ཆོས་འབྱུང་མཁས་པའི་དགའ་སྟོན།

འདུལ་བའི་ཆོས་ཀྱི་བྱུང་བ་བརྗོད་པ།

― PTT001_Page_0459 ―

^{[མ་དཔེ་གཟིགས་ན་འདིར་གནོན།]}

དམ་པའི་ཆོས་ཀྱི་འཁོར་ལོས་བསྒྱུར་བ་རྣམས་ཀྱི་བྱུང་བ་གསལ་བར་བྱེད་པ་མཁས་པའི་དགའ་སྟོན་ཞེས་བྱ་བ་ལས་ཡན་ལག་གསུམ་པ་བོད་ཀྱི་སྐབས་ལ་ལེའུ་བཅུ་ལས་གསུམ་པ་འདུལ་བའི་ཆོས་བྱུང་བཞུགས་སོ། །(ཉ༡བ)

― PTT001_Page_0460 ―

^{[མ་དཔེ་གཟིགས་ན་འདིར་གནོན།]}

[Full Size]

བོད་ཏུ་ཐུབ་བསྟན་ཕྱི་མ་དར་ཚུལ་ཡང༌། །དང་པོར་བསྟན་རྩ་འདུལ་བའི་སྡེ་སྣོད་ནི། །སྡོམ་བརྩོན་དུ་མ་ཁམས་སུ་བྲོས་པ་ལས། །མོས་པས་སྤྱོད་པའི་ས་ལ་གནས་པ་ཡི། །མུ་གཟུ་གསལ་འབར་རབ་ཏུ་བྱུང་བ་ནི། །བླ་ཆེན་དགོངས་པ་རབ་གསལ་ཞེས་བྱར་གྲགས། །དེ་ཡི་མཁན་བུ་སྡོམ་བརྩོན་མང་དུ་འཕེལ། ཁྱད་པར་དབུས་གཙང་མི་བཅུས་བཀའ་དྲིན་མནོས། །གཙང་ན་ལོ་ཚོ་ཚོང་ཚོ་རྣམ་པ་གཉིས། །དབུས་ན་ཀླུ་མེས་འབྲིང་ཚོ་རྦ་རག་གསུམ། །རེ་རེའང་ཡན་ལག་དུ་མར་བཅས་པ་ཡིས། །བོད་ཡུལ་ཀུན་ན་འདུལ་བསྟན་མཆོག་དུ་དར། །བསྟན་པའི་མེ་རོ་མདོ་ཁམས་ནས་གསོས་པ། །སྨད་འདུལ་ཞེས་བྱར་མཚན་དུ་གྲགས་པ་ཡིན། །དྲིན་ཅན་པཎ་ཆེན་གཉིས་ཀྱི་མཁན་བུ་ནི། །རྒྱ་གར་པཎ་ཆེན་དྷརྨ་པཱ་ལ་ལས། །ཞང་ཞུང་རྒྱལ་བའི་ཤེས་རབ་ཀྱིས་དྲིན་མནོས། །དེ་ཡི་སློབ་མ་དཔལ་འབྱོར་ལ་སོགས་བྱུང༌། །འདི་ལ་སྟོད་འདུལ་ཅེས་བྱར་གྲགས་པ་སྟེ། །རྣམ་པར་དག་ཀྱང་མང་དུ་(ཉ༢ན)

― PTT001_Page_0461 ―

^{[མ་དཔེ་གཟིགས་ན་འདིར་གནོན།]}

[Full Size]

མ་འཕེལ་སྐད། །ཕྱི་དུས་བསྐལ་བཟང་སངས་རྒྱས་བདུན་པ་གང༌། །རབ་གསལ་ཤཱཀྱའི་བསྟན་ལ་ཚངས་སྤྱོད་པ། །ཁ་ཆེའི་མཁས་པ་ཤཱ་ཀྱ་ཤྲཱི་ཞེས་པ། །འཕགས་པའི་ཡུལ་ན་རྩོད་མེད་སྡོམ་བརྩོན་པ། །ཁྲོ་ལོའི་དད་བརྩོན་མཁྱེན་པ་ཟླ་མེད་པས། །དབང་དུ་མཛད་དེ་བོད་ཡུལ་སྤྱན་དྲངས་པ། །དེ་ལས་བྱང་རྡོར་རྣམ་གཉིས་བསྙེན་རྫོགས་སྟེ། །རྩ་བའི་སྡེ་པ་རྣམ་བཞིའི་རྟེན་འབྲེལ་བཞིན། །འདུལ་བའི་སྡོམ་རྒྱུན་རབ་ཏུ་རྒྱས་པར་གྱུར། །དེ་ལྟར་སྐྱེས་བུ་དམ་པ་མང་པོ་ཡིས། །འདུལ་བའི་བཤད་རྒྱུན་སྒྲུབ་རྒྱུན་རྒྱ་ཆེར་སྤེལ། །ཁྱད་པར་མཁས་པ་ཆེན་པོ་མཚོ་སྣ་པ། །མགོན་པོ་ཊཀྴད་ཀྱིས་ནི་བསྐུལ་བ་ལས། །འདུལ་བའི་བསྟན་བཅོས་དུ་མ་མཛད་པ་ནི། །ཕྱི་དུས་བསྟན་པའི་མིག་འབྲས་ལྟ་བུར་གྱུར། །དེ་ལྟར་དམ་པ་རྣམས་ཀྱི་བཀའ་དྲིན་ལས། །ལྷག་པའི་ཚུལ་ཁྲིམས་དྲི་མེད་བསླབ་པ་དང༌། །འདུལ་བའི་སྡེ་སྣོད་དར་ཞིང་རྒྱས་པར་མཛད། །དེང་དུས་ཀྱང་ནི་གཟུགས་བརྙན་ཙམ་ཞིག་སྣང༌། །དགག་སྒྲུབ་བཅས་པ་རྒྱལ་བ་ཁོ་ནའི་ཡུལ། །སྟོན་དང་བསྟན་པ་གཅིག་གྱུར་སོ་སོར་ཐར། །ཇི་བཞིན་གང་གི་རྒྱུད་ལ་གནས་པ་ཡི། །བསྟན་རྩ་འདུལ་འཛིན་རྣམས་ལ་ཕྱག་འཚལ་ལོ། །དེ་ཡང་སངས་རྒྱས་ཉིད་རང་བྱུང་གིས་བསྙེན་པར་རྫོགས་ནས་སླར་ལྔ་སྡེ་ཡེ་ཤེས་ཁོང་ཆུབ་ཀྱིས་བཟང་སྡེའི་ཚོགས་དྲུག་བཅུ་སྐྱབས་སུ་འགྲོ་བས་འོད་སྲུང་ཆེན་པོ་སྟོན་པར་ཁས་བླངས་པས། ཕལ་ཆེར་ཞིག་ཚུར་ཤོག་གིས། ལེགས་བྱིན་དྲི་བས་མཉེས་པས། སྐྱེ་རྒུའི་བདག་མོ་ལྕི་བའི་ཆོས་བརྒྱད་ཁས་བླངས་པས་བསྙེན་པར་རྫོགས་པ་སོགས་སྔོན་(ཉ༢བ)

― PTT001_Page_0462 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་ཆོ་ག་སངས་རྒྱས་ཉིད་དང་གསོལ་བཞིས་བསྙེན་པར་རྫོགས་པ་དགེ་འདུན་དང་འབྲེལ་བའི་ལས་ཀྱིས་སྔོན་ཆོག་གི་ཡུལ་རྣམས་བསྙེན་རྫོགས་སུ་མཛད་ལ། སངས་རྒྱས་ནས་ལོ་བདུན་པའི་སྔོན་ནས་ད་ལྟར་གྱི་ཆོ་ག་གནང་ཞིང་བརྗོད་བྱ་དོན་གྱི་འདུལ་བའི་རྒྱུན་མ་ཆད་པའོ། །བརྗོད་བྱེད་ཀྱི་འདུལ་བ་སོ་སོ་ཐར་པའི་མདོ་གཉིས་ལུང་སྡེ་བཞི་ཕྱོགས་གཏོགས་དང་བཅས་པ་བཀའ་དང༌། བསྟན་བཅོས་ལ་ཉེར་སྦས་སོགས་དགྲ་བཅོམ་པ་མང་པོས་མཛད་པར་གྲགས་པ་བྱེ་བྲག་དུ་བཤད་པའི་ནང་ཚན་འདུལ་བ་བྱེ་བྲག་དུ་བཤད་པ་དང༌། དྲི་མེད་བཤེས་གཉེན། ཁྱད་པར་བཤེས་གཉེན་སོགས་ཀྱིས་སོ་ཐར་མདོ་བཀྲལ། སློབ་དཔོན་དགེ་ལེགས་བཤེས་གཉེན་གྱིས་ལུང་མ་མོའི་རྒྱ་ཆེར་འགྲེལ་དང༌། དུལ་ལྷས་རྣམ་འབྱེད་འགྲེལ་པ། དགེ་བའི་གཉེན་གྱིས་ལུང་ཞུ་བ། ཚུལ་ཁྲིམས་བསྐྱངས་ཀྱིས་ཕྲན་ཚེགས་རྣམས་བཀྲལ་ཞིང༌། ཕྱིས་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་ཡོན་ཏན་འོད་ཀྱིས་མདོ་རྩ་བ་དང་ལས་བརྒྱ་རྩ་གཅིག་པ་བསྡུས་རང་འགྲེལ་མཛད་ཅིང་ཆོས་བཤེས་ཀྱིས་རྒྱ་ཆེར་འགྲེལ་མཛད་པ་སོགས་ནས་གཞི་ཐམས་ཅད་ཡོད་སྨྲའི་སྡོམ་རྒྱུན་མཁན་པོ་ཞི་བ་འཚོའི་བར་འདུལ་བའི་བཤད་སྒྲུབ་ཀྱི་རྒྱུན་མ་ཆད་ཅིང་དེས་བོད་ཡུལ་དུ་དར་བར་མཛད་ཏོ། །དེ་ཡང་བསྟན་པའི་མེ་རོ་སྨད་ནས་ཇི་ལྟར་བསླང་བའི་ཚུལ་ལ་མི་མཐུན་པ་དུ་མ་སྣང་བ་ལས། ལོ་རྒྱུས་ཆེན་མོ་ལས་ནི། བསྟན་པ་བསྣུབས་པའི་དུས་དབུས་ནས་ཞང་མངའ་འཇམ་དཔལ་དང་ཡང་གོང་ཤེས་རབ་འབྱུང་གནས་གཉིས་ཁམས་སུ་བྱོན། དེའི་ཚེ་ཡང་གོང་གིས་ཁུངས་བསྟན་ནས་ཞང་མངའ་འཇམ་དཔལ་ལས་བླ་ཆེན་དགོངས་པ་རབ་གསལ་བསྙེན་པར་རྫོགས། དེའི་མཁན་བུ་ཅོག་རོ་དཔལ་གྱི་དབང་ཕྱུག་དང་གྲུམ་ཕྱིང་སླག་ཅན་གཉིས་ཡིན། དེ་ཚེ་གཙང་པ་ལོ་ཚོང་གཉིས་དབུས་པ་ཀླུ་མེས་དང་འབྲིང་སྟེ་བཞིས་ཅོག་གྲུམ་ལ་མཁན་སློབ་ཞུས་སྟེ་བླངས། མཁན་སློབ་ན་རེ་ལོ་སྟོན་མཐུ་ཆེ་བས་བསྟན་པ་སྲུངས། ཀླུ་མེས་བཙུན་པས་མཁན་པོ་གྱིས། ཚོང་གེ་བློ་རྣོ་བས་ཆོས་སྟོན། འབྲིང་ཕོ་སྦོ་མཐོ་བས་གནས་བརྟན་(ཉ༣ན)

― PTT001_Page_0463 ―

^{[མ་དཔེ་གཟིགས་ན་འདིར་གནོན།]}

[Full Size]

གྱིས་ལ་བཞི་གར་བསྡོམས་པས་གནས་གཞི་གཅིག་ཟུང་ཞིག་གསུངས་ཀྱང་མཁན་སློབ་ཀྱི་གསུང་བཅག་ནས་སོ་སོར་བཟུང་བས་སྡེ་བཞི་བྱུང༌། དེ་ཡང་གླང་དར་གྱིས་ཆོས་བསྣུབས་པའི་ལྕགས་བྱ་ནས་ལོ་ངོ་གསུམ་པ་ཆུ་མོ་གླང་ལ་ཁུ་གཞོན་ནུ་རིན་ཆེན། གཉས་ཡོན་ཏན་སྙིང་པོ། མཆིམས་ལྷུན་གྲགས་དང་མཆོག་གྲུབ་གཉིས་སྟེ་བཞིས་ཀླུ་མེས་མོན་མཁར་འབྲས་ཕུར་སྤྱན་དྲངས། ཕྱི་ལོ་སྟག་ལོ་ལ་ཀ་ཆུ་གསོས་སྟེ་བཟུང༌། སྤྱན་འདྲེན་བཞི་པོ་ཡང་རབ་ཏུ་བྱུང༌། དེ་ནས་ལོ་བཞི་པའི་མེ་སྦྲུལ་ལ་ཐང་པོ་ཆེ་བཏབ། དེའི་འོག་དུ་འབྲིང་ཡེ་ཤེས་ཡོན་ཏན་སྨྱལ་པ་དེ་བྱོན་སྟེ་བོ་དྷི་རཱ་ཛཱས་ཁམས་གསུམ་ཕུལ་ནས་བཞུགས་སྟེ་གངས་བར་ལྷ་ཁང་དང་གཉལ་གྱི་བཟང་རུ་སོགས་གྱང་སྐོར་དགུ་བཟུང༌། དེ་ནས་རག་ཤི་ཚུལ་འབྱུང་ཁམས་སུ་སྡོམ་པ་བླངས་ནས་བྱོན་སྟེ་སྣང་གསལ་ལྷ་ཁང་བཟུང༌། དེའི་གོང་ཙམ་དུ་རྦ་བཙུན་བློ་གྲོས་བྱོན་སྟེ་སྡོམ་པ་མ་བླངས་སྔོན་གྱི་དགྲ་བཅོམ་གཙུག་ཕུད་ཅན་ལ་གཙུག་ཕུད་རང་གིས་དོར་བ་ཡིན། དེས་ན་དབུས་ཀྱི་བསྟན་པ་ཕྱི་དར་གྱི་ཐོག་མ་ཀླུ་མེས་ཡིན་ལ་དེའི་གོང་དུ་དབུ་མ་མཛོད་མཁན་དང་གླན་སྟོན་ཤེས་རབ་རྡོ་རྗེ་བྱ་བ་ཁམས་ནས་བྱོན་ཡང་བསྟན་པ་མ་ཚུགས་ཅེས་བཤད་ཏོ། །ཡང་དཔོན་བི་ཅིས་བྲིས་པ་བདེ་སྔོན་ན་སྣང་བ་ནི། སྨར་གཡོ་གཙང་གསུམ་གྱིས་མདོ་སྨད་སྲོ་གུ་ལུང་དུ་བྱོན། དེའི་ཚེ་རྒྱལ་པོའི་ཆོས་བློན་འབྲོ་སྟག་སྣང་ཁྲི་གསུམ་རྗེས་བསྟན་པ་གསལ་ནུས་པར་སྨོན་ལམ་བཏབ་ནས་སོ་ལྔ་པ་ལྕགས་ཕག་ལ་ཚེ་འཕོས་སྟེ་ཙོང་ཁ་བདེ་ཁམས་སུ་ཆུ་བྱི་ལ་འཁྲུངས། ནར་སོན་ནས་ནོན་འཇམ་དཔལ་བཟླས་ལུང་བླངས། ཁང་རིན་རྡོར་ཞེས་སྤྱན་རས་གཟིགས་ཞལ་མཐོང་བ་ཞིག་ལ་སེམས་བསྐྱེད། སྐྱི་རྒྱལ་བའི་གཙུག་ཏོར་ལ་དབུ་ཚད། ནམ་དགའ་ལྡན་བྱང་ཆུབ་ལ་ཡོ་ག་གསན། འཁོར་བའི་སྡུག་བསྔལ་བསལ་ནས་ཐར་བ་ཡི། །བདུད་རྩིས་འགྲོ་བའི་སྡུག་བསྔལ་ཞི་བྱེད་པའི། །བསྟན་པ་(ཉ༣བ)

― PTT001_Page_0464 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱོགས་བཅུར་རྒྱས་པར་བྱ་བའི་ཕྱིར། །དང་པོར་བདག་གིས་རབ་ཏུ་བྱུང་བར་བྱ། །ཞེས་གཙང་གིས་མཁན་པོ། གཡོ་སྨར་གྱིས་སློབ་དཔོན་བྱས་སྟེ་རབ་བྱུང་བསྙེན་པར་རྫོགས། དེ་ནས་བྱང་ཕྱོགས་སུ་མི་ཉག་ལྷའི་ཡུལ་དུ་གོ་རོང་སེང་གེ་གྲགས་ལ་འདུལ་བ་གསན་པས་ལུང་སྡེ་བཞི་བསྟན་བཅོས་དང་བཅས་པ་བྱིན་ནས་བསྟན་པ་གསལ་བར་གྱིས་ཅིག་ཁོ་བོ་ནི་ཡུན་རིང་དུ་མི་འཚོའོ་གསུངས། དེ་ནས་དབུས་སུ་ཞང་ཆེན་པོ་དགེ་བ་ལ་ཆོས་ཉན་དུ་འབྱོན་བཞེད་པ་ན་ཀློང་ཐང་སྒྲོལ་མར་དབུས་ནས་རྒྱལ་པོའི་ཕོ་ཉ་བ་མངར་གཡུ་མཚོ་བྱ་བ་ཞིག་འདུག་པ་ན་རེ་དབུས་སུ་མུ་གེ་ཆེན་པོ་བྱུང་བས་བཙུན་པ་ཁྱོད་ཀྱིས་བཤུལ་ཡང་མི་ཕྱེད་བཀའ་འོད་མཆོག་གྲགས་པ་ལྷོ་བལ་ཏུ་ཆོས་བསླབས་ནས་ཁམས་སུ་བྱོན་ཟེར་བས་ལོག་སྟེ་ལྷ་རྩེ་བྷིག་ཏིག་གི་གནས་གཞིར་བཀའ་ལས་འབུམ་ཊཱིཀ་དང་ས་སྡེ་སོགས་མངོན་པའི་ཐེག་ཆེན་ལོ་བཅུ་གཉིས་གསན། རྨང་ལམ་ན་གླང་པོ་ཆེ་བཅིབས་ནོར་བུ་བསྣམས་ནས་ཚོང་འདུས་རྣམས་སུ་བྱོན་པས་མི་ཀུན་ན་རེ་བཙུན་པ་ཁྱོད་ཀྱི་ནོར་བུ་བཟང་སྟེ་རེ་ཞིག་ཉོ་བ་ཡང་མེད་རིན་ཡང་མི་ཐེག་ཟེར་བ་རྨིས་པས། བསྟན་པ་རིན་ཆེན་སྒྲོམ་ཕྱེ་སྟེ། །ཡོན་ཏན་མཆོག་གི་ནོར་བྱིན་ཡང༌། །དམན་རྣམས་དོན་དུ་མི་གཉེར་བས། །རེ་ཞིག་ནགས་སུ་གནས་པར་བྱ། །ཞེས་དགོངས་ཚེ་རི་དན་ཏིག་གི་ཐེའུ་རང་དཔུན་དགུས། བདག་ཅག་གིས་ཕྱོགས་གང་དང་གང་ན་དགོན་པ་ཆེན་པོ་དངོས་གྲུབ་བརྙེས་པ་མང་དུ་བྱུང་བ་རྩ་བ་དང་འབྲས་བུ་ལ་སོགས་པ་རྙེད་སླ་བ་དེར་འབྱོན་པར་ཅི་གནང༌། བདག་ཅག་གིས་ཀྱང་བྲན་དང་དགེ་བསྙེན་ཏུ་བགྱིའོ་ཞེས་ཞུས་སྟེ་དེར་བྱོན་ནས་མཆོད་གཏོར་རྒྱ་ཆེན་པོ་མཛད་དེ། བསྟན་པ་སྲུང་བ་སྐྱོབ་པའི་སྤྱན་སྔ་རུ། །ཐུགས་དམ་བཞེས་པ་རྒྱལ་སྲས་དཔའ་རྣམས་དང༌། །འཇིག་རྟེན་སྐྱོང་བ་རྫུ་འཕྲུལ་སྟོབས་ལྡན་པ། །སྐྱོབ་ལ་གུས་རྣམས་བདག་ལ་གདོང་གྲོགས་མཛོད། །ཅེས་འཕྲིན་ལས་བསྐུལ་ལོ། །དེ་ན་གཅིག་ཅར་འཇུག་པ་ཅེས་དགེ་བའི་(ཉ༤ན)

― PTT001_Page_0465 ―

^{[མ་དཔེ་གཟིགས་ན་འདིར་གནོན།]}

[Full Size]

ཕྱོགས་མི་བྱེད་པ་མང་བས་དེའི་ཆེད་དུ་ལྷ་ཁང་དང་མཆོད་རྟེན་མང་པོ་བཞེངས་པས་ཡུལ་དེར་ཚོན་རྩི་ཡང་བྱུང༌། གཟོ་ཡང་རང་གིས་མཛད། དེར་པ་གོང་ཡེ་ཤེས་གཡུང་དྲུང་འཁོར་མང་པོ་དང་བཅས་པ་དན་ཏིག་དུ་བྱོན་པ་ན་བླ་ཆེན་པོས་འདུལ་བའི་བསླབ་གཞི་བརྗོད་པས་དད་ཅིང་རང་གི་སྤྱོད་པས་འགྱོད་དེ་རབ་ཏུ་བྱུང༌། དེ་བཞིན་དུ་པར་གྲགས་པ། ཇ་པ་གྲགས་པ་དང་བཙུན་ཆེན་ཤེར་འབྱུང༌། གཞང་དཔལ་རྡོར་དང་སྲགས་རྒྱ་མཚོ། འལ་རྡོར་དབང་དང་སྣུབས་དཔལ་དབང༌། ཟོང་མཆོག་ཆོས་སྐྱོང་དང་མཚུར་ཤེས་རབ་མཆོག་སྟེ་གཉིས་རེ་ཉེ་བར་རབ་ཏུ་བྱུང་བས། པ་བར་གཉིས། ཇ་ཅོག་གཉིས། གཞང་གྲགས་གཉིས། འལ་སྣུབས་གཉིས། ཟོང་མཚུར་གཉིས་ཅེས་བྱ་ལ་མཚུར་གྱི་མཁན་བུ་ཀླུ་མེས་སོགས་དབུས་གཙང་པ་རྣམས་ཡིན་ནོ། །དེར་ཡང་དག་འཇོག་ལ་རྩེ་གཅིག་དུ་བརྩོན་པ་ལས་ཅི་ཞིག་ན་བརྒྱ་བྱིན་ལ་སོགས་པའི་ལྷ་རྣམས་མཚན་མོ་སྣང་བ་ཆེན་པོས་ཆོས་ཉན་པའི་ཕྱིར་ལྷགས་སྟེ་ཆོས་ཀྱི་གཏམ་གྱིས་ཡིད་ཚིམ་ནས་བཙུན་པ་ཁྱེད་ནི་བཟང་ན་མི་མ་ཡིན་པའི་འཁོར་འདི་དག་ནི་ངན་ནོ་ཟེར་ནས་སོང༌། འཁོར་རྣམས་ཀྱིས་མདང་སྣང་བ་འདི་ལྟ་བུ་གདའ་བ་ཁྱེད་ངེས་པར་སྤྲུལ་བ་ལགས་སམ་ཞུས་པས། ཁོ་བོ་ནི་སྤྲུལ་པ་མ་ཡིན་གྱི་ཐེག་ཆེན་སྦྱོར་ལམ་པ་སྣང་བ་ཐོབ་པའི་བན་ནྡྷེ་དགེ་བ་གསལ་ལོ་ཞེས་གསུངས། ཡང་སྐབས་གཞན་དུ། དང་པོ་བུད་མེད་སྒོག་ཚོང་མ། །བར་དུ་སྟག་སྣ་ཁྲི་སུམ་རྗེ། །ད་ལྟ་མུ་ཟུ་དགེ་བ་གསལ། །ཞེས་ཀྱང་གསུང་སྐད། དེ་ལྟ་བུའི་བླ་ཆེན་པོས་ལོ་ཞེ་དགུ་ལ་དན་ཏིག་དུ་བྱོན། སུམ་བཅུ་རྩ་ལྔ་དེར་བཞུགས། བརྒྱད་བཅུ་རྩ་བཞི་ཕག་ལ་གཤེགས། འཕགས་པ་ཐོགས་མེད་དང་བཙུན་པ་མཆེ་བའི་སྡེ་གཉིས་ཀྱིས་ཡུམ་དོན་མི་འདྲ་བར་བཀྲལ་བ་དེ་ཁོ་བོས་བྱམས་པ་ལ་ཞུ་དགོས་སློབ་དཔོན་དེ་གཉིས་ཀྱང་ད་ལྟ་དགའ་ལྡན་ན་བཞུགས་པ་ཡིན། ཡང་འཇིག་རྟེན་འདིར་ད་ལྟ་འཕགས་པ་འཇམ་དཔལ་བྱོན་ཡང་བསྐྲད་དེ་གཏོང་(ཉ༤བ)

