞི་སྐད། དེ་ལྟར་ཀླུ་མེས་ལ་ཞང་སྐོར་རྔོག་སྐོར་གླན་སྐོར་ཐང་སྐོར་ལ་སྔགས་མཚན་ཉིད་གཉིས་སྟེ་བཞིའམ་ལྔའོ། །སུམ་པས་འབྲོ་ས་ཐང་དུ་དམེ་རུ་བརྩིགས་སྟེ་སྡེ་མ་འཕེལ། སྤྱིར་ཀླུ་སུམ་གཉིས་གཅིག་དུ་སྡེབས་ནས་གདུང་གཉིས་ཟེར་ལ། དེའི་ཚེ་སྔར་གྱི་ཀ་བ་བཞི། ཀླུ་གསུམ་(ཉ༨ན)

[Full Size]

གྱི་མཁན་བུ་གླན་ཡེ་བྱང༌། ཚལ་ཆུང་གི་གཉོས་ཚུལ་རྒྱལ། འཕངས་དབང་རྒྱན། གཟི་རླུང་གཉིས། ཀླུ་མེས་ཀྱི་གཅུང་དགེ་ངོམ་འདིས་མོན་མཁར་འགན་བཞེངས། མཁན་བུ་མིན་ཡང་མི་ཆེ་བས་གྲངས་སུ་བགྲངས་པ་བྷེ་སྟོན་རྡོ་རྗེ་ཤེས་རབ་འདིས་གཞུང་སྒྲེ་མཁར་བཏབ། དེ་ལ་སོགས་པ་ནི་ཕྱམ་སོ་གཉིས། དེ་བས་ཆུང་བ་ལ་གྲལ་མ་དཔག་དུ་མེད་པ་ཅེས་གྲགས་ཤིང༌། རྒྱལ་དཀོར་ནོར། གཞུ་ཀུན་ར་བཟའ་མི། ཐང་པོ་ཆེ་དགེ་བཤེས། གྲ་ཐང་ལྷ་ཁང་གིས་ཁྱད་པར་འཕགས་པས་ཁྱད་འཕགས་ཀྱི་སྡེ་བཞིར་གྲགས་སོ། །རྦས་ཡུངས་འགུར་བརྩིགས། ལན་པའི་ལྕིལ་བུ་བཟུང༌། མཁན་བུ་མལ་སེམས་དཔའ་ཤེས་རབ་ཀྱིས་སྟོད་ལུངས་ཆ་ཐོག་བརྩིགས། ཐག་མ་ལྷ་ཁང་དང་མོན་གྲ་བཟུང༌། རྦའི་གཅུང་གིས་གྱེ་རེའི་མདའ་གྲོང་བརྩིགས། གཞོའི་འཆད་ཁ་བཟུང་སྟེ་དེ་རྣམས་རྦ་ཚོར་གྲགས། རག་ཤིས་ཕྲང་འོག་གི་ལྷ་ཁང་བརྩིགས། ཀ་ཚལ་དང་ཞྭ་བཟུང༌། གཅུང་པོས་དགེ་རྒྱས་བཟུང་དེའི་མཁན་བུ་མཐའ་བཞི་རྒྱལ་འཕགས་ཡིན། དེའི་མཁན་བུ་ཞང་ཤེས་རབ་འཕགས་ཀྱིས་ལན་པ་རྟ་བྲེས་བརྩིགས་སྟེ་དེ་རྣམས་ལ་རག་ཚོ་དང་རག་ཤིའི་གཅུང་ཚོ་ཟེར་རོ། །

[Full Size]

འབྲིང་གིས་ངན་ལམ་སྤྱི་མོ་བརྩིགས་པ་ལས་འབྲིང་ཚོ་སྟོད་པ་མཆེད། དེ་ནས་དཀར་ཆུ་དང་སྙེ་ཐང་བྲག་སྣ་བཟུང༌། དེའི་ལམ་སྟེགས་སུ་བྲང་ར་མོ་ཆེ་བརྩིགས། དེ་ལས་འབྲིང་ཚོ་སྨད་པ་མཆེད། ཀླུ་གོང་ནས་འབྲིང་ཚོ་བར་པ་བྱུང་སྟེ་དེ་རྣམས་ལ་འབྲིང་སྡེ་ཟེར་སྟེ་དབུས་པ་ལྔ་ལས་ཇི་ལྟར་གྱེས་པའོ། །གཙང་དུ་ལོ་སྟོན་ལ་མཁན་བུ་ཉི་ཤུ་རྩ་བཞི་ཞེས་གྲགས་ཀྱང་སྡེ་ཟིན་པ་ལ། རྒྱ་ཤཱཀྱ་གཞོན་ནུས་ལ་སྟོད་མར་ལ་ཐང་བརྩིགས། དེ་ལས་འབྲིང་མཚམས་ཀྱི་བུལ་ཏོག་ལྷ་ཁང་སོགས་གྱེས། སྐྱོ་ཤེས་རབ་རྡོ་རྗེས་དོན་མོ་རི་བརྩིགས། སྟག་ལོ་གཞོན་བརྩོན་གྱིས་སྟག་ལོ་ལྷ་ཁང་བརྩིགས། ཨ་མེས་ཞུ་གཅིག་གིས་མས་ཕྲེང་དང་བྲག་(ཉ༨བ)

[Full Size]

དམར་བཟུང༌། འདར་ཤཱཀྱ་ཡོན་ཏན་གྱིས་གཟུས་པོ་བཟུང༌། ལི་བློ་གྲོས་གཞོན་ནུས་ཇོ་མོ་བརྩིགས། གླག་བྱང་ཆུབ་རྒྱལ་མཚན་གྱིས་ཆུ་མིག་བརྩིགས། དེ་རྣམས་མཆེད་པ་ལ་རྒྱ་མཚོ་ནས་གླག་ཚོའི་བར་སོ་སོར་གྲགས་ཤིང་འགའ་ཤེས་རབ་བླ་མས་བསྙེམས་བརྩིགས། རྔོག་ཡེ་ཤེས་འབྱུང་གནས་ཀྱིས་སྤང་དཀར་ལྷ་ལུང་བརྩིགས་ཀྱང་དེ་གཉིས་ཀ་གླག་ཚོར་ཐིམ། གླང་བཙུན་བྱམས་པས་འོམ་ཕུག་བརྩིགས། དེ་ནས་གཙང་འགྲམ་བཟུང་སྟེ་བུམ་ཐང༌། ཆག་ས། ཀྲི་གོང༌། མགོས་སྟོན། ཁྲོལ་མ་སོགས་གླང་ཚོ་སྟོད་སྨད་དུ་གྱེས། མགོ་བ་ཡེ་ཤེས་གཡུང་དྲུང་གིས་སྦྲེ་ལྷ་ཁང་བཟུང༌། དེའི་མཁན་བུ་ལྕེ་བཙུན་ཤེས་འབྱུང་གིས་ཞ་ལུའི་མ་བརྩིགས་སྟེ་རྒྱ་གར་དུ་ཕྱིན། སྡོམ་པ་བསྐྱར་ནས་བླངས། པཎྜི་ཏ་གཅིག་གི་གསོལ་ཞལ་ལ་མཆོད་ཡུལ་གྱི་གཙོ་བོར་བྱེད། ཕོར་པ་ལ་ཞལ་བུར་ཡུལ་དེ་ན་གྲགས་པས་གཙུག་ལག་ཁང་གི་མིང་ཞ་ལུར་ཆགས། སློབ་མ་ཀ་བཞི་གདུང་དྲུག་དུ་གྲགས་པ་བྱུང་སྟེ་ཞ་ལུ་བརྒྱ་སྐོར་མཆེད། ཀྱི་ཡེ་ཤེས་དབང་པོས་ཤངས་མཁར་ལུང་དང་གྱེ་རེ་གླང་ར་དེའི་ལས་སྟེགས་སུ་མུ་ཤངས་ཀྱི་རོ་སྐམ་བརྩིགས། འདི་ནས་ཀྱི་ཚོ་སྟོད་སྨད་པར་གསུམ་དུ་གྱེས་སྟེ་གླང་ར་ནས་མཆེད་པ་ལ་གླང་སྐོར་དང་ཉུག་གི་ཨུ་ལུང་ནས་གྱེས་པ་ཨུ་ཚོ་ཟེར་སྟེ་བསྡོམས་ནས་ཀྱི་ཚོ་སྨད་པར་གྲགས། ཀྱིའི་སློབ་མ་ཨ་མེ་དེའི་མཁན་བུ་རྣམས་ལས་སྤང་གིས་འཁྲིས་དང་ཞང་ཚུལ་འཕགས་ཀྱིས་བྱ་རྒྱུས་བཟུང༌། ཀོང་ཕོ་ཐར་པ་རིན་ཆེན་ལ་མཁན་བུ་བཞིའི་གཟུ་སྟོན་འཕན་གྲགས་ཀྱིས་སྒྲེའི་ལྕེ་མཚམས་དང་རྒྱན་མཁར་སྟག་ལུང་བཟུང༌། དེ་ལས་མཆེད་པ་གཟུ་ཚོར་གྲགས། ལྕེ་བཙུན་དཀར་པོས་ཨང་ཡིག་དང༌། གཡུང་སྟོན་ཛ་ཀ་རིས་བ་འོར་བཟུང་ཡང་མཆེད་པ་མེད། ཤབ་རྩེས་ཤབ་རྩེ་ལྷ་ཁང་བརྩིགས་སྟེ་དེ་རྣམས་ལ་ཀོང་ཚོ་ཟེར་ཞིང་སྤྱིར་དེ་ཐམས་ཅད་ལ་ཀྱི་ཚོ་བར་པར་གྲགས། ཡང་ཨ་མེས་ཀྱིས་ལ་བྲིས་ཀྱི་ཁ་ཆད་ནས་སད་ཀྱི་ལ་སྟེང་བཟུང༌། (ཉ༩ན)

[Full Size]

དེར་སྟོད་ཀྱི་མཁན་བུ་རྣམས་བཞི་བྱུང་བའི་ཁྲི་སྟོན་བརྩོན་འབར་གྱིས་ཤོང་སྣར་བཟུང༌། ས་རྦད་བཙུན་ཆུང་གིས་བྲང་ཆུང་བཟུང༌། རྒྱ་སྟོན་ཨཱརྻ་དེ་ཝས་སྤོ་རུ་སྣ་བཟུང༌། འདར་ཤཱཀྱ་གཞོན་ནུས་སར་ཕུག་བཟུང་སྟེ། ཁྲི་ཚོ། བྲ་ཚོ། རྒྱ་ཚོ། སར་ཚོ་ཞེས་ཁྲལ་ཚོ་བཞི་བྱུང་བ་ལ་ཀྱི་ཚོ་སྟོད་པར་གྲགས། དེ་ལས་གྱེས་པ་གཞོན་ནུ་འབྱུང་གནས་ཀྱིས་རྒྱན་མཁར་ཐུར་ལ་བཟུང་བས་ཐུར་ཚོ་དང་ཀྱི་བཙུན་དཔལ་ཡེས་འབྲུང་ཀུན་ར་བཟུང་ངོ༌། །ཚོང་ཚོའི་སྡེ་ནི་ཚོང་བཙུན་ཤེས་རབ་སེང་གེས་སྡོ་གླིང་བཟུང༌། དེའི་མཁན་བུ་ལས་ཁྲལ་ཚོང་གུར་གྱེས་སྟེ་ཚོང་ཚོ་སྟོད་པ་ལ་སྐལ་སྒོར་དང་རྒྱན་སྐོར་གཉིས། བར་པ་ལ་གནས་སར་དང་གནས་རྙིང་གཉིས་སྟེ་བཞི་བྱུང༌། སྨད་པ་ལ་རྦ་ཚོ། ཉན་ཚོ་སྐོར། བྱ་ཆོས་སྐོར། སྨོན་གྲོ་སྐོར། དྭོ་ཚོ་སྟེ་ཁྲལ་ཚོ་ལྔ་ཡོད། དེ་ཡང་ཨ་མེས་ཚོང་བཙུན་གྱིས་རྩིས་ཀྱི་ཡང་དབེན་བཟུང༌། དེ་ལ་རྩིས་ལྷ་ཁང་ཉན་ཚོ་སྟག་ཚལ་གྱི་བྱ་ཆོས་མཁར་པོ་ཆེ་སྨོན་གྲོ་གསེར་གྱི་སྒོང་ཐོག་རྣམས་ཕུལ་ནས་བཟུང༌། རང་གི་མཁན་བུ་ལ་སོ་སོར་གཏད་པས་ཚོ་ལྔ་བྱུང་སྟེ་དེ་ལ་རྩིས་ལྷ་ཁང་རྦ་ཡོན་ཏན་བློ་གྲོས་ལ་གཏད་དེ་བསྐྱངས་པས་རྦ་ཚོར་གྲགས། རྦའི་མཁན་བུ་ཡོལ་ཆོས་དབང་གིས་སྐྱེགས་གནས་རྙིང་བཟུང་ནས་རྦ་ཚོ་སྟོད་པ་མཆེད། ཡོལ་ཐོག་འབེབས་ཀྱིས་ལྕང་ར་དང་སྟག་པ་ཇོ་བཙུན་གྱིས་ཅེ་ཏེ་བཟུང་ནས་རྦ་ཚོ་བར་པར་གྲགས། རྩིས་ནས་རྦ་ཚོ་སྨད་པ་མཆེད་ཏོ། །ཉན་ཚོ་རྭ་བློ་གྲོས་བཟང་པོ་དང་ཁམས་པ་ལ་གཏད། རྭས་ངུར་མིག་བཟུང་བས་རྭ་ཚོ་བྱུང༌། ཁམས་པས་ལྕགས་མཁར་བཟུང་བས་ཁམས་ཚོ་ཟེར་སྟེ་དེ་གཉིས་ཉན་ཚོར་སྐོར་རོ། །བྱ་ཆོས་མཁར་པོ་ཆེ་རྒྱ་ཚུལ་སེང་ལ་གཏད་དེས་ཀོང་པོ་ཡེ་འབྱུང་ལ་གཏད་དེས་ད་མུའི་གནས་མོ་ཆེ་དང་མཉམ་དུ་བསྐྱངས་པས་བྱ་ཆོས་སྐོར་རོ། །སྨོན་གྲོ་མར་པ་རྡོ་རྗེ་ཡེ་ཤེས་ལ་གཏད། དེས་མཁན་བུ་སྣེ་པོ་གྲགས་པ་རྒྱལ་མཚན་གཏད་ནས་སླར་དོང་མཁར་ཕུག་བཟུང༌། ཕྱིས་སྟག་ཚལ་དཀྱུས་ཐང་བཞེངས་ནས་ཨ་མེས་ལ་ཕུལ། མར་པས་(ཉ༩བ)

[Full Size]

བྲན་མ་སྒང་བརྩིགས། དེ་གསུམ་དང་ལན་འགྲོ་བའི་སྟག་ཚང་དང་བཞི་ལ་སྨོན་གྲོའི་མ་དང་མཉམ་པའི་བུ་བཞིར་གྲགས་སྟེ་སྨོན་གྲོ་སྐོར་རོ། །གསེར་གྱི་སྤོང་ཐོག་ཞང་ཚོར་ཁྲོད་པ་ལ་གཏད། དེས་སེར་གྱི་བྲག་ཤོད་བརྩིགས། བཙན་པོ་སྡིངས། རྩིས་ཀྱི་ཡང་དབེན་ར་སོག་མཚར་ལ། སྟག་ཚལ་མཁར་པོ་ཆེ་བཟུང་ནས་མཁན་བུ་རྦ་དགེ་མཐོང་ལ་གཏད། དེས་རོང་བ་དོ་བཟུང་ནས། མཁན་བུ་འབྲེ་བཙུན་སྔོན་མོ་ལ་གཏད། དེ་རྣམས་ལ་དྭོ་ཚོ་ཟེར་སྟེ་ཁྲལ་ཚོ་འདུས་ནས་འདུན་མ་བྱེད་པ་ན་དེ་དག་གི་བཙུན་ཆུང་གསུམ་བྱུང་བ་ལ་དཔོན་པོ་གར་སོང་དྲིས་པས་འདས་ཟེར་བས་འོ་ན་དྭོ་ཕྲུག་དུ་འདུག་པ་ཅེས་བྱས་སྟེ་དེར་ཆགས་སྐད། དེ་ལྟར་དབུས་གཙང་གི་མི་བཅུས་ཕྱིན་ཀྱང་དབུས་ནས་སུམ་པ་དང་གཙང་ནས་འོད་བརྒྱད་དཔུན་ཨུ་དཀར་སྟེ་བཞི་ལ་མཆེད་པ་མེད་པས་དབུས་གཙང་མི་དྲུག་དུ་གྲགས་ཤིང་དེའི་ཡང་རྦ་རག་གཅིག་དུ་བསྡེབས་ནས་མི་ལྔར་ཡང་གྲགས་སོ། །དབུས་གཙང་མི་བཅུ་ལ་མི་ཐེ་བ་འ་འབྲེའི་སྡེ་གཉིས་བྱུང་སྟེ་འ་ཞ་མགོ་བོ་ཆེའི་བུ་འ་ཡེ་ཤེས་གཡུང་དྲུང་གིས་ཁམས་སུ་སྡོམ་པ་ལེན་དུ་འགྲོ་བའི་ལམ་ལྷ་སར་ཕྱིན་པས་སྟེང་ཁང་དུ་འགྲོ་བའི་སྐས་ཀྱི་ཟུར་ལོགས་ལ་མགོན་པོའི་སྐུ་རི་མོར་ཡོད་པ་ཡར་རེས་རི་མོར་འདུག་པ་ལས་མར་འོངས་ཙ་ན་མགོན་པོ་དངོས་ཐོད་པའི་ནང་ན་མིའི་སྙིང་དང་ཁྲག་བསྲེས་པ་མི་རྩིབ་ཀྱི་ཐུར་མས་གསོལ་ཞིང་འདུག་སྟེ་ངས་ཁྱོད་ཀྱི་ཆོས་སྐྱོང་བྱ་ཡི་ཟླ་བ་གཅིག་ལ་འཁོར་བར་ཤོག་ཟེར་སྟེ་འ་ཚོ་མཐུ་ཆེ་བའི་རྒྱུ་མཚན་ཡང་དེ་ཡིན། དེར་ཁམས་སུ་བླ་ཆེན་གྱི་མཁན་བུ་ཀྲེ་པོ་མཆོག་བླ་ལ་བཀའ་དྲིན་ཞུས་པས་ངས་ཆུ་གཏོར་བཏང་ལ་འོང་གི་གསུང་ཙ་ན་དེ་ཁར་འདས། མཁན་པོའི་གསུང་དེ་ཀ་ལ་སྡོམ་པ་ཐོབ་པར་བཟུང་བས་དགེ་ཚུལ་ཆུ་གཏེར་མ་ཞེས་པ་བྱུང༌། འ་ཞ་དེས་སྣ་ནམ་འདྲེ་བརྔས་དང་འུ་ཡུག་མདའི་ར་ཤག་དང་དེའི་ལམ་སྟེགས་སྟག་གི་གནས་པོ་ཆེ་བཟུང༌། དེའི་མཁན་བུ་ཤེ་འུ་སྣ་ནམ་པས་ལྷན་གྱི་བ་སོ་ཐང༌། འཁོར་རེ་(ཉ༡༠ན)

[Full Size]

སྐྱི་སྒང༌། ཉང་རོ་བུད་མདོ། འཁོར་རེ་བ་ཁོར་ལྡན་གྱི་དྲེ་ཤོད་རྣམས་བཟུང༌། དེའི་མཁན་བུ་སོག་ཚུལ་ཁྲིམས་བླ་མས་ཀྱང་བ་སོ་ཐང་བཟུང༌། དེའི་མཁན་བུ་སྤང་འདུལ་འཛིན་གྱིས་སྟག་གི་སྤེན་ཅན་བཟུང༌། དེའི་མཁན་བུ་སྣུབས་རིན་ཆེན་གྲགས་ཀྱིས་ཁུ་ལུང་ལྷ་གྲལ་དང་འུ་ཡུག་གསལ་སྒང་སོགས་བཟུང་སྟེ་འ་ཚོའི་སྐོར་རོ། །ཡང་འབྲེ་གཞོན་ཚུལ་གྱིས་ཁམས་སུ་ཕྱིན་ཁྲི་ཁ་མཁར་སྣར་བླ་ཆེན་གྱི་མཁན་བུ་ཡ་ཟི་བོན་སྟོན་ལ་བཀའ་དྲིན་ཞུས་པས་དེར་བས་གསུངས་སྟེ་དེ་ཀར་འདས། དེ་ལ་སྡོམ་པ་ཐོབ་པར་བྱས་པས་དེར་བས་ཀྱི་བསྙེན་རྫོགས་སུ་གྲགས་དེ་ཕྱིར་ལོག་ནས་རྟ་ནག་ཕུའི་བྱ་ཚང་དང་ཤངས་ཀྱི་བྱེ་ཕུག་བཟུང༌། དེ་ནས་འཇད་ཀྱི་གནས་བརྒྱད་མཆེད་དེ་དེ་རྣམས་འབྲེ་ཚོ་ཡིན་ནོ། །དེ་ལྟར་དབུས་གཙང་གི་མི་དྲུག་འ་འབྲེ་དང་བཅས་པ་ལས་གྱེས་པ་ནི་སྨད་འདུལ་དུ་གྲགས་པ་ཡིན་ལ། སྡོམ་རྒྱུན་ནི། སྟོན་པ། ཤཱ་རིའི་བུ། དགྲ་གཅན་ཟིན། ཀླུ་སྒྲུབ། ལེགས་ལྡན་བྱེད། དཔལ་སྦས། ཡེ་ཤེས་སྙིང་པོ། བོ་དྷི་ས་ཏྭ་རྣམས་ཡིན། དེ་ཕྱིན་ལ་འདོད་ལུགས་དུ་མ་སྣང་སྟེ་མཁན་པོ་ཞི་བ་འཚོ། རྦ་རཏྣ། ལི་སངས་རྒྱས་ཡེ་ཤེས། ཀ་བ་འོད་མཆོག་གྲགས། དེས་གཡོ་སྨར་གཙང་གསུམ་ཞེས་འདོད་པ་དང༌། ཁ་ཅིག་ཞི་བ་འཚོའི་མཁན་བུ་ཀ་མ་ལ་ཤཱི་ལ། དེས་གཡོ་དགེ་འབྱུང་ཞེས་འཆད་པ་དང༌། རྦ་རཏྣ་མཁན་བུ་སྨར་གཡོ་གཙང་གསུམ་ཡིན་པར་འཆད་པ་ཡང་སྣང་ལ། ཁ་ཅིག་ཇི་ན་མི་ཏྲའི་མཁན་བརྒྱུད་དུ་འདོད་ཀྱང་བོ་དྷིས་ཏྭ་བོད་ཀྱི་གདུལ་སྐལ་ཡིན་པའི་རྟེན་འབྲེལ་ལས་དེའི་སྡོམ་རྒྱུན་དུ་གོར་མ་ཆག་གོ །ལྷ་ལུང་རབ་འབྱོར་དབྱངས་ལ་བླ་ཆེན་གྱིས་ཐུག་ཟེར་བའང་དག་པར་མ་མཐོང་ངོ༌། །བསྟན་པ་སྔ་ཕྱིའི་བར་དུ་དབུས་གཙང་དུ་བསྟན་པ་མེད་པ་ཐང་སྡེའི་ལུགས་ལ་ལྔ་བཅུ་རྩ་གསུམ། བུ་ལུགས་ལ་བདུན་བཅུ། འབྲོམ་ལུགས་པ་ལོ་དོན་བརྒྱད་སོང་བར་འདོད་ཏོ། །སྟོད་འདུལ་ནི་མངའ་རིས་སྟོད་ཏུ་མངའ་བདག་སྲོང་དེ་བསྟན་པ་ལ་ཆེར་དད་(ཉ༡༠བ)

[Full Size]

ཀྱང་མཁན་སློབ་མ་རྙེད་པས་ཡབ་སྲས་གསུམ་དཀོན་མཆོག་གི་དྲུང་དུ་རང་གིས་རྟགས་བླངས་སྟེ་ཁོང་རང་གི་མཚན་ཡེ་ཤེས་འོད་དུ་བསྒྱུར། པཎྜི་ཏ་དྷརྨ་པཱ་ལ་སྤྱན་དྲངས་སྟེ་སཱ་དྷུ་པཱ་ལ་གུ་ཎ་པཱ་ལ་པྲཛྙ་པཱ་ལ་སྟེ་པཱ་ལ་གསུམ་སོགས་མང་དུ་བསྙེན་པར་རྫོགས། པྲཛྙ་པཱ་ལའི་མཁན་བུ་ཞང་ཞུང་རྒྱལ་བའི་ཤེས་རབ། འདིས་པཎྜི་ཏ་མང་དུ་བསྟེན་ཞིང་མཁན་པོ་དང་བལ་པོའི་འདུལ་འཛིན་པྲེ་ཏ་ཀ་ལས་འདུལ་བའི་ལག་ལེན་ཐམས་ཅད་སྦྱངས། ཁ་ཆེ་ཛྙ་ན་ཤྲི་ལས་སོ་ཐར་མདོའི་འགྲེལ་པ་འདུལ་བ་བསྡུས་པ་མཉན་སྟེ་འགྱུར་བཅོས། ཁ་ཆེ་ཤྲཱི་སུ་བྷཱུ་ཏི་ཤཱནྟ་ལ་སུམ་བརྒྱ་པ་རྩ་འགྲེལ་མཉན་སྟེ་དགེ་བློ་དང་གཉིས་ཀྱིས་དག་པར་བཅོས་ནས་ལྷ་བྱང་ཆུབ་འོད་ལ་བཤད། འགྲེལ་པ་སློབ་ཕན་ཡང་བསྒྱུར། ས་མནྟ་ཤྲཱི་ཛཱ་ན་ལ་ཀཱ་རི་ཀ་ལྔ་བཅུ་པ་ཞུས་ནས་རྒྱ་གར་ཁ་ཆེ་བལ་པོ་སྟེ་དཔེ་གསུམ་དང་གཏུགས་ནས་བཅོས་ཤིང་བཤད། དགེ་ཚུལ་གྱི་ལོ་དྲི་དྷརྨ་པཱ་ལའི་རྒྱ་དཔེ་ལས་ཁ་ཆེ་ན་ར་ཡ་དེ་ཝ་ལ་ཞུས་ནས་བསྒྱུར་ཞིང་བཤད། དགེ་སློང་གི་ལོ་དྲི་ཇོ་བོ་རྗེ་དང་ནག་ཚོའི་འགྱུར་ལས་གསན། ཞང་ཞུང་པའི་སློབ་མ་ལོ་ཙཱ་བ་དཔལ་འབྱོར། འདིས་བལ་པོ་ཛ་ཡ་ཀ་ར་ལས་དགེ་སློང་གི་ཀཱ་རི་ཀ་དང་ཁ་ཆེ་པ་ར་ཧེ་ཏ་དང་མ་ཧཱ་ཛི་ན་ལས་དགེ་ཚུལ་གྱི་བསླབ་པའི་གཞི་མདོ་གསན། དེ་ལྟར་ན་དྷརྨ་པཱ་ལ་དང་པྲེ་ཏ་ཀ་ལག་ལེན་གྱི་རྒྱུད་པ་དང་གཞན་རྣམས་བཤད་པའི་རྒྱུད་པ་སྟེ་འདུལ་བའི་བཤད་སྒྲུབ་ཀྱི་བརྒྱུད་པ་གཉིས་ལྡན་ཡིན་ཞེས་ཞིང་མོ་ཆེ་པ་བྱང་ཆུབ་སེང་གེས་བྲིས་པའི་ཚིགས་བཅད་ལྷུག་པར་བཀྲོལ་བ་ཡིན་ལ་སྡོམ་རྒྱུན་ནི། དགྲ་གཅན་ཟིན། ཟག་ཟད་སྡེ། ཆོས་ཀྱི་སྡེ། དྷརྨ་པཱ་ལ། ཞེས་འདོད་པར་སྣང་ལ་སྟོད་འདུལ་འདི་ཤིན་དུ་དག་པར་གྲགས་ཀྱང༌། མཁན་རྒྱུད་འདི་ལ་བར་ནས་ཁ་ཡར་ཆད་པ་ཅིག་ཡིན་པར་དོགས་སོ། །སྤྱིར་འདུལ་བའི་བཤད་རྒྱུད་ནི། བསྟན་པའི་གཏད་རབས་བདུན་གྱི་འོག་དུ་ཕྱིར་མི་འོང་གློས་མི་འབེབས། ཡོན་ཏན་འོད། ཤཱཀྱ་འོད། ཆོས་ཀྱི་བཤེས་གཉེན་གཉིས། སེང་གེ་གདོང་ཅན། དེས་དཱ་ན་ཤཱི་ལ་དང་ཛི་ན་མི་ཏྲ་གཉིས་ཅེས་སྟོད་(ཉ༡༡ན)

[Full Size]

འདུལ་སྨད་འདུལ་གཉིས་མཐུན་པར་ཁས་ལེན་པར་སྣང་ལ་སྟོན་པ་འདས་ནས་ལོ་དགུ་བརྒྱ་ན་ཐོགས་མེད་བྱོན་པའི་ལོ་ཚིགས་དང་སྦྱར་ན་གློས་མི་འབེབས་དང་ཡོན་ཏན་འོད་ཀྱི་བར་དུ་འགའ་ཞིག་ཆད་པར་དོགས་སོ། །ཛི་ན་དཱ་ན་གཉིས་ལ་ཅོག་རོ་ཀླུའི་རྒྱལ་མཚན། དེ་ལ་གཡོ་སྨར་གཙང་གསུམ། དེ་ནས་བླ་ཆེན་པོ། གྲུམ་ཡེ་ཤེས་རྒྱལ་མཚན། ཀླུ་མེས་ཚུལ་ཁྲིམས་ཤེས་རབ། གཟུས་རྡོ་རྗེ་རྒྱལ་མཚན་སྟེ་སྨད་འདུལ་གྱི་བཤད་རྒྱུད་ཏོ། །སྟོད་འདུལ་ནི་ཛི་ན་དཱ་ན་གཉིས་ལ་ཤཱཀྱ་སེ་ན། དེ་ནས་དྷརྨ་པཱ་ལ། དེ་ལ་གྲུ་མེར་གྱི་མཁན་བུ་གྲ་ཕྱིའི་ཀླུབས་ལོ་ཙཱ་དང་སྐྱོགས་འདུལ་འཛིན་གཉིས། དེ་གཉིས་ལ་གཟུས་ཀྱིས་ཐུག་སྟེ་དེ་ཕྱིན་སྟོད་འདུལ་སྨད་འདུལ་གྱི་བཤད་རྒྱུན་གཅིག་དུ་གྱུར་པ་ཡིན་ནོ། །གཟུས་ལ་བུ་བཞིར་གྲགས་པ། འཛིམས་པ་ཤེས་རབ་འོད་དང་རོང་མཁར་ཕུག་གི་སྣེ་བོ་གྲགས་པ་རྒྱལ་མཚན་སྟེ་གཙང་དུ་བུ་གཉིས་ཀ་ཆུའི་སྤོ་ཆུང་ཚུལ་ཁྲིམས་བླ་མ་དང་རྒྱལ་གྱི་གླན་ཚུལ་བྱང་སྟེ་དབུས་སུ་གཉིས་སོ། །དེ་ལ་འཛིམས་པ་ནི་མངའ་རིས་པ་ཡིན། མཁས་པ་ཆེན་པོར་གྱུར་ནས་གཟུས་ལ་འདུལ་བ་ཉན་རས་འཛིམས་སུ་འདུལ་གྲ་བཙུགས་སློབ་མ་སྟོད་དུ་ཞང་ཞུང་རྒྱལ་ཤེ་འཛིམས་སུ་གཞོན་ཚུལ། དབུས་སུ་འབྲོ་སེང་དཀར་སྟོད་པ་ཡེ་ཤེས་བླ་མ། འདིས་འདམ་ཀོ་ཁྱིམ་བཏབ་པས་ཀོ་ཁྱིམ་པ་ཆེན་པོར་གྲགས། སྣེ་པོ་གྲགས་རྒྱལ་ནི་རོང་ལྷོ་རྩ་བ་ཡིན། མཁར་ཕུག་དང་དམུར་འདུལ་གྲ་བསྐྱངས། དེའི་སློབ་མ་སོག་ཚུལ་ཁྲིམས་བླ་མ་ཡུལ་ལྷ་རི་རྩ་བརྒྱད་པ་ཡིན། ལྷན་གྱི་བ་སོ་ཐང་དང་བྱེ་གླིང་སོགས་བཟུང༌། གླན་ཚུལ་བྱང་ཡུལ་རྒྱ་རི་མོ་ཅན་པ་ཡིན། འཕན་ཡུལ་རྒྱལ་དུ་བཤད་གྲ་བསྐྱངས། སློབ་མ་རྒྱལ་བ་གཡུང་དྲུང་དབང་ཕྱུག་གོ །སྤོ་ཆུང་ཡུལ་གཡོར་པོ་འབུམ་གླིང་པ། ཙན་ཐང་རོ་སྐམ། ཀ་ཆུ་རྣམས་བཟུང༌། སློབ་མ་མྱང་མཚན་པ་རིན་ཆེན་བླ་མ། དེའི་སློབ་མ་གམ་གསལ་བའི་སྙིང་པོའོ། །རྒྱ་འདུལ་འཛིན་ཆེན་པོ་དབང་ཕྱུག་བརྩོན་འགྲུས་ནི་ཡུལ་ཉང་སྟོད་མདར་བ་ཡིན། ཆུང་ངུ་ལ་ཡུམ་འདས་ནས་གནས་(ཉ༡༡བ)

[Full Size]

གཞི་བྱ་རོག་ཚང་དུ་ཕྱིན་པས་གཟུགས་བྱད་ལ་བརྙས་ནས་མ་ཚུད། དགའ་བ་གདོང་དུ་ཐལ་ཉལ་བྱས་ནས་ཀློག་བསླབས། མདོ་རྩ་ལ་ཀློག་དར་བྱས་པས་གཞུང་ཞར་ལ་ཟིན་སྟེ་སོག་ལ་འདུལ་བ་བསླབས། གཞན་ཡང་སྣེ་གླན་སྤོ་གསུམ། སོག་མྱང་ཀེ་གསུམ་ག་དང་བཅས་པ་ལ་སྦྱངས། སོ་བཞི་ནས་བརྒྱད་བཅུ་གྱ་ལྔའི་བར་དགའ་བ་གདོང་དང་ཆུ་མིག་ལུང་དུ་བཞུགས་ནས་འདུལ་གྲ་བསྐྱངས་སྟེ་གྱ་ལྔ་པ་ལྕགས་ཕག་ལ་གཤེགས། སློབ་མ་འདར་འདུལ་འཛིན། མཐའ་བཞི་བརྩོན་འབར། ཇོ་སྟན་ནག་པོ་དར་ཚུལ། རྨ་ཚོ་བྱང་ཆུབ་རྡོ་རྗེ་སྟེ་ཀ་བ་བཞི། སྣར་རྒྱ་ཚུལ་ཡོམ། སྣང་རྒྱ་རིན་ཚུལ། སྤྱི་ཐེར་པ་རིན་ཚུལ། ཁ་རུ་མེ་སྟོན། འཛིམས་པ་མེ་སྟོན། འཛིམས་པ་ཀློག་སྙིང༌། ལྡོག་པ་ཡེ་གྲགས། མངའ་རིས་པ་དཔལ་འབྱོར་ཤེས་རབ། སྨྱལ་པ་དར་མ་འོད་ཟེར་སོགས་སྟེ་གདུང་མ་བཅུ་རྣམས་སྔ་ཚར་ཡིན། བར་ཚར་ལ་སྐྱ་བོ་ཚུལ་འཕགས། མྱང་འདུལ་འཛིན། ཕྱི་ཚར་ལ་བྲག་དམར་རྡོ་རྗེ་ཕུར་བུ། བརྡ་འདུལ་འཛིན་སོགས་བྱོན་ཞིང་གཞན་ཡང་སྐྱི་ཤོད་པ་ཚུལ་འཕགས་དང་བྱ་འདུལ་སོགས་བྱོན་པ་ལས་འདར་གྱི་ཤབ། ལྷ་དར། ར་ས། བུ་དོང་སོགས་སུ་བཤད། མཐའ་བཞིས་མྱང་རོ་འུམ་ཕུག་བཟུང་སྟེ་མཁས་པ་རིན་སྐྱབས་སོགས་བྱུང༌། ཇོ་སྟན་ནག་པོ་དར་ཚུལ་ལོ་དྲུག་བཅུ་ལ་རབ་ཏུ་བྱུང༌། ཀློག་ཡིག་བསླབས། སྡེ་སྣོད་གསུམ་དང་ཁྱད་པར་འདུལ་བ་ལ་མཁས་པར་གྱུར་སྟེ་ཡར་ཀླུངས་ཚ་རོང་དང་ལུ་གུ་དོར་བཤད་པས་ཚ་རོང་པར་གྲགས། སློབ་མ་ཤ་མི་འདུལ་འཛིན་སོགས་བྱུང༌། ཤ་མི་ལ་བུ་བཞི་སྟེ་ཀླུབས་དཀར་འདུལ་འཛིན་ཇོ་སྟན་པང་ཚུལ་ཝལ་ཏི་ཇོ་སྲས་ཐག་མ་རྡོར་གཞོན། ཀླུབས་དཀར་གྱིས་རྒྱ་དུར་པང་ཚུལ་གྱིས་ཡང་དབེན་བཏབ་སྟེ་ལྷག་རུ་དང་རྩིབས་དཀར་བ་སོགས་ཡར་ལུངས་སུ་འདུལ་གྲ་མང་དུ་བྱུང་ཞིང་གཡམ་བཟང་ཆོས་རྗེས་གྲགས་པ་སྣུབས་འདུལ་འཛིན་དང་གྲབ་མི་དང་མ་ཚུལ་ཁྲིམས་ཀྱང་འདིའི་མཁན་བུ་ཡིན། ཝལ་ཏིས་སྐྱོར་མོ་ལུང་བཏབ་ཐག་མ་བས་འབྲི་ཁུང་གི་མཁན་པོ་ཡང་མཛད་ཝལ་ཏིས་(ཉ༡༢ན)

[Full Size]

ཀྱང་ཐུག་སློབ་མ་ཐོག་མ་ཀ་ཆེན་རྣལ་འབྱོར་བྱང་སེང༌། གཞུབ་སྟོན་ཡེ་ཤེས་སོགས་ཀྱི་བྱང་སེང་གིས་འཕན་ཡུལ་གྲོ་ས་བཏབ་སྟེ་ཕྱིས་སུའང་དམར་སྟོན་དཔལ་ལྡན་རིན་ཆེན་དང་དམར་སྟོན་རྒྱ་མཚོ་རིན་ཆེན་སོགས་ཀྱིས་འདུལ་བའི་བཤད་པའི་སྲོག་བཟུང་ངོ༌། །བྱང་སེང་གི་སློབ་མ་ཀ་བ་སྟོན་ནམ་གྱིས་ཕྱའི་ཕུར་གྲགས་ཚབ་བཏབ། ཀ་ཆེན་ལས་ཇོག་པོ་དགོན་སར་སོགས་དབུར་སྟོད་དང་འཕན་ཡུལ་དུ་འདུལ་གྲ་དུ་མ་བྱུང༌། ཝལ་ཏི་དང་ཀླུབས་དཀར་གྱི་སློབ་མ་གྲབ་མི་འདུལ་འཛིན། དེའི་སློབ་མ་རྒྱ་ངུར་བ་དར་མ་ཡེ་ཤེས་དང་ཟངས་ཆེན་པ་དར་མ་བསོད་ནམས་ཡིན། མཁན་སློབ་དེ་གཉིས་ཀྱིས་བསྙེན་པར་རྫོགས་པ་མཚོ་སྣ་པ་ཆེན་པོ་སྟེ་ལྷ་རི་སྡེ་སྣོད་འཛིན་པའི་སྐྱེ་བར་མཚོ་སྣ་སྟོད་ཏུ་འཁྲུངས། ལོ་བརྒྱད་ལ་ངའི་བླ་མའི་དྲུང་དུ་འགྲོ་ཟེར་ནས་ཟངས་ཆེན་པའི་དྲུང་དུ་བྲོས་ནས་ངའི་ཕ་མས་སླེབ་པར་མེད་པས་རབ་ཏུ་འབྱིན་པར་ཞུ་ཟེར་ནས་རབ་ཏུ་ཕྱུང་སྟེ་མཚན་ཤེས་རབ་བཟང་པོར་བཏགས། ཕྱིས་རྒྱ་དུང་བས་མཁན་པོ་བྱས་སྟེ་བསྙེན་པར་རྫོགས། གསུང་རབ་མཐའ་དག་དང་ཁྱད་པར་སྤྱོད་པའི་ཕྱོགས་ས་སྡེ་ཡན་ལག་དང་བཅས་པ་ལ་འདི་ལས་མཁས་པ་བོད་དུ་མ་བྱུང་བར་གྲགས། མནལ་ལམ་དུ་སློབ་དཔོན་ཡོན་ཏན་འོད་ལ་འདུལ་བ་མདོ་རྩ། ཞི་བའི་ལྷ་ལ་སྤྱོད་འཇུག་དབྱིག་གཉེན་ལ་མཛོད། ཕྱོགས་གླང་ཆོས་གྲགས་ལ་ཚད་མ་མདོ་དང་རྣམ་འགྲེལ། ཟླ་བ་གྲགས་པ་ལ་གསང་འདུས། རྗེ་བཙུན་བྱམས་པ་ལ་མངོན་རྟོགས་རྒྱན་གསན། སྒང་ཐོག་དང་གླིང་ཆེན་ཕུལ་ནས་བཞུགས་པའི་ཚེ་མགོན་པོ་ཏྲཀྴད་ཀྱིས་ཁྱེད་ཀྱིས་འདུལ་བའི་འགྲེལ་པ་མཛད་པར་ཞུ། དེ་ལ་ཐོས་བསམ་ཉམས་ལེན་བྱེད་པ་ཐམས་ཅད་ངས་བུ་བཞིན་དུ་སྐྱོང་ཞེས་ཞལ་གྱིས་བཞེས་གཉོས་ཆེན་པོའི་གདན་སར་གྲ་འོང་དུ་བཞུགས་སྟེ་འདུལ་བའི་རྣམ་བཤད་ཉི་མའི་འོད་ཟེར་དང་མདོ་རྩའི་མཆན་འགྲེལ་སོགས་བསྟན་བཅོས་མང་དུ་མཛད་ཅིང༌། ཐིག་ཕྱི་བ་རྒྱལ་སྲས་བཟང་པོ། (ཉ༡༢བ)

[Full Size]

མོན་ཁྲབ་པ་ཚུལ་ཁྲིམས་བཀྲ་ཤིས། སྒུ་རབ་པ་གོང་མ་ཆོས་རྒྱལ་བཟང་པོ། སོགས་ཁ་བ་དགེ་འདུན་བཟང་པོ། ཁང་སར་སྟེང་པ་བཟང་པོ་རྒྱལ་མཚན། རི་སྟེང་པ་རྒྱལ་མཚན་བཟང་པོ། མཁན་ཆེན་ཆོས་སྐྱབས་དཔལ་བཟང་སོགས་སློབ་མ་མང་དུ་བྱུང༌། དགུང་ལོ་དོན་གཉིས་སྦྲུལ་ཟླའི་ཉེར་དྲུག་ལ་དགེ་འདུན་བསྡུས་སྟེ་རབ་བྱུང་རྣམས་ཀྱིས་བསྟན་པའི་ཁུར་ཆེན་པོར་བཞེས་དགོས། བསྟན་པའི་ཁུར་བཞེས་ན་ལས་འབྲས་ཁྱད་དུ་མ་གསད། བསྟན་པའི་རྩ་བ་སོ་ཐར་ཡིན་པས་བསླབ་པ་རྣམས་འདུལ་བ་ནས་ཇི་ལྟར་བཤད་པ་བཞིན་སྲུངས། དེའི་སྟེང་ནས་ཉིན་རེ་ལ་གསོ་སྦྱོང་ཆག་མེད་བྱང་ཆུབ་སེམས་དཔའི་སྡོམ་པ་ཆག་མེད་དུ་ལེན་ཞིང་བློ་སྦྱོང་ཐུན་དྲུག་དུ་སྒོམ་དགོས། དེའི་སྟེང་ནས་སྡེ་སྣོད་གསུམ་དང་ཁྱད་པར་བྱང་ཆུབ་སེམས་དཔའི་སྤྱོད་ཕྱོགས་ཀྱི་གཞུང་ཨ་ཏི་ཤའི་གདམས་པ་རྣམས་ལ་ཐོས་བསམ་དང་ཉམས་ལེན་ཉིན་མཚན་འདའ་བར་འབུངས། སོ་ཐར་དང་བྱང་སྡོམ་སྲུང་བ་ལ་པང་པའི་མི་འདོར་བ་ལྟ་བུའི་གཉེན་པོ་བསྟེན། དེ་རྣམས་ཇི་ལྟ་བར་བསྒྲུབས་ན་སངས་རྒྱས་བྱང་སེམས་བླ་མ་དང་བཅས་པའི་དགོངས་པ་རྫོགས། ང་ལ་བླ་མར་བཟུང་བ་ཡིན། ངེད་རང་ཆོས་པར་ཁས་ལེན་པ་རྣམས་ལ་འཇིག་རྟེན་གྱི་བྱ་བ་སྐད་ཅིག་མ་གཅིག་ཀྱང་མ་མངགས་སོ་ཞེས་ཡང་ཡང་གདམས་སྟེ་སྐུ་འདས། སྐྱེས་བུ་དམ་པ་འདིས་ནི་ཕྱི་རབས་སུ་འདུལ་བའི་བསྟན་པ་མིག་ཕྱེ་བ་ལྟར་མཛད་པ་ཡིན་སྟེ་འདིས་མཛད་པའི་འདུལ་བའི་བསྟན་བཅོས་རྣམས་ཀྱི་དྲིན་ལས་དེང་སང་ཡང་ཆ་ཙམ་གནས་ཅིང་བསྟན་པ་རིས་མེད་དུ་ཚད་མར་གྱུར་པ་ཡིན་ལ་བདག་གི་བླ་མ་རྒྱལ་བ་ཀརྨ་པ་བརྒྱད་པའི་ཞབས་ཀྱིས་ཀྱང་འདིའི་ཡིག་ཆ་ཚད་མར་མཛད་ནས་མདོ་རྩའི་ཊཱིཀྲ་ཆེན་འདུལ་བའི་ཆུ་བོ་མཐའ་དག་གཅིག་དུ་འདུ་བའི་རྒྱ་མཚོ་འདི་མཛད་པ་ཡིན་ནོ། །རྨ་ཚོ་བྱང་རྡོར་གྱིས་རྒྱའི་གྲ་པ་ལྔ་བརྒྱ་ཙམ་ཁྲིད་ནས་དབུས་སུ་བཤད། དེའི་སློབ་མ་བྱ་འདུལ་ཆེན་པོ་བརྩོན་འགྲུས་འབར་ཡིན་སྟེ་གཙང་རོང་གི་གཡུང་དུ་ལྕགས་ལུག་ལ་(ཉ༡༣ན)

[Full Size]

འཁྲུངས། འབྲེ་ཤེས་རབ་འབར་ལས་རབ་ཏུ་བྱུང༌། ཐོག་མར་སོག་དང་ཕྱིས་རྒྱ་དང་རྨ་ཆོ་ཟླ་ཟུར་དུ་བྱས་པ་ལ་འདུལ་བ་སྦྱངས། རྒྱལ་ཚ་ཞང་ཡེ་ལ་དབུ་ཚད། ཟངས་དཀར་ལོ་ཙཱ་ལ་ཡོ་ག་སྟོད་ལུང་པ་ལ་བཀའ་གདམས་གསན། ཟུལ་ཕུར་འདུལ་གྲ་བསྐྱངས། པེ་ཀར་གྱིས་བཙུན་ཆུང་དུ་སྤྲུལ་ནས་ཞབས་ཏོག་བྱས་པས་འདུལ་བ་དང་འགལ་བ་ན་བཟའི་སྤུ་ཕྱིར་བསྟན་པ་གཅིག་ལས་མ་མཐོང་བས་དད་དེ་བྱ་ཊཱིཀྲ་འཛིན་པ་རྣམས་ལ་གྲོགས་བྱེད་པར་ཞུས། ཕག་གྲུ་པའི་དགེ་སློང་གི་མཁན་པོ་མཛད། ལོ་དགུར་ཚོགས་པ་བསྐྱངས་ནས་མཐར་སྒྲུབ་པ་སྙིང་པོར་མཛད་དེ་དོན་དྲུག་པ་ལ་ཟུལ་ཕུར་གཤེགས། སློབ་མ་འགྲོ་དོན་ནུས་པ་དོན་དྲུག་ཙམ་བྱུང༌། དེ་ལས་རྩིབས་པ་གཞོན་སང་གིས་ཉང་སྟོད་མཁར་ལུང་དུ་འདུལ་གྲ་བསྐྱངས། དབོན་པོ་ཆོས་དབང་ལ་སོགས་པ་ཚར་རྩིབས་པའི་མཁན་བུ་དཔལ་ལྡན་གྲོས་ཀྱིས་སྣར་ཐང་བཟུང༌། བ་ཕྱར་སྟོད་ནག་གིས་ལྷས་མོ་ཆེ། སྟག་ཚལ། སྨོན་གྲོ། རོང་མཁར་ཕུག་སོགས་སུ་བཤད། དེའི་སློབ་མ་མངའ་རིས་དགྲ་བཅོམ་གྱིས་པ་གྲོ་བྲག་ནག་དང་ཟམ་ཚེར་བཏབ། དེའི་སློབ་མ་མཆིམས་ན་མཁའ་གྲགས་དང་གྱང་མོ་ཆེ་བ་སོགས་བརྒྱད་བྱུང༌། གྱང་མོ་ཆེ་བ་ལ་སེང་གེ་ཟིལ་གནོན་གྱིས་ཐུག །གཙང་རོང་བ་ལྕེ་འདུལ་འཛིན་གྱིས་དུར་མིག་ལ་སོགས་པར་བཤད། དཔལ་ཆེན་ཡེ་ཤེས་གཡུང་དྲུང་དང་དེའི་སློབ་མ་གཉན་སྟོན་དགའ་བ་གདོང་པ་སོགས་བྱུང༌། སངས་རྒྱས་གཞུང་པ། ཨར་དགེ་བ། རི་ཟན་རྡོག་པ། ནགས་མོ་བ། བཀྲ་ཤིས་སྒང་པ་སོགས་ཀྱང་ཟུལ་ཕུའི་ཡན་ལག་གོ །བྱ་འདུལ་གྱི་སྣག་དཔོན་རོག་ཆོས་དབང་གིས་ཟུལ་ཕུའི་གདན་ས་མཛད། དེ་ནས་ཆོས་བྱང་ན་ཟ་ཕྲེང་གསོལ། འདི་ལ་བྱང་རྡོར་གཉིས་ཀྱིས་འདུལ་བ་ཉན་ཞིང༌། འགྲོ་མགོན་འཕགས་པའི་དགེ་ཚུལ་གྱི་སློབ་དཔོན་ཡིན། དེའི་སློབ་མ་ཆོས་ཀྱི་བརྩོན་འགྲུས། དེའི་སློབ་མ་ཆོས་གྲགས་རིན་ཆེན་དཔལ་སྟེ་གཉིས་ཀས་གདན་ས་བསྐྱངས། དེའི་སློབ་(ཉ༡༣བ)

[Full Size]

མ་ཀ་བཞི་པ། དེའི་སློབ་མ་བསོད་ནམས་གྲགས་པ་དང་གྲུབ་པ་དཔལ། དེ་གཉིས་ལ་བུ་རིན་པོ་ཆེས་འདུལ་བ་གསན་ནོ། །རྒྱའི་བར་ཚར་སྐྱེས་བོ་ཚུལ་འཕགས་ཀྱི་བུ་ཆེན་འདར་ཚུལ་ཁྲིམས་རྒྱལ་པོ། དེ་ནས་རིམ་བཞིན་སྟོད་ཚུལ་ཁྲིམས་འབུམ། ཉི་སྟེང་པ་བློ་གྲོས་གྲགས། རྒྱལ་ཚུལ་ཁྲིམས་གྲགས། སྣེ་མོ་བ་གྲགས་པ་སྨོན་ལམ། ནེལ་པ་པཎ་ཆེན་སོགས་ནེལ་པ་རྗེས་འབྲང་དང་བཅས་པ་བྱུང༌། ཕྱི་ཚར་བྲག་དམར་རྡོ་རྗེ་ཕུར་བུ་ལ་སྟོད་པ་དྷརྨ་ཞེས་གྲགས་པ་དེས་གྲོམ་པ་བྲག་དམར་དུ་བཤད་པའི་སློབ་མ་ཞང་ཞི་མཛེས་སོགས་བྱུང༌། བརྡ་འདུལ་གྱི་སློབ་མ་བཤེས་གཉེན་ཤཱཀྲ་གྲུབ་དང་བརྡ་འདུལ་ཕྱི་མས་ཤབ་སྟོད་སོགས་སུ་བཤད། ཆུ་མིག་གི་རྔོག་བཙུན་དཀར་མོས་ཞུས་ནས་ཆུ་མིག་སྡེ་སྐོར་གྱི་མཁན་པོ་མཛད། བརྡའི་སློབ་མ་སྐྱི་མ་གྲགས་ཚུལ་གྱིས་དྲང་པོ་ལུང༌། ཆག་ཉི་མས་ཤངས་སྲེག་ཤིང༌། མཐའ་སྟོན་གྱིས་མྱང་རོ་བླ་རིང་དུ་གྲ་བསྐྱངས། ཤཱཀྲ་གྲུབ་ཀྱིས་བརྡའི་གདན་ས་མཛད་པ་ལ་ཀློག་སྐྱ་དཔལ་འབྱོར་གྱིས་གསན་ནས་དོན་མོ་རིར་བཤད། སློབ་མ་སྐྱེལ་ནག་ཞང་ཤེར་འོད། དབོན་པོ་ཁྲི་བརྟན་སེང་གེ་ཤཱ་རྡོར་དང་བཞི་བྱུང༌། ཕྱིས་ཤེས་རབ་འོད་ཀྱིས་གདན་ས་མཛད་དེ་ཆུ་མིག་འདུལ་གྲ་བ་རྣམས་བྱུང༌། ཡང་ཁ་ཆེ་པཎ་ཆེན་གྱིས་སྣར་ཀླས་མོ་ཆེར་དབྱར་གནས་མཛད། འདུལ་བ་མེ་ཏོག་ཕྲེང་རྒྱུད་གསུངས་པ་ལ་སེང་གེ་ཟིལ་གནོན་དང་ཤངས་པ་ཇོ་སྟན་གྱིས་གསན་ནས་སོ་སོར་ཊཱིཀ་མཛད། སེང་གེ་ཟིལ་གནོན་ལ། ཚད་མའི་སྐྱེས་བུ། དེ་ལ་བུ་རིན་པོ་ཆེས་གསན་སྟེ་གླིང་འབུམ་ཊཱིཀ་ཆེན་སོགས་མཛད་ཏོ། །འདུལ་བ་མེ་ཏོག་ཕྲེང་རྒྱུད་འདི་ལ་ཕྱིས་ཀུན་མཁྱེན་རོང་པོ་སོགས་ཀྱིས་དགྲ་བཅོམ་པས་བརྩམས་པ་དང་ཚིགས་བཅད་བཟང་པོར་ཡོད་པ་དང་གླེང་གཞི་རྩ་བས་ཟིན་པ་སྟེ་ཁྱད་ཆོས་གསུམ་ཡོད་ཅེས་རྩལ་དུ་བཏོན་ཡང་དགྲ་བཅོམ་པ་ལས་བྱང་ཆུབ་སེམས་དཔའ་བསམ་པ་རྒྱ་ཆེ་བའི་རྟེན་འབྲེལ་གྱིས་ད་དུང་མདོ་རྩ་ཁོ་ན་དར་རོ། །པཎ་ཆེན་སྡོམ་རྒྱུན་ནི། ཁྲོ་ཕུ་ལོ་ཙཱ་བ་ཚུལ་ཁྲིམས་ཤེས་རབ་རྣམ་ཐོས་སྲས་བྲན་དུ་འཁོལ་བ་དེས་ཁ་ཆེ་བསོད་སྙོམས་པ་སྤྱན་དྲངས་སྟེ། པཎ་ཆེན་དེ་ནི་ནུབ་ཕྱོགས་ཁ་ཆེའི་ཡུལ་ཁྲི་བརྟན་གྱི་གྲོང་པྲ་ཝ་སུ་རར་ཡབ་རྒྱ་མཚོའི་དེད་དཔོན་ཛམ་ནག་གྲུབ་པ་སམ་ཀ་ཡའི་སྲས་སུ་འཁྲུངས། མཚན་ཛ་ཤོ་དྷ་(ཉ༡༤ན)

[Full Size]

རར་བཏགས། ལོ་བཅུ་ནས་སྒྲ་ཚད་གཟོ་གསོ་མཐའ་དག་ལ་སྦྱངས་སྟེ་གཞན་ལུགས་ཚར་བཅད་ནས་རྒྱལ་པོས་ཅོད་པན་བཅིངས། དགུང་ལོ་ཉེར་གསུམ་ལ་རབ་ཏུ་བྱུང་ཚེ་རྣལ་ལམ་ན་བྱང་ཆུབ་ཀྱི་ཤིང་ལོ་སྤྱི་བོར་སྤུངས་སྟེ་བྱུང༌། རབ་ཏུ་བྱུང་མ་ཐག་བྱང་ཆུབ་ཆེན་པོ་དང་བྱམས་པ་དང་སྒྲོལ་མ་གསུམ་ལ་བྱང་ཆུབ་ཀྱི་སེམས་ཀྱིས་ཟིན་པས་ཞག་རེ་ལ་ཆོས་སྤྱོད་བཅུ་མ་ཆག་པར་བྱེད་པ། ནོར་རྫས་ཅི་ཡང་བདག་དུ་མི་འཛིན་པ། གནོད་ལན་དུ་ཕན་འདོགས་པ། རྐྱེན་ཅི་འབྱུང་ཡང་ཐབས་གཞན་མི་འཚོལ་བར་ཕ་རོལ་ཏུ་ཕྱིན་པའི་དོན་སྒོམ་པ་སྟེ་བཞིའི་དམ་བཅའ་མཛད། བྱམས་པས་ཤར་ཕྱོགས་སུ་སོང་ལ་རིག་པ་མཐར་ཕྱིན་པར་གྱིས་ཅིག་པར་ལུང་བསྟན། ཞི་འབྱུང་སྦས་པ་དང་དབྱངས་སྙན་དང་བློ་སྦས་སོགས་བསྟེན་ནས་གསུང་རབ་ཐམས་ཅད་སྦྱངས་སྟེ་དབྱིག་གཉེན་ལྟར་ཏིལ་མར་གྱིས་ཟངས་བཀང་བར་སྐུ་དཔྱིངས་སྟེ་ཞག་དུ་མར་འབུམ་སྡེ་དུ་མ་ཞལ་ཐོན་མཛད། ཕར་ཕྱིན་གསན་པའི་རྣམ་རྫོགས་སྦྱོར་བའི་ཚེ་མདུན་གྱི་སྤྲིན་ཕུང་ལས་སྟོང་ཉིད་ཀྱི་སྒྲ་སྒྲོག་པ་གསན་སྟེ་ཏིང་ངེ་འཛིན་མི་མཚམས་པ་དཔག་མེད་སྐྱེས། སུམ་བཅུ་པ་ལ་མཁན་པོ་ཞི་འབྱུང་སྦས་པ་སོགས་བཅོ་བརྒྱད་ཀྱི་ཚོགས་ལས་བསྙེན་པར་རྫོགས་སྟེ་སྟན་གཅིག་དང་བསོད་སྙམས་པའི་སྦྱངས་ཡོན་བཟུང༌། པཎ་ཆེན་དེ་ཝ་པུཎྱེས་རྡོ་རྗེའི་ཐེག་པར་སྨིན་གྲོལ་དུ་མཛད་དེ་བདེ་མཆོག་དང་དུས་ཀྱི་འཁོར་ལོའི་ཞལ་བསྟན། ཙནྡནའི་ནགས་སུ་འཇམ་དབྱངས་དང་རྟ་མགྲིན་དང་སྒྲོལ་མའི་གསུང་ཐོས། སངས་རྒྱས་རིམ་གྲོ་པ་ཟུང་དང་བཅས་པས་ཀླུའི་རྒྱལ་པོ་ལ་བསོད་སྙོམས་མཛད་པ་དང་བྱམས་པ་ལ་རྒྱལ་པོ་དགེ་དབང་གིས་བསིལ་ཡབ་གཡོབ་པ་གཟིགས་ཤིང་ཆོས་བདུན་གསན། མར་མེའི་རྩེར་བྱམས་པ་དང་སྒྲོལ་མ་དང་ཐུབ་དབང་གཟིགས། རྡོ་རྗེ་གདན་དུ་མཆོད་པ་མཛད་པ་ལས་སྤོས་སྤྲིན་གྱི་དུད་པ་སྤྲིན་དུ་འཁྲིགས་པས་ཞག་བདུན་དུ་ན་མཁའ་ཁྱབ་པ་ལས་གློག་དང་ཟུང་འཇུག་སྒྲུབ་པའི་ཆོས་ཀྱི་སྒྲ་བྱུང་ཞིང་ཏིང་ངེ་འཛིན་ཁྱད་པར་ཅན་བརྙེས། རི་མོའི་བུད་མེད་ཀྱིས་འོ་མའི་བསོད་སྙོམས་ཕུལ་བ་(ཉ༡༤བ)

[Full Size]

འབྲུ་གསུམ་གྱིས་བྱིན་གྱིས་བརླབས་པ་སྦྲང་རྩི་ལྟ་བུའི་བདུད་རྩིར་གྱུར་པ་དང༌། འབྲོག་པས་འོ་མའི་བསོད་སྙོམས་ཕུལ་བའི་པྲིས་མ་ལ་བཀྲ་ཤིས་ཀྱི་རྟགས་བརྒྱད་ཤར། ཝ་ར་ཎ་སིའི་གནས་སུ་སངས་རྒྱས་ངང་པའི་གཟུགས་ཀྱིས་མ་ཧེ་ལ་གནས་པ་ཅིག་གིས། སྒྱུ་མ་ལྟ་བུར་གཟུང་དོན་མེད། །རྨི་ལམ་ལྟ་བུར་འཛིན་དོན་མེད། །ཚོགས་གཉིས་དབྱེར་མེད་ལམ་གྱི་མཆོག །སྟོང་ཉིད་སྙིང་རྗེའི་སྙིང་པོ་ཅན། །ཞེས་གསུངས་པ་གསན་སྟེ་སེམས་སྐྱེད་ཀྱང་ཞུས། བྱང་ཆུབ་ཀྱི་སྤྱོད་པ་རླབས་ཆེན་ཡང་གཟིགས། ཆོས་དེ་དག་རང་གི་ཁྲག་གིས་པགས་པ་ལ་བྲིས་སྟེ་སྣོད་ལྡན་ལ་བསྒྲགས། ཉི་སྦས་དང་ཟླ་སྦས་ལ་བྱམས་ཆོས་གསན་པས་ཐེག་པ་སྣ་ཚོགས་ཀྱི་དོན་དགོངས། བྱམས་པ་ལས་རྣམ་ཀུན་གྱི་སྐབས་ཀྱི་ཆོས་བདུན་གསན། འཇམ་དབྱངས་རྟ་མགྲིན་སྒྲོལ་མ་གསུམ་རང་རང་གི་རྩ་སྔགས་ཟླ་བ་གསན། ཝ་ར་ཎ་སིའི་འདམ་བུའི་ཁྲོད་ན་རྟེན་བྱིན་རླབས་ཅན་ཞིག་ཡོད་པ་མཇལ་བས་དེས་དངོས་སུ་ཆོས་གསུངས། དེའི་ཚེ་ལྔས་རྩེན་གྱི་བུས་གླུ་བླངས་ཤིང་རྔ་བརྡུངས། ཨོ་ཏྱནྟ་པུ་རིར་བྱང་ཆུབ་ཆེན་པོས་ཞལ་འཛུམ་པ་དང་སྒྲོལ་མས་མཆོད་རྫས་དངོས་སུ་བཞེས། མུ་སྟེགས་པ་དང་རྩོད་ཚེ་ཉིན་མོ་རྩོད་ལན་མ་ཐེབས་པ་མནལ་ལམ་དུ་སྒྲོལ་མས་ལུང་བསྟན་ནས་རྒྱལ། རྩོད་པ་ལས་རྒྱལ་བའི་ཡོན་རྒྱལ་པོས་ཕུལ་བ་རྣམས་ལས་རྟེན་ཁྱད་པར་ཅན་གསུམ་བཞེངས། མཆོད་རྟེན་མཚོན་ཆའི་འཁོར་ལོ་ཅན་ལ་གདུགས་སུས་འཁེལ་བ་ཀུན་གྱིས་བླ་མར་འཛིན་པ་ལས་ཁྲོ་གཉེར་ཅན་གྱིས་བྱིན་གྱིས་བརླབས་པས་བྱ་རོག་གིས་གྲོགས་བྱས་སྟེ་ཆོས་རྗེས་ཁེལ། ལུས་ཀྱི་བྱ་བ་རེ། ངག་གིས་གཞུང་རྩོམ་པ། ཡིད་ཀྱིས་དྲི་བ་དགུའི་དོན་སེམས་པ་རྣམས་དུས་དེར་ནུས་པས་ཡོངས་སུ་གྲགས་པའི་པཎ་ཆེན་དུ་གྱུར། བི་ཀྲ་མར་དབང་བསྐུར་མཛད་པ་ན་བུམ་ཆུ་བདུད་རྩིར་གྱུར་པས་བུམ་པ་གང་བ་ཉིན་ཕྱེད་དུ་ལོངས་སྤྱད་པས་མ་ཟད། རྒྱ་ནག་གི་རྒྱལ་པོའི་ཕོ་ཉས་སྤྱན་དྲངས་ཚེ་དགེ་སློང་དཀར་ཞིང་དུལ་བ་ཞིག་གིས་ད་ལྟ་འགྲོ་བའི་དུས་མ་ཡིན་མ་འོངས་པ་ན་སོང་ཞིག་ཞེས་བསྟན། ཁ་ཆེར་གྲོགས་པོ་ཅིག་གིས་གྲང་བའི་ཚེ་བསོད་སྙོམས་(ཉ༡༥ན)

[Full Size]

མཛད་པ་འོ་བརྒྱལ། འཚོ་བ་ངས་འབུལ་ཟེར་བ་ན་སྒྲོལ་མས་ཁྱོད་སངས་རྒྱས་ཀྱི་བསྟན་པ་མི་འཛིན་ནམ་གསུངས་པས་བསོད་སྙོམས་མཛད། ཐོ་རེངས་ཀྱི་བརྡ་སྒྲས་རྐྱེན་སྟེ་དགའ་ལྡན་གྱི་གནས་གཟིགས་ཤིང་བྱམས་པ་ལས་དད་པ་སྙིང་རྗེ་ཤེས་རབ་བརྩོན་འགྲུས་སྟེ་ཆོས་བཞི་གསན། རྡོ་རྗེ་གདན་དུ་ཅུང་ཟད་བསྙུངས་ནས་གཟིམས་པ་ན་དོན་ཞགས་དཀར་པོ་ཕྱག་བརྒྱད་པ་ལ་སྒྲོལ་མ་ཁྲོ་གཉེར་ཅན་རྟ་མགྲིན་ནོར་བཟང་རྣམས་ཀྱིས་བསྐོར་བ་གཟིམས་པ་ཅིག་གཟིགས། བཞེངས་པ་ན་དེ་རྣམས་ཀྱང་བཞེངས་པར་གཟིགས་ནས་སྒྲུབ་ཐབས་མཛད་པ་ནི་དོན་ཞགས་ཁ་ཆེ་མར་གྲགས། རྡོ་རྗེ་གདན་ལ་རྒྱལ་པོ་བྷ་མི་དེ་ཝའི་དམག་ཡོང་ཟེར་ནས་བལྟར་བྱོན་ནས་རྒྱང་གྲགས་ཙམ་དུ་བསོད་སྙོམས་མཛད་ནས་ཕྱིར་ལོག་ཚེ་མ་ཧཱ་བོ་དྷི་མདུན་ན་བྱོན་འདུག་ལྷུང་བཟེད་བཞག་ལ་ཕྱག་བྱ་སྙམ་པ་ན་དེ་ཕྱི་འགྲོས་ཀྱིས་ཇེ་རིང་ལ་སོང༌། ཕྱི་བཞིན་བྱོན་པས་བྱང་ཆུབ་ཆེན་པོའི་སྤྱན་སྔར་སླེབས། སླར་བྱོན་པས་ནགས་ནའང་སྔ་མ་བཞིན་འདུག་སྟེ་མཚན་ཉིད་ནི་མི་ཤེས་གསུངས། དེའི་ཚེ་རི་བྱ་རྐང་ལ་གྲུབ་ཐོབ་མང་དུ་ཡོད་པ་དང་སིངྒྷ་གླིང་ན་དགྲ་བཅོམ་པ་བཞུགས་པ་ལ་རྒྱལ་པོས་བསྙེན་བཀུར་མང་དུ་སྐྱེལ་བ་ན་དེ་དག་ཚིག་མཐུན་པར་ངེད་ལ་ཐག་རིང་དུ་བསྙེན་བཀུར་བ་བས་ཁྱེད་རང་གི་མ་ག་དྷ་ན་པཎ་ཆེན་ཤཱཀྱ་ཤྲཱི་བྱ་བ་མ་བྱོན་པའི་སངས་རྒྱས་རབ་གསལ་བཞུགས་པ་ལ་བསྙེན་བཀུར་བ་བསོད་ནམས་ཆེ་ཞེས་བསྐུལ་ཞིང་ཨོ་ཌྱན་ནས་མཁའ་འགྲོ་མས་ཀྱང་ལུང་བསྟན། རྒྱལ་པོ་སོགས་ཐམས་ཅད་ཀྱིས་གཙུག་གི་ནོར་བུར་བསྐུར། མ་ག་དྷར་བཟླས་སྒོམ་བྱས་ལ་ཚེ་འདིར་མཆོག་གི་དངོས་གྲུབ་ཐོབ་པར་བྱ་དགོས་སྙམ་པ་ན་མནལ་ལམ་དུ་མི་ཐོབ་ཅེས་བྱུང༌། ཡང་ཡང་གསོལ་བ་བཏབ་པས་ད་ལྟའི་སྤྱོད་པ་འདི་དོར་ནས་བསྒྲུབས་ན་འགྲུབ་ཅེས་བྱུང་གསུངས་སྟེ་སྤྱོད་པ་འདི་ལས་ལྷག་པ་མཆིས་སམ་ཞུས་པས་འདི་ཀུན་གཞན་དང་བསྟུན་པའི་ཙབ་ཙུབ་ཙམ་ཡིན། སྔགས་ཀྱི་སྤྱོད་པ་ཁྱད་པར་ཅན་མང་གསུངས། (ཉ༡༥བ)

[Full Size]

ཛ་ཡན་གར་རྒྱལ་པོའི་མཆོད་གནས་མཛད་པ་ན་མནལ་ལམ་དུ་སྒྲོལ་མས་ཕྱག་གཡས་བརྐྱངས་པའི་མཐིལ་ན་གསེར་དང་དངུལ་དང་བཻ་ཌཱུརྻའི་ཡི་གེ་ཏཱཾ་གསུམ་སྣང་བ་བྱིན་ནས་རྒྱལ་པོའི་འཁོར་ལོངས་སྤྱོད་པས་འདི་དགའ་བ་ཡིན་ནོ་གོ་འམ་གསུང་བས་མཆོད་གནས་བོར་སྟེ་འོན་ཀྱང་རྒྱལ་པོས་ནན་གྱིས་ཞུས་པས་ས་ཕྱོགས་དེར་བཞུགས། གར་ལོག་གི་དམག་གིས་ཡུལ་དབུས་བརླག་ཚེ་རྗེ་བཙུན་མས་རིགས་ཀྱི་བུ་ཁྱོད་ཤར་ཕྱོགས་སུ་སོང་ཞིག་གསུངས་སྟེ་བྱོན། འཇིགས་པ་ཆེ་ཞིང་ལམ་མ་ཤེས་པ་ན་ཉིན་མོ་མི་དཀར་པོ་ཅིག་དང་མཚན་མོ་བུད་མེད་དམར་མོ་རེས་སྣ་དྲངས། མ་ཧཱ་ཀཱ་ལས་དགེ་བསྙེན་ནག་པོ་ཅིག་དུ་བྱས་སྟེ་མར་མེ་བཏེག །སྐར་མ་པ་ཝ་སངས་ཀྱིས་མེ་ཏོག་གཏོར་ཞིང་ལམ་མཚོན་ནས་ཚེགས་མེད་པར་བཏོལ། ཛ་གཏྟ་ལར་བསོད་སྙམས་དཀའ་བར་བྱུང་ཚེ་རིག་འཛིན་གྱི་ལྷ་མོ་བཞིས་གདུགས་ཚོད་དྲངས་པ་རྨི་བ་ནས་རྙེད་སླ་བར་བྱུང༌། དེ་ལྟར་རྒྱ་གར་བྱང་ཕྱོགས་སུ་ཕེབས་པ་བོད་དུ་ཁྲོ་ཕུ་ལོ་ཙཱ་བ་ཆེན་པོས་གསན་ནས་ཤིང་ཕོ་བྱི་བ་ཁྲ་ཟླའི་བཅོ་ལྔ་ལ་གདན་འདྲེན་དུ་འབྱོན་པར་ཆས་པའི་ཕྱི་ནུབ་པཎ་ཆེན་ཛ་ག་བི་ཧར་ན་བཞུགས་ཚེ་མཆོད་རྟེན་གྱི་རྩེ་ནས་ལྷའི་བུ་གསུམ་འོངས་སྟེ་དང་པོས་གཙུག་གི་ནོར་བུ་ཕུལ་ནས། ཁོ་བོ་ནི་གཙུག་ཏོར་ཅན་བྱ་བ་མི་ཡུལ་གྱི་ཆོས་པ་རྣམས་ལ་ཕན་འདོགས་པ་ཡིན་ཟེར་ཡང་ཁོ་བོ་བསོད་སྙོམས་པ་ཡིན་པས་ནོར་བུ་མི་འདོད་གསུངས་སྟེ་མ་བཞེས། ཡར་ལུངས་ཇོ་བོའི་ཆོས་བྱུང་ན་འདི་ལ་སངས་རྒྱས་གཙུག་ཏོར་ཅན་ཞེས་འཁྲུལ་སྣང༌། གཉིས་པས་གསེར་གྱི་མེ་ཏོག་གསུམ་ཕུལ་སྟེ་ཁོ་བོ་གསེར་མདོག་ཅན་བྱ་བ་རྒྱལ་ཆེན་རིས་བཞི་པའི་ལྷའི་བུ་ཐམས་ཅད་ལ་ཕན་འདོགས་པ་ཡིན་ཟེར་སྟེ་བླངས་ནས་དཀོན་མཆོག་གསུམ་ལ་རེ་རེ་ཕུལ། གསུམ་པས་ཁོ་བོ་རྣམ་ཐོས་ཀྱི་བུ་ཞེས་བྱ་བ་ལྷ་མི་དགེ་བ་སུ་བྱེད་ཀྱི་གྲོགས་བྱེད་པ་ཡིན་ཟེར་སྟེ་འབྲས་ཆེན་ལྷུང་བཟེད་གང་བསོད་སྙོམས་སུ་ཕུལ། གསུམ་གས་མགྲིན་གཅིག་དུ་བྱང་ཕྱོགས་ཁ་བ་ཅན་ཡི་(ཉ༡༦ན)

[Full Size]

དྭགས་ཆོས་འཛིན་གྱི་ཡུལ་དུ་བྱམས་པའི་སྐུ་ཚད་བཞེང་པའི་གྲོགས་ལ་འབྱོན་པར་ཞུ་ཟེར། སྐུ་ཇི་ལྟ་བུ་དྲིས་པས་འདི་འདྲ་ཞིག་ཡིན་སྟེ་ཕྱག་མགོ་ཞབས་མགོ་ལས་མཚར་ཟེར་སྟེ་ལྡེར་ཚོ་ཆེན་པོ་ཞིག་བསྟན། བྱམས་ཆེན་གྱི་སྐུའི་སྤར་གྱི་ཕྱག་ཞབས་ཀྱི་མགོ་བྱས་པའི་སྐབས་སུ་འདུག་ལྡེར་ཚོ་དེ་ལས་འོད་ཟེར་དཔག་དུ་མེད་པ་འཕྲོས་ནས་འཇིག་རྟེན་སྣང་བར་བྱས་སྟེ་འདི་ལ་འབྲེལ་པ་བཞག་ཚད་བྱམས་པའི་བསྟན་པ་ལ་འཁོར་བ་ལས་ཐར་ཟེར་བའི་སྒྲ་གསན། སྒྲོལ་མས་ཀྱང་བྱང་ཕྱོགས་སུ་སོང་ཞིག་པར་ལུང་བསྟན་སྟེ་བྱང་ཕྱོགས་ནས་སྤྱན་འདྲེན་དོ་གལ་ཅན་ཡོད་པས་འགྲོ་གསུངས་སྟེ་ཚོང་འདུས་ལ་དྲུ་བར་བྱོན་ནས་ཟླ་བ་ཕྱེད་བསྒུགས། འཁོར་རྣམས་སྐྱོ་ནས་ལྡོག་པར་རྩོམ་པ་ན་ད་དུང་ཞག་གསུམ་སྡོད་ཅིག་གསུངས། ལོ་ཙཱ་བ་ཆེན་པོས་མོན་གྱི་ལམ་རྣམས་སུ་ཚ་གྲང་གཅན་གཟན་དུག་མའི་ཏོ་མ་སོགས་ཀྱི་འཇིགས་པ་དང་ལམ་འཁྱམས་པ་སོགས་ཀྱི་དཀའ་བ་ཆེར་སྤྱད་ནས་གྲོ་མོའི་གཏིང་རྒྱ་གར་བྱང་གི་བཻཌཱུར་ཚོང་འདུས་སུ་བཞུགས། སྤྱན་འདྲེན་པའི་གསོལ་བ་འདེབས་པ་ལ་ཡུལ་གྲུ་ཤིན་དུ་ཆེ་ཡང་དཀོན་མཆོག་གི་རྟེན་མ་རྙེད་ནས་གནས་ཁང་གི་ཁྱམས་ན་བྱིས་པའི་རྩེད་མོ་བྱེད་ས་སྟོན་པའི་འབྱིམ་སྐུ་ཅིག་དང་ཤིང་གི་མཆོད་རྟེན་ཞིག་འདུག་པ་ལ་མཆོད་པ་བྱས་གསོལ་བ་བཏབ་སྟེ་སངས་རྒྱས་དོན་ཡོད་གྲུབ་པ་ལ་ཕྱག་འཚལ་ལོ། །ཤཱཀྱའི་བསྟན་ལ་ཤཱཀྱའི་སྲས་བལྟམས་ཤཱཀྱའི་མཚན། །ལྔ་རིག་གཙུག་ནོར་དྲི་མེད་བརྟུལ་ཞུགས་བརྟན་པོ་འཛིན། །ཐུགས་རྗེའི་བདག་ཉིད་ངོ་མཚར་ཆོས་བཞིས་ཁྱད་འཕགས་གང༌། །པཎ་ཆེན་དམ་པས་བདག་སོགས་རྗེས་འཛིན་སྐྱོང་གྱུར་ཅིག །རིང་ཞིག་དུས་ནས་ཁྱོད་ཀྱི་མཚན་ཙམ་ཐོས་པས་ཀྱང༌། །རབ་དད་དགའ་སྐྱེས་སྤུ་ལྡང་མཆི་མ་འཁྲུག་འགྱུར་བ། །རིགས་ལྡན་བུ་ཞིག་གངས་ཅན་ཁྲོད་ནས་ཉིན་མཚན་དུ། །ཐལ་སྦྱར་སྤྱིས་འདུད་གདུང་བས་གསོལ་འདེབས་མཁྱེན་པར་མཛོད། །མ་ག་དྷ་སོགས་རིག་འབྱུང་གནས་(ཉ༡༦བ)

[Full Size]

ནི་སྡིག་ཏོ་ཡི། །དམག་ཚོགས་ཀྱིས་བཅོམ་ཨཽ་རྒྱན་ཁ་ཆེ་བལ་ཡུལ་ཡང༌། །ལོག་སྤྱོད་ཀྱིས་ཁེབས་དེང་སང་བསྟན་སྲོག་ལེགས་གནས་ནི། །བོད་ཡུལ་འདིར་ཟད་སྐྱེས་ཆེན་བྱང་ཕྱོགས་ཞབས་སྐྱོད་ཞུ། །སེམས་པ་གཞན་བཏང་ཁྱོད་ལ་ཡིད་བྱེད་གཅིག་པུ་ཡིས། །ཅིར་ཡང་མ་ཆགས་དཀའ་བ་དུ་མ་ཁྱད་བསད་ཅིང༌། །འདོད་པའི་ཡུལ་སྤངས་བཤུལ་རིང་བགྲོད་དཀའི་ལམ་ཞུགས་སྟེ། །ངལ་བརྒྱས་མཆིས་སོ་རེ་བ་མ་ལུས་མཆིས་པར་མཛོད། །རྒྱལ་སྲས་ཁྱེད་ལ་དོན་འགྱུར་གདུལ་བྱ་རྗེས་འཛིན་ལས། །གཞན་ལྟ་ཅི་མཆིས་ནུས་ཡོད་བཞིན་ཡང་བྱམས་པའི་ཕས། །བསད་སར་བུ་ཁྲིད་ཅི་དགར་ཡལ་དོར་འདྲར་གྱུར་ན། །ཀྱེ་མ་ཁྱེད་ཐབས་ཐུགས་རྗེ་གང་ལགས་བདག་ལ་གསུངས། །ཅེས་པའི་ཞུ་ཡིག་སམ་ཀྲྀ་ཏར་བྲིས་གསེར་གྱི་ཤེར་སྙིང་བོད་ཡིག་མ་གཅིག་དང་མི་ཉག་གྷའི་དར་ཆེན་གྱི་ན་བཟའ་ཟུང་ཇུ་ཟབ་ཀྱི་བླ་རེས་བཟང་པོ་དང་བཅས་ཁ་ཆེའི་པཎ་ཆུང་ལ་སོགས་པ་བཞི་མངགས། ཆོས་རྗེ་ལ་དྲུ་བར་ཞག་གསུམ་འཐེན་པའི་ཕྱི་ཉིན་འཁོར་རྣམས་ཕྱིར་འགྲོ་བའི་ཆས་བྱེད་པའི་ཚེ་ཕོ་ཉ་བ་བཞིས་སླེབས་སྟེ་ཞུ་ཡིག་ཕུལ། ཆོས་རྗེས་པཎ་ཆུང་དགུ་པོ་ལ་བཀའ་བགྲོས་པ་ན་གནས་སྐབས་འདི་འདྲ་བདག་ཅག་གིས་ག་ལ་ཤེས་ཆོས་རྗེ་ཉིད་མཁྱེན་པར་ཟད་ཏོ་ཟེར་སྒྲོལ་མ་ལ་ཞུའོ་གསུངས་ནས་ཞག་ལྔར་མཚམས་མཛད། ལྟས་བཟང་པོ་བྱུང་ནས་འབྱོན་པར་དགོངས་ཚེ་ཛ་གདྡྷ་ལའི་གནས་བརྟན་ཆེན་པོ་གཉིས་ཀྱིས་དགེ་འདུན་སྟོང་ཕྲག་གསུམ་ཁྲིད་རྒྱ་གར་ན་ངོ་ཆེན་གལ་ཅན་ལ་རྟེན་གདན་འདྲེན་པས་ཀླུ་སྒྲུབ་ཀྱིས་རབ་གནས་མཛད་པའི་ཐུགས་རྗེ་ཆེན་པོ་དང་པཎ་ཆེན་གྱི་ཐུགས་དམ་ཡིན་པས་སྒྲོལ་མའི་སྐུ་ཡང་དགོས་ཟེར་ནས་ཙནྡྲ་གོ་མི་ཏཱ་ར་སྤྱན་དྲངས་པ་སླེབས། ཆོས་རྗེས་ཀྱང་ལུགས་བཞིན་གསུ་བ་དང་འདུད་པ་མཛད། པཎ་ཆུང་གིས་དཀོན་གཉེར་ལ་གསུང་བྱིན་སྟེ་སྒྲོལ་མ་ཞལ་ཕྱིར་བསྒྱུར་ཤིང་རྟའི་གཟེར་ལྕག །འོན་ཀྱང་རྟེན་གྱི་ངོ་ཆེན་ལ་མི་ཉན་པའི་སྲོལ་མེད་(ཉ༡༧ན)

[Full Size]

ནས་རེ་ཞིག་ཕྱིར་བྱོན། ལོ་ཙཱ་བས་དེ་མནལ་ལམ་དུ་མཁྱེན་ནས་རྣམ་སྲས་གནད་ལ་བོར། ཆོས་རྗེ་ཞག་ཁ་ཅིག་བྱོན་ནས་ཞག་བདུན་དུ་སྐོར་མཆོད་མཛད་ཀྱང་ཐུགས་མ་ཕེབས། མནལ་ལམ་དུ་ལྷ་གསུམ་པོ་དེས་རྟག་དུ་བསྐུལ། རྗེ་བཙུན་མས་དགེ་འདུན་ནི་ནོར་འདོད་ཀྱི་ཆོས་མི་འདོད་པས་མགྲོན་བུས་ཚིམ། ངའི་གཟུགས་ནི་ཁྲོས་ནས་ཁ་ཕྱིར་ལོག །ཐུགས་རྗེ་ཆེན་པོའི་སྐུའང་ཤིང་རྟའི་གཟེར་ཆག་སྟེ་ཞབས་གོང་པོར་སོང༌། འདིར་ཅི་བྱེད་བྱང་ཕྱོགས་སུ་སོང་ཞིག་སོང་ཞིག་གསུང་བས་སླར་དགེ་འདུན་ལ་ཞུས་སྟེ་ཕྱིར་ཆས་ཚེ་ལོ་ཙཱ་བའི་མནལ་ལམ་དུ་རྣལ་འབྱོར་སྐྱིད་ཀྱི་མིང་པོས་ཡི་གེ་ཞིག་ཕུལ་བ་གཟིགས་པས་དགེ་སློང་བཻ་ཤྲ་ཝ་ཎས་སྤྲིངས་པ་ད་སྟེ་ཞག་བཅུ་གསུམ་ན་བྱམས་པ་ཤཱཀྱ་ཤྲཱི་འབྱོན་པར་ཡོད་སྟེ་དེར་མ་འདུག་པར་སྔོན་ཏུ་ལྡང་བ་བྱེད་པ་ལ་གྲོང་ཁྱེར་ཀ་རུ་ཎར་ཤོག་བྱ་བ་འདུག །ཡི་གེ་རྒྱ་ཡིག་དུ་འདུག་པ་བཀླགས་པས་བོད་ཡིག་དུ་སོང༌། སང་སྟེ་དགྱེས་ཆེས་ནས་ཏེ་ཏེ་བརྡུངས་པས་ཞབས་ལ་ཆུ་འབྲུམ་གན་ཊཱ་བ་ཟུག་ཅན་གྱིས་བཞེངས་མི་མཁྱེན་པ་ཡོད་ཀྱང་ཞར་ལ་རྡོལ་བས་གཞི་མེད་དུ་དྭངས། དགའ་སྟོན་གྱི་དྲིལ་སྒྲོགས་པ་ལ་ཚོགས་ཆེན་པོར་བྱེད་པས་པཎ་ཆུང་བ་གཉིས་སྔོན་ལ་འོངས་པ་རྐང་པ་ན་ནས་མནལ་ལམ་གྱི་དུས་ཉིད་ལ་རྣལ་འབྱོར་སྐྱིད་ཀྱི་མིང་པོས་བཀའ་ཤོག་ཁྱེར་སྟེ་ཕུལ་བ་བསྒྱུར་བས། རྗེ་བཙུན་མི་ཕམ་མགོན་པོ་ལ་ཕྱག་འཚལ་ལོ། །བྱང་ཕྱོགས་རྒྱུད་གནས་བདེ་གཤེགས་བསྟན་པའི་སྒྲོན་འཛིན་པ། །མ་ལུས་འགྲོ་དཔལ་བྱ་དཀའི་རྒྱལ་སྲས་སྤྱད་པ་སྤྱོད། །དགེ་སློང་མཁས་པ་ཁྲོ་ཕུ་ལོ་ཙཱར་རབ་གྲགས་གང༌། །བྱམས་ཆེན་འཕྲིན་ལས་ཡིད་བཞིན་ནོར་ལྟར་འགྲུབ་གྱུར་ཅིག །དགེ་སློང་བསོད་སྙོམས་པ་ཤཱཀྱ་དཔལ་བཟང་པོས་ཁྲོ་ཕུ་ལོ་ཙཱ་བ་ལ་ཐུགས་དགྱེས་པའི་སྒོ་ནས་ཤིས་པ་བརྗོད་པའོ། །ཞེས་པ་དང་བྱང་ཆུབ་ཤིང་ལོ་འདབ་མ་གསུམ་ཤ་ཁར་ཕུལ་གང་བསྐུར་འདུག །ལོ་ཙཱ་བ་དང་མཇལ་ཚེ་ལོ་ཙཱ་བ་མཁྱེན་རྟོགས་མཐའ་དག་རྫོགས་ཟིན་ཡང་དགུང་ལོ་སོ་གསུམ་(ཉ༡༧བ)

[Full Size]

པ་སྤྱིར་སྐུ་མཛེས་ཤིང་གཞོན་ཤ་ཆེས་ཆགས་པའི་ན་ཚོད་གཟིགས་པས་འདི་བཙུན་ཆུང་ལྟ་བུ་ཞིག་འདུག་པས་ཆོས་སྒྱུར་མི་ནུས་སམ་ལྷ་ཡང་བཞེང་ཐུབ་སྟེ་མི་འོང་ཁོ་རང་ལ་སེམས་སྐྱེད་དང་ཡི་དམ་ཞིག་བྱིན་ནས་ཕྱིར་ལྡོག་པར་བྱའོ་ཞེས་གསུངས་ཚེ་པཎ་ཆུང་དེས་ཁྱེད་ཀྱི་ན་ཚོད་ལ་བརྙས་པར་འདུག་པས་རང་གི་ཡོན་ཏན་སྟོན་ཟེར་ནས་བི་བྷཱུ་ཏི་ཙནྡྲ་དང་སུ་ག་ཏ་ཤྲཱི་སོགས་པཎ་ཆུང་དགུ་ལ་རང་གང་ལ་མཁས་ཟེར་བའི་སྒྲ་ཚད་སྡེ་སྣོད་མདོ་སྔགས་ལ་དྲི་བ་གསུམ་གསུམ་མཛད་པས་གུང་ཚིགས་སྔ་བ་ནས་ནམ་ཕྱེད་འདས་པར་སོང༌། ཆོས་རྗེའི་ཐུགས་དམ་ནར་མ་རྣམས་ཆུ་ཚོད་སོ་སོའི་དུས་ལས་ཐུགས་བྲེལ་ཅིས་ཀྱང་འདར་མེད་ནའང་ཇི་མི་སྙམ་པར་གསན་ཞིང་འདི་ལྟ་བུའི་ཆོས་ཐོས་པ་བསོད་ནམས་ཆེ་གསུང་ཞིང་པཎ་ཆེན་དཔོན་སློབ་ཐམས་ཅད་ཧ་ལས་སྟེ་བོད་ལ་འདི་ལྟ་བུའི་ཆོས་སྨྲ་བ་འོང་བ་ངོ་མཚར་ཆེ། འདིའི་མདུན་ན་ལོ་ཙཱ་བ་གཞན་རྣམས་དིག་པར་འདུག་གསུང་ཞིང་མཚན་ཡང་མ་ཧཱ་ལོ་ཙཱ་བ་འབའ་ཞིག་ནས་བརྗོད། དེ་ཕྱིན་ལོ་ཙཱ་བ་བྱོན་པའི་ཚེ་པཎ་ཆུང་དགུ་པོ་ལངས་ནས་རྒྱང་རིང་པོར་བཀྱེད། ཐལ་མོ་སྦྱར་སྟེ་མ་ཧཱ་པཎྜི་ཏ་མ་ཧཱ་ལོ་ཙཱ་བ་ཕ་ལ་ཕ་ལ་ཞེས་ཕན་ཚུན་རིག་རིག་པོར་བལྟ་སྐད། ཆོས་རྗེ་ཡང་ཐུགས་བཏེག་ཆེས་པས་སང་རང་འགྲོ་གསུང་བ་ན་བསྟན་བཅོས་ཅིག་གི་ཐུགས་རྩོམ་ཞུས། རྒྱལ་ཕྲན་ཞིག་ལ་ལམ་དཀའ་བའི་ཐབས་འཕྲུལ་གྱིས་ཐུགས་ངང་བསྲིངས། པཎ་ཆེན་ཐུགས་རྗེ་ཆེ་བས་མགོན་མེད་མང་པོ་སྐུ་ལ་འཁོར་བ་སོགས་སྐུ་འཁོར་ཕལ་ཆེར་ལ་མདོ་ལི་དགོས་པ་དང་མདོ་ལི་མི་ཐར་བའི་ས་ལ་འཛེག་རུ་བསྒྱུར་དགོས་པ་སོགས་གཞན་གྱིས་ལོ་ཟླར་སྒྲུབ་མི་ནུས་པ་རྣམས་ལོ་ཙཱ་བས་བདེ་བླག་དུ་བསྒྲུབས། དེ་ལྟར་ལོ་ཙཱ་བ་ཆེན་པོ་ཡོན་ཏན་བརྗོད་པར་དཀའ་བ་དེའི་དད་པ་དང་མཁྱེན་པ་དང་ནུས་པས་པཎ་ཆེན་དབང་དུ་འདུས་པ་ལྟར་གྱུར་སྟེ་ཅི་བཞེད་པར་བོད་དུ་སྤྱན་དྲངས་ནས་ཆོས་མང་དུ་བསྒྱུར། གཙང་དབུས་ལྷོ་བྲག་གཉལ་བྱར་རྣམས་སུ་བསྡོམས་པར་ལོ་(ཉ༡༨ན)

[Full Size]

བཅུ་ཙམ་བཞུགས། དཔྱལ་ལོ་ཞང་ལོ་ས་ལོ་ཆག་ལོ་སོགས་ལོ་ཙཱ་བ་མང་དུ་ཕྱགས་ཕྱིར་ཡོད་ཀྱང་ཁྲོ་ལོ་ཁོ་ན་དང་ཟླ་མེད་པའི་ལོ་པཎ་ཟུང་གཅིག་མཛད་དེ་བསམ་ཡས་ཀྱི་ཡུ་འབོག་ཆོས་ཁྲི་སོགས་ལ་ལོ་པཎ་བསྒྲིགས་ནས་ཆོས་གསུངས། འབུལ་བ་མཐའ་ཡས་པ་བྱུང་བ་ཐམས་ཅད་ཁྲོ་ཕུའི་བྱམས་ཆེན་ཁོ་ནའི་རྒྱུར་ཕུལ། བྱམས་ཆེན་ཟངས་གསེར་ལས་གྲུབ་པ་ཁྲུ་བརྒྱད་བཅུ་བ་ཕོ་བྲང་དང་བཅས་པ་གྲུབ་ནས་རབ་གནས་ལ་ཕྱོགས་པའི་ཚེ་དགྲ་བཅོམ་པས་བསྐུར་བའི་མེ་ཏོག་དང་རིང་སྲེལ་ཁ་ཕྱེ་ནས་དེའི་ལོ་རྒྱུས་པཎ་ཆེན་ཇི་ལྟར་གསུང་བ་ལོ་ཙཱ་བས་བསྒྱུར་པ་ནི། དེ་ཡང་འདི་ལྟར་ཐོས་སྟེ་མ་བྱོན་པའི་སངས་རྒྱས་གསུམ་པར་འགྱུར་ངེས་པ་ཆོས་རྗེ་པཎ་ཆེན་ཤཱཀྱ་ཤྲཱིའི་མཚེ་མར་གྱུར་པའི་མཆེད་ཟླ་ཁ་ཆེའི་པཎྜི་ཏ་ཆེན་པོ་བུདྡྷ་ཙནྡྲ་སངས་རྒྱས་ཟླ་བ་ཞེས་བྱ་བས་ཛམྦུའི་གླིང་གི་གླིང་ཕྲན་སིངྒྷ་ལ་སིངྒྷ་གླིང་པ་དྭི་པ་ཞེས་པ་བྱ་བ་སྔོན་སྲིན་མོ་གནས་པའི་གླིང་ཕྲན་ཞིག་ཇོ་བོ་སྤྱན་རས་གཟིགས་དབང་ཕྱུག་སྤྲུལ་པ་རྟའི་རྒྱལ་པོ་བཱ་ལ་ཧ་སྟོབས་ཆེན་ཞེས་པའི་འཕྲིན་ལས་ཀྱིས་བཏུལ་ནས་ད་ལྟ་ནང་པ་སངས་རྒྱས་པའི་བསྟན་པ་དར་བའི་གནས་སུ་གྱུར་ཡོད་པས་དེར་རཏྣ་ཙུནྡྷ་མ་ཎི་སྥ་ར་ན་རིན་ཆེན་གཙུག་གི་ནོར་བུ་འཕྲོ་བ་ཞེས་བྱ་བའི་ཕོ་བྲང་ན་དགྲ་བཅོམ་པ་དངོས་སུ་བཞུགས་སོ་ཞེས་བྱ་བ་ཐོས་ནས་ཁ་ཆེ་གྲིབ་བརྟན་གྱི་པྲ་ཝ་སུ་ར་རབ་མཆོག་ཞེས་བྱ་བའི་གཙུག་ལག་ཁང་ནས་དཔལ་རྡོ་རྗེ་གདན་དུ་བརྒྱུད་དེ་མ་ཧཱ་བོ་དྷི་ལ་མཆོད་པ་ཕུལ་ནས་དཀའ་བ་དུ་མ་སྤྱད་དེ་སིངྒྷ་གླིང་གི་དགྲ་བཅོམ་པའི་ཞལ་ཡང་བལྟས་དགྲ་བཅོམ་པ་ཡིན་ནམ་མ་ཡིན་གཏན་ལ་འབེབས་པའི་བརྟག་དཔྱད་མང་དུ་བྱར་ཡོད་པ་ལེགས་པར་བྱས་ནས་ཡིད་འཆེས་སྟེ་དེ་ཉིད་ཏུ་དབྱར་ཟླ་བ་གསུམ་ཚུལ་དུ་ཞུགས་སོ། །དགག་དབྱེ་ཐོན་ནས་ལྗོངས་རྒྱུ་བའི་དུས་སུ་དགྲ་བཅོམ་པ་དེ་ཉིད་ཀྱིས་དེ་བཞིན་གཤེགས་པའི་རིང་སྲེལ་ཡོད་པ་བ་སོའི་ཟ་མ་ཏོག་ཕྲ་རྒྱན་སྣ་ཚོགས་པས་སྤྲས་པ་ཅིག་དང་མེ་ཏོག་པདྨ་དཀར་པོ་ལྔ་ཁ་ཆེའི་པཎྜི་ཏ་དེ་ལ་གཏད་ནས་རིང་སྲེལ་གྱི་ཟ་མ་ཏོག་འདི་དང་ཟེའུ་འབྲུ་ཡོད་པའི་མེ་ཏོག་ཐོག་མ་ཁོ་ནར་དགེ་སློང་ཤཱཀྱ་ཤྲཱི་བྷ་དྲ་ལ་ཕུལ། མེ་ཏོག་(ཉ༡༨བ)

[Full Size]

