བཀའ་གདམས་ཀྱི་བྱུང་བ་བརྗོད་པ།
ཆོས་བྱུང་མཁས་པའི་དགའ་སྟོན་གི་བོད་ཡུལ་གྱི་སྐབས་ལ་ལེའུ་བཅུ་ལས་དྲུག་པ་བཀའ་གདམས་ཆོས་བྱུང་བཞུགས། །(ད༡བ)
སྔོན་ཚེ་རྒྱལ་སྲས་གཙོ་བོ་བཟང་སྐྱོང་ནི། །ཟ་ཧོར་རྒྱལ་པོའི་སྲས་འཁྲུངས་སྔགས་སྤྱོད་གྲུབ། །སླར་ཡང་ཕལ་ཆེན་སྡེ་ལས་རབ་ཏུ་བྱུང༌། །རིག་གནས་སྡེ་སྣོད་མདོ་རྒྱུད་མ་ལུས་མཁྱེན། །བྱང་ཆུབ་སེམས་ཀྱིས་འགྲོ་ཀུན་དབང་དུ་འདུས། །གྲུབ་ཐོབ་རྣལ་འབྱོར་དབང་ཕྱུག་དུ་མའི་མགོན། །འཛམ་གླིང་ཀུན་ན་ཕུལ་བྱུང་ཨ་ཏི་ཤ། །དཔལ་ལྡན་མར་མེ་མཛད་དཔལ་ཡེ་ཤེས་དེ། །ལྷ་བཙུན་བྱང་ཆུབ་སེམས་དཔའ་ཁུ་དབོན་གྱིས། །དཀའ་བ་ཆེན་པོས་ནན་གྱིས་སྤྱན་དྲངས་ཤིང༌། །ལྷག་པའི་ལྷ་ཚོགས་དུ་མས་བསྐུལ་བ་ལས། །བྱང་ཕྱོགས་གངས་ཅན་ཁྲོད་འདིར་གཤེགས་མཛད་དེ། །ཆོས་ཀྱི་རྩ་བ་ལས་འབྲས་བླང་དོར་བསྟན། །ཐམས་ཅད་དཀོན་མཆོག་གསུམ་ལ་སྐྱབས་འགྲོར་བཀོད། །རབ་ཏུ་བྱུང་རྣམས་ཚུལ་ཁྲིམས་གནས་ལ་སྦྱར། །ཐོས་ལྡན་རྣམས་ཀྱི་ལྟ་བ་དྲང་པོར་མཛད། །བསམ་གཏན་པ་རྣམས་(ད༢ན)
ཞི་ལྷག་གཉིས་ལ་སྦྱར། །སྔགས་ལ་ཞུགས་རྣམས་དམ་ཚིག་དག་པར་བཀོད། །ཀུན་ཀྱང་བྱང་ཆུབ་སེམས་ཀྱི་ཐེག་པས་ཁྲིད། །ཆོས་མིན་ཆོས་ལྟར་བཅོས་པ་ཀུན་ནུབ་སྟེ། །སངས་རྒྱས་བསྟན་པའི་ཉིན་བྱེད་རབ་ཏུ་གསལ། །བཀའ་གདམས་བསྟན་པའི་ཤིང་རྟ་ཆེན་པོ་ནི། །རྒྱལ་བས་བསྟན་པ་འཛིན་པར་ལུང་བསྟན་པ། །དགེ་བསྙེན་ཆེན་པོ་འབྲོམ་སྟོན་རྒྱལ་བ་ཡི། །འབྱུང་གནས་དམ་པའི་ཕྱག་དུ་བཞག་མཛད་དེ། །དགའ་ལྡན་དུ་གཤེགས་ན་མཁའ་དྲི་མེད་ཅེས། །མི་ཕམ་མགོན་གྱི་འཁོར་གྱི་གཙོ་བོར་གྱུར། །རིགས་གསུམ་མགོན་པོས་རྣམ་པར་སྤྲུལ་པ་ཡི། །སྐུ་མཆེད་གསུམ་སོགས་སྐྱེས་ཆེན་མཐའ་ཡས་ཀྱིས། །གཞུང་དང་མན་ངག་རབ་ཏུ་རྒྱས་མཛད་ནས། །མཐའ་ཡས་འགྲོ་བ་ངལ་གསོའི་སྟེགས་སུ་གྱུར། །དེ་བས་བོད་ཡུལ་བསྟན་པ་ཕྱི་དར་ལ། །བཀའ་དྲིན་འདི་དང་མཚུངས་པ་གཞན་ཡོད་མིན། །རིན་ཆེན་བྱང་ཆུབ་སེམས་ཀྱི་གྲུ་ཆེན་པོ། །བསླབ་གསུམ་ཚགས་ཀྱིས་བསྡམས་པ་ལེགས་བཤམས་སྟེ། །འགྲོ་ཀུན་སྡུག་བསྔལ་མཚོ་ལས་སྒྲོལ་བརྩོན་པ། །ཇོ་བོ་ཡབ་སྲས་རྒྱུད་པར་བཅས་ལ་འདུད། །དེ་ཡང་བསྟན་པ་ཕྱི་དར་ལ་བོད་ལ་བཀའ་དྲིན་ཆེ་བ་ཇོ་བོ་ཨ་ཏི་ཤ་ནི་རྒྱ་གར་ཤར་ཕྱོགས་བྷཾ་ག་ལའི་ཡུལ་གྱི་བྱེ་བྲག་ཟ་ཧོར་ཞེས་བྱ་བ་མི་ཁྲིམ་འབུམ་ཕྲག་ཉི་ཤུ་རྩ་བདུན་ཡོད་པའི་གྲོང་ཁྱེར་གྱི་དབུས་ན་ཕོ་བྲང་གསེར་གྱི་རྒྱལ་མཚན་ཅན་ཞེས་བྱ་བ་རྒྱ་ནག་སྟོང་ཀུན་དང་ལོངས་སྤྱོད་མཉམ་པ་དེར་སྔོན་མཁན་པོ་ཞི་བ་འཚོ་བྱོན་པའི་གདུང་རིགས་ཡབ་རྒྱལ་པོ་དགེ་བའི་དཔལ་དང་བཙུན་མོ་དཔལ་མོ་འོད་ཟེར་ཅན་ལ་སྲས་གསུམ་ལས་ཆེ་བ་པདྨའི་སྙིང་པོས་རྒྱལ་སྲིད་བཟུང༌། ཆུང་བ་དཔལ་གྱི་སྙིང་པོ་རབ་བྱུང་མཛད་དེ་དགེ་སློང་བཱིརྻ་ཙནྡྲ་ཞེས་བྱ་བ་སྐྱེད་རིམ་བརྟན་པ་ཅིག་བྱོན། འབྲིང་པོ་ཟླ་བའི་(ད༢བ)
སྙིང་པོ་ནི་ཇོ་བོ་འདི་ཡིན་སྟེ་འཁྲུངས་ནས་ཞག་བདུན་ན་སྒྲོལ་མ་ཞལ་གཟིགས་དེ་ཕྱིན་ཆད་ཅི་འདོད་སྒྲོལ་མ་ལ་གསོལ་བ་བཏབ་པས་དངོས་སུ་ཆོས་མི་གསུང་ཡང་སྤྲོས་པ་ནང་ནས་ཆོད་དེ་འོང་བ་ཡིན་གསུངས། ལོ་བཅུར་སྒྱུར་རྩལ་དྲུག་བཅུ་རྩ་བཞི་དང་གཟོ་དང་གསོ་བ་སྦྱངས། ལོ་བཅུར་ཕྱི་ནང་གི་སྒྲ་ཚད་བསླབས། རཱ་ཧུ་ལ་གུཔྟ་བཛྲ་ལ་དབང་ཞུས་པའི་ཚེ་དགྱེས་རྡོར་ཞལ་གཟིགས་རྟོགས་པ་རྒྱུད་ལ་སྐྱེས་སྟེ་གསང་མཚན་ཡེ་ཤེས་གསང་བའི་རྡོ་རྗེར་བཏགས། གཤིན་རྗེའི་གཤེད་ཀྱི་རྣལ་འབྱོར་པ་ཆང་འོ་མར་བསྒྱུར་ཞིང་གངྒཱ་ལ་གདིང་བ་བཏིང་ནས་འབྱོན་པ་ཀ་མ་ལ་རཀྵི་ཏ་ལས་གསང་སྔགས་ཀྱི་བཀའ་དྲིན་ཕལ་ཆེར་བརྙེས། བླ་མ་དེ་སེམས་ཙམ་རྣམ་རྫུན་པ་ཡིན། ཇོ་བོ་དབུ་མ་བཞེད་པ་ལ་མི་མཉེས། གསང་སྔགས་ཀྱི་སྒོ་ནས་ཚོགས་བསགས་པས་ཕྱིས་ཕྱག་རྒྱ་ཆེན་པོའི་དངོས་གྲུབ་ཐོབ་ནས་རྗེས་ཐོབ་ལ་གཟིགས་པས་ཆོས་རྣམས་ཀྱི་རང་བཞིན་ཁྱོད་ཀྱི་ལྟར་འདུག་གསུངས་ནས་དབུ་མ་པར་འགྱུར། ཨ་ཝ་དྷཱུ་ཏི་པ་ལོ་དགུ་བསྟེན། དེ་ཐ་མལ་གྱི་གཏམ་མི་གསུང་རེས་གསེར་གྱི་མཎྜལ་ཕུལ་ནས་ཆོས་ཞུས་ཀྱང་མི་གསུང༌། རེས་ལོང་མེད་པའི་དུས་ན་ཡང་མ་ཞུས་པར་གསུང༌། དཔོན་སློབ་གཉིས་ཟམ་པ་དོག་མོ་ཡ་ང་བ་ཞིག་ལ་འབྱོན་འཕྲོ་ལ་ཞལ་ལོག་མཛད་ནས་བུ་བདག་འཛིན་དང་མ་བྲལ་བར་དུ་ལས་འབྲས་ཕྲ་བ་ལ་ཡང་འཛེམས་ཅིག་པཎྜི་ཏ་དང་ནུས་པ་ཅན་འདི་དང་འདི་འདྲ་ཡང་ལས་འབྲས་ཕྲ་མོ་ལ་མ་འཛེམས་པས་ངན་སོང་གི་སྡུག་བསྔལ་འདི་འདྲ་བ་མྱོང་ཞིང་འདུག་གོ་གསུངས། ཆོས་ཀྱི་ཕྱིར་རྒྱ་མཚོ་ཆེན་པོར་ཡང་ལན་གསུམ་ཞུགས་སྟེ་བསོད་སྙོམས་པ་ཆེན་པོ་སོགས་ལས་དབང་རྒྱུད་གདམས་པ་མང་དུ་གསན། སྤྱོད་པའི་ཚད་དུ་ལོངས་སྟེ་རིག་པ་བརྟུལ་ཞུགས་ཀྱི་སྤྱོད་པ་ལོ་དྲུག་མཛད། ཤར་ཕྱོགས་བྷ་དུ་རའི་གྲོང་ན་བཞུགས་པ་ན་རོ་པའི་སློབ་མ་ཨ་ཝ་དྷཱུ་ཏི་པ་མངོན་ཤེས་ཅན་ལ་བྲྀ་ཀ་མ་ལར་ཡང་དབང་གསན་སྟེ་གསང་མཚན་སྔ་མ་དེ་ཁོ་ན་བཏགས། བུད་མེད་གཅེར་བུ་རུས་རྒྱན་ཅན་རེས་ངུ་རེས་རྒོད་པ་ཅིག་གཟིགས་ནས་ཡིད་ཀྱིས་གསོལ་བ་བཏབ་པས་ང་རེས་ངུ་རེས་རྒོད་པའི་(ད༣ན)
དོན་ཤེས་སམ་གསུངས། མ་འཚལ་ཞུས་པས་སེམས་ཅན་རྣམས་རང་རྒྱུད་ཀྱི་ཡེ་ཤེས་མ་རྟོགས་པར་འཁོར་བའི་སྡུག་བསྔལ་སྤྱོད་པས་ངུ་བ་ཡིན། རྟོགས་ན་ད་ལྟ་ཉིད་སངས་རྒྱས་ཡིན་པས་རྒོད་པ་ཡིན་གསུངས་ནས་རྡོ་རྗེ་རྣལ་འབྱོར་མའི་དབང་ཚེགས་ཆུང་ལ་དོན་ཆེ་བ་བྱིན་རླབས་ཀྱི་ལུགས་བྱ་བ་བསྐུར་ནས་རྣལ་འབྱོར་མའི་ཞལ་ཇི་ལྟར་བར་གཟིགས་གདམས་ངག་མ་ལུས་པར་ཞུས། དེའི་ཚེ་བྷཾ་ག་ལར་ཕྱི་ནང་གི་རྩོད་པ་ཆེན་པོ་བྱུང་ནས་བསྟན་པ་ཕལ་ཆེར་མུ་སྟེགས་ལ་ཤོར་ནས་རྩོད་པ་ཟློག་ནུས་པ་མེད་པའི་ཚེ་བུ་མོ་གཅིག་གིས་ཇོ་བོའི་སྐུ་ལས་འོད་འཕྲོ་བ་མཐོང་ནས་གནས་བརྟན་ལ་སྤྲང་པོ་འོད་འཕྲོ་བ་ཞིག་འདུག་རྣལ་འབྱོར་པ་ཡིན་སྟེ་འོང་རྩོད་པ་ཟློག་པར་ཞུས་ཟེར་ནས་ཞུས་པས་ཞལ་གྱིས་བཞེས། མུ་སྟེགས་ཐམས་ཅད་ཚར་བཅད་ནས་སྔར་ཤོར་བའི་གནས་དང་པཎྜི་ཏ་ཐམས་ཅད་ཚུར་ཐོབ་ཕྱི་རོལ་པ་ཐམས་ཅད་ནང་པར་བཅུག་གནས་བརྟན་དེས་རབ་ཏུ་འབྱུང་བ་དང་བཞུགས་པར་ཞུས་པས་ཀྱང་མ་གནང༌། གསང་སྔགས་ཀྱི་མཁྱེན་པ་དང་ནུས་པ་ལ་ང་བས་ཆེ་བ་མེད་སྙམ་དུ་ཐུགས་རྒྱལ་ཅུང་ཟད་བྱུང་བ་ན་མནལ་ལམ་དུ་མཁའ་འགྲོ་རྣམས་ཀྱིས་ན་མཁའ་ལ་གླེགས་བམ་དཔག་མེད་བཙེར་རྒྱུད་འདི་ཇི་སྐད་བྱ་བ་ཡིན། འདི་ཁྱོད་ཀྱིས་ཤེས་སམ་ཞེས་དྲིས་སྟེ་སྔོན་མཚན་ཡང་མ་གསན་པའི་རྒྱུད་མཐའ་ཡས་པ་འདུག །ལོགས་ཅིག་ན་པོ་ཏི་ནག་ཆུང་ཁ་ཤས་འདུག་པ་ལ་འདི་ཁྱོད་ཀྱིས་ཤེས་པའི་རྒྱུད་རྣམས་ཡིན་ཟེར། ཡང་ཇོ་མོ་སྒྲོལ་མ་བྱོན་ནས་ཁྱོད་པཎྜིཏ་སྔགས་མཁན་ཡིན་ནམ་གསུངས། ལགས་ཞུས་པས་འོ་ན་སྒྲུབ་ཐབས་འདི་དང་འདི་མཁྱེན་ནམ་གསུངས། དེ་ཀུན་དཔེ་ཡང་མཐོང་མ་མྱོང་ཞུས་པས་འོ་ན་ཁྱོད་སྔགས་ལ་མཁས་པའི་ཐུགས་རྒྱལ་ཆེ་ན། ཁྱེད་མིའི་ཡུལ་ན་རྟའི་སྤུ་རྩེ་གཅིག་ཙམ་ལས་མེད། སྔགས་ཀྱི་དཔེ་དོན་མང་པོ་མཁའ་འགྲོ་མའི་ལག་ན་ཡོད་པ་ཡིན་གསུངས་ནས་ཡལ། དེར་སྔགས་ལ་མཁས་པའི་ཐུགས་རྒྱལ་ཆག །འོན་ཡང་སྔགས་སྤྱོད་ཀྱིས་ཚེ་འདིར་འཚང་རྒྱ་བ་ཞིག་བྱ་(ད༣བ)
དགོས་དགོངས་པ་ན་དཔལ་ཧེ་རུ་ཀ་བྱོན་སྟེ་ཨ་ཝ་དྷཱུ་ཏི་པའི་སྤྱོད་པས་གར་ཡང་མི་ཕྱིན་པས་ཁྱོད་རབ་ཏུ་བྱུང་ཞིག །ཕྱི་ཞིག་ན་རབ་བྱུང་གི་གདུལ་བྱ་མང་བར་འབྱུང་ངོ་ཞེས་ལུང་བསྟན། ཡང་མནལ་ལམ་ན་སངས་རྒྱས་ཤཱཀྱ་ཐུབ་པ་དགེ་འདུན་དང་བཅས་པ་གདུགས་ཚོད་གསོལ་བའི་གྲལ་མཐའ་ན་ཇོ་བོ་ཉིད་འདུག་པ་ལ་སྟོན་པའི་ཞལ་ནས་མི་མ་གི་ཅི་ལ་ཆགས་ནས་ཁྱིམ་མི་སྤོང་བ་ཡིན་གསུང་བ་རྨིས། ཡང་གཙུག་ལག་ཁང་ཞིག་ན་བྱམས་པ་དགེ་སློང་གི་ཆ་བྱད་དུ་འདུག་པའི་དྲུང་དུ་འབྱོན་པར་བརྩམས་པས་འདི་རབ་ཏུ་བྱུང་བའི་ས་ཡིན་ཁྱོད་ཁྱིམ་པའི་ས་མིན་པས་མ་འོང་ཞིག་གསུང་བ་རྨིས། རང་བཞིན་གྱི་རྣལ་འབྱོར་མ་ཞིག་དང་མཇལ་བས་ཀྱང་ཨ་ཝ་དྷཱུ་ཏིའི་སྤྱོད་པ་མ་བྱས་ཚེ་འདི་ལ་བདེན་པ་མི་མཐོང་བར་ཆད་འོང་རབ་ཏུ་བྱུང་ན་བསྟན་པ་ལ་ཕན་ཞེས་གསུང་བས་བསྐུལ་སྟེ་དགུང་ལོ་ཉེར་དགུ་ལ་རྡོ་རྗེའི་གདན་མ་ཏི་བི་ཧ་རའི་གཙུག་ལག་ཁང་དུ་ཕལ་ཆེན་སྡེ་པའི་བྱེ་བྲག་འཇིག་རྟེན་ལས་འདས་པར་སྨྲ་བའི་སྡེ་པ་སངས་རྒྱས་ཡེ་ཤེས་ཀྱི་བཀའ་རྒྱུད་སྦྱོར་ལམ་པ་ཤཱི་ལ་རཀྵི་ཏས་མཁན་པོ་མཛད་དེ་རབ་ཏུ་བྱུང་དཱི་པམ་ཀ་ར་ཤྲཱི་ཛྙཱ་ན་དཔལ་མར་མེ་མཛད་ཡེ་ཤེས་སུ་མཚན་བཏགས་ནས་བསྙེན་པར་རྫོགས། དེའི་ཚེ་མཁན་པོས་མུ་སྟེགས་ཅིག་དང་རྩོད་པ་བྱས་པས་སྨྱོ་འབོག་ཡོར་བ་ལངས་ནས་འཕྲོ་ལ་ལུས། ཇོ་བོས་འཕྲོ་བླངས་ནས་བརྩད་པས་ཇོ་བོ་རྒྱལ། མུ་སྟེགས་ན་རེ་སྔར་མ་ཐོས་པའི་པཎྜིཏ་འདི་ཇི་ལྟ་བུ་ཡིན་ཟེར། ཇོ་བོས་པཎྜིཏ་ཙམ་མིན་སྒྲ་ཚད་ལ་བྱང་བར་བྱས་པ་ཅིག་ཡིན་སྟེ་བྱས་པས་འོ་ན་ངལ་དུ་འཕངས་རིག་པ་སློབས་ཟེར། དེ་ལ་བསྟེན་ནས་མཁན་པོས་ཀྱང་བསྐུལ་སྟེ་སླར་ཡང་བྱ་ཀ་ར་ཎ་སྡེ་བརྒྱད་དུ་གྲགས་པ་འཇམ་དཔལ་གྱི་སྒྲ་མདོ་སརྦ་ཛྙཱ་ན། ཨིནྡྲ། པཱ་ཎི། ཀ་ཙ་ན། མ་ཎི་བྱ་ཀཱ་ར་ཎ། ཀུན་དུ་བཟང་པོ་སོགས་སྒྲའི་གནས་མཐའ་དག་དང༌། བྲམ་ཟེ་ནོར་ལྷས་བྱས་པ་ཚིག་གི་སྒྲོན་མ་སོགས་ཕྱི་རོལ་བའི་སྒྲ་མདོ་མཐའ་ཡས་སྦྱངས། རྐང་མིག་པའི་རིགས་པའི་(ད༤ན)
ལྟ་བ་དང་ནང་པའི་སྡེ་བདུན་མདོ་བཅས་སོགས་ཚད་མའི་ཕུལ་དུ་ཕྱིན། རྡོ་རྗེ་གདན་དུ་སྒྲ་ཚད་ལ་ཤིན་དུ་མཁས་པའི་མུ་སྟེགས་པ་གདུགས་བཅུ་གསུམ་ཕུབ་པ་ཅིག་དང་ཕྱི་ལོ་གདུགས་བདུན་ཕུབ་པ་ཅིག་བྱུང་བ་ཇོ་བོས་ཚེགས་མེད་པར་བཏུལ། ཕྱི་ལོ་གདུགས་ལྔ་ཕུབ་པ་ཅིག་བྱུང་བ་སྒྲ་ཚད་ལ་ཆེར་མཁས་པས་དང་པོར་པཎྜིཏ་ཀུན་གྱིས་གོ་དེ་ནས་རིམ་གྱིས་གོ་བ་ཇེ་ཉུང་དུ་སོང་སྟེ་ཤིན་དུ་མཁས་པ་ལྔ་ཙམ་ལས་གཞན་གྱིས་མ་གོ །དེ་ནས་ཤིན་དུ་ཕྲ་བས་ཁོང་རང་གཉིས་མ་གཏོགས་པས་མ་གོ །དེ་ནས་མུ་སྟེགས་དེས་སྒྲའི་ཚིགས་བཅད་གཅིག་གི་དོན་ཇོ་བོ་ལ་དྲིས་པས་ལན་མ་ཐེབས་ནས་ཁྱོད་ཅུང་ཞིག་སྡོད་ཅིག་གསུངས་སྟེ་ནང་དུ་བྱོན་སྒྲོལ་མ་ལ་གསོལ་བ་བཏབ་པས་ཐུགས་ལ་གསལ་ལེར་བྱུང་སྟེ་ལན་བཏབ་ནས་ཚར་བཅད་གདུགས་ལྔ་པོ་ཇོ་བོ་ལ་ཕུལ་ཞབས་སྤྱི་བོར་བླངས་སྟེ་ནང་པ་ལ་བཀོད་ཏོ། །རྩིས་ཀྱི་གཙུག་ལག །ལུགས་ཀྱི་བསྟན་བཅོས། གསོ་བའི་གཞུང༌། ཕྱི་ནང་གི་རྟེན་འབྲེལ་གྱི་གནས་མ་ལུས་པ་ལ་འགྲན་པའི་ཟླ་མེད། ནང་རིག་པ་ལ་ཐེག་པ་ཆུང་ངུའི་སྡེ་བཞིའི་རྩ་བའི་བསྟན་བཅོས་བྱེ་བྲག་བཤད་པ། ཆེན་པོ་བམ་པོ་སུམ་བརྒྱ་ཡོད་པ་དེ་ཨོ་ཏྱནྟ་པུ་རིར་དྷརྨ་རཀྵི་ཏ་ལས་གསན་སྟེ་སྔགས་ཀྱི་སྦོམ་པོ་མི་འབྱུང་བའི་ཕྱིར་ཞག་དྲུག་ནང་དུ་བཞུགས་བདུན་པ་ལ་ཕྱིར་བྱོན། དེ་ལྟ་བུས་ལོ་བདུན་ལ་ཚར། གཞན་བརྩོན་འགྲུས་ཅན་གྱིས་ཀྱང་ལོ་བཅུ་གཉིས་དགོས་སྐད། སྡེ་པ་བཅོ་བརྒྱད་པོ་སོ་སོའི་སྡེ་སྣོད་གསུམ་པོ་མང་དུ་གསན་ཞིང་ཕལ་ཆེར་གཟིགས་པས་མཁྱེན་སྟེ་སྡོམ་པའི་གཏོང་ཐོབ་རྟེན་འབྲེལ་གྱི་འཁོར་ལོ་སོགས་རེ་རེ་ཞིང་མ་འདྲེས་པར་འབྱེད་པ་ལ་མཁས། ཐེག་ཆེན་ཕ་རོལ་ཏུ་ཕྱིན་པ་ལ་བདེན་བཞིའི་སྒོར་ཞུགས་པའི་ཐེག་ཆེན་ནི་ལུང་དབྱུག་པ་གསུམ་གྱི་ཕྲེང་བ་དང་རིགས་པ་རྟ་དབྱངས་ཀྱི་མདོ་སྡེ་རྒྱན་དང་ལྟ་བ་བྱེ་སྨྲ་དང་ཐུན་མོང་དུ་བྱས་བློ་སྦྱོང་བ་རྣམས་དྷརྨ་རཀྵི་ཏ་སྙིང་རྗེ་ཆེན་པོ་མངའ་བ་མི་གསོན་པོའི་ཤ་མིན་པས་མི་སོས་ཟེར་(ད༤བ)
བའི་ནད་པ་ཅིག་ལ་རང་གི་བརླ་ལས་ཤ་བཅད་དེ་བྱིན་པས་སོས་ནས་ན་ཚ་བུང་བའི་ཚེ་མནལ་ལམ་ཏུ་མི་དཀར་པོ་ཅིག་གིས་བྱང་ཆུབ་འདོད་པས་བརྩོན་འགྲུས་འདི་ལྟ་བུ་བརྩམ་པར་བྱའོ་ཞེས་ཕྱག་གིས་བྱུགས་པའི་མོད་ལ་རྨ་སོས་པ་དེ་ལ་གསན། ལུང་དྲི་མ་མེད་པར་གྲགས་པས་བསྟན་པའི་མདོ་དང་རིགས་པ་བྱང་ས་ལྟ་བ་སེམས་ཙམ་ལ་བསྟེན་ནས་སྤྱོད་པ་ཕྱིས་གསེར་གླིང་པ་ལས་གསན། ལུང་ན་མཁའ་སྙིང་པོའི་མདོ་རང་རིགས་པ་བསླབ་སྤྱོད་གཉིས་ལྟ་བ་མདོ་སྡེ་པ་ལ་བསྟེང་ནས་སྤྱོད་པ་བྱམས་པའི་རྣལ་འབྱོར་པ་ཅེས་བྱ་བ་བྱམས་པས་དངོས་སུ་རྗེས་སུ་བཟུང་བ་དེ་ལ་གསན། ཡང་དགེ་བསྙེན་ཞིག་འཁོར་འགའ་ལ་ཆོས་འཆད་སར་མི་ཞིག་གིས་ཁྱི་ལ་རྡོ་བརྒྱབ་པས་བླ་མ་ཨ་ན་ཟེར་ནས་ལིང་བོག །ཁྱི་ལ་རྡོ་ཕོག་སར་སྨུག་ཁྱུར་གྱིས་སྲངས་འདུག་སྐད་དེ་བདག་གཞན་བརྗེ་ནུས་པ་དེ་དང༌། རི་དྭགས་དམན་མ་ཐམས་ཅད་སྐྱབས་ཞུ་བའི་བྱང་ཆུབ་སེམས་དཔའ་ཞིག་ལའང་བྱང་ཆུབ་ཀྱི་སེམས་ཀྱི་བཀའ་དྲིན་ཞུས། མདོ་སྡེ་སྣ་ཚོགས་པའི་ཐེག་ཆེན་ནི་མདོ་མང་འདི་རྣམས་སྟེ་རེ་རེ་ཞིང་ཉམས་སུ་ལེན་པའི་གདམས་པ་དང་བཅས་པ་གསན་ཞིང་མཁྱེན། ཤེས་ཕྱིན་གྱི་སྒོར་ཞུགས་པའི་ཐེག་ཆེན་ནི་ལྟ་བ་སེམས་ཙམ་དུ་བཀྲོལ་བ་ཤཱནྟི་པའི་ལུགས་དང་དབུ་མར་བཀྲོལ་བ་སེང་བཟང་གི་ལུགས་དང་མདོར་ན་ཐེག་ཆེན་གྱི་སྡེ་སྣོད་བསྟན་བཅོས་ཐམས་ཅད་བྲྀ་ཀ་མ་ལར་བཞུགས་པ་དེ་ཐམས་ཅད་རྫོགས་པར་མཁྱེན། གསང་སྔགས་རྟོག་པའི་རྒྱུད་བྱ་བ་སྤྱོད་པ་གཉིས་ཀ་རྣལ་འབྱོར། རྣལ་འབྱོར་ཆེན་པོ་རྣལ་འབྱོར་བླ་མེད་དང་བདུན་དུ་བཞེད་པའི་རེ་རེའི་ཡང་རྒྱུད་སྡེ་མཐའ་ཡས་པ་གསན་ཞིང་མཁྱེན། ད་ནི་རྒྱུད་ཐམས་ཅད་མཁྱེན་སྙམ་པ་ན་མནལ་ལམ་དུ་གོ་སོ་མ་པུ་རིའི་སྒོ་སྲུང་ངག་དབང་གྲགས་པ་དང་མཇལ་བས་དོན་དམ་པའི་རྒྱུད་དྲུག་ཅེས་མཐར་ཐུག་འབའ་ཞིག་སྟོན་པའི་རྒྱུད་སོགས་རྒྱུད་འབུམ་ཕྲག་གཅིག་དང་བཞི་བརྒྱ་ལྔ་བཅུ་རྩ་ལྔ་གསན་སྟེ་མནལ་སད་པ་ན་ཐམས་ཅད་མཁྱེན་ནས་གདའ་སྐད། ཕྱི་རིག་(ད༥ན)
པ་ཅེས་བྱ་བ་ཕྱི་རོལ་པའི་གཞུང་ལུགས། རིག་བྱེད་པ། གྲངས་ཅན་པ། བྱེ་བྲག་པ་དཔྱོད་པ་པ་ཅེས་བྱ་བ་རྩ་བའི་སྡེ་བཞི་ལ་བསྟེན་ནས་ཚངས་པ་དང་ཁྱབ་འཇུག་དང་དབང་ཕྱུག་གིས་བྱས་པར་སྨྲ་བའི་གཞུང་དང༌། དྲང་སྲོང་སེར་སྐྱས་བྱས་པའི་གྲངས་བདུན་བཅུ་པ་ལ་སོགས་བསྟན་བཅོས་དང༌། རྣལ་འབྱོར་སྙིང་པོ་སོགས་ཕྱི་རོལ་པའི་གསང་སྔགས་མང་དུ་ཡོད་པ་དེ་ཐམས་ཅད་མ་ལུས་པར་མཁྱེན། ཨོ་ཌྱན་དུ་བྱོན་ནས་ཞན་ལ་གྲགས་པ་དང་མ་གྲགས་པའི་བླ་མ་མང་དུ་བསྟེན་སྟེ་གསང་སྔགས་གསན། ཟངས་གླིང་དང་ནས་གླིང་ལ་སོགས་པའི་རྒྱ་མཚོའི་གླིང་ཕྲན་དུ་ཡང་ཆོས་རེ་རེའི་ཕྱིར་བྱོན། ཁྱད་པར་དུ་གསེར་གླིང་པའི་སྙན་པ་གསན་པས་མི་བཟོད་པའི་དད་པ་འཁྲུངས་སྟེ་རྒྱ་མཚོ་ནས་ནོར་བུ་ལེན་པའི་ཚོང་པ་དང་ལྷན་དུ་གྲུ་པོ་ཆེར་ཞུགས་སྟེ་ཟླ་བ་བདུན་ཙམ་དུ་བྱོན། དུང་གི་མཚོ་དང་འོ་མའི་མཚོ་དང་མཚོ་ས་ནོན་ལ་སོགས་པར་གཟིངས་རླུང་གིས་དེད་དེ་ཁྱེར། ཆུ་སྲིན་ཉ་མིད་དང་ཉ་མིད་ཆེན་པོ་སོགས་དབུ་རུ་གཡོ་རུའི་བར་གྱི་རི་ཙམ་པ་གཟིགས། དབང་ཕྱུག་ཆེན་པོས་བར་ཆད་བརྩམས་པ་བཤེད་དམར་གྱི་ཏིང་ངེ་འཛིན་གྱིས་བཏུལ། གངས་ཅན་མཚོ་རྒྱལ་གྱི་སྐུའི་དབུ་གཙུག་ནས་ཆུ་ཆེན་པོ་འབབ་པ་ཡང་གཟིགས། གསེར་གླིང་དུ་བྱོན་པས་ལྷའི་ཡུལ་འདྲ་ཞིང་བསྟན་པ་དར་བར་འདུག །བླ་མས་སྣོད་བརྟག་པའི་ཕྱིར་ཟླ་བ་བཅུ་གཉིས་སུ་མ་མཇལ། མཆོད་པ་ཅིག་གི་སར་མཇལ་བས་ཚེ་རབས་སྔོན་གྱི་དཔོན་སློབ་ཡིན་པས་གཉིས་ཀས་ངོ་མཁྱེན་སྟེ་བླ་མས་ཇོ་བོའི་དབུ་ལ་ཕྱག་བཞག་ནས་ཤིས་པ་མང་དུ་བརྗོད། ཁྱོད་བྱམས་སྙིང་རྗེ་བྱང་ཆུབ་ཀྱི་སེམས་ལ་སློབ་ནུས་སམ། ལོ་བཅུ་གཉིས་སྡོད་ནུས་སམ་གསུངས་ནས་ཁོང་རང་གིས་རྙེད་པའི་སྟོན་པའི་གསེར་སྐུ་དེ་གནང༌། ལོ་བཅུ་གཉིས་སུ་དབུ་སྔས་སྤྲད་པར་ཡོལ་བས་བཅད་དེ་བཞུགས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་(ད༥བ)
གཤེགས་ཤུལ་བསྟན་པའི་རིམ་པ་དང་བསླབ་བཏུས་སྤྱོད་འཇུག་ལ་སོགས་པའི་སྤྱོད་པའི་གཞུང་མཐའ་དག་དང་ཁྱད་པར་དུ་བྱང་ཆུབ་ཀྱི་སེམས་རིན་པོ་ཆེ་བདག་གཞན་བརྗེ་བའི་བློ་སྦྱོང་གི་གདམས་པ་གཞན་ལ་མེད་པ་གསན་པས་བླ་མ་གཞན་ཐམས་ཅད་ལས་ཁྱད་པར་དུ་དྲིན་ཆེ་བར་མཛད་དེ་ཕྱིས་གཞན་ལ་ལོ་མཆོད་ཙམ་མཛད་གསེར་གླིང་པ་ལ་ཟླ་མཆོད་མཛད། བླ་མ་གཞན་གྱི་མཚན་གསན་ཚེ་ཕྱག་ཐུགས་ཀར་ཐལ་མོ་སྦྱོར། གསེར་གླིང་པའི་མཚན་གསན་ཚེ་སྤྱི་བོར་ཐལ་མོ་སྦྱོར་ཞིང་སྤྱན་ཆབ་ཤར་གྱིས་འོང༌། ང་ལ་ཡོན་ཏན་ཏུ་བྱས་པ་བསམ་པ་བཟང་པོ་སྤྲིང་ཙམ་ཞིག་ཡོད་འདི་མགོན་པོ་གསེར་གླིང་པའི་བཀའ་དྲིན་ཡིན་གསུང་སྐད། གསེར་གླིང་པའི་སློབ་མ་ཛྙ་ན་ཤྲཱི་མི་ཏྲ་དང་ཤཱནྟི་པ་དང་རཏྣ་ཀིརྟི་གསུམ་ལ་ཆོས་གང་མངའ་བ་གསན་སྟེ་དེ་གསུམ་ཇོ་བོ་དང་བཞི་ལ་གསེར་གླིང་པའི་བུ་ཆེན་བཞིར་བྱེད། མདོར་ན་ཀུ་སཱ་ལྀ་ཆེ་ཆུང་ནི་རྫོགས་པའི་སངས་རྒྱས་དང་ཡོན་ཏན་མཉམ་ཞིང་བརྒྱུད་པའི་བཀའ་བབས་མཐའ་ཡས་པ་མངའ་ལ་དེའི་ཡོན་ཏན་ཐམས་ཅད་གསེར་གླིང་པ་ལ་མངའ། དེའི་ཡོན་ཏན་ཐམས་ཅད་བུམ་པ་གཅིག་ནས་གཅིག་དུ་བྱོ་བ་ལྟར་ཇོ་བོ་ལ་རྫོགས་སྟེ་སྤྱིར་ལོ་གསུམ་ན་འཛམ་གླིང་གི་ཚོང་པ་གསེར་གླིང་དུ་ལན་རེ་ཡོང་བ་ལས་དེའི་ཚེ་གྲུ་བོ་ལན་གསུམ་དུ་བུབ་ནས་ལོ་བཅུ་གཉིས་པ་ལ་གྲུ་བོ་ཆེ་བྱུང་བའི་ཚེ་རྒྱ་གར་ཏུ་བྱོན། ན་རོ་པ་ལ་བྱིན་གྱིས་རློབ་པར་ཞུས་པས་ངའི་སློབ་མ་ཌོམྦྷི་པ་ལ་གསོལ་བ་ཐོབ་ཅིག་དེས་རྗེས་སུ་འཛིན་པར་འགྱུར་རོ་ཞེས་ལུང་བསྟན། དེ་བཙལ་བས་མ་རྙེད་མཎྜལ་ཕུལ་ཞིང་གསོལ་བ་བཏབ་པས་དགེ་སློང་ཤ་ནའི་གོས་གྱོན་པ་ཅིག་མི་ཤ་ལག་པ་ཅིག་ཟ་ཞིང་བྱུང༌། སྦོམ་པོ་མི་འོང་ངམ་བྱས་པས་སངས་རྒྱས་ལ་འཁྲུལ་པ་མངའ་འམ་གསུངས། དེ་ག་ལ་མངའ་བྱས་པས་འོ་ན་ཁྱོད་ཀྱང་ཅིག་འདོད་དམ་གསུངས་ནས་སྲིན་ལག་བཅད་ནས་བྱིན། དེ་ཟོས་པས་རོ་དཔེ་མེད་པ་ཅིག་བྱུང་སྟེ་སང་དྲོའི་གཎྜི་ལ་ཐུག་གི་བར་ཏིང་ངེ་འཛིན་བཟང་པོ་གཅིག་ལ་(ད༦ན)
སོང༌། ཌོམྦྷི་བའི་བྱིན་རླབས་ཡིན་ནམ་སུའི་ཡིན་སྙམ་པ་ལས་སང་ལོ་དུས་ན་སྔགས་པ་ཅིག་གིས་ཌོམྦྷི་པ་ལ་གསོལ་བ་བཏབ་པས་ང་དང་ལས་འབྲེལ་མེད། ངས་ན་ནིང་འདི་ཙམ་ན་འདི་ལྟར་བྱིན་གྱིས་བརླབས་པའི་པཎྜི་ཏ་དཱི་པཾ་ཀ་རའི་དྲུང་དུ་སོང་ཞིག་གསུངས་སྟེ་འོངས་ནས་མཎྜལ་ཕུལ་ཞིང་གསོལ་བ་བཏབ་པས་ཞག་འགའ་ན་བཀའ་དྲིན་གྱིས་ཁྱབ་ཧེ་རུ་ཀའི་དཀྱིལ་འཁོར་མངོན་སུམ་དུ་གྱུར་གསུངས་སྟེ་ན་བཟའ་འདྲ་མངའ་བ་གོ་ལང་བཙོངས་ནས་དགེ་འདུན་ལ་བསྙེན་བཀུར་བྱས་སྟེ་བཞུད། ཇོ་བོ་དེ་ནམ་གཟིགས་བཞེད་ཙམ་ན་ང་འདི་ན་ཡོད་གསུང་གིན་ལམ་གྱིས་བྱོན། ཕྱིས་བོད་དུ་འབྱོན་ཀར་ངའི་སློབ་མ་དེ་གར་ཡོད་ཏམ་དགོངས་ཙ་ན་གཅེར་བུ་རུས་རྒྱན་ཅན་ཏུ་ལམ་བྱུང་སྟེ་ཁོ་བོ་འདི་ན་མཆིས་གསུངས། དེ་ཕྱིན་བོད་ཏུ་མ་བྱོན་སྟེ་ཡུལ་མི་གཅིག་པས་ལན་ནམ་ཞིང་ཁམས་གཞན་དུ་བཞུད་དམ་གསུང་སྐད། གཞན་ཡང་ལྟ་བ་ལུང་སྟོན་པའི་བླ་མ་ན་རོ་པ། བརྟུལ་ཞུགས་བྱིན་གྱིས་རློབ་པ་ཌོམྦྷི་བ། ལས་ཚོགས་བྱིན་རླབས་སྟེར་བ་བ་ལི་ཨཱ་ཙརྻ། རྫུ་འཕྲུལ་བྱིན་རླབས་སྟེར་བ་མཁས་པ་མི་ཆེན་པོ། ཕག་མོའི་བྱིན་རླབས་སྟེར་བ་བྷཱུ་ཏ་ཀོ་ཊི། ཀླུ་སྒྲུབ་ཀྱི་གདམས་པ་སྟེར་བ་མཁས་པ་རྟ་མཆོག །བྱང་ཆུབ་ཀྱི་སེམས་བརྟན་པར་བྱེད་པ་ཤེས་རབ་བཟང་པོ། ཚིག་དོན་རྒྱས་པར་བྱེད་པ་ཤཱནྟི་པ། བསྟན་པའི་སྒོ་འབྱེད་བློ་སྦྱོང་གི་རིམ་པ་སྟེར་བ་གསེར་གླིང་པ་སྟེ་བཀའ་དྲིན་ཆེ་བ་དགུ། དེའི་སྟེང་དུ་བྱང་ཆུབ་བཟང་པོ། ཛེ་ཏ་རི་དྷརྨ་རཀྵི་ཏ་བསྣན་པས་རྩ་བའི་བླ་མ་བཅུ་གཉིས། གཞན་ཡང་དུ་ཧ་ར་ནག་པོ། རཱ་ཧུ་ལ། ན་རོ་པའི་སློབ་མ་མངོན་ཤེས་ཅན་སྟེ་མངོན་པར་ཤེས་པ་རྒྱ་ཆེན་པོ་མངའ་བ་གསུམ། ཨ་ཝ་དྷཱུ་ཏི་པ་དང་ཀ་མ་ལ་རཀྵི་ཏ་སྟེ་ཕྱག་རྒྱ་ཆེན་པོ་གྲུབ་པ་གཉིས། གཞན་ཡང་ཨ་ཝ་དྷཱུ་ཏི་པ། གཤིན་རྗེ་གཤེད་ཀྱི་རྣལ་འབྱོར་པ། ཌོམྦྷི་པ། རབ་ཏུ་འབྱིན་པར་བསྐུལ་པའི་རྣལ་འབྱོར་མ། སྒྲོལ་མ། ཛྙཱ་ན་ཤྲཱིས་ལུང་བསྟན་པའི་རྣལ་འབྱོར་མ་གཉིས། ཕག་མོའི་བྱིན་རླབས་སྟེར་བའི་རྣལ་འབྱོར་མ། རྡོ་རྗེ་(ད༦བ)
གདན་གྱི་ལམ་དུ་ལུང་སྟོན་པའི་རྣལ་འབྱོར་མ། བོད་དུ་བཀའ་ཆེམས་ལུང་སྟོན་པའི་རྣལ་འབྱོར་མ། མངོན་ཤེས་ཅན་གསུམ་རྣམས་ལ་ལུང་རྟོགས་གཉིས་ཀ་དང་ལྡན་པའི་བླ་མ་བཅུ་གསུམ་དུ་གྲགས་ཤིང༌། གསེར་གླིང་པ། ཤཱནྟི་པ། ཛེ་ཏ་རི། བྱང་ཆུབ་བཟང་པོ་སྟེ་རྟག་དུ་བསྟེན་པའི་བླ་མ་བཞིའོ། །དེ་ཐམས་ཅད་ཀྱི་ཡོན་ཏན་བུམ་པ་གཅིག་ནས་གཅིག་དུ་བྱོ་བ་ལྟར་ཇོ་བོ་ལ་མངའ་ཞིང༌། འཇམ་དབྱངས། ཀླུ་སྒྲུབ་ཡབ་སྲས། ཟླ་བ་གྲགས་པ། རིགས་པའི་ཁུ་བྱུག་ཆེ་ཆུང༌། ཨ་ཝ་དྷཱུ་ཏི་པ་ཆེ་ཆུང་སྟེ་ལྟ་བ་རྣམ་པར་དག་པ་ཟབ་མོ་དབུ་མའི་བརྒྱུད་པ་དང༌། བྱམས་པ། ཐོགས་མེད་སྐུ་མཆེད། འཕགས་གྲོལ། བཙུན་གྲོལ། མཆོག་གི་སྡེ། དུལ་བའི་སྡེ། རྣམ་སྣང་མཛད། སེང་གེ་བཟང་པོ། ཀུ་སཱ་ལི་ཆེ་བ་རིན་ཆེན་བཟང་པོ། ཆུང་བ་རིན་ཆེན་སྡེ། གསེར་གླིང་པ། ཡང་ན་དབྱིག་གཉེན་གྱི་སློབ་མ་བློ་བརྟན་ལ་ཀུ་སཱ་ལྀ་གཉིས་ཀས་ཐུག་སྟེ་སྤྱོད་པ་རྣམ་པར་དག་པ་རྒྱ་ཆེན་ཕ་རོལ་ཏུ་ཕྱིན་པའི་བརྒྱུད་པ་དང༌། རྡོ་རྗེ་འཆང༌། ཏེ་ལོ། ན་རོ། ཌོམྦྷི་པ་སྟེ་ཉམས་ལེན་བྱིན་རླབས་ཀྱི་བརྒྱུད་པ་སྟེ་གཙོ་བོར་བྱིན་རླབས་ཀྱི་བརྒྱུད་པའི་ཆུ་བོ་གསུམ་མངའ་ཞིང༌། གཞན་དུ་མདོ་རྒྱུད་མན་ངག་གི་བཀའ་བབས་བརྗོད་ཀྱི་མི་ལང་པ་གཅིག་དུ་འདུས་པ་སྟེ་བརྒྱུད་པ་དེ་ཐམས་ཅད་ཀྱི་ཡོན་ཏན་ཇོ་བོ་ལ་མངའ་འོ། །ང་ལ་སོ་ཐར་གྱི་སྡོམ་པ་ལ་ཉེས་པས་ཡེ་མ་གོས་བྱར་བཏུབ། བྱང་སྡོམ་ལ་ཉེས་བྱས་སྣ་རེ་ཙམ་འོང༌། སྔགས་སྡོམ་ལ་ལྟུང་བ་ཆེ་རེ་ཉེ་རེ་འོང༌། འོན་ཀྱང་དེ་མ་ཐག་བཤགས་སྟེ་ལྟུང་བ་དང་ཞག་དུ་འགྲོགས་མ་མྱོང་གསུང་སྟེ་བཙུན་པའི་མཐར་ཐུག་ཐུགས་དམ་གྱི་ལྷ་དཔག་མེད་ཞལ་གཟིགས། གསེར་གླིང་ནས་རྡོ་རྗེ་གདན་དུ་བྱོན་པའི་ཚེ་རང་བྱུང་ཁཱརྶ་པཱ་ཎ་གཅིག་ལ་རབས་ཆད་རྒན་རྒོན་གཉིས་ཀྱིས་མཆོད་པ་ཆེན་པོ་བྱ་བར་ཡོད་པའི་ཚེ་རྒན་པོའི་རྨི་ལམ་དུ་ང་ལ་མཆོད་པ་མ་བྱེད་པར་འདི་ན་དགེ་སློང་དི་པཾ་ཀ་ར་ཡོད་པ་ལ་གྱིས་བསོད་ནམས་དེ་ཆེའོ་ཞེས་ལུང་བསྟན། (ད༧ན)