― PTT001_Page_0466 ―

^{[མ་དཔེ་གཟིགས་ན་འདིར་གནོན།]}

[Full Size]

ནའང་ཁོ་བོ་ནི་བྱམས་པ་མ་བྱོན་གྱི་བར་དུ་འཛམ་གླིང་འདི་ཐམས་ཅད་ཏུ་སྐྱེ་བ་བརྒྱད་ཙམ་རེ་ལེན་དགོས་ཅེས་གསུངས་སྟེ་དགའ་ལྡན་དུ་གཤེགས། ཞེས་དཔོན་བི་ཅིས་བྲིས་པར་སྣང༌། ས་སྐྱ་བླ་མའི་ཆོས་བྱུང་ལས་ནི་བསྟན་པ་བསྣུབས་པའི་ཚེ་དང་པོར་སྨར་གཡོ་གཙང་གསུམ། དེ་ནས་བཀའ་འོད་མཆོག་གྲགས་པ་དང་རོང་པོ་ལྷུན་གྱི་དཔལ་གཉིས། དེ་ནས་ལྷ་ལུང་རྣམས་རིམ་པར་བྲོས། བོན་པོའི་བུ་སྨུ་གསལ་འབར་རབ་ཏུ་ཕྱུང་སྟེ་ཤཱཀྱ་དགེ་བ་གསལ་དུ་བཏགས་ནས་མཁས་པར་གྱུར། དེ་ནས་བལ་རྡོ་རྗེ་དབང་ཕྱུག་སྣུབས་དཔལ་གྱི་བྱང་ཆུབ། ཡང་གོང་ཡེ་ཤེས་གཡུང་དྲུང༌། སྦར་རིན་ཆེན། ལྕང་ཡེ་ཤེས་སེང་གེ་ཅོག་རོ་ཤེར་བྱང༌། ཤོད་ཆུང་པ་ཤེར་གྲགས། ཨན་འབར་བ་བྱང་ཆུབ། གྲུམ་ཡེ་རྒྱན། སྣུབས་དཔལ་བྱང༌། སྒྲོ་མཉྫུ་ཤྲཱི་སོགས་མཁས་བཙུན་མང་དུ་བྱོན། ཆོས་བསྣུབས་ནས་ལོ་དྲུག་བཅུ་ན་འཕན་ཡུལ་ཞོགས་པ་བོན་པོ་སྨུ་གསལ་གཤེན་འབར་གྱི་བུ་སྨུ་ཟ་འཕེན་བྱ་བའི་བྱིས་པས་སྣང་གསལ་ལྷ་ཁང་དུ་ཕྱིན་པས་གྱང་རིས་ལ་རབ་བྱུང་ཆོས་ཉན་བཤད་བྱེད་པའི་གཟུགས་མཐོང་ནས་དྲིས་པས་རྒན་མོ་ཞིག་ན་རེ་རབ་ཏུ་བྱུང་བ་བྱ་བའི་གཟུགས་ཡིན་ཟེར་བས་བྱིས་པ་དད་དེ་ངུས་ནས་ད་ག་ན་ཡོད་དྲིས་པས་ང་བུ་མོའི་དུས་ན་ཡོང་སྟེ་ཕྱིས་བསྣུབས་ནས་མེད། ད་ལྟ་ཁམས་ན་ཡོད་པར་འདུག་ཟེར་བས་བྱིས་པ་དེས་ལུས་སྲོག་ལ་མ་བལྟས་པར་ཕྱིན་སྟེ་རབ་ཏུ་བྱུང་བས་བླ་ཆེན་དགོངས་པ་གསལ་དུ་གྲགས། དབུས་གཙང་གི་མི་བདུན་ཞེས་ཀླུ་འབྲིང་ལོ་ཚོང་གི་སྟེང་དུ་སུམ་པ་ཡེ་བློ་རྒྱ་བན་བློ་ཤེ་གཞོན་བན་ཆོས་མཆོག་སྟེ་བདུན་ཕྱིན་པ་གྲུམ་དང་ཅོག་རོ་ལས་སྡོམ་པ་མནོས་ནས་ལོག །དེ་ནས་མཐའ་བཞི་རྒྱལ་འཕགས་རག་ཤི་ཚུལ་འབྱུང་རྦ་བཙུན་བློ་གྲོས་ཉང་བྲན་ཆོས་སྐྱབས་གྲུམ་ཤིང་ཤེར་སྨོན་སྟེ་ལྔས་དེའི་རྗེས་སུ་གྲུམ་ཅོག་ལས་བླངས་ཅེས་འཆད་པར་སྣང་ཡང་ཅུང་ཟད་མ་དག་པ་ཅིག་སྟེ། དེའི་ལུགས་ལ་(ཉ༥ན)

― PTT001_Page_0467 ―

^{[མ་དཔེ་གཟིགས་ན་འདིར་གནོན།]}

[Full Size]

བྱིས་པ་ཁམས་སུ་ཕྱིན་པ་དེ་ཁོ་ན་ལ་ཤཱཀྱ་དགེ་བ་གསལ་དུ་བཏགས་པ་ཕྱིས་མཁས་པར་གྱུར་ནས་དགོངས་པ་རབ་གསལ་དུ་གྲགས་པ་ཡིན་པས་ལན་གཉིས་སུ་བགྲང་མི་འོས་ལ་དབུས་གཙང་མི་བཅུ་སུས་ཀྱང་བླ་ཆེན་དང་དེའི་སློབ་མ་ལའང་མ་ཐུག་ན་དེས་བསྟན་པའི་མེ་རོ་གསོས་པར་ཇི་ལྟར་འཆད། དེས་ན་རྗེ་རང་བྱུང་རྡོ་རྗེ་དང་ཀུན་མཁྱེན་བུ་སྟོན་སོགས་བཞེད་པ་ནི་འདི་ཡིན་སྟེ། བསྟན་པ་བསྣུབས་པའི་ཚེ་འཇང་གི་གྱེལ་མི་གཙང་རབ་གསལ། བོ་དོང་པ་གཡོ་དགེ་འབྱུང༌། སྟོད་ལུགས་པ་སྨར་ཤཱཀྱ་མུ་ནི་དང་གསུམ་ཆུ་བོ་རི་ལ་སྒོམ་ཞིང་ཡོད་པས་བཙུན་པ་ཁྱི་ར་བྱེད་པ་མཐོང་ནས་དྲིས་པས་ཆོས་བསྣུབས་པར་ཤེས་ནས་འདུལ་བ་དྲེལ་ཁལ་གཅིག་བཀལ་ནས་སྐད་རིས་མི་གཅིག་པའི་སར་བསྟན་པ་དཔེལ་སྙམ་ནས་གར་ལོག་དང་ཧོར་ཡུལ་དུ་ཕྱིན་ཡང་དར་བར་མ་ནུས་སྟེ་མདོ་སྨད་ལྷོ་ངོས་ཀྱི་བེ་རོ་ཚ་ཆོན་ཚུར་ཐོན་རྨ་ཆུའི་རྒྱུད་རྨ་ལུང་རྡོ་རྗེ་བྲག་ར་ཨན་ཆུང་གནམ་རྫོང་ཡང་ཟེར་བ་དན་ཏིག་ཤེལ་གྱི་ཡང་དགོན་ན་སྒོམ་ཞིང་ཡོད་པ་རྨ་ཆུ་པའི་ཕྱུགས་རྫིས་མཐོང་སྟེ་མི་རྣམས་ལ་སྨྲས་པས་མོས་སྤྱོད་ཀྱི་ས་བ་མུ་ཟུ་གསལ་འབར་བྱ་བས་བལྟར་ཕྱིན་པས་དད་དེ་རབ་ཏུ་འབྱུང་བར་ཞུས་པས་འདུལ་བའི་པོ་ཏི་གཏད་ནས་འདི་ལྟོས་དད་ན་རབ་ཏུ་དབྱུང་ངོ་གསུངས་བལྟས་པས་ཆེར་དད་དེ་མཆི་མ་བྱུང༌། དེར་སྨར་གྱིས་མཁན་པོ་གཡོས་སློབ་དཔོན་བྱས་སྟེ་རབ་ཏུ་ཕྱུང༌། མཁན་སློབ་ལས་མིང་སྦྱར་སྟེ་ཤཱཀྱ་དགེ་བ་རབ་གསལ་ཏུ་བཏགས། ཕྱིས་ཐུགས་རབ་ཆེ་བས་དགོངས་པ་རབ་གསལ་དུ་གྲགས་སོ། །བསྙེན་རྫོགས་ཞུས་པ་དགེ་སློང་ལྔ་མ་ཚང་བས་མི་འོང་གསུངས་ནས་སྔར་ལྷ་ལུང་དཔལ་རྡོར་བ་གསུམ་ཀློང་ཐང་ན་འདུག་པར་ཐོས་ནས་བཙལ་བས་ཁོང་ན་རེ་ངས་རྒྱལ་པོ་བསད་པས་ཁ་སྐོང་མི་འོང་གཞན་བཙལ་གྱི་གསུངས་སྟེ་རྒྱའི་ཧྭ་ཤང་ཀེ་ཝ་ཇ་དང་གྱི་ཕན་གཉིས་བཏང་སྟེ་ལྔས་བསྙེན་པར་རྫོགས་ནས་འདུལ་བ་ལོ་བཅོ་ལྔ་གསན་ཞེས་རྗེ་རང་བྱུང་པ་བཞེད། རྫོགས་ནས་ལོ་ལྔ་ལོན་པ་དང་(ཉ༥བ)

― PTT001_Page_0468 ―

^{[མ་དཔེ་གཟིགས་ན་འདིར་གནོན།]}

[Full Size]

དབུས་ནས་གླག་པ་ལམ་པ་ཀླུ་མེས་ཚུལ་ཁྲིམས་ཤེས་རབ། སྨྱལ་པ་འབྲིང་ཡེ་ཤེས་ཡོན་ཏན། གཡོ་རུ་པ་ན་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་སྟེ་ལྔ༌། གཙང་ནས་མགུར་མོ་རབ་ཁ་བ་ལོ་སྟོན་རྡོ་རྗེ་དབང་ཕྱུག །ཤབ་སྒོ་ལྔའི་ཚོང་བཙུན་ཤེས་རབ་སེང་གེ །མངའ་རིས་པ་འོད་བརྒྱད་དཔུན་གཉིས། བོ་དོང་པ་ཨུ་དཀར་དེ་ཝ་དང་ལྔ་སྟེ་དབུས་གཙང་གི་མི་བཅུས་ཁམས་སུ་བྱོན། བསམ་ཡས་ཀྱི་མངའ་བདག་ཚན་ཡེ་ཤེས་རྒྱལ་མཚན་གྱིས་ཁམས་སུ་བརྫངས་ཅེས་ཀྱང་གྲགས། བཀའ་གདམས་ཀྱི་ཡི་གེ་འགའ་ལས་རྙེད་འཚོལ་ལ་ཕྱིན་པ་འདོད་པ་བཞིན་མ་འགྲུབ་ནས་རྒྱ་སྲང་ལ་ལྷུང་བའི་ཚེའུ་ཅག་རྣམས་ཟང་ཟིང་གི་ཆེད་དུ་འདི་ལྟར་དཀའ་བ་སྤྱོད་པ་བས་འདི་ཕྱི་ཐམས་ཅད་དུ་བདེ་བའི་ཆོས་བྱའམ་ཞེས་མོལ་ནས་རབ་ཏུ་འབྱུང་བར་འཆམས། ཕྱག་རྟེན་མེད་ཅེས་གླེངས་པས་ཁོང་རང་ཆོས་རྒྱུས་ཆེ་བ་འགས་གྲོས་བཏོན་མེ་ཏོག་མང་དུ་འཐུས་ནས་བླ་མ་འབྱོན་པའི་མདུན་དུ་མེ་ཏོག་གཏོར། ཕྱག་གུས་པར་བྱས་པས་ཁྱེད་རྣམས་ནི་ག་ནས་ཡིན་ནམ་མི་མཐོང་བ་ཅན་འགའ་འདུག་གསུངས་ནས་མཉེས་ཅེས་སྣང༌། བླ་ཆེན་ལ་མཁན་པོ་ཞུས་པས་ངས་བསྙེན་པར་རྫོགས་ནས་ལོ་ལྔ་ལས་མ་ལོན་པས་མི་བཏུབ་གསུངས། སྨར་གཡོ་གཙང་གསུམ་གྱིས་ངེད་རྒས་པས་མཁན་བུ་མི་འཁྱོངས་དམིགས་བསལ་ལ་གང་ཟག་ཁྱད་པར་ཅན་གྱིས་བཏུབ་པས་ཁྱོད་ཀྱིས་གྱིས་གསུངས་སྟེ་བླ་ཆེན་གྱིས་མཁན་པོ་མཛད་དེ་སྟན་ཐོག་གཅིག་དུ་ཚིགས་གསུམ་རིམ་ནོད་དུ་སྒྲུབ་པ་ཆིག་རྫོགས་སུ་བསྙེན་པར་རྫོགས། བྱིན་པོ་ཚོ་ཡར་འོངས། ཀླུ་མེས་ཀྱིས་གྲུམ་ལ་འདུལ་བ་ཉན་ཞིང་བསྡད་ཏོ། །དེའི་དུས་རག་ཤིའི་གཅུང་དང་རྦའི་གཅུང་ཕུ་བོ་བསུར་འོངས་པ་དང་ཀློང་ཐང་དུ་མཇལ་བས་གཅུང་གཉིས་དད་དེ་ལོས་མཁན་པོ་བྱས་ཕུ་བོ་གཉིས་ཀྱི་སློབ་དཔོན་བྱས་སྟེ་རབ་ཏུ་བྱུང་བས་དེ་ཕྱིན་རྦ་རག་གཉིས་གཅིག་དུ་སྡེབ་བོ། །དེ་ནས་ལོ་སྟོན་ན་རེ་ཁྱེད་རྣམས་འདིར་བཞུགས། (ཉ༦ན)

― PTT001_Page_0469 ―

^{[མ་དཔེ་གཟིགས་ན་འདིར་གནོན།]}

[Full Size]

ངས་ཚོང་པ་དང་འགྲོགས་སྟེ་དབུས་གཙང་དུ་ཕྱིན་ལ་བསྟན་པ་དར་བར་ནུས་ན་བསྡད་ཀྱི་ཁྱེད་རྣམས་ཡང་བྱོན། མི་ནུས་ན་ལོག་ལ་འོང་གསུངས་ནས་འདན་མའི་ཚོང་པ་དང་འགྲོགས་སྟེ་བྱོན་པས་ཚོང་པ་སྔར་སུམ་འཕྲང་ནས་ལྡོག་པ་ལ། ལོ་སྟོན་གྱིས་འདི་ནས་མ་ལྡོག་པར་གཙང་དུ་སོང་ཚོང་ལེགས་པར་འོང༌། མགུར་མོ་རབ་ཁ་ན་ལོ་ནད་གཙུག་ན་བྱ་བ་ཡོད། དེ་ལ་ཁྱོད་ཀྱི་བུ་རབ་ཏུ་བྱུང་ནས་དབུས་ན་ཡོད་གྱིས་ཅིག་བྱས་སྟེ་བཏང་བས་ཚོང་ལེགས་པར་བྱུང༌། དེ་ཕྱིན་མགུར་མོར་ཚོང་འདུས་ཆགས། ཕྱི་ལོ་ཀླུ་མེས་ཀྱིས་མཁན་པོ་ལ་ཁོ་བོ་དབུས་གཙང་དུ་འགྲོ་བས་མཆོད་གནས་ཅིག་ཞུ་བྱས་པས་བོན་པོའི་ཞྭ་འོབས་ཞུ་ཕོག་ནས་ས་སེར་བཏབ་པ་གསོལ་འཕྲོ་ཞིག་གནང་ནས་འདི་གོན་ལ་ང་རྗེས་སུ་དྲན་པར་གྱིས་གསུངས་སྟེ་གསོལ་ནས་ཕྱིས་དབུས་སུ་ཚད་པ་ཚབས་རྒྱབ་བལྟབ་སྟེ་གསོལ་བས་ཞྭ་སྣ་རིངས་སུ་གྲགས་པ་བྱུང་ལ་དབུས་གཙང་མི་བཅུ་ལས་མཆེད་པ་ཕལ་ཆེར་གྱི་ཞྭ་ཡིན། ཕྱིས་བཀའ་གདམས་ཀྱི་གཞུང་མན་ངག་པ་གཉིས་ལའང་འདི་ལས་གྱེས་པའི་ཞྭ་ཅུང་ཟད་མི་འདྲ་བ་རེ་ཡོད་ཅིང་དྭགས་པོ་སྒོམ་ཚུལ་གྱིས་འདིའི་རྒྱབ་བལྟབ་སྟེ་གསོལ་བས་སློབ་དཔོན་སྒོམ་ཚུལ་གྱི་ཞྭ་ཞེས་སྒོམ་ཞྭར་ཡང་གྲགས་སོ། །དེ་ནས་ཁོང་རྣམས་ཀྱིས་བསམ་ཡས་སུ་བྱོན་སྟེ་ཀླུ་མེས་ཀྱིས་ཀ་ཆུ་ཆེ་མཆེད་ཀྱིས་བུ་ཚལ་དང་དབུ་རྩེ། རག་ཤི་མཆེད་ཀྱིས་དགེ་རྒྱས། འབྲིང་གིས་ཟངས་ཁང་བཟུང༌། དེ་ནས་དབུས་པ་ལྔས་གནས་གཞི་སོ་སོ་རྩིག་པར་བྱས། ཀླུ་མེས་ཀྱི་དབུ་རུར་ལ་མོ་ཆག་དེའུ་བཏབ། མི་ཆོས་ཀྱི་ས་ཁུལ་དུ་བ་ལམ་གནས་བརྩིགས། ས་བྱ་ལ་མོར་འགྱེལ་བརྩིགས། ཕྱི་ལོ་གླན་རྡོག་རབ་ཏུ་ཕྱུང༌། དེའི་ཕྱི་ལོ་ཡེར་པ་བ་རང་བཏབ། གྲུ་མེར་སོགས་བཅོ་བརྒྱད་རབ་ཏུ་ཕྱུང༌། ཚོང་འདུས་གནས་བཞེངས། ཕྱིས་ཚེ་སྤོང་གི་སེ་ར་ཕུག་པར་བཞུགས་ནས་ཐང་དུ་བྱོན་པའི་ལམ་དུ་གྲོངས་སྟེ་ཀླུ་མེས་དང་གྲུ་མེར་གཉིས་ཀའི་གདུང་མཆོད་རྟེན་འོད་འབར་ན་མ་ཉམས་པར་(ཉ༦བ)

― PTT001_Page_0470 ―

^{[མ་དཔེ་གཟིགས་ན་འདིར་གནོན།]}

[Full Size]

བཞུགས། ཀླུ་མེས་ཀྱི་མཁན་བུ་ཞང་རྔོག་གླན་གྲུ་མེར་སྟེ་ཀ་བ་བཞི་ཡམ་ཤུད་སོགས་མང་དུ་བྱོན། དེ་ལ་ཞང་སྣ་ནམ་རྡོ་རྗེ་དབང་ཕྱུག་ནི་བྱམས་པའི་སྤྲུལ་པར་གྲགས། སྣ་ནམ་ཇོ་སྲས་དང་ཞང་ལྕམ་སྒྲོལ་མའི་སྲས་སུ་ཉམས་དགའ་མོར་འཁྲུངས། ལོ་བཅོ་བརྒྱད་པ་ལ་ར་བ་ཟླུམ་པོར་ཀླུ་མེས་ལས་རབ་ཏུ་བྱུང༌། དང་པོར་ར་ཆག་བཏབ། སོ་བདུན་པ་ཆུ་བྱི་ལ་རྒྱལ་ལུག་ལྷས་ཀྱི་ལྷ་ཁང་བཞེངས། རྒྱ་གར་དུ་བྱོན་རྡོ་རྗེ་གདན་པ་དང་མཇལ་ནས་འདུལ་བ་གསན་ཞིང་རྒྱ་གར་དུ་ཡང་འདུལ་བ་བཤད། གྱ་ལྔ་པ་ལྕགས་བྱི་ལ་གཤེགས། གདན་ས་གླན་ཚུལ་བྱང་གིས་བཟུང་སྟེ་པུ་ཏོ་བའི་མཁན་པོ་ཡིན། ཞང་ནས་མཁན་རབས་བཅུ་དྲུག་ལ་ལོ་ཉིས་བརྒྱ་ཉེར་བརྒྱད་འདས་པ་ན་ཧོར་དམག་གི་ཐོག་མ་དོར་ཏོག་གི་དམག་བྱུང་བས་རྒྱལ་ལྷ་ཁང་བསྲེགས། བཙུན་པ་སོ་སྟོན་སོགས་ལྔ་བརྒྱ་ཙམ་བཀྲོངས། སླར་དོར་ཏོག་གིས་གསེར་བྲེ་དངུལ་བྲེ་མང་པོ་རྒྱུར་སྦྱར་སྟེ་གསོས། འདི་ལས་མཆེད་པ་ཞང་སྐོར་ཞེས་གྲགས། རྔོག་བྱང་ཆུབ་འབྱུང་གནས་ཀྱིས་ཡེར་པ་བཟུང༌། གཡུ་སྒྲོ་ཁང་དམར། བཟད་ཀྱི་ལྡིང་པ། ཆུ་ཤུལ་ན་བོ། སྦུས་སྡེ་ལྷོ་གོང༌། ཡོལ་ཐང༌། ལབ་སོ། གྲལ་མ་ཐང༌། ཁ་རག་སོ་གཅིག་གཞུ་ཀུན་ར། ཚ་མིག་སོགས་བརྩིགས། རྔོག་གི་མཁན་བུ་ཞིག་གིས་ལྷོ་ནུབ་ཏུ་ལྷ་མདོ་བརྩིགས་པ་ལས་འབྲེ་ཆོ་ཞེས་མང་དུ་མཆེད། དེ་རྣམས་རྔོག་སྐོར་དུ་གྲགས། གླན་ཡེ་ཤེས་ཤེས་རབ་ཀྱིས་རྒྱ་སར་སྒང༌། བླག་མདའ། མཚལ་ཆུང་བཟུང་སྟེ་གླན་ཚོའོ། །ཐང་པོ་ཆེ་རྩིག་པ་ལ་ཁུའི་བནྡྷྱེ་མི་གསུམ་སོགས་ཕྱེད་དང་བརྒྱད་དུ་གྲགས་ཀྱང་གཙོ་བོར་གྲུ་མེར་ཚུལ་ཁྲིམས་འབྱུང་གནས་ཀྱིས་བཏབ་སྟེ་ཀླུ་མེས་ཉིད་ཀྱིས་ཀྱང་བཞུགས། འདི་ལས་མཆེད་པ་ལ་ཐང་སྐོར་དུ་གྲགས་ཤིང་གྲུ་མེར་གྱི་མཁན་བུ་ཁུ་སྟོན་བརྩོན་འགྲུས་གཡུང་དྲུང་གིས་བཟུང༌། དེ་ནས་ཁུ་འབྱུང་རྒྱན་ཁུ་ཤེར་བརྩོན་སོགས་ནས་ཁུ་རྒྱལ་ཚའི་བར་བྱོན། དེ་ནས་ཆག་ལོའི་སློབ་(ཉ༧ན)

― PTT001_Page_0471 ―

^{[མ་དཔེ་གཟིགས་ན་འདིར་གནོན།]}

[Full Size]

