དམ་ཅན་ཞིང་སྐྱོང་གཉིས་ཀྱི་སྒྲུབ་པའི་སྒབ་འདྲེ་མནན་པའི་མན་ངག །རཱ་ག་ཨ་སྱ།
དམ་ཅན་ཞིང་སྐྱོང་གཉིས་ཀྱི་སྒྲུབ་པའི་སྒབ་འདྲེ་མནན་པའི་མན་ངག་བཞུགས་སོ། །ན་མཿཤྲཱི་པྲ་བྷ་མ་ཧཱ་ཀཱ་ལ་ཡ། འདིར་ནི་ཡང་དག་བཤད་བྱ་བ། །སློབ་དཔོན་ནུས་པ་ལྡན་པ་ཡིས། །སྒབ་འདྲེ་ལེགས་པར་མནན་པ་ན། །སློབ་བརྒྱུད་མི་རབས་བཅུ་གསུམ་མམ། །བདུན་ནམ་ཐ་མའང་གསུམ་གྱི་བར། །མ་མནན་ན་ཡང་སྐྱོན་མེད་ཟེར། ཁོ་བོས་ལན་གསུམ་མནན་ན་ཡང་། །མནན་པ་གྲུབ་ན་བཀྲ་ཤིས་དགེ། མནན་ཚུལ་རྒྱས་བསྡུས་མང་ན་ཡང་། །སྒྲུབ་པ་རྟགས་ཐོན་དགོས་ཕྱིར་དཀའ། །སྒྲུབ་མི་དགོས་པར་མནན་ཆོག་པ། །མ་ཧཱ་བ་ལ་འདི་ཉིད་ཟབ། །དེ་ལས་གསར་རྙིང་རིགས་མང་ཡང་། །གནམ་ཆོས་འདི་ཉིད་ཟབ་ཅིང་རྣོ། །ཞིང་སྐྱོང་དམ་ཅན་གཉིས་ཀ་ཡི། །སྒྲུབ་པའི་བར་ཆད་སྒབ་འདྲེ་ནི། །ཤོག་བུར་སྣག་ཚ་གཙང་མ་ཡིས། །ལིངྒ་གཅིག་ལ་མགོ་གསུམ་པ། །དབུས་མི་གཡས་བྱ་གཡོན་སྤྲེའུ། །ལག་པ་མི་ལ་རྐང་པ་བྱ། །སྤྲེའུའི་མཇུག་མ་ཡོད་པ་བྲི། །སྙིང་ག་ཛཿགཉིས་ཁ་སྤྲོད་བར། །ཏྲི་ཡིག་གསུམ་ནི་བརྩེགས་མར་བྲི། །དེ་མཐར་ཡིག་མགོ་ཕྱིར་བསྟན་ལ། །སྒྲུབ་པ་ལ་བར་དུ་གཅོད་པར་བྱེད་པ་སྒབ་འདྲེ་ལག་རིང་། བཙན་ཡམ་ཤུད་དམར་པོ། འབྱུང་པོ་ཐེའུ་རང་སྟོང་འཁྲུག་གསུམ་ཁུག་ཅིག །མཱ་ར་ཡ་ཛཿཛཿརྦད་ནན། ཅེས་བྲི།
སྤྱི་བོར་ནན་དང་རྐང་ཞབས་ཡཾ། །ཡན་ལག་ཛཿཧཱུྃ་བཾ་ཧོཿབྲི། །ཐ་མར་ཛཿདང་ཁྲམ་གྱིས་བསྐོར། །དེ་ལ་འགུགས་གཞུག་བརྒྱ་རྩ་བྱ། །མ་ཧཱ་བ་ལའི་སྐུ་གཟུགས་ནི། །གནམ་ཆོས་བཞིན་དུ་བྲིས་པ་ལ། །བསྐྱེད་བསྟིམ་རང་སྔགས་བརྒྱ་རྩ་བཟླ། །རོ་གཡམ་རྡོ་རྗེ་རྒྱ་གྲམ་དང་། །རི་རབ་གླིང་བཞི་བཅས་པ་བྲི། །མཆོད་རྟེན་འོག་གམ་ལམ་རྒྱ་གྲམ། །ལྷ་ཁང་ངམ་ནི་སྒྲུབ་ཁང་གི །ཐེམ་འོག་གྲུ་གསུམ་དོང་བྲུས་ལ། །དམ་སྲི་ལིངྒ་མགོ་ཕྱིར་བསྟན། །གན་རྐྱལ་མནན་ནས་འགུགས་གཞུག་བྱ། །དེ་སྟེང་མ་ཧཱ་བ་ལ་བཞག །ས་ཁོད་རེ་ལ་རྒྱ་གྲམ་རེ། །དགུ་བྲི་རོ་གཡམ་རྒྱ་གྲམ་མནན། །དེ་སྟེང་མེ་ཁྲོལ་ཆུ་ཐིགས་བླུག །ལེགས་པར་བཅགས་ལ་མི་མངོན་བྱ། །དེ་སྟེང་རྟ་བྲོ་གང་རུང་བརྡུང་། །རྐང་པ་གཡོན་པས་རྒྱ་གྲམ་མནན། །དེ་ལྟར་བྱ་བ་གལ་ཆེ་ཞིང་། །ལོ་འགའ་སོང་ནས་བསྐྱར་ཡང་ལེགས། །དེ་སྐད་རཱ་ག་ཨ་སྱས་སྨྲས།། །།