སྡེ་པ་བཞི་ཀའི་ཁྲོད་དུ་བཙལ་བས་མ་རྙེད། ཁ་སང་མགྲོན་བཙུན་ཞིག་འདུག་པ་དེ་ཡིན་ནམ་ཟེར་ནས་བཙལ་པས་བཞུགས་འདུག་སྟེ་རྡོ་རྗེ་གདན་དུ་དེའི་བསྙེན་བཀུར་བཞེས་ཤིང་བཞུགས། ད་ནི་རྩེ་གཅིག་དུ་མཉམ་པར་བཞག་ལ་མྱུར་དུ་འཚང་རྒྱ་བར་བྱའོ་ཞེས་དགོངས་ཚེ་བླ་མ་རཱ་ཧུ་ལ་སྐད་ཅིག་གིས་བྱོན་སྟེ་ཡི་དམ་གྱི་ཞལ་མཐོང་བ་དང་དཀྱིལ་འཁོར་མང་པོ་མངོན་སུམ་དུ་གྱུར་པ་དང་ཐུན་མོང་གི་དངོས་གྲུབ་མང་དུ་ཐོབ་པ་དང་ཏིང་ངེ་འཛིན་རི་རྒྱུན་ཙམ་ཡོད་པ་སོགས་ཁྱོད་ཀྱི་ཡོན་ཏན་དེ་རྣམས་ཀྱིས་གར་ཡང་མི་ཕྱིན་གྱི་བྱམས་སྙིང་རྗེ་བྱང་ཆུབ་ཀྱི་སེམས་སྦྱོངས། ཐུགས་རྗེ་ཆེན་པོ་སྙིང་རྗེའི་ལྷ་ཡིན་པས་ཡི་དམ་དུ་བཟུང་ལ་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་བྱེད་པར་དམ་ཆོས་ཅིག་གསུངས། རྡོ་རྗེ་གདན་གྱི་འཁོར་ས་ལ་སྐོར་བ་མཛད་པའི་ཚེ་ལྡེར་ཚོ་མང་དུ་བཞུགས་པའི་གཅིག་བཞེངས་ནས་གཞན་གཅིག་ལ་མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས་ཆོས་གང་ལ་བསླབ་པར་བགྱི་ཞེས་དྲིས་པས་གཞན་དེ་ན་རེ་བྱང་ཆུབ་ཀྱི་སེམས་ལ་བསླབ་པར་བྱའོ་གསུངས་ནས་ཕར་ཕྱིན་ཐེག་པའི་ལུགས་ཀྱི་སེམས་སྦྱང་ཐབས་ཅིག་གསུངས། ཡང་སྐོར་བ་མཛད་དུས་ཅིག་རྡོ་རྗེ་གདན་གྱི་ལྷོ་ཕྱོགས་ཀྱི་ནམ་མཁའ་ལ་བུ་མོ་ལྷའི་ལུས་རྒྱན་གྱིས་བརྒྱན་པ་གཉིས་བྱུང་ནས་གཅིག་གིས་གཅིག་ལ་སྔ་མ་ལྟར་དྲི་ལན་བྱས་སྟེ་སྔགས་ལུགས་ཀྱི་སེམས་སྦྱང་ཐབས་ཅིག་གསུངས་སྟེ་སྒྲོལ་མ་དང་ཁྲོ་གཉེར་ཅན་ཡིན་སྐད། ཡང་བདུད་འདུལ་མཆོད་རྟེན་གྱི་དྲུང་ན་བུད་མེད་གཉིས་དང༌། སྒྲོལ་མའི་ལྷ་ཁང་དུ་བུད་མེད་རྒན་གཞོན་གཉིས་ཀྱི་དྲི་ལན་དང༌། བྱ་མདབ་ཀྱི་འོག་ན་བཞུགས་པའི་དེ་བཞིན་གཤེགས་པའི་སྐུ་དང༌། རྡོ་རྗེའི་ར་བའི་ལོགས་ཀྱི་བ་སོའི་ཐུབ་པ་དང་རྡོ་རྗེ་གདན་དུ་བུད་མེད་ཅིག་གིས་འཆགས་བྱས་ནས་ལོ་བཅུ་གཉིས་བསྒྲུབས་པས་གྲུབ་པ་ཐོབ་པ་སྟེ་དེ་རྣམས་རེ་རེ་ཞིང་མྱུར་དུ་འཚང་རྒྱ་བར་འདོད་པས་བྱང་ཆུབ་ཀྱི་སེམས་ལ་བསླབ་པར་བྱའོ་ཞེས་ཁོ་ན་མགྲིན་གཅིག་(ད༧བ)
ཏུ་གསུང་བ་གསན་པས་སྔར་བླ་མ་གསེར་གླིང་པས་ངེས་པར་མཛད་པའི་སྟེང་དུ་ལྷག་པར་ཡང་བྱང་ཆུབ་ཀྱི་སེམས་ལ་ཐུགས་ངེས་པར་གྱུར། དེའི་ཚེ་དགེ་ཚུལ་ཞིག་གིས་བ་ཅི་གེ་རའི་གླིང་ན་སྐྱེས་པ་དང་བུད་མེད་ཐམས་ཅད་རང་བཞིན་གྱི་རྣལ་འབྱོར་ཕོ་མོ་ཤ་སྟག་ཡིན་ཟེར་བ་ཐོས་ནས་བལྟར་ཕྱིན་པས་སངས་རྒྱས་བྱོན་ནོ་བཞུད་ཏོ་ཟེར་ནས་སྨྱོས་པ་འདྲ་བ་མ་གཏོགས་ཡིད་འཆེས་པ་མ་མཐོང༌། སུམ་མདོ་ཅིག་ན་ཐམས་ཅད་ལ་ལུང་བསྟན་བྱེད་པ་ཅིག་འདུག་པ་ལ་ཕྱག་ཞིག་ཡང་བྱས། ལོག་འོངས་པའི་ལམ་ཀར་ཚོང་པ་མང་པོ་ངོ་མཚར་གྱི་གཏམ་གླེང་བ་ལ་དགེ་ཚུལ་དེས་ཟེར་ཚད་མི་བདེན། བ་ཅི་གེ་རའི་གླིང་ན་གྲུབ་ཐོབ་ཤ་སྟག་ཡིན་ཟེར་ནས་ངས་བལྟར་ཕྱིན་པས་མི་བདེན་པར་འདུག་ཟེར། ཀུ་སཱ་ལི་དགེ་བ་བྱ་བའི་རྣལ་འབྱོར་པ་ཅིག་ཚོང་པའི་ཁྲོད་ན་ཡོད་པས་དགེ་ཚུལ་དེའི་ལོག་རྟོག་བསལ་བའི་ཕྱིར་གུད་དུ་ཁྲིད་ནས་རྣལ་འབྱོར་པ་ནང་ཕན་ཚུན་ཤེས་པ་ཡིན་ཁྱོད་ཀྱིས་མི་ཤེས་དེ་ཐམས་ཅད་རྣལ་འབྱོར་པ་ཤ་སྟག་ཡིན། ཁྱོད་ཀྱིས་ཕྱག་བྱས་པ་དེ་ནི་ཚེ་འདི་དོན་ཏུ་གཉེར་བ་ཡིན་གྱིས་རྣལ་འབྱོར་པ་མ་ཡིན། ངས་ཀྱང་དངོས་གྲུབ་ཕྲ་མོ་ཐོབ་ཟེར་ནས་ཀ་ཝ་ལི་ན་མདོ་དང་གསེར་དང་སྤུ་གྲི་འདུག་པ་མངོན་པར་ཤེས་ནས་བཤད་པས་ཡིད་འཆེས་སྟེ་གུས་པ་བྱས་ནས་འགྲོགས་སྟེ་འོངས། ཡུལ་དབུས་ན་གང་ཟག་ཁྱད་པར་ཅན་ཅི་འདྲ་ཡོད་གསུངས། རྡོ་རྗེ་གདན་ན་ཇོ་བོ་ཨ་ཏི་ཤ་ཞེས་བྱ་བ་བཞུགས་བྱས་པས། རྣལ་འབྱོར་པའི་ཞལ་ནས་སྐྱེས་བུ་དམ་པ་མཐོང་བར་དཀའ་བས་ཞལ་བལྟར་འདོད་གསུངས་ནས་བྱོན། དགེ་ཚུལ་དེས་ཇོ་བོ་ལ་ཞུས་པས་སྐྱེས་བུ་དམ་པ་མཐོང་བ་ནི་དོན་དང་ལྡན་པ་ཡིན་གྱིས་ཞལ་བལྟ་བར་བྱའོ་གསུངས་ནས་རྣལ་འབྱོར་པ་དེ་ནྱ་གྲོ་དྷའི་སྡོང་པོ་ཅིག་གི་རྩ་བར་དེ་ནུབ་ཉལ་བའི་ཤིང་ལོ་འཕྱག་ཅིང་འདུག་པར་བྱོན། རྣལ་འབྱོར་པ་དེས་ཇོ་བོ་ལ་ལུས་ཐམས་ཅད་ས་ལ་ཕབ་སྟེ། ཛམྦུའི་གླིང་གི་མཁས་(ད༨ན)
པ་ཁྱོད་ལ་ཕྱག་འཚལ་ལོ། །སངས་རྒྱས་བསྟན་པའི་སྲོག་ཤིང་ཁྱོད་ལ་ཕྱག་འཚལ་ལོ། །ཞེས་ཕྱག་བྱས། ཁོང་རྟེན་ཁྱིམ་པར་བཞུགས་པས་ཇོ་བོས་དངོས་སུ་ཕྱག་མ་མཛད་ཡིད་ཀྱིས་ཕྱག་མཛད་དེ་མཁས་པ་བྱ་བ་ཁྱེད་ཡིན་སྟེ་དོན་ལ་མཁས་པ་ཡིན་ང་ནི་ཚིག་ལ་མཁས་པར་ཟད་གསུངས་ནས་མཁས་དང་བྱིས་པ་འབྱེད་པ་ཅེས་བྱ་བའི་བསྟན་བཅོས་བརྩམས། པཎྜིཏ་གྲགས་པའི་ཆ་ཞེས་བྱ་བས་རྣལ་འབྱོར་པ་དེ་ལ་མྱུར་དུ་འཚང་རྒྱ་བར་འདོད་པས་གང་ལ་བསླབ་དྲིས་པས་བྱང་ཆུབ་ཀྱི་སེམས་ལ་བསླབ་པར་བྱའོ་གསུངས། ཡིད་མ་འཆེས་པས་འོ་ན་ཁྱེའུ་གཙང་མ་ཞིག་ཁྲིད་ཤོག་གསུངས་སྟེ་པྲ་ཕབ་ནས་སྒྲོལ་མ་དང་རིགས་གསུམ་མགོན་པོ་རྒྱལ་བ་རིགས་ལྔ་སོགས་སངས་རྒྱས་བྱང་སེམས་ཐམས་ཅད་ཀྱི་སྣང་བ་རིམ་པར་བསྟན་ནས་དྲིས་པས་ལན་དེ་ཁོ་ན་བྱུང་བས་གདོད་ཡིད་འཆེས། ཐེག་པ་ཆེ་ཆུང་ཡང་ལྟ་བས་མ་ཕྱེ་སྙིང་རྗེས་ཕྱེ་བ་ཡིན། ཆོས་ཟབ་མོ་ལ་ཡིད་འཆེས་པ་ལ་ཚོགས་དཔག་མེད་གསོག་དགོས་ཅེས་ཇོ་བོ་གསུང་སྐད། རྣལ་འབྱོར་པ་དེ་ལ་པཎྜིཏ་ཆེན་པོ་གཞན་ཞིག་གིས་མངོན་པར་ཤེས་པ་འཆར་བའི་ཐབས་དྲིས། གཅིག་གིས་ཚུལ་ཁྲིམས་དག་པའི་རྒྱུ་དྲིས་པས་ཀྱང་བྱང་ཆུབ་ཀྱི་སེམས་ཁོ་ན་སྦྱོངས་ཅིག་གསུངས། དེ་ལྟར་སངས་རྒྱས་བྱང་སེམས་དང་གྲུབ་ཐོབ་ཕོ་མོ་དཔག་དུ་མེད་པས་བྱམས་སྙིང་རྗེ་བྱང་ཆུབ་ཀྱི་སེམས་ལ་སྦྱར་བས་ད་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་དམ་བསྐང་བ་དང་བླ་མ་རྣམས་ཀྱི་གསུང་སྒྲུབ་པ་དང་རང་གཞན་གྱི་ཕུན་ཚོགས་སྒྲུབ་པ་གང་ལའང་བྱང་ཆུབ་ཀྱི་སེམས་ལས་ལྷག་པ་མི་འདུག་པས་ད་ནི་ཐུགས་རྗེ་ཆེན་པོ་ཡི་དམ་དུ་བཟུང་ནས་བྱང་ཆུབ་ཀྱི་སེམས་སྦྱང་བ་ལས་མེད་ཏོ་སྙམ་དུ་དགོངས་ནས་རྡོ་རྗེ་གདན་གྱི་ནུབ་ཕྱོགས་ན་འོད་དཔག་མེད་ཀྱི་ལྷ་ཁང་ཡོད་པར་བྱམས་པ་ལ་བཞུགས་པའི་ཚེ་སངས་རྒྱས་དང་བྱང་སེམས་མཐའ་ཡས་པ་དང་ཁྱད་པར་ཐུགས་རྗེ་ཆེན་པོ་དངོས་སུ་བྱོན་སྟེ་སྐྱེས་བུ་དམ་པ་ལེགས་(ད༨བ)
སོ་ལེགས་སོ་བྱ་བ་བྱས་སོ། །སངས་རྒྱས་ཐམས་ཅད་ཀྱི་གསང་བའི་མཛོད་གང་ཡིན་པ་ཁྱོད་ཀྱིས་ཤེས་སོ། །འདི་ནས་བྱང་ཕྱོགས་ན་ངའི་ཞིང་ཁམས་ཡོད། ལྷ་མོ་སྒྲོལ་མ་ཡང་དེ་ན་སེམས་ཅན་གྱི་དོན་མཛད་ཅིང་བཞུགས། ཁྱོད་ཀྱི་གདུལ་བྱ་མང་པོ་ཡང་དེ་ན་ཡོད་པས་བྱང་ཕྱོགས་སུ་སོང་ཞིག་ཞེས་ལུང་བསྟན། དེའི་ཚེ་རྒྱལ་པོ་མ་ཧཱ་པཱ་ལས་བྲྀ་ཀ་མ་ལ་ཤཱི་ལར་སྤྱན་དྲངས་སྟེ་རྩ་བའི་སྡེ་བཞི་པཎྜིཏ་ལྔ་བཅུ་རྩ་བདུན་དང་བཅས་པའི་གཙུག་གི་ནོར་བུ། ཐམས་ཅད་ཀྱི་ཐེ་ཚོམ་དྲི་བའི་གནས་སུ་བཞུགས་ཤིང་མུ་སྟེགས་མང་པོ་ཚར་བཅད། དེའི་ངོས་གཅིག་ལ་པཎྜིཏ་རྣམས་དང་ངོས་གཅིག་ན་གྲུབ་ཐོབ་རྣམས་བྲིས་ཡོད་པ་ལ་ཇོ་བོ་གཉིས་ཀར་བྲིས། སྔ་གདོང་གཡས་ལ་ཀླུ་སྒྲུབ་དང་གཡོན་ལ་ཇོ་བོ་བྲིས་སྟེ་ཀླུ་སྒྲུབ་དང་མཉམ་པར་བྱེད་སྐད། ཇོ་བོས་ཅི་བདེར་སྤྱོད་པ་ཤས་གཅིག་གནས་ནས་ཀྱང་ཕྱུང༌། ཁྱད་པར་མཻ་ཏྲྀ་པཎྜི་ཏས་རྣལ་འབྱོར་མའི་དམ་རྫས་ཆང་ཞིག་ཁྱེར་བ་གཞན་གྱིས་མཐོང་ནས་འདི་ཁྱེད་ལ་མི་གནོད་ཀྱང་གཞན་ལ་གནོད་པས་བཞུད་པར་ཞུ་གསུངས་ནས་ཕྱུང་བས་ཉམས་པ་སྒོ་ལ་འགྲོར་མི་བཏུབ་གསུངས་ནས་རྩིག་པ་ལ་མ་ཐོགས་པར་བཞུད། ཇོ་བོས་ལེགས་སམ་མ་ལེགས་སྙམ་ནས་སྒྲོལ་མ་ལ་གསོལ་བ་བཏབ་པས་བུ་མ་ལེགས་སོ་ཞེས་པའི་སྒྲ་ལན་གསུམ་བྱུང་སྟེ་གཟིགས་པས་སྒྲོལ་མའི་ཞལ་ནས་མཻ་ཏྲྀ་པ་སེམས་དང་པོ་བསྐྱེད་པའི་བྱང་ཆུབ་སེམས་དཔའ་ཡིན། བྱང་ཆུབ་སེམས་དཔའ་ལ་སྡིག་བསགས་པ་རྣམ་སྨིན་ཤིན་དུ་ཆེ་སྟེ་རི་རབ་ལ་ལན་གསུམ་བསྐོར་བའི་སེམས་ཅན་ཆེན་པོ་ཅིག་དུ་སྐྱེས་སྟེ་བྱ་སྣ་ཚོགས་ཀྱིས་ཟ་བར་འགྱུར། བོད་དུ་ཕྱིན་ནས་ཐེག་ཆེན་དར་བར་བྱས། ཉིན་རེ་ལ་སཱ་ཚ་བདུན་རེ་བཏབ་ན་ལས་འབྱང་གསུངས། དེ་སྐད་བླ་མ་ག་ག་པཱ་ལ་ལ་ཞུས་པས་ཁྱོད་ཀྱིས་ཕན་སེམས་ཀྱིས་བྱས་པས་ཉེས་པ་ཆུང་སྟེ་འོན་ཀྱང་འབྲས་ཆན་བྲེ་གང་སྦྱིན་པར་བཏང་བ་ཞིག་བོད་ན་རྒྱལ་པོ་བྱེད། ཁྱོད་དེའི་མཆོད་གནས་(ད༩ན)
ལ་འགྲོ་དགོས་པར་འདུག་གསུངས། དེ་ནས་སྲས་ནིརྻ་པཱ་ལས་མ་ག་དྷའི་རྒྱལ་པོ་བྱེད་པའི་ཚེ་དེ་དང་ནུབ་ཕྱོགས་ཀརྞའི་མུ་སྟེགས་ཀྱི་རྒྱལ་པོ་མ་མཐུན་ནས་མུ་སྟེགས་ཀྱི་རྒྱལ་པོས་མ་ག་དྷར་དམག་དྲངས་པས་གྲོང་མ་ཐུབ་པར་བྲྀ་ཀ་མ་ལར་དྲངས་སྟེ་རབ་བྱུང་བཞི་དགེ་བསྙེན་གཅིག་དང་ལྔ་བསད། ཡོ་བྱད་མང་པོ་ཁྱེར་བའི་ཚེ་ཇོ་བོ་ཐུགས་འཁྲུག་པ་མེད་པར་བྱམས་སྙིང་རྗེའི་ཏིང་ངེ་འཛིན་ལ་བཞུགས་པས་དེའི་མཐུས་ཕྱིས་དམག་ལོག་སྟེ་མུ་སྟེགས་ཀྱི་དམག་ཐམས་ཅད་གསོད་དུ་ཆ་བའི་ཚེ་སྲོག་བསྐྱབས་ནས་བཏང་བས་ཀརྞའི་རྒྱལ་པོ་དད་དེ་ནུབ་ཕྱོགས་སུ་སྤྱན་དྲངས་ནས་བསྙེན་བཀུར་ཆེན་པོ་བྱས། ཇོ་བོས་ཀྱང་ལམ་བར་ན་ཆུ་བོ་ཆེན་པོ་ཡོད་པ་ལ་ལུས་སྲོག་ལ་མ་གཟིགས་པར་ཡང་ཡང་བརྒལ་སྟེ་ཡོ་བྱད་ཐམས་ཅད་བསྡུམས་ཀྱི་ཕྱིར་བཏང་ནས་རྒྱལ་པོ་གཉིས་བསྡུམས་ནས་འཛའ་བོར་མཛད། དེའི་ཚེ་བོད་ཀྱི་རྒྱལ་བརྒྱུད་ལྷ་བླ་མ་ཡེ་ཤེས་འོད་ཀྱིས་ཇོ་བོའི་སྙན་པ་གསན་ནས་ལོ་ཙཱ་བ་རྒྱ་བརྩོན་འགྲུས་སེང་གེ་འཁོར་བརྒྱ་ཙམ་དང་བཅས་པ་ལ་གསེར་ལིང་བ་གཅིག་ལ་ཤིང་སྲང་བཅུ་དྲུག་ཡོད་པ་ཅིག་གིས་སྣ་དྲངས་མང་དུ་བསྐུར་སྟེ་ཇོ་བོ་སྤྱན་འདྲེན་དུ་བཏང་བས་ཇོ་བོའི་ཞལ་ནས་བོད་དུ་འགྲོ་བ་ལ་རྒྱུ་གཉིས་ཡིན། ཡང་ན་གསེར་འདོད་ནས་འགྲོ་བ་ཡིན་སྟེ་ང་ལ་གསེར་གྱི་དགོས་པ་མེད། ཡང་ན་བདག་པས་གཞན་གཅེས་ཀྱི་བྱང་ཆུབ་ཀྱི་སེམས་ཀྱིས་འགྲོ་བ་ཡིན་སྟེ་དེ་ཡང་ང་ལ་མེད། ད་མི་འགྲོ་གསུངས་ནས་གསེར་ཚུར་གཏད། ལོ་ཙཱ་བའི་འཁོར་ཕལ་ཆེར་ཡང་ཤི། གསེར་སིལ་མ་རྣམས་ཀྱང་བརླག་པས་ལོ་ཙཱ་བ་ཚུར་ལོག་སྟེ་གསེར་ལིང་བ་རྒྱལ་པོ་ལ་གཏད། རྒྱ་བརྩོན་སེང་ཇོ་བོ་ལ་ཆོས་ཉན་དུ་ལོག་པའི་ཕྱི་ལ་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ་ཞེས་བྱ་བ་ཡུལ་གུང་ཐང་གདུང་ནག་ཚོ་ཆུང་ངུ་ནས་རབ་ཏུ་བྱུང་སྟེ་ཤིན་དུ་བཙུན་པའི་འདུལ་བ་འཛིན་པ་དེ་ཡང་མངོན་པ་ཉན་ཅིང་འབྲེངས། ལྷ་བླ་མ་ཡེ་ཤེས་འོད་(ད༩བ)
ཀྱིས་གསེར་སྒྲུབ་ཏུ་མཐའ་ཁོབ་ཅིག་དུ་བྱོན་པས་གར་ལོག་གི་རྒྱལ་པོས་ཤེས་སྟེ་བཙོན་དུ་བཟུང༌། ཁྱོད་རང་གི་རྒྱལ་ཁམས་མུ་སྟེགས་ལ་འགོད་ན་བྱ་དགའ་ཆེན་པོ་སྟེར། ཐ་ན་ཡང་སྐྱབས་འགྲོ་གཏོང་ན་བླུད་མ་མི་འདོད། གཞན་དུ་གསེར་ལུས་ཚད་དང་མཉམ་པ་མ་བྱུང་ན་མི་གཏོང་ཟེར། དཔོན་པོ་ལྷ་བླ་མ་ཞི་བ་འོད་ཀྱིིས་བོད་ཁམས་གསུམ་གླིང་དགུ་ལ་གསེར་བསྡུས་ནས་སྐུ་ལུས་ཙམ་ཞིག་རྙེད་དེ་བླུ་བར་བརྩམས་པས་ད་དུང་དབུའི་ཚད་མ་ལོངས་ན་མི་གཏོང་ཟེར་ནས་མ་བཏང༌། ཁོང་རང་གི་གསུངས་ནས་ང་རྒས་ཤིང་མུ་སྟེགས་ཀྱིས་སྨན་ལོག་དཔྱད་ལོག་མང་པོས་ཤེས་པ་ཡང་མི་གསལ་བས་བླུས་ཀྱང་བསྟན་པའི་དོན་མི་ནུས། གསེར་དེས་ཇོ་བོ་སྤྱན་དྲོངས་ལ་བོད་དུ་བསྟན་པ་དར་བར་གྱིས། ངས་ཁྱེད་ཀྱི་ཆེད་དུ་ལུས་སྲོག་གར་ལོག་གི་རྒྱལ་པོ་ངན་པ་ལ་བྱིན་ཡོད་པས་དེ་ལ་དགོངས་ནས་ཁྱེད་བོད་དུ་བྱོན་སྟེ་བསྟན་པ་དར་བ་ཞིག་མཛད་པར་ཞུ། དེའི་ཚེ་ང་ཡང་ཁྱེད་ཀྱི་དྲུང་དུ་སྐྱེས་ནས་ཐེག་ཆེན་གྱི་ཆོས་སྤྱོད་པར་སྨོན་ལམ་འདེགས་སོ་ཞེས་ཇོ་བོའི་སྙན་དུ་ཐོང་ཞིག་གསུངས་སྟེ་རིང་པོ་མ་ལོན་པར་གར་ལོག་གིས་བཀྲོངས། ནག་ཚོས་རྒྱ་གར་དུ་ལོ་གཉིས་བཞུགས། མངོན་པ་དང་ལོ་ཙཱ་བ་མཁས་པར་གྱུར་སྟེ་སླར་བོད་དུ་བྱོན་པའི་ཚེ་ལྷ་བཙུན་བྱང་ཆུབ་འོད་ཀྱིས་སྤྱན་སྔར་བོས་སྟེ་བོད་ཡུལ་འདིར་བསྟན་པ་དར་གུད་ཤིན་དུ་ཆེ་བར་བྱུང༌། ཨ་ཙ་ར་དམར་པོ་ཅེས་བྱ་བས་གསང་སྔགས་ཐིག་ལེའི་སྐོར་བཤད་ནས་རབ་བྱུང་ཕལ་ཆེར་སེར་ཁྱིམ་ལ་བཀོད། ཕྱི་རོལ་པ་ལགས་སམ་ཤམ་ཐབས་སྔོན་པོ་ཅན་བྱ་བས་སྦྱོར་དགྲོལ་གྱི་ཆོས་བསྟན། སྔགས་པ་རྣམས་ཀྱིས་ཀྱང་གསང་སྔགས་སྒྲ་ཇི་བཞིན་དུ་སྤྱད་ནས་སྡིག་པ་ལ་འགོད་པ་ཅིག་བྱུང་སྟེ་བསྟན་པ་ཤིན་དུ་འགྲིབ། ཡབ་མེས་ཀྱིས་པཎྜི་ཏ་ཆེ་ཆུང་འགའ་གདན་དྲངས་ནས་གདའ་ཡང་བསྟན་པ་ལ་ཕན་པ་ཕར་ཞོག་སླར་གནོད་པ་བྱས་པ་བཞིན་དུ་(ད༡༠ན)
སོང་བས་ཨ་ཏི་ཤ་སྤྱན་འདྲེན་པ་ལ་ལན་གཉིས་བཏང་ཡང་གསེར་ཆུད་ཟོས། ཕོ་ཉ་མ་ལོག་པ་ལས་མ་བྱུང༌། ད་ཁྱེད་ཀྱིས་ཇོ་བོའི་སྙན་དུ་ཁུ་བོའི་གསུང་འཕྲིན་དེ་ཐོང༌། འདི་ན་གསེར་སྲང་བདུན་བརྒྱ་ཡོད་སྟེ་འདིས་མི་ནོར་ཐམས་ཅད་རྫོགས་ནས་ཡོད་ཀྱིས་འདི་ལ་མགོན་པོ་བོད་ཏུ་མ་བྱོན་ན་ཁྱེད་དམ་པ་རྣམས་ཀྱི་ཐུགས་རྗེ་ཡང་དེ་འདྲ་བས་བདག་ཅག་རྣམས་ཀྱི་ཅི་བདེ་བར་སྤྱད་པར་བགྱིའོ་ཞེས་མ་བྱོན་ཡང་སྙན་དུ་ལྷོན་པ་གྱིས་གསུངས་ནས་དཔོན་གཡོག་ལྔ་བརྫངས་སྟེ་བྱོན། བྱང་ཕྱོགས་སུ་དགེ་བསྙེན་ཆོས་འཕེལ་ཞེས་བྱ་བ་རྫུ་འཕྲུལ་དང་ལྡན་པ་འབྱུང༌། དེས་ངའི་བསྟན་པ་རྒྱས་པར་བྱེད་པར་འགྱུར་ཞེས་ལུང་བསྟན་པ་ལྟར་འབྲོམ་སྟོན་པའི་རྫུ་འཕྲུལ་གྱི་བཀོད་པ་མང་པོས་ལམ་དུ་འཇིགས་པ་བསལ་དབུགས་ཕྱུང་འདི་ལྟར་བྱོས་ཀྱི་གདམས་པ་བསྟན་སྟེ་བྲྀ་ཀ་མ་ལར་བཏོལ། ཇོ་བོ་ལ་གསེར་ལིང་བ་དེའི་མཐའ་སིལ་མས་བསྐོར་བའི་མཎྜལ་ཕུལ་ནས་གསོལ་བ་བཏབ་ཞུ་འཕྲིན་བརྗོད་པས་ལྷ་བླ་མ་ཁུ་དབོན་བྱང་ཆུབ་སེམས་དཔར་འདུག་པས་བྱང་ཆུབ་སེམས་དཔའི་བཀའ་ཡང་བཅག་དུ་མི་རུང༌། ངའི་ཕྱིར་ཁོང་གི་ནོར་མང་པོ་ཆུད་ཟོས་པས་ངོ་ཡང་གནོང་བར་ཡོད། བོད་སྙིང་ཡང་རྗེ་སྟེ་ང་ཡང་ན་སོ་རྒས་ལྡེ་མིག་མང་པོ་འཛིན་བྱ་བ་མང་པོའི་འཕྲོ་ཡང་ཡོད་པས་ཐོན་སྟེ་མི་འོང༌། འོན་ཀྱང་བོད་ཀྱི་སེམས་ཅན་ལ་ཕན་ཐོགས་སམ་མི་ཐོགས་ངས་བརྟག་པ་བྱ་ཡིས་རེ་ཞིག་ཁྱེད་རང་གི་གསེར་ཟུང་ཞིག་གསུངས་ནས་གཏད། དེའི་ནུབ་སྒྲོལ་མ་ལ་གསོལ་བ་བཏབ་སྟེ་ངས་བོད་ཏུ་ཕྱིན་ན་བསྟན་པ་ལ་ཕན་ཐོགས་སམ། རྒྱལ་པོ་བྱང་ཆུབ་སེམས་དཔའི་དགོངས་པ་རྫོགས་སམ། ལུས་སྲོག་གི་བར་ཆད་དུ་མི་འགྱུར་རམ་ཞེས་དོན་གསུམ་གསོལ་བ་བཏབ་པས་རྨང་ལམ་དུ་བྲྀ་ཀ་མ་ལ་ཤཱི་ལའི་དྲུང་ན་མུ་ཁེན་ཞེས་པ་མུ་སྟེགས་པའི་གྲོང་ཁྱེར་ཞིག་གི་དབུས་ན་ནང་པའི་ལྷ་ཁང་ཆུང་ངུ་ཞིག་ཡོད་པ་དེར་སོང་ལ་རྣལ་(ད༡༠བ)
འབྱོར་མ་ཞིག་འོང་བ་དེ་ལ་དྲིས་ཅེས་བྱུང་ནས་དེར་བྱོན་སྟེ་མཎྜལ་མཛད་ཅིང་ཡོད་ཙ་ན་ག་ནས་བྱུང་ཆ་མེད་པར་རྣལ་འབྱོར་མ་རལ་པ་ས་ལ་སླེབས་པ་ཅིག་བྱུང༌། དེ་ལ་གསོལ་བ་བཏབ་པས་བོད་དུ་བྱོན་ན་ཕན་ཐོགས། ཁྱད་པར་དུ་ཨུ་པ་སི་ཀ་ཅིག་ལ་བསྟེན་ནས་ཕན་ཐོགས། བོད་དུ་མ་བྱོན་ན་ཚེ་ལོ་དགུ་བཅུ་རྩ་གཉིས་ཐུབ། བྱོན་ན་བདུན་བཅུ་རྩ་གཉིས་ལས་མི་ཐུབ་གསུང་བས་སེམས་ཅན་ལ་ཕན་ན་ཚེ་རིང་ཐུང་ལ་མི་ལྟ་སྙམ་པ་འཁྲུངས། ཡང་རྡོ་རྗེ་གདན་དུ་གསོལ་བ་གདབ་དགོས་བསམས་ནས་བཞུད་ཀར་ཛྙ་ན་ཤྲཱི་ལ་ཞུས་པས་ཁྱོད་ཀྱི་དྲི་བ་དེ་རླབས་ཆེ་བ་ཞིག་འདུག་པས་རྡོ་རྗེ་གདན་གྱི་ལྷ་རིས་པའི་གསེབ་ན་རྡོ་རྗེ་སྒྲོལ་མའི་རྣལ་འབྱོར་མ་རྒན་མོ་རལ་པ་སེར་ཤར་རེ་བ་ཞིག་ཡོད། དེ་ལ་འདི་ཕུལ་ལ་དྲིས་ཅེས་མགྲོན་བུ་སྙིམ་པ་གང་བསྐུར། དེའི་ལམ་དུ་བུད་མེད་མིའི་ལུས་ལས་འདས་ལྷའི་ལུས་སུ་མ་སླེབས་པ་ཅིག་ལ་ཡིད་ཀྱིས་ཕྱག་དང་དྲི་བ་མཛད་པས་ཁྱོད་ངེས་པར་ལུས་སྲོག་ལ་མ་བལྟས་པར་སོང་ཞིག་འགྲོ་བ་མང་པོ་ལ་ཕན་པར་འགྱུར་རོ་གསུངས་སྟེ་སྒྲོལ་མ་ཡིན་སྐད། རྡོ་རྗེ་གདན་དུ་བྱོན་པ་དང་རྒན་མོ་རལ་པ་སེར་བ་ཞིག་ན་རེ་ཇོ་བོ་ཛྙཱ་ན་ཤྲཱིས་བསྐུར་བའི་མགྲོན་བུ་ཚུར་ཐོང་གསུངས་སྟེ་ཕུལ་ནས་ཡིད་ཀྱིས་དྲིས་པས་ཨུ་པ་སི་ཀ་ལ་བསྟེན་ནས་ཕན་པར་འགྱུར། དེས་ཁྱོད་ཀྱི་ཆོས་ཀྱི་སྒྲིབ་པ་ཟད་ནས་ཕྱི་མ་ལ་ཕྱག་རྒྱ་ཆེན་པོའི་དངོས་གྲུབ་འཐོབ་ཀྱི་གསུངས། དེ་རང་བཞིན་གྱི་རྣལ་འབྱོར་མ་ཡིན་སྐད། དེ་ནས་ཚུར་བྱོན་སྟེ་བོད་ལ་ཕན་ཐོགས་པར་ལུང་བསྟན་པས་འགྲོ་བར་ནི་བྱ་ན་བྱ་བ་སར་པ་མི་བརྩམ་པར་ཆོས་འཕྲོ་བཏུལ་བ་དང་གཙུག་ལག་ཁང་གི་གཉེར་གཏད་པ་སོགས་རྙིང་པ་འཕྲོ་ཅན་རྣམས་ཟིན་པ་ལ་བརྩོན་འགྲུས་བསྐྱེད་ཀྱང་ཟླ་བ་བཅོ་བརྒྱད་དགོས་པར་འདུག་པས་དེའི་བར་ལོ་ཙཱ་བས་སྡོད་ནུས་སམ་གསུངས། ཇི་ཙམ་འགོར་ཡང་སྡོད་པར་ཞུས་པས་འོ་ན་སྤྱན་འདྲེན་པ་སོངས་ལས་གནས་བརྟན་རཏྣ་ཨཱ་ཀ་ར་ལ་གནས་ཀྱི་སློབ་དཔོན་ལ་ཞུས་སློབ་གཉེར་གྱིས་གསུངས་སྟེ་ནག་ཚོས་(ད༡༡ན)
སློབ་གཉེར་གདམས་ངག་ཐམས་ཅད་རྒྱ་གར་ཉིད་དུ་རྫོགས་པར་བྱས། དེའི་ཚེ་རྗེ་ན་རོ་པ་ཆེན་པོ་དེ་བྲྀ་ཀ་མ་ལར་བྱོན་རབ་ཏུ་བྱུང་བ་ཐམས་ཅད་ཀྱིས་བསུ་བ་མཛད། ཇོ་བོ་དང་ཛྙཱ་ན་ཤྲཱི་མི་ཏྲ་གཉིས་ཀྱིས་ཕྱག་གཡས་གཡོན་ནས་བརྟེན་སྟེ་མདོ་ལི་ལ་སྤྱན་དྲངས། སེང་གེའི་ཁྲི་ལ་བཞུགས་པའི་ཚེ་ཁོ་བོ་ཡུན་རིང་དུ་མི་སྡོད་པས་ད་ཕྱིན་སངས་རྒྱས་ཀྱི་བསྟན་པའི་བདག་པོ་ནི་ཇོ་བོ་དཱི་པཾ་ཀཱ་ར་ཁྱོད་ཡིན་ནོ་ཞེས་བསྟན་པ་གཏད་ནས་ལྷོ་ཕྱོགས་སུ་བྱོན་སྟེ་ཞག་ཉི་ཤུ་ཙམ་ན་མྱ་ངན་ལས་འདས་སྟེ་གདུང་ཞིག་སྤྱན་དྲངས་པ་མཆོད་སྡོང་ན་བཞུགས། དགྱེས་པ་རྡོ་རྗེའི་རྣལ་འབྱོར་པ་དུ་ཧ་ར་ནག་པོས་ཇོ་བོ་ལས་དཔྱད་འཕྲུལ་གྱི་མེ་ལོང་ཞེས་བྱ་བ་གནང་སྟེ་ཁྱོད་བོད་དུ་འགྲོ་བར་འདུག་ཁྱོད་ལ་གདན་ས་བྱང་བསྐྱབས་པ་ལྷོ་གཞོལ་བ་ཤིང་རྩི་ནགས་ཚལ་ཅན་ཞིག་འོང༌། བོད་ནས་ཚུར་མི་ལྡོག་པར་འདུག་བུ་སློབ་མང་པོ་འོང༌། དེ་རྣམས་ཀྱིས་སྡེ་དགོན་མང་པོ་གཞེང་བར་འགྱུར། དེའི་ཚེ་འདི་དགོས་པ་ཡིན། ཁྱོད་ཀྱི་བུ་སློབ་རྣམས་ཀྱང་བུ་ཚ་བོ་ཡང་ཚ་གསུམ་ཙམ་ལ་ལེགས་པར་འོང༌། དེ་ནས་ནི་འཆོལ་གྱིས་འགྲོ་ཉེན་ཡོད་གསུངས། ལྷོ་ཕྱོགས་མཐར་སྐྱེས་ཀྱི་གྲོང་ན་མུ་སྟེགས་པ་རྒན་པོ་ལོ་བཞི་བརྒྱ་དང་ལྔ་བརྒྱ་ལོན་པ་མང་པོ་ནག་ཚོས་མཐོང་ནས་ཇོ་བོ་ལ་ཞུས་པས། དེས་དོན་མེད་རླུང་འཛིན་པ་ཡིན། ཕྱི་བ་དང་གྲུམ་པས་ཀྱང་ཤེས་གསུངས། ཇོ་བོའི་ཕྱིར་ནག་ཚོས་ཆུ་འགྲམ་ཞིག་དུ་ཕྱིན་པས་བྲམ་ཟེ་རྒན་པོ་ཅིག་གིས་རྒྱལ་བུའི་རོ་ཞིག་ཁུར་ནས་བྱུང་སྟེ་རོ་དེ་ཆུས་བཀྲུས། ཅུང་ཟད་ན་རོ་དེ་ལངས་བྲམ་ཟེ་དེ་ཤི་ནས་བྲམ་ཟེའི་རོ་ཆུར་བསྐུར་སྟེ་སོང༌། ཇོ་བོའི་ཞལ་ནས་གསང་སྔགས་ལ་ཡོན་ཏན་འདི་འདྲ་ཡོད་གསུངས། ཡང་སློབ་མ་དགེ་སློང་ཞིག་བྱུང་ནས་ཁོ་བོ་སྤྱོད་པ་དགྱིད་པར་ཞུ་ཟེར་བ་ལ་ཇོ་བོས་ད་དུང་སྔས་པ་སྲིད་གསུངས་པས་མི་མོས་པ་མི་མཛད་པར་ཞུ་ཟེར་ནས་ཆོས་གོས་དེ་བཞག་(ད༡༡བ)
སྤྱང་ཀི་ཅིག་དུ་བྱས་སྟེ་མི་རོ་ཞིག་ཁྱེར་ནས་ཟོས། ཡང་དགེ་སློང་དུ་ཁྲོད་བྱུང་བས་ཇོ་བོས་འོ་ན་དགྱིད་པར་ཞུ་གསུངས། དེ་ནས་གཞན་རྣམས་མིག་བྲིད་པའི་ཕྱིར་གནས་ཆེན་པོ་བརྒྱད་ལ་མཆོད་པ་མཛད། རེས་གར་གཤེགས་རེས་གར་གཤེགས་ནས་རྡོ་རྗེ་གདན་དུ་མཆོད་པ་མཛད། རྒྱ་གར་མཐའ་འཁོབ་ཙིནྡྷི་ལི་ཀྲ་མ་བྱ་བར་ཆོས་བློན་ཞིག་གིས་གཙུག་ལག་ཁང་བཞེང་པའི་ས་གནོན་བཅོལ་བ་ལ་སྔར་འགྲོ་མ་ཁོམ་ད་རེས་འགྲོ་བས་ཁྱེད་རྣམས་ཕྱིར་ལོག་ཞིག་གསུངས་ནས་འཁོར་བྱིན་ཟློག་ཡང་གནས་བརྟན་རཏྣ་ཨཱ་ཀ་ར་སོགས་བདག་ཅག་ཀྱང་འགྲོ་བར་ཞུ་གསུངས་ནས་བྱོན་སྟེ་ས་གནོན་མཛད། ད་ནི་བལ་ཡུལ་རང་བྱུང་གི་མཆོད་རྟེན་ལ་མཆོད་པར་འགྲོ་བས་ཁྱེད་རྣམས་ལོག་ཞིག་གསུངས་པ་དང་གནས་བརྟན་རཏྣ་ཨ་ཀ་ར་ན་རེ་ད་ངས་གོ །ཚེ་དང་ལྡན་པ་ཡང་སློབ་གཉེར་བྱེད་པར་མི་འདུག་བོད་རྒྱལ་པོས་ངེས་ཀྱི་མི་རྐུར་བཏང་བར་འདུག་ཇོ་བོ་ཡང་གཤེགས་པ་ལ་དགྱེས་པར་འདུག་མ་བཏང་ན་གཞན་དོན་གྱི་བར་ཆད་དུ་འགྲོ་ཚེ་དང་ལྡན་པ་ཡང་ང་རང་གི་སློབ་མ་ཡིན་པས་མི་དགའ་བ་བྱར་མི་རུང་ལོ་གསུམ་ཁྱེད་ལ་གཡར་དུ་བཏང༌། དེ་ནས་ཚུར་སྤྱན་དྲོངས། ཁྱོད་ཀྱིས་ཀྱང་བལ་ཡུལ་ཚུན་མ་བསྐྱལ་ན་དམ་ཚིག་ཉམས་སོ། །ཇོ་བོ་མི་བཞུགས་ན་རྒྱ་གར་ན་བསྟན་པ་ནུབ་པ་འདྲ་བ་ཡིན་ནོ་གསུངས། ཇོ་བོས་ཀྱང་གསེར་དེ་རྣམས་ཆ་བཞིར་བགོས་ནས་ལྷ་ཁང་དང་དགེ་འདུན་ལ་ཕུལ་སྟེ་བོད་དུ་བྱོན། ལམ་དུ་མུ་སྟེགས་ཀྱིས་བཀྲོང་བའི་གཤེད་མ་བཏང་བ་དང་རི་བྲགས་པའི་ཆོམ་རྐུན་བྱུང་བ་རྣམས་རེངས་པར་མཛད་དེ་སླར་སྙིང་རྗེས་བཀྲོལ། རྒྱ་བརྩོན་སེང་གིས་སྔར་མུ་སྟེགས་པ་ཅིག་ལ་རྫུ་འཕྲུལ་མིག་མཐོང་གི་ས་ལ་འཕུར་ནས་འགྲོ་བ་ཞིག་ཞུས། དེའི་རྔན་པ་གསེར་ཞོ་དོ་འདོད་པ་ལ་མེད་ནས་གསེར་གྱི་བསྡུད་པ་ཅིག་བྱིན་པས་སྲེགས་ལ་བླང་ཟེར་སྟེ་མ་འདོད་པར་དེ་དང་འགྲས། དེས་མཐུ་བྱས་ནས་བལ་པོར་གྲོངས། ཁོང་གིས་དཔེ་ཁ་(ད༡༢ན)
