དཀར་ཆག མཆོད་བརྗོད་་་་་་༡ རྣམ་ཐར་གྱི་ཆེ་བརྗོད་་་་་་༣ །ཐུན་མོང་སྲིད་པ་འཇིག་རྟེན་པའི་མཛད་པ།དང་པོ། གླེང་གཞི་དང་སྐུ་བལྟམས་པ།་་་་་༨ གཉིས་པ། སྡུག་བསྔལ་གྱི་བདེན་པ་ཕུལ་ཕྱིན་ཐུགས་ཉམས་སུ་བཞེས་པ།་་་་་་༢༡ གསུམ་པ། དགྲ་བོ་ཚར་བཅད་པ།་་་་་་་༢༩ མཆོག་གྱུར་ཞི་བ་མྱ་ངན་ལས་འདས་པའི་མཛད་པ། དང་པོ། བླ་མ་དང་ཞལ་མཇལ་བ།་་་་་་༥༠ གཉིས་པ། སྡིག་སྒྲིབ་མ་ལུས་སྦྱངས་པ།་་་་་༥༩ གསུམ་པ། དབང་དང་གདམས་ངག་ཐོབ་པ།་་་་་་་༩༣ བཞི་པ། ཉམས་རྟོགས་ཀྱི་མྱུ་གུ་འཁྲུངས་པ།་་་་་་༩༩ ལྔ་པ། རང་ཡུལ་དུ་ཕེབས་པ།་་་་་༡༡༦ དྲུག་པ། སྒྲུབ་པ་ལ་ཡི་དམ་བཅས་པ།་་་་་་༡༣༡ བདུན་པ། ཡེངས་མེད་དུ་རི་ལ་བསྒོམས་པ།་་་་་་་༡༣༩ བརྒྱད་པ། བསྟན་པ་དང་སེམས་ཅན་ལ་ཕན་བཏགས་པ་དང་དེ་རྒྱས་པར་ཕྱེ་བ་ མགུར་འབུམ 
་གྱི་སྐོར།་་་་་་་༡༨༧ མི་མ་ཡིན་གྱིས་མཐོ་འཚམས་པ་དམ་ལ་བཏགས་པའི་སྐོར་ལས་མི་ལ་ཤིང་ཐུན་གྱི་སྐོར།་་་་་་་༡༩༦ ལ་ཕྱི་ལ་བྱོན་པ་ཆུ་བཟང་གི་སྐོར།་་་་་་༢༠༣ གངས་མགུར་གྱི་སྐོར།་་་་་་༢༡༤ ལིང་པ་བྲག་སྲིན་མོའི་སྐོར།་་་་༢༢༨ རག་མའི་སྐོར་སྔ་མ།་་་་་་་༢༤༢ སྐྱང་ཕན་ནམ་མཁའ་རྫོང་གི་སྐོར།་་་་་་་༢༥༠ ཡོལ་མོ་གངས་རའི་སྐོར།་་་་་་༢༥༤ ཕུག་རོན་ལྷའི་བུ་མོས་མཆོད་པའི་སྐོར།་་་་་་༢༦༥ སྐལ་ལྡན་ཐུགས་སྲས་རྣམས་སྨིན་གྲོལ་ལ་བཀོད་པའི་སྐོར་ལས་བྲག་སྐྱ་རྡོ་རྗེ་རྫོང་གི་སྐོར་ཚོ་སྔ་མ།་་་་་་༢༧༠ རས་ཆུང་པ་དང་མཇལ་བའི་སྐོར།་་་་་་་༢༧༥ རྩ་ཕུ་རས་པ་དང་མཇལ་བའི་སྐོར།་་་་་་༢༨༢ རག་མའི་སྐོར་ཕྱི་མ།་་་་་་༢༨༦ སྟོན་པ་ཤཱཀྱ་གུ་ན་རྗེས་སུ་བཟུང་བའི་སྐོར།་་་་༢༩༧ དཔལ་དར་འབུམ་དང་མཇལ་བའི་སྐོར།་་་་་་༣༠༢ སེ་བན་རས་པ་དང་མཇལ་བའི་སྐོར།་་་་་་༣༡༤ འབྲི་སྒོམ་རས་པ་དང་མཇལ་བའི་སྐོར།་་་་༣༢༠ རས་པ་ཞི་བ་འོད་ཀྱི་སྐོར།་་་་་༣༢༢ ངན་རྫོང་སྟོན་པ་དང་མཇལ་བའི་སྐོར།་་་་་༣༥༣ དམ་པ་རྒྱགས་ཕུ་བ་དང་མཇལ་བའི་སྐོར།་་་་་་༣༦༣ མཁར་ཆུང་རས་པ་དང་མཇལ་བའི་སྐོར།་་་་་༣༦༥ རས་པ་དར་མ་དབང་ཕྱུག་དང་མཇལ་བའི་སྐོར།་་་་༣༦༩ ན་མོ་བོན་ཆུང་བཏུལ་བའི་སྐོར།་་་་་༣༧༦ བྲག་སྐྱ་རྡོ་རྗེ་རྫོང་གི་སྐོར་ཚོ་ཕྱི་མ།་་་་་་༣༨༧ གཤེན་སྒོམ་རས་པ་དང་མཇལ་བའི་སྐོར།་་་་་༣༩༩ རས་ཆུང་མ་དང་མཇལ་བའི་སྐོར།་་་་་༤༡༥ ཁྱི་ར་རས་པ་དང་མཇལ་བའི་སྐོར།་་་་་་༤༣༠ ཁོ་ཁོམ་རྒྱལ་པོས་མཆོད་ཅིང་ཚེ་རིང་མས་གླགས་བལྟ་ཕྱིར་མྱུལ་བའི་སྐོར།་་་་་་༤༤༢ ཚེ་རིང་མཆེད་ལྔས་དྲོད་ཉུལ་བ་དང་ཞུས་ལན་གྱི་རིམ་པ།་་་་་་༤༥༡ རས་པ་རྡོ་རྗེ་དབང་ཕྱུག་གི་སྐོར།་་་་་་༥༢༡ དྷརྨ་བོ་དྷི་དང་མཇལ་བའི་སྐོར།་་་་་༥༢༤ ཕྲག་དོག་གི་རྩོད་པ་རྫུ་འཕྲུལ་དང་ནུས་པས་བཟློག་པའི་སྐོར།་་་་༥༣༡ རས་ཆུང་ཏི་པུའི་སྐོར།་་་་་༥༥༦ མེས་སྒོམ་རས་པའི་སྐོར།་་་་་༥༦༡ ས་ལེ་འོད་ཀྱི་སྐོར།་་་་༥༦༥ གཡག་རུའི་སྐོར།་་་་་་་༥༧༨ རྐྱང་མགུར་གྱི་སྐོར།་་་་་་༥༩༧ གླན་སྒོམ་རས་པའི་སྐོར།་་་་་་༦༡༢ དམ་པ་སྒམ་པོ་པའི་སྐོར།་་་་་་་༦༡༨ ལོ་སྟོན་དགེ་འདུན་གྱི་སྐོར།་་་་་་༦༥༩ འབྲེ་སྟོན་གྱི་སྐོར།་་་་་་༦༦༧ ལི་སྐོར་ཕྱ་རུ་བའི་སྐོར།་་་་་༦༧༢ ཁ་འཐོར་སྣ་ཚོགས་ཀྱི་སྐོར་ལས་བུ་སློབ་དང་ཉ་མའི་ཞུས་ལན་གྱི་སྐོར།་་་་་་༦༧༨ བོན་པོ་རིའི་སྐོར།་་་་་་༦༩༤ དབང་བསྐུར་དང་རབ་གནས་ཀྱི་སྐོར།་་་་་༧༠༡ གཤེན་རྡོར་མོ་དང་ལེགས་སེ་འབུམ་གྱི་སྐོར།་་་་་་༧༠༣ འཆི་བྲོད་ཐིགས་ཚགས་མའི་སྐོར།་་་་་་་༧༡༢ ཆང་གླུའི་སྐོར།་་་་་་༧༡༨ རམ་སྡིངས་གནམ་ཕུག་མའི་སྐོར།་་་་་༧༢༤ རས་ཆུང་དབུས་བཞུད་ཀྱི་སྐོར།་་་་་༧༣༡ ཐོང་ལའི་སྐོར།་་་་་༧༥༣ གཤིན་དོན་ཐུགས་རྗེའི་ལྕགས་ཀྱུ་དང་སྲིང་མོ་པེ་ཏ་བྱང་ཆུབ་ལ་བཀོད་པའི་སྐོར།་་་་་༧༦༠ གཉའ་ནང་པའི་ཉ་མ་རྣམས་ལ་མཇུག་གི་ཞལ་གདམས་གསུངས་པའི་སྐོར།་་་་་༧༦༨ ལྷ་རྗེ་གཡང་ངེའི་སྐོར།་་་་༧༧༣ དབུས་བཞུད་ཕྱི་མའི་སྐོར།་་་་་་༧༧༩ བཀྲ་ཤིས་བརྩེགས་ཀྱི་སྐོར།་་་་་༧༩༠ བྲིན་གྱི་ཉ་མ་སྤྱིའི་སྐོར།་་་་༧༩༣ བདུད་བཞི་ལས་རྒྱལ་བ་དང་སྔགས་པའི་ཞུས་ལན་གྱི་སྐོར།་་་་་༧༩༨ བུ་སློབ་རྣམས་སྤྲོ་བ་བསྐྱེད་པ་བཀོད་པ་སྐུའི་རྫུ་འཕྲུལ་བསྟན་པའི་སྐོར།་་་་་་༨༠༢ དགུ་པ། གཟུགས་སྐུ་ཆོས་དབྱིངས་སུ་ཐིམ་པ།་་་་་༨༡༣
(༡)མཆོད་བརྗོད། ན་མོ་གུ་རུ། ཆོས་སྐུའི་ལྷ་ལམ་མ་རིག་ཆུ་འཛིན་གདོད་བྲལ་དབྱིངས་ན་གཟུགས་སྐུ་ལག་པའི་ཉིན་མཚན་མགོན་ནི་བདུད་ཆུའི་སྒྲ་གཅན་རྩ་བྲལ་འཕྲིན་ལས་མཁྱེན་བརྩེའི་འོད་འགྱེད་མཐའ་ཡས་དཔལ་འབར་བས། །ཤེས་བྱའི་དངོས་ཀུན་ཁྱབ་ཅིང་འགྲོ་བ་རིགས་རོ་ལམ་རྒྱུད་དབང་པོ་སྐྱེ་གནས་དུས་ཀྱིས་བསྡུས་པའི་སྲོག་ལྡན་ཀུན་གྱི་ཆོས་ལ་རྨོངས་པའི་གློ་བུར་མུན་པ་མཐའ་དག་རབ་བསལ་ནས། །དུག་མདའི་དབང་གིས་སྒོ་མེ་མི་དགེ་ཕྱོགས་དང་མཚམས་བྲལ་ཕུང་པོས་འཕངས་པའི་ལམ་དུ་ཞུགས་དང་འཇུག་འགྱུར་ཞུགས་འབྲས་ཚོར་བ་ཉམས་མྱོང་ཀུན་ལས་ཕྱིར་ལྡོག་བདེ་བར་ངལ་བསོས་ཏེ། སླར་ཡང་རྣམ་བྱང་རྒྱུ་ལམ་དག་ལ་བཀོད་ནས་འབྲས་བུ་དབང་ཕྱུག་ཀླུ་ལྡན་ཚེ་འདིར་སྩོལ་མཛད་མཁའ་མཉམ་འགྲོ་བའི་དཔལ་མགོན་མི་ལ་ཞེས་གྲགས་སྟོབས་བཅུ་མངའ་བ་དེ་ལ་འདུད། །ཁྱོད་ཐུགས་ཐུགས་རྗེའི་ཆུ་གཏེར་འཕྲིན་ལས་འགྲོ་དོན་རྦ་རླབས་འཐོར་ལས་ཡེ་ཤེས་ཐིགས་དང་དད་སོགས་ནོར་བུས་བདག་བློ་རྨིག་རྗེས་རབ་གང་ཉོན་མོངས་ཚད་གདུང་དབུལ་ཕོངས་ཀུན་བསལ་བས། །སྲེད་ལྡན་སྐྱེ་བོས་རྒྱན་སྤྲས་བཟང་མོ་དབེན་པར་བཏུས་ཚེ་ཚངས་སྤྱོད་སྨོན་ཡང་ལང་ཚོའི་དཔལ་གཟིས་བགྲོད་པ་ཕྱིར་བསྣུར་ཙམ་ལའང་བཟོད་གླགས་བྲལ་ཕྱིར་འཕྲལ་དུ་དགའ་བས་དགའ་བ་ལྟར། །
(༢)རྣམ་ཐར་ཡིད་འཕྲོག་མཛེས་མ་ཐུགས་རྗེའི་རྒྱན་སྤྲས་སྐལ་ལྡན་རྣ་བར་ལྷུང་ཚེ་གབ་པར་རློམ་ཡང་ངོ་མཚར་དཔལ་གཟིས་ཁོང་འཛུམ་གད་རྒྱངས་ཤོར་ཕྱིར་འཕྲལ་དུ་ཡི་གེའི་དགའ་སྟོན་འགྱེད། །དེ་ཕྱིར་རྣམ་ཐར་ནོར་བུའི་གབ་རྒྱའི་དྲི་མ་དད་བརྩོན་སྤོས་ཆུས་བྱི་དོར་བགྱིས་ནས་འགྲོ་བའི་དོན་དུ་ཐུབ་བསྟན་རྒྱལ་མཚན་རྩེ་མོར་མཆོད་པས་བླ་མ་མཁའ་འགྲོས་གནང་དུ་གསོལ། །
(༣)རྣམ་ཐར་གྱི་ཆེ་བརྗོད། དེ་ཡང་བོད་གངས་ཅན་གྱི་ཁྲོད་འདིར་དང་པོར་མེ་འོབས་ལྟ་བུའི་འཁོར་བ་མཐའ་དག་གི་ཉེས་དམིགས་ལ་ཐུགས་སྐྱོ་ཞིང་ངེས་པར་འབྱུང་བས་མཐོ་རིས་ཀྱི་ལྷ་ཚངས་པ་དང་བརྒྱ་བྱིན་གྱི་བདེ་བ་ལ་ཡང་སྨོན་པ་སྐད་ཅིག་ཙམ་ཡང་མེད་པའི་ཞེན་ལོག་དང་ལྡན་པ། པད་ཚལ་ལྟ་བུའི་ཐར་པ་དང་ཐམས་ཅད་མཁྱེན་པའི་ཡོན་ཏན་མཐོང་བས་ཡིད་འཕྲོགས་ཏེ་ཆོས་ཕྱིར་དུ་ལུས་སྲོག་གཏོང་བ་ལ་ཉམ་ང་དང་བག་ཚ་ཅུང་ཟད་ཙམ་ཡང་མེད་པའི་དད་བརྩོན་ཤེས་རབ་སྙིང་རྗེར་ལྡན་པ། བར་དུ་བླ་མ་དམ་པས་རྗེས་སུ་བཟུང་ཞིང་ཞལ་ནས་བྱུང་བའི་བདུད་རྩི་དབེན་པའི་རི་ཁྲོད་དུ་མྱངས་པས་ཉོན་མོངས་པའི་འཆིང་བ་ལས་གྲོལ་ཏེ་ཉམས་དང་རྟོགས་པའི་མྱུ་གུ་འཁྲུངས་པ། འཇིག་རྟེན་བློས་བཏང་གི་ཞེ་བཅད་དྲག་པོས་སྒྲུབ་པའི་རྒྱལ་མཚན་ལྷུར་མཛད་པའི་མིག་རྐྱེན་མཆོག་གིས་རྗེས་འཇུག་གི་སྐལ་ལྡན་རྣམས་འཇིག་རྟེན་གྱི་སྣང་ཞེན་དང་ལེ་ལོ་མེད་པར་ལམ་སྒྲུབ་པའི་ལྕག་ཐེབས་པ། ཡི་དམ་མཁའ་འགྲོས་རྗེས་སུ་བཟུང་ནས་ལམ་གྱི་གེགས་སེལ་ཞིང་བོགས་བཏོན་པས་ཉམས་རྟོགས་གོང་འཕེལ་དུ་རྒྱས་ཏེ་ཆོས་ལ་རང་བྱན་ཚུད་པ། རྒྱུད་པ་གོང་མ་ལ་མོས་གུས་མཐར་ཕྱིན་པས་ཐུགས་རྗེའི་བཀའ་བབས་ཏེ་རྒྱུད་པ་མཐའ་ཡས་ཤིང་མཉམ་པ་མེད་པའི་བྱིན་རླབས་ཀྱི་རྟགས་མཚན་དང་ལྡན་
(༤)པ། བྱང་ཆུབ་མཆོག་ཏུ་ཐུགས་བསྐྱེད་རྒྱ་ཆེ་ཞིང་ཤུགས་དྲག་པས་རྣམ་དཀར་གྱི་བག་ཆགས་མེད་པའི་སྐྱེ་བོ་རྣམས་ཀྱི་རྣ་བར་ཡང་གསུང་སྒྲོས་དང་མཚན་ལྷུང་བ་ཙམ་གྱིས་སྣང་བ་འགྱུར་ནས་དད་པའི་སྤུ་ལོང་གཡོ་ཞིང་མཆི་མ་འཁྲུག་བཞིན་པའི་ངང་ནས་བྱང་ཆུབ་ཀྱི་ས་བོན་བསྐྲུན་ཏེ་འཁོར་བ་དང་ངན་སོང་གི་འཇིགས་པ་མཐའ་དག་ལས་སྐྱོབ་ནུས་པ། གསང་སྔགས་ཕོ་ཉའི་ལམ་གྱི་གནད་ཟིན་པས་ཡེ་ཤེས་མཁའ་སྤྱོད་ཀྱི་རིག་མ་རྣམས་ཀྱིས་སྐུ་ལ་དགའ་བཞིའི་ཡེ་ཤེས་ཀྱི་བདེ་བ་བསྐྱེད་ཅིང་ལམ་སྒྲུབ་པའི་གྲོགས་སུ་གྱུར་པ། མཐར་སྒྲིབ་གཉིས་ལ་སོགས་པའི་སྤང་བྱ་མཐའ་དག་དབྱིངས་སུ་དག་པས་ཆོས་རྣམས་ཟད་སར་སྐྱོལ་བ། མཁྱེན་བརྩེ་ལ་སོགས་པའི་ཡོན་ཏན་མ་ལུས་པ་ཐུགས་ལ་རྫོགས་པས་རང་བྱུང་གི་སངས་རྒྱས་སུ་གྱུར་ཏེ་གྲུབ་མཐའ་ཕྱི་ནང་གི་གང་ཟག་ཀུན་གྱི་རྩོད་པ་དང་བྲལ་ཞིང་ཀུན་གྱི་ནང་ན་རྒྱལ་མཚན་གྱི་ཏོག་ལྟ་བུར་གྱུར་པ། བླ་མེད་རྡོ་རྗེ་ཐེག་པའི་ལམ་ལ་མྱུར་དུ་བསླབས་ཤིང་ཉམས་དང་རྟོགས་པ་མཐར་ཕྱིན་པ། ཆེ་བ་དཔའ་བོ་དང་མཁའ་འགྲོས་བརྗོད་ཕྱིར་སྙན་པའི་བ་དན་འཇིག་རྟེན་ཕྱོགས་བཅུ་ཀུན་ཏུ་གཡོ་བ། ཡས་བྱོན་གྱི་དགའ་བས་རྐང་མཐེབ་ཡན་ཁྱབ་ཅིང་མས་བརྟན་གྱི་དགའ་བ་སྤྱི་གཙུག་ཏུ་སོན་པས་འབྲས་བུའི་དགའ་བ་ལ་རེག་སྟེ་རྩ་གཙོ་མོ་གསུམ་དང་འཁོར་ལོ་བཞིའི་མདུད་པ་ཕྲ་རགས་ཐམས་ཅད་རང་སར་གྲོལ་བས་དབུ་མའི་ངོ་བོར་གྱུར་པ། དེའི་ཕྱིར་གསུང་རབ་མདོ་སྡེ་བཅུ་གཉིས་དང་རྒྱུད་སྡེ་བཞིའི་དགོངས་དོན་མཐའ་དག་རྡོ་རྗེའི་གླུར་ལེན་པ་ལ་ཐོགས་པ་མི་མངའ་བ། སྣང་བ་ཐམས་ཅད་ཆོས་སྐུར་ཤར་བས་བློ་གཉིས་འཛིན་གྱི་སྐོར་མགོ་ནས་བུད་
(༥)པ། ནང་རིག་པ་སེམས་ལ་སློབ་གཉེར་བྱས་པས་ཕྱི་སྣང་སྲིད་ཀྱི་དངོས་པོ་ཐམས་ཅད་དཔེ་ཆར་ཤར་བ། མཁྱེན་བརྩེའི་ནུས་པ་དཔག་ཏུ་མེད་པས་དུད་འགྲོར་གྱུར་པའི་སེམས་ཅན་ལ་ཡང་ཁྲིད་བཏབ་པས་སྨིན་གྲོལ་ལ་འགོད་ནུས་པ། ཆོས་བརྒྱད་ཀྱི་འདོར་ལེན་དང་གང་ཟག་གི་ངོ་འཛིན་བྲལ་བས་སྐྱེ་འགྲོ་ཀུན་གྱི་སྤྱི་བོས་བཏུད་དེ་ལྷ་མིར་བཅས་པའི་འགྲོ་བ་ཀུན་གྱི་མཆོད་གནས་སུ་ལྷན་མེ་ལྷན་ནེ་ལྷང་ངེར་བཞུགས་པ། ཟབ་མོའི་ལམ་སྒོམ་པའི་བརྩོན་འགྲུས་མཆོག་ཏུ་གྱུར་པས་རང་དང་སྐལ་བ་མཉམ་པའི་བྱང་ཆུབ་སེམས་དཔའ་རྣམས་ཀྱི་ཕྱག་གི་གནས་སུ་གྱུར་ཏེ་འགྲན་ཟླ་ཐམས་ཅད་དང་བྲལ་བ། ཉམས་སུ་མྱོང་བའི་བདག་མེད་ཀྱི་སེང་གེའི་ངར་སྐད་ཆེན་པོས་ལྟ་ངན་གྱི་རི་དྭགས་མཐའ་དག་ཟིལ་གྱིས་མནན་པས་ནམ་མཁའ་མཐའ་དབུས་མེད་པའི་གངས་རིའི་ཀློང་ན་སེང་གེ་དཀར་མོ་སྲབ་མེད་དུ་འཕྱོ་བ། ནང་ཟད་བར་གྱི་ཏིང་ངེ་འཛིན་ལ་མངའ་བརྙེས་པས་ཕྱི་འབྱུང་བཞིའི་གནོད་པ་ཐམས་ཅད་ཟིལ་གྱིས་མནན་ཞིང་དབང་དུ་མཛད་དེ་གྲོགས་སུ་ཤར་བ། རླུང་སེམས་ཀྱི་དབང་དམ་པའི་ཕ་རོལ་ཏུ་སོན་པས་ནམ་མཁའ་ལ་བྱ་ལྟར་ལྡིང་བ་དང་འགྲོ་འཆག་ཉལ་དང་འདུག་པའི་སྤྱོད་ལམ་སྟོན་ཅིང་། སྐུ་ལས་མེ་འབར་ཞིང་ཆུ་འཁྲུག་པ་དང་འདོད་དགུར་བསྒྱུར་བ་ལ་སོགས་ཏེ་བཀོད་པ་ལུས་ཀྱི་རྫུ་འཕྲུལ་ཡ་མ་ཟུང་དུ་མས་ལོག་ལྟ་ཅན་གྱི་ལྟ་ངན་སུན་དབྱུང་ནས་ཡང་དག་པའི་ལྟ་སྒོམ་སྤྱོད་འབྲས་ལ་འགོད་ནུས་པ། དབང་བཞིའི་ཉམས་ལེན་མཐར་ཕྱིན་པས་རྡོ་རྗེའི་ལུས་ཀྱི་ཡུལ་ཉི་ཤུ་རྩ་བཞི་ལ་དཔའ་བོ་དང་མཁའ་འགྲོ་སྤྲིན་བཞིན་དུ་འདུ་ཞིང་དེ་དག་གི་ཚོགས་ཀྱི་བདག་པོ་ཧེ་རུ་ཀར་
(༦)གྱུར་པ། ཉམ་ང་མེད་པའི་གདེང་དང་ལྡན་པས་ལྷ་མ་སྲིན་སྡེ་བརྒྱད་ཟིལ་གྱིས་མནན་ཏེ་བཀའ་བསྒྲུབས་པས་འཕྲིན་ལས་རྣམ་བཞི་ལྷུན་གྱིས་གྲུབ་པ། དངོས་པོའི་རྣམ་པ་ཐམས་ཅད་སྟོང་ཉིད་འོད་གསལ་གྱི་ངོ་བོར་མཁྱེན་ཅིང་སློབ་པའི་བཟོ་བོ། །ཡེ་ཤེས་ལྔའི་སྨན་སྦྱོར་གྱིས་དུག་ལྔའི་གཅོང་ནད་སུན་འབྱིན་པར་མཛད་པའི་སྨན་པ། འབྱུང་བ་ཕྱི་ནང་གི་རང་སྒྲས་ལེགས་ཉེས་ཀྱི་དོན་སྟོན་པ་ཀུན་དགོངས་ཤིང་དེ་ཐམས་ཅད་གྲག་སྟོང་དུ་མཁྱེན་པའི་སྒྲ་མཁན། གཞན་སེམས་ལ་སོགས་ཏེ་ལྐོག་གྱུར་གྱི་ཆོས་བཟང་ངན་ཐམས་ཅད་ས་ལེར་མཁྱེན་ཅིང་ཤེས་བྱ་མཐའ་དག་བདག་མེད་དུ་མངོན་སུམ་དུ་གཏན་ལ་ཕབ་པའི་ཚད་མ་མཁན། ཕྱི་དངོས་པོའི་ཆོས་ཐམས་ཅད་ནང་རིག་པ་སེམས་སུ་མཁྱེན་ལ་སེམས་གདོད་ནས་འོད་གསལ་སྐྱེ་མེད་སྟོང་པར་ཁོ་ཐག་ཆོད་ཅིང་དེ་འགག་མེད་དུ་ཤར་བའི་རང་རྩལ་སྐུ་གསུམ་འབྲལ་མེད་དུ་རང་གྲོལ་བ་སྟེ་སྙིང་པོ་དོན་གྱི་པཎྜི་ཏ་ཆེན་པོ། དག་པ་རབ་འབྱམས་ཀྱི་སངས་རྒྱས་ཀྱི་ཞིང་མཐའ་དག་རྫུ་འཕྲུལ་གྱིས་སྐད་ཅིག་ལ་ཉུལ་ནུས་ཤིང་རྣམ་བྱང་གི་མཛད་པ་ལ་བརྟེན་ནས། ཞིང་དེ་དག་གི་སངས་རྒྱས་དང་བྱང་ཆུབ་སེམས་དཔའ་རྣམས་ཆོས་འཆད་པ་དང་ཉན་པའི་གླེང་གཞིར་གྱུར་པས་སངས་རྒྱས་ཀྱི་ཞིང་མཐའ་དག་བྱང་ཞིང་དག་པར་མཛད་པ། རིགས་དྲུག་གི་སེམས་ཅན་རྣམས་ལ་རང་རང་གི་སྐལ་བ་དང་མཐུན་པའི་སྐུར་བསྟན་ནས་བློ་དང་འཚམ་པའི་ཆོས། དཔེ་འཇིག་རྟེན་གྱི་སྣང་བ་དང་བསྟུན་ཞིང་དོན་རྒྱལ་བའི་དགོངས་པ་དང་སྦྱར་ཏེ་བསྟན་པས་སྨིན་ཅིང་གྲོལ་བར་མཛད་པ་སྟེ། མདོར་ན་ཚེ་གཅིག་དང་ལུས་གཅིག་ལ་སྐུ་བཞི་ཡེ་ཤེས་ལྔའི་བདག་
(༧)ཉིད་ཁྱབ་བདག་རྡོ་རྗེ་འཆང་ཆེན་པོའི་གོ་འཕང་བརྙེས་ཏེ། ཚད་མེད་ཀྱི་ཐུགས་རྗེའི་ངང་ནས་བླ་མེད་ཀྱི་ཆོས་འཁོར་བསྐོར་བས་གཞལ་མེད་ཀྱི་སེམས་ཅན་རྣམས་བཟོད་མེད་ཀྱི་སྡུག་བསྔལ་ལས་བསྒྲལ་ཏེ། བདེ་ཆེན་སྐུ་བཞི་ལྷུན་གྲུབ་ཐར་པ་ཆེན་པོའི་གྲོང་ཁྱེར་དུ་སྐྱེལ་ཞིང་གནས་པར་མཛད་པའི་སྐྱེས་བུ་མཆོག་རབ་དམ་པར་གྱུར་པ། དཔལ་རྗེ་བཙུན་མི་ལ་བཞད་པ་རྡོ་རྗེ་ཞེས་མཚན་ཉི་ཟླ་ལྟར་ཡོངས་སུ་གྲགས་པ་དེ་ཉིད་ཀྱི་ཡ་མཚན་ཞིང་ངོ་མཚར་བའི་མཛད་པ། མཆོག་གི་གདུལ་བྱའི་སྣང་ངོར་བསྟན་པ་རྣམས་བརྗོད་ན་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་ནའང་། མདོར་བསྡུས་ན་གོང་གི་རྣམ་ཐར་གྱི་ཆེ་བརྗོད་ལྟར་ཡིན་ལ། ཐུན་མོང་གདུལ་བྱའི་སྣང་ངོར་བསྟན་པ་རྣམས་ཀྱང་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་བར་གྱུར་ཀྱང་། མདོར་བསྡུས་ན་གཉིས་ཡིན་ཏེ། ཐུན་མོང་སྲིད་པ་འཇིག་རྟེན་པའི་མཛད་པ་དང་། མཆོག་གྱུར་ཞི་བ་མྱ་ངན་ལས་འདས་པའི་མཛད་པའོ། །
(༨)ཐུན་མོང་སྲིད་པ་འཇིག་རྟེན་པའི་མཛད་པ། དང་པོ། གླེང་གཞི་དང་སྐུ་བལྟམས་པ། ཨེ་མ་ཧོ། འདི་སྐད་བདག་གིས་ཐོས་པའི་དུས་གཅིག་ན། རྣལ་འབྱོར་གྱི་དབང་ཕྱུག་རྗེ་བཙུན་མི་ལ་བཞད་པ་རྡོ་རྗེ་ཞེས་མཚན་ཡོངས་སུ་གྲགས་པའི་ཧེ་རུ་ཀ་ཆེན་པོ་དེ་ཉིད། ཡུལ་གཉའ་ནང་གྲོད་པ་ཕུག་ཅེས་བྱ་བའི་བསྟི་གནས་དམ་པ་ན། སྐྱེས་བུ་རས་ཆུང་རྡོ་རྗེ་གྲགས་པ་དང་། རས་པ་ཞི་བ་འོད། ངན་རྫོང་རས་པ། སེ་བན་རས་པ། ཁྱི་ར་རས་པ། འབྲི་སྒོམ་རས་པ། གླན་སྒོམ་རས་པ། རས་པ་སངས་རྒྱས་སྐྱབས། གཤེན་སྒོམ་རས་པ། དམ་པ་རྒྱགས་ཕུབ་དང་། སྟོན་པ་ཤཱཀྱ་གུ་ན་ལ་སོགས་ཏེ། ཐུགས་སྲས་རྣལ་འབྱོར་པ་སར་གནས་ཀྱི་སེམས་དཔའ་རྣམས་དང་། ལེགས་སེ་འབུམ་དང་གཤེན་རྡོར་མོ་ལ་སོགས་ཏེ་སྐལ་ལྡན་གྱི་ཉ་མ་ཕོ་མོ་རྣམས་དང་། ཇོ་མོ་ཚེ་རིང་མཆེད་ལྔ་ལ་སོགས་ཏེ། འཇའ་ལུས་མཁའ་སྤྱོད་གྲུབ་པའི་མཁའ་འགྲོ་མ་རྣམས་དང་། གཞན་ཡང་རྒྱུད་ཡོངས་སུ་དག་པའི་ལྷ་མིའི་རྣལ་འབྱོར་ཕོ་མོའི་ཚོགས་དང་བཅས་པའི་དབུས་ན་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་ཞིང་བཞུགས་སོ། །དེའི་ཚེ་སྐྱེས་བུ་རས་ཆུང་པ་ཁོང་རང་གི་བསམ་གཏན་ཁང་བུ་ན་ཐུགས་དམ་ལ་བཞུགས་པ་ལས། མཚན་ཐོག་ཐག་གཅིག་གི་མཚན་ལམ་ན། ཨུ་
(༩)རྒྱན་མཁའ་འགྲོའི་གླིང་ཡིན་ཟེར་བའི་ཡུལ་ཡིད་དུ་འོང་ཞིང་ཉམས་སུ་དགའ་བ། ཁང་ཁྱིམ་གྱི་རྒྱུ་དང་ས་གཞི་ཐམས་ཅད་རིན་པོ་ཆེ་དུ་མ་ལས་གྲུབ་པའི་གྲོང་ཁྱེར་ཆེན་པོ་ཞིག་གི་ནང་དུ་ཕྱིན་པས། གྲོང་ཁྱེར་དེའི་མི་ཐམས་ཅད་དར་གྱི་གོས་གྱོན་ཞིང་རུས་པ་དང་རིན་པོ་ཆེའི་རྒྱན་གྱིས་བརྒྱན་པ། བཞིན་བཟང་ཞིང་བལྟ་ན་སྡུག་པ་ཁོ་ན་འདུག་སྟེ། དེ་ཐམས་ཅད་བདག་ལ་ཚིག་ནི་མི་སྨྲ་བར་དགའ་བའི་འཛུམ་དང་ལྡན་པས་མིག་ཕལ་ཆེར་ཚུར་ཅེར་ལྟ་ཞིང་འདུག་པ་ལས། དེ་རྣམས་ཀྱི་ནང་ན་སྔར་བལ་པོར་མཇལ་བའི་བླ་མ་ཏི་པུ་པའི་སློབ་མ་བྷ་རི་མ་དེ་ཡང་གོས་དམར་པོ་གཅིག་གྱོན་ཏེ་གཙོ་མོའི་ཚུལ་དུ་འདུག་པས། ཚ་བོ་འོངས་སམ། འོངས་པ་ལེགས་སོ་ཞེས་བརྗོད་ནས་རིན་པོ་ཆེའི་ཁང་ཁྱིམ་འདོད་ཡོན་ཟད་མི་ཤེས་པས་གང་བ་ཞིག་གི་ནང་དུ་ཁྲིད་ནས། མགྲོན་གྱི་ཚུལ་དུ་བཟའ་བཏུང་གི་བསྙེན་བཀུར་བཟང་ཞིང་གྱ་ནོམ་པ་བྱས་ཏེ། ད་ལྟ་ཨུ་རྒྱན་ན་སངས་རྒྱས་མི་བསྐྱོད་པ་ཆོས་གསུང་གིན་ཡོད་པས་ཚ་བོ་རང་ཡང་ཆོས་ཞུ་ན་ངས་གནང་བ་ཞུའོ་ཟེར་བ་ལ། ཤིན་ཏུ་ཉན་པར་འདོད་ནས་ལེགས་སོ་བྱས་པས། འོ་ན་འདོང་ཟེར་མོ་དང་བསྡེབས་ཏེ་ཕྱིན་པས། གྲོང་ཁྱེར་དེའི་དབུས་ན་རིན་པོ་ཆེའི་ཁྲི་སྟན་མཐོ་ལ་ཡངས་པའི་སྟེང་ན། བཅོམ་ལྡན་འདས་མི་བསྐྱོད་པ་སྔར་ཡིད་ཀྱིས་བསྒོམས་པ་བས་ཀྱང་ཆེས་ཁྱད་པར་དུ་འཕགས་པ་ཞིག་འཁོར་རྒྱ་མཚོ་ལྟ་བུའི་དབུས་ན་ཆོས་སྟོན་པ་མཐོང་བས་དགའ་བ་དང་བདེ་བས་མྱོས་ཏེ་བརྒྱལ་འགྲོ་བ་ལྟ་བུ་ཞིག་ཐོབ། དེ་ནས་བྷ་རི་མ་ན་རེ་ཚ་བོ་རང་འདིར་རེ་ཞིག་སྡོད་ཅིག ངས་སངས་
(༡༠)རྒྱས་ལ་གནང་བ་ཞུས་འོང་གིས་ཟེར་སོང་བ་ལས་གནང་བ་ཐོབ་སྟེ། ཡང་མོས་ཁྲིད་ནས་སངས་རྒྱས་ཀྱི་ཞབས་དྲུང་དུ་ཕྱིན་ཕྱག་བཙལ། བྱིན་རླབས་ཞུས་ནས་སྤྱན་ལམ་དུ་ཆོས་ཉན་ཞིང་བསྡད་པས། ཞལ་འཛུམ་པ་དང་བཅས་པའི་ངང་ནས་ཅུང་ཞིག་བདག་ལ་སྤྱན་ཅེ་རེ་བཞུགས་འདུག་པ་ལས་བདག་ལ་བརྩེ་བས་དགོངས་པ་ཡིན་སྙམ་པ་བྱུང་། ཆོས་གསུང་བ་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཀུན་གྱི་གདུང་རབས་དང་འཁྲུངས་རབས་མཛད་པ་དང་རྣམ་ཐར་ཁོ་ན་གསུང་ཞིང་འདུག་པས་བ་སྤུ་གཡོ་བའི་དད་པ་ཐོབ། མཇུག་ཏུ་ཏཻ་ལོ་ནཱ་རོ་མར་པ་གསུམ་གྱི་རྣམ་ཐར་སྔར་རྗེ་བཙུན་གྱིས་གསུངས་པ་བས་ཀྱང་རྒྱས་ཤིང་ངོ་མཚར་ཆེ་བ་རྣམས་གསུང་བྱུང་བས་འཁོར་ཐམས་ཅད་མཆོག་ཏུ་དད་པར་གྱུར་འདུག །ཆོས་ཀྱི་མཇུག་ཏུ་ནངས་པར་གོང་དུ་བཤད་པ་དེ་རྣམས་ལས་ཀྱང་མཆོག་ཏུ་གྱུར་པ་མི་ལ་རས་པའི་རྣམ་ཐར་འཆད་པས་ཉན་དུ་ཤོག་གསུང་ཞིང་འདུག་པ་ལ། འཁོར་རྣམས་ཀྱི་ནང་ནས་ཁ་ཅིག་ན་རེ། གོང་གི་དེ་རྣམས་ལས་མཆོག་ཏུ་གྱུར་པ་བྱ་ཐབས་ཡོད་དམ། ཡོད་ན་ངོ་མཚར་ཚད་ལས་འདས་པ་ཞིག་ཡོད་པར་འདུག་ཟེར། ཡང་ཁ་ཅིག་ན་རེ། གོང་གི་དེ་རྣམས་ཀྱི་ཡོན་ཏན་ནི། སྐུ་སྐྱེ་བ་མང་པོར་ཚོགས་བསགས་སྒྲིབ་པ་སྦྱངས་པ་ལས་བྱུང་བའི་འབྲས་བུ་ཡིན། མི་ལ་རས་པ་ནི་ཚེ་གཅིག་ལུས་གཅིག་ལ་ཡོན་ཏན་གོང་མ་རྣམས་ལས་མི་ཞན་པ་ཐོབ་པ་ཞིག་ཡོད་པ་འདུག་ཟེར། ཡང་སྔ་མ་ན་རེ། འོ་ན་དེ་ལྟ་བུའི་ཆོས་ངོ་མཚར་ཆེ་བ་ཡོད་ནས་སེམས་ཅན་གྱི་དོན་དུ་མ་ཞུས་ན་རང་རེ་བུ་སློབ་རྣམས་ཞན་པས་སྒོ་གསུམ་བརྩོན་འགྲུས་དང་སྤོབས་པ་བསྐྱེད་དེ་འགྲོ་
(༡༡)བའི་དོན་དུ་ཞུ་བར་རིགས་སོ་ཟེར། ཡང་གཅིག་ན་རེ། མི་ལ་རས་པ་དེ་ད་ལྟ་གང་ན་བཞུགས་ཟེར། གཅིག་ན་རེ་མངོན་དགའ་འམ་འོག་མིན་གང་རུང་ན་ཡོད་པར་འདུག་ཟེར་བ་ལས། རས་ཆུང་བའི་ཐུགས་ལ། རྗེ་བཙུན་བཞུགས་དག་བོད་ན་བཞུགས་ཏེ། གང་ལྟར་ནའང་འདི་རྣམས་ཀྱི་ཟེར་ལུགས་འདི་ང་ལ་ངར་ལྡུད་པར་འདུག་པས། རྗེ་བཙུན་གྱི་རྣམ་པར་ཐར་པ་ཞིག་འགྲོ་བའི་དོན་དུ་ཅིས་ཀྱང་ཞུ་དགོས་སྙམ་པ་བྱུང་བའི་ཚེ། བྷ་རི་མ་དེས་རས་ཆུང་པའི་ཕྱག་ནས་བཟུང་སྟེ། ཅང་ཅང་ཁྲུག་ཁྲུག་མཛད་བཞིན་ཚ་བོས་གོ་བར་འདུག །ཚ་བོས་གོ་བར་འདུག་ཟེར་བའི་ངང་ནས་རས་ཆུང་པ་མནལ་སད་པ་ལས་ནམ་ཐོ་རངས་ཁར་སོང་འདུག་སྟེ། སྔར་བས་རིག་པ་དྭངས་ཤིང་དགེ་སྦྱོར་རྩལ་ཆེ་བར་བྱུང་བའི་ངང་ནས། མནལ་ལམ་གྱི་རྗེས་སུ་ཐུགས་འཕྲོས་པ་ལས། ཨུ་རྒྱན་མཁའ་འགྲོའི་ཚོགས་དབུས་སུ་མི་བསྐྱོད་པ་ལས་ཆོས་ཉན་པའང་ངོ་མཚར་ཆེ་མོད་དེ། དེ་བས་ཀྱང་བླ་མ་རྗེ་བཙུན་དང་མཇལ་བ་འདི་གང་ནས་བསམས་རུང་ངོ་མཚར་ཆེ། མི་བསྐྱོད་པ་ལས་ཆོས་ཉན་པའང་རྗེ་བཙུན་གྱི་བཀའ་དྲིན་ཡིན། ཁོང་རྣམས་རྗེ་བཙུན་མངོན་དགའ་འམ་འོག་མིན་གང་རུང་ན་བཞུགས་ཟེར་བ་ལ། བོད་ན་བཞུགས་སྙམ་པ་བླ་མ་ལ་བརྙས་བཅོས་ཀྱི་སྒོ་ནས་མཉམ་འགྲོགས་བྱེད་པའི་དྲེད་པོ་ཁྱོད་རང་གི་སྣང་ངོར་ཡིན་མོད། སྤྱིར་རྗེ་བཙུན་སངས་རྒྱས་ཡིན་པས་སྐུ་གསུང་ཐུགས་ཀྱི་མཛད་པ་བསམ་གྱིས་མི་ཁྱབ། ཁྱད་པར་དུ་རྗེ་བཙུན་རང་གང་ན་བཞུགས་པ་དེ་ཀ་འོག་མིན་དང་མངོན་དགའ་ཡིན་པར་ཡིད་མི་ཆེས་པའི་ཕུང་པོ་ལོག་ལྟ་མཁན་ཁྱོད་འདྲ་ཡོད་པ་ཞེས་རང་ལ་ངན་
(༡༢)སྨྲས་མང་དུ་མཛད་རྗེས། རྨི་ལམ་གྱི་ཆོས་འཆད་མཁན་དང་ཉན་མཁན་བྷ་རི་མ་དང་ཀུན་གྱི་བརྡ་དེ་རྣམས་ང་ལ་འགྲོ་བའི་དོན་དུ་རྗེ་བཙུན་གྱི་རྣམ་ཐར་ཞུས་ཀྱི་བརྡ་རུ་འདུག་པས་ཅིས་ཀྱང་ཞུ་དགོས་དགོངས་ནས། བླ་མ་ལ་མོས་གུས་ཐུན་མོང་མ་ཡིན་པ་ཞིག་སྐྱེས་ནས་གསོལ་བ་སྙིང་ཁོང་རུས་པའི་དཀྱིལ་ནས་བཏབ་སྟེ་དར་ཅིག་ཐུགས་དམ་གྱི་ངང་ལ་བཞག་པས། ཡང་མནལ་དང་འོད་གསལ་འདྲེས་པའི་ཉམས་ཀྱི་ངང་ལ་ཨུ་རྒྱན་གྱི་རྒྱན་དང་ཆ་ལུགས་ཅན་གྱི་ན་ཆུང་མཛེས་མ་དཀར་སྔོ་སེར་དམར་ལྗང་བ་ལྔ་རས་ཆུང་པའི་མདུན་ན་ཚུར་བསྒྲིགས་ཏེ་འདུག་པའི་གཅིག་ན་རེ། ནངས་པར་མི་ལ་རས་པའི་རྣམ་ཐར་གསུང་བ་ཡོད་པར་འདུག་པས་ཉན་དུ་འགྲོ་ཟེར། གཅིག་ན་རེ་ཞུ་བ་པོ་སུ་ཡོད་ཟེར། གཅིག་ན་རེ་ཐུགས་སྲས་བུ་ཆེན་རྣམས་ཀྱིས་ཞུས་ཏེ་འོང་ཟེར་བའི་ཚེ། ཀུན་རས་ཆུང་པ་ལ་མིག་འཛུམ་ཤིག་ཤིག་འདུག་སྐད། གཅིག་ན་རེ་ངོ་མཚར་ཅན་གྱི་ཆོས་ཉན་པ་ལ་ཀུན་སྤྲོ་བས་རང་རེ་རྣམས་ཀྱང་གསོལ་བ་བཏབ་པ་དྲག་ཟེར། གཅིག་ན་རེ་རྣམ་ཐར་ཞུ་བ་བུ་ཆེན་རྣམས་འོས། རང་རེ་རྣམས་ལ་དེའི་བསྟན་པ་སྤེལ་བ་དང་སྐྱོང་བ་བབ་པ་ཡིན་ཟེར་ནས་འཇའ་ཡལ་བ་བཞིན་སོང་། དེ་རྗེས་རས་ཆུང་པ་ཡང་འོད་གསལ་ལས་བཞེངས་པས། མཁའ་ལ་ནམ་ལངས་ཉི་མ་ལྷག་གིས་ཤར་འདུག་སྟེ། རས་ཆུང་པའི་ཐུགས་ལ་ཚེ་རིང་མཆེད་ལྔའི་བརྡ་དེ་རྣམས་ཀྱང་གོ་བར་འདུག་གིས་དགོངས་ནས། ཐུགས་དམ་རྗེས་ཐོབ་ཀྱི་ངང་ལ་འཚོ་བའི་སྟ་གོན་བྱས་ཏེ་ཚིམ་པར་རོལ་ནས། བླ་མའི་དྲུང་དུ་བྱོན་པས་འཁོར་གྲྭ་པ་བུ་སློབ་ཉ་མ་དང་བཅས་པ་རྣམས་ཀྱང་བླ་མའི་དྲུང་ན་ཁྲ་མེ་རེ་
(༡༣)འཛོམ་འདུག་སྐད། དེར་རས་ཆུང་པས་རྗེ་བཙུན་ལ་ཕྱག་བཙལ། སྙུན་དྲིས་ནས། རྗེ་བཙུན་གྱི་དྲུང་དུ་པུས་མོ་བཙུགས་ཐལ་མོ་སྦྱར་ཏེ་འདི་སྐད་ཅེས་གསོལ་བ་བཏབ་བོ། །བླ་མ་རྗེ་བཙུན་རིན་པོ་ཆེ་སྔར་འདས་པའི་སངས་རྒྱས་རྣམས་ཀྱིས་ཀྱང་མཛད་པ་བཅུ་གཉིས་ལ་སོགས་པའི་རྣམ་པར་ཐར་པ་བསམ་གྱིས་མི་ཁྱབ་པ་སེམས་ཅན་གྱི་དོན་དུ་གསུངས་པས་འཇིག་རྟེན་ན་སངས་རྒྱས་ཀྱི་བསྟན་པ་དར་བ་ལགས་ཤིང་། ཏཻ་ལོ་ནཱ་རོ་མར་པ་ལ་སོགས་ཏེ་བླ་མ་གྲུབ་ཐོབ་གོང་མ་རྣམས་ཀྱིས་ཀྱང་རང་རང་གི་རྣམ་ཐར་གསུངས་པས་ད་ལྟ་སྐལ་ལྡན་གྱི་གདུལ་བྱ་རྣམས་སྨིན་གྲོལ་གྱི་ལམ་ལ་འགོད་ནུས་པ་ལགས་ན། ད་རྗེ་བཙུན་རིན་པོ་ཆེ། ཁྱེད་ཀྱིས་ཀྱང་བདག་ཅག་བུ་སློབ་རྣམས་སྤྲོ་བ་བསྐྱེད་པ་དང་། མ་འོངས་པའི་སྐལ་ལྡན་གདུལ་བྱར་གྱུར་པ་རྣམས་རྗེས་སུ་གཟུང་ཞིང་། གཞན་ཡང་སྐྱེ་འགྲོ་མཐའ་དག་སྨིན་གྲོལ་ལ་འགོད་པར་བྱ་བའི་ཕྱིར་ཐུགས་བརྩེ་བ་ཆེན་པོས། རྗེ་བཙུན་རིན་པོ་ཆེ་ཁྱེད་རང་གི་གདུང་དང་རིགས་ཀྱི་འབྱུང་ཁུངས་དང་བཅས་ཏེ། རྣམ་པར་ཐར་པ་དང་མཛད་པ་རྣམས་གསུང་དུ་གསོལ་ཞེས་གསོལ་བ་བཏབ་པས། དེར་རྗེ་བཙུན་ཆེན་པོ་ཞལ་འཛུམ་པ་དང་བཅས་ཏེ། རས་ཆུང་བ་ཁོ་བོའི་ཆ་རྒྱུས་ཁྱོད་ཆེ་ནའང་། འདྲི་ན་དྲི་བ་ལ་ལན་གདབ་པར་བྱ་སྟེ། ངའི་རུས་ཁྱུང་པོ། རིགས་ཇོ་སྲས། ང་རང་མི་ལ་རས་པ། དང་པོ་ནི་ལས་ནག་པོ་ཡང་བྱས། བར་དུ་དཀར་པོ་ཡང་བྱས། ད་ལྟ་ལས་དཀར་ནག་གཉིས་ཀ་དང་བྲལ་ཞིང་། ལས་ཀྱི་གཞི་ཟད་པས་མ་འོངས་པ་ན་བྱེད་པར་མི་འགྱུར་བ་ཞིག་ཡིན་ཞིང་། དེ་རྣམས་རྒྱས་པར་བཤད་ན། ལ་ལ་ནི་
(༡༤)ངུ་བྲོ། ལ་ལ་ནི་དགོད་བྲོ་བའི་རྒྱུ་མཚན་མང་པོ་ཡོད་དེ། བཤད་རུང་དོན་ཆུང་བས་མི་རྒན་སོས་དལ་དུ་ཉལ་དུ་ཆུག་ཅེས་གསུངས་པས། ཡང་རས་ཆུང་པས་ཕྱག་བཙལ་ནས་གསོལ་བ་བཏབ་པ། རྗེ་བཙུན་རིན་པོ་ཆེ་ལགས། ཁྱེད་ཀྱིས་དང་པོར་དཀའ་ཐུབ་དང་ཞེ་བཅད་དྲག་པོས་གདམས་ངག་ཟབ་མོ་རྣམས་ཉམས་སུ་ལེན་ཅིང་། རྩེ་གཅིག་གི་སྒྲུབ་པ་ལྷུར་མཛད་པས་ད་ལྟ་གནས་ལུགས་མངོན་དུ་གྱུར་ཏེ། ཆོས་རྣམས་ཟད་སར་འཁྱོལ་བས། མ་འོངས་པ་ན་འཆིང་འགྱུར་གྱི་ལས་མི་མཛད་ཅིང་མི་མྱོང་བ་ཀུན་གྱི་མཐུན་གྲུབ་ལགས་མོད། གདུང་ཁྱུང་པོ། རིགས་ཇོ་སྲས། དེ་ལ་མི་ལར་མཚན་གསོལ་བའི་རྒྱུ་མཚན་དང་། སྐུ་འཁྲུངས་ནས་དང་པོ་ལས་ནག་པོ་མཛད་ཚུལ། བར་དུ་དཀར་པོ་མཛད་ཚུལ་ལ་བརྟེན་ནས་ངུ་བྲོ་བ་དང་དགོད་བྲོ་བའི་རྒྱུ་མཚན་དེ་ལ་དགོས་དོན་བསམ་གྱིས་མི་ཁྱབ་པ་ཞིག་ཡོད་པ་ལགས་པས། བདག་སོགས་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོས་དགོངས་ཏེ། སྐུ་གསུང་ཐུགས་སྙོམས་ལས་སུ་མི་བཞུགས་པར་རྒྱས་པར་གསུང་དུ་གསོལ། ཁྱེད་འདིར་ཚོགས་ཀྱི་མཆེད་ལྕམ་རྡོ་རྗེ་སྤུན་རྣམས་དང་། དད་འདུས་ཀྱི་ཉ་མ་རྣམས་ཀྱིས་ཀྱང་ངའི་གསོལ་བ་འདེབས་པའི་གྲོགས་མཛད་པར་ཞུ་ཞེས་གསོལ་བ་བཏབ་ནས་ཕྱག་མང་དུ་བཙལ་བས། དེར་ཐུགས་སྲས་བུ་ཆེན་རྣམས་དང་། དད་ཅན་གྱི་ཉ་མ་རྣམས་ཀྱིས་ཀྱང་ཕྱག་མང་དུ་བཙལ་ནས། སྐྱེས་བུ་དམ་པ་རས་ཆུང་པས་གསོལ་བ་བཏབ་པ་བཞིན་བཀས་གནང་སྟེ། ཆོས་ཀྱི་འཁོར་ལོ་བསྐོར་དུ་གསོལ་ཞེས་གསོལ་བ་ཡང་ཡང་བཏབ་པས།
(༡༥)རྗེ་བཙུན་གྱི་ཞལ་ནས། ཁྱེད་རྣམས་དེ་ཙམ་དུ་དོ་གལ་དང་ནན་ཏན་དུ་ཡང་འདྲི་ན། གསང་དགོས་མེད་པས་བཤད་པར་བྱ་སྟེ། ངའི་རུས་དང་རིགས་ནི། དབུ་རུ་བྱང་ཕྱོགས་ཀྱི་འབྲོག་སྡེ་ཆེན་པོ་ཞིག་གི་ཁྲོད་ནས་རུས་ཁྱུང་པོ། རིག་སྔགས་རྙིང་མ་པའི་བླ་མ་ཇོ་སྲས་ཤིག་གི་བུ་རྣལ་འབྱོར་པ་ཡི་དམ་གྱིས་རྗེས་སུ་བཟུང་བས་སྔགས་ནུས་དང་ལྡན་པ་ཞིག་རྒྱལ་ཁམས་ཀྱི་གནས་བསྐོར་བ་དང་རྟེན་མཇལ་བ་ལ་ཕྱིན་པས། གཙང་ལ་སྟོད་བྱང་གི་ཕྱོགས་གཅུང་པ་སྤྱི་ཞེས་བྱ་བར་ཕྱག་ཕེབས་ཏེ། ཡུལ་དེར་འདྲེ་གདོན་འདུལ་བ་དང་། བྱིན་རླབས་བྱས་པས་ནུས་པ་དང་ལྡན་ཕྱིར་ཕན་པ་ཤིན་ཏུ་མང་བར་བྱུང་ནས་གདུལ་བྱ་དང་འཕྲིན་ལས་ཆེ་བར་བྱུང་སྟེ། མཚན་ཁྱུང་པོ་ཇོ་སྲས་སུ་གསོལ་ནས་ལོ་འགའ་བཞུགས་པས། ཡུལ་དེར་ནད་གདོན་སོགས་རྐྱེན་ཅི་བྱུང་ཡང་གདན་འདྲེན་པ་ཞིག་ཡོད་པ་ལས། ནམ་ཞིག་གི་ཚེ་ཡུལ་དེ་ན་སྔར་ཇོ་སྲས་ཀྱི་ཕྱོགས་སུ་འོང་ཡེ་མ་ནུས་པའི་གདོན་གཞན་སུ་གང་གིས་ཀྱང་མི་ཐུབ་པའི་འཇིགས་སུ་རུང་བ་ཞིག་ཡོད་པ་དེ། ཇོ་སྲས་ལ་ཤིན་ཏུ་མི་དད་པའི་མི་ཚང་ཞིག་ལ་ཞུགས་ནས་གནོད་དུ་བྱུང་བ་ལ། བླ་མ་གཞན་གདན་དྲངས་ནས་དྲག་འདུལ་དང་བྱིན་རླབས་བྱས་པས། གདོན་དེས་ཚུར་ཅོལ་ལོ་དང་བཞད་གད་སུན་འབྱིན་བྱས་ནས་ཕན་པ་མ་བྱུང་བའི་ཚེ། དད་ལོག་ཅན་གྱི་མི་དེ་ལ་ཉེ་དུ་ཞིག་གིས། གདོན་གྱི་ཕག་ཏུ་ཁྱུང་པོ་ཇོ་སྲས་གདན་འདྲེན་པའི་གྲོས་བཏབ་པས། ཁོ་ན་རེ་རྨ་ལ་ཕན་ན་ཁྱིའི་ཚིལ་ནའང་ཚིལ་གྱིས་བོས་ཤོག་ཅིག་ཟེར་སྐད། དེར་མི་དེས་ཇོ་སྲས་གདན་དྲངས་པས། གདོན་གྱི་སར་ཕེབས་སུ་ཆ་བ་དང་། ཇོ་སྲས་ང་རྒྱལ་ལངས་
(༡༦)ཏེ། གསུང་ཆེན་པོས་ང་ཁྱུང་པོ་ཇོ་སྲས་འོང་གིན་ཡོད་དོ། །གདོན་བགེགས་རྣམས་ཀྱི་ཤ་ཟ་ཁྲག་འཐུང་བ་ཡིན་པས་སྡོད་ཨང་གསུང་ཞིང་མྱུར་དུ་བྱོན་པས། ཇོ་སྲས་རྩར་མ་ཕེབས་པ་ལ་གདོན་དེ་འཇིགས་ཤིང་སྐྲག་སྟེ་ཧ་ལས་ནས། ཕ་མ་མི་ལ་མི་ལ་ཞེས་ཡང་ཡང་ཟེར་ཞིང་འཇིགས་པའི་སྐད་དུ་མ་ཤོར། ཇོ་སྲས་རྩར་ཕེབས་པ་དང་། མི་ཁྱེད་འོང་སར་ང་འོངས་པ་མེད་པས་བདག་ལ་སྲོག་སྩོལ་ཅིག་ཟེར། ཇོ་སྲས་ཀྱིས་ཀྱང་གདོན་དེ་ལ་ཕྱིས་སུ་ལའང་མི་གནོད་པའི་མནའ་བླངས་ཏེ་བཏང་བས། གདོན་དེ་རང་བསྟེན་པའི་མི་ཚང་ཞིག་ལ་བབས་ནས། ཡང་མི་ལ་མི་ལ་ད་ལན་པས་སྡུག་པ་དང་ཉེན་པ་མ་བྱུང་ཟེར་ཞིང་འདུག་པ་ལ། མི་ཚང་དེ་རྣམས་ཀྱིས་མི་སུ་བྱུང་བྱས་པས། ཁྱུང་པོ་ཇོ་སྲས་བྱུང་ནས་སྲོག་ལ་བབ་པའི་སྡུག་བཏང་། མནའ་ཤོར་ཟེར་སོང་སྐད། དེ་ནས་ཇོ་སྲས་ཀྱི་ཡོན་ཏན་དང་ཆེ་བ་བརྗོད་པའི་ཆེད་དུ། མི་ཀུན་གྱིས་ཇོ་སྲས་ལ་མི་ལ་ཞེས་བརྗོད་པས་གདུང་གི་མཚན་ལ་མི་ལ་ཞེས་གྲགས་སོ། །གདོན་དེ་ཡང་ཕྱིས་གནོད་པ་ཡེ་མ་བྱུང་བས་ཚེ་འཕོས་པར་ཀུན་ཁ་འཆམས་སོ། །དེ་ནས་ཁྱུང་པོ་ཇོ་སྲས་ཀྱིས་ཡུམ་ཁབ་ཏུ་བཞེས་པས་སྲས་གཅིག་བྱུང་། དེ་ལ་སྲས་གཉིས་བྱུང་བས་ཆེ་བ་ལ་མི་ལ་མདོ་སྟོན་སེང་གེར་གྲགས། དེ་ལ་སྲས་མི་ལ་རྡོ་རྗེ་སེང་གེ་ཞེས་བྱ་བ་ཞིག་བྱུང་སྟེ། ཕྱིས་དེའི་རྒྱུད་པ་རྣམས་ལ་སྲས་རེ་རེ་ཡོད་པ་ཞིག་བྱུང་། མི་ལ་རྡོ་རྗེ་སེང་གེ་དེ་ཤོ་ལ་ཤིན་ཏུ་བརྩི་ཞིང་མཁས་པས་རྒྱལ་མང་པོ་ཐོབ་འོང་ཞིང་ཡོད་པ་ལས། དུས་ནམ་ཞིག་གི་ཚེ་ཡུལ་དེ་ན་མི་གཡོན་ཅན་ཤོ་ལ་ཤིན་ཏུ་མཁས་པ་ཕ་ཚན་རགས་ལ་མང་བ་
(༡༧)ཞིག་ཡོད་པ་དེས་མི་ལ་རྡོ་རྗེ་སེང་གེའི་ཚོད་བགམ་པའི་ཕྱིར་རྒྱལ་ཆུང་ངུ་བཙུགས་ཏེ་ཤོ་བརྩེས་པས་ཚོད་ལོངས་ཏེ། དེའི་ཉིན་ཁོས་རྒྱལ་རང་བཞིན་གྱིས་ཐོབ་པ་ལྟར་བྱས་པས་མི་ལ་རྡོ་རྗེ་སེང་གེ་ཡི་མ་རངས་ཏེ་ནངས་པར་ཤོ་ལན་ལེན་བྱས་པས་རུང་ཟེར། རྒྱལ་སྔར་བས་ཆེ་བ་བཙུགས་ཏེ་ཤོ་བརྒྱབ་པས་ཁ་དྲང་ཕྱིར་ཁོས་ལན་གསུམ་གྱི་བར་དུ་ཕམ་པ་ལྟར་བྱས་པའི་མཐར། ད་ཡང་ཤོ་ལན་ལེན་ཟེར་བས་རུང་ཟེར། རྒྱལ་ཆེ་ཆུང་ལ་གཉིས་ཀ་ཁ་འཆམས་ནས་ཞིང་ཁང་ནོར་གསུམ་ཤོའི་རྒྱལ་དུ་བཙུགས། ཞུ་འཆག་མེད་པར་འབའ་ཡི་གེས་བསྡམས་ནས་ཤོ་བརྩེས་པས་ཁོས་ཐོབ་སྟེ་ཞིང་ཁང་ནོར་གསུམ་ཁོའི་ཕ་ཚན་རྣམས་ཀྱིས་རྩིས་བླངས་ནས་མི་ལ་ཡབ་སྲས་ཡུལ་གཞིས་ཀུན་དང་བྲལ་ནས་ཡུལ་ཐོན་བྱོན་ཏེ། མང་ཡུལ་གུང་ཐང་གི་སྐྱ་རྔ་རྩ་ཞེས་བྱ་བར་ཕྱག་ཕེབས་ནས་གཞི་བཅས་ཏེ། ཡབ་མདོ་སྟོན་སེང་གེས་ཡུལ་པ་རྣམས་ཀྱི་ཀློག་སྒྲོག གཏོར་མ། སེར་བསྲུངས། སྲིའུ་གསོ་བ་ལ་སོགས་གྲོང་ཆོག་རྒྱུགས་པས་ཤིན་ཏུ་བྲིན་པར་བྱུང་བའི་ཡོན་དང་། སྲས་རྡོ་རྗེ་སེང་གེས་ཚོང་ཆེ་བ་ལ་དགུན་ལྷོ་བལ་བླན། དབྱར་བྱང་འབྲོག་བླན། ཆུང་བ་ལ་མང་ཡུལ་དང་གུང་ཐང་གི་བར་བླན་པས། ཡབ་སྲས་གཉིས་ཀྱིས་ནོར་མང་པོ་བསོགས། དེའི་ཚེ་ཡུལ་པའི་གཅེས་ཕྲུག་མ་ཞིག་དང་སྲས་རྡོ་རྗེ་སེང་གེ་གཉིས་དགའ་འདུས་ཀྱི་བཟའ་མིར་སོང་། དེ་གཉིས་ལ་སྲས་གཅིག་འཁྲུངས་པ་ལ་མི་ལ་ཤེས་རབ་རྒྱལ་མཚན་དུ་མཚན་གསོལ་ནས་བསྐྱེད་བསྲིང་ཞིང་ཡོད་པའི་ཚེ། མེས་པོ་མདོ་སྟོན་སེང་གེ་སྐུ་ཡལ་བའི་གཤེགས་རྫོངས་རྒྱས་པར་བྱས་རྟིང་། མི་ལ་རྡོ་རྗེ་སེང་གེས་ཚོང་གི་སྒོ་ནས་ནོར་སྤེལ་བས་སྔར་བས་
(༡༨)ཀྱང་ཕྱུག་པར་གྱུར་ཏེ། རྩའི་ཉེ་འཁོར་ན་འོར་མ་ཞེས་བྱ་བའི་ཡུལ་མི་ཞིག་ལ་རྩ་ན་ཞིང་དགའ་མོ་གྲུ་གསུམ་པ་ཞིག་ཡོད་པ་དེ། གསེར་དང་ལྷོ་བྱང་གི་རྫས་མང་པོ་བཅལ་ཏེ་ཉོས་པ་ལ་འོར་མ་གྲུ་གསུམ་དུ་གྲགས། ཞིང་དེའི་འགྲམ་ན་གནས་ཚང་དབང་བའི་ཁང་རོ་ཞིག་འདུག་པ་དེ་ཡང་ཉོས་ནས་མཁར་ལས་ཀྱི་འགྲམ་བཏིང་སྟེ་མཁར་ལས་བྱེད་བཞིན་པའི་ངང་ནས། མི་ལ་ཤེས་རབ་རྒྱལ་མཚན་ལོ་ཉི་ཤུ་ལོན་པ་དང་། རྩའི་མི་དྲག་རེར་གྱུར་པ་རུས་མྱང་ཡིན་པ་ཞིག་ལ། དཀར་མོ་རྒྱན་ཞེས་བྱ་བའི་བུ་མོ་གཟུགས་མཛེས་ལ་མི་ཆོས་ཕེར་བ། དགྲ་གཉེན་གང་ལའང་ཆགས་སྡང་རུས་ཐོན་པ་ཞིག་ཡོད་པ་དེ་བག་མར་བླངས་ཏེ་མྱང་ཚ་དཀར་རྒྱན་དུ་གྲགས་སོ། །དེ་ནས་མཁར་ལས་ཀྱི་འཕྲོ་མཐུད། སུམ་ཐོག་གི་སྟེང་ཁང་དུ་ལག་མཛོད་དང་གཡོས་ཁང་ཟུར་ན་ཡོད་པའི་ཚོམས་ཀ་བཞི་གདུང་བརྒྱད་ཡོད་པའི་ཁང་བ་སྐྱ་རྔ་རྩ་ན་དགའ་བ་ཞིག་བརྩིགས་པ་ཀ་བཞི་གདུང་བརྒྱད་དུ་གྲགས་ཏེ། དེ་ན་བདེ་སྐྱིད་སྙན་གྲགས་དང་བཅས་ཏེ་གནས་སོ། །དེ་ནས་གཅུང་དུ་མི་ལ་མདོ་སྟོན་སེང་གེ་ཡབ་སྲས་ཀྱི་སྙན་གྲགས་ཉེ་གྲོགས་རྣམས་ཀྱིས་ཐོས་པ་ལས། མི་ལ་རྡོ་རྗེ་སེང་གེའི་ཕ་སྤུན་གྱི་བུ་གཡུང་དྲུང་རྒྱལ་མཚན་ཞེས་བྱ་བ་བུ་སྨད་དང་སྲིང་མོ་ཁྱུང་ཚ་དཔལ་འགྲན་དང་བཅས་པ་ཡང་ཡུལ་ཐོན་ནས་སྐྱ་རྔ་རྩ་རུ་སླེབས་བྱུང་བ་ལ། མི་ལ་རྡོ་རྗེ་སེང་གེ་གཉེན་སྲེད་ཆེ་བས་དགའ་ཚོར་ཆེན་པོ་བྱུང་སྟེ། སྣ་ལེན་དང་སྣ་རྟེན་བྱས་གཞི་ཆགས་པ་ལ་ཚོང་གི་བྱེད་ལུགས་རྣམས་བསླབས་ཏེ་ཚོང་བྱས་པ་ལས། ཁོང་རྣམས་ཀྱིས་ཀྱང་ནོར་མང་དུ་བསོགས་སོ། །
(༡༩)དེ་ནས་སྐབས་ཤིག་གི་ཚེ་མྱང་ཚ་དཀར་རྒྱན་སྦྲུམ་དང་ལྡན་པར་གྱུར་ནས། མི་ལ་ཤེས་རབ་རྒྱལ་མཚན་ལྷོ་རྫས་མང་པོ་ཁྱེར་ཏེ། བྱང་སྟག་རྩེའི་ཕྱོགས་སུ་ཚོང་ལ་སོང་ནས་ཡུན་རིང་འགོར་བའི་ཚེ། ཆུ་ཕོ་འབྲུག་གི་ལོ་སྟོན་ཟླ་ར་བའི་ཉེར་ལྔ་སྐར་མ་རྒྱལ་ལ་བབ་པའི་ཉིན་ཨ་མ་ལ་ང་སྐྱེས་པས་ཡབ་ཀྱི་སར་བང་ཆེན་བརྫངས་ཏེ་འདིར་སྟོན་ལས་ཀྱང་ཐུག་ང་ལ་བུ་ཞིག་ཀྱང་སྐྱེས་པས། བུ་ལ་མིང་འདོགས་པ་དང་མིང་སྟོན་བྱེད་པ་ལ་མྱུར་དུ་ཤོག་བྱ་བའི་ཡི་གེ་བསྐུར་བ་བང་ཆེན་པས་ཀྱང་ཡབ་ལ་སྤྲད། ལོ་རྒྱུས་རྣམས་བཤད་པས། ཡབ་ཤིན་ཏུ་མཉེས་ཏེ། འོ་ལགས་སོ་ངའི་བུ་ལ་མིང་བཏགས་ཚར། ངེད་ཀྱི་རྒྱུད་པ་འདི་ལ་བུ་རེ་རེ་ལས་མི་འོང་བ་ཡིན་པས། ད་ལན་བུར་སྐྱེས་ཡོད་འདུག་པ་དེ། ཐོས་པའི་གཏམ་ལ་དགའ་བ་ཞིག་བྱུང་བས་ངའི་བུའི་མིང་ལ་ཐོས་པ་དགའ་ཟེར། ད་ཚོང་རྣམས་བྱས་ཚར་བས་འགྲོ་ཟེར་ནས་ཡུལ་དུ་བྱོན། ངའི་མིང་ཐོས་པ་དགའ་རང་དུ་བཏགས། མིང་སྟོན་བཟང་པོ་བྱས་ནས་གཅེས་པར་བསྐྱེད་བསྲིངས་ཕྱིས་ང་ལ་སྐད་སྙན་པོ་ཐོས་ཚད་སེམས་དགའ་བ་ཞིག་བྱུང་བས། མི་རྣམས་ཀྱིས་ཐོས་པ་དགའ་དེ་མིང་བཏགས་ལེགས་ཤིག་བྱུང་འདུག་ཟེར་བ་བྱུང་། དེ་ནས་ང་ལོ་བཞི་ལོན་པའི་ཚེ། ཨ་མ་ལ་བུ་མོ་ཞིག་སྐྱེས་པ་མགོན་མོ་སྐྱིད་དུ་མིང་བཏགས། གཅེས་མིང་པེ་ཏར་ཆགས་པས་པེ་ཏ་མགོན་མོ་སྐྱིད་དུ་གྲགས་ཏེ། ངེད་མིང་སྲིང་གཉིས་ཀ་ལ་གསེར་རལ་དང་གཡུ་རལ་ཉེ་ལེ་བ་ཡོད་པ་དྲན། ཡུལ་ནའང་ཁ་དྲག་ཅིང་དབང་བཙན་པས་ཡུལ་མི་དྲག་པ་རྣམས་དང་གཉེན་སྡེབ། ཞན་པ་རྣམས་འབངས་སུ་འཁོལ་བས་ཆོག་པ་བྱུང་བའི་ཚེ། ཡུལ་མི་རྣམས་
(༢༠)ཀྱི་ལྐོག་ལབ་ལ་འཁྱམ་པོ་ཡུལ་དུ་ཆགས་པ་ལ་འདི་ཚོ་བས་ཕོ་རྒོད་པ་དང་ནོར་ཆེ་བ་མི་འོང་། ཕྱིའི་ཁང་ཞིང་ནང་གི་རྡིག ཕོ་མོའི་རྒྱན་གང་ལ་བལྟས་རུང་ཆོག་པར་འདུག་ཟེར། ཀུན་སྨོན་དིར་རེ་བའི་ངང་ནས་མི་ལ་རྡོ་རྗེ་སེང་གེ་སྐུ་གཤེགས་ཏེ། ཐུགས་དགོངས་རྫོགས་ཐབས་རྣམས་རྒྱས་པར་བསྒྲུབས་པ་ཡིན་གསུངས། སྐུ་བལྟམས་པའི་མཛད་པ་སྟེ་དང་པོའོ། །
(༢༡)གཉིས་པ། སྡུག་བསྔལ་གྱི་བདེན་པ་ཕུལ་ཕྱིན་ཐུགས་ཉམས་སུ་བཞེས་པ། ཡང་རས་ཆུང་པས་ཞུས་པ། བླ་མ་ལགས། དང་པོ་ཡབ་དང་བྲལ་བས་འོ་བརྒྱལ་མང་པོ་ཐུགས་ཉམས་སུ་བཞེས་གསུངས་པ་ཇི་འདྲ་བ་ཞེས་ལགས་ཞུས་པས། དེ་ནས་ང་ལོ་བདུན་ཙམ་འགྲོ་བའི་ཚེ། ཡབ་མི་ལ་ཤེས་རབ་རྒྱལ་མཚན་དེ་བསྙུང་གཞི་དྲག་པོ་རང་ཞིག་གིས་ཟིན་ནས། སྨན་པ་དང་མོ་མ་རྣམས་ཀྱིས་ཀྱང་མི་འཚོ་བར་ལུང་བསྟན་ཅིང་བོར། གཉེན་ཉེ་འབྲལ་རྣམས་ཀྱིས་ཀྱང་མི་འཚོ་བར་ཤེས། ཁོང་རང་ཡང་མི་འཚོ་བར་ཁོ་ཐག་ཆོད་ནས། ཨ་ཁུ་དང་ཨ་ནེ་ལ་སོགས་གཉེན་ཉེ་རིང་གྲོགས་དགའ་བཤེས་ཡུལ་མི་ཁྱིམ་མཚེས་དྲག་པ་ཀུན་བསགས་ཏེ། བུ་སྨད་ནོར་དང་བཅས་པ་བཅོལ་གཏམ་བྱས་ནས། མཐར་ཕ་ཤུལ་བུས་འཛིན་དུ་འཇུག་པའི་ཁ་ཆེམས་ཡི་གེ་རྒྱས་པར་བྱས་ཏེ། ཀུན་གྱིས་ཐོས་པར་བསྒྲགས། དོན་བསྡུ་ལ་ངག་ཏུ་ང་ད་ལན་གྱི་ནད་འདིས་མི་གཏོང་བ་འདུག་ཅིང་། དེས་ན་ངའི་བུ་འདི་ཡང་ད་ལྟ་ཆུང་འདུག་པས། ཨ་ཁུ་དང་ཨ་ནེས་གཙོ་བྱས་པའི་གཉེན་བཤེས་ཀུན་ལ་བཅོལ་གཏམ་བྱ་རྒྱུ་ལ་ངའི་ཕུ་ན་ནོར་གནག་རྟ་ལུག་གསུམ། མདའ་ན་འོར་མ་གྲུ་གསུམ་གྱིས་གཙོ་བྱས་པའི་ཞིང་སྤྲང་མིག་ཏུ་མི་ཚུད་པ་འགའ།
(༢༢)ཁང་བའི་འོག་ན་ཕྱུག་བ་ར་བོང་གསུམ། སྟེང་ཁང་ན་རྡིག་གསེར་དངུལ་ཟངས་ལྕགས་གཡུ་དང་གོས་དར་འབྲུའི་བང་མཛོད་ལ་སོགས་ཏེ། མདོར་ན་མི་ནོར་གཞན་ལ་སྨོན་མི་དགོས་པ་ཡོད་པས། འདི་རྣམས་ཀྱི་སྟེང་ནས་ཆ་ཤས་ཤིག་ང་རང་གི་རྗེས་སུ་ཐོངས། དེ་ལྷག་རྣམས་ཁྱེད་འདིར་ཚོགས་ཀུན་ལ་ང་རང་གི་བུ་འདིས་ཁྱིམ་སོ་མི་ཟིན་གྱི་བར་ལ་བཅོལ་ལོ། །ཁྱད་པར་དུ་ཨ་ཁུ་དང་ཨ་ནེ་གཉིས་ལ་བཅོལ་ལོ། །བུ་འདིས་ཁྱིམ་སོ་ཕེར་བ་དང་། མཛེས་སེ་དང་ཆུང་གཉེན་བསྒྲིགས་ཡོད་པས། མོ་རང་མནའ་མར་བསུ་ནོར་རྣམས་ལྷག་ལུས་མེད་པར་ཕོག་ལ་ཕ་ཤུལ་བུས་འཛིན་དུ་ཆུག་ཅིག དེ་བར་ལ་ངའི་བུ་སྨད་གསུམ་གྱི་སྐྱིད་སྡུག་ཁྱེད་ཨ་ཁུ་དང་ཨ་ནེས་གཙོ་བྱས་པའི་གཉེན་ཚན་ཀུན་ཤེས་སོ། །སྡུག་ཏུ་མ་འཇུག་ཅིག ང་ཤི་དུར་ཁུང་ནས་བལྟའོ་ཞེས་གསུངས་ནས་གྲོངས་སོ། །དེ་ནས་ཡབ་ཀྱི་གཤེགས་རྫོངས་རྣམས་བྱས། དེ་ལྷག་གི་ནོར་རྣམས་ཀུན་ཁ་འཆམ་པར། མྱང་ཚ་དཀར་རྒྱན་རང་ཚགས་བྱེད་དུ་ཆུག ཁ་འཛིན་དགོས་པ་ཀུན་གྱིས་ཟུར་ནས་ཅི་ལེགས་གྱིས་ཟེར་བ་ལ། ཨ་ཁུ་དང་ཨ་ནེ་གཉིས་ན་རེ་མི་ཉེ་བྱས་རུང་དྲུང་པོ་ཉེ། ཁོང་མ་སྨད་ངེད་ཀྱིས་སྡུག་ཏུ་མི་འཇུག །ནོར་རྣམས་ཁ་ཆེམས་བཞིན་ངེད་ཀྱིས་ཚགས་བྱེད་ཟེར་ནས། ངའི་ཞང་པོ་དང་མཛེས་སེའི་ཕ་མིང་གིས་ལོ་རྒྱུས་བྱས་རུང་མ་ཉན་པར་ཕོ་ནོར་རྣམས་ཨ་ཁུས་བྱས། མོ་ནོར་རྣམས་ཨ་ནེས་བྱས། གཞན་རྣམས་ཕྱེད་མར་བགོས་ཏེ། ཁྱེད་མ་སྨད་རྣམས་གསོ་རེས་བྱེད་ཟེར་ནས། ངེད་མ་བུ་གསུམ་ལ་ནོར་དབང་རྒྱུ་མ་བྱུང་བའི་ཁར། དབྱར་ཞིང་ལས་བྱེད་དུས་ཨ་ཁུའི་གཡོག དགུན་བལ་ལས་བྱེད་
(༢༣)དུས་ཨ་ནེའི་གཡོག ལྟོ་ཁྱིའི་ལྟོ་ལ་ལས་བོང་ལས། གོས་ཧྲུལ་ཕྲག་ཐག་ཆད་པ་ལ་གྲེས་མའི་སྐེ་རགས་བཅིངས་པ་གྱོན་ནས། ལས་དལ་མེད་བྱེད་དགོས་བྱུང་བས་ཡན་ལག་རྣམས་སེར་ཀར་སོང་། ལྟོ་གོས་ངན་པའི་སྟོབས་ཀྱིས་ཁ་མདོག་སྐྱ་ལ་ཤ་རིད་པ། སྐྲ་དང་པོ་གསེར་གཡུའི་རལ་བ་ཉི་ལེ་བ་ལ། ཕྱིས་སྐྱ་བོ་བསེང་བསེང་ཤིག་སྲོའི་རལ་བ་ཉི་ལེ་བ་བྱུང་བས། མཐོང་བ་དང་ཐོས་པའི་མི་སེམས་ཆུང་ཀུན་མཆི་མ་འཆོར་བ་དང་། ཨ་ཁུ་དང་ཨ་ནེ་ལ་ལྐོག་ལབ་དིར་རེ་བ་བྱུང་རུང་འཛེམ་མེད་བྱས། ངེད་མ་སྨད་ལ་སྡུག་པོ་རང་བཏང་བས། ཨ་མས་ཨ་ནེ་ལ་ཁྱུང་ཚ་དཔལ་འགྲན་དུ་མི་འདུག་བདུད་མོ་སྟག་འགྲན་དུ་འདུག་བྱས་པས། ཨ་ནེ་ལ་བདུད་མོ་སྟག་འགྲན་དུ་མིང་ཆགས། དེ་དུས་འཇིག་རྟེན་པའི་གཏམ་དཔེ་ལ། མི་བདག་བདག་ཏུ་རེ། བདག་པོ་སྒོ་ཁྱིར་འདོན་ཟེར་བ་དེ་ངེད་མ་སྨད་ལ་བྱུང་། སྔར་ཡབ་མི་ལ་ཤེས་རབ་རྒྱལ་མཚན་བཞུགས་པའི་ཚེ། མི་དྲག་ཞན་ཀུན་ངེད་ཀྱི་ཞལ་འཛུམ་དཀར་ནག་ལྟ་བ་ཡིན་ཏེ། ཕྱིས་ནོར་ཡོད་རྒྱལ་པོའི་ཚུལ་དུ་སོང་ནས། ཨ་ཁུ་དང་ཨ་ནེའི་ཞལ་འཛུམ་དཀར་ནག་ལྟ་བ་བྱུང་། ཨ་མ་ལ་ཡང་མི་རྣམས་ཀྱིས་ལྐོག་ལབ་ཏུ་ཁྱོ་ཕྱུག་ཆུང་མ་གྲུང་། བལ་འཇམ་སྣམ་བུ་ལེགས་ཟེར་བ་དེ་བདེན་པར་འདུག་སྟེ། མི་གོ་ཆོད་རེ་མེད་ཙ་ན་དཔེ་འདི་དང་འདྲ། དང་པོ་མྱང་ཚ་དཀར་རྒྱན་ཁྱོ་བཟང་གིས་མགོ་འདོན་དུས། མོ་བློ་ཁོག་ཆེ་ལ་གྲུང་། ལག་བཅུད་ཆེ་ཟེར་བ་ཡོད་དེ། ད་གྲུང་ཞན་གྱི་ཤན་ཕྱེད་ནས་གདའོ་ཟེར། སྡུག་རེས་བྱུང་ན་ལབ་རེས་ཀྱི་དཔེ་དེར། རང་ལས་ཞན་པ་ཀུན་གྱིས་རྒྱབ་ནས་འཕྱ་བ་བྱུང་། ང་ལ་མཛེས་སེའི་ཕ་
(༢༤)མས་གོས་ལྷམ་སོ་མ་རེ་བྱིན་ནས། མི་ནོར་དུ་མ་སོང་ན། ནོར་མི་རྟག་རྩྭ་ཁའི་ཟིལ་བ་བྱ་བ་ཡིན་པས་ནོར་མེད་སྙམ་པ་མི་དགོས། དང་པོ་ཡབ་མེས་རྣམས་ལའང་ནོར་རྟིང་སོར་བྱུང་བ་ཡིན། ཁྱེད་རང་ཚོ་ལའང་ནོར་ཡོད་པའི་དུས་འོང་ཟེར་ནས་སེམས་གསོ་ཡང་ཡང་བཏང་། དེ་ནས་ང་ལོ་བཅོ་ལྔ་ཙམ་ལོན་པའི་ཚེ། ཨ་མ་ལ་ཕ་མས་བྱིན་པའི་ཞིང་སྐལ་བྲེ་པེ་སྟན་ཆུང་བྱ་བ་མིང་མི་སྙན་རུང་སྟོན་ཐོག་གཞུན་པོ་འོང་བ་ཞིག་ཡོད་པ་དེ། ཞང་པོས་སོ་ནམ་བྱས་པའི་ནས་སྐྱེད་འཕེལ་དུ་ཅི་འགྲོ་བྱས་ནས་ཕག་ཏུ་གསོག་གིན་ཡོད་པ་ཡང་མང་རབ་ཏུ་སོང་བ་ལ་ཤ་མང་པོ་ཉོས། ནས་དཀར་མོ་མང་པོ་ལ་ཕྱེ་བྱས། ནག་པོ་མང་པོ་ཆང་དུ་བཙོས་པས་མྱང་ཚ་དཀར་རྒྱན་མ་སྨད་ནོར་སློང་བྱེད་པ་ཡིན་པ་འདུག་ཟེར་བ་བྱུང་། དེ་ནས་ངེད་རང་གི་ཁང་བ་ཀ་བཞི་གདུང་བརྒྱད་མ་དེར་གདན་མང་པོ་གཡར་ནས་བཏིང་སྟེ། ཨ་ཁུ་དང་ཨ་ནེས་གཙོ་བྱས་པའི་གཉེན་ཉེ་འཁོར། གྲོགས་དགའ་བཤེས་ཡུལ་མི་ཁྱིམ་མཚེས་རྣམས་དང་། ཁྱད་པར་ཡབ་མི་ལ་ཤེས་རབ་རྒྱལ་མཚན་སྐུ་གཤེགས་ཁར་ཞལ་ཆེམས་ཀྱི་ཡི་གེ་རྒྱུས་ཡོད་པ་རྣམས་བོས་ཏེ། ཨ་ཁུ་དང་ཨ་ནེ་ལ་ཤ་ཁོག་འཛུགས། གཞན་གཟུག་ཐོབ་པ་ལ་གཟུག ལྷུ་ཐོབ་པ་ལ་ལྷུ། ཆང་དཀར་ཡོལ་གྱི་གཡང་ཚེ་དང་བཅས་པའི་སྟོན་མོ་བཟང་པོ་དྲངས་ནས། ཨ་མ་གྲལ་གྱི་དབུས་སུ་ལངས་ཏེ། འོ་ལགས་སོ། །བུ་སྐྱེས་པ་ལ་མིང་། ཆང་དྲངས་པ་ལ་གཏམ་བྱ་བར་གདའ་བས། ང་ཡང་གཏམ་ཚིག་གསུམ་པ་ཞིག་གཏོང་བ་ལགས་པས། ཡབ་མི་ལ་ཤེས་རབ་རྒྱལ་མཚན་སྐུ་ཐིམ་ཁར་ཞལ་ཆེམས་གསུངས་པ་རྒྱུས་ཡོད་ཀྱི་མི་བགྲེས་པ་
(༢༥)ཨ་ཁུ་དང་ཨ་ནེ་གཙོ་མཛད། འདིར་བཞུགས་ཀྱི་གྲལ་པ་རྣམས་སྙན་གསན་པར་ཞུ་ཞེས་བརྗོད་ནས། ཞང་པོས་ཡབ་ཀྱི་ཞལ་ཆེམས་ཀྱི་ཡི་གེ་བཀླགས་པའི་མཐར། ཨ་མས་ཡི་གེ་འདིའི་དོན་གསུང་ངག་དང་བཅས་པ་འདིར་བཞུགས་ཀྱི་བགྲེས་པ་ཀུན་གྱི་ཐུགས་ལ་གསལ་བས་རྒྱས་པར་ཞུ་མི་དགོས་པར་གདའ། དོན་དྲིལ་བ་ལ་སྔར་ཕན་ཨ་ཁུ་དང་ཨ་ནེ་གཉིས་ཀྱིས་ངེད་མ་སྨད་གསུམ་ལ་མགོ་འདོན་ཡང་དག་མཛད་པ་ཐུགས་ལ་བཏགས། ད་ང་རང་གི་བུ་དང་། མཛེས་སེ་གཉིས་ཀས་ཁྱིམ་སོ་ཟིན་པར་འདུག་པས། ངེད་རང་གི་ནོར་བཅོལ་རྣམས་སྤྲོད་པ་དང་། མཛེས་སེ་ཡང་མནའ་མར་བསུས་ནས་ཡབ་ཀྱི་ཞལ་ཆེམས་བཞིན་ཕ་ཤུལ་བུས་འཛིན་དུ་འཇུག་པར་ཞུ་བྱས་པས། ཨ་ཁུ་དང་ཨ་ནེ་གཉིས་ཅི་ལ་མི་འཆམ་རུང་ལྟོ་ལ་འཆམ་པ་དང་། ང་བུ་གཅིག་པོར་སོང་བ་དང་། ཨ་ཁུ་ལ་བུ་མང་པོ་ཡོད་པའི་སྟབས་ཀྱིས། ཨ་ནེ་དང་ཨ་ཁུ་གཉིས་གཅིག་ཏུ་དྲིལ་ནས་ཁྱེད་ཀྱི་ནོར་རམ་དེ་གང་ན་ཡོད་པ་ཡིན། དང་པོ་མི་ལ་ཤེས་རབ་རྒྱལ་མཚན་ཁོ་རང་ཁམས་བཟང་རིང་ལ་ཁང་ཞིང་གསེར་གཡུ་མཛོ་རྟ་གནག་ལུག་རྣམས་ངེད་ཀྱིས་གཡར་བཏང་བ། ཁོ་རང་འཆི་ཁར་ནོར་བདག་པོ་ལ་སྤྲད་པ་ཡིན། ཁྱེད་རང་དབང་བའི་ནོར་གསེར་སེ་གཅིག་གམ། ནས་ཕུལ་གང་ངམ། མར་ཉག་གཅིག་གམ། གོས་དར་རྐྱང་སྣ་གཅིག དུད་འགྲོ་ཚེ་འཛུགས་གཅིག་ཀྱང་མིག་གིས་མ་མཐོང་བ་ལ་ད་འདི་འདྲ་ཟེར་བ། ཁྱོད་ཀྱི་ཁ་ཆེམས་ཀྱི་ཡི་གེ་སུས་བྲིས། སྡུག་སྨད་ཚོ་ལྟོགས་གྲིར་མ་བསད་པར་གསོས་པ་ངེད་རབ་ཡིན།
(༢༦)ལར་མི་ངན་ལ་དབང་བསྐུར་ན་ཆུ་ལ་བྲེས་འཇལ་བྱེད་བྱ་བ་དེ་འདི་འདྲ་ལ་ཟེར་བ་ཡིན་ཟེར། སྣ་བུས་སྟན་ལས་ཧར་ལངས་བྱས། སེ་གོལ་གཏོགས། ཐུ་བ་སྤྲུགས། རྐང་བ་བརྡབས་ནས་ནན་ཏར་མ་སོང་ན་ཁང་བ་ཡང་ངེད་དབང་བས། མ་སྨད་ཚོ་ཕྱིར་སོངས་ཟེར་ཞིང་ཨ་མར་ཐལ་ལྕག་གིས་བརྡུངས། ངེད་མིང་སྲིང་གཉིས་ཕུ་དུང་གི་ལྕག་གིས་བརྡུངས། དེའི་ཚེ་ཨ་མ་ནི། ཡབ་མི་ལ་ཤེས་རབ་རྒྱལ་མཚན་ངེད་མ་སྨད་ཀྱི་ལས་བསྐོས་ལ་གཟིགས་དང་། ང་ཤི་དུར་ཁུང་ནས་བལྟའོ། གསུངས་པ་དེ་ད་གཟིགས་པའི་དུས་ལ་བབ་གདའོ་ཟེར། ངུ་ཞིང་འགྱེལ་ནས་འགྲེ་ལོག་ལོག་བྱེད་ཅིང་འདུག ངེད་མིང་སྲིང་གཉིས་ཀྱིས་ནི་ར་མདའ་ངུ་བ་མིན་པ་མ་བྱུང་། ཨ་ཞང་གིས་ནི་ཨ་ཁུ་ལ་བུ་མང་པོ་ཡོད་པས་རྒོལ་མ་ནུས། གཞན་ཡུལ་མི་ངེད་རང་ལ་དཀར་བ་རྣམས་ནི་མ་སྨད་ཚོའི་སྙིང་རྗེ་བ་ལ་ཟེར་མི་ངུ་བ་མི་འདུག གཞན་རྣམས་ཀྱང་ཤུགས་རིང་ནར་ནར་འདུག ཨ་ཁུ་དང་ཨ་ནེ་ནི་ངེད་ལ་ནོར་དགོས་ཟེར། ནོར་ཁྱེད་རང་ལ་འདུག་པ། ཡུལ་མི་ཁྱིམ་མཚེས་ལ་ཤ་ཆང་ཕངས་མེད་བཤམས་ནས་སྟོན་མོ་བཤམ་རྒྱུ་འདུག་པ། ཁྱེད་ཀྱི་ནོར་རམ་དེ་ངེད་ལ་མེད། ཡོད་ནའང་མི་གཏོང་བས་མ་སྨད་ཚོ་མང་ན་དམག་དྲོངས། ཉུང་ན་མཐུ་ཐོངས་ཟེར་ཞིང་ཐོན་སོང་། དེའི་ཕྱི་བཞིན་ཁོང་ལ་དཀར་མི་རྣམས་ཀྱང་ཐོན་སོང་། ཨ་མ་ནི་དེ་ནས་ཀྱང་ངུ་ཐག་མ་ཆོད་པར་འདུག་པ་ལ། ཞང་པོ་དང་མཛེས་སེའི་ཕ་མིང་སོགས་ངེད་རང་གི་དཀར་མི་ཀུན་ཨ་མའི་སེམས་གསོ་
(༢༧)ཕྱིར་བསྡད་ནས། ཆང་ལྷག་རྣམས་འཐུང་ཞིང་ཨ་མ་ལ་ད་མ་ངུ་། ངུས་པས་མི་ཕན། དེ་རིང་འདིར་སྟོན་གྲལ་དུ་ཚོགས་པ་ཀུན་ལ་ནོར་སློང་རེ་གྱིས། ངེད་འདི་ན་ཡོད་པ་ཀུན་གྱིས་ཀྱང་ཅི་དྲག་རེ་སྟེར། ཨ་ཁུ་དང་ཨ་ནེ་གཉིས་ཀྱིས་ཀྱང་ཅི་དྲག་རེ་སྟེར་འོང་ཟེར་བ་ལ། ཨ་ཞང་ན་རེ་དེ་ཀ་གྱིས་ལ་བུ་འདི་ཡོན་ཏན་ཞིག་སློབ་ཏུ་ཐོངས། ཁྱེད་རང་མ་སྨད་ངའི་སར་སྡོད་ལ་ཞིང་གི་སོ་ནམ་གྱིས། ཅི་ཕན་བྱེད་པ་ལས་འོས་མེད། གང་ནའང་ཨ་ཁུ་དང་ཨ་ནེ་ལ་ངོ་མི་ཚ་བ་ཞིག་བྱེད་དགོས་ཟེར་བ་ལ། ཨ་མ་ན་རེ་རང་གི་ནོར་ལ་དབང་རྒྱུ་མ་བྱུང་བའི་སློང་བྱས་པའི་ནོར་གྱིས་བུ་ཚ་མི་སོས། ཨ་ཁུ་དང་ཨ་ནེས་ངེད་རང་གི་ནོར་གྱི་ཆ་གཅིག་སྤྲད་རུང་སྟེར་དགོས་མེད། བུ་འདི་ཡོན་ཏན་ཞིག་སློབ་ཏུ་ཅིས་ཀྱང་གཏོང་། ངེད་མ་སྨད་ཨ་ཁུ་དང་ཨ་ནེས་གཤའ་མ་རང་མ་བཅོལ་བའི་རྟིང་ལ། རྔ་གདང་རྒྱུག་དང་དུད་པ་ལང་རྒྱུག་བྱས་ནས། ཁོང་གཉིས་ཀྱི་མངོན་བློ་འཆར་བ་ཡིན། ཞིང་གི་སོ་ནམ་ཡང་འདི་ཀ་ནས་བྱེད་ཟེར་ནས། རྩའི་མི་ཐོད་གད་ཁ་བྱ་བ་ན་སྔགས་རྙིང་མ་པའི་སློབ་དཔོན་ཀླུ་བརྒྱད་མཁན་གྲོང་ཆོག་ལ་ཤིན་ཏུ་བྲིན་པ་ཞིག་ཡོད་པ་དེར་ང་ཀློག་སློབ་ཏུ་བཏང་། དེ་དུས་གཉེན་རྣམས་ཀྱིས་ཀྱང་ནོར་སློང་སྣ་རེ་སྣ་གཉིས་བྱིན་འདུག ཁྱད་པར་མཛེས་སེའི་ཕ་མས་རྒྱགས་ཆུ་སྡོར་མེ་ཤིང་ཡན་བསྐུར་ནས་ང་ཀློག་སློབ་སར་མཛེས་སེ་མོ་རང་སེམས་གསོ་ལ་ཡང་ཡང་བཏང་བྱུང་། ཨ་ཞང་གིས་ཨ་མ་དང་སྲིང་མོ་མི་ལས་དང་སྤྲང་དུ་མི་འགྲོ་བའི་དུས་ཀྱི་ལྟོ་བྱིན། ཨ་མ་སྤྲང་དུ་ཨ་ཞང་གིས་མ་བཅུག་པར་མིའི་ལས་ཉིན་འཁལ་ཉིན་ཐགས་བྱེད་ཅིང་།
(༢༨)ངེད་མིང་སྲིང་ལ་ཅི་ཕན་དང་ནོར་ཅི་གསོག་བྱས། སྲིང་མོས་ཅི་ལྕོགས་ཀྱིས་མི་གཡོག་དང་། རྔ་གདང་རྒྱུག་དུད་པ་ལང་རྒྱུག་བྱས་ནས་ལྟོ་གོས་ཅི་རྙེད་བྱས་རུང་། ལྟོ་སྐྱ་ལ་གོས་ཧྲུལ་བ་ཡིད་ཕམ་པ་ལས་སྐྱིད་པོ་རང་མ་མྱོང་གསུངས་པས། དེའི་ཚེ་ཆོས་ཉན་དུ་གྱུར་ཚད་ཐུགས་སྐྱོ་ཤས་དང་ངེས་འབྱུང་གི་སྒོ་ནས་མཆི་མ་འདོར་ཞིང་དར་ཅིག་ཀུན་ཁ་རོག་པར་འདུག་གོ། །སྡུག་བསྔལ་གྱི་བདེན་པ་ཕུལ་ཕྱིན་ཐུགས་ཉམས་སུ་བཞེས་པའི་མཛད་པ་སྟེ་གཉིས་པའོ། །
(༢༩)གསུམ་པ། དགྲ་བོ་ཚར་བཅད་པ། ཡང་རས་ཆུང་བས་རྗེ་བཙུན་ལགས། རྗེ་བཙུན་གྱིས་དང་པོ་ལས་ནག་པོ་མཛད་གསུངས་པ་ཇི་ལྟ་བུ་ཞིག་མཛད་ཞུས་པས། མཐུ་དང་སེར་བས་སྡིག་བསགས་པ་ཡིན་གསུངས། རྗེ་བཙུན་མཐུ་དང་སེར་བ་སློབ་པའི་ཉེ་བར་ལེན་པའི་རྐྱེན་ཇི་ལྟ་བུ་ཞིག་བྱུང་ཞུས་པས། ང་མི་ཐོད་གད་ཁ་ན་ཀློག་སློབ་དུས་རྩའི་མདའ་རུ། སྐྱིད་སྟོན་གྱི་ཆང་ས་ཆེན་པོ་ཞིག་བྱུང་བ་དེའི་གྲལ་དབུ་ལ་སློབ་དཔོན་སྤྱན་དྲངས་པའི་ཕྱག་ཕྱི་ལ་ང་ཡང་ཕྱིན། དེར་ཆང་མང་བ་དང་སློབ་དཔོན་ལ་ཟུར་ནས་ཀྱང་ཆང་འདྲེན་མང་རབ་བྱུང་བ་ཀུན་ནས་བཏུངས་པས་བཟི་བེར་སོང་ཡོད་པ་ལ། སློབ་དཔོན་གྱིས་ང་ལ་སྐྱོས་མ་རྣམས་བསྐུར་ཏེ་སྔོན་ལ་བརྫངས་པས། ཆང་གིས་བཟི་བ་དང་། དེའི་ཉིན་གླུ་ལེན་མཁན་རྣམས་ལ་སེམས་འཕྲོས་ནས། གླུ་ལེན་སྙིང་འདོད་པ་ཞིག་བྱུང་བ་དང་། གྲེ་བ་བདེ་མོ་ཞིག་ཡོད་པས། གླུ་ལེན་ཞིང་འོངས་པས། ངེད་རང་གི་ཁང་བའི་མདུན་ན་ཡར་ལམ་ཡོད་པས་སྒོའི་ཐད་དུ་སླེབས་རུང་གླུ་བླངས་པས། ཨ་མ་ནང་ན་ཡོས་རྔོད་ཀྱིན་ཡོད་པས་ཐོས་ནས། ཅི་ཟེར་སྐད་འདི་ནི་ངའི་བུའི་སྐད་འདྲ། ངེད་མ་སྨད་བས་སྡུག་པ་ནི་ས་ཐོག་ན་མེད་པས་ཁོ་ནི་གླུ་ལེན་མི་ཐང་སྙམ་ནས་ཡིད་མ་ཆེས་པར་བལྟས་པས། ང་ཡིན་པར་ཤེས་
(༣༠)ནས་ཧ་ལས་ཏེ། སྐམ་པ་གཡས་སུ་བོར། ཡོས་དཀྲུགས་གཡོན་དུ་བོར། ཡོས་རྔོད་འཕྲོ་ཚིག་ཏུ་བཅུག ལག་པ་གཡས་སུ་ཡོག་པ་ཞིག་ཁྱེར། གཡོན་དུ་ཐལ་བ་སྦར་གང་ཁྱེར། སྐས་རིང་བ་ལས་བབས། ཐུང་བ་ལས་མཆོངས་ནས་ཕྱིར་ཐོན་བྱུང་སྟེ། ཐལ་བ་དེ་གདོང་ལ་བཏབ། ཡོག་པ་དེ་མགོ་ལ་ལན་འགའ་བརྒྱབ་ནས། ཡབ་མི་ལ་ཤེས་རབ་རྒྱལ་མཚན་ཁྱེད་ལ་བུ་འདི་འདྲ་སྐྱེས་སོ། །ཁྱེད་རབས་ཆད་གདའ་བ། ངེད་མ་སྨད་ཀྱི་ལས་བསྐོས་ལ་གཟིགས་དང་ཟེར་ཨ་མ་ཡུད་ཅིག་བརྒྱལ་ནས་འགྱེལ་འདུག་པའི་ཚེ། སྲིང་མོ་ཡང་ཐོན་བྱུང་སྟེ། ཨ་ཇོའི་བསམ་བློ་ལ་ཨ་མ་ལ་ལྟོས་དང་ཟེར་ངུ་ཞིང་འདུག་པ་ལ་བདེན་སྙམ་ནས། ང་རང་ཡང་མཆི་མ་མང་པོ་ཤོར། ངེད་མིང་སྲིང་གཉིས་ཀྱིས་ངུ་བའི་ངང་ནས་ཨ་མའི་ལག་པ་མཉེད་བཞིན་བོས་པས་དར་ཅིག་ནས་བརྒྱལ་བ་སངས་ཏེ་ལངས་བྱུང་ནས། ངུ་བའི་གདོང་གིས་ང་ལ་ཅི་རེ་བལྟས་ནས། བུ་རང་རེ་མ་སྨད་པས་སྡུག་པ་ས་ཐོག་ན་མེད་པ་ལ་ཁྱོད་གླུ་ལེན་པ་དྲན་པ་རང་འདུག་གམ། ང་མ་རྒན་མོ་ནི་བསམ་མནོ་གཏོང་གིན་ཡི་མུག་པ་དང་ངུ་བྲོ་བ་མིན་པ་མི་འདུག་ཟེར། སྨྲེ་སྔགས་འདོན་ཞིང་ངེད་མ་སྨད་གསུམ་ཀ་ངུས་སོ། །དེ་ནས་ངས་ཨ་མ་ལ་ཨ་མ་བདེན་ཏེ། དེ་ཙམ་གྱི་སྡུག་པ་མ་བྱེད། ངས་ཨ་མ་གང་འདོད་པའི་ལས་བྱའོ་བྱས་པས། ཨ་མ་ན་རེ་ང་དག་ཁྱོད་ཀྱི་སྟེང་དུ་བེར་གྱོན། འོག་ཏུ་རྟ་ཞོན་པའི་ཡོབ་ཆེན་སྡང་བ་དགྲ་འདི་ཚོའི་གཉའ་ཐོག་ན་ཕར་ཤུད་དེ་བ་ཞིག་འདོད་པ་ཡིན་ཏེ། དེ་རང་མི་འོང་བ་འདྲ། ངན་གཡོ་ཆེ་རབ་འོང་བ་འདྲ་བ་འདུག་པས། མཐུ་གཏད་སེར་
(༣༡)གསུམ་མཐར་ཕྱིན་པ་ཞིག་བསླབས་ནས། ཨ་ཁུ་དང་ཨ་ནེས་གཙོ་བྱས་པའི་ཡུལ་མི་ཁྱིམ་མཚེས་རང་རེ་མ་སྨད་ལ་སྡུག་པོ་གཏོང་མཁན་འདི་ཀུན་རྩ་བ་དགུ་རྒྱུད་ནས་རབས་ཆད་པ་ཞིག་འདོད་དེ། ཨེ་འོང་ལྟོས་དང་ཟེར་བ་ལ། ངས་ཨེ་འོང་བལྟའོ་ཨ་མ་རང་བླ་མའི་འབུལ་བ་དང་ང་རང་གི་རྒྱགས་ཅི་འབྱོར་གྲབས་གྱིས་ཤིག་བྱས་པས། ཨ་མས་མཐུ་སློབ་པའི་ཆ་རྐྱེན་དུ་ཞིང་བྲེ་པེ་སྟན་ཆུང་གི་ཕྱེད་བཙོངས་པའི་རིན་ལ་གཡུ་སྐར་ཆེན་འོད་འཕྲོ་བྱ་བ་ཞིག་དང་། རྟ་དཀར་པོ་སེང་གེ་སྲབ་མེད་བྱ་བ་ཡུལ་ན་དགའ་བ་ཞིག་དང་། ཚོས་ལྟང་གཉིས་བུར་ལྟང་གཉིས་ཁུགས་འདུག་པའི་བུར་ལྟང་གཉིས་འཕྲལ་དགོས་ལ་སྤྱད་ནས་གྲབས་ཚར་བ་དང་། ང་གུང་ཐང་གི་ལྷུན་གྲུབ་མགྲོན་ཁང་བྱ་བར་ཞག་འགའ་བསྡད་ནས་ལམ་གྲོགས་བཙལ་བས་མངའ་རིས་དོལ་ནས་ཡིན་ཟེར་བའི་གཅེས་ཕྲུག་ལྔ་དབུས་གཙང་གི་ཕྱོགས་ལ་ཆོས་དང་མཐུ་སློབ་ཏུ་འགྲོ་བ་ཡིན་ཟེར་སླེབས་བྱུང་བ་ལ། ང་ཡང་མཐུ་སློབ་ཏུ་འགྲོ་བས་རང་རེ་རྣམས་སྡེབ་འགྲོ་བྱས་པས། རུང་ཟེར་བ་དང་། གུང་ཐང་སྨད་དུ་ཁྲིད་ཕྱིན་ནས་ཞག་ཤས་ངེད་ཀྱིས་ཞབས་ཏོག་བྱས། དེ་བར་ལ་ཨ་མས་ཁོང་རྣམས་ལ་ངའི་ཕག་ཏུ་ངེད་ཀྱི་བུ་འདི་ལ་སྙིང་རུས་ཡེ་མེད་དོ། །ཁྱེད་གྲོགས་པོ་རྣམས་ཀྱིས་བསྐུལ་ལྕག་གྱིས་ལ་མཐུ་ཤིན་ཏུ་མཁས་པ་ཞིག་སློབས་ཤོག་ཅིག འདིར་སླེབས་དུས་སྣ་ལེན་དང་བྱ་དགའ་གཟབ་པ་བྱེད་དོ་ཟེར་བ་བྱས་འདུག དེ་ནས་རྟ་ལ་ཚོས་ལྟང་གཉིས་བཀལ། གཡུ་ལུས་ལ་བཅངས་ཏེ། ངེད་རྣམས་ཀྱིས་ལམ་དུ་ཆས་པ་ལ། ཨ་མ་ཐག་རིང་གི་བར་དུ་སྐྱེལ་དུ་ཕྱིན་
(༣༢)པའི་ལམ་བར་དང་། སྐྱེལ་ཆང་འཐུང་སར་ཨ་མས་ངའི་གྲོགས་པོ་རྣམས་ལ་ཁ་བརྡ་མང་པོ་བྱེད་ཅིང་འདུག ཁྱད་པར་དུ་ང་རང་ཟུར་དུ་བཀར་ནས། མ་གཅིག་དང་བུ་གཅིག་འབྲལ་མ་ཕོད་པར་ཨ་མས་ངའི་ལག་པ་ནས་བཟུང་སྟེ་བཅང་བཅང་བྱས་ཤིང་གདོང་མཆི་མས་གང་བའི་ངུ་ངག་གིས་བུ་འུ་ཅག་མ་སྨད་ཀྱི་ལས་བསྐོས་ལ་ལྟོས་ལ། ཡུལ་དུ་མཐུའི་རྟགས་ཐོན་པ་ཞིག་ཅིས་ཀྱང་གྱིས་ཤོག་ཅིག ཁོང་ཚོའི་མཐུ་དང་འུ་ཅག་གི་མཐུ་མི་འདྲའོ། །ཁོང་ཚོ་གཅེས་ཕྲུག་རང་དགའ་རྒྱགས་པའི་མཐུ་ཡིན་པར་འདུག འུ་ཅག་མ་སྨད་སྡུག་ཐུག་པའི་མཐུ་ཡིན་པས་ཁྱོད་སྙིང་རུས་སྐྱེད་ཤོག་ཅིག རྒྱ་ལ་གལ་ཏེ་བུ་ཁྱོད་ཀྱིས་ཡུལ་དུ་མཐུའི་རྟགས་མ་ཐོན་པར་ལོག་བྱུང་ན། ང་མ་རྒན་མོ་ཁྱོད་རང་གི་མདུན་དུ་ལྕེབས་ནས་ཤི་སྡོད་དོ་ཟེར། དམ་བཅའ་བསྒོས་ནས་ངེད་མ་སྨད་སོ་སོར་གྱེས་པ་ལས། ང་ཨ་མ་ལ་སེམས་འཕྲེང་དྲགས་ཏེ། ཡང་ཡང་ཕྱི་མིག་ལྟ་བ་དང་མཆི་མ་མང་པོ་ཤོར། ཨ་མ་ཡང་ང་བུ་གཅིག་པོ་ལ་སེམས་འཕྲེང་བས། ངེད་རྣམས་མཐོང་མཐོང་གི་བར་དུ་ང་ལ་མིག་ཅེ་རེ་ངུ་ཞིང་བསྡད་འདུག་པ་ལ་ང་ཡང་ཨ་མ་དང་ཡུད་ཙམ་ཞིག་འཕྲད་པ་ལ་ཕྱིར་ལོག་གམ་ལོག་གམ་སྙམ་པའི་སེམས་ཤིན་ཏུ་འཕྲེང་བ་ཞིག་བྱུང་སྟེ། ངེད་མ་སྨད་ཕྱིས་མི་འཕྲད་པ་དེ་སེམས་ཀྱིས་ཚོར་བ་ཡིན་པར་འདུག མི་མཐོང་བ་དང་ཨ་མ་ཡུལ་དུ་ངུ་ཞིང་ལོག་ཕྱིན་པས། ཞག་འགའ་ནས་མྱང་ཚ་དཀར་རྒྱན་གྱི་བུ་མཐུ་སློབ་ཏུ་སོང་འདུག་ཟེར་བའི་གྲགས་པ་ཆེན་པོ་བྱུང་འདུག ངེད་རྣམས་དབུས་གཙང་གི་ལམ་དུ་ཞུགས་ནས་ཕྱིན་པས། གཙང་རོང་གི་གཡག་སྡེ་ཞེས་བྱ་བར་སླེབས། དེར་ཕྱུག་པོ་ཆེན་པོ་གཅིག་ལ་རྟ་དང་
(༣༣)ཚོས་རྣམས་བཙོངས་པས་རིན་གསེར་དུ་བྱུང་བ་ལུས་ལ་བཅངས་ཏེ། གཙང་པོ་བརྒྱབ་ནས་དབུས་ཕྱོགས་ལ་གཏད་ཕྱིན་པས། འཐོན་ལུག་ར་ཁ་བྱ་བར་དབུས་པའི་བན་བཙུན་མང་པོ་དང་ཕྲད་དེ། དེ་རྣམས་ལ་དབུས་ཕྱོགས་ན་མཐུ་གཏད་སེར་གསུམ་ལ་མཁས་པ་ཇི་སྐད་བྱ་བ་ཡོད་དྲིས་པས། བན་དེ་གཅིག་ན་རེ་ཡར་ལུངས་སྐྱོར་པོ་གྲོང་བྱ་བ་ན་བླ་མ་གཉག་གཡུང་སྟོན་ཁྲོ་རྒྱལ་བྱ་བ་བཞུགས་ཏེ། ཁོང་མཐུ་གཏད་སོགས་དྲག་སྔགས་ལ་གྲུབ་པ་ཐོབ་པ་ཡིན་ཟེར་ཏེ། བན་དེ་དེ་ཁོང་གི་སློབ་མར་འདུག །དེ་ནས་ངེད་རྣམས་བླ་མ་གཡུང་སྟོན་ཁྲོ་རྒྱལ་རང་ལ་གཏད་ཕྱིན་པས་ཡར་ལུངས་སྐྱོར་པོ་གྲོང་དུ་སླེབས། བླ་མ་དང་མཇལ་བའི་ཚེ། ཁོང་གྲོགས་པོ་རྣམས་ནི་ཕྱག་རྟེན་སྣ་རེ་ཙམ་ལས་མི་གཏོང་བར་འདུག ངས་གསེར་གཡུ་ཀུན་ཕུལ་ཏེ། འདི་མིན་ལུས་ངག་ཡིད་གསུམ་ཡང་འབུལ། བདག་ལ་ཡུལ་མི་ཁྱིམ་མཚེས་སྐྱིད་དུ་ཕངས་པ་འགའ་བདོག་པས། ཡུལ་དུ་རྟགས་ཐོན་པའི་མཐུ་ཕུལ་དུ་ཕྱིན་པ་ཞིག་ཐུགས་རྗེས་འཛིན་པར་ཞུ་ཞིང་། དེ་བར་གྱི་ལྟོ་གོས་ཀྱང་ཐུགས་རྗེས་འཛིན་པར་ཞུ་ཞུས་པས། བླ་མ་ཞལ་འཛུམ་པ་ཞིག་མཛད་ནས། ཁྱོད་ཀྱི་གཏམ་དེ་རྣམས་ལ་བརྟག་པར་བྱ་གསུང་། དེ་ནས་ངེད་རྣམས་ལ་མཐུ་མཐིལ་ཕྱིན་པ་ནི་མ་བསླབས། གནམ་ས་ཁ་བརྡེབས་པ་ལྟ་བུའི་ཁ་ཕོ་ཡོད་པའི་ངན་སྔགས་སྣ་རེ་ཙམ་དང་། ཡང་ཕན་བྱེད་ཀྱི་གདམས་ངག་ཕྱག་ལེན་དང་བཅས་པ་སྣ་རེ་ཙམ་གནང་ནས་ལོ་གཅིག་ཙམ་སོང་བ་དང་། ངའི་གྲོགས་པོ་ཀུན་ལོག་འགྲོ་གྲབས་བྱེད་ཅིང་འདུག་པ་
(༣༤)ལ། བླ་མས་དབུས་ཕྲུག་གི་གོས་ལེགས་པ་རེ་ཀུན་ལ་བཙེམས་ནས་གནང་གིན་འདུག ང་ནི་ཡིད་ཅིག་མ་ཆེས་ཏེ། མཐུ་དེ་དག་གིས་ཡུལ་དུ་རྟགས་ཐོན་པ་ཡང་དཀའ་བར་འདུག མཐུའི་རྟགས་མ་ཐོན་བར་ཡུལ་དུ་ལོག་རུང་ཨ་མ་ལྕེབས་ཏེ་འཆི་བ་མིན་པ་མི་འོང་སྙམ་ནས་གྲབས་མ་བྱས་པས། གྲོགས་པོ་རྣམས་ན་རེ། ཐོས་པ་དགའ་ཡང་མི་འགྲོའམ་ཟེར། ང་འགྲོ་བ་ལ་མཐུ་མ་ལོབས་བྱས་པས། ཁོང་རྣམས་ན་རེ་རང་རེས་བསྙེན་པ་སྐྱེལ་ནུས་ན་གདམས་ངག་དེ་ཀུན་ཟབ་མོ་རང་འདུག བླ་མ་རང་ལའང་དེ་བས་ལྷག་པ་མེད་གསུང་གིན་འདུག་པས། ངེད་རྣམས་ཀྱིས་མཐུའི་སྒྲོ་འདོགས་ཆོད། ཁྱོད་རང་ལྷག་མ་འདྲ་ཨེ་གནང་ལྟོས་ཤོག་ཟེར། ཁོང་ཚོས་བླ་མ་ལ་གཏང་རག་དང་ཕྱག་ཕུལ་ནས་ཆས་འདུག་པ་ལ། ངས་ཀྱང་བླ་མས་གནང་བའི་གོས་དེ་གྱོན་ནས་ཁོང་རྣམས་གྲོ་ལམ་ཞིག་གི་བར་བསྐྱལ། ཁམས་བདེ་བྱས་ནས་ཁོང་ཚོ་ཡུལ་དུ་ལོག་སོང་། ང་བླ་མའི་དྲུང་དུ་ལོག་འོངས་པའི་ལམ་ལ། རྟ་བོང་གི་སྦངས། བ་གླང་གི་གཅི་བ། ཁྱི་ལུད་རྣམས་འཐུ་ཞིང་འོངས་པས་ཐུ་བ་ཁྲིག་པ་གང་རྙེད་པ། བླ་མའི་གསོལ་ཞིང་གཤིན་པོ་རང་ཞིག་ཡོད་པ་དེའི་ཁར་ས་ཁུང་བྲུས་ཤིང་སྦས་པ། བླ་མ་གཟིམས་ཁང་གི་སྟེང་ན་ཡོད་པས་གཟིགས་ཏེ། གྲྭ་པ་འགའ་ལ་ང་ལ་སྔར་སློབ་མ་ཇི་སྙེད་ཅིག་བྱུང་སྟེ། མ་གི་བས་ཤ་ཚ་བ་མ་བྱུང་། ད་དུང་ཡང་མི་འོང་། ཁོ་ད་ནངས་ང་ལ་ཁམས་བདེ་ཞུར་མི་འོང་བ་དེ་ཡང་ལོག་འོང་བའི་རྟགས་སུ་འདུག ཁོ་དང་པོ་ངའི་སར་སླེབས་འོངས་པའི་ཚེའང་ང་ལ་ཡུལ་མི་ཁྱིམ་མཚེས་སྐྱིད་དུ་ཕངས་པ་ཚོ་ཞིག་ཡོད་པས།
(༣༥)མཐུ་གནང་བར་ཞུ་ལུས་ངག་ཡིད་གསུམ་འབུལ་ཟེར། གླེན་པ་མ་གི་འདྲ་ཞིག་འོང་བ། ཁོའི་གཏམ་དེ་རྣམས་བདེན་ན་ནི་མཐུ་མ་བྱིན་ན་སྙིང་ཡང་རྗེ་བར་འདུག་གསུངས་པ་གྲྭ་པ་ཞིག་གིས་ང་ལ་བསྐྱར་བས། གོ་བཅད་མཐུ་ཟུར་པ་ཞིག་འོང་བར་འདུག་སྙམ་དགའ་ནས། བླ་མའི་དྲུང་དུ་ཕྱིན་པས། བླ་མའི་ཞལ་ཏ་ལ་ཐོས་པ་དགའ་ཁྱོད་ལོག་མི་འགྲོ་བ་ཅི་ཡིན་གསུངས། དེར་ངས་བླ་མ་རང་གིས་གནང་བའི་གོས་དེས་ཕྱག་རྟེན་བྱས་ཕྱག་ཕུལ། ཞབས་སྤྱི་བོར་བླངས་ཏེ། བླ་མ་རིན་པོ་ཆེ། བདག་ངེད་མ་སྨད་གསུམ་ཡོད་པ་ལ་ཨ་ཁུ་དང་ཨ་ནེས་གཙོ་བྱས་པའི་ཡུལ་མི་ཁྱིམ་མཚེས་འགའ་དགྲར་ལངས་ཏེ། མི་འཚམ་པའི་སྤྱོད་ཁྱེར་སྣ་ཚོགས་ཀྱི་སྒོ་ནས་སྡུག་པོ་རང་བཏང་། དེ་ལ་ལན་གཞན་གླན་པའི་སྟོབས་མེད་པར། ཨ་མས་བདག་མཐུ་སློབ་ཏུ་བརྫངས་པ་ལགས། བདག་གིས་མཐུའི་རྟགས་མ་ཐོན་བར་ཡུལ་དུ་ལོག་ན། བདག་གི་མདུན་དུ་ཨ་མ་ལྕེབས་ནས་འཆི་བ་ཡོད་པས་མ་ཕྱིན་པ་ལགས། དེས་ན་མཐུ་མཐིལ་ཕྱིན་པ་ཞིག་གནང་བར་ཞུ་ཞེས་ཞུ་བ་ཕུལ་ནས་ངུས་པས། ཁྱོད་ལ་ཡུལ་མིས་སྡུག་པོ་ཇི་འདྲ་བཏང་གསུང་། ངས་ཡབ་མི་ལ་ཤེས་རབ་རྒྱལ་མཚན་སྐུ་གཤེགས་ཚུལ་ནས། ཨ་ཁུ་དང་ཨ་ནེས་སྡུག་པོ་བཏང་ཚུལ་རྣམས་ངུ་ངག་གིས་རྒྱས་པར་ཞུས་པས། བླ་མ་ཡང་སྤྱན་ཆབ་ཉིལ་མཛད་ནས། དེ་ལྟར་བདེན་ན་ཧ་ཅང་མི་འོས་པར་འདུག་པས། མཐུ་ངས་བྱས་ཀྱང་ཆོག་པར་འདུག་སྟེ། ཏབ་ཏོབ་ལར་མི་འདྲེན། ལར་ངའི་མཐུ་འདི་ལ་སྟོད་མངའ་རིས་སྐོར་གསུམ་ནས་གསེར་གཡུ་བརྒྱ་འབུལ་སྟོང་འབུལ། སྨད་མདོ་ཁམས་སྒང་གསུམ་ནས་ཇ་སིགས་དང་གོས་དར་བརྒྱ་
(༣༦)འབུལ་སྟོང་འབུལ། བར་དབུས་གཙང་རུ་བཞི་ནས་སྣམ་ཕྲུག་དང་མར་ནས་བརྒྱ་འབུལ་སྟོང་འབུལ། བྱར་དྭགས་ཀོང་གསུམ་ནས་མཛོ་རྟ་དང་གནག་ལུག་བརྒྱ་འབུལ་སྟོང་འབུལ་བྱུང་སྟེ། ལུས་ངག་ཡིད་གསུམ་འབུལ་ཟེར་བ་ཁྱོད་ལས་མ་བྱུང་བས། མི་ཁྱོད་ཀྱི་གཏམ་དེ་ལ་བརྟག་པ་མྱུར་བ་ཞིག་བྱེད་གསུངས་ནས། དེའི་ཚེ་བླ་མ་ལ་གྲྭ་པ་རྟ་བས་བང་མགྱོགས་པ། གླང་པོ་ཆེ་བས་སྟོབས་ཆེ་བ་ཞིག་ཡོད་པ་དེ་ངའི་ཡུལ་དུ་བལྟར་བཏང་བས། ཁོང་མྱུར་དུ་འཁོར་བྱུང་སྟེ། བླ་མ་རིན་པོ་ཆེ་ཐོས་པ་དགའ་བདེན་པར་འདུག་པས། མཐུ་ཤིན་ཏུ་གནང་དགོས་པར་གདའོ་ཞུ་ཞིང་འདུག་པ་ལ། ང་ལ་བླ་མའི་ཞལ་ནས། དང་པོ་ནས་ཙབ་ཙོབ་ལ་མཐུ་བྱིན་ན་གླེན་པ་ཁྱོད་ཀྱིས་གྱོད་བྱེད་ཀྱིས་དོགས་པ་ཡིན། ད་བདེན་པ་ཡོད་འདུག་པས། མཐུ་སྟེར་མཐུ་སློབ་ཏུ་གཞན་ཞིག་ཏུ་འགྲོ་དགོས་ཏེ། ང་ལ་མཐུ་གཟའ་གདོང་དམར་ནག་ཅེས་བྱ་བ་ཧཱུྃ་ཤི་དང་ཕཊ་འགྱེལ་ཐོངས་པ་ཞིག་ཡོད་པ་དེ། གཙང་རོང་གི་གནུབས་ཁུ་ལུང་བྱ་བ་ན་བླ་མ་ཁུ་ལུང་པ་ཡོན་ཏན་རྒྱ་མཚོ་བྱ་བ་སྨན་ཡང་ཤེས་སྔགས་ཀྱང་ཤེས་པ་ཞིག་ཡོད་པ་དེ་ལ་བྱིན། ཁོང་ལ་སེར་བ་མཛུབ་་ཁྲིད་ཐོངས་པ་ཞིག་འདུག་པ་དེ་ང་ལ་བྱིན་ནས། ངེད་གཉིས་མཐུན་པའི་གྲོགས་པོ་བྱས་ཏེ། ང་ལ་མཐུ་སློབ་ཏུ་བྱུང་ཚད་ཁོང་ཅན་དུ་བཏང་བར་བྱས། ཁོང་ལ་སེར་བ་སློབ་ཏུ་བྱུང་ཚད་ང་ཅན་དུ་བཏང་བར་བྱས་ཡོད་པས། དེས་ན་ཁྱོད་ཀྱང་ཁོང་གི་དྲུང་དུ་ང་རང་གི་བུ་འདི་དང་བསྡེབས་ནས་གཏོང་བ་ཡིན་གསུངས། ཁོང་རང་གི་སྲས་ཆེ་བ་དར་མ་དབང་ཕྱུག་བྱ་བ་དང་། ང་གཉིས་ལ་
(༣༧)རྒྱགས་ཟོང་དུ་དབུས་ཀྱི་ཕྲུག་དང་ཐེར་མ་འདྲེས་པ་མཛོ་ཁལ་གཅིག་དང་། ཕྱག་རྟགས་རྟེན་དང་བཅས་པ་བསྐུར་ནས། གཙང་རོང་གི་གནུབས་ཁུ་ལུང་དུ་བྱོན་པས། བླ་མ་གནུབས་ཆུང་པ་དང་མཇལ་ཏེ། སྣམ་བུ་བུབས་རེའི་ཕྱག་རྟེན་དང་། བླ་མའི་ཕྱག་རྟགས་རྟེན་དང་བཅས་པ་ཕུལ་ནས། དེར་ཡང་རྒྱུ་མཚན་ལོ་རྒྱུས་ཞིབ་པར་ཞུས་ཏེ་མཐུ་ཐུགས་ལ་འདོགས་པར་ཞུ་ཞུས་པས། བླ་མའི་ཞལ་ནས། ངའི་གྲོགས་པོ་ཕྱི་ཐག་རིང་། ལབ་རྗེས་བཙན། ཁྱེད་གཉིས་ལ་མཐུའི་གདམས་ངག་ཅིས་ཀྱང་སྟེར་བ་ཡིན་པས། རི་སྣ་མ་གིར་ལག་མཐུས་གླགས་མི་ཚ་བའི་སྒྲུབ་ཁང་རྩིགས་གསུངས། དེར་འོག་ཏུ་ཐོག་རིམ་གསུམ་ཡོད་པ། སྟེང་དུ་ཐོག་རིམ་གཅིག་ཡོད་པ་ལ་གདུང་བཟང་པོ་ཉ་གཞིབས་གཞིབས་བཏང་། མཐའ་ཕ་བོང་གཡག་རོ་ཙམ་གྱིས་གོ་མཚམས་མེད་པར་གཏམས་ནས། སྒྲུབ་ཁང་གི་སྒོ་གཞན་གྱིས་མི་ཤེས་པ་དང་། ལག་མཐུས་གླགས་མི་རྙེད་པ་བྱས། དེ་ནས་མཐུའི་གདམས་ངག་གནང་སྟེ། མཐུ་བསྒྲུབས་ནས་ཞག་བདུན་སོང་བ་དང་། བླ་མ་བྱོན་ནས། སྔར་ཡིན་ན་ཞག་བདུན་རེས་ཆོག་གི་ཡོད། ད་ལན་ཡང་དེས་ཆོག་འོང་གསུང་བ་ལ། ངས་ཐག་རིང་གི་མཐུ་ལགས་པས་ད་དུང་ཡང་ཞག་བདུན་བསྒྲུབ་པར་ཞུ་ཞུས་པས། འོ་ན་སྒྲུབས་ཤིག་གསུང་བསྒྲུབས་པས། ཞག་བཅུ་བཞི་འགྲོ་བའི་ནུབ་མོ། ཡང་བླ་མ་བྱོན་ཏེ། དོ་ནུབ་དཀྱིལ་འཁོར་གྱི་མཐར་མཐུའི་རྟགས་འོང་བ་ཡོད་དོ་གསུངས། དེའི་ནུབ་མོ་བཀའ་སྲུང་དམ་ཅན་རྣམས་ཀྱིས་མི་མགོ་སུམ་ཅུ་སོ་ལྔ་དོན་སྙིང་དང་བཅས་པ་དམར་ཙར་རེ་ཁྱེར་བྱུང་ནས། ཁ་སང་ནས་ངེད་
(༣༨)འབོད་རང་འབོད་ཅིང་བསྐུལ་བ་དེ་འདི་ཀ་དགོས་པ་ཡིན་འོང་ཟེར་དཀྱིལ་འཁོར་གྱི་མཐར་སྤུངས་སོང་། ནངས་པར་ཡང་བླ་མ་བྱོན་ནས་ད་དུང་སྒྲོལ་རྒྱུ་གཉིས་འདུག་པ་སྒྲོལ་ལམ་འཇོག་གསུང་། དེར་ངས་སྙིང་ཚིམ་དང་བདེན་གཤགས་བདར་བའི་རྟེན་དུ་འཇོག་པར་ཞུ་ཞུས་ནས་བཞག་པས་ཨ་ཁུ་དང་ཨ་ནེ་ལུས་འདུག དེར་དམ་ཅན་ཆོས་སྐྱོང་རྣམས་ལ་གཏང་རག་གི་ཚོགས་གཏོར་ཕུལ་ནས་མཚམས་གྲོལ་ལོ། །ཁུ་ལུང་ན་ད་ལྟ་ཡང་སྒྲུབ་ཁང་གི་ཤུལ་ཡོད་དོ། །དེའི་དུས་ངའི་ཡུལ་སྐྱ་རྔ་རྩ་རུ། མཐུའི་རྟགས་ཇི་འདྲ་ཞིག་བྱུང་སྙམ་ན། ཨ་ཁུའི་བུ་ཆེ་བ་ལ་བག་མ་བླངས་པའི་བག་སྟོན་གྱི་་སར། ཨ་ཁུའི་བུ་རྣམས་དང་མནའ་མས་ཐོག་དྲངས་ངེད་མ་སྨད་ལ་ཤིན་ཏུ་སྡང་བའི་མི་མདའ་སུམ་ཅུ་སོ་ལྔ་ནང་དུ་འཛོམ། མགྲོན་པོ་གཞན་རྣམས་དང་ངེད་ལ་དཀར་མི་རྣམས་ཆས་འོང་བའི་ལམ་བར་གྱི་གླེང་མོ་ལ། མི་བདག་བདག་ཏུ་རེ། བདག་པོ་སྒོ་ཁྱིར་འདོན་ཟེར་བའི་གཏམ་དཔེ་ཇི་བཞིན་བྱེད་མཁན་སྙིང་མ་སྡུག་འདི་ཚོ་ལ་ཐོས་པ་དགའི་དག་མཐུ་མི་འོང་རུང་། དཀོན་མཆོག་གི་བདེན་མཐུ་ཞིག་འོང་ཐང་པ་ལ་ཟེར། འདུས་འོང་བ་རྣམས་ནང་དུ་མ་ཚུད་ཙམ་གྱི་བར་དེར། ཨ་ཁུ་དང་ཨ་ནེ་གཉིས་ཀྱིས་མི་འདི་ལ་ཟ་མ་འདི་སྟེར་དང་ལན་འདི་བཟློག་གི་གྲོས་བྱེད་ཅིང་ཕྱིར་བསྡད་པའི་དུས་སུ། སྔར་ངེད་རང་གི་གཡོག་མོ་ཕྱིས་ཨ་ཁུའི་གཡོག་བྱེད་པ་ཞིག་ཆུ་བཅུ་རུ་ཕྱིན་པས། ར་བ་ན་རྟ་མང་པོ་བཏགས་ཡོད་པ་མ་མཐོང་བར། སྡིག་པ་དང་། སྡོམ་དང་། སྦྲུལ་དང་། སྦལ་ལྕོང་ལ་སོགས་པས་གང་བའི་ནང་ན་སྡིག་པ་
(༣༩)རྭ་ཅན་གཡག་ཤད་ཙམ་ཞིག་གི་རྭ་བར་ན་ཀ་བ་བཅུག་སྟེ་ཕྱིར་འཐེན་པ་མཐོང་བས་འཇིགས་དྲགས་བྲོས་ཏེ་ཕྱིར་ཐོན་མ་ཐག་ཏུ། ར་བ་ན་རྟ་རྒོད་མ་ཚན་མ་དང་གསེབ་འདྲེས་པ་མང་པོ་བཏགས་ཡོད་པ་ལས། གསེབ་ཀྱིས་རྒོད་མར་བཙེས་པས། རྟ་ཀུན་འདྲོགས་པའི་ཕྲ་ཐོ་དང་། རྒོད་མས་གསེབ་ལ་ཕྲ་བརྒྱབ་པ་ཀ་བ་ལ་ཕོག་པས་ཀ་བ་འགྱེལ་ཏེ། ཁྱིམ་གཏིབས་པའི་གཏིབས་འོག་ཏུ་ཨ་ཁུའི་བུ་རྣམས་དང་། མནའ་མ་སོགས་མི་མདའ་སུམ་ཅུ་སོ་ལྔ་ཤི་བས་ཁང་བའི་ནང་ས་ཚུབ་དང་རོས་གང་། ཕྱི་ངུ་ཆོང་གིས་གང་བ་དེ་པེ་ཏས་མཐོང་སྟེ། མྱུར་དུ་ཨ་མའི་སར་ཕྱིན་ནས། ཨ་མ་ཨ་མ་ཨ་ཁུའི་ཁྱིམ་གཏིབས་ནས་མི་མང་པོ་ཤི་འདུག་ལྟོས་དང་ཟེར་བའི་གཏམ་བཤད་པས། ཨ་མས་བདེན་ནམ་མི་བདེན་སྙམ་དགའ་དྲགས་ལངས་ཏེ་བལྟས་པས། ཨ་ཁུའི་ཁྱིམ་ས་ཚུབ་ཕྱུར་རེ་བ་དང་། ལུང་བ་ངུ་ཙི་ཐེག་ཐེག་པ་མཐོང་སྟེ། ཧ་ལས་པ་ལྟར་དགའ་ནས། དེའི་ཚེ་ཨ་མས་དབྱུག་པ་རིང་པོ་ཞིག་གི་རྩེ་ལ་གོས་ཧྲུལ་བསྐྱོན་ཏེ་ཕྱར་ནས། སྐད་ཆེན་པོས་གསོལ་ལོ་མཆོད་ཅིག་ལྷ་བླ་མ་དཀོན་མཆོག་གསུམ། ཁོ་དེ་ཡུལ་མི་ཁྱིམ་མཚེས་པ་ཀུན་མི་ལ་ཤེས་རབ་རྒྱལ་མཚན་ལ་བུ་སྐྱེས་ཨེ་འདུག ང་མྱང་ཚ་དཀར་རྒྱན་གྱིས་གོས་ཧྲུལ་གྱོན། ལྟོ་ངན་ཟོས་ནས་བུའི་རྒྱགས་སྦྱངས་པ་ལ་དོན་བྱུང་ཨེ་འདུག་ལྟོས་དང་། དང་པོ་ཨ་ཁུ་དང་ཨ་ནེ་གཉིས་ན་རེ་མ་སྨད་ཚོ་མང་ན་དམག་དྲོངས། ཉུང་ན་མཐུ་ཐོངས་ཟེར་བ་བྱས་སོ། །ད་ཉུང་བའི་མཐུ་བཏང་བས་མང་བའི་དམག་ལས་ལྷག་པ་ཞིག་བྱུང་ངོ་། །སྟེང་གི་མི་ལ་ལྟོས། འོག་གི་ཕྱུགས་ལ་ལྟོས། བར་གྱི་ནོར་ལ་ལྟོས། ལར་མ་ཤི་ཚེ་རིང་
