གསང་མཚན་ཐུགས་ཀྱི་སྒྲུབ་པ་ལས་མིག་ནད་སྲུང་ཐབས། འབྲོག་པ་ཐུབ་རྒྱལ།
གསང་མཚན་ཐུགས་ཀྱི་སྒྲུབ་པ་ལས༔ མིག་ནད་སྲུང་ཐབས་བཞུགས་སོ༔ སློབ་དཔོན་པདྨ་འབྱུང་གནས་རྒྱལ་པོ་རྗེ་འབངས་བཅས་པ་མང་ཡུལ་བྱེ་མ་ལ་ཐོག་ཏུ་བཞུགས་པ་ལ༔ ལྷ་སྲས་མུ་ཁྲི་བཙན་པོས་ཞུས་པ༔ བདག་བུ་འབངས་རྣམས་ལ་རླུང་མཁྲིས་བད་ཀན་གསུམ་དང༔ ལས་ཀྱི་རྣམ་པར་སྨིན་པ་མ་ཡིན་པའི་ཆུ་བུར་གྱི་མིག་ལ་ནད་སྲུང་བའི་ཐབས་ཁྱད་པར་ཅན་གནང་བར་འཚལ་ཅེས་ཞུས་པས༔ མ་ཧཱ་གུ་རུས་བཀའ་བསྩལ་པ༔ ཕྱི་ཡི་སྲུང་བ་ནི༔ ཐབ་དང་གྲིབ་ལ་འཛེམ༔ རྫས་དང་སྔགས་ཀྱི་སྲུང་བ་འདི་ལྟ་སྟེ༔ གྲོ་གའམ༔ ཤོག་བུ་ལ་སྔགས་ཕྲེང་གཅིག་ཏུ་བྲིས་ལ༔ གུར་གུམ་གླ་བས་སེར་ནག་བྱ༔ ཨ་རུ་གསེར་མདོག་དང༔ གླ་བ་གཉིས་རིལ་མ་ཕྱེད་ཐུམ་པོ་བྱས་ལ༔ སྔགས་འཁོར་གསེབ་ཏུ་གཞུག༔ ལྟོ་སྟོང་ལ་མིག་ལ་བྱུག་ཅིང་སྣ་སྒོར་བསྣོམ༔ སྔགས་ནི་འདི་ལྟ་སྟེ༔ ཙཀྵུཿཤོ་དྷ་བར་ཏི་པྲ་བེ་ཤ་ཕཊ༔ ཨོཾ་ཨ་རུ་ན་ཧཱུྃ་སྭཱ་ཧཱ༔ འཆང་བ་པོ་ལ་མིག་ནད་འགོ་རིམས་ཐམས་ཅད་སྲུངས་ཤིག་རཀྵ༔ ལག་ལེན་ཞལ་ལས་ཤེས༔ ཟབ་ས་མ་ཡཱ༔ རྒྱ་རྒྱ་རྒྱ༔ ༈ མཐིང་ཤོག་ལ་སེར་གྱིས་བྲིས་པར་བལྟས་པས་མིག་ཤོག་དུག་གིས་ཕྱིད་པ་ལ་ཕན་པ་འབྲོག་པ་ཐུབ་རྒྱལ་གཏེར་མའོ། །ཤིང་ལ་བྲིས་ཟེར་གཡས་སུ་བཞག་ལ་ཡང་ཡང་བལྟའོ། །