ཟབ་ཆོས་འཇའ་ལུས་འོད་ཕུང་རང་གྲོལ་ལས་བླ་མ་བརྒྱུད་པའི་རྣམ་ཐར་ནོར་བུའི་དོ་ཤལ།
ཟབ་ཆོས་འཇའ་ལུས་འོད་ཕུང་རང་གྲོལ་ལས༔ བླ་མ་བརྒྱུད་པའི་རྣམ་ཐར་ནོར་བུའི་དོ་ཤལ་ཞེས་བྱ་བ་བཞུགས་སོ ཨྠྀི༔ བརྒྱུད་པ་ཕྱི་མ།
ན་མོ་གུ་རུ་ཛཱ་ཧ་བཱི་ར༔ ཀ་དག་ཆོས་སྐུའི་འོད་ཀློང་ནས༔ ལྷུན་གྲུབ་མ་འགགས་ལོངས་སྤྱོད་རྫོགས༔ རིག་རྩལ་སྣ་ཚོགས་སྤྲུལ་པའི་སྐུ༔ གང་འདུལ་གདུལ་བྱའི་རེ་སྐོང་བའི༔ རྩ་བའི་བླ་མའི་ཚོགས་རྣམས་ལ༔ རང་མདངས་ངང་དུ་ཕྱག་འཚལ་ལོ༔ འདིར་རྣལ་འབྱོར་གྱི་དབང་ཕྱུག་ཛཱ་ཧ་བཱིར་གྱི་ཟབ་ཆོས་འཇའ་ལུས་འོད་ཕུང་རང་གྲོལ་གྱི་བླ་མ་བརྒྱུད་པའི་རྣམ་ཐར་མདོར་བསྡུས་ནོར་བུའི་དོ་ཤལ་མཐོང་བ་རང་གྲོལ་ནི༔ དེ་ཡང་འོག་མིན་ཆོས་ཀྱི་དབྱིངས་ཆོས་སྐུའི་ཞིང་ཁམས་དམིགས་པས་མ་གྲུབ་པ་ན་འཁོར་འདས་ཐམས་ཅད་ཀྱི་སྤྱི་དཔལ༔ གདོད་མ་ཡེ་བཞུགས་ཀྱི་མགོན་པོ༔ ཆོས་སྐུ་འོད་མི་འགྱུར་བ་ཞེས་བྱ་བ་དེ་ཉིད་ཀྱིས༔ ཀ་དག་ཟང་ཐལ་བཟང་ངན་གྱི་དབྱེ་བསལ་དང་བྲལ་བ༔ ཐིག་ལེ་ལྔ་ལྡན་འོད་ལྔ་གཅལ་དུ་བཀྲམ་པ༔ ལྷུན་གྲུབ་བདེ་ཆེན་གྱི་ཞིང་ཁམས་ན༔ ལོངས་སྤྱོད་རྫོགས་སྐུ་ཐུགས་རྗེ་ཆེན་པོ་མཚན་དཔེ་ངེས་པ་ལྔ་ལྡན་པ་རིན་པོ་ཆེའི་རྒྱན་གྱིས་སྤྲས་པ་དེ་ཉིད་ལ་གསུངས༔ དེས་ཤར་ཕྱོགས་རི་པོ་ཏ་ལ་ཞེས་བྱ་བར་རིགས་གསུམ་མགོན་པོའི་ཕོ་བྲང་འོད་ཟེར་གྱི་གུར་ཁང་དུ༔ སྤྲུལ་སྐུ་པདྨ་འབྱུང་གནས་ཞེས་བྱ་བ༔ སྣང་བ་མཐའ་ཡས་ཀྱི་སྤྲུལ་པ༔ སྐུ་ལ་སྐྱེ་འཆི་དང་བགྲེས་རྒུད་མི་མངའ་བ༔ ཡེ་ཤེས་ཀྱི་མཁའ་འགྲོ་མ་ཀུན་གྱི་གཡོག་བྱེད་པ༔ དྲེགས་པ་སྡེ་བརྒྱད་བྲན་དུ་ཁོལ་བ་དེ་ཉིད་ལ་གསུངས༔ དེས་
རྒྱ་གར་གྲུབ་ཐོབ་ཆེན་པོ་མ་ཧཱ་ནཱ་ཐ་ཞེས་པར་སྤྲུལ༔ དེ་ཉིད་ཀྱིས་རྣལ་འབྱོར་དབང་ཕྱུག་ཛཱ་ཧ་བཱིར་ཞེས་པ་འཕོ་མེད་འོད་ལུས་འགྲུབ་པ་དེ་ཉིད་ལ་གནང༔ དེ་ལ་སློབ་མ་གྲུབ་པ་ཐོབ་པའི་སྐྱེས་ཆེན་འཇའ་ལུས་ཟག་མེད་དུ་གྲུབ་པ་བསམ་གྱིས་མི་ཁྱབ་པ་ཞིག་ཡོད་ཀྱང༔ ཡོངས་གྲགས་ཀྱི་བུ་ཆེན་བརྒྱད་ནི་འདི་ལྟ་སྟེ༔ བཛྲ་ནཱ་ཐ་༔ བྷྲ་མ་ནཱ་ཐ་༔ དྷེ་ཝ་ནཱ་ཐ་༔ ཤྲཱི་ནཱ་ཐ་༔ ཛིནྡྷ་བྷཱི་ར་༔ མ་ཎི་ཀཱ་ནཱ་ཐ་༔ པཎྜི་ཏ་སཽ་ཁྱ་༔ ཨ་མཱ་ར་སུ་ཁ་༔ དེ་རྣམས་འཕོ་མེད་འོད་ལུས་གྲུབ་པ་ཁོ་ནའོ༔ ད་ལྟའང་ལས་ལྡན་རྣམས་ཀྱིས་ཞལ་མངོན་སུམ་དུ་མཇལ་བ་དང་།༔ གསུང་གི་གདམས་པ་ཐོབ་པ་ནི་ཤིན་ཏུ་མང་ངོ༔ ཁྱད་པར་རིག་གནས་ཀུན་ལ་མཁྱེན་པ་རྒྱས་པར་མཛད་པ་བཛྲ་ནཱ་ཐས་བླ་མའི་ལུང་བསྟན་དང་གདུལ་བྱའི་དུས་བབས་དང་བསྟུན་བོད་ཡུལ་དུ་ཕེབས་ནས༔ ས་སྐྱ་བ་དང་ཀརྨ་པ་གཉིས་ལ་བཀའ་བབས་ཡོད་པའི་ལོ་རྒྱུས་ཕུལ་པས༔ སྐུ་སྒྲོབ་དང་སྐུ་འགོངས་ཀྱིས་ས་ཀར་གཉིས་ལ་རྟེན་འབྲེལ་མ་འགྲིག༔ དུས་མི་རིང་བར༔ ས་སྐྱ་པ་གདུང་གིས་ཕོངས་ཤིང༔ ཀརྨ་པ་བསྟན་པས་ཕོངས་པ་གཅིག་ཡོང་ངམ་གསུངས༔ སླར་ཡང་བླ་མའི་ལུང་བསྟན་བཞིན་དུ་རྫུ་འཕྲུལ་གྱིས་དབུར་སྟོད་འབྲི་ཁུང་དུ༔ ལྷ་སྲས་མུ་ཁྲི་བཙན་པོའི་རྣམ་སྤྲུལ་གཏེར་སྟོན་གནམ་ལྕགས་མེ་འབར་རམ༔ སྣ་ཚོགས་
རང་གྲོལ་རིན་ཆེན་ཕུན་ཚོགས་ཞེས་པ་དེ་ཉིད་ལ་ཡོངས་རྫོགས་གནང་ཞིང་བཀའ་བབས་སོ༔ སྐྱེས་ཆེན་དེ་ཉིད་ནི་སྔོན་རྒྱ་གར་འཕགས་པའི་ཡུལ་དུ་རང་སངས་རྒྱས་བདེན་པར་སྨྲ་བ་ཞེས་བྱ་བར་སྐྱེ་བ་བཞེས༔ དེ་ནས་རིམ་བཞིན་རྒྱ་གར་གྲོང་ཁྱེར་མཐུ་སྲུང་ཞེས་པར༔ ཡབ་བཛྲ་ཧཱུྃ་ཀཱར་དང་ཡུམ་རཏྣ་ཏཱ་རེ་ཞེས་པའི་སྲས་ཧཱུྃ་ཀཱ་ར་ཞེས་པར་སྐྱེ་བ་བཞེས༔ དེ་ནས་རྒྱ་གར་ལྷོ་ཕྱོགས་ར་ས་ཞེས་པར་ཡབ་རྒྱལ་པོ་ཨུཏྤལ་དང༔ ཡུམ་བཙུན་མོ་མཛེས་ལྡན་མའི་སྲས་དགེ་ཁྱིམ་ཞེས་པར་སྐྱེ་བ་བཞེས༔ དེ་ནས་རྡོ་རྗེ་གདན་གྱི་བྱང་ཕྱོགས་ཡུལ་འོད་ལྡན་གྱི་རྒྱལ་པོ་སིཾ་ཧ་རཱ་ཛ་དྷ་ར་དང༔ བཙུན་མོ་ལཀྵྨཱི་ཞེས་པའི་སྲས་བྷ་དྲ་པཱ་ལ་ཞེས་པར་སྐྱེ་བ་བཞེས༔ ཡང་ཡུལ་དེ་ཉིད་དུ༔ ཡབ་ཤཱནྟ་ས་ར་ཡུམ་རསྨི་ལི་ཀ་ཞེས་པའི་སྲས་དྷརྨ་པཱ་ལ་ཞེས་པར་སྐྱེ་བ་བཞེས༔ དེ་ནས་བོད་ཡུལ་གངས་ཅན་གྱི་ལྗོངས་འདིར༔ ཡབ་རྒྱལ་པོ་ཁྲི་སྲོང་ལྡེའུ་བཙན་དང༔ ཡུམ་ཚེ་སྤོང་བཟའི་སྲས་མུ་ཏིག་བཙན་པོའམ༔ ཁྲི་སྡེ་སྲོང་བཙན་ནམ༔ འཇིང་ཡོན་སད་ན་ལེགས་སམ༔ མུ་ཁྲི་བཙན་པོ་ཞེས་པར་སྐྱེ་བ་བཞེས༔ དེ་འོག་བོད་ཁམས་སུ་ཡབ་སྟོན་པ་སངས་རྒྱས་ཞེས་པ་དང༔ ཡུམ་ཆོས་ལྡན་ཞེས་པའི་སྲས་ཤེས་དཔལ་ཞེས་པར་སྐྱེ་བ་བཞེས༔ དེ་ནས་རྫོགས་ཆེན་རྣལ་འབྱོར་དྲི་མེད་འོད་ཟེར་གྱི་སྲས་སྤྲུལ་སྐུ་ཟླ་བ་གྲགས་པ་ཞེས་བྱ་བར་སྐྱེ་བ་
བཞེས༔ དེ་ནས་འབྲི་ཁུང་གི་ས་ཕྱོགས་སུ་ཡབ་རིན་ཆེན་ཆོས་ཀྱི་རྒྱལ་པོ་དང༔ ཡུམ་རིན་ཆེན་སྒྲོན་མ་གཉིས་ཀྱི་སྲས་རིན་ཆེན་རྣམ་རྒྱལ་ཞེས་པར་སྐྱེ་བ་བཞེས༔ དེ་ནས་དབུར་སྟོད་འབྲི་ཁུང་དཀོན་གཉེར་སྒང་ཞེས་པར༔ ཡབ་ཆོས་ཀྱི་རྒྱལ་པོ་བསྟན་པའི་རྒྱལ་མཚན་དང༔ ཡུམ་བསོད་ནམས་སྒྲོན་མ་ཞེས་པའི་སྲས་སུ་མེ་མོ་སྦྲུལ་གྱི་ལོ་ལ་སྐུ་བལྟམས༔ དགུང་ལོ་བརྒྱད་ཀྱི་སྟེང་གདན་ས་དཔལ་གྱི་ཕག་མོ་གྲུར་སྤྱན་སྔ་ཆོས་ཀྱི་གྲགས་པའི་དྲུང་དུ་རབ་ཏུ་བྱུང༔ མཚན་རིན་ཆེན་ཕུན་ཚོགས་ཆོས་ཀྱི་རྒྱལ་པོ་ཞེས་བྱ་བར་གསོལ༔ དགུང་ལོ་བཅུ་གསུམ་སྟེང་དཀར་པོ་ཀུན་དགའ་གྲགས་པས་ཁྲ་འབྲུག་གི་ཞིག་གསོས་མཛད་པའི་རབ་གནས་ལ་གདན་འདྲེན་ཞུས༔ གནས་ངེས་མེད་དུ་སྒྲུབ་པ་ལ་བཞུགས་པས༔ ཐུགས་རྗེ་ཆེན་པོ་གསང་བ་མཆོག་ལམ་དང༔ སྒྲོལ་དཀར་ཡིད་བཞིན་ནོར་མཆོག་འཁོར་ལོ་བདུན་མའི་གདམས་པ་ཁྱད་པར་ཅན་དག་སྣང་དུ་བྱུང༔ དེ་ནས་དགུང་ལོ་ཉི་ཤུ་བཞེས་པའི་དུས༔ འབྲི་ཁུང་ཏི་སྒྲོ་ན་སྒྲུབ་པ་ལ་བཞུགས་པའི་དུས༔ པཎྜི་ཏ་ཆེན་པོ་བཛྲ་ནཱ་ཐ་དཔོན་སློབ་བཅུ་གཅིག་བྱོན་ནས༔ ཚེ་གཅིག་ལུས་གཅིག་ལ་འཇའ་ལུས་མཁའ་སྤྱོད་སྒྲུབ་པའི་གདམས་ངག་ཛཱ་ཧ་བཱིར་རླུང་ཁྲིད་ཕྱི་ནང་གསང་གསུམ་ཡོངས་རྫོགས་ཀྱི་བཀའ་བབས་སོ
མ་ཧཱ་གུ་རུའི་ཟབ་ཡིག་ལུང་བསྟན་ལས༔ ཨེ་མ་ང་ཡི་གདམས་ངག་ཉོན་མོངས་རང་གྲོལ་ལ༔ གཅེས་པར་དགོས་པའི་རླུང་ཟས་ལག་ལེན་ནི༔ ལྷ་སྲས་སྐྱེ་བ་བརྒྱུད་དེ་ཆོས་འདི་དང་འཕྲད་ཚེ༔ ང་དང་མི་གཉིས་ཛཱ་ཧ་བཱིར༔ རྒྱ་གར་ཡུལ་འབྱུང་གྲུབ་པའི་རིག་འཛིན་བརྙེས༔ དེ་ཡི་ཡང་ཟབ་རླུང་གི་གདམས་པ་ནི༔ འཆི་མེད་གྲུབ་པའི་གནད་ཀུན་ལོན་གྱུར་ཏེ༔ པདྨ་ང་ཡི་ཐུགས་རྗེས་འཕྲད་པས་ལོངས༔ ཞེས་དང༔ དེ་ཉིད་རང་ལ་སྐྱོབ་པའི་དག་སྣང་ལུང་བསྟན་ལས༔ སློབ་དཔོན་དང་རྡོ་རྗེ་བདུད་འཇོམས་ལ་འབྲེལ་བ་ཐོགས་པ་ཞིག་གིས༔ ཁྱོད་ཀྱི་ཆོས་སྐལ་བདག་གིས་སྤྲོད་པར་གྱུར་ཅིག༔ ཅེས་པའི་སྨོན་ལམ་བཏབ་པ་དེ་ཡང་མི་འགྱངས་པར་བྱ་བྲལ་གྱི་ཚུལ་བཟུང་ནས་ཁྱོད་དང་འཕྲད་པར་འདུག་པས་ཐེ་ཚོམ་མེད་པར་ལོངས་ཤིག༔ གསུངས་པ་བཞིན་འབྲུག་ལོའི་ནང་དུ་པཎྜི་ཏ་བཛྲ་ནཱ་ཐ་དང་མཇལ་ནས་གདམས་ངག་ཟབ་མོ་ཉམས་བཞེས་གནང་ནས་བཞུགས་ཚེ༔ བཀྲེས་པའི་རྐྱེན་གྱིས་འཇིགས་པ་མི་སྣང་ནའང༔ སྐོམ་པ་ལ་ཕན་པ་ཞིག་དགོས་པར་འདུག་སྙམ་པའི་ཚེ༔ ཞག་བདུན་སོང་བའི་ཚེ་བྱ་རོག་གིས་འཕྲུལ་འཁོར་ལ་བརྟེན་ནས་རླུང་སྐོམ་དུ་འཐུང་བའི་གདམས་ངག་བྱུང༔ བྱ་རོག་དེ་ཉིད་ནི་བཛྲ་ནཱ་ཐ་དང་མགོན་པོའི་སྤྲུལ་པའོ༔ དེ་ཉིད་ཀྱི་དྲུང་དུ་རྫོགས་ཆེན་པ་ཚུལ་ཁྲིམས་སངས་
རྒྱས་ཞེས་བྱ་བ༔ འཁྲུངས་ཡུལ་རྩེ་གདོང༔ རུས་སྐྱོབ་པ༔ སྐུ་གཞོན་ནུ་ལ་རབ་ཏུ་བྱུང༔ ངོར་པ་དཀོན་མཆོག་ལྷུན་གྲུབ༔ འབྲི་ཁུང་ཟུར་པ་སོགས་བླ་མ་མང་དུ་བསྟེན༔ གསར་རྙིང་གི་ཆོས་མང་པོ་གསན་ཞིང༔ རྩེ་གདོང་བདག་ཆེན་གྱིས་རྫོགས་ཆེན་པར་མཚན་གསོལ༔ རྣལ་འབྱོར་དབང་ཕྱུག་ཛཱ་ཧ་བཱིར་གྱི་གདམས་ངག་ཁོ་ན་ལ་བརྟེན་ནས་ཟབ་བུ་གཏེར་ལུང་བདུན་པར༔ མི་ལོ་ཆེན་པོ་བདུན་གྱི་བར་དུ་ཛཱ་ཧ་བཱིར་གྱི་རླུང་ཟས་ཁོ་ན་མཛད་པས༔ རླུང་ཟས་ཀྱིས་གེགས་གྲོལ་ནས་རླུང་སེམས་ལ་རང་དབང་ཐོབ༔ བཀོད་པ་ལུས་ཀྱི་རྫུ་འཕྲུལ་དུ་མར་སྤྲུལ་ཞིང༔ ཡུལ་ཉི་ཤུ་རྩ་བཞི་དང༔ སངས་རྒྱས་ཀྱི་ཞིང་ཁམས་རྣམས་སུ་ཕེབས་ཤིང༔ ཡེ་ཤེས་ཀྱི་མཁྱེན་པ་དང་ལྡན་པ་དེ་ཉིད་ལ་བཀའ་བབས་སོ༔ དེ་ཉིད་ཀྱི་དྲུང་དུ་མངའ་རིས་པ་འོད་གསལ་མཆོག་ལྡན་ཞེས༔ འཁྲུངས་ཡུལ་གུ་གེ་སྦི་ཏེ་རོང་ཆུང་གི་ལུང་པ༔ རྐོས་སྦྲང་འབུད་རྒྱལ་ས་སྦྱིན་ཞེས་པ་དེར༔ ཡབ་ཞང་བློན་དར་མ་ཕྲིན་ལས་ཞེས་པ་དང༔ ཡུམ་ནི་ཆོས་རྒྱལ་ཁྲི་སྲོང་གི་དུས༔ ལོ་ཙཱ་བ་ཅོག་རོ་ཀླུའི་རྒྱལ་མཚན༔ དེའི་བུ་སྲིང་མོ་ཅོག་རོ་བཟའ་རྒྱལ་པོའི་བཙུན་མོར་བཞེས༔ ཆོས་རྒྱལ་གྱི་གདུང་རྒྱུད་མངའ་རིས་སུ་ཆད་པའི་དུས༔ ཅོག་རོའི་རྒྱུད་པ་རྣམས་སྐུའི་གནས་པ་ཡིན་པ་དང༔ ཡོན་ཏན་མཁས་པས་བདག་རྐྱེན་མཐོ་བར་
མཛད་པས༔ ཕྱག་ཕྱིར་འབྲངས་ཏེ་གུ་གེ་སྦི་ཏི་རོང་ཆུང་དགོན་པ་ཆགས༔ དེ་ནས་མི་རབས་བཅུ་གསུམ་གྱི་བར་དུ༔ ཡང་ཕུར་ལ་གྲུབ་པ་ཐོབ་པ་མང་དུ་བྱུང༔ དེ་ནས་སྔགས་གྲོང་དུ་སོང་སྟེ་དབང་རྒྱུན་ཆད༔ སླར་ཡང་དབུས་གཙང་དུ་བྱོན་ནས་དབང་ལུང་ཁྲིད་གསུམ་མང་དུ་གསན་ནས་ཡར་ལོག༔ དགོན་པ་གསར་དུ་བཏབ་ནས་འགྲོ་དོན་ཡང་རྒྱ་ཆེར་བྱུང་བའི་སྲིང་མོ༔ དབོན་མོ་ཉི་མ་བཟང་མོ་ཞེས་པའི་སྲས་སུ་མེ་མོ་སྦྲུལ་ལ་སྐུ་འཁྲུངས༔ མཚན་དཀོན་མཆོག་ཚེ་རིང་དུ་བཏགས༔ འཁྲུངས་ནས་ཞག་བདུན་སོང་བའི་ཚེ༔ གྲུབ་ཆེན་ཛཱ་ཧ་བཱིར་གྱི་སློབ་མ་ཛིནྡྷ་བྷཱི་ར་ཞེས་པ་དཔོན་སློབ་བདུན༔ མཚོ་མ་ཕམ་མཇལ་བར་བྱོན་པའི་དུས༔ བུ་ཆུང་དེ་ཉིད་ཀྱི་དཔྲལ་བར་སིནྡྷུ་རའི་ཐིག་ལེ་བྱས་ཏེ་འདི་སྐད་གསུངས༔ བྱིས་པ་འདི་ཉིད་དམ་ཆོས་མ་དར་བའི་སར་སྐྱེས་ཀྱང༔ ཆོས་ལྡན་བོད་དུ་ཆོས་དང་འཕྲད་པར་འགྱུར༔ བཅུ་གསུམ་མ་འགྱངས་དབུས་གཙང་ཡུལ་དུ་རྫོངས༔ སྙིགས་དུས་སེམས་ཅན་རྣམས་ཀྱི་མགོན་སྐྱབས་བྱེད་གསུངས་སོ༔ དེ་ནས་དགུང་ལོ་བཅུ་བཞི་ལོན་ཚེ༔ རང་གི་ཨ་ཁུ་རིག་འཛིན་དཔལ་འབར་ཞེས་པའི་རྒྱབ་ཏུ་སྤྱན་དྲངས་ཏེ༔ གློ་བོ་སྟོད་སྨད་ཀྱི་གནས་གང་ཡོད་མཇལ༔ ཁྱད་པར་མུ་ཀུ་ཆེད་ཏ་ར་ཞེས་པའི་ཆུ་མིག་བརྒྱ་རྩར་རྣལ་འབྱོར་དབང་ཕྱུག་ཛཱ་ཧ་བཱིར་དངོས་
མཇལ༔ ཛཱ་བཱིར་གདམས་ངག་ཡོངས་རྫོགས་གནང་ཞིང་ཟབ་བུ་ལུང་དུ་རང་གི་ཚེ་རབས་ཀྱི་བླ་མ་ཡོད་པའི་ལུང་བསྟན་དང༔ དབུས་གཙང་ན་འགྲོ་དོན་དཔག་མེད་ཡོང་གསུངས་པ་ལྟར་ཟབ་ལུང་གཏེར་ལུང་བདུན་པར་ཐེ་ཚོམ་མེད་པར་ཕེབས་པས༔ རྫོགས་ཆེན་ཚུལ་ཁྲིམས་སངས་རྒྱས་དང་མཇལ༔ གྲུབ་ཆེན་ཛཱ་ཧ་བཱིར་གྱི་གདམས་པ་མཐའ་དག་བརྩེ་བས་རྗེས་སུ་བཟུང་ཞིང༔ རྟེན་འབྲེལ་མ་ལུས་པར་འགྲིག་ཅིང༔ སྐྱེས་ཆེན་དམ་པ་མང་པོའི་ཞབས་ལ་གཏུགས༔ རབ་འབྱམས་རྣམ་དྲུག་ལ༔ གནས་པ་རབ་འབྱམས་པ་བྱམས་པ་ཕུན་ཚོགས༔ འབུམ་རབ་འབྱམས་པ་དཔལ་འབྱོར་ཤེས་རབ༔ ཇོ་གདན་པ་ལུང་རིག་རྒྱ་མཚོ༔ གསེར་མདོག་ཅན་གྱི་མཁན་ཆེན་ཀརྨ་བཟང་པོ༔ སྐྱེད་ཚལ་མཁན་པོ་ངག་དབང་གྲགས་པ༔ འཕྱོང་རྒྱས་རབ་འབྱམས་པ་དགོན་གསར་བ༔ གཏེར་སྟོན་རྣམ་གསུམ་ལ༔ གཏེར་སྟོན་ཞིག་པོ་གླིང་པ༔ གཏེར་སྟོན་བདེ་ཆེན་གླིང་པ༔ འཕྲང་མགོ་གཏེར་སྟོན་ཤེས་རབ་འོད་ཟེར༔ རྡོར་འཛིན་རྣམ་པ་དྲུག་ལ༔ མུས་པ་དཔལ་ལྡན་དོན་གྲུབ༔ བྲང་ཏི་ནམ་མཁའ་དཔལ་བཟང༔ ཤར་པ་ཀུན་དགའ་བཀྲ་ཤིས༔ ལྷ་རྗེ་བློ་གྲོས་རྒྱལ་མཚན༔ སྣ་ནམ་པ་བདེ་ལེགས་ཕུན་ཚོགས༔ གྲྭ་ཐང་བླ་ཆེན་པོ༔ སྡེ་བླ་རྣམ་
གསུམ་ནི༔ འབྲི་ཁུང་ཁྲི་ཐོག་པ་ཀུན་དགའ་རིན་ཆེན༔ ས་སྐྱ་ཁྲི་ཐོག་པ་ཀུན་དགའ་བསོད་ནམས༔ འབྲུག་པ་ཁྲི་ཐོག་པ་མི་ཕམ་ཆོས་རྒྱལ་ལོ༔ སྔགས་འཆང་རྣམ་དྲུག་ནི༔ མངའ་རིས་རིག་འཛིན་དཔལ་འབར༔ བྱང་བཀྲ་བཟང་བ་པདྨ་དབང་ཆེན༔ ཨེ་པ་ཆོས་ཀྱི་རྒྱལ་པོ༔ གཙང་རོང་ཚེ་བདག་རྡོ་རྗེ༔ འབྲི་ཁུང་ཟུར་པ་ཕུན་ཚོགས་རྣམ་རྒྱལ༔ དགེ་ལེགས་ཕུན་ཚོགས༔ རྣལ་འབྱོར་གསུམ་ནི༔ རྫོགས་ཆེན་རྣལ་འབྱོར་ཚུལ་ཁྲིམས་སངས་རྒྱས༔ ཕྱག་ཆེན་རྣལ་འབྱོར་བཀྲ་ཤིས་སྟོན་པ༔ རྩ་རླུང་རྣལ་འབྱོར་བྱམས་པ་ཆོས་རིན་ནོ༔ བཤེས་གཉེན་དྲུག་ནི༔ ནུབ་དགོན་པ་དཀོན་མཆོག་རྒྱལ་མཚན༔ དྲུག་པ་རྟོགས་ཆུང་བ༔ ཀརྨ་ཕུན་ཚོགས་རྣམ་རྒྱལ༔ སངས་རྒྱས་རྡོ་རྗེ༔ བྲག་རྒན་པ་ནམ་མཁའ་རྡོ་རྗེ༔ འདི་ལ་ཛཱ་བཱིར་ཟུར་བཀོལ་ཐམས་ཅད་གསན་པ་ཡིན༔ གངས་རི་ཐོད་དཀར་བའི་སྐུ་སྐྱེ་དཔའ་བོ་སྤྲུལ་སྐུ་སོགས་བསྟེན་ཞིང༔ དེ་དག་རྣམས་ཀྱིས་གདམས་ངག་བུམ་པ་གང་བྱོ་ཐམས་ཅད་གནང༔ ཁྱད་པར་རྣལ་འབྱོར་དབང་ཕྱུག་ཛཱ་བཱིར་ལན་གསུམ་ཞལ་གཟིགས་ཤིང༔ གདམས་པ་ཡོངས་རྫོགས་ཉེ་བརྒྱུད་དུ་གསན༔ གཞན་ཡང་གྲུབ་ཐོབ་རྣམ་བཞི་ཞལ་གཟིགས་ནས༔ གྲུབ་ཐོབ་ཚེ་སྒྲུབ་ཐབས་ལམ་དམར་ཁྲིད་ལ་སོགས་པའི་གདམས་པ་ཁྱད་པར་
ཅན་མང་པོ་དག་སྣང་དུ་བྱུང་ཞིང༔ དགུང་ལོ་བརྒྱ་དང་ལྔ་བཅུ་ང་བདུན་བཞུགས༔ དེ་ཉིད་ཀྱི་ཞབས་དྲུང་དུ༔ བདག་སོགས་རྣམས་ཀྱི་འདྲེན་མཆོག་དམ་པ་རིག་འཛིན་ཆོས་རྒྱལ་རྡོ་རྗེ་ཞེས་སྙན་པའི་བ་དན་འཇིག་རྟེན་གསུམ་དུ་ཁྱབ་པ་དེ་ཉིད༔ བྲེས་ཕུར་ལོ་ཙཱ་བ་ཆེན་པོ་གཉགས་ཛྙཱ་ནའི་གདུང་རྒྱུད་དུ་འཁྲུངས་ཤིང༔ སྐུ་གཞོན་ནུའི་དུས་སྐྱེས་ཆེན་དམ་པའི་རྣམ་ཐར་མཚན་ཉིད་ཡོངས་སུ་རྫོགས་པ་ཚང་ཞིང༔ གསང་སྔགས་གསར་རྙིང་བཀའ་གཏེར་རིང་ལུགས་ཐམས་ཅད་ལ་མཁྱེན་པ་རྒྱས་ཤིང༔ སྒྲོ་འདོགས་ཕྱོགས་མེད་དུ་བཅད༔ དཀའ་སྤྱད་སྙིང་རུས་ཀྱི་གོ་ཆ་རྨད་དུ་བྱུང་བས་སྒྲུབ་པ་རྩེ་གཅིག་གིས་རང་དོན་མངོན་དུ་གྱུར་ཅིང༔ གྲུབ་པ་བརྙེས་པས་གཞན་དོན་ཐུགས་བསྐྱེད་ཀྱི་ལས་འཕྲོའི་འབྲས་བུ་བཅུད་དུ་སྨིན་པ་དང༔ འོད་གསལ་རྡོ་རྗེ་སྙིང་པོའི་གནས་ལུགས་ཟང་ཐལ་མངོན་དུ་གྱུར་པས༔ དུས་གསུམ་ས་ལེར་མཁྱེན་པ༔ པདྨའི་བཀའ་ལུང་ཟབ་མོ་ལས་ཀྱང༔ དྷརྨ་རཱ་ཛ་ཞེས་བྱ་བ༔ གཙང་ཤངས་ཨེ་དམར་ཕྱོགས་སུ་འབྱུང༔ རྟ་མགྲིན་བྱིན་རླབས་སྐྱེས་བུ་ཡིན༔ འཕྲད་ཚང་ངན་སོང་འཁོར་ལོ་གཅོད༔ ཅེས་དང༔ དགོངས་འདུས་ལུང་བསྟན་བཀའ་རྒྱ་མ་ལས༔ བསམ་ཡས་ནུབ་བྱང་མཚམས་ཀྱི་རི་ནག་རྩར༔ དྷརྨའི་མིང་ཅན་ཆོས་རྒྱལ་གསུང་སྤྲུལ་ནི༔ ཞང་རིགས་སྤྱོད་པ་རླབས་ཆེན་འགྲོ་བ་འདུལ
ཞེས་དང༔ རྡོར་སེམས་ལུང་བསྟན་སྙིང་གི་མུན་སེལ་ལས༔ དེ་དང་དུས་མཚུངས་མྱང་སྨད་ཉི་ལུང་དུ༔ ཆོས་རྒྱལ་གསུང་སྤྲུལ་ཀུན་དགའི་མིང་ཅན་གཅིག༔ སྒྱུ་འཕྲུལ་ཞི་ཁྲོའི་དངོས་གྲུབ་བརྙེས་པ་འབྱུང༔ ཀུན་དགའི་མིང་ཅན་ཞེས་པ་ནི༔ རིག་འཛིན་ཆེན་པོ་འདི་ཉིད་སྐུ་ཆུང་ངུའི་དུས་སུ་ཡབ་ཡུམ་རྣམས་ཀྱིས་གཅེས་མིང༔ ཀུན་དགའ་བསྟན་འཛིན་དུ་བཏགས་པས་ན་ཀུན་དགའ་ཞེས་པའོ༔ ཅེས་པའི་མཚུངས་བྲལ་ཆེན་པོ་དེ་ཉིད་ལ་ཛཱ་བཱིར་ཡོངས་རྫོགས་ཀྱི་བཀའ་བབས་སོ༔ དེ་ཉིད་ཀྱིས་རྒྱལ་ཁམས་སྤྲང་པོ་ཉི་ཟླ་ཀློང་གསལ་ལ་གནང་བའོ༔ ཞེས་རྣལ་འབྱོར་གྱི་དབང་ཕྱུག་ཛཱ་ཧ་བཱིར་གྱི་བླ་མ་བརྒྱུད་པའི་རྣམ་ཐར་མདོར་བསྡུས་ནོར་བུའི་དོ་ཤལ་འདི་ཉིད༔ སྙིགས་དུས་ཀྱི་སྤྲང་པོ་ཉི་ཟླ་ཀློང་གསལ་གྱིས་བགྱིས་པའོ༔ དྲང་སྲོང་གཟའ་བརྒྱད་བཀའ་ཡི་བྱ་ར་མཛོད༔ འཇའ་ལུས་འོད་ཕུང་རང་གྲོལ་ལས༔ ལོ་རྒྱུས་ཉི་ཟླ་ཟུང་འབྲེལ་བཞུགས་སོ༔ ཨོཾ་ཨཱཿཧཱུྃ་གུ་རུ་ཛཱ་ཧ་བཱིར་སིདྡྷི༔ ཡེ་ནས་ཀ་དག་མི་དམིགས་སྤྲོས་བྲལ་ཀློང༔ ལྷུན་གྲུབ་མ་འགགས་རང་གསལ་མཚན་འཛིན་བྲལ༔ ཟུང་འཇུག་ཀུན་ཁྱབ་མཐའ་བྲལ་ཐུགས་རྗེ་འབར༔ རྣལ་འབྱོར་དབང་ཕྱུག་ཛཱ་བཱིར་ཞབས་ལ་འདུད༔ འཇའ་ལུས་མཆོག་སྩོལ་འོད་ཕུང་རང་གྲོལ་གྱི༔ ལོ་རྒྱུས་ཕྱི་ནང་གསང་གསུམ་བཀོད་པ་ལ༔ ཆོས་
བདག་མཁའ་འགྲོའི་ཚོགས་ཀྱིས་གནང་དུ་གསོལ༔ དེ་ལ་འདིར་སྙིགས་དུས་ཀྱི་སྤྲང་པོ་ཉི་ཟླ་ཀློང་གསལ་ཁོ་བོ༔ ཆུང་བྱིས་པ་ཨ་ལི་མའི་དུས་སུ་རྨི་ལམ་ཉམས་སྣང་ཐམས་ཅད་ལ༔ བུད་མེད་མང་པོ་འཚོགས་ནས་རང་གི་སྡོད་རོགས་དང་རྩེ་གྲོགས་བྱེད་ཅིང༔ ནུབ་མོ་ཡང་རང་ཉལ་ཚེ་མལ་གྱི་མཐའ་བསྐོར་ནས་བག་དྲོ་ཧུར་རེ་སྡོད་པ་དང༔ ཡང་སྐབས་འགའ་རེར་མཁའ་འགྲོ་མ་སུ་ཁ་སིདྡྷི་ཡིན་ཟེར་བའི་བུད་མེད་དཀར་མོ་རུས་པ་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་གཅིག་ཡང་ཡང་བྱུང་ནས༔ སུ་ཁ་ཆོས་དྲུག་ཡིན་ཟེར་བའི་པོ་ཏི་ཤིན་ཏུ་ལེགས་པ་གཅིག་བསྟན་ནས༔ འདི་ཉམས་སུ་བླངས་ན་དོན་ཆེན་འགྲུབ་ཟེར་བ་དང༔ རྩ་རླུང་འཕྲུལ་འཁོར་གྱི་གླིང་བཞི་འདེགས་པ༔ གླིང་བཞི་བགྲད་པ༔ གླིང་བཞི་དགྲམ་པ༔ གླིང་བཞི་སྡུད་པ༔ གཟེར་ཐེམ་བཀག་པ་ལ་སོགས་བསྟན་ཞིང༔ མཁའ་འགྲོ་མ་དེ་ལུས་དང་གྲིབ་མ་བཞིན་དུ་འགྲོགས་པ་ཁོ་ན་བྱུང༔ ཡང་སྐབས་གཅིག་ཙ་ན་གོང་གི་མཁའ་འགྲོ་མ་དེ་བུད་མེད་མི་སྡུག་པའི་ཆ་བྱད་དུ་སྤྲུལ་ནས༔ ཕྱག་གཡས་ཀྱི་གྲི་གུག་གིས་རང་ལུས་གཤགས་ནས༔ རྩ་རོ་རྐྱང་དབུ་གསུམ་འཁོར་ལོ་ལྔ་གྲངས་ཅན་གྲངས་མེད་ཀྱི་རྩ་འཁོར་རྣམས་མངོན་སུམ་དུ་བསྟན་ནས༔ ཁྱོད་ཀྱིས་འདི་ལྟ་བུ་བསྒོམ་ན་འཇའ་ལུས་རྡོ་རྗེའི་སྐུ་ཐོབ་གསུང་བ་ཞིག་ཀྱང་བྱུང༔ དེ་ནས་རང་ལོ་བཅུ་འགྲོ་ཚེ་ནམ་མཁའ་
ནས༔ ཤོག་དྲིལ་ཞེང་སོར་བཞི་ཙམ་ལ་དཀྱུས་མཐོ་དོ་བྱས་པ་ལ༔ ཡི་གེ་གཟབ་ཆུང་བརྩེགས་མའི་གཞུག་ཏུ་མཆན་བུས་ཀྱང་ཤིན་ཏུ་མཛེས་པར་བྱས་པ་གཅིག་ལག་ཏུ་བྱུང༔ དེ་སླར་ཡི་གེ་ཤེས་ཚེ་བསྟས་པས་རྒྱ་གར་གྲུབ་ཐོབ་ཛཱ་བཱིར་ཞེས་པའི་གདམས་པ༔ རླུང་ཟས་སུ་ཟ་ཚུལ་སྐོམ་དུ་འཐུང་ཚུལ༔ རླུང་རྟ་རུ་ཞོན་པ་གོས་སུ་གྱོན་པ༔ དྭངས་མ་དཀར་དམར་སྤེལ་སྦྱོང་བགྱིས་ཏེ༔ ཟག་མེད་འོད་ལུས་སྒྲུབ་ཐབས་དེ་རྣམས་ཀྱི༔ གེགས་སེལ་བོགས་འདོན་སོགས་འདུག་ཀྱང་དོན་ནི་མ་གོ༔ དགའ་ཚོར་དཔག་མེད་བྱུང་ནས་རང་གར་སྡོད་ཀྱི་སྔས་མགོར་བཞག་པས༔ རྗེས་སུ་ཤོག་དྲིལ་དེ་བསྐྱུར་ནས་མ་བྱུང་བས་སྙིང་དོན་པ་ལྟ་བུའི་སྡུག་བསྔལ་བྱུང་ནས༔ མངའ་རིས་སྟོད་ཕྱོགས་ལ་ནི་ཛཱ་བཱིར་ཞེས་པའི་སྒྲ་ཡང་མི་གྲགས་པ་འདུག༔ དེ་ང་རྒྱལ་ཁམས་གང་ན་ཡོད་ཀྱང་ཞུ་དགོས་སྙམས་ཏེ༔ ཕ་མ་གཉེན་ཚན་ནོར་རྫས་ཚེ་འདིའི་ལྟར་སྣང་ཐམས་ཅད་བློས་རྒྱང་བཏང་ཏེ༔ གྲྭ་ས་ཆེན་པོ་གསེར་མདོག་ཅན་དུ་སློབ་གཉེར་ལ་ཡོང་ཡང༔ མདོ་ཕྱོགས་ལ་སེམས་མ་སོང་ཞིང༔ རྫོགས་པ་ཆེན་པོ་འདི་རང་གི་ཕ་ཆོས་ཡིན་པས་ཞུ་བ་ལ༔ སྔ་འགྱུར་བསྟན་པའི་གཙུག་རྒྱན་རིག་འཛིན་ཆེན་པོ་ཆོས་རྒྱལ་རྡོ་རྗེའི་སྐུ་ཞབས་སུ་རྫོགས་ཆེན་བཀའ་གཏེར་བསམ་གྱིས་མི་ཁྱབ་པའི་དབང་ལུང་ཁྲིད་གསུམ༔ བཅུད་ལེན་སྐོར་མང་པོ་དང༔ ཁྱད་པར་དུ་རྣལ་འབྱོར་དབང་ཕྱུག་ཛཱ་བཱིར་གྱི་སྐོར་ཡོངས་
རྫོགས་བརྩེ་བས་རྗེས་སུ་བཟུང་ཞིང་འདི་སྐད་གསུངས༔ ཁོ་བོ་ལ་དང་པོ་མངའ་རིས་འོད་གསལ་མཆོག་ལྡན་གྱིས་ཛཱ་བཱིར་གྱི་གདམས་པ་བུམ་པ་གང་བྱོར་གནང་ཞིང་ཆོས་བདག་ཏུ་ལུང་བསྟན༔ བཀྲ་ཤིས་མངའ་གསོལ་མཛད་དེ་རྒྱལ་ཚབ་ཏུ་བཀོད་པ་ཡིན་ཅིང༔ དེ་བཞིན་དུ་དགེ་སློང་རང་ཡང༔ ཡང་ཏིག་ནག་པོ་གསེར་གྱི་འབྲུ་གཅིག་དང༔ རྣལ་འབྱོར་དབང་ཕྱུག་ཛཱ་བཱིར་གྱི་གདམས་པ་ཟབ་མོ༔ ཕུང་པོ་འོད་ལུས་སུ་འགྲུབ་པ་འདི་ཉིད་ཀྱི་ཆོས་བདག་ཡིན་པས༔ དེ་རིང་མན་ཆད་ཁྱེད་ཀྱི་མིང་ལ་དགེ་སློང་ཛཱ་བཱིར་འཇའ་ལུས་སྣང་སྟོང་རང་གྲོལ་གྱིས་ཤིག་གསུངས༔ ཛཱ་བཱིར་ཉེ་བརྒྱུད་དང་བཅས་པ་གནང་དབུགས་དབྱུང་གཟེང་བསྟོད༔ འགྲོ་དོན་བྱེད་པའི་རྒྱལ་ཚབ་ཏུ་མངའ་གསོལ་གནང་བས༔ ཁོ་བོས་ཀྱང་བླ་མའི་བཀའ་བཞིན་གདམས་ངག་ཆུད་མ་ཟོས་ཤིང༔ རྣམ་གཡེང་ལེ་ལོར་མ་ཤོར་བར༔ ངེས་མེད་ཀྱི་རི་ཁྲོད་རྣམས་སུ་ཚེ་འདི་བློས་བཏང་སྟེ་མི་ལོ་དྲུག་བདུན་ཙམ་མི་ཟས་རགས་པ་སྤངས་ནས༔ དཀའ་ཐུབ་བཅུད་ལེན་གྱི་རིགས་མང་པོ་དང༔ སྐབས་སྐབས་སུ་སྦང་རྩམ་ཐུར་མགོ་རེ་ལ་བརྟེན་ནས་སྒོམ་པའི་ཚེ༔ བུད་མེད་དཀར་མོ་རུས་པ་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་ཞིག་ཡང་ཡང་བྱུང་ནས༔ རང་ལུས་གཞན་ལུས་ཀྱི་ཉམས་ལེན་འཕྲུལ་འཁོར་གྱི་
གནད་དང༔ བདེ་བའི་བོགས་འདོན་ཤེས་རབ་གསང་བའི་བཅུད་ཀྱིས་ཡང་ཡང་ཚིམས་པར་བྱས་ནས་འདི་སྐད་གསུངས༔ པདྨ་རི་དྭགས་དུང་སྣ་ཅན༔ གླང་ཆེན་ལྕུགས་ཕྲན་ལ་སོགས་པའི༔ རིགས་ལྔའི་མཚན་རྟགས་ཤེས་རབ་མ༔ ལས་རྒྱར་བསྟེན་ན་ཐར་ལམ་བགྲོད༔ ང་རྒྱལ་སྡོམ་པས་མ་བཅིངས་པར༔ བདེ་སྟོང་དགའ་བཞིའི་རང་ཞལ་ལྟོས༔ སྣོད་བཅུད་ལྷ་ཡི་རོལ་པར་ཁྱེར༔ ཕྱི་ནང་འོད་གསལ་ཀློང་དུ་གྲོལ༔ ཞེས་གསུངས༔ ཡང་སྐབས་གཅིག་ཆུ་བར་ཕུའི་ཁྲུ་དཀར་ཁྲུ་ནག་ཞེས་པར་གནས་འབྲེལ་ལ་སྡོད་ཚེ༔ ཡང་གོང་གི་མཁའ་འགྲོ་མ་དེས་འདི་སྐད་གསུངས༔ ཀྱེ་ཧོ་འཇའ་ལུས་སྣང་སྟོང་རས་པ་ཁྱོད༔ གོས་དཀར་རལ་པའི་ཐོར་ཚུག་སྔགས་ཆས་གྱིས༔ ངེས་མེད་རི་ཁྲོད་རྒྱུ་ཞིང་ཡིད་འོང་པདྨར་རོལ༔ གསང་སྔགས་དམ་ཚིག་ལྔ་ལྡན་རྟག་ཏུ་གཅེས༔ སྔར་མིང་ཞོག་ལ་སྟོང་གསུམ་དཔལ་འབར་རམ༔ ཡང་ན་གླིང་བཞི་དཔལ་འབར་འགྲོ་བའི་མགོན༔ རྣམ་གཡེང་སྤོངས་ལ་བརྟུལ་ཞུགས་ལྡན་པ་ཡི༔ བདེ་སྟོང་བོགས་འདོན་ལས་ཀྱི་ཕྱག་རྒྱ་མ༔ པདྨ་ཨོ་རྒྱན་ཆོག་པའི་མིང༔ འཛོམ་དང་མདངས་གསལ་བུད་མེད་ལྔའི༔ ཤེས་རབ་གསང་བའི་བཅུད་ཐོབ་ཅིང༔ བཟང་མིང་སྒྲུབ་ཕུག་རྙེད་གྱུར་ན༔ འཇའ་ལུས་འགྲུབ་པར་ཐེ་ཚོམ་མེད༔ ཟེར་བ་སོགས་མང་དུ་བྱུང་ཡང་
ཟུར་དུ་ཤེས༔ དེ་ནས་ཡང་བེར་ཆུང་དབེན་པའི་རི་ཁྲོད་དུ་མཚམས་དམ་པོ་ལ་ཡོད་ཚེ༔ རང་གི་གཅུང་པོ་ཚེ་རིང་ཆོས་འཕེལ་ཞེས་པ་ཤི་ནས་ལོ་མང་དུ་སོང་བ༔ ཁོ་ཡིན་རྒྱུ་བ་བྱས་ཡོང་ནས་ཇོ་ཇོ་ལ་ཨ་ལྕེ་ནི་རྒྱབ་ཐུར་མདུན་ཐུར༔ ཐུར་མའི་ལག་ལེན་སྟོན་ཤོག་ཟེར་བས༔ ཡོངས་པ་ཡིན་ཟེར་ནས༔ རྒྱབ་ཐུར་མདུན་ཐུར་གྱི་འཛུག་ལུགས༔ ཁྲག་བྱུང་ན་འཛག་གཅོད་བསྡོམ་པ༔ རྗེས་སྤྱོད་བྱུག་བདུག་སྤྱོད་ལམ་བྱེད་ཚུལ་སོགས་བསླབ་བྱུང༔ དེར་བདག་གིས་ཨ་ལྕེའི་མིང་ལ་གང་ཟེར༔ ཁྱོད་རང་སྔར་ནས་ད་བར་གང་དུ་བསྡད་བྱས་པས༔ ཨ་ལྕེའི་མིང་ལ་མཁའ་སྤྱོད་རིག་འཛིན་གཙོ་མོ་ཛྙཱ་ན་ཌཱ་ཀི་སུ་ཁ་སིདྡྷི་ཟེར༔ ང་རང་སྔར་ཕན་ཆད་ཨ་ལྕེའི་ལོགས་སུ་བསྡད༔ ད་ནི་མྱུར་དུ་ཇོ་ཇོ་རང་གི་ཕྲིན་ལས་སྒྲུབ་པའི་བུ་མོ་གཅིག་ཏུ་སྐྱེ་བ་བླངས་ཏེ་མྱུར་དུ་མཇལ་རྒྱུ་ཡིན་ཟེར༔ སྐྱེ་བ་ལེན་ཚུལ་མིང་དང་ས་ཆ་སོགས་བཤད་བྱུང་ཡང་བརྗེད་ནས་མ་བྱུང༔ དེ་ནས་རྒྱུན་པར་ཛཱ་བཱིར་གྱི་གདམས་པ་ཁོ་ན་ཉམས་ལེན་བྱས་ནས༔ བེར་ཆུང་དབེན་པའི་རི་ཁྲོད་དུ་ལྟོ་གོས་ཐམས་ཅད་བློས་བཏང་སྟེ༔ མདོར་ན་འགྲོ་འདུག་སྤྱོད་ལམ་ཡང་མ་བྱས་པར་ཉིན་མཚན་མེད་པར་ཉམས་ལེན་གྱི་ངང་ལ་བསྡད་ཡོད་པའི་ཚེ༔ རང་གི་མདུན་དེར་རྣལ་འབྱོར་དབང་ཕྱུག་ཛཱ་ཧ་བཱིར་དེ་ཉིད་སྐུ་མདོག་དཀར་ལ་དམར་མདངས་
