རྡོར་སེམས་ཐུགས་ཀྱི་ཐིག་ལེའི་ཞི་བ་དང་ཁྲོ་བོའི་བརྒྱུད་པའི་གསོལ་འདེབས་སྒྱུ་འཕྲུལ་རྡོ་རྗེའི་རོལ་མོ། ཐེག་མཆོག་རྡོ་རྗེ།
རྒྱལ་ཀུན་འདྲེན་པ་ཁྱབ་བདག་ཀུན་ཏུ་བཟང་། །རྒྱལ་ཚབ་སྟོན་པ་རིགས་ལྔ་གངས་ཆེན་མཚོ། །རྒྱལ་སྲས་ཐུ་བོ་རིགས་གསུམ་མགོན་པོ་ལ། །གསོལ་བ་འདེབས་སོ་དབང་སྐུར་བྱིན་གྱིས་རློབས། །ངོ་མཚར་དམ་པའི་རིགས་ཅན་དྲྭ་མ་ལྔ། །ཏནྟྲ་བཅོ་བརྒྱད་སྐལ་ལྡན་རྒྱལ་པོ་ཛཿ །གསང་བའི་དོན་གཟིགས་ཀུ་ཀུ་རཱ་ཛ་ལ། །གསོལ་བ་འདེབས་སོ་དབང་སྐུར་བྱིན་གྱིས་རློབས། །གསང་རྒྱུད་མངའ་བདག་ཨིནྡྲ་བྷཱུ་ཏིའི་ཞབས། ཟུང་འཇུག་སྐུ་ཅན་སིཾ་ཧ་རཱ་ཛ་ཆེ། །མི་སློབ་མཐར་ཕྱིན་ཨུ་པ་རཱ་ཛ་ལ། །གསོལ་བ་འདེབས་སོ་དབང་སྐུར་བྱིན་གྱིས་རློབས། །མཁའ་སྤྱོད་ཚོགས་ཀྱི་གཙོ་མོ་གོ་མཱ་ས། །སྒེག་པ་རྡོ་རྗེ་རྒྱལ་པོ་ཀུ་ཀུའི་མཚན། །གྲུབ་པའི་དབང་ཕྱུག་རོ་ལངས་བདེ་བ་ལ། །གསོལ་བ་འདེབས་སོ༴ སྒྱུ་འཕྲུལ་གསང་མཛོད་རྡོ་རྗེ་བཞད་པ་དང་། །ཟ་ཧོར་རིག་འཛིན་རྒྱལ་པོ་པྲ་ཧསྟི། །སངས་རྒྱས་གསང་བ་དྲི་མེད་བཤེས་གཉེན་ལ། །གསོལ་བ་འདེབས་སོ༴ གསུང་གི་རྡོ་རྗེ་པདྨ་སཾ་བྷ་བ། །གསང་རྒྱུད་རྒྱ་མཚོའི་གཉེར་འཛིན་མཚོ་རྒྱལ་མ། །ཆོས་ཀྱི་ཤིང་རྟ་ཁྲི་སྲོང་ཡབ་སྲས་ལ། །གསོལ་བ་འདེབས་སོ༴ རྡོ་རྗེ་ཐེག་པའི་བཀའ་བབ་རྨ་གཉགས་གནུབས། །སྙིང་པོའི་སྲོལ་འབྱེད་མཆོག་གྱུར་བདེ་ཆེན་གླིང་། །འཇིག་རྟེན་དབང་ཕྱུག་ཐེག་མཆོག་རྡོ་རྗེ་ལ། །གསོལ་བ་འདེབས་སོ༴ ངེས་པའི་ལུང་ཟིན་ཟབ་གཏེར་བསྟན་པ་སྐྱོང་། །ཆོས་བདག་སྤྲུལ་པའི་སྐྱེས་མཆོག་
བརྒྱུད་པར་བཅས། །བཀའ་དྲིན་སུམ་ལྡན་འཁོར་ལོའི་མགོན་པོ་ལ། །གསོལ་བ་འདེབས་སོ༴ གསང་བའི་སྙིང་པོ་རྟོགས་བྱ་གཞི་ཡི་རྒྱུད། །རྟོགས་བྱེད་ཐབས་ཀྱི་ལམ་མཆོག་ལུང་གི་སྤྱི། །གྲུབ་པ་མཐར་ཕྱིན་སྒྱུ་འཕྲུལ་དྲྭ་བའི་འབྲས། །རྒྱུད་གསུམ་ཤེས་ཐོབ་མངོན་དུ་འགྱུར་བར་ཤོག །འཆིང་གྲོལ་མེད་པ་གནས་ལུགས་གདོད་མའི་གཤིས། །བདེན་པ་དབྱེར་མེད་རང་རིག་བྱང་ཆུབ་སེམས། །གློ་བུར་བཏགས་པའི་སྒྲིབ་པ་ལས་གྲོལ་ཏེ། །ངོ་བོའི་གཞི་ལ་དག་པ་གཉིས་འབྱོར་ཤོག །ཤེས་རབ་གསུམ་གྱིས་སེམས་ལྔ་ལེགས་བསྐྱེད་ནས། །ཐབས་ཀྱིས་ངེས་དང་ཤེས་རབ་རྣམ་གྲོལ་ལམ། །ཤེས་འཇུག་རིམ་དང་ཅིག་ཅར་དབང་པོ་བཞིན། །རྟོགས་གོམས་རིག་འཛིན་རྣམ་བཞི་འགྲུབ་པར་ཤོག །ལྟ་སྤྱོད་དཀྱིལ་འཁོར་དབང་བསྐུར་དམ་ཚིག་དང་། །ཕྲིན་སྒྲུབ་ཏིང་འཛིན་མཆོད་སྔགས་ཕྱག་རྒྱ་སྟེ། །རྒྱུད་ཀྱི་དངོས་བཅུར་མཁས་ཤིང་དབང་ཐོབ་ནས། །ལམ་གྱི་ཆ་རྐྱེན་ཉམས་འོག་ཚུད་པར་ཤོག །སྐུ་གསུང་ཐུགས་ཡོན་ཕྲིན་ལས་ལྔ་ཕྲག་ལྔ། །རྟེན་དང་བརྟེན་པར་མཛད་པའི་རོལ་མོ་ཅན། །ལྷུན་གྲུབ་ཆོས་དབྱིངས་ཀུན་ཁྱབ་འགྲོ་བ་ཀུན། །རྡོར་སེམས་ཐུགས་ཀྱི་ཐིག་ལེར་མངོན་རྫོགས་ཤོག །ཅེས་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་ཀརྨའི་དམ་ཅན་བྲག་ནས་གཏེར་དུ་བཞེས་པའི་སྒྱུ་འཕྲུལ་ཟབ་ཆོས་ཀྱི་བརྒྱུད་པའི་གསོལ་འདེབས་འདི་བཞིན་ཀརྨ་པ་བཅུ་བཞི་པས་བྲིས་པ་དགེ། །།