ཅིག་བལ་པོར་བཅོལ་བ་མ་ལོན་ནས་དེའི་གསེབ་ཏུ་རྩ་ལྟུང་རྒྱ་ཆེར་འགྲེལ་ཇོ་བོ་དང་རྒྱས་བྲྀ་ཀ་མ་ལར་བསྒྱུར་བ་དེ་ཡང་ལུས། རྒྱ་གྲོངས་པ་ལ་ཇོ་བོས་ཐུགས་ཁྲལ་ལྟར་མཛད་པ་ནག་ཚོས་ཐུགས་ཁྲལ་བསངས་པས་ངེད་རྒྱ་གར་ན་པཎྜི་ཏའི་མྱ་ངན་རྣལ་འབྱོར་པས་བསང༌། རྣལ་འབྱོར་པའི་ཆོས་ཀྱི་རྒྱབ་རྟེན་པཎྜི་ཏས་བྱེད་པ་ཡིན། དམའ་མོའི་མྱ་ངན་མཆོག་གིས་སེལ་དགོས་པ་ལ་མཐོ་ཤོས་ཀྱི་མྱ་ངན་དམའ་ཤོས་ཀྱིས་སེལ་བ་མིན་གསུངས་ནས་བཀྱོན། དེའི་ཚེ་མ་ག་དྷའི་རྒྱལ་པོ་ནིརྻ་པཱ་ལ་ལ་འཕྲིན་ཡིག་མཛད་དེ་ནག་ཚོས་བསྒྱུར། བལ་པོར་སྠཱ་བི་ཧ་ར་བྱ་བའི་གཙུག་ལག་ཁང་བཞེངས་སྟེ་རྒྱ་བོད་ཀྱི་དགེ་འདུན་ལ་སཱ་ཏྲ་བཙུགས། མང་ཡུལ་གུང་ཐང་དུ་ལོ་གཅིག་བཞུགས། དེ་ནས་པུ་རངས་སུ་གཤེགས་སྟེ་ལྷ་བཙུན་བྱང་ཆུབ་འོད་ཀྱིས་བསུ་བའི་བཀོད་པ་ཆེན་པོས་སྤྱན་དྲངས། རག་དུང་ཡང་སྔར་མེད་པ་ལ་ཇོ་བོ་སྤྱན་འདྲེན་པའི་ཕྱིར་བཅོས་སྟེ་ལོ་པཎ་སྤྱན་འདྲེན་གྱི་དུང་དུ་གྲགས། ལྷ་བཙུན་པས་བསྙུན་རྨེད་པ་དང་བོད་སྤྱིའི་སྤྱོད་པ་ལ་བཟོད་གསོལ་དང་ནག་ཚོ་ལ་གཏང་རག་གི་ཚིགས་བཅད་ཀྱང་གསོལ་སྟེ། ཨེ་མ་ཧོ། དགེ་སློང་བྱང་ཆུབ་འོད་བདག་གིས། །རྟག་དུ་བསམས་པའི་བླ་མ་སྤྱན་འདྲོངས་པས། །བོད་ཀྱི་ཡུལ་དུ་སྐྱེས་བུ་ཆེན་པོ་འདིའི། །གཞུང་ལུགས་ཤིན་དུ་དར་ཞིང་རྒྱས་པར་ཤོག །ཞེས་སྨོན་ལམ་མཛད། བོད་ལ་ཆོས་ཟབ་ཟབ་མཚར་མཚར་བས་ཀྱང་ལས་རྒྱུ་འབྲས་ཀྱི་ཆོས་ཀྱིས་སྐྱོང་བར་ཞུ་ཞུས་པས་ཤིན་དུ་མཉེས་ནས་ཆོས་ཤིན་དུ་ཟབ་པ་ལས་རྒྱུ་འབྲས་ཁོ་ན་ཡིན། རྒྱུ་འབྲས་ལ་ཡིད་འཆེས་ཐོབ་ན་དེ་ལས་ལྷག་པ་མེད། གཤིན་རྗེའི་གཤེད་ཀྱི་རྣལ་འབྱོར་པ་ཡི་དམ་གྱི་ཞལ་མཐོང་བས་ང་འདི་ཙམ་ལ་བལྟོས་སྟེ་མི་འོང་སྙམ་ནས་དགེ་འདུན་གྱི་ཡོ་བྱད་ཐུགས་ཐུབ་ཏུ་སྤྱད་པས་ཡི་དྭགས་གཤིན་རྗེའི་གཤེད་ཀྱི་གཟུགས་ཅན་དུ་སྐྱེས་པ་དང༌། བྲྀ་ཀ་མ་ལའི་ལག་བདེ་བས་དེ་རིང་གི་(ད༡༢བ)
བསྙེན་བཀུར་ནང་པར་བསྒྱུར་བས་དེའི་ནུབ་མོ་ཡི་དྭགས་ཀྱི་སྣང་བ་ཤར་བ་དང༌། གནས་བརྟན་ཞིག་གིས་དགེ་འདུན་ལ་དབང་ཆེན་བྱས་ཤིང་འབྲས་བྲེ་ཕྱེད་ཐུགས་ཐུབ་ཏུ་སྤྱད་པས་ཡི་དྭགས་དབང་ཆུང་ངུར་སྐྱེས་པ་སོགས་མང་དུ་གསུངས་ནས་རྒྱུ་འབྲས་ཀྱི་ཆོས་ཀྱིས་བསྐྱེད་བར་ཞལ་གྱིས་བཞེས་སྟེ་དེ་ཕྱིན་པཎྜིཏ་ལས་འབྲས་པར་མཚན་ཐོགས་སྟེ་མཚན་དེས་ཀྱང་བསྟན་པ་ལ་ཕན་པར་བྱུང༌། མཁས་པ་མང་པོས་ཇོ་བོ་ལ་ལྟ་བ་གང་བཞེད་ཞུས་པས་ཁྱེད་རང་གང་འདོད་གསུངས་སྟེ་དབུ་སེམས་སོགས་གཏམ་རྙིང་ལྟར་འདི་འདོད་ཞུས་པ་ན། ཁོ་བོ་ཡང་དེ་ལྟར་འདོད་དེ་ལ་ལུང་རིགས་འདི་ལྟ་བུ་བདོག་གསུངས། མངའ་རིས་པ་བློ་གསལ་ཞེས་བྱ་བ་བློ་གྲོས་ཟླ་མེད་པ་ཅིག་གིས་གོ་ནས་ཉིད་ཀྱི་བཞེད་པ་མི་གསུང་བར་ཀུན་ལ་མཐུན་འགྱུར་གནང་བ་ཇི་ལྟར་ལགས་ཞུས་པས། ང་ཡང་སངས་རྒྱས་ཀྱི་རྗེས་སུ་སློབ་པ་ཡིན་པས་གདུལ་བྱའི་བསམ་པ་དང་མཐུན་པར་ལན་བཏབ་པ་ཡིན་གསུངས། གཞན་ཞིག་གིས་འོ་ན་ཉིད་ཇི་ལྟར་བཞེད་ཞུས་པས། ང་ལ་འདོད་པ་མེད་གསུངས། དོན་དམ་དུ་བཞེད་པ་མི་མངའ་ཡང་ཀུན་རྫོབ་ཏུ་ཇི་ལྟར་བཞེད་ཞུས་པས། རབ་རིབ་ཅན་གྱིས་སྐྲ་ཤད་མཐོང་བ་ལྟར་འདི་ཐམས་ཅད་དེ་ལྟར་གནས་པ་ཡིན་གསུངས། སྣང་བ་སེལ་ལམ་མི་སེལ་ཞུས་པས་འབྲས་ཆན་ལ་རབ་རིབ་དག་པ་ལྟ་བུ་ཡིན་གྱི་ཁྱེད་རང་དཔྱོད་དང་གསུངས། རིག་ཤེས་ཚད་མའི་ངོར་ཆོས་ཅན་སྣང་ངམ་མི་སྣང་ཞུས་པས་མི་སྣང་སྟེ་མེད་ནས་མི་སྣང་བ་དང་ཡུལ་མ་ཡིན་ནས་མི་སྣང་བ་གཉིས་ལས་འདིར་མེད་ནས་མི་སྣང་བ་ཡིན་གསུངས། སངས་རྒྱས་ཀྱི་ས་ན་ཡེ་ཤེས་མངའ་འམ་མི་མངའ་ཞུས་པས་ཆ་མེད་འཚང་རྒྱ་མ་མྱོང་གསུངས། ཡང་སྒྱུ་མའི་མཁན་པོས་བློན་པོ་བསླུས་པ་འདྲ་བ་ཞིག་ཡིན་གྱིས་ཁྱེད་རང་དཔྱོད་དང་གསུངས། ཡེ་ཤེས་མི་མངའ་བར་བཞེད་པར་གོ་ནས་ཐམས་ཅད་བརྒྱལ་བོག་པ་བཞིན་དུ་གྱུར་པ་དང་ཁྱེད་བོད་ལ་ངའི་དབུ་མའི་ལྟ་བ་ལས་སེམས་ཙམ་བསྟན་ཀྱང་མི་བཟོད་གསུངས། ཁྱེད་སྒྱུ་མའི་དཔེ་ཇི་ལྟར་(ད༡༣ན)
འདོད་གསུང་བ་ལ་བོད་སྟོན་རྣམས་ཀྱི་རྡེའུ་ཤིང་བུ་ལ་སྔགས་ཀྱིས་བཏབ་པས་རྟ་གླང་དུ་སྣང་བ་ལྟར་འདོད་ཞུས་པས་ཞལ་ནག་ཐིང་མཛད་དེ་སྟོང་གཞི་འདོད་པ་སེམས་ཙམ་པའི་ལུགས། ན་མཁའ་ལ་སྔགས་ཀྱིས་བཏབ་པས་རྟ་གླང་དུ་སྣང་བ་ལྟ་བུ་ཡིན་གྱི་སྣ་ཚོགས་སུ་སྣང་བ་ཙམ་ལས་འཁྲུལ་གཞི་ཀུན་རྫོབ་ཏུ་ཡང་མེད་གསུངས། རབ་རིབ་ཀྱི་དཔེ་ཅི་ལགས་ཞུས་པས་རྒན་མོ་ཞིག་མིག་རབ་རིབ་ཀྱིས་ཁེབས་པས་འབྲས་ཆན་ལ་སྐྲ་ཤད་མཐོང་སྟེ་ཁོང་པར་སྲན་ཞུགས། ཕྱིས་བུས་སྨན་པ་བཀུག་སྟེ་སྨན་གྱིས་རབ་རིབ་བསལ་བས་ཟས་ལ་སྐྲ་ཤད་མེད་པར་གོ་ནས་ཁོང་པའི་སྲན་རང་བཞིན་གྱིས་ཞི་བ་ལྟ་བུ་ཡིན་གསུངས་པས་བོད་ཐམས་ཅད་སྤོབས་པ་ཅིག་སྟེ་ཆོས་འདི་ལ་རྒྱ་གར་ཁ་སྤུ་ཅན་རང་དགོས་པ་འདུག་ཟེར་སྐད། དེའི་དུས་ལོ་ཙཱ་བ་ཆེན་པོ་རིན་ཆེན་བཟང་པོ་བོད་ན་ཟླ་མེད་པར་གྲགས་པས་པཎྜིཏ་ལ་ཆོས་ཞུ་རྒྱུ་མེད། གསང་སྔགས་ལ་ང་རང་མཁས། འོན་ཡང་སྣེ་ལེན་བྱ་དགོས་སྙམ་ནས་སྤྱན་དྲངས། སྟན་མཉམ་པར་བཤམས། ཇོ་བོས་ཐོ་ལིང་གི་ལྷ་ཁང་ན་རྒྱུད་སྡེ་བཞིའི་ལྷ་ཚོགས་དཔག་མེད་བྲིས་འབུར་དུ་བཞུགས་པ་ལ་ལྷ་རེ་ལ་བསྟོད་པ་ཚིགས་སུ་བཅད་པ་རེ་མཛད་ཅིང་དབུ་དུད་པ་རེ་མཛད། དེ་ཐམས་ཅད་ལོ་ཙཱ་བ་ཆེན་པོས་ཀྱང་ཐུགས་ལ་ཟིན་སྟེ་གསང་སྔགས་ཀྱི་བདག་པོར་དགོངས་སྟེ་རང་གི་སྟན་ཅུང་ཟད་ཕྲི། ཇོ་བོས་ལོ་ཙཱ་བ་ལ་ཆོས་འདི་དང་འདི་མཁྱེན་ནམ་ཞེས་དྲིས་པ་ཐམས་ཅད་ལ་ཡང་འཚལ་ལགས་སོ་ཞེས་པ་ཁོ་ན་བྱུང་བས་ཇོ་བོ་མཉེས་སྟེ་ཁྱེད་ལྟ་བུ་བོད་ན་ཡོད་ན་ཁོ་བོ་འོང་མི་དགོས་པར་འདུག་པ་ལ་གསུངས། ལོ་ཙཱ་བས་ཇོ་བོ་ལ་ཆོས་ཅི་མཁྱེན་དྲིས་པས་ཁྱེད་ཐུན་མོང་མ་ཡིན་པ་ལ་ཟེར་རམ་གསུངས་པས་ཐུན་མོང་བ་ལ་ཤིན་དུ་མཁས་ཐུན་མོང་མ་ཡིན་པ་ལ་དྲིས་གསུང་བར་གོ་ནས་དྲིས་པས་སྔར་ལོ་ཙཱ་བས་གསན་མ་མྱོང་བའི་ཆོས་དཔག་དུ་མེད་པའི་མིང་ཤར་གྱིས་གསུངས་པས་ཧ་ལས་སྟེ་རང་གི་སྟན་འབྲིད་ཐེབས་གསུམ་(ད༡༣བ)
བྱས་ནས་མཐར་སྟན་མེད་པ་ཙམ་མཛད། དེ་ནུབ་ལོ་ཙཱ་བས་རྒྱུད་སྡེ་སོ་སོའི་ལྷ་ཁང་དུ་བྱོན་སྟེ་ཐུགས་དམ་སོ་སོར་མཛད་པ་མཁྱེན་ནས་གདམས་ངག་མེད་པ་འདྲ་དགོངས་སྟེ་ཆོས་ཐམས་ཅད་གང་ཟག་གཅིག་གིས་སྟན་ཐོག་གཅིག་དུ་ཇི་ལྟར་སྒྲུབ་གསུངས་པས། སོ་སོ་ནས་ཇི་ལྟར་བཤད་པ་བཞིན་ཉམས་སུ་ལེན་ལགས་མོད་ཞུས་པས་ཁོ་བོ་འོང་དགོས་པར་འདུག་དགོངས་ནས་ཞལ་ནག་ཐིང་གིས་སོང༌། ལོ་ཙཱ་བ་དེར་དུལ་ནས་ཉམས་སུ་ལེན་ཚུལ་ཞུས་པས་ཇོ་བོའི་ཞལ་ནས་ཐབས་གཅིག་གི་སྟེང་དུ་ཐབས་མ་ཚང་བ་མེད་པར་སྒྲུབ་དགོས་པ་ཡིན། དེ་ཡང་ཕར་ཕྱིན་ཐེག་པར་སློབ་དཔོན་ཐོགས་མེད་རྗེས་འབྲང་དང་བཅས་པའི་ལུགས་ཀྱི་ཆོས་ཐམས་ཅད་ཐ་སྙད་ཀྱི་དུས་སུ་ཡང་མཚན་ཉིད་གསུམ་གྱིས་གཏན་འབེབས། ཉམས་སུ་ཡང་མཚན་ཉིད་གསུམ་གྱིས་ལེན། འབྲས་བུ་ཡང་མཚན་ཉིད་གསུམ་སྟེ་སྤྲུལ་སྐུ་ཀུན་བཏགས་ལོངས་སྐུ་གཞན་དབང་ཆོས་སྐུ་ཡོངས་གྲུབ་བོ། །འཕགས་པ་ཀླུ་སྒྲུབ་ཡབ་སྲས་ཀྱི་ཐ་སྙད་ཀྱང་བདེན་གཉིས་ཀྱིས་གཏན་ལ་འབེབས། ཉམས་ལེན་ཡང་མཉམ་བཞག་དོན་དམ་སྤྲོས་བྲལ་དང་རྗེས་ཐོབ་ཀུན་རྫོབ་སྒྱུ་མ་ལྟ་བུ་སྟེ་བདེན་གཉིས་ལ་བྱེད། འབྲས་བུ་ཡང་ཆོས་སྐུ་དོན་དམ་དང་གཟུགས་སྐུ་ཀུན་རྫོབ་སྟེ་བདེན་གཉིས་མངོན་དུ་བྱེད། གསང་སྔགས་སུ་ཐ་སྙད་ཀྱང་རྒྱུད་གསུམ་གྱིས་གཏན་ལ་འབེབས། ལམ་དུས་ཀྱང་སྟོང་ཉིད་སྙིང་རྗེ་དབྱེར་མེད་དུ་གཟོད་ནས་གནས་པ་རྒྱུ་རྒྱུད་སྐྱེད་རྫོགས་སྒོམ་པ་ཐབས་རྒྱུད། སྟན་ཐོག་གཅིག་དུ་ལམ་འབྲས་བུ་དང་བཅས་པ་ཚང་བར་སྒོམ་པ་འབྲས་རྒྱུད་དེ་རྒྱུད་གསུམ་གིས་ཉམས་སུ་ལེན། འབྲས་བུ་ཡང་རྒྱུད་གསུམ་སྟེ་ཆོས་སྐུ་རྒྱུ་རྒྱུད་ལོངས་སྐུ་འབྲས་བུའི་རྒྱུད་སྤྲུལ་སྐུ་ཐབས་རྒྱུད་དེ། དེ་རྣམས་ཆོས་རེ་རེའི་སྟེང་དུ་ཐམས་ཅད་ཚང་བར་བསྒོམས་སྟེ་སྐྱེད་རིམ་གཅིག་པོའི་སྟེང་དུ་ཡང་ཐམས་ཅད་ཚང་བར་སྒོམ་(ད༡༤ན)
གསུངས། དེ་ནས་བདེ་མཆོག་གི་རིམ་པ་ཕག་མོའི་བྱིན་རླབས་ཞུས་པས་ཉམས་རྟོགས་ཁྱད་པར་ཅན་འཁྲུངས། དངོས་པོ་ཅི་ཡོད་ཕུལ་སྟེ་དེ་གཉིས་ཐུགས་དམ་དུ་མཛད། སྒྲུབ་པའི་མན་ངག་གསན་ནས་ཉེ་རྒྱུའི་སྒྲུབ་པ་མཛད་ཏོ། །ལྷ་བཙུན་པས་གསེར་གུག་སྲང་སུམ་བརྒྱ་ཕུལ་སྟེ་བོད་ན་ཐེག་ཆེན་གྱི་ལྟ་སྤྱོད་ལ་བཤེས་གཉེན་གྱིས་མ་ཟིན་པར་རང་རང་གི་རྟོག་གེས་དཔྱད་ནས་མི་མཐུན་པ་འདི་ལྟར་མཆིས་པ་རྣམས་བསལ་ནས་ཐེག་ཆེན་གྱི་བསྟན་བཅོས་ཇོ་བོ་ཉིད་ཇི་ལྟར་སྐུ་ཉམས་སུ་བཞེས་པ་ཅིག་བརྩམ་པར་ཞུ། འདུས་པ་ཡེ་ཤེས་ཞབས་ལུགས་ལ་བསྟེན་པའི་སྤྱན་རས་གཟིགས་ཀྱི་སྒྲུབ་ཐབས་ཅིག་ཞུ་ཞེས་གསོལ་བ་བཏབ་པས་བྱང་ཆུབ་ལམ་སྒྲོན་དང་གསང་འདུས་འཇིག་རྟེན་དབང་ཕྱུག་གི་སྒྲུབ་ཐབས་གནང༌། དེར་ལོ་ཙཱ་བ་ཡང་ཇོ་བོ་རྒྱ་གར་དུ་སྤྱན་འདྲེན་པར་འདོད། ཇོ་བོ་ཡང་ཨུ་པ་སི་ཀ་མེད་རྣལ་འབྱོར་མས་བསླུས་སམ་ཞེས་སྐབས་སུ་གསུངས། དེ་ཡང་འཕགས་པ་སྤྱན་རས་གཟིགས་དགེ་བསྙེན་དྷརྨ་ཏཱ་ལ་ཞེས་གནས་བརྟན་བཅུ་དྲུག་གི་རུང་བ་མཛད་པ་པོར་བཞུགས་པ་དེ་ཉིད་བོད་ཡུལ་དུ་མིར་སྐྱེ་བ་བཞེས་པ་འབྲོམ་སྟོན་པ་རྒྱལ་བའི་འབྱུང་གནས་ནི་དབུ་རུ་བྱང་ཕྱོགས་གནམ་བྱེ་མ་ལུང་གི་རྩཱ་སྒྱེ་མོར་ཡབ་སྟག་གསུམ་ཁུ་བཞེར་དང་ཡུམ་ཁུ་རྦོ་ཟ་ལྷ་གཅིག་གི་སྲས་སུ་ཤིང་འབྲུག་ལ་འཁྲུངས་མཚན་ཆོས་འཕེལ། ཞང་སྣ་ནམ་རྡོ་རྗེ་དབང་ཕྱུག་ལ་དགེ་བསྙེན་གྱི་སྡོམ་པ་བླངས། དགུང་ལོ་བཅུ་བདུན་ལ་ཁམས་སུ་བྱོན་སྟེ་གྲུམ་གྱི་མཁན་བུ་སེ་བཙུན་བྱང་ཆུབ་གཞོན་ནུ་བསྟེན། མངོན་པ་དང་སྔགས་རྙིང་མ་སོགས་མང་དུ་བསླབས། ཁོང་གི་རྟ་རྫི་མེལ་འཚེ་ཡོས་འཐག་ཐལ་འཕྱག་ཐམས་ཅད་མཛད། གྲ་པ་རྣམས་སྒྲོས་གླེང་བྱས་པས་སྟོན་པ་ཐུབ་པ་མ་བྱུང་ནས་ཆོས་མཁས་སུ་གྲགས་སྟེ་རྟ་རྫི་དང་ཡོས་འཐག་ལས་བཏོན་ནས་ལོ་བཞི་བཞུགས། ཁུ་རྔོག་འབྲོག་གསུམ་དུའང་མ་གིར་གྲགས། པཎྜིཏ་སྒྲའི་ཚེར་མ་ལ་སྒྲ་བསླབས། རྙེད་པར་དཀའ་བའི་མི་(ད༡༤བ)
ལུས་ཐོབ་པར་གྱུར་པའི་དུས་འདིར་ཆོས་རྣལ་མ་ཞིག་བྱ་དགོས་དེ་ལ་འདི་ཙམ་གྱིས་ཆོག་གམ་མི་ཆོག་པཎྜིཏ་མཁས་པ་ཅིག་ལ་འདྲི་དགོས་སྙམ་པ་དང་སེ་བཙུན་གྱིས་ཀྱང་ཕ་དང་ཕྲད་དུ་སོང་གསུངས་ནས་བརྫངས། སོག་ཆུ་ཁར་ཕྲེད་ཁ་ཡེར་ཆུང་དང་མཇལ་བས་དེ་དད་ནས་ར་སྒྲེང་ཕུལ། ཆོས་འཁོར་འཛུགས་པར་ཞུས་པས་ང་ད་རེས་པཎྜི་ཏའི་དྲུང་དུ་འགྲོ་བས་སྡོད་མི་ཁོམ། རྔོག་ལེགས་པའི་ཤེས་རབ་བྱ་བ་ཞིག་མྱུར་དུ་འོང་བས་དེ་ལ་ཞུས་གསུངས། ར་སྒྲེང་གི་དགོན་པ་ཕྱིས་འདེབས་པར་བྱས་ནས་ཡར་བྱོན། དགེ་བསྙེན་གྱི་སློབ་དཔོན་ལ་ཕྱག་མཛད། ལྷ་བཙུན་བོ་དྷི་རཱ་ཛཱ་སོགས་ལ་ཕྱག་མཛད་ཅིང་པཎྜི་ཏ་སྤྱན་འདྲོངས་ན་བསུ་བ་མཛད་པར་ཞུས། ཀ་བ་ཤཱཀྱ་དབང་ཕྱུག་ལ་བཙུན་མོའི་མུར་ཇ་ཕུལ་སྟེ་ངས་འཕྲིན་བྱུང་ན་ཁྱེད་ཀྱིས་བསྐུལ་མ་མཛད་ནས་པཎྜི་ཏ་ལ་སྟོད་ནས་བསུ་བར་ཞུ་བ་ཕུལ། བྱང་ལམ་ལ་བྱོན་པས་ལམ་ངོ་མ་ཤེས་པ་ན་པེ་ཀར་གྱིས་ལམ་བསྟན། ཡང་སྒྲོལ་མའི་སྤྲུལ་པ་ཤ་བ་འཐེང་མོ་ཞིག་གིས་ཀྱང་ལམ་བསྟན། ཇོ་བོ་པུ་རངས་རྒྱ་ཞིང་ན་བཞུགས་པའི་ཚེ་སྒྲོལ་མས་ད་ནི་ཞག་གསུམ་དྲོ་དང་བཞི་ན་བོད་ཀྱི་ཨུ་པ་སི་ཀ་ཆེན་པོ་འབྱོན་པས་དེ་ལ་བྱིན་གྱིས་རློབས་ཅིག་གསུང༌། ཇོ་བོས་ཀྱང་བུམ་པ་བཞེངས་ནས་ཞག་གསུམ་གྱི་ཉིན་བར་བྱ་ར་མཛད། དྲོ་ཚུན་མ་བྱོན་པས་རྗེ་བཙུན་མ་རྫུན་གསུང་ཅང་སྲིད་དམ་གསུངས། གྲོང་དུ་ཆོས་སྟོན་ལ་གཤེགས་པའི་ཤུལ་དུ་ཕེབས་པས་ང་བླ་མ་དང་མཇལ་བ་སྐད་ཅིག་སྔ་ཕྱི་ལ་ཁྱད་པར་ཡོད་གསུངས་ནས་བྱོན་སྟེ་སྲང་བར་ཞིག་དུ་མཇལ་བས་གཉིས་ཀས་ངོ་ཅེར་མཁྱེན་སྟེ་གུས་པས་བཏུད། ཇོ་བོས་ཕྱག་འབྲོམ་གྱི་དབུ་ཐོག་དུ་བཞག་ནས་ཤིས་པ་མང་པོ་བརྗོད། དེ་ནས་གཟིམས་ཁང་དུ་བྱོན་སྟེ་བུམ་པ་དབུ་ཐོག་དུ་བཞག་སྟེ་བྱིན་གྱིས་བརླབས། རྒྱ་གར་ན་པཎྜི་ཏ་མཁས་པ་ཇི་ལྟ་བུ་ཡོད། ངའི་སྔར་གྱི་ཆོས་ལམ་དུ་སོང་ངམ། ཉིད་ཀྱི་སྤྱན་སྔར་བསྡད་ན་ཇི་ལྟར་མཆི་ཞུས་པས། (ད༡༥ན)
རྒྱ་གར་ན་མཁས་པ་མང་དུ་ཡོད་ཅིང་ད་ལྟའང་ཤར་ཕྱོགས་བྷཾ་ག་ལར་ཉིན་རེ་གྲུབ་ཐོབ་རེ་འབྱོན་ཞིང་ཡོད། ཁྱོད་ཀྱིས་ཆོས་སྔར་བྱས་པ་གཞན་ལམ་དུ་མ་སོང༌། བླ་མའི་ཞབས་ཏོག་ལམ་དུ་སོང༌། ད་ཁྱོད་ངའི་དྲུང་དུ་སྡོད། སྒྲོལ་མས་ལུང་བསྟན་པ་ཡིན་གྱི་བཀའ་རྒྱུད་འདི་ལ་བྱིན་རླབས་ཡོད་བྱིན་རླབས་ཆེ་ཡི་གསུངས། དེ་ཉིན་གྱི་སྟོན་སྐལ་མར་ཚལ་ཞིག་བྱུང་བ་དེ་ནུབ་མར་མེ་མཚན་ཐུབ་ཅིག་ཕུལ། དེ་ཕྱིན་ར་སྒྲེང་ན་གདུང་ཁང་བཞུགས་པའི་བར་མར་དཀར་གྱི་མར་མེ་རྒྱུན་མ་ཆད་སྐད། དེ་ནུབ་ནས་དབུ་སྔས་སྦྲེལ་ཕལ་ཆེན་སྡེ་པ་ཡོལ་བས་ནུབ་ལྷག་ཉལ་ཐུབ་པར་འདོད་པས་བར་རས་ཡོལ་གྱིས་བཅད་དེ་རིག་པ་བསླབས། ཇོ་བོ་ཞག་གསུམ་ན་རྒྱ་གར་ལ་ཐེགས་རྒྱུ་དེར་འབྲོམ་གྱིས་ཕེབས། བཞུགས་པར་ཞུས་པས། གྲགས་པ་མ་ཡིན་མི་སྤྱོད་བ། །ཞེས་པ་བྱང་སེམས་ཀྱི་ཉེས་བྱས་ཡིན་པས་འགྲོ་གསུངས་སྟེ་གསེར་ལ་གཟིགས་ནས་བཞུད་བྱ་བ་དང༌། བོད་ན་མ་རྒྱུད་གསུང་བྱ་བ་དང་བོད་བ་ལང་ལྟ་བུའི་དབུས་ན་ཆོས་ཐམས་ཅད་སྟོང་ཉིད་ཡིན་གསུང་གི་འདུག་ལོ་ཞེས་རྒྱ་གར་དུ་སྒྲོག་པ་རེ་གཉིས་བྱུང་བས་ཕྱིར་ཟློག་པར་བཞེད། ལོ་ཙཱ་བ་ཡང་ཆད་སོའི་དབང་གིས་སྐྱེལ་བར་བཞེད། ལྷ་བཙུན་པས་ཀྱང་ཞུ་མ་ནུས་པའི་ཚེ་འབྲོམ་ཐུགས་ཟབ་ལ་དཀྱེལ་ཆེ་བས་དབུས་ཀྱི་ལྷ་ས་བསམ་ཡས་སོགས་གཙུག་ལག་ཁང་ངོ་མཚར་བ་ན་དགེ་འདུན་བརྒྱ་ཕྲག་མང་པོ་བཞུགས་པ་དེ་ཐམས་ཅད་ཇོ་བོ་ཕེབས་སུ་རེ་བ་རྩེ་གཅིག་པར་མཆིས་པ་སོགས་ཐབས་ཀྱི་ཞུས་པས། ཚངས་སྤྱོད་པ་གྲངས་མང་པོ་དེ་ལྟ་བུ་རྒྱ་གར་ན་ཡང་དཀོན། དེ་ཙམ་གྱི་ཁྲོད་དུ་དགྲ་བཅོམ་པ་བཞུགས་པར་ལུང་བསྟན་པས་བཞུགས་མཆི་གསུངས་ནས་བོད་ཕྱོགས་ལ་ཕྱག་མང་པོ་མཛད། དེ་ཐམས་ཅད་ང་འོང་བར་བཞེད་ན་ངས་དགེ་འདུན་གྱི་ངག་མི་གཅོག་པར་དམ་བཅས་པ་ཡིན་གསུངས་པས་སྤོབས་པ་སྐྱེས་སྟེ་བོད་དུ་འབྱོན་པར་ཞུས་པས་ཞལ་གྱིས་བཞེས་ཀྱང་ལོ་ཙཱ་བས་མ་གསན་པས། དང་པོ་ཚུར་སྤྱན་མ་འདྲོངས་ད་ཕར་སྤྱན་མ་འདྲོངས་ངས་ལོ་ཙཱ་བ་སྦྱངས་གསུང་སྐད། (ད༡༥བ)
དེ་ནས་འབྲོམ་གྱིས་དབུས་ཀྱི་མི་ཆེན་རྣམས་ལ། ཤིང་རྟའི་དབྱིབས་འདྲ་འཛམ་གླིང་གི །བྱེ་བྲག་བརྗིད་ལྡན་གངས་རིའི་བྱང༌། །ལོ་ཧིན་ཏ་ར་རིན་ཆེན་ཁུངས། །ཁ་བ་ཅན་ཞེས་མིང་གྲགས་ན། །བློ་ཆེན་སྟོབས་ལྡན་མི་སྲུན་པ། །བོད་ཅེས་བྱ་བ་གནས་པའི་ཕྱིར། །མི་རྒྱལ་བྱང་ཆུབ་སེམས་དཔའ་ཆེ། །དཔའ་ཆེན་མང་བའི་འཁོར་བཅས་ཀྱིས། །ཕན་གདགས་སླད་དུ་དམ་ཆོས་བསྒྱུར། །རྒྱུ་བཟང་བཀོད་ལེགས་གཙུག་ལག་ཁང༌། །བསམ་ཡས་ལ་སོགས་གནས་མཆོག་ན། །སྔོན་རྒྱལ་འཕྲུལ་རྗེའི་དགོངས་བསྐང་ཕྱིར། །བསྟན་པའི་བདུད་རྩི་རྒྱས་མཛད་ཅིང༌། །རྒྱལ་སྲས་འདྲེན་པ་དཀྱེལ་ཆེ་བའི། །མི་ཡི་རྒྱལ་པོ་ཤཱཀྱའི་སྲས། །ལྷ་བཙུན་བོ་དྷི་རཱ་ཛཱ་དང༌། །དང་པོར་དགེ་འདུན་ལུགས་འབྱིན་དཔོན། །བཙུན་ཆེན་ཡེ་ཤེས་བློ་གྲོས་དང༌། །ཐེག་ཆེན་གདུང་རྒྱུད་སྟོན་མཛད་པའི། །བསྟན་པའི་ཀ་བ་རྣམ་གསུམ་པོ། །དམིགས་བྱེད་བཤེས་གཉེན་རྣམ་གཉིས་དང༌། །རྗེས་སློབ་དཔལ་ལྡན་བཅུ་གཉིས་དང༌། །ཆོས་འཁོར་ཁྲིམས་བཞིན་སྐྱོང་མཛད་པའི། །རིང་ལུགས་ཆེན་པོ་རྣམ་གཉིས་དང༌། །ཆོས་གྲའི་སློབ་དཔོན་ཐུགས་རྒྱལ་ཅན། །ཀ་བ་གར་མི་མཆེད་གཉིས་དང༌། །དགེ་བཤེས་ཆེ་རྣམས་དགོངས་སྐོང་བའི། །ཀུན་ཕན་དབང་ཕྱུག་རྒྱལ་མཚན་དང༌། །གནས་བརྟན་བན་སྐྱའི་རེ་གནས་ས། །ཤཱཀྱ་གཞོན་རྒྱལ་བའི་སྲས་གཉིས་དང༌། །མཁས་བཙུན་ཆེན་པོར་སྙན་གྲགས་པ། །ལེགས་པའི་ཤེས་རབ་ལ་སོགས་པ། །འཕགས་པའི་དགེ་སློང་དགེ་འདུན་ཆེ། །སློབ་དཔོན་ཡོན་བདག་འཁོར་བཅས་ལ། །དགེ་བསྙེན་རྒྱལ་བའི་འབྱུང་གནས་ཀྱིས། །གུས་པ་སྔོན་འགྲོས་མཆིད་གསོལ་པ། །ཞེས་སོགས་ཀྱི་འཕྲིན་ཡིག་མཛད། ཇོ་བོ་ཕར་ཐེགས་པའི་ཕྱགས་ཕྱིར་བྱོན་སྟེ་ཅི་འགོར་མཛད། ལོ་ཙཱ་བས་ཅི་མགྱོགས་མཛད་པས་མང་ཡུལ་གྱི་བར་བྱོན། དེའི་ཚེ་ས་མན་སྟེ་གསུམ་གྱི་འཁྲུག་(ད༡༦ན)
པ་ལངས་པས་བལ་པོའི་རྫོང་འགགས་ནས་མ་ཐོན། དེ་བོད་ཀྱི་བསོད་ནམས་སུ་བྱུང༌། ཇོ་བོས་བློ་མི་བདེ་མི་དགོས་སྒྲུབ་པར་མ་ནུས་པ་ལ་ཉེས་པ་མེད་གསུངས་པས་ལོ་ཙཱ་བ་ཐུགས་བདེ་སྟེ་སླར་བོད་དུ་སྤྱན་དྲངས་ནས་མང་ཡུལ་དུ་ལྷ་ཁང་དཀར་པོ་བཞེངས། དབུས་སུ་ཆབ་ཤོག་སླེབས་པ་དང་དགེ་བཤེས་ཀ་བས་འཕྲིན་ཡིག་དུ་འཁོད་པའི་མི་ཆེན་རྣམས་རྒྱ་སར་སྒང་དུ་སུམ་པ་ཡེ་ཤེས་བློ་གྲོས་ཀྱི་སར་སྤྱན་དྲངས་གྲོས་མཛད་པས་ཁུ་སྟོན་བརྩོན་འགྲུས་གཡུང་དྲུང་ཞེས་བྱ་བ་མངོན་པ་ལ་ཤིན་དུ་མཁས་ཤིང་ཀླུ་མེས་པ་ཐམས་ཅད་ཀྱི་གནས་བརྟན་མཛད་ཁོང་ལས་མི་ཆེ་བ་མེད་པ་དེའི་མཚན་མ་འཚུད་པས་མ་མཉེས་སྟེ་སྔོན་ལ་ཇོ་བོ་འཐོབ་པར་བྱ་སྙམ་ནས་དེ་འཕྲལ་བྱོན་པས་གཞན་ཐམས་ཅད་ཀྱང་མྱུར་བར་བྱོན་པས་ཇོ་བོ་ཕར་མ་གཤེགས་པར་སླེབས། བོད་སྟོན་རྣམས་ཚག་ཞུ་བེར་ཆེན་གསོལ་བའི་སྐྱ་རགས་གཟིགས་པས་མི་མ་ཡིན་མང་པོ་བྱུང་གསུངས་ནས་དབུ་ཐུམ་ཕུར། དེ་ནས་བོད་སྟོན་རྣམས་ཀྱིས་སྣམ་སྦྱར་གསོལ་སྟེ་སེར་སྦྲེང་མཛད་ཕྱག་རྟེན་ཕུལ་བས་ཇོ་བོ་མཉེས་ནས་ཕྱག་མང་པོ་མཛད། དེར་ལོ་ཙཱ་བ་མང་དུ་ཚོགས་པས་གང་ལ་བྱ་མ་མཐུན་པ་ན་ཁུ་སྟོན་དབང་ཆེ་བས་ཐོག་མཐའ་བར་གསུམ་དུ་ཇོ་བོའི་ཕྱིར་དཀའ་བ་སྤྱད་པ་ནག་ཚོ་ཡིན་གསུངས་ནས་གུ་ལིང་གི་ཆོས་གོས་ཅིག་ཕུལ་སྟེ་ལོ་པཎ་དུ་བསྡེབས་དཔལ་ཐང་ལ་ཚུར་འབྱོན་དུས་མདོ་ཁམས་ནས་ཕྱིས་དགེ་བཤེས་དགོན་པ་བར་གྲགས་པ་མཛད་དབང་ཕྱུག་རྒྱལ་མཚན་དེ་ཕམ་ཐིང་པའི་དྲུང་དུ་ཆས་པ་མཇལ། བྱིན་རླབས་ཞུས་པས་བར་ཆད་འོང་བས་མ་འགྲོ་ངས་ཆོས་དང་ཟན་སྦྱར་གྱི་གསུངས། ལོངས་སྤྱོད་རྣམས་ཕུལ་བ་ལ་དགོན་པ་པའི་ས་ཏྲ་མཛད། ཆོས་སྒོ་སྐྱེལ་དུ་མཛད་ནས་བསྐྱངས། དེ་ནས་མདོག་ཚེ་སྣར་ཅིག་ཅར་བའི་ལམ་དོ་ཧ་གསུངས་པ་འབྲོམ་གྱིས་བཀག །མང་སྒར་དུ་བཟངས་བཞོན་ནུ་འབར་དང་(ད༡༦བ)
འབྲོག་མི་ལོ་ཙཱས་སྤྱན་དྲངས། ལེང་ལོ་ཙཱའི་ས་སྙིང་ལྷ་ཁང་ལ་རབ་གནས་མཛད། འཁྲེན་གྱི་བྲག་ལུང་གཟིགས་པས་བྱང་ཆུབ་སེམས་དཔའ་དྲོད་ཐོབ་པ་ཅིག་བཞུགས་འདུག་གསུངས་ནས་ཕྱག་མཛད་དེ་ཟངས་དཀར་མཛོད་ཁུར་བཞུགས་པར་གདའ། ཞ་ལུ་རི་ཕུག །ཚོང་དུས། ཉན་ཚོ་སོགས་སུ་བྱོན། ཡོལ་ཆོས་དབང་སྐུ་མཆེད་ལ་ཐུགས་རྗེ་ཆེན་པོ་ཞི་ཁྲོའི་སྐོར་མང་དུ་གསུངས་པས་ཟླ་བ་དྲུག་ནས་བཅུ་གཅིག་ཞལ་དང་རྟ་མགྲིན་ཞལ་གཟིགས། དེར་རྣལ་འབྱོར་པ་ཆེན་པོར་མཚན་གྲགས་པའི་ཨ་མེས་བྱང་ཆུབ་དེ་མདོ་ཁམས་སྨད་དུ་འཁྲུངས། སྤུན་བདུན་གྱི་ཐ་ཆུང་ཡིན་པས་བུ་མེད་པ་ཅིག་ལ་བྱིན། དེར་བུ་ཞིག་སྐྱེས་ནས་ཡང་གཞན་ཞིག་ལ་བྱིན། དེར་ཡང་སྐྱེས་པས་བཀྲ་ཤིས་པར་གྲགས་པའི་ཚེ་ཡུམ་བྱུང་ནས་ཁྱོད་རབ་ཏུ་བྱུང་བའི་དོན་དུ་སྐྱེད་པ་ཡིན་ཟེར་ནས་རབ་ཏུ་བྱུང༌། མཁན་པོའི་གཡོག་བྱེད་ཅིང་ཡོད་ཙ་ན་འདིར་མ་སྡོད་དབུས་སུ་སོང་ཟེར་ནས་བསྐུལ་སྟེ་ཉིན་ལམ་གསུམ་ཙམ་དུ་བསྐྱལ་ནས། བུ་ཁྱོད་དབུས་སུ་ཕྱིན་ནས་ཡང་དག་པའི་བླ་མ་དང་མཇལ་ཞིང་ཐུགས་ཟིན་ནས་གདམས་པ་དང་རྗེས་བསྟན་གསུངས་པ་ཚུལ་བཞིན་དུ་སྒྲུབ་པར་གྱུར་ཅིག །དེའི་ཚེ་ང་ཡང་ཁྱོད་ཀྱི་དྲུང་དུ་སྐྱེས་ནས་མ་སྨད་གཉིས་ལྷན་ཅིག་དུ་སངས་རྒྱས་སྒྲུབ་པར་གྱུར་ཅིག་ཞེས་སྨོན་ལམ་བཏབ་ནས་གྱེས། ཇོ་བོ་དང་མཇལ་བས་དེ་མ་ཐག་དམ་ཚིག་གསུམ་བཀོད་གནང་ནས་བཟླས་པ་སྟོང་བརྒྱད་བརྒྱ་སོང་བ་དང་ཞལ་གཟིགས། དེ་ཕྱིན་ཇོ་བོའི་ཉེ་གནས་མཛད། དེ་ནས་དབུས་སུ་བྱོན་སྟེ་བྱང་ཐང་ནས་ལྷ་སའི་ན་མཁའ་ལ་གཟིགས་སྟེ་འཇའི་གུར་སུམ་བརྩེགས་དང་ལྷ་མང་པོས་མཆོད་པ་རྒྱུན་མ་ཆད་པར་འདུག་གསུངས། ཆུ་བོ་རི་འདི་རིན་པོ་ཆེ་སྣ་ལྔ་ལས་གྲུབ་པར་འདུག་གསུངས། འཆིང་རུར་བུ་མོ་ཞིག་གིས་རྒྱན་ཐམས་ཅད་ཕུལ་བ་མྱུར་དུ་ཤི་བ་གསན་ནས་གཞུང་སྟག་དཀར་གྱི་གད་ཕུག་དུ་ཞག་ལྔ་བཞུགས་ནས་ངན་སོང་སྦྱོང་ཆོག་དང་སཱ་ཚ་མཛད་དེ་(ད༡༧ན)
ལྷར་སྐྱེས་གསུངས། དོལ་མདར་ལྷ་རྗེ་རགས་བྱ་བའི་ཆུ་རགས་མཛད་དེ་ཡུལ་འདི་ནས་བྱང་ཆུབ་སེམས་དཔའ་ཤ་མཚན་ཅན་ཞིག་འབྱུང་ཞེས་རོག་དམར་ཞུར་བ་ལུང་བསྟན། སྣོན་མདར་ཨཱརྻ་དེ་ཝའི་ལྷ་ཁང་ལ་རབ་གནས་མཛད་ནས་བཅུ་གཅིག་ཞལ་འདི་ལ་རབ་གནས་ཁྱད་པར་དུ་ཆགས་ཡོད་པས་སྒོས་མཆོད་རེ་གྱིས་གསུངས་ཚོང་དུས་ཀྱི་ལྷ་ཁང་རབ་གནས་མཛད། ཕག་ལོ་ལ་བསམ་ཡས་སུ་ཕྱགས་ཕེབས། ལམ་ཡིག་མངའ་རིས་ཀྱི་སཱ་ར་མར་ཕག་ལོ་བྲིས་ནོར་དུ་བྱས་འདུག་ཡང༌། འདི་དྲུག་བཅུ་རེ་དྲུག་བཞེས་པའི་མེ་མོ་ཕག་ལོ་ཡིན་ནོ། །བྱང་ཆུབ་ཆེན་པོའི་སྐུ་ལ་རྒྱ་གར་གྱི་མ་ཧཱ་བོ་དྷི་དང་ཁྱད་མི་འདུག་གསུངས། སེམས་སྐྱེད་བྱང་ཆུབ་གླིང་དུ་བྱོན་པ་མ་མཐོང་བར་སངས་རྒྱས་མ་ཆགས་པདྨའི་ཞལ་གྱི་རྡུལ་འཕྱི་ཞིང་འདུག །མར་ལ་མི་ཐར་བ་ལྟར་མཛད་དེ་སྐས་ལ་སྤྱན་དྲངས། པེ་ཀར་གླིང་གི་དཀོར་མཛོད་བྱང་ངོས་མར་བཞུགས། ནུབ་གཅིག་ངའི་དད་པ་དེ་ཉམས་སོང་སྐྱེས་རབས་སྤྱན་དྲོངས་དང་གསུངས་ནས་མར་མེ་ལ་གཟིགས། ལྷ་བཙུན་བོ་དྷི་རཱ་ཛཱ་སོགས་ལ་རིམ་པའི་ཆོ་ག་མཛད། ཀ་ཆུར་ཁུ་རྔོག་གིས་ཞུས་ནས་རིགས་ཚོགས་གསུངས། མཆིམས་ཕུར་འབྲོམ་ལ་སྔགས་ཀྱི་གདམས་པ་མང་དུ་གནང༌། དེར་སྤྱན་སྔ་ན་དགེ་ཚུལ་ཞིག་ལས་མེད་ཙ་ན་དགེ་སློང་གཞོན་ནུ་གཉིས་བྱོན་སྟེ་གཅིག་གིས་ཟད་པར་ཆུའི་ཏིང་ངེ་འཛིན་གཟིགས་པར་འཚལ་ལམ་ཟེར་ནས་དང་པོར་ཁོང་རང་གི་སྨིན་མཚམས་ཆུར་སོང༌། དེ་ནས་མཆེད་དེ་དམ་ཤོད་ཐམས་ཅད་ཆུར་གྱུར། གཅིག་གིས་ཟད་པར་དཀར་པོ་གཟིགས་པར་འཚལ་ལམ་ཞེས་སྨིན་མཚམས་ནས་འོད་དཀར་པོས་ངག་ཤོད་ཐམས་ཅད་དཀར་ཆམ་སོང༌། ཏིང་ངེ་འཛིན་ལས་ལངས་པ་དང་ཡང་སྨིན་མཚམས་སུ་འདུས་སྟེ་སོང༌། ཇོ་བོའི་ཞལ་ནས་ཕ་ལ་ཕ་ལ་ཏིང་ངེ་འཛིན་བཟང་གསུངས། ཡང་སྐབས་ཅིག་དེ་གཉིས་བྱོན་ནས་སྒྱུ་མ་ལྟ་བུའི་ཐང་ཀ་གཟིགས་པར་འཚལ་(ད༡༧བ)