ཆགས་པ༔ ཕྱག་གཡས་སེང་ལྡིང་གི་ཌཱ་མ་རུ་འཁྲོལ་ཞིང༔ གཡོན་འཆི་མེད་ཚེའི་བུམ་པ་བསྣམས་པ༔ ཕྲག་པ་གཡས་གཡོན་དུ་ཉི་ཟླ་དང༔ མཆན་ཁུང་གཡས་གཡོན་དུ་མེ་ཏོག་དཀར་དམར་གྱི་ཕྲེང་བས་མཛེས་པ༔ དབུ་སྐྲ་རལ་པའི་ཐོར་ཚུགས་ལ་རལ་ཆིངས་མེ་ཏོག་སྣ་ཚོགས་ཀྱིས་བརྒྱན་པ༔ དར་དམར་གྱི་ཨང་རག་གསོལ་བ༔ ཞབས་རྒྱལ་པོ་རོལ་པའི་སྟབས་ཀྱིས་གཡུ་འབྲུག་སྔོན་མོའི་སྟེང་ན་བཞུགས་ཏེ་འདི་སྐད་གསུངས་པའི་ཉམས་ཤིག་ཤར་བྱུང༔ ན་མོ་གུ་རུ་སིདྡྷི་བྷ་ཝནྟུ།༔ ཟབ་མོ་ངེས་པ་དོན་གྱི་མན་ངག་གིས༔ སྐལ་ལྡན་ཚེ་གཅིག་སངས་རྒྱས་བསྒྲུབ་པ་ལ༔ ཞེན་ལོག་དད་བརྩོན་ལྷག་བསམ་སྔོན་འགྲོ་བས༔ ལྷུན་གྲུབ་རྣམ་གསུམ་ཉམས་ལེན་སྲོག་ཤིང་མཆོག༔ ལམ་གྱི་རྩ་བ་བྱང་སེམས་མོས་གུས་ཏེ༔ ཉམས་རྟོགས་རྩ་བ་རྩ་རླུང་ཐིག་ལེ་ཡིན༔ དབུ་མ་འཇའ་ལུས་གསལ་སྟོང་འཛིན་མེད་སྒོམས༔ ཟག་བཅས་འཁོར་བའི་རྐྱེན་ལ་མ་ལྟོས་པར༔ ཟག་མེད་རླུང་གིས་བཟའ་བཏུང་གོས་རྒྱན་འཚོ༔ ཚེ་ཡི་མི་མཐུན་འགལ་རྐྱེན་ཀུན་འཇོམས་ཤིང༔ ཚ་གྲང་བད་མཁྲིས་ནད་རྣམས་བཤལ་སྐྱུག་འབྱིན༔ མཐུན་རྐྱེན་ཉམས་རྟོགས་ཉི་ཟླའི་དཀྱིལ་འཁོར་རྒྱས༔ ཟླ་བའི་ཉམས་ལེན་འདོད་ཆགས་བདག་པོས་བརྟེན༔ སྦུབས་འདྲེན་གཙུག་ཏོར་བསྒྲུབ་ཅིང་རླུང་གཉིས་བསྲེ༔ གེགས་
སེལ་ཡོན་ཏན་སྐྱེད་པའི་ཐབས་ལ་འབད༔ རྒན་པོའི་སྐྱོན་བྲལ་ཚེ་རིང་བཀྲག་མདངས་ལྡན༔ ཅིར་སྣང་དག་པའི་སྣང་བ་འཁོར་ཡུག་ལ༔ གཟུང་འཛིན་རེ་དོགས་བྲལ་བའི་མྱང་འདས་དངོས༔ ཚེ་འདིར་འཇའ་ལུས་མཆོག་གི་དངོས་གྲུབ་ཐོབ༔ མ་ཎི་དཔལ་འབར་གཞན་དོན་ལྷུན་གྱིས་གྲུབ༔ ཚོགས་གཉིས་དགེ་བ་བྱང་ཆུབ་ཆེན་པོར་བསྔོ༔ ཞེས་དང༔ ཀྱེ་ཧོ༔ དད་ལྡན་ཚེ་གཅིག་སངས་རྒྱས་ཐོབ་འདོད་རྣམས༔ ཚེ་སྒྲུབ་ཟབ་མོས་རྣལ་འབྱོར་ཚེ་སྲོག་བསྲིང༔ བདེ་དྲོད་གཏུམ་མོས་བག་ཆགས་གཉིས་འཛིན་བསྲེག༔ འབྱུང་ལྔའི་དྭངས་མ་ཡེ་ཤེས་ཟས་བཅུད་འཚོལ༔ རྐང་མགྱོགས་རླུང་གིས་མཁའ་སྤྱོད་དངོས་གྲུབ་བསྒྲུབ༔ ཆུ་རླུང་ཟབ་མོས་སྐོམ་པའི་ཚ་གདུང་སེལ༔ བཏུང་བའི་བྱེ་བྲག་ཕྱི་ནང་བཅུད་སྡུད་བྱ༔ རྩ་བའི་རླུང་ལྔས་ཕྱི་ནང་བར་ཆད་སེལ༔ རླུང་འཚོ་བཅུད་འཚོས་བཀྲག་མདངས་གཟི་བརྗིད་བསྐྱེད༔ ཁམས་ལ་དབང་ཐོབ་འཕོ་མེད་འོད་ལུས་འགྲུབ༔ ཅེས་གསུང་ཞིང་གོང་མ་དེ་ཉིད་གཞུང་སྔར་འཆད་པ་ཡིན༔ ཡང་པུས་མོ་གཡས་རྡེབ་གཡོན་རྡེབ༔ ཉི་ཟླའི་འདྲེན་འགྲེམ་རྐང་མགྱོགས་པུས་ནད་སེལ་བ་སོགས་ཀྱི་འཕྲུལ་འཁོར་ཐམས་ཅད་འཆུག་འདུག་པས༔ འདི་བཞིན་གྱིས་ཤིག་གསུངས་ནས་རླུང་འཛིན་འཕྲུལ་འཁོར་སོགས་ཀྱི་བཅའ་ཐབས་མང་དུ་བསྟན་ནས་
འཇའ་ལྟར་ཡལ་སོང༔ དེ་ལྟ་བུའི་གདམས་པ་ཟབ་མོའི་ཉམས་ལེན་བྱེད་ཚེ༔ ཞག་གྲངས་བཅུ་གསུམ་གྱི་བར་དུ༔ དངོས་ཉམས་རྨི་ལམ་ཐམས་ཅད་དུ་གྲུབ་པའི་དབང་ཕྱུག་ཛཱ་ཧ་བཱིར་དང་འབྲལ་མེད་བྱུང་ཞིང༔ ཉིན་རེ་མེ་དབང་ཚར་རེ་བྱིན་འབེབ་བཀྲ་ཤིས་ཚར་རེ་གནང་ཞིང་གདམས་པ་མཐའ་དག་ཐོབ་པའི་ཉམས་སྣང་ཡང་བྱུང་རུང༔ འདི་དག་ནི་རགས་བསྡུས་ཕྲན་བུ་ཡིན་ཞིང་ཉམས་སུ་ལེན་པའི་ཆོས་བྱེད་ཕོ་མོ་ཐམས་ཅད་ལ༔ ཟབ་ཆོས་འདིའི་བྱིན་རླབས་ཐུགས་རྗེ་ངོ་མཚར་རྟགས་གཞན་དང་མི་འདྲ་བ་ཞིག་འབྱུང་ཞིང༔ འགྲོ་བ་ཀུན་ལའང་ཕན་བདེ་རྒྱ་ཆེན་པོ་གཅིག་ཡོང་བསམ་པས༔ ལས་ལྡན་བདག་གི་རྗེས་སུ་ཞུགས་པ་རྣམས་ཀྱིས་སེམས་ལ་ཞོག༔ ཅེས་རྣལ་འབྱོར་དབང་ཕྱུག་ཛཱ་ཧ་བཱིར་གྱི་གདམས་པ་ངོ་མཚར་བའི་ལོ་རྒྱུས་འདི་ཉིད༔ ཤུད་པུ་དཔལ་སེང་གི་གདུང་ཕྲེང་ལས་བྱོན་པ༔ ཞབས་དྲུང་ཉི་ཟླ་རྡོ་རྗེས་བསྐུལ་ངོར༔ འཇའ་ལུས་སྣང་སྟོང་རང་གྲོལ་གྱིས་བརྗེད་ཐོར་བྲིས་པའོ༔ འཇའ་ལུས་འོད་ཕུང་རང་གྲོལ་ལས༔ སྔོན་འགྲོ་བྱིན་རླབས་ཐུགས་རྗེའི་འོད་འབར་བཞུགས་སོ༔ ན་མོ་གུ་རུ་ཛཱ་ཧ་བཱི་ར༔ བླ་མ་མཆོག་དང་ཡི་དམ་ལྷ༔ མཁའ་འགྲོ་ཆོས་སྐྱོང་དབྱེར་མེད་པའི༔ རྣལ་འབྱོར་དབང་ཕྱུག་ཛཱ་ཧ་བཱིར༔ འཁོར་དང་བཅས་ལ་ཕྱག་འཚལ་ལོ༔ འདིར་གྲུབ་པའི་
དབང་ཕྱུག་ཛཱ་ཧ་བཱིར་གྱི་གདམས་པ༔ ཁྱད་པར་གྱི་སྔོན་འགྲོ་ལ་གསུམ་སྟེ༔ སྐྱབས་འགྲོ་སེམས་བསྐྱེད་དང་ལྡན་པའི་སྒོ་ནས༔ ཚངས་པའི་གནས་བཞི་བསྒོམ༔ ལུས་གནད་མོས་གུས་དང་ལྡན་པའི་སྒོ་ནས༔ བླ་མའི་རྣལ་འབྱོར་བསྒོམ༔ ལྷག་བསམ་རྣམ་དག་གི་སྒོ་ནས༔ མཎྜལ་དབང་བཞི་ལེན་པའོ༔ དང་པོ་སྐྱབས་འགྲོ་ནི༔ བདག་སོགས་ནམ་མཁའ་དང་མཉམ་པའི་སེམས་ཅན་ཐམས་ཅད།༔ སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་མཆིའོ༔ ཆོས་སྐུ་ལོངས་སྐུ་སྤྲུལ་སྐུ་གསུམ་ལ་སྐྱབས་སུ་མཆིའོ༔ བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆིའོ༔ རྩ་དང་རླུང་དང་ཐིག་ལེ་གསུམ་ལ་སྐྱབས་སུ་མཆིའོ༔ རང་སེམས་སྟོང་གསལ་ཆོས་ཀྱི་སྐུ་ལ་སྐྱབས་སུ་མཆིའོ༔ སྨོན་པ་སེམས་བསྐྱེད་ནི༔ སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ༔ དེའི་ཕྱིར་དུ་བདག་གིས་འཇའ་ལུས་ཆོས་སྐུ་སྒྲུབ་པའི་ལམ་ཟབ་མོ་ཉམས་སུ་བླང་བར་བགྱིའོ༔ དོན་དམ་སེམས་བསྐྱེད་ནི༔ ན་མོ༔ བདག་གིས་སེམས་ཅན་ཀུན་དོན་དུ༔ འདི་བཟུང་འཁོར་བ་དོང་ནས་མ་སྤྲུགས་བར༔ ཚད་མེད་བཞི་ལྡན་ལྷག་བསམ་རྨང་བཏིང་ནས༔ སྐུ་གསུམ་གཏན་སྲིད་ཟིན་པར་སེམས་བསྐྱེད་དོ༔ གསུམ་མམ་བདུན་བརྗོད༔ རྡོར་སེམས་སྒོམ་བཟླས་ནི༔ ཧཱུྃ༔ རང་ལུས་ཐ་
མལ་སྤྱི་གཙུག་ཉི་ཟླའི་སྟེང༔ བླ་མ་རྡོར་སེམས་རྡོ་རྗེ་སྐྱིལ་ཀྲུང་བཞུགས༔༔ ཞི་ཚུལ་རྒྱན་ལྡན་ཐུགས་སྲོག་བདུད་རྩིའི་ཆུ༔ ཚངས་བུག་ནས་ཞུགས་ཉམས་ཆག་དག་གྱུར་ཅིག༔ ཡིག་བརྒྱ་བརྒྱ་སྟོང་ཁྲི་འབུམ་བཟླས་བརྗོད་བྱ༔ བླ་མའི་རྣལ་འབྱོར་བསྒོམ་པ་ནི༔ ཨོཾ་མ་ཧཱ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ༔ ཕྱི་ནང་ཆོས་ཀུན་སྟོང་གསལ་འཛིན་མེད་ངང༔ རང་ཉིད་དཔྲལ་བར་འཇའ་ཚོན་འོད་ལྔའི་ཀློང༔ རྩ་བའི་བླ་མ་གྲུབ་ཆེན་ཛཱ་ཧ་བཱིར༔ རབ་བྱུང་ཛོ་ཀི་རྡོ་རྗེའི་འདུག་སྟངས་ཅན༔ སྐུ་གསུང་ཐུགས་ལས་འོད་ཟེར་དཔག་མེད་འཕྲོས༔ རྒྱལ་བ་རབ་འབྱམས་བྱིན་རླབས་མ་ལུས་ཀུན༔ ཚུར་འདུས་ཡོངས་གྱུར་བླ་མའི་གནས་ལྔར་ཐིམ༔ བླ་མ་འོད་ཕུང་འཇའ་ཟེར་བདེ་དྲོད་འབར༔ འཇའ་ལུས་འོད་སྐུར་གྲོལ་བའི་དངོས་གྲུབ་སྩོལ༔ དེ་ནས་བརྒྱུད་པའི་གསོལ་འདེབས་ནི༔ ཨོཾ་ཨཱཿཧཱུྃ༔ ཀུན་བཟང་སྣང་མཐའ་བྱམས་མགོན་སྤྱན་རས་གཟིགས༔ རིག་འཛིན་པདྨ་མ་ཧཱ་ནཱ་ཐ་ལ༔ རྩེ་གཅིག་མི་འབྲལ་སྙིང་ནས་གསོལ་བ་འདེབས༔ རྩ་མདུད་རང་སར་གྲོལ་བར་བྱིན་གྱིས་རློབས༔ འབྱུང་ལྔའི་རླུང་ཟས་མཐར་ཕྱིན་འབྱོངས་པ་དང༔ ཟག་མེད་འོད་ལུས་འགྲུབ་པར་བྱིན་གྱིས་རློབས༔ ཛཱ་ཧ་བཱིར་དང་བཛྲ་ནཱ་ཐ་དང༔ གཏེར་སྟོན་གནམ་ལྕགས་རྫོགས་ཆེན་ཚུལ་ཁྲིམས་མཚན༔ རྩེ་གཅིག་མི་འབྲལ་སྙིང་ནས་གསོལ་བ་འདེབས༔ རྩ་མདུད་རང་
སར་གྲོལ༴ འབྱུང་ལྔའི་༴ ཟག་མེད༴ འོད་གསལ་མཆོག་ལྡན་ཆོས་རྒྱལ་རྡོ་རྗེ་དང༔ རྩ་བའི་བླ་མ་ཡི་དམ་མཁའ་འགྲོ་ལ༔ རྩེ་གཅིག༴ རྩ་མདུད༴ འབྱུང་ལྔའི༴ ཟག་མེད༴ བཀའ་སྲུང་གཟའ་བརྒྱད་ཟབ་མོ་རླུང་ཁྲིད་དང༔ གནས་ཡུལ་སྐྱོང་བའི་ཆོས་སྲུང་དམ་ཅན་ལ༔ རྩེ་གཅིག༴ རྩ་མདུད༴ འབྱུང་ལྔའི༴ ཟག་མེད༴ རྩ་བརྒྱུད་བླ་མ་རྣམས་ལ་གསོལ་བཏབ་མཐུས༔ སྟོང་ཕྲག་བདུན་ཅུ་རྩ་གཉིས་རྩ་མདུད་རྣམས༔ མ་ལུས་གྲོལ་ནས་འཕོ་མེད་མཆོག་གི་སྐུ༔ འགྱུར་བ་མེད་པ་ཚེ་འདིར་ཐོབ་པར་ཤོག༔ དེ་ནས་མཎྜལ་འབུལ་བ་ནི༔ ཨོཾ་ཨཱཿཧཱུྃ༔ སྒྱུ་ལུས་སྣང་སྟོང་རྩ་འཁོར་བདུན་ལྡན་ནང༔ དྭངས་མ་ཡེ་ཤེས་དཀར་དམར་འོད་སྐུར་འཁྱིལ༔ དགའ་བཞི་མཉམ་སྦྱོར་བདེ་ཆེན་མཎྜལ་འདི༔ སྐུ་གསུམ་བླ་མ་བརྒྱུད་པར་བཅས་ལ་འབུལ༔ རྩ་རླུང་བདེ་དྲོད་འབར་བའི་དངོས་གྲུབ་སྩོལ༔ གུ་རུ་རཏྣ་མཎྜལ་པཱུ་ཛ་ཧཱུྃ༔ དབང་བཞི་ཞུ་བ་ནི༔ ཨོཾ་ཨཱཿཧཱུྃ༔ ཧེ་རུ་ཀ་དཔལ་ཁྱབ་བདག་སྲིད་ཞིའི་མགོན༔ མི་ཟད་རྒྱན་གྱི་འཁོར་ལོའི་གཟི་བྱིན་མཆོག༔ བདག་སོགས་ལུས་ངག་ཡིད་ལ་སྨིན་གྲོལ་སྩོལ༔ བུམ་དབང་གསང་དབང་ཤེས་རབ་ཡེ་ཤེས་དབང༔ བཞི་པའི་དབང་བསྐུར་ས་ལམ་མཐར་ཕྱིན་ནས༔ ཟུང་འཇུག་ཀུན་ཁྱབ་བདེ་ཆེན་མཆོག་ཐོབ་ཤོག༔ ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ༔ དེ་ནས་སྨོན་
ལམ་བཏབ་པ་ནི༔ ཧོ༔ བདག་གཞན་མ་གྱུར་འགྲོ་བ་རྣམས༔ རྙེད་དཀའི་དལ་འབྱོར་གཅེས་མཐོང་ཞིང༔ མི་རྟག་འཆི་བའི་སྐྱོ་ཤས་ཀྱིས༔ འཁོར་བའི་གནས་ཚུལ་འཇིགས་མཐོང་ཞིང༔ འགྲོ་ཀུན་ཕ་མར་གཅེས་འཛིན་ཞིང༔ སྣང་བ་སྙིང་རྗེའི་རྣམ་པ་དང༔ སྟོང་ཉིད་སྙིང་རྗེའི་སྲོག་འཛིན་ཅིང༔ ཟབ་ལམ་རྒྱུད་སྡེ་བཞི་ཡི་དོན༔ ཚེ་གཅིག་སངས་རྒྱས་སྒྲུབ་པའི་ལམ༔ བསྐྱེད་རྫོགས་གནད་ཀུན་རབ་རྟོགས་ནས༔ རྩ་རླུང་ཐིག་ལེ་ལས་རུང་ཞིང༔ འཇིགས་མེད་འཇའ་ལུས་རྡོ་རྗེའི་སྐུ༔ འཕོ་མེད་མངོན་དུ་འགྱུར་བར་ཤོག༔ བཀྲ་ཤིས་ནི༔ ཨོཾ་ཨཱཿཧཱུྃ༔ སྐུ་ཡི་བཀྲ་ཤིས་མི་ཤིགས་རྡོ་རྗེའི་སྐུ༔ གསུང་གི་བཀྲ་ཤིས་འགག་མེད་ཚངས་པའི་གསུང༔ ཐུགས་ཀྱི་བཀྲ་ཤིས་རིག་སྟོང་འཁྲུལ་པ་བྲལ༔ ཡོན་ཏན་བཀྲ་ཤིས་བདེ་སྟོང་ལྷུན་གྱིས་གྲུབ༔ ཕྲིན་ལས་བཀྲ་ཤིས་ཀུན་ཁྱབ་ཐུགས་རྗེའི་རྩལ༔ སྐྱེ་འཆི་གཉིས་བྲལ་འཕོ་མེད་བདེ་བ་ཆེ༔ འཇའ་ལུས་འོད་སྐུར་འགྲུབ་པའི་བཀྲ་ཤིས་ཤོག༔ ཅེས་འཇའ་ལུས་འོད་ཕུང་རང་གྲོལ་གྱི་སྔོན་འགྲོ་བྱིན་རླབས་ཐུགས་རྗེ་འོད་འབར་ཞེས་བྱ་བ༔ འཇའ་ལུས་སྣང་སྟོང་རང་གྲོལ་གྱིས་བགྱིས་པའོ༔ དྲང་སྲོང་ཆེན་པོ་གཟའ་བརྒྱད་ཀྱིས་སྲུངས་ཤིག༔ བཛྲ་རཀྵ་རཱ་ཧུ་ལ་ཧཱུྃ༔ འཇའ་ལུས་འོད་ཕུང་རང་
གྲོལ་ལས༔ དབང་མཆོག་བདེ་ཆེན་བདུད་རྩིའི་ཆུ་རྒྱུན་བཞུགས་སོ༔ ན་མོ་གུ་རུ་དྷེ་ཝ་ཌཱ་ཀཱི་ནཱི་ཛཱ་ཧ་བཱིར་སིདྡྷི་བྷ་ཝནྟུ༔ གྲུབ་པའི་དབང་ཕྱུག་ཛཱ་བཱིར་འཁོར་མཁའ་འགྲོ་རྒྱ་མཚོའི་ཚོགས་ལ་ཕྱག་འཚལ་ལོ༔ འདིར་དད་ལྡན་སློབ་མ་ཚེ་འདི་བློས་བཏང་ཞིང་ཕྱི་མ་དོན་དུ་གཉེར་བའི་སྐལ་ལྡན་རྣམས་ལ༔ གཏུམ་མོའི་མེ་དབང་ཉོན་མོངས་བག་ཆགས་སྲེག་བྱེད་བདེ་ཆེན་བདུད་རྩིའི་ཆུ་རྒྱུན་གྱི་ལག་ལེན་ནི༔ དུས་སྦྱོར་ཚེས་གྲངས་བཟང་པོ་ལ༔ གནས་ཁང་ཕྱག་དར་རྐྱང་ནུལ་བྱ༔ སྟེགས་བུ་མདའ་གང་གྲུ་བཞིའི་སྟེང༔ ཆང་དང་སིནྡྷུ་ར་ཡིས་བྱུགས༔ དཀྱིལ་འཁོར་ཕོ་བྲང་པད་འདབ་བརྒྱད༔ སྒོ་དང་རྟ་བབས་མུ་ཁྱུད་བཅས༔ ལྟེ་བ་ཆོས་འབྱུང་ཉིས་བརྩེགས་ནང༔ པདྨ་འདབ་བཞི་ཕྱོགས་ཚོན་བྱ༔ དེ་དབུས་ཉི་ཟླ་ཁྲི་འུ་ཁར༔ བུམ་པ་མགུལ་ཆིངས་ཁ་རྒྱན་དང༔ ཤེལ་དང་མེ་ལོང་ཙཀ་ལི་བཤམ༔ གཡོན་དུ་བྷནྡྷ་མཚན་ལྡན་ནང༔ བྱང་སེམས་དཀར་དམར་གསང་རྫས་སྦྱར༔ མེ་ལོང་དཀྱིལ་འཁོར་ཁ་གཅོད་ཅན༔ དར་དམར་ལྡིང་གུར་ཕུབ་པ་བཤམ༔ གཡས་སུ་གཏོར་མ་འབར་བ་ལ༔ གཡུང་དྲུང་རིས་ཀྱིས་བརྒྱན་པ་བཤམ༔ རྒྱབ་ཏུ་དཔལ་འབར་མདའ་གང་ཚད༔ དཀར་སེར་དམར་ལྗང་མཐིང་ལྔ་བཤམ༔ མདུན་དུ་ཏིང་ལོ་ཕྱག་ལེན་བཞིན༔ མེ་རི་གསུམ་གསུམ་
དག་དང་བཅས༔ དེ་དབུས་ཆས་དབང་རྫས་ཀུན་དང༔ སློབ་མ་དུ་ཡོད་ཐམས་ཅད་ཀྱི༔ རས་དཀར་སྒོམ་ཐག་ཨང་རག་ལ༔ བསང་སྦྱང་ཁྲུས་དང་བགེགས་བསྐྲད་ལ༔ ཡིག་འབྲུ་གསུམ་དང་རཾ་བྲིས་ནས༔ ཡེ་ཤེས་མེ་དཔུང་འབར་བར་བསམ༔ གཞན་ཡང་ཕྱི་ནང་གསང་མཆོད་དང༔ སྨན་རཀ་གཏོར་མ་རྒྱས་པར་བཤམ༔ ལས་བུམ་འབྱུང་ལྔའི་ལྷ་མོར་བསྐྱེད༔ དེ་ནས་བླ་མས་སྒོམ་བཟླས་ནི༔ རྡོ་རྗེ་ཕག་མོའི་ལས་གཞུང་བསྲང༔ དབང་རྫས་བྱིན་རླབས་ལྡན་པར་བསྐྱེད༔ ལྷག་མ་ཡན་ཆད་གྲུབ་ནས་ཀྱང༔ དེ་ནས་སློབ་མ་རྣམས་ལ་གོང་གི་རས་དཀར་ཨང་རག་སྒོམ་ཐག་བྱིན་རླབས་དང་ལྡན་པ་དེ་བཀོན་ཏེ༔ སློབ་མ་དུ་ཡོད་ཁྲུས་ནས་ཕྱུང༔ དཀྱིལ་འཁོར་བསྐོར་ཞིང་འཛབ་མང་བཟླ༔ ཡོལ་བའི་ཕྱི་རུ་འཁོད་བྱས་ནས༔ ལངས་ཏེ་བརྒྱུད་པའི་གསོལ་འདེབས་དང༔ མཎྜལ་ཕྱག་མཆོད་དྲག་ཏུ་བྱ༔ དེ་ནས་བགེགས་བསྐྲད་མཚམས་བཅད་ཅིང༔ སྲུང་འཁོར་བསྒོམས་ནས་གྲལ་ལ་འཁོད༔ དཔའ་བོ་གཡས་ལ་དཔའ་མོ་གཡོན༔ གདན་དུ་གཡུང་དྲུང་རཾ་མཚན་བཏིང༔ བླ་མས་ཆོས་ཀྱི་ལོ་རྒྱུས་དང༔ ཆོས་བཤད་སྐྱབས་སེམས་ཡན་ལག་བདུན༔ སྔོན་འགྲོའི་ནང་བཞིན་བགྱིས་ནས་ཀྱང༔ འབུད་པ་དགུ་ཕྲུགས་ཡང་ཡང་བྱ༔ ཕྱི་ནང་སྡིག་སྒྲིབ་ཕྱིར་དོར་ནས༔ མེ་ཤེལ་ལྟ་བུར་གསལ་བཏབ་ལ༔ ཞུ་འབུལ་གསོལ་བ་འདི་ལྟར་
བཏབ༔ རྡོ་རྗེ་འཆང་དབང་བླ་མ་དང༔ མཁའ་འགྲོའི་ཚོགས་ལ་གསོལ་བ་འདེབས༔ བདག་ཅག་ཉོན་མོངས་འཁོར་བ་ལས༔ བསྒྲལ་ཕྱིར་ཡེ་ཤེས་དཀྱིལ་འཁོར་དུ༔ བདེ་སྟོང་ཟག་པ་མེད་པ་ཡི༔ དབང་མཆོག་དམ་པ་བསྩལ་དུ་གསོལ༔ སྨིན་ཅིང་གྲོལ་བར་མཛད་དུ་གསོལ༔ ཡེ་ཤེས་བདེ་དྲོད་སྦར་དུ་གསོལ༔ ཞེས་ལན་གསུམ་ཞུས་པའི་ལན་དུ༔ བླ་མས་འདི་ལྟར་བསྒོ་བར་བྱ༔ ཨེ་མ་སྐལ་ལྡན་རིགས་ཀྱི་བུ༔ དཀྱིལ་འཁོར་དམ་པའི་སྒོར་ཞུགས་ནས༔ སྨིན་ཅིང་གྲོལ་བར་འདོད་པ་ན༔ བླ་མའི་བསྒོ་བ་ཉན་པ་དང༔ དམ་ཚིག་ཚུལ་བཞིན་བསྲུང་ནུས་ན༔ ཇི་ལྟར་འདོད་པ་སྦྱིན་པར་བྱ༔ ཞེས་པའི་ལན་དུ༔ ཀྱེ་ཧོ་བླ་མ་རྡོ་རྗེ་འཛིན་པ་ཡིས༔ ཇི་ལྟར་བསྒོ་བའི་གསུང་ཉན་ཅིང༔ དམ་ཚིག་དག་ལས་མི་འདའ་བསྲུང༔ ཐུགས་རྗེ་བརྩེ་བས་གཟུང་དུ་གསོལ༔ ཞེས་ཞུས་ནས་སློབ་མའི་ལག་ཏུ་རྡོ་རྗེ་གཏད༔ ལྕེ་ཐོག་ཏུ་བདུད་རྩི་མྱང་དུ་བཅུག་ལ༔ ཧཱུྃ་ཧྲཱི༔ ང་ནི་དབང་ཆེན་ཧེ་རུ་ཀ༔ ཁྱེད་ལ་དམ་ཚིག་སྦྱིན་པར་བྱ༔ རྩ་བ་ཡན་ལག་དམ་ཚིག་རྣམས༔ ཉམས་པ་མེད་པར་རྟག་ཏུ་སྲུངས༔ གལ་ཏེ་ཉམས་ན་དམྱལ་བར་ལྟུང༔ མ་ཉམས་བྱིན་རླབས་དངོས་གྲུབ་ཐོབ༔ ཁྱོད་ཀྱིས་ཇི་ལྟར་འདོད་པའི་དོན༔ ཐམས་ཅད་མ་ལུས་མྱུར་དུ་འགྲུབ༔ ས་མ་ཡ་ཨུ་ད་ཀ་ཋ་ཋ་ན་ར་ཀན
ཞེས་དམ་ཚིག་གི་རྣམ་དབྱེ་རྒྱས་པར་བཤད༔ དེ་ནས་སློབ་མ་རྣམས་ལ་ཕག་མོའི་བསྐྱེད་རིམ་ཕོག༔ རྡོ་རྗེ་སྐྱིལ་ཀྲུང་ལག་པ་གཉིས་སྤྱི་བོར་ཐལ་མོ་སྦྱར༔ ངག་གནད་རླུང་བཟུང་སྨྲ་བ་བསྐྱུང༔ ཡིད་གནད་མ་ཡེངས་དམིགས་པ་ནི༔ སྤྱི་བོར་ཧཾ་ཡིག་དཀར་པོ་གྱེན་དུ་བཞེངས་པ༔ རྩ་གསུམ་འདུས་མཚམས་སུ་ཨ་ཐུང་གསལ་བཏབ༔ སྙིང་ཁར་དགའ་བ་འཁྱིལ་པ་དམར་པོ་གཡོན་དུ་འཁོར་བར་བསམ༔ བཤང་སྒོར་ཡཾ་ལས་རླུང་གི་དཀྱིལ་འཁོར་གཡོས༔ ཨ་ཐུང་ལས་མེ་འབར་ཞིང་སྤྱི་བོའི་ཧཾ་ལས་བདུད་རྩིའི་རྒྱུན་བབས༔ དགའ་བ་འཁྱིལ་བ་ལ་ཕོག་པས་རྒྱུད་བསྐུལ་ཏེ་རང་དབང་མེད་པར་དྲག་ཏུ་འཁོར་བ་ལས་འོད་ཟེར་དམར་པོ་ཕྱོགས་བཅུར་འཕྲོས༔ བླ་མ་ཡི་དམ་མཁའ་འགྲོ་ཐམས་ཅད་ཉི་ཟེར་ལ་རྡུལ་འཁྲིགས་པ་ལྟ་བུར་བྱོན་པར་བསམ་ལ༔ ཡེ་ཤེས་དབབ་པའི་རྫས་བསྲེགས་ཏེ༔ དཔོན་སློབ་ཐམས་ཅད་དམིགས་པ་བརྟན་པོས༔ རོལ་མོ་སྣ་ཚོགས་སྦིར་ཏེ་བྱིན་འབེབ་སྤྱན་འདྲེན་ནི༔ ཧཱུྃ་ཧྲཱི༔ ཆོས་དབྱིངས་བདེ་ཆེན་དཔལ་རི་འོད་གསལ་ཀློང༔ དག་པ་རབ་འབྱམས་མཁའ་འགྲོའི་འཇའ་སྤྲིན་འཁྲིགས༔ རང་བྱུང་ལྷུན་གྲུབ་པད་འབྱུང་ཡབ་ཡུམ་དང༔ ཞི་ཁྲོ་རབ་འབྱམས་རྩ་གསུམ་དྭངས་མའི་ལྷ༔ འདིར་བྱོན་སྐལ་ལྡན་བུ་ལ་བྱིན་གྱིས་རློབས༔ ཧཱུྃ་ཧྲཱི༔ ཨོ་རྒྱན་དུར་ཁྲོད་ཕོ་བྲང་ཆེན་པོ་ནས༔ ཆོས་
དབྱིངས་ངང་ལས་ཁྲོ་མོའི་སྐུར་སྤྲུལ་མ༔ རྡོ་རྗེ་ཕག་མོ་དབྱིངས་ནས་སྐུར་བཞེངས་ཤིག༔ འདིར་བྱོན་སྐལ་ལྡན་བུ་ལ་བྱིན་གྱིས་རློབས༔ ཤར་ཕྱོགས་མི་འགྱུར་རྡོ་རྗེའི་གནས་མཆོག་ནས༔ དཀར་མོ་ཞི་མཛད་ཞི་བའི་སྐུར་སྤྲུལ་མ༔ རྡོ་རྗེ་མཁའ་འགྲོ་དབྱིངས་ནས་སྐུར་བཞེངས་ཤིག༔ འདིར་བྱོན་སྐལ་ལྡན་བུ་ལ་བྱིན་གྱིས་རློབས༔ ལྷོ་ཕྱོགས་དཔལ་ལྡན་རིན་ཆེན་གནས་མཆོག་ནས༔ སེར་མོ་རྒྱས་མཛད་རྒྱས་པའི་སྐུར་སྤྲུལ་མ༔ རིན་ཆེན་མཁའ་འགྲོ་དབྱིངས་ནས་སྐུར༴༔ འདིར་བྱོན་སྐལ་ལྡན༴༔ ནུབ་ཕྱོགས་དབང་སྡུད་པདྨའི་གནས་མཆོག་ནས༔ དམར་མོ་དབང་མཛད་དབང་གི་སྐུར་སྤྲུལ་མ༔ པདྨ་མཁའ་འགྲོ་དབྱིངས་ནས་སྐུར༴༔ འདིར་བྱོན་སྐལ་ལྡན༴༔ བྱང་ཕྱོགས་ཚར་གཅོད་ལས་ཀྱི་གནས་མཆོག་ནས༔ ལྗང་མོ་ལས་མཛད་ཕྲིན་ལས་སྐུར་སྤྲུལ་མ༔ ལས་ཀྱི་མཁའ་འགྲོ་དབྱིངས་ནས་སྐུར༴༔ འདིར་བྱོན་སྐལ་ལྡན༴༔ དམ་ཚིག་མཁའ་འགྲོ་སྣ་ཚོགས་མཁའ་འགྲོ་དང༔ ཤ་ཟ་མཁའ་འགྲོ་འཇིག་རྟེན་མཁའ་འགྲོ་དང༔ མཁའ་འགྲོ་སྡེ་ལྔ་སྲུང་མ་ལས་བྱེད་རྣམས༔ ཐུགས་རྗེས་མྱུར་མགྱོགས་གློག་ལྟར་འཁྱུག་ཅིང་བྱོན༔ ཐུགས་རྗེའི་བྱིན་རླབས་འཇའ་འོད་ཐིབས་སེ་ཐིབ༔ ཡེ་ཤེས་རྣམ་ལྔའི་འོད་ཟེར་ཏ་ལ་ལ༔ བདེ་སྟོང་ཟག་མེད་འཇའ་འོད་ཁྱིལ་ལི་ལི༔ འཕོ་མེད་འཇའ་ལུས་
འོད་ཕུང་ཕུངས་སེ་ཕུང༔ དགའ་བཞི་འཛག་བྲལ་བདེ་སྟོང་ཁྲི་ལི་ལི༔ རང་ལུས་སྣང་སྟོང་ལྷ་སྐུར་སྤུངས་སེ་སྤུང༔ བདེ་དྲོད་ཡེ་ཤེས་མེ་དཔུང་ལྷབས་སེ་ལྷབ༔ དྭངས་མ་ཡེ་ཤེས་མེ་དཔུང་སྦར་དུ་གསོལ༔ ཡེ་ཤེས་རྣམ་ལྔའི་མེ་དཔུང་སྦར་དུ་གསོལ༔ རང་བྱུང་གཏུམ་མོའི་བདེ་དྲོད་སྦར་དུ་གསོལ༔ འཇའ་ལུས་འོད་གསལ་ཀློང་དུ་གྲོལ་བ་དང༔ ཟུང་འཇུག་ཀུན་ཁྱབ་བདེ་ཆེན་མཆོག་ཐོབ་ཤོག༔ ཨོཾ་སརྦ་མ་ཧཱ་གུ་རུ་དེ་ཝ་ཌཱ་ཀི་ནཱི་ཛྙཱ་ན་ཛྭ་ལ་རཾ་རཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཨེ་ཨཱ་རལླི་ཧྲིཾ་ཧྲིཾ་ཕེཾ་ཕེཾ་ཛཿཧཱུྃ་བཾ་ཧོ༔ ཞེས་དྲག་ཏུ་བརྗོད་ཅིང་མེ་ཏོག་འཐོར༔ ཕེབས་རྟགས་སྤྱི་དང་མཐུན༔ བརྟན་བྱེད་རྡོ་རྗེ་རྒྱ་གྲམ་སྤྱི་བོར་བཞག་ལ༔ ཏིཥྛ་བཛྲ་གྱིས་ཟུང་འཇུག་ཏུ་བསྟིམ༔ འབྲུ་གསུམ་བརྗོད༔ དེ་ནས་སོ་སོར་བསྟིམས་པས་ལྷའི་སྐུ་གསུང་ཐུགས་སུ་གྱུར་པར་བསམ༔ དེ་ནས་དངོས་གཞི་དབང་བསྐུར་བ་ལ་མཎྜལ་ཕུལ་ཏེ༔ དབང་དོན་གསོལ་བ་བཏབ་པ་ནི༔ ཧཱུྃ་ཧྲཱི༔ བླ་མ་ཡི་དམ་མཁའ་འགྲོ་ལ༔ བདག་སོགས་གུས་པས་གསོལ་བ་འདེབས༔ དབང་བསྐུར་བྱིན་རླབས་བསྩལ་དུ་གསོལ༔ སྨིན་ཅིང་གྲོལ་བར་མཛད་དུ་གསོལ༔ ཞེས་ལན་གསུམ་གསོལ་བ་བཏབ༔ བུམ་དབང་བསྐུར་བ་ནི༔ ཧཱུྃ་ཧྲཱི༔ ཆོས་སྐུ་ལོངས་སྐུ་སྤྲུལ་པའི་སྐུ༔ བླ་མ་སྐུ་གསུམ་བདེ་བ་ཆེ་
རིགས་ཀྱི་བུ་ལ་བྱིན་གྱིས་རློབས༔ བྱིན་རླབས་བདེ་སྟོང་དབང་བསྐུར་སྩོལ༔ ཨོཾ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛཿཙནྡྷ་ལཱི་ཤྭ་ར་སརྦ་ཏ་ཐཱ་ག་ཏེ་ཤྭ་ར་རཾ་སྭ་བྷཱ་ཝ་ཨཱཏྨ་ཀོ྅་ཧཾ་ཨ་བྷི་ཥིཉྩ་ཨཱོཾ༔ ཅེས་པས་གནས་ལྔར་དབང་བསྐུར་བུམ་ཆུས་ཁྲུས་འཐུང་བྱེད་དུ་བཅུག༔ དེ་ནས་ཐོད་པ་མེ་ལོང་མར་མེ་གནས་གསུམ་དུ་བཞག་ལ༔ ཧཱུྃ་ཧྲཱི༔ བྱིན་རླབས་མཁའ་འགྲོ་བདེ་སྟེར་མ༔ ཡེ་ཤེས་དབྱིངས་ཀྱི་རང་བཞིན་མཆོག༔ མཁའ་འགྲོ་རྒྱ་མཚོའི་དབང་བསྐུར་བས༔ བདེ་དྲོད་ཕྲིན་ལས་དབང་ཐོབ་ཤོག༔ ཨོཾ་སརྦ་མ་ཧཱ་གུ་རུ་བཛྲ་དེ་ཝ་ཌཱ་ཀི་ནཱི་ཛྙཱ་ན་ཛྭ་ལ་རཾ་རཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ༔ ཝཱ་ཀ་ཨ་བྷི་ཥིཉྩ་ཧཱུྃ༔ དེ་ནས་སློབ་མ་རྣམས་ལ་རྩ་འཁོར་ལྔ་གྲངས་ཅན་གྲངས་མེད་ཀྱི་རྩ་དང་རླུང་ཐིག་ལེའི་གནས་ཚུལ་བཤད་ཅིང༔ དེ་རྣམས་སུ་བླ་མ་ཡབ་ཡུམ་གྱི་བྱང་སེམས་ཀྱིས་གང་བར་བསམ་སྟེ༔ འབར་འཛག་གི་དམིགས་པ་ཕོག་ལ༔ བླ་མས་བདུད་རྩི་བྱང་སེམས་གསང་རྫས་ཀྱི་བྷནྡྷ་ཁ་ཕྱེས་ཏེ་སློབ་མ་རྣམས་ཀྱི་ཁར་བྱིན་ཞིང༔ གནས་ལྔར་ཐིག་ལེ་བྱས་ལ་འདི་སྐད་དོ༔ ཧཱུྃ་ཧྲཱི༔ ལུས་ལ་རྩ་རླུང་ཐིག་ལེ་བྱང་སེམས་གནས༔ དེ་དག་མ་དང་མཁའ་འགྲོའི་བཞུགས་གནས་ཏེ༔ ངོ་བོ་སངས་རྒྱས་རྣམས་ཀྱི་རང་བཞིན་ཅན༔ གཞན་དུ་བསྒོམ་བྱ་སྒོམ་བྱེད་ཅི་ལ་ཡོད༔ དབུ་མ་སྙིང་པོའི་
རྩ་རུ་བྱང་སེམས་གནས་པའི་ཕྱིར༔ རྩ་རླུང་ཐིག་ལེ་དྲོད་ཀྱི་དབང་བསྐུར་རོ༔ བུམ་དབང་གི་སྔགས་བརྗོད་དབང་བསྐུར་ལ༔ ཧོ༔ སྐལ་ལྡན་ཁྱོད་ལ་རྩ་རླུང་ཐིག་ལེ་དྲོད་ཀྱི་དབང་བསྐུར་པས་བདེ་དྲོད་རྟོགས་པ་རྒྱུད་ལ་སྐྱེས་ནས༔ བཅོམ་ལྡན་རྟ་ཕག་ཡབ་ཡུམ་གྱི་གོ་འཕང་ཚེ་འདི་ཉིད་ལ་ཐོབ་པར་གྱུར་ཅིག༔ ཅེས་བརྗོད༔ རྡོར་དྲིལ་སྙིང་ཁར་བཞག་ལ༔ ཧཱུྃ་ཧྲཱི༔ བླ་མ་དཔལ་ལྡན་རྡོ་རྗེ་འཆང༔ རིགས་ཀྱི་བུ་ལ་དབང་བསྐུར་བས༔ བྱིན་རླབས་བདེ་དྲོད་རང་འབར་ཞིང༔ བློ་འདས་མཐའ་བྲལ་རྟོགས་པར་ཤོག༔ ཨོཾ་ཨཱཿཧཱུྃ་ཧོཿཏྲཱཾ་ཧྲཱིཿཨཱ༔ ཨ་བྷི་ཥིཉྩ་ཧཱུྃ༔ ལག་པར་ཡང་སྦྱིན༔ མར་མེ་ལག་མཐིལ་གཉིས་དང་སྤྱི་བོར་བཞག་ལ༔ ཧཱུྃ་ཧྲཱི༔ ཉོན་མོངས་ཚང་ཚིང་བུད་ཤིང་སྲེག༔ ཡེ་ཤེས་གསལ་བའི་སྒྲོན་མེ་མཆོག༔ སྐལ་ལྡན་བུ་ལ་དབང་བསྐུར་བས༔ ཆགས་བྲལ་བདེ་དྲོད་འབར་བར་ཤོག༔ ཨཱོཾ་ཀརྨ་མཱ་ལེ་མ་ཧཱ་སུ་ཁ་ཧ་རི་ནི་ས་ཨ་བྷི་ཥིཉྩ་ཧོ༔ དེ་ནས་དཔལ་འབར་གྱི་དབང་བསྐུར་བ་ནི༔ ཧཱུྃ་ཧྲཱི༔ དཔལ་འབར་མེ་དཔུང་འཇའ་འོད་གཞལ་ཡས་སུ༔ བླ་མ་རྩ་གསུམ་འོད་ཕུང་འཇའ་ཟེར་འཁྲིགས༔ མ་སྲིང་མཁའ་འགྲོ་གྲངས་མེད་རྣམ་མང་འཚོགས༔ ཡེ་ཤེས་འོད་ལྔའི་མེ་དཔུང་ལྷབས་སེ་ལྷབ༔ བག་ཆགས་གཉིས་འཛིན་བུད་ཤིང་བསྲེགས་གྱུར་ནས་
