རྡོ་རྗེ་ཚེའི་སྐོར་ལས་གནམ་ལྕགས་རྡོ་རྗེའི་སྲོག་སྒྲུབ་ཀྱི་རིག་འཛིན་བརྒྱུད་པའི་གསོལ་འདེབས།


RTZ020_Page_0361
[མ་དཔེ་གཟིགས་ན་འདིར་གནོན།]

རྡོ་རྗེ་ཚེའི་སྐོར་ལས༔ གནམ་ལྕགས་རྡོ་རྗེའི་སྲོག་སྒྲུབ་ཀྱི་རིག་འཛིན་བརྒྱུད་པའི་གསོལ་འདེབས་བཞུགས་སོ༔ ༁ྃ༔ རྡོ་རྗེ་ཚེའི་སྐོར་ལས༔ གནམ་ལྕགས་རྡོ་རྗེའི་སྲོག་སྒྲུབ་ཀྱི་རིག་འཛིན་བརྒྱུད་པའི་གསོལ་འདེབས་ནི། མདུན་གྱི་ནམ་མཁར་དྲིན་ཅན་རྩ་བའི་བླ་མའི་སྤྱི་བོར་བརྒྱུད་རིམ་ཐོ་བརྩེགས་ཀྱི་སྤྱི་བོར་འཆི་མེད་པདྨ་འབྱུང་གནས༔ དེའི་སྤྱི་བོར་མགོན་པོ་ཚེ་དཔག་མེད་གསལ་ལ་གསོལ་བ་བཏབ༔ གནས་གསུམ་འོད་ཟེར་གྱི་ཐུགས་རྗེས༔ བདག་གི་སྒོ་གསུམ་སྨིན་བྱེད་ཀྱི་དབང་བླང་ངོ༔ ཧྲཱི༔ པདྨ་དབང་གི་གཞལ་ཡས་ཆེན་པོ་ནས༔ མ་ཆགས་པདྨ་འབར་བའི་གདན་སྟེངས་སུ༔ བཅོམ་ལྡན་མགོན་པོ་ཡེ་ཤེས་ཚེ་དཔག་མེད༔ འཆི་མེད་ཚེ་ཡི་ལྷ་ཚོགས་རྣམས་ཀྱིས་བསྐོར༔ རྡོ་རྗེ་ཚེ་ཡི་ལྷ་ཚོགས་ལ་གསོལ་བ་འདེབས༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ ཞེས་གསོལ་བ་བཏབ་པས་ཚེ་དཔག་མེད་རིག་འཛིན་པདྨ་འབྱུང་གནས་ལ་ཐིམ༔ ཧྲཱི༔ མགོན་པོ་ཚེ་དཔག་མེད་པའི་དགོངས་པ་ཡིས༔ ལྷ་མོ་ཙཎྜ་ལཱི་ཡི་ཐུགས་བརྒྱུད་ནས༔ འཆི་མེད་པདྨ་འབྱུང་གནས་བྱིན་བརླབས་པས༔ འདས་དང་མ་བྱོན་ད་ལྟ་དུས་གསུམ་གྱི༔ ཚེ་ཡི་རིག་འཛིན་རྣམས་ལ་གསོལ་བ་འདེབས༔ བདག་ལ་དབང་སྐུར་བྱིན་གྱིས་བརླབ་ཏུ་གསོལ༔ ཞེས་གསོལ་བ་བཏབ་པས་སྐུ་གསུང་ཐུགས་ཀྱི་འོད་ཟེར་གྱིས་དབང་བསྐུར་བྱིན་རླབས་ཐོབ་པར་བསྒོམ༔ སླར་ཡང་གསོལ་བ་འདེབས་པ་ནི༔ ཧྲཱི༔ བྲག་ཕུག་མཱ་ར་ཏི་ཀའི་


RTZ020_Page_0362
[མ་དཔེ་གཟིགས་ན་འདིར་གནོན།]

ཀེའུ་ཚང་དུ༔ འཆི་མེད་ཚེ་ཡི་རིག་འཛིན་སྒྲུབ་པའི་ཚེ༔ མགོན་པོ་ཚེ་དཔག་མེད་པས་བྱིན་བརླབས་པས༔ སྐྱེ་འཆི་མེད་པ་རྡོ་རྗེའི་ལུས་སུ་གྲུབ༔ འཆི་མེད་པདྨ་འབྱུང་གནས་ལ་གསོལ་བ་འདེབས༔