རྡོ་རྗེ་ཕུར་པའི་ཚེ་འགུགས་པའི་སྦྱོར་ར། པདྨ་གླིང་པ།


RTZ031_Page_0689
[མ་དཔེ་གཟིགས་ན་འདིར་གནོན།]

རྡོ་རྗེ་ཕུར་པའི་ཚེ་འགུགས་པའི་སྦྱོར་ར་བཞུགས་སོ༔ ཤྲཱི་ཀུ་མཱ་ར་ལ་ན་མོ༔ རྡོ་རྗེ་ཕུར་པའི་ཚེ་འགུགས་ཆོ་ག་གསང་བ་ལག་ལེན་འདི་ལ་གསུམ་སྟེ༔ སྦྱོར་བ་དང་དངོས་གཞི་རྗེས་རིམ་མོ༔ ཚེ་འགུགས་པའི་སྦྱོར་བ་ནི༔ རྡོ་རྗེ་ཕུར་པའི་དཀྱིལ་འཁོར་ཆེན་པོའི་ལྷར༔ ཚེའི་དཀྱིལ་འཁོར་བཅའ་བ་ནི༔ གངས་རྒྱུད་མ་ཆད་པའི་རི་བཀྲ་ཤིས་པའི་རིའི་ས་ལ༔ དཀྱིལ་འཁོར་ཁྲུ་གང་གྲུ་བཞི་པ་འཁོར་ལོ་རྩིབས་བརྒྱད་སེར་པོ་བྲིས་པའི་ལྟེ་བར༔ རྫ་བུམ་སོས་སྨིན་པ་དཀར་པོས་བྱུགས་པའི་ནང་དུ༔ ཆུ་འདུས་ཆུ་གཙང་བའི་ཆུས་བསིངས་པའི་ཆང་ལ་བདུད་རྩི་བཏབ༔ འབྲི་ལོ་བཅུའམ་བདུན་ལོན་པའི་མར་རིལ་མཆེད་ཚོ་དང་གྲངས་མཉམ་པ་སྒྲུབས༔ རྒད་པོ་བཀྲ་ཤིས་པ་ལོ་བརྒྱད་ཅུ་ཙམ་ལོན་པ་ལས་བླངས་པའི་ནས་ལ་ཕྱེ་བྱས་པའི་ཚེའི་འབྲང་རྒྱས་ཟླུམ་བརྗིད་ཀྱིས་ཁ་བཅད༔ ཚེའི་མདའ་དར་གཟུག༔ གཟུངས་ཐག་དཀར་པོ་བཏགས་ཏེ་ཚེ་ཕུར་ལ་གཏོད་དོ༔ དངོས་ནི༔ བདག་རྩ་བའི་དཀྱིལ་འཁོར་གསུམ་སྲུང་མར་བཅས་པའི་ཐུགས་དམ་བསྐུལ༔ འོད་ཟེར་སྣ་


RTZ031_Page_0690
[མ་དཔེ་གཟིགས་ན་འདིར་གནོན།]

ཚོགས་ལྕགས་འདྲ་བའི་ཕོ་ཉ་སྤྲོས༔ ཕྱོགས་བཅུར་ཁྱབ༔ བདེ་གཤེགས་སྐུ་གསུང་ཐུགས་ཀྱི་དངོས་གྲུབ་དང༔ སྟེང་ལྷ༔ འོག་ཀླུ༔ བར་མི༔ ཕྱི་སྣོད༔ ནང་བཅུད༔ ཐམས་ཅད་ཀྱི་དངོས་གྲུབ་ཚེའི་རང་བཞིན་བདུད་རྩིར་བཀུག་ལ༔ བུམ་པ་བྷྲཱུྃ་ལས་གཞལ་ཡས་ཁང་རྡོ་རྗེའི་གུར་ཆེན་དུ་དཀྱིལ་བར་བསམ་ཞིང༔ ཨོཾ་བཛྲ་ཀཱི་ལི་ཀཱི་ལ་ཡ༔ བཛྲ་ཨཱ་ཡུ་ཤེ་ཧཱུྃ་ཛ་ཛཿསིདྡྷི་ཕ་ལ་ཧཱུྃ་ཨཱ༔ ཞེས་ཁྲོ་བཅུ་སྲས་མཆོག་སྲུང་མ་ཐམས་ཅད་ཀྱི་སྔགས་ཤམ་དུ་སྦྱར་ཏེ༔ བཟླས་པ་བརྒྱ་སྟོང་ཅི་འགྲུབ་ཏུ་བྱའོ༔ དེ་ནས་ཕོ་ཉ་བསྐུལ་བ་ནི༔ ཧཱུྃ༔ དཔལ་ཆེན་ཐུགས་ཀྱི་དཀྱིལ་འཁོར་ནས༔ ཐུགས་རྗེས་འོད་འཕྲོས་ཚེ་འགུགས་ལྷ༔ ཁྲོ་རྒྱལ་ཡབ་ཡུམ་སྲས་འཁོར་བཅས༔ ཚེ་མཆོག་འགུགས་པའི་ཕྲིན་ལས་མཛོད༔ ཧཱུྃ་ཀཱར་སྒྲ་འབྱིན་ཕག་དང་རྨིགས་བུའི་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ རྣམ་རྒྱལ་སྙེམས་མ་སྟག་དང་བྱ་རྒོད་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ དབྱུག་སྔོན་སྡེར་མོ་གཡག་དང་བྱ་རོག་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ གཤིན་རྗེ་དུར་ཁྲོད་ཤ་བ་འུག་པའི་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ མི་གཡོ་གཏུན་ཁུང་གཟིག་དང་ཁྭ་ཡི་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ རྟ་མགྲིན་གཏུམ་མོ་བྱི་ལ་པུ་ཤུད་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ འདོད་