ལམ་ཞེས་ཐང་ཀ་ཕད་ཙེ་ཙམ་ཞིག་ལ་དུས་གསུམ་གི་སངས་རྒྱས་ཐམས་ཅད་ཀྱི་མཛད་པ་བཀྲ་ལམ་མེ་བ་ཞིག་དང་སྒྲོལ་མའི་ཐང་ཀ་བཀྲ་ལམ་པ་ཅིག་གཟིགས་དབུ་རྩེར་སྟོན་མོའི་དུས་དགེ་ཚུལ་དེས་དེ་གཉིས་གར་ཐལ་ཞུས་པས་ཁོང་དེར་མི་འོང་སའི་ལྷ་མོ་དང་ཤིང་གི་ལྷ་མོས་བཤོས་འདྲེན་པ་ཡིན་གསུངས། ཇོ་བོ་ཉིད་དབུ་རྩེའི་བྱ་མདབ་ཀྱི་ན་མཁའ་ལ་སྐོར་བ་མཛད་པ་རྒན་མོ་ཞིག་གིས་མཐོང༌། རྒྱ་གར་ནས་སློབ་མ་ཞིག་གསོལ་བ་འདེབས་པའི་དྲིལ་བུའི་སྒྲ་གསན། ཨ་མེས་ཀྱི་ཐུགས་ལ་ཐག་རིང་པོ་ནས་ཆོས་ལ་འོངས་པ་བྱ་བས་གཡེངས་པ་འདི་མི་འོངས་བར་འདུག་སྙམ་པ་མཁྱེན་ནས་འབྲོམ་ལ་འདི་ནི་བསམ་ངན་རྒྱུའོ་གྲོས་ཐོབ་ཅིག་གསུངས། དཀོར་མཛོད་གླིང་དུ་རྒྱ་དཔེའི་དཀོར་མཛོད་ཅིག་ཁ་ཕྱེ་ནས་གཟིགས་པས་སྔར་མ་གཟིགས་པའི་རྒྱུད་མང་དུ་སྣང་བས་ངས་མི་ཡུལ་གྱི་རྒྱུད་རྣམས་སུ་མ་ཟད་མཁའ་འགྲོ་མས་བསྟན་པ་ཡང་དཔག་མེད་མཐོང་སྟེ་དེ་རྣམས་ན་ཡང་འདི་ཀུན་མི་འདུག་གསང་སྔགས་འདི་ལ་མཐའ་མངོན་རྒྱུ་ཡོང་ཡོང་མི་འདྲ་གསུངས་ནས་མི་ཡུལ་ན་ཡོད་པའི་གསང་སྔགས་མ་ལུས་པ་མཁྱེན་དགོངས་པའི་ཐུགས་རྒྱལ་ཡང་དེར་ཆག །སློབ་དཔོན་པདྨས་སྲིན་པོའི་ཡུལ་སོགས་ནས་བླངས་པར་ངེས་སྤྱིར་ཡང་སློབ་དཔོན་པདྨས་ནཱ་ལེནྡ་ནས་རྒྱུད་ཀྱི་རྒྱ་དཔེ་ཐམས་ཅད་རྫུ་འཕྲུལ་གྱིས་བསམ་ཡས་སུ་བླངས་པས་མང་བ་ཡིན། དེའི་དུས་ཀྱི་བསྟན་པ་ལྟ་བུ་རྒྱ་གར་དུ་ཡང་མ་བྱུང་པ་འདུག །རཱ་ཛཱ་བོདྷི་ས་ཏྭ་གསུང་ཞིང་ཡི་རང་མཛད། སྟོན་པ་འདས་ནས་ཅི་ཙམ་སོང་གི་གཏན་རྩིས་མཛད། ཁུ་སྟོན་གྱིས་ཡར་ལུངས་སུ་སྤྱན་དྲངས་པས་འབྲོམ་གྱི་ཐུགས་ལ་ཁུ་ཐུགས་རྒྱལ་ཆེ་བས་ཞབས་ཏོག་ཐོ་བ་མི་འོང་སྙམ་ནས་བང་སྟོན་ལ་ངས་ཐབས་ཀྱིས་ཡར་ལུངས་ནས་བསམ་ཡས་སུ་སྤྱན་དྲངས་གིས་དེ་ནས་ཁྱོད་ཀྱིས་རྟ་པས་བསུས་ལ་སྙེ་ཐང་དུ་སྤྱན་དྲོངས་ཅིག་ཞེས་ཆད་བྱས། བྱ་སའི་ལྷ་ཁང་རྙིང་མ་ལ་རབ་གནས་ཀྱང་མཛད། ཐང་པོ་ཆེར་ར་བརྩིགས་ཁང་པར་(ད༡༨ན)
བཞུགས་སྟེ་ཉི་ཁྲི་སྣང་བ་དང་བྱམས་ཆོས་ཕྱི་མ་གསུམ་ལ་སོགས་མང་དུ་གསུངས། དེ་ནས་ཁུ་སྟོན་རང་ལྷ་སྡིངས་སུ་བཞུགས་སྟེ་མཐའི་མི་བྱ་བ་གྲངས་སུ་གཞུག་དགོས་ཟེར་ནས་ཞབས་ཏོག་ཐོ་བ་ཡང་མ་བྱས། འབྲོམ་དང་ཨ་མེས་ལ་ཡང་བརྙེས་སེ་བྱས་པས་ཨ་མེས་ཀྱིས་ཉེ་གནས་མི་དགྱིད་པར་ཞུས་པས་མ་གནང༌། དགེ་བཤེས་སྟོན་པས་ཞུ་གྲོགས་མཛད་པས་དེང་རྒྱ་གར་ན་ཡིན་ན་གྲོགས་རྣལ་མ་འདི་ལྟ་བུ་ངས་ཕོ་ཉས་དབང་དུ་བྱས་སྟེ་དགུག་དགོས་པའི་ཚོད་ཡིན་གསུང་ཞིང་དབུ་ཞྭ་ཕུད་ནས་དབུ་དཀར་པོ་ཨ་མེའི་པང་དུ་བཞག་སྟེ་ང་རྒྱ་གར་ཤར་དུ་སྐྱེས་ཁྱོད་མདོ་སྨད་དུ་སྐྱེས་པ་དེ་ལས་ཀྱིས་འཕྲད་པ་ཡིན། ངའི་མགོ་འདི་ལྟར་སོང་བ་ཞིག་ཁྱོད་ཀྱིས་འཇོག་ཕོད་ན་ཉེ་གནས་ཀ་མ་བྱེད་གསུངས་པས་མཆི་མ་ཕྲུལ་བྱུང་སྟེ་འོ་ན་ཇི་སྲིད་བཞུགས་ཀྱི་བར་དགྱིད་པར་ཞུ་ཟེར། འབྲོམ་གྱིས་ཁུ་སྟོན་མི་དགྱེས་པར་འདུག་པས་བདག་དབུ་རུར་མཆི་ལགས་སམ་ཞུས་པས། ཨུ་པ་སཱ་ཀ་བཞུགས་ན་ཁོ་བོའང་བཞུགས། ཨུ་པ་སཱ་ཀ་བཞུད་ན་ཁོ་བོའང་བཞུད་གསུངས། ཇོ་བོ་ཁུ་སྟོན་གྱིས་གཏོང་ན་དབུ་རུ་ན་སྙེ་ཐང་བྱ་བ་ནགས་ཚལ་དང་ནེ་སིང་རྒྱས་པ་དགུན་ཡང་མེ་ཏོག་སྐྱེ་བ་ཞིག་བཞུགས་སར་མཆིས་ཞུས་པས། ཁུས་མི་ཚོར་བའི་ཐབས་བཟང་པོ་ཡོད་ད་ལྟ་རང་གཤེགས་གསུངས་ནས་དེ་ནུབ་གྲབས་བྱས་ནང་པར་ཐོ་རེངས་གཤེགས། ཇོ་བོས་མི་ཞིག་ལ་ཁུ་སྟོན་གྱི་རྩར་སོང་ལ་ཇོ་བོ་དབུ་རུར་གཤེགས་སོ་ཞེས་གྱིས་ཅིག་གསུངས་ནས་ས་ལ་རི་མོ་ཞིག་མཛད་ནས་དེ་བསུབས་པ་དང་མི་དེས་དགོན་པར་ཕྱིན་ཡང་རེས་མ་རྟོལ་རེས་བརྗེད་ནས་ལན་བྱ་བ་མ་བྱུང༌། ཁུ་སྟོན་སྔར་ཕྱིར་སྐྱོ་སེང་ལ་འབྱོན་པ་ལ་དེ་ཉིན་སྒོ་བསྡམས་ནས་ལན་མ་སྟེར། ཐོས་ཀྱང་རྟ་བྱེ་ནག་དེ་སྔར་སྐད་ཐོས་པ་དང་དྲུང་དུ་འོང་བ་ལ་དེ་ཉིན་ཕྲ་ཤགས་བྱས་ནས་མ་ཟིན། ཟིན་ནས་རྟ་པ་མང་པོས་བསྙེགས་སྟེ་བྱོན། འོན་གྱི་གྲུ་ལ་དགེ་བཤེས་སྟོན་པ་དཔོན་གཡོག་སྔོན་ལ་བྱོན། དེ་ནས་(ད༡༨བ)
ཇོ་བོ་བྱོན་པའི་གྲུ་མདོ་མ་གང་ཙམ་འཕགས་པ་དང་ཁུ་སྟོན་རང་སྔོན་ལ་བྱོན་ནས་བཞུགས་པར་ཞུས་བས་མ་གནང་བར་མཆོད་གནས་སུ་དབུ་ཞྭ་རྒྱང་གིས་བསྐྱུར། ཇོ་བོས་འོན་ཁྲ་སྣར་བཞུགས་སྟེ་རྒན་མོ་ཞིག་གིས་ཟླ་གཅིག་ཆོས་འཁོར་བཙུགས་པའི་སྲོལ་ཡུན་རིང་དུ་བྱུང༌། དེ་ནས་བསམ་ཡས་སུ་ཕེབས་ཕལ་ཆེན་ལ་སོགས་པ་རྒྱ་གར་ན་མེད་པའི་དཔེ་དུ་མ་བྲིས་ནས་བསྐུར། དེར་དགེ་བཤེས་སྟོན་པ་ལ་ཕྲང་ཀ་བེར་ཆུང་གི་གདན་འདྲེན་བྱུང་བས་ད་འོང་མི་ཁོམ་ཇོ་བོ་སྐུ་ན་མཐོ་ཞིང་སྐུ་གཅོང་མངའ་བས་ཞབས་ཏོག་གལ་ཆེ། ང་ཇོ་བོ་དང་ཤི་བྲལ་བྱེད། དེ་ནས་མ་ཤི་ན་ཁྱེད་ཀྱི་མཆོད་གནས་བྱའོ་དེ་བར་འདི་རྣམས་དགོངས་ཅིག་ཞེས་ཆོས་ཀྱི་ཚིགས་བཅད་བསྐུར། སྔོན་པོ་ཊ་ལར་ཕྱག་ན་རྡོ་རྗེས་བསྐུལ་ནས་མཐའ་འཁོབ་འདུལ་བའི་ཕྱིར་སྤྱན་རས་གཟིགས་ཀྱིས་དཀྲོང་སྐྱེད་དུ་བཞེངས་པའི་གསང་འདུས་འཇམ་རྡོར་གྱི་སྐུ་རིགས་གསུམ་མགོན་པོས་རབ་གནས་མཛད། བདེ་བ་ཅན་ལྕང་ལོ་ཅན་པོ་ཊ་ལ་རི་བོ་རྩེ་ལྔ་རྣམས་སུ་ལོ་ལྔ་བརྒྱ་རེ་བཞུགས་ནས་འོད་དཔག་མེད་ལ་སོགས་པའི་ཐུགས་དམ་གྱི་རྟེན་མཛད། དེ་ནས་ཨོ་ཌྱན་དུ་ཨིནྡྲ་བོ་དྷི་ལྕམ་ལཀྵི། ཀླུ་མོ་རྣལ་འབྱོར་མ་རྣམས་ཀྱིས་ལོ་ལྔ་བཅུ་རེ་མཆོད། ས་ར་ཧས་ལོ་སུམ་བཅུ། ཀླུ་སྒྲུབ་ཀྱིས་ལོ་ཉིས་བརྒྱ། ཟླ་གྲགས་ཀྱིས་ལོ་བརྒྱ། བཱིར་ཝ་པས་ལོ་སུམ་བཅུ། མི་ཏྲ་པས་ལོ་ཉི་ཤུར་ཐུགས་དམ་གྱི་རྟེན་མཛད། དེ་ནས་ལི་ཡུལ་དུ་ཆོས་རྒྱལ་དཀོན་མཆོག་འཕེལ་གྱིས་སུམ་བཅུར་མཆོད། དེ་ནས་རྒྱལ་པོ་དགེ་བའི་བློ་གྲོས་ཀྱིས་མཆོད་ནས་ལོ་ལྔ་བཅུ་ལོན་པ་ན་ཇོ་བོ་རྒྱ་གར་ནས་བོད་དུ་འབྱོན་པའི་ཚེ་ཇོ་བོ་ཡབ་སྲས་ཀྱི་སྤྲུལ་པ་འབྲོག་པ་ཕ་པད་གཉིས་ཀྱིས་ཁལ་སུམ་བཅུ་ཙམ་དེད་ནས་སྐུ་ཆས་རྣམས་བི་ཀྲ་མ་ནས་བལ་པོར་བསྐྱལ་བའི་ཚེ་སྤྲུལ་པའི་ཁྱེའུ་འབྲོག་ཕྲུག་གི་རྣམ་པ་དེས་ཇོ་བོའི་བཀའ་འཕྲིན་ཁྱེར་ནས་མཐའ་འཁོབ་འདུལ་བའི་ཕྱིར་བཞེངས་པའི་ལྷ་དེ་སྐུར་ཞིག །ར་སྒྲེང་གི་གཙུག་ལག་ཁང་ཀ་བ་བརྒྱ་དང་(ད༡༩ན)
བཞི་བཅུ་ལྷག་པར་བཞུགས་སྟེ་མེ་ཏོག་ཤང་ཤང་གི་ཚལ། སྤང་སྤོས་དང་ཤུག་བའི་ནགས། ཆུ་བོའི་མཆོད་ཡོན། བྱ་ཚོགས་ཀྱིས་གྲ་སྙན། རྒྱལ་སྲིད་རིན་པོ་ཆེ་སྣ་བདུན་རྣམས་ཀྱིས་རྟག་དུ་མཆོད་ཅིང་འཕགས་པའི་དགེ་འདུན་གྱིས་བཀུར་སྟི་བྱའོ་ཞེས་གསུངས་པས་རྒྱལ་པོས་འཕྲེང་བཞིན་དུ་ཉིན་ལམ་དུ་མར་བསྐྱེལ་སྟེ་བལ་པོར་ཁྱེ་ཆུང་དེས་ཕད་བུའི་ནང་དུ་བཅུག་ནས་རྟེན་གསུམ་ཐམས་ཅད་ཀྱི་སྟེང་དུ་བཞག་པས་གཞན་རྣམས་ཀྱིས་འབར་བས། འཕྱོར་པོ་མ་ལ་མི་དགོས་ཀྱང༌། །འབྲོག་སྟོང་ཡུལ་དུ་དགོས་དུས་ཡོད། །གཞན་ལ་མི་རེག་རྒྱང་ངེ་འཇོག །ཟེར་ནས་ན་མཁའ་རྟེན་མེད་ལ་བཞག་པས་ངོ་མཚར་ནས་ཅི་ཡོད་དྲིས་པས། མ་བསྐོར་དགུ་བསྐོར་རྒྱགས་ཕྱེ་ཡོད། །མི་ལག་བརྒྱུད་པའི་སྙིང་པོ་ཡོད། །སུ་ལའང་མ་བྲིན་ང་མཁོ་ཡོད། །འབག་འབུག་མེད་པའི་མི་ཆུང་ཡོད། །འཁྱོག་འགུལ་མེད་པའི་ལག་པ་ཡོད། །གང་ལའང་མི་འཕོག་མདའ་གཞུ་ཡོད། །མ་ཚོགས་དགུ་ཚོགས་ལག་ཆ་ཡོད། །འདི་ན་མ་ཡོད་དགུ་ཡོད་ཏོ། །ཅེས་སྨྲས་པའི་བྱིས་པའི་རྩེད་མོ་ཞིག་ཡོད་པར་འདུག་ཟེར་སྐད། དེ་ལྟར་སྤྱན་དྲངས་པའི་རྟེན་འཇམ་པའི་རྡོ་རྗེ་ཡང་བསྐུར་སྟེ་ད་ལྟའང་ར་སྒྲེང་གི་རྟེན་གྱི་གཙོ་བོར་བཞུགས་སོ། །དེ་ནས་བང་སྟོན་གྱིས་རྟ་པ་ཉིས་བརྒྱས་བསུས་སྟེ་བསམ་ཡས་ཕུའི་ལ་ལ་བྱོན། དེ་དུས་མིས་ཕུལ་བའི་རྟ་ཕྱུགས་མང་དུ་ཡོད་པས་ཐུགས་འདོད་ཆེ་བར་སྒྲོག་པ་ཡང་བྱུང༌། འདི་རྣམས་མི་འཚོང་བར་ཞུས་པས་ཁྱེད་ཕ་མ་རྒན་རྒོན་ཡང་འཚོང་ངམ་གསུངས། བསམ་ཡས་ཀྱི་ལ་ལ་རྟ་རྒན་ཞིག་གི་ལག་པ་རྫ་བར་དུ་འཚུད་ནས་མ་ཐོན་པར་ལུས་པ་མཁྱེན་སྟེ་འདོན་དུ་བཏང༌། རྔོག་ལེགས་ཤེས་ལྷ་སར་སྤྱན་དྲངས། མི་དཀར་པོ་ཅིག་སྔུན་བསུར་བྱུང་སྟེ་མ་ཧཱ་པཎྜིཏ་བྱོན་པ་ལེགས་སོ་རྒྱལ་བར་གྱུར་ཅིག་གསུངས་ཇོ་བོ་དེ་མ་ཐག་ཆིབས་ལས་བབ་སྟེ་ཕྱག་ཐལ་མོ་སྦྱར་མདོ་འདོན་གྱིན་མགྱོགས་པར་འཕྲུལ་སྣང་དུ་བཞུད། མི་དེ་ཐུགས་རྗེ་ཆེན་པོ་ཡིན་པར་འདུག་བྱིན་རླབས་ཞུ་བར་འདོད་དེ་མ་ཟིན་འདི་ལ་ཐིམ་གསུངས་ནས་རང་བྱུང་(ད༡༩བ)
ཐུགས་རྗེ་ཆེན་པོའི་དྲུང་ན་བཞུགས་སྟེ་སྤྱན་རས་གཟིགས་དངོས་སུ་འདུག་གསུངས། ཇོ་བོ་ཤཱཀྱ་གཟིགས་པས་སྤྲུལ་པའི་སྐུ་དངོས་སུ་འདུག་གསུངས་ནས་འདྲ་འབག་གི་སྐུ་ཡང་བྲིས་སྟེ་ཐུགས་དམ་གྱི་རྟེན་མཛད། ཡོད་སྨྲའི་སྡེ་པ་ལ་སྤྱི་བཤགས་ཡོད་ཏམ་ཞུས་པས་ཁྱེད་རང་གི་སློབ་དཔོན་ཞི་བའི་ལྷས་མཛད་པ་ཡོད་གསུངས་ནས་གནང་སྟེ་མི་ཤེས་པ་དང་བརྗེད་པས་བྱས་པའི་ལྟུང་བ་རྣམས་འདིས་འདག་གསུངས། ཕལ་ཆེན་པའི་སྡེ་པ་ཅིག་གཟུགས་གསུང་བ་ལ་སྟོན་པས་བཀག་པས་ང་སྡེ་པ་གཟུགས་དབང་ཡང་མེད། གསང་སྔགས་དང་དོ་ཧ་ཡང་བཤད་དབང་མེད་ན་ཁོ་བོ་འོངས་པ་ལ་དོན་མ་མཆིས་གསུངས། ལྷ་སར་ཡ་མཚན་གྱི་རྟགས་མང་པོ་ཡང་གཟིགས། རང་བཞིན་གྱི་རྣལ་འབྱོར་མ་མང་པོ་དང་ཡང་མཇལ། དགྲ་བཅོམ་པ་ཅིག་ཀྱང་འདུག །བོད་ན་དུར་ཁྲོད་ཀྱི་གནས་ཅིག་ཡོད་པར་བཤད་པ་འདི་ཡིན་པར་འདུག །ཁྱད་པར་གསང་སྔགས་སྒྲུབ་པའི་གནས་ཀྱི་མཆོག་ཡིན་གསུངས་ནས་ཐུགས་ཚིམ་པ་མེད་པར་སྐོར་བ་དང་སྒྲུབ་པ་མཛད། ཇོ་བོ་ཞབས་ས་ལ་མི་རེག་པ་རྔོག་གིས་གཟིགས་ནས་ཞུས་པས་ཁོ་བོ་ལ་རྒྱ་གར་ན་ཡང་དེ་ལྟར་གྲགས་གསུངས། སྐོར་བ་མཛད་ཅིང་གཙུག་ལག་ཁང་འདིའི་ལོ་རྒྱུས་ཅིག་འོང་ཐང་དགོངས་པ་ན་སྤྲང་མོ་སྨྱོན་མ་ཟེར་བ་ཞིག་ན་རེ་ལྐོག་ཕ་གིར་གཤེགས་འཚལ་ཟེར་སྟེ་འདིའི་ལོ་རྒྱུས་ཅིག་འཚལ་ལམ་གསུང༌། རང་བཞིན་གྱི་རྣལ་འབྱོར་མར་མཁྱེན་སྟེ་ཅིས་ཀྱང་འཚལ་ཞུས་པས། འོ་ན་ཀ་བ་བུམ་པ་ཅན་ནས་འདོམ་ཕྱེད་དང་གསུམ་གཞལ་བ་ན་ཡོད་གཞན་ལ་མ་སྨྲ་ཞིག་གསུངས། འདོན་པར་བརྩིགས་པས་གཏེར་སྲུང་གཉན་པོ་ཅིག་འདུག་སྟེ་དེ་རིང་ཙམ་ཟིན་ཞིག་འབྲིར་བཏང་གཞན་མི་སྟེར་ཟེར་ནས་རྣལ་འབྱོར་པ་དང་སྟོན་པ་སོགས་བཞིས་སྣག་སྨྱུག་ཅི་རྙེད་ཀྱིས་བྲིས་པས་ལྷག་དུམ་ཞིག་ལུས། དེ་རྣལ་འབྱོར་པ་ལ་གནང་ནས་སུ་ལ་ཡང་མ་སྟོན་ཞིག་གསུངས། ཕྱིས་བྱ་ཡུལ་བས་ཐུགས་རྗེ་ཆེན་པོའི་(ད༢༠ན)
ཆེ་བའི་ཡོན་ཏན་ཞིག་དཀོན་གཉེར་ལ་གཏད། གཞན་གདུང་ཁང་དུ་བཅུག་སྐད། དེ་ནས་ཞག་གཉིས་ན་རང་བཞིན་གྱི་རྣལ་འབྱོར་མ་ལྷ་རྣམས་ཀྱིས་བསུས་ནས་གཤེགས་གསུངས་སྟེ་རྣལ་འབྱོར་པས་ཕྱིན་པས་གྲོངས་མ་ཐག་དུ་འདུག །ལྷ་སར་དགུན་ཅིག་བཞུགས་ནས་དབྱར་རྔོག་བྱང་ཆུབ་འབྱུང་གནས་ཀྱིས་ཡེར་པར་སྤྱན་དྲངས་སྟེ་བ་རང་དུ་བཞུགས། གནས་བརྟན་དད་པ་བླ་མས་ཇོ་བོའི་གཟིམས་ཁང་དུ་དམིགས་པ་ཅིག་བརྩིགས་པར་ཞལ་གཅིག་བཞུགས་སྟེ་གཟིམས་ཁང་དུ་གྲགས། ཞང་བཙུན་འོལ་རྒོད་འབར་གྱིས་བསྙེན་བཀུར་ཆེར་བྱས་ནས་གདམས་པ་ཞུས་པས། ཚེ་ཡུན་ཐུང་ཤེས་བྱའི་རྣམ་པ་མང༌། ཚེ་ཚད་ཀྱང་མི་ཤེས་པས་ཁྱོད་ཀྱིས་སྒོམས་ཅིག་བསྒོམས་པས་མང་པོ་མང་པོ་གོ་བ་ཡིན། མཉན་པས་ཉུང་ངུ་ཉུང་ངུ་ལས་མི་གོ་ཁྱོད་སྒྲུབ་པ་སྙིང་པོར་གྱིས་ཅིག་གསུངས། དེར་དགེ་བཤེས་སྟོན་པས་གསེར་ཞོ་དགུ་ལ་སྲང་རེར་བྱས་པའི་སྲང་བརྒྱ་རྩ་བརྒྱད། རྟ་ཉི་ཤུ་རྩ་གཅིག་བླ་གོར་གྱི་གཞོང་པ་ལ་སོགས་ནོར་སྣ་བརྒྱ་རྩ་བརྒྱད་ཕུལ། བོད་དུ་ཉིན་གཅིག་གི་འབུལ་བ་ལ་ཆེ་བར་གྲགས། ཇོ་བོའི་སྐུ་ཆེ་བའི་ཡོན་ཏན་འབྲོམ་གྱིས་བསྡེབས་པ་དེ་ཡང་ཚོགས་སུ་བཀླགས་པས་འོ་ན་ང་ལ་ཡོན་ཏན་དེ་ལས་མེད་དམ་གསུངས་ནས་ཆོས་ལ་དཀའ་སྤྱད་མཛད་ཚུལ་དང་སྒྲུབ་པ་ཉམས་སུ་བླངས་ཚུལ་ཅུང་ཟད་གསུངས་སྟེ་ཁྱེད་ཀྱིས་དཀའ་བ་མ་སྤྱད་པར་ཆོས་ཟབ་མོ་རྙེད་པ་དོན་ཆེ་ཡིས་ལེགས་པར་སྤྱོད་ཅིག་གསུངས། ཡང་རྟག་དུ་ངུ་དང་ནོར་བཟང་གི་རྣམ་ཐར་ཟུར་ཙམ་གསུངས་ནས་བླ་མ་དེ་ལ་འདོད་པ་མེད་ཀྱང་རྟེན་འབྲེལ་གྱི་ཆེ་བ་ཡིན་པས་བླ་མའི་ཞབས་ཏོག་དགོས་པ་ཡིན་གསུངས། བླ་གོར་གྱི་གཞོང་སྒོར་དེ་ཇོ་བོའི་གསོལ་སྡེར་མཛད་ནས་ཕྱིས་ཤངས་མཚལ་གྱིས་ཉིད་ཀྱི་སྐུ་འདྲ་ཕྱག་བྲིས་སུ་མཛད་ནས་དད་པའི་རྟེན་དུ་བཞག་སྟེ་ད་ལྟ་ཡེར་པ་ར་བ་ན་བཞུགས། དར་ཡུལ་མངོན་ཤེས་པ་(ད༢༠བ)
བྱ་བ་འདྲེས་ཡི་དམ་དུ་བརྫུས་ནས་ལུང་བསྟན་འཆད་པ་དེས་རྔོག་ལ་གཡུ་རྔན་པར་བྱིན་སྟེ་གྲོགས་བཅོལ་ནས་མཇལ་དུ་བྱུང་བ་ལ་ཁུ་སྟོན་གྱིས་ཇོ་བོའི་སྐུ་སྐྱེ་སྔ་ཕྱི་སོགས་དྲིས་པས་མང་པོ་ཅིག་ཤར་གྱིས་བྱུང༌། དེར་ཁུས་འགྲམ་པ་གཡས་གཡོན་དུ་ཀར་གོང་དང་སྲན་ཀྱ་བཅུག་ནས་འོ་ན་ངའི་འགྲམ་པ་གཡས་གཡོན་ན་ཅི་ཡོད་དྲིས་པས་མ་ཤེས་པར་སྐྱེངས་སྟེ་སོང་བས་ཕྱིས་བར་ཆད་དེ་མ་བྱུང་ཞིང་བོད་ན་སྔར་དེ་འདྲ་མང་པོ་ཡོད་པ་ཕྱིས་འཕྲིག་ཚུད་ནས་ཉུང་ངུར་གྱུར། ལན་པའི་ལྕིལ་པོར་ཟླ་བ་གཅིག་བཞུགས། བྱིས་པ་ཅིག་ལ་བྱིན་རླབས་མཛད་ནས་གཞན་ལ་ཕན་པ་ཅིག་འོང་གསུངས་སྟེ་ཕྱིས་ལྕང་ཕྱིའི་ཉང་མི་ཆེན་པོར་སྣང༌། བྲན་ཀས་བར་ཆད་བརྩམས་པས་མ་ཚུགས་པར་རྟ་མགྲིན་ཤཱ་ན་བཞི་སྐོར་གྱི་སྒོ་ནས་བཏུལ། འཕན་ཡུལ་དུ་སྤྱན་དྲངས་པས་རྟ་རོ་དམར་པོ་ཁ་ཕྱེ་བ་འདྲ་བ་འདིར་མི་འགྲོ་གསུངས་ནས་མ་བྱོན། རྟ་ཕྱུགས་དང་གྲ་ཁལ་ཐམས་ཅད་ཡེར་པའི་རྩྭ་ཁ་ལ་རི་དྭགས་ལྟར་ཡན་དུ་བཅུག །སྙེ་ཐང་དུ་སྤྱན་འདྲེན་པའི་ཚེ་བང་སྟོན་ལ་བལ་འཁོར་བཞི་དང་ནས་སྲན་ཁལ་བརྒྱད་ལས་མེད་པ་ལ་སྲིང་མོ་བན་མོ་ཕྱུག་མོ་ཞིག་ན་རེ་ལོ་པཎ་སྤྱན་འདྲེན་པ་ལ་ཡོ་བྱད་ཅི་ཡོད་ཟེར། སྣ་ལེན་ལྡང་ཙམ་ཡོད། དེ་ནས་ཨ་ཏི་ཤ་ཡིད་བཞིན་གྱི་ནོར་བུ་ཡིན་པས་ཁོང་རང་ལས་འོང་རང་རེ་གཉིས་ཀྱང་ཇོ་བོའི་ཐབ་ལ་ཟོས་པས་ཆོག་གི་ཁྱོད་རང་ཡང་གང་ཡོད་ཕུལ་ཞིག་བྱས་པས་དེས་ཡོ་བྱད་བཏང་སྟེ་སྣ་ལེན་དཔེ་མེད་པ་གྲུབ། ཁོང་རང་གི་བལ་འཁོར་བཞི་སོགས་ཕུལ། བང་སྟོན་གྱི་མི་ཆོས་འཇངས་པ་རྣམས་ཀྱིས་ནས་བོང་རྒྱབ་འཇངས་ནས་སྙེ་ཐང་དུ་འབྲེལ་ཡང་ད་དུང་མ་རྫོགས་པར་ཕུལ། དེ་ནས་བན་མོ་ལ་ཇོ་བོའི་དད་རྫས་ཁྱོད་ཀྱིས་མི་འཇུ་ཟེར་ནས་བང་སྟོན་གྱིས་ཟར་མ་བཅུག །ཇོ་བོའི་གསོལ་ཞོ་སྐུལ་གྱི་ཕུ་ནས་སྦྲེངས་པས་དེ་ཕྱིན་ཡུལ་དེ་ལ་ཕྱུགས་ནད་དང་གཅན་གཟན་མ་བྱུང༌། དེའི་ཚེ་བོད་ཁམས་གསུམ་གླིང་དགུའི་མི་ཆེན་ཐམས་ཅད་ཚོགས་ནས་ཆོས་མང་པོ་(ད༢༢དང་༢༣ན)
ཞུས། ལྷ་བཙུན་པས་བོད་ཀྱི་རབ་བྱུང་ཐམས་ཅད་ལ་མཁན་རྒྱུད་དེད་ཤམ་ཐབས་ཁྲལ་བསྡུས་ནས་སྙེ་ཐང་ན་མོ་ཆེར་འབུལ་བ་ཆེན་པོ་བྱས་སྟེ་འབྲོམ་སྟོང་བཙན་ན་མཁའ་བྱ་བ་བོད་ན་གཟུགས་མཛེས་པ་ཅིག་གིས་ཕྱག་དུ་འབུལ་དུ་བཅུག །ཡང་དེ་ལ་བཙུན་མོ་རིན་པོ་ཆེའི་རྒྱན་གྱིས་བརྒྱན་པ་སོགས་རྒྱལ་སྲིད་སྣ་བདུན་ཡང་ཕུལ། བརྒྱད་སྟོང་པ་ཇོ་བོ་ཉིད་ཀྱིས་གང་མཁྱེན་པ་ཅིག་ཞུས་པ་ལ་ཕྱ་དར་སྟོན་པས་ཟིན་བྲིས་བྱས་པས་ཕར་ཕྱིན་ཁམས་ལུགས་སུ་གྲགས་པ་ཤིན་དུ་རྩིས་ཆེ་བ་དེ་བྱུང༌། སྣ་ཆུང་སྟོན་པ་སོགས་བཞིས་ཇོ་བོ་ལ་གྲུབ་མཐའ་ཞིག་ཞུས་པས་ཕྱི་པའི་འཇུག་པ་ལྔ་དང་ནང་པའི་གཅིག་ཞེས་པ་ལ་བསྟེན་པ་ཐོ་རེ་བ་ཞིག་གསུངས་ནས་དེ་ཐམས་ཅད་རྣམ་པར་རྟོག་པ་ཡིན་ཚེ་ཐུང་འདི་ལ་རྣམ་རྟོག་བགྲང་གིས་མི་ལང་བ་ས་སྙིང་པོ་བསྡུས་མཛོད་གསུངས། སྙིང་པོ་ཇི་ལྟར་བསྡུ་ཞུས་པས། སེམས་ཅན་ཐམས་ཅད་ལ་སྙིང་རྗེས་ཁྱབ་པར་གྱིས། དེ་མ་བཟོད་པས་བྱང་ཆུབ་ཏུ་སེམས་སྐྱེད། དེ་འགྲུབ་པའི་ཆེད་དུ་ཚོགས་གཉིས་རྫོགས་པར་མཛོད། དེའི་དགེ་བ་སེམས་ཅན་ཐམས་ཅད་ལ་ཐུན་མོང་དུ་བསྔོ་བར་མཛོད། ཕྱི་ནང་གི་ཆོས་ཐམས་ཅད་རྨི་ལམ་སྒྱུ་མ་ལྟ་བུར་གོམས་པར་གྱིས། དེ་ལྟར་གྱིས་ལ་སྙིང་པོ་བསྡུས་མཛོད་གསུངས། གཅིག་གིས་ཅི་ཡང་མ་བྱས་པར་འཚང་རྒྱ་བའི་ཐབས་ཞུས་པས། བྱུང་ན་ཁོ་བོ་ཡང་འདོད་དེ་ཚོགས་གཉིས་མ་རྫོགས་པའི་སངས་རྒྱས་ཁོ་བོས་མི་ཤེས་གསུངས། བོད་སྟོན་ཁ་ཅིག་གིས་ཆོས་ཞུ་བར་བྱས་པས་ཞང་སྣ་ཆུང་སྟོན་པ་ན་རེ་ཇོ་བོ་ལ་ཆོས་ཞུས་ཚད་ལ་བྱང་ཆུབ་ཀྱི་སེམས་སྦྱོངས་བྱ་བ་ལས་མི་འོངས་བྱས་པས་གསན་ནས་ཁྱོད་རེ་བདེན། ང་ལ་རྒྱ་གར་ན་ཡང་ཁྱོད་འདྲ་བ་མན་ངག་དགའ་ཞིང་སྒྲུབ་པ་ལ་མི་དགའ་བའི་སློབ་མ་ཞིག་ཡོད་ཁོ་ཡང་བྱང་ཆུབ་ཀྱི་སེམས་ལ་ཡིད་མ་འཆེས་ཅེས་གྲགས་པའི་ཆའི་གཏམ་རྒྱུད་གསུངས། དགེ་བཤེས་སྟོན་པས་ཇོ་བོ་ལ་ཟླ་གྲགས་ལུགས་ཀྱི་རྟོགས་པ་ཕུལ་བས་ཇོ་བོ་ཐལ་མོ་ཤར་ཕྱོགས་(ད༢༢དང་༢༣བ)
སུ་སྦྱར་སྟེ་ད་ལྟ་རྒྱ་གར་ཤར་ཕྱོགས་ན་ལྟ་བ་འདི་ཁོ་ན་འཛིན། ཁྱོད་ལྟ་བུའི་སེམས་ཅན་ཆེན་པོ་བོད་ན་ཡོད་པ་བོད་བསོད་ནམས་རེ་མི་ཆུང༌། ཁོ་བོ་འོང་མི་དགོས་པར་འདུག་པ་ལ་གསུངས་ནས་གདམས་པ་ཤས་ཅིག་གནང༌། འབྲོམ་ལ་དགུན་མེ་ཏོག་འཆར་བ་ཞིག་ཡོད་ཟེར་བ་དེ་ག་རེ་གསུངས། ན་མོ་ཆེར་སྤྱན་དྲངས་ནས་གསིང་མའི་མེ་ཏོག་བསྟན་པས་རྫུན་མ་བཏང་ཙམ་འདུག །མེ་ཏོག་ལ་དགའ་ན་མེ་ཏོག་འབྱུང་བར་བྱའོ་གསུངས་ནས་ཕྱོགས་དེར་མེ་ཏོག་ཁྱད་པར་ཅན་མང་པོ་བྱུང༌། ན་མོ་ཆེར་ཇོ་བོ་སྐྱོ་བསང་མཛད་ཅིང་དུད་འགྲོ་ཀུན་ལ་རྟའི་བུ་ཆུང་སྐུ་ཁམས་བདེའམ་རའི་བུ་ཆུང་སྐུ་ཁམས་བདེའམ་གསུངས། ཁྱད་པར་ཁྱི་གུ་རྣམས་ཕྱག་དུ་བསྣམས་ཤིང་ཁྱིའི་བུ་ཆུང་སྐུ་ཁམས་བདེའམ་ལུས་ངན་འདི་ལྟ་བུ་ལེན་པ་ཁྱེད་རང་གིས་ནོངས་ཁྱེད་རང་གིས་ནོངས་གསུངས། རེས་འཛེ་སྤྲང་ཀུན་ལ་བག་ཆགས་ངན་གསུངས་ནས་ཤངས་སྐྱོར། རེས་འཛེ་སྤྲང་གི་གསེབ་ཏུ་བཞུགས་སྟེ་ཕམ་ཕབས་གནང་ཞིང་བྱམས་སྙིང་རྗེ་སྒོམ། ཁུ་སྟོན་གྱིས་ཇོ་བོས་ཀྱང་མི་ཆེན་པོ་མི་མཁྱེན་པར་གདའ་དེ་ལྟར་མཛད་པ་མ་ལགས་ཞུས་པས། བོད་ཀྱི་མི་ཆེན་གྱིས་དགོས་པ་མེད་ངའི་བྱམས་སྙིང་རྗེ་ལ་གནོད་གསུངས། ཉིན་ཅིག་དེ་རིང་སུ་ཡང་མ་གཏོང་ཞིག་གསུངས་སྟེ་རྒྱ་གར་ནག་ཆུང་གིས་འབུལ་བ་བྱེད་དུ་བཏང་ཟེར་བའི་མི་ཁྲེས་ཆུང་ཅན་ཞིག་བྱུང་བ་དེ་བཏང་བས་ཁྲེས་པོའི་ནང་ནས་ལྕགས་ཀྱིས་སྦར་མོ་ཞིག་འུར་གྱིས་སོང་བས་ཇོ་བོའི་སྐུ་རྒྱབ་ཀྱི་རྩིག་ངོས་ལ་ཐམ་སོང་ནས་ཕྲི་ལི་ལི་འདུག་སྟེ་མུ་སྟེགས་ཀྱི་ངན་སྔགས་ཀྱིས་མ་ཚུགས་གསུངས། ཡང་རྒྱ་གར་ནས་དགེ་སློང་ཤིན་དུ་བཙུན་པ་སྦྱངས་ཡོན་དང་ལྡན་པ་གཉིས་བྱུང་ཇོ་བོས་གང་ཟག་གི་བདག་མེད་གསུངས་པ་ན་ཐལ་མོ་སྦྱར་ནས་ཉན། ཆོས་ཀྱི་བདག་མེད་གསུངས་པ་ན་ཨ་ཏི་ཤ་འཇིགས་འཇིགས་མི་གསུང་བར་ཞུ་ཟེར་ནས་རྣ་བ་འགེབས། ཤེས་རབ་སྙིང་པོ་འདོན་པ་ཐོས་ན་ཡང་རྣ་བ་འགེབས་པས་ཇོ་བོ་ཐུགས་ཆད་དེ་བྱམས་སྙིང་རྗེ་བྱང་ཆུབ་ཀྱི་(ད༢༣ན)
སེམས་ཀྱིས་འཕངས་པའི་ཚོགས་ཁྱད་པར་ཅན་ལ་འབད་པ་མ་བྱས་ན་སྲུང་སྡོམ་དག་ལ་གཅིག་པུས་གར་ཡང་མི་ཕྱིན་པར་འདུག་གསུངས། ཡང་ཙོང་ཁའི་རྒྱལ་པོ་ལ་ལོངས་སྤྱོད་ཡོད་སོགས་ཞུས་པས་བོད་ན་དགེ་སློང་བཞི་སྡེ་ལ་འཚོ་བ་དྲངས་པའི་བསོད་ནམས་ལ་སྤྱོད་པ་སུའང་མི་འདུག་གསུངས། ཡང་རྒྱ་གར་གྱི་འབུལ་སྐྱེལ་ལ་དྲིས་པས་ངོ་མཚར་གྱི་གཏམ་རྣལ་འབྱོར་པ་ཅིག་གིས་ལོ་བཅུ་གཉིས་འཆག་པས་གྲུབ་པ་ཐོབ་སྟེ་ད་ལྟ་སྐུ་ལུས་མང་པོར་སྤྲུལ་ནས་བྱམས་སྙིང་རྗེ་ལས་བརྩམས་སྟེ་ཆོས་གསུང་ཞིང་གདའ། ཡང་རྣལ་འབྱོར་མ་ཞིག་གིས་མཎྜལ་ལྔ་ཕུལ་བས་དེ་ལས་པདྨའི་སྡོང་པོ་རེ་སྐྱེས་མེ་ཏོག་ཤར་ནས་ཞག་བདུན་དུ་སོ་ལེ་སྡོད་པ་ཅིག་ཡོད་ཟེར། དགེ་བཤེས་དགོན་པ་བས་དབུ་མཛད་ཇོ་བོའི་བླ་མཆོད་རྣམས་བུར་གྱི་ཉམས་དགའ་མོར་བཞུགས་པས་བླ་མཆོད་རྣམས་ཀྱི་ཞལ་ལྟ་གསུངས་ནས་ཡང་ཡང་འབྱོན། དགོན་པ་བ་ལ་ནུབ་ཅིག་འུར་སྒྲ་ཆེན་པོའི་རྗེས་ལ་ས་འོག་ན་སྡིག་པ་ཆེན་པོ་ཅིག་བྱུང་ནས་ཇོ་བོ་ལ་གསོལ་བ་བཏབ་པས་མེད་སོང༌། སང་ཇོ་བོ་སྔ་བར་བྱོན་ནས་མདང་ཁྱོད་ང་སྦྲོན་པ་ཅི་བྱུང་གསུངས། བྱུང་ཚུལ་ཞུས་པས་མི་གཡོ་བའི་རྣལ་འབྱོར་སྲུང་བའི་སྐོར་གནང༌། བསམ་གཏན་པའི་གནས་ཡིན་གསུངས་ནས་དགོན་པ་ཀུན་ལ་ཕྱག་མཛད། འདི་ན་མི་མེད་ཞུས་ཀྱང་ཕྱིས་སྒོམ་མཁན་འོང་སྟེ་མཆི། ཁོ་བོ་སྒོམ་པ་ལ་དགའ་ཁོ་བོ་ལ་སྒོམ་ཕྲུག་མ་བྱུང༌། བོད་དུ་འོངས་པ་དོན་མེད་གསུངས། ཁྱེད་རང་ཡང་རི་ལ་སྒོམས་གསུངས། འདྲེ་འོང་ཞུས་པས་ཁྱེད་རང་ཚུལ་ཁྲིམས་ཅ་ལེ་ཅོ་ལེར་སོང་བ་མིན་ནམ། ངེད་རྒྱ་གར་ན་འདྲེའི་གསེབ་ཏུ་སྒོམ་པ་ཡིན། ངའི་སློབ་མ་ཞིག་ལ་འདྲེའི་བར་ཆད་བྱུང་བ་སྟོང་ཉིད་དུ་བསྒོམས་པས་ཞི་འདུག་གསུངས། རེས་གཅིག་པུར་བསྡད་པ་འདྲེས་ཁྱེར་བ་མང་ཞེས་ཀྱང་གསུངས། རྔོག་གིས་དབང་སྐུར་མ་བྱས་པར་སྒྲུབ་ཐབས་ཆང་ཆུང་མཉན་དུ་རུང་ངམ་ཞུས་པས་བྱང་ཆུབ་ཀྱི་སེམས་བརྟན་(ད༢༣བ)