ལྷག་མ་བཞི་པོ་འདི་ཁྱེད་ཀྱི་ལྷུང་བཟེད་དུ་ཁྱེར་ལ་ཁྱེད་རང་གི་མཆེད་ཟླ་ཀ་སྨི་ར་པ་⁽1763⁾ཁ་ཆེ་བ་དེའི་ཕྱག་དུ་རེ་ཞིག་གཏོད་ཅིག །དེ་མ་འོངས་པའི་སངས་རྒྱས་བདུན་པ་ཡིན་པས་བསོད་སྙོམས་སམ་ཡོན་ཅུང་ཟད་ཕུལ་ན་འབྲས་བུ་དཔག་དུ་མེད་པར་འགྱུར་རོ། །སིངྒྷ་གླིང་གི་དགེ་སློང་བི་ཧ་ར་ག་ས་⁽1763⁾འདོད་ཆགས་དང་བྲལ་བ་ཀུན་ནས་འབྱུང་གནས་སྦས་པ་མནྟ་ཀཱ་ར་གུཔྟ་ཅེས་བྱ་བས་བསྐུར་རོ་ཀྵེ་མ་ཀུ་ཤ་ལ་⁽1763⁾སྐུ་ཁམས་བཟང་ངམ་སྨྲོས་ཤིག་དེ་ནས་མེ་ཏོག་གཅིག་བྱང་ཕྱོགས་གངས་ཅན་གྱི་ཡུལ་དུ་དྭི་བྷ་ཥི་མཻ་ཏྲྀ་ཤྲི་⁽1763⁾སྐད་གཉིས་སྨྲ་བ་བྱམས་དཔལ་ཞེས་བྱ་བ་ཞིག་འབྱུང་བར་འགྱུར་ལ་དེ་པཎྜི་ཏའི་སློབ་མར་འགྱུར་སྟེ་དེ་ལ་པཎྜི་ཏ་ཆེན་པོས་བྱིན་ལ་ས་ཏྭ་རྠཀ་ར་⁽1763⁾སེམས་ཅན་གྱི་དོན་གྱིས་ཅིག་ཞེས་སྨྲོས་ཤིག་དེ་ནས་མེ་ཏོག་གཅིག་བོད་ཡུལ་གྱི་འབྲི་ཞེས་བྱ་བར་དྷྱ་ཡི། བི་ཀྵུ་རཏྣ་ཤྲི་⁽1763⁾སྒོམ་པའི་དགེ་སློང་རིན་ཆེན་དཔལ་བྱ་བས་པཎྜི་ཏ་ལ་ནོར་དང་ན་བཟའ་མང་པོ་འབུལ་དུ་འོང་སྟེ་དེར་སྦྲོན་ཡང་མ་གཤེགས་པར་སྐྱེས་ལན་ཆོས་ཀྱི་ཚིགས་སུ་བཅད་པ་གཅིག་དང་མེ་ཏོག་པདྨ་ཞིག་སྐུར་ཞིག །དེ་ནི་ཐུབ་པ་ཆེན་པོ་འདས་ནས་ལོ་བཞི་བརྒྱ་ན་བྱུང་བའི་འཕགས་པ་ཀླུ་སྒྲུབ་བསྟན་པ་བསྙིགས་ཤིང་ཡང་བསྙིགས་སུ་གྱུར་པ་ན་འགྲོ་བ་མ་རུང་པ་གཞན་གྱིས་གཏན་འདུལ་བར་མི་ནུས་པ་རྣམས་འདུལ་བའི་དོན་དུ་བྱོན་པ་ཡིན་པས་དེའི་ཆོས་སྟོན་པ་པོར་ཁྱེད་ཅག་མི་དགོས་པར་ཤེས་པར་གྱིས་ཅིག་ཞེས་སྨྲོས་ཅིག །དེ་ནས་བོད་ཡུལ་དབུས་ཀྱི་རཏྣ་ཀུ་ཊི་⁽1763⁾རིན་ཆེན་བྱུང་བ་ཞེས་བྱ་བའི་གཙུག་ལག་ཁང་ནས་དྷྱ་ཡི་པཎྜི་ཏ་ཞིག་གིས་འཁོར་དང་བཅས་པ་ལ་བསྙེན་བཀུར་རྣམ་པ་དུ་མ་བྱས་ནས་སྤྱན་འདྲེན་དུ་འོང་བས་དེ་མ་འོངས་པའི་སངས་རྒྱས་སྐལ་ལྡན་ཤིང་རྟ་ཞེས་བྱ་བ་ཡིན། དེ་ལ་མེ་ཏོག་འདི་ཕུལ་ལ་དབྱར་གནས་པས་ཐེག་པ་ཆེ་ཆུང་གི་ཆོས་མང་དུ་སྟོན་ཞིག་པཎྜི་ཏ་རང་གི་ལོ་གྲངས་དང་མཉམ་པས་ཕྱིར་མི་ལྡོག་པ་འཐོབ་པར་འགྱུར་རོ། །དེ་ནས་པཎྜི་ཏ་ཆེན་པོ་དེ་དང་དེའི་སློབ་མ་ནོར་བཟང་ཞེས་བྱ་བས་དེ་བཞིན་གཤེགས་པ་ཤཱཀྱ་ཐུབ་པས་འགྲོ་བ་མ་བསྒྲལ་བའི་ལྷག་མ་རྣམས་སྒྲོལ་བའི་དོན་དུ་སངས་རྒྱས་མི་ཕམ་པའི་སྐུ་ཚད་གཞེངས་དུ་གསོལ་ནས་དེའི་སྐུ་གསུང་ཐུགས་བྱིན་གྱིས་(ཉ༡༩ན)

[Full Size]

བརླབ་པ་ཞག་བཅུ་གསུམ་གྱི་བར་དུ་བྱེད་པར་འགྱུར་ཞིང་ལྷའི་རིས་བཅུ་གསུམ་གྱིས་ཀྱང་མཆོད་པའི་རིས་བཅུ་གསུམ་བྱེད་པར་འགྱུར་བས་དེའི་དང་པོར་མེ་ཏོག་འདི་དབུ་ལ་ཞོག་ཅིག །མེ་ཏོག་ལྔ་པོ་འདི་ཡང་ཟས་ཀྱི་བྱ་བ་ནམ་བྱེད་པའི་ཚེ་རིང་སྲེལ་གྱི་ཟ་མ་ཏོག་འདིར་ཆུག་ལ་མཆོད་པ་དང་མ་བྲལ་བ་གྱིས། མེ་ཏོག་དེ་རྣམས་རང་རང་གི་མཆོད་པ་ཇི་སྲིད་མ་ཚར་བའི་བར་དེ་སྲིད་བརྙིངས་པ་དང་སྟོར་བ་ལ་སོགས་པར་མི་འགྱུར་བར་བྱིན་གྱིས་བརླབས་ཡོད་ཏོ་ཅེས་གསུང་ངོ༌། །དེ་ནས་ཁ་ཆེ་པཎྜི་ཏས་ལྷུང་བཟེད་དུ་མེ་ཏོག་དང་ཟ་མ་ཏོག་བཅུག་ནས་སིངྒྷ་གླིང་ནས་ཛམྦུའི་གླིང་དུ་འོངས་སྟེ་ཡང་དབུས་འགྱུར་ཚལ་གྱི་བྱང་ཆུབ་ཆེན་པོ་མ་ཧཱ་བོ་དྷི་ལ་གཏང་རག་གི་ཕྱག་འཚལ་དུ་བྱོན་པའི་ཚེ་མ་ཧཱ་བོ་དྷིའི་ཕོ་བྲང་གི་ཐེམ་སྐས་ལ་འཛེགས་པ་དང་ཆོས་རྗེ་པཎ་ཆེན་མ་ཧཱ་བོ་དྷི་ལ་ཕྱག་འཚལ་ནས་ཕྱིར་གཤེགས་པའི་དོན་དུ་རྡོ་རྗེའི་ཐེམ་སྐས་ལ་འབབ་པ་དང་ལྷན་ཅིག་འཛོམ་པར་གྱུར་ནས་ཐེམ་སྐས་དེ་ཉིད་ཀྱི་སྟེང་དུ་སྔར་གྱི་གསུང་གླེང་རྒྱས་པར་མཛད་དེ་ཕན་ཚུན་གཉིས་ཀ་གཤེགས་བཞུད་མཛད་ཏོ། །གཏམ་རྒྱུད་འདི་དག་ནི་ཁྲོ་ཕུའི་གཙུག་ལག་ཁང་ཆེན་པོ་དགའ་ལྡན་གྱི་ཕོ་བྲང་དུ་ཁྲུ་བརྒྱད་བཅུ་པའི་བྱམས་ཆེན་མགོན་པོ་མཐར་ཕྱིན་ནས་རབ་གནས་མཛད་པའི་དུས་སུ་གདམས་ངག་དང་བཅས་པ་རྒྱས་པར་གསུངས་ཤིང་ཟ་མ་ཏོག་ཁ་ཕྱེ་བས་རིང་སྲེལ་གཅིག་ལས་ལྔར་འཕེལ་འདུག་གསུངས་ནས་ཟ་མ་ཏོག་རིང་སྲེལ་གསུམ་དང་བཅས་པ་ལོ་ཙཱ་བ་ལ་གནང༌། དུང་ཆུང་གཡས་སུ་འཁྱིལ་བ་གསུམ་གྱིས་བརྒྱན་སྟེ་བྱམས་ཆེན་གྱི་ཐུགས་ཀར་བཞུགས། རིང་སྲེལ་གཅིག་ཆོས་རྗེ་ཉིད་ཀྱིས་ཚགས་མཛད། གཅིག་ལོ་ཙཱ་བ་ལ་སྲུང་བའི་རྟེན་དུ་དགྲ་བཅོམ་པས་བསྐུར་བའི་མེ་ཏོག་དང་ལྷན་ཅིག་དུས་དེ་ཉིད་དུ་གནང༌། དེ་ནས་དགྲ་བཅོམ་པས་སྔར་བསྐུར་བའི་མེ་ཏོག་དཀར་པོ་དེ་བྱམས་ཆེན་གྱི་དབུ་ལ་བཞག་དེ་ཉིད་ཀྱི་ནང་པར་ནས་ཆུ་ཕོ་སྤྲེའུའི་ལོ་བྲེའི་ཟླ་བའི་ཚེས་བཅུ་གསུམ་ལ་རབ་གནས་ཆེན་པོ་མཛད་ཏོ། །ཅེས་བྱུང་ལ་སྐུ་དེ་ནི་བྱམས་པ་(ཉ༡༩བ)

[Full Size]

དངོས་སུ་བཞུགས་པ་ཡིན་ནོ། །མེ་ཏོག་པདྨ་སྤྱི་ལ་ཟེའུ་འབྲུའི་ཚབ་ཏུ་འདབ་མ་བརྒྱད་ཆུང་ངུ་ལྟེ་བ་སྦུབས་ཅན་དང་ཡུ་བ་ཤིན་དུ་མཉེན་ཞིང་འབོལ་བ་ཆུ་ནང་དུ་འགྱེལ་བ་ཞིག་ལས་མི་འབྱུང་བས་པདྨ་ཟེའུ་འབྲུ་ཅན་དང་སྡོང་པོ་ཅན་ཆེས་དཀོན་པས་ན་ཟེའུ་འབྲུ་ཅན་མཆོག་དུ་བྱས་པའོ། །བྱམས་ཆེན་གྱི་དོན་ཏུ་དགུན་ལ་ཆེན་པོ་སོགས་ལ་ཤིན་དུ་གྲང་བ་ན་ཡང་འོ་བརྒྱལ་ཞུས་པ་ན་སྐུ་འོ་བརྒྱལ་ཐུགས་འོ་བརྒྱལ་བ་མེད་གསུངས། སླས་པོ་ཆེར་བཞུགས་དུས་སྒྲོལ་མའི་བྲིས་སྐུ་གཅིག་གིས་ཁྱེད་སྐྱེ་བ་མང་པོའི་གོང་དུ་པཎྜི་ཏ་ཅིག་དང་བགྲོ་གླེང་བྱས་པས་ཁྱོད་རྒྱལ་རུང་ཞིག་བྱུང་ནས་དེ་ལ་ངན་སྨྲས་མང་པོ་བྱས། དེ་ཡུལ་ཤིན་དུ་གཉན་པ་ཅིག་ཡིན་པས་དེའི་རྒྱུས་སྐྱེ་བ་མང་པོར་ཚིག་རྩུབ་དང་ཁྲོ་བ་བྱུང་བ་ཡིན་གསུངས། དེའི་རྒྱུ་མཐུན་སྦྱང་ཕྱིར་གཉེན་པོ་དྲག་པོ་བསྟེན་པ་ཡིན་ཡང་ཚིག་རྩུབ་བག་ཙམ་ད་དུང་འཆོར་བར་འདུག་གསུངས། དེའི་ཚེ་དུས་འཁོར་ནས་བཤད་པའི་འཇིག་རྟེན་གྱི་ཆགས་ལུགས་ལམ་པ་ཅིག་གཟིགས། སྲིན་པོར་རི་རབ་གནས་ཅིག་གི་སྦྱིན་སྲེག་གི་ཚེ་སྲེག་རྫས་གཡོན་པས་ཕུལ་ཟེར་བ་བྱུང༌། ཆོས་ཟབ་མོ་གསུང་བའམ་སྔགས་བཟླ་བའམ་དབེན་པར་གནས་པའི་དུས་འཇམ་དཔལ་ཐུགས་རྗེ་ཆེན་པོ་བྱམས་པ་བྱང་ཆུབ་ཆེན་པོ་ཚོའི་སྣང་བ་ཤར་ནས་འོང་དེའི་ཚེ་མི་གཞན་མ་འོངས་ན་མ་བདེ་བའི་ཆོས་ཀུན་དྲིར་བཏུབ་པར་འདུག་གསུངས། དེ་དག་ལ་སོགས་དག་སྣང་དང་ཡོན་ཏན་བག་ཙམ་འཆར་བ་འདུག་སྟེ་མི་ལ་བསྒྲགས་ན་སྡིག་གསོག་ཞིང་གཡེང་བར་འགྲོ་གསུངས། ད་ལྟ་ཐུགས་དམ་ཇི་ལྟར་མཛད་ཞུས་པས། ང་དང་པོར་སྐྱབས་འགྲོ་སེམས་བསྐྱེད་བྱས། སྐད་ཅིག་གིས་ལྷར་གསལ་འདེབས། དེ་ནས་བྱམས་སྙིང་རྗེ་གཙོ་བོར་བྱས་ནས་ཡན་ལག་བདུན་པ་བྱེད། དེ་ནས་འཁོར་ལོ་བདེ་མཆོག་ལ་ཡི་དམ་དུ་བྱེད་སྟེ་སྐྱེད་རྫོགས་ཟུང་དུ་ཆུད་ཙམ་ཡོད། དེ་ནས་བླ་མ་ལ་མཎྜལ་ཕུལ་ནས་སྒྲོལ་མའི་རྩ་སྔགས་བཟླས་པས་ཡི་དམ་ལྷའི་དག་སྣང་འཆར་སྟེ་དེ་ལ་དྲི་རྒྱུ་ཡོད། དེ་ནས་ཛཾ་ལའི་ཆུ་སྦྱིན་བྱེད། བྱམས་པའམ་ཡུམ་ཆེན་མོའི་ང་རྒྱལ་གྱིས་སེམས་སྐྱེད་གསོལ་བ་བཏབ་སྟེ་སེམས་ཅན་ཐམས་ཅད་ལ་ཆོས་(ཉ༢༠ན)

[Full Size]

ཀྱི་སྦྱིན་པ་བྱ་སྙམ་པའི་དོན་ཅིག་སྒོམ། ཉི་མ་དྲོས་ནས་འདུལ་བའི་བསོད་སྙོམས་བྱེད། དེ་ནས་ཐུན་གསུམ་གོང་ལྟར་བྱེད་སྟེ་སྤྱིར་ཐུན་བཞིར་སྒོམ། གཉིད་བྲོ་ཙམ་ན་ཐིབ་ཐིབ་པ་དང་ལྷའི་སྣང་བ་གཉིས་འདྲེས་མར་འོང་ཞིང་གཉིད་ཚེ་དུས་འཁོར་གྱི་རྨི་ལམ་གྱིས་གདམས་པ་ཅིག་གིས་དུས་འདར་འཇུག །དགེ་སྦྱོར་གྱི་མཇུག་དུ་བཟང་སྤྱོད་དང་དགྱེས་རྡོར་སྨོན་ལམ་བདུན་བཅུ་པ་འདེབས་ཤིང་སྨོན་ལམ་གལ་ཆེ་གསུངས། འབྲི་ཁུང་པ་ལ་ལུས་ཀྱིས་མ་མཇལ་བའི་དོད་པོར་ཡིད་ཀྱིས་ཡང་ཡང་མཇལ་ལོ་གསུངས། མདོར་ན་བོད་དུ་ལོ་བཅུ་བཞུགས་སྟེ་མཐར་ཀསྨིར་དོན་ཆེན་པོ་གསུངས་ནས་སུས་ཀྱང་གཤོལ་མ་ཐེབས་སྟེ་ཁ་ཆེར་ཐེགས་ནས་དེར་བསྟན་པ་གཞི་བཞེངས་སུ་གཏད་ནས་ལོ་བཅུ་གསུམ་ན་ཡུལ་ཐམས་ཅད་འཇའ་འོད་དང་མེ་ཏོག་གི་ཆར་གྱིས་ཁྱབ་པའི་ལྟས་དང་བཅས་དགའ་ལྡན་དུ་གཤེགས། གདུང་བཞུ་བའི་ཚེ་ན་མཁའ་ལས་ལྷའི་རོལ་མོ་དང་བདེ་མཆོག་གི་ལྷ་ཚོགས་དང་སིལ་སྙན་བདུན་པའི་ཚིགས་བཅད་འདི་བྱུང་སྟེ། གཅིག་གིས་མ་ཚད་ལོ་བརྒྱའི་དུས། །བྱ་ལོའི་དཀར་ཕྱོགས་ཟླ་བ་ནི། །སྤེན་པའི་ཉི་མའི་ཚེས་ལྔ་ལ། །འགྲོ་བའི་ཉི་མ་ནུབ་པར་བསྟན། །ཀྱེ་ཧོ་ཚུར་གཤེགས་ཚུར་གཤེགས་ལོངས། །མ་འཇིགས་དཔའ་བོ་ཆེན་པོ་ཀྱེ། །འཆི་བ་རྣམ་རྟོག་ཙམ་ཡིན་ནོ། །ཞེས་བྱ་མཁའ་ལ་སྒྲ་ཆེན་སྒྲོགས། །རབ་མཛེས་རྣམ་མང་གཞལ་ཡས་ནས། །ཐོད་པའི་དུམ་སྐྱེས་མ་ལ་སོགས། །ཐལ་སྦྱར་གདུགས་དང་རྒྱལ་མཚན་ཐོགས། །གཞན་དག་སྣ་ཚོགས་རོལ་མོ་བྱེད། །བསྟོད་བཀུར་བསྔགས་དང་གླུ་རྣམས་ལེན། །གང་ན་དཔལ་ལྡན་བདེ་མཆོག་ཆེ། །སྐུ་བཞིའི་རྒྱལ་པོ་བླ་ན་མེད། །མཐོང་ཞིང་ཐོས་ལ་མངོན་གྱུར་ལྟོས། །འཇིག་རྟེན་ཁམས་ཀྱི་དབང་ཕྱུག་པོ། །རང་གི་ཚོགས་ཀྱི་འཁོར་དང་བཅས། །ལྷ་དང་དྲི་ཟ་ཀླུ་དབང་རྣམས། །འོངས་སྟེ་མཆོད་པའི་སྤྲིན་ཚོགས་གཏིབས། །ལྷ་ཡི་མེ་ཏོག་ཆར་བབ་ཅིང༌། །དྲི་ཞིམ་(ཉ༢༠བ)

[Full Size]

སྒྲ་སྙན་ལྷ་མོ་དང༌། །ཀླུ་མོ་གཞོན་ནུར་བཅས་རྣམས་དེར། །མཆི་མ་འབྱིན་ཞིང་མཆོད་པ་བྱེད། །དེ་ཚེ་ས་དག་རྣམ་དྲུག་གཡོས། །བརྒྱ་ཕྲག་གཉིས་བཅས་པཎྜི་ཏས། །མཐུན་པར་མཁའ་ལས་ཆོས་སྒྲ་འདི། །ཐོས་ནས་ཏིང་འཛིན་མཆོག་རེག་གྱུར། །ཞེས་གྲགས་པཎྜི་ཏ་ཉིས་བརྒྱས་མགྲིན་གཅིག་དུ་ཐོས་ཤིང་ཏིང་འཛིན་སྐྱེས། སོ་སོས་ཡི་གེར་བྲིས་སྟེ་ཕྱིས་ལོ་ཙཱ་བ་ཆེན་པོས་ཆོས་རྗེས་སྔོན་ནས་ང་འདས་པའི་འོག་དུ་བོད་ན་རྗེ་བཙུན་བྱམས་ཆེན་བཞུགས་པར་ངའི་རུས་པ་དང་རིང་སྲེལ་རྣམས་ཆུག །མ་ཧཱ་ལོ་ཙཱ་བས་མཆོད་རྟེན་གྲུབ་ཀྱང་ལེགས་སོ་ཞེས་པའི་ཕྱག་བྲིས་བཀོད་སྟེ་པཎྜི་ཏ་སུ་བྷ་མ་ཤྲཱི་⁽1763⁾འཇུག་ངོགས་དཔལ་དང་ཏྲི་ལོ་ཀྱཱ་ནནྡ་⁽1763⁾སྲིད་གསུམ་ཀུན་དགའ་གཉིས་ལ་ཡི་གེ་འདི་དང་ངའི་རུས་པ་མ་ཧཱ་ལོ་ཙ་བ་ལ་བོད་དུ་སྐྱོལ་ཞིག་ཞེས་བཀའ་བབ་ནས་དབུའི་གདུང་དང་རིང་སྲེལ་པཎྜི་ཏ་གཉིས་ཀྱིས་བཀའ་བཞིན་མ་ཧཱ་ལོ་ཙཱ་བ་ལ་ཕུལ་སྟེ་མཆོད་རྟེན་ཆེན་པོ་མཛད་ཏོ། །པཎ་ཆེན་འདི་ལྕགས་སྤྲེལ་འཁྲུངས་པའི་རེ་ལྔ་ལ་བོད་དུ་ཕེབས་པར་གྲགས་ཀྱང་སིལ་སྙན་འདུན་པ་ཉིད་ཡིད་འཆེས་ཀྱི་གནས་ཡིན་པས་མེ་ལུག་ལ་འཁྲུངས། དོན་བརྒྱད་པ་ཤིང་བྱི་ལ་བོད་དུ་ཕེབས། གྱ་བདུན་པ་ཆུ་བྱ་ལ་ཁ་ཆེར་བྱོན། གོ་དགུ་པ་ཤིང་བྱ་ལ་དགའ་ལྡན་དུ་གཤེགས་པ་ཡིན་ནོ། །དེང་སང་པཎ་ཆེན་འདིའི་མཚན་ལ་བསྟེན་ནས་འཚོ་ཞིང་རྒྱུད་འཛིན་དུ་ཁས་འཆེ་བ་རྣམས་ལའང་ལོ་པཎ་འདི་གཉིས་ཀྱི་ཆོས་དང་རྣམ་ཐར་གང་གིའང་རྒྱུས་མི་སྣང་ཞིང་སྤྱིར་ཡང་པཎ་ཆེན་གྱི་རྣམ་ཐར་དེང་སང་གྲགས་ཆེར་མི་སྣང་བས་མ་ཧཱ་ལོ་ཙཱ་བའི་དཔག་བསམ་གྱི་འཁྲི་ཤིང་དང༌། ཁྲོ་དཔྱལ་གྱིས་མཛད་པའི་རྣམ་ཐར་ཐོར་བུ་མཁས་པ་བསོད་ནམས་དཔལ་གྱིས་བསྡུས་པ་ལས་རང་གཟོ་མེད་པར་མདོར་བསྡུས་པ་ཡིན་ནོ། །པཎ་ཆེན་དེའི་སློབ་མ་རྒྱ་བོད་ན་མཐའ་ཡས་ཀྱང་འདུལ་བའི་སྡོམ་རྒྱུན་ནི་པཎ་ཆེན་དབུས་སུ་ཕེབས་དུས་ཆུ་ཤུལ་ཕྲོག་མ་དགོན་པར་མི་བཅུ་གཅིག་གིས་བསྙེན་རྫོགས་ཉིན་གཅིག་ལ་བསྒྲུབས་པའི་ནང་ནས་གྲུ་ཤུལ་འཁོར་གང་བྱང་ཆུབ་དཔལ་དང་གཙང་པ་རྡོ་རྗེ་དཔལ་གཉིས་ཀྱིས་ཕྱགས་ཕྱིར་འགྲོ་བར་ཞུས་པས་ཟུལ་ཕུའི་ན་བཟའ་འཕྲེད་གསོལ་ལ་འདུལ་བ་(ཉ༢༡ན)

[Full Size]

ཉོན་ལ་ཤོག་གསུངས་ནས་འདུལ་བ་བསླབས། པཎ་ཆེན་གྱི་བླ་མཆོད་ཇོ་བོ་སྟན་གཅིག་པ་གཙང་སོ་བ་བསོད་ནམས་མཛེས་ཀྱི་ཕྱགས་ཕྱིར་བཞག །འདི་ནི་པཎ་ཆེན་བོད་དུ་ཕེབས་པའི་ལམ་དུ་ལ་སྟོད་པའི་སྟན་གཅིག་པ་བཟང་པོ་ཅིག་གིས་བདག་གིས་བསྙེན་པར་རྫོགས་ནས་ལྟུང་བས་སྐད་ཅིག་ཀྱང་མ་གོས་པར་བགྱིས་བདོག་པས་དེ་བྱང་ཆུབ་ཏུ་བསྔོ་བར་ཞུ་ཞུས་པས་པཎ་ཆེན་ཕྱག་ཐལ་མོ་སྦྱར་སྟེ་དགེ་བའི་བཤེས་གཉེན་པ་བསྔོ་རྒྱུ་བཟང་ཁྱེད་ངའི་མཆོད་གནས་སུ་བཞུགས་པར་ཞུ་གསུངས་ནས་མཆོད་གནས་ཀྱི་གཙོ་བོ་མཛད་པ་དེ་ཡིན། པཎ་ཆེན་རྒྱ་གར་ལ་ཐེགས་དུས་བྱང་རྡོར་གྱིས་ཕྱགས་ཕྱིར་འགྲོ་བར་ཞུས་པས་རྒྱ་གར་དུ་ཚད་པ་མི་ཐུབ། བོད་དུ་གཙང་སོ་བ་ལ་བསྟེན་ལ་འདུལ་བ་ཤོད། དགེ་སློང་བཞི་སྡེ་རེ་མ་བྲལ་བ་གྱིས་གསུངས་དེ་ལྟར་མཛད། གཙང་སོ་བ་གཤེགས་ནས་སློབ་མ་སོ་སོར་བསྐྱངས་པས་མཁན་པོ་རྡོ་རྗེ་དཔལ་གྱི་རྗེས་སུ་སངས་རྒྱས་དཔལ། འོད་ཟེར་དཔལ། ཆོས་ཀྱི་རྒྱལ་མཚན། སངས་རིན། བསོད་ནམས་དཔལ། ཤེས་རབ་མགོན་པོ། སེང་གེ་རྒྱལ་མཚན། བསོད་ནམས་དབང་ཕྱུག་བཀྲས་ཚུལ་བ་སོགས་སྟེ་སྙེ་མོ་ཚ་མིག་དུ་བཞུགས་པས་ཚ་མིག་ཚོགས་པ་ཟེར་ལ་ཕྱིས་ཚོགས་ཆེན་པར་གྲགས། མཁན་པོ་སེང་རྒྱལ་ཡན་གྱི་ནང་རྟེན་ཡང་ཟུལ་ཕུར་བསྐྱལ་ལོ། །མཁན་པོ་སངས་རྒྱས་དཔལ་གྱི་གྲོགས་མཆེད་གཞུ་པ་དཀོན་མཆོག་བཟང་པོས་ཚོགས་བསྐྱངས་སྟེ་གཞུའི་བྱེ་རྫིང་དུ་བཞུགས། དེ་ནས་ཐུགས་རྗེ་དཔལ། དར་མ་དཔལ། ཀུན་དགའ་དཔལ། ཚུལ་ཁྲིམས་དཔལ། སངས་གཞོན། དར་མ་བཟང་པོ། ཚུལ་ཁྲིམས་མགོན། བསོད་ནམས་འོད་ཟེར། རིན་ཆེན་ཚུལ་ཁྲིམས། བསོད་ནམས་ཤེས་རབ། ཤེས་རབ་མགོན་པོ་ལ་སོགས་པ་སྟེ་བྱེ་རྫིང་པའོ། །མཁན་པོ་བྱང་ཆུབ་དཔལ་ས་སྐྱ་པ་འགྲོ་མགོན་ཆོས་རྒྱལ་འཕགས་པའི་མཁན་པོ་ལ་གོང་དུ་གདན་འདྲེན་བྱུང་བས་གཙང་པ་དབང་ཕྱུག་(ཉ༢༡བ)

[Full Size]

གྲགས་གདན་སར་བསྐོས་སྟེ་ཧོར་ཡུལ་ལ་བྱོན་པས་འདམ་དུ་ཕེབས་པའི་ཚེ་འཕགས་པ་བསྙེན་རྫོགས་མཛད་ཟིན་པ་གསན་ནས་སླར་ལོག་སྟེ་ཚོགས་པ་སར་དུ་བསྐྱངས་པས་སྡེ་གཉིས་བྱུང་སྟེ་མཁན་པོ་གཙང་པའི་རྗེས་སུ་དབོན་པོ་གཞོན་བྱང༌། འདུལ་ཚད་པ་བྱང་ཆུབ་བཟང་པོ། དོན་གྲུབ་དཔལ། ཡོན་ཏན་རྒྱལ་མཚན། དཔལ་གྲུབ་པ་ལ་སོགས་པ་བྱོན་སྟེ་གཞུའི་དགེ་འདུན་སྒང་དུ་བཞུགས་པས་དགེ་འདུན་སྒང་པར་གྲགས། འདིའི་མཁན་པོ་ལ་གནས་བརྟན་བཅུ་དྲུག་གང་རུང་རེ་བྱོན་པའི་ཚེ་ཀརྨ་པ་ན་རིམ་རེའི་མཁན་པོ་མཛད་པ་པཎ་ཆེན་གྱི་ལུང་བསྟན་ཡོད་ཅིང་ངེས་པ་ཅན་ཡིན་ཞེས་སྙག་དབོན་བསོད་ནམས་བཟང་པོའི་རྣམ་ཐར་ན་གསལ་བར་སྣང་ཞིང་སྙག་དབོན་ཆེན་པོ་ལ་ཀརྨ་པ་དེ་བཞིན་གཤེགས་པས་བསྙེན་རྫོགས་མཛད། དོལ་ཚལ་མིན་ཕུལ་ནས་སྡེ་ཆེན་པོ་བཏབ་སྟེ་བཞུགས། དེའི་སློབ་མ་འཕགས་ཆེན་བསོད་ནམས་དང་ཐོག་བརྡུགས་པ་དེས་བསྙུང་གནས་པའི་སྡེ་བསྐྱངས་པ་འཕགས་སྡེར་གྲགས། ཁོང་གི་སློབ་མ་བཞིས་སྡེ་སོ་སོར་བསྐྱངས་པ་ལ་འཕགས་སྡེ་བཞི་བྱུང་སྟེ་དགེ་འདུན་སྒང་པའི་ཡན་ལག་གོ །མཁན་ཆེན་བྱང་ཆུབ་དཔལ་གྱིས་ཚོགས་སར་དུ་བསྐྱངས་པ་ལ། བདེ་བ་དཔལ། བཀའ་བཞི་པ་གྲགས་གཞོན། བྱང་སེམས་བསོད་ནམས་གྲགས་པ། བསོད་ནམས་བཟང་པོ། གཞོན་ནུ་མགོན། གྲགས་པ་རྒྱལ་མཚན། གྲགས་པ་བཤེས་གཉེན་ལ་སོགས་པ་བྱོན་སྟེ་སྦར་སྟག་པ་ཇོ་སྟན་དུ་གྲགས་ཤིང་སྣུབས་ཆོས་ལུང་བཏབ་པ་ཕྱིན་ཆོས་ལུང་པར་གྲགས་སོ། །འདི་རྣམས་ཡར་ལུངས་ཇོ་བོའི་ཆོས་བྱུང་དང་ཚལ་པའི་དེབ་དམར་དང་པོ་ལས་གང་བཤད་པ་བྲིས་པ་ཡིན་ལ་དེབ་སྔོན་ལས་ཚོགས་པ་བྱེ་རྫིང་བ་ནི་དཀོན་མཆོག་རྒྱལ་མཚན། ཐུགས་རྗེ་དཔལ་ཞེས་སོགས་དང༌། ཆོས་ལུང་པ་ནི་དབུ་མཛད་བསོད་ནམས་སྟོབས་ཅེས་སོགས་སྣང་བ་ནི་ཆ་མ་འཚལ་ལ་ཆག་ལོ་གསུམ་པས་དུས་འཁོར་ཆོས་བྱུང་དུ་པཎ་ཆེན་ཤིང་བྱི་ལ་ཁྲོ་ཕུར་ཕེབས་(ཉ༢༢ན)

[Full Size]

དབྱར་གནས་མཛད། ལྷོ་བྲག་པ་བྱང་ཆུབ་དཔལ་བསྙེན་པར་རྫོགས། དེ་ནས་སླས་མོ་ཆེར་བཞུགས་དུས་གཙང་སོ་བས་མཇལ་དེར་དབྱར་གནས་མཛད། རྒྱན་གོང་དུ་རྡོ་རྗེ་དཔལ་ལ་བསྙེན་རྫོགས་གནང་ཞེས་བྱང་ཆུབ་དཔལ་བསླབ་པ་སྒྲེས་པར་བྲིས་སྣང་ཞིང་དེབ་དམར་བ་སོགས་ནི་དཀྱིལ་འཁོར་གཅིག་པར་འདོད་པར་སྣང་ལ། ཡང་བྱང་རྡོར་གཉི་ག་འཕགས་པ་རིན་པོ་ཆེའི་མཁན་སློབ་ལ་སྤྱན་དྲངས་ནས་བྱོན་ཡང་བསྙེན་པར་རྫོགས་ཟིན་པར་གསན་ནས་ལམ་ནས་ལོག་སྟེ་ཕྱིས་སོ་སོར་བསྐྱངས་པ་ཆོས་ལུང་པ་དང་བྱེ་རྫིང་པ་ཡིན་ཞེས་བྲིས་པའང་སྣང་ངོ༌། །དེས་ན་རྫོགས་པའི་སངས་རྒྱས། ཤཱ་རིའི་བུ། སྲས་དགྲ་གཅན་ཟིན། བྲམ་ཟེ་དགྲ་གཅན་ཟིན། ཀླུ་སྒྲུབ་ཞབས། ཡོན་ཏན་བློ་གྲོས། རིན་ཆེན་བཤེས་གཉེན། དྷརྨ་པཱ་ལ། གུ་ཎ་པ་ཏི། ཆོས་ཀྱི་ཕྲེང་བ། ཞི་འབྱུང་སྦས་པ། ཁ་ཆེ་པཎྜི་ཏ་ཆེན་པོ་སྟེ་ཕྱིས་བོད་ཡུལ་དུ་སྡོམ་རྒྱུན་རྣམ་པར་དག་པ་འཕེལ་ཞིང་རྒྱས་པ་ནི་པཎ་ཆེན་གྱི་སྡོམ་རྒྱུན་ཚོགས་སྡེ་བཞི་འདི་ཁོ་ན་ཡིན་པས་བཀའ་དྲིན་གཞལ་དུ་མེད་པ་ཡིན་ལ་རྩ་བའི་སྡེ་པ་བཞིའི་རྟེན་འབྲེལ་ཡིན་ནོ། །ལེགས་པར་བཤད་པ་མཁས་པའི་དགའ་སྟོན་གྱི་བོད་ཡུལ་གྱི་བསྟན་པ་ཕྱི་དར་གྱི་སྐབས་ལས་བསྟན་པའི་རྩ་བ་འདུལ་བའི་སྡོམ་རྒྱུན་དང་བཤད་རྒྱུན་ཇི་ལྟར་དར་བའི་སྐབས་སྟེ་གསུམ་པའོ། །༈ སྭ་སྟེ། ཀྱཻ་གླེགས་བུའི་ངོས་ལ་སེ་གཅོད་འགྲོས་མཁས་པ། །རིག་པའི་འབྱུང་གནས་གཉལ་གྱི་ཆོས་ལུང་ནས། །ཚེ་དབང་དར་པོ་ཚེ་དབང་དོན་གྲུབ་དང༌། །བློ་གསལ་རྣམ་རྒྱལ་བསམ་པ་ལེགས་གྲུབ་དང༌། །ཀུན་དགའ་བསམ་འགྲུབ་ཀུན་དགའ་རྒྱལ་མཚན་ཞེས། །བསམ་འགྲུབ་མགོན་པོ་བཀྲ་ཤིས་དགོས་དར་སོགས། །དཔོན་སློབ་རྣམས་ཀྱིས་སོར་མོའི་གར་སྟབས་བསྒྱུར། །སངས་རྒྱས་བསྟན་པ་དར་ཞིང་རྒྱས་པ་དང༌། །ཕ་མས་ཐོག་དྲངས་མ་གྱུར་སེམས་ཅན་རྣམས། །བདེ་བ་ཅན་དུ་སངས་རྒྱས་གོ་འཕངས་ཐོབ་པར་ཤོག། ཤུ་བྷཾ྄།། །།(ཏ༡ན)

ལོ་པན་ཆོས་འབྱུང་།

[Full Size]

དམ་པའི་ཆོས་ཀྱི་འཁོར་ལོས་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བ་ལས་ཡན་ལག་གསུམ་པ་བོད་ཀྱི་སྐབས་ལ་ལེའུ་བཅུ་ལས་བཞི་པ་ལོ་པཎ་ཆོས་བྱུང་བཞུགས།(ཏ༡བ)

[Full Size]

སྤྲུལ་པའི་ཆོས་རྒྱལ་དམ་པ་དེ་རྣམས་ཀྱི། །གཞལ་དུ་མེད་པའི་ཐུགས་རྗེའི་བཀའ་དྲིན་ལས། །འཕགས་པའི་ཡུལ་དང་ཁྱད་པར་དབུས་འགྱུར་ཚལ། །ཀསྨི་ར་དང་ཟ་ཧོར་བལ་པོ་དང༌། །རྒྱ་ནག་ལ་སོགས་ཐུབ་བསྟན་དར་བའི་ས། །དམ་པའི་ཆོས་ཀྱི་འབྱུང་ཁུངས་ཆེ་རྣམས་ནས། །ཐུན་མོང་རིག་གནས་གཟོ་གསོ་སྒྲ་ཚད་བྱུང༌། །ཁྱད་པར་སྡེ་སྣོད་གསུམ་དང་རྒྱུད་སྡེའི་ཚོགས། །ནང་དོན་རིག་པའི་གནས་ལ་མངའ་བརྙེས་པའི། །པཎྜི་ཏ་དང་རིག་པ་གྲུབ་པའི་ཚོགས། །མང་ཞིག་བོད་ཀྱི་ཡུལ་དུ་བྱོན་ནས་ནི། །སྐལ་ལྡན་སྐྱེ་འགྲོ་མཐའ་ཡས་སྨིན་གྲོལ་མཛད། །རྒྱ་བོད་ཡུལ་གྲུའི་སྐད་གཉིས་ལ་བྱང་ཞིང༌། །ལེགས་སྦྱར་བརྡ་སྤྲོད་གནས་ཀུན་ཁོང་ཆུད་པ། །འཇིག་རྟེན་མིག་གྱུར་ལོ་ཙཱ་རྣམས་ཀྱིས་ནི། །འཛམ་གླིང་ཡུལ་གྲུ་དུ་མ་མྱུལ་མཛད་ནས། །མདོ་རྒྱུད་བསྟན་བཅོས་ངོ་མཚར་རྙེད་དཀའ་རྣམས། །སང་སྐྲྀ་ཏ་དང་ཡུལ་གྲུ་སྣ་ཚོགས་པའི། །སྐད་དང་ཡི་གེ་བརྡ་དང་ཐ་(ཏ༢ན)

[Full Size]

སྙད་ཚོགས། །རྣམ་མང་རྒྱ་མཚོ་ལྟ་བུར་གནས་པ་ལས། །རང་ཅག་བོད་ཡུལ་སྐྱེ་བོའི་ཡི་གེ་དང༌། །བོད་ཀྱི་སྐད་དུ་བསྒྱུར་སྟེ་གོ་སླར་མཛད། །སླར་ཡང་རྒྱ་དཔེའི་བྱེ་བྲག་དུ་མ་དང༌། །པཎྜི་ཏ་ལ་གཏུགས་སྟེ་དག་པར་བཅོས། །བཤད་རྒྱུན་སྒྲུབ་རྒྱུན་མན་ངག་རྒྱུན་ལྡན་པའི། །བཤད་ཉན་ཚུལ་བཞིན་སྤྱོད་པས་གཏན་ལ་ཕབ། །དེ་ཕྱིར་ལོ་པཎ་དམ་པ་དེ་རྣམས་ཀྱི། །བཀའ་དྲིན་ཁྲག་ཁྲིག་བྱེ་བའི་ཆ་ཙམ་ཡང༌། །རང་ཅག་བོད་ཡུལ་སྐྱེ་བོ་ཐམས་ཅད་ཀྱི། །ལུས་སྲོག་ལོངས་སྤྱོད་བཅས་པ་ལན་སྟོང་དུ། །ཚང་བར་ཕུལ་ཡང་ཆ་ཙམ་ག་ལ་ཁེར། །བོད་ཡུལ་རྨོངས་པའི་མུན་པ་ཀུན་བསལ་ནས། །ཡང་དག་ཆོས་ཀྱི་སྣང་བ་རྒྱས་མཛད་པ། །བོད་ཡུལ་བྱོན་པའི་ལོ་པཎ་ཐམས་ཅད་ལ། །བཀའ་དྲིན་དྲན་པས་རྟག་དུ་ཕྱག་བགྱིའོ། །རྒྱ་གར་གྱི་སློབ་དཔོན་ཀུ་ས་ར་བྲམ་ཟེ་ཤི་ཀ་ར། ཁ་ཆེ་ཏ་ནུ། བྲམ་ཟེ་ཨཱ་ནནྟ། བལ་པོ་ཤྲཱི་ལ་མཉྫུ། ཧ་ཤི་མ་ཧཱ་དེ་ཝ་ཆེ་སྟེ་ཆོས་རྒྱལ་སྲོང་བཙན་གྱི་དུས་བྱོན་པ་རྣམས་དང༌། བུདྡྷ་གུ་ཧྱས་སངས་རྒྱས་གསང་བ། བུདྡྷ་གུ་ཤཱནྟས་སངས་རྒྱས་ཞི་བ་འདི་གཉིས་གངས་ཏི་སེར་བྱོན་ནས་བཞུགས། རྒྱལ་པོ་མེས་ཨག་ཚོམས་ཀྱིས་སྤྱན་དྲངས་ཀྱང་མ་བྱོན། མདོ་སྡེ་ལྔ་བསྐུར་ནས་ཕྱིས་བསྟན་པ་འབྱུང་བར་བྱིན་གྱིས་བརླབས་པའི་དྲིན་ཅན་ཡིན། ཞི་བ་འཚོ་ནི་རྒྱ་གར་ཤར་ཕྱོགས་ས་ཧོ་ར་ཟ་ཧོར་གྱི་ཆོས་རྒྱལ་གྱི་སྲས། གཞི་ཐམས་ཅད་ཡོད་སྨྲའི་སྡེ་པ། སྡེ་སྣོད་རིག་གནས་ཐམས་ཅད་འཛིན་ཞིང་བོད་ཀྱི་དོན་ཁོ་ནར་སྨོན་ལམ་བཏབ་སྟེ་བྱོན་པ་(ཏ༢བ)

[Full Size]

ལོ་དགུ་བརྒྱ་འདས་སྟེ་བོད་ཡུལ་དུ་བྱོན་ནས་བོད་ཡུལ་དུ་ལོ་བཞི་བཅུར་ཟིན་པ་བཞུགས་སྟེ་བསམ་ཡས་སུ་མྱ་ངན་ལས་འདས་པའོ། །པདྨ་འབྱུང་གནས་ནི་བོད་ཀྱི་མི་མ་ཡིན་འདུལ་བའི་དོན་དུ་པདྨ་ལས་བརྫུས་སྟེ་སྐྱེས་པ་རིག་འཛིན་མཐའ་དག་གྲུབ་པ། ཡོ་གའི་ཕྱག་རྒྱའི་སྒོ་ནས་ལྷ་སྲིན་ཐམས་ཅད་བཏུལ། ད་ལྟ་རྔ་ཡབ་གླིང་ན་སྲིན་པོའི་རྒྱལ་པོར་བཞུགས་པའོ། །ཡོ་གའི་སློབ་དཔོན་དྷརྨ་ཀིརྟི་འདི་བསམ་ཡས་ཀྱི་རབ་གནས་མཁན་པོར་བུ་སྟོན་བཞེད། བི་མ་ལ་མི་ཏྲ་དྲི་མེད་བཤེས་གཉེན་འདི་དགའ་རབ་རྡོ་རྗེའི་དངོས་སློབ་སྟེ་ཕྱག་རྒྱ་རྒྱ་ཆེན་ཞེས་བཱི་མ་ལ་མུ་ཏྲ་དག་པར་ཀློང་ཆེན་པ་འཆད། དེབ་སྔོན་པས་འདི་བཱི་མ་ལ་སྔ་མར་བྱས་ནས་རྣལ་འབྱོར་པའི་ཆ་བྱད་ཅན་ཡིན་ཟེར་ཡང་ཁུངས་མེད་པས་པཎ་ཆེན་དུ་སྐུ་འདྲ་རྙིང་མ་རྣམས་ལ་ཡོད། ཤཱནྟི་གརྦྷ་ཞི་བ་སྙིང་པོ། བི་ཤུདྡྷ་སིངྷ་རྣམ་དག་སེང་གེ་རྒྱ་ནག་གི་ཧྭ་ཤང་མ་ཀོ་སེ་དང་རྦ་རཏྣ་འདི་ཤེས་ཕྱིན་འབུམ་ཐོག་མར་བསྒྱུར་བའི་ལོ་པཎ་ཡིན། ཀ་མ་ལ་ཤཱི་ལ་པདྨའི་ངང་ཚུལ་འདིས་ཧྭ་ཤང་མ་ཧཱ་ཡ་ན་རྩོད་པས་ཆོས་སུ་བཏུལ་སྟེ་དེ་རྣམས་ཁྲི་སྲོང་གི་དུས་ཀྱི་པཎ་ཆེན་ནོ། །ཀལྤ་མི་ཏྲ་དུས་ཀྱི་བཤེས་གཉེན། ཛི་ན་མི་ཏྲ་རྒྱལ་བའི་བཤེས་གཉེན། སུ་རེནྡྲ་བོ་དྷི་ལྷ་དབང་བྱང་ཆུབ། ཤཱི་ལེནྡྲ་བོ་དྷི་ཚུལ་ཁྲིམས་དབང་པོ་བྱང་ཆུབ། དཱ་ན་ཤཱི་ལ་སྦྱིན་པའི་ངང་ཚུལ། བོ་དྷི་མི་ཏྲ་བྱང་ཆུབ་བཤེས་གཉེན། མུ་ནེ་ཝརྨ་ཐུབ་པའི་གོ་ཆ། སརྦ་ཛྙཱ་དེ་ཝ་ཀུན་མཁྱེན་ལྷ། དཱི་ནྱ་པྲ་བྷ་རིག་བྱེད་འོད་ཟེར་སྟེ་བསྟན་པ་སྔ་དར་གྱི་པཎྜི་ཏའོ། །ཤྲཱི་ཀ་ར་ཝརྨ་དཔལ་འབྱུང་གོ་ཆ། དྷརྨ་པཱ་ལ་ཆོས་སྐྱོང་འདི་ནས་སྟོད་འདུལ་དར། པྲཛྙཱ་པཱ་ལ་ཤེས་རབ་སྐྱོང༌། བུདྡྷ་པཱ་ལ་སངས་རྒྱས་སྐྱོང༌། ཁ་ཆེ་ཛྙཱ་ན་ཤྲཱི་ཞི་བ་བཟང་པོ། ཤྲཱདྡྷ་ཀར་ཝརྨ་དད་བྱེད་གོ་ཆ། པདྨ་གུཔྟ་པདྨ་སྦས་པ། མུཀྟི་མི་ཏྲ་གྲོལ་བའི་བཤེས་གཉེན། བུདྡྷ་ཤཱནྟ་ཤྲཱི་དཔལ་སངས་རྒྱས་ཞི་བ། སུ་བྷ་ཥི་ཏ་ལེགས་གསུངས། པྲཛྙཱ་ཝརྨ་ཤེས་རབ་གོ་ཆ། སྨྲྀ་ཏི་ཛྙཱ་ན་ཀི་རྟི་དྲན་པ་ཡེ་ཤེས་གྲགས་སྟེ་འདི་དང་པཎྜི་ཏ་ཕྲ་ལ་རིང་བ་གཉིས་ལོ་ཙཱ་བ་བལ་པོ་པདྨ་རུ་ཅེས་བོད་དུ་སྤྱན་དྲངས། མུ་སྟེགས་ཀྱི་བསྐྲད་ལས་བྱུང་ཀྱང་ཟེར་སྟེ་མངའ་རིས་སུ་ལོ་ཙཱ་བ་ཕོ་ལོག་གིས་ཤི། པཎྜི་ཏ་གཉིས་བོད་(ཏ༣ན)

[Full Size]

དུ་སྐད་མི་མཁྱེན་པས་འཁྱམས། སྨྲྀ་ཏིས་རྟ་ནག་དུ་རྫི་བོ་མཛད། ཕྱིས་དཔྱལ་ལོ་སེ་ཙ་བསོད་ནམས་རྒྱལ་མཚན་གྱིས་པཎྜི་ཏར་མཁྱེན་སྟེ་སྨན་ལུང་དུ་སྤྱན་དྲངས་ནས་ཆོས་ཞུས། ཕྱིས་བོད་སྐད་བྱང་བར་མཁྱེན་ཁམས་སུ་བྱོན། འདན་སློང་ཐང་དུ་མངོན་པ་མཛོད་ཀྱི་བཤད་པ་བཙུགས། བདེན་བཞི་དང་འཇམ་དཔལ་གསང་ལྡན་སྔགས་དོན་རྣམ་གཟིགས་གཉིས་མེད་རྣམ་རྒྱལ་ཆེན་མོ་སོགས་རང་འགྱུར་མང་པོ་མཛད། ལི་ཆུ་གསེར་ཁབ་ཏུ་བྱོན་ནས་བོད་ལ་ཉེ་བར་མཁོ་བའི་སྒྲའི་བསྟན་བཅོས་སྨྲ་སྒོ་མཚོན་ཆ་མཛད། གླིང་ཡུལ་དུ་གཤེགས་སྐུ་འབུམ་བྱས་སྟེ་ཡུལ་དེ་དྲན་པ་ཐང་དུ་གྲགས་སོ། །ཕྲ་ལ་རིང་བས་གཙང་རོང་ཏུ་རྫོགས་ཆེན་པ་རོང་པ་ཆོས་བཟང་གྲོངས་པ་ལ་གྲོང་འཇུག་བྱས་པས་རོང་པས་ཆོས་མང་པོ་ཏོལ་ཤེས་སུ་བྱུང་སྟེ་གཞན་ཕན་མཛད་ཅེས་བུ་སྟོན་བཞེད་ཏོ། །པུནྱ་ཤྲི་ལེགས་རིག་དཔལ། ཁ་ཆེ་ཛྙཱ་ན་ཤྲཱི། ཙནྡྲ་རཱ་ཧུ་ལ་དགྲ་གཅན་ཟླ་བ། དྷི་ར་པཱ་ལ་བསྟན་སྐྱོང་ཞེས་བྱ་སྟེ་འབུམ་ཕྲག་གསུམ་པར་གྲགས་པ་རྔོག་ལོ་ཆེན་པོའི་བླ་མ་འདིས་བུ་དོང་དུ་བྱོན། འབུམ་གསེར་བྲིས་ཅིག་ལ་རབ་གནས་ཞུས་པས་བགེགས་ཆེན་པོ་འདུག་གསུངས་ནས་ཆོས་ལ་སྟེགས་མཛད་དེ་བཞུགས། བཞེངས་སྟེ་བལྟས་པས་ཡིག་འབྲུ་གཅིག་ཀྱང་མི་འདུག་སླར་མེ་ཏོག་འཐོར་རིམ་གྱིས་ཡིག་འབྲུ་ཁྲ་ལམ་ལམ་བྱུང་སྟེ་དེ་ལ་རྟེན་གྱི་གཙོ་བོར་བྱས་སྟེ་བུ་དོང་གི་སྡེ་ཆགས་ཤིང་ས་གྲུ་གསུམ་སྐྱེ་གནས་ལྟར་ཡོད་པས་བུ་མོའི་དོང་ངམ་ཨེ་ཞེས་བཏགས། ཁ་ཅིག་སྔར་འདུལ་འཛིན་གཞན་ཞིག་གིས་བཏབ་སྟེ་པཎ་ཆེན་ལ་ཕུལ་ཞེས་ཀྱང་ཟེར་རོ། །དེར་བུ་དོང་རིན་རྩེ་ལ་སོགས་མཁས་པ་དཔག་མེད་བྱུང་ངོ༌། །ཨ་ཏུ་པྱེ་ད་ཤ་མཉམ་མེད་བཅུ་པ། སུ་མ་ཏི་ཀིརྟི་བློ་མཆོག་གྲགས་པ། ཨ་མ་ར་ཙནྡྲ་འཆི་མེད་ཟླ་བ། ཐིག་ལེ་བུམ་པ་གཞོན་ནུ་བུམ་པ། ཀ་ན་ཀ་ཝརྨ་གསེར་མདོག །དམ་པ་རྒྱ་གར། ཛ་ཡ་ཨཱ་ནནྟ་འདིས་བོད་དུ་བྱོན། པ་ཚབ་ཀྱིས་ལོ་ཙཱ་བྱས་སྟེ་ཕྱ་པ་དང་དབུ་མ་ཐལ་རང་ལ་རྩོད་པས་པཎྜི་ཏས་མ་ཐུབ། སླར་རྒྱ་ནག་རི་བོ་རྩེ་ལྔར་བྱོན་ནས་འཇམ་དཔལ་བསྒྲུབས། རི་བོ་རྩེ་ལྔའི་འདབས་སུ་འཇུག་པའི་རྒྱས་འགྲེལ་རྟོག་གེ་ཐོ་བ་མཛད་ནས་སླར་རྩོད་པ་ལ་བྱོན་དུས་ཕྱ་བ་གཤེགས། (ཏ༣བ)

[Full Size]

པ་ཚབ་ཀྱི་བུ་བཞི་སོགས་ནས་དབུ་མ་ཐལ་འགྱུར་བ་བོད་དུ་དར་བར་མཛད་ཏོ། །གྷ་ཡ་དྷ་ར་ནི་ན་རོ་མེ་ཏྲི་སོགས་གྲུབ་ཐོབ་མང་པོའི་སློབ་མ་ཡིན། རྟེན་ཁྱིམ་པར་བཞུགས། བོད་དུ་ལན་མང་པོར་བྱོན་སྟེ་རེ་རེ་ལ་མཚན་ཐ་དད་ཏུ་ཐོགས་ཅིང་ཐེངས་ཅིག་ཨཱ་ཙརྻ་དམར་པོ་ཞབས་སུ་ཡང་གྲགས། ཕྱིས་འབྲོག་མགོས་ཀྱི་བླ་མ་བྱས་སོ། །ཁ་ཆེ་ཟླ་བ་མགོན་པོ། སྟོང་ཉིད་ཏིང་འཛིན་རྡོ་རྗེ། ཡེ་ཤེས་རྡོ་རྗེ། ཤེས་རབ་གསང་བ། མ་ཧཱ་ཛ་ན། མནྟུ་ཀ་ལཀྵུ། ཀརྨ་བཛྲ། ཛ་མ་རི། དཔའ་བོ་རྡོ་རྗེ་འདི་བོད་ཀྱི་གངས་རི་ལྟ་བ་ལ་ཡོང་གསུངས་ནས་འབྲོག་མིའི་སར་བྱོན་སྟེ་ཆོས་བསྟན་ནས་སླར་རྫུ་འཕྲུལ་གྱིས་བཞུད་སྐད། རཱ་ཧཱུ་ལ་གུཔྟ་བཛྲ་འདི་རི་ནག་པོའི་ཁོང་སེང་ན་བཞུགས། མཻ་ཏྲྀ་པའི་སློབ་མ་ཡང་ཡིན། ཁྱུང་བོ་རྣལ་འབྱོར་འཕན་ཡུལ་ཆད་དཀར་ན་བཞུགས་དུས་བོད་རི་རོང་དོག །ཁོ་བོས་རྡོ་རྗེ་གདན་གྱི་ཉི་མ་ཤར་མ་ཐོག་འོངས་པས་འདིར་ནམ་ནངས་ལས་མ་སླེབས་གསུངས་རྫུ་འཕྲུལ་དུ་མ་བསྟན། ཆོས་མང་དུ་གསུངས་ནས་བལ་པོར་བསྐྱལ་སྟེ་བོད་དུ་རྡོ་རྗེའི་ས་གཞི་མེད་པས་ཚེ་ཉི་ཟླ་དང་མཉམ་པ་དང་སྒྱུ་མ་སྒྲུབ་མི་བཏུབ་པ་ཡིན། ངའི་རྫུ་འཕྲུལ་གྱི་རྟ་ལ་བཞོན་རྒྱ་གར་དུ་འགྲོ། ཚེ་ཉི་ཟླ་དང་མཉམ་པ་སྒྲུབ་བོ་གསུང་བ་ལ་ཐེ་ཚོམ་སྐྱེས་པས་རྟོག་པའི་ཐུམ་པོ་ཁྱོད་མི་འགྲོ་བར་འདུག་གསུངས་ནས་ཉི་ཟེར་ལ་ཆིབས་སྟེ་བཞུད་ཏོ། །བཻ་རོ་ཙ་ན་བཛྲ་འདི་དངུལ་ཆུའི་བཅུད་ལེན་གྲུབ་པ་ཡིན། རྒྱ་ནག་དུ་བྱོན་པས་རྒྱལ་པོས་ཉམ་སད་པའི་ཕྱིར་དངུལ་ཆུ་དཀར་ཡོལ་གང་དྲངས་པ་ཅིག་ཅར་གསོལ། འོན་ཀྱང་རྒྱལ་པོས་ཉམས་སད་བྱས་པ་ལ་མ་མཉེས་ནས་ཆོས་མ་བསྟན་པར་བོད་དུ་བྱོན་སྟེ་རྗེ་དུས་མཁྱེན་དང་ཞང་ཚལ་པ་སོགས་ལ་གདམས་པ་སྟན། དམ་ཤོད་སྨད་དུ་བཞུགས་སོ། །བལ་པོ་ཨ་སུ་སྐྱེ་མེད་བདེ་ཆེ་འདི་མཻ་ཏྲྀ་པའི་ཆོས་ལ་མཁས། བོད་དུ་བྱོན་ནས་དོ་ཧ་དར་བར་མཛད། རས་ཆུང་པས་རྒྱ་གར་དུ་ཕྱག་རྒྱ་ཆེན་པོ་ལ་སུ་མཁས་དྲིས་པས་བླ་མ་བལ་པོ་བོད་དུ་སོང་ནས་རྒྱ་གར་དུ་ཕྱག་རྒྱ་ཆེན་པོ་རྩད་གཅོད་པའི་བོད་གླེན་པ་ཟེར་སྐད། ཕྱིས་སུ་འཕྲང་དུ་བཞུགས་སྲས་རྒྱུད་མང་དུ་བྱུང་ངོ༌། །རཏྣཱ་ཀཱ་ར་(ཏ༤ན)

[Full Size]

ཤཱནྟི་འདི་མཁས་པ་སྒོ་དྲུག་ཤཱནྟི་པ་ཆེན་པོ་དེ་ཡིན། གྲོང་འཇུག་གིས་ལུས་ལན་ལྔ་འཕོས་པའི་རྟིང་མ་ལ་ཐང་ཆེན་པོ་ཞེས་པའི་གཙུག་ལག་ཁང་བྱ་བར་བཞེང་ནས་ནོར་བཙལ་བའི་ཕྱིར་རྒྱ་ནག་ལ་འབྱོན་པའི་ལམ་བོད་ཏུ་བྱོན། རྗེ་དུས་མཁྱེན་ཞང་ཚལ་པ་སློབ་དཔོན་སྙེ་མདོ་བ་རྣམས་ལ་ལཉྩ་མཆོག་གྱུར་གྱི་གདམས་པ་གསུངས་སོ། །མཛྙུ་གྷོ་ཥ། སཱུརྻ་ཀིརྟི་ཉི་མ་གྲགས། ག་ག་ན་དྷ་ར་ན་མཁའ་འཛིན། ནོར་སྦས། ས་མནྟ་ཤྲཱི་ཀུན་ནས་དཔལ། ནི་སྐ་ལངྐ་དེ་ཝ། ཛེ་གཏྨི་ཏྲ་ཨཱ་ནནྟ་འདི་ནི་སྤྱན་རས་གཟིགས་ཀྱི་སྤྱན་གཡས་པའི་སྤྱན་ཆབ་ལས་བྱུང༌། ཝ་ར་ཎ་སིའི་རྒྱལ་པོ་བཙུན་མོ་ཆུན་མ་འོད་ཟེར་ཀུན་ནས་མཛེས་མའི་སྲས་སུ་འཁྲུངས། ཁྲོམ་ཆེན་པོའི་དབུས་སུ་ཡབ་དང་མཇལ་བས་ལྷ་མི་ཐམས་ཅད་དགའ་འོ་ཞེས་ཛ་གཏྲ་ཨཱ་ནནྟ་སྐྱེ་འགྲོ་ཀུན་དགར་བཏགས། ཆེན་མའི་སྲས་རྣམས་ཀྱིས་མཚོ་ནང་དུ་བསྐྱུར་བས་ཀླུས་མཆོད་སྟེ་ཆོས་བསྟན། ཆུར་བསྐྱུར་བ་གསངས་ནས་དཔུན་ཟླ་རྣམས་ཀྱིས་བདག་མ་རྙེད་ཏོ་བརྗོད་པས་གཅེན་རྣམས་མགུ་སྟེ་འདི་ནི་བདག་ཅག་གི་བཤེས་གཉེན་ཞེས་མི་ཏྲ་ཨཱ་ནནྟ་ཅེས་ཐོགས། ཡབ་ཡུམ་ལ་ཆོས་ཀྱི་ཕྱིར་གྱི་གསོལ་བ་ནན་གྱིས་བཏབ་མཐར་བྲོས་སྟེ་རྡོ་རྗེ་གདན་དུ་རྒྱལ་བའི་ལྷ་ལས་རབ་བྱུང་བསྙེན་རྫོགས་ནོད་ཨེ་ཀ་ཛཱ་ཊིས་ལུང་བསྟན་སྟེ་རྡོ་རྗེ་གདན་དུ་སྤྱན་རས་གཟིགས་དང་སྒྲོལ་མའི་ལྷ་ཁང་དུ་ཐུགས་རྗེ་ཆེན་པོ་ལོ་དྲུག་བསྒྲུབས། སླར་ཁཱརྶ་པཱ་པ་ཎའི་གཙུག་ལག་ཁང་དུ་ལོ་དྲུག་བསྒྲུབས། ཨོ་ཌྱན་དུ་དངོས་གྲུབ་ཐོབ་པར་ལུང་བསྟན་ཐོབ་ནས་བྱོན་སྟེ་སྤྱན་རས་གཟིགས་ཀྱི་སྤྱན་ཆབ་གཡོན་པ་ལས་བྱུང་བ་མཁའ་འགྲོ་མ་དེ་ཝ་ཌཱ་ཀི་ནིས་ཀུ་ལུ་ཏའི་གནས་སུ་མངལ་གྱི་དྲི་མ་སྦྱངས། རྣམ་སྨིན་གྱི་ལུས་དག་སྟེ་ཆུ་ཟླ་ལྟ་བུའི་སྐུ་བརྙེས། ཨོ་ཏྱནྟ་པུ་རི་གར་ལོག་གི་དམག་གིས་སྐོར་བ་ལ་ཞི་བས་ཆོས་གསུངས། རྒྱས་པའི་འཕྲིན་ལས་ས་རྡོ་རིན་པོ་ཆེ་བྱིན་གྱིས་བརླབས་པའི་ཆར་ཕབ། དབང་གི་སྒོ་ནས་ན་མཁའ་ལ་བྱོན་སྟེ་རྫུ་འཕྲུལ་བསྟན། དྲག་པོས་སྦ་ལྕག་ཀླད་ལ་བསྐོར་བས་ཉིན་གུང་ལ་མུན་སྲོས་ཤིང་རྡོའི་ཆར་ཕབ་པས་(ཏ༤བ)

[Full Size]

ཟློག་ཡབ་རྒྱལ་པོ་ལ་མུ་སྟེགས་གྱི་ར་ཙ་གྲགས་པ་སྡེའི་དམག་གིས་བསྐོར་བ་རེངས་པར་མཛད་སྟེ་ཟློག །ཐུགས་རྗེ་ཆེན་པོའི་མཎྜལ་ཤིང་སྟན་མདུན་དུ་བཞག་སྟེ་འདི་བསྐུལ་ནུས་ན་གསེར་སྲང་སྟོང་སྟེར་ནང་པ་ཐམས་ཅད་མུ་སྟེགས་ལ་འཇུག་གོ །བསྐུལ་མ་ནུས་ན་མུ་སྟེགས་ཐམས་ཅད་ནང་པ་ལ་ཞུགས་ཅིག་གསུངས་པས་གྱད་དང་གླང་ཆེན་དང་སྒྱུ་མ་བཤིག་སྔགས་སོགས་ཀྱིས་བསྐུལ་མ་ནུས་སྟེ་རྗེ་བཙུན་ཉིད་མེར་བསྲེགས་པས་མ་གནོད། ཟངས་སུ་བཅུག་གངྒཱ་བོར་བས་གངྒཱ་ཆར་པའི་བར་དུ་ཟངས་བཞག་སྟེ་གངྒཱ་གྱེན་དུ་ལོག་པས་ཕོ་བྲང་འཇིག་དུ་ཆ་བའི་ཚེ་གསོལ་བ་བཏབ་པས་ན་མཁའ་ལ་བྱོན་སྟེ་གངྒཱ་ཐོག་མའི་ཤུལ་དུ་སོང་གསུངས་པས་ཤར་གྱིས་སོང༌། ར་ཙ་དེས་མངའ་རིས་ཐམས་ཅད་ཕུལ་སྟེ་ཡབ་ཀྱི་མངའ་འབངས་དང་གཉི་ག་ལྷ་འབངས་སུ་བསྒྱུར་སྟེ་བསྟན་པ་དར་བར་མཛད། གནོད་སྦྱིན་ཀ་ལ་དང་བི་ཀ་ཥ་བྱ་བ་གཉིས་ཀྱིས་ཡུལ་གྲུ་ཆེན་པོ་ཅིག་སྟོངས་པར་ཟ་བ་བཏུལ་སྟེ་ཞམ་རིང་དུ་འབྲང་ཞིང་ཆོས་སྐྱོང་བྱེད། སྔར་ཐུགས་རྗེ་ཆེན་པོས་ཕྱི་ནང་གསང་བའི་སྒྲུབ་ཐབས་བརྒྱ་རྩ་བརྒྱད་པ་ཚན་གསུམ་དུ་གསུངས་པ་རྣམས་ཨཽ་རྒྱན་གྱི་ཡུལ་གྱི་དུར་ཁྲོད་ཆེན་པོར་ཐུགས་རྗེ་ཆེན་པོ་དངོས་སུ་བཞེངས་ནས་རིག་འཛིན་དགུ་ལ་གསུངས་ཤིང་ཁྱད་པར་སློབ་དཔོན་པདྨ་ལ་བྱང་ཕྱོགས་ཁ་བ་ཅན་གྱི་ཡུལ་ན་ད་ལྟ་སྤྱན་རས་གཟིགས་ཀྱི་སྤྲུལ་པ་རྒྱལ་པོ་ཅིག་གིས་སེམས་ཅན་གྱི་དོན་མཛད་ཅིང་ཡོད། འདི་ནས་གདུང་རབས་ལྔ་ན་འཇམ་དཔལ་གྱི་སྤྲུལ་པ་རྒྱལ་པོ་ཅིག་འབྱུང༌། དེས་མཁས་པ་མང་པོ་སྤྱན་འདྲེན་ཞིང་ཁྱོད་ཀྱང་སྤྱན་འདྲེན་པར་འགྱུར་བས་སོང་ལ་མི་རྣམས་ཐུགས་རྗེ་ཆེན་པོ་དང་གསང་བ་ཡེ་ཤེས་ཀྱི་ཏིང་ངེ་འཛིན་གྱིས་ཐུལ་ཞིག །མི་མ་ཡིན་རྣམས་ཁྲོ་བོ་རྟ་མགྲིན་གྱི་ཏིང་འཛིན་གྱིས་ཐུལ་ཞིག་ཅེས་གསུངས་ནས་སློབ་དཔོན་པདྨ་ཉིད་ལ་ཐིམ་པའི་སྣང་བ་བསྟན། སྐུ་དངོས་ནི་ནམ་ཡང་འདའ་བ་མེད་པར་ལྷོ་ཕྱོགས་དཔལ་གྱི་རི་དང་ལི་ཁ་ར་ཤིང་འཕེལ་གྱི་ནགས་ལ་སྐུ་འདི་ཉིད་ཀྱིས་བཞུགས་ཤིང་སྐལ་ལྡན་དུ་མའི་དོན་མཛད། ཕྱིས་རིང་མོ་ཞིག་ལ་ཁྱད་པར་དུ་མཁས་པ་ཤྲཱི་རྣམ་གཉིས་ལ་རྡོ་རྗེ་ཐེག་པའི་མན་ངག་བསྟན། དེའི་སྐབས་(ཏ༥ན)

[Full Size]

ཅིག་ན་ཁྲོ་ཕུ་ལོ་ཙཱ་བ་ཆེན་པོ་དགུང་ལོ་ཉེར་དྲུག་པ་བལ་པོར་བཞུགས་པའི་ཚེ་ཆུ་སྟོད་ཟླ་བ་ལ་རྗེ་བཙུན་མི་ཏྲ་ཛོ་གི་བྷུ་ཁཾ་དུ་བྱོན་ཟེར་སྟེ་སྒྲ་ཆེ་བར་བྱུང་ཡང་ཡིད་མ་འཆེས། དེ་ནས་ཁྱེའུ་མི་འདྲ་བ་ལྷའི་རྣམ་པ་ཅན་ཞིག་འཁོར་མང་པོས་བསྐོར་ནས་ཤིང་ཀུན་སྐོར་བ་ལ་བྱོན། གུ་ལང་དུ་མུ་སྟེགས་ཀྱི་རྟེན་ཕྱུགས་བདག་རང་བྱུང་གི་གསེར་གྱི་གྷ་ཊུ་རའི་རྩེ་མོར་སྐྱིལ་ཀྲུང་བཅས་སྟེ་མུ་སྟེགས་ཀྱི་རྣལ་འབྱོར་པ་ནུས་པ་ཅན་རྩོད་པ་དང་ནུས་པས་ཕམ་པར་མཛད། ཙཀྲ་ཝརྟི་ཆེ་ཆུང་བྱ་བ་ཏ་པ་སི་གཉིས་ཀྱིས་ཕྱུགས་བདག་ལ་ཕྱག་འཚལ་བར་བསྒོ་བས་ཕྱག་ཐལ་མོ་བརྡབས་པས་སྒོ་རང་བྱེ་སྟེ་སྐུ་དེ་འདར་ཞིང་གཡོས། མེ་ཏོག་དམར་པོའི་ཆར་བྱུང༌། པཎ་ཆེན་བུདྡྷ་ཤྲཱིས་དེ་རཱ་ཛཱ་གུ་རུ་ཡིན་ན་ངའི་བླ་མ་ཡིན་གསུངས་ནས་མཇལ་སྟེ་གཉི་ག་ཤིན་དུ་མཉེས། ཁྲོ་ལོས་མཇལ་དུ་བྱོན་པས་ནགས་མཐོངས་ཅིག་ན་སྐྱེ་བོ་མང་པོས་མཆོད་པ་དང་བཅས་ཞལ་བྱང་ཕྱོགས་སུ་གཟིགས་སྟེ་ལྷ་དངོས་ཡིན་སྙམ་པ་སྐུ་སྨད་ལ་རས་ཁྲ་བོ་གཡོགས་ཤིང་ཤིང་སྟན་མཆན་ཁུང་གཡོན་ན་འཛིན་པ་ཅིག་མཐོང་བས་རྗེ་བཙུན་མི་ཏྲ་ཡིན་མིན་གྱི་ཐེ་ཚོམ་རང་སར་ཞིག་སྟེ་དགའ་བ་མཐའ་ཡས་པས་ཞབས་ལ་ཡང་ཡང་གཏུགས། གོ་ལ་གསོལ་འཕྲོ་ཞིག་ཞལ་ནས་ཕྱུང་སྟེ་གནང་བ་ཟོས་པས་བྱིན་རླབས་ཐམས་ཅད་ཞུགས། ཁྲོམ་རྣམས་ཀྱིས་མི་ཚོར་གསུངས་ནས་མ་ཞུས་ཀྱང་དྲུག་ཚན་གསུམ་པའི་ཆོས་དེ་ཉིད་དུ་གསུངས། རྗེ་པཎ་ཆེན་གྱིས་ཆོས་ཀྱི་ནང་བྱན་པ་མཛད་དེ་སེམས་ཉིད་ངལ་གསོ་དང་རྡོ་རྗེ་སྦས་པའི་གསང་ལམ་གསུངས། ཤིན་ཏུ་ཐུགས་བརྩེ་བ་ཕ་བུ་ཕྲད་པ་ལྟར་གྱུར། བོད་དུ་གཤེགས་པར་ཞུས་ཤིང་ཡི་དམ་ཆོས་སྐྱོང་ལ་ངོ་ཆེན་ཞུས། རྗེ་པཎ་ཆེན་གྱིས་ཀྱང་གནོད་སྦྱིན་གཅིག་གིས་གྲོགས་བྱེད་ཀྱང་གཅིག་གིས་གེགས་བྱེད་པར་སྣང་བས་ཀ་ལ་ལ་ཁྲག་སྣའི་གཏོར་མ་སྐྱོལ་གསུང་བ་ལྟར་བྱས་པས་ང་ནི་བོད་དུ་གཤེགས་ཆས་བྱེད་པའི་མི་མ་ཡིན་གྱི་ཟང་ཟིང་ངོ་གསུངས་སྟེ་རྗེ་བཙུན་གྱིས་ཀྱང་འབྱོན་པའི་ཞལ་བཞེས་ཙག་ཙིག་བྱུང༌། ལ་སྟོད་ཆུ་མིག་རིང་མོ་ན་དགེ་བའི་བཤེས་གཉེན་བྲང་པོ་ལུང་པ་ཅེས་པ་དོན་(ཏ༥བ)

[Full Size]

འགས་པ་ཆེན་པོ་ཅིག་ཝ་པོ་ཟླ་བའི་ཚེས་བརྒྱད་ལ་བསྙུང་གནས་མཛད་པའི་ཐོ་རེངས་སང་རེས་ཐུགས་རྗེ་ཆེན་པོ་རས་སེར་པོས་དྲིལ་བ་ཞིག་ཁྲོ་ཧུར་འབྱོན་ནོ་ཟེར་བའི་སྒྲ་བྱུང་བ་དཔོན་སློབ་ལྔས་ཐོས། ལ་སྟོད་གཙང་སོའི་སྲིན་པོ་གདོང་གི་གནས་སུ་སྟོན་པ་དད་པ་བྱ་བ་ལ་རྗེ་བཙུན་མི་ཏྲ་ཛོ་གི་གནས་ཁང་གཡར་དུ་འབྱོན་གྱིས་ཁྱིམ་བྱི་དོར་གྱིས་བྱ་བ་ནུབ་གསུམ་དུ་བྱང༌། མཇལ་ནས་ལོ་ངོ་གཉིས་སོང་བ་ན་ཝཱ་ར་ཎ་སིའི་རྒྱལ་པོ་ཛཱ་ཡ་ཙནྡྲ་བྱ་བ་འཛམ་གླིང་ན་ཆེ་བ་དེ་དང་དེའི་མག་པ་དབུས་འགྱུར་འཆང་གི་རྒྱལ་པོ་ཤིང་རྟ་ཅན་བྱ་བ་དེ་གཉི་གས་ཏི་ར་ཧུར་ཏིའི་རྒྱལ་པོ་ལ་བཀའ་ཕབ་ནས་དེས་རྗེ་བཙུན་སྤྱན་འདྲེན་པའི་ཕྱིར་ཕོ་ཉ་བ་རལ་སྐོར་མཁན་ལ་སོགས་པའི་དམག་དཔུང་ཆེན་པོ་སླེབས་སྟེ་སྤྱན་དྲངས་ནས་ཕམ་ཐིང་དུ་གཤེགས། རྒྱ་གར་བའི་བསུ་བ་མཐའ་ཡས་པས་སླེབས། བོད་ཀྱིས་ཅི་བྱར་ཡང་མེད་པར་སོང་བའི་ཚེ་ལོ་ཙཱ་བ་ཆེན་པོས་ཀྱང་སྐྱེལ་ཐུང་གི་ཚུལ་དུ་བྱོན། རྗེ་བཙུན་ཕམ་ཐིང་གི་ཁང་བརྩེགས་ཅིག་གི་ཡང་ཐོག་བསིལ་ཁང་ན་བཞུགས་པའི་དྲུང་དུ་བཏོལ་ནས་གྲུབ་ཐོབ་འདི་ལྟ་བུ་དང་མཇལ་རྗེས་སུ་བཟུང༌། བོད་དུ་གཤེགས་པར་ཞལ་གྱིས་བཞེས་ནས་སྤྱན་མ་འདྲོངས་པར་སླར་གཤེགས་པ་ནི་བདག་དང་བོད་རྣམས་བསོད་ནམས་ཤིན་དུ་དམན། ང་ནི་ད་ལྟ་ལུས་སྲོག་དོར་སྟེ་ཤི་མ་ཐག་པོ་ཊ་ལར་རྗེ་བཙུན་ཉིད་ཀྱི་དྲུང་དུ་སྐྱེ་བར་བྱའོ་སྙམ་དུ་ཚམ་ཚོམ་མེད་པར་གྱུར་སྟེ་གསེར་གང་ཡོད་སྐུ་ལ་གཏོར་ནས་གཡང་ཆེན་པོ་ལ་རྒྱང་གིས་འཕྱོངས་པ་དང་རྗེ་བཙུན་གང་ནས་བྱོན་ཆ་མེད་པར་བར་སྣང་ལ་རྒྱང་བྱོན་སྟེ་ལོ་ཙཱ་བ་ཆེན་པོའི་ཕྱག་ནས་བཟུང་སྟེ་ཨ་ཧ་ཧ་དེ་ཙུག་མ་བྱེད་ཁྱོད་ཀྱི་འདོད་པ་ངས་སྒྲུབ་བོ་གསུངས་སྟེ་རྒྱལ་པོ་ཟླ་བ་ལ་འཕྲིན་ཡིག་མཛད། རྒྱ་གར་བ་རྣམས་ཟང་ཟིང་གིས་མགུ་བར་མཛད་དེ་སློག་ནས་དེ་ཕྱིན་ལོ་ཙཱ་བ་ཆེན་པོས་ཞབས་ཏོག་མཛད་ནས་ཐུན་མོང་གི་ཆོས་ཀྱིས་སྐྱེ་འགྲོ་མང་དུ་བཏུལ། ཁྱོད་ང་སྤྱན་འདྲེན་པ་ལ་དཀའ་བ་དེ་ཙམ་དུ་བྱེད་པ་དགོས་པ་ཅི་ཡོད་གསུངས་སྟེ་བསྟན་(ཏ༦ན)

[Full Size]

པ་དང་སེམས་ཅན་ལ་བསམས་པ་ཁོ་ན་ལས་གྲགས་འདོད་སོགས་རང་འདོད་ཀྱི་རྙོག་པ་རྡུལ་ཙམ་ཡང་མ་འདྲེས་པར་མཁྱེན་ནས་ཤིན་དུ་མཉེས། སྐུ་འཁོར་སྟོང་ལྷག་པའི་ཡོ་བྱད་ལོ་ཙཱ་བ་ཆེན་པོ་ཉིད་ཀྱིས་སྦྱར་སྟེ་བོད་ཕྱོགས་སུ་རིམ་པར་ཕེབས། སྐལ་ལྡན་རྣམས་དད་པའི་དབང་གིས་འདུས་ཁ་ཅིག་དེ་ལྟ་བུ་མི་སྲིད་ཟེར་ནས་བརྟག་དཔྱད་བྱེད་གྲགས་པ་དང་ལྟད་མོ་དང་དགེ་བའི་རྩ་བས་བསྐུལ་བའི་སྐྱེ་བོའི་ཚོགས་ཟླ་ལམ་ཙམ་ནས་སྤྲིན་བཞིན་འདུས་སྟེ་ཟང་ཟིང་གི་འབུལ་བ་རི་སྤུངས་པ་ལྟ་བུ་རྒྱུན་མི་ཆད་པ་ཐམས་ཅད་སྐྱི་རོང་གི་འཕགས་པ་སོགས་དཀོན་མཆོག་གི་མཆོད་པ་དང་དགེ་འདུན་གྱི་འདུ་བའི་སྒོ་འཁྲུག་རྩོད་ཀྱི་སྡུམས་ལམ་འཕྲང་གསོ་བ་སོགས་ལ་དེ་མ་ཐག་གནང་སྟེ་ཅུང་ཟད་ཀྱང་བདག་གིར་མི་མཛད་ལོ་ཙཱ་བ་ཆེན་པོས་ཀྱང་སྔ་འཕྲུལ་གྱི་བུ་ལོན་སོགས་ཀྱིས་ཡོ་བྱད་བློར་མི་ཆུད་པ་རྒྱུན་དུ་དགོས་པ་རྣམས་ཀྱང་ནོར་རྒྱུན་མ་དང་རྣམ་ཐོས་སྲས་བྲན་དུ་བཀོལ་བས་སྒྲུབ་པ་མ་གཏོགས་རྗེ་བཙུན་གྱི་འབུལ་བ་མ་ཤ་ཀ་གཅིག་ཀྱང་ལོངས་མི་སྤྱོད། གར་ཕེབས་ཀྱི་ཡུལ་གྲུ་ཐམས་ཅད་དུ་ལྟད་མོ་དང་ཟང་ཟིང་དང་ཆོས་ཀྱི་ལོངས་སྤྱོད་ལ་ཐུག་པ་མེད། སྐྱེ་བོ་འདུས་ཆེས་པས་ཁྱིམ་ཐམས་ཅད་ཐོག་ཁྲོལ་ཚགས་ལྟར་སོང༌། ཐམས་ཅད་ཀྱི་རྒྱུད་བྱིན་གྱིས་བརླབས། སྒོ་ཐམས་ཅད་ཐལ་བྱུང་དུ་གྱུར། བཟའ་བཏུང་ལ་འདོད་པ་མེད། འཐབ་རྩོད་དང་ཆེ་ཆུང་བརྩི་བའི་མིང་མི་གྲག་པར་སྐྱེ་བོ་ཆེ་ཆུང་ཐམས་ཅད་སྙིང་པོ་བཟློས་པ་དང་སྐྱབས་འགྲོ་སེམས་སྐྱེད་ཀྱི་འུར་དིར་དུ་སོང་སྐད། ཁ་ལ་བྱ་ལ་གསེབ་ལ་གསུམ་གང་ནས་བཞུད་པའི་ཁ་ཟིན་ལ་ཡུལ་པ་རྣམས་སོ་སོས་གསོལ་བ་བཏབ་པས་ལོ་ཙཱ་བས་ལ་ཕྱི་རྒྱབ་ཀྱི་གནས་ལེགས་པ་ཅིག་གཡོར་ཞིག་གསུངས་སྟེ་དཔལ་ཐང་ཡས་མིག་ན་དགེ་བཤེས་མོང་པོ་བྱ་བ་སྟོད་ཟུར་གྱི་དགེ་བསྙེན་ཚངས་སྤྱོད་པ་ཁྱད་པ་ཅན་ཞིག་བཞུགས་པ་ལ་གནས་གཡར་དུ་བཏང་བས་རྗེ་བཙུན་ཉིད་ཆིབས་པ་མཛད་དེ་འཁོར་སུ་ཡང་མེད་པར་ལ་ལ་མཇལ་བར་བསྒུག་པའི་སྐྱེ་བོ་སུས་ཀྱང་མ་མཐོང་བར་ལ་གང་ལ་བྱོན་ཡང་ཕེབས་མི་གཤའ་བའི་སྔ་བར་གདན་ཕེབས། དེ་རྣམས་སུ་སྐྱེ་བོ་(ཏ༦བ)

[Full Size]

མཐའ་ཡས་པ་འདུས་པ་ལ། རྨི་ལམ་གྲོང་ཁྱེར་ཡངས་པ་ན། །སྒྱུ་མའི་སྐྱེས་བུ་ལོངས་སྤྱོད་པ། །ལོངས་སྤྱོད་དུས་ན་ལོངས་སྤྱོད་མེད། །སྣང་སེམས་དེ་ལྟར་ཤེས་པར་བྱ། །ཞེས་སོགས་གསུངས། དགེ་བཤེས་དེ་ལ་སྙིང་རྗེ་ཆེན་པོ་དང་གནས་ལུགས་ཀྱི་སྒོམ་དོན་སྦྱར་བ་ཞིག་གསུངས་པས་གེགས་སོལ། རྟོགས་པ་ཁྱད་པར་ཅན་འཁྲུངས་སྟེ་ཆོས་དེས་སྐྱེ་འགྲོ་མང་པོ་སྨིན་གྲོལ་ལ་བཀོད། དེ་ནས་ལམ་ལ་སྟོད་བྱང་ལ་བྱོན། སྲིན་པོ་གདོང་དུ་དགེ་བཤེས་མང་ཆེས་པས་ཁ་ཅིག་ལ་བཞུགས་གནས་མེད་པར་ཕྱིར་ལུས་པ་ན་རྗེ་བཙུན་གྱི་ཞལ་ནས་ངའི་གནས་འདི་རྣམས་ལ་ཕུལ་གསུངས་སྟེ་ཚམ་ཚོམ་མེད་པར་ཐལ་བྱོན་སྟེ་སྟོན་པ་དད་པའི་སྒོ་ཕྱེ་ནས་ཨ་ཙ་ར་ལ་གནས་བྱིན་གསུངས་པས་རྨི་ལམ་དང་མཐུན་པས་དགའ་ཆེས་སྟེ་གསེར་གཡུ་འཁར་སྡེར་གང་ལ་སོགས་ཡོད་རྒུ་ཅོག་ཕུལ། སྙིང་པོ་དོན་གསུམ་གྱི་གདམས་ངག་གནང་བས་གྲོལ་བ་ཞིག་བྱུང༌། དེ་སོགས་གཞན་ཕན་མཐའ་ཡས་པ་མཛད་ནས་ཁྲོ་ཕུར་ཕེབས་སྟེ་ཟླ་བ་དྲུག་ཙམ་དུ་བཞུགས། ཡོ་བྱད་ཐམས་ཅད་ལྷ་སར་མཆོད་པ་སྐྱེལ་དུ་བཏང༌། བོད་ཐ་དད་ནས་སྤྱན་འདྲེན་པ་ཟད་པ་མེད་ཀྱང་རྡོ་རྗེ་གདན་ལ་གར་ལོག་གི་དམག་ཡོང་བ་ཟློག་དགོས་གསུངས་ནས་ཟང་ཟིང་ལ་ལྟོས་པ་རྡུལ་ཙམ་ཡང་མེད་པར་ཕྱིར་གཤེགས། རྒྱུད་གྲོལ་བ་དང་སྨིན་པ་ནི་བསམ་གྱིས་མི་ཁྱབ་པ་བྱུང་ཞིང་ཕལ་ཆེར་ལ་ཆོས་ཀྱི་ལས་འབྲེལ་བཞག །འུ་སྐོལ་གྱི་ལུགས་ཀྱིས་སྦྱིན་པ་དང་ཚུལ་ཁྲིམས་ལ་སོགས་དགེ་བ་ཅི་བྱེད་ཀྱང་མགོན་མེད་སྐྱབས་མེད་ཀྱི་སེམས་ཅན་འདི་རྣམས་འཁོར་བ་ལས་དྲང་དགོས་སྙམ་པའི་སྙིང་རྗེ་དང༌། དེ་ནུས་པའི་སངས་རྒྱས་ལ་འགོད་དགོས་སྙམ་སེམས་སྐྱེད་དང༌། ཤི་མ་ཐག་དགའ་ལྡན་དུ་སྐྱེས་ནས་ཆོས་ཉམས་སུ་བླང་བ་ལ་འགོད་པ་སྟེ་འདི་གསུམ་དང་མ་བྲལ་བར་བྱེད་དགོས་གསུང་ཞིང་ལོ་ཙཱ་བ་ཆེན་པོས་ཀྱང་ཆོས་དེའི་ཡོན་དུ་རྟ་བཟང་བ་གསུམ་ཕུལ་བས་ཆོས་རེ་ལ་ཡོན་རེ་འབུལ་བ་བཟང་གསུངས་སྟེ་དེ་ཕྱིན་ལོ་ཙཱ་བས་དེ་གསུམ་དང་འབྲལ་མེད་དུ་མཛད། ཁྲོམ་ཆེས་པས་(ཏ༧ན)

[Full Size]

ལམ་མ་ཤོགས་པ་ན་ནང་དུ་རྟོག་པའི་འདུ་འཛི་ལ་མ་ཤོགས་པའི་རྟགས་ཡིན། རྟོག་པ་ཐམས་ཅད་རང་ངོ་ཤེས་ན་ངོ་བོ་མེད་པ་ལ་བཤག་དགོས་པའི་མི་འོང༌། བཤག་རྒྱུ་ནང་དུ་གྲོལ་ན་ཕྱི་རོལ་འདྲ་སྐད་ཅིག་གིས་ཕྱལ་འགྲོ་ཡི་གསུངས། འོ་ན་ཕྱི་རོལ་ཇི་བཞིན་དེ་བཞིན་ནང༌། །བགྱི་བ་མེད་པར་གདའ་ཞུས་པས། །མེད་པ་མེད་དེ་དེ་སྐད་ཁ་ནས་འདོན་མཁན་ཚོ་རང་ཅེ་རེ་ལོང་དུ་འགྲོ་བར་འདུག་གསུངས་སྟེ་ལམ་འཕྲང་ནམ་དཀའ་བ་ན་སུས་ཀྱང་མ་མཐོང་བར་ཕ་གར་གཤེགས་པ་ཤ་སྟག་བྱུང༌། ཁྲོ་ཕུར་བྱམས་ཆེན་ཕོ་བྲང་དང་བཅས་པའི་རྟེན་འབྲེལ་མཛད་དེ་རབ་གནས་ཀྱི་དུས་ཁོ་བོའང་འོད་ཀྱི་ཕུང་པོའི་རྣམ་པར་འོང་གསུངས་སྟེ་ཕྱིས་སྐལ་ལྡན་མང་པོས་མཐོང་བ་བྱུང༌། བལ་པོར་སྤྱན་དྲངས་ནས་རྒྱ་གར་བ་སུམ་བརྒྱ་ཙམ་གྱི་ཞམ་རིང་བྱས་སྟེ་རྒྱ་གར་ལ་ཐལ་གྱིས་བཞུད། ཡོ་བྱད་ཐམས་ཅད་རང་སར་དོན་ལྡན་དུ་བཀྱེ་ནས་མ་བསྣམས་ཀྱང་དད་ལྡན་གྱིས་གསོལ་བ་བཏབ་པའི་གསེར་ཉུང་ཤས་ཅིག་བསྣམས་པ་ལས་མི་ཏྲ་ཡོ་གིས་གསེར་མི་ཁུར་མང་པོ་ཁྱེར་ཡོང་བྱ་བ་རྒྱ་བལ་དུ་གྲགས་ཉེ་གནས་གཉིས་ཀྱིས་མ་ག་དྷ་དང་ཝ་ར་ཎ་སིའི་རྒྱལ་པོ་བསུ་བ་ལ་སྦྲོན་ཞུས་ཀྱང་གནོད་སྦྱིན་གཉིས་དང་ཌཱ་ཀི་མ་གསུམ་སྦྲན་ཆོག་གསུངས་སྟེ་མ་གསན་པར་གཤེགས་པའི་ཚེ། འཁོར་མ་དག་པ་ཁ་ཅིག་གིས་ནང་བྱན་བྱས་སྟེ་གངྒཱའི་འགྲམ་དང་ཉེ་བར་གོ་སི་མ་ས་ལི་བྱ་བ་དང་ཏི་ཏི་ར་ཀུ་ར་བྱ་བའི་གྲོང་པ་གཉིས་ཀྱིས་ཡུལ་ལོག་བྱས་སྟེ་མི་ཏྲ་ཡོ་གི་འདི་སྔ་ཡང་བསད་པས་ཡང་ཡང་ལོག་ཟེར་བས་ད་རེ་མི་ལྡོག་པར་བྱ་ཟེར་ནས་སྐུ་སྟོད་སྨད་ཕྲལ་དབུ་བྱེ་མའི་གསེབ་ཏུ་སྦས། སྐུ་སྟོད་ཁྱེར་སྐུ་སྨད་གངྒ་ལ་བསྐྱུར། ཡོ་བྱད་རྣམས་བགོས་པས་ཞག་བདུན་ན་སྐུ་སྟོད་སྐུ་སྨད་དབུ་དང་བཅས་པ་འདུས་སྟེ་གཅེར་བུར་བྱོན་ནས་ཇག་པ་རྣམས་ལ་ཟས་སློང་པས་ཇག་པའི་ལག་ནས་ནོར་རྣམས་ཆ་མེད་དུ་སོང་བ་ཁོང་རང་གི་ཕྱག་དུ་འདུས་ནས་གསོ་ཕད་ཏུ་བཏུམས་དབྱུག་པའི་ངོས་གཉིས་སུ་བཀལ་སྟེ། (ཏ༧བ)

[Full Size]

མི་ཏྲ་ཛོ་གི་སྒྱུ་མའི་མི། །སྒྱུ་མའི་སྐྱེས་བུའི་འཕྲུལ་འཁོར་བཤིག །འཕྲུལ་འཁོར་བཤིག་པའི་རོ་ལ་ལྟོས། །མགོ་བོ་ཀོ་ཊའི་རལ་གྲིས་བཅད། །མགོ་བོ་གཏི་མུག་དག་པའི་རོ། །རོ་དེ་བྱེ་མའི་རློམ་དུ་སྦས། །གཏི་མུག་རྣམ་པར་མི་རྟོག་ཞིང༌། །ཁོག་སྟོད་ཏི་ཤི་ལི་ཡིས་བཅད། །ཁོག་སྟོད་ཞེ་སྡང་དག་པའི་རོ། །རོ་དེ་མ་ས་ལི་བས་ཁྱེར། །ཞེ་སྡང་འོད་གསལ་མེ་ཆེན་འབར། །ཁོག་སྨད་རོ་ཧི་ཁྱུད་འདྲས་བཅད། །ཁོག་སྨད་འདོད་ཆགས་དག་པའི་རོ། །རོ་དེ་གངྒཱའི་ཆུ་ལ་བསྐྱུར། །འདོད་ཆགས་བདེ་བ་ཆེན་པོར་དག །མི་བཟད་མཚོན་གྱིས་དྲལ་བའི་ཚེ། །ཟུག་རྔུ་སྟོང་པའི་ངང་དུ་འབར། །ཟུག་རྔུ་ཚོར་བ་ཚོར་བས་སྟོང༌། །གཉིས་མེད་ཡེ་ཤེས་འུ་རུ་རུ། །ཞེས་གླུ་ལེན་ཞིང་བྱོན་སྐད། །བཀྲོངས་ཟེར་བའི་ཟེར་སྒྲ་ལས་བལ་བོད་དད་པ་མ་ཐོབ་པ་ཁ་ཅིག་ཐེ་ཚོམ་དུ་ཡང་གྱུར། དེ་ནས་རིང་པོ་མ་ལོན་པར་རྒྱ་གར་གྱི་གླུ་མཁན་གྱིས་གླུ་དེ་ལེན་པ་བལ་བོད་དུ་མང་བར་བྱུང་བས་སླར་ཐམས་ཅད་ཡིད་འཆེས་ཤིང་མ་མཇལ་བ་རྣམས་ཀྱང་འགྱོད། ཕྱིས་པཎྜིཏ་དོན་ཡོད་རྡོ་རྗེས་བསྣམས་པ་ལས་ལོ་ཙཱ་བ་ཆེན་པོས་གླུ་དག་པར་བསྒྱུར་རོ། །དེ་ནས་རྗེ་བཙུན་གྱིས་རྡོ་རྗེ་གདན་དུ་བྱོན་སྟེ་རྟེན་འབྲེལ་གྱིས་དམག་ཟློག་དཔལ་གྱི་རིའི་ཕྱོགས་བཞི་ན་སྒོ་རེ་ཡོད་པའི་མཚམས་ན་འབྲོག་དགོན་པ་ཡང་མང་པོ་ཡོད་པ་དེ་རྣམས་སུ་ལྷ་ཁང་དང་མགྲོན་ཁང་མང་དུ་བཙུགས། ཨོ་ཏོའི་ཡུལ་དུ་ཐུགས་རྗེ་ཆེན་པོའི་སྒྲུབ་ཐབས་བརྒྱ་རྩ་བརྒྱད་ཀྱི་ལྷ་ཁང་བརྒྱ་རྩ་བཞེངས། རྗེ་བཙུན་ཕྱིར་ཐེགས་ནས་ལོ་ལྔ་ལོན་པ་ན་བལ་པོའི་རྣལ་འབྱོར་པ་གཉིས་དང་ཡ་ཐ་སུ་ཁི་གཉིས་ཀྱིས་རྡོ་རྗེ་གདན་དུ་ཕྱིན་པས་རྗེ་བཙུན་དང་དངོས་སུ་མཇལ། གྲགས་པ་ངན་པ་དང་ལ་ལའི་ཐེ་ཚོམ་སེལ་བའི་ཕྱིར་ཐེངས་ཅིག་བལ་ཡུལ་དུ་ཅིས་ཀྱང་འབྱོན་པར་ཞུ་ཞེས་ཞུས་པས་ད་སྟེ་ཟླ་བ་གཅིག་ན་བལ་ཡུལ་དང་ཉེ་བའི་ཀ་མ་ཙར་ཅིར་འོང་གིས་གསུངས་སྟེ་(ཏ༨ན)

[Full Size]

དེ་བཞིན་དུ་བྱོན་ནས་བལ་པོའི་སློབ་མ་རྣམས་ཀྱིས་མཇལ། ཁྲོ་ཕུར་ཡང་བཀའ་འཕྲིན་གྱིས་སླེབ་བོ། དེ་ནས་ཕྱི་ཞིག་ན་ཨོ་ཌྱན་གྱི་པཎྜི་ཏ་དོན་ཡོད་རྡོ་རྗེ་ལ་བཀའ་བསྒོས་སྟེ་ལྷ་སར་མཆོད་པ་དང་མི་ཏྲ་བརྒྱ་རྩའི་དབང་རྒྱུན་དཔེལ་བར་བོད་ཡུལ་དུ་བཏང༌། དེ་ནས་ལོ་ཉིས་བརྒྱ་དང་བཞི་བཅུ་ཙམ་འདས་པ་ན་པཎྜི་ཏ་ཤྲཱི་པུ་ཏྲ་དཔལ་གྱིས་སྲས་ཀྱིས་རྗེ་བཙུན་མཇལ། ཐུགས་དམ་ལྷ་དྲུག་གི་མན་ངག་གནང་སྟེ་བོད་དུ་སོང་ལས་རྣལ་འབྱོར་པ་སྒྱུ་ལུས་རྨི་ལམ་འབྱོངས་པ་ཅིག་ཡོད་པ་དེ་ལ་བྱིན་གསུངས་སྟེ་ཀརྨ་པ་དེ་བཞིན་གཤེགས་པའི་སློབ་མ་མི་ཉག་གྲགས་པ་རིན་ཆེན་ལ་པཎ་ཆེན་དེས་ལྷ་སར་གསུངས༌། སྤྱིར་ཤཱཀྱའི་བསྟན་པ་ཇི་སྲིད་གནས་ཀྱི་བར་དུ་མྱ་ངན་ལས་མི་འདའ་བར་འགྲོ་དོན་མཛད་ཅིང་ལྷ་ས་ཆུས་མ་ཞིག་གི་བར་ལྷ་སར་ལོ་རེ་ལ་ལན་རེ་འབྱོན་པར་ཞལ་གྱིས་བཞེས་པ་ཡིན་ནོ། །རྗེ་བཙུན་འདི་དང་སློབ་དཔོན་པདྨ་ལས་ལྷག་པའི་གྲུབ་ཐོབ་ནི་བོད་ཡུལ་དུ་གཞན་མ་བྱོན་པར་སྣང་བས་རྣམ་ཐར་ཆ་ཚང་ཞིག་བསྡུས་ནས་བཀོད་པའོ། །བུདྡྷཱ་ཤྲཱི་ཛྙཱ་ན་འདི་ནི་བལ་ཡུལ་ཁོ་ཕོམ་དུ་ཡབ་ཁ་ཆེ་བ་ཞིག་དང་ཡུམ་རྒྱ་གར་མོ་ཞིག་འདུས་པ་ལས་འཁྲུངས། རྒྱ་གར་དུ་བྱོན་སྟེ་བི་ཀྲ་མར་རིག་པའི་གནས་ལྔ་ལ་སྦྱངས། ཕལ་ཆེན་སྡེ་པ་ལས་རབ་ཏུ་བྱུང་སྟེ་བུ་སློབ་ཀྱང་རྒྱས་པར་གྱུར། ཁྱད་པར་རྡོ་རྗེ་གདན་པ་བི་ཁྱ་དེ་ཝ་སློང་མོ་པའི་ལྷ་ཞེས་པ་པཎ་ཆེན་གྲུབ་ཐོབ་ཅིག་རྩ་བའི་བླ་མར་བསྟེན་ཞིང་རྗེ་མི་ཏྲ་དང་མཇལ་ནས་རྡོ་རྗེ་ཐེག་པའི་བདག་པོར་གྱུར། རྡོ་རྗེ་གདན་དང་བི་ཀྲ་མ་ན་བཞུགས་པའི་ཚེ་རྡོ་རྗེ་གདན་པ་དེ་ལ་བལ་ཡུལ་གྱི་ཁོ་ཕོམ་རྒྱལ་པོ་དང་ཧང་དུ་དང་ཏ་པ་སི་རྣམས་ཀྱིས་བལ་ཡུལ་གྱི་ཆོས་སྟོན་པ་པོ་དང་ར་གྷ་བི་ཧ་ར་ལ་སོགས་གཙུག་ལག་ཁང་སར་པ་ཆ་གསུམ་གྱི་རབ་གནས་ལ་གཤེགས་པར་ཞུས་པས་ང་རྒས་ཆེས་བས་མི་སླེབ། ངའི་འོག་ན་མཁས་ཤིང་བཟང་བ་བུའི་དམ་པ་འདི་ཡིན་པས་གཏོང་གསུངས་སྟེ་རྗེ་འདི་སྲིངས། ཁྲོ་ཕུ་ལོ་ཙཱ་བ་ཆེན་པོས་པཎ་ཆེན་འདི་ལོ་ལྔར་བསྟེན་སྟེ་(ཏ༨བ)