RTZ031_Page_0691
[མ་དཔེ་གཟིགས་ན་འདིར་གནོན།]

རྒྱལ་མདའ་སྙེམས་སྤྱང་ཀི་ཁྲ་ཡི་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ བདུད་རྩི་རླུང་འབྱིན་སེངྒེ་ཕ་ཝང་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ ཁམས་གསུམ་གསོད་བྱེད་དོམ་དང་སྲེ་མོང་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ སྟོབས་ཆེན་བསྐྱོད་བྱེད་དྲེད་དང་བྱི་བའི་མགོ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ སྐུ་གསུང་ཐུགས་ཀྱི་སྲས་མཆོག་ཀཱི་ལ་ཡ༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ ཚད་མེད་བཞི་ལྡན་ཡེ་ཤེས་སྒོ་མ་བཞིས༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ མ་ལྟར་བྱམས་མཛད་དམ་ཅན་རྒྱ་མཚོའི་ཚོགས༔ རྡོ་རྗེ་ཚེ་མཆོག་འགུགས་པའི་ཕྲིན་ལས་མཛོད༔ ཨོཾ་བཛྲ་ཨཱ་ཡུ་ཤེ་ཧཱུྃ་ཛ་ཛ༔ ཞེས་མདའ་དར་གཡབ་ལ་བུམ་པར་བསྟིམ་མོ༔ རྗེས་ལ་ཚེ་བསྟིམ་པ་ནི༔ ཚེ་བུམ་དང་བཅས་པ་བཏེག་སྟེ་སྤྱི་བོར་བཞག་ལ༔ ཨོཾ་བཛྲ་ཀཱི་ལི་ཀཱི་ལ་ཡ༔ བཛྲ་ཨཱ་ཡུ་ཤེ་ཨ་བྷི་ཥིཉྩ་ཧཱུྃ་ཛ༔ ཀཱ་ཡ་ཨཱ་ཡུ་ཤེ་ཨོཾ༔ ཝཱ་ཀ་ཨཱ་ཡུ་ཤེ་ཨཱ༔ ཙིཏྟ་ཨཱ་ཡུ་ཤེ་ཧཱུྃ༔ ཞེས་གནས་གསུམ་དུ་སྐུ་གསུང་ཐུགས་ཚེ་ཡི་དངོས་གྲུབ་བསྟིམ་ཞིང་དབང་བསྐུར༔ བདུད་རྩི་འཐུང༔ ཚེ་མར་སྤྱི་གཙུག་ཏུ་བྱུགས༔ ལུས་ཐམས་ཅད་རྡོ་རྗེའི་རང་བཞིན་ཅིས་ཀྱང་མི་ཤིགས་པར་བསམ༔ ངག་གྲགས་སྟོང་ཀཱི་ལ་ཡར་གྲགས་པར་བསམ༔ ཡིད་སྟོང་གསལ་གཡུང་དྲུང་ཀློང་དུ་གསལ༔ བླ་


RTZ031_Page_0692
[མ་དཔེ་གཟིགས་ན་འདིར་གནོན།]

མས་མེ་ཏོག་གཏོར༔ རབ་གནས་བྱ༔ བཀྲ་ཤིས་གསོལ༔ ཚེ་ཟན་གཡས་སུ་ཁམ་ཁམ་ཟ༔ ཆང་གཡོན་སྐོར་དུ་ཧུབ་ཧུབ་བཏུང༔ ཚེ་མདུད་ལན་གསུམ་དུ་བྱུང་ན་ཚེའི་དངོས་གྲུབ་ཐོབ་བོ༔ རྡོ་རྗེ་ཕུར་པའི་ཚེ་འགུགས་ཀྱི་ཆོ་ག་ལག་ལེན་ནོ༔ ཨྠྀི༔ ས་མ་ཡཱ༔ བདག་པདྨ་གླིང་པས་ལྷོ་བྲག་སྨན་མདོ་ནས་གདན་དྲངས་པའོ། །མངྒ་ལཾ།། །།