(༤༠)ཙ་ན། བུས་བསྟན་པའི་ལྟད་མོ་འདི་འདྲ་མཐོང་བའི་དུས་བྱུང་བ་ཡིན། ང་མྱང་ཚ་དཀར་རྒྱན་ལ་ད་ལན་ལས་ཉམས་དགའ་བ་ཨེ་འོང་ལྟོས་དང་ཟེར། སྙིང་ཚིམ་དང་གཤགས་བདར་བ་ཁྱིམ་དུ་མ་ཚུད་པ་ཀུན་གྱིས་ཐོས་པས། ལ་ལ་ན་རེ་མོ་བདེན་བྱེད་དུ་འོང་ཟེར། ལ་ལ་ན་རེ་བདེན་པ་བདེན་ཏེ་ད་ལན་ཧ་ཅང་དྲགས་ཟེར། དེའི་སྟོབས་ཀྱིས་མི་ཤི་བྱུང་བ་ཀུན་གྱིས་ཐོས་ནས་འཚོགས་ཏེ། མོས་ད་ལན་གྱི་ཕུང་ཆེན་འདི་གཡོས་པས་མ་ཆོག་པར་སྙིང་ཚིམ་དེ་བྱས། མ་འཚམས་དྲགས་པས། སྡུག་སྣ་དགུ་བཏང་རྗེས་གསོན་སྙིང་ལ་དམར་འདོན་བྱེད་ཟེར་བ་ལ། རྒན་པ་རྣམས་ན་རེ་མོ་བསད་པས་ཅི་ལ་ཕན། ཡང་རང་རེ་ཚོ་ལ་མོའི་བུས་འདི་འདྲ་བ་ཞིག་འོང་བ་དེ་ཀ་ཡིན་མོད། དེ་བས་དང་པོར་མོའི་བུ་བཙལ་ཏེ་ལག་མཐུས་གསོད་ཅི་ཐུབ་གྱིས། དེ་ནས་མོ་རང་གསོད་ལུགས་སླ་ཟེར་བ་ལ་ཁ་འཆམ། ཨ་ཁུས་ཐོས་པས། ངེད་ལ་བུ་འཆི་རྒྱུ་དང་བུ་མོ་འཆི་རྒྱུ་མེད། ང་རང་ནི་ཤི་ན་དགའ་ཟེར། ཨ་མ་གསོད་པར་ཆས་པ་ལ། ཡུལ་མི་རྣམས་ཀྱིས་བཟུང་སྟེ། དང་པོ་ཡང་ཁྱེད་ཀྱི་ཁ་ཕྱིར་འགྲོལ་བས་ཡུལ་འདིར་ཕུང་འདི་བྱུང་བ་ཡིན། ད་ཡང་མོའི་བུ་མ་སོད་པར་ལས་འདི་བྱེད་ན་རང་རེ་ཚོ་འཐབ་བྱས་པས། ཨ་ཁུ་ལ་བྱ་ཐབས་མ་བྱུང་བར་ལུས། དེ་ནས་ཡུལ་མི་རྣམས་ཀྱིས་ང་གསོད་དུ་གཏོང་བའི་གྲོས་བྱས་པས། ཞང་པོ་ཨ་མའི་སར་འོངས་ནས། ཁ་སང་གི་གཏམ་དེ་དང་བྱེད་ལུགས་དེས། ད་ཡུལ་མི་རྣམས་ཀྱིས་ཁྱོད་རང་དང་བུ་ལག་མཐུས་གསོད་པར་འདུག་གིས། ནུས་པ་རང་ཅི་ཡོད་དམ་མཐུ་བྱུང་བ་རང་གིས་ཆོག་མོད་ཟེར་
(༤༡)མང་པོ་འབར་དུ་བྱུང་བ་ལ། ཨ་མས་ཞང་པོ་རང་གི་ཐོག་ཏུ་མ་བྱུང་བ་ལགས། དེ་ཙམ་གྱི་གོ་བ་ཞིག་དག་ང་ལ་ཡང་ཡོད་དེ། ངའི་ནོར་ཆེན་དེ་འཕྲོགས་པའི་ཁར་བྱེད་ལུགས་དེ་བྱས་པས་བསྲན་བཟོད་པ་དཀའ་མོ་ཀ་གདའ་ཞེས་ལན་གཞན་མ་བཅལ་བར་ངུས་པས། ཞང་པོ་ཡང་བདེན་པ་ཁྱོད་ཀ་བདེན། ད་གསོད་མཁན་བྱུང་དོགས་ཡོད་པས་སྒོ་དམ་དུ་ཆུག་ཟེར་ཐོན་སོང་། སྟེང་སྒོ་དམ་པའི་ངང་ནས་བསམ་བློ་མང་པོ་གཏོང་ཞིང་ཡོད་པའི་སྐབས་སུ། ཨ་ཁུའི་གཡོག་མོ་སྔར་ངེད་རང་གི་ཡིན་པ་དེས། ཁོང་ཚོ་གྲོས་བྱེད་པ་ཐོས་ནས་མོས་རུས་ཞེན་གྱིས་མ་བཟོད་པར། ཨ་མ་ལ་ཁོང་ཚོ་གྲོས་འདི་ལྟར་བྱེད་ཅིང་འདུག་པས་སྲས་ཀྱི་སྲོག་ཟོན་མཛོད་ཅིག་ཅེས་བྱ་བཏང་བས། ཨ་མའི་བསམ་པ་ལ། ཁོང་ཚོའི་གྲོས་དེ་ང་རེ་ཞིག་བློ་བདེ་ཚར་སྙམ་ནས། ཞིང་བྲེ་པེ་སྟན་ཆུང་གི་ཕྱེད་པོ་ཡང་བཙོངས་པའི་རིན་ལ་གསེར་སྲང་བདུན་བྱུང་བ། ཡུལ་པའི་མི་བཏང་བ་ནི་མ་བྱུང་། གཞན་བང་ཆེན་ནི་མ་འབྱོར་བས། ཨ་མ་རང་ང་ལ་འཕྲད་པ་དང་རྒྱགས་སྐྱེལ་བ་དང་ཁ་ཏ་འཇུག་པ་ལ་འོང་སྙམ་པའི་ཚེ། དབུས་ཕྱོགས་ཀྱི་རྣལ་འབྱོར་པ་བལ་པོ་བསྐོར་ནས་ལོག་འགྲོ་བ་ཞིག་ལྡོམ་བུ་བྱེད་དུ་བྱུང་བ་ལ། ལོ་རྒྱུས་རྣམས་ཞིབ་པར་དྲིས་པས། བང་ཆེན་གྱི་འོས་སུ་བྱུང་སྟེ། ཞག་འགའ་འདིར་བཞུགས། དབུས་་གཙང་གི་ཕྱོགས་ན་ངའི་བུ་ཞིག་ཡོད་པས། དེ་ལ་འཕྲིན་རེ་ཙམ་བསྐུར་བ་ཡིན་པས། དེ་རྣམས་ཀྱང་སྤྲོད་གྲོགས་གྱིས་བྱས་ནས། དེ་བར་ལ་ཞབས་ཏོག་སྐྱིད་དུ་ཚོར་བ་བྱས། ཨ་མས་མར་མེ་ཞིག་སྦར་ཏེ།
(༤༢)ངའི་བསམ་པ་བཞིན་གྲུབ་ན་མར་མེ་འདི་ཡུན་རིང་དུ་གནས་པ་དང་། མི་འགྲུབ་ན་མྱུར་དུ་འཆི་བའི་འཕྲིན་ལས་ཐོས་པ་དགའི་བླ་མ་དང་ཆོས་སྐྱོང་རྣམས་ཀྱིས་མཛོད་ཅིག་བྱས་དམོད་བོར་བས། མར་མེས་ཉིན་ཞག་ཕྲུགས་གཅིག་ཐུབ་སྟེ། བསམ་པ་གྲུབ་པར་ཡིད་ཆེས་ནས། རྣལ་འབྱོར་པ་རྒྱལ་ཁམས་བསྐོར་བ་ལ་གོས་ལྷམ་གལ་ཆེ་བས། ལྷན་པ་དང་ཀྲད་པ་གྱིས་བྱས། ལྷམ་གྱི་ཀྲད་རྒྱུན་རྣམས་ཁོ་རང་ལ་སྤྲད། གོས་བེམ་པོ་ཞིག་འདུག་པ་དེ་ལ་ཨ་མ་རང་གིས་ལྷན་པ་བརྒྱབ། བེམ་པོའི་ནང་གི་རྒྱབ་གཞུང་དུ། རྣལ་འབྱོར་པ་ལ་རྒྱུས་མེད་པའི་གསེར་སྲང་བདུན་པོ་སྦས་པའི་སྟེང་དུ་ལྷན་པ་ནག་པོ་ཁ་གང་གྲུ་བཞི་བ་ཞིག་བརྒྱབ། དབུས་སུ་སྐུད་པ་དཀར་ལ་སྦོམ་པའི་གཟེར་ཚོམ་སྐར་མ་སྨིན་དྲུག་གི་དབྱིབས་འདྲ་བ་ཕྱིར་མི་མངོན་པ་ཞིག་གིས་མནན་ཏེ། རྣལ་འབྱོར་པ་ལའང་རྔན་པ་ཆེན་པོ་བྱིན་ནས། ཡི་གེ་གབ་ཡིག་ལ་རྒྱ་ལ་དམ་ཡོད་པ་ཞིག་བསྐུར་ནས་བརྫངས་སོ། །དེ་ནས་ཨ་མའི་བསམ་པ་ལ་ཡུལ་མི་འདི་རྣམས་ཀྱི་གྲོས་བྱེད་ལུགས་འདིས། ཅི་བྱེད་མི་ཤེས་པས་སྡིགས་མོ་ཞིག་བྱེད་དགོས་སྙམ། པེ་ཏ་ལ་བསླབས་ནས། ཁ་སང་གི་རྣལ་འབྱོར་པ་དེ་ལ་ཨ་ཇོས་ཡི་གེ་བསྐུར་བྱུང་བྱ་བ་ཀུན་ལ་བསྒྲགས། ཨ་མས་ངས་བསྐུར་བ་ལྟར་བྱས་པའི་ཡི་གེ། ཨ་མ་དང་སྲིང་མོ་ཁམས་བཟང་ངོས་ནས་མཐུའི་རྟགས་མཐོང་ལས་ཆེ། ད་དུང་ཡུལ་མི་ཁྱེད་མ་སྨད་ལ་སྒོས་སུ་སྡང་པོ་བྱེད་མི་བྱུང་ན་མིང་རུས་ཡི་གེ་ལ་བྲིས་ལ་བསྐུར་ཐོངས། ངས་མཐུ་ལ་བརྟེན་ནས་མིའི་སྲོག་གཅོད་པ་ཟ་མའི་ཕུད་མཆོད་པ་ལས་སླ་བར་འདུག་པས་རབས་དགུ་རྒྱུད་ནས་བཅད་པས་ཆོག
(༤༣)ཡུལ་པ་སྤྱིས་སྡང་པོ་བྱས་ན་ཁྱེད་རང་མ་སྨད་འདི་ཕྱོགས་སུ་ཐོན་ཤོག ངས་ཡུལ་དེ་བྱུང་བའི་རྗེས་ཀྱང་མེད་པ་ཞིག་བཟོ་བ་ཡིན། ང་ལོངས་སྤྱོད་དང་འཚོ་བ་ཐོགས་མེད་ཀྱི་ངང་ནས་སྒྲུབ་པ་བྱེད་ཅིང་ཡོད་པས་ངའི་སེམས་ལས་མ་བྱེད། བྱ་བ་ཞིག་བྲིས་ནས་རྒྱ་བྱས་ཏེ། ཐོག་མར་ཞང་པོ་སོགས་ངེད་རང་ལ་དཀར་མི་རྣམས་ལ་བསྟན། དེ་ནས་ཡི་གེ་ཞང་པོའི་ལག་ཏུ་བཞག་ནས་ཀུན་གྱིས་མཐོང་བར་བྱས་པས། ཁོང་རྣམས་ཀྱི་གྲོས་འགྱུར་ཏེ། ལག་མཐུའི་བསམ་སྦྱོར་བོར་ནས། ཞིང་འོར་མ་གྲུ་གསུམ་ཡང་ཨ་ཁུའི་ལག་ནས་བླངས་ཏེ། ཨ་མ་ལ་སྤྲད་འདུག རྣལ་འབྱོར་པ་དེས་ཀྱང་ང་རྩད་གཅོད་ཅིང་འོངས་པས། ང་གནུབས་ཁུ་ལུང་ན་འདུག་ཟེར་བ་ཐོས་ནས། ངའི་སར་བྱུང་སྟེ། ཨ་མ་དང་སྲིང་མོ་སོགས་ཡུལ་གྱི་ལོ་རྒྱུས་རྣམས་རྒྱས་པར་བཤད། ཡི་གེ་སྤྲད་པ་ཟུར་ཞིག་ཏུ་བཀླགས་པས། ཐོས་པ་དགའ་ཁམས་བཟང་བར་ཡོད་ལས་ཆེ། མ་རྒན་མོ་ལ་བུ་སྐྱེས་པས་བསམ་པ་གྲུབ། ཡབ་མི་ལ་ཤེས་རབ་རྒྱལ་མཚན་གྱི་གདུང་རབས་ཟིན། ཡུལ་དུ་མཐུའི་རྟགས་ཐོན། མི་མགོ་སུམ་ཅུ་སོ་ལྔ་ཁང་བ་གཏིབས་པའི་འོག་ཏུ་ཤི། དེའི་ཕྱིར་ཡུལ་པ་འདི་པས་ངེད་མ་སྨད་ལ་གཤའ་མ་རང་མ་བྱས་པས། ད་དུང་སེར་བ་གྱང་རིམ་དགུ་ཡོད་ཟེར་བ་ཞིག་ཕོབ། དེས་མ་རྒན་མོའི་བསམ་པ་མཐར་ཕྱིན་པ་ཡིན། ཡུལ་པ་འདི་པས་ཁྱོད་འཚོལ་དུ་བཏང་ནས་བསད་རྟིང་ང་ཡང་གསོད་ཟེར་བར་འདུག་པས། རང་རེ་མ་བུ་གཉིས་ཀའི་ཕྱིར་དུ་སྲོག་ཟོན་དམ་པར་གྱིས། རྒྱགས་ཆད་ན་ལུང་བ་ཁ་བྱང་དུ་ལྟ་བ། སྤྲིན་ནག་པོ་ལྡིང་ཞིང་། སྐར་མ་སྨིན་དྲུག་འཆར་
(༤༤)བའི་འོག་ན་རང་རེའི་ཉེ་ཚན་གྲོང་པ་བདུན་ཡོད་པས། དེ་ནས་རྒྱགས་ཅི་འདོད་འོང་བ་ཡོད་པས་ལོངས། རྩད་མ་ཆོད་ན་ལུང་བ་དེའི་ནང་ན་རྣལ་འབྱོར་པ་འདི་རང་བཞུགས་པ་ཡིན་པས་གཞན་དུ་མ་འདྲི་བྱ་བ་ཞིག་འདུག་པས། ཡི་གེའི་དོན་ནི་མ་གོ། ཡུལ་དང་ཨ་མ་ནི་དྲན། རྒྱགས་ཆད་པ་ལ་ཤིན་ཏུ་མཁོ་བ་ཞིག་ཡོད་པར་འདུག་ཀྱང་། ལུང་བ་དང་ཉེ་ཚན་རྒྱུས་མེད་པས་མཆི་མ་མང་པོ་ཤོར། རྣལ་འབྱོར་པ་དེ་ལ་ཁྱེད་ལ་ངའི་གཉེན་རྣམས་ཡོད་པའི་ལུང་བ་རྒྱུས་ཡོད་པར་འདུག་པ་གང་ཡིན་དྲིས་པས། མངའ་རིས་གུང་ཐང་ཡིན་ཟེར། དེ་མིན་རྒྱུས་མེད་དམ་ཁྱེད་རང་གི་ཡུལ་གང་ཡིན་བྱས་པས། དེ་མིན་ལུང་བ་མང་པོ་རྒྱུས་ཡོད་དེ། ཁྱེད་ཀྱི་གཉེན་གྱི་ལུང་བ་རྒྱུས་མེད། ང་རང་དབུས་ནས་ཡིན་ཟེར། འོ་ན་ཁྱེད་རང་འདིར་ཅུང་ཟད་ཅིག་བཞུགས་ཤིག ང་ད་ལྟ་རང་འོང་གིས་བྱས་ནས། ཡི་གེ་དེ་བླ་མ་ལ་ཕུལ། ལོ་རྒྱུས་རྣམས་ཞུས་པས། ཡི་གེ་དེ་ཚར་གཅིག་གཟིགས་ནས། ཐོས་པ་དགའ་ཁྱོད་ཀྱི་ཨ་མ་དེ་ཞེ་སྡང་ཆེན་པོ་རང་ཞིག་ཡོད་པར་འདུག མི་དེ་ཙམ་ཤི་རྟིང་ཡང་ད་དུང་སེར་བ་ཕོབ་ཟེར་བ་བྱས་གདའ། ཁྱོད་ལ་བྱང་ན་ཉེ་ཚན་ཇི་འདྲ་ཡོད་གསུང་། སྔར་ཡོད་ཟེར་བ་ནི་མ་ཐོས། ཡི་གེ་ནི་དེ་འདྲ་གདའ། རྣལ་འབྱོར་པ་ལ་དྲིས་པས་ཡང་རྒྱུས་ནི་མི་གདའ་ཞུས་པས། བླ་མའི་ཇོ་མོ་ཡེ་ཤེས་མཁའ་འགྲོའི་མཚན་དང་ལྡན་པ་ཞིག་ཡོད་པ་དེས་ཡི་གེ་ཚར་གཅིག་བསྒྲགས་ནས། རྣལ་འབྱོར་པ་དེ་ནང་དུ་བོས་ཤོག་གསུང་། བོས་ནས་མེ་ཆེན་པོ་བཏང་། ཆང་ཞིམ་པོ་བྱིན་ཏེ། རྣལ་འབྱོར་པའི་རྒྱབ་ནས་བེམ་པོ་
(༤༥)ཕུད་དེ་ཡུམ་གྱིས་གྱོན་ནས། བེམ་པོ་འདི་འདྲ་གྱོན་ནས་རྒྱལ་ཁམས་བསྐོར་བའི་མི་ལ་སྐྱིད་འོང་གསུང་ཞིང་། ཕར་ཅམ་ཚུར་ཅམ་མཛད། དེ་ནས་ཁང་ཐོག་ལ་འཛེགས་སོང་སྟེ། ཡུམ་གྱིས་བེམ་པོའི་ནང་ནས་གསེར་བཏོན། ལྷན་པ་སྔར་བཞིན་བཙེམས་ཏེ། བེམ་པོ་རྣལ་འབྱོར་པ་རང་ལ་གཡོགས། དེ་ནུབ་ཀྱི་ཟ་མ་བྱིན་ནས་གནས་སུ་བསྐྱལ་ལོ། །དེ་ནས་ཡུམ་ན་རེ་ཐོས་པ་དགའ་འདིར་བླ་མའི་དྲུང་དུ་ཤོག་དང་གསུང་། ཕྱིན་པས་གསེར་སྲང་བདུན་པོ་གནང་བྱུང་། གསེར་གང་ན་གདའ་ཞུས་པས། རྣལ་འབྱོར་པའི་བེམ་པོའི་ནང་ན་འདུག ཐོས་པ་དགའ་ལ་མ་གྲུང་མོ་རང་ཞིག་ཡོད་པར་གདའ། ལུང་བ་ཁ་བྱང་དུ་ལྟ་བ་ལ་ཉི་མ་མི་འཆར་བ་ལྟར་རྣལ་འབྱོར་པའི་བེམ་པོའི་ནང་ལ་ཉི་མ་མི་འཆར་བ་ལ་ཟེར་བར་གདའ། སྤྲིན་ནག་པོ་ལྡིང་བ་ལྷན་པ་ནག་པོ་ཁ་གང་བཏབ་པ་ལ་ཟེར་བར་གདའ། སྐར་མ་སྨིན་དྲུག་འཆར་བ་སྐུད་པ་དཀར་པོའི་ཧབ་བཙེམས་ལ་ཟེར་བར་གདའ། དེའི་འོག་གི་ཉེ་ཚན་གྲོང་པ་བདུན་པོ་གསེར་སྲང་བདུན་པོ་ལ་ཟེར་བར་གདའ། རྩད་མ་ཆོད་ན་ལུང་བ་དེའི་ནང་ན་རྣལ་འབྱོར་པ་འདི་རང་བཞུགས་པས་གཞན་དུ་མ་འདྲི་བྱ་བ། མ་གོ་ན་གསེར་རྣལ་འབྱོར་པའི་བེམ་པོ་ལ་ཡོད་པས་གཞན་དུ་མ་འཚོལ་བྱ་བར་གདའ་གསུང་། བླ་མའི་ཞལ་ནས་ཁྱེད་བུད་མེད་བློ་རྣོ་ཟེར་བ་བདེན་པར་གདའ་གསུང་ཤིན་ཏུ་དགྱེས་འདུག དེ་ནས་ངས་རྣལ་འབྱོར་པ་ལ་གསེར་ཞོ་གང་བྱིན་པས་དགའ་སོང་། ཇོ་མོ་ལ་གསེར་ཞོ་བདུན་ཕུལ། བླ་མ་ལ་གསེར་སྲང་གསུམ་ཕུལ་ནས་ད་
(༤༦)དུང་བདག་གི་མ་རྒན་མོས་སེར་བ་དགོས་ཟེར་བ་གདའ་བས། སེར་བའི་གདམས་པ་ཐུགས་ལ་འདོགས་པར་ཞུ་ཞུས་པས། སེར་བ་དགོས་ན་བླ་མ་གཡུང་སྟོན་ཁྲོ་རྒྱལ་ཅན་དུ་སོངས་ཤིག་གསུང་། བླ་མའི་ཡི་གེ་རྟེན་དང་བཅས་པ་བསྐུར་ཏེ། ཡང་ཡར་ལུངས་སྐྱོར་པོ་གྲོང་དུ་ཕྱིན། བླ་མ་དང་མཇལ་གསེར་སྲང་གསུམ་གྱི་ཕྱག་རྟེན་དང་། བླ་མའི་ཡི་གེ་རྟེན་དང་བཅས་པ་ཕུལ། སེར་བ་དགོས་པའི་ལོ་རྒྱུས་ཞུས་པས། མཐུས་གོ་ཆོད་པར་བྱུང་ངམ་གསུང་། མཐུས་གོ་ཆོད་པར་བྱུང་། མི་མགོ་སུམ་ཅུ་སོ་ལྔ་བསད་ལགས་ཏེ། ད་དུང་སེར་བ་དགོས་ཟེར་ཡི་གེ་བྱུང་བས་ཐུགས་ལ་འདོགས་པར་ཞུ་ཞུས་པས། དེ་ལྟར་བྱ་གསུང་གདམས་ངག་གནང་ནས་སྒྲུབ་ཁང་རྙིང་བ་ཞིག་ཏུ་བསྒྲུབས་པས། ཞག་བདུན་ནས་ཐུན་དོང་གི་ནང་དུ་སྤྲིན་འཁྲིགས། གློག་འཁྱུག འབྲུག་དང་གཟའ་རཱ་ཧུ་ལའི་སྐད་འདོན་པ་བྱུང་བས། ད་ངས་སེར་བ་ལ་མཛུབ་ཁྲིད་བྱས་པས་ཆོག་པ་འདུག་སྙམ་པ་བྱུང་། བླ་མའི་ཞལ་ནས་ཀྱང་། ད་སེར་བ་ཐོངས་པར་འདུག་པས་ཁྱོད་ཀྱི་ཡུལ་ན་ལོ་ཏོག་མཐོ་དམན་ཇི་འདྲ་ཡོད་རིམ་པར་གསུང་བ་ལ། ངས་ཡུར་མ་རན་པ་ཙམ་དང་། ལྗང་བ་ཕུག་རོན་ནུབ་པ་ཙམ་ཡོད་ཅེས་རིམ་པར་ཞུས་པས། ཅུང་སྔས་གསུང་། ད་ཅི་ཙམ་ཡོད་གསུང་བ་ལ། སྙེ་མ་འཐོན་ཙམ་ཡོད་ཞུས་པས། འོ་ན་སེར་བ་གཏོང་དུ་འགྲོ་རན་གསུང་། ངའི་གྲོགས་ལ་སྔར་བང་ཆེན་ལ་ཕྱིན་པ་དེ་བཏང་སྟེ། ངེད་གཉིས་ཀྱིས་རྣལ་འབྱོར་པར་བརྫུས་ནས་ཕྱིན་པས། ཡུལ་དུ་རྒན་དྲན་མ་མྱོང་བའི་ལོ་ལེགས་བྱུང་བ་ལ། གང་དགར་བརྔ་རྒྱུ་མེད་པའི་ལོ་ཁྲིམས་བྱས། བཙས་མ་སང་རྔ་གནངས་རྔ་དང་
(༤༧)ཐུག་བྱུང་། དེར་ངས་ལུང་བའི་ཕུ་རུ་ཐུན་གསོས། སྔགས་བགྲངས་པས་ནམ་མཁའ་ལ་སྤྲིན་བྱིའུའི་རོ་ཙམ་ཡང་འདུར་མ་འདོད་པ་ལ། དམ་ཅན་རྣམས་ཀྱི་མིང་ནས་བོས། ཡུལ་མིས་སྡུག་བཏང་ཚུལ་གྱི་བདེན་པ་བདར། བེམ་པོ་བརྡབས་ནས་མང་པོ་ངུས་པས། ནམ་མཁའ་ལ་སྤྲིན་ནག་ཆེན་པོ་བསམ་གྱིས་མི་ཁྱབ་པ་གློ་བུར་དུ་འདུས་ནས། གཅིག་ཏུ་འཁྲིགས་ཏེ་སྐད་ཅིག་དེ་ཉིད་ལ། འབྲུ་སྣ་གཅིག་ཀྱང་ལུང་བར་མ་ལུས་པའི་སེར་བ་གྱང་རིམ་གསུམ་ཙམ་ཡོད་པ་བབས་ཏེ། རི་ཐམས་ཅད་གྲོག་པོར་སོང་། ཡུལ་པ་ཐམས་ཅད་འབྲུ་མིག་གིས་མི་མཐོང་བས་ངུ་ཆོང་དུ་སོང་འདུག དེའི་རྗེས་ལ་ཆར་རླུང་ཆེན་པོ་ཞིག་བྱུང་སྟེ། ངེད་རང་གཉིས་ཀྱང་གྲང་ནས་བྲག་ཕུག་ཁ་བྱང་བསྟན་ཞིག་ཏུ་སྤེན་མའི་མེ་བཏང་ནས་བསྡད་པས། ཡུལ་པའི་སྐྱེས་པ་ལོའི་གཏང་རག་གི་ཤ་ལ་རི་དྭགས་གསོད་དུ་ཕྱིན་པ་རྣམས་ཐོས་པ་དགའ་འདིས་ཡུལ་པ་ལ་སྡུག་བཏང་བ་ཙམ་སུས་ཀྱང་མ་བཏང་། སྔར་མི་དེ་ཙམ་བསད། ད་ལོའི་ལོ་ལེགས་ལ་འབྲུ་མིག་གིས་མི་མཐོང་བ་བཅོས། ད་ཁོ་ལག་ཏུ་ཚུད་ན་གསོན་སྙིང་ལ་དམར་འདོན་བྱས། ཤ་ཁམ་རེ་དང་ཁྲག་ཐིགས་རེར་བཏང་རུང་སྙིང་ན་བ་མི་སངས་པར་འདུག་ཟེར་ཞིང་། ཕུག་པའི་མདུན་ན་མར་ལོག་འགྲོ་ཞིང་འདུག་པ་ལ། རྒན་པ་ཞིག་ན་རེ། ཁ་རོག་ཁ་རོག་སྐད་ཆུང་དུ་ཆུག བྲག་ཕུག་ཡ་གི་ན་དུད་པ་ཞིག་འདུག་ཅི་ཡིན་མི་ཤེས་ཟེར་བ་ལ། གཞོན་པ་རྣམས་ན་རེ་ཐོས་པ་དགའ་ཁོ་ཡིན་ཐག་ཆོད། ཁོས་འུ་ཅག་མཐོང་བ་མེད་པས། ཡུལ་པས་དམག་གཡབས་ཏེ་མ་བསད་ན་འདིས་ད་དུང་ཡུལ་འདི་ཕུང་དུ་འཇུག་ཟེར་ཞིང་ལོག་སོང་བ་ལ། ངའི་
(༤༨)གྲོགས་པོ་ན་རེ་ཁྱོད་རང་སྔོན་ལ་སོངས། ངས་ཁྱོད་རང་ཡིན་པ་ལྟར་བྱས་ཏེ། སྙིང་ཚིམ་བཏབ་ལ་འོང་གིས་ཟེར། ངེད་གཉིས་ཀྱིས་ཞག་བཞིའི་ནུབ་དིང་རིའི་མགྲོན་ཁང་དུ་འཛོམ་དུས་བྱས། ཁོ་རྩལ་ཆེ་བ་རྒྱུས་ཡོད་པས་ཡ་མི་ང་བར་བཞག ང་དེ་དུས་ཨ་མ་དང་ལན་གཅིག་འཕྲད་སྙམ་པ་ལས། དགྲས་འཇིགས་ཏེ་མྱུར་དུ་བྲོས་ཏེ་གཉའ་ནང་སྐོར་ཕྱིན་པས། རྐང་བ་ལ་ཁྱིས་ཕུག་སྟེ་འཛོམ་དུས་སར་དུས་ལ་མ་སླེབས། གྲོགས་པོ་ཁོང་ཚོའི་དམག་གིས་བསྐོར་བྱུང་བ་ལ། དཀྱིལ་གཤགས་ནས་འོངས་ཏེ། ཉེ་བའི་ཚེ་མགྱོགས་སུ་ཕྱིན། འགྱང་བའི་ཚེ་དལ་དུ་བཅུག མཚོན་བརྒྱབ་བྱུང་བའི་ལན་དུ་རྡོ་ཆེན་པོ་རེ་ཙམ་འཕངས་ནས། ང་ལ་སྒོས་སུ་སུས་བསྡོས་པ་དེ་ལ་མཐུ་གཏོང་བ་ཡིན། ངས་སྔ་སོར་མི་དེ་ཙམ་ཞིག་བསད་སྙིང་ཚིམ་པོ་མིན་ནམ། ད་ལོའི་ལོ་ལེགས་ལ་འབྲུ་མིག་གིས་མི་མཐོང་བ་བཅོས། དེ་ཡང་སྙིང་ཚིམ་པོ་མིན་ནམ། དེ་ཡིན་པས་ཀྱང་ངའི་ཨ་མ་དང་སྲིང་མོ་ལ་གཤའ་མ་མ་བྱས་ན། ངས་ལུང་བ་འདིའི་ཕུ་རུ་གཏད་འཇུག མདའ་རུ་སེལ་འཇུག མི་ཤི་བའི་ལྷག་མ་རྣམས་ཀྱང་རབས་དགུ་རྒྱུད་ནས་བཅད་དེ། ཡུལ་འདི་ཕུང་ཤི་སྐྱ་ཐེར་ལ་མ་བཏང་ན་ང་མིན་པས། ཁྱོད་ཚོ་སྒུར་ཅིག་སྒུར་ཅིག་ཟེར་ཞིང་འོངས་འདུག་པ་ལ། ཁོང་ཚོ་སྐྲག་ནས་ཁྱོད་ཀྱིས་ལན་ཁྱོད་ཀྱིས་ལན་ཟེར་ནས་གཅིག་ལ་གཅིག་གྱོད་གདལ་ཞིང་ལོག་སོང་ཟེར། དེར་གྲོགས་པོ་ངའི་སྔོན་ལ་དིང་རིར་སླེབས་ནས་ཁང་གཉེར་བ་ལ་རྣལ་འབྱོར་པ་འདི་འདྲ་ཞིག་བྱུང་ངེ་དྲིས་པས། མ་བྱུང་ཁྱེད་རྣལ་འབྱོར་པ་བྱ་བ་སྐྱུར་དད་ཆེ་བ་ཡིན། ཡུལ་ཕ་གི་ན་ཆང་སྟོན་ཡོད་དེར་སོང་སྣོད་མེད་ན་
(༤༩)ངས་གཡར་བས་ཆོག་ཟེར། ཕོར་བ་གཏིང་རིང་ལ་མདོག་སྐྱ་བ་གཤིན་རྗེའི་གདོང་འདྲ་བ་ཞིག་གཡར་བྱུང་བ་ཁྱེར་ནས་སྟོན་མོ་བྱེད་པའི་སར་ང་གྲལ་འགབ་ཅིག་ན་ཡོད་པའི་འགྲམ་དུ་བྱུང་སྟེ། ཁྱེད་ཁ་སང་ནས་མི་སླེབ་པ་ཅི་ཡིན་ཟེར། ང་ཁ་སང་ནས་བསོད་སྙོམས་ཤིག་ལ་ཕྱིན་པས། རྐང་བ་ཁྱིས་ཕུག་སྟེ་མགྱོགས་པོ་མ་སླེབས། ད་མི་སྟོ་བ་ཡོད་ཀྱིས་བྱས་འགྲོགས་ཏེ་ལོག་འོངས་པས། ཡར་ལུངས་སྐྱོར་པོ་གྲོང་དུ་སླེབས། བླ་མའི་ཞལ་ནས། ཁྱེད་གཉིས་ལ་ཁར་ཆེ་ཆེན་པོ་རང་ཞིག་བྱུང་ཨང་གསུང་། བདག་གཉིས་ཀྱི་སྔོན་ལ་མི་ནི་མེད་སུ་ལས་གསན་ཞུས་པས། དམ་ཅན་སྲུང་མ་རྣམས་ཞལ་ངོ་ཚེས་བཅོ་ལྔའི་ཟླ་བ་ཙམ་ཕྱར་ནས་སླེབས་བྱུང་བས་གཏང་རག་ཡང་བཏང་ཡོད་གསུང་དགྱེས་དགྱེས་ལྟར་མཛད་ཅིང་འདུག་སྟེ། ངས་དེ་ལྟ་བུའི་སྒོ་ནས་དགྲ་ཐབས་བྱས་པས་ལས་ནག་པོ་བསགས་པ་ཡིན་གསུངས། དགྲ་བོ་ཚར་བཅད་པའི་མཛད་པ་སྟེ་གསུམ་པའོ། །
(༥༠)མཆོག་གྱུར་ཞི་བ་མྱ་ངན་ལས་འདས་པའི་མཛད་པ། དང་པོ། བླ་མ་དང་ཞལ་མཇལ་བ། ཡང་རས་ཆུང་པས་བླ་མ་ལགས། ལས་དཀར་པོ་མཛད་གསུང་བ་དམ་པའི་ཆོས་ལས་འོས་མེད་པས། རྗེ་བཙུན་ཆོས་དང་མཇལ་བའི་རྐྱེན་ཇི་ལྟ་བུ་ཞིག་བྱུང་ཞུས་པས། རྗེ་བཙུན་གྱི་ཞལ་ནས། ང་མཐུ་དང་སེར་བའི་སྡིག་ལ་འགྱོད་ནས། ཆོས་དྲན་དྲགས་ཉིན་ཟས་མི་དྲན། ཕྱིན་ན་སྡོད་སྙིང་འདོད། བསྡད་ན་འགྲོ་སྙིང་འདོད། མཚན་གཉིད་དུ་མི་འགྲོ་བའི་སྐྱོ་ཤས་དང་ངེས་འབྱུང་ཡོད་རུང་ཆོས་ལ་འགྲོ་ཟེར་ནི་མ་ནུས། བླ་མའི་ཞབས་ཏོག་བྱེད་ཅིང་བསྡད་པའི་ངང་ནས་ཆོས་བྱེད་པའི་ཐབས་ཤིག་ཇི་ལྟར་བྱ་སྙམ་པའི་བསམ་པ་དྲག་པོ་རྒྱུན་ཆགས་སུ་ཡོད་པའི་ཚེ། བླ་མ་ལ་མེད་པ་ཐམས་ཅད་ཟད་ལེན་བྱས་པས་ཆོག་པའི་ཡོན་བདག ཟས་ནོར་དུ་འཛོམ་ལ་དད་གུས་ཆེ་བ་ཞིག་ཡོད་པ་དེ། ནད་དྲག་པོ་ཞིག་གིས་ཟིན་ནས། བླ་མ་སྔས་སྲུང་ལ་གདན་དྲངས་སོང་། དེ་ནས་ཞག་གསུམ་ལོན་པ་དང་། བླ་མ་ཞལ་འཛུམ་ནག་རོག་གེ་བ་ཞིག་བྱས་བྱོན་བྱུང་བ་ལ། བླ་མ་ལགས། དེ་འདྲའི་ཞལ་འཛུམ་ནག་པ་ཅི་ལགས། ཞུས་པས། འདུས་བྱས་ཐམས་ཅད་མི་རྟག་པར་འདུག མདང་ངའི་ཡོན་བདག་དགའ་མོ་དེ་ཡང་ཤི་སོང་བས་འཁོར་བ་འདི་ལ་ཡིད་ཅིག་སྐྱོ་བ་ཡིན།
(༥༡)ལར་མི་རྒན་ངས་ཀྱང་གཞོན་སོ་དཀར་ནས་རྒན་སྐྲ་དཀར་གྱི་བར་ལ་མཐུ་གཏད་སེར་གསུམ་ཞིག་ལ་ལས་བྱས། བུ་ཁྱོད་ཀྱིས་ཀྱང་གཞོན་ནུ་ནས་མཐུ་དང་སེར་བས་སྡིག་ཆེན་པོ་བསགས། དེ་ཀུན་ཀྱང་ང་རང་གི་ཐོག་ཏུ་འོང་བར་འདུག་གསུང་། སེམས་ཅན་དེ་རྣམས་བླ་མ་རང་གིས་མཐོ་རིས་དང་ཐར་པར་མི་འདྲོངས་པ་ལགས་སམ་ཞུས་པས། སེམས་ཅན་རྣམས་ངོ་བོ་ཆོས་ཉིད་ཡིན་པ་དང་། རྣམ་པ་མཐོ་རིས་དང་ཐར་པར་འདྲེན་པའི་གོ་ཡུལ་ཞིག་དག་ཡོད། ཆོ་ག་ཞིག་ཀྱང་ཤེས་ཏེ། དེ་རྣམས་གོ་བ་དང་ཚིག་ཏུ་ལུས་ནས། རྐྱེན་བྱུང་ཚེ་ཕན་ཐོགས་པའི་གདེང་ཐོབ་པ་ཞིག་རང་མི་འདུག་པས། ད་ང་རྐྱེན་ཐུབ་པའི་ཆོས་ཤིག་བྱེད་པ་ཡིན་པས། ཁྱོད་ཀྱིས་ངའི་བུ་སློབ་རྣམས་སྐྱོངས། ངས་ཁྱོད་ཀྱིས་མཐོ་རིས་དང་ཐར་པའི་ལམ་སྣ་ཟིན་པ་ཞིག་བྱའོ། །ཡང་ན་ཁྱོད་རང་ཆོས་གྱིས་ལ་ང་ཡང་མཐོ་རིས་དང་ཐར་པའི་ལམ་སྣ་ཟིན་པ་ཞིག་གྱིས། ངས་མཐུན་རྐྱེན་རྣམས་སྦྱར་གྱིས་གསུངས་པས། ངའི་འདོད་པ་གྲུབ་སྟེ་བདག་གིས་ཆོས་བྱེད་པར་ཞུ་ཞུས་པས། འོ་ན་ཁྱོད་ལོ་ཡང་གཞོན་སྙིང་རུས་དང་དད་པ་ཡང་ཆེ་རབ་ཞིག་འདུག་པས། ཆོས་རྣམ་དག་རང་ཞིག་གྱིས་ཤིག་གསུངས་ནས་ཡར་ལུངས་ཀྱི་ཐེར་ཕྲུག་འདྲེས་པ་མཛོ་ཁལ་གཅིག་མཛོ་དང་བཅས་པ་གནང་སྟེ། གཙང་རོང་གི་སྣར་ཞེས་བྱ་བ་ན། བླ་མ་རོང་སྟོན་ལྷ་དགའ་ཞེས་བྱ་བ་དམ་ཆོས་རྫོགས་པ་ཆེན་པོ་ལ་མཁས་ཤིང་གྲུབ་པ་བརྙེས་པ་ཞིག་བཞུགས། དེར་སོངས་ལ་སྒྲུབ་པ་ཡང་དག་ཅིག་གྱིས་ཤིག་གསུང་། ངས་ཀྱང་བླ་མས་ལུང་བསྟན་པ་ལྟར་གཙང་རོང་སྣར་དུ་འོངས་ནས་
(༥༢)རྩད་བཅད་པས། བླ་མའི་ཇོ་མོ་དང་གྲྭ་པ་འགའ་འདུག་པ་རྣམས་ན་རེ། འདི་མ་དགོན་ཡིན་ཏེ། བླ་མ་ད་ལྟ་འདི་ན་མི་བཞུགས། མྱང་སྟོད་རི་ནང་བྱ་བའི་བུ་དགོན་ཞིག་ན་བཞུགས་ཟེར། འོ་ན་ང་བླ་མ་གཡུང་སྟོན་ཁྲོ་རྒྱལ་གྱིས་འདིར་བཏང་ནས་བརྫངས་པ་ཞིག་ཡིན་པས་མཇལ་བའི་གྲོགས་ལྡན་གྱིས་དང་བྱས། ལོ་རྒྱུས་རྣམས་རྒྱས་པར་བཤད་པས། ཇོ་མོས་གྲྭ་པ་ཞིག་ངའི་ལམ་སྣ་ལ་བཏང་བས། མྱང་སྟོད་རི་ནང་དུ་བླ་མ་དང་མཇལ། ཐེར་ཕྲུག་དང་མཛོའི་ཕྱག་རྟེན་ཕུལ། བདག་ཉི་མ་ལ་སྟོད་ནས་འོངས་པའི་མི་སྡིག་པོ་ཆེ་ཞིག་ལགས་པས། འཁོར་བ་ལས་ཚེ་འདིར་གྲོལ་བའི་ཆོས་ཤིག་ཞུ་བྱས་པས། བླ་མའི་ཞལ་ནས། ངའི་དམ་ཆོས་རྫོགས་པ་ཆེན་པོ་འདི་རྩ་བ་བྱུང་རྒྱལ། རྩེ་མོ་ཐོབ་རྒྱལ། འབྲས་བུ་ཡོག་རྒྱལ། ཉིན་བསྒོམས་ན་ཉིན་སངས་རྒྱ། ནུབ་བསྒོམས་ན་ནུབ་སངས་རྒྱ། སྐལ་ལྡན་ལས་འཕྲོ་ཅན་ལ་སྒོམ་མི་དགོས་པར་ཐོས་པས་གྲོལ་བ་དབང་པོ་ཡང་རབ་ཀྱི་ཆོས་སྐལ་ཡིན་པས་སྟེར་གསུངས། དབང་དང་གདམས་པ་གནང་བ་ལས། ངའི་བསམ་པ་ལ་ངས་དང་པོ་མཐུ་བྱས་པས་ཞག་བཅུ་བཞི་ལ་རྟགས་ཆེན་པོ་ཐོན། སེར་བ་ལ་ཞག་བདུན་གྱིས་ཆོག་པ་བྱུང་། ད་མཐུ་དང་སེར་བ་བས་ཀྱང་སླ་བའི་ཆོས་ཉིན་བསྒོམས་ན་ཉིན་སངས་རྒྱ། ནུབ་བསྒོམས་ན་ནུབ་སངས་རྒྱ། སྐལ་ལྡན་ལས་འཕྲོ་ཅན་ལ་ཐོས་པས་སྒོམ་མི་དགོས་པ་འདི་འདྲ་དང་འཕྲད་ལུགས་ཀྱིས་ང་ཡང་ལས་འཕྲོ་ཅན་ཞིག་ཡིན་པ་འདུག་སྙམ་ང་རྒྱལ་དང་བཅས་མ་བསྒོམས་པར་ཉལ་བསྡད་པས། ཆོས་དང་གང་ཟག་ཐ་དད་དུ་སོང་བའི་ཚེ། ཞག་འགའ་སོང་བ་དང་། བླ་མའི་ཞལ་ནས། ཁྱོད་ལ་སྟོད་ནས་
(༥༣)འོངས་པའི་མི་སྡིག་པོ་ཆེ་ཡིན་ཟེར་བ་བདེན་པར་འདུག ངའི་ཆོས་ཀྱི་ཁ་ཕོ་དེ་ཡང་ཅུང་ཟད་ཆེས་པ་ཞིག་བྱུང་འདུག་པས། ངས་ཁྱོད་མི་འདྲོངས་པར་འདུག་པས། ད་ཁྱོད་རང་ལྷོ་བྲག་གྲོ་བོ་ལུང་ཞེས་བྱ་བའི་དགོན་པ་ན། རྒྱ་གར་གྱི་གྲུབ་ཆེན་ནཱ་རོ་པའི་དངོས་སློབ། སྐྱེས་མཆོག་སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་ཞེས་བྱ་བ་སྔགས་གསར་མའི་གྲུབ་ཐོབ། ས་གསུམ་ན་འགྲན་ཟླ་དང་བྲལ་བ་ཞིག་བཞུགས། དེ་དང་ཁྱོད་རང་ཚེ་སྔ་མ་ནས་ལས་འབྲེལ་འདུག་པས་དེར་སོངས་ཤིག་གསུངས། དེར་ང་ལ་སྒྲ་སྒྱུར་མར་པའི་མཚན་ཐོས་པ་ཙམ་གྱིས་སེམས་ལ་སྨྲ་མི་ཤེས་པའི་དགའ་བ་དང་། ལུས་ལ་བ་སྤུ་ཀུན་གཡོ་བའི་བདེ་བ། མཆི་མ་འཁྲུག་པའི་མོས་གུས་ཚད་མེད་པ་ཞིག་བྱུང་བས། བློ་རྩེ་གཅིག་ཏུ་དྲིལ་ནས། ལམ་རྒྱགས་དང་པོ་ཏི་འདྲ་ཡོད་པ་ཁྱེར་ཏེ། བསམ་པ་གཞན་གྱིས་བར་མ་ཆོད་པར་བླ་མ་དང་མཇལ་ཏེ་ཞལ་མཐོང་བ་ཞིག་ནམ་འོང་ན་ནམ་འོང་ན་བསམ་ཞིང་ཕྱིན། ང་གྲོ་བོ་ལུང་དུ་ནངས་པར་སླེབས་འོང་བའི་དོ་ནུབ་མར་པའི་མནལ་ལམ་དུ་པཎ་ཆེན་ནཱ་རོ་བྱོན་ཏེ་དབང་བསྐུར། རྒྱུ་བཻཌཱུརྱ་ལས་གྲུབ་པའི་རྡོ་རྗེ་རྩེ་ལྔ་བ་དྲི་མས་ཅུང་ཟད་གོས་པ་ཞིག་དང་། གསེར་གྱི་བུམ་པ་བདུད་རྩིས་གང་བ་ཞིག་གནང་ནས། རྡོ་རྗེ་འདིའི་དྲི་མ་བུམ་ཆུ་འདིས་ཁྲུས་ལ། རྒྱལ་མཚན་གྱི་རྩེ་ལ་ཕྱོར་ཅིག དེས་རྒྱལ་བ་གོང་མ་རྣམས་མཉེས་ཤིང་། སེམས་ཅན་རྣམས་མགུ་བར་བྱེད་པ་ཡིན་པས་རང་གཞན་གྱི་དོན་གྲུབ་པ་ཡིན་ནོ་གསུངས་ནས་ནམ་མཁའ་ལ་གཤེགས་པ་དང་། བླ་མའི་བཀའ་བཞིན་བུམ་ཆུས་རྡོ་རྗེ་བཀྲུས་ཏེ། རྒྱལ་མཚན་གྱི་རྩེ་ལ་ཕྱར་བས། རྡོ་རྗེའི་འོད་ཀྱིས་
(༥༤)འཇིག་རྟེན་ཀུན་ཁྱབ་ཅིང་། རིགས་དྲུག་གི་སེམས་ཅན་རྣམས་ལ་ཕོག་པས་སྡུག་བསྔལ་མེད་པའི་བདེ་བའི་ངང་ནས་རྗེ་བཙུན་མར་པ་རང་དང་རྒྱལ་མཚན་ལ་སེམས་ཅན་ཀུན་གྱིས་ཕྱག་འཚལ་ཞིང་མཆོད་བསྟོད་འབུལ་བ་དང་། རྒྱལ་བ་རྣམས་ཀྱིས་རྒྱལ་མཚན་ལ་རབ་གནས་མཛད་པ་ཞིག་རྨིས་པས། ཐུགས་རྒྱལ་ཅུང་ཟད་འཁྲུངས་པའི་ངང་ནས་མནལ་སད་པ་དང་། ཐུགས་དགྱེས་ཤིང་སྤྲོ་བ་ཞིག་བྱུང་བའི་ངང་ནས། ཡུམ་ཚ་བ་འདྲེན་དུ་བྱུང་སྟེ། བླ་མ་ལགས། མདང་ངའི་རྨི་ལམ་དུ་ནུབ་ཕྱོགས་ཨུ་རྒྱན་ནས་ཡིན་ཟེར་བའི་བུད་མེད་གཉིས་ཀྱིས་ཤེལ་གྱི་མཆོད་རྟེན་ཕྱི་དྲི་མས་ཅུང་ཟད་གོས་པ་ཞིག་ཁྱེར་བྱུང་སྟེ། ཡབ་ལ་བླ་མ་ནཱ་རོ་པའི་བཀའ་ལུང་ཡིན་པས། མཆོད་རྟེན་འདི་ལ་རབ་གནས་གྱིས་ལ་རིའི་རྩེར་ཞོག་ཟེར་བ་ལ། ཡབ་ཀྱི་ཞལ་ནས་ཀྱང་མཆོད་རྟེན་འདིའི་རབ་གནས་པཎ་ཆེན་ནཱ་རོས་གྲུབ་གྲུབ་པ་ཞིག་ཡིན་ནའང་། བླ་མའི་བཀའ་སྒྲུབ་དགོས་གསུངས་ནས། མཆོད་རྟེན་བུམ་ཆུས་འཁྲུད་པ་སོགས་རབ་གནས་ཀྱི་ཆོ་ག་རྒྱས་པར་མཛད་དེ། རི་རྩེར་བཞག་པས་མཆོད་རྟེན་དེ་ལས་ཉི་ཟླ་ལྟ་བུའི་འོད་ཆེན་པོ་དང་། མཆོད་རྟེན་དེ་འདྲ་མང་པོ་འཕྲོས་ཏེ། རི་རྩེ་ཀུན་གང་བའི་དཀོན་གཉེར་བུད་མེད་དེ་གཉིས་ཀྱིས་བྱེད་ཅིང་འདུག་པ་ཞིག་རྨིས། ཅི་ཡིན་ནམ་ཞུས་པས། རྨི་ལམ་གྱི་དོན་མཐུན་པ་འདུག་དགོངས་ཏེ་ཐུགས་ཤིན་ཏུ་དགྱེས་པ་ཞིག་བྱུང་རུང་། རྨི་ལམ་ལ་འབྱུང་ས་མེད་པས་ཅི་ཡིན་མི་ཤེས། ང་ལམ་ཁ་མ་གིར་ཕྲུ་སློག་ཏུ་འགྲོ་བས་ཆས་གྱིས་གསུངས། ལས་མི་འདི་ཙམ་ཞིག་བྱས་ནས་ཁྱེད་བླ་མ་ཆེན་པོ་ཞིག་ལས་ལ་བྱོན་ན། ངེད་རྣམས་ལ་ཀུན་གྱིས་འཕྱ་བ་ཞིག་
(༥༥)འོང་བས་བཞུགས་པར་ཞུ་ཞེས་ཞུ་བ་ཕུལ་རུང་། མ་གསན་པར་བླ་མ་རང་བྱོན་ནས་ང་ལ་ཆང་མང་པོ་ཁྱེར་ཤོག་གསུངས། བུམ་པ་གང་ཁྱེར་ཕྱིན་པས། འདི་ང་རང་འཐུང་བ་ཡིན་ད་མགྲོན་ཆང་ཁྱེར་ཤོག་གསུངས། ཡང་བུམ་པ་གང་ཁྱེར་ཕྱིན་པས། དེ་ས་ལ་བསྐུངས་དབུ་ཞྭ་བཀབ་སྟེ། ཕྲུ་སློག་པའི་ངང་ནས་སོ་རང་མཛད་པ་དང་། ཕུད་བཞེས་རུང་བཞུགས་པར་འདུག ངས་ཀྱང་ལྷོ་བྲག་གི་མདའ་ནས། མི་ཕྲད་ཚད་ལ་སྐྱེས་མཆོག་མར་པ་ལོ་ཙཱ་གང་ན་བཞུགས་ཞེས་འདྲི་ཞིང་ཕྱིན་པས། རྒྱུས་ཡོད་ཟེར་བ་ཞིག་ཀྱང་མ་བྱུང་བ་ལ། གྲོ་བོ་ལུང་མཐོང་བའི་ལ་ཁར་སླེབས་པའི་ཚེ་མི་ཞིག་བྱུང་བ་ལ་སྔར་ལྟར་དྲིས་པས། མར་པ་ཟེར་བ་ནི་ཡོད། སྐྱེས་མཆོག་མར་པ་ལོ་ཙཱ་ཟེར་བ་ནི་མེད་ཟེར། འོ་ན་གྲོ་བོ་ལུང་གང་ན་ཡོད་བྱས་པས། གྲོ་བོ་ལུང་ཕ་གི་ཡིན་ཟེར་བསྟན་བྱུང་། ཕ་གི་ན་སུ་བཞུགས་བྱས་པས། མར་པ་ཟེར་བ་དེ་ག་ཡོད་ཟེར། དེ་ལ་གཞན་མཚན་མེད་དམ་བྱས་པས། ལ་ལས་བླ་མ་མར་པའང་ཟེར་ཞིང་འདུག་ཟེར། བླ་མའི་གདན་ས་ཡིན་པར་ཐག་ཆོད་དེ། ལ་ཁ་འདི་ལ་ཅི་ཟེར་བྱས་པས། འདི་ལ་ཆོས་ལ་སྒང་ཟེར། ཆོས་ལ་སྒང་ནས་བླ་མའི་གདན་ས་མཐོང་བ་རྟེན་འབྲེལ་ཤིན་ཏུ་ལེགས་སྙམ་དགའ་བ་ཞིག་བྱུང་། དེ་ནས་ཀྱང་ཡར་འདྲི་ཞིང་འོངས་པས། ཕྱུགས་རྫི་མང་པོ་ཞིག་འདུག དེ་རྣམས་ལ་དྲིས་པས། རྒན་པ་རྣམས་ན་རེ་རྒྱུས་མེད་ཟེར་བ་ལ། དེ་རྣམས་ཀྱི་ནང་ནས་བྱིས་པ་ཡིད་དུ་འོང་ལ་བཞིན་དང་རྒྱན་བཟང་བ།
(༥༦)སྨྲ་ལྕེ་བདེ་བ། སྣུམ་གྱི་རལ་བ་ཤིག་གེ་བ་ཞིག་ན་རེ། ངེད་ཀྱི་ཕ་ཇོ་ལ་ཟེར་བ་ཡིན་ནམ། དེ་ཡིན་ན་ངེད་ཀྱི་ཕ་ཇོ་ནི་ངེད་རང་གི་ནོར་གང་ཡོད་ཀྱིས་གསེར་ཉོས་ནས་རྒྱ་གར་ལ་ཁྱེར་འགྲོ། ཚུར་འཁྱོས་མ་ལ་པོ་ཏི་ཕྲ་རིང་བ་མང་པོ་ཁྱེར་ནས་སླེབས་འོང་བ་ཞིག་ཡོད། སྔར་ལས་རྒྱུ་ནས་མི་བྱེད་པའི་དེ་རིང་ཕ་ཇོ་ཕྲུ་སློག་གིན་ཡོད་ཟེར་བ་ལ། རིགས་པས་བརྟགས་ན་འདྲ་མོ་ཡིན་ཏེ། ཁོང་ལོ་ཙཱ་བ་ཆེན་པོ་ཞིག་ཕྲུ་སློག་གིན་རང་མེད་དམ་སྙམ་ནས་འོངས་པས། ལམ་ཁ་ཞིག་ན་བན་དེ་སྐུ་ཆེ་ལ་སྐུ་ཤ་འབྱོར་བ། སྤྱན་ཡངས་ལ་ཟིལ་ཆེ་བ་གཅིག་ཕྲུ་སློག་ཅིང་འདུག་པ་ལ། མཐོང་མ་ཐག་ཏུ་སྨྲར་མེད་པའི་དགའ་བདེ་བསམ་གྱིས་མི་ཁྱབ་པའི་ངང་ལ། ཚེ་འདིའི་སྣང་བ་ཏུར་ཏུར་པོ་དེ་འགགས་ནས་དར་ཅིག་ལུས་འདུག དེ་ནས་ངས་དྲུང་པ་ལགས། ཡུལ་འདི་ན་དཔལ་ནཱ་རོ་པའི་དངོས་སློབ། སྒྲ་སྒྱུར་མར་པ་ལོ་ཙཱ་ཞེས་བྱ་བ་བཞུགས་ཟེར་བ་དེ་གང་ན་བཞུགས་ཞུས་པ། བན་དེ་དེས་ངའི་མགོ་མཇུག་མེད་པ་ལ་ཡུན་རིང་བ་ཞིག་བལྟས་ཏེ། ཁྱོད་གང་ནས་ཡིན། ཅི་བྱེད་གསུངས་པས། བདག་གཙང་ལ་སྟོད་ཀྱི་མི་སྡིག་པོ་ཆེ་ཞིག་ལགས་ཏེ། ཁོང་སྙན་པ་ཤིན་ཏུ་ཆེ་བར་གདའ་བས་དམ་པའི་ཆོས་ཤིག་ཞུ་རུ་འོངས་པ་ལགས་ཞུས་པས། འོ་ན་ངས་མར་པ་དང་སྤྲད་ཀྱིས། ཁྱོད་ངའི་ཕྲུ་འདི་སློགས་ཤིག་གསུངས་དབུ་ཞྭའི་འོག་ནས་ཆང་ས་ལ་བསྐུངས་པ་བཏོན་ཏེ་གནང་བྱུང་བས་ཕན་ལ་ཞིམ་པ་ཞིག་བྱུང་། ཕྲུ་འདི་རེམ་ལ་སློགས་ཤིག་ཟེར་བན་དེ་དེ་ལོག་སོང་བ་དང་། ཆང་ལྷག་མ་ལུས་པར་བཏུངས་ཏེ་ཕྲུ་རེམ་ནས་བསློགས་པས། དར་ཅིག་ནས་ཕྱུགས་རྫིའི་གསེབ་ནས་ཆ་སྟོན་པའི་བུ་ཆུང་དེ་འབོད་དུ་བྱུང་
(༥༧)སྟེ། བླ་མའི་ཞལ་ཏ་ལ་ནང་དུ་ཤོག་གསུང་གིན་འདུག་ཟེར་བས་དགའ་སྟེ། ཁོང་གིས་ངའི་མཇལ་སྣའི་གོ་ཆོད་འདུག་པས། ངས་ཀྱང་ཁོང་གི་ཕྲུ་སློག་འཕྲོ་འདི་གོ་ཆོད་ཅིག་བྱེད་བྱས་ལྷག་ཅུང་ཟད་ཅིག་འདུག་པ་དེ་བསློགས། ཞིང་དེས་ང་བླ་མ་དང་མཇལ་བའི་མཐུན་རྐྱེན་བྱས་པས། ཞིང་གི་མིང་ལའང་མཐུན་རྐྱེན་དུ་ཆགས་ཏེ། དབྱར་ཞིང་གི་མཐའ། དགུན་དཀྱིལ་ལ་ལམ་ཡོད་པ་ཞིག་ཡོད་དོ། །དེ་ནས་ང་བུ་ཆུང་དེ་དང་བསྡེབས་ཏེ་ནང་དུ་ཕྱིན་པས། སྔ་ནས་ཀྱི་བན་དེ་དེས་གདན་གྱི་སྟེང་ན་འབོལ་ཉིས་རྩེག་གྲུམ་ཙེ་དང་སུམ་རྩེག་སྙེས་འབོལ་དང་བཅས་པའི་སྟེང་ན་སྣུམ་ཕྱིས་ཤིག་བྱས་པ་ལ་སྨིན་ཕྲག་དང་སྣའི་བྱ་གཤོག་གི་གཤོངས། སྨ་ར་དང་ཨག་ཚོམ་རྣམས་འཕྱི་བ་མ་བྱུང་བར་ས་ཁལ་ལེ་བ་ཞིག་བྱས་ནས་ལྟོ་ཚིལ་ལྷུག་གེ་འདུག་པ་ལ། འདི་ནི་སྔར་གྱི་དེ་ཀ་ཡིན་པར་འདུག བླ་མ་གང་ན་བཞུགས་པ་ན་སྙམ་བལྟས་པས། བླ་མའི་ཞལ་ནས། ངོ་མི་ཤེས་པ་བདེན་འོང་། མར་པ་ང་རང་ཡིན་ཕྱག་འཚལ་ཅིག་གསུངས། དེར་ཕྱག་བཙལ་ཞབས་སྤྱི་བོར་བླངས་ཏེ། བླ་མ་རིན་པོ་ཆེ་བདག་ཉི་མ་ལ་སྟོད་ནས་ཀྱི་མི་སྡིག་པོ་ཆེ་ཞིག་ལགས་པས། ལུས་ངག་ཡིད་གསུམ་ཡང་འབུལ། ལྟོ་གོས་ཆོས་གསུམ་ཡང་བླ་མ་ལ་ཞུ། ཚེ་འདིར་སངས་རྒྱ་བ་ཞིག་ཐུགས་རྗེས་འཛིན་པར་ཞུ་ཞུས་པས། བླ་མའི་ཞལ་ནས། སྡིག་པོ་ཆེ་ཡིན་པའི་ཡུས་ང་ལ་མི་འགྲོ། ངའི་ཆེད་དུ་སྡིག་པ་གསོག་ཏུ་བཏང་བ་ནི་མིན། ཁྱོད་ཀྱིས་སྡིག་པ་ཅི་བྱས་པ་གསུངས། རྒྱུ་མཚན་རྣམས་རྒྱས་པར་ཞུས་པས། འདུག་གང་ལྟར་ནའང་ལུས་ངག་ཡིད་གསུམ་འབུལ་བ་དེ་བཟང་། ལྟོ་གོས་ཆོས་གསུམ་ཀུན་མི་འོང་། ཡང་ན་ལྟོ་
(༥༨)གོས་སྟེར་ཆོས་གཞན་ནས་ཚོལ། ཡང་ན་ཆོས་སྟེར་ལྟོ་གོས་གཞན་ནས་ཚོལ། དེ་གཉིས་འདོམས། ངས་ཆོས་སྟེར་བ་འདམས་ན་ཚེ་འདིར་སངས་རྒྱ་མི་རྒྱ་ཁྱོད་རང་གི་སྙིང་རུས་ལ་རག་ལས་གསུངས། འོ་ན་བླ་མའི་དྲུང་དུ་ཆོས་ལ་གཏད་འོངས་པ་ལགས་པས། ལྟོ་གོས་གཞན་ནས་འཚོལ་བར་ཞུ་ཞུས་ནས་དཔེ་ཆ་གཅིག་ཡོད་པ་དེ་མཆོད་ཁང་དུ་བསྐྱལ་བས་ཁྱོད་ཀྱི་དཔེ་གོག་དེ་ཕྱིར་ཐོན། ངའི་རྟེན་མཆོད་རྣམས་ལ་ཆམ་པ་འོང་གསུངས། ངའི་དཔེ་ཆའི་ཁྲོད་ན་མཐུའི་དཔེ་ཆ་ཡོད་པས་ལན་སྙམ་པ་བྱུང་། ང་རང་འདུག་སར་ཚགས་བྱས་ནས་ཞག་ཤས་དེར་བསྡད་དེ། ཡུམ་གྱིས་ཟ་མ་སྐྱིད་པོ་བྱིན་གསུངས། བླ་མ་དང་ཞལ་མཇལ་བའི་མཛད་པ་སྟེ་མཆོག་གི་མཛད་པ་དང་པོའོ། །
(༥༩)གཉིས་པ། སྡིག་སྒྲིབ་མ་ལུས་སྦྱངས་པ། དེར་ལྷོ་བྲག་གི་ལུང་བ་ཕུ་མདའ་ཀུན་ལ་བསོད་སྙོམས་བྱས་པས། ལྷོ་བྲག་བྲེ་བོ་ཆེའི་ནས་ཁལ་ཉེར་གཅིག་རྙེད་པ་ལས། བཅུ་བཞི་ལ་ཟངས་རུ་བཞི་མ་ཕྱི་ནང་གཉིས་ཀ་ལ་དྲེག་དང་གཡའ་སོགས་སྐྱོན་གྱིས་མ་གོས་པ་གཅིག་ཉོས། ཁལ་གཅིག་ཤ་ཆང་དུ་སྦྱར། ཁལ་དྲུག་སྒྱེ་ཆེ་བ་ཞིག་ཏུ་བླུགས། དེའི་ཁར་ཟངས་དེ་སྦྲགས་ཏེ་ཁྱེར་འོངས་པས། བླ་མའི་གཟིམས་ཁང་དུ་སླེབས་པ་དང་། ཐང་ཆད་ནས་ལིང་སྐྱུར་དུ་ཕོག་པས། གཟིམས་ཁང་མེར་བ་ཞིག་བྱུང་། དེར་བླ་མ་བཞེས་པ་མཛད་ཅིང་འདུག་པ། འཕྲོ་ལ་བཞེངས་ནས་བན་ཆུང་ཤེད་པོ་ཆེ་ཞིག་འདུག་སྟེ། ཁྱོད་ངེད་རྣམས་ཀྱང་གཏིབས་འོག་ཏུ་ལག་མཐུས་གསོད་སྙམ་པ་ཡིན་ནམ། ནན་ཏར་མ་འཚམ་པས། ནས་དོ་ཕྱིར་ཐོན་གསུངས་ཞབས་ཀྱིས་ཕུལ་བས། རེ་ཞིག་ཕྱིར་འདོན་དགོས་བྱུང་བ་ལ། བླ་མ་ཐུགས་གཏུམ་པོ་རང་ཞིག་འོང་རིགས་སུ་འདུག་པས། སྐུ་དྲུང་དུ་དེ་ལུགས་ཀྱི་ཞབས་ཏོག་དང་སྤྱོད་ལམ་བྱེད་དགོས་སྙམ་པ་མ་གཏོགས་ལོག་ལྟ་མ་སྐྱེས། དེ་ནས་ཟངས་དེ་སྟོང་པར་ཀ་ཕྱག་རྟེན་དུ་ཕུལ། ཕྱག་བཙལ་བས། ཟངས་ཕྱག་ཏུ་བཞེས་པའི་ངང་ལ། ཡུག་ཅིག་སྤྱན་ཟིམ་མེ་དགོངས་པ་ལ་བཞུགས་པའི་མཐར། སྤྱན་ཆབ་ཉིལ་མཛད་དེ། རྟེན་འབྲེལ་བཟང་། པཎ་ཆེན་ནཱ་རོ་ལ་འབུལ་ལོ་གསུངས་
(༦༠)ཕྱག་ཏུ་ཡེར་བ་ཞིག་མཛད་ནས། ཟངས་དེའི་ལུང་རྣམས་འཁྲོལ་བ་དང་དབྱུག་པས་བརྡུངས་ཏེ་སྐད་ཅི་ཐོན་མཛད་ནས་མཆོད་ཁང་དུ་བསྣམས་ཏེ། མར་མེའི་མར་ཁུས་བཀང་བཞག་པར་གདའ། དེའི་ཚེ་ང་ཡིད་སྐྱོ་ཞིང་ཆོས་ཀྱི་འདོད་པས་གདུངས་ཏེ། ཡང་ཡང་ཆོས་དང་གདམས་ངག་གནང་བར་ཞུ་ཞུས་པས། བླ་མའི་ཞལ་ནས། ང་ལ་དབུས་གཙང་ནས་སློབ་མ་དད་པ་ཅན་མང་རབ་འོང་གིན་ཡོད་པ། ཡར་འབྲོག་སྟག་ལུང་པ་དང་། གླིང་པའི་མིས་བརྡུངས་ནས་རྒྱགས་ཆུ་དང་འབུལ་བ་མགོ་ཐོན་དུ་ཡེ་མ་བཅུག དེ་གཉིས་སུ་སེར་བ་རེ་ཕོབ་ཤོག དེ་ཡང་ཆོས་ཀ་ཡིན་ཞིང་། གདམས་ངག་ཀྱང་སྟེར་གསུངས་པ་ལ། དེ་གཉིས་སུ་སེར་བ་ཆེན་པོ་ཕབ་གདམས་ངག་ཞུས་པས། ཁྱོད་ཀྱིས་སེར་བ་རྡོག་པོ་གསུམ་ཕབ་པ་ལ་ངས་རྒྱ་གར་ནས་དཀའ་བ་སྤྱད་པའི་ཆོས་ཨེ་འོང་ངམ། ཅིས་ཀྱང་ཆོས་དགོས་ན་ལྷོ་བྲག་ལ་ཁ་བ་འདི་པས་ངའི་གཉལ་ལོ་རོ་ནས་འོང་བའི་བུ་སློབ་རྣམས་བརྡུངས། ང་ལ་ཡང་བརྙས་པ་ཆེན་པོ་རང་བྱས་པས། ཁྱོད་ལ་མཐུ་ཆེན་པོ་ཡོད་ཟེར་བ། ཁྱོད་རང་ལ་ཁ་བ་འདི་རྣམས་ལ་མཐུ་ཐོངས། མཐུའི་རྟགས་ཐོན་ན་པཎ་ཆེན་ནཱ་རོའི་ཚེ་གཅིག་ལུས་གཅིག་ལ་སངས་རྒྱ་བའི་གདམས་ངག་ཡོད་པས་སྟེར་གསུངས། དེར་མཐུ་བཏང་བས་ལ་ཁ་བ་རྣམས་ནང་འཛིངས་བྱུང་། ཐུགས་སྙུང་བའི་མི་མང་པོ་གྲི་ཁར་ཤི་བ་གཟིགས་ནས། ཁྱོད་ལ་མཐུ་ཆེན་པོ་ཡོད་ཟེར་བ་བདེན་པར་འདུག་གསུངས་ནས་ང་ལ་མིང་མཐུ་ཆེན་དུ་བཏགས། ད་སངས་རྒྱ་བའི་གདམས་ངག་གནང་བར་ཞུ་ཞུས་པས། ཧེ་ཧེ་ཁྱོད་ཀྱིས་སྡིག་པ་བསགས་
(༦༡)པའི་རྔན་པར་ངས་ལུས་སྲོག་ལ་མ་བལྟས་པར་རྒྱ་གར་ལ་ཕྱིན། ནོར་ལ་མ་བལྟས་པར་གསེར་ཕངས་མེད་དུ་ཕུལ་ནས་ཞུས་པའི་གདམས་ངག་མཁའ་འགྲོའི་ཁ་རླངས་ཐོ་ལེ་བ་འདི་ཚོ་དགོས་ཟེར་བ་ད་ཀུ་རེ་ཡིན་རུང་ཅུང་དྲགས་པས་དགོས་བྲོ། ང་མིན་གཞན་ཞིག་ཡིན་ན་གསོད་དུའང་འོང་། ད་ཁྱོད་རང་ཡར་འབྲོག་པ་རྣམས་ཀྱི་ལོ་སྐྱིན་ཆུག ལ་ཁ་བ་རྣམས་ཀྱི་མི་ཀུན་གསོས་ཤོག་ཅིག དེ་བྱུང་ན་གདམས་ངག་སྟེར། དེ་མིན་ངའི་ཕྱོགས་ལ་མ་འཁོར་གསུངས་ཕྱག་འབེབས་གནང་བ་ཙམ་གྱིས་བཀའ་བཀྱོན་མཛད། དེ་ནས་ཡི་ཆད་དྲགས་མང་པོ་ངུས་པས། ཡུམ་གྱི་སེམས་གསོ་མཛད། ནངས་པར་བླ་མ་རང་ཕེབས་ནས་མདང་ངས་ཁྱོད་ལ་མང་པོ་རང་འཐབས་འདུག མ་དགའ་བ་མ་བྱེད། ག་ལེ་བྱས་གདམས་ངག་སྟེར་བས་ངང་མ་ཐུང་། ཁྱོད་ལས་རེམ་པོ་རང་ཞིག་འདུག་པས། ད་དར་མ་མདོ་སྡེ་འབོགས་པའི་མཁར་ཞིག་རྩིག་གྲོགས་གྱིས། དེ་ཚར་ནས་གདམས་ངག་ཀྱང་སྟེར་ལ། ལྟོ་གོས་ཀྱང་ང་རང་གིས་སྦྱོར་གསུངས། དེ་བར་ལ་བདག་ཆོས་མེད་དུ་ཤི་ན་ཇི་ལྟར་བྱེད་ལགས་ཞུས་པས། དེ་བར་ལ་མི་འཆི་བའི་ཁག་ཀྱང་ང་རང་གིས་ཐེག་ཁ་ཕོ་མེད་པའི་ཆོས་མེད་དེ། ཁྱོད་རང་སྙིང་རུས་ཆེ་རབ་ཅིག་འདུག་པས་ངའི་གདམས་ངག་སྒོམ་ནུས་ན། ཚེ་འདིར་སངས་ཨེ་རྒྱ་མི་རྒྱ་ཡང་སྟོན་པ་ཡིན་ཏེ། ངའི་རྒྱུད་པ་འདི་ལ་གཞན་དང་རང་ཡེ་མི་འདྲ་བའི་བྱིན་རླབས་ཀྱི་བཀའ་བབས་ཤིག་ཡོད་གསུང་ཞལ་ཏ་བཟང་པོ་གནང་བས་སེམས་དགའ་བར་བྱུང་སྟེ། འོ་ན་མཁར་གྱི་ཞལ་བཅོས་མཛད་པར་ཞུ་ཞུས་པར། མཁར་དེ་ཕ་ཚན་ཀུན་གྱིས་
(༦༢)མནའ་བསྐྱལ་ནས་མཁར་རྩིག་ས་མེད་པའི་ས་འགག་དམ་པོ་ཞིག་ཡོད་པ་དེ་ལ། མར་པ་མནའ་ཁོངས་ན་མེད་པས་དེར་རྩིག་དགོངས་པའི་གཡོ་ཐབས་དང་། ངའི་སྡིག་པ་སྦྱོང་བའི་ཐབས་སུ། ཤར་ཕྱོགས་ཀྱི་རི་སྣ་ཞིག་ལ་མཁར་འདི་ལྟ་བུ་ཞིག་རྩིགས་ཤིག་གསུངས། ཟླུམ་པོ་ཞིག་བརྩིགས་པས། ཕྱེད་ཙམ་ལོངས་པ་དང་། བླ་མ་བྱོན་ནས་ཁ་སང་བསམ་མནོ་མ་ཐོངས་པར་འདུག མཁར་འདི་རྩ་བ་ནས་ཤིགས་ལ་ས་ས་མལ་དང་། རྡོ་རྡོ་མལ་དུ་སྐྱོལ་ཅིག་གསུངས། དེ་ལྟར་བྱས་པས། ཡང་ནུབ་ཕྱོགས་ཀྱི་རི་སྣ་ཞིག་ལ་བླ་མ་ཕུད་ཀྱིས་བད་པ་ལྟར་མཛད་ནས། ད་མཁར་འདི་ལྟ་བུ་ཞིག་རྩིགས་ཤིག་གསུངས། ཟླ་གམ་ཞིག་བརྩིགས། དེ་ཡང་ཕྱེད་ཙམ་ལོངས་པ་དང་། ཡང་བླ་མ་བྱོན་ནས་འདིས་ཀྱང་མི་འོང་བར་འདུག འདི་ཡང་ས་ས་མལ་དང་། རྡོ་རྡོ་མལ་དུ་སྐྱོལ་ཅིག་གསུངས། དེ་ལྟར་བྱས་པས། ཡང་བྱང་གི་རི་རྩེ་ཞིག་ལ་བྱོན་ནས། ཨ་བོ་མཐུ་ཆེན་ཁ་སང་ང་ཆང་གིས་བཟི་ནས་ཁ་ཏ་དེ་ཙམ་ཞིག་མ་བྱུང་བར་འདུག ད་འདིར་མཁར་དགའ་མོ་ཞིག་རྩིགས་གསུངས་པ་ལ། མཁར་བརྩིགས་ཤིང་བཤིག་པ་འདི་འདྲ་བདག་སྡུག་ལ་ཕྱག་རྫས་གཟན་པ་ལས་མི་གདའ་བས། ཐུགས་བསམ་ཡང་དག་བཏང་ནས་མཛད་པར་ཞུ་ཞུས་པས། ད་ལན་ཆང་གིས་བཟི་བ་ཡང་མེད། བསམ་བློ་ཡང་བཏང་བཏང་བ་ཡིན། སྔགས་པའི་མཁར་ཞེས་བྱ་བ་གྲུ་གསུམ་པ་ཞིག་དགོས་པ་ཡིན་པས་རྩིགས་ཤིག་འདི་བཤིག་ཀྱང་མི་དགོས་ཀྱིས་གསུངས། གྲུ་གསུམ་པ་ཞིག་བརྩིགས། དེ་ཡང་སུམ་ཆ་ཙམ་ལོངས་པའི་ཚེ། ཡང་བླ་མ་བྱོན་ནས། མཐུ་ཆེན་ཁྱོད་བརྩིགས་པའི་མཁར་འདི་སུའི་ཡིན། ཁ་ཏ་
(༦༣)སུས་བྱས་གསུངས་པ་ལ། བླ་མ་རང་གིས་ཞལ་ཏ་མཛད་པའི་སྲས་མཁར་ལགས་མོད་ཞུས་པས། ངས་འདི་འདྲའི་ཁ་ཏ་བྱས་པ་མི་དྲན། ཁྱོད་ཀྱི་དེ་བདེན་པ་རང་ཡིན་ན་ང་སྨྱོ་བའམ་དྲན་པས་མ་ཟིན་པ་ཞིག་དང་ཐུག་པ་ཡིན་འོང་གསུངས། དེ་དུས་བདག་གིས་འདི་འདྲ་བྱུང་གིས་དོགས་ནས་ཐུགས་བསམ་ལེགས་པར་གཏོང་བར་ཞུ་ཞེས་སྙན་བསྐུལ་ཕུལ་བས། ཐུགས་བསམ་བཏང་བཏང་བ་ཡིན། ད་ལན་གྱི་འདི་བཤིག་ཀྱང་མི་དགོས་གསུང་ཐུགས་དྲན་གསལ་པོ་རང་གདའ་ཞུས་པས། འོ་ན་དེ་དུས་ཀྱི་དཔང་པོ་ལ་སུ་ཡོད། ལར་མཁར་གྲུ་གསུམ་ཧོམ་ཁུང་འདྲ་བ་འདིར་ངེད་རྣམས་བཅུག་སྟེ་མཐུ་བྱེད་བསམ་པ་ཡིན་ན། ངེད་ཀྱིས་ནི་ཁྱོད་ཀྱི་གཞིས་འཕྲོགས་པ་ཡང་མེད་ལ། ཕ་ནོར་ཟོས་པ་ཡང་མེད་དོ། །དེ་ལྟར་མིན་པ་ཆོས་འདོད་པ་ཡིན་ན། གཞི་བདག་མི་དགའ་བར་འདུག་པས། འདིའི་ས་རྣམས་ས་མལ་དང་རྡོ་རྣམས་རྡོ་མལ་དུ་སྐྱོལ་ཅིག ཆོས་དགོས་ན་སྟེར་རོ། །དེ་བཞིན་མིན་ན་སོངས་གསུངས་ཐུགས་རྒྱལ་བཞེངས་འདུག་པས། སེམས་སྡུག་པ་ལ་ཚད་མེད་པ་ཞིག་བྱུང་རུང་ཆོས་འདོད་པས་བླ་མའི་བཀའ་བཞིན་མཁར་གྲུ་གསུམ་དེ་ཡང་ས་ས་མལ་དང་རྡོ་རྡོ་མལ་དུ་བསྐྱལ། དེ་དུས་ངའི་རོ་སྟོད་ལ་སྒལ་རྨ་ཞིག་བྱུང་བས། བླ་མ་ལ་གཟིགས་ཕུལ་རུང་བཀྱོན་པ་ལས་མི་འོང་། ཡུམ་ལ་གཟིགས་ཕུལ་རུང་ལས་ཡུས་སུ་འགྲོ་བར་འདུག་སྙམ་གཟིགས་མ་ཕུལ་བར་ངུས་ནས་ཆོས་ཞུ་གྲོགས་སུ་སྦྲན་པས། ཡུམ་བླ་མའི་དྲུང་དུ་བྱོན་ནས། དོན་མེད་ཀྱི་མཁར་ལས་ཀྱིས་མི་སྡུག་ཐག་གཅོད་པ་འདུག མཐུ་ཆེན་ལ་ཆོས་ཐུགས་རྗེས་འཛིན་པར་ཞུ་ཞུས་པས།
(༦༤)ཟ་མ་བཟང་བ་ཞིག་གྱིས་ལ་ངའི་རྩར་ཁྲིད་ཤོག་གསུངས། ཡུམ་གྱིས་ཟ་མ་དང་བཅས་ཏེ་བླ་མའི་དྲུང་དུ་བསྐྱལ་བས་བླ་མའི་ཞལ་ནས། མཐུ་ཆེན་ཁ་སང་གི་ངས་མ་བྱས་པའི་ཧམ་པ་དེ་འདྲ་མ་བྱེད། ཆོས་འདོད་ན་སྟེར་གསུངས། ཐུན་མོང་གི་སྐྱབས་འགྲོའི་ལུང་དང་སྡོམ་པ་ཞིག་གནང་སྟེ། དེ་ཀུན་ཐུན་མོང་གི་ཆོས་བྱ་བ་ཡིན། ཐུན་མོང་མ་ཡིན་པ་གསང་སྔགས་ཀྱི་གདམས་ངག་དགོས་ན། འདི་འདྲ་བྱེད་དགོས་གསུང་། ནཱ་རོའི་རྣམ་ཐར་དཀའ་བ་སྤྱད་ཚུལ་རྣམས་མདོར་བསྡུས་པ་ཞིག་གནང་ནས། ཁྱོད་ཀྱིས་འོང་བ་དཀའ་མོ་ཡིན་གསུངས་པས་མཆི་མ་འཆོར་བའི་དད་པ་དྲག་པོ་སྐྱེས་ཏེ། བླ་མས་ཅི་གསུང་སྒྲུབ་དགོས་སྙམ་ཡི་དམ་བཅས། དེ་ནས་ཞག་འགའ་སོང་བ་དང་། བླ་མ་ཞབས་འཆག་པའི་ཕྱག་ཕྱིར་འགྲོ་གསུངས་ཕྱིན་པས། ཕ་ཚན་རྣམས་ཀྱིས་སྲུང་བའི་ས་འགག་དེར་བྱོན་ནས། ད་ཁྱོད་རང་འདིར་མཁར་གྲུ་བཞི་སྐྱ་བོ་དགུ་ཐོག་གན་ཇི་ར་དང་བཅུ་ཐོག་ཡོད་པ་ཞིག་རྩིགས། དེ་བཤིག་ཀྱང་མི་བཤིག གྲུབ་པ་དང་གདམས་ངག་སྦྱིན་སྒྲུབ་པ་ལ་བཞག་ནས་སྒྲུབ་རྒྱགས་སྦྱར་གྱིས་གསུངས། འོ་ན་ཞལ་བཞེས་འདི་རྣམས་ཀྱི་སྐུ་དཔང་དུ་ཡུམ་བཞུགས་པར་རུང་ལགས་སམ་ཞུས་པས། རུང་གསུངས། དེར་བླ་མས་རྩིག་རྨང་གི་རི་མོ་མཛད། ངས་ཡུམ་གདན་དྲངས་ནས་ཡབ་ཡུམ་གཉིས་ཀ་བཞུགས་སར། སྔར་མཁར་གསུམ་བརྩིགས་ཤིང་བཤིགས་པ་ལ། གཅིག་ལ་ཐུགས་བསམ་མ་ཐོངས་གསུངས། གཉིས་པ་ལ་ཕུད་ཀྱིས་བད་གསུངས། གསུམ་པ་ལ་སྨྱོ་བའམ་དྲན་པས་མ་ཟིན་པ་ཡིན་ནམ་བྱས་པ་མི་དྲན་གསུངས། ཞལ་ཏ་གནང་ཚུལ་
(༦༥)ཞུས་པས་ཁྱོད་ལ་དཔང་པོ་སུ་ཡོད་གསུངས་པ་དང་གཞན་ཡང་བཀའ་བཀྱོན་མང་དུ་བྱུང་བས། ད་ལན་ཞལ་བཞེས་འདི་རྣམས་ཀྱི་དཔང་པོར་ཡུམ་སྤྱན་དྲངས་པ་ལགས་པས། སྐུ་དཔང་མཛོད་ཅིག་ཞུས་པས། ཡུམ་གྱི་ཞལ་ནས། ངས་དག་དཔང་པོ་བྱས་པས་ཆོག་སྟེ། ཡབ་སྐུ་དབང་བཙན་པས་བརྩི་བ་དཀའ་མོ་ཡིན། ལར་རང་ཡབ་མཁར་ལས་མཛད་དོན་མེད་པར་མཛད། བཤིག་དོན་མེད་པར་བཤིག་གིན་འདུག ཁྱད་པར་ས་འདི་རང་རེའི་མིན་པ་ཀུན་གྱི་མནའ་རི་ཡིན་པས། རྒྱ་འདྲེའི་གཞི་ཞིག་འོང་སྟེ། ཞུས་པས་ནི་ཡབ་མི་གསན་གསུང་བ་ལ། བླ་མའི་ཞལ་ནས་ཡུམ་ལ་ཁྱོད་རང་བཅོལ་བའི་དཔང་པོ་དེ་གྱིས། ངས་ཀྱང་ཁས་བླངས་པ་བཞིན་བྱེད། མ་བཅོལ་བའི་དོགས་པ་དེ་མ་སློང་བར་སོངས་གསུངས། དེར་ངས་མཁར་གྲུ་བཞིའི་རྨང་བཏིང་ནས་བརྩིགས་པའི་ཚེ། གཞུང་གི་རྔོག་སྟོན་ཆོས་རྡོར། དོལ་གྱི་ཚུར་སྟོན་དབང་ངེ་། གཙང་རོང་གི་མེས་སྟོན་ཚོན་པོ་རྣམས་ཀྱིས་སྐུ་རྩེད་ལ་རྡོ་ཆེན་པོ་རང་གཅིག་སྒྲིལ་ཞིང་བྱུང་བ་རྨང་རྡོར་བཅུག་ནས་སྐེད་སྒོའི་ཐད་ཐོག་སོ་གཉིས་ཙམ་ལོངས་པའི་ཚེ། མར་པ་བྱོན་ནས་ཀུན་ལ་གཟིགས་རྟོག་དགའ་མོ་མཛད་པས། བུ་ཆེན་གསུམ་པོས་བསྒྲིལ་བའི་རྡོ་དེ་ལ་ཕྱག་མཛུབ་བཙུགས་ཏེ། མཐུ་ཆེན་རྡོ་འདི་ག་ནས་བྱུང་གསུངས། ཐུགས་སྲས་བུ་ཆེན་རྣམས་ཀྱིས་སྐུ་རྩེད་ལ་བསྣམས་བྱུང་བ་ལགས་ཞུས་པས། འོ་ན་ཁོང་ཚོའི་རྡོས་ཁྱོད་ཀྱི་མཁར་ལས་ཀྱི་གོ་མི་ཆོད། རྡོ་འདི་ཐོན་ལ་དང་པོའི་སར་སྐྱོལ་གསུངས། མཁར་འདི་མི་བཤིག་པའི་ཞལ་བཞེས་ཡོད་ཞུས་པས། དེ་ཡོད་དེ་ངའི་བུ་སློབ་རིམ་གཉིས་
(༦༦)ཀྱི་རྣལ་འབྱོར་སྒོམ་པ་རྣམས་ཁྱོད་ཀྱི་གཡོག་ཏུ་བཀོལ་བར་མ་ཚད། ཀུན་བཤིག་པ་ནི་མིན། རྡོ་འདི་ཐོན་ལ་རང་གནས་སུ་སྐྱོལ་གསུང་། དེར་རྩེ་མོ་ནས་བཤིག་སྟེ་རྡོ་རང་གནས་སུ་བསྐྱལ་བས། ད་ཡང་ཁྱོད་རང་གིས་ལོངས་ལ་རྨང་རྡོར་ཆུག་གསུངས། བླངས་པས་ཁོང་གསུམ་གྱི་ཤེད་ང་རང་གཅིག་པོ་ལ་འདོན་དགོས་བྱུང་བས། སྦྱོང་པོ་རང་བྱུང་རུང་སྔར་བརྩིགས་པ་དེ་ལ་ངའི་གྱད་རྡོར་གྲགས་པ་ཡིན། རི་སྣ་དེར་རྩིག་རྨང་བཏིངས་པའི་ཚེ། ཕ་ཚན་ཀུན་གྱི་གྲོས་ལ། མནའ་རི་ལ་མར་པས་སྐུ་མཁར་བརྩིག་པར་འདུག་པས་བསྲུངས་པ་དྲག་ཟེར་བ་ལ། ལ་ལ་ན་རེ་མར་པ་རང་སྨྱོས་ནས་ལ་སྟོད་ཕྱོགས་ཀྱི་བན་ཆུང་ཤེད་པོ་ཆེ་ཞིག་འདུག་པ་དེ། ས་འབུར་ཚད་དང་རི་སྣ་ཡོད་ཚད་ལ་མཁར་གྱི་བཟོ་ལུང་མ་བསྟན་རེ་བརྩིགས། ཕྱེད་ཙམ་ལོངས་པ་དང་། ཡང་ཁོ་རང་བཤིག་ཏུ་བཅུག་ནས་ས་རྡོ་རྣམས་རང་གནས་སུ་སྐྱེལ་དུ་འཇུག་གིན་འདུག འདི་ཡང་བཤིག་འོང་། མི་བཤིག་ན་བསྲུངས་པས་ཆོག བཤིག་མི་བཤིག་བལྟའོ་ཟེར་བ་ལ། མ་བཤིགས་པར་མཁར་ལས་ནར་མར་བྱས་པས། བདུན་ཐོག་ཏུ་སོང་བ་དང་ངའི་རྐེད་པ་ལའང་སྒལ་རྨ་གཅིག་བྱུང་། དེ་དུས་ཕ་ཚན་རྣམས་ན་རེ། ད་མི་བཤིག་པར་འདུག དང་པོ་བཤིགས་པ་དེ་རྣམས་འདིར་རྩིག་པའི་ངན་གཡོ་ཡིན་པར་འདུག ད་རང་རེ་ཚོས་བཤིག་ཟེར་དམག་ཆས་པས། དེའི་ཚེ་བླ་མས་སྤྲུལ་པ་མཛད་ནས་དམག་ཁྲབ་ཅན་མང་པོས་མཁར་གྱི་ཕྱི་ནང་ཀུན་བཀང་བས། མར་པ་ལོ་ཙཱས་དམག་དེ་ཙམ་གང་ནས་བོས་པ་ན་ཟེར་ཀུན་སྐྲག་སྟེ་འཛིང་མ་ནུས་པར་རེ་རེ་ནས་ཕྱག་འབུལ་དང་ཞུ་འབུལ་ལ་ཕག་ཏུ་བྱུང་བས། ཀུན་ཡོན་བདག་
(༦༧)དང་འབངས་སུ་ཆུག་གོ། །དེ་དུས་གཙང་རོང་གི་མེས་སྟོན་ཚོན་པོ་བདེ་མཆོག་གི་དབང་མོ་ཆེ་ཞུར་བྱུང་བས། ཡུམ་གྱི་ཞལ་ནས་ད་ལན་ཁྱོད་རང་ཡང་དབང་ཞིག་ཅིས་ཀྱང་ཐོབ་པ་བྱེད་གསུངས། ང་རང་གི་ཡིད་ལའང་ངས་འདི་ཙམ་གྱི་མཁར་ཞིག་བརྩིགས་པ་ལ། རྡོ་ར་མགོ་ཙམ་ཞིག་གམ། ས་ཙེལ་པོ་གང་ངམ། ཆུ་ཕོགས་གཅིག་གམ། འཇིམ་པ་ཁྱེམ་གང་སྐྱེལ་བའི་གྲོགས་མེད་པར་བརྩིགས་པ་ཡིན་པས། ད་ལན་དབང་བསྐུར་གནང་འོང་སེམས་པ་བྱུང་སྟེ། ཕྱག་བཙལ་ནས་དབང་གྲལ་ལ་བསྡད་པས། བླ་མའི་ཞལ་ནས་མཐུ་ཆེན་ཁྱོད་ལ་དབང་ཡོན་ཅི་ཡོད་གསུངས། བླ་མའི་སྲས་མཁར་གྱི་ཞབས་ཏོག་བསྒྲུབས་པས། དབང་དང་གདམས་པ་གནང་བའི་ཞལ་བཞེས་ཡོད་པ་དེས་གནང་དུ་རེ་བསྡད་པ་ལགས་ཞུས་པས། བླ་མའི་ཞལ་ནས། ཁྱོད་ཀྱིས་སྤེའུ་ལག་ངར་ཙམ་ཞིག་བརྩིགས་པ་ལ། ངས་རྒྱ་གར་ནས་དཀའ་ལས་བྱས་པའི་དབང་དང་གདམས་པ་མི་ཐོབ། དབང་ཡོན་ཡོད་ན་ཁྱེར་ཤོག དེ་མིན་གསང་སྔགས་ཟབ་མོའི་དབང་གྲལ་དུ་མ་སྡོད་གསུངས། འགྲམ་ལྕག་བརྒྱབ། སྐྲ་ནས་བཟུང་ཕྱིར་བཏོན་པས། ད་ལྟ་རང་ཤི་ན་དགའ་བ་ལ་བསམ་མཚན་ཐོག་ཐག་ཏུ་ངུ་ཞིང་བསྡད། དེ་དུས་ཡུམ་བྱོན་ནས། བླ་མ་ཁོང་ངས་རྒྱ་གར་ནས་བླངས་པའི་ཆོས་འདི་རྣམས་སེམས་ཅན་ལ་ཕན་དུ་རེ་ནས་བླངས་པ་ཡིན་གསུངས། སྐུ་མདུན་དུ་ཁྱི་གཅིག་བྱུང་རུང་། ཆོས་གསུང་ཞིང་མཇུག་བསྔོ་བས་སྡུད་པ་ཞིག་འདུག་པ་ཡིན་ཏེ། ཁྱོད་ལ་ཐུགས་ལ་མི་འདོགས་པ་འདི་ཅི་ཡིན་མི་ཤེས་པར་འདུག འོན་ཀྱང་ལོག་ལྟ་མ་
(༦༨)སྐྱེས་པ་གྱིས་གསུངས། སེམས་གསོ་མཛད། ནངས་པར་བླ་མ་རང་བྱོན་ནས། མཐུ་ཆེན་ཁྱོད་རང་ད་རེ་ཞིག་མཁར་གྱི་རྩིག་འཕྲོ་ཞོག་ལ། ཞོལ་གྱི་རྣམ་པའི་ཁྱམས་ཀ་བ་བཅུ་གཉིས་ཡོད་པ་བཙན་ཁང་དང་བཅས་པ་ཞིག་རྩིགས། དེ་ལོངས་པ་དང་དབང་དང་གདམས་ངག་སྟེར་གསུངས། དེར་ཁྱམས་ཀྱི་རྨང་བཏིངས་ནས་བརྩིགས། ཡུམ་གྱིས་དུས་རྒྱུན་དུ་ཟ་མ་ལ་བྱན་མ་ཆག་པ་དང་། ཆང་བཟི་བེར་རེ་བ་རྒྱུན་དུ་གནང་ནས་སེམས་གསོ་བཏང་བྱམས་པོ་རང་མཛད། ཁྱམས་ལོངས་སུ་ཆ་བའི་ཚེ། དོལ་གྱི་ཚུར་སྟོན་དབང་ངེ་གསང་འདུས་ཀྱི་དབང་མོ་ཆེ་ཞུར་བྱུང་བས། ཡུམ་གྱི་ཞལ་ནས་ད་ལན་བུར་དབང་ཞིག་ཅིས་ཀྱང་ཐོབ་པ་བྱེད་གསུངས། མར་ལྟང་གཅིག་སྣམ་བུ་བུབས་གཅིག ཟངས་ཆུང་གཅིག་རྣམས་གནང་བ་ཕྱག་རྟེན་ལ་ཕུལ་ནས་དབང་གྲལ་ལ་བསྡད་པས། བླ་མའི་ཞལ་ནས་མཐུ་ཆེན་ཁྱོད་དབང་གྲལ་ལ་སྡོད་པའི་དབང་ཡོན་ཅི་ཡོད་གསུངས། མར་ལྟང་དང་སྣམ་བུ་དང་ཟངས་དེ་རྣམས་ལགས་ཞུས་པས། དེ་རྣམས་ང་ལ་ཡོན་བདག་ཆེ་གེ་མོ་དང་ཆེ་གེ་མོ་རྣམས་ཀྱིས་ཕུལ་བའི་ནོར་ལགས། ངའི་ནོར་གྱིས་ཁྱོད་ཀྱི་དབང་ཡོན་མི་འོང་། ཁྱོད་རང་ལ་ཡོད་ན་ཁྱེར་ཤོག དེ་མིན་ངའི་དབང་གྲལ་དུ་མ་སྡོད་གསུངས་བཞེངས་ནས་བཀའ་བཀྱོན་མང་པོ་གསུང་ཞིང་། ཞབས་ཐོས་བརྡུངས་ཏེ་བཏོན་པས། ས་ལ་ཐིམ་ན་དགའ་བ་ལ་སྙམ་པ་དང་། ངས་མཐུ་བཏང་ནས་མི་མང་པོ་བསད། སེར་བས་ལོ་མང་པོ་བཅོམ་པའི་རྣམ་སྨིན་ཡིན་ནམ། ཆོས་ཡེ་མི་འོང་བ་མཁྱེན་པ་ཡིན་ནམ། བླ་མ་ཐུགས་རྗེ་ཆུང་ནས་མི་གནང་བ་ཡིན་ནམ། གང་ནའང་ཆོས་མེད་པའི་མི་ལུས་སྡིག་
(༦༩)གསོག་པ་འདིས་ཅི་བྱེད། ལྕེབ་བམ་ལྕེབ་བམ་སྙམ་པའི་ཚེ། ཡུམ་གྱིས་ཚོགས་སྐལ་གཅིག་བསྐྱལ། སེམས་གསོ་མང་པོ་མཛད་ནས་སོང་རུང་། ཚོགས་ལ་རོལ་བའི་འདུ་ཤེས་ཀྱང་སྟོར་ནས། མཚན་ཡུལ་ངུ་ཞིང་བསྡད་པས། ནངས་པར་ཡང་བླ་མ་བྱོན་ནས། ད་ཁྱོད་རང་ཁྱམས་དང་སྤེའུའི་འཕྲོ་སློང་ལ་མཐར་སྐྱོལ། དེ་ནས་དབང་དང་གདམས་ངག་སྟེར་རང་སྟེར་གསུངས་ནས་མཁར་ལས་བྱས་པས། ཁྱམས་མཐར་ཕྱིན་དུ་ལོངས། དེའི་དུས་ངའི་ཚང་ར་ལ་ཡང་སྒལ་རྨ་གཅིག་བྱུང་སྟེ། སྒལ་མིག་གསུམ་ཀ་ནས་རྣག་ཁྲག་འཛག་པ་དང་། རྒྱབ་རྨ་རུ་སོང་བ་ཡུམ་ལ་གཟིགས་ཕུལ་ཏེ། མཁར་གྲུ་བཞི་འགྲམ་འདིང་དུས་ཀྱི་ཞལ་བཞེས་རྣམས་བསྙེལ་གསོས་ནས། ཆོས་དྲན་དྲག ཆོས་ཞུ་གྲོགས་སུ་སྦྲན་པས། ཡུམ་གྱིས་ལེགས་པར་གཟིགས་ནས་སྤྱན་ཆབ་བསིལ་ཏེ། ངས་བླ་མ་ལ་ཞུ་གསུང་། བླ་མའི་དྲུང་དུ་བྱོན་ནས་ཞུས་པ། བླ་མ་རིན་པོ་ཆེ། མཐུ་ཆེན་གྱིས་འདི་ཙམ་གྱི་མཁར་ལས་བྱས་པས་ཡན་ལག་ཐམས་ཅད་རྨ་དང་སེར་ཀར་སོང་། རྒྱབ་ལ་སྒལ་མིག་གསུམ་བྱུང་བ་ནས་རྣག་ཁྲག་བསམ་གྱིས་མི་ཁྱབ་པ་འཛག་གིན་གདའ། སྔར་རྟ་བོང་ལ་སྒལ་རྨ་བྱུང་ཟེར་བ་རྣ་བས་ཀྱང་ཐོས། མིག་གིས་ཀྱང་མཐོང་སྟེ། མི་ལ་སྒལ་རྨ་བྱུང་ཟེར་བ་ཐོས་ཀྱང་མ་ཐོས་མཐོང་ཡང་མ་མཐོང་། འདི་འདྲ་མི་གཞན་གྱིས་མཐོང་བ་དང་ཐོས་པ་བྱུང་ན་ང་ངོ་ཡང་ཚ་བར་གདའ། ཡབ་རང་བླ་མ་ཆེན་པོ་ལགས་པས་ཞབས་ཀྱང་འདྲེན་པར་གདའ། ཁོ་སྙིང་ཡང་རྗེ་བར་གདའ་བས། ད་བུ་འདི་ལ་ཆོས་ཤིག་གནང་བར་ཞུ། དང་པོ་མཁར་ལོངས་ནས་ཆོས་གནང་བར་མཛད་པ་ལགས་མོད་
(༧༠)ཞུས་པས། བླ་མའི་ཞལ་ནས་དེ་ཀ་རེད་ཟེར། མཁར་བཅུ་ཐོག་ལོངས་ནས་ཆོས་སྟེར་བར་བྱས་པ་ཡིན་པས་བཅུ་ཐོག་ག་རེ་གསུངས། བཅུ་ཐོག་ལས་ལྷག་པའི་ཁྱམས་བརྩིགས་པ་ལགས་མོད་ཞུས་པས། ལབ་ལབ་མང་ཁ་ན་མེད། བཅུ་ཐོག་ཁེལ་ན་ཆོས་སྟེར་བ་ཡིན། སྒལ་རྨ་རང་བྱུང་འདུག་གམ་གསུངས་པས། དེས་ན་ཡབ་སྐུ་དབང་གིས་གཅོད་པར་གདའ་བས་གང་དགྱེས་ཡིན། སྒལ་རྨ་བྱུང་བ་ཙམ་དུ་མ་ལུས་པར་རྒྱབ་སྒལ་རྨར་སོང་གདའ་ཞེས་གཟུག་གེ་བ་ཞུས་ནས་མྱུར་དུ་བྱོན་པས། འོ་ན་ཡར་ཤོག་གྱིས་གསུངས། ཆོས་གནང་བ་ཡིན་ནམ་སྙམ་ཕྱིན་པས། མཐུ་ཆེན་སྒལ་རྨ་སྟོན་དང་གསུངས། གཟིགས་ཕུལ་བས་ལེགས་པར་གཟིགས་པའི་མཐར། ཁྱོད་ཀྱི་འདི་བས་ལྷག་པ་ངའི་ཇོ་བོ་ནཱ་རོ་པ་དེས་དཀའ་ཆེན་བཅུ་གཉིས། དཀའ་ཕྲན་བཅུ་གཉིས་ཏེ། དཀའ་བ་མི་འདྲ་བ་ཉེར་བཞི་སྐུ་ལུས་རང་གི་ཐོག་ཏུ་སྤྱད་པ་ཡིན། ངས་ཀྱང་གཅེས་པའི་སྲོག་དང་ཕངས་པའི་ནོར་ལ་མ་བལྟས་པར་ཇོ་བོ་ནཱ་རོ་པ་བསྟེན་པ་ཡིན། དེའི་ཕྱིར་ཆོས་འདོད་ན་ཡུས་མ་ཆེ་བར་མཁར་ལས་ཀྱི་འཕྲོ་གྱིས་གསུང་བ་ལ་དེ་ཡང་མད་སྙམ་པ་བྱུང་། གོས་ལ་སྒལ་ཚགས་མཛད་དེ། རྟ་བོང་ལ་ཡང་འདི་བཞིན་བྱེད་ཀྱིན་འདུག་པས་སྒལ་ཚགས་གྱིས་ལ་ས་རྡོ་སྐྱོས་གསུངས། རྒྱབ་རྨར་སོང་བ་ལ་སྒལ་ཚགས་ཀྱིས་ཅི་ལ་ཕན་ཞུས་པས། ས་མི་འཆོར་བ་ལ་ཕན་གསུངས། དེར་བླ་མའི་བཀའ་ཡིན་སྙམ་ས་སྣོད་མདུན་དུ་ཁྱེར་ནས་ས་བསྐྱས་ཤིང་ཞལ་བ་བྱས་པ་བླ་མས་གཟིགས་པས། བླ་མ་ཅི་གསུང་སྒྲུབ་པའི་སྐྱེས་བུ་ངོ་མཚར་ཆེ་སྙམ། མར་པ་རང་ཡང་ལྐོག་ཏུ་སྤྱན་ཆབ་ཤོར་འདུག དེར་རྨ་རྣམས་འགྲམས་ནས་
(༧༡)ཤིན་ཏུ་ན་བའི་ཚེ། ཡུམ་ལ་ཞུས་ནས་རབ་ཆོས་གནང་བ། ཐ་མའང་རྨ་མ་སོས་བར་བསྡད་རྒྱུ་འོང་བའི་ཞུ་བ་ཡུམ་གྱིས་ཕུལ་བས། མཁར་མ་ཚར་བར་ཆོས་མི་འོང་། ལས་ནུས་ན་ཅི་ལྕོགས་གྱིས། མི་ནུས་ན་སྡོད་པ་ལས་འོས་མེད་གསུངས། ཡུམ་གྱི་ཞལ་ནས། རྨ་དང་སྒལ་པ་རྣམས་མ་སོས་བར་ལས་མ་བྱེད་པར་སྡོད་གསུང་། སྡོད་པའི་བར་ལ་ཟ་མ་བཅུད་ཆེ་ལ་བཟའ་ཆེ་བ་གནང་བས་ཞག་འགའ་ཆོས་མ་ཐོབ་པའི་སེམས་ལས་མིན་པ་སྐྱིད་དུ་ཚོར་བ་བྱུང་། དེར་རྨ་དགའ་རབ་སོས་པ་དང་། བླ་མའི་ཞལ་ནས་ཆོས་ཀྱི་སྒྲོས་མེད་པར། མཐུ་ཆེན་ད་ཡང་མཁར་ལས་རན་གསུང་བས་བྱེད་གྲབས་ཡོད་ཚེ་ཡུམ་གྱི་ཞལ་ནས། ད་རང་རེ་གཉིས་ཆོས་ཐོབ་པའི་ཐབས་ཤིག་བྱེད་གསུངས། ངེད་གཉིས་ཀྱིས་གྲོས་བྱས་ནས། ངས་ཕྱེ་སྒྱེ་ཆུང་ངུ་མ་ཞིག་གི་ཁར་དཔེ་ཆ་དང་ཆོས་ཕྲན་ཚེགས་ཡོད་པ་དྲགས་ཏེ། བླ་མས་གཟིགས་ས་ཞིག་ཏུ་ད་ང་གཏོང་གྲོགས་མཛོད་ཟེར་ཞིང་འགྲོ་བ་ལྟར་བྱས། ཡུམ་གྱིས་ད་ངས་བླ་མ་ལ་ཞུས་ནས་ཆོས་འོང་རང་འོང་བར་བྱའོ། །ཅིས་ཀྱང་སྡོད་གསུང་ཞིང་འཛིན་པ་ལྟར་མཛད་པས། བླ་མས་གཟིགས་ཏེ། བདག་མེད་མ་ཁྱེད་གཉིས་ཅི་བྱེད་ཅིང་ཡོད་པ་ཡིན་གསུངས། མཐུ་ཆེན་ཁོ་དང་པོ་ས་ཐག་རིང་ནས་བླ་མའི་དྲུང་དུ་ཆོས་ལ་གཏད་ནས་འོངས་པ་ལ། ཆོས་མི་གནང་བའི་ཁར་བཀའ་བཀྱོན་དང་ཕྱག་འབེབས་མང་བ་ལས་མ་བྱུང་བས། ཆོས་མེད་དུ་ཤི་ཡིས་དོགས་ད་བླ་མ་གཞན་འཚོལ་དུ་འགྲོ་ཟེར་ཆས་གདའ་བ་ལ། བདག་གིས་ཆོས་གནང་བའི་ཁག་ཁུར་དང་ངོ་ཆེན་བྱེད་བྱས་བཤོལ་
(༧༢)བཏབ་པ་ལགས་ཞུས་པས། གོ་གསུང་ཕྱིར་བྱོན་བྱུང་སྟེ། ང་ལ་འགྲམ་ལྕག་མང་པོ་བརྒྱབ་ནས། ཁྱོད་དང་པོ་ངའི་སར་སླེབས་མ་ཐག་ལུས་ངག་ཡིད་གསུམ་ང་རང་ལ་ཕུལ་ཚར་བ་ལ་ད་ཁྱོད་གང་དུ་འགྲོ་བ་ཡིན། ནན་ཏར་མ་སོང་ན་ང་རང་དབང་བའི་ལུས་ངག་ཡིད་གསུམ་དུམ་བུ་བརྒྱར་གཏུབས་ཀྱང་ང་རང་དབང་ཆེ་མོད། ཅིས་ཀྱང་ཁྱོད་ཐོན་འགྲོ་ན། ངའི་ནང་ནས་ཕྱེ་ཁྱེར་བའི་རྒྱུ་མཚན་ཤོད་གསུངས། བསྒྱེལ་ཞིང་བརྡུངས། ཕྱེ་འཕྲོགས་ཏེ་ནང་དུ་བསྣམས་སོང་བ་དང་། སེམས་ཕམ་པ་ལ་ཚད་མེད་པ་བུ་གཅིག་པུ་ཤི་བའི་མ་ལྟ་བུ་བྱུང་རུང་། ཡུམ་དང་གྲོས་ཡོད་པ་དང་། བླ་མ་ཟིལ་ཆེ་བས་ཟིལ་མ་བཟོད་པར་ནང་དུ་ལོག་ནས་ངུ་ཞིང་བསྡད་པས། ཡུམ་གྱི་ཞལ་ནས་རེ་ཞིག་ཐབས་ཅི་བྱས་རུང་། བླ་མས་ཁྱོད་ལ་ཆོས་མི་གནང་བར་འདུག་སྟེ། འོན་ཀྱང་ནམ་ཞིག་གནང་བ་ཞིག་ཅིས་ཀྱང་འོང་། དེ་བར་ལ་ངས་གཅིག་བྱ་གསུངས། རྡོ་རྗེ་ཕག་མོའི་སྒོམ་ཐབས་ཤིག་གནང་བས་ཀྱང་། ཉམས་མྱོང་མ་སྐྱེས་རུང་སེམས་ལ་ཤིན་ཏུ་ཕན་པ་དང་ཟིང་ཐུང་བར་བྱུང་སྟེ། ཡུམ་རང་གི་སྐུ་དྲིན་བསབ་པ་དང་། བླ་མའི་ཡུམ་ཡིན་པས་སྡིག་པ་འདག་བསམ། གནང་ཆུང་དབྱར་ཡུམ་བ་འཇོ་བའི་འཇོ་སྟེགས། གོ་ཁར་ཡོས་རྔོད་པའི་རྔོད་སྟེགས་ཚུན་མཛད་ཅིང་ཞབས་ཏོག་བསྒྲུབས། དེའི་ཚེ་ངེས་པར་བླ་མ་གཞན་འཚོལ་དུ་འགྲོ་དགོས་སྙམ་པ་ལ། བསམ་མནོ་ལེགས་པར་བཏང་བས། ཚེ་གཅིག་ལུས་གཅིག་ལ་སངས་རྒྱ་བའི་གདམས་ངག བླ་མ་འདི་མིན་པ་གཞན་ལ་མེད་པར་ཐག་ཆོད་འདུག ད་ལན་སངས་རྒྱས་མ་ཐོབ་ན་ངས་ཕྱི་མ་ངན་སོང་དུ་སྐྱེ་བའི་ལས་བསགས་ཚར་ཡོད་
(༧༣)པས། ཆོས་ཕྱིར་ནཱ་རོ་པའི་དཀའ་བ་ཙམ་སྤྱད་ནས། བླ་མ་འདི་ཅི་མཉེས་ཤིག་གིས་གདམས་ངག་ཐོབ་པར་བྱས་ལ། བསྒོམས་ནས་ཚེ་འདིར་སངས་རྒྱས་ཐོབ་པ་ཞིག་བྱེད་དགོས་སྙམ་ནས། ཡང་ས་རྡོ་བསྐྱས་ནས་ཁྱམས་དང་བཙན་ཁང་གི་ཞལ་བའི་འཕྲོ་བྱེད་ཅིང་ཡོད་པའི་ཚེ། གཞུང་གི་རྔོག་སྟོན་ཆོས་རྡོར་འཁོར་དང་བཅས་པ་འབུལ་བ་མང་པོ་ཁྱེར་ཏེ་དགྱེས་པ་རྡོ་རྗེའི་དབང་མོ་ཆེ་ཞུར་བྱུང་བས། ཡུམ་གྱི་ཞལ་ནས། ཡབ་མཁར་ལས་ཀྱི་ཞབས་ཏོག་འདི་ཙམ་གྱིས་མི་ཆོག་པར་ནོར་རང་ལ་དགྱེས་ན། ད་ལན་འབུལ་བ་ཕུལ་ཏེ། དབང་ཐོབ་རང་ཐོབ་པ་ཞིག་བྱེད་པས། འདི་ཕུལ་ལ་སྔོན་ལ་ཁྱོད་རང་གིས་ཞུས་ཤིག མ་གནང་ན་ངས་ཞུ་ཡིས་གསུངས། ཡུམ་རང་གི་ཕག་ནོར་གྱི་གཡུ་དྲུག་དམར་ཆེ་ལ་ལེགས་པ་ཞིག་གནང་བ་དེ་ཕུལ་ནས། ད་ལན་གྱི་དབང་འདི་བདག་ལའང་ཅིས་ཀྱང་གནང་བར་ཞུ་ཞུས་ཏེ། དབང་གྲལ་ལ་བསྡད་པས། གཡུ་སློག་ཅིང་གཟིགས་ནས། མཐུ་ཆེན་ལ་འདི་གང་ནས་བྱུང་། བདག་ལ་ཡུམ་གྱིས་གནང་བ་ལགས་ཞུས་པས་ཞལ་འཛུམ་མཛད་དེ། བདག་མེད་མ་བོས་ཤོག་གསུངས། ཡུམ་སྤྱན་དྲངས་པས། བདག་མེད་མ་འོ་སྐོལ་ལ་གཡུ་འདི་ག་ནས་བྱུང་གསུང་བ་ལ། དེར་ཡུམ་གྱིས་ཕྱག་མང་པོ་ཕུལ་ནས། གཡུ་འདི་ལ་ཡབ་ཀྱི་ཐེ་རེག་ཡེ་མེད་ལགས། འདི་དང་པོ་ང་ཕ་མས་ཡབ་ཀྱི་དྲུང་དུ་རྫོང་བའི་ཚེ། བླ་མ་ཡང་ཐུགས་གཏུམ་མེ་བ་ཞིག་ཡོད་པར་འདུག་པས། གལ་ཏེ་བཟའ་ཚོ་བྱེ་བྲལ་ལ་སོང་ན་དགོས་པས་འདི་སུ་ལའང་མ་སྟོན་པར་ཚགས་གྱིས་ཤིག་ཟེར། བདག་རང་གི་ཕག་ནོར་དུ་གནང་བ་ལགས་ནའང་། ད་བུ་འདི་སྙིང་རྗེ་དྲགས་མ་
(༧༤)བཟོད་པར་བྱིན་པ་ལགས་པས། གཡུ་འདི་ཡབ་བཞེས་ལ་མཐུ་ཆེན་ལ་དབང་བསྐུར་ཐུགས་རྗེས་འཛིན་པར་ཞུ། སྔར་དབང་གྲལ་ནས་བཏོན་པའི་ཡི་ཆད་མང་པོ་རང་མྱོང་བས་ད་ལན་བླ་མ་རྔོག་པ་འཁོར་བཅས་ཀྱིས་ཀྱང་ངའི་ཞུ་བ་འབུལ་གྲོགས་མཛོད་ཅིག་གསུངས། ཕྱག་མང་དུ་ཕུལ་བས། བླ་མ་ཐུགས་གཏུམ་པའི་སྟབས་ཀྱིས་རྔོག་པ་འཁོར་བཅས་ཀྱིས་ཀྱང་ཞུ་བ་གཞན་འབུལ་མ་ནུས་པར་དེ་ལྟར་ལགས་སོ་ཞེས་ཡུམ་དང་མཉམ་པོར་ཕྱག་ཕུལ་བས། བླ་མའི་ཞལ་ནས། བདག་མེད་མའི་བྱེད་ལུགས་ཀྱིས་གཡུ་བཟང་པོ་མི་ལ་ཤོར་ཚད་ཚད་པ་བྱུང་འདུག་གསུངས། གཡུ་མགུལ་དུ་བཞེས་ནས་བདག་མེད་མ་ཁྱོད་བསམ་མནོ་མ་ཆུང་། ཁྱོད་རང་རིལ་པོ་ང་དབང་ན། གཡུ་ང་ཡི་དབང་ཡིན་མོད། མཐུ་ཆེན་ཁྱོད་རང་ལ་ནོར་ཡོད་ན་ཁྱེར་ཤོག་དབང་བསྐུར་གྱིས། གཡུ་ང་རང་གི་ཡིན་པར་འདུག་གསུང་རུང་། ཡུམ་གྱིས་གཡུ་ཕུལ་བའི་ཡུས་ཀྱིས་ད་དུང་ཞུ་བ་འོང་ངམ་སྙམ་བསྡད་པས། བླ་མ་ཐུགས་ཁྲོས་ནས་ཧར་གྱིས་བཞེངས་ཏེ། ཐོན་བྱས་རུང་མི་འགྲོ་བའི་ཁྱོད་ཀྱི་ཡུས་ཅི་ཡོད་པ་གསུངས། ཁ་བུབ་ཏུ་ས་སྲོས་པ་འདྲ་བ་ཞིག་བརྡབས། གན་རྐྱལ་དུ་ནམ་ལངས་པ་འདྲ་བ་ཞིག་བརྡབས་ནས་ཕྱག་དབྱུག་བཞེས་བྱུང་བ། རྔོག་གིས་བཟུང་བའི་བར་ལ་འཇིགས་དྲགས་རྒྱ་མཐོངས་ཤིག་ཡོད་པ་དེ་ལ་མཆོངས་ཕྱིན་པས། བླ་མ་རང་ཡང་ཐུགས་ལས་བྱུང་རུང་ཐུགས་རྒྱལ་བཞེངས་པ་ལྟར་མཛད་འདུག་ང་ལ་ཅི་ཡང་མ་བྱུང་སྟེ། སྡུག་དྲགས་ལྕེབ་དགོས་སྙམ་ཡོད་པའི་ཚེ། ཡུམ་ཡང་སྤྱན་ཆབ་འདོན་ཞིང་བྱུང་ནས། མཐུ་ཆེན་སེམས་སྡུག་པོ་མ་བྱེད་ཅིག ཁྱོད་པས་ཤ་ཚ་བ་དང་
(༧༥)སྙིང་ཉེ་བའི་སློབ་མ་མི་འོང་བས། བླ་མ་གཞན་ལ་ཆོས་ཞུ་རུང་ངས་མཇལ་བའི་མཐུན་རྐྱེན་བྱས་ནས་ཆོས་རྒྱགས་དང་འབུལ་བ་ཡང་སྦྱིན་གྱིས་གསུང་སེམས་གསོ་མཛད། སྔར་ཡིན་ན་ཚོགས་འཁོར་ཅི་བྱེད་ཀྱི་གྲལ་ལ་ཡུམ་བཞུགས་དགོས་པ་ལ། དེའི་ནུབ་མོ་ང་མཚན་ཡལ་ངུ་བའི་ཟླ་ལ་བཤུམས་ཤིང་བཞུགས། ནངས་པར་ང་ལ་བླ་མའི་དྲུང་དུ་ཤོག་གསུངས། ཆོས་གནང་བ་ཡིན་ནམ་སྙམ་ཕྱིན་པས། མདང་ངས་ཁྱོད་ལ་དབང་མ་བསྐུར་བ་ལ་མ་དགའ་བ་དང་ལོག་ལྟ་མ་བྱུང་ངམ་གསུངས། བླ་མ་ལ་དད་ལོག་དག་མ་བྱུང་ལགས་ཏེ། བདག་རང་ལས་སྡིག་སྒྲིབ་ཆེ་བས་ལན་སྙམ་སྡུག་པོ་རང་བྱུང་ལགས་ཞུས་ནས་ངུས་པས། ང་ལ་ངུ་མ་ཤགས་བྱེད་པའི་ཡུས་རང་ཅི་ཡོད་ཕྱིར་སོངས་གསུངས། ཕྱིར་ཐོན་ཕྱིན་ཏེ། སྙིང་རླུང་ལང་བ་ལྟ་བུའི་སྡུག་བསྔལ་གྱི་ངང་ནས་བསམ་བློ་ལ། ང་སྡིག་བྱེད་དུས་རྒྱགས་ཡོན་འབྱོར་ནས། ཆོས་བྱེད་དུས་ནོར་ཅི་ཡང་མེད་པ་འདི་འདྲ་བྱུང་། སྡིག་བྱེད་དུས་ཀྱི་གསེར་དེའི་ཕྱེད་ཙམ་ཞིག་ཡོད་ནའང་དབང་དང་གདམས་ངག་ཐོབ་པར་འདུག་སྟེ། ད་བླ་མ་འདིས་ནི་འབུལ་བ་མེད་པར་གདམས་ངག་མི་གནང་བར་འདུག གཞན་དུ་ཕྱིན་རུང་འབུལ་མི་དགོས་པ་ནི་མི་འོང་། ནོར་མེད་པས་ཆོས་ནི་མི་ཐོབ་པར་འདུག ཆོས་མེད་ཀྱི་མི་ལུས་སྡིག་གསོག་པ་ལས་ནི་ལྕེབ་པ་དགའ། ད་ཅི་དྲག་ན་ཅི་དྲག་ན་སྙམ་པ་ལ། ཡང་ཕྱུག་པོ་ཆེན་པོ་ཞིག་གི་གཡོག་བྱས་པའི་གླ་བསོགས་ནས་ཆོས་ཞུ་བའི་རྒྱགས་ཡོན་འདྲ་འབྱོར་རམ། ཡང་ན་ལས་ངན་པོས་མཐུ་བཏང་ཡོད་པས་ཡུལ་དུ་ཕྱིན་རུང་ཆོག་པར་འདུག ཨ་མ་ཡང་ཕྲད་པས་དགའ་འོང་། ནོར་ཁུག་པའང་སྲིད། གང་ལྟར་
(༧༦)ནའང་ཆོས་འཚོལ་བའམ་ནོར་འཚོལ་བ་གང་རུང་ཞིག་ལ་འགྲོ་དགོས་པར་འདུག བླ་མའི་ཕྱེ་ཁྱེར་རུང་ཐུགས་ཁྲེལ་ལས་མི་འོང་སྙམ། ང་རང་གི་དཔེ་ཆ་རྣམས་ཁྱེར་ཏེ། ཡུམ་ལ་ཡང་མ་ཞུས་པར་ཐོན་ཕྱིན་པས། ལམ་བར་ལ་ཡུམ་གྱི་བཀའ་དྲིན་དྲན་ནས་ཤིན་ཏུ་འཕྲེང་བ་ཞིག་བྱུང་། གྲོ་བོ་ལུང་ནས་ཚ་ལམ་རྒྱང་པ་ཞིག་གི་སར་སླེབས་པ་དང་ལྟོ་རན་ཏེ། དང་པོར་ཕྱེ་བསླངས། དེ་ནས་སྣོད་སྤྱད་གཡར། ཆུ་མེ་ཤིང་རྣམས་བསོགས་ནས་ལྟོ་གཡོས་ཏེ་ཟོས་པས། ཉི་མ་ཕྱེད་ཡོལ་སོང་། དེར་བསམ་པ་ལ། ངས་ལས་བྱས་པ་རྣམས་ཀྱི་ཕྱེད་ཙམ་བླ་མའི་ཞབས་ཏོག་ཏུ་སོང་རུང་། ཕྱེད་ཙམ་ང་རང་གི་ལྟོ་རིན་དུ་འདུག ད་ནངས་ཀྱི་ལྟོ་ན་མ་གཅིག་པོ་འདིའི་དཀའ་ལས་འདི་ལ། ཡུམ་གྱིས་ལྟོ་གཡོས་གཡོས་པ་བྱན་དང་བཅས་པ་ཁ་ཚ་རིང་ངེ་བ་རྒྱུན་དུ་གནང་བ་ཡིན་པ་ལ། ད་ནངས་ངས་ཡུམ་ལ་ཁམས་བདེ་ཞིག་ཞུས་མི་འོང་བ་དེ་ང་མི་ངན་པར་འདུག ད་དུང་ལོག་གམ་སྙམ་ནའང་། ལོག་འགྲོ་རང་མ་སྤོབས། སྣོད་སྤྱད་རྣམས་སྤྲོད་དུ་ཕྱིན་པས། མི་རྒན་ཞིག་ན་རེ། མི་གཞོན་ལས་འོང་འོང་འདྲ་མོ་འདུག་པ་ལ། སློང་བ་ལས་རབ་ཀློག་ཤེས་ན་ཆོས་ཐོན། མི་ཤེས་ན་གཡོག་བྱས་ནའང་ལྟོ་གོས་གཉིས་ཀ་འོང་། ཁྱོད་ཀྱིས་ཀློག་ཤེས་སམ་ཟེར་བ་ལ། ང་རྒྱུན་དུ་སློང་བ་ཞིག་མིན། ཀློག་ཤེས་བྱས་པས། དེ་ཀ་ཙམ་ཀ་གཤའ། འོ་ན་ཞག་འགའ་ངའི་ཀློག་ཐོན་ཡོན་དམར་པོ་སྟེར་ཟེར་བས་དགའ་སྟེ། རུང་བྱས་བསྡད་ནས་བརྒྱད་སྟོང་པ་བཀླགས་པས། རྟག་ཏུ་ངུའི་རྣམ་ཐར་མཐོང་སྟེ། ནོར་མེད་མཉམ་པོ་ལ་ཁོང་གིས་ཆོས་ཕྱིར་དུ་ལུས་སྲོག་བློས་གཏོང་ནུས་འདུག་སྟེ། སྙིང་བཏོན་ན་འཆི་བ་ལས་འོས་མེད།
(༧༧)སྙིང་ཡང་འཚོང་བ་ལ་ཐག་བཅད་འདུག འདིའི་རྩིས་བཏང་ན་ངས་ཆོས་ཕྱིར་དུ་དཀའ་བ་ཡེ་མ་སྤྱད་པར་འདུག བླ་མས་ཆོས་གནང་བའང་སྲིད། མ་གནང་རུང་ཡུམ་གྱིས་བླ་མ་གཞན་དང་སྤྲོད་པའི་ཞལ་བཞེས་བཟང་པོ་ཡང་ཡོད་སྙམ་ལོག་འགྲོ་བའི་སྤོབས་པ་ཞིག་སྐྱེས་ཏེ། ལོག་ནས་ཕྱིན། ང་ཐོན་པ་དང་ཡུམ་གྱིས་བླ་མ་ལ། ཡབ་ཀྱིས་མ་ཐུབ་པའི་དགྲ་དེ་ཐོན་ནས་མི་གདའོ། །ཐུགས་བདེ་ལགས་སམ་ཞུས་པས། སུ་གསུངས། འོ་ན་དགྲ་མི་ཤ་བོ་ཟིན་པ་ལྟར་ཡབ་ཀྱིས་སྡུག་གཏོང་བ་དེ་མཐུ་ཆེན་མིན་ལགས་སམ་ཞུས་པས། ཞལ་རས་ནག་ལོག་མཛད་ནས་སྤྱན་ཆབ་ཉིལ་བྱུང་སྟེ། བཀའ་བརྒྱུད་བླ་མ། མཁའ་འགྲོ། ཆོས་སྐྱོང་། ངའི་སྐལ་ལྡན་གྱི་བུ་ཁུག་ཤོག་ཅིག་གསུངས། དབུ་གཏུམས་ཏེ་བཞུགས་པར་གདའ། དེར་ང་ཡུམ་གྱི་དྲུང་དུ་སླེབས། ཕྱག་ཕུལ་བས། ཡུམ་ཤིན་ཏུ་དགྱེས་ནས་དེ་ཀ་ལོས་དྲག ད་ཁྱོད་ལ་བླ་མས་ཆོས་ཤིག་གནང་བ་འདྲ། ངས་ཁྱོད་ཐོན་འདུག་ཞུས་པས། ངའི་སྐལ་ལྡན་གྱི་བུ་ཁུག་ཤོག་གསུངས། སྤྱན་ཆབ་བསིལ་ཞིང་འདུག ཁྱོད་བླ་མའི་ཐུགས་རྗེས་བཀུག་པ་འདྲ་གསུངས། ངའི་བསམ་པ་ལ་དེ་ཡུམ་གྱིས་ངའི་སེམས་གསོ་བ་ཡིན། ངེས་པར་བདེན་ནས་སྤྱན་ཆབ་འདོན་པ་དང་། སྐལ་ལྡན་གསུང་བ་ཡིན་ན་དགའ་འཚེང་སྟེ། དེ་མིན་ཁུག་ཤོག་གསུང་བ་དང་། དབང་དང་གདམས་ངག་མི་གནང་ལུགས་ཀྱིས་སྐལ་ལྡན་མིན་ཚར་འདུག་པས། གཞན་དུ་འགྲོ་ས་ཡང་མེད། འདིར་ཆོས་ཀྱང་མི་ཐོབ་པའི་སྡུག་པོ་འོང་ངམ་སྙམ་པ་བྱུང་། དེར་ཡུམ་གྱིས་མཐུ་ཆེན་གྱིས་འོ་ཅག་བློས་མ་ཐོངས་པར་ལོག་བྱུང་། ཕྱག་
(༧༨)འབུལ་དུ་འོངས་པས་ཆོག་ལགས་སམ་ཞུས་པས། འོ་ཅག་བློས་མ་ཐོངས་པ་མིན། ཁོ་རང་བློས་མ་ཐོངས་པ་ཡིན། ཕྱག་འཚལ་དུ་ཐོངས་ནའང་ཐོངས་གསུངས། ཕྱག་འབུལ་ལ་ཕྱིན་པས། བླ་མའི་ཞལ་ནས། མཐུ་ཆེན་ཙབ་ཙོབ་དང་བློ་མ་མང་བར་སྙིང་ནས་ཆོས་འདོད་པ་ཡིན་ན། ཆོས་ཕྱིར་སྲོག་ཀྱང་གཏོང་དགོས་པས། མཁར་ལ་ད་ཐོག་གསུམ་ཁོལ། དེ་ནས་གདམས་ངག་སྟེར། དེ་མིན་ངའི་ལྟོ་གྲོན་པ་མིན་པ་མེད་ཁྱོད་རང་ལ་འགྲོ་ས་ཡོད་པར་འདུག་པས་སོངས་གསུངས་པས། ལན་ཞུ་མ་ནུས་པར་ཕྱིར་ཐོན་འོངས་ཏེ། ཡུམ་ལ་ད་ཨ་མ་ཡང་དྲན་པོ་རང་གདའ། བླ་མས་ཆོས་ཀྱང་མི་གནང་བར་གདའ། མཁར་ལས་ཀྱི་འཕྲོ་ཚར་ནས་ཆོས་གནང་ན་བསྡད་རིན་ཆོག་པ་གདའ་སྟེ། མཁར་ལས་ཚར་རྟིང་ཡང་ཆོས་མི་གནང་བའི་སྙད་ཅི་མཛད་ཁུངས་མི་གདའ་བས། བདག་ཡུལ་དུ་འགྲོ་བར་ཞུ། ཡབ་ཡུམ་སྐུ་ཁམས་བཟང་བར་སྨོན་ལམ་འདེབས་བྱས། ཕྱག་ཕུལ་ཏེ་དཔེ་ཆ་ཁྱེར་ནས་འོང་གྲབས་བྱས་པས། ཡུམ་གྱི་ཞལ་ནས་བུ་བདེན། ངས་དང་པོ་ཁས་བླངས་པ་ལྟར། བླ་མ་རང་གི་བུ་ཆེན་ཡང་ཡིན། གདམས་ངག་ཡང་ཡོད་པའི་རྔོག་སྟོན་ལས་ཆོས་ཐོབ་པའི་ཐབས་ཤིག་བྱའོ། །རེ་ཞིག་སྡོད་ལ་ལས་བྱེད་པ་ལྟར་གྱིས་ཤིག་གསུངས། དེར་དགའ་དྲགས་ལས་བྱེད་ཅིང་བསྡད། པཎ་ཆེན་ནཱ་རོ་པ་དེ་ཚེས་བཅུ་ལ་ཚོགས་གཏོར་གྱི་མཆོད་པ་རྒྱ་ཆེན་མཛད་ཀྱིན་ཡོད་འདུག་པས། དེའི་སྟོབས་ཀྱིས་མར་པ་ཡང་ཚེས་བཅུ་མཛད་ཅིང་འདུག དེ་དུས་ཡུམ་གྱིས་ནས་ཁལ་རེ་ཡོད་པའི་ཆང་ཚོད་ཆེན་པོ་གསུམ་བཙོས་པ་ལ། གར་སླ་འབྲིང་གསུམ་དུ་བྱས་ནས། ཡང་ལ་ཡང་བསིངས་
