མགོན་པོ་གོང་གནོན་ཡེ་ཤེས་པའི་སྒྲུབ་ཐབས་སྙིང་པོའི་བཅུད་ཐིགས། འགྱུར་མེད་རྡོ་རྗེ།
མགོན་པོ་གོང་གནོན་ཡེ་ཤེས་པའི་སྒྲུབ་ཐབས་སྙིང་པོའི་བཅུད་ཐིགས་ནི། ན་མོ་ཤྲཱི་མ་ཧཱ་ཀཱ་ལ་ཡ། མཐུ་ཆེན་རྡོ་རྗེ་ནག་པོ་ཆེ། །དཔལ་ལྡན་མགོན་པོ་ཕྱག་བཞི་པ། །གོང་གནོན་ཡེ་ཤེས་ལྷ་ཉིད་དུ། །སྒྲུབ་པའི་ལས་རིམ་འདི་ལྟ་སྟེ། །བླ་མ་དཀོན་མཆོག་རྣམ་གསུམ་ལ། །རྟག་པར་བདག་ནི་སྐྱབས་སུ་མཆི། །བླ་མེད་བྱང་ཆུབ་མཆོག་ཐོབ་ཕྱིར། །ཡེ་ཤེས་མགོན་པོ་བསྒྲུབ་པར་བགྱི། །རང་ལུས་ཐ་མལ་ལྟེ་བ་རུ། །ཧཱུྃ་མཐིང་མ་ཡིག་སྨུག་ནག་ལས། །འོད་འཕྲོས་ལུས་ཀུན་ཁྱབ་པར་གྱུར། །ཕྱིར་འཕྲོས་རྡོ་རྗེའི་གུར་ཁང་ནི། །སྲ་བརྟན་གཞོམ་དུ་མེད་པའི་དབུས། །པདྨ་ཉི་མ་རོ་སྟེང་དུ། །བདག་ཉིད་ཡེ་ཤེས་མགོན་པོའི་སྐུ །མཐིང་ནག་ཞལ་གཅིག་ཕྱག་བཞི་པ། །ཞལ་གདངས་མཆེ་གཙིགས་ལྗགས་འདྲིལ་ཞིང་། །སྤྱན་གསུམ་སྡང་མིག་དམར་ལ་འཁྲུག །ཁྲོ་གཉེར་བསྡུས་ཤིང་སྨིན་མ་དང་། །སྨ་ར་དམར་སེར་མེ་ལྟར་འབར། །དབུ་སྐྲ་ཁམ་ནག་གྱེན་དུ་བརྫེས། །ཕྱག་བཞིས་ཙིཏྟ་བྷཉྫ་དང་། །རལ་གྲི་དང་ནི་ཁ་ཊྭཱཾ་འཛིན། །ཐོད་སྐམ་དབུ་བརྒྱན་ཐོད་རློན་གྱི། །དོ་ཤལ་སྦྲུལ་གྱི་ཆུན་པོས་བརྒྱན། །གླང་ཆེན་ཞིང་གི་སྟོད་གཡོགས་དང་། །སྟག་གི་པགས་པའི་ཤམ་ཐབས་ཅན། །སྣ་ཚོགས་དར་དང་རུས་པས་བརྒྱན། །ཞབས་གཉིས་ཕྱེད་སྐྱིལ་རོལ་
སྟབས་ཀྱིས། །བཞུགས་པའི་པང་དུ་གསང་བའི་ཡུམ། །ཙཎྜི་ནག་མོ་ཕྱག་གཉིས་ཀྱིས། །གྲི་ཐོད་འཛིན་པས་ཡབ་ལ་འཁྱུད། །འཇིགས་གཟུགས་རུས་པའི་རྒྱན་གྱིས་བརྒྱན། །གཉིས་ཀ་མེ་དཔུང་འབར་བའི་ཀློང་། །འཇིགས་པའི་ཞལ་བགྲད་ཧ་ཧ་དང་། །ཧཱུྃ་ཧཱུྃ་ཕཊ་ཅེས་འབྲུག་སྒྲ་ལྟར། །སྒྲོག་ཅིང་བཞུགས་པའི་སྐུ་ཡིས་ནི། ཁམས་གསུམ་མ་ལུས་ཁྱབ་པར་བཞུགས། །འཁོར་དུ་དམ་ཅན་དྲེགས་པའི་ཚོགས། །གྲངས་མེད་སྤྲིན་གཏིབས་ལྟ་བུར་གྱུར། །ཡབ་ཡུམ་ཐུགས་ཀར་པད་ཉིའི་སྟེང་། །མཐིང་ནག་ཧཱུྃ་དང་སྨུག་ནག་མ། །གནས་པའི་འོད་ཀྱིས་ཡེ་ཤེས་པ། །སྤྱན་དྲངས་བཛྲ་ས་མཱ་ཛཿ ཛཿཧཱུྃ་བཾ་ཧོཿགཉིས་མེད་གྱུར། །ཐུགས་ཀའི་ཧཱུྃ་མཐར་གསང་སྔགས་ཀྱི། །ཕྲེང་བས་གཡས་སུ་བསྐོར་བ་ལས། །སྔགས་ཀྱི་འོད་ཟེར་ཞལ་ནས་འཐོན། །ཡུམ་གྱི་ཞལ་ཞུགས་སྐུའི་དབྱིབས་བརྒྱུད། །བདེ་བའི་ངར་བཅས་མཁའ་གསང་ལས། །ནོར་བུར་ཞུགས་ཏེ་འགལ་མེ་ལྟར། །ཡོངས་སུ་འཁོར་བ་ཉིད་དུ་གྱུར། །ཨོཾ་མ་ཧཱ་ཀཱ་ལ་ཨེ་ཀ་ཛཱ་ཊི་མ་མ་ཧཱུྃ་ཧཱུྃ། ཞེས་བཟླ་ཐུན་མཚམས་སྣོད་བཅུད་ཀུན། །འོད་ཞུ་རང་དང་དེ་ཉིད་ཀྱང་། །ཐུགས་ཀའི་ཧཱུྃ་བསྟིམ་ནཱ་དའི་བར། །བསྡུས་ནས་མི་དམིགས་དབྱིངས་སུ་བཞག །
སླར་ཡང་མགོན་པོའི་སྐུར་ལངས་ནས། །དགེ་བ་འདི་ཡིས་མྱུར་དུ་བདག །ཡེ་ཤེས་མགོན་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་པའི་སྨོན་ལམ་ཡང་དག་གདབ། །རེས་འགའ་རྩ་བའི་བཟླས་པ་ཉིད། །སོང་རྗེས་ཐུགས་ཀའི་ཧཱུྃ་ཡིག་གི །དབུས་སུ་རང་སེམས་ཡི་དམ་ལྷ། །གཡས་གཡོན་མདུན་རྒྱབ་རྣམས་སུ་ནི། །བསྲུང་བྱ་མཐའ་དག་གནས་པར་བསམ། །སྔགས་ཕྲེང་སྐུ་ལས་ཡེ་ཤེས་ཀྱི། །འོད་ཟེར་བསྐལ་མེ་ལྟར་དྲག་པ། །འབར་ཞིང་འཚུབས་པས་གནོད་བྱེད་ཀུན། །བསྲེགས་བཅོམ་ཕྱི་རོལ་མི་ཤིགས་པ། །རྡོ་རྗེའི་གུར་གྱིས་བཅིངས་པར་བསམ། གོང་གི་རྩ་བའི་སྔགས་ཉིད་དང་། ཨོཾ་མ་ཧཱ་ཀཱ་ལ་ཨེ་ཀ་ཛཱ་ཊི་གུ་ཎ་ཧྲྀ་ད་ཧཱུྃ་ཕཊ། ཅེས་པ་གཉིས་ཀྱི་སྔགས་གཤམ་དུ། མ་མ་ཀཱ་བཱ་ཙི་རཀྵ་རཀྵ་ཧཱུྃ་ཕཊ། ཅེས་པ་བཏགས་ནས་བརྒྱ་རྩ་འམ། །ཉེར་གཅིག་ཙམ་བཟླ་སྲུང་བའི་མཆོག །སྤྱིར་ན་གོང་གི་རྩ་བའི་སྔགས། །འབུམ་ཚོ་གསུམ་གྱི་གྲངས་ཚད་ཡིན། །རྒྱུན་དུ་རྩ་སྔགས་སྟོང་བཟླས་ན། །སྲུང་སྔགས་བཏགས་པ་བརྒྱ་རྩ་གཅིག །རྩ་སྔགས་བརྒྱ་ལ་སྲུང་བའི་སྔགས། །ཉེར་གཅིག་ཙམ་རེ་བཟླས་པའི་མཐར། །ཉེར་བསྡུ་བྱས་ནས་ཐུན་མཚམས་ལྷར། །ལངས་རྗེས་གཏོར་འབུལ་བསྟོད་པ་སོགས། །རྒྱས་བསྡུས་སྐབས་དང་སྦྱར་བ་ཡིས། །
ཐུན་མཚམས་བྱ་བ་འགྲུབ་པ་ཡིན། །ཞེས་དད་ལྡན་ངག་དབང་དར་རྒྱས་ཀྱིས་བསྐུལ་ངོར་གཏེར་གཞུང་རྩ་བའི་དགོངས་པ་མན་ངག་གིས་བརྒྱན་ཏེ་འགྱུར་མེད་རྡོ་རྗེས་སྨྲས་པའི་ཡི་གེ་པ་ནི་རྣམ་གྲོལ་ལོ།། །།