གཞོན་ནུ་བུམ་སྐུར་འཕོ་མེད་འཇིགས་བྲལ་ཤོག༔ འཛབ་བརྗོད་དབང་དོན་ངོ་སྤྲོད་བྱ༔ རས་དབང་བསྐུར་བ་ནི༔ ཧཱུྃ་ཧྲཱི༔ གཟུང་འཛིན་གོས་སྤངས་རས་དཀར་དྲི་མེད་དང༔ བདེ་སྟོང་ཟུང་འཇུག་ཐབས་ཤེས་སྒོམ་ཐག་དང༔ མཁའ་འགྲོ་དབང་སྡུད་དར་དམར་ཨང་རག་དང༔ མཁའ་སྤྱོད་བགྲོད་པའི་དུར་ཁྲོད་ཆས་དབང་གིས༔ སྐལ་ལྡན་རིགས་ཀྱི་བུ་ལ་དབང་བསྐུར་པས༔ སྣང་བ་དབང་སྡུད་མཁའ་སྤྱོད་མྱུར་བགྲོད་ཤོག༔ འཛབ་གོང་བཞིན་བརྗོད་དོ༔ དེ་ནས་གཏོར་དབང་བསྐུར་བ་ནི༔ ཧཱུྃ་ཧྲཱི༔ ཞི་རྒྱས་དབང་དྲག་ཐོགས་མེད་རྒྱལ༔ ཕྲིན་ལས་ཡོངས་རྫོགས་བཀྲ་ཤིས་འབར༔ སྐལ་ལྡན་བུ་ལ་དབང་བསྐུར་བས༔ འབར་འཛག་བདེ་དྲོད་མཐར་ཕྱིན་ཞིང༔ བར་ཆད་བདུད་ལས་རྒྱལ་བར་ཤོག༔ གོང་གི་འཛབ་དང་བཅས་པས་གནས་གསུམ་དུ་བསྐུར༔ དེ་ལྟ་བུའི་དབང་ཟབ་མོ་ཡང་གསང་རྨད་དུ་བྱུང་བ་ཐོབ་ནས༔ དམ་ཚིག་བསྲུང་བ་གལ་ཆེ༔ དམ་ཚིག་རྒྱས་པར་གཞན་དུ་ཤེས༔ བསྡུ་ན་འདི་ལྟར་བསྲུང་བར་གཅེས༔ རྒྱུད་ལས༔ བླ་མས་ཅི་གསུང་རྒྱལ་བའི་བཀའ༔ རྒྱལ་བའི་བཀའ་ལས་འདའ་མི་བྱེད༔ ཁྲི་དྲུག་རྡོ་རྗེ་དམྱལ་བར་སྐྱེ༔ དེ་མཐར་དམྱལ་བ་ཤམ་བྷ་ལ༔ སྡུག་བསྔལ་བཤད་ཀྱིས་མི་ལང་མྱོང༔ དམ་ཚིག་ཉམས་
པའི་གསོན་པ་བས༔ དམ་ཚིག་གཙང་མར་ཤི་བ་རུང༔ བཙུན་པ་འདུལ་ཁྲིམས་མེད་པ་དང༔ སྔགས་པ་དམ་ཚིག་མེད་པ་དང༔ བུད་མེད་ངོ་ཚ་མེད་པ་གསུམ༔ གང་ལ་མི་གཏོགས་མི་སྲིད་དོ༔ དེ་བས་འབད་པ་དུ་མ་ཡིས༔ ཉོན་མོངས་རྣམ་པར་འཇོམས་པ་དང༔ མི་དགེ་སྤོང་ལ་བརྩོན་པར་གྱིས༔ དམ་ཚིག་ཉམས་པའི་མི་དག་ལ༔ རྨི་ལམ་ངན་པ་ཐམས་ཅད་རྨི༔ མཚན་མ་ངན་པ་ཐམས་ཅད་འབྱུང༔ ལྟས་ངན་ཐམས་ཅད་འབྱུང་བ་ཡིན༔ ལོ་སྐེག་ཟླ་སྐེག་ཞག་གི་སྐེག༔ དུས་མ་ཡིན་པར་འཆི་བར་འགྱུར༔ གཤིན་རྗེའི་ཞགས་པ་ཐམས་ཅད་གདེངས༔ གདོན་བགེགས་ཆེ་དགུ་ཐམས་ཅད་གནོད༔ བཀྲ་མི་ཤིས་པ་ཐམས་ཅད་འབྱུང༔ རྣམ་པར་གཡེང་བ་ཐམས་ཅད་འདུ༔ རིམས་ཀྱི་ནད་རིགས་ཐམས་ཅད་འགོ༔ ཀླུ་དང་ས་བདག་གཉན་རྣམས་གནོད༔ རྒྱལ་པོ་ཆོམ་རྐུན་མེ་ཆུ་དུག༔ འཇིགས་པ་བཅུ་དྲུག་ཚེ་འདིར་འབྱུང༔ གཞན་ལས་དམ་ཉམས་སློབ་མར་མིན༔ དམ་ཚིག་ཉམས་པའི་མི་དག་དང༔ ཡུལ་ལུང་གཅིག་ཏུ་མི་སྡོད་ཅིང༔ ཆུ་ཀླུང་གཅིག་ལ་མི་འཐུང་ངོ༔ ཞེས་དང༔ གཞན་དུ་དམ་ཚིག་ཉམས་པ་དང༔ རང་གི་དམ་ཚིག་ཉམས་པ་ལ༔ སྤྱིར་གསང་སྔགས་དམ་ཚིག་གི་ཆོས་འབྲེལ་སོགས༔ མ་འབྲེལ་བར་བྱེད་དགོས་ཏེ༔ བཅོམ་ལྡན་ཐུབ་པའི་དབང་
པོའི་ཞལ་ནས༔ བླ་མར་སྨད་པའི་གང་ཟག་ནི༔ རྨི་ལམ་དུ་ཡང་མཐོང་མི་བྱ༔ ཞེས་དང༔ ཕ་མ་གཉིས་བསད་དགྲ་བཅོམ་ལྔ་བརྒྱ་བཀྲོངས༔ དེ་བཞིན་གཤེགས་པའི་སྐུ་འབུམ་བརྒྱ་ཕྲག་བཤིགས༔ དེ་ལས་བླ་མ་རྡོ་རྗེ་འཛིན་པ་ལ༔ ལོག་ལྟ་སྐད་ཅིག་ཙམ་ལ་སྐྱེས་གྱུར་ན༔ རྣམ་སྨིན་བརྒྱ་ཕྲག་གཉིས་ཀྱིས་ཆེ་བར་འགྱུར༔ ཞེས་དང༔ ཉན་ཐོས་རང་རྒྱལ་བྱང་སེམས་དང༔ གསང་སྔགས་དམ་ཚིག་མ་ཉམས་བསྲུང༔ ཁྱད་པར་དམ་ཚིག་སྐུ་གསུང་ཐུགས༔ སྲོག་ལ་བབས་ཀྱང་བསྲུང་བར་བྱ༔ ཞེས་གསུངས་པ་ལྟར༔ སྐུ་གསུང་ཐུགས་སོགས་ཀྱི་དམ་ཚིག་མ་ཉམས་པར་བྱའོ༔ དམ་ཚིག་སྲུང་བའི་ཕན་ཡོན་ནི༔ གནས་སྐབས་སུ་ལུས་ཀྱི་ནད་གདོན་ཞི༔ གཟི་བརྗིད་ཕུན་སུམ་ཚོགས༔ མཐར་ཐུག་འཇའ་ལུས་ཟག་མེད་རྡོ་རྗེའི་སྐུར་གྲོལ་བར་འགྱུར་ཏེ༔ དྲི་མེད་པདྨ་འདབ་བརྒྱད་ཀྱི་རྒྱུད་ལས༔ དམ་ཚིག་ཐེག་ཆེན་ཆོས་ཀྱི་སྲོག༔ མ་ཉམས་སྲུང་བའི་རྣལ་འབྱོར་ལ༔ ཡེ་ཤེས་ཕོ་རྒྱུད་སྤྲིན་ལྟར་འཐིབས༔ མ་དང་མཁའ་འགྲོ་བྲན་བཞིན་འབྲེང༔ དམ་ཅན་སྲུང་མ་བྲན་ལྟར་ཁོལ༔ མཆོག་དང་ཐུན་མོང་དངོས་གྲུབ་འདུ༔ ཞེས་གསུངས་པས༔ དམ་ཚིག་སྤང་བླང་ཤེས་ཤིང་བསྲུང་བ་གལ་ཆེའོ༔ མཚན་བརྗོད་ལས༔ དམ་ཚིག་ཆེན་པོ་དེ་ཉིད་མཁྱེན༔ དབང་པོ་བསམ་པ་མཁྱེན་མཆོག་
གིས༔ ཞེས་གསུངས་པ་ལྟར་རོ༔ དེ་ནས་དགའ་སྟོན་དང་གཏང་རག་གི་མཎྜལ་ཕུལ༔ དབང་འདི་ཤིན་ཏུ་གཉན་པས་ཚུལ་དང་ལྡན་ཞིང་དཀའ་སྤྱད་སྙིང་རུས་ལ་བརྩོན་པ༔ བླ་མ་སངས་རྒྱས་སུ་མཐོང་བ༔ ཅི་གསུང་དང་དུ་ལེན་པ་ལ་སྟེར་བའི་དུས༔ གསེར་གྱི་མཎྜལ་མེད་པ་དང་ཚོགས་འཁོར་མེད་པ་ལ་སྟེར་དུ་མི་རུང་ངོ༔ གསུམ་ལྔ་བདུན་ལས་སྤེལ་མི་རུང༔ དེ་ཡི་དམ་ལས་འགལ་གྱུར་ན༔ དྲང་སྲོང་གཟའ་བརྒྱད་འཁོར་བཅས་ཀྱིས༔ སྙིང་ཁྲག་ཞལ་དུ་བཞེས་ཤིག་རོལ༔ བླ་མའི་རྒྱ༔ མཁའ་འགྲོ་རྣམ་གསུམ་གྱི་རྒྱ༔ དྲང་སྲོང་གཟའ་བརྒྱད་འཁོར་བཅས་ཀྱི་རྒྱ་ཡོད་དོ༔ རཱ་ཧུ་ལ་རཀྵ་སི༔ འཇའ་ལུས་འོད་ཕུང་རང་གྲོལ་ལས༔ དམར་ཁྲིད་སངས་རྒྱས་ལག་འཆང་སྙིང་གི་ཐིག་ལེ་བཞུགས་སོ༔ ན་མོ་གུ་རུ་དེ་ཝ་ཌཱ་ཀི་ནཱི་སརྦ་སིདྡྷི་བྷ་ཝནྟུ༔ ཟབ་མོ་ངེས་པ་དོན་གྱི་མན་ངག་གིས༔ སྐལ་ལྡན་ཚེ་གཅིག་སངས་རྒྱས་སྟེར་བའི་ཆོས༔ ཞེན་ལོག་དད་བརྩོན་ལྷག་བསམ་སྔོན་འགྲོ་བས༔ ཞེས་པས་འདིར་ཚེ་གཅིག་ལུས་གཅིག་ལ་འཇའ་ལུས་ཆོས་སྐུ་སྒྲུབ་པའི་མྱུར་ལམ་ཟབ་མོའི་གདམས་པ་འདི་ཉིད༔ བླ་མ་མཁའ་འགྲོས་དངོས་སུ་ཞུ་དག་དང་བཅས་ཏེ༔ མཚན་རྒྱ་གར་གྱི་སྐད་དུ་བགྱིས་ནས་ལས་དང་སྐལ་བར་ལྡན་པའི་གང་ཟག་རྣམས་ལ་ཟབ་མོ་ངེས་དོན་སྙིང་པོ༔ ལམ་
གྱི་མཆོག་ཏུ་གྱུར་པ་སངས་རྒྱས་ལག་བཅང་གི་གདམས་པ་གསུངས་པའི་དོན་ལ་གསུམ་སྟེ༔ སྔོན་འགྲོ་དངོས་གཞི་རྗེས་དང་གསུམ་མོ༔ དང་པོ་སྔོན་དུ་འགྲོ་བ་ལ་ཡང་གསུམ་སྟེ༔ ཐུན་མོང་དང་ཐུན་མོང་མ་ཡིན་པ་དང་ཁྱད་པར་གྱི་ཐུན་མོང་ངོ༔ དེ་ལ་དང་པོ་ཐུན་མོང་ནི༔ ལམ་འདི་ཉིད་ཉམས་སུ་ལེན་པར་འདོད་པའི་གང་ཟག་རྣམས་ཚེ་གཅིག་ལུས་གཅིག་གིས་སངས་རྒྱས་སྒྲུབ་པར་བྱེད་པ་ལ༔ བར་ཆད་ཀྱིས་མི་ཚུགས་པ་སྔགས་སྲུང་གི་མན་ངག་རྣམ་བཞི་དང༔ དལ་འབྱོར་རྙེད་དཀའ་དང༔ འཆི་བ་མི་རྟག་པ༔ ལས་རྒྱུ་འབྲས༔ འཁོར་བའི་ཉེས་དམིགས༔ རིགས་དྲུག་གི་སྡུག་བསྔལ་བསམ་པ་ནི་སྤྱི་དང་མཐུན་ནོ༔ གཉིས་པ་ཐུན་མོང་མ་ཡིན་པ་ལ་ཁྱད་ཆོས་བཞི་སྟེ༔ འཁོར་བའི་སྡུག་བསྔལ་མཐའ་དག་སྐྱོན་དུ་ཤེས་ཏེ༔ འཇིག་རྟེན་གྱི་ཕུན་སུམ་ཚོགས་པ་ལ་ཞེན་པ་ལོག་པའི་ཁྱད་ཆོས༔ ཐར་པའི་བདེ་བ་མཐའ་དག་ཡོན་ཏན་དུ་ཤེས་ཏེ༔ དེ་ཉིད་ལ་བསྒྲུབ་འདོད་ཀྱི་མོས་གུས་དང་དད་པ་བསྐྱེད་པའི་ཁྱད་ཆོས༔ ཐར་པའི་བདེ་བ་བསྒྲུབ་པའི་ཚེ༔ རྣམ་གཡེང་ལེ་ལོ་སྤངས་ཏེ་བརྩོན་འགྲུས་དང་ལྡན་པའི་ཁྱད་ཆོས༔ བརྩོན་འགྲུས་དེས་གཏན་གྱི་ཐར་པའི་ལམ་ཉམས་སུ་ལེན་པའི་ཚེ༔ རང་འདོད་ཀྱི་ཡིད་ཀྱི་བློ་སྤངས་ཏེ༔ ཅི་བྱེད་གཞན་དོན་དུ་སེམས་བསྐྱེད་པའི་ལྷག་བསམ་དང་ལྡན་པའི་ཁྱད་ཆོས་སོ༔ གསུམ་པ་ཁྱད་པར་གྱི་ཐུན་མོང་ནི༔ འཇའ་
ལུས་རྡོ་རྗེའི་ཚིག་རྐང་ལས༔ ལམ་གྱི་རྩ་བ་བྱང་སེམས་མོས་གུས་ཏེ༔ ཞེས་པས༔ དགའ་དང་སྙིང་རྗེ་བྱམས་པ་དང་བཏང་སྙོམས་བཞི་སྟེ༔ སྙིང་རྗེ་ཚད་མེད་པ་རྒྱལ་པོའི་བུ་སྟོར་བའམ༔ རྔ་མོང་གི་ཕྲུ་གུ་སྟོར་བའམ༔ ལག་རྡུམ་ཆུས་ཁྱེར་བ་ལྟར༔ ཚད་མེད་པའི་སྙིང་རྗེ་འགྲོ་ལ་གདུང་སེམས་བསྒོམ་པའོ༔ དགའ་བ་ཚད་མེད་པ་རབས་ཆད་ལ་བུ་སྐྱེས་པའམ༔ སྟོར་བ་རྙེད་པ་ཤི་བ་སོས་པ་ལྟ་བུའི་ཀུན་ལ་དགའ་ཞིང་མགུ་བར་བྱ༔ བྱམས་པ་ཚད་མེད་པ་བྱ་མོ་སྒོ་ངར་སྲེད་པའམ་ལུག་གི་རྫི་བོ་དང་སྨན་པ་ལྟ་བུར༔ གཞན་ལ་ཕན་པའི་འདུ་ཤེས་འབའ་ཞིག་བསྒོམ་པའོ༔ བཏང་སྙོམས་ཚད་མེད་རྒྱལ་པོས་སྦྱིན་པ་གཏོང་བའམ༔ དྲང་སྲོང་གིས་གཏོར་མ་བསྔོ་བ་བཞིན་དུ་ཕྱོགས་རིས་དང་བྲལ་བའི་ཀུན་ཁྱབ་ཆེན་པོར་བསྒོམ་པའོ༔ མོས་གུས་ཞེས་པ་བླ་མ་སངས་རྒྱས་སུ་མཐོང་བའི་མོས་གུས༔ ཅི་གསུང་ཚད་མར་འཛིན་པའི་མོས་གུས༔ གང་གསུང་དང་དུ་ལེན་པའི་མོས་གུས༔ ཅི་མཛད་ལེགས་པར་མཐོང་བའི་མོས་གུས༔ ཅི་ཡོད་བླ་མར་འབུལ་བའི་མོས་གུས༔ བླ་མ་དང་ཆོས་མིག་ལྟར་དུ་འཚོ་ཞིང༔ སྙིང་ལྟར་དུ་གཅེས་པར་འཛིན་པའི་མོས་གུས་སོ༔ དེ་ལྟ་བུའི་བྱང་སེམས་མོས་གུས་ནི་ཆོས་ཐམས་ཅད་ཀྱི་རྩ་བ་གལ་པོ་ཆེ་ཡིན་པས་གནད་དུ་བསྣུན་པ་གལ་ཤིན་ཏུ་ཆེའོ༔ དེ་རྣམས་ནི་སྔོན་འགྲོའི་རིམ་པའོ༔ དངོས་གཞི་ལ་གསུམ་
སྟེ༔ སེམས་ཉིད་ཀྱི་གཞི་རྩ་ལེགས་པར་གཅོད་པའི་སྒོ་ནས་ལྷུན་གྲུབ་རྣམ་གསུམ་ཉམས་སུ་ལེན་པ་དང༔ ཁ་ཟས་ཀྱི་འཁྲི་བ་བཅད་ཅིང་འབྱུང་ལྔའི་རླུང་ཟས་སུ་ཟ་བ་དང༔ གོས་ཀྱི་འཁྲི་བ་གཅོད་ཅིང་བདེ་སྟོང་གཏུམ་མོ་གོས་སུ་གྱོན་པ་དང་གསུམ་མོ༔ དངོས་གཞིའི་དང་པོ་འཇའ་ལུས་རྡོ་རྗེའི་ཚིག་རྐང་ལས༔ ལྷུན་གྲུབ་རྣམ་གསུམ་ཉམས་ལེན་སྲོག་ཤིང་མཆོག༔ ཅེས་པའི་ལྷུན་གྲུབ་རྣམ་གསུམ་ནི༔ གཞི་ནས་མ་བཅོས་ལྷུན་གྲུབ་ཀྱི་གནས་ལུགས་བཟོ་མེད་ཁྱབ་གདལ་དུ་གོ་ཞིང༔ དེ་ཉིད་ཀྱི་དོན་ལ་སེམས་འདས་མ་འདས་ད་ལྟ་དུས་གསུམ་གྱི་རྟོག་པ༔ གང་གིས་ཀྱང་མ་ཡེངས་པར་མཉམ་པར་འཇོག་ཤེས་པ༔ སངས་རྒྱས་མྱུར་དུ་འགྲུབ་པ་གཞིའི་མན་ངག་གོ༔ ལམ་མ་འཁྲུལ་ལྷུན་གྲུབ་གནས་ལུགས་བཟོ་མེད་རང་ཤར་རང་གྲོལ་དུ་གོ་ཞིང༔ དེ་ཉིད་ཀྱི་དོན་ལ་འཁྲུལ་མེད་རྩལ་སྦྱོང་བོགས་འདོན་ཞེས་པ༔ སངས་རྒྱས་མྱུར་དུ་འགྲུབ་པའི་ལམ་གྱི་མན་ངག་གོ༔ འབྲས་བུ་མ་བསྒྲུབ་ལྷུན་གྲུབ་ཀྱི་གནས་ལུགས་བཟོ་མེད་ལ་ཡིད་ཆེས་བརྟན་པ་ཐོབ་པ༔ འབྲས་བུ་མྱང་འདས་སུ་གོ་ཞིང་དེ་ཉིད་ཀྱི་དོན་ལ་གཟུང་འཛིན་རེ་དོགས་དང་བྲལ་བ་ཐག་ཆོད་ཀྱི་ཉམས་ལེན་ཤེས་པ༔ འབྲས་བུ་མྱུར་དུ་སངས་རྒྱས་འགྲུབ་པ་འབྲས་བུའི་མན་ངག་གོ༔ དེ་ལྟ་བུའི་མན་ངག་གི་གནད་གོ་ཞིང་མཐར་ཕྱིན་དུ་བསྐྱངས་པས༔ འཁྲུལ་པའི་རྫུན་ཕུགས་རྡིབ་ནས་
གནས་ལུགས་ཀ་དག་གི་ལ་བཟླ་བ་ནི༔ ཆོས་ཐམས་ཅད་ཀྱི་རང་བཞིན་སྲོག་གི་མཆོག་ཏུ་གྱུར་པ་ཡིན་ནོ༔ གཉིས་པ་ནི་འཇའ་ལུས་རྡོ་རྗེའི་ཚིག་རྐང་ལས༔ ཟག་བཅས་འཁོར་བའི་རྐྱེན་ལ་མ་ལྟོས་པར༔ ཟག་མེད་རླུང་ལྔའི་དྭངས་མ་བཅུད་དུ་ཟ༔ ཞེས་པས༔ ཁ་ཟས་ཀྱི་འཁྲི་བ་གཅོད་ཅིང་འཇའ་ལུས་སུ་བགྲོད་པའི་ཉམས་ལེན་ལ་གསུམ་སྟེ༔ སྟེང་རླུང་ཟས་སུ་ཟ་བ་དང༔ འོག་རླུང་ཟས་སུ་ཟ་བ་དང༔ བར་རླུང་ཟས་སུ་ཟ་བ་དང་གསུམ་ལས༔ འོག་རླུང་དང་བར་རླུང་ཟ་བའི་རིམ་པ་འོག་ཏུ་བསྟན་ཞིང༔ འདིར་སྟེང་རླུང་ཟས་སུ་ཟ་བ་ཉམས་ལེན་རྒྱུན་ཁྱེར་གྱི་རིམ་པ་ནི༔ གནས་ཤིན་ཏུ་དབེན་ཞིང་ཉམས་དགའ་བར༔ ཁྲུས་བསང་གཙང་སྦྲ་དང་ལྡན་པས་རྩ་བ་གསུམ་ལ་ཚོགས་ཀྱི་འཁོར་ལོ་ཕུལ་ནས༔ རླུང་ཟས་མཐར་ཕྱིན་པའི་གསོལ་བ་བཏབ་སྟེ༔ སྟན་གྱི་རྒྱབ་མཐོ་བ་ལ་ཛཱ་ཧ་བཱིར་ལུས་གནད་རྒྱུན་ཁྱེར་ལ་གནས་པར་བྱའོ༔ ལུས་གནད་ནི་རྐང་པ་གཡོན་པའི་རྟིང་པས་འཕོངས་ཀྱི་བཤང་གཅིའི་བར་དུ་མནན༔ གཡས་པའི་རྟིང་པ་སྤུ་དཀར་ནག་མཚམས་དང༔ སོར་མོའི་རྩེ་རྣམས་གདན་སྟེང་དུ་བཙུགས༔ ལག་པ་གཉིས་པུས་མོ་གཡས་གཡོན་གྱི་སྟེང་དུ་མདའ་ལྟར་བསྲང༔ ལུས་གནད་ཤིན་ཏུ་དྲང་བའི་ངང་ནས༔ རང་ལུས་ཐ་མལ་པའི་སྣ་བུག་གཡས་ནས་ཕོ་རླུང་ཞེས་པའམ༔ དྲག་རླུང་ངམ༔ རྩུབ་རླུང་ཞེས་པ༔ ལན་གསུམ་
དུ་མདའ་ལྟར་འཕངས་པས་ཞེ་སྡང་ལས་གྱུར་པ་ཐམས་ཅད་ཁ་དོག་དམར་པོའི་རྣམ་པར་དཔག་ཚད་རྒྱང་གྲགས༔ ཕྱི་ཡི་རྒྱ་མཚོའི་ཕ་མཐར༔ ནད་གདོན་སྡིག་སྒྲིབ༔ གྲིབ་དང་མི་གཙང་བ་རྩྭ་དུག་རླུང་དུག་ཐིག་ལེའི་ཉེས་སྐྱོན་ཉོན་མོངས་པ་བརྒྱད་ཁྲི་བཞི་སྟོང་ལ་སོགས་པ་ཐམས་ཅད་དུ་བ་ནག་བུན་རྣག་ཁྲག་ཆུ་སེར་སྡིག་པ་སྡོམ༔ སྦལ་པ་འབུ་སྲིན་སོལ་ཁུ་དུད་ཁུའི་རྣམ་པར༔ ནག་འདུ་རུ་རུ་ཐོན་པར་བསམ་ལ་ལུས་སྤྲུགས་དམིགས་པ་དང་བསྟུན་ཏེ་བྱའོ༔ དེ་བཞིན་དུ་སྣ་བུག་གཡོན་ནས་མོ་རླུང་ཞེས་པའམ༔ ལས་རླུང་བག་ཆགས་ཀྱི་རླུང་གསུམ་འཇམ་པོས་ལན་གསུམ༔ ཁ་དོག་སེར་པོའི་རྣམ་པར་ཉོན་མོངས་པ་འདོད་ཆགས་ལས་གྱུར་པ་ཐམས་ཅད་དབྱུང་ངོ༔ དབུས་ནས་མ་ནིང་ཞེས་པའམ༔ མཉམ་རྒྱུའི་རླུང་ངམ༔ ཉོན་མོངས་ཀྱི་རླུང་སོགས༔ གཏི་མུག་ལས་གྱུར་པ་ཐམས་ཅད་ཁ་དོག་ནག་པོའི་རྣམ་པར༔ ས་འོག་རིམ་པ་དགུའི་ནང་དུ་གོང་གི་དམིགས་པ་དང་བཅས་དབྱུང་ངོ༔ དེ་ནས་ཐབས་ཤེས་ཟུང་འཇུག་གི་རླུང་དལ་བར་བཞག་པའི་ངང་ནས༔ མི་མནོ་མི་བསམ་ལྷང་ངེ་བ་བཟོ་མེད་ཀ་དག་གི་ངང་ལ་བཞག་གོ༔ སྐབས་འདིར་འཇའ་ལུས་རྡོ་རྗེའི་ཚིག་རྐང་ལས༔ དབུ་མ་འཇའ་ལུས་གསལ་སྟོང་འཛིན་མེད་བསྒོམ༔ ཞེས་པས༔ རང་ལུས་དབུ་མ་ཁྱད་ཆོས་བཞི་ལྡན་རྩ་བ་ཕྲ་བ་གསང་གནས་སུ་ཟུག་ཅིང༔ གདེངས་ཀ་ཆེ་བ་སྤྱི་བོར་བསྟན་པ་རང་ལུས་ཀྱི་ཚད་
ཙམ༔ ཕྱི་སྔོ་བ་ནང་ཤིན་ཏུ་དམར་བའི་མདངས་དང་ལྡན་པ༔ ཡར་སྣ་ཟླ་བའི་ངོ་བོ་ཐིག་ལེ་དཀར་པོ་རྣམ་པ་རིལ་བ༔ བྱ་མ་སར་གྱི་སྒོ་ང་ཙམ་འོད་ཟེར་སྣ་ཚོགས་འཕྲོ་བ་གཅིག་གསལ་བཏབ༔ མར་སྣ་ཐིག་ལེ་དམར་པོའི་རྣམ་པ་རིལ་བ་བྱ་མ་སར་གྱི་སྒོ་ང་ཙམ་གཅིག་གསལ་བཏབ༔ དེ་ཡང་དྭངས་ཤིང་ཐོགས་པ་མེད་པ་བར་སྣང་དྭངས་པའི་འཇའ་ཚོན་ལྟར་གསལ་སྟོང་འཛིན་མེད་དུ་སྒོམ་པ་ནི་དམིགས་པ་ཆུ་བོའི་རྒྱུན་གྱི་ཉམས་ལེན་གལ་ཆེའོ༔ དེ་ནས་མཉམ་རླུང་ཚར་གཅིག་བུས་རྗེས་ཕྱི་རོལ་གྱི་བཅུད༔ ས་རླུང་སེར་པོ༔ ཆུ་རླུང་དཀར་པོ༔ མེ་རླུང་དམར་པོ༔ རླུང་གི་རླུང་ལྗང་གུ༔ ནམ་མཁའི་རླུང་སྔོན་པོ༔ གཞན་ཡང་ཕྱོགས་བཅུའི་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ནོར་ལྷ་གཏེར་བདག༔ ས་རྡོ་རི་བྲག༔ རྩི་ཤིང་ནགས་ཚལ༔ འབྱུང་བ་བརྟན་གཡོ༔ སྣོད་བཅུད་ཀྱི་དྭངས་མ་ཐམས་ཅད་འོད་དང་འོད་ཟེར་གྱི་རྣམ་པར་ཁྲ་བུན་ནུ་ནུ་བྱུང་ནས་རང་ལུས་དབུ་མར་ཐིམ༔ དབུ་མ་ཆོས་འབྱུང་ཡང་འཇའ་ཚོན་གྱི་རྣམ་པར་འཛམ་གླིང་འོད་ཀྱིས་ཁྱབ་པ་གཅིག་ཏུ་བསམ༔ དེ་ནས་རླུང་ཞི་བ༔ བཙན་ཐབས༔ དྲག་པོ་གསུམ་ལ༔ རེ་རེ་ལ་ཉི་ཤུ་རྩ་གཅིག་རེ་ཐུན་དྲུག་དྲུག་ཏུ་ཟའོ༔ རླུང་ཟ་མ་ནུས་པར་ལེ་ལོ་གཡེངས་བ་དཔའ་ཞུམ་བྱས་ན་ཡོན་ཏན་མི་སྐྱེ་བས༔ འདིར་བཤད་པ་བཞིན་ཟ་བར་གལ་ཆེའོ༔ རླུང་ཞི་
བར་ཟ་བ་ཧུབ་སྒྲས་ཁ་སོ་གཉིས་ཀྱི་བར་ནས་འདྲེན་ནོ༔ བཙན་ཐབས་སུ་ཟ་བ་ཁ་སྣ་བཙུམ་པའི་སྒང་ལ་རླུང་རིག་མིད་པ་ནས་སྒྲ་བཅས་ཀྱིས་མིད༔ དྲག་པོར་ཟ་བ་གཡས་གཡོན་གསུམ་གསུམ་ནས༔ ཁ་སྒྲ་བཅས་མིད་པ་སྒྲ་བཅས་ཀྱི་འཇུག་པའོ༔ གསུམ་ཀ་ཕོ་བ་གང་བར་མ་གྱུར་གྱི་བར་དུ་ཟའོ༔ དེ་ཐམས་ཅད་ཀྱི་ཉམས་ལེན་དམིགས་གནད་ཟབ་མོ་རྣམས་ཞལ་ལས་ཤེས་པར་བྱའོ༔ ཉམས་ལེན་མ་འབྱོངས་བར་སྤང་བྱ་གསུམ་ནི༔ སྟེང་རླུང་སྒྲེགས་པ་འོག་རླུང་འདོར་བ་སྤང༔ ཟས་རེག་དྲི་མ་མེ་དང་ཉི་མ་སྤང༔ ཚ་སྐྱུར་སྔོ་ངད་བྱུག་བདུག་སྤང་བར་བྱ༔ རྒྱུན་ཁྱེར་གསུམ་ནི་ལུས་མ་ཡེངས་པ༔ དབུ་མ་འཛུག་བསྐོར་འཐེན་གསུམ་ལུས་སྦྱོང་འཕྲུལ་འཁོར་བསྐྱེད་རིམ་དང་ཉི་ཟླ་བསྐོར་བ་དང་མི་འབྲལ་བར་བྱའོ༔ ངག་མ་ཡེངས་པ་སྟེང་འོག་བར་གསུམ་རླུང་རྩོལ་འབྱུང་ལྔའི་བཅུད་སྡུད་རླུང་འཚོ་བཅུད་འཚོ་དང་མ་བྲལ་བར་བྱའོ༔ ཡིད་མ་ཡེངས་པ་ཆོས་འབྱུང་བྱང་སེམས་དཀར་དམར་ལྷུན་གྲུབ་རྣམ་གསུམ་གྱི་ངང་ལ་མ་བཅོས་ཀ་དག་ཏུ་བཞག་གོ༔ སྐབས་སྐབས་སུ་རླུང་གྲུ་བཤུད་ཉི་ཟླ་བསྐོར་བ་རྣམས་རེས་མོས་སུ་ཉམས་སུ་བླངས་པས༔ མཐུན་རྐྱེན་ཉམས་རྟོགས་ཉི་ཟླའི་དཀྱིལ་འཁོར་ལྟར་རྒྱས་པའོ༔ ཞེས་དེ་ལྟར་ཚེ་གཅིག་ལུས་གཅིག་གིས་མཚུངས་མེད་འཇའ་ལུས་སྒྲུབ་པའི་དམར་ཁྲིད༔ སངས་རྒྱས་ལག་
བཅངས་སུ་གདམས་པའི་ཟབ་ཁྲིད་ཚང་ལ་མ་ནོར་རྫོགས་པ་འདི་ཉིད༔ ཉམས་སྣང་ཟ་ཟིར་དུ་བྱུང་བ་ལ་བརྟེན་ཏེ་དུང་དཀར་རྒྱ་མཚོའི་རུས་མིང་གི་ཐ་ཤལ་སྤྲང་པོ་ཉི་ཟླ་ཀློང་གསལ་གྱིས་དུས་ཚེས་ངེས་མེད་དུ་བེར་ཆེན་དབེན་པའི་རི་ཁྲོད་དུ་ཉམས་ལེན་ངང་ནས་ཡི་གེར་བཀོད་པའོ༔ ཚེ་གཅིག་འོད་ཕུང་མཆོག་སྒྲུབ་ཟབ་ཆོས་འདི༔ དབང་མེད་ལུང་མེད་དམར་ཁྲིད་ཉམས་མྱོང་མེད༔ དཔེ་བལྟས་ཚིག་ཟིན་ཁ་ཆོས་གཟུ་ལུམ་བྱེད༔ ཆོས་མིན་བསྟན་བཤིག་དམ་ཉམས་མ་ལུས་ཀུན༔ སྙིང་ཁྲག་དྭངས་མ་གཟའ་བདུད་ཞལ་དུ་བཞེས༔ བཛྲ་རཱ་ཧུ་ལ་རཀྵ་སི་ཧཱུྃ༔ འཇའ་ལུས་འོད་ཕུང་རང་གྲོལ་ལས༔ གཏུམ་མོ་རྫོགས་རིམ་ཟུང་འཇུག་འཁོར་འདས་རང་གྲོལ་བཞུགས་སོ༔ ན་མོ་གུ་རུ་ཛཱ་ཧ་བཱིར་མ་ཧཱ་སུ་ཁ་སིདྡྷི་ཕ་ལ་ཧོ༔ རྣལ་འབྱོར་དབང་ཕྱུག་ཛཱ་ཧ་བཱིར༔ འཁོར་དང་བཅས་ལ་ཕྱག་འཚལ་ཞིང༔ དེས་གསུང་ཐེག་པའི་ཡང་རྩེ་མཆོག༔ བོགས་འདོན་གཏུམ་མོའི་དམར་ཁྲིད་འདི༔ ལས་ལྡན་དོན་དུ་ཅུང་ཟད་བྲི༔ ཆོས་བདག་མཁའ་འགྲོས་གནང་དུ་གསོལ༔ འཇའ་ལུས་རྡོ་རྗེའི་ཚིག་རྐང་ལས༔ ཉམས་རྟོགས་རྩ་བ་རྩ་རླུང་ཐིག་ལེ་ཡིན༔ ཞེས་པས་ཉི་མའི་ངོ་བོ་ཐིག་ལེ་དམར་པོ་ལ་བརྟེན་ནས༔ གཏུམ་མོ་གོས་སུ་གྱོན་པ་ལ་གསུམ་སྟེ༔ ལུས་རྩ་གནད་དང་ལྡན་པ༔ ངག་
རླུང་གནད་དང་ལྡན་པ༔ སེམས་དམིགས་གནད་དང་ལྡན་པའི་ངང་ནས༔ ཧཱུྃ༔ ཡེ་སྟོང་ཀ་དག་སྤྲོས་བྲལ་རང་མདངས་ལས༔ སྣོད་ཀྱི་འཇིག་རྟེན་དག་པ་མཁའ་སྤྱོད་གནས༔ བཅུད་ཀྱི་སེམས་ཅན་རྒྱལ་ཡུམ་ཕག་མོར་གྱུར༔ སྐྱེ་མེད་ཆོས་འབྱུང་དམར་ནག་ཡངས་པའི་ནང༔ པདྨ་ཉི་ཟླ་བམ་རོ་བརྩེགས་པའི་སྟེང༔ རང་ལུས་རྒྱལ་ཡུམ་རྡོ་རྗེ་ཕག་མོའི་སྐུ༔ དམར་གསལ་བརྐྱང་བསྐུམ་གྲི་གུག་ཐོད་ཁྲག་འཛིན༔ སྤྱི་གཙུག་ཕག་གདོང་ཁ་ཊྭཱཾ་བདེ་ཉམས་སྒྱུར༔ གཅེར་བུ་སྐྲ་གྲོལ་ཐོད་སྐམ་ལྔ་ཡིས་བརྒྱན༔ མེ་དཔུང་དམར་ནག་ཀློང་ན་འགྱིང་བག་བཞུགས༔ སྐབས་འདིར་བཟླས་པ་ཅི་རིགས་བྱེད་པ་ཞལ་ལས་ཤེསགུ་རུ་ཧྲཱི་མ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ས་མ་ཡ་ཛཿཛ༔ སྤྱི་གཙུག་གསང་གནས་བར་དུ་དབུ་མ་ནི༔ མཚན་ཉིད་བཞི་ལྡན་སྤྲོ་བསྡུ་གོ་རིམ་བཞིན༔ བདེ་སྟོང་ཞལ་མཇལ་ཨ་ཧཾ་འབར་འཛག་བསྒོམ༔ བཞི་གསུམ་བཅུ་གཉིས་བདེ་སྟོང་རང་ཞལ་ལྟ༔ དྲག་རླུང་གཅུན་ལ་དམིགས་པ་ལྟེ་འོག་གི༔ ཨ་ཐུང་མེ་ལྕེ་ལམ་ལམ་འབར་བར་བསམ༔ མེ་ལྕེ་ཡར་བྱུང་རྩ་ནང་ཐམས་ཅད་དྲོས༔ རྩ་ནང་མ་ཤོང་ལུས་ནང་ཐམས་ཅད་གང༔ སླར་ཡང་སྟོང་གསུམ་འཇིག་རྟེན་ཐམས་ཅད་གང༔ མེ་ཡི་ཚྭ་ཚྭ་འུར་འུར་འབར་བར་བསམ༔ མེ་ལྕེའི་རྩེ་ལ་ཌཱ་ཀི་དཔག་མེད་ཀྱིས༔ མེ་དཔུང་བསྣམས་ནས་བྲོ་
གར་བྱེད་པར་བསམ༔ རིག་པ་བརྟུལ་ཞུགས་བྲོ་གར་དྲག་ཏུ་བྱ༔ སླར་ཡང་མེ་ལྕེ་ཚུར་བྱུང་རང་ལ་ཐིམ༔ འཁོར་ལོ་ལྔ་ལ་འབར་འཛག་དྲག་ཏུ་བསྒོམ༔ ལྷ་ཚོགས་གསལ་བཏབ་ཡབ་ཡུམ་འབྲོས་འདེད་བསྐུལ༔ གསོལ་འདེབས་འབད་ཅིང་ལུས་གནད་དྲག་ཏུ་གཅུན༔ ལུས་གནད་པུས་འཁྱུད་ཁྲིལ་གཉིས་བསྡམ༔ རླུང་གནད་བསྡིག་ཅིང་མགྲིན་གཅུ་མནན༔ དམིགས་གནད་གསལ་སྟོང་རྩ་འཁོར་བསྒོམ༔ སྤེལ་ཞིང་བརྩེགས་ལ་འབད་པས་བསྣུན༔ གྲངས་མེད་བར་དུ་རླུང་འཛིན་གཅེས༔ ཉི་ཟླ་སྐོར་ཞིང་དྲོད་འབེབ་བྱ༔ འདྲེན་འགྲེམ་འཕྲུལ་འཁོར་དྲག་ཏུ་འབད༔ དེ་ལྟར་ཉམས་ལེན་རྩལ་འབྱོངས་ནས༔ རང་ལུས་འོད་རིག་ཡིད་རིག་དང༔ བོལླའི་བདེ་བ་ལ་བརྟེན་ནས༔ ཚེ་གཅིག་འཇའ་ལུས་འགྲུབ་འདོད་ན༔ དམིགས་པའི་རིམ་པ་འདི་ལྟར་རོ༔ བདེ་སྟོང་རང་ཞལ་བལྟ་ཞིང་དྭངས་མ་དལ་བུས་དབབ༔ གཉེན་པོ་དྲག་པོས་འཛག་པ་མེད་པར་བཅིང༔ རླུང་སེམས་གཉིས་ཀྱིས་འགྲངས་པར་དྲང༔ འཕྲུལ་འཁོར་རྣམ་བཞིས་ཁྲེམ་པར་དགྲམ༔ ཞེས་པས༔ འདོད་ཆགས་བདག་པོས་བྱ་ཕོ་མགྲིན་སྙན་བསྟེན༔ བྱ་ཕོ་འགྲོས་ཀྱིས་དྭངས་མ་དལ་བུས་དབབ༔ བྱ་ཕོ་འགྱིང་གིས་འཛག་པ་མེད་པར་བཅིང༔ བྱ་ཕོ་འདྲེན་གྱིས་དྭངས་མ་འདྲོངས་པར་དྲང༔ བྱ་ཕོ་སྤྲུག་གིས་ཁྲེམ་པར་དགྲམ༔ རང་ལུས་བདེ་སྟོང་ཁ་སྦྱོར་ལ
འཆུག་མེད་རྩ་ཡི་ཐེམ་བུ་དགོས༔ གཞན་ལུས་བདེ་ཆེན་ཁ་སྦྱོར་ལ༔ འཆུག་མེད་རླུང་གི་ཐེམ་བུ་དགོས༔ འཁོར་འདས་མཉམ་ཉིད་ཁ་སྦྱོར་ལ༔ འཛིན་མེད་ལྟ་བའི་ཐེམ་བུ་དགོས༔ ཅེས་པས་དེ་ལ་བརྟན་པ་ཐོབ་ནས་གཞན་ལུས་བསྟེན་པ་ནི༔ བདག་ཉིད་སྐད་ཅིག་དྲན་རྫོགས་སུ༔ ཐ་མལ་ཤེས་པ་མ་ཡེངས་པར༔ རྟ་མགྲིན་དབང་ཆེན་སྐུ་མདོག་དམར༔ ཞལ་གཅིག་ཕྱག་གཉིས་སྤྱན་གསུམ་བསྒྲད༔ གཡས་གཡོན་གྲི་གུག་ཐོད་ཁྲག་བསྣམས༔ གཅེར་བུ་རུས་པའི་རྒྱན་ལྡན་བསྒོམ༔ སྤྱི་བོར་ཡི་གེ་ར་འོད་ཞུ༔ རྡོ་རྗེ་དཔའ་བོ་སྐུ་མདོག་དཀར༔ གཡས་གཡོན་རྡོ་རྗེ་ཐོད་ཁྲག་འཛིན༔ མགྲིན་པར་ཡི་གེ་ཙ་འོད་ཞུ༔ རཏྣ་དཔའ་བོ་སྐུ་མདོག་སེར༔ གཡས་གཡོན་རིན་ཆེན་ཐོད་ཁྲག་འཛིན༔ སྙིང་གར་ཧྲཱིཿབསྐྱེད་འོད་ཞུ་བས༔ སངས་རྒྱས་དཔའ་བོ་སྐུ་མདོག་མཐིང༔ གཡས་གཡོན་འཁོར་ལོ་ཐོད་ཁྲག་འཛིན༔ ལྟེ་བར་ཧྲི་བསྐྱེད་འོད་ཞུ་བས༔ པདྨ་དཔའ་བོ་སྐུ་མདོག་དམར༔ གཡས་གཡོན་པདྨ་ཐོད་ཁྲག་འཛིན༔ གསང་གནས་ཡ་བསྐྱེད་འོད་ཞུ་བས༔ ལས་ཀྱི་དཔའ་བོ་སྐུ་མདོག་ལྗང༔ གཡས་གཡོན་རྒྱ་གྲམ་ཐོད་ཁྲག་འཛིན༔ དེ་ལྟར་གསལ་བའི་སྐུ་པང་དུ༔ རྡོ་རྗེ་ཕག་མོ་སྐུ་མདོག་དམར༔ ཞལ་གཅིག་ཕྱག་གཉིས་སྤྱན་གསུམ་བསྒྲད༔ གཡས་པས་གྲི་གུག་གཡོན་ཐོད་ཁྲག༔ འཁྲིལ་སྦྱོར་
ཞལ་ལྗགས་དགྱེས་པའི་ཚུལ༔ གཅེར་བུ་རྒྱན་ལྡན་མཛེས་པར་བསྒོམ༔ དེ་ལྟར་བསྒོམས་པའི་སྤྱི་གཙུག་ཏུ༔ ཡི་གེ་ཧ་བསྐྱེད་འོད་ཞུ་བས༔ རྡོ་རྗེ་ཌཱ་ཀི་སྐུ་མདོག་དཀར༔ ཞལ་གཅིག་ཕྱག་གཉིས་སྤྱན་གསུམ་བགྲད༔ གཡས་པས་གྲི་གུག་གཡོན་ཐོད་ཁྲག༔ གཅེར་བུ་རུས་པའི་རྒྱན་བཅས་བསྐྱེད༔ མགྲིན་པར་རི་བསྐྱེད་འོད་ཞུ་བས༔ རིན་ཆེན་ཌཱ་ཀི་སྐུ་མདོག་སེར༔ སྙིང་ཁར་མ་བསྐྱེད་འོད་ཞུ་བས༔ སངས་རྒྱས་མཁའ་འགྲོ་སྐུ་མདོག་མཐིང༔ ལྟེ་བར་ནི་བསྐྱེད་འོད་ཞུ་བས༔ པདྨ་མཁའ་འགྲོ་སྐུ་མདོག་དམར༔ གསང་གནས་ས་བསྐྱེད་འོད་ཞུ་བས༔ ཀརྨ་མཁའ་འགྲོ་སྐུ་མདོག་ལྗང༔ དེ་ལྟར་རིག་པའི་ལྷ་ཚོགས་ཀྱང༔ གསལ་ལ་འཛིན་མེད་སྦྱོར་བར་བསམ༔ བདག་ཉིད་ཡབ་ཡུམ་སྤྱི་གཙུག་ཏུ༔ པདྨ་ཉི་ཟླའི་གདན་སྟེང་དུ༔ བདེ་གཤེགས་ཀུན་འདུས་པདྨ་འབྱུང༔ མཐིང་ནག་ཞལ་གཅིག་ཕྱག་གཉིས་པ༔ གཡས་པས་རྡོ་རྗེ་ཐུགས་ཀར་འཛིན༔ ཕྱག་གཡོན་དྲིལ་བུ་ཡུམ་ལ་འཁྱུད༔ སྐུ་པང་ཡེ་ཤེས་མཚོ་རྒྱལ་དཀར༔ འཛུམ་མཛེས་མདངས་གསལ་འོད་ཟེར་འཕྲོ༔ སྐྲ་གྲོལ་གཅེར་བུ་འོད་ལྡན་བསྐྱེད༔ དེ་ལྟར་གསལ་བཏབ་རོལ་པ་ཡིས༔ ཐ་མལ་པ་རུ་མི་འགྲོ་འོ༔ བདག་གཞན་བསྐྱེད་རིམ་གདིང་མེད་པས༔ འདོད་པས་གདུང་བའི་ཆགས་ལམ་ཀུན༔ ཁྱི་ཕག་