མ་བླ་བྲང་པ་གཞོན་ནུ་རྒྱལ་མཚན་ནས་བླ་བྲང་པ་དང༌། ལོ་པའི་སངས་རྒྱས་ཇོ་བོའི་སློབ་མ་གསེར་ཁང་པ་དང༌། ཁུ་མདོ་སྡེ་འབར་གྱི་ཆོས་བརྒྱུད་འཛིན་པ་ཁུ་པ་སྟེ་གསུམ་དུ་གྱེས་སོ། །ཡང་ཁུའི་བནྡྷྱེ་མི་གསུམ་གྱི་ཁུ་ཤུད་པུ་ཚ་གཞོན་ནུ་གྲགས་པས་ཁུ་ཚེས་ཀྱི་སོ་མཚམས་སུ་འཇུ་མ་བཞེངས། དེ་ནས་ཡུགས་ཀྱི་ཤུད་པུས་སྤྱན་དྲངས་སྟེ་བ་ཤི་བཏབ། རྒྱ་གར་གྱི་ཤིང་བ་ཤེ་རུ་ལས་བྱས་པའི་རྟེན་ཞིག་ཡོད་པའི་མིང་ཆགས་ནས་བ་ཤི་རུའི་ལྷ་ཁང་ཟེར། དེ་ནས་ཡར་སྟོད་དུ་བར་ཡུལ་བཞེངས་སོ། །ཡམ་ཤུད་རྒྱལ་བ་འོད་ཀྱིས་གཡུ་རྩེ་ལྷ་ཁང་ཁྲབ་ལ་ཁ་ཕུག་བོ་ཆེ་གད་པ་ཐོག་ལྕང་ཚགས་སོགས་བཟུང༌། དེའི་མཁན་བུ་མགར་སྲགས་གཉིས་གྲ་པ་མངོན་ཤེས་སོགས་ལས་སྨྱལ་པ་མགར་སྲགས་གཉིས་ཀྱི་བྱར་ཡུར་འོག་དང་རྩི་འོར་བཟུང་ནས་སྨྱལ་གྱི་ཀླུ་མས་རྣམས་བྱུང༌། གྲ་པ་མངོན་ཤེས་ནི་མངོན་པ་ལ་མཁས་པས་དེར་གྲགས། མཆིམས་རྡོ་རྗེ་སྤྲེ་ཆུང་གི་རྒྱུད་པ་ཡིན་ལ་བར་ཅིག་ནས་ཞང་དུ་འབོད། འཁྲུངས་ཡུལ་དག་ས་པོ་ལ་མཚན་དབང་ཕྱུག་འབར་དུ་དོད་པ་དང༌། འཁྲུངས་ཡུལ་གྲ་མཚན་ཤེས་རབ་རྒྱལ་བར་འདོད་པ་གཉིས་སྣང༌། ཁུ་བོ་ལས་ཞང་བློན་གྱི་སྒྲུབ་ལུང་བླངས་པ་ཙམ་གྱིས་ཞལ་མཐོང་སྟེ་ནུས་མཐུ་ཆེ་མཁས་པ་ཆེན་པོར་གྱུར་སྟེ་དམ་པ་རྒྱ་གར་ལས་ཞི་བྱེད་སྒྲོན་མ་དགུ་དང་ཁ་ཚ་ཟླ་མགོན་ལས་སྦྱོར་དྲུག་གསན་སྟེ་མཁྱེན་རྟོགས་འཛོམ། ལྷ་བུག་པ་ཅན་པ་ལ་བདེ་མཆོག་གི་དབང་བསྐུར་བས་ལོ་དུས་སུ་བུ་བྱུང་བས་འབུལ་བ་ཆེར་བྱས་ཤིང་སྐུ་བསོད་རྒྱས་སྟེ་གཡེ་ཡར་ལུངས་སོགས་སུ་གནས་གཞི་མང་དུ་མཛད། སྤྱན་ཡས་དང་གྲ་སྐྱིད་རུ་བཏབ། བཙུན་མོ་དཔལ་གྱི་ངང་ཚུལ་མའི་ལྷ་ཁང་རོང་སྐམ་གསོས་སྟེ་སྡེ་བཙུགས། སྐྱིད་རུ་ནས་མཁན་བུ་བཞིའི་ཤ་སྟོན་གྱིས་གནས་སྒོར། རྔན་ཆུང་སྟོན་པས་སྒ་འདྲ། ལྷབ་ཀྱིས་བསོ་ཐང་བནྡྷྱེ་བྱང་སེམས་ཀྱིས་རི་ཕུག་བཏབ། (ཉ༧བ)

― PTT001_Page_0472 ―

^{[མ་དཔེ་གཟིགས་ན་འདིར་གནོན།]}

[Full Size]

རྣ་ཤུད་ཀྱི་སོ་མཚམས་སུ་གནོད་སྦྱིན་གྱིས་ལུང་བསྟན་སྟེ་གྲ་ཐང་བརྩིགས། སྤྱིར་ལྷ་ཁང་བརྒྱ་རྩ་བརྩིགས་པར་གྲགས། དགུང་ལོ་དོན་དགུ་ལ་མཁན་བུ་ཅིག་གིས་སྙིང་ཐུར་བརྒྱབ་པ་ཐལ་ནས་གཤེགས། དབོན་པོ་འབྱུང་ཤེད་དང་འབྱུང་ཚུལ་གྱིས་ལྷག་རྣམས་བསྒྲུབས། གྲ་པའི་གདན་ས་དོན་སྟངས་པ་ཆོས་སྐྱབས་ཀྱིས་མཛད་དེ་ཁོང་རོག་དམར་ཞུར་བའི་སློབ་མ་ཡིན། སྤྱིར་འཇུག་པ་སེམས་སྐྱེད་ལ་བཀའ་དོག་ཡང་ཁོང་གི་རྨི་ལམ་ན་དགའ་ལྡན་དུ་བྱམས་པ་དང་མཇལ་ཙམ་པའི་མེ་ཏོག་སྙིམ་པ་གང་གཏོར་བས་དབུ་ཐོག་དུ་མེ་ཏོག་གི་ཁང་བརྩེགས་སུ་གྱུར། བྱམས་པའི་ཞལ་ནས་ཁྱོད་ཀྱིས་མི་ཡུལ་དུ་འགྲོ་བ་མཆོག་དམན་ཐམས་ཅད་ལ་འཇུག་པ་སེམས་སྐྱེད་མ་བྱིན་ན་ངའི་བཀའ་ལས་འགལ་ལོ་གསུང་བ་ཐོས་ནས་ཡངས་པར་མཛད་པ་ལ་རོག་གིས་བཀྱོན་པས་བདག་ལ་འདི་མི་བྱར་མ་བཏུབ་པ་ཡིན་ཞེས་ལུང་བསྟན་ཞུས་པས་འོ་ན་ཁྱོད་ཀྱི་དེ་ང་ལ་ཡང་གྱིས་དང་གསུངས་ནས་གསན་སེམས་སྐྱེད་རྨི་ལམ་མ་ཞེས་པ་དེ་ཡིན་ནོ། །སྤྱིར་ཐང་པོ་ཆེ་ལག་བཅས་ལ་མཚན་ཉིད་ཀྱི་སྡེ་ཟེར། ཕུག་པོ་ཆེ་གྲ་ཐང་སོགས་ལ་སྔགས་སྡེ་ཟེར། གྲ་པས་དབུ་ར་གོང་མ་བཟུང༌། ཁུ་སྟོན་བརྩོན་འགྲུས་གཡུང་དྲུང་སྦར་གྲ་པའི་སློབ་མ་ཡིན་ནའང་ཕྱིས་ཕྲག་དོག་གིས་མཐུ་རྒྱས་བྱས། གྲ་པས་རོག་པ་རྩའི་གཅེས་ཕྱུག་མི་བཞི་རབ་ཏུ་ཕྱུང་ནས་བྱེ་མ་ལྷ་ཁང་གི་འཁྲིས་སུ་མ་བཀོད་ལྷ་ཁང་བཏབ། ཉེ་གནས་རྒ་བྲན་ནག་པོས་ཁུ་སྟོན་ཟུར་ཕུད་ཀྱི་ཀླུ་ལ་གཏད་ཚེ་སྔགས་མཚན་ཉིད་ཀྱི་རྩོད་པ་བྱུང༌། དེ་སྡུམ་ཚེ་མ་བཀོད་མདའ་རྒྱང་དུ་བསྣུར་བྱ་བ་སོགས་བྱུང་བས་བསྣུར་སྟེ་བྱེ་ལུང་བཏབ་ནས་རྩོད་པ་ཞི་སྐད། དེ་ལྟར་ཀླུ་མེས་ལ་ཞང་སྐོར་རྔོག་སྐོར་གླན་སྐོར་ཐང་སྐོར་ལ་སྔགས་མཚན་ཉིད་གཉིས་སྟེ་བཞིའམ་ལྔའོ། །སུམ་པས་འབྲོ་ས་ཐང་དུ་དམེ་རུ་བརྩིགས་སྟེ་སྡེ་མ་འཕེལ། སྤྱིར་ཀླུ་སུམ་གཉིས་གཅིག་དུ་སྡེབས་ནས་གདུང་གཉིས་ཟེར་ལ། དེའི་ཚེ་སྔར་གྱི་ཀ་བ་བཞི། ཀླུ་གསུམ་(ཉ༨ན)

― PTT001_Page_0473 ―

^{[མ་དཔེ་གཟིགས་ན་འདིར་གནོན།]}

[Full Size]

གྱི་མཁན་བུ་གླན་ཡེ་བྱང༌། ཚལ་ཆུང་གི་གཉོས་ཚུལ་རྒྱལ། འཕངས་དབང་རྒྱན། གཟི་རླུང་གཉིས། ཀླུ་མེས་ཀྱི་གཅུང་དགེ་ངོམ་འདིས་མོན་མཁར་འགན་བཞེངས། མཁན་བུ་མིན་ཡང་མི་ཆེ་བས་གྲངས་སུ་བགྲངས་པ་བྷེ་སྟོན་རྡོ་རྗེ་ཤེས་རབ་འདིས་གཞུང་སྒྲེ་མཁར་བཏབ། དེ་ལ་སོགས་པ་ནི་ཕྱམ་སོ་གཉིས། དེ་བས་ཆུང་བ་ལ་གྲལ་མ་དཔག་དུ་མེད་པ་ཅེས་གྲགས་ཤིང༌། རྒྱལ་དཀོར་ནོར། གཞུ་ཀུན་ར་བཟའ་མི། ཐང་པོ་ཆེ་དགེ་བཤེས། གྲ་ཐང་ལྷ་ཁང་གིས་ཁྱད་པར་འཕགས་པས་ཁྱད་འཕགས་ཀྱི་སྡེ་བཞིར་གྲགས་སོ། །རྦས་ཡུངས་འགུར་བརྩིགས། ལན་པའི་ལྕིལ་བུ་བཟུང༌། མཁན་བུ་མལ་སེམས་དཔའ་ཤེས་རབ་ཀྱིས་སྟོད་ལུངས་ཆ་ཐོག་བརྩིགས། ཐག་མ་ལྷ་ཁང་དང་མོན་གྲ་བཟུང༌། རྦའི་གཅུང་གིས་གྱེ་རེའི་མདའ་གྲོང་བརྩིགས། གཞོའི་འཆད་ཁ་བཟུང་སྟེ་དེ་རྣམས་རྦ་ཚོར་གྲགས། རག་ཤིས་ཕྲང་འོག་གི་ལྷ་ཁང་བརྩིགས། ཀ་ཚལ་དང་ཞྭ་བཟུང༌། གཅུང་པོས་དགེ་རྒྱས་བཟུང་དེའི་མཁན་བུ་མཐའ་བཞི་རྒྱལ་འཕགས་ཡིན། དེའི་མཁན་བུ་ཞང་ཤེས་རབ་འཕགས་ཀྱིས་ལན་པ་རྟ་བྲེས་བརྩིགས་སྟེ་དེ་རྣམས་ལ་རག་ཚོ་དང་རག་ཤིའི་གཅུང་ཚོ་ཟེར་རོ། །

― PTT001_Page_0474 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲིང་གིས་ངན་ལམ་སྤྱི་མོ་བརྩིགས་པ་ལས་འབྲིང་ཚོ་སྟོད་པ་མཆེད། དེ་ནས་དཀར་ཆུ་དང་སྙེ་ཐང་བྲག་སྣ་བཟུང༌། དེའི་ལམ་སྟེགས་སུ་བྲང་ར་མོ་ཆེ་བརྩིགས། དེ་ལས་འབྲིང་ཚོ་སྨད་པ་མཆེད། ཀླུ་གོང་ནས་འབྲིང་ཚོ་བར་པ་བྱུང་སྟེ་དེ་རྣམས་ལ་འབྲིང་སྡེ་ཟེར་སྟེ་དབུས་པ་ལྔ་ལས་ཇི་ལྟར་གྱེས་པའོ། །གཙང་དུ་ལོ་སྟོན་ལ་མཁན་བུ་ཉི་ཤུ་རྩ་བཞི་ཞེས་གྲགས་ཀྱང་སྡེ་ཟིན་པ་ལ། རྒྱ་ཤཱཀྱ་གཞོན་ནུས་ལ་སྟོད་མར་ལ་ཐང་བརྩིགས། དེ་ལས་འབྲིང་མཚམས་ཀྱི་བུལ་ཏོག་ལྷ་ཁང་སོགས་གྱེས། སྐྱོ་ཤེས་རབ་རྡོ་རྗེས་དོན་མོ་རི་བརྩིགས། སྟག་ལོ་གཞོན་བརྩོན་གྱིས་སྟག་ལོ་ལྷ་ཁང་བརྩིགས། ཨ་མེས་ཞུ་གཅིག་གིས་མས་ཕྲེང་དང་བྲག་(ཉ༨བ)

― PTT001_Page_0475 ―

^{[མ་དཔེ་གཟིགས་ན་འདིར་གནོན།]}

[Full Size]

དམར་བཟུང༌། འདར་ཤཱཀྱ་ཡོན་ཏན་གྱིས་གཟུས་པོ་བཟུང༌། ལི་བློ་གྲོས་གཞོན་ནུས་ཇོ་མོ་བརྩིགས། གླག་བྱང་ཆུབ་རྒྱལ་མཚན་གྱིས་ཆུ་མིག་བརྩིགས། དེ་རྣམས་མཆེད་པ་ལ་རྒྱ་མཚོ་ནས་གླག་ཚོའི་བར་སོ་སོར་གྲགས་ཤིང་འགའ་ཤེས་རབ་བླ་མས་བསྙེམས་བརྩིགས། རྔོག་ཡེ་ཤེས་འབྱུང་གནས་ཀྱིས་སྤང་དཀར་ལྷ་ལུང་བརྩིགས་ཀྱང་དེ་གཉིས་ཀ་གླག་ཚོར་ཐིམ། གླང་བཙུན་བྱམས་པས་འོམ་ཕུག་བརྩིགས། དེ་ནས་གཙང་འགྲམ་བཟུང་སྟེ་བུམ་ཐང༌། ཆག་ས། ཀྲི་གོང༌། མགོས་སྟོན། ཁྲོལ་མ་སོགས་གླང་ཚོ་སྟོད་སྨད་དུ་གྱེས། མགོ་བ་ཡེ་ཤེས་གཡུང་དྲུང་གིས་སྦྲེ་ལྷ་ཁང་བཟུང༌། དེའི་མཁན་བུ་ལྕེ་བཙུན་ཤེས་འབྱུང་གིས་ཞ་ལུའི་མ་བརྩིགས་སྟེ་རྒྱ་གར་དུ་ཕྱིན། སྡོམ་པ་བསྐྱར་ནས་བླངས། པཎྜི་ཏ་གཅིག་གི་གསོལ་ཞལ་ལ་མཆོད་ཡུལ་གྱི་གཙོ་བོར་བྱེད། ཕོར་པ་ལ་ཞལ་བུར་ཡུལ་དེ་ན་གྲགས་པས་གཙུག་ལག་ཁང་གི་མིང་ཞ་ལུར་ཆགས། སློབ་མ་ཀ་བཞི་གདུང་དྲུག་དུ་གྲགས་པ་བྱུང་སྟེ་ཞ་ལུ་བརྒྱ་སྐོར་མཆེད། ཀྱི་ཡེ་ཤེས་དབང་པོས་ཤངས་མཁར་ལུང་དང་གྱེ་རེ་གླང་ར་དེའི་ལས་སྟེགས་སུ་མུ་ཤངས་ཀྱི་རོ་སྐམ་བརྩིགས། འདི་ནས་ཀྱི་ཚོ་སྟོད་སྨད་པར་གསུམ་དུ་གྱེས་སྟེ་གླང་ར་ནས་མཆེད་པ་ལ་གླང་སྐོར་དང་ཉུག་གི་ཨུ་ལུང་ནས་གྱེས་པ་ཨུ་ཚོ་ཟེར་སྟེ་བསྡོམས་ནས་ཀྱི་ཚོ་སྨད་པར་གྲགས། ཀྱིའི་སློབ་མ་ཨ་མེ་དེའི་མཁན་བུ་རྣམས་ལས་སྤང་གིས་འཁྲིས་དང་ཞང་ཚུལ་འཕགས་ཀྱིས་བྱ་རྒྱུས་བཟུང༌། ཀོང་ཕོ་ཐར་པ་རིན་ཆེན་ལ་མཁན་བུ་བཞིའི་གཟུ་སྟོན་འཕན་གྲགས་ཀྱིས་སྒྲེའི་ལྕེ་མཚམས་དང་རྒྱན་མཁར་སྟག་ལུང་བཟུང༌། དེ་ལས་མཆེད་པ་གཟུ་ཚོར་གྲགས། ལྕེ་བཙུན་དཀར་པོས་ཨང་ཡིག་དང༌། གཡུང་སྟོན་ཛ་ཀ་རིས་བ་འོར་བཟུང་ཡང་མཆེད་པ་མེད། ཤབ་རྩེས་ཤབ་རྩེ་ལྷ་ཁང་བརྩིགས་སྟེ་དེ་རྣམས་ལ་ཀོང་ཚོ་ཟེར་ཞིང་སྤྱིར་དེ་ཐམས་ཅད་ལ་ཀྱི་ཚོ་བར་པར་གྲགས། ཡང་ཨ་མེས་ཀྱིས་ལ་བྲིས་ཀྱི་ཁ་ཆད་ནས་སད་ཀྱི་ལ་སྟེང་བཟུང༌། (ཉ༩ན)

― PTT001_Page_0476 ―

^{[མ་དཔེ་གཟིགས་ན་འདིར་གནོན།]}

[Full Size]

དེར་སྟོད་ཀྱི་མཁན་བུ་རྣམས་བཞི་བྱུང་བའི་ཁྲི་སྟོན་བརྩོན་འབར་གྱིས་ཤོང་སྣར་བཟུང༌། ས་རྦད་བཙུན་ཆུང་གིས་བྲང་ཆུང་བཟུང༌། རྒྱ་སྟོན་ཨཱརྻ་དེ་ཝས་སྤོ་རུ་སྣ་བཟུང༌། འདར་ཤཱཀྱ་གཞོན་ནུས་སར་ཕུག་བཟུང་སྟེ། ཁྲི་ཚོ། བྲ་ཚོ། རྒྱ་ཚོ། སར་ཚོ་ཞེས་ཁྲལ་ཚོ་བཞི་བྱུང་བ་ལ་ཀྱི་ཚོ་སྟོད་པར་གྲགས། དེ་ལས་གྱེས་པ་གཞོན་ནུ་འབྱུང་གནས་ཀྱིས་རྒྱན་མཁར་ཐུར་ལ་བཟུང་བས་ཐུར་ཚོ་དང་ཀྱི་བཙུན་དཔལ་ཡེས་འབྲུང་ཀུན་ར་བཟུང་ངོ༌། །ཚོང་ཚོའི་སྡེ་ནི་ཚོང་བཙུན་ཤེས་རབ་སེང་གེས་སྡོ་གླིང་བཟུང༌། དེའི་མཁན་བུ་ལས་ཁྲལ་ཚོང་གུར་གྱེས་སྟེ་ཚོང་ཚོ་སྟོད་པ་ལ་སྐལ་སྒོར་དང་རྒྱན་སྐོར་གཉིས། བར་པ་ལ་གནས་སར་དང་གནས་རྙིང་གཉིས་སྟེ་བཞི་བྱུང༌། སྨད་པ་ལ་རྦ་ཚོ། ཉན་ཚོ་སྐོར། བྱ་ཆོས་སྐོར། སྨོན་གྲོ་སྐོར། དྭོ་ཚོ་སྟེ་ཁྲལ་ཚོ་ལྔ་ཡོད། དེ་ཡང་ཨ་མེས་ཚོང་བཙུན་གྱིས་རྩིས་ཀྱི་ཡང་དབེན་བཟུང༌། དེ་ལ་རྩིས་ལྷ་ཁང་ཉན་ཚོ་སྟག་ཚལ་གྱི་བྱ་ཆོས་མཁར་པོ་ཆེ་སྨོན་གྲོ་གསེར་གྱི་སྒོང་ཐོག་རྣམས་ཕུལ་ནས་བཟུང༌། རང་གི་མཁན་བུ་ལ་སོ་སོར་གཏད་པས་ཚོ་ལྔ་བྱུང་སྟེ་དེ་ལ་རྩིས་ལྷ་ཁང་རྦ་ཡོན་ཏན་བློ་གྲོས་ལ་གཏད་དེ་བསྐྱངས་པས་རྦ་ཚོར་གྲགས། རྦའི་མཁན་བུ་ཡོལ་ཆོས་དབང་གིས་སྐྱེགས་གནས་རྙིང་བཟུང་ནས་རྦ་ཚོ་སྟོད་པ་མཆེད། ཡོལ་ཐོག་འབེབས་ཀྱིས་ལྕང་ར་དང་སྟག་པ་ཇོ་བཙུན་གྱིས་ཅེ་ཏེ་བཟུང་ནས་རྦ་ཚོ་བར་པར་གྲགས། རྩིས་ནས་རྦ་ཚོ་སྨད་པ་མཆེད་ཏོ། །ཉན་ཚོ་རྭ་བློ་གྲོས་བཟང་པོ་དང་ཁམས་པ་ལ་གཏད། རྭས་ངུར་མིག་བཟུང་བས་རྭ་ཚོ་བྱུང༌། ཁམས་པས་ལྕགས་མཁར་བཟུང་བས་ཁམས་ཚོ་ཟེར་སྟེ་དེ་གཉིས་ཉན་ཚོར་སྐོར་རོ། །བྱ་ཆོས་མཁར་པོ་ཆེ་རྒྱ་ཚུལ་སེང་ལ་གཏད་དེས་ཀོང་པོ་ཡེ་འབྱུང་ལ་གཏད་དེས་ད་མུའི་གནས་མོ་ཆེ་དང་མཉམ་དུ་བསྐྱངས་པས་བྱ་ཆོས་སྐོར་རོ། །སྨོན་གྲོ་མར་པ་རྡོ་རྗེ་ཡེ་ཤེས་ལ་གཏད། དེས་མཁན་བུ་སྣེ་པོ་གྲགས་པ་རྒྱལ་མཚན་གཏད་ནས་སླར་དོང་མཁར་ཕུག་བཟུང༌། ཕྱིས་སྟག་ཚལ་དཀྱུས་ཐང་བཞེངས་ནས་ཨ་མེས་ལ་ཕུལ། མར་པས་(ཉ༩བ)

― PTT001_Page_0477 ―

^{[མ་དཔེ་གཟིགས་ན་འདིར་གནོན།]}

[Full Size]

བྲན་མ་སྒང་བརྩིགས། དེ་གསུམ་དང་ལན་འགྲོ་བའི་སྟག་ཚང་དང་བཞི་ལ་སྨོན་གྲོའི་མ་དང་མཉམ་པའི་བུ་བཞིར་གྲགས་སྟེ་སྨོན་གྲོ་སྐོར་རོ། །གསེར་གྱི་སྤོང་ཐོག་ཞང་ཚོར་ཁྲོད་པ་ལ་གཏད། དེས་སེར་གྱི་བྲག་ཤོད་བརྩིགས། བཙན་པོ་སྡིངས། རྩིས་ཀྱི་ཡང་དབེན་ར་སོག་མཚར་ལ། སྟག་ཚལ་མཁར་པོ་ཆེ་བཟུང་ནས་མཁན་བུ་རྦ་དགེ་མཐོང་ལ་གཏད། དེས་རོང་བ་དོ་བཟུང་ནས། མཁན་བུ་འབྲེ་བཙུན་སྔོན་མོ་ལ་གཏད། དེ་རྣམས་ལ་དྭོ་ཚོ་ཟེར་སྟེ་ཁྲལ་ཚོ་འདུས་ནས་འདུན་མ་བྱེད་པ་ན་དེ་དག་གི་བཙུན་ཆུང་གསུམ་བྱུང་བ་ལ་དཔོན་པོ་གར་སོང་དྲིས་པས་འདས་ཟེར་བས་འོ་ན་དྭོ་ཕྲུག་དུ་འདུག་པ་ཅེས་བྱས་སྟེ་དེར་ཆགས་སྐད། དེ་ལྟར་དབུས་གཙང་གི་མི་བཅུས་ཕྱིན་ཀྱང་དབུས་ནས་སུམ་པ་དང་གཙང་ནས་འོད་བརྒྱད་དཔུན་ཨུ་དཀར་སྟེ་བཞི་ལ་མཆེད་པ་མེད་པས་དབུས་གཙང་མི་དྲུག་དུ་གྲགས་ཤིང་དེའི་ཡང་རྦ་རག་གཅིག་དུ་བསྡེབས་ནས་མི་ལྔར་ཡང་གྲགས་སོ། །དབུས་གཙང་མི་བཅུ་ལ་མི་ཐེ་བ་འ་འབྲེའི་སྡེ་གཉིས་བྱུང་སྟེ་འ་ཞ་མགོ་བོ་ཆེའི་བུ་འ་ཡེ་ཤེས་གཡུང་དྲུང་གིས་ཁམས་སུ་སྡོམ་པ་ལེན་དུ་འགྲོ་བའི་ལམ་ལྷ་སར་ཕྱིན་པས་སྟེང་ཁང་དུ་འགྲོ་བའི་སྐས་ཀྱི་ཟུར་ལོགས་ལ་མགོན་པོའི་སྐུ་རི་མོར་ཡོད་པ་ཡར་རེས་རི་མོར་འདུག་པ་ལས་མར་འོངས་ཙ་ན་མགོན་པོ་དངོས་ཐོད་པའི་ནང་ན་མིའི་སྙིང་དང་ཁྲག་བསྲེས་པ་མི་རྩིབ་ཀྱི་ཐུར་མས་གསོལ་ཞིང་འདུག་སྟེ་ངས་ཁྱོད་ཀྱི་ཆོས་སྐྱོང་བྱ་ཡི་ཟླ་བ་གཅིག་ལ་འཁོར་བར་ཤོག་ཟེར་སྟེ་འ་ཚོ་མཐུ་ཆེ་བའི་རྒྱུ་མཚན་ཡང་དེ་ཡིན། དེར་ཁམས་སུ་བླ་ཆེན་གྱི་མཁན་བུ་ཀྲེ་པོ་མཆོག་བླ་ལ་བཀའ་དྲིན་ཞུས་པས་ངས་ཆུ་གཏོར་བཏང་ལ་འོང་གི་གསུང་ཙ་ན་དེ་ཁར་འདས། མཁན་པོའི་གསུང་དེ་ཀ་ལ་སྡོམ་པ་ཐོབ་པར་བཟུང་བས་དགེ་ཚུལ་ཆུ་གཏེར་མ་ཞེས་པ་བྱུང༌། འ་ཞ་དེས་སྣ་ནམ་འདྲེ་བརྔས་དང་འུ་ཡུག་མདའི་ར་ཤག་དང་དེའི་ལམ་སྟེགས་སྟག་གི་གནས་པོ་ཆེ་བཟུང༌། དེའི་མཁན་བུ་ཤེ་འུ་སྣ་ནམ་པས་ལྷན་གྱི་བ་སོ་ཐང༌། འཁོར་རེ་(ཉ༡༠ན)