པོ་ཡོད་ན་དེ་ཙམ་རུང༌། བོད་ཀྱི་དབང་སྐུར་གྱིས་དབང་སྐུར་གྱི་གོ་མི་ཆོད་པར་སྣང༌། བོད་དད་པ་ཆེ་བས་སྣོད་རུང་གི་སློབ་མ་ཡོད་སྲིད་དབང་བསྐུར་ནུས་ཀྱིས་སློབ་དཔོན་མི་འདུག་གསུངས། རྔོག་ཕྱིས་ཀྱང་གསུང་འདི་ལ་ཡིད་འཆེས་སོ་གསུངས་སྐད། ཡང་ཆོས་ཞུས་པ་ན་དད་པ་དད་པ་དད་པ་ཁོ་ན་གལ་ཆེ་གསུངས། བཅུད་ལེན་ཞུས་པས་ཁོ་བོ་ནི་བྱང་ཆུབ་ཀྱི་སེམས་བཅུད་དུ་ལེན་གསུངས། ཆོས་གོས་གྱོན་པ་གདིང་བ་འདིངས་པ་ནམ་གུང་ལ་ཉལ་བ་རྣམས་ལ་སངས་རྒྱས་ཀྱི་རྗེས་སུ་བསླབ་སྙམ་པའི་དུས་དྲན་རེ་མེད་ན་ཉེས་པ་འབྱུང་སྟེ་བོད་ཀྱི་རབ་བྱུང་ལ་ཅི་ཆ་གསུངས། སེམས་སྐྱེད་ཞུ་བ་ཚན་གཅིག་ལ་སྟོན་པ་འདི་ཀུན་ལ་ཆོས་ཞུ་བའི་རྒྱགས་འདུག་སྟེ་མཆོད་པའི་ཡོ་བྱད་མི་འདུག་གསུངས། ཁམས་པ་ཚན་གཅིག་ལ་དགེ་བཤེས་སྟོན་པས་ལོ་ཙཱ་བསྒྱུར་སྟེ་རྒྱུ་བྱིན་རླབས་ནས་བཟུང་རབ་གནས་ཀྱི་གདམས་པ་གནང༌། སློབ་མ་སོ་སོས་ཞུས་སྟེ་ཁྲོ་བོ་མི་གཡོ་བ་སོགས་དང་གསེར་གླིང་པའི་ཨ་ར་པ་ཙ་ན་སོགས་དང་ཇོ་བོ་ཉིད་ཀྱི་སྤྱན་རས་གཟིགས་ཞལ་གསུམ་ཕྱག་དྲུག་པ་སོགས་དང་སྤྱན་རས་གཟིགས་དབང་ཕྱུག་གིས་ཞུས་པའི་མདོ་སོགས་དང་འཇིག་རྟེན་དབང་ཕྱུག་ཁཱརྶ་པ་ཎཱི་སྒྲུབ་ཐབས་ཀླུ་སྒྲུབ་ཀྱིས་མཛད་པ་སོགས་དང༌། ཨཱརྻ་དེ་ཝའི་སྤྱན་རས་གཟིགས་སྒྱུ་འཕྲུལ་དྲ་བའི་སྒྲུབ་ཐབས་སོགས་ཆེས་མང་པོ་འབྲོམ་དང་ལོ་ཙཱ་བས་བསྒྱུར། ལོ་ཙཱ་བ་མཆིམས་ཕུར་དགེ་སྦྱོར་ལ་བྱོན་པ་རོང་པ་འགར་དགེ་སོགས་སྟོན་ཆེན་མང་དུ་བྱོན་པས་དགེ་བཤེས་སྟོན་པས་བོས་སྟེ་མ་རྒྱུད་ཀྱི་གདམས་པ་མང་དུ་བསྒྱུར་རོ། །དབུ་གཡོར་གཙང་གསུམ་གྱིས་ཞུས་སྟེ་བྱང་ས་དང་བྱམས་ཆོས་ལ་སོགས་པ་བསྒྱུར་ཞིང་བསླབ་སྤྱོད་སོགས་སྤྱི་ལྟར་གསུངས། ལོ་ཙ་བས་ཇོ་བོའི་ཆོས་རྣམས་ཁུངས་ཕྱུང་ཞིང་དགེ་བཤེས་སྟོན་པས་གསན། བོད་ཀྱི་བསྟན་བཅོས་མང་པོ་གཟིགས་སུ་ཕུལ་བས་ཨ་རོའི་ཐེག་ཆེན་རྣལ་འབྱོར་མ་གཏོགས་གཞན་ལ་མ་མཉེས། དེ་ཕན་ཆད་བོད་ཡུལ་གྱི་ས་ལ་ལོ་བདུན་དང་(ད༢༤ན)
ཟླ་བ་ལྔ་བཞུགས་ནས། ཆོས་ཀྱི་དབྱིངས་ཀྱི་གླུ་དང་འཁོར་བ་ལས་ངེས་འབྱུང་གི་གླུ་དང་བདེ་བ་དྲུག་གི་གླུ་དང་བྱང་ཆུབ་སེམས་ཀྱི་གླུ་སོགས་མགུར་དུ་བཞེས་པ་མ་གཏོགས་ཆོས་ཙམ་མི་གསུངས། མཚན་མོ་ཕལ་ཆེར་མཁའ་འགྲོ་མའི་ཚོགས་སུ་གསང་སྔགས་ཟབ་མོའི་དོན་ལྟ་བ་རྡོ་རྗེའི་གླུ་དང་སྤྱོད་པ་རྡོ་རྗེའི་གླུ་དང་སྒོམ་པ་རྡོ་རྗེའི་གླུ་དང་རྡོ་རྗེ་ཆོས་ཀྱི་གླུ་སོགས་མགུར་དུ་བཞེས་པ་བླ་མས་གནང་ནས་ལོ་ཙཱ་བས་བསྒྱུར། ལོ་ཙཱ་བས་མཆིམས་ཕུར་ཟོ་གསོད་ཞུས་པས་གནང་ནས་ཟླ་བ་དྲུག་བཞུགས། ཇོ་བོ་བསྙུང་བ་རེ་བྱུང་ཐུགས་དམ་གྱི་ལྷ་རེ་ཞལ་གཟིགས་ཤིང་དྭངས། དེ་ལྟ་བུ་ལན་མང་དུ་བྱུང༌། སྤྱིར་སྙེ་ཐང་དུ་ཞལ་གཟིགས་མང༌། ཁྱད་པར་ཟླ་བ་ཉའི་ནུབ་གཅིག་ལ་དུས་གསུམ་གྱི་སངས་རྒྱས་དང་སེམས་དཔའ་གཟིགས། དེ་ནས་ནུབ་རེ་བཞིན་གཟིགས། ཉིན་གཅིག་རླུང་ཆེན་པོ་ཅིག་ལ་ཇོ་བོ་མཎྜལ་མཛད་ཅིང་ཕྱག་སེར་ག་ཤིག་གེ་ཡོད་པ་ལ་ཇོ་མོ་སྒྲོལ་མ་བྱོན་ནས་ད་དེ་ཙམ་གྱི་དཀའ་བ་བགྱི་ག་ན་འཚལ་གསུངས། ཡང་མནལ་ལམ་དུ་བུད་མེད་ཀྱི་རྒྱན་གྱི་སིལ་ཁྲོལ་གསན་པས་ལྟ་མི་རུང་དགོངས་ནས་མ་གཟིགས་ཙ་ན་ཁྱོད་མ་ལ་ཡང་མི་གཟིགས་སམ་གསུངས་འཕྲལ་སད་ཙ་ན་སྒྲོལ་མ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་ཅིག་མངོན་སུམ་དུ་གཟིགས་སྐད། ང་རྨི་ལམ་དུ་སྒྲོལ་མ་ལ་ཡང་མའི་འདུ་ཤེས་སྒོམ་པ་ཡིན་སྟེ་ཇོ་མོ་རང་འདི་ན་བཞུགས་པ་དཔང་པོ་ཡིན་གསུངས་སྟེ་སྒྲོལ་མའི་ཐང་སྐུ་ལ་ཕྱག་མཛུབ་བཙུགས་པ་དེ་ད་ལྟ་ར་སྒྲེང་ན་ཡོད་སྐད། ཡང་གཟིམས་ཆུང་དུ་གདུགས་ཚོད་ཀྱི་བཤོས་འདྲེན་དུ་བྱོན་པས་སྤྱན་ན་མཁའ་ལ་གཟིགས་ནས་མཻ་ཏྲྀ་མཻ་ཏྲྀ་གསུང་བས་ལོག །ཡང་དེ་བཞིན་དུ་འདུག་སྟེ་དགེ་བཤེས་སྟོན་པས་ཨ་མེ་ལ་ཇོ་བོའི་འཚོ་བ་དེ་གྲངས་སུ་མ་གཞུག་པར་སྲོས་ཅིག་ཇོ་བོས་བྱམས་པ་ཞལ་གཟིགས་ཆོད་དུ་འདུག །འོ་སྐོལ་གཉིས་ཀྱིས་མཐོང་དུས་ནི་མེད་གསུངས་གུང་ཡོལ་ཁར་ངའི་ཆོས་སྟོན་ཁྱེར་ལ་(ད༢༤བ)
ཤོག་གསུངས་སྟེ་ཇི་ལྟར་ལགས་ཞུས་པས། མཻ་ཏྲྀ་བྷྲི་ཁོ་ལི་གསུང༌། དྲོ་ཐོན་ནས་ད་ནང་ནས་རྗེ་བཙུན་བྱམས་པ་དང་འཇམ་དཔལ་གཉིས་མདུན་གྱི་ན་མཁའ་འདིར་བྱོན་ཐེག་པ་ཆེན་པོའི་ཆོས་ལ་བགྲོ་བ་མཛད། ཕྱག་རྡོར་གྱིས་བར་ཆད་སྲུང༌། ལྷའི་བུ་རྣམས་ཀྱིས་ཟིན་བྲིས་བྱས། ད་དེ་འབྲི་དགོས་གསུང་ནས་ཕྱག་བྲིས་མཛད། ངས་འདི་འདྲ་ཞིག་མཐོང་བས་འདི་དང་བྱང་ཆུབ་ཆེན་པོ་པུ་རི་མ་དང་ཡི་གེ་དྲུག་པ་བྲག་རི་མ་གསུམ་བྲིས་ལ་ཚུར་སྐུར་ཞེས་བྲྀ་ཀ་མ་ལར་བསྐུར་བས་རྒྱ་གར་ཤར་ཕྱོགས་ནས་པཎྜི་ཏ་མཁས་པ་བོས་ནས་བྲིས་སྟེ་བསྐུར་བྱུང་བ་སྙེ་ཐང་ན་ཡོད་སྐད། ཡང་སངས་རྒྱས་ཐམས་ཅད་གདུལ་བྱ་ལ་གང་འདུལ་དུ་བསྟན་པ་ལས་རང་མདོག་གསེར་མདོག་འདུག་གསུངས་ནས་རིགས་ལྔ་སེར་འཇམ་དུ་མཛད། དེ་དུས་ཁམས་སྟོན་རྒྭ་ཆེན་རྒྭ་ཆུང་གཉིས་བ་རི་བ་སོགས་རྒྱ་གར་དུ་ལམ་རྒྱུས་དང་འཕྲལ་སྐད་དང་བྱིན་རླབས་ཞུར་བྱུང་བས་བྱིན་རླབས་མཛད། ཁྱེད་རང་ལ་བར་ཆད་མེད་གཞན་ལ་ཕན་ཐོགས་པར་འོང་བ་འདུག་གིས་བླ་མ་རྡོ་རྗེ་གདན་པའི་སྤྱན་སྔར་སོང་ཞིག་གསུངས། དེའི་དུས་ཆོས་ཐམས་ཅད་ཀྱང་ཞལ་ཆེམས་སུ་གསུངས་ཞིང་དྷརྨ་ཨ་ལོ་ཀ་ཡམ་ཆོས་བྱ་བའི་དུས་ཡིན་གསུངས། གསང་སྔགས་ཀྱི་ལམ་འདི་སྦྲུལ་སྨྱུག་དོང་དུ་བཅུག་པའམ་གླང་པོ་ཆེའི་སྣ་ལ་རལ་གྲི་བཏགས་པ་དང་འདྲ་སྟེ་ཁེ་ཉེན་ཆེ་བ་ཡིན་གསུངས། བོད་ཀྱིས་རྒྱུད་སྡེ་བཞི་ག་ལོངས་སྤྱད་མི་ནུས་བོད་ལ་རྣལ་འབྱོར་རྒྱུད་འཚམས་གསུངས། གཟིམས་ཁང་གི་སྒོ་བསྡམས་ཚེ་ཕྱིར་གདུགས་ལ་བཞུགས་གདའ་བས་དགེ་བཤེས་སྟོན་པས་ཨ་ཏི་ཤ་རྩིག་པ་ལ་ཐོགས་པ་མེད་མཆི་སྐད་ན་མེད་དམ་ཞེས་ཞུས་པས་རྒྱ་གར་ན་དེ་སྐད་དུ་གྲགས་གསུང་ཞིང་སྐུ་གཤེགས་ཀར་ཁྲུ་གང་ཙམ་གྱི་ན་མཁའ་ལ་བཞུད་པ་ཀུན་གྱིས་མཐོང༌། རྒྱ་གར་ནས་སློབ་མས་གསོལ་བ་བཏབ་པའི་དྲིལ་བུའི་སྒྲ་དང་ལྷས་མཆོད་པའི་རོལ་མོའི་སྒྲ་རྣམས་གསན་གསུངས། (ད༢༥ན)
ངའི་བླ་མ་རྣམས་དགའ་ལྡན་ན་བཞུགས། ང་ཡང་དགའ་ལྡན་དུ་འགྲོ་གསུངས། དེ་ལྟ་བུ་མང་དུ་གསུང་བས་དགེ་བཤེས་སྟོན་པས་འདི་ན་ངོ་མཚར་གྱི་གཏམ་མང་ཞེས་ལོ་ཙཱ་བ་སྤྱན་དྲངས། སྔོན་ན་རོ་པའི་སློབ་མ་པཎྜི་ཏ་ཛྙཱ་ན་ཀཱ་ར་ལ་འཕགས་སྐོར་གྱི་མན་ངག་ཞིག་ཞུར་ཡོད་པ་དེ་ཡིད་ལ་བཅགས་སོ་གསུང་བས་ལོ་ཙཱ་བས་བལ་པོར་མི་མཐོ་བཙུགས་ནས་བཞག་པས་པཎྜི་ཏ་དེ་བྱོན། རྒྱ་གར་ལ་འབྱོན་པ་འདུག་པས་མྱུར་དུ་བྱོན་ཟེར་བ་བྱུང༌། ལོ་ཙཱ་བས་དེ་སྙན་བསྐུལ་བས་དེ་ལྟར་ཡིན་ཡང་ཁོ་བོ་ནི་རྒས་པས་ཉན་པའི་མཐུ་མེད། ཁྱོད་འབོད་པ་ཅིག་འོང་གིས་དེའི་དུས་སོང་ལ་ཆོས་དེ་ཉོན། དེའི་བར་འུ་ཅག་འགྲོག་ང་ཡང་ད་སྟེ་ཟླ་བ་བཅུ་ཙམ་ན་དགའ་ལྡན་དུ་བྱམས་པའི་དྲུང་དུ་འགྲོ་སེམས་ཅན་ཀུན་རྟག་དུ་གཅིག་པོར་འགྲོ་བ་ཡིན་པས་འུ་ཅག་ཡང་རྟག་དུ་མི་འགྲོགས་སོང་གསུངས། ལོ་ཙཱ་བས་བདག་གིས་ཇོ་བོ་འབོར་མི་ནུས་པར་གདའ་བས་མི་འཆི་བར་ཞུ་ཞུས་པས། ཐེག་པ་ཆེན་པོའི་ཆོས་ལ་བར་ཆད་མང་བས་ཁྱོད་ཅིས་ཀྱང་འགྲོ་དགོས། དེའི་བར་དུ་མཆོད་པ་དང་གསོལ་བ་ཐོབ་གསུངས། ཟླ་བ་གཅིག་ན་སློབ་དཔོན་རྒྱལ་རིན་གྱིས་ཕོ་ཉ་གཉིས་ལ་མྱུར་དུ་བྱོན་ཟེར་བ་བྱུང་ནས། ཇོ་བོས་ང་ཡང་དགའ་ལྡན་དུ་ལྷའི་བུ་ན་མཁའ་དྲི་མེད་བྱ་བར་འགྱུར། ཁྱོད་ཀྱིས་ངའི་ལུས་ཚད་དུ་གཟུགས་བརྙན་ལེགས་པར་བྲིས། ང་དགའ་ལྡན་ནས་ཁུག་ལ་རབ་གནམ་གྱིས། གསོལ་བ་ཐོབ་ང་དགའ་ལྡན་ནས་འོང་བ་ཡིན་ནོ། །ད་དུང་ཟླ་གཅིག་སྡོད་ལ་གསོལ་བ་ཐོབ་གསུངས་སྟེ་ཟླ་བ་ཕྱེད་དང་གཉིས་སུ་མཆོད་ཅིང་གསོལ་བ་བཏབ། དེའི་དུས་བོད་སྟོན་ཐམས་ཅད་འདུས་ནས་ཇོ་བོའི་རྣམ་སྲོལ་སུས་འཛིན་ཟེར་བས་ལོ་ཙཱ་བའི་གསུང་ནས། ཆོས་ཐམས་ཅད་ནས་ཡོན་ཏན་བླ་མ་ལས་སྐྱེ་བར་བཤད་འདུག་བླ་མའི་ཞབས་ཏོག་འབྲོམ་གྱི་(ད༢༥བ)
འདྲ་བ་སུས་ཀྱང་མ་གྲུབ། ཇོ་བོའི་སྲོལ་འབྲོམ་སྟོན་པས་འཛིན་ཐང་གསུངས་པས་ཐམས་ཅད་མ་དགའ། འབྲོམ་སྟོན་འདྲ་བས་ཟེར་སྟེ་ཕྱིས་དེ་ཁོ་ན་ཡིན་པར་སྣང༌། དེ་ནས་ཇོ་བོས་ལོ་ཙཱ་བ་ད་སོང་གསུངས་སྟེ་ལོ་ཙཱ་བས་བླ་མ་དགའ་ལྡན་གྱི་གནས་ནས་བདག་ལ་གཟིགས་སུ་གསོལ་བྱིན་གིས་བརླབ་ཏུ་གསོལ་སྤྱན་རས་ཀྱིས་བཙར་གསོལ་བླ་མ་ཉིད་སྐུའི་གཟུགས་བརྙན་ཏུ་འབྱོན་པར་ཞུ་འཚལ་ཞེས་གསོལ་བ་བཏབ། ཇོ་བོས་ཀྱང་དེ་ལྟར་བྱའོ་ཞེས་ཞལ་གྱིས་བཞེས། འབྲོམ་གྱིས་ཀྱང་མི་ཆོས་གནད་ཀྱི་ཕྲེང་བ་སོགས་ཞལ་གདམས་སུ་མཛད་དེ་ལོ་ཙཱ་བ་བྱོན། རྣལ་འབྱོར་པ་ཆེན་པོས་བདག་བསོད་ནམས་ཆུང་བས་བླ་མའི་ཞབས་ཏོག་ལས་སྒོམ་རྒྱུ་མ་བྱུང་སྙམ་པ་ན་ཇོ་བོའི་ཞལ་ནས་སྒོ་གསུམ་བླ་མའི་ཞབས་ཏོག་ལ་བཀོལ་ན་སྒོམ་གྱི་དམིགས་པ་གཞན་ནས་བཙལ་མི་དགོས་གསུངས་སྟེ་ཕྱིས་དགེ་བཤེས་དགོན་པ་བའི་གསུང་ནས་སློབ་དཔོན་སྟོན་པས་ལོ་ཙཱ་བ་བྱས། སློབ་དཔོན་རྣལ་འབྱོར་པས་གཡོག་བྱས། ངས་བསྒོམས་པ་ཡིན་སྟེ་རྟོགས་པ་དེ་ཁོང་གཉིས་མཐོ་བར་འདུག་གསུང་སྐད། ཨ་ཙ་ར་ཞིག་གི་དྲུང་ན་གསེར་ཅུང་ཟད་ཡོད་པ་འདི་སྐྱེལ་དུ་རྣལ་འབྱོར་པ་གཏོང་དགོས། ནད་མེད་པ་ནི་བདེ་བའི་མཆོག །དགའ་བ་བྱིན་པ་སྦྱིན་པའི་མཆོག །མྱ་ངན་འདས་པ་བདེ་བའི་མཆོག །བློ་གཏད་ཐུབ་པ་གྲོགས་ཀྱི་མཆོག །གསུངས། འབྲོམ་གྱིས་ཁོང་མི་གཏོང་བར་ཞུས་ཀྱང་ཁོ་བསམ་པ་བཟང་བས་དོན་འགྲུབ་འོང་གསུངས་ནས་གསེར་སྲང་སུམ་བཅུའི་ཀོ་ཐུམ་དང་གཞན་ཤས་ཅིག་ལ་བྱིན་རླབས་ཅིག་བྱས་བས་མ་རེག་ཞིག་གསུང་བ་ལ་གཅིག་གིས་རེག་པས་བར་ཆད་ཅིག་འོང་བར་འདུག་སྟེ་མི་ཚུགས་པར་འདུག་གི་གསུངས། རྣལ་འབྱོར་པས་ཇོ་བོ་དང་ད་མི་མཇལ་སྙམ་ནས་མཚན་རངས་བཤུམས་པས་སྤྱན་ཀུན་ཐོ་བ་ཙམ་དུ་སོང་སྐད། བར་ཆད་ལན་གསུམ་དུ་བྱུང་ཡང་སྐྱོན་མེད་དུ་བི་ཀྲ་མ་ལར་འཁྱོལ། ཇོ་བོ་སྐུ་(ད༢༦ན)
འདའ་ཀར་མི་རེ་ལ་ཞལ་ཆེམས་རེ་གསུངས། རྣལ་འབྱོར་པ་དང་དགོན་པ་བས་ད་མན་ཇི་ལྟར་བགྱི་ཞུས་པས། འཇིག་རྟེན་བློས་ཐོང༌། ཚེ་མཇུག་འདི་སྟོན་པ་ཆེན་པོ་དང་མ་བྲལ་བ་གྱིས་གསུངས། ཅི་ལགས་ཞུས་པས་ངས་བྱིན་གྱིས་བརླབས་པ་ཡིན་གསུངས། ཕྱག་ཁྲི་མཆོག་གིས་ཇོ་བོ་འདས་ནས་བདག་གིས་བཤད་དམ་ཞུས་པས་བྱ་བ་ངན་པ་འཕྲོ་ཆོད་གསུངས། སྒོམ་མམ་ཞེས་དང༌། སྒོམ་ཡང་སྒོམ་བཤད་ཀྱང་བཤད་དམ་ཞུས་ཀྱང་དེ་སྐད་གསུངས། འོ་ན་ཇི་ལྟར་བགྱི་ཞུས་པས། དབེན་པ་གྱིས་གསུངས། སེམས་བཟང་པོ་མེད་ན་ཐོས་བསམ་སྒོམ་གསུམ་ཅི་བྱས་ཀྱང་དོན་མེད་པས་སེམས་བཟང་པོ་གྱིས་གསུངས། དགེ་བཤེས་སྟོན་པ་ལ་ཤིང་རྟའི་སྲོལ་གསུམ་གྱི་སྐྱེས་བུ་ཆེན་པོའི་ཆོས་ལུགས་དུས་གསུམ་གྱི་སངས་རྒྱས་བྱང་སེམས་ཀུན་གྱི་ཤིང་རྟ་ཆེན་པོའི་ལམ་འདི་ཁྱོད་ལ་གཏད་ཀྱིས་ཟུང་ཞིག་ཞེས་དང༌། ད་ནི་གུང་ཐང་པ་ཡང་ཡར་ལ་སོང༌། །ཨ་མེས་དམ་པ་རྒྱ་གར་ཡུལ་དུ་ཆས། །ཁུ་རྔོག་ལ་སོགས་ཆེ་བ་རང་སར་སྐྱོང༌། །ཁྱོད་ཀྱི་དྲུང་ན་ཁོ་བོ་དགོང་ཉི་ཙམ། །ཡིན་མིན་ཀུན་གྱི་མགོ་ལྟག་འབྱེད་པའི་དུས། །སྙིང་པོ་ཐམས་ཅད་གཅིག་དུ་དྲིལ་བའི་དུས། །ཐོས་བསམ་སྒོམ་གསུམ་གཅིག་དུ་སྤྲུག་པའི་དུས། །འབྲོམ་རྗེ་ཐུབ་པའི་བསྟན་པ་ལྔ་སྟོང་གནས། །འོན་ཀྱང་བོད་དུ་ཆོས་སྤྱོད་ཇི་ལྟར་དར། །བདག་གིས་བསྟན་པ་དཀྲོང་སྐྱེད་བྱས་པ་ཡིན། །ད་ནི་ལེགས་པར་གཞི་བཞེངས་ཚར་བ་ཡིས། །ཆོས་འདི་ལེགས་པར་སྐྱོངས་ཤིག་རྒྱལ་བ་འབྲོམ། །མཐའ་རྒྱ་བྱང་ནས་སྐྱེད་ཅིག་སྙིང་སྟོབས་ཅན། །ཕོ་རུས་རྣམ་ཐར་ཟུང་ཞིག་ཁྲེལ་གཞུང་ཅན། །ཕ་གཅིག་བུ་གཅིག་ཡིན་ན་སྙིང་ལ་སོགས། །གུང་ཐང་པ་ནི་བླ་མ་གཉིས་པ་འཚོལ། །འབྲོམ་རྗེ་ཁྱོད་ཉིད་ཁོ་བོ་གཅིག་བུ་སེམས། །སྦྲུལ་གི་ལྤགས་པ་བརྗེས་ཀྱང་(ད༢༦བ)
སྦྲུལ་མི་རྗེ། །ཁོ་བོ་འཆི་ཚུལ་བསྟན་ཡང་ཨ་ཏི་ཤ། །བདག་གི་བསྟན་པ་འདི་ལ་ཁྱོད་ལ་གཏད། །ལོ་སྐོར་གཅིག་གི་ནང་དུ་བྱང་ཕྱོགས་སུ། །ཆོས་ཀྱི་ཆར་པ་ཕོབ་ལ་གཞན་དོན་མཛོད། །དེ་ནས་ཁྱོད་ཀྱི་ཡོན་ཏན་མ་ལུས་པ། །གང་ཟག་གཅིག་གིས་བླང་བར་མི་ནུས་ཀྱི། །ལས་ཚན་བརྒྱད་བཅུར་བགོས་ལ་མཐའ་རྒྱ་སྐྱེད། །གཙོ་བོ་སྤྲུལ་པའི་སྐུ་མཆེད་གསུམ་པོ་ལ། །གཞུང་དང་མན་ངག་ཐུན་མོང་གསུམ་བྱིན་ལ། །ལྷག་ཆད་མེད་པར་རང་གི་གདན་ས་གཏོད། །གནས་ཀྱི་གདན་སར་ཨ་མེས་ཆེན་པོ་སྐོས། །དེ་ནས་ཞེན་ཞིང་ཆགས་པར་མ་བྱེད་པར། །དགའ་ལྡན་གནས་སུ་བདག་གི་དྲུང་དུ་ཤོག །ཞེས་འབྲོམ་ལ་བསྟན་པ་བཏད། ཇོ་བོའི་བཀས་བླ་མཆོད་རྣམས་མན་ཆད་ཀྱིས་བཤེས་གཉེན་པ་ལ། དབུ་མཛད་རྣལ་འབྱོར་པ་བཞིས་སྣ་དྲངས་ནས། །སྣ་ཐག་སོར་བཞི་དེ་རིང་འབྲོམ་ལ་གཏོད། །ཧྲལ་ཧྲུལ་ཐམས་ཅད་མི་ཚེ་བྱང་དུ་འབྱིད། །ཚེ་མཇུག་ཉི་མའི་འདེ་ས་བྱང་དུ་བྱ། །ཞེས་མགོ་ལུས་ཕུལ། དེ་ཡང་གླེགས་བམ་ནས་གསུངས་པ་ལྟར་ན་ཡེར་པར་ཟབ་ཆོས་རྣམས་བགྲོ་བ་རྫོགས་ནས་སྒྲོལ་མས་སྙེ་ཐང་དུ་བསྐུལ། ལམ་དུ་ལྷ་སར་ཐུབ་པའི་ཞལ་ནས་མར་མེ་མཛད་ཁྱོད་ཀྱིས་རྡོ་རྗེའི་གདན་ནས་འདིར་འོངས་སེམས་ཅན་མང་པོའི་དོན་བྱས་བསྟན་པ་ཉིན་མོར་བྱས་པས་ད་ནི་དགའ་ལྡན་ན་དོན་ཆེ་བས་སྲས་ཀྱི་ཐུ་བོ་རྒྱལ་ཚབ་ཏུ་ཞོག་ལ་དགའ་ལྡན་དུ་འབྱོན་པར་གནང་ངོ་གསུངས། སྒྲོལ་མས་ཀྱང་ད་ནི་དགའ་ལྡན་དུ་སྨོན་ལམ་བཏབ་པའང་གྲུབ་པར་ཉེའོ་གསུངས། སྙེ་ཐང་དུ་ཕེབས་སྟེ་ཁྲུམས་ཟླའི་བཅོ་ལྔ་ནས་བཟུང་དབྱུག་གུའི་བཅོ་བརྒྱད་ཀྱི་བར་ཉིན་རེ་ཞིང་འདའ་བའི་ལྟས་རེ་སྣང་སྟེ། དེ་ཡང་བཅོ་ལྔའི་ཉིན་བདུད་རིས་རྣམས་དགའ་ཞིང་སྤྲོ་བ། བཅུ་དྲུག་ལ་ལྷ་རྣམས་སྨྲེ་སྔགས་འདོན་པ། དེ་བཞིན་དུ་གར་ཡང་བག་མི་ཕེབས་པ་དང༌། ཤར་རིའི་རྩེར་དྲང་སྲོང་ལོ་སྟོང་ལོན་པ་ཅིག་སྨོན་ལམ་གྲུབ་པ་ངས་(ད༢༧ན)
ཇོ་བོ་བཞུགས་པར་གསོལ་བ་མ་ཐེབས་སོ་ཅེས་ངུ་བ་དང༌། ལྷོ་རིའི་རྩེར་བྲམ་ཟེ་ཚེ་བསྐལ་པ་བགྲངས་པ་ཅིག་ཇོ་བོ་རྒྱལ་བ་གཤེགས་སོ་ཞེས་ངུ་བ་དང༌། ནུབ་རིའི་རྩེ་ན་དྲང་སྲོང་ལོ་སྟོང་ལོན་པ་ཅིག་རྒྱལ་བ་མྱུར་དུ་འདའོ་ཞེས་ངུ་བ་དང༌། སྒྲོལ་མ་མྱ་ངན་མཛད་པ་དང༌། བྱང་རིའི་རྩེར་གནོད་སྦྱིན་རྣམས་མྱ་ངན་བྱེད་པ་དང༌། ལྷ་རྣམས་འཇའ་ཚོན་གྱི་ལམ་འཆོས་པ་དང༌། ཡི་དྭགས་རྣམས་གཏོར་མ་ཆད་པའི་སེམས་ཁྲལ་བྱེད་པ་དང༌། དགའ་ལྡན་དུ་འདིར་མགོན་པོ་འཁྲུང་ཞེས་སྤྲུལ་པའི་པདྨ་ལ་དགའ་བས་སྐོར་བ་དང༌། འུར་ཞིང་ས་གཡོས་པའི་གསེབ་ནས་པདྨ་བྱུང་བ་ལ་ཇོ་བོ་བཞུགས་སྟེ་ལྷ་བཞིས་སྤྱན་འདྲེན་པར་རྩོམ་པ་དང༌། ས་དང་རྩི་ཤིང་ཐམས་ཅད་དུས་མིན་དུ་མདངས་ཡལ་བས་མྱ་ངན་ལྟར་སྟོན་པ་དང༌། ཆུ་རྣམས་ཐོགས་ཅིང་མྱ་ངན་གྱི་སྒྲ་འབྱིན་པ་དང༌། བྱ་དང་རི་དགས་རྣམས་མྱ་ངན་བྱེད་པ་དང༌། གནམ་སྟོང་གི་ཉིན་དམ་ཚིག་གསུམ་བཀོད་ལ་གནས་བརྟན་བཅུ་དྲུག་གིས་བསྐོར་བས་སྲས་ཀྱི་དབུགས་འབྱིན་མཛད། འདི་ཡན་ཆད་ནི་དགེ་བཤེས་སྟོན་པ་ཉིད་ཀྱིས་གཟིགས་པ་སྟེ་ལྷའི་མིག་དག་པ་རྣམས་ཀྱི་ཡུལ་ལོ། །ཚུར་མཐོང་གི་དཔྱོད་ལྡན་འགའ་རེས་དགེ་བཤེས་ཐུགས་བྲེལ་བ་ལ་སོམ་ཉི་ཙམ་བྱུང༌། དབྱུག་གུའི་ཚེས་གཅིག་ལ་ཀུན་གྱིས་མཐོང་བར་ལྷ་བཞིའི་ཁ་དོག་གི་སྤྲིན་སོ་སོ་ཕྱོགས་བཞི་ནས་འཁྲིགས་སྟེ་འཇའ་འོད་ཀྱིས་གང༌། མེ་ཏོག་གི་ཆར་འབབ་རོལ་མོ་སྣ་ཚོགས་སྒྲོག་པར་ཐོས། འབྲོམ་གྱིས་རིགས་ལྔའི་ལྷ་ཚོགས་ཀྱིས་བར་སྣང་གང༌། ཇོ་བོ་རྒྱན་ཅན་དུ་བཞེངས་པ་ཤེས་ཕྱིན་གསུང་ཞིང་ཉན་པའི་སེམས་དཔའ་མང་པོས་དབུགས་འབྱིན་པར་གཟིགས། དེ་བཞིན་དུ་ས་རྡོ་རི་བྲག་ཐམས་ཅད་ཤེས་ཕྱིན་གྱིས་སྒྲར་འུར་ཞིང་གཞན་ངོར་འུར་སྒྲ་ཆེན་པོ་གྲག །སྤྲིན་གུག་དཀར་པོ་ཅིག་དབུ་ཐོག་དུ་(ད༢༧བ)
ཡལ་མ་ཐག་ཟབ་མོ་ལྟ་རྒྱུད་ཀྱི་བླ་མ་རྣམས་བྱོན་ནས་དབྱུགས་ཕྱུང༌། ལྟས་ཆེན་པོ་དང་བཅས་ནས་བླ་མ་ཐིག་ལེར་ཐིམ་པ་དང་རྒྱལ་བའི་སྐུར་བཞེངས་པ་དང་རྡོ་རྗེའི་གླུ་དྲི་ལན་དུ་མ་མཛད་ཅིང་སྒྲོལ་མས་དབུགས་ཕྱུང༌། དབྱུག་གུའི་ཚེས་བཞི་ནས་དགུའི་བར་དུ་ཐུབ་པ། སྒྲོལ་མ། བདེ་མཆོག །མཁའ་འགྲོ་བླ་མ་རྣམས་ཀྱིས་ལུང་བསྟན་བསྐུར་སྟེ་བཞུགས་པར་ཞུས། བདེ་གཤེགས་བརྒྱད་ཀྱིས་དབུགས་ཕྱུང་བཅུ་ལ་ནང་གི་ལྷ་ཚོགས་ཐམས་ཅད་ཚོགས་འཁོར་མཛད། བཅུ་གཅིག་ནས་བླ་མ་སྐུ་ཅུང་ཟད་བསྙུན་པར་བསྟན། བཅུ་གསུམ་ལ་སྐུའི་བཀོད་པས་ཕྱོགས་ཐམས་ཅད་བཀང་སྟེ་ཐིག་ལེར་སྡུ་བ་དང་བཞེངས་པར་བསྟན། བཅུ་བཞི་ལ་སངས་རྒྱས་འོད་དཔག་མེད་ལ་སོགས་པ་ཐམས་ཅད་བྱོན་མཆོད་པ་ཤོམས། ཁོ་བོ་འཆི་བར་གདའ་ལྷན་སྐྱེས་ཀྱི་ལྷ་ཡང་ངུ་ཞིང་འདུག་གསུངས་སྟེ་འབྲོམ་གྱིས་ལྷ་དང་གནོད་སྦྱིན་ལ་སོགས་པ་ཕྱོགས་ཀུན་ན་མྱ་ངན་བྱེད་པ་གཟིགས་པས་ཅུང་ཟད་བརྒྱལ། བླ་མ་དང་སྒྲོལ་མས་དབུགས་ཕྱུང་ཞིང༌། ཁྱོད་ཀྱི་དགེ་བའི་བཤེས་གཉེན་མདོ་སྡེ་ལ་གྱིས། ཨ་མེས་བྱང་ཆུབ་ཀྱིས་མགོ་བྱས་ཐ་མལ་གྱི་རྣམ་ཏོག་མི་རྒྱུ་བའི་དགེ་སློང་བཞི་སྡེ་རེ་ལ་འཚོ་བ་དྲོངས། འདུལ་བ་འཛིན་པའི་དགེ་འདུན་གྱི་སྡེ་ཅིག་ཚུགས། ང་ཟེར་བ་ཡིན་གྱིས་ལ་ཁྱོད་རང་གཉེར་ག་བྱེད་ལོ་གྱིས་དང༌། འདི་ལ་བྱེད་པ་པོ་ཅིག་འོང་གིས་གསུངས། སངས་རྒྱས་རྣམས་ཀྱིས་དབུགས་ཕྱུང༌། བླ་མ་དང་སངས་རྒྱས་ཐམས་ཅད་ཐིག་ལེར་གྱུར་པའི་ཐིག་ལེ་འབྲོམ་གྱི་ཐུགས་ཀར་ཐིམ། ཅི་ཞིག་ན་གཟུགས་སྐུར་བཞེངས་སོ། །ཉ་ལ་འབྲོམ་ལ་ཡེར་པའི་བྲག་རི་འགྱེལ་བ་དང་ཇོ་བོ་ལ་ས་གཞི་བར་སྣང་འབྲོམ་གྱི་སྲས་ཀྱིས་གང་བར་རྨིས་སྟེ་དྲིན་ལན་མཛད། མཐར་ཡབ་སྲས་དབྱེ་མེད་དུ་ཐིག་ལེར་གྱུར་པ་ལས་སླར་སོ་སོར་བཞེངས་སོ། །(ད༢༨ན)
དེ་ལྟར་ལོ་གཅིག་དང་ཁྱད་པར་ཁྲུམས་ཀྱི་བཅོ་ལྔ་ནས་དབྱུག་གུའི་བཅོ་བརྒྱད་ཀྱི་བར་ཉིན་རེ་ཞིང་འབྲོམ་གྱིས་སྤྲུལ་པ་དཔག་དུ་མེད་པས་མྱ་ངན་ལས་མི་འདའ་བར་གསོལ་བ་ལས་སྐུ་དངོས་ཀྱི་གདུལ་བྱ་མེད་པའི་ཕྱིར་བཞུགས་པར་ཞལ་གྱིས་མ་བཞེས་ཀྱང་དེ་སྲིད་དུ་གཟུགས་སྐུའི་སྣང་བརྙན་བསྟན་ལ། དགུང་ལོ་དོན་གསུམ་རྟ་ལོ་དབྱུག་གུའི་བཅོ་བརྒྱད་ལ་བབ་ཚེ་དགེ་བཤེས་པས་ཀྱང་ནོངས་པ་བཟོད་གསོལ་དང་དགེ་བ་བསྔོས་སྟེ་ཇོ་བོ་ཉིད་གཟུགས་སྐུ་སྤྲོ་བ་དང་བསྡུ་བའི་ཆོ་འཕྲུལ་མཐའ་ཡས་པས་དགའ་ལྡན་དུ་གཤེགས་ཤིང་གཞན་ངོར་གདུང་ཙམ་ཞིག་བསྟན་ནོ། །དེ་ཕྱིན་ཐུགས་ཁྲལ་གྱི་ཚུལ་མི་སྟོན་པར་བོད་སྟོན་རྣམས་ཀྱི་མྱ་ངན་སངས། དེ་ནས་དགེ་བའི་བཤེས་གཉེན་གྱི་གདུང་འཕགས་པ་མྱ་ངན་ལས་འདས་པ་ལྟར་སྦྱོང་གསུང་བས་སྙེ་ཐང་ན་མོ་ཆེར་པུར་ཞུགས་ཀྱིས་སྦྱངས། ཀ་བ་ཤཱཀྱ་དབང་ཕྱུག་བྱོན་ནས་དགེ་བཤེས་པས་ལྡེ་མིག་ཐམས་ཅད་ཁོང་ལ་ཕུལ། ཁོང་གིས་ཇོ་བོའི་གདུང་དང་རྒྱ་དཔེ་གསེར་གླིང་པའི་དངུལ་གདུགས་ཅན་སོགས་དགེ་བཤེས་པ་ལ་གནང༌། ཁུ་རྔོག་སོགས་གཞན་རྣམས་ལ་གང་འོས་རེ་གནང་སྟེ་སྐུ་བལྡད་ཆེན་པོ་མཛད། འོར་དུ་གཙུག་ལག་ཁང་བཞེངས། བཤེས་གཉེན་པས་ལོ་གཅིག་གཉེན་ཐང་དུ་བཞུགས་ནས་ཇོ་བོའི་ས་ཏྲ་བཏེག་སྟེ་དགེ་སློང་ཚུལ་ཁྲིམས་དག་པ་གཉིས་ཀྱི་གདུང་སྤྱན་དྲངས། ཁང་ནག་དུ་བ་ཅན་དུ་མ་བཞུགས་པར་གུར་དཀར་དུ་བཞུགས་སྟེ་སྟོད་ལུངས་ལ་བྱོན། གནམ་གྱི་བྱེ་མ་ལུང་དུ་གནས་གཞི་མཛད་བཞེད་པ་སྐྱི་སྟོན་ཇོ་ཡེས་ཀྱིས་བཀག །ཞང་ཕྲེང་ཁ་བེར་ཆུང་གིས་སྤྱན་དྲངས་སྟེ་ར་སྒྲེང་དུ་ལུག་ལོ་ལ་ཕེབས། ལུང་བསྟན་པའི་གནས་འདི་ཡིན་པར་མཁྱེན། གཉན་གྲོང་ནས་འདོམ་ལྔ་བརྒྱའི་སར་དགོན་པ་གོང་མ་བཏབ་སྟེ་ནུབ་ཕྱོགས་སུ་རྣལ་འབྱོར་པ་ཆེན་པོ་ཨ་མེས་བྱང་ཆུབ་ཀྱི་གཟིམས་ཁང་བྱས། དེ་ནས་དགོན་པ་བ་འཛིང་དབང་(ད༢༨བ)
ཕྱུག་རྒྱལ་མཚན་དང་རྣལ་འབྱོར་པ་ཤེས་རབ་རྡོ་རྗེ་དང་རྣལ་འབྱོར་པ་བྱམས་པའི་བློ་གྲོས་སྟེ་རྣལ་འབྱོར་པ་བཞིའི་གཟིམས་ཁང་རྣམས་ཡོན་བདག་ཞང་དྲུང་ཕ་བཞི་ཞེས་གྲགས་པ་དགྲ་བཅོམ་ལྷུན་པོ་ཤཱཀྱ་གྲགས་གླ་བ་ཁ་སེར་སྟེ་ཕྲེང་ཁ་བེར་ཆུང་གི་སྲས་བེར་རྒྱུད་བཞིར་གྲགས་པ་སོ་སོས་བྱས། དགོན་པ་འོག་དུ་ཀླུ་རྒྱལ་ནེའུ་ལུང་པའི་ཕོ་བྲང་གི་སྟེང་དུ་དགེ་བཤེས་སྟོན་པའི་གཟིམས་ཁང་བཏབ། མེ་བྱ་ལ་དབུ་རྩེ་ཀ་གཉིས་མ་བཏབ་སྟེ་ཇོ་བོའི་གདུང་ཕྱག་དཔེ་རྣམས་དྲེའུ་རིག་པ་ཅན་ལ་བཀལ་སྟེ་བཏང་བས་ནེའུ་ཅག་ཅིག་ཤང་ཤང་སྐྱེས་པ་ཅིག་དུ་ཉལ་ནས་དེར་རྨང་བཏིང༌། སྔོན་སེང་གེ་བྲག་ཕུག་དུ་མནལ་ལམ་བརྟགས་པས་གསེར་གྱི་མཆོད་རྟེན་གཟིགས་པའང་འདི་ཡིན། དགེ་བཤེས་ཀྱི་ཞལ་ནས་ཇོ་བོའི་གདན་ས་འདི་ལ་ངོ་མཚར་གྱི་རྟགས་མང་པོ་བྱུང་བས་ཁྱོད་རྣམས་སྣབས་དང་མཆིལ་མ་སོགས་མ་དོར་ཞིག་གསུངས། ས་འདུལ་ལ་བརྒྱད་སྟོང་འགྲེལ་ཆེན་གསུངས། ཆུ་མིག་གཉིས་འདུག་པ་སྒྲོམ་དུ་དྲངས། ཤར་རྒྱང་གྲགས་གཉིས་ཀྱི་ས་ནས་གསེར་གཡུ་དངུལ་མཆོང་གི་ཤུག་པ་བཞི་ཀླུས་ཕུལ་སྟེ་དངུལ་མ་གསེར་མ་གཉིས་བཅད། ཤིང་གཟོ་བ་བི་རིས་ཕྱི་ཀ་བ་བཅུ་གཉིས་ནང་ཀ་གཉིས་རྒྱ་ཕུབས་བྲེ་མགྱོགས་ཀྱིས་རྩིག་པའི་གོ་ཆོད་བའི་གཟོ་ཁྱད་ཅན་བྱས། ཁྱམས་སྟོད་ཀ་བ་བཅུ་གཉིས་ཕུབ་ནས་འདི་མན་ལ་བྱེད་པོ་ཅིག་འོང་གིས་གསུངས་ནས་བཞག་ཕྱག་ཁྲི་མཆོག་གིས་བལ་ཡུལ་ནས་དངུལ་གྱི་བྱང་བུ་བསླངས། ལམ་དུ་སྒྲོལ་མས་བསྐྱབས། རྒྱ་གར་གྱི་ལྷ་གཟོ་མཁས་པ་མ་ནུས་དངུལ་གྱི་མཆོད་རྟེན་ནང་དཀྱིལ་འཁོར་གྱི་རྣམ་པར་བྱས་པར་གདུང་རྣམས་བཞུགས། གཟུངས་རྣམས་ཀྱང་དངུལ་གྱི་བྱང་བུ་ལ་ཡི་གེ་བརྐོས་ནས་བཞུགས། འཛིན་མདོ་ཡོན་ཏན་འབར་བྱ་བ་ལ་ཁྱོད་འཇིག་རྟེན་གྱི་ཤེས་པ་ཆེ་བས་འཇིག་རྟེན་བྱེད་ལོ་ཞིག་གིས་དང་ངས་(ད༢༩ན)