(༧༩)བྱས་པའི་ཕུད་གར་མ་དེ། ཡུམ་གྱིས་གྲྭ་པ་རྣམས་བླ་མ་ལ་ཡང་ཡང་བཏུད་ནས་འདྲེན་དུ་བཅུག ཡུམ་དང་ངས་ཀྱང་ཡང་ཡང་དྲངས། འབྲིང་པོ་གྲྭ་པ་རྣམས་ཀྱིས་གསོལ། སླ་བ་ནས་ཡུམ་གྱིས་ཞལ་རེག་པ་རེ་མཛད་ནས་མང་པོ་མི་གསོལ་བར་འདུག ངས་ཀྱང་ཡུམ་བཞིན་བྱས་པས་མ་བཟི། གྲྭ་པ་རྣམས་ཀྱང་བད་འདུག བླ་མ་ནི་ཕུད་བདའ་བ་དང་། ཞུ་མཁན་མང་བའི་སྟོབས་ཀྱིས་ཤིན་ཏུ་བད་ནས་མནལ་འཐུག་པོར་སོང་བའི་ཚེ། ཡུམ་གྱིས་གཟིམས་ཁང་ནས་བླ་མའི་ཕྱག་རྟགས། ནཱ་རོའི་སྐུ་རྒྱན། ཐུགས་དམ་པདྨ་རཱ་ག་རྣམས་བླངས་ཏེ། བླ་མའི་བཀའ་ཤོག་ལྟར་བྱས་པའི་ཡི་གེ་ཡུམ་གྱིས་སྔར་ནས་མཛད་མཛད་པ་ཞིག་འདུག་པ་དེ་ལ་ཕྱག་རྟགས་སྐྱོན་རྒྱ་བྱས་ཏེ། རྟེན་རྣམས་ན་བཟའ་བཟང་པོས་དྲིལ། ལ་ཅའི་དམ་ཁས་མནན་ནས་ང་ལ་གནང་སྟེ། ཡུམ་གྱི་ཞལ་ནས། འདི་རྣམས་བླ་མས་བསྐུར་བ་ལྟར་གྱིས་ལ། བླ་མ་རྔོག་པའི་དྲུང་དུ་ཕུལ་ལ་ཆོས་ཞུས་ཤིག་གསུང་ང་གཞུང་དུ་བརྫངས་ཏེ། ང་བླ་མ་རྔོག་པ་ལ་བློ་གཏད་ནས་ཕྱིན། དེ་ནས་ཞག་གཉིས་ཙམ་སོང་བ་དང་། ཡུམ་ལ་བླ་མའི་ཞལ་ནས། ད་ལྟ་མཐུ་ཆེན་ལས་ཅི་བྱེད་ཅིང་འདུག་གསུང་བ་ལ། ཁོ་འགྲོ་ཞིང་ཡོད་འོང་། དེ་མིན་བདག་ལ་རྒྱུས་མེད་ཞུས་པས། གར་སོང་གསུངས། ཁོ་མཁར་ལས་འདི་ཙམ་ཞིག་བྱས་རུང་ཆོས་མི་གནང་བའི་ཁར་བཀའ་བཀྱོན་དང་ཕྱག་འབེབས་མང་བར་བྱུང་བས། ད་བླ་མ་གཞན་དུ་འཚོལ་དུ་འགྲོ་ཟེར་ཆས་པ་ལ། ཡབ་ལ་ཞུས་རུང་ནི་ཐུགས་རྩིས་མི་འདུག་པ་དང་། ཡང་ཕྱག་འབེབས་བྱས་སྙིང་རྗེ་བ་ལས་མི་འོང་སྙམ་ནས་མ་ཞུས། ངས་ནི་བཤོལ་ཅི་
(༨༠)བཏབ་རུང་མ་ཐེབས་པར་སོང་ཞུས་པས། ཞལ་རས་ནག་ཐིང་བ་ཞིག་མཛད་ནས་ཅི་ཙམ་ལ་སོང་གསུངས། ཁ་སང་སོང་ཞུས་པས། དར་ཅིག་དགོངས་པ་ལ་བཞུགས་པའི་མཐར། ད་ལན་ངའི་བུ་དེ་ཐག་རིང་ཞིག་ཏུ་མ་སོང་བར་འདུག་གསུངས། དེར་ང་གཞུང་གི་རི་བོ་ཁྱུང་སྡིང་དུ་སླེབས་ཏེ། བླ་མ་རྔོག་པས་གྲྭ་པ་མང་པོ་ལ་བརྟག་གཉིས་འཆད་ཅིང་འདུག་པ་ལ། ཆོས་མཚམས། འཆད་པ་པོ་ང་ཆོས་ཀྱང་ང་། རང་གི་ཚོགས་ལྡན་ཉན་པ་ང་། །འཇིག་རྟེན་སྟོན་པ་བསྒྲུབ་བྱ་ང་། འཇིག་རྟེན་འཇིག་རྟེན་འདས་པ་ང་། ལྷན་ཅིག་སྐྱེས་དགའི་རང་བཞིན་ང་། ཞེས་བྱ་བ་གསུང་བའི་སྐབས་སུ། ངས་ཀྱང་རྒྱང་ནས་ཕྱག་བཙལ་བས། བླ་མས་དབུ་ཞྭ་ཕུད་ནས་ཕྱག་ལན་མཛད་ཅིང་། བླ་མ་མར་པའི་སློབ་རྒྱུད་ཀྱི་ཕྱག་འཚལ་ལུགས་སུ་འདུག ཆོས་མཚམས་ཀྱི་རྟེན་འབྲེལ་ཡང་ཤིན་ཏུ་ལེགས་ཏེ། ཁོང་རང་ཆོས་ཀུན་གྱི་བདག་པོར་འོང་བར་འདུག་པས། སུ་ཡིན་དྲིས་ཤོག་གསུང་། གྲྭ་པ་ཞིག་ངའི་སར་བྱུང་བས་ངོ་ཤེས་ཏེ། ཁྱེད་འདིར་གང་ལ་བྱོན་ཟེར་བ་ལ། ངས་བླ་མ་མར་པ་ཐུགས་བྲེལ་ཆེས་ནས་ང་གཅིག་པུ་ལ་ཆོས་གསུང་སྐབས་མ་བྱུང་བས། འདིར་ཆོས་ཞུ་རུ་འོངས་པ་ཡིན། དེའི་ཕྱག་རྟགས་སུ་ནཱ་རོའི་སྐུ་རྒྱན། ཐུགས་དམ་པདྨ་རཱ་ག་རྣམས་གནང་ཡོད་བྱས་པས། གྲྭ་པ་དེས་བླ་མའི་དྲུང་དུ། ཨ་བོ་མཐུ་ཆེན་ཡིན་པར་འདུག དེས་ཞུ་དོན་རྣམས་ཕུལ་བས། བླ་མ་ཤིན་ཏུ་མཉེས་ཏེ། ངའི་གདན་སར་ཇོ་བོ་ནཱ་རོ་པའི་སྐུ་རྒྱན་དང་ཐུགས་དམ་འོང་བ་ཨུ་དུམ་ཝ་རའི་མེ་ཏོག་ལྟར་དཀོན་ཞིང་ངོ་མཚར་ཆེ་
(༨༡)བས་བསུ་བ་བྱེད་དགོས། དེས་ན་ད་ལན་གྱི་ཆོས་མཚམས་ལེགས་སར་ཞོག ཁྱེད་གྲྭ་པ་རྣམས་སོང་ལ་གདུགས་རྒྱལ་མཚན་དང་རོལ་ཆ་རྣམས་ཁྱེར་ལ་མྱུར་དུ་ཤོག ཨ་བོ་མཐུ་ཆེན་ལ་ཕྱིར་ཁྱེད་པ་ཞིག་གྱིས་གསུང་། ང་ཕྱག་བཙལ་ས་དེ་གར་བསྡད་ཡོད་པས། གྲྭ་པ་ཞིག་བྱུང་ནས་ཞལ་ཏ་བསྒྱུར་སོང་། ངས་ཕྱག་བཙལ་ས་དེ་ལ་ཕྱིས་ཕྱག་འཚལ་སྒང་དུ་གྲགས། ང་ཡང་ཕྱིར་བཀྱེད་པས། དེ་མ་ཐག་གདུགས་རྒྱལ་མཚན་དང་རོལ་ཆ་བསམ་གྱིས་མི་ཁྱབ་པ་ཁྱེར་བའི་སེར་ཕྲེང་གིས་བསུ་བ་མཛད་ནས། གཟིམས་ཁང་དུ་སླེབས་པ་དང་། ངས་ཕྱག་བཙལ་ཕྱག་རྟགས་རྟེན་དང་བཅས་པ་ཕུལ་བས། སྤྱན་ཆབ་བསིལ་ཞིང་དབུ་ཐོག་ཏུ་བཞག་ནས་བྱིན་རླབས་ཞུས་ཏེ། རྟེན་རྣམས་མཆོད་པ་བཟང་པོ་བཤམས་ནས་རྟེན་གྱི་གཙོ་བོར་བཞུགས་སུ་བཅུག ཕྱག་རྟགས་དེ་བཀླགས་པས། རྔོག་ཆོས་སྐུ་རྡོ་རྗེས་བསྒྲུབ་བྱ་ལ་འདིར་ང་མཚམས་དམ་པོ་རང་ཞིག་ལ་ཆུག་ནས་མཐུ་ཆེན་ངང་ཐུང་བར་འདུག་པ། ཁོ་ཁྱོད་ལ་ཆོས་ཞུར་བཏང་བ་ཡིན་པས། དབང་བསྐུར་གདམས་ངག་སྟོན་ཅིག དེ་ལྟར་བྱས་པས་ཆོག་པའི་བརྡར་ནཱ་རོའི་སྐུ་རྒྱན། ཐུགས་དམ་པདྨ་རཱ་ག་རྣམས་བསྐུར་བ་ཡིན་བྱ་བ་ཞིག་འདུག དེར་བླ་མའི་ཞལ་ནས། བླ་མའི་བཀའ་ཡིན་པས། དབང་དང་གདམས་ངག་ཅིས་ཀྱང་འོང་། ང་ཁྱེད་འབོད་དུ་རང་གཏོང་དགོས་སྙམ་པ་ཡོད་པ་ལ། བྱོན་པ་དེ་བླ་མའི་ཐུགས་རྗེ་ཡིན། ང་ལ་ཁམས་དང་དྭགས་ཀོང་ཡར་ལུངས་རྣམས་ནས་གྲྭ་པ་མང་པོ་འོང་ཞིང་ཡོད་པ་ལ། དོལ་གྱི་ཡས་ཕོ་ཡས་མོ་བྱ་བའི་མི་ངན་རྣམས་ཀྱིས་ཆོས་རྒྱགས་མགོ་ཐོན་དུ་ཡེ་མ་བཅུག་པས། དེར་སེར་བ་ཞིག་ཕོབ་ཤོག དེ་ནས་
(༨༢)དབང་དང་གདམས་པ་བྱ་ཡིས་གསུངས། དེར་ངའི་བསམ་པ་ལ། ལས་ངན་པ་ང་འདྲ་བ་ཞིག་འོང་བ། སེར་བ་བཏང་ན་འོངས་པ་དམ་པའི་ཆོས་ལ་འོངས་པ་ལ། འོང་བ་སྡིག་པའི་ལས་ཤིག་འོང་བར་འདུག མ་བཏང་ན་ནི་བླ་མའི་བཀའ་བཅག་པར་ཡང་འགྲོ་ཞིང་ཆོས་ཀྱང་མི་ཐོབ་པར་འདུག་པས། སེར་བ་མི་གཏོང་ཐབས་མི་འདུག་སྙམ། རྫས་བསགས་སྔགས་ཀྱིས་བྲབས་པའི་ཐུན་ཁྱེར་ནས་ཡུལ་དེར་ཕྱིན་ཏེ། ལས་ལ་སྦྱར་ནས་སེར་བ་འབབ་ཏུ་ཆ་བ་དང་། ཡས་ཕོར་རྒན་མོ་ཞིག་གི་ནང་དུ་གནས་གཡར་ཏེ་ཆར་ཡིབ་བྱས་པས། གློག་འཁྱུག འབྲུག་ལྡིར། སྤྲིན་ནག་འདུས་ཏེ་སེར་བའི་མགོ་རེ་རེ་གཉིས་གཉིས་བྱུང་བ་དང་། རྒན་མོས་ལོ་སེར་བས་བརྡུངས་རྟིང་ངས་གང་ཟ་ཟེར་ངུ་ཞིང་འདུག་པས། ངས་སྡིག་ཅིག་རང་བསགས་སྙམ། གནས་མོ་ཞིང་ཅི་འདྲ་ཞིག་ཡོད་པ་མྱུར་དུ་རི་མོར་བྲིས་དང་བྱས་པས། ཡོད་དག་འདི་འདྲ་ཡོད་དེ་ཟེར། གྲུ་གསུམ་མཆུ་རིང་ཞིག་བྲིས་བྱུང་བས། ལྟ་སྟངས་བྱས་སླ་ང་བཀབ་པས་མཆུའི་རི་མོ་ཅུང་ཟད་ཅིག་མ་ཁེབས་དེ་རླུང་ཚུབ་ཅིག་གིས་བསུབས་སོང་། དེར་སེར་ཐག་ཆོད་ནས་བལྟར་ཕྱིན་པས། ཡུལ་གཉིས་ཀྱི་ལྟག་གི་རི་ཐམས་ཅད་གྲོག་པོར་བཏང་། ཞིང་གཞན་ཐམས་ཅད་ནི་ལྷག་མེད་དུ་སོང་འདུག་པ་ལ། རྒན་མོའི་མོའི་ཞིང་མ་སྐྱོན་པ་སྣུམ་རུག་གེ་འདུག མཆུ་སེར་བས་བརྡུངས་རྟིང་ཆུ་ལོག་གིས་མནན་ཏེ་འདུག ཞིང་དེ་ལ་ཕྱིས་ཀྱང་སེར་བ་ཅི་བྱུང་རུང་མི་འབབ་པས་མོ་ལ་སེར་ཁྲལ་མི་དགོས་ལ། ཆུ་ལོག་གིས་མནན་པའི་མཆུ་ལ་སེར་ཁྲལ་དགོས་ཀྱིན་ཡོད་སྐད།
(༨༣)དེ་ནས་ང་ལོག་འོངས་པས། ལམ་དུ་ཕྱུགས་ལུག་རྣམས་ཆུ་ལོག་གིས་ཁྱེར་བའི་རྫི་བོ་རྒན་བྱིས་གཉིས་དང་ཕྲད་དེ། དེ་གཉིས་ལ་ང་ཡིན་ཏེ་བླ་མ་རྔོག་པའི་གྲྭ་པ་རྣམས་མ་བཅོམ་ཞིག བཅོམ་ན་སེར་བ་འདི་འདྲ་རྟག་ཏུ་འབེབས་སོ་བྱ་བའི་ཕྱི་ཐན་བསྐུར་བས། ཡུལ་དེ་གཉིས་ཀྱིས་གུས་པས་བཏུད་དེ་ཡོན་བདག་ཏུ་གྱུར་པས་ཕྱིས་བླ་མའི་ཞབས་ཏོག་ཏུ་སོང་འདུག དེར་ངས་ཚེར་ཕུང་ཞིག་རང་གི་འོག་ནས་ཀྱང་བྱིའུའི་རོ་མང་པོ་རྙེད་པ་དང་། ལམ་བར་ཀུན་ལ་བྱ་དང་བྱི་བའི་རོ་བྱུང་ཚད་འཐུ་ཞིང་འོངས་པས། ཆར་ཁེབས་ཀྱི་སྟེང་གཡོགས་ཤིག་དང་ཐུ་བ་གང་བྱུང་བ། བླ་མའི་དྲུང་དུ་སྤུངས་ཏེ། བླ་མ་རིན་པོ་ཆེ་ད་བདག་གིས་འོངས་པ་དམ་པའི་ཆོས་ལ་འོངས་ནས་བྱུང་བ་སྡིག་པའི་ལས་ལས་མ་བྱུང་བས། སྡིག་པོ་ཆེ་ལ་ཐུགས་རྗེས་གཟིགས་འཚལ་ཞེས་ཞུས་ནས་ངུས་པས། བླ་མའི་ཞལ་ནས། ཨ་བོ་མཐུ་ཆེན་དེ་ཙམ་སྐྲག་མི་དགོས། རང་རེ་ནཱ་རོ་མཻ་ཏྲིའི་རྒྱུད་པ་ལ་སྡིག་པོ་ཆེ་བཙན་ཐབས་སུ་སངས་རྒྱ་བ། བྱ་བརྒྱ་འུར་རྡོ་གཅིག་གིས་འདེད་པའི་གདམས་ངག་ཡོད་པ་ཡིན། ད་ལན་སེར་བས་བསད་ཚད་ཀྱི་སེམས་ཅན་ཐམས་ཅད་མ་འོངས་པའི་ཚེ། ཁྱེད་རང་མངོན་པར་རྫོགས་པར་སངས་རྒྱས་པའི་ཞིང་དེར་འཁོར་གྱི་ཐོག་མར་སྐྱེ་བ་ཡིན། དེ་བར་ལ་ངའི་མཐུས་ངན་སོང་དུ་མི་སྐྱེ་བས་དགའ་བར་གྱིས་ཤིག ཡིད་མི་ཆེེས་ན་འདི་ལྟར་ཡིན་གསུངས། དར་ཅིག་དགོངས་པ་ལ་བཞུགས་པའི་མཐར་སེ་གོལ་ཞིག་གཏོགས་པས། རོ་ཐམས་ཅད་སོས་ནས་ཧར་ལངས་ཏེ། སྐད་ཅིག་དེ་ཉིད་ལ་གནམ་ལ་འཕུར་དགུ་དང་ས་ལ་འཛུལ་དགུ་རྣམས་རང་རང་སོ་སོའི་གནས་སུ་སོང་བ་
(༨༤)དང་། བླ་མ་སངས་རྒྱས་དངོས་སུ་མཐོང་སྟེ། རེ་རང་དགའ་ན་རེ་རང་དགའ་ན། ད་ལན་སེམས་ཅན་མང་པོ་རང་ཞིག་ཤི་ན་འཚེང་སྟེ་སྙམ་པ་བྱུང་། དེ་ནས་དགྱེས་པ་རྡོ་རྗེའི་དཀྱིལ་འཁོར་དུ་དབང་བསྐུར། གདམས་ངག་གནང་ནས། བླ་མའི་གདན་ས་མཐོང་བའི་གྲོག་ལྡན་ཁ་ལྷོར་ལྟ་བ་ཞིག་ན་ཕུག་རོན་ཞིག་འདུག་པ་དེ་གསོས་ཏེ་འདག་སྦྱར་ལ་བསྡད་པའི་བུག་སྒོར། བླ་མས་ཆོས་གནང་ཞིང་ཡེངས་མེད་དུ་བསྒོམས་རུང་། མར་པའི་བཀས་མ་གྲོལ་བས་ཉམས་མྱོང་ཅི་ཡང་མ་སྐྱེས་པ་ལ། ལན་ཞིག་བླ་མའི་ཞལ་ནས། ཨ་བོ་མཐུ་ཆེན། རྟགས་འདི་འདྲ་དང་འདི་འདྲ་བྱུང་ངེ་གསུངས། ཅི་ཡང་མ་བྱུང་ལགས་ཞུས་པས། ཅི་ཟེར་ངའི་རྒྱུད་པ་འདི་ལ་དམ་ཚིག་གི་སེལ་མེད་ན་ཉམས་རྟོགས་ཀྱི་ཡོན་ཏན་མྱུར་དུ་མི་སྐྱེ་བའི་མཐུ་མེད་པ་ཞིག་ཡིན་ཏེ། ཁྱེད་རང་ནི་ང་ལ་དད་ནས་འོངས་པ་ཡིན། བླ་མའི་བཀས་མ་གྲོལ་ན་ནི་ཕྱག་རྟགས་གནང་དོན་ཡང་མེད་ཅི་ཡིན་ནམ། གང་ལྟར་ནའང་སྙིང་རུས་སྐྱེད་ལ་སྒོམས་ཤིག་གསུངས་པས། འཇིགས་ཆུམ་པ་ཞིག་བྱུང་སྟེ། དངོས་སྣང་ཞུའམ་སྙམ་པ་ལ། ཞུ་རང་མ་སྤོབས་པར། བླ་མ་མར་པའི་ཐུགས་ཟིན་པ་ཞིག་ཅིས་ཀྱང་དགོས་པ་འདུག་སྙམ་པ་བྱུང་། སྙིང་རུས་བསྐྱེད་ནས་སྒོམ་ཞིང་བཞུགས་པའི་ཚེ། བླ་མ་མར་པས་སྲས་མཁར་གྱི་འཕྲོ་ལོངས་ནས། རྔོག་པའི་སར་གསུང་ཡིག་བྱུང་བ་ལ། འདིར་ངེད་ཀྱི་སྲས་མཁར་ལ་སྤེན་བད་དགོས་པ་བྱུང་བས། ཁྱེད་ཀྱིས་དེ་ནས་སྤེན་ཁུར་གྱི་འབུལ་བ་ཅི་ལྕོགས་ཤིག་སྔོན་ལ་ཁྱེར་ཤོག སྤེན་བད་དང་གན་ཇི་ར་ཁེལ་བ་དང་། མཁར་གྱི་རབ་གནས། མདོ་སྡེ་འབུམ་གྱི་ཆེ་འདོན་
(༨༥)རྣམས་དུས་མཉམ་དུ་བྱེད་པ་ཡོད་པས། དེ་ལ་ཁྱེད་རང་ཡང་ཤོག དེ་ན་ངེད་ཀྱི་མི་ངན་དེ་ཡོད་འདུག་པ། དེ་ཡང་དེ་དུས་ཁྲིད་ཤོག་གསུང་བ་ཞིག་འདུག་པས། བླ་མ་རྔོག་པ་ངའི་བུག་སྒོར་བྱོན་ནས་གསུང་ཡིག་བསྟན་ཏེ། ངེད་ལ་ཕྱག་རྟགས་འདི་བཞིན་འདུག མི་ངན་དེ་ཡོད་འདུག་པ་གསུང་ལུགས་ཀྱིས་བླ་མའི་བཀས་རང་མ་གྲོལ་བ་འདྲ་གསུངས་པས། བདག་ལ་བླ་མ་རང་གི་བཀའ་ལུང་དངོས་ནི་མེད་ལགས་ཏེ། ཕྱག་རྟགས་རྟེན་དང་བཅས་པ་ཡུམ་གྱིས་གནང་ནས་འདིར་བརྫངས་པ་ལགས་ཞུས་པས། ཨེ་ཨེ་དེས་ན་རང་རེ་གཉིས་ཀྱིས་དོན་མེད་ཀྱི་ལས་ཤིག་བྱས་འདུག བླ་མའི་བཀས་མ་གྲོལ་ན་ཡོན་ཏན་མི་སྐྱེ་བ་ལས་འོས་མེད་དེ་བྱ་ཐབས་མེད། ཁྱེད་རང་ལ་ཤོག་གསུང་བ་འདུག་པས་འགྲོའམ་མི་འགྲོ་གསུངས་པས། ད་ལན་བདག་ཀྱང་ཕྱག་ཕྱི་ལ་འགྲོ་བར་ཞུ་ཞུས་པས། འོ་ན་སྤེན་མ་རྣམས་བརྫངས་ནས། དུས་ངེས་པ་ཅན་སྒྲིག་ཏུ་སོང་ཡོད། དེ་བར་ལ་མཚམས་གྱིས་གསུངས། དེ་ནས་དུས་སྒྲིག་པའི་མི་དེ་འཁོར་ནས་ངའི་བུག་སྒོར་བྱུང་སྟེ། མཁར་གྱི་རབ་གནས་དང་། སྲས་ཀྱི་ཆེ་འདོན་བྱེད་ཚུལ་གྱི་གླེང་མོ་རྣམས་ཞིབ་པར་བཤད་བྱུང་། ངའི་གླེང་མོ་འདྲ་འདུག་གམ་བྱས་པས། འདུག ཡུམ་གྱི་ཞལ་ནས་ངེད་ཀྱི་མི་དེས་ཅི་བྱེད་ཅིང་འདུག་གསུངས། མཚམས་དམ་པོ་ལ་གདའ་ཞུས་པས། དེ་མིན་ཅི་བྱེད་ཅིང་འདུག་གསུངས། མི་མེད་ས་རང་ན་སྡོད་ཀྱིན་གདའ་ཞུས་པས། ཁོའི་འདི་ལུས་པས་ལན། ཁོ་འདིར་སྡོད་ཚེ་འདི་རང་རྩེ་བ་ཡིན་པས། འདི་སྤྲོད་ཅིག་གསུང་། འདི་གནང་བ་ཡིན་
(༨༦)ཟེར། ཁོའི་སྐེ་རགས་ཀྱི་མདུད་པ་བཀྲོལ་ནས་འཇིམ་པའི་ཤོ་ཞིག་སྤྲད་བྱུང་། དེར་ཡུམ་གྱིས་ཕྱག་རེག་ཡོད་སྙམ་བྱིན་རླབས་ཞུས། ཁོ་སོང་བ་དང་ཤོ་རྩེ་སྙིང་འདོད་པ་ཞིག་བྱུང་ནས་བརྩེས་པས། བསམ་བློ་ལ་ངས་སྔར་ཡུམ་གྱི་དྲུང་དུ་ཤོ་བརྩེས་པ་ནི་མེད། ད་ཡུམ་ཡང་ཐུགས་རྗེས་མི་འཛིན་པ་ཡིན་ལས་ཆེ། ཤོ་འདིས་དང་པོ་ཕ་མེས་ཡང་ཡུལ་བཏོན་པ་ཡིན་སྙམ། ཀླད་ལ་བསྐོར་ཏེ་བརྡབས་པས། ཆག་པའི་ནང་ནས་ཤོག་རིལ་ཞིག་བྱུང་བ་བཀླགས་པས། ད་བུ་རང་ལ་ཡང་བླ་མས་དབང་དང་གདམས་ངག་གནང་བ་ཡོད་པས། བླ་མ་རྔོག་པ་དང་བསྡེབས་ལ་ཤོག་བྱ་བ་ཞིག་འདུག་པས། དགའ་དྲགས་ནས་ཕུག་པའི་ནང་དུ་ཕར་རྒྱུག་ཚུར་རྒྱུག་བྲོ་འཁྲབས་སོ། དེ་ནས་ང་ལ་བླ་མ་རྔོག་པའི་ཞལ་ནས། ཨ་བོ་མཐུ་ཆེན་རང་ཡང་རྐང་པ་ཕྱོགས་ལ་འགྲོ་གྲབས་གྱིས་ཤིག་གསུངས་པ་ལྟར་བྱས། བླ་མ་རྔོག་པ་ནི། བླ་མ་མར་པ་རང་གིས་གནང་བའི་བྱིན་རླབས་ཀྱི་རྟེན་རྣམས་མ་གཏོགས། སྐུ་གསུང་ཐུགས་ཀྱི་རྟེན་ཡོད་ཚད་དང་། གསེར་གཡུ་དང་གོས་དར་སོགས་ནང་གི་རྡིག་ཀུན་དང་། ར་མ་རྒན་མོ་རྐང་ཆག་མ་ཞིག་འདུག་པ་དེ་ཕྱུགས་ཁྱུའི་རྗེས་མི་ཟིན་པ་འདུག་པས་ཞོག་གསུངས། དེ་མ་གཏོགས་ཕྱི་ནང་གི་ནོར་ཡོད་དགུ་ཀུན་ཁྱེར་ནས་འབྱོན་གྲབས་མཛད་པའི་ཚེ། བླ་མས་ང་ལ་ཡང་ཁྱོད་ཀྱིས་ངེད་ལ་ཡང་ཕན་ཐོགས་པོ་རང་བྱས་པས་བླ་མ་མར་པ་དང་མཇལ་བའི་ཕྱག་རྟེན་གྱིས་ཤིག་གསུངས། དར་ཡུག་གཅིག་གནང་། ཇོ་མོས་ཀྱང་ཡུམ་བདག་མེད་མ་དང་མཇལ་བའི་ཕྱག་རྟེན་གྱིས་ཤིག་གསུངས། ཐུད་རྐྱལ་ཞིག་གནང་།
(༨༧)དེ་ནས་བླ་མ་རྔོག་པ་ཡབ་ཡུམ་འཁོར་དང་བཅས་པ་ཆས་ཏེ་གྲོ་བོ་ལུང་གི་མདར་སླེབས་པ་དང་། བླ་མའི་ཞལ་ནས། ཨ་བོ་མཐུ་ཆེན་སྔོན་ལ་སོངས་ལ་ཡུམ་གྱི་དྲུང་དུ་ངེད་རྣམས་འོང་ཞིང་ཡོད་ཞུས་ལ་ཆང་ཞིག་ཨེ་གནང་ལྟོས་ལ་ཤོག་གསུངས་པས། ང་སྔོན་ལ་ཕྱིན་པས། ཐོག་མར་ཡུམ་དང་མཇལ། ཕྱག་དང་ཐུད་རྐྱལ་ཕུལ་ནས། བླ་མ་རྔོག་པ་འབྱོན་ཞིང་བདོག་པས་བསུ་ཆང་ཞིག་གནང་བར་ཞུ་ཞུས་པས། ཡུམ་ཤིན་ཏུ་དགྱེས་ནས་བླ་མ་གཟིམས་ཁང་ན་བཞུགས་ཡོད་པས་དེ་སྐད་ཞུས་ཤོག་ཅིག་གསུངས་ཞུར་ཕྱིན་པས། བླ་མ་གཟིམས་ཁང་གི་ཡང་ཐོག་ན་ཞལ་ཤར་ལ་གཟིགས་ནས་ཐུགས་དམ་ལ་བཞུགས་འདུག་པ་ལ། ཕྱག་དང་དར་ཡུག་ཕུལ་བས་ཞལ་ནུབ་ཏུ་གཟིགས་སོང་། ནུབ་ནས་ཕུལ་བས་ལྷོར་གཟིགས་སོང་བ་ལ། ངས་བླ་མ་ལགས། བདག་ལ་བཀའ་བཀྱོན་གནང་ཕྱིར་ཕྱག་མི་བཞེས་རུང་། བླ་མ་རྔོག་པས་སྐུ་གསུང་ཐུགས་ཀྱི་རྟེན་དང་། གསེར་གཡུ་དང་མཛོ་རྟ་སོགས་ནོར་ཡོད་དགུ་ཅོག་འབུལ་བར་ཁྱེར་ནས་འབྱོན་གྱིན་ཡོད་ལགས་པ། དེ་ལ་བསུ་ཆང་ཞིག་རེ་བ་འདྲ་ལགས་པས་གནང་བར་ཞུ་ཞུས་པས། ཐུགས་རྒྱལ་བཞེངས་ཏེ་ཕྱག་སེ་གོལ་གཏོགས་ཤིང་གསུང་དྲག་པོས། ངས་རྒྱ་གར་ནས་བཀའ་སྡེ་སྣོད་བསམ་གྱིས་མི་ཁྱབ་པའི་ནང་ནས་རྒྱུད་སྡེ་བཞིའི་དོན་སྙིང་ཕྱུང་བའི་མན་ངག་ཁྱད་པར་ཅན་རྣམས་ཁྱེར་འོངས་པའི་ཚེ། བསུ་མཁན་བྱིའུ་ཐེང་མ་ཞིག་ཀྱང་མེད་པའི། ཁོ་དུད་འགྲོ་ཀྱལ་ཀྱོལ་འགའ་དེད་ནས་འོང་བ་ལ། ང་ལོ་ཙཱ་བ་ཆེན་པོ་ཞིག་གིས་བསུ་བ་དགོས་ན་མི་འོང་བས་ད་ལྟ་རང་ལོག་གྱིས་གསུངས། བླ་མའི་བཀའ་བཞིན་ཡུམ་ལ་ཞུས་པས།
(༨༨)བླ་མ་ཐུགས་གཏུམ་པས་ལན། རྔོག་མི་ཆེན་པོ་ཡིན་པས་བསུ་བ་བྱེད་དགོས། རང་རེ་མ་བུ་གཉིས་ཀྱང་འདེང་གསུངས་པ་ལ། བླ་མ་རྔོག་པ་བླ་མ་ཡབ་ཡུམ་གྱི་བསུ་བ་འོང་དུ་རེ་བ་མི་གདའ། ཕུད་ཅིག་གནང་བར་ཞུ་ཞུས་རུང་ང་རང་ཡང་འགྲོ་གསུངས། གྲྭ་པ་འགའ་ལ་ཆང་མང་པོ་བསྐུར་ནས་ཡུམ་གྱིས་བསུ་བ་མཛད། དེ་ནས་ལྷོ་བྲག་ལུང་བའི་མི་མང་པོ་བསགས་ཏེ། སྲས་ཀྱི་ཆེ་འདོན། གཟིམས་ཁང་གི་རབ་གནས་སྟོན་མོ་བཟང་པོ་དང་བཅས་པ་མཛད་པའི་སྟོན་གྲལ་དུ། བླ་མ་མར་པས་བཀྲ་ཤིས་མངའ་གསོལ་གྱི་མགུར་འདི་གསུངས་སོ། །བླ་མ་བཀའ་དྲིན་ཅན་ལ་གསོལ་བ་འདེབས། །ངའི་རྒྱུད་པ་རིན་ཆེན་འདི་ཉིད་ལ། །ཉེས་ལྟུང་མེད་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །གདམས་ངག་ཟབ་མོའི་ཉེ་ལམ་ལ། །ནོར་འཁྲུལ་མེད་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ང་རང་མར་པ་ལོ་ཙཱ་ལ། །ཟབ་མོ་གནད་ཀྱི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །བླ་མ་ཡི་དམ་མཁའ་འགྲོ་ལ། །བྱིན་རླབས་དངོས་གྲུབ་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །བུ་ཆེན་སློབ་མའི་འཁོར་ཚོགས་ལ། །དད་པ་དམ་ཚིག་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ཡོན་བདག་ཡུལ་མི་ཉེ་རིང་ལ། །མཐུན་རྐྱེན་ཚོགས་གསོག་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ལས་དང་བྱ་བ་ཐམས་ཅད་ལ། །འགྲོ་དོན་བྱང་ཆུབ་བཀྲ་ཤིས་ཡོད། །
(༨༩)བཀྲ་ཤིས་དེས་ཀྱང་བཀྲ་ཤིས་ཤོག །སྣང་ཞིང་སྲིད་པའི་ལྷ་འདྲེ་ལ། །ཆད་མདོ་བཙན་པའི་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །འདིར་ཚོགས་ཁྲོམ་གྱི་ལྷ་མི་ལ། །བདེ་སྐྱིད་སྨོན་ལམ་བཀྲ་ཤིས་ཡོད། །བཀྲ་ཤིས་དེས་ཀྱང་བཀྲ་ཤིས་ཤོག །ཅེས་གསུངས་པའི་རྗེས་སུ། བླ་མ་རྔོག་པས་འབུལ་བ་རྣམས་ཕུལ་ནས། བླ་མ་རིན་པོ་ཆེ། སྤྱིར་གྱིས་བདག་རང་གི་སྒོ་གསུམ་བླ་མར་དབང་ལགས་ནའང་། ད་ལན་ཁྱད་པར་དུ་ཡུལ་ན་ར་མ་ཞོལ་མོ་རྐང་ཆག་མ་ཞིག་ཡོད་པ་དེ་སྤྱིར་གྱིས་ར་རྣམས་ཀྱི་ཕྱི་མོ་ཡིན་པས་རྒས་པ་དང་། ཁྱད་པར་རྐང་པ་ཆག་ནས་འདིར་འོང་མ་ཕེར་བར་ལུས། དེ་མིན་ནོར་ཡོད་དགུ་ཀུན་བླ་མ་ལ་འབུལ་བ་ལགས་པས། དབང་གདམས་ངག་ཟབ་ཁྱད་ཐོན་པ་ཀུན་དང་། ཁྱད་པར་སྙན་གྱི་ཤོག་རིལ་གྱི་གདམས་ངག་ཐུགས་རྗེས་འཛིན་པར་ཞུ་ཞུས་ནས། ཕྱག་ཕུལ་བས། བླ་མ་མར་པ་དགྱེས་བཞིན་འོ་དེ་ལྟར་ལགས་ན། ངའི་ཟབ་ཁྱད་ཅན་གྱི་དབང་དང་གདམས་ངག་རྣམས་ཀྱང་། སྤྱིར་གྱིས་རྡོ་རྗེ་ཐེག་པའི་ཉེ་ལམ། བསྐལ་པ་གྲངས་མེད་ཀྱི་བར་དུ་བསྒུག་མི་དགོས་པར་ཚེ་འདིར་སངས་རྒྱ་བའི་གདམས་ངག་ཡིན་པ་དང་། ཁྱད་པར་ཤོག་རིལ་གྱི་གདམས་ངག་ལ། བླ་མ་མཁའ་འགྲོའི་བཀའ་རྒྱ་དམ་པོ་ཡོད་པས། རྒས་པ་དང་རྐང་པ་ཆག་ནའང་ཆག་ར་མ་མ་ཕུལ་ན་འོང་བ་དཀའ་མོ་ལགས། དེ་མིན་གྱི་གདམས་ངག་གཞན་རྣམས་ཁྱོད་རང་ལ་བྱིན་ཚར་རོ་གསུངས་པས། གྲལ་པ་ཀུན་བཞད་གད་ཐེག་པ་ཞིག་བྱུང་། ཡང་བླ་མ་རྔོག་པས་ཞོལ་མོ་ཡང་བླངས་ཏེ་ཕུལ་ན་བཀའ་རྒྱ་བཀྲོལ་ནས་གནང་དུ་རུང་ལགས་
(༩༠)སམ་ཞུས་པས། ཁྱོད་རང་གིས་བླངས་ཏེ་ཕུལ་ན་རུང་གསུངས། དེར་མི་རྣམས་གྱེས་པའི་ནངས་པར་བླ་མ་རྔོག་པ་གཅིག་པུར་བྱོན་ནས། ར་མ་རྒྱབ་ཏུ་བསྣམས་ཏེ་བླ་མ་ལ་ཕུལ་བས། བླ་མ་ཤིན་ཏུ་དགྱེས་ཏེ། གསང་སྔགས་ཀྱི་སློབ་མ་དམ་ཚིག་ཅན་བྱ་བ་ཁྱོད་འདྲ་བ་ལ་ཟེར་བ་ཡིན། ང་ར་མ་ཞིག་རང་གིས་དགོས་རྒྱུ་ཆུང་སྟེ། ཆོས་ཀྱི་ཆེ་བ་འདོན་པ་ལ་དགོས་པ་ཡིན་གསུངས་ནས། དབང་དང་གདམས་པ་ཁྱད་པར་ཅན་མང་པོ་གནང་བར་ཞལ་གྱིས་བཞེས་ཏེ། ཕྱིས་གནང་ངོ་། །དེ་ནས་ཐག་རིང་གི་གྲྭ་པ་རྣམས་དང་། ནང་མི་ཉུང་བསྡུས་འགའ་བསགས་ནས། བྱ་དགའི་ཚོགས་མཆོད་ཅིག་བྱས་པའི་གྲལ་དུ། བླ་མ་མར་པའི་སྐུ་འཁྲིས་སུ་སེང་ལྡེང་གི་དབྱུག་པ་རིང་པོ་ཞིག་ཡོད་པ་དེ་བཞག་ནས། བླ་མ་རྔོག་པ་ལ་སྤྱན་འབྲུ་ཚུགས་སུ་གཟིགས་ཤིང་ཕྱགས་སྡིགས་མཛུབ་ཏུ་མཛད་ནས། རྔོག་སྟོན་ཆོས་རྡོར། ཁྱོད་ཐོས་པ་དགའ་ཟེར་བའི་མི་ངན་འདི་ལ་དབང་བསྐུར་ནས་གདམས་ངག་བཤད་པའི་རྒྱུ་མཚན་ཅི་ཡིན་གསུངས། སྤྱན་དབྱུག་པ་ལ་ཧྲིག་ཧྲིག་འདུག་པ་དང་། བླ་མ་རྔོག་པ་ཐུགས་སྐྲག་སྟེ། ཕྱག་འབུལ་བའི་ངང་ནས། བླ་མ་རིན་པོ་ཆེ་བདག་ལ་བླ་མ་རང་གིས་མཐུ་ཆེན་ལ་དབང་བསྐུར་གདམས་ངག་སྟོན་གསུང་བའི་ཕྱག་རྟགས། ནཱ་རོའི་སྐུ་རྒྱན། ཐུགས་དམ་པདྨ་རཱ་ག་རྟེན་དང་བཅས་པ་གནང་བྱུང་བས་བཀའ་བསྒྲུབས་པ་ལགས། དེས་ན་བདག་ལ་གནོང་འགྱོད་མེད་པས་བཀའ་བཀྱོན་དང་ཐུགས་ཁྲེལ་མེད་པ་ཞིག་མཁྱེན་ཞུས་ནས་སྤྱན་རིག་རིག་འདུག་པས། ཐུགས་ཁྲོས་པའི་ཕྱག་མཛུབ་ང་ལ་གཏད་དེ། ཁྱོད་ལ་དེ་
(༩༡)ཀུན་གང་ནས་བྱུང་གསུང་བས། ང་ནི་སྙིང་ཐོན་འགྲོ་བ་ལྟ་བུའི་སྡུག་བསྔལ་དང་། འཇིགས་སྐྲག་སྐད་མི་ཐོན་པ་ལྟ་བུ་བྱུང་སྟེ། འདར་བའི་སྐད་ཀྱིས་བདག་ལ་ཡུམ་གྱིས་གནང་བ་ལགས་ཞུས་པས། ཧར་གྱིས་བཞེངས་ཏེ། སེང་ལྡེང་གི་དབྱུག་པ་ཕྱར་ནས། ཡུམ་ལ་ཕྱག་འབེབས་སུ་ཆས་པ་ལས། ཡུམ་གྱིས་སྔ་སོ་ནས་དགོངས་ཏེ། བཞེངས་ནས་ཕྱིར་རྒྱངས་བཀྱེད་དེ་བཞུགས་འདུག་པ། མཆོད་ཁང་ནང་དུ་བྲོས་ཏེ་སྒོ་བཅད་པས། བླ་མ་སྒོ་ལ་ཕྱག་ཧྲད་ཧྲད་པ་འགའ་མཛད་པའི་མཐར། བཞུགས་གདན་གྱི་ཁར་བྱོན་ནས། རྔོག་སྟོན་ཆོས་རྡོར་ཟེར་བའི་མ་བཅོལ་བ་བྱེད་མཁན་ཁྱོད་རང་། ངའི་ནཱ་རོའི་སྐུ་རྒྱན་དང་ཐུགས་དམ་རྣམས་ད་ལྟ་རང་ལོངས་ཤོག་ཅིག་གསུང་དབུ་གཏུམས་ནས་བཞུགས་པ་ལ། དེ་མ་ཐག་བླ་མ་རྔོག་པས་ཕྱག་ཕུལ་ནས་སྐུ་རྒྱན་དང་ཐུགས་དམ་ལེན་པར་ཆས་ནས་ཕྱིར་བྱོན་བྱུང་བ། ང་ཡང་ཡུམ་དང་དུས་མཉམ་དུ་ཕྱིར་བྲོས་ཏེ་བསམས་ཤིང་ངུ་བྲོ་བ་ཞིག་བྱུང་ནས་ཕག་ཏུ་ངུ་ཞིང་བསྡད་པས་མཐོང་སྟེ། ཕྱག་ཕྱིར་འཁྲིད་པར་ཞུ་བ་ཕུལ་བས། བླ་མའི་བཀས་མ་གྲོལ་བར་ངས་ཁྱེད་ཁྲིད་རུང་ད་ལན་གྱི་འདི་དང་འདྲ་སྟེ། རང་རེ་གཉིས་ཀ་ལ་མི་དགའ་བས་ད་ལན་སྡོད། ཕྱིས་ངེས་པར་རྗེས་སུ་མི་འཛིན་ཞིང་བཀས་གྲོལ་ན་ཕན་ཅི་ཐོགས་བྱེད་དོ་གསུང་བ་ལ། འོ་ན་བདག་སྡིག་སྒྲིབ་ཆེས་པའི་ཞོར་ལ་བླ་མ་དང་ཡུམ་ལ་ཡང་འོ་བརྒྱལ་འདི་འདྲ་བྱུང་བས། ད་ལན་གྱི་ལུས་འདི་ཆོས་མི་ཐོབ་པའི་ཁར་སྡིག་པ་ཆེ་ལ་མང་བ་གསོག་པར་གདའ་བས་ལྕེབས་ནས་ཤི་སྡོད། ཕྱི་མ་ཆོས་ཐོབ་པའི་མི་ལུས་ཤིག་ཏུ་སྐྱེ་བར་ཐུགས་རྗེས་འཛིན་པར་ཞུ་བྱས་ལྕེབས་གྲབས་བྱས་པས། བླ་མས་ང་བཟུང་སྟེ།
(༩༢)སྤྱན་ཆབ་བསིལ་ཞིང་། ཨ་བོ་མཐུ་ཆེན་དེ་འདྲ་མ་བྱེད་ཅིག རྒྱལ་བའི་བཀའི་མཐར་ཐུག་གསང་སྔགས་ཀྱི་ལུགས་ལ། རང་གི་ཕུང་ཁམས་སྐྱེ་མཆེད་ཐམས་ཅད་ལྷ་ལས་འདའ་ས་མེད་པ་ཞིག་ཡོད་པ་ཡིན། དུས་ལ་མ་བབ་པར་འཕོ་བ་བྱས་རུང་ལྷ་བསད་པའི་ཉེས་པ་ཡོད་ན། ལྕེབས་ན་དེ་བས་སྡིག་ཆེ་བ་ཅི་ཡོད། མདོ་ལུགས་ལའང་རང་སྲོག་རང་གིས་བཅད་པ་ལས་སྡིག་ཆེ་བ་མེད་པས་དེ་རྣམས་གོ་བར་གྱིས་ལ་ལྕེབ་པའི་བསམ་སྦྱོར་བོར་ཅིག ད་དུང་བླ་མས་ཆོས་གནང་བའང་སྲིད། མ་གནང་རུང་བླ་མ་གཞན་ལ་ཆོས་ཐོབ་པ་ཞིག་ངེས་པར་འོང་གསུངས་ཞལ་ཏ་གནང་བའི་བར་ལ། གྲྭ་པ་གཞན་རྣམས་ཀྱིས་ཀྱང་། ང་ལ་ཐུགས་ཀྱིས་མ་བཟོད་པར། རེས་ཡར་བྱོན་ནས་བླ་མ་ལ་ཞུ་སྐབས་ཨེ་འདུག་བལྟས། རེས་འགའ་མར་བྱོན་ནས་ང་ལ་སེམས་གསོ་མཛད་རུང་། ངའི་སྙིང་འདི་ལྕགས་ལས་བྱས་པ་ཡིན་ནམ། མིན་ན་གས་ཏེ་འཆི་ཐང་སྙམ་པའི་སྡུག་བསྔལ་བྱུང་སྟེ། ཚེ་སྟོད་ལ་སྡིག་པ་ཆེན་པོ་བྱས་པས་ཆོས་ཞུ་བ་རང་གི་ཕྱིར་ཡང་དེ་ལྟ་བུའི་སྡུག་བསྔལ་མྱོང་གསུངས། དེའི་ཚེ་ཆོས་ཉན་པ་ཀུན་གྱི་ནང་ནས་མཆི་མ་དྲག་པོ་མི་གཏོང་བ་ནི་གཅིག་ཀྱང་མེད་དོ། །སྐྱོ་ཤས་དང་ངེས་འབྱུང་གིས་བརྣངས་ཏེ་བརྒྱལ་བ་ཡང་འགའ་བྱུང་ངོ་། །སྡུག་བསྔལ་ཡི་ཆད་ཀྱི་སྒོ་ནས་སྡིག་སྒྲིབ་སྦྱངས་པའི་མཛད་པ་སྟེ་གཉིས་པའོ། །
(༩༣)གསུམ་པ། དབང་དང་གདམས་ངག་ཐོབ་པ། ཡང་རས་ཆུང་བས་འོ་ན་རྗེ་བཙུན་བླ་མ་མར་པས་རྗེས་སུ་འཛིན་པའི་རྐྱེན་ཇི་ལྟ་བུ་ཞིག་བྱུང་ཞུས་པས། དེར་གྲྭ་པ་རྣམས་ཀྱིས་ཡར་འབྱོན་མར་འབྱོན་མཛད་པས་དར་ཅིག་ནས་མར་པ་དགོངས་པ་ལས་བཞེངས་ཏེ། ཐུགས་ཞི་བའི་ངང་ནས་འོ་ད་བདག་མེད་མ་ལ་འདིར་ཤོག་གྱིས་གསུངས། ཡུམ་གདན་དྲངས་ཕྱིན་པས། རྔོག་ཆོས་སྐུ་རྡོ་རྗེ་ལ་སོགས་པའི་གྲྭ་པ་གཞན་ཚོ་གར་སོང་གསུངས་པ་ལ། བླ་མ་རྔོག་པ། བླ་མ་རང་གི་བཀས་ནཱ་རོའི་སྐུ་རྒྱན་དང་ཐུགས་དམ་ད་ལྟ་ལོངས་ཤོག་གསུངས་པ་ལྟར་ལེན་དུ་འབྱོན་པར་ཆས་ནས་སྒོ་ཕྱིར་ཕེབས་ཏེ། ཨ་བོ་མཐུ་ཆེན་གྱིས་ཞུ་བ་འདི་ལྟར་འབུལ་བ་ལ་ཞལ་ཏ་འདི་ལྟར་གནང་ཞིང་ད་ལྟ་བཞུགས་གདའ་ཞེས་ཞིབ་རྒྱས་ཞུས་པས་མར་པ་སྤྱན་ཆབ་ཉིལ་མཛད་དེ། གསང་སྔགས་ཀྱི་སློབ་མ་ཞེས་བྱ་བ་དེ་འདྲ་ཞིག་དགོས་རྒྱུ་ཡང་ཡིན། ཡིན་པ་བཞིན་བྱུང་གིས། ད་ངའི་བུ་སློབ་རྣམས་སྙིང་རྗེ་བས་བོས་ཤོག་ཅིག་གསུངས། དེར་གྲྭ་པ་ཞིག་བླ་མ་རྔོག་པ་གདན་འདྲེན་དུ་ཕྱིན་ནས། ད་བླ་མ་ཐུགས་ཞི་ནས་ང་གདན་འདྲེན་དུ་བཏང་བ་ཡིན་པས་ཕེབས་པར་ཞུ་ཞུས་འབྱོན་པ་ལ། ངས་མི་ལས་འཕྲོ་ཅན་ཚོའི་དགའ་བ་ལ། ལས་ངན་པོ་ང་ལ་ནི་བླ་མ་ཐུགས་ཞི་རུང་དྲུང་དུ་འགྲོ་བའི་སྐལ་བ་མེད་པས་ཕྱིན་
(༩༤)རུང་བཀའ་བཀྱོན་དང་ཕྱག་འབེབས་ལས་མི་འོང་བྱས་ངུ་ཞིང་བསྡད་པས། བླ་མ་རྔོག་པ་ཡང་བཞུགས་ནས་གྲྭ་པ་དེ་ལ། བླ་མའི་དྲུང་དུ་ཨ་བོ་མཐུ་ཆེན་གྱི་རྒྱུ་མཚན་རྣམས་ཞུས་ལ། སྐུ་དྲུང་དུ་འགྲོ་རུང་ངམ་ལྟོས་ཤོག དེ་བར་ལ་ང་འདིར་མ་བསྡད་ན། འདིས་གང་མིན་བྱས་ཉེན་འདུག་གསུངས། གྲྭ་པ་དེས་བླ་མ་མར་པ་ལ་རྒྱུ་མཚན་རྣམས་ཞུས་པས། སྔར་ཡིན་ན་ཁོ་བདེན། ད་དེ་འདྲ་བྱེད་མི་དགོས། ད་ལན་འབོད་པའི་མགྲོན་གྱི་གཙོ་བོ་མཐུ་ཆེན་ཡིན་པས། བདག་མེད་མ་སོངས་ལ་བོས་ཤོག་ཅིག་གསུངས། དེར་ཡུམ་ཞལ་འཛུམ་བག་དང་བཅས་བྱོན་ཏེ་ཨ་བོ་མཐུ་ཆེན་ད་རང་བླ་མས་ཁྱོད་རྗེས་སུ་འཛིན་པ་འདྲ། ཐུགས་རྗེ་གཏིང་ནས་གཡོས་པའི་རྟགས་ལ་ད་ལན་མགྲོན་གྱི་གཙོ་བོ་ཁོ་ཡིན་པས་ང་རང་ལ་བོས་ཤོག་ཅིག་གསུངས། ང་རང་ལའང་བཀའ་བཀྱོན་ཡང་མ་བྱུང་། དགའ་བར་གྱིས་ལ་འདོང་ངོ་གསུང་བ་ལ། ད་དུང་བདེན་ནམ་རྫུན་སྙམ་པའི་ཐེ་ཚོམ་ལོག་གེ་བ་ཞིག་ལ་ནང་དུ་ཕྱིན་པས། གྲལ་འགྲིག་པ་དང་། བླ་མའི་ཞལ་ནས། བརྟགས་ན་རང་རེ་ཀུན་ལ་གྱོད་མེད་དོ། །ངས་ནི་མཐུ་ཆེན་གྱི་སྡིག་པ་སྦྱོང་ཐབས་སུ་སྡུག་བཏང་བ་མ་གཏོགས་རང་འདོད་ཀྱི་མཁར་ལས་ཡིན་ན་ཞི་བའི་སྒོ་ནས་བཅོལ་བས་ཆོག་པས་ང་བདེན། བདག་མེད་མ་སྤྱིར་བུད་མེད་དུ་སོང་བ་དང་། སྒོས་སུ་སྙིང་རྗེ་ཆེ་རབ་ཅིག་འདུག་པས་མ་ཕོད་པ་བདེན་ནའང་རྟེན་དང་བཅས་པའི་ཡིག་རྫུས་དེ་གནང་ཆེས། རྔོག་ཆོས་སྐུ་རྡོ་རྗེ་ནི་ཁྱོད་རང་ཟེར་བ་ལྟར་བདེན་ཏེ། འོན་ཀྱང་རྟེན་རྣམས་རེ་ཞིག་ཚུར་ལོངས་ཤོག རྗེས་སུ་ཁྱོད་རང་ལ་སྟེར་བ་ཡིན། མཐུ་ཆེན་ནི་
(༩༥)ཆོས་ཀྱི་འདོད་པས་གདུངས་པས་ཅི་ཐོབ་ཀྱི་ཐབས་བྱེད་པས་བདེན། ད་ལན་རྔོག་ལ་བདག་མེད་མས་ཡིག་རྫུས་བསྐུར་བ་ནི་མ་གོ། །རྔོག་སྟོན་གྱིས་མཐུ་ཆེན་ལ་དབང་བསྐུར་གདམས་ངག་བྱིན་པའི་རྐྱེན་གྱིས། ད་ཡི་ཆད་གཏོང་ཐབས་མ་རྙེད་པས། ཚིག་པ་ལོག་པ་གྲོས་ཀྱི་ཆུ་ལོག་ལྟར་བྱུང་རུང་འཇིག་རྟེན་པའི་དེ་དང་མི་འདྲ་སྟེ། རྣམ་པ་ཅིར་སྣང་རུང་ཐམས་ཅད་ཆོས་ཕྱོགས་ནས་ཡུས་ཐེག་པ་ཡིན་པས། ངོ་བོ་བྱང་ཆུབ་ཀྱི་ལམ་དུ་འགྲོ་བས། གྲལ་པ་ཆོས་མ་གོ་བ་རྣམས་དད་པ་མ་ལོག་ཅིག ལར་རང་ངའི་བུ་འདི་ལ་ཡི་ཆད་ཆེན་པོ་ལན་དགུ་ཐོངས་ན། ཕྱིས་མི་ལུས་ལེན་མི་དགོས་པར་ཕུང་པོ་ལྷག་མེད་དུ་སངས་རྒྱ་བ་ཡོད་པ་ཡིན་ཏེ། དེ་ལྟར་མ་བྱུང་བས་སྡིག་སྒྲིབ་ཀྱི་ལྷག་ཅུང་ཟད་ཅིག་ལུས་པ་བདག་མེད་མ་བློ་ཆུང་བས་ལན། འོན་ཀྱང་སྡིག་པ་ཚབས་ཆེན་འདག་པའི་ཡི་ཆད་ཆེན་པོ་བརྒྱད་དང་སྣང་ཆུང་མང་པོའི་སྒོ་ནས་ཚར་བཅད་སོང་བ་ཡིན། ད་རྗེས་སུ་བཟུང་ནས་མི་རྒན་ང་རང་གི་སྙིང་དང་འདྲ་བའི་གདམས་ངག་རྣམས་བྱིན་ཏེ། སྒྲུབ་རྒྱགས་ཡང་ང་རང་གིས་སྦྱངས་ནས་སྒོམ་དུ་འཇུག་པ་ཡིན་པས་དགའ་བར་གྱིས་ཤིག་གསུང་བྱུང་། དེའི་ཚེ་ངའི་ཡིད་ལ། ངའི་འདི་རྨི་ལམ་ཡིན་ནམ་མངོན་སུམ་ཡིན། རྨི་ལམ་ཡིན་ན་གཉིད་མ་སད་ན་དགའ་སྟེ་སྙམ་པའི་དགའ་སྤྲོ་ཚད་མེད་པ་ཞིག་བྱུང་སྟེ། ཡང་དགའ་དྲགས་ངུ་ཤོར་བའི་ངང་ནས་ཕྱག་ཕུལ་བས། ཡུམ་དང་བླ་མ་རྔོག་པ་སོགས་ཚོགས་པ་ཀུན་བླ་མ་ལ་ཚར་གཅོད་པའི་ཚེ་ཐབས་མཁས་པའམ། རྗེས་སུ་འཛིན་པའི་ཚེ་ཐུགས་རྗེ་ཆེ་བའམ། བླ་མ་རང་སངས་རྒྱས་དངོས་སུ་འདུག་སྙམ་ལྷག་པར་དད་པ་སྐྱེས་པ་དང་། ང་ལ་ཐུགས་བརྩེ་
(༩༦)བས་སྤྱན་ཆབ་བསིལ་ཞིང་བཀའ་དྲིན་ཆེ་ཞེས་ཕྱག་ཕུལ་བའི་མཐར་ཚོགས་པ་ཀུན་བཞད་གད་ཐེག་གེ་བའི་ངང་ནས་ཚོགས་ཀྱི་འཁོར་ལོ་བསྐོར་རོ། །དེའི་ནུབ་མོ་ཚོགས་པ་ཀུན་འཛོམ་སར་མཆོད་པ་བཤམས་ནས། ཐུན་མོང་སོ་ཐར་གྱི་སྡོམ་པ་སྟེར་གསུངས། ངའི་སྐྲ་བྲེགས། ལུས་བསྒྱུར་ནས་མིང་དང་པོ་ནས་ཕྲད་དུས་ཀྱི་རྨི་ལམ་དུ་ནཱ་རོས་བཏགས་ཚར་ཡོད་གསུངས། མི་ལ་རྡོ་རྗེ་རྒྱལ་མཚན་དུ་བཏགས་ཏེ་དགེ་བསྙེན་གྱི་སྡོམ་པ་དང་། བྱང་ཆུབ་སེམས་དཔའི་བསླབ་བྱ་གནང་སྟེ། ནང་མཆོད་ཀྱི་ཀ་པཱ་ལ་ལ་ཆེད་གཉེར་གྱི་ཐུགས་གཏད་པའི་བྱིན་རླབས་མཛད་པས། ནང་མཆོད་འོད་ཟེར་ཁ་དོག་ལྔ་ལྡན་དུ་ཁོལ་བ་ཀུན་གྱིས་དངོས་སུ་མཐོང་། དེ་ནས་ཐོག་མར་བླ་མ་ཡི་དམ་མཆོད། དེ་ནས་མར་པ་རང་གིས་བཞེས། དེ་ནས་ང་ལ་གནང་བྱུང་བ། ངས་ལྷག་མ་མ་ལུས་པར་འཐུངས་པས། བླ་མའི་ཞལ་ནས། རྟེན་འབྲེལ་བཟང་། རྒྱུད་པ་གཞན་འགའ་ཞིག་གི་དབང་བཞི་རྫོགས་པས་ངའི་ནང་མཆོད་ཀྱི་བདུད་རྩི་མྱོང་བ་ལྷག་ནའང་། གསང་སྔགས་སྨིན་བྱེད་ཀྱི་དབང་ནངས་པར་ནས་བསྐུར་རོ་གསུངས། དེ་ནས་བདེ་མཆོག་དྲུག་ཅུ་རྩ་གཉིས་ཀྱི་དཀྱིལ་འཁོར་རྒྱས་པ་བཞེངས་ནས་དབང་བསྐུར་བའི་དཀྱིལ་འཁོར་སྟོན་པའི་ཚེ། རྡུལ་ཚོན་གྱི་དཀྱིལ་འཁོར་ལ་ཕྱག་མཛུབ་གཏད་དེ། འདི་མཚོན་བྱེད་དཔེའི་དཀྱིལ་འཁོར་བྱ་བ་ཡིན། མཚོན་བྱ་དོན་གྱི་དཀྱིལ་འཁོར་འདི་ན་གསུངས། ནམ་མཁའ་ལ་ཕྱག་མཛུབ་གཏད་བྱུང་བས། འཁོར་ལོ་སྡོམ་པ་ལ་ཡུལ་ཉི་ཤུ་རྩ་བཞི། གནས་སུམ་ཅུ་སོ་གཉིས། དུར་ཁྲོད་ཆེན་པོ་བརྒྱད་ཀྱི་དཔའ་བོ་དང་མཁའ་
(༩༧)འགྲོས་བསྐོར་ནས་ཁྲ་ལམ་མེ་བཞུགས་པ་དངོས་སུ་མཐོང་། དེའི་ཚེ་བླ་མ་དང་དཀྱིལ་འཁོར་གྱི་ལྷས་མགྲིན་གཅིག་ཏུ་གསང་མཚན་དཔལ་བཞད་པ་རྡོ་རྗེར་བཏགས་ཏེ། རྒྱུད་ཀྱི་ལུང་རྣམས་རྒྱས་པར་གནང་ནས། མན་ངག་གི་ཉམས་ལེན་དང་། ཕྱག་ལེན་རྣམས་མཐིལ་ཕྱིན་པར་བསྟན་ཏེ། བླ་མའི་ཕྱག་ངའི་སྤྱི་བོར་བཞག་ནས། བུ་ཁྱོད་སློབ་མ་སྣོད་ལྡན་དུ་དང་པོ་ནས་ཤེས་ཏེ། ཁྱོད་ངའི་སར་འོང་བའི་ནུབ་མོ། ང་ལ་རྨི་ལམ་འདི་འདྲ་བྱུང་བ་ཁྱོད་ཀྱིས་སངས་རྒྱས་ཀྱི་བསྟན་པ་ལ་ཕན་ཐོགས་པའི་རྟགས་སུ་འདུག བདག་མེད་མ་ལ་རྨི་ལམ་འདི་འདྲ་བྱུང་འདུག་པ་ཡང་གོང་དང་འདྲ་བ་ལས། ཁྱད་པར་དཀོན་གཉེར་བུད་མེད་ཀྱིས་བྱེད་པ་དེ། ཆོས་བདག་མཁའ་འགྲོས་བྱེད་པ་ཞིག་འོང་བ་ཡིན། དེས་ན་ཁྱོད་ང་ལ་བླ་མ་མཁའ་འགྲོས་གནང་བའི་སློབ་མར་བྱུང་བས། ངས་ཀྱང་ཕྲུ་སློག་པ་ལྟར་བྱས་ནས་བསུར་འོངས་པ་ཡིན། ཁྱོད་ཀྱིས་ངས་བྱིན་པའི་ཆང་རྫོགས་པར་འཐུངས་པ་དང་། ཕྲུ་རྫོགས་པར་བསློགས་པ་དེ་གདམས་ངག་གི་སྣོད་དུ་གྱུར་ཅིང་རྫོགས་པར་ཁོང་དུ་ཆུད་པའི་རྟགས་སུ་བྱུང་། དེ་ནས་ཟངས་ཕུལ་བ་དེ་ལ་ལུང་བཞི་འདུག་པ་དེ། ང་ལ་ཡོངས་གྲགས་ཀྱི་བུ་ཆེན་བཞི་འོང་བའི་རྟགས་སུ་འདུག དྲེག་པ་ལ་སོགས་པའི་དྲི་མ་མེད་པ་དེ། ཁྱོད་རང་སེམས་ཉོན་མོངས་པའི་དྲི་མ་ཆུང་ཞིང་ལུས་གཏུམ་མོའི་བདེ་དྲོད་ལ་དབང་བའི་རྟགས་སུ་འདུག སྟོང་པར་ཕུལ་བ་དེས་ཁྱོད་སྒྲུབ་པ་བྱེད་པའི་ཚེ། འཚོ་བ་བཀྲེན་ཙམ་འོང་བར་འདུག་སྟེ། འོན་ཀྱང་ཚེ་སྨད་དང་། བུ་རྒྱུད་ལ་ལོངས་སྤྱོད་ཆེན་པོ་འབྱུང་བར་བྱ་བའི་ཕྱིར་དང་། སྣོད་ལྡན་གྱི་སློབ་མ་གདམས་ངག་གི་
(༩༨)བཅུད་ཀྱིས་ཚིམ་པར་བྱ་བའི་ཕྱིར། ངས་མཆོད་མེའི་མར་ཁུས་བཀང་བཞག སྙན་གྲགས་ཆེན་པོ་འབྱུང་བའི་ཕྱིར་ཟངས་ལ་སྐད་ཅི་ཐོན་བྱས། ཁྱོད་རང་གི་ལས་སྒྲིབ་སྦྱང་ཕྱིར་ངས་ཞི་རྒྱས་དབང་དྲག་གི་མཁར་ལས་བཅོལ་བ་དང་། དབང་གྲལ་ནས་བཏོན་པ་སོགས་མི་འཚམ་པ་དུ་མའི་སྒོ་ནས་ཡི་ཆད་མང་པོ་བཏང་བ་ལ་ལོག་ལྟ་མ་སྐྱེས་པ་དེས། ཁྱོད་ཀྱི་བུ་རྒྱུད་རྣམས་དང་པོར་དད་བརྩོན་ཤེས་རབ་སྙིང་རྗེ་ཆེ་བ་སོགས་སློབ་མའི་ཆོས་ཀུན་ཚང་བ་དང་། བར་དུ་ཚེ་འདིའི་འདོད་ཡོན་ལ་ཞེན་པ་ཆུང་ཞིང་དཀའ་སྤྱད་སྙིང་རུས་ཀྱིས་རི་ལ་སྒོམ་བསྲན་ཆེ་བ་དང་། མཐར་ཉམས་མྱོང་དང་བྱིན་རླབས་མཁྱེན་བརྩེར་ལྡན་ཕྱིར་མཚན་ལྡན་གྱི་བླ་མ་ཤ་སྟག་འབྱུང་བས་བཀའ་བརྒྱུད་ཀྱི་བསྟན་པ་ཟླ་བ་ཡར་གྱི་ངོ་ལྟར་བྱེད་པ་ཡིན་པས་དགའ་བར་གྱིས་ཤིག་གསུང་ལུང་བསྟན། དབུགས་དབྱུང་། གཟེངས་བསྟོད། སྤྲོ་བ་སྐྱེད་པ་མཛད་དེ་སྐྱིད་པའི་མགོ་ཚུགས་པ་ཡིན་གསུངས། དབང་དང་གདམས་ངག་ཐོབ་པའི་མཛད་པ་སྟེ་གསུམ་པའོ། །
(༩༩)བཞི་པ། ཉམས་རྟོགས་ཀྱི་མྱུ་གུ་འཁྲུངས་པ། ཡང་རས་ཆུང་པས། རྗེ་བཙུན་གྱིས་གདམས་ངག་གསན་མ་ཐག་རི་ཁྲོད་ལ་བྱོན་ནམ། བླ་མའི་དྲུང་དུ་བཞུགས་ཞུས་པས། དེར་ང་ལ་བླ་མའི་གསུང་གིས་སྒྲུབ་པ་རེམ་ལ་གྱིས་ཤིག་གསུངས། འཚོ་བའི་ཡོ་བྱད་བཟང་པོ་དང་བཅས་ཏེ། ལྷོ་བྲག་སྟག་ཉའི་བྲག་ལ་སྒོམ་དུ་བཅུག དེའི་ཚེ་ངས་མཆོད་ཀོང་མར་ཁུས་བཀང་བ་ལ་མེ་སྦར་ནས། སྤྱི་བོར་བཞག་སྟེ་མར་མེ་མ་རྫོགས་བར་དུ་ལུས་མི་འགུལ་བར་ཉིན་མཚན་ཐོག་ཐག་འདའ་བར་བྱས་ཏེ་བསྒོམས་ནས་ཟླ་བ་བཅུ་གཅིག་སོང་བ་དང་། བླ་མ་ཡབ་ཡུམ་ཚོགས་ཀྱི་འཁོར་ལོའི་ཡོ་བྱད་བཟང་པོ་བསྣམས་ནས་བྱོན་ཏེ། བླ་མའི་ཞལ་ནས། བུ་ཁོ་དེ་ཟླ་བ་བཅུ་གཅིག་ཙམ་སྟན་གྱི་དྲོད་མ་ཡལ་བར་སྒོམ་ནུས་པ་དགའ་རབ་ཡིན། ད་རེ་ཞིག་བུག་སྒོ་ཤིགས་ལ་ཕ་རྒན་ངའི་འགྲམ་དུ་ཁམས་དུབ་པ་བསང་བ་དང་། ཉམས་སྐྱེ་ཚུལ་གྱི་གླེང་མོ་བྱེད་པ་ལ་ཤོག་ཅིག་གསུང་བ་ལ། ཁམས་དུབ་གསོ་བ་རང་དེ་ཀ་ཡིན་ཏེ། བླ་མའི་བཀའ་ཡིན་པས་འགྲོ་དགོས་སྙམ་ནས། བུག་སྒོ་བཤིག་པར་བརྩམས་པས་ཕངས་པའི་སྣང་བ་ཞིག་བྱུང་སྟེ་བཤིག་མ་ཕོད་པར་ཡུག་ཅིག་དེ་ཀར་བསྡད་པས། ཡུམ་ཕེབས་ནས། བུ་འོང་གིན་ཡོད་དེ་གསུངས། བུག་སྒོ་བཤིག་མ་ཕོད་ལགས་ཞུས་པས། མི་སྐྱོན་གསང་སྔགས་ཟབ་མོ་རྟེན་འབྲེལ་གྱིས་
(༡༠༠)ཆེ་བ་ཡིན་ཞིང་། ཁྱད་པར་བླ་མ་ཡང་ཐུགས་གཏུམ་པས་རྟེན་འབྲེལ་འཆུགས་པ་སོགས་བྱུང་ན་མི་འོང་བས། ཨ་མས་བུག་སྒོ་བཤིག་གིས་མྱུར་དུ་བྱོན་ཅིག་གསུངས། བཤིག་བྱུང་བ་ལ། མད་སྙམ་ཕྱིན་པས། བླ་མའི་ཞལ་ནས། རང་རེ་ཕ་བུ་གཉིས་མངོན་རྟོགས་སྒོམ་ཆོ་ག་གྱིས། བདག་མེད་མས་ཚོགས་ཀྱི་སྟ་གོན་གྱིས་ཤིག་གསུངས། ཚོགས་འཁོར་བསྐོར་བའི་ཚེ། བླ་མའི་ཞལ་ནས། བུ་གདམས་ངག་རྣམས་ལ་ངེས་ཤེས་ཅི་སྐྱེས། ཉམས་རྟོགས་དང་གོ་ཡུལ་ཇི་འདྲ་ཤར་བ་རྣམས་བློ་ལྷོད་གྱིས་ལ་ཤོད་ཅིག་གསུང་བ་ལ། བླ་མའི་དྲུང་དུ་ཡིད་དད་གུས་ཆེན་པོའི་ངང་ནས། ལུས་པུས་མོ་བཙུགས་ཐལ་མོ་སྦྱར། མིག་མཆི་མ་འཁྲུག་བཞིན་ཉམས་རྟོགས་འབུལ་བའི་ཐོག་མར་ངག་གི་མགུར་ལ་སྔ་བ་བླ་མ་ལ་ཡན་ལག་བདུན་པ་འདི་ཕུལ་ལོ། །མ་དག་གདུལ་བྱའི་སྣང་ངོ་ལ། །སྣ་ཚོགས་སྤྲུལ་པའི་སྐུར་སྟོན་ཅིང་། །དག་པའི་འཁོར་གྱི་གདུལ་བྱ་ལ། །རྗེ་ལོངས་སྤྱོད་རྫོགས་སྐུར་འཆར་ལ་འདུད། །ཡན་ལག་དྲུག་ཅུའི་ཚངས་དབྱངས་ཀྱིས། །རང་རང་སྐད་དུ་དམ་པའི་ཆོས། །བརྒྱད་ཁྲི་བཞི་སྟོང་གསུང་མཛད་པའི། །གྲག་སྟོང་དབྱེར་མེད་གསུང་ལ་འདུད། །འོད་གསལ་ཆོས་སྐུའི་ནམ་མཁའ་ལ། །མཚན་མའི་སྒྲིབ་གཡོགས་མེད་བཞིན་དུ། །ཤེས་བྱ་ཀུན་ལ་ཁྱབ་མཛད་པ། །འགྱུར་མེད་ཆོས་སྐུའི་ཐུགས་ལ་འདུད། །ཆོས་དབྱིངས་དག་པའི་ཕོ་བྲང་ན། །མི་འགྱུར་བདག་མེད་སྒྱུ་མའི་སྐུ། །དུས་གསུམ་སངས་རྒྱས་བསྐྱེད་པའི་ཡུམ། །ཡུམ་ཆེན་བདག་མེད་ཞབས་ལ་འདུད། །ཁྱེད་ཀྱིས་བསྡུས་
(༡༠༡)པའི་སྲས་རྣམས་དང་། །བཀའ་བཞིན་སྒྲུབ་པའི་སློབ་མའི་ཚོགས། །འཁོར་དང་བཅས་པ་ཐམས་ཅད་ལ། །ཟོལ་མེད་གུས་པས་ཕྱག་འཚལ་ལོ། །འཇིག་རྟེན་ཁམས་ནི་ཐམས་ཅད་ན། །མཆོད་པའི་ཡོ་བྱད་ཅི་ཡོད་དང་། །བདག་ལུས་ཁྱེད་ཀྱི་སྤྱན་སྔར་འབུལ། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །ཆོས་འཁོར་རྒྱ་ཆེན་བསྐོར་དུ་གསོལ། །འཁོར་བ་མ་སྟོངས་བར་དུ་ནི། །དཔལ་ལྡན་བླ་མ་བཞུགས་སུ་གསོལ། །དགེ་ཚོགས་སེམས་ཅན་དོན་དུ་བསྔོ། །དེ་ལྟར་ཡན་ལག་བདུན་པ་ཞིག་སྔོན་དུ་གསོལ་ནས། སྐབས་ཀྱི་ཞུ་དོན་ལ། རྡོ་རྗེ་འཆང་དང་དབྱེར་མེད་པའི་བླ་མ་ཡབ་ཡུམ་སྲས་དང་བཅས་པའི་འཕྲིན་ལས་རྣམ་པར་དཀར་བ་དང་། ཐུགས་རྗེ་ཚད་མེད་པའི་བྱིན་རླབས་ཀྱི་ནུས་མཐུ་དང་། འཁོར་བ་མེད་པའི་བཀའ་དྲིན་ལ་བརྟེན་ནས་འབངས་བདག་ལ། གོ་ཡུལ་གྱི་རྟོགས་པ་ཅུང་ཟད་ཡོད་པ་རྣམས་འབུལ་བས། ཐུགས་ཆོས་ཉིད་འགྱུར་བ་མེད་པའི་ངང་ནས་སྙན་ཅུང་ཞིག་གསན་དུ་གསོལ། ཐོག་མར་མ་རིག་པའི་རྐྱེན་གྱིས་འདུ་བྱེད་ལ་སོགས་པའི་རྟེན་འབྲེལ་བཅུ་གཉིས་ཀྱིས་བསྡུས་པའི་ལུས། རྣམ་སྨིན་ཤ་ཁྲག་རྡོས་བཅས་རྣམ་པར་ཤེས་པའི་འཛིན་པ་དང་བཅས་པ་འདི་བསོད་ནམས་ཅན་ཐར་པ་འདོད་པ་རྣམས་ཀྱི་དལ་འབྱོར་ལུས་ཀྱི་གྲུ་ཆེན། ལས་ངན་ཅན་སྡིག་པ་གསོག་པ་རྣམས་ཀྱི་ངན་འགྲོར་འཁྲིད་པའི་སྣ་འདྲེན། ཡར་འགྲོ་མར་འགྲོའི་ས་མཚམས། མདུན་མ་གཏན་ལེགས་དང་གཏན་ཉེས་ཀྱི་ཁེ་ཉེན་ཤིན་ཏུ་ཆེ་བའི་དུས་ཀྱེམ་པ་ཞིག་ཡིན་པར་གོ་ཞིང་། དེ་ཡང་འཁོར་བའི་རྒྱ་མཚོ་སྡུག་བསྔལ་གྱི་འབྱུང་གནས་
(༡༠༢)ཤིན་ཏུ་ཐར་དཀའ་བ་འདི་ལ། ད་ལན་རྗེ་འགྲོ་བའི་དེད་དཔོན་ཁྱེད་ཀྱི་མཐུ་ལ་བརྟེན་ནས་སྒྲོལ་དུ་རེ་བྱེད་པ་ལ། ཐོག་མར་བླ་མ་དཀོན་མཆོག་གསུམ་ལ་སྐྱབས་ཞུས་ནས་བསླབ་བྱ་ཚུལ་བཞིན་དུ་སློབ་པ་དང་། དེའི་ནང་ནས་ཀྱང་བདེ་ལེགས་ཐམས་ཅད་ཀྱི་འབྱུང་གནས་བླ་མ་ཡིན་པར་འདུག་པས། ཅི་གསུང་དང་དུ་ལེན་ཞིང་དམ་ཚིག་མ་ཉམས་པར་བྱེད་པ་འདི་གལ་ཆེ་བའི་གནད་ཀ་དང་པོ་ཡིན་པར་གོ་ལགས། དེ་རྗེས་དལ་འབྱོར་རྙེད་དཀའ་དང་། འཆི་བ་མི་རྟག་པ། ལས་རྒྱུ་འབྲས་འཁོར་བའི་ཉེས་དམིགས་རྣམས་དྲག་ཏུ་བསམས་པས་བློ་རང་དབང་མེད་པར་འཁུལ་ནས། འཁོར་བ་ལས་ཐར་བར་འདོད་པའི་བསམ་པས་རྟེན་སོ་སོར་ཐར་པའི་སྡོམ་པ་གང་ཡང་རུང་བ་ཞིག་ལ་བརྟེན་དགོས་ཏེ། རྟེན་ས་གཞི་དང་འདྲ་ལ། དེ་ལ་བརྟེན་ནས་ཐེག་པ་རིམ་གྱིས་འཛེག་ཅིང་ཁས་བླངས་པའི་བསླབ་བྱ་མིག་འབྲས་ལྟར་བསྲུང་བ་དང་། གལ་ཏེ་ཉམས་ན་ཕྱིར་འཆོས་ཤིང་། རང་ཞི་བདེ་དོན་དུ་གཉེར་བ་ཐེག་པ་དམན་པར་གོལ་པས། སེམས་ཅན་ཐམས་ཅད་འཁོར་བ་མཐའ་དག་ལས་སྒྲོལ་བར་འདོད་པས་བྱང་ཆུབ་ཏུ་སེམས་བསྐྱེད་ནས། བྱམས་དང་སྙིང་རྗེས་ཅི་བྱེད་ཐམས་ཅད་གཞན་དོན་དུ་བསྔོ་བ་ཐེག་ཆེན་སེམས་བསྐྱེད་ཡིན་པར་གོ་ལགས། ཉན་རང་གི་ལམ་སྤངས་ནས། ཐེག་པ་ཆེན་པོའི་ལམ་དུ་འཇུག་པ་ལ་ལྟ་བ་རྣམ་དག་གིས་གཞི་བཟུང་ནས་བླ་མེད་རྡོ་རྗེ་ཐེག་པའི་ལམ་དུ་འཇུག་སྟེ། དེ་ཡང་ལྟ་བ་རྣམ་དག་རྟོགས་པར་བྱེད་པ་ལ། བླ་མ་མཚན་ཉིད་དང་ལྡན་པ་ཞིག་གིས། དབང་བཞི་རྣམ་པར་དག་པའི་ཆོ་ག་ཚང་ཞིང་མ་ནོར་བ་ལ་བརྡ་འཕྲོད་པའི་ཐབས་ཤེས་དང་ལྡན་པ་ཞིག་
(༡༠༣)དགོས། དབང་ཞེས་པ་ཟབ་མོ་ལྟ་བ་ལ་དབང་བས། ད་གཟོད་རིམ་པ་བཞིན་སྒོམ་སྟེ། དེ་ཡང་མཚན་ཉིད་ཐེག་པ་དང་ཐུན་མོང་བ་གང་ཟག་གི་བདག་མེད་འཚོལ་བ་ལ་འབད་དེ། ལུང་དང་རིགས་པ་གཉིས་ཀ་ལ་དཔེ་དང་རྒྱུ་མཚན་དུ་མའི་སྒོ་ནས་བཙལ་བས་བདག་མ་རྙེད་པ་དང་གང་ཟག་གི་བདག་མེད་རྟོགས། དེ་ལྟར་གང་ཟག་མ་རྙེད་པ་དང་སེམས་མཉམ་པར་འཇོག་དགོས་ཏེ། རྒྱུ་མཚན་དུ་མའི་སྒོ་ནས་བཞག་པའི་ཚེ། རྣམ་རྟོག་རྒྱུན་ཆད་ནས་སེམས་རྟོག་མེད་དུ་ལྷན་སོང་སྟེ། ལོ་དང་ཟླ་བ་ཞག་ལ་སོགས་པ་ཅི་ཙམ་སོང་ཡང་རང་གིས་མི་ཤེས་པར་གཞན་གྱིས་ཚོད་འཛིན་དགོས་པ་བྱུང་བ་ནི་ཞི་གནས་སྐྱེས་པ་ཡིན། དེ་ལ་དྲན་ཤེས་ཀྱིས་བསྐྱངས་ནས་བྱིང་རྨུགས་སུ་མ་སོང་བར། རིག་པའི་ངར་འདོན་བྱས་པས། སྣང་ལ་རང་བཞིན་མེད་པ་གསལ་ལ་རྟོག་པ་མེད་པ། རྗེན་ནེ་ཡེར་རེ། ས་ལེ་སིང་ངེ་བ་དེ་ཞི་གནས་ཀྱི་ཉམས་ཡིན། དེ་ལ་ལྷག་མཐོང་དུ་འཛིན་རུང་། སོ་སོ་སྐྱེ་བོ་ལ་ལྷག་མཐོང་མཚན་ཉིད་པ་མི་འཆར་བས། ས་དང་པོ་ཐོབ་པ་དང་ལྷག་མཐོང་དང་མཇལ་བ་ཡིན་སྙམ་ལགས། དེས་ན་དམིགས་པ་ལ་བརྟེན་ནས་རྣམ་པ་ལམ་དུ་བྱེད་པ་ཡིན། གཞན་ཞི་གནས་ཀྱི་ཉམས་སྣང་ལྷ་སྐུ་སོགས་མཐོང་སྣང་སྣ་ཚོགས་བྱུང་བ་རྣམས་བསྒོམས་པའི་རྟགས་ཙམ་ཡིན་གྱི། སྙིང་པོ་གང་ཡང་མེད་སྙམ་ལགས། མདོར་ན་ཞི་གནས་བཟང་པོའི་ཉམས་ངར་འདོན་དང་བཅས་པ་དང་། སོ་སོར་རྟོགས་པའི་ཤེས་རབ་ཟབ་མོས་དཔྱོད་པ་དང་བཅས་པ་འདི། ལྷག་མཐོང་ཐོབ་པར་བྱེད་པའི་ཐབས་མེད་མི་རུང་། སྐས་ལ་འཛེག་པའི་སྐས་ཐེམ་འོག་མ་དང་འདྲ་བསམ་ལགས། ཞི་གནས་སྒོམ་པ་
(༡༠༤)སོགས་མཚན་བཅས་མཚན་མེད་གང་བྱེད་ཐམས་ཅད་ཀྱི་སྔོན་དུ་བྱམས་སྙིང་རྗེས་ཀུན་ནས་སློང་སྟེ། ཅི་བྱེད་གཞན་དོན་དུ་དམིགས་པའི་སེམས་བསྐྱེད་ཀྱིས་ཟིན་པ་དང་། བར་དུ་ལྟ་བ་རྣམ་པར་དག་པས་དམིགས་མེད་དུ་སྦྱོང་བ་དང་། ཐ་མ་གཞན་དོན་དུ་བསྔོ་བ་སྨོན་ལམ་གྱི་རྒྱས་འདེབས་དམིགས་མེད་ཀྱི་ངང་ནས་བྱེད་པ་ལམ་ཐམས་ཅད་ཀྱི་མཆོག་ཡིན་པར་གོ་ལགས། མི་ལྟོགས་པ་ལ་ཟན་གོ་བས་མི་ཕན་ཟ་དགོས་པ་ལྟར། སྟོང་ཉིད་རྟོགས་པ་ལ་དོན་གོ་བས་མི་ཆོག་སྒོམ་དགོས་པར་གོ་ལགས་ཤིང་། ཁྱད་པར་ལྷག་མཐོང་རྟོགས་པའི་ཐབས་རྗེས་ཐོབ་ཏུ་བསགས་སྦྱང་གཉིས་ལ་ཡེངས་མེད་དུ་འབད་དགོས་པར་གོ་ལགས། དོན་དྲིལ་བ་ལ། ད་ལྟ་རྣལ་འབྱོར་པ་ཉམས་སུ་ལེན་པའི་སྟོང་ཉིད། མཉམ་ཉིད་བརྗོད་མེད་མི་རྟོག་པ་རྣམས་དབང་བཞི་དང་མཐུན་པའི་གསང་སྔགས་རྡོ་རྗེ་ཐེག་པའི་ལམ་རིམ་གྱི་ལྟ་བ་ཡིན་པར་གོ་ལགས། གོ་བ་རྣམས་མངོན་དུ་བྱེད་པ་ལ་ལུས་ལ་བབ་བསྐུར། ལྟོ་ལ་གྱོང་བསྐུར། སེམས་ལ་ལས་བསྐུར་ནས་སྣང་བ་གདོང་འདེད། འཆི་ནུས་ཐོག་འགེལ་ཅི་བྱུང་རོ་སྙོམས་ནས། སྐུ་དྲིན་འཁོར་ཐབས་མེད་པའི་བླ་མ་ཡབ་ཡུམ་གྱི་དྲུང་དུ། ཟང་ཟིང་གི་ཞབས་ཏོག་འབུལ་རྒྱུ་མ་བྱུང་བས། སྒྲུབ་པའི་མཆོད་པ་ཇི་སྲིད་འཚོའི་བར་དུ་འབུལ་ཞིང་། མཐར་ཐུག་གི་རྟོགས་པ་འོག་མིན་ཆོས་ཀྱི་ཕོ་བྲང་དུ་འབུལ་བར་ཞུ། རྡོ་རྗེ་འཆང་ཆེན་བླ་མ་དང་། །སངས་རྒྱས་བསྐྱེད་པའི་བདག་མེད་ཡུམ། །རྒྱལ་སྲས་སྤྲུལ་པའི་ཚོགས་རྣམས་ལ། །གོ་རྟོགས་ཡིད་ཡུལ་ཤར་བ་ཡི། །ཚིག་འགའ་སྙན་དུ་ཕུལ་བ་ལ། །མ་རྟོགས་ལོག་རྟོགས་འཁྲུལ་
(༡༠༥)རྟོགས་སོགས། །ཉེས་ཚོགས་ཐམས་ཅད་བཟོད་པར་གསོལ། །སླར་ཡང་ཆོས་བཞིན་འཆོས་པར་ཞུ། །རྗེ་ཁྱེད་ཀྱི་ཐུགས་རྗེའི་དཀྱིལ་འཁོར་ལས། །བྱིན་རླབས་ཀྱི་ཚ་ཟེར་འཕྲོས་པ་ཡིས། །བདག་བློའི་པད་མོ་ཁ་ཕྱེ་སྟེ། །ཉམས་རྟོགས་ཀྱི་དྲི་བསུང་འཕྲོ་བ་འདི། །དྲིན་ལན་ལ་འཁོར་ཐབས་མ་མཆིས་པས། །སྒྲུབ་པའི་མཆོད་པ་རྒྱུན་དུ་འབུལ། །སྒྲུབ་པ་མཐའ་རུ་ཕྱིན་པ་དང་། །བསྒྲུབས་འབྲས་ཀྱིས་འགྲོ་ལ་ཕན་པར་མཛོད། །འབངས་ཞུ་ཕོད་ཆེས་ན་བཟོད་པར་གསོལ། །ཞེས་ཞུས་པས། བླ་མའི་ཞལ་ནས། བུ་ཁྱོད་ལ་དེ་ཙམ་ཞིག་རེ་ཡང་རེ་སྟེ་བྱུང་འདུག་གསུང་མཉེས་མཉེས་མཛད། ཡུམ་གྱི་ཞལ་ནས། ངའི་བུ་འདི་ལ་འདི་ཙམ་ཞིག་འོང་བའི་བློ་སྟོབས་དང་ནུས་པ་ཞིག་ཡོད་གསུང་ཤིན་ཏུ་དགྱེས་ཏེ་ཆོས་ཀྱི་གླེང་མོ་མང་དུ་གནང་ནས་ཡབ་ཡུམ་གཉིས་གཟིམས་ཁང་དུ་བྱོན། ངས་ཀྱང་སྔར་ལྟར་འདག་སྦྱར་ལ་བསྒོམས། དེའི་ཚེ་བླ་མ་ཡང་དབུ་རུ་བྱང་ཕྱོགས་ལ་འགྲོ་དོན་ལ་བྱོན་ནས། མར་པ་མགོ་ལེགས་ཀྱི་སར་ཚོགས་འཁོར་ཞིག་མཛད་པའི་ནུབ་མོ་སྔར་པཎ་ཆེན་ནཱ་རོའི་བརྡའི་གསུང་མ་གོ་བ་ཞིག་ཡོད་པ་དེ། མཁའ་འགྲོས་བཀྲོལ་ཞིང་། བརྡས་བསྐུལ་ཏེ། ནཱ་རོ་པ་དང་མཇལ་དུ་འབྱོན་པར་དགོངས་ཏེ། གྲོ་བོ་ལུང་དུ་ཕེབས་ནས་ཞག་འགའ་བཞུགས་ཡོད་པའི་ཚེ། ནུབ་གཅིག་ངའི་རྨི་ལམ་དུ་བུད་མེད་སྔོ་བསངས་མ་དར་གྱི་ན་བཟའ་དང་། རུས་པའི་རྒྱན་གྱིས་མཛེས་པ། སྨིན་མ་དང་སྨ་ར་སེར་ཁྱུག་གེ་ཡོད་པ་ཞིག་བྱུང་ནས། བུ་ཁྱོད་ལ་ཡུན་དུ་བསྒོམས་པས་
(༡༠༦)སངས་རྒྱ་བ་ཕྱག་རྒྱ་ཆེན་པོ་དང་། ཆོས་དྲུག་གི་གདམས་ངག་དེ་འདུག་སྟེ། སྐད་ཅིག་མ་གཅིག་བསྒོམས་པས་སངས་རྒྱ་བ་ཁྱད་པར་གྱི་འཕོ་བ་གྲོང་འཇུག་གི་གདམས་ངག་དེ་མི་འདུག་པ་ཞུས་ཤིག་ཟེར་སོང་བ་ལ། ངས་བསམ་མནོ་ཞིག་བཏང་བས། བུད་མེད་དེ་མཁའ་འགྲོ་མའི་ཆ་བྱད་དུ་འདུག་རུང་། མཁའ་འགྲོའི་ལུང་བསྟན་ཡིན་ནམ། བདུད་ཀྱི་བར་ཆད་ཡིན་མི་ཤེས། གང་ཡིན་ནའང་ངའི་བླ་མ་དུས་གསུམ་གྱི་སངས་རྒྱས་ཀྱིས་མི་མཁྱེན་པའམ། མ་རྟོགས་པ་གཅིག་ཀྱང་མེད་དེ། ཡ་གི་སངས་རྒྱས་ཐོབ་པའི་གདམས་ངག་མན་ཆད་ནས། མ་གི་རྫ་གཏུགས་བྱེད་པའི་གདམས་པ་ཡན་ཡོད་པ་ཡིན་པས། རྒྱ་ལ་མཁའ་འགྲོའི་ལུང་བསྟན་ཡིན་ན་གྲོང་འཇུག་ཅིས་ཀྱང་ཞུ་དགོས་སྙམ་ནས། འདག་སྦྱར་བཤིག་སྟེ་བླ་མའི་དྲུང་དུ་ཕྱིན་པས། བླ་མའི་ཞལ་ནས། མཚམས་དམ་པོ་ལ་མི་སྡོད་པར། བར་ཆད་བྱུང་ཉེན་ཡང་ཡོད་ཅི་ལ་འོངས་གསུང་བ་ལ། བདག་ལ་བུད་མེད་འདི་འདྲ་ཞིག་གིས་འདི་སྐད་ཟེར་བྱུང་བ་བར་ཆད་ཡིན་ནམ་ལུང་བསྟན་ཡིན་མ་ཤེས། གལ་ཏེ་ལུང་བསྟན་ཡིན་ན་གྲོང་འཇུག་ཞུར་འོངས་པ་ལགས་པས་གནང་བར་ཞུ་ཞུས་པས། ཡུག་གཅིག་དགོངས་པ་ལ་བཞུགས་ནས། དེ་མཁའ་འགྲོའི་ལུང་བསྟན་ཡིན་པར་འདུག་སྟེ། ང་རྒྱ་གར་ནས་ཚུར་འོང་དུས། པཎ་ཆེན་ནཱ་རོའི་ཞལ་ནས། གྲོང་འཇུག་གི་གསུང་སྒྲོས་ཤིག་བྱུང་བ་ལས་ཞུས་སུ་ཚོར་བ་མི་འདུག་པས། རྒྱ་དཔེ་རྣམས་བཀླགས་ཏེ་འཚོལ་བ་ཡིན་གསུངས། དཔོན་སློབ་གཉིས་ཀས་ཉིན་མཚན་ཕྲུགས་གཅིག་ཏུ་གྲོང་འཇུག་གི་དཔེ་ཆ་བཙལ་བས། འཕོ་བའི་ཡིག་ཆ་མང་དུ་རྙེད་དེ། གྲོང་འཇུག་གི་ཡི་གེ་འབྲུ་གཅིག་ཀྱང་མ་རྙེད་པ་ལ།
(༡༠༧)བླ་མའི་ཞལ་ནས། དབུ་རུ་བྱང་ཕྱོགས་སུ་བྱུང་བའི་བརྡ་དེ་ཡང་འདི་ཞུ་བ་ལ་བསྐུལ་བར་འདུག གཞན་ཡང་གདམས་ངག་ཅི་ཡོད་མི་ཤེས་པར་འདུག་པས་ཞུ་རུ་འགྲོ་གསུང་བ་ལ། སྐུ་ན་བགྲེས་པའི་རྒྱུ་མཚན་སོགས་ཕུལ་ནས་བཤོལ་ཅི་བཏབ་རུང་མ་ཐེབས་པར། སློབ་མ་རྣམས་ཀྱི་འབུལ་བ་གསེར་དུ་བསྒྲིལ་བས། གསེར་དཀར་ཡོལ་གང་བྱུང་བ་བསྣམས་ཏེ་རྒྱ་གར་ལ་བྱོན་པས། ནཱ་རོ་པ་སྤྱོད་པ་ལ་གཤེགས་པ་དང་ཐུག སྲོག་ལ་མ་ལྟོས་པར་འཚོལ་སྙམ་རྟེན་འབྲེལ་མང་པོ་བསྒྲིགས་པས་མཇལ་བའི་ལུང་བསྟན་ཁོ་ན་ཐོབ་སྟེ། གསོལ་བ་འདེབས་ཤིང་བཙལ་བས། ནགས་གསེབ་ཅིག་ཏུ་མཇལ་ཏེ། ཕུ་ལ་ཧ་རིའི་དགོན་པར་གདན་དྲངས་ནས། འཕོ་བ་གྲོང་འཇུག་གི་གདམས་ངག་ཞུས་པས། པཎ་ཆེན་ནཱ་རོའི་ཞལ་ནས། འདི་ཁྱོད་རང་དྲན་ནམ་ལུང་བསྟན་བྱུང་གསུང་བ་ལ། འདི་བདག་རང་དྲན་པ་མིན། བདག་ལ་ལུང་བསྟན་བྱུང་བའང་མིན། བདག་ལ་སློབ་མ་ཐོས་པ་དགའ་ཞེས་བྱ་བ་ཡོད་པ་དེ་ལ་མཁའ་འགྲོའི་ལུང་བསྟན་བྱུང་ནས་ཞུར་འོངས་པ་ལགས་ཞུས་པས། ངོ་མཚར་ཆེ། བོད་མུན་ནག་གི་གླིང་ན་སྐྱེས་བུ་གངས་ལ་ཉི་མ་ཤར་བ་འདྲ་བ་ཡང་ཡོད་པར་འདུག་གསུངས། ཕྱག་གཉིས་སྤྱི་བོར་ཐལ་མོ་སྦྱར་ཏེ། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་ཕྱག་འཚལ་ལོ། །ཞེས་གསུང་ཞིང་སྤྱན་བཙུམས་ཏེ། དབུ་གུག་གུག་པ་ལན་གསུམ་མཛད་པས། རྒྱ་གར་གྱི་རི་དང་རྩི་ཤིང་རྣམས་ཀྱང་བོད་ཀྱི་ཕྱོགས་ལ་མགོ་གུག་གུག་པ་ལན་གསུམ་བྱུང་། དུས་ད་ལྟའི་བར་དུ་ཡང་ཕུ་ལ་ཧ་རིའི་རི་དང་ཤིང་རྣམས་བོད་ཀྱི་ཕྱོགས་ལ་
(༡༠༨)མགོ་གུག་གེ་ཡོད་པར་འདུག དེ་ནས་མཁའ་འགྲོ་སྙན་བརྒྱུད་ཀྱི་གདམས་ངག་རྣམས་རྫོགས་པར་གནང་ནས། པཎ་ཆེན་ནཱ་རོས་རྟེན་འབྲེལ་ཞིག་བསྒྲིགས་པ་ལས། མར་པའི་ཕྱག་འཚལ་ལུགས་ཀྱི་རྟེན་འབྲེལ་གྱིས་གདུང་རྒྱུད་ཐུང་བ་ཙམ་བྱུང་ནའང་། ངའི་འཕྲིན་ལས་ཀྱི་ཆོས་རྒྱུད་ཆུ་བོའི་གཞུང་ལས་རིང་བ་འོང་བའི་ལུང་བསྟན་ཐོབ་སྟེ། བོད་དུ་གདན་ཕེབས། དེ་ནས་ཕྱག་འཚལ་ལུགས་ཀྱི་རྟེན་འབྲེལ་གྱིས་སྲས་དར་མ་མདོ་སྡེ་སྐུ་ཡལ་བའི་ལོ་མཆོད་ཀྱི་མཆོད་འབུལ་ལ། གྲྭ་བུ་སློབ་ཀུན་འཛོམ་པའི་མཆོད་པའི་ཚོགས་གྲལ་དུ། བླ་མ་ལ་སློབ་མ་བུ་ཆེན་རྣམས་ཀྱིས་ཞུས་པ། བླ་མ་རིན་པོ་ཆེ། སྲས་དུས་གསུམ་གྱི་སངས་རྒྱས་ལྟ་བུ་དེ་ནི་བདག་ཅག་སེམས་ཅན་རྣམས་ཀྱི་བསོད་ནམས་ཀྱིས་མ་ཐུབ། བླ་མ་རང་ནི་སྐུ་ན་བགྲེས་གདའ་བས། ད་བཀའ་བརྒྱུད་ཀྱི་བསྟན་པ་རིན་པོ་ཆེ་ཇི་ལྟར་དར་བར་འགྱུར་བ་དང་། བདག་ཅག་སློབ་མ་རྣམས་ལ་གདུལ་བྱ་དང་འཕྲིན་ལས་ཇི་ལྟར་འབྱུང་བའི་ལུང་བསྟན་ཅིག་གནང་བར་ཞུ་ཞུས་པས། བླ་མའི་ཞལ་ནས། ང་ནཱ་རོ་པཎ་ཆེན་གྱི་བུ་རྒྱུད་འདི་རྟེན་འབྲེལ་དང་རྨི་ལམ་ལ་མངའ་བརྙེས་པ་ཡིན་ཞིང་། བཀའ་བརྒྱུད་ཀྱི་བསྟན་པ་ལ་ཕན་ཆེན་ནཱ་རོའི་ལུང་བསྟན་བཟང་པོ་ཡང་ཡོད། ཁྱེད་བུ་ཆེན་རྣམས་ཀྱིས་རྨི་ལམ་སྒུགས་ལ་ཤོག་ཅིག་གསུངས། དེར་བུ་ཆེན་རྣམས་ཀྱིས་རྨི་ལམ་བཟུང་ནས་ཞུས་པས། ཀུན་ལ་རྨི་ལམ་བཟང་པོ་འགའ་བྱུང་འདུག་ནའང་། ལུང་བསྟན་ཕོག་པ་མ་བྱུང་སྟེ། ང་ལ་ཀ་ཆེན་བཞིའི་རྨི་ལམ་བྱུང་ཚུལ་རྣམས་བླ་མའི་དྲུང་དུ་ཕུལ་བ་འདི་ལྟར་རོ། །
(༡༠༩)རྗེ་རྡོ་རྗེ་འཆང་གི་བཀའ་བཞིན་དུ། །མདང་སུམ་ཉལ་བའི་རྨི་ལམ་ན། །བྱུང་ཚུལ་བླ་མའི་དྲུང་དུ་འབུལ། །སྙན་དར་ཅིག་བདག་ལ་གསན་པར་ཞུ། །འཛམ་གླིང་ཡངས་པའི་བྱང་ཕྱོགས་འདིར། །ལྷུན་སྡུག་གངས་རི་ཆགས་པ་རྨིས། །གངས་རྩེ་མོ་དགུང་ལ་རེག་པ་རྨིས། །རྩེ་ལ་ཉི་ཟླ་འཁོར་བ་རྨིས། །འོད་ཀྱིས་ནམ་མཁའ་གང་བ་རྨིས། །རྩ་བས་ས་གཞི་ཁྱབ་པ་རྨིས། །ཕྱོགས་བཞིར་ཆུ་རྒྱུན་འབབ་པ་རྨིས། །ཆུ་དེས་འགྲོ་ཀུན་ཚིམ་པ་རྨིས། །ཆུ་སྣ་རྒྱ་མཚོར་འབབ་པ་རྨིས། །མེ་ཏོག་སྣ་ཚོགས་བཀྲ་བ་རྨིས། །སྤྱིར་གྱི་རྨི་ལམ་དེ་ལྟར་རྨིས། །བླ་མ་དུས་གསུམ་སངས་རྒྱས་ལ་ཞུས་པ་ལགས། སྒོས་ལྷུན་སྟུག་གངས་རི་མཐོན་པོ་དེའི། །ཤར་དུ་ཀ་ཆེན་བཙུགས་པ་རྨིས། །ཀ་ཐོག་ཏུ་སེང་ཆེན་འགྱིང་བ་རྨིས། །སེང་གཡུ་རལ་མཐའ་ནས་རྒྱས་པ་རྨིས། །སྡེར་བཞི་གངས་ལ་བགྲད་པ་རྨིས། །སྤྱན་མིག་གྱེན་དུ་གཟིགས་པ་རྨིས། །སེང་གངས་དཀར་གྱི་ལྟོངས་སུ་འཕྱོ་བ་རྨིས། །བླ་མ་དུས་གསུམ་སངས་རྒྱས་ལ་ཞུས་པ་ལགས། །ལྷོ་རུ་ཀ་ཆེན་བཙུགས་པ་རྨིས། །ཀ་ཐོག་ཏུ་སྟག་མོ་ངར་བ་རྨིས། །སྟག་གྲ་འཛུམ་མཐའ་ནས་རྒྱས་པ་རྨིས། །ཁོང་འཛུམ་ལན་གསུམ་བྱས་པ་རྨིས། །སྡེར་བཞི་ནགས་ལ་བགྲད་པ་རྨིས། །སྤྱན་མིག་གྱེན་ལ་གཟིགས་པ་རྨིས། །སྟག་ནགས་ཀྱི་གསེབ་ལ་འཕྱོ་བ་རྨིས། །ནགས་ཐང་ཤིང་རྒྱུད་དུ་སྦྲེལ་བ་རྨིས། །བླ་མ་དུས་གསུམ་སངས་རྒྱས་ལ་ཞུས་པ་ལགས། །ནུབ་ཏུ་ཀ་ཆེན་བཙུགས་པ་རྨིས། །ཀ་ཐོག་ཏུ་ཁྱུང་ཆེན་ལྡིང་བ་རྨིས། །
(༡༡༠)ཁྱུང་གཤོག་སྒྲོ་མཐའ་ནས་རྒྱས་པ་རྨིས། །ཁྱུང་རཱ་གནམ་དུ་གཟེངས་པ་རྨིས། །སྤྱན་མིག་གྱེན་དུ་གཟིགས་པ་རྨིས། །ཁྱུང་ནམ་མཁའི་མཐོངས་ལ་འཕུར་བ་རྨིས། །བླ་མ་དུས་གསུམ་སངས་རྒྱས་ལ་ཞུས་པ་ལགས། །བྱང་དུ་ཀ་ཆེན་བཙུགས་པ་རྨིས། །ཀ་ཐོག་ཏུ་རྒོད་པོ་ལྡིང་བ་རྨིས། །རྒོད་རྩེ་སྒྲོ་མཐའ་ནས་རྒྱས་པ་རྨིས། །རྒོད་ཚང་བྲག་ལ་བཅས་པ་རྨིས། །རྒོད་དེ་ལ་བུ་གཅིག་བྱུང་བ་རྨིས། །བྱ་ཕྲན་གྱིས་ནམ་མཁའ་གང་བ་རྨིས། །སྤྱན་མིག་གྱེན་དུ་གཟིགས་པ་རྨིས། །རྒོད་ནམ་མཁའི་མཐོངས་ལ་འཕུར་བ་རྨིས། །བླ་མ་དུས་གསུམ་སངས་རྒྱས་ལ་ཞུས་པ་ལགས། །དེ་ལྟར་རྨིས་པའི་རྟེན་འབྲེལ་གྱིས། །བཟང་བའི་དགེ་ལྟས་ཡིན་ནམ་སྙམ། །བདག་ནི་ཉམས་དགའ་ཤེས་པ་སྤྲོ། །ངོ་སྤྲོད་ལུང་བསྟན་གནང་དུ་གསོལ། །ཞེས་ཞུས་པས། བླ་མ་ཤིན་ཏུ་མཉེས་ཏེ། རྨི་ལམ་བཟང་འདུག་གསུངས། ཡུམ་ལ་བདག་མེད་མ་ཚོགས་ཀྱི་འཁོར་ལོ་བཟང་པོ་ཞིག་གི་གྲབས་གྱིས་གསུངས། དེར་ཡུམ་གྱིས་ཡོ་བྱད་རྣམས་འཛོམ་པ་དང་། སློབ་མ་བུ་ཆེན་རྣམས་བསགས་ནས་ཚོགས་འཁོར་བཟང་པོ་ཞིག་མཛད་པའི་གྲལ་དུ། བླ་མའི་ཞལ་ནས། མི་ལ་རྡོ་རྗེ་རྒྱལ་མཚན་ལ་རྨི་ལམ་འདི་འདྲ་བྱུང་འདུག་པ་ངོ་མཚར་ཆེ་ཨང་གསུང་བ་ལ། བུ་ཆེན་རྣམས་ཀྱིས་རྨི་ལམ་དེ་དག་གི་བརྡ་དོན་བཀྲོལ་ནས་ལུང་བསྟན་གནང་བར་ཞུ་ཞུས་པས། སྐྱེས་མཆོག་སྒྲ་སྒྱུར་ཆེན་པོས་བུ་སློབ་རྣམས་ལ་རྨི་ལམ་བརྡ་གྲོལ་གྱི་མགུར་འདི་གསུངས་སོ། །
(༡༡༡)རྗེ་དུས་གསུམ་སངས་རྒྱས་འགྲོ་བའི་མགོན། །པཎ་ཆེན་ནཱ་རོའི་ཞབས་ལ་འདུད། །འདིར་བཞུགས་གདན་གང་བུ་སློབ་ཀུན། །རྨི་ལམ་བརྡ་ལས་བྱུང་བ་ཡི། །ངོ་མཚར་མ་འོངས་ལུང་བསྟན་འདི། །ཕ་རྒན་ང་ཡིས་བཤད་ཀྱིས་ཉོན། །འཛམ་གླིང་བྱང་ཕྱོགས་ས་སྟེང་དེ། །བོད་ན་དར་བའི་ཐུབ་བསྟན་ཡིན། །དེ་སྟེང་གངས་རི་ཆགས་པ་དེ། །ཕ་རྒན་མར་པ་ལོ་ཙཱ་དང་། །བཀའ་བརྒྱུད་ཡོངས་ཀྱི་བསྟན་པ་ཡིན། །གངས་རྩེ་མོ་དགུང་ལ་རེག་པ་འདི། །ལྟ་བ་འགྲན་ཟླ་མེད་པ་ཡིན། །རྩེ་ལ་ཉི་ཟླ་འཁོར་བ་དེ། །སྒོམ་པ་འོད་གསལ་མཁྱེན་བརྩེ་ཡིན། །འོད་ཀྱིས་ནམ་མཁའ་གང་བ་དེ། །ཐུགས་རྗེས་མ་རིག་མུན་སེལ་ཡིན། །རྩ་བས་ས་གཞི་ཁྱབ་པ་དེ། །འཕྲིན་ལས་ཀྱིས་ས་གཞི་ཁྱབ་པ་ཡིན། །ཕྱོགས་བཞིར་ཆུ་རྒྱུན་འབབ་པ་དེ། །སྨིན་གྲོལ་དབང་བཞིའི་གདམས་ངག་ཡིན། །ཆུ་དེས་འགྲོ་ཀུན་ཚིམ་པ་དེ། །གདུལ་བྱ་སྨིན་ཞིང་གྲོལ་བ་ཡིན། །ཆུ་སྣ་རྒྱ་མཚོར་འབབ་པ་དེ། །འོད་གསལ་མ་བུ་མཇལ་བ་ཡིན། །མེ་ཏོག་སྣ་ཚོགས་བཀྲ་བ་དེ། །འབྲས་བུ་སྐྱོན་བྲལ་ཉམས་མྱོང་ཡིན། །སྤྱིར་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །སྒོས་ལྷུན་སྟུག་གངས་རི་མཐོན་པོ་དེའི། །ཤར་དུ་ཀ་ཆེན་བཙུགས་པ་དེ། །དོལ་གྱི་ཚུར་སྟོན་དབང་ངེ་ཡིན། ཀ་ཐོག་ཏུ་སེང་གེ་འགྱིང་བ་དེ། །ཁོ་མི་གཞི་སེང་དང་འདྲ་བ་ཡིན། །སེང་གཡུ་རལ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །སྡེར་བཞི་གངས་ལ་བགྲད་པ་དེ། །ཚད་མེད་བཞི་དང་ལྡན་པ་ཡིན། །སྤྱན་
(༡༡༢)མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །སེང་གངས་དཀར་ལྟོངས་སུ་འཕྱོ་བ་དེ། །ཐར་པའི་གླིང་དུ་གཤེགས་པ་ཡིན། །ཤར་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །ལྷོ་རུ་ཀ་ཆེན་བཙུགས་པ་དེ། །གཞུང་གི་རྔོག་སྟོན་ཆོས་རྡོར་ཡིན། །ཀ་ཐོག་ཏུ་སྟག་མོ་ངར་བ་དེ། །ཁོ་མི་གཞི་སྟག་དང་འདྲ་བ་ཡིན། །སྟག་གྲ་འཛུམ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །ཁོང་འཛུམ་ལན་གསུམ་བྱས་པ་དེ། །སྐུ་གསུམ་རང་ངོ་འཕྲོད་པ་ཡིན། །སྡེར་བཞི་ནགས་ལ་བགྲད་པ་དེ། །འཕྲིན་ལས་རྣམ་བཞི་གྲུབ་པ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །སྟག་ནགས་ཀྱི་གསེབ་ཏུ་འཕྱོ་བ་དེ། །ཐར་པའི་གླིང་དུ་གཤེགས་པ་ཡིན། །ཐང་ཤིང་རྒྱུད་དུ་འབྲེལ་བ་དེ། །བུ་ཚ་བོས་རྒྱུད་པ་འཛིན་པ་ཡིན། །ལྷོ་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །ནུབ་ཏུ་ཀ་ཆེན་བཙུགས་པ་དེ། །གཙང་རོང་གི་མེས་སྟོན་ཚོན་པོ་ཡིན། །ཀ་ཐོག་ཏུ་ཁྱུང་ཆེན་ལྡིང་བ་དེ། །ཁོ་མི་གཞི་ཁྱུང་དང་འདྲ་བ་ཡིན། །ཁྱུང་གཤོག་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །ཁྱུང་རྭ་གནམ་དུ་གཟེངས་པ་དེ། །ལྟ་སྒོམ་གྱི་གོལ་ས་ཆོད་པ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །ཁྱུང་ནམ་མཁའི་མཐོངས་ལ་འཕུར་བ་དེ། །ཐར་པའི་གླིང་དུ་གཤེགས་པ་ཡིན། །ནུབ་རྨི་ལམ་མི་ངན་རྨི་ལམ་བཟང་། །འདིར་ཚོགས་གྲྭ་པ་བུ་སློབ་ཀུན། །བྱང་དུ་ཀ་ཆེན་བཙུགས་
(༡༡༣)པ་དེ། །གུང་ཐང་གི་མི་ལ་རས་པ་ཡིན། །ཀ་ཐོག་ཏུ་རྒོད་པོ་ལྡིང་བ་དེ། །ཁོ་མི་གཞི་རྒོད་དང་འདྲ་བ་ཡིན། །རྒོད་རྩེ་སྒྲོ་མཐའ་ནས་རྒྱས་པ་དེ། །སྙན་བརྒྱུད་ཀྱི་གདམས་ངག་ཐེབས་པ་ཡིན། །རྒོད་ཚང་བྲག་ལ་བཅས་པ་དེ། །ཚེ་སྲོག་བྲག་ལས་སྲ་བ་ཡིན། །རྒོད་དེ་ལ་བུ་གཅིག་བྱུང་བ་དེ། །འགྲན་གྱི་དོ་མེད་ཅིག་འོང་བ་ཡིན། །བྱ་ཕྲན་གྱིས་ནམ་མཁའ་གང་བ་དེ། །བཀའ་བརྒྱུད་ཀྱི་བསྟན་པ་དར་བ་ཡིན། །སྤྱན་མིག་གྱེན་དུ་གཟིགས་པ་དེ། །འཁོར་བ་ལ་ཕྱི་ཕྱག་འཚལ་བ་ཡིན། །རྒོད་ནམ་མཁའི་མཐོངས་སུ་འཕུར་བ་དེ། །ཐར་པའི་གླིང་དུ་གཤེགས་པ་ཡིན། །བྱང་རྨི་ལམ་མི་ངན་རྨི་ལམ་བཟང་། །ཁྱེད་འདིར་ཚོགས་རྣམས་ལ་བཤད་པ་ཡིན། །ང་ཕ་རྒན་གྱི་བྱ་བ་བྱས་ཤིང་ཚར། །ད་ཁྱེད་བུ་སློབ་ཀྱི་དུས་ལ་བབ་ནས་གདའ། །ང་མི་རྒན་གྱི་ཁ་ལ་གཏད་ཡོད་ན། །ཕྱིས་སྒྲུབ་བརྒྱུད་ཀྱི་བསྟན་པ་དར་ནས་འོང་། །ཞེས་གསུངས་ནས། ཚོགས་པ་ཀུན་ལ་དགའ་སྤྲོ་དཔག་ཏུ་མེད་པ་ཐོབ་བོ། །དེ་ནས་བླ་མས་བུ་ཆེན་རྣམས་ལ་ཆོས་དང་གདམས་ངག་གི་དཀོར་མཛོད་རྣམས་ཁ་ཕྱེ་སྟེ། ཉིན་འཆད་ཅིང་། མཚན་སྒོམ་དུ་བཅུག་ནས་ཀུན་ཐུགས་དམ་དམར་བར་ཡོད་པའི་ཚེ། བདག་མེད་མའི་ཟབ་དབང་ཞིག་མཛད་པའི་ནུབ་མོ། ཐུགས་དགོངས་ལ། བུ་སློབ་འདི་རྣམས་ལ། ཁྱད་པར་དུ་ཆོས་གང་ལ་གང་གི་བཀའ་བབས་དང་འཕྲིན་ལས་ཡོད་པ་དེ་ལ་དེ་སྟེར་དགོས་པས། ནངས་པར་ཐོ་རངས་ཀྱི་རྟེན་འབྲེལ་ལ་བརྟག་པ་བྱ་དགོངས་ནས། ཐོ་རངས་འོད་གསལ་གྱི་ངང་ནས་བུ་ཆེན་རྣམས་ལ་གཟིགས་པས།
(༡༡༤)གཞུང་གི་རྔོག་སྟོན་ཆོས་རྡོར་དགྱེས་རྡོར་གྱི་རྒྱུད་འགྲེལ་འགའ་ལ་བཤར་སྦྱང་མཛད། དོལ་གྱི་ཚུར་སྟོན་དབང་ངེ་འཕོ་བ་སྒོམ། གཙང་རོང་གི་མེས་སྟོན་ཚོན་པོ་འོད་གསལ་སྒོམ། ང་གཏུམ་མོ་སྒོམ་པ་གཟིགས་པས། ཆོས་སོ་སོའི་བཀའ་བབས་དང་འཕྲིན་ལས་གང་ཡོད་མཁྱེན་པས། བླ་མ་རྔོག་པ་ལ་མཐའ་དྲུག་ཚུལ་བཞིའི་སྒོ་ནས་རྒྱུད་བཤད་ཐབས་ཀྱི་མན་ངག་མུ་ཏིག་བསྟར་ལ་བརྒྱུས་པ་ལྟ་བུ་ཞིག་ཡོད་པ་དེ་དང་། ནཱ་རོའི་རྒྱན་དྲུག ཐུགས་དམ་པདྨ་རཱ་ག དགང་གཟར་བླུགས། རྒྱ་འགྲེལ་གྱི་ཕྱག་དཔེ་དང་བཅས་པ་གནང་ནས་བཤད་པའི་སྒོ་ནས་འགྲོ་དོན་གྱིས་ཤིག་གསུངས། དོལ་གྱི་ཚུར་སྟོན་དབང་ངེ་ལ་འཕོ་བ་རྒྱ་མཐོངས་ཁ་ཕྱེ་བ་ལ་བྱ་འཕུར་བ་ལྟ་བུ་ཞིག་ཡོད་པ་དེ་དང་། ནཱ་རོའི་དབུ་ལོ། ཕྱག་སེན། བདུད་རྩི་རིལ་བུ། རིགས་ལྔའི་དབུ་རྒྱན་རྣམས་གནང་སྟེ། འཕོ་བ་སྦྱོངས་ཤིག་གསུངས། གཙང་རོང་གི་མེས་སྟོན་ཚོན་པོ་ལ། འོད་གསལ་མུན་ནང་དུ་མར་མེ་སྦར་བ་ལྟ་བུ་ཞིག་ཡོད་པ་དེ་དང་། ནཱ་རོའི་རྡོ་རྗེ་དྲིལ་བུ། ཌཱ་མ་རུ། ཉ་ཕྱིས་ཀྱི་ཀ་པཱ་ལ་རྣམས་གནང་ནས། བར་དོ་ཆོད་ཅིག་གསུངས། ང་ལ་གཏུམ་མོའི་ཁྱད་ཆོས་ཤིང་གཤགས་ལ་མེ་སྦར་བ་ལྟ་བུ་དང་། མཻ་ཏྲི་པའི་དབུ་ཞྭ། ནཱ་རོའི་ན་བཟའ་རྣམས་གནང་ནས། གཡའ་ཁྲོད་དང་གངས་ཁྲོད་འགྲིམས་ལ་ལྟ་སྒོམ་ཉམས་སུ་ལོངས་ཤིག་གསུངས། དེ་ནས་གྲྭ་པ་ཀུན་འཛོམ་པའི་ཚོགས་འཁོར་ཞིག་མཛད་པའི་གྲལ་དུ། ངས་ཁྱེད་རྣམས་ལ་རྟེན་འབྲེལ་དང་མཐུན་པའི་གདམས་ངག་བྱིན་པ་བཞིན། སློབ་བརྒྱུད་རྣམས་ལ་ཡང་གཙོ་བོར་རང་རང་གི་གདམས་ངག་གི་ཕན་ཐོགས་
(༡༡༥)དང་འཕྲིན་ལས་རྒྱ་ཆེར་འབྱུང་བ་ཡིན་ནོ། །ད་མདོ་སྡེ་འབུམ་ནི་མེད། ངའི་བཀའ་བརྒྱུད་ཀྱི་ཕ་རབས་ཀྱི་གདམས་ངག་དང་བྱིན་རླབས་ཀྱི་རྒྱུད་པ་ཁྱེད་རྣམས་ལ་གཏད་པ་ཡིན་པས་འབུངས་ཤིག འགྲོ་དོན་འཕེལ་བར་ཡོང་ངོ་གསུངས། དེ་ནས་བུ་ཆེན་རྣམས་རང་རང་གི་གདན་སར་ཕེབས། ང་ལ་བླ་མའི་ཞལ་ནས། ཁྱོད་རང་ལོ་ཤས་ངའི་སར་སྡོད། དབང་དང་གདམས་ངག་ཁྱད་པར་བ་ཡང་སྟེར་རྒྱུ་ཡོད། ཉམས་རྟོགས་ཀྱང་བླ་མའི་དྲུང་དུ་གཏན་ལ་འབེབས་དགོས་པ་ཡིན་པས། མཚམས་དམ་པོ་ལ་སྡོད་གསུངས། ནཱ་རོས་ལུང་བསྟན་པའི་ཟངས་ཕུག་གི་ཕུག་པར་བསྡད་པས། ཡབ་ཡུམ་གཉིས་ཀྱིས་གཏོར་ཕོར་རེ་བཏང་བའི་ཚོགས་སྐལ་ཚུན་གནང་སྟེ། ཐུགས་ཤིན་ཏུ་བརྩེ་བར་མཛད་གསུངས། བླ་མའི་དྲུང་དུ་བསྒོམས་པས་ཉམས་རྟོགས་ཀྱི་མྱུ་གུ་འཁྲུངས་པའི་མཛད་པ་སྟེ་བཞི་པའོ། །
(༡༡༦)ལྔ་པ། རང་ཡུལ་དུ་ཕེབས་པ། ཡང་རས་ཆུང་པས་རྗེ་བཙུན་བླ་མ་མར་པའི་དྲུང་ནས་འབྱོན་པ་དེ་རྐྱེན་ཇི་ལྟ་བུ་ཞིག་གིས་བསྐུལ། མར་པའི་གསུང་གིས་ལོ་ཤས་སྡོད་གསུང་བ་འདུག་པ་ཅི་ཙམ་བཞུགས་ཞུས་པས། རྗེ་བཙུན་གྱི་ཞལ་ནས། ང་དེར་ལོ་མང་མ་བསྡད། ང་ཡུལ་དུ་འོང་བའི་རྐྱེན། ང་མཚམས་ཀྱི་ངང་ནས་དགེ་སྦྱོར་དམར་བར་ཡོད་ཅིང་། སྔར་ཡིན་ན་གཉིད་དུ་ཡེ་མི་འགྲོ་བ་ལ། ལན་ཞིག་ཐོ་རངས་གཉིད་དུ་སོང་བའི་རྨི་ལམ་ན། ཕ་ཡུལ་སྐྱ་རྔའི་རྩ་ལ་སླེབས་པས། ཁང་བ་ཀ་བཞི་གདུང་བརྒྱད་དེ་བོང་རྒན་གྱི་རྣ་བ་བཞིན་རལ། ནང་གི་ནོར་དམ་ཆོས་དཀོན་མཆོག་བརྩེགས་པ་དེ་ཐིགས་པས་གདུངས། ཕྱིའི་ཞིང་འོར་མ་གྲུ་གསུམ་དེ་འཇག་སྐྱས་འཕྱུར། ཉེ་དུ་མ་རྒན་མོ་དེ་ཤི། སྲིང་མོ་དེ་སྤྲང་བ་ལ་འཁྱར་བ་རྣམས་བྱུང་བས། ཉེ་དུ་དགྲར་ལངས་པའི་སྟབས་ཀྱིས་མ་བུ་རྣམས་ཆུང་ངུ་ནས་སྡུག་གྱེས་ལ་སོང་ཞིང་ཁ་མ་ཕྲད་པ་ལ་བརྟེན་ནས། སྐྱོ་བ་ལ་ཚད་མེད་པ་ཞིག་བྱུང་སྟེ། ཨ་མ་དང་སྲིང་མོའི་མིང་ནས་བོས་ནས་མང་པོ་ངུས་པ་ཞིག་རྨིས་པ་ལས། གཉིད་སད་པ་དང་སྔས་མཆི་མས་བངས་འདུག བསམ་མནོ་ཞིག་བཏང་བས། ཨ་མ་དྲན་དུ་རང་སོང་། ངུ་མང་པོ་ཤོར་ཏེ་ད་མ་རྒན་མོ་དང་ཅིས་ཀྱང་འཕྲད་པ་བྱེད་བསམ་ནམ་ལངས་པ་དང་། བུག་
(༡༡༧)སྒོ་བཤིགས་ནས་བླ་མའི་དྲུང་དུ་ཞུར་ཕྱིན་པས། བླ་མ་མནལ་དུ་སོང་བ་དང་ཐུག་བྱུང་། དེར་དབུའི་སྔས་མགོར་དམན་ཆ་བཟུང་བའི་ལུས་ངག་གིས། རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྤྲང་ལན་ཞིག་ཡུལ་དུ་གཏོང་བར་ཞུ། །ཡུལ་ངན་རྩ་ཡི་ཀོ་རོན་ན། །ཉེ་བ་དགྲར་ལངས་ཀྱི་མ་བུ་གསུམ། །སོ་སོར་གྱེས་ནས་ལོ་འགའ་ཐལ། །ད་སེམས་ལ་འཕྲེང་སྟེ་བཟོད་གླགས་མེད། །ལན་ཞིག་འཕྲད་དུ་གཏོང་བར་ཞུ། །ཕྱིན་ཆད་དྲུང་དུ་མྱུར་དུ་འོང་། །ཞེས་གསོལ་བ་བཏབ་པས། བླ་མ་མནལ་སད་པ་དང་། མཁར་ལ་ཉི་མ་ཤར་ཏེ། དབུ་སྔས་ཀྱི་སྐར་ཁུང་ནས་དབུ་ལ་ཉི་མ་ཤར་བ་དང་། ཡུམ་གསོལ་འདྲེན་དུ་བྱུང་བ་རྣམས་དུས་གཅིག་ཏུ་འཛོམས་པས། བླ་མའི་ཞལ་ནས། བུ་ཁྱོད་མཚམས་དམ་པོ་ལ་ཧར་འདོན་བྱས་འོང་བའི་རྒྱུ་མཚན་ཅི་ཡིན། བདུད་དང་བར་ཆད་འཇུག་པའི་རྒྱུ་ཡིན། ད་ལྟ་རང་ལོག་ལ་མཚམས་ལ་སྡོད་གསུང་བ་ལ། རྨི་ལམ་དུ་བྱུང་ཚུལ་དང་སླར་ཡང་ཞུ་བ་འདི་ལྟར་ཕུལ་ལོ། །རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྤྲང་ལན་ཞིག་ཡུལ་དུ་གཏོང་བར་ཞུ། །ཡུལ་སྐྱ་རྔ་རྩ་ཡི་ཀོ་རོན་ན། །ནོར་ལུས་པའི་དངོས་པོ་མ་མཆིས་ཏེ། །སེམས་འཕྲེང་བར་བྱ་བ་འདི་འདྲ་བདོག ཁང་བ་ཀ་བཞི་གདུང་བརྒྱད་དེ། །དུས་ད་ལྟ་འགྱེལ་ལམ་མ་འགྱེལ་བལྟ། །དམ་ཆོས་དཀོན་མཆོག་བརྩེགས་པ་དེ། །ད་ལྟ་ཐིགས་པས་ཨེ་གདུངས་བལྟ། །བཤོས་ཞིང་འོར་མ་གྲུ་གསུམ་དེ། །ད་ལྟ་འཇག་སྐྱས་ཨེ་འཕྱུར་བལྟ། །མ་རྒན་ལུས་ཀྱི་སྒྲོམ་བུ་དེ། །ད་ལྟ་སྐུ་ཁམས་ཨེ་བཟང་བལྟ། །སྲིང་མོ་པེ་
(༡༡༨)ཏ་མགོན་སྐྱིད་དེ། །ད་ལྟ་འཁྱར་རམ་མ་འཁྱར་བལྟ། །ལས་ཀྱིས་བསྐོས་པའི་མཛེས་སེ་དེ། །ད་ལྟ་ཁྱིམ་སོ་ཨེ་ཟིན་བལྟ། །ཁྱིམ་མཚེས་ཨ་ཁུ་གཡུང་རྒྱལ་དེ། །ད་ལྟ་འདུག་གམ་མི་འདུག་བལྟ། །ཨ་ནེ་བདུད་མོ་སྟག་འགྲན་དེ། །ད་ལྟ་ཤི་འམ་མ་ཤི་བལྟ། །མཆོད་གནས་དཀོན་མཆོག་ལྷ་འབུམ་དེ། །ད་ལྟ་བཞུགས་སམ་མི་བཞུགས་བལྟ། །ཁྱད་པར་ལུས་སེམས་བསྐྱེད་པའི་མ། །དྲན་ནས་བཟོད་གླགས་མི་གདའ་བས། །ལན་གཅིག་ཡུལ་དུ་གཏོང་བར་ཞུ། །ཞབས་ཕྱིར་མྱུར་དུ་འོང་བར་ཞུ། །ཞུས་པས། བླ་མའི་ཞལ་ནས། བུ་ཁོ་དེ། ཁྱོད་དང་པོར་ངའི་སར་སླེབས་པའི་ཚེ། ཡུལ་དང་ཉེ་འཁོར་འཕྲེང་དགོས་མེད་པའི་གཏམ་ཞིག་འདུག་པ་ལ། ད་ཡོད་དོ་མང་པོ་རང་འདུག་སྟེ། ཡུལ་དུ་ཕྱིན་རུང་ཨ་མ་དང་འཕྲད་པ་དཀའ། གཞན་རྣམས་ཀྱང་ཐད་ཀར་ཨེ་འོང་མི་ཤེས། །དབུས་གཙང་གི་ཕྱོགས་སུ་ཡང་ལོ་འགའ་སོང་འདུག འདིར་ཡང་ལོ་མང་པོ་རང་སོང་། ད་འགྲོ་ནའང་བཏང་བས་ཆོག་སྟེ། ཕྱིས་འདིར་འོང་རྩིས་བྱས་རུང་། ཁྱོད་འདིར་ཞུ་བ་འབུལ་དུ་འོངས་པ་དང་། ང་གཉིད་དུ་སོང་བ་ཐུག་པ་དེ། རང་རེ་ཕ་བུ་ཚེ་འདིར་མི་འཕྲད་པའི་རྟེན་འབྲེལ་ཡིན། འོན་ཀྱང་མཁར་ལ་ཉི་མ་ཤར་བ་འདི། ཁྱོད་ཀྱིས་སངས་རྒྱས་ཀྱི་བསྟན་པ་ཉིན་མོར་བྱེད་པའི་རྟེན་འབྲེལ་ཡིན། ཁྱད་པར་ངའི་མགོ་ལ་ཉི་མ་ཤར་བ་འདི་སྒྲུབ་རྒྱུད་ཀྱི་བསྟན་པ་དར་རྒྱས་སུ་བྱེད་པའི་རྟེན་འབྲེལ་ཡིན། བདག་མེད་མས་ཚོགས་འཁོར་ཁྱེར་འོངས་པ་འདི། ཁྱོད་ཏིང་ངེ་འཛིན་གྱི་ཟས་ཀྱིས་འཚོ་བའི་རྟེན་
