ཐུགས་སྒྲུབ་བདེ་གཤེགས་འདུས་པའི་བརྒྱུད་འདེབས། བློ་གྲོས་མཐའ་ཡས།
ཐུགས་སྒྲུབ་བདེ་གཤེགས་འདུས་པའི་བརྒྱུད་འདེབས་བཞུགས་སོ། །ཆོས་སྐུ་མཐའ་ཡས་ལོངས་སྐུ་འཇིག་རྟེན་མགོན། །སྤྲུལ་སྐུ་པད་འབྱུང་མཁའ་འགྲོ་མཚོ་རྒྱལ་མ། །སངས་རྒྱས་དབོན་པོ་ཐུགས་སྲས་ཀུན་དགའ་དཔལ། །ཨོ་རྒྱན་མགོན་པོ་ཡོན་ཏན་རྒྱལ་བའི་མཚན། །བསོད་ནམས་རྒྱལ་མཚན་ཡེ་ཤེས་རྒྱལ་བ་བཟང་། །རིན་བཟང་དོན་གྲུབ་རིན་ཆེན་ཆོས་དཔལ་བཟང་། །བསོད་ནམས་བཀྲ་ཤིས་མཚོ་སྐྱེས་རྡོ་རྗེ་འཆང་། །ཀུན་དགའ་བཀྲ་ཤིས་ངག་དབང་རྣམ་པར་རྒྱལ། །བཀྲ་ཤིས་དཔལ་གྲུབ་གྲགས་པ་ལེགས་གྲུབ་དང་། །འཇམ་དཔལ་རྒྱ་མཚོ་འཕགས་མཆོག་ངག་དབང་གྲགས། །ཕྲིན་ལས་བསྟན་འཛིན་གྲགས་པ་རིན་ཤེ་དང་། །མཐོང་ཐོས་དཔལ་འཕེལ་ཆོས་རྗེ་ཀུན་དགའི་མཚན། །ཆོས་དབྱིངས་ལྷུན་གྲུབ་ངག་དབང་བསྟན་པའི་ཉི། །པདྨ་འོད་གསལ་མདོ་སྔགས་གླིང་པ་སོགས། །བཀའ་བརྒྱུད་བླ་མ་རྒྱལ་བ་སྲས་དང་བཅས། །མཁའ་འགྲོ་ཆོས་སྐྱོང་དམ་ཅན་སྲུང་མ་ལ། །སྒོ་གསུམ་རྩེ་གཅིག་གུས་པས་གསོལ་བ་འདེབས། །དབང་བཞིས་རྒྱུད་སྨིན་སྒྲིབ་པ་རྣམ་བཞི་དག །ལམ་བཞི་མཐར་ཕྱིན་སྐུ་བཞི་མངོན་གྱུར་ནས། །བདེ་ཆེན་པདྨའི་ཞལ་དང་གྲགས་པ་དཔལ། །དབྱེར་མེད་ཕྱག་རྒྱའི་ཡེ་ཤེས་མྱུར་འགྲུབ་ཤོག །ཅེས་པའང་བློ་གྲོས་མཐའ་ཡས་ཀྱིས་སྦྱར་བ་དགེ་ལེགས་འཕེལ།། །།