མཆོག་གླིང་ཟབ་བདུན་དྲག་སྔགས་བརྒྱུད་འདེབས། ཀརྨ་པ་ཐེག་མཆོག་རྡོ་རྗེ།
ཨེ་མ་ཧོ། བཅོམ་ལྡན་ཀུན་བཟང་དཔལ་ཆེན་ཧེ་རུ་ཀ །གསང་བའི་བདག་པོ་སྟོབས་ལྡན་ནག་པོ་ལ། །གསོལ་བ་འདེབས་སོ་རྡོ་རྗེའི་བདེན་ཚིག་འགྲུབ། །དྲག་པོ་སྔགས་ཀྱི་ནུས་རྩལ་སྟོབས་ལྡན་ཤོག །ལས་ཅན་དྲྭ་མ་ལྔ་དང་རྡོ་རྗེ་ཆོས། །སློབ་དཔོན་ཆེན་པོ་ཤཱནྟིཾ་གརྦྷ་ལ། །གསོལ་བ་འདེབས་སོ་རྡོ་རྗེའི་བདེན་ཚིག་འགྲུབ། །དྲག་པོ་སྔགས་ཀྱི་ནུས་རྩལ་སྟོབས་ལྡན་ཤོག །འཇམ་དཔལ་དབྱངས་དངོས་བཻ་རོ་ཙ་ན་དང་། །ལྷ་ཡི་སྲས་མཆོག་དམ་འཛིན་མཚན་ཅན་ལ། །གསོལ་བ་འདེབས་སོ་རྡོ་རྗེའི་བདེན་ཚིག་འགྲུབ། །དྲག་པོ་སྔགས་ཀྱི་ནུས་རྩལ་སྟོབས་ལྡན་ཤོག །སྙིགས་མ་ལྔ་བདོའི་འགྲོ་བ་ཉམ་ཐག་ལ། །ཟབ་གཏེར་བདུད་རྩིས་སྨིན་མཛད་གཏེར་ཆེན་རྗེར། །གསོལ་བ་འདེབས་སོ་རྡོ་རྗེའི་བདེན་ཚིག་འགྲུབ། །དྲག་པོ་སྔགས་ཀྱི་ནུས་རྩལ་སྟོབས་ལྡན་ཤོག །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །རྡོ་རྗེའི་ལམ་མཆོག་རྣལ་མར་འབྱོར་པ་ཀུན། །ཀ་དག་གཞི་དབྱིངས་འོད་གསལ་དག་པའི་མཁར། །ལྷུན་གྲུབ་སྐུ་བཞིའི་རྒྱལ་ས་ཟིན་པར་ཤོག །ལོག་པར་འཁུ་བ་མ་རུངས་བདུད་སྡེའི་དཔུང་། །དྲག་པོ་སྔགས་ཀྱི་མཚོན་ཆས་
རབ་བསྒྲལ་ནས། །འུབ་ཆུབ་བློ་འདས་ཆོས་སྐུའི་ངང་དུ་གྲོལ། །གཞི་ལམ་འབྲས་བུ་མཐར་ཕྱིན་སངས་རྒྱས་ཤོག །ཅེས་དམོད་པ་དྲག་སྔགས་ཀྱི་བརྒྱུད་པའི་གསོལ་འདེབས་འདི་ཡང་། གཏེར་འབྱིན་མཚུངས་བྲལ་མཆོག་གྱུར་བདེ་ཆེན་གླིང་པས་བཀའ་ཡིས་བསྐུལ་བ་ལྟར། དཔལ་ཀརྨ་པའི་སྐྱེ་བའི་ཕྲེང་བ་བཅུ་བཞི་པ་སུམ་ལྡན་རྡོ་རྗེ་འཛིན་པ་ཐེག་པ་མཆོག་གི་རྡོ་རྗེས་བྲིས་པ་དགེ། །།