― PTT001_Page_0478 ―

^{[མ་དཔེ་གཟིགས་ན་འདིར་གནོན།]}

[Full Size]

སྐྱི་སྒང༌། ཉང་རོ་བུད་མདོ། འཁོར་རེ་བ་ཁོར་ལྡན་གྱི་དྲེ་ཤོད་རྣམས་བཟུང༌། དེའི་མཁན་བུ་སོག་ཚུལ་ཁྲིམས་བླ་མས་ཀྱང་བ་སོ་ཐང་བཟུང༌། དེའི་མཁན་བུ་སྤང་འདུལ་འཛིན་གྱིས་སྟག་གི་སྤེན་ཅན་བཟུང༌། དེའི་མཁན་བུ་སྣུབས་རིན་ཆེན་གྲགས་ཀྱིས་ཁུ་ལུང་ལྷ་གྲལ་དང་འུ་ཡུག་གསལ་སྒང་སོགས་བཟུང་སྟེ་འ་ཚོའི་སྐོར་རོ། །ཡང་འབྲེ་གཞོན་ཚུལ་གྱིས་ཁམས་སུ་ཕྱིན་ཁྲི་ཁ་མཁར་སྣར་བླ་ཆེན་གྱི་མཁན་བུ་ཡ་ཟི་བོན་སྟོན་ལ་བཀའ་དྲིན་ཞུས་པས་དེར་བས་གསུངས་སྟེ་དེ་ཀར་འདས། དེ་ལ་སྡོམ་པ་ཐོབ་པར་བྱས་པས་དེར་བས་ཀྱི་བསྙེན་རྫོགས་སུ་གྲགས་དེ་ཕྱིར་ལོག་ནས་རྟ་ནག་ཕུའི་བྱ་ཚང་དང་ཤངས་ཀྱི་བྱེ་ཕུག་བཟུང༌། དེ་ནས་འཇད་ཀྱི་གནས་བརྒྱད་མཆེད་དེ་དེ་རྣམས་འབྲེ་ཚོ་ཡིན་ནོ། །དེ་ལྟར་དབུས་གཙང་གི་མི་དྲུག་འ་འབྲེ་དང་བཅས་པ་ལས་གྱེས་པ་ནི་སྨད་འདུལ་དུ་གྲགས་པ་ཡིན་ལ། སྡོམ་རྒྱུན་ནི། སྟོན་པ། ཤཱ་རིའི་བུ། དགྲ་གཅན་ཟིན། ཀླུ་སྒྲུབ། ལེགས་ལྡན་བྱེད། དཔལ་སྦས། ཡེ་ཤེས་སྙིང་པོ། བོ་དྷི་ས་ཏྭ་རྣམས་ཡིན། དེ་ཕྱིན་ལ་འདོད་ལུགས་དུ་མ་སྣང་སྟེ་མཁན་པོ་ཞི་བ་འཚོ། རྦ་རཏྣ། ལི་སངས་རྒྱས་ཡེ་ཤེས། ཀ་བ་འོད་མཆོག་གྲགས། དེས་གཡོ་སྨར་གཙང་གསུམ་ཞེས་འདོད་པ་དང༌། ཁ་ཅིག་ཞི་བ་འཚོའི་མཁན་བུ་ཀ་མ་ལ་ཤཱི་ལ། དེས་གཡོ་དགེ་འབྱུང་ཞེས་འཆད་པ་དང༌། རྦ་རཏྣ་མཁན་བུ་སྨར་གཡོ་གཙང་གསུམ་ཡིན་པར་འཆད་པ་ཡང་སྣང་ལ། ཁ་ཅིག་ཇི་ན་མི་ཏྲའི་མཁན་བརྒྱུད་དུ་འདོད་ཀྱང་བོ་དྷིས་ཏྭ་བོད་ཀྱི་གདུལ་སྐལ་ཡིན་པའི་རྟེན་འབྲེལ་ལས་དེའི་སྡོམ་རྒྱུན་དུ་གོར་མ་ཆག་གོ །ལྷ་ལུང་རབ་འབྱོར་དབྱངས་ལ་བླ་ཆེན་གྱིས་ཐུག་ཟེར་བའང་དག་པར་མ་མཐོང་ངོ༌། །བསྟན་པ་སྔ་ཕྱིའི་བར་དུ་དབུས་གཙང་དུ་བསྟན་པ་མེད་པ་ཐང་སྡེའི་ལུགས་ལ་ལྔ་བཅུ་རྩ་གསུམ། བུ་ལུགས་ལ་བདུན་བཅུ། འབྲོམ་ལུགས་པ་ལོ་དོན་བརྒྱད་སོང་བར་འདོད་ཏོ། །སྟོད་འདུལ་ནི་མངའ་རིས་སྟོད་ཏུ་མངའ་བདག་སྲོང་དེ་བསྟན་པ་ལ་ཆེར་དད་(ཉ༡༠བ)

― PTT001_Page_0479 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་མཁན་སློབ་མ་རྙེད་པས་ཡབ་སྲས་གསུམ་དཀོན་མཆོག་གི་དྲུང་དུ་རང་གིས་རྟགས་བླངས་སྟེ་ཁོང་རང་གི་མཚན་ཡེ་ཤེས་འོད་དུ་བསྒྱུར། པཎྜི་ཏ་དྷརྨ་པཱ་ལ་སྤྱན་དྲངས་སྟེ་སཱ་དྷུ་པཱ་ལ་གུ་ཎ་པཱ་ལ་པྲཛྙ་པཱ་ལ་སྟེ་པཱ་ལ་གསུམ་སོགས་མང་དུ་བསྙེན་པར་རྫོགས། པྲཛྙ་པཱ་ལའི་མཁན་བུ་ཞང་ཞུང་རྒྱལ་བའི་ཤེས་རབ། འདིས་པཎྜི་ཏ་མང་དུ་བསྟེན་ཞིང་མཁན་པོ་དང་བལ་པོའི་འདུལ་འཛིན་པྲེ་ཏ་ཀ་ལས་འདུལ་བའི་ལག་ལེན་ཐམས་ཅད་སྦྱངས། ཁ་ཆེ་ཛྙ་ན་ཤྲི་ལས་སོ་ཐར་མདོའི་འགྲེལ་པ་འདུལ་བ་བསྡུས་པ་མཉན་སྟེ་འགྱུར་བཅོས། ཁ་ཆེ་ཤྲཱི་སུ་བྷཱུ་ཏི་ཤཱནྟ་ལ་སུམ་བརྒྱ་པ་རྩ་འགྲེལ་མཉན་སྟེ་དགེ་བློ་དང་གཉིས་ཀྱིས་དག་པར་བཅོས་ནས་ལྷ་བྱང་ཆུབ་འོད་ལ་བཤད། འགྲེལ་པ་སློབ་ཕན་ཡང་བསྒྱུར། ས་མནྟ་ཤྲཱི་ཛཱ་ན་ལ་ཀཱ་རི་ཀ་ལྔ་བཅུ་པ་ཞུས་ནས་རྒྱ་གར་ཁ་ཆེ་བལ་པོ་སྟེ་དཔེ་གསུམ་དང་གཏུགས་ནས་བཅོས་ཤིང་བཤད། དགེ་ཚུལ་གྱི་ལོ་དྲི་དྷརྨ་པཱ་ལའི་རྒྱ་དཔེ་ལས་ཁ་ཆེ་ན་ར་ཡ་དེ་ཝ་ལ་ཞུས་ནས་བསྒྱུར་ཞིང་བཤད། དགེ་སློང་གི་ལོ་དྲི་ཇོ་བོ་རྗེ་དང་ནག་ཚོའི་འགྱུར་ལས་གསན། ཞང་ཞུང་པའི་སློབ་མ་ལོ་ཙཱ་བ་དཔལ་འབྱོར། འདིས་བལ་པོ་ཛ་ཡ་ཀ་ར་ལས་དགེ་སློང་གི་ཀཱ་རི་ཀ་དང་ཁ་ཆེ་པ་ར་ཧེ་ཏ་དང་མ་ཧཱ་ཛི་ན་ལས་དགེ་ཚུལ་གྱི་བསླབ་པའི་གཞི་མདོ་གསན། དེ་ལྟར་ན་དྷརྨ་པཱ་ལ་དང་པྲེ་ཏ་ཀ་ལག་ལེན་གྱི་རྒྱུད་པ་དང་གཞན་རྣམས་བཤད་པའི་རྒྱུད་པ་སྟེ་འདུལ་བའི་བཤད་སྒྲུབ་ཀྱི་བརྒྱུད་པ་གཉིས་ལྡན་ཡིན་ཞེས་ཞིང་མོ་ཆེ་པ་བྱང་ཆུབ་སེང་གེས་བྲིས་པའི་ཚིགས་བཅད་ལྷུག་པར་བཀྲོལ་བ་ཡིན་ལ་སྡོམ་རྒྱུན་ནི། དགྲ་གཅན་ཟིན། ཟག་ཟད་སྡེ། ཆོས་ཀྱི་སྡེ། དྷརྨ་པཱ་ལ། ཞེས་འདོད་པར་སྣང་ལ་སྟོད་འདུལ་འདི་ཤིན་དུ་དག་པར་གྲགས་ཀྱང༌། མཁན་རྒྱུད་འདི་ལ་བར་ནས་ཁ་ཡར་ཆད་པ་ཅིག་ཡིན་པར་དོགས་སོ། །སྤྱིར་འདུལ་བའི་བཤད་རྒྱུད་ནི། བསྟན་པའི་གཏད་རབས་བདུན་གྱི་འོག་དུ་ཕྱིར་མི་འོང་གློས་མི་འབེབས། ཡོན་ཏན་འོད། ཤཱཀྱ་འོད། ཆོས་ཀྱི་བཤེས་གཉེན་གཉིས། སེང་གེ་གདོང་ཅན། དེས་དཱ་ན་ཤཱི་ལ་དང་ཛི་ན་མི་ཏྲ་གཉིས་ཅེས་སྟོད་(ཉ༡༡ན)

― PTT001_Page_0480 ―

^{[མ་དཔེ་གཟིགས་ན་འདིར་གནོན།]}

[Full Size]

འདུལ་སྨད་འདུལ་གཉིས་མཐུན་པར་ཁས་ལེན་པར་སྣང་ལ་སྟོན་པ་འདས་ནས་ལོ་དགུ་བརྒྱ་ན་ཐོགས་མེད་བྱོན་པའི་ལོ་ཚིགས་དང་སྦྱར་ན་གློས་མི་འབེབས་དང་ཡོན་ཏན་འོད་ཀྱི་བར་དུ་འགའ་ཞིག་ཆད་པར་དོགས་སོ། །ཛི་ན་དཱ་ན་གཉིས་ལ་ཅོག་རོ་ཀླུའི་རྒྱལ་མཚན། དེ་ལ་གཡོ་སྨར་གཙང་གསུམ། དེ་ནས་བླ་ཆེན་པོ། གྲུམ་ཡེ་ཤེས་རྒྱལ་མཚན། ཀླུ་མེས་ཚུལ་ཁྲིམས་ཤེས་རབ། གཟུས་རྡོ་རྗེ་རྒྱལ་མཚན་སྟེ་སྨད་འདུལ་གྱི་བཤད་རྒྱུད་ཏོ། །སྟོད་འདུལ་ནི་ཛི་ན་དཱ་ན་གཉིས་ལ་ཤཱཀྱ་སེ་ན། དེ་ནས་དྷརྨ་པཱ་ལ། དེ་ལ་གྲུ་མེར་གྱི་མཁན་བུ་གྲ་ཕྱིའི་ཀླུབས་ལོ་ཙཱ་དང་སྐྱོགས་འདུལ་འཛིན་གཉིས། དེ་གཉིས་ལ་གཟུས་ཀྱིས་ཐུག་སྟེ་དེ་ཕྱིན་སྟོད་འདུལ་སྨད་འདུལ་གྱི་བཤད་རྒྱུན་གཅིག་དུ་གྱུར་པ་ཡིན་ནོ། །གཟུས་ལ་བུ་བཞིར་གྲགས་པ། འཛིམས་པ་ཤེས་རབ་འོད་དང་རོང་མཁར་ཕུག་གི་སྣེ་བོ་གྲགས་པ་རྒྱལ་མཚན་སྟེ་གཙང་དུ་བུ་གཉིས་ཀ་ཆུའི་སྤོ་ཆུང་ཚུལ་ཁྲིམས་བླ་མ་དང་རྒྱལ་གྱི་གླན་ཚུལ་བྱང་སྟེ་དབུས་སུ་གཉིས་སོ། །དེ་ལ་འཛིམས་པ་ནི་མངའ་རིས་པ་ཡིན། མཁས་པ་ཆེན་པོར་གྱུར་ནས་གཟུས་ལ་འདུལ་བ་ཉན་རས་འཛིམས་སུ་འདུལ་གྲ་བཙུགས་སློབ་མ་སྟོད་དུ་ཞང་ཞུང་རྒྱལ་ཤེ་འཛིམས་སུ་གཞོན་ཚུལ། དབུས་སུ་འབྲོ་སེང་དཀར་སྟོད་པ་ཡེ་ཤེས་བླ་མ། འདིས་འདམ་ཀོ་ཁྱིམ་བཏབ་པས་ཀོ་ཁྱིམ་པ་ཆེན་པོར་གྲགས། སྣེ་པོ་གྲགས་རྒྱལ་ནི་རོང་ལྷོ་རྩ་བ་ཡིན། མཁར་ཕུག་དང་དམུར་འདུལ་གྲ་བསྐྱངས། དེའི་སློབ་མ་སོག་ཚུལ་ཁྲིམས་བླ་མ་ཡུལ་ལྷ་རི་རྩ་བརྒྱད་པ་ཡིན། ལྷན་གྱི་བ་སོ་ཐང་དང་བྱེ་གླིང་སོགས་བཟུང༌། གླན་ཚུལ་བྱང་ཡུལ་རྒྱ་རི་མོ་ཅན་པ་ཡིན། འཕན་ཡུལ་རྒྱལ་དུ་བཤད་གྲ་བསྐྱངས། སློབ་མ་རྒྱལ་བ་གཡུང་དྲུང་དབང་ཕྱུག་གོ །སྤོ་ཆུང་ཡུལ་གཡོར་པོ་འབུམ་གླིང་པ། ཙན་ཐང་རོ་སྐམ། ཀ་ཆུ་རྣམས་བཟུང༌། སློབ་མ་མྱང་མཚན་པ་རིན་ཆེན་བླ་མ། དེའི་སློབ་མ་གམ་གསལ་བའི་སྙིང་པོའོ། །རྒྱ་འདུལ་འཛིན་ཆེན་པོ་དབང་ཕྱུག་བརྩོན་འགྲུས་ནི་ཡུལ་ཉང་སྟོད་མདར་བ་ཡིན། ཆུང་ངུ་ལ་ཡུམ་འདས་ནས་གནས་(ཉ༡༡བ)

― PTT001_Page_0481 ―

^{[མ་དཔེ་གཟིགས་ན་འདིར་གནོན།]}

[Full Size]

གཞི་བྱ་རོག་ཚང་དུ་ཕྱིན་པས་གཟུགས་བྱད་ལ་བརྙས་ནས་མ་ཚུད། དགའ་བ་གདོང་དུ་ཐལ་ཉལ་བྱས་ནས་ཀློག་བསླབས། མདོ་རྩ་ལ་ཀློག་དར་བྱས་པས་གཞུང་ཞར་ལ་ཟིན་སྟེ་སོག་ལ་འདུལ་བ་བསླབས། གཞན་ཡང་སྣེ་གླན་སྤོ་གསུམ། སོག་མྱང་ཀེ་གསུམ་ག་དང་བཅས་པ་ལ་སྦྱངས། སོ་བཞི་ནས་བརྒྱད་བཅུ་གྱ་ལྔའི་བར་དགའ་བ་གདོང་དང་ཆུ་མིག་ལུང་དུ་བཞུགས་ནས་འདུལ་གྲ་བསྐྱངས་སྟེ་གྱ་ལྔ་པ་ལྕགས་ཕག་ལ་གཤེགས། སློབ་མ་འདར་འདུལ་འཛིན། མཐའ་བཞི་བརྩོན་འབར། ཇོ་སྟན་ནག་པོ་དར་ཚུལ། རྨ་ཚོ་བྱང་ཆུབ་རྡོ་རྗེ་སྟེ་ཀ་བ་བཞི། སྣར་རྒྱ་ཚུལ་ཡོམ། སྣང་རྒྱ་རིན་ཚུལ། སྤྱི་ཐེར་པ་རིན་ཚུལ། ཁ་རུ་མེ་སྟོན། འཛིམས་པ་མེ་སྟོན། འཛིམས་པ་ཀློག་སྙིང༌། ལྡོག་པ་ཡེ་གྲགས། མངའ་རིས་པ་དཔལ་འབྱོར་ཤེས་རབ། སྨྱལ་པ་དར་མ་འོད་ཟེར་སོགས་སྟེ་གདུང་མ་བཅུ་རྣམས་སྔ་ཚར་ཡིན། བར་ཚར་ལ་སྐྱ་བོ་ཚུལ་འཕགས། མྱང་འདུལ་འཛིན། ཕྱི་ཚར་ལ་བྲག་དམར་རྡོ་རྗེ་ཕུར་བུ། བརྡ་འདུལ་འཛིན་སོགས་བྱོན་ཞིང་གཞན་ཡང་སྐྱི་ཤོད་པ་ཚུལ་འཕགས་དང་བྱ་འདུལ་སོགས་བྱོན་པ་ལས་འདར་གྱི་ཤབ། ལྷ་དར། ར་ས། བུ་དོང་སོགས་སུ་བཤད། མཐའ་བཞིས་མྱང་རོ་འུམ་ཕུག་བཟུང་སྟེ་མཁས་པ་རིན་སྐྱབས་སོགས་བྱུང༌། ཇོ་སྟན་ནག་པོ་དར་ཚུལ་ལོ་དྲུག་བཅུ་ལ་རབ་ཏུ་བྱུང༌། ཀློག་ཡིག་བསླབས། སྡེ་སྣོད་གསུམ་དང་ཁྱད་པར་འདུལ་བ་ལ་མཁས་པར་གྱུར་སྟེ་ཡར་ཀླུངས་ཚ་རོང་དང་ལུ་གུ་དོར་བཤད་པས་ཚ་རོང་པར་གྲགས། སློབ་མ་ཤ་མི་འདུལ་འཛིན་སོགས་བྱུང༌། ཤ་མི་ལ་བུ་བཞི་སྟེ་ཀླུབས་དཀར་འདུལ་འཛིན་ཇོ་སྟན་པང་ཚུལ་ཝལ་ཏི་ཇོ་སྲས་ཐག་མ་རྡོར་གཞོན། ཀླུབས་དཀར་གྱིས་རྒྱ་དུར་པང་ཚུལ་གྱིས་ཡང་དབེན་བཏབ་སྟེ་ལྷག་རུ་དང་རྩིབས་དཀར་བ་སོགས་ཡར་ལུངས་སུ་འདུལ་གྲ་མང་དུ་བྱུང་ཞིང་གཡམ་བཟང་ཆོས་རྗེས་གྲགས་པ་སྣུབས་འདུལ་འཛིན་དང་གྲབ་མི་དང་མ་ཚུལ་ཁྲིམས་ཀྱང་འདིའི་མཁན་བུ་ཡིན། ཝལ་ཏིས་སྐྱོར་མོ་ལུང་བཏབ་ཐག་མ་བས་འབྲི་ཁུང་གི་མཁན་པོ་ཡང་མཛད་ཝལ་ཏིས་(ཉ༡༢ན)

― PTT001_Page_0482 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱང་ཐུག་སློབ་མ་ཐོག་མ་ཀ་ཆེན་རྣལ་འབྱོར་བྱང་སེང༌། གཞུབ་སྟོན་ཡེ་ཤེས་སོགས་ཀྱི་བྱང་སེང་གིས་འཕན་ཡུལ་གྲོ་ས་བཏབ་སྟེ་ཕྱིས་སུའང་དམར་སྟོན་དཔལ་ལྡན་རིན་ཆེན་དང་དམར་སྟོན་རྒྱ་མཚོ་རིན་ཆེན་སོགས་ཀྱིས་འདུལ་བའི་བཤད་པའི་སྲོག་བཟུང་ངོ༌། །བྱང་སེང་གི་སློབ་མ་ཀ་བ་སྟོན་ནམ་གྱིས་ཕྱའི་ཕུར་གྲགས་ཚབ་བཏབ། ཀ་ཆེན་ལས་ཇོག་པོ་དགོན་སར་སོགས་དབུར་སྟོད་དང་འཕན་ཡུལ་དུ་འདུལ་གྲ་དུ་མ་བྱུང༌། ཝལ་ཏི་དང་ཀླུབས་དཀར་གྱི་སློབ་མ་གྲབ་མི་འདུལ་འཛིན། དེའི་སློབ་མ་རྒྱ་ངུར་བ་དར་མ་ཡེ་ཤེས་དང་ཟངས་ཆེན་པ་དར་མ་བསོད་ནམས་ཡིན། མཁན་སློབ་དེ་གཉིས་ཀྱིས་བསྙེན་པར་རྫོགས་པ་མཚོ་སྣ་པ་ཆེན་པོ་སྟེ་ལྷ་རི་སྡེ་སྣོད་འཛིན་པའི་སྐྱེ་བར་མཚོ་སྣ་སྟོད་ཏུ་འཁྲུངས། ལོ་བརྒྱད་ལ་ངའི་བླ་མའི་དྲུང་དུ་འགྲོ་ཟེར་ནས་ཟངས་ཆེན་པའི་དྲུང་དུ་བྲོས་ནས་ངའི་ཕ་མས་སླེབ་པར་མེད་པས་རབ་ཏུ་འབྱིན་པར་ཞུ་ཟེར་ནས་རབ་ཏུ་ཕྱུང་སྟེ་མཚན་ཤེས་རབ་བཟང་པོར་བཏགས། ཕྱིས་རྒྱ་དུང་བས་མཁན་པོ་བྱས་སྟེ་བསྙེན་པར་རྫོགས། གསུང་རབ་མཐའ་དག་དང་ཁྱད་པར་སྤྱོད་པའི་ཕྱོགས་ས་སྡེ་ཡན་ལག་དང་བཅས་པ་ལ་འདི་ལས་མཁས་པ་བོད་དུ་མ་བྱུང་བར་གྲགས། མནལ་ལམ་དུ་སློབ་དཔོན་ཡོན་ཏན་འོད་ལ་འདུལ་བ་མདོ་རྩ། ཞི་བའི་ལྷ་ལ་སྤྱོད་འཇུག་དབྱིག་གཉེན་ལ་མཛོད། ཕྱོགས་གླང་ཆོས་གྲགས་ལ་ཚད་མ་མདོ་དང་རྣམ་འགྲེལ། ཟླ་བ་གྲགས་པ་ལ་གསང་འདུས། རྗེ་བཙུན་བྱམས་པ་ལ་མངོན་རྟོགས་རྒྱན་གསན། སྒང་ཐོག་དང་གླིང་ཆེན་ཕུལ་ནས་བཞུགས་པའི་ཚེ་མགོན་པོ་ཏྲཀྴད་ཀྱིས་ཁྱེད་ཀྱིས་འདུལ་བའི་འགྲེལ་པ་མཛད་པར་ཞུ། དེ་ལ་ཐོས་བསམ་ཉམས་ལེན་བྱེད་པ་ཐམས་ཅད་ངས་བུ་བཞིན་དུ་སྐྱོང་ཞེས་ཞལ་གྱིས་བཞེས་གཉོས་ཆེན་པོའི་གདན་སར་གྲ་འོང་དུ་བཞུགས་སྟེ་འདུལ་བའི་རྣམ་བཤད་ཉི་མའི་འོད་ཟེར་དང་མདོ་རྩའི་མཆན་འགྲེལ་སོགས་བསྟན་བཅོས་མང་དུ་མཛད་ཅིང༌། ཐིག་ཕྱི་བ་རྒྱལ་སྲས་བཟང་པོ། (ཉ༡༢བ)