(༡༡༩)འབྲེལ་ཡིན། ད་གཏོང་བ་ལས་འོས་མི་འདུག་པས། བདག་མེད་མ་མཆོད་པ་བཟང་པོ་ཞིག་ཤོམས་ཤིག་གསུངས། བླ་མས་དཀྱིལ་འཁོར་བཞེངས། ཡུམ་གྱིས་མཆོད་པ་བཤམས་ནས། མཁའ་འགྲོ་སྙན་བརྒྱུད་ཀྱི་སྨིན་ལམ་བརྡའི་དབང་དང་། གྲོལ་ལམ་གྱི་གདམས་ངག་གཞན་ལ་མ་གྲགས་པའི་ཆིག་རྒྱུད་རྣམས་རྫོགས་པར་གནང་ནས། འོ་ལགས་སོ། གདམས་ངག་འདི་རྣམས་ང་ལ་ཇོ་བོ་ནཱ་རོ་པས་ཁྱོད་རང་ལ་སྟེར་དགོས་པའི་ལུང་བསྟན་ཡོད་པས་བྱིན་པ་ཡིན། ཁྱོད་ཀྱིས་ཀྱང་མཁའ་འགྲོས་ལུང་བསྟན་པའི་སློབ་མ་ཐོག་མར་གང་བྱུང་བ་ཞིག་ལ་རྒྱུད་པ་བཅུ་གསུམ་མ་རྫོགས་ཀྱི་བར་དུ་ཆིག་རྒྱུད་ཀྱི་རྒྱས་ཐོབ་ལ་བྱིན་ཞིག གཞན་ཡང་གདམས་ངག་རྣམས་ཟས་ནོར་དང་ཚེ་འདིའི་ངོ་དགའི་ཕྱིར་དུ་བྱིན་ན་མཁའ་འགྲོའི་བཀའ་ཆད་འོང་བས་དམ་པར་གྱིས་ལ་ཉམས་སུ་ལོངས། སྐལ་ལྡན་གྱི་སློབ་མ་བྱུང་ན་ཟང་ཟིང་གི་འབུལ་བ་མེད་རུང་དབང་དང་གདམས་ངག་གིས་རྗེས་སུ་ཟུངས་ལ་བསྟན་པ་སྤེལ་ཅིག ཏཻ་ལོས་ཇོ་བོ་ནཱ་རོ་པ་ཚར་བཅད་པའམ། ངས་ཁྱོད་རང་ཚར་གཅོད་པ་ལྟར་བྱས་ན་བློ་དམན་རྣམས་ལ་ཕན་མི་ཐོགས་པས་དེ་ལུགས་ཀྱི་ཆོས་སྟོན་མཚམས་གྱིས། རྒྱ་གར་ན་ཆོས་འདིའི་ཆ་ལག་བཀའ་རྒྱ་ཅུང་ལྷོད་པ་ལུས་མེད་མཁའ་འགྲོའི་ཆོས་སྐོར་དགུ་ཡོད་པ་ལས། བཞི་ངས་ཁྱོད་རང་ལ་བསྟན་པ་ལྟར་ཡིན། ད་དུང་ལྔ་ཡོད་དེ་ང་རང་གི་རྒྱུད་པ་ཕྱིན་ནས་ནཱ་རོའི་བུ་རྒྱུད་ཅིག་ལ་ཞུས་ན་ལོངས་ཤིང་སེམས་ཅན་ལ་ཕན་ཐོགས་པ་ཡོད་པས། ཁྱོད་ཀྱིས་ཅི་ལོངས་གྱིས། ཁྱོད་ཀྱི་བསམ་པ་ལ་ང་ཟང་ཟིང་གི་འབུལ་བ་མེད་པས་གདམས་ངག་རྣམས་རྫོགས་པར་མ་བྱུང་ངམ་སྙམ་ན། ཟང་ཟིང་གི་
(༡༢༠)འབུལ་བ་རང་གིས་ང་མི་མགུ། ཁྱོད་ཀྱི་སྒྲུབ་པའི་མཆོད་པ་དང་སྙིང་རུས་ལ་མགུ་བ་ཡིན་པས་སྙིང་རུས་སྐྱེད་ལ་སྒྲུབ་པའི་རྒྱལ་མཚན་ཚུགས་ཤིག ངས་ཇོ་བོ་ནཱ་རོ་པའི་གདམས་ངག་རྣམས་ཀྱི་ནང་ནས་བུ་ཆེན་གཞན་རྣམས་ལ་མེད་པའི་ཁྱད་ཆོས། མཁའ་འགྲོ་སྙན་བརྒྱུད་ཀྱི་གདམས་ངག་འདི་ཁྱོད་ལ་མཆོག་ཏུ་བྱིན་པས་བུམ་པ་གང་བྱོའི་ཚུལ་དུ་ཡོད་དོ། །ངའི་ཚིག་རྣམས་ལ་རྫུན་དང་གདམས་ངག་རྣམས་ལ་ལྷག་ཆད་ཡོད་རི་ཞེས་བླ་མས་ཡི་དམ་དཔང་དུ་བཙུགས་པའི་དབུ་སྙུང་བཞེས་ནས་མགུར་འདི་གསུངས་སོ། །ན་མོ་བཀའ་དྲིན་ཅན་ལ་གསོལ་བ་འདེབས། །བཀའ་དྲིན་ཅན་གོང་མའི་རྣམ་ཐར་ལ། །བསམས་ན་གདམས་ངག་དེ་ཉིད་རང་། །མང་པོ་ཐོབ་འདོད་གཡེང་བའི་རྒྱུ། །གནད་ཀྱི་གསུང་ངག་སྙིང་ལ་ཆོངས། །དེ་དེ་མང་ཡང་འདི་ཉིད་མེད། །སྡོང་བོ་མང་ཡང་འབྲས་བུ་མེད། །ཡོན་ཏན་ཡིན་ཡང་དོན་དམ་མིན། །དེ་འདྲ་བསླབས་ཀྱང་འདི་མཐོང་མེད། །བཤད་རྒྱུ་མང་ཡང་ཕན་རྒྱུ་མེད། །ཕན་སྙིང་ལ་ཐོགས་པ་དམ་པའི་ནོར། །ནོར་ཕྱུག་པོ་འདོད་ན་འདི་ལ་དྲིལ། །ཆོས་ཉོན་མོངས་འདུལ་བ་ཐབས་ཀྱི་ལམ། །ལམ་བཙན་ས་འཛིན་ན་འདི་ལ་དྲིལ། །སེམས་ཁོ་ཐག་ཆོད་པ་ཆོས་ཤེས་དཔོན། །དཔོན་བཟང་པོ་འདོད་ན་འདི་ལ་དྲིལ། །འཁོར་བ་ངུ་བྲོ་སྒྱིད་ལུག་སྐྱུར། །མི་མེད་ཀྱི་རྫ་བྲག་ཕ་ཡི་མཁར། །གྲོགས་མེད་གཅིག་པུ་ལྷ་ཡི་ཡུལ། །སེམས་ལ་སེམས་ཞོན་ཆད་མེད་རྟ། །རང་ལུས་དགོན་པ་ལྷ་ཡི་ཁང་། །ཡེངས་མེད་ཀྱི་དགེ་སྦྱོར་སྨན་གྱི་མཆོག །དོན་དང་ལྡན་པའི་སྐྱེས་བུ་ལ། །དོན་ལ་ཐོགས་མེད་ཀྱི་གདམས་ངག་བྱིན། །
(༡༢༡)ང་དང་གདམས་ངག་ཁྱོད་དང་གསུམ། །མ་རུལ་མ་སུངས་མ་སྐམ་པར། །བུ་ཡི་ལག་ཏུ་བཞག་པ་འདིས། །འབྲས་བུ་ལོ་འདབ་རྒྱས་པར་ཤོག །ཅེས་གསུངས་ནས། ཕྱག་ངའི་མགོ་ཐོག་ཏུ་བཞག་སྟེ། བུ་ཁྱོད་འགྲོ་བ་འདི་སེམས་ལ་ཤིན་ཏུ་གཅགས་པ་ཞིག་བྱུང་སྟེ། འདུས་བྱས་ཐམས་ཅད་འདིས་མཚོན་པ་ཡིན་པས་བྱ་ཐབས་མེད། འོན་ཀྱང་ཞག་འགའ་སྡོད། གདམས་ངག་རྣམས་ལ་བསམ་བློ་ཐོངས་ལ་དོགས་པ་རྣམས་ཆོད་གསུངས། དེར་ང་ཡང་བླ་མའི་བཀའ་བཞིན་ཞག་འགའ་བསྡད། གདམས་ངག་གི་སྒྲོ་འདོགས་རྣམས་ཆོད་པ་དང་། བླ་མའི་ཞལ་ནས། བདག་མེད་མ་ཚོགས་དང་མཆོད་པ་བཟང་པོ་ཞིག་ཤོམས་ཤིག ད་མི་ལ་འགྲོ་རན་པས་གཏོང་བ་ཡིན་ནོ་གསུངས། ཡུམ་གྱིས་བླ་མ་ཡི་དམ་ལ་མཆོད་པ། མཁའ་འགྲོ་ཆོས་སྐྱོང་ལ་གཏོར་མ། རྡོ་རྗེ་སྤུན་རྣམས་ལ་ཚོགས་འཁོར་བཟང་པོ་བཤམས་པའི་ཚོགས་གྲལ་དུ། བླ་མས་སྐུ་དགྱེས་པ་རྡོ་རྗེ། འཁོར་ལོ་བདེ་མཆོག གསང་བ་འདུས་པ་ལ་སོགས་ཏེ་ཡི་དམ་གྱི་སྐུ་དང་། རྡོ་རྗེ་དྲིལ་བུ། འཁོར་ལོ་རིན་པོ་ཆེ། པདྨ། རལ་གྲི་ལ་སོགས་ཏེ་ཕྱག་མཚན་དང་། ཨོཾ་ཨཱཿཧཱུྃ་དཀར་དམར་མཐིང་གསུམ་ལ་སོགས་ཏེ་ཡིག་འབྲུ་དང་། འོད་འཚེར་བའི་ཐིག་ལེར་སྣང་བ་དང་། གང་དུའང་མི་སྣང་བ་ལ་སོགས་ཏེ་དུ་མར་བསྟན་ནས། དེ་རྣམས་བཀོད་པ་ལུས་ཀྱི་རྫུ་འཕྲུལ་བྱ་བ་ཡིན་ཏེ། བྱུང་རྒྱལ་དུ་བསྟན་ཀྱང་དགོས་པ་ཆུང་། ད་ལན་མི་ལ་རས་པ་འགྲོ་བའི་རྫོངས་སུ་བསྟན་པ་ཡིན་གསུང་བ་ལ། བླ་མ་སངས་རྒྱས་དངོས་སུ་མཐོང་ནས་དགའ་སྤྲོ་དཔག་ཏུ་མེད་པ་ཞིག་བྱུང་སྟེ། ང་རང་བསྒོམས་ནས་རྫུ་འཕྲུལ་འདི་ལྟ་
(༡༢༢)བུ་ཐོབ་པར་བྱེད་དགོས་སྙམ་པ་བྱུང་། བླ་མའི་ཞལ་ནས་བུ་མཐོང་ངམ། ཡིད་ཆེས་སམ་གསུངས། མཐོང་ལགས། ཡིད་མི་ཆེས་པའི་རང་དབང་མི་གདའ་བས། བདག་རང་ཡང་བསྒོམས་ནས་འདི་འདྲ་བྱེད་དགོས་སྙམ་པ་བྱུང་ལགས་ཞུས་པས། བུ་དེ་ཡིན་ད་འགྲོ་ནའང་སོངས་ལ། ངས་ཁྱོད་ལ་ཆོས་རྣམས་སྒྱུ་མ་ལྟ་བུར་ངོ་སྤྲད་པས་དེ་བཞིན་དུ་ཉམས་སུ་ལོངས། གནས་གཡའ་ཁྲོད་གངས་ཁྲོད་ནགས་ཁྲོད་རྣམས་སྟེན། རི་ཁྲོད་རྣམས་ཀྱི་ནང་ནས་ཀྱང་ལ་སྟོད་རྒྱལ་གྱི་ཤྲཱི་རི་འདི་རྒྱ་གར་གྱི་གྲུབ་ཆེན་རྣམས་ཀྱིས་བྱིན་གྱིས་བརླབས་པའི་རི་ཡིན་པས་དེ་ལ་སྒོམས། གངས་ཏི་སེ་སངས་རྒྱས་ཀྱིས་ལུང་བསྟན་པའི་རི་བོ་གངས་ཅན་དང་འཁོར་ལོ་སྡོམ་པའི་ཕོ་བྲང་ཡིན་པས་དེ་ལ་སྒོམས། ལ་ཕྱི་གངས་ར་ཡུལ་ཉི་ཤུ་རྩ་བཞིའི་ཡ་གྱལ་གཽ་དཱ་ཝ་རི་ཡིན་པས་དེ་ལ་སྒོམས། མང་ཡུལ་གྱི་རི་བོ་དཔལ་འབར་དང་། བལ་ཡུལ་གྱི་ཡོལ་མོ་གངས་ར་མདོ་ཕལ་པོ་ཆེ་ནས་ལུང་བསྟན་པའི་གནས་ཡིན་པས་དེ་ལ་སྒོམས། བྲིན་གྱི་ཆུ་དབར་ཞིང་སྐྱོང་གི་མཁའ་འགྲོ་བཞུགས་ཤིང་འདུ་བའི་གནས་ཡིན་པས་དེ་ལ་སྒོམས། གཞན་ཡང་མི་མེད་ཀྱི་གནས་མཐུན་རྐྱེན་གང་འཛོམ་དུ་སྒོམས་ལ་སྒྲུབ་པའི་རྒྱལ་མཚན་ཚུགས་ཤིག ཤར་ཕྱོགས་ན་གནས་ཆེན་དི་ཝི་ཀོ་ཊི་དང་ཙཱ་རི་འབྲེལ་ནས་ཡོད་དེ། དེ་ད་ལྟ་ཞལ་འབྱེད་མ་རན། མ་འོངས་པ་ན་ཁྱོད་ཀྱི་བུ་རྒྱུད་ཀྱིས་འཛིན་པ་ཞིག་འོང་བ་ཡིན། ཁྱོད་རང་ལུང་བསྟན་པའི་གནས་དེ་རྣམས་སུ་སྒྲུབ་པ་གཙོ་བོར་ཐོན་ཅིག་སྒྲུབ་པ་ནུས་ན་བླ་མའི་ཞབས་ཏོག ཕ་མའི་དྲིན་ལན། སེམས་ཅན་གྱི་འགྲོ་དོན་རྣམས་དེ་ཀ་རང་གིས་གྲུབ་པ་ཡིན། སྒྲུབ་པ་མ་ནུས་ན་ཚེ་རིང་པོ་ལས་ངན་གསོག་ཆེ་བ་ལས་
(༡༢༣)མེད་པས། ཚེ་འདིའི་འདུན་ཐག་སྐྱུངས་ལ། ཚེ་འདིའི་དོན་དུ་གཉེར་བའི་མི་དང་ལབ་མ་བྱེད་པར་སྒྲུབ་པ་ལ་འབུངས་ཤིག་གསུངས། སྤྱན་ཆབ་ཉིལ་མཛད་ནས། བུ་ད་རང་རེ་ཕ་བུ་གཉིས་ཚེ་འདིར་མི་འཕྲད་པར་འདུག་པས། ངས་ཀྱང་ཁྱོད་མ་བརྗེད་པར་བྱེད། ཁྱོད་རང་ཡང་ང་མ་བརྗེད་པར་གྱིས། དེ་ལྟར་བྱས་པས་ཕྱི་མ་དག་པ་མཁའ་སྤྱོད་དུ་འཕྲད་པར་ཐེ་ཚོམ་མེད་པས་དགའ་བར་གྱིས། དུས་རེ་ཞིག་ན་རྩ་རླུང་གི་གེགས་ཤིག་འོང་བར་འདུག་པས་དེ་བྱུང་ཚེ་འདི་ལ་ལྟོས་དེ་བར་མ་ལྟ་གསུང་། ཐུམ་བྱས་པའི་ཤོག་དྲིལ་ལ་ཆའི་དམ་ཁ་སྦྱར་བ་ཞིག་གནང་། དེའི་དུས་ཀྱི་བླ་མའི་གསུང་རྣམས་ཤིན་ཏུ་སེམས་ལ་ཕན་ཞིང་ཡིད་ལ་འཇགས་པ་ཞིག་བྱུང་བས། ཕྱིས་གསུང་རེ་རེ་དྲན་པ་ཙམ་གྱིས་དགེ་སྦྱོར་ཤེད་ཇེ་ཆེ་ལ་སོང་། དེ་ནས་བླ་མའི་ཞལ་ནས་བདག་མེད་མ། ནངས་པར་མི་ལ་རྡོ་རྗེ་རྒྱལ་མཚན་འགྲོ་བའི་གྲབས་གྱིས། ཡིད་སྐྱོ་མོ་ཞིག་འོང་རུང་སྐྱེལ་མ་ལ་འགྲོ་དགོས་གསུངས། ང་ལ་ཁྱོད་རང་དོ་ནུབ་ངའི་སར་ཉོལ། ཕ་བུ་གླེང་མོ་བྱེད་པ་ཡིན་གསུངས། ང་ཡང་བླ་མའི་དྲུང་དུ་ཉལ་བས། དེར་ཡུམ་ཡང་ཕེབས་བྱུང་སྟེ། ཐུགས་སྐྱོ་བའི་ཉམས་མང་པོ་མཛད་ཅིང་བཤུམས་པས། བླ་མའི་ཞལ་ནས། བདག་མེད་མ་ངུ་དོན་ག་ལ་ཡོད། ཁོ་བླ་མའི་དྲུང་དུ་སྙན་བརྒྱུད་ཀྱི་གདམས་ངག་ཟབ་མོ་རྣམས་ཐོབ་ནས། རི་ཁྲོད་ལ་སྒོམ་དུ་འགྲོ་བ་ལ་ངུ་ཅི་དགོས། དེ་བས་སྤྱིར་སེམས་ཅན་རྣམས་སངས་རྒྱས་ཡིན་པ་ལ་རང་གིས་རང་མ་རིག་པར་སྡུག་བསྔལ་གྱི་ངང་ལ་འཆི་བ་རྣམས་དང་། ཁྱད་པར་མི་ལུས་ཐོབ་ནས་ཆོས་མེད་དུ་འཆི་བ་འདི་རྣམས་ལ་
(༡༢༤)བསམས་ན་ངུ་བྲོ། དེ་ལ་ངུ་ན་ཁྱོད་ལ་རྟག་ཏུ་ངུ་དགོས་པར་འདུག་གསུངས། ཡུམ་གྱི་ཞལ་ནས། དེ་དག་ལགས་ཏེ། དེ་ལྟ་བུའི་སྙིང་རྗེ་རྟག་ཏུ་འོང་བ་དཀའ་མོར་གདའ། ད་ལན་རང་ལས་སྐྱེས་པའི་བུ་འཁོར་འདས་གཉིས་ཀ་ལ་བློ་གྲོས་རྒྱས་ཤིང་། རང་གཞན་གཉིས་ཀའི་དོན་གྲུབ་པ་དེ་དང་ཤི་བྲལ་བྱུང་། དད་བརྩོན་ཤེས་རབ་སྙིང་རྗེར་ལྡན་པ། གང་ཟེར་གྱི་ཁ་ལ་ཉན་པའི་བུ་གང་ནས་བསམས་རུང་སྐྱོན་མེད་པ་འདི་དང་གསོན་བྲལ་བྱུང་བས་སེམས་སྐྱོ་བ་ལ་བཟོད་ཐབས་རང་མི་གདའ་ཞེས་ཞུས་ནས་ཆེར་བཤུམས་པས། ང་ནི་མཆི་མས་བརྣངས་བརྣངས་པར་ཡོད། བླ་མ་ཡང་སྤྱན་ཆབ་བསིལ་བས། དཔོན་སློབ་ཀུན་གཅིག་ལ་གཅིག་འཕྲེང་ཕྱིར་ཐུགས་སྐྱོ་སྟེ་སྤྱན་ཆབ་ཤོར་བས་གསུང་གླེང་མ་བྱུང་། ནངས་པར་ནམ་ལངས་པ་དང་། ཚོགས་ཆས་བཟང་པོ་བསྣམས་ནས་དཔོན་སློབ་བཅུ་གསུམ་ཙམ་གྱིས། ཚ་ལམ་གཅིག་གི་བར་སྐྱེལ་མ་མཛད་པའི་ལམ་བར་ལ་ཀུན་གྱིས་ཐུགས་འཕྲེང་བའི་སྐྱོ་ཤས། གསུང་འཕྲེང་བའི་སྙིང་གཏམ། སྐུ་འཕྲེང་བའི་རྣམ་འགྱུར་མང་པོ་མཛད་ཅིང་བྱོན། དེ་ནས་ཆོས་ལ་སྒང་ཞེས་བྱ་བ་ཕྱོགས་ཀུན་གསལ་བའི་ལ་ཁ་ཞིག་ཏུ་ཚོགས་འཁོར་བཟང་པོ་མཛད་པའི་གྲལ་དུ། བླ་མས་ངའི་ལག་པ་ཕྱག་གིས་བཟུང་སྟེ། བུ་ཁྱོད་དབུས་གཙང་ཕྱོགས་སུ་འགྲོ་བ་ལ། གཙང་སིལ་མ་ལ་ལ་སོགས་པ་འདི་ཀུན་ཇག་ཉེན་ཆེན་པོ་ཡོད་པས། གྲོགས་བཟང་པོ་ཞིག་དང་བསྡེབས་ནས་གཏོང་སྙམ་པ་ཡིན་ཏེ། གཅིག་པུར་འགྲོ་བ་ཞིག་ཤར་བྱུང་། འོན་ཀྱང་ངས་བླ་མ་ཡི་དམ་ལ་གསོལ་བ་གདབ། མཁའ་འགྲོ་ཆོས་
(༡༢༥)སྐྱོང་ལ་བཀའ་བསྒོ། བུའི་ལམ་བར་ལ་བར་ཆད་མི་འོང་བ་བྱེད། ཁྱོད་རང་ཡང་སྤྱོད་ལམ་གཟབ་པ་གལ་ཆེ། ད་ཁྱོད་འདི་ནས་བླ་མ་རྔོག་པའི་དྲུང་དུ་སོངས་ལ། གདམས་ངག་རྣམས་ལ་གོ་བསྡུར་གྱིས་ལ་ཁྱད་པར་ཅི་འདུག་ལྟོས། དེ་ནས་ཡར་མྱུར་དུ་སོངས་ལ། ཡུལ་དུའང་ཞག་བདུན་ལས་མང་བ་མ་སྡོད་པར། རི་ཁྲོད་ལ་སྒྲུབ་པ་གཙོ་བོར་ཐོན་ཅིག རང་གཞན་ཀུན་གྱི་དོན་ཡིན་ནོ་གསུང་བ་ལ། ངས་ཞུ་བ་གཙང་ལ་ཡར་འགྲོའི་གླུ་འདི་ཕུལ་ལོ། །རྗེ་མི་བསྐྱོད་ཀྱི་ངོ་བོ་རྡོ་རྗེ་འཆང་། །སྤྲང་ལན་ཞིག་གཙང་ཕྱོགས་ཡར་ལ་འགྲོ། །འབངས་ལན་ཞིག་ཡུལ་དུ་འགྲོ་བ་ལ། །ཕ་བླ་མ་རྗེ་ཡི་བཀའ་དྲིན་གྱིས། །གཙང་སིལ་མ་ལ་ཡི་ལ་རྩེ་ན། །བརྟན་མ་བཅུ་གཉིས་ཀྱི་བསུ་བ་ཡོད། །རྗེ་བྱིན་རླབས་ཅན་ལ་གསོལ་བ་འདེབས། །རྒྱབ་རྟེན་དཀོན་མཆོག་གསུམ་ལ་འཆོལ། །གནས་གསུམ་མཁའ་འགྲོའི་སྐྱེལ་མ་ཡོད། །གྲོགས་བྱང་ཆུབ་སེམས་དང་འགྲོགས་ནས་འགྲོ། །བསུ་མར་ལྷ་སྲིན་སྡེ་བརྒྱད་ཡོད། །སྡང་བ་དགྲ་ཡི་འཇིགས་དང་བྲལ། །འོན་ཀྱང་ཞུ་བ་འབུལ་བ་ལ། །འདི་ཕྱི་གཉིས་ཀྱི་སྐྱེལ་བསུ་ཞུ། །བར་ཆད་རྐྱེན་གྱི་བཟློག་པ་ཞུ། །ལུས་ངག་སེམས་ལ་བསྲུང་བ་ཞུ། །སྨོན་ལམ་ཐུགས་ཁུར་རྟེན་འབྲེལ་ཞུ། །ཐུགས་རྗེ་ནུས་པའི་དབང་བསྐུར་ཞུ། །རྒྱུད་ལུང་མན་ངག་གི་རྒྱབ་རྟེན་ཞུ། །ཚེ་རིང་ནད་མེད་ཀྱི་བཀྲ་ཤིས་ཞུ། །སྤྲང་པོའི་སྐྱིད་སྡུག་ཁྱེད་རང་མཁྱེན། །རི་ཁྲོད་ཐུབ་པར་བྱིན་གྱིས་རློབས། །ཞེས་ཞུས། བླ་མའི་ཞལ་ནས། བུ་དེ་རྣམས་ཡིན། ཕ་རྒན་ངས་ཁྱོད་རང་ལ་
(༡༢༦)འཆད་པའི་སྙིང་གཏམ་གྱི་ཐ་མ་འདི་རྣམས་མ་བརྗེད་པར་སེམས་ལ་ཆོངས་ཤིག་གསུངས། ཕྱག་ངའི་མགོ་ཐོག་ཏུ་བཞག་ནས་མགུར་འདི་གསུངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །ལས་ཅན་ཆོས་དང་མཐུན་པའི་བུ། །ཆོས་སྐུ་སངས་རྒྱས་གྲུབ་པར་ཤོག །ངག་རྡོ་རྗེའི་བཟླས་པ་བདུད་རྩིའི་རོས། །རྟེན་འབྲེལ་ལོངས་སྐུར་གྲུབ་པར་ཤོག །སེམས་རྩ་བ་བྱང་ཆུབ་སྡོང་པོ་ལ། །སྤྲུལ་སྐུའི་ལོ་འདབ་རྒྱས་པར་ཤོག །བླ་མའི་བཀའ་ཚིག་རྡོ་རྗེའི་གསུང་། །སྙིང་ལ་བརྗེད་མེད་གནས་པར་ཤོག །ཡི་དམ་མཁའ་འགྲོའི་བྱིན་རླབས་དེ། །སྲོག་གི་རྩ་བར་གནས་པར་ཤོག །ཆོས་སྐྱོང་སྲུང་མའི་རྒྱབ་རྟེན་དེས། །འབྲལ་བ་མེད་པར་སྐྱོང་བར་ཤོག །རྟེན་འབྲེལ་ཟབ་མོའི་སྨོན་ལམ་དེ། །མྱུར་བ་ཉིད་དུ་གྲུབ་པར་ཤོག །ཆོས་མཛད་ཀུན་གྱི་ཐུགས་རྗེ་དེས། །དུས་གསུམ་ཀུན་ཏུ་འཛིན་པར་ཤོག །གཙང་སིལ་མ་ལ་ཡི་ལ་ཐོག་ཏུ། །བརྟན་མ་བཅུ་གཉིས་ཀྱི་བསུ་མ་ཡོད། །སང་ཉིན་འགྲོ་བའི་ལམ་བར་ལ། །དཔའ་བོ་མཁའ་འགྲོའི་སྐྱེལ་མ་ཡོད། །ཕ་ཡུལ་ཞེན་པའི་མཁར་ཞིང་ན། །མི་རྟག་སྒྱུ་མའི་སློབ་དཔོན་ཡོད། །ཨ་ནེ་སྲིང་མོའི་ཉེ་འཁོར་ལ། །སྒྱུ་མ་ཞིག་པའི་སློབ་དཔོན་ཡོད། །མི་མེད་ལུང་པའི་བྲག་ཕུག་ན། །འཁོར་འདས་བརྗེ་བའི་ཚོང་འདུས་ཡོད། །སྙིང་རུས་ལུས་ཀྱི་དགོན་པ་ན། །ལྷ་བདེ་གཤེགས་འདུས་པའི་མཆོད་ཁང་ཡོད། །ནད་མེད་ཟ་ཡི་ཚོགས་འཁོར་ལ། །མཁའ་འགྲོ་མཉེས་པའི་བདུད་རྩི་ཡོད། །འཕྲུལ་འཁོར་གནད་ཀྱི་ཁ་བསྒྱུར་ལ། །འབྲས་རིན་ཆེན་སྐྱེ་བའི་
(༡༢༧)སོ་ནམ་ཡོད། །ཡུལ་མི་རྩིས་ཆུང་བའི་རང་ཡུལ་དེར། །འཕྲལ་གཡེང་བ་མེད་པའི་དགེ་སྦྱོར་ཡོད། །མཚམས་དམ་པོ་མི་མེད་ཁྱི་མེད་ན། །རྟགས་མྱུར་དུ་མཐོང་བའི་སྒྲོན་མེ་ཡོད། །ཟས་དཀོར་ཟས་མེད་པའི་རང་ཟས་ལ། །བདེ་བ་ལྷ་ཡི་ཕམ་ཕབས་ཡོད། །གྲིབ་མེད་ལྷ་ཡི་གཞལ་ཡས་ན། །རང་དོན་གྲུབ་པའི་ལྟད་མོ་ཡོད། །ངོ་ལྐོག་མེད་པའི་ལྷ་ཆོས་ལ། །དམ་ཚིག་གཙང་མའི་འཕྲིན་ལས་ཡོད། །བཀའ་བཞིན་སྒྲུབ་པའི་སོ་ནམ་ལ། །དངོས་གྲུབ་ཀུན་གྱི་གཏེར་ཁ་ཡོད། །དམ་ཆོས་མཁའ་འགྲོའི་སྲོག་སྙིང་ལ། །འཁོར་འདས་གྱེས་པའི་སོ་མཚམས་ཡོད། །མར་པ་ལོ་ཙཱའི་བུ་རྒྱུད་ལ། །གཏམ་སྙན་མང་པོའི་འོང་སྒོ་ཡོད། །མི་ལ་རས་པའི་སྙིང་རུས་ལ། །སངས་རྒྱས་བསྟན་པའི་སྲོག་ཤིང་ཡོད། །སྲོག་ཤིང་འཛིན་པའི་སྐྱེས་བུ་ལ། །རྒྱུད་པ་བཟང་པོའི་བཀྲ་ཤིས་ཤོག །བཀའ་བརྒྱུད་བླ་མའི་བཀྲ་ཤིས་ཤོག །ཡི་དམ་བཟང་པོའི་བཀྲ་ཤིས་ཤོག །བདེ་དགྱེས་གསང་གསུམ་བཀྲ་ཤིས་ཤོག །དམ་ཆོས་བཟང་པོའི་བཀྲ་ཤིས་ཤོག །མཁའ་འགྲོའི་སྲོག་སྙིང་བཀྲ་ཤིས་ཤོག །མཁའ་འགྲོ་བཟང་པོའི་བཀྲ་ཤིས་ཤོག །གནས་གསུམ་མཁའ་འགྲོའི་བཀྲ་ཤིས་ཤོག །ཆོས་སྐྱོང་བཟང་པོའི་བཀྲ་ཤིས་ཤོག དུུད་སོལ་ལྷ་མོའི་བཀྲ་ཤིས་ཤོག །བུ་སློབ་བཟང་པོའི་བཀྲ་ཤིས་ཤོག །བཀའ་བཞིན་སྒྲུབ་པའི་བཀྲ་ཤིས་ཤོག །བརྒྱུད་ནས་བརྒྱུད་བཅས་བཀྲ་ཤིས་ཤོག །བཀྲ་ཤིས་མི་འགྱུར་བརྟན་པར་ཤོག །དོན་དེ་དག་མ་བརྗེད་ཉམས་སུ་ལོངས། །ཞེས་གསུང་ཞིང་དགྱེས་དགྱེས་མཛད། དེ་ནས་ཡུམ་གྱིས་ལམ་ཆས་བཟང་པོ་དང་གོས་ལྷམ་སོ་མ་རྣམས་གནང་
(༡༢༨)སྟེ། བུ་འདི་རྣམས་ཟང་ཟིང་གི་རྫོངས་མཚོན་པ་ཙམ་ཡིན། འདི་འོ་ཅག་མ་བུ་གཉིས་ཀྱི་ཚེ་འདིའི་འབྲེལ་ཐག་གི་མཇུག་མ་གྱིས། བུ་དགེ་ལེགས་ཕུན་ཚོགས་ཀྱི་ངང་ནས་བཞུད་པར་ཞུ། ཕྱི་མ་ཨུ་རྒྱན་མཁའ་སྤྱོད་དུ་མཇལ་བའི་སྨོན་ལམ་འདེབས། ཆོས་ཀྱི་རྫོངས་ལ་ཨ་མའི་སྙིང་གཏམ་འདི་རྣམས་ཀྱང་མ་བརྗེད་པ་གྱིས་ཤིག་གསུངས། ཀ་པཱ་ལ་བདུད་རྩིས་བཀང་བའི་སྣོད་བཅུད་དང་བཅས་པ་གནང་སྟེ། ཡུམ་གྱིས་མགུར་འདི་བཞེས་སོ། །དྲིན་ཅན་མར་པའི་ཞབས་ལ་འདུད། །བུ་སྙིང་རུས་ཅན་གྱི་སྡུག་བསྲན་ཅན། །ཕྱི་ཐག་རིང་ཞིང་ངང་རིང་པོ། །སྐལ་བ་ཅན་གྱི་བུ་ཁྱོད་ནི། །བླ་མའི་བདུད་རྩི་ཡེ་ཤེས་ཆང་། །ངོམས་པར་འཐུང་ལ་བཞུད་པར་ཞུ། །ཕྱི་མ་དག་པའི་ཞིང་ཁམས་སུ། །ངོ་ཤེས་བཞིན་དུ་འཕྲད་པར་སྨོན། །ཕ་དང་མ་གཉིས་མ་བརྗེད་པར། །གསོལ་བ་ཡང་ཡང་འོ་དོད་བོས། །སྙིང་ལ་ཕན་པའི་གདམས་ངག་ཟས། །འགྲངས་པར་ཟ་ཞིང་བཞུད་པར་ཞུ། །ཕྱི་མ་དག་པའི་ཞིང་ཁམས་སུ། །ངོ་ཤེས་བཞིན་དུ་འཕྲད་པར་སྨོན། །དྲིན་ཅན་ཕ་མ་མ་བརྗེད་པར། །བཀའ་དྲིན་སེམས་ཤིང་སྙིང་རུས་མཛོད། །མཁའ་འགྲོའི་ཁ་རླངས་ཟབ་མོའི་གོས། །དྲོ་བར་གྱོན་ཞིང་བཞུད་པར་ཞུ། །ཕྱི་མ་དག་པའི་ཞིང་ཁམས་སུ། །ངོ་ཤེས་བཞིན་དུ་འཕྲད་པར་སྨོན། །མ་ནུས་སེམས་ཅན་མ་བརྗེད་པར། །རང་སེམས་བྱང་ཆུབ་ལམ་ལ་ཆུག །ཐེག་ཆེན་སེམས་བསྐྱེད་བསྟན་པའི་ཁུར། །ཆེ་བར་སྣོམས་ལ་བཞུད་པར་ཞུ། །ཕྱི་མ་དག་པའི་ཞིང་ཁམས་སུ། །ངོ་ཤེས་བཞིན་དུ་འཕྲད་པར་སྨོན། །སྐལ་བ་བཟང་མོའི་བདག་མེད་མས། །
(༡༢༩)བུ་ལ་སྙིང་གཏམ་བསྐུལ་བ་རྣམས། །བུས་ཀྱང་མ་བརྗེད་སྙིང་ལ་ཟུངས། །མས་ཀྱང་ཡིད་ལ་ཏུར་རེ་བྱེད། །སེམས་ཡིད་མཐུན་པའི་མ་བུ་གཉིས། །ཕྱི་མ་དག་པའི་ཞིང་ཁམས་སུ། །ངོ་ཤེས་བཞིན་དུ་འཕྲད་པར་སྨོན། །སྨོན་པ་བཞིན་དུ་འགྲུབ་པར་ཤོག །དྲིན་ལན་ཆོས་ཀྱིས་འཁོར་བར་ཤོག །ཅེས་གསུང་ཞིང་སྤྱན་ཆབ་མང་པོ་བསིལ། དེར་ཚོགས་པ་ཀུན་སྤྱན་ཆབ་བསིལ་ཞིང་ཐུགས་སྐྱོ་བའི་རྣམ་འགྱུར་མང་པོ་མཛད་ཅིང་གདའ། ངས་ཀྱང་ཡབ་ཡུམ་གཉིས་ལ་ཕྱི་ཕྱག་ཕུལ་ཞབས་སྤྱི་བོར་བླངས། དབང་ཞུས་སྨོན་ལམ་བཏབ་ནས། ཇི་སྲིད་བླ་མའི་ཞལ་རས་མ་མཐོང་གི་བར་ལ་ཕྱི་འགྲོས་ཀྱིས་འོངས་པས། འཁོར་བཅས་ཀུན་སྤྱན་ཆབ་ཉི་ལེ་ང་ལ་གཟིགས་པ་མཐོང་བས་འོང་མི་ཕོད་པ་ཙམ་པ་ཞིག་བྱུང་། དེ་ནས་བླ་མ་ཡབ་ཡུམ་མི་མཐོང་བ་དང་ཐད་སོར་ཕྱིན་ནས་ལུང་པ་ཞིག་བརྒལ་ཏེ་ཕྱི་མིག་ཅིག་བལྟས་པས། བླ་མ་འཁོར་བཅས་ལ་ཁ་དེ་ཀ་ན་སྨུག་ཕུང་ངེ་བཞུགས་འདུག་པས། སེམས་འཕྲེང་དྲགས་ལོག་གམ་སྙམ་པའི་ངང་ནས། ཡང་བསམ་མནོ་ཞིག་བཏང་བས། གདམས་ངག་རྣམས་ནི་རྫོགས་པར་ཐོབ། ཆོས་མིན་པའི་ལས་ནི་གང་དུའང་མི་བྱེད། བླ་མ་ནི་འབྲལ་མེད་དུ་གཙུག་ཏུ་བསྒོམས་པས་ཆོག་ཅིང་། ཕྱི་མ་དག་པའི་ཞིང་དུ་མཇལ་བའི་ཞལ་བཞེས་བཟང་པོ་ཡང་ཡོད། རེ་ཞིག་ལུས་སེམས་བསྐྱེད་པའི་མ་དང་འཕྲད་པར་བྱས་ནས་ཡང་བླ་མའི་དྲུང་དུ་འོངས་པས་ཆོག་སྙམ། ཡིད་སྐྱོ་ཆོང་ངེ་བ་ཞིག་ལ་ལམ་དུ་ཞུགས་ནས། བླ་མ་རྔོག་པའི་དྲུང་དུ་ཕྱིན། གདམས་
(༡༣༠)ངག་རྣམས་གོ་བསྡུར་བས། རྒྱུད་ཀྱི་བཤད་པ་ལ་ཁོང་ལྷག་པར་འདུགཉམས་ལེན་ལ་ང་རང་ཞན་རྒྱུ་མི་འདུག ཁྱད་པར་མཁའ་འགྲོ་སྙན་བརྒྱུད་ཀྱིས་ང་རང་ལྷག་པར་འདུག དེ་ནས་ཕྱག་བྱས་སྨོན་ལམ་བཏབ་ནས་ང་རང་གི་ཡུལ་དུ་འོངས་པས། ཞག་གསུམ་ལ་སླེབས་ཏེ། རླུང་གི་ནུས་པ་ཡང་དགའ་རབ་ཡིན་སྙམ་པའི་རང་མཐོང་བྱུང་གསུངས། གདམས་ངག་སྤྱི་ལ་རང་བྱན་ཚུད་ནས་མནལ་ལམ་གྱི་བརྡས་བསྐུལ་བས། ཆིག་རྒྱུད་ཀྱི་གདམས་ངག་ཐོབ་སྟེ། བླ་མའི་དྲུང་ནས་རང་ཡུལ་དུ་ཕེབས་པའི་མཛད་པ་སྟེ་ལྔ་པའོ། །
(༡༣༡)དྲུག་པ། སྒྲུབ་པ་ལ་ཡི་དམ་བཅས་པ། ཡང་རས་ཆུང་པས། བླ་མ་རྗེ་བཙུན་འཁྲུངས་ཡུལ་དུ་ཕེབས་དུས་མནལ་ལམ་བཞིན་བྱུང་ངམ་ཡུམ་དང་མཇལ་ཞུས་པས། རྗེ་བཙུན་གྱི་ཞལ་ནས། ངན་པའི་རྨི་ལམ་མཐོང་བ་བཞིན་མ་དང་འཕྲད་པའི་སྐལ་བ་མ་བྱུང་གསུངས། ཡང་རས་ཆུང་པས། འོ་ན་རྗེ་བཙུན་གྱིས་གཟིམས་ཁང་དུ་བྱོན་ལུགས་གང་ལྟར་མཛད། ཐོག་མར་ཡུལ་མི་ཇི་འདྲ་དང་མཇལ་ཞུས་པས། ངས་ཐོག་མར་ལུང་བའི་ཕུ་དེར་རང་གི་ཁང་བ་མཐོང་ས་ཞིག་ཏུ་ཕྱུགས་རྫི་མང་པོ་འདུག་པ་ལ། ཡུལ་རྣམས་ཀྱི་མིང་དང་། དེ་ན་ཡོན་བདག་ཇི་འདྲ་ཡོད་ཅེས་འདྲི་བ་ལྟར་བྱས་པས། ཞིབ་པར་བཤད་བྱུང་། དེ་ནས་ངེད་རང་གི་ཁང་བ་ལ་གཏད་ནས། ཡུལ་མ་གི་ལ་ཅི་ཟེར། ཡོན་བདག་ཇི་སྐད་བྱ་བ་ཡོད་བྱས་པས་མ་གི་ལ་ཀ་བཞི་གདུང་བརྒྱད་ཟེར་ཏེ། ཡོན་བདག་འདྲེ་མིན་པ་ཅི་ཡང་མེད་ཟེར། མ་གིའི་མི་རྣམས་ཤི་བའམ་ཡུལ་ཐོན་ཞེས་ཞིབ་ཏུ་དྲིས་པས། མ་གིར་དང་པོ་མི་ལུང་བ་འདི་ན་ཕྱུག་པ་ཞིག་བྱུང་བ་ཡིན་པར་འདུག་སྟེ། བར་དུ་བུ་གཅིག་པོ་རང་ཞིག་བྱུང་བའི་ཕ་འཆི་བ་སྔས་པ་དང་། ཁ་ཆེམས་འཇོག་ལུགས་མ་བྱུང་བར། ཕ་ཤི་རྟིང་བུ་གཅིག་པོའི་ནོར་ཀུན་ཕ་ཚན་གྱིས་འཕྲོགས། བུ་གཅིག་པོ་ཆེར་སོང་ནས་སྤྲོད་བྱས་རུང་
(༡༣༢)མ་སྤྲད་པའི་ལན་དུ་ཁོས་མཐུ་བཏང་སེར་བ་ཕབ་ནས་ཡུལ་འདི་ཕུང་དུ་བཅུག དེས་ད་ངེད་ལུང་བའི་མི་ཀུན་ཁོའི་ཆོས་སྐྱོང་ལ་འཇིགས་དྲགས་ནས། ཞིང་ཁང་གི་ཕྱོགས་ལ་འགྲོ་བ་དག་ཨ་ཅང་ཆེ་སྟེ། མིག་ཀྱང་ལྟ་མི་ཕོད་པ་ཙམ་ཡོད། དེས་ན་ཁང་བ་མ་གིའི་ནང་ན་བུ་གཅིག་པོའི་མའི་རོ་དང་འདྲེ་སྡོད་ཅིང་ཡོད། སྲིང་མོ་ཞིག་ཡོད་པ་དེ་ཨ་མའི་རོ་བོར་ནས་ག་ཤེད་སྤྲང་དུ་སོང་ནས་མེད། ད་ཁོ་རང་ཤི་བ་ཡིན་ནམ་སྐད་ཅི་ཡང་མི་འདུག རྣལ་འབྱོར་པ་རང་འགྲོ་ནུས་ན་ཁང་བ་མ་གིའི་ནང་ན་ཆོས་ཡོད་ཟེར་ལྟོས་ཤོག་དང་ཟེར་བས། དེ་འདྲ་བྱུང་ནས་ཅི་ཙམ་སོང་བྱས་པས། མ་ཤི་ནས་ལོ་བརྒྱད་ཙམ་སོང་། མཐུ་དང་སེར་བ་བྱུང་བ་དྲན་ཙམ་འདུག གཞན་ཐོས་ལོ་ལས་མེད་ཟེར་བས། ཁོང་རྣམས་ངའི་ཆོས་སྐྱོང་ལ་འཇིགས་པར་ཡོད་འདུག་པས། ང་ལ་གནོད་པ་བྱེད་མི་ནུས་པར་འདུག་སྙམ་པ་དང་། མ་རྒན་ཤི་བ་དང་སྲིང་མོ་འཁྱར་བས་ཁོ་ཐག་ཆོད་ནས། ཡིད་ཤིན་ཏུ་སྐྱོ་བ་ཞིག་བྱུང་སྟེ། ཉི་མ་མ་ནུབ་བར་ལྐོག་ཅིག་ཏུ་ངུ་ཞིང་བསྡད། ཉི་མ་དམར་ཐག་ཆོད་པ་དང་ཡུལ་དུ་ཕྱིན་པས། རྨི་ལམ་དུ་ཇི་ལྟར་བྱུང་བ་ལྟར་ཕྱིའི་ཞིང་འཇག་སྐྱས་འཕྱུར། ཁང་བ་ལྷ་ཁང་འདྲ་བ་དེ་རལ། ནང་དུ་ཕྱིན་པས། དམ་ཆོས་དཀོན་མཆོག་བརྩེགས་པ་དེ་ཐིགས་པ་དང་ས་ཕུད་ཀྱིས་གདུངས། བྱ་དང་བྱི་བའི་བྲུན་དང་ཚང་གདན་བྱས་འདུག་སྟེ། གང་ལ་བལྟས་ཤིང་བསམས་རུང་ཡིད་སྐྱོ་བ་ཞིག་བྱུང་། དེ་ནས་གོ་ཁར་ཕྱིན་པས། ལྷན་པ་དང་ས་འདྲེས་པའི་ཕུང་པོ་ཞིག་ལ་སྔོ་མང་པོ་སྐྱེས་འདུག་པ་དེ་བླངས་པས། མི་རུས་མང་པོ་སྐྱ་ཁྲོལ་ཐོན་བྱུང་བས། མའི་རུས་པ་ཡིན་པར་ཤེས་ཏེ། དྲན་དྲགས་ཡིད་སྐྱོ་
(༡༣༣)བས་བཟོད་གླགས་མེད་པར་བསམ་མི་ཤེས་ཤིང་སྨྲ་མི་ཐུབ་པའི་སྙིང་རླུང་ལངས་ནས་དྲན་མེད་དུ་འགྲོ་ཚད་བྱུང་བས། དེ་མ་ཐག་བླ་མའི་གདམས་ངག་དྲན་ནས། མའི་རྣམ་ཤེས་དང་ང་རང་གི་སེམས་བསྲེས། དེ་བཀའ་བརྒྱུད་བླ་མའི་ཐུགས་ཡེ་ཤེས་དང་བསྲེས་ཏེ། ཨ་མའི་རུས་པ་ལ་སྔས་བྱས། སྒོ་གསུམ་སྐད་ཅིག་ཀྱང་མ་གཡོས་པར་འོད་གསལ་ལ་བསྡད་པས། ཕ་མ་གཉིས་ཀ་འཁོར་བའི་སྡུག་བསྔལ་ལས་གྲོལ་བའི་བདེན་པ་མཐོང་། ཞག་བདུན་སོང་བ་དང་། ཏིང་ངེ་འཛིན་ལས་ལངས་ཏེ། བསམ་བློ་ཞིག་བཏང་བས། འཁོར་བ་མཐའ་དག་ལ་སྙིང་པོ་མེད་པར་ཁོ་ཐག་ཆོད་ནས། མའི་རུས་པ་འདི་ལ་ཚ་ཚ་ཞིག་བཏབ། དེའི་ཡོན་དུ་དཀོན་བརྩེགས་འདི་ཕུལ་ལ། ང་རང་བྲག་དཀར་རྟ་སོར་ཤི་མ་ཤི་དང་ཉིན་མཚན་མེད་པར་སྒྲུབ་པ་བྱེད་དགོས། ཆོས་བརྒྱད་ཀྱི་སྣང་བ་ཤར་ན་ལྕེབས་ནས་ཤི་སྡོད། སྐྱིད་ཆོས་ཀྱི་སྣང་བ་ཤར་ན་མཁའ་འགྲོ་ཆོས་སྐྱོང་རྣམས་ཀྱིས་ཀྱང་ངའི་སྲོག་ཆོད་ཅིག་བྱས་ཡིད་ཀྱིས་དམ་བཅའ་དྲག་པོ་ཡང་ཡང་བྱས་ནས། མའི་རུས་པ་དེ་རྣམས་བཏུས། དཀོན་བརྩེགས་ཀྱི་ས་དང་བྱ་བྲུན་རྣམས་བསལ་ཏེ་ཞབས་ཏོག་ལེགས་པ་ཞིག་ཕུལ་བས། ཐིགས་པས་ཆེར་མ་སྐྱོན་པར་ཡི་གེ་རྣམས་ཁྲ་ལམ་མེ་འདུག་པས། དབུ་དུམ་དེ་རྒྱབ་ཏུ་ཁྱེར། མའི་རུས་པ་རྣམས་ཐུ་བར་ཁྱེར་ནས་ཡིད་སྐྱོ་བ་ལ་ཚད་མེད་པ་ཞིག་གི་ངང་ནས་འཁོར་བ་ལ་སྙིང་པོ་མེད་པར་ཁོ་ཐག་ཆོད་ནས། སྙིང་པོའི་ཆོས་བྱེད་པར་དམ་བཅའ་བ་ཕྱ་མ་ཕྱོའི་གླུ་འདི་བླངས་སོ། །རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྒྲ་སྒྱུར་མར་པའི་བཀའ་ལུང་
(༡༣༤)བཞིན། །ཕ་ཡུལ་བདུད་ཀྱི་བཙོན་ར་རུ། །མི་རྟག་སྒྱུ་མའི་སློབ་དཔོན་བྱུང་། །སློབ་དཔོན་བཟང་པོ་འདི་ཉིད་ལ། །ངེས་ཤེས་འདྲོངས་པར་བྱིན་གྱིས་རློབས། །སྤྱིར་སྣང་ཞིང་སྲིད་པའི་ཆོས་རྣམས་ཀུན། །མི་རྟག་མི་བརྟན་འགྱུར་ཞིང་འགྲོ། །སྒོས་འཁོར་བའི་ཆོས་ལ་སྙིང་པོ་མེད། །སྙིང་པོ་མེད་པའི་བྱ་བྱེད་པས། །སྙིང་པོའི་ལྷ་ཆོས་བྱེད་དུ་འགྲོ། །དང་པོ་ཕ་ཡོད་ཙ་ན་བུ་ང་མེད། །བུ་ཡོད་ཙ་ན་ཕ་ཡང་མེད། །གཉིས་ཀ་འཛོམ་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །མ་ཡོད་ཙ་ན་བུ་ང་མེད། །བུ་ང་སླེབས་ཚེ་མ་རྒན་གུམ། །གཉིས་ཀ་འཛོམ་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །སྲིང་མོ་ཡོད་ཚེ་མིང་པོ་མེད། །མིང་པོ་སླེབས་ཚེ་སྲིང་མོ་འཁྱར། །གཉིས་ཀ་འཛོམ་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །དམ་ཆོས་ཡོད་ཚེ་ཞབས་ཏོག་མེད། །ཞབས་ཏོག་སླེབས་ཚེ་ཐིགས་པས་གདུངས། །གཉིས་ཀ་འཛོམ་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། ཁང་བ་ཡོད་ཚེ་བདག་པོ་མེད། །བདག་པོ་སླེབས་ཚེ་ཁང་བ་རལ། །གཉིས་ཀ་འཛོམ་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །བཤོས་ཞིང་ཡོད་ཚེ་བདག་པོ་མེད། །བདག་པོ་སླེབས་ཚེ་འཇག་སྐྱས་འཕྱུར། །གཉིས་ཀ་འཛོམ་རུང་སྙིང་པོ་མེད། །བདག་པོ་སྙིང་པོའི་ལྷ་ཆོས་བྱེད། །བྲག་དཀར་རྟ་སོར་སྒོམ་དུ་འགྲོ། །ཕ་ཡུལ་ཕ་ཁང་ཕ་ཞིང་སོགས། །འཁོར་བ་
(༡༣༥)སྙིང་པོ་མེད་པའི་ཆོས། །སྙིང་མེད་སེམས་ཅན་སུ་དགའ་ཁྱེར། །རྣལ་འབྱོར་ང་ཐར་པ་སྒྲུབ་ཏུ་འགྲོ། །ཕ་དྲིན་ཅན་མར་པ་ལོ་ཙཱ་བ། །སྤྲང་རི་ཁྲོད་ཟིན་པར་བྱིན་གྱིས་རློབས། །ཞེས་ཡིད་སྐྱོ་བའི་གླུ་མ་དབྱངས་བླངས་ནས། དང་པོ་ཀློག་སློབ་པའི་སློབ་དཔོན་གྱི་སར་ཕྱིན་པས། སློབ་དཔོན་རང་ནི་གྲོངས་འདུག སྲས་པོ་ལ་དཀོན་བརྩེགས་ཀྱི་དབུ་དུམ་ཕུལ་ནས། ཆོས་འདིའི་དབུ་ཞབས་ཀུན་ཁྱོད་ལ་འབུལ། ངའི་མ་རྒན་མོའི་རུས་པ་འདི་ལ་ཚ་ཚ་ཞིག་ཐོབ་ལ་སློང་བྱས་པས། ཁྱེད་ཀྱི་ཆོས་ཀྱི་རྗེས་སུ་ཆོས་སྐྱོང་འོང་བས་མི་འདོད། ཚ་ཚ་འདེབས་གྲོགས་བྱའོ་ཟེར། ང་རང་གིས་ཕུལ་བ་ལ་ཆོས་སྐྱོང་མི་འོང་བྱས་པས། འོ་ན་ལེགས་ཟེར་ང་རང་གིས་ཀྱང་གྲོགས་བྱས་ནས་མའི་རུས་པ་ལ་ཚ་ཚ་བཏབ། རབ་གནས་ཀྱི་ཆོ་ག་བྱས་ཏེ་མཆོད་རྟེན་གྱི་ནང་དུ་གདན་དྲངས་ནས་འགྲོ་གྲབས་བྱས་པས། སྲས་པོ་ན་རེ། ངེད་ཀྱིས་ཞབས་ཏོག་ཅི་ལྕོགས་བྱེད་པས། འདིར་ཞག་འགའ་བཞུགས་ལ་གསུང་གླེང་མཛད་ཟེར། ང་གླེང་མོ་ལབ་ཁོམ་མེད། སྒྲུབ་པ་ལ་རིངས་པ་ཡོད་བྱས་པས། འོ་ན་དོ་ནུབ་བཞུགས་ནངས་པར་སྒྲུབ་རྒྱགས་མཚོན་པ་ཞིག་འབུལ་ཟེར་བསྡད། ཁོང་ན་རེ། ཁྱེད་དང་པོ་གཞོན་དུས་མཐུས་དགྲ་བཏུལ། ད་དར་ལ་བབ་ནས་ཆོས་རྣམ་དག་མཛད་པ་ངོ་མཚར་ཆེ། མ་འོངས་པ་ན་གྲུབ་ཐོབ་ཅིག་འོང་སྟེ་ཡོད། བླ་མ་གང་འདྲ་ལ་གདམས་ངག་ཇི་འདྲ་ཐོབ་ཅེས་ཞིབ་ཏུ་འདྲི་རུ་བྱུང་བས། རྫོགས་ཆེན་ཐོབ་ལུགས་དང་། ཁྱད་པར་མར་པ་དང་མཇལ་ལུགས་རྣམས་བཤད་པས། ངོ་མཚར་ཆེ་འདུག དེ་ལྟར་ཡིན་ན་ཁྱེད་
(༡༣༦)རང་ཡང་ཁང་བ་ཞིག་གསོས་བྱས། མཛེས་སེ་ཁབ་ཏུ་བཞེས་ནས། བླ་མའི་རྣམ་ཐར་སྐྱོང་བ་དྲག་ཟེར་བས། ངའི་བླ་མ་མར་པས་འགྲོ་བའི་དོན་དུ་ཡུམ་བཞེས་པར་གདའ། དེ་ལྟ་བུའི་བསམ་སྦྱོར་དང་ནུས་པ་བདག་ལ་མེད་པས། སེང་གེའི་ཕྱི་བཞིན་རི་བོང་མཆོངས་རུང་གཡང་ལ་ལྷུང་ནས་འཆི་བར་ངེས། སྤྱིར་གྱིས་ང་འཁོར་བ་ལ་ཡིད་སྐྱོ་ནས་བླ་མའི་གདམས་ངག་དང་སྒྲུབ་པ་མིན་པ་གཞན་གང་གིས་ཀྱང་དགོས་པ་མེད་པའི་བསམ་པ་ཞིག་རྟག་ཏུ་ཡོད་ཅིང་། ང་རི་ཁྲོད་ལ་སྒྲུབ་པ་བྱེད་པ་འདི་བླ་མའི་ཞལ་ཏའི་མཐིལ་ཡང་ཡིན། རྣམ་ཐར་ཡང་དེ་ཀས་འཁྱོངས། ཐུགས་དགོངས་ཡང་སྒྲུབ་པས་རྫོགས་པ་ཡོད། བསྟན་པ་དང་སེམས་ཅན་ལ་ཡང་སྒྲུབ་པས་ཕན། ཕ་མ་ཡང་སྒྲུབ་པས་འདྲོངས། རང་དོན་ཡང་སྒྲུབ་པས་གྲུབ། ངས་སྒྲུབ་པ་མིན་པ་གཞན་ཤེས་ཡང་མི་ཤེས། འོང་ཡང་མི་འོང་། སེམས་ཡང་མི་སེམས་པར་གདའ། ཁྱད་པར་ཡུལ་དུ་སླེབས་ནས་ཕ་མས་ཁང་གཞིས་བཟུང་། ནོར་བསོགས་པའི་རྗེས་རྣམས་ཀྱི་དཔེས་གསལ་བཏབ་པས་སྒྲུབ་པ་བྱེད་པའི་བསམ་པ་དྲག་ཏུ་རང་སོང་བས་ཁོང་ན་མེ་འབར་བ་ཙམ་གདའ། གཞན་སྡུག་བསྔལ་འདི་འདྲ་ཐོག་ཏུ་མ་བབ་པ་དང་། འཆི་བ་དང་ངན་སོང་གི་སྡུག་བསྔལ་མ་དྲན་པ་རྣམས་ལ་སྐྱིད་ཆོས་ཀྱིས་ཆོག་པར་གདའ་སྟེ། བདག་ལྟོ་གོས་གཏམ་གསུམ་ལ་མ་ལྟོས་པའི་སྒྲུབ་པ་བྱེད་སྙམ་པ་རྐྱེན་འདི་དག་གིས་བསྐུལ་ཞིང་དོན་འདི་རྣམས་ལགས་བྱས། མཆི་མ་འཁྲུག་བཞིན་པའི་ངང་ནས་གླུ་འདི་བླངས་སོ། །སྐྱེས་མཆོག་མར་པའི་ཞབས་ལ་འདུད། །སྤྲང་མངོན་ཞེན་ལྡོག་པར་
(༡༣༧)བྱིན་གྱིས་རློབས། །ཀྱེ་མ་ཀྱེ་མ་ཀྱི་ཧུད་ཀྱི་ཧུད་ཨང་། །འཁོར་བའི་ཆོས་ལ་བློ་གཏད་བྱེད་པ་རྣམས། །བསམས་ཤིང་བསམས་ཤིང་ཡི་མུག་ཡང་ཡང་ལྡང་། །སྤྱད་ཅིང་སྤྱད་ཅིང་སྡུག་བསྔལ་གཏིང་ནས་འཁྲུག །བསྐོར་ཞིང་བསྐོར་ཞིང་འཁོར་བའི་གཏིང་ལ་འཕེན། །འདི་འདྲའི་སྙིང་རླུང་ལས་ཀྱིས་ཟིན་པ་རྣམས། །ཙུག་བྱེད་ཙུག་བྱེད་ཆོས་ལས་དྲག་པ་མེད། །རྗེ་མི་བསྐྱོད་ཀྱི་ངོ་བོ་རྡོ་རྗེ་འཆང་། །སྤྲང་རི་ཁྲོད་ཐུབ་པར་བྱིན་གྱིས་རློབས། །མི་རྟག་སྒྱུ་མའི་གྲོང་ཁྱེར་ན། །ཤུལ་རིངས་ཀྱི་མགྲོན་པོ་སྙིང་རླུང་ལངས། །ཡུལ་ཡ་མཚན་ཅན་གུང་ཐང་གི་སྐོར་ལུང་ལ། །ནོར་ལུག་རྣམས་བ་རའི་ཁ་ཟས་རྩྭ། །དུས་དེང་སང་འབྱུང་པོས་བདག་ཏུ་བཟུང་། །འདི་ཡང་མི་རྟག་སྒྱུ་མའི་དཔེ། །དཔེ་འདིས་ཀྱང་རྣལ་འབྱོར་ང་སྒྲུབ་པ་བྱེད། །ཚང་མང་ཀ་བཞི་གདུང་བརྒྱད་དེ། །དུས་དེང་སང་སེང་གེའི་ཡ་མགལ་འདྲ། །མཁར་ཟུར་བཞི་ལོགས་བརྒྱད་རྩེ་དང་དགུ། །དུས་དེང་སང་བོང་བུའི་རྣ་བ་འདྲ། །འདི་ཡང་མི་རྟག་སྒྱུ་མའི་དཔེ། །དཔེ་འདིས་ཀྱང་རྣལ་འབྱོར་ང་སྒྲུབ་པ་བྱེད། །བཤོས་ཞིང་འོར་མ་གྲུ་གསུམ་དེ། །དུས་དེང་སང་འཇག་མའི་ཡུལ་དུ་སོང་། །གཉེན་ཉེ་བ་ཕ་སྤུན་རེ་བ་རྣམས། །དུས་དེང་སང་དགྲ་བོར་དམག་ཏུ་ལངས། །འདི་ཡང་མི་རྟག་སྒྱུ་མའི་དཔེ། །དཔེ་འདིས་ཀྱང་རྣལ་འབྱོར་ང་སྒྲུབ་པ་བྱེད། །ཕ་བཟང་མི་ལ་ཤེས་རྒྱལ་དེ། །དུས་དེང་སང་བྱུང་བའི་རྗེས་ཀྱང་མེད། །ཨ་མ་མྱང་ཚ་དཀར་རྒྱན་དེ། །དུས་དེང་སང་རུས་ཀྲང་ཁོག་པ་ཞིག །འདི་ཡང་མི་རྟག་སྒྱུ་མའི་དཔེ། །དཔེ་འདིས་ཀྱང་རྣལ་འབྱོར་ང་སྒྲུབ་པ་བྱེད། །བླ་མཆོད་དཀོན་མཆོག་
(༡༣༨)ལྷ་འབུམ་དེ། །དུས་དེང་སང་མི་ཡི་གཡོག་པོ་བྱེད། །དམ་ཆོས་དཀོན་མཆོག་བརྩེགས་པ་དེ། །དུས་དེང་སང་བྱ་བྱིའི་ཚང་སྟན་བྱེད། །འདི་ཡང་མི་རྟག་སྒྱུ་མའི་དཔེ། །དཔེ་འདིས་ཀྱང་རྣལ་འབྱོར་ང་སྒྲུབ་པ་བྱེད། །ཁྱིམ་མཚེས་ཨ་ཁུ་གཡུང་རྒྱལ་དེ། །དུས་དེང་སང་སྡང་བའི་དགྲ་དང་སྡོང་། །སྲིང་མོ་པེ་ཏ་མགོན་སྐྱིད་དེ། །གར་སོང་རྗེས་འགྲོའི་གཏད་སོ་མེད། །འདི་ཡང་མི་རྟག་སྒྱུ་མའི་དཔེ། །དཔེ་འདིས་ཀྱང་རྣལ་འབྱོར་ང་སྒྲུབ་པ་བྱེད། །རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྤྲང་རི་ཁྲོད་ཐུབ་པར་བྱིན་གྱིས་རློབས། །ཞེས་སྐྱོ་ཤས་ཀྱི་གདུང་དབྱངས་དེ་རྣམས་བླངས་པས། ཁོང་ངོ་མཚར་ཆེ། ཤིན་ཏུ་ཡང་བདེན་ཟེར། ཤུགས་རིང་ནར་ནར་འདུག ཡུམ་ཞིག་འདུག་པ་དེ་མཆི་མ་འདོན་ཞིང་མང་དུ་ངུ་ཞིང་འདུག གཞན་ཡང་ངས་ཡུལ་གྱི་སྣང་ཚུལ་རྣམས་མཐོང་བས་རྐྱེན་བྱས། སྒྲུབ་པ་བྱེད་པའི་དམ་བཅའ་ངོ་ལྐོག་མེད་པར་ཁ་ནས་ཀྱང་མང་དུ་ཤོར། ཞེ་ལ་ཡང་ནར་མར་བཅངས་དོན་ལ་ཡང་སྒྲུབ་པ་མ་བྱས་པའི་འགྱོད་པ་མེད་གསུངས། སླར་ཡང་རྐྱེན་གྱིས་འཁོར་བ་ལ་སྙིང་པོ་མེད་པར་གསལ་ཐེབས་ནས་སྒྲུབ་པ་ལ་ཡི་དམ་བཅས་པའི་མཛད་པ་སྟེ་དྲུག་པའོ། །
(༡༣༩)བདུན་པ། ཡེངས་མེད་དུ་རི་ལ་བསྒོམས་པ། ཡང་རས་ཆུང་པས། རྗེ་བཙུན་གྱིས་ཐོག་མར་དཀའ་སྤྱད་དང་སྒྲུབ་པ་གནས་གང་དང་གང་དུ་མཛད་ཞུས་པས། དེར་སློབ་དཔོན་གྱི་སྲས་པོས་ནངས་པར་འདི་རྣམས་ལ་སྒྲུབ་རྒྱགས་ཀྱི་རྟེན་མཛོད་ལ། ངེད་རྣམས་ཀྱང་ཐུགས་དམ་གྱི་ཁོངས་སུ་ཆུད་པར་མཛོད་ཅིག་ཟེར། ཕྱེ་སྒྱེ་གང་དང་། ཆུ་སྡོར་བཟང་པོ་བྱིན་བྱུང་བ་རྣམས་ཁྱེར་འོངས་ཏེ། ངེད་རང་གི་ཁང་བའི་རྒྱབ་རི་ལ་བྲག་ཕུག་བཟང་པོ་ཞིག་ཡོད་པ་དེར་སྒོམ་ཞིང་བསྡད། རྒྱགས་ཆུ་རྣམས་ལ་སྲིས་སེ་བྱས་པས་ལུས་ཟུངས་ཕལ་ཆེར་ཟད་རུང་དགེ་སྦྱོར་དམར་བར་བྱུང་ཞིང་ཟླ་བ་འགའ་ཐུབ། དེ་ནས་རྒྱགས་ཆུ་རྣམས་རྫོགས་ནས་ཟས་ཡེ་མེད་པ་རང་ལ་ཡུན་རིང་མ་ཚུགས་པས། བསམ་མནོ་ཞིག་ལ་ཕུའི་འབྲོག་པ་ལ་ཆུ་སྡོར་བསླངས། མདའི་ཞིང་པ་ལ་རྒྱགས་བསླངས་ཏེ། འཚོ་བ་རྟ་མ་ཆད་ཙམ་ལ་བརྟེན་ནས་སྒྲུབ་པ་བྱེད་དགོས་སྙམ། འབྲོག་སློང་ལ་ཕྱིན་ཏེ་སྦྲ་ཞིག་གི་འགག་ཏུ་རྣལ་འབྱོར་པ་ལ་ཆུ་སྡོར་གྱི་སློང་མོ་ཞུ་བྱས་པས། ཨ་ནེའི་སྦྲ་དང་ཐུག་སྟེ། ཨ་ནེས་ང་ངོ་ཤེས་ནས། སྙིང་མི་དགའ་བས་ཐོག་མར་ཁྱི་རྣམས་རྦད་བྱུང་བ། རྡོ་དང་བེར་ཀས་བསྲུངས་པས། ཨ་ནེ་རང་སྦྲའི་ཚུགས་ཤིང་ཁྱེར་ནས་ཕ་
(༡༤༠)བཟང་གི་རྐང་འདྲེན་པོ། ཉེ་ཚན་གྱི་བརླ་འཚོང་པོ། ཡུལ་གྱི་ཕུང་འདྲེ་ཁྱོད་ཅི་ལ་འོངས། ཕ་བཟང་ལ་བུ་ཁྱོད་འདྲ་སྐྱེ་བ་ཟེར་ཞིང་མང་པོ་རྡེག་ཏུ་བྱུང་བ་ལ། ང་ཕྱིར་བྲོས་པས་འཚོ་བ་ངན་པས་ལུས་སྟོབས་ཉམས་པ་དང་། རྐང་བ་རྡོ་ལ་ཐོགས་ནས་ཀོ་ཆུ་ཞིག་གི་ནང་དུ་འགྱེལ་ནས་འཆི་ཚད་པ་ཞིག་བྱུང་དུས་ཡང་འབར་ཞིང་འདུག ངས་ཅི་ལོངས་ཤིག་བྱས་ཏེ། བེར་ཀ་ལ་ལུས་བརྟེན་ནས་ཨ་ནེ་ལ་གླུ་འདི་བླངས་སོ། །ཕ་དྲིན་ཅན་མར་པའི་ཞབས་ལ་འདུད། །ཡུལ་ངན་རྩ་ཡི་ཀོ་རོན་ན། །གཉེན་བཤེས་དགྲར་ལངས་ཀྱི་མ་བུ་གསུམ། །སྲན་ཕུང་བེར་ཀས་གཏོར་བ་བཞིན། །ཁྱེད་ཨ་ཁུ་ཨ་ནེས་ཨེ་བཏང་སོམས། །ང་སྤྲང་པོ་ས་མཐར་འཁྱམས་ཀྱི་བར། །ཨ་མ་སྡུག་བསྔལ་ཕོངས་གྲིར་ཤི། །སྲིང་མོ་ལྟོ་གོས་སྤྲང་ཕྱིར་འཁྱར། །ངས་མ་སྲིང་གི་གདུང་སེམས་མ་ཆོད་པས། །ཕ་ཡུལ་བཙོན་རར་སླེབས་པའི་ཚེ། །བརྩེ་བའི་མ་དང་གཏན་བྲལ་བྱུང་། །སྲིང་མོ་སྡུག་པས་ས་མཐར་འཁྱར། །ང་སྐྱོ་ཤས་སྙིང་རླུང་ཁོང་ནས་ལངས། །ངེད་མ་བུ་གསུམ་གྱི་སྡུག་བསྔལ་འདི། །ཁྱེད་གཉེན་བཤེས་བགྲོས་ནས་མ་བཅོལ་ལམ། །བཟོད་གླགས་མེད་པའི་སྡུག་བསྔལ་དེས། །དམ་ཆོས་སྒྲུབ་པའི་གསལ་འདེབས་བྱུང་། །དྲིན་ཅན་མར་པའི་གདམས་ངག་རྣམས། །ལྟོས་མེད་རི་ལ་བསྒོམས་པའི་ཚེ། །སྒྱུ་མ་ལུས་ཀྱི་ཕུང་པོ་ལ། །ཟས་མེད་སློང་དུ་འོངས་པའི་ཚེ། །འབུ་ཚེ་ཟད་གྲོག་མའི་ཚང་སྒོ་བཞིན། །བདག་ཀྱང་ཨ་ནེའི་སྒོ་དྲུང་སླེབས། །གཅན་གཟན་ཁྱི་ཡི་ཕོ་ཉ་བཀྱེ། །སྟོབས་མེད་ལུས་ཀྱིས་གཡུལ་ངོ་སྤྲད། །དྲག་སྔགས་ཚིག་ངན་དམོད་པ་
(༡༤༡)ཡིས། །བློ་ཡི་མུག་ཁོང་གཟེར་གཏིང་ནས་སློང་། །ཚུགས་ཤིང་བེར་ཀའི་མཚོན་ཆར་གྱིས། །བདག་ལུས་ཟུག་རྔུ་ན་ཚས་བཀང་། །རིན་ཆེན་སྲོག་དང་དོ་བྲལ་བྱུང་། །ཞེ་སྡང་ལྡང་བར་ང་རིགས་ཀྱང་། །ངས་ནི་བླ་མའི་བཀའ་བཞིན་སྒྲུབ། །ཨ་ནེ་ཞེ་སྡང་མ་ཆེ་བར། །སྒྲུབ་རྒྱགས་འཚོ་བའི་སློང་མོ་ཞུ། །བྱམས་སྙིང་རྗེའི་མངའ་བདག་མར་པ་རྗེ། །འབངས་ཞེ་སྡང་ཞི་བར་བྱིན་གྱིས་རློབས། །ཞེས་ངུ་ངག་གིས་གླུ་མ་དབྱངས་དེ་བླངས་པས། ཨ་ནེའི་ཕྱི་བཞིན་བུ་མོ་ཞིག་འདུག་པ་དེ་མཆི་མ་ནར་བྱུང་བ་དང་། ཨ་ནེ་ཡང་སྐྱེངས་ནས་གཉིས་ཀ་ནང་དུ་སོང་སྟེ། མར་རིལ་གཅིག་དང་ཐུད་ཕྱེ་རུལ་བ་མཚོན་པ་ཞིག་བུ་མོ་དེ་ལ་བསྐུར་བྱུང་། སྦྲ་གཞན་རྣམས་ལ་བསླངས་པས། ངས་ངོ་ཤེས་པ་ནི་མི་འདུག ཁོང་ཚོས་ང་ཡིན་པར་ཤེས་ཏེ་ལྟ་ནན་ཆེ་བ་རེ་བྱས་ནས་བསོད་སྙོམས་དྲག་པ་རེ་བྱིན་བྱུང་བ་རྣམས་ཁྱེར་འོངས་ནས། ཨ་ནེའི་བྱེད་ལུགས་དེས་ཨ་ཁུ་ཡང་གོ་བས་ཕྱོགས་ཙམ་ལའང་མི་འགྲོ་དགོས་སྙམ་བྱུང་སྟེ། རྩ་ཕུའི་ཞིང་པ་རྣམས་ལ་བསོད་སྙོམས་བསླངས་པས། ཨ་ཁུ་སྔར་གྱི་ཁང་གཞིས་འཕོས་པའི་སྒོར་སླེབས་པས་ཨ་ཁུས་ཤེས་ནས། རོ་ལྟར་རྒས་རུང་ཁྱོད་ཀ་དགོས་པ་ཡོད་དོ་ཟེར་གསོད་རྡོ་འཕངས་པ་ཕོག་ཚད་པ་བྱུང་བ་ངས་ཀྱང་ངོ་ཤེས་ནས་བྲོས་ཕྱིན་པས། སྟོབས་ཀྱིས་ཅི་འཁྱུད་ཀྱི་རྡོ་མང་པོ་འཕངས་བྱུང་། ང་དེ་ནས་ཀྱང་བྲོས་པས། མདའ་གཞུ་ཁྱེར་ནས་ཕྱིར་ཐོན་བྱུང་སྟེ། བརླ་འཚོང་པོ། རྐང་འདྲེན་པོ་ཁྱོད་ཀྱིས་ཡུལ་འདི་ཕུང་དུ་མ་བཅུག་གམ། ཡུལ་པ་རྣམས་དགྲ་ལག་ཏུ་ཆུག་ཡོད་དོ། །མྱུར་དུ་ཐོན་ཤོག་ཅིག་
(༡༤༢)ཟེར་ཞིང་མདའ་རྒྱག་ཏུ་བྱུང་། དེར་ཡུལ་པའི་ཕོ་གཞོན་འགས་ཀྱང་རྡོ་བ་རེ་ཙམ་འཕངས་བྱུང་བ་ལ། ངས་ཀྱང་སྔར་མཐུ་བཏང་བའི་གནོང་གིས་གང་མིན་བྱུང་གིས་དོགས་ནས་མཐུས་སྡིགས་མོ་བྱེད་སྙམ། བཀའ་བརྒྱུད་བླ་མ། ཁྲག་འཐུང་དམ་ཅན་རྒྱ་མཚོ། རྣལ་འབྱོར་པ་ཆོས་བྱེད་པ་ལ་དགྲ་བྱུང་ངོ་། །ར་མདའ་རློགས་ཤིག ང་ཤི་རུང་ཆོས་སྐྱོང་ལ་འཆི་རྒྱུ་མེད་དོ་བྱས་པས། ཁོང་རྣམས་འཇིགས་ནས་ཀུན་གྱིས་ཨ་ཁུ་བཟུང་། ངེད་རང་ལ་དཀར་མི་རྣམས་ཀྱིས་མཚམས་བྱས། རྡོ་རྡེག་མི་རྣམས་ཀྱིས་བཟོད་གསོལ་བྱས། ཨ་ཁུས་ནི་བསོད་སྙོམས་ཡང་སྟེར་ཁ་མི་ཉན། གཞན་ཡུལ་པ་སྤྱིས་བསོད་སྙོམས་དྲག་པ་རེ་བྱིན་བྱུང་བ་རྣམས་ཁྱེར་ཏེ། ད་ཡུལ་འདིར་བསྡད་རུང་ཁོང་ཚོའི་ཞེ་སྡང་གསོག་པར་འདུག་པས། འགྲོ་དགོས་སྙམ་པ་ལ། དེ་ནུབ་རྨི་ལམ་དུ་སྔར་གྱི་གནས་དེ་ཀར་ཞག་ཤས་བསྡད་ན་བཟང་བའི་བརྡ་ཞིག་བྱུང་སྟེ་ཞག་འགའ་དེ་ཀར་བསྡད་པས་མཛེས་སེས་ཚོར་ནས། ཟས་ཆང་བཟང་པོ་ཁྱེར་ཏེ་འཕྲད་དུ་བྱུང་བས། བཅངས་ནས་མང་པོ་ངུ་ཞིང་འདུག ཨ་མ་ཤི་ཚུལ་དང་སྲིང་མོ་འཁྱར་ཚུལ་བཤད་བྱུང་བས་ཤིན་ཏུ་སྐྱོ་བ་ཞིག་བྱུང་སྟེ་ང་རང་ཡང་མཆི་མ་མང་པོ་ཤོར། ངས་མོ་ལ་ཁྱོད་ད་དུང་ཁྱིམ་ལ་མི་འགྲོ་བ་ཕྱི་ཐག་རིང་བྱས་པས། མོ་ན་རེ། ཁྱེད་ཀྱི་ཆོས་སྐྱོང་ལ་འཇིགས་ནས་དགོས་ཟེར་བ་ཡང་མ་བྱུང་། བྱུང་ཡང་འགྲོ་བ་ཡང་མེད། ཁྱེད་ཆོས་མཛད་པ་ངོ་མཚར་ཆེ། ད་ཞིང་ཁང་རྣམས་ཇི་ལྟར་བྱེད་ཟེར་བས། ངས་མོའི་བསམ་པ་གོ་སྟེ། ང་ཁྱིམ་ཐབ་ལ་མ་སྦྱར་བ་འདི། སྒྲ་སྒྱུར་མར་པའི་བཀའ་དྲིན་ཡིན། ཆོས་
(༡༤༣)ཕྱོགས་ནས་སྨོན་ལམ་བཟང་པོ་བཏབ་པས་ཆོག འཇིག་རྟེན་ཕྱོགས་ནས་མོ་རང་ཁོ་ཐག་ཆོད་པའི་གཏམ་ཞིག་དགོས་སྙམ། སྲིང་མོ་དང་ཕྲད་ན་མོ་ལ་སྟེར། དེ་བར་ཞིང་ཁྱོད་རང་ཐོབ། སྲིང་མོ་ཤི་བར་ཐག་ཆོད་ན་ཞིང་ཁང་གཉིས་ཀ་ཁྱོད་རང་ཁྱེར་བྱས་པས། ཁྱེད་རང་ལ་མི་དགོས་པ་ལགས་སམ་ཟེར་བས། ང་ལྟོ་དཀའ་ཐུབ་དང་བྱ་འཚོལ་བྱི་འཚོལ་བྱེད་པས་ཞིང་གི་དགོས་པ་མེད། གནས་མི་མེད་ཀྱི་བྲག་ཕུག་ཏུ་སྡོད་པས་ཁང་བས་དགོས་པ་མེད། འཛམ་བུའི་གླིང་དབང་རུང་འཆི་ཚེ་གཞག་དགོས་འདུག་པས། ད་ལྟ་ནས་བློས་བཏང་ན་འདི་ཕྱི་ཀུན་ཏུ་སྐྱིད་པར་འོང་བ་འདུག དེས་ན་སྤྱོད་པ་མི་ཀུན་དང་རྒྱབ་ལོག་བྱེད་པས་ད་ང་ལ་མི་མ་རེ་ཞིག་བྱས་པས། མོ་ན་རེ། འོ་ན་ཁྱེད་ཆོས་པ་ཀུན་དང་ཡང་རྒྱབ་ལོག་མཛད་དམ་ཟེར་བ་ལ། དང་པོ་བསམ་པ་འཇིག་རྟེན་གྱི་ཆེ་ཐབས་ཁོང་དུ་བཅུག་ནས། སྦྱོར་བ་པོ་ཏི་འགའི་ཚིག་བཤད་བསླབས་ཏེ། ད་ལྟའི་བསམ་པ་རང་ཕྱོགས་རྒྱལ་ན་དགའ་ཞིང་། གཞན་ཕྱོགས་འཕམ་ན་དགའ་བ་ཁོང་དུ་འཚངས་པའི་སྦྱོར་བ་ནོར་ཅི་གསོག་དང་སྙན་གྲགས་ཅི་ཐོབ་བྱེད་པའི་ཆོས་པར་མིང་བཏགས་ནས་གོས་སེར་པོ་གྱོན་པ་ཙམ་པ་འདི་ཀུན་དང་རྒྱབ་ལོག་ཡིན་ཡང་ཡིན། བྱེད་ཀྱང་བྱེད། དེ་མིན་པའི་ཆོས་པ་རྣམས་ཐེག་པ་སོ་སོའི་ཆ་ལུགས་སུ་སྣང་རུང་། བསམ་སྦྱོར་གོང་ལྟར་མེད་ན་དོན་ལ་མཐུན་པས་རྒྱབ་ལོག་མི་ཤེས། ང་དང་དོན་མི་མཐུན་ན་རྒྱབ་ལོག་རང་ཡིན་བྱས་པས། འོ་ན་ཁྱེད་ཀྱི་ཆ་ལུགས་སྤྲང་པོ་བས་ངན་པ་འདི་འདྲའི་ཆོས་པ་སྔར་མ་མཐོང་། འདི་ཐེག་པ་ཆེན་པོ་གང་གི་ཆ་ལུགས་ཡིན་ཟེར་བས། འདི་ཐེག་པ་ཀུན་གྱི་མཆོག་རབ་ཚེ་འདིར་སངས་རྒྱས་
(༡༤༤)སྒྲུབ་ཕྱིར་ཆོས་བརྒྱད་རླུང་ལ་བསྐུར་བ་ཞེས་བྱ་བའི་ཐེག་པའི་ཆ་ལུགས་ཡིན་བྱས་པས། མོ་ན་རེ། ཁྱེད་དང་ཁོང་ཚོའི་ཆ་ལུགས་དང་སྤྱོད་པ་ཀུན་ཁྱེད་རང་ཟེར་བ་བཞིན་རྒྱབ་ལོག་རང་དུ་འདུག་པས་གང་རུང་ཞིག་ཆོས་མིན་པ་འདྲ། ཡིན་པ་མཉམ་པོ་ལ་ཁོ་ཚོའི་དེ་དགའ་བར་འདུག་ཟེར་བ་ལ། ངས་ཁྱོད་འཇིག་རྟེན་པ་དགའ་བའི་ཆོས་པ་དེ་ལ་ང་མི་དགའ། ང་དང་དོན་མཐུན་པའི་ཆོས་པ་ན་བཟའ་ངུར་སྨྲིག་གསོལ་བ་རྣམས་ལའང་། ཆོས་བརྒྱད་ཀྱི་ཆ་བག་ཙམ་རེ་ཡོད་པ་འདྲ། མེད་རུང་སངས་རྒྱས་ཐོབ་པ་མྱུར་མི་མྱུར་ལ་ཁྱད་པར་བསམ་གྱིས་མི་ཁྱབ་པ་ཞིག་ཡོད་དེ། དེ་ཁྱོད་ཀྱིས་མི་གོ དེ་བས་ཁྱོད་རང་ཡང་ནུས་ན་ཆོས་གྱིས། མི་ནུས་ན་ཁང་ཞིང་ཁྱེར་ལུགས་སྔར་ལྟར་གྱིས་ལ་སོངས་བྱས་པས། མོ་ན་རེ། ང་ལ་ཁྱེད་ཀྱི་ཁང་ཞིང་མི་དགོས། སྲིང་མོ་ལ་བྱིན་མཛོད། ཆོས་ཤིག་བྱེད་དེ། ཁྱེད་ཀྱི་འདི་འདྲ་མི་ནུས་པར་གདའ་ཟེར་སོང་ངོ་། །དེ་ནས་ཨ་ནེས་ང་ཁང་ཞིང་ལ་གཙིགས་མེད་པ་ཐོས་ནས། ཞག་འགའ་སོང་བ་དང་། ཨ་ནེའི་བསམ་པ་ལ། ཁོ་བླ་མའི་བཀའ་བཞིན་བྱེད་ཟེར་བས་ཞིང་འདི་ཨེ་ཁུགས་ལྟ་སྙམ། ངའི་སར་རྩམ་ཆང་ཆུ་སྡོར་མཚོན་པ་ཞིག་ཁྱེར་ནས་བྱུང་སྟེ། ཁ་སང་ངས་མི་ཤེས་པ་ཞིག་བྱས་འདུག་སྟེ། ཚ་བོ་ཆོས་པ་ཡིན་པས་བཟོད་པར་མཛོད། ད་ཨ་ནེས་ཁྱེད་རང་གི་ཞིང་བཏབ་ནས་རྒྱགས་སྐྱེལ་ཟེར་བ་ལ། འོ་ན་ཨ་ནེས་ཟླ་བ་རེ་ལ་ནས་ཁལ་རེའི་ཕྱེ་སྐྱོལ། དེ་ལྷག་རྣམས་ཨ་ནེ་ཁྱེར་ལ་ཞིང་ཐོབ་ཅིག་བྱས་པས། དེ་ལྟར་བྱེད་ཟེར། ཟླ་བ་གཉིས་ཙམ་ཆོད་དོན་བཞིན་བསྐྱལ། དེ་ནས་ལན་ཞིག་ཨ་ནེ་བྱུང་
(༡༤༥)ནས། མི་རྣམས་ན་རེ། ཞིང་བཏབ་ན་ཚ་བོའི་ཆོས་སྐྱོང་གིས་མཐུ་བྱེད་ཟེར་ཏེ། མཐུ་རང་མི་བྱེད་ལས་ཆེ་ཟེར་བས། མཐུ་ཅི་ལ་བྱེད། དགེ་བ་འོང་བས་ཨ་ནེ་རང་ཞིང་ཐོབ་ལ་རྒྱགས་སྐྱོལ་ཅིག་བྱས་པས། འོ་ན་ཚ་བོ་ལ་ནི་ཁྱད་མེད། ཨ་ནེ་བློ་བདེ་བ་འདུག་པས། ཚ་བོས་མནའ་ཞིག་སྐྱོལ་དང་ཟེར་བ་ལ། འདི་ལ་བསམ་བློ་ཅི་ཡོད་མི་ཤེས་པར་འདུག་སྟེ། མི་དགའ་བ་ཡང་ཆོས་ཡིན་སྙམ་མནའ་བསྐྱལ་བས་དགའ་སྟེ་ལོག་སོང་། དེ་ནས་ངས་སྙིང་རུས་བསྐྱེད་ནས་བསྒོམས་རུང་ལུས་ལ་བདེ་དྲོད་ཀྱི་ཡོན་ཏན་ཙམ་སྐྱེར་མ་འདོད་པར་ད་ཅི་དྲག་སྙམ་ཞིང་ཡོད་པའི་ཚེ། ནུབ་གཅིག་གི་རྨི་ལམ་ན་ཞིང་ཐ་བ་ཞིག་རྨོས་པས་སྲ་དྲགས་མ་ཕེད་པར་ད་འཇོག་གམ་སྙམ་པ་ལ། རྗེ་བཙུན་མར་པ་ནམ་མཁར་བྱོན་ནས། བུ་སྙིང་རུས་དང་བརྩོན་འགྲུས་བསྐྱེད་ལ་རྨོས་ཤིག ཐ་བ་སྲ་ཡང་ཕེད་ནས་འོང་གིས་གསུང་ཞིང་། མར་པས་སྣ་ཁྲིད་ནས་རྨོས་པས། འདུར་ཕེད་དེ་ལོ་ཏོག་བཟང་པོ་སྐྱེས་པ་རྨིས་པས། གཉིད་སད་པ་དང་སེམས་དགའ་བ་ཞིག་བྱུང་བ་ལ། རྨི་ལམ་བག་ཆགས་འཁྲུལ་བ་ལ་བླུན་པོ་རྣམས་ཀྱང་བདེན་ཆེར་མི་འཛིན་ན། བླུན་པོ་བས་ཀྱང་ང་བླུན་ནམ་སྙམ་པ་བྱུང་། འོན་ཀྱང་སྙིང་རུས་བྱས་བསྒོམས་པས་ཡོན་ཏན་སྐྱེ་བའི་རྟགས་སུ་འདུག་སྙམ་དགའ་བཞིན་རྨི་ལམ་གྱི་དོན་གསལ་འདེབས་པའི་གླུ་འདི་བླངས་སོ། །རྗེ་བཀའ་དྲིན་ཅན་ལ་གསོལ་བ་འདེབས། །སྤྲང་རི་ཁྲོད་ཟིན་པར་བྱིན་གྱིས་རློབས། །གཞི་མཉམ་པ་ཉིད་ཀྱི་ཞིང་ས་ལ། །ལམ་དད་པ་བརྟན་པོའི་ཆུ་ལུད་སྦྱར། །སེམས་དཀར་པོ་དྲི་མེད་ཀྱི་ས་བོན་བཏབ། །
(༡༤༦)གསོལ་འདེབས་དྲག་པོའི་གཡུ་འབྲུག་ལྡིར། །བྱིན་རླབས་རྩོལ་མེད་ཀྱི་ཆར་བ་བབས། །སེམས་ཡིད་གཉིས་མེད་པའི་རྨོན་དོར་ལ། །ཐབས་ཤེས་རབ་གཉིས་ཀྱི་རྨོས་གཤོལ་བཏགས། །འཁྲུལ་རྟོག་མེད་པའི་སྐྱེས་བུ་ཡིས། །ཡེངས་པ་མེད་པའི་ཐོང་ཞིག་འཛིན། །བརྩོན་འགྲུས་དྲག་པོའི་ལྕག་གིས་འབྲབ། །ཉོན་མོངས་དུག་ལྔའི་ཐ་བ་སློག །རང་རྒྱུད་ངན་པའི་རྡོ་བ་སོལ། །གཡོ་ཟོལ་མེད་པའི་ཡུར་མ་བྱེད། །ལས་འབྲས་བདེན་པའི་སྙེ་མ་ལ། །རྣམ་ཐར་བཟང་པོའི་བཙས་མ་རྔ། །གདམས་ངག་བཟང་པོའི་འབྲས་བུ་ཡིས། །གཏད་སོ་མེད་པའི་བང་བ་འགེངས། །མཁའ་འགྲོའི་རྔོད་འཐག་ཟས་ཀྱི་མཆོག །བདག་རྣལ་འབྱོར་སྒྲུབ་པའི་འཚོ་བ་ཡིན། །རྨི་ལམ་དོན་གྱི་གསལ་འདེབས་ཡིན། །ཚིག་ལ་དོན་ཉིད་མི་སྐྱེ་ཞིང་། །མཚོན་པ་ཙམ་གྱིས་མི་རྟོགས་པས། །སླད་ནས་བྱང་ཆུབ་སྒྲུབ་པ་རྣམས། །སྙིང་རུས་བསྐྱེད་ནས་སྒོམ་པར་ཞུ། །དཀའ་ཐུབ་དང་སྙིང་རུས་རྩལ་བསྐྱེད་ནས། །དཀའ་བས་བསྒྲུབས་ན་དཀོན་པའང་འགྲུབ། །ཕོ་བྱང་ཆུབ་ཀྱི་སྐྱེས་བུ་ཆོས་བྱེད་རྣམས། །སྒྲུབ་པ་ལ་བར་ཆད་མེད་པར་ཤོག །ཅེས་བརྗོད་ནས། ང་བྲག་དཀར་རྟ་སོ་ལ་སྒོམ་དུ་འགྲོ་དགོས་སྙམ་ཡོད་པའི་ཚེ། ཨ་ནེས་ནས་ཁལ་གསུམ་གྱི་ཕྱེ། ཐུལ་གོག་གཅིག རས་བཟང་པོ་གོས་ལྡང་གཅིག མར་ཚིལ་འདྲེས་པའི་ཆུ་སྡོར་རྣམས་ཁྱེར་བྱུང་སྟེ། འདི་རྣམས་ཚ་བོའི་ཞིང་བཙོངས་པའི་རིན་ཡིན་པས་ཁྱེར་ལ་ངའི་མིག་གིས་མི་མཐོང་། རྣ་བས་མི་ཐོས་པའི་ཡུལ་ཕྱོགས་ཤིག་ཏུ་འགྲོ་རོགས་གྱིས། དེ་མིན་ཡུལ་མི་ཀུན་གྱིས་ང་ལ་དང་པོ་ཐོས་པ་དགས་སྡུག་དེ་བཏང་རྟིང་། ད་
(༡༤༧)ཡང་ཁྱེད་ཀྱི་བསྟེན་རྩི་བྱས་ནས། ཡུལ་མི་ལྷག་མ་འདི་རྣམས་ཀྱང་གསོད་པ་ཡིན་ན། ཁྱེད་རང་གཉིས་ཀ་གསོད་གཏོང་ཟེར་བས། ཚ་བོ་རང་ཡུལ་གཞན་དུ་བྲོས་པ་ལེགས་པར་འདུག ཅིས་ཀྱང་མི་འགྲོ་ན་ང་གསོད་དོན་མེད། ཚོ་བོ་རང་གསོད་མི་གསོད་ལ་ཐེ་ཚོམ་མི་འདུག་གོ་ཟེར་བྱུང་བས། ངའི་བསམ་པ་ལ། ཡུལ་མིས་དེ་ལྟར་མི་ལབ་པ་ངས་གོ ང་ཆོས་བཞིན་མི་བྱེད་ན་སྤྱིར་གྱིས་ཞིང་འཕྲོགས་པ་ལ་མཐུ་མི་བྱེད་པའི་མནའ་བསྐྱལ་བ་མེད། ཁྱད་པར་རྣལ་འབྱོར་པའི་མནའ་རྨི་ལམ་སྒྱུ་མ་ཡིན་པས་ཁྱོད་རྐང་མཐིལ་སེར་ལོག་གཏོང་བ་ལ་ཚེགས་མེད་དེ་ད་ང་དེ་ལྟར་མི་བྱེད། ཞེ་སྡང་སྐྱེ་ཡུལ་མེད་པའི་བཟོད་པ་སུ་ལ་བསྒོམ། ང་རང་དོ་ནུབ་ཤི་ན་ཞིང་གིས་མི་ཚད་འདི་རྣམས་ཀྱིས་ཀྱང་ཅི་བྱེད། སངས་རྒྱས་ཐོབ་པའི་ཐབས་ལ་བཟོད་པ་མཆོག་ཏུ་གསུངས་པ་ཡིན། དེ་སྒོམ་པའི་རྟེན་ཨ་ནེ་ཡིན་ཞིང་། དམ་པའི་ཆོས་དང་མཇལ་བ་ཡང་ཨ་ཁུ་དང་ཨ་ནེའི་དྲིན་ཡིན། བཀའ་དྲིན་ཤིན་ཏུ་ཆེ་བས་དྲིན་ལན་དུ་ཕྱི་མ་སངས་རྒྱས་ཐོབ་པའི་སྨོན་ལམ་རྟག་ཏུ་འདེབས། ཚེ་འདིར་ཞིང་དུ་མ་ཟད་ཁང་བ་ཡང་བྱིན་པས་ཆོག་སྙམ་པ་བྱུང་བ་ལྟར། ཨ་ནེ་ལ་ཡང་གོ་བར་ལབས་ཏེ། ང་བྱང་ཆུབ་སྒྲུབ་པ་ལ་བླ་མའི་གདམས་ངག་མིན་པ་ཅིས་ཀྱང་དགོས་པ་མེད་པས། ཞིང་དུ་མ་ཟད་ཁང་བ་ཡང་ཨ་ནེ་ཁྱེར་ཞིག་བྱས་གླུ་འདི་བླངས་སོ། །རྗེ་བླ་མའི་བཀའ་དྲིན་རི་ཁྲོད་འགྲིམ། །སྤྲང་པོའི་སྐྱིད་སྡུག་ཁྱེད་རང་ཤེས། །འཇིག་རྟེན་འཁོར་བ་ལས་ཀྱིས་དུབ། །འབགས་ན་ཐར་བའི་སྲོག་རྩ་གཅོད། །སྐྱེ་བོའི་སོ་ནམ་སྡིག་པའི་ལས། །སྤྱད་ན་ངན་སོང་སྡུག་
(༡༤༨)བསྔལ་མྱོང་། །ཉེ་དུའི་གདུང་སེམས་བདུད་ཀྱི་མཁར། །བརྩིགས་ན་མེ་འོབས་ནང་དུ་ཚུད། །ཟས་ནོར་གྱི་གསོག་འཇོག་མི་ཡི་ནོར། །བསོགས་ཚད་དགྲ་བོའི་རྒྱགས་ཕྱེ་ཡིན། །སྐྱིད་འདོད་ཀྱི་ཇ་ཆང་བཙན་དུག་གི་ཆུ། །འཐུངས་ན་ཐར་པའི་སྲོག་རྩ་གཅོད། །ཨ་ནེའི་ཞིང་རིན་སེར་སྣའི་རྫས། །ཟོས་ན་ཡི་དྭགས་ཀྱི་གནས་སུ་སྐྱེ། །ཨ་ནེའི་ཁ་ཏ་ཞེ་སྡང་གི་ཚིག །ལབས་ན་བདག་གཞན་གཉིས་ཕུང་འོང་། །བདག་གི་ཞིང་ཁང་ཐམས་ཅད་ནི། །ཨ་ནེ་ཁྱེར་ལ་དགའ་བར་གྱིས། །མི་ཁ་ཆོས་ཀྱིས་སངས་པ་ཡིན། །ལྷ་ཁ་སྙིང་པོས་བསྒྲུབས་པ་ཡིན། །འདྲེ་ཁ་སྙིང་རྗེས་གནོན་པ་ཡིན། །ཉེས་ཁ་རླུང་ལ་བསྐུར་བ་ཡིན། །རང་ཁ་གྱེན་ལ་ལྟ་བ་ཡིན། །རྗེ་མི་བསྐྱོད་ཀྱི་ངོ་བོ་སྐུ་དྲིན་ཅན། །སྤྲང་རི་ཁྲོད་ཐུབ་པར་བྱིན་གྱིས་རློབས། །ཞེས་པའི་གླུ་བླངས་པས། ཨ་ནེ་ན་རེ། ཆོས་པ་བཟང་པོ་བྱ་བ་ཚ་བོ་འདི་འདྲ་ལ་ཟེར་བ་ཡིན། དགའ་རབ་ཡིན་ཟེར། དགའ་ནས་སོང་། དེ་ནས་རྐྱེན་དེས་བསྐུལ་བས་སྐྱོ་ཤས་དྲག་པོ་རང་ཞིག་བྱུང་། ཞིང་ཁང་གི་ཁོ་ཐག་ཆོད་པས་བློ་བདེ་བ་ཞིག་ཀྱང་བྱུང་བས། ང་དང་པོའི་དམ་བཅའ་ལྟར་བྲག་དཀར་རྟ་སོ་ལ་སྒོམ་དུ་འགྲོ་སྙམ་པ་ཤར། ཕུག་པ་དེར་མཉམ་གཞག་གི་དགེ་སྦྱོར་གྱི་རྐང་ཚུགས་པས་རྐང་ཚུགས་ཕུག་ཏུ་གྲགས་སོ། །དེ་ནས་ནངས་པར་ཞིང་རིན་གྱི་ཆས་རྣམས་དང་། གཞན་ཡང་ལྷག་ཅུང་ཟད་ཡོད་པ་རྣམས་ཁྱེར་ཏེ། མི་སུས་ཀྱང་མ་ཚོར་བར་བྲག་དཀར་རྟ་སོར་ཕྱིན་ནས། རྟ་སོ་ན་ཕུག་པ་སྐྱིད་པོ་རང་ཞིག་འདུག་པ་དེར་བསྡད། སྒོམ་སྟན་སྲ་བའི་འབོལ་ཆུང་ཞིག་བཤམས་ཏེ་གནས་མལ་བཟུང་ནས། གྲོང་
(༡༤༩)ཡུལ་དུ་མི་འབབ་པའི་དམ་བཅའ་བྱས་པ་ནི། བདག་ཉམས་རྟོགས་ཁྱད་པར་ཅན་ཞིག་མ་སྐྱེས་ཀྱི་བར་དུ་རི་ཁྲོད་འདིར་ལྟོགས་གྲིར་ཤི་རུང་དད་ཟས་དང་གཤིན་ཟས་ཀྱི་ཐལ་བ་འགམ་ཕྱིར་མི་འབབ། འཁྱགས་གྲིར་ཤི་རུང་གོས་ཕྱིར་མི་འབབ། སྐྱོ་གྲིར་ཤི་རུང་འདུ་འཛི་དང་གཡེང་བའི་ལས་མི་བྱེད། ན་སྟེ་ཤི་རུང་སྨན་ཐུན་གཅིག་གི་ཕྱིར་ཡང་མི་འབབ། ཚེ་འདིའི་བྱ་བ་སྒྲུབ་ཕྱིར་ལུས་འགུལ་བ་ཙམ་ཡང་མི་བྱེད་པར་སྒོ་གསུམ་ཡེངས་མེད་དུ་སངས་རྒྱས་བསྒྲུབ་བོ། །བདག་གིས་དམ་བཅའ་འདི་རྣམས་འགྲུབ་པར་བླ་མ་ཡི་དམ་གྱི་བྱིན་གྱིས་རློབས་ཤིག མཁའ་འགྲོ་ཆོས་སྐྱོང་རྣམས་ཀྱིས་འཕྲིན་ལས་སྒྲུབས་ཤིག གལ་ཏེ་དམ་བཅའ་འདི་རྣམས་ལས་འགལ་ན་སྒྲུབ་པ་མི་བྱེད་པའི་མི་ལུས་པས་ཤི་བ་སྐྱིད་པས། དམ་ཅན་རྒྱ་མཚོས་དམ་བཅའ་ལས་འགལ་མ་ཐག་ཏུ་ངའི་སྲོག་ཆོད་ཅིག་བླ་མ་ཡི་དམ་རྣམས་ཀྱིས་ཕྱི་མ་དམ་པའི་ཆོས་དང་མཇལ་ནས། སྒྲུབ་པ་བྱེད་ནུས་པའི་མི་ལུས་སུ་སྐྱེ་བར་བྱིན་གྱིས་རློབས་ཤིག ཅེས་དམ་བཅས་ནས་དམ་བཅའ་སྨོན་ལམ་གྱི་གླུ་འདི་བླངས་སོ། །རྗེ་ནཱ་རོའི་བུ་རྒྱུད་ཐར་པའི་ལམ། །སྤྲང་རི་ཁྲོད་ཟིན་པར་བྱིན་གྱིས་རློབས། །བདུད་འཇིག་རྟེན་གྱི་གཡེང་བས་མི་གཡེང་བར། །སྒོམ་མཉམ་གཞག་གི་བསམ་གཏན་འཕེལ་བར་ཤོག །ཞི་གནས་ཀྱི་རྫིང་ལ་མི་ཞེན་པར། །ལྷག་མཐོང་གི་མེ་ཏོག་འཁྲུངས་པར་ཤོག །སྤྲོས་བཅས་ཀྱི་ཙབ་ཙོབ་མི་ལྡང་བར། །སྤྲོས་མེད་ཀྱི་ལོ་འདབ་རྒྱས་པར་ཤོག །སྒྲུབ་ཁང་དུ་ཡིད་གཉིས་མི་སྐྱེ་བར། །ཉམས་རྟོགས་ཀྱི་འབྲས་བུ་སྨིན་པར་ཤོག །བདུད་
(༡༥༠)རིགས་ཀྱི་བར་གཅོད་མི་ནུས་པར། །རང་སེམས་ལ་ངེས་ཤེས་འདྲོངས་པར་ཤོག །ཐབས་ལམ་ལ་ཐེ་ཚོམ་མི་སྐྱེ་བར། །ཕ་རྗེས་བུ་ཡིས་ཟིན་པར་ཤོག །རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྤྲང་རི་ཁྲོད་ཟིན་པར་བྱིན་གྱིས་རློབས། །ཞེས་སྨོན་ལམ་བཏབ་ནས་འཚོ་བ་ཕྱེའི་དྲི་མ་ཡོད་ཙམ་གྱི་སྐྱོ་ཚ་ལ་བརྟེན་ཏེ་བསྒོམས་པས། སེམས་ལ་ཕྱག་ཆེན་གྱི་གདེང་ཞིག་ཐོབ་རུང་། ལུས་སྟོབས་ཤོར་བས་རླུང་མ་འཆུན་པར། ལུས་ལ་བདེ་དྲོད་ཡེ་མ་བྱུང་བས་ཤིན་ཏུ་གྲང་བར་བྱུང་སྟེ། བླ་མ་ལ་གསོལ་བ་རྩེ་གཅིག་ཏུ་བཏབ་པས། ནུབ་གཅིག་འོད་གསལ་གྱི་ཉམས་སྣང་ལ། བླ་མ་མར་པས་བཏང་བ་ཡིན་ཟེར། བུད་མེད་མང་པོས་ཚོགས་ཀྱི་འཁོར་ལོ་བཟང་པོ་བསྐོར་ཏེ། ཁོ་དེ་མི་ལ་རས་པ་བདེ་དྲོད་མ་སྐྱེས་ན་མར་པའི་ཞལ་ནས་སྒོ་གསུམ་གྱི་གཅུན་ཐབས་འདི་ལྟར་གྱིས་ལོ་ཟེར་འཁྲུལ་འཁོར་བསྟན་སོང་བ་ལྟར། མེ་ཐབ་དྲུག་ཆིངས་ཙོག་པུའི་གནད་ཀྱིས་ལུས་ཀྱི་བདེ་བ་བཙལ། རྒྱ་མདུད་ཆིངས་སྲོག་རྩོལ་རླུང་གི་གནད་ཀྱིས་ངག་གི་གྲིམས་ཆ་བཙལ། སྦྲུལ་མདུད་ཆིངས་རང་གྲོལ་གྱི་གནད་ཀྱིས་སེམས་ཀྱི་ལྷོད་ཆ་བཙལ་ཞིང་བསྒོམས་པས། ལུས་ལ་བདེ་དྲོད་དགའ་རབ་སྐྱེས། དེ་ནས་ལོ་གཅིག་ཙམ་སོང་བའི་ཚེ། ཁམས་སངས་ལ་འགྲོ་སྙིང་འདོད་པ་ཞིག་བྱུང་སྟེ་འགྲོ་གྲབས་བྱས་པས། སྔར་གྱི་དམ་བཅའ་ཏུར་དྲན་ནས། རང་ལ་ལྕག་འདེབས་ཀྱི་གླུ་འདི་བླངས་སོ། །རྡོ་རྗེ་འཆང་ཆེན་མར་པའི་སྐུ། །སྤྲང་རི་ཁྲོད་ཟིན་པར་བྱིན་གྱིས་
(༡༥༡)རློབས། །ཕོ་མཚར་པོ་མི་ལ་རས་པ་ཁྱོད། །གྲོས་རང་གཏམ་རང་ལ་ཕན་པའི་དབྱངས། །གྲོགས་གཏམ་སྙན་འཆད་པའི་མི་དང་བྲལ། །ལྟད་མོ་ལྟ་འདོད་ཀྱི་ལུང་བ་སྟོངས། །སྐྱོ་བ་སངས་འདོད་ཀྱི་ཡུལ་རྐྱེན་མེད། །སེམས་མ་སྤྲོ་མ་སྤྲོ་རང་སར་ཞོག །སྤྲོས་ན་མི་དགེ་སྣ་ཚོགས་དྲན། །མ་ཡེངས་མ་ཡེངས་དྲན་པ་སྟེན། །ཡེངས་ན་དགེ་སྦྱོར་རླུང་ལ་འཆོར། །མ་འགྲོ་མ་འགྲོ་ཉལ་ས་ནོན། །ཕྱིན་ན་རྐང་པ་རྡོ་ལ་ཐོགས། །མ་གསེང་མ་གསེང་མགོ་བོ་ཁུག །གསེངས་ན་དོན་མེད་ཕྱལ་བར་འགྲོ། །མ་ཉལ་མ་ཉལ་དགེ་སྦྱོར་མཛོད། །ཉལ་ན་ཉོན་མོངས་དུག་ལྔས་ནོན། །ཞེས་རང་གིས་རང་ལ་ལྕག་བཏབ་ནས་ཉིན་མཚན་མེད་པར་བསྒོམས་པས། དགེ་སྦྱོར་འཕེལ་པོ་རང་དེ་ལོ་གསུམ་ལྷག་པར་བྱུང་། དེ་ནས་ལོ་རེ་ལ་ཕྱེ་ཁལ་རེའི་དམིགས་གཏད་ཡོད་པ་ཟད་ནས་འཚོ་བའི་རྒྱུན་ཡེ་མེད་པ་རང་བྱས་ན། སྲོག་གི་བར་ཆད་དུ་འགྲོ་བར་འདུག འཇིག་རྟེན་པ་རྣམས་གསེར་ཞོ་རེ་ཞོ་དོ་རྙེད་ན་དགའ་ཞིང་སྟོར་ན་སྡུག་བསྔལ་བའི་རྩིས་བཏང་ན། སངས་རྒྱས་མ་ཐོབ་པར་ལུས་དང་བྲལ་ན་དེ་ལྟ་མིན་ཏེ། སྟོང་གསུམ་གསེར་གྱིས་བྱུར་བུར་བཀང་བ་བས་ཀྱང་། སངས་རྒྱས་སྒྲུབ་པའི་ལུས་འདི་གཅེས། སྔར་གྱི་དམ་བཅའ་དང་འགལ་བ་ལས་ནི་སྒྲུབ་པ་བྱེད་འཕྲོ་ལ་ཤི་བ་རུང་ད་ཅི་དྲག་གམ་སྙམ་པ་དང་། གྲོང་ཡུལ་དུ་འབབ་པ་ནི་མིན། ཆོས་ཕྱིར་ཡིན་པས་དམ་བཅའ་ཡང་མི་འགལ། དཀའ་ཐུབ་ཀྱིས་ཟས་ཞིག་འཚོལ་དུ་འགྲོ་དགོས་སྙམ། བྲག་དཀར་གྱི་མདུན་ན་ཕར་ཕྱིན་པས་། དེ་ན་ཉི་མ་དྲོ་བ། ཆུ་བཟང་བ། ཟྭ་མང་པོ་སྐྱེས་པ། མཐོང་ཡེལ་ཆེ་བའི་
(༡༥༢)གནས་དང་བ་སྤྲོ་མོ་རང་ཞིག་འདུག་པ་དེར་འཕོས་ཏེ། ཟྭ་རང་ལ་བརྟེན་ནས་བསྒྲུབ་པ་བྱེད་ཅིང་བསྡད་པས། ཕྱི་ན་གོས་དང་། ནང་ན་འཚོ་བ་ཕྱེ་དང་བཅུད་ཡེ་མེད་པའི་སྟབས་ཀྱིས། ལུས་ཀེང་རུས་ལྟར་སོང་བ་ཟྭའི་མདོག་འདྲ་བ་ལ། སྤུ་སྔོ་ཞོ་ལེ་བ་བྱུང་བའི་ཚེ། བླ་མས་གནང་བའི་བེའུ་བུམ་དེ་ལ་བཅང་བ་རེ་བྱས། མགོ་ཐོག་ཏུ་བཞག་པས། ཅི་ཡང་ཟ་རྒྱུ་མེད་པ་ལ། གསུས་པ་བདེ་མེར་བ་དང་། སྒྲིགས་པ་ཆིལ་ཆིལ་བ་བྱུང་། རྒྱ་བཤིགས་ནས་ལྟ་སྙམ་པ་ལ། ད་དུང་རེ་ཞིག་ལྟ་མ་རན་པའི་བརྡ་ཞིག་བྱུང་ནས་བཞག དེ་ནས་ལོ་གཅིག་ཙམ་ལོན་པ་དང་། གནས་དེར་སྐྱིད་གྲོང་ཚོང་འདུས་པའི་ཁྱི་ར་བ་རི་དྭགས་མ་སོད་པ་འགའ་བྱུང་སྟེ། ཐོག་མར་འདྲེ་འདུག་ཟེར་བྲོས་སོང་། མི་དང་སྒྲུབ་པ་པོ་ཡིན་པའི་ལོ་རྒྱུས་བྱས་པས། ཡིན་ཡིན་རང་མི་འདྲ་སྟེ་ལྟར་རུང་ཟེར། ཚུར་བྱུང་ནས་ཕུག་པའི་ནང་ཐམས་ཅད་གཡེངས་ཏེ། ཁྱོད་ཀྱི་སྒྲུབ་རྒྱགས་གང་ན་ཡོད། ངེད་རྣམས་ལ་སྐྱིར་ཐོངས། ཕྱིས་སྐྱིན་པ་དམར་པོ་སྟེར། མི་གཏོང་ན་གསོད་པ་ཡིན་ཟེར་སྡིགས་སུ་བྱུང་བ་ལ། ང་ལ་ཟྭ་མིན་པ་ཅི་ཡང་མེད། ཡོད་རུང་སྒྲུབ་པ་པོ་འདེགས་པའང་ཡོད་པ་ལ། འཕྲོག་པས་འབྱུང་དོགས་མེད་བྱས་པས། འཕྲོག་བྱས་པ་མིན། སྒྲུབ་པ་པོ་བཏེགས་པས་ཅི་འོང་ཟེར། བསོད་ནམས་འོང་བྱས་པས། འོ་ན་འདེགས་ཟེར། པང་དུ་བླངས་ནས་ས་ལ་ཡང་ཡང་བརྡབས་པས། དཀའ་ཐུབ་བྱས་པའི་ལུས་ན་ཚས་གང་རུང་བཟོད་གླགས་མེད་པའི་སྙིང་རྗེ་དྲག་པོ་སྐྱེས། མཆི་མ་ཤོར་བས། གཅིག་ངན་མི་བྱེད་པར་བསྡད་འདུག་པ་དེ་ན་རེ། ཁོ་རེ་ཚོ། ཁོང་ཆོས་པ་རྣམ་དག་ཅིག་ཡིན་པར་འདུག དེ་མིན་ནའང་
(༡༥༣)མི་རིད་པོ་འདི་ལ་དེ་ཙུག་བྱས་པས་ཕོ་སྐྱེས་པར་མི་འགྲོ། འུ་ཅག་ལྟོགས་པ་ཁོང་གིས་ལན་པ་ནི་མིན། དེ་འདྲ་མ་བྱེད་ཟེར་ང་ལ་རྣལ་འབྱོར་པ་ངོ་མཚར་ཆེ། ངས་ཁྱེད་ཀྱི་ཐུགས་དཀྲུགས་པ་མེད་པས། ཐུགས་དམ་གྱི་སྐྱབས་འོག་ཏུ་ཆུག་ཅིག་ཟེར་བ་ལ། གཞན་རྣམས་ན་རེ་ངེད་ཀྱིས་ཀྱང་ཁྱེད་བཏེགས་ཡོད་པས་ངེད་ཚོ་ཡང་ཆུག་ཅིག་ཟེར། གཅིག་དེ་ན་རེ་འཇུག་ལུགས་མི་འདྲ་བ་མིན་པ་འཇུག་པ་ཁག་ཐེག་ཟེར་བཞད་གད་ཐེག་གེ་སོང་བས། ང་ལ་མཐུ་བྱ་སྙམ་པ་མེད་རུང་། དཀོན་མཆོག་གི་བཀའ་ཆད་བྱུང་ནས། ཁྱི་ར་བ་རྣམས་ལ་དཔོན་པོས་ཆད་པ་བཅད། དྲགས་པ་དེ་བསད། མ་བྱེད་ཟེར་བ་དེ་མ་གཏོགས་གཞན་རྣམས་ཀྱི་མིག་བཏོན་འདུག་ཟེར། དེ་ནས་ལོ་གཅིག་ཙམ་སོང་བའི་ཚེ། གོས་ཀུན་ཟད་ནས་ཨ་ནེས་ཞིང་རིན་ལ་བྱུང་བའི་ཐུལ་གོག་དེའི་ལྷག་རོ་འདྲ་འདུག་པ་དང་། ཕྱེ་ཟད་པའི་སྒྱེ་དེ་དང་། རས་གོས་རྣམས་བཙེམས་ནས་གདན་གོས་བྱེད་སྙམ་པ་ལ། དོ་ནུབ་ཤི་ན་འཚེམ་པོས་དོན་མེད། དེ་བས་བསྒོམ་པ་དགའ་སྙམ་བོར་ནས། ཐུལ་གོག་དེ་གདན་གྱི་རྣམ་པར་བཏིང་ནས་སྨད་ལ་གང་ཁེབས་བྱས། ཕྱེ་སྒྱེའི་རེ་ཚལ་དེས་སྟོད་གཡོགས་བྱས། རས་དེས་གང་མཁོའི་གྱོན་ལུགས་བྱས་པས། རས་དེ་ཡེ་གྱོན་མི་ཉན་པར་སོང་བའི་ཚེ། ཧ་ཅང་རང་ཡང་བློས་བཏང་དྲགས་འདུག་འཚེམ་སྙམ་པ་ལ། ཁབ་སྐུད་ཀྱང་མ་འབྱོར་བར་རས་དེ་ཁལ་གསུམ་དྲེས་རྡོག་བྱ་བ། སྟོད་སྨད་རྐེད་པ་རྣམས་ལ་ཁལ་བ་རེ་ཡོད་པ་ལ། དྲེས་ཐག་ཆད་པ་མདུད་པ་བོར་ཞིང་མཐུད་པའི་སྐེ་རགས་བཅིངས་ནས་ཉིན་ཅི་འཁྱོལ་བྱས། ཐུལ་གོག་དང་རེ་ཚལ་གྱི་གོས་གདན་གང་འཁེབས་
(༡༥༤)ཀྱིས་མཚན་ཅི་འཁྱོལ་བྱས་བསྒོམས་ཤིང་ཡོད་པའི་ཚེ། ལོ་གཅིག་ཙམ་སོང་བ་དང་། མི་མང་པོའི་སྐད་དི་རི་རི་བྱུང་། བལྟས་པས་ཁྱི་ར་བ་འགའ་ཤ་མང་པོ་ཁྱེར་ནས་ཕུག་པའི་འགག་ཏུ་སླེབས་བྱུང་བ། ང་མཐོང་བ་དང་འདྲེ་འདུག་ཟེར་སྔ་མ་རྣམས་བྲོས་སོང་། ཕྱི་མ་རྣམས་ན་རེ། ཉིན་པར་འདྲེ་བྱུང་དོགས་མེད་དགའ་མོ་ལྟོས་དང་། ད་དུང་འདུག་གམ་ཟེར། ད་དུང་ཡང་འདུག་ཟེར་བས། ཁྱི་ར་བ་རྒན་པ་ཕྱི་ནས་འོང་བ་རྣམས་ཀྱང་འཇིགས་འདུག་པ་དང་། ངས་འདྲེ་མིན། རི་འདི་ལ་སྒོམ་པའི་སྒོམ་ཆེན་ཡིན་ཏེ། འཚོ་བ་མེད་པས་ལུས་འདི་ལྟར་སོང་བ་ཡིན་བྱས། ལོ་རྒྱུས་རྣམས་རྒྱས་པར་བཤད་པས། བདེན་རྫུན་བལྟའོ་ཟེར་ཕུག་པའི་ནང་དུ་སོང་བས། ཟྭ་མིན་པ་ཅི་ཡང་མི་འདུག་པ་དང་། ཀུན་དད་པར་གྱུར་ཏེ་ཤ་མང་པོ་དང་རྒྱགས་ལྷག་གི་ཕྱེ་རྣམས་ཕུལ་ནས། འདི་འདྲ་རང་མཛད་པ་ངོ་མཚར་ཆེ། ངེད་རྣམས་ཀྱིས་བསད་པའི་སེམས་ཅན་རྣམས་ཀྱི་ཡར་འདྲེན་མཛོད། ངེད་རང་རྣམས་ཀྱི་སྡིག་སྦྱོང་མཛོད་ཅིག་ཟེར། གུས་གུས་བྱས་ནས་སོང་། དེར་ང་ཡང་མི་ཟས་ཟ་རྒྱུ་ཡོད་བསམ་དགའ་རུ་ཚོར་བ་བྱུང་སྟེ། ཤ་ཚོད་ཟོས་པས་ལུས་བདེ་འབོལ་ལེ་བ་དང་། ཁམས་དྭངས་སིང་བ་དང་། རིག་པ་ངར་ཆིལ་བྱུང་བས་དགེ་སྦྱོར་ཤེད་ཆེ་ཏིང་སོང་སྟེ། སྔར་དང་མི་འདྲ་བའི་བདེ་སྟོང་གི་ཉམས་བཟང་པོ་སྐྱེས་བྱུང་བས། གྲོང་ཡུལ་དུ་ལོངས་སྤྱོད་ལ་བྱུང་རྒྱལ་དུ་སྤྱོད་ཚེའི་བརྒྱ་འབུལ་བས། རི་ཁྲོད་དུ་དཀའ་བ་སྤྱོད་ཚེའི་ཟན་ཆང་རེ་བསོད་ནམས་ཆེ་བར་འདུག་སྙམ་པ་བྱུང་། ངས་ཤ་རྣམས་བསྲིས་ནས་ཟོས་པས། མཐར་འབུས་གང་བྱུང་བ་ལ། འབུ་བསལ་ནས་ཤ་ཟ་སྙམ་པ་དང་།
(༡༥༥)ང་རང་ལ་བསོད་ནམས་དང་དབང་རེས་མེད་པ་ཡིན། འབུའི་ཟས་སྐལ་འཕྲོགས་པའི་ཟ་མ་བཟང་པོས་དགོས་པ་མེད་སྙམ་ཤ་འབུ་རང་ཟར་བཅུག་ནས། ང་རང་གིས་ཟྭའི་དཀའ་ཐུབ་ཀ་བྱས། ལན་ཞིག་མཚན་མོ་མི་གཅིག་ང་ལ་ཟས་ནོར་ཡོད་དུ་རེ་ནས་བྱུང་སྟེ། ཕུག་པའི་ནང་ཀུན་གཡེང་གིན་འདུག་པ་ལ། ང་དགོད་ཅིག་ཤོར་ཏེ། ངས་ཉིན་མོ་མ་རྙེད་པའི་ས་དེ་ནས་ཁྱོད་ཀྱིས་མཚན་མོ་ཨེ་རྙེད་ལྟོས་ཤིག་བྱས་པས། ཁོ་རང་ཡང་དགོས་ཅིང་ཐོན་སོང་། དེ་ནས་ཡང་ལོ་གཅིག་ཙམ་སོང་བའི་ཚེ། རྩ་ནས་ཀྱི་ཁྱི་ར་བ་རི་དྭགས་མ་སོད་པ་འགའ་བྱུང་སྟེ། ངས་རས་འགའ་ཁལ་གསུམ་དྲེས་རྡོག་མ་དེ་གྱོན་ནས་མཉམ་པར་བཞག་ཡོད་པ་ལས། གཞུ་མཆོག་བཙུགས་ནས་འདི་མི་ཡིན་ནམ་འདྲེ་ཡིན། གཟུགས་བརྙན་ནམ། གོས་སམ་གང་ནས་བལྟས་ཀྱང་འདྲེ་ཡིན་པ་འདྲ་ཟེར་བ་ལ། ངས་ཁ་ཚིག་བྱས་ང་ཡིན་དག་མི་ཡིན་བྱས་པས། ངའི་སོ་ཞོ་ལས་ངོ་ཤེས་ཏེ། ཁྱོད་ཐོས་པ་དགའ་ཡིན་ནམ་ཟེར། ཡིན་བྱས་པས། འོ་ན་དེ་རིང་ངེད་རྣམས་ལ་གྲོ་རེ་སློང་། རྟིང་སོར་ཚབ་མི་ཕམ་པ་སྐྱེལ། ཁྱོད་དང་པོ་ལན་ཞིག་ཡུལ་དུ་འོངས་པའི་གཏམ་ཞིག་བྱུང་ནས་ལོ་མང་དུ་སོང་། དེ་ནས་ད་བར་འདི་ཀར་བསྡད་པ་ཡིན་ནམ་ཟེར། དེ་ཀ་ཡིན་ཏེ། ཁྱེད་རྣམས་ཟར་རུང་བའི་ཟས་མེད་བྱས་པས། ཁྱོད་རང་གང་ཟ་བ་དེ་སློང་། དེ་ཀས་འོང་ཟེར། འོ་ན་ཁྱེད་རང་རྣམས་མེ་ཐོངས་ལ་ཟྭ་ཚོས་ཤིག་བྱས་པས། མེ་བཏང་ཟྭ་བཙོས་ནས་ད་འདི་ལ་འདེབས་པའི་སྡོར་དགོས་ཟེར། སྡོར་ཡོད་ན་ཟས་བཅུད་དང་མ་བྲལ་བ་བྱ་བ་ཡིན་ཏེ། ཁོ་བོ་ལ་དེ་མེད་ནས་ལོ་འགའ་ཐལ་ལོ། །སྡོར་ལ་ཟྭ་ཐོབ་བྱས་པས། འོ་ན་ཐལ་ཞིག་དགོས་པ་འདུག་ཟེར་
(༡༥༦)བས། ཐལ་ཡོད་ན་ཟས་རྩི་དང་མ་བྲལ་བ་བྱ་བ་ཡིན་ཏེ། ཁོ་བོ་ལ་དེ་མེད་ནས་ཀྱང་ལོ་འགའ་ཐལ་ལོ། །ཐལ་ལའང་ཟྭ་ཀ་ཐོབ་བྱས་པས། འོ་ན་ཚྭ་ཞིག་མེད་ཐབས་རང་མི་འདུག་ཟེར་བས། ཚྭ་ཡོད་ན་ཟས་རོ་དང་མ་བྲལ་བ་བྱ་བ་ཡིན་ཏེ། ཁོ་བོ་ལ་དེ་མེད་ནས་ཀྱང་ལོ་འགའ་ཐལ་ལོ། །ཚྭ་ལ་ཡང་ཟྭ་ཀ་ཐོབ་ཅིག་བྱས་པས། ཁོང་ཚོ་ན་རེ། ཁྱོད་ཀྱི་ལྟོ་གོས་འདི་ལ་གཟུགས་བརྙན་དང་ཁ་ཐབས་འདི་ལས་བྱུང་དོགས་མི་འདུག ཕོ་རང་མ་སྐྱེས། མི་གཡོག་བྱས་རུང་ལྟོ་འགྲངས་ལ་གོས་དྲོ་བ་ཡོང་། འཛམ་བུ་གླིང་གི་མི་ཞིག་ལ་ཁྱོད་ལས་སྡུག་པ་དང་སྙིང་རྗེ་བ་མི་འོང་ཟེར་བ་ལ། ངས་ཁོ་རེ་ཚོ་དེ་སྐད་མ་ཟེར་དང་། ང་མི་ལུས་ལོན་པའི་དྲག་ཤོས་ཤིག་ཡིན་ཏེ། ལྷོ་བྲག་མར་པ་ལོ་ཙཱ་ལྟ་བུ་དང་མཇལ། ཚེ་གཅིག་ལུས་གཅིག་ལ་སངས་རྒྱ་བའི་གདམས་ངག་ཐོབ་ནས། དབེན་པའི་རི་ལ་ཚེ་འདི་བློས་བཏང་སྟེ་སྒོམ་ཞིང་ནམ་གཞག་གཏན་གྱི་དོན་བསྒྲུབ། ལྟོ་གོས་གཏམ་གསུམ་ལ་གྱོང་བསྐུར་ནས་ཉོན་མོངས་པའི་དགྲ་ཚེ་འདིར་འཇོམས་པར་བྱེད་པ་ཡིན་པས། འཛམ་བུ་གླིང་གི་མི་གཅིག་ལ་ང་བས་ཕོ་རྒོད་པ་དང་འདུན་མ་ལེགས་པ་མེད། དེ་བས་ཁྱེད་རང་རྣམས་སངས་རྒྱས་ཀྱི་བསྟན་པ་དར་བའི་ཡུལ་ཕྱོགས་སུ་སྐྱེས་རུང་། སྒྲུབ་པ་བྱེད་པ་དག་ཨ་ཅང་ཆེ་སྟེ། ཆོས་ཉན་པ་ཙམ་གྱི་འདུ་ཤེས་ཀྱང་མེད་པར་དམྱལ་བ་གཏིང་ཅི་ཟབ་དང་ཡུན་ཅི་རིང་གི་ཐབས་སུ། སྡིག་པ་ལ་བྲེ་གསོག་ཕུལ་གསོག་བྱེད་པ་ལས་འདུན་མ་ཉེས་ཚབས་ཆེ་བ་མི་འོང་། ང་ནམ་ཕུགས་བདེ་ཞིང་སྐྱིད་པ་དག་ཨ་ཅང་ཆེ་སྟེ། འཕྲལ་ལའང་བློ་བདེ་བའི་གདེང་འདི་འདྲ་ཡོད་པས། ངའི་གླུ་འདི་ཉོན་ཅིག་བྱས་བདེ་བ་ལྔའི་གླུ་འདི་བླངས་
(༡༥༧)སོ། །རྗེ་དྲིན་ཅན་མར་པའི་ཞབས་ལ་འདུད། །ཚེ་འདི་བློ་ཡིས་ཐོངས་པར་བྱིན་གྱིས་རློབས། །བྲག་དཀར་རྟ་སོ་དབུ་མ་རྫོང་། །དབུ་མ་རྫོང་གི་རྫོང་རྩེ་ན། །བོད་ཀྱི་རྣལ་འབྱོར་རས་པ་ང་། །ལྟོ་གོས་ཚེ་འདི་བློས་བཏང་ནས། །རྫོགས་པའི་སངས་རྒྱས་སྒྲུབ་པ་ལ། །འོག་ན་སྲ་བའི་འབོལ་ཆུང་བདེ། །སྟེང་ན་བལ་པོའི་ཤིང་རས་བདེ། །པུས་མཁྱུད་སྒོམ་ཐག་སྐོར་གཅིག་བདེ། །འགྲངས་ལྟོགས་སྙོམས་པའི་སྒྱུ་ལུས་བདེ། །ལྟ་རྟོག་ཐོངས་པའི་སེམས་ཉིད་བདེ། །མི་བདེ་མི་གདའ་བདེ་མོར་གདའ། །བདེ་བདེ་འདྲ་ན་ཀུན་ཀྱང་མཛོད། །ཆོས་བྱེད་ཀྱི་སྐལ་བ་མི་ལྡན་ན། །ང་བདག་གཞན་སེམས་ཅན་ཐམས་ཅད་ཀྱི། །གཏན་གྱི་བདེ་སྐྱིད་སྒྲུབ་པ་ལ། །གོ་ལོག་གི་སྙིང་རྗེ་མི་འཚལ་གྱིས། །ཉི་མ་ཟེར་བྱུང་ལ་ལ་སོང་། །ཁྱེད་རྣམས་རང་རང་གནས་སུ་སོངས། །ང་ཚེ་ཐུང་ནམ་འཆི་ཆ་མེད་ལ། །རྫོགས་པའི་སངས་རྒྱས་སྒྲུབ་པ་ལ། །གཡེངས་གཏམ་ལབ་ཏུ་ཁོམ་པ་མེད། །དེའི་ཕྱིར་མཉམ་གཞག་གི་ངང་དུ་འཇོག་བྱས་པས། ཁོང་རྣམས་ན་རེ། ཁྱེད་རང་དག་བདེ་བདེ་མང་པོ་འདྲེན་གྱིན་འདུག་སྟེ། བདེ་ངེས་པ་གྲེ་བ་བདེ་མོ་ཞིག་འདུག ངེད་རྣམས་ཁྱོད་ཀྱི་འདི་འདྲ་བྱེད་པ་རུང་ཡང་མི་རུང་ཟེར་ནས་སོང་ངོ་། །དེ་ནས་སྐྱ་རྔ་རྩ་ན་ལོ་རེ་བཞིན་ཚ་ཚ་འདེབས་པའི་ཆང་ས་ཆེན་པོ་ཞིག་བྱེད་ཅིང་ཡོད་པ། དེའི་དུས་སུ། ཁྱི་ར་བ་རྣམས་ཀྱིས་མགྲིན་གཅིག་ཏུ་བསྡེབས་ནས། བདེ་བ་ལྔའི་དབྱངས་བླངས་པས། དེའི་ས་ན་པེ་ཏ་ཡང་
