ཟབ་ཆོས་རྟ་ཕག་ཡིད་བཞིན་ནོར་བུའི་བརྒྱུད་པའི་གསོལ་འདེབས་ཟུང་འཇུག་རོལ་མོ། པདྨ་གར་གྱི་དབང་ཕྱུག

[Full Size]

ཟབ་ཆོས་རྟ་ཕག་ཡིད་བཞིན་ནོར་བུའི་བརྒྱུད་པའི་གསོལ་འདེབས་ཟུང་འཇུག་རོལ་མོ་ཞེས་བྱ་བ་བཞུགས་སོ། །ཨོཾ་ཨཱཿཧཱུྃ་ཧྲཱིཿ སྣང་བ་མཐའ་ཡས་འཇིག་རྟེན་དབང་ཕྱུག་དང་། །པདྨ་སཾ་བྷ་ཡེ་ཤེས་མཚོ་རྒྱལ་མ། །ཏིང་འཛིན་བཟང་པོ་ཨོ་རྒྱན་ལས་འཕྲོ་གླིང་། །ཀརྨ་རིག་འཛིན་ཀརྨ་ཆགས་མེད་ཞབས། །པདྨ་ཀུན་དགའ་ཕྲིན་ལས་དབང་འབྱུང་རྗེ། །ཤེས་རབ་གྲགས་པ་བསྟན་འཛིན་དོན་ཀུན་གྲུབ། ཐེག་མཆོག་བསྟན་འཕེལ་རྩ་བརྒྱུད་བླ་མ་ལ། །གསོལ་བ་འདེབས་སོ་ཐུགས་རྗེས་བྱིན་གྱིས་རློབས། །འགྱུར་མེད་བདེ་བ་དབང་ཆེན་རྟ་མཆོག་དཔལ། །སྤྲོས་བྲལ་སྟོང་ཉིད་རྡོ་རྗེའི་རྣལ་འབྱོར་མ། །ཟུང་འཇུག་གུ་རུ་ཡིད་བཞིན་ནོར་བུ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཐབས་མཆོག་སྣང་བའི་རང་བཞིན་ཕོ་རྒྱུད་དང་། །ཤེས་རབ་སྟོང་པའི་རང་རྩལ་མོ་རྒྱུད་ཚོགས། །གཉིས་མེད་མ་ནིང་རྒྱུད་གསུམ་དམ་ཅན་ལ། །གསོལ་བ་འདེབས་སོ་ཕྲིན་ལས་རྣམ་བཞི་སྒྲུབས། །སྣང་སྟོང་ལྷ་སྐུ་གྲགས་སྟོང་སྔགས་ཀྱི་སྒྲ །རིག་སྟོང་བདེ་ཆེན་ཡེ་ཤེས་འཁོར་ལོར་ཤར། །རང་སྣང་དབང་འདུས་གཞན་སྣང་ཟིལ་གྱིས་གནོན། །དབང་ཆེན་ཡབ་ཡུམ་ཕྱག་རྒྱ་མྱུར་འགྲུབ་ཤོག །ཀ་དག་ཁྲེགས་ཆོད་དགོངས་པའི་གཟེར་ཐེབས་ཤིང་། །ལྷུན་གྲུབ་ཐོད་རྒལ་སྣང་བཞིའི་རྩལ་རྫོགས་ཏེ། །འཁོར་

[Full Size]

འདས་ཆོས་ཀུན་གདོད་མའི་ཟད་སར་ཕྱིན། །རིགས་བདག་བླ་མའི་གོ་འཕང་ཐོབ་པར་ཤོག །ཅེས་པའང་ཟབ་ཆོས་འདི་ལ་མོས་པ་ཀརྨེ་ཤྭ་རས་བསྐུལ་ངོར་པདྨ་གར་གྱི་དབང་ཕྱུག་རྩལ་གྱིས་ཡང་དབེན་ཀུན་བཟང་བདེ་ཆེན་གླིང་དུ་སྤེལ་བ་དགེ་ལེགས་འཕེལ།། །།