འཇིག་རྟེན་སྤོང་ལོ་ཞིག་བྱེད་གསུངས་ནས་རེས་ཁྱུང་མགོ་ཅན་ལ་སྐོར་བ་མཛད་རེས་ཅི་ཡང་མི་མཛད། ཤངས་སྣབས་དང་སྤྱན་ཆབ་ལྐོག་མ་ན་མར་སླེབ་པ་མི་འཕྱེད་པར། འཇིག་རྟེན་མཁྱེན་པ་རྙེད་དང་མ་རྙེད་དང༌། །སོགས་གསུང་ཞིང་ཆོས་བརྒྱད་ལ་བཏང་སྙོམས་ཆེན་པོ་མཛད་ཅིང་བཞུགས། ཕྱག་ཁྲི་མཆོག་གིས་མང་སྐོལ་དང་སྤོང་དག་མཛད་ནས་ངའི་གཏམ་འདི་རི་གཟར་གྱི་རྦབ་འདྲ་བ་ཞིག་འོང་སྟེ་བཟོད་པ་མཛོད་ཅིག་གསུངས་ནས། དགེ་བཤེས་སྟོན་པས་མི་ཤེས་ཁོ་ན་མ་གསུངས་བར་ཇོ་བོའི་ཆོས་མ་སྦ་བར་ཤོད། ཨ་མེས་ཁྱོད་མི་ཆོས་སུ་ངན་སྟེ་ཇོ་བོའི་ཕྱགས་ཕྱི་བཞག་ནས་སྦས་རྒྱ་མཚོའི་གཡོག་བྱེད། ལྷ་ཆོས་སུ་ངན་སྟེ་ཇོ་བོའི་ཆོས་བཞག་ནས་ལྷ་ཆུང་སྟོན་པ་ལ་བདག་མེད་མའི་རྫོགས་རིམ་ཞུས། ཁྱེད་ས་ཏྲ་པ་རྣམས་ཀྱང་ཇོ་བོའི་ས་ཏྲ་བཞག་ནས་རོག་ལྷ་བཟོའི་ཟན་ཟ་བ། ཞེས་སོགས་ཐམས་ཅད་ལ་བཀའ་བབས་ཡལ་མེ་བ་རེ་མཛད་ནས་ཁོ་བོ་ཡང་སང་ནས་མཚམས་བྱེད་པར་ཞུ་གསུང་ཙ་ན་ཤུག་གསེབ་ན་ཕར་སུ་དང་ཡང་གཏམ་མི་མཛད་པར་ཅི་བདེར་བཞུགས་སྟེ་རྣམ་པར་རྟོག་པ་ལས་མཚམས་པོ་ཆེ་བཅད་པར་གདའ། ཕྱིས་སྐུ་ལུས་འདིས་མཁའ་སྤྱོད་དུ་བྱོན་སྟེ་ཤུལ་ན་མཆོད་རྟེན་ཡོད། ཁུ་རྔོག་དང་རོང་པ་འགར་དགེས་ཇོ་བོའི་དངུལ་གྱི་གདུང་ཁང་རེ་མཛད། ལོ་ཙཱ་བས་རས་ཁྲུ་བཅུ་བཞི་པ་ལ་སྐུ་ཚད་ལ་བླ་མ་རྣམས་དང་བོད་སྟོན་དང་རྣམ་ཐར་གྱིས་བསྐོར་བ། རྒྱབ་ཏུ་བསྟོད་པ་བརྒྱད་བཅུ་པ་ཡོད་པ་བྲིས། སྤྱིར་ཇོ་བོ་ལ་སློབ་མ་ལ་བྱོན་ཚུལ་ནི། རྒྱ་གར་དུ་ཌོམྦི་པས་ལུང་བསྟན་པའི་སྔགས་པ་དང༌། བྱང་ཆུབ་ཀྱི་སེམས་འབྱོངས་པའི་དགེ་ཚུལ་དང༌། ནག་ཚོས་གཟིགས་པར་ཡང་སྤྱོད་པ་དགྱིད་པར་ཞུ་བའི་དགེ་སློང་དང༌། གྲོང་འཇུག་བྱེད་པའི་བྲམ་ཟེ་གཟིགས་པ་(ད༢༩བ)
དང༌། མཆིམས་ཕུར་ཏིང་ངེ་འཛིན་འབུལ་བའི་དགེ་སློང་གཉིས་སོགས་བྱུང་བས་གྲུབ་ཐོབ་སྦས་པའི་རྣལ་འབྱོར་ནི་མཐའ་མི་མངོན་པ་ཡོད་པར་སྣང་ལ། ཚུར་མཐོང་གི་སྤྱོད་ཡུལ་དུ། པུ་ཏོ་པ། དབུ་མ་སེང་གེ །བཤེས་གཉེན་གསང་བ། ཛྙཱ་ན་མ་ཏི། ཕྱི་ནང་ཤན་འབྱེད་པ་ལ་མཁས་པ་སའི་སྙིང་པོ་སྟེ་རྒྱ་གར་གྱི་པཎ་ཆེན་དེ་རྣམས་གཙོ་བོ་ཡིན་ལ་སྤྱིར་སྡེ་པ་བཅོ་བརྒྱད་པོ་ཐམས་ཅད་ཀྱིས་ཚད་མར་བཀུར་ཞིང་ལུང་ལེན་པའི་གནས་བྱེད་ཏོ། །བོད་ཏུ་ནི་ཞལ་མཇལ་དང་གུས་པ་མ་བྱས་པ་སུ་ཡང་མེད་ཀྱང་གཙོ་བོར་ལྷ་བླ་མ་ཁུ་དབོན། ལོ་ཆེན་རིན་བཟང༌། རྒྱ་བརྩོན་སེང༌། ནག་ཚོ། སྟོན་པ་ཡང་རབ། སྒོམ་པ་ཚུལ་ཁྲིམས། བཙུན་པ་དགེ་སྐྱོང༌། དགེ་བློ། ཤཱཀྲ་བློ། གཟུས་རྡོ་རྗེ་རྒྱལ་མཚན་སོགས་མངའ་རིས་པ་དང༌། གཙང་དུ་བྲག་སྟོན་ཆེ་ཆུང༌། ལེང་འབྲོག་གཉིས། མགར་འགོས་གཉིས། ཡོལ་མཆེད་གསུམ་སོགས་དང༌། དབུས་སུ་ཁུ་རྔོག་འབྲོམ་གསུམ་སོགས་དང༌། རྣལ་འབྱོར་པ་བཞི་སོགས་ཁམས་པ་སྟེ་བགྲང་གིས་མི་ལང་བ་བྱོན་ཞིང༌། རྣལ་འབྱོར་པ་གཡུང་དྲུང་རྒྱལ་མཚན་བྱ་བ་ཉན་ཐོས་ཀྱི་སའི་ཡོན་ཏན་ཐམས་ཅད་རྫོགས་ལ་ཕལ་ཆེར་ནི་ཕྱིར་མི་ལྡོག་པ་སྟེ་རེ་རེས་ཀྱང་བསྟན་པའི་བྱ་བ་ཆེར་མཛད་ལ་བཀའ་རྒྱུད་ཀྱི་གཞུང་ཚུགས་པ་ནི་སྟོན་པ་ཆེན་པོ་ཁོ་ནའོ། །དགེ་བཤེས་སྟོན་པས་གདན་ས་ལོ་དགུ་མཛད་པའི་བར་ལ་སྐྱུ་ར་གཞོན་འོད། ལྷབ་མི་ཡེ་ཤེས་གཡུང་དྲུང༌། རུག་པའི་ཞང་ཆེན་པོ། ཀཾ་ཡུང་པ་བ། ཁམ་པ་ལུང་པ་ལ་སོགས་དང་ཁྱད་པར་སྐུ་མཆེད་གསུམ་སྨིན་པར་མཛད། སྤྱིར་ཆོས་ཀྱི་ལས་ཚན་བརྒྱད་བཅུར་བགོས་ཤིང་ཐུན་མོང་གི་སྣང་བ་ལ་ཚོགས་པ་དྲུག་བཅུ་ཙམ་བྱུང་བ་ཐམས་ཅད་ཡོན་ཏན་ཡོངས་སུ་རྫོགས་པ་ཤ་སྟག་ཡོད་སྐད། དྲུག་བཅུ་པ་ཆུ་ཡོས་བྲེ་ཕུལ་ཟླ་བ་(ད༣༠ན)
སེ་བ་མེ་ཏོག་དཀར་ལྟེམ་པའི་དུས་པུ་ཏོ་པ་ལ་ངས་ཁྱོད་ཀྱི་བསྟེན་ས་གཞན་མ་མཐོང་བས་དགེ་བའི་བཤེས་གཉེན་མདོ་སྡེ་ལ་ཆོལ་ཁ་ཡར་པུང་གདང་ཆོས་ལ་འདུག་ཞིག་གསུངས་ནས་གཤེགས། དེ་ནས་རྣལ་འབྱོར་པ་ཆེན་པོས་འོག་དུ་ཀ་བ་བཅུ་དྲུག་མའི་སར་བཞུགས་ནས་གདན་ས་ལོ་བཅུ་གསུམ་མཛད། སྟོད་ལུང་པ་ཆེན་པོ། ལོ་མཁར་བུ་བ། མང་ར་བ་སོགས་མང་པོ་སྨིན། རྟ་ལོ་བདུན་བཅུ་པ་ཤིང་ཡོས་ལ་ཐེགས། དེའི་རིང་བེར་རྒྱུད་དགྲ་བཅོམ་གྱི་སྲས་དར་མ་ཡེ་ཤེས་ཀྱིས་ཁྱམས་སྨད་ཁྱམས་ཆུང་ནག་ཚང་རྣམས་མཛད། དེ་ནས་དགོན་པ་པས་གོང་ཉིད་དུ་བཞུགས་སྟེ་གདན་ས་ལོ་བདུན་མཛད། འབྲུག་ལོ་རེ་དྲུག་པ་ཆུ་བྱ་ལ་འདས། སློབ་མ་དགོན་གྱི་བུ་བཞི་ཞེས་པ་ལས་ཞང་ཀ་མ་པ་ཤེས་རབ་འོད་ནི་སྔོན་ཇོ་བོ་ལན་པའི་ལྕིལ་པོར་ཕེབས་དུས་བུ་མོ་ཞིག་ལ་འདི་ལ་བུ་བཟང་པོ་ཅིག་ཡོང་གསུངས་པ་བཞིན་མེ་བྱ་ལ་འཁྲུངས། དགོན་པ་པས་ཆོས་དང་ཟང་ཟིང་གིས་བསྐྱངས། རྟོག་གེ་ལ་འབར་བའི་འགྱུར་བཅོས་ཀྱང་མཛད། ཀ་མའི་གཙུག་ལག་ཁང་བཏབ། དོན་ལྔ་པ་ལྕགས་ཕག་ལ་ཐེགས། སྣེའུ་ཟུར་པ་ཡེ་ཤེས་འབར་ནི་ཆུ་རྟ་ལ་འཁྲུངས། དགོན་པ་པས་རྗེས་སུ་བཟུང༌། ཡི་དམ་མཐའ་ཡས་པ་ཞལ་གཟིགས། ཕྱིས་པུ་ཏོ་བ་བསྟེན་ཕྱག་རྡོར་ལ་ནུས་པ་ཐོབ་པས་འཛེ་ནད་མང་པོ་བསལ། ལམ་ཞིག་དུ་ཕ་བོང་ལ་ཞབས་བཏད་དེ་ཕྱགས་སྒྲོག་བཅིངས་པས་སྦྲུལ་དཀར་པོ་ཅིག་ཐོན་སོང་སྟེ་དེ་ན་མཛེ་བོ་ཡོད་པའི་ནད་ཐོན། ཕྱིས་སྣེ་ཟུར་དུ་བཞུགས། གཞུང་མན་ངག་གི་སྐྱེས་ཆེན་མང་པོ་འདུས། མངའ་རིས་པ་བྱང་ཆུབ་དགེ་མཛེས་ཅེས་པ་མགོན་པོ་ཞལ་གཟིགས་ཚེ་ངའི་སྡོམ་པ་གསུམ་ལ་ཉེས་སྐྱོན་འདུག་ན་ཁྱེད་ཀྱིས་སྙིང་ཁྲག་འཐུང་ཞིག་བྱས་པས་དགེ་སློང་གི་དམ་བཅའ་འཇིགས་གསུང་བ་(ད༣༠བ)
དེ་ལ་སོགས་པ་བྱོན་ཞིང༌། རྒྱུད་འཛིན་ནི་གཙང་ན་དྲང་པོ་ལུང་པ་སྤྱི་བོ་ལྷས་པ་སོགས་སོ། །དོན་བདུན་པ་ས་ཁྱི་ལ་ཐེགས། འདིའི་ཕྱག་གཡས་པ་གཉལ་གསེར་ཕྱེད་མཆོད་རྟེན་ན་བཞུགས་པས་བྱིན་རླབས་ཆེ་བ་ཡིན་ནོ། །དེ་གཉིས་ཀྱི་ཁར་གཉན་སྣ་མོ་བ་དང༌། འབྲེ་ཀོ་དེ་ལུང་པ་བསྣན་པས་དགོན་གྱི་བུ་ཞིག་ཟེར་ལ། གཞན་ཡང་ཤ་བོ་སྒང་པ་པདྨ་བྱང་ཆུབ་དང་ཁ་རག་སྒོམ་ཆུང་ཡང་ཡིན་ནོ། །ཡང་ཕུ་ཆུང་པས་དེང་སང་ཉན་ཐོས་ཀྱི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་ཞིག་སྨིན་བདོ་གསུངས་པ་རྣལ་འབྱོར་པ་ཆེན་པོའི་སློབ་མ་མང་ར་བ་དབང་ཕྱུག་རྒྱལ་མཚན་དེའི་སློབ་མ་སྙུག་རུམ་པ་བརྩོན་འགྲུས་འབར་ཡིན་ནོ། །དེ་ནས་པུ་ཏོ་བས་གདན་ས་མཛད་པ་ཁམས་པ་འགས་བཞུགས་སུ་མ་སྟེར། དེ་ནས་བར་ཉག་བྱུང་སྟེ་ཁྱིམ་པས་བཟུང༌། པུ་ཏོ་བ་གཤེགས་ནས་ལོ་གཉིས་གསུམ་ན་མཐའ་བཞི་སྒོམ་པས་ཤ་ར་བ། ཀ་མ་བ། བྱ་ཡུལ་བ། གླང་ཐང་པ་རྣམས་དང་བགྲོས། ཉག་ཉུག་ཕུད་ནས་ས་ཏྲ་བཙུགས། དེ་ནས་དཔོན་བརྒྱད་པ་དང་ཟིར་གུ་ཆོས་གྲགས་ཀྱིས་ཀ་གཉིས་མའི་ནུབ་ཏུ་ཀ་བ་བཅུ་དྲུག་མ་བཞེངས། དེ་ནས་རྔོག་ལོ་ལ་ཕུལ་ནས་ཆོས་བར་ས་མཛད། ཀ་གཉིས་མ་བཞེངས་ནས་ལོ་གོ་གསུམ་ན་ཞང་འོད་འཇོ་པས་ར་སྒྲེང་བཟུང༌། བེར་རྒྱུད་སེ་བོ་གཞོན་ཚུལ་དང་གཉིས་ཀྱིས་ཀ་གཉིས་མ་ལ་གསེར་ཐོག་ཕུབ་ཅིང་སེ་བོ་གཞོན་ཚུལ་གྱིས་དབུ་རྩེ་ཀ་བ་ཉེར་བཞི་མ་བཞེངས་ནས་ལོ་གཉིས་ན་འོད་འཇོ་བ་གཤེགས། དེ་ནས་སྒང་ཐང་དཀར་བས་ལོ་ཉེར་དགུ། འོད་འཇོ་བས་ལོ་བཅུ་དྲུག་ཡོན་བཙུན་བརྩོན་རྡོར་གྱིས་ཀ་གཉིས་མའི་རྒྱབ་ཏུ་ཀ་བཞི་མ་བཞེངས། སྤྱིར་ཁྱམས་ཀ་བ་བརྒྱ་དང་བཞི་བཅུ། བྲང་ཁང་སྟོང༌། རྟེན་ལུགས་མ་ངོ་མཚར་ཅན་ལྔ་བཅུ། ཐང་སྐུ་བྱིན་རླབས་ཅན་སུམ་སྟོང་དྲུག་བརྒྱ་ལྷག་པ། གསུང་རྟེན་པོ་ཏི་ས་ཡ་ཕྲག་བཅུ། གདུང་རྟེན་བདུན་བརྒྱ་བདུན་བཅུ་རྩ་(ད༣༡ན)
ལྔ་ལ་སོགས་པ་བཞུགས་ཅེས་སྣང༌། བར་སྐབས་སུ་མེའི་གནོད་པ་གཅིག་གཉིས་བྱུང་མོད་ཀྱི་ད་ལྟའང་སྐུ་གསུང་ཐུགས་རྟེན་མེ་བརྡུགས་མ་དུ་མ་ཡོད་ཏོ། །རྒྱ་འདུལ་ལོ་གཅིག་གཙང་པ་ཇི་སྟན་ལོ་ལྔ། ཀོ་ཁྱིམ་པ་ལོ་གསུམ། སྣར་བས་ལོ་བཅུ་གཅིག །འདི་དུས་ཧོར་དམག་གི་གནོད་པ་བྱུང༌། གུར་སྟོན་གྱིས་གསོས། དེ་ནས་ལྷ་འགྲོ་མགོན་གྱི་སློབ་མ་རྨ་སྟོན་སོགས་བྱོན་ཞིང་དེང་དུའང་བསྟན་པའི་གཟུགས་བརྙན་ཙམ་སྣང་སྟེ་གདན་ས་ར་སྒྲེང་དངོས་ཀྱི་སྐབས་སོ། །ཁྱད་པར་བཀའ་གདམས་ཀྱི་བསྟན་པ་ཉིན་མོར་བྱེད་པ་སྐུ་མཆེད་གསུམ་ཞེས་གྲགས་པ་ནི་བཀའ་གདམས་པ་ཡོན་ཏན་གསང་བ་ཉིད་མཛད་ཀྱང་གསང་ཆོས་གླེགས་བམ་ལས་ཡང་ཡང་གསལ་ཞིང་སྤྱིར་བལ་ཡུལ་ཤིང་ཀུན་དུ་རྣལ་འབྱོར་པ་ནུས་པ་ཐོབ་པ་ཅིག་གིས་མི་མ་ཡིན་གྱི་གསེབ་ཏུ་སྐོར་བ་བྱས་པ་ན་མཁའ་འགྲོའི་གླུ་ལས་འཕགས་པ་ཝ་ཏི་མཆེད་གསུམ་དང་སྐུ་མཆེད་གསུམ་པོ་ཐ་མི་དད་པར་རིགས་གསུམ་མགོན་པོའི་ངོ་བོར་ཐོས་པ་ལས་མཆེད་ནས་རིགས་གསུམ་མགོན་པོར་ཁ་ཚོན་ཆོད་པ་ལས། སྤྱན་རས་གཟིགས་ཕུ་ཆུང་པ་ནི་ཕུ་ཆུང་དུ་འཁྲུངས། འབྲོམ་སྟེན་ནས་མན་ངག་ཡོངས་སུ་རྫོགས་ཤིང་རྔོག་ལེགས་པའི་ཤེས་རབ་ཀྱིས་ཡེར་པར་ཇོ་བོ་ཡབ་སྲས་ལ་གསན་ནས་རྫུ་འཕྲུལ་གྱིས་བཀོད་པའི་སྤྲུལ་པའི་གླེགས་བམ་མངའ་རིས་པ་ཤེས་རབ་རྒྱལ་མཚན་ལ་བརྒྱུད་དེ་གླེགས་བམ་གྱི་བཀའ་བབས། ཤ་གཟུག་རང་ཟ་ཞེས་སྒྲུབ་པ་རྩེ་གཅིག་དུ་མཛད། སྤྲུལ་པ་མང་པོས་གཞུང་མན་ངག་གཉིས་སྤེལ། ཞང་ཀ་མ་བ་རིན་ཆེན་རྒྱལ་མཚན་ཐིག་ལེར་སྨིན་གྲོལ་མཛད། གླེགས་བམ་གཏད་དེ་དོན་དྲུག་པ་མེ་ཁྱི་ལ་བཀོད་པ་བསྡུས། དེ་ནས་ཞང་སྟོན་དར་མ་རྒྱལ་མཚན། སྟབས་ཀ་བ་བྱང་ཆུབ་བཟང་པོ། སྣར་ཐང་པ་ན་མཁའ་རིན་ཆེན། (ད༣༡བ)
དེ་ཡན་གསང་ཆོས་བཀའ་རྒྱ་མར་ཡོད་ཅིང་དེ་ནས་མང་དུ་འཕེལ་སྟེ་རྩ་བ་བྱང་ཆུབ་སེམས་དཔའ་ནོར་བུའི་ཕྲེང་བ་ནི་འབྲོམ་གྱིས་ཇོ་བོའི་གསུང་བསྡུས་པ་ཡིན་ལ་འདི་དང་ཇོ་བོས་རྒྱལ་པོ་ནིརྻ་པཱ་ལ་ལ་འཕྲིན་ཡིག་མཛད་པ་ཕལ་ཆེར་གཅིག་དུ་བྱུང་བས་རྒྱལ་པོ་དེ་འབྲོམ་དང་ཐུགས་རྒྱུད་གཅིག་པའོ་ཞེས་ཁོ་བོ་འབའ་ཞིག་སེམས་ལ་ཐིག་ལེ་བཅུ་དྲུག་ལྷ་ཆོས་བདུན་རྗེས་དྲན་ལྔ་ཚད་མེད་བཞི་བརྟག་པ་གཉིས་མདོར་ན་རང་སེམས་སྲུང་བ་གཅིག་པོར་ཆོས་ཐམས་ཅད་བསྡུས་སྟེ་སྟོན་པ་བཀའ་གདམས་གླེགས་བམ་གྱི་བཀའ་བབས་ཡིན་ནོ། །རྒྱལ་བའི་བཀའ་ཉིད་གདམས་ངག་དུ་བྱེད་པ་བཀའ་གདམས་ཅེས་གཞུང་མན་ངག་གཉིས་འཆད་ལ་འབྲོམ་གྱིས་ཡི་དམ་ལྷ་བཞི་ཆོས་བྱང་ཆུབ་ཀྱི་སེམས་གཉིས་སོགས་བདམ་ཁར་བདམས་པས་བཀའ་བདམས་ཅེས་གླེགས་བམ་ལས་འཆད་ཏོ། །དེང་སང་ཆོས་སྤོང་ཤེས་པ་ཙམ་ལ་ཆོས་གོ་གཅོད་པ་དག་ཁ་ཅིག་གླེགས་བམ་ལ་སྒྲོ་སྐུར་བྱེད་པ་ནི་བདུད་ཀྱི་ལས་སོ། །དགེ་ཡེ་བ་ཚུལ་ཁྲིམས་སེང་གེ་སོགས་སྐུ་མཆེད་གསུམ་གྱི་འཁྲུངས་ལོ་གཞན་དུ་སྨྲ་ཡང༌། ཇོ་བོ་བོད་ཏུ་ཕེབས་ལོ་ལས་ལོ་བཅུས་སྔ་བའི་ལྕགས་མོ་ལུག་ལ་ཕུ་ཆུང་བ་དང་པུ་ཏོ་པ་འཁྲུངས། དེ་ནས་ལོ་བདུན་འདས་པ་ས་ཕོ་སྟག་ལ་སྤྱན་སྔ་བ་འཁྲུངས་པར་དེབ་སྔོན་པ་སོགས་འདོད་པ་འདི་དག་པར་སྣང༌། འཇམ་པའི་དབྱངས་པུ་ཏོ་བ་ཆེན་པོ་ནི་འཕན་ཡུལ་གྱི་པྲས་བྲའོ་སྒང་དུ་སྐུ་གཤེན་སྲིད་ལྷ་འབར་གྱི་སྲས་སུ་འཁྲུངས། ཡེར་པའི་རྔོག་དང་རྒྱལ་གྱི་གླན་ཚུལ་བྱང་ལ་བསྟེན་སྟེ་རབ་ཏུ་བྱུང༌། མཚན་རིན་ཆེན་གསལ་ཡིན། བྲག་རྒྱབ་ཏུ་དགེ་སློང་བཞེས། དགེ་འདུན་གྱི་གཉེར་ཡང་ཅུང་ཟད་དང་མདོ་མང་ཚར་གཅིག་གི་ཕྱག་ལེན་པ་མཛད། དགེ་འདུན་སྤྱི་ལས་ལྷག་པ་ཞོ་ཞལ་ཙམ་ཡང་མ་གསོལ། ཇོ་བོ་དང་ཞལ་མཇལ་ཆོས་ཐོབ་ཙམ་བྱུང༌། ཉེར་བརྒྱད་པ་ས་ཁྱི་ལ་འབྲོམ་དང་མཇལ། (ད༣༢ན)
གདམས་ངག་སྣ་བསྟན་ཙམ་གྱིས་ཇི་ལྟ་བ་ཐུགས་ལ་འཁྲུངས། འབྲོམ་གཤེགས་ནས་ལོ་བཅོ་བརྒྱད་སྒྲུབ་པ་མཛད་ང་གཅིག་པ་ལྕགས་བྱ་ནས་ཚོགས་བསྐྱངས་སྟེ་གཞུང་མཁན་བྲག་ལྟག་ལུང་སྒྲོ་ལབ་མཁར་ཐོག་སོགས་མ་ངེས་པར་གཞི་ཇི་བཞིན་པས་བཞུགས། ཚེ་བློས་བཏང་གི་ཚོགས་པ་ཉིས་སྟོང་བརྒྱད་བརྒྱ་རེ་འདུས། སྤྱིར་དགེ་སློང་ཁས་ཉན་ཁྱད་པར་བྱང་ཆུབ་སེམས་དཔའ་ཁས་ཉན་གསུངས་སྟེ་གནོད་ལན་མི་མཛད། ཆོས་ལམ་སྒྲོན་གྱི་རྒྱབ་ཏུ་བསླབ་བཏུས་དང་སྤྱོད་འཇུག་མདོ་སྡེ་རྒྱན་དང་བྱང་ས། སྐྱེས་རབས་དང་ཆེད་དུ་བརྗོད་པའི་ཚོམས་སྟེ་གཞུང་དྲུག་འཆད་པས་བཀའ་གདམས་གཞུང་པར་གྲགས། ཆོས་ཚིག་གཅིག་ཀྱང་ཕྱིར་མ་ལུས་པར་ཉམས་ལེན་ཁོ་ནར་གསུངས། ཕྱིས་པུ་ཏོར་དགོན་པ་བཏབ་སྟེ་བཞུགས་པས་པུ་ཏོ་བར་གྲགས། ངའི་དོན་གྱི་མཁན་པོ་དེ་ར་སྒྲེང་གི་དགེ་བསྙེན་རྒན་པོ་དེ་ཡིན་པར་འདུག་གསུངས་ནས་སྔར་དགེ་སློང་སོགས་བླངས་པ་དེ་ངེས་འབྱུང་རྣལ་མ་སྐྱེས་པ་ནས་སོ་ཐར་མཚན་ཉིད་པར་འགྱུར་པ་སྡོམ་པ་གནས་གྱུར་ཞེས་བཞེད། འཕགས་པའི་གནས་བརྟན་ཡན་ལག་འབྱུང་དུ་ཞལ་གིས་བཞེས། དོན་ལྔ་ལ་བཀོད་པ་བསྡུས། སློབ་མ་གཞན་དོན་ནུས་པ་བགྲང་གིས་མི་ལང་ཡང་གཙོ་བོར་གཙང་ན་རམ་སྣང་གཉིས། དོལ་ན་འབེ་རོག་གཉིས། གཉལ་ན་གླང་གཉོས་གཉིས། འཕན་ཡུལ་ན་ཉི་ཟླ་ཟུང་གཅིག་སྟེ་ཀ་ཆེན་བརྒྱད་ཡིན་ལ། དེབ་སྔོན་པས་གཙང་སྟོད་དུ་བྱ་ཕག་གཉིས་དང༌། ཡར་ལུངས་ཇོ་བོས་ཁམས་སུ་བྱ་ཕག་གཉིས་ཅེས་དང་དགེ་ཡེ་བས་མངའ་རིས་སུ་བྱ་འདུལ་དང་ཕག་སྒུར་བ་ཅེས་ཀ་བ་བཅུར་འཆད་ཀྱང་འདི་བདག་གིས་ནི་མ་འཚལ་ཏོ། །དེ་ལ་གཙང་དུ་རམ་སྡིང་མ་བ་ནི་སྐྱེ་བ་སྔ་མ་རྒྱ་གར་ཤར་ཕྱོགས་སུ་པཎྜི་ཏ་རྡོ་རྗེ་གཞོན་ནུར་ཡོད་པ་སྒྲོལ་མས་བོད་དུ་གཞན་དོན་ལ་བསྐུལ་སྟེ་བྱོན། ལ་སྟོད་ལ་འུབ་ཤིང་འགྲམ་དུ་ཡབ་རྡོ་རྗེ་འབུམ་དང་ཡུམ་དཔལ་མོ་(ད༣༢བ)
འཚོའི་སྲས་སུ་འཁྲུངས། རྒྱགས་ཆད་པ་ན་ནང་ནས་ཀྱིས་གང་བ་དང་ཡབ་ཡུམ་གྱི་ཕྱག་མཐིལ་ཏུ་མཆིལ་མ་ཐིགས་པ་རེ་བླུག་པ་བལྡད་བས་ཞག་བདུན་དུ་ཟས་མ་དགོས་པ་བྱུང༌། སེམས་ཅན་སྡུག་བསྔལ་པ་གཟིགས་ཚད་ལ་ངས་བུ་འདི་རྣམས་ནམ་འདྲོངས་ན་ཞེས་བཤུམ། མཁན་པོ་ལེ་འབྱུང་དང་སློབ་དཔོན་འོལ་ཕུ་བ་ལས་སྨུར་རབ་བྱུང་མཛད། མཚན་འབྱུང་གནས་རྡོ་རྗེ། བྱམས་པ་དང་སྟོན་པས་ལུང་བསྟན་སྟེ་ལོ་བཅུ་དགུ་ལ་པུ་ཏོར་བྱོན། པུ་ཏོ་བ་ལ་ཡང་སྒྲོལ་མ་དང་སྤྱན་རས་གཟིགས་དང་འཇམ་དཔལ་གྱིས་དེ་རིང་སྤྲུལ་པའི་སྐུ་ཞིག་འོང་གསུངས། པུ་ཏོ་བས་དགེ་འདུན་གྱི་ཚོགས་སུ་སང་སྐྱེས་བུ་དམ་པ་ཅིག་འོང་བ་དེའི་མཇལ་སྣ་སུས་བྱས་མཆོག་འགྲུབ་བོ་གསུངས། ཐམས་ཅད་ཀྱིས་བཙལ་བས་ཇོ་སྟན་བཟང་པོ་ཅིག་གིས་མཇལ་ཕྱག་བྱས་པས། ཁྱེད་འདག་སྦྱར་ལོ་བཅུ་གསུམ་གྱི་དམ་བཅས་ནས་ལོ་བདུན་སོང་བའི་འཕགས་པ་ཅིག་བདག་སོ་སྐྱེ་ཅིག་ལ་ཕྱག་བྱས་ནས་ཅི་བྱེད་གསུངས་པས་མངོན་ཤེས་མངའ་བར་རིག་སྟེ་ཞབས་སྤྱི་བོར་བླངས་པས་རྟོགས་པ་ཁྱད་པར་ཅན་སྐྱེས། བླ་མས་ཀྱང་བསུ་བའི་མཆོད་བ་བཤམས་སྟེ་དེ་བཞིན་གཤེགས་པ་བྱོན་ནས་ཡོད་ཏོ་གསུངས། མཇལ་མ་ཐག་མོས་གུས་ཀྱིས་ཅུང་ཟད་བརྒྱལ། སངས་པ་ན་ཞབས་ལ་གཏུགས་སྟེ་བདག་ལ་ཐུགས་རྗེས་སྐྱོབ་པར་ཞུ་ཞུས་པས་བླ་མའི་ཞལ་ནས་ཁྱེད་དུས་གསུམ་གྱི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ཅིག་ཡིན་གྱི་ངས་ཀྱང་ཅུང་ཟད་བྱིན་གྱིས་རློབ་བོ་གསུངས། ཆོས་ཐམས་ཅད་མགོ་སྨོས་པ་ཙམ་གྱིས་རང་ཤར་དུ་མཁྱེན་སྟེ་ཡབ་སྲས་ཆོས་ཀྱིས་ཉིན་མཚན་འདའ། དགེ་འདུན་རྣམས་ཀྱིས་རྟོགས་པ་དྲིས་པས། རྒྱུ་འབྲས་ཕྲ་ཞིབ་བསྒོམས་ཙ་ན་སྡིག་པ་ལས་བློ་ལོག་ནས་དགེ་བ་འབའ་ཞིག་བསྒྲུབས་པས་བདག་གཞན་ཚོགས་གཉིས་རྫོགས་སངས་རྒྱས་ཐོབ་པའི་ཐབས་ཅིག་བདོག་སོགས་དང༌། སེམས་མ་བཅོས་ལྷུག་པར་བཞག་པས་སངས་(ད༣༣ན)
རྒྱས་རང་ཆས་སུ་རྟོགས་པའི་ཐབས་ཤིག་བདོག་སོགས་གསུངས་པས་ཐམས་ཅད་ལ་ཏིང་ངེ་འཛིན་བཟང་པོ་སྐྱེས་སྐད། ལོ་སར་ཞིག་ལ་སའི་ལྷ་མོས་མེ་ཏོག་པདྨ་ཕུབ་ཙམ་ཞིག་ཕུལ་བ་བླ་མས་དཀོན་མཆོག་ལ་ཕུལ་བས་མི་སྣང་བར་གྱུར་སྟེ་དྲི་བཟང་པོ་བྱུང༌། བླ་མས་འབྱོར་པ་མང་པོ་དང་དབྱར་གྱི་འཚོ་བ་གནང་སྟེ་ཚོགས་རྫོགས་པའི་སླད་དུ་རྒྱལ་བའི་སྲས་ཀྱིས་བཞེས་སུ་གསོལ་གསུངས། ཡང་ལན་གཅིག་ཇ་གསོལ་དུས་རྟོགས་པ་ཅིག་ཕུལ་དང་གསུང་བ་ལ་གཟུང་བའི་ཡུལ་སྒྱུ་མའི་རང་བཞིན་ལ་ཞེན་ཞིང་ཆགས་པ་མི་གདའ་འོ། །སོགས་ཕུལ་སྟེ་ཁོ་བོ་ནི་སྐྱེད་རིམ་འབྱོངས་པ་ལགས་པས་གཟིགས་དང་གསུངས་པས་སྟོན་པའི་སྐུར་མངོན་སུམ་ཏུ་གཟིགས་སྟེ་ཕྱག་གི་དཀར་ཡོལ་ཤོར་ནས་སྤྱན་ཧ་རེ་གདའ་སྐད། ཆབ་ཚ་ཐོམ་བུ་གང་ལ་ཇི་ཙམ་སྤྱད་ཀྱང་མ་ཟད་སྔོན་ངས་རྒྱ་གར་དུ་འབྲས་ཆན་བྲེ་གང་གིས་མི་སྟོང་ཁེབ་མྱོང་གསུངས། སྒྲོལ་མ་དང་ཁྲོ་གཉེར་ཅན་གྱིས་ཁྱེད་ཀྱི་ཞལ་དུ་ཟན་ཁམ་རེ་ཐོངས་པ་རྣམས་ཀྱང་འཁོར་བ་ལས་ཐར་བས་ཟན་བསོད་མཛོད་ཅིག་འགྲོ་དོན་ཆེའི་གསུངས་ཀྱང་བླ་མས་བཀའ་མ་གནང༌། ནང་ཞིག་བླ་མ་སྤྱན་ཆབ་ཙ་རེ་བྱོན་ནས་ངས་བློས་མི་ཐོངས་པར་འདུག་སྟེ་སྒྲོལ་མ་དང་ཁྲོ་གཉེར་ཅན་མི་དགྱེས་པར་གདའ་བས་བཞུད་ཅིག་གསུངས། བཞུད་པའི་ཉིན་དེ་རིང་ལས་སྐྱོ་བ་ཅིག་གསུངས་སྐད། རྨུ་ལྷ་ཤངས་འབར་དང་འུ་ཡུག་རྡོར་ལེགས་ཀྱིས་སྲོག་སྙིང་ཕུལ། ཆུ་མིག་སེར་པོ་དང་རྟ་ཤིའི་བྲག་ལ་བཞུགས་པས་ལྦ་བ་སྦུབས་སུ་ནུབ། ཟག་པ་ཟད། ཁམས་གསུམ་ཐམས་ཅད་གཟིགས། སློབ་མ་འདུས་པ་ལན་གཉིས་བཀྱེ་བའི་ཚེ་ཟམ་པ་ཆེན་པོ་ལ་བྱོན་པས་ཕར་གར་ཐོན་པ་ན་ཟམ་པ་བརྟུལ་ནས་མི་རྣམས་སྨྲེ་སྔགས་འདོན་པ་གཟིགས་སྟེ་ཚོགས་བསྐྱངས། ནུབ་གཅིག་པུ་ཏོ་བ་སེང་གེ་ལ་བཅིབས་ནས་བྱོན་སྟེ་ང་མྱ་ངན་ལས་འདའ་བ་ཁྱོད་ལ་ཕྲེང་ནས་(ད༣༣བ)
འོངས་པ་ཡིན་ཞེས་ཞལ་གདམས་དུ་མ་གསུངས་ནས་ན་མཁའ་ལ་གཤེགས། ཞག་བདུན་དུ་ཉིན་མཚན་ངོ་མི་ཤེས་པའི་ཐུགས་ཁྲལ་བྱུང་བས་བླ་མའི་སྐུ་གཟིགས་སྟེ་ཆོས་གསུང་བ་གསན་པས་སྡུག་བསྔལ་ཞི། རང་ཉིད་སྟོན་པ་དངོས་སུ་གཟིགས། པུ་ཏོ་བའི་སློབ་མ་བཅུ་དྲུག་བྱུང་ནས་བླ་མ་དམ་པ་གྲོངས། ཚེ་ཕྱི་མ་དོན་དུ་གཉེར་ཚད་འབྱུང་གནས་རྡོ་རྗེའི་དྲུང་དུ་སོང་གསུངས་ནས་ངེད་རྣམས་ཡོང་པ་ཡིན་ཟེར་བས། འོ་སྐོལ་ཚོའི་ཆོས་ས་ཞིག་བཙལ་ཡོང་གི་གསུངས་ནས་རམ་སྡིང་མར་བྱོན། གཞི་བདག་ཐམས་ཅད་ཀྱིས་ས་ཕུལ། བུད་མེད་ཆེན་མོ་ཆུ་དར་སྨུག་པོའི་གོས་གྱོན་པ་ཅིག་གིས་སེམས་སྐྱེད་ཞུས་དུང་གི་མཛོ་མོ་ཞིག་ཕུལ་ནས་འདི་ལ་ཆུ་ཞིག་ཡོང་ཟེར། དེ་ས་ལ་ཐིམ་གར་ཅུང་ཟད་སྡོད་ཅིག་རབ་གནས་བྱའོ་གསུངས། མོད་དེར་སངས་རྒྱས་བྱང་སེམས་ཐམས་ཅད་དང་པུ་ཏོ་བ་ལ་སོགས་བླ་མ་ཐམས་ཅད་བྱོན་ནས་མཛོ་དང་བཅས་པ་ས་ལ་ཐིམ་པས་ཆུ་འོ་མ་འདྲ་བ་ཞིག་རྡོལ། ཕུད་དཀོན་མཆོག་མཆོད་ནས་ཧུབ་གང་གསོལ། འཐུངས་ཚད་ལ་ངན་སོང་མེད་ཏོ་གསུངས། དེར་ཚོགས་པ་ཡང་ཆེར་བསྐྱངས། རི་རྩེ་ནས་དགོན་པར་སྐད་ཅིག་གིས་འབྱོན་པ་དང་ནུབ་མོའང་ཉིན་མོ་ལྟར་གསལ་བ་དང་སྟོང་གསུམ་གསལ་བར་སྟོན་པ་སོགས་མཛད། མཁའ་འགྲོ་རྣམས་ཀྱིས་ཁྱེད་ཀྱི་མཚན་ཐོས་ཚད་ལ་ངན་སོང་མེད་པས་ཁྱེད་ཀྱི་མཚན་སྒྲོགས་ཅེས་བསྐུལ། དགེ་སློང་དར་གྱི་ཆོས་གོས་ཅན་ཞིག་གིས་ཇ་ཅུང་ཟད་ཕུལ་ནས་སྤྲིན་གྱི་གསེབ་ལ་སོང༌། ཇ་དེ་ཇི་ཙམ་སྐོལ་ཡང་མ་ཟད། ཕྱིས་དེ་བཞེས་ནས་དགའ་ལྡན་ནས་ཀྱི་འབུལ་བ་འདི་ཁ་ཟས་ཀྱི་མཐའ་མ་ཡིན་ནོ་གསུངས། ལུས་འདིས་མཁའ་སྤྱོད་དུ་གཤེགས་གསུངས་པར་སྐུ་གདུང་འཇོག་པར་ཞུས། མ་འོངས་པའི་གདུལ་བྱ་རྣམས་ང་འབྱུང་གནས་རྡོ་རྗེ་ལ་གསོལ་བ་ཐོབ། འདས་གྲོངས་མེད་(ད༣༤ན)
དོ་གསུངས། མ་འོངས་པ་གནས་འདི་མུ་སྟེགས་ཀྱིས་འཇིག །ཕྱིས་ལྷོ་ཕྱོགས་ནས་སྐལ་ལྡན་ཞིག་གིས་གསོས་སྟེ་ངའི་མཆོད་རྟེན་བྱེད་ཅེས་གསུངས་སྟེ་གཡུ་ལོ་བཀོད་པར་གཤེགས། ཕྱིས་དགོན་པ་ཧོར་གྱིས་བཤིག །ཅི་ཞིག་ན་འགྲོ་མགོན་སོར་རྡེ་པ་ཆེན་པོ་དེ་ལྷོ་བྲག་བྲག་ལུང་གི་སྨད་བཀྲ་ཤིས་སྒང་དུ་འཁྲུངས། དང་སྦྲོར་མཁན་པོ་མ་དང་སློབ་དཔོན་དབུ་མ་པ་ལས་རབ་ཏུ་བྱུང༌། མཚན་བསོད་ནམས་སེང་གེ །མདོ་སྔགས་ལ་སྦྱངས་པས་མཁས་པ་ཆེན་པོར་གྱུར། དང་སྦྲོར་དབུ་མའི་ཟུར་ཆོས་པ་མཛད། དགུང་ལོ་བཞི་བཅུ་ནས་ཤངས་འབར་གྱིས་གདན་དྲངས་སྟེ་རམ་སྡིང་མར་བྱོན་ནས་སྔོན་གནས་མང་པོ་གསུངས། སྐུ་འབུམ་རྨང་ནས་གསོས་ཞིག་གསོ་རྒྱ་ཆེར་ལན་གསུམ་མཛད། པུ་ཏོ་དང་སྙེ་ཐང་འོར་རྒྱ་གྲོང་རྣམས་ལའང་ཞིག་གསོ་མཛད། ལྷོ་བྲག་དུ་ཧོར་དམག་ལྷགས་ཚེ་འཇིགས་སྐྱོབ་མཛད། ཐུབ་པའི་གསེར་སྐུ་ཅིག་གིས་སོར་རྡེལ་ཞིག་འཕངས་པ་དེར་བབ་པར་གཟིགས་ནས་ཕྱག་སེན་གྱི་དཀྱིལ་བྲ་ཐུར་བྱ་བའི་རི་ལ་ལྷོ་བྲག་སྡིང་མའི་གཙུག་ལག་ཁང་བཏབ། རམ་སྡིང་མ་བའི་སྤྲུལ་པར་ཞལ་གྱིས་བཞེས་ཤིང་དེ་ཐམས་ཅད་དུ་འཕྲིན་ལས་ཀྱི་དགོངས་པ་ཡོངས་སུ་རྫོགས་ཤིང་མྱ་ངན་ལས་འདས་སོ། །སྣང་གིས་སྣང་དྲེའུ་ལྷས་ཀྱི་ལྷ་ཁང་བཏབ། དོལ་པ་འབེ་སོ་ཀེར་གྱིས་གཞུང་མདར་ར་སྲེགས་ཀྱི་ལྷ་ཁང་བཏབ། རོག་དོལ་པ་ཤེས་རབ་རྒྱ་མཚོ་ནི་ཤངས་ཞུར་དམར་པོ་ཡོད་པས་རོག་དམར་ཞུར་བར་གྲགས། རྟ་མགྲིན་གྱི་སྤྲུལ་པ་ཡིན། འདིར་བྱང་ཆུབ་སེམས་དཔའ་ཤ་མཚན་ཅན་འབྱུང་ཞེས་སྔོན་ཇོ་བོས་ལུང་བསྟན། ཡང་གད་ཀྱི་གཙུག་ལག་ཁང་བཏབ། གཉལ་ནས་གླང་བྱ་རབ་པ་ཡོན་ཏན་བློ་གྲོས་ཀྱིས་ཆོས་སྒྲོ་ཤོ་པོར་གྲོང་མཁར་དང་སྐྱིད་སྟེངས་བཏབ། གཉོས་ཆེན་པོ་ནི་རྒྱ་གར་གྱི་སློབ་དཔོན་ལ་བ་བས་ཙཱ་རི་རོང་བསྐོར་ནས་ལ་བ་ཕུག་(ད༣༤བ)
