ཕྱག་རྡོར་སྟོབས་པོ་ཆེ་རྡོ་རྗེ་གཏུམ་པོའི་བརྒྱུད་པའི་གསོལ་འདེབས་བྱིན་རླབས་ཆར་འབེབ། གར་གྱི་དབང་ཕྱུག་རྩལ།
ཕྱག་རྡོར་སྟོབས་པོ་ཆེ་རྡོ་རྗེ་གཏུམ་པོའི་བརྒྱུད་པའི་གསོལ་འདེབས་བྱིན་རླབས་ཆར་འབེབ་ཅེས་བྱ་བ་བཞུགས་སོ། །ཨོཾ་ཨཱཿཧཱུྃ། ནུབ་ཕྱོགས་ཨོ་རྒྱན་སྤྲུལ་པའི་ཕོ་བྲང་དུ། །བསྟན་པའི་བདག་པོ་ཐུབ་དབང་བཅོམ་ལྡན་འདས། །བྱང་སེམས་ལྷ་མིའི་རིག་འཛིན་རྣམས་ཀྱིས་བསྐོར། །བསྟན་པའི་མངའ་བདག་མཆོག་ལ་གསོལ་བ་འདེབས། །ལྕང་ལོ་ཅན་གྱི་ཕོ་བྲང་དམ་པ་ན། །གསང་བའི་བདག་པོ་ཕྱག་རྡོར་སྟོབས་པོ་ཆེ། །གནོད་སྦྱིན་སྡེ་དཔོན་རིག་འཛིན་ཚོགས་ཀྱིས་བསྐོར། །རིག་སྔགས་བདག་པོའི་ཞབས་ལ་གསོལ་བ་འདེབས། །པདྨ་འོད་ཀྱི་ཕོ་བྲང་དམ་པ་རུ། །དྲེགས་པ་ཀུན་འདུལ་པདྨ་ཐོད་ཕྲེང་རྩལ། །དྷཱ་ཀི་རིག་འཛིན་གིང་ཆེན་ཚོགས་ཀྱིས་བསྐོར། །དྲག་རྩལ་མཐུ་སྟོབས་ཅན་ལ་གསོལ་བ་འདེབས། །རྡོ་རྗེ་གདན་མཚུངས་འཕྲུལ་སྣང་གཞལ་ཡས་སུ། །མངའ་བདག་ཡབ་སྲས་ཡེ་ཤེས་མཚོ་རྒྱལ་ལ། །རིག་འཛིན་ལྷ་དང་ལྷ་མོའི་ཚོགས་ཀྱིས་བསྐོར། །སྨིན་གྲོལ་མཐར་ཕྱིན་གསུམ་ལ་གསོལ་བ་འདེབས། །རྒྱལ་བས་ལུང་བསྟན་སྣང་རྩེའི་གཞལ་ཡས་སུ། །པདྨའི་གདུང་འཛིན་གར་གྱི་དབང་ཕྱུག་ལ། །དད་ལྡན་ཆོས་མཛད་འབྲེལ་ལྡན་ཚོགས་ཀྱིས་བསྐོར། །སྨིན་གྲོལ་དགའ་སྟོན་འགྱེད་ལ་གསོལ་བ་འདེབས། །
དེ་ལྟར་གསོལ་བཏབ་ཐུགས་རྗེའི་བྱིན་རླབས་ཀྱིས། །མི་མཇེད་ཁམས་འདིར་བཀྲ་ཤིས་བདེ་ལྡན་ཞིང་། །བར་ཆད་བགེགས་ཞི་སྐྱེད་རྫོགས་མཐར་ཕྱིན་ནས། །གསང་བའི་བདག་པོའི་གོ་འཕང་ཐོབ་པར་ཤོག །ཅེས་པ་འདི་སྤྲུལ་སྐུ་རིན་པོ་ཆེ་བདེ་ཆེན་གླིང་པས་བསྐུལ་བའི་ངོར་རྫོགས་ཆེན་པ་གར་གྱི་དབང་ཕྱུག་རྩལ་གྱིས་སྦྱར་བའོ། །མངྒ་ལཾ།། །།