[Full Size]

སྒྲའི་བསྟན་བཅོས་ཆེན་པོ་རཱ་ཛཱ་ཤྲཱི་དང་ཀ་ཙན་དང་ཤད་མ་སླར་ཡང་སྦྱངས། སྡེ་སྣོད་གསུམ་གྱི་དོན་དྲིལ་བའི་བསྟན་བཅོས་རྒྱལ་བའི་ལམ་འཇུག་དང༌། མངོན་རྟོགས་རྒྱན་གྱི་འགྲེལ་པ་ཤེས་རབ་སྒྲོན་མེ་ལ་སོགས་པ་རྩོམ་པར་ཞུས་སྟེ་བརྩམས། མདོ་སྔགས་མཐའ་དག་གི་དོགས་པ་བཅད་ནས་བོད་དུ་གཤེགས་པར་ཞུས་པས་རྗེ་མི་ཏྲ་ཕེབས་སྟེ་པཎ་ཆེན་ཉིད་ཀྱིས་ཐོག་མར་རྗེ་བཙུན་འདི་སྤྱན་དྲོངས། ཁྱོད་ལྷ་ཆེན་པོ་བཞེང་པ་སོགས་ལ་ས་གཞི་འདུལ་བ་དང་མི་རྣམས་བྱིན་གྱིས་རློབ་པ་ལ་འདི་མངགས་པ་ཡིན། རྗེ་བཙུན་འདི་བྱོན་ནས་ཐམས་ཅད་འུར་ལངས་པའི་སྐབས་སུ་ངས་འོངས་ནས་མདོ་སྔགས་གང་ལ་གང་འོས་བསྟན་ནོ་གསུངས། མེ་མོ་སྦྲུལ་ལོ་ལ་རྗེ་བཙུན་ཕེབས་ནས་ལོ་བཞི་པ་ལྕགས་ཕོ་སྤྲེའུའི་ལོ་པཎ་ཆེན་ཉིད་ལོ་དྲུག་བཅུ་རྩ་གཅིག་བཞེས་པ་ལ་བོད་ཏུ་སྤྱན་དྲངས། བྱམས་ཆེན་འགྲུབ་པའི་རྟེན་འབྲེལ་མང་དུ་མཛད། ཆག་ལོ་ཙཱ་བ་ལ་བཏང་ནས་སྨྱལ་ལ་སོགས་པར་སྤྱན་དྲངས། མདོ་སྔགས་ཀྱི་ཆོས་མཐའ་ཡས་པ་གསུངས་ནས་སླར་བལ་པོར་བཞུད་ཅིང་ཡོ་བྱད་ཀྱི་ཕུད་རྡོ་རྗེ་གདན་དུ་གསེར་སྲང་བརྒྱ་དང་བི་ཀྲ་མར་ཆོས་ཁྲིའི་ཕྱོགས་བཞིར་གླང་ཆེན་གྱིས་བཏེག་པའི་སེང་གེ་ཟངས་གསེར་ལས་བྱས་པ་ངོ་མཚར་བ་ཕུལ་ཞིང་དེ་འདྲ་བ་ཞིག་སྠཱ་བི་ཧར་ན་ཡང་ཡོད། པཎ་ཆེན་འདིའི་སྐུ་སྐྱེ་པ་ཁྲོ་ཕུ་སེམས་དཔའ་ཆེན་པོ་ཡིན་ནོ། །ཤཱཀྱ་ཤྲཱི་བྷ་དྲ་ནི་རྣམ་ཐར་འདུལ་བའི་སྐབས་སུ་བསྟན་ཟིན་ལ་དེའི་ཕྱགས་ཕྱིར་པཎ་ཆུང་དགུ་བྱོན་པ་ལས་བི་བྷཱུ་ཏི་ཙནྡྲ་རྣལ་འབྱོར་ཟླ་བ་ནི་སྒྲ་དང་མངོན་པ་ལ་མཁས་ཤིང་དཔལ་ཤ་ཝར་ལ་ཡང་དངོས་སུ་ཐུག་སྟེ་སྦྱོར་བ་ཡན་ལག་དྲུག་པ་གསན། དཔྱལ་ཨ་མོ་གྷ་ལ་གསུངས་པས་ཛོ་ནང་སྦྱོར་དྲུག་པ་རྣམས་བྱུང༌། པཎ་ཆེན་ལ་འབྲི་ཁུང་འཇིག་རྟེན་མགོན་པོ་དང་རྒྱ་མའི་སངས་རྒྱས་དབོན་སྟོན་གྱི་གདན་འདྲེན་འདོམས་ནས་གྲོས་མཛད་པ་ན་བི་བྷཱུ་ཏིས་ནོར་འབྲི་ཁུང་པ་མང་ཟེར་སྟེ་ཕྱག་རྒྱ་པ་འདི་རྫུན་ཆེ་ཟེར་བྱས་པས་(ཏ༩ན)

[Full Size]

རྗེ་པཎ་ཆེན་གྱིས་ནཱ་གརྫུ་ན་དེ་སྐད་མི་བཏུབ་བོ། །འབྲི་ཁུང་པའི་སློབ་མ་ཁམས་པ་ཅིག་གིས་ང་ལ་ཆོས་གོས་སློངས། སྣམ་བུ་བྱིན་པ་མ་འདོད་པར་ངའི་ཆོས་གོས་ནས་འཐེན། ཇོ་སྲས་ཉི་མས་དེ་ལ་ཕུལ་བརྡེག་བྱས་པས་བརྡབས་ནས་སྣ་ཁྲག་བྱུང༌། དེ་ནས་རྗེ་བཙུན་མ་སྒྲོལ་མ་ཞག་བདུན་དུ་ངའི་ཡན་ལག་བདུན་པའི་ཡུལ་མཛད་དུ་མ་བཞེད། ནན་གྱིས་གསོལ་བ་བཏབ་པས་ཀྱང་སྐུ་རྒྱབ་བསྟན་ནས་ཞལ་སྟོན་དུ་མ་བཞེད་རྒྱུ་མཚན་ཞུས་པས་ཁྱེད་ཀྱི་འཁོར་གྱིས་ནཱ་གརྫུ་ནའི་སློབ་མ་སུན་ཕྱུང༌། བཤེགས་པར་བནྡྷྱ་ཆོས་གོས་མེད་པ་བརྒྱ་ལ་ཆོས་གོས་བྱིན་གསུངས། པཎྜི་ཏ་ཡང་དེར་སོང་ལ་ངག་གི་ལས་བཤེགས་པ་གྱིས། གང་མོས་པའི་ལྷ་ཁང་ཞིག་བཞེངས་ཅིག་གསུངས། དེར་བི་བྷཱུ་ཏིས་འབྲི་ཁུང་དུ་བྱོན་ནས་བཤེགས་པ་ཕུལ་བསྟོད་པ་མཛད། ཕྱིས་སྲིན་པོ་རིར་པཎ་ཆེན་གྱི་སྐུ་ཚད་ཀྱི་བདེ་མཆོག་གི་ལྷ་ཁང་བཞེངས་སྟེ་ན་མཁའ་ལ་བཞུགས་པ་བྱིན་རླབས་ཅན་དུ་གྲགས། བོད་དུ་ཡུན་རིང་དུ་བཞུགས་ཤིང་ཕྱིས་ས་པཎ་གི་སྡོམ་གསུམ་རབ་དབྱེ་བརྩམས་ནས་སྡོམ་སུམ་གནས་གྱུར་དུ་བཤད་པ་གཟིགས་ནས། དེང་སང་བསྟན་པའི་ཞབས་འདི་རུ། །སྡོམ་པ་གསུམ་གྱི་རྣམ་གཞག་ལ། །མཁས་པའི་རྒྱུ་སྐར་འགའ་ཞིག་གིས། །ཕྱོགས་རེའི་ཆ་ཙམ་རྟོགས་གྱུར་མོད། །སོགས་ནས། བདག་བློ་ཉི་མའི་དཀྱིལ་འཁོར་གྱིས། །ཕྱོགས་ལས་རྒྱལ་བར་བྱས་སྟེ་འགོད། །ཅེས་དང༌། གསུམ་ལྡན་གསུངས་པའི་དགོངས་པ་ནི། །ཞེས་སོགས་ཀྱི་སྡོམ་གསུམ་འོད་ཕྲེང་བརྩམས་ཤིང་རང་འགྱུར་མང་དུ་མཛད་ཏོ། །སུ་ག་ཏ་ཤྲི་བདེ་གཤེགས་དཔལ་དབུ་མ་དང་ཕར་ཕྱིན་ལ་མཁས། ཛ་ཡ་དྡྷ་རྒྱལ་བས་བྱིན་སྔགས་དང་འདུལ་བ་ལ་མཁས། དཱ་ནཱ་ཤཱི་ལ་ཚད་མ་རྒྱན་དང་ཆོས་མཆོག་ལ་མཁས། འདི་དང་སངྒྷ་ཤྲཱི་ལ་ས་སྐྱ་བ་ཀུན་དགའ་རྒྱལ་མཚན་གྱིས་སྒྲ་དང་ཚད་མ་བསླབས། རྗེ་པཎ་ཆེན་ལས་བསྙེན་རྫོགས་མཛད་དེ་པཎྜི་ཏ་ཆེན་པོར་གྱུར། རྒྱ་གར་ན་(ཏ༩བ)

[Full Size]

དཱ་ན་ཤྲཱི་ལ་སྒྲ་ཚད་ལ་མཁས་པར་འདུག་པ་དེ་ངའི་རྩར་ཀོར་གྱིས་འཁོར་བྱུང་ཞེས་གསུངས་སྐད། རྒྱ་གར་བ་ཡི་དམ་གསང་བས་ས་པཎ་གྱིས་འདིའི་ཡི་དམ་མ་མཁྱེན་ནས་དྷ་དུ་ར་དཀར་པོའི་རྫས་དྲངས་བསྙུང་བ་ལ་སྨན་པས་འགྲངས་པར་ཁ་མར་བཏགས་ནས་ད་ཇི་ལྟར་མཛད་ཞུས་པས་འོ་ན་ཡི་དམ་ལ་འཕོ་བ་བྱེད་པ་ཡིན་གསུངས་ནས་ན་བཟའི་གོང་པའི་བར་ནས་གཤེད་དམར་གྱི་སྐུ་ཆུང་ངུ་ཞིག་བཏོན་ནས་དེ་ལ་འཕོ་བར་བཞེད་དེ་སྤྱི་བོ་ནས་འོད་ཁྲ་ཆེམ་བྱུང་བ་དང་ཀུ་རེ་བགྱིས་པ་ཡིན་མི་འཕོ་བར་ཞུ་ཞེས་ཡང་ཡང་ཞུས་པས་མ་འཕོས་ཀྱང་ཤིན་དུ་མ་མཉེས་ནས་མཐར་ས་པན་རང་གི་ལྕམ་མོ་ཞིག་ལས་རྒྱར་ཕུལ་བས་ཐུགས་སོས་སྟེ་གཤེད་དམར་ཡི་དམ་དུ་གནང་ཞེས་ཐོས་ཤིང་ཕྱིར་དཱ་ན་ཤཱི་ལ་སྐུ་འདའ་ཀར་ང་ལྟ་བུའི་མཁས་པ་བོད་མཐའ་འཁོབ་ཏུ་འཆི་དགོས་པ་གསུངས་ནས་འདར་མ་བཞེད་པ་ལ་མཁན་པོ་བོ་དྷ་ས་ཏྭ་དང་ཇོ་བོ་རྗེ་དང་དམ་པ་སངས་རྒྱས་རྣམས་ཀྱང་བོད་དུ་འདས་ཞུས་པས་བིཀྵུ་སྡོམ་པ་གཙང་མ་ཡིན་ཨ་ཙ་ར་སེམས་བཟང་པོ་ཡིན་ཛོ་གི་མན་ངག་མང་པོ་ཤེས་གསུངས་སྐད། པཎྜི་ཏ་སྨི་ཏི་ཡང་བོད་དུ་འདས་བྱས་པས། དེ་ལྟ་བུ་མཁས་པ་ཆེན་པོ་ཡིན། འོ་ན་ཁོ་བོའི་འཆི་ས་ལོས་བཏུབ་གསུངས་ནས་གཤེགས་སྐད་ཏོ། །སདྷ་ཤྲཱི་སྒྲ་ཙནྡྲ་པ་དང་མངོན་པ་མཛོད་ལ་མཁས། སུ་མ་ཏི་སཱ་གར་བློ་བཟང་རྒྱ་མཚོ་མངོན་པ་གོང་འོག་ལ་མཁས། ཀ་ལ་ཙནྡྲ་དུས་ཀྱི་ཟླ་བ་དུས་འཁོར་ལ་མཁས། ཛི་ན་གུཔྟ་རྒྱལ་བ་སྦས་པ་བྱམས་ཆོས་ལ་མཁས། མ་ཧཱ་བོ་དྷི་བྱང་ཆུབ་ཆེན་པོ་ཕར་ཕྱིན་དང་སྤྱོད་ཕྱོགས་ལ་མཁས་སྟེ་པཎ་ཆུང་དགུ་པོའོ། །ཕྱིས་པཎ་ཆེན་གཤེགས་ཀར་ལོ་ཙཱ་བ་ཆེན་པོ་ལ་བཀའ་ཡིག་ཕྱག་བྲིས་མཛད་དེ་རིང་སྲེལ་སྐྱེལ་བ་ལ་པཎྜི་ཏ་ཛ་བྷ་མ་ཤྲཱི་འཇུག་ངོགས་དཔལ་དང་ཏྲཻ་ལོཀྱ་ཨཱ་ནནྟ་འཇིག་རྟེན་གསུམ་ཀུན་ནས་དགའ་བ་གཉིས་ལ་བཀའ་ཕབ་སྟེ་བོད་དུ་བྱོན། སིལ་སྙན་བདུན་པའི་ཚིགས་བཅད་སོགས་བསྒྱུར་རོ། །ལོངས་སྤྱོད་རྡོ་རྗེ། རཏྣ་ཤྲཱི། (ཏ༡༠ན)

[Full Size]

བལ་པོ་མ་ཧཱ་པ་ན། བལ་པོ་བཛྲ་ཀིརྟི། བལ་པོ་ཀཱ་ཡ་ཤྲཱི། བལ་པོ་གྲགས་པ་དཔལ། སུ་མཱ་ར། ཐམས་ཅད་མཁྱེན་པའི་དཔལ། སཱདྷཱུ་ཀིརྟི། བི་ན་ཡ་ཤྲཱི། མངྒ་ལ་ཤྲཱི། དཱབ་ན་ཨཱ་ཙརྻ། ཛ་ཡ་དེ་ཝ། ལ་ཀཱིམ་ཀཱ་ར། རཏྣ་ཤྲཱི། ཨཱ་ནནྟ་ཤྲཱི། རཱ་ཧུ་ལ་ཤྲཱི། ཟངས་གླིང་པ། ཀིརྟི་པཎྜི་ཏ་ལ་སོགས་དང༌། ཤཱ་རི་པུ་ཏྲ་དང༌། ཕྱིས་རྒྱ་གར་ཤར་ཕྱོགས་ཀྱི་པཎྜི་ཏ་ཤྲཱི་པཱ་རཏྣ་ནགས་ཀྱི་རིན་ཆེན་ཞེས་བྱ་བ་སངས་རྒྱས་དབྱངས་ཀྱི་སློབ་མ་ཤ་ཝ་རིས་རྗེས་སུ་བཟུང་ནས་བོད་ཡུལ་དུ་སོང་ཞིག་རྒྱལ་པོ་ཅིག་ལ་བརྟེན་ནས་སྐྱེ་བོ་རྣམས་ཀྱི་ལོག་རྟོག་ལྡོག་པར་འགྱུར་རོ་ཞེས་ལུང་བསྟན་སྟེ་བོད་དུ་བྱོན། ལྷ་གཟུགས་གྲགས་པ་འབྱུང་གནས་ཀྱིས་སྦྱིན་བདག་བྱས་སྟེ་ཆོས་མང་དུ་གསུངས་བོད་ཀྱི་མཁས་པ་དང་དཔྱོད་ལྡན་མང་ཞིག་གི་ལྟ་བ་དྲང་པོར་མཛད་ནས་བལ་པོར་གཤེགས་སྟེ་པཎྜི་ཏ་ཚད་ལྡན་བོད་དུ་བྱོན་པ་དེང་སང་ཡན་ལ་འདི་རྟིང་མར་སྣང་ངོ༌། །སྒྱུར་བྱེད་ཀྱི་ལོ་ཙཱ་བ་བཀའ་དྲིན་ཅན་ཇི་ལྟར་བྱོན་པ་ནི། ལོ་ཙཱ་བ་ལ་སྔ་བ་ཐོན་མི་སམྦྷོ་ཊ། དྷརྨ་ཀོཥྛ། ལྷ་ལུང་རྡོ་རྗེ་དཔལ། བྲན་ཀ་མུ་ལ་ཀོ་ཥ་རྣམས་ཆོས་རྒྱལ་སྲོང་བཙན་གྱི་དུས་ཀྱི་ལོ་ཙཱ་བའོ། །ཁ་ཆེ་ཨཱ་ནནྟ། ཁྲི་བཞེར་སང་ཤི་ཏ། སྦྲང་རྒྱ་རེ་ལེགས་གཟིགས། སེང་མ་གོང་ལྷ་ལུང་གཟིགས། རྦ་ཡེ་ཤེས་དབང་པོ། ངན་ལམ་རྒྱལ་བ་མཆོག་དབྱངས། དབའ་ས་མཛྙུ་ཤྲཱི། པ་གོར་བཻ་རོ་ཙ་ན། རྦ་མང་རྗེ་གསལ་སྣང༌། སྣ་ནམ་རྡོ་རྗེ་བདུད་འཇོམས། གཉགས་ཛྙ་ན་ཀུ་མར། ཅེ་ཛྙ་ན་སིདྡྷི། མཆིམས་ཤཱཀྱ་པྲ་བྷ། བྲང་ཏི་ཛ་ཡ་རཀྴི་ཏ། ཤུད་བུ་དཔལ་གྱི་སེང་གེ །རྩངས་དེ་ཝེནྡྲ་རཀྴི་ཏ། བྲན་ཀ་མོ་ཏི་ལ། ཁོན་ནཱ་གེནྡྲ་རཀྵི་ཏ། རྨ་རིན་ཆེན་མཆོག །རྩངས་ས་ལའི་བུ་རིན་ཆེན་ལེགས་གྲུབ། དྷརྨ་ཨཱ་ལོ་ཀ་དྲན་པ་ནམ་མཁའ། སྒྲོ་རིན་ཆེན་སྡེ། རྨ་རྣམ་པར་མི་རྟོག་པ། རྨ་ཤཱཀྱ་འོད། ཅེ་ཁྱི་(ཏ༡༠བ)

[Full Size]

འབྲུགརླངས་ཁམས་པ་གོ་ཆ། གཉགས་དེ་ཝ་ཀོ་ཥ། ཞང་རྒྱལ་ཉེན་ཉ་བཟང༌། མགོས་ཆོས་གྲུབ། སྟོང་ཆོས་གྲུབ། སྟོང་ཨཱ་ཙརྻ། དྷརྨ་ཏ་ཤྲཱི་ལ། ཅོག་རོ་ཀླུའི་རྒྱལ་མཚན། ཀ་བ་དཔལ་བརྩེགས་སྲུང་བ། ཞང་གི་བནྡྷྱ་ཡེ་ཤེས་སྡེ། རཏྣ་རཀྵི་ཏ། ཛ་ཡ་རཀྵི་ཏ། མཉྫུ་ཤྲི་ཝརྨ། རད་ནེནྡུ་ཤཱི་ལ། བཟང་སྐྱོང༌། ལྷའི་ཟླ་བ། དཔལ་གྱི་ལྷུན་པོ། དཔལ་འབྱོར། ཡེ་ཤེས་སྙིང་པོ། རྒྱལ་བ་ཤེས་རབ། ཤཱཀྱ་བཤེས་གཉེན། དགེ་བ་དཔལ། ལེགས་པའི་སྡེ། སྣུབས་ན་མཁའ་སྙིང་པོ། ཡི་གེ་པ་དགོན་གླིང་རྨ། གཞོན་ནུ་སྲུང་བ། ན་མཁའ་སྐྱོང་རྣམས་ནི་བསྟན་པ་སྔ་དར་གྱི་ལོ་ཙཱ་བ་ཡིན་ནོ། །ཕྱི་དར་ལ་ལྷ་བླ་མ་ཡེ་ཤེས་འོད་ཀྱིས་མངའ་རིས་སུ་ཁྱེའུ་ཀུན་བསགས་ནས་བློ་རྣོ་ཉེར་གཅིག་རྒྱ་གར་དུ་བརྫངས་སྟེ་རབ་བདུན་ནས་རིན་ཆེན་བཟང་པོ་དང་འབྲིང་བདུན་ནས་གྲགས་འབྱོར་ཤེས་རབ་གཉིས་མ་གཏོགས་པ་ཤི། རིན་ཆེན་བཟང་པོ་མཁས་པའི་མཐར་ཐུག་པར་གྱུར་སྟེ་མཚན་ཉིད་ཐེག་པ་དང་རྒྱུད་སྡེ་བཞི་གནས་བསྒྱུར་ཞིང་ཁྱད་པར་ཡོ་ག་དང་གསང་འདུས་ཀྱི་ཕྱོགས་བསྒྱུར། སྔགས་ལོག་སུན་འབྱིན་མཛད་དེ་སྦྱོར་གྲོལ་དུས་མིན་དུ་སྤྱོད་པ་བཀག་ལོ་ཙཱ་བ་ཆེན་པོར་མཚན་གྲགས་སོ། །མངའ་རིས་སུ་སངས་རྒྱས་སྐར་རྒྱལ་ཡིན་ཟེར་བ་སྟོན་པའི་སྐུ་ལྟར་སྣང་བ་རྫུ་འཕྲུལ་ཅན་ཞིག་གིས་ན་མཁའ་ལ་འཕགས་སྟེ་སངས་རྒྱས་ཀྱི་བསྟན་པ་དང་འདྲ་མིན་དུ་བསྟན་པ་ལ་སྐྱེ་བོ་ཐམས་ཅད་འདུས་པ་ན་ལོ་ཆེན་གྱིས་འཇིགས་བྱེད་ཀྱི་སྒྲུབ་པ་ཟླ་བ་དྲུག་མཛད་དེ་སྐྱེད་རིམ་བརྟན་པོས་དེའི་རྩར་བྱོན་པ་ན་ལོ་ཆེན་གྱིས་གཟིགས་པ་ཙམ་གྱིས་དེ་ས་ལ་ལྷུང་སྟེ་རྫི་བོ་ཐ་མལ་པ་ཅིག་དུ་གྱུར། དེས་བསྟན་པའི་ཆོས་ལས་དོར་གཅོད་ཀྱི་ཕན་ཡོན་མ་གཏོགས་བསྣུབས་སྐད། དེ་ནི་ནག་ཕྱོགས་ཀྱི་ཀླུ་སྐར་རྒྱལ་ཞེས་བྱ་བས་རྫི་བོ་ཞིག་ལ་བརླབས་སྟེ་བསྟན་པ་ལ་བར་ཆད་བརྩམས་པར་སྣང༌། ཕྱིས་ཇོ་བོ་རྗེ་ལས་སྒྲུབ་པའི་གདམས་ངག་གསན་སྟེ་སྒྲུབ་ཁང་རིམ་པ་གསུམ་གྱི་སྒོ་རེ་རེ་(ཏ༡༡ན)

[Full Size]

ཞིང་འདི་ཚུན་ལ་ཆོས་མིན་གྱིས་རྟོག་པ་དང༌། རང་དོན་ཡིད་བྱེད་ཀྱི་རྟོག་པ་དང༌། ཐ་མལ་གྱི་རྟོག་པ་སྐྱེས་ན་མགོ་བོ་ཁོས་ཅིག་ཞེས་བྲིས་ནས་ཉེ་རྒྱུའི་སྒྲུབ་པ་མཛད་དེ་དགུང་ལོ་དགུ་བཅུ་གོ་བརྒྱད་བཞེས་པ་ཇོ་བོ་ཐེགས་པའི་ཕྱི་ལོ་ཤིང་ལུག་ལ་སྐུ་ལུས་འདིས་མཁའ་སྤྱོད་དུ་གཤེགས་སོ། །དེའི་ལོ་ཆུང་གྲགས་འབྱོར་ཤེས་རབ་ཀྱིས་ཀྱང་ཚད་མ་དང་མ་རྒྱུད་བདེ་མཆོག་གི་སྐོར་བསྒྱུར་ཞིང་འཕྲིན་ལས་ཆེའོ། །བལ་པོ་ཆུང་འགར་ཆོས་བཟང་གིས་ཀྱང་ལོ་ཙཱའི་ཆོས་དྲུག་ཅེས་གྲགས་པ་བསྒྱུར་ནས་རི་བོ་རྩེ་ལྔར་གཤེགས། དགེ་ཚུལ་ཁྱུང་གྲགས། བལ་པོ་པདྨ་རུ་ཙེ། པ་ཚབ་ཚུལ་ཁྲིམས་རྒྱལ་མཚན་འདིས་དྲན་པ་ཉེར་བཞག་གི་འགྱུར་ཆད་བསབས། དཔྱལ་སེ་ཙ་བསོད་ནམས་རྒྱལ་མཚན། རོང་པ་ཆོས་བཟང༌། འབྲོ་སེང་དཀར་ཤཱཀྱའི་འོད། ཁྱུང་པོ་ཆོས་བརྩོན། རྒྱ་བརྩོན་འགྲུས་སེང་གེ་ནག་ཚོ་ཚུལ་ཁྲིམས་རྒྱལ་བ། རྔོག་ལེགས་པའི་ཤེས་རབ། འབྲོམ་སྟོན་རྒྱལ་བའི་འབྱུང་གནས། ཁྱུང་པོ་རྣལ་འབྱོར། ཡོལ་ལྕགས་རྡོ་རྗེ་དབང་ཕྱུག །རྨ་དགེ་བའི་བློ་གྲོས། བྱི་ཇོ་ཟླ་བའི་འོད་ཟེར་འདིས་དུས་འཁོར་ཐོག་མར་བོད་ཡུལ་དུ་བསྒྱུར། དེ་ནས་ལོ་བཅུ་དྲུག་པ་ལ་ཇོ་བོ་རྗེ་བོད་དུ་ཕེབས་སོ། །ལྷ་ཞི་བ་འོད། ཁུ་དངོས་གྲུབ། ཆོས་ཀྱི་ཤེས་རབ། མར་ཐུང་དད་པ་ཤེས་རབ། ག་རོད་ཚུལ་ཁྲིམས་འབྱུང་གནས། འབྲོག་མི་ཤཱཀྱ་བློ་གྲོས། འབྲོག་མི་ཤཱཀྱ་ཡེ་ཤེས་འདིའི་བཀའ་རྒྱུད་དཔལ་ལྡན་ས་སྐྱ་པའོ། །སྟག་ལོ་གཞོན་བརྩོན། ལྷོ་བྲག་མར་པ་ཆོས་ཀྱི་བློ་གྲོས་འདིས་སྒྲུབ་རྒྱུད་ཀྱི་བསྟན་པ་དཔེལ་ལོ། །མགོས་ཁུག་པ་ལྷ་བཙས་འདིས་རྒྱ་གར་དུ་ལན་གསུམ་བྱོན། པཎ་གྲུབ་བདུན་བཅུ་རྩ་གཉིས་བསྟེན་མ་རྒྱུད་མང་དུ་བསྒྱུར། སྔགས་ལོ་གསུམ་འབྱིན་བརྩམས་སོ། །ཟངས་དཀར་འཕགས་པ་ཤེས་རབ་ནི་མངའ་རིས་ཟངས་དཀར་དུ་འཁྲུངས། ཁ་ཆེ་དགོན་པ་བ་དང་ཁ་ཆེ་ཛྙཱ་ན་ཤྲཱི་སོགས་བསྟེན། རྣམ་སྲས་ཀྱི་སྐོར་སྤྱན་དྲངས་(ཏ༡༡བ)

[Full Size]

ལྷ་སའི་སྤྲང་ཚང་བཏོན། ལྷ་ས་བསམ་ཡས་དང་མཐའ་འདུལ་ཕལ་ཆེར་སྟེ་གཙུག་ལག་ཁང་བཅོ་ལྔ་ཙམ་ལ་ཞིག་གསོ་ཕུལ་ཕྱིན་མཛད། སྣུར་ཉི་མ་དང་སྦལ་ཏི་སེམས་དཔའ་ཆེན་པོ་སོགས་ཟངས་དཀར་གྱི་བུ་བཞི་བྱུང༌། རྭ་ལོས་འཕགས་སྐོར་བསྒྱུར་ཡང་ཤྩོ་ཀ་ལྔ་ཙམ་ལས་མ་འགྱུར་བ་ལྔ་འགྱུར་ཙམ་མྱུར་དུ་བསྒྱུར་བས་ཕྲག་དོག་སྐྱེས་སྟེ་རེག་དུག་བཏང་བས་སྙུང༌། ཕྱིས་ཆུ་མིག་རིང་མོར་འདས་ཞེས་རྣམ་ཐར་ན་སྣང༌། གཉན་དར་མ་གྲགས་ཀྱིས་རྒྱ་གར་དུ་ལོ་བཅུ་གཉིས་བཞུགས། ཆོས་མང་དུ་བསྒྱུར། ཁྱད་པར་དུ་མགོན་པོ་ཞལ་བཞི་པ་སྤྱན་དྲངས། ཕྱིས་རྭ་ལོ་དང་མཐུ་འགྲན་པས་གཉི་ག་གཤེགས་སྐད། རྭ་རྡོ་རྗེ་གྲགས་ཀྱིས་བ་རོ་ཕྱག་རྡུམ་སོགས་བསྟེན། གཤེད་སྐོར་སོགས་གཙོ་བོར་བསྒྱུར། རྒྱ་བོད་དུ་ཟང་ཟིང་གི་དགེ་བ་མང་དུ་མཛད་མངོན་སྤྱོད་མང་དུ་མཛད་སྐད། འདི་ལ་རྗེ་འཇིག་རྟེན་མགོན་པོ་སོགས་ནི། བ་རོ་དེ་མུ་སྟེགས་ཡིན་ཞིང་རྭ་ལོས་ཁོང་རང་གི་སློབ་དཔོན་མཐུས་བསད་པ་ཡིན་ཞེས་འདི་ལས་བརྒྱུད་པ་ཙམ་གྱི་ཆོས་ལ་མི་མཉེས་ཁེར་གང་འཁོར་ལོ་གྲགས། ལ་ཆིངས་ཡོན་ཏན་འབར། སྤོང་ཞོ་གསལ་བ་གྲགས། མགར་ཆོས་ཀྱི་བཟང་པོ། ཤེའུ་བཛྲ་དེ་ཝ། རབ་ཞི་བཤེས་གཉེན། མར་པ་དོ་པ་ཆོས་ཀྱི་དབང་ཕྱུག་འདི་ཡ་འབྲོག་དོ་ནང་དུ་འཁྲུངས། བདེ་མཆོག་གི་སྐོར་མང་དུ་བསྒྱུར་རོ། །དེའི་ལོ་ཆུང་ལེགས་པའི་ཤེས་རབ་ཀྱིས་ཀྱང་བདེ་མཆོག་གི་སྐོར་མང་དུ་སྤྱན་དྲངས་སྒྲུབ་པ་རྩེ་གཅིག་མཛད་དེ་སྐུ་ལུས་འདིས་མཁའ་སྤྱོད་དུ་བྱོན་ནོ། །སྤྱིར་ལོ་ཆེན་རིན་ཆེན་བཟང་གི་སློབ་མ་ལོ་ཆུང་སྟེ་གཉིས་ཀ་ལ་སྤུ་རངས་ལོ་ཆུང་ཞེས་གྲགས་ཅིང་གཉིས་ཀའི་མཚན་ལེགས་པའི་ཤེས་རབ་ཏུ་འདོད་པ་དུ་མ་བྱུང་ཡང་སྔ་མའི་མཚན་ནི་གྲགས་འབྱོར་ཤེས་རབ་དང་ཕྱི་མའི་མཚན་ལེགས་པའི་ཤེས་རབ་ཡིན་ལ་སྐུ་ལུས་འདིས་མཁའ་སྤྱོད་ཏུ་གཤེགས་པ་ནི་ཕྱི་མ་ཡིན་པར་སྣང་ངོ༌། །(ཏ༡༢ན)

[Full Size]

ཟུ་དགའ་བ་རྡོ་རྗེ། ཆོས་ཀྱི་ཡོན་ཏན། ཆོས་ཀྱི་རིན་ཆེན། ཀློག་སྐྱ་ཤེས་རབ་བརྩེགས། བ་རི་རིན་ཆེན་གྲགས་འདི་ཁམས་སུ་འཁྲུངས། རྡོ་རྗེ་གདན་པ་ལ་སོགས་བསྟེན། དོན་ཞགས་ལ་གཙོ་བོར་མཛད་ནས་ཐུགས་རྗེ་ཆེན་པོ་ཞལ་གཟིགས། རྒྱ་གར་དུ་མུ་སྟེགས་ཀྱི་རྒྱལ་པོས་མི་བརྒྱ་ཕྲག་བླུད་དུ་གསོད་པ་གསེར་གང་ཡོད་ཀྱིས་བླུས། ལན་གཅིག་ཐུགས་རྗེ་ཆེན་པོ་བཤུམ་ཞིང་འདུག །ཅི་ནོངས་ཞུས་པས་ངའི་བུ་མང་འོར་ལོ་ཙཱ་བའི་གསེར་ཞོ་དོ་ངའི་བུ་སྨྱལ་པ་ལོ་ཙཱ་བས་བརྐུས་ནས་ངུ་ཞིང་འདུག་གསུངས། མ་ག་དྷའི་གྲོང་དུ་བཙལ་བས་དེ་ལྟར་འདུག་སྟེ་བླ་མ་གྲུབ་ཐོབ་ཅིག་ལ་དབང་བསྐུར་ཞུ་བའི་ཆོས་འཚོལ་དུ་བོད་དུ་ཕྱིན་པས་གསེར་ཞོ་དོ་རྙེད་པ་སྟོར། ད་དབང་བསྐུར་མི་ཐོབ་ཟེར་ནས་སྡུག་བསྔལ་བར་འདུག་པས་བ་རི་བས་གསེར་ཞོ་བཞི་བྱིན། འདིས་ས་སྐྱའི་བླ་མ་ཡང་མཛད་ཆོས་མང་དུ་བསྒྱུར། གཙོ་བོར་དོན་ཞགས་ཀྱི་འཕྲིན་ལས་ཆེའོ། །པ་ཚབ་ཉི་མ་གྲགས། ལྷ་བཙན་པོ་མུ་ནི་རཱ་ཛཱ། དིང་རི་ཆོས་གྲགས། རྒྱུས་སྨོན་ལམ་གྲགས། མང་འོར་བྱང་ཆུབ་ཤེས་རབ། མལ་གྱི་བློ་གྲོས་གྲགས་འདིས་མགོན་པོའི་སྐོར་དུ་མ་སྤྱན་དྲངས་སྟེ་མགོན་པོའི་དངོས་སློབ་རྒྱ་གར་གྱི་སློབ་དཔོན་ཨ་རྞ་པ་ལ་གསན་པ་གྲི་གུག་ལྕགས་པར་མ་སྨྱལ་པ་ཉི་མ་འབར་ལ་གནང་ནས་ཕྱིས་བེར་ནག་ཅན་དུ་གྲགས། བྲམ་ཟེ་མཆོག་སྲེད་ནས་ཤྲཱདྡྷ་ཀ་ར། ལོ་ཆེན་རིན་བཟང༌། བྲག་སྟེང་པ་ཡོན་ཚུལ་ལ་གསན་པ་གྲི་ཕུག་ཅེར་བུ་ནི་ས་ཆེན་ཀུན་སྙིང་ལ་གནང་སྟེ་ཕྱིས་གུར་མགོན་དུ་གྲགས་སོ། །གྱི་ལྗང་དབུ་དཀར་ནི་མ་མགོན་གྱི་གྲུབ་ཐོབ་ཡིན། འགྲོ་ཤེས་རབ་གྲགས་འདིས་དུས་འཁོར་འབྲོ་ལུགས་རྣམས་བསྒྱུར། བ་རེག་ཐོས་པ་དགའ། རྨ་ཆོས་འབར། མཚུར་དབྱིག་གི་རྒྱལ་མཚན་འདི་གསུམ་གྱིས་རྒྱ་གར་ཕྱག་ན་བསྟེན་ནས་གྲུབ་སྙིང་དང་དོ་ཧའི་སྐོར་བསྒྱུར། ཙ་མི་སངས་རྒྱས་(ཏ༡༢བ)

[Full Size]

གྲགས་པ་འདི་མདོ་ཁམས་སྨད་མི་ཉག་གི་ཡུལ་དུ་འཁྲུངས། རྒྱ་གར་དུ་མཁས་ཤིང་དངོས་གྲུབ་ཐོབ་ནས་རྡོ་རྗེ་གདན་དུ་སྟོན་པའི་རྒྱལ་ཚབ་མཛད། དུས་འཁོར་ཙ་མིའི་རྒྱུད་གསུམ་སོགས་བསྒྱུར། རྒྭ་ལོ་གཞོན་ནུ་དཔལ་འདི་མདོ་ཁམས་སུ་འཁྲུངས། རུས་རྒྭ་ཡིན་པ་རྒན་གཞོན་གཉིས་ཕྱིན་པས་རྒྭ་ཆེན་རྒྭ་ཆུང་དུ་གྲགས། རྒྱ་གར་དུ་སུ་མཁས་དྲིས་པས་ཙ་མི་ཁོ་ན་མཁས་ཟེར་བས་རྒྱ་གར་དུ་ཡོང་ནས་བོད་གཅིག་གིས་གཅིག་ལ་ཉན་པ་མི་ཡོང་བསམས་ནས་གཞན་དྲིས་པས་ཨ་བྷྱ་ཀཱ་ར་དང་ཨོ་ཌྱན་གྱི་པཎྜི་ཏ་ཝཱ་གི་ཤྭ་ར་མཁས་ཟེར་སྟེ་དེ་གཉིས་ཀྱང་ཙ་མི་ལ་ཆོས་ཉན་ཞིང་འདུག་པས་སླར་ཙ་མི་དང་ཨ་བྷྱ་ལ་ཆོས་ཞུས། བདེ་མཆོག་གི་བསྙེན་པ་བྱས་པས་ཡི་དམ་གྱི་ལུང་བསྟན་བྱུང་ནས་སྤྱོད་པ་ལ་དུར་ཁྲོད་གསིལ་བ་ཚལ་དུ་ཕྱིན། དེར་ལས་མགོན་བྱ་རོག་མས་སྲོག་སྙིང་ཕུལ། བར་ཆད་མེད་པར་ལོག་པས་བླ་མ་གཉིས་ཀྱིས་ཀྱང་བཀུར་སྟི་མཛད། མ་ག་དྷའི་རྒྱལ་པོས་སྤྱན་དྲངས་སྐྱེ་བོའི་ཚོགས་ས་གཞི་གང་བ་འདུས་སྟེ་མེ་ཏོག་གཏོར་བ་ལ་པུས་མོ་ནུབ་པ་ཙམ་བྱུང་སྟེ་སངས་རྒྱས་མྱ་ངན་ལས་འདས་རྗེས་ཆོས་སྨྲ་བ་ལ་མེ་ཏོག་གཏོར་བ་དེ་ལས་མང་བ་མ་བྱུང་བར་གྲགས། ཆོས་དུ་མ་བསྒྱུར་ཞིང་ཁྱད་པར་མགོན་པོ་བྱ་རོག་མ་སྤྱན་དྲངས་སྟེ་རྗེ་དུས་མཁྱེན། ཞང་རིན་པོ་ཆེ། ཁམས་པ་ཨ་སེང་གསུམ་ལ་གནང་ཞིང་ཁམས་པ་ཨ་སེང་ལ་དཔལ་ཕག་མོ་གྲུ་པས་གསན་སྟེ་མགོན་པོ་དཀར་ལུགས་ཚལ་ལུགས་འབྲི་གདན་གྱི་ལུགས་རྣམས་བྱུང་ངོ༌། །རྒྭ་ལོ་ལ་སྲོག་གེགས་བྱུང་བ་གཞན་གྱིས་མ་སོལ་ནས་ས་ཆེན་གྱིས་བསལ་ཞེས་བོད་ན་ཟེར་ཡང་གཞན་ཞིག་དང་འཁྲུལ་བ་སྟེ་དེ་ལྟའི་གནས་མེད་པས་རྒྭ་ལོའི་རྣམ་ཐར་ལྟོས་ཅིག །ཀྲེ་བོ་ཤེས་རབ་དཔལ། མཚུར་སྟོན་དབང་གི་རྡོ་རྗེ། རྭ་ཆོས་རབ། དཔྱལ་ཀུན་དགའ་རྡོ་རྗེ། དཔྱལ་ཀུན་དགའ་གྲགས། ཞང་ཤེས་རབ་བླ་མ། ཞ་མ་སེང་རྒྱལ། བཀྲ་ཤིས་རྒྱལ་མཚན། (ཏ༡༣ན)

[Full Size]

ཆོས་ཀྱི་སྙིང་པོ། ཀཾ་ཆོས་ཀྱི་ཡེ་ཤེས། ཕྱུགས་མཚམས་དབང་ཕྱུག་རྒྱ་མཚོ། ཚུལ་ཁྲིམས་ཡོན་ཏན། ཁེར་གང་ཡོན་ཏན་དཔལ། བསོད་ནམས་བཟང་པོ། སུམ་བྷ་དཔལ་མཆོག་དང་པོའི་རྡོ་རྗེ་འདིས་རྡོ་རྗེའི་གདན་དུ་སྒྲོལ་མ་དང་ཕག་མོ་ལས་བློ་སྦྱོང་སྙན་རྒྱུད་གསན་པས་རྟོགས་པ་འཁྲུངས་ཤིང་བདེ་མཆོག་མཁའ་འགྲོ་རྒྱ་མཚོ་གཙོ་བོར་སྤྱན་དྲངས་སོ། །ཉི་མ་རྡོ་རྗེ། ཁུ་དགེ་བསྙེན་ནེ་ཙོ། ཀློག་སྐྱ་གཞོན་ནུ་འབར། ལྷ་ཡེ་ཤེས་རྒྱལ་མཚན། བྱང་ཆུབ་འབྱུང་གནས། གླན་ཆོས་ཀྱི་བློ་གྲོས། ཅོག་གྲུ་ཏིང་འཛིན་བཟང་པོ། ཤེས་རབ་ཡེ་ཤེས། རིག་པ་གཞོན་ནུ། གཞོན་ཚུལ། ཁུ་མདོ་སྡེ་འབར། སྟེང་ལོ་ཚུལ་ཁྲིམས་འབྱུང་གནས་འདིས་མདོ་མང་གི་ལུང་རྒྱུན་སྤྱན་དྲངས། ཤེས་རབ་བརྩོན་འགྲུས། གཡུང་དྲུང་འོད། བསོད་ནམས་རྒྱལ་བ། ཅོག་གྲུ་ཤེས་རབ་བླ་མ། ཅོག་གྲུ་མྱ་ངན་མེད། བསོད་ནམས་མོས་པ། ཚུལ་ཁྲིམས་བརྩེགས། རྔོག་བུདྡྷ་པཱ་ལ། རྒྱལ་ལོ་ཙཱ་བ། སྦལ་རྡོ་རྗེ་རྒྱལ་པོ། ལྷ་རིན་པོ་ཆེ། ལྷ་ཆོས་ཀྱི་རིན་ཆེན། ཀྱུ་ར་ཚུལ་ཁྲིམས་འོད་ཟེར། དགེ་སློང་བྱའི་གདོང་ཅན། ར་བྱིང་ལོ་ཙ། ཕུར་བུ་འོད། ཤེས་རབ་ལེགས། ནག་ཚོ་དྷརྨ་གྲགས། མར་པ་བློ་གྲོས་བཟང་པོ། སེ་ལོ་ཙཱ། རོང་གླིང་ལོ་ཙཱ། ཤོ་རིམ་ལོ་ཙཱ། ཟླ་བ་གྲགས་པ། གཉལ་མི་ཡེ་ཤེས་ཆོས། ཆོས་ཀྱི་ཟླ་བ། ཤེས་རབ་སྐྱབས། ནག་ཚོ་ཤེས་རབ་རྒྱལ་མཚན། འ་ཞ་རྒྱ་གར་བརྩེགས། གཉན་བསོད་ནམས། བ་རི་ཆོས་གྲགས། ཨོང་པོ་ལོ་ཙཱ། གཞོན་ནུ་ཤེས་རབ། མགར་ཤེས་འབྱུང༌། འཇམ་དཔལ་གཞོན་ནུ། ཤེས་རབ་འོད་ཟེར། ཅེ་དགའ་བ་དཔལ། ཡེ་ཤེས་འབྱུང་གནས། བརྩོན་འགྲུས། ལོ་རྡོ་རྗེ་རྒྱལ་མཚན། ཞམ་དགེ་བསྙེན་སེང་རྒྱལ། ཅེ་བཀྲ་ཤིས། ཆག་དགྲ་བཅོམ། (ཏ༡༣བ)

[Full Size]

དཔྱལ་ཆོས་བཟང༌། དཀར་ལོ་ཙཱ་བ། ཞང་དགེ་བ། ལོ་ཙཱ་བ་ཆེན་པོ་སྣུབས་བྱམས་པའི་དཔལ། ཆག་ཆོས་རྗེ་དཔལ། དཔྱལ་ཤེས་རབ་འོད། ཞང་གྲུབ་པ་དཔལ། ས་སྐྱ་པཎྜི་ཏ་ཀུན་དགའ་རྒྱལ་མཚན་འདིས་ཚད་མ་རྣམ་འགྲེལ་དར་བར་མཛད། གློ་བོ་ཤེས་རབ་རིན་ཆེན། ལྷོ་བྲག་པ་འུ་རུ་དར་མ་སེང་གེ་མི་མཉམ་བཟང་པོ། ཨོ་ཌྱན་པ་རིན་ཆེན་དཔལ། ཤོང་རྡོ་རྗེ་རྒྱལ་མཚན། ཤོང་བློ་གྲོས་བརྟན་པ། ཁམས་པ་བློ་གྲོས་རྒྱལ་པོ། འདན་མ་ཚུལ་སེང༌། ར་བ་གཞོན་བརྩོན། ཤུད་ཀེ་གྲགས་པ་རྒྱལ་མཚན། ཐར་ལོ་ཉི་མ་རྒྱལ་མཚན། དཔང་བློ་གྲོས་བརྟན་པ། སྒྲ་ཚད་པ་རིན་རྒྱལ། དབུས་པ་བློ་གསལ་འདིས་རྒྱ་ནག་དང་ཡུ་གུར་ནས་འདུལ་བ་ལུང་གི་ལུང་རྒྱུན་སྤྱན་དྲངས། སྟག་ལུང་པ་ཤཱཀྱ་བཟང་པོ། ལེགས་པའི་བློ་གྲོས། བུ་སྟོན་ཐམས་ཅད་མཁྱེན་པ། ཐུགས་སྲས་ལོ་ཙ་བ་རིན་ཆེན་རྣམ་རྒྱལ། ཇོ་ནང་བློ་གྲོས་རྒྱལ་མཚན། ས་བཟང་བློ་གྲོས་དཔལ། འབྲི་ཁུར་ལོ་ཙཱ་བ། ཀུན་སྤངས་གྲགས་པ་རྒྱལ་མཚན། ཡར་ལོ་གྲགས་པ་རྒྱལ་མཚན། ལོ་ཆེན་བྱང་ཆུབ་རྩེ་མོ། བོ་དོང་གྲགས་པ་རྒྱལ་མཚན། སྣར་ཐང་བ་སང་གྷ་ཤྲི། ལོ་ཆེན་སྐྱབས་མཆོག་དཔལ་བཟང༌། ཆོས་འཁོར་སྣང་བ་ཤེས་རབ་རིན་ཆེན། མགོས་ལོ་ཙཱ་བ་གཞོན་ནུ་དཔལ། ཁྲིམས་ཁང་བ་བསོད་ནམས་རྒྱ་མཚོ། ཆག་ལོ་རིན་ཆེན་ཆོས་རྒྱལ། བདག་གི་མཁན་པོ་དོན་གྱི་སླད་དུ་མཚན་ནས་སྨོས་སྟེ་ཞ་ལུ་ལོ་ཆེན་ཆོས་སྐྱོང་དཔལ་བཟང་པོ་འདིས་ནི་མཛོད་འགྲེལ་གནམ་ལྕགས་ཐོག་གཟེར་དང་མཛོད་ཀྱི་གནས་དགུ་པ་སོགས་འགྱུར་མང་པོ་མཛད། ཕྱི་དུས་བརྡ་སྤྲོད་ཡན་ལག་དང་བཅས་པའི་བསྟན་པ་རྨང་ནས་གསོས་སྟེ་དར་བར་མཛད་ཏོ། །དེ་ལྟར་ལོ་པཎ་དེ་རྣམས་ཀྱིས་མདོ་རྒྱུད་མན་ངག་བཀའ་བསྟན་བཅོས་མང་དུ་བསྒྱུར་ཞིང་འགྱུར་བཅོས་དང་ཞུས་དག་སོགས་མཛད་པའི་དྲིན་ལས་(ཏ༡༤ན)

[Full Size]

དེང་སང་དུའང་བསྟན་པའི་ཆ་ཤས་ཙམ་གནས་པ་ཡིན་ནོ། །འདི་ཕྱིན་རང་རང་གི་ཕྱོགས་གཞུང་ནས་མཆིང་བུ་ནོར་བུའི་གྲལ་དུ་འཛུད་པ་མ་ཡིན་པའི་ལོ་པཎ་ཚད་ལྡན་མཐོང་ན་བསྣན་པར་བྱ་ཞིང་སྔ་མ་རྣམས་ཕལ་ཆེར་བུའི་ཆོས་བྱུང་ལྟར་ཡིན་ཞིང་ཅུང་ཟད་ཁ་བཀང་བ་ཡིན་ཡང་བདག་འདྲ་བས་མ་ཐོས་པ་མང་བའི་ཕྱིར་འདིར་མ་ཆུད་པའི་ཚད་ལྡན་གྱི་ལོ་པཎ་གཟུར་གནས་ཀྱིས་མཐོང་ན་བསྟན་པར་བྱའོ། །ལེགས་པར་བཤད་པ་མཁས་པའི་དགའ་སྟོན་གྱི་བོད་ཡུལ་གྱི་སྐབས་ལས་ལོ་པཎ་ཇི་ལྟར་བྱོན་པ་སྤྱིར་བསྟན་པ་སྟེ་སྐབས་བཞི་པའོ།། །།ནོར་འཛིན་དབང་མོ་ཚོགས་གཉིས་གྲུབ་མ་ཡིས། པར་འདི་བྱར་གྱི་གཞག་ཡུལ་སྟག་རྩེར་བསྒྲུབས། །ཤུ་བྷཾ།།

གསང་སྔགས་རྙིང་མའི་ཆོས་ཀྱི་བྱུང་བ་བརྗོད་པ།

[Full Size]

ཆོས་བྱུང་མཁས་པའི་དགའ་སྟོན་གྱི་ཡན་ལག་གསུམ་པ་བོད་ཡུལ་གྱི་སྐབས་ལ་ལེའུ་བཅུ་པ་ལས་སྐབས་ལྔ་པ་གསང་སྔགས་རྙིང་མའི་ཆོས་བྱུང་བཞུགས་སོ། །(ཐ༡བ)

[Full Size]

དཔལ་ལྡན་བླ་མའི་ཞབས་ལ་ཕྱག་འཚལ་ལོ། །ཆོས་དབྱིངས་གཟོད་ནས་ཡེ་རྫོགས་ཀུན་དུ་བཟང༌། །ལྷུན་གྲུབ་ལོངས་སྤྱོད་རྫོགས་པའི་སྐུར་བཞེངས་པས། །དག་པའི་ས་ལ་གནས་པའི་གདུལ་བྱ་ལ། །རྩོད་མེད་ལྷུན་གྲུབ་ཐེག་པ་བླ་མེད་ཆེ། །རྒྱ་ཆད་ཕྱོགས་ལྷུང་བྲལ་བ་དུས་བཞིར་ནི། །དུས་མེད་བསྟན་པས་གངྒཱའི་བྱེ་སྙེད་ཀྱི། །རྒྱལ་སྲས་བླ་མེད་བྱང་ཆུབ་ཆེན་པོར་བཀོད། །དེ་ལྟའི་ཆོས་ཀྱི་རྣམ་གྲངས་ན་མཁའ་ཡི། །ཚད་ཀྱི་ཀླས་པ་གཞལ་དུ་མེད་པ་ལས། །རྩ་མཆོག་བུ་ག་ཙམ་ཞིག་འཛམ་གླིང་འདིར། །དགའ་རབ་རྡོ་རྗེ་ཤྲཱི་སིངྷ་དང༌། །ཛྙཱ་ན་སཱུ་ཏྲ་མཁས་པ་བཱི་མ་ལ། །པད་མ་ཀཱ་ར་ལ་སོགས་མཆོག་དངོས་ཀྱི། །རིག་པ་འཛིན་པ་དུ་མས་སྣང་བར་མཛད། །སྐྱེད་རིམ་སྟོན་པའི་རྒྱུད་སྡེ་སྔ་འགྱུར་ཚོགས། །དུ་མས་སྐལ་ལྡན་མང་ཞིག་སྨིན་གྲོལ་བྱས། །རྡོ་རྗེ་(ཐ༢ན)

[Full Size]

ཕུར་བུ་པད་མ་དབང་ཆེན་སོགས། །དྲག་སྔགས་གྲུབ་པའི་ནུས་ལྡན་དཔག་མེད་ཀྱིས། །བོད་ཡུལ་སངས་རྒྱས་བསྟན་པ་རབ་ཏུ་བསྲུངས། །དེ་བས་བོད་ལ་གཅིག་དུ་བཀའ་དྲིན་ཆེ། །དེ་ལྟར་རྡོ་རྗེ་ཐེག་པ་སྔ་འགྱུར་གྱི། །ལྷ་ཚོགས་རྣམས་དང་རྩ་རྒྱུད་བླ་མར་བཅས། །མཆོག་གི་རིག་པ་གྲུབ་པ་ཐམས་ཅད་ལ། །དད་པའི་ཡིད་ཀྱིས་རབ་ཏུ་ཕྱག་འཚལ་ལོ། །གསང་སྔགས་སྔ་འགྱུར་གྱི་མཆོག་ལ་འགོས་ཁུག་པ་ལྷ་བཙས་སོགས་ཀྱིས་མཛད་ཏོ་བར་གྲགས་པའི་སྔགས་ལོག་སུན་འབྱིན་དུ་འདོད་པ་དུ་མར་བཀའ་བསྟན་བཅོས་ཁུངས་མ་མིན་པར་སྨྲ་བ་རྣམས་ནི་བདག་གིས་ཀྱང་གཞན་དུ་ལན་བཏབ་ཟིན་ཅིང་སྤྱིར་ལོ་ཆེན་རིན་ཆེན་བཟང་པོའི་སྔགས་ལོག་སུན་འབྱིན་དང་ལྷ་ཞི་བ་འོད་ཀྱི་འཇམ་ཡིག་སོགས་སར་རྙིང་གང་གིའང་རུང་སྟེ་སྦྱོར་དགྲོལ་ལ་སོགས་པའི་སྔགས་སྤྱོད་སོ་སྐྱེས་སྒྲ་ཇི་བཞིན་དུ་སྤྱོད་པ་འགོག་པ་ཡིན་གྱི་གསང་སྔགས་རྙིང་མའི་རྩ་བ་འགོག་པ་མ་ཡིན་ལ། ཇོ་བོ་རྗེ་ལ་སོགས་པ་རྒྱ་གར་གྱི་པཎ་གྲུབ་དེ་ཙམ་ཞིག་བོད་དུ་བྱོན་པ་ཐམས་ཅད་ཀྱིས་མ་བཀག་པའི་ཕྱིར་དང༌། གལ་སྟེ་ཀླུ་དཀར་རྒྱལ་གྱིས་བཀའ་བརྫུས་མ་བསྟན་པ་ལྟ་བུ་ཡིན་ན་བསྟན་པ་ལ་ཤིན་དུ་སེལ་ཆེ་བས་ལོ་ཆེན་རིན་བཟང་གིས་ཀླུ་དཀར་རྒྱལ་བཏུལ་བ་ལྟར་རྙིང་མ་སྨྲ་བ་འདུལ་བྱེད་ཀྱི་སྐྱེས་བུ་དམ་པ་རྫུ་འཕྲུལ་དང་ནུས་པར་ལྡན་(ཐ༢བ)

[Full Size]

པ་བྱོན་ནས་བཏུལ་སྟེ་ཕྱིན་ཆད་ཐམས་ཅད་ཀྱིས་ཡང་དག་མ་ཡིན་པར་ཤེས་ནས་སུ་ཡང་མི་འཇུག་པ་ཅིག་ངེས་པར་འོང་དགོས་པ་ལས་དེ་ལྟ་བུ་མ་བྱུང་བའི་ཕྱིར་དང༌། གལ་སྟེ་བཀའ་བརྫུས་མ་ཡིན་ན་པཎྜི་ཏ་མཁས་པ་བོད་དུ་བྱོན་པ་རྣམས་ཀྱིས་མི་མཁྱེན་པ་མི་སྲིད་ཅིང་མཁྱེན་ན་བསྟན་པའི་དབེན་དེ་ལྟ་བུ་ལ་བཏང་སྙོམས་སུ་འཇོག་པ་ག་ལ་སྲིད་པའི་ཕྱིར་དང༌། བཀའ་གདམས་གླེགས་བམ་ཚད་མར་བྱེད་ན་དེ་ལས་ཇོ་བོ་རྗེ་སྔོན་སློབ་དཔོན་པད་མར་མཛད་དེ་བོད་ཀྱི་ལྷ་སྲིན་བཏུལ་བའི་དུས་ཀྱི་ཆོས་བླ་མས་ད་ལྟ་སྔགས་པ་རྣམས་ལ་དར་བ་འདི་ཡིན་ཞེས་གསུང་པ་དང༌། པཎ་ཆེན་ཤཱཀྱ་ཤྲཱི་དང་ཁྲོ་ཕུ་ལོ་ཙཱ་བ་ཆེན་པོས་བསམ་ཡས་ནས་གསང་སྙིང་གི་རྒྱ་དཔེ་རྙེད་དེ་རྟ་སྟོན་གཟི་བརྗིད་ཀྱི་ཕྱག་དུ་བྱུང་བ་ཤ་གང་ལོ་ཙཱ་བ་ལ་ཕུལ། དེས་བཅོམ་ལྡན་རལ་གྲི་ལ་བསྐུར་བས་ཐུགས་འཆེས་སྟེ་གསང་སྙིང་གྲུབ་པ་རྒྱན་གྱི་མེ་ཏོག་བརྩམས་སྟེ་དེར་གསང་འདུས་ཀྱི་འགྲེལ་ཆེན་བི་ཤྭ་མི་ཏྲས་མཛད་པ་ལས། ཡེ་ཤེས་སེམས་དཔའ་གང་རེག་པ། །ཞེས་པའི་འགྲེལ་པར། གསང་བ་སྙིང་པོ་ལས་འོག་མིན་གྱི་གནས་མཐའ་དང་མུ་མེད་པ་ན་གཞི་ཚད་མེད་པའི་ཡེ་ཤེས་ཀྱི་དཀྱིལ་འཁོར་གསལ་བ་ལ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་རྒྱ་ཕྱོགས་བཅུར་ཡོངས་སུ་མ་ཆད་པ་ཞེས་དྲངས་པ་སོགས་གསང་སྙིང་གི་མཚན་སྨོས་ནས་ལུང་གསལ་བར་ལན་བརྒྱད་དགུར་བགྲངས་པ་སྨོས་ཤིང༌། ལོག་པའི་སྐྱོན་བཞི་བརྗོད་པ་འདི་སྐད་བདག་གིས་བཤད་པ་ཅེས་མི་རིགས་པ་དང༌། གཞི་ཚད་མེད་མི་རིགས་དང༌། དུས་གསུམ་ལ་དུས་བཞིར་བཤད་པ་མི་རིགས་པ་དང༌། དཀྱིལ་འཁོར་གྱི་གཙོ་བོ་རྡོ་རྗེ་སེམས་དཔས་བྱས་པ་མི་རིགས་པ་བཞི་ལ། འདི་སྐད་བདག་གི་བཤད་པའི་དུས་གཅིག་ན་ཞེས་པ་ནི་སྟོན་པ་ཉིད་སྡུད་པ་པོར་བཞེད་པའི་ལུགས་སྟེ། འདུས་པའི་འགྲེལ་པ་མཚོ་སྐྱེས་རྡོ་རྗེའི་གསང་བ་གྲུབ་(ཐ༣ན)

[Full Size]

པར། སློབ་དཔོན་ཕལ་ཆེར་འདི་སྐད་བརྗོད། །དཔལ་ལྡན་འདུས་པ་མདངས་ཆེན་གྱི། །རྒྱུད་ཀྱི་སྡུད་པར་བྱེད་པ་པོ། །དཔའ་བོ་འཇིག་རྟེན་དབང་ཕྱུག་ཟེར། །བླ་མའི་ཞབས་ཀྱི་བཀའ་དྲིན་གྱིས། །དཔལ་ལྡན་འདུས་པའི་སྡུད་པ་པོ། །གཞན་དག་ཡོད་པ་མ་ཡིན་ཞེས། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པོ་ནི་ཐུགས་རྡོ་རྗེ། །ཞེས་སྟོན་པ་ཉིད་ཀྱིས་བསྡུས་པར་བཞེད་པ་ཡིན་ལ། གཞི་ཚད་མེད་ཀྱང་མངོན་པ་ནས་འོག་མིན་ཚད་མེད་དུ་བཤད་པ་དང༌། དུས་བཞི་ཡང་བི་ཤྭ་མི་ཏྲའི་འགྲེལ་པར། དུས་བཞི་མཉམ་པ་ཉིད་དུ་དེ་བཞིན་རིག་པར་བྱ། །ཞེས་དང༌། ཕྱོགས་བཅུ་དུས་བཞིའི་མགོན་པོ་ཀུན་གྱི་ཞེས་བཤད་ལ་སངས་རྒྱས་གསང་བས་དུས་བཞི་བསྐལ་པ་བཞི་ལ་བཤད་ཏོ། །རྡོ་རྗེ་སེམས་དཔའ་དབུས་སུ་འབྱུང་བ་ནི་གཙོ་བོ་འཕོ་བ་སྟེ་སར་མ་ནས་ཀྱང་བཤད་ཏོ། །ཏིཀྲ་ནི་ཤེས་རབ་མིང་དུ་སྨ། །ཞེས་ཐིག་ལ་ཏིཀྲ་རུ་བྱས་པ་ནི་གསང་སྙིང་གི་རྒྱ་དཔེར་སཱུ་ཏྲཾ་པྲཛྙཱ་ཏིཀྲ་ཥྱ་ཏི་ཞེས་ཡོད་པ་ལ་སཱུ་ཏྲཾ་ཐིག་གི་སྐད་དོད་ཡིན་ལ་ཐིག་ལ་ཏིཀྲ་ཅེས་འདོན་པ་བརྡ་རྙིང་ཡིན་ལ་རྒྱུད་གཞན་དུ་ཁ་འཕངས་པ་ནི་དགྱེས་རྡོར་སོགས་ཀྱང་དེ་ཉིད་འདུས་པར་ཁ་འཕངས་པ་བཞིན་ནོ་ཞེས་དོགས་པ་བསལ་ཞིང༌། སྒྱུ་འཕྲུལ་སྡེ་བརྒྱད་དང་གསང་སྙིང་གི་འགྲེལ་པ་ཉི་འོད་སེང་གེས་བྱས་པ་རྣམས་པད་མ་རུ་ཅི་རས་བསྒྱུར་པ་དང༌། གསང་སྙིང་གི་སངས་རྒྱས་གསང་བའི་འགྲེལ་པ་བཻ་རོ་ཙ་ནས་བསྒྱུར་བར་དཀར་ཆག་འཕང་ཐང་མར་བཤད་ཅེས་དང༌། སྐུ་གསུང་ཐུགས་ཀྱི་རྒྱུད་གསུམ་ལྕེ་བཀྲ་ཤིས་ཀྱི་བསྒྱུར་བར་དཀར་ཆག་འཕང་ཐང་མ་དང་ལྡན་དཀར་མ་གཉིས་ཀར་བཤད་ཅེས་དང༌། སྨྀ་ཏི་དང་ལོ་ཆེན་རིན་བཟང་གིས་ཡང་དག་མེ་གཅིག་དང་ཡང་དག་གི་འགྲེལ་པ་ཀུན་སྙིང་གིས་མཛད་པ་དང་རྫོགས་(ཐ༣བ)

[Full Size]

ཆེན་ཁ་ཅིག་བསྒྱུར་བར་ཡང་བཅོམ་རལ་བས་བཤད་ཏོ། །གཞན་ཡང་རྡོ་རྗེ་བཞད་པའི་འདུས་པའི་འགྲེལ་ཆེན་དང་མཉམ་སྦྱོར་གྱི་འགྲེལ་པ་བརྒྱ་བྱིན་སྡོང་པོའི་མཛད་པར་ཡང་གསང་སྙིང་གི་ལུང་མང་དུ་དྲངས་ཡོད་པར་སྣང་ལ། ཕུར་པ་རྩ་བའི་དུམ་བུ་ཤངས་སྲེག་ཞིང་ནས་སློབ་དཔོན་པད་མའི་རྒྱ་དཔེ་དངོས་རྙེད་ནས་ས་སྐྱ་པཎྜི་ཏས་བསྒྱུར་ཞིང་ཐར་ལོས་བལ་པོར་ཡང་རྒྱ་དཔེ་ཅིག་གཟིགས་པར་གསུངས་སོ། །རྫོགས་ཆེན་སེམས་ཀློང་མན་ངག་གི་སྡེ་རྣམས་ནི་རྒྱ་གར་ཉིད་དུ་ཡང་སྤྱོད་པ་བླང་དོར་བླ་ན་མེད་པར་བསྟན་པའི་དོན་མ་རྟོགས་ན་ཆད་ལྟ་དང་ཉེ་བར་འགྱུར་བས་ཤིན་དུ་སྦས་སྟེ་སྔགས་ལ་མཁས་པའི་པཎྜིཏ་རྣམས་དང་རྒྱལ་པོས་རྒྱས་བཏབ་སྟེ་ལོངས་སྤྱད་དུ་མེད་པ་ཤྲཱི་སིངྷ་དང་བཱི་མ་ལ་མུ་དྲས་བཻ་རོ་ཙ་ན་གཙང་ལེགས་གྲུབ་ལ་ལྐོག་དུ་བཤད་པས་པཎྜིཏ་ཐམས་ཅད་ཀྱི་རྨི་ལམ་འཁྲུགས་སྟེ་མན་ངག་གི་ཆོས་བོད་དུ་ཤོར་བར་ཤེས་ནས་སླར་དཔེ་རྣམས་རྡོ་རྗེའི་གདན་དུ་སྦས་ནས་མི་ཐོན་པར་བྱས་པར་བཻ་རོའི་འདྲ་འབག་ལྷད་མེད་རྣམས་ལས་མཐོང་བས་ད་ལྟ་རྒྱ་གར་ན་པཎྜིཏ་ལ་མ་གྲགས་པ་ཡིན་ལ། ཇོ་བོ་རྗེས་བསམ་ཡས་སུ་རྒྱ་དཔེའི་དཀོར་མཛོད་གཅིག་ཁ་ཕྱེ་གཟིགས་པས་སྔར་གསན་གཟིགས་མེད་པའི་རྒྱུད་ཤིན་དུ་མང་བར་གཟིགས་སྟེ་ངས་འཛམ་གླིང་ན་གྲགས་པའི་རྒྱུད་རྣམས་སུ་མ་ཟད་མཁའ་འགྲོ་མས་བསྟན་པ་ཁོ་ན་ཡང་མཐའ་ཡས་པར་མཐོང་སྟེ་དེ་ཀུན་ལ་ཡང་རྒྱུད་འདི་རྣམས་མི་གདའ། ཕལ་ཆེར་སློབ་དཔོན་པདྨས་རྫུ་འཕྲུལ་གྱིས་སྲིན་པོའི་ཡུལ་ནས་བླངས་པ་ཡིན་མཆི་ཐེག་པ་ཆེན་པོ་གསང་སྔགས་འདི་ལ་མཐའ་མེད་པ་རང་དུ་འདུག་ཞེས་སྔགས་ལ་མཁས་པའི་ཐུགས་རྒྱལ་མ་ལུས་པ་དེར་ཆག་པར་བཤད་པས་དེ་ཀུན་ནི་ཕལ་ཆེར་རྫོགས་ཆེན་གྱི་རྒྱུད་རྣམས་སུ་གོར་མ་ཆག་སྙམ་ལ། འདུས་པ་མདོ་ནི་ལྷས་ཞུས་པའི་མདོའམ་མདོ་སྡེ་གདམས་ངག་འབོགས་པའི་རྒྱལ་པོ་ཅེས་(ཐ༤ན)

[Full Size]

གྲགས་པ། རྒྱུ་ལ་མོས་པ་རྒྱུའི་ཆོས་ཀྱི། །སོགས་ཀྱི་ཁུངས་དེ་ཉིད་ཡིན་པར་འགོས་ལོ་གཞོན་ནུ་དཔལ་བ་སོགས་འཆད་ཏོ། །སྤྱིར་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་རྣམས་གཙོ་བོར་ལྷ་ཀླུ་སོགས་འགྲོ་བའི་གནས་གཞན་ཁོ་ན་ན་བཞུགས་པ་ལས་ཤེར་ཕྱིན་འབུམ་པ་སོགས་འཕགས་པ་ཀླུ་སྒྲུབ་ཀྱིས་ཀླུ་ཡུལ་ནས་བླངས། མདོ་སྡེ་ས་བཅུ་པ་སོགས་མང་ཞིག་འཕགས་པ་ཐོགས་མེད་ཀྱིས་དགའ་ལྡན་ནས་བླངས་སྟེ་དར་བ་ན་ཉན་ཐོས་པ་ཀུན་ཀྱིས་སྐུར་པ་བཏབ་པ་ལས་ཐེག་ཆེན་བཀར་བསྒྲུབས། གསང་སྔགས་རྙིང་མ་རྣམས་སློབ་དཔོན་དགའ་རབ་རྡོ་རྗེ་དང་སློབ་དཔོན་ཆེན་པོ་པདྨ་ལ་སོགས་ཀྱིས་འོག་མིན་དང་སྲིན་པོའི་ཡུལ་སོགས་ནས་སྤྱན་དྲངས། དགྱེས་རྡོར་བདེ་མཆོག་འདུས་པ་ལ་སོགས་འཕགས་པ་ཀླུ་སྒྲུབ་དང་རྒྱལ་པོ་ཨིནྡྲ་བོ་དྷི་དང་སློབ་དཔོན་ལ་བ་པ་དང་རྟ་མཆོག་བི་ན་མ་ལ་སོགས་པས་སྤྱན་དྲངས་སྟེ་དར་བའི་ཚེ་མཚན་ཉིད་ཐེག་པ་བ་རྣམས་ཀྱིས་སྒྲོ་སྐུར་བྱས་པ་ན་གསང་སྔགས་བཀར་སྒྲུབ་དགོས་པ་བྱུང་བ་ཡིན། དེས་ན་བོད་ཡུལ་པ་དག་རྒྱ་དཔེ་ཡོད་ན་ཡང་དག་ཡིན་ལ་མེད་ན་ཡང་དག་མིན་པར་འཆད་པ་འདི་ལ་ཡང་དེ་ཙམ་གྱི་སྙིང་པོ་ཅི་ཡོད་སྟེ་རྒྱ་དཔེ་རྒྱང་འཕེན་གྱི་གཞུང་ལ་སོགས་པ་མུ་སྟེགས་ཀྱི་ཆོས་རྣམས་ལ་ཡང་ཡོད་ལ་དགའ་ལྡན་དང་འོག་མིན་དང་ཀླུ་ལ་སོགས་པའི་གནས་ནས་བླངས་པའི་གླེགས་བམ་རྣམས་རྒྱ་གར་གྱི་ཏཱ་ལའི་ལོ་མ་ཁོ་ན་ལ་ལོ་པཎ་ལ་གྲགས་པའི་ཡི་གེ་ཁོ་ནས་བྲིས་པ་ཅིག་ཡོད་པར་དཀའ་སྟེ་དེ་རྣམས་ཀྱི་བྲི་གཞི་སྣག་ཚ་ཡིག་གཟུགས་སོགས་གང་དུ་ཡོད་ཤེས་དཀའ་བས་གལ་སྟེ་མཐོང་ན་ཁྱེད་ཅག་ཡང་དག་མ་ཡིན་པར་ལྟ་བའི་བློ་སྐྱེ་ཡང་སྲིད་ལ། ཡང་སངས་རྒྱས་ཀྱི་ཆོས་བསམ་གྱིས་མི་ཁྱབ་ཀྱང་ཡུལ་དུས་ཀྱི་གདུལ་བྱ་དེའི་ཁམས་དང་དབང་པོ་དང་འཚམས་པར་དེའི་སྐད་དང་ཚིག་དུ་གོ་བར་(ཐ༤བ)

[Full Size]

འགྱུར་བ་ལྟར་ཞིང་གཞན་ནས་སངས་རྒྱས་ཀྱི་མཐུས་ཆོས་ཀྱི་གླེགས་བམ་འབྱུང་བ་ན་ཡང་ཡུལ་དུས་དེའི་སྐད་དང་ཡིག་གཟུགས་སུ་འབྱུང་བར་ཡང་མི་འགལ་བས་སློབ་དཔོན་པདྨ་ལྟ་བུས་བོད་ཀྱི་གདུལ་བྱའི་དོན་དུ་འོག་མིན་སོགས་ནས་གླེགས་བམ་སྤྱན་དྲངས་པ་ན་ཡང་བོད་ཀྱི་སྐད་དང་ཡིག་གཟུགས་སུ་མི་འབྱོན་པར་ཡང་མ་ངེས་པས་ཉན་རང་དང་བྱང་སེམས་རྣམས་ཀྱིས་ཀྱང་བསམ་གྱིས་མི་ཁྱབ་པའི་གནས་འདི་དག་ལ་བདག་ཅག་བྱིས་པ་རྣམས་ཀྱིས་ཚད་འཛིན་པའི་ངལ་བས་ཅི་བྱ་སྟེ་བག་ཡོད་པར་སྤྱོད་ཅིག །དེས་ན་རྒྱལ་བ་བྱམས་པས། སྔར་ལུང་མ་བསྟན་ལྷན་ཅིག་བྱུང༌། །སྤྱོད་ཡུལ་མ་ཡིན་གྲུབ་པ་དང༌། །ཡོད་དང་མེད་ན་ཡོད་མེད་དང༌། །གཉེན་པོ་དང་ནི་སྒྲ་གཞན་ཕྱིར། །ཞེས་པས་ཐེག་ཆེན་བཀར་བསྒྲུབས་པའི་རིགས་པ་འདི་ཁོ་ནས་གསང་སྔགས་རྙིང་མ་ཡང་བཀར་སྒྲུབ་ནུས་སྟེ། གལ་སྟེ་རྙིང་མ་བཀའ་མིན་ན་མ་འོངས་པར་གསང་སྔགས་རྙིང་མའམ་རྫོགས་ཆེན་བྱ་བ་བཀའ་མ་ཡིན་པ་བཀའ་ལྟར་བཅོས་པ་འབྱུང་ཞེས་ལུང་སྟོན་རིགས་པ་ལས་དེ་ལྟར་བསྟན་པ་མི་སྣང་བའི་ཕྱིར་དང༌། དེ་ལྟ་བུ་འབྱུང་བ་མ་མཁྱེན་པ་མི་རིགས་སྟེ་སངས་རྒྱས་རྣམས་ནི་མངོན་སུམ་གྱི་སྤྱན་ཅན་ཡིན་ལ་དུས་ལའང་ཡེ་ཤེས་མ་བསྒྲིབས་པའི་ཕྱིར། མཁྱེན་ཀྱང་མ་བསྟན་པ་མི་རིགས་སྟེ་བསྟན་པ་དག་ཀྱང་སྲུང་བར་མཛད་པའི་ཕྱིར། བདེ་དགྱེས་ལ་སོགས་པ་རྣམས་ཀྱིས་ཡང་རྒྱུད་རྒྱས་པ་འབུམ་བདུན་དང་འབུམ་ལྔ་མངོན་བརྗོད་འབུམ་པ་ཆེན་པོ་སོགས་རྣམས་དང་སྔ་འགྱུར་གྱི་རྒྱུད་སྡེ་ཆེན་པོ་འདི་རྣམས་ནི་སྔོན་རྫོགས་ལྡན་ལ་སོགས་པའི་དུས་སུ་མཚུངས་པར་གསུངས་པས་རྒྱུད་དེ་དག་ལྷན་ཅིག་དུ་བྱུང་བ་ཡིན་ན་དེ་ལས་གང་ཡང་དག་དང་གང་ལྟར་སྣང་དུ་འཇོག །མདོ་སྒྱུ་སེམས་གསུམ་གྱི་རྒྱུད་ལྷད་མེད་འདི་ལྟ་བུ་རྟོག་གེ་པ་ལ་སོགས་པས་རྩོམ་པར་ག་ལ་ནུས་སྟེ་འདི་ལྟ་བུ་ཉན་རང་གི་ཡང་སྤྱོད་ཡུལ་མ་(ཐ༥ན)

[Full Size]

ཡིན་ན་གཞན་གྱིས་ལྟ་ཅི་སྨོས་པའི་ཕྱིར། གལ་སྟེ་སྟོན་པ་ལས་གཞན་པའི་སངས་རྒྱས་ཞིག་གིས་གསུངས་སོ་སྙམ་ན་དེ་ལྟར་ན་བཀའ་ཡིན་པར་གྲུབ་པ་དང༌། ཡང་སར་མའི་རྒྱུད་སྡེ་འདི་དག་ལས་གཞན་པའི་གསང་སྔགས་ཡོད་ཏམ་མེད། མེད་ན་གསང་སྔགས་ནི་མཐའ་མི་མངོན་པར་བཤད་པ་དང་འགལ་ཞིང༌། ཡོད་ན་སྔ་འགྱུར་འདི་དག་ཀྱང་སངས་རྒྱས་པའི་གསང་སྔགས་ཡང་དག་ཅིའི་ཕྱིར་མ་ཡིན། སྔོན་སློབ་དཔོན་པདྨ་ལ་ཆོས་རྒྱལ་ཁྲི་སྲོང་གིས་བཙུན་མོ་མཁར་ཆེན་བཟའ་མཚོ་རྒྱལ་ཕུལ་བ་བཞེས་པས་བློན་པོ་རྣམས་བཙུན་མོ་ཡང་ཕྲོགས་པས་རྒྱལ་སྲིད་འཕྲོག་ངེས་ཟེར་ནས་གཤེགས་པར་གསོལ་བ་བཏབ་སྣང་བས་རྒྱལ་པོ་ལ་མ་རྒྱུད་ཀྱི་གདམས་པ་གནང་བར་གདོན་མི་ཟ་ལ། དགེ་སློང་ལུས་ལ་ཕྱག་རྒྱ་བསྟེན། །ཞེས་སློབ་དཔོན་པདྨ་དངོས་རིག་གི་ལམ་པར་ཡང་སྣང་བ་དེ་དུས་བདེ་དགྱེས་སོགས་ནི་མ་བསྒྱུར། རྙིང་མ་ནི་བཀའ་མིན་པས་སློབ་དཔོན་པདྨས་རྒྱལ་པོ་ལ་གསུངས་པ་དང་སྣུབས་ན་མཁའ་སྙིང་པོས་ལས་རྒྱ་ལས་སྒྲུབ་པ་མཛད་པར་གྲགས་པའི་དབང་གསུམ་པའི་ལམ་དེ་དག་གཞན་གང་ཞིག་ཡིན་སྟེ་རྙིང་མའི་གསང་སྔགས་ཉིད་ལས་འོས་ཅི་མཆིས། གལ་སྟེ་སར་མའི་རྒྱུ་དང་མི་མཚུངས་པ་དུ་མ་ཡོད་པས་སོ་ཅེ་ན། འོ་ན་རྒྱུན་མི་ཆད་པས་རྒྱུད་དུ་བཤད་པ་སོགས་མཚུངས་པ་དེ་བས་ཀྱང་མང་བས་དེས་ཡང་དག་དུ་ཡང་ཅིས་སྒྲུབ་མི་ནུས། རྫོགས་ཆེན་དུ་ལས་འབྲས་མེད་པ་དང་འཁོར་འདས་གང་ཡང་མེད་པའི་སྔོན་ཏུ་ཀུན་དུ་བཟང་པོ་སངས་རྒྱས་པ་སོགས་བཤད་པས་ཡང་དག་མ་ཡིན་ནོ་སྙམ་ན། ལས་འབྲས་མེད་པ་ནི་ལས་འབྲས་ལ་གཅིག་དུ་ཞེན་པའི་གཉེན་པོའི་འཛིན་པ་གཞིག་པའི་ཆེད་དེ་མདོ་ལས་ཀྱང་མཚོན་ཆ་ཐོགས་པའི་ཆོས་ཀྱི་རྣམ་གྲངས་བཤད་པ་དང༌། རྒྱལ་ལ་སོགས་ལ་ཆགས་པ་ཕྲ། །(ཐ༥བ)

[Full Size]

ཞེས་བཤད་པ་ལྟར་ཡིན་གྱི་གནས་སྐབས་གཞན་དུ་མ་ཡིན་ལ། འཁོར་འདས་གང་ཡང་མེད་པའི་སྔོན་ནི་ཆོས་དབྱིངས་ཀྱི་ངོ་བོ་ཉིད་ལ་འཁོར་འདས་གང་ཡང་མི་དམིགས་པ་དང༌། དེ་རང་ངོ་ཤེས་པས་ཀུན་བཟང་ཚོགས་མ་བསགས་སྒྲིབ་པ་མ་སྦྱངས་པར་སངས་རྒྱས་པ་ནི། སྐད་ཅིག་གཅིག་གིས་རྫོགས་སངས་རྒྱས། །སྐད་ཅིག་གཅིག་གིས་བྱེ་བྲག་ཕྱེད། །ཅེས་པ་ལྟར་ཆོས་དབྱིངས་རང་ངོ་ཤེས་ན་དེ་ཉིད་དུ་གྲོལ་བ་དང༌། དེའི་འོད་ལྔ་ཡེ་ཤེས་ལྔ་དང་སྐུ་ལྔར་ཤར་བ་སོགས་ནི་ལྷན་སྐྱེས་ཀྱི་སྐུ་འོད་གསལ་དེ་ཉིད་ལོངས་སྤྲུལ་གྱི་རྣམ་པ་ཐམས་ཅད་དུ་འཆར་ཞིང་སེམས་ཉིད་དྲི་མ་མེད་པ་འདི་ལས་ཅི་ཡང་སྣང་དུ་རུང་བའི་དོན་ལ་སོགས་པར་གླེང་གཞི་ལྟ་བུའི་སྒོ་ནས་གཞི་ལམ་འབྲས་བུ་བརྗོད་པས་སྒྲ་གཞན་དུ་བསྟན་པར་བྱ་བ་ཡིན་གྱི་ལོ་རྒྱུས་བརྗོད་པ་མ་ཡིན་ལ། འདི་ནི་སར་མའི་རྒྱུད་སྡེ་ལ་ཡང་འདི་སྐད་བདག་ཐོས་སོགས་ཡི་གེའི་དོན་དུ་ཚིག་འདི་སྐད་སྟོན་པས་གསུངས་པ་སྡུད་པ་པོ་བདག་གིས་དུས་དེར་འཁོར་དེ་དག་དང་ལྷན་ཅིག་པར་ཐོས་པའི་དུས་ཅིག་ན་ཞེས་ལོ་རྒྱུས་ལྟར་ཡོད་མོད་ཀྱང༌། སྦས་དོན་ཏུ་ཨེ་ཡིག་དམར་ཆ་དང་ཝཾ་ཡིག་དཀར་ཆ་དང་ཨ་ཡིག་བར་སྲིད་གསུམ་ཚོགས་པ་ཨེ་ཝཾ་གཉིས་མེད་ལས་སྐྱེད་རིམ་གྱི་སྦྱང་གཞི་ལུས་གྲུབ་པ་སོགས་སུ་འཆད་ཅིང༌། མཐར་ཐུག་གི་དོན་དུ་ཨེ་ཤེས་རབ་དང་ཝཾ་ཡིག་ཐབས་ཐིག་ལེ་གཉིས་སུ་མེད་པ་སྟེ་གཞི་ལམ་འབྲས་བུའི་ཆོས་ཐམས་ཅད་ཐབས་ཤེས་དབྱེར་མེད་དུ་སྟོན་པར་བཤད་པ་ཡིན་ནོ། །དེས་ན་སར་རྙིང་གི་རྒྱུད་འཛིན་པོ་སུ་ཡིན་ཡང་རུང་སྟེ་རྒྱུད་ཀྱི་གླེང་གཞི་དང་འཁོར་འདས་ཀྱི་བྱུང་ཚུལ་འདི་དག་སྔོན་བྱུང་གི་ལོ་རྒྱུས་ཁོ་ནར་རྟོག་པར་ནི་མི་བྱ་སྟེ་ལོ་རྒྱུས་ཀྱི་ཚུལ་གྱིས་ཉམས་སུ་བླང་བྱའི་ཆོས་ཀྱི་རྣམ་གྲངས་སྟོན་པར་རིག་པར་བྱའོ། །དེས་ན་རྫོགས་ཆེན་ལས་འཁོར་འདས་ཀྱི་ཐོག་མའི་མཐའ་བཤད་ཏོ་སྙམ་ན་ངེས་པའི་དོན་འདི་མཚོན་བྱེད་ཡིན་གྱི་བསྐལ་པ་ཆགས་འཇིག་བཤད་པ་ལྟ་བུ་ཞིག་མ་ཡིན་ནོ། །(ཐ༦ན)

[Full Size]

ཉོན་མོངས་པའི་གཉེན་པོ་ཡང་བྱེད་དེ་སྐྱེད་རིམ་དང་རྫོགས་རིམ་ཆགས་ལམ་དང་གྲོལ་ལམ་གཉིས་ཀྱིས་ལམ་སྦྱོང་པར་སར་མའི་བླ་མེད་རྣམས་དང་ཐ་མི་དད་པའི་ཕྱིར་རོ། །དེས་ན་སྐྱེད་རྫོགས་ཀྱིས་རང་རྒྱུད་ཀྱི་ཉོན་མོངས་པ་འདུལ་བས་རྡོ་རྗེ་ཐེག་པའི་འདུལ་བ་ལ་སྣང༌། དབྱིངས་རིག་གཉིས་སུ་མེད་པའི་རང་གི་སེམས་ཉིད་འོད་གསལ་བ་ལ་འཇུག་པས་སྔགས་ཀྱི་མདོ་སྡེ་ལ་འཇུག །ཆོས་ཐམས་ཅད་ཀྱི་རང་བཞིན་ཅིར་ཡང་མ་གྲུབ་ཅིང་གང་དུ་ཡང་འཆར་རུང་བ་དང་མི་འགལ་བའི་ཕྱིར་ཆོས་ཉིད་དང་མི་འགལ་བས་ན་བཀའ་ཡང་དག་པ་སྟེ། སྟོན་པ་ཉིད་ཀྱིས་ང་མྱ་ངན་ལས་འདས་ནས་འདུལ་བ་ལ་སྣང་མདོ་སྡེ་ལ་འཇུག་ཆོས་ཉིད་དང་མི་འགལ་ན་བཀའ་ཡིན་པར་ཟུང་ལ་དེ་ལས་ལྡོག་ན་མ་ཡིན་པར་ཟུང་ཞིག་ཞེས་གསུངས་ལ་རྒྱལ་བ་བྱམས་པས། རང་གི་འདུལ་ལ་སྣང་ཕྱིར་དང༌། །ཞེས་ཐེག་ཆེན་ཉིད་ལ་སྦྱར་བ་བཞིན་ནོ། །འདི་སྐད་བདག་གིས་བསྟན་པའི་དུས་གཅིག་ན་ཞེས་དང་རྫོགས་སོའི་དོད་དུ་ནམ་དུ་ཡང་མ་རྫོགས་སོ་ཞེས་འབྱུང་བ་སོགས་ཀྱང༌། བརྟག་གཉིས་ལས། འཆད་པ་པོ་ང་ཆོས་ཀྱང་ང༌། །རང་གི་ཚོགས་ལྡན་ཉན་པོ་ང༌། །འཇིག་རྟེན་སྟོན་པ་བསྒྲུབ་བྱ་ང༌། །འཇིག་རྟེན་འཇིག་རྟེན་འདས་པ་ང༌། །ཞེས་ཆོས་ཐམས་ཅད་སྟོན་པ་ཉིད་དུ་གསུངས་པ་དང་ཁྱད་མེད་ལ། རྗོད་བྱེད་ཚིག་གི་རྒྱུད་ཀྱི་མཐར་རྫོགས་སོ་སྦྱར་བ་ནི་རེ་ཞིག་གླེགས་བམ་དེ་རྫོགས་པའི་དོན་ཡིན་གྱི་རྒྱུད་རྫོགས་པའི་དོན་མིན་ལ། བརྗོད་བྱ་དོན་གྱི་རྒྱུད་ལས་བརྩམས་ན་ནམ་ཡང་མ་རྫོགས་པའི་རྒྱུན་ཆད་མེད་པ་ཅིག་མ་བཞག་ན་རྒྱུད་དུ་ཇི་ལྟར་འཇོག །དེས་ན་དོན་ལ་རྟོན་པར་བྱའི་ཚིག་ཙམ་ལ་བརྩད་པས་ཅི་ཞིག་བྱ། དུས་ཐམས་ཅད་ཀྱི་མཆོག་ནི་བསམ་གྱིས་མི་ཁྱབ་པ་ཆོས་ཉིད་ཀྱི་དུས་ཡིན་ལ་དུས་གསུམ་ནི་འཇིག་རྟེན་གྱི་གདགས་པ་ཙམ་སྟེ་དེས་ན་དུས་བཞིར་བཤད་པ་ལ་འགལ་བ་ཅི་ཡོད། (ཐ༦བ)

[Full Size]

རྡོར་སེམས་ལྷའི་གཙོ་བོར་མི་རིགས་ནས་མཐར་རྡོར་སེམས་གཙོ་བོར་བྱས་པའང་འགོག་དགོས་སོ། །སྤྱིར་རྡོར་སེམས་ཀྱི་མཚན་རིགས་དྲུག་པ་རྡོ་རྗེ་འཆང་ལ་འཇུག་པའི་སྐབས་དང་རིགས་ལྔ་པའི་མི་བསྐྱོད་པ་ལ་འཇུག་པ་དང་གསང་སྔགས་ཀྱི་བྱང་ཆུབ་སེམས་དཔའ་སྤྱི་ལ་འཇུག་པ་དང་རྡོར་རིགས་ཀྱི་སེམས་དཔའ་སྤྱི་ལ་འཇུག་པ་དང་རྡོར་རིགས་ཀྱི་སེམས་དཔའི་ནང་ཚན་རྣལ་འབྱོར་རྒྱུད་ཀྱི་ཤར་གྱི་སེམས་དཔའ་བཞིའི་དང་པོ་ལ་འཇུག་པ་སོགས་མང་བས་སྐབས་ཐོབ་མ་ཕྱེ་བའི་མིང་ཙམ་ལ་རྩོད་པ་ནི་བོད་ཕྱི་རབས་པ་རྣམས་ཀྱིས་མཁས་ཉམས་སུ་བྱེད་པར་སྣང་མོད། དཔྱོད་ལྡན་གྱི་མདུན་དུ་བྲིམ་པར་བྱ་བ་མ་ཡིན་ནོ། །བཏགས་གྲོལ་དང་མཐོང་གྲོལ་དང་མྱོང་གྲོལ་སོགས་ཀྱང་གདུལ་བྱ་དེ་དང་དེར་རིགས་སད་པ་ལས་འཕྲོ་བཞག་པ་ཁ་ཅིག་ལ་ནི་དེ་དག་གི་དེ་མ་ཐག་དུ་གྲོལ་བ་ཡང་ཡོད་ལ་སྤྱིར་ཕན་ཡོན་གྱི་སྒོ་ནས་དུས་གཞན་ལ་དགོངས་པ་ཡིན་ཡང་གང་ཟག་དེས་ད་ལྟ་ཉིད་ལ་གོ་ནས་འཇུག་པའི་རྒྱུར་འགྱུར་བ་ཡིན་ལ། ཟ་མ་ཏོག་གི་མདོ་ལས་ཡིག་དྲུག་གི་ཕན་ཡོན་བཤད་པ་དང་སོ་སོར་འབྲང་མའི་མདོ་ལས་གཟུངས་དེ་ལུས་ལ་བཅངས་པའི་ཕན་ཡོན་བཤད་པ་སོགས་སར་མའི་མདོ་རྒྱུད་ལ་ཆེས་མང་ཞིང་སངས་རྒྱས་ཤཱཀྱ་ཐུབ་པའི་མཚན་ཐོས་པ་ཙམ་གྱིས་ཕྱིར་མི་ལྡོག་པ་འཐོབ་པར་གསུངས་པ་དང་ཡང་མཚུངས་སོ། །ལུང་རིགས་ཀྱིས་གྲུབ་པར་མ་ཟད་དམ་པ་རྒྱ་གར་གྱིས་རྫོགས་ཆེན་ཡང་དག་དུ་གསུངས་པ་དང༌། དམ་པའི་བླ་མ་ཕ་རྒྱུད་གཡོ་བ་རླུང་གི་རྣལ་འབྱོར་གྱི་བླ་མ་བཅུ་གཅིག་གི་ནང་ནས་ཡོ་ག་ལ་མཁས་པ་གསུམ་གྱི་གཅིག་བུདྡྷ་གུཧྱ་སྟེ་སངས་རྒྱས་གསང་བ་ཡིན་ལ་དེའི་སྐབས་སུ། དེ་ལ་རྡོ་རྗེ་སེམས་དཔའ་སྒྱུ་འཕྲུལ་དྲ་བའི་རྒྱུད་འདི་ལ་རྩ་རྒྱུད་གསང་སྙིང་སོགས་རྒྱུད་འགྲེལ་གདམས་པ་ལག་ལེན་དང་བཅས་པ་དཔག་མེད་བཞུགས་ཀྱང་ཉམས་ལེན་ཚིག་གསུམ་པོ་འདིས་ཆོག་སྟེ། དག་སྣང་ཡིད་ལ་བྱས་པས་དངོས་འཛིན་ཡིད་ཀྱི་སྤུ་རིས་སུབས་ནས་སྣང་(ཐ༧ན)

[Full Size]

བ་སྤྲུལ་སྐུར་འཆར་བ་འདི་ནི་བུདྡྷ་གུཧྱའི་གདམས་པ་ཡིན་ཞེས་སངས་རྒྱས་གསང་བའི་རྣམ་ཐར་དང་བཅས་སྟེ་གསུངས་པ་དང༌། པཎ་ཆེན་ཤཱཀ་ཤྲིའི་ཁྱད་པར་གྱི་བླ་མ་བཞི་ལས་གདམས་པ་ཁྱད་པར་བ་བཞི་ཞེས་པའི་གཅིག་སློབ་དཔོན་པདྨ་ལས་རྡོ་རྗེ་ཕུར་པའི་དབང་རྒྱུད་མན་ངག་གསན་པ་ལ་བྱས་པ་དང༌། རྗེ་མི་ལ་སོགས་མར་པའི་བཀའ་རྒྱུད་ཀྱི་གྲུབ་ཆེན་ཕལ་ཆེར་གྱིས་ཕྱག་རྫོགས་གཅིག་དུ་སྦྱོར་ཞིང་འབྲི་ཁུང་འཇིག་རྟེན་མགོན་པོ་དང་ཐམས་ཅད་མཁྱེན་རང་བྱུང་རྡོ་རྗེ་སོགས་ཀྱིས་རྩ་འཁོར་ལོ་ལྔ་ལ་སྒྲུབ་པ་བཀའ་བརྒྱད་ཀྱི་རིགས་ལྔ་དང་རྩ་ཕྲན་ལ་གཞན་གསུམ་བཀོད་པ་དང༌། རྗེ་རྒོད་ཚང་པས་ཛཱ་ལནྡྷ་རར་བྱོན་དུས་དེའི་སྐོར་དུ་རྫོགས་ཆེན་གྱི་གྲུབ་ཐོབ་མང་པོ་མཇལ་བ་དང་རྗེ་ཡང་དགོན་པའི་ཐུགས་དམ་རྫོགས་ཆེན་ལས་འཁྲུངས་པ་དང་ཞང་གཡུ་བྲག་པའི་འཆིམས་ཕུ་བཀའ་རྒྱ་མ་ཞེས་སློབ་དཔོན་པདྨ་བོ་དྷི་ས་ཏྭ་བཱི་མ་ལ་མི་ཏྲ་རྣམས་ལ་དངོས་སུ་གསན་པའི་རྫོགས་ཆེན་གྱི་གདམས་ངག་ཡོད་པ་སོགས་སར་མ་ཉིད་ཀྱི་ཡང་སྐྱེས་ཆེན་མཐའ་དག་གིས་མངོན་དུ་མཛད་ཅིང༌། བསྐལ་བཟང་གི་སངས་རྒྱས་དྲུག་པར་རྩོད་པ་མེད་པ་གྲུབ་ཐོབ་ཀརྨ་པག་ཤིས་སྔོན་རྫོགས་ལྡན་གྱི་མཐའ་མ་མང་བཀུར་རྒྱལ་པོའི་དུས་རྡོ་རྗེ་འཆང་ཨིནྡྲ་བོ་དྷི་ཡེ་ཤེས་སྒྲིབ་པ་མེད་པའི་སྐུར་བསྟན་པའི་ཚེ་ཤཱཀྱའི་རིགས་མཐོང་ན་ཡིད་འོང་གི་མདུན་དུ་ཁོ་བོ་ཡང་རྣལ་འབྱོར་ན་མཁའ་འོད་ཡེ་ཤེས་དབྱིངས་སུ་གྱུར། རྒྱལ་པོ་ཛའི་ཁབ་ཏུ་ཆོས་ཀྱི་ཆར་བབ་པའི་ཚེ་རྒྱལ་པོའི་ཚ་བོ་བཛྲ་ཤྲཱིར་གྱུར། ལྷའི་བུ་ཀུན་དགའ་སྙིང་པོ་དགའ་རབ་རྡོ་རྗེ་བྱས་སྟེ་རྫོགས་པ་ཆེན་པོ་སྟོན་པའི་ཚེ་ཏོག་ཙེ་རྣལ་འབྱོར་གྱི་དབང་ཕྱུག་དུ་གྱུར་པས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་བཅུ་རྩ་བཞི་ཐམས་ཅད་རྟོགས་པ་ནས་ད་ལྟའི་བར་གསང་སྔགས་སར་རྙིང་ཐམས་ཅད་ཇི་ལྟ་བར་མངོན་དུ་གྱུར་ཞེས་སྔོན་གནས་རྗེས་སུ་དྲན་པས་གསལ་བར་བསྟན་ཞིང་ཕྱག་རྫོགས་དབྱེར་མེད་པའི་སྐུ་བཞི་གནད་(ཐ༧བ)

[Full Size]