― PTT001_Page_0483 ―

^{[མ་དཔེ་གཟིགས་ན་འདིར་གནོན།]}

[Full Size]

མོན་ཁྲབ་པ་ཚུལ་ཁྲིམས་བཀྲ་ཤིས། སྒུ་རབ་པ་གོང་མ་ཆོས་རྒྱལ་བཟང་པོ། སོགས་ཁ་བ་དགེ་འདུན་བཟང་པོ། ཁང་སར་སྟེང་པ་བཟང་པོ་རྒྱལ་མཚན། རི་སྟེང་པ་རྒྱལ་མཚན་བཟང་པོ། མཁན་ཆེན་ཆོས་སྐྱབས་དཔལ་བཟང་སོགས་སློབ་མ་མང་དུ་བྱུང༌། དགུང་ལོ་དོན་གཉིས་སྦྲུལ་ཟླའི་ཉེར་དྲུག་ལ་དགེ་འདུན་བསྡུས་སྟེ་རབ་བྱུང་རྣམས་ཀྱིས་བསྟན་པའི་ཁུར་ཆེན་པོར་བཞེས་དགོས། བསྟན་པའི་ཁུར་བཞེས་ན་ལས་འབྲས་ཁྱད་དུ་མ་གསད། བསྟན་པའི་རྩ་བ་སོ་ཐར་ཡིན་པས་བསླབ་པ་རྣམས་འདུལ་བ་ནས་ཇི་ལྟར་བཤད་པ་བཞིན་སྲུངས། དེའི་སྟེང་ནས་ཉིན་རེ་ལ་གསོ་སྦྱོང་ཆག་མེད་བྱང་ཆུབ་སེམས་དཔའི་སྡོམ་པ་ཆག་མེད་དུ་ལེན་ཞིང་བློ་སྦྱོང་ཐུན་དྲུག་དུ་སྒོམ་དགོས། དེའི་སྟེང་ནས་སྡེ་སྣོད་གསུམ་དང་ཁྱད་པར་བྱང་ཆུབ་སེམས་དཔའི་སྤྱོད་ཕྱོགས་ཀྱི་གཞུང་ཨ་ཏི་ཤའི་གདམས་པ་རྣམས་ལ་ཐོས་བསམ་དང་ཉམས་ལེན་ཉིན་མཚན་འདའ་བར་འབུངས། སོ་ཐར་དང་བྱང་སྡོམ་སྲུང་བ་ལ་པང་པའི་མི་འདོར་བ་ལྟ་བུའི་གཉེན་པོ་བསྟེན། དེ་རྣམས་ཇི་ལྟ་བར་བསྒྲུབས་ན་སངས་རྒྱས་བྱང་སེམས་བླ་མ་དང་བཅས་པའི་དགོངས་པ་རྫོགས། ང་ལ་བླ་མར་བཟུང་བ་ཡིན། ངེད་རང་ཆོས་པར་ཁས་ལེན་པ་རྣམས་ལ་འཇིག་རྟེན་གྱི་བྱ་བ་སྐད་ཅིག་མ་གཅིག་ཀྱང་མ་མངགས་སོ་ཞེས་ཡང་ཡང་གདམས་སྟེ་སྐུ་འདས། སྐྱེས་བུ་དམ་པ་འདིས་ནི་ཕྱི་རབས་སུ་འདུལ་བའི་བསྟན་པ་མིག་ཕྱེ་བ་ལྟར་མཛད་པ་ཡིན་སྟེ་འདིས་མཛད་པའི་འདུལ་བའི་བསྟན་བཅོས་རྣམས་ཀྱི་དྲིན་ལས་དེང་སང་ཡང་ཆ་ཙམ་གནས་ཅིང་བསྟན་པ་རིས་མེད་དུ་ཚད་མར་གྱུར་པ་ཡིན་ལ་བདག་གི་བླ་མ་རྒྱལ་བ་ཀརྨ་པ་བརྒྱད་པའི་ཞབས་ཀྱིས་ཀྱང་འདིའི་ཡིག་ཆ་ཚད་མར་མཛད་ནས་མདོ་རྩའི་ཊཱིཀྲ་ཆེན་འདུལ་བའི་ཆུ་བོ་མཐའ་དག་གཅིག་དུ་འདུ་བའི་རྒྱ་མཚོ་འདི་མཛད་པ་ཡིན་ནོ། །རྨ་ཚོ་བྱང་རྡོར་གྱིས་རྒྱའི་གྲ་པ་ལྔ་བརྒྱ་ཙམ་ཁྲིད་ནས་དབུས་སུ་བཤད། དེའི་སློབ་མ་བྱ་འདུལ་ཆེན་པོ་བརྩོན་འགྲུས་འབར་ཡིན་སྟེ་གཙང་རོང་གི་གཡུང་དུ་ལྕགས་ལུག་ལ་(ཉ༡༣ན)

― PTT001_Page_0484 ―

^{[མ་དཔེ་གཟིགས་ན་འདིར་གནོན།]}

[Full Size]

འཁྲུངས། འབྲེ་ཤེས་རབ་འབར་ལས་རབ་ཏུ་བྱུང༌། ཐོག་མར་སོག་དང་ཕྱིས་རྒྱ་དང་རྨ་ཆོ་ཟླ་ཟུར་དུ་བྱས་པ་ལ་འདུལ་བ་སྦྱངས། རྒྱལ་ཚ་ཞང་ཡེ་ལ་དབུ་ཚད། ཟངས་དཀར་ལོ་ཙཱ་ལ་ཡོ་ག་སྟོད་ལུང་པ་ལ་བཀའ་གདམས་གསན། ཟུལ་ཕུར་འདུལ་གྲ་བསྐྱངས། པེ་ཀར་གྱིས་བཙུན་ཆུང་དུ་སྤྲུལ་ནས་ཞབས་ཏོག་བྱས་པས་འདུལ་བ་དང་འགལ་བ་ན་བཟའི་སྤུ་ཕྱིར་བསྟན་པ་གཅིག་ལས་མ་མཐོང་བས་དད་དེ་བྱ་ཊཱིཀྲ་འཛིན་པ་རྣམས་ལ་གྲོགས་བྱེད་པར་ཞུས། ཕག་གྲུ་པའི་དགེ་སློང་གི་མཁན་པོ་མཛད། ལོ་དགུར་ཚོགས་པ་བསྐྱངས་ནས་མཐར་སྒྲུབ་པ་སྙིང་པོར་མཛད་དེ་དོན་དྲུག་པ་ལ་ཟུལ་ཕུར་གཤེགས། སློབ་མ་འགྲོ་དོན་ནུས་པ་དོན་དྲུག་ཙམ་བྱུང༌། དེ་ལས་རྩིབས་པ་གཞོན་སང་གིས་ཉང་སྟོད་མཁར་ལུང་དུ་འདུལ་གྲ་བསྐྱངས། དབོན་པོ་ཆོས་དབང་ལ་སོགས་པ་ཚར་རྩིབས་པའི་མཁན་བུ་དཔལ་ལྡན་གྲོས་ཀྱིས་སྣར་ཐང་བཟུང༌། བ་ཕྱར་སྟོད་ནག་གིས་ལྷས་མོ་ཆེ། སྟག་ཚལ། སྨོན་གྲོ། རོང་མཁར་ཕུག་སོགས་སུ་བཤད། དེའི་སློབ་མ་མངའ་རིས་དགྲ་བཅོམ་གྱིས་པ་གྲོ་བྲག་ནག་དང་ཟམ་ཚེར་བཏབ། དེའི་སློབ་མ་མཆིམས་ན་མཁའ་གྲགས་དང་གྱང་མོ་ཆེ་བ་སོགས་བརྒྱད་བྱུང༌། གྱང་མོ་ཆེ་བ་ལ་སེང་གེ་ཟིལ་གནོན་གྱིས་ཐུག །གཙང་རོང་བ་ལྕེ་འདུལ་འཛིན་གྱིས་དུར་མིག་ལ་སོགས་པར་བཤད། དཔལ་ཆེན་ཡེ་ཤེས་གཡུང་དྲུང་དང་དེའི་སློབ་མ་གཉན་སྟོན་དགའ་བ་གདོང་པ་སོགས་བྱུང༌། སངས་རྒྱས་གཞུང་པ། ཨར་དགེ་བ། རི་ཟན་རྡོག་པ། ནགས་མོ་བ། བཀྲ་ཤིས་སྒང་པ་སོགས་ཀྱང་ཟུལ་ཕུའི་ཡན་ལག་གོ །བྱ་འདུལ་གྱི་སྣག་དཔོན་རོག་ཆོས་དབང་གིས་ཟུལ་ཕུའི་གདན་ས་མཛད། དེ་ནས་ཆོས་བྱང་ན་ཟ་ཕྲེང་གསོལ། འདི་ལ་བྱང་རྡོར་གཉིས་ཀྱིས་འདུལ་བ་ཉན་ཞིང༌། འགྲོ་མགོན་འཕགས་པའི་དགེ་ཚུལ་གྱི་སློབ་དཔོན་ཡིན། དེའི་སློབ་མ་ཆོས་ཀྱི་བརྩོན་འགྲུས། དེའི་སློབ་མ་ཆོས་གྲགས་རིན་ཆེན་དཔལ་སྟེ་གཉིས་ཀས་གདན་ས་བསྐྱངས། དེའི་སློབ་(ཉ༡༣བ)

― PTT001_Page_0485 ―

^{[མ་དཔེ་གཟིགས་ན་འདིར་གནོན།]}

[Full Size]

མ་ཀ་བཞི་པ། དེའི་སློབ་མ་བསོད་ནམས་གྲགས་པ་དང་གྲུབ་པ་དཔལ། དེ་གཉིས་ལ་བུ་རིན་པོ་ཆེས་འདུལ་བ་གསན་ནོ། །རྒྱའི་བར་ཚར་སྐྱེས་བོ་ཚུལ་འཕགས་ཀྱི་བུ་ཆེན་འདར་ཚུལ་ཁྲིམས་རྒྱལ་པོ། དེ་ནས་རིམ་བཞིན་སྟོད་ཚུལ་ཁྲིམས་འབུམ། ཉི་སྟེང་པ་བློ་གྲོས་གྲགས། རྒྱལ་ཚུལ་ཁྲིམས་གྲགས། སྣེ་མོ་བ་གྲགས་པ་སྨོན་ལམ། ནེལ་པ་པཎ་ཆེན་སོགས་ནེལ་པ་རྗེས་འབྲང་དང་བཅས་པ་བྱུང༌། ཕྱི་ཚར་བྲག་དམར་རྡོ་རྗེ་ཕུར་བུ་ལ་སྟོད་པ་དྷརྨ་ཞེས་གྲགས་པ་དེས་གྲོམ་པ་བྲག་དམར་དུ་བཤད་པའི་སློབ་མ་ཞང་ཞི་མཛེས་སོགས་བྱུང༌། བརྡ་འདུལ་གྱི་སློབ་མ་བཤེས་གཉེན་ཤཱཀྲ་གྲུབ་དང་བརྡ་འདུལ་ཕྱི་མས་ཤབ་སྟོད་སོགས་སུ་བཤད། ཆུ་མིག་གི་རྔོག་བཙུན་དཀར་མོས་ཞུས་ནས་ཆུ་མིག་སྡེ་སྐོར་གྱི་མཁན་པོ་མཛད། བརྡའི་སློབ་མ་སྐྱི་མ་གྲགས་ཚུལ་གྱིས་དྲང་པོ་ལུང༌། ཆག་ཉི་མས་ཤངས་སྲེག་ཤིང༌། མཐའ་སྟོན་གྱིས་མྱང་རོ་བླ་རིང་དུ་གྲ་བསྐྱངས། ཤཱཀྲ་གྲུབ་ཀྱིས་བརྡའི་གདན་ས་མཛད་པ་ལ་ཀློག་སྐྱ་དཔལ་འབྱོར་གྱིས་གསན་ནས་དོན་མོ་རིར་བཤད། སློབ་མ་སྐྱེལ་ནག་ཞང་ཤེར་འོད། དབོན་པོ་ཁྲི་བརྟན་སེང་གེ་ཤཱ་རྡོར་དང་བཞི་བྱུང༌། ཕྱིས་ཤེས་རབ་འོད་ཀྱིས་གདན་ས་མཛད་དེ་ཆུ་མིག་འདུལ་གྲ་བ་རྣམས་བྱུང༌། ཡང་ཁ་ཆེ་པཎ་ཆེན་གྱིས་སྣར་ཀླས་མོ་ཆེར་དབྱར་གནས་མཛད། འདུལ་བ་མེ་ཏོག་ཕྲེང་རྒྱུད་གསུངས་པ་ལ་སེང་གེ་ཟིལ་གནོན་དང་ཤངས་པ་ཇོ་སྟན་གྱིས་གསན་ནས་སོ་སོར་ཊཱིཀ་མཛད། སེང་གེ་ཟིལ་གནོན་ལ། ཚད་མའི་སྐྱེས་བུ། དེ་ལ་བུ་རིན་པོ་ཆེས་གསན་སྟེ་གླིང་འབུམ་ཊཱིཀ་ཆེན་སོགས་མཛད་ཏོ། །འདུལ་བ་མེ་ཏོག་ཕྲེང་རྒྱུད་འདི་ལ་ཕྱིས་ཀུན་མཁྱེན་རོང་པོ་སོགས་ཀྱིས་དགྲ་བཅོམ་པས་བརྩམས་པ་དང་ཚིགས་བཅད་བཟང་པོར་ཡོད་པ་དང་གླེང་གཞི་རྩ་བས་ཟིན་པ་སྟེ་ཁྱད་ཆོས་གསུམ་ཡོད་ཅེས་རྩལ་དུ་བཏོན་ཡང་དགྲ་བཅོམ་པ་ལས་བྱང་ཆུབ་སེམས་དཔའ་བསམ་པ་རྒྱ་ཆེ་བའི་རྟེན་འབྲེལ་གྱིས་ད་དུང་མདོ་རྩ་ཁོ་ན་དར་རོ། །པཎ་ཆེན་སྡོམ་རྒྱུན་ནི། ཁྲོ་ཕུ་ལོ་ཙཱ་བ་ཚུལ་ཁྲིམས་ཤེས་རབ་རྣམ་ཐོས་སྲས་བྲན་དུ་འཁོལ་བ་དེས་ཁ་ཆེ་བསོད་སྙོམས་པ་སྤྱན་དྲངས་སྟེ། པཎ་ཆེན་དེ་ནི་ནུབ་ཕྱོགས་ཁ་ཆེའི་ཡུལ་ཁྲི་བརྟན་གྱི་གྲོང་པྲ་ཝ་སུ་རར་ཡབ་རྒྱ་མཚོའི་དེད་དཔོན་ཛམ་ནག་གྲུབ་པ་སམ་ཀ་ཡའི་སྲས་སུ་འཁྲུངས། མཚན་ཛ་ཤོ་དྷ་(ཉ༡༤ན)

― PTT001_Page_0486 ―

^{[མ་དཔེ་གཟིགས་ན་འདིར་གནོན།]}

[Full Size]

རར་བཏགས། ལོ་བཅུ་ནས་སྒྲ་ཚད་གཟོ་གསོ་མཐའ་དག་ལ་སྦྱངས་སྟེ་གཞན་ལུགས་ཚར་བཅད་ནས་རྒྱལ་པོས་ཅོད་པན་བཅིངས། དགུང་ལོ་ཉེར་གསུམ་ལ་རབ་ཏུ་བྱུང་ཚེ་རྣལ་ལམ་ན་བྱང་ཆུབ་ཀྱི་ཤིང་ལོ་སྤྱི་བོར་སྤུངས་སྟེ་བྱུང༌། རབ་ཏུ་བྱུང་མ་ཐག་བྱང་ཆུབ་ཆེན་པོ་དང་བྱམས་པ་དང་སྒྲོལ་མ་གསུམ་ལ་བྱང་ཆུབ་ཀྱི་སེམས་ཀྱིས་ཟིན་པས་ཞག་རེ་ལ་ཆོས་སྤྱོད་བཅུ་མ་ཆག་པར་བྱེད་པ། ནོར་རྫས་ཅི་ཡང་བདག་དུ་མི་འཛིན་པ། གནོད་ལན་དུ་ཕན་འདོགས་པ། རྐྱེན་ཅི་འབྱུང་ཡང་ཐབས་གཞན་མི་འཚོལ་བར་ཕ་རོལ་ཏུ་ཕྱིན་པའི་དོན་སྒོམ་པ་སྟེ་བཞིའི་དམ་བཅའ་མཛད། བྱམས་པས་ཤར་ཕྱོགས་སུ་སོང་ལ་རིག་པ་མཐར་ཕྱིན་པར་གྱིས་ཅིག་པར་ལུང་བསྟན། ཞི་འབྱུང་སྦས་པ་དང་དབྱངས་སྙན་དང་བློ་སྦས་སོགས་བསྟེན་ནས་གསུང་རབ་ཐམས་ཅད་སྦྱངས་སྟེ་དབྱིག་གཉེན་ལྟར་ཏིལ་མར་གྱིས་ཟངས་བཀང་བར་སྐུ་དཔྱིངས་སྟེ་ཞག་དུ་མར་འབུམ་སྡེ་དུ་མ་ཞལ་ཐོན་མཛད། ཕར་ཕྱིན་གསན་པའི་རྣམ་རྫོགས་སྦྱོར་བའི་ཚེ་མདུན་གྱི་སྤྲིན་ཕུང་ལས་སྟོང་ཉིད་ཀྱི་སྒྲ་སྒྲོག་པ་གསན་སྟེ་ཏིང་ངེ་འཛིན་མི་མཚམས་པ་དཔག་མེད་སྐྱེས། སུམ་བཅུ་པ་ལ་མཁན་པོ་ཞི་འབྱུང་སྦས་པ་སོགས་བཅོ་བརྒྱད་ཀྱི་ཚོགས་ལས་བསྙེན་པར་རྫོགས་སྟེ་སྟན་གཅིག་དང་བསོད་སྙམས་པའི་སྦྱངས་ཡོན་བཟུང༌། པཎ་ཆེན་དེ་ཝ་པུཎྱེས་རྡོ་རྗེའི་ཐེག་པར་སྨིན་གྲོལ་དུ་མཛད་དེ་བདེ་མཆོག་དང་དུས་ཀྱི་འཁོར་ལོའི་ཞལ་བསྟན། ཙནྡནའི་ནགས་སུ་འཇམ་དབྱངས་དང་རྟ་མགྲིན་དང་སྒྲོལ་མའི་གསུང་ཐོས། སངས་རྒྱས་རིམ་གྲོ་པ་ཟུང་དང་བཅས་པས་ཀླུའི་རྒྱལ་པོ་ལ་བསོད་སྙོམས་མཛད་པ་དང་བྱམས་པ་ལ་རྒྱལ་པོ་དགེ་དབང་གིས་བསིལ་ཡབ་གཡོབ་པ་གཟིགས་ཤིང་ཆོས་བདུན་གསན། མར་མེའི་རྩེར་བྱམས་པ་དང་སྒྲོལ་མ་དང་ཐུབ་དབང་གཟིགས། རྡོ་རྗེ་གདན་དུ་མཆོད་པ་མཛད་པ་ལས་སྤོས་སྤྲིན་གྱི་དུད་པ་སྤྲིན་དུ་འཁྲིགས་པས་ཞག་བདུན་དུ་ན་མཁའ་ཁྱབ་པ་ལས་གློག་དང་ཟུང་འཇུག་སྒྲུབ་པའི་ཆོས་ཀྱི་སྒྲ་བྱུང་ཞིང་ཏིང་ངེ་འཛིན་ཁྱད་པར་ཅན་བརྙེས། རི་མོའི་བུད་མེད་ཀྱིས་འོ་མའི་བསོད་སྙོམས་ཕུལ་བ་(ཉ༡༤བ)

― PTT001_Page_0487 ―

^{[མ་དཔེ་གཟིགས་ན་འདིར་གནོན།]}

[Full Size]

འབྲུ་གསུམ་གྱིས་བྱིན་གྱིས་བརླབས་པ་སྦྲང་རྩི་ལྟ་བུའི་བདུད་རྩིར་གྱུར་པ་དང༌། འབྲོག་པས་འོ་མའི་བསོད་སྙོམས་ཕུལ་བའི་པྲིས་མ་ལ་བཀྲ་ཤིས་ཀྱི་རྟགས་བརྒྱད་ཤར། ཝ་ར་ཎ་སིའི་གནས་སུ་སངས་རྒྱས་ངང་པའི་གཟུགས་ཀྱིས་མ་ཧེ་ལ་གནས་པ་ཅིག་གིས། སྒྱུ་མ་ལྟ་བུར་གཟུང་དོན་མེད། །རྨི་ལམ་ལྟ་བུར་འཛིན་དོན་མེད། །ཚོགས་གཉིས་དབྱེར་མེད་ལམ་གྱི་མཆོག །སྟོང་ཉིད་སྙིང་རྗེའི་སྙིང་པོ་ཅན། །ཞེས་གསུངས་པ་གསན་སྟེ་སེམས་སྐྱེད་ཀྱང་ཞུས། བྱང་ཆུབ་ཀྱི་སྤྱོད་པ་རླབས་ཆེན་ཡང་གཟིགས། ཆོས་དེ་དག་རང་གི་ཁྲག་གིས་པགས་པ་ལ་བྲིས་སྟེ་སྣོད་ལྡན་ལ་བསྒྲགས། ཉི་སྦས་དང་ཟླ་སྦས་ལ་བྱམས་ཆོས་གསན་པས་ཐེག་པ་སྣ་ཚོགས་ཀྱི་དོན་དགོངས། བྱམས་པ་ལས་རྣམ་ཀུན་གྱི་སྐབས་ཀྱི་ཆོས་བདུན་གསན། འཇམ་དབྱངས་རྟ་མགྲིན་སྒྲོལ་མ་གསུམ་རང་རང་གི་རྩ་སྔགས་ཟླ་བ་གསན། ཝ་ར་ཎ་སིའི་འདམ་བུའི་ཁྲོད་ན་རྟེན་བྱིན་རླབས་ཅན་ཞིག་ཡོད་པ་མཇལ་བས་དེས་དངོས་སུ་ཆོས་གསུངས། དེའི་ཚེ་ལྔས་རྩེན་གྱི་བུས་གླུ་བླངས་ཤིང་རྔ་བརྡུངས། ཨོ་ཏྱནྟ་པུ་རིར་བྱང་ཆུབ་ཆེན་པོས་ཞལ་འཛུམ་པ་དང་སྒྲོལ་མས་མཆོད་རྫས་དངོས་སུ་བཞེས། མུ་སྟེགས་པ་དང་རྩོད་ཚེ་ཉིན་མོ་རྩོད་ལན་མ་ཐེབས་པ་མནལ་ལམ་དུ་སྒྲོལ་མས་ལུང་བསྟན་ནས་རྒྱལ། རྩོད་པ་ལས་རྒྱལ་བའི་ཡོན་རྒྱལ་པོས་ཕུལ་བ་རྣམས་ལས་རྟེན་ཁྱད་པར་ཅན་གསུམ་བཞེངས། མཆོད་རྟེན་མཚོན་ཆའི་འཁོར་ལོ་ཅན་ལ་གདུགས་སུས་འཁེལ་བ་ཀུན་གྱིས་བླ་མར་འཛིན་པ་ལས་ཁྲོ་གཉེར་ཅན་གྱིས་བྱིན་གྱིས་བརླབས་པས་བྱ་རོག་གིས་གྲོགས་བྱས་སྟེ་ཆོས་རྗེས་ཁེལ། ལུས་ཀྱི་བྱ་བ་རེ། ངག་གིས་གཞུང་རྩོམ་པ། ཡིད་ཀྱིས་དྲི་བ་དགུའི་དོན་སེམས་པ་རྣམས་དུས་དེར་ནུས་པས་ཡོངས་སུ་གྲགས་པའི་པཎ་ཆེན་དུ་གྱུར། བི་ཀྲ་མར་དབང་བསྐུར་མཛད་པ་ན་བུམ་ཆུ་བདུད་རྩིར་གྱུར་པས་བུམ་པ་གང་བ་ཉིན་ཕྱེད་དུ་ལོངས་སྤྱད་པས་མ་ཟད། རྒྱ་ནག་གི་རྒྱལ་པོའི་ཕོ་ཉས་སྤྱན་དྲངས་ཚེ་དགེ་སློང་དཀར་ཞིང་དུལ་བ་ཞིག་གིས་ད་ལྟ་འགྲོ་བའི་དུས་མ་ཡིན་མ་འོངས་པ་ན་སོང་ཞིག་ཞེས་བསྟན། ཁ་ཆེར་གྲོགས་པོ་ཅིག་གིས་གྲང་བའི་ཚེ་བསོད་སྙོམས་(ཉ༡༥ན)