ཏུ་བཞུགས། དེ་ནས་སྨྱལ་དུ་བྱོན་སྟེ་ལ་བ་ཕུག་དུ་བཞུགས་ནས་བྲ་འོར་གྱིས་བྱིན་གྱིས་བརླབས། སླར་རྒྱ་གར་དུ་གཤེགས་སྟེ་སྐུའི་ལྤགས་པ་ལ་བདེ་མཆོག་གི་ལྷ་ཚོགས་རྩ་རིས་སུ་འབྱུང་བར་བྱིན་གྱིས་བརླབས་སྟེ་བཞག །བསམས་བཞིན་བྲ་འོར་གྱི་འགྲམ་གཉོས་ཀྱི་གྲོང་དུ་འཁྲུངས། ཆོས་ཐམས་ཅད་རང་བྱུང་དུ་མཁྱེན། ལོ་བཅུ་ནས་པུ་ཏོ་བ་བསྟེན། ཉེར་གཅིག་ལ་སྐུ་མཆེད་གསུམ་ལས་བསྙེན་པར་རྫོགས། མཚན་ཆོས་འབར། པུ་ཏོ་བས་ལུང་བསྟན་སྟེ་ལ་བ་ཕུག་གི་མདུན་ཐང་རྒྱལ་མཚན་འདྲ་བར་བྲ་འོར་གྱི་གཙུག་ལག་ཁང་བཞེངས། སློབ་མ་རས་ཆུང་པ་དང་རས་ཆུང་མ་ལ་བཀའ་བསྒོས་སྟེ་རྒྱ་གར་ནས་སྐྱེ་བ་སྔ་མའི་ལྤགས་པ་དང་ཌ་དྲིལ་སོགས་བླངས། པུ་ཏོ་བ་ལ་ཐུགས་བརྒྱད་བྱོན་པའི་ཐུགས་གཅིག་དང་བཅས་བཞུགས་པའི་མཆོད་རྟེན་ནུབ་མ་བཞེངས། གླང་བྱ་རབ་པ་ལ་ཕྱག་རྡོར་འཁོར་ཆེན་གྱི་ལུང་བསྟན་བྱུང་སྟེ་ཞབས་ལ་གཏུགས། ཞང་དང་གྲོ་ལུང་པས་བསྟུད། རེ་གསུམ་པ་འབྲུག་ལོ་ལ་གཤེགས། སྒལ་ཚིགས་ལ་སངས་རྒྱས་སྟོང་བྱོན། སློབ་མ་གུན་པ་ཐུགས་རྗེ་རྒྱལ་མཚན་གྱིས་གསེར་ཕྱེ་འབུམ་པ་བཞེངས། དཀོར་འདུལ་འཛིན་གྱིས་རྟེའུར་བཏབ། ཆག་དགྲ་བཅོམ་གྱིས་གདན་ས་བྱས། འབྲང་རིན་པོ་ཆེས་འོ་གྲོ་བཏབ། ཞང་བསོད་ནམས་རྒྱལ་མཚན་གྱིས་བྱེ་ས་བཏབ། དབོན་པོ་གཉོས་ཆོས་ཀྱི་སེང་གེས་བྲ་འོར་དུ་གདན་ས་མཛད། དེ་ནས་མཚོ་སྣ་པ་ཆེན་པོ། མོན་གྲབ་པ་ཚུལ་ཁྲིམས་བཀྲ་ཤིས། ཆོས་བསྐྱབས་དཔལ་བཟང་པོ་རྣམས་བྱོན་པ་ཡིན་ནོ། །འཕན་ཡུལ་ནས་ཉི་མ་ལྟ་བུ་ཤ་ར་བ་ཡོན་ཏན་གྲགས་ནི་བྱང་རོམ་པོའི་འབྲོག་དུ་ལྕགས་ཁྱི་ལ་འཁྲུངས། པུ་ཏོ་བ་བསྟེན། བཀའ་འགྱུར་ཐུགས་ལ་བཞུགས་པར་གྲགས། པ་ཚབ་ལོ་ཙཱ་བའི་དབུ་མའི་འཕྲིན་ལས་དཔེལ་བའི་གྲོགས་མཛད། སེམས་(ད༣༥ན)
སྐྱེད་ལུགས་གཉིས་གཅིག་པའི་གྲུབ་མཐའ་མཛད། ཚོགས་པ་སུམ་སྟོང་བརྒྱད་བརྒྱ་ལྷག་ཙམ་རྟག་དུ་འདུ། དོན་གཉིས་པ་མེ་བྱ་ལ་ཐེགས། སློབ་མ་འཕྲིན་ལས་ཅན་མང་ན་འང་གཙོ་བོར་བྱང་ཆུབ་སེམས་ཀྱི་བཀའ་བབས་མཆད་ཀ་བ། རྣམ་ཐར་གྱི་བཀའ་བབས་ཉི་མ་འདུལ་འཛིན། གཞུང་བཤད་ཀྱི་བཀའ་བབས་སྟབས་ཀ་བ། རྟོགས་པའི་བཀའ་བབས་རོང་སྟོན་ཤེས་འོད། འཕྲིན་ལས་ཀྱི་བཀའ་བབས་གཏུམ་སྟོན་བློ་གྲོས་གྲགས། ལོངས་སྤྱོད་ཀྱི་བཀའ་བབས་རྣལ་འབྱོར་ཤེས་རྡོར་སྟེ་བཀའ་བབས་དྲུག་ཟེར། བྱ་མཆད་ཀ་བ་ནི་ལོ་རོར་ལྕགས་སྦྲུལ་ལ་འཁྲུངས། བློ་སྦྱོང་ལ་རྩལ་དུ་བཏོན། ཕྱིས་བློ་སྦྱོང་ལ་ཚོགས་ཆོས་མཛད། མཆད་ཀ་བཏབ། དོན་ལྔ་པ་ཤིང་ལུག་ལ་འདས། དེའི་སློབ་མ་སེ་ལྕིལ་བུ་བ་ཆོས་ཀྱི་རྒྱལ་མཚན་ནི་གཉལ་སེ་ཁུན་དུ་འཁྲུངས། ལྕིལ་བུ་དང་མཆད་ཀ་སར་མ་བཏབ། འདིའི་སློབ་མ་རྣལ་འབྱོར་བྱང་སེང་གེས་གྲོ་ས་བཏབ། རྒྱ་སྤངས་པ། ལྷ་དགེ་འདུན་སྒང་པ། ཉན་ལྷ་སྡིངས་པ་རྣམས་སོ་སོས་རང་མིང་གི་དགོན་པ་བཏབ། ལྷ་ལུང་གི་དབང་ཕྱུག་ཡར་ལུངས་སུ་འོད་སྲུང་རྒྱུད་པར་ས་སྟག་ལ་འཁྲུངས། སེའི་གདན་ས་མཛད། དོན་ལྔ་པ་ཆུ་འབྲུག་ལ་ཐེགས། དེའི་དབོན་པོ་ལྷ་འགྲོ་མགོན་དབང་ཕྱུག་འོད་ནི་མེ་རྟ་ལ་འཁྲུངས། ཝལ་ཏི་ལས་རབ་ཏུ་བྱུང༌། ཁུ་བོ་ལས་ཆོས་ཐམས་ཅད་གསན། གདན་ས་མཛད་དུས་ཀོང་པོ་ནས་ཏ་བར་སོགས་གཙུག་ལག་ཁང་སུམ་བཅུ། དྭགས་པོ་ནས་བླ་མདའ་སོགས་དང༌། གཉལ་ནས་ཟངས་པོ་ཆེ་སོགས་དང༌། གཡེ་ནས་བུ་དལ་སོགས་སྟེ་གཙུག་ལག་ཁང་བརྒྱ་ཕྲག་མང་པོའི་བདག་པོ་མཛད། དབྱར་གནས་ལ་གནས་བརྟན་བཅུ་དྲུག་ཀྱང་བྱོན། ལྷ་སར་དངོས་སུ་ཇོ་བོས་ཆོས་གསུངས། འདམ་གྱི་ལྷ་མོ་ཆེའི་བགེགས་བསྐྲད། དོན་བཞི་པ་ས་ལུག་ལ་ཐེགས། (ད༣༥བ)
དེ་ནས་རིམ་པར་ལྷ་བྲག་ཁ་བ་བློ་གྲོས་ཡེ་ཤེས། ལྷ་བློ་གྲོས་འོད། ལྷ་རིན་སེང༌། ལྷ་ཤཱཀྱ་བསོད་ནམས་ནས་དེང་སང་གི་བར་དུ་ལྷའི་གདུང་གིས་འཛིན་ནོ། །སྟབས་ཀ་བས་སྟབས་ཀ །འོད་འཛོ། ཁྲ་ཕུ་གསུམ་བཏབ། གཏུམ་སྟོན་ལ་བླ་མས་ཁྱོད་ཀྱིས་དགེ་སློང་བཞི་སྡེ་རེ་མ་བྲལ་བར་བསྟེན་གསུངས་ནས་སྣར་ཐང་བཏབ། ལོ་བཅུ་བཞི་ནས་རྡོ་སྟོན་ཤེས་རབ་གྲགས་བསྐོས་སྟེ་ལ་སྟོད་ཆོས་ལུང་དུ་དབེན་བ་མཛད་ནས་གཤེགས་པས་ཆོས་ལུང་སྐུ་གཤེགས་ཟེར། རྡོ་སྟོན་ཤེས་རབ་གྲགས་ནས་ཞང་ཞུང་རྡོ་རྗེ་འོད། གྲོ་སྟོན་བདུད་རྩི་གྲགས། འདི་སངས་རྒྱས་སྟོང་གི་ཡ་གྱལ་དུ་གྲགས། དབུ་རྩེ་རྙིང་མ་བཞེངས། ཞང་ཆོས་ཀྱི་བླ་མ། སངས་རྒྱས་སྒོམ་པ་འདིའི་རིང་སྐྱེལ་ནག་གྲགས་སེང་སྤྱན་དྲངས་བཤད་གྲ་བཙུགས། བྱང་ཆེན་བཞེངས། མཆིམས་ན་མཁའ་གྲགས། འགྲོ་མགོན་འཕགས་པའི་བླ་མ་མཛད། སྐྱོ་སྟོན་སྨོན་ལམ་ཚུལ་ཁྲིམས་ཀྱིས་ལྷ་ཁང་ཆེན་མོ་དང་ལྕགས་རི་བཞེངས། ཉི་མ་རྒྱལ་མཚན་ཟེའུ་གྲགས་པ་བརྩོན་འགྲུས། གྲགས་པ་ཤེས་རབ། མཆིམས་བློ་བཟང་གྲགས་པ། ཀུན་དགའ་རྒྱལ་མཚན་སོགས་བྱོན་སྟེ་མཁན་པོ་ལ་གནས་བརྟན་བཅུ་དྲུག་འབྱོན་པར་གྲགས། ཟླ་བ་ལྟ་བུ་གླང་ཐང་པ་རྡོ་རྗེ་སེང་གེ་ནི་ཤིང་རྟ་ལ་འཁྲུངས། སངས་རྒྱས་སྣང་བ་མཐའ་ཡས་ཀྱི་སྤྲུལ་པར་རྡོ་རྗེ་གདན་པས་ལུང་བསྟན། རྟག་དུ་འཁོར་བའི་ཉེས་དམིགས་སེམས་པས་སྐུ་ཚེ་ལ་ཞལ་འཛུམ་པ་ལན་གསུམ་ལས་མ་བྱུང་བར་གྲགས། ལན་གཅིག་ཚེ་རབས་ཐམས་ཅད་དུ་དགེ་སློང་གི་དངོས་པོ་དང་མི་འབྲལ་བའི་དམ་བཅའ་མཛད་པས་དཔལ་ལྷ་མོ་དྲེའུའི་སྐད་ལྷང་གིས་བྱོན་སྟེ་དེ་སྲིད་ངས་ཁྱོད་ཀྱིས་གྲོགས་བྱའོ་གསུངས། གླང་ཐང་བཏབ། བདུན་བཅུ་པ་ཆུ་ཡོས་ལ་ཐེགས། སློབ་མ་ཤ་པོ་སྒང་པ་པདྨ་བྱང་ཆུབ་(ད༣༦ན)
སོགས་མང་དུ་བྱོན། གདན་སར་ཤ་པོ་བ་གླང་ཐང་ཞང༌། དགེ་བཤེས་གཉན་སོགས་བྱུང་ཞིང་ཕྱིས་རྒྱ་མ་བ་ལ་ཕུལ་ལོ། །བཀའ་གདམས་གཞུང་བའི་སྐབས་སོ། །ཕྱག་རྡོར་གྱི་ངོ་བོ་སྤྱན་སྔ་ཚུལ་ཁྲིམས་འབར་ནི་ཉན་གྱི་སྣང་ར་སྒང་དུ་དབས་ཤཱཀྱ་རྡོ་རྗེ་དང་ཡུམ་ལི་མོ་ཡེ་ཤེས་སྒྲོན་གྱི་སྲས་སུ་ས་སྟག་ལ་འཁྲུངས། བཅོ་བརྒྱད་པ་ལ་མལ་སེམས་དཔའ་ཤེས་རབ་ལས་རབ་ཏུ་བྱུང༌། ཉི་ཤུ་ལ་འབྲོམ་དང་མཇལ། ཉེ་གནས་རྟག་དུ་མཛད་པས་སྤྱན་སྔ་བར་གྲགས་སྟེ་སྤྱན་སྔའི་མཚན་ཐོབ་པའི་དང་པོ་ཡིན། ཇོ་བོའི་སྔགས་ཀྱི་མན་ངག་རྣམས་ཀྱང་ཁོང་ལ་གནང༌། ཉེར་བདུན་ལ་འབྲོམ་གཤེགས་ནས་རྣལ་འབྱོར་པ་གོང་འོག་རྣམས་བསྟེན། གཙང་ནས་གོང་མོ་སྒང་པ་བྱ་བའི་རྣལ་འབྱོར་མ་ཞིག་གིས་གདམས་ངག་བཏབ་བྱུང་བའི་ཉམས་མྱོང་གི་ཚད་དུ་མ་ཕྱིན་ནས་དགོན་པ་པས་གསང་འདུས་རིམ་ལྔ་ཞིག་བཏབ་པས་ཚད་དུ་སྐྱོལ་སྐད། ལོ་ཙཱ་མཁྱེན། གསང་སྔགས་ཐམས་ཅད་ཀྱི་བཟླས་པ་གྲུབ། སཱ་ཚ་ཁོ་ནའང་རི་དེའུ་ཙམ་སོང་ཟེར། ཆོས་སྐྱོང་ཀུན་གྱིས་སྲོག་སྙིང་ཕུལ། ཆོས་ཐམས་ཅད་ཡང་ན་དོན་དམ་ཡང་ན་ཀུན་རྫོབ་ཅེས་བཞེད། ང་བརྒྱད་ནས་འཁྲུངས་ཡུལ་དུ་ལོ་དགོན་པ་བཏབ། ལོ་དྲུག་བཞུགས། ཐུགས་ཟོ་མ་སོད་ནས་སྨྱུག་རུམ་དུ་ལོ་གསུམ་བཞུགས་སྟེ་དོན་དྲུག་པ་ཆུ་ལུག་ལ་ཐེགས། སློབ་མ་འགྲོ་དོན་ཅན་མང་ནའང་སྤྱན་སྔའི་སྒོམ་བཞི་སྐད་ན། ཟར་པ་ཕག་སྒོམ་རྡོར་ཡེས་ཀྱིས་མལ་གྲོར་ཟར་བཏབ། དགག་དབྱེ་ཤེས་རིན་གྱིས་ཆེར་སྐྱེས་ལྷ་ཁང༌། རུག་པ་སྟོན་སྒོམ་གྱིས་ཀླུང་ཤོད་རུག་པ། རལ་པ་པད་སྒོམ་གྱིས་དར་ལྷ་ཁང་བཏབ་བོ། །སྟོད་ལུང་པ་རིན་ཆེན་སྙིང་པོ་ནི་ཆུ་སྤྲེ་ལ་འཁྲུངས། སྟོད་ལུང་ཙན་གྲོ་དགོན་པ་བཏབ། གྱ་ལྔ་པ་མེ་སྤྲེ་ལ་ཐེགས། འདིའི་ཡང་(ད༣༦བ)
སློབ་ལྷོ་བྲག་སྲིན་པོ་བ་སོགས་ཡིན། སྤྱན་སྔའི་སློབ་མའི་གཙོ་བོ་ནི་སྤྲུལ་སྐུ་བྱ་ཡུལ་པ་ཆེན་པོ་སྟེ་སྟོད་ལུང་གོལ་གྱི་ལུང་དུ་འཁྲུངས། ཡབ་གཤེགས་ཡུམ་གྱིས་བོར་སྟེ་ནེ་ནེ་མོ་ཞིག་གིས་བསྐྱངས། བཅུ་གཉིས་ལ་རབ་ཏུ་བྱུང་ཞིང་བཅུ་དྲུག་ནས་སྟོད་ལུང་པའི་ཉེ་གནས་ལོ་ལྔ་མཛད། བསླབ་བཏུས་སོགས་མཁྱེན་པར་སྦྱངས། སྟོད་ལུང་པས་སྤྱན་སྔ་མཇལ་དུ་བྱོན་ཚེ་མཇལ་བས་མཉེས་སྟེ་སྟོན་པ་རེ་སྐྱིད་འདི་ལྟ་བུའི་ཉེ་གནས་ཡོད་པ་གསུངས། འོ་ན་འབུལ་ལམ་ཞུས་པས་འབུལ་ཅང་ཕོད་དམ་གསུངས་པས་དར་ཡུག་གཅིག་བཏགས་ནས་ཕུལ། སྤྱན་སྔ་ནས་ཡེ་མི་བཀྱོན་པས་སངས་རྒྱས་ཀྱི་འདུ་ཤེས་བཅོས་མིན་དུ་ཤར། ཕྱག་གས་གས་སུ་ཞལ་ཟས་རྫི་བ་སོགས་དཀའ་བ་ཆེས་བཟོད་ཅིང་མཚན་མོ་མཎྜལ་ཕུལ་ཞིང་གསོལ་བ་ཁོ་ན་བཏབ། ལོའི་ལྷ་ཁང་མཛད་ཚེ་ས་རྡོ་ལ་མ་འཇུས་པ་མེད། ཤ་ཁྲག་ལྦུ་བར་སོང་སོང་ཞབས་ཏོག་ལ་འབུངས། སྤྱན་སྔ་བ་ཤིན་དུ་མཉེས་ཤིང་པུ་ཏོ་བས་ཀྱང་བསྔགས་པ་ཆེར་མཛད། སྟོད་ལུང་པས་བཙུན་ཆུང་འདི་ཅི་འདྲ་ཞུས་པས། འདི་དད་པ་དང་ཤེས་རབ་ནི་ཆེ་ཆོས་ཐམས་ཅད་ན་མཁའ་ལ་མདུང་བསྐོར་གསུངས། གཡེང་བ་ཁོ་ན་བྱེད་དགོས་པ་ལྟར་སྣང་ཡང་ཞོགས་གཅིག་ཐལ་བ་འབོར་དུ་འགྲོ་བ་ན་སྐས་གདང་གསུམ་པའི་ཁར་བབས་ཚེ་མདོ་རྒྱུད་ཐམས་ཅད་ཀྱི་དོན་མངོན་སུམ་དུ་ལམ་ཤར། སྐྱི་སྨང་པའི་དགེ་བཤེས་འདི་རྣམས་བླ་མའི་ཞབས་དོག་མི་བྱེད་པར་ཐོས་པ་ཁོ་ན་བྱེད་པ་འདི་ནོར་གསུངས། སྤྱན་སྔས་ཀྱང་ཁྱོད་ནི་ཐར་ཟིན་གྱིས་ང་མ་བཞག་ཞིག་གསུངས། མྱ་ངན་ལས་འདའ་ཀའི་ཚེའང་ཆོས་སྐུ་གཅིག་དུ་མ་གྱུར་བར་དུ་མི་འབྲལ་ལོ་གསུངས། ལོ་དགུ་བསྟེན་ལོ་བཞིར་མཚམས་མཛད། དེ་ནས་ཚོགས་བསྐྱངས། ཞ་བས་བྱ་ཡུལ་གྱི་ས་ཕུལ་བས་ཀླུ་གསེན་རྣམས་གནས་སྤོས། ཀླུ་ཆེ་བ་ཞིག་(ད༣༧ན)
འདུག་པ་བཏུལ་ནས་ཕ་བོང་ཐག །ཐུག་རྣམས་བཅག་ཞིང་སྦས་སྟེ་བྱ་ཡུལ་བཏབ། ཤིང་རྣམས་ནགས་ཤོད་ནས་དྲངས། རྟེན་དང་ས་རྒྱན་གནམ་རྒྱན་མི་ཤོང་བ་འདུས། འགྲོ་དོན་ཆེར་མཛད་དེ་རེ་བཞི་པ་ས་རྟ་ལ་གཤེགས་གདུང་སྦྱངས་པས་དུ་བས་གར་ཁེབ་ཏུ་རིང་སྲེལ་བྱུང༌། ཚོགས་པ་ཉིས་སྟོང་ལྷག་ཙམ་གྱི་ནང་ནས་ཏིང་ངེ་འཛིན་སྐྱེས་པ་ལྔ་བརྒྱ། དགེ་བཤེས་ཆེན་པོ་བརྒྱ་དང་བཅུ། ཕྱིའི་ཆེན་པོ་དགུ་བར་གྱི་ཆེན་པོ་བརྒྱད། ནང་ཐུགས་ཀྱི་སྲས་གསུམ་ཞེས་དེབ་སྔོན་པ་འཆད་ལ། ཆེན་པོ་བཅུ་གསུམ་ཞེས་ཡར་ལུངས་ཇོ་བོས་བྲིས་སྣང༌། དེ་ལ་རབ་སྒང་བ་དང་ངང་ཚང་བ་གཉིས་ཁམས། ཤ་པ་གླིང་པ་དང་བོ་ཐང་པ་གཉིས་དྭགས་པོ། མེར་པ་དང་རྒྱ་རི་བ་གཉིས་གཡེ། བྲག་དམར་པ་བྲག་ནག་པ་མུས་སྨན་པ་རྣམས་གཙང་སྟེ་ཡུལ་དེ་རྣམས་སུ་འཕྲིན་ལས་ཆེ་ཞིང༌། དབུར་སྟོད་དུ་བུལ་པས་རྒྱལ་པོ་སྟེང་བཏབ། འཆུམས་སུ་འཁྲུངས་པ་ཁྲོམ་ཞེར་ཆེན་པོ་རིན་ཆེན་སེང་གེས་ཀཾ་ཀཾ་བཏབ། དེར་སྐྱོ་སྟོན་བྱང་ཆུབ་རིན་ཆེན་ཁྲོམ་གཞེར་རིན་ཆེན་སེང་གེ་ཕྱི་མ་སོགས་གདན་ས་པ་བཟང་པོ་རིང་དུ་བྱུང༌། དུམ་པུ་རི་པ་ཟླ་བ་རྒྱལ་མཚན་གྱི་དུམ་བུ་རི་བཏབ། སྒྱེར་སྒོམ་ཆེན་པོས་རྒྱ་མའི་མཆོད་ཁང་རྙིང་མ་དང་རིན་ཆེན་སྒང་བཏབ། འདི་སྣེ་ཟུར་བ་དང་བྱ་ཡུལ་བ་ཐུན་མོང་གི་སློབ་མ་ཡིན། མཚན་གཞོན་ནུ་གྲགས་པ། ལྕགས་རྟ་ལ་འཁྲུངས་ནས་གྱ་གཉིས་པ་ལྕགས་ཡོས་ལ་ཐེགས། དེའི་ཅུང་པོ་བུ་མོ་སྟག་གི་སྲས་སངས་རྒྱས་དབོན་སྟོན་གཞོན་ནུ་སངས་རྒྱས་ནི་ས་རྟ་ལ་འཁྲུངས། བྱ་ཡུལ་བ་ཆེན་པོའི་སྐྱེ་བ་དྲན། མ་འོངས་པའི་སངས་རྒྱས་སྐལ་ལྡན་ཤིང་རྟར་སིངྒྷ་གླིང་གི་དགྲ་བཅོམ་པས་ལུང་བསྟན། རྒྱ་མའི་ལྷ་ཁང་ཆེན་མོ་བཞེངས། ཁ་ཆེ་པཎ་ཆེན་དང་མཇལ་ཚེ་སྒྲོལ་མས་(ད༣༧བ)
ཤིང་རྟ་མྱུར་དུ་འཆག་པར་ལུང་བསྟན་པ་ལྟར་དོན་གསུམ་པ་ལྕགས་ཕོ་རྟ་པཎ་ཆེན་ས་སྐྱར་དབྱར་གནས་པའི་ལོ་འདུན་མའི་ཞལ་བསྐོས་མཛད་པ་འཁོར་ཚོ་མ་ཉན་པས་ངའི་སྐྱ་མ་དེ་རིང་ནས་ཙེན་བསྡུས་ཆོག་གསུངས་འཕོ་བ་མཛད་ནས་གཤེགས། སངས་རྒྱས་ཡོན་ཏན། བདེ་གཤེགས་ཆེན་པོ་སོགས་གདན་རིམ་བཟང་དུ་བྱུང༌། བདག་གི་ལོ་སོ་གསུམ་པ་མེ་སྤྲེ་ལ་རྒྱ་མའི་ལྷ་ཁང་ཆེན་མོ་མེས་གཤེགས་པ་ཡིན་ནོ། །སློབ་མ་རྟོགས་ལྡན་བཟང་མོ་བ། ལྷོ་བྲག་དང་སྤྲོའི་དབུ་མ་པ་དགེ་བོར་པ་སོགས་བུ་ཆེན་བརྒྱད་བྱོན། བྱ་ཡུལ་བའི་ཐུགས་ཀྱིས་སྲས་གཙང་པ་རིན་པོ་ཆེ་རྡོ་རྗེ་མི་སྐྱོད་པ་ནི་གཙང་སྟོད་སྣུབས་ཀྱི་ཡུལ་དུ་སྔགས་པའི་སྲས་སུ་འཁྲུངས། ཆུང་ངུ་ནས་གཏོར་མ་གཏོང་བའི་ཚུལ་མཛད། མིག་སྒྱུའི་སྟོང་གཟུགས་རང་བྱུང་དུ་བྱུང༌། མཁའ་འགྲོ་མ་འབར་མས་རྗེས་སུ་བཟུང༌། རྔོག་ལོ་ཆེན་པོ་སོགས་ལོ་ཙཱ་བ་རང་ཡང་ལྔ་ཙམ་བསྟེན། སྔགས་མཚན་ཉིད་ལ་འདི་མ་སྦྱངས་བྱ་བ་མེད། སྟོད་བསྙུང་བ་སྤྱན་རས་གཟིགས་ཀྱིས་བསལ། རྒྱ་གར་ལ་འབྱོན་པའི་ལམ་དིང་རིར་དམ་པ་དང་མཇལ་བས་ཁོང་རང་གི་གོས་དྲིལ་སྟེ་སྤྱི་བོར་བཞག་ཐུབ་པའི་ཙ་ཀ་ལི་ཅིག་གཏད། ཁུར་མང་གི་མེ་ཏོག་ཅིག་ཆུ་ལ་བསྐུར། རྡོ་བ་ཞིག་གཏད་དེ་ཤར་དུ་འཕེན་བཅུག་བྱུང་བས་དེར་འཁོད་པ་རྣམས་ན་རེ་མི་འདི་བསོད་ནམས་རེ་ཆེ། དམ་པ་བཞེངས་པ་དང་ཐུག་གོས་སྤྱི་བོར་བཞག་པ་སོགས་ཀུན་གྱིས་འཁུར་ཞིང་བསྟན་པའི་བདག་པོ་བྱེད། གང་ལའང་མ་ཆགས་པ་ཅིག་འོང༌། ཤར་ཕྱོགས་ལ་སོང་དང་དོན་འགྲུབ་འོང་གསུང་བར་འདུག་ཟེར། རྒྱ་བལ་ན་མུ་གེ་ཆེ་ཟེར་བས་ལོག་དབུས་གཙང་གི་སྟོན་པ་སུས་ཀྱང་མ་ཐུབ། ཁོང་རྣམས་བཀའ་གདམས་པ་ལ་སྐུར་བ་འདེབས་པ་ན་ཁ་བཟུང༌། བྱ་ཡུལ་བ་དེ་(ད༣༨ན)
བླ་མས་བྱིན་གྱིས་བརླབས་པས་ནི་ཡིན་ཆོས་མི་ཤེས་ཟེར་བས་དེ་གཉིས་ནི་འགལ། གང་ལྟ་ནའང་ཞལ་ལྟ་སྙམ་ནས་མཇལ། རྟ་བཟང་པོ་གཅིག་དང་གསེར་སྲང་གང་ཕུལ། ཚོགས་ཆོས་ཅིག་གསན་པས་སྔར་གྱི་ཚོ་ཁ་བཤད་ཙམ་ཡིན་པར་འདུག་སྙམ་དུ་བཅོས་མིན་གྱིས་མོས་གུས་སྐྱེས། སྔོན་རྣལ་འབྱོར་པ་རྣམས་ཀྱིས་སྤྱན་སྔ་བསྐྱངས་པ་ལྟར་སྐྱོང་གསུང་ནས་ཆོས་ཚུར་བསྐྱལ་ཞིང་རྫོགས་པར་གནང༌། རྒྱ་སྟོན་དང་གཉིས་ལ་དབང་བསྐུར་ཞིག་གནང་བས་རྒྱ་སྟོན་གྱིས་མི་གཡོ་བ་ཞལ་གཟིགས། ཉིད་ལ་རྒྱུད་སྡེ་རབ་འབྱམ་གྱི་ཚིག་དོན་ཐམས་ཅད་ཐུགས་ལ་བྱོན། ཆོས་ཉིད་ཀྱི་བདེན་པ་གཟིགས། ཆོས་ཞུ་རེས་བཞིན་གསེར་ཞོ་ཕྱེད་མ་ཐ་མར་ཡང་ཕུལ། ཕྱིས་སྐུ་བསོད་སྐྱེས་ནས་ཆོས་པོ་ཏི་བརྒྱ་ལྷག་དང་གསེར་ཕྱེ་མ་བུ་མོ་ལོ་བརྒྱད་མ་ཞིག་གིས་མི་ཐེག་པ་ཕུལ། སྔར་ལོའི་གདན་ས་དང་ཕྱིས་ལོ་བྱ་ཡུལ་གཉིས་ཀའི་གདན་ས་མཛད། རྟེན་དགེ་བསྙེན་མཚན་ན་མཁའ་རྡོ་རྗེ་ཡིན། གྱ་ལྔ་པ་ལྕགས་སྦྲུལ་ལ་ཐེགས། སློབ་མ་གཙང་པའི་བུ་བཞི་སོགས་མང་དུ་བྱུང༌། གླང་ལུང་པ་བརྩོན་འགྲུས་གཞོན་ནུ་སྟོད་ལུང་མཚུར་དུ་ཆུ་ཡོས་ལ་འཁྲུངས། པ་ཚབ་ལོ་ཙཱ་དང་ཆོས་ཀྱི་པདྨ་ལས་རབ་ཏུ་བྱུང༌། བྱ་འདུལ་དང་ཕྱ་པ་ལས་བསྙེན་པར་རྫོགས། གཙང་པ་རིན་པོ་ཆེའི་གདམས་ངག་རྫོགས་སྟེ་ལོ་བྱ་ཡུལ་གྱི་གདན་ས་ལོ་སོ་གཉིས་མཛད་ནས་དོན་གཅིག་པ་ཆུ་གླང་ལ་གཤེགས། སངས་རྒྱས་སྒོམ་པ་རྡོ་རྗེ་གཞོན་ནུ་ནི་ཡུལ་གཞུང་སྣེ་གདོང་དུ་ལྕགས་འབྲུག་ལ་འཁྲུངས། ལྦལ་ཏི་ལས་རབ་བྱུང་བསྙེན་རྫོགས་མཛད། གླང་ལུང་པའི་གདམས་པ་རྫོགས་ནས་སྒྲུབ་པ་མཛད་ཚེ་ཆོས་ཐམས་ཅད་མཁྱེན། གདན་ས་ཡུན་རིང་དུ་བསྐྱངས་སྟེ་བདུན་བཅུ་པ་ས་གླང་ལ་ཐེགས། ཟམ་རིན་པོ་ཆེ་གྲགས་པ་སེང་གེ་(ད༣༨བ)
ནི་འཕན་ཡུལ་མདར་ལྕགས་ཕག་ལ་འཁྲུངས། ཡུམ་སྒྲོལ་མར་གཟིགས། ལྕམ་མོས་སངས་རྒྱས་སྒོམ་པ་ལ་སྐྱབས་སུ་མཆི་ཟེར་བས་དད་ཅིང་སངས་རྒྱས་སྒོམ་པ་ཞལ་གཟིགས། རྣལ་འབྱོར་བྱང་སེང་ལས་རབ་བྱུང་བསྙེན་རྫོགས་མཛད། སངས་རྒྱས་སྒོམ་པའི་གདམས་པ་ཡོངས་སུ་རྫོགས། ལྷ་མོས་བསྐུལ་སྟེ་གདན་ས་མཛད། རེ་དྲུག་པ་མེ་འབྲུག་ལ་གཤེགས། དེའི་སློབ་མ་འོད་གསལ་བས་ཞོགས་སུ་འོད་གསལ་བཏབ། རི་མེར་བས་ལྷོ་བྲག་ཤར་དུ་རི་མེར་བཏབ། བར་དོར་མཆོག་ཐོབ་པར་གྲགས་པ་ཁམ་པ་ལུང་ཉན་དུ་ཆུ་འབྲུག་ལ་འཁྲུངས་པ་དེས་ལོ་བྱ་ཡུལ་གྱི་གདན་ས་ལོ་ཉེར་བདུན་མཛད་དེ་ཆུ་རྟ་ལ་གཤེགས། སངས་རྒྱས་ཇོ་བོ་དབང་ཕྱུག་གཞོན་ནུ་ཆུ་འབྲུག་དེ་ཉིད་ལ་འཁྲུངས། སངས་རྒྱས་སྒོམ་པའི་སྐྱེ་བར་གྲགས། དྲུག་བཅུ་པ་ཡོས་ལ་གདན་ས་མཛད། ཆོས་སྐྱོང་ལ་ནུས་པ་ཐོན་པས་བྱ་ཡུལ་ཞིག་གསོའི་དུས་ཆོས་སྐྱོང་གི་གཏོར་མ་སྐུ་དང་བཅས་པ་བཞི་སྦས། གྱ་གཅིག་པ་ཆུ་ཡོས་ལ་ཐེགས། འབྲི་ཁུང་པ་སྐུ་ཞང་ཚུལ་རྒྱལ་གྱིས་ལོར་སྡེ་དམག་དྲངས་མི་མང་པོ་བསད་དུས་གཏོར་མ་གཅིག་འཕངས་པ་མ་སྐམ་པར་འདུག་སྐད་དེ་སྐུ་ཞང་པ་ཞལ་ངོ་རྣམས་མིས་བསད་སྐད། དེ་ནས་གཙང་སྟོན་གྱིས་གདན་ས་ལོ་གསུམ་མཛད་པའི་ཤིང་བྱ་ལ་འབྲི་ཁུང་པའི་དམག་གིས་བྱ་ཡུལ་བསྲེགས། གཙང་སྟོན་བཀྲོངས། དེ་ནས་ལོ་ལྔ་སོང་བ་ལྕགས་སྟག་ལ་འབྲི་ཁུང་གླིང་ལོག་བྱུང༌། ཕྱི་ལོ་ལྕགས་ཡོས་ལ་སངས་རྒྱས་ཇོ་བོས་གདན་ས་མཛད་དེ་ལོ་གཅིག་ལ་གསོས་དེ་ནས་གྲུ་ཤུལ་པ་སངས་རྒྱས་སྟོན་པ་དང་སངས་རྒྱས་སྒོམ་པ་ཕྱི་མ་སངས་རྒྱས་དབོན་རྣམས་དང་གཙན་གྲོ་བ་ཚུལ་ཁྲིམས་མགོན་པོ་སོགས་བྱོན་སྟེ་ལོ་བྱ་ཡུལ་དང་མདོར་ན་བཀའ་གདམས་མན་ངག་པའི་སྐབས་སོ། །(ད༣༩ན)
ཡང་སྐུ་མཆེད་གསུམ་གྱི་ཁར་ཁམ་པ་ལུང་པ་བསྣན་པས་ཞལ་བཞི་ཞེས་ཀྱང་གྲགས་སྟེ་དེ་ནི་སྒང་ཤཱཀྱ་ཡོན་ཏན་ཟེར། ཤིང་གླང་འཁྲུངས། གོ་གཅིག་ཤིང་འབྲུག་ལ་ཐེགས་སྟེ་སློབ་མ་རྣམས་སྣེའུ་ཟུར་པ་དང་ཐུན་མོང་དུ་གྱུར་ཏོ། །རོང་པ་ཕྱག་སོར་བ་ནི་ཇོ་བོའི་དངོས་སློབ་བརྒྱད་ཡང་སློབ་དང་ཉིང་སློབ་མང་པོ་བསྟེན་པས་ཅུང་ཟད་མ་མཐུན་ནས་སྔ་རིས་སུ་ནག་ཚོ་དངོས་ལ་བཏུགས། གདམས་པ་མང་དུ་གསན་ཕྱིས་ཇོ་བོ་སྤྱན་དྲངས་པའི་ལོ་རྒྱུས་ཞུས་པས་དེ་ལ་ང་མཁས་པ་ཡིན་ཀྱང་ཁྱོད་མིན་པ་རྩད་གཅོད་པ་མ་བྱུང་ཞེས་རྒྱས་པར་གསུངས། འབྱོན་ཁར་རི་ལག་སོར་ལྟ་བུར་སྒོམས་ཤིག་གསུངས་སྟེ་ར་སྒྲེང་གི་འོག་ཅོམ་ཆུང་གི་ནང་ལག་སོར་དགོན་པར་སྒྲུབ་པ་རྩེ་གཅིག་དུ་མཛད། ལན་གཅིག་པ་ཚབ་དང་ཕྲེང་ག་རྗེའི་འཁྲུག་བསྡུམས་ལ་མཚམས་བཀྲོལ་བ་ན་ཕོད་མདོར་རྨ་ཚོ་བྱང་རྡོར་དང་མཇལ་སྟེ་དད་ནས་འུ་ཤང་རྡོར་སྤྱན་དྲངས། ཁོང་དཔོན་སློབ་ལྔ་བརྒྱ་ལ་ཆོས་གསུངས། ཟུར་ཆོས་པ་བཞིའི་བྱ་འདུལ་གྱིས་རྣམ་ཐར་གཙོ་བོར་བྲིས། རྣམ་བར་བ་ཞེས་པ་སྟོད་ལུངས་རམ་པ་ལྷ་སྡིངས་འདེབས་མཁན་གསང་ཕུའི་གདན་སའང་མཛད་པ་དེ་དང༌། རྔོག་མཆིམས་ཕུ་བ་གཉིས་ཀྱིས་གདམས་ངག་གཙོ་བོར་བྲིས། ཞུས་ལན་པས་གཉིས་ཀ་རྒྱས་པར་བྲིས་སྟེ་བསྟན་རིམ་བཞི་བྱུང་ཞིང་ཕྱིས་ཡི་གེ་ཐམས་ཅད་བྱ་འདུལ་གྱི་ཕྱག་དུ་བྱུང་ནས་ཇོ་བོའི་རྣམ་ཐར་རྒྱས་པ་ལམ་ཡིག་ཆེན་མོ་དང་བསྟན་རིམ་མཛད། ཕྱག་སོར་བ་ནས་བརྒྱུད་པ་ལ་བཀའ་གདམས་འོག་མར་གྲགས་སོ། །རྔོག་ལེགས་པའི་ཤེས་རབ་ཀྱི་རྗེས་འབྲང་གསང་ཕུ་བ་སྟེ། སྔོན་བོད་རྒྱལ་པོ་ལ་ཤེ་མོང་ཆེར་བལྡབས་པའི་བློན་པོ་ཆེན་པོ་རྔོག་ལས་སློབ་དཔོན་པདྨའི་དངོས་སློབ་ཕུར་པའི་གྲུབ་ཐོབ་ཟར་མ་ཆད་པའི་རིགས་ལས་ཡ་འབྲོག་གི་མཚོའི་བྱང་འགྲམ་སྒོག་ཞེས་པར་ཡབ་རྔོག་སྟོན་རྡོ་རྗེ་གཞོན་ནུ་ལ་སྲས་ལྔ་ཡོད་པའི་ཆེ་བ་(ད༣༩བ)
ལེགས་པའི་ཤེས་རབ་ནི་འབྲོམ་ཡེ་ཤེས་ཡོན་ཏན་ལས་རབ་ཏུ་བྱུང༌། ཁམས་སུ་སེ་བཙུན་ལས་མཁས་པར་སྦྱངས། འབྲོམ་བོད་ལ་བྱོན་པའི་ཕྱི་ལོ་བྱ་ལོ་ལ་དབུས་སུ་བྱོན། ཇོ་བོ་རྗེ་ལ་གདམས་པ་མཐའ་དག་གསན། ལུང་པ་ཕ་གིའི་ནང་ན་དུང་གཡས་སུ་འཁྱིལ་བ་འདྲ་བ་ཡོད་དེར་གཙུག་ལག་ཁང་ཐོབ་ཅེས་ཇོ་བོས་ལུང་བསྟན་པ་ཐོག་མར་བྲག་ནག་དུ་བཏབ། ཕྱིས་ནེའུ་ཐོག་ཡིན་པར་མཁྱེན་ནས་ཆུ་གླང་ལ་བཏབ། ཇོ་བོའི་སློབ་མའི་ནང་ནས་གྲུབ་མཐའ་ལ་མཁས་པར་གྲགས་པ་རྣལ་འབྱོར་པ་ཆག་ཁྲི་མཆོག་གིས་ལོ་གཅིག་ཆོས་བཤད། དེ་ནས་ལོ་ཙཱ་བ་ཆེན་པོ་བྱོན་པ་ཡིན་ནོ། །དེ་ནི་རྔོག་ལེགས་ཤེའི་གཅུང་པོ་ཀླུ་ཁྲི་ཀླུ་བྱང་ཆོས་སྐྱབས་ཐུབ་པ་བཞི་ལས་ཆོས་སྐྱབས་ཀྱིས་སྲས་རྔོག་ལོ་ཆེན་པོ་ལྕགས་ཕག་ལ་འཁྲུངས། སྐུ་ཆུང་ངུའི་དུས་འོ་བརྒྱལ་བར་བྱུང་བས་ལོ་བཅུ་བདུན་ལ་ཁུ་བོའི་མཚན་ལ་བསྙེགས་སྟེ་བྱོན། ན་བཟའ་ཧྲུལ་པོ་རྐྱང་གཅིག་ལ་དྲེས་མའི་སྐུ་རགས་འཁོར་གཅིག་ཡོད། ཆུ་ཐགས་པ་ལ་སློངས་པས་ཡོས་ཅུང་ཟད་བྱིན་པ་ཕག་དུ་བླུག །གནས་ཚང་མ་རྙེད་བར་རྟ་བྲེས་སུ་གཟིམས་པས་ཁུ་བོས་མནལ་ལམ་ན་རྟ་བྲེས་སུ་སེང་གེ་གསེར་གྱི་མདོག་ཅན་གཟིགས་སྟེ་དྲིས་པས་དཔོན་པོར་མཁྱེན་སྟེ་བོས། ཕྱག་ཚོལ་གསུངས་པས་སློབས་དང་ཟེར། ཕྱག་བཙལ་བས་སྐུ་རགས་ཆད་དེ་ཡོས་འཐོར་བས་ཞལ་བ་ཁྱབ་པས་འཕྲིན་ལས་ཆེན་པོ་ཡོང་བར་འདུག་གསུངས། རིག་པ་བརྟག་ཕྱིར་ཞོ་ཕོར་པ་གང་ཕྱེ་བཏབ་པ་བྱུར་མོ་ཞིག་དྲངས་པས་མདུན་དུ་ཞོག་ཟེར། གོས་ཀྱི་གོང་པ་ནས་ཁབ་སྦོམ་པ་ཅིག་བཏོན་པས་མཐའ་ནས་དྲིལ་བས་ཅུང་ཟད་རེ་འགོས་པ་ཟོས་པས་ཅི་ཞིག་ན་དམའ་ཞོམ་སོང༌། རྐེད་པ་ནས་རྩིབ་མའི་ཐུར་མ་ཞིག་བཏོན་ནས་དཀྲུགས་སྟེ་གསོལ། ཅུང་ཟད་ཀྱང་མ་བོ་བས་ངོ་མཚར་(ད༤༠ན)
དུ་བྱས། རབ་ཏུ་ཕྱུང་ནས་མཚན་བློ་ལྡན་ཤེས་རབ་ཅེས་བཏགས་པས་བློ་ལྡན་དང་ཤེས་རབ་གཅིག་པ་ལ་གཉིས་བརྩེགས་ནས་ཅི་བྱེད་གསུངས་པས་འོ་ན་བློ་ལྡན་བཟང་པོ་གྱིས་གསུངས་སྟེ་ཕྱིས་བསྟན་བཅོས་མང་པོའི་སྦྱར་བྱང་ལ་བློ་ལྡན་བཟང་པོ་ཡོད། ཀློག་ཡིག་སྔ་ནས་མཁྱེན་པས་འགྲེལ་པ་དོན་གསལ་མཚན་མ་ཞིག་གཏན་ནས་དེ་རིང་ནགས་གསེབ་ཕ་གིར་འདི་ཟུང་ཤོག་གསུངས་ནས་དགོང་མོ་བྱོན་པ་ན་ཙམ་ཟིན་གསུངས་པས་ཡི་གེ་ཨ་མ་རྣམས་བཟུང་ཡོད། བུ་ཆུང་ཚོ་འཛིན་དགོས་ན་སང་ཟུང་ཆོག་ཟེར། ཁྱོད་ཀྱི་སློབ་དཔོན་ངས་མི་ཡོང་བ་འདུག་གསུངས་ནས་རྒྱ་གར་དུ་བཏང་ཞེས་རྗེ་འཕྲིན་ལས་ཞབས་གསུངས། ཀ་ཆུའི་སྦོ་ཚུལ་ཁྲིམས་བླ་མ་ལ་ཡང་གསན་པ་ཅུང་ཟད་མཛད་ཟེར། མངའ་བདག་རྩེ་ལྡེའི་ཆོས་འཁོར་ལ་བྱོན་པས་གསེར་ཅུང་ཟད་ཡོད་པ་སྟོར་བས་རྒྱལ་པོས་གསེར་མང་དུ་བསྐུར་སྲས་མངའ་བདག་དབང་ལྡེས་ཡོན་བདག་བགྱི་བར་ཆད་ནས་གཅན་ཁ་བོ་ཆ། རྔོ་སྟོན་ཁྱུང་པོ་ཆོས་བརྩོན། རྭ་ལོ། གཉན་ལོ་རྣམས་དང་འགྲོགས་སྟེ་བྱོན། ཡུལ་དབུས་དང་ཁ་ཆེ་ལ་སོགས་པར་པནྜི་ཏ་སཛྫ་ན་དང༌། འབུམ་ཕྲག་གསུམ་པ་དང༌། པ་ར་ཧེ་ཧ་དང༌། མཱ་ཧཱ་ཛ་ན་དང༌། སུ་མ་ཏི་ཀིརྟི་དང༌། ཨ་ཏུ་ལྱ་དང༌། བ་རེནྡྲ་རུ་ཅི་དང༌། སྐལ་ལྡན་རྒྱལ་པོ་ལ་སོགས་པ་མང་དུ་ལུས་སྲོག་ལ་བསྡོས་ནས་ཀྱང་བཙལ་ཞིང་བསྟེན། འབུམ་ཕྲག་གསུམ་པ་ལ་ཆོས་གསན་དུས་རྒྱ་ཚད་བསྙུང་བས་ཆོས་རར་སྐུ་སྨད་ཤོང་བའི་དོང་བྲུས་པར་བཞུགས་སྟེ་གསན། ཆོས་ཐམས་ཅད་གསན་པ་ཙམ་གྱིས་མཁྱེན་པས་གྲོགས་ཀྱིས་ཕྲ་དོག་གིས་སྐད་རིགས་གཞན་དུ་གསུང་བར་ཞུས་པས་སྐད་རིགས་ཐམས་ཅད་ལ་བྱང་བར་གྱུར། ཌོམྦི་ཧེ་རུ་ཀ་བྱོན་སྟེ་ངའི་སྟག་འཕོངས་ལ་ཞོན་མཁའ་སྤྱོད་ལ་འཁྲིད་གསུངས་པ་ན་བོད་ལ་གཟིགས་ནས་སྤྲིན་ནག་ལིང་བ་ཕ་གིའི་འོག་བསྟན་(ད༤༠བ)