ཀྱི་ངོ་སྤྲོད་གདམས་ངག་གི་སྙིང་པོར་མཛད་པ་དང༌། རྗེ་རང་བྱུང་པས་བཱི་མ་ལ་རང་གི་མཛོད་པུར་ཐིམ་པར་གཟིགས་སྟེ་སྙིང་ཐིག་གི་དོན་ཇི་ལྟ་བ་མངོན་ཏུ་གྱུར་སྟེ་ཡིག་ཆ་མཛད། རྗེ་རོལ་པའི་རྡོ་རྗེ་ཀརྨར་བཞུགས་དུས་ཀུན་བཟང་གི་དགོངས་པ་མཐར་ཐུག་རྫོགས་ཆེན་ཐོད་རྒལ་གྱི་རྟོགས་པ་མངོན་ཏུ་གྱུར་ནས། རང་གསལ་སྙིང་པོ་སྟོང་གསལ་ཀུན་དུ་བཟང༌། །གདོད་ནས་དག་པ་རྫོགས་པ་ཆེན་པོའི་དབྱིངས། །གཞི་ལྔའི་གདངས་ལ་རང་གསལ་ཀུན་དུ་ཁྱབ། །འོད་ལྔའི་གདངས་ལ་མ་བཅོས་མཉམ་པར་བཞག །ཞེས་སོགས་ཀྱི་རྡོ་རྗེའི་མགུར་མཛད། མཚན་བརྗོད་པར་དཀའ་བ་རྒྱལ་བ་མི་བསྐྱོད་རྡོ་རྗེས་གུ་རུ་མཚན་བརྒྱད་ཞང་སྐུ་བརྒྱད་ཀརྨ་པ་རབས་བརྒྱད་རྣམས་དབྱེར་མེད་དུ་གཟིགས་ནས་དེའི་བླ་མ་སྒྲུབ་པ་མཛད། ཇོ་ནང་ཀུན་མཁྱེན་གྱིས་ཇོ་ནང་གི་སྐུ་འབུམ་གྱི་སྲོག་ཤིང་ཨོ་ཌྱན་གྱིས་བཙུགས་པར་གཟིགས་ཤིང་ལྷ་ཁང་བརྒྱ་རྩ་བརྒྱད་ཀྱི་གཅིག་ཨོ་ཌྱན་གྱི་ལྷ་ཁང་དུ་མཛད་པ་སོགས་སྐྱེས་ཆེན་མཐའ་ཡས་པ་ཕྱོགས་འདིར་དགོངས་པ་གཅིག་པ་ཡིན་ལ། གཏེར་མ་ཡང་སྤྱན་རས་གཟིགས་ཀྱིས། ང་དང་ཁྱོད་གཉིས་ཁྱད་པར་མེད། །སྐྱེར་པ་སྒང་འདི་པོ་ཏ་ལ། །ཞེས་གསུངས་པའི་དབོན་སྟོན་སྐྱེར་སྒང་པས་མནལ་ལམ་བཟུང་སྟེ་ཨོ་ཌྱན་དུ་བྱོན། སློབ་དཔོན་པདྨ་ལས་རྟ་མགྲིན་གསང་སྒྲུབ་ཀྱི་མན་ངག་ཞུས་ཚེ་རྟ་མགྲིན་གྱི་སྐུར་བཞེངས་ནས་ལན་གསུམ་གསུངས་སྟེ་རྟ་མགྲིན་གྱི་སྒྲུབ་ཐབས་བརྒྱ་རྩ་བརྒྱད་ཀྱི་ནང་ནས་མཆོག་དུ་གྱུར་པ་འདི་ངས་བོད་དུ་ལྷ་སྲིན་འདུལ་དུ་འོངས་པའི་ཚེ་སྙེ་མོར་སྦས་པ་ད་ལྟ་སྔགས་པ་ཅིག་གིས་ཐོན་ནས་ཡོད་པས་ཞུས་ཅིག་གསུངས་ནས་སྙེ་མོར་སྔགས་པ་དེ་ལ་ཞུས། ཕྱིས་སློབ་དཔོན་གྱི་དྲུང་དུ་ཞུས་དག་བྱས་པས་ད་དུང་འཁོར་ལོ་མ་བྱིན་པར་འདུག་པས་ཞུས་ཅིག་གསུངས་སྟེ་སླར་འབུལ་བ་བྱས་ནས་འཁོར་ལོ་བྱིན་པར་བཤད་པས་སློབ་དཔོན་གྱིས་སྣོད་ལྡན་གྱི་དོན་ཏུ་སྦས་པའི་གཏེར་ཡོད་པར་གྲུབ་ལ། ཞང་(ཐ༨ན)

[Full Size]

རིན་པོ་ཆེས་འཕྲང་པོའི་བྲག་ནས་ལུང་བསྟན་གྱི་ཤོག་སེར་རྙེད། ཇོ་ནང་ཀུན་མཁྱེན་དང་འཕགས་པའི་གནས་བརྟན་བཌྷུ་ལའི་སྐུའི་བཀོད་པ་གཉག་དབོན་ཆེན་པོས་གྲུབ་ཐོབ་འདར་བྱ་རུ་བའི་གཏེར་མ་རྟ་མགྲིན་ཡང་གསང་ཁྲོས་པ་ལ་ཐུགས་དམ་གཙོ་བོར་མཛད། དཔལ་ལྡན་ས་སྐྱ་པ་ན་རིམ་གྱི་ཡི་དམ་གྱི་གཙོ་བོ་ཕུར་པ་བཀའ་མ་ལ་མཛད་པ་སོགས་ཡང་དག་པའི་ཤེས་བྱེད་བགྲང་བ་ལས་འདས་པ་ཡིན་ནོ། །འོན་ཡང་ཕྱི་དུས་རང་གཟོ་སྣ་ཚོགས་དང་ཆོས་སྣ་ཚོགས་བསྲེས་ཤིང་དེ་ཐམས་ཅད་གཏེར་བརྫུས་བྱས་ནས་རྙེད་པ་འཚོལ་ཞིང་བླུན་པོ་མགོ་བསྐོར། དེ་ལ་བརྟེན་ནས་ཡང་དག་པའི་དཔྱོད་ལྡན་རྣམས་ཡི་ཆད། དཔྱོད་ལྡན་དུ་རློམ་པའི་རྟོག་གེ་པ་རྣམས་དེ་མཐོང་བས་རྙིང་མ་ཐམས་ཅད་ལ་སྐུར་བ་འདེབས་ཤིང་ར་གན་གསེར་བརྫུས་གཅིག་གཉིས་མཐོང་བའི་རྟགས་ཀྱིས་གསེར་ཐམས་ཅད་ལ་སྐུར་པ་འདེབས་པ་ལྟར་སྣང་མོད་ཡང་ཤཱཀྱའི་བསྟན་པ་ཐ་མ་ལ་ཕལ་ཆེར་བདུད་དབང་དུ་གྱུར་ནས་ལོག་པའི་ཚུལ་མང་དུ་འབྱུང་བར་གསུངས་པས་འདི་དག་ནི་རྡོ་རྗེ་ཐེག་པ་རྙིང་མའི་བསྟན་པ་བར་ཆད་བྱེད་པའི་གདོན་གདུག་པ་ཅན་ཞིག་གིས་དང་པོར་ལུང་བསྟན་སྣ་ཚོགས་དང་ལྷ་འདྲེའི་ནོར་ཕྲ་མོ་རེ་གཉིས་རྙེད་དུ་བཅུག་པས་རློམ་སེམས་སྐྱེད་རྒྱུད་ཆོས་མིན་དུ་བསྒྱུར་ནས་ཕྱིས་རྫུན་རྒྱབ་ཏུ་རྫུན་གྱི་འཁོར་ལོ་བསྐོར་བས་གཏེར་ཆོས་ཡང་དག་རྣམས་ཀྱང་དྲི་མ་ཅན་དུ་བྱེད་པ་ཅིག་ཡིན་པར་སྣང་ལ། བདག་གི་སློབ་མ་བསམ་གཏན་པ་མང་པོ་ལ་ཡང་ཐོག་མར་རྨི་ལམ་དང་ཉམས་སུ་གཏེར་གནས་སྟོན་པ་དང་ཁ་བྱང་གི་ལུང་སྟོན་པ་སོགས་མང་དུ་བྱུང་སྣང་བ་རྣམས་སྐྱོན་ཡོན་དང་བདེན་རྫུན་དུ་མ་བཟུང་བར་ཉམས་ལེན་པར་བསྐྱངས་པས་ཕྱིས་གདོན་གྱི་རྟགས་རེ་བསྟན་ནས་དེ་ཕྱིན་མི་འབྱུང་བ་མང་དུ་བྱུང་བས་ཕྱིས་འབྱུང་རྣམས་འདི་ལ་གཟབ་པར་བྱ་ཞིང༌། འདི་རིགས་དང་ལྷ་སྐུ་ཞལ་མཐོང་སོགས་ཐམས་ཅད་ལ་སྤྱིར་ལམ་འབྲས་ལས་བརྡས་(ཐ༨བ)

[Full Size]

བརྟག་བར་བཤད་ཀྱང་འདི་རིགས་ཀྱི་སྐད་ཅིག་དེ་རྟོག་མེད་ལ་འབྱུང་བས་དེའི་ཚེ་བརྡ་དྲན་བར་དཀའ་ལ་སྤྲུལ་སྐུ་ཞལ་མཐོང་བ་སོགས་ཡང་དག་ཡིན་ན་ཐེ་ཚོམ་ཙམ་སྐྱེས་པས་ཀྱང་དངོས་གྲུབ་རིང་དུ་བྱེད་ཅིང་ལྟར་སྣང་ཡིན་ན་དད་པ་ཙམ་སྐྱེས་པས་ཀྱང་བར་ཆད་ཅུང་ཟད་རེ་མི་འབྱུང་མི་སྲིད་པས་འདི་ཐམས་ཅད་ལ་བདེན་རྫུན་གྱི་རློམ་སེམས་མེད་པར་ཉམས་ལེན་བསྐྱངས་པའི་ཚེ་ཡང་དག་ཡིན་ན་ཇེ་གསལ་ཇེ་བརྟན་དུ་འགྱུར། ཉམས་རྟོགས་ཀྱང་གོང་དུ་འཕེལ། མོས་གུས་དང་སྙིང་རྗེ་ཆེར་རྒྱས་པར་འགྱུར་ལ། ཡང་དག་མིན་ན་རང་ལ་རློམ་སེམས་དང་ང་རྒྱལ་སྐྱེ། བླ་མ་དང་གདམས་ངག་ལ་ཐེ་ཚོམ་ཟ་བ་ཞིག་འབྱུང༌། འོན་ཡང་བར་ཆད་ཀྱི་རློམ་སེམས་སུ་ཡང་མ་བཟུང་བར་བསྐྱངས་པས་མཐར་ཆོ་འཕྲུལ་སྟོན་པའམ་རང་བཞིན་གྱིས་ཞི་བར་འགྱུར་བ་ཡིན་ནོ། །དེས་ན་རྒྱ་གར་ན་སར་རྙིང་ཐ་དད་པ་མེད་ཀྱང་བོད་དུ་འགྱུར་སྔ་ཕྱིའི་དབང་གིས་མིང་ཐ་དད་ཐོགས་ཅིང་ཐ་སྙད་མི་འདྲ་བ་ཅུང་ཟད་འབྱུང་བ་ནི་དགྱེས་རྡོར་གྱི་རྒྱུད་ཉིད་ལའང་བརྟག་གཉིས་དང་ཕྱག་ཐིག་དང་ཡེ་ཤེས་ཐིག་ལེ་རྣམས་ཐ་སྙད་མི་འདྲ་བ་ཡོད་པ་བཞིན་ཡིན་ལ། རོག་གི་མཁས་པ་ཤེས་རབ་འོད་ཀྱི་གྲུབ་མཐའ་ཆེན་མོར་སར་རྙིང་ལ་ཁྱད་ཡོད་མེད་གསུམ་བྱས་པའང་ཁྱད་ཡོད་པར་འདོད་པ་གཞན་ལུགས་ཀྱི་ན་ཡམས་བཀོད། ཁྱད་མེད་པར་འདོད་པ་རང་ལུགས་ཀྱི་ལན་དངོས་བཤད། ཁྱད་པར་ཆེ་བར་འདོད་པ་རྙིང་མའི་ཆེ་བ་དབྱུང་བ་སྟེ་སྟོན་བྱེད་པཎྜི་ཏའི་ཁྱད་པར་སྔོན་གྱི་སློབ་དཔོན་པདྨ་ལ་སོགས་པས་བསྟན་པ་དང་ཕྱིས་ཀྱི་པཎྜིཏ་གསེར་འཚོལ་བའི་ཆེད་དུ་བོད་ལ་གང་བྲིན་གྱི་ཆོས་བྱེད་ཅིང་ཆོས་རེ་ལ་ཡང་དུམ་བུ་མང་པོར་བཅད་ནས་རེ་རེ་ལ་གསེར་གྱི་ཡོན་ཐ་དད་པ་ལེན་པས་བཤད་པ་མི་འདྲ། སྒྱུར་བྱེད་ལོ་ཙཱ་བའི་ཁྱད་པར་སྔོན་གྱི་ལོ་ཙཱ་བ་བརྒྱ་རྩ་བརྒྱད་སོགས་རྒྱ་དཔེ་ལས་བོད་སྐད་དང་བོད་དཔེ་ལས་རྒྱ་སྐད་དུ་བཀླག་(ཐ༩ན)

[Full Size]

ནུས་པ་རྣམས་ཀྱིས་བསྒྱུར་ཞིང་ཞུས་པ་དང་ཕྱིས་ཀྱི་ལོ་ཙཱ་བ་དབྱར་མང་ཡུལ་དུ་བསྡད་དགུན་བལ་པོར་ཕྱིན་སྔོན་བསྒྱུར་བ་རྣམས་ལ་འགྱུར་བཅོས་སུ་མིང་བཏགས་ནས་བཅོས་བསླད་རེ་བྱེད་པ་ཚོས་བསྒྱུར་བ་མི་འདྲ། སྤྱན་འདྲེན་ཡོན་བདག་གི་ཁྱད་པར་ཆོས་རྒྱལ་བྱང་སེམས་རྣམས་ཀྱིས་སྤྱན་དྲངས་པ་དང་ད་ལྟ་ཛོ་གིའམ་ལོ་ཙཱ་བ་རེ་ཙམ་གྱིས་ཁྲིད་ནས་འོངས་པ་མི་འདྲ། ཆོས་གཞི་བཞུགས་གནས་ཀྱི་ཁྱད་པར་སྔོན་བསམ་ཡས་ལ་སོགས་པར་གདན་ཕབ་པ་དང་དེང་སང་དགོན་བུ་ཅག་ཅོག་རེར་སྡོད་པ་མི་འདྲ། ཞུ་རྟེན་གསེར་ཕྱེའི་ཁྱད་པར་སྔོན་གསེར་ཕྱེ་ཤ་བའི་རླུད་བུ་བཀང་ནས་འབུལ་བ་སོགས་དང་ཕྱིས་ཞོ་རེ་ཞོ་གཉིས་འབུལ་བ་མི་འདྲ་ཞེས་རྙིང་མའི་ཆེ་བ་འདོན་ཕྱིར་བརྗོད་པར་ཟད་དེ། ཇོ་བོ་རྗེ་དང་པཎ་ཆེན་ཤཱཀ་ཤྲི་སོགས་གསེར་དང་བོང་བར་མཉམ་པའི་དམ་པ་འདི་དག་ནི་ཕྱིས་གདུལ་དཀའ་བའི་དུས་སུ་ཡང་འཕྲིན་ལས་འདི་ལྟ་བུ་མཛད་པ་ལས་ན་སངས་རྒྱས་གཉིས་པར་སྣང་ལ། ལོ་ཙཱ་བ་ཡང་ལོ་ཆེན་རིན་ཆེན་བཟང་པོ། རྔོག་ལོ་ཙཱ་བ་ཆེན་པོ། ཁྲོ་ལོ་བྱམས་པའི་དཔལ་རྣམས་ནི་མཁྱེན་པ་དང་འཕྲིན་ལས་གཉི་ག་སྔོན་གྱི་ལོ་ཙཱ་བ་མཐའ་དག་བསྡུས་པས་ཀྱང་མི་དོ་བར་སྣང་ལ། སྤྱན་འདྲེན་ཀྱང་ལྷ་བླ་མ་ཡེ་ཤེས་འོད་ལྟ་བུ་ཆོས་ཕྱིར་སྲོག་བཏང་བ་བློའི་ར་བ་ལས་བརྒལ་བ་དེ་ལྟ་བུ་བྱུང་བས་གཅིག་དུ་ངེས་པ་ནི་མ་ཡིན་ལ། སྤྱིར་པཎྜིཏ་ཁ་ཅིག་བོད་རབ་བྱུང་ལ་ཚིས་ཆེ་བར་ཐོས་ནས་ཀྱི་རོང་ཏུ་ཇོ་བོའི་མདུན་དུ་རྟགས་རང་བླངས་བྱས་ནས་བོད་དུ་མཁན་པོ་བྱེད་པ་ལོ་ཙཱ་བ་ཁ་ཅིག་གིས་མཐོང་ཟེར་བ་སོགས་ཀྱང་དུ་མ་སྣང་བས་སྤྱིར་དུ་ནི་དེ་དག་ལ་ཡང་བདེན་པའི་ཆ་ཤས་ཡོད་ཏོ། །དེ་ལྟར་གསང་སྔགས་སྔ་འགྱུར་རྣམས་བཀའ་ཡང་དག་དུ་བསྒྲུབས་ནས་དེ་ཡང་དེ་ནི་དེ་དག་གི་དམ་པའི་ཆོས་ཇི་ལྟར་བྱུང་བ་བརྗོད་པར་བྱ་སྟེ། གསང་སྔགས་སྔ་འགྱུར་གྱི་ཆོས་ཀྱི་གཙོ་བོ་ནི་སེམས་ཕྱོགས་སྒྱུ་འཕྲུལ་འདུས་པ་མདོ་སྡེ་མདོ་སྒྱུ་སེམས་གསུམ་ཞེས་གྲགས་པ་(ཐ༩བ)

[Full Size]

ཡིན་ལ་དེ་ལས་དེ་ཡང་སེམས་ཕྱོགས་རྫོགས་པ་ཆེན་པོ་ཇི་ལྟར་བྱུང་བ་ནི་འཁོར་འདས་གང་གི་ཡང་རྒྱ་ཆད་ཕྱོགས་ལྷུང་མེད་པ་ངོ་བོ་སྟོང་རང་བཞིན་འོད་གསལ་ཐུགས་རྗེ་འགག་མེད་དུ་བཞུགས་པ་ནི་གཞི་དེ་བཞིན་ཉིད་དེ་འཁོར་འདས་སུ་ཤར་བ་ན་ཡང་དེ་ཉིད་ལས་གཡོ་བ་མེད་ཏོ། །གལ་སྟེ་འཁོར་འདས་སུ་འདོགས་པ་ན་ནི་ཀུན་བཟང་ནས་འཇག་མིག་གི་སྲིན་བུའི་བར་ཁྱད་མེད་པར་ཤེས་བྱའི་གཤིས་གནས་ལུགས་ཀྱི་འདུག་ཚུལ་རང་བཞིན་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་ཡེ་སངས་རྒྱས་པ་ཅེས་བྱ་སྟེ། སྒྱུ་འཕྲུལ་རྒྱས་པར། ཕྱོགས་བཅུ་དུས་བཞིའི་རང་བཞིན་ནི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །དེ་ལ་འཁོར་འདས་ཀྱི་གདགས་པ་མེད་པ་ནི་ངོ་བོའི་ཆ་ནས་ཡིན་ལ་བཏགས་པ་ནི་འདོགས་འདོད་ཀྱི་ཆ་ནས་ཡིན་པས་མི་འགལ་སྟེ་བུམ་པ་ལ་མིང་གང་ཡང་མི་གནས་པ་དང་གང་ཡང་འདོགས་སུ་རུང་བ་མི་འགལ་བ་བཞིན་ནོ། །དེ་ལས་རང་བཞིན་ཐ་མི་དད་པའི་ཡེ་ཤེས་ཀྱི་རླུང་གཡོ་བ་མེད་པར་གཡོས་པས་རང་བཞིན་གོ་འབྱེད་པའི་ཆ་ལས་རང་རྩལ་ལྷུན་གྲུབ་ཀྱི་སྣང་བ་ཤར་དུས་ངོ་བོ་རང་བཞིན་ཐུགས་རྗེ་ཐ་མི་དད་པ་དེ་ཉིད་རང་ངོ་རང་གིས་ཤེས་པས་གཟི་ཐོག་དེ་ཉིད་དུ་འབྲས་བུར་རང་གྲོལ་བ་ནི་ཐོག་མའི་མགོན་པོ་འོད་མི་འགྱུར་བའི་ཀུན་དུ་བཟང་པོ་གཞི་ཐོག་ནས་བྱང་ཆུབ་པ་སྟེ་སྤྲོས་བྲལ་ཆེན་པོ་གཞོན་ནུ་བུམ་པ་སྐུའི་ཞིང་ཁམས་ཅེས་བྱ་བ་ཆོས་སྐུའི་ཞིང་ཁམས་རྒྱ་ཚད་ལས་འདས་པས་ན་ལྷུན་གྲུབ་ཀྱི་དབྱིངས་ན་དུས་བཞི་འཕོ་འགྱུར་མེད་པའི་རང་བཞིན་ན་མཁའ་ཇི་སྲིད་བར་ཕུན་ཚོགས་ལྔ་ལྡན་དུ་བཞུགས་ཅེས་བྱ་ལ་འོན་ཡང་རྟེན་བརྟེན་པ་དང་དབྱིབས་ཁ་དོག་གི་རྣམ་པ་ནི་མེད་ཏོ། །དེ་ལྟར་སངས་རྒྱས་དང་སེམས་ཅན་འཁོར་བ་དང་མྱང་འདས་ཐམས་ཅད་ཀྱི་གཞི་ཐ་མི་དད་པ་དེ་ཉིད་ལས་རང་རྩལ་ལྷུན་གྲུབ་ཀྱི་སྣང་བ་ཤར་བའི་ཚེ་རང་ངོ་ཤེས་པར་མ་ནུས་པ་(ཐ༡༠ན)

[Full Size]

ནི་མ་རིག་པ་ཡིན་ལ་དེ་ལས་ལས་ཀྱི་རླུང་གཡོས་སྟེ་ངོ་བོ་མ་རྟོགས་བཞིན་དུ་རང་བཞིན་ལ་བདག་དང་རང་རྩལ་ལ་གཞན་དུ་འཁྲུལ་བས་གཟུང་འཛིན་སྲིད་པའི་འཁོར་ལོར་སྣང་བ་ནི་འཁོར་བ་སྟེ་འདིའི་ཚེ་ཡང་གཞི་ལས་གཡོས་པ་ནི་མེད་ཏོ། །དེ་ལྟར་རྨི་ལམ་ལྟར་མི་བདེན་ཀྱང་བདེན་པ་ལྟར་འཁྲུལ་བའི་སེམས་ཅན་རྣམས་ལ་འབད་པ་དང་རྟོག་པ་དང་མཚན་མ་མེད་བཞིན་དུ་མཁྱེན་ཞིང་བརྩེ་བ་ཐུགས་རང་བྱུང་གི་ཡེ་ཤེས་ལྔའི་རྣམ་པར་གཡོས་པ་ལས་ཆོས་ཀྱི་སྐུ་དེ་ཉིད་ལས་གཡོ་བ་མེད་བཞིན་དུ་འོག་མིན་སྟུག་པོ་བཀོད་པའི་ཞིང་ཁམས་ནམ་མཁའི་མཐས་ཀླས་པར་རིགས་ལྔ་གངས་ཆེན་མཚོ་དང་རིགས་དྲུག་པ་དཔལ་རྡོ་རྗེ་སེམས་དཔའི་སྐུ་མཚན་དཔེ་མཐའ་ཡས་པ་ཅན་ལོངས་སྤྱོད་རྫོགས་པའི་སྐུར་བཞེངས་སྟེ་རང་ཉིད་ཀྱི་ཕུང་ཁམས་སྐྱེ་མཆེད་ལ་སོགས་པ་སྐུ་གསུང་ཐུགས་ཀྱི་ཡོན་ཏན་བགྲང་བ་ལས་འདས་པ་རྣམས་ལས་འཁོར་གྱི་རྣམ་པར་སྣང་ཡང་གཅིག་པ་དང་ཐ་དད་པ་གང་ཡང་མ་ཡིན་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་བ་སྙེད་ལ་རང་བཞིན་རྫོགས་པ་ཆེན་པོ་སྐུ་དང་ཡེ་ཤེས་འདུ་འབྲལ་མེད་པ་ཆོས་ཐམས་ཅད་གཟོད་ནས་ཡེ་སངས་རྒྱས་པ་ལྷུན་གྲུབ་ཡོངས་རྫོགས་སུ་སྟོན་པ་བྱ་རྩོལ་དང་བྲལ་བའི་ཐེག་པ་ཉིད་སྨྲ་བསམ་བརྗོད་པ་དང་བྲལ་བར་ཅི་ཡང་མི་སྟོན་པའི་ཚུལ་གྱིས་ཐོག་མ་མེད་པའི་དུས་ནས་བསྟན་ཅིང་ད་ལྟར་སྟོན་ལ་ཕྱི་མའི་མཐར་གཞལ་བར་མི་ནུས་པ་ན་མཁའ་ཇི་སྲིད་པ་དང་སེམས་ཅན་ཇི་སྲིད་པ་དེ་སྲིད་དུ་སྟོན་པར་འགྱུར་བས་སྐད་ཅིག་ཀྱང་རྒྱུན་ཆད་པ་མེད་ལ་སྐུ་ན་མཁའ་གང་བ་དེ་རྣམས་ཀྱི་བ་སྤུའི་སྒོ་ནས་སྤོས་ཆུའི་རྒྱུན་གངས་ཆེན་མཚོ་འབབ་པས་ན་མཁའ་ཀུན་གང་ལ་ཕྱག་མཚན་འཁོར་ལོ་དང་རྡོ་རྗེ་དང་རིན་ཆེན་དང་པདྨ་དང་རྒྱ་གྲམ་རྣམས་སོ་སོའི་ཁོང་སེང་ལས་སྐྱེས་པའི་པདྨ་ཉེར་ལྔ་ལ་ཞིང་གི་གཙོ་བོ་ཉེར་ལྔ་དང་དེ་ཐམས་ཅད་ཀྱི་གོ་ན་འབྱུང་བཞིའི་རྡུལ་ཕྲ་རབ་ཇི་སྙེད་པ་རེ་རེའི་ཁོངས་ན་ཡང་(ཐ༡༠བ)

[Full Size]

སངས་རྒྱས་ཀྱི་ཞིང་དབྱིབས་རྒྱུ་ཚད་ཁ་དོག་འགྲོ་བའི་རིས་ཐ་དད་པ་བསམ་པར་མི་ནུས་པ་ཞིང་ཐམས་ཅད་ཀྱི་རྡུལ་གྱི་གྲངས་དང་མཉམ་པ་ཡོད་ལ་དེ་རྣམས་ཀྱང་ཆགས་འཇིག་སྟོངས་གནས་སྣ་ཚོགས་པ་ཉི་ཟེར་གྱི་རྡུལ་གཡོ་བ་ལྟ་བུ་ཡིན་ལ་ཕར་ཕྱིན་ཐེག་པར་རྣམ་སྣང་གངས་ཆེན་མཚོ་ཞེས་པ་ཙམ་ལས་མེད་ཀྱང་ཐེག་པ་འདིར་རིགས་ཐམས་ཅད་ཀྱི་གནག་ཆེན་མཚོའི་སྟོན་པ་གསུངས་པ་འདི་ནི་ནམ་ཡང་མྱ་ངན་ལས་འདའ་བ་མེད་པ་སྟེ་ལོངས་སྤྱོད་རྫོགས་པའི་སྐུ་དངོས་བཤད་པ་ཡིན་ནོ། །དེ་ལྟར་ན་མཁས་ཁྱབ་ཚད་ན་ཞིང་གིས་ཁྱབ་པའི་ཞིང་སོ་སོའི་འགྲོ་བ་རྣམས་ཀྱི་ཆོས་སྐུ་མགོན་པོ་འོད་མི་འགྱུར་བ་ཉིད་ལོངས་སྐུ་རིགས་དྲུག་གི་རྣམ་པར་བཞེངས་པ་དེ་དག་ལ་སྣང་བ་དག་པ་རྣམས་ཀྱིས་མདོའི་སངས་རྒྱས་མཆོག་གི་སྤྲུལ་སྐུའི་རྣམ་པ་དང་སྔགས་ཀྱི་སངས་རྒྱས་ཧེ་རུ་ཀ་ཁ་སྦྱོར་གྱི་སྐུ་ཞི་བ་དང་ཁྲོ་བོ་སྣ་ཚོགས་སུ་སྣང་བར་འགྱུར་ལ་རང་དང་འཚམས་པའི་ཆོས་ཐེག་པ་དེ་དང་དེ་གསུང་བར་མཐོང་ནས་ལམ་དེ་དག་སྒྲུབ་པར་འགྱུར་ལ། སངས་རྒྱས་ཀྱི་རྣམ་པར་མཐོང་མི་ནུས་པ་རྣམས་ཀྱིས་གྲུབ་པ་དང་རིག་པ་འཛིན་པ་དང་དགེ་བའི་བཤེས་གཉེན་དུ་སྣང་ལ། ལྷ་རྣམས་ཀྱིས་རང་རང་གི་གཙོ་བོར་སྣང་བས་བག་མེད་ལས་ལྡོག་པ་དང་ལྷ་མིན་གྱིས་ཐག་བཟང་རིས་སུ་སྣང་བས་རང་གི་སྲིད་སྲུང་བར་མཐོང་ལ། དུད་འགྲོས་སེང་གེ་ལ་སོགས་པ་རང་རང་གི་གཙོ་བོར་མཐོང་སྟེ་སྐྲག་པས་དེས་བསྟན་པ་ལས་འགོང་མི་ནུས་པ་དང༌། ཡི་དྭགས་རྣམས་ཀྱིས་གཙོ་མོ་ཁ་འབར་མ་ལྟ་བུར་སྣང་སྟེ་སེར་སྣའི་ཉེས་པ་སྟོན་པ་དང༌། དམྱལ་བ་པ་རྣམས་ཀྱིས་གཤིན་རྗེའི་རྒྱལ་པོ་དང་དམྱལ་སྲུང་དུ་སྣང་བས་ལས་འབྲས་ལུང་སྟོན་པས་ལས་རྒྱུ་འབྲས་ལ་ཡིད་འཆེས་བསྐྱེད་པ་སོགས་གང་འདུལ་དེར་སྣང་བ་སྟོན་པ་སྟེ། གཟོ་དང་སྐྱེ་དང་བྱང་ཆུབ་ཆེ། །ཞེས་སྤྲུལ་སྐུ་འབྱུང་བའི་(ཐ༡༡ན)

[Full Size]

གོ་རིམ་དུ་བསྟན་པ་ཉིད་ཁོ་ན་ཡིན་ལ་དེས་ན་མིའི་ཐུབ་པ་ཤཱཀྱ་སེང་གེ་ཞེས་བཤད་པའང་བསྟན་པ་འདིའི་གཙོ་བོའི་དབང་དུ་བྱས་ནས་སྤྱིར་བསྟན་གྱི་བྱེ་བྲག་དུ་རང་ཉིད་གང་གིས་འདུལ་བ་དེ་ཁོ་ན་རང་སྐལ་གྱི་ཐུབ་པ་ཡིན་པས་རང་ཅག་གི་ཐུབ་པ་དང་ཀུན་བཟང་དང་རྡོ་སེམས་ནི་རྩ་བའི་བླ་མ་འདི་ཁོ་ན་ཡིན་པར་རིག་པར་བྱའོ། །དེ་ཡང་ཆོས་སྐུའི་ཞིང་ནི་འོད་གསལ་རྡོ་རྗེ་སྙིང་པོའི་ཞིང་ཁམས་ཅེས་བསྟན་སྟེ་ལོངས་སྤྲུལ་གྱི་ཞིང་གཉིས་ཀ་འདིར་ཆུད་ཏོ། །ལོངས་སྐུའི་ཞིང་ནི་ཚངས་པ་རྔ་སྒྲའི་ཞིང་ཁམས་ཅེས་བྱ་སྟེ་སྤྲུལ་སྐུའི་ཞིང་ཐམས་ཅད་འདིའི་ཁོངས་སུ་ཆུད་ཏོ། །སྤྲུལ་སྐུའི་ཞིང་ནི་ཚངས་ཆེན་གྱི་ཞིང་ཞེས་བྱ་སྟེ་དག་མ་དག་གི་འཇིག་རྟེན་གྱི་ཁམས་ཐམས་ཅད་འདིར་ཆུད་ཏོ། །དེ་ལྟར་འཁོར་འདས་སྤྱིར་བཤད་ནས་ཞིང་འདིར་སྟོན་པའི་མཛད་པ་བསྟན་པའི་ཚུལ་ནི། ཐོག་མའི་མགོན་པོ་དེ་ཉིད་ཞིང་འདི་འདུལ་བའི་ཕྱིར་རིས་མཐུན་གྱི་སེམས་ཅན་མིར་གྱུར་པས་བྱང་ཆུབ་ཏུ་སེམས་བསྐྱེད་ཅིང་ལམ་བགྲོད་ནས་སངས་རྒྱས་པར་སྣང་བ་སྟེ། ཁ་ཅིག་ཐོག་མའི་མགོན་པོ་ལས་རྒྱུད་ཐ་དད་པའི་སེམས་ཅན་གྱིས་སེམས་བསྐྱེད་པར་འདོད་པ་ལ་ནི། སྒྱུ་འཕྲུལ་རྡོ་རྗེ་ལས། དང་པོའི་རྒྱལ་བ་ས་རྒྱལ་བ། །སེམས་དཔའ་ཆེ་དང་འཇོམས་པ་ཆེ། །ཞེས་དང༌། འདི་ནི་སྟོན་པ་རྡོ་རྗེ་འཆང༌། །སངས་རྒྱས་ཀུན་བས་སྔར་སངས་རྒྱས། །ཅེས་གསུངས་པ་དང་འགལ་ལོ་ཞེས་མཁས་པ་ཀློང་ཆེན་པས་བཤད་ཏོ། །དེ་ཡང་སྔོན་བསྐལ་པ་མཐའ་ཡས་པ་ན་ཞིང་ཁམས་རང་བཞིན་རྣམ་པར་བཀོད་པར་སངས་རྒྱས་མེ་ཏོག་མཛེས་པ་ཆེན་པོ་ལ་གསེར་གྱི་རྡོ་རྗེ་ཞིག་ཕུལ་ནས་དང་པོར་ཐུགས་བསྐྱེད། དེ་ནས་ཅི་ཞིག་ན་བྲམ་ཟེ་ལེགས་བྱིན་དུ་གྱུར་པའི་ཚེ་མངོན་པར་རྫོགས་པར་སངས་རྒྱས་སྟེ་ཆོས་སྐུའི་དགོངས་པ་ལ་བཞུགས་པ་ལས་ལོངས་སྐུར་རང་(ཐ༡༡བ)

[Full Size]

བྱོན་སྟེ་མཛད་པ་སུམ་བཅུ་རྩ་དྲུག་དང་ལྡན་པར་ཐུགས་རྗེ་ཕྱོགས་བཅུར་འཕྲོས་པའི་ངང་ལས་རིགས་ལྔ་གཙོ་འཁོར་གྲངས་མེད་བརྗོད་དུ་མེད་པ་ཆོས་ཉིད་ཀུན་དུ་བཟང་པོའི་ལོངས་སྤྱོད་དུ་འདུས་ཤིང་རྫོགས་པ་ཆེན་པོའི་སྐུར་འོད་འབར་ཏོ། །དེའི་ཚེ་འོད་ཁྱིམ་རྣམ་དག་བཀོད་ལེགས་ཀྱི་ཁང་བརྩེགས་སུ་སྟོན་པ་རང་ཤེས་རིག་གི་རྒྱལ་པོ་རྣམ་སྣང་གངས་ཆེན་མཚོ་ཞེས་བྱ་བ་དཀྱིལ་འཁོར་ཐམས་ཅད་ཀྱི་མངའ་བདག་དུ་འབྱུང་སྟེ་སྐུ་གསུང་ཐུགས་བྱས་པ་མེད་པའི་བསྟན་པ་རིན་པོ་ཆེའི་ངང་ལས་མི་གཡོ་མི་འབྱུང་མི་གནས་མི་ལེན་མི་འདོར་མི་སྐྱོད་པ་ཉིད་དུ་རང་བྱུང་ལ་གདུལ་བྱ་མ་ཡིན་ལ་འདུལ་བྱེད་དུ་གྱུར་པའི་འཁོར་ཚོམ་བུ་འབུམ་ཕྲག་གྲངས་མེད་པ་ཡང་ཉིད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ལས་འཕྲོས་ཤིང་འདུས་སྟེ་ཐམས་ཅད་ཀྱང་ཕྱོགས་བཅུའི་འཇིག་རྟེན་མ་ཡིན་པ་སྟུག་པོ་བཀོད་པ་རང་སྣང་དག་པ་རང་ཤར་གྱི་ཞིང་དག་པར་འོད་གསལ་ཏོ། །དེའི་སྣང་ཆ་ལ་མཚན་དཔེ་ཕུན་སུམ་ཚོགས་པ་རྡོ་རྗེ་འཆང་གི་སྐུར་བྱུང་སྟེ་སྔོན་རྡོ་རྗེ་ཕུལ་ནས་སེམས་བསྐྱེད་པའི་རྒྱུ་ལས་སོ། །མདོར་ན་ཆོས་སྐུའི་དུས་ན་གནས་ཆོས་དབྱིངས་དམིགས་པ་མེད་པར་སྟོན་པ་ཀུན་བཟང་རང་བཞིན་གྱིས་མཛད་པ་མ་ལུས་པ་རྫོགས་པ་འཁོར་རྡུལ་གཅིག་གི་སྟེང་ན་རྡུལ་ཇི་སྙེད་ཀྱི་སངས་རྒྱས་རྒྱ་མཚོ་དང་ལྷན་ཅིག་བསྟན་པ་དངོས་རང་བཞིན་རྫོགས་པ་ཆེན་པོ་དུས་ཆོས་ཉིད་ལ་མཐོང་བ་རྣམ་པར་དག་པའི་སྤྱོད་ཡུལ་སྟེ་ཕུན་ཚོགས་ལྔར་རྟག་དུ་བཞུགས་པ་དེ་མཚོན་བྱེད་ཆོས་སྐུ་རྫོགས་པ་ཆེན་པོའི་བྱིན་རླབས་ལས་རང་ཤར་བ་རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་འཁྲུངས་པའི་རྡོ་རྗེ་ཚེ་ལོ་དཔག་མེད་ནས་བཅུ་པའི་བར་ཡུལ་དུས་དེའི་མི་རྣམས་ཀྱི་ཆག་གང་བ་ན་མཁའ་ལ་ལྷུན་གྱིས་གྲུབ་པ་སྟེ་བསྟན་པའི་བཙས་དང་པོའོ། །ལོངས་སྐུའི་བསྟན་པའི་དུས་ན་སྟོན་པ་གངས་ཆེན་མཚོའི་སྤོས་ཆུའི་མཚོ་དང་པདྨ་དང་འོད་ཀྱི་རྡུལ་རེ་རེ་ལ་ཞིང་གཞལ་དུ་(ཐ༡༢ན)

[Full Size]

མེད་པར་སྟོན་འཁོར་ཚད་མེད་པར་གནས་ཅིང་བྱ་རྩོལ་དང་བྲལ་བའི་ཆོས་ཀྱི་འཁོར་ལོ་རྒྱུན་མི་ཆད་པ་མཚོན་བྱེད་གསུང་རང་བྱུང་གི་ཡི་གེ་སུས་ཀྱང་མ་བྱས་པ་བསྟན་པ་ཐམས་ཅད་ཀྱི་བུ་གཅིག་གི་གླེགས་བམ་རིན་པོ་ཆེ་བརྒྱ་རྩ་གཅིག་ལས་རང་བྱུང་བ་ཆོས་ཀྱི་རང་སྒྲ་སྒྲོག་པ་ན་མཁའ་ལ་ཤར་བ་ནི་བསྟན་པའི་བཙས་གཉིས་པའོ། །ལོངས་སྐུའི་སྣང་ཆ་ཉིད་ལས་གནས་རིས་བཅུ་གཉིས་སུ་སྟོན་པ་བཅུ་གཉིས་སུ་སྣང་བས་སེམས་ཅན་རྣམས་འདུལ་བར་མཛད་དེ་དེ་མཚོན་བྱེད་སྤྲུལ་སྐུའི་བྱིན་རླབས་ལས་རང་བྱུང་བ་རིན་པོ་ཆེ་བརྒྱ་རྩ་གཅིག་ལས་སུས་ཀྱང་མ་བྱས་པར་གྲུབ་པའི་སྐུ་གཟུགས་འགྲོ་བའི་ལུས་བོངས་དང་མཉམ་པ་ཅིག་ན་མཁའ་ལ་རང་བྱུང་བ་ནི་བསྟན་པའི་བཙས་གསུམ་པ་སྟེ་འདི་དག་སྐུ་གསུང་ཐུགས་ཀྱི་བསྟན་པ་གར་ཡོད་དུ་གནས་ལ། ཐུགས་ཀྱི་རྟེན་རྡོ་རྗེས་འགྲོ་བའི་རེ་འདོད་ཐམས་ཅད་སྐོང༌། གསུང་གི་རྟེན་གླེགས་བམ་དེ་དང་ཕྲད་པ་དང་སྒྲ་ཐོས་པ་ཙམ་གྱིས་གྲོལ་བར་བྱེད་དེ་འདིའི་ཆོས་ཀྱི་རྣམ་གྲངས་ནི་བཏགས་གྲོལ་གྱི་རྒྱུད། འདི་སྐད་བདག་གིས་བསྟན་པའི་དུས་གཅིག་ན། མཐོ་དམན་ཕྱི་ནང་མེད་གནས་སུ། །སྟོན་པ་ཀུན་དུ་བཟང་པོ་ཡིས། །སྟོན་པ་རྡོ་རྗེ་སེམས་དཔའ་ལ། །ཡབ་ཀྱི་དགོངས་པ་ཀུན་དུ་བཟང༌། །ཨ་ཏི་རང་ཤུགས་ཚིག་དུ་བྱིན། །ཨེ་མ་འདི་འཛིན་སྐལ་བ་ཆེ། །འདི་ནི་རང་བྱུང་ཆེན་པོའོ། །ཞེས་སོགས་ཡབ་དང་ཡུམ་དང་གཉིས་མེད་ཀྱི་དགོངས་པ་ཀུན་དུ་བཟང་པོ་བཏགས་གྲོལ་གྱི་རྒྱུད་ཡིན་ནོ། །སྐུའི་རྟེན་དེ་གང་གིས་མཐོང་བའི་ལུས་འོད་གསལ་དུ་གྲོལ་བར་བྱེད་ཏོ། །དེ་ལྟར་བསྟན་པའི་བཙས་དེ་དག་ནི་རང་བཞིན་རྫོགས་པ་ཆེན་པོའི་ལུང་རྟོགས་ཀྱི་བསྟན་པ་གར་ཡོད་དུ་གནས་པ་སྟེ། ཐལ་འགྱུར་ལས། བཀའ་གསང་ངེས་པ་བཅུ་བདུན་དང༌། །བསྟན་པའི་གཟེར་དང་འཕྲུལ་ཡིག་(ཐ༡༢བ)

[Full Size]

བཅས། །སྤྲུལ་སྐུའི་ཞིང་ཁམས་ཐོག་མ་ལ། །སྟོན་པ་ཀུན་དུ་བཟང་པོ་ཡིས། །སྟུག་པོ་བཀོད་པའི་གནས་སུ་བཟུང༌། །དེ་ནས་ལྕང་ལོ་ཅན་གྱི་གནས། །ཀུན་རིག་རྣམ་པར་སྣང་མཛད་ཀྱིས། །འདི་ཉིད་བཟུང་བས་རིགས་ལྔར་སྨིན། །དེ་འདས་ང་ཡིས་བཟུང་བ་ཡིས། །བརྟན་པའི་སྲོག་ཤིང་དམ་པ་ཡི། །སངས་རྒྱས་སྟོང་དང་རྩ་གཉིས་ནི། །འདི་ལ་བརྟེན་ནས་ངེས་པར་འབྱུང༌། །ཞེས་སོགས་ཀྱིས་ཞིང་རེ་རེར་ཡང་སྣོད་ཀྱི་དབང་གིས་སྙིང་པོ་ལྡན་དང་རྫོགས་ལྡན་ཆེན་པོ་རྫོགས་ལྡན་དང་གསུམ་ལྡན་དང་གཉིས་ལྡན་རྩོད་ལྡན་དང་རྩོད་ལྡན་ཆེན་པོ་སྟེ་འབྱུང་བའི་དུས་བདུན་དེ་དག་གི་བར་རྣམས་ལ་མི་འབྱུང་བའི་དུས་བདུན་སྟེ་སྒྲོན་བསྐལ་བདུན་དང་མུན་བསྐལ་བདུན་ཞེས་ཀྱང་བྱ་ལ། དེ་ལྟར་དར་ནུབ་བཅུ་བཞི་པོ་རྫོགས་པ་ན་ཞིང་དེའི་ཆོས་འདིའི་གདུལ་བྱ་རྫོགས་པས་ཞིང་གཞན་དུ་འཕོ་བ་ཡིན་ལ་དེ་ཡང་སྔོན་སྟུག་པོ་བཀོད་པར་ཀུན་དུ་བཟང་པོས་བཟུང༌། དེ་ནས་ལྕང་ལོ་ཅན་དུ་རྣམ་པར་སྣང་མཛད་ཀྱིས་བཟུང༌། དེ་ནས་ཞིང་འདི་ཆགས་ནས་གནས་བསྐལ་གྱི་དང་པོ་སྟོན་པ་བཅུ་གཉིས་ལས་ཐོག་མའི་ཚེ་བཙས་གསུམ་པོ་འདིར་བབ་ཅིང་དེ་ནས་ཡ་ཐོག་རིང་མོའི་མཐའི་མའི་ཚེ་ལོ་བཅུ་པ་འདིའི་བར་ལ་ཞིང་ཁམས་འདིར་བསྟན་པ་ཇི་ལྟར་འཕར་ཚུལ་ཡང༌། བྱང་གི་ཕྱོགས་ནི་གཡོ་བ་ལྡན། །བསྟན་པའི་སྒྲོན་མེ་དེར་གནས་སྟེ། །དཔལ་ལྡན་སྐྱོང་ཞེས་བྱ་བ་ཡི། །དགེ་སློང་དག་གིས་འཛིན་པར་འགྱུར། །དེ་ཡི་ཡོན་བདག་རྒྱལ་པོ་ནི། །ཛི་ན་མི་ཏྲ་ཞེས་བྱ་བས། །བསྟན་པ་གསལ་བའི་གཞི་མ་བྱེད། །ལོ་ནི་སྟོང་དང་སུམ་བརྒྱར་གནས། །དེ་ནས་མུན་པའི་བསྐལ་པ་ནི། །དྲུག་བཅུའི་བར་ལ་གནས་པའོ། །དེ་ནས་ལྷོ་ཕྱོགས་འཚལ་བ་སྐྱོབ། །ཅེས་སོགས་ལུང་བསྟན་པ་སྟེ། །བྱང་ཕྱོགས་གཡོ་ལྡན་དུ་དགེ་སློང་དཔལ་ལྡན་སྐྱོང་སྦྱིན་(ཐ༡༣ན)

[Full Size]

བདག་རྒྱལ་པོ་ཛི་ན་མི་ཏྲ་དུས་ལོ་སྟོང་དང་སུམ་བརྒྱ་མུན་བསྐལ་དྲུག་བཅུའོ། །དེ་ནས་ལྷོ་ཕྱོགས་འཚལ་པ་སྐྱོོབ་ཏུ་དགའ་བའི་དཔལ་དང་ཁྱིམ་བདག་དགེ་བའི་དངོས་གྲུབ་ཀྱིས་ལོ་བརྒྱར་འཛིན་སྟེ་མུན་པའང་ལོ་བརྒྱ་དང་ཉི་ཤུའོ། །དེ་ནས་ཤར་ཕྱོགས་རྡོ་རྗེ་འབྱུང་བའི་རི་རྩེར་རྒྱལ་པོ་སཱུ་ཏྲ་སེ་ན་དང་བྲམ་ཟེ་ཛ་ཡ་ཨ་ཀ་རས་སྟོང་དང་བཞི་བརྒྱར་འཛིན་སྟེ་མུན་པ་ལོ་ལྔ་སྟོང་ངོ༌། །དེ་ནས་ནུབ་ཕྱོགས་བྷ་ཏི་སེ་ལིར་དགེ་སློང་བདེ་བ་སྐྱོད་དང་དཔའ་བོ་འཇིགས་ཀྱིས་ལོ་སྟོང་འཛིན་ལ་ལྔ་སྟོང་དུ་མུན་པའོ། །དེ་ནས་འདི་ཉིད་དུ་བབས་སྟེ་ལོ་ལྔ་བརྒྱ་ལྔ་བཅུར་བློ་གྲོས་བཟང་པོ་དང་མཁའ་འགྲོ་མ་གསལ་བྱེད་མས་འཛིན་ལ། འདིའི་ཚེ་ལོ་བཅུ་པ་རྫོགས་ནས་འཇིག་རྟེན་གྱི་ཁམས་གཞན་དུ་འཕོ་བའོ། །བློ་གྲོས་བཟང་པོ་ནི་འདི་འཛིན་པ་ཐམས་ཅད་དང་ལོ་ལྔ་བརྒྱ་ནི་ལོ་ཆེན་སྟེ་ལྔ་བརྒྱ་ལྔ་བརྒྱར་ལོངས་པའོ་ཞེས་ཀློང་ཆེན་པས་བཤད་པ་ལྟར་ན་ལྔ་རྒྱ་ཕྲག་རེ་ལ་ལོ་རེར་བརྩི་བ་ཡིན་ནམ་སྙམ་མོ། །དེ་ཙམ་ཞིག་ཞིང་དེའི་མི་རྣམས་ལ་སྣང་ལ་གཞན་དུ་མཁའ་འགྲོའི་དོན་བྱེད་པའོ། །ཁྱད་པར་འཛམ་གླིང་འདི་ཉིད་ཀྱི་དུས་བཅུ་བཞི་ནི། ཐལ་འགྱུར་ལས། བསྟན་པ་འཇིག་པའི་ཉེ་རྒྱུ་ནི། །དེ་དག་སོ་སོའི་གནས་དག་དུ། །གང་ཟག་ལོག་སྲེད་ཅན་ཞེས་བྱ། །དེ་དེ་དག་ནི་བསྟན་པ་ཀུན། །འཇིག་པར་བྱེད་པའི་ཉེ་རྒྱུ་ཡིན། །ཞེས་མུན་པར་བྱེད་པའི་གང་ཟག་སྤྱིར་བསྟན་ནས། འདི་ཉིད་དང་པོ་མུན་པའི་དུས། །ཛམྦུ་གླིང་གི་ནུབ་ཕྱོགས་སུ། །རྒྱལ་པོ་ལག་པ་སོར་མོ་དྲུག །མདུན་ན་སོ་ལྷག་སྔོན་པོ་ཡོད། །ལག་པ་གཡས་པའི་གྲུ་མོ་ལ། །རྨེ་བ་ནག་པོ་སྡིག་པའི་དབྱིབས། །རབ་ཏུ་འཇིགས་པ་ཡོད་པ་ཡིས། །སངས་རྒྱས་བསྟན་པ་མུན་པར་འགྱུར། །ལོ་ནི་དྲུག་བཅུའི་བར་ལ་འབྱུང༌། །(ཐ༡༣བ)

[Full Size]

དེ་ནས་དཔལ་འཛིན་དང་པོས་འཛིན། །ཞེས་སོགས་ཀྱིས་བྱེ་བྲག་དུ་བསྟན་སྟེ། དཔལ་འཛིན་དང་པོས་སྒྲོན་མེ་སྟོང་སུམ་བརྒྱ། དེ་ནས་བྱང་ཕྱོགས་སུ་གཟི་ལྡན་གྱི་རི་རྩེར་དགེ་སློང་གཟི་བརྗིད་ཅན་གཡས་པ་ལ་རྣ་བ་གཉིས་དང་མིག་ཟུར་གསུམ་མ་འགེབས་པ་ཅིག་གིས་མུ་སྟེགས་དང་རྩོད་ནས་མུན་པ་ལོ་དྲུག་བཅུ། དེ་ནས་བདེ་བའི་ལྷས་སྣང་བ་ལོ་བརྒྱ། དེ་ནས་བྱང་ཤར་ཆུ་བོ་རབ་མེད་ཀྱི་རྩར་རྒྱལ་པོ་མིག་གཅིག་པ་གྱད་ཀྱི་སྟོབས་ཅན་གྱིས་ལོ་དྲུག་བཅུ་མུན་པར་བྱེད། དེ་ནས་རང་རྒྱལ་གྱི་གཟུགས་ཅན་རྡོ་རྗེ་གདན་ནས་ནུབ་ཏུ་འབྱུང་བས་སྒྲོན་མེ་ལོ་བརྒྱ་དང་ཉི་ཤུ། དེ་ནས་ཡུལ་དབུས་སུ་གྲོང་གསེར་དུ་གནས་བརྟན་ལྕེ་རྩེ་གཉིས་པ་ལུས་ཐུང་བས་སྡེ་པ་རྩོད་དེ་མུན་པ་ལོ་དྲུག་བཅུ། དེ་ནས་ཤར་ལྷོ་ཀི་ཏའི་ཆུ་འགྲམ་དུ་དཔལ་གྱི་སེང་གེས་སྒྲོན་མེ་ལོ་སྟོང་བཞི་བརྒྱ། དེ་ནས་གངྒཱའི་འགྲམ་དུ་རྒྱལ་པོ་དཔུང་པ་ལྗང་གུ་ལ་རབ་བྱུང་གི་གཟུགས་སོར་བཞི་ཡོད་པས་ལོ་དྲུག་བཅུ་མུན་པ། དེ་ནས་བྲྀ་ཀ་མ་ལའི་གཙུག་ལག་ཁང་གི་བདག་པོ་གཞོན་ནུའི་མགོན་གྱིས་སྒྲོན་མེ་ལོ་སྟོང༌། དེ་ནས་ལྷོ་ཕྱོགས་ཚངས་པའི་གྲོང་དུ་དམངས་རིགས་སེང་གེའི་མགོ་ཅན་སྐྱེས་ནས་ཟླ་གསུམ་ལོན་པ་ནས་མུན་པ་ལོ་དྲུག་བཅུ། དེ་ནས་བྱ་རྒོད་ཕུང་རིར་དགེ་སློང་མཛེས་བྱེད་གཞོན་ནུས་སྒྲོན་མེ་ལོ་ལྔ་བརྒྱ་ལྔ་བཅུ། དེ་ནས་ཁ་ཆེ་སྒྲ་ལྡན་གྱི་གྲོང་དུ་རིགས་ངན་གྱི་ནང་དུ་བྱ་ལུས་མི་གདོང་ཅན་སྐྱེས་ནས་ལོ་བཅུ་ནས་བཟུང་སྟེ་མུན་པ་ལོ་དྲུག་བཅུ། དེ་ནས་ཡུལ་དབུས་ནས་ཤར་དུ་དཔག་ཚད་ལྔ་འདས་པར་དགེ་སློང་ཤཱཀྱ་ཛི་ཀས་ལོ་བཅུ་འཛིན་སྟེ་འདིའི་དུས་ཚེ་ལོ་བཅུ་པ་རྫོགས་ནས་ཞིང་འདིའི་དར་ནུབ་བདུན་ཚང་སྟེ་དེ་སྲིད་ཆོས་འདིས་ཁྱིམ་པ་དང་རབ་བྱུང་གི་མི་ཇི་སྙེད་གྲོལ་བ་ཡང༌། བཀོད་པ་ཆེན་པོའི་རྒྱུད་ལས། ད་ནི་འདི་ནས་མི་གནས་ནས། །(ཐ༡༤ན)

[Full Size]

ཚེ་ལོ་དྲུག་བཅུ་ཡན་ཆད་ལ། །འབྲས་བུར་གྲོལ་བ་སྟོང་ཕྲག་གཅིག །འབྱུང་བར་ད་དེངས་དག་དུ་སྟེ། །ཞེས་སོགས་སྟེ་ཁྱིམ་པ་སྙེད་རབ་བྱུང་དེའི་ཕྱེད་དང་ལྷག་མ་བྱང་སེམས་ཚེ་ལོ་ལྔ་བཅུ་པའི་བར་དུ་སྐྱེས་པ་ཉིས་སྟོང་དང་སྤྱིར་བུད་མེད་ཤས་ཆེ་བ་འབུམ་ཕྲག་གཉིས་གྲོལ། སུམ་བཅུ་པའི་བར་དུ་བུད་མེད་འབུམ་ཕྲག་གཅིག་དང་སྐྱེས་པ་སྟོང་ཕྲག་ལྔ་གྲོལ་བ་སྟེ་འདི་ཐམས་ཅད་ནི་སེམས་ཆོས་སྐུ་དང་ལུས་འོད་ཀྱི་སྐུར་གྲོལ་བའི་གྲངས་བསྟན་པའོ། །སྒྲོན་མེའི་བསྟན་པ་མཐའ་མ་ད་ལྟའི་འདི་ཉིད་འཛིན་པ་པོ་ལུང་བསྟན་པ་ནི་ཐལ་འགྱུར་ལས། ང་ནི་མྱ་ངན་འདས་འོག་དུ། །ནུབ་ཕྱོགས་ཨོ་ཌྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བ་ཛྲ་ཧེ། །འདིས་ནི་དམ་པའི་བསྟན་པ་འཛིན། །ཞེས་དགའ་རབ་རྡོ་རྗེ་དང༌། དེ་ཡི་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུ་གུ་སྐལ་ལྡན་པ། །མཉྫུ་ཤྲཱི་པ་ཏི་ཅེས། །ལོ་ནི་བདུན་བཅུ་རྩ་ལྔར་འཛིན། །ཞེས་འཇམ་དཔལ་བཤེས་གཉེན་དང༌། །དེའི་རྗེས་སུ་སྐལ་ལྡན་ལ། །སོ་ཤ་གླིང་ཞེས་བྱ་བ་རུ། །ཁྱིམ་བདག་རིགས་སྐྱེས་ཤྲི་སིངྷ། །ཞེས་བྱ་བ་ཡིས་འཛིན་པར་འགྱུར། །ཞེས་ཤྲི་སིངྷ་དང༌། དེ་རྗེས་འཛིན་པ་གདོལ་པའི་རིགས། །ཛྙ་ན་སཱུ་ཏྲས་འདི་ཉིད་འཛིན། །ཞེས་ཛྙ་ན་སཱུ་ཏྲ་དང༌། དེ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་ངག་གིས་འཛིན། །ཞེས་བཱི་མ་ལ་རྒྱ་ཆེན་དང་མུ་དྲ་ཕྱག་རྒྱ་སྟེ་འདི་ལྟར་ན་བཱི་མ་ལུ་མུ་དྲ་དག་པར་ཀློང་ཆེན་པ་འཆད་ཏོ། །དེ་ཡིས་རྗེས་ལ་རྒྱལ་པོའི་རིགས། །སྤྲུལ་པ་ཕྱག་བརྙན་བཅས་པས་འཛིན། །ཞེས་ཆོས་རྒྱལ་ཁྲི་སྲོང་ལྡེ་བཙན་དང༌། ཉང་ཏིང་འཛིན་བཟང་པོ། གཡུ་སྒྲ་སྙིང་པོ། པངས་མི་ཕམ་མགོན་པོ་སོགས་སུ་སྣང༌། དེ་ཡི་རྗེས་ལ་དགེ་སྦྱོང་གཟུགས། །ལྷུན་གྱི་རྒྱལ་མཚན་(ཐ༡༤བ)

[Full Size]

དག་གིས་འཛིན། །ཞེས་ལྡང་མ་ལྷུན་རྒྱལ། དེ་རྗེས་སིངྷ་ཤྲ་རས་འཛིན། །ཞེས་ལྕེ་བཙུན་སེང་གེ་དབང་ཕྱུག་འདི་མན་ནས་དགེ་སློང་དཔལ་ལྡན་རིག་འཛིན་ཀུ་མ་ར་ཛ་ཡིན་པར་དངོས་སུ་བསྟན་ནས་བློ་གྲོས་ཆེན་པོ་ཀློང་ཆེན་པ་ཉིད་དུ་བཞེད་པར་འདུག་ཀྱང་བར་དེ་དག་གོ་རིམ་མི་འབྱོར་བར་སྣང་ལ། ལྕེ་བཙུན་གྱི་འོག་དུ། དེ་རྗེས་ས་ལ་གནས་པ་ཡི། །བྱང་ཆུབ་སེམས་དཔའ་དག་གིས་འཛིན། །ཞེས་སྣང་བ་འདིས་སྙིང་ཐིག་འཛིན་པའི་དམ་པ་མང་པོ་ཞིག་ལྷན་ཅིག་དུ་ལུང་བསྟན་པ་སྙམ་སྟེ་མཁའ་འགྲོ་སྙིང་ཐིག་ལས། ས་ལ་གནས་པའི་བྱང་སེམས་ཀྱིས། །རྒྱ་མཚོའི་བར་དུ་དཔལ་བར་བྱེད། །ཅེས་རྗེ་རང་བྱུང་པ་ལུང་བསྟན་པ་དང་ཡང་མཐུན་པར་སྣང་བས་རྗེ་རང་བྱུང་བ་དང་ཞང་སྟོན་ལ་སོགས་མང་པོ་ལུང་བསྟན་པར་གོའོ། །དེ་འོག་ལག་ན་རྡོ་རྗེ་ཡི། །སྤྲུལ་པ་བཛྲཱ་ཕ་ལས་འཛིན། །དེ་འོག་རྒྱལ་པོ་སེང་གེ་སྟེ། །བཟང་པོ་དག་གིས་འཛིན་པའོ། །དེ་འོག་སྒྲ་མཁས་དཔལ་འཛིན་ནོ། །དེ་འོག་ཡོ་གི་པྲ་བས་འཛིན། །དེ་འོག་རྒྱལ་པོ་ཁྲི་འོད་ཏོ། །དེ་འོག་དགེ་སློང་དཔལ་དང་ལྡན། །དེ་ནས་བློ་གྲོས་མཆོག་གིས་འཛིན། །དེ་ནས་མཁའ་འགྲོ་དཔལ་འཛིན་མས། །བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་པའི་དུས་ལ་དར། །དེ་ནས་མི་གནས་རང་ས་ན། །ཞེས་པ་འདི་རྣམས་ལས་ཕལ་ཆེར་སླར་འོང་དགོས་པ་སྙམ་ལ། བབས་ལུགས་ཆེན་མོར་ལོ་བརྒྱ་བརྒྱ་ན་བཱི་མ་ལའི་སྐུའི་བཀོད་པ་རེ་འབྱུང་བར་ལུང་བསྟན་དང་སྦྱར་ན་ལྡང་མ་མན་ཆོད་བཱི་མ་ལ་ཉིད་འབྱོན་པ་སྙམ་ལ། འོན་ཡང་ལོ་བརྒྱ་མི་སྤྱིར་བརྩིས་ནས་སྦྱར་བ་ཞིག་ཡིན་པ་སྙམ་དུ་སྐྱེས་སྟེ་དེས་ན་ཆོས་རྒྱལ་ཁྲི་སྲོང་དང་ཉང་དུས་མཉམ་ཡིན་མོད་ཀྱང་ཉང་དང་ལྡང་མའི་བར་དུ་མི་རབས་གསུམ་བཞི་ཡོད་པས་སྤྱིར་བརྩིས་ན་ལོ་བརྒྱ་རེ་ལ་རེ་རེ་འགྲིག་པ་ཅིག་ཏུ་དགོངས་པར་གདོན་མི་ཟ་ལ་(ཐ༡༥ན)

[Full Size]

སྒྲ་མཁས་དཔལ་འཛིན་ནི་ཀློང་ཆེན་པ་ཉིད་དུ་གོའོ། །ཚེ་ལོ་བཅུ་པའི་འོག་དུ་འདིའི་གདུལ་སྐལ་རྫོགས་པས་བསྟན་པའི་བཙས་དང་བཅས་སྟེ་མཛེས་ལྡན་བཀོད་པའི་ཞིང་དང༌། ཡངས་པ་སྐྱོབ་པའི་ཞིང་དང༌། གཙུག་ཕུད་དབྱངས་ལྡན་གྱི་ཞིང་རྣམས་སུ་རིམ་པར་འཕར་ཞིང་དེ་རྣམས་ཀྱི་བསྟན་པ་བདུན་ཚན་རེ་རྫོགས་ནས་སྤྲུལ་སྐུའི་ཞིང་གངས་ཆེན་མཚོའི་ཐུགས་དཔལ་བེའི་ཐད་ཀྱི་འཇིག་རྟེན་སྟོངས་སྟེ་རྡོ་རྗེ་འཆང་ཆེན་པོའི་མཛད་པ་སྐོར་གཅིག་རྫོགས་ལ་སླར་དེའི་འཇིག་རྟེན་འོག་མ་ལ་བསྐལ་པ་ས་ཡ་དྲུག་འབུམ་དུ་འཕེལ་འགྲིབ་མེད་པར་གནས་པ་སོགས་ན་མཁའ་སྐྱེ་འགག་མེད་པ་ལ་སྤྲིན་སྐྱེ་འགག་དང་བཅས་པ་མི་འགལ་བའི་ཚུལ་གྱིས་ན་མཁའ་ཇི་སྲིད་པ་དེ་སྲིད་དུ་འཕྲིན་ལས་རྒྱུན་མི་ཆད་པའོ། །དེ་ཡང་སྤྱིར་ཚེ་ལོ་དཔག་མེད་ནས་ཚེ་ལོ་སྟོང་གི་བར་ནི་སྐུའི་བསྟན་པའི་དུས། དེ་ནས་བདུན་བཅུའི་བར་གསུང་གི་བསྟན་པ། དེ་ནས་བཅུ་པའི་བར་ཐུགས་ཀྱི་བསྟན་པའི་དུས་ནི་སྤྱིར་བཏང་ཡིན་ལ། བྱེ་བྲག་དུ་བསྟན་པ་དངོས་ཀྱི་ཚད་ནི་སྐུའི་བསྟན་པ་ལོ་ལྔ་བརྒྱ་ལྔ་སྟོང་ཕྲག་གསུམ། གསུང་དང་ཐུགས་ནི་ལྔ་བརྒྱ་ལྔ་སྟོང་ཕྲག་རེའོ། །དེ་ལ་སྐུའི་བསྟན་པའི་དུས་ན་རྡོ་རྗེ་ནི་ཨོ་ཌྱན་གྱི་ཡུལ་གྱི་ལན་ཚྭའི་རྒྱ་མཚོ་ལ་ཡོད་སྟེ་སྐབས་སུ་འོད་དང་སྒྲ་དང་དགེ་སློང་རྫུ་འཕྲུལ་ཅན་མང་པོའི་སྤྲུལ་པ་འབྱུང་ངོ༌། །ཡི་གེ་དང་སྐུ་ནི་རྡོ་རྗེ་གདན་གྱི་དཔག་ཚད་ལྔ་བརྒྱའི་ན་མཁའ་ལ་བཞུགས་སྟེ་མཁའ་འགྲོ་མས་འཛིན་ཞིང་མཆོད་ཏོ། །གསུང་གི་བསྟན་པའི་དུས་ན་རྡོ་རྗེ་ནི་རི་མ་ལ་ཡ་ལག་ན་རྡོ་རྗེའི་གནས་ན་གནོད་སྦྱིན་རྣམས་ཀྱིས་ཕྱག་བྱེད་ཏོ། །ཡི་གེ་ནི་རྡོ་རྗེ་གདན་གྱི་སྟེང་གི་ན་མཁར་གནས་སོ། །སྐུ་ནི་འཛམ་གླིང་ཐམས་ཅད་དུ་འཕར་ཞིང་འགྲོ་ལ་སྐབས་སུ་བསྟན་པ་ལ་གནོད་པ་བྱུང་ཚེ་ཞལ་ནས་ཧཱུྃ་སྒྲ་དང་སྤྱན་ལས་མེ་བྱུང་བས་ཟློག་གོ །ཐུགས་ཀྱི་བསྟན་(ཐ༡༥བ)

[Full Size]

པའི་དུས་ན་རྡོ་རྗེ་ནི་རྡོ་རྗེ་གདན་གྱི་ན་མཁར་གནས་ལ་ཡི་གེ་རབ་ཏུ་ཁྲོས་པས་དྲང་སྲོང་གི་ཕུག་ན་གནས། སྐུ་ནི་སུམ་བཅུ་རྩ་གསུམ་གྱི་གནས་ལག་ན་རྡོ་རྗེའི་ཁང་བརྩེགས་ཅེས་བྱ་བའི་ཡང་ཐོག་ན་གནས་སྟེ་དེ་ལྟར་རང་བྱུང་གི་རྟེན་འདི་གསུམ་གྱིས་འཛམ་གླིང་འདི་གཞན་ལས་ཁྱད་པར་དུ་འཕགས་སོ། །དེ་ལ་སྤྱིར་ཐུན་མོང་སྡེ་སྣོད་གསུང་བའི་ཆ་ནས་བསྐལ་བཟང་འདི་ལ་སྟོན་པ་སྟོང་ཡིན་མོད་ཀྱང་འབྲས་བུ་གསང་སྔགས་རྫོགས་པ་ཆེན་པོ་སྟོན་པའི་དབང་དུ་བྱས་ནས་སྟོན་པ་བཅུ་གཉིས་སྟེ། རིག་པ་རང་ཤར་ཆེན་པོའི་རྒྱུད་ལས། ཐོག་མ་མེད་པའི་དུས་ཀྱི་ཚེ། །དེ་ཡི་ནོར་བུ་རིན་ཆེན་སྟོར། །ནོར་བུ་སྟོར་བའི་རང་བཞིན་གྱིས། །སྣང་མུན་གཉིས་ཀྱི་མཚམས་ནས་འོངས། །རྐྱེན་བཞི་དམིགས་པ་མ་དག་པས། །དགའ་ལྡན་བརྩེགས་པའི་ཡུལ་དུ་འོངས། །རྟེན་ནི་པདྨ་དག་པ་ཡིན། །གསང་སྔགས་རྒྱུད་ཆེན་བསྟན་པ་བཙུགས། །ཉེ་བའི་འཁོར་ནི་མི་འཁྲུགས་པའོ། །རྒྱུད་ཀྱི་རྒྱལ་པོ་ཐལ་འགྱུར་བཤད། །ཅེས་སོགས་དང་ཨ་ཏི་བཀོད་པའི་རྒྱུད་བཱི་མ་ལས་གཡུ་ཡིག་ཅན་དུ་དྲངས་པ་ལྟར། དང་པོ་ཚེ་ལོ་དཔག་མེད་ཀྱི་དུས་ཡུལ་དགའ་ལྡན་བརྩེགས་པར་སྔོན་གྱི་སྨོན་ལམ་རྗེས་སུ་དྲན་པས་སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པ་ཅེས་བྱ་བ་པདྨ་གསེར་གྱི་མདོག་ཅན་སྟོང་གི་དབུས་མ་ལས་བརྫུས་སྟེ་འཁྲུངས་ཤིང་པདྨ་སྟོང་པར་ང་དང་འདྲ་བའི་སྤྲུལ་སྐུ་སྟོང་སྣང་བ་ནི་བསྐལ་བཟང་གི་སངས་རྒྱས་སྟོང་འབྱུང་བའི་ལྟས་དང་ན་མཁའ་འོད་ཀྱི་སྐར་མ་འབུམ་ཕྲག་དྲུག་བཅུ་རྩ་བཞི་སྣང་བ་རྫོགས་ཆེན་གྱི་རྒྱུད་དེ་ཙམ་འབྱུང་བའི་ལྟས་སུ་བྱུང་ལ་འོད་ཆེར་གསལ་བའི་སྐར་མ་བཅུ་བདུན་བྱུང་བ་ནི་རྒྱུད་ཀྱི་གཙོ་བོ་བཅུ་བདུན་གྱི་ལྟས་སོ། །དེ་ལྟར་འཁོར་ལྟ་བུར་སྣང་བའི་སངས་རྒྱས་སྟོང་དང་རྩ་གཉིས་ལ། སྒྲ་ཐལ་འགྱུར་གྱི་རྒྱུད་ལྷའི་བྱེའི་མཆུ་འགྱུར་གྱི་སྐད་ཀྱིས་བསྟན་སྟེ་ལྷའི་བུ་ཉི་མ་རབ་ཏུ་སྣང་བྱེད་དང་དགའ་(ཐ༡༦ན)

[Full Size]

བྱེད་དབང་ཕྱུག་ཞེས་བྱ་བ་སེམས་དཔའ་གཉིས་ཀྱིས་བསྡུས་སོ། །གཉིས་པ་ཚེ་ལོ་བྱེ་བ་གཅིག་གི་ཚེ་སྟོན་པ་ཁྱེའུ་འོད་མི་འཁྲུགས་པ་ཉིད་འོད་ལྔའི་སྒོ་ང་ལས་འཁྲུངས་སྟེ་འཁོར་མཁའ་འགྲོ་མ་འབུམ་ཕྲག་གཉིས་ལ་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྒྱུད་ལྔ་ཁྱབ་འཇུག་ཟུར་ཕུད་ལྔ་པའི་སྐད་ཀྱིས་བསྟན་སྟེ་ཆོས་འདིས་གྲོལ་བའི་བུད་མེད་དེ་ཙམ་ཞིག་འབྱུང་བའི་ལྟས་སོ། །གསུམ་པ་ཚེ་ལོ་འབུམ་གྱི་ཚེ་གནས་དྲོད་གཤེར་འདུས་པ་འོད་དཀྱིལ་སྤུངས་པར་སྟོན་པ་འཇིགས་པ་སྐྱོབ་པའི་ཡིད་ཀྱིས་བྱང་ཆུབ་སེམས་དཔའ་འབུམ་ཕྲག་དྲུག་ལ་རླུང་གི་སྒྲ་མ་ར་ཤ་ཤུ་ལས་དྲངས་ནས་འཁོར་བ་དོང་སྤྲུགས་ལ་སོགས་པའི་རྒྱུད་གསུངས་སྟེ་སྐྱེས་པ་དེ་སྙེད་ཅིག་འདིས་གྲོལ་བའི་ལྟས་སོ། །བཞི་པ་ཚེ་ལོ་བརྒྱད་ཁྲི་པའི་ཚེ་གནས་ཆགས་འབྱུང་མངལ་དུ་སྣང་བར་སྟོན་པ་གཞོན་ནུ་རོལ་པས་རྣམ་པར་རྩེ་བས་འཁོར་གནོད་སྦྱིན་སྟོང་ལ་སེམས་སྡེ་རྩ་བའི་རྒྱུད་ལྔ་དང་ཡན་ལག་གི་རྒྱུད་དྲུག་སྟེ་བཅུ་གཅིག་བསྟན། ལྔ་པ་ནི་ཚེ་ལོ་བདུན་ཁྲི་པའི་ཚེ་སུམ་བཅུ་རྩ་གསུམ་གྱི་གནས་འཚོ་བྱེད་གཞོན་ནུའི་ལྡུམ་རར་དྲུག་པ་རྡོ་རྗེ་འཆང་གིས་འཁོར་སངས་རྒྱས་རབས་བདུན་དུ་སྣང་བ་རང་བཀོད་ནས་འབད་བཅས་འབད་མེད་གཉིས་ཀ་དང་ལྡན་པ་སྟེ་ཕར་ཕྱིན་དྲུག་གསུམ་བཅོ་བརྒྱད་ཀྱི་ཆོས་གསུངས། དྲུག་པ་ཚེ་ལོ་དྲུག་ཁྲི་པའི་ཚེ་རི་རབ་བྱང་ཤར་གྱི་བང་རིམ་སྟེང་དུར་ཁྲོད་མེ་རི་འབར་བར་སྟོན་པ་གཞོན་ནུ་དཔའ་བོ་སྟོབས་ལྡན་ཞལ་གསུམ་ཕྱག་དྲུག་ན་རིགས་དྲུག་གི་གྲོང་ཁྱེར་འཛིན་པ་ཅིག་གིས་བྱང་སེམས་སྤྲིན་གྱི་ཤུགས་ཅན་སོགས་བདུན་དང་མཁའ་འགྲོ་དང་ལྷ་ཀླུ་དཔག་མེད་ལ་རིག་པ་རང་ཤར་ཆེན་པོའི་རྒྱུད་ལ་སོགས་པ་གསུངས། བདུན་པ་ནི་ཚེ་ལོ་ཁྲིའི་དུས་སྟོན་པ་དྲང་སྲོང་ཁྲོས་པའི་རྒྱལ་པོ་ཕྱག་གཉིས་མདབ་བཟང་གི་བུ་འཛིན་པས་སྲིན་པོའི་ཡུལ་དུ་ལུའི་སྒྲ་དང་ལྡན་པའི་ཕུག་དུ་སྲིན་པོ་བྱེ་བ་(ཐ༡༦བ)

[Full Size]

གཅིག་ལ་འདུལ་བའི་རྒྱུད་བཅུ་ལ་སོགས་པ་བསྟན། བརྒྱད་པ་ཚེ་ལོ་ལྔ་སྟོང་བའི་ཚེ་བྱ་རྒོད་ཕུང་པོའི་རིར་སྟོན་པ་དགྲ་བཅོམ་པ་གསེར་འོད་དམ་པས་ཉན་ཐོས་གྲངས་མེད་པ་ལ་འདུལ་བ་ཁྲི་ཕྲག་དཔག་མེད་གསུངས། དགུ་པ་ཚེ་ལོ་སྟོང་གི་དུས་སོག་པོ་གཡུའི་སྨིན་མ་ཅན་གྱི་ཡུལ་དུ་སྟོན་པ་བརྩེ་བས་རོལ་བའི་བློ་གྲོས་ཀྱིས་བྱང་ཆུབ་སེམས་དཔའ་དཔག་མེད་ལ་ཕྲ་རྒྱུད་བདུན་ལ་སོགས་པ་གསུངས། བཅུ་པ་ཚེ་ལོ་ལྔ་བརྒྱ་བའི་ཚེ་བྱ་རྒོད་ཕུང་རིར་སྟོན་པ་འོད་སྲུང་སྒྲེས་པོས་སྐར་མ་འོད་བཟང་སོགས་བདུན་ལ་ལུང་ཨ་ནུ་སོགས་ཁྲི་ཕྲག་བརྒྱད་བསྟན། བཅུ་གཅིག་པ་ནི་ཚེ་ལོ་སུམ་བརྒྱ་བའི་ཚེ་རྡོ་རྗེ་གདན་དུ་སྟོན་པ་མངོན་རྫོགས་རྒྱལ་པོས་རིགས་གསུམ་མགོན་པོ་ལ་ངེས་པའི་དོན་འབའ་ཞིག་གསུངས། བཅུ་གཉིས་པ་ནི་ཚེ་ལོ་བརྒྱ་པའི་དུས་ཝ་ར་ཎ་སི་ལ་སོགས་པར་སྟོན་པ་ཤཱཀྱའི་དབང་པོ་ཉིད་ཀྱིས་ཐེག་པའི་རིམ་པ་རྣམས་གསུངས་པ་སྟེ་སྟོན་པ་བཅུ་གཉིས་སོ། །ཅི་བསྐལ་བཟང་འདིར་སྔོན་བྱོན་པའི་སངས་རྒྱས་འཁོར་བ་འཇིགས་ལ་སོགས་པ་མི་འདྲེན་པར་མ་གྲགས་པ་དེ་དག་འདྲེན་པ་ཅི་ཞེ་ན། འདུས་པ་སོགས་ཀྱང་སངས་རྒྱས་ཤཱཀྱ་ཐུབ་པ་དང་མཐའ་མ་མོས་པ་མ་གཏོགས་པ་བསྐལ་བཟང་གི་སངས་རྒྱས་གཞན་ལ་ཐུན་མོང་གི་གདུལ་བྱ་སྔགས་ཀྱི་ཐེག་པ་མི་འབྱུང་བར་བཤད་པ་ཉིད་དང་ཁྱད་མེད་པར་རྫོགས་པ་ཆེན་པོ་ཉིད་གདུལ་བྱ་ལ་ཇི་ལྟར་སྣང་བ་བརྗོད་པ་ཡིན་ལ་འཇམ་དཔལ་རྩ་བའི་རྒྱུད་སྔོན་ཚེ་ལོ་དཔག་དུ་མེད་པའི་དུས་གཙང་མའི་གནས་སུ་གསུངས་པར་བཤད་པ་བཞིན་ནོ། །དེ་ལྟར་སྐུ་གསུམ་པོ་རེ་རེ་ལ་ཡང་སྐུ་གསུང་ཐུགས་ཀྱི་མཛད་པ་གསུམ་རེ་དང་དེ་རེ་རེ་ལ་ཕྱི་ནང་གསང་བ་ཡང་གསང་གི་མཛད་པ་བཞི་རེ་ཡོད་པས་སྐུ་གསུམ་པོ་རེ་རེ་ལ་སོ་སོའི་མཛད་པ་སོ་དྲུག་རེར་རྣམ་པར་འཇོག་ལ། སྟོན་པ་བཅུ་གཉིས་ལ་ཕུན་(ཐ༡༧ན)

[Full Size]

ཚོགས་ལྔ་རེ་སྦྱར་བས་ཆོས་ཀྱི་རྣམ་གྲངས་དྲུག་བཅུ་ཞེས་བྱ་ལ་སྤྱིར་ཆོས་ཀྱི་རྣམ་གྲངས་དགུ་བཅུ་རྩ་དྲུག་དང་ལྡན་ན་བསྟན་པའི་གཙོ་བོ་ཞེས་བྱ་ཞིང་མི་ལྡན་ན་ཁོལ་བུའི་སྟོན་པ་ཅེས་བྱ་ལ། དེ་ཡང་གནས་མི་འདྲ་བ་བཅུ་གཉིས་སུ་སྟོན་པ་སྐུ་མདོག་དང་ཕྱག་མཚན་མི་འདྲ་བ་བཅུ་གཉིས་སུ་བྱོན་སྟེ་གདུལ་བྱ་རིས་མི་འདྲ་བ་བཅུ་གཉིས་ཀྱི་ངོར་མཛད་པ་མི་འདྲ་བ་བཅུ་གཉིས་སྣང་བ་སྐུའི་བསྟན་པ་དང༌། དེས་ཆོས་མི་འདྲ་བ་བཅུ་གཉིས་བསྟན་པས་གདུལ་བྱའི་ངག་གི་འཆིང་བ་བཅུ་གཉིས་འགྲོལ་བ་གསུང་གི་བསྟན་པ་དང༌། ཐུགས་ཀྱི་དགོངས་པ་མི་འདྲ་བ་བཅུ་གཉིས་ཀྱིས་གདུལ་བྱའི་རྟོག་པ་མི་འདྲ་བ་བཅུ་གཉིས་འགྲོལ་བ་ཐུགས་ཀྱི་བསྟན་པ་སྟེ་དེ་ལྟར་བཅུ་གཉིས་ཚན་བརྒྱད་ཀྱིས་ཆོས་ཀྱི་རྣམ་གྲངས་དགུ་བཅུ་རྩ་དྲུག་གོ །དེ་ལྟར་སྐུ་གསུམ་དང་སྟོན་པ་བཅུ་གཉིས་ལ་སོགས་དང་སླད་ནས་འབྱོན་པའི་སངས་རྒྱས་བྱམས་པ་ལ་སོགས་པ་རྣམས་ཀྱང་རྣམ་པ་ཐ་དད་པར་བསྟན་ཡང་རང་བཞིན་ཐ་མི་དད་པའི་ཕྱིར་རྒྱལ་བ་དགོངས་པའི་བརྒྱུད་པ་ཅེས་བྱའོ། །སྟོན་པ་མྱ་ངན་ལས་འདས་ནས་ལོ་སུམ་བརྒྱ་དང་དྲུག་བཅུ་ན་ཨོ་ཌྱན་གྱི་ཡུལ་དྷ་ན་ཀོ་ཤའི་གླིང་བཀྲ་ཤིས་བདེ་བརྩེགས་ཀྱི་གཙུག་ལག་ཁང་ཞེས་བྱ་བ་གཙུག་ལག་ཁང་སྟོང་དང་དྲུག་བརྒྱའི་འཁོར་དང་ལྡན་པ་ཡོད་པ་ན་རྒྱལ་པོ་ཨུ་པ་རཱ་ཛཱ་དང་བཙུན་མོ་འོད་ལྡན་མའི་སྲས་མོ་མིའི་ལུས་ལས་འདས་པའི་དགེ་སློང་མ་གཞོན་ནུ་མ་ཞིག་རྒྱ་མཚོའི་གླིང་ན་བསམ་གཏན་བྱེད་པ་ན་མི་དཀར་པོ་འོད་དང་ལྡན་པ་ཅིག་གིས་ཤེལ་གྱི་བུམ་པ་ཡིག་ལྔས་སྤྲས་པ་ཅིག་ཨོཾ་ཨཱཿཧཱུྃ་སྭཱ་ཧཱ་ཞེས་སྤྱི་བོར་བཞག་སྟེ་དབང་སྐུར་བས་ལུས་བདེ་བས་གང་འོད་ཀྱིས་ཁམས་གསུམ་དུས་གཅིག་ལ་གསལ་བར་རྨིས་སྟེ་སད་ནས་བཤད་པ་ན་གཡོག་མོ་མཁའ་འགྲོ་མ་བུརྞེ་མི་ལུས་བཟུང་བ་དེ་ན་དེ་ཉིད་ལ་སངས་རྒྱས་ཀྱི་སྤྲུལ་པ་ཅིག་འཁྲུང་བའི་རྟགས་ལགས་སོ་(ཐ༡༧བ)

[Full Size]

ཟེར་སྟེ་རྡོ་རྗེ་སེམས་དཔའི་སྐུའི་བཀོད་པ་ལྷའི་བུ་ཀུན་དགའ་སྙིང་པོ་ཉིད་ལྷུམས་སུ་ཞུགས་སྟེ་ཅི་ཞིག་ན་ཁྱེའུ་འོད་དང་ལྡན་པ་ཅིག་རྩིབ་མའི་གོ་བར་ནས་བཙས་པས་སྐྲག་སྟེ་ཐལ་ཁུང་དུ་བོར་བས་འོད་དང་སྒྲ་དང་མེ་ཏོག་གི་ཆར་བྱུང་བས་ཕྱུང་བ་ན་མ་ཉམས་པར་འདུག་པས་ཁྲུས་གསོལ་བས་ལྷ་དང་མཁའ་འགྲོས་མཆོད་ཅིང་བསྟོད་ནས་དགའ་རབ་རྡོ་རྗེ་ཞེས་གྲགས་ཤིང་མྱུར་བར་སྐུ་རྫོགས་སྟེ་ལོ་བདུན་པ་ལ་པཎྜིཏ་ལྔ་བརྒྱ་དང་རྩོད་པ་བྱས་པས་སུས་ཀྱང་མ་ཐུབ་སྟེ་སྤྲུལ་པར་རིག་ནས་ཞབས་སྤྱི་བོར་བླངས། དེ་ནས་བྱང་ཕྱོགས་ཉི་མ་རབ་ཏུ་སྣང་བྱེད་ཀྱི་རི་བྲག་ཡི་དྭགས་དྲག་པོ་གནས་པར་འཇག་སྤྱིལ་དུ་ལོ་གསུམ་བཅུ་རྩ་གཉིས་ཏིང་འཛིན་མཛད་པས་ས་གཡོས་ཤིང་མུ་སྟེགས་ཀྱི་བསྟན་པ་ཉམས་པར་བྱས་ཅེས་པའི་སྒྲ་བྱུང༌། ཕྱུགས་རྫི་རྣམས་ཀྱིས་ཏིང་ངེ་འཛིན་ལས་སློང་མ་ནུས་པ་མུ་སྟེགས་ཀྱི་རྒྱལ་པོས་ཐོས་སྟེ་གཤེད་མ་བཏང་བས་སྐུ་ཉི་ཞུར་ལྟར་སྣང་བས་གནོད་མ་ནུས་སྟེ་སླར་ན་མཁའ་ལ་སྤྲིན་གྱི་གསེབ་ཏུ་གཤེགས་པས་དད་པར་གྱུར་སྟེ་སངས་རྒྱས་ཀྱི་བསྟན་པ་ལ་བཀོད། སྔོན་གི་སྟོན་པ་རྣམས་ཀྱིས་གསུངས་པའི་སྡེ་སྣོད་དང་རྫོགས་པ་ཆེན་པོ་འབུམ་ཕྲག་དྲུག་བཅུ་རྩ་བཞི་ཐུགས་ལ་མངའ་བ་དེ་རྡོ་རྗེ་སེམས་དཔས་མངོན་སུམ་དུ་གནང་བ་བྱིན་ནས་མ་ལ་ཡའི་རྩེར་རྡོ་རྗེ་དབྱིངས་ཀྱི་མཁའ་འགྲོ་མ་དང་ཡོན་ཏན་མཐའ་ཡས་པའི་མཁའ་འགྲོ་མ་དང་གསུམ་གྱིས་གླེགས་བམ་དུ་བཀོད། མཁའ་འགྲོ་མ་སེམས་ལྡན་མ་མཆོད་པ་པོར་རྗེས་སུ་གནང་སྟེ་མཁའ་འགྲོ་མངོན་བྱུང་གི་ཕུག་དུ་བཞུགས་སོ། །དེ་ནས་སློབ་དཔོན་ཉིད་རྡོ་རྗེ་གདན་གྱི་བྱང་ཤར་དཔག་ཚད་ལྔ་ན་དུར་ཁྲོད་གསིལ་བའི་ཚལ་ཡོད་པར་ཁྱབ་འཇུག་གི་བུ་མོ་གཅེར་བུ་ལ་ཆིབས་སྟེ་བྱོན་ནས་དབུས་ཀྱི་མཆོད་རྟེན་གྱི་རྩར་མཁའ་འགྲོ་མ་རྣམས་ལ་ཆོས་སྟོན་ཏོ། །དེའི་ཚེ་རྡོ་རྗེ་གདན་གྱི་ནུབ་ཕྱོགས་རིམ་པ་གཉིས་པའི་གྲོང་ན་བྲམ་ཟེའི་རིགས་འཇམ་དཔལ་བཤེས་གཉེན་ཞེས་བྱ་བ་རིག་པའི་གནས་(ཐ༡༨ན)

[Full Size]

ལྔ་མཐར་ཕྱིན་པ་ཅིག་ལ་འཇམ་དཔལ་རྣོན་པོས་ལུང་བསྟན་སྟེ་གསིལ་བའི་ཚལ་དུ་བྱོན་ནས་ལོ་དོན་ལྔར་ཆོས་མཉན་སྟེ་སངས་རྒྱས་མྱ་ངན་ལས་འདས་ནས་ལོ་ལྔ་བརྒྱ་དང་བཞི་བཅུ་ལོན་པའི་ཚེ་ཆུ་བོ་དན་ཏིག་གི་མགོར་དགའ་རབ་རྡོ་རྗེ་འོད་ཕུང་དུ་ཡལ་སྟེ་འོད་ཀྱི་དཀྱིལ་ནས་འདས་རྗེས་ཀྱི་གླེགས་བམ་བབས་པ་གཟིགས་པ་ཙམ་གྱིས་འཇམ་དཔལ་བཤེས་གཉེན་ཉིད་དགའ་རབ་རྡོ་རྗེ་དང་རྟོགས་པ་མཉམ་པར་གྱུར་སྟེ་རྫོགས་པ་ཆེན་པོ་འབུམ་ཕྲག་རྩ་བཞི་བསྡུས་ནས་གནས་པ་སེམས་ཀྱི་སྡེ། བྱ་བྲལ་ཀློང་གི་སྡེ། གནད་མན་ངག་གི་སྡེ་དང་གསུམ་དུ་ཕྱེ། གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་རྣར་རྒྱུད་གཉིས་སུ་ཕྱེ་ནས་རྣར་རྒྱུད་མཆན་དུ་བཏབ། བཤད་རྒྱུད་སྙིང་གི་ཐིག་ལེ་དཔེལ་བའི་གནས་མ་རྙེད་ནས་རྡོ་རྗེ་གདན་དུ་སྦས། སློབ་དཔོན་ཉིད་རྡོ་རྗེ་གདན་གྱི་ནུབ་ཕྱོགས་དུར་ཁྲོད་སོ་ས་གླིང་དུ་ལོ་བརྒྱ་དང་རྩ་དགུར་བཞུགས་སོ། དེའི་ཚེ་རྒྱ་ནག་གི་ཡུལ་དུ་ཁྱིམ་བདག་གི་བུ་ཤྲཱི་སིངྷ་ཞེས་བྱ་བ་རིག་གནས་ལ་མཁས་པ་ཅིག་ལ་སྤྱན་རས་གཟིགས་ཀྱིས་འཇམ་དཔལ་བཤེས་གཉེན་གྱི་དྲུང་དུ་སོང་ཞིག་པར་ལུང་བསྟན། དེས་ཀྱང་མྱུར་དུ་རྟོགས་པར་བྱ་བའི་ཕྱིར་གསང་སྔགས་མཐའ་དག་སྦྱངས་ཤིང་རབ་ཏུ་བྱུང༌། སླར་ཡང་ཐུགས་རྗེ་ཆེན་པོས་བསྐུལ་སྟེ་ཚེའི་རིག་འཛིན་དང་རྫུ་འཕྲུལ་བསྒྲུབས་ནས་འཇམ་དཔལ་བཤེས་གཉེན་དང་མཇལ་སྟེ་ལོ་ཉེར་ལྔར་བསྟེན། སངས་རྒྱས་མྱ་ངན་ལས་འདས་ནས་ལོ་བརྒྱད་བརྒྱ་སུམ་བཅུ་འདས་པའི་ཚེ་སློབ་དཔོན་འོད་ཕུང་དུ་ཡལ་སྟེ་འདས་རྗེས་ཤྲཱི་སིངྷའི་ཕྱག་དུ་བབས་པས་རྟོགས་པ་མཉམ་པར་གྱུར། དེ་ནས་ལོ་བརྒྱ་དང་ཉེར་ལྔ་ན་འཇམ་དཔལ་བཤེས་གཉེན་ཉིད་ནུབ་ཕྱོགས་སུ་པདྨ་ལས་བརྫུས་སྟེ་སྐྱེས་ནས་འཇམ་དཔལ་བཤེས་གཉེན་ཕྱི་མར་གྲགས་སྟེ་འདིས་སློབ་དཔོན་པདྨ་འབྱུང་གནས་ལ་གསང་སྔགས་མཐའ་དག་བསྟན་ཞིང༌། ཨཱརྻ་དེ་ཝ་ལ་གདམས་པ་སྙིང་ཐིག་(ཐ༡༨བ)

[Full Size]

བསྟན་པས་འོད་དུ་ཡལ་ལོ། །འདིས་སངས་རྒྱས་ཡེ་ཤེས་ཞབས་རྗེས་སུ་བཟུང་སྟེ་འཇམ་དཔལ་ཞལ་ལུང་ནི་རྫོགས་པ་ཆེན་པོ་དང་ཐ་མི་དད་པར་འགོས་གཞོན་ནུ་དཔལ་འཆད་ཏོ། །འཇམ་དཔལ་བཤེས་གཉེན་འདས་པའི་འོག་དུ་ཤྲཱི་སིངྷས་མན་ངག་གི་དཔེ་ཕྱུང་ནས་ཐིག་ལེའི་སྐོར་ལ་ཕྱི་སྐོར་ནང་སྐོར་གསང་སྐོར་གསང་བ་བླ་ན་མེད་པའི་སྐོར་སྟེ་བཞིར་ཕྱེ་ནས་སྔ་མ་གསུམ་གཏེར་དུ་སྦས། གསང་བ་བླ་ན་མེད་པ་ནི་ཉིད་ཀྱི་ཐུགས་ལ་གབ་པ་ལས་སླར་མཁའ་འགྲོས་ལུང་བསྟན་སྟེ་དེ་ཉིད་དུ་སྦས། ཉིད་གསིལ་སྦྱིན་གྱི་དུར་ཁྲོད་ཏུ་བཞུགས་སོ། །དེའི་ཚེ་རྒྱ་གར་ནུབ་ཕྱོགས་སུ་ཁྱིམ་བདག་གི་བུ་ལས་རབ་ཏུ་བྱུང་བ་བི་མ་ལ་མི་ཏྲ་དང་ཤར་ཕྱོགས་སུ་གདོལ་པའི་རིགས་ལས་རབ་ཏུ་བྱུང་བ་ཛྙཱ་ན་སཱུ་ཏྲ་ཅེས་བྱ་བ་མཁས་པ་མཐར་ཕྱིན་པ་གཉིས་རྡོ་རྗེའི་གདན་ན་པཎ་ཆེན་ལྔ་བརྒྱའི་གཙོ་བོར་བཀུར་ཞིང་སྔོན་དཔུན་དུ་གྱུར་པས་གཉི་ག་ཐུགས་ཤིན་དུ་གཅུགས་པར་གནས་པ་ལས་སྐྱོ་སེང་ལ་བྱོན་པའི་སར་ན་མཁའ་ལ་རྡོ་རྗེ་སེམས་དཔའ་བྱོན་སྟེ་ཁྱེད་གཉིས་སྐྱེ་བ་ལྔ་བརྒྱར་པཎྜི་ཏར་གྱུར་ནས་ཆོས་སྤྱད་ཀྱང་ཅི་ཡང་མ་ཐོབ་ཀྱིས་ཚེ་འདིར་འཚང་རྒྱ་བར་འདོད་ན་རྒྱ་ནག་བྱང་ཆུབ་ཤིང་དྲུང་གི་ལྷ་ཁང་དུ་སོང་ཞིག་པར་བསྐུལ་བ་ན་བཱི་མ་ལ་བརྩོན་འགྲུས་ཆེ་བས་དེ་མ་ཐག་བྱོན་སྟེ་རྣ་རྒྱུད་དང་ཕྱི་ནང་གསང་གསུམ་གྱི་མན་ངག་གཉན་ནས་ཚིམ་སྟེ་རྒྱ་གར་དུ་ལོག །ཛྙཱ་ན་སཱུ་ཏྲ་དང་མཇལ་བས་ལུང་བསྟན་དྲན་སྟེ་སངས་རྒྱས་ཀྱི་སྤྲུལ་པ་དེ་ད་ལྟ་བཞུགས་སམ་དྲིས་ནས་དེ་མ་ཐག་བྱོན་སྟེ་བྱིན་རླབས་ཀྱིས་ཉིན་གཅིག་ལ་ཟླ་བ་དགུའི་ལམ་བགྲོད་དེ་སླེབ་པ་ན་བུད་མེད་མཛེས་མ་ཆུའི་བུམ་པ་ཁུར་བ་ཞིག་གིས་བཀྲ་ཤིས་ཁྲི་སྒོར་སོང་ཞིག་པར་ལུང་བསྟན། དེར་ཕྱིན་པ་ན་མཁའ་འགྲོ་མ་སྤྱོད་མས་དུར་ཁྲོད་གསིལ་སྦྱིན་དུ་སོང་ཞིག་པར་ལུང་བསྟན་སྟེ་ཕྱིན་པ་ན་ཤྲཱི་སིངྷ་ཐོད་པའི་ཁང་བརྩེགས་ཀྱི་ནང་ནས་ཁྱབ་འཇུག་གི་སྟན་ལས་བཞེངས་སྟེ་ཕྱག་སོར་མོ་གསུམ་གྱེན་ལ་ཕྱར་བས་ལོ་གསུམ་ན་(ཐ༡༩ན)

[Full Size]

གནང་བར་གོ་སྟེ་དེའི་བར་བླ་མའི་ཁོལ་པོ་མཐའ་དག་བྱས། དེ་ནས་ལོ་དགུར་རྣ་རྒྱུད་དང་ཕྱི་ནང་གསང་གསུམ་གནང་སྟེ་འདི་ལ་དཔེ་ཞིག་ཡོང་ཐང་སྙམ་པ་ན་དཔེ་རྣམས་ཕྱུང་སྟེ་གནང༌། ཐུགས་ཚིམ་ནས་འགྲོ་བར་ཆས་པ་ན་ཚིམ་མམ་གསུངས། ཚིམ་ལགས་ཞུས་པས་གཏད་པ་མེད་གསུང་བས་སླར་གདམས་པ་ཁྱད་པར་བ་ཡོད་པར་ཤེས་ནས་གསོལ་བ་བཏབ་པས་སྤྲོས་བཅད་ཀྱི་དབང་རྫོགས་པར་བསྐུར་ནས་གསང་བ་བླ་མེད་ཀྱི་གདམས་ངག་ལོ་གསུམ་དུ་གནང༌། འདི་རྣམས་ཀྱི་གླེགས་བམ་ནི་དུས་ལ་བབ་པའི་ཚེ་ཁྱོད་ཉིད་ལ་སྣང་བར་འགྱུར་རོ་ཞེས་ལུང་བསྟན། གདམས་ངག་ཐོབ་པས་ད་ནི་ཉམས་སུ་བླང་བཞིན་པས་བླ་མའི་ཞབས་ཏོག་བྱའོ་སྙམ་པ་ན་སླར་སྤྲོས་མེད་ཀྱི་དབང་རྫོགས་པར་བསྐུར་སྟེ་ལོ་གཅིག་དུ་འཁོར་འདས་རུ་ཤན་འབྱེད་པའི་སྤྱོད་པ་ཚར་ཕྱིན་ཤིན་དུ་སྤྲོས་མེད་ཀྱི་དབང་བསྐུར་བས་ངེས་ཤེས་ཁྱད་པར་ཅན་སྐྱེས། རབ་ཏུ་སྤྲོས་མེད་ཀྱི་དབང་རྫོགས་པ་ན་བརྟན་པ་ཐོབ་སྟེ་ལོ་བཅུ་དྲུག་དུ་བླ་མའི་མཛད་སྤྱོད་ལྟ་ཞིང་ཉམས་སུ་བླངས། དེའི་དུས་ཤྲཱི་སིངྷ་ཉིད་བརྟུལ་ཞུགས་སུ་རླུང་འཛིན་གྱི་སྤྱོད་པ་དང་ཁྲོ་བོ་དང་ཧེ་རུ་ཀའི་ཆ་བྱད་ཀྱིས་དུར་ཁྲོད་ཉུལ་བ་དང་འབྱུང་བཞིའི་རྟེན་འབྲེལ་སོགས་མ་ངེས་པའི་སྤྱོད་པ་མཛད་ཏོ། །དེའི་ཚེ་རྒྱལ་པོ་དཔལ་བྱིན་གྱིས་སྤྱན་དྲངས་ནས་སེང་གེ་དཀར་པོ་ཡན་ལག་དྲུག་ལྡན་ལ་བཅིབས་སྟེ་གཤེགས། ཞག་བདུན་ན་ས་གཡོ་བ་དང་སྒྲ་དང་འོད་བྱུང་སྟེ་མྱ་ངན་ལས་འདས་པར་ཤེས་ནས་གསོལ་བ་བཏབ་པས་ཞལ་ཆེམས་གཟེར་བུ་བདུན་པ་ཛྙཱ་ན་སཱུ་ཏྲའི་ཕྱག་དུ་བབས་སྟེ་གསང་བའི་མན་ངག་རྣམས་བཀྲ་ཤིས་ཁྲི་སྒོའི་ཀ་བའི་ཁོང་ནས་ལོང་ལ་དུར་ཁྲོད་བ་སིང་གི་ནགས་ལ་སོང་ཞིག་པར་ལུང་བསྟན་ཐོབ་སྟེ་འདིའི་ཚེ་འདས་ལོ་དགུ་བརྒྱ་དང་བརྒྱད་བཅུ་བཞི་ལོན་ནོ། །དེ་ནས་གླེགས་བམ་རྣམས་ཕྱུང་སྟེ་རྡོ་རྗེ་གདན་གྱི་ཤར་ཕྱོགས་ཐག་རིང་པོ་ན་དུར་ཁྲོད་བ་སིང་ཡོད་པར་བྱོན་ནས་མཁའ་འགྲོ་མ་རྣམས་ལ་ཆོས་སྟོན་(ཐ༡༩བ)