ཀུན་དང་ཁྱད་ཅི་ཡོད༔ ཐབས་ལམ་ཉམས་ལེན་བྱེད་པ་ཀུན༔ མཁའ་གསང་བྱིན་གྱིས་བརླབ་པ་དང༔ རང་ལུས་ལྷ་རུ་བསྐྱེད་པ་དང༔ འདུ་ཤེས་གསུམ་ལྡན་ཤིན་ཏུ་གཅེས༔ རང་ལུས་གནས་པའི་བྱང་ཆུབ་སེམས༔ སངས་རྒྱས་རྣམས་ཀྱི་གཞི་ཡིན་ཞིང༔ མཁའ་འགྲོ་མ་ཡི་བཞུགས་གནས་ཏེ༔ ཕྱི་རུ་ཉུངས་འབྲུ་ཙམ་བོ་ན༔ རིག་འཛིན་མཆོག་གི་གོ་འཕང་དབེན༔ དེ་བས་རང་གཞན་ཉམས་ལེན་འདི༔ ཉམས་སུ་ལེན་པའི་སྐྱེས་བུ་ནི༔ སོ་ཐར་བྱང་སེམས་སྔགས་སྡོམ་གྱི༔ དམ་ཚིག་མ་ཉམས་རབ་ཏུ་བསྲུང༔ ཚུལ་ཁྲིམས་ལྡན་པའི་དགེ་སློང་གིས༔ ཉམས་ལེན་འཆུག་མེད་བརྩོན་གྱུར་ན༔ ཏིང་ངེ་འཛིན་འཕེལ་བྱང་སེམས་རྒྱས༔ རྩ་ཁམས་མཁའ་འགྲོ་དགྱེས་དེའི་མཐུས༔ ལུས་ལ་བདེ་དྲོད་རྟོགས་པ་འཆར༔ སྣང་སྲིད་ལྷ་འདྲེ་བྲན་བཞིན་ཁོལ༔ བར་ཆད་མ་དང་མཁའ་འགྲོས་སེལ༔ ཐུན་མོང་མི་ནོར་ཟས་གསུམ་འདུ༔ འཆི་ཚེ་ཨོ་རྒྱན་མཁའ་སྤྱོད་འགྲོ༔ འདི་སྤངས་འཇིག་རྟེན་བུད་མེད་སྤྱོད༔ ཕྱི་མ་དམྱལ་གནས་རོ་མྱག་སྐྱེ༔ དེས་ན་གཅིག་བརྒྱུད་གདམས་པ་ལས༔ མང་ན་མཁའ་འགྲོའི་ཆད་པ་ཡོང༔ ཚེ་ཐུང་དམ་ཉམས་ན་རཀ་ལྟུང༔ གསང་སྟེ་གསང་སྔགས་ཉམས་ལེན་འབད༔ རྒྱ་རྒྱ་རྒྱ༔ གདིང་ལྡན་བུ་ཡིས་ཉམས་བླངས་ན༔ ཡོན་ཏན་འདི་རྣམས་ཟླ་བ་རྒྱས་ལྟར་འབྱུང
ཡོན་ཏན་བརྒྱད་དང་ཕྲིན་ལས་བཞི༔ མངོན་ཤེས་ལྔ་དང་རྫུ་འཕྲུལ་དང༔ ལུས་བདེ་སེམས་བདེ་འོད་གསལ་འཆར༔ འགྲོ་མགྱོགས་རྒས་སྲ་ཚེ་རིང་ཞིང༔ བདེ་དྲོད་འབར་ཞིང་འཛག་སྒོ་སྡོམ༔ རྩ་མདུད་གྲོལ་དང་རྟགས་བཅུ་འཆར༔ གཞན་སྣང་བསྒྱུར་དང་མཁའ་སྤྱོད་བགྲོད༔ སྐུ་གསུམ་ཞལ་མཐོང་སྐུ་བཞི་མཐའ་རུ་ཕྱིན༔ དོན་གཉིས་མཐར་ཕྱིན་ཚེ་འདིར་སངས་རྒྱས་ཐོབ༔ རྒྱལ་བས་རྒྱུད་དང་མན་ངག་མང་གསུངས་ཀྱང༔ ཚེ་གཅིག་དོན་གྱི་སངས་རྒྱས་བསྒྲུབ་པ་ལ༔ མཐར་ཐུག་ལམ་ནི་རྣམ་པ་གཉིས་ལས་མེད༔ སྟེང་སྒོ་རྣམ་པར་གྲོལ་བའི་ལམ་མཆོག་དང༔ འོག་སྒོ་བདེ་བ་ཆེན་པོའི་ལམ་གཉིས་ལས༔ འདི་ནི་འོག་སྒོ་བདེ་བ་ཆེན་པོའི་ལམ༔ ས་བཅུའི་བྱང་ཆུབ་སེམས་དཔར་གྱུར་ན་ཡང༔ སངས་རྒྱས་ཐོབ་པའི་རྩ་མདུད་གྲོལ་བ་ལ༔ འོག་སྒོ་བདེ་བའི་ཕྱག་རྒྱ་མ་བསྟེན་ན༔ ས་བཅུའི་བྱང་ཆུབ་སེམས་དཔའི་གོ་འཕང་ལས༔ བཅུ་གསུམ་རྫོགས་པའི་ཤེས་རབ་མི་ཐོབ་པས༔ བརྟུལ་ཞུགས་ཅན་གྱིས་ཕྱག་རྒྱ་བསྟེན་པ་གཅེས༔ བསྐལ་པ་བཟང་པོའི་སངས་རྒྱས་སྟོང་རྣམས་ཀྱང༔ རྩ་མདུད་གྲོལ་ཕྱིར་ལས་ཀྱི་ཕྱག་རྒྱ་བསྟེན༔ སྲིད་པ་ཐ་མའི་རྣལ་འབྱོར་ཕོ་མོ་ཀུན༔ མན་ངག་བཞིན་དུ་ཉམས་བླངས་གྱུར་པ་ན༔ འཇིག་རྟེན་མཁྱེན་པའི་སངས་རྒྱས་ཐོབ་པར་གྱུར༔ ཤེས་རབ་རང་
བཞིན་སངས་རྒྱས་སྐྱེད་པའི་ཡུམ༔ ཐབས་ཤེས་ཡ་བྲལ་ཉམས་ལེན་སུ་ཡིས་བྱེད༔ ཆོས་སྐུའི་ཞིང་ན་ཡབ་ཡུམ་འཁྲིལ་སྦྱོར་བཞུགས༔ ལོངས་སྐུའི་ཞིང་ན་ཟུང་འཇུག་མཉམ་རོལ་མཛད༔ བདེ་མཆོག་ཀྱཻ་རྡོར་དུས་འཁོར་གསང་འདུས་སོགས༔ ཡི་དམ་ཞི་ཁྲོ་བདེ་གཤེགས་རྒྱ་མཚོ་ཀུན༔ ཐབས་ཤེས་མི་འབྲལ་ཟུང་འཇུག་གཅེར་བུར་འཁྱུད༔ རྒྱ་གར་གྲུབ་ཐོབ་བརྒྱད་ཅུ་རྩ་ལྔ་ཡང༔ ཕྱག་རྒྱ་ལ་བསྟེན་དངོས་གྲུབ་རྣམ་གཉིས་ཐོབ༔ ཨོ་རྒྱན་པདྨ་རྗེ་འབངས་ཉེར་ལྔ་དང༔ གྲུབ་ཆེན་བརྒྱ་དང་པཎ་ཆེན་བརྒྱ་རྩ་བརྒྱད༔ ཕྱག་རྒྱ་ལ་བསྟེན་འཇའ་ལུས་འཕོ་མེད་གྲུབ༔ རྒྱ་བོད་གྲུབ་ཐོབ་ཀུན་གྱི་དགོངས་དོན་ཡིན༔ རྙིང་མ་རྒྱུད་འབུམ་གསར་མ་རྒྱུད་འབུམ་སོགས༔ དེ་དག་མ་ལུས་ཉམས་ལེན་མཐར་ཐུག་པ༔ ཕྱག་རྒྱ་ཁོ་ནར་གསུངས་པ་མ་དགོངས་པར༔ དུས་གསུམ་སངས་རྒྱས་རྒྱལ་ཀུན་མཛད་བཟང་ལ༔ ཡ་ག་ཅལ་སྒྲོག་མུ་ཅོར་སྐུར་པ་འདེབས༔ ཕྱི་མ་དམྱལ་བ་སྒྲུབ་པ་ཨ་ཙ་མ༔ དམ་ཉམས་ལོག་རྟོག་ཅན་ལ་བཀའ་རྒྱ་གདམས༔ གཟའ་བདུད་ཆེན་པོ་དྲང་སྲོང་གཟའ་བརྒྱད་ཀྱིས༔ བཀའ་འདི་ཐུབ་པར་སྲུངས་ཤིག་བཛྲ་རཀྵ་སི་ཧཱུྃ༔ འཇའ་ལུས་འོད་ཕུང་རང་གྲོལ་ལས༔ ཤེས་རབ་མའི་ཉམས་ལེན་གསེར་གྱི་ཡང་ཞུན་བཞུགས་སོ
ན་མོ་གུ་རུ་ཛཱ་ཧ་བཱིར༔ ཤེས་རབ་བློ་ཆེ་དད་ལྡན་རིགས་བཟང་རྣམས༔ མ་ནོར་ལམ་མཆོག་ཚེ་གཅིག་སངས་རྒྱས་བསྟན༔ ཉམས་སུ་ལོངས་ཤིག་སྐལ་ལྡན་བུད་མེད་རྣམས༔ ཞེས་པས་འདིར་སྐལ་ལྡན་གྱི་བུད་མེད་རྣམས་ཚེ་གཅིག་ལམ་མཆོག་སྒྲུབ་པའི་ལམ་ཉམས་སུ་ལེན་པར་འདོད་ན༔ གོང་དུ་བཤད་པའི་ཉམས་ལེན་རྣམས་ལ་རྟགས་ཐོན་ངེས་སུ་བྱས་ནས༔ སླར་གསང་ཁྲིད་ལ་ཡིད་ཆེས་བརྟན་པ་མ་ཐོབ་བར་དུ་སྦྱང༔ མཐར་ཕྱིན་ནས་བོགས་འདོན་ཐུར་མའི་ཉམས་ལེན་བྱ་སྟེ༔ དེ་ལའང་བཞི་སྟེ་ཐུར་མའི་རྒྱུ༔ ཐུར་མའི་ཚད༔ འཇུག་པའི་ཚད་འཛིན༔ གེགས་བསལ་བ་དང་བཞི་ཡོད་པ་ལས༔ དང་པོ་ཐུར་མའི་ཚད་ནི་རིང་ཐུང་མཐོ་གང་སོར་བཞི༔ བུད་མེད་སྐྱེས་པའི་སྐྱོན་གྱིས་མ་གོས་པ་རྣམས་ལ༔ མཐེའུ་ཆུང་གི་ཚིགས་དང་པོ་ཡན་ཤོང་ཙམ༔ ཐབས་ཅན་ནམ་འཁོར་བ་སྤེལ་ལ་མཐེ་བོང་ཤོང་ཙམ་མོ༔ རྒྱུ་ནི་གསེར་དངུལ་ཟངས་ལྕགས་སམ༔ བེ་རྐང་སྟག་མ་བྱ་རྐང་སོགས་གང་འབྱོར་རོ༔ འཇུག་ཚད་ནི༔ སྟེང་ཞལ་མ་ཞེས་པ་རྩ་ཁ་མདུན་ངོས་ལ་ཡོད་པས༔ རང་སོར་ལྔ་ཚུན་ཙམ་དུའོ༔ འོག་ཞལ་ཅན་ཞེས་པ་རྩ་ཁ་རྒྱབ་ངོས་ལ་ཡོད་པས་སོར་བཞིའི་ཚད་ཙམ༔ མདུན་ཞལ་ཅན་ཞེས་པ་པདྨའི་འོག་ཤ་རྒྱས་ཏེ་མས་རུས་འབུར་དུ་ཡོད་པ་ཡིན་ནོ༔ ཤོར་ཅན་ཞེས་པ་པདྨའི་སྟེང་
གི་ཤ་རུས་རྒྱས་པ༔ རྒྱ་ཕིབས་ཁ་ཕུབ་ལྟར་ཟེའུ་འབྲུ་གསང་བའི་མཛོད་ཐུར་དུ་བལྟབ་པའོ༔ པདྨ་བདེ་ཆེན་གསང་བའི་ཕོ་བྲང་ཨེ་ཝཾ་དཀྱིལ་འཁོར་དུ༔ སོར་གསུམ་ཚུན་ཆད་འགྲོ༔ དེ་ནས་སོར་གསུམ་ཚུན་གྱེན་ལ་སེགས༔ དེ་ནས་སོར་གཅིག་ཐུར་ལ་གནོན༔ དེ་ནས་སོར་གཉིས་གྱེན་ལ་གན་ཏེ་ཕུལ་ནས༔ སོར་དགུའི་ས་ན་སྲིད་པའི་ཞགས་པ་ཡོད༔ སླེབ་མ་ཐག་ཏུ་དབུགས་རིང་ཤུགས་རིང་འདར་སྐད་དང༔ ཡན་ལག་འཁྲབ་ཅིང་སྨར་དོས་ཆད་པ་དང༔ ཟུག་རྔུ་དྲག་པོ་མི་བཟོད་པའི་སྡུག་བསྔལ་དུ་ཡོང་བས༔ དེ་མ་ཐག་གསང་ཐུར་སོར་གཅིག་ཕྱིར་འཐེན་ནོ༔ དབུ་མ་དལ་བུས་བཙུགས་ནས་འཇམ་རླུང་ཞི་བར་དྲངས་པས༔ ཟུག་རྔུ་ལས་རིམ་གྱིས་རྒྱལ་བར་འགྱུར་བས་སྒྱིད་མ་ལུག་པར་སྟོང་འདྲེན་སྟོད་མནན་སྒང་འདྲེན་སྒང་མནན་བྱས་པས༔ ཐུར་རླུང་གྱེན་ལ་རྒྱུག་པའི་ཚེ༔ འཇའ་འོད་དུ་མེ་རེ་འབྱུང་སྟེ་ལུས་ཐམས་ཅད་གང་བར་བསམ༔ དེ་ནས་ཐུར་མ་དལ་བུས་འཐེན་ཞིང༔ འཇམ་རླུང་བཟུང་ནས་ཕོ་བ་གཡས་སྐོར་རྡོ་རྗེ་ཐོ་རྡེག་སོགས་ལ་འབད་པས་ཞག་བདུན་ཚུན་ལ་གསང་ཐུར་འབྱོངས་པར་ཐེ་ཚོམ་མེད༔ ཆུ་གཏོང་སྐབས་ཀྱི་སྔ་ཕྱི་ཐམས་ཅད་ལ་རྣག་ཁྲག་དུམ་པ་རེ་ཡོང་བ་དང༔ རྩ་ཆུ་རེ་མོས་སུ་སྡོམ་པ་རྒྱུ་སྨད་དང་ལྟེ་བ་བརྒྱུད་དེ་ཟུག་དྲག་པོ་ལོང་བས༔ དེ་རྣམས་
ལ་བྲེད་སྣང་མི་དགོས་ཁད་ཀྱི་ན་ཟུག་ལས་རྒྱལ་བར་འགྱུར་རོ༔ དེ་ནས་ཆུའམ་མར་སོགས་གང་རུང་སྟོབས་འཐུང་ཚོད་དང་སྦྱར་ནས་རིམ་པར་འདྲེན་ནོ༔ སྙིང་རུས་བསྐྱེད་ལ་པདྨ་དུང་འབུད་པདྨ་སྒྲ་འབྱིན་ཁྲག་འཐུང་རྣམས་ལ་རྟགས་མ་བྱུང་བར་དུ་བསྐྱེད་དོ༔ གེགས་སེལ་ནི་གོ་ཟློག་འཕྲུལ་འཁོར་སྒྲ་གཅན་ཆེ་ཆུང་དང༔ བསྒྲད་འབེབ་ལ་སོགས་གཞུང་གི་འཕྲུལ་འཁོར་ལ་འབད་པར་བྱའོ༔ ཨན་ཙམ་ཟུག་ཆེ་ནས་མི་བཟོད་ན་རྫས་སྨན་བྱུག་འཕྱིང་དྲོན་བདུག་ཅིང་བཀུ་བྱུགས་ཐེམས་པར་བྱ༔ ཆང་གསར་རུས་ཁུ་དཀར་གསུམ་མངར་གསུམ་དཀོར་ནག་ལོག་འཚོ་མ་ཡིན་པ་རྣམས་དང་དུ་བླང༔ ཐར་པ་དང་ཐམས་ཅད་མཁྱེན་པའི་སྲོག་འཕྲོག་པའི་དཀོར་ཟས་སྤངས་ལ༔ སྲིན་པོ་རླུང་ཟས་རླུང་འཚོས་དུས་འདའ་བར་བྱས་ལ༔ གནས་གཡའ་ཁྲོད་གངས་ཁྲོད་དུ་སྒྲུབ་པའི་རྒྱལ་མཚན་འཛུགས་པའི་དགའ་སྟོན་ལ་འབད་འཚལ་ལོ༔ དེ་ལྟར་འབད་པའི་ཡོན་ཏན་ནི༔ མཁའ་སྤྱོད་རིག་འཛིན་གསུམ་དུ་མདངས་ལྡན་ནུ་མ་མེད༔ ཉི་མ་ཚངས་ཞུགས་གཙུག་ཏོར་ལྟར་མི་མངོན༔ མཆོག་གི་སྐུ་གསུམ་མངོན་གྱུར་ལམ་འདི་འགྲུབ༔ ཅེས་དང༔ བག་མེད་དུ་བྱས་ན་རྒྱུད་ལས༔ སྐྱེ་བ་དམན་པའི་བྱང་སེམས་དེ༔ ས་ཆུ་མེ་རླུང་གིས་ཁྱེར་ནས༔ ལྷ་ཀླུ་ས་བདག་ཚོགས་རྣམས་ཀུན༔ ནད་ཡམས་དལ་གྱིས་འཐིབས་ནས་སུ༔ ཀུན་གྱི་གྲོང་ཁྱེར་བརླག་པར་འགྱུར༔ བདག་མེད་ཁྱི་
མོའི་ལུས་བླངས་ནས༔ ཐར་མེད་གནས་སུ་ལྟུང་བར་འགྱུར༔ ཞེས་པ་ལ་སོགས་པའི་ཉེས་ལྟུང་མང་པོར་གསུངས་ཀྱང༔ ཅུང་ཟད་མང་ཆེས་པས་མ་བྲིས༔ དེ་རྣམས་ནི་སྔོན་དུ་འགྲོ་བ་དང་དངོས་གཞིའི་སྐོར་རོ༔ རྗེས་ཀྱི་རིམ་པ་ལ་གསུམ་སྟེ༔ འཇའ་ལུས་རྡོ་རྗེའི་ཚིག་རྐང་ལས༔ གེགས་སེལ་ཡོན་ཏན་སྐྱེད་པའི་ཐབས་ལ་འབད༔ ཅེས་པས༔ སྨན་དང་སྔགས་འཕྲུལ་འཁོར་གྱི་གེགས་སེལ་དང་གསུམ་ལས༔ དང་པོ་འཕྲུལ་འཁོར་གྱི་གེགས་སེལ་ནི༔ རྡོ་རྗེའི་ལུས་འདུལ་དྭངས་སྙིགས་དབྱེ་བ་དང༔ ཉི་ཟླ་སྒྲ་གཅན་གེགས་སེལ་ཆེ་ཆུང་བྱ༔ ཕྱི་ནང་གསང་གསུམ་འབོད་ཆེན་འབོད་ཆུང་དང༔ གསང་བའི་སྐྱིལ་ཀྲུང་ཉི་ཟླ་གོ་བཟློག་བྱ༔ གཡང་མོའི་སྤྲུག་དང་སེང་སྤྲུག་ཧ་སྤྲུག་འབད༔ ཤེས་རབ་མ་ཡི་གེགས་སེལ་འཕྲུལ་འཁོར་རོ༔ འཕྲུལ་འཁོར་བྱེད་ཚེ་དམིགས་གནད་འདི་ཉིད་གཅེས༔ ཡར་ལ་ལངས་དུས་ཕག་མོའི་ང་རྒྱལ་བསྐྱེད༔ འབེབ་པའི་དུས་སུ་སྣང་སྲིད་འོད་སྐུར་འཁྱིལ༔ འདྲེན་པའི་དུས་སུ་ཉི་ཟླ་ཚངས་རྩེར་གནོན༔ དགྲམ་པའི་དུས་སུ་སྐུ་ཐིག་ཚོམ་བུར་བལྟ༔ ངལ་གསོའི་དུས་སུ་ཀ་དག་གནས་ལུགས་ངང༔ རང་ལུས་གནས་པའི་ལྷ་ཚོགས་མ་ལུས་ཀུན༔ འོད་ལྔ་ཚོམ་བུའི་ཀློང་དུ་ཁྲ་ཤིག་གེ༔ དྭངས་མ་འོད་གསལ་ངོ་བོར་འོད་མེར་རེ
གསལ་སྟོང་ཟུང་འཇུག་ངང་དུ་ཆམ་གདལ་ལེ༔ མཉམ་ཉིད་ཡེ་གྲོལ་ངང་དུ་རྗེན་ཧྲིག་གེ༔ འཁོར་གསུམ་དམིགས་མེད་ངང་དུ་བདེ་ཉམས་སྐྱོངས༔ འཕྲུལ་འཁོར་བཞག་ཚེ་སྨོན་ལམ་འདི་ལྟར་བྱ༔ ལུས་ལྷ་སྐུ་འགྲུབ་པར་བྱིན་གྱིས་རློབས༔ ངག་སྔགས་སུ་འཆར་བར་བྱིན་གྱིས་རློབས༔ ཡིད་ཀ་དག་འགྲུབ་པར་བྱིན༴༔ རྩ་རླུང་ཐིག་ལེ་འབྱོངས་པར་བྱིན༴༔ འཇའ་ལུས་མཁའ་སྤྱོད་འགྲུབ་པར༴༔ ཚེ་གཅིག་སངས་རྒྱས་ཐོབ་པར༴༔ ཞིང་ཁམས་རྣམ་དག་འབྱོངས་པར༴༔ འབྲེལ་ཚད་དོན་དང་ལྡན་པར༴༔ རང་གཞན་དོན་གཉིས་འགྲུབ་པར༴༔ གདོད་མའི་རང་ཞལ་མཇལ་བར་བྱིན་གྱིས་རློབས༔ རཱ་ཧུ་ལ་རཀྵ་སི་ཧཱུྃ༔ འཇའ་ལུས་འོད་ཕུང་རང་གྲོལ་ལས༔ གེགས་སེལ་བདུད་རྩིའི་ཆར་འབེབ་དངོས་གྲུབ་མྱུར་སྩོལ་བཞུགས་སོ༔ ན་མོ་གུ་རུ་ཛཱ་ཧ་བཱིར༔ གདོད་མའི་གནས་ལུགས་མངོན་གྱུར་ཅིང༔ སྣང་སྲིད་དག་པ་རབ་འབྱམས་སུ༔ རང་གྲོལ་ལྷུན་གྲུབ་འོད་ཀྱི་སྐུ༔ འཇའ་ལུས་མཁའ་སྤྱོད་དངོས་གྲུབ་བརྙེས༔ རྣལ་འབྱོར་དབང་ཕྱུག་ཛཱ་ཧ་བཱིར༔ འཁོར་དང་བཅས་ལ་ཕྱག་འཚལ་ལོ༔ འདིར་གྲུབ་པའི་དབང་ཕྱུག་ཛཱ་ཧ་བཱིར་གྱིས་གདམས་པ་ཟབ་མོའི་ཉམས་ལེན་བྱེད་པའི་སྐལ་ལྡན་ཕོ་མོ་རྣམས་ཀྱི་གེགས་སེལ་བདུད་རྩིའི་ཆར་འབེབ་འདོད་དགུའི་བང་མཛོད་
དངོས་གྲུབ་མྱུར་སྩོལ་འདི་ལ་བཞི་སྟེ༔ རླུང་གི་སྦྱོར་བ་ལ་བརྟེན་ནས་གེགས་སེལ་བ་དང༔ དམིགས་པ་ལ་བརྟེན་ནས་གེགས་སེལ་བ་དང༔ སྨན་ལ་བརྟེན་ནས་གེགས་སེལ་བ་དང༔ སྔགས་ལ་བརྟེན་ནས་གེགས་སེལ་བ་དང་བཞིའོ༔ དང་པོ་སྟོད་ནད་གཟེར་བ་སེལ་བའི་དམིགས་པ་ནི༔ རང་གི་ཁོག་སྟོད་ཐམས་ཅད་ལྕགས་ཚགས་ཀྱི་མིག་ལྟར་ཡོད་པའི་ནང་ནས༔ རྣག་ཁྲག་ཆུ་སེར་ནད་གདོན་ཐམས་ཅད་ཤོར་སྒྲ་དང་བཅས་ཏེ་ཐོན་པར་བསམ་ལ༔ སྟོད་ཀྱི་རླུང་སྲང་དུ་ཁུ་ཚུར་བརྡེག་པ་དང་ཧ་འདོན་དྲག་ཏུ་བྱའོ༔ གཉིས་པ་སྨད་ནད་སྦོས་ཁྲོག་སེལ་བའི་དམིགས་པ་ནི༔ རང་གི་ཕོ་བར་གནམ་ལྕགས་ཀྱི་འཁོར་ལོ་རྩིབས་བཅུ་དྲུག་པ༔ ལྟེ་བར་རཾ་གྱི་འོག་ཏུ་ཡཾ་གྱིས་མཚན་པ༔ ཡཾ་ལས་རླུང་བྱུང་རཾ་ལས་མེ་འབར་གནམ་ལྕགས་མེ་ཡི་འཁོར་ལོ་དྲག་ཏུ་འཁོར་བས༔ ལུས་ཡེ་ཤེས་ཀྱི་མེས་གང་བར་བསམས་ནས་ཕོ་བ་གཡས་གཡོན་དྲག་ཏུ་བསྐོར་ཞིང༔ རྡོ་རྗེ་ཐོ་རྡེག་དང་དྲོད་འབེབ་ཀྱི་འཕྲུལ་འཁོར་ལ་འབད་དོ༔ གསུམ་པ་སྟེང་རླུང་འགགས་པ་སེལ་བའི་དམིགས་པ་ནི༔ རང་གི་མགྲིན་པ་ནས་རླུང་ཐམས་ཅད་སྔོ་ཕྱུ་རུ་རུ་འོག་སྒོ་དང་བ་སྤུའི་བུ་ག་ཐམས་ཅད་ནས་སིར་སྒྲ་དང་བཅས་དོན་པར་བསམ་ཞིང༔ མདུན་རྒྱབ་གཡས་གཡོན་ཐམས་ཅད་ནས་གཞིལ་བའོ༔ བཞི་པ་སྨད་རླུང་དབུགས་ངན་བསྒོམས་པའི་དམིགས་
པ་ནི༔ ཀ་བ་བཙུགས་ལ་སྨད་རླུང་གྱེན་ལ་དྲངས་ནས༔ རླུང་ཐམས་ཅད་སྔོ་ཕྱུ་རུ་རུ་སྤྱི་བོའི་གཙུག་ནས་ཡར་ཐོན་ཏེ༔ མདའ་གང་ཙམ་གྱི་ཐད་དུ་ཤེལ་དཀར་མཆོད་རྟེན་གྱི་རྣམ་པར་ཆགས་པས་དེ་རྣམས་ལས་བདུད་རྩིའི་རྒྱུན་བབས་པར་བསམ་ལ་འབེབ་ཆུང་ཧ་སྒྲ་དང་བཅས་པའོ༔ ལྔ་པ་སྙིང་རླུང་སེལ་བའི་དམིགས་པ་ནི༔ རང་གི་གློ་སྙིང་ཐམས་ཅད་དམར་ཁྲ་ལེ་བ་ཁྲོལ་ཚགས་ལྟ་བུ་ནས་རྣག་ཁྲག་ཆུ་སེར་ཐམས་ཅད་སྒྲ་དང་བཅས་ཏེ་འཛག་པར་བསམ་ལ༔ ཙོག་འབེབ་འཕྲུལ་འཁོར་གྱིས་སེལ་ལོ༔ དྲུག་པ་ཆུ་སེར་སེལ་བའི་དམིགས་པ་ནི༔ རང་ལུས་ཤ་ཁྲག་མེད་པར་རུས་ཀྲང་དུ་བསམ་པའི་སྟོད་སྨད་བར་གསུམ་ཁྲོལ་ཚགས་ལྟ་བུ་ཁ་མང་པོ་ཡོད་པ་ནས་ཆུ་སེར་ཐམས་ཅད་རླུང་གིས་བདས་ཏེ་ཕྱིར་འུར་སྒྲ་དང་བཅས་ཏེ་ཐོན་པར་བསམ་མོ༔ བདུན་པ་མིག་སྣ་སོར་མོ་ལ་འདྲེན་པའི་དམིགས་པ་ནི༔ རང་ལུས་ཐམས་ཅད་རྩའི་དྲྭ་བར་འབྲེལ་བས་དེ་ཐམས་ཅད་ཀྱི་རྩེ་ཡན་ལག་གི་སོར་མོ་དང༔ སྣ་མིག་རྣམས་ལ་ཟུག་རྩའི་རྩེ་ཐམས་ཅད་སོག་ཕོན་གྱི་མགོ་བོ་བྲེག་པ་ལྟར༔ སྦུ་གུ་ཧ་རེ་ཡོད་པ་ནས་རླུང་ཐམས་ཅད་བུན་བུན་ཐོན་པར་བསམ་མོ༔ བརྒྱད་པ་པུས་ནད་སེལ་བ་དང་རྐང་མགྱོགས་ཀྱི་གེགས་སེལ་ནི༔ དེ་ལ་རྐང་མགྱོགས་ཀྱི་དམིགས་གནད་གོང་དུ་བསྟན་ཅིང༔ པུས་ནད་སེལ་བའི་ལུས་གནད་ཧར་
ལངས་དང་པུས་སྟེང་ཁུ་ཚུར་གསུམ་བསྣུན་ཅིང་རྒྱབ་ནས་སྒྱིད་ཁུག་གསུམ་བསྣུན་དང༔ རྟིང་པར་ཤད་རྗེས་འཐེན་སྐྱོད་གང་མང་དང་སྐབས་རེར་ཐོག་ལ་འཇུས་ཏེ་རྐང་པ་བརྐྱང་བསྐུམ་རེས་མོས་སུ་བྱེད་དོ༔ བར་སྐབས་སུ་འཕྲེད་མ་སོགས་ལ་རྐང་རྩེ་སར་བཙུགས་ནས་གནམ་སྒྲེང་དུ་རྒྱུག་གོ༔ སྐབས་སུ་རྐང་མཐིལ་ཐམས་ཅད་བུག་པའི་རང་བཞིན་ནས་ཚིགས་ནད་ཐམས་ཅད་རྣག་ཁྲག་ཆུ་སེར་གྱི་རྣམ་པར་དོན་པར་དམིགས་པའོ༔ དགུ་པ་ཤ་ལྷད་འདོན་པའི་དམིགས་པ་ནི༔ རང་ལུས་མེ་རུ་འུར་སྒྲ་དང་བཅས་ནས་འབར་ནས༔ ནད་གདོན་སྡིག་སྒྲིབ་ཐམས་ཅད་ཚིག་ནང་ཁྲོལ་ཤ་ཁྲག་ཐམས་ཅད་ཕྱིར་ཐོན་ནས༔ ལུས་ཕྲུ་མ་ཕུས་བཏབ་པ་ལྟ་བུར་གསལ་ཏེ་དགྲམ་འདྲེན་ལ་འབད༔ སྨན་ལ་བརྟེན་པའི་གེགས་སེལ་ནི༔ སྟོད་སྨད་ཀྱི་སྦོས་ཁྲོག་གཟེར་ལངས་ནད་རིགས་འཇོམས་པ་ནི༔ ཆུ་རྩ་དྲེག་པ་དང་སྣུམ་མེད་པ་བྱ་བྲུན་ཐར་ནུ་ཆ་མཉམ་ལ༔ ཐུར་མགོ་གང་ཙམ་ཆུ་བསྐོལ་ལྕག་གིས་ཕུལ་ཆུ་སྐོལ་ཐེབ་གསུམ་ལ་བཏང༔ རླུང་ཞི་དྲག་གང་མང་བཅུག་ནས་སྲིན་པོ་གྲེ་འགགས་ཀྱིས་གནད་ལ་དབབ་པས༔ ནད་ཐམས་ཅད་བཤལ་དུ་འབྱུང་བའོ༔ ཆུ་སྐོལ་གང་འཐུང་ཐུབ་ཐུབ་ཡང་ཡང་བཏང་བས༔ རླུང་ཡར་འགྱིང་ན་མར་མནན་པས༔ མཐར་ཆུ་མདོག་ནམ་ཐོན་ཐོན་བཤལ་ལོ༔ མེ་དྲོད་གསོ་བའི་དྲོད་སྨན་
ནི༔ སེ་འབྲུ་སུག་སྨེལ་ཤིང་ཚ་པི་པི་ལིང་བཞི་ཆ་སྙོམས་ལ༔ རྒྱ་ཚ་ཞད་ཙམ་བཏང་ཞིབ་བཏགས་རྣ་བྲུས་གང་གི་ཚད་ཙམ་ཆུ་གྲང་གིས་ཕུལ་བཏང༔ ཐུན་ཚད་ཚ་གྲང་དང་སྦྱར༔ ཆུ་བསྡོམས་ཞི་སྲིན༔ ལྕམ་འབྲུ་སྡིག་སྲིན་དྲོད་སྨན་པི་པི་ལིང་གཡེར་མ༔ གཟེ་མ་རྣམས་ཆ་སྙོམས་རྒྱ་ཚ་ཞད་ཙམ་བཏང་བའི་ཐང་དང་པོ་སླ༔ བར་དུ་གར༔ མཐར་སླ་བ་ཅི་མང་བཏང༔ བལ་འདབ་གཙང་མ་ལ་སྔགས་འདི་བརྒྱ་རྩ་བསྒྲངས་ལ་ཆུ་སོར་སྦྱར༔ ཨོཾ་ཆུ་ཤད་ཤད་དམར་ནར་ནར་ས་ཆལ་ཆལ་ཆུ་ཐོན་ཐོན་སྭཱ་ཧཱ༔ དེས་ནད་ལས་གྲོལ་བར་འགྱུར་རོ༔ གཞན་ཡང་རླུང་གི་ནད་ཕལ་ཆེ་བ་ལ་རུས་གསར་གྱི་ཐང༔ མཁྲིས་པ་ལ་ཨ་རུ་ར་གསེར་མདོག་གི་ཐང༔ བད་ཀན་སྐྱ་སྨུག་སོགས་གང་ལའང་ཚ་ལ་བུལ་ཏོག་ཅོང་ཞི༔ ལྒ་སྐྱ་རྣམས་ཆ་སྙོམས་ཞིབ་ཏུ་བཏགས་ཤིང་ཆུ་བསྐོལ་གྱིས་ཕུལ་ནས་བཏང་བས་ནད་ཐམས་ཅད་བཤལ་དུ་འབྱུང་ངོ༔ ཤ་དུག་སྦྱར་དུག་སོགས་ཀྱིས་ནད་ལྷོངས་པ་ལ་རླུང་ལ་འབད་ཅིང༔ དྲི་ཆུ་སྐོར་ལོག་བྱས་པས་སྟེང་འོག་གི་གྲང་བའི་ནད་བྱང་ཞིང་གསོ་བའི་སྨན་དུ་འགྱུར་རོ༔ ས་བདག་ཀླུའི་ནད་འདོན་ན་ཐོག་མར་རླུང་ལ་འབྱོངས་པར་བྱས་ལ་གཉེན་པོའི་སྨན་ནི་བསེ་ཞོ་ཞོ་གང་ཐར་ནུ་ཞོ་ཕྱེད་སྨན་ཆེན་ཞོ་གང༔ གསེར་མདོག་ཞོ་བཞི༔ གླ་རྩི་ཞོ་ལྔ༔ ར་ཁྲག་ནག་པོ་ཞོ་ལྔ༔ པདྨ་དམར་ཁྲ་བར་གཤོག་ཕྲལ་བ་བཅུ་
གཅིག༔ རྒྱ་ཚ་ཞོ་ཕྱེད༔ པི་པི་ལིང་རྡོག་པོ་གསུམ༔ ཤིང་མངར་སྲན་མ་ཙམ༔ སྡིག་སྲིན་ཐུན་བཟང་བ་གསུམ་གྱི་བོངས༔ ལྕམ་འབྲུ་ཐུན་ལྔ༔ གཟེ་མ་ཐུན་ལྔ༔ རྨ་བྱའི་མདོངས་གསུམ༔ རུས་སྦལ་དང༔ སྤིར་གྱི་རུས་པ་ཞོ་རེ༔ དེ་རྣམས་ཞིབ་ཏུ་བཏགས་ལ་ཙནྡན་མར་ཁུས་བསྡུས་པའི་རིལ་བུ་སྲན་ཆུང་ཙམ་རེ་ནངས་རེས་བརྟེན༔ རླུང་ལ་འབད་པས་ནད་རྣམས་རང་འབྱོངས་སུ་འབྱུང་ཞིང་སོས་པར་ངེས་སོ༔ མིད་པ་རྒྱུན་གཅོད་ཀྱི་སྐབས་སུ་ཐོག་མར་སྒོག་སྐྱའི་ཐང་ཕྲན་བུ་བཏང་བས་འབྱུང་བ་ཆ་སྙོམས༔ ཆུ་བསྐོལ་གྲང་དྲོ་གང་འཐུང་ཡང༔ ཨོཾ་ཐུད་དེ་ཐུད་དེ་ཐུད་སྭཱ་ཧཱ༔ བརྒྱ་རྩ་བཟླས་ཆུ་ལ་བཏབ་སྟེ་འཐུང་ངོ༔ ཆུ་དུག་ཞི་ཞིང་ཆུ་སྟོབས་བསྐྱེད་པའོ༔ མིད་པ་རྒྱུན་གཅོད་མི་བྱེད་སྐབས་སུ་དཀར་གསུམ་མངར་གསུམ་ཆང་ཞིམ་པོ་དུམ་རེ་བཏང་བས་ཏིང་ངེ་འཛིན་འཕེལ་བར་འགྱུར་རོ༔ མིག་རབ་རིབ་ཏུ་གྱུར་ནས་མི་གསལ་ན་ཨ་རུ་རའི་ཐང༔ སྣས་དྲི་མི་ཚོར་ན་ཤ་ཆེན་གྱི་གསུར༔ སྐྱུག་ལོག་བྱུང་ན་འབུ་ཡིན་པས་སྒོག་ཐང་བཏང་བའམ༔ ལ་ཕུག་གི་དྲི་མ་བསྣོམ༔ ལྕེས་རོ་ཚོར་བ་ཤོར་ན་བསྲེགས་ཤ་ཁམ་བུ་རེ་ཟ༔ དྲི་ཆེན་མ་ཐོན་ན་ཚྭ་མར་ཁམ་གཅིག་གཏང༔ གྲང་བ་སྐྱེས་ན་ལྒ་སྤོད་ཀྱི་ཐང་གཏང༔ ཁྱོམ་ཁྱོམ་རྡིབ་ན་ཀ་ར་ཆུ་སྐོལ་གཏོང༔ རླུང་ལངས་ན་ཕྱེ་མར་དུད་པས་འདུག
བད་ཀན་ལངས་ན་བཅའ་སྒའི་ཕྱེ་མ་ཆུ་གྲང་བཏབ་ལ་བཏང༔ མར་ནག་སྔོ་དང་ཤ་རྩམ་ཆང་སྐྱུར་ལན་ཚྭ་སྤང༔ མེ་དང་ཉི་མར་མི་སྡོད༔ བུད་མེད་ལ་མི་འཁྲིག༔ ཞག་ཉེར་གཅིག་གིས་རང་སོ་ཟིན༔ ཟླ་བ་གཅིག་གིས་འབྱུང་བ་ཆ་སྙོམས༔ ཟླ་བ་གཉིས་ནས་ལུས་ཤིང་བལ་ལྟར་ཡང༔ གསུམ་ནས་འབྱུང་བ་ཆ་སྙོམས༔ རིག་པ་དྭངས་སྙིགས་ཕྱེད༔ བཞི་ནས་ཏིང་ངེ་འཛིན་དང་ཤེས་རབ་སྐྱེ༔ ལྔ་ནས་མངོན་ཤེས་འཆར༔ དྲུག་ནས་བླ་མ་མཁའ་འགྲོའི་དངོས་གྲུབ་འབྱུང༔ རྒན་པོའི་སྐྱོན་བྲལ་འཆི་བདག་བདུད་ལས་རྒྱལ༔ འཕྲོ་གཅོད་ན་དང་པོ༔ དལ་གྱིས་བཟའ་བཏུང་བརྟེན་ཞིང༔ ཆུང་ཆུང་དང་ཉུང་ཉུང་ནས་བསླབ་པར་བྱའོ༔ དེ་ལ་གོམས་པས་གེགས་མི་འབྱུང་སྟེ་ཡོན་ཏན་ཕུན་སུམ་ཚོགས་པ་དང་ལྡན་པར་འགྱུར་རོ༔ ཡོན་ཏན་གྱི་མངོན་རྟགས་བྱུང་ན་རློམ་པས་ང་རྒྱལ་དྲེགས་ཆོས་མི་བྱ༔ ལྷོངས་ཀྱི་རྣམ་པས་ཅུང་ཟད་མ་བདེ་བ་བྱུང་ཡང༔ སྒྱིད་ལུག་དཔའ་ཞུམ་ནས་འཕྲོ་མི་གཅོད༔ མི་བདེ་བ་རྒྱུན་བསྲིངས་ནས་བདེར་མ་སོང་ན་ཧ་ཅང་ནན་ཆེར་མི་བྱ་བར་འཕྲོ་དལ་གྱིས་གཅད༔ བཟང་ངན་གྱི་རྣམ་པ་ཅི་བྱུང་ཡང་རྣམ་པར་མི་རྟོག་པའི་ངང་ལ་མཉམ་པར་བཞག་གོ༔ དེ་ལ་སོགས་པའི་རྣམ་བཞག་འོས་པ་དང་མི་འོས་པ་རྣམས་གདམས་པ་སྤྱི་དང་བསྟུན་ཞིང༔ རྣལ་འབྱོར་པ་ཉམས་རྟོགས་ཅན་གྱིས་ཤེས་པར་བྱའོ༔ འདིའི་ཡོན་
ཏན་ཐུན་རེ་བསྒོམས་པས་ཀྱང་ཚེ་རིང་ནད་མེད་ལོངས་སྤྱོད་འཕེལ་བ་ལ་སོགས་པའི་དོན་འབྲས་དཔག་ཏུ་མེད་པ་འབྱུང་བར་འགྱུར་ན༔ རྒྱུན་དུ་ཉམས་སུ་བླངས་ན་བརྗོད་ལས་འདས་པའི་ཡོན་ཏན་ཐོབ་པར་འགྱུར་རོ༔ ས་མ་ཡ་རཀྵ་རཱ་ཧུ་ལ༔ འཇའ་ལུས་འོད་ཕུང་རང་གྲོལ་ལས༔ ཁྱད་པར་འཕགས་པའི་ཁྲིད་ཆེན་བརྒྱད་དང་འབྱུང་བའི་གེགས་སེལ་བཞུགས་སོ༔ ན་མོ་གུ་རུ་ཛཱ་ཧ་བཱིར་ཨ་ཡུརྫྙཱ་ན་སིདྡྷི་ཧཱུྃ༔ འདིར་གྲུབ་པའི་དབང་ཕྱུག་ཛཱ་ཧ་བཱིར་གྱི་ཁྱད་པར་འཕགས་པའི་ཁྲིད་ཆེན་བརྒྱད་ཀྱི་ཟུར་དམིགས་འདི་སྔོན་ཆད་མ་དར་ཀྱང༔ དེང་ནས་བླ་མ་མཁའ་འགྲོས་ལྡོམ་བུ་བ་བདག་ཉིད་ལ་ཉམས་ཟིར་དུ་གནང་བ་ཡི་གེར་བྲིས་པ་སྣང་ཡང་དད་ལྡན་རྣམས་ཀྱི་སྙིང་ནོར་ས་མ་ཡ༔ ན་མོ་གུ་རུ་ཛཱ་ཧ་བཱིར༔ དད་ལྡན་ཚེ་གཅིག་ཐར་པ་ཐོབ་འདོད་རྣམས༔ ཚེ་སྒྲུབ་ཟབ་མོས་རྣལ་འབྱོར་ཚེ་སྲོག་བསྲིང༔ བདེ་དྲོད་གཏུམ་མོས་བག་ཆགས་གཉིས་འཛིན་བསྲེག༔ རླུང་ལྔའི་དྭངས་མ་ཡེ་ཤེས་ཟས་བཅུད་འཚོལ༔ རྐང་མགྱོགས་རླུང་གིས་མཁའ་སྤྱོད་དངོས་གྲུབ་བསྒྲུབ༔ ཆུ་རླུང་ཟབ་མོས་སྐོམ་པའི་ཚ་གདུང་སེལ༔ བཏུང་བའི་བྱེ་བྲག་ཕྱི་ནང་བཅུད་སྡུད་བྱ༔ རྩ་བའི་རླུང་ལྔས་ཕྱི་ནང་བར་ཆད་སེལ༔ རླུང་འཚོ་བཅུད་འཚོས་བཀྲག་མདངས་གཟི་བརྗིད་བསྐྱེད༔ ཁམས་ལ་དབང་ཐོབ་མཁའ་སྤྱོད་མྱུར་བགྲོད་
འགྱུར༔ ཞེས་པས༔ དང་པོ་ཚེ་སྒྲུབ་ཀྱི་ཞལ་ཤེས་ནི༔ རང་ལུས་གནམ་ལྕགས་ཀྱི་རྡོ་རྗེ་རྩེ་དགུ་པར་བསྒོམ་སྟེ༔ དེའི་ལྟེ་བར་རླུང་སེམས་ཀྱི་ངོ་བོ༔ ཉི་ཟླའི་གྭའུ་འོད་འབར་བའི་ནང་དུ༔ མགོན་པོ་ཚེ་དཔག་མེད་ལོངས་སྐུའི་ཆ་ལུགས་གསལ་བཏབ༔ ཁ་སོ་གཉིས་ཀྱི་བར་ནས་ཧ་སིབ་ཀྱིས་རླུང་རྔུབས་པས༔ བླ་མ་སངས་རྒྱས་བྱང་ཆུབ་སེམས་དཔའ་དཔའ་བོ་དཔའ་མོ་དང༔ སྐྱེ་འགྲོ་མཆོག་དམན་བར་གསུམ་བརྟན་གཡོ་སྣོད་བཅུད་ཀྱི༔ ཚེ་བཅུད་ཐམས་ཅད་ཚེ་དང་བསོད་ནམས་དཔལ་འབར་གྱི་ནུས་མཐུར་བཀུག་ནས་ཉི་ཟླའི་གྭའུར་ཐིམ་པས་བཀྲག་མདངས་འོད་དུ་འཚེར་བ་ལ་དམིགས་པ་གཏད༔ གཟུངས་སྔགས་འདི་ཉིད་རླུང་ཟ་བ་དང་བསྟུན་ཏེ་བཟླའོ༔ ཨོཾ་བཛྲ་ཨཱ་ཡུ་ཥེ་བྷྲཱུྃ་ནྲྀ་ཛ༔ དེ་ལྟར་ཡང་ཡང་བྱས་པས་ཚེ་འཕེལ་བར་འགྱུར༔ ཨུ་པ་དེ་ཤ༔ གཉིས་པ་གཏུམ་མོའི་ཞལ་གདམས་ནི༔ ལུས་གནད་རྒྱུན་ཁྱེར་ལྟར་ལ༔ རང་ལུས་ཕག་མོར་གསལ་བཏབ༔ རྩ་གསུམ་འཁོར་ལོ་ལྔ་ལྡན་དང༔ ཆོས་འབྱུང་རྣམ་གསུམ་བསྒོམས་ནས༔ རླུང་དྲག་ཏུ་གཅུན་དམིགས་པ་ལྟེ་འོག་ཏུ་ཨ་རཾ་མེ་འབར་ལ་གཏད་དོ༔ མེ་ལྕེ་ཡར་ཡར་འབར་ལུས་ཐམས་ཅད་གང༔ མེ་ལྕེའི་རྩེ་ལ་མཁའ་འགྲོ་མ་གྲངས་མེད་ཀྱི་ཕྱག་ན༔ ཡེ་ཤེས་ཀྱི་མེ་དཔུང་འབར་བ་བསྣམས་པ་སྟེ༔ ཐམས་ཅད་ཀྱང་བྲོ་གར་བྱེད་པར་བསམ་ལ་དྲོད་
