གཏེར་གསར་ཡང་དག་གི་ལས་བྱང་ཕྲིན་ལས་སྒྱུ་འཕྲུལ་ནས་གསབ་སྟེ་ཅུང་ཟད་རྒྱས་པར། པདྨ་གར་དབང་།
གཏེར་གསར་ཡང་དག་གི་ལས་བྱང་ཕྲིན་ལས་སྒྱུ་འཕྲུལ་ནས་གསབ་སྟེ་ཅུང་ཟད་རྒྱས་པར་བྱ་བའི་སྐབས། བདུད་རྩི་སྨན་མཆོད་ཀྱི་མཚན་དོན། ཀ་དག་གཏིང་གསལ་རང་བྱུང་གདོད་མའི་མགོན། ཁྱབ་བདག་བླ་མ་ཀུན་ཏུ་བཟང་པོ་མཆོག །རྡོ་རྗེ་སེམས་དཔའ་དགའ་རབ་རྡོ་རྗེ་ལ། སྨན་མཆོད་འབུལ་ལོ་ཚེ་དབང་མཆོག་དངོས་སྩོལ། །འཇམ་དཔལ་བཤེས་གཉེན་རོ་ལངས་བདེ་བའི་ཞབས། །སངས་རྒྱས་གསང་བ་བལ་པོ་ཧཱུྃ་ཀཱ་ར། །པདྨ་ཐོད་ཕྲེང་ནམ་མཁའི་སྙིང་པོ་ལ། །སྨན་མཆོད་འབུལ་ལོ་ཚེ་དབང་མཆོག་དངོས་སྩོལ། ཁྲི་སྲོང་ལྡེའུ་བཙན་ཡེ་ཤེས་མཚོ་རྒྱལ་མ། །ལྷ་སྲས་དམ་འཛིན་མཆོག་གྱུར་བདེ་ཆེན་གླིང་། །མཁྱེན་བརྩེའི་དབང་པོ་རྩ་བརྒྱུད་བླ་མ་ལ། །སྨན་མཆོད་འབུལ་ལོ་ཚེ་དབང་མཆོག་དངོས་སྩོལ། །རྡོ་རྗེ་ཁྲག་འཐུང་དབྱིངས་ཕྱུག་རྣལ་འབྱོར་མ། །གཽ་རཱི་མ་བརྒྱད་ཕྲ་མེན་ཌཱ་ཀིའི་ཚོགས། །དཔལ་གྱི་རྣམ་རོལ་བཀའ་སྡོད་དམ་ཅན་ལ། །སྨན་མཆོད་འབུལ་ལོ་ཚེ་དབང་མཆོག་དངོས་སྩོལ། །ཅེས་པའང་ལྷོ་བྲག་མཁར་ཆུའི་སྒྲུབ་གནས་སུ་བསྙེན་སྒྲུབ་འབྲེལ་འཇོག་སྐབས་པདྨ་གར་དབང་གིས་སྤེལ།།