[Full Size]

ཏོ། །དེའི་ཚེ་བཱི་མ་ལ་དུར་ཁྲོད་གཞན་ཞིག་དུ་སྤྱོད་པ་ལ་བྱོན་པ་ན་མཁའ་འགྲོ་མ་དཔལ་གྱི་བློ་གྲོས་ཀྱིས་སྔ་མ་ལས་ཆེས་ཟབ་པ་གསང་བ་སྙིང་ཐིག་གི་མན་ངག་ཡོད་ཀྱིས་བ་སིང་དུ་སོང་ཞིག་པར་བསྐུལ་ནས་སྐད་ཅིག་གིས་བྱོན་པ་ན་ཛྙཱ་ན་སཱུ་ཏྲ་བཞུགས་ཤིང་གདའ་ནས་ཐེ་ཚོམ་མེད་པར་རྗེས་སུ་འཛིན་པར་ཞུས་པས་མཛོད་པུ་ནས་འོད་ཟེར་མཐའ་ཡས་པ་བཀྱེ་སྤྱན་གྱེན་དུ་ལྡོག་པས་ལོངས་སྐུའི་ཞིང་ཁམས་དཔག་མེད་བསྟན་སྟེ་ཡིད་འཆེས་སྐྱེད་ནས་སྤྲོས་བཅས་ཀྱི་དབང་བསྐུར་བས་བཱི་མ་ལའི་མཛོད་པུའི་སྒོ་བྱེ། སྤྲོས་མེད་ཀྱི་དབང་བསྐུར་བས་བ་སྤུའི་སྒོ་ནས་འོད་བྱུང༌། ཟླ་བ་དྲུག་གིས་འཁོར་འདས་ཀྱི་རུ་ཤན་ཕྱེ་སྟེ་ཤིན་དུ་སྤྲོས་མེད་ཀྱི་དབང་བསྐུར་བས་ཉམས་མྱོང་ཁྱད་པར་ཅན་སྐྱེས་སྟེ་ཤངས་ཀྱི་རྩེར་ཨ་དཀར་པོ་འཁྲིག་ལ་ཁད་པ་བྱུང༌། རབ་ཏུ་སྤྲོས་མེད་ཀྱི་དབང་བསྐུར་བས་སེམས་ཉིད་ཟང་ཐལ་དུ་སོང༌། གདམས་པ་ཐམས་ཅད་ཡོངས་སུ་རྫོགས་སྟེ་འདིའི་ཚེ་སློབ་དཔོན་གཉི་གས་ལོ་བརྒྱ་དང་གསུམ་རེ་ལོན། དེ་ནས་ལོ་བཅུ་ན་ཛྙཱ་ན་སཱུ་ཏྲ་ཟག་བཅས་ཀྱི་ལུས་མི་སྣང་བར་ཡལ་སྟེ་བཱི་མ་ལའི་ཕྱག་དུ་འདས་རྗེས་བབས་པས་རྟོགས་པ་མཉམ་པར་གྱུར་སྟེ་འདིའི་ཚེ་འདས་ལོ་དགུ་བརྒྱ་གོ་བཞིའོ། །བཱི་མ་ལ་ཉིད་ནི་ཀ་མ་རུའི་རྒྱལ་པོ་དང་ནུབ་ཕྱོགས་ཀྱི་རྒྱལ་པོ་དྷརྨ་པ་ལའི་མཆོད་གནས་ལོ་ཉི་ཤུ་རེ་མཛད་ནས་དུར་ཁྲོད་རབ་ཏུ་སྣང་བྱེད་ཏུ་མཁའ་འགྲོ་དབང་དུ་སྡུད་པའི་སྤྱོད་པ་སྣ་ཚོགས་མཛད་ཅིང་གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ནས་ཨོ་ཌྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དང་ཁ་ཆེའི་མཐའ་འཁོབ་རིགས་ངན་གྱི་གྲོང་གསེར་གླིང་གི་བྲག་སྐྱིབས་དང་དུར་ཁྲོད་དེ་ཉིད་རྣམས་སུ་རེ་རེ་སྦས་སོ། །སྤྱིར་འཛམ་གླིང་ན་མཁའ་འགྲོ་ངེས་པར་འདུ་བའི་དུར་ཁྲོད་བརྒྱ་དང་བཅུ་གསུམ་ལས་སྤྱོད་པའི་གནས་དྲུག་ཉམས་སྦྱོང་བའི་གནས་བཅུ་བཞི་དམ་ཚིག་སྐོང་བའི་གནས་བརྒྱད་འདོད་ཅིང་འདུན་པའི་གནས་བཞི་སྟེ་སོ་གཉིས་རྒྱ་གར་ན་ཡོད་ལ་ཨོ་ཌྱན་ན་བརྒྱད། (ཐ༢༠ན)

[Full Size]

ཁ་ཆེ་ན་བཅུ་ལི་དང་ཧོར་ན་ལྔ་མི་ཉག་དང་ཟ་ཧོར་ན་བཅུ་རྒྱ་ཡུལ་ན་སོ་གཅིག་བོད་ན་གཉིས་ལྷག་མ་ཡུལ་གྲུ་གཞན་ན་ཁ་འཐོར་དུ་ཡོད་ལ་དེ་རྣམས་ཀྱི་ནང་ནས་དུར་ཁྲོད་ཆེན་པོ་བརྒྱད་ནི་རང་བཞིན་གྱི་མཁའ་འགྲོའི་གཙོ་མོ་གནས་པས་མཆོག་ཡིན་ལ་དེ་དག་ན་མཆོད་རྟེན་རེ་ཆུ་རེ་ལྷ་འདྲེ་དྲག་པོ་རེ་མ་མོ་རེ་གྲུབ་པའི་སློབ་དཔོན་རེ་དངོས་གྲུབ་རེ་ཡོད་ཅིང་ལྷ་དང་མ་མོ་དེ་དག་ལ་སྒྲུབ་ཐབས་ཟབ་མོ་རེ་ཡང་ཡོད་ལ་དུར་ཁྲོད་དངོས་དེ་རྣམས་སུ་སུས་ཀྱང་མ་བསྐྱལ་བར་གླིང་བཞི་གའི་སེམས་ཅན་གྱི་རོ་རང་བཞིན་གྱིས་འདུ་ཞིང་མཆོག་གི་དངོས་གྲུབ་འཐོབ་ལ་དུར་ཁྲོད་དངོས་དེ་དག་ནི་རྙེད་པར་ཤིན་དུ་དཀའ་ལ་རོ་མིས་སྐྱེལ་བའི་དུར་ཁྲོད་རྣམས་ནི་མི་མ་ཡིན་གདུག་པ་དང་ཤ་ཟ་མཁའ་འགྲོའི་གནས་སྟེ་བར་ཆད་ཀྱང་མང་ཐུན་མོང་གི་དངོས་གྲུབ་ཀྱི་གནས་ཙམ་དུ་ཟད་ཅིང་དུར་ཁྲོད་གཙོ་བོ་བརྒྱད་པོ་དང་མིང་གཅིག་པ་ཙམ་ནི་ཤིན་དུ་མང་ལ་བོད་ཀྱི་གཉིས་ནི་གཞོའི་ཏི་སྒྲོ་མཁའ་འགྲོ་རེས་འགའ་འདུ་བའི་གནས་དང་ཙཱ་རི་ནི་མཆོག་གི་དངོས་གྲུབ་འཐོབ་པའི་གནས་ཡིན་པར་ལམ་ཡིག་ཅུང་ཟད་དང་བཅས་བཤད་ཅིང་འདིའི་ཡང་གནས་ཀྱི་སྙིང་པོ་ནི་མཁའ་འགྲོ་མ་ཁྲུས་བྱེད་ཀྱི་མཚོ་འོ་མ་ལྟ་བུ་ལ་སྔོ་དམར་གྱི་རི་མོ་ཡོད་པའི་དབུས་ན་ཤེལ་གྱི་མཆོད་རྟེན་སྒོ་བདུན་བཅུ་རྩ་བདུན་པ་ལྷ་ཚོགས་ཐམས་ཅད་ཀྱི་ཕོ་བྲང་དུ་བཞུགས་པར་བཤད་ལ། འཛམ་གླིང་གི་གྲུབ་པའི་གནས་དེ་ཐམས་ཅད་དུ་བཱི་མ་ལས་སྤྱོད་པ་མཛད་ལ་ཙཱ་རི་ན་ཡང་མུ་སྟེགས་ཀྱི་རྣལ་འབྱོར་པ་བཏུལ་བའི་བཱི་མ་ལའི་ཞབས་རྗེས་ཡོད་ཏོ། །འདི་ཡན་ནི་མཆོག་གི་དངོས་གྲུབ་ཐོབ་པའི་རིག་འཛིན་བརྡ་དང་བྱིན་རླབས་ཀྱིས་གྲོལ་བའི་ཕྱིར་རིག་འཛིན་བརྡའི་བརྒྱུད་པ་ཅེས་བྱའོ། །འདི་ཕྱིན་ནི་གང་ཟག་སྙན་ཁུང་དུ་བརྒྱུད་པ་ཅེས་བྱ་སྟེ་སྤྲུལ་པའི་གང་ཟག་ཆོས་རྒྱལ་རྗེ་བློན་ལྟ་བུ་དང་ལམ་ལ་དབང་བའི་གང་ཟག་ས་ལམ་ཐོབ་པ་དང་མོས་པས་སྤྱོད་པའི་སྐལ་ལྡན་གྱི་སྒྲུབ་པོ་རྣམས་རྣ་བའི་དབང་པོར་(ཐ༢༠བ)

[Full Size]

མིང་ཚིག་གི་རྣམ་པའི་གདམས་པ་བཏབ་པས་རྒྱུད་གྲོལ་སྟེ་བླ་མའི་རྟོགས་པ་སློབ་མའི་རྒྱུད་ལ་འཕོ་བས་གདམས་པའི་བྱིན་རླབས་ཀྱི་རྒྱུན་མ་ཆད་པའི་དོན་ནོ། །དེའི་ཚེ་བོད་ཡུལ་དུ་འཇམ་དཔལ་དང་སྤྱན་རས་གཟིགས་ཐ་མི་དད་པའི་སྐུའི་བཀོད་པ་ཆོས་རྒྱལ་ཁྲི་སྲོང་ལྡེ་བཙན་དུ་བསྟན་སྟེ་བསམ་ཡས་ལ་སོགས་པའི་གཙུག་ལག་ཁང་བཞེངས། དམ་པའི་ཆོས་བསྒྱུར་ནས་དར་ཞིང་རྒྱས་པའི་ཚེ་རྒྱལ་པོས་གསང་སྔགས་ཀྱི་ཆོས་ཁྱད་པར་བ་ཡོད་པར་མཁྱེན་ཞིང་ཐོག་མར་རྒྱལ་བུའི་དུས་ཀྱི་སྐུ་རྫི་ཕྱིས་རབ་ཏུ་བྱུང་བ་མྱང་ཏིང་འཛིན་བཟང་པོ་ཅེས་བྱ་བ་ལོ་བདུན་དུ་ཏིང་ངེ་འཛིན་གཅིག་ལ་མཉམ་པར་བཞག་པ་ཤའི་སྤྱན་གྱིས་གླིང་བཞི་པའི་འཇིག་རྟེན་ཐམས་ཅད་གཅིག་ཅར་གཟིགས་པས་མྱང་བན་ཤའི་སྤྱན་ཅན་ཞེས་གྲགས་པ་དེས་ཀྱང་བསྐུལ་སྟེ་བཱི་མ་ལ་རྒྱལ་པོའི་མཆོད་གནས་སུ་བཞུགས་པ་ལ་སྤྱན་འདྲེན་པར་ཀ་ཅོག་གཉིས་མངགས་སྟེ་བཱི་མ་ལས་ཀྱང་གདམས་ངག་གི་མཆོག་ཐམས་ཅད་བསྣམས་ཨ་ཙ་ར་སའི་སྙིང་པོ་གཡོག་དུ་ཁྲིད་ནས་བོད་དུ་བྱོན། རྒྱ་གར་བ་ཐམས་ཅད་ཀྱི་རྨི་ལམ་འཁྲུགས་ཤིང་ཤིང་རྩི་དང་མེ་ཏོག་ཐམས་ཅད་ཀྱང་ཁ་བོད་དུ་བལྟས། མཁའ་འགྲོ་མ་ཐམས་ཅད་གྱིས་ཆོ་ངེས་བཏབ། ཆུ་ཚོད་ཀྱི་རྩིས་ཐམས་ཅད་ཀྱང་འཁྲུགས་པས་ཅིས་ལན་བརྟགས་པ་ན་བུད་མེད་མཁའ་འགྲོ་མ་ཞིག་ན་རེ་པཎྜིཏ་མཁས་པ་ཅིག་འབྲས་བུ་གསང་སྔགས་ཀྱི་སྙིང་པོ་ཐམས་ཅད་དཔེ་ཙམ་ཡང་མ་བཞག་པར་བསྣམས་སྟེ་བོད་དུ་བྱོན་པས་ལན་ཟེར་བ་དང་རྒྱ་གར་བ་རྣམས་ཀྱིས་བོད་ཐེ་ཚོམ་སྐྱེད་པའི་ཕྱིར་རྐང་མགྱོགས་པ་བཏང་སྟེ་བཱི་མ་ལའི་སྔུན་དུ་བོད་དུ་སླེབས་པར་བྱས་ནས་ཕྲ་མེན་གྱི་ངན་སྔགས་མཁན་པོ་ཅིག་ཁྲིད་སོང་ངོ་ཞེས་བསྒྲགས་པས་པཎྜིཏ་བསམ་ཡས་སུ་ཕེབས་ཀྱང་བོད་རྣམས་ཐེ་ཚོམ་ཟོས་སྟེ་རྒྱལ་པོ་དང་མ་མཇལ། དབུ་ཚལ་དུ་ལྡེར་ཚོ་ལ་ཕྱག་མཛད་པས་ལྡེར་ཚོ་ས་ཕུང་དུ་ཞིག་པས་སླར་ལ་ཐེ་ཚོམ་ཆེར་(ཐ༢༡ན)

[Full Size]

སྐྱེས། ཡང་བཱི་མ་ལས་ས་ཕུང་གི་སྤྱི་བོར་ཕྱག་བཞག་ཅིང་དབུའི་ཞྭ་བཀོན་པ་ཙམ་གྱིས་སྔ་མ་ལས་ཆེས་ལེགས་ཤིང་འོད་དང་ལྡན་པར་གྱུར། ཐེ་ཚོམ་སེལ་ཕྱིར་སྐྱབས་འགྲོ་ཡན་ལག་དྲུག་པ་ཡང་མཛད་པས་ཡིད་འཆེས་སྟེ་རྒྱལ་པོས་ཕྱག་མཛད་པའི་ཚེ་རྒྱལ་པོའི་ཐུགས་ཀར་རིགས་གསུམ་མགོན་པོ་བཀྲ་ལམ་མེ་བཞུགས་པ་བཱི་མ་ལས་གཟིགས་ཤིང་སྣོད་དག་པ་གཞན་འགས་ཀྱང་མཐོང༌། བཱི་མ་ལས་ཨོཾ་ཨཱཿཧཱུྃ་སྭཱ་ཧཱ་ཞེས་སེ་གོལ་བརྡབས་པས་དབུ་ཞྭ་རིན་པོ་ཆེའི་པྲོག་ཞུར་གྱུར་སྟེ་རིགས་ལྔའི་སྐུ་ལམ་གྱིས་བྱུང་བ་རྒྱལ་པོ་ལ་སོགས་པས་གཟིགས། འདི་ལ་དེབ་སྔོན་དུ་བཱི་མ་ལ་སྔ་མ་འདི་རྣལ་འབྱོར་པ་རལ་པ་ཅན་དུ་ཡོད་པས་ཕྱི་རོལ་པར་དྭོགས་པ་སྐྱེས་པ་སེལ་ཕྱིར་ཡན་ལག་དྲུག་པ་བརྩམས་ཟེར་བ་སྣང་ཡང་ཡེར་པའི་དཀར་ཆག་ལས་ལྷ་ལུང་རབ་འབྱོར་དབྱངས་དཔུན་གསུམ་བཱི་མ་ལས་རབ་ཏུ་ཕྱུང་བར་བཤད་པ་དང༌། སྐུ་འདྲ་རྙིང་པའི་སློབ་དཔོན་པདྨ་རྒྱ་གར་མ་ལྟ་བུའི་པཎ་ཞྭ་མདབ་རིང་མདབ་མའི་རྒྱབ་སྒོར་མོ་པད་རིས་ཅན་གསོལ་བ་ཁོ་ནར་ཐོས་པས་རབ་བྱུང་དུ་གོར་མ་ཆག་ལ་རྒྱལ་བློན་གྱི་ཐེ་ཚོམ་སེལ་བའང་རྐང་མགྱོགས་པས་ངན་པར་བསྒྲགས་པ་ལས་བྱུང་བའི་ཐེ་ཚོམ་སེལ་ཕྱིར་ཉིད་ཏོ། །འདིའི་ཚེ་བཱི་མ་ལས་ལོ་སུམ་བརྒྱ་བཞེས་ཤིང་སྤྱིར་འདས་ལོ་སྟོང་དང་བརྒྱད་བཅུར་འཆད་ཏོ། །དེར་ཕར་ཕྱིན་དང་དབུ་མ་གསུང་བའི་ཚེ་བཻ་རོ་ཙ་ན་ཚ་བ་རོང་དུ་བཞུགས་པས་བོད་ཀྱི་རྒྱལ་བློན་ལ་ལ་ཡོགས་འདོར་དུ་གཡུ་སྒྲ་སྙིང་པོ་བཏང་བ་དེས་སློབ་དཔོན་གྲོལ་བཞུད་པའི་ཤུལ་དུ་ཆོས་ཁྲི་ལ། ཉན་ཐོས་བྱིས་པའི་ཆོས་ཀྱིས་འཚང་མི་རྒྱ། །ཕོ་རོག་རྡོ་རྗེ་འགྲོས་ཀྱིས་ས་མི་ཆོད། །བྱ་བ་བྲིས་པ་གཟིགས་ནས་དྲིས་པ་ན་ད་ཅི་སྤྲང་པོ་ཅིག་འདི་ན་འདུག་ཟེར་ནས་བཙལ་བས་གཡུ་སྒྲ་སྙིང་པོ་རྙེད་དེ་སེམས་སྨད་ལྔ་ལ་མཁས་པར་གཟིགས་ནས་སླར་ཁོང་ལ་འཚམས་པའི་ཕྱི་འགྱུར་བཅུ་གསུམ་པོ་བསྟན་(ཐ༢༡བ)

[Full Size]

པས་སེམས་སྨད་བཅོ་བརྒྱད་དུ་གྲགས། སྤྱིར་སྒྱུ་འཕྲུལ་ལ་སོགས་པའི་ཆོས་དུ་མ་གཉགས་ལ་སོགས་པས་བསྒྱུར། གསང་བ་བླ་མེད་ཀྱི་རྒྱུད་མན་ངག་ནི་གཞན་སུ་ལ་ཡང་ཆ་མེད་པར་རྗེ་བློན་གཉིས་ཀྱིས་ཐུགས་དམ་མནོག་ཆོས་སུ་མཛད་ནས་སྲོད་དང་ཐོ་རེངས་ཀྱི་ཚེ་བསྒྱུར་ཞིང་རྗེ་བློན་གྱིས་ཤིན་དུ་ཟབ་པའི་ཆོས་འདི་ལྟ་བུ་བློར་མི་ཆུད་ཚུལ་བཞིན་དུ་སྤྱོད་པ་མི་འབྱུང་བས་མ་འོངས་པའི་སྐལ་ལྡན་གྱི་དོན་དུ་སྦ་པར་བཀས་བཅད། བཱི་མ་ལས་གསང་བ་སྙིང་ཐིག་གི་སྐོར་རྣམས་མཆིམས་ཕུའི་དགེ་གོང་དུ་བོད་ཡིག་དུ་བསྒྱུར་ནས་སྦས། ཐིག་ལེའི་སྐོར་གྱི་རྒྱུད་མན་ངག་གི་རྒྱ་དཔེ་རྣམས་མ་འོངས་པ་ན་ཚོང་འདུས་ཀྱི་འོ་མ་ལྟར་བསླད་ཅིང་ཉམས་འགྲོ་བར་གཟིགས་ནས་ཞུས་དག་གི་ཐེབས་སུ་སྦས། དེ་ལྟར་ལོ་བཅུ་གསུམ་བོད་ཡུལ་དུ་བཞུགས་ནས་སུམ་བརྒྱ་དང་བཅུ་གསུམ་བཞེས་ཚེ་རྒྱ་ནག་དུ་གཤེགས་སྟེ་བསྟན་པ་ཇི་སྲིད་གནས་ཀྱི་བར་ལ་སྐུ་དེ་ཉིད་མ་བསྡུས་པར་བཞུགས་པ་ཡིན་ལ་ལོ་བརྒྱ་བརྒྱ་ན་བོད་དུ་སྐུའི་བཀོད་པར་འབྱུང་ལ་འདིས་ནི་དགའ་རབ་རྡོ་རྗེ་ཉིད་ལ་ལན་བདུན་དུ་མཇལ་ནས་གསན་ཞིང་མ་འོངས་པ་བསྟན་པའི་བཙས་འཇིག་རྟེན་གཞན་དུ་འཕོས་པའི་ཚེ་རྡོ་རྗེའི་གདན་དུ་འོད་ཀྱི་སྐུའི་ཡལ་བར་འགྱུར་རོ། །ཨ་ཙ་ར་སའི་སྙིང་པོ་མཆིམས་ཕུར་གྲོངས་པས་ལྟས་ཁྱད་པར་ཅན་བྱུང་སྟེ་བཱི་མ་ལ་གྲོངས་པར་ནོར་བ་བྱུང་ངོ༌། །བཱི་མ་ལ་བཞུད་ནས་ལོ་ལྔ་བཅུ་རྩ་ལྔ་ན་མྱང་ཏིང་འཛིན་བཟང་པོ་དེ་རྒྱུད་རྣམ་པར་དག་ནས་རྡོ་རྗེ་ལེགས་པས་ཁམས་སུ་སེར་བ་ཕབ་ནས་ནས་རྔ་མོའི་ཁལ་རྒྱབ་བརྒྱ་བཀལ་བྱུང་བ་ལ་རྡོ་རྗེ་འཕངས་པས་དམ་ཚིག་དྲན་སྟེ་ནས་ཕུལ་བ་ལ་ཞྭའི་ལྷ་ཁང་བཞེངས་ནས་གདམས་པ་རྣམས་ཀེ་ཚང་རིས་གསུམ་སྒོའི་སྟེང་ཀ་བའི་ཁོང་གསེང་རྣམས་སུ་སྦས་ཅིང་སྙན་རྒྱུད་ཚིག་གི་རིམ་པ་འབྲོ་རིན་ཆེན་འབར་བ་ལ་བརྒྱུད་པའི་སྲོལ་མི་ཉམས་པའི་ཆེད་དུ་གཏད། བབས་ལུགས་ཆེན་མོ་ན་འདི་ཙམ་ལས་མི་སྣང་ཡང་འདྲ་འབག་ལྷད་མེད་དང་སྙིང་ཐིག་གི་(ཐ༢༢ན)

[Full Size]

ལོ་རྒྱུས་སོགས་སུ་བཱི་མ་ལས་གཞན་ལ་སྣོད་བརྟགས་པས་མ་རྙེད། མྱང་ལ་ང་ཨ་ཙ་ར་རྒྱ་གར་དུ་འགྲོ་བ་ལ་གསེར་མང་པོ་དགོས་པས་ཁྱོད་ཀྱིས་ཡོད་ཚད་གསེར་དུ་དྲིལ་ལ་ང་ལ་ཕུལ་ཞིག་གསུངས་པས་རྒྱལ་པོ་དང་གཉགས་སོགས་ལ་མི་གསུང་བར་བདག་ལ་དེ་ལྟ་བུ་གསུང་བ་བསོད་ནམས་ཆེ་སྙམ་ནས་གསེར་མང་དུ་ཕུལ་བ་ན་ང་ལ་གསེར་གྱིས་དགོས་པ་མེད་སྣོད་བརྟགས་པ་ཡིན་གསུངས་ནས་སྙིང་ཐིག་རྫོགས་པར་གནང་བར་བཤད་ལ་ཞྭའི་ལྷ་ཁང་ཡང་བཱི་མ་ལ་དང་མྱང་ཐུན་མོང་དུ་བཞེངས་ཤིང་གཏེར་རྣམས་ཀྱང་གཙོ་བོར་བཱི་མ་ལ་ཉིད་ཀྱིས་སྦས་པ་ཡིན་ནོ། །འབྲོས་སྦས་བློ་གྲོས་དབང་ཕྱུག་ལ་བཤད། དེས་གཞོའི་ལྡང་མ་དགེ་མཆོག་གི་བུ་གནས་བརྟན་ལྡང་མ་ལྷུན་རྒྱལ་ལ་བཤད། འདི་བཱི་མ་ལའི་སྐུའི་བཀོད་པ་ཡིན། འདི་ལ་ཞྭའི་མགོན་པོས་ལུང་བསྟན་ནས་གཏེར་རྣམས་ཕྱུང༌། སྣོད་ལྡན་བཙལ་བས་གཞན་མ་རྙེད་ནས་ཉང་རོ་གཉན་མཚོའི་ལྕེ་ཐུབ་པའི་བུ་ལྕེ་བཙུན་སེང་གེ་དབང་ཕྱུག་ཞེས་བྱ་བ་ཆོས་མང་དུ་ཤེས་པ་ཅིག་ལ་བསྟན་པས་ཞར་ལ་བལ་པོ་སྒོམ་ཆུང་བྱ་བ་ཞིག་ཀྱང་འདིས་གྲོལ། དཔེ་འདི་དག་པར་བྲིས་ལ་ཁྲའི་ཟླ་བ་ལ་སྐྱོལ་ཞིག་གསུངས་ནས་གྱེས། འབུལ་བ་ཆེན་པོ་ཁྱེར་ནད་དཔེ་སྐྱེལ་དུ་ཕྱིན་པས་སྙེ་ཐང་དུ་སླེབས་ཚེ་ཉང་བཀའ་གདམས་པ་བྱ་བ་དང་ཕྲད་པས་ལྡང་མ་ཁྲའི་ཟླ་བ་ལ་གཤེགས། སྔར་གནས་བརྟན་ཡིན་པ་ཙམ་ལས་བཟང་པོར་མི་རྩི་བ་འདུག་སྟེ་གཤེགས་པའི་དུས་མཁྱེན་རྟགས་ངོ་མཚར་བ་མཐའ་ཡས་བྱུང་བས་ཕྱིས་ཐམས་ཅད་འགྱོད་པ་སྐྱེས་འདུག་ཁྱེད་འབུལ་བ་འདི་ཙམ་སྐྱེལ་བ་གདམས་ངག་ཁྱད་པར་ཅན་ཞུས་པར་ཐག་ཆོད་པས་དེ་བདག་ལ་ཞུ་ཟེར་སྟེ་བྱིན་པས་ཏི་སྒྲོར་ལོ་སོ་གཉིས་བསྒོམས་སྟེ་ཟག་པ་ཟད་ཡོན་ཏན་ཆེར་སྐྱེས། ལྕེ་བཙུན་གྱིས་བཱི་མ་ལ་དངོས་སུ་མཇལ་སྟེ་ལོ་དུ་མར་བསྟེན། མཆིམས་ཕུའི་གཏེར་ལུང་བསྟན་སྟེ་(ཐ༢༢བ)

[Full Size]

མཁའ་འགྲོས་ཕྱེ་ནས་བྱིན། སློབ་དཔོན་པདྨའི་གཏེར་དང་སྣུབས་སངས་རྒྱས་ཡེ་ཤེས་ཀྱི་གཏེར་ཡང་ཐོན། སྣོད་ལྡན་མ་རྙེད་པས་ཕལ་ཆེར་སྣོད་ལྡན་ལ་སྨོན་ལམ་བཏབ་སྟེ་སྦས། ལོ་བརྒྱ་དང་ཉེར་ལྔ་ལ་འོད་ལུས་སུ་ཡལ་སྟེ་འདས་རྗེས་མཁའ་འགྲོའི་ཕྱག་དུ་བབས། དེ་ནས་ལོ་སུམ་བཅུ་ན་རོང་སྣར་མངའི་ལྕེ་སྒོམ་ནག་པོས་ཕྱི་ནང་གསང་གསུམ་གྱི་སྐོར་བཏོན་སྟེ་དར་རྒྱས་སུ་གྱུར། དེས་ཞང་སྟོན་བཀྲ་ཤིས་རྡོ་རྗེ་ལ་བཤད་དེ་ཡ་འབྲོག་གི་དོ་ནང་དུ་འཁྲུངས། མདོ་སྔགས་ལ་མཁས་པར་སྦྱངས་རྡོར་ལེགས་ཀྱིས་ལུས་དང་གྲིབ་མ་ལྟར་འགྲོགས་པས་གྲོགས་ཐམས་ཅད་བྱས་སྟེ་འུ་ཡུག་གི་བྲག་ནས་ཁ་བྱང་བརྒྱ་རྩ་བརྒྱད་དང་མན་ངག་མང་པོ་ཐོན། ཚོགས་བསྐྱངས་པས་འོད་ལུས་མ་གྲུབ་ཀྱང་འདས་རྟགས་བཟང་པོ་བྱུང༌། དེའི་རིགས་ཀྱི་སྲས་མཁས་པ་ཉི་འབུམ་ནི་ཕྱག་རྡོར་གྱི་སྤྲུལ་པ་བཛྲ་ཕ་ལ་ཡིན་པར་འཆད། ཡབ་དང༌། རྒྱ་སྟོན་ལུང་དྲོ་བ་དང༌། ཞང་གཡུ་བྲག་པ། རྔོག་རྒྱལ་ཚ་རྡོར་སེང་སོགས་བསྟེན་འཕྲིན་ལས་ཤིན་དུ་ཆེའོ། །དེའི་སློབ་མ་ཆོས་དག་གུ་རུ་ཇོ་འབེར་ནི་མཁས་པ་ཉི་འབུམ་གྱི་གཅུང་གི་སྲས་ཤེས་བྱ་ཐམས་ཅད་ལ་ཐོགས་བརྡུགས་མེད་པའི་ཤེས་རབ་མངའ་གཙོ་བོར་སྙིང་ཐིག་གི་བདག་པོར་གྱུར། དེའི་སློབ་མ་འཁྲུལ་ཞིག་སེང་གེ་རྒྱབ་པ་ནི་དབུས་ཀྱི་གྲར་འཁྲུངས། རྐྱེན་རེ་ལ་བསྟེན་ནས་གཞན་ལ་མཐོ་འགྲོགས་དང་ཁྱད་གསོད་མི་བྱེད། ཤིག་དང་འཇི་བ་དང་ལོང་སྤྲང་ཁོ་ན་ལ་བྱམས་པ་སོགས་བྱིས་པའི་དུས་ནས་དམ་བཅའ་མང་པོ་བྱས། ཆོས་མ་ཉན་ཀྱང་སེམས་སྟོང་པར་གོ་སྟེ་སྙིང་པོའི་དོན་རྟོགས། ལེ་སྒང་པ་ལས་རབ་ཏུ་བྱུང་སྙིང་ཐིག་ལས་ཆོས་ཉིད་ཟད་པའི་སྣང་བ་ཤར། བཞུགས་སའི་མིང་གིས་སེང་གེ་རྒྱབ་པར་གྲགས། དེའི་སློབ་མ་མེ་ལོང་རྡོ་རྗེ་ནི་སྒྲགས་ཀྱི་ཕུར་འཁྲུངས། ཆུང་ངུ་ནས་ཆོས་ཕྱིར་དཀའ་(ཐ༢༣ན)

[Full Size]

སྤྱད་མང་པོ་བྱས། གྲུབ་ཐོབ་ཟ་ལུང་པ་དང༌། མཚུར་ཕུའི་མདོ་བོ་རས་པ། འཁྲུལ་ཞིག་སེང་གེ་རྒྱབ་པ་སྟེ་རྩ་བའི་བླ་མ་གསུམ་བསྟེན་ཞིང་འཁྲུལ་ཞིག་པ་ལས་རྒྱུད་མན་ངག་གི་སྙིང་པོ་རྙེད། སྒྲུབ་པ་གཙོ་བོར་མཛད་དེ་དྲུག་བཅུ་རྩ་གཅིག་ལ་མཁར་ཆུར་འདས་སྟེ་གདུང་ཁང་འོད་ཀྱི་དྲ་བས་གཡོགས་པ་བྱུང་སྐད། དེའི་སློབ་མ་རིག་འཛིན་ཀུ་མ་རཱ་ཛཱ་ཡིན་སྟེ་གཡོ་རུ་འོན་གྱི་བར་སར་རྫིང་ཁར་ཇོ་སྲས་སུ་འཁྲུངས། ཕག་མོ་གྲུར་སྤྱན་སྔ་གྲགས་ཡེ་བ་ལས་རབ་ཏུ་བྱུང༌། ཚར་སྟེང་པ་དང་མཚུར་ཕུའི་གཉན་རས་དང་གྲུབ་ཐོབ་ཨོ་ཌྱན་པ་སོགས་བླ་མ་མང་དུ་བསྟེན་ནས་ཆོས་མཐའ་དག་གསན། ཁྱད་པར་མེ་ལོང་པ་ལས་རྟོགས་པ་སྐྱེས་ཤིང་དབང་གདམས་ངག་རྣམས་ཡོངས་སུ་རྫོགས་སྟེ་མཉེས་པ་གསུམ་གྱིས་མཉེས། མཚུར་ཕུར་ཆོས་རྗེ་རང་བྱུང་རྡོ་རྗེ་ལ་སྙིང་ཐིག་གི་ཆོས་ཕུལ། གཡེ་དྭགས་ཀོང་པོ་རྣམས་ལ་ལམ་རྒྱ་མཛད། ཤངས་ལ་ཨའི་རི་མོ་ཡོད་ཅིང་སྔགས་བདག་གཟའ་དམ་ཅན་གསུམ་དང་མི་བཞིན་དུ་ལབ། སྙིང་ཐིག་གི་ཟབ་གནད་རྣམས་གཞན་དང་ཕྱེ་ནས་སྟོན་པས་བཱི་མ་ལའི་སྐུའི་བཀོད་པར་གྲགས། བདུན་བཅུ་རྩ་བརྒྱད་པ་སྟོན་ཟླ་འབྲིང་པོའི་ཉེར་ལྔ་ལ་གྲོངས་པ་ལས་ཤུལ་པས་སྨེ་སྔགས་བཏོན་གསོལ་བ་བཏབ་པས་བཞེངས་སྟེ་བསྙུང་བ་མེད་པར་ཞག་བཅུ་བཞིར་བཞུགས་ནས་ཆོས་དང་ཞལ་ཆེམས་མཛད་དེ་སྟོན་ཟླ་ཐ་ཆུང་གི་ཚེས་བརྒྱད་ལ་འདས། དེའི་སློབ་མ་ནི་ཀུན་མཁྱེན་ཚུལ་བློ་ཡིན་སྟེ་གཡོ་རུ་གྲའི་སྟོད་གྲོང་དུ་ཇོ་སྲས་སུ་འཁྲུངས། མཁན་པོ་བསམ་རིན་ལས་རབ་ཏུ་བྱུང་ཞིང་གསང་ཕར་སྡེ་སྣོད་མཐའ་དག་ལ་སྦྱངས། ཤེས་རབ་ཀྱི་ལྷ་གྲུབ་སྟེ་བློ་གྲོས་ཐོགས་པ་མེད་པས་ཀློང་ཆེན་རབ་འབྱམ་དུ་གྲགས། ཀརྨ་པ་རང་བྱུང་རྡོ་རྗེ་ལས་གདམས་པ་མང་དུ་གསན། །(ཐ༢༣བ)

[Full Size]

རིག་འཛིན་པ་དང་མཇལ་བས་མདང་ལྷའི་བྱ་ཡིན་ཟེར་བ་ངོ་མཚར་ཅན་ཞིག་བྱུང་བ་ཁྱེད་དུ་འདུག་གསུངས་ནས་ཆོས་དང་བརྒྱུད་པ་གཏད། ཆོས་ཉན་པ་སྒྲུབ་པ་གང་གི་སྐབས་སུ་ཡང་ཟས་གོས་དང་གནས་ཀྱི་དཀའ་བ་ཆེར་སྤྱད། ཕྱིས་འབྲི་ཁུང་པ་དང་ཏ་སི་བྱང་རྒྱལ་སོགས་མི་ཆེན་དང་དགེ་བཤེས་ཐམས་ཅད་ཀྱི་བླ་མ་རྩོད་མེད་དུ་གྱུར། ཞྭའི་ལྷ་ཁང་གསོ་བའི་ཞིག་རལ་གྱི་དུས་མནན་པའི་ཐོད་པ་མང་པོ་འཕར་ཞིང་བྱུང་བ་ན་ཟ་གཡབས་པས་བཟུང་སྟེ་སྡིགས་མཛུབ་ཀྱིས་སླར་མནན། དབུ་རྩེའི་རྒྱབ་ནས་ལྷ་ཁང་གསོ་བའི་ཐེབས་གསེར་འགུ་རྩེ་གང་བཅུས་པ་ལ་སྐུད་གསེར་བྱས། གཏེར་མང་དུ་འདུག་པ་ལ་འགའ་ཙམ་ལས་མ་བླངས། དམ་ཅན་པ་བྱིས་པ་གཡུ་རྣ་ཅན་ཞིག་དུ་བྱས་ནས་ཉིན་རེ་བཞིན་གཟོ་བོའི་གྲོགས་ལ་བྱུང༌། རྡོ་རིང་ཆེན་མོ་གཉིས་ཡོད་པ་གཙུག་ལག་ཁང་ཞིག་པའི་ཚེ་འགྱེལ་ནས་སུས་ཀྱང་མ་ལྷོངས་པ་ལ་གཏོར་མ་དང་བདེན་ཚིག་བརྗོད་ནས་སྐུ་ཆོས་བརྡབས་པས་ལྷོངས་པའི་ངོ་མཚར་བསྟན། ཐོད་པ་སྣ་ཚོགས་སུ་དམ་སྲི་མནན་འདུག་པ་རྣམས་ཀྱི་ཉམས་པ་གསོས་ནས་སླར་མནོན་པར་བརྩམས་པའི་ཚེ་རླུང་ནག་གཡོས་ས་རྡོའི་ཆར་བབ་པས་མི་ཐམས་ཅད་བྲོས་སྟེ་གྲོགས་མ་བྱུང་བ་ལ་ཉིད་ཀྱིས་དྲག་པོའི་གར་མཛད་པས་ཐོད་པ་རྣམས་འཕར་ནས་ཕན་ཚུན་རྡབ་ཅིང་འཁྲོལ་ཐོད་པ་ཆེ་ཤོས་ཅིག་ན་མཁའ་ལ་འཆོར་བར་བྱུང་བ་སྡིགས་མཛུབ་ཀྱིས་ཕབ་སྟེ་ཞབས་ཀྱིས་མནན་པས་གུ་རུ་དྲག་པོ་དངོས་སུ་མཐོང་བ་བྱུང་ཐོད་པ་རྣམས་ཕྲ་མེན་མཆོད་རྟེན་གྱི་ཞབས་སུ་མནན། རབ་གནས་ཀྱི་དུས་ངོ་མཚར་མཐའ་ཡས་པ་བྱུང༌། སངས་རྒྱས་བྱང་སེམས་ཀྱི་དག་སྣང་ནི་མཐའ་ཡས་པར་གཟིགས། ས་ཕག་གི་རྩོད་པ་འབྱུང་བར་མཁྱེན་ནས་ལྷོ་མོན་ཕྱོགས་སུ་བྱོན་ནས་ཆོས་ཀྱི་སྲོལ་གཏོད། སླར་ལྷོ་འབྲོག་དབུ་གཡོར་ཐམས་ཅད་དུ་འཕྲིན་(ཐ༢༤ན)

[Full Size]

ལས་ཤིན་དུ་ཆེ་བས་ཐམས་ཅད་ཕན་བདེ་ལ་བཀོད། ཆོས་ཁྲལ་མི་ལེན། དད་རྫས་ཆུད་མི་གཟོན། ཡོ་བྱད་ཆོས་ཕྱོགས་སུ་བསྔོས་པ་རྣམས་གང་དུ་ཡང་བསྔོས་བསྒྱུར་མི་མཛད། བཀུར་སྟི་དགེ་འདུན་ལ་དགོས་པ་ཡིན་སྡིག་ཅན་ལ་མི་དགོས་གསུངས་ནས་ཁྱིམ་པའི་མི་ཆེན་ལ་སྟན་དང་བཀུར་སྟི་མི་མཛད། འབུལ་བ་ལ་འདབ་ལན་མི་མཛད། ཚོགས་གསོག་ཡོན་བདག་གི་བྱ་བ་ཡིན་མཆོད་ཡོན་གྱི་བྱ་བ་གོ་ལོག་པ་མ་བཟང་གསུངས། སྤྲང་པོ་སོགས་སྙོམས་ཆུང་གིས་ཅི་དྲངས་ཀྱང་ཞིམ་ཞིམ་ལྟར་གསོལ་ཞིང་མོད་དང་བསྔོ་བ་རྒྱས་པར་མཛད། དེ་ལ་སོགས་པ་སྐྱེས་བུ་དམ་པའི་སྤྱོད་པ་ལ་གནས། ཁྱད་པར་དུ་ཆོས་རྒྱལ་ཁྲི་སྲོང་ལྡེ་བཙན་གྱི་སྲས་མོ་པདྨ་གསལ་ལ་སློབ་དཔོན་པདྨས་དབང་བསྐུར་མཁའ་འགྲོ་སྙིང་ཐིག་གི་ཆོས་བདག་དུ་བཏང་སྟེ་སྐྱེ་བ་རིམ་པར་བརྒྱུད་པའི་པདྨ་ལས་འབྲེལ་རྩལ་ཞེས་གསང་མཚན་དུ་འབོད་པ་དཔའ་ལུང་པ་རིན་ཆེན་རྡོ་རྗེའི་སྐྱེ་བ་ཡིན་སྟེ། མཆིམས་ཕུར་མཁའ་འགྲོ་སྙིང་ཐིག་གི་ཆོས་བཀའ་ཕྱེ་བའི་མཐོང་སྣང་རིན་པོ་ཆེ་འོད་ཀྱི་དྲ་བར་རྣལ་འབྱོར་མ་ཞིག་ལ་རྡོ་རྗེ་ཕག་མོ་ཡེ་ཤེས་སུ་བབས་སྟེ་གདམས་པའི་ལྷག་ཆད་བསལ། སློབ་དཔོན་རིན་ཆེན་རྡོ་རྗེ་གར་ཡོད་དྲིས་པས་ཁོང་འདི་ན་ཟེར་ནས་བླ་མ་ལ་མཛུབ་མོ་བཙུགས། བླ་མས་ཁོང་དེའི་རྗེས་ལ་བུམ་ཐང་དུ་སྐྱེ་བར་བཤད་པ་ཡིན་མོད་ང་གར་ཡིན་གསུངས་པས། ལོངས་སྐུའི་ཞིང་མྱུལ་ནས་བུམ་ཐང་དུ་སྐྱེ་བར་གསུངས་པ་ཡིན་ཁྱེད་རང་ད་ལྟ་ཆོས་ཉིད་མངོན་སུམ་གྱི་སྣང་བ་ལ་སྤྱོད་པ་འདི་ལོངས་སྐུའི་ཞིང་མྱུལ་བ་ཡིན་ཞེས་བསྟན། ཆོས་བཀའ་ཆེ་བའི་ངོ་མཚར་མཐའ་ཡས་པ་བྱུང་བར་སྣང༌། སྒྲ་ཚད་སྙན་ངག་སོགས་རྟོག་གེའི་སྐོར་དང༌། བྱམས་ཆོས་དབུ་མ་འདུལ་མངོན་སྤྱོད་ཕྱོགས་ཀྱི་ཡིག་ཆ་དང༌། སྔགས་སར་རྙིང་(ཐ༢༤བ)

[Full Size]

ཕྱག་རྫོགས་ཞི་གསུམ་གྱི་ཡིག་ཆ་མང་པོ་དང༌། ཁྱད་པར་མཁའ་འགྲོ་སྙིང་ཐིག་གི་སྙིང་པོ་མཁའ་འགྲོ་ཡང་ཐིག་དང་བཱི་མ་ལ་སྙིང་ཐིག་གི་སྙིང་པོ་བླ་མ་ཡང་ཐིག་དང་ཟབ་མོ་ཡང་ཐིག་སོགས་བསྟན་བཅོས་ཚད་དུ་ལོངས་པ་མང་བར་མཛད་པའི་དཀར་ཆག་རིན་པོ་ཆེའི་མཛོད་ཁང་ཞེས་བྱ་བ་སྣང༌། ང་དྲུག་བཞེས་པའི་ཆུ་ཡོས་ལ། ད་ནི་མི་སྡོད་པདྨ་ལས་འབྲེལ་རྩལ། །འཆི་མེད་བདེ་ཆེན་བཙན་ས་འཛིན་དུ་འགྲོ། །གཡུལ་ལས་རྣམ་པར་རྒྱལ་བའི་ལྷ་དབང་དང༌། །རྒྱ་མཚོའི་དོན་ཡོངས་གྲུབ་པའི་ཚོང་པ་དང༌། །བསམ་གཏན་གྲུབ་པའི་དགའ་བས་ཆེས་ལྷག་གོ །ཞེས་སོགས་ཀྱི་ཞལ་ཆེམས་མཛད་དེ་བསམ་ཡས་མཆིམས་ཕུར་གཟུགས་སྐུ་བསྡུས་སྟེ་ལྟས་ངོ་མཚར་བ་བསྟན་ཏོ། །བུ་སློབ་མང་དུ་བྱོན་པ་ལས་སྙིང་ཐིག་གི་བཀའ་ནི་མཁས་གྲུབ་དྷརྨ་ཀིརྟི། སྤྲུལ་སྐུ་ཉི་མ་འོད་ཟེར། བྱང་སེམས་ཀུན་དགའ་རྒྱལ་མཚན། སྤྲུལ་སྐུ་ཆོས་དབྱིངས་གྲགས་པའི་བར་དུ་རིམ་པར་བཀའ་བབས་སོ། །སྤྱན་རས་གཟིགས་དབང་ཕྱུག་དངོས་སུ་བྱོན་པ་ལ་ཀརྨ་པ་རང་བྱུང་རྡོ་རྗེས་བཱི་མ་ལ་མུ་དྲ་རང་གི་མཛོད་པུར་ཐིམ་པའི་མོད་ལ་སྙིང་ཐིག་གི་དགོངས་པ་ཇི་ལྟ་བ་མངོན་དུ་གྱུར་ཀྱང་གསང་སྔགས་བླ་མ་ལ་བལྟོས་པའི་མིག་ལྟོས་བསྟན་པའི་ཆེད་དུ་རིག་འཛིན་ཀུ་མ་རཱ་ཛཱ་ལ་གསན། སློབ་དཔོན་པདྨ་ལ་བརྒྱུད་པ་ཅིག་འོང་ཐང་དགོངས་པའི་ཚེ་སློབ་དཔོན་པདྨ་ལས་དངོས་སུ་གསན་ཡང་སླར་ཤོའི་རྒྱལ་སྲས་ལེགས་ལྡན་པ་སྤྱན་དྲངས་སྟེ་ཙཱ་རི་དགོན་སར་དུ་གསན་པར་བསྟན་ནས་ཕྱིས་སློབ་མ་རྣམས་ལ་གསུངས་སྟེ་འདི་ལྟ་བུའི་ཆོས་ནུབ་ཏུ་ཕངས་པས་སློབ་དཔོན་རྒྱ་བ་གཡུང་སྟོན་རྡོ་རྗེ་དཔལ་གྱིས་གཙང་ཕྱོགས་དང་ཡེ་རྒྱལ་བས་ཁམས་ཀོང༌། ཡེ་ཤེས་རྒྱལ་མཚན་པས་ཧོར་དང་རྒྱ་ནག་སྤྲུལ་སྐུ་བས་དབུས་སུ་དར་བར་གྱིས་ཅེས་སྨན་ལུང་པ་ཤཱཀྱ་གཞོན་སོགས་ལ་རྗེས་སུ་གདམས་སྟེ། ས་ལ་(ཐ༢༥ན)

[Full Size]

གནས་པའི་བྱང་སེམས་ཀྱིས། །རྒྱ་མཚོའི་བར་དུ་དཔེལ་བར་བྱེད། །ཅེས་ལུང་བསྟན་པ་མངོན་དུ་གྱུར་པའོ། །ཀུན་མཁྱེན་པ་ལ་མཁས་གྲུབ་བདེ་ལེགས་པ་ཅེས་བྱ་བ་མཁྱེན་པ་དང་སྙིང་བརྩེ་དང་རྟོགས་པ་དང་ནུས་པར་ལྡན་ཞིང་སྤྱོད་པ་ཤིན་དུ་དག་པ་ཅིག་གིས་ཀྱང་སེམས་ཕྱོགས་མཐའ་དག་གསན་ནས་དེའི་སློབ་མ་འཕན་ཡུལ་པ་བློ་གྲོས་རྒྱ་མཚོས་སྨན་རྩེའི་དགོན་པ་བཏབ་ཅིང་རིམ་པས་ཉན་ཕོ་བ་ཡོན་ཏན་དཔལ། སྤྲུལ་སྐུ་བསམ་རྒྱན་ལ་སོགས་པ་རིམ་པར་བྱོན། ཡང་བཱི་མ་ལས་རྨ་རིན་ཆེན་མཆོག་དང་གཉགས་ཛྙཱ་ན་ཀུ་མར་ལ་བཤད། གཉགས་ལ་སོག་པོ་དཔལ་གྱི་ཡེ་ཤེས། གྲ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ། གཉན་དཔལ་དབྱངས། མཚུར་ནག་ཡེ་ཤེས་འབར། ཨུ་པ་བདེ་གསལ། ཐང་བཟང་དཔལ་རྡོར། སྒྱེར་འཕགས་པ་ཤེས་རབ། བུ་སུ་ཀུ་མཆོག་གི་བྱང་ཆུབ་རྣམས་ཀྱི་ཞུས་ཤིང་སོག་པོ་དཔལ་ཡེ་ལ་སྣུབས་སངས་རྒྱས་ཡེ་ཤེས་ཀྱིས་གསན་པ་ཡང་སྒྱུ་འཕྲུལ་དང་སེམས་ཕྱོགས་གཉིས་ཀའི་བཀའ་བབས་གཅིག་གོ །བཻ་རོ་ཙ་ན་ལས་བརྒྱུད་པ་ནི་འདྲ་འབག་ཆེན་མོ་ལས་འདི་ལྟར་དུ་བཤད་སྟེ། སུམ་བཅུ་རྩ་གསུམ་གྱི་གནས་ན་ལྷ་དེ་ཝ་བཟང་སྐྱོང་ལ་བུ་ལྔ་བརྒྱ་ཡོད་པའི་ཐུ་བོ་ལྷའི་བུ་ཀུན་དགའ་སྙིང་པོ་ནི་བག་མེད་པ་ལས་ལོག་སྟེ་རྩེ་གཅིག་དུ་སྒོམ་པ་ལས་ལྷའི་བུ་སེམས་ལྷག་ཅན་ཞེས་མིང་དུ་གྱུར་ཅིང་དེ་ལས་སངས་རྒྱས་ཐམས་ཅད་ཀྱི་འོད་ཟེར་སྤྱི་གཙུག་དུ་ཐིམ་པ་དང༌། ཚངས་པ་དང་ཁྱབ་འཇུག་དང་གུ་ལང་གསུམ་ཁྱུར་མིད་བྱས་པ་དང༌། ཉི་ཟླ་གཉིས་ལག་དུ་བཟུང་སྟེ་འཇིག་རྟེན་སྣང་བར་བྱས་པ་དང༌། སྤྲིན་རིན་པོ་ཆེའི་མདོག་ཅན་ལས་བདུད་རྩིའི་ཆར་བབ་པས་ས་ཐམས་ཅད་ངོམས་ཅིང་རྩི་སྨན་ཐམས་ཅད་སྐྱེས་པ་སྟེ་ངོ་མཚར་གྱི་རྨི་ལམ་བཞི་རྨིས་པ་ན་ལྷའི་(ཐ༢༥བ)

[Full Size]

དབང་པོས་སངས་རྒྱས་ཐམས་ཅད་ཀྱི་དགོངས་པ་རྟོགས་པ་དང༌། བདུད་འཐུལ་བ་དང༌། རྒྱུ་འབྲས་ལས་འདས་པའི་རྩོལ་མེད་ཀྱི་ཐེག་པ་རྙེད་པར་འགྱུར་བ་དང༌། དེས་སྐལ་ལྡན་གྱི་དོན་བྱེད་པའི་ལྟས་སུ་བསྟན་ཏོ། །དེར་ལྷའི་བུས་ཕྱོགས་བཅུར་བལྟས་སྟེ། གསུང་གི་མངའ་བདག་ཐམས་ཅད་ཀྱིས། །རྩོལ་པའི་ཐེག་པ་མཐར་བཏོན་ནས། །རྩོལ་མེད་ཐེག་པ་མི་སྟོན་པ། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མཆིས་པས་ན། །ལྷུན་གྲུབ་ཐེག་པ་གསུང་དུ་གསོལ། །ཞེས་གསོལ་བ་བཏབ་པས་སངས་རྒྱས་ཐམས་ཅད་ན་མཁའ་ལ་འདུས་སྟེ། དུས་གསུམ་སངས་རྒྱས་ཐམས་ཅད་ཀྱི། །ཐུགས་རྗེའི་རང་བཞིན་ཁྱོད་ཡིན་པས། །སངས་རྒྱས་ཀུན་གྱི་མཛད་པར་ཤར། །གསུང་གི་མངའ་བདག་ཐམས་ཅད་ཀྱི། །ཡེ་ཤེས་རང་བཞིན་ཁྱོད་ཡིན་པས། །ཐམས་ཅད་བྱང་ཆུབ་སེམས་སུ་གསལ། །བདེ་གཤེགས་མ་ལུས་ཐམས་ཅད་ཀྱི། །སྐུ་ཡི་ངོ་བོ་དང་ལྡན་པས། །རྨད་བྱུང་རོལ་པའི་སྐུ་རུ་ཤར། །ཚིག་གཅིག་དོན་དུ་རྫོགས་པའི་བདག །རིན་ཆེན་འཕྲུལ་གྱི་སྙིང་པོའི་དོན། །སྐལ་ལྡན་རྣམས་ལ་བསྟན་དུ་གསོལ། །ཞེས་མགྲིན་གཅིག་དུ་རྡོ་རྗེ་སེམས་དཔའ་ལ་བསྐུལ་བས་རྡོ་རྗེ་སེམས་དཔས། རྡོ་རྗེ་སེམས་དཔའ་ན་མཁའ་ཆེ། །ཚིག་གི་སྤྱོད་ཡུལ་མ་ཡིན་པས། །བདག་གིས་སྒྲོགས་པར་ཤིན་དུ་དཀའ། །མ་རྟོགས་པ་ལ་ཚིག་སྒོ་ནས། །མཚོན་ཞིང་རྟོགས་པར་བྱ་བའི་ཕྱིར། །ཅི་རིགས་པར་ནི་རྣམ་པར་དགྲོལ། །ཞེས་གསུངས་སྟེ་ཐུགས་ཀ་ནས་ཕྱག་ན་རྡོ་རྗེ་ཕྱུང༌། དེས་ཤར་ཕྱོགས་རྡོ་རྗེས་རྣམ་པར་གནོན་པའི་སངས་རྒྱས་རྡོ་རྗེ་གསང་བ་དང༌། ལྷོ་ཕྱོགས་རིན་ཆེན་སྣང་བའི་སངས་རྒྱས་རིན་ཆེན་ཞལ་དང༌། ནུབ་ཕྱོགས་པདྨ་བརྩེགས་པའི་སངས་རྒྱས་པདྨའི་འོད་དང༌། བྱང་ཕྱོགས་(ཐ༢༦ན)

[Full Size]

རྣམ་དག་གྲུབ་པའི་སངས་རྒྱས་གྲུབ་པར་སྣང་བ་དང༌། དབུས་ཕྱོགས་མཐའ་དང་བྲལ་བའི་སངས་རྒྱས་རྣམ་པར་སྣང་མཛད་རྣམས་ལ་གསོལ་བ་བཏབ་པས་གཟོད་ནས་སྐྱེ་འགག་མེད་པ་དང་ཡོན་ཏན་ཡེ་རྫོགས་དང་བྱང་ཆུབ་ཀྱི་སེམས་འཁོར་བས་མ་གོས་པ་དང༌། དེ་རྟོགས་ན་ཕྲིན་ལས་རང་ལས་འཆར་བ་དང༌། ཡེ་ཤེས་གསང་བའི་རང་བཞིན་ནི། །སངས་རྒྱས་སེམས་ཅན་གཉིས་སུ་མེད། །ན་མཁའ་བཞིན་དུ་ཀུན་ལ་ཁྱབ། །མ་རིག་ཡེ་ཤེས་ཐ་དད་མེད། །མ་རྟོགས་རྟོགས་པའི་རྒྱན་དུ་གཅིག །ཡེ་ཤེས་གསང་བའི་མཚན་ཉིད་ནི། །རང་རིག་འོད་གསལ་རྣམ་པར་དག །རྣམ་རྟོག་ཡེ་ཤེས་ཉིད་དུ་གནས། །གཞི་བཞག་རང་ལུགས་རིན་ཆེན་འོད། །རང་བྱུང་མ་བཙལ་གདོད་ནས་དག །ཞེས་སོགས་གསུངས་པས་སེམས་དཔའ་རྡོ་རྗེ་རྩོལ་མེད་ཨ་ཏིའི་དོན་མངོན་དུ་གྱུར་སྟེ་སུམ་བཅུ་རྩ་གསུམ་གྱི་གནས་སུ་བྱོན་ནས་ལྷའི་བུ་ཀུན་དགའ་སྙིང་པོ་ལ་རྒྱལ་ཐབས་སྤྱི་ལུགས་ལ་སོགས་པའི་དབང་བསྐུར། ལྷུན་གྲུབ་རྣམ་གསུམ་ལ་སོགས་པའི་ལུང་ཕོག་ནས། རྨད་བྱུང་བསྟན་པའི་སྙིང་པོ་འདི། །ལྷ་གནས་གསུམ་དུ་གྲགས་གྱུར་ནས། །ཡང་སྤྲུལ་གང་ཟག་ཐུགས་སྲས་ཀྱིས། །འཛམ་གླིང་དབུས་སུ་རྒྱས་པར་ཤོག །ཅེས་ལུང་བསྟན་བསྟན་པ་གཏད་ཏོ། །ལྷའི་བུ་དེ་ཉིད་དགེ་སློང་མ་མེ་ཏོག་གསལ་ལས་ཕ་མེད་པར་རྩིབ་མའི་གོ་བར་ལས་བཙས་སྟེ་རྒྱལ་སྲིད་སྐྱོང་བ་ན་ཕྱག་ན་རྡོ་རྗེས་ཀློང་དགུ་བམ་པོ་ཉི་ཁྲི་དང་བཅས་པའི་རྒྱུད་མན་ངག་སྐད་ཅིག་གིས་ཁོང་དུ་ཆུད་པར་དབང་བསྐུར་ཞིང་བྱིན་གྱིས་བརླབས་སྟེ་རྫོགས་པ་ཆེན་པོའི་ས་ལ་སངས་རྒྱས་ནས་སྐལ་ལྡན་ལ་སྟོན་སྟེ། །དེའི་ཚེ་བྲམ་ཟེ་སྙིང་པོ་གྲུབ་པ་ཅེས་བྱ་བ་འཇམ་དཔལ་བཤེས་གཉེན་རྒྱལ་པོ་དྷ་ན་ཏཱ་ལ་དུ་པོ་རཱ་ཛཱ་ཏི་ཀ་(ཐ༢༦བ)

[Full Size]

སྲས་མོ་མེ་ཏོག་གསལ། ཀླུ་རྒྱལ་དགའ་པོ་མིའི་ལུས་གདོལ་པའི་རིགས་བཟུང་བ་ན་ག་ཙཱརྻ་དང་ལག་ན་རྡོ་རྗེའི་སྲས་མོ་གནོད་སྦྱིན་མོ་བྱང་ཆུབ་མ་རྣམས་ལ་ཆོས་བསྟན་པས་འཇམ་དཔལ་བཤེས་གཉེན་སྤངས་རྟོགས་མཐར་ཕྱིན་ལ་གཞན་རྣམས་སྔ་མ་སྔ་མས་ཕྱི་མ་ཕྱི་མའི་དོན་བྱས་སོ། །དེ་ནས་གཟུགས་ཚོང་མ་ས་ར་ནི། ཁ་ཆེའི་གནས་བརྟན་རབ་སྣང༌། ཨོ་ཌྱན་གྱི་དགེ་སློང་མ་ཧཱ་རཱ་ཛཱ། སྲས་མོ་གོ་མ་དེ་ཝི། ཨཱ་ཙཱརྻ་ཨཱ་ལོ་ཀ་ཀུ་ཀུ་རཱ་ཛཱ་སྔ་མ། དྲང་སྲོང་བ་ཤི། སྨད་ཚོང་མ་བདག་ཉིད་མ། ནཱ་གཱ་རྫཱུ་ན། ཀུ་ཀུ་རཱ་ཛཱ་ཕྱི་མ། འཇམ་དཔལ་བཤེས་གཉེན་ཕྱི་མ་དྲང་སྲོང་དེ་ཝ་རཱ་ཛཱ། བྷཱ་ཏི་ཀུ་ནཱ། ཤྲཱི་སིངྷ། དེ་ལ་བཱི་མ་ལ་མི་ཏྲ་དང་དགེ་སློང་མ་ཀུན་དགའ་མོ་སྟེ་རིམ་པར་རྗེས་སུ་བཟུང་བས་རྟོགས་པ་སྐྱེས་པ་ན་ཆེད་དུ་བརྗོད་པ་རེ་བྱས་སོ། །དགེ་སློང་མ་ཀུན་དགའ་མོས་མན་ངག་ཚིག་མང་པོས་བསླད་ནས་བཤད། རྩོད་པ་ཡང་བྱས་པས་འཇིག་རྟེན་ན་ནད་མུག་མཚོན་གསུམ་བྱུང་སྟེ་མཁས་པའི་པཎྜི་ཏ་མི་དགུས་པྲ་ལ་སོགས་པས་བརྟགས་པས་མན་ངག་སྣོད་མིན་ལ་འཕེལ་བས་ལན་པར་ཤེས་སྟེ་ལྷད་ཅན་རྣམས་བསྲེགས། རྒྱུད་མན་ངག་གཙང་མ་རྣམས་རྒྱལ་པོ་དང་པཎྜི་ཏའི་རྒྱ་གཉིས་ལྡན་བྱས་སྟེ་རྡོ་རྗེ་གདན་དུ་མི་དཔེལ་བར་ཁྲིམས་སུ་བཅས་སྟེ་བཞག་ཀུན་དགའ་མོ་བཀའི་ཆད་པས་ལུས་དོར་ནས་སེམས་ཕྱག་རྡོར་གྱི་ཐུགས་ཀར་ཐིམ་སྟེ་སྔགས་ཀྱི་ཆེ་བ་དབྱུང་བའི་ཆེད་ཏོ། །དེའི་ཚེ་རྒྱ་གར་གྱི་དགེ་སློང་ཨ་བ་དྷུ་ཏི་ཚེ་འཕོས་པ་བོད་ཀྱི་རྒྱལ་པོ་ཁྲི་སྲོང་ལྡེ་བཙན་དུ་གྱུར་སྟེ་བསྟན་པ་བཙུགས། སྔོན་གྱི་བག་ཆགས་ལས་རྒྱ་གར་ན་རྩོལ་མེད་ཀྱི་ཐེག་པ་ཡོད་པར་ཤེས་ནས་ལེན་པར་འདོད་དེ་སྤྲོ་བ་དྲིས་པ་ན་གཞན་མ་རྙེད་ནས། སྔོན་ཨོ་ཌྱན་དུ་རྒྱལ་པོ་པཱ་ལ་དེ་ཝ། ཁ་ཆེར་ཙནྡྲ་གི་ཏ། སིང་ངའི་ཡུལ་དུ་དགེ་སློང་ལེགས་པའི་བློ་གྲོས། དེ་ཚེ་མཁན་པོ་ལ་མ་(ཐ༢༧ན)

[Full Size]

གུས་པས་ཕྱི་མར་ཚ་བ་རོང་གི་ཕྱུགས་རྫི། དེ་ནས་ཨ་ཝ་དྷུ་ཏི། དེ་ནས་ཚ་བ་རོང་གི་དགེ་སློང་པུརྞ་ལས་བོད་དུ་སྐྱེས་པ་པ་གོར་བཻ་རོ་ཙ་ན་མཁྱེན་པ་ཆེ་ཞིང་རྫུ་འཕྲུལ་ཐོབ་པ་དེ་དང༌། ཚུལ་ཁྲིམས་སྲུང་ཕྱིར་རང་སྲོག་བཏང་བའི་དགེ་སློང་བྷ་ཧུ་རའི་སྐྱེ་བ་གཙང་ལེགས་གྲུབ་དང་གཉིས་རྒྱ་གར་དུ་ཆས་སྟེ་ཨཱརྻ་པ་ལོའི་གླིང་དུ་གནས་སྤགས་པས་བཻ་རོ་ལ་བུ་མོ་ཞིག་གིས་ཁོག་པ་དྲལ་ནས་སྙིང་གི་ཆུ་སེར་བཙིར་བ་དང༌། མི་སྙིང་ཉེར་གཅིག་ཟོས་པ་དང༌། མི་དཀར་པོ་ཅིག་གིས་སྤྱི་བོར་ཨ་ཅིག་བཞག་པས་ཨ་མེར་འབར་སྟེ་ལུས་ཚིག་པ་དང༌། བྱང་ཆུབ་ཀྱི་ཤིང་རྩ་བ་བཏོན་ནས་བོད་དུ་ཁྱེར་འོངས་པ་དང༌། ན་མཁའ་ནས་ཉི་ཟླ་གཉིས་ཤར་བ་ཟླ་བ་ན་མཁར་ནུབ་ཅིང་ཉི་མ་ཧས་པོ་རི་ལ་ཤར་སྟེ་ཡང་ནུབ་ནས་ཚ་བ་རོང་དུ་ཤར། ཡང་བོད་དུ་ཤར་བ་རྨིས་པས། སྒྲིབ་པ་དག་པ་དང༌། མཁས་པ་ཉེར་གཅིག་གི་དགོངས་པ་ལོན་པ་དང༌། རྣམ་སྨིན་གྱི་ལུས་འདག་པ་དང༌། མན་ངག་གི་ཆོས་ལོན་པ་དང༌། ལེགས་གྲུབ་སྔར་འདས་ཤིང་ཉིད་ཀྱང་ཚ་བ་རོང་དུ་སྤྱུག་པ་དང༌། སླར་བོད་ལ་ཕན་པར་ཤེས་སོ། །བཻ་རོ་ལ་ལམ་དུ་ཁང་པ་རྡིབ་པ། མཚོན་ཟུག་པ། མེ་ཆུ་དུག་སོགས་ཀྱི་གནོད་པ་སོགས་ཤི་ལ་ཐུག་པ་ལྔ་བཅུ་རྩ་བདུན་བྱུང་ཡང་མ་གནོད། གཅན་ཕྲེང་པས་གསོད་པར་བརྩམས་པ་རྫུ་འཕྲུལ་བསྟན་པས་ལྡོག །རྒྱ་གར་དུ་བཏོལ་སྟེ་གསེར་རྣམས་ས་ལ་སྦས་སྟེ་མན་ངག་གི་ཆོས་ལ་སུ་མཁས་ཐམས་ཅད་ལ་དྲིས་པས་སློབ་དཔོན་ཤྲཱི་སིངྷ་ཞེས་བྱ་བ་མཁས་པ་ཉེར་ལྔའི་ཐུགས་སྲས་པཎྜི་ཏ་སྟོང་གི་སློབ་དཔོན་འཇམ་དཔལ་དང་དངོས་སུ་མཇལ་བ་ཞིག་དྷ་ནེ་ཀོ་ཤའི་གནས་སེང་ལྡེང་བསིལ་བྱེད་ཀྱི་ཚལ་ཙནྡན་དྲི་ཞིམ་གྱི་ནགས་རིན་པོ་ཆེ་ཟ་མ་ཏོག་སྤུངས་པའི་ཁབ་བྱ་བར་བཞུགས་ཅེས་ཐོས་ནས་བཙལ་སྟེ་རྒྱལ་པོ་ཅིག་གིས་གཙུག་ལག་ཁང་དེ་འདི་ཡིན་སྟེ་འདི་ན་ཀེ་ཚང་ཆེན་པོ་དགུ་ལས་ཐོག་མ་ན་སྟོན་པ་དགའ་(ཐ༢༧བ)

[Full Size]

རབ་རྡོ་རྗེ་ཆོས་ཉིད་སྐྱེ་འགག་མེད་པའི་དངོས་གྲུབ་ཐོབ་པ་རིག་པ་ཀློང་དུ་ཤར་བའི་སྐྱེས་བུ་དེའི་སྤྱན་སྔར་མཁས་པ་དགོངས་རྒྱུད་རྣམ་པར་དག་པ་བཅུ་དྲུག་བཀའི་ལུང་ནོད་ཅིང་བཞུགས་པ་ལས་དགོངས་པ་ཀློང་དུ་གྱུར་སྟེ་སྨྲ་བསམ་ཚིག་ལས་འདས་པར་བཞུགས་སོ། །མཁས་པ་ཕྱི་མ་བདུན་ད་དུང་ཚིག་ལ་ཆགས་པས་ལ་མ་ཟློས་སྟེ་ཀེ་ཚང་གཉིས་པ་ན་བཞུགས་སོ། །གསུམ་པ་ནི་བཱི་མ་ལ་མི་ཏྲ་ལ་སོགས་པ་བཞུགས་སོ། །གནད་དེ་ན་བྲམ་ཟེ་མོ་རྒན་མོ་ཞིག་ཡོད་པ་ལ་དྲིས་ཅིག་ཞེས་བསྟན། བྲམ་ཟེ་མོ་ལ་དྲིས་པས་དེས་པྲ་སེ་ནས་མི་རྟོགས་པའི་ཐབས་བྱས་སྟེ་མན་ངག་གི་ཆོས་བོད་དུ་འཁྱེར་བའི་ལྟས་སུ་པཎྜི་ཏ་རྣམས་ཀྱི་རྨི་ལམ་ལོག་པ་བཤད་དེ་མན་ངག་འཐོབ་པར་ལུང་བསྟན། བྲམ་ཟེ་མོ་ཤེལ་གྱི་བློ་གྲོས་ཆུ་ལེན་དུ་འོང་བ་ལ་འཕྲིན་སྲིངས་ཅིག་པར་བསྟན་ཏོ། །འདི་ལྟར་ན་ནོར་བཟང་གི་རྣམ་ཐར་གྱི་ཚོང་དཔོན་རིན་ཆེན་གཙུག་ཕུད་ཀྱི་རྣམ་ཐར་གྱི་ཁང་བརྩེགས་བཅུའི་བཅུ་པ་ན་སངས་རྒྱས་རྣམས་ཆོས་བགྲོ་བ་དང་དགུ་པ་ནས་བཅུ་པ་པ་རྣམས་གནས་པ་སོགས་བཤད་པ་ལྟར་གནས་འདི་ཡང་དག་པའི་སྣང་བའི་གནས་ཕལ་པས་མཐོང་བར་མི་ནུས་པ་ཅིག་ཡིན་པར་སྣང་ལ་ཀེ་ཚང་ཞེས་པའང་ཁང་བརྩེགས་ཀྱི་འགྱུར་ཁྱད་དུ་སྣང་ངོ༌། །ཆུ་ཆུན་མ་ལ་འཕྲིན་དུ་མར་བསྲིངས་ཀྱང་མ་གྲུབ་པས་བཻ་རོ་ཙ་ནས་ལྟ་སྟངས་ཀྱིས་ཆུ་བུམ་ས་ལ་སྦྱར་བས་འཁུར་མ་ནུས་ནས་ཁྱོད་ཀྱང་རྫུ་འཕྲུལ་དང་ལྡན་པར་གདའ་སྟེ་བདག་ལའང་འདི་ལྟ་བུ་ཡོད་ཟེར་ནས་མོས་རང་གི་བྱང་ཁོག་ཕྱེ་བས་རྡོ་རྗེ་དབྱིངས་ཀྱི་ལྷ་སོ་བདུན་བཀྲ་ལམ་མེ་བསྟན། ཐབས་ཀྱིས་ནང་དུ་བཏོལ་བར་གྱིས་ལ་བཱི་མ་ལ་ལ་སོགས་པའི་མཁས་པ་རྣམས་བཞུགས་པ་ལ་ཕྱག་གིས་བརྡ་འདི་བསྟན་པ་ལ་ལན་འདི་གྱིས་བསླབས། སྐབས་བཙལ་ནས་སྒོའི་གསེང་ཅིག་ལ་ནང་དུ་བཏོལ་སྟེ་ཕྱག་བྱས། (ཐ༢༨ན)

[Full Size]

བརྡ་ལན་གྱིས་མཉེས། ནང་པར་ཤྲཱི་སིངྷ་ལ་ཤོག་འཕྲིན་ཕུལ་བས་མཇལ་སྟེ་གསེར་དཔག་མེད་ཕུལ། རྩོལ་མེད་ཀྱི་ཐེག་པ་སྟོན་པར་ཞུས་པས་དོ་ནུབ་ཚད་མ་བརྟག་གི་གསུངས་ནས་ནང་བར། མཚན་མ་བཟང་བོད་ལ་ཕན་ཐོགས་ངེས། དེ་ཡང་སྒྲོན་བསྐལ་མུན་བསྐལ་གྲངས་མེད་འདས་པའི་སྔོན་དུ་བསྐལ་པ་དགའ་བ་ལ་སངས་རྒྱས་སྟོང་ཕྲག་དྲུག་བཅུ་བྱུང་བའི་མཐའ་མ་མངོན་རྫོགས་རྒྱལ་པོས་མན་ངག་རྣམས་ཐུགས་ཀྱི་སྲས་བདུན་ལ་གཏད་པས་དེ་དག་རིམ་པར་སངས་རྒྱས། དེ་ནས་མུན་བསྐལ་ལྔ་བརྒྱའི་འོག་དུ་བསྐལ་པ་འདི་ལ་སངས་རྒྱས་སྟོང་འབྱུང་བའི་ཤཱཀྱའི་བསྟན་པ་ལ་རྒྱུ་འབྲས་ལ་ཟློ་བའི་ཐེག་པ་འདི་འབྱུང་སྟེ་དང་པོ་རྒྱ་གར་དུ་དར་ནས་ཨོ་ཌྱན་གྱི་ཡུལ་དུ་འཁོར་བ་ལན་གསུམ་སྟོངས་པར་བྱེད། དེ་ནས་གསང་བ་དམ་པ་འདི། །མཐའ་འཁོབ་ཡུལ་དུ་རྒྱས་པར་འགྱུར། །ཞེས་ས་བརྒྱད་པའི་བྱང་སེམས་གཅིག་གིས་བླངས་སྟེ་མཐའ་འཁོབ་རྒྱལ་པོ་སྤྱན་རས་གཟིགས་ཀྱི་སྤྲུལ་པ་ལ་སྟོན། དེར་གཞན་འདུལ་བའི་དུས་ལ་མ་བབ་སྟེ་ཚ་བའི་ཡུལ་དུ་ས་བདུན་པའི་བྱང་སེམས་ལྐོག་མ་ན་རྨེ་བ་ཡོད་པ་ཅིག་དང་རང་རྒྱལ་གྱི་སྤྲུལ་པ་ཅིག་ལ་སྟོན། དེས་ས་བདུན་པའི་བྱང་སེམས་ཅིག་ལ་སྟོན། དེ་ནས་རིམ་པར་ས་ལྔ་པ་དང་བརྒྱད་པ་དང་བདུན་པ་དང་གསུམ་པ་པ་དང༌། དེ་ནས་བརྒྱད་པ་དང་བདུན་པ་པ་དཔེལ་བ་བདུན་རྒྱུད་ལ་བསྟན་ནས་གྲུབ་པ་འཐོབ་པར་འགྱུར་ལ། དེ་ནས་ས་བརྒྱད་པ་པ་ཅིག་ལ་བསྟེན་སྟེ་དེས་ཐུན་མོང་དང་ཐུན་མོང་མ་ཡིན་པའི་ཚོགས་ལ་བསྟན་སྟེ་ལ་ལས་ནི་གོ་ལ་ལས་ནི་མ་གོ་ལ་ལ་ཉམས་ལ་ལ་གྲོལ་ཞིང་བཀའ་ཉམས་ནས་གླེགས་བམ་མང་པོ་བྲིས་སྟེ་སྣོད་མིན་གྱི་ལག་དུ་འགྲིམས་ནས་དེས་མན་ངག་ཉམས་ལྷ་སྲིན་རྣམས་འཁྲུགས་སྟེ་བསྐལ་པ་ཕྲ་མོ་འཇིག་གོ །མན་ངག་འདི་དང་ཕྲད་པའི་སྐྱེས་བུས་བླ་མ་སངས་(ཐ༢༨བ)

[Full Size]

རྒྱས་ཉིད་དུ་མཐོང་བར་བྱས་སྟེ་གསངས་སྟེ་སྤྱད་ན་མྱ་ངན་ལས་འདའོ། །བསྐལ་པ་འདིའི་འོག་དུ་མུན་པའི་བསྐལ་པ་ལྔ་བརྒྱ་འབྱུང༌། དེ་ནས་སྒྲོན་མེའི་བསྐལ་པ་བཟང་ལྡན་བྱ་བ་ལ་གསང་བའི་སྣོད་ལྡན་གྱི་གང་ཟག་མོས་པའི་རྡོ་རྗེ། སྟོབས་ཀྱི་རྡོ་རྗེ། ཤུགས་འཆང་བའི་རྡོ་རྗེ། རྡོ་རྗེ་རྒྱལ་མཚན་ཞེས་བྱ་བ་དང་བཞིས་གྲུབ་པར་འགྱུར་རོ། །དེས་ན་དུས་ལ་བབ་པས་ན་ཁྱེད་ལ་བསྐུར་བར་བྱ་སྟེ་བསྐུར་ཐབས་མ་ལེགས་ན་འུ་ཅག་གསུམ་གའི་སྲོག་ལ་འོང༌། ཡུལ་འདིར་ཡང་གང་དགར་སྤྱད་དུ་མེད་དེ་རྒྱལ་པོས་ཚོར་ན་མན་ངག་རང་ཡང་མེད་པར་བྱེད་པས་ཁྱེད་གཉིས་ཆོས་གཞན་ཉན་པ་ལྟར་གྱིས་ལ་པཎྜི་ཏ་བརྒྱད་ལ་གསེར་ཕུལ་ལ་རྒྱུ་འབྲས་ཀྱི་ཆོས་ཉོན་ཞིག་མཚན་མོ་མན་ངག་གི་ཆོས་བསྟན་གྱི་གསུངས་སྟེ་དེ་ལྟར་བྱས། མཚན་མོ་པྲ་སེ་ནས་མི་ཟིན་པའི་ཐབས་བྱས་སྟེ་མན་ངག་བཤད་ཅིང་དར་དཀར་ལ་ར་དཀར་མོའི་འོ་མས་བྲིས་སྟེ་དུད་པས་བདུགས་ན་ཡི་གེ་གསལ་བ་བྱས། རྫུ་འཕྲུལ་དང་འཕྲུལ་ཐབས་ཀྱིས་མན་ངག་གི་དཔེ་བམ་པོ་བརྒྱ་དང་ལྔ་བཅུ་རྩ་བཞི་ཕྱུང་བའི་ཚེ་གཙང་རིས་ཀྱི་མགོན་པོ་སུམ་བརྒྱ་དྲུག་བཅུ་དང་སྔགས་ཕྱི་ནང་གི་སྲུང་མ་ཐམས་ཅད་ལྷགས་སྟེ་ཕྱག་དང་སྐོར་བ་བྱས་ནས་བདག་ཅག་ཆོས་སྲུང་རྣམས་ནི་བཀའ་འདི་རྣམས་ཀྱི་རྗེས་སུ་མཆིའོ་ཁྱད་པར་མན་ངག་སྙན་རྒྱུད་ཀྱི་རྗེས་སུ་མཆིའོ་རབ་ཏུ་ཡང་མཆིའོ། །སྣོད་དང་མི་ལྡན་པ་ཐོབ་ལོ་ཤེས་ལོ་མཁས་ལོ་བཙུན་ལོ་ཉན་ལོ་ཐོས་ལོ་སྒོམ་ལོ་སྒྲུབ་ལོ་ཙམ་གྱིས་ཆོག་པ། དད་པ་གཏིང་ནས་མེད་པ། ཞེན་པ་མ་ལོག་འཛིན་ཆགས་མ་ཁྲོལ་བ། ཆོས་དང་འབུལ་བ་ལ་ཕམ་རྒྱལ་རྩི་བའི་མི་ལག་འགྲིམས་ཙ་ན་དམ་ཉམས་སུ་སོང་བ་ཡིན་པས་དེ་ཙ་ན་བདག་ཅག་རྣམས་མི་དགའ་ཤིན་དུ་རབ་ཏུ་ཡང་མ་དགའ་སྟེ་བདག་ཅག་(ཐ༢༩ན)

[Full Size]

ལ་ལ་ནི་ཕ་མ་བསད་པ་སྙམ་བྱེད། ལ་ལ་ནི་བུ་གཅིག་སྟོར་བ་སྙམ་བྱེད། དཔྲལ་བའི་མིག་ཕྱུང་བ་སྙམ་ཁོང་གི་སྙིང་ཕྱུང་བ་སྙམ་ནོར་བུ་རིན་པོ་ཆེ་སྟོར་བ་སྙམ་བྱེད་དེ་དེའི་ཚེ་ནད་དང་མུ་གེ་དང་འཁྲུག་པ་དང་ས་གཡོས་དང་རླུང་ནག་དང་བུ་ཡུག་དང་མི་ཤིས་པ་སྣ་ཚོགས་པ་འོང༌། ན་རག་ཆེན་པོ་ཡང་ཡོངས་སུ་འཕེལ། སློབ་དཔོན་ཡང་ཚེ་ཐུང་ནད་མང༌། སློབ་མ་རྣམས་ཕོངས་ཤིང་དུག་དང་གྲིར་འཆི། ཆོས་པ་རྣམས་མཐུ་ཆུང༌། བོན་དང་མུ་སྟེགས་དང་སྲིན་པོ་བདུད་དུ་ལྡང༌། དེའི་ཚེ་ལ་ལས་མན་ངག་འདི་རྣམས་སྲེག །ལ་ལས་རུལ་དུ་འཛུད། ལ་ལས་ནི་འཚོང༌། ལ་ལས་ནི་བསྲེས་ཅིང་བསླད་དེ། དེ་ལ་བསྟེན་ནས་འདི་འཆད་ཅིང་ཐུགས་ལ་འཆང་བ་རྣམས་སངས་རྒྱས་ཀྱི་ངོ་བོ་ཉིད་ཡིན་ཀྱང་དེ་ལ་ལ་ལས་སྐུར་པ་འདེབས། ལ་ལས་སྨོད། ལ་ལས་སུན་འབྱིན། རྐྱེན་དེས་སངས་རྒྱས་ཀྱི་བསྟན་པ་འཇིག་པར་འགྱུར་རོ། །དེས་ན་ཤིན་དུ་གསང་བར་སྦོས་ཅིག །ཤིན་ཏུ་གསངས་ལ་སྤྱོད་ཅིག །ཤིན་ཏུ་གསང་བས་ཆོངས་ཅིག་གསང་བར་ཡིད་ལ་གྱིས་ཅིག་ཅེས་མགྲིན་གཅིག་དུ་བསྒྲགས་ནས་མི་སྣང་བར་གྱུར་ཏོ། །དེ་ཡང་རེས་ནགས་ཚལ་གྱི་དབུས། རེས་རི་བོའི་རྩེ། རེས་ནམ་མཁའི་མཐོངས། རེས་རྒྱ་མཚོའི་ནང་དུ་བཤད་དེ་ཐོག་མར་བོད་དུ་མན་ངག་འབྱུང་བའི་རྟགས་སུ་རིག་པའི་ཁུ་བྱུག །ཚང་ཞིང་རྫོགས་པའི་རྟགས་སུ་རྩལ་ཆེན་སྤྲུགས་པ། དེ་བཞིན་དུ་བསམ་གཏན་སྟོན་པ་ཐིག་ལེ་དྲུག་པ། ཐེག་པ་ཐམས་ཅད་ཀྱི་ལྟ་སྐྱོང་ཁོངས་སུ་ཆུད་པ་ཁྱུང་ཆེན་ཐེག་པ། ཐམས་ཅད་ལས་ཁྱད་འདོན་པ་མི་ནུབ་རྒྱལ་མཚན་སྟེ་ཆེ་བ་ལྔ། གྲུབ་མཐའ་ཐམས་ཅད་འདུས་པ་ཡིད་བཞིན་ནོར་བུ། ཆོས་དང་གང་(ཐ༢༩བ)

[Full Size]

ཟག་གི་ཆེ་བ་དབྱུང་བ་ཆེ་བཙན་དམ་པ། ཐེག་པ་གོང་འོག་གི་སྐྱོན་ཡོན་འབྱེད་པ་སྤྱི་སྦྱོང་རྒྱལ་པོ་ཤེས་རབ་གསུམ་ལ་བསྟེན་པ་ཀུན་འདུས་རིག་པ་སྟེ་ཆུང་བ་བཞི། གདམས་པ་ལ་རགས་པར་སྟོན་པ་བདེ་འབྱམས། འབྲས་བུ་སྐུ་གསུང་ཐུགས་སྟོན་པ་སྲོག་གི་འཁོར་ལོ། དཔེ་དོན་རྟགས་གསུམ་སྟོན་པ་སེམས་ཏི་ཀྲ་དང་ན་མཁའ་རྒྱལ་པོ་སྟེ་འབྲིང་བཞི། དྲང་ངེས་དབྱེ་བ་བདེ་བ་ཕྲ་བཀོད། ཐེག་པའི་ཤན་འབྱེད་པ་སྤྱི་ཆིངས་རིགས་པ་དང་མི་འགལ་བ་རྡོ་ལ་གསེར་ཞུན། སྤྱོད་པ་དང་དམ་ཚིག་སྟོན་པ་རྩེ་མོ་བྱུང་རྒྱལ་སྟེ་ཆེ་བའི་ཕྱོགས་བཞི། འཆལ་པ་ཚར་གཅོད་པ་རྨད་བྱུང་བཤད་དེ་སེམས་སྡེ་བཅོ་བརྒྱད་ཏོ། །དེའི་ཚེ་བཻ་རོས་སངས་རྒྱས་རྣམ་པར་སྣང་མཛད་ཀྱི་ཞལ་མཐོང་ཆོས་ཐོས་སྟེ་བཻ་རོ་ཙ་ནར་མིང་བཏགས་སོ། །སྤྱིར་སད་མི་བདུན་རབ་ཏུ་བྱུང་ཚེ་བཻ་རོ་ཙ་ན་རཀྵི་ཏ་ཅེས་རྣམ་སྣང་སྲུང་བའམ་རྣམ་སྣང་འཚོར་མིང་བརྗེས་པ་ཡིན་ཀྱང་སླར་ཡང་རྣམ་པར་སྣང་མཛད་ཉིད་དུ་བཏགས་པའོ། །དེས་ལེགས་གྲུབ་ཚིམ་སྟེ་རྒྱལ་པོ་ལ་ངོ་སོ་འདོད་པས་བོད་དུ་སོང་བ་གཅན་འཕྲང་བས་བསད་ཏོ། །བཻ་རོ་ཙ་ན་མ་ཚིམ་སྟེ་ཡིད་མི་བདེ་བར་འདུག་པ་ན་བླ་མས་ཁྱོད་ནའམ་གསུངས་སྟེ། མཐོང་སྟེ་མ་ཕྲད་རང་སེམས་ན། །མྱངས་སྟེ་མ་ཚིམ་རང་སེམས་ན། །ནད་གཞིལ་སེམས་སྡེ་བཅོ་བརྒྱད་པོས། །གདེང་མ་རྙེད་པར་འདོད་པ་རྙེད། །མཐར་ཕྱིན་གྱི་སྨན་ཞིག་ང་གཏོང་འཚལ། །ཞུས་པས། ངས་ཐམས་ཅད་བསྟན་ཟིན་ན་ཁྱོད་ཅི་ལ་བརྡུགས་གསུང་བ་ན། ལྟ་བ་ཕྱོགས་རིས་མེད་པ་དེ། །ལས་དང་རྟོག་པའི་འཕྲང་ལ་བརྡུགས། །སྤྱོད་པ་བླང་དོར་མེད་པ་དེ། །འདོད་རྩོལ་གཉིས་ཀྱི་འཕྲང་ལ་བརྡུགས། །ལམ་ལ་སྒྲོད་དུ་མེད་པ་དེ། །(ཐ༣༠ན)

[Full Size]

ལུང་དང་རིགས་པའི་འཕྲང་ལ་བརྡུགས། །རང་བྱུང་ཡེ་ཤེས་ཆེན་པོ་དེ། །བག་ཆགས་སྟུག་པོའི་འཕྲང་ལ་བརྡུགས། །དུས་གསུམ་སངས་རྒྱས་དགོངས་པ་དེ། །བྱིང་རྒོད་གཉིས་ཀྱི་འཕྲང་ལ་བརྡུགས། །འབྲས་བུ་སྐུ་གསུམ་ལྷུན་གྲུབ་དེ། །བརྡ་དོན་ཕྲད་པའི་འཕྲང་ལ་བརྡུགས། །རྫོགས་ཆེན་བྱ་བྲལ་ལྷུན་གྲུབ་དེ། །བརྡ་དོན་དབྲལ་བའི་འཕྲང་ལ་བརྡུགས། །སངས་རྒྱས་སྤྱོད་ཡུལ་རང་དབང་དེ། །སྤྱི་བླུགས་ཚངས་པའི་དབང་ལ་བརྡུགས། །ཆ་ལ་སེམས་སྡེ་བཅོ་བརྒྱད་པོས། །འཕྲང་བརྒྱད་སྐྱེལ་མ་མ་ཤོགས་པས། །བདག་རང་བཻ་རོ་ཙ་ན་ཡང༌། །ཡུལ་དུ་འགྲོ་བ་འཕྲང་ལ་བརྡུགས། །ཞུས་པས་སློབ་དཔོན་གྱིས་ཀྱང་ཁྱད་པར་བ་སྟོན་པར་དགོངས། པཎ་ཆེན་རྣམས་ཀྱི་རྨི་ལམ་གཉིས་པ་ལོག་སྟེ་ཆུ་ཐམས་ཅད་བོད་དུ་བབ་པ་དང་རྩི་ཤིང་ཐམས་ཅད་བོད་དུ་སོང་བ་སོགས་རྨིས། རྒྱུད་སྡེ་དྲུག་བཅུ་དང་དབང་མན་ངག་གནང༌། ཁྱད་པར་དུ་འབྲས་བུ་རང་ཆས་སུ་སྟོན་པ་རྒྱ་མཚོའི་ཀློང་བསྟན་པས་རྟོགས་པའི་མཐར་ཕྱིན་ཀྱང་སྒྲོ་འདོགས་གཅོད་པའི་ཕྱིར། སྐུ་གསུམ་སྟོན་པ་མཆོག་གི་སྲས། །ཐམས་ཅད་མཁྱེན་པ་བདག་གི་ཕ། །བློ་ཡི་རེ་དྭོགས་བཅད་པའི་ཕྱིར། །དབུ་སྨྱུང་བཞེས་པའི་ཆོས་ཅིག་ཞུ། །བྱས་པས། ཆོས་ཀྱི་དབྱིངས་ལ་ཟད་མེད་ཀྱང༌། །དེ་བཞིན་ཉིད་ནི་གཅིག་ཤེས་ན། །མ་ལུས་དེ་ལ་ཡོངས་སུ་རྫོགས། །དེ་ལས་ཡོད་ན་སིདྡྷི་ཀན། །གསུང་ངོ༌། །དེ་ནས་བླ་མའི་ཞལ་ནས་གདམས་པ་འདི་ལ་བཙའ་ལུགས་གསུམ་བྱིན་པ་བཞིན་མི་སྦྱིན་པ་བཞི་ཡོད་སྟེ་འཁོར་འདས་ཐམས་ཅད་གསལ་བར་བྱེད་པའི་ཕྱིར་མིག་འབྲས་ལྟར་བཙའ། ཐེག་པ་ཀུན་གྱི་བཅུད་ཡིན་པས་ཁོང་སྙིང་ལྟར་བཙའ། (ཐ༣༠བ)

[Full Size]

ཆོས་ཀུན་གྱི་རྩ་བ་ཡིན་པས་སྲོག་ལྟར་བཙའོ། །དད་ལྡན་འཇམ་རིང་ཡུན་བརྟེན་ལ། །དཔེ་དང་འགྲེལ་ཊཱིཀ྄་མན་ངག་རྣམས། །གྲངས་བཏབ་བསྡེབས་སྟེ་བྱིན་པར་བྱ། །དཔུང་བཟང་ཡུན་རིང་སྣོད་ལྡན་ལ། སྦ་སྲི་མེད་པར་ཚང་བར་བྱིན། །དད་པ་ཅན་ལ་མི་ཞུ་ཡང༌། །ནན་གྱིས་བྱིན་ཞིང་གཏད་གཉེར་བྱ། །དད་ཅན་ཤེས་རབ་ཆུང་བ་ལ། །ཡིད་དང་སྦྱར་ལ་བྱིན་པར་བྱ། །ཁོང་ཁྲོ་ཆེ་ཞིང་དད་མེད་ལ། །ཚིག་འགས་བྲིད་ལ་མི་སྦྱིན་བསྐྲད། །དད་བརྩོན་ཤེས་ཆུང་ཚིག་ལ་དགའ། །བཤད་རིངས་དཔེ་འགྲེལ་འདོད་པ་ལ། །ཕྱོགས་ཙམ་གྱིས་བྲིད་མི་སྦྱིན་བསྐྲད། །མི་སྒོམ་ཡི་གེར་བྲི་རིངས་ལ། །ཆོས་གཞན་གྱིས་བྲིད་མི་སྦྱིན་བསྐྲད། །ནོར་ཕྱིར་ཆོས་འཚོལ་དད་མེད་རིགས། །དང་པོ་ཉིད་ནས་བརྟགས་སྟེ་སྤང༌། །འོན་ཀྱང་བོད་ཀྱི་རྒྱལ་པོ་ལ་སྟོན་ཅིག་གསུངས་ནས་རྗེས་སུ་གནང༌། དགའ་རབ་རྡོ་རྗེ་དང་མཇལ་བར་ལུང་བསྟན་ནས་བཙལ་བས་མཁའ་འགྲོས་ཨོ་ཌྱན་དུ་སོང་ཞིག་པར་ལུང་བསྟན་སྟེ་ཨོ་ཌྱན་གྱི་དུར་ཁྲོད་དུ་འོད་ཀྱི་ཁྱེ་ཆུང་དུ་བཞུགས་པ་དང་མཇལ། རྫོགས་པ་ཆེན་པོའི་རྒྱུད་འབུམ་ཕྲག་བཅུ་བཞི་བསྟན་སྟེ་ན་མཁའ་ལ་འོད་དུ་ཡལ། སླར་ཤྲཱི་སིངྷའི་དྲུང་དུ་འོངས་པས་སློབ་དཔོན་གྱི་ཞལ་ནས། རང་སེམས་ཡེ་ཤེས་རྡོ་རྗེ་འདི། །ཡོད་མེད་དབུས་སུའང་མི་དམིགས་ཤིང༌། །རྟག་ཆད་མཐའ་ལ་མི་གནས་པ། །སྒྲོ་སྐུར་མེད་པའི་ཆོས་ཉིད་ལ། །བླང་དོར་མེད་པར་བློ་བཞག་སྟེ། །འདི་ཞེས་སྒོམ་པའི་འདུ་ཤེས་བྲལ། །དེ་ནི་དགོངས་པའི་མཐར་ཐུག་གོ །སེམས་ནི་སངས་རྒྱས་ཀུན་གྱི་དངོས། །སེམས་ཀྱིས་སེམས་ལ་ལྟ་བ་ན། །སེམས་ཀྱི་སྐྱོན་དང་གོ་ས་བརྟག །དེ་ནས་ཉམས་དང་དྲོད་ཚད་སྐྱེ། །རང་སྣང་དཀྱིལ་འཁོར་རང་ལ་འཆར། །(ཐ༣༡ན)

[Full Size]

སེམས་ནི་ཁ་དོག་ཅིར་མི་དམིགས། །དབྱིབས་ཀྱི་རྣམ་པ་གང་ཡང་མེད། །སེམས་ནི་རྒྱུད་ལས་མ་སྐྱེས་སྟེ། །རྐྱེན་གྱིས་རྣམ་པར་འཇིག་པ་མེད། །ཐོག་མར་མ་བྱུང་མཐར་མི་འགྲོ། །དུས་གསུམ་ཀུན་དུ་སྟོང་ཞིང་དབེན། །འདི་འདྲ་ཞེས་སུ་བསྟན་དུ་མེད། །བདག་གཞན་གཟུང་འཛིན་བཏང་སྙོམས་དང༌། །རྒྱུ་རྐྱེན་གང་གིའང་སྤྱོད་ཡུལ་མིན། །བྱིང་རྒོད་གཉིས་པོ་འདི་ལ་མེད། །ཇི་བཞིན་པ་ཡི་ངང་དུ་ཞོག །ཡིག་འབྲུ་ཕྱག་མཚན་སྐུར་མི་དམིགས། །སྒྲ་དང་ཚིག་ལས་འདས་པར་བསྒོམ། །སྙམ་བྱེད་བློའམ་འཇིགས་པའི་བློ། །ཀུན་ལ་རེ་དྭོགས་མེད་པར་བཞག །ཅིར་ཡང་རྟོག་པར་མི་བྱའོ། །སྟོང་པའི་ངང་ལས་མ་གཡོས་ན། །དབུགས་ཀྱི་རྒྱུ་བ་མི་ཚོར་ཞིང༌། །ཕུང་པོ་ཡོད་པར་མི་མངོན་སྟེ། །ན་མཁའ་སྟོང་པའི་ངང་ཉིད་ལས། །རིག་པ་ཡེ་ཤེས་ཤར་བའི་དྲོད། །སྐར་མའི་འོད་འདྲ་ཀློག་འབྱུང་འདྲ། །ཉི་མ་ཤར་བའི་འོད་འདྲར་གསལ། །གཅིག་གོ་ཀུན་རྫོགས་མན་ངག་ཡིན། །ཞེས་གནད་ཀྱི་ཞལ་ཆེམས་ཐུགས་ཀྱི་མཛོད་བཏོལ་སྟེ་རླུང་གིས་ཀྱང་ཐོས་སུ་མི་རུང་བར་མཛད་ནས་བཻ་རོ་ཉིད་ལ་གདམས་སྟེ་སློབ་དཔོན་འོད་དུ་ཡལ་བའི་ཚེ་རྐང་མགྱོགས་གྲུབ་པའི་མཆོག་ཀུ་མ་ར་དང་ཀུ་ཧ་ར་དྷཱ་ཏུ་བྱ་བ་གཉིས་ཡོད་པ་ལས་བཻ་རོས་ཀུ་མ་ར་དང་གྲོགས་པོར་བྱས་གསེར་བྱིན་ནས་རྐང་མགྱོགས་བསླབས་པས་གཏན་གྱི་རྐང་མགྱོགས་ཕས་བུ་ལ་ཡང་མི་སྟེར་བས་བོད་དུ་མ་སླེབས་བར་གྱི་རྐང་མགྱོགས་བྱིན་ནོ་ཟེར་ནས་ཅུང་ཟད་བྱིན་སྟེ་རེ་མ་ཏིའི་རྐང་མགྱོགས་བསྒྲུབས་པས་སྤྱིར་གླག་གཟན་ལ་འཇུམས་པ་ལྟར་མགྱོགས་པ་ཡོད་ཀྱང་གོ་བོ་རི་རྩིབས་གཅོད་པ་བཻ་རོས་གྲུབ། རྐྱང་མགྱོགས་ཀྱི་གཙོ་བོ་གཅིག་ཤོས་ལ་ཡང་རྔན་པ་བཅུག་སྟེ་བོད་མི་མ་མཐོང་གནོད་སྦྱིན་ཤ་བའི་རུ་ཅན་སོང་ངོ་བར་སྒྲོགས་སུ་(ཐ༣༡བ)