― PTT001_Page_0488 ―

^{[མ་དཔེ་གཟིགས་ན་འདིར་གནོན།]}

[Full Size]

མཛད་པ་འོ་བརྒྱལ། འཚོ་བ་ངས་འབུལ་ཟེར་བ་ན་སྒྲོལ་མས་ཁྱོད་སངས་རྒྱས་ཀྱི་བསྟན་པ་མི་འཛིན་ནམ་གསུངས་པས་བསོད་སྙོམས་མཛད། ཐོ་རེངས་ཀྱི་བརྡ་སྒྲས་རྐྱེན་སྟེ་དགའ་ལྡན་གྱི་གནས་གཟིགས་ཤིང་བྱམས་པ་ལས་དད་པ་སྙིང་རྗེ་ཤེས་རབ་བརྩོན་འགྲུས་སྟེ་ཆོས་བཞི་གསན། རྡོ་རྗེ་གདན་དུ་ཅུང་ཟད་བསྙུངས་ནས་གཟིམས་པ་ན་དོན་ཞགས་དཀར་པོ་ཕྱག་བརྒྱད་པ་ལ་སྒྲོལ་མ་ཁྲོ་གཉེར་ཅན་རྟ་མགྲིན་ནོར་བཟང་རྣམས་ཀྱིས་བསྐོར་བ་གཟིམས་པ་ཅིག་གཟིགས། བཞེངས་པ་ན་དེ་རྣམས་ཀྱང་བཞེངས་པར་གཟིགས་ནས་སྒྲུབ་ཐབས་མཛད་པ་ནི་དོན་ཞགས་ཁ་ཆེ་མར་གྲགས། རྡོ་རྗེ་གདན་ལ་རྒྱལ་པོ་བྷ་མི་དེ་ཝའི་དམག་ཡོང་ཟེར་ནས་བལྟར་བྱོན་ནས་རྒྱང་གྲགས་ཙམ་དུ་བསོད་སྙོམས་མཛད་ནས་ཕྱིར་ལོག་ཚེ་མ་ཧཱ་བོ་དྷི་མདུན་ན་བྱོན་འདུག་ལྷུང་བཟེད་བཞག་ལ་ཕྱག་བྱ་སྙམ་པ་ན་དེ་ཕྱི་འགྲོས་ཀྱིས་ཇེ་རིང་ལ་སོང༌། ཕྱི་བཞིན་བྱོན་པས་བྱང་ཆུབ་ཆེན་པོའི་སྤྱན་སྔར་སླེབས། སླར་བྱོན་པས་ནགས་ནའང་སྔ་མ་བཞིན་འདུག་སྟེ་མཚན་ཉིད་ནི་མི་ཤེས་གསུངས། དེའི་ཚེ་རི་བྱ་རྐང་ལ་གྲུབ་ཐོབ་མང་དུ་ཡོད་པ་དང་སིངྒྷ་གླིང་ན་དགྲ་བཅོམ་པ་བཞུགས་པ་ལ་རྒྱལ་པོས་བསྙེན་བཀུར་མང་དུ་སྐྱེལ་བ་ན་དེ་དག་ཚིག་མཐུན་པར་ངེད་ལ་ཐག་རིང་དུ་བསྙེན་བཀུར་བ་བས་ཁྱེད་རང་གི་མ་ག་དྷ་ན་པཎ་ཆེན་ཤཱཀྱ་ཤྲཱི་བྱ་བ་མ་བྱོན་པའི་སངས་རྒྱས་རབ་གསལ་བཞུགས་པ་ལ་བསྙེན་བཀུར་བ་བསོད་ནམས་ཆེ་ཞེས་བསྐུལ་ཞིང་ཨོ་ཌྱན་ནས་མཁའ་འགྲོ་མས་ཀྱང་ལུང་བསྟན། རྒྱལ་པོ་སོགས་ཐམས་ཅད་ཀྱིས་གཙུག་གི་ནོར་བུར་བསྐུར། མ་ག་དྷར་བཟླས་སྒོམ་བྱས་ལ་ཚེ་འདིར་མཆོག་གི་དངོས་གྲུབ་ཐོབ་པར་བྱ་དགོས་སྙམ་པ་ན་མནལ་ལམ་དུ་མི་ཐོབ་ཅེས་བྱུང༌། ཡང་ཡང་གསོལ་བ་བཏབ་པས་ད་ལྟའི་སྤྱོད་པ་འདི་དོར་ནས་བསྒྲུབས་ན་འགྲུབ་ཅེས་བྱུང་གསུངས་སྟེ་སྤྱོད་པ་འདི་ལས་ལྷག་པ་མཆིས་སམ་ཞུས་པས་འདི་ཀུན་གཞན་དང་བསྟུན་པའི་ཙབ་ཙུབ་ཙམ་ཡིན། སྔགས་ཀྱི་སྤྱོད་པ་ཁྱད་པར་ཅན་མང་གསུངས། (ཉ༡༥བ)

― PTT001_Page_0489 ―

^{[མ་དཔེ་གཟིགས་ན་འདིར་གནོན།]}

[Full Size]

ཛ་ཡན་གར་རྒྱལ་པོའི་མཆོད་གནས་མཛད་པ་ན་མནལ་ལམ་དུ་སྒྲོལ་མས་ཕྱག་གཡས་བརྐྱངས་པའི་མཐིལ་ན་གསེར་དང་དངུལ་དང་བཻ་ཌཱུརྻའི་ཡི་གེ་ཏཱཾ་གསུམ་སྣང་བ་བྱིན་ནས་རྒྱལ་པོའི་འཁོར་ལོངས་སྤྱོད་པས་འདི་དགའ་བ་ཡིན་ནོ་གོ་འམ་གསུང་བས་མཆོད་གནས་བོར་སྟེ་འོན་ཀྱང་རྒྱལ་པོས་ནན་གྱིས་ཞུས་པས་ས་ཕྱོགས་དེར་བཞུགས། གར་ལོག་གི་དམག་གིས་ཡུལ་དབུས་བརླག་ཚེ་རྗེ་བཙུན་མས་རིགས་ཀྱི་བུ་ཁྱོད་ཤར་ཕྱོགས་སུ་སོང་ཞིག་གསུངས་སྟེ་བྱོན། འཇིགས་པ་ཆེ་ཞིང་ལམ་མ་ཤེས་པ་ན་ཉིན་མོ་མི་དཀར་པོ་ཅིག་དང་མཚན་མོ་བུད་མེད་དམར་མོ་རེས་སྣ་དྲངས། མ་ཧཱ་ཀཱ་ལས་དགེ་བསྙེན་ནག་པོ་ཅིག་དུ་བྱས་སྟེ་མར་མེ་བཏེག །སྐར་མ་པ་ཝ་སངས་ཀྱིས་མེ་ཏོག་གཏོར་ཞིང་ལམ་མཚོན་ནས་ཚེགས་མེད་པར་བཏོལ། ཛ་གཏྟ་ལར་བསོད་སྙམས་དཀའ་བར་བྱུང་ཚེ་རིག་འཛིན་གྱི་ལྷ་མོ་བཞིས་གདུགས་ཚོད་དྲངས་པ་རྨི་བ་ནས་རྙེད་སླ་བར་བྱུང༌། དེ་ལྟར་རྒྱ་གར་བྱང་ཕྱོགས་སུ་ཕེབས་པ་བོད་དུ་ཁྲོ་ཕུ་ལོ་ཙཱ་བ་ཆེན་པོས་གསན་ནས་ཤིང་ཕོ་བྱི་བ་ཁྲ་ཟླའི་བཅོ་ལྔ་ལ་གདན་འདྲེན་དུ་འབྱོན་པར་ཆས་པའི་ཕྱི་ནུབ་པཎ་ཆེན་ཛ་ག་བི་ཧར་ན་བཞུགས་ཚེ་མཆོད་རྟེན་གྱི་རྩེ་ནས་ལྷའི་བུ་གསུམ་འོངས་སྟེ་དང་པོས་གཙུག་གི་ནོར་བུ་ཕུལ་ནས། ཁོ་བོ་ནི་གཙུག་ཏོར་ཅན་བྱ་བ་མི་ཡུལ་གྱི་ཆོས་པ་རྣམས་ལ་ཕན་འདོགས་པ་ཡིན་ཟེར་ཡང་ཁོ་བོ་བསོད་སྙོམས་པ་ཡིན་པས་ནོར་བུ་མི་འདོད་གསུངས་སྟེ་མ་བཞེས། ཡར་ལུངས་ཇོ་བོའི་ཆོས་བྱུང་ན་འདི་ལ་སངས་རྒྱས་གཙུག་ཏོར་ཅན་ཞེས་འཁྲུལ་སྣང༌། གཉིས་པས་གསེར་གྱི་མེ་ཏོག་གསུམ་ཕུལ་སྟེ་ཁོ་བོ་གསེར་མདོག་ཅན་བྱ་བ་རྒྱལ་ཆེན་རིས་བཞི་པའི་ལྷའི་བུ་ཐམས་ཅད་ལ་ཕན་འདོགས་པ་ཡིན་ཟེར་སྟེ་བླངས་ནས་དཀོན་མཆོག་གསུམ་ལ་རེ་རེ་ཕུལ། གསུམ་པས་ཁོ་བོ་རྣམ་ཐོས་ཀྱི་བུ་ཞེས་བྱ་བ་ལྷ་མི་དགེ་བ་སུ་བྱེད་ཀྱི་གྲོགས་བྱེད་པ་ཡིན་ཟེར་སྟེ་འབྲས་ཆེན་ལྷུང་བཟེད་གང་བསོད་སྙོམས་སུ་ཕུལ། གསུམ་གས་མགྲིན་གཅིག་དུ་བྱང་ཕྱོགས་ཁ་བ་ཅན་ཡི་(ཉ༡༦ན)

― PTT001_Page_0490 ―

^{[མ་དཔེ་གཟིགས་ན་འདིར་གནོན།]}

[Full Size]

དྭགས་ཆོས་འཛིན་གྱི་ཡུལ་དུ་བྱམས་པའི་སྐུ་ཚད་བཞེང་པའི་གྲོགས་ལ་འབྱོན་པར་ཞུ་ཟེར། སྐུ་ཇི་ལྟ་བུ་དྲིས་པས་འདི་འདྲ་ཞིག་ཡིན་སྟེ་ཕྱག་མགོ་ཞབས་མགོ་ལས་མཚར་ཟེར་སྟེ་ལྡེར་ཚོ་ཆེན་པོ་ཞིག་བསྟན། བྱམས་ཆེན་གྱི་སྐུའི་སྤར་གྱི་ཕྱག་ཞབས་ཀྱི་མགོ་བྱས་པའི་སྐབས་སུ་འདུག་ལྡེར་ཚོ་དེ་ལས་འོད་ཟེར་དཔག་དུ་མེད་པ་འཕྲོས་ནས་འཇིག་རྟེན་སྣང་བར་བྱས་སྟེ་འདི་ལ་འབྲེལ་པ་བཞག་ཚད་བྱམས་པའི་བསྟན་པ་ལ་འཁོར་བ་ལས་ཐར་ཟེར་བའི་སྒྲ་གསན། སྒྲོལ་མས་ཀྱང་བྱང་ཕྱོགས་སུ་སོང་ཞིག་པར་ལུང་བསྟན་སྟེ་བྱང་ཕྱོགས་ནས་སྤྱན་འདྲེན་དོ་གལ་ཅན་ཡོད་པས་འགྲོ་གསུངས་སྟེ་ཚོང་འདུས་ལ་དྲུ་བར་བྱོན་ནས་ཟླ་བ་ཕྱེད་བསྒུགས། འཁོར་རྣམས་སྐྱོ་ནས་ལྡོག་པར་རྩོམ་པ་ན་ད་དུང་ཞག་གསུམ་སྡོད་ཅིག་གསུངས། ལོ་ཙཱ་བ་ཆེན་པོས་མོན་གྱི་ལམ་རྣམས་སུ་ཚ་གྲང་གཅན་གཟན་དུག་མའི་ཏོ་མ་སོགས་ཀྱི་འཇིགས་པ་དང་ལམ་འཁྱམས་པ་སོགས་ཀྱི་དཀའ་བ་ཆེར་སྤྱད་ནས་གྲོ་མོའི་གཏིང་རྒྱ་གར་བྱང་གི་བཻཌཱུར་ཚོང་འདུས་སུ་བཞུགས། སྤྱན་འདྲེན་པའི་གསོལ་བ་འདེབས་པ་ལ་ཡུལ་གྲུ་ཤིན་དུ་ཆེ་ཡང་དཀོན་མཆོག་གི་རྟེན་མ་རྙེད་ནས་གནས་ཁང་གི་ཁྱམས་ན་བྱིས་པའི་རྩེད་མོ་བྱེད་ས་སྟོན་པའི་འབྱིམ་སྐུ་ཅིག་དང་ཤིང་གི་མཆོད་རྟེན་ཞིག་འདུག་པ་ལ་མཆོད་པ་བྱས་གསོལ་བ་བཏབ་སྟེ་སངས་རྒྱས་དོན་ཡོད་གྲུབ་པ་ལ་ཕྱག་འཚལ་ལོ། །ཤཱཀྱའི་བསྟན་ལ་ཤཱཀྱའི་སྲས་བལྟམས་ཤཱཀྱའི་མཚན། །ལྔ་རིག་གཙུག་ནོར་དྲི་མེད་བརྟུལ་ཞུགས་བརྟན་པོ་འཛིན། །ཐུགས་རྗེའི་བདག་ཉིད་ངོ་མཚར་ཆོས་བཞིས་ཁྱད་འཕགས་གང༌། །པཎ་ཆེན་དམ་པས་བདག་སོགས་རྗེས་འཛིན་སྐྱོང་གྱུར་ཅིག །རིང་ཞིག་དུས་ནས་ཁྱོད་ཀྱི་མཚན་ཙམ་ཐོས་པས་ཀྱང༌། །རབ་དད་དགའ་སྐྱེས་སྤུ་ལྡང་མཆི་མ་འཁྲུག་འགྱུར་བ། །རིགས་ལྡན་བུ་ཞིག་གངས་ཅན་ཁྲོད་ནས་ཉིན་མཚན་དུ། །ཐལ་སྦྱར་སྤྱིས་འདུད་གདུང་བས་གསོལ་འདེབས་མཁྱེན་པར་མཛོད། །མ་ག་དྷ་སོགས་རིག་འབྱུང་གནས་(ཉ༡༦བ)

― PTT001_Page_0491 ―

^{[མ་དཔེ་གཟིགས་ན་འདིར་གནོན།]}

[Full Size]

ནི་སྡིག་ཏོ་ཡི། །དམག་ཚོགས་ཀྱིས་བཅོམ་ཨཽ་རྒྱན་ཁ་ཆེ་བལ་ཡུལ་ཡང༌། །ལོག་སྤྱོད་ཀྱིས་ཁེབས་དེང་སང་བསྟན་སྲོག་ལེགས་གནས་ནི། །བོད་ཡུལ་འདིར་ཟད་སྐྱེས་ཆེན་བྱང་ཕྱོགས་ཞབས་སྐྱོད་ཞུ། །སེམས་པ་གཞན་བཏང་ཁྱོད་ལ་ཡིད་བྱེད་གཅིག་པུ་ཡིས། །ཅིར་ཡང་མ་ཆགས་དཀའ་བ་དུ་མ་ཁྱད་བསད་ཅིང༌། །འདོད་པའི་ཡུལ་སྤངས་བཤུལ་རིང་བགྲོད་དཀའི་ལམ་ཞུགས་སྟེ། །ངལ་བརྒྱས་མཆིས་སོ་རེ་བ་མ་ལུས་མཆིས་པར་མཛོད། །རྒྱལ་སྲས་ཁྱེད་ལ་དོན་འགྱུར་གདུལ་བྱ་རྗེས་འཛིན་ལས། །གཞན་ལྟ་ཅི་མཆིས་ནུས་ཡོད་བཞིན་ཡང་བྱམས་པའི་ཕས། །བསད་སར་བུ་ཁྲིད་ཅི་དགར་ཡལ་དོར་འདྲར་གྱུར་ན། །ཀྱེ་མ་ཁྱེད་ཐབས་ཐུགས་རྗེ་གང་ལགས་བདག་ལ་གསུངས། །ཅེས་པའི་ཞུ་ཡིག་སམ་ཀྲྀ་ཏར་བྲིས་གསེར་གྱི་ཤེར་སྙིང་བོད་ཡིག་མ་གཅིག་དང་མི་ཉག་གྷའི་དར་ཆེན་གྱི་ན་བཟའ་ཟུང་ཇུ་ཟབ་ཀྱི་བླ་རེས་བཟང་པོ་དང་བཅས་ཁ་ཆེའི་པཎ་ཆུང་ལ་སོགས་པ་བཞི་མངགས། ཆོས་རྗེ་ལ་དྲུ་བར་ཞག་གསུམ་འཐེན་པའི་ཕྱི་ཉིན་འཁོར་རྣམས་ཕྱིར་འགྲོ་བའི་ཆས་བྱེད་པའི་ཚེ་ཕོ་ཉ་བ་བཞིས་སླེབས་སྟེ་ཞུ་ཡིག་ཕུལ། ཆོས་རྗེས་པཎ་ཆུང་དགུ་པོ་ལ་བཀའ་བགྲོས་པ་ན་གནས་སྐབས་འདི་འདྲ་བདག་ཅག་གིས་ག་ལ་ཤེས་ཆོས་རྗེ་ཉིད་མཁྱེན་པར་ཟད་ཏོ་ཟེར་སྒྲོལ་མ་ལ་ཞུའོ་གསུངས་ནས་ཞག་ལྔར་མཚམས་མཛད། ལྟས་བཟང་པོ་བྱུང་ནས་འབྱོན་པར་དགོངས་ཚེ་ཛ་གདྡྷ་ལའི་གནས་བརྟན་ཆེན་པོ་གཉིས་ཀྱིས་དགེ་འདུན་སྟོང་ཕྲག་གསུམ་ཁྲིད་རྒྱ་གར་ན་ངོ་ཆེན་གལ་ཅན་ལ་རྟེན་གདན་འདྲེན་པས་ཀླུ་སྒྲུབ་ཀྱིས་རབ་གནས་མཛད་པའི་ཐུགས་རྗེ་ཆེན་པོ་དང་པཎ་ཆེན་གྱི་ཐུགས་དམ་ཡིན་པས་སྒྲོལ་མའི་སྐུ་ཡང་དགོས་ཟེར་ནས་ཙནྡྲ་གོ་མི་ཏཱ་ར་སྤྱན་དྲངས་པ་སླེབས། ཆོས་རྗེས་ཀྱང་ལུགས་བཞིན་གསུ་བ་དང་འདུད་པ་མཛད། པཎ་ཆུང་གིས་དཀོན་གཉེར་ལ་གསུང་བྱིན་སྟེ་སྒྲོལ་མ་ཞལ་ཕྱིར་བསྒྱུར་ཤིང་རྟའི་གཟེར་ལྕག །འོན་ཀྱང་རྟེན་གྱི་ངོ་ཆེན་ལ་མི་ཉན་པའི་སྲོལ་མེད་(ཉ༡༧ན)

― PTT001_Page_0492 ―

^{[མ་དཔེ་གཟིགས་ན་འདིར་གནོན།]}

[Full Size]

ནས་རེ་ཞིག་ཕྱིར་བྱོན། ལོ་ཙཱ་བས་དེ་མནལ་ལམ་དུ་མཁྱེན་ནས་རྣམ་སྲས་གནད་ལ་བོར། ཆོས་རྗེ་ཞག་ཁ་ཅིག་བྱོན་ནས་ཞག་བདུན་དུ་སྐོར་མཆོད་མཛད་ཀྱང་ཐུགས་མ་ཕེབས། མནལ་ལམ་དུ་ལྷ་གསུམ་པོ་དེས་རྟག་དུ་བསྐུལ། རྗེ་བཙུན་མས་དགེ་འདུན་ནི་ནོར་འདོད་ཀྱི་ཆོས་མི་འདོད་པས་མགྲོན་བུས་ཚིམ། ངའི་གཟུགས་ནི་ཁྲོས་ནས་ཁ་ཕྱིར་ལོག །ཐུགས་རྗེ་ཆེན་པོའི་སྐུའང་ཤིང་རྟའི་གཟེར་ཆག་སྟེ་ཞབས་གོང་པོར་སོང༌། འདིར་ཅི་བྱེད་བྱང་ཕྱོགས་སུ་སོང་ཞིག་སོང་ཞིག་གསུང་བས་སླར་དགེ་འདུན་ལ་ཞུས་སྟེ་ཕྱིར་ཆས་ཚེ་ལོ་ཙཱ་བའི་མནལ་ལམ་དུ་རྣལ་འབྱོར་སྐྱིད་ཀྱི་མིང་པོས་ཡི་གེ་ཞིག་ཕུལ་བ་གཟིགས་པས་དགེ་སློང་བཻ་ཤྲ་ཝ་ཎས་སྤྲིངས་པ་ད་སྟེ་ཞག་བཅུ་གསུམ་ན་བྱམས་པ་ཤཱཀྱ་ཤྲཱི་འབྱོན་པར་ཡོད་སྟེ་དེར་མ་འདུག་པར་སྔོན་ཏུ་ལྡང་བ་བྱེད་པ་ལ་གྲོང་ཁྱེར་ཀ་རུ་ཎར་ཤོག་བྱ་བ་འདུག །ཡི་གེ་རྒྱ་ཡིག་དུ་འདུག་པ་བཀླགས་པས་བོད་ཡིག་དུ་སོང༌། སང་སྟེ་དགྱེས་ཆེས་ནས་ཏེ་ཏེ་བརྡུངས་པས་ཞབས་ལ་ཆུ་འབྲུམ་གན་ཊཱ་བ་ཟུག་ཅན་གྱིས་བཞེངས་མི་མཁྱེན་པ་ཡོད་ཀྱང་ཞར་ལ་རྡོལ་བས་གཞི་མེད་དུ་དྭངས། དགའ་སྟོན་གྱི་དྲིལ་སྒྲོགས་པ་ལ་ཚོགས་ཆེན་པོར་བྱེད་པས་པཎ་ཆུང་བ་གཉིས་སྔོན་ལ་འོངས་པ་རྐང་པ་ན་ནས་མནལ་ལམ་གྱི་དུས་ཉིད་ལ་རྣལ་འབྱོར་སྐྱིད་ཀྱི་མིང་པོས་བཀའ་ཤོག་ཁྱེར་སྟེ་ཕུལ་བ་བསྒྱུར་བས། རྗེ་བཙུན་མི་ཕམ་མགོན་པོ་ལ་ཕྱག་འཚལ་ལོ། །བྱང་ཕྱོགས་རྒྱུད་གནས་བདེ་གཤེགས་བསྟན་པའི་སྒྲོན་འཛིན་པ། །མ་ལུས་འགྲོ་དཔལ་བྱ་དཀའི་རྒྱལ་སྲས་སྤྱད་པ་སྤྱོད། །དགེ་སློང་མཁས་པ་ཁྲོ་ཕུ་ལོ་ཙཱར་རབ་གྲགས་གང༌། །བྱམས་ཆེན་འཕྲིན་ལས་ཡིད་བཞིན་ནོར་ལྟར་འགྲུབ་གྱུར་ཅིག །དགེ་སློང་བསོད་སྙོམས་པ་ཤཱཀྱ་དཔལ་བཟང་པོས་ཁྲོ་ཕུ་ལོ་ཙཱ་བ་ལ་ཐུགས་དགྱེས་པའི་སྒོ་ནས་ཤིས་པ་བརྗོད་པའོ། །ཞེས་པ་དང་བྱང་ཆུབ་ཤིང་ལོ་འདབ་མ་གསུམ་ཤ་ཁར་ཕུལ་གང་བསྐུར་འདུག །ལོ་ཙཱ་བ་དང་མཇལ་ཚེ་ལོ་ཙཱ་བ་མཁྱེན་རྟོགས་མཐའ་དག་རྫོགས་ཟིན་ཡང་དགུང་ལོ་སོ་གསུམ་(ཉ༡༧བ)