(༡༥༨)སློང་མོ་བྱེད་ཅིང་ཡོད་པས་ཐོས་ཏེ། ཁོང་དེ་སྐད་ཟེར་མཁན་དེ་སངས་རྒྱས་ཞིག་ཡོད་པར་འདུག་བྱས་པས། ཁྱི་ར་བ་རྣམས་ཀྱི་ནང་ནས་གཅིག་ན་རེ། ཧེ་ཧེ་མོ་རང་གི་ཇོ་ཇོའི་བསྟོད་ར་ལ་ཟེར། གཅིག་ན་རེ་སངས་རྒྱས་དང་སེམས་ཅན་གང་ཡིན་རུང་། ཁྱོད་རང་གི་ཇོ་ཇོ་ལྟོགས་གྲིར་འཆི་རུ་ཆ་བའི་གླུ་ཡིན་ཟེར་བས། པེ་ཏས་ང་ཕ་མ་སྔ་མོར་ཤི། གཉེན་དགྲར་ལངས། ཇོ་ཇོ་ས་མཐར་འཁྱར་མ་ཕྲད་པའི་སྤྲང་མོ་ཞིག་ལ་སྙིང་ཚིམ་བྱ་མི་དགོས་འདུག་ཟེར་མང་དུ་ངུས་པའི་སར་མཛེས་སེ་བྱུང་ནས། མ་ངུ་ཇོ་ཇོ་ཡིན་པར་ཡོད་པ་འདུག དང་པོ་ང་དང་ཡང་ཕྲད། ད་ཁྱོད་རང་བྲག་དཀར་རྟ་སོར་སོངས་ལ་ཨེ་འདུག་ལྟོས་ཤོག འདུག་ན་རང་རེ་གཉིས་ཀ་འཕྲད་དུ་འགྲོ་ཟེར་བས་བདེན་སྙམ། ཕ་འབབ་བསླངས་པའི་ཆང་ཟོ་བ་གང་དང་། ཕྱེ་དང་ཟན་འདྲེས་པ་སྣོད་ཆུང་ཞིག་འདུག་པ་དེ་གང་ཁྱེར་ནས་བྲག་དཀར་རྟ་སོར་སླེབས་བྱུང་སྟེ། སྒོའི་ཕྱི་ནས་བལྟས་པས། ང་དཀའ་ཐུབ་ཀྱིས་གདུངས་པའི་ལུས། མིག་གཏིང་དུ་ལྷུང་བ། རུས་པ་ཐམས་ཅད་སྒང་དུ་ཐོན་པ། མདོག་སྔོ་ལ་ཤ་རིད་པ། ཤ་རུས་བྲལ་དུ་ཆ་བའི་པགས་པ་ལ་བ་སྤུ་སྔོ་ཟིང་ངེ་བ་སྐྱེས་པ། སྐྲ་ཡེགས་ལ་འཇིགས་པ། ཡན་ལག་རྣམས་འཆག་ལ་ཁད་པ་དེ་མཐོང་ནས། ཐོག་མར་འདྲེ་ཡིན་པ་འདྲ་སྙམ་འཇིགས་པ་ལས། ཇོ་ཇོ་ལྟོགས་གྲིར་འཆི་རུ་ཆ་བ་འདུག་ཟེར་བ་ཐོས་པས་ཐེ་ཚོམ་ཟོས་ཏེ། ཁྱེད་མི་ཡིན་ནམ་འདྲེ་ཡིན་ཟེར། ང་མི་ལ་ཐོས་པ་དགའ་ཡིན་བྱས་པས་སྐད་ངོ་ཤེས་ཏེ། ནང་དུ་འོངས་ང་ལ་འཇུས་ནས། ཨ་ཇོ་ཨ་ཇོ་ཟེར་བའི་ངང་ནས་ཡུག་གཅིག་དྲན་མེད་དུ་བརྒྱལ་འདུག ངས་ཀྱང་པེ་ཏ་ཡིན་པར་ཤེས་ཏེ། དགའ་བ་དང་སྐྱོ་བ་གཉིས་
(༡༥༩)ཀ་བྱུང་། གསོ་བའི་ཐབས་ཅི་ལེགས་བྱས་པས། དར་ཅིག་ནས་དྲན་པ་རྙེད་དེ། པུས་མོ་གཉིས་ཀྱི་བར་དུ་མགོ་བོ་བཙུད། ལག་པ་གདོང་ལ་བཀབ་ནས། ངུ་བའི་སྨྲེ་སྔགས་ལ། ཨ་མ་ནི་ཨ་ཇོ་སྙིང་ལ་འདོད་བཞིན་པའི་ངང་ནས་སྡུག་གྲིར་ཤི། གཞན་འཁོར་མི་ནི་མ་བྱུང་བས་ང་སྡུག་དྲགས་ཁྱིམ་དུ་མ་ཚུགས་པར་ཡུལ་གཞན་དུ་སྤྲང་དུ་ཕྱིན། ཨ་ཇོ་ཡང་ཤི་བ་ཡིན་ནམ། མ་ཤི་ན་འདི་བས་སྐྱིད་པ་ཞིག་ཡོད་སྙམ་པ་བྱུང་སྟེ། ཨ་ཇོའི་སྐྱིད་སྡུག་ནི་འདི་ཀར་འདུག ང་སྲིང་མོའི་ཁ་འཁོས་ནི་འདི་ཀ་ཡིན། འུ་ཅག་མིང་སྲིང་བས་སྡུག་པ་ནི་ས་ཐོག་ཏུ་མི་འོང་ཟེར་ཕ་མའི་མིང་ནས་བོས་ཏེ། མང་དུ་ངུ་ཞིང་འདུག་པ་ལ་ངས་སེམས་གསོ་མང་པོ་བཏང་རུང་ཕན་པ་མ་བྱུང་བས། ང་རང་ཡང་ཤིན་ཏུ་སྐྱོ་བའི་ངང་ནས་སྲིང་མོ་ལ་གླུ་འདི་བླངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །སྤྲང་རི་ཁྲོད་ཟིན་པར་བྱིན་གྱིས་རློབས། །སྲིང་མོ་འཁོར་བའི་གདུང་སེམས་ཅན། །སྤྱིར་སྐྱིད་སྡུག་ཐམས་ཅད་མི་རྟག་སྟེ། །སྒོས་སྡུག་ལུགས་འདི་འདྲ་བྱས་གྱུར་ན། །གཏན་གྱི་བདེ་སྐྱིད་ཡོད་པར་ངེས། །དེ་ཕྱིར་ཨ་ཇོའི་གླུ་ལ་ཉོན། །ང་འགྲོ་ཀུན་དྲིན་ཅན་ཕ་མ་ཡི། །དྲིན་ལན་བསབ་ཕྱིར་ཆོས་བྱེད་པའི། །གནས་ལ་བལྟས་ན་རི་དྭགས་འདྲ། །གཞན་གྱིས་མཐོང་ན་སྙིང་རླུང་ལྡང་། །ཟས་ལ་བལྟས་ན་ཁྱི་ཕག་འདྲ། །གཞན་གྱིས་མཐོང་ན་སྐྱུག་བྲོ་ལྡང་། །ལུས་ལ་བལྟས་ན་ཀེང་རུས་འདྲ། །སྡང་དགྲས་མཐོང་ཡང་མཆི་མ་འཆོར། །སྤྱོད་ལམ་བལྟས་ན་སྨྱོན་པ་འདྲ། །སྲིང་མོ་ཡི་མུག་ཁ་སྐྱེངས་སྐྱེ། །སེམས་ལ་བལྟས་ན་སངས་རྒྱས་དངོས། །རྒྱལ་བས་གཟིགས་ན་སྤྲོ་བ་སྐྱེ། །འོག་ན་
(༡༦༠)རྡོ་བའི་གྲང་ཆལ་ལ། །ཤ་ལྤགས་འབིགས་པའི་སྙིང་རུས་བྱས། །ལུས་ཕྱི་ནང་ཟྭ་ཡི་རང་བཞིན་ལ། །མདོག་སྔོན་པོ་ཞིག་ལ་འགྱུར་བ་མེད། །མི་མེད་བྲག་གི་ཕུག་པ་ན། །སྐྱོ་ཆད་དེ་བ་ལ་སངས་དུས་མེད། །བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད། །ངས་སྙིང་རུས་འདི་ལྟར་བསྒོམས་པའི་མཐུས། །ཉམས་རྟོགས་སྐྱེ་བར་ཐེ་ཚོམ་མེད། །ཉམས་དང་རྟོགས་པ་འཁྲུངས་པ་ན། །ཚེ་འདིའི་བདེ་སྐྱིད་ཞོར་ལ་འབྱུང་། །ཕྱི་མ་མངོན་པར་རྫོགས་སངས་རྒྱ། །དེ་ཕྱིར་སྲིང་མོ་པེ་ཏ་ལྕམ། །ཡི་ཆད་སྡུག་བསྔལ་མ་མང་བར། །ཆོས་ཕྱིར་དཀའ་བ་སྤྱད་འཚལ་ལོ། །བྱས་པས། པེ་ཏ་ན་རེ། དེ་ལྟར་ཡིན་ན་དག་ངོ་མཚར་ཆེ་སྟེ། བདེན་པ་རང་དཀའ་བ་འདྲ། བདེན་ན་ཆོས་པ་གཞན་རྣམས་ཀྱང་འདི་བཞིན་རང་མ་བྱུང་རུང་འདིའི་ཆ་འདྲ་ཙམ་བྱེད་ཐང་སྟེ། སྡུག་འདི་འདྲ་བྱེད་མཁན་མ་མཐོང་ཟེར། ཟན་དང་ཆང་བྱིན་བྱུང་བ་ཟོས་འཐུངས་པའི་མོད་ལ་རིག་པ་གསལ་སིང་སོང་། དེའི་ནུབ་མོ་དགེ་སྦྱོར་ལ་བོགས་ཐོན་པ་བྱུང་། ནངས་པར་པེ་ཏ་སོང་རྗེས་སྔར་ཡོང་མ་མྱོང་བའི་ལུས་ལ་བདེ་ཟུག་ན་ཟུག་གཉིས་ཀ་ཡོད་པ་དང་། སེམས་ལ་དགེ་མི་དགེའི་རྟགས་སྣང་སྣ་ཚོགས་བྱུང་ཚེ་སྙིང་རུས་བྱས་བསྒོམས་རུང་། ཕན་གནོད་ཅི་ཡང་མ་བྱུང་། དེ་ནས་ཞག་འགའ་ནས་མཛེས་སེས་ཤ་མར་རྙིང་བ་དང་། རྩམ་ཆང་བཟང་ལ་མང་བ་ཁྱེར་ཏེ་པེ་ཏ་དང་གཉིས་ཀ་ཕྲད་དུ་བྱུང་བ། ང་ཆུ་ལེན་དུ་ཕྱིན་པ་དང་ཐུག་སྟེ། ང་ལ་གོས་མེད་པར་སྔོ་ཧྲེང་ཧྲེང་འདུག་པ་དེ་མཐོང་
(༡༦༡)ནས། གཉིས་ཀ་ངོ་ཚ་རུང་མ་ཕོད་པར་ངུ་ཞིང་འདུག དེ་ནས་ཤ་མར་དང་ཕྱེ་ཕུལ་ཆང་དྲངས་པ་འཐུང་བའི་བར་ལ། པེ་ཏ་ན་རེ། ད་ཨ་ཇོ་ལ་གང་ནས་བལྟས་རུང་མིའི་མིང་རང་མི་འདུག་པས། བསོད་སྙོམས་རེ་མཛོད་ལ་མི་ཟས་དུམ་རེ་གསོལ། ངས་ན་བཟའ་ཞིག་ཅི་འབྱོར་བྱས་ལ་འབུལ་དུ་འོང་ཟེར། མཛེས་སེ་ན་རེ། འཚོ་བའི་བསོད་སྙོམས་རེ་ཅིས་ཀྱང་མཛོད། ན་བཟའ་ཞིག་ངས་ཀྱང་འབུལ་དུ་འོང་ཟེར་བས། ངས་ད་ནམ་འཆི་ཆ་མེད་ལ་བསོད་སྙོམས་བྱས་འཚོ་བ་སྒྲུབ་པའི་ལོང་དང་དོན་མེད། གྲང་གྲིར་ཤི་ཡང་ཆོས་ཕྱིར་ཡིན་པས་འགྱོད་རྒྱུ་ཆུང་། སྒྲུབ་པ་བློས་བཏང་ནས་འབད་པས་བསྒྲུབས་པའི་ལྟོ་ཡོག་ཚད་དང་། གོས་བཟང་པོ་བརྩེགས་ནས་གྱོན་པའི་མདུན་དུ། གཉེན་དང་དགའ་གྲོགས་འཚོགས་ནས་བག་མེད་ཀྱི་བཟའ་བཏུང་དང་། བཞད་གད་བྱེད་པའི་ཆོས་དེས་ངའི་བསམ་པ་མི་རྫོགས་པས། ཁྱེད་ཀྱི་གོས་དང་འོང་མཁན་ཡང་མི་དགོས། ཁ་ལ་ཡང་མི་ཉན་པས་བསོད་སྙོམས་ཀྱང་མི་བྱེད་བྱས་པས། པེ་ཏ་ན་རེ། འོ་ན་ཨ་ཇོའི་བསམ་པ་ཇི་འདྲ་ཞིག་གིས་རྫོགས་པ་ཡིན། འདི་ལས་ཀྱང་སྡུག་པ་ཞིག་གིས་རྫོགས་པ་འདུག་སྟེ། བྱ་ཐབས་རང་མེད་དམ་ཟེར་བ་ལ། ངའི་འདི་བས་ངན་སོང་གསུམ་བསམ་གྱིས་མི་ཁྱབ་པས་སྡུག་སྟེ། སྡུག་དེ་མྱོང་ཐབས་བྱེད་པའི་སེམས་ཅན་རང་མང་བར་གདའ། ངའི་བསམ་པ་འདི་ལྟ་བུ་ཞིག་གིས་རྫོགས་པ་ཡིན་བྱས། བསམ་པ་རྫོགས་ལུགས་ཀྱི་གླུ་འདི་བླངས་སོ། །རྗེ་བླ་མའི་སྐུ་ལ་གསོལ་བ་འདེབས། །སྤྲང་རི་ཁྲོད་ཟིན་པར་བྱིན་གྱིས་རློབས། །ང་སྐྱིད་པ་གཉེན་གྱིས་མ་ཚོར་ཞིང་། །སྡུག་པ་དགྲ་ཡིས་མ་
(༡༦༢)ཚོར་བར། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །རྒས་པ་གྲོགས་ཀྱིས་མ་ཚོར་ཞིང་། །ན་བ་སྲིང་མོས་མ་ཚོར་བར། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ཤི་བ་མི་ཡིས་མ་ཚོར་ཞིང་། །རོ་རུལ་བྱ་ཡིས་མ་མཐོང་བར། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ཤ་རུལ་སྦྲང་མས་འཇིབ་པ་དང་། །རྩ་རྒྱུས་འབུ་ཡིས་ཟ་བ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ང་སྒོ་ན་མི་རྗེས་མེད་པ་དང་། །ནང་ན་ཁྲག་རྗེས་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །རོ་ལ་འཁོར་མི་མེད་པ་དང་། །ཤི་ན་ངུ་མི་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ང་གར་སོང་འདྲི་མི་མེད་པ་དང་། །འདིར་སོང་གཏད་སོ་མེད་པ་རུ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །མི་མེད་ལུང་བའི་བྲག་ཕུག་ཏུ། །སྤྲང་པོ་འཆི་བའི་སྨོན་ལམ་འདི། །འགྲོ་བའི་དོན་དུ་ཐེབས་པར་ཤོག །ཐེབས་ན་བསམ་པ་རྫོགས་པ་ཡིན། །བྱས་པས། མཛེས་སེ་ན་རེ། དང་པོའི་གསུང་ལུགས་དང་ད་ལྟའི་མཛད་པ་རྣམས་མཐུན་པར་འདུག་པས་ངོ་མཚར་ཆེ་ཟེར། པེ་ཏ་ན་རེ་ཨ་ཇོ་རང་ཅི་གསུང་རུང་འཚོ་བ་དང་ན་བཟའ་ཡེ་མེད་པ་འདི་ལ། ངས་ཡེ་མི་བཟོད་པར་འདུག་པས། ངས་ན་བཟའ་ཞིག་ཅི་འབྱོར་བྱས་སྐྱེལ་དུ་འོང་། ལྟོ་གོས་བཟང་བས་སྒྲུབ་པ་བྲོས་དོགས་མེད་དེ། བསོད་
(༡༦༣)སྙོམས་མི་བྱེད་པར་འདུག མ་བྱས་པར་ཨ་ཇོ་རང་གི་བསམ་པ་ལྟར་རི་ཁྲོད་འདིར་འཁོར་མཁན་མེད་པར་སྡུག་གྲིར་འཆི་བ་འདུག་གིས་དང་། གལ་ཏེ་མ་ཤི་ན་ངས་གོས་ཤིག་ཅི་འབྱོར་བྱས་སྐྱེལ་ལོ་ཟེར། ཁོང་གཉིས་སོང་། ངས་ཟ་མ་བཟང་པོ་རྣམས་ཟོས་པས། ལུས་ཀྱི་བདེ་ཟུག་དང་ན་ཟུག་ཡིད་ཀྱི་ལུས་སྣང་རྣམས་ཇེ་ཆེར་སོང་ནས་སྒོམ་མི་ནུས་པ་བྱུང་བའི་ཚེ། སྒོམ་མི་ནུས་པ་ལས་གེགས་ཆེ་བ་མི་འོང་སྙམ། བླ་མས་གནང་བའི་ཤོག་རིལ་གྱི་རྒྱ་བཤིགས་ནས་བལྟས་པས། དེའི་ནང་ན་གེགས་སེལ་བོགས་འདོན་གྱི་ཉིང་ཁུ། སྐྱོན་འཛིན་ཡོན་ཏན་དུ་བསྒྱུར་བའི་མན་ངག་རྣམས་དང་། ཁྱད་པར་འདིའི་སྐབས་སུ་ཟ་མ་བཟང་པོ་བསྟེན་བྱ་བ་ཞིག་འདུག་པས། སྔར་སྙིང་རུས་བྱས་བསྒོམས་པའི་ནུས་པས། རྩ་ནང་དུ་ཁམས་འདུས་སུ་ཆ་བ་ཟས་ངན་པའི་སྟོབས་ཀྱིས་སློང་མ་ནུས་པ་ལ། པེ་ཏའི་ཆང་གིས་ཅུང་ཟད་བསླངས། མཛེས་སེས་ཕུལ་བ་རྣམས་ཀྱིས་རྫོགས་པར་བསླངས་པར་གོ་ནས། ཤོག་རིལ་གྱི་ནང་ལྟར་ལུས་གནད། རླུང་གནད། དམིགས་པ་རྣམས་ལ་འབད་པས། རྩ་ཕྲན་རྣམས་ཀྱི་མདུད་པ་གྲོལ། དབུ་མའི་ཡང་ལྟེ་བ་མན་གྱི་མདུད་པ་གྲོལ་ཏེ། བདེ་གསལ་མི་རྟོག་པའི་ཉམས་སྔར་གོ་མྱོང་བ་རྣམས་དང་ཚིག་ཏུ་འདྲ་ལ། དོན་ལ་རྩལ་ཆེ་ཞིང་བརྟན་པས་མི་འདྲ་བའི་ཉམས་རྟོགས་ཀྱི་ཡོན་ཏན་ཁྱད་པར་ཅན་སྐྱེས་ཏེ། གེགས་ལས་གྲོལ་ནས་སྐྱོན་རྣམས་ཡོན་ཏན་དུ་ངོ་འཕྲོད། རྣམ་རྟོག་ཏུ་བཟུང་བ་ཆོས་སྐུར་ཤར་བས། སྤྱིར་འཁོར་འདས་ཀྱི་ཆོས་ཐམས་ཅད་རྟེན་འབྲེལ་དུ་གོ་ཞིང་། དེ་ཡང་ཀུན་གཞི་རང་སེམས་ཕྱོགས་ལྷུང་དང་བྲལ་བ། ལམ་ལོག་ལྟས་དྲངས་པའི་རྐྱེན་གྱིས་འབྲས་བུ་
(༡༦༤)འཁོར་བ། ལམ་ལྷག་བསམ་གྱིས་དྲངས་པའི་རྐྱེན་གྱིས་འབྲས་བུ་མྱང་འདས། དེ་གཉིས་ཀའི་སྙིང་པོ་སྟོང་ཉིད་འོད་གསལ་དུ་ཁོ་ཐག་ཆོད་ལ། ཁྱད་པར་ད་ལན་རྒྱུད་ལ་སྐྱེས་པའི་ཡོན་ཏན་འདི་སྔར་བསྒོམས་པས་རྒྱུ་བྱས། ཟ་མ་དང་མན་ངག་ཟབ་མོས་རྐྱེན་བྱས་པའི་རྟེན་འབྲེལ་ལས་བྱུང་བར་གོ་ནས། གསང་སྔགས་ཐབས་ཀྱི་ལམ་འདོད་ཡོན་ལམ་དུ་འཁྱེར་བ་ལ་ཐུན་མོང་མ་ཡིན་པའི་ངེས་ཤེས་འདྲོངས། པེ་ཏ་དང་མཛེས་སེ་ཡང་ཤིན་ཏུ་དྲིན་ཆེ་བར་གོ་ནས། བྱས་པ་དྲིན་གཟོ་དགེ་བ་བྱང་ཆུབ་ཏུ་བསྔོས་པའི་མཐར། རྟེན་འབྲེལ་སྙིང་པོའི་གླུ་འདི་བླངས་སོ། །ལྷོ་བྲག་མར་པའི་ཞབས་ལ་འདུད། །སྤྲང་རི་ཁྲོད་ཟིན་པར་བྱིན་གྱིས་རློབས། །ཡོན་བདག་བཟང་པོའི་ཚོགས་གསོག་ལ། །དོན་གཉིས་འགྲུབ་པའི་རྟེན་འབྲེལ་འགྲིག །རྙེད་དཀའ་འཇིག་སླའི་ལུས་པོ་འདི། །ཟས་དང་ཕྲད་པས་སྐུ་ཁམས་བཟང་། །དོག་མོ་ས་ཡི་རྩི་བཅུད་དང་། །དགུང་སྔོན་དབྱིངས་ཀྱི་སྦྲང་ཆར་གཉིས། །འགྲོ་ལ་ཕན་པའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་ལྷ་ཆོས་ཡིན། །ཕ་མས་གསོས་པའི་སྒྱུ་ལུས་དང་། །བླ་མ་དམ་པའི་གདམས་ངག་གཉིས། །ལྷ་ཆོས་བྱེད་པའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་སྙིང་རུས་ཡིན། །མི་མེད་ལུང་བའི་བྲག་ཕུག་དང་། ཁ་ཞེ་མེད་པའི་དགེ་སྦྱོར་གཉིས། །ཅི་བསམས་འགྲུབ་པའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་སྟོང་ཉིད་ཡིན། །མི་ལ་རས་པའི་སྒོམ་བསྲན་དང་། ཁམས་གསུམ་སེམས་ཅན་དད་པ་གཉིས། །འགྲོ་དོན་འབྱུང་བའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་སྙིང་རྗེ་ཡིན། །བྲག་ལ་
(༡༦༥)སྒོམ་པའི་སྒོམ་ཆེན་དང་། །འཚོ་བ་སྦྱོར་བའི་ཡོན་བདག་གཉིས། །སངས་མཉམ་པོར་རྒྱ་བའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་བསྔོ་བ་ཡིན། །བླ་མ་བཟང་པོའི་ཐུགས་རྗེ་དང་། །སློབ་མ་བཟང་པོའི་སྒོམ་བསྲན་གཉིས། །བསྟན་པ་འཛིན་པའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་དམ་ཚིག་ཡིན། །བྱིན་རླབས་མྱུར་པོའི་དབང་བསྐུར་དང་། །དད་གུས་དྲག་པོའི་གསོལ་འདེབས་གཉིས། །མྱུར་དུ་མཇལ་བའི་རྟེན་འབྲེལ་ཡིན། །རྟེན་འབྲེལ་གྱི་སྙིང་པོ་བཀྲ་ཤིས་ཡིན། །རྗེ་མི་བསྐྱོད་ཀྱི་ངོ་བོ་རྡོ་རྗེ་འཆང་། །སྤྲང་པོའི་སྐྱིད་སྡུག་ཁྱེད་རང་མཁྱེན། །ཞེས་པའི་གླུ་བླངས། དེ་ནས་ཡང་སྙིང་རུས་བྱས་བསྒོམས་པས། ཉིན་སྣང་ལ་ལུས་འདོད་དགུར་བསྒྱུར་བ་དང་། མཁའ་ལ་ལྡིང་བ་ལ་སོགས་ཏེ་རྫུ་འཕྲུལ་ཡ་མ་ཟུང་དཔག་མེད་སྟོན་ནུས་པའི་ཉམས་ཤར། མཚན་སྣང་རྨི་ལམ་དུ་སྲིད་པའི་རྩ་རྩེ་ཀུན་ཐོགས་མེད་དུ་གསལ་ཞིང་ཉུལ་ནུས་པ་དང་། ལུས་སེམས་བརྒྱ་ཕྲག་དུ་མར་སྤྲུལ་ནས། རེ་རེ་སངས་རྒྱས་ཀྱི་ཞིང་རེ་རེར་ཕྱིན་ཏེ་ཆོས་ཉན་པ་དང་། སེམས་ཅན་དཔག་མེད་ལ་ཆོས་སྟོན་ནུས་པ་དང་། ལུས་མེར་འབར་བ་དང་། ཆུར་འབྲུབ་པ་ལ་སོགས་ཏེ། རྫུ་འཕྲུལ་བསམ་གྱིས་མི་ཁྱབ་པ་སྟོན་པ་བྱུང་བས་སེམས་ལ་དགའ་སྤྲོ་དང་དཔའ་སྐྱེས་ནས་བྲོད་བཞིན་བསྒོམས་པས། དངོས་སུ་ནམ་མཁའ་ལ་འཕུར་ནུས་པ་བྱུང་སྟེ། རེས་སྨིན་ཁྱུགས་གྲིབ་མའི་རྫོང་ལ་ཕར་འཕུར་ཏེ་བསྒོམས་པས། གཏུམ་མོའི་བདེ་དྲོད་ཀྱང་སྔར་བས་ལྷག་པ་བསམ་གྱིས་མི་ཁྱབ་པ་སྐྱེས། རེས་བྲག་དཀར་རྟ་སོར་ཚུར་འོངས་པའི་ཚེ། རྟ་སོའི་འགྲམ་ན་གློང་གདའ་བྱ་བའི་ཡུལ་ཆུང་
(༡༦༦)ཞིག་ཡོད་པ་དེ་ན། དང་པོ་ཨ་ཁུའི་མནའ་མ་ཐིབས་འོག་ཏུ་ཤི་བའི་མིང་པོ་ཕ་བུ་གཉིས་བུས་རྨོས་སྣ་འཁྲིད། ཕས་ཐོང་བཟུང་ནས་ཞིང་རྨོ་ཞིང་འདུག་པས། བུས་ང་འཕུར་བ་མཐོང་ནས། ཨ་ཕ་ཡ་མཚན་ལ་ལྟོས་དང་མི་འཕུར་བྱུང་ཟེར། ལས་འཕྲོ་བོར་ནས་ལྟ་ཞིང་འདུག་པ་ལ། ཕ་ན་རེ་ཡ་མཚན་དང་ལྟད་མོ་ཆེ་རྒྱུ་ཅི་ཡོད། མྱང་ཚ་དཀར་རྒྱན་ཟེར་བའི་བུད་མེད་ཁྲམ་མ་ཞིག་གི་བུ། གཡོན་ཅན་མི་ལ་ཟེར་བའི་གོག་པ་ལྟོ་མ་ཕྱིད་པ་ཞིག་ཡོད་པ་དེ་ཡིན་པར་འདུག གྲིབ་མ་དང་འགོམ་ཡུག་མ་ཕོག་པ་གྱིས་ལ་རྨོས་སྣ་ཁྲིད་ཟེར། ཕ་རང་གྲིབ་མ་ཕོག་གིས་དོགས་མགོ་ལུས་ཡོ་བྱེད་ཅིང་འདུག བུ་ན་རེ། འཕུར་ཐུབ་ན་གོག་ནའང་གོག ལྟད་མོ་མི་འཕུར་བ་ལས་ཆེ་བ་མི་འོང་བས་ལྟོས་ཟེར་ལྟ་ཞིང་འདུག་གོ། །དེ་ནས་ངའི་བསམ་པ་ལ། ད་ངས་འགྲོ་དོན་བྱས་ན་སེམས་ཅན་ལ་ཕན་ཐོགས་པ་འདུག་པས་བྱེད་དགོས་སྙམ་པའི་ཚེ། ཡི་དམ་གྱིས་དངོས་སུ་ཚེ་འདིར་བླ་མའི་བཀའ་བཞིན་སྒྲུབ་པ་གཙོ་བོར་ཐོན་ཅིག སངས་རྒྱས་ཀྱི་བསྟན་པའི་ཞབས་ཏོག་དང་སེམས་ཅན་གྱི་འགྲོ་དོན་ལ་དེ་བས་ཆེ་བ་མི་འོང་ངོ་བྱ་བའི་ལུང་བསྟན་བྱུང་བས། བསམ་བློ་ལ། ཚེ་གང་འདི་སྒྲུབ་པས་འདས་ན། མ་འོངས་པའི་སྐལ་ལྡན་གྱི་སྐྱེས་བུ་རྣམས་ཚེ་བློས་བཏང་སྟེ་ཆོས་སྒྲུབ་པའི་མིག་རྐྱེན་མཆོག་ཏུ་གྱུར་པས། བསྟན་པ་དང་སེམས་ཅན་ལ་ཕན་ཐོགས་རྒྱ་ཆེར་འོང་བར་གོ་ནས། སྒྲུབ་པ་རང་བྱེད་པར་བློ་ཐག་ཆོད་པ་ལ། ཡང་བསམ་བློ་ཞིག་ལ། ང་སྔར་གནས་འདིར་ཡུན་རིང་དུ་བསྡད། དེ་བར་མི་བྱུང་བ་རྣམས་ལ་ཆོས་ཀྱི་ཁ་ཕོ་ཡང་མང་པོ་ཤོར། ཁྱད་པར་བའི་ཉམས་
(༡༦༧)རྟོགས་ཤར་ནས་འཕུར་བ་དེ་ཡང་མིས་མཐོང་། ད་འདིར་བསྡད་རུང་འཇིག་རྟེན་པའི་རྐྱེན་བཟློག་དང་། འདོད་པ་སྒྲུབ་དགོས་སོགས་ལྷའི་བུའི་བདུད་དང་། འཇིག་རྟེན་ཆོས་བརྒྱད་ཀྱིས་སྒྲུབ་པ་ལ་བར་ཆད་བྱུང་དོགས་ཡོད་པས། བླ་མས་ལུང་བསྟན་པའི་གནས་ཆུ་དབར་ལ་སྒོམ་དུ་འགྲོ་དགོས་སྙམ། ཟྭ་འཚོད་པའི་རྫ་དེ་རྒྱབ་ཏུ་གཏད་དེ་བྲག་དཀར་རྟ་སོ་ནས་ཆས་འོངས་པས་སྒྲུབ་པ་ཡུན་རིང་གི་བར་ལ་ལྟོ་གོས་ངན་པའི་སྟོབས་ཀྱིས་རྐང་བ་ལ་རྭ་ཆགས་པ་ཕུག་པའི་འགྲམ་དུ་རྡོ་ལ་འདྲེད་ནས་འགྱེལ་བས། རྫའི་ལུང་ཐག་ཆད་ནས་རྦབ་ཏུ་ཤོར་བ་འཛིན་དུ་ཕྱིན་པས། རྫ་ཆག་པའི་ནང་ནས་ཟྭའི་ཁྲུད་མ་གཅིག་ཁར་གཅིག་ཆགས་པ་རྫ་རང་ཇི་ལྟ་བ་ཞིག་སྔོ་ཁོར་རེ་བྱུང་བ་ལ། འདུས་བྱས་མི་རྟག་པ་སྟོན་ཅིང་དྲན་གསོ་བ་དང་། སྒྲུབ་པའི་བསྐུལ་མར་ཡང་གོ་སྟེ་ཡ་མཚན་ཞིང་ངེས་པར་འབྱུང་བའི་ངང་ནས། རྫ་ད་ལྟ་ཡོད་པ་ད་ལྟ་མེད། །དཔེ་འདིས་འདུས་བྱས་ཀྱི་ཆོས་ཀུན་མཚོན། །ཁྱད་པར་དལ་འབྱོར་གྱི་མི་ལུས་མཚོན། །དེས་ན་རྣལ་འབོར་མི་ལ་ང་། །ཡེངས་མེད་དུ་སྒྲུབ་ལ་བརྩོན་འགྲུས་བྱེད། །ནོར་ཡོད་རྒུ་འདུས་པ་མཁོ་བའི་རྫ། །དུས་ད་ལན་ཆག་པ་བླ་མར་བྱུང་། །ཆོས་མི་རྟག་བཤད་པ་ངོ་མཚར་ཆེ། །ཟེར་གླུ་ལེན་ཞིང་ཡོད་པའི་ཚེ། ཁྱི་ར་བ་འགའ་ཚ་བ་འདེབས་སུ་ངའི་སར་བྱུང་ནས། རྣལ་འབྱོར་པ་ཁྱོད་ལ་གླུ་ལེན་པའི་སྐད་སྙན་པོ་ཞིག་འདུག རྫའི་ཁོག་མ་དེ་བཅག་ནས་ཟྭའི་ཁོག་མ་འདིས་ཅི་བྱེད་པ་ཡིན། ལུས་སྔོ་ལ་རིད་པ་འདི་ཅི་ལས་བྱུང་ཟེར་བ་ལ། ངས་ལུས་ཟུངས་ཟད་པའི་རྒྱུ་མཚན་
(༡༦༨)རྣམས་བཤད་པས། ངོ་མཚར་ཆེ་འོ་ན་ཡར་ཤོག་ཟེར་ཚ་བ་མཉམ་དུ་བྱིན་པ་ཟ་བའི་བར་ལ། ཁྱི་ར་བ་གཞོན་པ་ཞིག་ན་རེ། ཁྱོད་རང་མི་མིག་རྩ་ཅན་ཞིག་འདུག་པ་ལ། འདི་འདྲའི་སྡུག་བྱེད་པ་བས་འཇིག་རྟེན་པ་བྱས་ན། རབ་རྟ་བཟང་སེང་ཕྲུག་འདྲ་བ་ཞོན། འཁོར་གསུམ་ཚེར་མ་འདྲ་བ་བཏགས་ནས། སྡང་བའི་དགྲ་བཏུལ། ནོར་ལོངས་སྤྱོད་འཛོམ་པོས་བྱམས་པའི་གཉེན་བསྐྱངས་པས་སྐྱིད་འོང་། དེ་མིན་ཚོང་བྱས་རུང་རང་མགོ་ཐོན་པས་སྐྱིད་འོང་། ཐ་མ་མི་གཡོག་བྱས་ཀྱང་ལྟོ་གོས་བཟང་པོ་མྱོང་བས་ལུས་སེམས་འདི་འདྲ་བས་སྐྱིད་པ་འོང་སྟེ། སྔར་མ་ཤེས་འདུག ད་བྱས་པ་དྲག་ཟེར། རྒན་པ་ན་རེ། ཁོང་ཆོས་པ་སྒྲུབ་པ་པོ་དགའ་མོ་རང་ཞིག་ཡིན་རིགས་སུ་འདུག་པས། འུ་ཅག་འཇིག་རྟེན་པའི་ཁ་ལ་ཉན་དོགས་མེད་ཁ་རོག་སྡོད། དེ་བས་ཁྱེད་གྲེ་བ་བདེ་མོ་རང་ཞིག་འདུག་པས། ངེད་ཚོའི་སེམས་ལ་ཕན་པའི་གླུ་གཅིག་ལོངས་དང་ཟེར་བས། ང་ལ་ཁྱེད་རྣམས་ཀྱིས་བལྟས་ན་ང་སྡུག་སྡུག་འདྲ་སྟེ། འཇིག་རྟེན་འདི་ན་ང་བས་སྐྱིད་པ་དང་ཤེས་པ་བསམ་བློ་ཐོངས་པ་གཞན་མེད་པ་དེ་ཁྱེད་རྣམས་ཀྱིས་མ་གོ ང་ལ་ཁྱེད་རྣམས་ཀྱི་རབ་དང་མཐུན་པའི་སྐྱིད་ལུགས་འདི་འདྲ་ཡོད་པས་ཉོན་ཅིག་བྱས་རྣལ་འབྱོར་རྟ་རྒྱུག་གི་གླུ་འདི་བླངས་སོ། །ཕ་དྲིན་ཅན་མར་པའི་ཞབས་ལ་འདུད། །ང་རང་ལུས་རི་བོའི་དགོན་པ་ན། །བྱང་ཁོག་སྟོད་ཀྱི་ལྷ་ཁང་ན། །ཟུར་གསུམ་སྙིང་གི་དབུ་རྩེ་ན། །སེམས་ཀྱི་རྟ་ཕོ་རླུང་ལྟར་འཕྱོ། །རྟ་འཛིན་ན་ཞགས་པ་གང་གིས་འཛིན། །
(༡༦༩)བརྟོད་ན་ཕུར་པ་གང་གིས་བརྟོད། །ལྟོགས་ན་ཟས་སུ་ཅི་ཞིག་སྟེར། །སྐོམ་ན་ཆུ་རུ་ཅི་ཞིག་ལྡུད། །འཁྱགས་ན་ར་བ་གང་དུ་འཛུད། །རྟ་འཛིན་ན་གཉིས་མེད་ཀྱི་ཞགས་པས་འཛིན། །བརྟོད་ན་ཏིང་འཛིན་གྱི་ཕུར་བས་བརྟོད། །ལྟོགས་ན་བླ་མའི་གདམས་ངག་སྟེར། །སྐོམ་ན་དྲན་པའི་ཆུ་རྒྱུན་ལྡུད། །འཁྱགས་ན་སྟོང་ཉིད་ཀྱི་ར་བར་འཇུག །ཐབས་ཤེས་གཉིས་ཀྱི་སྒ་སྲབ་སྤྲད། །འགྱུར་མེད་བརྟན་པའི་གོང་རྨེད་བཅུག །སྲོག་རྩོལ་རླུང་གི་མཐུར་མདའ་བརྒྱུས། །དེ་ལ་རིག་པའི་ཁྱེའུ་ཆུང་ཞོན། །ཐེག་ཆེན་སེམས་བསྐྱེད་རྒྱ་རྨོག་གྱོན། །ཐོས་བསམ་སྒོམ་པའི་འཇོལ་ཁྲབ་གྱོན། །བཟོད་པའི་ཕུབ་ཆུང་རྒྱབ་ཏུ་ཁུར། །ལྟ་བའི་མདུང་རིང་ལག་ཏུ་ཐོགས། །ཤེས་རབ་ཀྱི་རལ་གྲི་གློ་ལ་བཏགས། །ཀུན་གཞི་འཇམ་པོའི་སྨྱུག་མ་ལ། །ཁོང་ཁྲོ་མེད་པའི་འཁྱོག་ཅིག་བསྲང་། །ཚད་མེད་བཞི་ཡི་སྒྲོ་ཞིག་བསྐྱོན། །ཤེས་རབ་རྣོན་པོའི་མདེའུ་བཙུགས། །སྟོང་པ་ཉིད་ཀྱི་གཞུ་མོ་ལ། །ཐབས་ལམ་ཟབ་མོས་ལྟོང་སྦྱར་ནས། །ཟུང་འཇུག་ཡངས་པའི་འདོམ་ལ་འཇལ། །མདའ་འཕེན་པ་རྒྱལ་ཁམས་ཡོངས་ལ་འཕེན། །ཕོག་པ་དད་པ་ཅན་ལ་ཕོག །ཤི་བ་ངར་འཛིན་གྱི་འགོང་པོ་ཤི། །དེ་ཕྱིར་དགྲ་ནི་ཉོན་མོངས་འདུལ། །གཉེན་ནི་འགྲོ་དྲུག་སེམས་ཅན་སྐྱོང་། །རྟ་རྒྱུག་ནི་བདེ་ཆེན་ཐང་ལ་རྒྱུག །སྙོག་ནི་རྒྱལ་བའི་གོ་འཕང་སྙོག །དཀྱུས་སྨད་འཁོར་བའི་གཞི་རྩ་བཅད། །དཀྱུས་སྟོད་བྱང་ཆུབ་སྐམ་སར་སླེབ། །རྟ་དེ་ལྟར་བརྒྱུགས་པས་སངས་རྒྱས་ཐོབ། །ཁྱེད་ཀྱི་སྐྱིད་དང་འདྲའམ་ལྟོས། །འཇིག་རྟེན་གྱི་སྐྱིད་ལ་སྨོན་རྒྱུ་མེད། །བྱས་པས།
(༡༧༠)ཁོང་རྣམས་དད་པར་གྱུར་ནས་སོང་ངོ་། །ང་ཡང་ཆུ་དབར་ལ་འགྲོ་བའི་ལམ་དཔལ་ཁུད་ལ་བརྒྱུད་ནས་དིང་རིར་སླེབས་ཏེ་ལམ་ཁ་ཞིག་ཏུ་ཐད་ཀར་ཉལ་ཏེ་བསྡད་པས། སྣོག་མོ་ལ་འགྲོ་བའི་ན་ཆུང་རྒྱན་གོས་འཕྱོར་མོ་འགའ་བྱུང་བ་རྣམས་ཀྱིས་ང་དཀའ་ཐུབ་ཀྱིས་གདུངས་པའི་ལུས་དེ་མཐོང་ནས། གཅིག་ན་རེ། ཁོ་རེ་ཚོ་ལྟོས་དང་སྡུག་སྡུག་གི་འདྲ་བ་ལ། འདི་འདྲའི་ལུས་སུ་ནམ་ཡང་སྐྱེ་བར་མ་འགྱུར་ཅིག་ཟེར། གཅིག་ན་རེ། སྙིང་རྗེ་བ་ལ། འདི་འདྲ་མཐོང་བས་ཀྱང་སྙིང་རླུང་ལྡང་བར་འདུག་ཟེར་བ་ལ། ང་ཡང་མ་རིག་པའི་སེམས་ཅན་སྙིང་རྗེ་སྙམ་ཁོང་ཚོ་ལ་སྙིང་རྗེ་ལྷང་བ་ཞིག་སྐྱེས་ཏེ་ཙོག་ལངས་ནས། བུ་མོ་ཚོ་དེ་སྐད་མ་ཟེར་དང་། སེམས་ཁྲལ་དེ་མི་དགོས་པ་འདུག་གིས། ཁྱེད་རྣམས་ཀྱིས་ང་འདྲ་བར་སྨོན་ལམ་བཏབ་ཀྱང་སྐྱེ་བར་མི་འདུག སྙིང་རྗེ་བ་ངོ་མཚར་ཆེ་སྟེ་རང་མཐོང་དང་སྙིང་རྗེ་གོ་ལོག་ཡིན་པས་ངའི་གླུ་འདི་ཉོན་ཅིག་བྱས་གླུ་འདི་བླངས་སོ། །རྗེ་གསོལ་བ་འདེབས་སོ་བཀའ་དྲིན་ཅན། །བྱིན་གྱིས་རློབས་ཤིག་མར་པའི་ཞབས། །སེམས་ཅན་ལས་ངན་མནར་བ་རྣམས། །རང་མིན་གཞན་ལ་མཐོང་བ་ཆུང་། །ལས་ངན་བུ་མོ་ཁྱིམ་ལ་དད། །སྣང་ངན་རང་རྩིས་མེ་ལྟར་འབར། །སེམས་ཅན་བསམ་བརླག་སྙིང་རེ་རྗེ། །དུས་ངན་བསྐལ་པའི་སྙིགས་མ་ལ། །ཁྲམ་པ་ཡི་དམ་ལྷ་བཞིན་མཆོད། །ཟོག་པོ་རིན་ཆེན་གསེར་ལས་བྲིན། །ཆོས་པ་ལམ་ཁའི་རྡོ་བཞིན་བསྐྱུར། །མ་རིག་སེམས་ཅན་སྙིང་རེ་རྗེ། །ཁྱོད་བུ་མོ་འཕྱོར་མོ་སྤུན་རྣམས་དང་། །ང་གུང་
(༡༧༡)ཐང་གི་མི་ལ་རས་པ་གཉིས། །ཞེས་ཀྱང་ཕར་ཁྲེལ་ཚུར་ཁྲེལ་ཡིན། །སྙིང་ཡང་ཕར་རྗེ་ཚུར་རྗེ་ཡིན། །སྙིང་རྗེའི་མདུང་ཁ་བྱས་པ་ལ། །ནམ་ཕུགས་སུ་རྒྱལ་ལྟ་ཡང་ལྟ། །རྨོངས་པ་ཁ་འཆལ་སྨྲ་བ་ལ། །མི་ལ་རས་པས་གདམས་ངག་བཤད། །དེ་ཆུ་ལན་ཆང་གིས་འཇལ་བ་ཡིན། །ངན་ལན་བཟང་གིས་བསྐོར་བ་ཡིན། །བྱས་པས། སྙིང་རྗེ་བ་ལ་ཟེར་བའི་བུ་མོ་དེ་ན་རེ། ཁོང་མི་ལ་རས་པ་ཟེར་བ་དེ་ཡིན་པར་འདུག འོ་ཅག་ཀུན་རང་མཐོང་ཆེས་པས་ཁ་ནས་གང་མིན་བཅོ་བརྒྱད་ཤོར། ད་བཤགས་པ་གྱིས་ཟེར། སྨོན་ལམ་འདེབས་མཁན་གྱི་བུ་མོ་དེ་ལ་ཆེད་གཉེར་གྱིས་བསྐུལ་བས། མོས་ཀྱང་དུང་རྡོག་བདུན་ཕུལ་ནས། ཀུན་གྱིས་ཕྱག་འཚལ་བཤགས་པ་ཕུལ་ཏེ། ད་དུང་ཆོས་ཤིག་གནང་བར་ཞུ་ཟེར་བའི་ལན་དུ་གླུ་འདི་བླངས་སོ། །རྗེ་བཀའ་དྲིན་ཅན་ལ་གསོལ་བ་འདེབས། །དབྱངས་ཆུང་དམ་པའི་ཆོས་སུ་བཤད། །སྟེང་དགའ་ལྡན་ལྷ་ཡི་ཕོ་བྲང་ན། །ཆོས་ངེས་དོན་མི་བྲིན་དྲང་དོན་བྲིན། །འོག་མ་དྲོས་ཀླུ་ཡི་ཕོ་བྲང་ན། །ཆོས་ཟབ་མོ་མི་བྲིན་ཟང་ཟིང་བྲིན། །བར་འཛམ་བུ་གླིང་གི་མི་ཡུལ་འདིར། །ཆོས་མཁས་པ་མི་བྲིན་རྫུན་པ་བྲིན། །དབུས་གཙང་རུ་བཞིའི་རྒྱལ་ཁམས་ན། །ཆོས་སྒོམ་པ་མི་བྲིན་བཤད་པ་བྲིན། །དུས་ངན་བསྐལ་པའི་སྙིགས་མ་ལ། །མི་བཟང་པོ་མི་བྲིན་ངན་པ་བྲིན། །བུ་མོ་འཕྱོར་མོའི་མིག་ཡུལ་དུ། །མི་རྣལ་འབྱོར་མི་བྲིན་འཕྱོར་པོ་བྲིན། །ན་ཆུང་བུ་མོའི་རྣ་བ་རུ། །ཆོས་སིལ་མ་མི་སྙན་དབྱངས་ཆུང་སྙན། །དེ་གདམས་ངག་གླུ་རུ་བླངས་པ་ཡིན། །
(༡༧༢)དུང་རྡོག་བདུན་གྱི་གདབ་ལན་ཡིན། །བཤགས་པ་ཚར་བའི་དགའ་སྟོན་ཡིན། །ཞེས་གསུངས་པས། ཁོང་རྣམས་དད་པར་གྱུར་ཏེ་སོང་ངོ་། །ང་ཡང་བྲིན་དུ་ཕྱིན་པས། ཆུ་དབར་དང་སྐྱིད་ཕུག་གཉིས་ཀའི་ལོ་རྒྱུས་ཐོས་ཏེ། སྐྱིད་ཕུག་ཉི་མ་རྫོང་དུ་སྒོམ་ཞིང་བསྡད། དེར་དགེ་སྦྱོར་འཕེལ་བའི་ངང་ནས་ཟླ་བ་འགའ་སོང་བ་དང་། བྲིན་པའི་མི་རྣམས་བཟའ་བཏུང་གི་མཐུན་རྐྱེན་རེ་ཁྱེར་ནས་ལན་རེ་རེ་གཉིས་གཉིས་བྱུང་བས་བསམ་གཏན་ལ་ཅུང་ཟད་གནོད་པར་གོ་ནས། ད་གནས་འདིར་ཡུན་རིང་རབ་ཡང་སོང་། དགེ་སྦྱོར་ཡང་འཕེལ་རབ་བྱུང་། ད་ཡང་མི་འདུས་ན་བསམ་གཏན་གྱི་གེགས་སུ་འགྲོ་ཉེན་འདུག་པས། མི་མེད་ཀྱི་ལུང་སྟོང་ཞིག་ཏུ་འགྲོ་དགོས། དེ་ཡང་བླ་མའི་བཀའ་བཞིན་ལ་ཕྱི་ལ་འགྲོ་དགོས་སྙམ་ཡོད་པའི་ཚེ། པེ་ཏས་བལ་སྤུ་བྱུང་ཚད་བསྡུས་ནས་བཟོས་པའི་སྣམ་བུ་གཅིག་ཁྱེར་ཏེ། བྲག་དཀར་རྟ་སོར་ཕྱིན་པས། ང་མི་འདུག་པ་དང་། ཀུན་ལ་འདྲི་ཞིང་འཚོལ་དུ་ཕྱིན་ཚེ། གུང་ཐང་སྟོད་དུ་རྣལ་འབྱོར་པ་ཟྭའི་འབུ་འདྲ་བ་ཞིག་དཔལ་ཁུད་ནས་ལ་སྟོད་ལྷོ་ཕྱོགས་ལ་སོང་ཟེར་བ་ཐོས་ཏེ། ངའི་རྗེས་གཅོད་ཅིང་ཕྱིན་པས། དིང་རི་ན་བླ་མ་བ་རི་ལོ་ཙཱ་བ་ཁྲི་བརྩིགས། གདུགས་ཕུབ། དར་གྱི་ན་བཟའ་བཟང་པོ་གསོལ། གྲྭ་བུ་སློབ་རྣམས་ཀྱིས་དུང་བུས་པས། མི་མང་པོ་འདུས་ནས་མཐའ་བསྐོར། ཇ་ཆང་འདྲེན་ཞིང་འབུལ་བ་མང་པོ་བྱེད་ཅིང་འདུག་པ་མཐོང་བས། པེ་ཏའི་བསམ་པ་ལ། མི་གཞན་གྱི་ཆོས་པ་ལ་འདི་འདྲ་ཡོང་གིན་འདུག་སྟེ། ངའི་ཨ་ཇོའི་ཆོས་འདི་རང་སྡུག་ལ་གཞན་གྱིས་བརྙས་
(༡༧༣)པ། གཉེན་ཚན་རྣམས་ངོ་ཚ་བ་ལས་མི་འདུག་པས། ང་ཨ་ཇོ་དང་ཕྲད་ན་བླ་མ་འདིའི་ཕྱག་ཕྱི་ལ་ཅི་ཚུད་ཀྱི་ཐབས་དང་གྲོས་ཤིག་བྱེད་དགོས་བསམས་ནས། དེར་ཚོགས་པའི་མི་འགའ་ལ་དྲིས་པས། བྲིན་ན་འདུག་ཟེར་བ་ཐོས་ཏེ། བྲིན་དུ་འོངས་རྩད་བཅད་ནས་སྐྱིད་ཕུག་ཏུ་ངའི་སར་བྱུང་སྟེ། ཨ་ཇོའི་ཆོས་ཁ་ལ་བཟའ་རྒྱུ་ཡང་མེད། ལུས་ལ་གྱོན་རྒྱུ་ཡང་མེད་པས་ཁྲེལ་ངོ་ཚ་ནས་བུད་པ་འདིས་མི་འོང་བར་འདུག ད་སྣམ་བུ་འདི་ལ་སྨད་གཡོགས་ཤིག་མཛོད་ལ། ཁོང་གཞན་གྱི་ཆོས་པ་བླ་མ་བ་རི་ལོ་ཙཱ་བ་བྱ་བ། འོག་ན་ཁྲི་བརྩིགས། སྟེང་ན་གདུགས་ཕུབ་པའི་བར་དུ། སྐུ་དར་ཟབ་ཀྱི་སྦུབས་ན་ཞལ་ཇ་ཆང་གི་ངང་ལ་འགྲོ་བ། གྲྭ་བུ་སློབ་རྣམས་ཀྱིས་དུང་ཁ་སྦྱོར་དུ་བུས་པས་མི་མང་པོ་འདུས་ནས། འབུལ་བ་བསམ་གྱིས་མི་ཁྱབ་པ་འོང་བས། འཁོར་དང་ཉེ་ཚན་ལ་ཕན་པ། མི་ལ་ངོམ་པས་ཆོག་པའི་ཆོས་པ་བཟང་པོ་རང་ཞིག་འདུག དེའི་ཕྱག་ཕྱི་ལ་ཨེ་འཁྲིད་ལྟོས་དང་། ཁྲིད་ན་གྲྭ་པ་ཞན་ཤོས་ཤིག་ཐོབ་རུང་སྐྱིད་པོ་འོང་བ་འདུག་གིས། དེ་མིན་ཨ་ཇོའི་ཆོས་འདི་དང་། ངའི་འཁོས་ཀ་འདིས་འོ་ཅག་མིང་སྲིང་གི་ཚེ་མི་ཕྱིད་པར་འདུག་ཟེར་ངུ་ཞིང་འདུག་པས། ངས་པེ་ཏ་དེ་སྐད་མ་ཟེར་ཅིག ཁྱོད་དག་ང་གོས་མེད་པ་ཆ་ལུགས་ལྷུག་པར་གནས་པ་འདི་ལ་ངོ་ཚར་བྱེད་པར་འདུག་སྟེ་ངའི་འདི་སྤྱིར་ཡོད་པ་རང་གིས་འཚེང་སྟེ་ཆོས་དང་མཇལ་བ་ཡིན་པས་ངོ་མི་ཚ། ཁྱད་པར་ཨ་མ་ལས་སྐྱེས་ཙམ་ཉིད་ན་ཡོད་པས་ངོ་ཚ་རྒྱུ་མེད། དེ་བས་སྤྱིར་སྡིག་པར་ངོ་ཤེས་ནས་མི་འཛེམ་པར་ཕ་མའི་ཐུགས་དཀྲུག བླ་མ་དང་དཀོན་མཆོག་གི་དཀོར་ལ་
(༡༧༤)འབག རང་འདོད་སྒྲུབ་ཕྱིར་ངན་གཡོ་སྣ་ཚོགས་ཀྱི་སྒོ་ནས་སེམས་ཅན་ལ་གནོད་འཚེ་བྱེད་པ་རྣམས། རང་གཞན་ཀུན་ལ་གནོད་ཅིང་། ལྷ་མི་དམ་པ་ཀུན་གྱིས་ཁྲེལ་བས་འདི་ཕྱི་གཉིས་ཀར་ངོ་ཚ། ཁྱད་པར་ལུས་ལ་ངོ་ཚ་ན། ཁྱོད་རང་ཨ་མ་ལས་སྐྱེས་དུས་མེད་པའི་བྲང་ལ་སྐྲངས་འབུར་ཞིག་འདུག་པ་དེ་ངོ་ཚ་མོད། ཡང་ཁྱོད་ཀྱི་ཡིད་ལ་ང་ལྟོ་གོས་ལ་གྱོང་བསྐུར་ནས་སྒོམ་པ་འདི། ཟང་ཟིང་མ་འབྱོར་བ་ཡིན་པ་འདུག་སྙམ་སྟེ་དེ་ལྟ་མིན། སྤྱིར་གྱིས་ང་རང་འཁོར་བ་ངན་སོང་གི་སྡུག་བསྔལ་འདི་ལ་འཇིགས་དྲགས། གསོན་པོར་མེ་ནང་དུ་བཅུག་པ་ལྟ་བུའི་འཇིགས་སྐྲག་ཡོད་པས། འདུ་འཛི་དང་གཡེང་བ་ཆོས་བརྒྱད་ཀྱི་འདོར་ལེན་མཐོང་ཚེ་སྐྱུག་ནད་པ་ལ་ཟན་བྱིན་པ་ལྟར་ཞེ་ལོག ཕ་བསད་ཀྱི་ལག་དམར་པོ་མཐོང་བ་ལྟར་སེམས་མི་དགའ་བ་ཞིག་ཡོད་པས་སྤངས་པ་ཡིན། ཁྱད་པར་ང་ལ་ལྷོ་བྲག་མར་པའི་བཀའ་ལུང་ལ། འཇིག་རྟེན་གྱི་ཆོས་བརྒྱད་འདུ་འཛིའི་གཡེང་བ་སྤོངས། གྱོང་ལྟོ་གོས་གཏམ་གསུམ་ལ་ཐོངས། གནས་ངེས་མེད་ཀྱི་དབེན་པ་འགྲིམས་ལ། ཚེ་འདི་བློས་བཏང་གི་བསམ་སྦྱོར་དྲག་པོས་སྒྲུབ་པ་གཙོ་བོར་ཐོན་ཅིག་གསུངས་པ་ཡོད་པས་བླ་མའི་བཀའ་སྒྲུབ་པ་ཡིན། བཀའ་བཞིན་བསྒྲུབས་པས། རང་གི་འཁོར་དུ་བྱུང་བའི་སེམས་ཅན་འགའི་ཚེ་འདིའི་བདེ་སྐྱིད་ཙམ་དུ་མ་ཟད། རང་གཞན་སེམས་ཅན་ཀུན་གྱི་ནམ་གཞག་གཏན་གྱི་བདེ་སྐྱིད་ཡོད་པ་དང་། ནམ་འཆི་ངེས་མེད་དུ་འདུག་པས་ཚེ་འདིའི་བྱ་བ་འཇིག་རྟེན་ཆོས་བརྒྱད་ཀྱི་ཆེ་ཐབས་སྤངས་པ་ཡིན། བསྒྲུབས་ན་བླ་མ་བ་རི་བའི་ཕྱག་ཕྱི་བ་ཞན་ཤོས་སུ་མ་ཟད་ཁོང་རང་ཙམ་ཞིག་ང་འོང་སྟེ། ཚེ་འདིར་སངས་རྒྱས་ཐོབ་པར་འདོད་
(༡༧༥)ནས་སྒྲུབ་པ་ལ་ནན་ཏན་དང་བརྩོན་འགྲུས་བྱས་པ་ཡིན། ད་པེ་ཏ་རང་ཡང་ཆོས་བརྒྱད་སྤོངས་ལ་ཨ་ཇོའི་ཕྱི་བཞིན་ལ་ཕྱི་གངས་ལ་སྒོམ་དུ་འགྲོ། ཆོས་བརྒྱད་བློས་བཏང་ནས་སྒོམ་ནུས་ན་འདི་ཕྱི་གཉིས་ཀ་རུ་སྐྱིད་པའི་ཉི་མ་འཆར་བ་ཡིན་པས། ཨ་ཇོའི་གླུ་འདི་ཉོན་ཅིག་བྱས་གླུ་འདི་བླངས་སོ། །རྗེ་དུས་གསུམ་སངས་རྒྱས་འགྲོ་བའི་མགོན། །ཆོས་བརྒྱད་སྐྱོན་གྱིས་མ་གོས་ལྟར། །བུ་རྒྱུད་བྱིན་གྱིས་རློབས་མཛད་པ། །སྒྲ་སྒྱུར་མར་པའི་ཞབས་ལ་འདུད། །ཚེ་འདིའི་འདོད་པས་གདུངས་པ་ཡི། །སྲིང་མོ་ཉོན་ཅིག་པེ་ཏ་ལྕམ། །གདུགས་ཡ་ཐོག་གསེར་གྱི་གན་ཇི་ར་བཀྲག་དང་གཅིག །མ་ཐོག་རྒྱ་མོ་དར་གྱི་ཤམ་བུ་འགྲིག་དང་གཉིས། །བར་གདུགས་རྩིབས་རྨ་བྱའི་ལྡིང་ཁང་མཛེས་དང་གསུམ། །སེང་ལྡེང་དམར་པོའི་ཡུ་བ་འདྲོངས་དང་བཞི། །འདི་བཞི་བཤམས་ན་ཨ་ཇོས་ཤོམས་ཙམ་གདའ། །ཆོས་བརྒྱད་དུ་འདུག་པས་ཨ་ཇོས་སྤངས་པ་ཡིན། །ཆོས་བརྒྱད་སྤངས་པས་སྐྱིད་པའི་ཉི་མ་ཤར། །དེ་ཕྱིར་ཆོས་བརྒྱད་སྤོངས་ཤིག་པེ་ཏ་ལྕམ། །ཆོས་བརྒྱད་སྤངས་ལ་ལ་ཕྱི་གངས་ལ་གཤེགས། །འོ་སྐོལ་ལྕམ་སྲིང་བསྡེབས་ལ་ལ་ཕྱི་གངས་ལ་གཤེགས། །དཀར་པོ་དུང་གི་རྒྱང་གྲགས་ཆེ་དང་གཅིག །དུང་མཁན་མཁས་པའི་རྐན་དབུགས་བཟང་དང་གཉིས། །རྒྱ་མོ་དར་གྱི་མདུད་པ་ཁྲ་དང་གསུམ། །རབ་བྱུང་བཙུན་པའི་འདུ་ཚོགས་མང་དང་བཞི། །འདི་བཞི་བཤམས་ན་ཨ་ཇོས་ཤོམས་ཙམ་གདའ། །འཇིག་རྟེན་གྲོང་ལྟག་གི་དགོན་ཆུང་ཁྲ་དང་གཅིག །སྟོན་ཆུང་གསར་པའི་སྨྲ་ལྕེ་བདེ་དང་གཉིས། །ཡོ་མར་རྒྱ་ཇའི་ཐབ་ཀ་བཟང་དང་གསུམ། །བཙུན་ཆུང་
(༡༧༦)གཞོན་ནུའི་ལག་བདེ་འཁྱུག་དང་བཞི། །འདི་བཞི་བཤམས་ན་ཨ་ཇོས་ཤོམས་ཙམ་གདའ། །མོ་བོན་རྩིས་གསུམ་གྱི་གྲོང་ཆོག་བྲིན་དང་གཅིག །མ་ཇོའི་ཚོགས་དཔོན་ཚུལ་འཆོས་མཁས་དང་གཉིས། ཁ་ཟ་འདོད་འབར་བའི་ཚོགས་འཁོར་སྐོར་དང་གསུམ། །ཉ་མ་མགོ་སྐོར་གྱི་གླུ་ཆུང་སྙན་དང་བཞི། །འདི་བཞི་བཤམས་ན་ཨ་ཇོས་ཤོམས་ཙམ་གདའ། །ས་མཁར་སྤེའུའི་མཐོ་བཙན་ལེགས་དང་གཅིག །བཤོས་ཞིང་བཟང་པོའི་སོ་ནམ་རེམ་དང་གཉིས། །སེར་སྣས་བསོགས་པའི་ཟས་ནོར་འཛོམ་དང་གསུམ། །འཁོར་བ་སྤེལ་བའི་འཁོར་གཡོག་མང་དང་བཞི། །འདི་བཞི་བཤམས་ན་ཨ་ཇོས་ཤོམས་ཙམ་གདའ། །གྱི་ལིང་རྟ་ཕོའི་མགོ་འཕང་མཐོ་དང་གཅིག །སྒ་ཁྲ་རིན་ཆེན་རྒྱན་ཆ་མཛེས་དང་གཉིས། །སྡིག་སྤྱོད་སྐྱེས་བུའི་འཁོར་གསུམ་ཁྲ་དང་གསུམ། །དགྲ་འདུལ་གཉེན་སྐྱོང་གི་ལས་ལ་བརྩོན་དང་བཞི། །འདི་བཞི་བཤམས་ན་ཨ་ཇོས་ཤོམས་ཙམ་གདའ། །ཆོས་བརྒྱད་བློ་ཡིས་མི་གཏོང་ཞིང་། །གནས་ལ་ཕྱི་གངས་ལ་མི་འགྲོ་ན། །གཉེན་ཉེ་དུའི་གདུང་སེམས་ཡིད་ལ་གཟན། །ང་ཚེ་འདིའི་གླེང་མོས་དགེ་སྦྱོར་གཡེང་། །ལར་སྐྱེས་ནས་ནམ་འཆི་ཆ་མེད་ལ། །ཆོས་ལོང་ཡོད་ཀྱི་ཕྱི་བཤོལ་བྱ་ལོང་མེད། །ཡེངས་མེད་དུ་སྒྲུབ་ལ་བརྩོན་འགྲུས་བྱེད། །ཕ་བླ་མའི་གདམས་ངག་སེམས་ལ་ཕན། །ཕན་པའི་གདམས་ངག་བསྒོམས་ནས་ཀྱང་། །བདེ་ཆེན་ཐར་པ་སྒྲུབ་པ་ཡིན། །དེ་ཕྱིར་ལ་ཕྱི་གངས་ལ་འགྲོ། །སྲིང་མོ་ཆོས་བརྒྱད་འདོར་ལེན་གྱིས། །སྡིག་ལ་བྲེ་གསོག་ཕུལ་གསོག་གྱིས། །སྤྱིར་ཁམས་གསུམ་འཁོར་བར་ཅི་གནས་མཛོད། །སྒོས་ངན་སོང་གསུམ་པོ་ཅི་
(༡༧༧)ཐོབ་མཛོད། །བརྒྱ་ལ་འཁོར་བས་འཇིགས་པ་ན། །འཇིག་རྟེན་ཆོས་བརྒྱད་བློས་ཐོངས་ལ། །འོ་སྐོལ་ལྕམ་སྲིང་བསྡེབས་ལ་ལ་ཕྱི་གངས་ལ་གཤེགས། །ལྕམ་སྲིང་སྐལ་ལྡན་གཉིས་བསྡེབས་ལ་གངས་ཀྱི་ར་བ་ལ་གཤེགས། །ཞེས་གསུངས་པས། པེ་ཏ་ན་རེ། ཨ་ཇོའི་འཇིག་རྟེན་ཆོས་བརྒྱད་དེ་སྐྱིད་པོ་ལ་ཟེར་བར་འདུག་སྟེ། དེ་འོ་ཅག་མིང་སྲིང་གཉིས་ལ་སྤང་མ་དགོས་གདའོ། །བླ་མ་བ་རི་ལོ་ཙཱ་བ་ལྟ་བུ་མི་འོང་བར་ཤེས་པའི་ཁ་སྙད་ལ་ཨ་ཇོ་རང་གིས་བདེན་བདེན་མོ་དང་། ཡིན་ཡིན་མོ་མང་པོ་ཤེས་ཀྱིན་འདུག་སྟེ། ང་ཁ་ལ་ཟས་དང་ལུས་ལ་གོས་མེད་པའི་སྡུག་ཉོ་རུ་ལ་ཕྱི་ལ་མི་འགྲོ། གང་ན་ཡོད་ཀྱང་ཆ་མེད། ཨ་ཇོ་རང་ཡང་རི་དྭགས་ཁྱིས་དེད་པ་བཞིན་བྲོས་ནས་བྲག་རི་ལ་འཁྲས་སྡོད་པ་ལས། ས་གཅིག་ཏུ་བསྡད་ན་ཐུགས་དམ་ཡང་འཕེལ། ངས་རྩད་གཅོད་པ་ཡང་སླ་བར་འདུག འདི་ཕྱོགས་ཀྱི་མི་རྣམས་ཀྱང་མོས་རབ་ཡོད་པ་འདྲ་བར་འདུག་པས། རྟག་ཏུ་བཞུགས་ན་རབ། དེ་མིན་ནའང་ཞག་འགའ་ཅིས་ཀྱང་བཞུགས། སྣམ་བུ་འདི་ལ་སྨད་གཡོགས་ཤིག་ཀྱང་འཚེམ་གྲོགས་མཛོད་ཅིག་ང་མྱུར་དུ་སླེབ་འོང་ངོ་ཟེར་བ་ལ། ངས་ཞག་ཤས་དེར་སྡོད་པར་ཁས་བླངས། སྲིང་མོ་དིང་རི་ཕྱོགས་ལ་སློང་དུ་སོང་བའི་བར་ལ་ངས་སྲིང་མོའི་སྣམ་བུ་དེ་ལ་མགོ་ཀུན་འཐུམས་པའི་ཞྭ་གཅིག་ལག་པའི་སོར་མོ་རེ་རེ་ལ་ཤུབས་རེ། རྐང་བ་ལ་ལྷམ། འདོམས་ཀྱི་ཆ་ལུགས་ལ་ཤུབས་གཅིག་བཟོས་ཏེ་བཞག ཞག་འགའ་ནས་སྲིང་མོ་སླེབས་བྱུང་སྟེ། ཨ་ཇོས་སྣམ་བུ་མ་བཙེམས་པ་ཡིན་ནམ་ཟེར་བ་ལ། བཙེམས་ཡོད་བྱས་ཤུབས་རྣམས་
(༡༧༨)ཡན་ལག་རྣམས་དང་ཆ་ལུགས་ལ་སོ་སོར་བསྐོན་ནས་བསྟན་པས། ད་ཨ་ཇོ་མི་རུ་རང་མི་འདུག ངོ་ཚ་མི་ཤེས་པའི་སྟེང་དུ་ངས་དཀའ་ལས་བྱས་པའི་སྣམ་བུ་དེ་ཡང་ཆུད་གཟོན་འདུག རེས་འགའ་སྒྲུབ་པ་མ་གཏོགས་གང་ཡང་བྱེད་ལོང་མེད་པ་འདྲ་བ་ཞིག་ལ། རེས་འགའ་ཇི་འདྲའི་དལ་བ་ཡང་བྱུང་འདུག་ཟེར་བས། ངས་ང་མིའི་དམ་པ་རྣལ་འབྱོར་ལ་སྙིང་པོ་ལེན་མཁན་དེ་ཡིན། ངོ་ཚ་ཤེས་ནས་ཀ་སྤྱིར་དམ་ཚིག་དང་སྡོམ་པ་ཚུལ་བཞིན་བསྲུང་། ཁྱོད་སྲིང་གཅིག་མ་ཆ་ལུགས་མཐོང་བ་ལ་ངོ་ཚ་བྱེད་ཅིང་འདུག་པས། བྲེགས་ན་སྙམ་ནའང་འབྲེག་རང་མ་ནུས་པར། དགེ་སྦྱོར་གཡེང་རུང་ཁྱོད་རང་ཟེར་བ་ལྟར་ངོ་ཚའི་གོས་བཟོས། གཞན་རྣམས་ཀྱང་ལུས་ཀྱི་ཆ་ཡིན་པར་མཉམ་པས། ཆ་ལུགས་དང་ཁྱད་མི་འདུག་བསམ་ཤུབས་བཟོས་པ་ཡིན། སྣམ་བུ་ཆུད་མ་ཟོས་པར་ངོ་ཚའི་གོས་བྱུང་འདུག་པ། ད་ཁྱོད་ང་ལས་ངོ་ཚ་ཆེ་བར་འདུག་པས། ངའི་ཆ་ལུགས་ངོ་ཚ་ན་ཁྱོད་ཀྱི་དེ་ཡང་ངོ་ཚ། ངོ་ཚ་བའི་ནོར་ཚགས་བྱེད་པ་བས་མེད་པ་དགའ་བ་ཡིན་པས་ཁྱེད་ཀྱི་དེ་མེད་པ་ཞིག་རེམ་ཞིག་བྱས་པས་ངོ་ནག་ཐུག་ཐུག་འདུག ལར་འཇིག་རྟེན་པ་རྣམས་ངོ་མི་ཚ་བ་ལ་ཚ། ཚ་ངོ་ཤེས་པ་ངན་སྤྱོད་གཡོ་སྒྱུ་ལ་མི་ཚ་སྟེ་ངོ་ཚ་བྱེད་ལུགས་མི་ཤེས་པར་འདུག་པས། ཨ་ཇོའི་གླུ་འདི་ཉོན་ཅིག་བྱས་ངོ་ཚ་བྱེད་ལུགས་དབྱེ་བའི་གླུ་འདི་བླངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །སྤྲང་ངོ་ཚ་ཤེས་པར་བྱིན་གྱིས་རློབས། །ངོ་ཚས་བཅིངས་པའི་པེ་ཏ་ལྕམ། །དར་ཅིག་ཨ་ཇོའི་གླུ་ལ་ཉོན། །ཁྱོད་ཐ་སྙད་རྨོངས་པའི་ངོ་ཚ་མཁན། །ངོ་མི་ཚ་ལ་ངོ་ཚར་
(༡༧༩)བྱེད། །ང་ངོ་ཚའི་དོན་ཤེས་རྣལ་འབྱོར་ང་། །སྒོ་གསུམ་ལྷུག་པར་སྡོད་པ་ལ། །ངོ་ཚའི་སྒྲོ་སྐུར་ག་ལ་ཡོད། །ལུས་ཕོ་མོར་གྲུབ་པ་ཤེས་ཟིན་ནས། །མཚན་མ་ཡོད་པ་སུས་ཀྱང་ཤེས། །ཁྲེལ་དང་ངོ་ཚ་བསྲུང་བ་རྣམས། །འཇིག་རྟེན་ཕལ་ལ་མི་འདུག་སྟེ། །ངོ་ཚའི་བུ་མོ་རིན་གྱིས་ཉོས། །ངོ་ཚའི་བུ་ཕོ་པང་དུ་བླངས། །བརྣབ་སེམས་གནོད་སེམས་ལོག་ལྟའི་འབྲས། །ངན་སྤྱོད་གཡོ་སྒྱུ་རྐུ་འཕྲོག་དང་། །བློ་གཏད་ཉེ་བ་བསླུ་བ་རྣམས། །ཁྲེལ་ངོ་ཚ་ཡིན་ཏེ་འཛེམ་མཁན་ཉུང་། །ཚེ་འདི་བློས་བཏང་གི་སྒོམ་ཆེན་ཀུན། །ཉམས་ལེན་གནད་ཀྱི་མན་ངག་མཆོག །ཟབ་མོ་རྡོ་རྗེའི་གསང་སྤྱོད་ཀྱིས། །མི་ཚེ་ཆོས་ལ་སྐྱེལ་བ་ལ། །བཅོས་མའི་ངོ་ཚ་བྱེད་དོན་མེད། །དེ་ཕྱིར་རང་སྡུག་མ་ཤོམ་པར། །པེ་ཏ་ཤེས་པ་རང་སོར་ཞོག །བྱས་པས། ངོ་ནག་ཐུག་གེ་བའི་ངང་ནས་སློང་མོ་ལས་བྱུང་བའི་རྒྱགས་ཆུ་སྡོར་རྣམས་ཕུལ་ནས། གང་བྱས་རུང་ངས་མནོས་པ་བཞིན་ཨ་ཇོས་མི་བྱེད་པར་འདུག་སྟེ། ངས་ཨ་ཇོ་བློས་མི་ཐོངས་པར་འདུག་པས། འདི་ཀུན་གསོལ་མཛོད། ངས་ད་དུང་ཅི་རྙེད་བྱས་འོང་གིས་ཟེར་འགྲོ་གྲབས་བྱེད་ཅིང་འདུག་པ་ལ། ངས་པེ་ཏ་བློ་ཆོས་ལ་འགྱུར་དུ་ཨེ་རུང་བསམ། ཁྱོད་རང་ཡང་ཆས་འདི་རྣམས་མ་ཟད་བར་ཆོས་མི་བྱེད་རུང་སྡིག་མ་གསོག་པར་སྡོད་བྱས། བསྡད་པའི་བར་ལ། རྣ་བར་རྒྱུ་འབྲས་ཀྱི་ཆོས་ཅི་འགྲོ་བྱས་པས། ཆོས་ལ་ངེས་ཤེས་འདྲོངས་ནས་བློ་སྣ་ཅུང་ཟད་ཐུང་དུ་སོང་བའི་ཚེ། ཨ་ནེ་ཡང་ཨ་ཁུ་ཤི་རྟིང་ཁ་ཞེ་མེད་པའི་འགྱོད་པ་སྐྱེས་ཏེ། མཛོ་ཨུ་
(༡༨༠)ཞིག་ལ་ཁལ་བཀལ་ནས་བྲིན་གྱི་བར་དུ་རྩད་གཅོད་ཅིང་འོངས། བྲིན་དུ་སླེབས་པ་དང་། ཆས་སྤྱི་དང་མཛོ་བཅོལ་བའི་ཐོག་ནས། ཨ་ནེ་རང་གིས་ཅི་ཐེག་ཅིག་ཁྱེར་ནས་འོངས་པ། པེ་ཏ་སྤོ་མཐོ་ན་ཡོད་པས་མཐོང་སྟེ། ཨ་ནེ་ཡིན་པར་ཤེས་ནས། ཨ་ནེས་འོ་ཅག་མ་བུ་ལ་སྡུག་སྣ་དགུ་བཏང་བས་མ་འཕྲད་པ་དྲག་ཟེར་ཕུག་པའི་འགག་ན་བཅའ་ཟམ་ཞིག་ཡོད་པ་དེ་བསྡོགས། ཨ་ནེ་ཟམ་སྣར་སླེབས་བྱུང་སྟེ། ཚ་མོ་ཟམ་པ་མ་སྡོག་ཅིག་ཨ་ནེ་འོང་གིན་ཡོད་དོ་ཟེར་བ་ལ། དེ་ཀས་སྡོག་པ་ཡིན་བྱས་པས། ཚ་མོ་བདེན་ཏེ་ད་ང་འགྱོད་པ་དྲག་པོ་རང་ཞིག་སྐྱེས་ནས། ཁྱེད་མིང་སྲིང་དང་འཕྲད་དུ་འོངས་པས་ཟམ་པ་ཚུགས། མི་འཛུགས་ན་ཨ་ཇོ་ལ་ང་སླེབས་འདུག་གྱིས་དང་ཟེར་བས། ང་ཡང་ཟམ་པའི་ཚུར་སྣེ་བྲག་ཐོག་ཅིག་གི་ཁར་ཕྱིན་ནས་བསྡད་པས། ཨ་ནེས་ཕྱག་འཚལ་ཞིང་འཕྲད་དགོས་པའི་ལོ་རྒྱུས་མང་པོ་བྱེད་ཅིང་འདུག་པས། ངའི་བསམ་པ་ལ། རྟིང་ཡེ་མ་ཕྲད་ན་ཆོས་པར་ཡང་མི་རུང་། ཐོག་མར་ཤགས་ཤིག་འདེབས་དགོས་སྙམ། ངས་ང་སྤྱིར་གཉེན་གྱི་ཁོ་ཐག་ཆོད། སྒོས་ཨ་ཁུ་དང་ཨ་ནེའི་ཁོ་ཐག་ཆོད་དེ། དང་པོ་སྡུག་དེ་བཏང་བའི་ཁར། ཆོས་བྱས་རྟིང་སློང་མོ་ལ་འོངས་དུས་ཡང་སྡུག་དེ་བཏང་བས། ཨ་ཁུ་དང་ཨ་ནེའི་ཁོ་ཐག་ཆོད་དོ། །དེའི་རྒྱུ་མཚན་གླུ་འདི་ལྟར་ཡིན་པས་ཉོན་ཅིག་བྱས། ཨ་ནེར་ཁྲེལ་འདེབས་ཀྱི་གླུ་འདི་ལྟར་བླངས་སོ། །ཕ་ཀུན་ལ་བརྩེ་བའི་ཐུགས་རྗེ་ཅན། །སྒྲ་སྒྱུར་མར་པའི་ཞབས་ལ་འདུད། །སྤྲང་གཉེན་མེད་བདག་གི་གཉེན་མཛོད་ཅིག །ལས་བྱས་པ་
(༡༨༡)དྲན་ནམ་ཨ་ནེ་སོམས། །མི་དྲན་གླུ་ཡིས་གསལ་ཞིག་འདེབས། །མ་ཡེངས་འགྱོད་སེམས་སྐྱེད་ལ་ཉོན། །སྐྱ་རྔ་རྩ་ཡི་ཀོ་རོན་ན། །ཕ་བཟང་གིས་བོར་བའི་མ་བུ་གསུམ། །ནོར་ཡོད་དགུ་འཕྲོགས་ནས་སྡུག་དགུ་བཅོལ། །མཐར་སྲན་ཕུང་བེར་ཀས་གཏོར་བ་བཞིན། །ཁྱེད་ཨ་ཁུ་ཨ་ནེས་བཏང་བས་ན། །སྤྱིར་གཉེན་གྱི་ཁོ་ཐག་དེ་ནས་ཆོད། །སྒོས་བུ་ང་ས་མཐར་འཁྱར་བའི་ཚེ། །མ་སྲིང་དྲན་ནས་ཡུལ་དུ་འོངས། །མ་ཤི་སྲིང་མོ་འཁྱར་བ་དེས། །སྐྱོ་ཤས་སྙིང་རླུང་ལངས་པའི་མཐུས། །རྩེ་གཅིག་སྒྲུབ་པ་བྱེད་པའི་ཚེ། །འཚོ་བ་ཟས་ཀྱིས་བཀྲེས་ཕོངས་བྱུང་། །གཉེན་ཨ་ནེའི་སྒོ་དྲུང་སློང་དུ་འོངས། །འཁོས་མེད་ཀྱི་རྣལ་འབྱོར་ངོ་ཤེས་ནས། །ཞེ་སྡང་གནོད་སེམས་བསམ་སྦྱོར་ནི། །ཁྱི་ཕྱོ་ཕྱོ་ཟེར་ཞིང་རྦོད་དུ་བྱུང་། །སྦྲ་ཡི་ཚུགས་ཤིང་བེར་ཀ་ཡིས། །ལུས་སྙེ་ཕུང་བཞིན་དུ་བརྡུངས་པས་ན། །ཆབ་ཀོ་མོའི་ནང་དུ་ཁ་བུབ་འགྱེལ། །རིན་ཆེན་སྲོག་དང་དོ་བྲལ་བྱུང་། །བརླ་འཚོང་ཟེར་ཞིང་འཐབ་པ་དང་། །རྐང་འདྲེན་ཟེར་ཞིང་འབར་བ་ཡི། །ཚིག་རྩུབ་མཚོན་གྱིས་སྙིང་བསྣད་པས། །སྡུག་བསྔལ་ཡི་ཆད་སྙིང་རླུང་བསླངས། །དབུགས་སྟོད་དུ་འཚངས་ནས་སྐད་མ་ཐོན། །དེ་རྗེས་བདག་ལ་དགོས་མེད་ཀྱང་། །གཡོ་ཐབས་དུ་མས་ཁང་ཞིང་འཕྲོགས། །ཨ་ནེའི་ལུས་ལ་བདུད་མོའི་སེམས། །ཨ་ནེའི་ཁོ་ཐག་དེ་ནས་ཆོད། །ཨ་ཁུའི་སྒོ་རུ་སླེབས་པའི་ཚེ། །བསམ་ངན་སྦྱོར་རྩུབ་འབེན་ཚིག་ནི། །ཡུལ་གྱི་ཕུང་འདྲེ་སླེབས་ཡོད་ཟེར། །ཁྱིམ་མཚེས་གསོད་པའི་ར་མདར་སྦྲན། །མི་སྙན་ཁ་ནས་ཐོན་གསུམ་སྨྲས། །གོར་མོ་རྡོ་ཡི་ཆར་བ་ཕབ། །ཉག་
(༡༨༢)ཕྲན་མདའ་ཡི་ཟམ་པ་བཙུགས། །སྙིང་ལ་བཟོད་བྲལ་ནད་ཀྱིས་བཏབ། །དེར་ཡང་སྲོག་དང་དོ་བྲལ་བྱུང་། །ཨ་ཁུའི་ལུས་ལ་གཤེད་མའི་སེམས། །ཨ་ཁུའི་ཁོ་ཐག་དེ་ནས་ཆོད། །རང་འཁོས་མེད་ཀྱི་ཉེ་བ་དགྲ་བས་སྡང་། །དེ་རྗེས་རི་ལ་སྒོམ་པའི་ཚེ། །ཕྱི་ཐག་ཅན་གྱི་མཛེས་སེ་དེས། །མ་ཕོད་བརྩེ་བས་ཕྲད་དུ་བྱུང་། །བློ་དང་འཚམ་པའི་སྙིང་གཏམ་གྱིས། །སྡུག་བསྔལ་ཅན་ལ་སེམས་གསོ་བཏང་། །རོ་བཅུད་ལྡན་པའི་ཁ་ཟས་ཀྱིས། །དབུལ་ཕོངས་བདག་གི་བཀྲེས་སྐོམ་བསལ། །བཀའ་དྲིན་ཆེ་བར་འཁུམས་ལགས་ཀྱང་། །སྐྱེས་བུ་ཆོས་མཛད་མ་ལགས་པ། །མཛེས་སེ་བྱུང་རུང་འཕྲད་དོན་མེད། །ཨ་ནེ་འཕྲད་དོན་དེ་བས་ཆུང་། །ད་ལྟ་ཉིད་དུ་སླར་ལོག་ལ། །སྔ་བའི་དུས་སུ་འགྲོ་འདུག་རན། །བྱས་པས། ཨ་ནེས་མཆི་མ་མང་པོ་བཏང་ཞིང་། ཕྱག་མང་དུ་བཙལ། སྔར་ཕན་ཆད་ཚ་བོ་བདེན། བཟོད་པ་བཞེས་པར་ཞུ་ཞེས་ཁ་ཞེ་མེད་པའི་བཤགས་པ་ཕུལ། ད་ཕྱིས་ང་རང་འགྱོད་དྲགས་པ་དང་། གཉེན་སྲེད་མ་སྤོང་བར་ཚ་བོ་ལ་མཇལ་དུ་འོངས་པ་ཡིན་པས། ཁྱེད་མིང་སྲིང་གིས་མཇལ་ཁ་ཞིག་ཅིས་ཀྱང་དགོས། འདོད་པ་བཞིན་མ་ཕྲད་ན་ང་ལྕེབས་ནས་ཤི་སྡོད་ཟེར་བ་ལ་མ་ཕོད་པར་ཟམ་པ་འཛུགས་གྲབས་བྱས་པས། པེ་ཏས་ལྐོག་ཤུབ་ཀྱིས་འཕྲད་མི་དགོས་པའི་རྒྱུ་མཚན་བཀོད་ནའང་མ་ཉན་པར། སྤྱིར་དམ་ཚིག་ཉམས་པའི་མི་དང་ལུང་བ་གཅིག་ནས་ཆུ་འཐུངས་ན་ཡང་ཉམས་གྲིབ་ཀྱིས་ཕོག་པ་ཡིན་ཏེ། ཆོས་ཀྱི་དམ་ཉམས་མིན་པ་དང་། ང་ཆོས་པ་ཡིན་པས་འཕྲད་པ་ཡིན་བྱས་ཟམ་པ་བཙུགས། འཕྲད་ཁ་འདོད་པ་བཞིན་བཏང་།
(༡༨༣)རྒྱུ་འབྲས་ཀྱི་ཆོས་མང་པོ་བཤད་པས། བློ་ཁ་ཆོས་ལ་འགྱུར་ནས་ཕྱིས་ཆོས་བྱས་གདམས་ངག་བསྒོམས་པས་རང་གྲོལ་གྱི་རྣལ་འབྱོར་མ་ཞིག་བྱུང་བ་ཡིན་གསུངས། དེ་ནས་རྗེ་བཙུན་ལ་རས་པ་ཞི་བ་འོད་ཀྱིས། རྗེ་བཙུན་གྱིས་ཆོས་ཞུ་ཚེ་བླ་མའི་དྲུང་དུ་མོས་གུས་མཛད་ལུགས་སམ། ཐོབ་ནས་རི་ལ་སྒོམ་པའི་ཐུགས་རུས་སམ། གང་ནས་བསམས་རུང་བློས་མི་འཁྱུད་པ་གདའ་བས། མཛད་པ་དེ་རྣམས་ལ་བསམས་ན། བདག་ཅག་རྣམས་ཀྱིས་ཆོས་འདི་རང་བྱེད་ལོར་གདའ་བས། འཁོར་བ་མི་གྲོལ་བར་འདུག ཅི་རང་དྲག་ན་ཞེས་མང་དུ་ངུས་པས། རྗེ་བཙུན་གྱི་ཞལ་ནས། འཁོར་བ་དང་ངན་སོང་གི་སྡུག་བསྔལ་ལ་བསམས་ན། མོས་གུས་དང་སྙིང་རུས་དེ་ཡང་ཆེས་སྐྱོན་རང་མི་འདུག སྙིང་ཡོད་རྣམས་ཀྱིས་རྒྱུ་འབྲས་ཀྱི་ཆོས་ཐོས་ནས་ཡིད་ཆེས་རྟིང་། དེ་ཙམ་གྱི་སྙིང་རུས་ཀུན་གྱིས་ནུས་པར་གདའ་སྟེ། ཆོས་ལ་ཡིད་མ་ཆེས་པར་གོ་ཡུལ་དུ་ལུས་ཤིང་། ཆོས་བརྒྱད་བློས་མ་ཐོངས་པ་ཡིན་པས། རྒྱུ་འབྲས་ལ་ཡིད་ཆེས་པ་གལ་ཆེ། རྒྱུ་འབྲས་རགས་པ་ཙམ་ལའང་ཡིད་མ་ཆེས་པའི་རྟགས་ནར་མར་བསྟན་རྟིང་། སྟོང་ཉིད་ཀྱི་བཤད་པ་ལུང་རིགས་དང་མཐུན་མཐུན་མོ་མང་པོ་བྱས་རུང་། སྟོང་ཉིད་དེ་བས་ཀྱང་ཕྲ་བས་གོ་བ་དང་ཡིད་ཆེས་པ་དཀའ། སྟོང་ཉིད་ལ་ཡིད་ཆེས་རྟིང་། སྟོང་ཉིད་རང་རྒྱུ་འབྲས་སུ་ཤར་བར་གོ་བ་ནས། རྒྱུ་འབྲས་ཀྱི་འདོར་ལེན་སྡིག་སྤོང་དགེ་སྒྲུབ་ལ་བརྩོན་དུ་རང་འགྲོ་བ་ཡིན་
(༡༨༤)ཞིང་། ཆོས་ཀུན་གྱི་རྩ་བ་རྒྱུ་འབྲས་ལ་ཡིད་ཆེས་པ་འདི་ཡིན་པས། སྡིག་སྤོང་དགེ་སྒྲུབ་ཀྱི་ཕྱག་ལེན་ལ་ཞིབ་པ་དང་བརྩོན་པ་གལ་ཆེའོ། །ངས་དང་པོ་སྟོང་ཉིད་ཀྱི་དོན་མ་རྟོགས་ཏེ་རྒྱུ་འབྲས་ལ་ཡིད་ཆེས་པས། སྡིག་པ་ཚབས་ཆེན་དེ་བསགས་རྟིང་། ངན་སོང་གསུམ་ལས་བཏང་ས་མེད་སྙམ་འཇིགས་དྲགས། བླ་མ་ལ་མོས་གུས། སྒོམ་པ་ལ་སྙིང་རུས་མི་འོང་དབང་མེད་བྱུང་བ་ཡིན། ཁྱེད་རྣམས་ཀྱང་ང་རང་གི་ངག་ལྟར་གསང་སྔགས་ཀྱི་ཉམས་ལེན་ད་ལྟའི་འདི་བཞིན་དུ་གྱིས་ལ་རི་ཁྲོད་དུ་གཅིག་པུར་སྡོད་ནུས་པ་གྱིས་ཤིག འཁོར་བ་ལས་ཐར་བའི་ཁག་མི་རྒན་ང་རང་གིས་ཁུར་བ་ཡིན་ནོ་གསུངས། ཡང་ངན་རྫོང་སྟོན་པ་བོ་དྷི་རཱ་ཛཱས། རྗེ་བཙུན་རིན་པོ་ཆེ་རང་རྡོ་རྗེ་འཆང་ཆེན་མིའི་གཟུགས་སུ་སྐུ་སྤྲུལ་ནས། མཛད་པ་དེ་རྣམས་སེམས་ཅན་གྱི་དོན་དུ་སྟོན་པ་ཞིག་ཡིན་པ་འདྲ། དེ་མིན་རུང་། བསྐལ་པ་དཔག་ཏུ་མེད་པ་ནས་ཚོགས་བསགས་པ། ཕྱིར་མི་ལྡོག་པའི་སེམས་དཔའ་ཆེན་པོ་ཞིག་ཡིན་པར་ཐག་ཆོད་གདའ་སྟེ། ཆོས་ཕྱིར་སྲོག་ཀྱང་འདོར་ཞིང་རྣལ་འབྱོར་རབ་ཏུ་བརྩོན། ཞེས་བྱ་བའི་རྟགས་རྣམས་རྗེ་བཙུན་ལ་ཚང་གདའ། དེ་མིན་བདག་སོགས་སོ་སོ་སྐྱེ་བོ་རྣམས་ཀྱིས་ནི། བླ་མའི་དྲུང་གི་དད་གུས་ཀྱི་མཛད་པ་སོགས། ཆོས་ཕྱིར་དཀའ་བ་སྤྱོད་ཚུལ་རྗེ་བཙུན་གྱི་དེ་འདྲ་བློ་རང་གིས་ཡང་མི་འཁྱུད་ན། ཕྱག་ལེན་ལ་སུས་ཁེལ། བརྒྱ་ལ་ཕྱག་ལེན་ལ་བཀལ་རུང་། ལུས་ཀྱིས་རྐྱེན་མི་ཐེག་པར་འདུག་པས། རྗེ་བཙུན་དང་པོ་ནས་སངས་རྒྱས་བྱང་སེམས་གང་རུང་ཞིག་ཡིན་པར་ཐག་ཆོད་གདའ། དེས་ན་བདག་ནི་ཆོས་མ་ནུས་རུང་རྗེ་བཙུན་གྱི་ཞལ་མཐོང་གསུང་ཐོས་པས་སེམས་
(༡༨༥)ཅན་རྣམས་ཀྱང་འཁོར་བ་ལས་གྲོལ་སྙམ་པ་གདའ་བས། རྗེ་བཙུན་རྡོ་རྗེ་འཆང་ངམ། བྱང་ཆུབ་སེམས་དཔའ་གང་གི་སྤྲུལ་པ་ལགས་པ་དེ་གསུང་དུ་གསོལ་ཞེས་ཞུས་པས། རྗེ་བཙུན་གྱི་ཞལ་ནས། ང་གང་གི་སྤྲུལ་པ་ཡིན་ང་རང་ལ་ཡང་ཆ་མེད། ངན་སོང་གསུམ་གྱི་སྤྲུལ་པ་ཡིན་རུང་། ཁྱེད་རང་རྣམས་ཀྱིས་རྡོ་རྗེ་འཆང་སོགས་གང་དུ་མཐོང་བ་དེའི་བྱིན་རླབས་འཇུག་པས་མོས་གུས་གྱིས། སྤྲུལ་པ་ཡིན་སྙམ་པ་དེ་ཁྱེད་རང་རྣམས་ཀྱིས་ང་ལ་དག་སྣང་ཡིན་ཏེ། ཆོས་ལ་ལོག་ལྟ་དེ་བས་ཆེ་བ་མི་འོང་། ཆོས་རྣམ་དག་བྱེད་པའི་ཆེ་བ་མ་མཐོང་བས་ལན། སྤྱིར་གྱིས་དམ་པའི་ཆོས་ཀྱི་ཆེ་བས། ཚེ་སྟོད་ལ་ང་ལྟ་བུར་སྡིག་པ་ཚབས་ཅན་བྱས་པའི་སོ་སོ་སྐྱེ་བོ་ཞིག་ཡིན་རུང་། ཕྱིས་རྒྱུ་འབྲས་ལ་ཡིད་ཆེས་ནས། ཚེ་བློས་བཏང་སྟེ་སྒོ་གསུམ་གཡོ་མེད་དུ་སྒོམ་ནུས་ན་སངས་རྒྱས་ཐོབ་པ་ལ་ཐག་རིང་མི་འདུག ཁྱད་པར་བླ་མ་མཚན་ལྡན་ཞིག་གིས་རྗེས་སུ་བཟུང་ཞིང་། གསང་སྔགས་ཉེ་ལམ་གྱི་མན་ངག་དང་སྙིང་པོའི་དོན། ཐ་སྙད་ཀྱི་སྒྲིབ་གཡོགས་མེད་པར་གཅེར་མཐོང་དུ་ངོ་སྤྲོད་པའི་དབང་དང་གདམས་ངག་ཐོབ་ནས་སྒོམ་ནུས་ན། ཚེ་འདིར་སངས་རྒྱ་མི་རྒྱ་ཐེ་ཚོམ་མི་འདུག་ཅིང་། ཚེ་འདིར་མི་དགེ་བཅུ་དང་མཚམས་མེད་ལྔའི་ལས་ཚབས་ཆེན་བྱས་ན་ཤི་མ་ཐག་དམྱལ་བ་མནར་མེད་དུ་སྐྱེ་མི་སྐྱེ་ཐེ་ཚོམ་མི་འདུག་སྟེ། རྒྱུ་འབྲས་ལ་ཡིད་མ་ཆེས་ཤིང་སྙིང་རུས་ཆུང་བས་ལན། སྙིང་ཐག་པ་ནས་རྒྱུ་འབྲས་ལ་ཡིད་ཆེས་ན། ངན་སོང་གི་སྡུག་བསྔལ་ལ་འཇིགས་སྐྲག སངས་རྒྱས་ཐོབ་འདོད་ཀྱི་སྒོ་ནས་དང་པོར་བླ་མ་ལ་མོས་གུས། བར་དུ་གདམས་ངག་སྒོམ་པ་ལ་སྙིང་
(༡༨༦)རུས། མཐར་ཉམས་རྟོགས་སྐྱོང་ལུགས་སོགས་ཀྱི་སྙིང་རུས་ངའི་འདི་བས་མི་ཞན་པ་སོ་སྐྱེ་སྙིང་རུས་ཅན་ཀུན་ལ་འོང་བར་འདུག བྱུང་ཚེ་སངས་རྒྱས་དང་བྱང་ཆུབ་སེམས་དཔའི་སྤྲུལ་པར་རློམ་པ་འདུག་སྟེ། གསང་སྔགས་ཀྱི་ཉེ་ལམ་ལ་ཡིད་མ་ཆེས་པའི་རྟགས་ཡིན་པས། ད་ཁྱེད་རང་རྣམས་རྒྱུ་འབྲས་ལ་ཡིད་ཆེས་པར་གྱིས་ལ། གོང་མའི་རྣམ་ཐར་ལས་རྒྱུ་འབྲས། འཁོར་བའི་ཉེས་དམིགས། དལ་འབྱོར་རྙེད་དཀའ། ནམ་འཆི་ཆ་མེད་རྣམས་སོམས་ལ། གསང་སྔགས་ཀྱི་ཉམས་ལེན་ལ་འབུངས་ཤིག ངས་ཀྱང་ལྟོ་གོས་གཏམ་གསུམ་ལ་གྱོང་བཏང་། སེམས་ལ་དཔའ་བསྐྱེད། ལུས་ལ་བབ་བསྐུར། སྡུག་བསྔལ་ཁྱད་དུ་བསད་ནས་མི་མེད་ཀྱི་རི་ལ་བསྒོམས་པས་ཉམས་རྟོགས་ཀྱི་ཡོན་ཏན་སྐྱེས་པ་ཡིན། ཁྱེད་རྣམས་ཀྱང་ངའི་རྗེས་སུ་ཞུགས་ལ་ཉམས་སུ་ལོངས་ཤིག་གསུངས། བླ་མའི་བཀའ་སྒྲུབ་ཕྱིར་ཚེ་འདི་བློས་བཏང་སྟེ་སྙིང་རུས་དང་དཀའ་སྤྱད་དྲག་པོས་ཡེངས་མེད་དུ་རི་ལ་བསྒོམས་པའི་མཛད་པ་སྟེ་བདུན་པའོ། །
(༡༨༧)བརྒྱད་པ། བསྟན་པ་དང་སེམས་ཅན་ལ་ཕན་བཏགས་པ་དང་དེ་རྒྱས་པར་ཕྱེ་བ་
མགུར་འབུམ ་གྱི་སྐོར། ཡང་རས་ཆུང་པས། རྗེ་བཙུན་གྱི་མཛད་པ་དེ་རྣམས་དོན་ལ་ཡ་མཚན་དང་ངོ་མཚར་གོང་ན་མེད་དུ་གདའ་བས་དགོད་ལ་དེ་བས་བྲོ་བ་མི་འོང་སྟེ། རྣམ་པ་ངུ་བྲོ་བ་ཁོ་ནར་གདའ། རྣམ་པ་ཡང་དགོད་བྲོ་བའི་མཛད་པ་རྣམས་གསུང་དུ་གསོལ་ཞེས་ཞུས་པས། རྗེ་བཙུན་གྱི་ཞལ་ནས། རྣམ་པ་དགོད་བྲོ་བ་སྙིང་རུས་ཀྱིས་སྒྲུབ་པ་བྱས་པའི་འབྲས་བུ། མི་དང་མི་མ་ཡིན་གྱི་གདུལ་བྱ་སྐལ་ལྡན་རྣམས་སྨིན་གྲོལ་གྱི་ལམ་ལ་བཀོད་པས་སངས་རྒྱས་ཀྱི་བསྟན་པ་ལ་ཕན་བཏགས་པ་འདི་ཀ་ཡིན་མོད་གསུངས། ཡང་རས་ཆུང་པས་རྗེ་བཙུན་གྱི་གདུལ་བྱའི་ཐོག་མར་མི་དང་མི་མ་ཡིན་གང་བྱུང་ཞུས་པས། ཐོག་མ་རང་མི་མ་ཡིན་རྣམས་མཐོ་འཚམ་དུ་བྱུང་བ་སྔ། དེ་རྗེས་མིའི་སློབ་མ་ཕལ་ཆེར་འདུས་པའི་རྗེས་སུ་ཚེ་རིང་མའི་ཆོ་འཕྲུལ་བྱུང་། དེ་རྗེས་མིའི་བུ་སློབ་གཞན་རྣམས་བྱུང་བ་ཡིན་ཏེ། ངའི་བསྟན་པ་མི་མ་ཡིན་ཚེ་རིང་མ་དང་། མི་དབུས་པ་སྟོན་པ་དེས་སྤེལ་བར་འདུག་གསུངས། དེའི་ཚེ་སེ་བན་རས་པས། རྗེ་བཙུན་གྱི་སྒྲུབ་གནས་རྣམས་ཀྱི་གཙོ་བོ་
(༡༨༨)ལ་ཕྱི་ཆུ་དབར་དུ་གདའ་བ། དེ་གཉིས་དང་གོང་གི་དེ་རྣམས་མིན་པ་གང་དང་གང་དུ་སྒྲུབ་པ་མཛད་ཞུས་པས། བལ་པོའི་ཡོལ་མོ་གངས་ར། ཡོངས་སུ་གྲགས་པ་ཕྱིའི་རྫོང་དྲུག །མ་གྲགས་པ་ནང་གི་རྫོང་དྲུག །གསང་བའི་རྫོང་དྲུག་སྟེ་བཅོ་བརྒྱད། ཡང་རྫོང་གཉིས་དང་ཉི་ཤུ། ཡོངས་སུ་གྲགས་པའི་ཕུག་ཆེན་བཞི། མ་གྲགས་པའི་བཞི་སྟེ། དེ་རྣམས་ཀྱི་ནང་དུ་སྔར་གྱི་གནས་རྣམས་ཀྱང་འཐུས་པ་ཡིན། གཞན་ཡང་ཕུག་ཕྲན་དང་རི་ཁྲོད་དབེན་ལ་མཐུན་རྐྱེན་འཛོམས་པ་རྣམས་སུ་བསྒོམས་པས་བསྒོམ་བྱ། སྒོམ་བྱེད། སྒོམ་མཁན་གསུམ་གཅིག་ཏུ་འདྲེས་ནས་སྒོམ་མི་ཤེས་པར་འདུག་གསུངས། ཡང་རས་ཆུང་པས། རྗེ་བཙུན་གྱིས་ཆོས་རྣམས་ཟད་སར་སྐྱོལ་བའི་ཐུགས་རྗེས། བདག་སློབ་འབངས་རྣམས་ལ་ཡང་ཕྱིན་ཅི་མ་ལོག་པའི་གོ་བ་དང་མྱོང་བ་འདྲེས་པ་ཅུང་ཟད་རེ་ལ་བརྟན་པ་ཐོབ་པས་བློ་བདེ་བར་གདའ་བ་བཀའ་དྲིན་ཆེ་ལགས། མ་འོངས་པའི་གདུལ་བྱ་རྣམས་ཚོགས་གསོག་པའི་མིག་རྐྱེན་དུ་སྒྲུབ་གནས་ཕྱི་ནང་གསང་བའི་རྫོང་རྣམས་དང་། ཕུག་ཆེན་རྣམས་ཀྱི་ངོས་འཛིན་མིང་རེ་གསུང་བར་ཞུ་ཞུས་པས། ཡོངས་སུ་གྲགས་པ་ཕྱིའི་རྫོང་དྲུག་ནི། བྲག་དཀར་རྟ་སོ་དབུ་མ་རྫོང་། སྨིན་ཁྱུག་གྲིབ་མ་རྫོང་། ལིང་བ་བྲག་དམར་རྫོང་། རག་མ་བྱང་ཆུབ་རྫོང་། སྐྱང་ཕན་ནམ་མཁའ་རྫོང་། བྲག་སྐྱ་རྡོ་རྗེ་རྫོང་རྣམས་སོ། །མ་གྲགས་པ་ནང་གི་རྫོང་དྲུག་ནི། མཆོང་ལུང་ཁྱུང་གི་རྫོང་། སྐྱིད་པ་ཉི་མ་རྫོང་། ཁུ་བྱུག་དབེན་པ་རྫོང་། ཤེལ་ཕུག་ཆུ་ཤིང་རྫོང་། བེ་རྩེ་འདོད་ཡོན་རྫོང་།
(༡༨༩)རྩིག་པ་རྐང་མཐིལ་རྫོང་རྣམས་སོ། །གསང་བའི་རྫོང་དྲུག་ནི། རྒྱ་བྲག་ནམ་མཁའ་རྫོང་། སྟག་ཕུག་སེང་གེ་རྫོང་། སྦས་ཕུག་མ་མོ་རྫོང་། ལ་ཕུག་པདྨ་རྫོང་། གླང་སྒོ་ཀླུ་བདུད་རྫོང་། ཁྲོ་རྒྱལ་རྡོ་རྗེ་རྫོང་རྣམས་སོ། །ཡང་རྫོང་གཉིས་ནི། སྐྱིད་ཕུག་ཉི་མ་རྫོང་དང་། སྤོ་མཐོ་ནམ་མཁའ་རྫོང་གཉིས་སོ། །ཡོངས་སུ་གྲགས་པའི་ཕུག་ཆེན་བཞི་ནི། གཉའ་ནང་གི་གྲོད་པ་ཕུག ལ་ཕྱིའི་བདུད་འདུལ་ཕུག བྲིན་གྱིས་འབྲི་ལྕེ་ཕུག ཏི་སེའི་རྫུ་འཕྲུལ་ཕུག་རྣམས་སོ། །མ་གྲགས་པ་བཞི་ནི། རྩའི་རྐང་ཚུགས་ཕུག རོན་གྱི་འོད་གསལ་ཕུག ར་ལའི་ཟ་འོག་ཕུག ཀུ་ཐང་གི་ཕུག་རོན་ཕུག་རྣམས་ཡིན། དེ་རྣམས་སུ་སྒོམ་པ་བྱུང་ན་དབེན་ལ་མཐུན་རྐྱེན་འཛོམས་པ་ཡང་ཡོད་ཅིང་། བརྒྱུད་པའི་བྱིན་རླབས་འཇུག་པ་ཡིན་པས་སྒོམས་ཤིག་གསུངས་པས། དེར་ཚོགས་པའི་ལྷ་མིའི་བུ་སློབ་ཆོས་ཉན་ཉ་མའི་ཚོགས་དང་བཅས་པ་ཀུན་ལ་སྐྱོ་ཤས་དང་ངེས་འབྱུང་། དད་པ་དང་སྙིང་རྗེ་ཚད་ལས་འདས་པ་རྒྱུད་ལ་སྐྱེས་ཏེ། ཆོས་བརྒྱད་ཚེ་འདིའི་སྣང་བ་ལ་ཞེན་པ་ལོག་ནས། ཀུན་དམ་པའི་ཆོས་ལ་དགའ་མགུ་ཡི་རངས་ཏེ། ཐུགས་སྲས་བུ་ཆེན་རྣམས་ཀྱིས་སྒོ་གསུམ་བསྟན་པ་དང་སེམས་ཅན་གྱི་དོན་དུ་བསྔོས་ནས། དཀའ་ཐུབ་དང་སྡུག་སྒུར། སྙིང་རུས་དང་ཞེ་བཅད་དྲག་པོས་གཡོ་མེད་དུ་རི་ལ་སྒོམ་པའི་དམ་བཅའ་ཕུལ། མི་མ་ཡིན་རྣམས་ཀྱིས་བསྟན་པ་བསྲུང་བར་ཁས་བླངས་ཤིང་དམ་བཅས། ཉ་མ་རྣམས་ཀྱི་ནང་ནས་ཀྱང་རབ་རྣམས་ཀྱིས་ཚེ་འདི་བློས་བཏང་སྟེ། རྗེ་བཙུན་གྱི་ཕྱག་ཕྱིར་འབྲངས་ནས་བསྒོམས་པས་གནས་ལུགས་ཀྱི་དོན་མཐོང་བའི་རྣལ་འབྱོར་ཕོ་མོ་མང་དུ་བྱུང་། འབྲིང་
(༡༩༠)རྣམས་ཀྱིས་ལོ་སྒྲུབ་ཟླ་སྒྲུབ་ཀྱི་དམ་བཅའ་བླངས། ཐ་མས་ཀྱང་སྡིག་པ་སྣ་རེ་རྟག་ཏུ་སྤོང་ཞིང་། དགེ་བ་སྣ་རེ་རྟག་ཏུ་སྒྲུབ་པའི་དམ་བཅའ་མ་བླངས་པ་མེད་ཅིང་། དེ་ཐམས་ཅད་མཐར་འཁྱོལ་བ་ཡིན་ནོ། །དེ་ཡན་ཆད་རྗེ་བཙུན་རང་གི་གསུང་ཇི་ལྟ་བ་ཡི་གེར་བཀོད་པ་ལགས་ཤིང་། བསྒྲུབས་འབྲས་ཀྱིས་བསྟན་པ་དང་སེམས་ཅན་ལ་ཕན་བཏགས་པའི་མཛད་པ་རྗེ་བཙུན་རང་གི་ཞལ་ནས་གསུངས་པ་མདོར་བསྟན་ལུས་རྣམ་གཞག་ལྟ་བུར་གྱུར་པ་འདི་ལ་ཅུང་ཟད་ཞིག་རྒྱས་པར་ཕྱེ་ན། སྐོར་ཚོ་ཆེན་པོ་གསུམ་སྟེ། མི་མ་ཡིན་རྣམས་ཀྱིས་མཐོ་འཚམས་པ་དམ་ལ་བཏགས་པའི་སྐོར། སྐལ་ལྡན་ཐུགས་སྲས་རྣམས་སྨིན་གྲོལ་ལ་བཀོད་པའི་སྐོར། ཁ་འཐོར་བའི་ཉ་མ་བུ་སློབ་ལ་སྣ་ཚོགས་པའི་ཆོས་འཁོར་བསྐོར་བའི་སྐོར་རོ། །དེ་རྣམས་རྒྱས་པར་ཕྱེ་ན། དང་པོ་མི་མ་ཡིན་རྣམས་དམ་ལ་བཏགས་ཚུལ་ནི། བྲག་དམར་མཆོང་ལུང་དུ་བགེགས་ཀྱི་རྒྱལ་པོ་བྷི་ནཱ་ཡ་ཀ་དམ་ལ་བཏགས་པ་བླ་མ་དྲན་དྲུག་གི་སྐོར་གསུངས། དེ་ནས་བླ་མའི་བཀའ་སྒྲུབ་ཕྱིར་ལ་ཕྱི་ལ་བྱོན་ནས། ལྷ་ཆེན་ཚོགས་བདག་དམ་ལ་བཏགས་པ་ལ་ཕྱི་ཆུ་བཟང་གི་སྐོར་གསུངས། དེའི་ཕྱི་ལོ་ལ་ཕྱི་གནས་མཐིལ་དུ་བྱོན་པ་ལ་བརྟེན་ནས། ཡོངས་སུ་གྲགས་པའི་གངས་མགུར་ཆེན་མོ་གསུངས། དེ་ནས་བླ་མའི་བཀའ་སྒྲུབ་ཕྱིར་མང་ཡུལ་གྱི་རི་བོ་དཔལ་འབར་དང་། བལ་ཡུལ་གྱི་ཡོལ་མོ་གངས་ར་ལ་འབྱོན་དགོངས་ནས་སླར་ཡང་གུང་ཐང་ལ་བྱོན་པས། ལིང་པ་བྲག་ལ་ཐུགས་སོང་སྟེ། དེར་རེ་ཞིག་བཞུགས་པས། ལིང་པ་བྲག་སྲིན་མོའི་སྐོར་གསུངས། དེ་ནས་རི་བོ་དཔལ་འབར་གྱི་འདབས་རག་མ་བྱང་ཆུབ་
(༡༩༡)རྫོང་དུ་བསེའི་ལྷ་མོ་ཞིག་དང་རག་མའི་གཞི་བདག་དམ་ལ་བཏགས་པའི་སྐོར་གསུངས། དེ་ནས་སྐྱང་ཕན་ནམ་མཁའ་རྫོང་དུ་བཞུགས་ནས། མི་མ་ཡིན་དང་མི་མང་པོ་ལ་ཕན་འདོགས་མཛད། དེ་ནས་ཡོལ་མོ་གངས་ར་ལ་བྱོན་ནས། སིང་ག་ལའི་ནགས་གསེབ་སྟག་ཕུག་སེང་གེ་རྫོང་དུ་བཞུགས་ཏེ། དེར་ཡང་མི་མ་ཡིན་དང་མི་འགའི་དོན་མཛད། དེར་བོད་ལ་སོངས་ལ་རི་ཁྲོད་དང་དབེན་པར་སྒོམ་བཞིན་པའི་ངང་ནས་འགྲོ་བའི་དོན་གྱིས་ཤིག་བྱ་བའི་ལུང་བསྟན་བྱུང་བ་ལྟར། བོད་ལ་བྱོན་ནས་གུང་ཐང་གི་ཕུག་ཅིག་ཏུ་བཞུགས་ཏེ་ཕུག་རོན་གྱི་སྐོར་གསུངས་སོ། །གཉིས་པ་ཐུགས་སྲས་རྣམས་དང་མཇལ་ཚུལ་ནི། དེ་ནས་བྲག་སྐྱ་རྡོ་རྗེ་རྫོང་དུ་བཞུགས་ནས་སེམས་ཅན་མང་པོའི་དོན་མཛད་ཚེ། ཡུམ་རྡོ་རྗེ་རྣལ་འབྱོར་མས་རྗེ་བཙུན་ལ་སྤྱིར་གྱིས་བུ་སློབ་རྣམས་འབྱུང་བའི་ལུང་བསྟན་དང་། ཁྱད་པར་མཁའ་འགྲོ་སྙན་བརྒྱུད་ཀྱི་གདམས་ངག་ལེན་པའི་སློབ་མ་རས་ཆུང་རྡོ་རྗེ་གྲགས་པ་གནས་དང་བཅས་པ་ལུང་བསྟན་ཏེ། གུང་ཐང་ར་ལའི་ཕུ་ཟ་འོག་ཕུག་ཏུ་བཞུགས་པས། ཐུགས་ཀྱི་སྲས་རས་ཆུང་བ་དང་མཇལ། དེ་ནས་རས་ཆུང་པ་རྒྱ་གར་ལ་སྙུང་གཞི་འཆོས་སུ་བྱོན་ནས། ཡང་དཔོན་སློབ་གཉིས་མཇལ་ཏེ་རོན་ཕུའི་འོད་གསལ་ཕུག་ཏུ་རྩ་ཕུ་རས་པ་དང་མཇལ། དེ་ནས་རག་མ་བྱང་ཆུབ་རྫོང་དུ་བྱོན་པས་རས་པ་སངས་རྒྱས་སྐྱབས་དང་མཇལ། དེ་ནས་བྱོན་ཏེ་གཉའ་ནང་གྲོད་ཕུག་ཏུ་བཞུགས་པའི་ཚེ། སྔ་ནས་དད་བཞིན་པ་སྐྱོ་སྟོན་ཤཱཀྱ་གུ་ན་ལ་དབང་དང་གདམས་པ་གནང་ནས་སྨིན་གྲོལ་ལ་བཀོད། དེ་ནས་བྱང་རྟ་སྒོ་ལ་བྱོན་ཚེ་ཕ་རེས་གཅུང་གི་གད་པ་
(༡༩༢)གླི་གསུམ་དུ་ཉ་མ་དཔལ་དར་འབུམ་དང་མཇལ། ཚུར་རེས་གཡས་རུ་བྱང་གི་མགྲོན་ཁང་ཞིག་ཏུ་སེ་བན་རས་པ་དང་མཇལ། དེ་ནས་ལ་སྟོད་རྒྱལ་གྱི་ཤྲཱི་རི་ལ་སྒོམ་དུ་བྱོན་པས་འབྲི་སྒོམ་རས་པ་དང་མཇལ། དེ་ནས་སྟོན་རོ་སྙོམས་ཀྱི་ལྡོམ་བུ་ལ་བྱོན་པས་ཆུ་མིག་དངུལ་འབུམ་དུ་རས་པ་ཞི་བ་འོད་དང་མཇལ། དེ་ནས་ལྕིམ་ལུང་དུ་སྦ་ལྕག་གི་སྐོར་ལ་ངན་རྫོང་རས་པ་དང་མཇལ། དེ་ནས་ལ་ཕྱི་ལ་བཞུགས་པའི་ཚེ་བླ་མས་ལུང་བསྟན་ལྟར་མཁའ་འགྲོས་བསྐུལ་ཏེ། ཏི་སེ་ལ་བྱོན་པའི་ལམ་དུ་དམ་པ་རྒྱགས་ཕུ་བ་དང་མཇལ། དེ་ནས་ཡར་བྱོན་ཏེ་གློ་བོ་ཀོ་རེ་ལ་ཐོག་གི་སྐོར་ལ་མཁར་ཆུང་རས་པ་དང་མཇལ། དེ་ནས་དགུན་པུ་རངས་ཀྱི་རོང་འབྲི་རྩེའི་གངས་འདབས་སུ་བཞུགས་དུས་རས་པ་དར་མ་དབང་ཕྱུག་དང་མཇལ་ཏེ་སོས་ཏི་སེ་ལ་བྱོན་ནས་ན་རོ་བོན་ཆུང་རྫུ་འཕྲུལ་གྱི་ཟིལ་གྱིས་མནན་པ་ཏི་སིའི་སྐོར། དེ་ནས་མར་བྱོན་སླར་ཡང་བྲག་སྐྱ་རྡོ་རྗེ་རྫོང་དུ་བཞུགས་པས་རོང་ཆུང་རས་པ་དང་མཇལ། དེ་ནས་མཁའ་འགྲོས་བསྐུལ་ཏེ་བྱོན་པའི་ལམ་དུ་སྦས་ཕུག་མ་མོ་རྫོང་གཟིགས། དེར་ཞག་ཤས་བཞུགས་པས་རྫི་བོ་ཞབས་ཕྱིར་འབྲངས་པ་ལ་ལུག་རྫི་རས་པ་བྱ་བའི་རྟོགས་ལྡན་བཟང་པོ་ཞིག་བྱུང་། དེ་ནས་ལ་ཕུག་པདྨ་རྫོང་དུ་གཤེན་སྒོམ་རས་པ་དང་མཇལ་ཏེ། ཕྱིས་གླང་སྒོ་ཀླུ་བདུད་རྫོང་དང་། སྦས་ཕུག་མ་མོ་རྫོང་དུ་བཞུགས་ཚེ་ཞབས་ཏོག་ཀྱང་ཕུལ་དུ་ཕྱིན་པ་ཕུལ་བ་ཡིན། དེ་ནས་ཅོ་རོ་འབྲིག་མཚམས་ལ་བྱོན་པའི་སྐོར་ལ་རས་ཆུང་མ་དང་མཇལ། དེ་ནས་མོན་གཉི་ཤངས་འགུར་རྟ་ལ་བཞུགས་ཚེ་ཁྱི་ར་རས་པ་དང་མཇལ། དེའི་སྟོབས་ཀྱིས་རྗེ་བཙུན་གྱི་སྙན་གྲགས་ཆེན་པོ་བལ་ཡུལ་ཁྱབ་པ་དང་། སྒྲོལ་
(༡༩༣)མས་ལུང་བསྟན་ཏེ་བསྐུལ་བའི་སྟོབས་ཀྱིས་ཁོ་ཁོམ་རྒྱལ་པོས་མཆོད་པར་གྱུར། དེ་ནས་རས་ཆུང་པ་དང་གཤེན་སྒོམ་རས་པས་སྤྱན་དྲངས་ནས་ལ་ཕྱིའི་མདོ་སྙན་གཡོན་ཕུག་ཏུ་བཞུགས། དེའི་ཕྱི་ལོ་མཆོང་ལུང་བྲག་ལ་བཞུགས། དེ་ནས་ཆུ་དབར་དུ་བྱོན་པས། ཚེ་རིང་མའི་སྐོར་གསུམ་རིམ་པར་གསུངས། དེ་ནས་བྲིན་སྡིང་མར་བྱོན་པའི་ཚེ་རས་པ་རྡོ་རྗེ་དབང་ཕྱུག་དང་མཇལ། དེ་ནས་རྗེ་བཙུན་དཔོན་སློབ་གཉའ་ནང་གྲོད་ཕུག་ཏུ་བཞུགས་པའི་ཚེ། རྒྱ་གར་གྱི་དྷཱརྨ་བོ་དྷི་དང་། བལ་པོ་རྫོང་དུ་མཇལ་བས། རྗེ་བཙུན་ལ་ཕྱག་ཕུལ། དེས་སྐུ་བསོད་རྒྱས་པའི་སྟོབས་ཀྱིས་མཚན་ཉིད་ཀྱི་སྟོན་པ་དར་བློས་ཕྲག་དོག་གིས་རྩོད་པ་བྱས་པ། རྫུ་འཕྲུལ་དང་ནུས་པས་བཟློག་པའི་སྐོར། དེའི་རྐྱེན་གྱིས་རས་ཆུང་ཏི་པུའི་སྐོར། དེའི་བར་ལ་གྲོད་ཕུག་ཏུ་མེ་སྒོམ་རས་པ་དང་མཇལ། གཉའ་ནང་གནག་ཁྲར་རས་མ་ས་ལེ་འོད་དང་མཇལ། དེ་ནས་རྗེ་བཙུན་བྲག་དམར་སྤོ་མཐོར་བྱོན་ནས་བཞུགས་པ་ལས། རས་ཆུང་པ་ཚུར་འབྱོན་པ་གཟིགས་ནས་བསུ་རུ་བྱོན་ཏེ་གཡག་རུའི་སྐོར་དང་། རྐྱང་མགུར་གྱི་སྐོར་གསུངས། དེ་ནས་ཆུ་དབར་དུ་བྱོན་ནས་དྭགས་པོའི་གླན་སྒོམ་རས་པ་དང་མཇལ། བྲིན་གྱི་སྤྲོ་བདེ་བཀྲ་ཤིས་སྒང་དུ། སྔོན་བཅོམ་ལྡན་འདས་ཀྱིས་ལུང་བསྟན་པའི་སྐྱེས་བུ་ཆེན་པོ་ཐུགས་ཀྱི་སྲས་མཆོག་དམ་པར་གྱུར་པ། དགེ་སློང་རྡོ་རྗེ་འཛིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་འོད་གཞོན་ནུ་སེམས་ཅན་གྱི་དོན་དུ། མིར་སྐུ་སྐྱེ་བ་བཞེས་པ་མཉམ་མེད་དྭགས་པོ་ལྷ་རྗེ་དང་མཇལ། དེ་ནས་ཆུ་དབར་གྱི་འོམ་ཆུང་ན་བཞུགས་པའི་ཚེ། སྔར་རྒོལ་དུ་བྱུང་བའི་ལོ་སྟོན་དགེ་འདུན་དང་མཇལ་ནས་
(༡༩༤)རྗེས་སུ་བཟུང་། དེ་ནས་སྐྱིད་ཕུག་ཉི་མ་རྫོང་ན་བཞུགས་པའི་ཚེ། བྲིན་གྱི་འབྲེ་སྟོན་བཀྲ་ཤིས་འབར་དང་མཇལ། སྤྱོད་པ་མཛད་ཚེ་དགེ་འདུན་རྣམས་ཀྱི་ནང་ནས་ལི་སྐོར་ཕྱ་རུ་བ་ཕྱག་ཕྱིར་འབྲངས་ནས་མཇལ་བ་ཡིན་ནོ། །རྗེ་བཙུན་རིན་པོ་ཆེ་ལ་མཁའ་འགྲོས་མིའི་བུ་སློབ་རྣམས་ཀྱི་ནང་ནས། གྲུབ་ཐོབ་རང་ཡང་ཉི་ཤུ་རྩ་ལྔ་འབྱུང་བར་ལུང་བསྟན་པ་དེ་རྣམས་ནི་ཐུགས་ཀྱི་སྲས་བརྒྱད། ཉེ་བའི་སྲས་བཅུ་གསུམ། དེ་རྣམས་ཀྱི་སྲིང་བཞི་རྣམས་ཡིན་ཞིང་། དེ་དག་དང་མཇལ་ཚུལ་ཀུན་ལ་སྐོར་ཚོ་ཆེན་པོ་རེ་རེ་ཡོད་པ་ལགས་སོ། །དེ་ནས་གསུམ་པ་ཁ་འཐོར་བ་སྣ་ཚོགས་ཀྱི་སྐོར་ལ། ནང་དང་གསང་བའི་རྫོང་འགའ་ཞིག་ཏུ་ཐུགས་སྲས་རྣམས་དང་མཇལ་བའི་སྔ་ཕྱི་ངེས་མེད་དུ་གསུངས་པ། གྲྭ་བུ་སློབ་དང་ཉ་མ་འགའི་ཞུས་ལན་གྱི་སྐོར་འགའ་རེ། སྒམ་པོ་པ་བཞུགས་དུས་བོན་པོ་རིའི་སྐོར། དེ་ནས་གཉའ་ནང་དུ་བྱོན་ནས་དབང་བསྐུར་དང་རབ་གནས་ཀྱི་སྐོར། རྩར་མར་གཤེན་རྡོར་མོ་དང་ལེགས་སེ་འབུམ་གྱི་སྐོར། དེ་ནས་འཆི་བྲོད་ཐིགས་ཚགས་མའི་སྐོར། དེ་ནས་རས་ཆུང་པ་དང་དཔོན་སློབ་གཉིས་ལ་ཕྱི་ལ་བྱོན་ཚེ་བདུད་འདུལ་ཕུག་མོ་ཆེ་དང་སྐྱོ་སངས་ལ་བྱོན་པའི་སྐོར། དེ་ནས་ཡར་བྱོན་ཏེ་རམ་སྡིངས་གནམ་ཕུག་མའི་སྐོར། དེ་ནས་ཉ་མ་རྣམས་ཀྱིས་སྤྱན་དྲངས་ཏེ། གཉའ་ནང་གྲོད་ཕུག་ཏུ་བཞུགས་ཚེ་རྗེ་བཙུན་རང་གི་རྣམ་ཐར་གསུངས་ཏེ་རས་ཆུང་དབུས་བཞུད་ཀྱི་སྐོར། མཁའ་འགྲོ་སེང་གེའི་གདོང་ཅན་གྱིས་མཚམས་སྦྱར་ཏེ་ཐོང་ལར་དམ་པ་དང་མཇལ་བའི་སྐོར། ལས་ཞིང་དུ་གཤིན་དོན་ཐུགས་རྗེའི་ལྕགས་
(༡༩༥)ཀྱུ་དང་། ཡུམ་གྱི་དྲིན་ལན་བསབ་པའི་སྐོར། རྩར་མའི་ཉ་མ་སོགས་གཉའ་ནང་པ་རྣམས་ལ་མཇུག་གི་ཞལ་ཆེམས་ཀྱི་སྐོར། དེ་ནས་ཆུ་དབར་དུ་འབྱོན་པའི་ཞར་ལ། དིང་རིར་ལྷ་རྗེ་གཡང་ངེའི་སྐོར། ཆུ་དབར་དུ་ཕེབས་ནས་དབུས་བཞུད་ཕྱི་མའི་སྐོར། བྲིན་ལྷ་བྲོར་ཡོན་བདག་བཀྲ་ཤིས་བརྩེགས་ཀྱི་སྐོར། བྲིན་བྲག་མཁར་དུ་མཛེས་སེ་འབུམ་དང་། ཁུ་བྱུག་ལ་སོགས་ཏེ་ཉ་མ་སྤྱིའི་སྐོར། བྲག་དམར་སྤོ་མཐོར་བདུད་བཞི་ལས་རྒྱལ་བ་དང་། སྔགས་པའི་ཞུས་ལན་གྱི་སྐོར། བུ་སློབ་ཡོངས་ལ་སྤྲོ་བ་བསྐྱེད་པ། བཀོད་པ་སྐུའི་རྫུ་འཕྲུལ་གྱི་སྐོར་ལ་སོགས་ཏེ། ཡོངས་སུ་གྲགས་པ་དང་མ་གྲགས་པའི་ཆོས་འཁོར་བསྐོར་བའི་ཚེ། སྐོར་ཚོ་བསམ་གྱིས་མི་ཁྱབ་པའི་སྒོ་ནས། མཐའ་ཡས་པའི་སྐལ་ལྡན་གྱི་སྐྱེས་བུ་དབང་པོ་རབ་རྣམས་སྨིན་ཅིང་གྲོལ་བར་མཛད། དབང་པོ་འབྲིང་རྣམས་སྨིན་པར་མཛད་ཅིང་གྲོལ་བའི་ལམ་བསྟན། ཐ་མ་རྣམས་ཀྱིས་ཀྱང་བྱང་ཆུབ་མཆོག་ཏུ་སེམས་བསྐྱེད་ཅིང་། བྱང་ཆུབ་སེམས་དཔའི་བསླབ་བྱ་ལ་སློབ་པ་ལ་བསམ་སྦྱོར་བརྟན་པོ་ལ་བཀོད། སྐལ་མེད་རྣམས་ལའང་རྣམ་དཀར་གྱི་བག་ཆགས་བཞག་ནས། གནས་སྐབས་མཐོ་རིས་ལྷ་མིའི་བདེ་བ་ལ་བཀོད་པའི་འཕྲིན་ལས་དང་། ཐུགས་རྗེ་ནམ་མཁའ་ལྟ་བུས་སངས་རྒྱས་ཀྱི་བསྟན་པ་ཉིན་མོར་མཛད་ཅིང་། སེམས་ཅན་འཁོར་བ་དང་ངན་སོང་གི་སྡུག་བསྔལ་མཐའ་དག་ལས་སྐྱོབ་པར་མཛད་པ་ལགས་སོ། །དེ་དག་ མགུར་འབུམ ་གྱི་སྐབས་སུ་ཤིན་ཏུ་རྒྱས་པར་ཕྱེ་ནས་བསྟན་ཏོ། །བསྒྲུབས་འབྲས་ཀྱིས་བསྟན་པ་དང་སེམས་ཅན་ལ་ཕན་བཏགས་པའི་མཛད་པ་སྟེ་བརྒྱད་པའོ། །
(༡༩༦)མི་མ་ཡིན་གྱིས་མཐོ་འཚམས་པ་དམ་ལ་བཏགས་པའི་སྐོར་ལས་མི་ལ་ཤིང་ཐུན་གྱི་སྐོར། ན་མོ་གུ་རུ། རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པ་དེ་ཉིད། མཆོང་ལུང་ཁྱུང་གི་རྫོང་ན་འོད་གསལ་ཕྱག་རྒྱ་ཆེན་པོའི་ངང་ལ་བཞུགས་པའི་དུས་ནམ་ཞིག་གི་ཚེ། འཚོ་བའི་སྟ་གོན་ལ་བཞེངས་པས། ཕྱེ་ཚྭ་ཆུ་སྡོར་དག་ལྟ་ཅི་སྨོས་ཏེ། གོ་ཁ་ན་ཤིང་ཡང་མི་འདུག ཐབ་ཁ་ན་ཆུ་དང་མེ་ཡང་མི་འདུག་པས། ངའི་འདི་ཧ་ཅང་རང་ཡང་བློས་བཏང་དྲགས་འདུག་པས། ཤིང་ཞིག་འཐུ་རུ་འགྲོ་དགོས་དགོངས་ནས་བྱོན་ཏེ། ཤིང་ཐུ་བ་གང་ཙམ་རྙེད་པའི་ཚེ། རླུང་ཆེན་པོ་ཞིག་གློ་བུར་དུ་ལངས་ནས། རས་བཟུང་ཚེ་ཤིང་ཁྱེར། ཤིང་བཟུང་ཚེ་རས་ཁྱེར་བ་ལས། ཐུགས་དགོངས་ལ། ང་སྔར་རི་ཁྲོད་དུ་དེ་ཙམ་ཞིག་བསྡད་རུང་། ད་དུང་བདག་འཛིན་བློས་མ་ཐོངས་པར་འདུག བདག་འཛིན་བློས་མ་ཐོངས་པའི་ཆོས་དང་སྒྲུབ་པས་ཅི་བྱེད་སྙམ། རས་དགའ་ན་རས་ཁྱེར། ཤིང་དགའ་ན་ཤིང་ཁྱེར་གསུངས། གཉིས་ཀ་བློས་བཏང་སྟེ་བཞུགས་པས། འཚོ་བ་ངན་པའི་སྟོབས་ཀྱིས་བསེར་མའི་རྣམ་པས། ཡུག་ཅིག་ཐུགས་དྲན་མེད་དུ་ཐིམ་པ་ལས་བཞེངས་པའི་ཚེ། རླུང་ཞི་བ་དང་རས་དེ་ཤིང་སྡོང་ཞིག་གི་རྩེ་ལ་ལིང་ངེ་འདུག་པ་དང་། ཐུགས་སྐྱོ་བའི་ཉམས་ཤར་བའི་ངང་ལ་ཕ་བོང་ལུག་རོ་ཙམ་ཞིག་གི་ཁར་མཉམ་པར་བཞག་པའི་མཐར། ཤར་ཕྱོགས་གྲོ་བོ་ལུང་གི་ཕྱོགས་སུ་སྤྲིན་དཀར་པོ་གཅིག་ལིང་བྱུང་བས། སྤྲིན་ཕ་གིའི་འོག་ན་གྲོ་བོ་ལུང་གི་དགོན་པ་ཡོད། དེ་ན་
