མཁའ་འགྲོ་བདུད་འདུལ་དྲག་མོ་སེང་གེའི་གདོང་ཅན་གྱི་བརྒྱུད་པའི་གསོལ་འདེབས། སྟག་ཤམ་ནུས་ལྡན་རྡོ་རྗེ།
མཁའ་འགྲོ་བདུད་འདུལ་དྲག་མོ་སེང་གེའི་གདོང་ཅན་གྱི་བརྒྱུད་པའི་གསོལ་འདེབས་བཞུགས་སོ། །ཀུན་བཟང་ཀུན་ཁྱབ་ཀུན་གཞི་བདེ་བ་ཆེ། །ཀུན་བཟང་ཡབ་ཡུམ་རིགས་ལྔ་རྡོ་རྗེ་འཛིན། །རྡོ་རྗེ་ཐེག་པ་གསང་སྔགས་དཀྱིལ་འཁོར་ལྷ། །གསོལ་བ་འདེབས་སོ་རྡོ་རྗེའི་ནུས་པ་སྩོལ། །སྟོན་པ་ཡང་དག་རྫོགས་པ་ཤཱཀྱ་སེང་། །བསྟན་པ་འཛིན་མཛད་བྱང་ཆུབ་སེམས་དཔའི་ཚོགས། །གསང་སྔགས་མཛོད་འཛིན་གསང་བདག་སེང་གེའི་སྒྲ །གསོལ་བ་འདེབས་སོ་བླ་མེད་དངོས་གྲུབ་སྩོལ། །རིག་པ་འཛིན་པ་པདྨཱ་ཀ་ར་བ། །བདུད་འདུལ་མཁའ་འགྲོའི་དངོས་སྤྲུལ་མཚོ་རྒྱལ་མ། །མཁའ་འགྲོས་བྱིན་རླབས་ཨཱརྻ་བློ་གྲོས་མཚན། །གསོལ་བ་འདེབས་སོ་དབང་བཞིའི་དངོས་གྲུབ་སྩོལ། །གཏེར་གྱི་དངོས་གྲུབ་མཆོག་བརྙེས་སྟག་ཤམ་པ། །བྱིན་རླབས་དངོས་གྲུབ་མཆོག་བརྙེས་བླ་མ་རྗེ། །བདུད་འདུལ་ཡེ་ཤེས་མཁའ་འགྲོ་སེང་གདོང་མར། །གསོལ་བ་འདེབས་སོ་སྔགས་ཀྱི་དངོས་གྲུབ་སྩོལ། །བདག་སོགས་དད་དང་མོས་པས་གསོལ་བཏབ་པས། །བདུད་འདུལ་ཡེ་ཤེས་མཁའ་འགྲོའི་བྱིན་རླབས་ཀྱིས། །བསྟན་ལ་གནོད་ཅིང་སྡང་བའི་སེམས་འཆང་བའི། །ཕྱི་ལོག་མུ་སྟེགས་སྡེ་དང་སྐྱེ་བོའི་རིགས། །ནང་མཐུན་
བསྟན་པའི་སེལ་བྱེད་བན་སྔགས་བོན། །མི་དང་མི་མིན་བདུད་དང་འབྱུང་པོའི་རིགས། །བྱད་མ་གནོད་བྱེད་ཟློག་དང་ཞི་བ་དང་། །བསྒྲལ་ཅིང་བརླགས་ནས་མིང་ཡང་མེད་པར་གྱུར། །རྣལ་འབྱོར་བསམ་པའི་དོན་ཀུན་མྱུར་འགྲུབ་ནས། །ཕྲིན་ལས་རྣམ་བཞིའི་དངོས་གྲུབ་བསྩལ་དུ་གསོལ། །ཅེས་བདུད་འདུལ་དྲག་མོ་སེང་གེའི་གདོང་པ་ཅན་གྱི་བརྒྱུད་འདེབས་བསྟན་དགྲ་བརླག་པའི་དམོད་ཚིག་ཤམ་བསྒྱུར་ཡོད་པ་དགོས་ཞེས། རྟའུ་དཔོན་པོ་རིན་ཆེན་སོགས་དོན་གཉེར་རྣམས་ཀྱིས་བསྐུལ་ངོར་རྣལ་འབྱོར་པ་སྟག་ཤམ་ནུས་ལྡན་རྡོ་རྗེས་མེ་མོ་ཕག་ལོ་ཧོར་ཟླ་བཞི་པའི་ཚེས་བཅུ་གཉིས་ལ་བྲིས་པ་དགེ་ལེགས་འཕེལ།། །།