འབེབ་ཙོག་འབེབ་དང༔ བརྟུལ་ཞུགས་ཀྱི་འཕྲུལ་འཁོར་ལ་དྲག་ཏུ་འབད་པས་བདེ་དྲོད་རང་དབང་མེད་པར་འབར་རོ༔ སྦས་ཆོས་ཨུ་པ་དེ་ཤའོ༔ གསུམ་པ་རླུང་ལྔའི་ཞལ་གདམས་ནི༔ རླུང་ཤས་ཅན་གྱི་གང་ཟག་ལ༔ འབྱུང་བ་སའི་བཅུད་སྲ་ཞིང་འཐས་པ་ལྕི་བ་སེར་པོར་གསལ་བཏབ་སྟེ་རྔུབ་པའོ༔ ཚད་ཤས་ཅན་ལ་འབྱུང་བ་ཆུའི་བཅུད་བསིལ་ཞིང་དྭངས་པ༔ ཁ་དོག་དཀར་པོ་རེག་བྱ་བསིལ་བ་རྔུབ་པར་བྱའོ༔ གྲང་ཤས་ཆེ་ན་འབྱུང་བ་མེའི་བཅུད་དམར་ཞིང་འཚེར་བ་ཚ་ངར་ལྡན་པ་རྔུབ་པར་བྱའོ༔ བད་ཀན་གྱིས་བྱིང་ཤས་ཆེ་ན་འབྱུང་བ་རླུང་གི་བཅུད་ཡངས་ཤིང་གཡོ་བ་སིར་སྒྲ་དང་བཅས་རྔུབ་པའོ༔ རིག་པ་ལ་གསལ་ཆ་མེད་ན་འབྱུང་བ་ནམ་མཁའི་རླུང་མཐའ་དབུས་གཞོམ་གཞིག་དང་བྲལ་བ་སྔོན་པོར་རྔུབ་པའོ༔ རླུང་ལྔའི་ཞལ་གདམས་ཨུ་པ་དེ་ཤའོ༔ བཞི་པ་རྐང་མགྱོགས་རླུང་གི་ཞལ་གདམས་ནི༔ གསང་རླུང་རྟ་རུ་ཞོན་པར་འདོད་ན༔ འགྲོ་ཚེ་སྟེང་རླུང་མནན་འོག་རླུང་འཐེན༔ རྐང་འོག་གཉིས་སུ་ཡཾ་ལས་རླུང་གི་དཀྱིལ་འཁོར་གཞུའི་དབྱིབས་ཅན་ཆངས་གཟུང་ལ་ཡཾ༔ མཆོག་མ་བ་དན་གྱིས་མཚན་པ༔ འགྲོ་ཚེ་ལག་པ་གཉིས་ཀྱི་སྲིན་ལག་གི་འཕར་རྩ་མཐེ་བོང་གིས་མནན་པའི་ཁུ་ཚུར་བཅང་མཆན་རྩ་བཅིངས་ཏེ༔ ཡཾ་ལས་རླུང་གཡོས་བ་དན་བསྐྱོད་ནས་བཏེགས་པའི་ཚུལ་དུ་
དམིགས་ལ༔ གོམ་ཟོར་ཡང་ཆོད་ཀྱིས་བཏང་ལ་ཕྱིན་པས་མི་ཕལ་པ་ལས་དགུ་འགྱུར་གྱིས་མགྱོགས་ཤིང༔ མཁའ་སྤྱོད་ཀྱི་དངོས་གྲུབ་ཐོབ་བོ༔ འདིའི་སྐབས་སུ་རྐང་མགྱོགས་ཀྱི་འཕྲུལ་འཁོར་དང༔ པུས་ནད་སེལ་བའི་འཕྲུལ་འཁོར་གླིང་བཞི་བསྒྲད་པའི་འཕྲུལ་འཁོར་དང་མི་འབྲལ་བར་བྱའོ༔ རླུང་གནད་བུམ་པ་ཅན་ལ་འབད་པ་ཨུ་པ་དེ་ཤའོ༔ ལྔ་པ་ཆུ་རླུང་སྐོམ་དུ་འཐུང་བའི་ཞལ་ཤེས་ནི༔ ལུས་སྐྱིལ་ཀྲུང་ཕྱེད་པ་མདའ་ལྟར་བསྲང༔ ལྐོག་མ་དང་མིད་པ་མདུན་དུ་བརྒྱང༔ རང་རྡོ་རྗེ་མཁའ་འགྲོ་སྐུ་མདོག་དཀར་མོར་གསལ༔ རྩ་ནང་ཐམས་ཅད་རྡོ་རྗེ་མཁའ་འགྲོ་གྲངས་མེད་པས་མེར་གྱིས་ཁེངས་པར་སྒོམ་ཞིང་ཆུ་རླུང་དཀྱིལ་འཁོར༔ ཕྱིའི་ཆུ་རླུང་ཐམས་ཅད་མགྲིན་པ་ལྡེམ་གུག་གིས༔ ཧ་སིབ་ཀྱིས་སོ་བར་ནས་དྲངས་པས༔ རང་ལུས་ཀྱི་རྩ་སྟོང་ཕྲག་བདུན་ཅུ་རྩ་གཉིས་སོགས་ཀྱི༔ གྲངས་ཅན་དང་གྲངས་མེད་ཀྱི་རྩ་ཐམས་ཅད་སོག་ཕོན་གྱི་མགོ་བྲེགས་པ་ལྟ་བུ༔ སྦུ་གུ་ཧ་རེ་ཁྲག་ཆུ་སེར་གྱིས་མ་གང་བ༔ སྟོང་སང་ངེ་ཡོད་པའི་ནང་དུ༔ ཆུའི་བཅུད་ཐམས་ཅད་དཀར་ནར་རེ་ཞུགས་པས་ལུས་ཕྲུ་མ་བུས་པ་ལྟར༔ བདུད་རྩིས་དཀར་མེར་གྱིས་གང་བར་བསམ་མོ༔ ཞག་གསུམ་ནས་བརྟན་པ་ཐོབ་ཅིང་སྐོམ་པའི་གདུང་བ་ལས་གྲོལ༔ ཕྱིས་སྐོམ་པའི་ཚེ་དྲན་པ་ཙམ་གྱིས་ཆོག་པའོ༔ ཆུ་རླུང་གི་ཨུ་པ་དེ་ཤའོ༔ དྲུག་པ་རླུང་ཧུབ་དབར་དུ་བཟའ་བའི་
ཞལ་ཤེས་ནི༔ ཆུ་བསྐོལ་ཆུ་གྲང་དར་ཆུ་འོ་ཆུ་ཁྲུས་ཆུ་རྡོ་ཆུ༔ ཇ་ལ་སོགས་པ་འཐུང་བའི་ཚེ༔ ཧུབ་སྒྲ་དང་བཅས་པས་ས་ཆུ་མེ་རླུང་འབྱུང་ལྔའི་བཅུད་དང༔ དུས་གསུམ་རྒྱལ་བའི་ཐུགས་རྗེ་བྱིན་རླབས་བསོད་ནམས་ཐམས་ཅད༔ འཇའ་འོད་དུ་མེ་རེ་རེ་བྱུང་ནས་བཏུང་བ་དང་མཉམ་དུ་རང་ལུས་འཇའ་འོད་ཀྱིས་ཁེངས་པར་བསམ་ནས་མིད་པའོ༔ འདི་ཚེ་སྒྲུབ་ཀུན་གྱི་རྩ་བའི་མཐར་ཐུག་ཏུ་གྱུར་པ་ཡིན་ནོ༔ རླུང་ཧུབ་དབར་དུ་བཟའ་བའི་ཨུ་པ་དེ་ཤའོ༔ བདུན་པ་རྩ་བའི་རླུང་ལྔའི་ཕྱི་ནང་བར་ཆད་སེལ་བའི་ཞལ་ཤེས་ནི༔ དང་པོ་ས་རླུང་ཟ་བའི་ཚེ་ལུས་གནད་ཛཱ་ཧ་བཱིར་རྒྱུན་ཁྱེར་ལྟར་ལ༔ ལྟེ་འོག་ཨ་རཾ་གསལ་བཏབ་མགོ་གུག་པས༔ ཕྱི་རོལ་སོར་བཅུ་གཉིས་ཀྱི་ཚད་ནས་ལཾ་ལས་ས་བཅུད་སེར་པོ་འཇམ་ལ་ཐུང་བའི་ཚུལ་དུ་རྔུབ་ཅིང་འབུད་དོ༔ གཉིས་པ་ཆུ་རླུང་བཟའ་ཚེ་རྐང་པ་རྡོ་རྗེའི་སྐྱིལ་ཀྲུང་མཐེ་བོང་ལག་གཉིས་ཀྱིས་བཟུང་ནས༔ རོ་སྟོད་བསྒྱེད་ཅིང་སྙིང་གར་ཧཱུྃ་མཐིང་ནག་འོད་དང་འོད་ཟེར་འཕྲོ་བ་ལ་སེམས་གཏད་དེ༔ ཕྱི་རོལ་སོར་བཅུ་གསུམ་ཙམ་ནས་ཁཾ་ལས་ཆུ་རླུང་དཀར་པོ་འཇམ་ལ་རིང་བ་སོ་དབར་ནས་རྔུབ་ཅིང་འབུད་དོ༔ གསུམ་པ་མེ་རླུང་ཟས་སུ་བཟའ་བའི་ཚེ་སྐྱིལ་ཀྲུང་མིག་གཉིས་བསྒྲིལ་རྣ་བའི་བུག་པ་གཉིས་བསངས་ཏེ༔ ཡན་ལག་ཐམས་ཅད་སྤྲུག་ཅིང་ཕྱོགས་བཞིར་འཁྲབ་པའི་ངང་ནས༔ ཕྱི་རོལ་
སོར་བཅུ་གསུམ་ཙམ་ལས་རཾ་ལས་མེ་རླུང་དམར་པོ་རྩུབ་ཐུང་དུམ་བུར་རྔུབ་ཅིང་འབུད་དོ༔ བཞི་པ་རླུང་གི་རླུང་བཟའ་ཚེ༔ གྱད་ཀྱི་འདུག་སྟངས་དྲག་ཤུལ་གྱི་ངང་ནས་ཕྱི་རོལ་སོར་བཅོ་ལྔ་ཚད་ཙམ་ལས་ཡཾ་ལས་རླུང་གི་རླུང་དྲག་པོ་སྒྲ་ཅན་གྱིས་རྔུབ་ཅིང་འདུད་དོ༔ ལྔ་པ་ནམ་མཁའི་རླུང་ཟས་སུ་བཟའ་བའི་ཚེ༔ ལུས་གནད་ཙོག་པུ་འཐེན་སློང་གི་ངང་ནས༔ ཕྱི་རོལ་སོར་བཅུ་དྲུག་ཙམ་ནས་ཨེ་ལས་ནམ་མཁའི་རླུང་སྔོན་པོ་ཤིན་ཏུ་འཇམ་པའི་ངང་ནས་རྔུབ་ཅིང་འབུད་དོ༔ རྩ་བའི་རླུང་ལྔའི་ཨུ་པ་དེ་ཤའོ༔ བརྒྱད་པ་རླུང་འཚོའི་ཞལ་ཤེས་ནི༔ ལུས་གནད་རི་བོང་ཙོག་སྡོད་ཀྱི་ངང་ནས༔ ཀ་བ་བཙུགས་པ་གླང་པོ་ཆུ་སྲིན་ནེ་ཙོ་སོགས་ཀྱིས་རླུང་ལྷ་རྒྱ་མཚོར་སྤྱན་དྲངས་པ༔ ཟུག་གཟེར་སྦོས་ཁྲོག་སོགས་ན་ཟུག་གང་བྱུང་ཡང་ཐུན་ཆུང་ངུ་ནས་བསླབ་པས༔ ཟུག་རྔུ་མཐའ་དག་ལས་རྒྱལ་བར་འགྱུར་རོ༔ དེ་ལྟར་རླུང་འཚོ་བཅུད་འཚོ་ལ་བརྟན་པ་ཐོབ་པས༔ འཆི་བདག་གི་བདུད་ལས་རྒྱལ་བར་འགྱུར་རོ༔ རླུང་འཚོ་མཐར་ཕྱིན་པའི་རྟགས་སུ་བདུད་རྩི་ཁ་དོག་དམར་པོ་དང༔ སེར་པོ་དང༔ སྔོན་པོ་དང༔ དཀར་པོ་དང༔ ལྗང་ཁུ་ལ་སོགས་འགྱུར་ན༔ རྣལ་འབྱོར་པའི་མདོག་ཀྱང་དེ་ལྟར་དུ་ངེས་པར་འགྱུར་རོ༔ འདིའི་གནད་ལ་ཐུར་སྲོག་ལ་བསྲེ་བའི་རླུང་རྩོལ་ལ་འབད་པ་འདོན་པ་གལ་ཆེའོ༔ ཕྱི་དབང་པོ་བཀྲག་
མདངས་ཀྱི་རྒྱན་གྱིས་མཛེས་པས་སུས་མཐོང་ཡང་ལྟ་ན་སྡུག་པ་དང༔ ནང་རིག་པ་འོད་གསལ་གྱི་རྒྱན་གྱིས་མཛེས་པས་གཞན་སྣང་ཟིལ་གྱིས་ནོན་པ་དང༔ གཞན་ཡང་ཕྱི་རོལ་གྱི་ཟས་བཅུད་ཐམས་ཅད་དབང་དུ་འདུས་པ་དང༔ ཐ་མལ་བཟའ་བཏུང་གི་མངོན་ཞེན་ཆོད་པ༔ དགེ་སྦྱོར་འཕེལ་རིག་པ་དྭངས་དབང་པོ་གསལ༔ ལུས་ངག་ཡིད་གསུམ་ལ་ཉམས་རྟོགས་འབར་ཏེ་ནམ་མཁའ་ལ་འཕུར་བ་དང༔ མངོན་ཤེས་འཆར་ཆུ་ལ་མི་བྱིང་བ་སོགས་ཡོན་ཏན་དཔག་ཏུ་མེད་པ་འབྱུང་ངོ༔ ཤིན་ཏུ་ཟབ་པའི་མན་ངག་རྒྱལ་པོ་འདི་བརྒྱུད་པ་འཛིན་ངེས་པ་དང་སྐལ་ལྡན་སྙིང་རུས་ཅན་གྱི་གང་ཟག་ལ་བསྟན་ནོ༔ གཞན་རྣམས་ལ་བཀའ་རྒྱ་ཤིན་ཏུ་དམ་པར་བྱའོ༔ རཱ་ཧུ་ལ་རཀྵ་ས་མ་ཡ་ཧཱུྃ༔ འཇའ་ལུས་འོད་ཕུང་རང་གྲོལ་ལས༔ བོགས་འདོན་ནད་བརྒྱ་སྨན་གཅིག་བདུད་རྩི་འཆི་སོས་བཞུགས་སོ༔ ན་མོ་གུ་རུ་ཛཱ་ཧ་བཱིར༔ འཇའ་ལུས་རྡོ་རྗེའི་ཚིག་རྐང་ལས༔ ཚེ་ཡི་འགལ་རྐྱེན་མི་མཐུན་ཀུན་འཇོམས་ཤིང༔ ཚ་གྲང་བད་མཁྲིས་ནད་རྣམས་བཤལ་སྐྱུག་འབྱིན༔ མཐུན་རྐྱེན་ཉམས་རྟོགས་ཉི་ཟླའི་དཀྱིལ་འཁོར་རྒྱས༔ ཞེས་པའི་དོན་ལ་གསུམ་སྟེ༔ རང་ལུས་ཀྱི་ནད་ཐམས་ཅད་རླུང་གིས་བཤལ་སྐྱུག་ཏུ་འབྱིན་པ་དང༔ འཕྲུལ་འཁོར་གྱིས་བཤལ་སྐྱུག་འབྱིན་པ་དང༔ སྨན་
གྱིས་བཤལ་སྐྱུག་འབྱིན་པ་དང་གསུམ༔ དང་པོ་ནི་རང་ཉིད་གང་དུ་གནས་པའི་ས་ཕྱོགས་འདི་དག་པ་མཁའ་སྤྱོད་ཀྱི་ཞིང་ཁམས་སུ་བསྒོམ༔ ཨེ་ལས་ཆོས་ཀྱི་འབྱུང་གནས་གྲུ་གསུམ་ཁ་སྦྱོར་ཡངས་ཤིང་རྒྱ་ཆེ་བའི་ནང་དུ་བདག་ཉིད་རྡོ་རྗེ་ཕག་མོ་ཞལ་ཕྱག་ཡོངས་རྫོགས་སུ་གསལ་བའི་སྐུ་སྐེད་མན་ཆད་ཡེ་ཤེས་མེ་རླུང་འཚུབས་པའི་ནང་དུ་བཞུགས་པར་བསམ༔ དེའི་སྤྱི་བོར་བརྒྱུད་པའི་བླ་མ་རྣམས་ཐོ་བརྩེགས་སུ་བཞུགས་པར་གསལ་བཏབ་སྟེ༔ གསོལ་བ་དྲག་ཏུ་འདེབས་པར་བྱའོ༔ ན་མོ་རྩ་བརྒྱུད་བླ་མ་དམ་པ་ཁྱེད་རྣམས་ལ༔ སྒོ་གསུམ་གུས་པའི་ཡིད་ཀྱིས་གསོལ་འདེབས་ན༔ ལུས་ངག་ཡིད་ལ་སྐུ་གསུང་ཐུགས་ཞུགས་ནས༔ རྒྱབ་རླུང་མྱུར་གྲོལ་མདུན་རླུང་མཐར་ཕྱིན་ནས༔ སྲོག་ཐུར་མ་བུ་འདྲེས་པར་བྱིན་གྱིས་རློབས༔ ལྟོོ་གོས་ཞེན་པ་ཆོད་པར་བྱིན་གྱིས་རློབས༔ རླུང་སེམས་དབུ་མར་ཆུད་པར་བྱིན་གྱིས་རློབས༔ བདེ་སྟོང་ལྷན་སྐྱེས་རྟོགས་པར་བྱིན་གྱིས་རློབས༔ འཇའ་ལུས་མཁའ་སྤྱོད་འགྲུབ་པར་བྱིན་གྱིས་རློབས༔ ཞེས་གསོལ་བ་བཏབ་པས་ལྷ་ཚོགས་དགྱེས་ནས་འོད་དུ་རིམ་གྱིས་ཞུ༔ ཐམས་ཅད་རང་ཉིད་ལ་མར་མེ་གཅིག་ལས་གཉིས་མཆེད་ཀྱི་ཚུལ་དུ་རང་ལ་ཐིམ༔ དེ་ནས་ལུས་གནད་སྡོང་པོ་གསུམ་བལྟབ་ལ༔ རླུང་གནད་ཀ་བ་གཅིག་པ་སྟེ༔ པུས་གཉིས་བར་དུ་སྐུམ་ཁྲུ་གང༔ བརླ་རྟིང་སྤྲད་ལ་སྲིན་
ཞལ་དུ༔ ལྗོན་ཤིང་ལྷོའི་བཅུད་མཆོག་ལྕགས་སམ་སྨྱུག་མའི་ཐུར་མ་སྦོམ་ཕྲ་རན་པ༔ རིང་ཐུང་མཐོ་གང་སོར་བཞི་པ༔ སྦོམ་ཕྲ་མདའ་སྨྱུག་ཕྲ་ཤོས་ཙམ༔ རྡོ་རྗེའི་བུ་གར་བཙུགས་བཤང་ལམ་དང་ཆུ་ལམ་གྱི་ཐད༔ ཡར་ལ་ཐུག་གི་བར་ལ་བཏང༔ སྟེང་རླུང་དྲག་ཏུ་མནན༔ མདུན་རླུང་རང་སར་བཞག༔ རྒྱབ་རླུང་ཐུར་ལ་ཆུ་བཙིར་བ་བཞིན་འཕུལ་ནས༔ དེ་ཕྱིར་རྒྱང་གིས་འཐོན་ན་འོག་རླུང་སྟེང་དུ་སྤོ་བ་ཡིན་ཞིང༔ རྡོ་རྗེའི་བུ་གར་སོར་བཞི་ཙམ་བཙུགས༔ མདུན་རླུང་མནན་རྒྱབ་རླུང་དྲག་ཏུ་འཐེན་པས༔ རྡོ་རྗེའི་རྩ་བར་ལྷན་གྱིས་འདྲོངས་ན༔ འོག་རླུང་སྟེང་དུ་འདྲོངས་པའི་ཚད་ཡིན་ནོ༔ དེ་ནས་ངང་པའི་སྒོ་ངའི་ཀོང་བུ་སྨྱུག་སྦུབས་སོགས་ལ་ཉམས་སད་པ་ཞལ་ལས་ཤེས༔ གསུམ་པ་སྤོ་བའི་རིམ་པ་ནི༔ ཐུར་མ་བཙུགས་ལ་ཕུས་བཏབ་པའམ༔ སྒང་ཕུག་རླུང་གིས་བཀང་པས་བཙིར་ཏེ་ལམ་སྦྱོང་བའོ༔ རྡོ་རྗེའི་བུམ་པར་དབྱུགས་དཀྱིལ་ནས་འཕུལ་འཐེན་ལ་བསླབ་པས་ངེས་པར་འགྲུབ་བོ༔ ཁྲག་གཅོད་པ་འཛག་པ་སྲུང་བ་དྲང་བ་མགོ་གནོན་ལ་སོགས་པ་མཐོང་བ་བརྒྱུད་པའི་ཞལ་ལས་ཤེས༔ དེ་ལྟར་བརྟན་པ་ཐོབ་ནས་ཕྱག་རྒྱ་མ་ཟླ་མཚན་འབབ་པའི་དུས་སུ༔ ཀུནྡ་བྷ་གར་ཕབ་ལ་དཀར་དམར་འདྲེས་པ་དེ་དྲངས་ཏེ་འདྲེན་འགྲེམ་ལ་འབད་པས་ལུས་ལང་ཚོ་རྒྱས་པ་དང་ཚེ་སྒྲུབ་ཀྱི་མཆོག་ཏུ་འགྱུར་རོ༔ དེ་ལྟར་རྒྱབ་མདུན་གྱི་རླུང་ལ་བརྟན་པ་ཐོབ་
ནས༔ བོགས་འདོན་གཞན་ལུས་རྩལ་སྦྱོང་བྱ་སྟེ༔ འཇའ་ལུས་རྡོ་རྗེའི་ཚིག་རྐང་ལས༔ རྒན་པོའི་སྐྱོན་བྲལ་ཚེ་རིང་བཀྲག་མདངས་ལྡན༔ ཅིར་སྣང་དག་པའི་སྣང་བ་འཁོར་ཡུག་འཆར༔ ཞེས་པས༔ འདྲེན་པའི་ཐོག་མར་མཁའ་གསང་བྱིན་རླབས་ནི༔ རྡོ་རྗེ་རྩེ་ལྔ་བུ་ག་ཧཱུྃ་གིས་བཀག༔ པདྨ་འདབ་བཞི་བུ་ག་ཕཊཿཀྱིས་མཚན༔ འབུ་འགྲོས་ཚུལ་གྱིས་དལ་བུས་ཉམས་བླངས་པས༔ དགའ་བ་བཞི་གསུམ་བཅུ་གཉིས་ཡེ་ཤེས་ཀྱི༔ བདེ་ཆེན་འབར་ཚེ་དྭངས་སྙིགས་འདི་ལྟར་དབྱེ༔ རང་ལུས་གཞན་ལུས་གང་བསྟེན་ཀྱང༔ ཐིག་ལེ་འཕོ་ལ་ཁད་པའི་དུས༔ རང་ཉིད་སྨིན་མཚམས་དག་ཏུ་ནི༔ གཡུང་དྲུང་གཡས་སུ་འཁོར་བའི་དབུས༔ ཐིག་ལེ་དཀར་པོ་དྲུག་བརྩེགས་བསམ༔ དེ་ལ་རིག་པ་མ་ཡེངས་གཏད༔ སྙིགས་འཆོར་དྭངས་མ་འཆོར་མི་སྲིད༔ ཡང་ཡང་བསྒོམ་ཞིང་བསྐྱར་བ་ལས༔ དྭངས་སྙིགས་ཕྱེད་པར་ཐེ་ཚོམ་མེད༔ ཡང་གཅིག་ཕྱག་རྒྱ་མཚན་ལྡན་གྱི༔ དྭངས་མ་འདྲེན་པའི་དམིགས་པ་ནི༔ རང་གི་གསང་རྡོར་བུང་བ་དར་མ༔ ཕྱག་རྒྱའི་མཁའ་གསང་པདྨ་དམར་པོ༔ དྭངས་མ་སྦྲང་རྩི་ལྟ་བུ་དེ༔ བུང་བས་པདྨར་ཞུགས་ནས་སྦྲང་བཅུད་འཇིབ་པར་དམིགས་ཤིང༔ ཞུགས་ལྟར་རྩོལ་བ་བྱས་པས་དྭངས་མ་ལོན་པར་ཐེ་ཚོམ་མེད༔ གསང་བའི་རླུང་འཛིན་མ་ཆགས་པར་བྱའོ༔ རྒྱབ་མདུན་གཉིས་ཀྱི་ཨུ་པ་དེ་ཤའོ༔ བཛྲ་རཱ་ཧུ་ལ་རཀྵ་སི་
ཧཱུྃ༔ འཇའ་ལུས་འོད་ཕུང་རང་གྲོལ་ལས༔ འཕྲུལ་འཁོར་རྩ་འགྲེལ་འཇའ་ལུས་མཆོག་སྟེར་བཞུགས་སོ༔ ན་མོ་གུ་རུ་ཛཱ་ཧ་བཱིར༔ རྡོ་རྗེ་ཐེག་པའི་ཡང་རྩེ་རྨད་བྱུང་ལམ༔ ཉོན་མོངས་ལས་རླུང་ཡེ་ཤེས་སྟོབས་བསྒྱུར་ཞིང༔ འཇིགས་བྲལ་འཕོ་མེད་འཇའ་ལུས་མཆོག་སྟེར་བའི༔ རྣལ་འབྱོར་དབང་ཕྱུག་ཛཱ་ཧ་བཱིར་སྤྱི་བོས་མཆོད༔ འདིར་གྲུབ་པའི་དབང་ཕྱུག་ཛཱ་ཧ་བཱིར་གྱི་ཉམས་ལེན་རྒྱུན་ཁྱེར་འཇའ་ལུས་འོད་ཕུང་རང་གྲོལ་གྱི༔ འཕྲུལ་འཁོར་ལུས་འདུལ་བྱེད་པར་འདོད་ན༔ འབེབ་གཞུང་འབེབ་གདན་ཚད་ལྡན་སྟེང༔ ལངས་ཏེ་ཡན་ལག་མདའ་ལྟར་བསྲང༔ སྟོད་ཀྱི་སྲང་དང་སྨད་གྲང་དུང༔ འབེབ་དང་བསྟུན་ཏེ་གདན་ཁར་གདབ༔ ཞེས་པའི་ཐོག་མར་གསོལ་འདེབས་གྲུབ་ཚེ༔ སྭ་བྷཱ་ཝས་སྟོང་པར་སྦྱང༔ སྟོང་པའི་ངང་ལས་དུར་ཁྲོད་ཆེན་པོ་འཇིགས་ཤིང་མེ་རླུང་འཁྲུགས་པའི་ནང་དུ༔ ཨེ་ལས་ཆོས་ཀྱི་འབྱུང་གནས་གྲུ་གསུམ་ཁ་སྦྱོར་ཡངས་ཤིང་རྒྱ་ཆེ་བའི་ཀློང་དུ༔ རང་ཉིད་ཡེ་ཤེས་ཀྱི་མཁའ་འགྲོ་མ་ཞལ་ཕྱག་ཡོངས་རྫོགས་ཀྱི་སྐུར་གྱུར༔ ཨོཾ་བཛྲ་བཻ་རོ་ཙ་ནཱི་ཧྲཱིཿམ་ཧ་རི་ནི་ས་ཛྙཱ་ན་ཛྭ་ལ་རཾ་རཾ་ཧཱུྃ་ཕཊ༔ དམིགས་པ་ནི༔ ཡར་ལངས་པའི་དུས་སུ་ཕག་མོའི་ང་རྒྱལ་བསྐྱེད༔ འབེབ་པའི་དུས་སུ་སྣང་སྲིད་འོད་སྐུར་གསལ༔ འདྲེན་པའི་དུས་སུ་དཀར་
དམར་ཧཾ་ལ་བསྟིམ༔ འགྲེམ་པའི་དུས་སུ་སྐུ་ཐིག་ཚོམ་བུར་མེར༔ ངལ་གསོའི་དུས་སུ་ཀ་དག་ངང་ལ་བཞག༔ དེ་ནས་འབེབ་གདན་ཉི་ཟླ་ཁ་སྦྱོར་གྱི་སྟེང་དུ༔ རང་ལུས་རྡོ་རྗེ་ཕག་མོར་བསྐྱེད༔ དེ་ནས་སྲུང་བའི་འཁོར་ལོ་བསྒོམ་པ་ནི༔ སྐྱིལ་ཀྲུང་རྐྱང་འཁྲབ་དང་བཅས་བཤིག་གྱུར་ནས༔ རྐང་གཉིས་མདའ་ལྟར་མདུན་དུ་ཤད་ཀྱིས་བརྐྱང༔ འཆུན་བཙལ་སྡུད་དང་མཉམ་དུ་ལག་རྒྱབ་གཉིས༔ གདན་ཁར་གདབ་མཉས་རྐང་གཉིས་འུབ་བསྡུས་ནས༔ ལངས་ཏེ་ལུས་གནད་མདའ་ལྟར་བསྲང་མཉམ་འཕར༔ ངག་ཏུ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་ཁྲོ་མོའི་སྟངས་སྟབས་བྱེད༔ གཡས་གཡོན་སྡིགས་མཛུབ་ཕྱོགས་བཞིར་བསྒྲེང༔ དེ་རྗེས་ལག་གཉིས་རྐང་གཉིས་བསྒྲད༔ རླུང་སེམས་ལྟེ་འོག་ཧྲིལ་བཅུག་སྣང་སེམས་བསྲེ༔ ཕག་སྐད་ངུར་ཞིང་འབེབ་གསུམ་ཀ་དག་ངང་ལ་བཞག༔ དེ་ནས་དང་པོ་ལུས་འདུལ་འཕྲུལ་འཁོར་ནི༔ སྐྱིལ་ཀྲུང་རྐྱང་འཁྲབ་གྱེན་ལངས་གོང་དང་མཚུངས༔ ལག་གཡས་ཁུ་ཚུར་སྐེད་བཀན་ལག་གཡོན་སྡིགས་མཛུབ་བསྒྲེང༔ ཛཱ་ཧ་བཱིར་གྱི་སྙིང་པོ་ཉེར་གཅིག་བརྗོད༔ སྔགས་མཆིལ་འཇའ་འོད་བསམ་ལ་དཔྲལ་བར་བྱུག༔ རྐྱང་འཁྲབ་གསུམ་དང་དཔུང་པ་གཡས་གཡོན་རྒྱབ་མདུན་འཕུར༔ ལག་མགོ་མར་འཐེན་དཔུང་མགོ་རྒྱབ་
ལ་འཐེན༔ ཐལ་མོ་སྦྱར་བའི་བྷེ་ཤ་གཉིས་ཤུད་པའི༔ ལག་གཉིས་མིག་གཉིས་བཀབ་ལ་ལན་གསུམ་འཕུར༔ དེ་ནས་མགོ་བོ་ལན་དྲུག་གཡས་གཡོན་མདུན་རྒྱབ་འཕུར༔ དེ་ནས་གདོང་བཤད་བྲང་བཅག་གདབ༔ སླར་ཡང་ལག་གཉིས་བྲང་སྟེང་གཡས་གཡོན་འཆུན་བཙལ་བསྒྲེང༔ ཁུ་ཚུར་གཡས་གཡོན་འཆུན་བཙལ་རྒྱབ་མདུན་བསྒྲེང༔ དེ་ནས་ལག་གཉིས་དཔྱི་ཐད་རྒྱབ་ལ་བརྐྱང་བ༔ དལ་མོར་བཅག་འཐོན་རྒྱབ་རྗེས་རྟིང་པར་བཤུད༔ ལག་གཉིས་ངར་གདོང་བཟུང་སྟེ་ལུས་ཀུན་འཆུན་བཙལ་འཐེན༔ དེ་རྗེས་འབེབ་ཆེན་མཉམ་བཞག་གསུམ་བཅས་བརྒྱབ༔ ཧ་སྤྲུག་ཐེམས་པར་བྱེད་ཅིང་ཀ་དག་ངང་ལ་བཞག༔ གཉིས་པ་ཡན་ལག་ལྔ་སྦྱོང་རིམ་པ་ནི༔ སྐྱིལ་ཀྲུང་བྱས་ཏེ་རྐྱང་འཁྲབ་ལན་གསུམ་བརྒྱབ༔ གཡས་གཡོན་འཕུར་བསུབ་ཐལ་སྦྱར་བྷེ་ཤ་བཤུད༔ མགོ་བོ་འཕུར་དང་གདོང་བཤད་བྲང་བཅག་བརྒྱབ༔ དེ་ནས་ལག་གཉིས་གཡོན་གྱི་ཕྲག་གོང་ནས༔ པུས་མོ་གཡས་ཀྱི་སྟེང་དུ་འཆུན་བཙལ་འཐོན༔ དེ་འདྲ་གཡས་གཡོན་གཉིས་ལ་ལན་གསུམ་བྱ༔ ཁུ་ཚུར་བཅས་ཏེ་རྒྱབ་མདུན་འཆུན་བཙལ་འཐེན༔ སྐྱིལ་ཀྲུང་བཤིག་ཅིང་འབེབ་ཆུང་རྐང་གཡས་ཀྱི༔ སྤྱི་མགོ་ནས་བཟུང་རྐང་མགོའི་བར་དུ་བཤུད༔ ལག་གཉིས་བསྣོལ་ནས་སྒྱིད་ཁུང་ལན་གསུམ་འཐེན༔ དེ་བཞིན་གཡོན་ལ་བྱེད་པ་ཤིན་ཏུ་
གཅེས༔ འབེབ་ཆུང་གསུམ་བརྒྱབ་དེ་རྗེས་ཀ་དག་བཞག༔ གསུམ་པ་དབུ་མ་འཛུག་པའི་རིམ་པ་ནི༔ སྐྱིལ་ཀྲུང་བཤིག་དང་གྱེན་ལངས་གོང་དང་འདྲ༔ ལག་གཉིས་པུས་མོས་གཡས་གཡོན་སྟེང་དུ་ཁུ་ཚུར་བཞག༔ ངག་ནས་ཧ་ཧ་ཞེས་སྒྲས་དབུ་མ་ལན་གསུམ་བཙུགས༔ སྒང་འདྲེན་བྱ་ཞིང་འབེབ་ཆེན་གསུམ་གསུམ་བརྒྱབ༔ བཞི་པ་དབུ་མ་བསྐོར་བའི་དམིགས་པ་ནི༔ ལུས་གནད་རྐང་གནད་གོང་དང་འདྲ་བ་ལ༔ དབུ་མ་བཙུགས་ཏེ་གཡས་གཡོན་མང་དུ་བསྐོར༔ དེ་ནས་འབེབ་ཆེན་གསུམ་གསུམ་གོང་དང་འདྲ༔ ལྔ་པ་དབུ་མ་གསལ་འདེབས་རིམ་པ་ཡང༔ ལུས་གནད་རླུང་གནད་གྱེན་ལངས་གོང་བཞིན་ལས༔ སླར་ཡང་དབུ་མ་བཙུགས་ཏེ་ཉི་ཟླ་བསྐོར༔ འབེབ་ཆེན་བྱས་རྗེས་གཡས་གཡོན་འཐེན་པ་དང༔ ཧ་སྤྲུག་བྱེད་ཅིང་ཀ་དག་ངང་ལ་བཞག༔ དྲུག་པ་རྩ་ཐེམ་རླུང་ཐེམ་བྱེད་པ་ནི༔ སྐྱིལ་ཀྲུང་བཤིག་ལ་རྐང་གཉིས་མདུན་དུ་བརྐྱང༔ ལག་གཉིས་པུས་སྟེང་བཞག་ལ་སྒང་འདྲེན་གསུམ༔ ཙོག་པུ་རྐང་བསྣོལ་སྒང་འདྲེན་སྟོང་འདྲེན་བྱ༔ གཅུས་འབེབ་གསུམ་དང་ཧ་སྤྲུག་གོང་དང་མཚུངས༔ བདུན་པ་ཧཱུྃ་འདྲེན་བྱང་སེམས་གྱེན་འདྲེན་ནི༔ རྡོ་རྗེ་སྐྱིལ་ཀྲུང་ལག་གཉིས་བརླ་སྦུག་བཙུགས༔ སྟོང་འདྲེན་སྒང་འདྲེན་གཡས་གཡོན་དབུས་གསུམ་དུ༔ ལན་
གྲངས་དགུ་རུ་བྱེད་པ་ཤིན་ཏུ་གཅེས༔ གཅུས་འབེབ་གསུམ་དང་སྤྲུག་སོགས་གོང་དང་མཚུངས༔ བརྒྱད་པ་སྟོང་འདྲེན་སྒང་འདྲེན་བྱེད་པ་ནི༔ རྡོ་རྗེ་སྐྱིལ་ཀྲུང་བཤིག་ལ་སེམས་དཔའི་སྐྱིལ་ཀྲུང་བྱ༔ ལག་གཉིས་རྐང་པའི་གཡས་གཡོན་ངར་གདོང་བཟུང༔ སྟོང་འདྲེན་རྒྱུ་མ་ཆད་ཆད་དག་ཏུ་འཐེན༔ སྒང་འདྲེན་མགོ་བོ་གས་གས་ལན་དགུར་འབད༔ འབེབ་ཆུང་དང་བསྟུན་གཡང་མོའི་སྒང་སྤྲུག་བྱ༔ དགུ་པ་རླུང་གདུགས་ལྟར་བསྐྱིལ་བ་ནི༔ རྡོར་སྐྱིལ་བཤིག་ལ་སེམས་དཔའི་སྐྱིལ་ཀྲུང་སྟེང༔ ལག་གཉིས་རྐྱང་འཁྲབ་ལྡན་པས་མཇིང་པ་འཕྲེང༔ ཧཱུྃ་ཧཱུྃ་སྒྲ་བཅས་བྱང་སེམས་ཧཾ་ལ་བསྟིམ༔ གཡས་གཡོན་དབུས་གསུམ་སྒང་འདྲེན་སྟོང་འདྲེན་བྱ༔ ཧ་སྤྲུག་ལ་སོགས་གཡས་གཅུ་གཡོན་གཅུ་བྱ༔ བཅུ་པ་པུས་མོ་གཡས་རྡེབ་གཡོན་རྡེབ་བྱ༔ རྡོར་སྐྱིལ་བཤིག་ལ་སེམས་དཔའི་སྐྱིལ་ཀྲུང་བྱ༔ ལག་གཡོན་པུས་སྟེང་མདའ་ལྟར་བསྲང་སྟེ་བཞག༔ ལག་གཡས་པུས་མཐར་ཕྱིན་ནས་ནང་དུ་བཀན༔ སྒང་འདྲེན་སྟོང་འདྲེན་དང་བསྟུན་ཟུང་འདྲེན་བྱ༔ ཉི་ཟླ་དཀར་དམར་ཚངས་རྩེར་བསྐྱིལ༔ དེ་བཞིན་གཡས་གཡོན་གཉིས་ལ་རེས་མོས་བྱེད༔ འབེབ་ཆུང་གསུམ་དང་ཧ་སྤྲུག་གོང་དང་མཚུངས༔ བཅུ་གཅིག་ཙོག་འབེབ་འབེབ་ཆུང་ཞེས་བྱ་ནི༔ སྐྱིལ་ཀྲུང་བྱས་ལ་དབུ་མ་
བཙུགས་པའི་ནང༔ ཡན་ལག་ཆུ་སེར་ཐམས་ཅད་བསྡུ་བྱ་ཞིང༔ སྐྱིལ་ཀྲུང་བཤིག་ལ་རྐང་པའི་ཆུ་སེར་བསྡུས༔ ཙོག་པུ་རྐང་པ་བསྣོལ་ཞིང་ལག་གཉིས་འཁྱུད༔ དབུ་མ་བཙུགས་ལ་ཙོག་འབེབ་མང་དུ་བྱ༔ ཆུ་སེར་ཕྱིར་འབུད་ཡང་ཡང་བསྐྱར་བ་གཅེས༔ སྒུར་འབེབ་ལན་གསུམ་ཧ་སྤྲུག་གོང་དང་འདྲ༔ བཅུ་གཉིས་པ་བསྒྲད་འབེབ་ཧ་སྤྲུག་བྱེད་པ་ནི༔ སྐྱིལ་ཀྲུང་བཤིག་དང་གྱེན་ལངས་གོང་ལྟར་བྱེད༔ ལངས་ཏེ་ཡན་ལག་ཐམས་ཅད་ཕྱོགས་བཞིར་བརྒྱང༔ དགྱེ་ལོག་བྱ་ཞིང་རྐྱང་འཁྲབ་ལན་གསུམ་བྱེད༔ དེ་འདྲ་ལན་གསུམ་བར་དུ་གཡས་གཡོན་བརྐྱང༔ བསྒྲད་འབེབ་གསུམ་དང་བསྟུན་ཏེ་ཧག་ཧག་བརྗོད༔ ཧ་སྤྲུག་ཀ་དག་བཞག་སོགས་གོང་དང་མཚུངས༔ བཅུ་གསུམ་ཀྱང་ཀྱུར་ཞེས་པའི་འཕྲུལ་འཁོར་ནི༔ སྐྱིལ་ཀྲུང་བཤིག་སོགས་གྱེན་ལངས་གོང་བཞིན་ལ༔ རྐང་གཉིས་བཤད་ཀྱང་གདན་ཁར་འབེབ་དང་མཉམ༔ ལག་གཉིས་རྐྱང་འཁྲབ་བྲང་ཁར་བསྣུན་པ་དང༔ དེ་འདྲ་ལན་གསུམ་དག་ཏུ་འབད་པ་གཅེས༔ རྗེས་ནི་ཧ་སྤྲུག་ཀ་དག་གོང་དང་འདྲ༔ བཅུ་བཞི་པ་རྡོ་རྗེ་སྦུགས་འདྲེན་ནི༔ སྐྱིལ་ཀྲུང་བཤིག་སོགས་རྐང་གནད་གོང་ལྟར་ལ༔ འབེབ་དང་བསྟུན་ལ་པུས་མོ་ཐེར་གྱིས་བཙུག༔ ལག་གཉིས་པུས་སྟེང་བཞག་ལ་སྦུགས་འདྲེན་ནི༔ ནོར་
བུ་མ་ནུབ་བར་དུ་ཐབས་མཁས་ཀྱིས༔ ངེས་འདྲོང་མ་བྱུང་བར་དུ་སྒང་འདྲེན་བྱ༔ ལུས་གནད་བསྲངས་ཏེ་རྐྱང་འཁྲབ་ལན་གསུམ་རྡེག༔ གཅུས་འབེབ་ལན་གསུམ་ཧ་སྤྲུག་གོང་བཞིན་བྱ༔ བཅོ་ལྔ་མིག་དང་སོར་མོར་དགྲམ་པ་ནི༔ རྐང་པ་རྡོ་རྗེ་སྐྱིལ་ཀྲུང་ལ༔ ལག་གཉིས་པུས་མགོའི་གཡས་ཐད་ཤད་དེ་བརྐྱང༔ རྒོད་གཤོག་ལྟར་བརྒྱང་སོར་མོས་སྒོ་གསུམ་བཀག༔ རྣ་བའི་ཁུང་ནས་རླུང་རྣམས་ཕྱིར་ལ་དབྱུང༔ སླར་ཡང་རྣ་བ་ཁ་དང་སྣ་བུག་དགག༔ མིག་གཉིས་བསྒྲིམ་ཞིང་རླུང་རྣམས་ཕྱིར་ལ་དབྱུང༔ རྐྱང་འཁྲབ་བརྡབ་ཅིང་ལག་སོར་མདུན་དུ་བསྒྲེང༔ སོར་བཅུའི་ནང་ནས་རླུང་ཀུན་ཕྱིར་ལ་དབྱུང༔ རྡོར་སྐྱིལ་བཤིག་ལ་སྐྱིལ་ཀྲུང་ལན་གསུམ་བརྡེག༔ བཅུ་དྲུག་ཤ་བསླད་འདོན་པའི་འཕྲུལ་འཁོར་ནི༔ སྐྱིལ་ཀྲུང་བཤིག་ལ་རྐང་གཉིས་བསྣོལ༔ ལུས་གནད་བསྲངས་ལ་ལག་གཉིས་སྤྱི་བོར་བསྣོལ༔ གཡས་བསྐོར་གཡོན་བསྐོར་ལན་གྲངས་དགུ་ཡི་བར༔ གནས་གསུམ་འཁོར་ལོ་རིམ་པ་བཞིན་དུ་བསྐོར༔ གཅུས་འབེབ་དྲག་པོ་ལན་གསུམ་དག་ཏུ་བརྡབ༔ ཧ་སྤྲུག་གཅུ་སོགས་གོང་བཞིན་ཀ་དག་བཞག༔ བཅུ་བདུན་སྙིང་རླུང་སེལ་བའི་འཕྲུལ་འཁོར་ནི༔ སྐྱིལ་ཀྲུང་བཤིགས་ལ་རྐང་མཐིལ་གཉིས་སྦྱར་བའི༔ རྐང་སོར་ལག་གཉིས་སྦར་འཛིན་དྲག་ཏུ་བསྡམ༔ སྒལ་ཚིགས་
བཙུགས་ལ་ནམ་མཁར་དྲག་པོས་འཐེན༔ སྦར་འཛིན་སར་བཙུགས་སྒུར་འདྲེན་དྲག་ཏུ་བྱ༔ དེ་འདྲ་ཡར་གསུམ་མར་གསུམ་ལན་གྲངས་དྲུག༔ རྗེས་ནི་སྒུར་འབེབ་ལན་གསུམ་དྲག་ཏུ་བྱ༔ བཅོ་བརྒྱད་ནམ་མཁའ་ཞལ་མཇལ་བྱེད་པ་ནི༔ སྐྱིལ་ཀྲུང་བཤིག་སོགས་གྱེན་ལངས་གོང་ལྟར་ལ༔ ལུས་གནད་བསྲང་སྟེ་རྡོ་རྗེ་སྦུགས་སུ་དྲང༔ ནམ་མཁའི་ཁམས་སུ་རྡོར་སེམས་བསྒོམ་པར་བྱ༔ རྗེས་ནི་འབེབ་ཆེན་དང་བསྟུན་ཐལ་མོ་སྦྱར༔ སྦ་བཞི་འཁྲབ་སོགས་གེགས་སེལ་ཞལ་ལས་ཤེས༔ སྦྱོར་དངོས་རྗེས་གསུམ་ཚང་བའི་འཕྲུལ་འཁོར་འདིས༔ སྐྲ་དཀར་གཉེར་མ་མེད་པ་དང༔ གཞོན་ཤ་ཆགས་ཤིང་རྩ་མདུད་གྲོལ༔ སྦ་བ་སྦུབས་ནུབ་གཙུག་ཏོར་འགྲུབ༔ འཕོ་མེད་འཇའ་ལུས་འོད་ཀྱི་སྐུ༔ ཚེ་ཡི་རིག་འཛིན་ཐོབ་པར་འགྱུར༔ སྐལ་ལྡན་རྣམས་ཀྱིས་ཉམས་སུ་ལོངས༔ སྐལ་མེད་རྣམས་ལ་གསང་དམ་རྒྱ༔ དེ་རྣམས་ཀུན་གྱི་རྩ་བའི་སྡོམ༔ དང་པོ་ལུས་འདུལ་རོལ་རྩེད་བྱ༔ གཉིས་པ་ཡན་ལག་ལྔ་སྦྱོང༔ གསུམ་པ་དབུ་མ་འཛུག་པ༔ བཞི་པ་དབུ་མ་བསྐོར་བ༔ ལྔ་པ་དབུ་མ་གསལ་འདེབས༔ དྲུག་པ་རྩ་ཐེམ་རླུང་ཐེམ༔ བདུན་པ་ཧཱུྃ་རིང་བྱང་སེམས་འདྲེན༔ བརྒྱད་པ་སྟོང་འདྲེན་སྒང་འདྲེན༔ དགུ་པ་རླུང་གདུགས་ལྟར་བསྐྱིལ་བ༔ བཅུ་པ་པུས་མོ་གཡས་རྡེབ་གཡོན་རྡེབ༔ བཅུ་གཅིག་ཙོག་