(༡༩༧)ངའི་བླ་མ་སྒྲ་སྒྱུར་མར་པ་ལོ་ཙཱ་དེ་བཞུགས་ཏེ་སྙམ་པ་དང་། བླ་མ་ཡབ་ཡུམ་མཆེད་གྲོགས་རྡོ་རྗེ་སྤུན་གྱི་འཁོར་དང་བཅས་པའི་དབུས་ན་རྒྱུད་ཀྱི་བཤད་པ་དབང་དང་གདམས་ངག་རྣམས་གནང་ཚུལ་དྲན་ནས། ད་ལྟ་བཞུགས་ན་ཅི་ལ་ཐུག་རུང་མཇལ་དུ་འགྲོ་བ་ཡིན་ཏེ་དགོངས་པ་དང་། སྔར་གྱི་སྐྱོ་ཤས་དེའི་ཁར་བླ་མ་དྲན་དྲགས་ཐུགས་སྐྱོ་བ་ལ་ཚད་ལས་འདས་པ་ཞིག་གི་ངང་ནས་སྤྱན་ཆབ་མང་པོ་བསིལ་ཞིང་ཐུགས་སྐྱོ་བའི་གདུང་དབྱངས་བླ་མ་དྲན་དྲུག་གི་མགུར་འདི་གསུངས་སོ། །ཕ་དྲན་པས་གདུང་སེལ་མར་པའི་ཞབས། །སྤྲང་གདུང་དབྱངས་ཐལ་ལོ་མར་པ་རྗེ། །བྲག་དམར་མཆོང་ལུང་ཤར་ཕྱོགས་ན། །ཆུ་འཛིན་སྤྲིན་དཀར་ལང་མ་ལིང་། །སྤྲིན་དཀར་པོ་ལྡིང་བའི་འོག་ཅིག་ན། །རྒྱབ་རི་གླང་ཆེན་འགྱིངས་འདྲའི་མདུན་ཞིག་ན། །མདུན་རི་སེང་ཆེན་འགྱིངས་འདྲའི་སྟེང་ཞིག་ན། །གནས་ཆེན་གྲོ་བོ་ལུང་གི་དགོན་པ་ན། །རྡོ་ཆེན་ཨ་མོ་ལི་ཀའི་ཁྲི་སྟེང་ན། །གདན་ཁྲི་སྙན་ས་ལེའི་པགས་སྟེང་ན། །དེ་ན་སུ་བཞུགས་སུ་མི་བཞུགས། །དེ་ན་སྒྲ་སྒྱུར་མར་པ་བཞུགས། །དུས་ད་ལྟ་བཞུགས་ན་དགའ་བ་ལ། །ང་མོས་གུས་ཆུང་ཡང་མཇལ་སྙིང་འདོད། །གདུང་སེམས་ཆུང་རུང་མཇལ་སྙིང་འདོད། །ང་བསམ་ཞིང་མཚན་ལྡན་བླ་མ་དྲན། །སྒོམ་ཞིང་མར་པ་ལོ་ཙཱ་དྲན། །ཡུམ་མ་ལས་ལྷག་པའི་བདག་མེད་མ། །དུས་ད་ལྟ་བཞུགས་ན་དགའ་བ་ལ། །ས་སྐོར་ཐག་རིང་ཡང་མཇལ་སྙིང་འདོད། །ལམ་བགྲོད་པར་དཀའ་ཡང་མཇལ་སྙིང་འདོད། །བསམ་ཞིང་མཚན་ལྡན་བླ་མ་དྲན། །སྒོམ་ཞིང་མར་པ་ལོ་ཙཱ་དྲན། །སྙན་
(༡༩༨)བརྒྱུད་བརྡ་ཡི་དབང་བཞི་དེ། །ད་ལྟ་བསྐུར་ན་དགའ་བ་ལ། །ང་འབུལ་བ་ཆུང་རུང་ཞུ་སྙིང་འདོད། །དབང་ཡོན་མེད་རུང་ཞུ་སྙིང་འདོད། །བསམ་ཞིང་མཚན་ལྡན་བླ་མ་དྲན། །སྒོམ་ཞིང་མར་པ་ལོ་ཙཱ་དྲན། །ཁྲིད་ཟབ་མོ་ནཱ་རོ་ཆོས་དྲུག་དེ། །ད་ལྟ་གསུང་ན་དགའ་བ་ལ། །ང་སྙིང་རུས་ཆུང་རུང་ཞུ་སྙིང་འདོད། །ང་སྒོམ་བསྲན་ཆུང་རུང་སྒོམ་སྙིང་འདོད། །བསམ་ཞིང་མཚན་ལྡན་བླ་མ་དྲན། །སྒོམ་ཞིང་མར་པ་ལོ་ཙཱ་དྲན། །མཆེད་གྲོགས་དབུས་གཙང་དད་འདུས་དེ། །ད་ལྟ་བཞུགས་ན་དགའ་བ་ལ། །ང་ཉམས་རྟོགས་ངན་རུང་བསྡུར་སྙིང་འདོད། །གོ་བ་ཞན་རུང་བསྡུར་སྙིང་འདོད། །བསམ་ཞིང་མཚན་ལྡན་བླ་མ་དྲན། །སྒོམ་ཞིང་མར་པ་ལོ་ཙཱ་དྲན། །སྤྲང་མོས་གུས་ཀྱི་ངང་ནས་འབྲལ་མེད་ཀྱང་། །བླ་མ་སྙིང་ནས་དྲན་པ་ཡི། །འདོད་པས་གདུངས་ནས་བཟོད་གླགས་མེད། །དབུགས་སྟོད་དུ་འཚངས་ནས་སྐད་མ་ཐོན། །བུའི་གདུང་བ་སོལ་ཅིག་བཀའ་དྲིན་ཅན། །ཞེས་གསུངས་པས། སྤྲིན་དེ་དར་སྣ་ལྔའི་ཡུག་བརྐྱངས་པ་ལྟ་བུ་ཞིག་ཏུ་གྱུར་པའི་རྩེ་ལ། རྗེ་མར་པ་དེ་ཉིད་སྔར་བས་ཀྱང་གཟི་བརྗིད་ཆེ་བ་ཞིག་སེང་གེ་དཀར་མོ་རྒྱན་དུ་མས་བརྒྱན་པ་ཞིག་ལ་ཆིབས་ནས་བྱོན་ཏེ། བུ་མཐུ་ཆེན་ཁྱོད་ད་ལན་གདུང་བ་དྲག་པོས་ང་འབོད་པ་དེ་ཅི་བྱུང་། བླ་མ་དང་ཡི་དམ་དཀོན་མཆོག་ལ་ཡི་ཆད་དམ། རྟོག་པ་རྐྱེན་ངན་གྱི་ཡུལ་ཕྱིར་འབྲངས་སམ། སྒྲུབ་ཁང་དུ་ཆོས་བརྒྱད་ཀྱི་བར་ཆད་ཞུགས་སམ། རེ་དོགས་ཀྱི་འགོང་བོས་བློ་གཙེར་བས་ཡིད་སུན་ནམ། ཡང་ཡར་བླ་མ་དཀོན་མཆོག་ལ་ཞབས་ཏོག མར་རིགས་དྲུག་གི་སེམས་ཅན་ལ་སྦྱིན་གཏོང་། བར་
(༡༩༩)དུ་ཁྱོད་རང་ལ་སྡིག་སྒྲིབ་དག་པ་དང་ཡོན་ཏན་སྐྱེ་བའི་མཐུན་རྐྱེན་བཟང་པོ་བྱུང་བ་ཡིན་ནམ། ཅི་ཡིན་རུང་ཁྱོད་དང་ང་ལ་འབྲལ་ཐབས་མེད་ཀྱིས། སྒྲུབ་པས་བསྟན་པ་དང་སེམས་ཅན་གྱི་དོན་གྱིས་ཤིག་གསུངས་པའི་ཉམས་ཤིག་ཤར་བས། དགྱེས་དྲགས་བཟོད་གླགས་མེད་པའི་ངང་ནས། ཉམས་ཤར་གྱི་གསུང་ལན་དུ་མགུར་འདི་བཞེས་སོ། །ཕ་བླ་མའི་ཞལ་མཐོང་གསུང་ཐོས་པས། །སྤྲང་པོའི་སྙིང་རླུང་ཉམས་སུ་ཤར། །བླ་མའི་རྣམ་ཐར་དྲན་པ་ཡིས། །རྟོགས་པ་མོས་གུས་གཏིང་ནས་སྐྱེས། །ཐུགས་རྗེ་བྱིན་རླབས་དངོས་སུ་ཞུགས། །ཆོས་མིན་སྣང་བ་ཐམས་ཅད་འགགས། །བླ་མ་དྲན་པའི་གདུང་དབྱངས་འདི། །རྗེ་བཙུན་སྙན་ལ་གཟན་ལགས་ཀྱང་། །སྤྲང་ལ་སྣང་བ་འདི་བས་མེད། །ད་དུང་བགྱིད་དོ་ཐུགས་རྗེས་སྐྱོངས། །སྙིང་རུས་སྡུག་བསྲན་གྱི་སྒྲུབ་པ་འདི། །ཕ་བླ་མ་མཉེས་པའི་ཞབས་ཏོག་ཡིན། །གཅིག་པུར་རི་ཁྲོད་འགྲིམ་པ་འདི། །མཁའ་འགྲོ་མཉེས་པའི་ཞབས་ཏོག་ཡིན། །རང་རྩིས་མེད་པའི་དམ་ཆོས་འདི། །སངས་རྒྱས་བསྟན་པའི་ཞབས་ཏོག་ཡིན། །ཚེ་དང་སྒྲུབ་པ་སྙོམས་པ་འདི། །མགོན་མེད་སེམས་ཅན་གྱི་སྦྱིན་གཏོང་ཡིན། །ན་དགའ་ཤི་སྐྱིད་སྙིང་རུས་འདི། །ལས་སྡིག་སྒྲིབ་སྦྱོང་བའི་ཕྱགས་ཤིང་ཡིན། །སྡིག་ཟས་སྤངས་པའི་དཀའ་ཐུབ་འདི། །ཉམས་རྟོགས་སྐྱེ་བའི་མཐུན་རྐྱེན་ཡིན། །ཕ་བླ་མའི་དྲིན་ལན་སྒྲུབ་པས་འཇལ། །བུ་ཐུགས་རྗེས་སྐྱོངས་ཤིག་གུ་རུ་རྗེ། །སྤྲང་རི་ཁྲོད་ཟིན་པར་བྱིན་གྱིས་རློབས། །ཞེས་གསུངས། ཐུགས་སྤྲོ་སིང་ངེ་བའི་ངང་ནས་རས་གོས་དེ་བཞེས། ཤིང་མཚོན་པ་ཞིག་ཁྱེར་
(༢༠༠)ནས་སྒྲུབ་ཁང་དུ་བྱོན་པས། སྤྱིལ་པོ་ན་ལྕགས་ཀྱི་ཨ་ཙ་ར་མིག་ཕོར་ཁོག་ཙམ་བགྲད་པ་ལྔ་འདུག་པ་ལས། གཅིག་རྗེ་བཙུན་གྱི་གཟིམས་མལ་ན་བསྡད་ནས་ཆོས་འཆད། གཉིས་ཀྱིས་ཉན། གཅིག་གིས་ལྟོ་གཡོ། གཅིག་གིས་ཕྱག་དཔེ་རྣམས་གཡེང་ཞིང་འདུག་པས། ཐོག་མར་ཟིལ་བུན་པ་ཞིག་བྱུང་། དེ་རྗེས་གཞི་བདག་མ་དགའ་བའི་ཆོ་འཕྲུལ་ཡིན་པར་འདུག ང་གནས་གང་དུ་སྡོད་རུང་གཏོར་མ་གཏང་རྒྱུ་ནི་མེད། བསྟོད་པ་རེ་མ་བྱས་པ་མེད་པས། གནས་འདི་ལའང་བསྟོད་པ་ཞིག་བྱེད་དགོས་པ་ཡིན་ཡོང་དགོངས་ཏེ། །གནས་ལ་བསྟོད་པའི་མགུར་འདི་གསུངས་སོ། །ཨེ་མ་རི་ཁྲོད་དབེན་པའི་གནས། །རྒྱལ་བ་བྱང་ཆུབ་བརྙེས་པའི་ས། །གྲུབ་ཐོབ་རྣམས་ཀྱི་བཞུགས་པའི་ཤུལ། །མི་ང་རང་གཅིག་པུར་འདུག་པའི་ཡུལ། །བྲག་དམར་མཆོང་ལུང་ཁྱུང་གི་རྫོང་། །སྟེང་ན་ལྷོ་སྤྲིན་ཁོར་མ་ཁོར། །འོག་ན་གཙང་ཆབ་གྱ་མ་གྱུ། །བར་ན་རྒོད་པོ་ལང་མ་ལིང་། །རྩི་ཤིང་སྣ་ཚོགས་བན་མ་བུན། །ལྗོན་ཤིང་གར་སྟབས་ཤིགས་སེ་ཤིགས། །བུང་བ་གླུ་ལེན་ཁོ་རོ་རོ། །མེ་ཏོག་དྲི་ངད་ཆི་ལི་ལི། །བྱ་རྣམས་སྐད་སྙན་ཀྱུ་རུ་རུ། །དེ་འདྲའི་བྲག་དམར་མཆོང་ལུང་ན། །བྱ་དང་བྱིའུ་གཤོག་རྩལ་སྦྱོང་། །སྤྲ་དང་སྤྲེའུ་ཡང་རྩལ་སྦྱོང་། །རི་དྭགས་སྣ་ཚོགས་བང་རྩལ་སྦྱོང་། །ང་མི་ལ་རས་པ་ཉམས་རྩལ་སྦྱོང་། །ཉམས་རྩལ་བྱང་ཆུབ་སེམས་གཉིས་སྦྱོང་། །ང་དང་དབེན་གནས་གཞི་བདག་མཐུན། །ཁྱེད་འདིར་ཚོགས་འབྱུང་བོ་མི་མ་ཡིན། །བྱམས་སྙིང་རྗེའི་བདུད་རྩི་འདི་འཐུངས་ལ། །རང་རང་སོ་སོའི་གནས་སུ་དེངས། །ཞེས་
(༢༠༡)གསུངས་པས། ཨ་ཙ་ར་དེ་རྣམས་རྗེ་བཙུན་ལ་མི་དགའ་བའི་རྣམ་པས་ཕན་ཚུན་སྡང་མིག་གི་འགྲོས་ཤིག་ཤིག་པའི་ངང་ནས། ཨ་ཙ་ར་གཉིས་བསྣན་ཏེ། བདུན་དུ་སོང་བའི་ལ་ལས་རྔམས་གཙིགས་བསྡམས། ལ་ལས་སོ་ཁྲིག་ཁྲིག་བྱེད་ཅིང་མཆེ་བ་གཙིགས། ལ་ལ་དགོད་ཅིང་སྐད་དྲག་པོ་འདོན། ཀུན་དྲིལ་ནས་རྡེག་སྟངས་དང་སྡིགས་མོ་བྱེད་དུ་བྱུང་བས། མི་མ་ཡིན་གྱིས་བར་ཆད་རྩོམ་པར་དགོངས་ནས། ཁྲོ་བོའི་ལྟ་སྟངས་ཀྱི་ངང་ནས་དྲག་སྔགས་བཟླས་རུང་མ་སོང་། སྙིང་རྗེ་ཆེན་པོ་ཐུགས་ལ་འཁྲུངས་ནས་ཆོས་བཤད་རུང་འགྲོར་མ་འདོད་པའི་ཚེ། ཐུགས་ལ། ང་ལ་ལྷོ་བྲག་མར་པས་ཆོས་ཐམས་ཅད་རང་སེམས་སུ་ངོ་སྤྲད་ཅིང་རང་སེམས་འོད་གསལ་སྟོང་པར་ཁོ་ཐག་ཆོད་པ་ལ། གདོན་བགེགས་ཕྱི་རོལ་ཏུ་བཟུང་ནས་སོང་ན་དགའ་བ་འདི་བྱེད་དོན་མི་འདུག་དགོངས། མི་འཇིགས་པའི་གདེང་མངོན་དུ་གྱུར་ནས། ལྟ་བ་གདེང་དང་ལྡན་པའི་མགུར་འདི་གསུངས་སོ། །ཕ་བདུད་བཞིའི་དམག་དཔུང་ལས་རྒྱལ་བ། །སྒྲ་སྒྱུར་མར་པའི་ཞབས་ལ་འདུད། །མི་ང་དག་ང་རང་མི་ཟེར་ཏེ། །ང་ནི་དར་སེང་དཀར་མོའི་བུ། །ཨ་མའི་མངལ་ནས་རྩལ་གསུམ་རྫོགས། །ཕྲུག་གུའི་ལོ་ལ་ཚང་དུ་ཉལ། །ཐོང་བའི་ལོ་ལ་ཚང་སྒོ་བསྲུངས། །དར་མའི་ལོ་ལ་གངས་སྟོད་འགྲིམས། །ང་གངས་བུ་ཡུག་འཚུབས་རུང་ཡ་མི་ང་། །བྲག་གཡང་ས་ཆེ་རུང་བག་མི་ཚ། །མི་ང་དག་ང་རང་མི་ཟེར་ཏེ། །ང་ནི་བྱ་རྒྱལ་ཁྱུང་གི་བུ། །སྒོ་ངའི་ནང་ནས་གཤོག་སྒྲོ་རྒྱས། །ཕྲུག་གུའི་ལོ་ལ་ཚང་དུ་ཉལ། །ཐོང་བའི་ལོ་ལ་ཚང་སྒོ་བསྲུངས། །ཁྱུང་ཆེན་དར་མའི་ལོ་ལ་ནམ་འཕང་
(༢༠༢)བཅད། །ང་གནམ་ཁ་ཞེང་ཆེ་རུང་ཡ་མི་ང་། །ས་ལུང་སུལ་དོག་རུང་བག་མི་ཚ། །མི་ང་དག་ང་རང་མི་ཟེར་ཏེ། །ང་ནི་ཉ་ཆེན་ཡོར་མོའི་བུ། །ཨ་མའི་མངལ་ནས་གསེར་མིག་འཁྱིལ། །ཕྲུག་གུའི་ལོ་ལ་ཚང་དུ་ཉལ། །ཐོང་བའི་ལོ་ལ་ཁྱུ་སྣ་དྲངས། །ཉ་ཆེན་དར་མའི་ལོ་ལ་མཚོ་མཐའ་བསྐོར། །ང་མཚོ་རྦ་རླབས་ཆེ་རུང་ཡ་མི་ང་། །དོལ་ལྕགས་ཀྱུ་མང་རུང་བག་མི་ཚ། །མི་ང་དག་ང་རང་མི་ཟེར་ཏེ། །ང་ནི་བཀའ་བརྒྱུད་བླ་མའི་སྲས། །ཨ་མའི་མངལ་ནས་དད་པ་སྐྱེས། །ཕྲུག་གུའི་ལོ་ལ་ཆོས་སྒོར་ཞུགས། །ཐོང་བའི་ལོ་ལ་སློབ་གཉེར་བྱས། །སྒོམ་ཆེན་དར་མའི་ལོ་ལ་རི་ཁྲོད་འགྲིམས། །ང་འདྲེ་གདུག་རྩུབ་ཆེ་རུང་ཡ་མི་ང་། །གདོན་ཆོ་འཕྲུལ་མང་རུང་བག་མི་ཚ། །སེང་གངས་ལ་འགྱིང་བ་སྤར་མི་འཁྱག །སེང་གེ་གངས་ལ་སྤར་འཁྱག་ན། །རྩལ་གསུམ་རྫོགས་པ་དོན་རེ་ཆུང་། །ཁྱུང་མཁའ་ལ་འཕུར་བ་ལྷུང་མི་སྲིད། །ཁྱུང་ཆེན་མཁའ་ནས་ལྷུང་སྲིད་ན། །གཤོག་སྒྲོ་རྒྱས་པ་དོན་རེ་ཆུང་། །ཉ་ཆབ་ལ་འཕྱོ་བ་འཚུབ་མི་སྲིད། །ཉ་ཆེན་ཆུ་ཡིས་འཚུབ་སྲིད་ན། །ཆུ་ནང་སྐྱེས་པ་དོན་རེ་ཆུང་། །ལྕགས་ཀྱི་ཕ་བོང་རྡོས་མི་ཤིགས། །ལྕགས་ཀྱི་ཕ་བོང་རྡོས་ཤིགས་ན། །ཞུན་ཐར་བྱས་པ་དོན་རེ་ཆུང་། །ང་མི་ལ་རས་པ་འདྲེས་མི་འཇིགས། །མི་ལ་རས་པ་འདྲེས་འཇིགས་ན། །གནས་ལུགས་རྟོགས་པ་དོན་རེ་ཆུང་། །ཁྱེད་འདིར་བྱོན་འདྲེ་གདོན་བགེགས་ཀྱི་ཚོགས། །ད་ལན་ཡོང་བ་ངོ་མཚར་ཆེ། །མི་རིངས་གློད་ལ་རྒྱུན་དུ་བཞུགས། །བཀའ་མཆིད་གསུང་གླེང་ཞིབ་ཏུ་བགྱིད། །རིངས་རུང་དོ་ནུབ་ཅིས་ཀྱང་སྡོད། །འོ་སྐོལ་སྒོ་གསུམ་རྩལ་
(༢༠༣)འགྲན་ཞིང་། །དཀར་ནག་ཆོས་ཀྱི་ཆེ་ཁྱད་བལྟ། །ཁྱེད་བར་ཆད་མ་ཚུགས་མི་ལྡོག་འོང་། །བར་ཆད་མ་ཚུགས་ལོག་གྱུར་ན། །ད་ལན་ཡོང་བ་ཁ་རེ་སྐྱེངས། །ཞེས་གསུངས་ནས་ཐུགས་དམ་གྱི་ང་རྒྱལ་བཞེངས་ཏེ། ནང་དུ་ཐལ་གྱིས་བྱོན་པས། །ཨ་ཙ་ར་རྣམས་འཇིགས་སྐྲག་བསྔངས་ནས་མིག་རིག་རིག་བྱེད་ཅིང་། ལུས་འདར་བའི་སྟོབས་ཀྱིས་ཕུག་པའི་ནང་ཀུན་ཀྱང་འདར་ཡམ་མེ་བ་ཞིག་བྱས་ཏེ་རིངས་སྟབས་སུ་གཅིག་ལ་ཀུན་ཐིམ་པའི་མཐར། གཅིག་པོ་ཡང་རླུང་ཚུབ་ཁྱིལ་བ་ཞིག་བྱས་ནས་མེད་པར་སོང་བ་དང་། རྗེ་བཙུན་གྱི་།ཐུགས་དགོངས་ལ། བགེགས་ཀྱི་རྒྱལ་པོ་བི་ནཱ་ཡ་ཀས་གླགས་འཚོལ་དུ་འདུག སྔ་མའི་རླུང་དེ་ཡང་ཁོའི་ཆོ་འཕྲུལ་ཡིན་པར་འདུག་སྟེ། བླ་མའི་ཐུགས་རྗེས་གླགས་མ་རྙེད་དགོངས་པ་དང་། དེ་རྗེས་ཐུགས་དམ་ལ་བོགས་བསམ་གྱིས་མི་ཁྱབ་པ་བྱུང་བ་ཡིན་ནོ། །བགེགས་ཀྱི་རྒྱལ་པོ་བི་ནཱ་ཡ་ཀས་རྐྱེན་བྱས་པ། བླ་མ་དྲན་དྲུག་གི་སྐོར་རམ། བྲག་དམར་མཆོང་ལུང་གི་སྐོར་རམ། མི་ལ་ཤིང་ཐུན་གྱི་སྐོར་ཞེས་ཀྱང་བྱ་སྟེ། དོན་གཅིག་ལ་མཚན་གསུམ་ལྡན་གྱི་སྐོར་ཚོ་དགེའོ། ལ་ཕྱི་ལ་བྱོན་པ་ཆུ་བཟང་གི་སྐོར། ན་མོ་གུ་རུ། རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པ་དེ་ཉིད། མཆོང་ལུང་བྲག་ལ་བཞུགས་པ་ལས། བླ་མའི་བཀའ་སྒྲུབ་ཕྱིར་ཐོང་ལ་བརྒྱུད་དེ་ལ་ཕྱི་གངས་ཀྱི་ར་བ་ལ་སྒོམ་དུ་བྱོན་པས་ལ་ཕྱིའི་གནས་སྒོ་གཉའ་ནང་རྩར་མར་ཕྱག་ཕེབས་པའི་ཚེ། རྩར་མ་པ་རྣམས་ཆང་ས་ཆེན་པོ་ཞིག་
(༢༠༤)བྱེད་ཅིང་ཡོད་པའི་གྲལ་གཏམ་ལ་ད་ལྟ་མི་ལ་རས་པ་ཞེས་བྱ་བ། འཚོ་བ་དཀའ་ཐུབ་རང་ལ་བརྟེན་ནས་གནས་མི་མེད་ཀྱི་རི་ཁྲོད་རང་ལ་བཞུགས་པའི་ཆོས་པ་རྣམ་དག་རང་ཞིག་ཡོད་པར་འདུག་ཅེས་རྗེ་བཙུན་གྱི་སྙན་པ་བརྗོད་ཅིང་ཡོད་པའི་ཚེ། རྗེ་བཙུན་ཁོང་ཚོའི་སྒོ་དྲུང་དུ་ཕེབས་པས། བུད་མེད་གཞོན་ནུ་མ་བཞིན་དང་རྒྱན་བཟང་པོས་སྤྲས་པ་ཞིག་ཕྱིར་ཐོན་བྱུང་བ་དེ་ལེགས་སེ་འབུམ་ཡིན་ཏེ་མོ་ན་རེ། རྣལ་འབྱོར་པ་ཁྱོད་གང་ནས་ཡིན་ཟེར་བ་ལ། རྗེ་བཙུན་གྱིས་ང་ངེས་མེད་ཀྱི་རི་ལ་སྡོད་པའི་སྒོམ་ཆེན་མི་ལ་རས་པ་ཟེར་བ་ཞིག་ཡིན། ཡོན་བདག་མོ་ཁྱོད་ལ་བཟའ་བཏུང་ཟས་ཀྱི་འབྲེལ་བ་ཞིག་སློང་བས་སྟེར་དགོས་གསུངས་པས། མོ་ན་རེ་འཚོ་བ་དྲངས་པས་ཆོག་ཁྱེད་མི་ལ་རས་པ་ཟེར་བ་དེ་རང་ཡིན་ནམ་ཟེར་བས། རྗེ་བཙུན་གྱིས་དེ་ལ་རྫུན་ཟེར་དོན་མེད་གསུངས་པས། མོ་དགའ་ནས་རྟབ་རྟོབ་ཏུ་ནང་དུ་ཕྱིན་ཏེ་གྲལ་པ་རྣམས་ལ་སྔ་གོང་ཐག་རིང་ན་འདུག་ཟེར་བའི་ཆོས་པ་དགའ་མོ་དེ་ད་ལྟ་རང་རེའི་སྒོ་དྲུང་ན་ཕེབས་གདའོ་བྱས་པས། ཀུན་ཕྱིར་ཐོན་ཏེ་ལ་ལས་ཕྱག་འབུལ། ལ་ལས་ལོ་རྒྱུས་ཞིབ་ཏུ་དྲིས་ནས། རྗེ་བཙུན་ཡིན་པར་ངེས་པ་དང་ནང་དུ་སྤྱན་དྲངས་བསྙེན་བཀུར་ཕུན་སུམ་ཚོགས་པ་ཕུལ་ཏེ། ཀུན་དད་དད་མོས་མོས་སུ་འདུག་པ་ལ། གྲལ་མགོ་ན་ཡོན་བདག་ཕྱུག་པོ་གཞོན་ནུ་མ་ཞིག་འདུག་པ་དེ་གཤེན་རྡོར་མོ་ཡིན་ཏེ། ཁོས་རྗེ་བཙུན་ལ་ཞལ་ཏ་ཞིབ་རྒྱས་ཞུས་པའི་མཐར་ད་བླ་མ་གང་དུ་འབྱོན་ཟེར་བ་ལ། ང་ལ་ཕྱི་ལ་སྒོམ་དུ་འགྲོ་གསུངས་པས། ཁོ་ན་རེ་དེ་བས་ངེད་ཀྱི་འདྲེ་ལུང་སྐྱོག་མོར་བཞུགས་ནས་ས་གཞི་བྱིན་གྱིས་རློབ་དགོས། ཞབས་ཏོག་ཀྱང་འོ་མི་བརྒྱལ་བ་འབུལ་
(༢༠༥)ཟེར་བས། དེ་ན་སྟོན་པ་ཞིག་འདུག་པ་ན་རེ། ཡོན་མཆོད་གཉིས་མཐུན་བྱུང་ལ་ཕྱི་ཀ་འདྲེ་ལུང་སྐྱོག་མོའི་མིང་ཡིན། ད་བླ་མ་དེར་བཞུགས་པ་བྱུང་ན་བདག་ཀྱང་ཅི་ལྕོགས་ཀྱིས་ཞབས་ཏོག་འབུལ་ཞིང་ཆོས་ཞུ་ཟེར་ཏེ། སྟོན་པ་ཤཱཀྱ་གུ་ན་ཡིན་ནོ། །དེ་རྗེས་ཡོན་བདག་དེ་ན་རེ། དེས་ན་ཨ་ལ་ལ་ངེད་ཀྱི་འབྲོག་ས་དགའ་མོ་རང་ཞིག་ཡོད་པ་ལ་འདྲེའི་གནོད་པ་མངོན་སུམ་དུ་ཡོང་བ་མང་དྲགས་འཇིགས་ནས་འབྲོག་ཚུགས་སུ་ཡེ་མ་འདོད་ད་མྱུར་དུ་ཕེབས་པར་ཞུ་ཟེར་ཚོགས་པ་ཀུན་གྱིས་ཕྱག་ཕུལ་བས། རྗེ་བཙུན་གྱི་ཞལ་ནས་ང་མྱུར་དུ་འགྲོ་སྟེ་ཁྱེད་ཀྱི་འབྲོག་གི་ཕྱིར་འགྲོ་བ་མ་ཡིན། ང་ལ་བླ་མའི་བཀའ་ཞིག་ཡོད་པས་དེ་སྒྲུབ་ཏུ་འགྲོ་བ་ཡིན་གསུངས་པས། ཁོང་རྣམས་ན་རེ་ངེད་ལ་དེ་ཀས་ཆོག་ད་འཚོ་ཆས་བཟང་པོ་དང་བཅས་ཏེ་ཞབས་ཏོག་པ་གཏོང་ཟེར་བས། རྗེ་བཙུན་གྱི་ཞལ་ནས་ང་རི་ཁྲོད་དུ་གྲོགས་དང་འཚོ་བ་བཟང་པོ་རང་བསྟེན་པའི་མི་ཞིག་མིན་པས་ཐོག་མར་ང་རང་གཅིག་པུར་འགྲོ། ཁྱེད་རྣམས་ཞབས་ཏོག་བྱེད་པ་ངོ་མཚར་ཆེ་བས་རྟིང་སོར་བལྟ་གསུངས། རྗེ་བཙུན་རང་ལ་ཕྱི་གངས་ལ་བྱོན་པས། ལ་རྩར་ཕེབས་པ་ན་མི་མ་ཡིན་གྱི་ཆོ་འཕྲུལ་དྲག་པོ་བྱུང་། ལའི་གཟུག་ཕེབས་འཕྲལ་ནམ་མཁའ་འཚུབས། དྲག་པོའི་འབྲུག་ལྡིར་ཞིང་། གློག་འཁྱུག་པ་དང་། ལུང་བ་ཕན་ཚུན་གྱི་རི་ནུར་ནས། ཕུ་ཆུ་འཁྱིལ་ཏེ་རྦ་རླབས་དྲག་པོ་འཁྲུག་པའི་མཚོ་ཆེན་པོ་ཞིག་ཏུ་གྱུར་པ་ལ། རྗེ་བཙུན་གྱིས་ལྟ་སྟངས་མཛད་ཕྱག་འཁར་བསྣུན་པས་མཚོ་ཞབས་ནས་ཟགས་ཏེ་མེད་པར་སོང་བ་ལ་དམུ་རྫིང་དུ་གྲགས། དེ་ནས་མར་ཅུང་ཟད་བྱོན་པས་མི་མ་ཡིན་རྣམས་ཀྱིས་རི་ཕན་ཚུན་བསྙིལ་བའི་བར་ལ་ཕ་བོང་མང་པོ་རྦ་
(༢༠༦)རླབས་འཁྲུག་ཅིང་བྱུང་བའི་ཚེ་མཁའ་འགྲོས་ལུང་བ་ཕན་ཚུན་གྱི་བར་དུ་རི་སྦྲུལ་ཐུར་དུ་བརྒྱུགས་པ་འདྲ་བ་ཞིག་གི་ལམ་ཕུལ་བས། རྦབ་ཞི་བའི་ལམ་དེ་ལ་མཁའ་འགྲོ་སྒང་ལམ་དུ་གྲགས། དེ་ནས་མི་མ་ཡིན་སྟོབས་ཆུང་བ་རྣམས་རང་ཞི་ལ་སོང་། ཆེ་བ་རྣམས་གླགས་མི་རྙེད་རུང་ད་དུང་གླགས་འཚོལ་བ་ལ་མཁའ་འགྲོ་སྒང་ལམ་རྫོགས་མཚམས་སུ། རྗེ་བཙུན་གྱིས་ལོག་འདྲེན་ཟིལ་གནོན་གྱི་ལྟ་སྟངས་ཤིག་མཛད་པས། ཆོ་འཕྲུལ་ཀུན་ཞི་ནས་བཞུགས་ས་དེར་རྡོ་ལ་ཞབས་རྗེས་གཅིག་བྱུང་། དེ་ནས་ཅུང་ཟད་ཅིག་བྱོན་པས། ནམ་མཁའ་དྭངས་ནས་ཐུགས་སྤྲོ་བར་གྱུར་ཏེ་སྒང་ཞིག་ཏུ་བཞུགས་པས། སེམས་ཅན་རྣམས་ལ་བྱམས་པའི་ཏིང་ངེ་འཛིན་འཁྲུངས་པས་ཐུགས་དམ་ལ་བོགས་ཤིན་ཏུ་ཆེ་བར་བྱུང་སྟེ་བཞུགས་ས་དེ་ལ་བྱམས་སྒང་དུ་གྲགས། དེ་ནས་ཆུ་བཟང་དུ་བྱོན་ནས་ཆུ་བོ་རྒྱུན་གྱི་རྣལ་འབྱོར་གྱི་ངང་ལ་བཞུགས་པའི་ཚེ། མེ་ཕོ་སྟག་གི་ལོ་སྟོན་ཟླ་ར་བའི་ཚེས་བཅུའི་ནུབ། བལ་པོའི་བྷ་རོའི་རྣམ་པའི་གདོན་ཆེན་པོ་ཞིག་གིས་གཙོ་བྱས་པའི་མི་མ་ཡིན་གྱི་དམག་ཆུ་བཟང་ལུང་བའི་གནམ་ས་གང་བ་འོངས་ནས། རྗེ་བཙུན་ལ་རི་བསྙིལ་བ་དང་། ཐོག་ལ་སོགས་ཏེ་མཚོན་ཆའི་ཆར་དྲག་པོ་འབེབ་པ་དང་། མཚན་ནས་བོས་ཏེ་ཟུངས་ཤིག །སོད་ཅིག་ལ་སོགས་ཏེ་མི་སྙན་པའི་སྒྲ་སྒྲོག་ཅིང་། མི་སྡུག་པའི་གཟུགས་དུ་མ་སྟོན་དུ་བྱུང་བས། མི་མ་ཡིན་གྱིས་གླགས་འཚོལ་དུ་འདུག་དགོངས་ནས་རྒྱུ་འབྲས་བདེན་པའི་ཆོས་འདི་མགུར་དུ་གསུངས་སོ། །བླ་མ་རྣམས་ལ་ཕྱག་འཚལ་ལོ། །རྗེ་བཀའ་དྲིན་ཅན་ལ་སྐྱབས་སུ་མཆི། །ཡོངས་འཁྲུལ་སྣང་མིག་གི་རྣམ་ཤེས་ལ། །གདོན་གནོད་སྦྱིན་
(༢༠༧)ཕོ་མོའི་ཆོ་འཕྲུལ་བྱུང་། །ཨ་ཙ་མ་ཡི་དྭགས་སྙིང་རེ་རྗེ། །མི་ང་ལ་ཁྱེད་དག་མི་གནོད་དེ། །སྔོན་ལས་ངན་བསགས་པའི་འབྲས་བུ་དེས། །ད་ལྟ་རྣམ་སྨིན་གྱི་ལུས་ལ་སྤྱོད། །ཡིད་མཁའ་ལ་རྒྱུ་བའི་གཟུགས་ཅན་དེ། །བསམ་ངན་ཉོན་མོངས་ཀྱི་ཀུན་སློང་དང་། །སྦྱོར་བ་ལུས་ངག་གི་གདུག་རྩུབ་ཀྱིས། །གསོད་གཅོད་རྡེག་འཚོག་བྱེད་དོ་ཟེར། །རྟོག་མེད་རྣལ་འབྱོར་རས་པ་འདི། །བློ་ཡང་མེད་པ་ལྟ་བའི་གདེང་། །དཔའ་བོ་སེང་གེའི་སྤྱོད་འགྲོས་ཀྱིས། །ལུས་ནི་ལྷ་སྐུའི་རྫོང་ལ་ཞེན། །ངག་ནི་སྔགས་ཀྱི་རྫོང་ལ་ཞེན། །སེམས་ནི་འོད་གསལ་གྱི་རྫོང་ལ་ཞེན། །ཚོགས་དྲུག་རང་གི་ངོ་བོས་སྟོང་། །ཁོ་བོ་དེ་ལྟ་བུའི་རྣལ་འབྱོར་ལ། །ཁྱེད་ཡི་དྭགས་ཀྱི་མཐོ་འཚམས་མི་སྟོ་སྟེ། །སྤྱིར་ལས་དགེ་སྡིག་གི་འབྲས་བུ་བདེན་པས་ན། །རྒྱུ་མཐུན་རྣམ་སྨིན་བསགས་བསགས་ནས། །ངན་སོང་དུ་འགྲོ་བ་ཡི་རེ་མུག །ཨ་ཙ་མ་ཉོན་མོངས་ཡི་དྭགས་ཀུན། །དོན་གནས་ལུགས་མ་རྟོགས་སྙིང་རེ་རྗེ། །དངོས་ངན་མི་ལ་རས་པ་འདི། །ངག་རིག་བྱེད་གླུ་ཡི་ཆོས་བཤད་པ། །ནང་བཅུད་ཀྱིས་བསྡུས་པའི་སེམས་ཅན་རྣམས། །གཉེན་ཕ་མར་མ་གྱུར་གང་ཡང་མེད། །དེ་དྲིན་ཅན་ཡིན་པས་སྡུག་པར་ཕངས། །ཁྱོད་དེ་བས་གནོད་སེམས་སླར་ལོག་ལ། །ལས་རྒྱུ་འབྲས་བསམས་ན་ཅིས་མི་ལེགས། །ཆོས་དགེ་བཅུ་སྤྱད་ན་ཅི་མིས་ལེགས། །ཚིག་ལེགས་པར་ཟུངས་ལ་རྟོག་དཔྱོད་ཐོངས། །དོན་གོ་བར་གྱིས་ལ་ཕྱིར་ལ་ཉོན། །ཞེས་གསུངས་པས། འདྲེ་དམག་རྣམས་ན་རེ། ཁྱོད་ཀྱི་ཁ་སྤྱང་གིས་ངེད་མགོ་མི་འཁོར། ཆོ་འཕྲུལ་ཞི་ནས་ཁྱོད་བདེ་བར་བཏང་མི་ཡོང་ཟེར། དམག་
(༢༠༨)མང་དུ་སོང་ཆོ་འཕྲུལ་ཆེར་སོང་བ་ལས། རྗེ་བཙུན་གྱིས་ཐུགས་ལ་དགོངས་པ་ལྟར། འདྲེ་དམག་རྣམས་ལ་ང་བླ་མའི་དྲིན་གྱིས་གནས་ལུགས་རྟོགས་པའི་རྣལ་འབྱོར་པ་བར་ཆད་བདུད་ཀྱི་ཆོ་འཕྲུལ་སེམས་ཀྱི་རྒྱན་ཡིན་པས། ད་དུང་ཆེར་ཐོངས་བྱང་ཆུབ་མཆོག་ལ་སྦྱོར་བར་འདུག་གིས་གསུངས་ནས། རྒྱན་དུ་ཆེ་བ་བདུན་གྱི་མགུར་འདི་གསུངས་སོ། །རྗེ་སྒྲ་སྒྱུར་མར་པའི་ཞབས་ལ་འདུད། །ང་གནས་ལུགས་རྟོགས་པའི་རྣལ་འབྱོར་པ། །རྒྱན་དུ་ཆེ་བའི་གླུ་ཞིག་ལེན། །ཁྱེད་འདིར་ཚོགས་གནོད་སྦྱིན་ཕོ་མོ་རྣམས། །ཡིད་མ་ཡེངས་རྣ་བའི་དབང་བོ་གཏོད། །དབུས་རི་བོ་མཆོག་རབ་མཆོད་རྟེན་ལ། །ལྷོ་བཻ་དཱུརྱའི་འོད་གསལ་བ། །འཛམ་གླིང་ནམ་མཁའི་རྒྱན་དུ་ཆེ། །རི་གཉའ་ཤིང་འཛིན་གྱི་གོང་རོལ་ན། །ཉི་ཟླ་ཟུང་ཅིག་འོད་གསལ་བ། །གླིང་བཞི་ཡོངས་ཀྱི་རྒྱན་དུ་ཆེ། །ཀླུ་བྱང་ཆུབ་སེམས་ཀྱི་རྫུ་འཕྲུལ་གྱིས། །ནམ་མཁའི་མཐོངས་ནས་ཆར་བབས་པ། །དོག་མོ་ས་ཡི་རྒྱན་དུ་ཆེ། །ཕྱི་རྒྱ་མཚོ་ཆུ་ཡི་རླངས་པ་ལས། །བར་སྣང་ཡོངས་ལ་ལྷོ་སྤྲིན་བྱུང་། །ལྷོ་སྤྲིན་བར་སྣང་གི་རྒྱན་དུ་ཆེ། །འབྱུང་བ་དྲོད་གཤེར་གྱི་རྟེན་འབྲེལ་གྱིས། །དབྱར་སྤང་རིའི་ལོགས་ལ་འཇའ་ཚོན་བཀྲ། །འཇའ་ཚོན་སྤང་རིའི་རྒྱན་དུ་ཆེ། །ནུབ་མ་དྲོས་མཚོ་ལས་ཆབ་བབས་པས། །ལྷོ་འཛམ་བུ་གླིང་གི་རྩི་ཤིང་རྒྱས། །སྐྱེ་འགྲོ་ཡོངས་ཀྱི་རྒྱན་དུ་ཆེ། །ང་རྣལ་འབྱོར་རི་ཁྲོད་འཛིན་པ་ལ། །སེམས་སྟོང་ཉིད་བསྒོམས་པའི་ནུས་མཐུ་ཡིས། །འདྲེ་གནོད་སྦྱིན་ཕོ་མོའི་ཆོ་འཕྲུལ་བྱུང་། །ཆོ་འཕྲུལ་རྣལ་འབྱོར་གྱི་རྒྱན་དུ་ཆེ། །ཁྱེད་ལེགས་པར་ཉོན་དང་མི་མ་
(༢༠༩)ཡིན། །མི་ང་ངོ་ཁྱོད་ཀྱིས་ཤེས་སམ་ཅི། །ང་ངོ་ཁྱོད་ཀྱིས་མ་ཤེས་ན། །ང་རྣལ་འབྱོར་མི་ལ་རས་པ་ཡིན། །བྱམས་སེམས་ཀྱི་མེ་ཏོག་གཏིང་ནས་འཁྲུངས། །གླུ་སྙན་པའི་དབྱངས་ཀྱིས་བརྡ་སྦྱར་ནས། །ངག་བདེན་པའི་ཚིག་གིས་ཆོས་བཤད་དེ། །ཕན་པའི་སེམས་ཀྱིས་གྲོས་ཤིག་འདེབས། །ཁྱོད་བྱང་ཆུབ་མཆོག་ཏུ་སེམས་བསྐྱེད་ནས། །འགྲོ་བ་གཞན་དོན་མ་བྱུང་ཡང་། །མི་དགེ་བཅུ་པོ་སྤངས་ནས་ནི། །རང་ཞི་བདེ་ཐར་པ་ཅིས་མི་སྒྲུབ། །མི་ང་ཟེར་ཉན་ན་དོན་ཆེན་འགྲུབ། །འཕྲལ་དམ་ཆོས་བྱས་ན་ཡུན་དུ་བདེ། །ཞེས་གསུངས་པས། མི་མ་ཡིན་དེ་རྣམས་ཕལ་ཆེར་རྗེ་བཙུན་ལ་དད་ཅིང་གུས་པར་གྱུར་ནས། ཆོ་འཕྲུལ་ཞི་བར་བྱས་ཏེ། རྣལ་འབྱོར་པ་ངོ་མཚར་ཆེ། ཡིན་ལུགས་ཀྱི་བརྡ་མ་བཀྲོལ་ཞིང་རྟགས་མ་མཐོང་ན་ངེད་རྣམས་ཀྱིས་ཀྱང་མི་རྟོགས་པར་འདུག ད་ཁྱོད་ལ་ངེད་ཀྱིས་བར་ཆད་མི་ཚུགས་འདུག་གིས། །སྔར་ལས་འབྲས་ཀྱི་ཆོས་གསུང་བ་བཀའ་དྲིན་ཆེ་ནའང་ངེད་ངན་པའི་བག་ཆགས་མཐུག་པ་དང་བློ་གྲོས་ཆུང་བས་ཡིད་ལ་མ་ཟིན། ད་ཚིག་ཉུང་ལ་དོན་ཆེ་བ། གོ་སླ་ལ་འཁྱེར་བདེ་བའི་ཆོས་ཤིག་ཞུ་ཟེར་བ་ལ། རྗེ་བཙུན་གྱིས་ཡིན་པ་བདུན་གྱི་མགུར་འདི་གསུངས་སོ། །སྒྲ་སྒྱུར་མར་པའི་ཞབས་ལ་འདུད། །བྱང་སེམས་འབྱོངས་པར་བྱིན་གྱིས་རློབས། །དོན་བདེན་པའི་ཚིག་དང་མ་འབྲེལ་ན། །གླུ་གྲེ་འགྱུར་སྙན་ཡང་པི་ཝང་ཡིན། །ཆོས་མཐུན་དཔེ་ཡིས་མ་མཚོན་པའི། །ཚིག་སྡེབ་སྦྱོར་མཁས་ཀྱང་སྒྲ་སྙན་ཡིན། །ཆོས་ལག་ལེན་རྒྱུད་ལ་མི་འགེལ་ན། །ངས་ཤེས་སོ་ཟེར་ཡང་མགོ་སྐོར་ཡིན། །དོན་སྙན་བརྒྱུད་ཀྱི་གདམས་པ་མ་
(༢༡༠)བསྒོམས་ན། །གནས་རི་ཁྲོད་བཟུང་ཡང་རང་སྡུག་ཡིན། །ཕན་ངེས་པའི་དམ་ཆོས་མི་བྱེད་ན། །འཕྲལ་སོ་ནམ་རེམ་ཡང་སྡུག་ལས་ཡིན། །ལས་རྒྱུ་འབྲས་ཞིབ་ཏུ་མི་རྩི་ན། །ཚིག་ཁ་ཏ་ཆེ་ཡང་སྨོན་པ་ཡིན། །ཚིག་དོན་ལག་ཏུ་མི་ལེན་ན། །འཕྲལ་བཤད་ལོ་བྱས་ཀྱང་ཁྲམ་པ་ཡིན། །ལས་མི་དགེ་སྤངས་ན་ངང་གིས་འགྲུབ། །ལས་དགེ་བ་བསྒྲུབས་ན་ཤུགས་ལ་འགྲུབ། །འགག་གཅིག་ལ་དྲིལ་ཞིང་ཉམས་སུ་ལོངས། །ཚིག་མང་པོ་བཤད་པས་ཕན་པ་ཆུང་། །དོན་དེ་བཞིན་ཉམས་སུ་ལེན་འཚལ་ལོ། །ཞེས་གསུངས་པས། ཆོས་ཞུ་བ་དེ་རྣམས་རྗེ་བཙུན་ལ་དད་ཅིང་གུས་པར་གྱུར་ནས། ཕྱག་དང་སྐོར་བ་ལན་དུ་མ་བྱས་ནས། ཀུན་རང་གནས་སུ་སོང་རུང་གཙོ་བོ་དེ་བྷ་རོ་འགའི་འཁོར་དང་བཅས་པ་སླར་ཡང་སྔར་ལྟར་ཆོ་འཕྲུལ་སྟོན་དུ་བྱུང་བ་ལས། རྗེ་བཙུན་གྱིས་ཡང་རྒྱུ་འབྲས་ཀྱི་ཆོས་འདི་མགུར་དུ་གསུངས་སོ། །དྲིན་ཅན་མར་པའི་ཞབས་ལ་འདུད། །ཁྱོད་ད་དུང་ཉོན་དང་མི་མ་ཡིན། །ལུས་མཁའ་ལ་རྒྱུ་བ་ཐོགས་པ་མེད། །བསམ་ངན་བག་ཆགས་རྒྱུད་ལ་འཐས། །ཉོན་མོངས་ཀྱི་མཆེ་བས་གཞན་ལ་རྔམས། །གཞན་སྡུག་གི་སྡིག་པས་རང་ཉིད་མནར། །རྒྱུ་འབྲས་ཀྱི་བདེན་པ་སྟོར་ས་མེད། །རྣམ་སྨིན་ནུས་པས་གཏོང་མི་སྲིད། །ཁྱོད་རང་གིས་རང་ཉིད་མནར་སྡང་བྱེད། །ཨ་ཙ་མ་ཡི་དྭགས་ཀྱི་འཁྲུལ་བ་ལ། །ཡི་རེ་མུག་ལས་ངན་གྱི་ནུས་པ་ལ། །འདི་འདྲར་རང་བསམས་ན་སྙིང་རླུང་ལྡང་། །ཁྱོད་སྔོན་ཡང་ལས་ངན་བསགས་བསགས་པས། །ད་དུང་ལས་ངན་གསོག་སྙིང་འདོད། །
(༢༡༡)གསོད་གཅོད་ཀྱི་སྡིག་པས་ཟིན་པ་ཡིས། །ཟས་སུ་ཤ་དང་ཁྲག་ལ་དགའ། །ལས་སུ་འགྲོ་བའི་སྲོག་གཅོད་པ། །རིགས་དྲུག་གི་ནང་ནས་ཡི་དྭགས་ལུས། །སྡིག་ལས་སྤྱད་པས་ངན་འགྲོར་ལྟུང་། །ཨ་རེ་ཕངས་ཆོས་ལ་སྣང་བ་སྒྱུར། །རེ་དོགས་མེད་བདེ་བ་མྱུར་དུ་འགྲུབ། །ཅེས་བྱས་པས། ཁོང་རྣམས་ན་རེ། ཁྱོད་ངེད་ཚོ་ལ་ཆོས་བཤད་མཁས་མཁས་སུ་འདུག་པས་གོ་འདུག གོ་བ་ལྟར་ཁྱོད་རང་གིས་ཉམས་སུ་བླངས་པས་གདེང་ཅི་ཡོད་ཟེར་དུ་བྱུང་བ་ལ། རྗེ་བཙུན་གྱིས་གདེང་ཚད་ལྡན་པའི་མགུར་འདི་གསུངས་སོ། །མཚན་ལྡན་མར་པའི་ཞབས་ལ་འདུད། །ང་དོན་དམ་རྟོགས་པའི་རྣལ་འབྱོར་པ། །གཞི་སྐྱེ་མེད་ངང་ལ་གདེང་བཅས་ནས། །ལམ་འགག་མེད་ཀྱི་རྩལ་ཁ་རིམ་གྱིས་རྫོགས། །ཐབས་སྙིང་རྗེ་ཆེན་པོས་བརྡ་སྦྱར་ནས། །དོན་ཆོས་ཉིད་ཀྱི་ཀློང་ནས་དབྱངས་ཤིག་ལེན། །ཁྱོད་ལས་ངན་སྒྲིབ་གཡོགས་མཐུག་པོ་ཡིས། །ངེས་དོན་གྱི་གནས་ལུགས་མི་གོ་སྟེ། །དྲང་དོན་གྱི་ཆོས་ཤིག་ད་དུང་འཆད། །སྔོན་ཐམས་ཅད་མཁྱེན་པ་སངས་རྒྱས་ཀྱིས། །བཀའ་དྲི་མ་མེད་པའི་མདོ་རྒྱུད་ལས། །ལས་རྒྱུ་འབྲས་ཀྱི་ཆོས་ལ་ནན་ཏན་གསུངས། །དེ་འགྲོ་བ་ཀུན་གྱི་གཉེན་གཅིག་པོ། །དོན་མི་སླུ་ངེས་པའི་བདེན་ཚིག་ཡིན། །རྗེ་བྱམས་པའི་གསུང་ལ་ཁྱོད་ཀྱང་ཉོན། །ང་ཉམས་རྒྱུད་ལ་སྦྱངས་པའི་རྣལ་འབྱོར་འདི། །ཕྱི་འཕྲུལ་སྣང་གི་བགེགས་ལ་ཕར་བལྟས་པས། །སེམས་སྐྱེ་མེད་ཀྱི་ཆོ་འཁྲུལ་ཡིན་པར་གོ། །ནང་རིག་པའི་སེམས་ལ་ཚུར་བལྟས་པས། །རྩ་བྲལ་གྱི་སེམས་
(༢༡༢)ཉིད་ཡེ་ནས་སྟོང་། །དེ་བླ་མ་རྒྱུད་པའི་བྱིན་རླབས་དང་། །རང་གཅིག་པུར་བསྒོམས་པའི་ཡོན་ཏན་གྱིས། །རྗེ་ནཱ་རོ་ཆེན་པོའི་རྒྱུད་པས་རྟོགས། །དོན་མ་ནོར་རྒྱལ་བའི་དགོངས་པ་བསྒོམས། །ཐབས་ཟབ་མོ་རྒྱུད་སྡེའི་དགོངས་པ་རྣམས། །བླ་མ་རྗེ་ཡིས་གནད་བཀྲོལ་ཏེ། །ལམ་བསྐྱེད་རྫོགས་བརྟན་པར་བསྒོམས་པའི་མཐུས། །ནང་རྩ་གནས་རྟེན་འབྲེལ་ཤེས་པའི་ཕྱིར། །ཕྱི་འཁྲུལ་སྣང་གི་བགེགས་ལ་ང་མི་འཇིགས། །ངེད་བྲམ་ཟེ་ཆེན་པོའི་རྒྱུད་པ་ལ། །དཔལ་ནམ་མཁའ་ལྟ་བུའི་རྣལ་འབྱོར་མང་། །ཡིད་གཉུག་མའི་དོན་ལ་སྦྱངས་སྦྱངས་ནས། །འཁྲུལ་སྣང་གི་དྲན་པ་དབྱིངས་སུ་ཡལ། །གནོད་བྱ་དང་གནོད་བྱེད་ངས་མ་མཐོང་། །ཆོས་སྡེ་སྣོད་ཀྱི་གསུང་རབ་ཞལ་ཕྱེ་ཡང་། །དོན་འདི་ལས་མེད་པར་བློ་ཐག་ཆོད། །ཅེས་གསུངས་པས། བྷ་རོ་འཁོར་བཅས་རང་རང་གི་ཐོད་རྣམས་ཕུད་ནས་ཕྱག་དང་སྐོར་བ་མང་དུ་བྱས་ནས། ཟླ་བ་གཅིག་གི་འཚོ་བ་འབུལ་ཟེར་འཇའ་ཡལ་བ་བཞིན་སོང་བ་ལས། ནངས་པར་ནམ་ལངས་ཉི་མ་ཤར་བ་དང་། མདང་གི་བྷ་རོ་དེ་རྣམས་བྷ་རི་མ་རྒྱན་བཟང་པོ་བཏགས་པའི་འཁོར་དུ་མས་བསྐོར་ནས་བྱུང་སྟེ། རྗེ་བཙུན་ལ་རྒུན་ཆང་ལ་སོགས་པའི་ཆང་སྣ་མང་པོས་རིན་པོ་ཆེའི་སྣོད་དུ་མ་བཀང་། འབྲས་ཆན་དང་ཤ་ལ་སོགས་ཏེ་ཟས་སྣ་མང་པོས་འཁར་གཞོང་བཟང་པོ་རྣམས་བཀང་ནས་འདྲེན་ཅིང་ད་ཕྱིན་ཆད་བཀའི་འབངས་བགྱིད་ཅིང་ཅི་གསུང་གི་བཀའ་བསྒྲུབ་པར་བགྱིའོ་ཟེར། ཕྱག་དང་སྐོར་བ་མང་དུ་བྱས་ཏེ་མི་སྣང་བར་གྱུར་པ་དེ་ལ་ནི་རྒྱལ་པོ་ཐང་འགྲེམ་ཞེས་ཀྱང་བྱ་སྟེ། ལྷ་ཆེན་པོ་ཚོགས་ཀྱི་བདག་པོ་ཡིན་ནོ། །
(༢༡༣)དེས་རྗེ་བཙུན་ལ་ཡང་ཐུགས་དམ་བོགས་ཆེ་བ་དང་སྐུ་ཁམས་བདེ་བའི་ངང་ནས་ཟླ་བ་གཅིག་གི་བར་དུ་བཀྲེས་སྣང་ཡེ་མེད་པར་གྱུར་ཏོ། །དེ་ནས་རྗེ་བཙུན་ལ་ཕྱི་ཆུ་བཟང་གི་གནས་ཐུགས་ཁོངས་སུ་ཆུད་ནས། ལ་ཕྱི་གནས་མཐིལ་གཟིགས་སུ་བྱོན་པའི་ལམ་འོམ་བུའི་ཐང་ཆེན་པོ་ཞིག་གི་དབུས་ན་བྲག་སྐྱིབས་དང་བཅས་པའི་ཕ་བོང་ཆེན་པོ་ཞིག་འདུག་པ་དེར་རེ་ཞིག་བཞུགས་པའི་ཚེ། མཁའ་འགྲོ་མང་པོས་ཕྱག་བཙལ་འདོད་ཡོན་སྣ་ཚོགས་ཀྱི་མཆོད་པ་ཕུལ་སྐོར་བ་བྱས་པས། རྡོ་ལ་མཁའ་འགྲོའི་ཞབས་རྗེས་གཉིས་བྱུང་བ་དང་། འཇའ་ཡལ་བ་བཞིན་སོང་ངོ་། །དེ་ནས་ཅུང་ཟད་བྱོན་པ་དང་མི་མ་ཡིན་གྱིས་ཆོ་འཕྲུལ་འབྱོན་ལམ་ཐམས་ཅད་དུ་མོ་མཚན་ཆེན་པོ་དུ་མ་བསྟན་བྱུང་བས། རྗེ་བཙུན་གྱིས་ཀྱང་ལྟ་སྟངས་ཀྱི་ངང་ནས་གསང་རྡོར་ལས་སུ་རུང་བར་མཛད་ནས་བྱོན་པས། མཚན་མ་དགུ་འདས་པའི་མཚམས་སུ་གནས་ཀྱི་བཅུད་འདུས་པའི་རྡོ་བ་ཞིག་ལ་གསང་གནས་རྡོར་ཞིང་ལྟ་སྟངས་མཛད་པས་ཆོ་འཕྲུལ་ཀུན་ཞི་བའི་ས་ལ། ལ་དགུ་ལུང་དགུར་གྲགས། དེ་ནས་གནས་མཐིལ་དུ་ཕེབས་སུ་ཆ་བའི་ཚེ། ཡང་སྔར་གྱི་བྷ་རོ་དེས་བསུ་བ་བྱས་མཆོད་པ་ཕུལ་ཆོས་ཁྲི་བརྩིགས་ནས་ཆོས་ཞུས་པས། རྗེ་བཙུན་གྱིས་ཀྱང་རྒྱུ་འབྲས་ཀྱི་ཆོས་མང་པོ་གསུངས་པའི་མཐར་ཆོས་ཁྲིའི་མདུན་ན་ཕ་བོང་ཆེན་པོ་ཞིག་འདུག་པ་དེ་ལ་ཐིམ་སོང་ངོ་། །དེ་ནས་རྗེ་བཙུན་གནས་མཐིལ་དུ་བྱོན་པས་ཐུགས་ཤིན་ཏུ་དགྱེས་ཏེ་ཟླ་བ་གཅིག་ཙམ་བཞུགས་ནས་གཉའ་ནང་རྩར་མར་ཕེབས་ཏེ་ཡོན་བདག་རྣམས་ལ། འདྲེ་ལུང་སྐྱོག་མོ་རང་དུ་འདུག་སྟེ། ངས་འདྲེ་རྣམས་ཐུལ་ནས་ད་སྒྲུབ་གནས་སུ་སོང་ཡོད། ང་ཡང་གདོད་ཀྱི་
(༢༡༤)ཕྱིན་ཏེ་སྒོམ་པ་ཡིན་གསུངས་པས། ཁོང་རྣམས་མཆོག་ཏུ་དད་པར་གྱུར་ཏོ། །ལ་ཕྱི་ལ་བྱོན་པ་ཆུ་བཟང་གི་སྐོར་རོ། །གངས་མགུར་གྱི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་དང་པོར་ལ་ཕྱི་གངས་གཟིགས་སུ་བྱོན་པས་ལྷ་འདྲེ་གདུག་པ་ཅན་རྣམས་བཏུལ་ཞེས་པའི་སྙན་པ་ལ་བརྟེན་ནས། གཉའ་ནང་པ་ཀུན་གྱི་ཕྱག་མཆོད་ཀྱི་གནས་སུ་གྱུར་ཅིང་། ཁྱད་པར་ཇོ་མོ་འུར་མོས་ཆོས་ཞུས། དེའི་ཚེ་དམ་པ་རྒྱགས་ཕུ་བ་སྐུ་ན་ཕྲ་མོ་རང་དུ་ཡོད་པ་ལ་བདག་གི་བུ་འདི་ཡང་ཆེར་སོང་བ་དང་། རྗེ་བཙུན་གྱི་ཕྱག་ཕྱིར་འབུལ་ཟེར་ཤིན་ཏུ་དད་པར་གྱུར་པའི་ས་ནས། རྩར་མ་པ་རྣམས་ཀྱིས་སྤྱན་དྲངས་ཏེ་གཤེན་རྡོར་མོས་ཞབས་ཏོག་འབུལ་བའི་ཚེ། རྗེ་བཙུན་གྲོང་གསེབ་ཏུ་བཞུགས་པ་དང་འཁོར་བའི་བྱ་བ་རྣམས་གཟིགས་པས་ཤིན་ཏུ་ཐུགས་འབྱུང་བའི་རྣམ་པ་མཛད། ལ་ཕྱི་གངས་ལ་འགྲོ་གསུངས་པས། རྩར་མ་པ་རྣམས་ཀྱིས་རྗེ་བཙུན་ལ་སེམས་ཅན་གྱི་དོན་ལས་ནི་མེད། ངེད་རྣམས་ཀྱི་དོན་ལ་ད་ལོ་དགུན་འདིར་བཞུགས་ཁྲིད་རེ་གསུང་བར་ཞུ། འདྲེ་ཐུལ་རྟིང་ནམ་བྱོན་རུང་ཆོག་པས་ནངས་པར་སོས་ངེད་རྣམས་ཀྱང་ཕྱག་ཕྱི་བྱས་འགྲོ་ཟེར་བ་དང་། ཁྱད་པར་སྟོན་པ་ཤཱཀྱ་གུ་ན་དང་། གཤེན་རྡོར་མོས་ནམ་ཟླ་དགུན་དུ་སོང་བ་དང་གངས་ལ་འོ་བརྒྱལ་ཡོང་ལུགས་སོགས་བཤོལ་འདེབས་ཀྱི་ཞུ་བ་ཅི་ཕུལ་རུང་མ་གསན་པར། སྤྱིར་ང་ནཱ་རོ་པཎ་ཆེན་གྱི་བུ་རྒྱུད་གངས་ཀྱི་ང་རོས་མི་འཇིགས། མར་པའི་བཀའ་ཡང་འདུ་
(༢༡༥)འཛི་དང་གཡེང་བ་སྤོངས་ལ་གནས་མི་མེད་ཀྱི་དབེན་པ་སྟེན་གསུང་བ་ཡིན། ཁྱད་པར་ང་གྲོང་ཡུལ་དུ་གཞི་ཕབ་སྡོད་པ་འཆི་བས་འཚེར་གསུང་འབྱོན་པར་ཐག་ཆོད་པ་དང་། རྩར་མ་པ་རྣམས་ཀྱིས་མྱུར་བར་རྗེ་བཙུན་གྱི་འཚོ་ཆས་འབུལ་བ་དང་ཁོ་རང་འགའ་དགུན་ཆོས་ཞུར་ཡོང་བའི་ཆད་མདོ་བྱས་ཏེ། སྟོན་པ་ཤཱཀྱ་གུ་ན་དང་གཤེན་རྡོར་མོ་སོགས་བན་སྐྱེས་དྲུག་གིས་གཤེགས་སྐྱེམས་ཁྱེར་ཏེ་ལ་ཐོག་པར་འགྲོ་གྱིས་ལ། ལ་བབས་ནས་ཀྱང་དམུ་རྫིང་བར་ཕྱིན། དེ་ནས་རྗེ་བཙུན་གྱིས་སྐུ་ཆས་ཕྱེ་བྲེ་དོ་འབྲས་བྲེ་གང་ཤ་གཟུག་གཅིག །མར་ཞོགས་གཅིག་རྣམས་ཡོད་པ་བསྣམས་ཏེ་བདུད་འདུལ་ཕུག་མོ་ཆེར་བྱོན་ནས་བཞུགས། ཁོང་རྣམས་ཕར་ལོག་ཕྱིན་པས་ལ་ཐོག་ཏུ་གནམ་འཁྲིགས་བུ་ཡུག་འཚུབས་ནས་ལམ་ཕྱེད་པ་ཡང་དཀའ་མོ་རང་བྱུང་པུས་གོང་མན་འཚུབ་དང་འཐབ་ཅིང་ཡོང་བས་ཡུལ་དུ་མི་ཉལ་ཙམ་ལ་སླེབ། དེའི་ནུབ་མོ་ནས་བཟུང་སྟེ་ཁ་བ་ཉིན་མཚན་བཅོ་བརྒྱད་བབས་པས། དེར་ཟླ་བ་དྲུག་ཏུ་བྲིན་གཉའ་ནང་གི་འགྲུལ་ཆད་པས། སློབ་འབངས་རྣམས་ཀྱིས་རྗེ་བཙུན་གྲོངས་པར་ཐག་བཅད་དེ། ཐུགས་དགོངས་རྫོགས་ཐབས་ཀྱི་ཚོགས་མཆོད་ཕུལ། ཕྱིས་ས་གའི་ཟླ་བར་སོང་བ་དང་ཡང་སྔར་གྱི་བུ་སློབ་རྣམས་ཀྱིས་གངས་སྟ་གྲིས་གཤགས་ནས། རྗེ་བཙུན་གྱི་གདུང་གདན་འདྲེན་དུ་ཕྱིན་ཏེ། གནས་སུ་སླེབ་ཏུ་ཆ་བའི་ཚེ་སྟེགས་ཤིག་ཏུ་ངལ་བསོ་ཞིང་བསྡད་པས། ཕ་བོང་ཞིག་གི་ཁར་གསའ་ཆེན་པོ་ཞིག་འཛེགས་ནས་བྱ་རྨྱང་བྱས་ཏེ། ཡུན་རིང་པོ་ཞིག་བལྟས་ནས་སོང་སྐད། དེར་ཁོང་རྣམས་ཀྱིས་གསའ་མ་གིས་རྗེ་བཙུན་གྱི་པུར་ཟོས་ཡོད་པ་ན་ན་བཟའི་དུམ་བུ་འདྲ་བའམ། དབུ་སྐྲ་འདྲ་བ་ཡོད་དམ་
(༢༡༦)གཞན་མི་རྙེད་ཅེས་གླེང་ཞིང་ཤིན་ཏུ་མ་དགའ་ནས་ངུ་བཞིན་ཕྱིན་པས་གསའ་བབས་པའི་ཤུལ་ན་ཕར་ལ་མིའི་རྐང་རྗེས་ཤིག་འདུག དེ་ནས་འཕྲང་རིང་ཞིག་ལ་གཟིག་དང་སྟག་ཏུ་བརྫུས་ནས་སོང་བའི་འཕྲང་ལམ་དེ་ལ་སྟག་འཕྲང་གཟིག་འཕྲང་དུ་གྲགས་སོ། །དེར་ཁོངས་རྣམས་ཀྱང་དོགས་པ་སྐྱེས་ཏེ་ལྷ་འདྲེ་ཡིན་ནམ་སྙམ་ནས་ཐེ་ཚོམ་ཟ་ཞིང་འོངས་པས་བདུད་འདུལ་ཕུག་མོ་ཆེར་སླེབ་ཏུ་ཉེ་བའི་ཚེ། རྗེ་བཙུན་གྱིས་མགུར་བཞེས་པ་ཐོས་པས་འོ་ན་ཁྱི་ར་བས་རྒྱགས་ཕུལ་བའམ། གཅན་གཟན་གྱིས་བསད་པའི་ཐེད་འདྲ་རྙེད་ནས་མ་གྲོངས་པ་སྲིད་དམ་སྙམ་ནས་ཕྱིན་པས། བླ་མའི་ཞལ་ནས་གླེན་པ་ཀུན་ད་ཕྱི་དེ་ཙ་ན་འོང་གིན་འདུག་པ་ལ། ད་དུང་མི་སླེབ་པ་ཅི་ཡིན། ཟན་དང་ཚོད་མ་ཡང་གྲང་འགྲོ་བར་འདུག་ད་ཕུག་ཏུ་མྱུར་དུ་ཤོག་གསུངས་པས། དེར་ཁོང་རྣམས་དགའ་ཆེས་ནས་ངུ་བྲོ་སྟེ། ཀུན་རྗེ་བཙུན་གྱི་ཕྱག་ཞབས་ཀུན་ནས་རུབ་རུབ་འཇུས་ཏེ་ངུས་པས། རྗེ་བཙུན་གྱི་ཞལ་ནས། ད་དེ་སྐད་མ་བྱེད་པར་ཟ་མ་ཟོ་གསུངས་པས། ཁོང་རྣམས་ཀྱིས་ཀྱང་གདོད་ཀྱིས་ཕྱག་བཙལ་བསྙུན་དྲིས་ནས་བརྟགས་པས་སྔར་གྱི་ཆས་རྣམས་ཕྱེ་བྲེ་གང་ལས་མ་ཟད་པའི་སྟེང་ནས་འབྲས་ལ་ཤ་བཏབ་པའི་ཚོད་མ་བྱས་འདུག་པ་ལ། སྟོན་པ་ཤཱཀྱ་གུ་ནས་ངེད་རྣམས་ཀྱི་ཟ་མ་ཚུན་མཛད་གདའ་བ། བདག་རྣམས་འོང་བ་རྗེ་བཙུན་གྱིས་ཐུགས་མཁྱེན་གྱིས་གཟིགས་པ་ལགས་སམ་ཞུས་པས། རྗེ་བཙུན་གྱི་ཞལ་ནས་ངས་ཕ་བོང་གི་སྟེང་ནས་བལྟས་པས། ཁྱེད་རྣམས་ངལ་བསོ་ཞིང་འདུག་པ་མཐོང་གསུངས། ཡང་སྟོན་པ་ཤཱཀྱ་གུ་ནས་བདག་ཅག་རྣམས་ཀྱིས་ནི་ཕ་བོང་གི་སྟེང་ན་གསའ་གཅིག་ལས་རྗེ་བཙུན་མ་མཐོང་།
(༢༡༧)དེ་དུས་རྗེ་བཙུན་གང་ན་བཞུགས་ཞུས་པས། རྗེ་བཙུན་གྱི་ཞལ་ནས་གསའ་དེ་ཀ་ང་ཡིན་མོད། རླུང་སེམས་ལ་དབང་ཐོབ་པའི་རྣལ་འབྱོར་པ་འབྱུང་བ་བཞིའི་སྐྱེ་མཆེད་ཟིལ་གྱིས་ནོན་པས། ལུས་འདོད་རྒུར་བསྒྱུར་བའི་རྫུ་འཕྲུལ་སྟོན་ནུས་པ་ཡིན། ད་ལན་ངས་ཀྱང་ཁྱེད་རྣམས་སྐལ་ལྡན་དུ་འདུག་པས་བཀོད་པ་ལུས་ཀྱི་རྫུ་འཕྲུལ་བསྟན་པ་ཡིན། ད་དེ་ལྟར་བྱེད་པའི་གཏམ་མི་ལ་མ་ལབ་གསུངས། ཡང་གཤེན་རྡོར་མོས་ཞུས་པ། རྗེ་བཙུན་ན་ནིང་ལས་ཀྱང་སྐུ་མདངས་ཤིན་ཏུ་བཟང་བར་གདའ་བ། ལམ་སྒོ་གཉིས་ནི་ཁ་བས་ཆོད་དེ་མིའི་ཞབས་ཏོག་ནི་མེད། ལྷ་འདྲེས་ཞབས་ཏོག་བགྱིས་སམ། རི་དྭགས་ཀྱི་ཐེད་རོ་འདྲ་རྙེད་པ་ལགས་སམ་ཇི་ལྟར་ལགས་ཞུས་པས། རྗེ་བཙུན་གྱི་ཞལ་ནས་ང་ཕལ་ཆེར་ཏིང་ངེ་འཛིན་ལ་འབྱམས་ནས་ཟས་ཟ་མ་དགོས། དུས་བཟང་གི་ཚེ་མཁའ་འགྲོ་རྣམས་ཀྱིས་ཚོགས་ཀྱི་འཁོར་ལོའི་སྐལ་བ་རེ་ཡང་བསྐྱལ། རེས་ཕྱེ་ཐུར་མགོ་ཙམ་རེ་འགམས། ཁྱད་པར་ཁ་སང་རྟའི་ཟླ་བའི་སྨད་ལ་ཁྱེད་བུ་སློབ་རྣམས་ཀྱིས་ངའི་མཐའ་བསྐོར་ནས་བཟའ་བཏུང་མང་པོ་དྲངས་པའི་ཉམས་ཤིག་ཤར་བ་ལས། ཞག་མང་པོའི་བར་དུ་ཟ་མ་ཟ་སྙིང་ཡེ་མི་འདོད་པ་ཞིག་བྱུང་བ་དེ་དུས་ཁྱེད་རྣམས་ཀྱིས་ཅི་བྱས་པ་ཡིན་གསུངས། དེར་ཁོང་རྣམས་ཀྱིས་དུས་བརྩིས་པས་ཐུགས་དགོངས་རྫོགས་ཐབས་ཀྱི་མཆོད་པ་ཕུལ་བ་དང་དུས་མཚུངས་འདུག་ཚུལ་ཞིབ་རྒྱས་ཕུལ་བས། རྗེ་བཙུན་གྱི་ཞལ་ནས་འཇིག་རྟེན་པ་རྣམས་ཀྱིས་དགེ་རྩ་བགྱིས་པ་བར་དོར་ཕན་པར་འདུག་སྟེ། དེ་བས་ཀྱང་ད་ལྟ་བར་དོ་གཅོད་པ་སྟོབས་ཆེ་གསུངས། དེ་ནས་ཁོང་རྣམས་ཀྱིས་རྗེ་བཙུན་གཉའ་ནང་དུ་གདན་འདྲེན་
(༢༡༨)པའི་ཞུ་བ་ནན་ཅན་ཕུལ་བས། རྗེ་བཙུན་གྱི་ཞལ་ནས་ང་འདི་ཀ་རང་ཉམས་དགའ་ཞིང་ཏིང་ངེ་འཛིན་འཕེལ་བར་འདུག་པས་མི་འགྲོ་ཁྱེད་རང་རྣམས་སོངས་གསུངས་པས། ཁོང་རྣམས་ཀྱིས་ད་ལན་རྗེ་བཙུན་ཕར་མི་འབྱོན་ན་བདག་རྣམས་ལ་གཉའ་ནང་པ་ཀུན་གྱིས་ཁྱེད་ཀྱིས་རྗེ་བཙུན་གྲོངས་སུ་བཅུག་པ་ཡིན་ཟེར་གཏམ་ངན་དང་ཁ་ཆག་ཆེན་པོ་རང་ཡོང་། ཁྱད་པར་ཇོ་མོ་འུར་མོས་ངའི་རྗེ་བཙུན་ཁྱེར་ལ་ཤོག་ཟེར་བའི་འཕྲིན་ངན་ཡང་ཡང་བསྐུར་བྱུང་བས་བླ་མ་མི་གཤེགས་ན་ངེད་རྣམས་ཀྱང་འདིར་འཆི་བར་སྒུག་ཅིང་སྡོད་ཞུས་པས། རྗེ་བཙུན་གྱིས་ཁོང་རྣམས་ཀྱི་ནན་མ་ཐེག་པར་འབྱོན་པར་ཞལ་གྱིས་བཞེས་ཏེ། རྗེ་བཙུན་ལ་དགུན་མཁའ་འགྲོས་མི་ལ་རས་པ་ཁྱོད་ལ་མི་དགོས་རུང་། མ་འོངས་སློབ་རྒྱུད་ལ་དགོས་པས་གངས་གཤོག་ཐབས་འདི་ལྟར་གྱིས་ཟེར་མཁའ་འགྲོས་བསླབས་པ་ལྟར་བྱས་པའི་དཀྱར་དེ་ཁྱེར་ཁོང་རྣམས་བྱུང་བའི་ནངས་པར་ཚུར་བྱོན་པས། ལ་ཐོག་ནས་གཤེན་རྡོར་མོ་སྔོན་ལ་ཕྱིན། རྩར་མ་པ་སོགས་ཉ་མ་རྣམས་ལ། རྗེ་བཙུན་སྐུ་མ་ནོངས་པར་འབྱོན་ཞིང་ཡོད་བྱ་བའི་གཏམ་སྙན་བསྒྲགས། རྗེ་བཙུན་དཔོན་སློབ་ཀྱང་ཕ་བོང་དཀར་ལེབ་ཏུ་གྲོ་བཏབ་པའི་སར། གཏམ་སྙན་ཐོས་པའི་ཉ་མ་ཕོ་མོ་རྒན་བྱིས་མེད་པ་ཀུན་རྗེ་བཙུན་གྱི་གདོང་བསུ་སྟེ་ཞལ་ལྟ་རུ་བྱུང་བ་ཀུན་གྱིས་རྗེ་བཙུན་གྱི་སྐུ་ལ་འཆངས་ཤིང་ངུས་ཏེ་སྨྲེ་སྔགས་ཀྱི་སྒོ་ནས་བསྙུན་དྲི་ཞུས། ཕྱག་དང་སྐོར་བ་བྱས། དེའི་ཚེ་རྗེ་བཙུན་ལ་ཕྱག་འཁར་སྦའི་བེར་མ་ལྕག་གཅིག་ཡོད་པ་དེས་ཨོཾ་ཚུགས་མཛད། གངས་གཤོག་པའི་དཀྱར་དེ་ཞབས་ལ་གསོལ་ཏེ། ཕ་བོང་དཀར་ལེབ་ཀྱི་སྟེང་ནས་དེར་ཚོགས་པའི་ཉ་མ་རྣམས་
(༢༡༩)ལ་བསྙུན་དྲི་སྨེད་ཀྱི་ལན་དུ་མགུར་འདི་གསུངས་སོ། །དཔལ་དེ་རིང་བཀྲ་ཤིས་ཁྲི་གདུགས་ལ། །ཁྱེད་ཕྱག་མཇལ་གྱི་ཡོན་བདག་ཕོ་མོ་དང་། །ང་རྣལ་འབྱོར་མི་ལ་རས་པ་གཉིས། །འོ་སྐོལ་མ་ཤི་ཕྲད་པ་གློ་བ་དགའ། །ང་མི་རྒན་གླུ་ཡི་དཀོར་མཛོད་ཡིན། །བསྙུན་དྲི་སྨེད་ཀྱི་ལན་དེ་གླུ་ཡིས་འཇལ། །སྙན་ལྷན་ནེ་གསོན་ལ་ཐུགས་གཏད་འཚལ། །ཡང་སྟག་གི་ལོ་ཡི་ལོ་གཞུག་ལ། །ཡོས་བུའི་ལོ་ཡི་ལོ་མགོ་ལ། །ཝ་རྒྱལ་ཟླ་བའི་ཉ་དྲུག་ལ། །ང་འཁོར་བའི་ཆོས་ལ་ཡིད་འབྱུང་ནས། །འབྲོག་ལ་ཕྱི་གངས་ཀྱི་ར་བ་དེར། །མི་ང་ཡང་དབེན་པ་སྙེག་ཏུ་ཕྱིན། །ཁོང་གནམ་ས་གཉིས་པོ་གྲོས་བྱས་ཏེ། །སྐྱི་སེར་རླུང་གི་བང་ཆེན་བཏང་། །འབྱུང་བ་ཆུ་ཀླུང་གཡོས་གཡོས་ནས། །ལྷོ་སྤྲིན་སྨུག་པོ་འདུན་མར་བསྡུས། །ཉི་ཟླ་ཟུང་གཅིག་བཙོན་དུ་བཟུང་། །རྒྱུ་སྐར་ཉེར་བརྒྱད་སྟར་ལ་བརྒྱུས། །ཁྲིམས་ཀྱིས་གཟའ་བརྒྱད་ལྕགས་སུ་བཅུག །དགུ་ཚིགས་སྐྱ་མོ་བརྟོད་ལ་མནན། །སྐར་ཕྲན་ཡོངས་ལ་བུད་ཀྱིས་བཏབ། །བུད་ཀྱི་མདངས་གཡོགས་ཐ་མ་ལ། ཁ་བ་ཉིན་དགུ་མཚན་དགུ་བབས། །ཆ་ལ་ཉིན་མཚན་བཅོ་བརྒྱད་བབས། །འབབ་ཆེ་སྟེ་ཆེ་བ་བལ་འདབ་ཙམ། །འདབ་ཆགས་བྱ་ལྟར་ལྡིང་ཞིང་བབས། །ཆུང་སྟེ་ཆུང་བ་ཕང་ལོ་ཙམ། །བུང་བ་ལྟ་བུར་འཁོར་ཞིང་བབས། །ཡང་ཆུང་སྲན་མ་ཡུངས་འབྲུ་ཙམ། །ཁུ་འཕངས་བཞིན་དུ་འདྲིལ་ཞིང་བབས། །ལར་ཁ་བ་ཆེ་ཆུང་ཚད་ལས་འདས། །མཐོ་གངས་དཀར་གྱི་རྩེ་མོ་དགུང་ལ་རེག །དམའ་རྩི་ཤིང་ནགས་ཚལ་བསྙལ་ཞིང་མནན། །རི་ནག་པོ་རྣམས་ལ་སྐུ་
(༢༢༠)དཀར་གསོལ། །མཚོ་རྦ་རླབས་ཅན་ལ་དར་ཆགས་བཏབ། །གཙང་ཆབ་སྔོན་མོ་སྦུབས་སུ་བཅུག །ས་མཐོ་དམན་མེད་པར་ཐང་དུ་མཉམ། །འབབ་དེ་ལྟར་ཆེ་བའི་རང་བཞིན་གྱིས། །སྤྱིར་མགོ་ནག་མི་ལ་བཟང་བཙོན་གལ། །རྐང་བཞིའི་ཕྱུགས་ལ་མུ་གེ་བྱུང་། །སྒོས་རི་དྭགས་དམན་མའི་འཚོ་བ་བཅད། །སྟེང་འདབ་ཆགས་བྱ་ལ་རྒྱགས་ཆད་བྱུང་། །འོག་བྲ་བ་བྱི་བ་གཏེར་དུ་སྦས། །གཅན་གཟན་རྣམས་ལ་ཁ་ཆིངས་བྱུང་། །དེ་འདྲའི་སྐྱི་འདོང་སྐལ་བ་ལ། །ང་མི་ལ་རས་པའི་སྒོས་སྐལ་དུ། །སྟེང་ནས་འབབ་པའི་བུ་ཡུག་དང་། །དགུན་ལོ་གསར་སྒང་གི་ལྷགས་པ་དང་། །ང་རྣལ་འབྱོར་མི་ལའི་རས་གོས་གསུམ། །མཐོ་གངས་དཀར་གྱི་ལྟོངས་སུ་འཁྲུག་པ་ཤོར། ཁ་བ་བབས་རྒྱལ་ཆབ་ཏུ་ཞུ། །རླུང་འར་འུར་ཆེ་ཡང་རང་སར་ཞི། །རས་གོས་མེ་ལྟར་འབར་གྱིན་གདའ། །གྱད་དཔེ་བཞག་གི་ཤི་སྲོག་དེ་རུ་བསྣོལ། །མཚོན་རྩེ་རྒྱལ་གྱི་རལ་ཁ་དེ་རུ་སྤྲད། །དཔའ་ལ་དོར་གྱི་འཁྲུག་པ་དེར་རྒྱལ་བས། །སྤྱིར་ཆོས་པ་ཡོངས་ལ་ཚད་ཅིག་བཞག །སྒོས་སྒོམ་ཆེན་ཡོངས་ལ་ཚད་དོ་བོར། །ཡང་སྒོས་གཏུམ་མོ་རས་རྐྱང་གི་ཆེ་བ་བཏོན། །ནད་འདུ་བ་རྣམ་བཞི་སྲང་ལ་གཞལ། །ཕྱིས་ནང་འཁྲུག་མེད་པར་གཏན་ཁྲིགས་བགྱིས། །རླུང་ཚ་གྲང་གཉིས་ཀ་གཅུད་ལ་བོར། །ཕྱིས་ཅི་ཟེར་ཉན་པར་ཁ་ཡིས་བླངས། །སྐྱི་འདོང་ཁ་བའི་གདོང་སྲི་མནན། །ཕྱིས་གཡོ་འགུལ་མེད་པར་རྩིགས་ལ་ཕབ། །སྲིད་དམག་དཔུང་བགྱིད་ཀྱང་མ་འཚལ་བར། །དུས་ད་རེས་ཀྱི་འཁྲུག་པ་རྣལ་འབྱོར་རྒྱལ། །ང་མེས་ཀྱི་ཚ་བོ་སྟག་སླག་ཅན། །སྡར་ཝ་སླག་གྱོན་ནས་འབྲོས་
(༢༢༡)མ་མྱོང་། །ང་ཕ་ལ་བུ་སྐྱེས་གྱད་ཀྱི་རིགས། །སྡང་དགྲ་ལ་རུ་ཟུར་འཆོར་མ་མྱོང་། །ང་གཅན་གཟན་རྒྱལ་པོ་སེང་གེའི་རིགས། །གནས་གངས་ཁོངས་མིན་པར་སྡོད་མ་མྱོང་། །ཤོ་མས་ཀྱང་བྲེ་མོ་བགྱིས་པ་ལགས། །ང་མི་རྒན་གྱི་ཁ་ལ་གཏད་ཡོད་ན། །ཕྱིས་སྒྲུབ་རྒྱུད་ཀྱི་བསྟན་པ་དར་ཏེ་མཆི། །གྲུབ་ཐོབ་འགའ་རེ་འབྱོན་ཏེ་མཆི། །རྣལ་འབྱོར་མི་ལ་རས་པ་ང་། །རྒྱལ་ཁམས་ཡོངས་ལ་གྲགས་ཏེ་མཆི། །ཁྱོད་བུ་སློབ་རྣམས་བསམས་ཤིང་དད་དེ་མཆི། །གཏམ་སྙན་ཞིག་ཕྱི་ནས་བརྗོད་དེ་མཆི། །ང་རྣལ་འབྱོར་གཡར་ཁམས་བདེ་བར་བྱུང་། །ཁྱེད་ཡོན་བདག་རྣམས་སྐུ་ཁམས་བདེ་ལགས་སམ། །ཞེས་གསུངས་པའི་ཚེ། ཉ་མ་རྣམས་དགའ་དྲགས་འུར་ཏེ་བྲོ་འཁྲབས་པས། རྗེ་བཙུན་ཡང་ཐུགས་ཉམས་འུར་བ་ལྟར་མཛད་ནས་ཞབས་བྲོ་མཛད་པས། ཕ་བོང་འདམ་བརྫིས་པ་བཞིན་དུ་ནུར་ནས་ཕ་བོང་གི་སྟེང་ཐམས་ཅད་ཞབས་རྗེས་དང་ཕྱག་འཁར་གྱི་རྗེས་ཀྱིས་གང་། རྐེད་པ་ནུར་བའི་བང་རིམ་ལོག་གེ་བ་བྱུང་བ་དེ་ལ། སྔར་ཕ་བོང་དཀར་ལེབ་ཟེར་བ་ལ་ཕྱིས་དཀྱར་རྗེས་པར་གྲགས་སོ། །དེ་ནས་ཉ་མ་རྣམས་ཀྱིས་གཉའ་ནང་རྩར་མར་སྤྱན་དྲངས་ནས་གཏང་རག་གི་བསྙེན་བཀུར་འབུལ་བའི་གྲལ་དུ་ལེགས་སེ་འབུམ་གྱིས་ད་ལན་རྗེ་བཙུན་སྐུ་མ་ནོངས་པར་ཕེབས་པ་འདི་ཅི་གང་ལས་ཡང་དགའ་བ་ཞིག་བྱུང་། སྐུ་མདངས་ནི་སྔར་བས་ཀྱང་བཟང་བར་འདུག ཐུགས་དམ་བཟང་པོ་ནི་ཡེ་འཁྲུངས་ཡིན། ཞབས་ཏོག་མཁའ་འགྲོ་རྣམས་ཀྱིས་བགྱིས་ལགས་སམ་ཞེས་ཞུས་པའི་ལན་དུ་མགུར་འདི་གསུངས་སོ། །
(༢༢༢)རྗེ་བླ་མའི་ཞབས་ལ་སྤྱི་བོས་འདུད། །བྱིན་རླབས་ཀྱི་དངོས་གྲུབ་མཁའ་འགྲོས་བྱིན། །དམ་ཚིག་གི་བདུད་རྩི་ཕན་པ་ཆེ། །དད་པའི་མཆོད་པས་དབང་པོ་གསོས། །བུ་སློབ་ཀྱི་ཚོགས་གསོག་བཟང་ནས་བྱུང་། །ལྟ་བའི་སེམས་ལ་སྟོང་ཉིད་ཤར། །བལྟ་རྒྱུའི་ངོ་བོ་རྡུལ་ཙམ་མེད། །བལྟ་བྱ་ལྟ་བྱེད་སྟོར་ནས་ཐལ། །ལྟ་བའི་རྟོགས་ཚུལ་བཟང་ནས་བྱུང་། །སྒོམ་པ་འོད་གསལ་ཆུ་བོའི་རྒྱུན། །བསྒོམ་རྒྱུའི་ཐུན་མཚམས་གཟུང་རྒྱུ་མེད། །བསྒོམ་བྱ་སྒོམ་བྱེད་སྟོར་ནས་ཐལ། །སྒོམ་པའི་སྙིང་རུས་བཟང་ནས་བྱུང་། །སྤྱོད་པའི་བྱ་བྱེད་འོད་གསལ་དང་། །རྟེན་འབྲེལ་སྟོང་པར་ཐག་ཆོད་པས། །སྤྱད་བྱ་སྤྱོད་བྱེད་སྟོར་ནས་ཐལ། །སྤྱོད་པའི་བྱེད་ཚུལ་བཟང་ནས་བྱུང་། །ཕྱོགས་ཆའི་རྟོག་པ་དབྱིངས་སུ་ཡལ། །ངོ་ལྐོག་ཆོས་བརྒྱད་རེ་དོགས་མེད། །བསྲུང་བྱ་སྲུང་བྱེད་སྟོར་ནས་ཐལ། །དམ་ཚིག་སྲུང་ཚུལ་བཟང་ནས་བྱུང་། །རང་སེམས་ཆོས་སྐུར་ཐག་ཆོད་ཅིང་། །རང་གཞན་དོན་གཉིས་གྲུབ་པའི་ཕྱིར། །བསྒྲུབ་བྱ་སྒྲུབ་བྱེད་སྟོར་ནས་ཐལ། །འབྲས་བུ་གྲུབ་ཚུལ་བཟང་ནས་བྱུང་། །མི་རྒན་ང་ཡི་སྐྱིད་གླུ་འདི། །དད་ཅན་ཉ་མའི་ཞུས་ལན་ཡིན། །སྒྲུབ་པའི་སྐུ་མཚམས་ཁ་བས་བསྡམས། །འཚོ་བའི་ཞབས་ཏོག་མཁའ་འགྲོས་བགྱིས། །གཡའ་གངས་ཀྱི་འབབ་ཆུ་བཏུང་བའི་མཆོག །སུས་སྒྲུབ་མེད་པར་དཔལ་ལས་གྲུབ། །ལས་བྱ་དགོས་མེད་པར་སོ་ནམ་ཚར། །འཕྲལ་གསོག་འཇོག་མེད་པར་བང་མཛོད་གང་། །སེམས་ལ་བལྟས་པས་ཐམས་ཅད་མཐོང་། །དམན་སར་བསྡད་པས་རྒྱལ་ས་ཟིན། །མདུན་མ་ཡང་རྩེ་བླ་མའི་དྲིན། །བུ་སློབ་ཡོན་བདག་འཁོར་
(༢༢༣)བཅས་རྣམས། །དད་པས་ཞབས་ཏོག་བྱེད་པ་ཡི། །དྲིན་ལན་ཆོས་ཀྱིས་འཇལ་བ་ཡིན། །ཐུགས་དགྱེས་པར་མཛོད་ཅིག་འདིར་བྱོན་རྣམས། །ཞེས་གསུངས་པས། སྟོན་པ་ཤཱཀྱ་གུ་ནས་ཕྱག་ཕུལ་ཏེ། ད་ལན་གྱི་ཁ་བ་ཆེན་པོ་དེ་འདྲ་བས་རྗེ་བཙུན་སྐུ་མ་ནོངས་པར་བྱོན་པ་དང་། ངེད་སློབ་འབངས་རྣམས་ལའང་ཤི་ཆད་མེད་པར། དཔོན་སློབ་ཞལ་འཛོམས་པ་འདི་ཤིན་ཏུ་དགའ་ཚོར་ཆེ་བ་ཞིག་བྱུང་ཞིང་། དེ་རིང་གི་སྐབས་སུ་ངེད་རྣམས་ལ་དྲིན་ལན་དུ་ཆོས་ཀྱི་སྐྱེས་ཁ་གནང་གསུང་བ་བཀའ་དྲིན་ཆེ་བས། སྐུ་སྐྱེས་ལ་ད་ལོ་དགུན་རྗེ་བཙུན་རང་གི་ཐུགས་ཉམས་སུ་འཁྲུངས་པའི་ཆོས་ཤིག་གནང་བར་ཞུ་ཞུས་པས། རྗེ་བཙུན་གྱིས་སྟོན་པ་ཤཱཀྱ་གུ་ནའི་ཞུས་ལན་ཉ་མ་རྣམས་ལ་བྱོན་སྐྱེས་སུ་ཐུགས་ཉམས་གནད་ཀྱི་མདོ་དྲུག་འདི་མགུར་དུ་གསུངས་སོ། །རྗེ་གསུམ་ལྡན་བླ་མའི་ཞབས་ལ་འདུད། །ངས་དབེན་པ་བསྟེན་པའི་སྒོམ་ཉམས་རྣམས། །དགུང་དོ་ནུབ་བཀྲ་ཤིས་གྲལ་གང་འདིར། །ཁྱེད་སྟོན་པ་ཤཱཀྱ་གུ་ནས་དབུ་མཛད་པའི། །གདན་གང་འཛོམས་པའི་བུ་སློབ་རྣམས། །སྨོན་ལམ་དག་པས་མཚམས་སྦྱར་ནས། །ཡོན་བདག་རྡོར་མོ་བཟའ་ཚོ་དང་། །དམ་ཚིག་ཆོས་ཀྱི་འབྲེལ་བ་ཡི། །ཁྱེད་བུ་སློབ་རྣམས་ཀྱིས་ཞུ་ཕུལ་བ། །ཕ་བྱོན་སྐྱེས་ཆོས་ཤིག་གནང་འཚལ་སྐད། །དོན་དེ་ལ་མཆིད་ལན་འདི་སྐད་དོ། །ང་འཁོར་བའི་ཆོས་ལ་ཡིད་འབྱུང་སྟེ། །སྐྱོ་ནས་ལ་ཕྱི་གངས་ལ་ཕྱིན། །དབེན་གནས་བདུད་འདུལ་ཕུག་པ་དེར། །རྣལ་འབྱོར་མི་ལ་རས་པ་ངས། །ཟླ་དྲུག་བསྒོམས་པའི་ཉམས་ཤར་བ། །གནད་
(༢༢༤)ཀྱི་མདོ་དྲུག་གླུ་རུ་ལེན། །ཕྱི་ཡི་ཡུལ་དྲུག་དཔེར་བཞག་ནས། །ནང་གི་སྐྱོན་དྲུག་གཏན་ལ་འབེབས། །མི་ཐར་འཆིང་བའི་སྒྲོག་དྲུག་ལ། །ཐབས་ཀྱིས་གྲོལ་བའི་ལམ་དྲུག་མཐོང་། །ཀློང་དྲུག་གདེང་དུ་གྱུར་པ་ལས། །ཉམས་ལ་བདེ་བ་རྣམ་དྲུག་ཤར། །གླུ་དེ་རྗེས་བསྐྱར་ནས་མ་བླངས་ན། །དོན་དེ་ཐུགས་སུ་མི་འབྱོན་པས། །ཚིག་བརྡ་ཡིས་འགྲོལ་ན་འདི་སྐད་ཡིན། །ཡང་ཐོགས་ཐུག་ཡོད་ན་ནམ་མཁའ་མིན། །གྲངས་ཀྱིས་ལང་ན་སྐར་ཕྲན་མིན། །གཡོ་འགུལ་ཡོད་ན་རི་བོ་མིན། །ཕྲི་བསྣན་ཡོད་ན་རྒྱ་མཚོ་མིན། །ཟམ་པས་སླེབ་ན་ཆུ་བོ་མིན། །བཟུང་དུ་ཡོད་ན་འཇའ་ཚོན་མིན། །དེ་ནི་ཕྱི་ཡི་དཔེ་དྲུག་ཡིན། །ཡང་བཟའ་གཏད་ཡོད་ན་ལྟ་བ་མིན། །བྱིང་རྒོད་ཡོད་ན་སྒོམ་པ་མིན། །བླང་དོར་ཡོད་ན་སྤྱོད་པ་མིན། །རྣམ་རྟོག་ཡོད་ན་རྣལ་འབྱོར་མིན། །ཤར་ནུབ་ཡོད་ན་ཡེ་ཤེས་མིན། །སྐྱེ་འཆི་ཡོད་ན་སངས་རྒྱས་མིན། །དེ་ནི་ནང་གི་སྐྱོན་དྲུག་ལགས། །ཡང་ཞེ་སྡང་ཆེ་ན་དམྱལ་བའི་སྒྲོག །སེར་སྣ་ཆེ་ན་ཡི་དྭགས་སྒྲོག །གཏི་མུག་ཆེ་ན་བྱོལ་སོང་སྒྲོག །འདོད་ཆགས་ཆེ་ན་མི་ཡི་སྒྲོག །ཕྲག་དོག་ཆེ་ན་ལྷ་མིན་སྒྲོག །ང་རྒྱལ་ཆེ་ན་ལྷ་ཡི་སྒྲོག །འདི་མི་ཐར་འཆིང་པའི་སྒྲོག་དྲུག་ལགས། །ཡང་དད་པ་ཆེ་ན་ཐར་པའི་ལམ། །མཁས་བཙུན་བསྟེན་ན་ཐར་པའི་ལམ། །དམ་ཚིག་གཙང་ན་ཐར་པའི་ལམ། །རི་ཁྲོད་འགྲིམ་ན་ཐར་པའི་ལམ། །གཅིག་པུར་སྡོད་ན་ཐར་པའི་ལམ། །སྒྲུབ་པ་བྱེད་ན་ཐར་པའི་ལམ། །འདི་ཐབས་ཀྱིས་འགྲོལ་བའི་ལམ་དྲུག་ལགས། །ཡང་ལྷན་ཅིག་སྐྱེས་པ་གཉུག་མའི་ཀློང་། །ཕྱི་ནང་མེད་པ་རིག་
(༢༢༥)པའི་ཀློང་། །གསལ་འགྲིབ་མེད་པ་ཡེ་ཤེས་ཀློང་། །ཁྱབ་གདལ་ཆེན་པོ་ཆོས་ཀྱི་ཀློང་། །འཕོ་འགྱུར་མེད་པ་ཐིག་ལེའི་ཀློང་། །རྒྱུན་ཆད་མེད་པ་ཉམས་ཀྱི་ཀློང་། །དེ་དག་གདེང་ཅན་ཀློང་དྲུག་ལགས། །ཡང་ལུས་ལ་གཏུམ་མོ་འབར་བས་བདེ། །རླུང་རོ་རྐྱང་དྷུ་ཏཱིར་ཆུད་པས་བདེ། །སྟོད་བྱང་ཆུབ་སེམས་ཀྱི་རྒྱུན་འབབ་བདེ། །སྨད་དྭངས་མའི་ཐིག་ལེས་ཁྱབ་པས་བདེ། །བར་དཀར་དམར་ཐུག་ཕྲད་རྩེ་བས་བདེ། །ལུས་ཟག་མེད་བདེ་བས་ཚིམ་པས་བདེ། །དེ་རྣལ་འབྱོར་ཉམས་ཀྱི་བདེ་དྲུག་ལགས། །ད་གནད་ཀྱི་མདོ་དྲུག་དོན་གྱི་གླུ། །ཟླ་དྲུག་བསྒོམས་པའི་ཉམས་དབྱངས་འདི། །ཁྱེད་བུ་སློབ་འཚོགས་པའི་དགའ་སྟོན་མཛོད། །ལར་མི་དགའ་བ་འཚོགས་པ་ད་རེས་ཙམ། །ཆང་བདུད་རྩིར་འཐུང་བ་ཀུན་ཀྱང་མཉེས། །མི་རྒན་གླུ་རྒན་ལེན་པ་དེ། །ཁྱེད་བུ་སློབ་རྣམས་ཀྱི་ངོ་མ་ཆོགས། །ད་རེས་ཀྱི་ཆོས་སྐྱེས་དེ་ལ་མཛོད། །ཐུགས་དགྱེས་པར་བཀྲ་ཤིས་ཆོས་ལ་འབུངས། །ལས་དག་པའི་སྨོན་ལམ་འགྲུབ་པར་ཤོག །ཅེས་གསུངས་པས། །གཤེན་རྡོར་མོས་རྗེ་བཙུན་རིན་པོ་ཆེ་དུས་གསུམ་སངས་རྒྱས་ལྟ་བུ་དང་མཇལ་རུང་ཞབས་ཏོག་བྱེད་པ་དང་། ཕྱག་ཕྱི་ལ་འབྲངས་ནས་ཆོས་བྱེད་པ་དག་ལྟ་སྨོས་ཏེ། མོས་པ་ཙམ་ཡང་མི་བྱེད་པ་འདི་རྣམས་བྱོལ་སོང་བས་ཀྱང་གླེན་པར་འདུག་ཞུས་པས། རྗེ་བཙུན་གྱི་ཞལ་ནས། ང་ལ་དག་མོས་པ་མ་བྱས་ཀྱང་རུང་སྟེ། མི་ལུས་རིན་པོ་ཆེ་སངས་རྒྱས་ཀྱི་བསྟན་པ་དར་དུས་ཐོབ་ནས་ཆོས་མི་བྱེད་པ་རྣམས་ཤིན་ཏུ་གླེན་པ་ཡིན་གསུངས་ནས་མགུར་འདི་གསུངས་སོ། །
(༢༢༦)སྒྲ་སྒྱུར་མར་པའི་ཞབས་ལ་འདུད། །ཁྱོད་གསོན་དང་ཡོན་བདག་དད་པ་ཅན། །དམ་ཆོས་ཐང་མར་བརྡལ་བ་ལ། །སྡིག་པ་བབ་ཅོལ་དུ་བྱེད་པ་ཤིན་ཏུ་གླེན། །དཀའ་ཡང་ཐོབ་པའི་དལ་འབྱོར་ལུས་པོ་འདི། །མི་ཚེ་སྟོང་ཟད་ལ་སྐྱེལ་བ་ཤིན་ཏུ་གླེན། །གྲོང་ཁྱེར་གྱང་ར་ཞིག་པའི་དུར་ཁྲོད་དུ། །དུས་རྟག་ཏུ་སྡོད་པ་ཤིན་ཏུ་གླེན། །བཟའ་མི་ཚོང་འདུས་མགྲོན་པོ་ལྟ་བུ་ལ། །ངན་ཤགས་འཐབ་མོ་བྱེད་པ་ཤིན་ཏུ་གླེན། །ཚིག་སྙན་གྲགས་སྒྱུ་མའི་རང་སྒྲ་ལ། །ཞེ་ངན་གལ་དུ་འཛིན་པ་ཤིན་ཏུ་གླེན། །སྡང་དགྲ་མེ་ཏོག་བཞིན་དུ་ཡལ་རྒྱུ་ལ། །འཐབ་མོས་རང་སྲོག་སྐྱེལ་བ་ཤིན་ཏུ་གླེན། །གཉེན་ཚན་བློ་བྲིད་རྫུན་གྱི་ཟོལ་ཁང་ལ། །ཤི་ཚེ་མྱ་ངན་བྱེད་པ་ཤིན་ཏུ་གླེན། །ནོར་རྫས་ཟིལ་བ་ལྟ་བུའི་གཡར་པོ་ལ། །སེར་སྣའི་མདུད་པས་འཆིང་བ་ཤིན་ཏུ་གླེན། །ཕུང་བོ་མི་གཙང་རྫས་ཀྱི་རྐྱལ་བ་ལ། །བཟང་འདོད་བྱི་དོར་བྱེད་པ་ཤིན་ཏུ་གླེན། །གདམས་ངག་བདུད་རྩིའི་ཟས་མཆོག་འདི། །ཟས་ནོར་དོན་དུ་འཚོང་བ་ཤིན་ཏུ་གླེན། །གླེན་པ་མང་པོ་ཚོགས་པ་ལ། །སྤྱང་ན་ལྷ་ཆོས་རང་མགོ་ཐོན། །ཕོ་གྲུང་ན་རྣལ་འབྱོར་ང་བཞིན་མཛོད། །ཅེས་གསུངས་པས། དེར་ཚོགས་པའི་ཉ་མ་རྣམས་ཀྱིས་ཐུགས་རྗེས་ཟུངས། བདག་ཅག་རྣམས་ཀྱང་རྗེ་བཙུན་ལྟ་བུའི་སྤྱང་པོ་གྲུང་པོ་རང་མ་བྱུང་རུང་། གླེན་པའི་ཟླ་ལ་མ་ལུས་ཙམ་ཞིག་ཨེ་ཡོང་ལྟ་བ་ལགས་པས། རྗེ་བཙུན་ཡུལ་ཕྱོགས་འདིར་ཐུགས་ཕབ་ནས། ངེད་གསོན་པོ་རྣམས་ལ་ཆོས་གསུང་ཞིང་བླ་མཆོད། གཤིན་པོ་རྣམས་ཡར་འདྲེན་ལ་རྒྱུན་དུ་བཞུགས་པར་ཞུ་ཞུས་པས། རྗེ་བཙུན་གྱི་ཞལ་ནས་ང་ལ་ཕྱི་གངས་ལ་སྒོམ་དགོས་པ་བླ་མའི་
(༢༢༧)བཀའ་ལུང་ཡོད་པས་ཐོག་རེ་ཙམ་སྡོད། གཞི་བཟུང་ནས་ཁྱེད་ཡོན་བདག་གི་ངོ་འཛིན་པའི་མི་ཆོས་ངས་མི་ཤེས། ཁྱེད་རྣམས་ཀྱང་ང་ལ་མིག་བརྙས་ཁྱེར་བ་ལས་མི་ཡོང་གསུངས་ནས་མགུར་འདི་གསུངས་སོ། །རྗེ་ལྷོ་བྲག་མར་པའི་ཞབས་ལ་འདུད། །ཁྱེད་འདིར་ཚོགས་ཀྱི་ཡོན་བདག་ཕོ་མོ་རྣམས། །ང་རྣལ་འབྱོར་མི་ལ་རས་པ་ལ། །འགྱུར་མེད་ཀྱི་དད་པ་གཏིང་ནས་གྱིས། ཁ་ཞེ་མེད་པས་གསོལ་བ་ཐོབ། །གཞི་གཅིག་ཏུ་རྒྱུན་དུ་བསྡད་གྱུར་ན། །འཕྲལ་མཉམ་དུ་འགྲོགས་པས་སྣང་བ་སུན། །མིག་འདྲིས་ཆེས་ན་གཤིས་ཀྱིས་བརྙས། །འགྲོགས་ཡུན་རིང་ན་རེ་འཁང་མང་། །གཤིས་ངན་འཐབ་མོས་དམ་ཚིག་དཀྲུག །གྲོགས་ངན་གྱིས་དགེ་སྦྱོར་བཟང་པོ་སྤུར། །གཙོ་འདུན་གྱི་ཁ་གཟུས་ལས་ངན་གསོག །ཡིན་མིན་ཁ་རྟོགས་དགྲ་བོ་འཁོར། །ཕྱོགས་ཆའི་གཡོ་སྒྱུ་སྡིག་པ་ཆེ། །དད་ཟས་ཁ་ལན་བསམ་ངན་འཁྲུག །གཤིན་ཟས་ཀྱི་རོ་དོམ་ཐེག་ཐབས་མེད། །ཁྱེད་མི་ནག་གི་བླ་མཆོད་ཤིན་ཏུ་ལོད། །འགྲོགས་ཀྱིན་བརྙས་ན་ཡི་མུག་ལྡང་། །ཚང་མང་གི་དཔོན་པོ་འཆི་ཁར་སྡུག །དེ་བས་རི་ཁྲོད་ཀྱི་རྣལ་འབྱོར་པ། །གྲོང་ཡུལ་དུ་ལུས་ན་གྱོང་རེ་ཆེ། །ང་ཕྱོགས་མེད་ཀྱི་རི་ཁྲོད་འགྲིམ་དུ་འགྲོ། །ཁྱེད་དད་ལྡན་རྣམས་ཚོགས་གསོག་ངོ་མཚར་ཆེ། །འདིར་ཚོགས་ཀྱི་ཡོན་བདག་ཕོ་མོ་རྣམས། །བླ་མཆོད་བགྱིད་ཟེར་བག་ཆགས་བཟང་། །སྨོན་ལམ་གྱི་འབྲེལ་བས་ཡང་ཡང་མཇལ། །ཞེས་གསུངས་པས། ཉ་མ་རྣམས་ངེད་དག་རྣ་བ་མི་སུན་ཏེ། རྗེ་བཙུན་ཐུགས་སུན་དགོངས་པ་ཡིན་འདུག ད་ཞུ་བ་ནན་གྱིས་ཕུལ་རུང་གསན་དགོངས་བྱུང་
(༢༢༨)དོགས་མེད་བདག་ཅག་རྣམས་ལ་གཟིགས་ནས་ལ་ཕྱི་ལ་ཡང་ཡང་མྱུར་དུ་འབྱོན་པར་ཞུ། ཞེས་ཞུས་ནས། འབུལ་བ་མང་པོ་ཕུལ་བ་རྣམས་མ་བཞེས་པ་ལས་དེར་ཚོགས་པའི་བུ་སློབ་ཀུན་མཆོག་ཏུ་ངོ་མཚར་དུ་གྱུར་ནས། དགའ་མགུ་ཡི་རངས་ཤིང་རྗེ་བཙུན་ལ་མི་ཕྱེད་པའི་དད་པ་ཐོབ་པར་གྱུར་ཏོ། །གངས་མགུར་གྱི་སྐོར་རོ། །ལིང་པ་བྲག་སྲིན་མོའི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་ལ་གཉའ་ནང་རྩར་མའི་ཉ་མ་སོགས་གཉའ་ནང་པ་རྣམས་ཀྱིས་བཞུགས་པའི་གསོལ་བ་ཅི་བཏབ་རུང་མ་གསན་པར། བླ་མའི་བཀའ་བསྒྲུབ་ཕྱིར་སྐྱིད་གྲོང་གི་རི་བོ་དཔལ་འབར་ལ་སྒོམ་དུ་བྱོན་པ་ལས། ལིང་པའི་བྲག་ཕུག་ལ་ཐུགས་སོང་སྟེ། དེར་རེ་ཞིག་ཐུགས་དམ་སྐྱོང་ཞིང་བཞུགས་པ་ལས་ནམ་ཞིག་ནམ་སྲོད་བྱི་སོང་བའི་ཚེ། རྗེ་བཙུན་བཞུགས་པའི་གཡོན་ཕྱོགས་ན་བྲག་གི་སེར་ཁ་ཞིག་ཡོད་པ་དེའི་སྲུབས་ལ་བཤུད་སྐད་ཅིག་ཚེར་ཚེར་འདུག་པ་ལས་བཞེངས་ཏེ་གཟིགས་པས་ཅི་ཡང་མི་འདུག ང་སྒོམ་ཆེན་པ་རང་སྣང་འཁྲུལ་བར་འདུག་དགོངས་ནས། ཡང་གཟིམས་མལ་དུ་བཞུགས་པས་བྲག་གི་སེར་ཁ་ན་ཚུར་འོད་ཆེན་པོ་ཞིག་གི་སྣ་ལ་མི་དམར་པོ་གླ་བ་ནག་པོ་ལ་ཞོན་པའི་སྣ་བུད་མེད་བཟང་མོ་གཅིག་གིས་ཁྲིད་པ་ཞིག་བྱུང་ནས། མི་དེས་རྗེ་བཙུན་ལ་གྲུ་མོས་ཕུལ་རྡེག་ཅིག་བྱས་ནས་རླུང་ཚུབ་ཞིག་ཏུ་ཡལ་སོང་། བུད་མེད་དེ་ཁྱི་མོ་དམར་མོ་ཞིག་ཏུ་སོང་ནས་ཞབས་གཡོན་པའི་མཐེ་བོང་བཟུང་སྟེ་གཏོང་དུ་མ་ཉན་པས། བྲག་སྲིན་མོའི་
(༢༢༩)ཚོ་འཕྲུལ་དུ་མཁྱེན་ནས་མགུར་འདི་གསུངས་སོ། །དྲིན་ཅན་མར་པའི་ཞབས་ལ་འདུད། །མི་ང་ལ་མཐོ་འཚམས་གླགས་ལྟ་ཞིང་། །མི་སྡུག་སྤྲུལ་པའི་གཟུགས་སྟོན་པ། །ཁྱོད་ལིང་པ་བྲག་གི་བྲག་སྲིན་མོ། །ལས་ངན་འདྲེ་མོ་མ་ཡིན་ནམ། །གླུ་སྙན་པའི་འགྱུར་ཁུགས་ངས་མི་ཤེས། །ངག་བདེན་པའི་ཚིག་ལ་ཁྱོད་ཀྱང་ཉོན། །ཡ་གི་དགུང་སྔོན་གྱི་དཀྱིལ་ཞིག་ན། །ཉི་ཟླ་ཟུང་གཅིག་གཡང་ཆགས་པ། །དེ་ངོ་མཚར་ལྷ་ཡི་གཞལ་ཡས་ཁང་། །འོད་ཟེར་སྐྱེ་འགྲོའི་དཔལ་དུ་ཤར། །ལས་སུ་གླིང་བཞི་བསྐོར་བ་ལ། །གཟའ་ཁྱབ་འཇུག་དགྲ་རུ་མ་ལྡང་ཅིག །ཤར་རྩེ་མཐོན་ཤེལ་གྱི་གངས་རི་ལ། །དར་སེང་དཀར་མོའི་གཡང་ཆགས་པ། །དེ་བྱོལ་སོང་བཀོད་པའི་རྒྱལ་བོ་ཡིན། །ཆེ་རྟགས་སུ་གོད་ཀྱི་ཤ་མི་ཟ། །ཁོང་གཡའ་སྔོན་ཟུར་ལ་འབབ་པའི་ཚེ། །བུ་ཡུག་དགྲ་རུ་མ་ལྡང་ཅིག །ལྷོ་ནགས་མའི་གསེབ་ཀྱི་ལྡིང་ཁང་དུ། །སྟག་མོ་རི་ཁྲའི་གཡང་ཆགས་པ། །དེ་གཅན་གཟན་ཡོངས་ཀྱི་གྱད་པ་ཡིན། །དཔའ་རྟགས་སུ་རང་གི་སྲོག་མི་ཕངས། །ཁོང་དོག་མོའི་འཕྲང་ལ་འགྲིམ་པའི་ཚེ། །ས་མདའ་དགྲ་རུ་མ་ལྡང་ཅིག །ནུབ་མ་ཕམ་གཡུ་མཚོ་མེར་བ་ལ། །ལྟོ་དཀར་ཉ་ཡི་གཡང་ཆགས་པ། །དེ་འབྱུང་བ་ཆུ་ཡི་གར་མཁན་ཡིན། །ཡ་མཚན་དུ་གསེར་མིག་འཁྱིལ་བ་ཡོད། །ཁོང་འདོད་ཡོན་ཟས་ཕྱིར་འབྲང་བའི་ཚེ། །ལྕགས་ཀྱུ་དགྲ་རུ་མ་ལྡང་ཅིག །བྱང་གི་བྲག་དམར་བསམ་ཡས་ལ། །བྱ་རྒྱལ་རྒོད་པོའི་གཡང་ཆགས་པ། །དེ་འདབ་ཆགས་བྱ་ཡི་དྲང་སྲོང་ཡིན། །ངོ་མཚར་གཞན་གྱི་སྲོག་མི་གཅོད། །ཁོང་རི་གསུམ་
(༢༣༠)རྩེ་ལ་གཟན་འཚོལ་ཚེ། །ཐག་རྙི་དགྲ་རུ་མ་ལྡང་ཅིག །བྲག་རྒོད་ཚང་ཅན་གྱི་ལིང་པ་ལ། །མི་ལ་རས་པའི་གཡང་ཆགས་པ། །འདི་རང་གཞན་དོན་གཉིས་སྒྲུབ་མཁན་ཡིན། །བདེན་རྟགས་སུ་ཚེ་འདི་བློས་བཏང་སྟེ། །རྒྱུ་བྱང་ཆུབ་མཆོག་ཏུ་སེམས་བསྐྱེད་ནས། །དུས་ཚེ་གཅིག་ལུས་གཅིག་འདི་ཉིད་ཀྱིས། །རྩེ་གཅིག་སངས་རྒྱས་སྒྲུབ་པ་ལ། །ཁྱོད་བྲག་སྲིན་དགྲ་རུ་མ་ལྡང་ཅིག །གླུ་ངོ་མཚར་དཔེ་ལྔ་དོན་དང་དྲུག །ཚིག་སྙན་ངག་མདོ་ལོང་གསེར་ཐག་ཅན། །དོན་མཇལ་བར་གདའ་འམ་བྲག་སྲིན་མོ། །ལས་བསགས་ཀྱིན་ལྕི་བ་སྡིག་པ་ཡིན། །ཁྱོད་དེ་ལ་ནན་ཏན་མ་ཆེ་བར། །ངན་སེམས་གདུག་རྩུབ་སླར་ཐུལ་དང་། །ལར་ཐམས་ཅད་སེམས་སུ་མ་ཤེས་ན། །རྣམ་རྟོག་གི་འདྲེ་ལ་ཟད་པ་མེད། །སེམས་ཉིད་སྟོང་པར་མ་རྟོགས་ན། །འདྲེ་ལོག་གིས་བཟློག་པར་ཅང་གདའ་འམ། །ཁྱོད་མ་གནོད་མ་གནོད་འདྲེ་མོ་ངན། །མི་ང་ལ་མ་གནོད་སླར་ལོག་ཅིག །ཅེས་གསུངས་པས། ཞབས་ནས་བཟུང་བཟུང་བ་དེ་ནི་མ་བཏང་གཟུགས་མེད་པའི་སྐད་གཅིག་གིས་ལན་འདི་སྐད་བཏབ་བོ། །ཨེ་མ་སྐལ་ལྡན་རིགས་ཀྱི་བུ། །གཅིག་པུར་རྒྱུ་བའི་སྙིང་སྟོབས་ཅན། །རི་ཁྲོད་འགྲིམ་པའི་རྣལ་འབྱོར་པ། །དཀའ་བ་སྤྱོད་པའི་ངོ་མཚར་ཅན། །མི་ཁྱོད་ཀྱིས་གླུ་བླངས་རྒྱལ་པོའི་བཀའ། །རྒྱལ་པོའི་བཀའ་དེ་གསེར་བས་ལྕི། །གསེར་ལ་ར་ཤོར་མཚང་དུ་ཆེ། །མཚང་དེ་ལས་སླར་ལྡོག་མ་ཤེས་ན། །ངས་སྔོན་ཆད་སྨྲས་པ་རྫུན་དུ་ཟད། །དེ་ཡན་ཆད་རྗེ་རྒྱལ་ཁྲིམས་ཀྱི་གླུ། །ད་དཔེ་དེ་ལ་དྲངས་པའི་མཆིད་ཅིག་འཚལ། །ཐུགས་མ་ཡེངས་
(༢༣༡)དར་ཅིག་གསན་པར་ཞུ། །ཡ་གི་དགུང་སྔོན་གྱི་དཀྱིལ་ཞིག་ན། །འོད་གསལ་ཉི་ཟླའི་གཡང་ཆགས་པ། །དེ་ངོ་མཚར་ལྷ་ཡི་གཞལ་ཡས་ཁང་། །གླིང་བཞིའི་མུན་པ་སེལ་ལོ་སྐད། །ཁོང་ལས་སུ་གླིང་བཞི་བསྐོར་བའི་ཚེ། །སྣང་སྣང་བྱ་ར་མི་གཏོང་ཞིང་། །དཀྱིལ་འཁོར་འོད་ཀྱིས་མ་བསླུས་ན། །གཟའ་ཁྱབ་འཇུག་དགྲ་རུ་ཅི་ལ་ལྡང་། །ཤར་གངས་དཀར་ཤེལ་གྱི་ཟུར་ཕུད་ལ། །དར་སེང་དཀར་མོའི་གཡང་ཆགས་པ། །དེ་བྱོལ་སོང་བཀོད་པའི་རྒྱལ་པོ་སྟེ། །འབངས་དུད་འགྲོ་ཁྲིམས་ལ་གནོན་ནོ་སྐད། །ཁོང་གཡའ་སྔོན་ཟུར་ལ་འབབ་པའི་ཚེ། །ཁྲོ་གཏུམ་ང་རྒྱལ་མི་ཆེ་ཞིང་། །གཡུ་རལ་སྔོན་མོས་མ་ནོན་ན། །བུ་ཡུག་དགྲ་རུ་ཅི་ལ་ལྡང་། །ལྷོ་ནགས་མའི་གསེབ་ཀྱི་ལྡིང་ཁང་ན། །སྟག་གུ་རི་ཁྲའི་གཡང་ཆགས་པ། །དེ་གཅན་གཟན་ཡོངས་ཀྱི་གྱད་པ་སྟེ། །སྡེར་ཆགས་ཟིལ་གྱིས་གནོན་ནོ་སྐད། །ཁོང་དོག་མོའི་འཕྲང་ལ་འགྲིམ་པའི་ཚེ། །ཡང་རྩལ་དྲེགས་པས་མི་སྙེམས་ཤིང་། །རི་མོ་འཛུམ་གྱིས་མ་བསླུས་ན། །ས་མདའ་དགྲ་རུ་ཅི་ལ་ལྡང་། །ནུབ་མ་ཕམ་གཡུ་མཚོ་མེར་བ་ལ། །ལྟོ་དཀར་ཉ་ཡི་གཡང་ཆགས་པ། །དེ་འབྱུང་བ་ཆུ་ཡི་གར་མཁན་ཏེ། །ལྷ་དྲང་སྲོང་གཟིགས་མོར་ཆེའོ་སྐད། །ཁོང་འདོད་ཡོན་ཟས་ཕྱིར་འབྲང་བའི་ཚེ། །མི་ཟས་དོན་དུ་མི་གཉེར་ཞིང་། །སྒྱུ་མའི་ལུས་ཀྱིས་མ་བསླུས་ན། །ལྕགས་ཀྱུ་དགྲ་རུ་ཅི་ལ་ལྡང་། །བྱང་གི་བྲག་དམར་བསམ་ཡས་ལ། །བྱ་རྒྱལ་རྒོད་པོའི་གཡང་ཆགས་པ། །དེ་འདབ་ཆགས་བྱ་ཡི་དྲང་སྲོང་སྟེ། །འདབ་ཆགས་ཟིལ་གྱིས་གནོན་ནོ་སྐད། །ཁོང་རི་གསུམ་གྱི་རྩེ་ལ་གཟན་འཚོལ་ཚེ། ཤ་ཁྲག་གཟན་དུ་མི་
(༢༣༢)འཚོལ་ཞིང་། །གཤོག་སྒྲོ་ལྡེམ་གྱིས་མ་བསླུས་ན། །ཐག་རྙི་དགྲ་རུ་ཅི་ལ་ལྡང་། །བྲག་རྒོད་ཚང་ཅན་གྱི་ལིང་པ་ལ། །ཁྱོད་མི་ལ་རས་པའི་གཡང་ཆགས་པ། །རང་གཞན་དོན་གཉིས་སྒྲུབ་མཁན་དེ། །རྒྱུ་བྱང་ཆུབ་མཆོག་ཏུ་སེམས་བསྐྱེད་ནས། །ཚེ་གཅིག་ལུས་གཅིག་འདི་ཉིད་ཀྱིས། །རྩེ་གཅིག་སངས་རྒྱས་བསྒྲུབས་ནས་ཀྱང་། །འགྲོ་དྲུག་གི་ལམ་སྣ་འདྲེན་ནོ་སྐད། །ཁྱོད་རྩེ་གཅིག་བསམ་གཏན་སྒོམ་པའི་ཚེ། །བག་ཆགས་མཐུག་པས་རྒྱུ་བྱས་ཏེ། །རང་སེམས་འཁྲུལ་བའི་ཉེར་ལེན་གྱིས། །རྣམ་རྟོག་དགྲ་རུ་མ་ལངས་ན། །ང་བྲག་སྲིན་དགྲ་རུ་ཅི་ལ་ལྡང་། །ལར་བག་ཆགས་བདུད་འདི་སེམས་ལས་བྱུང་། །སེམས་ཀྱི་དེ་ཉིད་མ་ཤེས་ན། །ཁྱོད་སོངས་ཤིག་བྱས་པས་ང་མི་འགྲོ། །རང་སེམས་སྟོང་བར་མ་རྟོགས་ན། །འདྲེ་ང་བས་མི་ཚད་གཞན་ཡང་ཡོད། །རང་སེམས་རང་གིས་ངོ་ཤེས་ན། །མི་མཐུན་རྐྱེན་རྣམས་གྲོགས་སུ་འཆར། །ང་བྲག་སྲིན་མོ་ཡང་འབངས་སུ་མཆི། །ལར་མི་ཁྱོད་ཀྱི་ཡིད་ལ་འཁུ་འཁྲིག་ཡོད། །ད་དུང་རང་སེམས་གཏན་ལ་ཕོབ། །ད་དུང་འཁྲུལ་བའི་ཕུ་ཐག་ཆོད། །ཅེས་བྲག་སྲིན་མོས་དེ་སྐད་ཞུར་བྱུང་བས། རྗེ་བཙུན་གྱི་ཐུགས་ལ་ཤིན་ཏུ་འཐད་པ་ཞིག་བྱུང་སྟེ། དེའི་ལན་དུ་དྲན་པའི་དཔེ་བརྒྱད་ཀྱི་མགུར་འདི་གསུངས་སོ། །ཁྱོད་བདེན་ནོ་བདེན་ནོ་འདྲེ་མོ་ངན། །ཚིག་དེ་བས་བདེན་པ་ཡོད་རེ་སྐན། །ང་སྔོན་ཆད་རྒྱལ་ཁམས་འགྲིམས་འགྲིམས་ནས། །གླུ་དེ་བས་སྙན་པ་ཐོས་མ་མྱོང་། །མཁས་པ་བརྒྱ་ཡི་ཞལ་བསྡུར་ཡང་། །དོན་དེ་ལས་ལྷག་པ་ཡོད་མི་སྲིད། །འདྲེ་ཁྱོད་ཀྱི་ཁ་ནས་ལེགས་བཤད་བྱུང་། །ལེགས་བཤད་
(༢༣༣)གསེར་གྱི་ཐུར་མ་དེ། །མི་ཁོ་བོའི་རྣམ་ཤེས་སྙིང་ལ་བརྒྱབ། །ནང་དངོས་པོ་འཛིན་པའི་སྙིང་རླུང་བསལ། །མ་རིག་འཁྲུལ་བའི་མུན་ནག་སངས། །བློ་པདྨ་དཀར་པོ་ཁ་ཡང་ཕྱེ། །རང་རིག་གསལ་བའི་སྒྲོན་མེ་སྦར། །དྲན་པའི་ཡེ་ཤེས་ཏུར་གྱིས་སད། །དྲན་པ་སད་དམ་མ་སད་པ། །དགུང་སྔོན་གྱི་དཀྱིལ་དུ་ཡར་བལྟས་པས། །ཆོས་ཉིད་སྟོང་པ་ཏུར་གྱིས་དྲན། །ང་དངོས་པོའི་ཆོས་ལ་ཉམ་ང་མེད། །ཉི་ཟླ་གཉིས་ལ་ཕར་བལྟས་པས། །སེམས་ཉིད་འོད་གསལ་ཏུར་གྱིས་དྲན། །ང་བྱིང་རྒོད་གཉིས་ལ་ཉམ་ང་མེད། །རི་བོའི་རྩེ་ལ་ཕར་བལྟས་པས། །འགྱུར་མེད་ཏིང་འཛིན་ཏུར་གྱིས་དྲན། །ང་འཕོ་འགྱུར་རྟོག་པས་ཉམ་ང་མེད། །ཆུ་བོའི་གཞུང་ལ་མར་བལྟས་པས། །རྒྱུན་ཆད་མེད་པ་ཏུར་གྱིས་དྲན། །གློ་བུར་རྐྱེན་གྱིས་ཉམ་ང་མེད། །འཇའ་ཚོན་རི་མོ་མཐོང་ཙ་ན། །སྣང་སྟོང་ཟུང་འཇུག་ཏུར་གྱིས་དྲན། །ང་རྟག་ཆད་གཉིས་ལ་ཉམ་ང་མེད། །གཟུགས་བརྙན་ཆུ་ཟླ་མཐོང་ཙ་ན། །འཛིན་མེད་རང་གསལ་ཏུར་གྱིས་དྲན། །ང་གཟུང་འཛིན་རྟོག་པས་ཉམ་ང་མེད། །རང་རིག་སེམས་ལ་ཚུར་བལྟས་པས། །བུམ་ནང་མར་མེ་ཏུར་གྱིས་དྲན། །ང་གཏི་མུག་རྨོངས་པས་ཉམ་ང་མེད། །འདྲེ་ཁྱོད་ཀྱི་ཁ་ནས་དེ་ཐོས་པས། །སོ་སོ་རང་རིག་ཏུར་གྱིས་དྲན། །ང་བར་ཆོད་བགེགས་ལ་ཉམ་ང་མེད། །ཁྱོད་དེ་ཙམ་ལེགས་བཤད་ཤེས་ཤེས་ནས། །སེམས་ཀྱི་དེ་ཉིད་གོ་གོ་ནས། །ད་ལྟ་ལུས་ངན་འདྲེ་མོར་སྐྱེས། །ལས་ངན་གནོད་ཅིང་འཚེ་བར་བྱེད། །དེ་རྒྱུ་འབྲས་ཁྱད་དུ་བསད་པས་ལན། །ད་ཡང་འཁོར་བའི་ཉེས་དམིགས་སོམས། །ལས་མི་དགེ་བཅུ་བོ་གཏན་ནས་
(༢༣༤)སྤོངས། །ང་སེང་གེ་ལྟ་བུའི་རྣལ་འབྱོར་ཡིན། །ཉམ་ང་བག་ཚ་མེད་པ་ཡིན། །མི་ང་ཡིས་ཀུ་རེ་བྱས་པ་ལ། །ཁྱོད་བདེན་ནོ་མ་སྙམ་འདྲེ་མོ་ངན། །འདྲེ་ཁྱོད་ཀྱིས་དོ་ནུབ་མཐོ་འཚམས་པས། །སྔོན་གནོད་སྦྱིན་ཤ་ཟ་སྤུན་ལྔ་དང་། །རྒྱལ་པོ་བྱམས་པའི་སྟོབས་བཞིན་དུ། །སྨོན་ལམ་འབྲེལ་བས་མཚམས་སྦྱར་ནས། །བྱང་ཆུབ་སེམས་དང་ལྡན་གྱུར་ཏེ། །དུས་ཕྱི་མ་ང་ཡི་གདུལ་བྱར་ཤོག །ཅེས་གསུངས་པས། བྲག་སྲིན་མོ་ཤིན་ཏུ་དད་པར་གྱུར་ནས། ཞབས་ནས་བཟུང་བ་བཏང་སྟེ། ཡང་ལུས་མེད་པའི་སྐད་སྙན་པོ་ཞིག་གིས་བར་སྣང་ནས་ཚུར་ལ་ཞུ་བ་འདི་ལྟར་ཕུལ་ལོ། །ཀྱེ་མ་སྐལ་ལྡན་རྣལ་འབྱོར་པ། །བསོད་ནམས་བསགས་པས་དམ་ཆོས་སྤྱོད། །ངོ་མཚར་གཅིག་པུར་རི་ལ་བཞུགས། །ཐུགས་རྗེའི་སྤྱན་རྒྱང་འགྲོ་ལ་གཟིགས། །ང་པདྨ་ཐོད་ཕྲེང་རྒྱུད་པ་འཛིན། །དམ་ཆོས་ཚིག་གི་ཕྲེང་བ་ཉན། །ཚིག་ཐོས་པ་ཡོད་ཀྱང་ཞེན་པ་ཆེ། །ང་རྣལ་འབྱོར་ཡོངས་ཀྱི་ཚོགས་ཁང་འགྲིམས། །ལས་འཕྲོ་ཅན་རྣམས་དགེ་ལ་འགོད། །སྐལ་བ་ཅན་རྣམས་དོན་དང་སྤྲོད། །སེམས་བཟང་སྣང་བ་དཀར་ལགས་ཀྱང་། །ལུས་ངན་མ་སོས་ལྟོགས་ཚོར་ཆེ། །ལས་ངན་འཛམ་གླིང་གྲོང་ཁྱེར་མྱུལ། །ཟས་སུ་ཤ་དང་ཁྲག་ལ་དགའ། །མི་ཙམ་པོ་ཡོངས་ཀྱི་སེམས་ལ་འཇུག །སྨན་མཆོར་མོ་ཀུན་ལ་སྙིང་རླུང་སློང་། །ཕོ་མཆོར་པོ་ཀུན་ལ་མཚལ་རིས་བཏབ། །མིག་གིས་ཀུན་ལ་ལྟད་མོ་བལྟས། །སེམས་ཀྱིས་རྒྱལ་ཁམས་ཞེ་ལ་མནན། །ལུས་ཀྱིས་ཀུན་ལ་གཡེང་འདེགས་བྱས། །གནས་ནི་ལིང་པའི་བྲག་ལ་གནས། །དེ་ཚོ་ང་ཡི་སྤྱོད་འགྲོས་ཡིན། །ཁྱེད་ཀྱི་དྲུང་དུ་ཞུ་བ་