― PTT001_Page_0493 ―

^{[མ་དཔེ་གཟིགས་ན་འདིར་གནོན།]}

[Full Size]

པ་སྤྱིར་སྐུ་མཛེས་ཤིང་གཞོན་ཤ་ཆེས་ཆགས་པའི་ན་ཚོད་གཟིགས་པས་འདི་བཙུན་ཆུང་ལྟ་བུ་ཞིག་འདུག་པས་ཆོས་སྒྱུར་མི་ནུས་སམ་ལྷ་ཡང་བཞེང་ཐུབ་སྟེ་མི་འོང་ཁོ་རང་ལ་སེམས་སྐྱེད་དང་ཡི་དམ་ཞིག་བྱིན་ནས་ཕྱིར་ལྡོག་པར་བྱའོ་ཞེས་གསུངས་ཚེ་པཎ་ཆུང་དེས་ཁྱེད་ཀྱི་ན་ཚོད་ལ་བརྙས་པར་འདུག་པས་རང་གི་ཡོན་ཏན་སྟོན་ཟེར་ནས་བི་བྷཱུ་ཏི་ཙནྡྲ་དང་སུ་ག་ཏ་ཤྲཱི་སོགས་པཎ་ཆུང་དགུ་ལ་རང་གང་ལ་མཁས་ཟེར་བའི་སྒྲ་ཚད་སྡེ་སྣོད་མདོ་སྔགས་ལ་དྲི་བ་གསུམ་གསུམ་མཛད་པས་གུང་ཚིགས་སྔ་བ་ནས་ནམ་ཕྱེད་འདས་པར་སོང༌། ཆོས་རྗེའི་ཐུགས་དམ་ནར་མ་རྣམས་ཆུ་ཚོད་སོ་སོའི་དུས་ལས་ཐུགས་བྲེལ་ཅིས་ཀྱང་འདར་མེད་ནའང་ཇི་མི་སྙམ་པར་གསན་ཞིང་འདི་ལྟ་བུའི་ཆོས་ཐོས་པ་བསོད་ནམས་ཆེ་གསུང་ཞིང་པཎ་ཆེན་དཔོན་སློབ་ཐམས་ཅད་ཧ་ལས་སྟེ་བོད་ལ་འདི་ལྟ་བུའི་ཆོས་སྨྲ་བ་འོང་བ་ངོ་མཚར་ཆེ། འདིའི་མདུན་ན་ལོ་ཙཱ་བ་གཞན་རྣམས་དིག་པར་འདུག་གསུང་ཞིང་མཚན་ཡང་མ་ཧཱ་ལོ་ཙཱ་བ་འབའ་ཞིག་ནས་བརྗོད། དེ་ཕྱིན་ལོ་ཙཱ་བ་བྱོན་པའི་ཚེ་པཎ་ཆུང་དགུ་པོ་ལངས་ནས་རྒྱང་རིང་པོར་བཀྱེད། ཐལ་མོ་སྦྱར་སྟེ་མ་ཧཱ་པཎྜི་ཏ་མ་ཧཱ་ལོ་ཙཱ་བ་ཕ་ལ་ཕ་ལ་ཞེས་ཕན་ཚུན་རིག་རིག་པོར་བལྟ་སྐད། ཆོས་རྗེ་ཡང་ཐུགས་བཏེག་ཆེས་པས་སང་རང་འགྲོ་གསུང་བ་ན་བསྟན་བཅོས་ཅིག་གི་ཐུགས་རྩོམ་ཞུས། རྒྱལ་ཕྲན་ཞིག་ལ་ལམ་དཀའ་བའི་ཐབས་འཕྲུལ་གྱིས་ཐུགས་ངང་བསྲིངས། པཎ་ཆེན་ཐུགས་རྗེ་ཆེ་བས་མགོན་མེད་མང་པོ་སྐུ་ལ་འཁོར་བ་སོགས་སྐུ་འཁོར་ཕལ་ཆེར་ལ་མདོ་ལི་དགོས་པ་དང་མདོ་ལི་མི་ཐར་བའི་ས་ལ་འཛེག་རུ་བསྒྱུར་དགོས་པ་སོགས་གཞན་གྱིས་ལོ་ཟླར་སྒྲུབ་མི་ནུས་པ་རྣམས་ལོ་ཙཱ་བས་བདེ་བླག་དུ་བསྒྲུབས། དེ་ལྟར་ལོ་ཙཱ་བ་ཆེན་པོ་ཡོན་ཏན་བརྗོད་པར་དཀའ་བ་དེའི་དད་པ་དང་མཁྱེན་པ་དང་ནུས་པས་པཎ་ཆེན་དབང་དུ་འདུས་པ་ལྟར་གྱུར་སྟེ་ཅི་བཞེད་པར་བོད་དུ་སྤྱན་དྲངས་ནས་ཆོས་མང་དུ་བསྒྱུར། གཙང་དབུས་ལྷོ་བྲག་གཉལ་བྱར་རྣམས་སུ་བསྡོམས་པར་ལོ་(ཉ༡༨ན)

― PTT001_Page_0494 ―

^{[མ་དཔེ་གཟིགས་ན་འདིར་གནོན།]}

[Full Size]

བཅུ་ཙམ་བཞུགས། དཔྱལ་ལོ་ཞང་ལོ་ས་ལོ་ཆག་ལོ་སོགས་ལོ་ཙཱ་བ་མང་དུ་ཕྱགས་ཕྱིར་ཡོད་ཀྱང་ཁྲོ་ལོ་ཁོ་ན་དང་ཟླ་མེད་པའི་ལོ་པཎ་ཟུང་གཅིག་མཛད་དེ་བསམ་ཡས་ཀྱི་ཡུ་འབོག་ཆོས་ཁྲི་སོགས་ལ་ལོ་པཎ་བསྒྲིགས་ནས་ཆོས་གསུངས། འབུལ་བ་མཐའ་ཡས་པ་བྱུང་བ་ཐམས་ཅད་ཁྲོ་ཕུའི་བྱམས་ཆེན་ཁོ་ནའི་རྒྱུར་ཕུལ། བྱམས་ཆེན་ཟངས་གསེར་ལས་གྲུབ་པ་ཁྲུ་བརྒྱད་བཅུ་བ་ཕོ་བྲང་དང་བཅས་པ་གྲུབ་ནས་རབ་གནས་ལ་ཕྱོགས་པའི་ཚེ་དགྲ་བཅོམ་པས་བསྐུར་བའི་མེ་ཏོག་དང་རིང་སྲེལ་ཁ་ཕྱེ་ནས་དེའི་ལོ་རྒྱུས་པཎ་ཆེན་ཇི་ལྟར་གསུང་བ་ལོ་ཙཱ་བས་བསྒྱུར་པ་ནི། དེ་ཡང་འདི་ལྟར་ཐོས་སྟེ་མ་བྱོན་པའི་སངས་རྒྱས་གསུམ་པར་འགྱུར་ངེས་པ་ཆོས་རྗེ་པཎ་ཆེན་ཤཱཀྱ་ཤྲཱིའི་མཚེ་མར་གྱུར་པའི་མཆེད་ཟླ་ཁ་ཆེའི་པཎྜི་ཏ་ཆེན་པོ་བུདྡྷ་ཙནྡྲ་སངས་རྒྱས་ཟླ་བ་ཞེས་བྱ་བས་ཛམྦུའི་གླིང་གི་གླིང་ཕྲན་སིངྒྷ་ལ་སིངྒྷ་གླིང་པ་དྭི་པ་ཞེས་པ་བྱ་བ་སྔོན་སྲིན་མོ་གནས་པའི་གླིང་ཕྲན་ཞིག་ཇོ་བོ་སྤྱན་རས་གཟིགས་དབང་ཕྱུག་སྤྲུལ་པ་རྟའི་རྒྱལ་པོ་བཱ་ལ་ཧ་སྟོབས་ཆེན་ཞེས་པའི་འཕྲིན་ལས་ཀྱིས་བཏུལ་ནས་ད་ལྟ་ནང་པ་སངས་རྒྱས་པའི་བསྟན་པ་དར་བའི་གནས་སུ་གྱུར་ཡོད་པས་དེར་རཏྣ་ཙུནྡྷ་མ་ཎི་སྥ་ར་ན་རིན་ཆེན་གཙུག་གི་ནོར་བུ་འཕྲོ་བ་ཞེས་བྱ་བའི་ཕོ་བྲང་ན་དགྲ་བཅོམ་པ་དངོས་སུ་བཞུགས་སོ་ཞེས་བྱ་བ་ཐོས་ནས་ཁ་ཆེ་གྲིབ་བརྟན་གྱི་པྲ་ཝ་སུ་ར་རབ་མཆོག་ཞེས་བྱ་བའི་གཙུག་ལག་ཁང་ནས་དཔལ་རྡོ་རྗེ་གདན་དུ་བརྒྱུད་དེ་མ་ཧཱ་བོ་དྷི་ལ་མཆོད་པ་ཕུལ་ནས་དཀའ་བ་དུ་མ་སྤྱད་དེ་སིངྒྷ་གླིང་གི་དགྲ་བཅོམ་པའི་ཞལ་ཡང་བལྟས་དགྲ་བཅོམ་པ་ཡིན་ནམ་མ་ཡིན་གཏན་ལ་འབེབས་པའི་བརྟག་དཔྱད་མང་དུ་བྱར་ཡོད་པ་ལེགས་པར་བྱས་ནས་ཡིད་འཆེས་སྟེ་དེ་ཉིད་ཏུ་དབྱར་ཟླ་བ་གསུམ་ཚུལ་དུ་ཞུགས་སོ། །དགག་དབྱེ་ཐོན་ནས་ལྗོངས་རྒྱུ་བའི་དུས་སུ་དགྲ་བཅོམ་པ་དེ་ཉིད་ཀྱིས་དེ་བཞིན་གཤེགས་པའི་རིང་སྲེལ་ཡོད་པ་བ་སོའི་ཟ་མ་ཏོག་ཕྲ་རྒྱན་སྣ་ཚོགས་པས་སྤྲས་པ་ཅིག་དང་མེ་ཏོག་པདྨ་དཀར་པོ་ལྔ་ཁ་ཆེའི་པཎྜི་ཏ་དེ་ལ་གཏད་ནས་རིང་སྲེལ་གྱི་ཟ་མ་ཏོག་འདི་དང་ཟེའུ་འབྲུ་ཡོད་པའི་མེ་ཏོག་ཐོག་མ་ཁོ་ནར་དགེ་སློང་ཤཱཀྱ་ཤྲཱི་བྷ་དྲ་ལ་ཕུལ། མེ་ཏོག་(ཉ༡༨བ)

― PTT001_Page_0495 ―

^{[མ་དཔེ་གཟིགས་ན་འདིར་གནོན།]}

[Full Size]

ལྷག་མ་བཞི་པོ་འདི་ཁྱེད་ཀྱི་ལྷུང་བཟེད་དུ་ཁྱེར་ལ་ཁྱེད་རང་གི་མཆེད་ཟླ་ཀ་སྨི་ར་པ་⁽1763⁾ཁ་ཆེ་བ་དེའི་ཕྱག་དུ་རེ་ཞིག་གཏོད་ཅིག །དེ་མ་འོངས་པའི་སངས་རྒྱས་བདུན་པ་ཡིན་པས་བསོད་སྙོམས་སམ་ཡོན་ཅུང་ཟད་ཕུལ་ན་འབྲས་བུ་དཔག་དུ་མེད་པར་འགྱུར་རོ། །སིངྒྷ་གླིང་གི་དགེ་སློང་བི་ཧ་ར་ག་ས་⁽1763⁾འདོད་ཆགས་དང་བྲལ་བ་ཀུན་ནས་འབྱུང་གནས་སྦས་པ་མནྟ་ཀཱ་ར་གུཔྟ་ཅེས་བྱ་བས་བསྐུར་རོ་ཀྵེ་མ་ཀུ་ཤ་ལ་⁽1763⁾སྐུ་ཁམས་བཟང་ངམ་སྨྲོས་ཤིག་དེ་ནས་མེ་ཏོག་གཅིག་བྱང་ཕྱོགས་གངས་ཅན་གྱི་ཡུལ་དུ་དྭི་བྷ་ཥི་མཻ་ཏྲྀ་ཤྲི་⁽1763⁾སྐད་གཉིས་སྨྲ་བ་བྱམས་དཔལ་ཞེས་བྱ་བ་ཞིག་འབྱུང་བར་འགྱུར་ལ་དེ་པཎྜི་ཏའི་སློབ་མར་འགྱུར་སྟེ་དེ་ལ་པཎྜི་ཏ་ཆེན་པོས་བྱིན་ལ་ས་ཏྭ་རྠཀ་ར་⁽1763⁾སེམས་ཅན་གྱི་དོན་གྱིས་ཅིག་ཞེས་སྨྲོས་ཤིག་དེ་ནས་མེ་ཏོག་གཅིག་བོད་ཡུལ་གྱི་འབྲི་ཞེས་བྱ་བར་དྷྱ་ཡི། བི་ཀྵུ་རཏྣ་ཤྲི་⁽1763⁾སྒོམ་པའི་དགེ་སློང་རིན་ཆེན་དཔལ་བྱ་བས་པཎྜི་ཏ་ལ་ནོར་དང་ན་བཟའ་མང་པོ་འབུལ་དུ་འོང་སྟེ་དེར་སྦྲོན་ཡང་མ་གཤེགས་པར་སྐྱེས་ལན་ཆོས་ཀྱི་ཚིགས་སུ་བཅད་པ་གཅིག་དང་མེ་ཏོག་པདྨ་ཞིག་སྐུར་ཞིག །དེ་ནི་ཐུབ་པ་ཆེན་པོ་འདས་ནས་ལོ་བཞི་བརྒྱ་ན་བྱུང་བའི་འཕགས་པ་ཀླུ་སྒྲུབ་བསྟན་པ་བསྙིགས་ཤིང་ཡང་བསྙིགས་སུ་གྱུར་པ་ན་འགྲོ་བ་མ་རུང་པ་གཞན་གྱིས་གཏན་འདུལ་བར་མི་ནུས་པ་རྣམས་འདུལ་བའི་དོན་དུ་བྱོན་པ་ཡིན་པས་དེའི་ཆོས་སྟོན་པ་པོར་ཁྱེད་ཅག་མི་དགོས་པར་ཤེས་པར་གྱིས་ཅིག་ཞེས་སྨྲོས་ཅིག །དེ་ནས་བོད་ཡུལ་དབུས་ཀྱི་རཏྣ་ཀུ་ཊི་⁽1763⁾རིན་ཆེན་བྱུང་བ་ཞེས་བྱ་བའི་གཙུག་ལག་ཁང་ནས་དྷྱ་ཡི་པཎྜི་ཏ་ཞིག་གིས་འཁོར་དང་བཅས་པ་ལ་བསྙེན་བཀུར་རྣམ་པ་དུ་མ་བྱས་ནས་སྤྱན་འདྲེན་དུ་འོང་བས་དེ་མ་འོངས་པའི་སངས་རྒྱས་སྐལ་ལྡན་ཤིང་རྟ་ཞེས་བྱ་བ་ཡིན། དེ་ལ་མེ་ཏོག་འདི་ཕུལ་ལ་དབྱར་གནས་པས་ཐེག་པ་ཆེ་ཆུང་གི་ཆོས་མང་དུ་སྟོན་ཞིག་པཎྜི་ཏ་རང་གི་ལོ་གྲངས་དང་མཉམ་པས་ཕྱིར་མི་ལྡོག་པ་འཐོབ་པར་འགྱུར་རོ། །དེ་ནས་པཎྜི་ཏ་ཆེན་པོ་དེ་དང་དེའི་སློབ་མ་ནོར་བཟང་ཞེས་བྱ་བས་དེ་བཞིན་གཤེགས་པ་ཤཱཀྱ་ཐུབ་པས་འགྲོ་བ་མ་བསྒྲལ་བའི་ལྷག་མ་རྣམས་སྒྲོལ་བའི་དོན་དུ་སངས་རྒྱས་མི་ཕམ་པའི་སྐུ་ཚད་གཞེངས་དུ་གསོལ་ནས་དེའི་སྐུ་གསུང་ཐུགས་བྱིན་གྱིས་(ཉ༡༩ན)

― PTT001_Page_0496 ―

^{[མ་དཔེ་གཟིགས་ན་འདིར་གནོན།]}

[Full Size]

བརླབ་པ་ཞག་བཅུ་གསུམ་གྱི་བར་དུ་བྱེད་པར་འགྱུར་ཞིང་ལྷའི་རིས་བཅུ་གསུམ་གྱིས་ཀྱང་མཆོད་པའི་རིས་བཅུ་གསུམ་བྱེད་པར་འགྱུར་བས་དེའི་དང་པོར་མེ་ཏོག་འདི་དབུ་ལ་ཞོག་ཅིག །མེ་ཏོག་ལྔ་པོ་འདི་ཡང་ཟས་ཀྱི་བྱ་བ་ནམ་བྱེད་པའི་ཚེ་རིང་སྲེལ་གྱི་ཟ་མ་ཏོག་འདིར་ཆུག་ལ་མཆོད་པ་དང་མ་བྲལ་བ་གྱིས། མེ་ཏོག་དེ་རྣམས་རང་རང་གི་མཆོད་པ་ཇི་སྲིད་མ་ཚར་བའི་བར་དེ་སྲིད་བརྙིངས་པ་དང་སྟོར་བ་ལ་སོགས་པར་མི་འགྱུར་བར་བྱིན་གྱིས་བརླབས་ཡོད་ཏོ་ཅེས་གསུང་ངོ༌། །དེ་ནས་ཁ་ཆེ་པཎྜི་ཏས་ལྷུང་བཟེད་དུ་མེ་ཏོག་དང་ཟ་མ་ཏོག་བཅུག་ནས་སིངྒྷ་གླིང་ནས་ཛམྦུའི་གླིང་དུ་འོངས་སྟེ་ཡང་དབུས་འགྱུར་ཚལ་གྱི་བྱང་ཆུབ་ཆེན་པོ་མ་ཧཱ་བོ་དྷི་ལ་གཏང་རག་གི་ཕྱག་འཚལ་དུ་བྱོན་པའི་ཚེ་མ་ཧཱ་བོ་དྷིའི་ཕོ་བྲང་གི་ཐེམ་སྐས་ལ་འཛེགས་པ་དང་ཆོས་རྗེ་པཎ་ཆེན་མ་ཧཱ་བོ་དྷི་ལ་ཕྱག་འཚལ་ནས་ཕྱིར་གཤེགས་པའི་དོན་དུ་རྡོ་རྗེའི་ཐེམ་སྐས་ལ་འབབ་པ་དང་ལྷན་ཅིག་འཛོམ་པར་གྱུར་ནས་ཐེམ་སྐས་དེ་ཉིད་ཀྱི་སྟེང་དུ་སྔར་གྱི་གསུང་གླེང་རྒྱས་པར་མཛད་དེ་ཕན་ཚུན་གཉིས་ཀ་གཤེགས་བཞུད་མཛད་ཏོ། །གཏམ་རྒྱུད་འདི་དག་ནི་ཁྲོ་ཕུའི་གཙུག་ལག་ཁང་ཆེན་པོ་དགའ་ལྡན་གྱི་ཕོ་བྲང་དུ་ཁྲུ་བརྒྱད་བཅུ་པའི་བྱམས་ཆེན་མགོན་པོ་མཐར་ཕྱིན་ནས་རབ་གནས་མཛད་པའི་དུས་སུ་གདམས་ངག་དང་བཅས་པ་རྒྱས་པར་གསུངས་ཤིང་ཟ་མ་ཏོག་ཁ་ཕྱེ་བས་རིང་སྲེལ་གཅིག་ལས་ལྔར་འཕེལ་འདུག་གསུངས་ནས་ཟ་མ་ཏོག་རིང་སྲེལ་གསུམ་དང་བཅས་པ་ལོ་ཙཱ་བ་ལ་གནང༌། དུང་ཆུང་གཡས་སུ་འཁྱིལ་བ་གསུམ་གྱིས་བརྒྱན་སྟེ་བྱམས་ཆེན་གྱི་ཐུགས་ཀར་བཞུགས། རིང་སྲེལ་གཅིག་ཆོས་རྗེ་ཉིད་ཀྱིས་ཚགས་མཛད། གཅིག་ལོ་ཙཱ་བ་ལ་སྲུང་བའི་རྟེན་དུ་དགྲ་བཅོམ་པས་བསྐུར་བའི་མེ་ཏོག་དང་ལྷན་ཅིག་དུས་དེ་ཉིད་དུ་གནང༌། དེ་ནས་དགྲ་བཅོམ་པས་སྔར་བསྐུར་བའི་མེ་ཏོག་དཀར་པོ་དེ་བྱམས་ཆེན་གྱི་དབུ་ལ་བཞག་དེ་ཉིད་ཀྱི་ནང་པར་ནས་ཆུ་ཕོ་སྤྲེའུའི་ལོ་བྲེའི་ཟླ་བའི་ཚེས་བཅུ་གསུམ་ལ་རབ་གནས་ཆེན་པོ་མཛད་ཏོ། །ཅེས་བྱུང་ལ་སྐུ་དེ་ནི་བྱམས་པ་(ཉ༡༩བ)

― PTT001_Page_0497 ―

^{[མ་དཔེ་གཟིགས་ན་འདིར་གནོན།]}

[Full Size]

དངོས་སུ་བཞུགས་པ་ཡིན་ནོ། །མེ་ཏོག་པདྨ་སྤྱི་ལ་ཟེའུ་འབྲུའི་ཚབ་ཏུ་འདབ་མ་བརྒྱད་ཆུང་ངུ་ལྟེ་བ་སྦུབས་ཅན་དང་ཡུ་བ་ཤིན་དུ་མཉེན་ཞིང་འབོལ་བ་ཆུ་ནང་དུ་འགྱེལ་བ་ཞིག་ལས་མི་འབྱུང་བས་པདྨ་ཟེའུ་འབྲུ་ཅན་དང་སྡོང་པོ་ཅན་ཆེས་དཀོན་པས་ན་ཟེའུ་འབྲུ་ཅན་མཆོག་དུ་བྱས་པའོ། །བྱམས་ཆེན་གྱི་དོན་ཏུ་དགུན་ལ་ཆེན་པོ་སོགས་ལ་ཤིན་དུ་གྲང་བ་ན་ཡང་འོ་བརྒྱལ་ཞུས་པ་ན་སྐུ་འོ་བརྒྱལ་ཐུགས་འོ་བརྒྱལ་བ་མེད་གསུངས། སླས་པོ་ཆེར་བཞུགས་དུས་སྒྲོལ་མའི་བྲིས་སྐུ་གཅིག་གིས་ཁྱེད་སྐྱེ་བ་མང་པོའི་གོང་དུ་པཎྜི་ཏ་ཅིག་དང་བགྲོ་གླེང་བྱས་པས་ཁྱོད་རྒྱལ་རུང་ཞིག་བྱུང་ནས་དེ་ལ་ངན་སྨྲས་མང་པོ་བྱས། དེ་ཡུལ་ཤིན་དུ་གཉན་པ་ཅིག་ཡིན་པས་དེའི་རྒྱུས་སྐྱེ་བ་མང་པོར་ཚིག་རྩུབ་དང་ཁྲོ་བ་བྱུང་བ་ཡིན་གསུངས། དེའི་རྒྱུ་མཐུན་སྦྱང་ཕྱིར་གཉེན་པོ་དྲག་པོ་བསྟེན་པ་ཡིན་ཡང་ཚིག་རྩུབ་བག་ཙམ་ད་དུང་འཆོར་བར་འདུག་གསུངས། དེའི་ཚེ་དུས་འཁོར་ནས་བཤད་པའི་འཇིག་རྟེན་གྱི་ཆགས་ལུགས་ལམ་པ་ཅིག་གཟིགས། སྲིན་པོར་རི་རབ་གནས་ཅིག་གི་སྦྱིན་སྲེག་གི་ཚེ་སྲེག་རྫས་གཡོན་པས་ཕུལ་ཟེར་བ་བྱུང༌། ཆོས་ཟབ་མོ་གསུང་བའམ་སྔགས་བཟླ་བའམ་དབེན་པར་གནས་པའི་དུས་འཇམ་དཔལ་ཐུགས་རྗེ་ཆེན་པོ་བྱམས་པ་བྱང་ཆུབ་ཆེན་པོ་ཚོའི་སྣང་བ་ཤར་ནས་འོང་དེའི་ཚེ་མི་གཞན་མ་འོངས་ན་མ་བདེ་བའི་ཆོས་ཀུན་དྲིར་བཏུབ་པར་འདུག་གསུངས། དེ་དག་ལ་སོགས་དག་སྣང་དང་ཡོན་ཏན་བག་ཙམ་འཆར་བ་འདུག་སྟེ་མི་ལ་བསྒྲགས་ན་སྡིག་གསོག་ཞིང་གཡེང་བར་འགྲོ་གསུངས། ད་ལྟ་ཐུགས་དམ་ཇི་ལྟར་མཛད་ཞུས་པས། ང་དང་པོར་སྐྱབས་འགྲོ་སེམས་བསྐྱེད་བྱས། སྐད་ཅིག་གིས་ལྷར་གསལ་འདེབས། དེ་ནས་བྱམས་སྙིང་རྗེ་གཙོ་བོར་བྱས་ནས་ཡན་ལག་བདུན་པ་བྱེད། དེ་ནས་འཁོར་ལོ་བདེ་མཆོག་ལ་ཡི་དམ་དུ་བྱེད་སྟེ་སྐྱེད་རྫོགས་ཟུང་དུ་ཆུད་ཙམ་ཡོད། དེ་ནས་བླ་མ་ལ་མཎྜལ་ཕུལ་ནས་སྒྲོལ་མའི་རྩ་སྔགས་བཟླས་པས་ཡི་དམ་ལྷའི་དག་སྣང་འཆར་སྟེ་དེ་ལ་དྲི་རྒྱུ་ཡོད། དེ་ནས་ཛཾ་ལའི་ཆུ་སྦྱིན་བྱེད། བྱམས་པའམ་ཡུམ་ཆེན་མོའི་ང་རྒྱལ་གྱིས་སེམས་སྐྱེད་གསོལ་བ་བཏབ་སྟེ་སེམས་ཅན་ཐམས་ཅད་ལ་ཆོས་(ཉ༢༠ན)