[Full Size]

བཅུག་སྟེ་ཆས་དེ་ལྟ་བུར་ཞུགས་སྟེ་བྱོན། ལམ་དུ་ཡང་སྐལ་ལྡན་འགའི་དོན་མཛད། བོད་ཏུ་མྱུར་བར་ཕེབས་སྟེ་རྒྱལ་པོས་ཞབས་མཐིལ་གཙུག་དུ་བླངས་པས་རྒྱལ་པོ་ལ་ཉིན་མོ་རྒྱུ་འབྲས་ཀྱི་ཆོས་དང་མཚན་མོ་རྫོགས་པ་རྩོལ་མེད་ཀྱི་ཐེག་པ་བསྟན། བཻ་རོ་བོད་དུ་ཞལ་ཕྱོགས་ནས་བྱོན་པའི་ནུབ་ནས་བཟུང་སྟེ་རྒྱ་གར་བའི་རྨི་ལྟས་གསུམ་པ་ལོག་པས་མན་ངག་གི་ཆོས་བོད་ཏུ་ཤོར་བར་ཤེས་སྟེ་རྡོ་རྗེ་གདན་དུ་བལྟས་པ་ན་རྒྱ་རུ་སྤོད་ཞིག་ཞིང་ཆོས་མ་ཚང་བར་ཤེས་པས་རྒྱལ་པོ་དང་པཎྜི་ཏ་གཅིག་ལ་གཅིག་ཡིད་མ་ཆེས་སྟེ་རྒྱལ་པོས་པཎྜི་ཏ་རྣམས་ལ་གསངས་ནས་རྡོ་རྗེ་གདན་ནམ་ཨ་སུ་ར་གསང་བའི་བྲག་ཕུག་གམ་བྱ་རྒོད་ཕུང་པོར་སྦས་སམ་ཡང་ཟེར་སྟེ་མི་སྣང་བར་བྱས། བོད་ཐེ་ཚོམ་སྐྱེད་ཕྱིར་ཕྲ་མེན་གྱི་ངག་སྔགས་ཁྱེར་སོང་བས་བོད་མི་བརླག་པའི་ཐབས་གྱིས་ཞེས་རྐང་མགྱོགས་པ་བཏང་སྟེ་རུ་བཞི་ཐམས་ཅད་ཏུ་བསྒྲགས་པས་བོད་བློན་རྣམས་ཀྱིས་གཅུགས་ལ་ཉན་སྟེ་འདི་མི་གསོད་ན་རྒྱལ་ཁྲིམས་བཤིག་པར་བགྲོས་སྟེ་རྒྱལ་པོ་ལ་གསོལ་བ་བཏབ། བཙུན་མོ་ཚེ་སྤོང་བཟས་ཀྱང་བཻ་རོ་ཙ་ན་སླུ་བར་མ་ཚུགས་པའི་སེམས་ནད་བྱས་སྟེ་བློན་པོ་རྣམས་བསླད། རྒྱལ་པོ་ལ་ནན་གྱིས་ཞུས་པ་ན་ཐབས་མ་རྙེད་ནས་བསད་པར་ཞལ་གྱིས་བཞེས་སྟེ་སྤྲང་པོ་ཅིག་ལ་བཻ་རོའི་ཆས་བཅོས་ནས་མི་རྣམས་ཀྱིས་མ་སླེབས་ཙམ་ལ་ཟངས་སུ་བཅུག་སྟེ་ཆུར་བསྐུར། གདན་ཁྲིའི་འོག་དུ་གནམ་སྒོ་སྔོ་ཐེམ་ཅན་ལས་བབས་པར་བཻ་རོ་བཞུགས་སྟེ་རྒྱལ་པོས་ནམ་ཕྱེད་ན་ཆོས་ཉན་པ་ལས་ནང་འཁོར་བ་ཞིག་གིས་མཐོང༌། དེ་ནས་རྒྱལ་པོའི་གདུགས་ཁང་བྱ་བའི་ཕྱིར་ཀ་བ་ཁོང་སྟོང་སྒོ་ཅན་དུ་བྱས་པར་སློབ་དཔོན་བཞུགས་ན་བཙུན་མོས་ཤེས་སྟེ་བློན་པོ་རྣམས་ལ་བསྙད་དེ་བོད་འབངས་སྤྱིས་ནན་གྱིས་གསོལ་བས་ཐབས་མ་རྙེད་དེ་སྤྱུག་པར་ཞལ་གྱིས་བཞེས། སློབ་དཔོན་གྱིས་ཀྱང་ཚ་བ་རོང་དུ་སྔོན་གྱི་(ཐ༣༢ན)

[Full Size]

ལས་འབྲེལ་ཞིག་ཡོད་པས་དེར་འགྲོའོ་གསུངས་ནས་རྒྱལ་བློན་ཐམས་ཅད་ཀྱིས་བསྐྱལ། དཀའ་བ་བཅོ་བརྒྱད་ལ་སོགས་པའི་མགུར་མང་པོ་མཛད་དེ་གཤེགས། རྒྱལ་མོ་རོང་པའི་ཡུལ་མི་རྣམས་ཀྱིས་བོད་ཀྱི་རྟོག་ཆེན་པར་དྭོགས་ནས་སྦལ་དོང་དུ་ཞག་བདུན་དང་ཤིག་སྣ་ཚོགས་པའི་དོང་དུ་ཞག་བདུན་བསྐྱུར། སྐྱེ་བ་མང་པོའི་གོང་དུ་ཡུལ་དེའི་ནེ་ལེར་གྱུར་ཚེ་སྦལ་པ་བཟོས་པ་དང༌། ཡུལ་དེར་དགེ་སློང་ཞིག་དུ་གྱུར་ཚེ་ཤིག་དོར་བ་བྱས་ཟོས་པའི་རྣམ་སྨིན་གྱི་མཐའ་མར་ཞལ་གྱིས་བཞེས་སྟེ་དགེ་སློང་པུརྞའི་སྔོན་གནས་དྲན་པ་གསུངས་པས་གྲུ་དང་མདོ་གཞེར་ལ་སོགས་པ་རྒྱལ་བློན་རྣམས་ཀྱིས་རྒྱལ་པོའི་མེས་སུ་གཏོགས་པའི་དགེ་སློང་པུརྞ་ཡིན་པར་ཤེས་ནས་བཤགས་པ་དང་བཀུར་སྟི་བྱས། ཐུགས་མི་བདེ་བ་ལྟར་མཛད་པའི་རྒྱུ་དྲིས་པས་ང་སྤྱུགས་པའི་རྐྱེན་གྱིས་རྒྱལ་པོ་ཁྲི་སྲོང་ལྡེ་བཙན་འདི་ཙམ་ན་འགྲོངས་པར་འདུག་པས་དེས་མི་དགའ་གསུངས་སྟེ་འདི་ལ་ཟླ་བ་གསུམ་དང་དྲུག་དང་ལོ་གསུམ་དང་ལོ་སྐོར་གཅིག་ཟེར་བ་སོགས་ཡི་གེ་མི་འདྲ་བ་སྣ་ཚོགས་འདུག །འོན་ཡང་རྒྱལ་པོ་དེའི་སྲས་གཡུ་སྒྲ་སྙིང་པོ་མ་དད་ནས་བུ་གཅིག་ཤི་བའི་ཕ་མ་དང་རྒན་རྒོན་འཆིར་གཏུགས་པ་དང་སྐྱེས་པ་བུད་མེད་ལང་ཚོ་ཅན་རྩེ་བ་རྣམས་རིམ་པར་བཏང་སྟེ་ཆོས་བྱས་ན་བུ་དང་ཕྲད་དམ། རྒས་པ་གཞོན་ནུར་ལྡོག་གམ། རྩེ་དགའ་འདི་ལས་ལྷག་པའི་བདེ་སྐྱིད་ཆོས་ལ་ཡོད་ཏམ་བྱ་བ་རིམ་པས་འདྲིར་བཅུག་པས། བུ་བས་རང་ཉིད་ཀྱང་འཆི་བ་དང༌། རྒས་དུས་ཆོས་དྲན་ཀྱང་འཕྱིས་པ་དང༌། ཐམས་ཅད་མི་རྟག་པ་རྣམས་རིམ་པར་གསུངས་པས་དེ་དག་ཀྱང་དད་ཅིང་གཡུ་སྒྲ་ཡང་ཅུང་ཟད་དད་ནས་འོག་རྟ་ཕུལ་སྟེ་ཆོས་ཞུས་པས་མ་གནང་བ་དང༌། ཡང་ཁྲུས་ལ་གདན་དྲངས་ནས་ཆུའི་ནང་དུ་གདམས་པ་མི་གནང་ན་ཆུ་ལ་བཀྲོང་ངོ་ཞེས་བསྡིགས་པས། ཡོན་དང་དད་པ་གཉིས་མེད་པར། །(ཐ༣༢བ)

[Full Size]

ནན་ཚིར་བྱས་པས་ཆོས་འཁུགས་སམ། །འཆི་ན་གཉི་ག་འཆི་མེད་དེ། །ང་ཤི་འོག་མིན་གནས་སུ་འགྲོ། །ཁྱོད་ཤི་ངན་སོང་གསུམ་དུ་འགྲོ། །ཁྱོད་ཀྱིས་ཕོད་ན་ང་ཡིས་ཕོད། །གསུངས་པས་སྐྲག་སྟེ་བཟོད་གསོལ་བྱས། །ཡང་དཔེ་ཆ་བརྐུས་ནས་ཀུན་བྱེད་ཀྱི་རྒྱུད་བྲིས་སྟེ་ང་ལ་ཡང་ཆོས་ཡོད་ཟེར་བས། རྡོ་རྗེ་སེམས་དཔའ་དགའ་རབ་འཇམ་དཔལ་གྱི། །ཞལ་ནས་གསུངས་པའི་མན་ངག་ངེས་པའི་དོན། །རྒྱལ་བའི་དགོངས་པ་ཤིན་དུ་གཏིང་ཟབ་ལ། །ཡིག་ནག་ཚིག་གིས་བྱང་ཆུབ་རྙེད་པ་མིན། །ཞེས་གསུངས་པས་དད་པ་དྲག་དུ་སྐྱེས་སྟེ་ངུས་ནས་རྗེས་སུ་བཟུང་བར་ཞུས་པས་རྒྱུ་འབྲས་ཀྱི་ཆོས་གསུངས་པས་མ་ཚིམ་སྟེ་ཚེ་འདིར་འཚང་རྒྱ་བའི་གདམས་པ་ཞུས་པས། ལུས་ཀྱི་སྒོ་ནས་བྲན་གཡོག་ཅི་དགོས་བྱེད་པ། བླ་མའི་སྐུ་དགྲ་འདུལ་བ། ཕྱག་སྐོར་གྱིས་སྒྲིབ་པ་སྦྱོང་བ་སྟེ་ལུས་ཀྱི་སྦྱང་བ་གསུམ། ངག་གིས་ཞེ་ས་དང་གསོང་པོར་སྨྲ་བ། སྐུ་དགྲ་ལ་དྲག་སྔགས་ཀྱི་སྨོད་པ་འབེབས་པ། རྟག་དུ་གསོལ་བ་འདེབས་པ་སྟེ་ངག་གི་སྦྱང་བ་གསུམ། ཡིད་ཀྱིས་རྟག་དུ་བླ་མའི་རྣལ་འབྱོར་སྒོམ་པ། ཅི་གསུངས་མོས་པས་སྒྲུབ་པ། ལུས་ལོངས་སྤྱོད་ཐམས་ཅད་འབུལ་བ་སྟེ་ཡིད་ཀྱི་སྦྱང་བ་གསུམ་དང་དེ་ལྟར་སྦྱང་བ་དགུ་ཁྱིམ་དང་ཉེ་འབྲེལ་སྤོང་བར་ཕོད་པ་སོགས་ཕོད་པ་བཅུ་གསུམ་བྱེད་ནུས་ན་བསྟན་ནོ་ཞེས་གསུངས་པས་ཅི་གསུང་སྒྲུབ་པར་དམ་བཅས་པ་ན། འོ་ན་ཨོ་ཌྱན་གྱི་ཡུལ་རྡོ་རྗེའི་གདན་རྣམས་སུ་སོང་ལ་དགའ་རབ་རྡོ་རྗེ་དང་མཁས་པ་ཉེར་ལྔ་རྣམས་ལ་གསེར་འདི་འབུལ་དུ་སོང་ཞིག་དེ་རྣམས་ཀྱི་གདམས་པ་ངས་གདབ་བོ་ཅེས་གསེར་མང་པོ་བསྐུར་བ་དང་བཀའ་ཉན་སྟེ་ཨོ་ཌྱན་དུ་འགྲོ་ཁར་ཁོང་རང་གི་ཡབ་ཡུམ་བློན་འབངས་དང་བཅས་པས་ཨོ་ཌྱན་དུ་ཕྱིན་རུང་དགའ་རབ་རྡོ་རྗེ་མི་རྙེད། དེ་བས་སློབ་དཔོན་བཻ་རོ་(ཐ༣༣ན)

[Full Size]

ཉིད་ལ་གཏུགས་པ་བཟང་ཟེར་ནས་གྲོས་བཏབ་པས་སྲོག་ལ་བབ་ཀྱང་བླ་མའི་བཀའ་སྒྲུབ་ཟེར་ནས་འགྲོ་བར་ཆས་པའི་ཚེ་སློབ་དཔོན་གྱི་ཞལ་ནས་ཁྱོད་དེ་ཙམ་དུ་བླ་མའི་བཀའ་སྒྲུབ་ན་ཨོ་ཌྱན་དུ་འགྲོ་མི་དགོས། འདི་ཉིད་དུ་རྗེས་སུ་བཟུང་གིས་ཉམས་སད་བྱས་པ་རྣམས་ལ་བཤགས་པ་གྱིས་ཅིག་ཞེས་གསུངས་ནས་གཡུ་སྒྲས་ལུས་ལོངས་སྤྱོད་ཐམས་ཅད་ཕུལ་སྟེ་གདམས་ངག་དུ་མ་གནང༌། སྤྱིར་ཡི་གེ་སྔ་ཞིང་བར་དུ་ཡིག་མཁན་གྱི་སྐྱོན་བརྒྱུད་པ་དུ་མ་དང་པདྨ་དཀའ་ཐང་དང་སྲེ་བ་ལ་སོགས་པ་སྲེ་བསླད་མི་འདྲ་བ་མང་དུ་སྣང་བས་འདྲ་འབག་ལྷད་གཏན་མེད་དེང་སང་མི་རྙེད་པར་སྣང་ཡང་ལྷད་ཅན་གྱི་གསེབ་ནས་ལྷད་མེད་ཀྱི་དོན་གོ་བར་སྣང་ལ། དེས་ན་ཁ་ཅིག་རྒྱལ་མོ་གཡུ་སྒྲ་སྙིང་མོ་ཞེས་རྟེན་རྒྱལ་པོའི་སྲས་མོར་འདོད་པ་དང༌། ཡང་རྒྱལ་པོའི་སྲས་པོ་ཡིན་པ་ལ་བཻ་རོས་དོང་ནས་ན་མཁའ་ཆེའི་རྒྱུད་ཁ་ཐོན་མཛད་པ་བློ་ལ་ཟིན་ནས་ཕྱིས་བཻ་རོས་ཡབ་ཡུམ་ལས་བསླངས་བྱ་བ་དང༌། གཙང་ལེགས་གྲུབ་ཀྱི་སྐྱེ་བའི་སྤྲང་ཕྲུག་དུ་འདོད་པ་དང༌། དེ་ཡང་བུད་མེད་དུ་འདོད་པ་སོགས་མང་དུ་སྣང་ཡང་ལོ་རྒྱུས་ཀྱི་བབས་རྣམས་བསྒྲིགས་ན་རྒྱལ་མོ་ནི་ཡུལ་གྱི་མིང་དང་རིགས་རྒྱལ་པོའི་སྲས་ཡིན་ལ་མཚན་གཡུ་སྒྲ་སྙིང་པོ་ཡིན་པ་དང༌། ཉམས་སད་བྱས་པ་དང༌། མཁས་པར་གྱུར་ནས་བཱི་མ་ལ་བསམ་ཡས་སུ་བྱོན་པའི་དུས་རྒྱལ་བློན་ལ་ལ་ཡོགས་དོར་དུ་བཏང་ནས་བོད་འབངས་ཐམས་ཅད་འགྱོད་དེ། སྐྱེ་བ་སྔ་ཕྱི་དྲན་པས་བྱང་ཆུབ་སེམས་དཔའ་ཡིན་ཡང་དག །མན་ངག་གི་ཆོས་ཁྱད་པར་ཅན་རྙེད་པས་སྤྲུལ་སྐུ་ཡིན་ཡང་དག་སོགས་ལྷའི་སྤྱན་ཐོབ། རྐང་མགྱོགས་གྲུབ། བཟོད་པ་ཐོབ་བདེན་པ་མཐོང༌། སྒྲིབ་གཉིས་བྱང༌། སངས་རྒྱས་ཀྱི་སྤྲུལ་པ་སྟོན་པའི་ཞལ་སྐྱིན་ས་བརྒྱད་པ་ཐོབ་པ་ཡིན་ཡང་དག་ཞེས་བཻ་རོ་ལ་ཡང་དག་བཅུ་གཅིག་གི་བསྟོད་པ་ཕུལ་ནས་བཻ་རོ་སྤྱན་འདྲེན་དུ་(ཐ༣༣བ)

[Full Size]

བཏང་བས་ཐུགས་གཏིང་ནས་མཉེས་སྟེ་གདམས་ངག་ཚང་སྤྲུགས་སུ་དེར་རྫོགས་པ་འདི་དག་པར་སྣང་ལ། བཱི་མ་ལ་བོད་དུ་བྱོན་པ་ཡང་ཆོས་རྒྱལ་ཁྲི་སྲོང་གི་དུས་དང་མུ་ནེ་བཙན་པོའི་དུས་དང་སད་ན་ལེགས་ཀྱི་དུས་ཡིན་པར་བཤད་པ་གསུམ་སྣང་ཡང་སད་ན་ལེགས་རྒྱལ་པོར་གྱུར་ནས་མུ་ནེ་བཙན་པོའི་གཤིད་མཛད་དུས་བཱི་མ་ལ་བྱོན་པ་དང༌། གཙང་ལེགས་གྲུབ་ཀྱི་སྐྱེ་བ་ནི་ཕྱིས་བཻ་རོ་ལི་ཡུལ་དུ་སྤྱན་འདྲེན་པ་མོ་ལི་བཟའ་ཚུལ་ཁྲིམས་སྒྲོལ་མར་བཤད་པའི་ཕྱོགས་འདི་དག་པར་སྣང་ངོ༌། །སློབ་དཔོན་བཻ་རོས་ཀྱང་རྒྱ་ནག་དུ་བྱོན་སྟེ་གྲུབ་ཐོབ་དང་མཁའ་འགྲོ་མ་རྣམས་དང་དགོངས་ཉམས་བསྡུར། ཁམས་སུ་ཡང་གཞན་དོན་མཛད། སླར་བོད་དུ་བྱོན་པའི་ལམ་དུ་ཙངས་མི་ཕམ་མགོན་པོ་ལོ་བརྒྱ་ལོན་པ་ཅིག་ལ་རྒད་པོ་མཛུབ་ཚུགས་ཀྱི་གདམས་པ་བཏབ་པས་ཅིག་ཅར་དུ་གྲོལ་སྟེ་རང་རྒྱལ་གྱི་ལུས་ཀྱི་བཀོད་པར་བཤད་པ་དེ་ཡིན། བོད་དུ་བྱོན་ནས་རྒྱལ་བློན་ཐམས་ཅད་ལ་ཆོས་གསུངས། སླར་ལི་ཡུལ་དུ་གཤེགས་སྟེ་ཕྱིས་བ་སིང་གི་ནགས་སུ་འོད་ཀྱི་སྐུར་ཡལ་ལོ། །གཡུ་སྒྲས་ཀྱང་པངས་སངས་རྒྱས་མགོན་པོ། རྒྱ་བློ་གྲོས་གཞོན་ནུ། སྦས་རྡོ་རྗེ་རྒྱལ་མཚན་སོགས་སྨིན་གྲོལ་དུ་བྱས་སོ། །ཡར་ལུངས་པ་སྙགས་ཛྙ་ན་ཀུ་མ་རས་བཱི་མ་ལ་དང་བཻ་རོ་དང་གཡུ་སྒྲ་སྟེ་གསུམ་ག་ལ་བསྟེན་ནས་བླ་མ་སོ་སོ་ལས་ཀྱང་ང་རང་མཁས་སྙམ་པའི་བློ་ལན་གསུམ་སྐྱེས་པས་གསོད་ངེས་ཀྱི་བཙོན་དུ་ལན་གཉིས་ཚུད། ཕྱིས་སྦྲུལ་ཆེན་པོ་ཅིག་གིས་རྐེ་ལ་འཁྲིལ་བ་ལ་སོག་པོ་དཔལ་གྱི་ཡེ་ཤེས་ཀྱིས་ལུས་སྲོག་དང་བསྡོས་ནས་ཐར་བར་བྱས། སྦྲུལ་གྱི་མགོ་ནས་ཟོས་པས་གདམས་ངག་རྫོགས་པར་གནང་སྟེ་འདི་སྔོན་མགར་བ་བེག་ཙེ་བྱ་བ་ཁྲོ་བོའི་དབྱིབས་སུ་ཡོད་པ་ཅིག་སྣོད་ལྡན་དུ་མཁྱེན་ནས་གདམས་ངག་གིས་ཁ་བྲིད་དེ་སོག་པོ་དཔལ་གྱི་ཡེ་ཤེས་སུ་མིང་སྤོས་པ་ཡིན། དེ་ལ་སྣུབས་སངས་རྒྱས་རིན་པོ་ཆེས་ཞུས་སོ། །ཤྲཱི་སིངྷ་དང་(ཐ༣༤ན)

[Full Size]

དགའ་རབ་རྡོ་རྗེ་སོགས་བཻ་རོ་ཙ་ན་དང་དུས་མི་མཚུངས་སོ་སྙམ་དུ་དོགས་པར་མི་བྱ་སྟེ་གྲུབ་ཆེན་དེ་རྣམས་ནི་སྐལ་ལྡན་ལ་ད་ལྟར་ཡང་མཇལ་དུ་ཡོད་པའི་ཕྱིར་རོ། །དེ་ལྟར་སེམས་ཕྱོགས་ཀྱི་བཀའ་བབས་གཉིས་བཤད་ནས་བདག་ཉིད་ཆེན་པོ་པདྨ་འབྱུང་གནས་ལས་ཇི་ལྟར་བྱུང་བ་ནི། སྤྱིར་ཐང་ཡིག་ལེའུ་བརྒྱ་དང་གཅིག་པར་འདོད་པ་ཚིག་བཅད་ལྷུག་གཉིས་སྣང་བ་འདི་ལ་ལྷད་ཧ་ཅང་མང་ཆེས་པས་བདག་གིས་མཐོང་བ་ཁོ་ན་ཡང་མི་འདྲ་བ་ལྔ་བཅུར་ཟིན་པ་སྣང་བས་ཡིད་རྟོན་མི་ནུས་པར་སྣང་ལ། འོན་ཀྱང་སྐྱེ་བོ་མ་བརྟགས་པར་འཇུག་པ་རྣམས་ཀྱི་དད་པ་འཕེལ་བའི་རྒྱུར་སྣང་བས་འདི་རྣམས་ལ་ཡང་སྐུར་པ་གདབ་པར་མི་བྱ་སྟེ་ཆོས་བསྟན་པའི་དགོས་པ་ནི་གདུལ་བྱ་དད་པ་ལ་འགོད་པ་ཡིན་པའི་ཕྱིར་རོ། །དེས་ན་སྔོན་གྱི་མཁས་གྲུབ་དུ་མའི་གསན་ཡིག་ན་སློབ་དཔོན་གྱི་རྣམ་ཐར་རྒྱས་འབྲིང་བསྡུས་གསུམ་ཞེས་དང༌། རྒྱས་པ་ཉང་རལ་གྱི་གཏེར་མ་ལེའུ་ཞེ་བརྒྱད་པ་ཅེས་སྣང་བས་འདིའི་ཕྱོགས་དག་པ་སྙམ་ལ་འདི་ལའང་ལྷད་ཅུང་ཟད་སྐབས་སྐབས་ན་ཡོད་པ་འདྲ་ནའང་ས་བོན་ཙམ་བརྗོད་ན། ཨོ་ཌྱན་གྱི་རྒྱལ་པོ་ཨིནྡྲ་བོ་དྷི་ལ་སྲས་མི་མངའ་ནས་དཀོར་མཛོད་སྦྱིན་པར་བཏང་སྟེ་རྒྱ་མཚོ་ནས་ཡིད་བཞིན་ནོར་བུ་ཀླུ་མོ་མཛེས་ལྡན་མ་ལས་བླངས་སྟེ་ཚུར་ལམ་དྷ་ན་ཀོ་ཤའི་གླིང་ནས་ཁྱེའུ་པདྨ་ལས་འཁྲུངས་པ་རྙེད་སྟེ་སྤྱན་དྲངས་ནས་མཚོ་སྐྱེས་རྡོ་རྗེར་མཚན་གསོལ་སྟེ་སྲས་སུ་བཟུང༌། ནོར་བུའི་མཐུས་རིན་པོ་ཆེའི་ཁྲི་སྟན་དང་ཁང་བཟང་བྱུང་ཞིང་ཟས་གོས་དང་རིན་པོ་ཆེའི་ཆར་གྱིས་སྐྱེ་བོ་ཚིམ་པར་བྱས། སྲས་ཀྱིས་རྒྱལ་སྲིད་སྤོང་བའི་ཕྱིར་རྩེད་མོའི་གར་མཛད་པའི་མཚོན་ཤོར་བའི་ཚུལ་གྱིས་བློན་པོའི་བུ་བསད་དེ་ཁྲིམས་ཀྱིས་སྤྱུགས། དུར་ཁྲོད་དུ་བྱོན་སྟེ་དུར་ཁྲོད་ཀྱི་རྫས་ལ་ལོངས་སྤྱོད་ཅིང་མཁའ་འགྲོ་རྣམས་དབང་དུ་འདུས་སྟེ་སྦྱོར་དགྲོལ་གྱི་སྤྱོད་པ་མཛད་པས་སྲིན་པོ་ཤ་ན་རཱཀྵར་གྲགས། (ཐ༣༤བ)

[Full Size]

མཁའ་འགྲོ་མ་བདུད་འདུལ་མ་དང་ཞི་འཚོ་མས་དབང་བསྐུར་བྱིན་གྱིས་བརླབས། འཁྲུངས་སའི་མཚོ་གླིང་དུ་བྱོན་སྟེ་གསང་སྔགས་མཁའ་འགྲོའི་བརྡ་སྐད་ཀྱིས་བསྒྲུབས་པས་རྒྱ་མཚོའི་གླིང་གི་མཁའ་འགྲོ་བཞི་དབང་དུ་འདུས་སྟེ་ཕག་མོའི་ཞལ་མཐོང་བྱིན་གྱིས་བརླབས་སྟེ་རྒྱ་མཚོའི་ཀླུ་དང་བར་སྣང་གི་གཟའ་སྐར་རྣམས་དམ་ལ་བཏགས་སྟེ་རྡོ་རྗེ་དྲག་པོ་རྩལ་དུ་གྲགས། སློབ་དཔོན་པྲ་ཧ་སྟི་ལས་རབ་ཏུ་བྱུང་སྟེ་ཤཱཀྱ་སེང་གེར་གྲགས། ཡོ་གའི་རྒྱུད་རྣམས་ཚར་བཅོ་བརྒྱད་མཉན་པས་དེ་ཉིད་དུ་ལྷ་རྣམས་ཞལ་མཐོང༌། འཇམ་དཔལ་བཤེས་གཉེན་ལ་གསོལ་བ་བཏབ་པས་ངས་ཁྱོད་འདུལ་བའི་དུས་ལ་མ་བབ་དགེ་སློང་མ་ཀུན་དགའ་མོ་ལ་དབང་ཞུས་ཅིག་གསུངས་སྟེ་མཁའ་འགྲོ་མ་གསང་བ་ཡེ་ཤེས་དགེ་སློང་མར་བསྟེན་པ་དང་མཇལ་བ་ན་ཧཱུྃ་ཡིག་དུ་བསྒྱུར་ནས་དེས་ཞལ་དུ་མིད་པདྨར་བཏོན་ནས་སྒྲིབ་པ་གསུམ་སྦྱངས་ནས་སྣང་བ་མཐའ་ཡས་ཀྱི་སྒོ་ནས་ཕྱི་ཚེའི་རིག་འཛིན། སྤྱན་རས་གཟིགས་ཀྱི་སྒོ་ནས་ནང་ཕྱག་ཆེན་གྱི་རིག་འཛིན། གསང་བ་རྟ་མགྲིན་གྱི་སྒོ་ནས་དྲེགས་པ་ཅན་ཐམས་ཅད་འདུལ་བར་དབང་བསྐུར་རོ། །དེ་ནས་འཇམ་དཔལ་བཤེས་གཉེན་ལས་ཕྱི་ནང་གི་ཆོས་དུ་མ་མཉན་སྟེ་འཇམ་དཔལ་གྱི་ཞལ་མཐོང༌། སློབ་དཔོན་ཧཱུྃ་ཀ་ར་ལས་ཡང་དག །ཤཱཀྱ་དེ་ཝ་ལས་ཕུར་པ། ན་གཱརྫཱུ་ན་ལས་པདྨ་གསུང༌། སངས་རྒྱས་གསང་བ་ལས་སྒྱུ་འཕྲུལ། རྡོ་རྗེ་མི་འགྱུར་ལས་བདུད་རྩི་ཡོན་ཏན། དྷ་ན་སཾ་སྐྲྀ་ཏ་ལས་སྲིད་པ་མ་མོ། ཤྲཱི་སིངྷ་ལས་སེམས་ཕྱོགས། གུ་ཧྱ་ཙཎྜ་ལས་དམོད་པ་དྲགས་སྔགས་རྣམས་ཚར་རེ་གསན་པས་ལྷ་སོ་སོའི་ཞལ་གཟིགས་སྟེ་བློ་ལྡན་མཆོག་སྲེད་དུ་གྲགས་སོ། །དེ་ནས་ཟ་ཧོར་གྱི་རྒྱལ་པོ་གཙུག་ལག་འཛིན་གྱི་བུ་མོ་མེ་ཏོག་མནྡྷ་ར་བ་དབང་དུ་མཛད་དེ་རི་བོ་པོ་ཏ་ལའི་འདབས་སུ་ཁར་ཏིའི་གནས་སུ་ཚེའི་རིག་འཛིན་གྲུབ་སྟེ་ཡབ་ཡུམ་གྱི་ཚུལ་གྱིས་ཟ་ཧོར་གྱི་ཡུལ་དུ་བསོད་སྙོམས་(ཐ༣༥ན)

[Full Size]

ལ་བྱོན་པས་མེ་ཕུང་དུ་བསྲེགས་པ་ན་ཏིལ་མར་མཚོར་འཁྱིལ་བའི་དབུས་ན་པདྨའི་སྡོང་པོ་ལ་ཡབ་ཡུམ་བཞུགས་སྟེ་པདྨ་འབྱུང་གནས་དང་པདྨ་སམྦྷ་ཝར་གྲགས་ཤིང་ཟ་ཧོར་གྱི་རྒྱལ་ཁམས་བཏུལ། ཨོ་ཌྱན་དུ་བྱོན་སྟེ་བསོད་སྙོམས་མཛད་པས་འབངས་ཀྱིས་ངོ་ཤེས་ནས་མེར་བསྲེགས་པས་སོལ་བའི་གུར་ཁྱིམ་ན་པདྨའི་སྡོང་པོ་ལ་བཞུགས་སྟེ་སེམས་ཅན་འཁོར་བ་ལས་བསྒྲལ་བ་མཚོན་པས་ཐོད་སྐམ་གྱི་ཕྲེང་བ་གསོལ་བར་མཐོང་སྟེ་པདྨ་ཐོད་ཕྲེང་རྩལ་ཏུ་གྲགས། སྔོན་རྒྱལ་པོའི་སྲས་ཡིན་པས་པདྨ་རྒྱལ་པོར་ཡང་གྲགས་སྟེ་ཨོ་ཌྱན་གྱི་རྒྱལ་ཁམས་བཏུལ་སྟེ་རྒྱལ་པོ་འཁོར་བཅས་འོད་ལུས་སུ་ཡལ། རྒྱ་གར་དུ་མུ་སྟེགས་ཀྱི་སྟོན་པ་ལྔ་བརྒྱས་བསྟན་པ་སྣུབ་པའི་ཚེ་བྱོན་ནས་རྩོད་པ་མཛད་པས་སློབ་དཔོན་རྒྱལ། མུ་སྟེགས་ཀྱིས་མཐུ་བྱེད་པའི་ཚེ་མཁའ་འགྲོ་མ་བདུད་འདུལ་མས་བསེའི་སྒྲོམ་བུ་ཞིག་ཕུལ་ནས་བདུད་དང་མུ་སྟེགས་ཐུལ་ཅིག་པར་གསོལ་བ་ན་སྒྲོམ་བུ་ནས་སྲོག་སེར་ཐོག་དང་བཅས་པའི་ངན་སྔགས་བྱུང་ནས་ཐོག་ཕབ་སྟེ་མུ་སྟེགས་རྣམས་ནགས་སུ་བསྲེགས། ལྷག་མ་སངས་རྒྱས་པར་བཙུད་དེ་སེང་གེ་སྒྲ་སྒྲོག་དུ་གྲགས། རྒྱ་བལ་གྱི་མཚམས་ཡང་ལེ་ཤོད་ཀྱི་བྲག་ཕུག་དུ་བལ་མོ་ཤཱ་ཀྱ་དེ་ཝ་ལ་སྒྲུབ་རྟེན་མཛད་ནས་ཡང་དག་གི་སྒོ་ནས་མཆོག་བསྒྲུབས་པས་ཀླུ་གིང་པོ། གནོད་སྦྱིན་རྒོད་མ་ཁ་ཕྲ་མེན། གློག་མ་སྲིན་གསུམ་གྱིས་བར་དུ་བཅད་དེ་ལོ་གསུམ་དུ་ཆར་མ་བབ་པས་ནད་མུག་རྒྱས་པའི་ཚེ་བར་ཆད་དུ་དགོངས་ནས་རྒྱ་གར་གྱི་བླ་མ་རྣམས་ལ་བར་ཆད་འདུལ་བའི་ཆོས་རྫོང་བར་ཞུས་པས་སློབ་དཔོན་པྲ་ཧསྟི་ལ་ཕུར་པའི་ཆོས་ཞུས་ཅིག་པར་གཞན་རྣམས་ཀྱིས་ལུང་བསྟན་སྟེ་པྲ་ཧསྟིས་ཕུར་པ་འབུམ་སྡེའི་ནང་ནས་དགྲ་བགེགས་འདུལ་བའི་སྐོར་མི་ཁུར་གཉིས་བརྫངས་པ་ཕེབས་པ་ཙམ་གྱིས་བར་ཆད་ཞི་ཆར་བབ་ནད་མུག་ཆད། ཡང་ཕུར་གྱི་ལྷ་ཚོས་ཐམས་ཅད་ཞལ་གཟིགས་(ཐ༣༥བ)

[Full Size]

མཆོག་གི་དངོས་གྲུབ་ཐོབ་སྟེ་ཡང་དག་ཚོང་པ་འདྲ། དངོས་གྲུབ་ཆེ་ཡང་བར་ཆོད་མང་བས་ཕུར་པ་སྐྱེལ་མ་དང་འདྲ་བ་དགོས་པར་གཟིགས་ནས་ཡང་ཕུར་སྦྲགས་མའི་སྒྲུབ་ཐབས་མཛད། སྲོད་ལ་ཤྭ་ན་མ་མཆེད་བཞི། གུང་ལ་རེ་མ་ཏི་མཆེད་བཞི། ཐོ་རངས་བསེའི་ལྷ་མོ་མཆེད་བཞི། བསེའི་སྐྱེས་བུ་བཞི། དུང་གི་སྐྱེས་བུ་བཞི། ལྕགས་ཀྱི་སྐྱེས་བུ་བཞི་སྟེ་ཕོ་རྒྱུད་མོ་རྒྱུད་ཐམས་ཅད་ཀྱིས་སྲོག་སྙིང་ཕུལ་ནས་དམ་ལ་བཏགས་སྟེ་ཕུར་པའི་བཀའ་སྲུང་དུ་བཞག་གོ །བོད་ཀྱི་ལྷ་སྲིན་ཐམས་ཅད་དམ་ལ་བཏགས་པ་ན་རྡོ་རྗེ་ཁྲོ་ལོད་དུ་མཚན་གྲགས་སྟེ་སྔོན་མེད་པའི་ཁྲོ་བོ་འཇིགས་རུང་དུ་སྣང་བས་ཁྲོ་བོ་ལོད་པོའམ་འཆོལ་པའི་ཁྲོ་བོ་ཞེས་བྱ་བའི་དོན་ཡིན་ལ་བསམ་ཡས་རྒྱལ་པོ་འདུལ་བའི་ཕྱིར་གུ་རུ་དྲག་པོར་བསྟན་ནས་བྲན་དུ་བཀོལ་ལོ། །གཞན་ཡང་རྒྱལ་པོ་མྱ་ངན་མེད་འདུལ་བའི་དགེ་ཚུལ་དེ་ཡང་སློབ་དཔོན་གི་སྐུའི་བཀོད་པ་ཡིན་ལ་དགེ་སློང་དབང་པོའི་སྡེ་ཉིད་ཀྱང་སློབ་དཔོན་ལས་ཐ་མི་དད་པར་མི་འགལ་སྟེ་སྤྱོད་ཡུལ་རྣམ་འཕྲུལ་གྱི་མདོར། ང་མྱ་ངན་ལས་འདས་ནས་རྒྱལ་པོ་མ་སྐྱེས་དགྲའི་སྐལ་བའི་ངའི་རིང་སྲེལ་དང་མདོ་འདི་ལྷན་ཅིག་དུ་རྒྱལ་པོའི་ཁབ་ཀྱི་ལྷོ་ཕྱོགས་སུ་མ་འོངས་པ་ལོ་བརྒྱ་ན་རྒྱལ་པོ་མྱ་ངན་མེད་ཅེས་བྱ་བ་འབྱུང་བ་དེའི་དོན་དུ་སྦེད་པར་འགྱུར་ལ་དེའི་ཚེ་དགེ་སློང་དབང་པོའི་སྡེ་ཞེས་བྱ་བས་ཕྱུང་སྟེ་མདོ་འདིས་རྒྱལ་པོ་འདུལ་ཞིང་རྒྱལ་པོ་དེས་རིང་སྲེལ་ཅན་གྱི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་ཞིང་དགེ་སློང་དེས་མདོ་འདི་བྱང་གི་ཕྱོགས་སུ་འཇོག་པར་འགྱུར་མོད་ཀྱི་སུས་ཀྱང་ཤེས་པར་མི་འགྱུར་རོ་ཞེས་ལུང་བསྟན་པས་དགེ་སློང་དེས་མདོ་དེ་བོད་ཡུལ་དུ་སྦས་པ་སྙམ་མོ། །དེ་བཞིན་དུ་མུ་སྟེགས་ཀྱི་རྒྱལ་པོ་ནོར་བུ་འོད་ལྡན་གནས་སྤར་སྟེ་རྒྱལ་པོར་མཛད་ནས་བྷངྒ་ལ་བཏུལ། བྲམ་ཟེའི་བུ་གྲུབ་པ་བརྙེས་པ་ཌོམྦྷི་ཧེ་རུ་ཀ་ཡང་ཨོ་ཌྱན་གྱི་ཡུལ་འདུལ་བའི་ཕྱིར་སྐུའི་བཀོད་པ་ཡིན། ཡང་མུ་སྟེགས་ཀྱི་རྒྱལ་པོ་ཀླུའི་ཁྱབ་འཇུག་(ཐ༣༦ན)

[Full Size]

ཞེས་བྱ་བས་བསྟན་པ་འཇིག་པའི་ཚེ་བདེ་མཆོག་དུས་ཀྱི་སྙིང་པོ་ཞེས་བྱ་བའི་ཁྱེའུ་དང་སྤྲུལ་པའི་ཉར་བྱས་སྟེ་བཏུལ། མདོར་ན་གྲུབ་པའི་སློབ་དཔོན་འདི་ལྟ་བུའི་ཡོན་ཏན་དང་གདུལ་བྱ་འདུལ་ཚུལ་ནི་བསམ་པར་མི་ནུས་པས་ངོ་མཚར་གྱི་རྣམ་ཐར་འདི་དག་ལས་ཆེས་བླ་ལྷག་པ་མཐའ་ཡས་པ་ཅིག་ཡོད། དེས་ཀྱང་གདུལ་བྱ་རྣམས་ཀྱི་སྐལ་པར་མ་འཚམ་པ་ཞིག་གིས་དེང་སང་མི་སྣང་ལ་ས་བོན་ཙམ་སྣང་བ་འདི་དག་ལ་ཡང་རྒྱལ་པོ་བཀའ་ཐང་སྙིང་ཐིག་གི་བབས་ལུགས་གསེར་འོད་དམ་པ་སོགས་བསྲེས་ཤིང་གྲོང་ཚིག་མི་མཛེས་པ་མང་དུ་བསྣན་པས་ནོག་ནོག་པོར་བྱས་སྣང་ངོ༌། །ལྷ་འདྲེ་མཐུ་བོ་ཆེ་རྣམས་ཀྱི་ཞུད་ཟེར་མངལ་སྐྱེས་ཀྱི་མིས་ཐུབ་པར་དཀའ་བས་གདུལ་བྱ་མི་མ་ཡིན་གཙོ་བོར་འདུལ་བའི་ཕྱིར་བརྫུས་སྐྱེས་སུ་བྱོན་པ་ཡིན་ལ། སྤྱན་སྔ་ལྷ་གཟིགས་རས་པས། བླ་མེད་དོན་རྫོགས་འདུས་པའི་རྒྱུད་ལ་སོགས་པའི་ལུང༌། ང་ནི་མྱ་ངན་འདས་འོག་དུ། །ལོ་ནི་བཞི་གཉིས་ལོན་པ་ན། །ཞེས་དང༌། ལོ་ནི་བཅུ་རུ་གཉིས་ཆད་ན། །འཇིག་རྟེན་ཀུན་གྱི་དཔལ་དང་ལྡན། །ཨོ་ཌྱན་ཡུལ་དུ་ང་ཉིད་འབྱུང༌། །པདྨ་འབྱུང་གནས་ཞེས་བྱ་བ། །སྔགས་ཀྱི་བསྟན་པའི་བདག་པོར་འགྱུར། །ཞེས་ལུང་བསྟན་པ་འདྲེན་པ་ལྟར་ན་སངས་རྒྱས་མྱ་ངན་ལས་འདས་ནས་ལོ་བརྒྱད་ན་འཁྲུངས་པར་སྣང་ལ། མང་ཞིག་དུ། ལོ་ནི་སུམ་སྟོང་དྲུག་བརྒྱ་ལོན། །ལས་ཀྱིས་བོད་ཡུལ་དབུས་སུ་འོངས། །ཅེས་དང༌། བོད་དུ་ལོ་བརྒྱ་དང་བཅུ་གཅིག་བཞུགས་བར་འཆད་ཀྱང་གྲངས་ཀྱི་ངེས་བཟུང་དངོས་མ་ཡིན་ཀྱང་མང་དུ་ལོན་པའི་ཐ་ཚིག་ཙམ་ཡིན་ནམ། སྤྱིར་རྒྱ་གར་ན་བགྲོད་པ་ལ་ལོར་འདྲེན་པ་ཡང་ཡོད་སྐད་པས་དེ་ལྟ་བུ་ཞིག་ཡིན་གྲང་ཞེས་སེམས་སོ། །བོད་དུ་སྤྱན་དྲངས་ཚུལ་ནི་རྒྱལ་རབས་ཆེན་མོར་ན་ཡམས་གཉིས་ཀྱིས་བཤད་པ་ཉིད་(ཐ༣༦བ)

[Full Size]

ཡིན་ལ་ལྷ་འདྲེ་ཐམས་ཅད་བྲན་དུ་བཀོལ་ནས་བསམ་ཡས་ལ་སོགས་པའི་ལྷ་ཁང་བཞེངས། བོད་ཀྱི་ལྷ་འདྲེ་ཐམས་ཅད་བཀའ་འོག་དུ་ལན་གཉིས་བཅུག་ནས་གསུམ་པ་མ་ཚར་བ་ལ་བློན་པོ་རྣམས་མ་དད་པས་གཤེགས་པར་གསོལ་བ་ན་བོད་ཡུལ་གྱི་གཡའ་རི་གངས་རི་བྲག་རི་མཐའ་དག་སྒྲུབ་གནས་སུ་བྱིན་གྱིས་བརླབས་སྟེ་མི་མ་ཡིན་རྣམས་ཀྱི་དོན་མཛད་དེ་སྐུ་དངོས་ཀྱིས་རྔ་ཡབ་གླིང་དུ་གཤེགས་ནས་སྲིན་པོའི་ཁ་གནོན་དུ་བསྐལ་པ་འདི་ཇི་སྲིད་བར་བཞུགས་སོ། །ཐང་ཡིག་ལྷད་ཅན་དུ་སྲིན་པོའི་ཡུལ་དེ་འཛམ་གླིང་སོག་པའི་དབྱིབས་ཀྱི་ཡུ་བ་ལ་ཡོད་པར་བྲིས་པ་ནི་ལྷད་བཏབ་པར་སྣང་ལ་སྲིན་པོའི་ཡུལ་དེ་ནི་འཛམ་གླིང་གི་གླིང་གཡོག་འཛམ་གླིང་ནས་ནུབ་ན་ཡོད་པ་དེ་ཡིན་ལ་སློབ་དཔོན་གྱིས་སྲིན་པོའི་རྒྱལ་པོར་བཞེངས་སྟེ་མ་བཏུལ་ན་སྲིན་པོ་རྫུ་འཕྲུལ་གྱིས་འཛམ་གླིང་དུ་ལྷགས་པར་འགྱུར་བས་ཁ་གནོན་མཛད་པ་ཡིན་ཞིང་གུ་རུ་ཆོས་དབང་གི་རྨང་ལམ་ཞྭ་ནག་མར་ཡང་འདི་ཉིད་ཤིན་དུ་གསལ་བར་གཟིགས་སྣང་ངོ༌། །འོན་ཀྱང་ཟངས་མདོག་དཔལ་རི་ཅིག་ནི་འཛམ་གླིང་ཉིད་ནའང་ཡོད་སྟེ་མདོ་དྲན་པ་ཉེར་བཞག་ལས། གངས་ཅན་ནས་དཔག་ཚད་ལྔ་བརྒྱ་ན་ཤིང་དང་བྱ་དང་རི་དྭགས་ཀྱིས་གང་བར་རི་གཞན་ཟངས་ཀྱི་མདོག་དཔག་ཚད་ཉི་ཤུ་པ་ཕུག་སྟོང་དང་ལྡན་པར་གྲུབ་པའི་ཚོགས་གནས་སོ་ཞེས་བོད་ནས་ནུབ་བྱང་དུ་དཔག་ཚད་ལྔ་བརྒྱ་ན་ཡོད་ལ་སྔགས་གྲུབ་པ་རྣམས་གནས་པར་བཤད་པས་དེར་ཡང་སྐུའི་བཀོད་པ་ཅིག་བཞུགས་པར་སྣང་ངོ། །ཕུར་པའི་ལོ་རྒྱུས་རྣམས་ལས་ནི་ཨོ་ཌྱན་གྱི་རྒྱལ་པོའི་སྲས་མཆེད་གཉིས་ཡོད་པ་ལས་ཆེ་བ་རྒྱལ་སར་བཏོན། ཡུལ་ཆོས་ཀྱིས་ཆུང་བ་ཤཱནྟ་རཀྵི་ཏ་དམངས་སུ་ཕབ་པས་རི་ལ་བྲོས་སྟེ་སྦྱོར་དགྲོལ་བྱས་ནས་སྒྲིབ་པ་སྦྱང་ཕྱིར་པྲ་ཧསྟི་ལས་ཕུར་པའི་ཆོས་ཚར་བཅོ་བརྒྱད་དུ་མཉན་སྟེ་ཚེ་དང་ལས་དང་ས་འོག་གི་རིག་འཛིན་གསུམ་གྲུབ། བོད་ཀྱི་སྤྱན་(ཐ༣༧ན)

[Full Size]

འདྲེན་པ་མི་ངལ་བའི་ཕྱིར་བྱོན་པས་ཨ་སུ་རའི་བྲག་ཕུག་དུ་སློབ་དཔོན་གསུམ་ཚོགས་པ་ན་བཱི་མ་ལས་ཆུ་བོ་ལ་ཕུར་པ་གདེངས་པས་གྱེན་ལ་ལོག་བལ་པོ་ཤཱི་ལ་མཉྫུས་བྲག་ལ་བཏབ་པས་འབྱིམ་པ་ལ་བཏབ་པ་ལྟར་སོང༌། སློབ་དཔོན་གྱིས་ནགས་ལ་མེ་ཤོར་བ་ལ་གདེངས་པས་ཙནྡནའི་ནགས་སུ་སོང༌། ཡང་ལེ་ཤོད་དུ་བསེའི་ལྷ་མོས་བར་ཆད་བྱས་པ་ཕྱག་རྒྱ་བཞིས་བཅིངས། དབུ་ཞྭའི་འོག་དུ་མནན་སྟེ་ནང་པར་གཟིགས་པས་ལྷའི་བུ་མོ་འདྲ་བ་བཞི་འདུག་ནས་ཕུར་པའི་ཆོས་བོད་དུ་ཁྱེར་བ་ན་བདག་ཅག་མཁའ་འགྲོ་རྣམས་སྙིང་བཏོན་པ་སྙམ་བྱེད་ནས་འོངས་པ་ཡིན་སྟེ་ད་ནི་འབངས་སུ་མཆིའོ་ཞེས་སྲོག་སྙིང་ཕུལ་སྟེ་རྡོ་རྗེ་ཡང་སྦྱིན་ལ་སོགས་པར་མིང་བཏགས་པ་ས་བདག་ཆེན་མོ་བཞི། དེར་སྒྲུབ་པ་ཞག་གསུམ་མཛད་པའི་མཐའ་མའི་སྲོད་ལ་ནག་མོ་དྲེའུ་བཞོན་པ་སྲིད་པ་ཕོ་རྒྱུད་ཀྱི་ལྕམ་མོ་བཞི་བྱུང་སྟེ་དམ་ལ་བཏགས་པ་བདག་ཉིད་ཆེན་མོ་བཞི། ནམ་སྨད་ལ་ལྕགས་ཀྱི་སྤྱང་མོ་མགོ་དགུ་གསེར་གྱི་འཕར་བ་ལྕེ་བརྒྱད། ཟངས་ཀྱི་ཝ་མོ་རྐང་གསུམ། ལྕགས་ཀྱི་ཁྱི་མོ་རྐང་གསུམ་རྣམ་དམ་ལ་བཏགས་པ་ཤྭ་ན་མ་མཆེད་བཞིའོ། །དེ་ནས་བསམ་ཡས་སུ་བྱོན་སྟེ་རྒྱལ་པོ་ལ་ཕུར་པའི་ཆོས་གསུངས་སྟེ་བཞུགས་པར་མ་གནང་བར་རྒྱལ་པོས་གཙང་ཡབ་ལ་གོང་དུ་བསྐྱལ་སྟེ་སྲིན་ཡུལ་དུ་བཞུད་ཅེས་སྣང་ལ། མཁར་ཆེན་བཟའ་འཚོ་རྒྱལ། ཅོག་རོ་ཟ་མཆོད་གནས་མ། ཨ་ཙ་ར་མ་གསལ་ལེ་གསུམ་ལ་དཀྱིལ་འཁོར་མདུན་གྱི་ན་མཁར་སྤྲུལ་སྟེ་དབང་ལྷ་དང་བླ་མ་གང་ལ་ཞུ་དྲིས་པས་ཅོག་རོས་ལྷ་ལ་འདེམས། མཁར་ཆེན་བཟས་བླ་མ་ལ་འདེམས། ས་ལེས་བླ་མའི་ཐུགས་དང་སྦྱོར་བར་ཞུས་པས་ལྕོག་རོ་ལ་མི་ཟབ་པར་གསུངས་པས་ཕུར་པ་དང་ཡང་དག་བདུད་རྩི་རྣམས་ལྕ་ལུགས་སུ་གྲགས། མཁར་ཆེན་བཟའ་ལ་རྒྱུད་མན་ངག་སྙིང་(ཐ༣༧བ)

[Full Size]

པོར་དྲིལ་ནས་གནང་སྟེ་ས་ལེ་ལ་ཁྱོད་ཀྱིས་ཤོད་གསུངས། མདོར་ན་རླངས། རྔོག །ཁོ་ན། རོག་མགོས། དབང༌། སོ། ཟུར། སྣུབས། རྒྱུས། འོ་བྲན་ལ་སོགས་པའི་གདུང་རིགས་ལས་རྡོ་རྗེ་ཕུར་པ་གྲུབ་པ་ནི་བོད་ཡུལ་དུ་ཤིན་དུ་མང་བས་སར་མ་རྣམས་མ་དར་གྱི་བར་དུ་བོད་དུ་ཡི་དམ་དང་བསྟན་སྲུང་གི་སྲོག་རྩ་ཡང་ཕུར་གྱིས་བཟུང་བ་ཡིན་ལ་བརྒྱུད་པ་བྱིན་གྱིས་རློབ་པར་ནུས་པའི་སྔགས་འཆང་དེ་རྣམས་ཀྱི་གདུང་རིགས་ཤས་ཆེ་བ་ལས་སར་མའི་སྐྱེས་ཆེན་རྣམས་ཀྱང་བྱོན་པ་ཡིན་ནོ། །མཁའ་འགྲོ་སྙིང་ཐིག་ནི་མཚོ་རྒྱལ་ལ་གསང་ཆོས་སུ་གདམས་ནས་གཏེར་དུ་སྦས་ཤིང་སེམས་ཕྱོགས་དང་སྐྱེད་རྫོགས་གཞན་རྣམས་གཏེར་དུ་སྦས་སྟེ་སྐལ་ལྡན་ལ་སྨོན་ལམ་བཏབ་ནས་དུས་འགའ་འགའ་ན་འབྱུང་བ་ཡིན་ནོ། །དེ་ལྟར་སེམས་ཕྱོགས་ཀྱི་བྱུང་ཚུལ་བཤད་ནས། གཉིས་པ་སྒྱུ་འཕྲུལ་དང༌། གསུམ་པ་འདུས་པ་མདོའི་ཕྱོགས་ཇི་ལྟར་བྱུང་བ་ནི་རྒྱལ་བ་གཡུང་གི་གསང་སྙིང་འགྲེལ་པའི་དོན་བསྡུས་ནས་བཤད་པར་བྱ་སྟེ། དེ་ཡང་གསང་སྙིང་ལས། དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོའི་བྱིན་གྱིས་བརླབས་པ་ལས་རིག་པའི་སྐྱེས་བུ་ཐུབ་པ་དྲུག་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡེ་ཤེས་ལས་འཐོན་ཏོ་ཞེས་པས་དཔལ་ཀུན་དུ་བཟང་པོ་ལས་ཐུབ་པ་དྲུག་འཕྲོས་སྟེ་རིགས་དྲུག་དུ་སྐུས་དོན་མཛད། གསུང་གིས་ཆོས་བསྟན། ཐུགས་ཀྱིས་མངོན་པར་མཁྱེན་པས་འདུལ་བར་མཛད་ལ། དེ་ལས་ཐེག་པ་རིམ་པ་དགུའི་ལྷ་མིའི་ཐེག་པ་ནས་ཉན་རང་བྱང་སེམས་ཀྱི་བར་ནི་རྒྱུ་མཚན་ཉིད་ཀྱི་ཐེག་པ་ཡིན་ལ། བླ་ན་མེད་པའི་ཐེག་པ་དང༌། ཞེས་པས་འབྲས་བུ་གསང་སྔགས་ལ་ཕྱི་ཀྲྀ་ཡ་ཨུ་པ་ཡོ་ག་གསུམ་ནི་བྱ་སྤྱོད་རྣལ་འབྱོར་དང་གཅིག་ལ། ནང་མ་ཧཱ་ཨ་ནུ་ཨ་ཏི་གསུམ་ནི་ཕ་རྒྱུད་མ་རྒྱུད་གཉིས་མེད་ཀྱི་རྒྱུད་ལས་གཙོ་བོར་དེ་ཁོ་ན་ཉིད་སྟོན་པ་(ཐ༣༨ན)

[Full Size]

རྣམས་དང་དོན་གཅིག་གོ་ཞེས་རྒྱལ་བ་གཡུང་བཞེད་ཏོ། །དེ་ལས་མ་ཧཱ་ཡོ་ག་མདོ་དང་སྒྱུ་འཕྲུལ་ནི། ཀུན་དུ་བཟང་པོས་གསུངས། རྒྱལ་ཚབ་རིགས་ལྔས་བསྡུས། རྒྱལ་སྲས་སེམས་དཔའ་རྣམས་ཀྱིས་ཉམས་སུ་བླངས་ཤིང་བཀྲལ་བ་ནི་རྒྱལ་བ་དགོངས་རྒྱུད་ཏོ། །ཁྱད་པར་རིགས་གསུམ་མགོན་པོས་ལྟ་སྤྱོད་སྒྲུབ་པ་གསུམ་གྱི་དོན་སྙིང་པོར་དྲིལ་སྟེ་གདུལ་བྱ་ལྷ་ཀླུ་མི་གསུམ་རྗེས་སུ་བཟུང་བ་སྟེ། འཇམ་དཔལ་རྡོ་རྗེ་རྣོན་པོས་ལྷའི་བུ་གྲགས་ལྡན་མཆོག་སྐྱོང་རྗེས་སུ་བཟུང་ལ། དེ་ནས་རིམ་པར་རིན་ཆེན་འོད་འབར། ཚངས་པ་སྐྱེས་རྒུའི་བདག་ཚངས་པ་ཀུན་གྲོལ། ཚངས་པ་གཙུག་ཕུད་འཛིན། བརྒྱ་བྱིན། དེས་ལྷའི་རིག་འཛིན་ཚོམ་བུ་འབུམ་སྡེ་བཏུལ་སྟེ་རྒྱལ་བའི་གདུང་འཚོབ་པར་གྱུར་ཏོ། །སྤྱན་རས་གཟིགས་བདུད་རྩིས་སྨན་གྱི་སྐུ་ཅན་གྱིས་ཀླུ་དུག་ཅན་རྣམས་ཀྱི་དུག་བཅིལ། སྣོད་ལྡན་དུ་མཛད་ནས་ཀླུ་རྒྱལ་མགྲིན་ནག་པོ་རྗེས་སུ་བཟུང༌། དེ་ནས་རིམ་པར་ཀླུ་མོ་ཁ་འདུལ། ཀླུ་མོ་འདུལ་ཚངས་མ། ཀླུ་ཡིད་འོང་དགའ་བ། ཀླུ་རྒྱལ་འཇོག་པོ། དེས་ཀླུའི་རིག་འཛིན་ཚོམ་བུ་འབུམ་སྡེ་བཏུལ་ཏོ། །ཕྱག་ན་རྡོ་རྗེ་འཇིགས་པའི་གཟུགས་ཅན་གྱིས་གཙོ་བོར་གནོད་སྦྱིན་ཚོམ་བུ་འབུམ་སྡེ་བཏུལ་ཞིང་ཁྱད་པར་དུ་རི་མ་ལ་ཡའི་རྩེར་ལྷ་གྲགས་ལྡན་མཆོག་སྐྱོང༌། གནོད་སྦྱིན་སྐར་མདའ་གདོང༌། སྲིན་པོ་ལངྐ་མགྲིན་བཅུ། ཀླུ་རྒྱལ་འཇོག་པོ། ལི་ཙཱ་ཝི་དྲི་མ་མེད་པར་གྲགས་པ་སྟེ་དམ་པའི་རིགས་ཅན་དྲ་མ་ལྔ་དང་རིག་འཛིན་རྒྱ་མཚོ་ལྟ་བུ་ལ་གསུངས་པ་ནི་རིག་འཛིན་བརྡའི་བརྒྱུད་པའོ། །དེའི་ཚེ་ཕྱག་རྡོར་གྱིས་བྱིན་གྱིས་བརླབས་ལས་རྒྱལ་པོ་ཛ་ལ་རྨི་ལྟས་བདུན་ཤར་ཞིང་གླེགས་བམ་གྱི་ཆར་བབ་པ་སྟེ། དེ་ཡང་རྒྱལ་པོ་ཛ་ལ་རྨི་ལྟས་བདུན་ཤར་(ཐ༣༨བ)

[Full Size]

བ་ནི་མདོ་དགོངས་འདུས་ཀྱི་འགྲེལ་པ་ལས། སྐུ་གསུང་ཐུགས་རྟགས་ཐིམ་པ་དང༌། །ཆོས་ཀྱི་བགྲོ་བ་མཛད་པ་དང༌། །ཆོས་སྒྲ་ཆེན་པོ་སྒྲོགས་པ་དང༌། །བདུད་རྩི་ཆར་དུ་བབ་པ་དང༌། །རིན་ཆེན་ཆར་དུ་བབ་པ་དང༌། །པཱུ་ཛ་རྒྱ་ཆེན་བྱས་པ་དང༌། །ཞེས་པས་ཕྱག་རྡོར་ན་མཁར་བྱོན་སྟེ་སྐུ་ལས་འོད་ཟེར་སྤྲོས་གདུལ་བྱའི་རྟོག་སྒྲིབ་སྦྱངས། གསུང་གིས་ཆོས་བསྟན་སྟེ་གོ་བར་མཛད། ཐུགས་ཀ་ནས་འོད་ཟེར་འབར་བ་བྱུང་རྒྱལ་པོའི་ཐུགས་ཀར་ཐིམ། སྤྱི་གཙུག་ནས་ཉི་མ་ཤར་སྟེ་རྒྱལ་པོའི་ཐུགས་ཀར་ཐིམ་པ་ནི་རྨི་ལམ་དང་པོའོ། །དུས་གསུམ་གྱི་སངས་རྒྱས་དཔག་མེད་ཉི་ཟླ་ལ་ཆིབས། གསེར་གྱི་འཁོར་ལོ་བསྣམས་ནས་ཆོས་སྟོན་པ་ནི་གཉིས་པའོ། །ན་མཁའ་ལ་སྤྲིན་གསེར་མདོག་ཅན་ཆགས། སྣང་སྲིད་གསལ་བའི་གློག་འབྱིན། འབྲུག་སྒྲ་ཆོས་སྒྲར་ལྡིར་བ་ནི་གསུམ་པའོ། །དེ་ལས་བདུད་རྩིའི་ཆར་བབ་ས་ཐམས་ཅད་ཆག་ཆག་བཏབ་སྐྱེ་འགྲོ་རྣམས་བཀྲུས་སྟེ་རྡོ་རྗེའི་རྣལ་འབྱོར་ཞེས་པའི་སྔགས་སྒྲ་སྒྲོག་པ་ནི་བཞི་པའོ། །སྤྲིན་གསེབ་དེ་ནས་རིན་པོ་ཆེའི་སྒྲོམ་ནང་ནས་ཐིང་ཤོག་ལ་གསེར་ཡིག་རང་བྱུང་བའི་གླེགས་བམ་གྱི་ཆར་བབ་པ་ནི་ལྔ་པའོ། །དེ་རྣམས་ལ་རིག་འཛིན་དང་བྱང་སེམས་ཐམས་ཅད་ཀྱིས་མཆོད་བསྟོད་ཕྱག་སྐོར་བྱེད་པ་ནི་དྲུག་པ་སྟེ་སྔར་གྱི་ཚིག་རྐང་སོ་སོའི་དོན་ནོ། །དེ་ནས་ན་མཁའ་ལ་གཟུགས་མི་མངོན་པའི་སྒྲ་ཞིག་གྲག་པ་ནི། ལས་དང་སྐལ་པར་རབ་ལྡན་པ། །བསོད་ནམས་ཆེན་པོ་དྲ་མ་ཁྱོད། །སྤྲུལ་པས་ཇི་ལྟར་ལུང་བསྟན་བཞིན། །རྒྱལ་བས་འབྱུང་བར་ལུང་བསྟན་པའི། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱོད་ལ་སྒྲོག་པར་བྱའོ། །ཞེས་གྲག་པ་ནི་བདུན་པ་སྟེ་དེ་མ་ཐག་སད་ནས་དགའ་ཞིང་ངོ་མཚར་བས་ཕོ་བྲང་གི་ཡང་ཐོག་དུ་བྱོན་པས་འཇའ་འོད་དང་(ཐ༣༩ན)

[Full Size]

མེ་ཏོག་ལང་ལོང་དུ་འབབ་ཅིང་ཕྱག་ན་རྡོ་རྗེའི་སྐུ་རིན་པོ་ཆེ་སྨུག་པོ་ལས་རང་བྱུང་བ་ཁྲུ་གང་པ་ཅིག་འདུག་ནས་སྤྱི་བོར་བླངས་སྟེ། ཨེ་མ་ངོ་མཚར་མཆོག་གི་སྐུ། །འདྲེན་པ་མཆོག་གི་དཔལ་ལགས་གང༌། །མོས་པའི་ཡིད་ཀྱི་སྒོ་ནས་ནི། །སྔོན་ཚེ་གོང་ནས་བསྒྲུབས་པ་ཡི། །ལས་ཀྱིས་འབྲེལ་བའི་ལྷ་མཆོག་ཁྱོད། །བསྐལ་པ་བརྒྱར་ཡང་མི་གཏོང་ངོ༌། །ཞེས་བརྗོད་ནས་ཟླ་བ་བདུན་བསྒྲུབས་པ་ན་རྨི་ལམ་དུ་བྱུང་བའི་པོ་ཏི་རྣམས་མངོན་སུམ་དུ་བབས་སྟེ་གཟིགས་པ་ཙམ་གྱིས་རྟོགས་ཀྱང་གཞན་གཟུ་ལུམ་དང་རས་གཅོད་ཀྱིས་འཇུག་པ་དགག་པའི་ཕྱིར་མ་མཁྱེན་པ་ལྟར་བསྟན་ནས་འདི་རྣམས་ཀྱི་དོན་དྲི་དགོས་པས་འཛམ་གླིང་ན་མཁྱེན་པ་སུ་ཆེ་དྲིས་པས། རྒྱལ་པོ་ཨུ་པ་རཱ་ཛཱ་དང་རིན་ཆེན་མང་གིས་བྱིན་གྱིས་བརླབས་པའི་དགེ་སློང་ཀུ་ཀུ་རཱ་ཛཱ་གཉིས་མཁྱེན་པ་ཆེའོ་ཟེར་སྟེ་སྤྱན་འདྲེན་བཏང་བས་བརྡ་མ་འཕྲོད་ཀྱིས་དྭོགས་ནས་གླེགས་བམ་ཚུར་སྐུར་ཞིག་ཟེར་ནས་མཆོད་པ་དང་བཅས་སྟེ་ཤིང་རྟ་ལ་སྤྱན་དྲངས་པ་ན་སྔ་མས་བརྡ་མ་མཇལ། ཕྱི་མས་སྒྱུ་འཕྲུལ་སྟོང་ཕྲག་བརྒྱ་པའི་ནང་ནས་རྡོ་རྗེ་སེམས་དཔའ་ཞལ་མཐོང་གི་ལེའུ་ཤེས་སྟེ་བསྒྲུབས་པས་ཟླ་བ་བདུན་ན་གྲུབ་སྟེ་བསྟན་པ་འདི་དག་རྟོགས་པའི་དངོས་གྲུབ་ཞུས་པས་ཕྱག་ན་རྡོ་རྗེས་སྟོན་པར་འགྱུར་རོ་གསུངས་སྟེ་ཟླ་བ་བདུན་བསྒྲུབས་པས་ཕྱག་རྡོར་བྱོན་སྟེ་རྡོ་རྗེ་ལན་གསུམ་གསོར་ནས། སྤོང་ལེན་བརྟུལ་ཞུགས་སྤྱོད་པའི་དབང༌། །དགེ་བས་བསྐུར་ན་སྡིག་པ་མེད། །ཅེས་གསུང་ཞིང་དོན་གྱི་བསྟན་པ་ཐམས་ཅད་རྫོགས་པར་སྐུར་ནས་ཚིག་གི་བསྟན་པ་དེ་དག་དགེ་བསྙེན་ལི་ཙཱ་ཝི་དྲི་མ་མེད་པ་ལ་ཞུས་ཤིག་ཅེས་ལུང་བསྟན་པ་ལྟར་མཉན་ནས་དགེ་སློང་ཀུ་ཀུ་རཱ་ཛཱ་དེས་སྒྱུ་འཕྲུལ་སྟོང་ཕྲག་(ཐ༣༩བ)

[Full Size]

བརྒྱ་པ་ལས་ཏནྟྲ་སྡེ་བཅོ་བརྒྱད་དུ་ཕྱེ་སྟེ། སངས་རྒྱས་མཉམ་སྦྱོར། གླང་ཆེན་རབ་འབོག་གླང་ཆེན་མཚོར་ཞུགས་སྟེ་སྐུའི་རྒྱུད་གསུམ། ཟླ་གསང་ཐིག་ལེ་གཅིག་ལས་འཕྲོས་པ་དུ་མ་འཕྲོས་པ་སྟེ་གསུང་གི་རྒྱུད་གསུམ། གསང་བ་འདུས་པ་རི་བོ་བརྩེགས་པ་རྩེ་གཅིག་དུ་འདུས་པ་སྟེ་ཐུགས་ཀྱི་རྒྱུད་གསུམ། དཔལ་མཆོག་དང་པོ་བདུད་རྩི་མཆོག་དང་པོ་ཡིད་བཞིན་ནོར་བུའི་རྒྱུད་དེ་ཡོན་ཏན་གྱི་རྒྱུད་གསུམ། ཀརྨ་མཱ་ལ་སྒྲོན་མེ་འབར་བ་ཀི་ལ་ཡ་ཡིག་འབྲུ་བཅུ་གཉིས་སྟེ་འཕྲིན་ལས་ཀྱི་རྒྱུད་གསུམ། སྒྱུ་འཕྲུལ་དྲ་བ་དམ་ཚིག་བཀོད་པ་ཐབས་ཀྱི་ཞགས་པ་སྟེ་སྤྱིའི་རྒྱུད་གསུམ་དང་བཅོ་བརྒྱད་དུ་ཕྱེ་ནས་རྒྱལ་པོ་ཛ་ལ་བཤད། དེ་ནས་རིམ་པར་རྒྱལ་པོ་སིངྷ་རཱ་ཛཱ། ལྷ་གཅིག་གོ་མ་པ་ལ། ཀུ་ཀུ་རཱ་ཛཱ་ཕྱི་མ། རོ་ལངས་བདེ་བའི་དངོས་གྲུབ། རྡོ་རྗེ་བཞད་པ། ཟ་ཧོར་གྱི་མཁན་པོ་པྲ་ཧ་སྟི། སངས་རྒྱས་གསང་བ། དེས་བཱི་མ་ལ་ལ་སོགས་པ་པཎྜིཏ་ལྔ་བརྒྱ་ལ་བཤད། བཱི་མ་ལ་བོད་དུ་བྱོན་སྟེ་སྙགས་ཛྙཱ་ནས་མདོ་དང་སེམས་ཕྱོགས་བསྒྱུར། རྨ་རིན་ཆེན་མཆོག་གིས་མཚན་ཉིད་དང་སྒྱུ་འཕྲུལ་བསྒྱུར། དེ་ཡང་ཐམས་ཅད་རང་སྣང་དུ་སྟོན་པ་རྒྱུད་གསང་བ་སྙིང་པོ། རོལ་པ་མངོན་པར་བརྗོད་པ་ལྷ་མོ་སྒྱུ་འཕྲུལ། དཀྱིལ་འཁོར་སྟོན་པ་སྒྱུ་འཕྲུལ་བརྒྱད་པ། འཕྲིན་ལས་སྟོན་པ་སྒྱུ་འཕྲུལ་བཞི་བཅུ་པ། དབང་གཙོ་བོར་སྟོན་པ་སྒྱུ་འཕྲུལ་བླ་མ། ཡོན་ཏན་མཐར་ཕྱིན་པར་སྟོན་པ་སྒྱུ་འཕྲུལ་བརྒྱད་བཅུ་པ། སྡེ་སྣོད་ཡོངས་ལ་ཁྱབ་པར་སྟོན་པ་སྒྱུ་འཕྲུལ་དྲ་བ་ཆེན་པོ། དམ་ཚིག་གཙོ་བོར་སྟོན་པ་སྒྱུ་འཕྲུལ་ལེ་ལག་སྟེ་སྒྱུ་འཕྲུལ་སྡེ་བརྒྱད། གྲོལ་ལམ་རིམ་གྱིས་སྟོན་པ་ཡེ་ཤེས་སྙིང་པོ། ཅིག་ཅར་སྟོན་པ་རྡོ་རྗེ་མེ་ལོང༌། ཐབས་ལམ་རིམ་གྱིས་སྟོན་པ་རྡོ་རྗེ་ཐལ་བ། ཅིག་ཅར་སྟོན་པ་རྡོ་རྗེ་རྒྱ་མཚོ་སྟེ་བཤད་རྒྱུད་སྡེ་བཞི་ཞེས་བྱའོ། །དེ་ལས་སྡེ་བརྒྱད་ནི་བཱི་མ་ལས་(ཐ༤༠ན)

[Full Size]

རྨ་རིན་ཆེན་མཆོག་དེས་གཙུག་རུ་རིན་ཆེན་གཞོན་ནུ་དང་གྱེ་རེ་མཆོག་སྐྱོང་གཉིས། དེ་གཉིས་ལ་དར་རྗེ་དཔལ་གྱི་གྲགས་པ་དང་ཞང་རྒྱལ་བའི་ཡོན་ཏན་གཉིས། དེའི་དར་རྗེ་ལ་བཀའ་ཡོངས་གྲགས་པ་དང་ཞང་ལ་བཀའ་མཆིམས་ཕུ་མར་གྲགས་སྟེ་སྒྱུ་དྲ་མ་གཏོགས་པ་སྣུབས་སངས་རྒྱས་ཡེ་ཤེས་ཀྱིས་གསན་ནོ། །ཁྱད་པར་དུ་འདུས་པ་མདོ་ནི་རྩ་བའི་རྒྱུད་ཀུན་འདུས་རིག་པའི་མདོ་དང་བཤད་པའི་རྒྱུད་མདོ་དགོངས་པ་འདུས་པ་གཉིས་ཡིན་སྟེ་དེ་ནི་རྒྱལ་པོ་ཛ་ནས་སྲས་ཨིནྡྲ་བོ་དྷི་དང་ནཱ་ག་བོ་དྷི་གུ་ཧྱ་བོ་དྷི་སྟེ་གསུམ་ལ་བཤད། ནཱ་ག་བོ་དྷི་ནི་ཀླུ་བ་སུ་རིགས་དྲུག་གིས་ལོ་དགུར་བཤད་དུ་མ་སྟེར། ཨིནྡྲས་ཀུ་ཀུ་རཱ་ཛཱ། དེ་ནས་རིམ་བཞིན་ཀུ་ཀུ་རཱ་ཛཱ། རོ་ལངས་བདེ་བ། རྡོ་རྗེ་བཞད་པ། པྲ་ཧ་སྟི། དེས་ཤཱཀྱ་སེང་གེ །ཤཱཀྱ་པྲ་བྷ། ཤཱ་ཀྱ་མི་ཏྲ་གསུམ་ལ་བཤད། ཤཱཀྱ་སེང་གེས་དྷ་ན་རཀྵི་ཏ། དེས་སྠིར་མ་ཏི། དེས་བདེ་བ་གསལ་མཛད། དེས་དྷརྨ་བོ་དྷི་དང༌། བ་སུ་དྷ་ར་དང༌། བྲུ་ཤ་མཁན་པོ། དེ་གསུམ་ལ་སྣུབས་སངས་རྒྱས་ཡེ་ཤེས་སོ། །པོ་ཏིའི་ཆར་བབ་པའི་ལོ་རྒྱུས་འདི་དག་ལ་ས་སྐྱ་པ་ཁ་ཅིག་དེ་ལྟར་ན་གསང་སྔགས་རང་ཉིད་ལེན་པར་འགྱུར་ཞིང་བླ་མ་མེད་པར་མི་འགྲུབ་པར་བཤད་པ་དང་འགལ་བས་རྫུན་གཏམ་ཡིན་ནོ་ཞེས་ཟེར་ཡང་རྡོ་རྗེ་སེམས་དཔའ་དང་ཕྱག་ན་རྡོ་རྗེས་བསྟན་པས་བླ་མའི་གོ་མི་ཆོད་ན་ཧ་ཅང་ཐལ་ཞིང་ལྷའི་བྱིན་རླབས་ཀྱིས་གླེགས་བམ་ཆེད་དུ་བབ་པ་ལ་ཐུབ་ཆོད་དུ་བླངས་པར་ཡང་ག་ལ་འགྱུར། ཤེས་ཕྱིན་གྱི་ཚུལ་བརྒྱ་ལྔ་བཅུ་པའི་འགྲེལ་པར་ཡང༌། གསུང་རབ་འདིའི་ལོ་རྒྱུས་བཤད་ན་སྔོན་སངས་རྒྱས་མི་ཡུལ་ན་ལོ་བརྒྱད་བཅུ་བཞུགས་པའི་ཚེ་ན་སརྦ་བུད་དྷས་མ་ཡོ་ག་དང་གུ་ཧྱ་ས་མ་ཡ་ལ་(ཐ༤༠བ)

[Full Size]

སོགས་པས་འདུལ་ཞིང་དེ་ནས་ཐེག་པ་དེ་དག་གི་སྣོད་དུ་གྱུར་པ་ཛམྦུ་གླིང་གི་མི་ཡུལ་ན་མེད་པས་རྒྱལ་ཆེན་རིས་བཞི་པའི་གནས་ན་ལྷ་རྣམས་དང་བསྐལ་པ་བཟང་པོའི་བྱང་ཆུབ་སེམས་དཔའ་ལ་སོགས་པ་སྣོད་དུ་གྱུར་ནས་དེའི་ཚེ་མདོ་སྡེ་དེ་ན་བཞུགས་སོ། །སླད་ཀྱིས་སངས་རྒྱས་མྱ་ངན་ལས་འདས་པའི་འོག་དུ་ཟ་ཧོར་གྱི་རྒྱལ་པོ་འཁོར་དང་བཅས་པ་ངོ་མཚར་དུ་གྱུར་སྟེ་ཆོས་ལ་དད་པ་དག་པ་ཞིག་འདུས་པ་ཐེག་པ་དེའི་འདུལ་སྐལ་དུ་གྱུར་ཞིང་སྣོད་དུ་གྱུར་ནས་སརྦ་བུདྡྷས་མ་ཡོ་ག་ལ་སོགས་པ་མདོ་སྡེ་ཆེན་པོ་བཅོ་བརྒྱད་ཕྱག་ན་རྡོ་རྗེའི་བྱིན་གྱིས་བརླབས་ཀྱིས་ཟ་ཧོར་གྱི་ཡུལ་དུ་གཤེགས་པ་དང་ཟ་ཧོར་གྱི་རྒྱལ་པོ་ཨིནྡྲ་བོ་དྷིས་མདོ་སྡེ་དག་བལྟས་པས་བརྡ་མ་འཕྲོག་ནས་གང་གིས་ཤེས་མངོན་ཤེས་ཀྱིས་བལྟས་པ་ན། ཡུལ་དབུས་སུ་སློབ་དཔོན་ཀུ་ཀུ་རཱ་ཛཱ་ཉིན་རེ་ཞིང་ཁྱི་སྟོང་ལ་ཆོས་འཆད་མཚན་རེ་ཞིང་ཁྱི་དེ་དག་དམ་ཚིག་དུ་ལོངས་སྤྱོད་མཛད་པ་ཅིག་བཞུགས་པ་དེའི་ཐེག་པའི་སྣོད་དུ་ཡང་གྱུར་ལ་བདག་གི་འདུལ་སྐལ་དུ་ཡང་འགྱུར་བ་འདྲ་ནས་རྒྱལ་པོས་ཕོ་ཉ་བཏང་སྟེ་སློབ་དཔོན་སྤྱན་དྲངས་པ་དང་སློབ་དཔོན་གྱིས་མངོན་ཤེས་ཀྱིས་བརྟགས་པས་བདག་གི་འདུལ་སྐལ་དུ་ཡང་བབ་ལ་བདག་ཀྱང་མདོ་སྡེ་དེའི་སྣོད་དུ་འགྱུར་བར་ཤེས་མོད་ཀྱི། འོན་ཀྱང་མདོ་སྡེ་དེ་དག་སྔར་མ་བལྟས་ན་བརྒྱ་ལ་རྒྱལ་པོའི་ཐེ་ཚོམ་དག་མ་སོལ་བར་གྱུར་ན་མི་རུང་ངོ་སྙམ་ནས་མདོ་སྡེ་ཚུར་བླངས་ནས་བལྟས་པ་ན་མགོ་མཇུག་གར་ལྟ་བའི་ཆ་མ་མཆིས་ནས་དེ་ཉིད་ཏུ་ལུས་བརྡབས་སྟེ་མགོན་མེད་ཏོ་སྐྱབས་མེད་ཏོ་ཞེས་བོས་པ་དང༌། དཔལ་རྡོ་རྗེ་སེམས་དཔའ་མངོན་པར་གཤེགས་སྟེ་ཁྱེད་ཅི་འདོད་དྲིས་པས་བདག་མདོ་སྡེ་ཟབ་མོ་འདི་བལྟས་པ་ཙམ་གྱིས་ཤེས་པར་འདོད་ཅེས་གསོལ་བ་དང་དེ་བཞིན་དུ་གནང་ངོ༌། །དེ་ནས་སརྦ་བུདྡྷ་མ་ཡོ་ག་ལ་སོགས་པའི་གླེགས་བམ་རྣམས་མ་ཕྱེ་(ཐ༤༡ན)

[Full Size]

བར་དེ་དག་གི་དོན་ཡིད་ལ་མངོན་སུམ་དུ་གསལ་བར་གྱུར་ཏོ། །དེ་ནས་སློབ་དཔོན་དེ་ཟ་ཧོར་གྱི་ཡུལ་དུ་གཤེགས་ནས་རྒྱལ་པོ་འཁོར་དང་བཅས་པ་ལ་ཆོས་དེ་དག་བཤད་ཏོ། །དཔལ་རྡོ་རྗེ་སེམས་དཔས་ལུང་བསྟན་ནས་རྒྱལ་པོ་འཁོར་དང་བཅས་པ་རྣམས་རྡོ་རྗེ་དབྱིངས་ཀྱི་དཀྱིལ་འཁོར་ལྟར་བཀོད་ནས་སྒོམ་དུ་བཅུག་པས་རིམ་པ་ལྟར་རྒྱལ་པོ་འཁོར་བཅས་དང་དེའི་སྲས་འཁོར་བཅས་དང་སྲས་མོ་འཁོར་དང་བཅས་པ་རྣམས་ལ་གནས་པའི་རིག་འཛིན་དུ་གྲུབ་བོ། །དེ་ནས་སྲས་མོ་དེས་རྒྱལ་བུ་ལ་མན་ངག་བཞག་པ་ལས་འཕེལ་བ་ནི་དེང་སང་འདི་ལགས་སྟེ་ཅེས་དང༌། མཉམ་སྦྱོར་གྱི་འགྲེལ་པ་ལས་ཀྱང་དེ་ལྟར་དུ་བཤད་པ་དང༌། ལོ་ཙཱ་བ་ཟུ་དགའ་རྡོར་གྱིས་ནཱ་ལེནྡ་ན་པོ་ཏིའི་ཆར་བབ་ཚུལ་རི་མོར་བྲིས་པ་མཐོང་བར་བཤད་པས་འགོག་པར་མི་བྱ་ལ། འོན་ཡང་ཡུལ་འདི་རི་མ་ལ་ཡའི་འདབས་སུ་འཆད་པ་བྱུང་ཡང༌། རི་མ་ལ་ནི་སིངྒྷ་ལའི་གླིང་གི་དབུས་ན་ཡོད་པར་གྲགས་འདི་ནི་འཛམ་གླིང་ཉིད་ཡིན་ཞིང་ཨོ་ཌྱན་གྱི་ཡུལ་དུ་འདོད་པའང་རྒྱལ་པོའི་མིང་གིས་འཁྲུལ་བ་སྟེ་ཟ་ཧོར་གྱི་ཡུལ་ཁོ་ནར་རིག་པར་བྱ་ལ། ཀུ་ཀུ་རཱ་ཛཱ་འདི་དག་ཀྱང་ཁྱི་སྟོང་གིས་བསྐོར་བ་ཆེ་བ་དང་ཁྱི་ལྔ་བརྒྱས་བསྐོར་བ་ཆུང་བ་སྟེ་ཌཱ་ཀི་རྣམས་གཟུགས་གཞན་དུ་བསྒྱུར་བའོ། །བདེ་གཤེགས་འདུས་པའི་ལོ་རྒྱུས་བཻ་རོ་ཙ་ནའི་མཛད་བྱང་ཡོད་པ་མྱང་རལ་གྱི་གཏེར་མ་ལས་ནི། བཅོམ་ལྡན་འདས་ཆོས་ཀྱི་སྐུ་མཉམ་པ་ཉིད་དུ་བཞུགས་པ་ལ་ཡུམ་ཀུན་དུ་བཟང་མོས་དབྱིངས་རྣམ་དག་གི་ཀློང་ནས་རྡོ་རྗེ་དམ་ཚིག་ཆེན་པོའི་གླུས་བསྐུལ་ནས་ལོངས་སྐུ་ཞི་བར་བཞེངས་སྟེ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ནོ། །ཞི་བས་མི་འཐུལ་བ་རྣམས་ལ་ཁྲོ་བོ་ཆེ་མཆོག་དུ་བཞེངས་སྟེ་ཁྲོ་བོའི་དཀྱིལ་(ཐ༤༡བ)

[Full Size]

འཁོར་གསུངས་སོ། །དེ་ཡང་བདེ་གཤེགས་འདུས་པ་རྩ་བའི་རྒྱུད། ཕྱི་མ་མངོན་བྱུང་གི་རྒྱུད། ཕྱི་མའི་ཕྱི་མ་སྔགས་ཀྱི་རྒྱུད། མ་ཚང་ཁ་སྐོང་གི་རྒྱུད། འབྱེད་པ་ལྡེ་མིག་གི་རྒྱུད་དེ་ཞི་ཁྲོ་སྤྱིའི་རྒྱུད་ལྔ། དེ་རྣམས་ཀྱི་རྩ་རྒྱུད་གསང་འདུས་ཞི་བ་འདུས་པ་ཆེ་མཆོག་འདུས་པ་སོགས་འདུས་པ་བརྒྱད་དང༌། ཞི་ཁྲོ་ལྷན་ཅིག་པ་རིག་འཛིན་འདུས་པ་སྟེ་བྱེ་བྲག་གི་རྩ་རྒྱུད་བཅུ། དེ་ནས་འཇམ་དཔལ་གཤིན་རྗེ་སོགས་སོ་སོའི་གཙོ་བོར་སྤྲུལ་སྟེ་གསུངས་པ་ཡན་ལག་གི་རྒྱུད་ལ་འཇམ་དཔལ་གསང་རྒྱུད་གསང་བ་གྲུབ་པ་བརྗོད་པ་གླུར་བླངས་སོགས་དང་རྨེ་བརྩེགས་འཇིགས་བྱེད་གཤེད་དམར་ནག་དང་བཅས་པ་སྟེ་འཇམ་དཔལ་སྐུའི་རྒྱུད་སོ་བཞི། རྟ་མཆོག་རོལ་པ། རྔོག་མ་ལེབ་རྒན་ལ་སོགས་པ་པདྨ་གསུང་གི་རྒྱུད་བཅུ་གཉིས། ཧེ་རུ་ཀ་གལ་པོ་ཆེ་ཆུང༌། འཇིག་རྟེན་ལས་འདས་པའི་མདོ་སྔ་ཕྱི་ཀུན་འདུས་རིག་པ། མཉམ་སྦྱོར་གསང་སྙིང་མ་བུ་དྲུག་སོགས་ཡང་དག་ཐུགས་ཀྱི་རྒྱུད་བཅོ་བརྒྱད། བདུད་རྩི་རོལ་པ་བམ་པོ་བརྒྱད་པ་སོགས་བདུད་རྩི་ཡོན་ཏན་གྱི་རྒྱུད་དགུ་ཕུར་པའི་རྒྱུད་ལ་བྱི་ཏོ་ཏ་མ་ལ་འབུམ་སྡེ་ཕ་རྒྱུད་རྣལ་འབྱོར་དམ་པ་གསང་ཆེན་མོ་རྒྱུད་ཀི་ལ་ཡ་བཅུ་གཉིས་གཉི་གའི་རྒྱུད་དེ་ཕུར་པའི་སྤྱི་རྒྱུད་དང་བྱེ་བྲག་དུ་ཕུར་པ་མ་རྒྱུད་ལ་རྡོ་རྗེ་ཡེ་ཤེས་སངས་རྒྱས་རྣལ་འབྱོར་རྩེ་མོ་སྟེ་རྩེ་མོ་བཞི་དེའི་ཡན་ལག་ཟློག་ཕུར་བཅུ་གཉིས། འཕྲིན་ལས་རྣམ་བཞི་སྲུང་མ་བཅུ་གཉིས་ཀྱི་རྒྱུད་ཏོ། །ཕུར་པ་ཕ་རྒྱུད་ལ་ཡང་སྙིང་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྒྱུད་ལྔ། སྙིང་པོའི་རྒྱུད་གསུམ། ཡན་ལག་ཁྲོ་བོ་བཅུའི་རྒྱུད་བཅུ། ལོ་མའི་རྒྱུད་བཞི། མེ་ཏོག་གི་རྒྱུད་བཅུ། འབྲས་བུའི་རྒྱུད་བཞི། མ་ཚང་ཁ་སྐོང་ཀྱི་རྒྱུད་ལྔ་སྟེ་རྩ་བའི་རྒྱུད་གསུམ་ལ་ཡན་ལག་གི་རྒྱུད་མཐའ་ཡས་པ་ནི་ཕུར་པ་འཕྲིན་ལས་ཀྱི་རྒྱུད་ཏོ། །མ་མོ་རྦོད་གཏོང་ལ་མ་མོ་(ཐ༤༢ན)

[Full Size]

གསང་བ་གཏན་ཚིགས་ཀྱི་རྒྱུད་སྲིད་པའི་ཀློང་ཆེན་མོ་འབུམ་ཕྲག་གཅིག་སྟེ་རྩ་རྒྱུད་ལེའུ་བརྒྱ་རྩ་བརྒྱད་རྒྱུད་ཕྱི་མ་ལེའུ་གཅིག་དང་བྱེ་བྲག་དུ་ཤེལ་མཚོ་དྭངས་པ་སོགས་དཀར་མོ་སྐུའི་རྒྱུད་དགུ་ཙིཏྟ་གདོང་ཟློག་སོགས་སྨུག་མོ་གསུང་གི་རྒྱུད་བཞི། སྨུག་ནག་འཁྱིལ་པ་སོགས་ནག་མོ་ཐུགས་ཀྱི་རྒྱུད་བདུན། སེར་མོ་ཡོན་ཏན་དང་ལྗང་མོ་ཕྲིན་ལས་ལ་རྒྱུད་རེ་རེ་གཞན་མཁའ་འགྲོའི་སྒོས་རྒྱུད་མཐའ་ཡས་པའོ། །འཇིག་རྟེན་མཆོད་བསྟོད་ལ་དྲེགས་པ་འདུས་པ་སོགས་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྒྱུད་ལྔ་ཡན་ལག་གི་རྒྱུད་སྡེ་དཔོན་སུམ་བཅུའི་སྒོས་རྒྱུད་སོགས་དང་རྨོད་པ་དྲག་སྔགས་ལ་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྒྱུད་ལྔ་དང་སྡེ་དཔོན་བཅོ་བརྒྱད་སོ་སོའི་སྒོས་རྒྱུད་སོགས་མང་པོའོ། །དེ་ལྟར་རྒྱལ་བ་དགོངས་པས་བཀའ་བསྩལ་བ་དེ་ཀུན་དུ་བཟང་པོ་ཉིད་དང་ཐ་མི་དད་པའི་བྱང་ཆུབ་སེམས་དཔའ་རྡོ་རྗེ་ཆོས་སམ་ཕྱག་ན་རྡོ་རྗེའམ་རྡོ་རྗེ་སེམས་དཔའ་འམ་རྡོ་རྗེ་དྲག་པོ་རྩལ་ལམ་མིའི་ཐོད་པ་ཅན་ཞེས་ཀྱང་བྱ་བ་དེས་ཚོམ་བུ་དགུའི་དཀྱིལ་འཁོར་དུ་རང་ཉིད་སྟོན་པ་པོ་དང་རིག་འཛིན་གཞན་རྣམས་འཁོར་དུ་བྱས་སྟེ་རང་ཉིད་ཀྱིས་བསྟན་པར་མཚམས་སྦྱར་ནས་བསྡུས་སྟེ་གསེར་གྱི་གླེགས་བུ་ལ་བཻ་ཌཱུརྻ་ཞུན་མས་བྲིས་སྟེ་ཀུན་དུ་བཟང་མོའི་ཐུགས་ཀྱི་སྤྲུལ་པ་མཁའ་འགྲོ་མ་ཐམས་ཅད་ཀྱི་གཙོ་མོ་ལས་ཀྱི་དབང་མོ་ཆེ་ལ་གཏད་དེ་ཁྱོད་ཀྱིས་སྤྱི་བྱེ་བྲག་གི་རྒྱུད་རྣམས་ཐ་དད་དུ་ཕྱེ་ལ་རིན་པོ་ཆེའི་སྒྲོམ་སོ་སོར་ཞོག་ལ་སྐལ་ལྡན་རྗེས་སུ་ཟུང་ཞིག་པར་གདམས་སོ། །མཁའ་འགྲོ་མ་དེས་སྤྱི་རྒྱུད་ལྔ་བྱེ་བྲག་གི་རྒྱུད་བཅུ་གཉིས་རྣམས་རིན་པོ་ཆེ་སྣ་ཚོགས་པའི་སྒྲོམ་བུར་བཅུག །ཡན་ལག་གི་བཀའ་བརྒྱད་སོ་སོ་རྣམས་ལྕགས་ཟངས་དངུལ་གསེར་གཡུ་གསེ་མཆོང་གཟི་རྣམས་ཀྱི་སྒྲོམ་བུ་སོ་སོར་རིམ་པས་(ཐ༤༢བ)

[Full Size]

བཅུག་སྟེ་དུར་ཁྲོད་གསིལ་བའི་ཚལ་གྱི་རང་བྱུང་གི་མཆོད་རྟེན་དྲུང་དུ་ཕྱི་མཆོད་རྟེན་ལ་ནང་གཞལ་མེད་ཁང་པར་བྱས་དེ་དེར་བཞུགས་ནས་རྒྱས་བཏབ་སྟེ་མཆོད་ཏོ། །དུར་ཁྲོད་དེ་ཡང་ཉིན་བཞིན་ཐོག་སེར་འབབ་ཅིང་མཚན་མོ་མེ་འོད་དུ་འབར་མཁའ་འགྲོ་དང་ལྷ་སྲིན་གྱིས་མཆོད་པའི་གླུ་དང་རོལ་མོ་རྟག་དུ་འབྱུང་བ་ལས་ཕྱི་ཞིག་ན་གྲུབ་ཆེན་བརྒྱད་དུར་ཁྲོད་བརྒྱད་པོ་རེ་རེ་ན་སོ་སོར་བཞུགས་པ་ལས་ཐུགས་ཀྱིས་གཟིགས་སྟེ་དུས་གཅིག་དུ་མཆོད་རྟེན་དེའི་རྩར་འདུས་སྟེ་ཏིང་ངེ་འཛིན་མཛད་པས་ཞག་བདུན་ན་མཁའ་འགྲོ་ལས་ཀྱི་དབང་མོ་ཆེ་འཁོར་བཅས་དབང་དུ་འདུས་སྟེ་བཀའ་ཅི་བསྩལ་ཟེར་བ་ན་ཁྱེད་རྣམས་ཀྱི་མཆོད་པའི་ཡུལ་གྱི་སྒྲོམ་འདི་རྣམས་ངེད་རྣམས་ལ་བྱིན་ཞིག་གསུངས་པས་མཁའ་འགྲོ་མ་དེས་རྒྱ་བཀྲོལ་ནས་སློབ་དཔོན་བརྒྱད་པོ་ལ་སྒྲོམ་སོ་སོར་གཏད་དེ། འཇམ་དཔལ་བཤེས་གཉེན་ལ་འཇམ་དཔལ་སྐུ། ནཱ་གརྫུ་ན་ལ་པདྨ་གསུང༌། ཧཱུྃ་ཀ་ར་ལ་ཡང་དག་ཐུགས། བཱི་མ་ལ་མུ་དྲ་ལ་བདུད་རྩི་ཡོན་ཏན། སློབ་དཔོན་པདྨ་ལ་ཕུར་པ་འཕྲིན་ལས། དྷ་ན་སཾ་སྐྲྀ་ཏ་ལ་མ་མོ། གུ་ཧྱ་དེ་ཝ་ལ་མཆོད་བསྟོད། ཤཱནྟི་གརྦྷ་ལ་དྲག་སྔགས་གཏད་དེ་སོ་སོར་བཀའ་བབས། ཐ་དད་དུ་བྱོན་པ་ལས་སླར་སློབ་དཔོན་པདྨས་བྱོན་སྟེ་མཁའ་འགྲོ་དབང་དུ་བསྡུས་པས་དབུས་ཀྱི་རིན་པོ་ཆེ་ཐོད་པའི་སྒྲོམ་བུ་ནས་རྒྱུད་མན་ངག་ཐམས་ཅད་ཕྱུང་སྟེ་གཏད་རྒྱ་བཀྲོལ་ནས་སྐལ་ལྡན་ལ་སྟོན་ཞིག་པར་རྗེས་སུ་གནང་ངོ༌། །དེ་ནས་ཡང་ལེ་ཤོད་དུ་བྱོན་སྟེ་ཞི་བའི་དཀྱིལ་འཁོར་བསྒྲུབས་པས་རྡོ་རྗེ་དབྱིངས་ཀྱི་ལྷ་ཚོགས་ཐམས་ཅད་མངོན་སུམ་དུ་ཞལ་གཟིགས་སྟེ་ཚེའི་རིག་འཛིན་གྲུབ། དེ་ནས་ཁྲོ་བོ་རོལ་པ་བསྒྲུབས་པས་བདག་ཉིད་དང་གཉིས་སུ་མི་ཕྱེད་པར་གྲུབ་སྟེ་ཕྱག་ཆེན་གྱི་རིག་འཛིན་ཐོབ། རྒྱལ་པོ་ཁྲི་སྲོང་ལྡེ་བཙན་གྱིས་བོད་དུ་སྤྱན་དྲངས་ནས་ལྷ་སྲིན་བཏུལ་སྟེ་བསམ་ཡས་ཀྱི་རབ་གནས་མངའ་གསོལ་བའི་བར་མཛད། (ཐ༤༣ན)

[Full Size]

རྒྱལ་པོས་དཀའ་བ་མེད་པར་མྱུར་དུ་འཚང་རྒྱ་བའི་གདམས་པ་ཞུས་པས་མཆིམས་ཕུ་གྲི་གུར་རྗེ་འབངས་བརྒྱད་ལ་དབང་ཕྱི་ནང་གསང་གསུམ་རྫོགས་པར་བསྐུར་བ་ལས་གསེར་སྲང་བཅུ་ལས་བྱས་པའི་མེ་ཏོག་རེ་སོ་སོར་དོར་བས་རྒྱལ་པོ་ཉིད་དབུས་ཆེ་མཆོག་ལ་བབས། ན་མཁའ་སྙིང་པོ་བཛྲ་ཧེ་རུ་ཀ །སངས་རྒྱས་ཡེ་ཤེས་འཇམ་དཔལ་གཤིན་རྗེ། ངན་ལམ་རྒྱལ་བ་མཆོག་དབྱངས་རྟ་མགྲིན་དབང་གི་དཀྱིལ་འཁོར། མཁར་ཆེན་བཟའ་འཚོ་རྒྱལ་ཕུར་པ། དཔལ་གྱི་ཡེ་ཤེས་བླ་མེད་ཧེ་རུ་ཀ །རླངས་དཔལ་གྱི་སེང་གེ་དྲེགས་པ་ཀུན་འདུལ། བདག་བཻ་རོ་ཙ་ན་སྟོབས་ལྡན་ནག་པོའི་དཀྱིལ་འཁོར་ལ་བབས་སོ། །དེ་ནས་ཁྲོ་བོའི་ལྷ་ཚོགས་བདུན་བརྒྱ་ཉི་ཤུའི་ཞལ་མེ་ལོང་ལ་གཟུགས་བརྙན་ལྟར་བསྟན་ནས་དབང་ཕྱི་ནང་གསང་གསུམ་ལྟ་བ་སྤྱི་འབྱམ་དང་བཞི་ཡོངས་སུ་རྫོགས་པར་བསྐུར་ཞིང་ངོ་སྤྲད། སྒོ་གསུམ་ལྷའི་སྐུ་གསུང་ཐུགས་སུ་གནས་གྱུར་ཅིང་སྨིན་པར་མཛད་པ་དེ་ཡིན་ནོ། །དེ་ནས་བདག་ཅག་རྣམས་ལ་རྒྱུད་སྡེ་ཡང་སོ་སོར་བཤད་དེ་མཁས་པ་མི་བཞིའི་གདམས་ངག་དབང་དང་བཅས་པ་ནི་རྒྱལ་པོ་ཉིད་དང་གཉགས་ལ་གནང་བ་ཡིན་ནོ། །རྒྱལ་པོས་སྐུ་ཚེ་དེ་ལ་ཉམས་སུ་མ་ལོངས་ཀྱང་སྐུ་ཚེ་ཕྱིར་བསྲིངས། ན་མཁའ་སྙིང་པོས་ཉི་ཟེར་ལ་ཞོན། སངས་རྒྱས་ཡེ་ཤེས་ཀྱིས་ན་མཁའ་ལ་འཕུར། ངན་ལམ་གྱིས་སྤྱི་གཙུག་དུ་རྟ་མགོ་དང་རྟ་སྐད་ཕྱུང༌། མཁར་ཆེན་བཟས་བསད་པ་གསོ་ནུས། འབྲོག་མི་དཔལ་ཡེས་ཀྱིས་མ་མོ་དངོས་སུ་རྦོད། རླངས་དཔལ་སེང་གིས་སྡེ་བརྒྱད་བྲན་དུ་འཁོལ། བདག་གིས་ཀྱང་འཇིག་རྟེན་གྱི་དྲེགས་པ་དབང་དུ་འདུས་ཤིང་ལས་འཆོལ་བར་ནུས། གཞན་ཡང་དྲག་པོ་མཐུའི་སྐོར་མཐའ་ཡས་དང་རྩིས་(ཐ༤༣བ)