འབེབ་འབེབ་ཆུང༔ བཅུ་གཉིས་བསྒྲད་འབེབ་ཧ་སྒྲ༔ བཅུ་གསུམ་པ་ཀྱང་ཀྱུར༔ བཅུ་བཞི་པ་རྡོ་རྗེ་སྦུབས་འདྲེན༔ བཅོ་ལྔ་པ་རླུང་སོར་མོ་ལ་འགྲེམས་པ༔ བཅུ་དྲུག་པ་ཤ་བསླད་འདོན་པ༔ བཅུ་བདུན་པ་སྙིང་རླུང་སེལ་བ༔ བཅོ་བརྒྱད་ནམ་མཁའ་ཞལ་མཇལ༔ སྦ་བཞི་འཁྲབ་དང་རྩལ་སྤྲུག་སོགས༔ དེ་རྣམས་རྣལ་འབྱོར་དབང་ཕྱུག་ཛཱ་ཧ་བཱིར་གྱི་ཟབ་ཆོས༔ འཇའ་ལུས་འོད་ཕུང་རང་གྲོལ་གྱི་འཕྲུལ་འཁོར་རྩ་འགྲེལ།༔ འཇའ་ལུས་མཆོག་སྟེར་ཞེས་བྱ་བ༔ འཇའ་ལུས་སྣང་སྟོང་རང་གྲོལ་ལམ༔ འཛིན་པ་རང་གྲོལ་གྱི་རྣལ་འབྱོར་དབང་ཕྱུག་གསུང་ལ་འཕྲི་བསྣན་མེད་པ་དམ་རྒྱ༔ གཟའ་བདུད་ཀྱི་རྒྱ་ཡོད་དོ༔ དྲང་སྲོང་གཟའ་བརྒྱད་ཀྱིས་སྲུངས་ཤིག༔ བཛྲ་རཀྵ་རཀྵ༔ འཇའ་ལུས་འོད་ཕུང་རང་གྲོལ་ལས༔ ཛཱ་བཱིར་བླ་བསྒྲུབ་འོད་ཕུང་རང་གྲོལ་བཞུགས་སོ༔ ན་མོ་གུ་རུ་ཛཱ་ཧ་བཱིར༔ བླ་མ་མཆོག་དང་ཡི་དམ་ལྷ༔ མཁའ་འགྲོའི་དབང་ཕྱུག་ཀུན་གྱི་རྗེ༔ རྣལ་འབྱོར་དབང་ཕྱུག་ཛཱ་ཧ་བཱིར༔ མི་འབྲལ་སྙིང་གི་ཐིག་ལེར་བཞུགས༔ དེ་ཉིད་སྒྲུབ་པའི་རིམ་པ་ལ༔ སྔོན་འགྲོ་དངོས་གཞི་རྗེས་དང་གསུམ༔ དེ་ལ་དང་པོ་སྔོན་འགྲོ་ནི༔ དབེན་ཞིང་ཉམས་དགའི་གནས་མཆོག་ཏུ༔ ཚེ་འདིའི་བྱ་བ་བློ་བཏང་ནས༔ དཀའ་
ཐུབ་བཅུད་ལེན་ས་སྡེ་བཙུགས༔ མེ་དང་ཉི་མ་གཉིས་སྤངས་ནས༔ གྲིབ་དང་མི་གཙང་ཀུན་ལ་འཛེམ༔ མ་གྱུར་འགྲོ་ལ་སྙིང་རྗེ་བསྒོམ༔ སྟོང་དང་སྙིང་རྗེའི་ངང་ཉིད་ལས༔ རང་ཉིད་འདུག་པའི་གནས་མཆོག་ནི༔ ཨོ་རྒྱན་དག་པ་མཁའ་སྤྱོད་བསམ༔ དེ་དབུས་ཆོས་འབྱུང་འོད་ལྔའི་ཀློང༔ པདྨ་ཉི་ཟླ་བམ་རོའི་སྟེང༔ དབང་ཆེན་པདྨ་ཧེ་རུ་ཀ༔ དམར་ནག་གྲི་གུག་ཐོད་ཁྲག་འཛིན༔ དབུ་གཙུག་རྟ་ཞལ་འཚེར་ཞིང་ངུར༔ དུར་ཁྲོད་ཆས་བརྒྱད་སྐུ་ལ་རྫོགས༔ པང་དུ་བདེ་སྟེར་ཕག་མོ་ཡུམ༔ གྲི་ཐོད་རྒྱན་ཅན་ཕག་ཞལ་ངུར༔ ཡབ་ཡུམ་གཉིས་མེད་གར་དགུར་འབར༔ མེ་དཔུང་འབར་བའི་ཀློང་ན་འགྱིང༔ རྩ་གསུམ་འཁོར་ལོ་ལྔ་པོ་དང༔ གྲངས་ཅན་གྲངས་མེད་རྩ་རྣམས་གསལ༔ གནས་ལྔར་རིགས་ལྔའི་དཀྱིལ་འཁོར་མཛེས༔ སྤྱི་གཙུག་འཇའ་འོད་ཆོས་འབྱུང་ཀློང༔ གྲུབ་པའི་དབང་ཕྱུག་ཛཱ་ཧ་བཱིར༔ རྒྱལ་པོ་རོལ་སྟབས་ཡུམ་དང་སྦྱོར༔ གཡས་གཡོན་ཉི་མ་ཟླ་བས་སྤྲས༔ རྩ་བརྒྱུད་བླ་མའི་དབུས་ན་བཞུགས༔ དེ་ཉིད་སྤྱི་གཙུག་འོད་ལྔའི་ཀློང༔ བླ་མ་བུདྡྷ་ཐོད་ཕྲེང་རྩལ༔ མཐིང་གསལ་རྡོར་དྲིལ་མཚན་དཔེས་སྤྲས༔ གསང་ཡུམ་མནྡྷཱ་ར་བ་ནི༔ དཀར་དམར་གྲི་ཐོད་པད་སྐྱིལ་འཁྲིལ༔ ཆོས་འབྱུང་འོད་ལྔའི་ཀློང་ན་བཞུགས༔ སྙོམས་འཇུག་སྦྱོར་བས་བདེ་བ་
རྒྱས༔ བདེ་བའི་འོད་ཟེར་ཕྱོགས་བཅུར་འཕྲོས༔ བདེ་གཤེགས་རྒྱལ་བ་རབ་འབྱམས་ཀྱི༔ ཐུགས་རྗེའི་བྱིན་རླབས་མ་ལུས་དང༔ བརྟན་གཡོ་སྣོད་བཅུད་བཀྲག་མདངས་ཀུན༔ བླ་མ་ཡབ་ཡུམ་སྦྱོར་མཚམས་ཐིམ༔ བླ་མ་ཡབ་ཡུམ་སྦྱོར་མཚམས་ནས༔ བདུད་རྩི་དཀར་དམར་འོ་རྒྱུན་བབས༔ རྣལ་འབྱོར་དབང་ཕྱུག་སྐུ་ལུས་བརྒྱུད༔ བདེ་བས་མཉེས་ནས་བདུད་རྩིའི་རྒྱུན༔ སྤྱི་བོའི་ལྷ་ཚོགས་རྣམས་ལ་ཕོག༔ ཟག་མེད་དགའ་བཞིའི་དཔལ་འབར་ནས༔ སྤྱི་བོའི་འཁོར་ལོ་དྭངས་མས་ཁེངས༔ སུམ་བརྒྱ་དྲུག་ཅུའི་རྩ་མདུད་གྲོལ༔ ཞེ་སྡང་འཛིན་པ་རང་སར་དག༔ མི་བསྐྱོད་སངས་རྒྱས་སྤྱན་མར་གྱུར༔ རྣམ་ཤེས་ཕུང་པོ་དབྱིངས་སུ་དག༔ ལུས་ནང་འོད་ཟེར་དཀར་པོས་གང༔ མེ་ལོང་ཡེ་ཤེས་རང་རྩལ་རྒྱས༔ རླུང་རིག་དབྱེར་མེད་བཟླས་པ་བྱ༔ བདེ་ཆེན་དཀར་དམར་མགྲིན་པར་བབས༔ མགྲིན་པའི་ལྷ་ཚོགས་བདེ་བས་མཉེས༔ བརྒྱད་གཉིས་བཅུ་དྲུག་མདུད་གྲོལ་ནས༔ ང་རྒྱལ་སེར་སྣའི་ཉེས་ལྟུང་སྦྱངས༔ ཚོར་བའི་ཕུང་པོ་དབྱིངས་སུ་དག༔ ལུས་ནང་འོད་ཟེར་སེར་པོས་གང༔ རིན་འབྱུང་མཱ་ཀཱིའི་རང་བཞིན་དང༔ མཉམ་ཉིད་ཡེ་ཤེས་རང་རྩལ་རྒྱས༔ གོང་བཞིན་རླུང་རིག་བཟླས་པར་འབད༔ བདེ་ཆེན་དཀར་དམར་སྙིང་ཁར་བབས༔ སྙིང་ཁའི་ལྷ་ཚོགས་
བདེ་བས་མཉེས༔ སུམ་ཅུ་རྩ་གཉིས་མདུད་གྲོལ་ནས༔ གཏི་མུག་ཉེས་ལྟུང་དྲི་མ་སྦྱངས༔ གཟུགས་ཀྱི་ཕུང་པོ་དབྱིངས་སུ་དག༔ ལུས་ནང་འོད་ཟེར་མཐིང་གས་གང༔ རྣམ་སྣང་དབྱིངས་ཕྱུག་སྐུ་རུ་གྱུར༔ ཆོས་དབྱིངས་ཡེ་ཤེས་རང་རྩལ་རྒྱས༔ གོང་བཞིན་རླུང་རིག་བཟླས་པ་བྱ༔ བདེ་ཆེན་དཀར་དམར་ལྟེ་བར་བབས༔ ལྟེ་བའི་ལྷ་ཚོགས་བདེ་བས་མཉེས༔ དྲུག་ཅུ་རྩ་བཞིའི་མདུད་གྲོལ་ནས༔ འདོད་ཆགས་ཉེས་ལྟུང་སྡིག་སྒྲིབ་སྦྱངས༔ འདུ་ཤེས་ཕུང་པོ་རང་སར་དག༔ ལུས་ནང་འོད་ཟེར་དམར་པོས་གང༔ སྣང་མཐའ་གོས་དཀར་སྐུ་རུ་གྱུར༔ སོར་རྟོག་ཡེ་ཤེས་རང་རྩལ་རྒྱས༔ རླུང་རིག་དབྱེར་མེད་བཟླས་པ་བྱ༔ བདེ་ཆེན་དཀར་དམར་གསང་གནས་བབས༔ གསང་གནས་ལྷ་ཚོགས་བདེ་བས་མཉེས༔ ཉི་ཤུ་རྩ་བརྒྱད་མདུད་གྲོལ་ནས༔ ཕྲག་དོག་ཉེས་ལྟུང་སྡིག་སྒྲིབ་སྦྱངས༔ འདུ་བྱེད་ཕུང་པོ་དབྱིངས་སུ་དག༔ ལུས་ནང་འོད་ཟེར་ལྗང་གུས་གང༔ དོན་གྲུབ་སྒྲོལ་མའི་སྐུ་རུ་གྱུར༔ བྱ་གྲུབ་ཡེ་ཤེས་རང་རྩལ་རྒྱས༔ རླུང་རིག་དབྱེར་མེད་བཟླས་པ་བྱ༔ རང་ལུས་བ་སྤུའི་བུ་ག་ན༔ བྱེ་བ་ས་ཡའི་ལྷ་ཚོགས་རྣམས༔ བདེ་བས་མཉེས་ནས་འོད་ཟེར་འབར༔ སྙོམས་འཇུག་བདེ་བའི་རང་སྒྲ་ཡིས༔ ཕྱོགས་བཅུའི་ཞིང་ཁམས་རབ་འབྱམས་ན༔ བཞུགས་པའི་རྒྱལ་ཀུན་ཐུགས་དམ་
བསྐུལ༔ ཐུགས་རྗེའི་བྱིན་རླབས་སྤྱན་དྲངས་ནས༔ རང་སྣང་ལྷུན་གྲུབ་ལྷ་ལ་ཐིམ༔ གདོས་བཅས་ཤ་ཁྲག་འོད་དུ་ཞུ༔ མ་དག་ཤ་རུས་སྙིགས་མ་སྦྱངས༔ འཇའ་ལུས་རྡོ་རྗེའི་སྐུ་རུ་གྱུར༔ ལུགས་འབྱུང་བདེ་བ་ཡས་ནས་འབར༔ ལུགས་བཟློག་བདེ་དྲོད་མས་ནས་རྒྱས༔ བདེ་དྲོད་འོད་ཀྱི་གོང་བུར་གྱུར༔ འཁོར་ལོ་རེ་ལ་བུམ་ཅན་བརྒྱད༔ འཕྲུལ་འཁོར་རླུང་རིག་ངང་ནས་བཟླ༔ ཧྲཱིཿགུ་རུ་པདྨ་ཨཱ་ཡུར་ཛྙཱ་ན་ཛཱ་ཧ་བཱིར་ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ས་མ་ཡ་སརྦ་སིདྡྷི་སྡུས་སྡུས༔ ཐུན་མཚམས་བསྟོད་པ་འདི་ལྟར་བྱེད༔ ཧཱུྃ་ཧྲཱི༔ སྐུ་ལྔ་ཡོངས་རྫོགས་པདྨ་ཚེ་དཔག་མེད༔ སྐྱེ་འཆི་གཉིས་སྤངས་གྲུབ་ཆེན་ཛཱ་ཧ་བཱིར༔ སྣང་སྟོང་ཟུང་འཇུག་རྟ་ཕག་ཡབ་ཡུམ་དང༔ དཔའ་བོ་མཁའ་འགྲོའི་ཚོགས་ལ་ཕྱག་འཚལ་བསྟོད༔ འཆི་མེད་འོད་ལུས་འགྲུབ་པའི་དངོས་གྲུབ་སྩོལ༔ དེ་ནས་རིམ་བཞིན་བདེ་བའི་རྒྱུན༔ འདྲེན་དང་བསྟུན་ནས་སྤྱི་བོར་དྲང༔ བདེ་བའི་འོད་ཟེར་རབ་འཕྲོས་པས༔ བླ་མ་ཡབ་ཡུམ་ཐུགས་མཉེས་ནས༔ ཕྱི་ནང་སྣོད་བཅུད་འབྱུང་བ་ལྔའི༔ བཅུད་རྣམས་འོད་ཟེར་ཚུལ་དུ་བསྡུས༔ འདྲེན་འགྲེམས་དགྲམ་གསུམ་རབ་འབད་པས༔ ལྷ་ཚོགས་ཐམས་ཅད་འོད་དུ་ཞུ༔ རང་ཡང་འོད་ཀྱི་ཕུང་པོར་གྱུར༔ སྣང་སྲིད་འཇའ་འོད་སྐུ་ཐིག་དང༔ ལྔ་ལྡན་འོད་ལྔའི་ཀློང་དུ་བསམ༔ བདུན་གསུམ་ཉེར་གཅིག་བསྒྲུབས་པ་ཡིས༔ འགྲུབ་རྟགས་རང་
ལུས་ཡངས་ཤིང་བདེ༔ འོད་ལྔའི་སྣང་བ་རྒྱུན་མི་འཆད༔ འཇའ་འོད་སྐུ་ཐིག་ཚོམ་བུ་དང༔ ཐིག་ལེ་སྟོང་སྒྲོན་འོད་མདངས་འཚེར༔ ཉི་ཟླ་གཟའ་སྐར་འཆར་བ་དང༔ ཉིན་དང་མཚན་གྱི་སྣང་བ་མེད༔ སྣང་སྲིད་བླ་མའི་སྐུ་རུ་འཆར༔ ཟས་གོས་གཉིས་ཀྱི་འཛིན་པ་ཟད༔ བློ་འདས་ཆེན་པོའི་སྐུ་རུ་གྲོལ༔ གཞན་ཡང་རྟགས་མཚན་ངོ་མཚར་ཅན༔ དཔག་མེད་བརྗོད་དུ་མེད་པ་ཡོང༔ ཨི་བདེན་ལྟོས་ཤིག་དད་ལྡན་ཀུན༔ ཉམས་སུ་ལོངས་ཤིག་སྐལ་ལྡན་ཀུན༔ ཨེ་མ་ངོ་མཚར་རྨད་ཀྱི་ཆོས༔ ཐེག་ཀུན་རྩེ་མོ་ཡང་རྩེ་མཆོག༔ དུས་གསུམ་རྒྱལ་བའི་དགོངས་པའི་བཅུད༔ མ་མོ་མཁའ་འགྲོའི་སྙིང་གི་ཁྲག༔ རྣལ་འབྱོར་ཙིཏྟའི་ཡང་ཞུན་སྐོར༔ ཟབ་ཆོས་འཇའ་ལུས་མཆོག་སྦྱིན་འདི༔ དཔེ་སྣ་གཅིག་ལས་མང་མི་བྱེད༔ བུདྡྷ་བཛྲ་དྷརྨ་དང༔ སངྒྷ་ཤྲཱི་གདོང་སྨེ་ཅན༔ དེ་ལྔ་ཟབ་ཆོས་འདི་ཡི་བདག༔ རེས་འགའ་སྦ་ཞིང་རེས་འགའ་སྤེལ༔ མ་ནོར་བརྟག་པ་རིམ་གྱིས་གྱིས༔ གཅིག་བརྒྱུད་གཅིག་ལ་སྤྲོད་པ་ལས༔ མང་ན་རྩ་བའི་དམ་འགལ་ཞིང༔ དྲང་སྲོང་གཟའ་བདུད་ཆེན་པོ་ཡིས༔ བཀའ་ཆད་དྲག་པོས་བསྡིག་པར་འགྱུར༔ ཐམས་ཅད་འཇའ་ལུས་སྐུ་ཐོབ་ཤོག༔ སྙིགས་དུས་ཆོས་ལོག་དར་བའི་དུས༔ རྣལ་འབྱོར་སྙིང་གི་ཐིག་ལེ་འདི༔ ལས་ཅན་རྣམས་དང་འཕྲད་པར་ཤོག༔ ས་མ་ཡ༔ ཙིཏྟརབརྡ་
ཐིམ༔ ཞལ་ཤེས་གནད་ཀྱི་མན་ངག་ནི༔ ཉམས་ལེན་ཟབ་མོའི་དུས་ཀྱི་ཚེ༔ དང་པོར་ནམ་ལངས་ཉི་ཤར་བར༔ རྣལ་འབྱོར་དབང་ཕྱུག་ཛཱ་ཧ་བཱིར༔ གཞོན་ནུའི་ཚུལ་འཆང་དཀར་དམར་མདངས༔ ཕྱག་གཡས་ཤེལ་གྱི་ཕྲེང་བ་དང༔ གཡོན་པ་རྣམ་རྒྱལ་ཨ་རུ་ར༔ དུག་ལྔ་འཇོམས་པའི་སྨན་མཆོག་འཛིན༔ འཇའ་འོད་ཀློང་ན་སྐྱིལ་ཀྲུང་བཞུགས༔ སྐུ་ལས་འོད་ཟེར་དཀར་པོ་འཕྲོས༔ ནད་གདོན་བར་ཆད་དགྲ་བགེགས་དང༔ རྐྱེན་ངན་མི་ཁ་བྱུར་གསུམ་ཞི༔ རླུང་ནི་ཞི་བའི་ཚུལ་གྱིས་ཟ༔ དེ་ནས་ཉིན་གུང་ཚུན་ཆད་དུ༔ རྣལ་འབྱོར་དབང་ཕྱུག་ཛཱ་ཧ་བཱིར༔ དར་བབས་ཚུལ་འཆང་སེར་གསལ་མདངས༔ ཕྱག་གཡས་རྡོ་རྗེ་གཡོན་པ་ཚེ་བུམ་འཛིན༔ འཇའ་ཟེར་ཀློང་ན་ཕྱེད་སྐྱིལ་བཞུགས༔ འོད་ཟེར་སེར་པོ་ཕྱོགས་བཅུར་འཕྲོས༔ ཚེ་དང་བསོད་ནམས་དཔལ་འབྱོར་དང༔ མི་ནོར་ཟས་གསུམ་སྙན་གྲགས་དང༔ མ་ལུས་ཐམས་ཅད་དབང་བསྡུས་ནས༔ རླུང་ནི་བཙན་ཐབས་དག་གིས་ཟ༔ ཉི་མ་ཕྱེད་ནས་དགོང་མྱུར་ཚུན༔ རྣལ་འབྱོར་དབང་ཕྱུག་ཛཱ་ཧ་བཱིར༔ བསྒྲེས་པའི་ཚུལ་འཆང་དམར་སྨུག་མདངས༔ ཕྱག་གཡས་འགུགས་པའི་ལྕགས་ཀྱུ་དང༔ གཡོན་པས་པད་ཕྲེང་དམར་པོ་འཛིན༔ ཉི་དཀྱིལ་དབུས་སུ་རོལ་སྟབས་
བཞུགས༔ སྐུ་ལས་འོད་དམར་ལྕགས་ཀྱུའི་ཚུལ༔ སྟེང་འོག་ཕྱོགས་མཚམས་ཀུན་ཏུ་འཕྲོས༔ ཁམས་གསུམ་སྲིད་གསུམ་མ་ལུས་དང༔ སྐྱེ་འགྲོ་ཕོ་མོ་མ་ལུས་དང༔ ལྷ་སྲིན་སྡེ་བརྒྱད་མི་མ་ཡིན༔ མ་ལུས་དབང་བསྡུས་བྲན་དུ་ཁོལ༔ རླུང་ནི་དྲག་པོའི་ཚུལ་དུ་རྔུབ༔ དགོང་མྱུར་དག་ནས་སྲོད་ཆེན་བར༔ རྣལ་འབྱོར་དབང་ཕྱུག་ཛཱ་ཧ་བཱིར༔ ཁྲོ་ཚུལ་ལྗང་སྔོན་འོད་ཟེར་འཕྲོ༔ ཕྱག་གཡས་སྒྲོལ་བའི་རྩེ་གསུམ་དང༔ གཡོན་པས་ཉི་ཟེར་ཞགས་པ་བསྣམས༔ ཆོས་འབྱུང་ཀློང་ན་རྔམས་ཚུལ་བཞུགས༔ སྐུ་ལས་འོད་ཟེར་མཚོན་ཆའི་ཚུལ༔ དཔག་མེད་ཕྱོགས་བཅུར་འཕྲོས་པ་ཡིས༔ བསྟན་དགྲ་སྒོས་དགྲ་སྐུ་དགྲ་དང༔ ཞིང་བཅུའི་དགྲ་བགེགས་ཚར་བཅད་བསམ༔ འོག་རླུང་རྔུབ་ཅིང་སྟེང་རླུང་དྲང༔ གནམ་ལྕགས་འཁོར་ལོས་དུམ་བུར་གཏུབས༔ རྡུལ་ཕྲན་བཞིན་དུ་བརླག་པར་བསམ༔ སྙིགས་མ་ཕྱིར་འབུད་དྭངས་མ་རྔུབ༔ དགྲ་བོའི་ཤ་ཁྲག་དྲོད་དབུགས་དང༔ ཕུང་ཁམས་སྐྱེ་མཆེད་མ་ལུས་པ༔ དྲང་སྲོང་གཟའ་བརྒྱད་ཞལ་དུ་བསྟབ༔ ལྷག་མ་རྗེས་ཤུལ་མེད་པར་བསམ༔ ཞི་རྒྱས་དབང་དྲག་ལས་སྦྱོར་དང༔ ཆོས་སྐྱོང་ཆེན་པོའི་དྲག་བསྐུལ་རྣམས༔ མ་ཧཱ་ཡོ་གའི་ཞལ་ལས་ཤེས༔ འདི་ལྟར་ཟབ་པའི་མཐར་ཐུག་འདི༔ སྙིགས་དུས་དུག་ལྔ་རགས་པའི་
དུས༔ གཞན་ལ་སྟོན་པའི་ཆོས་མིན་ཀྱང༔ ལས་འཕྲོ་སྐལ་བ་ཅན་རྣམས་ལ༔ མ་བཟོད་བརྩེ་བས་སྙིང་ནས་བཏོན༔ སྙིང་གི་སྙིང་ཐིག་ཡང་གསང་འདི༔ དད་ལྡན་སྙིང་གི་དཀྱིལ་དུ་ཆོངས༔ མོས་ལྡན་རྣམས་ལ་གཏད་རྒྱ་གྱིས༔ སྙིང་རུས་ཅན་གྱིས་ཉམས་སུ་ལོངས༔ ཆོས་བཞིན་བྱེད་དང་འཕྲད་པར་ཤོག༔ འགྲོ་ཀུན་འཁོར་བ་དོང་སྤྲུགས་ནས༔ ཐམས་ཅད་གདོད་མའི་སར་གྲོལ་ཤོག༔ དྲང་སྲོང་ཆེན་པོས་བཀའ་འདི་སྲུངས༔ འཇའ་ལུས་འོད་ཕུང་རང་གྲོལ་ལས༔ བཀའ་སྲུང་གཟའ་བདུད་ཀྱི་གསོལ་ཀ་དགྲ་བགེགས་མྱུར་སྒྲོལ་བཞུགས་སོ༔ བཛྲ་པཱ་ཎི་ཧཱུྃ༔ དེ་ལྟ་བུའི་ཟབ་ལམ་མཁའ་སྤྱོད་མྱུར་བགྲོད་ཀྱི་ཉམས་ལེན་བྱེད་པའི་སྐལ་ལྡན་རྣམས་ཀྱི་ཕྱི་ནང་གསང་བའི་བར་ཆད་བསལ་བ་དང༔ བསྟན་དགྲ་ཐལ་བར་བརླག་པའི་མཚོན་ཆ་དྲང་སྲོང་གཟའ་བརྒྱད་ཀྱི་གསོལ་ཁ་ནི༔ ཐོག་མར་རྟེན་གཏོར་གྱི་བྱིན་རླབས་ནི༔ ཨོཾ་ཨོཾ་གྱིས་ཕྱི་ནང་སྟོང་ཉིད་ངང༔ ཨཱཿཨཱཿལས་བྷནྡྷའི་གཏོར་སྣོད་ཡངས་པའི་ནང༔ ཧཱུྃ་རྣྲི་ཏྲི་ཡོངས་གྱུར་དགྲ་བགེགས་གདུག་པ་ཅན༔ མ་ལུས་ཚར་བཅད་ཤ་ཁྲག་རུས་པ་རྣམས༔ དམར་ནག་ལྦུ་བ་འཁྲིགས་པའི་རྒྱ་མཚོར་གྱུར༔ ཨོཾ་ཨཱཿཧཱུྃ༔ ལན་གསུམ་བརྗོད༔ མདུན་བསྐྱེད་ནི༔ མདུན་
དུ་ཁྲག་མཚོ་དམར་ནག་འཁྱིལ་བའི་ཀློང༔ དམ་ཉམས་རུ་ཏྲའི་བཾ་གྱི་གདན་སྟེང་དུ༔ ར་ཡིག་ནག་པོ་འོད་ཞུ་དོན་གཉིས་བྱས༔ འཇིགས་བྱེད་ཁྱབ་འཇུག་ཆེན་པོ་སྒྲ་གཅན་འཛིན༔ དུད་ཁ་མགོ་དགུ་སྐུ་ལུས་མིག་གིས་གང༔ ཕྱག་གཉིས་མདའ་གཞུ་ཞགས་པ་དགྲ་ལ་འདེབས༔ སྐུ་སྨད་སྦྲུལ་མཇུག་འཇིགས་པའི་གར་དགུར་ལྡན༔ ལྷ་སྲིན་སྡེ་བརྒྱད་དམག་དཔུང་འཁོར་གྱིས་བསྐོར༔ མེ་དུད་དམར་ནག་ཀློང་དུ་གསལ་བར་བསྐྱེད༔ ཧྲི་ཤག་རུ་རཾ་ནཱ་ག་ཙིཏྟ་ཏྲཾ་མ་མ་ཡོཾ་ཟ་འགྲམ་ཧ་ཧེ་ཡོ་ཀེ་ཤེ་ལ་ཀེ་ཏ་ཀེ་ཏ་ཛཿཛ༔ བཟླས་པ་བྱ༔ སྤྱན་འདྲེན་ནི༔ ཧཱུྃ༔ སྐུ་གསུམ་ལྷུན་གྱིས་གྲུབ་པའི་དཀྱིལ་འཁོར་ནས༔ གསང་བདག་ཕྱག་ན་རྡོ་རྗེ་གཤེགས་སུ་གསོལ༔ འདོད་ཆགས་ཞེ་སྡང་འཁྲུགས་པའི་དཀྱིལ་འཁོར་ནས༔ ལྷ་ཆེན་གཟའ་བདུད་ཆེན་པོ་གཤེགས་སུ་གསོལ༔ འཇིག་རྟེན་སྲིད་པ་ཡངས་པའི་དཀྱིལ་འཁོར་ནས༔ དྲང་སྲོང་གཟའ་ཆེན་བརྒྱད་པོ་གཤེགས་སུ་གསོལ༔ ཕྱོགས་བཞི་ནམ་མཁའ་ཡངས་པའི་དཀྱིལ་འཁོར་ནས༔ སྲིང་མོ་གདོང་མོ་མཆེད་བཞི་གཤེགས་སུ་གསོལ༔ བཞུགས་སུ་གསོལ་བ་ནི༔ དམ་ཉམས་རུ་ཏྲ་བམ་རོའི་གདན་སྟེང་དུ༔ དྲག་པོའི་ཕྲིན་ལས་བསྒྲུབ་ཕྱིར་བཞུགས་སུ་གསོལ༔ པདྨ་རུ་ཏྲ་ཏིཥྛ་ལྷན༔ ཕྱག་འཚལ་བ་ནི༔ བདག་ཅག་ལུས་ངག་ཡིད་གསུམ་དད་པ་ཡིས
མཉམ་ཉིད་དག་པའི་ངང་དུ་ཕྱག་འཚལ་ལོ༔ ཕྱི་མཆོད་འབུལ་བ་ནི༔ ཨརྒྷཾ་བདུག་སྤོས་མེ་ཏོག་མར་མེ་དྲི༔ ཞལ་ཟས་སིལ་སྙན་ཕྱི་མཆོད་སྣ་ཚོགས་འབུལ༔ ནང་མཆོད་ནི༔ གཟུགས་སྒྲ་དྲི་རོ་རྩི་བཅུད་རྣམ་ལྔ་དང༔ རིན་ཆེན་སྣ་ལྔ་སྨན་རཀ་གཏོར་གསུམ་འབུལ༔ གསང་མཆོད་འབུལ་བ་ནི༔ གསང་མཆོད་དམ་ཉམས་བསྒྲལ་པའི་ཤ་ཁྲག་རུས༔ ཕུང་ཁམས་བླ་ཚེ་སྲོག་དབུགས་བཞེས་སུ་གསོལ༔ རཱ་ཧུ་ལ་པཀྵི་མི་ཀེ་ཨརྒྷཾ་ནས་ཤབྡའི་བར་དང་བ་ལིནྟ་པཉྩ་རཀྟ་ཁ་ཁ་ཁཱ་ཧི་ཁཱ་ཧི༔ བསྟོད་པ་ནི༔ ཧཱུྃ་བྷྱོ༔ མཐུ་སྟོབས་དྲེགས་པའི་གཙོ་བོ་རཱ་ཧུ་ལ༔ དབུ་དགུ་སྤྱན་སྟོང་སྦྲུལ་རིགས་ལྔ་ཡིས་བརྒྱན༔ མདའ་གཞུ་ཞགས་པས་བསྟན་པའི་དགྲ་བོ་སྒྲོལ༔ གཟའ་བདུད་འཁོར་དང་བཅས་ལ་ཕྱག་འཚལ་བསྟོད༔ ཕྲིན་ལས་བཅོལ་བ་ནི༔ ཧཱུྃ༔ བསྟན་བཤིག་དམ་ཉམས་རུ་ཏྲ་མ་ལུས་པའི༔ ཚེ་སྲོག་དྭངས་མ་མ་ལུས་བསྡུས་ནས་ཀྱང༔ ལུས་སེམས་ཕྲོལ་ལ་སེམས་ཀྱི་མར་མེ་སོད༔ མིང་ཙམ་མེད་པར་ཐལ་བའི་རྡུལ་དུ་རློགས༔ རྐྱེན་ངན་བར་ཆད་བཟློག་པའི་ཕྲིན་ལས་མཛོད༔ དེ་ནས་གཏོར་མ་འབུལ་ཞིང་ཐལ་མོ་བརྡབ་བོ༔ ཛཱ་བཱིར་གཏོང་སྐབས་རྣམས་སུ་འདི་ཉིད་གཏོར་བསྔོས་མ་ཆག་པར་བྱ་བ་ནི་གལ་ཆེའོ༔ ཞེས་པ་ནི་སྙིགས་དུས་ཀྱི་སྤྲང་པོ་ཉི་ཟླ་ཀློང་གསལ་འཇའ་ལུས་སྣང་སྟོང་རང་གྲོལ་ཁོ་བོ་བས་མཐའ་རི་ཁྲོད་གཉན་ཁྲོད་དུར་ཁྲོད་ལུང་སྟོང་རྣམས་སུ་༔ ཚེ་འདིའི་ལྟོ་གོས་
ལོངས་སྤྱོད་སྙན་གྲགས་ཐམས་ཅད་བློས་བཏང་ནས་སྒོམ་པའི་ཚེ་དག་སྣང་ཕྲན་བུ་བྱུང་བ་རྣམས་ཙིཏྟའི་དཀྱིལ་དུ་སྦས་ནས་སུ་ལའང་མ་བསྟན་ཀྱང༔ དད་ལྡན་མང་པོས་ཡང་ཡང་བསྐུལ་བའི་ངོར་ཡི་གེར་བྲིས་པའོ༔ ཆོས་བདག་མཁའ་འགྲོའི་ཚོགས་ལ་བཟོད་པར་གསོལ༔ རཱ་ཧུ་ལ་རཀྵ་སི་ཧཱུྃ༔ འཇའ་ལུས་སྣང་སྟོང་རང་གྲོལ་ལས༔ རྒྱབ་མདུན་གཉིས་ཀྱི་ཡིག་ཆུང་ལྡེ་མིག་རང་གྲོལ་བཞུགས་སོ༔ ན་མོ་གུ་རུ་དྷེ་ཝ་ཌཱ་ཀི་ནཱི༔ འདིར་རྒྱབ་ཐུར་དང་མདུན་ཐུར་སྐབས་ཀྱི་ཡིག་ཆུང་བཀའ་རྒྱ་མ་ལས་ལྡན་ཚེ་འདི་བློས་བཏང༔ ཕུང་པོ་འཇའ་ལུས་ཟག་མེད་དུ་འགྲུབ་པར་འདོད་པ་རྣམས༔ སྐྱབས་སེམས་སྔོན་འགྲོ་རྣམས་གོང་ལྟར་དང༔ བླ་མའི་རྣལ་འབྱོར་སྐབས་རང་གི་སྤྱི་བོར་པདྨ་ཉི་ཟླ་བརྩེགས་པ་འོད་ལྔ་འབར་བའི་སྟེང་དུ་རྩ་བའི་བླ་མ་དང་གཉིས་སུ་མེད་པའི་གྲུབ་པའི་དབང་ཕྱུག་ཛཱ་ཧ་བཱིར་ཞལ་གཅིག་ཕྱག་གཉིས་པ༔ ཕྱག་གཡས་སེང་ལྡེང་གི་ཌཱ་རུ་འཁྲོལ་ཞིང༔ གཡོན་འཆི་མེད་ཚེའི་བུམ་པ་བསྣམས་པ༔ དབུ་སྐྲ་རལ་པའི་ཐོར་ཚུགས་ལ་རལ་ཆིངས་མེ་ཏོག་སྣ་ཚོགས་ཀྱི་ཚོམ་བུས་བརྒྱན་པ༔ སྐུ་མདོག་སྨུག་ནག་འོད་དང་འོད་ཟེར་དུ་འཕྲོ་བ༔ ཞབས་གཉིས་རྒྱལ་པོ་རོལ་པའི་འདུག་སྟངས་ཀྱིས་གཡུ་འབྲུག་སྔོན་མོའི་སྟེང་དུ་བཞུགས་པ༔ འཁོར་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་ནོར་ལྷ་གཏེར་བདག་གི་ཚོགས་དང་བཅས་པ་འོད་ཕུང་འཇའ་ཟེར་གྱི་ཀློང་ན་བཞུགས་པར་
གསལ་བཏབ༔ གསོལ་འདེབས་རྒྱས་བསྡུས་གོང་དང་མཐུན༔ བསྡུ་ན༔ མ་ཧཱ་སུ་ཁ་ཛྙཱ་ན་སིདྡྷི་ཧོ༔ པདྨཱཀ་ར་ཛཱ་ཧ་བཱིར༔ མི་ཏྲ་ཛོ་ཀི་ཀང་ཀ་ནི༔ འོད་གསལ་མཆོག་དང་དྷརྨའི་མཚན༔ རྩ་བརྒྱུད་བླ་མ་ཁྱེད་རྣམས་ལ༔ ལུས་ངག་ཡིད་གསུམ་གསོལ་འདེབས་ཀྱིས༔ བདག་གི་སྒོ་གསུམ་བྱིན་བརླབས་ནས༔ མཆོག་ཐུན་དངོས་གྲུབ་སྩོལ་བ་དང༔ མཁའ་སྤྱོད་འགྲུབ་པར་བྱིན་གྱིས་རློབས༔ སྲོག་ཐུར་མ་བུ་ཡོངས་འདྲེས་ནས༔ རྟགས་བཅུ་ངོ་མཚར་བརྒྱད་ལ་སོགས༔ བརྟུལ་ཞུགས་སྤྱོད་པ་མཐར་ཕྱིན་ནས༔ དག་པའི་ཞིང་ཁམས་བགྲོད་པར་ཤོག༔ ཅེས་གསོལ་བ་སྙིང་ཁོང་རུས་པའི་གཏིང་ནས་བཏབ༔ བླ་མ་འོད་ཞུ་རང་གི་དབུ་མའི་ནང་དུ་ཐིམ༔ སྣང་བ་ཐམས་ཅད་འཇའ་འོད་བུན་ནེ་བའི་ངང་ལ་མཉམ་པར་བཞག༔ དངོས་གཞི་དབུ་མ་འཛུག་སྐབས་རང་ལུས་རྡོ་རྗེ་ཕག་མོ་སྐུ་མདོག་པདྨ་རཱ་གའི་མདངས་ལྡན་དམར་འོད་འཚེར་བ༔ ཕྱི་ནང་ཐམས་ཅད་འོད་ཟེར་གྱི་རང་བཞིན་ཅན་སྟོང་སང་སང་བ༔ ཡང་ཕྱོད་ཕྱོད་པ་བར་སྣང་ཁམས་ན་ཡེ་རེ་ཡོད་པ༔ ཕྲུ་མ་ཕུས་བཏབ་པ་ལྟ་བུའི་སྤྱི་བོར་ཕག་ཞལ་མཐིང་ནག་ངུར་བ༔ ལུས་ནང་དུ་རྩ་དབུ་མ་རང་གི་ལག་ངར་ཙམ༔ ཕྱི་སྔོ་ནང་དམར་སྐྱ༔ ཡར་རྩེ་སྤྱི་བོ་ཕག་ཞལ་གྱི་མགྲིན་པ་དང༔ མར་སྣ་སྲིན་པོའི་སྒོར་སླེབས་པ༔ མཚན་
ཉིད་བཞི་དང་ལྡན་པ་གསལ་བཏབ་ནས༔ དབུ་མ་འཛུག་བསྐོར་འཐེན་གསུམ་ཕྲ་ལ་མཉེན་པ་མ་བྱུང་གི་བར་ཐུན་དྲུག་ཏུ་སྦྱང༔ དམིགས་སྐོར་དང་པོའོ༔ དམིགས་སྐོར་གཉིས་པ་ནི༔ ཁུ་ཚུར་པུས་སྟེང་བཞག་ནས་ཀ་བ་འཛུགས༔ དམིགས་པ་སྲིན་པོའི་སྒོར་ཟླ་བའི་དཀྱིལ་འཁོར་སེན་གང་བ་གཅིག་གསལ་བཏབ༔ ཡར་འཐེན་དུས་རྩ་མདུད་ཐམས་ཅད་བཀྲོལ་ནས༔ ཕག་ཞལ་གྱི་སྤྱི་བོར་སྐྱ་ཐལ་གྱིས་སླེབས༔ འཇོག་དུས་རྩ་མདུད་ཐམས་ཅད་མར་བཀྲོལ་ནས་སྲིན་པོའི་སྒོར་སྐྱ་གསལ་གྱིས་སླེབས༔ དེ་མ་འབྱོངས་བར་དུ་སྦྱང་བར་བྱའོ༔ དམིགས་སྐོར་གསུམ་པ་ནི༔ དབུ་མའི་མར་སྣ་འོག་སྒོར་ཕག་ཞལ་དམར་མོ་ངུར་སྒྲ་སྒྲོག་པ༔ དེའི་ནུས་པས་འབྱུང་བ་ས་ཆུ་མེ་རླུང་ནམ་མཁའ༔ ས་རྡོ་རི་བྲག་རྩི་ཤིང་ནགས་ཚལ་བརྟན་གཡོ་སྣོད་བཅུད་མ་ལུས་པ་འུབ་བསྡུས༔ སྤྱི་བོའི་ལྷ་ཚོགས་རྣམས་ལ་མཆོད་པ་འབུལ༔ དབུ་མའི་ནང་ཐམས་ཅད་འོད་ཟེར་གྱིས་གང་བར་བསམ༔ དམིགས་སྐོར་བཞི་པ་ནི༔ འོག་སྒོའི་ཕག་ཞལ་དམར་མོའི་ཡར་སྙན་གྱི་ནང་དུ༔ ཡི་གེ་ཧེ་སེར་པོ་གསེར་གྱི་མདོག་ཅན་གཅིག་བསམ༔ ཀ་བ་འཛུགས་པའི་ཚེ་ཧེ་སེར་པོའི་སྣ་ལ་འབྱུང་བ་ས་བཅུད་དང་ཐིག་ལེ་གསེར་བཙོ་མ་ལྟར་སྤྱི་བོའི་ཕག་ཞལ་གྱི་མགྲིན་པར་སླེབ་ལྷ་ཚོགས་མཆོད༔ རྩ་མདུད་ཐམས་ཅད་གྲོལ༔ ཨ་ཝ་དྷཱུ་ཏིའི་རང་བཞིན་དུ་བསམ་མོ༔ དམིགས་སྐོར་ལྔ་པ་ནི༔ འོག་སྒོའི་ཕག་ཞལ་ནས
རྡོ་རྗེ་ཕག་མོ་སོར་གང་བ་གཅིག་ཡར་དབུ་མའི་ནང་ལ་ཞུགས༔ གྲི་གུག་གིས་རྩ་མདུད་ཐམས་ཅད་བཀྲོལ༔ སྤྱི་བོར་རྒྱང་འཐོན༔ རྩ་བའི་བླ་མ་དང་གཉིས་སུ་མེད་པར་གྱུར༔ དམིགས་སྐོར་དྲུག་པ་ནི༔ སྡོང་པོ་གསུམ་བལྟབ་ལ་མང་དུ་སྦྱང༔ དམིགས་སྐོར་བདུན་པ་ནི༔ སྲིན་པོ་ཁ་འགྱེད་ལ་རྟགས་མ་ཐོན་བར་དུ་སྦྱང༔ དམིགས་སྐོར་བརྒྱད་པ་རླུང་འཚོ་བཅུད་འཚོ་ལ་སྦྱང༔ དེ་རྣམས་ལ་བརྟན་པ་ཐོབ་པ་དང༔ ཐུར་མ་འཛུགས་པ་གོང་དུ་གསལ༔ རླུང་བཤལ་རྫས་བཤལ་གང་བྱེད་ཀྱི་དམིགས་པ་ཕྱག་ལེན་ཚུལ་མ་འཆུག་པའི་ཞལ་ལས་དྲིས༔ བཅུད་འཚོ་བའི་འཕྲུལ་འཁོར་སེ་ཀེ་རེའི་ལུས་གནད་ཤིན་ཏུ་ཟབ༔ ལུས་གནད་བླ་མའི་ཞལ་ལས་ཤེས༔ རཱ་ཧུ་ལ་རཀྵ་སི༔ འཇའ་ལུས་འོད་ཕུང་རང་གྲོལ་ལས༔ གསོལ་འདེབས་དངོས་གྲུབ་ཆར་འབེབ་བཞུགས་སོ༔ ན་མོ་གུ་རུ་ཛཱ་ཧ་བཱིར༔ ཀ་དག་བློ་འདས་ཆོས་དབྱིངས་ཕོ་བྲང་དུ༔ སྐུ་གསུམ་བླ་མ་མཆོག་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་བྱིན་གྱིས་རློབས༔ འཕོ་མེད་འཇིགས་བྲལ་བདེ་ཆེན་ཕོ་བྲང་དུ༔ རྣལ་འབྱོར་དབང་ཕྱུག་ཞབས་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་བྱིན་གྱིས་རློབས༔ སྣང་སྲིད་འོད་ལྔ་ཚོམ་བུའི་ཕོ་བྲང་དུ༔ རྩ་བརྒྱུད་བླ་མའི་ཚོགས་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་
བྱིན་གྱིས་རློབས༔ མི་ཤིགས་རྡོ་རྗེ་གསུམ་ལྡན་ཕོ་བྲང་དུ༔ དྲིན་ཆེན་རྩ་བའི་བླ་མ་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་བྱིན་གྱིས་རློབས༔ གནས་ལུགས་འདུ་འབྲལ་མེད་པའི་ཕོ་བྲང་དུ༔ མཆེད་དང་ལྕམ་དྲལ་ཚོགས་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་བྱིན་གྱིས་རློབས༔ རིམ་དགུ་སྡེ་བཞི་མན་ངག་ཀུན་གྱི་བཅུད༔ ཟབ་ཆོས་འོད་ཕུང་རང་གྲོལ་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་བྱིན་གྱིས་རློབས༔ བཀའ་དང་དམ་ཚིག་གཉན་པོའི་ཕོ་བྲང་དུ༔ གཟའ་བརྒྱད་གདོང་མོ་བཞི་ལ་གསོལ་བ་འདེབས༔ ཕུང་པོ་ལྷག་མེད་འཇའ་ལུས་འགྲུབ་པ་དང༔ ཚེ་འདིར་མཁའ་སྤྱོད་བགྲོད་པར་བྱིན་གྱིས་རློབས༔ རྩ་བརྒྱུད་བླ་མ་རྣམས་ལ་གསོལ་བཏབ་མཐུས༔ འཁྲུལ་སྣང་ཚེ་འདིའི་ཞེན་པ་ཆོད་པ་དང༔ ཟག་བཅས་འཁོར་བའི་རྐྱེན་ལ་མ་ལྟོས་པར༔ ཟག་མེད་རླུང་གི་བཟའ་བཏུང་གོས་ཀྱིས་འཚོ༔ ཚེ་གཅིག་སངས་རྒྱས་འཁོར་བ་དོང་སྤྲུགས་ཤོག༔ ཅེས་པའི་གསོལ་འདེབས་འདི་ཉིད་ས་དྲུག་པ་མངོན་དུ་གྱུར་པའི༔ བྱང་ཆུབ་སེམས་དཔའི་གནས་ཆེན་བདེ་ཆེན་པདྨ་གླིང་ཕུག་གི་ངོ་མཚར་ཀུན་གཟིགས་སུ་ཆོས་རྗེ་གྲགས་པས་བསྐུལ་ངོར་གང་ཐོན་དུ་བྲིས་པའོ༔ མ་དག་འཁྲུལ་པ་ཐམས་ཅད་རང་སར་ཞིག༔ བདེ་ཆེན་ཡེ་ཤེས་མཆོག་ལ་མངའ་དབང་སྒྱུར༔ ཧེ་རུ་ཀ་དཔལ་རིགས་བརྒྱའི་ཁྱབ་བདག་ཆེ༔ རིག་འཛིན་ཉི་ཟླ་ཀློང་གསལ་རྒྱལ་
