འཕགས་པ་སྤྱན་རས་གཟིགས་ཀྱི་བཀའ་སྲུང་མཆོད་པ། རྒོད་ཀྱི་ལྡེམ་འཕྲུ་ཅན།
འཕགས་པ་སྤྱན་རས་གཟིགས་ཀྱི་བཀའ་སྲུང་མཆོད་པ་བཞུགས་སོ༔ ཧྲཱིཿཔདྨཱནྟ་ཀྲྀཏ་ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་ཞུ་བ་ལས་བྱུང་བའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར༔ རང་གི་སྙིང་ག་ནས་འོད་འཕྲོས་པས་མདུན་གྱི་ནམ་མཁར་བཀའ་སྲུང་དབང་གི་མ་མོ་བདུན༔ བཛྲ་ས་མ་ཡ་ཛ་ཛ༔ པདྨ་ཌཱ་ཀི་ནཱི་ས་པ་རི་བཱ་ར་ཨེ་ཧྱེ་ཧི༔ པདྨ་ཌཱ་ཀི་ནཱི་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ བདུན་བརྗོད། པདྨ་ཌཱ་ཀི་ནཱི་ས་པ་རི་བཱ་ར་ཨརྒྷཾ་སོགས་བརྗོད། དམར་ནག་པདྨ་ཁྲོས་པའི་དུར་ཁྲོད་ནས༔ རྒྱལ་བའི་བསྟན་སྲུང་རྣལ་འབྱོར་གྲོགས་མཛད་མ༔ བདེ་གཤེགས་གསུང་ལས་སྤྲུལ་པའི་མ་མོ་བདུན༔ དབང་དྲག་ཕྲིན་ལས་མཛད་ལ་ཕྱག་འཚལ་ལོ༔ འོད་དཔག་མེད་ཀྱི་དགོངས་བསྐྱེད་མ༔ སྤྱན་རས་གཟིགས་ཀྱི་བཀའ་ཉན་མ༔ མཚོ་སྐྱེས་རྡོ་རྗེའི་ཕྲིན་ལས་མ༔ བདེ་གཤེགས་བཀའ་ཡི་བྱ་ར་མ༔ རྣལ་འབྱོར་བདག་གི་བཀའ་སྲུང་མ༔ ཆོས་མཛད་ཡོངས་ཀྱི་གྲོགས་མཛད་མ༔ བཀའ་སྲུང་དབང་གི་མ་མོ་བདུན༔ རྒྱན་གྱི་གཏོར་མ་འདི་བཞེས་ལ༔ ཐུགས་རྗེ་ཆེན་པོའི་བསྟན་པ་སྤེལ༔ བཅོལ་བའི་ཕྲིན་ལས་བསྒྲུབ་པར་མཛོད༔ ཅེས་བརྗོད་དོ། །ནུབ་ཟངས་མཛོད་དམར་པོ་ནས། རིག་འཛིན་རྒོད་
ཀྱི་ལྡེམ་འཕྲུ་ཅན་གྱིས་བཏོན་པའོ། །སྤྲུལ་སྐུ་རིག་འཛིན་ཆེན་པོའི་ཞལ་ཤེས་ཀྱི་གསུང་འཕྲོས་ལས། ཐུགས་རྗེ་ཆེན་པོའི་ཆོས་སྐོར་འདི་ལ༔ ཁྲིད་དང་བཀའ་སྲུང་མཆོད་ཐབས་ཡོད་དེ། བསྒྱུར་དགོས་པ་ཡོད༔ གསུངས་སོ། །ཤུབྷཾ།། །།