― PTT001_Page_0498 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་སྦྱིན་པ་བྱ་སྙམ་པའི་དོན་ཅིག་སྒོམ། ཉི་མ་དྲོས་ནས་འདུལ་བའི་བསོད་སྙོམས་བྱེད། དེ་ནས་ཐུན་གསུམ་གོང་ལྟར་བྱེད་སྟེ་སྤྱིར་ཐུན་བཞིར་སྒོམ། གཉིད་བྲོ་ཙམ་ན་ཐིབ་ཐིབ་པ་དང་ལྷའི་སྣང་བ་གཉིས་འདྲེས་མར་འོང་ཞིང་གཉིད་ཚེ་དུས་འཁོར་གྱི་རྨི་ལམ་གྱིས་གདམས་པ་ཅིག་གིས་དུས་འདར་འཇུག །དགེ་སྦྱོར་གྱི་མཇུག་དུ་བཟང་སྤྱོད་དང་དགྱེས་རྡོར་སྨོན་ལམ་བདུན་བཅུ་པ་འདེབས་ཤིང་སྨོན་ལམ་གལ་ཆེ་གསུངས། འབྲི་ཁུང་པ་ལ་ལུས་ཀྱིས་མ་མཇལ་བའི་དོད་པོར་ཡིད་ཀྱིས་ཡང་ཡང་མཇལ་ལོ་གསུངས། མདོར་ན་བོད་དུ་ལོ་བཅུ་བཞུགས་སྟེ་མཐར་ཀསྨིར་དོན་ཆེན་པོ་གསུངས་ནས་སུས་ཀྱང་གཤོལ་མ་ཐེབས་སྟེ་ཁ་ཆེར་ཐེགས་ནས་དེར་བསྟན་པ་གཞི་བཞེངས་སུ་གཏད་ནས་ལོ་བཅུ་གསུམ་ན་ཡུལ་ཐམས་ཅད་འཇའ་འོད་དང་མེ་ཏོག་གི་ཆར་གྱིས་ཁྱབ་པའི་ལྟས་དང་བཅས་དགའ་ལྡན་དུ་གཤེགས། གདུང་བཞུ་བའི་ཚེ་ན་མཁའ་ལས་ལྷའི་རོལ་མོ་དང་བདེ་མཆོག་གི་ལྷ་ཚོགས་དང་སིལ་སྙན་བདུན་པའི་ཚིགས་བཅད་འདི་བྱུང་སྟེ། གཅིག་གིས་མ་ཚད་ལོ་བརྒྱའི་དུས། །བྱ་ལོའི་དཀར་ཕྱོགས་ཟླ་བ་ནི། །སྤེན་པའི་ཉི་མའི་ཚེས་ལྔ་ལ། །འགྲོ་བའི་ཉི་མ་ནུབ་པར་བསྟན། །ཀྱེ་ཧོ་ཚུར་གཤེགས་ཚུར་གཤེགས་ལོངས། །མ་འཇིགས་དཔའ་བོ་ཆེན་པོ་ཀྱེ། །འཆི་བ་རྣམ་རྟོག་ཙམ་ཡིན་ནོ། །ཞེས་བྱ་མཁའ་ལ་སྒྲ་ཆེན་སྒྲོགས། །རབ་མཛེས་རྣམ་མང་གཞལ་ཡས་ནས། །ཐོད་པའི་དུམ་སྐྱེས་མ་ལ་སོགས། །ཐལ་སྦྱར་གདུགས་དང་རྒྱལ་མཚན་ཐོགས། །གཞན་དག་སྣ་ཚོགས་རོལ་མོ་བྱེད། །བསྟོད་བཀུར་བསྔགས་དང་གླུ་རྣམས་ལེན། །གང་ན་དཔལ་ལྡན་བདེ་མཆོག་ཆེ། །སྐུ་བཞིའི་རྒྱལ་པོ་བླ་ན་མེད། །མཐོང་ཞིང་ཐོས་ལ་མངོན་གྱུར་ལྟོས། །འཇིག་རྟེན་ཁམས་ཀྱི་དབང་ཕྱུག་པོ། །རང་གི་ཚོགས་ཀྱི་འཁོར་དང་བཅས། །ལྷ་དང་དྲི་ཟ་ཀླུ་དབང་རྣམས། །འོངས་སྟེ་མཆོད་པའི་སྤྲིན་ཚོགས་གཏིབས། །ལྷ་ཡི་མེ་ཏོག་ཆར་བབ་ཅིང༌། །དྲི་ཞིམ་(ཉ༢༠བ)

― PTT001_Page_0499 ―

^{[མ་དཔེ་གཟིགས་ན་འདིར་གནོན།]}

[Full Size]

སྒྲ་སྙན་ལྷ་མོ་དང༌། །ཀླུ་མོ་གཞོན་ནུར་བཅས་རྣམས་དེར། །མཆི་མ་འབྱིན་ཞིང་མཆོད་པ་བྱེད། །དེ་ཚེ་ས་དག་རྣམ་དྲུག་གཡོས། །བརྒྱ་ཕྲག་གཉིས་བཅས་པཎྜི་ཏས། །མཐུན་པར་མཁའ་ལས་ཆོས་སྒྲ་འདི། །ཐོས་ནས་ཏིང་འཛིན་མཆོག་རེག་གྱུར། །ཞེས་གྲགས་པཎྜི་ཏ་ཉིས་བརྒྱས་མགྲིན་གཅིག་དུ་ཐོས་ཤིང་ཏིང་འཛིན་སྐྱེས། སོ་སོས་ཡི་གེར་བྲིས་སྟེ་ཕྱིས་ལོ་ཙཱ་བ་ཆེན་པོས་ཆོས་རྗེས་སྔོན་ནས་ང་འདས་པའི་འོག་དུ་བོད་ན་རྗེ་བཙུན་བྱམས་ཆེན་བཞུགས་པར་ངའི་རུས་པ་དང་རིང་སྲེལ་རྣམས་ཆུག །མ་ཧཱ་ལོ་ཙཱ་བས་མཆོད་རྟེན་གྲུབ་ཀྱང་ལེགས་སོ་ཞེས་པའི་ཕྱག་བྲིས་བཀོད་སྟེ་པཎྜི་ཏ་སུ་བྷ་མ་ཤྲཱི་⁽1763⁾འཇུག་ངོགས་དཔལ་དང་ཏྲི་ལོ་ཀྱཱ་ནནྡ་⁽1763⁾སྲིད་གསུམ་ཀུན་དགའ་གཉིས་ལ་ཡི་གེ་འདི་དང་ངའི་རུས་པ་མ་ཧཱ་ལོ་ཙ་བ་ལ་བོད་དུ་སྐྱོལ་ཞིག་ཞེས་བཀའ་བབ་ནས་དབུའི་གདུང་དང་རིང་སྲེལ་པཎྜི་ཏ་གཉིས་ཀྱིས་བཀའ་བཞིན་མ་ཧཱ་ལོ་ཙཱ་བ་ལ་ཕུལ་སྟེ་མཆོད་རྟེན་ཆེན་པོ་མཛད་ཏོ། །པཎ་ཆེན་འདི་ལྕགས་སྤྲེལ་འཁྲུངས་པའི་རེ་ལྔ་ལ་བོད་དུ་ཕེབས་པར་གྲགས་ཀྱང་སིལ་སྙན་འདུན་པ་ཉིད་ཡིད་འཆེས་ཀྱི་གནས་ཡིན་པས་མེ་ལུག་ལ་འཁྲུངས། དོན་བརྒྱད་པ་ཤིང་བྱི་ལ་བོད་དུ་ཕེབས། གྱ་བདུན་པ་ཆུ་བྱ་ལ་ཁ་ཆེར་བྱོན། གོ་དགུ་པ་ཤིང་བྱ་ལ་དགའ་ལྡན་དུ་གཤེགས་པ་ཡིན་ནོ། །དེང་སང་པཎ་ཆེན་འདིའི་མཚན་ལ་བསྟེན་ནས་འཚོ་ཞིང་རྒྱུད་འཛིན་དུ་ཁས་འཆེ་བ་རྣམས་ལའང་ལོ་པཎ་འདི་གཉིས་ཀྱི་ཆོས་དང་རྣམ་ཐར་གང་གིའང་རྒྱུས་མི་སྣང་ཞིང་སྤྱིར་ཡང་པཎ་ཆེན་གྱི་རྣམ་ཐར་དེང་སང་གྲགས་ཆེར་མི་སྣང་བས་མ་ཧཱ་ལོ་ཙཱ་བའི་དཔག་བསམ་གྱི་འཁྲི་ཤིང་དང༌། ཁྲོ་དཔྱལ་གྱིས་མཛད་པའི་རྣམ་ཐར་ཐོར་བུ་མཁས་པ་བསོད་ནམས་དཔལ་གྱིས་བསྡུས་པ་ལས་རང་གཟོ་མེད་པར་མདོར་བསྡུས་པ་ཡིན་ནོ། །པཎ་ཆེན་དེའི་སློབ་མ་རྒྱ་བོད་ན་མཐའ་ཡས་ཀྱང་འདུལ་བའི་སྡོམ་རྒྱུན་ནི་པཎ་ཆེན་དབུས་སུ་ཕེབས་དུས་ཆུ་ཤུལ་ཕྲོག་མ་དགོན་པར་མི་བཅུ་གཅིག་གིས་བསྙེན་རྫོགས་ཉིན་གཅིག་ལ་བསྒྲུབས་པའི་ནང་ནས་གྲུ་ཤུལ་འཁོར་གང་བྱང་ཆུབ་དཔལ་དང་གཙང་པ་རྡོ་རྗེ་དཔལ་གཉིས་ཀྱིས་ཕྱགས་ཕྱིར་འགྲོ་བར་ཞུས་པས་ཟུལ་ཕུའི་ན་བཟའ་འཕྲེད་གསོལ་ལ་འདུལ་བ་(ཉ༢༡ན)

― PTT001_Page_0500 ―

^{[མ་དཔེ་གཟིགས་ན་འདིར་གནོན།]}

[Full Size]

ཉོན་ལ་ཤོག་གསུངས་ནས་འདུལ་བ་བསླབས། པཎ་ཆེན་གྱི་བླ་མཆོད་ཇོ་བོ་སྟན་གཅིག་པ་གཙང་སོ་བ་བསོད་ནམས་མཛེས་ཀྱི་ཕྱགས་ཕྱིར་བཞག །འདི་ནི་པཎ་ཆེན་བོད་དུ་ཕེབས་པའི་ལམ་དུ་ལ་སྟོད་པའི་སྟན་གཅིག་པ་བཟང་པོ་ཅིག་གིས་བདག་གིས་བསྙེན་པར་རྫོགས་ནས་ལྟུང་བས་སྐད་ཅིག་ཀྱང་མ་གོས་པར་བགྱིས་བདོག་པས་དེ་བྱང་ཆུབ་ཏུ་བསྔོ་བར་ཞུ་ཞུས་པས་པཎ་ཆེན་ཕྱག་ཐལ་མོ་སྦྱར་སྟེ་དགེ་བའི་བཤེས་གཉེན་པ་བསྔོ་རྒྱུ་བཟང་ཁྱེད་ངའི་མཆོད་གནས་སུ་བཞུགས་པར་ཞུ་གསུངས་ནས་མཆོད་གནས་ཀྱི་གཙོ་བོ་མཛད་པ་དེ་ཡིན། པཎ་ཆེན་རྒྱ་གར་ལ་ཐེགས་དུས་བྱང་རྡོར་གྱིས་ཕྱགས་ཕྱིར་འགྲོ་བར་ཞུས་པས་རྒྱ་གར་དུ་ཚད་པ་མི་ཐུབ། བོད་དུ་གཙང་སོ་བ་ལ་བསྟེན་ལ་འདུལ་བ་ཤོད། དགེ་སློང་བཞི་སྡེ་རེ་མ་བྲལ་བ་གྱིས་གསུངས་དེ་ལྟར་མཛད། གཙང་སོ་བ་གཤེགས་ནས་སློབ་མ་སོ་སོར་བསྐྱངས་པས་མཁན་པོ་རྡོ་རྗེ་དཔལ་གྱི་རྗེས་སུ་སངས་རྒྱས་དཔལ། འོད་ཟེར་དཔལ། ཆོས་ཀྱི་རྒྱལ་མཚན། སངས་རིན། བསོད་ནམས་དཔལ། ཤེས་རབ་མགོན་པོ། སེང་གེ་རྒྱལ་མཚན། བསོད་ནམས་དབང་ཕྱུག་བཀྲས་ཚུལ་བ་སོགས་སྟེ་སྙེ་མོ་ཚ་མིག་དུ་བཞུགས་པས་ཚ་མིག་ཚོགས་པ་ཟེར་ལ་ཕྱིས་ཚོགས་ཆེན་པར་གྲགས། མཁན་པོ་སེང་རྒྱལ་ཡན་གྱི་ནང་རྟེན་ཡང་ཟུལ་ཕུར་བསྐྱལ་ལོ། །མཁན་པོ་སངས་རྒྱས་དཔལ་གྱི་གྲོགས་མཆེད་གཞུ་པ་དཀོན་མཆོག་བཟང་པོས་ཚོགས་བསྐྱངས་སྟེ་གཞུའི་བྱེ་རྫིང་དུ་བཞུགས། དེ་ནས་ཐུགས་རྗེ་དཔལ། དར་མ་དཔལ། ཀུན་དགའ་དཔལ། ཚུལ་ཁྲིམས་དཔལ། སངས་གཞོན། དར་མ་བཟང་པོ། ཚུལ་ཁྲིམས་མགོན། བསོད་ནམས་འོད་ཟེར། རིན་ཆེན་ཚུལ་ཁྲིམས། བསོད་ནམས་ཤེས་རབ། ཤེས་རབ་མགོན་པོ་ལ་སོགས་པ་སྟེ་བྱེ་རྫིང་པའོ། །མཁན་པོ་བྱང་ཆུབ་དཔལ་ས་སྐྱ་པ་འགྲོ་མགོན་ཆོས་རྒྱལ་འཕགས་པའི་མཁན་པོ་ལ་གོང་དུ་གདན་འདྲེན་བྱུང་བས་གཙང་པ་དབང་ཕྱུག་(ཉ༢༡བ)

― PTT001_Page_0501 ―

^{[མ་དཔེ་གཟིགས་ན་འདིར་གནོན།]}

[Full Size]

གྲགས་གདན་སར་བསྐོས་སྟེ་ཧོར་ཡུལ་ལ་བྱོན་པས་འདམ་དུ་ཕེབས་པའི་ཚེ་འཕགས་པ་བསྙེན་རྫོགས་མཛད་ཟིན་པ་གསན་ནས་སླར་ལོག་སྟེ་ཚོགས་པ་སར་དུ་བསྐྱངས་པས་སྡེ་གཉིས་བྱུང་སྟེ་མཁན་པོ་གཙང་པའི་རྗེས་སུ་དབོན་པོ་གཞོན་བྱང༌། འདུལ་ཚད་པ་བྱང་ཆུབ་བཟང་པོ། དོན་གྲུབ་དཔལ། ཡོན་ཏན་རྒྱལ་མཚན། དཔལ་གྲུབ་པ་ལ་སོགས་པ་བྱོན་སྟེ་གཞུའི་དགེ་འདུན་སྒང་དུ་བཞུགས་པས་དགེ་འདུན་སྒང་པར་གྲགས། འདིའི་མཁན་པོ་ལ་གནས་བརྟན་བཅུ་དྲུག་གང་རུང་རེ་བྱོན་པའི་ཚེ་ཀརྨ་པ་ན་རིམ་རེའི་མཁན་པོ་མཛད་པ་པཎ་ཆེན་གྱི་ལུང་བསྟན་ཡོད་ཅིང་ངེས་པ་ཅན་ཡིན་ཞེས་སྙག་དབོན་བསོད་ནམས་བཟང་པོའི་རྣམ་ཐར་ན་གསལ་བར་སྣང་ཞིང་སྙག་དབོན་ཆེན་པོ་ལ་ཀརྨ་པ་དེ་བཞིན་གཤེགས་པས་བསྙེན་རྫོགས་མཛད། དོལ་ཚལ་མིན་ཕུལ་ནས་སྡེ་ཆེན་པོ་བཏབ་སྟེ་བཞུགས། དེའི་སློབ་མ་འཕགས་ཆེན་བསོད་ནམས་དང་ཐོག་བརྡུགས་པ་དེས་བསྙུང་གནས་པའི་སྡེ་བསྐྱངས་པ་འཕགས་སྡེར་གྲགས། ཁོང་གི་སློབ་མ་བཞིས་སྡེ་སོ་སོར་བསྐྱངས་པ་ལ་འཕགས་སྡེ་བཞི་བྱུང་སྟེ་དགེ་འདུན་སྒང་པའི་ཡན་ལག་གོ །མཁན་ཆེན་བྱང་ཆུབ་དཔལ་གྱིས་ཚོགས་སར་དུ་བསྐྱངས་པ་ལ། བདེ་བ་དཔལ། བཀའ་བཞི་པ་གྲགས་གཞོན། བྱང་སེམས་བསོད་ནམས་གྲགས་པ། བསོད་ནམས་བཟང་པོ། གཞོན་ནུ་མགོན། གྲགས་པ་རྒྱལ་མཚན། གྲགས་པ་བཤེས་གཉེན་ལ་སོགས་པ་བྱོན་སྟེ་སྦར་སྟག་པ་ཇོ་སྟན་དུ་གྲགས་ཤིང་སྣུབས་ཆོས་ལུང་བཏབ་པ་ཕྱིན་ཆོས་ལུང་པར་གྲགས་སོ། །འདི་རྣམས་ཡར་ལུངས་ཇོ་བོའི་ཆོས་བྱུང་དང་ཚལ་པའི་དེབ་དམར་དང་པོ་ལས་གང་བཤད་པ་བྲིས་པ་ཡིན་ལ་དེབ་སྔོན་ལས་ཚོགས་པ་བྱེ་རྫིང་བ་ནི་དཀོན་མཆོག་རྒྱལ་མཚན། ཐུགས་རྗེ་དཔལ་ཞེས་སོགས་དང༌། ཆོས་ལུང་པ་ནི་དབུ་མཛད་བསོད་ནམས་སྟོབས་ཅེས་སོགས་སྣང་བ་ནི་ཆ་མ་འཚལ་ལ་ཆག་ལོ་གསུམ་པས་དུས་འཁོར་ཆོས་བྱུང་དུ་པཎ་ཆེན་ཤིང་བྱི་ལ་ཁྲོ་ཕུར་ཕེབས་(ཉ༢༢ན)

― PTT001_Page_0502 ―

^{[མ་དཔེ་གཟིགས་ན་འདིར་གནོན།]}

[Full Size]

དབྱར་གནས་མཛད། ལྷོ་བྲག་པ་བྱང་ཆུབ་དཔལ་བསྙེན་པར་རྫོགས། དེ་ནས་སླས་མོ་ཆེར་བཞུགས་དུས་གཙང་སོ་བས་མཇལ་དེར་དབྱར་གནས་མཛད། རྒྱན་གོང་དུ་རྡོ་རྗེ་དཔལ་ལ་བསྙེན་རྫོགས་གནང་ཞེས་བྱང་ཆུབ་དཔལ་བསླབ་པ་སྒྲེས་པར་བྲིས་སྣང་ཞིང་དེབ་དམར་བ་སོགས་ནི་དཀྱིལ་འཁོར་གཅིག་པར་འདོད་པར་སྣང་ལ། ཡང་བྱང་རྡོར་གཉི་ག་འཕགས་པ་རིན་པོ་ཆེའི་མཁན་སློབ་ལ་སྤྱན་དྲངས་ནས་བྱོན་ཡང་བསྙེན་པར་རྫོགས་ཟིན་པར་གསན་ནས་ལམ་ནས་ལོག་སྟེ་ཕྱིས་སོ་སོར་བསྐྱངས་པ་ཆོས་ལུང་པ་དང་བྱེ་རྫིང་པ་ཡིན་ཞེས་བྲིས་པའང་སྣང་ངོ༌། །དེས་ན་རྫོགས་པའི་སངས་རྒྱས། ཤཱ་རིའི་བུ། སྲས་དགྲ་གཅན་ཟིན། བྲམ་ཟེ་དགྲ་གཅན་ཟིན། ཀླུ་སྒྲུབ་ཞབས། ཡོན་ཏན་བློ་གྲོས། རིན་ཆེན་བཤེས་གཉེན། དྷརྨ་པཱ་ལ། གུ་ཎ་པ་ཏི། ཆོས་ཀྱི་ཕྲེང་བ། ཞི་འབྱུང་སྦས་པ། ཁ་ཆེ་པཎྜི་ཏ་ཆེན་པོ་སྟེ་ཕྱིས་བོད་ཡུལ་དུ་སྡོམ་རྒྱུན་རྣམ་པར་དག་པ་འཕེལ་ཞིང་རྒྱས་པ་ནི་པཎ་ཆེན་གྱི་སྡོམ་རྒྱུན་ཚོགས་སྡེ་བཞི་འདི་ཁོ་ན་ཡིན་པས་བཀའ་དྲིན་གཞལ་དུ་མེད་པ་ཡིན་ལ་རྩ་བའི་སྡེ་པ་བཞིའི་རྟེན་འབྲེལ་ཡིན་ནོ། །ལེགས་པར་བཤད་པ་མཁས་པའི་དགའ་སྟོན་གྱི་བོད་ཡུལ་གྱི་བསྟན་པ་ཕྱི་དར་གྱི་སྐབས་ལས་བསྟན་པའི་རྩ་བ་འདུལ་བའི་སྡོམ་རྒྱུན་དང་བཤད་རྒྱུན་ཇི་ལྟར་དར་བའི་སྐབས་སྟེ་གསུམ་པའོ། །༈ སྭ་སྟེ། ཀྱཻ་གླེགས་བུའི་ངོས་ལ་སེ་གཅོད་འགྲོས་མཁས་པ། །རིག་པའི་འབྱུང་གནས་གཉལ་གྱི་ཆོས་ལུང་ནས། །ཚེ་དབང་དར་པོ་ཚེ་དབང་དོན་གྲུབ་དང༌། །བློ་གསལ་རྣམ་རྒྱལ་བསམ་པ་ལེགས་གྲུབ་དང༌། །ཀུན་དགའ་བསམ་འགྲུབ་ཀུན་དགའ་རྒྱལ་མཚན་ཞེས། །བསམ་འགྲུབ་མགོན་པོ་བཀྲ་ཤིས་དགོས་དར་སོགས། །དཔོན་སློབ་རྣམས་ཀྱིས་སོར་མོའི་གར་སྟབས་བསྒྱུར། །སངས་རྒྱས་བསྟན་པ་དར་ཞིང་རྒྱས་པ་དང༌། །ཕ་མས་ཐོག་དྲངས་མ་གྱུར་སེམས་ཅན་རྣམས། །བདེ་བ་ཅན་དུ་སངས་རྒྱས་གོ་འཕངས་ཐོབ་པར་ཤོག། ཤུ་བྷཾ྄།། །།(ཏ༡ན)