[Full Size]

སྨན་སྤྱད་གཟོའི་ཡན་ལག་དང་བཀའ་རྫོགས་པ་ཆེན་པོ་དགོངས་པའི་གཏིང་ཕྱུང་བ་རྣམས་ཀྱང་རྒྱལ་པོའི་དོན་དུ་ཞུས་ཤིང་བདག་ལ་གནང༌། གདམས་པ་འདི་རྣམས་གང་ཟག་ལ་བརྒྱུད་ན་བཀའ་ལད་ཅིང་ཆོས་བསྣུབས་པའི་ཚེ་ཉམས་པར་འགྱུར་བས་རྒྱལ་པོ་ཉིད་ཀྱི་ཕྱིར་ལོ་བརྒྱད་དང་བཅུ་གཅིག་བོད་ཡུལ་དུ་བཞུགས་ནས་ཞབས་ཀྱིས་བཅགས་པའི་གཙུག་ལག་ཁང་དང་བྲག་དང་ས་རྡོ་མཚན་མ་ཅན་རྣམས་ལ་མི་བརླག་པའི་ཚས་ཀྱིས་སྡོམས་མི་ཤིགས་པའི་རྒྱས་ཐོབ་ལ་གཏེར་དུ་སྦོས་ཅིག་ཞེས་གསུངས་ཤིང་བྲག་དམར་མགྲིན་བཟང་ལ་སྦས། མ་འོངས་པ་དང་དབོན་སྲས་ཀྱིས་ཆོས་བསྣུབས་པའི་ཚེ་མཁའ་འགྲོ་མ་རྣམས་ཀྱིས་ཁྱེར་སྟེ་མཐའ་འདུལ་གྱི་རྣམ་སྣང་གི་སྐུ་ལུས་ལ་གཏེར་དུ་སྦེད་ཅིང་རྒྱལ་པོ་ཉིད་དང་འཕྲད་པར་འགྱུར་རོ་ཞེས་སྣང་ངོ༌། །འདིར་ལོ་བརྒྱད་དང་བཅུ་གཅིག་ཞེས་སྣང་བས་བརྒྱ་དང་བཅུ་གཅིག་ནི་ཡི་གེ་མ་དག་པ་སྟེ་སློབ་དཔོན་པདྨས་རྒྱལ་པོའི་མཆོད་གནས་སུ་ལོ་བརྒྱད་དང་བོད་ཡུལ་གྱི་སྒྲུབ་གནས་རྣམས་བསྡོམས་པར་ལོ་བཅུ་གཅིག་བཞུགས་པ་ཡིན་པར་གོའོ། །ཆོས་དབང་གི་གཏེར་མ་མཁར་ཆེན་བཟའི་ཟིན་བྲིས་ལས་ཕལ་ཆེར་འདི་དང་མཚུངས་པ་ལ། དབང་གི་ཚེ་ལྷོ་ནུབ་ནས་འོད་ཟེར་ལྔ་འཕྲོས་ནས་མཁར་ཆེན་བཟའི་མེ་ཏོག་ལ་ལན་དྲུག་ཐིམ། མངའ་བདག་གིས་དཀྱིལ་འཁོར་དགུ་ཡོངས་སུ་རྫོགས་པ་ཞི་ཁྲོའི་ལྷ་ཚོགས་ཐམས་ཅད་ཞལ་གཟིགས། གཞན་བརྒྱད་ཀྱིས་མེ་ཏོག་བབས་པའི་ལྷ་སོ་སོའི་ཞལ་གཟིགས། མཁར་ཆེན་བཟས་སངས་རྒྱས་བྱང་སེམས་ཐམས་ཅད་རྡོ་རྗེ་སློབ་དཔོན་ལས་མ་འདས་པར་མཐོང༌། དེའི་དུས་བོད་སྤྱི་ཙམ་ལ་བདེ་སྐྱིད་ཕུན་སུམ་ཚོགས་པའི་དངོས་གྲུབ་རི་རྩེ་ཐམས་ཅད་ནས་ཆུ་འབབ་པ། ལྷ་སྲིན་ཐམས་ཅད་ཨར་(ཐ༤༤ན)

[Full Size]

ལ་གཏད་པ། རི་ཐམས་ཅད་ནགས་དང་ལུང་ཐམས་ཅད་ནར་འགྱུར་བ། རྒྱལ་པོའི་སྐུ་ཚེ་ཉི་ཟླ་དང་མཉམ་པ་སྦྱིན་པར་དགོངས་པ་ལ་བོད་སྤྱིའི་བསོད་ནམས་ཀྱི་སྐལ་པར་མ་གྱུར་པས་དངོས་གྲུབ་ལ་སློང་བ་མ་བྱུང་ངོ་ཞེས་སྣང་ངོ༌། །འཇམ་དཔལ་སྐུའི་བཀའ་བབས་ཀྱི་སངས་རྒྱས་ཡེ་ཤེས་དེ་ནི་སྒྲགས་པ་སངས་རྒྱས་ཡེ་ཤེས་སུ་སྣང་ལ་སྣུབས་སངས་རྒྱས་ཡེ་ཤེས་ནི་རལ་པ་ཅན་གྱི་དུས་བྱུང་ནས་བོད་དང་བལ་པོ་དང་རྒྱ་གར་དང་བྲུ་ཤའི་མཁས་པ་མང་པོ་བསྟེན་ཞིང་བྲུ་ཤའི་ལོ་ཙཱ་བ་ཆེ་བཙན་སྐྱེས་ལས་མདོ་དགོངས་འདུས་གསན། སྤྱིར་མི་མ་ཡིན་བྲན་དུ་འཁོལ། ལོ་བརྒྱ་དང་བཅུ་གསུམ་དུ་བཞུགས་སྟེ་སློབ་དཔོན་འདི་ལ་མདོ་སྒྱུ་སེམས་གསུམ་གྱི་བཀའ་ཐམས་ཅད་གཅིག་དུ་བབས་པ་ཡིན་ནོ། །དེ་ལ་སློབ་མ་ལྔ་ལས་སོ་ཡེ་ཤེས་དབང་ཕྱུག་ལ་ལྟ་བ་སྒང་དྲིལ། བ་གོར་འཕགས་པ་ལ་འགྲེལ་པ། ངན་ཡོན་ཏན་འཕགས་ལ་ཏར་ཀ་གེགས་སེལ། སྲུ་ལེགས་སྒྲོན་ལ་ཚིག་སྙན་པའི་རིགས་ཀྱི་སྲས། ཁུ་ལུང་པ་ཡོན་ཏན་རྒྱ་མཚོ་ལ་བཞི་ག་བཤད། དེའི་སྲས་ཡེ་ཤེས་རྒྱ་མཚོ་དང་པདྨ་དབང་རྒྱལ། དང་པོའི་སྲས་ལྷ་རྗེ་ཧཱུྃ་ཆུང་སྟེ་རྗེ་མི་ལའི་བླ་མ་དེ་ཡིན། དེའི་སློབ་མ་མྱང་ཡེ་ཤེས་འབྱུང་གནས། ཡང་སོ་ཡེ་དབང་ནས། ངབ་ཐུང་བྱང་ཆུབ་རྒྱལ་མཚན། ཀོང་བཙུན་ཤེར་ཡེ། རྭ་ཐུང་ཤེས་ཚུལ། མྱང་ཤེས་རབ་མཆོག་མྱང་ཡེ་འབྱུང་ཞེས་གཡུང་གིས་བཤད་ལ། ཁ་ཅིག་ངབ་ཀོང་རྭ་གསུམ་སོའི་སློབ་བུར་འདོད་པའང་སྣང་ངོ༌། །མྱང་ལ་ཐུར་པོ་ཆེས་གསན་ཞིང་སངས་རྒྱས་ཡེ་ཤེས་ཀྱི་དངོས་སློབ་སྟོང་ཚབ་འཕགས་པ་ལ་ཡང་གསན་ནོ། །དེ་ལ་ཟུར་པོ་ཆེ་ནི་གདུང་རུས་ཟུར། ཡབ་སྲས་བཟང་མིག་པོ་ཆེ། མཆེད་བཞིའི་ཆེ་བ་སྟེ་ཚངས་སྤྱོད་ཀྱི་དགེ་བསྙེན་དུ་བཞུགས། (ཐ༤༤བ)

[Full Size]

མྱང་ཡེ་འབྱུང་ལྕེ་ཤཱཀྱ་མཆོག་རོག་ཤཱཀྱ་འབྱུང་གནས་སོགས་བླ་མ་མང་དུ་བསྟེན་ནས་མདོ་སྒྱུ་སེམས་གསུམ་ལ་མཁས་པའི་མཐར་ཕྱིན། རྩ་རྒྱུད་བཤད་རྒྱུད་འགྲེལ་པ་སྒྲུབ་ཐབས་སོ་སོར་ཕྱེ་སྟེ་བཤད། ལྟ་དགོངས་ཀྱི་རྩེ་མོ་ཟུར་ཆུང་ཤེས་རབ་གྲགས། སྒྱུ་འཕྲུལ་གྱི་རྩེ་མོ་མི་ཉག་འབྱུང་གྲགས། མཁྱེན་རྒྱའི་རྩེ་མོ་ཞང་འགོས་ཆུང་བ། སྒོམ་སྒྲུབ་ཀྱི་རྩེ་མོ་བཟང་སྒོམ་ཤེས་རྒྱལ་སྟེ་རྩེ་མོ་བཞི། རྩགས་བླ་མ་ལ་སོགས་པ་རྩེ་ལྐོག་བརྒྱད། སྒོམ་ཆེན་བརྒྱ་རྩ་བརྒྱད་ལ་སོགས་པའི་སློབ་མ་བྱུང༌། འུག་པ་ལུང་གི་ལྷ་ཁང་ཤངས་མདའི་དཔལ་ཆེན་སོགས་བཞེངས། ཀླུ་བཀུག་སྟེ་ཆང་རྫར་བཅུག་ཁ་བཅིངས་ནས་ཆུ་ནུས་ཚད་བརྒྱབ་ཅིང་བཙགས་པས་ཀླུ་དེས་ཡུལ་གྱི་ཆང་བསྡུས་པས་ཆང་ཟད་མེད་ཞག་མང་པོར་བྱུང༌། རབ་གནས་ཀྱི་སྟོན་མོ་ལ་གྲོང་པའི་ཕྱུགས་གཡར་ནས་བསད་དེ་ཤ་བཀྱེ། དགོང་མོ་ཕྱུགས་རྣམས་གསོན་པོར་གཏད་སྐད་དེ་བསད་གསོ་ནུས། འབྲོག་མིས་གསེར་གྱི་འབུལ་བ་བསླངས་བ་ན་མི་མ་ཡིན་ལས་གསེར་སློང་པས་སྲོག་ཆགས་ཀྱི་གཟུགས་མ་བྱུང་གི་བར་ལོང་ཟེར་སྟེ་གསེར་ཁུང་བུ་ནས་བརྡོལ་བའི་མཐའ་སྦལ་པའི་གཟུགས་ཅན་བྱུང་བས་འཕྲོ་བཅད་དེ་གསེར་སྲང་བརྒྱ་ཕུལ་ནས་བསམ་མི་ཁྱབ་ཞུས་སྟེ་འབྲོག་མིའི་སྟོན་ལས་ཀྱི་དུས་བེར་གྱི་ཐོག་དུ་ཚར་མ་ཁུར་ནས་བསྐྱས། མཐར་སྒྲོ་ཕུག་གི་ལྷ་ཁང་བརྩིགས། དྲུག་བཅུ་རྩ་གཅིག་ལ་གཤེགས། ཟུར་ཆུང་པ་ནི་ཕབ་བཙུན་རྒན་ཞིག་བུར་ཡོད་པ་ཆུང་ངུ་ནས་ཟུར་ཆེན་གྱིས་བསོས། མཚན་ཤེས་རབ་གྲགས། ཕྱིས་བྲག་རྒྱ་བོ་དགུ་འདུས་སུ་སྒྲུབ་པ་མཛད་པས་བདེ་གཤེགས་རྒྱ་བོ་བར་ཐོགས། བླ་མའི་གསུང་གིས་སྒོམ་མ་ཕྱུག་མོ་མ་སྨད་ཅིག་གི་བདག་བྱས་སྟེ་ཡོ་བྱད་རྣམས་ཕུལ་ནས་ཆོས་ཞུས་དཔེ་བྲིས། ཕྱིས་(ཐ༤༥ན)

[Full Size]

སེམས་ཅན་གྱི་དོན་བྱེད་དགོས་པས་དེ་ལ་མ་ཆགས་པར་བྲོས་ཤོག་གསུངས་སྟེ་བཀའ་བཞིན་བསྒྲུབས། མདོ་དགོངས་འདུས་བཤད་པའི་ཐོག་མར་དཔེ་འགྲེམས་སུམ་བརྒྱ་བྱུང༌། ཆུང་ངུའི་དུས་སྐོར་བ་བྱས་པས་ཞབས་ས་ལ་མི་རེག་པར་བླ་མས་གཟིགས། འབངས་རྩེ་མོ་བཞི་དགོངས་པ་འགྲན་པས་དགོངས་པ་རི་བོ་ལྟར་གཡོ་འགུལ་མེད་པ་ཐམས་ཅད་ལ་བྱུང༌། ཡང་ཟུར་ཆུང་པ་ཏཱ་ལ་གང་ཙམ་དུ་ན་མཁའ་ལ་འཕགས། རུ་ལུའི་ཛཱབ་དབྱངས་བཟླ་བ་ན་དྲུང་དང་རྒྱང་གྲགས་ཀྱི་ཕ་རོལ་ལ་གསུང་ཆེ་ཆུང་གི་ཁྱད་པར་མི་མངོན། ཁྱེད་གསུམ་གྱིས་འཆད་ཉན་གྱིས་གསུངས་སྟེ་སྒྲུབ་པ་ལ་གཤེགས། དེ་གསུམ་གྱི་འགོ་བྱ་ཚས་གསང་སྙིང་གི་ཐབས་ལམ་གྱི་སྐབས་སུ་མ་རྒྱུད་དགོས་པར་འདུག་ཟེར་ནས་འགོས་ལྷ་བཙས་ཀྱི་སར་སོང༌། མེག་ཆུང་དབང་སེང་གིས་དཀྱིལ་འཁོར་སློང་བ་ལ་ཡོ་ག་དགོས་པར་འདུག་ཟེར་ནས་སུམ་པ་ཡེ་འབར་གྱི་སར་སོང༌། འགོས་ཆུང་དབང་ངེས་གྲུབ་མཐའི་རྒྱབ་ཏུ་ཚད་མ་དགོས་པར་འདུག་ཟེར་ནས་པང་ག་དར་ཆུང་གི་སར་སོང་བས་གོ་མ་ཆོད་མི་གསུམ་དུ་གྲགས། སྒྲུབ་པ་མཛད་པས་ཆོ་འཕྲུལ་མཐའ་ཡས་ཀྱང་ཉམ་ང་མ་བྱུང༌། སྣང་གྲག་རྡོ་རྗེ་སེམས་དཔའི་དཀྱིལ་འཁོར་དུ་ཤར། འདི་ཡང་བཟང་རྟོག་གི་མཐུ་བརྟས་པ་ཙམ་ལས་སྙིང་པོ་མེད་དགོངས་ནས་རྫོགས་ཆེན་རྩོལ་བྲལ་གྱི་ངང་ལ་བཞག་པས་རང་སྣང་རིས་མེད་ཀྱི་དགོངས་པ་ཤར། སྣོད་བཅུད་ལ་ཐོགས་མེད་ཟང་ཐལ་དུ་འབྱོན། མཚན་ཉིད་ཀྱི་མཁས་པ་ཅིག་གིས་རྩོད་པ་བཙུགས་སྟེ་ཀ་བ་ཆོས་ཅན་བྱས་པས། ང་རྫོགས་ཆེན་རང་སྣང་རིས་མེད་ཀྱི་མདུན་ན་ཀ་བ་མི་གདའ་གསུངས་ནས་ཕྱག་ཀ་བ་ལ་གཡུགས་པས་ཉི་ཞུར་ལ་བརྒྱབ་པ་ལྟར་སོང་བས་དད་དེ་སློབ་(ཐ༤༥བ)

[Full Size]

མར་གྱུར་པ་ནི་མ་ཐོག་བྱང་འབར་ཡིན་ཟེར། དེ་ནས་ལྷ་རྗེ་འུག་པ་ལུང་པ་མ་གཤེགས་ཙམ་ལ་གདན་ས་མཛད་དེ་ཚོགས་བསྐྱངས། དེའི་ཚེ་ཁྱུང་པོ་གྲགས་སེ་ཞེས་བྱ་བ་མཚན་ཉིད་ཀྱི་མཁས་པ་དེས་སློབ་མ་མཁས་པ་བཞི་ལྷ་རྗེ་སུན་འབྱིན་དུ་བཏང་སྟེ་སྐྱོ་སྟོན་ཤཱཀྱ་ཡེས་ཀྱིས་ཁྱེད་རྫོགས་ཆེན་པ་སྒོམ་གཙོ་བོར་བྱེད་དམ་བྱས་པས་ང་དམིགས་པ་གང་ལ་གཏད་འདུག་གསུངས། འོ་ན་མི་སྒོམ་མམ་དྲིས་པས་ང་གང་ལ་ཡེངས་འདུག་གསུངས་པས་དྲི་རྒྱུ་ཟད། གླན་སྟོན་ཤཱཀྱ་བཟང་གིས་ཁྱེད་སྒྱུ་འཕྲུལ་བ་སྣང་སྲིད་ལྷའི་དཀྱིལ་འཁོར་དུ་འདོད་དམ་དྲིས་པས་ཡུལ་རང་རྒྱུད་པར་མངོན་སུམ་དུ་སྣང་བ་སུས་ཁེངས་གསུངས། འོ་ན་མི་འདོད་དམ་བྱས་པས་མ་དག་པའི་འཁྲུལ་སྣང་སྦྱོང་ཕྱིར་སངས་རྒྱས་ཀྱིས་གསུངས་པ་དང་འགལ་བར་ཅི་ནུས་གསུངས་པས་སྤོབས་པ་ཟད། ཡང་ཁེང་བླ་མ་དང་མངའ་ཏི་ཇོ་ཤཱཀྱ་གིས་ཀྱང་དྲི་རྒྱུ་ཟད་དེ་དད་ནས་སློབ་མར་གྱུར་པ་ལ་སེམས་ཕྱོགས་སྒྱུ་འཕྲུལ་མདོ་འཕྲིན་སྒྲུབ་ཀྱི་ཀ་བ་སྟེ་ཀ་བ་བཞི་བྱུང༌། མ་ཐོག་བྱང་འབར་ལ་སོགས་གདུང་བརྒྱད། སྒོམ་ཆེན་མི་གཉིས། ཡུས་པོ་ཆེ་མི་གཅིག །ཏ་གུར་མི་གཉིས་སོགས་དཔག་མེད་བྱུང༌། འགོས་ལྷ་བཙས་ཀྱིས་ཀྱང་དཔལ་ཆེན་པོའི་འདུ་ཤེས་སྐྱེས་སྟེ་ཕྱག་བཙལ། ཡང་ཁེང་བླ་མ་ལ་ལོངས་སྤྱོད་ཀྱི་རྟེན་འབྲེལ་མཛད་པས་སྐུ་བསོད་རྒྱས། ཁྱུང་པོ་གྲགས་སེས་ཟུར་ཆུང་པ་འདྲ་བའི་ལོག་ཆོས་མཁན་བསད་ན་འཚང་རྒྱ་ངེས་བྱས་པ་གསན་པ་ན་ཆོས་གྲར་བཞད་ཅིང་ཆོས་བྱ་བ་ངའི་གསང་སྔགས་འདི་ཡིན་པར་འདུག་དགྲོལ་བ་ལམ་བྱེད་འདི་སྔགས་ལས་གཞན་ལ་མེད་སྙམ་ཙ་ན་ཟུར་ཆུང་པ་ལྟ་བུ་བསད་ན་འཚང་རྒྱ་ཞེས་ཁྱུང་པོ་གྲགས་སེ་ལྟ་བུའི་མཚན་ཉིད་པ་ཆེན་པོ་ཡང་བློ་ཕུགས་ངའི་ཆོས་ལ་གཏོད་པར་(ཐ༤༦ན)

[Full Size]

འབུལ་བས་དགའ་བ་ཅིག་བྱུང་གསུང་སྐད་དེ་ཕྲག་དོག་རྩ་བ་ནས་ཞི། དྲུག་བཅུ་རྩ་གཅིག་ལ་གཤེགས། དེའི་སྲས་སྒྲོ་ཕུག་པ་ཆེན་པོ་ནི་མངའ་ཏིཀྲ་བཟའ་གཙུག་ཏོར་ལྕམ་ལས་བཙས། སྐྱོ་སྟོན་ཤཱཀ་ཡེའི་རྨི་ལམ་ན་ཡུམ་གྱི་སྲིན་ལག་ལ་སྟོན་པའི་སྐུ་རྨིས་པས་ཤཱཀྱ་སེང་གེ་དང་མངའ་ཆ་ཧོར་པོར་གྲོགས། ཀ་བ་བཞི་སོགས་བླ་མ་མང་དུ་བསྟེན། ཕྱག་རྡོར་གྱི་སྤྲུལ་པར་གྲགས། འཕྲིན་ལས་ཤིན་དུ་ཆེ་སྟེ་ལྷོ་བྲག་བྱ་ཟེའི་མར་པ་ཤེས་རབ་འོད་སོགས་སློབ་མ་གདུགས་ཐོགས་སྟོང་དང་གཙོ་བོ་བཅུ་གཉིས་སོགས་བྱུང༌། རི་རྩེར་ཚོགས་འཁོར་མཛད་མགུར་གསུངས་ནས་ན་མཁའ་ལ་ཇེ་མཐོར་མཁའ་སྤྱོད་ཏུ་འབྱོན་པར་ཆས་པ་སློབ་མས་ངུས་པས་ངས་ལུས་མ་བཞག་ན་ཤུལ་དུ་བཀྲ་ཤིས་པ་ཡིན་སྟེ་ད་ཅུང་མི་ལེགས་གསུངས། རེ་གཅིག་པ་ཤིང་སྟག་ལ་ཐེགས། སྤུར་བཞུ་ཚེ་མི་མ་ཡིན་གྱིས་ཕུལ་བ་མི་ལ་མེད་པའི་ནོར་སྣ་བཞི་བྱུང༌། སློབ་མའི་མཆོག་ལྕེ་སྟོན་རྒྱ་ནག་ནི་མེས་པོ་འཕངས་བྱང་བརྩོན་གྱིས་སྐྱིལ་མཁར་ལྷ་ཁང་བཞེངས། ཤིང་ཕོ་ཁྱི་ལ་འཁྲུངས། དེའི་དུས་མཁས་པ་ཤེ་ཁྱུང་གཉིས་འབན་འབྲེ་གཉིས་རྒྱ་སྟག་གཉིས་བྱ་བ་ཡོད་པའི་ཕལ་ཆེར་ལ་གཏུགས་སྟེ་དབུ་ཚད་སྡེ་སྣོད་ལ་མཁས་པའི་མཐར་སོན། སྒྲོ་ཕུག་པ་ལ་རྒྱ་བརྩོན་སེང་དཔོན་གཡོག་གིས་རྩོད་པ་བཙུགས་པ་ན་ཁོང་རབ་ཏུ་ཕམ་པར་བྱས་པས་མཉེས་ནས་གདམས་ངག་ཐམས་ཅད་རྫོགས་པར་གནང་བས་སློབ་མ་གཞན་ལས་ཆོས་ཟབ། དགུང་ལོ་བཞི་བཅུ་ལ་གཤེགས་བཙུན་མཛད་གཞན་དོན་བསྐྱངས་སྟེ་ལྔ་བཅུ་རྩ་དྲུག་ལ་གཤེགས། དེའི་སློབ་མ་དབུས་པ་སྟོན་ཤཱཀ་གིས་སེ་བྲག་བཏབ་པས་དམ་པ་སྲེ་བྲག་པར་གྲགས། དབུས་པ་ཞིག་པོ་ནི་(ཐ༤༦བ)

[Full Size]

གཟུང་འཛིན་གྱི་འཁྲུལ་པ་ཞིག་སྟེ་གྲུབ་ཐོབ་ཆེན་པོར་བཞུགས། ལྕེ་སྟོན་ཡོན་ཏན་གཟུངས་ནི་རྒྱ་ནག་གི་དབོན་པོར་འཁྲུངས། སེ་བྲག་པ་སོགས་བསྟེན་སྟེ་ལྷ་རྗེ་ལྷ་ཁང་པར་གྲགས། དེའི་སློབ་མ་ཞིག་པོ་བདུད་རྩི་ནི། སངས་རྒྱས་དྭགས་ཆུང་བྱ་བ་དབུས་ཀྱི་བཟད་པ་དྭགས་པོ་རྒྱ་རས་ཀྱི་ཕྱིར་བྱོན་པས་མཚན་ཆགས་པ་ཞིག་ལྷོ་བྲག་གི་ཕུར་མོང་སྒང་ན་བཞུགས་པ་བཟད་པས་སྤྱན་དྲངས་སྟེ་ལྷ་གདོང་དང་བྱ་སྐད་དགོན་པ་སོགས་ཕུལ་ནས་བཞུགས། དེའི་སྲས་སྔ་རྒྱུད་ལ་མཁས་པ་ཇོ་ནམ་སོགས་བྱོན་ཞིང་ཕྱི་ཚར་ཝང་ཆུང་མ་ལ་ཞིག་པོ་བདུད་རྩི་བལྟམས། ཡབ་དང་ལྷོ་བལ་གྱི་རྣལ་འབྱོར་མ་མངོན་ཤེས་ཅན་སོགས་ཀྱིས་གཞན་དོན་འབྱུང་བར་ལུང་བསྟན། འོངས་ཕུད་གཏོར་བས་འོངས་ཆེར་འཕེལ་བས་ཡུམ་གྱིས་ཀྱང་སྤྲུལ་སྐུར་ཤེས། ཞང་པོ་དམ་པ་སེ་བྲག་པ་དང་བླ་མ་ལྷ་ཁང་པ་བསྟེན། ཞང་གཡུ་བྲག་པའི་སྙན་པ་ཐོས་ནས་སྤྱན་དྲངས་སྟེ་ཆོས་འཁོར་བཙུགས་པས་ཆོས་ལྷ་ཁང་པ་ལ་ཉན་ནས་ཞབས་ཏོག་ཚལ་པ་ལ་བྱས་ཟེར་ནས་སྐྱེས་བོས་ཤེས་པ་ན་ལྷ་རྗེ་ལྷ་ཁང་པས་ནས་དང་ཤ་མར་བསྐུར་སྟེ་ཁྱོད་བླ་མ་བཟང་པོ་སྤྱན་དྲངས་ཆོས་འཁོར་བྱེད་པ་ལ་ངས་ཀྱང་འཐུད་བྱ་དགོས་སྟེ་འདི་ལས་མ་འབྱོར་གསུང་བས་དད་པ་ལྷག་པར་སྐྱེས། གཞན་གྱི་ཡང་ཟེར་ལོ་ཆང༌། རྟོགས་པའི་མཐར་ཕྱིན། སྣང་བ་ལ་ཐོགས་བརྡུགས་མེད། བོད་ཡུལ་ཐམས་ཅད་དུ་བྱོན་རི་རྒྱ་ལུང་རྒྱ་ལ་སོགས་གཞན་ཕན་མཐའ་ཡས་མཛད། ལོ་པཎ་སུ་བྱོན་ཀྱང་འདེགས། རྒྱ་གར་ནག་སོགས་ནས་སློབ་མ་མཐའ་ཡས་པ་འདུས། རྡོ་རྗེ་གདན་ལ་མཆོད་པ་ལན་གསུམ་བསྐྱལ། ལྷ་སར་ཆུ་རགས་དང་ཞིག་གསོ་རྒྱ་ཆེར་མཛད། ཕྱིས་ལྷ་ས་ནས་ཐེགས་པའི་སྐྱེལ་ཆང་གིས་(ཐ༤༧ན)

[Full Size]

གྲ་པ་རྣམས་བཟི་ནས་འཐབ་མོ་བྱས་པས་ཐུགས་སྐྱོ་སྟེ་ང་གཅིག་པ་ས་ཡོས་ལ་གསང་ཕུའི་རྒྱ་ར་གད་ལོགས་སུ་གཤེགས། གདུང་ཆབ་གཞུང་ལ་སྤྱན་དྲངས་ནས་ཐང་སྐྱར་བཞུ་བས་ས་གཡོས། ཡོན་ཆབ་ཀྱི་ནང་ནས་འཇའ་ཚོན་གྱི་པདྨ་སྐྱེས་པ་ཞག་གསུམ་དུ་བསྡད། གདུང་ཁང་གི་མཆོད་རྟེན་བྱས། དེའི་གདན་སར་དམིགས་སྟེ་ཐང་སྐྱའི་གཙུག་ལག་ཁང་བྱས་སོ། །དེའི་སློབ་མ་མ་ཧཱ་ལྷུན་པོ། མཁས་པ་ཇོ་ནམ། དབུས་པ་ཇོ་བསོད་ལ་སོགས་བྱོན་ཞིང་སློབ་མའི་མཆོག་ནི་རྟ་སྟོན་ཇོ་ཡེས་སྟེ་མེས་པོ་རྟ་སྟོན་དབང་གྲགས། ཡབ་རྟ་སྟོན་ཇོ་འབུམ་ཡིན། གཅུང་པོ་རྟ་སྟོན་ཇོ་བསོད། མཆེད་གཉིས་ཀས་ཆོས་མང་དུ་མཁྱེན་ཞིང་གཙོ་བོར་ཞིག་པོ་བསྟེན། བླ་མ་ཤིན་དུ་མཉེས། ཡུལ་གཞིས་ཐམས་ཅད་བཙོངས་པའི་སྤོང་དག་ཆོས་འཁོར་ལན་བཞི་བྱས། གསུང་སྒྲོས་ཐམས་ཅད་ཡི་གེར་བཀོད་པས་ཕྱི་རབས་ལ་དྲིན་ཆེ། རི་ཁྲོད་འགྲིམས་པ་བས་ཀྱང་བླ་མའི་ཞབས་ཏོག་འདི་རང་སྟོབས་ཆེ་བར་འདུག་གསུངས། བླ་མ་གཤེགས་ནས་མྱ་ངན་བྱུང་བ་ན་རྨི་ལམ་དུ་ཞིག་པོ་བྱོན་སྟེ་ཆོས་གསུངས་པས་སྡུག་བསྔལ་རང་ཡལ་སྟེ་དེ་ཕྱིན་སྡུག་བསྔལ་རང་རྒྱུད་པ་དང་བྲལ། ལྷ་སར་ཞབས་ཏོག་མང་དུ་མཛད་དེ་རེ་བརྒྱད་པ་ལྕགས་སྟག་ལ་འདས་སོ། །གཞན་ཡང་རྟ་སྟོན་གཟི་བརྗིད་ལ་སོགས་པ་མཁས་པ་མང་དུ་བྱུང་ངོ༌། །སྒྲོ་ཕུག་པའི་སློབ་མ་ཇི་སྟོན་ཉེ་སྟོན་གཉིས་ལ་གཙང་ནག་འོད་འབར་གྱིས་ཐུག་དེ་ནས་རིམ་པར་གཡུང་སྟོན་སངས་རྒྱས། རྒྱ་ཁབ་གོང་པ། པཀྴི་ཤཱཀྱ་འོད་དང་གཡུང་ཆོས་མགོན། དེ་གཉིས་ལ་རྦ་སྟོན་གཟི་བརྗིད། དེ་ལ་རྒྱལ་བ་གཡུང་སྟོན་པས་གསན་ནོ། །ཡང་ན་གཙང་ནག་ལ་མེ་སྟོན་མགོན་པོ་(ཐ༤༧བ)

[Full Size]

བླ་མ་སྲོ། པཀྴི་ཤཱ་ཀུ་འོད། རྟ་ནག་པ་བདུད་འདུལ། མདའ་ཤཱཀྱ་འཕེལ་དང་ཟུར་བྱམས་པ་སེང་གེ །རྒྱལ་བ་གཡུང་ངོ༌། །རྒྱལ་བ་གཡུང་ནི་མཁས་པ་ཆེན་པོ་སར་རྙིང་གཉི་གའི་གྲུབ་ཐོབ་རྩོད་པ་མེད་པའོ། །ཡང་ཡར་ལུངས་རྒྱ་སྨན་དུ་གཉལ་སྟོན་སངས་རྒྱས་གྲགས་ཅེས་བྱ་བ་ཞིག་གིས་ཛམྦྷ་ལ་བསྒྲུབས་པས་ཞིང་ཆུང་ཞིག་ཡོད་པ་ཆུས་ཁྱེར་སྟེ་རྒྱལ་ཁམས་ལ་བྱོན་པས་པུ་གུ་དོར་ཕྱུག་པོ་འཛེ་ཅན་ཞིག་ཤི་བའི་རོ་ལུས་པ་ལ་སྙིང་བརྩེ་ནས་དོར་བས་མལ་འོག་ནས་གསེར་དཔག་མེད་བྱུང་བས་དབུལ་བ་བསལ་ལོ། །སྒྲོ་ཕུག་པའི་སློབ་མ་བྱ་ཆེན་པོའི་དཔོན་པོ་དང་མྱང་ནག་མདོ་པོ་སོགས་ལ་ཆོས་གསན། ཡང་དག་གི་ཞལ་གཟིགས། འཁྲུངས་ཡུལ་དུ་རྡོ་ཐོག་ཐེལ་བཏབ། དེའི་སློབ་མ་སྐྱི་ཆོས་ཀྱི་སེང་གེ་སྟེ་ཧོར་ཡུལ་དུ་བྱོན་པས་རྒྱལ་པོ་སེ་ཆེན་གྱིས་མཆོད་རྟེན་ཞིག་དུ་བཅུག་ནས་སྒོ་བརྩིགས་སྟེ་བཞག །ལོ་འཁོར་ནས་བལྟས་པས་རྡོ་རྗེ་ཕུར་པའི་སྐུར་གྱུར་འདུག་ནས་གཤེགས་པ་ལ་རྔོ་ཐོག་པ་ལ་དར་རིང་ཆེན་མོ་སོགས་དང་ལས་ཀ་ཆེར་གནང་ནས་བླ་མཆོད་མཛད། སྐྱི་ཆོས་སེང་གི་སློབ་མ་སྨན་ལུང་པ་སྟེ་ཡུལ་ཡར་ལུངས་པ། ཡབ་ཕ་ཇོ་བདག་ཉིད་ཆེན་པོ། གདུང་རུས་མྱང༌། མཆེད་ལྔའི་ཆེ་ཤོས། གཞན་བཞི་ནི་ཆོས་ལྡན་པ། སྐལ་ལྡན་པ། དུར་ཁྲོད་པ། དབང་རྒྱལ་བའོ། །མཚན་ཤཱཀྱ་འོད། གསང་མཚན་མི་སྐྱོད་རྡོ་རྗེ་སྤྱིར་ཡར་ལུངས་སྤྲུལ་སྐུར་གྲགས། གུ་རུ་ཆོས་དབང་གི་ཡབ་སྟོན་ཉིའི་སྐྱེ་བ་ཡིན་པས་བཀའ་བརྒྱད་ཀྱི་བཀའ་བབས་གཏད་ཅིང་མྱང་སྟོན་དབོན་པོ་ཞེས་ཆོས་དབང་གི་སྐྱེས་རབས་ཞུ་བ་པོ་ཡིན། གསང་སྙིང་གི་ཁོག་དབུབ་ཏཱི་ཀ་རྒྱུད་དོན་རྣམ་ངེས་ལ་སོགས་པ་མཛད། དེ་ལ་དྭགས་པོའི་སངས་རྒྱས་གོང་ལ་བས་གསན་(ཐ༤༨ན)

[Full Size]

ཞིང་དྭགས་པོ་ཉིད་དུ་གཉན་སྟོན་ལ་སོགས་པའི་སློབ་མ་མང་དུ་བྱུང་སྟེ་དར་རྒྱས་སུ་མཛད་ཅིང་དེ་ལས་ཁམས་སུ་མང་དུ་དར་རོ། །ཡར་ལུངས་སྤྲུལ་སྐུའི་སྲས་རིན་པོ་ཆེ་ཤཱཀྱ་འབུམ་པ་དང་སྐྱི་ཆོས་སེང་གི་གདན་ས་པ་རྒྱ་ཡེ་ཤེས་མགོན་པོ་སོགས་ཀྱིས་ཀྱང་དར་རྒྱས་སུ་མཛད། ཡང་སྒྲོ་ཕུག་པ་ཆེན་པོའི་སློབ་མ་འཛམ་སྟོན་འགྲོ་བའི་མགོན་པོ་ཞེས་བྱ་བ་མཁས་གྲུབ་ཆེན་པོ་ཅིག་བྱོན་སྟེ་འདི་ནི་རྗེ་དུས་མཁྱེན་གྱི་སྔ་སློབ་ཅིག་གི་སྐྱེ་བར་སྔོན་དུ་ལུང་བསྟན་ཞིང་ཕྱིས་ངོས་འཛིན་མཛད་པ་འཛམ་སྐྱེ་བ་གསུམ་པ་ཅེས་འཛམ་ཡུལ་ཙམ་ན་སྒོམ་བཟང་བ་བྱུང་ཞེས་པ་དེ་ཡིན་པས་སྙམ་ལ་དེའི་སློབ་མ་རྗེ་ཕག་མོ་གྲུ་པ་དང་འཁྲུངས་ཡུལ་གཅིག་ཞིང་མ་དཔུན་དུ་གྱུར་པ་མཚན་ཤེས་རབ་སེང་གེ་དང་སྤོབས་པ་མཐའ་ཡས་ཞེས་བྱ་ལ་སྤྱིར་ཀ་དམ་པ་བདེ་གཤེགས་སུ་གྲགས་པ་དང༌། གཙང་དུ་འཁྲུངས་པའི་གཙང་སྟོན་རྡོ་རྗེ་རྒྱལ་མཚན་ཞེས་བྱ་བ་གཉིས་བྱོན་ལ། འདི་གཉིས་ཀྱང་གྲོགས་མཆེད་ལས་དཔོན་སློབ་ཏུ་གྱུར། ཀ་ཐོག་གིས་དེར་མི་མ་ཡིན་གདུག་པ་ཅན་ཞིག་གིས་མངོན་སུམ་དུ་གནོད་པ་ཆེར་བྱེད་པ་ཅིག་ཡོད་པ་ལ་དེ་གནས་པའི་ཕ་བོང་སྐུ་ཆོས་ཀྱིས་བཅིངས་གཙང་སྟོན་གྱིས་ཁྲིད་དམ་པས་ཕྲེང་ལྕག་གིས་དེད་དེ་ཀ་རོང་གི་ཐག་རིང་པོར་བསྐྱལ་བས་ཕ་བོང་ལ་ཕྱག་ཕྲེང་སོགས་ཀྱི་རྗེས་གསལ་བར་དོད་པ་ད་ལྟ་ཡོད། ཡི་གེ་ཀ་འདྲ་བའི་ས་ཐོག་དུ་དགོན་པ་བཏབ་པས་ཀ་ཐོག་དུ་གྲགས། དམ་པ་བདེ་གཤེགས་དེ་ནི་སྔོན་ཀྲྀ་ཀིའི་བུ་མོ་བདུན་གྱི་དང་པོ་དང༌། གནས་བརྟན་བར་དྷ་ཛ། ཕལ་ཆེན་པའི་གནས་བརྟན། མུ་སྟེགས་ཀྱིས་མཁས་པ་ཕྱིས་ནང་པར་གྱུར་པ། ཝ་ར་ཎ་སིའི་ཆོས་རྒྱལ། ལོ་ཙཱ་བ་རྨ་རིན་ཆེན་མཆོག་ལ་སོགས་པའི་སྐྱེ་བ་མང་དུ་དྲན། ཁྱད་པར་དུ་སྐྱེ་བ་སྔ་མ་དེ་བལ་པོ་(ཐ༤༨བ)

[Full Size]

བྷ་དནྟ་བྱ་བའི་རྣལ་འབྱོར་པ་ཅིག་མི་ཉག་གི་རྒྱལ་པོའི་བླ་མར་གྱུར་སྟེ་དད་ཆེས་པས་དེའི་དབུའི་དབྱིབས་བྱས་ནས་ཕྲེང་བའི་མདུད་འཛིན་ལ་བརྒྱུད་པར་མི་ཉག་གི་ཡུལ་ཐམས་ཅད་དུ་བཀར་བཏགས། ཕྱིས་ཕྱིའི་རྒྱ་མཚོ་གཟིགས་སུ་བྱོན་སྟེ་རྒྱ་མཚོའི་འགྲམ་དུ་ཕྲུ་མ་བཏབ་སྟེ་བཞུགས་པ་ན་མཚན་མོ་དུས་མིན་གྱི་རྒྱ་མཚོའི་རླབས་འཁྲུགས་པའི་སྒྲ་འབྲུག་སྟོང་འུར་བ་ལྟ་བུ་བྱུང་སྟེ་གཞན་རྣམས་བྲོས། བླ་མ་ཁྲི་ཐོག་དུ་བཞུགས་པ་རླབས་ཀྱིས་གཤེགས་ནས་སྐུ་གདུང་སླར་མཚོ་འགྲམ་དུ་ཕུལ་བ་རྒྱལ་པོས་སྤྱན་དྲངས་ནས་མཆོད་པ་བྱེད་པ་དང༌། རྒྱ་གར་ནུབ་ཕྱོགས་ཀྱི་རི་བྲགས་ཆེན་པོར་ད་ལྟ་སུམ་བཅུ་རྩ་གསུམ་གྱི་བྱང་ཕྱོགས་ཀྱི་ཚལ་ན་གནས་པའི་ལྷའི་དྲང་སྲོང་གཞོན་ནུས་བྱིན་ཕྱི་མར་བདེ་བ་ཅན་དུ་འབྱོན་པ་འདི་ཉིད་དེའི་ཚེ་དྲང་སྲོང་ག་ག་ཏི་བྱ་བར་ཡོད་པའི་དྲུང་དུ་ནེ་ཙོར་སྐྱེས་སྟེ་རིགས་སྔགས་བསླབས་པས་ནུས་པ་ཅན་དུ་གྱུར། དེའི་ཚེ་རིའི་ཤར་ངོས་ན་དཀར་པོའི་ཀླུ་ཅིག་དང༌། ལྷོ་ངོས་ན་ནག་པོའི་ཀླུ་སྟོབས་ཅན་ཞིག་གནས་པ་ལས་ནག་པོའི་ཀླུ་དེས་ན་མཁའ་ལ་ཐོག་སེར་དང་སྤྲིན་ནག་གིས་ཁྱབ་པར་བྱས། ས་གཞི་ལ་སྦལ་སྤྲུལ་འཇོང་སྡིག་སོགས་སྲོག་ཆགས་སྣ་ཚོགས་པས་ཁྱབ་པའི་དམག་དཀར་པོ་ལ་དྲངས་པ་ན། ཀླུ་དཀར་པོ་དེས་ནེ་ཙོ་ལ་སྐྱབས་སུ་སོང་བས་ནེ་ཙོས་རིག་སྔགས་བཏོན་གཤོག་པ་བརྡབས་པས་ནག་པོའི་ཀླུ་བྲོས་སྤྲིན་ཡལ་སྲོག་ཆགས་རྣམས་ཀྱང་མེད་པར་གྱུར་སྟེ་དཀར་པོའི་ཀླུ་སྟོབས་རྒྱས་པས་རྒྱལ་ཁམས་ཐམས་ཅད་ཏུ་འབྲུ་བཅུད་འཕེལ་ཞིང་བདེ་བར་བྱས་པ་དང༌། ཁྱད་པར་རྒྱ་གར་དུ་མུ་སྟེགས་ཞི་བ་པ་དར་སྟེ་བསྟན་པ་ནུབ་ཏུ་ཆ་བའི་ཚེ་སློབ་དཔོན་ཞི་བའི་ལྷར་གྱུར་ནས་སྔོན་དུ་ཞི་བའི་གྲུབ་མཐའ་སྦྱངས་ནས་ཕྱིས་བསྙིལ། སྤྱོད་འཇུག་གསུངས། མུ་སྟེགས་མཁས་པ་(ཐ༤༩ན)

[Full Size]

ཅིག་དང་ཡུན་རིང་དུ་རྩོད་པ་ན་ཉིད་ཅིག་སློབ་དཔོན་མ་བཞུགས་པའི་ཤུལ་དུ་སླེབས་པའི་ཚེ་སློབ་དཔོན་གྱི་ཁྲིའི་ན་མཁར་འཇམ་པའི་དབྱངས་བཞུགས་པར་མཐོང་བས་དད་དེ་རྗེས་སུ་བཟུང་བ་རྣམས་གསལ་བར་དྲན། སངས་རྒྱས་ཀྱི་ཞིང་མཐའ་ཡས་པ་རྒྱུན་དུ་གཟིགས། སྔོན་རྒྱལ་པོར་གྱུར་པའི་ཚེ་བློན་པོ་ཅིག་གིས་མཆོད་ཡོན་དབྱེན་བྱས་པའི་ལྕེ་གཅོད་ཏུ་བཅུག་པས་ད་ལྟ་ངག་མི་བདེ་བ་ཡིན་གསུང་ཞིང་རྒྱུ་འབྲས་ལ་རྩིས་སུ་མཛད། ཡོན་ཏན་ན་མཁའ་དང་མཉམ་གཞན་ཕན་མཐའ་ཡས། འདུལ་བ་གཙོ་བོར་སྟོན་པའི་སྒོ་ནས་གསང་སྔགས་དར་བར་མཛད་ལ། ཕྱི་མར་བདེ་བ་ཅན་དུ་བྱང་ཆུབ་སེམས་དཔའ་བློ་གྲོས་སྙིང་པོར་འགྱུར་ཞིང་མ་འོངས་པ་བསྐལ་པ་སྐར་མ་བཀྲམ་པ་ལྟ་བུ་ལ་ཚེ་དཔག་མེད་ཅེས་བྱ་བའི་དེ་བཞིན་གཤེགས་པར་འཚང་རྒྱ་བར་དགོངས་སོ། །རིན་པོ་ཆེ་གཙང་སྟོན་པ་དེས་ཀྱང་མི་བསྐྱོད་པའི་ཞིང་རྟག་པར་གཟིགས་སྟེ་བྱང་ཆུབ་སེམས་དཔའ་ནོར་བུའི་སྙིང་པོ་ཁྱོད་མ་འོངས་པ་དེ་བཞིན་གཤེགས་པ་འོད་ཟེར་རབ་ཏུ་འཕྲོ་བ་ཞེས་བྱ་བར་འཚང་རྒྱའོ་ཞེས་ལུང་བསྟན་ཐོབ། བཀའ་སྲུང་བྲན་ལྟར་དུ་འཁོལ། ཟག་མེད་མངོན་དུ་བྱས་པའི་རྟགས་རྫོགས། དེ་བཞིན་གཤེགས་པ་འོད་ཀྱི་རྒྱལ་པོའི་ཞིང་དུ་བྱང་ཆུབ་སེམས་དཔའ་འོད་ཀྱི་རྒྱལ་པོར་གྱུར་པ་དང༌། ལོ་ཙཱ་བ་ཀ་བ་ཡེ་ཤེས་མཆོག་དང༌། རྒྱ་གར་ཕྱག་ན་ལ་སོགས་པའི་སྔོན་གྱི་གནས་མང་དུ་དྲན། འཕྲིན་ལས་མཐའ་ཡས་ཤིང་ཕྱི་མར་བདེ་བ་ཅན་དུ་བྱང་ཆུབ་སེམས་དཔའ་ནོར་བུའི་སྙིང་པོར་འགྱུར་བ་དང༌། བསྐལ་པ་སྐར་མ་བཀྲམ་པ་ལྟ་བུའི་སངས་རྒྱས་རྣམས་ཀྱི་དཀྱིལ་ཙམ་དུ་དམ་པ་བདེ་གཤེགས་འཚང་རྒྱ་ཞིང་དེ་ནས་བཅུའི་འོག་དུ་དེ་བཞིན་གཤེགས་པ་འོད་ཟེར་རབ་ཏུ་འཕྲོ་བར་འཚང་རྒྱ་བར་གཟིགས། (ཐ༤༩བ)

[Full Size]

འགྲོ་མགོན་རས་ཆེན་གྱིས་ཀྱང་དག་སྣང་མཐའ་ཡས་པ་གཟིགས་ནས་ཆོས་མང་དུ་གསན་ནོ། །དེའི་སློབ་མ་སྤྱན་སྔ་བྱམས་པ་འབུམ་ནི་སློབ་དཔོན་ཛ་ལནྡྷ་ར་པའི་སློབ་མ་ནག་པོ་སྤྱོད་པ་ཆེན་པོ་ཡིན་སྟེ་རྗེ་མི་ཏྲ་ཛོ་གིས་སོ་མ་ཛོ་གི་ཞེས་བྱ་བ་ཐུན་མོང་གི་དངོས་གྲུབ་ཐོབ་པ་ཅིག་ལ་ཁྱོད་བོད་དུ་འགྲོ་ན་ཡུལ་ཀ་ཐོག་བྱ་བར་སློབ་དཔོན་ཤཱནྟ་དེ་ཝ་དང་བཛྲ་པཱ་ཎི་བོད་དུ་སྐྱེ་བ་བཟུང་བའི་གདན་ས་ན་ཀ་ཧྣ་པ་ཆེན་པོ་ཡོད་ཀྱིས་དེ་ལ་ཕྱག་གྱིས་ཀམ་པོ་གནས་ནང་དང་འཇང་ཡུལ་དུ་ཡང་ལན་རེ་སོང་ཞིག་ཞེས་ལུང་བསྟན་སྟེ་བོད་དུ་འོངས་ནས་འདིའི་ཞབས་ལ་གཏུགས་ལུང་བསྟན་པ་བཤད་ཏོ། །གཞན་ཡང་ཀརྞ་རི་པའི་སློབ་མ་ཨཱ་ནནྟ་ཤྲཱིར་གྱུར་སྟེ་རྡོ་རྗེའི་གདན་དུ་གནས་བརྟན་བྱས། ས་ར་ཧའི་སློབ་མ་དཱ་ན་ཀིརྟིར་གྱུར་སྟེ་པཎྜི་ཏ་ཐམས་ཅད་ཀྱི་བླ་མར་གྱུར། རྒྱ་གར་ལྷོ་ཕྱོགས་ཀྱི་ཆོས་རྒྱལ་དྷི་པཱ་ལ་རཱ་ཛཱར་གྱུར་སྟེ་གྲུབ་ཐོབ་བརྒྱད་བཅུ་ཕལ་ཆེར་མཆོད་གནས་སུ་རྟག་པར་བཞུགས་པ་ལ་ལོ་བརྒྱད་བཅུ་རྩ་བཞིར་མཆོད་ཅིང་སོ་མ་པུ་རི། ཛ་གཧ་པཱ་ལ་ཀོ་ཊ་ལ། ཨོ་ཌྱན་ལ་སོགས་པའི་གཙུག་ལག་ཁང་ཆེན་པོ་བདུན་བཞེངས་པ་སོགས་ཀྱི་སྔོན་གནས་དྲན། ཕྱི་མར་བདེ་བ་ཅན་དང་སླར་དཔལ་ལྡན་འབྲས་སྤུངས་སུ་བྱང་ཆུབ་སེམས་དཔའ་ཀ་མ་ལ་ཤཱི་ལར་འགྱུར་བར་གཟིགས། གྲུབ་ཐོབ་ཀརྨ་པཀྴིིས་ཀྱང་འདི་ལས་རབ་ཏུ་བྱུང་ཞིང་རྫོགས་པ་ཆེན་པོའི་བཀའ་ཐམས་ཅད་གསན་ཞིང་སྤྱིར་འཕྲིན་ལས་ན་མཁའ་དང་མཉམ་མོ། །དེ་ནས་ཀྱང་གྲུབ་ཐོབ་ཀརྨ་པཀ་ཤི་དང་འགྲོ་མགོན་ཆོས་རྒྱལ་འཕགས་པའི་བླ་མ་ཙ་ཏི་སྤྱན་སྔ་མང་ཕུ་བ་བསོད་ནམས་འབུམ་ལ་སོགས་མཁས་ཤིང་གྲུབ་པ་ཤ་སྟག་བྱོན་སྟེ་ད་ལྟར་ཡང་དར་ཞིང་རྒྱས་ལ། ཀ་ཐོག་པ་འདི་རྣམས་ནི་གཞི་འདུལ་བའི་ཚུལ་ཁྲིམས་གཙོ་བོར་མཛད་པས་དགོན་པ་གཙང་ཞིང་དག །སྤྱོད་འཇུག་(ཐ༥༠ན)

[Full Size]

སོགས་སྤྱོད་ཕྱོགས་དར་བས་ཐེག་ཆེན་གྱི་ལམ་གྱི་གཞུང་བསྲོངས། སྔགས་མཚན་ཉིད་མཐའ་དག་དར་ཞིང་ཁྱད་པར་མདོ་སྒྱུ་སེམས་གསུམ་གྱི་བསྟན་པ་དངོས་གཞི་འདིར་གནས་པ་ཡིན་ནོ། །སྤྱིར་ཟུར་ཆེ་ཆུང་ལས་འཕྲོས་པའི་སྔགས་པས་བོད་ཁམས་གང་ཞིང་བཤད་ཉན་ཤིན་དུ་དར་བས་སྔོན་བོད་ཏུ་མདོ་སྒྱུ་སེམས་གསུམ་ལས་དར་བའི་ཆོས་མ་བྱུང་སྙམ་སྟེ་ཟིན་བྲིས་ཁོ་ནའང་མཐའ་ཡས་པར་སྣང་ལ་ཅུང་ཟད་ཞིབ་པ་དེབ་སྔོན་ན་སྣང་ངོ༌། གསང་སྔགས་སྙིང་མ་བཀའ་མའི་སྐབས་བཤད་ཟིན་ཏོ། །གཏེར་མའི་ཕྱོགས་སླར་བཤད་པར་བྱ་སྟེ། དེ་ཡང་བོད་ཁ་ཅིག་གཏེར་མའི་ཆོས་མི་སྲིད་ཏོ་སྙམ་དུ་བྱེད་པ་དེ་ནི་ཆོས་སྤོང་གི་ལས་ཆེན་པོ་ཡིན་སྟེ། མདོ་ལས་བསྙེན་གནས་དང་སྐྱབས་འགྲོའི་དཔེ་ཀ་བ་ལས་བྱུང་བར་བཤད་པ་དང༌། སྟོན་པ་བྲམ་ཟེ་ཆེན་པོས་སྤྱན་དྲངས་པའི་ལམ་དུ་ཕྱགས་བདར་གྱི་ཕུང་པོ་ལས་འོད་ཟེར་དང་སངས་རྒྱས་ཤཱཀྱ་ཐུབ་པ་བྱོན་པ་ལེགས་སོ་ཞེས་བྱ་བའི་སྒྲ་བྱུང་བས་སྟོན་པས་ཕྱག་མཛད་སྤྱན་ཆབ་ཕྱུང་ན་བཟའ་ཕུད་ནས་གསོལ་སྟེ་སངས་རྒྱས་ཐམས་ཅད་ཀྱི་རིང་སྲེལ་འདིར་བཞུགས་སོ་ཞེས་གསང་བ་རིང་སྲེལ་གྱི་གཟུངས་གསུངས་པའང་དེ་བཞིན་གཤེགས་པ་གཟུངས་ཀྱི་དཔེ་ལ་བལྟོས་མི་དགོས་པས་མ་ཕྱུང་བ་མ་གཏོགས་དོན་གྱིས་གཏེར་མར་སོང་བའི་ཕྱིར་དང༌། རྒྱ་གར་དུ་ཡང་ཆོས་རྒྱལ་མྱ་ངན་མེད་ཀྱི་དོན་དུ་དགྲ་བཅོམ་པ་གྲགས་པས་སངས་རྒྱས་ཀྱི་རིང་སྲེལ་ཕྱུང་བ་དང༌། རྒྱུད་བླ་སོགས་བྱམས་ཆོས་ཕྱི་མ་གསུམ་མངའ་བདག་མཻ་ཏྲྀ་པས་མཆོད་རྟེན་གྱི་སེར་ག་ནས་རྙེད་པ་སོགས་དང༌། གྲུབ་ཐོབ་ཤིངྑ་པས་ཆུ་མང་པོ་དྲུབས་པའི་དངུལ་ཆུར་བྱིན་གྱིས་བརླབས་པ་བལ་པོའི་ཀླུ་སྒྲུབ་ཕུག་པར་འཕགས་པ་ཀླུས་སྦས་པ་ཨ་ཙ་ར་ཞིག་གིས་བཏོན་ཞིང་གསེར་འགྱུར་བྱས་པ་(ཐ༥༠བ)

[Full Size]

བྱུང་ནས་རིང་པོ་མ་ལོན་པར་པཎ་ཆེན་ནགས་རིན་གྱིས་གསུངས་པའི་ཕྱིར། དེས་ན་གཏེར་ནི་སར་རྙིང་ཐམས་ཅད་ལ་ཡོད་པས་རྙིང་མ་ཁོ་ནར་ཡང་མ་ངེས་ལ། རྙིང་མའི་གཏེར་ལའང་ནོར་གཏེར་དཔག་མེད་ཡོད་པ་ནི་ཕྱི་རབས་རྒྱལ་རྒྱུད་ཀྱི་དོན་དང་ལྷ་ཁང་རྣམས་གསོ་བའི་རྐྱེན་དུ་སྦས་ནས་ཁ་བྱང་རྣམས་རྒྱལ་པོའི་དཀོར་མཛོད་དུ་འཇོག་ལ། རྒྱལ་སྲིད་ཉམས་པས་ཚང་མ་མེད་མོད་ཀྱང་བསམ་ཡས་གཙང་པོའི་མཛོད་ནའང་མང་བར་ཡོད་པས་ཁྲོ་ཕུ་ལོ་ཙཱ་བ་ཆེན་པོས་ལྷ་ཆེན་པོའི་ཡོ་བྱད་མ་ལྡང་ནས་ཁོང་རང་གི་འབུལ་བ་ཕྱིར་བསློག་སྟེ་ཁ་བྱང་འགའ་ཞིག་བསླངས་པ་ན། གཙང་པོ་ན་རེ་སེམས་ཅན་གྱི་བསོད་ནམས་དམན་པ་འབྲས་རུལ་བ་དང་བྱི་བས་ཟོས་པ་སོགས་ཀྱིས་ཆུད་ཟོས་པ་མང་བར་སྣང༌། འོན་ཀྱང་འགའ་ཞིག་འབུལ་ཟེར་བ་ན་པཎ་ཆེན་གྱིས་དེ་ཁོང་ལའང་གནོད་པས་ཁྱོད་རང་འདི་སྒྲུབས་གསུངས་ནས་ཛམ་ནག་གི་སྒྲུབ་ཐབས་གནང་བ་ལྟར་ཡིན་ལ། ཆོས་གཏེར་ལའང་སློབ་དཔོན་པདྨའི་གཏེར་དང༌། འཚོ་རྒྱལ་དང་ཆོས་རྒྱལ་ཁྲི་སྲོང་དང་མུ་ཏིག་བཙན་པོ་དང་སྣུབས་ན་མཁའ་སྙིང་པོ་དང་སྙགས་དང་བཻ་རོ་ཙ་ན་དང་སྣ་ནམ་རྡོ་རྗེ་བདུད་འཇོམས་དང་སྣུབས་སངས་རྒྱས་ཡེ་ཤེས་སོགས་ཀྱིས་སྦས་པ་མང་དུ་ཡོད་པས་ཐམས་ཅད་སློབ་དཔོན་པདྨས་སྦས་པ་ཡང་མ་ཡིན་ནོ། །ཆོས་གཏེར་ལའང་སྐལ་ལྡན་གྱིས་རྙེད་པར་སྨོན་ལམ་བཏབ་པ་ཙམ་ལས་བདག་པོ་མ་ངེས་པ་ཆེས་མང་ཞིང་ཆོས་བདག་ངེས་པ་ཅན་ཡང་དུ་མ་ཡོད་ཏོ། །དེ་ཡང་པདྨ་བཀའ་ཐང་གི་གཏེར་འདིར་སྦས་བཤད་པ་རྣམས་ནི་ལྷད་མེད་ཡིན་པར་སྣང་ལ། གཏེར་སྟོན་ལུང་བསྟན་འདི་བར་སྐབས་སུ་ལྷད་སྣ་ཚོགས་བསྲེས་སྟེ་ས་པཎ་ལ་སྐུར་པ་གདབ་པར་འདོད་ནས། རྒྱ་གར་མ་ཕྱིན་ཀུན་སྙིང་ལོ་ཙཱ་(ཐ༥༡ན)

[Full Size]

ཞེས། །ཅེས་སོགས་ལོག་པ་བྲིས་པ་དང༌། ལྷའི་བུ་རབ་རྩལ་ལུང་བསྟན་པའི་མདོ་ལས་ཅེས་བར་དུ་ཡིག་ནོར་བྱུང་བ་ཚུན་བྲིས་པས་དཔྱད་མི་བཟོད་ཅིང་གཏེར་མ་ལ་སྐུར་པ་འདེབས་པའི་གཞི་ཆེན་པོར་གྱུར་སྣང་ལ། སྤྱིར་གཏེར་རྟགས་སོགས་ལ་བརྟགས་ན་འདི་ལ་རྩ་བ་ཡང་དག་ཞིག་ཡོད་པར་འདུག་པ་དེ་དེང་སང་མ་རྙེད་ཀྱང་གཏེར་རྟགས་དང་འདོན་པ་པོའི་མཚན་གཏེར་གནས་རྣམས་རགས་པ་ཙམ་འདི་ཀ་ཡིན་ངེས་སྣང་བས་དགོད་པར་བྱ་སྟེ། རྒྱལ་པོའི་གདུང་རབས་བརྒྱད་དམ་བཅུ་ན་ལ་སྟོད་དུ་ནད་མུག་གིས་མི་ཐོག་བུད་པ་བྱུང་ཚེ་གཏེར་བཏོན་སངས་རྒྱས་བླ་མས་གློ་བོ་གེ་སར་གྱི་གཏེར་འབྱིན། བལ་བོད་ཀྱི་མཚམས་སུ་ནགས་ལ་མེ་ཤོར་བས་སྐྱེ་བོ་ཁ་བཏགས་ཚེ་རྒྱ་ལོ་ཙཱས་པུ་ན་རྫ་རིའི་འབྱིན། བྱ་ཁྱི་ལྷ་ཁང་འཁྲུགས་པའི་ཚེ་ཁམས་ཀློང་ཐང་སྒྲོན་མའི་གཏེར་སྣ་ནམ་པས་འབྱིན། ལ་སྟོད་གཅུང་པ་དྲིལ་ཆེ་ཆུང་འཁྲུག་ཚེ་རྒྱ་ཞང་ཁྲོམ་གྱིས་གཡོ་རུ་རྫ་ཕུག་གི་འབྱིན། མང་ཡུལ་ན་མཁའ་ཁྲག་མདོག་དུ་འགྲོ་བའི་བསད་ཤི་བྱུང་ཚེ་བྱམས་པ་སྤྲིན་གྱི་གཏེར་སྟོད་གཏེར་གྱི་བདག་པོ་ཉི་མ་སེང་གེས་འབྱིན། ཤོང་གསུམ་འཇག་སྐྱར་འཕྱུར་ཚེ་བྱང་གི་གཏེར་ཕྲན་རྣམས་གཡོ་རུ་སྟོན་ཤཱཀྱ་གིས་འབྱིན། པ་གྲོ་གནམ་ཐང་དཀར་པོར་སོག་པོ་ལྷགས་ཚེ་བུམ་ཐང་རྩེ་ལུང་གི་གཏེར་བོན་པོ་བག་ཚལ་གྱིས་འབྱིན། འུག་པ་ལུང་སོགས་སུ་མདོ་སྔགས་གཉིས་འཁྲུག་པའི་ཚེ་ཤེལ་བྲག་གི་གཏེར་སྙེ་མོ་ཞུ་ཡས་ཀྱིས་འབྱིན། འཇིམས་ཀྱི་མདར་སྡེ་དགོན་ཟ་འོག་འདྲ་བ་བྱུང་ཚེ་གཙང་རི་བོ་ཆེའི་གཏེར་གྲུབ་ཐོབ་དངོས་གྲུབ་ཀྱིས་འབྱིན། རྒྱ་ནག་གི་རྒྱལ་ས་རྟ་རྫིས་ཕྲོགས་ཚེ་བལ་ཡུལ་ཨེའི་གཙུག་ལག་ཁང་གི་གཏེར་གཙུག་ལག་དར་ལ་དགེས་འབྱིན། ལ་སྟོད་དུ་མཚོན་གྱི་སོ་ནམ་བྱེད་པའི་ཚེ་ལྷོ་གཏེར་(ཐ༥༡བ)

[Full Size]

ཕྲན་རྣམས་ཀུ་ཚ་སྟོན་པས་འབྱིན། བྱང་ཕྱི་གོང་རུ་བརླག་པའི་ཚེ་རུ་མཚམས་གྱི་གཏེར་བོན་པོ་ལྷ་འབུམ་གྱིས་འབྱིན། ལྟ་ལོག་སར་པ་ཞིག་ཤིན་དུ་དར་བའི་ཚེ་བུམ་ཐང་གི་གཏེར་ཁྱུང་པོ་བུ་དཔལ་གྱིས་འབྱིན། སྡེ་འཁྲུག་མང་པོ་དང་དམར་པོ་རི་ལ་ལྷ་ཁང་བྱུང་ཚེ་ཧས་པོ་རིའི་གཏེར་ཤ་མི་རྡོར་རྒྱལ་གྱིས་འབྱིན། གཏེར་བརྫུས་མང་པོ་བྱུང་ཚེ་ལྡང་མ་ལྷུན་རྒྱལ་གྱིས་བཱི་མ་ལའི་གཏེར་འབྱིན། བྱིང་སོགས་ཀྱི་ཡུལ་ཞིག་ཚེ་གྲ་པ་མངོན་ཤེས་ཀྱིས་ཇོ་མོའི་གླིང་གསུམ་གྱི་གཏེར་འབྱིན། སློབ་དཔོན་ཉིད་དྭགས་པོ་ལྷ་རྗེར་བྱོན་པའི་ཚེ་ར་ཤག་གཏེར་བཏོན་གྱིས་མཆིམས་ཕུ་དང་ཁོ་ཐིང་གི་གཏེར་འབྱིན། འཁྲུག་པ་དར་ཞིང་སྐུ་དང་གསུང་རབ་མི་སྟོང་དུ་འཇལ་བའི་མགོ་ཚུགས་ཚེ་མྱང་རལ་པ་ཅན་གྱིས་ཁོ་ཐིང་དང་སྲིན་པོ་སྦར་རྗེས་ཀྱི་གཏེར་འབྱིན། པུ་རངས་རྒྱལ་པོས་བོད་ལ་གསེར་འདོད་པ་བྱུང་ཚེ་དཔོན་བསམ་ཁྱུང་ཐོག་གིས་གྲོམ་པ་རྒྱལ་གྱི་གཏེར་འབྱིན། ཧོར་བོད་ཀྱི་འབྲེལ་ཐོག་མར་བྱུང་ཚེ་ར་མོ་ཤེལ་སྨན་གྱིས་ཤེལ་ཕུག་གི་གཏེར་འབྱིན། ཧོར་དམག་དང་པོ་བྱུང་ཚེ་ཆོས་ཀྱི་དབང་ཕྱུག་གིས་གནམ་སྐས་ཅན་དང་མཁར་ཆུའི་གཏེར་འབྱིན། མྱང་སྨད་བྱ་རོག་རྫོང་དུ་ཧོར་དམག་ལྷགས་ཚེ་གུ་རུ་ཛོ་རྩེས་ཟང་ཡག་བྲག་གི་གཏེར་འབྱིན། གཞོ་ལུང་དུ་མེའི་འཇིགས་པ་བྱུང་ཞིང་དཔལ་མོ་དཔལ་ཐང་དུ་གཡུལ་ངོ་ཆེན་པོ་བྱུང་ཚེ་གངས་བར་ཕུག་མོའི་གཏེར་པདྨ་དབང་ཕྱུག་གིས་འབྱིན། སིལ་མ་ལ་ཁར་འཇག་མའི་མི་བྱུང་ཞིང་སྨོན་མདའི་ལ་ཁར་ཤེལ་གྱི་ཕ་བོང་བྱུང་ཚེ་སྤ་མ་གོང་གི་གཏེར་དེ་བན་རྒྱ་མཚོས་འབྱིན། བོད་རྣམས་ཧོར་གྱིས་མནར་ཞིང་གནས་བརྟན་རྣམས་ཧོར་ཆས་བྱེད་པའི་ཚེ་རྔོ་བོད་མཚམས་ཀྱི་གཏེར་རབ་ཤི་སྟོན་པས་འབྱིན། ཡུལ་མང་དུ་སྟོངས་པའི་ཚེ་ལྷོ་མོན་གྱི་གཏེར་སྨན་པ་ཉམ་དཔལ་གྱིས་འབྱིན། ནང་རྨེ་དང་དུག་དར་བའི་ཚེ་བུ་ཚལ་གྱི་གཏེར་གྲྭ་སྒོམ་(ཐ༥༢ན)

[Full Size]

ཆོས་ཀྱི་རྡོ་རྗེས་འབྱིན། དུག་གཟོ་ཐབས་སོགས་དར་བའི་ཚེ་འུ་ཡུག་དང་གཡག་སྡེའི་གཏེར་གཡག་ཆར་སྔོན་མོས་འབྱིན། ཁྱིམ་པ་ཀུན་ཆོས་སྐད་བྱེད་ཚེ་པ་གྲོའི་གཏེར་གྲུབ་ཐོབ་མཁར་ནག་གིས་འབྱིན། མི་ཐུབ་ལྔ་བྱུང་ཞིང་ནད་སྔོན་མ་གྲགས་པ་མང་པོ་འབྱུང་ཚེ་འོན་ལྗང་རྡོའི་གཏེར་ལྷ་བཙུན་སྔོན་མོས་འབྱིན། དགེ་རྒྱས་ཀྱི་རི་མོ་བརྗེས་པའི་ཚེ་སྲིན་མོ་རྫོང་གསུམ་གྱི་གཏེར་ཁམས་པ་ཉི་མ་གྲགས་ཀྱིས་འབྱིན། ས་ནང་འཇིགས་བརྒྱད་ཤ་བའི་རྭ་ལྟ་བུ་བྱུང་ཞིང་མི་རྒོད་དབུས་སུ་དིབ་ཚེ་ལྡང་ལྷ་བྲག་གི་གཏེར་རིན་ཆེན་ཚུལ་རྡོར་གྱིས་འབྱིན། རྡོའི་མཆོད་རྟེན་གདུགས་དང་ཆོས་འཁོར་ཉམས་ཚེ་མོན་ཁ་ཆུ་ཕུག་གི་གཏེར་ཚེ་བརྟན་རྒྱལ་མཚན་གྱིས་འབྱིན། དབུས་མདུན་བྱས་སྟེ་ཧོར་ཁྲིམས་འཇིག་ཚེ་ཀོ་རོ་བྲག་གི་གཏེར་རིན་ཆེན་གླིང་པས་འབྱིན། ཕག་གིས་ས་རློག་ཚེ་ཤེལ་བྲག་གི་གཏེར་ཨོ་ཌྱན་གླིང་པས་འབྱིན། མཐའ་དམག་དབུས་སུ་དིབ་འབྲི་ཕག་འཐབ་དབུས་གཙང་སིལ་བུ་དང་ཕག་ཁྱུ་ཚལ་པར་སོང་ཚེ་རྡོ་རྗེ་ཁྲོ་ལོད་ཀྱིས་སྟག་ཚང་ཟབ་ལུང་གི་གཏེར་འབྱིན། ས་ཧོར་ཞིག་མཆོད་རྟེན་ནས་ཐོད་པ་ཁྱིས་གཡེང་ཚེ་དྲི་མེད་འོད་ཟེར་གྱིས་མཆིམས་ཕུའི་གཏེར་འབྱིན། བདུད་ཀྱི་གང་ཟག་ས་སྟེང་གཡོ་ནུས་པ་ཙམ་ཞིག་བྱུང་ཚེ་རྡོ་རྗེ་གླིང་པས་ཡུན་བུ་བླ་སྒང་གི་གཏེར་འབྱིན། ཆོས་ལོག་གིས་ཡུལ་གང་ཚེ་ཤ་འུག་སྟག་སྒོའི་གཏེར་གཏེར་བདག་གླིང་པས་འབྱིན། ཁ་རག་གི་ལར་སོ་པས་རྟག་དུ་སྲུང་ཚེ་ཀུན་སྤྱོད་གླིང་པས་མཆོད་རྟེན་དཀར་པོའི་གཏེར་འབྱིན། མྱང་སྨད་ཉི་མ་མདོར་རྫོང་བྱུང་ཞིང་དམག་དཔོན་བརྒྱ་དང་བཅུ་དྲུག་ཚོགས་ཚེ་གཡས་རུ་གཙང་འཕང་གི་གཏེར་མདོ་སྔགས་གླིང་པས་འབྱིན། ཡ་འབྲོག་མཚོ་གླིང་དགུ་ལ་དམག་སྒར་བྱུང་ཞིང་སྟག་འཐབ་ཏུ་གཙང་པ་སུམ་གཉིས་འཆི་ཚེ་སྟན་གཉིས་གླིང་པ་(ཐ༥༢བ)

[Full Size]

རྩིས་ཀྱི་ལྷ་ཁང་གི་གཏེར་འབྱིན། སྟོད་ལུངས་སུ་ཕག་ཚང་བྱུང་ཞིང་བོད་སིལ་བུ་ཁྱུས་འཚོ་བའི་ཚེ་རྡོ་རྗེ་གླིང་པས་གནམ་ལྕགས་བྲག་དང་བུ་ཆུའི་གཏེར་འབྱིན། རུ་ལག་དུ་ཕག་ཁྱུ་བྱུང་བ་ན་ཀོང་པོ་མཆིམས་ཡུལ་གྱི་གཏེར་རིན་ཆེན་གླིང་པས་འབྱིན། འགོས་ཕག་རིར་གནས་གཞི་རྫོང་ལ་བཀབ་པ་དང་ལ་སྟོད་དུ་དུག་གི་ཚོང་འདུས་བྱུང་ཚེ་པདྨ་གླིང་པས་མེ་འབར་མཚོའི་གཏེར་འབྱིན། པཎྜིཏ་དུ་མ་བོད་དུ་ལྷགས་ནས་ཇོ་བོ་ལ་མཆོད་པ་བྱེད་ཚེ་ལས་འཕྲོ་གླིང་པས་ལྷོ་ཀོང་བྱང་ཀོང་གི་གཏེར་འབྱིན། བོད་རྒྱལ་པོ་བརྒྱ་རྩ་བརྒྱད་ཏུ་གྱེས་ཚེ་བྱལ་གྱི་བྲག་གི་གཏེར་བསམ་གཏན་གླིང་པས་འབྱིན། སྣུབས་སྲེག་པ་ལུང་དུ་མུ་གེ་བྱུང་ཚེ་ཁྱུང་ཚང་བྲག་གི་གཏེར་ཞིག་པོ་གླིང་པས་འབྱིན། རྟ་རྒོད་ཐང་ལ་དབུས་དམག་འཚོག་ཞིང་ཧས་པོ་རིའི་རྒྱུད་དུ་མེ་འབར་རྫོང་བྱུང་ཚེ་ཁ་རག་གི་གཏེར་བདེ་ཆེན་གླིང་པས་འབྱིན། རྣལ་འབྱོར་པ་ནུས་ལྡན་རྡོ་རྗེ་ཞེས་བྱ་བས་ཁམས་ཀྱི་གཏེར་འབྱིན་པ་ཐང་ཡིག་གཅིག་ཁོ་ན་སྣང༌། གཞན་འདི་རྣམས་ཕལ་ཆེར་མཐུན་པར་འདུག་ལ། མཐའ་དམག་དབུས་དིབ་འབྲི་དང་ཕག་པ་འཐབ། །དབུས་གཙང་སིལ་བུ་ཕག་ཁྱུ་ཚལ་པར་འགྲོ། །སྟག་ཚང་ཟམ་ལུང་སྦས་པའི་གཏེར་ཁ་འདི། །མི་གཞག་འདོན་པའི་རྟགས་དེར་བསྟན་ནས་འབྱུང༌། །ཞེས་པ་འདི་ཕལ་ཆེར་ན་མི་སྣང་ཡང་རྙིང་པ་གཅིག་གཉིས་ན་སྣང་བ་འདི་ནི་ད་ལྟའི་དུས་ཡིན་པ་སྙམ་མོ། །འདི་ལ་པུ་རངས་རྒྱལ་པོས་བོད་ལ་གསེར་འདོད་འབྱུང་བ་ནི་ལྷ་བླ་མས་བོད་བཙུན་ལ་ཤམ་ཐབས་ཁྲལ་བསྡུས་ནས་ཇོ་བོ་རྗེ་ལ་གསེར་མང་དུ་ཕུལ་བ་དང༌། བྱ་རོག་རྫོང་དུ་ཧོར་དམག་ལྷགས་པ་ནི་དཔོན་ཆེན་ཀུན་བཟང་བསད་པའི་དུས་དང༌། གཞོ་ལུང་དུ་མེའི་འཇིགས་པ་(ཐ༥༣ན)

[Full Size]

འབྱུང་བ་ནི་འབྲི་ཁུང་གླིང་ལོག་དང༌། ས་ནང་འཇིགས་བརྒྱད་ཤ་བའི་རྭ་ཅོ་ནི་ས་སྐྱ་པའི་ཞལ་ངོ་ནང་ཞིག་དང༌། ཕག་གི་ས་རློག་པ་ནི་ཏ་སི་བྱང་རྒྱལ་གྱིས་ཁྲི་སྐོར་རྣམས་བཤིག་པ་དང༌། མཆོད་རྟེན་ནས་ཐོད་པ་ཁྱིས་གཡེང་བ་ཧས་པོ་རིའི་རྒྱབ་ཏུ་མཁན་པོའི་སྐུ་གདུང་བྱེ་མ་ལ་བཞུགས་ནས་སྟེང་ན་མཆོད་རྟེན་ཡོད་པ་ལས་དབུ་ཐོད་ཐོན་པ་བྱིས་པ་མང་པོས་རྙེད་དེ་མཁན་པོའི་དབུ་ཐོད་བྱུང་ངོ་ཟེར་ནས་རྩེད་མོའི་རོལ་ཆ་བྱས་གོས་ཀྱི་འདོ་ལི་ལ་སྤྱན་དྲངས་པ་ཐང་པོ་ཆེ་པའི་ཚོང་བཙུན་ཞིག་དང་ཕྲད་པས་མཛོ་ཁལ་བཅས་བྱིན་ནས་བླུས་སྟེ་ཁྱེར། བསམ་ཡས་པ་རྣམས་ཀྱིས་ཕྱི་བསྙེགས་བྱས་སྟེ་དབུ་ཐོད་བླངས་དབུ་མ་ལ་བྱིན་པ་འདི་ཡིན་པར་སྣང༌། འོན་ཡང་མེ་ཡར་རྫོང་བྱུང་ནས་ཡུན་རེ་ཞིག་ལོན་པ་སོགས་ཀྱིས་འདི་ལ་ལ་གོ་རིམ་དང་ལ་ལ་དཀྲུགས་པ་ཅིག་ཡིན་པར་སྣང་ལ། པ་གྲོར་སོག་པོ་ལྷགས་པ་སོགས་མང་ཞིག་ད་འབྱུང་འགྱུར་དུ་སྣང་ཞིང༌། རྒྱ་གར་གྱི་པཎྜིཏ་དུ་མ་ཞིག་ལྷ་སར་མཆོད་པ་བྱེད་པ་ནི་ལྷ་སའི་སྤྲུལ་པ་སྡུད་པར་ཤེས་ནས་འབྱོན་པར་འདུག་པས་ཕལ་ཆེར་གྱི་མཐའ་མར་འབྱུང་ལ། གཏེར་བཏོན་འདི་རྣམས་ཀྱང་གྲགས་པ་ཙམ་ཁོ་ན་འབྱུང་བར་མ་ངེས་སྟེ་ཤས་ཆེར་སྦས་པའི་རྣལ་འབྱོར་པ་སྐལ་ལྡན་འགའ་ཟུང་གི་དོན་མཛད་པ་མང་བ་སྙམ་མོ། །དེ་ལས་གཙོ་བོར་གྲགས་ཆེ་བ་མངའ་བདག་མྱང་ནི་ལྷོ་གཏམ་ཤུལ་བཙན་གྲོའི་འཇོང་པོ་གསེར་གྱི་དགོན་པར་མྱང་ཏིང་འཛིན་བཟང་པོའི་རིགས་མྱང་སྟོན་ཆོས་འཁོར་དང་ཡུམ་པདྨ་བདེ་རྩལ་གྱི་སྲས་སུ་ཤིང་འབྲུག་ལ་འཁྲུངས། མཁའ་འགྲོ་རིགས་བཞི་སྒྲོལ་མ་སློབ་དཔོན་པདྨ་རྣམས་ཀྱིས་ཆོས་ལ་བསྐུལ། ལོ་བཅུ་གསུམ་པ་ལ་ཐུགས་རྗེ་ཆེན་པོ་དང་ཕུར་པ་གྲུབ་སྟེ་འཇོང་ཕུའི་བྲག་ལ་ཕྱག་ཞབས་ཀྱི་རྗེས་དང་ཟངས་ཀྱི་(ཐ༥༣བ)

[Full Size]

ཕུར་པས་རྟ་སྐད་འཚེར་པ་བྱུང༌། རང་གི་ཡབ་དང་སློབ་དཔོན་འདུལ་འཛིན་རྒྱལ་སྲས་ཁམ་བུ་ཡ་ལེ་གུ་རུ་ཁྲོ་བོ་ཆེན་པོ་གྲུབ་ཐོད་དངོས་གྲུབ་རྣམས་ལས་སར་རྙིང་གི་ཆོས་མཐའ་ཡས་གསན། མཁའ་འགྲོས་བྲག་རྡོ་རྗེ་རྩེ་ལྔ་པ་འདྲ་བའི་གནས་སུ་སོང་ཞིག་པར་ལུང་བསྟན་སྟེ་སྨྲ་བོར་བྱོན། ཉི་ཤར་གྱི་དུས་བུ་ལྟོས་ཅིག་བྱ་བའི་སྒྲ་བྱུང་ནས་ཕྱིར་བལྟས་པས་རྣལ་འབྱོར་པ་རུས་རྒྱན་ཅན་ཞིག་འདུག་པ་བོས་སྟེ་ཚ་བ་དྲངས་པས་དེ་ན་རེ། ང་ནི་ནམ་མཁའི་རྣལ་འབྱོར་པ། །དབང་ཕྱུག་རྡོ་རྗེ་བྱ་བ་ཡིན། །བུ་ཁྱོད་ལས་དང་སྐལ་བར་ལྡན། །པདྨས་དབང་དང་ལུང་གིས་སྐྱོབ། །གསང་སྔགས་ཟབ་མོའི་ཆོས་རྣམས་ཀུན། །ད་ལྟ་མཁའ་འགྲོའི་ལག་ན་ཡོད། །གསོལ་བ་ཐོབ་ལ་མྱུར་དུ་ལོང༌། །ཞེས་ཁ་བྱང་ཡང་བྱང་གནད་ཡིག་གསུམ་གཏད་དེ་འཇའ་ལྟར་ཡལ། ར་ཤག་གཏེར་བཏོན་དང་གྲ་པ་མངོན་ཤེས་ཀྱིས་ཀྱང་ཁ་བྱང་བཏང་སྟེ་སྲིན་པོ་སྦར་རྗེས་ནས་ཐུགས་རྗེ་ཆེན་པོ་དང་མ་མགོན་སྐོར་དམ་རྫས་གདན་དྲངས། ཡེ་ཤེས་མཚོ་རྒྱལ་གྱི་སྤྲུལ་པས་སྟག་སྒྲོམ་ཆོས་གཏེར་གྱིས་གང་བ་དངོས་སུ་གཏད་པ་ནས་མཁའ་འགྲོའི་སྒྲུབ་སྐོར་སོགས་བྱོན། ཁོ་ཐིང་གི་གནང་ཡིག་མ་བྱུང་བ་ལྷའི་ཕྱག་མཛུབ་ཆད་པ་ཚོང་པས་ཁྱེར་སྟེ་ཕུལ་བ་ནས་ཤོག་དྲིལ་བྱུང་སྟེ་སྒྲོམ་སྨུག་སྒྲོམ་སྐྱ་གཉིས་ནས་བདེ་འདུས་དང་རྟ་མགྲིན་བཀའ་སྲུང་དང་རྟ་མགྲིན་གྱི་སྐུ་སོགས་བྱིན་རླབས་ཀྱི་རྟེན་དཔག་མེད་བྱོན། གཞན་ཡང་མཆིམས་ཕུ་ཤམ་པོ་གངས་ལྷ་ས་སོགས་བཅུ་གསུམ་ནས་གཏེར་མང་དུ་བྱུང་སྟེ་གཏེར་བྱུང་ཚངས་པའི་དྲ་པར་གསལ། བདེ་འདུས་ཀྱི་སྨན་བསྒྲུབས་ཚེ་སྨན་གྱི་ལྷ་མོས་དངོས་སུ་ཨ་རུ་ར་རློན་པ་ཕུལ། མཚོ་རྒྱལ་གྱིས་དངོས་གྲུབ་ཅི་འདོད་གསུང་བ་ལ་ཆོས་ཞུས་པས་མཁའ་འགྲོ་ལུང་བསྟན་གྱི་སྐོར་དང་ཞུས་ལན་བརྒྱ་རྩའི་དཔེ་དངོས་སུ་(ཐ༥༤ན)

[Full Size]

གཏད། དུར་ཁྲོད་གསིལ་བའི་ཚལ་དུ་ཁྲིད་དེ་སློབ་དཔོན་པདྨས་བུ་ཚངས་པ་ལྷའི་མེ་ཏོག་སླེབ་བམ་ཞེས་གསུང་ཞིང་ཀེང་རུས་ཀྱི་ཁྲི་ལ་བཞག་སྟེ་གྲུབ་ཆེན་དགུས་བཀའ་བརྒྱད་སྤྱི་དང་བྱེ་བྲག་གི་དབང་ཐམས་ཅད་རྫོགས་པར་གནང༌། ཡི་དམ་དབང་དུ་འདུས་ཆོས་སྐྱོང་བྲན་དུ་འཁོལ། འཕྲིན་ལས་ཚད་མེད་པ་རྒྱས། བཀའ་བརྒྱད་དང་ཐུགས་རྗེས་ཆེན་པོ་སྲོང་བཙན་ལུགས་དང་པད་སྐོར་ལུགས་དང་གསང་སྐོར་དང་བྱིན་རླབས་དབང་རྣམས་ཀྱི་བཀའ་རིམ་པར་བབས་པ་གཉོས་གྲགས་རྒྱལ་ཞིག་པོ་བདུད་རྩི་སྲས་མི་སྐྱོད་རྡོ་རྗེ་སྨན་འོན་པ་སྟེ་སྟོན་ཁྲི་མཆོག་སྟེ་བཀའ་བབས་ཀྱི་བུ་ལྔ་དང༌། སྲས་ཆུང་བ་སྤྱན་རས་གཟིགས་ཞི་ཁྲོའི་སྤྲུལ་པ་མངའ་བདག་འགྲོ་མགོན་ན་མཁའ་དཔལ་ནི་སྨིན་གྲོལ་ཡོངས་རྫོགས་ཀྱི་བཀའ་བབས་ཅིང་ཐུགས་གཏེར་ཆེན་པོ་གཏད་དེ་དགུང་ལོ་རེ་དགུ་པ་ཤིང་བྱི་ལ་སྲས་ཆུང་གདན་སར་བསྐོས་སྟེ་ཞལ་གདམས་དང་རྫུ་འཕྲུལ་མང་པོ་བསྟན་སྟེ་ཆོས་དབྱིངས་སུ་བསྡུས་པའི་ཚེ་ཐུགས་ཀ་ནས་ཧྲཱིཿཡིག་དཀར་པོ་ཞིག་བདེ་བ་ཅན་དུ་གཤེགས་པར་བསྟན་ལ། སླར་སྐུའི་སྤྲུལ་པ་རྒྱ་གར་ཤར་ཕྱོགས་སུ་རྣལ་འབྱོར་པ་སྣ་ཚོགས་སུ་སྟོན་པ་དང༌། གསུང་གི་སྤྲུལ་པ་གུ་རུ་ཆོས་ཀྱི་དབང་ཕྱུག་དང༌། ཐུགས་ཀྱི་སྤྲུལ་པ་མཚོ་མ་དྲོས་པ་དང་ཉེ་བར་ཌཱ་ཀི་བུདྡྷ་ཛྙཱ་ནའི་སྲས་ཡུལ་ཉེ་བཞིར་རྣལ་འབྱོར་པའི་སྤྱོད་པ་མཛད་པ་སྟེ་གསུམ་ཅིག་ཆར་དུ་འབྱུང་བར་བསྟན། ལོ་ཙཱ་བ་ཆག་གིས་གདུང་བཞུ་བས་མེ་སྦར་བར་མ་ནུས། སླར་རང་བྱུང་དུ་འབར་སྟེ་མེ་ལས་འཇའ་ཚོན་བྱུང་བ་ནུབ་ཕྱོགས་སུ་ཟུག །འཇའ་དཀར་པོ་ཞིག་ལྷ་སའི་བཅུ་གཅིག་ཞལ་གྱི་ཐུགས་ཀ་དང་གདུང་ཁང་འབྲེལ་བར་ཟུག་པ་མཐོང༌། གདུང་ཁང་ན་ཁྱེའུ་ལོ་བརྒྱད་པ་རྒྱན་(ཐ༥༤བ)

[Full Size]

ཅན་ཧ་རི་ནི་ས་སྒྲོག་པ་མཁའ་འགྲོ་མང་པོས་བསྐོར་བ་ཞིག་ཀུན་གྱིས་མཐོང༌། ཐུགས་ལྗགས་དབུ་སྐྲ་རྣམས་མ་ཉམས་པར་བྱོན་ཞིང་རྟེན་རིང་སྲེལ་མང་དུ་བྱུང༌། དེ་ནས་མངའ་བདག་འགྲོ་མགོན་གྱིས་སྐུ་རྟེན་རིགས་གསུམ་མགོན་པོ་མི་ཚད་བལ་ཡུལ་དུ་བཞེངས་སྟེ་སྤྱན་དྲངས། གསུང་རྟེན་མདོ་མང་དང་སར་རྙིང་གི་རྒྱུད་འབུམ་བཞེངས། ཐུགས་རྟེན་དུ་གདུང་འབུམ་མཐོང་གྲོལ་ཆེན་མོ་བཞེངས་སྟེ་པཎ་ཆེན་ཤཱཀྴཱི་རབ་གནས་ལ་སྤྱན་དྲངས་ནས་ཆོས་འཁོར་བཙུགས། ཉིད་ཀྱིས་གཙུག་ཕུད་ཕུལ། འོན་ཡང་འཕྲིན་ལས་འདི་ཀ་ཆེ་གསུངས་ནས་རབ་ཏུ་འབྱུང་བར་མ་གནང༌། ཡོན་ཏན་གྱི་རྟེན་བལ་རིས་ཀྱི་ཐང་ཀ་ཐོག་ཚད་མ་བརྒྱ་དང་བརྒྱད་བཞེངས། འཕྲིན་ལས་ཀྱི་རྟེན་རྡོ་རྣམས་ཤམ་པོ་གངས་ནས་ན་མཁའ་ལ་ལུག་ཁྱུ་ལྟར་དེད་སྐད་དེ་གང་ནས་དྲངས་ཆ་མེད་པར་ལྷ་སར་རྡོ་སྐྱ་ཆག་གིས་ཆགས་པ་ལ་ཆུ་རགས་མཛད། པཎ་ཆེན་གྱིས་སྤྱན་རས་གཟིགས་ཀྱི་སྤྲུལ་པར་ལུང་བསྟན། གུ་རུ་ཆོས་དབང་སོགས་སློབ་མ་མང་པོའི་དོན་མཛད། དེའི་སྲས་མངའ་བདག་བློ་ལྡན་ནི་འཇམ་དཔལ་གྱི་སྤྲུལ་པ་དང་དེའི་སྲས་མངའ་བདག་བདུད་འདུལ་ནི་ཕྱག་རྡོར་གྱི་སྤྲུལ་པ་སྟེ་གདུང་རྒྱུད་ལ་རིགས་གསུམ་མགོན་པོ་འབྱུང་བར་ལུང་བསྟན་པ་དེ་ཡིན་ལ། མངའ་བདག་མྱང་ཉིད་ནི་ཆོས་རྒྱལ་ཁྲི་སྲོང་ལྡེ་བཙན་གྱི་སྐུའི་སྐྱེ་བ་དངོས་ཡིན་ནོ། །གཏེར་ཁ་འོག་མ་པར་གྲགས་པ་གུ་རུ་ཆོས་ཀྱི་དབང་ཕྱུག་ནི་གདུང་རུས་པང༌། སྔོན་སྙགས་བོན་གཉའ་རིངས་བྱ་བས་ཆོས་རྒྱལ་ཁྲི་སྲོང་ལྡེ་བཙན་ལ་ཐོག་ཕབ་སྟེ་དགྲོང་བར་ཁས་བླངས་པ་ན། སློབ་དཔོན་པདྨ་དང་བཱི་མ་ལ་དང་བཻ་རོའི་སློབ་མ་པད་རྗེ་བཙན་ཁྲོམ་བྱ་བའི་སྔགས་པ་ནུས་པ་ཅན་ཞིག་ལྡ་དྲིས་པས་ཕོ་བྲང་ཡང་ཐོག་དུ་ངའི་གདན་ཤོགས་ཅིག་ཟེར་སྟེ་ཁྲི་བཤམས། (ཐ༥༥ན)

[Full Size]

སང་ཉིན་ཕྱེད་ན་ཐོག་སྨད་ལྔ་དུས་གཅིག་ལ་ཕབ་བྱུང་བ་སྡིགས་མཛུབ་ཀྱིས་བླངས་སྟེ་བོན་གྲོང་ལ་འཕངས་པས་གྲོང་བསྲེགས་སྟེ་བརླག །རྒྱལ་པོས་ཁྱད་ནོར་མང་པོ་དང་ཡུལ་གྱི་འུད་བདུན་ཕུལ་སྟེ་མཆོད་གནས་སུ་བཀུར། དེའི་སྲས་ཆེ་བ་པང་རིག་འཛིན་སྙིང་པོ་ནི་ཡང་འདུལ་གྱི་ལྷ་ཁང་བཞིའི་མཆོད་གཉེར་མཛད་ནས་ལོ་སྐོར་རེ་ན་མཆོད་པ་འབྱོན་པ་ལས་ཁོ་ཐིང་དུ་མཆོད་པ་ལ་བྱོན་ཚེ་ལ་ཡག་རྫ་བར་གྱི་དཔོན་ཆེན་སྤྲད་པས་བྱལ་ལྷ་ཁང་གི་ས་འདུལ་དང་ཕྱིས་རབ་གནས་ཞུས་སྟེ་ནོར་གཞིས་མང་དུ་ཕུལ་བས་ཚེ་སྔ་མའི་ཡུལ་ཡིན་གསུངས་ནས་བཞེས་སྟེ་དེའི་སྲས་ཆེ་བ་ཀུན་མཁྱེན་ཤེས་རབ་རྒྱལ་པོ་ནས་མཁྱེན་ལྡན་ནུས་ཅན་བར་མ་ཆད་དུ་བྱུང་བའི་མཁས་སྟོན་ཉི་རྒྱ་བ་མཁན་པོ་བལ་སྟོན་པའི་སློབ་མ་དེའི་ཇོ་མོ་ས་མ་གྲོངས་ནས་སླར་ལེན་པར་འགྲོ་བའི་ཚེ་རྨི་ལམ་དུ་སྲིང་མོ་ཞིག་ན་རེ། མཁའ་འགྲོ་གར་གྱི་དབང་མོ་ལ་ཇོ་མོར་གྱིས་ཅིག་ཟེར། དེ་སུ་ཡིན་བྱས་པས། འཁྲུལ་པ་ནུབ་ཕྱོགས་རི་འདབ་ན། །འགྲོ་འདུལ་འཁོར་བའི་ཆ་ལུགས་འཛིན། །བུད་མེད་དཀར་མོ་སྙིང་ག་ན། །ཡི་གེ་ཧེ་ཡིས་རབ་ཏུ་མཚན། །དེ་ཉིད་བསྟེན་གྱུར་ཉི་མ་འཆར། །བདག་ནི་ཏཱ་རེ་ཏུ་ཏྟཱ་རེ། །ལུང་ལ་ཐེ་ཚོམ་ཁྱོད་མ་ཟ། །ཟེར་ནས་སངས་རྒྱས་འོད་སྲུང་དང་བྱམས་པ་ཆོས་བགྲོ་བའི་མདུན་དུ་ཤད་ཀྱིས་སོང་བ་རྨིས་ནས་འཕུར་ཆེན་འཕུར་ཆུང་སོགས་འཕུར་ནུས་པའི་གྲུབ་ཐོབ་ཀྱི་བརྒྱུད་པ་དཀར་སྟོན་ཆོས་འོད་ཀྱི་ལྕམ་མོ་དཀར་ཟ་མགོན་སྐྱིད་ཡིན་པར་ཤེས་ནས་བླངས་པ་ལས། ཡུམ་ལ་ཉི་ཟླ་ཁ་སྦྱར་དུ་སྤྱི་བོར་ཐིམ། ལྷའི་བདུད་རྩི་བླུད། རབ་བྱུང་སྐུ་མདོག་དཀར་བ་ཞིག་གིས་མདའ་དར་གཏད་དེ། འཇིག་རྟེན་དཔལ་མགོན་སྐྱེད་བྱེད་མ། །ཉི་ཟླའི་དབང་པོ་ཁྱོད་ལ་ཡོད། །བོད་ནི་མུན་པའི་སྨག་རུམ་འདྲ། །ཡེ་ཤེས་སྒྲོན་གསལ་ད་ཐེག་ཅིག །ཞེས་པ་རྨིས། ཡུམ་གྱི་ཁོང་ནད་ཞི་(ཐ༥༥བ)

[Full Size]

