ཕྱག་རྡོར་གཏུམ་པོ་མེ་ལྕེ་ཕྲེང་བ་ཆོས་དབང་ལུགས་ཀྱི་བླ་མ་བརྒྱུད་པའི་གསོལ་འདེབས། བསྟན་འཛིན་ཡེ་ཤེས་ལྷུན་གྲུབ།
ཕྱག་རྡོར་གཏུམ་པོ་མེ་ལྕེ་ཕྲེང་བ་ཆོས་དབང་ལུགས་ཀྱི་བླ་མ་བརྒྱུད་པའི་གསོལ་འདེབས་བཞུགས་སོ། །ཀུན་བཟང་གསང་བདག་པདྨ་འབྱུང་གནས་ཞབས། །ཡེ་ཤེས་མཚོ་རྒྱལ་གཏེར་སྟོན་ཆོས་དབང་དང་། །མི་བསྐྱོད་རྡོ་རྗེ་དྭགས་སྟོན་གཉན་སྟོན་རྗེ། །སེ་སྡིངས་ཡབ་སྲས་རྣམས་ལ་གསོལ་བ་འདེབས། །གུ་རུ་ཆོས་འོད་དྷརྨ་བཛྲ་དང་། །ཤེས་རབ་དབང་ཕྱུག་དྲན་མཆོག་ཆོས་ཀྱི་དབང་། །ཀརྨ་གུ་རུ་ཀརྨ་དབང་འབྱོར་མཚན། །ཀུན་བཟང་རྡོ་རྗེ་རྣམས་ལ་གསོལ་བ་འདེབས། །བློ་མཆོག་རྡོ་རྗེ་འཇམ་དབྱངས་ལེགས་བཤད་ཞབས། །པདྨ་རང་ཤར་པདྨ་དབང་འབྱོར་གཉིས། །གསང་བདག་རྡོ་རྗེ་ཡེ་ཤེས་ལྷུན་གྲུབ་དང་། །ཆོས་ཀྱི་རྒྱལ་མཚན་མཁྱེན་བརྩེའི་དབང་པོ་སོགས། །དངོས་བརྒྱུད་བླ་མ་རྣམས་ལ་གསོལ་བ་འདེབས། །བསྐྱེད་རིམ་གསལ་བས་གང་སྣང་ལྷ་སྐུར་ཤར། །བཟླས་བརྗོད་སྔགས་ཀྱིས་ཐོགས་མེད་ནུས་པ་གྲུབ། །རྫོགས་རིམ་འོད་གསལ་ཟབ་མོའི་རྣལ་འབྱོར་གྱིས། །ལྷན་སྐྱེས་ཡེ་ཤེས་རྗེན་པར་རྟོགས་པར་ཤོག །ཕ་རོལ་རིག་སྔགས་བཟློག་དང་ཀླུ་ནད་སྲུང་། །སེར་བ་སྲུང་འབེབས་ཆུ་ཆར་དབབ་དང་བཅད། །ཞི་རྒྱས་དབང་དྲག་ཕྲིན་ལས་སྦྱོར་བ་ཀུན། །གང་བརྩམ་མྱུར་དུ་འགྲུབ་པར་བྱིན་གྱིས་རློབས། །འགྲོ་ཀུན་རྒྱུད་ལ་གདོད་ནས་ཉེར་བཞུགས་པའི། །ཐུགས་ཀྱི་
རྡོ་རྗེ་གསང་བདག་སེང་གེའི་སྒྲ །མ་ནོར་མ་བཅོས་རང་ཞལ་མངོན་གྱུར་ནས། །འཁོར་བ་དོང་ནས་སྤྲུགས་པའི་མཐུ་ཐོབ་ཤོག །ཆོས་དབང་གཏུམ་པོའི་བརྒྱུད་པའི་བླ་མ་རྣམས་ལ་གསོལ་བ་འདེབས་པའི་ཚིགས་སུ་བཅད་པ་འདི་ཡང་ཁྱབ་བདག་པདྨ་དབང་ཆེན་སྙིང་རི་ཞབས་དྲུང་རིན་པོ་ཆེའི་བཀའ་བཞིན་བསྟན་འཛིན་ཡེ་ཤེས་ལྷུན་གྲུབ་ཀྱིས་ཡུད་ཙམ་ལ་སྨྲས་པ་ཡི་གེའི་སྲད་བུར་འགྱུར་མེད་ཚུལ་ཁྲིམས་ཀྱིས་སྤེལ་བའོ། །མངྒ་ལཾ།། །།