ཕུར་པ་ཡང་གསང་སྤུ་གྲིའི་བརྒྱུད་འདེབས། འགྱུར་མེད་རྡོ་རྗེ།― RTZ031_Page_0071 ―
[མ་དཔེ་གཟིགས་ན་འདིར་གནོན།]
ཕུར་པ་ཡང་གསང་སྤུ་གྲིའི་བརྒྱུད་འདེབས། ཀུན་བཟང་རིགས་ལྔ་རིག་འཛིན་རྡོ་རྗེ་ཆོས། །ལས་ཀྱི་དབང་ཆེན་རྡོ་རྗེ་ཐོད་ཕྲེང་རྩལ། །མཁར་ཆེན་མཚོ་རྒྱལ་གཏེར་སྟོན་ཆོས་དབང་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །མི་བསྐྱོད་རྡོ་རྗེ་དྭགས་སྟོན་གཉན་སྟོན་དང་། །སེ་ལྡིང་ཡབ་སྲས་ཆོས་སྐུ་འོད་ཟེར་ཞབས། །དཔལ་འབྱོར་དབང་ཕྱུག་ཆོས་ཀྱི་དབང་པོ་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །རིག་འཛིན་ལེགས་ལྡན་ཞབས་དང་མཁྱེན་བརྩེའི་དབང་། །དབང་ཕྱུག་རབ་བརྟན་བསོད་ནམས་མཆོག་ལྡན་དཔལ། །འཕྲིན་ལས་ལྷུན་གྲུབ་གཏེར་བརྒྱུད་དང་པོ་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །པད་གླིང་རྒྱལ་བ་དོན་གྲུབ་རང་གྲོལ་མཚན། །བསྟན་འཛིན་གྲགས་པ་མདོ་སྔགས་བསྟན་འཛིན་བཟང་། །ཕྲིན་ལས་ལྷུན་གྲུབ་གཏེར་བརྒྱུད་གཉིས་པ་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །ཁ་སྐོང་། བརྒྱུད་སྲོལ་ཀུན་འདུས་གཏེར་ཆེན་ཆོས་ཀྱི་རྒྱལ། །རིན་ཆེན་རྣམ་རྒྱལ་ཀློང་ཡངས་འོད་གསལ་ཞབས། །མཆོག་སྤྲུལ་པད་དབང་ཁྲི་ཆེན་པད་རྒྱལ་ལ། ། ― RTZ031_Page_0072 ―
[མ་དཔེ་གཟིགས་ན་འདིར་གནོན།]
གསོལ་བ་འདེབས་སོ་བདུད་དཔུང་འཇོམས་པར་ཤོག །འཕྲིན་ལས་ཆོས་སྒྲོན་སངས་རྒྱས་ཀུན་དགའི་མཚན། །ཡོངས་རྫོགས་བསྟན་པའི་སྲོག་འཛིན་འཇམ་པའི་དབྱངས། །འཕྲིན་ལས་ཡོངས་གྲུབ་རྩ་བརྒྱུད་བླ་མ་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །བརྒྱུད་འདེབས་ཁ་སྐོང་གུ་ཎས་སོ། །གཞི་དུས་ཏིང་འཛིན་གསུམ་གྱི་རོལ་པ་ལས། །དཀྱིལ་འཁོར་གསུམ་གྱི་རྣམ་པར་ཡོངས་ཤར་བས། །སྒོ་གསུམ་ལས་ཉོན་མུན་པ་དབྱིངས་སྦྱངས་ནས། །འབྲས་བུ་སྐུ་གསུམ་གོ་འཕང་མྱུར་ཐོབ་ཤོག །ཅེས་པའང་རྒྱལ་ཁམས་པ་འགྱུར་མེད་རྡོ་རྗེས་སོ།། |