ལྷུམས་ནས་ཨ་ཡིག་གི་སྒྲ་ཡང་ཡང་གསུངས། སྤྲེའུའི་ལོ་དཔྱིད་རའི་བཅོ་ལྔའི་ཉི་ཤར་ལ་བལྟམས། མཚན་བརྗོད་གསེར་མ་ཞིག་འབྲི་ཞིང་ཡོད་པའི་ཚིག་མཚམས་ཀྱི་རྟེན་འབྲེལ་བརྟགས་པས། ཆོས་ཀྱི་དབང་ཕྱུག་ཆོས་ཀྱི་རྒྱལ་བྱ་བ་དང་ཐུག་པས་མཚན་དེར་བཏགས། ཡུམ་གྱིས་ང་ལོ་དགུ་ལོན་དུས་བླ་མ་སེ་གྲོ་ཆེན་པོས་ཁྱོད་ལ་བུ་ཞིག་སྐྱེ་བ་དེ་ལ་མིང་འཇམ་དཔལ་མཚན་བརྗོད་ལས་དྲས་པ་ཅིག་ཐོགས་གསུང་བ་ཡོད་ཟེར་ནས་འཇམ་དཔལ་རྡོ་རྗེར་བཏགས། མིག་མཐོང་བ་རྣོན་པོ་ཅིག་གིས་ལྷ་འདྲེ་ཐམས་ཅད་ཀྱིས་མཆོད་ཅིང་འདུག་ཟེར་ནས་འཇིག་རྟེན་དབང་ཕྱུག་དུ་གསོལ། སྔོན་ཡབ་ཀྱིས་བླ་མ་སངས་རྒྱས་སྙི་སྒོམ་ལ་བདག་གཙང་སྒོམ་བགྱི་བར་ཞུ་བྱས་པས། ཁྱོད་ཁྱིམ་གྱིས་ཅིག་བྱང་ཆུབ་སེམས་དཔའི་གདུང་མི་ཆད་པ་ཡིན། དགེ་སློང་གི་སྡེ་བརྒྱ་ལས་བྱང་ཆུབ་སེམས་དཔའ་གཅིག་འགྲོ་དོན་ཆེ་གསུངས། འབྲི་ཁུང་འཇིག་རྟེན་མགོན་པོ་ལ་ཕུར་པ་རྩ་རྒྱུད་ཉན་ཚེ་ཁྱོད་ཀྱི་བུ་ཆུང་མཐའ་ཅིག་ལ་ཆོས་སློབས་ཅིག་དེས་འཕྲིན་ལས་འབྱུང་ངོ་ཞེས་དང༌། མལ་ཀ་བ་ཅན་པས་དགེ་བཤེས་ལྷོ་པ་ཁོ་དེ་མདའ་ལྔ་གཞུ་གཅིག་ཚགས་གྱིས་དང་དེ་ལས་དགྲ་སྙིང་ལ་ཕོག་པའི་མདའ་གཅིག་འོང་ཞེས་དང༌། ཞང་རིན་པོ་ཆེས་དགེ་བཤེས་ལྷོ་ཆུང་པ་ཁྱོད་ཀྱི་བུ་ངས་བྱའམ་མད་ཀྱང་ཀུ་རེ་ཡིན་ཁྱོད་ལ་ང་འདྲ་བའི་བུ་ཞིག་འོང་ཞེས་དང༌། གྲ་པ་མངོན་ཤེས་ཀྱིས་ཟབ་མོ་ཐུགས་ཀྱི་གཏེར་གཅིག་མ་འདི་ལྷོ་བྲག་འཇམ་དཔལ་བྱ་བས་ཐོན་པར་བཤད་ཅེས་སོགས་དམ་པ་མང་པོས་ལུང་བསྟན། ལོ་བཞི་ནས་ཡབ་ལ་བྲིས་ཀློག་སྨྲ་སྒོ་མཚོན་ཆ། ཡི་གེའི་མདོ་རིག་བཀླག་སྡེ་ལྔ་བི་ཝརྟ་ཆེན་མོ་སོགས་སྒྲ་ཡིག་གི་བསྟན་བཅོས་བཅུ་གསུམ་ཙམ་དང༌། སྐྱེ་བོ་གསོ་ཐིགས་སོགས་ལུགས་ཀྱི་བསྟན་བཅོས་བཅུ། རྒྱལ་རབས་སྡེ་བདུན། ལྡེ་རྒྱུད་ཆེན་པོའི་སྒྲུང་འབུམ་སོགས་གླུ་གར་གྱི་བསྟན་བཅོས་བརྒྱ་དང་བཞི། (ཐ༥༦ན)

[Full Size]

བོན་གྱི་གཞུང་ཆེན་བདུན་བཅུ་དོན་ལྔ། ན་མཁའ་པྲ་ཁྲིད་ཀྱི་རྒྱུད་ཆེ་ཆུང་སོགས་མདོས་གཞུང་བཅུ་ལ་མདོས་ཆེན་བརྒྱ་ཕྲག་བརྒལ་བ། ཏྲ་ཏ་ཀ་ལའི་ཐིག་རྩ་སོགས་སྔགས་ཕྱི་ནང་གི་ཐིག་རྩ་ཀུན། ཕུར་པའི་སྐོར་པོ་ཏི་མདའ་ཚང་མ་བཞི་ལ་སོགས་པ་མང་པོ་དགུང་ལོ་དགུ་ཡན་ལ་དཔྱིས་ཕྱིན་པར་གསན་ཞིང་མཁྱེན། བཅུ་ལ་སར་མའི་ཕྱག་རྡོར་ལུགས་དྲུག་གསན་སྟེ་བསྒྲུབས་པས་དགུན་བུམ་ཆུ་འཁོལ། གཤིན་རྗེའི་གཤེད་དང་ཕུར་པའི་བསྙེན་པ་ཚད་དུ་ཕྱིན། བཅུ་གཅིག་ལ་སྒྱུ་འཕྲུལ་གྱི་དབང་རྒྱུད་མན་ངག་ཐམས་ཅད་དང༌། བཅུ་གཉིས་ལ་ཀ་ཀ་ནི་གྲ་ལྔ་སྒྲུབ་ཐབས་བརྒྱ་རྩ་ལ་སོགས་པ་མཁྱེན་ཞིང་ཡིག་བརྒྱའི་སྒྲུབ་པ་མཛད། བཅུ་གསུམ་ལ་ཡང་དག་མ་གཤིན་ཐུགས་རྗེ་ཆེན་པོ་ལུགས་གཉིས་དང་རྟ་མགྲིན་སོགས་སར་རྙིང་དུ་མ་གསན་ཞིང་བསྒྲུབས། དེ་ཐམས་ཅད་ཡབ་མཁས་པ་སྟོན་ཉི་ཁོ་ན་ལས་གསན་ལ། བཅུ་གསུམ་པའི་དུས་ཉམས་སྣང་ལ་ཇོ་མོ་སྒྲོལ་མས་ཁྲིད་དེ་ཤེལ་མཁར་དགུ་ཐོག་གི་རྩེར་བསྐྱལ་བས་རྡོ་རྗེ་སེམས་དཔའ་དང་མཇལ། དེ་ན་ཊཱཀི་གདོང་བཞི་པ་ཅིག་འདུག་པའི་མདུན་ཞལ་དཀར་པོ་ནས། སངས་རྒྱས་བསྟན་པ་ཁྱོད་ཀྱིས་ཟུངས། །གཡས་སེར་པོ་ནས། དམ་ཆོས་དར་བར་ཁྱོད་ཀྱིས་གྱིས། །རྒྱབ་དམར་པོ་ནས། དགེ་འདུན་དབུ་འཕང་ཁྱོད་ཀྱིས་སྟོད། །གཡོན་སྔོན་པོ་ནས། དུས་ངན་གདུལ་དཀའ་ཁྱོད་ཀྱིས་ཐུལ། །ཟེར་ནས་མདའ་དཀར་པོ་སྒྲོ་ལྔ་པ་ཅིག་གཏད་ནས་རྒྱལ་བའི་ལུང་ཐམས་ཅད་ཆོས་ཀྱི་དབང་ཕྱུག་གིས་བསྡུས། བོད་ལ་ཉི་མ་ཤར་གསུངས་ནས་འོད་དམར་པོར་གྱུར་ནས་སྙིང་གར་ཐིམ། ཡབ་ལ་སྨྲས་པས་དེ་འདྲ་ལ་དགའ་བྲོད་མ་བྱེད་བདུད་ཡིན་པའང་སྲིད་དེ་མིན་ན་བུས་འགྲོ་དོན་འོང་བ་འདྲ་གསུང་སྐད། བཅུ་བཞི་ནས་བརྩམས་(ཐ༥༦བ)

[Full Size]

སྟེ་སེ་གྲོ་གྱང་སར་བ་ལ་ཚད་མ་རིགས་ཐིགས་མངོན་པ་ཀུན་ལས་བཏུས་སྤྱོད་འཇུག་དགྱེས་རྡོར་ལ་སོགས་པའི་གཞུང་ཆེན་དང༌། ཕྱགས་རྫོགས་ཞི་བྱེད་ཆོས་དྲུག་ལ་སོགས་པའི་མན་ངག་དང༌། སློབ་དཔོན་མཐའ་སྐོར་བ་ལ་དབུ་མ་བདེན་ཆུང་སོགས་དང༌། མཚུར་སྟོན་ཡབ་སྲས་ལ་ཨ་ཏིའི་སྐོར་སོགས་མདོ་སྔགས་སར་རྙིང་གི་བཤད་སྒྲུབ་ཀྱི་བཀའ་མཐའ་ཡས་པ་གསན། སླར་ཡབ་ལས་ཞི་བྱེད་ཕྱག་རྫོགས་གཅོད་ཡུལ་མཐའ་དག་གསན་ནས་ཉམས་སུ་བླངས་ཤིང༌། ནག་རྩིས་སྔ་ཕྱི་བར་གསུམ་གྱི་སྐོར་མཐའ་དག་དང་ཡན་ལག་བརྒྱད་པ་སོགས་སྨན་དཔྱད་བཀའ་གཏེར་ལུགས་མི་འདྲ་བ་བཅུ་གཅིག་སོགས་སྦྱངས་སྟེ་མཁས་པར་མཁྱེན། བཅུ་བདུན་པ་ལ་མངའ་བདག་འགྲོ་མགོན་མཇལ་ཕྱིས་མྱང་གི་གཏེར་ཆོས་ཐམས་ཅད་གཏད་དེ་ཆོས་བདག་དུ་བསྐོས། བཅོ་བརྒྱད་པ་ལ་ས་སྐྱ་པཎྜི་ཏ་ལ་གནས་གཞི་སྒང་པོར་སེམས་སྐྱེད་དང་གྱང་སར་དུ་ཆོས་འབྲེལ་ལྷ་ལུང་གི་མཆོད་རྟེན་རྩར་རབ་གནས་ཐོབ། དེ་ནུབ་རྒྱ་ནག་རི་བོ་རྩེ་ལྔར་མེ་ཏོག་ཨུ་དུམ་ཝ་ར་འཚོལ་དུ་ཕྱིན་པས་ཨུཏྤལ་སྔོན་པོ་གདུགས་གན་ཀྱལ་ཙམ་ཞིག་གི་སྟེང་ན་འཇམ་དཔལ་བཞུགས་པའི་ཞལ་ནས། ཛྙཱ་ན་ཀཱ་ཡ་དྷརྨ་དྷཱ་ཏུ། ཆོས་ཀྱི་དབང་ཕྱུག་ང་ཡིན་ནོ། །དེ་ནི་ཁྱོད་ཀྱི་སེམས་རྟོག་གོ །སེམས་རྟོག་ནི་ཆོས་ཀྱི་སྒོ་མོ་བསམ་གྱིས་མི་ཁྱབ་བོ། །ཆོས་སྒོ་བསམ་གྱིས་མི་ཁྱབ་པའི་དོན་ནི་རང་བྱུང་ཡེ་ཤེས་ཐིག་ལེ་ཉག་གཅིག་གོ །ཆོས་སྒོ་བརྒྱད་ཁྲི་བཞི་སྟོང་གི་དོན་ཁྱོད་ལ་བཤད་ཟིན་གྱིས་དེའི་དོན་ལ་དཔྱོད་ཞིག་ཞེས་ཐོས་པ་ན་གཉིད་སད་དེ་ཆོས་ཐམས་ཅད་ཐོབ་སྙམ་པ་བྱུང༌། བཅུ་དགུ་པ་ལ་ཡབ་ཀྱིས་གདམས་ངག་ངོ་སྤྲོད་ཀྱི་གནད་དང་བསྟན་སྲུང་གི་དྲག་སྔགས་ཐམས་ཅད་གནང༌། མདོར་ན་ཐེག་པ་རིམ་དགུ་ལ་སྦྱངས་ཚུལ་ཉིད་ཀྱི་གསུང་ལས་(ཐ༥༧ན)

[Full Size]

དང་པོ་བདེན་བཞིའི་སྒོར་ཞུགས་གང་ཟག་གི་བདག་མེད་རྟོགས། དགྲ་བཅོམ་གྱི་འབྲས་བུ་ལ་སྨོན་རྒྱལ་མཁན་ལྟར་རང་དོན་བག་ཙམ་བྱས། དེ་ནས་རྟེན་འབྲེལ་བཅུ་གཉིས་ཀྱི་སྒོར་ཞུགས་ཆོས་ཀྱི་བདག་མེད་ཀྱི་ཕྱོགས་གཅིག་རྟོགས། ཡིད་ཞི་བདེ་ལ་སྨོན་བསེ་རུ་ལྟ་བུར་ཡང་བག་ཙམ་བསྡད། དེ་ནས་ཕར་ཕྱིན་བཅུའི་སྒོར་ཞུགས་བདག་མེད་གཉིས་ཀའི་དོན་རྟོགས། ཀུན་དུ་འོད་ཀྱི་ས་ལ་ཡིད་སྨོན་མཉན་པ་ལྟར་རང་གཞན་གཉིས་ཀའི་དོན་ཡང་བག་ཙམ་བྱས། དེ་ནས་བྱ་བ་དྲུག་གི་སྒོར་ཞུགས་སྐྱེ་འགག་མེད་པའི་དོན་རྟོགས། རྡོ་རྗེ་འཛིན་པའི་ས་ལ་ཡིད་སྨོན་བྲམ་ཟེ་ལྟ་བུར་གཙང་སྦྲ་ཡང་བག་ཙམ་བྱས། དེ་ནས་ཕྱི་ནང་གཉིས་ཀའི་སྒོར་ཞུགས་སྐྱེ་འགག་གཉིས་ལྷར་རྟོགས། རིགས་བཞིའི་རྡོ་རྗེ་འཆང་ལ་ཡིད་སྨོན་རྗེ་རིགས་ལྟར་ཕྱི་ནང་གཉིས་ཀའི་སྤྱོད་པ་བག་ཙམ་སྤྱད། དེ་ནས་ཡོ་གའི་སྒོར་ཞུགས་རྒྱལ་མཆོག་རྣམ་པ་གསུམ་གྱིས་རྒྱུད་སྦྱངས། རིགས་ལྔའི་སངས་རྒྱས་སུ་སྨོན་རྒྱལ་པོ་ལྟར་ཚོགས་དཔོན་ཡང་བག་ཙམ་བགྱིས། དེ་ནས་ཏིང་འཛིན་རྣམ་གསུམ་གྱི་སྒོར་ཞུགས་སྣང་སྲིད་ལྷའི་དཀྱིལ་འཁོར་དུ་རྟོགས། པདྨ་ཅན་གྱི་ས་ལ་ཡིད་སྨོན་མངལ་སྐྱེས་ལྟར་རིམ་གྱིས་ས་ལམ་སྦྱངས། དེ་ནས་སྐད་ཅིག་ལྷར་གསལ་གྱི་སྒོར་ཞུགས་ཡབ་ཡུམ་གཉིས་མེད་རང་བྱུང་དུ་རྟོགས། འཁོར་ལོ་ཚོགས་ཆེན་གྱི་ས་ལ་ཡིད་སྨོན་བརྫུས་སྐྱེས་ཚུལ་གྱིས་རིག་པའི་རྩལ་སྦྱངས། དེ་ནས་བྱ་བྲལ་རྟོགས་པའི་སྒོར་ཞུགས་འཁོར་འདས་གཉིས་མེད་རང་སེམས་སུ་རྟོགས། ཀུན་བཟང་དབྱེར་མེད་ཀྱི་ས་ལ་སྨོན། སངས་རྒྱས་མཉམ་སྦྱར་ངོ་མཚར་ཆེ། །རང་བྱུང་ཉི་མའི་སྙིང་པོ་བཞིན། །པང་བན་གྱི་ཉམས་དྲོད་བདེ་བར་གདའ། །ཞེས་གསུངས་སྟེ་ཐེག་པའི་སྤྱི་ཆིངས་ཤིན་དུ་ཆེ་བར་སྣང༌། འདི་ལ་ཨུ་པའི་ཞུགས་(ཐ༥༧བ)

[Full Size]

ཚུལ་གྱི་སྨད་དང་ཡོ་གའི་ཞུགས་ཚུལ་གྱི་སྟོད་ནས་ཆད་སྣང་བས་ཕྱི་མོ་མ་རྙེད་ཀྱང་དོན་ལ་བསམས་ནས་ཆད་པ་བསོས་པ་ཡིན། ཁམས་ཀློང་ཐང་སྒྲོན་མའི་གཏེར་མ་ཤོག་སྔོན་དངུལ་ཡིག་ཅན་ལས། དུས་ཀྱི་མཐའ་མ་ལ་བབ་པས་བོད་ཀྱི་བསོད་ནམས་བྱང་ནས་ལྷོར་འགྲིབ་པའི་ཚེ་བསམ་ཡས་ཀྱི་ལྷོ་གཡོ་རུའི་ནང་དུ་ཐུགས་རྗེ་ཆེན་པོའི་སྤྲུལ་པ་འཇམ་དཔལ་གྱི་གསུང་སྤྲུལ་ཕྱག་ན་རྡོ་རྗེའི་དངོས་གྲུབ་བརྙེས་པ་ཅིག་གིས་ཐུགས་རྗེ་ཆེན་པོའི་བསྟན་པ་དར་རྒྱས་སུ་བྱེད་པར་འགྱུར་གྱི་དེ་ནི་དབུགས་འབྱིན་ཆེན་པོ་ཅེས་བྱའོ་ཞེས་སོགས་གཞན་ལས་ལུང་བསྟན་པ་ཆེས་མང་བར་སྣང༌། ཁྱད་པར་དུ་གྲ་པ་མངོན་ཤེས་ཀྱིས་བསམ་ཡས་ནས་ཐོན་པ་གཏེར་ཁ་ཐམས་ཅད་ཀྱི་ནང་ན་ཟབ་པ་ཐུགས་ཀྱི་གཏེར་གཅིག་མའི་ཁ་བྱང་སྤྲད་པ་ལྷ་གཟོ་འཇམ་དཔལ་བྱ་བས་ཞུས་སྟེ་འདོན་པར་བརྩམས་པས་ཤི། ཕྱིས་སྔགས་པ་མང་པོས་འདོན་པར་བརྩམས་པས་ཀྱང་ཐོག་སེར་བྱུང་སྟེ་བྱེར། ཁ་བྱང་དེ་བརྒྱུད་ནས་དགུང་ལོ་བཅུ་གསུམ་པ་ལ་ཕྱག་དུ་བྱུང་བ་ཡབ་ལ་གཟིགས་ཕུལ་བས་ཐམས་ཅད་བརླག་པའི་བརླག་ཤོག་སེར་པོ་དེས་ཅི་བྱེད་ཁྱོད་འཆི་བ་ཉོའམ་ཞེས་ཕྲོགས་ནས་སྦས། ཕྱིས་བརྐུས་ནས་རྟོགས་ལྡན་གཅོད་ཡུལ་བ་ཞིག་གིས་གྲོགས་བྱས་ནས་ཆུ་སྦྲུལ་ནག་པོའི་ལོ་དགུང་ལོ་ཉེར་གཉིས་པ་ལ་གནམ་སྐས་ཅན་ནས་གཞན་ཁ་བྱང་དང་ལྡེ་མིག་ཐོག་ནས་སླར་རྨི་ལམ་བརྟགས་པ་ན་ཀེ་ཚང་སྒོ་ལྕགས་ཅན་ཞིག་ལ་མི་ནག་པོ་ཅིག་གིས་རེག་སྟེ་ཁྱོད་རང་གི་ནོར་ལོང་ཟེར། མཁའ་འགྲོས་ཀྱང་མར་བྱས་སྟེ་གཏད་རྒྱ་བཀྲོལ། སྒོ་ཕྱེ་བས་བྱ་ཁྱུང་ཞིག་བྱུང་བའི་ཁ་ནས་མེ་འབར་བས་སྐུ་ལུས་བསྲེགས་སྟེ་སེམས་ཐུགས་རྗེ་ཆེན་པོར་ལམ་བྱུང་བ་དེ་བྱ་དེ་ལ་བཞོན་པས་འཇའ་སྤྲིན་རིམ་པ་བཅུ་གསུམ་གྱི་རྩེར་རྡོ་རྗེ་སེམས་དཔའ་(ཐ༥༨ན)

[Full Size]

ཤེལ་གྱི་ཁྱེ་ཆུང་གི་རྣམ་པར་སྣང་བ་ཐུགས་ཀ་དང་སྤྱན་འབྲས་དང་བར་སྣང་ལ་ཨ་དཀར་པོ་རེ་ཡོད་པ་ཅིག་གིས་སྤྱི་བོར་བུམ་པ་བཞག་ཞལ་དུ་བདུད་རྩི་བླུག་པས་རྡོར་སེམས་ཐུགས་ཀའི་ཨ་ལ་ཐིམ། ཨ་གསུམ་གཅིག་ལ་གཅིག་ཐིམ་སྟེ་རང་གི་ཐུགས་ཀར་ཐིམ་པས་འཛིན་མེད་ཀྱི་དགོངས་པ་ཤར། བུམ་པ་དེ་ཕྱག་ན་གདའ་ནས་ཁྱེར་ཕྱིན་པས་ཁྲི་ཆེན་པོའི་སྟེང་དུ་སླེབས་སྟེ་བུ་ཡིན་ཟེར་བ་བཅུ་དྲུག་དང་བུ་མོ་ཡིན་ཟེར་བ་བརྒྱད་ལ་བྱིན། སྐྱ་སེར་དཔག་མེད་ལ་བཀྱེ་བ་རྨིས། དེ་ནས་བྲག་རྐེད་ཀྱི་གཏེར་གནས་དངོས་ནས་ཁྲོ་ཆུའི་ཀླུ་བདུད་ཀྱི་གཟུགས་དང་ཟངས་ཀྱི་སྒྲོམ་བུ་ནས་བླ་རྫོགས་ཐུགས་གསུམ་གྱིས་གཙོས་པའི་གདམས་པ་མཐའ་ཡས་པ་བྱུང༌། སྤྱིར་གུ་རུ་ཉིད་ཀྱིས། གནམ་སྐས་ཅན་དང་བྲག་ཕྲེང་རྟ་མགྲིན་ཞབས། །མོན་མཁར་སྟེང་དང་རྟ་མགྲིན་དབེན་རྩའི་སྒོ། །ཁོ་ཡི་གཤེད་དམར་རྟ་མགྲིན་སྒྲོམ་ཆོས་དང༌། །སྲས་མཁར་སྐྱ་བོ་ཕུག་རིང་ཕྱག་ཐེབ་མ། །བསམ་ཡས་ཨཱརྻ་ལྕགས་ཕུར་མོན་བུམ་ཐང༌། །རྩིས་ཀྱི་ལྷ་ཁང་རོང་བྲག་ཧ་བོ་གངས། །རང་གབ་དོན་གྱི་གཏེར་དང་བཅས་པའོ། །ཞེས་མདོར་བསྟན་པའི་གཏེར་ཁ་ཆེན་པོ་བཅོ་བརྒྱད་ཕྱེ་སྟེ་གཏེར་བྱུང་ཆེན་མོ་ངོ་མཚར་སྨད་ཏུ་བྱུང་བ་ཡོད་ཏོ། །གཏེར་འདི་རྣམས་ཀྱང་གཏེར་བདག་བཀུག་ནས་དམ་ལ་བཏགས་སྟེ་འདོན་མཁན་གཞན་བཏང་བ་ཁོ་ན་ཤས་ཆེ་ལ་རང་གིས་འདོན་པ་ན་ཡང་སྐལ་ལྡན་གྱི་གཏེར་དཔང་ཡིད་ཆེས་ཀྱི་མི་དབང་དུ་བཞག་ནས་བཏོན་པ་ཁོ་ན་ཡིན་པས་གཞན་ལས་ཁྱད་པར་དུ་འཕགས་སོ། །དེ་ནས་གཏེར་ཐོན་པ་ཤིན་དུ་གསངས་ཀྱང་ཐམས་ཅད་དུ་གྲགས་ནས་ཡབ་ཀྱིས་ཁྱོད་ཀྱིས་གཏེར་ཐོན་ཟེར་བ་ཐོན་པ་རང་ཅི་ཐོན་ཁྱེར་ཤོག་གསུངས། ཟངས་སྒྲོམ་ཕྱག་དུ་ཕུལ་བས་མང་པོ་ཡོད་པར་འདུག་དཀར་ཆག་ཀློགས་གསུངས་ནས་བཀླགས་པས། (ཐ༥༨བ)

[Full Size]

སངས་རྒྱས་མཉམ་སྦྱོར་གྱི་རྩ་རྒྱུད་གཅིག་ཤེས་ཀུན་གྲོལ་ཡིན་ནམ་དེ་ཀློགས་དང་གསུངས། བཀླགས་པས་ད་གོ་གོ་དེས་ཆོག་ཁྱོད་ལ་སྔར་གྲོས་མ་ཐུངས་པ་བཏབ་ཟིན། ཕྱིས་གྱོད་བསྣན་ཀྱང་གཏམ་རོ་ལས་མི་ཡོང་བས་ཁྱོད་ལ་མི་འབར་རོ། །ད་གཏེར་དེས་འཕུང་འཚེངས་གང་ཡིན་ཀྱང་ཟིན་ནོ། །དུས་གསུམ་རྩོད་མེད་ཨོ་ཌྱན་གྱི་བཀའ་ཡིན་མོད་ཟབ་ཀྱང་ང་ཁྱོད་ཀྱི་ཆོས་ལ་མི་རེ། ད་རང་གི་འདུན་མ་ལོ་བཞི་བཅུའི་བར་དུ་རུ་བཞིའི་བླ་མ་མཁས་གྲུབ་ཐམས་ཅད་ཀྱི་དགོངས་པ་བསྡུས་སྤྲོས་པ་ཆོད་འཁོར་འདས་ཀྱི་གཞི་རྩ་སེམས་ཉིད་གཅིག་པུ་འདིའི་ལ་ཟློས་ཟིན། ད་ཡང་ཁྱེད་ངའི་ཁ་ལ་ཕལ་ཆེར་མི་ཉན། ཉན་པར་སོང་ན་བླ་རྫོགས་ཐུགས་གསུམ་འདིའི་ཆོས་མགོ་ཅི་ཐོན་གྱིས། དེ་མིན་པའི་མཐུ་སད་སུད་སྨན་དཔྱད་རག་རེག་མོ་རྩིས་ཤབ་ཤིབ་རྫུ་འཕྲུལ་གཟོ་སྣ་སྐྱག་སྐྱོག་ཡང་ན་མིན་པའི་རྒྱོགས་དང་དཔག་ཆེན་སོགས་དེ་འདྲ་ཐམས་ཅད་ཆོས་མགོ་མ་ཐོན་བར་དུ་ཁར་ཟུར་ཙམ་ཡང་མ་འདོན། ཤེས་ཤེས་མང་ལ་མཐར་ཐོན་མེད་ན་མཐར་སྤྲང་པོར་འགྲོ་བ་ཡིན་ནོ། །སྤྱིར་གཏེར་ཆོས་ལ་གནག་པ་ག་ལ་ཡིན། སངས་རྒྱས་ཀྱི་མདོ་རྒྱུད་ཀུན་དུ་གཏེར་ལུང་གསུངས། རིག་འཛིན་གོང་མའི་ཕྱག་བཞེས་ཡིན། སྔར་ཡང་གཏེར་མང་པོ་བརྡོལ་སྟེ་གཏེར་འདོན་མཁན་བློ་ཆུང་རེས་ཆོས་ལ་དག་མ་ཐོན་པར་ཟས་ནོར་ལ་མིག་ཉེ་བྱས་པས་འགྲོ་དོན་དེ་ཙམ་མ་བྱུང་བ་ཤས་ཆེ་བ་འདི་ལྟ་སྟེ། རྒྱ་ཞང་ཁྲོམ་གྱིས་སྣུབས་ཀྱི་གཏེར་མང་དུ་ཐོན་ཡང་སྔུན་ལ་ངན་སྔགས་དཔེལ་བས་འགྲོ་དོན་རྒྱ་བཏུལ། ཀུ་ཚ་སྨན་པས་སློབ་དཔོན་པདྨའི་ཤོག་སེར་སྒྲོམ་ཆུང་གང་ཐོན་ཡང་སྨན་དཔྱད་བྱས་པས་འགྲོ་དོན་རྒྱ་ཆུང༌། ཡ་འགྲོག་གཉན་གྱི་ར་ཤག་གཏེར་བཏོན་གྱིས་ཁོ་ཐིང་ནས་སྒྲུབ་ཐབས་སྟག་སྒྲོམ་གང་ཐོན་ཡང་སྔོན་ལ་མདོས་ཆོག་བྱས་པས་ཕྱིས་(ཐ༥༩ན)

[Full Size]

མདོས་མཁན་དུ་སོང༌། བོན་པོ་བྲག་ཚལ་གྱིས་བུམ་ཐང་ནས་ཆོས་བསེ་སྒྲོམ་གང་ཐོན་ཡང་སྔོན་ལ་དཔེ་དཀར་བསྒྲུབས་པས་མཐུ་མཁན་ལས་མ་བྱུང༌། དེ་འདྲ་ལ་ཟད་པ་མེད། རིག་འཛིན་གོང་མ་ཚོས་གཞན་དོན་དུ་དམིགས་ཀྱང་ཆོས་མགོ་མ་ཐོན་པར་གཞན་དོན་དུ་མ་སོང་བའི་གཏེར་བཏོན་ཚོ་གོ་མ་ཆོད་རང་ཡིན་ནོ་བསམས་གཞིགས་ལ་ཆོས་མགོ་ཐོན་ཅིག །ཆོས་བྱུང་ན་ཟས་ནོར་ཞོར་ལ་ཡོང་ཆོས་སྐྱོང་རྣམས་མ་བསྒྲུབས་ཀྱང་འཁོར་ནས་མཐུ་ཞར་ལ་ཡོང༌། ཆོས་སྐྱོང་ཁོ་རང་ཆོས་བྱེད་སྐྱོང་བར་དམ་བཅས་པ་ཡིན་པས་ཁོ་རང་དམ་ཉམས་དྭོགས་ནས་སྐྱོང་བ་ཡིན། བློ་རྩབ་རྩུབ་མ་མང་བར་བླ་རྫོགས་ཐུགས་གསུམ་གྱིས་གྲུབ་པ་ལ་དྲིལ་ཞིག །ད་ལྟ་མངའ་བདག་མྱང་སྲས་མིས་འཁུར་བ་འདི་ཁོས་ཐུགས་རྗེ་ཆེན་པོ་བསྐྱངས་པས་བྱུང་བ་ཡིན་གཏེར་བཏོན་གྱ་མ་བརྡུགས་ཙམ་ཁོ་ན་ཡིན་ནོ། །ངས་ལོ་དྲུག་གི་གོང་ནས་འགྲོ་བྱས་པའི་དུས་ཚོད་དེ་ད་ཟླ་བ་གཉིས་ཀྱིས་ཐེམ་པས་དེ་ཙམ་ན་འགྲོའོ་དེ་ལ་མི་ཚོས་གཏེར་སྡུར་ཡིན་ཟེར་བ་འོང་སྟེ་རྟོག་པ་བྱ་མི་དགོས། ང་ཡན་ཆད་མི་རབས་བཅུ་བདུན་སོང་སྟེ་ནང་གི་གྲུབ་རྟགས་མ་བྱུང་བ་མེད། ངས་ཀྱང་ཞན་ཤོས་མིན་ཙམ་ཡོང་གསུངས་སྟེ་ལོ་རྒྱུས་འདི་དག་ཀྱང་གང་ཟག་འགའ་རེས་གཏེར་ཐོན་པ་དང་སྤྱོད་པ་ཀུན་ལ་ཕན་པར་གདའ་ནས་བཀོད་པའོ་ཞེས་གུ་རུ་གཉིད་ཀྱིས་གཏེར་བྱུང་དུ་བཀོད་ཏོ། །མངའ་བདག་འགྲོ་མགོན་གྱིས་གཏེར་གྱི་ཉམ་ང་ཆེ་གསུངས་ནས་གཟིགས་པས་མཉེས་སྟེ་ཆེད་དུ་བརྗོད་པ་མཛད། མཁའ་རི་ལུང་བསྟན་ལས་ཧོར་དམག་འབྱུང་བ་སོགས་ཐོས་པས་སློབ་དཔོན་མཐའ་སྐོར་བ་སོགས་མང་པོས་ཧོར་ད་ལྟ་ཡུལ་ན་མེད་པ་ལ་བོད་ཐམས་ཅད་འདེད་པ་ག་ལ་འོང་ཟེར་ནས་སྐུར་པ་བཏབ་པས་ཐུགས་ཆད་ནས་གདམས་པ་རྣམས་སླར་(ཐ༥༩བ)

[Full Size]

སྦེད་པར་དགོངས་པ་ན་བུ་མོ་གཉིས་ཀྱིས་རྟ་དཀར་པོ་བྱའི་གཤོག་པ་ཅན་ལ་བསྐྱོན་ནས་རྔ་ཡབ་གླིང་དུ་སློབ་དཔོན་པདྨའི་དྲུང་དུ་བཏོལ་སྟེ་ཡོངས་རྫོགས་ཀྱི་དབང་བསྐུར་ནས། ཀྱེ་ཧོ། ལམ་གྱི་ལམ་མཆོག་གཞན་དོན་ཡིན། །འདི་ལ་སྒྱིད་ལུག་སུ་སྐྱེས་པ། །དེ་ཡི་བྱང་ཆུབ་རྒྱང་ཐག་རིང༌། །སྔོན་ཡང་འཕགས་པའི་དབུ་བཅུ་གཅིག །རྣམ་སྨིན་དེས་གྱུར་ཕྱིས་འགྱོད་བཤགས། །ཐུགས་བསྐྱེད་མཛད་ནས་ཞལ་བསྒྱུར་བཞིན། །བུ་ཁྱོད་སེམས་སྐྱེད་མ་གཏོང་ཞིག །ད་སྟེ་ལོ་བདུན་འདས་པ་ན། །ནུབ་བྱང་མཚམས་ནས་འགྲོ་དོན་འབྱུང༌། །འདི་ནས་ལོ་ནི་ལྔ་བརྒྱ་ན། །ལྷ་སའི་ཇོ་བོ་བོད་མི་འཛིན། །ལོ་ནི་སུམ་བརྒྱའི་ནང་ཁོངས་སུ། །བསམ་ཡས་རྟ་མགྲིན་ཨོ་ཌྱན་འབྱོན། །ཞེས་སོགས་ལུང་བསྟན། འདིར་མ་ཞེན་ཞིག་ཞེན་ན་འཕོས་ཉེན་ཡོད་ཏོ་གསུངས་ནས་འོད་ཕུབ་ལྟ་བུས་བཏེག་སྟེ་སྐད་ཅིག་ལ་སླེབས། གཏེར་དང་པོ་འདི་བཏོན་ནས་ལོ་བདུན་པའི་ཤིང་བྱི་ལ་ཧོར་དམག་དང་པོ་དོར་ཏོག་གི་དམག་འཕན་ཡུལ་དུ་ལྷགས་པ་ཡིན། མོན་མཁར་སྟེང་ནས་ཨོ་ཌྱན་གྱི་སྐུ་བཏོན་ནས་ཕྱིས་ཞལ་བསྟན་པས་རིང་སྲེལ་གྱི་ཆར་པ་བབ་པས་ཉ་མིག་གཏོར་བར་འདུག་ཟེར་སྐུར་པ་བྱུང་ཡང་ཕྱིས་ལུས་ལས་རྡུལ་འབབ་པ་ལྟར་ཕྲམ་ཕྲོམ་དུ་བབ་པས་རྩོད་མེད་དུ་ཡིད་འཆེས། གཏེར་གནས་རང་སེམས་ལ་ཆོས་ཉིད་རང་ཆས་སུ་གནས་པ་ནི་གཏེར་གྱི་མཐར་ཐུག་སྟེ་མདོ་རྒྱུད་རྣམས་ཁ་བྱང་མན་ངག་ཡང་བྱང་བླ་མས་ངོ་སྤྲད་པ་ལྡེ་མིག་སྟེ་རང་ངོ་ཇི་བཞིན་མངོན་དུ་གྱུར་པ་གཏེར་ཐོན་པ། རང་གཞན་མཉམ་ཉིད་དུ་གྲོལ་བ་གཏེར་གྱི་འགྲོ་དོན་དུ་གསུངས། དངོས་ཉམས་རྨི་ལམ་དུ་བླ་མ་ཡི་དམ་ཆོས་སྐྱོང་གཟིགས་པ་བགྲང་ལས་འདས། ཁྱད་པར་དུ་སྐྱེ་བ་གཏན་གྱི་བླ་མ་རིག་འཛིན་པདྨས་རྟག་པར་མངོན་སུམ་དུ་ཞལ་བསྟན་ཞིང༌། (ཐ༦༠ན)

[Full Size]

བསམ་ཡས་བཞེང་མཁན་འོ་སྐོལ་རང་ཡིན་མོད། ཅེས་ཆོས་རྒྱལ་ཁྲི་སྲོང་ལྡེ་བཙན་དང་དེའི་ཕྱི་མ་སུམ་བཅུ་རྩ་གསུམ་དུ་ལྷའི་བུ་འོད་མཐའ་ཡས་དང༌། དེའི་ཕྱི་མ་རྒྱལ་པོ་ཁྲི་རལ་པ་ཅན་རྣམས་ཡིན་པར་ལུང་བསྟན། དངུལ་དཀར་གྱི་མེ་ལོང་བསྟན་ནས་བྱིན་གྱིས་བརླབས་པས་དེ་ཕྱིན་གྱི་སྐྱེ་བ་བཅུ་གསུམ་དྲན་སྟེ། ཤར་ཕྱོགས་བྷཾ་ག་ལར་རྒྱལ་པོ་ཆོས་ལྡན་དུ་གྱུར་པ་ན་ཕྱི་བློན་ཞིག་སྨྱོ་ནས་བུ་སྨད་གསུམ་བསད་པས་ཁྲིམས་ལ་སྦྱར་སྟེ་མེར་བསྲེགས་པས་ཁོ་རྩལ་ཆེ་བས་ནགས་ལ་བྲོས་སྟེ་ནགས་མེར་མཆེད་པས་སྐྱོ་ནས་རབ་ཏུ་བྱུང་ཞིང་གནས་བརྟན་ཆེན་པོར་གྱུར། ཕྱིས་ཞང་པོ་བྲམ་ཟེ་བཟང་སྐྱོང་གིས་སྔགས་ཀྱི་སྒོར་བཅུག་སྟེ་ཐུགས་རྗེ་ཆེན་པོ་གྲུབ་ནས་ཡུལ་ཁམས་དགེ་བ་ལ་བཀོད། ༡ དེ་ནས་ཟངས་གླིང་དུ་རྒྱལ་པོར་གྱུར་སྒྱུ་མ་མཁན་གྱིས་བསྟན་པ་ལས་ཐམས་ཅད་སྒྱུ་མར་རྟོགས་སྟེ་ཡུལ་པ་དེ་གྲོལ་བར་བྱས། ༢ དེ་ནས་ལྷོ་ཕྱོགས་སུ་རྒྱལ་བུར་སྐྱེས་ཚེ་ནུ་བོ་སྤྱུག་པའི་གྲོས་ཐོས་པས་མ་དགའ་སྟེ་ཆུ་བོར་མཆོངས་པས་མ་ཤི་སྟེ་སོས་ནས་པཎྜིཏ་འཁོར་སྟོང་ལྡན་པར་གྱུར་ཚེ་རྔོན་པ་རག་ཤ་རྒོད་ཀྱིས་ཕག་རྒོད་མོ་ཞིག་གསོན་པོར་བཤས་པས་ཕག་ཕྲུག་བཅུ་བྱུང་སྟེ་ཕག་རོའི་ནུ་མ་ལ་འཇིབ་པ་མཐོང་བས་སྙིང་རྗེ་སྐྱེས་སྟེ་བརྒྱལ། སངས་ཙ་ན་རྔོན་པ་དེ་ཕྱག་ན་རྡོ་རྗེ་དང་ཕག་ཕྲུག་བཅུ་ཁྲོ་བོ་བཅུ་ཕག་མོའི་ཁོང་པ་སྲིན་པོ་རུ་དྲའི་ཁོག་པའི་གཞལ་ཡས་སུ་སྣང་སྟེ། སྙིང་རྗེ་མེད་ན་རིགས་ཆད་ཡིན། །སོགས་ནས། ཕག་པ་མ་བསྒྲལ་ཉན་ཐོས་བསྒྲལ། །གསུངས་ནས་ཤར་ཕྱོགས་སུ་གཤེགས་པའི་ཕྱི་བཞིན་ཕྱིན་པས་འཇམ་དཔལ་གཤིན་རྗེ་དང་དེའི་སློབ་མ་སྦས་པའི་མི་ལྔ་དང་མཇལ་སྟེ་རྒྱུད་གྲོལ་ནས་རྒྱལ་ཁམས་དེ་བཏུལ། ༣ དེ་ནས་བལ་ཡུལ་དུ་རྒྱལ་བུ་དྷརྨ་རཱ་ཛཱར་སྐྱེས་མཁས་པར་གྱུར་སྟེ་མུ་སྟེགས་འགྲོ་བཟང་དང་རྩོད་པས་(ཐ༦༠བ)

[Full Size]

སློབ་དཔོན་རྒྱལ། མུ་སྟེགས་ཀྱིས་ཞག་བདུན་གྱི་མཐུ་ཁས་བླངས། རྒྱལ་པོས་ཀྱང་དམག་བྱེད་པར་བཟས་པ་ན་མཚན་མོ་བུད་མེད་དམར་ནག་གཉིས་ཀྱིས་ཁྱེར་སྟེ་མུ་སྟེགས་དེའི་དྲུང་དུ་སླེབས་པ་ན་ཁྱོད་རྒྱལ་པོ་ཡིན་པས་མི་གསོད་ཀྱི་ངའི་བུ་མོ་འདི་མཁའ་འགྲོའི་རིགས་ཡིན་པས་བསྟེན། ང་ལ་གནོད་པ་བྱེད་རི་བྲོ་བོར་ཟེར་ནས་དེ་ལྟར་ཉན། བུ་མོ་གུད་ཅིག་དུ་བཞག་པ་ན་གར་འགྲོ་ཟེར། ང་ཚད་མའི་འཕྲོ་ཉན་དུ་འགྲོ་བྱས་པས། ཆོས་རྒྱལ་ཁྱོད་ཅི་ཅོལ་རེ་ཆུང༌། །ཚད་ལས་འདས་དོན་མ་རྟོགས་ན། །ཚད་མ་ཉན་པས་འཚང་མི་རྒྱ། །ལྷན་སྐྱེས་ཤེས་རབ་ང་བཞག་ནས། །རང་བྱུང་ཡེ་ཤེས་ག་ནས་འཚོལ། །ཟེར་བས་རྣལ་འབྱོར་མར་ཤེས་སྟེ་གསོལ་བ་བཏབ་པས་རྡོ་རྗེ་རྣལ་འབྱོར་མར་དངོས་སུ་བཞེངས་སྟེ་རྒྱུད་མན་ངག་བསྟན་ནས་བསྒྲུབས་པས་འཁོར་ཚོམ་བུ་དང་བཅས་པ་གྲོལ་ལོ། ། ༤ དེ་ནས་ལི་ཡུལ་གྱི་རྒྱལ་པོར་གྱུར་སྟེ་རྒྱལ་སྲིད་ཆོས་སུ་བསྒྱུར། ༥ དེ་ནས་མདོ་སྨད་ཙོང་ཁར་ཨེ་སྣང་འོད་དུ་གྱུར་སྟེ་ལོ་ཆེན་རིན་ཆེན་བཟང་པོ་དང་སྔགས་ཀྱི་བླ་མ་དྲུག་བསྟེན་མདོ་ཁམས་བཏུལ། ༦ དེ་ནས་པུ་རངས་སུ་འཁྲུངས་སྟེ་མདོ་སྔགས་ལ་སྦྱངས། ཟུར་ཆེན་གྱི་སློབ་མར་གྱུར། ཕ་དམ་པས་གནད་ཀྱི་ངོ་སྤྲད། འགྲོ་བ་མང་པོའི་དོན་མཛད་ཏོ། ། ༧ དེ་ནས་ལི་ཡུལ་གྱི་རྒྱལ་ཕྲན་དུ་སྐྱེས་ནས་བུ་སྨད་དང་སྲིད་རྒྱས་པའི་ཚེ་ཏུ་རུ་ཀའི་རྒྱལ་པོའི་དམག་བྱུང་བུ་སྨད་ཐམས་ཅད་བསད་ཡུལ་ཐམས་ཅད་བརླག་པས་རལ་སྐོར་བྱས་སྟེ་རྒྱལ་པོ་དེ་གསོད་དུ་ཕྱིན་པས་དེ་ན་རེ། ཕས་འཁོར་མས་འཁོར་བུ་ཚས་འཁོར། །དགྲས་འཁོར་གཉེན་འཁོར་རང་གིས་འཁོར། །ཕ་སོད་མ་སོད་བུ་ཚ་སོད། །དགྲ་སོད་གཉེན་སོད་ཁྱོད་རང་སོད། །ཐམས་ཅད་བསད་ན་རང་གྲོལ་བདེ། །ཟེར་སྟེ་གང་ཡང་མི་སྣང་བར་གྱུར། ཡུལ་དང་བུ་སྨད་ཀྱང་མ་ཉམས་པར་འདུག་(ཐ༦༡ན)

[Full Size]

སྟེ་ཚིགས་བཅད་ཀྱི་དོན་གོ་ནས་རི་བོའི་རྩེར་བསྒོམས་པས་གྲུབ་པ་ཐོབ་སྟེ་ཡུལ་དེ་བཏུལ་ཏོ། ། ༨ དེ་ནས་རྒྱ་ནག་རྩིས་ཀྱི་རྒྱལ་པོའི་སྲས་ཤོ་དྷ་ར་གར་གྱུར་སྟེ་རྒྱལ་སྲིད་བསྐྱངས། འཇམ་དཔལ་གྱིས་ལུང་བསྟན་སྟེ་བཱི་མ་ལ་དང་མཇལ་བས་སྨིན་ཞིང་གྲོལ་སྟེ་ཡུལ་ཁམས་དེ་བཏུལ་ཏོ། ། ༩ དེ་ནས་རྒྱ་གར་ཤར་ལྷོར་དྲང་སྲོང་ཉི་འོད་ཀྱི་བུར་གྱུར། ན་རོ་པ་དང་ནག་པོ་པ་ལས་མན་ངག་ཐོབ་སྟེ་གྲོགས་བུ་མོ་བཅོ་ལྔ་ཁྲིད་ནས་སྤྱོད་པ་ལ་ཕྱིན་པས་སྤྱོད་པ་སྔར་ཞུགས་ཀྱི་རྣལ་འབྱོར་པ་ཙོད་རུ་ཁྱེར་བ་ཞིག་དང་དུག་མཚོའི་འགྲམ་དུ་ཕྲད་པས་ཁྱེད་ཚོ་སྤྱོད་པ་པ་ཡིན་ནམ་ཟེར། བུད་མེད་རྣམས་ཀྱིས་ཡིན་ནོ་ཟེར་བས་འོ་ན་དུག་ཆུ་འཐུང་ཞིག་ཟེར། སྔོན་ལ་ཁྱོད་ཀྱིས་འཐུང་ཟེར་བས་དེས་དུག་ཆུ་ཀ་པཱ་ལས་བཅུས་ནས་ཕྱེད་འཐུངས་སྟེ་ལྷག་མ་བུད་མེད་རྣམས་ལ་གཏོར་བས་བུད་མེད་བཅོ་ལྔ་པོ་འཛེ་མོ་མི་བཟད་པར་གྱུར་ནས། འདི་ལྟར་དགྱིད་པ་མ་ལེགས་སོ་བྱས་པས། འོ་ན་མེད་པར་བྱ་ཡིས་ཟེར་སྟེ་བུད་མེད་དེའི་སྙིང་གར་ཙོད་རུ་དེ་རེག་པས་བཅོ་ལྔ་པོ་སྐད་ཅིག་ལ་ཤི། དེར་ཐོད་རྒལ་གྱི་སྤྱོད་པ་དེ་ལྟ་བུ་མ་བྱེད་ང་ལ་ཡང་བར་ཆོད་ཆེ་བྱས་པས། རྣལ་འབྱོར་པ་དེ་ན་རེ། བུད་མེད་དུག་གི་རང་བཞིན་སྟེ། །དུག་གིས་དུག་བཅོམ་ཡེ་ཤེས་ཆེ། །ཡེ་ཤེས་ཆེ་ལ་རབ་སྦྱོར་བས། །སྦྱོར་བའི་སྤྱོད་པ་དེ་ཁོ་ན། །ལུས་རྒྱས་ཡེ་ཤེས་བར་དུ་བཅད། །ལུས་རྒྱ་བཤིག་པས་འཁོར་བ་བསྒྲོལ། །སྲོག་མེད་སྲོག་ཡང་བཅད་ཏུ་མེད། །མེད་པར་རྟོགས་ན་ཆོད་པ་ཡིན། །དགྲོལ་བའི་སྤྱོད་པ་དེ་ཁོ་ན། །སྦྱོར་དགྲོལ་སྤྱོད་པ་མ་གཏོགས་པ། །གསང་སྔགས་བྱ་བ་གང་ལ་བྱ། །བར་ཆོད་བྱ་བ་ཅི་ལ་ཟེར། །ཟེར་བས་ངེས་པ་རྙེད་དེ་ཕྱག་བྱས་པ་ན། ཨེ་མ། གསོད་པར་ནུས་པ་དགྲོལ་བ་མིན། །གསོ་བར་(ཐ༦༡བ)

[Full Size]

ནུས་ན་དགྲོལ་བ་ཆེ། །ཆགས་པས་སྦྱོར་པ་སྦྱོར་པ་མིན། །ཆགས་པ་མེད་ན་སྦྱོར་བ་ཆེ། །ཟེར་ནས་སེ་གོལ་གཏོགས་པས་བུད་མེད་རྣམས་སྔ་མ་བས་ཆེས་མཛེས་པར་གྱུར། དུར་ཁྲོད་རྣམས་སུ་སྤྱོད་པ་མཐར་ཕྱུང་སྟེ་རྣལ་འབྱོར་པ་མཐའ་ཡས་པ་གྲོལ་བར་བྱས་སོ། ། ༡༠ དེ་ནས་ཟ་ཧོར་གྱི་རྒྱལ་བུ་སི་དྷི་ཤྲཱིར་གྱུར་སྟེ་ཡབ་ངང་པའི་རྒྱལ་པོ་ལ་ཆིབས་སྟེ་དགའ་ལྡན་དུ་གཤེགས་རྗེས་རྒྱལ་ས་མཛད། སླར་རྒྱལ་སྲིད་སྲས་ཐུགས་རྗེ་ཆེན་པོའི་སྤྲུལ་པ་ལ་གཏད་དེ་སྒྲུབ་པ་མཛད་པས་འཇམ་དཔལ་དང་ཐུགས་རྗེ་ཆེན་པོ་གྲུབ་སྟེ་ཡུལ་ཁམས་དེ་བཏུལ་ཏོ། ། ༡༡ དེ་ནས་མ་ག་དྷར་རྒྱལ་པོར་གྱུར་སྟེ་མཁས་ཤིང་སྐྱེད་རིམ་གྱི་གྲུབ་པ་བརྙེས་མུ་སྟེགས་བཏུལ། རྒྱལ་ས་མཛད་པའི་སྲས་སྔ་ཚར་བརྒྱད་དེའི་སྲས་བཅུ་དྲུག་རྣམས་རབ་ཏུ་ཕྱུང༌། ཕྱི་ཚར་ཁ་ཆེའི་རྒྱལ་པོའི་སྲས་མོ་ལ་སྲས་གཙུག་ཏོར་དགུ་པ་ཅིག་བཙས་སྟེ་བཙས་མ་ཐག་ནས་ཆོས་རང་བྱུང་དུ་གསུང་བ་ལ་རྒྱལ་ས་གཏད་དེ་མཁའ་སྤྱོད་ཏུ་གཤེགས་སོ། ། ༡༢ དེ་ནས་མངའ་བདག་མྱང་རལ་སྟེ་བཅུ་གསུམ་མོ། །དེ་རྣམས་གསལ་བར་དྲན་སྟེ་ཞུས་ལན་མང་དུ་བྱས་པའི་མཐར་ན་མཁའ་ལ་བལྟས་པས་སྲིད་པའི་འཁོར་ལོའི་སྟེང་ན་ཤེལ་གྱི་མཆོད་རྟེན་བང་རིམ་བརྒྱད་པ་བུམ་པ་ལ་ཉི་མའི་སྒོ་གཅིག་ཡོད་པའི་འཁོར་ལོའི་སྟེང་ན་མུ་སྟེགས་མི་གཉིས་སྐོར་བ་བྱེད། བང་རིམ་མས་རིམ་གྱིས། རྒྱལ་མཁན་གསེ་རུ་གྲུབ་པ་དང༌། །བྲམ་ཟེ་རྗེ་རིགས་རྒྱལ་པོ་དང༌། །མངལ་སྐྱེས་མི་དང་བརྫུས་སྐྱེས་ལྷ། །དེ་རྣམས་གནས་སྟེ་རེ་རེ་ཞིང་ང་མཐོ་ཟེར་བ་ལ་བུམ་པའི་ལོགས་ནས་བྱ་ཁྱུང་ཞིག་གིས་ཐམས་ཅད་པས་ཀྱང་ང་མཐོ་ཟེར། དེ་ཚེ་མཆོད་རྟེན་དེ་ལས་ཐམས་ཅད་ངའི་ཆོ་འཕྲུལ་ཡིན་ནོ་ཟེར་ཙ་ན་སློབ་དཔོན་པདྨ་ཉིད་བཞེངས་ནས་སེམས་ཆོས་དབྱེར་མེད་རང་དྭངས་སུ་ཞོག་ཞིག་གསུངས་སྟེ་ཉི་མའི་སྒོ་བྱེ་བའི་ནང་དུ་གཤེགས་པར་(ཐ༦༢ན)

[Full Size]

གཟིགས་སོ། །གཞན་ཡང་ངོ་མཚར་གྱི་རྣམ་ཐར་མཐའ་ལས་འདས་ཤིང་གཙོ་བོར་མ་ཎི་འབའ་ཞིག་གིས་འཕྲིན་ལས་མཛད་དེ་བོད་ཡུལ་ཐམས་ཅད་ཡིག་བདུན་གྱི་རྒྱུན་གྱིས་བཀང༌། བརྒྱ་བྱིན་དང་ཉི་ཟླའི་ལྷའི་བུས་མཆོད་བསྟོད་བྱས། བོད་ཀྱི་ལྷ་འདྲེ་ཐམས་ཅད་ཀྱིས་བླ་མར་བཀུར་ཞིང་སྙན་གྲགས་ཀྱི་དངོས་གྲུབ་ཕུལ། ཚོང་འདུས་འགུར་མོའི་ལྷ་ཁང་དང༌། ཁྱད་པར་དགུང་ལོ་ལྔ་བཅུ་རྩ་ལྔ་ཚུན་ལ་བསམ་གྲུབ་བདེ་བ་ཆེན་པོའི་ལྷ་ཁང་ཚར་བར་མཛད། གྲ་མ་ལུང་པའི་ཇོ་སྟན་རྣམས་ཀྱིས་གཎྜི་ར་ཕུལ་ལྕགས་ཐག་བརྐྱངས། ང་བདུན་ས་འབྲུག་ལ་ཧ་བོ་གངས་བཟང་ནས་བསྟན་གཙོའི་སྐུ་གདན་དྲངས་སྟེ་འདི་ནི་དང་པོར་འཕགས་པ་ཀླུ་སྒྲུབ་ཀྱིས་རི་བཏང་བཟུང་ནས་སྤྱན་དྲངས་སྟེ་འགྲོ་དོན་མཛད། བར་དུ་སློབ་དཔོན་པདྨས་སྣབ་སྟོད་ས་ཟམ་ཡང་དབེན་ནས་སྤྱན་དྲངས་སྟེ་འགྲོ་དོན་མཛད་ནས་གཏེར་དུ་སྦས་པ་ཡིན་ལ། འདི་ནི་སེམས་ཅན་གྱི་བསོད་ནམས་ཀྱི་ཞིང་ལྷ་སའི་ཇོ་ཤཱཀྱ་དང་མཚུངས་པ་ཡིན་སྟེ་དངོས་ཀྱིས་འགྲོ་བའི་དོན་མཛད་པ་ད་ལྟ་བཞུགས་ལ་མ་འོངས་པར་ཀླུ་ཡུལ་དུ་སྤྱན་འདྲེན་པར་གསུངས་སོ། །སྤྱིར་ཆོས་གཏེར་ཟབ་མོ་མང་ཞིག་སྣོད་མ་རྙེད། རྒྱུད་མན་ངག་མང་པོ་རྒྱ་ཆེས། དྲག་སྔགས་རྣམས་གཞན་ལ་གནོད་པར་དོགས་ནས་མང་དུ་མ་བཏོན། བཏོན་པ་རྣམས་ལས་ཀྱང་བཀའ་བབས་ཀྱི་བུ་ལ་གཏོད་པར་བཤད་པ་རྣམས་མ་གཏོགས་ཕལ་ཆེར་སླར་སྦས་ཤིང་སྐུ་དང་དབང་བུམ་སོགས་ཀྱང་གཏེར་གནས་སྔ་མ་དང་ལྷ་ཁང་ཉིད་དུ་སྦས་པ་ཕྱིས་འཕྲིན་ལས་འབྱུང་བར་གསུངས་སོ། །ཁོ་བོ་ཆོས་ཀྱི་དབང་ཕྱུག་ལ། །སེམས་ཅན་རྣམ་རྟོག་ཐ་དད་ཀྱིས། །ལ་ལ་ཆོས་དབང་བདེ་ན་དགའ། །ལ་ལ་ཆོས་དབང་བདེ་ཡིས་དྭོགས། །སོགས་ནས། ཆོས་དབང་སེམས་ཉིད་རེ་དྭོགས་བྲལ། །ཆོས་དབང་སེམས་ལ་ཟུག་རྔུ་མེད། །བདེ་ན་དགའ་(ཐ༦༢བ)

[Full Size]

ཚོད་དགྱེས་པར་མཛོད། །ཆོས་དབང་ཟུག་རྔུ་སྤངས་པ་མེད། །སྡུག་ན་དགའ་ཚོད་གྱེས་པར་དགོངས། །ཆོས་དབང་སེམས་ལ་སྐྱེ་ཤི་མེད། །ཤི་ཡིས་དྭོགས་ཚོད་གྱེས་པར་མཛོད། །ཆོས་དབང་སེམས་ཉིད་ཆོས་དབྱིངས་ཤི། །མ་ཤི་དོགས་ཚོ་དགྱེས་པར་དགོངས། །ཆོས་དབང་སེམས་ཉིད་འཕོ་འགྱུར་མེད། །རྟག་དུ་རེ་ཚོ་དགྱེས་པར་དགོངས། །ཆོས་དབང་སེམས་ལ་རང་བཞིན་མེད། །རྟག་གིས་དྭོགས་ཚོ་དགྱེས་པར་མཛོད། །ཆོས་དབང་སེམས་ཀྱིས་མ་བཏུལ་མེད། །རྒྱལ་དུ་རེ་ཚོ་དགྱེས་པར་མཛོད། །ཆོས་དབང་སེམས་ལ་མཐོ་དམན་མེད། །རྒྱལ་གྱིས་དྭོགས་ཚོ་དགྱེས་པར་མཛོད། །ཅེས་གསུངས་ཤིང་རེ་དོགས་རྩད་ནས་ཟད། སྣང་སྲིད་དབང་དུ་འདུས་པའི་རྣལ་འབྱོར་པ་ཆེན་པོར་བཞུགས་ལ། ཀུན་བཟང་བདེ་ཆེན་ཆོས་དབྱིངས་གཞལ་ཡས་སུ། །སྒྱུ་མའི་སྐྱེས་བུ་ཆོས་དབང་ད་ནི་སྡུད། །ཅི་ཕྱིར་ལུས་འདིའི་གདུལ་བྱ་རྫོགས་རྫོགས་འདྲ། །ལས་ངན་ཟད་པའི་རྟགས་ཀྱང་ལུས་ལ་སྨིན། །རྨི་ལམ་མི་གཟུགས་ཆོས་དབང་ཡལ་ནས་འགྲོ། །ཞེས་སོགས་དང༌། དཔོན་སློབ་ཀུན་བསྡེབས་ནོར་བུའི་ཚོང་ལེན་རྨིས། །ང་དང་འབྲེལ་ཚད་གཏན་བདེ་འཐོབ་པའི་རྟགས། །ཅེས་སོགས་དང༌། འདི་ནས་མི་རབས་བདུན་ནམ་བཅུ་གསུམ་ན། དྷརྨ་མི་ཏྲ་ཅིག་གིས་ལོངས་སྤྱད་ནས། །བདག་གི་ཤ་རུས་སྲན་ཚད་ཡུངས་འབྲུ་རེ། །ལྟོར་སོང་ཐམས་ཅད་ལམ་འགྲོ་དོན་ཆེན་འཐོབ། །ཅེས་དང༌། ང་ནས་བརྒྱུད་པ་བདུན་ནམ་བརྒྱད་དུས་སུ། །ལུས་སྐྱེད་རིགས་ཀྱི་བརྒྱུད་པ་མི་ཆད་ཀྱང༌། །གཏེར་ཆོས་ཡོངས་རྫོགས་བཀའ་ལུང་ཙམ་པོར་འགྲོ། །བསྟན་པའི་གཙོ་བོ་འདི་ཡི་རྟེན་འབྲེལ་གྱིས། །བརྒྱུད་པའི་གདུལ་བྱ་གཙང་དུ་སྐྱོན་མེད་ཙམ། །ཞེས་དང༌། བསམ་གྲུབ་ལྷ་ཁང་གསང་སྔགས་བསྟན་པའི་སྲོག །བུ་སློབ་(ཐ༦༣ན)

[Full Size]

དམ་ལྡན་བུ་ཡིས་ཞབས་ཏོག་འབུངས། །གཙུག་ལག་ཉམས་རྐྱེན་བུ་ཡིས་བྱས་ཀྱང་ཐོན། །ལྷ་ཁང་ཞབས་ཏོག་སྤྲང་པོས་བྱས་ཀྱང་ཁུར། །ཞེས་ལྷ་ཁང་གི་ཞབས་ཏོག་གལ་ཆེ་བ་སོགས་ཀྱི་ཞལ་ཆེམས་ཁྱད་པར་བ་མཛད་དེ་དགུང་ལོ་ང་དགུ་པ་ལ་མྱ་ངན་ལས་འདས། སློབ་མའི་དམ་པ་བལ་པོ་བྷ་རོ་གཙུག་འཛིན་ནི་བལ་ཡུལ་ཡམ་བུ་བ་ཡིན། བོད་ནས་གསེར་བཙལ་སྟེ་རྒྱ་གར་དུ་འགྲོ་སྙམ་ནས་བོད་དུ་འོངས་པས་རྨི་ལམ་དུ་བུ་མོ་ཞིག་གིས་ལུང་བསྟན་སྟེ་གུ་རུ་དང་མཇལ་བས་ཞག་བདུན་གྱི་བར་བླ་མ་ཨོ་ཌྱན་དངོས་སུ་མཐོང༌། དེ་ཕྱིན་བླ་མའི་སྐུ་ཐུན་མོང་བར་སྣང༌། གསུང་གླེང་བྱས་པ་ཙམ་གྱིས་རྟོགས་པ་ཤར། ནུབ་ཅིག་དབང་མཛད་པ་ན་ཁྱོད་ཀྱིས་ང་ཅིར་མཐོང་གསུངས་ཡི་དམ་དངོས་སུ་མཐོང་ཞུས་པས། འོ་ན་ཚོགས་གཏོར་གཞན་དུ་འབུལ་ས་མེད་གསུངས་ནས་རྣ་བའི་ཤ་བུབས་ཕྱེད་ལ་སོགས་པའི་ཚོགས་རྫས་ཐམས་ཅད་སྐད་ཅིག་གིས་བཞེས། ཡང་ང་ཅིར་མཐོང་གསུངས་སངས་རྒྱས་དངོས་སུ་གདའོ་བྱས་པས། འོ་ན་དབང་བསྐུར་བྱའོ་གསུངས་སྟེ་མཆོད་རྫས་བསྡུས་དཀྱིལ་འཁོར་བཤིག་ནས་ཤུལ་དུ་བྲོ་བརྡུངས་སྟེ་དྲི་ཆེན་དོར་ནས་སྤྱི་བོར་བཞག་པས་ལུས་ཤུན་པོ་དོར་བ་ལྟ་བུའི་ཉམས་ཤར། གསང་ཆབ་བླུད་པས་བདེ་བ་བཟོད་མེད་དུ་སྐྱེས། སྙིང་གར་ཕྱག་མཛུབ་བཙུགས་ནས་ང་བྱ་བ་འདི་ངོས་ཟུང་ཞིག་གསུངས་པས་ལྷན་སྐྱེས་ཀྱི་ཡེ་ཤེས་མཐོང༌། ང་མཐོང་དོན་ལ་མ་ཡེངས་ཅིག །སྒོམ་རྒྱུ་སྤུ་ཙམ་ཡང་མེད་ཏོ་གསུངས་པས་རྟོགས་པའི་མཐར་ཐུག་སྟེ་དབང་བཞི་རིམ་ཅན་དུ་ངོ་སྤྲད། ད་ནི་དུས་གསུམ་གྱི་སངས་རྒྱས་བྱོན་ཡང་དབང་ཞུ་སྙམ་པ་མི་གདའ་རྒྱ་གར་དུ་འགྲོ་བའི་སྤྲོས་པ་ཡང་ཆོད་གདའ་ཞུས་པས། འཁོར་བར་མི་འཁྱམ་པའི་སངས་རྒྱས་(ཐ༦༣བ)

[Full Size]

བྱུང་ན་མུ་སྟེགས་པ་ཡིན། ཁྱོད་རྒྱ་གར་དུ་སོང་ལས་བླ་མ་རྙེད་ན་བླ་མ་འཚོལ་སློབ་མ་རྙེད་ན་སློབ་མ་འཚོལ་ཞེས་ལུང་བསྟན། འདི་དད་པ་ཤིན་དུ་ཆེ་བས་གུ་རུའི་སྟ་ཟུར་ལ་ཁྲོ་བོའི་སྤྱན་མངའ་བ་དང་མཁའ་འགྲོ་དང་ཆོས་བགྲོ་བ་སོགས་ངོ་མཚར་མཐའ་ཡས་པ་མཐོང༌། དྲག་སྔགས་རྟགས་ཐོན་པ་མཆིས་སམ་ཞུས་པས། མང་པོ་ཤེས་སྟེ་མི་ཎི་འདྲེན་ནས་སྒྲུབ་མ་ཁོམ་གསུངས། གྱེན་དེ་ན་རི་བོང་ཞིག་སོང་བ་ལ་ས་ལ་རི་བོང་གི་གཟུགས་བྲིས་སྟེ་ཁབ་ལ་སྔགས་ལན་བདུན་བགྲངས་སྟེ་གཟུགས་ལ་བརྒྱབ་པས་རི་བོང་ཐུར་ལ་འདྲིལ་བྱུང༌། ང་སྒྲིབ་པ་སྦྱང་དགོས་ལོང་ཤོག་གསུངས་ནས་དྲོད་མ་ཡལ་བ་ལ་བཏགས་གྲོལ་བཏགས་ཚོགས་གཏོར་དང་བསྔོ་བ་མཛད། མི་ལ་དེ་འདྲ་འོང་ངམ་ཞུས་པས་མི་དང་ཕྱི་བ་འདྲ་གསུངས་ནས་ཕྱི་བའི་གཟུགས་ཅིག་ལ་ཁབ་བཙུགས་ནས་བཏོན་པས་དམར་ནར་གྱིས་བྱུང་སྟེ་ད་ཕྱི་ཁུང་མ་གིར་ལྟོས་ཤོག་གསུངས་ནས་ལྟར་ཕྱིན་པས་ཕྱི་བ་ཞིག་ཁྲག་ལྷུད་ཀྱིས་ཤི་འདུག་ནས་སྔར་ལྟར་གནས་སྤར། འདི་འདྲ་བ་མཐའ་ཡས་ཤེས་སྟེ་སེམས་ཅན་ལ་གནོད་པས་སུ་ལ་ཡང་མི་སྟེར། དགྲ་ལ་ཡང་འཚང་རྒྱ་བའི་མཐུ་ལས་གཞན་མི་བྱེད། འདི་པ་དུད་འགྲོར་སོང་བས་དྲངས་པ་ཡིན་མོད། མི་ལུས་འཐོབ་པ་ནི་ཤིན་དུ་དཀའ། སྲོག་བཅད་པའི་སྡིག་པ་ནི་མཐའ་ཡས། གཅིག་ཤི་བས་མི་ཆོག་དེའི་ཉེ་འཁོར་ཐམས་ཅད་སྡུག་བསྔལ་བ་ཡིན། དེས་ན་དགྲ་ལ་མཐུ་མི་བྱེད་སླར་སྙིང་རྗེ་སྐྱེ་དགོས་པ་ཡིན་གསུང་ཞིང་རང་དོན་དུ་མཐུ་ངན་སྔགས་མཛད་རིའི་ཞེ་མནའ་མང་པོ་མཛད། རྒྱ་གར་དུ་བར་ཆད་མེད་པར་གཏོལ་བའི་བྱིན་རླབས་ཞུས་པས་བྷ་རོ་རང་གིས་གསེར་ཞོ་དྲུག་བཅུ་ཕུལ་བའི་ཕྱེད་ཕྱེ་དང་བསྲེས་སྦྱིན་སྲེག་མཛད་ནས་འཕངས་སེམས་མ་བྱེད་པར་ཐལ་བ་ཆུ་ལ་ཕོ་ལམ་དུ་ཟས་སྟེར་བ་ཞིག་ཡོང་བ་ཁྱེར་ཤོག་གསུངས། ཐལ་(ཐ༦༤ན)

[Full Size]

བ་སྦྱངས་ནས་བུ་མོ་ཞིག་གིས་ཉུང་མ་ཞིག་བྱིན་པ་ཕུལ་བས་རས་ཁོབ་ལ་ཚོས་ཅིག་གསུངས་སྟེ་ཤར་གྱུར་ནས་རོ་མངར་ལ་ཤུམ་པ་ཅིག་འདུག །ཁྱོད་ཀྱི་དོན་དེས་གྲུབ་གསུང་ཞིང་ངའི་ཡོན་ཏན་ཐུན་མོང་མ་ཡིན་པ་མཐོང་བ་རྣམས་གཞན་ལ་མ་བཤད་ཅིག་པར་བཀའ་རྒྱ་བཏབ། རྒྱ་གར་དུ་འགྲོ་དུས་སྐྱེལ་ཐུང་མཛད་གསེར་ཞོ་གསུམ་ཕུལ་བ་འབབ་ཆུ་ལ་གཏོར་སྟེ་མེ་ལ་བསྲེགས་པས་མཁའ་འགྲོ་མཉེས་ན་ཆུར་དོར་ན་དེ་བས་ཀྱང་དགྱེས་མཆི་གསུང་ངོ༌། །གཞན་ཡང་སྣོད་ལྡན་གྱི་བུ་དགུ་ལ་སོགས་སྐལ་ལྡན་མཐའ་ཡས་པ་སྨིན་གྲོལ་ཏུ་མཛད་ཅིང་ཆུ་ཞལ་མགུར་གསུམ་ལ་སོགས་པའི་བླ་ཆེན་མི་དཔོན་ཐམས་ཅད་ཀྱིས་ཞབས་ལ་གཏུགས། གྲུབ་ཐོབ་པ་ཎི་རིན་ཆེན་ཞེས་བྱ་བ་ལ་ཁྱད་པར་ཐུགས་རྗེ་ཆེན་པོའི་བཀའ་བབས་སྟེ་ཁམས་སུ་པང་སྟོན་འོད་ཟེར་བླ་མ་ལ་སོགས་པ་སྤྱན་རས་གཟིགས་ཀྱིས་བྱིན་གྱིས་བརླབས་པ་མང་དུ་དཔེལ་སྟེ་ཐུགས་རྗེ་ཆེན་པོ་སྒྲུབ་པའི་སྲོལ་དང༌། རིགས་ཆོས་གཉིས་ཀའི་སྲས་ཀྱི་མཆོག་པདྨ་དབང་ཆེན་དང་སྨྱལ་དུ་འཁྲུངས་པའི་སྲས་ཉི་མ་འོད་ཟེར་སོགས་ཀྱིས་རིགས་ཆོས་གཉི་གའི་བརྒྱུད་པ་བཟུང་སྟེ་བསྟན་པ་དར་རྒྱས་སུ་མཛད། སྲས་པདྨ་དབང་ཆེན་ནི་སྔོན་ལང་གྲོ་དཀོན་མཆོག་འབྱུང་གནས་ཀྱི་སྐྱེ་བ་ཡིན་ལ་ཕྱིས་རཏྣ་གླིང་པར་གུ་རུ་ཉིད་ཀྱིས་ལུང་བསྟན་ནོ། །དེ་ལྟར་གཏེར་ཁ་གོང་འོག་འདི་གཉིས་དང་སྙིང་ཐིག་གོང་འོག་གཉིས་ནི་རྙིང་མའི་གཏེར་ཆོས་ཀྱི་རྩ་བ་ཡིན་ལ་འདི་དག་ལས་དོན་གཉིས་གྲུབ་པ་ཆེས་མང་དུ་བྱུང་ངོ༌། །དེ་རྣམས་སུ་མ་ཟད་ལྷོ་བྲག་ཁོ་ཐིང་དུ་ར་ཤག་རྣལ་འབྱོར་པ་ཆེན་པོ་ཅེས་བྱ་བ་ལོ་བརྒྱ་དང་བཅུ་ལོན་པ་ཐུགས་ཀ་ན་སྙིང་པོ་འབྲུ་བཞི་རང་བྱུང་དུ་བྱོན་པ་ཡོད་ལ་རྗེ་མི་ལ་བླ་མའི་མཁར་ལས་བྱེད་པའི་སྐབས་ཅིག་མཇལ་དུ་ཕྱིན་པས་ལྷ་ཁང་ནང་དུ་ཉལ་བའི་ཐོ་རེངས་བུད་མེད་དཀར་མོ་ཞིག་གིས་སྦྲང་ཆང་ཀ་པཱ་ལ་(ཐ༦༤བ)

[Full Size]

གང་བྱིན་སྟེ་ཁྱོད་བལ་བོད་ཀྱི་མཚམས་སུ་བསྒོམས་ན་ལམ་མྱུར། ང་ཡང་ཁྱོད་ཀྱི་ཡུལ་ཕྱོགས་པ་ཅིག་ཡིན་སྟེ་ཁྱོད་ཀྱི་ལུས་དང་གྲིབ་མ་ལྟར་མི་འགྲོགས་ཀ་མེད་པ་ཅིག་ཡིན་ཟེར། གནངས་ཉིན་བླ་མ་དེ་དཔོན་སློབ་ཉེར་གཅིག་སྨན་སྒྲུབ་དམ་པོ་ལ་བཞུགས་ཀྱང་རྗེ་བཙུན་སྒྲུབ་པའི་གྲར་བོས། མཇལ་མ་ཐག་དབུ་སྔས་ནས་སྒྲོ་བ་ཞིག་གི་ནང་ནས་བོད་ཆུང་ཞིག་ཕྱུང་སྟེ་འདི་ཁྱོད་རང་ལ་སྔ་ནུབ་ནས་བསུ་བ་དེ་ཀུན་གྱི་སྒྲུབ་ཐབས་ལགས། ཁྱོད་ལ་སྟེར་དགོས་པར་ལུང་བསྟན་པ་ཡིན་ཞེས་ཚེ་རིང་མའི་སྒྲུབ་ཐབས་སྤྲད་པར་བཤད་ལ་འདི་དང་མདོས་ལ་མཁས་པའི་ར་ཤག་ཐ་དད་དུ་སྣང་ཞིང༌། རྗེ་སྒོམ་པོ་པས་ཀྱང་ཨོ་ཌྱན་གྱི་ལུང་བྱང་དང་སེམས་ཁྲིད་ཀྱི་ཁ་བྱང་ལྷན་ཅིག་པར་དུང་མཚོ་རས་པའི་དོན་དུ་སྦས་པ་སོགས་གཏེར་མ་ཚད་ལྡན་བགྲང་གིས་མི་ལང་བ་ཡོད་ལ། ཆོས་དབང་གི་གསུང་གི་རྣམ་ཐར་སྐབས་བརྒྱད་མ་ལས། གཏེར་མིན་གཏེར་འདྲ་བརྫུན་གཏེར་མཁན། །པེ་ཐེའི་བྱིན་རླབས་ཞུགས་པ་བརྒྱད། །ད་ལྟ་བོད་ན་ངེས་པར་ཡོད། །ཡང་ཞུས་ལུང་ཞུས་བསྟན་པའི་བདུད། །དེ་རྣམས་ཀུན་དང་འབྲེལ་མི་བྱ། །སྐུར་པ་ཡང་ནི་མི་གདབ་བོ། །དེ་རྣམས་ཀུན་གྱིས་ཆོས་རྣམས་དཀྲུག །ཁྱད་པར་གཏེར་ཆོས་བསྟན་པ་སྣུབ། །འོན་ཀྱང་མཁའ་འགྲོའི་བཀའ་ཆད་ཀྱིས། །རྒྱུ་འབྲས་ངེས་པར་སྨིན་པར་བྱེད། །རང་ལ་བལྟོས་པའི་འཁོར་ཀུན་ལ། །དེ་སྐད་གསངས་སྟེ་བསྒྲགས་ནས་སུ། །འགོང་པོའི་བསྟན་ལ་མི་གཞུག་གོ །ཞེས་གསུངས་པ་ལྟར་སྐྱེ་བོ་བསླུ་བའི་རྫུན་གཏེར་ནི་ཆེས་མང་བར་སྔ་ཕྱིར་སྣང་ལ། དེ་དག་མང་ཆེས་པས་ཡང་དག་རྣམས་མི་གསལ་བ་རླུང་ཚུབ་ཀྱི་ནང་གི་མར་མེ་ལྟར་སྣང་ཡང་ཆོས་ཀྱི་མིག་(ཐ༦༥ན)

[Full Size]

ལྡན་ལ་སྒྲིབ་མེད་ཏུ་གསལ་ཞིང་སྤྱིར་ར་གན་མཐོང་བའི་རྟགས་ཀྱིས་གསེར་ར་གན་དུ་སྒྲུབ་པ་དང༌། ཛམྦུའི་གསེར་མཐོང་བའི་རྟགས་ཀྱིས་ར་གན་གསེར་དུ་སྒྲུབ་པ་གཉི་ག་སྤངས་སྟེ་ལོག་ལྟའི་བདུད་མ་ཞུགས་ཤིང་དུས་མིན་གྱི་དག་སྣང་རྒྱ་འབྱམས་པ་ཡང་མ་ཡིན་པས་གཏེར་མའི་ཕྱོགས་འདི་དག་ཤེས་པར་བྱའོ། །དམ་པའི་ཆོས་ཀྱི་འཁོར་ལོས་སྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་གྱི་བོད་ཡུལ་གྱི་སྐབས་ལས་རྡོ་རྗེ་ཐེག་པ་སྔ་འགྱུར་ཇི་ལྟར་བྱུང་བ་བཤད་པ་སྟེ་སྐབས་ལྔ་པའོ། །པར་འདིའི་སྦྱིན་བདག་ས་སྐྱོང་ནོར་འཛིན་དབང༌། བྱ་ཡུལ་དཔོན་ས་ཚོགས་གཉིས་གྲུབ་པའི་ས། །དད་ལྡན་བླ་མ་རིག་དབང་ཐོབ་ཀྱིས་བསྒྲུབས། །དགེ་བ་བྱང་ཆུབ་མཆོག་གི་རྒྱུ་རུ་སྔོ། །ཨེ་མ་ཧོ། བཀའ་བརྒྱུད་གདན་ས་གནས་ཆེན་སྲས་ཁར་དུ། །དཔལ་ལྡན་བླ་མའི་སྐུ་ཚེ་བརྟན་ཕྱིར་དང༌། །མཐའ་ཡས་འགྲོ་ལ་ཆོས་སྦྱིན་སྤེལ་སླད་དུ། །རྙིང་མའི་བརྒྱུད་ཀྱི་ཆོས་བྱུང་པར་དུ་བསྒྲུབས། །བརྐོས་ཀྱི་བྱེད་པོ་གཉལ་གྱི་སྤངས་བརྒྱུད་ནས། །རིག་བྱེད་མཁས་པ་ཚེ་དབང་དར་པོ་དང༌། །ཚེ་དབང་དོན་གྲུབ་ཀུན་དགའ་བསམ་འགྲུབ་དང༌། །ཀུན་དགའ་རྒྱལ་མཚན་བཀྲ་ཤིས་ཚེ་དབང་དང༌། །བསམ་འགྲུབ་མགོན་པོ་བཀྲ་ཤིས་དགོས་དར་སོགས། །དཔོན་སློབ་བདུན་གྱིས་སོར་མོའི་གར་སྟབས་བསྒྱུར། །འདིས་ཀྱང་བསྟན་པ་དར་ཞིང་རྒྱས་པ་དང༌། །མཁའ་མཉམ་འགྲོ་ལ་བདེ་སྐྱིད་འབྱུང་ཕྱིར་བསྔོ། །ཤུ་བྷཾ་མསྟུ་སརྦ་ཛ་ག་ཏཱམ།། །།(ད༡ན)

བཀའ་གདམས་ཀྱི་བྱུང་བ་བརྗོད་པ།

[Full Size]

ཆོས་བྱུང་མཁས་པའི་དགའ་སྟོན་གི་བོད་ཡུལ་གྱི་སྐབས་ལ་ལེའུ་བཅུ་ལས་དྲུག་པ་བཀའ་གདམས་ཆོས་བྱུང་བཞུགས། །(ད༡བ)

[Full Size]

སྔོན་ཚེ་རྒྱལ་སྲས་གཙོ་བོ་བཟང་སྐྱོང་ནི། །ཟ་ཧོར་རྒྱལ་པོའི་སྲས་འཁྲུངས་སྔགས་སྤྱོད་གྲུབ། །སླར་ཡང་ཕལ་ཆེན་སྡེ་ལས་རབ་ཏུ་བྱུང༌། །རིག་གནས་སྡེ་སྣོད་མདོ་རྒྱུད་མ་ལུས་མཁྱེན། །བྱང་ཆུབ་སེམས་ཀྱིས་འགྲོ་ཀུན་དབང་དུ་འདུས། །གྲུབ་ཐོབ་རྣལ་འབྱོར་དབང་ཕྱུག་དུ་མའི་མགོན། །འཛམ་གླིང་ཀུན་ན་ཕུལ་བྱུང་ཨ་ཏི་ཤ། །དཔལ་ལྡན་མར་མེ་མཛད་དཔལ་ཡེ་ཤེས་དེ། །ལྷ་བཙུན་བྱང་ཆུབ་སེམས་དཔའ་ཁུ་དབོན་གྱིས། །དཀའ་བ་ཆེན་པོས་ནན་གྱིས་སྤྱན་དྲངས་ཤིང༌། །ལྷག་པའི་ལྷ་ཚོགས་དུ་མས་བསྐུལ་བ་ལས། །བྱང་ཕྱོགས་གངས་ཅན་ཁྲོད་འདིར་གཤེགས་མཛད་དེ། །ཆོས་ཀྱི་རྩ་བ་ལས་འབྲས་བླང་དོར་བསྟན། །ཐམས་ཅད་དཀོན་མཆོག་གསུམ་ལ་སྐྱབས་འགྲོར་བཀོད། །རབ་ཏུ་བྱུང་རྣམས་ཚུལ་ཁྲིམས་གནས་ལ་སྦྱར། །ཐོས་ལྡན་རྣམས་ཀྱི་ལྟ་བ་དྲང་པོར་མཛད། །བསམ་གཏན་པ་རྣམས་(ད༢ན)

[Full Size]

ཞི་ལྷག་གཉིས་ལ་སྦྱར། །སྔགས་ལ་ཞུགས་རྣམས་དམ་ཚིག་དག་པར་བཀོད། །ཀུན་ཀྱང་བྱང་ཆུབ་སེམས་ཀྱི་ཐེག་པས་ཁྲིད། །ཆོས་མིན་ཆོས་ལྟར་བཅོས་པ་ཀུན་ནུབ་སྟེ། །སངས་རྒྱས་བསྟན་པའི་ཉིན་བྱེད་རབ་ཏུ་གསལ། །བཀའ་གདམས་བསྟན་པའི་ཤིང་རྟ་ཆེན་པོ་ནི། །རྒྱལ་བས་བསྟན་པ་འཛིན་པར་ལུང་བསྟན་པ། །དགེ་བསྙེན་ཆེན་པོ་འབྲོམ་སྟོན་རྒྱལ་བ་ཡི། །འབྱུང་གནས་དམ་པའི་ཕྱག་དུ་བཞག་མཛད་དེ། །དགའ་ལྡན་དུ་གཤེགས་ན་མཁའ་དྲི་མེད་ཅེས། །མི་ཕམ་མགོན་གྱི་འཁོར་གྱི་གཙོ་བོར་གྱུར། །རིགས་གསུམ་མགོན་པོས་རྣམ་པར་སྤྲུལ་པ་ཡི། །སྐུ་མཆེད་གསུམ་སོགས་སྐྱེས་ཆེན་མཐའ་ཡས་ཀྱིས། །གཞུང་དང་མན་ངག་རབ་ཏུ་རྒྱས་མཛད་ནས། །མཐའ་ཡས་འགྲོ་བ་ངལ་གསོའི་སྟེགས་སུ་གྱུར། །དེ་བས་བོད་ཡུལ་བསྟན་པ་ཕྱི་དར་ལ། །བཀའ་དྲིན་འདི་དང་མཚུངས་པ་གཞན་ཡོད་མིན། །རིན་ཆེན་བྱང་ཆུབ་སེམས་ཀྱི་གྲུ་ཆེན་པོ། །བསླབ་གསུམ་ཚགས་ཀྱིས་བསྡམས་པ་ལེགས་བཤམས་སྟེ། །འགྲོ་ཀུན་སྡུག་བསྔལ་མཚོ་ལས་སྒྲོལ་བརྩོན་པ། །ཇོ་བོ་ཡབ་སྲས་རྒྱུད་པར་བཅས་ལ་འདུད། །དེ་ཡང་བསྟན་པ་ཕྱི་དར་ལ་བོད་ལ་བཀའ་དྲིན་ཆེ་བ་ཇོ་བོ་ཨ་ཏི་ཤ་ནི་རྒྱ་གར་ཤར་ཕྱོགས་བྷཾ་ག་ལའི་ཡུལ་གྱི་བྱེ་བྲག་ཟ་ཧོར་ཞེས་བྱ་བ་མི་ཁྲིམ་འབུམ་ཕྲག་ཉི་ཤུ་རྩ་བདུན་ཡོད་པའི་གྲོང་ཁྱེར་གྱི་དབུས་ན་ཕོ་བྲང་གསེར་གྱི་རྒྱལ་མཚན་ཅན་ཞེས་བྱ་བ་རྒྱ་ནག་སྟོང་ཀུན་དང་ལོངས་སྤྱོད་མཉམ་པ་དེར་སྔོན་མཁན་པོ་ཞི་བ་འཚོ་བྱོན་པའི་གདུང་རིགས་ཡབ་རྒྱལ་པོ་དགེ་བའི་དཔལ་དང་བཙུན་མོ་དཔལ་མོ་འོད་ཟེར་ཅན་ལ་སྲས་གསུམ་ལས་ཆེ་བ་པདྨའི་སྙིང་པོས་རྒྱལ་སྲིད་བཟུང༌། ཆུང་བ་དཔལ་གྱི་སྙིང་པོ་རབ་བྱུང་མཛད་དེ་དགེ་སློང་བཱིརྻ་ཙནྡྲ་ཞེས་བྱ་བ་སྐྱེད་རིམ་བརྟན་པ་ཅིག་བྱོན། འབྲིང་པོ་ཟླ་བའི་(ད༢བ)

[Full Size]

སྙིང་པོ་ནི་ཇོ་བོ་འདི་ཡིན་སྟེ་འཁྲུངས་ནས་ཞག་བདུན་ན་སྒྲོལ་མ་ཞལ་གཟིགས་དེ་ཕྱིན་ཆད་ཅི་འདོད་སྒྲོལ་མ་ལ་གསོལ་བ་བཏབ་པས་དངོས་སུ་ཆོས་མི་གསུང་ཡང་སྤྲོས་པ་ནང་ནས་ཆོད་དེ་འོང་བ་ཡིན་གསུངས། ལོ་བཅུར་སྒྱུར་རྩལ་དྲུག་བཅུ་རྩ་བཞི་དང་གཟོ་དང་གསོ་བ་སྦྱངས། ལོ་བཅུར་ཕྱི་ནང་གི་སྒྲ་ཚད་བསླབས། རཱ་ཧུ་ལ་གུཔྟ་བཛྲ་ལ་དབང་ཞུས་པའི་ཚེ་དགྱེས་རྡོར་ཞལ་གཟིགས་རྟོགས་པ་རྒྱུད་ལ་སྐྱེས་སྟེ་གསང་མཚན་ཡེ་ཤེས་གསང་བའི་རྡོ་རྗེར་བཏགས། གཤིན་རྗེའི་གཤེད་ཀྱི་རྣལ་འབྱོར་པ་ཆང་འོ་མར་བསྒྱུར་ཞིང་གངྒཱ་ལ་གདིང་བ་བཏིང་ནས་འབྱོན་པ་ཀ་མ་ལ་རཀྵི་ཏ་ལས་གསང་སྔགས་ཀྱི་བཀའ་དྲིན་ཕལ་ཆེར་བརྙེས། བླ་མ་དེ་སེམས་ཙམ་རྣམ་རྫུན་པ་ཡིན། ཇོ་བོ་དབུ་མ་བཞེད་པ་ལ་མི་མཉེས། གསང་སྔགས་ཀྱི་སྒོ་ནས་ཚོགས་བསགས་པས་ཕྱིས་ཕྱག་རྒྱ་ཆེན་པོའི་དངོས་གྲུབ་ཐོབ་ནས་རྗེས་ཐོབ་ལ་གཟིགས་པས་ཆོས་རྣམས་ཀྱི་རང་བཞིན་ཁྱོད་ཀྱི་ལྟར་འདུག་གསུངས་ནས་དབུ་མ་པར་འགྱུར། ཨ་ཝ་དྷཱུ་ཏི་པ་ལོ་དགུ་བསྟེན། དེ་ཐ་མལ་གྱི་གཏམ་མི་གསུང་རེས་གསེར་གྱི་མཎྜལ་ཕུལ་ནས་ཆོས་ཞུས་ཀྱང་མི་གསུང༌། རེས་ལོང་མེད་པའི་དུས་ན་ཡང་མ་ཞུས་པར་གསུང༌། དཔོན་སློབ་གཉིས་ཟམ་པ་དོག་མོ་ཡ་ང་བ་ཞིག་ལ་འབྱོན་འཕྲོ་ལ་ཞལ་ལོག་མཛད་ནས་བུ་བདག་འཛིན་དང་མ་བྲལ་བར་དུ་ལས་འབྲས་ཕྲ་བ་ལ་ཡང་འཛེམས་ཅིག་པཎྜི་ཏ་དང་ནུས་པ་ཅན་འདི་དང་འདི་འདྲ་ཡང་ལས་འབྲས་ཕྲ་མོ་ལ་མ་འཛེམས་པས་ངན་སོང་གི་སྡུག་བསྔལ་འདི་འདྲ་བ་མྱོང་ཞིང་འདུག་གོ་གསུངས། ཆོས་ཀྱི་ཕྱིར་རྒྱ་མཚོ་ཆེན་པོར་ཡང་ལན་གསུམ་ཞུགས་སྟེ་བསོད་སྙོམས་པ་ཆེན་པོ་སོགས་ལས་དབང་རྒྱུད་གདམས་པ་མང་དུ་གསན། སྤྱོད་པའི་ཚད་དུ་ལོངས་སྟེ་རིག་པ་བརྟུལ་ཞུགས་ཀྱི་སྤྱོད་པ་ལོ་དྲུག་མཛད། ཤར་ཕྱོགས་བྷ་དུ་རའི་གྲོང་ན་བཞུགས་པ་ན་རོ་པའི་སློབ་མ་ཨ་ཝ་དྷཱུ་ཏི་པ་མངོན་ཤེས་ཅན་ལ་བྲྀ་ཀ་མ་ལར་ཡང་དབང་གསན་སྟེ་གསང་མཚན་སྔ་མ་དེ་ཁོ་ན་བཏགས། བུད་མེད་གཅེར་བུ་རུས་རྒྱན་ཅན་རེས་ངུ་རེས་རྒོད་པ་ཅིག་གཟིགས་ནས་ཡིད་ཀྱིས་གསོལ་བ་བཏབ་པས་ང་རེས་ངུ་རེས་རྒོད་པའི་(ད༣ན)

[Full Size]

དོན་ཤེས་སམ་གསུངས། མ་འཚལ་ཞུས་པས་སེམས་ཅན་རྣམས་རང་རྒྱུད་ཀྱི་ཡེ་ཤེས་མ་རྟོགས་པར་འཁོར་བའི་སྡུག་བསྔལ་སྤྱོད་པས་ངུ་བ་ཡིན། རྟོགས་ན་ད་ལྟ་ཉིད་སངས་རྒྱས་ཡིན་པས་རྒོད་པ་ཡིན་གསུངས་ནས་རྡོ་རྗེ་རྣལ་འབྱོར་མའི་དབང་ཚེགས་ཆུང་ལ་དོན་ཆེ་བ་བྱིན་རླབས་ཀྱི་ལུགས་བྱ་བ་བསྐུར་ནས་རྣལ་འབྱོར་མའི་ཞལ་ཇི་ལྟར་བར་གཟིགས་གདམས་ངག་མ་ལུས་པར་ཞུས། དེའི་ཚེ་བྷཾ་ག་ལར་ཕྱི་ནང་གི་རྩོད་པ་ཆེན་པོ་བྱུང་ནས་བསྟན་པ་ཕལ་ཆེར་མུ་སྟེགས་ལ་ཤོར་ནས་རྩོད་པ་ཟློག་ནུས་པ་མེད་པའི་ཚེ་བུ་མོ་གཅིག་གིས་ཇོ་བོའི་སྐུ་ལས་འོད་འཕྲོ་བ་མཐོང་ནས་གནས་བརྟན་ལ་སྤྲང་པོ་འོད་འཕྲོ་བ་ཞིག་འདུག་རྣལ་འབྱོར་པ་ཡིན་སྟེ་འོང་རྩོད་པ་ཟློག་པར་ཞུས་ཟེར་ནས་ཞུས་པས་ཞལ་གྱིས་བཞེས། མུ་སྟེགས་ཐམས་ཅད་ཚར་བཅད་ནས་སྔར་ཤོར་བའི་གནས་དང་པཎྜི་ཏ་ཐམས་ཅད་ཚུར་ཐོབ་ཕྱི་རོལ་པ་ཐམས་ཅད་ནང་པར་བཅུག་གནས་བརྟན་དེས་རབ་ཏུ་འབྱུང་བ་དང་བཞུགས་པར་ཞུས་པས་ཀྱང་མ་གནང༌། གསང་སྔགས་ཀྱི་མཁྱེན་པ་དང་ནུས་པ་ལ་ང་བས་ཆེ་བ་མེད་སྙམ་དུ་ཐུགས་རྒྱལ་ཅུང་ཟད་བྱུང་བ་ན་མནལ་ལམ་དུ་མཁའ་འགྲོ་རྣམས་ཀྱིས་ན་མཁའ་ལ་གླེགས་བམ་དཔག་མེད་བཙེར་རྒྱུད་འདི་ཇི་སྐད་བྱ་བ་ཡིན། འདི་ཁྱོད་ཀྱིས་ཤེས་སམ་ཞེས་དྲིས་སྟེ་སྔོན་མཚན་ཡང་མ་གསན་པའི་རྒྱུད་མཐའ་ཡས་པ་འདུག །ལོགས་ཅིག་ན་པོ་ཏི་ནག་ཆུང་ཁ་ཤས་འདུག་པ་ལ་འདི་ཁྱོད་ཀྱིས་ཤེས་པའི་རྒྱུད་རྣམས་ཡིན་ཟེར། ཡང་ཇོ་མོ་སྒྲོལ་མ་བྱོན་ནས་ཁྱོད་པཎྜིཏ་སྔགས་མཁན་ཡིན་ནམ་གསུངས། ལགས་ཞུས་པས་འོ་ན་སྒྲུབ་ཐབས་འདི་དང་འདི་མཁྱེན་ནམ་གསུངས། དེ་ཀུན་དཔེ་ཡང་མཐོང་མ་མྱོང་ཞུས་པས་འོ་ན་ཁྱོད་སྔགས་ལ་མཁས་པའི་ཐུགས་རྒྱལ་ཆེ་ན། ཁྱེད་མིའི་ཡུལ་ན་རྟའི་སྤུ་རྩེ་གཅིག་ཙམ་ལས་མེད། སྔགས་ཀྱི་དཔེ་དོན་མང་པོ་མཁའ་འགྲོ་མའི་ལག་ན་ཡོད་པ་ཡིན་གསུངས་ནས་ཡལ། དེར་སྔགས་ལ་མཁས་པའི་ཐུགས་རྒྱལ་ཆག །འོན་ཡང་སྔགས་སྤྱོད་ཀྱིས་ཚེ་འདིར་འཚང་རྒྱ་བ་ཞིག་བྱ་(ད༣བ)

[Full Size]

དགོས་དགོངས་པ་ན་དཔལ་ཧེ་རུ་ཀ་བྱོན་སྟེ་ཨ་ཝ་དྷཱུ་ཏི་པའི་སྤྱོད་པས་གར་ཡང་མི་ཕྱིན་པས་ཁྱོད་རབ་ཏུ་བྱུང་ཞིག །ཕྱི་ཞིག་ན་རབ་བྱུང་གི་གདུལ་བྱ་མང་བར་འབྱུང་ངོ་ཞེས་ལུང་བསྟན། ཡང་མནལ་ལམ་ན་སངས་རྒྱས་ཤཱཀྱ་ཐུབ་པ་དགེ་འདུན་དང་བཅས་པ་གདུགས་ཚོད་གསོལ་བའི་གྲལ་མཐའ་ན་ཇོ་བོ་ཉིད་འདུག་པ་ལ་སྟོན་པའི་ཞལ་ནས་མི་མ་གི་ཅི་ལ་ཆགས་ནས་ཁྱིམ་མི་སྤོང་བ་ཡིན་གསུང་བ་རྨིས། ཡང་གཙུག་ལག་ཁང་ཞིག་ན་བྱམས་པ་དགེ་སློང་གི་ཆ་བྱད་དུ་འདུག་པའི་དྲུང་དུ་འབྱོན་པར་བརྩམས་པས་འདི་རབ་ཏུ་བྱུང་བའི་ས་ཡིན་ཁྱོད་ཁྱིམ་པའི་ས་མིན་པས་མ་འོང་ཞིག་གསུང་བ་རྨིས། རང་བཞིན་གྱི་རྣལ་འབྱོར་མ་ཞིག་དང་མཇལ་བས་ཀྱང་ཨ་ཝ་དྷཱུ་ཏིའི་སྤྱོད་པ་མ་བྱས་ཚེ་འདི་ལ་བདེན་པ་མི་མཐོང་བར་ཆད་འོང་རབ་ཏུ་བྱུང་ན་བསྟན་པ་ལ་ཕན་ཞེས་གསུང་བས་བསྐུལ་སྟེ་དགུང་ལོ་ཉེར་དགུ་ལ་རྡོ་རྗེའི་གདན་མ་ཏི་བི་ཧ་རའི་གཙུག་ལག་ཁང་དུ་ཕལ་ཆེན་སྡེ་པའི་བྱེ་བྲག་འཇིག་རྟེན་ལས་འདས་པར་སྨྲ་བའི་སྡེ་པ་སངས་རྒྱས་ཡེ་ཤེས་ཀྱི་བཀའ་རྒྱུད་སྦྱོར་ལམ་པ་ཤཱི་ལ་རཀྵི་ཏས་མཁན་པོ་མཛད་དེ་རབ་ཏུ་བྱུང་དཱི་པམ་ཀ་ར་ཤྲཱི་ཛྙཱ་ན་དཔལ་མར་མེ་མཛད་ཡེ་ཤེས་སུ་མཚན་བཏགས་ནས་བསྙེན་པར་རྫོགས། དེའི་ཚེ་མཁན་པོས་མུ་སྟེགས་ཅིག་དང་རྩོད་པ་བྱས་པས་སྨྱོ་འབོག་ཡོར་བ་ལངས་ནས་འཕྲོ་ལ་ལུས། ཇོ་བོས་འཕྲོ་བླངས་ནས་བརྩད་པས་ཇོ་བོ་རྒྱལ། མུ་སྟེགས་ན་རེ་སྔར་མ་ཐོས་པའི་པཎྜིཏ་འདི་ཇི་ལྟ་བུ་ཡིན་ཟེར། ཇོ་བོས་པཎྜིཏ་ཙམ་མིན་སྒྲ་ཚད་ལ་བྱང་བར་བྱས་པ་ཅིག་ཡིན་སྟེ་བྱས་པས་འོ་ན་ངལ་དུ་འཕངས་རིག་པ་སློབས་ཟེར། དེ་ལ་བསྟེན་ནས་མཁན་པོས་ཀྱང་བསྐུལ་སྟེ་སླར་ཡང་བྱ་ཀ་ར་ཎ་སྡེ་བརྒྱད་དུ་གྲགས་པ་འཇམ་དཔལ་གྱི་སྒྲ་མདོ་སརྦ་ཛྙཱ་ན། ཨིནྡྲ། པཱ་ཎི། ཀ་ཙ་ན། མ་ཎི་བྱ་ཀཱ་ར་ཎ། ཀུན་དུ་བཟང་པོ་སོགས་སྒྲའི་གནས་མཐའ་དག་དང༌། བྲམ་ཟེ་ནོར་ལྷས་བྱས་པ་ཚིག་གི་སྒྲོན་མ་སོགས་ཕྱི་རོལ་བའི་སྒྲ་མདོ་མཐའ་ཡས་སྦྱངས། རྐང་མིག་པའི་རིགས་པའི་(ད༤ན)