གྱུར་ཅིག༔ འཇའ་ལུས་འོད་ཕུང་རང་གྲོལ་ལས༔ ཕྲིན་ལས་དག་པ་རབ་འབྱམས་བཞུགས་སོ༔ ན་མོ་གུ་རུ་ཛཱ་ཧ་བཱིར༔ མ་རིག་གཉིས་འཛིན་འགྲོ་བ་ལ༔ གཉིས་མེད་རང་གྲོལ་སྟོན་མཛད་པའི༔ རྣལ་འབྱོར་དབང་ཕྱུག་ཛཱ་ཧ་བཱིར༔ མི་འབྲལ་སྙིང་གི་ཐིག་ལེར་བཞུགས༔ དེ་མཉེས་མཆོད་པའི་རིམ་པ་ལ༔ སྔོན་འགྲོ་དངོས་གཞི་རྗེས་དང་གསུམ༔ སྔོན་འགྲོ་སྐྱབས་འགྲོ་སེམས་བསྐྱེད་དང༔ བགེགས་གཏོར་བསྔོ་བ་སྤྱི་དང་མཚུངས༔ བཀའ་བསྒོ་བ་ནི༔ ཧཱུྃ་ཧྲཱི༔ སྲིད་གསུམ་ཞིང་དུ་འཁོད་པའི་སྡེ་བརྒྱད་དང༔ མ་རིག་འཁྲུལ་སྣང་ལོག་འདྲེན་བགེགས་ཀྱི་ཚོགས༔ ལན་ཆགས་གཏོར་མ་འདི་ཡིས་ཚིམས་གྱིས་ལ༔ རང་རང་སོ་སོའི་གནས་སུ་ཕྱིར་དེངས་ཤིག༔ ཧྲཱིཿབཛྲ་ཀྲོ་ཏ་ཧྱ་གྷྲཱི་ཝ་བཛྲ་བྷ་རཱ་ཧི་འབྱུང་པོ་ཨུ་ཙ་ཏ་ཡ་ཧཱུྃ་ཕཊ༔ དང་ཧཱུྃ་བཞི་མ་བརྗོད༔ མཚམས་གཅོད་ཅིང་སྲུང་འཁོར་བསྒོམ་པ་ནི༔ ཧཱུྃ་ཧྲཱི༔ ཡེ་ནས་ཐམས་ཅད་ཆོས་དབྱིངས་རང་བཞིན་ལ༔ སྣང་སྲིད་སྣོད་བཅུད་མ་བཅོས་གཞི་ཡི་ལྷ༔ རང་བབས་ལྷུན་གྲུབ་གཉུག་མའི་ངང་དུ་གྲོལ༔ རང་རིག་རང་ཤར་ངང་དུ་མཚམས་བཅད་དོ༔ ཙིཏྟ་དྷརྨ་བཛྲ་ཨ་ཨ་ཨ་ཨ་ཨ༔ སྐྱབས་སེམས་ནི༔ ཧཱུྃ་ཧྲཱི༔ སྡུག་བསྔལ་ལས་ཀྱིས་མནར་བའི་སྐྱེ་འགྲོ་རྣམས༔ ཟུང་འཇུག་འཇའ་ལུས་འོད་སྐུ་མ་ཐོབ་བར༔ བདེ་གཤེགས་རིགས་འདུས་ལྷ་ལ་
སྐྱབས་སུ་མཆི༔ གཉིས་འཛིན་འཁྲུལ་པའི་འཕྲང་ལས་བསྒྲལ་བའི་ཕྱིར༔ འཁྲུལ་པ་རང་དག་ངང་དུ་སེམས་བསྐྱེད་དོ༔ ཞེས་དང༔ ཚོགས་གསག་སྒྲིབ་སྦྱོང་གི་སྐོར་ནི༔ ཐོག་མར་ཡན་ལག་བདུན་པ་ནི༔ ཧཱུྃ་ཧྲཱི༔ ཀ་དག་ངང་ལས་ལྷུན་གྲུབ་སྐུར་བཞེངས་པའི༔ རང་རྩལ་རིག་པ་རང་ཤར་ལྷ་ཚོགས་རྣམས༔ འཇའ་འོད་འོད་ཕུང་ཐིག་ལེའི་ཀློང་ནས་གཤེགས༔ སྣང་སྲིད་དག་པ་རབ་འབྱམས་མཆོད་པར་འབུལ༔ སྒོ་གསུམ་སྡིག་སྒྲིབ་ཉམས་ཆག་དག་གྱུར་ཅིག༔ ཟག་མེད་དགེ་ལ་ཡི་རང་ཆོས་འཁོར་བསྐུལ༔ འཆི་མེད་རྟག་པར་བཞུགས་གསོལ་དགེ་བའི་མཐུས༔ འགྲོ་ཀུན་འཇའ་ལུས་རྡོ་རྗེའི་སྐུ་ཐོབ་ཤོག༔ སྡོམ་བཟུང་ནི༔ རྩ་གསུམ་དམ་ཚིག་ས་ཡ་འབུམ་སྡེ་རྣམས༔ སྲོག་ཕྱིར་མི་སྤང་བསྒྲུབ་བོ་ས་མ་ཡ༔ རྡོར་སེམས་བསྒོམ་བཟླས་ནི༔ རྒྱལ་བ་ཀུན་འདུས་རིགས་བདག་རྡོ་རྗེ་སེམས༔ ཐུགས་སྲོག་སྐྱེ་མེད་ཨ་ཡིག་རང་སྒྲ་སྒྲོག༔ སྔར་བསགས་སྒོ་གསུམ་ལས་རྣམས་མཐོལ་ལོ་བཤགས༔ བླ་མའི་རྣལ་འབྱོར་ནི༔ ཨོཾ་ཨཱཿཧཱུྃ་ཧྲཱི༔ དག་པ་རབ་འབྱམས་འོད་གསལ་ཚོམ་བུའི་ཀློང༔ རྩ་བའི་བླ་མ་གྲུབ་ཆེན་ཛཱ་ཧ་བཱིར༔ རྒྱལ་པོའི་རོལ་སྟབས་ཌཱ་རུ་ཚེ་བུམ་འཛིན༔ རྩ་བརྒྱུད་བླ་མ་རྒྱ་མཚོའི་དབུས་ན་བཞུགས༔ གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས༔ འཕོ་མེད་འོད་ལུས་འགྲུབ་
པར་བྱིན་གྱིས་རློབས༔ མཎྜལ་ནི༔ ཕྱི་ནང་སྣོད་བཅུད་བཀྲག་མདངས་གཟི་བརྗིད་དང༔ ཀུན་བཟང་མཆོད་སྤྲིན་ནམ་མཁའ་ཁྱབ་པར་འབུལ༔ དབང་བཞི་ཞུ་བ་ནི༔ ལུས་ངག་ཡིད་ལ་སྐུ་གསུང་ཐུགས་མཆོག་གི༔ ཡེ་ཤེས་རྣམ་ལྔའི་གཟི་བྱིན་བསྐྱེད་དུ་གསོལ༔ ཀཱ་ཡ་ཝཱ་ཀ་ཙིཏྟ་མ་ཧཱ་གུ་རུ་སརྦ་སིདྡྷི་ཕ་ལ་ཧཱུྃ༔ དེ་ནས་དངོས་གཞིའི་རིམ་པ་ནི༔ མཆོད་རྫས་བྱིན་རླབས་དང་བྱིན་འབེབ་ནི༔ ཧཱུྃ་ཧྲཱི༔ སྐྱེ་མེད་བྷནྡྷ་ཐོད་དཀར་ཡངས་པའི་ནང༔ ཕྱི་ནང་གསང་གསུམ་རྫས་མཆོག་ཨ་མྲྀཏ༔ གཟུགས་སྒྲ་དྲི་རོ་རེག་བྱ་རོ་ནུས་ལྡན༔ རིགས་ལྔ་ཡབ་ཡུམ་ཟུང་འཇུག་རབ་སྦྱར་བའི༔ མཉམ་ཉིད་དགའ་བཞིའི་བདེ་སྟོང་ལྷན་ཅིག་སྐྱེས༔ འཁོར་འདས་རང་གྲོལ་མཆོད་པའི་སྤྲིན་ཕུང་འཁྲིགས༔ གདོད་མ་རང་ཤར་ལྷ་ལ་མཆོད་པ་འབུལ༔ འཁོར་བ་དོང་ནས་སྤྲུགས་པའི་བྱིན་ཆེན་ཕོབ༔ མ་ཧཱ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ་ཧཱུྃ་ཨརྒྷཾ་ནས་ཤབྡའི་བར་དང༔ སརྦ་པཉྩ་ཨ་མྲྀཏ་ཧཱུྃ་ཧྲཱིཿཋཱ༔ ཞེས་དང༔ དངོས་གཞི་ནི༔ ཧཱུྃ་ཧྲཱི༔ སྣང་སྲིད་ཡེ་ནས་དག་པའི་རང་མདངས་ལས༔ མ་བཅོས་ལྷུན་གྲུབ་ཆོས་འབྱུང་མེ་དཔུང་ཀློང༔ རང་རིག་ཧྲཱིཿལས་རྟ་ཕག་ཞལ་ཕྱག་རྫོགས༔ དེ་ཉིད་དབུ་གཙུག་ཆོས་འབྱུང་འོད་ལྔའི་ཀློང༔ རྣལ་འབྱོར་དབང་ཕྱུག་གྲུབ་ཆེན་ཛཱ་ཧ་བཱིར༔ སྐུ་མདོག་དཀར་དམར་འཇའ་ཟེར་འོད་ཕུང་འཁྲུགས༔ ཕྱག་གཡས་
རྡོ་རྗེ་གཡོན་པས་ཚེ་བུམ་འཛིན༔ རིན་ཆེན་མེ་ཏོག་སྣ་ཚོགས་རྒྱན་གྱིས་སྤྲས༔ གསང་བའི་ཡུམ་མཆོག་བདེ་ཆེན་ཛྙཱ་ན་འཁྲིལ༔ གཡས་གཡོན་ཉི་མ་ཟླ་བ་འོད་ཕུང་འབར༔ རྩ་བརྒྱུད་བླ་མ་རྒྱ་མཚོའི་དབུས་ན་བཞུགས༔ དེ་ཉིད་དབུ་གཙུག་པད་སྡོང་འོད་ལྔའི་ཀློང༔ རྩ་བའི་བླ་མ་རྗེ་བཙུན་ཐོད་ཕྲེང་རྩལ༔ སྐུ་མདོག་སྔོན་པོ་རྡོར་དྲིལ་བསྣོལ་ཐབས་འཛིན༔ པང་དུ་གསང་བའི་ཡུམ་མཆོག་མནྡྷཱ་ར༔ གྲི་ཐོད་རྒྱན་ཅན་པད་སྐྱིལ་ཡབ་ལ་འཁྲིལ༔ འཇའ་ཟེར་འོད་ཕུང་ཐིག་ལེའི་ཀློང་ན་བཞུགས༔ བདག་ཉིད་རྟ་ཕག་ཡབ་ཡུམ་གནས་ལྔ་རུ༔ དཔའ་བོ་མཁའ་འགྲོའི་དཀྱིལ་འཁོར་འོད་ཕུང་འཐིབས༔ ཕྱོགས་བཞིར་འཇའ་འོད་འོད་ཕུང་ཐིག་ལེའི་ཀློང༔ མཁའ་འགྲོ་སྡེ་བཞི་འཛུམ་མདངས་གར་ཉམས་འཁྱུག༔ སྟོང་གསལ་མ་འགགས་ལྷུན་གྲུབ་ངང་དུ་བསྒོམ༔ སྤྱན་འདྲེན་པ་ནི༔ ཧཱུྃ་ཧྲཱི༔ ཆོས་དབྱིངས་བདེ་ཆེན་དཔལ་རི་འོད་གསལ་ཀློང༔ དག་པ་རབ་འབྱམས་མཁའ་འགྲོ་འཇའ་སྤྲིན་འཁྲིགས༔ རང་བྱུང་ལྷུན་གྲུབ་པད་འབྱུང་ཡབ་ཡུམ་དང༔ ཞི་ཁྲོ་རབ་འབྱམས་རྩ་གསུམ་དྭངས་མའི་ལྷ༔ གནས་འདིར་འགྲོ་ལ་དགོངས་ཏེ་གཤེགས་སུ་གསོལ༔ ཕྱོགས་བཞི་མཚམས་བརྒྱད་སྟེང་འོག་གནས་བཅུ་དང༔ ནུབ་ཕྱོགས་ཨོ་རྒྱན་དག་པ་མཁའ་སྤྱོད་ཞིང༔ འཇའ་འོད་ལྔ་ལྡན་སྐུ་ཐིག་ཚོམ་བུའི་ཀློང
འཇའ་ལུས་འཕོ་མེད་འཇིགས་བྲལ་རྡོ་རྗེའི་སྐུ༔ རྩ་བརྒྱུད་བླ་མ་གྲུབ་ཆེན་ཛཱ་ཧ་བཱིར༔ གནས་འདིར་འགྲོ་ལ་དགོངས་ཏེ་གཤེགས་སུ་གསོལ༔ རང་ལུས་འབྱུང་བ་བཞི་དག་འོད་གསལ་ཀློང༔ དྭངས་མ་ཡེ་ཤེས་ལྔ་ལྡན་ཕོ་བྲང་ནས༔ རང་སྣང་ཌཱ་ཀི་དཔའ་བོ་མཁའ་འགྲོ་དང༔ གྲངས་མེད་འབུམ་ཕྲག་ཡངས་པའི་ལྷ་ཚོགས་རྣམས༔ གནས་འདིར་འགྲོ་ལ་དགོངས་ཏེ་གཤེགས་སུ་གསོལ༔ ཚོམ་བུ་འོད་ལྔའི་ཀློང་དུ་བཞུགས་སུ་གསོལ༔ ཟུང་འཇུག་འོད་ཕུང་ངང་ལ་ཕྱག་འཚལ་ལོ༔ བླང་དོར་འཛིན་པ་རང་དག་མཆོད་པ་འབུལ༔ འཁོར་གསུམ་དམིགས་མེད་ངང་ནས་བཞེས་སུ་གསོལ༔ མ་ཧཱ་སརྦ་པཱུ་ཛ་ས་མ་ཡ་ཧཱུྃ༔ མཉམ་ཡངས་བློ་འདས་ངང་ནས་ཕྱག་འཚལ་ལོ༔ ཕྱི་ནང་གསང་གསུམ་དམ་རྫས་སྨན་རག་དང༔ སྦྱོར་སྒྲོལ་གྷ་ཎ་ཙཀྲའི་མཆོད་པ་འབུལ༔ འཇའ་འོད་འོད་ཕུང་ཐིག་ལེའི་ཀློང་དུ་བཞེས༔ སྲིད་མཚོ་མི་ཟད་འཁོར་བ་དོང་སྤྲུགས་ཤོག༔ འདས་དང་མ་འདས་ད་ལྟའི་སོ་མཚམས་ནས༔ འཇིག་རྟེན་འདས་ཀྱང་འཁོར་བའི་ཆ་ལུགས་འཛིན༔ དམ་ལྡན་སྐྱོང་ཞིང་དམ་ཉམས་སྲོག་རྩ་གཅོད༔ སྣང་བ་རང་ཤར་རྒྱན་གྱི་གཏོར་མ་ལོངས༔ འཁོར་བ་དོང་ནས་སྤྲུགས་པའི་ཕྲིན་ལས་མཛོད༔ རང་གཞན་དགེ་ཚོགས་རྣམ་མཁྱེན་སར་བསྔོ་ཞིང༔ ཕྱམ་གྲོལ་ཀློང་
ཡངས་ཆེན་པོའི་བཀྲ་ཤིས་ཤོག༔ དྲང་སྲོང་ཆེན་པོས་བཀའ་ཡི་བྱ་ར་མཛོད༔ འཇའ་ལུས་འོད་ཕུང་རང་གྲོལ་ལས༔ འཕྲུལ་འཁོར་བཀའ་རྒྱ་མ་བདེ་སྟོང་འོད་ལུས་བཞུགས་སོ༔ ན་མོ་གུ་རུ་ཛཱ་ཧ་བཱིར་སིདྡྷི་ཕ་ལ་ཧཱུྃ༔ ན་མོ༔ ཐབས་ཤེས་ཟུང་གཉིས་བརྩེགས་པའི་གདན་སྟེང་དུ༔ རི་རྒྱལ་ལྷུན་པོ་འགྱིང་ཞིང་རབ་ཏུ་བརྟན༔ དཔག་བསམ་ལྗོན་པའི་གཟུང་ཆེན་མཁྲང་ཞིང་ལྡེམ༔ རྣམ་རྒྱལ་ཁང་བཟང་དཀར་གསལ་སྟེང་དུ་ཕྱེ༔ རླུང་ལྷ་ཕོ་མོ་ཟོམ་ཆེན་ནང་དུ་བསྙལ༔ རི་རབ་ཐེམ་སྐས་ནང་ནས་སྤུར་ཞིང་སྦུད༔ དེ་ཚེ་རང་རིག་ཉི་ཟླའི་ལྷ་ཞལ་མཐོང༔ ཞེས་པའི་ལུས་གནད་དང་ལྡན་པའོ༔ སྟེང་འོག་རླུང་ནི་དབུ་མའི་ཁྱིམ་དུ་ཞུགས༔ གླིང་བཞི་རི་རབ་ལྟེ་བར་བསྒྱིང༔ དེས་ནི་དབུ་མའི་རླུང་གི་ལམ་སྦྱང་སྟེ༔ རྩ་གནས་མ་ཁྲེམས་བར་དུ་འདི་ལ་འབད༔ གླིང་བཞི་རབ་བསྒྲད་འབར་ཞིང་རྡེབ་པ་ནི༔ འཆུན་ལྡན་རབ་ཏུ་སྒྲིམ་པའི་ངང་ཉིད་ལས༔ གྲངས་མེད་ཅི་ནུས་བར་དུ་འདིར་འབད་བསྣུན༔ ཞེས་པས་རླུང་གནད་བསྟན་པ་ཡིན་ཞིང༔ ལུས་གནད་དང་ལྡན་པའི་ངང་ནས་གེགས་སེལ་འཕྲུལ་འཁོར་ནི༔ སྟོད་རླུང་མཇིང་ནད་སེལ་འདོད་ན༔ རྡོ་རྗེ་སྐྱིལ་ཀྲུང་དང་བཅས་ནས༔ ལག་གཉིས་བཅང་ཕྲག་བརྡབ༔ གཡས་སྐོར་བྱས་ནས་ཁུ་
ཚུར་བཅང༔ ཚིགས་པ་དང་པོར་ལན་གསུམ་བརྡེག༔ དེ་ཡིས་རིགས་འགྲེ་གཡོན་ལའང་བྱ༔ སྙིང་རླུང་སེལ་བ་རྡོར་སྐྱིལ་བཤིག༔ སྙིང་ཐད་རྒྱབ་མདུན་ཁུ་ཚུར་གཉིས༔ དྲག་ཏུ་རྡེབ་ཅིང་ཧ་འདོན་བྱ༔ སྦོས་ནད་སེལ་བ་ཁུ་ཚུར་གཉིས༔ ཕོ་སྟོད་ཕོ་སྨད་ལྟེ་བའི་དཀྱིལ༔ འབེབ་དང་བསྟུན་ལ་ཡང་ཡང་བརྡེག༔ འབེབ་ཆུང་ཧ་འདོན་དྲག་ཏུ་བྱ༔ སྟོད་སྨད་བར་གསུམ་གེགས་སེལ་ལོ༔ སྐྲན་སེལ་རྡོ་རྗེ་སྐྱིལ་ཀྲུང་བྱ༔ ལག་གཉིས་བཅང་ཕྲག་དང་བཅས་ནས༔ ཕོ་སྟོད་ཕོ་སྨད་འཕུར་བསུབ་བྱ༔ ཐལ་སྦྱར་གུང་མཛུབ་གཉིས་སྦྱར་བརྐྱང༔ གཡས་ནས་བསྐོར་ཏེ་གཡོན་དུ་འཕང༔ དེ་བཞིན་གཡོན་ནས་གཡས་སུ་འཕང༔ བཅང་ཕྲག་དང་བཅས་རྡོར་སྐྱིལ་བཤིག༔ ཐལ་སྦྱར་དང་བཅས་འབེབ་ཆུང་བྱ༔ ཧ་རིང་ཧ་ཐུང་མང་དུ་བརྗོད༔ པུས་ནད་སེལ་བ་རྡོར་སྐྱིལ་བཤིག༔ གྱད་ལངས་དང་བསྟུན་ཁུ་ཚུར་གཉིས༔ པུས་མོའི་ཕྱི་ནང་བསྣུན་པ་གསུམ༔ དེ་ནས་བཤུད་པ་ལན་གསུམ་བྱ༔ གཅུས་འབེབ་བྱས་རྗེས་ཧ་སྤྲུག་འབད༔ རྐང་མགྱོགས་འཕྲུལ་འཁོར་རྡོར་སྐྱིལ་བཤིག༔ གྱད་ལངས་དང་བཅས་རྐང་གཡོན་བཙུགས༔ ལག་གཡས་པུས་སྟེང་དག་ཏུ་བཞག༔ ལག་གཡོན་རྐང་པའི་མཐེ་བོང་ནི༔ སྣ་ཐད་ལན་གསུམ་བར་དུ་འཐེན༔ དེ་འདྲ་གཡས་གཡོན་རེས་མོས་བྱ༔ དེ་ནས་
ལག་གཡས་རྒྱབ་སྟེང་རྐང་གཡས་འཐེན༔ རྐང་གཡོན་ལག་གཡོན་དྲང་པོར་བརྐྱང༔ དེ་འདྲ་གཡས་གཡོན་རེས་མོས་བྱ༔ སྒུར་འབེབ་བྱ་ཞིང་ཧ་སྤྲུག་བྱེད༔ དེ་རྣམས་གེགས་སེལ་འཕྲུལ་འཁོར་ཡིན༔ དེ་ནས་འོག་སྒོའི་འཕྲུལ་འཁོར་ནི༔ དང་པོ་ཧཱུྃ་རིང་སྟོང་འདྲེན་ནི༔ རྡོར་སྐྱིལ་བཤིག་རྗེས་པུས་སྟེང༔ ཁུ་ཚུར་པུས་མོའི་གཡས་གཡོན་བཞག༔ ཧཱུྃ་རིང་དྲག་པོས་བྱང་སེམས་རྣམས༔ སྤྱི་བོའི་ཧཾ་ལ་ཡང་ཡང་བསྟིམ༔ སྒུར་འབེབ་གསུམ་དང་གཡང་སྤྲུག་བྱ༔ གཉིས་པ་སེང་གེ་ཧྲི་འདྲེན་ནི༔ པུས་བཙུགས་རྐང་མགོ་ཕྱིར་ཕུལ་ནས༔ ལག་གཉིས་པུས་ཕྲག་བཅུག་ནས་རྐང་གཉིས་འཐེན༔ ཧཱུྃ་ཐུང་དྲག་པོས་བྱང་སེམས་ཧཾ་ལ་བསྟིམ༔ གོང་བཞིན་སྒུར་འབེབ་འབའ་སྤྲུག་བྱ༔ གསུམ་པ་ཝ་མོའི་སྣོམ་འདྲེན་ནི༔ རྡོར་སྐྱིལ་བཤིག་ནས་ཙོག་པུར་ལངས༔ ལག་གཉིས་པུས་སྟེང་གཡས་གཡོན་བཞག༔ ཧྲིང་ཧྲིང་དྲག་པོས་བྱང་སེམས་རྣམས༔ སྤྱི་གཙུག་བདེ་བ་ཆེན་པོར་བསྐྱལ༔ སྒུར་འབེབ་འབའ་སྤྲུག་གོང་བཞིན་བྱ༔ དེ་ནས་ཡང་གསང་རྣམ་གསུམ་ནི༔ རྡོར་སྐྱིལ་བཤིག་ནས་རྐང་གཡོན་བརྐྱང༔ ལག་གཡོན་ཁུ་ཚུར་པུས་སྟེང་བཞག༔ གཡས་གཉིས་བསྐུམ་སྟེ་ཧཾ་ཧཾ་སྒྲས༔ ཀུན་ད་སྤྱི་བོའི་ཧཾ་ལ་བསྟིམ༔ སྒུར་འབེབ་འབའ་སྤྲུག་གོང་བཞིན་བྱ༔ དེ་ནས་ཡང་གསང་
རྣམ་གསུམ་ནི༔ རྡོར་སྐྱིལ་བཤིགས་ལ་གྱད་ལངས་གྱད་འཛུགས་བྱ༔ ལག་གཉིས་རང་ཐད་གཤོག་པ་ལྟར་བརྒྱངས་ལ༔ ཧཱུྃ་རིང་དྲག་པོས་ལན་གྲངས་དགུ་རུ་དྲང༔ འབེབ་ཆེན་གསུམ་དང་ཧ་སྤྲུག་དག་ལ་འབད༔ ཡང་ན་རྐང་གཡས་མདུན་དུ་བརྐྱང༔ རྐང་གཡོན་རྒྱབ་ངོས་ཕྱི་ལ་ཕུལ༔ ལག་གཡས་རྒྱབ་ལ་ཕྱི་རུ་བརྐྱང༔ ལག་གཡོན་རང་མདུན་ཕྱོགས་ལ་བརྐྱང༔ དེ་འདྲ་གོ་ལོག་རེས་མོས་བྱ༔ ཧཱུྃ་ཐུང་སྒྲ་ཡིས་སྤྱི་བོར་དྲང༔ གཅུས་འབེབ་ཧ་སྤྲུག་དག་ལ་འབད༔ ཡང་ན་རྐང་ལག་བཞི་པོ་བཅུན༔ ཧྲི་ཞེས་རྒྱུ་ཞབས་སྒལ་པར་སྦྱར༔ སྒུར་འབེབ་ཧ་སྤྲུག་དྲག་ཏུ་འབད༔ ཡང་གཅིག་རྡོར་སྐྱིལ་བཤིགས་གྱུར་ནས༔ གོང་བཞིན་གྱད་ལངས་གྱད་འཛུགས་བྱེད༔ འབེབ་བཅས་རྐང་གཡོན་ཤད་ཀྱིས་བརྐྱང༔ རྐང་གཡས་བརླ་ཡི་འོག་ཏུ་བཅུག༔ ལག་གཡས་ཁུ་ཚུར་བརླ་ཁུག་བཙུགས༔ ལག་གཡོན་རྐང་དང་མཉམ་དུ་བརྐྱང༔ ཧཾ་ཧཾ་དྲག་ཏུ་བརྗོད་པ་ཡིས༔ ཉི་ཟླ་དཀར་དམར་ཚངས་རྩེར་དྲང༔ བྱ་ཕོ་སྤྲུགས་པ་ལྟ་བུ་ཡིས༔ དཀར་དམར་འོད་ཀྱི་གོང་བུར་ལྟ༔ འཇའ་ལུས་རྡོ་རྗེའི་སྐུ་བརྙེས་པ༔ རྣལ་འབྱོར་དབང་ཕྱུག་ཛཱ་ཧ་བཱིར༔ དེ་ཉིད་རང་ཉམས་འཁྲུལ་སྣང་དུ༔ ཡང་ཡང་བྱུང་ནས་གདམས་པ་ཡིན༔ སྙིང་གི་ཐིག་ལེ་དྭངས་མའི་བཅུད༔ སྙིགས་དུས་དུག་ལྔ་བྱོལ་ཉོག་ཏུ༔ སྤྱོད་པའི་སེམས་
ཅན་སྐལ་དམན་ལ༔ རླུང་ཕྱོགས་ཙམ་ཡང་སྒྲོག་ཕངས་ཀྱང༔ ལས་ལྡན་རྗེས་འཇུག་སྙིང་གི་བུ༔ སྐལ་བ་ཅན་གྱི་དོན་སླད་དུ༔ འཇའ་ལུས་སྣང་སྟོང་རང་གྲོལ་གྱིས༔ མ་ཕོད་བརྩེ་བས་གདམས་པའོ༔ དྲང་སྲོང་གཟའ་བདུད་ཆེན་པོས་བཀའ་འདི་ཐུབ་པར་བསྲུང་བར་མཛོད༔ རཱ་ཧུ་ལ་རཀྵ་སི་ཧཱུྃ་ས་མ་ཡ༔ འཇའ་ལུས་འོད་ཕུང་རང་གྲོལ་ལས༔ སྔགས་ལ་བརྟེན་པའི་གེགས་སེལ་བར་ཆད་ཀུན་སེལ་བཞུགས་སོ༔ ན་མོ་གུ་རུ་དྷེ་ཝ་ཌཱ་ཀི་ནཱི་སུ་ཁ་སིདྡྷི་ཕ་ལ་ཧཱུྃ༔ འདིར་སྔགས་ལ་བརྟེན་པའི་གེགས་སེལ་རྣམས་ནི༔ གཞན་སྣང་དབང་དུ་སྡུད་ཅིང་བསོད་ནམས་ཀྱི་སྟོབས་སྐྱེད་པའི་མན་ངག་གི་སྐོར་ནི༔ ཐོག་མར་སྔོན་འགྲོའི་སྔགས་ཚན་བཞིའི་དང་པོ་ཆར་པ་འབེབ་པའི་མན་ངག་ནི༔ རང་ལུས་ཨོ་རྒྱན་ནམ་ཛཱ་ཧ་བཱིར་གང་རུང་དུ་བསྒོམ༔ སྤོས་དཀར་གྱི་དུད་པ་བཏང༔ སྔགས་འདི་རྣམས་དྲག་ཏུ་བཟླས་པས་དགོང་ཇ་དུས་ཙམ་ལ་ངེས་པར་འབབ་བོ༔ སྔགས་ནི༔ ཨི་ཤྭ་ར་ཀ་འ་བེ་ཏྲ་པ་རི་ཤ་ཧོ༔ མེ་གྷ་གྷ་ཎོ་ཨ་ཝེ་ར་ཏེ་ཕུ་རེ་ཨི་ཤྭ་ར་འ་བཱ་ཙ་ཞེས་བཟླའོ༔ གཉིས་པ་ས་ལ་བརྟེན་པའི་ཚེ་སྒྲུབ་ནི༔ ཨཱོཾ་རཏྣ་མ་ཧཱ་ར་ཥཱེ༔ དྷརྟི་སི་ཐ་ཙ་མ་ཊ་མ་ཏ༔ ཞེས་ལག་པ་ས་ལ་རེག་ལ་སྔགས་གསུམ་དང་ཕྱག་གསུམ་བྱའོ༔ དེ་ནས་ལག་པ་ས་ལ་བསྣུན་ནས་སེ་གོལ་གསུམ་བྱའོ༔ ཡང༔ ན་མོ་ཨ་མར་དྷརྟི༔ ཨ་མར་མི་དི་ཀཱ་ཡ་
ཙ་མཱ་ཊ་མ་ཏཱ༔ པཎྜི་ཚོ་དྷེ་པྲ་ན་ཀ་ཧཱུྃ་ན་ཛ་ཡ་ཛ་ཡ༔ ཤྲི་གྷོ་རཀྵ་ནཱ་ཐ་པརྣ་ཞེས་དག་པར་བཟླའོ༔ ས་ལ་བརྟེན་པའི་ཚེ་སྒྲུབ་བོ༔ སྐྲ་དཀར་དང་གཉེར་མ་མི་འོང་བའི་མན་ངག་ནི༔ སྔ་དྲོ་ཚར་གསུམ་ཆུ་འཐུང་ཐེབས་གསུམ༔ དགོང་མོ་ཡང་དེ་དང་འདྲ༔ སྐྲ་དཀར་དང་གཉེར་མ་མི་འོང་ཞིང་གཞོན་ནུར་སྡོད༔ གནོད་བྱེད་ཀྱིས་ཉེན་པ་གང་ལ་ཡང་ཆུ་ལ་ལན་གསུམ་སྔགས་ནས་བླུད་ན་ཕན་པར་འགྱུར་རོ༔ ན་མ་པཱ་ནི༔ བཛྲ་མ་ཎི་ཀ་ཡེ་པཱ་ཎི་བཱི་ཝ༔ ཧ་ཏྲོ་ནི་རུ་ཏྲེ༔ བྷྲ་མ་ཎ་ས་ཀི༔ ཀྲ་ཀྲི་ཨང་གཱེ༔ ཤྲཱི་ནཱ་ཐ༔ ཀི་ཨངྐེ་འ༔ ཛེ་བྷི་ཤ་པཱ་ནི་པི་ཝ་ཛེ་བྷི་ཤ་ཐ་ཀ༔ ཅེས་བཟླའོ༔ རང་ཨུ་རྒྱན་དུ་བསྒོམ༔ ཆུ་ལ་བརྟེན་པའི་ཚེ་སྒྲུབ་ནི༔ སྔ་དགོང་གུང་གསུམ་དུ་ཉི་མ་ལ་ཁ་བལྟས་ནས་རང་གི་མཛོད་སྤུར་ཛཱ་ཧ་བཱིར་བསྒོམས་ལ་མཆོད་པ་འབུལ༔ ས་ལ་ལག་པ་རེག་ལ་མཆོད་པི་པི་འབུད་མེད་ན་ཐལ་མོའི་སྒྲས་མཆོད༔ དེ་ནས་སྔགས་བཟླས་པ་དང་འབྱུང་བ་ས་ཆུ་མེ་རླུང་ནམ་མཁའ་རིག་འཛིན་ཚེའི་གྲུབ་ཐོབ༔ དཔའ་བོ་མཁའ་འགྲོ་ཉི་མ་ཟླ་བ་རྣམས་འོད་དུ་ཞུ་ནས་འོད་མེ་རེ་རེ་རང་གི་ཁར་ཞུགས༔ སྡུག་བསྔལ་རྒྱུ་དང་བཅས་དག༔ ལུས་འཆི་མེད་བདུད་རྩིའི་རྒྱུན་གྱིས་མེར་གྱིས་ཁེངས་པར་བསམ༔ ཁྱོར་བར་ཆུ་ལ་སྔགས་ཏེ་འཐུང༔ དེ་ལྟ་བུ་ལན་གསུམ་བྱའོ༔ སྔགས་ནི༔ ཧཱུྃ་ཀ་རེ༔ མ་ར་ཝེ༔ ཨ་ཀ་རེ་པ་
སི་འགད་ཚ་ཏི༔ མ་ཀཱ་རེ་ཤང༔ གཱ་རུ་ཎ༔ ག་ཏཱོ་པ་ནོ༔ པུ་ནེ་ཏེ༔ འ་ཏེ་ཏ་ཀ་ཧ་ར་ན༔ ཏ་ཏཱ་ཀ་བྷ་ར་ཎ༔ འདེ་སི་འབོ་ལེ༔ ཀ་བྷྲེ་ཎ་མ་ར་ཎ༔ སྲ་ནུ་རཀྵ༔ ཅེས་དག་པར་བཟླ་བར་བྱའོ༔ གསུམ་པ་ཟས་དུག་སྲུང་བ་བྷི་ཤ་སྟོབས་འཇོམས་ཀྱི་མན་ངག་ནི༔ རང་ཉིད་སྨན་གྱི་ལྷ་མོ་སྨན་གྱི་ལོ་མ་གྱོན་པའམ༔ རྨ་བྱར་བསྒོམས་ལ་རྨ་བྱའི་ལུས་ལ་སྔགས་འདི་རང་བྱུང་དུ་ཡོད་པས་ན་དེའི་ཡོན་ཏན་གྱིས་དུག་བཟའ་བའོ༔ ཧ་ས་ཙེ་གེ༔ བ་ར་ཏ་ཏ༔ ན་མ་ཧཱུྃ༔ ཙྭཱརྱ་བ་ཏ༔ ཧ་རི་རུ་པ་ས༔ སྲིན་དང་ཤ་དུག་སྦྱར་དུག་བཙན་དུག་སོགས་དུག་རིགས་ཐམས་ཅད་ལ་འགྲེ༔ དྲན་པ་གསུམ་ལྡན་ཤིན་ཏུ་གཅེས༔ བཞི་པ་ནི༔ ཨོཾ་ཤིག་ཤིག་འབར་བ་སོད༔ ཅེས་བཟླས་ནས་རྨ་འབྲས་གང་བྱུང་ཡང༔ སྔགས་ཆུ་བཏང་ཞིང་མཐའ་ནས་འདེབས་སོ༔ དེ་རྣམས་ནི་སྔོན་དུ་འགྲོ་བ་སྔགས་སྲུང་གི་མན་ངག་བཞིའོ༔ རྗེས་ཀྱི་སྔགས་ཀྱི་སྐོར་རྣམ་པ་ལྔ་སྟེ༔ ལུས་སྟོད་སྨད་ཀྱི་སྐྲང་འབུར་དང་སྨེན་པ་ཁྲོས་པ་ཞི་བར་བྱེད་པ་དང༔ མདའ་མདུང་མཚོན་ཆའི་ངར་དབལ་གཞོམ་པར་བྱེད་པ་སྔགས་ལ་བརྟེན་པ་དང་འཁོར་ལོའི་མན་ངག་མཛེ་དང་ཕོ་ནད་སྒོས་སུ་བཅོས་པར་བྱེད་པ༔ སེར་བ་སྲུང་བ་ཐོ་དང་སྔགས་ལ་བརྟེན་པའི་མན་ངག་གོ༔ དང་པོ་ཚ་གྲང་གི་ནད་གཟེར་མིག་གང་བྱུང་སར་
མཐེ་བོང་ལ་སྔགས་མེ་མནན་པས་གཟེར་མིག་ཞི་བར་འགྱུར་རོ༔ གཞན་ཡང་ཚ་གྲང་གི་ནད་རིགས་ཐམས་ཅད་ལ་ཕན་ནོ༔ ཨི་ཤཱ་ར་བྷཱ་ཙ་ཅེས་པ་འདི་ཉིད་ཆུ་ལའང་བཟླས་པས་ཆོག༔ གཉིས་པ་སེར་བ་སྲུང་བ་དང་ཐོ་དང་སྔགས་ལ་བརྟེན་པ་ནི༔ ཨོཾབཾཏིནིནནནརཧལྷཀེཏཤངལིཧཱུྃཕཊམིརིཏིཧཱུྃམུཧཱུྃཕཊཨཀྲོཏེཀམརིལརིལལཾཟློགབྷྱོབྷྱོཟློག༔ སྔགས་འདི་དབུ་ཅན་ཚག་མེད་དུ་བྲི༔ ཁམ་སའི་རུས་སྦལ་འཇིགས་སུ་རུང་བའི་ནང་དུ་ཉུངས་དཀར་རྒྱལ་པོ་དང་ལྷན་ཅིག་ཏུ་བཅུག༔ ཡི་གེ་མགོ་ནས་དྲིལ་རབ་གནས་བསྐྱེད་ཆོག་མི་བྱ༔ རུས་སྦལ་ཕྱོགས་བཞི་མཚམས་བརྒྱད་ཐོ་ཁོངས་སུ་སྦེད༔ འདི་ཡིས་མི་ཐུབ་གང་ཡང་མེད་པས་གསེར་གྱི་མཎྜལ་མེད་པ་ལ་སྟེར་བར་མི་བྱེད་དོ༔ གསུམ་པ་མཛེ་དང་ཕོ་ནད་སྒོས་སུ་བཅོས་པའི་མན་ངག་ནི༔ ཨོཾ་པྲ་ཐ་མ་དྷེ་ཝ་ཀ་ར༔ དྷཱུ་ཏི་ཨེ་བྷ་ནཱ་བྷཱ་ས་ཀར༔ ཏྲི་ཏྲི་ཨེ་ཏྲ་ལོ་ཀ༔ ཙའུཀ༔ ཙ་ཏུ་ར་ཐེ༔ པཉྩ་མེ་པྲ་བྷཱ་ས་ཀ་རང༔ ས་ཧ་སྲ་ཀོརྞ་ཥཥྚ་མེས་པ་ཏ་མེ༔ ར་ཝི་ཎ་མ༔ ཨ་དྷི་ཏ་ནཱ་མ༔ ཨཥྚ་མེ༔ ན་མོ་མཱ་ར་ཀ་ཌཱེ་ཨུ༔ ར་གྷུ་ན་མཱ༔ དྷ་ས་མི༔ ཨེ་ཀ་དྷ་ཤ༔ ཤི་བ་པུརྫ་ནཱ་མ༔ ཛྷི་ཎ་ཀ་ར་ནཱ་མ༔ དྷོ་ཨ་དྷཱ་ས་ནཱ་མ༔ ཨུ་དྷ་ཡ༔ ཨ་དྷི་ཏ༔ མ་དྷ་ཎེ༔ ཤི་ཝ་ལི་ཀ་སཾ་ཛ༔ བྷཱིཥྞ་རུ་པ་དྷིཥྚ༔ མུཥྚི༔ ཀུཥྚི༔ ས་བྷ་ཥ་ཊཾ་ཐི་ཨི་ས་ར་ན་ཙ༔ ཞེས་པའི་
སྔགས་འདི་དག་པར་བཟླ་ཞིང་ཆུ་གཙང་ལ་སྔགས་འདི་ལན་གསུམ་བཏབ་ཅིང༔ སྔགས་དགུ་བཟླས་ཆུ་ལ་ལན་གསུམ་འཐུང་བས་ཕན་པར་ཐེ་ཚོམ་མེད༔ དུས་གནད་ནི་ཉི་ཟེར་དམར་འོད་ཡོལ་ནས་དཀར་པོ་སྙིང་པོ་ཕྱེ་ཙམ་ཤར་བ་ལ་བྱའོ༔ ནད་ཚབ་ཆེ་ན་ལོ་གཅིག་དང་འགོ་ཟིན་ཙམ་ལ་ཟླ་བ་དྲུག་གིས་ངེས་པར་སེལ་བར་འགྱུར་བ་ཐེ་ཚོམ་མེད༔ སྤང་བྱ་ཤ་ཆང་བུད་མེད་ཞོ་འོ་མ་སྤང་བར་བྱའོ༔ སྐྱོ་ཚ་བ་མཛོ་མོའི་འོ་མ་ལན་ཚྭ་ཞན་པ་སྐྱ་སོལ་གྱི་རིགས་ལ་སོགས་བརྟེན་པར་བྱ༔ མི་དང་ཁྱིའི་སྒྲ་མེད་པར་ལུས་ངག་ཡིད་གསུམ་བཞུར་ཏེ་མན་ངག་འདི་ཉིད་བར་མ་ཆད་པ་བརྟེན་ན་སྣ་ཞོམ་པ་སོགས་ཀྱང་སོས་པར་འགྱུར་ན་འགོ་ཟིན་ཙམ་ལ་སྨོས་ཅི་དགོས༔ བཞི་པ་མདའ་མདུང་མཚོན་ཆའི་ངར་དབལ་འཇོམས་པར་བྱེད་པ་སྔགས་དང་སྲུང་བའི་འཁོར་ལོ་ལ་བརྟེན་པ་ནི་ཧ་ཅང་གི་གོ་རྒྱུ་མི་འདུག་པས་འདིར་མ་བྲིས༔ ཟུར་དུ་རྟོགས་པར་གྱིས༔ ལུ་མ་ཙཀྲ་མེ་དྷ་ནི༔ དྷ་དྷི་ན་མ་པཱ་ཏ་ཏེ༔ མན་ཏྲ་ལི༔ རྟ་རྟིར་གྷ་གྷ་མ་ཡིན་ཏེ༔ སྔ་དྲོ་ཤར༔ ཉི་གུང་ལྷོ་བྱང༔ དགོང་མོ་ནུབ་ཏུ་ཕྱོགས་ཏེ༔ སྔགས་ཚར་གསུམ་བཟླས་ཏེ༔ སའི་བཅུད་འཐུང་ཚུལ་བྱ༔ འདིའི་ཕན་ཡོན་ནི༔ གཙོ་བོར་མཆོག་འགྲུབ༔ ཐུན་མོང་གྲུབ་ཆེན་བརྒྱད་ལ་དབང་ཐོབ་པ་ནི༔ རྒྱུན་དུ་འཛབ་ཏུ་བཟླས་པས་འགྲུབ་བོ༔ རིན་ཆེན་ཕུན་ཚོགས
ཇག་འཆིང་ལྷ་འདྲེ་གཅན་གཟན་སྲུང་བ༔ ཚེ་ལཽ་ཀ་རེ༔ ཚེ་ད་ཀ་རེ༔ བྷེ་དྷུ་ཀ་རེ༔ བྷིག་ཛྙ་བ་སྔོ་འབྱི་ཀ་རེ༔ ཨི་ཧི་སྲིན་པོ༔ ཕུ་ཏྲི་ན་མཱ་རེ༔ ཤྲཱི་ནཱ་ཐ༔ ཀི་ཨང་གྱ་ཕུར་རོ༔ དུས་གསུམ་དུ་ལན་གསུམ་བཟླས་ཏེ༔ ཐལ་མོ་གཡས་ཀྱིས་གཡོན་ལ་བསྣུན་པར་བྱ༔ དེའི་སྒྲ་ཐོས་པ་ཚུན་ཆད་དུ༔ བྱ་དང་ལྷ་འདྲེ་གཅན་གཟན་ཆོམ་རྐུན་ཇག་པའི་གནོད་པ་བསྲུང་བར་འགྱུར་རོ་ཟབ༔ ཚེ་སྒྲུབ་རླུང་ལ་བརྟེན་པ༔ བྷ་ཡེ་ཨཱ་བྷ་མ་ནི༔ ཤྲཱི་སུརྫ༔ ཨུ་ཀ་བྷནྡྷ༔ བྷ་ན་ཨུ་ཀ་ན་བྷྲ་ཧ་མ་རུ་སི༔ སན་ཙ་ཤྲཱི་བི་ཏུ་སི་བྷི་ཤི་སུརྫ༔ བྷ་དུ་ཁ་ན་མས་ཏྲ་ཏ༔ ཕྱག་ལེན་ཞལ་ཤེས༔ དེ་ཝ་ནཱ་ཐ་ནས་བརྒྱུད༔ མིག་གསལ་བྱེད་བཞུགས༔ ཏདྱ་ཐཱ༔ ཏ་ཏ་ཙཀྵུར་མ་ལ་བ་ལམ་བྷི་ས་ཏ་ར་མ་ལ་ཙཀྵུ་ཏྲ་ཤྲོད་ཏྲ་པྲ་བྷ་ས་ཀ་ར་སྭཱ་ཧཱ༔ ཆུ་གཙང་ལ་བཟླས་མིག་ལ་བྱུགས༔ བྷི་ཤ་སྟོབས་འཇོམས་ཀྱི་སྔགས་ནི༔ ཨོཾ་མ་ཧཱ་བི་ཏྲེ་ན་འབྱོ་འབི་ཀཱ་ཀྲོ་ནི་ཏིང་གི་རི་བི༔ ཅེས་པས་སྔགས་འདི་ཉིད་ཨ་རུ་ར་ལ་བཏབ་སྟེ་ནད་པ་ལ་སྦྱིན་པར་བྱའོ༔ ལག་ལེན་ནི༔ ཨོཾ་ཀཾ་ཀ་རི་ཀཾ་རི་ཀག་རོ་ཀ་རི་ཀརྨ་གུ་རུ་འཛི༔ དྷརྨ་གུ་རུ་ཛཱི༔ འགུ་རུ་ཧ་རི་ས་ཏི་ཕ་ལ་ཧོ༔ ཀ་ར༔ ཀརྨ་གུ་རུ་ཕ་ལ༔ དྷརྨ་གུ་རུ་ཕ་ལ༔ ཤོ་མོ་གུ་རུ་ཕ་ལ
ཤོ་མོ་ན་ཏ་ཕ་ལ༔ ཀརྨ་གུ་རུ་ཨུ་ཁྲ་ཙ་ལེ་ཙ་ལེ༔ དྷརྨ་གུ་རུ་ཨུ་ཁྲ་ཙ་ལེ་ཙ་ལེ༔ འགར་རྒ་ནཱ་གི་སོད༔ ནཱ་གའི་དུག་སོད༔ གུ་རུ་ཧ་ས་ཏི་ནཱ་གི་རྦད༔ ནཱ་གི་དུག་སོད༔ ཅེས་པས་སྔགས་འདི་ཉིད་ཁྲི་ཕྲག་གཅིག་ཏུ་བསྙེན་པ་གོང་བསྙེན་དང༔ ལས་སྦྱོར་ཚེ་ཅོག་ཙེའམ༔ སྡེར་གདན་གང་རུང་ལ་སོར་མོའི་སྒྲ་དྲག་ཏུ་སྦྱིན༔ བཟའ་བཏུང་གི་ཚོགས་ལ་མིག་ཆེར་གྱིས་ལྟ་སྟངས་བྱ༔ བྷི་ཤ་འཇོམས་པའི་མན་ངག་ཛཱ་ཧ་བཱིར་ལུགས་ཤིན་ཏུ་ཟབ༔ སྔོན་འགྲོ་དང་རྗེས་ཀྱི་སྐོར་ཤིན་ཏུ་ཟབ་པ་རྫོགས་སོ༔ ཨ་ཙརྻ་ལུགས་ཀྱི་མན་ངག་ཡོད༔ གྲོད་པ་ཕུས་འདེབས་བྱེད་པ་ལ༔ རྫས་ལ་ར་རྒྱ་བོའི་ལྒང་ཕུག༔ ཡུགས་ས་མའི་སྐྲ༔ དགྲ་བོའི་རྐང་ས༔ སྐྱེར་ཕུར་གཅིག་སྐྱེས༔ སྔགས་ནི༔ དུར་སྣད་སོད༔ བསད་ན་ལྒང་ཕུག་གི་དབུགས་བཙན་ཐབས་སུ་བཏང༔ མི་བསད་ན་དལ་བུས་བཏང༔ བསྙེན་པ་སྟོང་ཚོ་གཅིག་ཡིན༔ ཡུགས་ས་མོའི་སྐྲ་འཁལ་ཏེ་ལྒང་ཕུག་གི་ཁ་འཁྱིག༔ དགྲ་བོའི་རྐང་ས་ལྒང་ཕུག་ནང༔ སྐྱེར་པ་གཅིག་སྐྱེས་ཕུར་པས་བརྡུང༔ མུ་སྟེགས་ལུགས་ཀྱི་མན་ངག་ཟབ ཨྠྀི༔ ཨ་ཙརྱའི་ཁབ་མཐུ་བྱེད་པ་ནི༔ རྫས་ལ་ཟངས་ཁབ་སོར་བཞི་དགོས༔ དགྲ་བོའི་རྐང་རྗེས་ཡིན་ངེས་ཀྱི་ས་ཡང་དགོས༔ བག་ཕྱེ་དང་ས་བསྲེས་ནས་མིའི་གཟུགས་འཁྱིད་གང་བ་བཅོས༔ སྔགས་ནི