(༢༣༥)ལགས། །ལན་ཅིག་གླུ་རུ་བླངས་པ་ཡིན། །འོ་སྐོལ་མཇལ་བའི་དགའ་སྤྲོ་ཡིན། །ད་ལྟ་མཚར་བའི་ཞུ་དོན་ཡིན། །རྣལ་འབྱོར་ཁྱེད་ཀྱི་ཞབས་ཏོག་ཡིན། །ང་རང་དད་པའི་གསལ་ཚིག་ཡིན། །གླུ་དྲང་གཏམ་ཕུལ་བས་མཉེས་པར་ཤོག །ཅེས་ཟེར་བས། རྗེ་བཙུན་གྱི་ཐུགས་ལ། མི་མ་ཡིན་གྱི་རིགས་འདི་ལ་ནན་གྱིས་དྲི་བ་བྱས་དམ་ལ་གདགས་དགོས་དགོངས་ནས་མོའི་ཞུས་ལན་དུ་མགུར་འདི་གསུངས་སོ། །འོ་ན་ཉོན་ཅིག་དམན་མོ་ཁྱོད། །སློབ་དཔོན་བཟང་སྟེ་སློབ་མ་ངན། །ལྷ་ཆོས་ཐོས་བསམ་བྱས་པ་རྣམས། །དོན་མ་གོ་ཚིག་གི་འཕྲེང་བ་བཟུང་། ཁས་ལེགས་ལེགས་སྨྲས་ཀྱང་ལག་ལེན་མེད། །ཁྲམ་གཏམ་ཁ་ཡི་སྟོང་བཤད་དེས། །རང་རྒྱུད་དྲི་མ་འདག་མི་སྲིད། །ཁྱོད་སྔོན་གྱི་བག་ཆགས་ངན་པ་དང་། །འཕྲལ་དུ་ལས་ངན་བསགས་པའི་ཕྱིར། །སྡོམ་པ་དམ་ཚིག་ཁས་ལེན་ཉམས། །དེ་ཡི་སྟོབས་ཀྱིས་དམན་མོར་སྐྱེས། །ལུས་སྡུག་བསྔལ་ཤ་ཟའི་གྲོང་དུ་རྒྱུག །ངག་མི་བདེན་ངོ་ལྐོག་རྫུན་ཚིག་མང་། །སེམས་མི་དགེ་འགྲོ་བའི་སྲོག་ལ་གནོད། །ལུས་ངན་པའི་གཟུགས་སུ་སྐྱེས་པ་དེ། །ལས་རྒྱུ་འབྲས་ཁྱད་གསོད་ཆེས་པས་ལན། །ད་འཁོར་བའི་ཉེས་དམིགས་བསམ་ཤེས་ན། །ལས་མི་དགེ་བྱས་ཚད་བཤགས་པ་གྱིས། །དགེ་བ་བསྒྲུབ་པར་ཁ་ཡིས་ལོངས། །ང་སེང་གེ་ལྟ་བུར་འཇིགས་པ་མེད། །གླང་ཆེན་ལྟ་བུར་ཉམ་ང་མེད། །སྨྱོན་པ་ལྟ་བུར་བཟའ་གཏད་མེད། །ང་ཡིས་ཁྱོད་ལ་བདེན་ཚིག་བརྗོད། །ཁྱོད་ཀྱིས་ད་དུང་དྲང་གཏམ་སྨྲོས། །མི་ང་ལ་བར་ཆད་མཐོ་འཚམས་པ། །འདྲེ་ཁྱོད་ཀྱི་གཏན་གྱི་སོ་ནམ་ཡིན། །
(༢༣༦)ཆོས་སྨོན་ལམ་འབྲེལ་བའི་སྟོབས་བཞག་ནས། །མ་འོངས་དུས་ན་རྗེས་སུ་འཛིན། །དེ་རྟོག་དཔྱོད་མཛོད་ཅིག་དམན་མོ་འཁྲུལ། །ཞེས་གསུངས་པས། བྲག་སྲིན་མོས་ལུས་སྔ་མ་ལྟར་བསྟན་ནས་དྲང་གཏམ་གྱི་ཞུ་དོན་འདི་གླུ་རུ་ཕུལ་ལོ། །རྗེ་དུས་གསུམ་སངས་རྒྱས་ཀུན་གྱི་གཙོ། །རྡོ་རྗེ་འཆང་ཆེན་དྲང་སྲོང་ལུས། །ངོ་མཚར་བསྟན་པའི་བདག་པོ་མཛད། །ཡ་མཚན་བྱང་ཆུབ་སེམས་བསྐྱེད་བཟང་། །ངེད་དམན་མོ་མིང་སྲིང་བསོད་ནམས་ཆེ། །ཁྱེད་ཀྱི་གསུང་ཐོས་གོ་བ་སྐྱེས། །ངས་དང་པོར་སློབ་དཔོན་གཉན་གྱི་བཀའ། །དམ་ཆོས་ལྷ་ཆོས་ཐོས་བསམ་བྱས། །བར་དུ་ལས་འཕྲོ་ངན་ལ་ཞུགས། །ཉོན་མོངས་གདུག་རྩུབ་བཟོད་བསྲན་མེད། །དེས་ན་ལུས་ངན་དམན་མོར་སྐྱེས། །འགྲོ་བ་སེམས་ཅན་ཐམས་ཅད་ལ། །ཕན་ཡང་བཏགས་ཏེ་གནོད་ཀྱང་བསྐྱལ། །དུས་ན་ནིང་སོང་བའི་སྔོན་རོལ་ན། །ལིང་པའི་བྲག་ལ་སྒོམ་ཆེན་ཁྱོད། །བྱོན་ནས་གཅིག་པུར་སྒྲུབ་པ་མཛད། །ངེད་ཀྱང་རེས་དགའ་རེས་མ་དགའ། །དགའ་བའི་ཕྱིར་ན་དོ་ནུབ་མཇལ། །མ་དགའི་ཕྱིར་ན་ཞབས་ལ་འཇུས། །དེ་གནོང་བའི་ཕྱིར་ན་རྗེ་ལ་བཤགས། །དུས་ད་ནས་དམན་མོའི་གདུག་རྩུབ་སྤོང་། །ཆོས་སྙིང་ནས་བྱེད་ལ་སྟོང་གྲོགས་བྱེད། །མ་འོངས་དུས་ན་བདག་ཅག་རྣམས། །བདེ་ཆེན་ལྗོན་པའི་བསིལ་གྲིབ་ཀྱིས། །དུག་ལྔས་ཉིན་མཚན་གདུངས་པ་ཡི། །ལས་ངན་འདྲེ་མོ་བསྐྱབ་ཏུ་གསོལ། །ཁྱོད་ཀྱི་བཀའ་ལ་བརྟེན་ནས་སུ། །འདི་ནས་བཟུང་སྟེ་བྱང་ཆུབ་བར། །གདུག་པའི་བསམ་པ་ཀུན་ཞི་སྟེ། །རྣལ་འབྱོར་སྐྱོབ་པའི་
(༢༣༧)སྲུང་མ་བྱེད། །སྒྲུབ་པ་པོ་ཡི་སྟོང་གྲོགས་བྱེད། །སྒོམ་ཆེན་ཀུན་གྱི་འབངས་མོ་བྱེད། །ཆོས་མཛད་ཀུན་གྱི་ཁ་འཛིན་བྱེད། །དམ་ཚིག་ཅན་གྱི་སྟོང་གྲོགས་བྱེད། །བསྟན་པ་སྲུང་ཞིང་ཞབས་ཏོག་བྱེད། །ཅེས་སྨོན་ལམ་བཟང་པོ་བརྗོད་ཅིང་། སྒྲུབ་པ་བྱེད་པ་ཐམས་ཅད་ཀྱི་མགོན་བྱེད། གནོད་པ་མི་སྐྱེལ་བར་ཁས་བླངས་དམ་བཅས་ཤིན་ཏུ་དད་པར་གྱུར་པ་དང་། རྗེ་བཙུན་གྱིས་བྲག་སྲིན་མོ་རྗེས་སུ་འཛིན་པའི་མགུར་འདི་གསུངས་སོ། །ང་འཁོར་བ་སྤངས་པའི་བན་དེ་ཡིན། །བླ་མ་དམ་པའི་སྲས་པོ་ཡིན། །གདམས་ངག་རིན་ཆེན་གཏེར་མཛོད་ཡིན། །དམ་ཆོས་སྙིང་ནས་སྒྲུབ་མཁན་ཡིན། །ཆོས་ཉིད་རྟོགས་པའི་རྣལ་འབྱོར་ཡིན། །སེམས་ཅན་རྣམས་ཀྱི་མ་རྒན་ཡིན། །སྙིང་སྟོབས་ཅན་གྱི་སྐྱེས་བུ་ཡིན། །ཤཱཀྱ་ཐུབ་པའི་སྲོལ་འཛིན་ཡིན། །བྱང་ཆུབ་སེམས་ཀྱི་བདག་ཉིད་ཡིན། །བྱམས་པ་སྔོན་ནས་བསྒོམས་པ་ཡིན། །སྙིང་རྗེས་གདུག་པ་འདུལ་བ་ཡིན། །ལིང་པ་བྲག་ལ་གནས་པ་ཡིན། །ཡེངས་པ་མེད་པར་སྒོམ་མཁན་ཡིན། །ཁྱོད་དགའ་བར་སེམས་སམ་དམན་མོ་འཁྲུལ། །དགའ་བར་མ་ཚོར་ཁྱེད་ཅག་ངན། །འདྲེ་ཁྱོད་པས་ཆེ་བ་ངར་འཛིན་ཡིན། །འདྲེ་ཁྱོད་པས་མང་བ་འདུ་ཤེས་ཡིན། །འདྲེ་ཁྱོད་པས་ངན་པ་བསམ་ངན་ཡིན། །འདྲེ་ཁྱོད་པས་རྒོད་པ་རྣམ་རྟོག་ཡིན། །འདྲེ་ཁྱོད་པས་ལང་ཤོར་བག་ཆགས་ཡིན། །འདྲེ་འདྲེ་རུ་བཟུང་ན་གནོད་པ་ཡིན། །འདྲེ་སྟོང་པར་ཤེས་ན་སོང་བ་ཡིན། །འདྲེ་ཆོས་ཉིད་དུ་གོ་ན་གྲོལ་བ་ཡིན། །འདྲེ་ཕ་མར་ཤེས་ན་ཟིན་པ་ཡིན། །འདྲེ་སེམས་སུ་ཤེས་ན་རྒྱན་དུ་འཆར། །དེ་ཡིན་ལུགས་ཤེས་
(༢༣༨)པས་ཐམས་ཅད་གྲོལ། །འདྲེ་དམན་མོས་ཞུ་ཚིག་བརྡ་རུ་བསྟན། །མི་ཁོ་བོས་གདུལ་བྱར་དམ་ལ་བཏགས། །ཁྱེད་ཅག་དམ་བཅས་ཚིག་བཞིན་སྒྲུབས། །བདག་ཅག་རྡོ་རྗེ་འཛིན་པ་ཡི། །དམ་ཚིག་གཉན་པོའི་གསུང་མ་གཅོག །ཐུགས་རྗེ་དྲག་པོ་སུན་མ་འབྱིན། །ལུས་ངག་བསམ་པའི་བར་མ་གཅོད། །གལ་ཏེ་དམ་ལས་འདས་གྱུར་ན། །རྡོ་རྗེ་དམྱལ་བར་འགྲོ་བར་ངེས། །དེ་དོ་གལ་ཆེ་བས་ལན་གསུམ་བསྐྱར། །དེ་གོ་བར་གྱིས་ལ་ལག་ལེན་སྐྱོངས། །འོ་སྐོལ་སྨོན་ལམ་བཟང་བས་ཕྲད། །མ་འོངས་ཚེ་ན་བདེ་ཆེན་ཞིང་། །རབ་འབྱམས་བསམ་གྱིས་མི་ཁྱབ་པར། །བྱང་ཆུབ་སེམས་དང་ཁྱོད་ལྡན་ནས། །གདུལ་བྱ་འཁོར་གྱི་དང་པོར་སྐྱེ། །རྡོ་རྗེ་སེམས་དཔའི་བུད་མེད་བྱ། །ཞེས་གསུངས་ཏེ། དམ་ལ་བཏགས་པས། བྲག་སྲིན་མོས་རྗེ་བཙུན་ལ་ཕྱག་དང་སྐོར་བ་མང་དུ་བྱས། ཅི་གསུང་བ་སྒྲུབ་པར་ཁས་བླངས་ནས་འཇའ་ཡལ་བ་བཞིན་སོང་བའི་མཐར་ནམ་ལངས་ཉི་མ་ཤར་བ་དང་། བྲག་སྲིན་མོ་མིང་སྲིང་འཁོར་དང་བཅས་པ། མི་སྐྱེས་པ་དང་བུད་མེད་རྒྱན་བཟང་པོ་བཏགས་པ། མཛེས་ཤིང་ཡིད་དུ་འོང་བའི་རྣམ་པས། ཚོགས་དང་མཆོད་པ་མང་པོ་ཁྱེར་ནས་བྱུང་སྟེ། རྗེ་བཙུན་ལ་མཆོད་པ་ཕུལ་ནས། བྲག་སྲིན་མོས་བདག་ལས་ངན་གྱིས་འདྲེ་མོའི་ལུས་བླངས། བག་ཆགས་ངན་པས་ཁ་བསྒྱུར། །བསམ་པ་ངན་པས་ད་ཅི་མཐོ་འཚམས་པ་བཟོད་པར་གསོལ། ད་ཕྱིན་ཆད་རྣལ་འབྱོར་པ་ཁྱེད་གསུངས་པའི་བཀའ་ཉན་ཅིང་འབངས་སུ་མཆི་བས། ད་རྗེ་བཙུན་ཁྱེད་རང་གི་ཐུགས་ལ་འཁྲུངས་པའི་ངེས་དོན་གྱི་ཆོས་ཤིག་གནང་བར་ཞུ་ཞུས་ནས་ཞུ་དོན་དུ་གླུ་འདི་ཕུལ་
(༢༣༩)ལོ། །ཨེ་མ་ཡ་རབས་མཛངས་ཀྱི་བུ། །བསོད་ནམས་བསགས་པའི་སྐལ་བ་ཅན། །རྒྱུད་པ་བཟང་པོའི་བྱིན་རླབས་ཅན། །སྒྲུབ་པ་མཛད་པའི་སྙིང་རུས་ཅན། །གཅིག་པུར་བཞུགས་པའི་སྙིང་སྟོབས་ཅན། །ཟབ་མོ་དོན་གྱི་སྒྲུབ་ལ་བརྩོན། །འདྲེ་བར་གཅོད་ཡོང་བར་མི་སྲིད་པས། །ནང་རྩ་རླུང་རྟགས་ཀྱི་རྟེན་འབྲེལ་ལས། །སྒྱུ་མ་གར་གྱིས་དོན་སྟོན་པས། །ངེད་ཅག་ཁྱེད་ཀྱི་སེམས་དང་བསྡོངས། །སྨོན་ལམ་བཟང་པོས་སྔོན་ནས་འབྲེལ། །སྔོན་ཆད་གྲུབ་ཐོབ་མང་མཇལ་ཡང་། །བཀའ་དྲིན་བྱིན་རླབས་ཁྱེད་ལས་ཐོབ། །ད་དམན་མོ་བདག་གིས་ཞུ་འབུལ་བ། །ཆོས་དྲང་དོན་ཐེག་དམན་མགོ་བསྐོར་འདིས། །ལས་ཉོན་མོངས་ཐུལ་བ་དཀའ་བར་མཆིས། ཁ་བཤད་སྟོང་པའི་མཆོར་མགྲོན་དེ། །རྐྱེན་སྡུག་བསྔལ་བྱུང་ན་འབྲོ་བར་ངེས། །ཆོས་ཀྱིས་དྲེད་པའི་སློབ་དཔོན་དེ། །རང་དོན་མ་གྲུབ་ཁྲོ་བར་འདུག །རྗེ་དུས་གསུམ་སངས་རྒྱས་སྤྲུལ་པའི་སྐུ། །ཆོས་ཉིད་ངེས་པའི་དོན་རྟོགས་པ། །ཐུགས་ལ་འཁྲུངས་པ་ཟབ་མོའི་དོན། །གནད་ལ་དྲིལ་བའི་མན་ངག་དབྱངས། །ངེས་དོན་མཐར་ཐུག་སྐྱེལ་ས་དེ། །བདག་ཅག་མིང་སྲིང་འཁོར་བཅས་པ། །རྡོ་རྗེའི་གསང་ཚིག་དམ་པའི་དོན། །ཡེ་ཤེས་ཆེན་པོ་འོད་གསལ་བ། །མཆོག་གི་འོད་གསལ་གནང་དུ་གསོལ། །ངེས་དོན་ཟབ་མོ་གསང་བའི་རྒྱ། །ཐོས་པས་ངན་སོང་ལྟུང་མི་སྲིད། །བསྒོམས་པས་འཁོར་བར་འཁྱམས་མི་སྲིད། །སྦ་བསྲི་མེད་པར་གནང་བར་ཞུ། །ཞེས་ཞུས་པས། རྗེ་བཙུན་གྱིས། ད་དུང་ཁྱོད་ཚོས་
(༢༤༠)ངེས་དོན་སྒོམ་མི་ནུས། གལ་ཏེ་ནུས་ན་ང་ལ་སྲོག་སྙིང་དང་དམ་བཅའ་དྲག་པོ་འབུལ་དགོས་གསུངས་པས། འགྱུར་བ་མེད་པའི་སྲོག་སྙིང་ཕུལ་ནས། ད་ཕྱིན་ཆད་རྗེ་བཙུན་ཅི་གསུང་གི་བཀའ་སྒྲུབ་ཅིང་། ཆོས་མཛད་ཐམས་ཅད་ཀྱི་སྟོང་གྲོགས་བྱེད་པར་དམ་བཅའ་ཕུལ་བས། རྗེ་བཙུན་གྱིས་ཀྱང་མོའི་ཞུས་ལན་དུ་ངེས་པ་དོན་གྱི་ཆོས་ཐིམ་པ་ཉེར་བདུན་འདི་མགུར་དུ་གསུངས་སོ། །རྗེ་སྦས་པའི་སངས་རྒྱས་མི་གཟུགས་ཅན། །མཚན་བརྗོད་པར་དཀའ་བའི་ལོ་ཙཱ་བ། །ཕ་བཀའ་དྲིན་ཅན་གྱི་ཞབས་ལ་འདུད། །ང་རིག་བྱེད་གླུ་མཁན་མ་ཡིན་ཏེ། །འདྲེ་ཁྱོད་ཀྱིས་གླུ་ལོངས་གླུ་ལོངས་ཟེར། །ད་རེས་གནས་ལུགས་ཀྱི་དབྱངས་ཤིག་ལེན། །འབྲུག་དང་གློག་དང་ལྷོ་སྤྲིན་གསུམ། །བྱུང་ཡང་ནམ་མཁའ་རང་ལས་བྱུང་། །ཐིམ་ཡང་ནམ་མཁའ་རང་ལ་ཐིམ། །འཇའ་དང་ན་བུན་ཁུག་རྣ་གསུམ། །བྱུང་ཡང་བར་སྣང་རང་ལས་བྱུང་། །ཐིམ་ཡང་བར་སྣང་རང་ལ་ཐིམ། །རྩི་བཅུད་དང་ལོ་ཏོག་འབྲས་བུ་གསུམ། །བྱུང་ཡང་ས་གཞི་རང་ལས་བྱུང་། །ཐིམ་ཡང་ས་གཞི་རང་ལ་ཐིམ། །ནགས་ཚལ་མེ་ཏོག་ལོ་འདབ་གསུམ། །བྱུང་ཡང་རི་བོ་རང་ལས་བྱུང་། །ཐིམ་ཡང་རི་བོ་རང་ལ་ཐིམ། །ཆུ་ཀླུང་དང་ཆུ་བུར་ཆུ་རླབས་གསུམ། །བྱུང་ཡང་རྒྱ་མཚོ་རང་ལས་བྱུང་། །ཐིམ་ཡང་རྒྱ་མཚོ་རང་ལ་ཐིམ། །བག་ཆགས་དང་ཞེན་ཆགས་འཛིན་ཆགས་གསུམ། །བྱུང་ཡང་ཀུན་གཞི་རང་ལས་བྱུང་། །ཐིམ་ཡང་ཀུན་གཞི་རང་ལ་ཐིམ། །རང་རིག་དང་རང་གསལ་རང་གྲོལ་གསུམ། །བྱུང་ཡང་སེམས་ཉིད་རང་ལས་
(༢༤༡)བྱུང་། །ཐིམ་ཡང་སེམས་ཉིད་རང་ལ་ཐིམ། །སྐྱེ་མེད་དང་འགག་མེད་བརྗོད་མེད་གསུམ། །བྱུང་ཡང་ཆོས་ཉིད་རང་ལས་བྱུང་། །ཐིམ་ཡང་ཆོས་ཉིད་རང་ལ་ཐིམ། །འདྲེར་སྣང་དང་འདྲེར་འཛིན་འདྲེར་རྟོག་གསུམ། །བྱུང་ཡང་རྣལ་འབྱོར་རང་ལས་བྱུང་། །ཐིམ་ཡང་རྣལ་འབྱོར་རང་ལ་ཐིམ། །ལར་བགེགས་རྣམས་སེམས་ཀྱི་ཆོ་འཕྲུལ་ཏེ། །རང་སྣང་སྟོང་པར་མ་རྟོགས་པས། །འདྲེ་རང་རྒྱུད་དུ་འཛིན་ན་རྣལ་འབྱོར་འཁྲུལ། །ལར་འཁྲུལ་བའི་རྩ་བ་སེམས་ལས་བྱུང་། །སེམས་ཀྱི་ངོ་བོ་རྟོགས་པ་ལས། །འོད་གསལ་འགྲོ་འོང་མེད་པར་མཐོང་། །ཕྱི་ཡུལ་གྱི་སྣང་བ་འཁྲུལ་བའི་སེམས། །སྣང་བའི་མཚན་ཉིད་བརྟགས་པ་ལས། །སྣང་སྟོང་གཉིས་སུ་མེད་པར་རྟོགས། །ལར་སྒོམ་པ་ཉིད་ཀྱང་རྟོག་པ་ལ། །མི་སྒོམ་པ་ཡང་རྟོག་པ་སྟེ། །སྒོམ་དང་མི་སྒོམ་གཉིས་སུ་མེད། །གཉིས་འཛིན་ལྟ་བ་འཁྲུལ་བའི་གཞི། །མཐར་ཐུག་དོན་ལ་ལྟ་བ་མེད། །འདི་ཀུན་སེམས་ཀྱི་མཚན་ཉིད་དེ། །ནམ་མཁའི་མཚན་ཉིད་དཔེར་བཞག་ནས། །དོན་ཆོས་ཉིད་གཏན་ལ་འབེབས་པ་ཡིན། །ད་ཁྱོད་ལྟ་བ་བློ་འདས་ཀྱི་དོན་ལ་ལྟོས། །སྒོམ་པ་ཡེངས་མེད་ཀྱི་ངང་དུ་ཞོག །སྤྱོད་པ་ཤུགས་འབྱུང་འགག་མེད་སྐྱོངས། །འབྲས་བུ་རེ་དོགས་ཐ་སྙད་སྤོངས། །འདྲེ་ཁྱོད་ཀྱི་ཆོས་སྐལ་དེ་ལ་མཛོད། །ང་སྟོང་དབྱངས་གླུ་ལ་འབྱམས་མི་ཁོམ། །ཁྱོད་དྲི་རྟོག་མ་མང་ཁ་རོག་སྡོད། །འདྲེས་གླུ་ལོངས་ཟེར་བས་བླངས་པ་ཡིན། །ད་ལྟ་ཁོ་བོའི་སྨྱོན་ཚིག་ཡིན། །འདྲེ་ཁྱོད་ཀྱིས་ཉམས་སུ་ལེན་ནུས་ན། །ཟས་སུ་བདེ་ཆེན་ཟས་ལ་ཟོ། །སྐོམ་དུ་ཟག་མེད་བདུད་རྩི་འཐུངས། །ལས་སུ་
(༢༤༢)རྣལ་འབྱོར་སྟོང་གྲོགས་མཛོད། །ཅེས་གསུངས་པས། བྲག་སྲིན་མོ་འཁོར་བཅས་མཆོག་ཏུ་དད་པར་གྱུར་ནས། ཕྱག་དང་སྐོར་བ་མང་དུ་བྱས། བཀའ་དྲིན་ཆེ་ཞེས་བརྗོད་ནས་འཇའ་ཡལ་བ་བཞིན་སོང་ངོ་། །དེ་ཕྱིན་ཆད་རྗེ་བཙུན་གྱི་བཀའ་བཞིན་གནས་དེར་སྒོམ་ཆེན་སུ་བཞུགས་རུང་མི་གནོད་ཅིང་ཆོས་དང་མཐུན་པའི་སྟོང་གྲོགས་བྱེད་དོ། །ལིང་པ་བྲག་སྲིན་མོའི་སྐོར་རོ། །རག་མའི་སྐོར་སྔ་མ། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་ལིང་པ་བྲག་ནས་རི་བོ་དཔལ་འབར་ལ་སྒོམ་དུ་འབྱོན་དགོངས་ནས་བྱོན་པའི་ཚེ། རག་མའི་ཡོན་བདག་རྣམས་ལ་རི་བོ་དཔལ་འབར་དུ་འབྱོན་པའི་ལོ་རྒྱུས་གསུངས་པས། ཁོང་རྣམས་ན་རེ། རི་བོ་དཔལ་འབར་བས། རི་བོ་དཔལ་འབར་གྱི་འགག་ན། གནས་དགོན་རྫོང་སྐྱིད་པོ་རང་ཞིག་ཡོད། དེར་བཞུགས་ན་དགའ། །རི་བོ་དཔལ་འབར་གྱི་ལམ་རྒྱུས་ངེད་ཚོ་ལའང་མེད། དགོན་རྫོང་དེར་བཞུགས་ན་ངེད་ཀྱིས་ལམ་མཁན་གཏོང་ཟེར་བས། ཐུགས་དགོངས་ལ་ཐོག་མར་གནས་དེར་བསྡད། དེ་ནས་རི་བོ་དཔལ་འབར་ལ་བལྟར་འགྲོ་དགོངས་ཏེ། ཁོང་ཚོའི་ལམ་མཁན་མི་དགོས་དགོངས་ནས། ཁྱེད་ཀྱི་ལམ་མཁན་མི་དགོས་ང་རང་གིས་རྙེད་གསུངས་པས། ལམ་མཁན་མེད་པའི་རྩད་ཆོད་ས་མེད། ཁྱེད་ལ་ལམ་མཁན་ཡོད་པ་ཨེ་ཡིན་ཟེར་བ་ལ། ཡོད་གསུངས་པས། སུ་ཇི་སྐད་བྱ་བ་ཡོད་ཟེར་བའི་ལན་དུ་མགུར་འདི་གསུངས་སོ། །
(༢༤༣)མཚན་ལྡན་བླ་མ་དམ་པ་དེ། །མུན་པ་སེལ་བའི་ལམ་མཁན་ཡིན། །གྲང་དྲོ་མེད་པའི་རས་རྐྱང་འདི། །ཞེན་པ་སྤོང་བའི་ལམ་མཁན་ཡིན། །གདམས་ངག་བསྲེ་འཕོ་སྐོར་གསུམ་འདི། །བར་དོ་སེལ་བའི་ལམ་མཁན་ཡིན། །རླུང་སེམས་ལས་སུ་རུང་བ་འདི། །རྒྱལ་ཁམས་བསྐོར་བའི་ལམ་མཁན་ཡིན། །ཕུང་བོ་གཟན་དུ་བསྐྱུར་བ་འདི། །བདག་འཛིན་འདུལ་བའི་ལམ་མཁན་ཡིན། །དབེན་པའི་གནས་སུ་སྒོམ་པ་འདི། །བྱང་ཆུབ་སྒྲུབ་པའི་ལམ་མཁན་ཡིན། །ལམ་མཁན་དྲུག་གིས་སྣ་དྲངས་ནས། །བྱང་ཆུབ་རྫོང་ལ་འདུག་ཀྱང་འཚལ། །ཞེས་གསུངས་ནས་རག་མ་ཕུའི་གནས་སུ་བྱོན་ཏེ། དེ་མན་ཆད་གནས་དེ་ལ་བྱང་ཆུབ་རྫོང་དུ་གྲགས་སོ། །དེ་ནས་རྗེ་བཙུན་གནས་དེར་ཆུ་བོ་རྒྱུན་གྱི་ཏིང་ངེ་འཛིན་ལ་བཞུགས་པ་ལས། དུས་ནམ་ཞིག་གི་ཚེ་ནམ་གུང་ལ་བབ་པ་དང་། དམག་གི་དུང་སྒྲ་དང་བསོ་སྒྲ་མང་པོ་བྱུང་བས། ཡུལ་པ་རྣམས་ལ་དགྲ་བྱུང་བ་ཡིན་ནམ་དགོངས་ནས། སྙིང་རྗེ་དྲག་པོ་འཁྲུངས་པའི་ཏིང་ངེ་འཛིན་གྱི་ངང་ལ་བཞུགས་པ་ལས་ཇེ་ཉེ་ཇེ་ཉེར་སོང་སྟེ། འོད་དམར་པོ་ཆེན་པོ་ཞིག་ཐལ་བྱུང་བ་ལས་ཅི་ཡིན་ནམ་སྙམ་གཟིགས་པས། ཐང་ཐམས་ཅད་མེ་འཁྲིགས་ཤིང་ས་དང་བར་སྣང་ཐམས་ཅད་འཇིགས་ཤིང་ཡ་ང་བའི་དམག་ཚོགས་ཀྱིས་གང་འདུག་པ་རྣམས་ཀྱིས་མེ་སྦོར་བ་དང་། ཆུ་འཁྲུག་པ་དང་། རི་བསྙིལ་བ་དང་། ས་གཡོ་བ་དང་། མཚོན་བསྣུན་པ་ལ་སོགས་པ་ཆོ་འཕྲུལ་སྣ་ཚོགས་སྟོན་ཅིང་། ཁྱད་པར་སྒྲུབ་ཕུག་བཤིག་པ་ལ་སོགས་པ་དང་། མི་སྙན་པ་སྣ་ཚོགས་བརྗོད་དུ་བྱུང་བ་ལས། རྗེ་བཙུན་གྱི་ཐུགས་ལ་མི་མ་
(༢༤༤)ཡིན་གྱིས་བར་ཆད་དང་མཐོ་འཚམས་པ་ཡིན་པར་དགོངས་ནས། ཨ་ཙ་མ་སྲིད་པ་ཐོག་མེད་དུས་ནས་ལས་ངན་བསགས་པས་རིགས་དྲུག་གི་གནས་སུ་འཁྱམས། དེའི་ནང་ནས་ཀྱང་མཁའ་ལ་རྒྱུ་བའི་ཡི་དྭགས་སུ་སྐྱེས། བསམ་ངན་སྦྱོར་རྩུབ་ཀྱིས་གཞན་ལ་གནོད་སེམས་དང་ལྡན་པ་འདི་རྣམས་ཀྱིས་སྐྱེ་འགྲོ་མང་པོའི་སྲོག་ལ་འཚེ་ཞིང་གནོད་པ་བྱེད་པར་འདུག་པས། ད་ཡང་ཐར་མེད་ཀྱི་དམྱལ་བར་སྐྱེས་ནས་བཟོད་མེད་ཀྱི་སྡུག་བསྔལ་མྱོང་དགོས་པ་འདི་རྣམས་སྙིང་རེ་རྗེ་དགོངས་ནས་མགུར་འདི་གསུངས་སོ། །ཐུགས་བྱམས་པའི་ནམ་མཁའ་ཡངས་པ་ལ། །སྙིང་རྗེའི་ཆུ་འཛིན་རབ་བསྡུས་ཏེ། །འཕྲིན་ལས་ཀྱི་ཆར་རྒྱུན་ཕབ་ནས་ཀྱང་། །གདུལ་བྱའི་ལོ་ཏོག་སྨིན་མཛད་པའི། །སྒྲ་སྒྱུར་མར་པའི་ཞབས་ལ་འདུད། །འགྲོ་བ་ནམ་མཁའ་དང་མཉམ་པའི་སེམས་ཅན་རྣམས། །རྣམ་མཁྱེན་སངས་རྒྱས་ཀྱི་གོ་འཕང་ཐོབ་པར་བྱིན་གྱིས་རློབས། །ཁྱེད་འདིར་འཚོགས་གནོད་སྦྱིན་མི་མ་ཡིན། །ཡིད་མཁའ་ལ་རྒྱུ་བ་མཁའ་འགྲོའི་ཚོགས། །ཟས་ཡིད་ལ་བཏགས་པའི་ཡི་དྭགས་རྣམས། །ལས་མི་དགེ་སྤྱད་པའི་རྣམ་སྨིན་གྱིས། །དུས་ད་ལྟ་ཡི་དྭགས་ལུས་སུ་སྐྱེས། །ཚེ་འདིར་ཡང་གཞན་ལ་གནོད་པའི་མཐུས། །ཕྱི་མ་དམྱལ་བའི་གནས་སུ་སྐྱེ། །དེ་རྒྱུ་འབྲས་ཟུར་ཙམ་སྟོན་པའི་གླུ། །ད་དགོས་དོན་གཏན་ལ་ཕབ་ཙ་ན། །ང་ནི་བཀའ་བརྒྱུད་བླ་མའི་བུ། །གཞི་དད་པ་སྐྱེས་ནས་ཆོས་ལ་ཞུགས། །ལས་རྒྱུ་འབྲས་ཤེས་ནས་དཀའ་བ་སྤྱད། །ལམ་བརྩོན་འགྲུས་བསྐྱེད་ནས་བསྒོམས་པའི་མཐུས། །འབྲས་བུ་སེམས་ཀྱི་གནས་ལུགས་མཐོང་། །
(༢༤༥)ངས་སྣང་བ་ཐམས་ཅད་སྒྱུ་མར་ཤེས། །བདག་ཏུ་འཛིན་པའི་ནད་ལས་གྲོལ། །གཟུང་འཛིན་འཁོར་བའི་འཆིང་ཐག་བཅད། །འགྱུར་མེད་ཆོས་སྐུའི་རྒྱལ་ས་ཟིན། །བློ་ཡ་ང་བྲལ་བའི་རྣལ་འབྱོར་ལ། །ཁྱོད་གནོད་པའི་སེམས་ཀྱིས་བར་གཅོད་པ། །ལུས་ངལ་བ་ཙམ་ཞིག་བྱུང་བར་ཟད། །སེམས་སླར་ཡང་ཁོང་ཁྲོ་སྐྱེ་བའི་རྒྱུ། །མི་ང་ཡི་ཤེས་རྒྱུད་ཀུན་གཞི་ལ། །འདྲེ་ཁྱོད་པས་ཚངས་པའི་འཇིག་རྟེན་ནས། །དམྱལ་ཁམས་བཅོ་བརྒྱད་ཡན་ཆད་ཀྱི། །འགྲོ་བ་རིགས་དྲུག་དགྲར་ལངས་ཀྱང་། །འཇིགས་སོ་སྙམ་པ་ཡོད་རེ་སྐན། །ད་འདིར་འཚོགས་གནོད་སྦྱིན་མི་མ་ཡིན། །ཁྱེད་མཐུ་སྟོབས་རྫུ་འཕྲུལ་དཔུང་བསྐྱེད་ལ། །མི་ང་ལ་གནོད་པ་མ་འཁྱོལ་བར། །ཁྱེད་འདི་ནས་གཞན་དུ་སོང་གྱུར་ན། །སྔོན་ཆད་བྱས་པ་དོན་མེད་ཡིན། །སླར་ཡང་ཁྱེད་རང་ངོ་རེ་ཚ། །རེམ་ཞིག་རེམ་ཞིག་འདྲེ་ཚོགས་རྣམས། །ཞེས་གསུངས་ནས། ཆོས་ཉིད་ཀྱི་ངང་དུ་མཉམ་པར་བཞག་པས། འདྲེ་ཚོགས་རྣམས་སླར་དད་པར་གྱུར་ཏེ། ཕྱག་དང་སྐོར་བ་མང་དུ་བྱས། ཞབས་སྤྱི་བོར་བླངས། ཁྱེད་བརྟན་པ་ཐོབ་པའི་རྣལ་འབྱོར་པར་གདའ་བ། ངེད་ཀྱིས་ངོ་མ་ཤེས། སྔོན་ཆད་མཐོ་འཚམས་པ་བཟོད་པར་གསོལ། ད་ཕྱིན་ཆད་ཅི་གསུང་གི་བཀའ་བསྒྲུབ་པས་ཆོས་འབྲེལ་རེ་གནང་བར་ཞུ་ཟེར་བ་ལ། རྗེ་བཙུན་གྱིས་འོ་ན། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་བྱ། །ཞེས་གསུངས་པས། ཁོང་རང་རྣམས་ཀྱིས་ཡིན་ལུགས་བརྗོད། སྲོག་སྙིང་ཕུལ་ནས་བཀའི་འབངས་བགྱིད་པར་ཁས་བླངས་ཏེ། རང་རང་
(༢༤༦)སོ་སོའི་གནས་སུ་སོང་བ་དེ་རྣམས་ནི་མང་ཡུལ་གྱི་བསེའི་ལྷ་མོ་དང་། རི་བོ་དཔལ་འབར་གྱི་གཞི་བདག་ཡིན་ནོ། །རྗེ་བཙུན་གྱིས་ཀྱང་རི་བོ་དཔལ་འབར་གྱི་གཞི་བདག་འདིར་བྱུང་རྟིང་རི་བོ་དཔལ་འབར་ལ་ཆེད་དུ་བསྒོམ་དུ་འགྲོ་མི་དགོས་པ་འདུག་དགོངས་ཏེ། གནས་དེ་གར་ཞག་ཤས་བཞུགས་པ་ལས། ཐུགས་དམ་ཤིན་ཏུ་འཕེལ་བར་བྱུང་ནས་མགུར་འདི་བཞེས་སོ། །བྱང་ཆུབ་རྫོང་གི་དབེན་གནས་ན། །བྱང་ཆུབ་སྒྲུབ་པའི་མི་ལ་ང་། །བྱང་ཆུབ་སེམས་ལ་དབང་སྒྱུར་ཞིང་། །བྱང་ཆུབ་སེམས་ཀྱི་རྣལ་འབྱོར་སྐྱོང་། །བྱང་ཆུབ་ཆེན་པོ་མྱུར་ཐོབ་ནས། །མར་གྱུར་འགྲོ་བ་འདི་དག་ཀུན། །བྱང་ཆུབ་མཆོག་ལ་སྦྱོར་བར་ཤོག །ཅེས་གསུང་ཞིང་ཐུགས་དམ་ལ་བརྩོན་པར་གྱུར་ཏོ། །དེ་ནས་ཞག་འགའ་ནས་ཡོན་བདག་གཅིག་གིས་ཤིང་ཁུར་གཅིག་དང་། ཕྱེ་ཁལ་ཕྱེད་ཙམ་ཕུལ་ནས། ན་བཟའ་སྲབ་པོ་རང་གདའ་བས་བསེར་དུ་འོང་། ལྷོའི་ནང་ནས་རག་མ་འདི་གྲང་ཞིང་། དེའི་ནང་ནས་ཀྱང་བྲག་ཐོག་འདི་ནན་ཏར་གྲང་བ་ཞིག་ལགས་པས། བཞེས་ན་བདག་གིས་ཐུལ་བ་གཅིག་འབུལ་བླ་མ་ཁྱེད་ཇི་སྐད་བྱ་བ་ལགས་ཟེར་བ་ལ། རྗེ་བཙུན་གྱིས། ཡོན་བདག་ཁྱོད་རང་གི་མིང་ཅི་ཡིན་གསུངས་པས། ལྷ་འབར་བྱ་བ་ལགས་ཟེར་བ་ལ། རྗེ་བཙུན་གྱིས་མིང་ལེགས་ཏེ། ཁྱོད་ཀྱི་ཕྱེ་དང་ཐུལ་བ་ལ་སོགས་པ་རྣམས་ལ་ལྟོས་མི་དགོས་པ་ཞིག་ཡིན་ནའང་། ཕྱེ་འབུལ་བ་ངོ་མཚར་ཆེ་ཐུལ་བ་མི་དགོས་ང་འདི་ལྟར་ཡིན་གསུངས་ནས། ལྷ་འབར་ལ་མགུར་འདི་གསུངས་སོ། །ང་རིགས་དྲུག་འཁྲུལ་བའི་གྲོང་ཁྱེར་དུ། །རྣམ་ཤེས་འཁྲུལ་བའི་
(༢༤༧)ཁྱེའུ་ཆུང་འཁྱམས། །ལས་ཀྱི་འཁྲུལ་སྣང་སྣ་ཚོགས་མྱོང་། །རེས་འགའ་ལྟོགས་པའི་འཁྲུལ་སྣང་བྱུང་། །རོ་སྙོམས་ལྡུམ་བུ་ཟས་སུ་ཟོས། །རེས་ནི་དཀའ་ཐུབ་རྡེ་འཆའ་བྱས། །རེས་འགའ་སྟོང་ཉིད་ཟས་སུ་ཟོས། །རེས་འགའ་ཐབས་ཆག་སྡུག་བསྲན་བསྐྱེད། །རེས་འགའ་སྐོམ་པའི་འཁྲུལ་སྣང་བྱུང་། །གཡའ་ཡི་བསིལ་ཆབ་སྔོན་མོ་འཐུངས། །རེས་འགའ་རང་བྱུང་དྲི་ཆུ་བསྟེན། །རེས་ནི་སྙིང་རྗེའི་ཆུ་རྒྱུན་འཐུངས། །རེས་འགའ་མཁའ་འགྲོའི་དམ་རྫས་འཐུངས། །རེས་འགའ་འཁྱགས་པའི་སྣང་བ་བྱུང་། །རས་གོས་རྐྱང་རེ་གོས་སུ་གྱོན། །རེས་འགའ་གཏུམ་མོའི་བདེ་དྲོད་སྦར། །རེས་ནི་ཐབས་ཆག་སྡུག་བསྲན་བསྐྱེད། །རེས་འགའ་གྲོགས་ཀྱི་འཁྲུལ་སྣང་ཤར། །རིག་པ་ཡེ་ཤེས་གྲོགས་སུ་བསྟེན། །དཀར་པོ་དགེ་བཅུའི་ལས་ལ་སྤྱད། །ཡང་དག་ལྟ་བའི་ཉམས་ལེན་བྱས། །རང་རིག་སེམས་ཀྱི་རྩ་བརྡར་བཅད། །ང་རྣལ་འབྱོར་མི་ཡི་སེང་གེ་ཡིན། །ལྟ་བ་བཟང་པོའི་གཡུ་རལ་རྒྱས། །སྒོམ་པ་བཟང་པོའི་མཆེ་སྡེར་ཅན། །ཉམས་ལེན་གངས་ཀྱི་ལྟོངས་སུ་བྱས། །ཡོན་ཏན་འབྲས་བུ་འཐོབ་ཏུ་རེ། །ང་རྣལ་འབྱོར་མི་ཡི་རྒྱ་སྟག་ཡིན། །བྱང་ཆུབ་སེམས་ཀྱི་རྩལ་གསུམ་རྫོགས། །ཐབས་ཤེས་དབྱེར་མེད་གྲ་འཛུམ་ཅན། །འོད་གསལ་སྨན་ལྗོངས་ནགས་ལ་བསྡད། །གཞན་དོན་འབྲས་བུ་འབྱུང་དུ་རེ། །ང་རྣལ་འབྱོར་མི་ཡི་རྒོད་པོ་ཡིན། །བསྐྱེད་རིམ་གསལ་བའི་འདབ་གཤོག་རྒྱས། །རྫོགས་རིམ་བརྟན་པའི་ལྡེམ་སྒྲོ་ཅན། །ཟུང་འཇུག་ཆོས་ཉིད་མཁའ་ལ་ལྡིང་། །ཡང་དག་དོན་གྱི་བྲག་ལ་ཉལ། །འབྲས་བུ་
(༢༤༨)དོན་གཉིས་འགྲུབ་ཏུ་རེ། །ང་རྣལ་འབྱོར་མི་ཡི་དམ་པ་སྟེ། །ང་ནི་མི་ལ་རས་པ་ཡིན། །ང་ནི་སྣང་བ་གདོང་འདེད་མཁན། །ང་ནི་འདུན་མ་གང་བྱུང་མཁན། །ང་ནི་ངེས་མེད་རྣལ་འབྱོར་པ། །ང་ནི་གང་བྱུང་གཏད་མེད་མཁན། །ང་ནི་ཟས་མེད་ལྡུམ་བུ་པ། །ང་ནི་གོས་མེད་གཅེར་བུ་པ། །ང་ནི་ནོར་མེད་སློང་མོ་པ། །ང་ནི་ཕྱི་ཚིས་བསམ་མེད་མཁན། །ང་ནི་འདིར་སྡོད་འདིར་གནས་མེད། །ང་ནི་སྤྱོད་པ་བྱུང་རྒྱལ་མཁན། །ང་ནི་སྨྱོན་པ་ཤི་སྐྱིད་མཁན། །ང་ནི་ཅང་མེད་དགོས་མེད་མཁན། །དགོས་པའི་ཡོ་བྱད་བསྒྲུབ་དགོས་ན། །མི་ཁྱོད་ལ་ཉོན་མོངས་དཀའ་ཚེགས་ཡོད། །ཡོན་བདག་འོ་བརྒྱལ་ལོག་ལ་བཞུད། །རྣལ་འབྱོར་གང་བྱུང་འདུན་མ་བྱེད། །ཐུགས་བསམ་པ་བཟང་ཞིང་དགེ་བ་ཡིས། །སྦྱིན་གཏོང་བྱེད་པ་ཐུགས་ལ་བཏགས། །ཚེ་འདིར་ཚེ་རིང་ནད་མེད་ཅིང་། །དལ་འབྱོར་བདེ་སྐྱིད་ལོངས་སྤྱད་ནས། །ཕྱི་མ་དག་པའི་ཞིང་ཁམས་སུ། །མཇལ་ནས་ཆོས་ལ་སྤྱོད་པར་ཤོག །དེ་ནས་གཞན་དོན་གྲུབ་པར་ཤོག །ཅེས་གསུངས་པས། ཁོ་ཤིན་ཏུ་དད་པར་གྱུར་ཏེ། ཁྱེད་གྲུབ་ཐོབ་མི་ལ་ཡིན་པར་གདའ་བས། དེ་ཀས་ཆོག་པར་གདའ་སྟེ། ངེད་མི་ནག་པ་ཚོགས་རྫོགས་ཕྱིར་དུ་འདིར་བཞུགས་རིན་འཚོ་ཆས་བདག་གིས་བསྒྲུབ་པས་ཅིས་ཀྱང་བཞེས་པར་ཞུ་ཞེས་ཞུས་ནས། བྱང་ཆུབ་རྫོང་དུ་བཞུགས་རིང་གི་འཚོ་རྒྱགས་ཕྱུག་པོ་ལྷ་འབར་གྱིས་ཕུལ་ལོ། །དེ་ནས་རྗེ་བཙུན་ལ་ཐུགས་དམ་ཤིན་ཏུ་བོགས་ཆེ་བར་བྱུང་བས། ཐུགས་མཉེས་བཞིན་པའི་ངང་ལ་རག་མའི་ཉ་མ་འགའ་མཇལ་དུ་
(༢༤༩)བྱུང་བ་རྣམས་ན་རེ། གནས་ལ་ཐུགས་འགྲོ་བ་དང་ཐུགས་དམ་དམར་པོ་བྱུང་ངམ་ཞུས་པ་ལ། རྗེ་བཙུན་གྱིས་གནས་ལ་ཡིད་མགུ་དགེ་སྦྱོར་ཡང་འཕེལ་བར་བྱུང་གསུངས་པས། ཁོང་རྣམས་ན་རེ་དེ་ག་ཡོང་ཞུས། གནས་དགའ་མོ་འདི་ལ་བསྟོད་པ་ཞིག་དང་། ཁྱེད་རང་གི་ཐུགས་དམ་མཛད་ཚུལ་ཞིག་གནང་བར་ཞུ་ཞུས་པའི་ལན་དུ་མགུར་འདི་གསུངས་སོ། །བྱང་ཆུབ་རྫོང་གི་དབེན་གནས་འདི། །ཕུ་ན་ལྷ་བཙན་གངས་དཀར་མཐོ། །མདའ་ན་ཡོན་བདག་དད་ལྡན་མང་། །རྒྱབ་རི་དར་དཀར་ཡོལ་བས་བཅད། །མདུན་ན་དགོས་འདོད་ནགས་ཚལ་སྤུངས། །སྤང་གཤོང་ནེའུ་གསིང་ཆེ་ལ་ཡངས། །དྲི་ལྡན་ཡིད་འོང་པདྨ་ལ། །རྐང་དྲུག་ལྡན་པའི་དར་དིར་ཅན། །རྫིང་བུ་ལྟེང་ཀ་ཆུ་ངོགས་ལ། །ཆུ་བྱ་མགྲིན་པ་སྐྱོགས་ནས་བལྟ། །ལྗོན་ཤིང་རྒྱས་པའི་ཡལ་ག་ལ། །མཛེས་པའི་བྱ་ཚོགས་སྐད་སྙན་བསྒྱུར། །དྲི་བཞོན་བསེར་བུས་བཏབ་པ་ལ། །རྐང་འཐུང་ཡལ་གས་གར་སྟབས་བྱེད། །མཐོ་ཞིང་གསལ་བའི་ལྗོན་ཤིང་རྩེར། །སྤྲ་སྤྲེལ་ཡང་རྩལ་སྣ་ཚོགས་བྱེད། །སྔོ་འཇམ་ཡངས་པའི་གསིང་མ་ལ། །རྐང་བཞི་དུད་འགྲོ་ཟས་ལ་བཀྲམ། །དེ་དག་སྐྱོང་བྱེད་ཕྱུགས་རྫི་རྣམས། །གླུ་དང་གླིང་བུའི་སྐད་སྙན་བསྒྱུར། །འཇིག་རྟེན་སྲེད་པའི་ཁོལ་པོ་རྣམས། །ཟང་ཟིང་ལས་བྱེད་ས་གཞི་ཁྱབ། །དེ་ལ་ལྟ་བའི་རྣལ་འབྱོར་ང་། །ཀུན་གསལ་རིན་ཆེན་བྲག་སྟེང་ན། །སྣང་བ་མི་རྟག་དཔེ་རུ་འདྲེན། །འདོད་ཡོན་མིག་ཡོར་ཆུ་རུ་སྒོམ། །ཚེ་འདི་རྨི་ལམ་སྒྱུ་མར་ལྟ། །མ་རྟོགས་པ་ལ་སྙིང་རྗེ་སྒོམ། །ནམ་
(༢༥༠)མཁའ་སྟོང་པ་ཟས་སུ་ཟ། །ཡེངས་པ་མེད་པའི་བསམ་གཏན་བསྒོམ། །སྣ་ཚོགས་ཉམས་ལ་ཅི་ཡང་འཆར། །ཨེ་མ་ཁམས་གསུམ་འཁོར་བའི་ཆོས། །མེད་བཞིན་སྣང་བ་ངོ་མཚར་ཆེ། །ཞེས་གསུངས་པས། ཁོང་རྣམས་དད་བཞིན་ལོག་སོང་ངོ་། །རག་མའི་སྐོར་སྔ་མའོ། །སྐྱང་ཕན་ནམ་མཁའ་རྫོང་གི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་རག་མ་ནས་སྐྱང་ཕན་ནམ་མཁའ་རྫོང་དུ་བྱོན་ཏེ་བཞུགས་དུས་ནམ་ཞིག་གི་ཚེ་སྤྲེའུ་རི་བོང་ལ་ཞོན་པ་ཞིག་ཤོ་མའི་ཕུབ་གྱོན། སོག་མའི་མདའ་གཞུ་ཐོགས་ནས་གླགས་བལྟར་བྱུང་བ་ལ། རྗེ་བཙུན་བཞད་མོ་ཞིག་ཤོར་བས། ཁོ་ན་རེ། ཁྱོད་འཇིགས་སུ་རེ་ནས་འོངས་པ་ཡིན་ཏེ། མི་འཇིགས་ན་འགྲོ་ཟེར་བ་ལ། རྗེ་བཙུན་གྱིས། ང་སྣང་བ་སེམས་སུ་ཐག་ཆོད་ཅིང་། སེམས་ཉིད་ཆོས་སྐུར་ངོ་འཕྲོད་པས། འདྲེ་ཁྱོད་ཀྱིས་ཆོ་འཕྲུལ་ཅི་བསྟན་ཡང་། །རྣལ་འབྱོར་ང་ཡི་གད་མོའི་གནས། །ཞེས་གསུངས་པས། ཁོས་ཞབས་ཏོག་བསྒྲུབ་པར་ཁས་བླངས་ཏེ་འཇའ་ཡལ་བ་བཞིན་སོང་བ་དེ་གྲོ་ཐང་རྒྱལ་པོ་ཡིན་ནོ། །དེ་ནས་གྲོ་ཐང་གི་ཡོན་བདག་རྗེ་བཙུན་གྱི་ཞལ་བལྟར་བྱུང་བ་རྣམས་ན་རེ། གནས་འདི་ལ་ཡོན་ཏན་ཅི་གདའ་ཞུས་པའི་ལན་དུ་མགུར་འདི་གསུངས་སོ། །བླ་མ་རྗེ་ལ་གསོལ་བ་འདེབས། །གནས་འདིའི་ཡོན་ཏན་ཤེས་མ་ཤེས། །གནས་འདིའི་ཡོན་ཏན་མ་ཤེས་ན། །དབེན་གནས་སྐྱང་
(༢༥༡)ཕན་ནམ་མཁའ་རྫོང་། །ནམ་མཁའ་རྫོང་གི་ཕོ་བྲང་ན། །སྟེང་ན་ལྷོ་སྤྲིན་སྨུག་པོ་འཐིབས། །འོག་ན་གཙང་ཆབ་སྔོན་མོ་འབབ། །རྒྱབ་ན་བྲག་དམར་ནམ་མཁའི་དབྱིངས། །མདུན་ན་སྤང་པོ་མེ་ཏོག་བཀྲ། །ཟུར་ན་གཅན་གཟན་ངར་སྐད་འདོན། །ལོགས་ལ་བྱ་རྒྱལ་རྒོད་པོ་ལྡིང་། །མཁའ་ལ་སྦྲང་ཆར་ཟིམ་བུ་འབབ། །རྒྱུན་ཏུ་བུང་བས་གླུ་དབྱངས་ལེན། །ཤ་རྐྱང་མ་བུས་རྩེ་བྲོ་བརྡུང་། །སྤྲ་དང་སྤྲེའུས་ཡང་རྩལ་སྦྱོང་། །ཅོ་ག་མ་བུ་འགྱུར་སྐད་མང་། །ལྷ་བྱ་གོང་མོས་གླུ་དབྱངས་ལེན། །རྫ་ཆབ་བསིལ་མས་སྙན་པ་བརྗོད། །དུས་ཀྱི་སྐད་རིགས་ཉམས་ཀྱི་གྲོགས། །གནས་འདིའི་ཡོན་ཏན་བསམ་མི་ཁྱབ། །ཉམས་དགའ་གླུ་རུ་བླངས་པ་ཡིན། །གདམས་ངག་ཁ་རུ་བཏོན་པ་ཡིན། །འདིར་ཚོགས་ཡོན་བདག་ཕོ་མོ་རྣམས། །མི་ང་ཕྱིར་འབྲོངས་ལ་ང་བཞིན་མཛོད། །ལས་སྡིག་པ་སྤོངས་ལ་དགེ་བ་སྒྲུབས། །ཞེས་གསུངས་པས། ཁོངས་རྣམས་ཀྱི་ནང་ན་སྔགས་པ་ཞིག་འདུག་པ་དེ་ན་རེ། རྗེ་བཙུན་ལགས། ངེད་རྣམས་ལ་ཞལ་མཇལ་བའི་དགའ་སྟོན་ནམ་བྱོན་སྐྱེས་སུ་ལྟ་སྒོམ་སྤྱོད་པའི་ཉམས་ལེན་གོ་སླ་ལ་འཁྱེར་བདེ་བ་ཞིག་གནང་བར་ཞུ་ཞུས་པའི་ལན་དུ་མགུར་འདི་གསུངས་སོ། །བླ་མའི་བྱིན་རླབས་སེམས་ལ་ཞུགས། །སྟོང་ཉིད་རྟོགས་པར་བྱིན་གྱིས་རློབས། །ཡོན་བདག་དད་པའི་ཕྱག་ལན་དུ། །ལྷ་ཡི་དམ་མཉེས་པའི་གླུ་ཞིག་ལེན། །སྣང་དང་སྟོང་དང་དབྱེར་མེད་གསུམ། །འདི་གསུམ་ལྟ་བའི་མདོར་བསྡུས་ཡིན། །གསལ་དང་མི་རྟོག་མ་ཡེངས་
(༢༥༢)གསུམ། །འདི་གསུམ་སྒོམ་པའི་མདོར་བསྡུས་ཡིན། །ཆགས་མེད་ཞེན་མེད་མཐར་སྐྱོལ་གསུམ། །འདི་གསུམ་སྤྱོད་པའི་མདོར་བསྡུས་ཡིན། །རེ་མེད་དོགས་མེད་འཁྲུལ་མེད་གསུམ། །འདི་གསུམ་འབྲས་བུའི་མདོར་བསྡུས་ཡིན། །ངོ་མེད་ལྐོག་མེད་ཟོལ་མེད་གསུམ། །འདི་གསུམ་དམ་ཚིག་མདོར་བསྡུས་ཡིན། །ཞེས་གསུངས་པས། ཁོང་རྣམས་དད་བཞིན་དུ་ལོག་སོང་བ་ལས་ཡང་ཞག་འགའ་ནས་ཉ་མ་མང་པོ་མཇལ་དུ་བྱུང་བ་ལས། སྔར་གྱི་དེ་རྣམས་ཀྱིས་རྗེ་བཙུན་སྐུ་ཁམས་དང་འཁྱེར་སོ་བདེ་ལགས་སམ་ཞེས་བསྙུན་དྲིས་པའི་ལན་དུ་མགུར་འདི་གསུངས་སོ། །བླ་མ་དམ་པའི་ཞབས་ལ་འདུད། །གནས་མི་མེད་དབེན་པའི་ནགས་འདབས་ན། །མི་ལ་རས་པའི་སྒོམ་ལུགས་བདེ། །འཛིན་ཆགས་མེད་པའི་འགྲོ་འདུག་བདེ། །ན་ཚ་མེད་པའི་སྒྱུ་ལུས་བདེ། །ཉལ་བ་མེད་པའི་འདུག་ལུགས་བདེ། །རྟོག་པ་མེད་པའི་ཏིང་འཛིན་བདེ། །གྲང་བ་མེད་པའི་གཏུམ་མོ་བདེ། །ཞུམ་པ་མེད་པའི་བརྟུལ་ཞུགས་བདེ། །རྩོལ་བ་མེད་པའི་སོ་ནམ་བདེ། །གཡེང་བ་མེད་པའི་དབེན་གནས་བདེ། །དེ་ཚོ་ལུས་ཀྱི་འཁྱེར་སོ་ཡིན། །ཐབས་ཤེས་གཉིས་ཀྱི་ཐེག་པ་བདེ། །བསྐྱེད་རྫོགས་ཟུང་འཇུག་ཉམས་ལེན་བདེ། །རླུང་འགྲོ་འོང་མེད་པའི་དྲན་པ་བདེ། །ལབ་གྲོགས་མེད་པའི་སྨྲ་བཅད་བདེ། །དེ་ཚོ་ངག་གི་འཁྱེར་སོ་ཡིན། །ངོས་བཟུང་མེད་པའི་ལྟ་བ་བདེ། །རྒྱུན་ཆད་མེད་པའི་སྒོམ་པ་བདེ། །ཉམས་པ་མེད་པའི་སྤྱོད་པ་བདེ། །རེ་དོགས་
(༢༥༣)མེད་པའི་འབྲས་བུ་བདེ། །དེ་ཚོ་སེམས་ཀྱི་འཁྱེར་སོ་ཡིན། །འགྱུར་མེད་རྟོག་མེད་འོད་གསལ་བདེ། །བདེ་ཆེན་རྣམ་དག་དབྱིངས་སུ་བདེ། །འགག་མེད་འཆར་སྒོའི་ཀློང་དུ་བདེ། །ཤིན་ཏུ་བདེ་བའི་དབྱངས་ཆུང་འདི། །ཉམས་མྱོང་གླུ་རུ་བླངས་པ་ཡིན། །ལྟ་སྤྱོད་ཟུང་དུ་སྦྲེལ་བ་ཡིན། །སླད་ནས་བྱང་ཆུབ་སྒྲུབ་པ་རྣམས། །ཉམས་སུ་ལེན་ན་དེ་ལྟར་མཛོད། །ཅེས་གསུངས་པས། ཉ་མ་རྣམས་ན་རེ། བླ་མའི་སྐུ་གསུང་ཐུགས་ཀྱི་འཁྱེར་སོའི་བདེ་ལུགས་དེ་རྣམས་ཤིན་ཏུ་ངོ་མཚར་ཆེ་བར་གདའ། དེ་རྣམས་གང་ལས་བྱུང་ཞུས་པས། དེ་རྣམས་སེམས་རྟོགས་པ་ལས་བྱུང་བ་ཡིན་གསུངས་པས། འོ་ན་ངེད་རྣམས་ལའང་བདེ་བ་དེ་ལྟ་བུ་རང་མ་བྱུང་རུང་། དེའི་ཆ་འདྲ་ཙམ་ཡོང་དུ་རེ་བས། སེམས་རྟོགས་ཐབས་ཀྱི་སྒོམ་ལུགས་འདི་ལྟར་གྱིས་གསུང་བའི་ཆོས་གོ་སླ་ལ་འཁྱེར་བདེ་བ་ཞིག་གནང་བར་ཞུ་ཞུས་པའི་ལན་དུ། རྗེ་བཙུན་གྱིས་སེམས་དོན་བཅུ་གཉིས་མ་འདི་མགུར་དུ་གསུངས་སོ། །བླ་མ་དམ་པའི་ཞབས་ལ་འདུད། །ཡོན་བདག་སེམས་ཉིད་རྟོགས་འདོད་རྣམས། །ཉམས་སུ་ལེན་ན་འདི་ལྟར་མཛོད། །དད་དང་མཁས་དང་བཙུན་དང་གསུམ། །འདི་གསུམ་སེམས་ཀྱི་སྲོག་ཤིང་ལགས། །བཙུགས་ན་བརྟན་ལ་འཇུག་ན་བདེ། །སྲོག་ཤིང་མཛད་ན་དེ་ལ་མཛོད། །ཆགས་མེད་ཞེན་མེད་རྨོངས་མེད་གསུམ། །འདི་གསུམ་སེམས་ཀྱི་གོ་ཆ་ལགས། །གྱོན་ན་ཡང་ལ་མཚོན་ཁར་སྲ། །གོ་ཆ་མཛད་ན་དེ་ལ་མཛོད། །སྒོམ་དང་བརྩོན་འགྲུས་སྡུག་བསྲན་གསུམ། །འདི་གསུམ་
(༢༥༤)སེམས་ཀྱི་རྟ་ཕོ་ལགས། །བརྒྱུགས་ན་མགྱོགས་ལ་བྲོས་ན་ཐར། །རྟ་ཕོ་མཛད་ན་དེ་ལ་མཛོད། །རང་རིག་རང་གསལ་རང་བདེ་གསུམ། །འདི་གསུམ་སེམས་ཀྱི་འབྲས་བུ་ལགས། །བཏབ་ན་སྨིན་ལ་ཟོས་ན་བཅུད། །འབྲས་བུ་མཛད་ན་དེ་ལ་མཛོད། །སེམས་དོན་རྣམ་པ་བཅུ་གཉིས་འདི། །རྣལ་འབྱོར་བློ་ལ་ཤར་ནས་བླངས། །ཁྱོད་ཡོན་བདག་དད་པའི་ཕྱག་ལེན་མཛོད། །ཅེས་གསུངས་པས། ཁོང་རྣམས་དད་པར་གྱུར་ནས་ཕྱིས་ཀྱང་ཞབས་ཏོག་ཕུན་སུམ་ཚོགས་པ་བསྒྲུབས་པར་གྱུར་ཏོ། །རྗེ་བཙུན་ཡང་ཡོལ་མོ་གངས་ར་ལ་ཐུགས་ཆས་སོ། །སྐྱང་ཕན་ནམ་མཁའ་རྫོང་གི་སྐོར་རོ། །ཡོལ་མོ་གངས་རའི་སྐོར། ན་མོ་གུ་རུ། རྣལ་འབྱོར་གྱི་དབང་ཕྱུག་དམ་པ་རྗེ་བཙུན་མི་ལ་རས་པ་དེ་ཉིད་བླ་མའི་བཀའ་བསྒྲུབ་ཕྱིར་སྐྱང་ཕན་ནས་ཡོལ་མོ་གངས་ལ་བྱོན་ཏེ། སིང་ག་གླིང་གི་ནགས་གསེབ་སྟག་ཕུག་སེང་གེ་རྫོང་དུ་བཞུགས་དུས། ཡོལ་མོའི་གཞི་བདག་མོས་དང་པོ་ནས་ཞི་བའི་སྒོ་ནས་མཛེས་པའི་གཟུགས་བསྟན། བཀའ་འབངས་སུ་ཁས་བླངས་ནས་བསྙེན་བཀུར་ཕུན་སུམ་ཚོགས་པ་བསྒྲུབས་པར་གྱུར་ཏོ། །དེ་ནས་རྗེ་བཙུན་ཐུགས་དམ་ཤིན་ཏུ་འཕེལ་བར་ཡོད་པའི་ཚེ། མོན་ཡུལ་གྱི་བན་དེ་གཞོན་ནུ་མ་ལྔ་ཙམ་ཆོས་ཞུར་བྱུང་བ་རྣམས་ན་རེ། གནས་འདིར་འཇིགས་སྐྲག་གིས་བོགས་འདོན་ཡོང་བས་ཐུགས་དམ་ཤིན་ཏུ་འཕེལ་བ་ཞིག་ཡོད། བླ་མ་ལ་ཡང་བྱུང་ལགས་སམ་ཞུས་
(༢༥༥)པའི་ལན་དུ། གནས་ལ་བསྟོད་པ་དང་ཐུགས་དམ་འཁྲུངས་ཚུལ་འདི་མགུར་དུ་གསུངས་སོ། །བླ་མ་དམ་པའི་ཞབས་ལ་འདུད། །ང་བསོད་ནམས་བསགས་པས་རྗེ་དང་མཇལ། །བླ་མའི་ལུང་བསྟན་གནས་སུ་སླེབ། །མོན་ཡུལ་ཤིང་རི་བདེ་བའི་མཁར། །སྤང་རི་མེ་ཏོག་བཀྲ་བའི་ཡུལ། །ལྗོན་ཤིང་གར་སྟབས་བྱེད་པའི་གསེབ། །སྤྲ་སྤྲེའུས་རྩེད་མོ་རྩེ་བའི་ས། །བྱ་སྐད་སྣ་ཚོགས་སྒྲོག་པའི་གནས། །བུང་བ་ལང་ལིང་འཕུར་བའི་ས། །ཉིན་མཚན་མེད་པར་འཇའ་རིས་འཁྱུག །དབྱར་དགུན་མེད་པར་སྦྲང་ཆར་འབབ། །སྟོན་དཔྱིད་མེད་པར་ན་བུན་འཁྲིག །དེ་ལྟ་བུ་ཡི་དབེན་གནས་ན། །རྣལ་འབྱོར་མི་ལ་རས་པ་ང་། །སེམས་སྟོང་ཉིད་སྒོམ་པའི་འོད་གསལ་བདེ། །འཆར་སྒོ་མང་ན་ཤིན་ཏུ་བདེ། །མཐོ་དམན་ཆེ་ན་དེ་བས་བདེ། །ལས་ངན་མེད་པའི་སྐྱེ་གཟུགས་བདེ། །སྣ་ཚོགས་འཁྲུག་ན་ཤིན་ཏུ་བདེ། །འཇིགས་སྣང་ཆེ་ན་དེ་བས་བདེ། །ཉོན་མོངས་སྐྱེ་འཆིའི་ཤི་བྲལ་བདེ། །གདུག་རྩུབ་ཆེ་ན་ཤིན་ཏུ་བདེ། །ན་ཚ་མེད་ན་དེ་བས་བདེ། །སྡུག་བསྔལ་བདེ་བར་ཤར་བས་བདེ། །ཉམས་ཤུགས་ལ་འཁྲུལ་འཁོར་ཤིན་ཏུ་བདེ། །མཆོང་རྒྱུག་གི་གར་སྟབས་དེ་བས་བདེ། །ངག་བྱུང་རྒྱལ་གླུ་ཡི་དཀོར་མཛོད་བདེ། །ཚིག་བུང་བའི་བརྡ་དབྱངས་ཤིན་ཏུ་བདེ། །སྒྲ་ཚོགས་སུ་འགྱུར་ན་དེ་བས་བདེ། །སེམས་ངར་ལྡན་གྱི་སྤོབས་པ་དབྱིངས་སུ་བདེ། །རང་ཤུགས་ཀྱིས་རང་ཤར་ཤིན་ཏུ་བདེ། །སྣ་ཚོགས་སུ་ཤར་ན་དེ་བས་བདེ། །ཉམས་བདེ་ཞིང་
(༢༥༦)སྐྱིད་པའི་རྣལ་འབྱོར་པ། །བུ་དད་པ་ཅན་མཇལ་བའི་བྱོན་སྐྱེས་མཛོད། །ཅེས་གསུངས་ཏེ། དབང་དང་གདམས་ངག་གནང་ནས་སྒོམ་དུ་བཅུག་པས་ཉམས་རྟོགས་བཟང་པོ་སྐྱེས་པ་ལ་རྗེ་བཙུན་ཐུགས་མཉེས་ཏེ། ཞལ་གདམས་བདུད་རྩིའི་ཉམས་དབྱངས་འདི་མགུར་དུ་གསུངས་སོ། །བླ་མ་སངས་རྒྱས་ཆོས་ཀྱི་སྐུ། །མ་ནོར་ཐར་པའི་ལམ་སྟོན་པ། །ཐུགས་རྗེ་འཕྲིན་ལས་འགྲོ་བའི་དཔལ། །འབྲལ་མེད་གཙུག་གི་རྒྱན་དུ་བཞུགས། །ཁྱེད་འདིར་བཞུགས་ཆོས་མཛད་ཉམས་ལེན་མཁན། །དམ་ཆོས་བྱེད་ལུགས་མང་ན་ཡང་། །ཟབ་ལམ་བསྒོམ་པ་སྐལ་བ་བཟང་། །ཁྱེད་ཚེ་གཅིག་སངས་རྒྱས་སྒྲུབ་དུས་སུ། །ཚེ་འདིའི་རང་འདོད་མ་ཆེ་ཞིག །ཆེས་ན་དགེ་སྡིག་སྣ་ཚོགས་སྤྱོད། །སྤྱད་ན་ངན་འགྲོར་ལྟུང་བར་འགྱུར། །བླ་མའི་ཞབས་ཏོག་བྱེད་དུས་སུ། །ངས་བྱས་ཁོང་ཡུས་མ་ཆེ་ཞིག །ཆེས་ན་དཔོན་སློབ་རེ་འཁང་འབྱུང་། །བྱུང་ན་བསམ་པའི་དོན་མི་འགྲུབ། །དམ་ཚིག་སྡོམ་པ་སྲུང་དུས་སུ། །མི་ནག་གྲོང་དུ་མ་ཉལ་ཅིག །ཉལ་ན་མིག་སློབ་ངན་པ་སྐྱེ། །སྐྱེས་ན་དམ་ཚིག་སྡོམ་པ་འཆོར། །ཐོས་པའི་སློབ་གཉེར་བྱེད་དུས་སུ། །ཐ་སྙད་ང་རྒྱལ་མ་ཆེ་ཞིག །ཆེས་ན་དུག་ལྔའི་མེ་རོ་ལྡང་། །ལངས་ན་དགེ་སྦྱོར་བསམ་པ་འཁྲུག །གྲོགས་དང་ལྷན་ཅིག་སྒོམ་དུས་སུ། །བྱ་རྒྱུ་བྱེད་རྒྱུ་མ་མང་ཞིག །མང་ན་ཟབ་མོའི་དགེ་སྦྱོར་གཡེངས། །གཡེངས་ན་ལྷ་ཆོས་སྐལ་པ་འཆད། །ཐབས་ལམ་སྙན་བརྒྱུད་སྒོམ་དུས་སུ། །འདྲེ་འདུལ་བྱིན་རླབས་མ་བྱེད་ཅིག །བྱས་ན་རང་རྒྱུད་འདྲེ་རུ་ལྡང་། །ལངས་ན་
(༢༥༧)གྲོང་པའི་ཆོས་སྤྱོད་རེམ། །ཉམས་དང་རྟོགས་པ་ཤར་དུས་སུ། །ཕོ་ཚོད་མངོན་ཤེས་མ་འཆད་ཅིག །བཤད་ན་གསང་བའི་བརྡ་སྐད་འཆོར། །ཤོར་ན་ལམ་རྟགས་ཡོན་ཏན་འགྲིབ། །སྐྱོན་དུ་ཤེས་ནས་སྤོང་བར་མཛོད། །སྡིག་སྤྱོད་ཁྲམ་ཟས་ཟ་བ་དང་། །གཤིན་པོའི་རོ་དོམ་འཁུར་བ་དང་། །ངོ་སྲུང་གི་འདུན་མ་མ་བྱེད་པར། །ཉམ་ཆུང་གྱིས་ལ་རང་མགོ་ཐོན། །ཞེས་གསུངས་པས། ཁོང་རྣམས་ཀྱིས་རང་མགོ་འདོན་ལུགས་ཇི་ལྟར་བགྱིད། རྗེ་བཙུན་གྱིས་གསུང་བར་ཞུ་ཞུས་པའི་ལན་དུ་མགུར་འདི་གསུངས་སོ། །རྗེ་བཀའ་དྲིན་ཅན་ལ་གསོལ་བ་འདེབས། །སྤྲང་ཉམས་ལེན་བདེ་བར་བྱིན་གྱིས་རློབས། །ཁྱེད་གསར་བུའི་ཁྲིད་ཕྲུག་གཞོན་ནུ་རྣམས། །ལས་དགེ་སྡིག་གཡོ་སྒྱུའི་གྲོང་ཁྱེར་ན། །བུ་སྐལ་བ་མ་ཆད་ལྷ་ཆོས་ཉན། །ལམ་ལོག་པར་མ་སོང་ང་དང་ཕྲད། །ཚོགས་ཡང་ཡང་བསགས་པས་སྒོམ་སྒྲུབ་བྱེད། །བྱིན་རླབས་ཀྱི་ན་བུན་ཉམས་རྟོགས་སྐྱེས། །སྐྱེས་པས་མི་ཕན་མགོ་འདོན་འཚལ། །རང་མགོ་འདོན་པའི་མན་ངག་འདི། །བརྩེ་བས་བཤད་ཀྱིས་རྣ་བས་ཉོན། །དབེན་གནས་རི་ཁྲོད་འཛིན་དུས་སུ། །གྲོང་ཡུལ་གྱི་ལྟད་མོ་མ་དྲན་ཅིག །དྲན་ན་རང་སེམས་བདུད་ཀྱིས་གཡེངས། །བློ་ནང་དུ་ཁུག་ལ་རང་མགོ་ཐོན། །སྒོམ་སྙིང་རུས་གནད་ནས་འདོན་དུས་སུ། །ནམ་འཆི་ཆ་མེད་སེམས་པ་དང་། །འཁོར་བའི་ཉེས་དམིགས་དྲན་པ་ཡིས། །ཚེ་འདིའི་སྐྱིད་འདོད་མ་དྲན་པར། །སྡུག་བསྲན་སྐྱེད་ལ་རང་མགོ་ཐོན། །ཟབ་མོའི་སྒོམ་ཁྲིད་ཞུ་དུས་སུ། །
(༢༥༨)སློབ་གཉེར་གྱི་ཤེས་འདོད་མ་ཆེ་ཞིག །ཆེས་ན་གྲོང་པའི་ཆོས་སྤྱོད་རེམ། །རེམ་ན་མི་ཚེ་སྟོང་ཟད་ཡོང་། །ཉམ་ཆུང་དུ་གྱིས་ལ་རང་མགོ་ཐོན། །ཉམས་རྟོགས་ཉག་ཉུག་སྐྱེ་དུས་སུ། །བརྗོད་འདོད་ཀྱིས་རང་རྩིས་མ་ཆེ་ཞིག །བརྗོད་ན་མ་དང་མཁའ་འགྲོ་འཁྲུག །ཡེངས་མེད་དུ་སྒོམ་ཞིང་རང་མགོ་ཐོན། །བླ་མ་དང་མཉམ་དུ་འགྲོགས་དུས་སུ། །བཟང་ངན་གྱི་སྐྱོན་ཡོན་མ་རྟོག་ཅིག །བརྟགས་ན་སྐྱོན་གྱི་ཕུང་བོར་མཐོང་། །དག་སྣང་བྱེད་བཞིན་རང་མགོ་ཐོན། །མཆེད་གྲོགས་དང་དབང་གྲལ་མཐུན་དུས་སུ། །གྲལ་མགོ་དང་ཁ་རྒན་མ་འདོད་ཅིག །འདོད་ན་ཆགས་སྡང་གིས་དམ་ཚིག་འཁྲུག །མཐུན་པོ་བྱེད་བཞིན་རང་མགོ་ཐོན། །གྲོང་ཡུལ་དུ་ལྡོམ་བུ་བྱེད་དུས་སུ། །ཆོས་ཟོག་གིས་མི་མགོ་མ་སྐོར་ཅིག །བསྐོར་ན་རང་ཉིད་ངན་འགྲོར་ལྟུང་། །ལས་དྲང་པོ་བགྱིས་ཤིང་རང་མགོ་ཐོན། །ལར་དུས་དང་རྣམ་པ་ཐམས་ཅད་དུ། །རང་རྩིས་དང་རང་འདོད་མ་ཆེ་ཞིག །ཆེས་ན་ཆོས་གཟུགས་ཀྱིས་དྲེད་པོར་འགྲོ། །རྫུན་ཟོལ་ཟོག་སྤོངས་ལ་རང་མགོ་ཐོན། །རང་མགོ་འདོན་པའི་སྐྱེས་བུ་ལ། །རང་དྲིན་ཆེ་བའི་གདམས་ངག་རྣམས། །རང་གཞན་དོན་དུ་ད་དུང་སྟེར། །སྦྱིན་པ་སྙིང་གི་དཀྱིལ་དུ་ཟུངས། །ཞེས་གསུངས་པས། ཁོང་རྣམས་སྒོམ་སྒྲུབ་ལ་སྙིང་རུས་དང་། ཚེ་འདི་བློས་གཏང་གི་ཞེ་སྤྱད་ཆེ་བར་བྱུང་སྟེ། རྗེ་བཙུན་ལ་མི་ཕྱེད་པའི་དད་པས་གསེར་གྱི་མཎྜལ་ཕུལ་ནས་ལྟ་སྒོམ་སྤྱོད་པའི་གནད་སྙིང་པོར་དྲིལ་བའི་ཉམས་ལེན་ཞིག་ཞུ་ཞུས་པས། རྗེ་བཙུན་གྱི་ཞལ་ནས། གསེར་ཁྱེད་རང་རྣམས་ཀྱི་སྒྲུབ་རྒྱགས་
(༢༥༩)གྱིས། ལྟ་སྒོམ་གྱི་གནད་འདི་ལྟར་ཡིན་གསུངས། །ལྟ་སྒོམ་སྤྱོད་པའི་གཟེར་འདི་མགུར་དུ་གསུངས་སོ། །རྗེ་བླ་མའི་ལྟ་སྒོམ་སྤྱོད་པའི་འགྲོས། །རང་གྲུབ་ཏུ་གནས་པར་བྱིན་གྱིས་རློབས། །ལྟ་བ་འདི་ལ་གཟེར་གསུམ་གདབ། །སྒོམ་པ་འདི་ལ་གཟེར་གསུམ་གདབ། །སྤྱོད་པ་འདི་ལ་གཟེར་གསུམ་གདབ། །འབྲས་བུ་འདི་ལ་གཟེར་གསུམ་གདབ། །ལྟ་བའི་གཟེར་གསུམ་བཤད་ཙ་ན། །སྣང་སྲིད་སེམས་སུ་འདུས་ཏེ་གདའ། །སེམས་ཉིད་གསལ་བའི་ངང་ལ་གདའ། །དེ་ལ་ངོས་བཟུང་མེད་པར་གདའ། །སྒོམ་པའི་གཟེར་གསུམ་བཤད་ཙ་ན། །རྣམ་རྟོག་ཆོས་སྐུར་གྲོལ་བར་གདའ། །རིག་གསལ་བདེ་བའི་ངང་དུ་གདའ། །མ་བཅོས་མཉམ་པར་བཞག་པར་གདའ། །སྤྱོད་པའི་གཟེར་གསུམ་བཤད་ཙ་ན། །དགེ་བཅུ་སྤྱོད་པའི་ཤུགས་ལ་འཆར། །སྡིག་བཅུ་རང་བཞིན་གནས་སུ་དག །གཉེན་པོས་གསལ་སྟོང་བཅོས་སུ་མེད། །འབྲས་བུའི་གཟེར་གསུམ་བཤད་ཙ་ན། །མྱང་འདས་གཞན་ནས་སྒྲུབ་ཏུ་མེད། །འཁོར་བ་གཞན་དུ་སྤང་དུ་མེད། །རང་སེམས་སངས་རྒྱས་སུ་བློ་ཐག་ཆོད། །གཟེར་གསུམ་ནང་ནས་གཟེར་གཅིག་འདེབས། །གཟེར་ནི་ཆོས་ཉིད་སྟོང་པའི་གཟེར། །འདེབས་མཁན་བླ་མ་དམ་པས་མཛད། །མང་དུ་དཔྱོད་ན་ཐེབས་མི་འགྱུར། །ལྷན་ཅིག་རྟོགས་ན་ཐེབས་པ་ཡིན། །སྤྱིར་ཆོས་མཛད་རྣམས་ཀྱི་སྤྱི་ནོར་འདི། །རྣལ་འབྱོར་བློ་ལ་ཤར་ནས་བླངས། །ཁྱེད་བུ་སློབ་རྣམས་ཀྱི་ཐུགས་དགྱེས་མཛོད། །ཅེས་གསུངས་པས། སློབ་
(༢༦༠)མ་རྣམས་ན་རེ། དེ་རྣམས་མ་ནོར་བར་ཉམས་སུ་ལེན་པའི་ལམ་མཁན་རྩ་བའི་བླ་མ་ལ་ཕུར་ཚུགས་སུ་གསོལ་བ་འདེབས་པ་འདི་ལས་ལྷག་པ་མེད་ལགས་སམ་ཞུས་པས། རྗེ་བཙུན་མཉེས་ནས། ལམ་མཁན་གྱི་རྩ་བ་དེ་ལ་ཡན་ལག་འདི་འདྲ་འབྱུང་བ་ཡིན་གསུངས་ནས་མགུར་འདི་གསུངས་སོ། །བླ་མ་དང་གདམས་ངག་སློབ་མ་གསུམ། །སྙིང་རུས་དང་སྡུག་བསྲན་དད་པ་གསུམ། །ཤེས་རབ་དང་སྙིང་རྗེ་མི་གཞི་གསུམ། །འདི་རྣམས་རྒྱུན་གྱི་ལམ་མཁན་ཡིན། །འདུ་འཛི་མེད་པའི་དབེན་པ་འདི། །བསམ་གཏན་སྐྱོང་བའི་ལམ་མཁན་ཡིན། །གྲུབ་ཐོབ་བླ་མ་རྗེ་བཙུན་དེ། །མུན་པ་སེལ་བའི་ལམ་མཁན་ཡིན། །སྐྱོ་ངལ་མེད་པའི་དད་པ་འདི། །བདེ་འགྲོར་འཁྲིད་པའི་ལམ་མཁན་ཡིན། །དབང་པོ་རྣམ་ལྔའི་རྟོག་པ་དེ། །ཐུག་ཕྲད་གྲོལ་བའི་ལམ་མཁན་ཡིན། །བཀའ་བརྒྱུད་བླ་མའི་ཞལ་གདམས་དེ། །སྐུ་གསུམ་སྟོན་པའི་ལམ་མཁན་ཡིན། །སྐྱབས་ཡུལ་དཀོན་མཆོག་གསུམ་པོ་འདི། །ནོར་བ་མེད་པའི་ལམ་མཁན་ཡིན། །ལམ་མཁན་དྲུག་གིས་སྣ་དྲངས་ནས། །རྣལ་འབྱོར་བདེ་ཆེན་ཐང་ལ་འགྲོ། །སྤྲོས་མེད་མི་རྟོག་ངང་ལ་སྡོད། །རང་ཤེས་རང་གྲོལ་གྱི་རང་ཡུལ་སྐྱིད། །ངེས་ཤེས་དོན་ཤེས་ཀྱི་རང་ཚུགས་བཟུང་། །རྒྱལ་ཁམས་མི་མེད་ལུང་སྟོང་དུ། །རྣལ་འབྱོར་སྐྱིད་གླུ་འབྲུག་བཞིན་སྒྲོག །སྙན་པའི་ཆར་བ་ཕྱོགས་བཅུར་འབབ། །སྙིང་རྗེའི་མེ་ཏོག་ལོ་འདབ་རྒྱས། །བྱང་སེམས་ཀྱི་འབྲས་བུ་དག་པར་སྨིན། །བྱང་ཆུབ་ཀྱི་འཕྲིན་ལས་ཐམས་ཅད་ཁྱབ། །ཅེས་གསུངས་པས། ཁོང་རྣམས་ཀྱི་ཡིད་ལ་བླ་མ་གང་དུ་
(༢༦༡)བཞུགས་ཀྱང་ཆོག་པར་འདུག་པས། ངེད་རྣམས་ཀྱི་ཡུལ་དུ་གདན་འདྲེན་དགོས་སྙམ་ནས། བླ་མ་ལགས། བླ་མའི་ཐུགས་དམ་ལ་ནི་འབུབ་མེད་ཅིང་སྒོམ་མི་དགོས་པར་གདའ་བས། ངེད་རྣམས་ཀྱི་ཡུལ་དུ་ཕེབས་ནས་ཡོན་བདག་གི་ཚོགས་གསོག་བཞེས་ཤིང་ཆོས་འཁོར་བསྐོར་ནས་སེམས་ཅན་གྱི་དོན་མཛད་པར་ཞུ་ཞུས་པ། རྗེ་བཙུན་གྱི་ཞལ་ནས་ང་རི་ཁྲོད་དུ་སྒོམ་པ་འདི་ཀ་སེམས་ཅན་གྱི་དོན་ཡིན། སྒོམ་ལ་འབུབ་མེད་རུང་སྒོམ་ཆེན་རི་ལ་སྡོད་པ་དཔའ་ཚུལ་ཡིན་གསུངས་ནས་མགུར་འདི་གསུངས་སོ། །བླ་མའི་དྲིན་ལན་སྒྲུབ་པས་འཇལ། །རྒྱུད་སྨིན་ཅིང་གྲོལ་བར་བྱིན་གྱིས་རློབས། །ཁྱེད་འདིར་བཞུགས་སྐལ་ལྡན་ཆོས་མཛད་ལ། །ཟབ་དོན་མན་ངག་གླུ་རུ་ལེན། །མ་ཡེངས་རྣ་བའི་དབང་པོ་གཏོད། །གངས་སྟོད་ཀྱི་དར་སེང་དཀར་མོ་དེ། །སེང་གངས་དཀར་ལྟོངས་སུ་འགྱིང་བ་དེ། །གཞན་གྱིས་འཇིགས་པ་མ་ལགས་ཏེ། །སེང་གངས་ལ་འགྱིང་བ་དཔའ་ཚུལ་ཡིན། །བྲག་དམར་གྱི་བྱ་རྒྱལ་རྒོད་པོ་དེ། །རྒོད་གཤོག་སྒྲོ་ནམ་མཁའི་དབྱིངས་སུ་བརྐྱང་། །རྒོད་གཡང་ལ་ལྷུང་དོགས་མ་ཡིན་ཏེ། །ནམ་འཕང་གཅོད་པ་དཔའ་ཚུལ་ཡིན། །མ་གི་ཆུ་བོ་རྒྱ་མཚོ་ལ། །འགྱུར་ལྕམ་ཉ་མོས་ཡང་རྩལ་སྦྱོང་། །ཉ་འཚུབས་ཀྱིས་བོགས་པ་མ་ཡིན་ཏེ། །ལུས་འགྱུར་འཁྱུག་པ་དཔའ་ཚུལ་ཡིན། །མོན་རི་ཤིང་གི་ཡལ་ག་ལ། །སྤྲ་སྤྲེའུས་ཡང་རྩལ་སྦྱོང་བ་དེ། །སྤྲེའུ་འགྱེལ་གྱིས་དོགས་པ་མ་ཡིན་ཏེ། །རྩེད་སྣ་མང་བ་རང་གཤིས་ཡིན། །ཤིང་གསེབ་ནགས་ཀྱི་ལྡིང་ཁང་ན། །རྒྱ་སྟག་ཁྲ་བོས་ཡང་རྩལ་སྦྱོང་། །
(༢༦༢)སྟག་འཇིགས་ཀྱིས་དོགས་པ་མ་ལགས་ཏེ། །རྩལ་གྱིས་དྲེགས་པའི་རང་གཤིས་ཡིན། །སིང་ག་ལ་ཡི་ནགས་གསེབ་ན། །མི་ལ་རས་པས་སྟོང་ཉིད་སྒོམ། །སྒོམ་ཤོར་གྱིས་དོགས་པ་མ་ལགས་ཏེ། །སྒོམ་ཡུན་དུ་བསྲིང་བ་དཔའ་ཚུལ་ཡིན། །ཆོས་དབྱིངས་རྣམ་དག་དཀྱིལ་འཁོར་ལ། །ཡེངས་པ་མེད་པའི་ཉམས་ལེན་དེ། །དོན་ནོར་གྱིས་དོགས་པ་མ་ཡིན་ཏེ། །གནད་རང་ས་འཛིན་པ་དཔའ་ཚུལ་ཡིན། །ནང་རྩ་རླུང་ཐིག་ལེའི་ཉམས་ལེན་ལ། །གེགས་དང་གོལ་ས་འཕྱུག་པ་དེ། །ཆོས་སྐྱོན་ཅན་ཡིན་པ་མ་ལགས་ཏེ། །རྟགས་མྱུར་དུ་ཐོན་པའི་ཁ་ཕོ་ཡིན། །རང་ཤར་སྤྱོད་པའི་ཤུགས་འགྲོས་ལ། །མཐོ་དམན་རྣམ་འགྱུར་མང་བ་དེ། །བློ་གཉིས་སྣང་གི་རྟོག་པ་མ་ཡིན་ཏེ། །རྟགས་སྣ་ཚོགས་འཆར་བའི་རྟེན་འབྲེལ་ཡིན། །ལས་རྒྱུ་འབྲས་ནུས་པ་སྨིན་པ་ལ། །དགེ་སྡིག་གི་རང་གཟུགས་མཐོང་བ་དེ། །སྒོམ་གོལ་སར་སོང་བ་མ་ཡིན་ཏེ། །རིགས་སོ་སོར་གསལ་བའི་བདེན་ཚིག་ཡིན། །སྒོམ་རང་ཚུགས་ཐུབ་པའི་སྒོམ་ཆེན་རྣམས། །འཇིག་རྟེན་ལ་སྲེད་པ་ཆུང་བ་དེ། །གཏམ་ཟེར་ལོ་འདོད་པ་མ་ཡིན་ཏེ། །འཕྲལ་ཞེན་པ་ལོག་པའི་ནང་རྟགས་ཡིན། །ཆོས་ཟབ་ལམ་སྒོམ་པའི་རྣལ་འབྱོར་ང་། །རི་དང་བྲག་ལ་སྐྱོ་བ་དེ། །ཟོག་དང་ཐོ་ཅོ་མ་ཡིན་ཏེ། །རྩེ་གཅིག་ཏུ་བསྒོམ་པ་རང་འདོད་ཡིན། །རས་པའི་གླུ་དབྱངས་མང་པོ་འདི། །ཡེངས་འདོད་ཀྱི་ཁ་ཁྲམ་མ་ཡིན་ཏེ། །དད་ཅན་བུ་སློབ་ཚོགས་པ་ལ། །ཕན་པའི་སྙིང་གཏམ་ཟབ་མོ་ཡིན། །ཞེས་གསུངས་པས། ཁོང་རྣམས་ན་རེ། འོ་ན་རི་ཁྲོད་ཁོ་
(༢༦༣)ནར་བཞུགས་རུང་བསམ་གཏན་ཁང་བ་སོགས་མཐུན་རྐྱེན་རེ་དགོས་པར་འདུག་པས་བསྒྲུབ་འཚལ་ཞུས་པས། རྗེ་བཙུན་གྱི་ཞལ་ནས། ང་ལ་བསམ་གཏན་གྱི་མཁར་སོགས་མཐུན་རྐྱེན་རྣམས་འདི་འདྲ་ཡོད་གསུངས་ནས་མགུར་འདི་གསུངས་སོ། །ཕ་ཡིད་བཞིན་ནོར་བུའི་ཞབས་ལ་འདུད། །བུ་མཐུན་རྐྱེན་འཛོམ་པར་བྱིན་གྱིས་རློབས། །རང་ལུས་ལྷ་སྐུའི་མཁར་སྤེ་ལ། །ངེས་ཤེས་འདྲོངས་པར་མཛད་དུ་གསོལ། །ངས་འཇིགས་ཀྱིས་དོགས་ནས་མཁར་ཞིག་བརྩིགས། །མཁར་ནི་ཆོས་ཉིད་སྟོང་པའི་མཁར། །ད་ཞིག་གིས་དོགས་པ་ང་ལ་མེད། །ངས་གྲང་གིས་དོགས་ནས་གོས་ཤིག་བཙལ། །གོས་ནི་གཏུམ་མོ་ཨ་ཤད་གོས། །ད་གྲང་གིས་དོགས་པ་ང་ལ་མེད། །ངས་དབུལ་གྱིས་དོགས་ནས་ནོར་ཞིག་བཙལ། །ནོར་ནི་འཛད་མེད་འཕགས་ནོར་བདུན། །ད་དབུལ་གྱིས་དོགས་པ་ང་ལ་མེད། །ངས་ལྟོགས་ཀྱིས་དོགས་ནས་ཟས་ཤིག་བཙལ། །ཟས་ནི་ཆོས་ཉིད་ཏིང་འཛིན་ཟས། །ད་ལྟོགས་ཀྱིས་དོགས་པ་ང་ལ་མེད། །ངས་སྐོམ་གྱིས་དོགས་ནས་བཏུང་བ་བཙལ། །བཏུང་བ་དྲན་ཤེས་བདུད་རྩིའི་ཆང་། །ད་སྐོམ་གྱིས་དོགས་པ་ང་ལ་མེད། །ངས་སྐྱོ་ཡིས་དོགས་ནས་གྲོགས་ཤིག་བཙལ། །གྲོགས་ནི་བདེ་སྟོང་རྒྱུན་གྱི་གྲོགས། །ད་སྐྱོ་ཡིས་དོགས་པ་ང་ལ་མེད། །ངས་ནོར་གྱིས་དོགས་ནས་ལམ་ཞིག་བཙལ། །ལམ་ནི་ཟུང་འཇུག་ཡངས་པའི་ལམ། །ད་ནོར་གྱིས་དོགས་པ་ང་ལ་མེད། །ནོར་འདོད་དགུ་ཚང་བའི་རྣལ་འབྱོར་ང་། །གནས་གང་དུ་བསྡད་ཀྱང་
(༢༦༤)སྐྱིད་པར་འདུག །ཡོལ་མོ་སྟག་ཕུག་སེང་གེ་རྫོང་། །སྟག་མོའི་ངར་སྐད་སྐྱི་ཤ་ཚ། །དེས་དབང་མེད་སྐུ་མཚམས་དམ་དུ་བཅུག །སྟག་ཕྲུག་གི་རྩེད་འཕྱོ་སྙིང་རྗེ་སྐྱེ། །དེས་དབང་མེད་དུ་བྱང་སེམས་བསྒོམ་དུ་བཅུག །སྤྲེའུའི་ཙི་སྒྲ་ཞེ་ལ་བཅགས། །དེས་དབང་མེད་དུ་སྐྱོ་ཤས་སྐྱེ་རུ་བཅུག །སྤྲེ་ཕྲུག་གི་ཀུ་སྒྲ་དགོད་སྙིང་འདོད། །དེས་དབང་མེད་དུ་སེམས་བསྐྱེད་བསྒོམ་དུ་བཅུག །ཁུ་བྱུག་གི་ངག་སྙན་ཡིད་རྩ་སྐྱོ། །དེས་དབང་མེད་དུ་མཆི་མ་འཆོར་དུ་བཅུག །ཅོ་གའི་འགྱུར་སྐད་རྣ་བར་སྙན། །དེས་དབང་མེད་དུ་རྣ་བ་སྙན་དུ་བཅུག །བྱ་རོག་གི་སྒྲ་སྐད་སྣ་ཚོགས་པ། །རྣལ་འབྱོར་འདུག་གྲོགས་སེམས་ལ་ཕན། །གནས་འདི་འདྲར་བསྡད་ན་ངང་གིས་སྐྱིད། །གྲོགས་གཅིག་ཀྱང་མེད་ན་དེ་བས་སྐྱིད། །རྣལ་འབྱོར་སྐྱིད་པའི་ཉམས་དབྱངས་འདིས། །འགྲོ་བའི་སྡུག་བསྔལ་སེལ་བར་ཤོག །ཅེས་གསུངས་པས། དེ་དུས་ཀྱི་བུ་སློབ་རྣམས་ལ་སྐྱོ་ཤས་དང་ངེས་འབྱུང་དྲག་པོ་སྐྱེས་ནས་རི་ལས་མི་འབབ་པའི་དམ་བཅའ་ཕུལ་ནས་བསྒོམས་ནས་དགེ་སྦྱོར་མཐར་ཕྱིན་པ་ཁོ་ན་བྱུང་བ་ཡིན་ནོ། །དེ་ནས་རྗེ་བཙུན་ལ་ཡང་ཡི་དམ་གྱིས་ད་ཡང་བོད་ལ་སོངས་ལ་རི་ཁྲོད་དབེན་པར་སྒོམ་བཞིན་པའི་ངང་ནས་འགྲོ་བའི་དོན་གྱིས་ཤིག བསྟན་པ་དང་སེམས་ཅན་ལ་ཕན་པར་འགྱུར་རོ་བྱ་བའི་ལུང་བསྟན་བྱུང་བས། རྗེ་བཙུན་ཡང་ཐུགས་བོད་ལ་ཆས་སོ། །ཡོལ་མོ་གངས་རའི་སྐོར་རོ། །
(༢༦༥)ཕུག་རོན་ལྷའི་བུ་མོས་མཆོད་པའི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་ཡོལ་མོ་ནས་ལུང་བསྟན་བཞིན་བོད་ལ་བྱོན་ནས། ཀུ་ཐང་གི་ཕུག་པ་ཞིག་ཏུ་བསེ་རུ་ལྟར་གཅིག་པུར་འོད་གསལ་གྱི་ངང་ལ་བཞུགས་པའི་ཚེ། ཕུག་རོན་གསེར་གྱི་རྣ་ཆ་གཡོ་བ་ཞིག་བྱུང་སྟེ། ཕྱག་གི་ཚུལ་དུ་ལུས་ཞུང་ཞུང་མགོ་གུག་གུག་དང་སྐོར་བ་མང་དུ་བྱས་ནས། ས་ཕྱོགས་གཙང་བའི་བྲག་ཁ་ཞིག་ཏུ་འཕུར་སོང་བ་ལས། རྗེ་བཙུན་གྱིས་མི་མ་ཡིན་གྱི་གདན་འདྲེན་དུ་མཁྱེན་ནས། དེའི་སར་བྱོན་པས། འབྲས་དཀར་མོའི་ཕུང་བོ་ཞིག་འདུག་པ་དེ་ལ། ཕུག་རོན་དེས་མཆུ་བཙུགས་ནས་འབུལ་ཚུལ་དང་། སྔར་ལྟར་ཕྱག་དང་སྐོར་བ་བྱས་ཏེ་འཕུར་སོང་བ་ལས། རྗེ་བཙུན་ཐུགས་སྤྲོ་ཞིང་ཡ་མཚན་པར་གྱུར་ཏེ་མགུར་འདི་གསུངས་སོ། །ཨེ་མ་ཧོ། །དྲིན་ཅན་མར་པ་ལྷོ་བྲག་པ། །སྙིང་ནས་དྲན་པས་སྙིང་དུ་བསྒོམ། །ཡང་ཡང་འབྲལ་མེད་གསོལ་བ་འདེབས། །རང་སེམས་བླ་མ་འདྲེས་པས་བདེ། །ཨ་ལ་ལ་སྣང་བ་གཤིས་ཀྱི་རང་བཞིན་འདི། །སྐྱེ་མེད་ཆོས་སྐུར་ངོ་སྤྲད་པས། །མ་བཅོས་ཆོས་སྐུའི་ངང་དུ་འདྲེས། །ལྟ་བ་མཐོ་དམན་རྩིས་གདབ་མེད། །སེམས་མ་བཅོས་པ་འདི་བདེ་མོར་གདའ། །སྟོང་གསལ་སེམས་ཀྱི་རང་བཞིན་འདི། །གསལ་སྟོང་རིག་པར་ངོ་སྤྲད་པས། །མ་བཅོས་གཉུག་མའི་ངང་དུ་འདྲེས། །སྒོམ་བཟང་ངན་གྱི་རྩིས་གདབ་བདག་ལ་མེད། །སེམས་མ་བཅོས་པ་འདི་
(༢༦༦)བདེ་མོར་གདའ། །ཚོགས་དྲུག་རང་སར་དྭངས་པ་ལ། །གཟུང་འཛིན་གཉིས་མེད་ངོ་སྤྲད་པས། །བདེ་སྡུག་གཉིས་པོ་གཅིག་ཏུ་འདྲེས། །མ་བཅོས་གཉུག་མའི་ངང་དུ་ལུས། །སྤྱོད་པ་ཡིན་མིན་གྱི་རྩིས་གདབ་བདག་ལ་མེད། །སེམས་མ་བཅོས་པ་འདི་བདེ་མོར་གདའ། །འབྲས་བུ་ཆོས་སྐུའི་རང་བཞིན་འདི། །སྣ་ཚོགས་སྤྲུལ་སྐུར་ངོ་སྤྲད་པས། །ཐུག་ཕྲད་དྲན་གྲོལ་གྱི་ངང་དུ་འདྲེས། །འབྲས་བུ་ཚུར་ཤོག་གི་ཡིད་སྨོན་བདག་ལ་མེད། །སེམས་མ་བཅོས་པ་འདི་བདེ་མོར་གདའ། །ཞེས་གསུངས་པའི་མཐར། སྔར་གྱི་ཕུག་རོན་དེ་གྲོགས་བདུན་དང་བཅས་པ་འོངས་ནས། རྗེ་བཙུན་ལ་སྔར་ལྟར་ཕྱག་དང་སྐོར་བ་བྱེད་དུ་བྱུང་བས། རྗེ་བཙུན་གྱི་ཐུགས་ལ་འདི་རྣམས་མི་མ་ཡིན་དུ་འདུག་པས། གཏམ་གསོང་པོར་སྨྲའམ་མི་སྨྲ་བལྟ་དགོངས་ནས། ཁྱེད་རྣམས་སུ་ཡིན་ཅི་ལ་ཡོང་གསུངས་པས། ལྷའི་བུ་མོ་རྣམས་ཀྱིས་རྫུ་འཕྲུལ་བཤིགས་ནས། རང་ལུས་བསྟན་ཏེ་སྔར་བྱུང་བའི་གཙོ་མོ་དེ་ན་རེ། བདག་རྣམས་ལྷའི་བུ་མོ་ལགས། ཁྱེད་ལ་དད་ནས་ཆོས་ཞུ་རུ་ཡོང་བ་ལགས་པས། གནང་བར་ཞུ་ཟེར་བའི་ལན་དུ་རྗེ་བཙུན་གྱིས་མགུར་འདི་གསུངས་སོ། །རྗེ་ངོ་མཚར་སྤྲུལ་པའི་བླ་མ་དེ། །ཐུགས་རྗེ་མ་ཆུང་བྱིན་གྱིས་རློབས། །ཁྱོད་བྱ་ཕུག་རོན་སྔོན་མོར་ལུས་སྟོན་པའི། །རྣམ་འཕྲུལ་ཆོས་མཐུན་སྤྱོད་པ་ཅན། །མཚར་སྡུག་ལྷ་ཡི་བུ་མོ་བརྒྱད། །དཀར་པོའི་ལྷ་ཆོས་བྱེད་སྙམ་ན། །གླུ་འདི་དོན་ཡིད་ལ་འཛིན་པར་ཞུ། །སྤྱིར་འཇིག་རྟེན་སྲིད་པའི་བདེ་བ་འདི། །སྐྱིད་སྐྱིད་འདྲ་ཡང་མྱུར་དུ་
(༢༦༧)འབྲལ། །སྒོས་མོ་བཙུན་བཟང་མོའི་ལྟ་བ་འདི། །མཐོ་མཐོ་འདྲ་ཡང་གཏད་སོ་མེད། །འཁོར་བ་སྡུག་བསྔལ་གྱི་ཁྱིམ་ཐབ་འདི། །འཐད་འཐད་འདྲ་ཡང་སྡུག་བསྔལ་མང་། །རིགས་རྒྱུད་བཟང་པོའི་བུ་ཕྲུག་དེ། །རང་འཁོས་མེད་ན་མྱ་ངན་ཆེ། །བླ་མ་བཟང་པོའི་སློབ་མ་དེ། །སྤྱོད་པ་ངན་ན་འཁོར་བར་ལྟུང་། །ཕུག་རོན་སྤྲུལ་པའི་ལྷ་མོ་ཡིས། །དམ་ཆོས་ཞུས་ཀྱང་ཡིད་ཆེས་དཀའ། །ཅིས་ཀྱང་དམ་ཆོས་མཛད་པ་ན། །འཇིག་རྟེན་འདི་ཡི་ཡོན་ཏན་ལ། །ངེས་པར་སྐྱོན་དུ་མཐོང་བ་དང་། །ཚེ་འདིར་བྱུང་བའི་རྐྱེན་ངན་རྣམས། །བྱང་ཆུབ་གྲོགས་སུ་ཤེས་པར་མཛོད། །མི་བདག་ལ་རྐྱེན་ངན་བཀའ་དྲིན་ཆེ། །ཁྱེད་ཀྱང་དེ་བཞིན་ཤེས་པར་མཛོད། །ཅེས་གསུངས་པས། ལྷ་མོ་དེ་རྣམས་དེ་ལྟར་འཚལ་ལོ་ཞེས་བཞིན་འཛུམ་པ་དང་བཅས་པས་ཕྱག་དང་སྐོར་བ་བྱེད་ཅིང་འདུག་པ་ལ། རྗེ་བཙུན་གྱིས་ཁྱེད་རྣམས་ཕུག་རོན་དུ་སྤྲུལ་ཡོང་བ་ཅི་ཡིན་གསུངས་པས། ཁོང་རྣམས་ན་རེ། ཁྱེད་ཚེ་འདི་དང་རང་དོན་གྱི་འཁྲི་བ་རྩ་བ་ནས་མེད་པར་གཞན་དོན་དུ་བྱང་ཆུབ་སྒྲུབ་ཕྱིར་གཡེང་བ་ཀུན་སྤངས་ནས། གཅིག་པུར་ཁོར་ཡུག་ཏུ་བསམ་གཏན་ཁོ་ན་མཛད་པ་དེ། ངེད་ལྷའི་མིག་གིས་མཐོང་བས། དད་ནས་ཆོས་ཞུ་རུ་ཡོང་བ་ལ་མི་སྡིག་ཅན་ལ་ལུས་སྦ་ཕྱིར་སྤྲུལ་པ་ཡིན། ད་ལྷའི་ཡུལ་དུ་བྱོན་ནས་ཆོས་གསུང་བར་ཞུ་ཞུས་པ་ལ། རྗེ་བཙུན་གྱི་ཞལ་ནས། ང་ཚེ་གང་འདི་མི་ཡུལ་དུ་བསྡད་ནས་འགྲོ་དོན་བྱེད། ལྷ་ཡུལ་ལའང་སྙིང་པོ་མེད་པས་དགོས་པ་མེད། ལྷ་ཡུལ་དུ་ཕྱིན་རུང་འདི་ལས་མེད་པས། ཁྱེད་
(༢༦༨)རང་རྣམས་འདི་བཞིན་ཉམས་སུ་ལོངས་གསུངས་ནས་མགུར་འདི་གསུངས་སོ། །ལྷོ་བྲག་མར་པའི་ཞབས་ལ་འདུད། །ཕ་བླ་མའི་བྱིན་རླབས་དངོས་གྲུབ་ཞུ། །ཁྱེད་ལྷ་ཡི་བུ་མོ་མཛེས་མ་བརྒྱད། །འབྲས་དཀར་མོའི་དངོས་གྲུབ་བསམ་གཏན་ཟས། ཁམས་སོས་པར་གྱུར་པས་ཐུགས་དམ་འཕེལ། །དྲིན་ལན་ཆོས་ཀྱིས་འཇལ་བ་ལ། །སྙན་ལྷན་ནེ་གསོན་ལ་ཡིད་ལ་ཞོག །དཀར་པོ་ལྷ་ཡི་རྒྱལ་ས་དེ། །འཛིན་རྒྱུ་བྱུང་ཡང་སྙིང་པོ་མེད། །ལྷ་ཕྲུག་གཞོན་ནུའི་བརྩེ་གདུང་དེ། །སྣང་བ་སྐྱིད་ཀྱང་མྱུར་དུ་འབྲལ། །མིག་འཕྲུལ་སྒྱུ་མའི་ཟོལ་ཟོག་དེ། །ལོངས་སྤྱོད་ཆེ་ཡང་ལྟུང་བའི་རྒྱུ། །འགྲོ་དྲུག་འཁོར་པའི་སྡུག་བསྔལ་དེ། །བསམས་ན་སྙིང་རླུང་དྲག་པོ་ལྡང་། །ཁྱེད་དེ་ཕྱིར་ལྷ་ཆོས་བྱེད་བསམས་ན། །སྐྱབས་དཀོན་མཆོག་གསུམ་ལ་གསོལ་བ་ཐོབ། །འགྲོ་དྲུག་སེམས་ཅན་ཕ་མར་སྒོམས། །མཆོད་པ་བླ་མ་རྗེ་ལ་ཕུལ། །སྦྱིན་པ་དབུལ་ཕོངས་རྣམས་ལ་ཐོངས། །དགེ་བ་འགྲོ་དྲུག་དོན་དུ་སྔོས། །རྒྱུན་དུ་ནམ་འཆི་ཆ་མེད་སྒོམས། །རང་ལུས་ཡི་དམ་ལྷ་ཡི་ངང་། །བརྗོད་པ་ཟབ་མོའི་སྔགས་ལ་གྱིས། །རང་རིག་ཡེ་ཤེས་སྟོང་ཉིད་སྒོམས། །རྒྱུན་དུ་རང་སེམས་དཔང་དུ་ཚུགས། །ཞེས་གསུངས་པས། ཁོང་རྣམས་ན་རེ། ངེད་མ་རིག་པའི་སེམས་ཅན་རྣམས། སེམས་དང་མ་བྲལ་རྟིང་ཉོན་མོངས་པ་དང་མི་འབྲལ་བར་འདུག་པ་འདི་ལ་དྲན་འཛིན་གཉེན་པོ་བསྟེན་ཐབས་ཀྱི་ཆོས་ཤིག་གསུང་བར་ཞུ་ཟེར་བའི་ལན་དུ་མགུར་འདི་གསུངས་སོ། །
(༢༦༩)དྲིན་ཅན་མར་པའི་ཞབས་ལ་འདུད། །རྒྱུད་གཉེན་པོ་བཟང་བར་བྱིན་གྱིས་རློབས། །ཁྱེད་དད་ལྡན་ལྷ་ཡི་བུ་མོ་རྣམས། །རྒྱུན་དུ་ཉམས་ལེན་བྱེད་པ་ན། །ནང་དུ་ཞི་གནས་བསམ་གཏན་སྒོམས། །བྱ་བ་བཏང་བ་གཅིག་རྒྱན་དུ་ཆེ། །ཕྱི་རུ་གཉེན་པོ་ཏུར་རེ་ཟུངས། །ལུས་ངག་དལ་བ་གཅིག་རྒྱན་དུ་ཆེ། །རྒྱུན་དུ་དྲན་པ་རང་སོ་ཟུངས། །བྱ་བྱེད་ཉུང་བ་གཅིག་རྒྱན་དུ་ཆེ། །རྐྱེན་ངན་བློ་བརྡེག་བྱུང་ཙ་ན། །ཞེ་སྡང་ལངས་དོགས་ཏུར་རེ་གྱིས། །འདོད་པའི་ནོར་དང་ཕྲད་དུས་སུ། །འདོད་ཆགས་སྐྱེས་དོགས་ཏུར་རེ་གྱིས། །ཚིག་ངན་མཚོན་ཆ་བྱུང་དུས་སུ། །རྣ་བ་འཁྲུལ་དོགས་ཏུར་རེ་གྱིས། །གྲོགས་དང་མཉམ་པོར་འགྲོགས་དུས་སུ། །ཕྲག་དོག་སྐྱེས་དོགས་ཏུར་རེ་གྱིས། །རང་ལ་བཀུར་སྟི་བྱུང་དུས་སུ། །ང་རྒྱལ་སྐྱེས་དོགས་ཏུར་རེ་གྱིས། །དུས་དང་རྣམ་པ་ཐམས་ཅད་དུ། །རང་རྒྱུད་ངན་པའི་འགོང་བོ་ཐུལ། །སྤྱོད་ལམ་རྣམ་བཞི་ཅི་བྱེད་ཀྱང་། །གང་ཤར་སྟོང་ཉིད་སྒྱུ་མར་སྒོམས། །མཁས་བཙུན་བརྒྱ་ཡི་ཞལ་ཕྱེ་ཡང་། །དེ་ལས་ལྷག་པ་ཡོང་རྒྱུ་མེད། །ཁྱེད་དགའ་བར་སྒོམས་ལ་ཉམས་ལེན་གྱིས། །ཞེས་གསུངས་པས། ལྷ་མོ་དེ་རྣམས་དགའ་མགུ་ཡི་རངས་ཏེ་སླར་ཡང་ཕུག་རོན་དུ་སྤྲུལ་ནས་ལྷ་ཡུལ་དུ་སོང་ངོ་། །རྗེ་བཙུན་ཡང་འབྲས་བཞེས་པས་ཐུགས་དམ་འཕེལ་བའི་ངང་ནས་བྲག་སྐྱ་རྡོ་རྗེ་རྫོང་ལ་བྱོན་ནོ། །ཕུག་རོན་ལྷའི་བུ་མོས་མཆོད་པའི་སྐོར་ཏེ། འདི་ཡན་གཙོ་བོར་མི་མ་ཡིན་རྣམས་ཀྱིས་མཐོ་འཚམས་པ་དམ་ལ་བཏགས་པའི་སྐོར་རོ། །
(༢༧༠)སྐལ་ལྡན་ཐུགས་སྲས་རྣམས་སྨིན་གྲོལ་ལ་བཀོད་པའི་སྐོར་ལས་བྲག་སྐྱ་རྡོ་རྗེ་རྫོང་གི་སྐོར་ཚོ་སྔ་མ། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་བྲག་སྐྱ་རྡོ་རྗེ་རྫོང་ལ་བྱོན་ནས། བྲག་རྟ་སྒའི་ཕུག་ན་ཐུགས་དམ་འཕེལ་བར་ཡོད་པའི་ཚེ། ཀུ་ཐང་གི་སྔགས་པ་ཞིག་རྗེ་བཙུན་གྱི་ཞལ་བལྟར་བྱུང་བས་མཆོག་ཏུ་དད་པར་གྱུར་ནས། བླ་མ་ལགས། བདག་གིས་སྒོམ་ལོ་བྱས་རུང་། གནད་ཅིག་མ་ཤེས་པ་ལགས་སམ། སྐྱེད་དང་ཡོན་ཏན་ཙམ་ཡོང་རྒྱུ་མ་བྱུང་བ་འདི་ལ་གདམས་ངག་གནང་བར་ཞུ་ཞུས་པའི་ལན་དུ། དེ་ལ་གནད་འདི་ཀུན་ཤེས་དགོས་ཞེས་ཡོད་དེ་དྲུག་གི་མགུར་འདི་གསུངས་སོ། །སེམས་ཀྱི་འཆར་སྒོ་འདི་ཉི་ཟེར་གྱི་རྡུལ་བས་ཀྱང་མང་བ་ཞིག་གདའ་སྟེ། །དེ་ལ་དངོས་སྣང་རང་མལ་དུ་ཤེས་པའི་ཇོ་བོ་རྣལ་འབྱོར་པ་འདྲ་ཡོད་དེ། །གཞི་དངོས་པོའི་གནས་ལུགས་དེ་རྒྱུ་རྐྱེན་གང་གིས་ཀྱང་མ་བསྐྱེད་པ་ཞིག་གདའ་སྟེ། །དེ་ལ་ཉག་གཅིག་རྩད་ནས་ཆོད་པའི་ཇོ་བོ་རྣལ་འབྱོར་པ་འདྲ་ཡོད་དེ། །ཐོལ་སྐྱེས་ཀྱི་ཤེས་པ་འདི་མདུང་ཐོགས་བརྒྱ་ཡིས་མི་བཟློག་པ་ཞིག་གདའ་སྟེ། །དེ་ལ་ཞེན་པ་རང་ལོག་ཏུ་ཤེས་པའི་ཇོ་བོ་རྣལ་འབྱོར་པ་འདྲ་ཡོད་དེ། །ཡིད་འགྱུ་བྱེད་འདི་ལྕགས་ཀྱི་པར་བུར་བཅུག་ཀྱང་མི་ཐུབ་པ་ཞིག་གདའ་སྟེ། །དེ་ལ་དྲན་པ་རང་སྟོང་དུ་ཤེས་པའི་ཇོ་བོ་རྣལ་འབྱོར་པ་འདྲ་ཡོད་དེ། །འདོད་ཡོན་གྱི་ལོངས་སྤྱོད་འདི་ཡེ་ཤེས་ལྷ་ཡིས་མི་སྤོངས་པ་ཞིག་གདའ་སྟེ། །དེ་ལ་ཚོགས་དྲུག་ལྷུག་པར་ཤེས་པའི་ཇོ་བོ་རྣལ་འབྱོར་པ་
(༢༧༡)འདྲ་ཡོད་དེ། །ཚོགས་དྲུག་ཡུལ་གྱི་སྣང་བ་འདི་རྒྱལ་བའི་ཕྱག་གིས་ཀྱང་མི་ཁེགས་པ་གདའ་སྟེ། །དེ་ལ་སྣང་བ་ཡུལ་མེད་དུ་ཤེས་པའི་ཇོ་བོ་རྣལ་འབྱོར་པ་འདྲ་ཡོད་དེ། །གསུངས་པས། ཡང་ཁོ་ན་རེ། དེ་ལྟ་བུའི་ཐུགས་དམ་དེ་རིམ་གྱིས་སྐྱེ་ལགས་སམ། ཅིག་ཅར་དུ་སྐྱེ་ཞེས་ཞུས་པས། རྗེ་བཙུན་གྱིས་གང་ཟག་དབང་བོ་རབ་ལ་ཅིག་ཅར་དུ་སྐྱེ། འབྲིང་དང་ཐ་མ་ལ་རྣལ་འབྱོར་བཞིའི་རིམ་པས་སྐྱེ་སྟེ། སྐྱེས་ངེས་པ་དང་མ་སྐྱེས་པ་སྐྱེས་པར་གཟུང་བའི་རྟགས་འདི་འདྲ་འོང་གསུངས། རྣལ་འབྱོར་བཞིའི་ཡིན་མིན་ཤན་འབྱེད་ཀྱི་མགུར་འདི་གསུངས་སོ། །རྗེ་བླ་མ་མཆོག་གི་ཞབས་ལ་འདུད། །སེམས་དངོས་པོར་འཛིན་པ་འཁོར་བའི་རྒྱུ། །གསལ་ལ་འཛིན་མེད་རང་རིག་དེ། །ལྷུན་གྲུབ་ཡིན་པར་ངོ་ཤེས་ན། །རྩེ་གཅིག་མཐའ་རུ་ཕྱིན་པ་ཡིན། །ཟུང་འཇུག་ཟེར་ཞིང་མཚན་བཅས་བསྒོམ། །རྒྱུ་འབྲས་ཟེར་ཞིང་ལོག་འཚོ་བསྒྲུབ། །རྨོངས་པ་ཀུན་འབྱུང་བསྒོམ་པ་ལ། །རྩེ་གཅིག་གི་རྣལ་འབྱོར་ཁོ་ལ་མེད། །གསལ་ལ་འཛིན་མེད་རང་སེམས་དེ། །སྤྲོས་བྲལ་བདེ་བའི་སྙིང་པོ་ཅན། །ངོ་བོ་མཁའ་ལྟར་གསལ་ཙ་ན། །སྤྲོས་བྲལ་མཐའ་རུ་ཕྱིན་པ་ཡིན། །སྤྲོས་མེད་ཟེར་ཞིང་སྤྲོས་པ་མང་། །བརྗོད་མེད་ཟེར་ཞིང་ཐ་སྙད་མང་། །རྨོངས་པ་ངར་འཛིན་བསྒོམ་པ་ལ། །སྤྲོས་བྲལ་གྱི་རྣལ་འབྱོར་ཁོ་ལ་མེད། །སྣང་སྟོང་གཉིས་མེད་ཀྱི་ཆོས་སྐུ་ལ། །འཁོར་འདས་གཅིག་ཏུ་ཉམས་སུ་མྱོང་། །སངས་རྒྱས་སེམས་ཅན་འདྲེས་པ་ན། །རོ་གཅིག་ཟེར་ཞིང་དུ་མར་སྨྲ། །ཉག་གཅིག་ཟེར་ཞིང་
(༢༧༢)ཐུན་དུ་གཅོད། །རྨོངས་པ་ཡི་ཡང་རྨོངས་པ་ལས། །རོ་གཅིག་གི་རྣལ་འབྱོར་ཁོ་ལ་མེད། །རྣམ་རྟོག་ཡེ་ཤེས་ཀྱི་སྙིང་པོ་ཅན། །ལྷུན་གྲུབ་རྒྱུ་འབྲས་གཉིས་སུ་མེད། །སྐུ་གསུམ་རང་ལ་ཚང་ཙ་ན། །སྒོམ་མེད་མཐའ་རུ་ཕྱིན་པ་ཡིན། །སྒོམ་མེད་ཟེར་ཞིང་ཡིད་ལ་བྱེད། །འོད་གསལ་ཟེར་ཞིང་གཏི་མུག་བསྒོམ། །རྨོངས་པ་ཁ་ལྟ་སྨྲ་བ་ལ། །སྒོམ་མེད་ཀྱི་རྣལ་འབྱོར་ཁོ་ལ་མེད། །ཅེས་གསུངས་པས། ཡང་ཁོས་ཉམས་ལེན་དེ་ཚོ་ངོ་མཚར་ཤིན་ཏུ་ཆེ་བར་གདའ། ངེད་འཇིག་རྟེན་པ་རྣམས་ཕ་རོལ་ཏུ་ཕྱིན་པ་དྲུག་ཉམས་སུ་ལེན་ན་ཇི་ལྟར་ལེན། ཞེས་ཞུས་པའི་ལན་དུ་མགུར་འདི་གསུངས་སོ། །རྗེ་མཚན་ལྡན་བླ་མའི་ཞབས་ལ་འདུད། །ནོར་རྫས་རྩྭ་ཁའི་ཟིལ་བ་འདྲ། །ཆགས་སེམས་མེད་པའི་སྦྱིན་པ་ཐོངས། །དལ་འབྱོར་སྙིང་པོ་ལེན་པའི་ཚེ། །མིག་འབྲས་བཞིན་དུ་ཚུལ་ཁྲིམས་སྲུངས། །ངན་སོང་རྩ་བ་ཞེ་སྡང་ཡིན། །སྲོག་ལ་བབ་ཀྱང་བཟོད་པ་སྒོམས། །ལེ་ལོས་རང་གཞན་དོན་མི་འགྲུབ། །དགེ་བའི་ལས་ལ་བརྩོན་པར་མཛོད། །འཁྲུལ་བས་ཐེག་ཆེན་དོན་མི་རྟོགས། །རྩེ་གཅིག་དོན་ལ་གོམས་པར་གྱིས། །བཙལ་བས་སངས་རྒྱས་མི་རྙེད་པས། །རང་གི་སེམས་ཀྱི་མཚན་ཉིད་ལྟོས། །དད་པ་སྟོན་ཀའི་ན་བུན་འདྲ། །ཡལ་བའི་དུས་སུ་སྙིང་རུས་འཚལ། །ཞེས་གསུངས་པས། ཁོ་དད་པ་དང་ངོ་མཚར་སྐྱེས་ནས་ལོག་སོང་བ་ལས། ཞག་འགའ་ནས་འབུལ་བ་དང་བཅས་པའི་ཉ་མ་མང་པོ་ཁྲིད་དེ་རྗེ་བཙུན་གྱི་དྲུང་དུ་ཡོང་། བསྙེན་བཀུར་བཟང་པོ་
(༢༧༣)ཕུལ་ནས། ཡང་ཁོས་འདིར་ཚོགས་པའི་ཉ་མ་རྣམས་རྗེ་བཙུན་གྱི་རྣམ་ཐར་ལ་དད་ནས་ཞལ་བལྟར་ཡོང་བ་ལགས་པས། རྗེ་བཙུན་གྱིས་དཀའ་སྤྱད་དྲག་པོ་མཛད་པའི་འབྲས་བུས་ཐུགས་དམ་གྱི་གདེང་ཐོབ་ཚུལ་གྱི་ཆོས་ཤིག་གནང་བར་ཞུ་ཞུས་པའི་ལན་དུ། རྗེ་བཙུན་གྱིས་གདེང་ཚད་དྲུག་གི་མགུར་འདི་གསུངས་སོ། །འཁོར་བའི་ཆོས་ལ་ཡིད་འབྱུང་ནས། །དད་པ་དྲག་པོས་མཚམས་སྦྱར་ཏེ། །ཡུལ་གྱི་ཞེན་པ་སྤང་དཀའ་བས། །ཕ་ཡུལ་སྤངས་པས་ཞེ་སྡང་ཞི། །གཉེན་གྱི་གདུང་སེམས་བཟློག་དཀའ་བས། །ཉེ་དུ་སྤངས་པས་གདུང་སེམས་བྲལ། །ནོར་ལ་ཆོག་ཤེས་མ་མཆིས་པས། །རས་རྐྱང་གྱོན་པས་ཞེན་པ་བཟློག །འཇིག་རྟེན་གཡེང་བ་སྤང་དཀའ་བས། །དམན་ས་བཟུང་བས་ང་རྒྱལ་ཆག །བདག་འཛིན་གྱི་ཁེངས་དྲེགས་སྤང་དཀའ་བས། །རི་དྭགས་བཞིན་དུ་རི་ཁྲོད་འགྲིམས། །ཁྱེད་དད་ལྡན་གྱི་ཚོགས་གསོག་དོན་ཡོད་བྱས། །འདི་ནི་སྙིང་རུས་ཀྱི་གདེང་ཚད་ཡིན། །ཆོས་སྐུ་ནམ་མཁའ་ལྟ་བུ་སྟེ། །འགྲོ་བ་ཡོངས་ལ་ཁྱབ་ལགས་ཀྱང་། །སྔར་མ་རིག་པ་ཡིས་འཁོར་བར་འཁྱམས། །ཆ་ཙམ་ཤེས་ཀྱང་བརྟན་པར་དཀའ། །དེ་ཉིད་བརྟན་པར་མ་གྱུར་པས། །སྐབས་སུ་དུག་ལྔ་རང་རྒྱུད་ཤོར། །དེས་དོན་མེད་བྱིས་པའི་ནང་དུ་འཁྱམས། །དེ་ཉིད་བརྟན་པར་གྱུར་པ་ན། །ཚོགས་དྲུག་ཞེན་མེད་རྒྱུན་དུ་འཆར། །སྐུ་གསུམ་འབྲལ་མེད་རྒྱུན་དུ་གནས། །དེ་ནི་རྟོགས་པའི་གདེང་ཚད་ལགས། །མཉམ་བཞག་རྗེས་ཐོབ་རྣམ་གཉིས་
(༢༧༤)ཀྱང་། །ལས་དང་པོ་པ་ལ་སྣང་བ་ལགས། །བརྟན་པའི་སེམས་ལ་གཉིས་སྣང་མེད། །ཡེངས་པ་མེད་པའི་རྣལ་འབྱོར་ལ། །ཚོགས་དྲུག་ཞེན་མེད་རྒྱུན་དུ་འཆར། །སྐུ་གསུམ་འབྲལ་མེད་རྒྱུན་དུ་གནས། །ཞེན་པ་མེད་པ་འགྲོ་བའི་རླུང་། །ཡིད་འོང་ཡོན་ཏན་ཀུན་གྱི་གནས། །མཁས་པ་ནམ་མཁའ་ལྟ་བུར་བསྒོམ། །སྤྱོད་ལམ་རྣམ་བཞིར་མ་ཆགས་པས། །མཛེས་པའི་གཟུགས་དང་ཆགས་པའི་ནོར། །ཅིར་སྣང་ན་བུན་ལྟར་ཤེས་པས། །འགྲོ་བ་འདྲེན་པའི་བསམ་པ་ཡང་། །ཐ་མལ་ལུས་རྣམས་སྒྱུ་མ་དང་། །ཆུ་ཟླ་ལྟ་བུར་འཛིན་མེད་པར། །ཡུལ་གྱི་འཆིང་བས་མི་གོས་ཏེ། །དཔེ་ནི་འདམ་སྐྱེས་པདྨ་འདྲ། །འདི་ནི་སྤྱོད་པའི་གདེང་ཚད་ཡིན། །སེམས་ཁྱབ་གདལ་ནམ་མཁའ་ལྟ་བུ་སྟེ། །རྐྱེན་སྣང་ཆོས་སྐུར་གསལ་བ་དག །རྣམ་པ་ཀུན་མཁྱེན་སྟོན་པ་ཉིད། །ཤེལ་གོང་ལག་མཐིལ་བཞག་པ་འདྲ། །དང་པོ་གང་ནས་འོངས་པ་མེད། །བར་དུ་གང་དུའང་གནས་པ་མེད། །ཐ་མར་གར་ཡང་སོང་བ་མེད། །དུས་གསུམ་མཉམ་པ་ཉིད་གནས་པས། །སེམས་ལ་སྐྱེ་འཆིའི་རྒྱུ་མ་མཆིས། །གདོད་ནས་དག་པ་ནམ་མཁའ་ལྟ་བུ་ལ། །དཀར་དམར་གྱི་སྤྲིན་ཕུང་རང་སར་ཡལ། །འབྱུང་བ་བཞི་ཡི་རྗེས་མི་གཅོད། །སེམས་ཁྱབ་གདལ་ནམ་མཁའ་ལྟ་བུ་ལ། །སྐྱེ་མེད་ཀྱི་རྒྱུན་དང་མ་བྲལ་བས། ཁམས་གསུམ་འཁོར་བའི་རྒྱུན་ལམ་ཆོད། །འདི་ནི་འབྲས་བུའི་གདེང་ཚད་ལགས། །དེ་ལྟར་རྟོགས་པའི་རྣལ་འབྱོར་དེ། །ནམ་ཞིག་སྒྱུ་ལུས་འཇོག་པའི་ཚེ། །ཡོན་ཏན་རྫོགས་པའི་བར་དོ་རུ། །
