བོན་རྩིས་ཕྲ་མེན་སྐོར་རྣམས་ལས་དབང་དྲག་འབར་བའི་སྒྲུབ་ཐབས། མཆོག་གྱུར་གླིང་པ།
བོན་རྩིས་ཕྲ་མེན་སྐོར་རྣམས་ལས༔ དབང་དྲག་འབར་བའི་སྒྲུབ་ཐབས་བཞུགས༔
བོན་སྲས་དབང་དྲག་འབར་ལ་འདུད༔ དེ་ཉིད་སྒྲུབ་པའི་གང་ཟག་གིས༔ སྦྱོར་དངོས་རྗེས་ཀྱིས་ཉམས་སུ་བླང༔ དང་པོ་སྐྱབས་ཡུལ་མདུན་དུ་བསྒོམ༔ ངེས་འབྱུང་བསམ་པ་བརྟན་པོ་ཡིས༔ ཧོ༔ བླ་ན་མེད་པའི་སྐྱབས་རྣམས་ལ༔ བདག་སོགས་འགྲོ་ཀུན་སྐྱབས་སུ་མཆི༔ མི་འགྱུར་གཡུང་དྲུང་ས་ཐོབ་ནས༔ འགྲོ་ཀུན་སྒྲོལ་བར་སེམས་བསྐྱེད་དོ༔ གཉིས་པ་བསྐྱེད་རྫོགས་དོན་ལ་འཇུག༔ བོན་ཉིད་མཐའ་བྲལ་སྙིང་རྗེའི་ཚུལ༔ ཧཱུྃ་ཡིག་མཐིང་གའི་འཕྲོ་འདུ་ལས༔ སྣང་སྲིད་ཁྲོ་བོ་འབར་བའི་ཞིང༔ གནམ་ལྕགས་འཁོར་ལོ་རྩིབས་བཅུའི་དབུས༔ པདྨ་ཉི་སྟེང་མེ་ཡི་ཀློང༔ བོན་སྲས་དབང་དྲག་འབར་བའི་སྐུ༔ མཐིང་ནག་རབ་འཇིགས་ཁྲོ་གཏུམ་ཚུལ༔ བེར་ཆེན་ཕྱི་ནང་དུར་ཁྲོད་ཆས༔ རྡོ་རྗེ་དང་ནི་ཕུར་པ་འཛིན༔ སྟག་མོ་གྲུས་མའི་སྟེང་ན་འགྱིང༔ ཁྲོ་བོ་ཁྲོ་མོ་འབུམ་གྱིས་བསྐོར༔ རྡོ་རྗེ་གསུམ་གྱི་ཡི་གེ་ལས༔ འོད་འཕྲོས་རྔ་ཡབ་གླིང་མཆོག་ནས༔ རིག་འཛིན་ཚོགས་རྣམས་སྤྱན་དྲངས་བསམ༔ ཧཱུྃ༔ མ་རུངས་གདུག་པ་འདུལ་བའི་ཕྱིར༔ དབྱིངས་ཀྱི་ཁྲོ་རྒྱལ་འཁོར་དང་བཅས༔ གནས་འདིར་སྤྱན་འདྲེན་གཤེགས་སུ་གསོལ༔ བྱིན་རླབས་དབང་དང་དངོས་གྲུབ་སྩོལ༔ ཧྲིཾ་ཧྲིཾ་ཕེཾ་ཕེཾ་ཛ་ཛ༔ ཧྲཱི༔ པདྨ་ཉི་མའི་གདན་སྟེངས་སུ༔ དགྱེས་ཤིང་བརྟན་པར་བཞུགས་སུ་གསོལ༔ བོན་སྲས་དབང་དྲག་འབར་བ་ལ༔ རང་བཞིན་རྣམ་དག་
མཇལ་ཕྱག་འཚལ༔ ས་མ་ཡ་ཏིཥྛ་ལྷན༔ ཨ་ཏི་པཱུ་ཧོ༔ པྲ་ཏཱིཙྪ་ཧོ༔ ཧཱུྃ༔ འདོད་པའི་ཡོན་ཏན་ལྔ་ཡི་སྤྲིན༔ སྨན་རག་གཏོར་མའི་མཆོད་པ་དང༔ སྦྱོར་སྒྲོལ་གསང་བའི་མཆོད་པ་རྣམས༔ རིག་འཛིན་བླ་མའི་ཚོགས་ལ་འབུལ༔ ཨོཾ་མ་ཧཱ་པཱུ་ཛ་པྲ་ཏི་ཛ་ཧོ༔ བསྭོ༔ ཡེ་ནས་རྣམ་དག་ངང་ཉིད་ལས༔ བདེ་ཆེན་གཡུང་དྲུང་འདུ་འབྲལ་མེད༔ བོན་སྲས་འབར་བའི་སྐུར་སྟོན་པ༔ ཁྲོ་བོའི་རྒྱལ་ལ་ཕྱག་འཚལ་བསྟོད༔ དེ་ནས་བཟླས་པའི་རིམ་པ་ནི༔ ཐུགས་ཀར་ཉི་མ་འབར་བའི་དབུས༔ འགྱུར་མེད་གཡུང་དྲུང་ཡིག་འབྲུ་ལ༔ མེ་ཡི་ཚྭ་ཚྭ་འཕྲོ་བ་ཡིས༔ ནད་གདོན་སྡིག་སྒྲིབ་དམིགས་མེད་སྦྱངས༔ རིག་འཛིན་བླ་མའི་བྱིན་རླབས་རྣམས༔ ཚུར་འདུས་བདག་ཐིམ་གཟི་བྱིན་འབར༔ སྣང་སྲིད་སྐུ་གསུང་ཐུགས་ཀྱི་ངང༔ གཡུང་དྲུང་ཐིག་ལེའི་ངང་དུ་རྫོགས༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ འབྲུ་གཅིག་ལྔ་སྦྲེལ་རླུང་དང་སྦྱར༔ མཐར་ནི་སྣང་སྲིད་རང་ལ་འདུས༔ དེ་ཉིད་ཐུགས་ཀྱི་གཡུང་དྲུང་ལ༔ ཐིམ་ནས་སྐྱེ་མེད་ངང་ལ་བཞག༔ རྗེས་སུ་སྨོན་ལམ་གདབ་པ་ནི༔ ཧོ༔ བླ་མེད་བོན་འདི་བསྒྲུབས་པའི་མཐུས༔ འགྲོ་བ་ཆོས་སྐུའི་སར་འགོད་ཤོག༔ འགྱུར་མེད་གཡུང་དྲུང་སྐུ་གསུང་ཐུགས༔ མྱུར་དུ་འགྲུབ་པའི་བཀྲ་ཤིས་ཤོག༔ དེ་ལྟར་གུ་རུ་པདྨ་ཡིས༔ བཻ་རོ་ཙ་ན་བདག་ལ་བསྩལ༔ རིན་ཆེན་གཏེར་དུ་སྦས་པ་འདི༔ ལས་འཕྲོ་ཅན་དང་འཕྲད་
པར་ཤོག༔ ས་མ་ཡ་རྒྱ༔ འབུར་མོ་བྲག་ནས་མཆོག་གྱུར་གླིང་པས་བཏོན་པའོ།། ༔ བོན་སྲས་དབང་དྲག་འབར་ལ་འདུད༔ དེ་ཉིད་སྒྲུབ་པའི་གང་ཟག་དེས༔ དང་པོ་དབང་གིས་སྨིན་པར་བྱ༔ གཏོར་མ་བྲིས་སྐུ་ལྷ་རུ་བསྒོམ༔ སློབ་མ་སྡིག་དང་སྒྲིབ་སྦྱངས་ནས༔ ལྷ་རུ་བསྒོམས་ནས་བྱིན་ཆེན་འབེབ༔ གཏོར་མའི་ལྷ་ནི་སློབ་མར་བསྟིམ༔ ཧཱུྃ༔ བོན་སྲས་དབང་དྲག་འབར་བའི་ཚོགས༔ བོན་ཉིད་དབྱིངས་ནས་སྐུར་བཞེངས་ལ༔ སྐལ་ལྡན་སློབ་མའི་ཚོགས་རྣམས་ལ༔ བདེ་ཆེན་འགྱུར་མེད་གཡུང་དྲུང་ནས༔ སྐུ་གསུང་ཐུགས་ཀྱི་དབང་མཆོག་སྩོལ༔ སྒོ་གསུམ་སྨིན་ཅིང་གྲོལ་བར་མཛོད༔ ཁྱེད་དང་དབྱེར་མེད་བྱིན་གྱིས་རློབས༔ ཧཱུྃ་གི་གླུ་བླངས་དབྱེར་མེད་བསྲེས༔ རྗེས་ཀྱི་བྱ་བ་སྤྱི་ལྟར་སྤྱད༔ ས་མ་ཡ་རྒྱ༔ འབུར་མོ་བྲག་ནས་མཆོག་གྱུར་གླིང་པས་སྤྱན་དྲངས་པའོ།། །།