ཧ་རི་ནི་ནན་སོད༔ བསད་ན་སྙིང་ལ་ཟངས་ཁབ་ཀྱི་རྩེ་ཐག་རྒྱབ་ནས་སྙིང་ལ་བཙུགས༔ མི་བསད་ན་ཡན་ལག་བཞི་ཡིན་ནོ༔ བསྙེན་པ་ཉི་མ་གཅིག་ཡིན༔ ལམ་སྲུང་གི་མན་ངག་རྫས་དང་སྔགས་གཉིས་ཏིང་ངེ་འཛིན་དང་གསུམ༔ རྫས་ལ་ཕོ་འབྲོང་གི་རྔ་མ་དང༔ བྱ་རྒོད་ཀྱི་རྒྱུས་པ་ཕྱི་བསྒྲིལ༔ མདུད་པ་བདུན་རྒྱབ༔ སྔགས་ནི༔ ས་དུ་རྦད་ས་ཧ༔ ཞེས་པས་རང་ཉིད་ཨ་ཙརྱ་མིག་ཆེ་བ་སྣ་རྒྱུད་རིང་བ༔ རལ་པའི་ཐོར་ཚུགས་ཅན་གཅིག་བསྒོམ༔ དགྲ་ཇག་རྣམས་ལྕགས་ཀྱི་ཕ་བོང་དུ་བསྒོམ༔ ལུས་ཀྱིས་འགུལ་མི་ཤེས༔ ངག་གིས་སྨྲ་མི་ཤེས༔ ཡིད་ཀྱིས་བསམ་མི་ཤེས་པར་བསམ་ལ་སྔགས་སྲུང་སྐུད་ལ་འདེབས༔ འདི་རྒྱ་གར་ཛོ་གིའི་མན་ངག་གོ༔ འབྲི་གུང་རིན་པོ་ཆེའི་ཕྱག་ལེན་མའོ༔ ཟབ་ཨྠྀི༔ དབང་སྡུད་འགུགས་པའི་ལྕགས་ཀྱུ་ནི༔ གོང་བསྙེན་སྟོང་ཕྲག་གཅིག་གོ༔ ལས་སྦྱོར་བྱེད་དུས༔ ཟས་གང་ཡང་རུང་བ་གཅིག་ལ་བརྒྱ་རྩ་བརྒྱད་བཏབ་སྟེ་སྦྱིན་ནོ༔ སྔགས་ནི༔ ཡེམ་ཡེམ་ཁམ་ཁམ་ཙག་ཙག་དུང་དུང་ཆེ་གེ་མོའི་ཡིད་ཀྱི་རྣམ་པར་ཤེས་པ་ཁུག་ཎི་ཛ༔ བཏབ་ནས་མ་སྤྱད་ན་སྨྱོ་འགྲོ་བས༔ རིག་མ་མཚན་ལྡན་མ་གཏོགས་གང་བྱུང་ལ་མི་བྱེད་དོ༔ བཏབ་ན་རྟ་ཡི་ཕྱིར་ལ་རྟེའུ་རྒྱུག་པ་དང་མཚུངས༔ རྒྱལ་པོའི་སྲས་མོ་ཡིན་ཡང་བདག་གི་དབང་
དུ་འདུ་ངེས་སོ༔ ཨ་ཙརྱའི་མན་ངག་གོ༔ བདག་གིས་ཀྱང་ལག་ལེན་བླ་མ་ལ་ཞུས་པ་ཡིན་ཅིང༔ གཅིག་བརྒྱུད་ཟབ༔ མཁའ་འགྲོ་ལ་བརྟེན་ནས་མུ་དྲ་འགུགས་འདོད་ན༔ ཆུ་ཤུལ་ས་ལ་དེ་གཟུགས་བྱ༔ རཀྟ་དང་ནི་གྷི་ཝང་གིས༔ མིང་རུས་བྲིས་ལ་སྙིང་གར་བཅུག༔ རང་ཉིད་མཁའ་འགྲོར་གསལ་བར་བསྒོམ༔ ཟངས་ཁབ་སྔགས་ཀྱིས་བྱིན་བརླབས་པས༔ དེ་ཡི་བྷ་ག་བསྒུལ་ཞིང་དཀྲུགས༔ ཤིན་ཏུ་ཆགས་པའི་ཡིད་ཀྱིས་ནི༔ སྔགས་འདི་ཁྲི་ཕྲག་གསུམ་དུ་བཟླ༔ བཾ་ཧ་རི་ནི་ས༔ ཆེ་གེ་མོ་ལ་ཨཱ་ཀརྴ་ཡ་ཛ༔ རྣམ་ཤེས་བྲེང་བྲེང་དུང་དུང་བདག་གི་དབང་དུ་གྱུར་ཅིག༔ ཅེས་བཟླས་སྔགས་བཏབ་བཟའ་བ་སྦྱིན༔ དེས་ནི་ངེས་པར་དབང་དུ་འདུ༔ འགྲོལ་འདོད་རྫས་ནི་འོ་མར་བཀྲུ༔ སྣ་ཁྲག་མངལ་ཁྲག་མ་ཆོད་ན༔ རང་ཉིད་བརླ་ཤའི་དྲེག་པ་དང༔ ཆུ་སྦྱར་སྔགས་མང་དུ་བཏབ་ནས་ཁོང་དུ་བཏང་བས་ཆོད་ངེས་སོ༔ ས་དམར་སུ་དུ་བེ་རྦད༔ ན་མོ་གུ་རུ༔ དངུལ་ཆུ་རྗེན་པར་བཟའ་བའི་ཐབས་ནི༔ རང་མཁའ་འགྲོ་མ་དཀར་མོ་སྐྲ་གྱེན་དུ་འཁྱིལ་བ་སྤྱན་གསུམ་བསྒྲད་པ༔ སྐུ་ལ་རུས་པའི་རྒྱན་གྱིས་བརྒྱན་པར་བསྒོམས་ནས༔ ཨོཾ་བཛྲ་ཏྲི་ཏྲི་དངུལ་ངར་སོད༔ མཚལ་ངར་ཞི༔ དངུལ་དུག་དང་ངར་སྭཱ་ཧཱ༔ སྔགས་འདི་སུམ་བརྒྱ་བཟླས་ནས་དངུལ་ཆུ་བཞི་ནམ་ནངས་རེ་བཞིན་ཆང་བཟང་པོ་བྲེ་ཕྱེད་ཡན་གྱིས་ཕུལ་ནས་
ཟོས་ན་ཏིང་ངེ་འཛིན་འཕེལ༔ སྦྱར་དུག་སོགས་དུག་རིགས་ཐམས་ཅད་ཀྱི་གཉེན་པོར་འགྲོ་ཞིང་གག་ལྷོག་གཟེར་གསུམ་སོགས་བཞི་བརྒྱ་རྩ་བཞིའི་ནད་རྣམས་འཇོམས་པས་ཕན་ཡོན་མཐའ་ཡས་སོ༔ ན་མ་ཏ་པ་ཤ་ནི་ཧཱུྃ་ཕཊ༔ ཡིག་འབྲུ་བརྒྱད་པ་འདི་ཉིད་ནད་བརྒྱ་སྔགས་གཅིག་ཡིན༔ ལག་ལེན་ཞལ་ལས་ཤེས༔ ཅེས་རྣལ་འབྱོར་དབང་ཕྱུག་ཛཱ་ཧ་བཱིར་གྱི་ཐུན་མོང་མ་ཡིན་པ་ཁྱད་པར་འཕགས་པའི་གདམས་པ་འདི་རྣམས་བརྒྱུད་པ་འཛིན་ངེས་མ་གཏོགས་གཞན་རྣམས་ལ་ཟུར་ཙམ་མི་སྟོན་ནོ༔ དྲང་སྲོང་གཟའ་བརྒྱད་ཀྱིས་བཀའ་ཡི་བྱ་ར་མཛོད༔ རཱ་ཧུ་ལ་ས་མ་ཡ་རཀྵ་སི་ཧཱུྃ་ཕཊ༔ མངྒ་ལཾ༔ འཇའ་ལུས་འོད་ཕུང་རང་གྲོལ་ལས༔ འཇའ་ལུས་སྣང་སྟོང་རང་གྲོལ་གྱི་རྟོགས་པའི་གླུ་བཞུགས་སོ༔ ན་མོ་གུ་རུ་སིདྡྷི་བྷ་ཝནྟུ༔ རྒྱུད་སྡེའི་དགོངས་དོན་མཐར་ཕྱིན་ཛཱ་ཧ་བཱིར༔ རིག་གནས་ཀུན་མཁྱེན་བཛྲ་ནཱ་ཐའི་ཞབས༔ ཟབ་མོ་རླུང་གི་བཀའ་བབ་གནམ་ལྕགས་དང༔ རྒྱལ་བས་ལུང་བསྟན་མཉེས་པ་ཚུལ་ཁྲིམས་མཚན༔ དུས་གསུམ་མཁྱེན་གཟིགས་འོད་གསལ་མཆོག་ལྡན་རྗེ༔ རྣལ་འབྱོར་དབང་ཕྱུག་ཆོས་རྒྱལ་རྡོ་རྗེ་དང༔ སྐུ་དྲིན་འཁོར་མེད་འཛིན་པ་རང་གྲོལ་ཞབས༔ ཟབ་ཆོས་བསྟན་སྲུང་དྲང་སྲོང་གཟའ་བརྒྱད་དང༔ དངོས་གྲུབ་ཀུན་འབྱུང་ཟབ་མོ་རླུང་ཁྲིད་ལ
རྩེ་གཅིག་གུས་པ་ཆེན་པོས་གསོལ་བ་འདེབས༔ རྩ་རླུང་རང་སར་གྲོལ་བར་བྱིན་གྱིས་རློབས༔ རླུང་ཟས་མཐའ་རུ་ཕྱིན་པར་ཐུགས་རྗེས་གཟིགས༔ ཟག་མེད་འོད་ལུས་འགྲུབ་པར་བྱིན་གྱིས་རློབས༔ ཅེས་པས་བརྒྱུད་པའི་བླ་མ་ལ་གསོལ་བ་བཏབ་ནས༔ སླར་ཡང་ཉམས་ལེན་གླུར་བླངས་འདི་ལྟར་གདའ༔ ཨེ་མ་ཧོ༔ ཟབ་པའི་མཐར་ཐུག་རླུང་ཟས་བཅུད་ལེན་གྱི༔ སྙིང་པོའི་ཡང་ཞུན་ཛཱ་བཱིར་རླུང་གི་ཟས༔ ཚེ་གཅིག་འཇའ་ལུས་འགྲུབ་པར་འདོད་པ་ཡི༔ སྐལ་ལྡན་ཚེ་གཅིག་སངས་རྒྱས་ཐོབ་འདོད་རྣམས༔ ཐོག་མར་འཆི་བ་མི་རྟག་སྒོམ་བྱེད་ཅིང༔ འཁོར་བའི་ཕྱོགས་ལ་ཞེན་པ་བཟློག་པ་དང༔ ཞེན་ཅིང་ཆགས་པའི་ཕྱོགས་ཀུན་རྒྱང་གིས་དོར༔ དལ་འབྱོར་རྙེད་དཀའ་ཐར་པའི་ཕན་ཡོན་བསམ༔ ཐུན་དང་ཐུན་མོང་མ་ཡིན་སྔོན་འགྲོར་འབད༔ ལྷག་བསམ་རྣམ་དག་བྱང་ཆུབ་སེམས་བསྒོམ་ཞིང༔ གཞི་ནི་མ་བཅོས་ཡེ་ནས་ལྷུན་གྲུབ་དང༔ ལམ་ནི་མ་འཁྲུལ་གནས་ལུགས་བཟོ་བཅོས་བྲལ༔ འབྲས་བུ་མ་བསྒྲུབ་སྤང་བླང་རེ་དོགས་བྲལ༔ ལྷུན་གྲུབ་རྣམ་གསུམ་ཉམས་ལེན་གཙོ་བོ་དེ༔ བྱང་ཆུབ་མ་ཐོབ་བར་དུ་མ་ཡེངས་སྒོམས༔ དེ་རྗེས་སྐྱབས་སེམས་གསོལ་འདེབས་ཐུན་དྲུག་འབད༔ ཕོ་མོ་མ་ནིང་དྲག་རླུང་འཇམ་རླུང་རྣམས༔ རླུང་གི་གེགས་རྣམས་མ་སེལ་བར་དུ་འབུད
ཕྱིར་དབྱུང་དུས་སུ་ནད་གདོན་བགེགས་སོགས་ཐོན༔ རླུང་འཇུག་དུས་སུ་བདེ་གཤེགས་ཐུགས་རྗེ་དང༔ བརྟན་གཡོ་སྣོད་བཅུད་དྭངས་མ་འུབ་ཀྱིས་བསྡུས༔ ས་ཆུ་མེ་རླུང་ནམ་མཁའི་ཁམས་རྣམས་བཀུག༔ འཇའ་ཚོན་རྣམ་པར་ལུས་ནང་མེར་གྱིས་ཁེངས༔ ཕྱི་ནང་མེད་པར་འཇའ་འོད་བུན་ནེར་གསལ༔ ཉེར་གཅིག་བར་དུ་རླུང་སྒྲ་བཅས་ནས་རྔུབ༔ དེ་བཞིན་བཙན་ཐབས་ཁ་སྣ་བཙུམས་པས་བགང༔ རླུང་རིག་གཉིས་ནི་མིད་པ་ནས་རྔུབ་ཅིང༔ ལྟོ་བ་གང་བར་མ་གྱུར་བར་དུ་འབད༔ དྲག་པོར་ཟ་བ་དམིགས་པ་གོང་བཞིན་ལས༔ ཁ་ནི་སྒྲ་བཅས་མིད་པ་སྒྲ་བཅས་བྱ༔ ཕྱི་ནང་བར་གསུམ་འབྱུང་ལྔའི་རླུང་རྣམས་རྔུབ༔ སྟེང་རླུང་མར་མནན་འོག་རླུང་མ་འཆོར་གཅེས༔ བར་རླུང་ལྟེ་འོག་བརྒྱངས་ལ་གྲུ་ཤུད་བྱ༔ ལུས་གནད་རྟིང་གཡས་སྤུ་མཚམས་དག་ཏུ་གཏད༔ རྐང་པའི་སོར་རྩེ་གདན་སྟེང་ཉིད་དུ་བཙུགས༔ གཡོན་པའི་རྟིང་པ་བཤང་གཅིའི་བར་དུ་མནན༔ ལུས་ཉིད་ཤིན་ཏུ་དྲང་པའི་ངང་ནས་ནི༔ གཡས་གཡོན་ལག་གཉིས་པུས་མོའི་སྟེང་དུ་བཞག༔ རང་ལུས་ཆོས་འབྱུང་ཕྱི་ནང་དཀར་དམར་གྱི༔ ཡར་མར་གཉིས་སུ་བྱང་ཆུབ་སེམས་ངོ་བོ༔ དཀར་དམར་ལྕོག་སྒོང་ཙམ་རེ་གསལ་བར་བསྒོམ༔ གཡས་གཡོན་བསྐོར་ལ་འབྲོས་འདེད་ཚུལ༔ སྟོད་སྨད་གཉིས་
ལའང་རིགས་འགྲེས་བྱ༔ ཀ་བ་བཙུགས་ལ་འདྲེན་འགྲེམས་གང་མང་གིས༔ ལུས་ཀྱི་ནང་ཀུན་འཇའ་འོད་འོད་ཀྱིས་གང༔ ཉིན་མཚན་རྒྱུན་ཁྱེར་ཡིན་པས་བརྩོན་འགྲུས་འབད༔ ཆུ་བོ་རྒྱུན་གྱི་ཏིང་འཛིན་ཉམས་ལེན་ཡིན༔ སྡོང་པོ་གསུམ་ལྡན་ལུས་གནད་དེ་ཉིད་སྟེང༔ ཐུར་སྲོག་བསྲེས་ལ་འཛུག་བསྐོར་འཐེན་གསུམ་འབད༔ ཆུ་སྲིན་ཁ་འབྱེད་རི་བོང་བཅུད་འདྲེན་དང༔ གླང་ཆེན་འདྲེན་སོགས་གེགས་སེལ་འཕྲུལ་འཁོར་འབད༔ རང་ལུས་ལྷ་ཚོགས་བཅུད་ཀྱིས་མཉེས་ནས་ཀྱང༔ ཟག་མེད་འཇའ་ལུས་སྐུ་མཆོག་ཐོབ་པར་འགྱུར༔ ཅིར་སྣང་དག་པའི་སྣང་བ་འཁོར་ཡུག་འཆར༔ རྒྱབ་རླུང་མདུན་རླུང་རླུང་འཚོ་བཅུད་འཚོ་དང༔ སྦུབས་འདྲེན་གཙུག་ཏོར་སྒྲུབ་པའི་ཐབས་ལ་འབད༔ བོགས་འདོན་ཐབས་ལམ་དམར་ཁྲིད་གདམས་པ་དང༔ རང་གཞན་གཉིས་ཀྱིས་ཉམས་ལེན་འབད་གྱུར་ན༔ ཚེ་གཅིག་དག་གིས་མཁའ་སྤྱོད་བསྒྲུབ་པ་དང༔ ཟག་བཅས་འཁོར་བའི་རྐྱེན་ལ་མ་ལྟོས་པར༔ ཟག་མེད་རླུང་གི་བཟའ་བཏུང་གོས་རྒྱན་འཚོ༔ ཚེ་ཡི་མི་མཐུན་འགལ་རྐྱེན་ཀུན་འཇོམས་ཤིང༔ ཚ་གྲང་བད་མཁྲིས་ནད་རྣམས་བཤལ་སྐྱུག་འབྱིན༔ མཐུན་རྐྱེན་ཉམས་རྟོགས་ཉི་ཟླའི་དཀྱིལ་འཁོར་རྒྱས༔ མ་ཎིའི་དཔལ་ལྟར་གཞན་དོན་ལྷུན་གྱིས་གྲུབ༔ ཚོགས་གཉིས་དགེ་བ་བྱང་ཆུབ་ཆེན་པོར་བསྔོ༔ ཟབ་མོ་རླུང་
གི་ཟས་ལ་བརྩོན་གྱུར་ན༔ ཕན་ཡོན་དེ་རྣམས་སྐད་ཅིག་ཉིད་དུ་འབྱུང༔ སེམས་ལ་ཞོག་དང་དད་ལྡན་ཆོས་བྱེད་ཚོ༔ སྙིགས་མའི་དུས་ཀྱི་དགེ་སློང་སེར་གཟུགས་ཅན༔ ཐོས་བསམ་སྒོམ་པས་དབེན་པའི་སྤྲང་འཁྱམས་པས༔ མིག་མེད་མུན་པར་མདའ་འཕེན་དཔེ་བཞིན་དུ༔ གང་བྱུང་སྤྲ་འཆལ་སྨྲ་བའི་སྨྱོན་པའི་ཚིག༔ སྦྱོར་དངོས་རྗེས་གསུམ་ཚང་བའི་དམིགས་རིམ་འདི༔ དད་ལྡན་རི་ཁྲོད་འགྲིམ་པའི་ཆ་རྐྱེན་མཛོད༔ མཁས་གྲུབ་མཁྱེན་ལྡན་རྣམས་ཀྱི་སྤྱན་སྔར་བཤགས༔ བཀའ་ཡི་སྲུང་མ་རྣམས་ལ་རྒྱ་ཁྲོལ་ཞུས༔ མོས་གུས་ཅན་གྱི་ཙིཏྟའི་དཀྱིལ་དུ་རྒྱོབ༔ དད་མེད་རྣམས་ཀྱིས་ལོག་ལྟའི་སྐུར་གཞི་མཛོད༔ ཆོས་དྲེད་པོ་རྣམས་བརྙས་ཆོས་འདི་ལ་གྱིས༔ ལོག་སྲེད་ཅན་ཚོ་ཡ་ག་ཕྱོགས་བཅུར་སྒྲོགས༔ སྡིག་ཅན་རྣམས་ཚོ་འཁོར་བ་དོང་སྤྲུགས་ཤོག༔ ལེ་ལོ་ཅན་གྱི་ཤེས་རྒྱུད་ཆོས་ལ་སྒྱུར༔ ཉམ་ཆུང་རྣམས་ཀྱིས་འདི་ཉིད་ཉམས་སུ་ལོངས༔ ཚེ་གཅིག་འོད་ཕུང་གྲོལ་བའི་བཀྲ་ཤིས་ཤོག༔ ཅེས་པ་འདི་ཉིད་རྒྱ་གར་གྱི་གྲུབ་ཆེན་ཛཱ་ཧ་བཱིར་གྱི་རླུང་ཁྲིད་ཟབ་མོ་ལ་མི་ཕྱེད་པའི་དད་པ་ཐོབ་པ་སྤྲང་པོ་ཉི་ཟླ་ཀློང་གསལ་ཞེས་བགྱི་བས༔ རང་རེའི་མཆེད་གྲོགས་སྤྲང་ལོང་རྣམས་ཀྱི་དོན་དུ་སྤྲང་གླུ་ཟར་ཟིར་དུ་བླངས་པ་འདི་ཡང་གནས་མཆོག་མཁའ་སྤྱོད་ཡང་རྩེར་སྒྲ་འཆལ་དུ་བགྱིས་པའོ༔ འཇའ་ལུས་འོད་
ཕུང་རང་གྲོལ་ལས༔ སྣང་འཁྲུལ་རྫུན་ཚིག་ཕྲེང་བ་བཞུགས་སོ༔ ན་མོ་གུ་རུ་སིདྡྷི་བྷ་ཝནྟུ༔ འདིར་སྙིགས་དུས་ཀྱི་སྤྲང་པོ་ཉི་ཟླ་ཀློང་གསལ་ཁོ་བོ༔ ཟབ་བུ་མཚོར་གསང་བའི་གནས་མཆོག་ཏུ༔ ཛཱ་ཧ་བཱིར་གྱི་གདམས་ངག་ཟབ་མོ་ཉམས་ལེན་ལ་འབད་དུས༔ ཉམས་སྣང་དུ་གཏེར་ལུང་དང་པོའི་ཤར་འདབས་དུད་སྤྲིན་སྨུག་ནག་འཚུབས་མའི་ཀློང་དཀྱིལ་ནས༔ གཏེར་སྲུང་ཨེ་ཀ་ཛཱ་ཏི་སྐུ་གཟུགས་འདོམ་གང་བྱས་པ་གཅིག་གི་ཞལ་ནས་འདི་སྐད་གསུང་པར་ཐོས༔ ཨེ་མ་ལས་སྨིན་སེམས་ཅན་དུཿཁ་བརྡོལ་བའི་དུས༔ ཇི་ལྟར་བྱས་ཀྱང་བདེ་སྐྱིད་ཟད་ལ་ཉེ༔ ལས་ངན་དབང་གིས་སྡུག་བསྔལ་མཚོ་མོ་བརྡོལ༔ ཤར་ནམ་མཁའི་དཀྱིལ་ན་གྱི་ལིང་འཚེར་སྐད་སྒྲོག༔ ལྷོ་ནགས་མའི་གསེབ་ནས་རྒྱ་སྟག་སྡེར་བཞི་བསྒྲད༔ ནུབ་གངས་སྟོད་རྩེ་ནས་ཐང་དཀར་གཤོག་སྒྲོ་བརྒྱངས༔ བྱང་འབྲོང་གཡག་རྭ་ཕྱར་མེ་ཆེན་འབར༔ དེ་ལ་ཕན་པའི་བཟང་དྲུག་ནུས་ལྡན་ཞིག༔ ལྷོ་ལྗོན་ཤིང་འདབ་རྒྱས་གླིང་ན་ཡོད༔ དེ་ཡོད་ཀྱང་མགོ་ནག་ཏི་འཁོར་བས༔ སྨན་མི་ཕན་དུག་ལ་སྨན་པར་འཛིན༔ སྨན་བཙལ་པས་དུག་གི་ཁ་རླངས་ཕོག༔ ཡ་རོང་སྤྲེ་འུའི་ཚ་བོ་ཕྲག་དོག་མཁས༔ མགོ་ནག་མི་ལ་ཁྲེལ་མེད་དུག་མཚོ་བརྡོལ༔ བོད་ཡུལ་ཁམས་ན་སྐྱིད་པའི་གོ་སྐབས་མེད༔ ནམ་མཁའི་ཁམས་ན་བྱ་ཁྱུང་རྩལ་
གསུམ་རྫོགས༔ སྤྱན་མིག་ཁྲ་བོས་གླིང་བཞི་ཡོངས་ལ་གཟིགས༔ སྤྲུལ་པའི་བུ་ཡུག་འཛམ་གླིང་གནས་སུ་ཁྱབ༔ འཇིགས་པ་སྟག་གི་ངར་བསྒྲགས་པས༔ སྤྲེ་འུ་ལྗོན་ཤིང་རྩེ་མོ་ནས༔ སྡོང་རྩར་ལྷུང་གྱུར་ཨ་ཙ་མ༔ དེ་འདྲའི་དུས་ལ་མ་སླེབ་གོང༔ རིག་འཛིན་པདྨར་གསོལ་འདེབས་རེམ༔ པདྨའི་ཚེས་བཅུ་བྱུང་རེས་ཀྱི༔ ཅི་ཡོད་ཚོགས་ཀྱི་འཁོར་ལོར་བཤམ༔ རྩ་གསུམ་ལྷ་ཚོགས་མཉེས་པར་གྱིས༔ སྙིགས་དུས་ལྟ་སྤྱོད་ཡ་བྲལ་དུས༔ གནས་ངན་མི་ནག་གྲོང་ཡུལ་དུ༔ འགྲོ་འདུག་བྱ་བྲེལ་མ་མང་བར༔ པདྨས་བྱིན་བརླབས་སྦས་ཡུལ་དུ༔ སྒོ་གསུམ་སྒྲུབ་ལ་བརྩོན་པར་གྱིས༔ དེང་སང་གངས་ཅན་བོད་ཡུལ་འདིར༔ བདུད་དང་འགོང་པོའི་སྤྲུལ་པ་མང༔ ཆོས་བྱེད་དམོད་ཅིང་སྡིག་བྱེད་བསྟོད༔ རྫུན་དང་ཟོག་གིས་འགྲོ་བ་བསླུ༔ མ་གྲོལ་གྲོལ་བརྫུའི་སྨྱོ་སྤྱོད་དར༔ རྒྱལ་ཁམས་ཞོར་དཀྲུགས་གྲུབ་ཐོབ་འབྱུང༔ མྱ་ངན་དུཿཁས་འགྲོ་བ་མནར༔ ཡ་མ་ཟུང་གི་ཆོས་ལོག་ཡོང༔ ཡར་ལ་བསྡུས་ཤིང་མར་ལ་དཀྲུགས༔ ཕར་དཀྲུགས་ཚུར་དཀྲུགས་བྱས་པ་ཡིས༔ གསང་སྔགས་ཡིན་ཞེས་ལམ་ལོག་འཁྲིད༔ དུག་ལྔས་བཅིངས་པའི་ཆོས་ལོག་གིས༔ འགྲོ་ཀུན་རྒྱལ་ཁམས་ཕུང་བར་འགྱུར༔ རི་འུར་གནམ་འུར་ས་འུར་འབྱུང༔ གཟའ་ཡན་སྐར་ཡན་
ནམ་མཁར་འཆར༔ ནད་རིམས་མཚོན་དང་མུ་གེ་དར༔ མཐའ་ཡི་དམག་དཔུང་དབུས་སུ་འགྲིམ༔ དམ་ཉམས་སློབ་མ་སེང་ལྟར་འགྱིང༔ ཟོག་པོ་རིན་ཆེན་གསེར་ལས་བྲིན༔ ཆོས་སྐད་ཟབ་མོ་མི་ནག་གླེང༔ ཆོས་བྱེད་མི་ལ་བདུད་དུ་བལྟ༔ སྙིགས་དུས་སེམས་ཅན་དུག་ལྔ་རགས༔ དེ་ཕྱིར་རང་ཉིད་དམན་ཆ་བཟུང༔ པདྨས་སྦས་པའི་ཡུལ་དབུས་སུ༔ ཐུགས་རྗེ་ཆེན་པོའི་སྒྲུབ་རྒྱུན་ཚུགས༔ རྫོགས་པ་ཆེན་པོའི་གནས་ལུགས་སྐྱོངས༔ ཞེས་གསུངས་ནས་འཇའ་ཚོན་དམར་ནག་གི་འཚུབ་མ་འཁྱིལ་ལེ་བ་བྱས་ནས་ནམ་མཁའི་མཐོངས་སུ་ཡལ་སོང༔ གང་བྱུང་རྫུན་ཚིག་ཏུ་བྲིས་པའོ༔ ཨེ་ཀ་ཛཱ་ཏིས་སྲུངས་ཤིག་རཀྵ༔ འཇའ་ལུས་འོད་ཕུང་རང་གྲོལ་ལས༔ ལས་ཚོགས་འདོད་དགུའི་བང་མཛོད་བཞུགས་སོ༔ ན་མོ་གུ་རུ་ཛཱ་ཧ་བཱིར༔ རྣལ་འབྱོར་དབང་ཕྱུག་ཞབས་ལ་ཕྱག་འཚལ་ལོ༔ དེ་ཉིད་ཞལ་ནས་ལེགས་གསུངས་གདམས་པའི་མཆོག༔ ནད་གདོན་ཞི་བྱེད་འདོད་དགུའི་བང་མཛོད་འདི༔ འགྲོ་ལ་ཕན་ཕྱིར་ཅུང་ཟད་བྲི་བར་བྱ༔ ཅེས་པས་དེ་ལ་དང་པོ་ལུས་ཀྱི་རྨ་འབྲས་གསོ་བ་ནི༔ ཨོཾ་ཤིག་ཤིག་འབར་བ་སོད༔ ཅེས་བཟླས་ཤིང་སྔགས་ཆུ་ཁོང་དུ་བཏང༔ རྨ་འབྲས་བྱུང་སར་སྔགས་མཆིལ་བཏབ༔ གཉིས་པ་ལུས་ཀྱི་རྨ་ཤུ་གསོ་བ་ནི༔ ཐལ་ཆེན་ཐར་ནུ་ཆུ་རྩ་བསྲེགས་པ་རྣམས༔ ཞིབ་བཏགས་
མར་རྙིང་སྦྱར་བ་ཤུ་བར་བྱུགས༔ ཤུ་འབྲས་གསར་རྙིང་མ་ལུས་སོས་པར་འགྱུར༔ གསུམ་པ་ལུས་ཀྱི་རྩ་འཆུས་གསོ་བ་ནི༔ སརྦ་རྩ་ཁྲི་རྦད་ནན་སྭཱ་ཧཱ༔ ཅེས་བཟླས་ཕོ་ལ་མདའ་དང་མོ་ལ་འཕང༔ མང་དུ་བསྒྲིལ་བས་ནད་ལས་གྲོལ༔ བཞི་པ་ལུས་ཀྱི་གྲང་ནད་གསོ་བ་ནི༔ ཚོན་སྐུད་སྣ་ལྔའི་སྲད་བུ་ལ༔ མདུད་པ་བདུན་རྒྱབ་ཧཱུྃ་དུ་བསམ༔ ཧཱུྃ་ལས་མེ་འབར་ནད་གདོན་བསྲེགས༔ སྔགས་འདི་ཉི་ཤུ་རྩ་གཅིག་བཟླ༔ ཨོཾ་བཛྲ་ཀྲོ་ཏ་སྲིན་མོ་ཧུར་ཐུཾ༔ སྲིན་མོའི་སྙིང་ལ་མཱ་ར་ཡ་རྦད༔ དེ་ནས་སྲུང་སྐུད་སྐེད་ལ་བཏགས༔ ལྔ་པ་ཁྱི་རྨུགས་རྨ་མེད་བྱེད་པ་ན༔ མི་དེའི་མིང་ནས་བོས་ལ་ང་ལ་ཁྱིས་རྨུགས་སོ་ཞེས་ཟེར་ནས་ཕེར་ཆེན་གསུམ་རྒྱབ༔ སྔགས་འདི་གསུམ་བཟླས༔ ཨོཾ་མུ་ལི་ཁྱི་ལི་ནད་སོས་ཤིག༔ ཅེས་པས་རྨ་ལ་འདེབས་རྨ་དཀྲིས་ཁ་སྲུང་མི་དགོས༔ དྲུག་པ་ཁྲག་གཅོད་པའི་གདམས་པ་ནི༔ ཨོཾ་ཁྲག་ཉག་རཾ་རཾ་ཧཱུྃ་ཧཱུྃ་ཕཊ་སྭཱ་ཧཱ༔ མཐེ་བོ་ཆེ་དང་རྡོ་གྲང་ལ་བཏབ་ན་ཆད་པར་འགྱུར་རོ༔ བདུན་པ་སྣ་ཁྲག་མངལ་ཁྲག་གཅད་པ་ནི༔ རང་གི་བརླ་ཤའི་དྲེག་པ་དང་ཆུ་སྦྱར་སྔགས་ཆུ་ཁོང་དུ་བཏང༔ དེས་སྣ་ཁྲག་མངལ་ཁྲག་ཆོད༔ བརྒྱད་པ་སྐྱ་རིབ་སྔོ་རིབ་སེལ་བ་ནི༔ ཨོཾ་ཀ་ཙ་ཀ་བྷི་ར་ཡ་སོལ་སོལ་སྭཱ་ཧཱ༔ ཆུ་གཙང་ངམ་སྔགས་མཆིལ་མིག་ལ་
བྱུགས༔ སྔགས་བཟླས་ཕུ་ཡིས་བཏབ་གྱུར་ན༔ མིག་ནད་ཐམས་ཅད་སེལ་བར་འགྱུར༔ དགུ་པ་མིག་གི་སྲིན་ཐོར་སེལ་བ་ནི༔ ཨོཾ་སྲིན་ཤི༔ སྲིན་སོད༔ བྲ་སོ་བྲ་ཤི་བྲ་སོད༔ ལན་མང་དུ་བཟླས་ཏེ་སྔགས་མཆིལ་མིག་ལ་བཏབ་པའམ༔ ཤ་གསར་ལ་སྔགས་ཏེ་མིག་ལ་ཡུད་ཙམ་ཕྱིས་ན་ཕན༔ བཅུ་པ་མིག་ལ་གྲམ་རྡུལ་ཤོར་ན༔ ཨོཾ་ལཾ་དན་ཏི་སྭཱ་ཧཱ༔ ཞེས་བཟླས་མིག་དང་སྣ་བུག་ཏུ་ཕུས་འདེབས་སོ༔ དེས་མིག་རྡུལ་གྲྭ་མ་སེལ་བར་འགྱུར་རོ༔ བཅུ་གཅིག་འགོ་བའི་རིམས་ནད་སྲུང་བ་ནི༔ ཨོཾ་ཨ་དྷུ་ཏེ༔ ཤར་ཀ་ཏེ༔ ཀུག་ལ་ཏེ༔ ཏེ་མ་དུ་ཏེ༔ ཨ་ཝ་ཡ་ཏེ་སྭཱ་ཧཱ༔ ཐོ་རངས་ཉི་ཤུ་རྩ་གཅིག་བཟླ༔ རིམས་ནད་མ་ལུས་བསྲུང་བར་འགྱུར༔ བཅུ་གཉིས་གློ་རྒན་ལུད་པ་སེལ་བ་ནི༔ ཨོཾ་ཨར་ལ་ཕར་ཕྱུ་ཤེས་ཙ་སྭཱ་ཧཱ༔ སུམ་བརྒྱ་བཟླས་ལ་གངས་ཆུར་བཏབ༔ ཐོ་རངས་ལྟོ་སྟོང་ཁོང་དུ་བཏང༔ དེས་ནི་གློ་རྒན་ལུད་པ་སེལ༔ བཅུ་གསུམ་ཆར་གཅོད་མན་ངག་ནི༔ ཨོཾ་ཙཀྲ་རྦད་རྦད༔ དུམ་དུམ༔ ཆིལ་ཆིལ་ཕཊ་སྭཱ་ཧཱ༔ ལོ་མ་སོང་བའི་ཚྭ་རྩི་གསར་པ་ལ་སྔགས་སུམ་བརྒྱ་བཟླས་ཏེ་ཕྱོགས་བཞིར་ཕུས་འདེབས་སོ༔ བཅུ་བཞི་པ་ཁ་བ་སྲུང་ཐབས་ནི༔ ཨོཾ་ནཱ་ག་འཆིལ་འཆིལ་ཕུ༔ ཡཾ་རཾ་ཕུ༔ ཞེས་སྟོང་ཕྲག་གསུམ་བཟླས་ཏེ་དར་སྔོན་པོས་ཡུག་ཡུག་བྱ་ཞིང་ཕུ་འདེབས
དར་དམར་ལ་སྔགས་འདི་བྲིས་ཏེ་དར་ལྕོག་བཙུགས༔ བཅོ་ལྔ་གཅན་གཟན་སྲུང་ཐབས་ནི༔ ཨོཾ་དཀར་བྲམ་ཟེ་སོད༔ དམར་བྲམ་ཟེ་སོད༔ སྡེ་བརྒྱད་ཁ་ཁོག༔ སྤྲེ་ཏེ་རས་ཙེ་ཁ་ཐུཾ་སྭཱ་ཧཱ༔ ལུག་ནག་པོའི་སོག་པ་གཡས་པའི་བལ་ལ་སྲུང་སྐུད་བཅོས༔ རྡོ་རྗེའི་མདུད་པ་དགུ་རྒྱབ་གསུམ་དཀྲིས་བྱས་ཏེ༔ གང་སྲུང་བའི་སོག་པ་གཡས་པའི་སྟེང་དུ་འདོགས༔ དེ་ཡིས་རི་ཁྱི་ཁ་ཆིངས་འགྱུར༔ བཅུ་དྲུག་པ་ནད་བརྒྱ་སྔགས་གཅིག་ནི༔ ཨོཾ་ན་མ་ཏ་པ་ཤ་ནི་ཧཱུྃ་ཕཊ༔ ཡིག་འབྲུ་དགུ་པ་འདི་ཉིད་ནི༔ ནད་རིགས་ཀུན་གྱི་གཉེན་པོ་ཡིན༔ བཅུ་བདུན་མི་རྒོད་ཁ་འཆིང་ནི༔ རྫས་དང་སྔགས་དང་ཏིང་འཛིན་གསུམ༔ རྫས་ནི་ཕོ་འབྲོང་རྔ་མ་དང༔ བྱ་རྒོད་རྒྱུས་པ་ཕྱི་བསྒྲིལ་ལ༔ མདུད་པ་བདུན་བྱས་སྔགས་འདི་བཏབ༔ ས་དུ་རྦད་སྭཱ་ཧཱ༔ རང་ཉིད་ཨ་ཙརྱ་མིག་ཆེ་ལ་སྣ་རྒྱུད་རིང་བ༔ རལ་པའི་ཐོར་ཚུགས་ཅན་དུ་བསྒོམ༔ དགྲ་ཇག་རྣམས་ལྕགས་ཀྱི་ཕ་བང་དུ་བསྒོམ་སྟེ༔ ལུས་ཀྱིས་འགུལ་མི་ཤེས༔ ངག་གིས་སྨྲ་མི་ཤེས༔ ཡིད་ཀྱིས་བསམ་མི་ཤེས་པར་བསམ་ལ༔ སྔགས་བཟླས་མདུད་པར་བཏབ་ལ་དམ་དུ་བསྡམ༔ དེ་ཡིས་མི་རྒོད་རེངས་པར་འགྱུར༔ བཅོ་བརྒྱད་དགྲ་བགེགས་སྒྲོལ་བ་ནི༔ རྫས་ནི་དགྲ་བོའི་
རྗེས་ས་གཡོན་པ་དང༔ ཡུགས་ས་མ་སྟག་ལོ་མའི་ཕུ་དུང་གཡོན་པ་དང༔ རེ་ལྕག་པ་ཐང་ཕྲོམ་པ་གཉིས་ཞིབ་པར་བཏགས༔ གོང་གི་རྗེས་ས་དང་ཡོ་བསྲེས་ལ༔ སྲེ་མོང་ངམ་ཁྱི་གུ་ནག་པོའམ་ཨ་ལི་ནག་པོའི་རླིད་བུ་གང་རུང་དུ་བཅུག༔ ཕོ་ལ་ལྕང་མ་མོ་ལ་ཤུག་པའམ་སྐྱེར་ཕུར་བརྡུང༔ ཉི་མ་ཕྱེད་ལ་དགྲ་བོ་སྦོས་པ་ཡོང༔ གུས་པས་བཏུད་ན་རྫས་དེ་བཏོན་ལ་རླིད་བུ་ཕྱིར་ལོག་བྱ༔ མེ་ལ་ཡུག་ཡུག་བྱས་པས་གྲོལ་བར་འགྱུར༔ པྲ་ཏི་པ་ཏ་ཏི་ཁ་རི་ཁོ་རི༔ ཞེས་སྔགས་འདི་ཉེར་གཅིག་བཟླས༔ དེ་ནི་རྐྱལ་འབུད་མན་ངག་ཡིན༔ དེ་ནས་སྒང་འབུད་བྱེད་པ་ནི༔ རྫས་ལ་ར་རྒྱ་བོའི་སྒང་ཕུག་ཡུགས་སའི་སྐྲ་སྐུད༔ དགྲ་བོའི་རྗེས་ས༔ སྐྱེར་ཕུར་གཅིག་སྐྱེས༔ རྐང་ས་མིང་ཡིག་ལྒང་ཕུག་ནང་དུ་བཅུག༔ ཡུགས་སའི་སྐྲ་སྐུད་ཀྱིས་ལྒང་ཕུག་ཁ་བཀྱིགས་བྱ༔ སྐྱེར་པ་གཅིག་སྐྱེས་ཕུར་པས་བརྡུང་ཞིང༔ སྔགས་འདི་ཁྲི་ཕྲག་བཟླ༔ དུར་རྦད་སོད༔ བསད་ན་ལྒང་ཕུག་གི་དབུགས་བཙན་ཐབས་སུ་བཏང༔ མི་བསད་ན་དལ་བུས་བཏང༔ དམ་ཉམས་དགྲ་བོ་བརླག་པར་འགྱུར་རོ༔ བཅུ་དགུ་པ་མུ་ཏྲ་དབང་སྡུད་ནི༔ སྒྲུབ་པ་དང་ལས་སྦྱོར་གཉིས་ལས༔ ཐོག་མར་སྒྲུབ་པ་ནི༔ ཆུ་ཤུལ་ས་ལ་དེའི་གཟུགས་བྱ༔ རཀྟ་དང་ནི་གྷི་ཧང་གིས༔ མིང་རུས་བྲིས་ལ་སྙིང་ཁར་
བཅུག༔ རང་ཉིད་རྣལ་འབྱོར་དབང་ཕྱུག་བསྒོམ༔ ཟངས་ཁབ་སྔགས་ཀྱིས་བྱིན་བརླབས་པས༔ མོ་ཡི་བྷ་གར་བསྒུལ་ཞིང་དཀྲུགས༔ ཤིན་ཏུ་ཆགས་པའི་ཡིད་ཀྱིས་ནི༔ སྔགས་འདི་ཁྲི་ཕྲག་གསུམ་དུ་བཟླས༔ བཾ་ཧ་རི་ནི་ས་ཆེ་གེ་མོ་ལ་ཨཱ་ཀརྴ་ཡ་ཛ༔ རྣམ་ཤེས་བྲེང་བྲེང་དུང་དུང༔ བདག་གི་དབང་དུ་གྱུར་ཅིག༔ ཅེས་བཟླས་སྔགས་དེ་ཡང་ཡང་བསྒུལ༔ དེ་ནས་ལས་སྦྱོར་བྱེད་པའི་ཚེ༔ སྟོང་ཕྲག་གཅིག་དང་བརྒྱ་རྩ་བརྒྱད༔ གང་ཡིན་ཟས་ལ་འདི་ཉིད་བཟླ༔ ཡེམ་ཡེམ་ཁཾ་ཁཾ་ཙག་ཙག་དུང་དུང་ཆེ་གེ་མོའི་ཡིད་ཀྱི་རྣམ་པར་ཤེས་པ་ཁུག་ནྲྀ་ཛ༔ ཇི་ལྟར་ཡིན་ཡང་རང་གི་དབང་དུ་འདུས༔ ཉི་ཤུ་ཟས་ངན་དུག་སྦྱོར་བསྲུང་བ་ནི༔ རང་ཉིད་སྨན་གྱི་ལྷ་མོ་སྨན་གྱི་ལོ་མ་གྱོན་པའམ༔ རྨ་བྱར་བསྒོམས་ལ་སྔགས་འདི་བཟླ༔ ཧ་ས་ཅོ་གེ༔ བར་ཏ་ཏ་ན་མ་ཧཱུྃ༔ ཙརྱ་བ་ཏ༔ ཧ་རི་རུ་པ་ས༔ དྲན་པ་གསུམ་ལྡན་ངང་ནས་བཟླ༔ ཟས་ངན་དུག་སྦྱོར་བསྲུང་བར་འགྱུར༔ ཉེར་གཅིག་བྷི་ཤ་འཇོམས་པའི་མན་ངག་ནི༔ ཨོཾ་མ་ཧཱ་བི་ཊེ་ན་བྷྱོ༔ བཱི་ཀ་ཀྲོ༔ བི་ཏིང་གི་ཏི་བི༔ ཞེས་པ་འདི་ཉིད༔ ཨ་རུ་ར་གསེར་མདོག་ལ་བཏབ་སྟེ་ནད་པ་ལ་སྦྱིན༔ དུག་ཉེན་ཡོད་སར་ཟས་རང་གི་མདུན་དུ་བྱུང་ཚེ་ཅོག་ཙེའམ་སྡེར་གདན་གང་རུང་ལ༔ སོར་མོའི་སྒྲ་དྲག་ཏུ་འབྱིན་ཞིང༔ བཟའ་བཏུང་གི་ཚོགས་ལ་མིག་ཆེར་ལྟ་སྟངས་ངང་ནས༔ སྔགས་
འདི་ཉིད་བཟླའོ༔ ཨོཾ་ཀཾ་རི་ཀཾ་ཀ་རོ་ཀ་རི་ཀརྨ་གུ་རུ་ཛཱི༔ དྷརྨ་གུ་རུ་ཛཱི༔ གུ་རུ་ཧ་རི༔ སི་ཏི་ཕ་ལ་ཧོ༔ ཀརྨ་གུ་རུ་ཕ་ལ༔ དྷརྨ་གུ་རུ་ཕ་ལ༔ ཤོ་མོ་གུ་རུ་ཕ་ལ༔ ཤོ་མོ་ན་ཏ་ཕ་ལ༔ ཀརྨ་གུ་རུ་ཨུ་ཁྲ་ཙ་ལེ་ཙ་ལེ༔ དྷརྨ་གུ་རུ་ཨུ་ཁྲ་ཙ་ལེ་ཙ་ལེ༔ གརྒ་ནཱ་གི་སོད༔ ནཱ་གི་དུག་སོད་གུ་རུ་ཧ་ས་ཏི༔ ནཱ་གི་རྦད༔ ནཱ་གི་དུག་སོད༔ གོང་བསྙེན་ཁྲི་ཕྲག་གཅིག་ཡིན་ནོ༔ ཉེར་གཉིས་པ་དངུལ་ཆུ་བཅུད་ལེན་ནི༔ རང་ཉིད་ཡེ་ཤེས་མཁའ་འགྲོ་དཀར༔ དབུ་སྐྲ་གྱེན་འཁྱིལ་སྤྱན་གསུམ་བསྒྲད༔ སྐུ་ལ་རུས་པའི་རྒྱན་དྲུག་མནབ༔ གྲི་གུག་ཐོད་ཁྲག་འཛིན་པར་བསྒོམ༔ ཨོཾ་བཛྲ་ཏྲི་ཏྲི༔ དངུལ་ངར་སོད༔ མཚལ་ངར་ཞི༔ དངུལ་དུག་ཐམས་ཅད་ཉལ་ཉལ་སྭཱ་ཧཱ༔ སུམ་བརྒྱ་བཟླས་ནས་དངུལ་ཆུར་བཏབ༔ ཆང་བཟང་བྲེ་ཕྱེད་ཡན་གྱིས་ཕུལ༔ ཟ་ཚད་བཞི་ནམ་རེ་རེ་ཡིན༔ དེ་ཟོས་ཏིང་འཛིན་འཕེལ་བ་དང༔ ཤ་དུག་སྦྱར་དུག་དབྱིག་དུག་དང༔ དུག་རིགས་ཀུན་ལ་གཉེན་པོར་འགྲོ༔ གག་ལྷོག་གཟེར་གསུམ་འགོ་བའི་ནད༔ བཞི་བརྒྱ་རྩ་བཞིའི་ནད་ཀུན་འཇོམས༔ གཞན་ཡང་ཕན་ཡོན་བསམ་ལས་འདས༔ ཉེར་གསུམ་རྐུན་མ་བསྲུང་བ་ནི༔ མིས་མ་འགོང་པའི་རྡེ་འུ་ལ༔ སྔགས་འདི་ཅི་མང་བཏབ་ནས་གང་བསྲུང་ལ་བཏགས་པའོ༔ ཨོཾ་བ་ར་བ་ར་སྭཱ་ཧཱ༔ ཞེས་བཟླས་བཏགས་
པས་རྐུན་མ་ཐུབ༔ ཅེས་འཇའ་ལུས་འོད་ཕུང་རང་གྲོལ་གྱི༔ ལས་ཚོགས་དགོས་འདོད་ཀུན་འབྱུང་འདི་ཉིད༔ འཇའ་ལུས་སྣང་སྟོང་རང་གྲོལ་ཞེས་པ་བདག༔ འདོད་དགུའི་འབྱུང་གནས་བལ་ཡུལ་གནས་བསྐོར་བྱེད་ཚེ༔ འཕགས་པ་ཤིང་ཀུན་གྱི་ཙོ་བ་རར་ཉམས་ཟིར་དུ་བྱུང་བ་བཞིན་ཡི་གེར་བྲིས་པའོ༔ གཟའ་མཆོག་འཇིགས་བྱེད་ཆེན་པོས་སྲུངས་ཤིག་བཛྲ་རཀྵ་རཱ་ཧུ་ལ་སི་ཧཱུྃ༔ སརྦ་མངྒ་ལཾ། །དགེའོ།། །།