པ་ཉི་མ་ཤར་བ་ལྟ་བུ་ཞིག་མ་བྱས་པར་མི་འགྲོ་གསུངས་སྐད། བོད་དུ་གསེར་སློང་གི་འཕྲིན་ཡིག་མཛད། ལོ་བཅུ་བདུན་སྦྱངས་པ་མཛད་ནས་བོད་དུ་བྱོན། སྔོན་ཁུ་བོ་དང་ཕྱིས་མཁར་ཕུ་བ་ལ་བཀའ་གདམས་གསན། རྒྱལ་ཡུམ་གཉིས་དང་བསྟན་བཅོས་གཞུང༌། །འབུམ་ཕྲག་གཅིག་དང་ཁྲི་ཕྲག་གསུམ། །སྟོང་ཕྲག་གསུམ་ནི་ལྷག་བཅས་བསྒྱུར། །ཞེས་བོད་ཀྱི་ལོ་ཙཱ་བའི་ནང་ན་ཆོས་བསྒྱུར་བ་མང༌། དཔེ་ཆ་གང་གཟིགས་ཀྱང་ཐ་ན་ཚེག་ཤད་ཙམ་ལའང་ཞུས་དག་མཛད། ཆོས་གཞི་བསྐོར་བའི་གནས་ཀྱང༌། ལྷ་ས་བསམ་ཡས་སྒང་ཐོག་དང༌། །ལྷ་ཡངས་པ་ལམ་མྱུག་གུ་སྣར། །འཁོར་གྱི་གྲངས་ནི་རིམ་པ་བཞིན། །ཁྲི་དང་སུམ་སྟོང་བདུན་བརྒྱ་དང༌། །གཉིས་སུ་སྟོང་ཚོ་བཅུ་གསུམ་ཚོགས། །ཁྲི་ཚོ་གཉིས་དང་ཁྲི་ཚོ་གཅིག །རྣལ་འབྱོར་ཕོ་མོ་ཁྲི་ཚོ་གཉིས། །ཚོགས་སོ་ལུང་རིགས་སྨྲ་བ་ཡི། །ཞར་ཆོས་སྟོང་དང་བརྒྱད་བརྒྱ་དང༌། །བརྒྱད་བཅུ་རྩ་ལྔ་ཡོད་པ་ལ། །རྒྱན་དང་ཆོས་མཆོག་ལྔ་བཅུ་ལྔ། །རྣམ་ངེས་ཉིས་བརྒྱ་ལྔ་བཅུ་ལྔ། །ལུང་ཆོས་སྨྲ་བ་སྟོང་དང་ནི། །ལྔ་བརྒྱ་བདུན་བཅུ་རྩ་ལྔ་ཡོད། །ཅེས་སོ། །གསང་མདའ་ཤ་བ་རྩར་བྲག་རིའི་བར་དུ་ཆོས་གསུང་དུས་ཚངས་པའི་གསུང་མངའ་བས་གསུང་ལ་ཉེ་རིང་མེད་ཀྱང་ཞལ་ལྟ་བའི་ཕྱིར་མི་རེའི་ཤུལ་ལ་གསེར་སྲང་ཕྱེད་མའི་ཉོ་ཚོང་བྱེད། ཕྱིས་སྐུ་དར་ཡོལ་གྱིས་བསྐོར་བའི་ནང་ནས་ཞལ་བྲག་ལ་གཏད་ནས་གསུང་ཚེ་ཆུ་ཕར་ཁ་ཐམས་ཅད་ནས་ཉན། མཇུག་དུ་ལེགས་པར་གསུངས་སོ་ཞེས་ཀ་ཝ་ལི་ཁ་བཏབ་པའི་སྐད་ཀྱིས་རིའི་ཕྱུགས་ཁྱུག་འདྲོགས་སྐད། བཀའ་བསྟན་འགྱུར་ཐམས་ཅད་ཐུགས་ལ་མངའ། སངས་རྒྱས་ཀྱི་འཁོར་འདུས་པ་ཆུང་ངུ་ཙམ་རྟག་དུ་འདུ། ལོ་བཅུ་བདུན་འགྲོ་དོན་མཛད། སློབ་དཔོན་སྐལ་ལྡན་རྒྱལ་པོ་དང་པོར་ཕྱི་པ་ཡིན་པ་དང༌། དགེ་སློང་(ད༤༡ན)
ལ་དུད་འགྲོ་བསད་པ་ལྟུང་བྱེད་འབའ་ཞིག་པ་ལས་མེད་པར་གོ་བས་ཕྱི་པའི་ལྷ་དངོས་གྲུབ་མྱུར་བས་སྤང་མ་ནུས་པར་སྲོག་གི་མཆོད་སྦྱིན་བྱེད་པ་མ་འཕྲིགས། བོད་དུ་སྤྱན་འདྲེན་དགོས་གསུངས་ནས་བལ་པོའི་བར་བྱོན། ཉིན་གཅིག་ར་བསད་པའི་མཆོད་སྦྱིན་བྱས་པ་དགོངས་ནས་བོད་ལ་དར་དྭོགས་གདན་མི་འདྲེན་པར་ཞུས་པས་བླ་མ་གཤིན་རྗེའི་གཤེད་ཀྱི་ནུས་པ་ཅན་ཐུགས་ལོག་ནས་སྦྱིན་སྲེག་བྱས། ལོ་འགའ་ན་དྲིས་པས་འཕྲིན་ལས་ཤིན་དུ་ཆེ་བར་ཤེས། སྦྱིན་སྲེག་ཉེར་ལྔས་འཁོར་བསྒྱུར། ལྔ་བཅུས་སར་གནས་ཀྱི་སེམས་དཔའ་དགྲོལ་བས་དེ་བྱས་ཀྱང་མ་གྲོངས་ཟེར། སླར་བརྒྱ་རྩ་བརྒྱད་ཀྱིས་དག་ས་པ་དགྲོལ་བར་བཤད་པ་བྱས་པས་རྟགས་བྱུང་ནས་རི་ཡ་རི་མ་རིའི་འགྲམ་ཀླུ་བྱར་བྱིང་གསུམ་གྱི་མཚམས་སུ་སྒུར་སྡོད་ཅེས་འཕྲིན་བསྐུར། དེར་ཕེབས་པ་ན་བསྙུང་བས་གཎྜི་རྡུངས་གསུངས་པས་གཎ་གཡོག་མ་བྱུང༌། དུང་བུས་གསུངས་པས་རྩམ་པའི་སྣོད་དང་འབྲེལ་བས་སུབས། བཙུན་ཆུང་ཞིག་ལ་གཞུང་ཞིག་ཐོན་གསུངས་པས། ལྷ་ཡི་རྒྱལ་པོས་ཆར་ཕབ་ཀྱང༌། །ས་བོན་མི་རུང་མི་འཁྲུང་ལྟར། །སངས་རྒྱས་རྣམས་ནི་བྱོན་གྱུར་ཀྱང༌། །སྐལ་བ་མེད་པས་བཟང་མི་མྱོང༌། །ཞེས་ཟེར། ད་དུང་ཞིག་ཐོན་གསུངས་པས། སྐར་མ་རབ་རིབ་མར་མེ་དང༌། །སོགས་བཏོན་པས། མཐུ་འདི་ཟློག་ཐུབ་པར་འདུག་སྟེ་དམ་ཚིག་གི་སེལ་དུ་འགྲོ་བས་མི་ཟློག་གསུངས། འདི་ལ་འཛེགས་ནས་རྒྱ་མཚོའི་ཕ་རོལ་ཏུ། །འགྲོའོ་སྙམ་ནས་རྒྱ་མཚོར་འཇུག་པ་གང་ཡིན་པ། །ལྦུ་བ་རྡོས་འདྲ་རབ་ཏུ་འཇིག་པའི་ལུས་འདི་ནི། །རི་མཆོག་འདྲ་བའི་རང་བཞིན་འདིས་ནི་གཏན་ནས་བསླུས། །ཁྱེད་ཀྱང་སྡེ་སྣོད་ཆོས་ལ་སྦྱོངས་ཤིག་རིག་པ་ཡི། །ཆོས་ཉིད་མཐོང་བས་ཚད་མའི་ངེས་ཤེས་སྐྱེ་བར་འགྱུར། །ཞེས་བུའི་ཐུ་བོ་ཞང་དང་གྲོ་ལུང་པ་ལ་གསུངས་སྟེ་མ་རིའི་རྩར་མྱ་ངན་(ད༤༡བ)
ལས་འདས། སྤུར་ཤིང་རྟ་ལ་གདན་དྲངས་ཚེ་ས་གཡོས། འཇའ་འོད་དང་སྒྲ་ཆེན་པོ་བྱུང༌། གསངས་སྟེ་བརྫུས་མ་སྤྱན་དྲངས་པས་བསམ་ཡས་ཀྱི་རྒན་མོ་ཞིག་ན་རེ། ལོ་ཙཱ་བ་ཆེན་པོ་དེ་བསམ་ཡས་ཀྱི་རྒྱ་སྒོ་ལ་ངེས་པར་དབུ་ཞྭ་འབུད། ང་ལ་ཡང་གསོལ་རས་རེ་སྐྱེལ། དེའི་རིང་བྱ་རྣམས་ཀྱང་འབུ་མི་ཟ་བ་ཡིན་པ་ལ་དེ་རྣམས་མི་འདུག་པས་གཤེགས་ངེས་ཟེར་སྐད། གསང་མདར་གདུང་སྦྱངས་པས་སྟོན་པའི་སྐུ་སོགས་རྟེན་ཁྱད་པར་ཅན་བྱོན། སློབ་མའི་ཚོགས་མཐའ་ཡས་ཀྱང་གཙོ་བོ་ཞང་ཚེ་སྤོང་ཆོས་ཀྱི་བླ་མ། ཞང་གྲོ་ལུང་པ་བློ་གྲོས་འབྱུང་གནས། འབྲེ་ཤེས་རབ་འབར། ཁྱུང་རིན་ཆེན་གྲགས་སྟེ་སྲས་ཀྱི་ཐུ་བོ་བཞི། གངས་པ་ཤེའུ། གོང་བུ་རྭ་ཅན། ཤམ་པོ་མེ་དིག་མེ་ལྷང་ཚེར། དམར་སྒ་ལང༌། རྔོག་སྐྱ་བོ། ཀྲེ་བོ་མཆོག་བླ་སོགས་མང་དུ་བྱོན། ལམ་རིམ་ཡང་མཛད་ཅིང༌། གྲོ་ལུང་པས་ཀྱང་བསྟན་རིམ་ཆེན་མོ་མཛད་དེ་དངོས་སློབ་ཡན་ཇོ་བོའི་ལུགས་མཛད་ཏོ། །ཞང་ཚེ་སྤོང་ནི་གཉལ་ཆོས་སྒོ་ཤོ་བོར་ཚེ་སྤོང་དུ་འཁྲུངས། གྲོ་ལུང་པ་འཁྲུངས་སའང་ཕྱོགས་མཐུན་དུ་ཡོད། ཚེ་སྤོང་གིས་གསང་ཕུའི་གདན་ས་ལོ་སོ་ལྔ་མཛད། འདུ་ཁང་བཞེངས། གྲོ་ལུང་པས་ལོ་ཆེན་གྱི་ཐུགས་དང་ན་བཟའ་བཞུགས་སྟན་བཞུགས་པའི་མཆོད་རྟེན་དང་འདྲ་འབག་གི་ཐང་ཆེན་བརྒྱ་རྩ་བརྒྱད་བཞེངས། ལོ་ཆེན་གྱིས་བསྒྱུར་རྩོམ་མཛད་པ་ཐམས་ཅད་ཚར་གསུམ་དུ་བཞེངས་སྟེ་གཅིག་གསང་ཕུར་ཕུལ། གཅིག་སྐུ་འབུམ་དུ་བཞུགས། གཅིག་དྲིན་ལས་ཀྱི་སྡེར་བཞག་གསང་སྔགས་ལ་ད་ལྟ་གྲོ་ལུང་ཧྲལ་མོ་མཁས་ཅེས་རྡོ་རྗེ་གདན་གྱི་སྒོ་གོང་ལ་མཁའ་འགྲོ་མས་ཡི་གེ་ལན་གསུམ་བཏབ་པ་དང་པོ་གཉིས་ཕྱི་རོལ་པས་ཕྱིས། ཕྱི་མ་ཕྱི་མ་ཐུབ། གསང་ཕུར་བཞུགས་དུས་གཉལ་ནས་རྒྱགས་ལེན་པ་ལ་ཞག་རེས་འཁོར་སྐང་སྟེ་(ད༤༢ན)
རྫུ་འཕྲུལ་མངའ་བར་བྱེད། ཟུར་ཆོས་པ་སྐུ་འབུམ་གྱི་ཤར་དུ་ཕྱ་པས་ཚད་མ། ལྷོར་རྒྱ་མ་ཆིང་རུ་བས་བྱམས་ཆོས། ནུབ་ཏུ་རིན་ཚུལ་གྱིས་མངོན་པ། བྱང་དུ་ཡོན་ཏན་ཤེས་རབ་ཀྱིས་འདུལ་བ་འཆད། དྲིན་ལས་ཀྱི་ཐང་དེ་དགེ་འདུན་གྱིས་གང་བའི་ཀ་ཝ་ལི་ཁ་བཏབ་པའི་སྒྲས་ཆུ་བྱང་ཁའི་རྟ་པ་འདྲོགས་སྐད། དྲིན་ལས་དང་ས་ཆུང་ཆོས་བར་མཛད་ཚེ་མཛོ་དཀར་པོ་ཅིག་ལ་དྲིན་ལས་ཀྱི་རྒྱ་སྒོའི་ནང་ནས་བཅིབས་སྟེ་བརྒྱད་སྟོང་པ་ཞལ་ཐོན་མཛད་ཅིང་བྱོན་པས་སབ་ཆུང་གི་རྒྱ་སྒོའི་ནང་དུ་ཕེབས་པ་དང་རྫོགས་སོ་འགྲིག །མར་ལའང་དེ་ལ་བྱུང་བས་ངའི་ཕྲིན་ལས་འདི་ཡུན་རིང་པོ་མི་ཡོང་བ་འདྲ་གསུང་སྐད། དང་པོར་ཡོ་བྱད་ཀྱིས་ཕོངས་ཀྱང་གུན་པ་ལྷ་རྗེ་ལས་ཛཾ་བྷ་ལའི་སྒྲུབ་ཐབས་གསན་པས་ཛཾ་ལས་གསེར་གྱི་སྦྲང་མའི་གཟུགས་ཀྱིས་གསོལ་དཀར་གྱི་ནང་དུ་འཁོར་བ་ཕྱིན་ལོངས་སྤྱོད་ཀྱི་རླབས་འཕྱུར། ལོ་ཙཱ་བ་ཆེན་པོའི་བཞེད་པ་ཇི་ལྟ་བ་འཛིན་ཞིང་བསྟན་བཅོས་མང་དུ་མཛད་དེ་ཚིག་གི་སྦྱོར་བ་ཁོ་ན་ཡང་མཁས་པའི་དབུས་ན་ཉི་མ་ལྟར་ལྷམ་མེའོ། །ཞང་ཚེ་སྤོང་གི་འོག་དུ་གསང་ཕུར་གཉལ་པ་རི་ལུས་ལོ་གཉིས། རྣམ་པར་བས་ལོ་བརྒྱད། དེ་ནས་གྲོ་ལུང་པ་སྤྱན་དྲངས་པས་ངའི་གྲོགས་མཆེད་ཚེ་སྤོང་གི་འོག་དུ་ང་འོས་པ་ཡིན་ཡང་དེ་རྗེས་འགའ་ཞིག་འདུག་ཟེར་བས་སུ་ཡིན་གྱི་གདན་སར་འགྲོ་བ་མི་ཡོང༌། ཟུར་ཆོས་པ་མཁས་པ་ཅིག་གདན་སར་གཏོང་ཞེས་ཕྱ་པ་གདན་སར་བསྐོས། འདི་སྟོད་ལུང་རྒྱ་དམར་བའི་སློབ་མ་ཡང་ཡིན། གདན་ས་ལོ་བཅོ་བརྒྱད་མཛད་དེ་ཆུ་གླང་ལ་ཐེགས། སློབ་མ་ཐུགས་སྲས་སེང་ཆེན་བརྒྱད་ཅེས། གཙང་ནག་པ་བརྩོན་འགྲུས་སེང་གེ །དན་འབག་སྨྲ་བའི་སེང་གེ །བྲུ་ཤ་བསོད་ནམས་སེང་གེ །རྨ་བྱ་རྩོད་པའི་(ད༤༢བ)
སེང་གེ །རྩགས་དབང་ཕྱུག་སེང་གེ །ཉང་བྲན་ཆོས་ཀྱི་སེང་གེ །འདན་མ་དཀོན་མཆོག་སེང་གེ །གཉལ་པ་ཡོན་ཏན་སེང་གེ །ཁ་ཅིག་གཙང་པ་འཇམ་དཔལ་སེང་གེ་ཡང་འདྲེན། རྔོག་སྲས་ར་མོ། ཁོན་སྲས་རྩེ་མོ། གཉོས་སྲས་དཔལ་ལ། ཁུ་སྲས་ནེ་ཙོ་སྟེ་ཇོ་སྲས་བཞི། འགར་དབང་གྲུབ། ཀོང་པོ་འཇག་ཆུང༌། ལྷོ་པ་སྒོག་ཟན། པར་ཕུ་བ་སྟེ་ཤེས་རབ་ཅན་བཞི། གཞན་ཡང་འཇད་པ་སྟོན་སྐྱབས་དང་རྡོ་རྗེ་འོད་ཟེར་སོགས་མཁས་པ་མང་དུ་བྱུང་ཞིང་ཁམས་མི་གསུམ་གྱིས་ཀྱང་ཐུག་གོ །ཕྱ་པ་འདི་ནི་བོད་སྐད་སྨྲ་བ་ལ་མཁས་པར་གྲགས། ཚད་མ་བསྡུས་པ་སོགས་མཛད་དེ་ཀློག་པ་པོ་རྣམས་ཀྱི་བསྡུས་པ་ཅེས་པའང་འདི་ནས་དར་རོ། །སྤྱིར་བྱེ་མདོའི་ལུགས་ལ་ཐུགས་ཚིས་ཆེ་ཞིང་སློབ་དཔོན་ཟླ་བའི་ལུགས་འགོག་པར་མཛད་ཏོ། །གཙང་ནག་པ་ནི་དང་པོར་ཤེས་རབ་ཆུང་བ་ལ་སྲི་མདའི་བྲག་དུ་མི་གཡོ་བ་བསྒྲུབས་པས་མི་དཀར་པོ་ཅིག་གིས་རལ་གྲིས་ལུས་བཏུབས་པས་སྣང་བ་ལ་བྱུང་བ་ནས་ཐུགས་རབ་ཀྱི་ནམ་ནངས། ཕྱིས་འཇམ་དཔལ་བསྒྲུབས་པས་ན་མཁའ་རལ་གྲིས་གང་བར་གཟིགས་སྟེ་ཕྱིས་ས་པཎ་གྱིས་སྐྱེས་བུ་ཆེན་པོ་དེ་ས་ཐོབ་པའི་གནས་ཡིན་ཞེས་ཕུག་པ་དེ་ལ་ཕྱག་མཛད་པས་དུས་འདིར་ས་ཐོབ་པར་གྲགས། བསྟན་བཅོས་མང་དུ་མཛད་ཅིང་སློབ་དཔོན་ཟླ་བའི་ལུགས་ལ་མཆོག་དུ་མཛད། ཤིན་དུ་བཀྲེན་ཞིང་ཕྱིས་ས་སྐྱར་བཞུགས་ཟེར་བ་སོགས་ཀྱི་ངག་སྒྲོས་འཁྱམ་པོ་ནི་མི་དག་པར་སྣང་ངོ༌། །རྨ་བྱ་བྱང་བརྩོན་རྩོད་པའི་སེང་གེ་ཡང་རང་བཞིན་གྱི་གཟུགས་འདོད་རྒུར་བསྒྱུར་བ་གྲུབ་ཅིང་སློབ་དཔོན་ཟླ་བའི་ལུགས་མཛད། ཕྱ་པའི་གདན་སར་རྩགས་དབང་ཕྱུག་སེང་གེས་ལོ་ལྔ། དེ་གཉིས་ཀྱི་སློབ་མ་གཉལ་པ་དད་པ་བཟང་པོས་ལོ་བདུན། འཇམ་རྩེ་ནེས་ལོ་བདུན། (ད༤༣ན)
འདིའི་སློབ་མ་གཙང་པ་འཇམ་དཔལ་སེང་གེས་གླིང་སྟོད་དུ་བཤད་པས་གླིང་སྟོད་སྨད་གྱེས་སྟེ་གདན་ས་དངོས་གླིང་སྨད་ཡིན་པར་ཡར་ལུང་ཇོ་བོའི་ཆོས་བྱུང་དང་ཚལ་པའི་དེབ་དམར་ལས་བྲིས་པ། ཕྱིས་ཀྱི་གཉལ་ཞིག་བུ་དགུའི་ནང་གི་མཁས་པ་ཇོ་ནམ་གྱིས་གླིང་སྨད་དུ་བཤད་པས་གདན་ས་ཕྱེད་དུ་སོང་བས་གདན་ས་དངོས་གླིང་སྟོད་ཡིན་པར་གསང་ཕུ་བ་ཁ་ཅིག་གི་བྲིས་སྣང༌། དེབ་ཐེར་སྔོན་པོ་ན་རྩེགས་དང་གཉལ་པའི་བར་དུ་གཙང་པ་འཇམ་སེང་ལོ་གསུམ་ཞེས་བྲིས་ཤིང་གླིང་སྟོད་ཀྱི་གདན་རབས་ལ་གཉལ་པ་དང་འཇམ་རྩེ་མི་འདྲེན་པ་དེ་ནི་མ་ཡིན་ནོ། །འཇམ་རྩེ་ནེ་ཕྱིན་གླིང་སྨད་དུ་བཟང་བ་དར་མ་འོད་དང་བཟང་པ་དོན་གྲུབ་ཀྱིས་ལོ་སུམ་བཅུ་གཙང་པ་ཇོ་ནམ་གྱིས་འགྲལ་གྱི་ཆོས་གཞི་དང་གཉིས་དྲིལ་ནས་ལོ་བཅོ་ལྔ། དེའི་སློབ་མ་རོག་གིས་ཟླ་བ་དྲུག་འོད་ཟེར་མགོན་པོས་ལོ་སུམ་བཅུ་མཛད། སློབ་མ་འཇམ་དབྱངས་ཤཱཀ་གཞོན། དོན་གྲུབ་དཔལ། ཁ་རག་པ་བྱང་གཞོན་སོགས་བྱུང༌། འཇམ་དབྱངས་ཤཱཀ་གཞོན་གྱིས་ཚལ་གུང་ཐང་གི་བཤད་གྲ་བཙུགས། ལོ་དྲུག་ནས་གླིང་སྨད་ཀྱི་གདན་ས་ལོ་ཉེར་བདུན་མཛད། བློ་གྲོས་མཚུངས་མེད་ཕྱོགས་ལས་རྣམ་རྒྱལ། རྒྱ་སྡེ་བ་གཞོན་འོར་སོགས་མཁས་པ་མང་དུ་བྱུང༌། རྒྱ་མ་བ་བཀྲ་ཤིས་རྒྱལ་མཚན་ལོ་བརྒྱད། ཕྱོགས་ལས་རྣམ་རྒྱལ་ལོ་བརྒྱད་སོགས་གླིང་སྨད་པའི་སྐབས་སོ། །གླིང་སྟོད་དུ་གཙང་པ་འཇམ་དཔལ་སེང་གེ་འཇམ་སྟོན་རྡོ་རྗེ་ཤེས་རབ། ཞུ་སྟོན་ཧྲལ་མོ། བློ་གྲོས་འབར། དེའི་འོག་དུ་གཉལ་ཞིག་འཇམ་པའི་རྡོ་རྗེ་མཚན་དངོས་ཤེས་རབ་བློ་གྲོས་ནི་གཉལ་སེ་ཁུན་པ་ཞང་གཡེ་པ་དང་ངན་འབག་སྨྲ་སེང་གི་སློབ་མ་ཡིན། གྲུབ་པ་ཐོབ་པར་གྲགས། གདན་ས་ལོ་ཉེར་བརྒྱད་མཛད། གསང་ཕུ་ནས་སྣོན་(ད༤༣བ)
ལ་འབྱོན་དུས་གྲ་པ་རྣམས་མདའ་བསྐོར། ཁོང་རང་རི་ལ་མ་ཐོགས་པར་འབྱོན་སྐད། གསོལ་དཀར་དང་ཕྱག་དཔེ་ན་མཁའ་ལ་བཞག་སྟེ་སྒྲོ་གླིང་མཛད་ཐལ་སྐད་བཏོན་པས་གདོན་བགེགས་ཡུལ་འབུད། གསང་ཆབ་ཀྱིས་ནད་གདོན་ཐམས་ཅད་ཞི་ཐུབ་པས་གསང་ཆབ་དང་འོ་མ་བརྗེ་བ་མི་ཐོབ་པ་ཡོད་སྐད། དེས་འུ་ཤང་རྡོར་ལོ་དགུར་མཚམས་བཅད་དེ་བཤད་པས་གཉལ་ཞིག་བུ་དགུ་ཞེས་གཟང་རིང༌། ཕུ་ཐང་དར་དཀོན། གཙང་པ་གྲུ་གུ་སྟེ་སྔ་ཚར་གསུམ། འུ་ཡུག་པ་བསོད་ནམས་སེང་གེ །བུ་དོང་རིན་རྩེ། གཙང་པ་ཇོ་ནམ་སྟེ་བར་ཚར་གསུམ། རྒྱ་མཆིང་རུ་བ། འཇམ་སར། སྐྱེལ་ནག་གྲགས་སེང་སྟེ་ཕྱི་ཚར་གསུམ་སྟེ་ཕྲིན་ལས་ཅན་དགུ་བྱུང་ལ། དེའི་གཟང་རིང་ནི་ས་པཎ་ལས་མྱུར་བའི་ཤེས་རབ་མངའ་བར་གྲགས། དེས་ཁྲོ་ཕུ་ལོ་ཙཱ་བ་རྩ་བའི་བླ་མར་བསྟེན་ནས་གྲུབ་པ་བརྙེས། ཁྲོ་ཕུར་བཤད་གྲ་མཛད་དེ་ཕྱིས་རྒལ་ཚིགས་ལ་སངས་རྒྱས་སུམ་བཅུ་སོ་ལྔ་དང་དབུ་ཐོད་ལ་སྨན་བླ་མཆེད་བརྒྱད་བྱོན། ལྷོ་པ་གྲུབ་སེང་ལ་སོགས་པའི་མཁས་པ་མང་དུ་བྱུང་ཞིང་སྟག་སྡེ་བ་སེང་གེ་རྒྱལ་མཚན་དང་དཔང་ལོ་ཆེན་པོ་དང་བུ་སྟོན་ཐམས་ཅད་མཁྱེན་པ་སོགས་ཀྱང་བཤད་རྒྱུན་དེ་ལ་བྱོན་པ་ཡིན་ནོ། །ཕུ་ཐང་པས་སྟོད་ལུང་མཚོ་སྨད་དང་ཡར་ལུང་སོགས་སུ་བཤད་པས་གཉན་དར་མ་སེང་གེ་དང་བྱ་ཡུལ་དཀར་མོ་སོགས་བྱུང༌། གཙང་པ་གྲུ་གུས་ཞ་ལུར་བཤད་གྲ་བཙུགས། འུ་ཡུག་པས་ས་པཎ་ལ་རྩོད་དུ་བྱོན་པས་གྲལ་དབུ་ཞིག་མཛད་ཀྱི་འདུག །ཁྲེས་པོ་མ་ཕོག་པར་དྲི་བ་མཛད་པས་དགེ་བའི་བཤེས་གཉེན་པ་རེ་ཞིག་ཆོས་སྟོན་གསོལ་གསུངས་བག་ཕབ་སྟེ་གཟང་རིང་མ་འཁུགས་པས་ས་སྐྱར་བཤད་གྲ་བཙུགས། ས་པཎ་གྱིས་ཤནྟི་པ་དང་མཉམ་པར་གསུངས། ཁོང་གིས་ཀྱང་ས་པཎ་ལ་རྣམ་འགྲེལ་གསན་ནས་བཤད་པས་རྣམ་འགྲེལ་དར། སྔོན་(ད༤༤ན)
ཚད་མ་བསྡུས་འབྲིང་ཁོ་ན་ལས་རྣམ་འགྲེལ་མ་དར་པ་ལས་ཆོས་རྗེ་ས་པཎ་གྱིས། ནུབ་པ་ཉིད་དུ་འགྱུར། ཞེས་པ་བསྟན་བཅོས་ཀྱི་མཐའི་ཚིག་སྤྲ་མ་ལེགས་པར་དགོངས་ནས། མཁས་པའི་པདྨ་རྒྱས་བྱེད་ཡིན། །ཞེས་པའི་ཤྩོ་ཀ་བསྣན་པས་རྣམ་འགྲེལ་ཆེར་དར་སྟེ་དེང་སང་ནི་འབྲིང་བསྡུས་ནུབ་པ་ལྟར་སྣང་སྟེ། རྗེ་བཙུན་གྱིས། ཕྱི་མའི་དུས་ན་བསྟན་བཅོས་ཀུན་གྱི་མིག་གཅིག་དུ་ནི་འདི་འགྱུར་རོ། །ཞེས་ལུང་བསྟན་པ་ཐོག་དུ་བབ་བོ། །བུ་དོང་རིན་རྩེས་བྲག་རམ་དུ་བཤད་གྲ་བཙུགས། སློབ་དཔོན་དར་འོད། དབུ་མ་པ་ཤེས་འབུམ། བོ་སྟོན་གྲགས་སེང༌། ཨོ་ཌྱན་པ་རིན་ཆེན་དཔལ་ལ་སོགས་མཁས་པ་མང་དུ་བྱུང༌། རྒྱ་མཆིང་རུ་བས་སྙེ་ཐང་བདེ་བ་ཅན་བཏབ། སངས་རྒྱས་དཔལ་དང་སྙགས་གྲགས་ཚུལ་སོགས་བྱོན། འཇམ་དབྱངས་སར་མ་བས་སློབ་དཔོན་གཉལ་ཞིག་ཉིད་དང་ཕྱོགས་ཆོས་དཔེ་ལ་འགྲོ་མི་འགྲོ་ལ་ཉིན་རངས་པ་གསུམ་དུ་བརྩད་པས་མཐའ་མའི་ཉིན་སློབ་དཔོན་གྱིས་དར་ཡུག་གནང་མང་ཇ་བསྐོལ་སྟེ་གནས་འདི་ལ་ང་འཇམ་དབྱངས་ལའང་མི་འདྲི་བསམ་པ་ཡོད་སྟེ་ཁྱོད་འཇམ་དབྱངས་དངོས་སུ་གདའ་གསུང་ནས་འཇམ་དབྱངས་སར་མར་བཏགས། རྐྱང་འདུར་དུ་བཤད་གྲ་བཙུགས། ཕྱིས་སྦྱོར་དྲུག་གི་གྲུབ་ཐོབ་ཏུ་གྱུར། རྒྱ་ནག་རི་བོ་རྩེ་ལྔར་ཡང་བྱོན། མཆིམས་ཆེན་པོས་བདག་རྐྱེན་མཛད་དེ་སྐྱེལ་ནག་གྲགས་སེང་གིས་སྣར་ཐང་དུ་བཤད་གྲ་བཙུགས་པ་ཚུགས་དཀའ་ནའང་མཆིམས་ཀྱི་གསུང་བཞིན་ཆང་པའི་མང་ཇ་མང་དུ་བསྐོལ་ནས་མཐའ་མ་ལ་ཆང་པ་ནི་ཕུལ་ཡོད། ད་སྒྲོ་གླེང་བྱེད་ཟེར་ནས་བྱས་པས་ལེགས་པར་ཚུགས་སྟེ་སྐྱི་སྟོན་གྲགས་འབུམ་དང་ཆུ་མིག་པ་སེང་གེ་དཔལ་སོགས་བྱུང༌། བཅོམ་ལྡན་རལ་གྲི་ནི་ཕུ་ཐང་བ་བསམ་ཡས་མཆོད་རྟེན་དཀར་པོ་པའི་གྲ་པ་བྱས། དགའ་བ་གདོང་དུ་དབྱར་ཉི་མ་བརྩོན་འགྲུས་ལ་ཕར་ཕྱིན་སློབ་ཚེ་ས་ནད་ཀྱི་རྟོག་(ད༤༤བ)
པ་བྱུང་ནས་སྣར་ཐང་དུ་མཆིམས་ཀྱི་གདན་སར་སྐྱོ་སྟོན་པ་ཕྱག་རྡོར་ལ་བསྙེན་པ་ལོ་བཅུ་གཉིས་ཉི་མ་མ་མཐོང་བར་བསྒྲུབས་པ་དེའི་དྲུང་དུ་བྱོན། སྣར་ཐང་གི་སྒོའི་ཐེམ་པ་ལ་ཞབས་བཞག་པ་དབུ་ལ་ཉི་མ་ཤར་བ་ཚོགས་དུང་བུས་པ་རྣམས་མཚུངས་པས་རྟེན་འབྲེལ་ལེགས་པར་བྱུང༌། ནད་འདི་ལ་ཞེད་མི་དགོས། རྣམ་ངེས་ཀྱི་གཞུང་དེ་གྲོག་པོ་ཕག་གིར་སྐྱོར་གསུངས། རྣམ་ངེས་སྟོང་བསྐྱར་བས་ས་ནད་ཡུལ་བུད། སྐྱི་སྟོན་གྲགས་འབུམ་ལ་བསྟེན་སྟེ་མཁས་པར་གྱུར་སྟེ་རིགས་པའི་རལ་གྲིར་གྲགས། སྣར་ཐང་དུ་བཤད་པ་མཛད་པས་སྡེ་སྣོད་འཛིན་པ་སུམ་གཉིས་འདུས་པར་གྲགས། མཁན་པོ་ཟི་དབོན། སྐྱི་སྟོན་ཤཱཀ་འབུམ་སོགས་མཁས་པ་མང་དུ་བྱོན། འཇམ་སྒེག་པག་ཤི་སློབ་མའི་མཆོག་ཡིན་ཡང་སློབ་དཔོན་ལ་འདྲེའི་སྡིགས་རི་བསྐུར་བས་ཐུགས་ལོག་སྟེ་འཁོར་མ་བྱུང་ནས་ས་སྐྱར་བཞུགས། ཕྱིར་ཧོར་རྒྱལ་པོ་བུ་ཡན་དུའི་བླ་མ་མཛད། འབུལ་བ་ཅི་བསྐུར་ཡང་མ་མཉེས་པ་ལ་ཕྱིས་རྒྱ་སྣག་སྒམ་གང་ཤོག་དུ་སྨྱུག་གུ་སོགས་ཕུལ་བས་མཉེས་སྟེ་ངའི་བུ་དེ་ལ་ཤེས་རབ་ཡོད་གསུངས་སྐད། དེས་ཀྱང་བསྟན་བཅོས་མང་དུ་མཛད་དེ་མཁས་པ་མཆོག་དུ་གྲགས། དེ་གཉིས་ཀའི་སློབ་མ་དབུས་པ་བློ་གསལ་བྱང་ཆུབ་ཡེ་ཤེས་ཀྱིས་འདུལ་བ་ལུང་གི་ལུང་རྒྱུན་རྒྱ་ནག་ནས་བླངས། བཀའ་བསྟན་འགྱུར་ལ་བམ་ཚད་འགྱུར་བྱང་སོགས་ངེས་པར་དཀར་ཆག་བརྩམས། འཇམ་སྒེག་གིས་ཡོ་བྱད་གནང་སྟེ་ལོ་ཙཱ་བ་བསོད་ནམས་འོད་ཟེར་དང་རྒྱང་རོ་བྱང་འབུམ་སོགས་གསུམ་གྱིས་དཀའ་བ་ཆེན་པོས་དབུས་གཙང་ཐམས་ཅད་ནས་ཕྱི་མོ་བཙལ་སྟེ་བཀའ་དང་བསྟན་བཅོས་བོད་དུ་འགྱུར་རོ་འཚལ་བཞེངས་སྟེ་སྣར་ཐང་བཀའ་འགྱུར་དང་སྣར་ཐང་བསྟན་འགྱུར་ཞེས་ཐོག་མ་ཡིན་ལ། ཕྱིས་བོད་ཡུལ་ཐམས་ཅད་དུ་མང་དུ་མཆེད་པ་ཡིན་ནོ། །གཉལ་ཞིག་དཔོན་སློབ་ཀྱི་སྐབས་གླིང་སྟོད་དུ་གཉལ་(ད༤༥ན)
ཞིག་ལ་འོག་དུ་རྒྱལ་བ་སེ་སྟོན། རྒྱ་མཆིང་རུ་བ། ཆུ་མིག་པ་སེང་གེ་དཔལ་འདི་སྣར་ཐང་གི་དགེ་བཤེས་ཡིན་ཡང་མཆིང་རུ་པ་ལ་རྩོད་དུ་ཡོང་པས་མ་ཐུབ་པར་དད་དེ་རྒྱ་མཆིང་གི་སློབ་མར་གྱུར་ཏོ། །ལྡན་མ་གྲགས་རིན་ལྷོ་བྲག་པ་སོགས་བྱུང་ངོ༌། །ལོ་ཙཱ་བའི་སློབ་མ་ཞང་གཉིས་ཀྱི་སྐབས་སོ། །འབྲེ་ཤེས་རབ་འབར་གྱིས་ཉང་སྟོད་གནས་རྙིང་དུ་ཕར་ཕྱིན་བཤད། གཙང་པ་འབྲེ་སྒུར་ཨར་བྱང་ཡེས་སོགས་བྱོན་ལ་སྟོད་པ་དཀོན་མཆོག་མཁར་གྱིས་གདན་ས་མཛད་དེ་དབོན་རྒྱུད་ཀྱིས་འཛིན་ནོ། །གཙང་པ་འབྲེ་སྒུར་གྱིས་དགའ་བ་གདོང་བྱ་རོག་ཚང་སོགས་སུ་བཤད། ཨར་བྱང་ཡེ་སྐྱིས་གཅིག་པོར་འཕན་ཡུལ་ནས་སྒོ་ལ་ལ་བྱོན་པས་ས་འཕྱིས་སྟེ་ལ་ཐོག་དུ་གྲོག་སུལ་ཞིག་དུ་གཟིམས། དེར་བུ་མོ་མི་ངན་གྱིས་གོས་ཕྲལ་བའི་གཅེར་བུ་ཞིག་ཀྱང་བྱུང༌། དེ་འཁྱགས་ནས་འཆི་བར་འདུག་པས་ལུས་ཀྱི་དྲོད་ལ་བཅར་སྟེ། ན་ཚོད་མཉམ་པར་མ་དང་བུ་མོ་དང༌། སྲིང་མོའི་འདུ་ཤེས་སྐྱེད་བགྱི་གསུངས་པ་ཡིན། ཁྱོད་རང་ང་ལ་ཕའི་འདུ་ཤེས་ཞོག་ངས་ཁྱོད་ལ་བུ་མོའི་འདུ་ཤེས་བཞག་གི་ཆགས་པར་མ་བྱེད་ཅིག་གསུངས། བུ་མོ་དེས་སྔ་བར་ཕ་མའི་སར་ཕྱིན་སྟེ་འདི་འདྲ་བའི་དགེ་བཤེས་བཟང་པོ་ཞིག་འབྱོན་གྱི་འདུག་སྨྲས་པས་སྤྱན་དྲངས་སྟེ་ཕ་མས་རྒྱས་འབྲིང་བསྡུས་གསུམ་གྱི་གསུང་རབ་སོགས་ཕུལ། འདི་ནས་ཕྲིན་ལས་རྒྱས་པས་མཁས་མགོ་བཙུན་གྱིས་ཐོན་པ་ཨར་ཞེས་གྲགས་ཤིང་གནམ་ཙེང་ལྡེང་དང་གཞུ་ཀུན་ར། གནམ་རྫིང་ཁ་ལ་སོགས་པར་བཤད། གྲ་པ་དཔེ་འགྲེམས་བརྒྱད་བརྒྱ་ཙམ་འདུས། དཀར་ཆུང་རིང་མོ་དང་ཁུ་ཤེར་བརྩོན་སོགས་མང་དུ་བྱོན། དེ་གསུམ་ཀའི་སློབ་མ་ཞང་གཡེ་པས་མོན་འདྲ་དང་རྒྱ་གྲོང་འོར་ལ་སོགས་པར་མདོ་སྨད་ཚོ་བཞིའི་གྲ་པ་ལ་བཤད། མཁས་པ་བསོད་རིན། གཉལ་ཞིག་རྒྱལ་བ་སེ་སྟོན་སོགས་མཐའ་ཡས་པ་བྱོན། གྲལ་སྟན་ཟ་(ད༤༥བ)
འོག་ལ་བྱེད་པ་དང༌། མང་ཇ་རེ་ལ་ཇ་སིག་ཆེན་ལྔ་བཅུ་ཙམ་དགོས་པར་གྲགས། མཁན་པོ་བསོད་རིན། འགྲལ་ཤེས་རྒྱལ། གཙང་པ་ཇོ་ནམ་རྣམས་རིམ་པར་གདན་ས་མཛད། འདི་ཡན་དཔེ་ཐོག་ནས་འཆད་པ་ལ་འགྲལ་གྱིས་ཐོགས་ཐོག་ནས་བཤད་པས་ཆོས་བློ་འཆད་ཀྱི་སྔ་མར་གྲགས་སྟེ་དེ་ཕྱིན་གླིང་སྨད་པ་དང་འདྲེས་པ་ཡིན་ནོ། །འགྲལ་གྱི་སྐུ་ཚེའི་སྨད་ལ་ཤབ་འབྲེ་སྒང་དུ་བཤད་གྲ་བཙུགས། རྭ་གྲགས་ཤེ་སོགས་བྱོན། འབྲེ་ཨར་གྱི་ཆོས་གྲར་ལྷ་འདུ་བས་དྲི་ཞིམ་པོ་འོང་བར་གྲགས་ཤིང༌། དེ་ཕྱིན་གྱི་ཕར་ཕྱིན་པ་ཕལ་ཆེར་འབྲེ་ཨར་ལ་བསྟེན་པ་ཡིན་ནོ། །རྔོག་ལོའི་དངོས་སློབ་ལས་འབྲེ་ཁྱུང་གི་སྐབས་སོ། །མདོར་ན་དཔལ་ལྡན་གསང་ཕུ་འདི་ནི་བོད་ཀྱི་ཀློག་པ་པོའི་ཆུ་བོ་ཐམས་ཅད་ཀྱི་འབྱུང་གནས་གངས་རི་ལྟ་བུ་ཡིན་ལ་ཕྱིས་ཀྱང་མཁས་པ་ཆེན་པོ་གཡག་ཕྲུག་སངས་རྒྱས་དཔལ། དེའི་སློབ་མ་རོང་སྟོན་ཤེས་བྱ་ཀུན་རིག་དང༌། སྙེ་ཐང་བདེ་བ་ཅན་དུ་སྦྱངས་པ་མཛད་ཅིང་རེད་མདའ་པ་གཞོན་ནུ་བློ་གྲོས་ཀྱི་སློབ་མ་ཤར་ཙོང་ཁ་པ་ཆེན་པོ་རྣམས་སོ་སོའི་རྒྱུད་འཛིན་གྱིས་བོད་ཡུལ་ཁྱབ་པར་གནས་ཅིང་བཀའ་གདམས་ཀྱི་ལྟ་གྲུབ་འཛིན་པ་དེང་སང་མི་སྣང་ཡང་འདི་ཐམས་ཅད་བཀའ་གདམས་པ་ལས་འཕྲོས་པ་ནི་ཡིན་ལ། རྗེ་སྒམ་པོ་པ་ཕྱིན་གྱི་དྭགས་རྒྱུད་པ་རྣམས་ནི་བཀའ་ཕྱག་ཆུ་བོ་གཉིས་འདྲེས་ཅེས་ཟབ་མོ་ལྟ་བ་དང་རྒྱ་ཆེན་སྤྱོད་པའི་གཞུང་གཉིས་བཀའ་གདམས་དངོས་འཛིན་པ་ཡིན་ནོ། །བོད་ཡུལ་ན་བཀའ་གདམས་པར་གྲགས་པ་ཇོ་བོ་རྗེ་ཨ་ཏི་ཤའི་བཀའ་རྒྱུད་ཀྱི་སྐབས་སྟེ། ཆོས་བྱུང་མཁས་པའི་དགའ་སྟོན་གྱི་བོད་ཡུལ་གྱི་སྐབས་ལས་ཇོ་བོ་བཀའ་རྒྱུད་བཤད་པ་སྟེ་སྐབས་དྲུག་པའོ།། །།ཀྱཻ། ཡིག་བརྐོས་བྱེད་པོ་གཉལ་གྱིས་གང་བརྒྱུད་ནས། །ཚེ་དབང་དར་པོ་དཔོན་སློབ་དགུ་ཡིས་བགྱིས། །འདི་ཡི་རྣམ་དཀར་དགེ་བ་གང་མཆིས་པ། །ཕ་མས་གཙོ་བྱས་སངས་རྒྱས་ཐོབ་པར་ཤོག །མངྒ་ལཾ། །