(༢༧༥)གདམས་ངག་ཟབ་མོ་ངོ་འཕྲོད་པས། །སེམས་མ་དང་བུ་རུ་མཇལ་ཏེ་མཆི། །གལ་ཏེ་དེ་རུ་མ་མཇལ་ན། །མ་དག་ཉེར་ལེན་སྒྱུ་ལུས་དེ། །ལྷན་ཅིག་བྱང་བའི་གདམས་ངག་གིས། །དག་པའི་སྒྱུ་ལུས་ལོངས་སྐུར་འཆར། །ལོངས་སྐུ་གཟུགས་བརྙན་ལྟར་ཤེས་པས། །ལམ་ལ་ནོར་གྱིས་དོགས་མ་མཆིས། །འདི་བར་དོ་མི་འཁྲུལ་གྱི་གདེང་ཚད་ལགས། །ཞེས་གསུངས་པས། ཀུ་ཐང་གི་ཉ་མ་རྣམས་ཤིན་ཏུ་མོས་པར་གྱུར་ཏེ། ཕྱིས་ནས་ཀྱང་ཞབས་ཏོག་ཕུལ་དུ་ཕྱིན་པ་བསྒྲུབས་པ་ཡིན་ནོ། །དེ་ནས་རྗེ་བཙུན་ལ་ནམ་ཐོ་རངས་ཤིག་འོད་གསལ་གྱི་ངང་ལ་རྡོ་རྗེ་རྣལ་འབྱོར་མས་མི་ལ་རས་པ་ཁྱོད་ལ་མིའི་བུ་སློབ་ཉི་མ་ལྟ་བུ་གཅིག ཟླ་བ་ལྟ་བུ་གཅིག རྒྱུ་སྐར་ལྟ་བུ་ཉེར་གསུམ་སྟེ། གྲུབ་ཐོབ་རང་ཡང་ཉེར་ལྔ། ཕྱིར་མི་ལྡོག་པའི་རྟོགས་ལྡན་བརྒྱ། ལམ་ལ་དྲོད་ཐོབ་པའི་སྐྱེས་ཆེན་བརྒྱ་རྩ་བརྒྱད། ལམ་སྣ་ཟིན་པའི་རྣལ་འབྱོར་ཕོ་མོ་སྟོང་རྩ་གཅིག ཆོས་འབྲེལ་ཐོབ་པས་ངན་སོང་གི་རྒྱུན་ལམ་ཆད་པ་རྩིས་ལས་འདས་པ་འོང་བ་ལས། གུང་ཐང་གི་ཕུ་ར་ལ་བྱ་བ་ན་ལས་ཅན་གྱི་སྐྱེས་བུ་ཟླ་བ་ལྟ་བུ་དེ་ཡོད་པས། དེའི་དོན་དུ་དེ་ཕྱོགས་སུ་སོངས་ཤིག་བྱ་བའི་ལུང་བསྟན་བྱུང་བས། རྗེ་བཙུན་ཡང་གུང་ཐང་སྟོད་དུ་ཐུགས་ཆས་སོ། །བྲག་སྐྱ་རྡོ་རྗེ་རྫོང་གི་སྐོར་ཚོ་སྔ་མའོ། །རས་ཆུང་པ་དང་མཇལ་བའི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་ལུང་བསྟན་ལྟར་གུང་ཐང་སྟོད་དུ་བྱོན་ནས། གུང་ཐང་ཁབ་ཏུ་ཕྱག་ཕེབས་པའི་ཚེ་མཁར་ལས་
(༢༧༦)བྱེད་མི་མང་པོ་འདུག་པ་དེ་རྣམས་ལ་འཚོ་བ་ཟས་ཀྱི་འབྲེལ་བ་དགོས་གསུངས་པས། ཁོང་རྣམས་ན་རེ། ངེད་རྣམས་མཁར་ལས་ཀྱིས་བྲེལ་ནས་ལོང་མི་འདུག ཁྱེད་རང་དལ་བར་འདུག་པས་ངེད་ཀྱི་ལས་ཚབ་གྱིས། བཞེས་པ་དྲང་གིས་ཟེར་བ་ལ། རྗེ་བཙུན་གྱིས་ངས་ང་རང་གི་ལུགས་ཀྱི་མཁར་ལས་ཚར་ནས་དལ་བ་ཡིན། ཟ་མ་མི་སྟེར་རུང་ཁྱེད་འཇིག་རྟེན་པའི་མཁར་ལས་དེ་བོར་ལ་ཐོངས་གསུངས་པས། ཡང་ཁོང་རྣམས་ན་རེ། ཁྱེད་རང་གི་ལུགས་ཀྱི་མཁར་ལས་ཇི་ལྟར་བྱས། ངེད་ཀྱི་མཁར་ལས་འབོར་དགོས་པའི་རྒྱུ་མཚན་ཅི་ཡིན་ཟེར་བའི་ལན་དུ་མགུར་འདི་གསུངས་སོ། །ང་དད་པའི་ས་གཞི་བརྟན་དང་གཅིག །བརྩོན་འགྲུས་ཀྱི་རྩིག་པ་མཐོ་དང་གཉིས། །བསམ་གཏན་གྱི་གྱང་ཞེང་ཆེ་དང་གསུམ། །ཤེས་རབ་ཀྱི་བད་འབུར་ལེགས་དང་བཞི། །དེ་བཞི་བསྡེབས་པའི་མཁར་སྤེ་དེ། །ནམ་ཞིག་གཏན་གྱི་མཁར་སྤེ་ཡིན། །ཁྱེད་འཇིག་རྟེན་པའི་མཁར་གྱིས་བསླུ་བསླུ་འདྲ། །བདུད་ཀྱི་བཙོན་ར་དེ་བོར་ལ་ཐོངས། །ཞེས་གསུངས་པས། ཡང་ཁོང་རྣམས་ན་རེ། དེ་སེམས་ལ་ཤིན་ཏུ་ཕན་པ་ཞིག་བྱུང་། ཁྱེད་རང་གི་ལུགས་ལ་ངེད་ཀྱི་ཕྱིའི་ཞིང་ནང་གི་ནོར། གཉེན་སྲིད་སྡེ། གཏན་གྲོགས་ཆུང་མ། དེ་ལ་སྐྱེས་པའི་བུ་ཚ་རྣམས་ཀྱི་དོད་ཇི་འདྲ་ཡོད། ངེད་ཀྱི་ལུགས་དེ་ད་དུང་འབོར་ལས་ཆེ་བས། ཁྱེད་རང་ལ་ཡོད་ལུགས་དང་ངེད་ཀྱི་དེ་འབོར་བའི་རྒྱུ་མཚན་རེ་གསུང་བར་ཞུ་དང་ཟེར་བའི་ལན་དུ་མགུར་འདི་གསུངས་སོ། །ང་ཀུན་གཞིའི་ཞིང་ས་བཟང་དང་གཅིག །གདམས་ངག་གི་ས་བོན་
(༢༧༧)ཐེབས་དང་གཉིས། །ཉམས་ལེན་གྱི་མྱུ་གུ་འཁྲུངས་དང་གསུམ། །སྐུ་གསུམ་གྱི་འབྲས་བུ་སྨིན་དང་བཞི། །དེ་བཞི་བསྡེབས་པའི་སོ་ནམ་དེ། །ནམ་གཞག་གཏན་གྱི་སོ་ནམ་ཡིན། །ཁྱེད་འཇིག་རྟེན་པའི་སོ་ནམ་གྱིས་བསླུ་བསླུ་འདྲ། །ལྟོ་རྒྱབ་ཀྱི་ཁོལ་བོ་དེ་བོར་ལ་ཐོངས། །ང་སྟོང་ཉིད་ཀྱི་གཏེར་ཁ་བཟང་དང་གཅིག །འཕགས་པའི་ནོར་བདུན་ཕྱུག་དང་གཉིས། །དགེ་བཅུའི་ཁོལ་སྤྱད་བདེ་དང་གསུམ། །ཟག་མེད་ཀྱི་བདེ་བ་ཆེ་དང་བཞི། །འདི་བཞི་བསྡེབས་པའི་ཟས་ནོར་དེ། །ནམ་གཞག་གཏན་གྱི་ཟས་ནོར་ཡིན། །ཁྱེད་འཇིག་རྟེན་པའི་ཟས་ནོར་དེས་བསླུ་བསླུ་འདྲ། །སྒྱུ་མའི་མགོ་སྐོར་དེ་བོར་ལ་ཐོངས། །ང་སངས་རྒྱས་ཀྱི་ཕ་མེས་བཟང་དང་གཅིག །དམ་ཆོས་ཀྱི་ཞལ་ངོ་རགས་དང་གཉིས། །དགེ་འདུན་གྱི་ཚ་ཞང་དར་དང་གསུམ། །ཆོས་སྐྱོང་གི་སྟ་ཟུར་དཔའ་དང་བཞི། །དེ་བཞི་བསྡེབས་པའི་སྲིད་ཟླ་དེ། །ནམ་གཞག་གཏན་གྱི་སྲིད་ཟླ་ཡིན། །ཁྱེད་འཇིག་རྟེན་པའི་གཉེན་གྱིས་བསླུ་བསླུ་འདྲ། །གནས་སྐབས་ཀྱི་ཟ་གྲོགས་དེ་བོར་ལ་ཐོངས། །ང་བདེ་གཤེགས་ཀྱི་ཕ་མེས་བཟང་དང་གཅིག །བདེ་གསལ་གྱི་གཡོ་སྦྱོར་མཁས་དང་གཉིས། །ཟུང་འཇུག་གི་ཤ་བཀྲག་དྭངས་དང་གསུམ། །ཉམས་རྟོགས་ཀྱི་རྒྱན་གོས་མཛེས་དང་བཞི། །དེ་བཞི་བསྡེབས་པའི་ཆུང་མ་དེ། །ནམ་གཞག་གཏན་གྱི་ཆུང་མ་ཡིན། །ཁྱེད་འཇིག་རྟེན་པའི་གྲོགས་ཀྱིས་བསླུ་བསླུ་འདྲ། །གནས་སྐབས་ཀྱི་འཐབ་ཡ་དེ་བོར་ལ་ཐོངས། །ང་རིག་པའི་ཁྱེའུ་འཁྲུངས་དང་གཅིག །དྲོད་རྟགས་ཀྱི་ཚར་སྐྱེད་ཆེ་དང་
(༢༧༨)གཉིས། །ཉམས་རྟོགས་ཀྱི་སྨྲ་ལྕེ་བདེ་དང་གསུམ། །སངས་རྒྱས་ཀྱི་གདུང་རྒྱུད་འཛིན་དང་བཞི། །དེ་བཞི་བསྡེབས་པའི་སྲས་བུ་དེ། །ནམ་གཞག་གཏན་གྱི་སྲས་བུ་ལགས། །ཁྱེད་འཇིག་རྟེན་གྱི་སྲས་བུས་བསླུ་བསླུ་འདྲ། །འཁོར་བའི་བཤལ་ཐག་དེ་བོར་ལ་ཐོངས། །ཁྱོད་གུང་ཐང་གི་ལས་བྱེད་ཕོ་མོ་དང་། །ང་རྣལ་འབྱོར་མི་ལ་རས་པ་གཉིས། །ཚིག་ཕར་འདྲི་ཚུར་འདྲིའི་བག་ཆགས་ཀྱིས། །དཔལ་ཨུ་རྒྱན་གནས་སུ་མཇལ་བར་ཤོག །ཅེས་གསུངས་པས། ཁོང་རྣམས་ཤིན་ཏུ་དད་པར་གྱུར་ནས། ཕྱག་བཙལ་འཚོ་བ་དྲངས་ཏེ། ཕྱིས་ནས་ཀྱང་ཤིན་ཏུ་མོས་པར་གྱུར་ཏོ། །དེ་ནས་རྗེ་བཙུན་ར་ལའི་ཕུ་ཟ་འོག་ཕུག་ཏུ་བཞུགས་པས། ར་ལ་ན་ཕ་སྔ་མོ་ནས་ཤི་བའི་བུ་བཞིན་ལེགས་ལ་ཤེས་རབ་ཆེ་བ་ཞིག་ཡོད་པ་དེའི་མ་དང་ཁུ་བོ་ཚོགས་ནས་སྐྱོང་བའི་ལུགས་སུ་ཡོད་པ་ལ། བུ་དེས་གཞོན་ནུ་ནས་ཀློག་བཟང་པོ་ཤེས་པས། གསུང་སྒྲོག་ལ་ཤིན་ཏུ་བྲིན་པས་འཁྱོས་མ་མང་པོ་ཡོང་བ་ཞིག་ཡོད་པས། ནམ་ཞིག་གི་ཚེ་ཁོང་རང་གི་ལུང་བའི་ཕུ་དེ་ན་ཡར་ལ་བོང་བུ་ཞོན་ནས་བ་གླང་གི་རྫི་བོ་ལ་ཕྱིན་པས་རྗེ་བཙུན་གྱི་སྒྲུབ་ཕུག་གི་མདུན་ན་ཡར་སླེབ་པ་དང་། རྗེ་བཙུན་གྱིས་མགུར་གསུང་བ་ཐོས་ནས་སྣང་བ་འགྱུར་ཏེ། བོང་བུ་ལས་བབས་ཕྱུགས་རྣམས་བོར་ནས། རྗེ་བཙུན་གྱི་དྲུང་དུ་ཕྱིན་པས། ཞལ་མཐོང་མ་ཐག་སྨྲ་མི་ཤེས་པའི་ཏིང་ངེ་འཛིན་རྒྱུད་ལ་སྐྱེས་ཏེ་ཡུག་ཅིག་ཁྲོང་ངེ་ལངས་ཏེ་འདུག་པ་དེ་ཐུགས་སྲས་རས་ཆུང་རྡོ་རྗེ་གྲགས་པ་ཡིན་ནོ། །ཁོང་ལས་སད་པའི་སྟོབས་ཀྱིས་རྗེ་བཙུན་ལ་མི་ཕྱེད་པའི་དད་པ་ཐོབ་སྟེ། གསུང་སྒྲོག་ཏུ་ཕྱིན་པའི་འཁྱོས་མ་རྣམས་
(༢༧༩)རྗེ་བཙུན་གྱི་དྲུང་དུ་ཕུལ་ནས། ཆོས་ཞུ་ཞིང་བསྡད་པ་ལས་མ་ཁུས་རྩད་བཅད་པས། རྗེ་བཙུན་གྱི་དྲུང་ན་འདུག་པ་དང་། འཁྱོས་མ་མ་བྱུང་བས་ཡོན་བདག་རྣམས་ཀྱིས་མ་བྱིན་པ་ཡིན་ནམ་སྙམ་ནས་གསུང་སྒྲོག་ཏུ་བཏང་བའི་ཡོན་བདག་རྣམས་ལ། ཁྱེད་ཀྱིས་ངེད་ཀྱི་བུ་ལ་ཟ་ཡོན་བྱིན་ནམ་ཞེས་རིམ་པར་དྲིས་པས་བྱིན་ཟེར་བ་ཁོ་ན་བྱུང་སྟེ། རྗེ་བཙུན་ལ་ཕུལ་བར་ཤེས་ནས། མ་ཁུས་ཇི་ལྟར་བཀག་རུང་མ་ཁོགས་པས། ཁོང་གཉིས་ཁྲོས་ནས་སྡང་པོ་རང་བྱས་པས། བུས་ཀྱང་རྗེ་བཙུན་ལ་ཁྲིད་ཞུས་ནས་བསྒོམས་པས། ཉམས་རྟོགས་བཟང་པོ་འཁྲུངས། གཏུམ་མོའི་དྲོད་ཀྱིས་ཀྱང་རས་རྐྱང་ཐུབ་པ་བྱུང་སྟེ། མིང་ཡང་རས་ཆུང་པར་བཏགས་ནས་ཡོད་དུས། མ་ཁུས་ནན་གྱིས་བཀུག་ནས་ཕྲུ་སློག་ཏུ་བཅུག་པས་ས་བདག་གི་ནད་ཀྱིས་ཟིན་ཏེ། དེ་ལ་ཕན་དུ་རེ་ནས་མཚམས་ལ་ཡོད་དུས། ཨ་ཙ་ར་ལྔ་འཚོ་བ་སློང་དུ་བྱུང་བས། མ་ཁུས་ལྟོ་ལ་ཡོས་ཤིག་བསྐྱལ་ཡོད་པ་ནས་བྱིན་པ་ཟ་བའི་བར་ལ། ཁོང་རྣམས་ཙི་ཙི་ཛོྭ་ལ་ཟེར་ཞིང་མཛེ་ནད་དུ་ཤེས་འདུག འདི་ལ་ཕན་པའི་ཐབས་ཤེས་སམ་དྲིས་པས། དྲག་པ་དེ་ན་རེ་ཁྱོད་སྙིང་རྗེ་མོ་རང་ཞིག་འདུག ངའི་བླ་མ་ཝ་ལ་ཙནྡྲ་ལ་སྤྲད་དོ་ཟེར། ཁོ་རང་བོད་ལ་འགྲོ་བ་བཤོལ་ནས་རྒྱ་གར་ལ་འགྲོ་བར་དམ་བཅས། རས་ཆུང་པས་ཀྱང་རྗེ་བཙུན་ལ་རྒྱ་གར་ལ་འགྲོ་བའི་གནང་བ་ཞུས་པས། རྗེ་བཙུན་གྱིས་གནང་སྟེ། འགྲོ་ཆོས་སུ་མགུར་འདི་གསུངས་སོ། །དྲིན་མཆོག་རྗེ་ལ་གསོལ་བ་འདེབས་སོ། །བུ་རས་ཆུང་པ་ལ་བྱིན་
(༢༨༠)གྱིས་རློབས་ཤིག །བུ་ཚེ་འདིའི་བློ་ཕུགས་ཆོས་ལ་གཏོད་ཅིག །བླ་མ་ཡི་དམ་དཀོན་མཆོག་གསུམ་ལ། ཁ་ཚིག་མིན་པར་གསོལ་བ་འདེབས་ཤིང་། །རྒྱ་གར་གླིང་དེ་བསྐོར་ལ་བྱོན་ཅིག །ཏིང་འཛིན་དཀའ་ཐུབ་ཟས་སུ་བཟའ་ཞིང་། །ཨ་ཐུང་རྟེན་འབྲེལ་རས་གོས་གྱོན་ལ། །རླུང་སེམས་སྒྱུ་མའི་རྟ་ལ་ཞོན་ནས། །རྒྱ་གར་གླིང་དེ་བསྐོར་ལ་བྱོན་ཅིག །དྲི་མེད་སེམས་ལ་ཕྱི་བདར་གྱིས་ལ། །དམ་ཚིག་དངུལ་དཀར་མེ་ལོང་དེ་ཀུན། །འགྱོད་མེད་དྲན་པས་རྒྱུན་དུ་ལྟ་ཞིང་། །རྒྱ་གར་གླིང་དེ་བསྐོར་ལ་བྱོན་ཅིག །ལོ་འདོད་རྐུན་མས་ཕྱི་གནོན་ཡོང་བས། །ཆོས་བརྒྱད་མགོ་སྙོམས་སོ་པ་ཐོངས་ལ། །ཡོན་ཏན་དམིགས་མེད་ངང་དུ་སྦས་ནས། །སེམས་བསྐྱེད་བཟང་པོས་བསྐོར་ལ་བྱོན་ཅིག །བུ་ཚེ་རིང་ནད་མེད་སྨོན་ལམ་འདེབས་སོ། །ཞེས་གསུངས་ནས། རྗེ་བཙུན་སྒྲུབ་ཕུག་གི་ནང་དུ་བཞུགས་པ་ལ། རས་ཆུང་པས་ཕྱི་ནས་འདག་སྦྱར་ཕུལ་ཏེ། ཨ་ཙ་རའི་ཕྱི་བཞིན་རྒྱ་གར་ལ་བྱོན་པས། བླ་མ་ཝ་ལ་ཙནྡྲ་དང་མཇལ་ཏེ། ཕྱག་རྡོར་གཏུམ་པོ་ཁྱུང་གཤོག་ཅན་གྱི་གདམས་ངག་རྣམས་རྫོགས་པར་གནང་བ་བསྒོམས་པས། བསྙུང་གཞི་ལས་གྲོལ་ནས། བོད་དུ་ཕེབས་ཚེ་སྐྱིད་གྲོང་ནས་བླ་མ་འདྲི་ཞིང་བྱོན་པས། སྔར་མི་ལ་ཟེར་བའི་རྣལ་འབྱོར་པ་ཞིག་འདུག་ཟེར་བ་ཐོས། ཕྱིས་གཏམ་མི་འདུག་ཟེར་བས་ངའི་བླ་མ་གྲོངས་པ་ཡིན་ནམ་སྙམ་ཐུགས་མི་བདེ་བའི་ངང་ནས། ཟ་འོག་ཕུག་ཏུ་བྱོན་ནས་གཟིགས་པས། སྔར་གྱི་འདག་སྦྱར་ཡེ་མ་ཞིག་པར་འདུག་པ་དང་། ད་ནང་ན་གྲོངས་ཡོད་སྙམ་འདག་སྦྱར་བཤིག་ནས་སྒྲུབ་ཕུག་གི་
(༢༨༡)ནང་དུ་བྱོན་པས། རྗེ་བཙུན་ཐུགས་དམ་གྱི་ངང་ལ་ཁྲོང་ངེ་བཞུགས་འདུག་པས། དགའ་སྤྲོ་དཔག་མེད་ཅིག་ཐོབ་སྟེ། རས་ཆུང་པས་སྙུན་དྲིས་པའི་ལན་དུ་རྗེ་བཙུན་གྱིས་མགུར་འདི་གསུངས་སོ། །དྲིན་ཅན་མར་པའི་ཞབས་ལ་འདུད། །བདག་ཉེ་དུ་དང་འབྲེལ་ཐག་བཅད་པས་བདེ། །ཕ་ཡུལ་གྱི་ཞེན་པ་སྤངས་པས་བདེ། །ཡུལ་སྡེའི་གཉེར་ཁ་མེད་པས་བདེ། །དགེ་འདུན་གྱི་རྫས་ལ་མ་འབགས་བདེ། ཁང་ཁྱིམ་བདག་ཏུ་མ་བཟུང་བདེ། །འདི་ལ་འདི་དགོས་མེད་པས་བདེ། །འཕགས་པའི་ནོར་གྱིས་ཕྱུག་པས་བདེ། །འཚོ་སྐྱོང་གི་སྡུག་བསྔལ་མི་དགོས་བདེ། །བོར་སྟོར་གྱི་དོགས་པ་མེད་པས་བདེ། །ཟད་པའི་འཇིགས་པ་མེད་པས་བདེ། །སེམས་ཀྱི་ཕུ་ཐག་ཆོད་པས་བདེ། །ཡོན་བདག་གི་ངོས་བཟུང་མི་དགོས་བདེ། །སྐྱོ་ངལ་སུན་པ་མེད་པས་བདེ། །ཚུལ་འཆོས་མ་བྱས་སྤྱོད་པས་བདེ། །ཅི་བྱས་ཆོས་སུ་སོང་བས་བདེ། །འགྲོ་འདོད་ངལ་དུབ་མེད་པས་བདེ། །གསོད་གཅོད་འཇིགས་པ་མེད་པས་བདེ། །རྐུ་འཕྲོག་འཇིགས་པ་བྲལ་བས་བདེ། །དགེ་སྦྱོར་གྱི་མཐུན་རྐྱེན་བྱུང་བས་བདེ། །སྡིག་པའི་ལས་རྣམས་སྤངས་པས་བདེ། །བསོད་ནམས་ཀྱི་ལས་ལ་འབད་པས་བདེ། །ཞེ་སྡང་གནོད་སེམས་བྲལ་བས་བདེ། །ང་རྒྱལ་ཕྲག་དོག་སྤངས་པས་བདེ། །ཆོས་བརྒྱད་སྐྱོན་དུ་མཐོང་བས་བདེ། །དེ་ཡང་བཏང་སྙོམས་བཞག་པས་བདེ། །སེམས་ཀྱིས་སེམས་ལ་བལྟས་པས་བདེ། །དེ་ཡང་རེ་དོགས་མེད་པས་བདེ། །འཛིན་མེད་འོད་གསལ་ཀློང་ན་བདེ། །མི་རྟོག་ཡེ་ཤེས་དབྱིངས་ན་བདེ། །
(༢༨༢)ཤུགས་འབྱུང་གཉུག་མའི་ངང་དུ་བདེ། །ཚོགས་དྲུག་རང་སར་བཞག་པས་བདེ། །སྒོ་ལྔའི་རྣམ་ཤེས་གསལ་བས་བདེ། །ཡིད་ཀྱི་འགྲོ་འོང་ཆད་པས་བདེ། །བདག་ལ་བདེན་ལུགས་མང་བར་གདའ། །རྣལ་འབྱོར་རང་གི་སྐྱིད་གླུ་ཡིན། །སྐྱིད་པ་གཞན་ལ་ང་མི་སྨོན། །ཤི་ཡང་བདེ་སྟེ་སྡིག་མ་བྱས། །གསོན་ཡང་བདེ་སྟེ་དགེ་སྦྱོར་འཕེལ། །ཟས་གོས་ཡོན་བདག་རྣམས་ཀྱིས་སྦྱོར། །འདི་ནི་དཀོན་མཆོག་བླ་མའི་དྲིན། །རྣལ་འབྱོར་བདེ་བའི་ཆེད་དུ་བདེ། །རས་ཆུང་བདེ་འམ་དོན་གྲུབ་བམ། །ཞེས་གསུངས་པས། རས་ཆུང་པས་ཀྱང་། བདག་ཀྱང་བདེ། དོན་གྲུབ། ད་དུང་ཁྲིད་དང་གདམས་ངག་ཐུགས་རྗེས་འཛིན་པར་ཞུ་ཞུས་པས། རྗེ་བཙུན་གྱིས་སླར་ཡང་རས་ཆུང་པ་ལ་ཁྲིད་བཏབ་སྟེ་ཟ་འོག་ཕུག་ཏུ་སྒོམ་དུ་བཅུག་པས། ཉམས་རྟོགས་མཐར་ཕྱིན་པར་གྱུར་ཏོ། །ཟ་འོག་ཕུག་ཏུ་ཐུགས་སྲས་རས་ཆུང་པ་དང་མཇལ་བའི་སྐོར་རོ། །རྩ་ཕུ་རས་པ་དང་མཇལ་བའི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད། ཟ་འོག་ཕུག་ནས་རོན་ཕུའི་འོད་གསལ་ཕུག་ཏུ་བྱོན་ནས་བཞུགས་པའི་ཚེ། འཁྲུངས་ཡུལ་རྩ་ཕུའི་གཞོན་པ་འགའ་ཞིག་རྗེ་བཙུན་དང་མཇལ་དུ་བྱུང་བ་རྣམས་ན་རེ། ཁྱེད་དང་པོ་དགྲ་བཏུལ། ད་ཆོས་ཁྱད་པར་ཅན་མཛད་པ་ངོ་མཚར་ཆེ། ངེད་རྣམས་ཀྱང་ཁྱེད་ཀྱི་སར་སླེབ་ཚེ་ཆོས་བྱས་ན་སྙམ། ཡུལ་དུ་སླེབ་ཚེ་འཇིག་རྟེན་བྱས་ན་སྙམ་པ་ཡོང་གི་གདའ་བ། ཅི་དྲག་ན་ཞུ་བའི་ལན་དུ།
(༢༨༣)རྗེ་བཙུན་གྱི་ཞལ་ནས། སྐྱེ་རྒ་ན་འཆི་སོགས་འཁོར་བའི་སྡུག་བསྔལ་ལས་གྲོལ་བའི་གདེང་ཐོབ་ན་གང་བྱས་བདེ། དེ་མིན་ཚེ་འདིའི་སྡུག་བསྔལ་ལས་ཕྱི་མའི་སྡུག་བསྔལ་རྒྱུན་རིང་ཞིང་ངོས་དྲག་པས། ཕྱི་མའི་དོན་ཚགས་སུ་འཇུག་པ་གལ་ཆེ་བ་འདི་ལྟར་ཡིན་གསུངས་ནས་མགུར་འདི་གསུངས་སོ། །འོ་སྐོལ་འགྲོ་བ་འཇིག་རྟེན་པ། །སྐྱེ་རྒ་ན་འཆིའི་ཆུ་བོས་འཁྱེར། །ཆུ་བོ་འདི་བས་ཕྱི་མ་ཆེ། །གྲུ་གཟིངས་ཚགས་སུ་ཆུད་ལགས་སམ། །བདུད་དང་སྲིན་པོ་གཤིན་རྗེ་ཡི། །འཇིགས་པ་འདི་བས་ཕྱི་མ་ཆེ། །སྐྱེལ་མ་ཚགས་སུ་ཆུད་ལགས་སམ། །འདོད་ཆགས་ཞེ་སྡང་གཏི་མུག་གི། །ཞེན་འཁྲིས་འདི་བས་ཕྱི་མ་ཆེ། །གཉེན་པོ་ཚགས་སུ་ཆུད་ལགས་སམ། ཁམས་གསུམ་འཁོར་བའི་ཡུལ་པོ་ཆེ། །བཤུལ་ཐག་འདི་བས་ཕྱི་མ་རིང་། །རྒྱགས་ཕྱེ་གྲབས་སུ་ཆུད་ལགས་སམ། །མ་ཆུད་དམ་པའི་ལྷ་ཆོས་མཛོད། །ཅེས་གསུངས་པས། ཁོང་རྣམས་ན་རེ། དེ་ཤིན་ཏུ་སེམས་ལ་ཕན་པ་ཞིག་བྱུང་། །ངེད་རྣམས་ཀྱང་བླ་མའི་དྲུང་དུ་ཆོས་བྱེད་པ་ལགས། །སྡུག་པོ་རང་བྱེད་དོན་མི་འདུག་པས། བླ་མས་ཀྱང་ཡོན་བདག་དང་བུ་སློབ་ཀྱི་འཚོ་སྐྱོང་བྱས། ནོར་བག་ཙམ་རེ་ཕྱག་ཚགས་མཛད་པར་ཞུ། གོང་གི་དེ་རྣམས་ངེད་རྣམས་ཀྱིས་མི་ཤེས་པ་འདུག་པས། དེ་དག་གི་དོན་གསུང་བར་ཞུ་ཞུས་པའི་ལན་དུ་མགུར་འདི་གསུངས་སོ། །བླ་མ་མཁས་པ་བསྟེན་པ་ལ། །འཁོར་འདས་སྐྱེལ་མ་ཟེར་བ་ཡིན། །སྦྱིན་པ་ཕངས་མེད་གཏོང་བ་དེ། །ལམ་རྒྱགས་ཚགས་སུ་འཇུག་པ་ཡིན། །ཉམས་མྱོང་མུན་ལ་ཟླ་ཤར་དེ། །སྐྱེལ་མ་ཚགས་
(༢༨༤)སུ་འཇུག་པ་ཡིན། །བསོགས་པ་ཆོས་ལ་གཏོང་བ་དེ། །གྲུ་གཟིངས་ཚགས་སུ་འཇུག་པ་ཡིན། །ལྟ་བ་ཕྱོགས་རིས་མེད་པ་ན། །བསྒོམ་པ་ཡེངས་པ་མེད་པ་ཡིན། །སྤྱོད་པ་ཆོས་དང་མཐུན་པ་ན། །དམ་ཚིག་བླ་མ་མཉེས་པ་ཡིན། །འབྲས་བུ་འཆི་ཁར་འགྱོད་མེད་ཡིན། །གཉེན་དང་ཡོན་བདག་སློབ་མ་གསུམ། །ང་རྣལ་འབྱོར་པ་ལ་དགོས་རྒྱུ་ཆུང་། །ཁྱེད་འཇིག་རྟེན་པ་ལ་དགོས་པ་ཡིན། །ཕྱག་དང་ཞེ་ས་ཚུལ་འཆོས་གསུམ། །ང་རྣལ་འབྱོར་པ་ལ་དགོས་རྒྱུ་ཆུང་། །ཆོས་བརྒྱད་མཁན་ལ་དགོས་པ་ཡིན། །རྫས་དང་ཡོ་བྱད་འདུ་འཛི་གསུམ། །ང་རྣལ་འབྱོར་པ་ལ་དགོས་རྒྱུ་ཆུང་། །གྲགས་འདོད་ཅན་ལ་དགོས་པ་ཡིན། །ཁྲུས་དང་གཙང་སྦྲ་རྟོག་པ་གསུམ། །ང་རྣལ་འབྱོར་པ་ལ་དགོས་རྒྱུ་ཆུང་། །གཞོན་ནུ་ཚོ་ལ་དགོས་པ་ཡིན། །མི་དགོས་བཅུ་གཉིས་བྱ་བ་ལགས། །ཀུན་གྱི་སྤྱོད་ཡུལ་འདི་མ་ལགས། །རྣལ་འབྱོར་རས་པའི་ཁ་ཕོ་འདི། །འདིར་འཚོགས་རྣམས་ཀྱི་བློ་ལ་ཟུངས། །བདེ་བ་འདོད་ན་དམ་ཆོས་མཛོད། །འདུ་འཛིས་སྐྱོ་ན་དབེན་པ་སྟེན། །སྙིང་རུས་ཆེ་ན་གཅིག་པུར་སྡོད། །བྱང་ཆུབ་འདོད་ན་སྒོམ་བསྲན་སྐྱེད། །བདུད་བཞིའི་དགྲ་ལས་རྒྱལ་བར་ངེས། །ཞེས་གསུངས་པས། དེ་རྣམས་ཀྱི་ནང་ནས་གཞོན་པ་དད་བརྩོན་ཤེས་རབ་སྙིང་བརྩེར་ལྡན་པ་ཞིག་འདུག་པ་དེ་ན་རེ། བླ་མ་ལགས། བདག་རྣམས་ཚེ་འདིར་དགོས་པ་རྣམས་ལ་ཆགས་ནས། ཚེ་ཕྱི་མར་དགོས་པ་རྣམས་ཚགས་སུ་མ་ཆུད། ད་བླ་མའི་ཕྱག་ཕྱིར་འབྲངས་ནས། ཚེ་འདི་བློས་བཏང་སྟེ།
(༢༨༥)ཕྱི་མའི་དོན་ཚགས་སུ་འཇུག་པར་ཞུ་ཞེས་ཞུ་བ་ནན་གྱིས་འབུལ་དུ་བྱུང་བ་ལ། རྗེ་བཙུན་གྱིས་དལ་འབྱོར་གྱི་མི་ལུས་རིན་པོ་ཆེ་ཐོབ་དུས་ཆོས་བྱེད་པ་འདི་དཀའ་མོ་རང་ཞིག་འདུག རྒྱ་ལ་ཆོས་བྱེད་མི་བྱུང་རུང་། བླ་མ་ལ་སོགས་མཐུན་རྐྱེན་རྣམ་དག་འཛོམ་པ་དཀའ་མོ་ཡིན་པས། ད་ལྟ་འཛོམ་དུས་ལྷ་ཆོས་བྱེད་འཚལ་ཞེས་མགུར་འདི་གསུངས་སོ། །མི་ཁོམ་བརྒྱད་པོ་སྤངས་པ་ཡི། །དལ་འབྱོར་ཚང་བའི་མི་ལུས་དཀའ། །ཚེ་འདིའི་བདེ་སྐྱིད་བློས་བཏང་ནས། །དལ་འབྱོར་སྙིང་པོ་ལེན་པ་དཀའ། །འཁོར་བའི་ཆོས་ཀྱི་སྐྱོན་མཐོང་ནས། །མྱ་ངན་འདས་པ་སྒྲུབ་པ་དཀའ། །རྒྱ་ལ་དམ་ཆོས་སྒྲུབ་ན་ཡང་། །མཐུན་རྐྱེན་རྣམ་དག་འཛོམ་པ་དཀའ། །ལུང་རིགས་མན་ངག་ལྡན་པ་ཡི། །ཐུགས་རྗེ་ལྡན་པའི་བླ་མ་དཀའ། །དད་པ་སྐྱོ་ངལ་མེད་པ་ཡི། །ཉམས་ལེན་ནུས་པའི་སློབ་མ་དཀའ། །འཇིགས་དང་འཚེ་བ་སྤངས་པ་ཡི། །ཕུན་སུམ་ཚོགས་པའི་དགོན་པ་དཀའ། །ལྟ་སྤྱོད་གྲུབ་མཐའ་མཐུན་པ་ཡི། །བསམ་སྦྱོར་གཅིག་པའི་གྲོགས་པོ་དཀའ། །ན་དང་ཚ་བ་སྤངས་པ་ཡི། །བཀོལ་དུ་བཏུབ་པའི་ལུས་པོ་དཀའ། །དེ་རྣམས་ཐམས་ཅད་འཛོམས་ན་ཡང་། །རྩེ་གཅིག་ཉམས་སུ་ལེན་པ་དཀའ། །འདི་ནི་དཀའ་བའི་ཆོས་དགུ་སྟེ། །དཀའ་ཡང་དཀའ་སྟེ་སྤྱད་ཀྱང་འཚལ། །ཞེས་གསུངས་པས། ཁོ་རང་དབང་མེད་པའི་དད་པ་སྐྱེས་ཏེ། ཕྱག་ཕྱིར་འབྲངས་པ་རྗེས་སུ་བཟུང་ནས། དབང་དང་གདམས་པ་གནང་ནས་སྨིན་ཅིང་གྲོལ་ཏེ། རྩ་ཕུ་རས་པ་བྱ་བ་ཉེ་བའི་སྲས་གཅིག་བྱུང་
(༢༨༦)ངོ་། །འོད་གསལ་ཕུག་ཏུ་རྩ་ཕུ་རས་པ་དང་མཇལ་བའི་སྐོར་རོ། །རག་མའི་སྐོར་ཕྱི་མ། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་འོད་གསལ་ཕུག་ནས་མང་ཡུལ་སྐྱིད་གྲོང་ན་མར་སྐུ་ཁམས་བསང་བ་དང་། རོ་སྙོམས་ཟས་ཀྱི་ལྡོམ་བུ་ལ་བྱོན་པའི་ཚེ། གྲོང་ཁྱེར་ཞིག་གི་དབུས་ན་མི་མང་པོ་ཞིག་འདུག་པ་ལ། ཡོན་བདག་རྣམས། རྣལ་འབྱོར་ང་ལ་ད་ནངས་ཀྱི་འཚོ་བ་སློང་གསུངས་པས། ཁོང་རྣམས་ན་རེ། རྣལ་འབྱོར་པ་ཁྱོད་དང་པོ་ཞིག་རག་མ་ན་འདུག་ཟེར་བ་དེ་ཨེ་ཡིན་ཟེར་བ་ལ་ཡིན་གསུངས་པས། འོ་ན་ཁྱེད་ངོ་མཚར་ཅན་ཞིག་ཡིན་པར་འདུག་ཟེར་ཀུན་མོས་པར་གྱུར་པ་ལས། དེ་དག་གི་ནང་ནས་རབས་ཆད་བཟའ་མི་གཉིས་འདུག་པ་དེས་ནང་དུ་གདན་དྲངས་ཏེ། བསྙེན་བཀུར་ཞུས་ནས། བླ་མ་ལགས། ཁྱེད་ཀྱི་ཡུལ་དང་ཉེ་རིགས་རྣམས་ག་ན་ཡོད་ཟེར་བས། རྗེ་བཙུན་གྱིས། ངས་ཡུལ་དང་ཉེ་རིགས་བོར། ཡུལ་དང་ཉེ་རིགས་ཀྱིས་ང་བོར་བའི་སྤྲང་པོ་ཞིག་ཡིན་གསུངས་པས། འོ་ན་ངེད་ཀྱི་བུ་དོད་མཛོད། །ངེད་ལ་ཡུལ་གཞིས་བཟང་པོ་ཡང་ཡོད། ཁྱེད་རང་ཐུགས་འགྲོ་བའི་བུ་མོ་གཅིག་ཀྱང་ལེན། དེས་ཉེ་འཁོར་ཡང་ཤུགས་ཀྱིས་ཡོང་ཟེར་བ་ལ། ངས་དེ་ཀུན་མི་དགོས་ངས་བོར་བ་ཞིག་ཡིན་ཞེས་མགུར་འདི་གསུངས་སོ། །ཡུལ་དང་པོ་ཉམས་དགའ་སྐྱིད་སྐྱིད་པོ། །ལུས་ངག་ཡིད་གསུམ་འབྲད་པའི་སེག་རྡར་ཡིན། །བར་དུ་རྨོ་རྐོ་འོ་རེ་བརྒྱལ། །ས་བོན་ཕར་
(༢༨༧)བཏབ་ཚུར་མི་འབྱུང་། །ཡུལ་ངན་མུ་གེའི་གྲོང་ཁྱེར་དེ། །མགོན་མེད་དྲི་ཟའི་གནས་དང་འདྲ། །ཐ་མར་བསྐྱུར་ནས་འགྲོ་རྒྱུ་ཡིན། །སྡིག་གསོག་གི་གནས་ཁང་སེམས་ལ་གཟན། །གནས་སྐབས་ཀྱི་བཙོན་དོང་ང་མི་འདོད། །ཁྱེད་ཀྱི་བུ་དོད་ང་མི་བྱེད། །ཅེས་གསུངས་པས། ཁོང་གཉིས་ན་རེ། དེ་སྐད་མ་གསུང་། ངེད་ཀྱིས་ཁྱེད་རང་འཐད་པའི་ཕ་བཟང་གི་བུ་མོ་ཞིག་བག་མར་བསུ་བ་ཡིན་ཞུ་བའི་ལན་དུ་མགུར་འདི་གསུངས་སོ། །གྲོགས་དང་པོ་ལྷ་མོ་བཞད་ཁ་མ། །བལྟ་བའི་གདོང་ལ་ཆོག་རྒྱུ་མེད། །བར་དུ་སྲིན་མོ་རོ་མིག་མ། །ཕར་གཅིག་ལབ་ན་ཚུར་གཉིས་རྒོལ། །སྐྲ་ལ་འཆང་ན་སྒྱིད་པར་འཇུ། །དབྱུག་པ་བརྒྱབ་ན་གཟར་བུ་འཕྱར། །ཐ་མར་བ་རྒན་སོ་མེད་མ། །སྲིན་མོའི་སྡང་མིག་སེམས་ལ་གཟན། །བདུད་མོའི་འཐབ་ཡ་སྤངས་པ་ཡིན། །ཁྱེད་ཀྱི་གཞོན་གྲོགས་ང་མི་འདོད། །ཅེས་གསུངས་པས། བླ་མ་ལགས། རྒས་ནས་ཤི་ལ་ཐུག་ཚེ། གཞོན་ཚེ་བཞིན་མི་ཡོང་བར་གདའ། རང་ལ་བུ་རེ་མེད་ན་ཡིད་འཕམ་པ་ལ་ཚད་ལས་འདས་པ་རེ་ཡོང་གིན་འདུག དེས་ན་ཁྱེད་ལའང་བུ་རེ་དགོས་ལགས་སམ་ཟེར་བའི་ལན་དུ་མགུར་འདི་གསུངས་སོ། །བུ་དང་པོ་ལྷ་བུ་ཡིད་འོང་བོ། །སྙིང་བརྩེ་བའི་སེམས་ལ་བཟོད་གླགས་མེད། །བར་དུ་བུ་ལོན་འདེད་དྲག་པོ། །ཐམས་ཅད་བྱིན་ཡང་མགུ་དུས་མེད། །མི་ཡི་བུ་མོ་ནང་དུ་བཅུག །དྲིན་ཅན་ཕ་མ་ཕྱི་རུ་ཕུད། །ཕ་ཡིས་བོས་ཀྱང་ལན་མི་སྟེར། །མ་ཡིས་བོས་ཀྱང་ཨང་
(༢༨༨)མི་ཁུགས། །ཐ་མར་ཁྱིམ་མཚེས་སྙིང་རིང་པོ། །ཁྲམ་པའི་ཁ་ཚིས་བྱས་པས་ཕུང་། །རང་སྐྱེས་ཀྱི་དགྲ་བོ་སེམས་ལ་གཟན། །འཁོར་བའི་བཤལ་ཐག་སྤངས་པ་ཡིན། །འཇིག་རྟེན་གྱི་བུ་ཚ་ང་མི་འདོད། །ཅེས་གསུངས་པས། ཁོང་གཉིས་ན་རེ། རང་སྐྱེས་ཀྱི་དགྲ་བོ་ཡིན་ནའང་ཡིན། བུ་མོ་གཅིག་ཡོད་རུང་ཆོག་པར་འདུག་སྟེ། མེད་པས་བློ་མ་བདེ་ཟེར་བའི་ལན་དུ་མགུར་འདི་གསུངས་སོ། །བུ་མོ་དང་པོ་ལྷ་ཕྲུག་འཛུམ་ཁ་མོ། །ནོར་གང་དམར་འཁྱེར་བའི་དབང་མོ་ཆེ། །བར་དུ་ལན་ཆགས་འཁོར་མེད་མ། །ཕ་ལ་དངོས་སུ་བསླངས་ནས་འཁྱེར། །མ་ལ་ལྐོག་ཏུ་བརྐུས་ནས་འཁྱེར། །བྱིན་པ་ངོ་སོར་མི་བྱེད་པ། །དྲིན་ཅན་ཕ་མའི་སྙིང་རླུང་སློང་། །ཐ་མར་གྲི་མོ་གདོང་དམར་མ། །ལེགས་ན་གཞན་གྱི་དཔལ་སྐྱེད་མ། །ཉེས་ན་རང་གི་བྱུར་སྡུད་མ། །ཕུང་བྱེད་ཀྱི་གྲི་མོ་སེམས་ལ་གཟན། །སངས་མེད་ཀྱི་མྱ་ངན་སྤངས་པ་ཡིན། །ཕུང་གཞིའི་བུ་མོ་ང་མི་འདོད། །ཅེས་གསུངས་པས། ཁོང་གཉིས་ན་རེ། བུ་དང་བུ་མོ་མི་དགོས་རུང་། །གཉེན་གཞན་རེ་མེད་ན་ཁ་ཞན་པའི་སྡུག་བསྔལ་རང་བཟོད་གླགས་མི་འདུག་ཟེར་བའི་ལན་དུ་མགུར་འདི་གསུངས་སོ། །གཉེན་དང་པོ་ཕྲད་དགའ་མཐོང་འཛུམ་པོ། །འདིར་བྱོན་དང་འདིར་བཞུགས་ཀྱིས་ལུང་བ་འགེངས། །བར་དུ་ཤ་ཆང་གི་ཟས་ལན་ཅན། །ཕར་གཅིག་ལན་དུ་ཚུར་གཅིག་སྟེར། །ཐ་མར་ཆགས་སྡང་གི་འགྱོད་གཞི་ཅན། །སྡུག་འགྲོས་ཀྱི་གྱོད་རྩ་སེམས་ལ་གཟན། །
(༢༨༩)སྐྱིད་ཚེའི་ཟ་གྲོགས་དེ་སྤངས་པ་ཡིན། །འཇིག་རྟེན་གྱི་ཉེ་དུ་ང་མི་འདོད། །ཅེས་གསུངས་པས། ཡང་ཁོང་གཉིས་ན་རེ། ཁྱེད་གཉེན་ཉེ་རིང་གང་ཡང་མི་འདོད་རུང་དེ་ཡིན། ངེད་ལ་ནོར་ལོངས་སྤྱོད་ཀྱིས་ཆོག་པ་ཡོད། འདི་རྣམས་ཀྱི་བདག་པོ་ཅིས་ཀྱང་མཛད་པར་ཞུ་ཟེར་ཞུ་བ་ནན་གྱིས་འབུལ་དུ་བྱུང་བ་ལ། རྗེ་བཙུན་གྱི་ཞལ་ནས། ཡུལ་ཆུང་གཅིག་གི་མུན་པ་སེལ་ཕྱིར་ཉི་ཟླ་བསྡད་མི་འོང་ངས་ཀྱང་སྒྲུབ་པ་དང་འགྲོ་བ་མང་པོའི་དོན་བློས་བཏང་ནས་ཁྱེད་གཉིས་ཀྱི་ཚེ་འདིའི་བུ་དོད་མི་བྱེད། ང་དང་ཕྲད་པ་རང་གིས་ཁྱེད་གཉིས་ཀྱི་འདི་ཕྱིའི་དོན་གྲུབ། ཕྱི་མ་ཨུ་རྒྱན་དུ་འཛོམ་པའི་སྨོན་ལམ་འདེབས་ཞེས་མགུར་འདི་གསུངས་སོ། །ནོར་དང་པོ་བདག་སྐྱིད་གཞན་སྨོན་པོ། །ཅི་ཙམ་ཡོད་ཀྱང་ཆོག་ཤེས་མེད། །བར་དུ་སེར་སྣའི་མདུད་པས་འཆིང་། །དགེ་བའི་ཕྱོགས་སུ་གཏོང་མི་ཕོད། །དགྲ་འདྲེ་གཉིས་ཀྱི་གཡབ་མོ་ཡིན། །རང་གིས་བསོགས་པ་མི་ཡིས་སྤྱོད། །ཐ་མར་སྲོག་གི་བདུད་དུ་འོང་། །དགྲ་བོའི་ནོར་གཉེར་སེམས་ལ་གཟན། །འཁོར་བའི་བསླུ་རྡོ་སྤངས་པ་ཡིན། །བདུད་ཀྱི་མགོ་སྐོར་དེ་ང་མི་འདོད། །ཅེས་གསུངས་པས། ཁོང་གཉིས་རྗེ་བཙུན་ལ་མི་ཕྱེད་པའི་དད་པ་ཐོབ་ནས། བསོགས་པའི་ནོར་ཐམས་ཅད་ཆོས་ཕྱོགས་སུ་བཏང་། རྗེ་བཙུན་ལ་གདམས་ངག་ཞུས་ནས་བསྒོམས་པས། འཆི་ཁར་ལམ་སྣ་ཟིན་ཏེ། ངན་སོང་གི་སྡུག་བསྔལ་ལས་རྒྱུན་དུ་གྲོལ་ནས། རིམ་གྱིས་བྱང་ཆུབ་ཐོབ་པར་གྱུར་ཏོ། །དེ་ནས་རྗེ་བཙུན་སླར་ཡང་རག་མ་བྱང་ཆུབ་རྫོང་དུ་བྱོན་ནས་བཞུགས་པའི་ཚེ།
(༢༩༠)སྔར་གྱི་ཡོན་བདག་རྣམས་ཀྱིས་ཞབས་ཏོག་ཕུལ་ནས། ཐུགས་དམ་འཕེལ་བར་ཡོད་པའི་དུས་ནམ་ཞིག་གི་ཚེ། རྗེ་བཙུན་གྱི་དྲུང་དུ་ཕྱུགས་རྫི་གཉིས་མཇལ་དུ་བྱུང་བའི་གཞོན་པ་དེ་ན་རེ། བླ་མ་ལ་བཞུགས་གྲོགས་མེད་པ་ལགས་སམ་ཟེར་བ་ལ། ཡོད་གསུངས་པས། སུ་ཇི་སྐད་བྱ་བ་ཡོད་ཟེར་བ་ལ། གྲོགས་བྱང་ཆུབ་ཀྱི་སེམས་བྱ་བ་གཅིག་ཡོད་གསུངས་པས། དེ་ད་ལྟ་ག་ན་ཡོད་ཟེར་བ་ལ། ད་ལྟ་ཀུན་གཞི་རྣམ་ཤེས་ཀྱི་ཁང་བ་ན་ཡོད་གསུངས་པས། ཁོ་ན་རེ། ཀུན་གཞི་རྣམ་ཤེས་ཀྱི་ཁང་བ་གང་ལ་ཟེར་བ་ལགས་ཟེར་བ་ལ། རྗེ་བཙུན་གྱིས། ང་རང་གི་ལུས་ལ་ཟེར་བ་ཡིན་གསུངས་པས། རྒན་པ་དེ་ན་རེ། བླ་མ་ཁྱོད་ལ་སྐྱབས་འབྱུང་མི་འདུག་འགྲོ་ཟེར། གཞོན་པ་དེ་ན་རེ། རྣམ་པར་ཤེས་པ་སེམས་ལ་ཟེར་བ་ལགས་སམ། ལུས་འདི་སེམས་ཀྱི་ཁང་བ་ལགས་སམ་ཟེར་བ་ལ། ཡིན་གསུངས་པས། ཡང་ཁོ་ན་རེ། མིའི་ཁང་བའི་ནང་ན་མི་གཅིག་ཡོད་པ་དང་། །མི་མང་པོ་ཡོད་པ་ཡོང་གི་འདུག་པ། ལུས་ཀྱི་ནང་ན་སེམས་གཅིག་ཀ་ཡོད་དམ་མང་པོ་ཡོད། དུ་ཡོད་རུང་ཇི་འདྲ་ཞིག་ཡོད་ཟེར་བ་ལ། རྗེ་བཙུན་གྱིས། གཅིག་ཡོད་དམ་དུ་ཡོད་ཁྱོད་རང་ལྟོས་ཤོག་དང་གསུངས་པས། ལགས་ཟེར་ཁོང་གཉིས་ལོག་སོང་སྟེ། ནངས་པར་ཁ་སང་གི་བྱིས་པ་གཞོན་པ་དེ། རྗེ་བཙུན་གྱི་དྲུང་དུ་བྱུང་ནས། བླ་མ་ལགས། མདང་ངས་སེམས་དུ་འདུག ཇི་འདྲ་ཞིག་འདུག་བལྟས་པས། སེམས་གཅིག་ལས་མི་འདུག གཅིག་པོ་དེ་བསད་པས་མི་སོད། བདས་པས་མི་ནོན། བཟུང་བས་མི་ཟིན། མནན་པས་མི་ནོན། བཞག་ན་མི་སྡོད། བཏང་
(༢༩༡)ན་མི་འགྲོ། བསྡུས་ན་མི་འདུ། བལྟས་ན་མི་མཐོང་། བརྟགས་ན་མི་ཤེས། ཡོད་འཕྲོ་ལ་མི་ཡོང་། མེད་བསམས་ན་རྡོལ་ཡོང་། རིག་རིག་ཏུར་ཏུར། ཕྲས་ཕྲས། ཡལ་ཡལ་བ་འདི་ཅི་ཡིན་མི་ཤེས་པར་གདའ་བས། འདི་ཅི་ཡིན་བླ་མས་སྟོན་པར་ཞུ་དང་ཞེས་ཟེར་བས། དེ་ལ་རྗེ་བཙུན་གྱིས་མགུར་འདི་བཞེས་སོ། །སྐྱོང་བྱེད་རྫི་བོ་ཚུར་ལ་ཉོན། །བུ་རམ་མངར་བའི་རོ་མཆོག་འདིའི། །ཡོན་ཏན་ཐོས་པས་མྱོང་བ་མིན། །ཡིད་ལ་ཤར་ཡང་རོ་མི་མྱོང་། །ལྕེ་ཡིས་མྱངས་པས་རོ་མྱོང་ལྟར། །དེ་བཞིན་སེམས་ཀྱི་ངོ་བོ་དེ། །གང་ཟག་གཞན་གྱིས་བརྡ་སྤྲད་པས། །གོ་སྐབས་ཙམ་ལས་མཐོང་མི་འགྱུར། །གོ་སྐབས་ཙམ་ལ་བརྟེན་ནས་ནི། །སེམས་ཉིད་བཙལ་ན་མཐོང་བར་ངེས། །སྐྱོང་བྱེད་སེམས་ལ་དེ་ལྟར་ཞོག །ཅེས་གསུངས་པས། ཁོ་ན་རེ། འོ་ན་བརྡ་སྤྲོད་པའི་གོ་སྐབས་དེ་བླ་མས་བདག་ལ་གསུངས་དང་། བདག་གིས་དོ་ནུབ་བཙལ་ལ་ནངས་པར་འཁྱེར་ལ་ཡོང་ལགས་ཀྱིས་ཞེས་ཟེར་བ་ལ། རྗེ་བཙུན་གྱིས། འོ་ན་ཁྱོད་རང་དོ་ནུབ་སེམས་དེའི་ཁ་དོག་དཀར་དམར་སོགས་ཇི་འདྲ་འདུག དབྱིབས་ནར་མོ་ཟླུམ་པོ་སོགས་ཇི་འདྲ་འདུག མགོ་ནས་རྐང་མཐིལ་གྱི་བར་གང་དུ་གནས་ལྟོས་ཤོག་ཅེས་གསུངས་པས། དེར་ནངས་པར་ཉི་མ་ཤར་ལྷོད་པ་དང་ཕྱུགས་བདས་ནས་སླེབ་བྱུང་བ་ལ། རྗེ་བཙུན་གྱིས་མདང་ཁྱོད་ཀྱིས་སེམས་བཙལ་ལམ་གསུངས་པས། ཁོ་ན་རེ་བཙལ་ལགས་ཟེར། ཇི་འདྲ་འདུག་གསུངས་པས། ཁོ་ན་རེ། གཡོ་བ། དྭངས་པ། གསལ་
(༢༩༢)བ། ངོས་བཟུང་མེད་པ། ཁ་དོག་དང་དབྱིབས་སུ་མ་གྲུབ་པ། མིག་དང་བསྡེབས་ནས་བལྟ་བ། རྣ་བ་དང་བསྡེབས་ནས་ཉན་པ། སྣ་དང་བསྡེབས་ནས་སྣོམ་པ། ལྕེ་དང་བསྡེབས་ནས་སྨྲ་ཞིང་མྱང་བ། རྐང་བ་དང་བསྡེབས་ནས་འགྲོ་བ། ཕུ་གཡོ་མདའ་དཀྲུག ད་ལྟར་གྱི་ལུས་འདི་ཀུན་ཁོའི་ཁོལ་པོར་གདའ། ལུས་དགའ་རབ་ཡོད་དུས་ཁོས་བཀོལ་ནས། བདེ་ཆོད་ཚད་སྤྱད་དེ་ལུས་རྒས་འཁོགས་པའམ། རལ་ཆད་བྱུང་ན་རྟུག་པ་ཕྱིས་པའི་རྡོ་བཞིན་དུ་བསྐྱུར་ནས་ཁོ་རང་ལངས་འགྲོ་བའི་དམར་ཆུང་བདེ་བླག་ཅན་ཞིག་གདའ་སྟེ། ཁོ་ལའང་ཕུང་པོའི་ལ་ཡོགས་ཀྱིས་འབོལ་ལེ་ཤིག་གེ་བསྡད་རྒྱུ་མི་ཡོང་བར་སྡུག་བསྔལ་གྱིས་རང་འགགས་ལ་འགྲོ་བའི་རིགས་སུ་གདའ། ནུབ་མོ་གཉིད་དུ་སོང་བར་ཁོ་རང་དགར་འགྲོ་ཞིང་གདའ་སྟེ། ཁོ་ལ་འོ་བརྒྱལ་མང་བར་ཡོང་གིན་གདའ། ཁོའི་རིན་ལ་བདག་ཀྱང་སྡུག་ཏུ་འཇུག་པར་གདའ་ཟེར་རོ། །དེར་རྗེ་བཙུན་གྱིས་ཡང་མགུར་འདི་གསུངས་སོ། །བུ་སྐྱོང་བྱེད་རྫི་བོ་ཚུར་ཉོན་དང་། །ལུས་བེམ་རིག་གཉིས་ཀྱི་སོ་མཚམས་སུ། །རྣམ་པར་ཤེས་པ་སྡིག་པོ་ཆེ། །ངན་སོང་གི་སྡུག་བསྔལ་མྱོང་རྒྱུ་དེ། །འཁོར་བ་སྤངས་ནས་ཕྱིར་བཟློག་སྟེ། །མཐོ་རིས་ཐར་པའི་གྲོང་ཁྱེར་དུ། །འགྲོ་བར་འདོད་དམ་རིགས་ཀྱི་བུ། །འགྲོ་འདོད་ཡོད་ན་ཁྲིད་པས་ཆོག །ཅེས་གསུངས་པས། དེ་ཅིས་ཀྱང་ཐུགས་ལ་བཏགས་འཚལ་ཞེས་ཟེར། ཁྱོད་ཀྱི་མིང་ཅི་ཡིན་གསུངས་པས། ཁོ་ན་རེ་དགེ་བསྙེན་སངས་རྒྱས་སྐྱབས་བྱ་བ་ལགས་ཟེར། ལོ་ཅི་ཙམ་ལོན་གསུངས་
(༢༩༣)པས། བཅུ་དྲུག་ལོན་ཞེས་ཟེར། དེར་རྗེ་བཙུན་གྱིས་སྐྱབས་འགྲོའི་ལུང་དང་། སྐྱབས་འགྲོའི་ཕན་ཡོན་བསྡུས་པ་ཞིག་གནང་ནས། དོ་ནུབ་མན་ཆད་སྐྱབས་འགྲོ་མ་ཆག་པར་གྱིས། ཁྱོད་རང་བསྐྱབ་པ་ལུས་ཡིན་ནམ་སེམས་ཡིན་དོ་ནུབ་ཚོལ་ལ་སང་སྔ་དྲོ་ཁྱེར་ལ་ཤོག་ཅེས་གསུངས་པས། དེར་ཁོ་སང་སྔ་དྲོ་ཡོང་ནས། བླ་མ་ལགས་མདང་བདག་གིས་ང་རང་སྐྱབས་པ་ལུས་ཡིན་ནམ་སེམས་ཡིན་བལྟས་པས་གཉིས་ཀ་མ་ཡིན་ཏེ། ལུས་ཀྱི་མགོ་ནས་རྐང་བའི་བར་ལ་རེ་རེ་ལ་མིང་རེ་བཏགས་གདའ། ཡང་སྐྱབས་པ་དེ་ལུས་ཐམས་ཅད་འདུས་པ་དེ་ཡིན་ནམ་བསམ་པས། ལུས་དང་སེམས་བྲལ་ཙ་ན་རོ་ཟེར་བ་མིན་པ་སྐྱབས་པའི་མིང་མི་ཡོང་བར་འདུག རོ་ཡང་སིལ་བུར་འཐོར་ཙ་ན་རོའི་མིང་ཡང་མི་ཡོང་བར་འདུག འོ་ན་སྐྱབས་པ་དེ་སེམས་ཡིན་ནམ་བལྟས་པས། སྐྱབས་པ་ཡིན་ན་སེམས་ཟེར་བ་མི་འཐད་ལ། སེམས་ཀྱི་མིང་ལ་སྐྱབས་པ་བཏགས་པ་ཡིན་ན་ནི་སེམས་ཟེར་བའང་མི་འཐད་ལ། གལ་ཏེ་སེམས་སྔ་མ་དེ་ལ་སེམས་ཟེར་ཞིང་། ཕྱི་མ་ལ་སྐྱབས་པ་འདོགས་པ་ཡིན་ན་ནི། སྐྱབས་པ་འདོགས་པའི་དུས་ཀྱི་སེམས་སྔ་ཕྱི་གཉིས་འགགས་ཚར་བས། ད་ལྟའི་སེམས་དང་མ་འོངས་པའི་སེམས་ལ་ཡང་མིང་འདོགས་དགོས་ལ། སེམས་སྔ་ཕྱི་ཐམས་ཅད་ལ་སྐྱབས་པ་བཏགས་པ་ཡིན་ན་ནི་སེམས་ལ་འཆི་རྒྱུ་མི་འདུག་པས། སྐྱེ་བ་སྔ་ཕྱི་ཐམས་ཅད་དུ་རིགས་དྲུག་གང་དུ་སྐྱེས་ཀྱང་། སྐྱབས་པ་ཁོ་ནས་ཆོག་པ་ལགས་ཏེ། སྐྱེ་བ་སྔ་མ་ཅི་བྱས་ནི་མི་དྲན། ཕྱི་མ་ཅི་བྱེད་ནི་མི་ཤེས། ན་ནིང་དང་ཁ་སང་སོགས་ཀྱི་སེམས་ནི་འདས་ཚར། སང་ནངས་པར་གྱི་
(༢༩༤)སེམས་ནི་ད་དུང་མ་བསླེབས། ད་ལྟར་གྱི་སེམས་ཀྱང་རིམ་པ་བཞིན་མི་གནས་པར་གདའ་བས། བླ་མས་གསུང་དུ་གསོལ། བླ་མ་ཁྱེད་མཁྱེན་མཁྱེན་ཞེས་ཞུས་པས། དེའི་ལན་དུ་རྗེ་བཙུན་གྱིས་མགུར་འདི་གསུངས་སོ། །བདག་མེད་གནས་ལུགས་རྟོགས་པའི་བླ་མ་ལ། །བདག་ཅག་སྒོ་གསུམ་གུས་པས་གསོལ་བ་འདེབས། །བདག་དང་བདག་གི་རྗེས་འཇུག་སློབ་མ་རྣམས། །བདག་མེད་གནས་ལུགས་རྟོགས་པར་བྱིན་གྱིས་རློབས། །བདག་འཛིན་ཡུལ་ནས་ཐོན་པར་ཐུགས་རྗེས་ཟུངས། །དེ་རྗེས་སྐྱོང་བྱེད་རྫི་བོ་ཚུར་ལ་ཉོན། །ང་བདག་ཏུ་འཛིན་པའི་རྣམ་ཤེས་འདི། །བལྟས་པས་མཐོང་བར་ངས་མ་གོ། །སྒོམ་ཕྱག་རྒྱ་ཆེན་པོ་བསྒོམ་ནུས་ན། །མཐོང་མེད་ཚུལ་གྱིས་མཐོང་བ་ཡོད། །ཕྱག་རྒྱ་ཆེན་པོ་བསྒོམ་པ་ལ། །གཞི་དད་གུས་དོན་གཉེར་ཆེན་པོ་དགོས། །ལམ་འཁོར་བའི་རྒྱུ་འབྲས་ཤེས་ཀྱང་འཚལ། །འབྲས་བུ་མངོན་དུ་བྱེད་པ་ལ། །བླ་མའི་དབང་ལུང་མན་ངག་དགོས། །གདམས་ངག་གི་སྣོད་དུ་རུང་བ་ལ། །བསོད་ནམས་བསགས་པའི་སློབ་མ་དགོས། །སྐྱིད་ཐེག་སྡུག་ཐེག་ཞེ་བཅད་དགོས། །འཆི་བར་ནུས་པའི་ཐོག་འགེལ་དགོས། །དེ་འགྲུབ་པར་འདུག་གེ་ཁྱེའུ་ཆུང་། །དེ་འགྲུབ་ན་ཁྱོད་ལ་ལས་འཕྲོ་ཡོད། །དེ་མི་འགྲུབ་རྒྱུ་མཚན་བཤད་མི་རུང་། །ལར་ཁྱོད་ཀྱིས་བསམ་མནོ་བཏང་བ་ལ། །ང་བདག་ཏུ་འཛིན་པ་མ་རྙེད་པ། །དེ་གང་ཟག་གི་བདག་མེད་བྱ་བ་ཡིན། །ད་ཆོས་ཀྱི་བདག་མེད་རྟོགས་འདོད་ན། །ལོ་བཅུ་གཉིས་
(༢༩༥)ང་ཡི་ཕྱི་བཞིན་འབྲོངས། །དེ་ནས་སེམས་ངོ་ཤེས་པར་འགྱུར། །བུ་ཁྱེའུ་ཆུང་སེམས་ལ་དེ་ལྟར་ཞོག །ཅེས་གསུངས་པས། ཁོ་ན་རེ། ད་བདག་བླ་མ་ཁྱེད་ལ་མགོ་འབུལ་ལུས་འབུལ་བྱེད། བདག་གི་སེམས་འདིའི་རྩ་བརྡར་ཆོད་པ་ཞིག་མཁྱེན་ཞེས་ཟེར་རོ། །དེར་རྗེ་བཙུན་གྱི་ཐུགས་ལ་འདིས་སྒོམ་ནུས་སམ་མི་ནུས་བལྟ་དགོས་དགོངས་ནས། དཀོན་མཆོག་ལ་གསོལ་བ་བཏབ་ནས། ཁྱོད་རང་གི་མདུན་གྱི་སྣ་རྩེའི་ཐད་ཙམ་དུ་སྟོན་པ་སངས་རྒྱས་ཀྱི་སྐུ་འདི་ལྟ་བུ་ཞིག་སྒོམས་ཤིག་གསུངས་ནས། ཞི་གནས་ཀྱི་དམིགས་པ་ཞིག་ཕོག་ནས་བཏང་ངོ་། །དེར་ཞག་བདུན་མ་བྱུང་། ཞག་བདུན་སོང་བ་དང་། ཁྱེའུའི་ཕ་དེ་ཡོང་ནས། བླ་མ་ལགས། བདག་གི་བུ་དེ་ལོག་མ་ཡོང་ནས་ཞག་བདུན་སོང་། བུ་གྱ་ཉེས་སམ་བསམས་ནས་འཚོལ་དུ་ཕྱིན་པས་རྫི་རོགས་ཀུན་ན་རེ། ཁོ་བླ་མ་ཅན་སོང་ནས་ཆོས་ཉན་གྱིན་འདུག་ཟེར་ནས་ལོག་ཡོང་ངམ་བསམས་པས་མ་བྱུང་། །འདིར་ཡོང་ལགས་སོ་ཞེས་ཟེར། འདིར་མ་ཡོང་ནས་ཞག་བདུན་སོང་གསུངས་པས། ཕ་དེ་ངུ་ཞིང་ལོག་ནས་སོང་ངོ་། །དེ་ནས་མང་པོས་བཙལ་བས། རྫ་ཁུང་གཅིག་ན་ལུས་དྲང་པོར་བསྲངས་ནས་མིག་ཧུ་རེ་འདུག ཅི་བྱེད་པ་ཡིན་སྨྲས་པ་དང་། ངས་བླ་མའི་གདམས་ངག་བསྒོམ་པ་ཡིན་ཟེར། ཞག་བདུན་སོང་ནས་ལོག་མི་ཡོང་བ་ཅི་ཡིན་བྱས་པས། ཁོ་ན་རེ། ང་ཡུག་ཅིག་མིན་པ་མ་བསྡད་ཁྱེད་ཀྱི་རྫུན་ཡིན་ཟེར། ཉི་མ་ལ་ལྟོས་བྱས་པས། ད་ཅི་བསྒོམ་ལ་འཇོག་པའི་དུས་ལས་ད་ལྟ་སྔ་བར་འདུག་ཅི་ཡིན་ནམ་ཟེར། དེ་མན་ཆད་དུས་ཞག་རེ་དུས་ཞག་ལྔ་དྲུག་སྟོར་ནས་མང་པོ་འཚོལ་དགོས་པ་
(༢༩༦)བྱུང་བས། འདི་གྱ་ཞིག་ཉེས་འདུག བཙལ་བཙལ་ནས་སྐྱོ་བ་ཡང་སྐྱེ་བར་འདུག ཁྱེད་རང་བླ་མ་ཅན་འགྲོ་ཡེ་བྱས་པས་འགྲོ་ཟེར་ནས་རྒྱགས་དང་བཅས་བསྐྱལ་ལོ། །དེར་བླ་མས་དགེ་བསྙེན་གྱི་བསླབ་པ་ཞིག་ཕོག ལས་རྒྱུ་འབྲས་ཀྱི་ཆོས་བཤད་པའི་མཐར་ལྷན་ཅིག་སྐྱེས་སྦྱོར་གྱི་ཁྲིད་ཕོག་པས། སྒོམ་རྣམ་དག་རྒྱུད་ལ་སྐྱེས་ནས་བླ་མ་ཤིན་ཏུ་མཉེས་ཏེ་མགུར་འདི་གསུངས་སོ། །དཔལ་ནཱ་རོ་མཻ་ཏྲིས་བྱིན་བརླབས་པ། །རྗེ་སྒྲ་སྒྱུར་མར་པའི་ཞབས་ལ་འདུད། །ཆོས་ཁ་ལ་བྱེད་པའི་སྟོན་ཆེན་ཚོ། །ཆོས་བཤད་པའི་མཁྱེན་རྒྱ་ཆེན་ཡང་། །ལུས་བེམ་རིག་རྟེན་དང་འབྲལ་དུས་སུ། ཁ་བཤད་ཀྱི་ཆོས་བཤད་ནམ་མཁར་དེངས། །འོད་གསལ་གྱི་འཆར་སྒོ་མུན་པས་བསྒྲིབས། །འཆི་ཁའི་ཆོས་སྐུ་འཇིགས་སྐྲག་ཏུ་སོང་། །སྡེ་སྣོད་ལ་མི་ཚེ་སྦྱངས་ན་ཡང་། །ལུས་བེམ་རིག་འབྲལ་ཁར་མ་ཕན་ནོ། །ཞི་གནས་བསྒོམ་པའི་སྒོམ་ཆེན་ཀུན། །ཉམས་ཀྱི་ངར་འདོན་གསལ་སྣང་ལ། །ལྷག་མཐོང་དུ་འཛིན་པའི་བློ་བདེ་བོ། །འཆི་ཁར་ཆོས་སྐུའི་ལྷག་མཐོང་ལ། །འོད་གསལ་མ་བུ་མ་འཕྲོད་པར། །སྔར་བསྒོམས་ཞི་གནས་ཀྱིས་འཆི་ཁར་མ་ཕན་ཞིང་། །སླར་དུད་འགྲོའི་རྒྱུ་རུ་སོང་ལགས་སམ། །བུ་དགེ་བསྙེན་སྐྱབས་མཆོག་ཚུར་ལ་ཉོན། །ལུས་གནད་མཉམ་པར་བཞག་དུས་སུ། །རྟོག་མེད་སྣང་བ་འགགས་པ་དེ། །ཞི་གནས་ལྟེང་པོ་བྱ་བ་ཡིན། །དེ་དྲན་ཤེས་ཀྱིས་ངར་འདོན་བྱས་པའི་ཚེ། །མར་མེ་ལྟར་རང་གསལ་ལྷག་གེ་བ། །མེ་ཏོག་ལྟར་རང་དྭངས་གསལ་ལེ་བ། །མིག་ནམ་
(༢༩༧)མཁའ་དྭངས་པར་བལྟས་པ་བཞིན། །རིག་སྟོང་རྗེན་ནེ་ཡེར་རེ་བ། །རྟོག་མེད་གསལ་ཞིང་དྭངས་པ་དེ། །ཞི་གནས་ཉམས་ཀྱི་སྣང་བ་ཡིན། །ཉམས་སྣང་བ་དེ་རྣམས་གཞིར་བཞག་ནས། །རྗེ་དཀོན་མཆོག་ལ་གསོལ་བ་འདེབས་བཞིན་དུ། །ཆོས་ཐོས་བསམ་གྱི་ཕུ་ཐག་བཅད་ནས་ནི། །བདག་མེད་གོ་ཡུལ་གྱི་སོར་རྟོག་ལྷག་མཐོང་ལ། །ཞི་གནས་ངར་འདོན་གྱི་སྲོག་ཐག་བཟང་པོ་བཏགས། །བྱམས་དང་སྙིང་རྗེའི་སྐྱེས་བུ་སྟོབས་ལྡན་གྱིས། །གཞན་ཕན་སེམས་བསྐྱེད་ཀྱི་རྩལ་སྟོབས་དྲག་པོ་ཡིས། །སྨོན་ལམ་རྣམ་དག་གིས་གྱེན་དུ་དྲངས་པ་ལས། །མཐོང་ལམ་རྣམ་པར་དག་པས་མངོན་སུམ་དུ། །རྣམ་དག་མཐོང་མེད་ཀྱི་ལྷག་མཐོང་རྟོགས་ཏེ་མཆི། །བློ་རེ་དོགས་ཀྱི་རང་མཚང་དེ་དུས་རིག །མ་ཕྱིན་པར་སངས་རྒྱས་ཀྱི་ས་རུ་བསླེབས། །མ་བལྟས་པར་ཆོས་སྐུ་དེ་དུས་མཐོང་། །མ་བསྒྲུབས་པར་འདུན་མ་ལྷུན་གྱིས་གྲུབ། །བུ་དགེ་བསྙེན་སེམས་ལ་དེ་ལྟར་ཞོག །ཅེས་གསུངས་ཤིང་། ཞབས་ཕྱིར་ཁྲིད་ནས་དབང་དང་གདམས་པ་རྣམས་རྫོགས་པར་གནང་ནས་བསྒོམས་པས། ཉམས་རྟོགས་མཐར་ཕྱིན་པའི་ཐུགས་ཀྱི་སྲས་རས་པ་སངས་རྒྱས་སྐྱབས་ཞེས་བྱ་བར་གྲགས་སོ། །རག་མར་ཕྱི་མ་བྱོན་དུས། རས་པ་སངས་རྒྱས་སྐྱབས་དང་མཇལ་བའི་སྐོར་རོ། །སྟོན་པ་ཤཱཀྱ་གུ་ན་རྗེས་སུ་བཟུང་བའི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་མང་ཡུལ་སྐྱིད་གྲོང་ནས་གཉའ་ནང་དུ་བྱོན་པས་སྔར་གྱི་ཡོན་བདག་རྣམས་དགའ་སྤྲོ་དཔག་མེད་ཐོབ་
(༢༩༨)ནས་གཉའ་ནང་དུ་རྟག་ཏུ་བཞུགས་དགོས་ཞེས་གསོལ་བ་བཏབ་སྟེ། བཙན་སྡོད་ཤོད་ཀྱི་བར་ན་ཕ་བོང་གྲོད་པ་འདྲ་བ་ཞིག་གི་འོག་ན་ཕུག་པ་ཞིག་ཡོད་པ་དེར་བཞུགས་དུས་སྟོན་པ་ཤཱཀྱ་གུ་ན་དང་གཉའ་ནང་པའི་ཉ་མ་རྣམས་དྲུང་དུ་འོངས་ནས། རྗེ་བཙུན་ལ་ཡུལ་ཕྱོགས་གཞན་གྱི་རི་ཁྲོད་དུ་ཐུགས་དམ་གྱི་བོགས་ཇི་འདྲ་བྱུང་དང་གདེང་ཇི་འདྲ་འཁྲུངས་ཞུས་པའི་ལན་དུ་མགུར་འདི་གསུངས་སོ། །སྒྲ་སྒྱུར་མར་པའི་ཞབས་ལ་འདུད། །ང་རི་ཁྲོད་གཞན་དུ་བསྒོམས་པ་ལས། །སྐྱེ་བ་མེད་པའི་གདེང་གཅིག་རྙེད། །ཚེ་སྔ་ཕྱི་གཉིས་སུ་འཛིན་པ་དག །རིགས་དྲུག་གི་སྣང་བ་རྫུན་དུ་ཐལ། །སྐྱེ་འཆི་གཉིས་ཀྱི་སྒྲོ་འདོགས་ཆོད། །མཉམ་པ་ཉིད་ཀྱི་གདེང་གཅིག་རྙེད། །བདེ་སྡུག་གཉིས་སུ་འཛིན་པ་དག །ཚོར་བའི་ཉམས་མྱོང་རྫུན་དུ་ཐལ། །སྤང་བླང་གཉིས་ཀྱི་སྒྲོ་འདོགས་ཆོད། །དབྱེ་རུ་མེད་པའི་གདེང་གཅིག་རྙེད། །འཁོར་འདས་གཉིས་སུ་འཛིན་པ་དག །ས་ལམ་སྦྱོང་བ་རྫུན་དུ་ཐལ། །རེ་དོགས་གཉིས་ཀྱི་སྒྲོ་འདོགས་ཆོད། །ཅེས་གསུངས་པས། ཉ་མ་རྣམས་ན་རེ། གཞན་ཐུགས་དམ་ཅི་འཁྲུངས་ཞུས་པས། ཁྱེད་ཉ་མ་རྣམས་ཀྱི་བློ་དང་མཐུན་པའི་དགེ་སྦྱོར་སྐྱེ་ལུགས་ཤིག་བྱུང་ཞེས་མགུར་འདི་གསུངས་སོ། །ཕ་མའི་རྒྱུ་རྐྱེན་ཕྱི་ནས་ཤར། །རང་ཀུན་གཞིའི་རྣམ་ཤེས་ནང་ནས་ཤར། །བར་དུ་མི་ལུས་གཙང་མ་ཐོབ། །ངེད་ངན་སོང་གསུམ་དུ་མ་སྐྱེས་ཙམ་གདའོ། །སྐྱེ་འཆིའི་སྣང་བ་ཕྱི་ནས་ཤར། །ཞེན་ལོག་དད་པ་ནང་ནས་
(༢༩༩)ཤར། །བར་དུ་དམ་པའི་ལྷ་ཆོས་དྲན། །ཡུལ་གཉེན་གྱི་དགྲ་ལ་མ་ཤོར་ཙམ་གདའོ། །ཕ་བླ་མའི་རྒྱུ་རྐྱེན་ཕྱི་ནས་ཤར། །རང་སྦྱོང་བྱེད་ཀྱི་ཤེས་རབ་ནང་ནས་ཤར། །བར་དུ་ཡིད་ཆེས་ཀྱི་གོ་བ་སྐྱེས། །ཆོས་ལ་ཐེ་ཚོམ་མ་སྐྱེས་ཙམ་གདའོ། །འགྲོ་དྲུག་གི་སེམས་ཅན་ཕྱི་ནས་ཤར། །སྙིང་རྗེ་ཕྱོགས་མེད་ནང་ནས་ཤར། །བར་དུ་བསྒོམས་པའི་ཉམས་མྱོང་དྲན། །ཐུགས་རྗེ་ཞེ་འདོད་དུ་མ་སོང་ཙམ་གདའོ། ཁམས་གསུམ་རང་གྲོལ་ཕྱི་ནས་ཤར། །རང་བྱུང་ཡེ་ཤེས་ནང་ནས་ཤར། །བར་དུ་རྟོགས་པའི་གདེང་དང་ལྡན། །དོན་ལ་ཉམ་ང་མེད་ཙམ་གདའོ། །འདོད་ཡོན་རྣམ་ལྔ་ཕྱི་ནས་ཤར། །འཛིན་མེད་ཀྱི་ཤེས་རབ་ནང་ནས་ཤར། །བར་དུ་རོ་སྙོམས་ཀྱི་སྤྱོད་པ་སྤྱད། །སྐྱིད་སྡུག་གཉིས་སུ་མི་འཛིན་ཙམ་གདའོ། །བྱས་ཆོས་འཇིག་པ་ཕྱི་ནས་ཤར། །རེ་དོགས་བྲལ་བ་ནང་ནས་ཤར། །བར་དུ་རྩོལ་སྒྲུབ་ཀྱི་ནད་དང་བྲལ། །དགེ་སྡིག་གཉིས་སུ་མི་འཛིན་ཙམ་གདའོ། །ཞེས་གསུངས་པས། སྟོན་པ་ཤཱཀ་གུས། རྗེ་བཙུན་གྱི་ཐུགས་དམ་དང་པོ་ནས་ཡེ་བཟང་ཡིན། བདག་གིས་རྗེ་བཙུན་གྱི་ཞལ་སྔ་མོ་ནས་མཐོང་རུང་གདམས་ངག་ཡིད་ཆེས་ཤིང་བློ་ཁེལ་བ་ཞིག་མ་ཐོབ། ད་དབང་དང་གདམས་ངག་ཐུགས་རྗེས་འཛིན་པར་ཞུ་ཞུས་པས། རྗེ་བཙུན་གྱིས་ཀྱང་དབང་དང་གདམས་པ་གནང་སྟེ་སྒོམ་དུ་བཅུག་པས། སྟོན་པ་ལ་ཉམས་སྐྱེས་ཏེ། རྗེ་བཙུན་ལ་ཞུས་པ། སྣང་བ་དང་འཁོར་བ་འདི་མེད་ན་ཉམས་སུ་ལེན་ཡང་མི་དགོས་པ་འདུག སེམས་མེད་ན་མཁན་པོ་ཡང་མི་ཡོང་བ་འདུག བླ་མ་མེད་ན་ཉམས་སུ་ལེན་ཡང་མི་ཤེས་པ་འདུག འདི་རྣམས་ལ་མཚན་ཉིད་
(༣༠༠)རེ་དང་སེམས་ཀྱི་ངོ་སྤྲོད་ཅིག་གནང་བར་ཞུ་ཞུས་པའི་ལན་དུ་མགུར་འདི་གསུངས་སོ། །སྣང་བའི་མཚན་ཉིད་སྐྱེ་བ་མེད། །སྐྱེ་བ་བྱུང་ན་དངོས་འཛིན་ཡིན། །འཁོར་བའི་མཚན་ཉིད་གཞི་རྩ་བྲལ། །གཞི་རྩ་བྱུང་ན་རྣམ་རྟོག་ཡིན། །སེམས་ཀྱི་མཚན་ཉིད་ཟུང་དུ་འཇུག །ཕྱོགས་ཆ་བྱུང་ན་ཞེ་འདོད་ཡིན། །བླ་མའི་མཚན་ཉིད་རྒྱུད་པར་ལྡན། །རང་བཟོ་བྱེད་ན་རྨོངས་པ་ཡིན། །སེམས་ཉིད་ནམ་མཁའ་ལྟ་བུ་ལ། །རྣམ་རྟོག་ལྷོ་སྤྲིན་ལྟ་བུས་བསྒྲིབས། །མཚན་ལྡན་བླ་མའི་མན་ངག་འདི། །འབྱུང་བ་སྐྱེ་སེར་གྱི་ཚུལ་དུ་གདའ། །རྟོག་པ་རང་ཡང་འོད་གསལ་དང་། །ཉམས་མྱོང་ཉི་ཟླ་ལྟ་བུ་ཤར། །ཕྱོགས་བཅུ་དུས་གསུམ་མེད་པར་གསལ། །ངོས་བཟུང་མེད་པས་བརྗོད་བྲལ་དང་། །ངེས་ཤེས་གཟའ་སྐར་ལྟ་བུ་ཤར། །གང་ཤར་དུས་ན་བདེ་བ་ཆེ། །རང་བཞིན་སྤྲོས་བྲལ་ཆོས་ཀྱི་སྐུ། །ཚོགས་དྲུག་རྐྱེན་སྣང་སྟོང་པའི་ངང་། །འབད་མེད་ཤུགས་འབྱུང་ཟག་མེད་འདི། །རང་བཞིན་ལྷུག་པའི་ངང་ཞིག་ལ། །འཛིན་མེད་ཡེ་ཤེས་རྒྱུན་པར་གནས། །འབྲལ་མེད་སྐུ་གསུམ་ངོ་མཚར་ཆེ། །ཞེས་གསུངས་ནས། སྟོན་པ་ཚེ་འདིའི་སྙན་གྲགས་དང་བདེ་སྐྱིད་ལ་མ་ཆགས། ཐ་སྙད་ཀྱི་ཚིག་ཕྱིར་མ་འབྲངས་པར་ཚེ་དང་སྒྲུབ་པ་སྙོམས་ཤིག ཁྱེད་ཀྱིས་འདི་བཞིན་ཆོས་མཛད། ཀུན་གྱིས་ཉམས་སུ་ལེན་རྒྱུ་ཡིན་པས། ཚིག་འདི་དག་གི་དོན་ཉམས་སུ་ལོངས་ཤིག་གསུངས་ནས་མགུར་འདི་གསུངས་སོ། །སྐྱེས་བུ་སྐལ་ལྡན་དམ་པ་རྣམས། །ཚེ་འདི་སླུ་བྱེད་ཡིན་པ་ཆ་མེད་
(༣༠༡)དམ། །ལོངས་སྤྱོད་སྒྱུ་མ་ཡིན་པ་ཆ་མེད་དམ། །འཁོར་བ་ཞི་བ་ཡིན་པ་ཆ་མེད་དམ། །བདེ་བ་རྨི་ལམ་ཡིན་པ་ཆ་མེད་དམ། །བསྟོད་སྨད་བྲག་ཅ་ཡིན་པ་ཆ་མེད་དམ། །སྣང་བ་སེམས་ཉིད་ཡིན་པ་ཆ་མེད་དམ། །རང་སེམས་སངས་རྒྱས་ཡིན་པ་ཆ་མེད་དམ། །སངས་རྒྱས་ཆོས་སྐུ་ཡིན་པ་ཆ་མེད་དམ། །ཆོས་སྐུ་ཆོས་ཉིད་ཡིན་པ་ཆ་མེད་དམ། །རྟོགས་ན་ཅི་སྣང་སེམས་སུ་འདུས། །སེམས་ལ་ཉིན་དང་མཚན་དུ་ལྟོས། །སེམས་ལ་བལྟས་པས་མཐོང་བ་མེད། །མཐོང་བ་མེད་པའི་ངང་ལ་ཞོག །ང་ཉིད་ཕྱག་རྒྱ་ཆེན་པོ་ལ། །རང་བཞིན་ལྷག་པ་བསམ་དུ་མེད། །ཤེས་པ་མི་བཟུང་ངང་ལ་བཞག །མཉམ་བཞག་རྗེས་ཐོབ་དབྱེར་མེད་པས། །བསྒོམ་པའི་རིམ་པ་བདག་ལ་མེད། །ཇི་ལྟར་སྣང་ཡང་ངོ་བོས་སྟོང་། །དྲན་པས་བཟུང་དང་མ་བཟུང་མེད། །མ་སྐྱེས་པ་ཡི་རོ་མྱོང་བས། །དེ་བཞིན་སྒོམ་པ་རྟོགས་པ་ཡིས། །ལས་ཀྱི་ཕྱག་རྒྱ་བསྒོམ་པ་དང་། །རྩ་རླུང་ཐིག་ལེ་བསྒོམ་པ་དང་། །སྔགས་བཟླས་པ་དང་ལྷ་སྒོམ་དང་། །ཚངས་པའི་གནས་གཞི་བསྒོམ་ལ་སོགས། །ཐེག་པ་ཆེན་པོའི་འཇུག་ཐབས་ཙམ། །དེ་རྣམས་ཆེད་དུ་བསྒོམས་པས་ཀྱང་། །ཆགས་སྡང་རྩ་བ་མི་སྤོངས་ཀྱིས། །སྣང་བ་རང་གི་སེམས་ཉིད་ལགས། །སེམས་ཉིད་སྟོང་པར་ཤེས་པར་གྱིས། །རྟོགས་པ་ཉམས་དང་མ་བྲལ་ན། །ཚུལ་ཁྲིམས་མཆོད་སོགས་དགེ་བའི་ཚོགས། །ཐམས་ཅད་མ་ལུས་དེ་ལ་ཚང་། །ཞེས་གསུངས་པས། །སྟོན་པ་ཤཱཀ་གུས་ཀྱང་སྒྲུབ་པ་ཁོ་ན་མཛད་པས་ཉམས་རྟོགས་ཁྱད་པར་ཅན་འཁྲུངས་པའི་སྟོན་སྒོམ་ཉེ་བའི་སྲས་གཅིག་བྱུང་བ་ཡིན་ནོ། །གཉའ་ནང་གྲོད་ཕུག་
(༣༠༢)ཏུ་སྟོན་པ་ཤཱཀྱ་གུ་ན་རྗེས་སུ་བཟུང་བའི་སྐོར་རོ། །དཔལ་དར་འབུམ་དང་མཇལ་བའི་སྐོར། ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་བྱང་རྟ་སྒོའི་གངས་ལ་སྒོམ་དུ་འབྱོན་དགོངས་ནས། ནམ་ཟླ་སྟོན་ཞིག་ལ་བྱོན་པའི་ཚེ། གཅུང་གི་གད་པ་གླེ་གསུམ་དུ་ཕྱག་ཕེབས་པ་ལས། ཡུལ་པ་ཀུན་བཙས་མ་རྔ་ཞིང་འདུག ཁྱད་པར་ཞིང་ཆེན་པོ་ཞིག་གི་སྟེང་ན། བུ་མོ་ལོ་ལྔ་གསུམ་བཅོ་ལྔ་ཙམ་ལོན་པ་ཡེ་ཤེས་མཁའ་འགྲོའི་མཚན་རྟགས་དང་ལྡན་པ་ཞིག་གིས་མགོ་བྱས་པའི་མི་མང་པོ་བཙས་མ་རྔ་བ་ཞིག་འདུག་པས་དེར་བྱོན་ནས། ཡོན་བདག་རྣམས་རྣལ་འབྱོར་པ་ང་ལ་འཚོ་བ་ཞིག་སློངས་གསུངས་པས། བུ་མོ་དེ་ན་རེ། རྣལ་འབྱོར་པ་ཁྱེད་རང་མཁར་ཕ་གིའི་སྒོར་བྱོན་ལ་བཞུགས་ཤིག་ང་ཡང་འཕྲལ་དུ་སླེབ་འོང་ཟེར་བ་ལས། རྗེ་བཙུན་མཁར་དེའི་སྒོར་བྱོན་ནས། སྒོ་དེར་ཕྱག་བེར་སུག་པ་ཞིག་མཛད་པས། སྒོ་དེ་ནང་དུ་བརྒྱངས་སོང་བ་དང་། ཡུག་ཅིག་ན་དེའི་ནང་ནས་རྒན་མོ་མི་སྡུག་པའི་ཆ་བྱད་ཅན་ཐལ་བ་སྤར་མོ་གང་འཁྱེར་བ་ཞིག་བྱུང་ནས། སྤྲང་པོ་རྣལ་འབྱོར་པ་ཁྱེད་རྣམས་དབྱར་གྱི་དུས་ན་དཀར་སྤྲང་བྱེད། དགུན་གྱི་དུས་ན་སྐྱུར་སྤྲང་བྱེད། ཁྱོད་ལ་སྡོད་པའི་དུས་ཀྱང་མི་འདུག ཁྱོད་ངའི་བུ་མོ་དང་མནའ་མའི་སྐྱེ་ཆ་རྣམས་རྐུ་བསམས་ནས་མི་མེད་པའི་སྐབས་བཤར་ཏེ་འོངས་པ་ཡིན་ནམ་ཟེར་གཟུགས་པོ་ཁྲིག་ཁྲིག་བྱེད་ཐལ་བ་འདེབས་གྲབས་བྱེད་ཅིང་། མང་དུ་འབར་དུ་བྱུང་བ་ལས། རྗེ་བཙུན་གྱིས་རྒན་མོ་
(༣༠༣)ཁྱོད་ཀྱི་ཐལ་བ་རྡེག་ལོང་འོང་བས། ཅུང་ཟད་ཅིག་ང་མི་ལ་རས་པའི་གླུ་འདིར་ཉོན་ཅིག་གསུངས་ནས་ཨ་ཕྱི་ལ་དོན་དགུ་དང་ལྡན་པའི་མགུར་འདི་གསུངས་སོ། །ཡར་མཐོ་རིས་ཐར་པའི་བདེ་བ་དང་གཅིག །མར་ངན་སོང་གསུམ་གྱི་སྡུག་བསྔལ་དང་གཉིས། །བར་གར་སྐྱེ་རང་དབང་མེད་པ་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་ཆོས་དང་འཁོན་པའི་ཞེ་གནག་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །ཁྱོད་དང་པོ་ཁྱིམ་ལ་བཏང་དུས་ན། །འདི་འདྲ་མ་ཞིག་ཨེ་བྱུང་སོམས། །སྔ་དྲོ་ལྡང་བའི་སྔ་མ་དང་གཅིག །དགོང་མོ་ཉལ་བའི་ཕྱི་མ་དང་གཉིས། །ཟིན་པ་མེད་པའི་བྱ་ལས་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་གླ་ལྟོ་མེད་པའི་བྲན་ཁོལ་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །དེ་ནས་འདི་འདྲ་ཨེ་བྱུང་སོམས། །གལ་པོ་ཆེ་ཡི་བཟའ་དཔོན་དང་གཅིག །མེད་ཀྱང་དགོས་པའི་ཁྲལ་སྡུད་དང་གཉིས། །མེད་མི་རུང་གི་བུ་ཚ་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་གལ་ཆུང་རང་ལ་དགོས་པའི་སྐལ་མེད་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །དེ་རྗེས་འདི་འདྲ་ཨེ་བྱུང་སོམས། །ཐོབ་ན་བརྐུ་བའི་རྐུན་མ་དང་གཅིག །མ་ཐོབ་འཕྲོག་པའི་ཇག་པ་དང་གཉིས། །
(༣༠༤)ཤི་རྨས་མེད་པའི་འཁྲུག་པ་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་དགྲ་ཕུགས་ནས་ལངས་པའི་མེ་རེག་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །དེ་རྗེས་འདི་འདྲ་ཨེ་བྱུང་སོམས། །མིའི་བུ་མོའི་ངོ་འཛིན་དང་གཅིག །རང་གི་བུ་ཚའི་ཚིག་སྦོགས་དང་གཉིས། །ཚ་ཡུག་མང་པོའི་ཅོ་ལོ་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་བཟོད་པ་སྒོམ་པའི་རྣ་ཐེག་ཅན། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །དེ་རྗེས་འདི་འདྲ་ཨེ་བྱུང་སོམས། །བརྟོད་ཕུར་འདོན་པའི་ལྡང་ལུགས་དང་གཅིག །བྱ་ལ་འཇབ་པའི་འགྲོ་ལུགས་དང་གཉིས། །ས་དོ་ཆད་པའི་སྡོད་ལུགས་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་སྒྱུ་ལུས་རྒུད་པའི་ཡིད་ཕམ་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །དེ་རྗེས་འདི་འདྲ་ཨེ་བྱུང་སོམས། །ཕྱི་པགས་པ་འདུས་པའི་གཉེར་མ་དང་གཅིག །ནང་ཤ་ཁྲག་ཟད་པའི་རུས་འབོར་དང་གཉིས། །བར་གླེན་ལྐུགས་འོན་ལོང་ཐོམ་ཡོར་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་མི་སྡུག་སྟོན་པའི་ཁྲོ་གཉེར་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །ད་ལྟ་འདི་འདྲ་ཨེ་འདུག་སོམས། །གྲང་ལ་ཉོག་པའི་བཟའ་བཏུང་དང་གཅིག །
(༣༠༥)ལྕི་ལ་ཧྲུལ་བའི་དུག་པོ་དང་གཉིས། །པག་པོ་བཞི་སྦྱོར་གྱི་མལ་ས་དང་གསུམ། །གསུམ་དེ་གསུམ་འཛོམས་པའི་དུས་ཚོད་ན། །ཨ་ཕྱི་མིས་འགོམ་ཁྱིས་འགོམ་གྱི་རྟོགས་ལྡན་མ། །ཁྱེད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་གྱིས། །བསྟེན་ན་མཚན་ལྡན་བླ་མ་སྟེན། །ད་ནི་འདི་འདྲ་ཡོང་བས་སོམས། །ཡར་མཐོ་རིས་དང་ཐར་པ་ནི་ཉིན་མོའི་སྐར་མ་བས་བཀོན། །མར་འཁོར་བ་དང་ངན་སོང་ནི་ཤ་གཟུག་ཕྲན་པས་བྲིན། །ད་ལྟ་ཡིད་ཕམ་བེམ་རིག་འགྱེས་དུས་འདིར། །ཨ་ཕྱི་འཆི་བྲོད་གདེང་ཚད་མེད་པའི་གནོང་ཅན་མ། །ཁྱོད་ལྟ་རྟོག་རང་གི་སེམས་ལ་ཐོངས། །བྱེད་ན་དམ་པའི་ལྷ་ཆོས་མཛོད། །བསྟེན་ན་མཚན་ལྡན་བླ་མ་སྟེན། །ཅེས་གསུངས་པས། རྗེ་བཙུན་གྱི་ཐུགས་རྗེ་དང་གསུང་དབྱངས་སྙན་པོས་རྒན་མོ་རང་དབང་མེད་པའི་དད་པ་སྐྱེས། །ལག་པའི་ཐལ་བ་ཡང་སོར་བར་ནས་འཛགས་ནས་སོང་སྟེ། རྒན་མོས་སྔར་བྱས་ཀྱི་ལས་རྣམས་དྲན་ནས་འགྱོད་དེ། མཆི་མ་གཏོང་ཞིང་ཡོད་པའི་ཚེ། ཞིང་ཁའི་བུ་མོ་རྗེ་བཙུན་ལ་སྒོ་ཁུང་སྟོན་མཁན་དེ་སླེབ་བྱུང་བས། རྗེ་བཙུན་ལ། རྣལ་འབྱོར་པ་ཁྱེད་ཆོས་པ་མི་འདྲ་བར་རྒན་མོ་འདི་བརྡུངས་ནས། འདི་རྡུང་བའི་ཤགས་རང་ཅི་ཡོད་དམ་ཟེར་བྱུང་བ་ལ། རྒན་མོ་ན་རེ། བུ་མོ་ཁོང་ལ་རྒོལ་བ་མ་ཞུ་ཅིག་ཁོང་གིས་ང་ལ་བཀའ་བཀྱོན་པ་མ་ཡིན། ངས་ཁོང་ལ་རྒོལ་བ་ཞུས་པའི་ལན་དུ། ཆོས་ཤིག་གནང་བ་དེ་རྣམས་ངའི་ཐོག་ཏུ་མ་བྱུང་བ་སྣ་གཅིག་ཀྱང་མི་འདུག་པས། རང་ལ་ཡི་ཆད་གནོང་ལངས་ཏེ། ཆོས་མ་ནུས་པ་ལ་འགྱོད་དྲགས་ནས་མཆི་མ་ཤོར་བ་ཡིན། ད་ཁྱོད་རང་ང་ལྟ་བུ་ནི་མིན།
(༣༠༦)ན་སོ་ནི་གཞོན་ལོངས་སྤྱོད་དང་དད་པ་ནི་ཡོད། བླ་མ་འདི་མི་ལ་རས་པ་ཟེར་བ་དེ་ཡིན་པར་འདུག ཁོང་ལ་བསྙེན་བཀུར་ཕུལ་ལ། ཆོས་དང་གདམས་ངག་ཞུས་ཤིག་ཟེར་བ་ལ། བུ་མོ་དེ་ན་རེ། དེ་ལྟར་ཡིན་ན་ཁྱེད་གཉིས་ཀ་ངོ་མཚར་ཆེ། ཁྱེད་དབང་ཕྱུག་མི་ལ་རས་པ་ཡིན་ན། ངེད་ཞལ་མཇལ་བ་རང་གིས་བསོད་ནམས་བསགས། ཁྱེད་ཀྱིས་ཆོས་པ་རྣམས་ལ་རྒྱུད་པའི་ལོ་རྒྱུས་བཤད་པས། བུ་སློབ་རྣམས་ཡིད་ཆེས་པ་དང་། སྣང་བ་འགྱུར་བའི་གདམས་པ་བྱ་བ་ཡོད་ཟེར་བ། ཁྱེད་ཀྱི་རྒྱུད་པ་དེ་གསུངས་དང་ཟེར་བ་ལ། རྗེ་བཙུན་གྱིས་བུ་མོ་དེ་ལས་ཅན་གྱི་སློབ་མར་དགོངས་ནས། རྒྱུད་པའི་ཐུག་ཚུལ་འདི་མགུར་དུ་གསུངས་སོ། །ཆོས་སྐུ་ཀུན་ལ་ཁྱབ་པ་ཀུན་ཏུ་བཟང་པོ་དང་གཅིག །ལོངས་སྐུ་མཚན་དཔེས་སྤྲས་པ་རྡོ་རྗེ་འཆང་ཆེན་དང་གཉིས། །སྤྲུལ་སྐུ་འགྲོ་དོན་མཛད་པ་ཤཱཀྱ་ཐུབ་པ་དང་གསུམ། །རྒྱུད་པ་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །རྒྱུད་པ་དེ་གསུམ་ལ་དད་པའི་ཉ་མ་འདྲ་ཡོད་དམ་གསུངས་པས། རྒྱུད་པ་ངོ་མཚར་ཆེ་བར་གདའ། དཔེ་ཆུ་མགོ་གངས་ལ་ཐུག་པ་ལྟ་བུ་ཞིག་འདུག ཁྱེད་ཆོས་པ་ལ། ཕྱི་ཤེས་རྒྱུད་བརྡའི་བླ་མ་ལ་བརྟེན་ནས། ནང་སྐྱེ་མེད་ཆོས་སྐུ་གཏན་ལ་འབེབས་པ་བྱ་བ་ཡོད་ཟེར་བ། ཁྱེད་རང་གིས་རྩ་བའི་བླ་མ་ཇི་ལྟ་བུ་ཞིག་བསྟེན་གསུངས་དང་ཟེར་བ་ལ། རྗེ་བཙུན་གྱིས་ང་ལ་རྩ་བའི་བླ་མ་འདི་ལྟ་བུ་ཡོད་གསུང་མཚན་ལྡན་བླ་མ་བསྟེན་ཚུལ་འདི་མགུར་དུ་གསུངས་སོ། །ཤེས་རྒྱུད་ཕྱི་ནས་མཚོན་པ་ཕྱིའི་བླ་མ། །རིག་རྒྱུད་ནང་ནས་སྟོན་པ་
(༣༠༧)ནང་གི་བླ་མ། །དོན་རྒྱུད་སེམས་ལ་སྟོན་པ་དོན་གྱི་བླ་མ། །བླ་མ་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །བླ་མ་དེ་གསུམ་ལ་དད་པའི་ཉ་མ་འདྲ་ཡོད་དམ། །ཞེས་གསུངས་པས། མོ་ན་རེ། བླ་མ་དེ་ཁྱད་པར་འཕགས་གདའ། གསེར་གྱི་ཉག་ཐག་ལ་གཡུ་བརྒྱུས་པ་ལྟ་བུ་ཞིག་འདུག བླ་མ་དེ་ལྟ་བུ་ལ་ཆོས་ཞུ་བའི་སྔོན་དུ་དབང་ཇི་ལྟ་བུ་ཞུས་ཟེར་བའི་ལན་དུ་མགུར་འདི་གསུངས་སོ། །བུམ་པ་སྤྱི་ཐོག་ཏུ་འཇོག་པ་ཕྱི་ཡི་དབང་། །རང་ལུས་ལྷ་སྐུར་སྟོན་པ་ནང་གི་དབང་། །སེམས་ཉིད་རང་ངོ་སྤྲོད་པ་དོན་གྱི་དབང་། །དབང་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །དབང་དེ་གསུམ་ཞུ་བའི་ཉ་མ་འདྲ་ཡོད་དམ། །ཞེས་གསུངས་པས། ཡང་མོ་ན་རེ། དབང་ཤིན་ཏུ་ཟབ་པར་གདའ། དཔེ་གཅན་གཟན་གྱི་རྒྱལ་པོ་སེང་གེས་སྡེར་ཐམས་ཅད་ཟིལ་གྱིས་གནོན་པ་ལྟ་བུ་ཞིག་གདའ། ད་དབང་ཞུས་རྟིང་རིག་པ་ལམ་དུ་འཇུག་པ་ལ་དོན་གྱི་ཁྲིད་བྱ་བ་ཡོད་ཟེར་བ་ཁྲིད་ཇི་ལྟ་བུ་ཞུས་ཞུ་བའི་ལན་དུ་མགུར་འདི་གསུངས་སོ། །ཐོས་བསམ་སྒོམ་གསུམ་བྱེད་པ་ཕྱི་ཡི་ཁྲིད། །རིག་པ་རྡོ་རུས་སྤྲོད་པ་ནང་གི་ཁྲིད། །ཉམས་རྟོགས་འདུ་འབྲལ་མེད་པ་དོན་གྱི་ཁྲིད། །ཁྲིད་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །ཁྲིད་དེ་གསུམ་ཞུ་བའི་ཉ་མ་འདྲ་ཡོད་དམ། །ཞེས་གསུངས་པས། ཁྲིད་དེ་མེ་ལོང་གཡའ་དག་པ་ལ་གཟུགས་བརྙན་འཆར་བ་ལྟ་བུ་ཞིག་གདའ། ཁྲིད་ཞུས་རྟིང་རི་ཁྲོད་འགྲིམས་ནས་གཅོད་བྱེད་དགོས་ཟེར་བ། ཁྱེད་ཀྱིས་གཅོད་ཇི་ལྟ་བུ་ཞིག་བྱས་ཟེར་བའི་
(༣༠༨)ལན་དུ་མགུར་འདི་གསུངས་སོ། །གཉན་ས་རི་ཁྲོད་འགྲིམས་པ་ཕྱི་ཡི་གཅོད། །ཕུང་བོ་གཟན་ཏུ་བསྐྱུར་བ་ནང་གི་གཅོད། །ཉག་གཅིག་རྩད་ནས་གཅོད་པ་དོན་གྱི་གཅོད། །གཅོད་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །གཅོད་དེ་གསུམ་ཞུ་བའི་ཉ་མ་འདྲ་ཡོད་དམ། །ཞེས་གསུངས་པས། མོ་ན་རེ། གཅོད་དེ་བྱ་ཁྱུང་ནམ་མཁའ་ལ་འཕུར་བས་བྱ་ཕྲན་ཐམས་ཅད་ཟིལ་གྱིས་གནོན་པ་ལྟར་ངོ་མཚར་ཤིན་ཏུ་ཆེ་བར་གདའ། རྣལ་འབྱོར་པ་ལ་གཅོད་བྱེད་དུས་རྐྱེན་ངན་ལམ་དུ་སློང་བ་ལ་ཕཊ་བྱ་བ་ཡོད་ཟེར་བ། ཁྱེད་ཀྱིས་ཕཊ་ཀྱི་དོན་ཞིག་གསུངས་དང་ཟེར་བ་ལ་མགུར་འདི་གསུངས་སོ། །རྣམ་རྟོག་འཐོར་བ་སྡུད་པ་ཕྱི་ཡི་ཕཊ། །རིག་པ་བྱིང་བ་བསེང་བ་ནང་གི་ཕཊ། །གནས་ལུགས་ངང་ལ་འཇོག་པ་དོན་གྱི་ཕཊ། །ཕཊ་སྐོར་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །ཕཊ་དེ་གསུམ་སྒྲོག་པའི་ཉ་མ་འདྲ་ཡོད་དམ། །ཞེས་གསུངས་པས། མོ་ན་རེ། ཕཊ་དེ་ཤིན་ཏུ་ངོ་མཚར་ཆེ་བར་གདའ་སྟེ། རྒྱལ་པོ་ཆེན་པོའི་དམག་གི་དུང་ངམ་བཀའ་ལྟ་བུར་དོན་མྱུར་ལ་ཆེ་བ་སྟོན་པ་ཞིག་གདའ། དེ་ལྟར་ཐུགས་ཉམས་སུ་བཞེས་པ་ལ་འཆར་སྒོ་ཇི་ལྟ་བུ་ཞིག་བྱུང་ཟེར་བའི་ལན་དུ་མགུར་འདི་གསུངས་སོ། །གཞི་མ་བཅོས་ཁྱབ་གདལ་ཆེན་པོར་ཤར། །ལམ་མ་བཅོས་ཟངས་ཐལ་ཆེན་པོར་ཤར། །འབྲས་བུ་མ་བཅོས་ཕྱག་རྒྱ་ཆེན་པོར་ཤར། །འཆར་སྒོ་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །འཆར་སྒོ་
(༣༠༩)དེ་གསུམ་བསྒྲུབ་པའི་ཉ་མ་འདྲ་ཡོད་དམ། །ཞེས་གསུངས་པས། མོ་ན་རེ། འཆར་སྒོ་དེ་རྣམས་སྤྲིན་མེད་ཀྱི་མཁའ་ལ་ཉི་མ་ཤར་བས་དངོས་པོ་ཐམས་ཅད་གསལ་བ་ལྟར་ངོ་མཚར་ཤིན་ཏུ་ཆེ་བར་གདའ། འཆར་སྒོ་དེ་ལ་ཐུགས་ཉམས་སུ་བཞེས་པས་གདེང་ཇི་ལྟ་བུ་ཞིག་ཐོབ་ཟེར་བའི་ལན་དུ་མགུར་འདི་གསུངས་སོ། །ལྷ་མེད་འདྲེ་མེད་ལྟ་བའི་གདེང་། །དམིགས་མེད་ཡེངས་མེད་སྒོམ་པའི་གདེང་། །རེ་མེད་དོགས་མེད་འབྲས་བུའི་གདེང་། །གདེང་དེ་གསུམ་དང་ལྡན་པའི་རྣལ་འབྱོར་པ་ལགས་ཏེ། །གདེང་དེ་གསུམ་འདོད་པའི་ཉ་མ་འདྲ་ཡོད་དམ། །ཞེས་གསུངས་པས། དེ་ནས་བུ་མོ་དེ་ཤིན་ཏུ་དད་པར་གྱུར་ནས་ཕྱག་བཙལ། ཞབས་སྤྱི་བོར་བླངས་ནས་ནང་དུ་གདན་དྲངས་ཏེ། བསྙེན་བཀུར་ཕུན་སུམ་ཚོགས་པ་ཞུས་ནས། བླ་མ་ལགས། བདག་སྔར་མ་རིག་པས་བསྒྲིབས་ནས་ཆོས་མ་དྲན། ད་བླ་མ་ཁྱེད་ཀྱི་ཕྱག་ཕྱི་ལ་འབྲངས་པས། ཆོས་ཐུགས་རྗེས་འཛིན་པར་ཞུ་ཞེས་རང་སྐྱོན་མཐོང་ནས། ཆོས་ཞུ་བའི་ཞུ་དོན་འདི་ལྟར་ཕུལ་ལོ། །ཨང་ཀེ་བླ་མ་རིན་པོ་ཆེ། །འོ་ན་སྐྱེས་མཆོག་སྤྲུལ་པའི་སྐུ། །བདག་མ་གོ་མ་རིག་འཁྲུལ་དང་གསུམ། །འཇིག་རྟེན་འདི་ན་མཚང་རེ་ཆེ། །དབྱར་གསུམ་ལྷོ་སྤྲིན་སྟོབས་ཆེས་པས། །ཁྲི་གདུགས་ཤར་བ་ངས་མ་ཚོར། །དགུན་གསུམ་ངར་བ་སྟོབས་ཆེས་པས། །མེ་ཏོག་འཁྲུངས་པ་ངས་མ་ཚོར། །བག་ཆགས་ངན་པ་ཚན་ཆེས་པས། །ཁྱེད་གྲུབ་ཐོབ་ཡིན་པ་ངོ་མ་ཤེས། །ངེད་མོ་བྱིས་ཀྱི་རྣམ་ཐར་བཤད་ཙ་ན། །ལས་ངན་དབང་གིས་ལུས་ངན་
(༣༡༠)བླངས། །སྐྱེ་གནས་ངན་པའི་སྒྲིབ་གཡོགས་ཀྱིས། །རང་སངས་རྒྱས་ཡིན་པ་ངས་མ་ཚོར། །སྙིང་རུས་མེད་པས་ཆོས་མི་དྲན། །ཆོས་བྱ་བློ་ཡོད་ཀྱང་ལེ་ལོས་ཁྱེར། །སྐྱེ་སྒོ་ལེགས་ན་གཞན་དབང་འཆོར། །སྐྱེ་སྒོ་ཞན་ན་གྲོགས་མི་རྙེད། །དྲིན་ཅན་ཕ་མ་རྒྱབ་ཏུ་བོར། །གཏན་གྲོགས་ཕྱོགས་སུ་ཤི་ལྕེབས་བྱེད། །རྩེ་རེག་ཆེ་ལ་བཟོད་བསྲན་ཆུང་། །སྐྱོ་མ་མང་ལ་མཆུ་བསྡུར་མཁས། །ཡུལ་སྡེའི་ནང་ནས་མི་ཁ་སྡུད། །བཟའ་ཚང་ནང་ནས་སྒོ་ཁྱི་དགོས། །ཟས་ནོར་སྤྱི་རུ་སྤྱོད་ལགས་ཀྱང་། །གཤིས་ངན་སེར་སྣ་སྒོས་སུ་བྱེད། །མི་རྟག་འཆི་བ་ཡོང་སྙམ་མེད། །སྒྲིབ་པ་ལུས་ཀྱི་གྲིབ་བཞིན་འབྲངས། །ད་སྙིང་ནས་ལྷ་ཆོས་བྱེད་ལགས་པས། །བདག་གོ་བདེ་འཁྱེར་སླའི་ཆོས་ཤིག་ཞུ། །ཞེས་ཞུས་པས། མཉེས་ནས་རྗེ་བཙུན་གྱིས་མོའི་ཞུས་ལན་དུ་ མགུར་འདི་གསུངས་སོ། །ཨང་ཀེ་ཉ་མ་དཔལ་དར་འབུམ ། །ཁྱེད་བུད་མེད་རྣམས་ཀྱི་རྣམ་ཐར་འདི། །བསྟོད་ར་བརྗོད་ན་རང་མཐོང་སྐྱེ། །སྨད་ར་བརྗོད་ན་ཁོང་ཁྲོ་སྐྱེ། །གནས་ལུགས་བརྗོད་ན་མཚང་ལ་འཕོག །ད་མི་རྒན་ང་ཡི་ཁ་ལ་ཉོན། །ཁྱེད་སྙིང་ནས་ལྷ་ཆོས་བྱེད་པ་ན། །བྱད་ཀྱི་ཕྱི་བརྡར་བཤོལ་ནས་ཀྱང་། །སེམས་ལ་ཕྱི་བརྡར་བྱེད་རེ་རན། །ལེགས་འདོད་ཚུལ་འཆོས་སྤངས་ནས་ཀྱང་། །དམན་པའི་གོ་ས་འཛིན་རེ་རན། །བུ་ཁྱོའི་ཁོལ་མོ་བཤོལ་ནས་ཀྱང་། །མཚན་ལྡན་བླ་མ་བསྟེན་རེ་རན། །ཚེ་འདིའི་བྱ་དོན་སྤངས་ནས་ཀྱང་། །ཕྱི་མའི་དོན་ཆེན་སྒྲུབ་རེ་རན། །ནོར་འདོད་སེར་སྣ་སྤངས་ནས་ཀྱང་། །ཕྱོགས་མེད་སྦྱིན་པ་གཏོང་རེ་རན། །
(༣༡༡)དོན་དེ་ཚོ་ཤེས་ན་གྲུང་མོ་ཡིན། །ཁྱེད་མོ་བྱིས་དང་བྱིའུ་ཅོ་ག་འདྲ། །ལྕེ་བདེ་མོ་ལ་ལྷ་ཆོས་དཀོན། །ཁྱེད་མོ་བྱིས་དང་ནགས་གསེབ་རྨ་བྱ་འདྲ། །སྒེག་གཟུགས་མཁན་ལ་ལྷ་ཆོས་དཀོན། །ཁྱེད་མོ་བྱིས་དང་ཚོང་འདུས་ཁེ་བ་འདྲ། །ཁྲམ་སེམས་ཅན་ལ་ལྷ་ཆོས་དཀོན། །ཁྱེད་ལྷ་ཆོས་ཚུལ་བཞིན་བྱེད་འདོད་ན། །ང་ཕྱིར་འབྲོངས་ལ་ང་བཞིན་མཛོད། །གདམས་ངག་ཡེངས་མེད་རི་ལ་སྒོམས། །ཞེས་གསུངས་པས། ཡང་བུ་མོ་དེས། རྗེ་བཙུན་ལ་ཞུ་དོན་འདི་གླུ་རུ་ཕུལ་ལོ། །ཨང་ཀེ་རྗེ་བཙུན་རིན་པོ་ཆེ། །འབྲེལ་ཚད་དོན་ལྡན་རྣལ་འབྱོར་པ། །ང་ཉིན་པར་ཟིན་མེད་ལས་ཀྱིས་བྲེལ། །མཚན་མོ་གཏི་མུག་གཉིད་དུ་སོང་། །ནངས་ནུབ་ལྟོ་གོས་ཀྱིས་བྲན་ཏུ་བཀོལ། །ཆོས་ལ་བྱེད་པའི་ལོང་མ་བྱུང་། །ཞེས་ཞུས་པས། རྗེ་བཙུན་གྱི་ཞལ་ནས། ཁྱོད་ཆོས་རྣམ་དག་བྱེད་ན་འཇིག་རྟེན་གྱི་བྱ་བ་དགྲར་ཤེས་ནས། རྒྱབ་ཏུ་བསྐྱུར་དགོས་ཞེས་མོའི་ཞུས་ལན་དུ་རྒྱབ་བསྐྱུར་བཞི་མ་འདི་ མགུར་དུ་གསུངས་སོ། །ཨང་ཀེ་ཉ་མ་དཔལ་དར་འབུམ ། །གསོན་དང་ཕྱུག་མོ་དད་པ་ཅན། །ཚེ་འདི་བས་ཕྱི་མ་བཤུལ་ཐག་རིང་། །རྒྱགས་ཕྱེ་གྲབས་སུ་ཆུད་ལགས་སམ། །རྒྱགས་ཕྱེ་གྲབས་སུ་མ་ཆུད་ན། །སྦྱིན་པ་ཡིན་པས་གཏོང་ཡང་འཚལ། །དགྲ་སེར་སྣ་ཟེར་བའི་འགག་ཁྱི་མཁན། །འདིས་ཕན་པར་བཟུང་ཡང་གནོད་པ་བསྐྱལ། །སེར་སྣ་དགྲ་བོ་ཡིན་པར་ཤེས་ལགས་སམ། །ཤེས་ན་རྒྱབ་ཏུ་བསྐྱུར་ལ་ཐོངས། །ཨང་ཀེ་ཉ་མ་དཔལ་དར་འབུམ། །ཚེ་འདི་བས་ཕྱི་མ་མུན་པ་ནག །སྒྲོན་མེ་གྲབས་
(༣༡༢)སུ་ཆུད་ལགས་སམ། །སྒྲོན་མེ་གྲབས་སུ་མ་ཆུད་ན། །འོད་གསལ་ཡིན་པས་སྒོམ་ཡང་འཚལ། །དགྲ་གཏི་མུག་ཟེར་བའི་རོ་ཉལ་མཁན། །འདིས་ཕན་པར་བཟུང་ཡང་གནོད་པ་བསྐྱལ། །གཏི་མུག་དགྲ་བོ་ཡིན་པར་ཤེས་ལགས་སམ། །ཤེས་ན་རྒྱབ་ཏུ་བསྐྱུར་ལ་ཐོངས། །ཨང་ཀེ་ཉ་མ་དཔལ་དར་འབུམ། །ཚེ་འདི་བས་ཕྱི་མ་འཇིགས་པ་ཆེ། །སྐྱེལ་མ་གྲབས་སུ་ཆུད་ལགས་སམ། །སྐྱེལ་མ་གྲབས་སུ་མ་ཆུད་ན། །ལྷ་ཆོས་ཡིན་པས་བྱེད་ཀྱང་འཚལ། །དགྲ་ཉེ་འབྲེལ་ཟེར་བའི་བཤོལ་འདེབས་མཁན། །འདིས་ཕན་པར་བཟུང་ཡང་གནོད་པ་བསྐྱལ། །ཉེ་འབྲེལ་དགྲ་བོ་ཡིན་པར་ཤེས་ལགས་སམ། །ཤེས་ན་རྒྱབ་ཏུ་བསྐྱུར་ལ་ཐོངས། །ཨང་ཀེ་ཉ་མ་དཔལ་དར་འབུམ། །ཚེ་འདི་བས་ཕྱི་མ་ལམ་འཕྲང་རིང་། །རྟ་ཕོ་ཚགས་སུ་ཆུད་ལགས་སམ། །རྟ་ཕོ་ཚགས་སུ་མ་ཆུད་ན། །བརྩོན་འགྲུས་ཡིན་པས་རྩོམ་ཡང་འཚལ། །དགྲ་ལེ་ལོ་ཟེར་བའི་བསླུ་བྲིད་མཁན། །འདིས་ཕན་པར་བཟུང་ཡང་གནོད་པ་བསྐྱལ། །ལེ་ལོ་དགྲ་བོ་ཡིན་པར་ཤེས་ལགས་སམ། །ཤེས་ན་རྒྱབ་ཏུ་བསྐྱུར་ལ་ཐོངས། །ཞེས་གསུངས་པས། ཡང་བུ་མོ་དེ་ན་རེ། བླ་མ་ལགས། ཚེ་ཕྱི་མའི་གྲབས་ཅི་ཡང་ཚགས་སུ་མ་ཆུད། ད་ཚགས་སུ་འཇུག་པས་སྒོམ་ཁྲིད་ཅིག་ཐུགས་རྗེས་འཛིན་པར་ཞུ་ཞེས་ཞེ་ཐག་པའི་ཞུ་བ་འབུལ་དུ་བྱུང་བས། རྗེ་བཙུན་ཤིན་ཏུ་མཉེས་ཏེ། ཁྱོད་ཞེ་ཐག་པ་ནས་ཆོས་བྱེད་ན། ངེད་ཀྱི་ལུགས་ལ་མིང་སྤོ་ཡང་མི་དགོས། རབ་སྐྲའི་འོག་ནས་སངས་རྒྱ་བ་ཡིན་པས། སྐྲ་གཅོད་པ་དང་ཆས་བསྒྱུར་བ་ཡང་མི་དགོས་གསུངས། སྒོམ་
(༣༡༣)ཁྲིད་སེམས་ཀྱི་ཉམས་ལེན་དཔེ་བཞི་དོན་དང་ལྔའི་ མགུར་འདི་གསུངས་སོ། །ཨང་ཀེ་ཉ་མ་དཔལ་དར་འབུམ ། །འོ་ན་ཕྱུག་མོ་དད་ཅན་མ། །ཁྱོད་ནམ་མཁའ་འདི་ལ་དཔེ་ལོངས་ལ། །མཐའ་དབུས་མེད་པའི་སྒོམ་ཞིག་གྱིས། །ཉི་ཟླ་གཉིས་ལ་དཔེ་ལོངས་ལ། །གསལ་འགྲིབ་མེད་པའི་སྒོམ་ཞིག་གྱིས། །རི་བོ་འདི་ལ་དཔེ་ལོངས་ལ། །འཕོ་འགྱུར་མེད་པའི་སྒོམ་ཞིག་གྱིས། །རྒྱ་མཚོ་ཆེ་ལ་དཔེ་ལོངས་ལ། ཁ་གཏིང་མེད་པའི་སྒོམ་ཞིག་གྱིས། །རང་གི་སེམས་ལ་དོན་གྱིས་ལ། །འཁུ་འཕྲིག་མེད་པའི་སྒོམ་ཞིག་གྱིས། །ཞེས་གསུངས་ནས། ལུས་གནད་དང་སེམས་གནད་རྣམས་བསྟན་ཏེ། སྒོམ་དུ་བཅུག་པས། བུ་མོ་དེ་ལ་ཉམས་རྟོགས་བཟང་པོ་སྐྱེས་ནས། ཐེ་ཚོམ་དང་གེགས་བསལ་བའི་ཕྱིར། ཞུ་དོན་འདི་ལྟར་ཕུལ་ལོ། །ཨང་ཀེ་རྗེ་བཙུན་རིན་པོ་ཆེ། །འོ་ན་སྐྱེས་མཆོག་སྤྲུལ་པའི་སྐུ། །ངས་ནམ་མཁའ་བསྒོམ་དུ་བདེ་ལགས་དེ། །ལྷོ་སྤྲིན་བསྒོམ་དུ་ཅུང་མ་བདེ། །ད་ལྷོ་སྤྲིན་བསྒོམ་པའི་གདམས་ངག་ཞུ། །ཉི་ཟླ་བསྒོམ་དུ་བདེ་ལགས་ཏེ། །གཟའ་སྐར་བསྒོམ་དུ་ཅུང་མ་བདེ། །ད་གཟའ་སྐར་བསྒོམ་པའི་གདམས་ངག་ཞུ། །རི་བོ་བསྒོམ་དུ་བདེ་ལགས་ཏེ། །རྩི་ཤིང་བསྒོམ་དུ་ཅུང་མ་བདེ། །ད་རྩི་ཤིང་བསྒོམ་པའི་གདམས་ངག་ཞུ། །རྒྱ་མཚོ་བསྒོམ་དུ་བདེ་ལགས་ཏེ། །རྦ་རླབས་བསྒོམ་དུ་ཅུང་མ་བདེ། །ད་རྦ་རླབས་བསྒོམ་པའི་གདམས་ངག་ཞུ། །རང་སེམས་བསྒོམ་དུ་བདེ་ལགས་ཏེ། །རྣམ་རྟོག་བསྒོམ་དུ་ཅུང་མ་བདེ། །
(༣༡༤)ད་རྣམ་རྟོག་བསྒོམ་པའི་གདམས་ངག་ཞུ། །ཞེས་ཞུས་པས། རྗེ་བཙུན་ཡང་སྒོམ་སྐྱེས་འདུག་དགོངས་ཐུགས་ཤིན་ཏུ་མཉེས་ཏེ། མོའི་ཞུས་ལན་དུ་གེགས་སེལ་བོགས་འདོན་གྱི་ མགུར་འདི་གསུངས་སོ། །ཨང་ཀེ་ཉ་མ་དཔལ་དར་འབུམ ། །ཉོན་དང་ཕྱུག་མོ་དད་ཅན་མ། །ནམ་མཁའ་བསྒོམ་དུ་བདེ་ལགས་ན། །ལྷོ་སྤྲིན་ནམ་མཁའི་ཆོ་འཕྲུལ་ཡིན། །ནམ་མཁའ་རང་གི་ངང་དུ་ཞོག །ཉི་ཟླ་བསྒོམ་དུ་བདེ་ལགས་ན། །གཟའ་སྐར་ཉི་ཟླའི་ཆོ་འཕྲུལ་ཡིན། །ཉི་ཟླ་རང་གི་ངང་དུ་ཞོག །རི་བོ་བསྒོམ་དུ་བདེ་ལགས་ན། །རྩི་ཤིང་རི་བོའི་ཆོ་འཕྲུལ་ཡིན། །རི་བོ་རང་གི་ངང་དུ་ཞོག །རྒྱ་མཚོ་བསྒོམ་དུ་བདེ་ལགས་ན། །རྦ་རླབས་རྒྱ་མཚོའི་ཆོ་འཕྲུལ་ཡིན། །རྒྱ་མཚོ་རང་གི་ངང་དུ་ཞོག །རང་སེམས་བསྒོམ་དུ་བདེ་ལགས་ན། །རྣམ་རྟོག་སེམས་ཀྱི་ཆོ་འཕྲུལ་ཡིན། །སེམས་ཉིད་རང་གི་ངང་དུ་ཞོག །ཅེས་གསུངས་ནས་བསྒོམས་པས། སེམས་ཆོས་ཉིད་ཀྱི་གན