རྗེ་བཙུན་སྒྲོལ་མ་ལ་བསྟེན་པའི་དགྲ་ཇག་འཆིང་བའི་མན་ངག་གི་ལག་ལེན། བརྩོན་འགྲུས་གྲགས་པ།
རྗེ་བཙུན་སྒྲོལ་མ་ལ་བསྟེན་པའི་དགྲ་ཇག་འཆིང་བའི་མན་ངག་གི་ལག་ལེན་བཞུགས་སོ། །
ཨོཾ་སྭསྟི་སིདྡྷཾ། འདིའི་ལོ་རྒྱུས་རྣམས་ནི་གཞན་དུ་གསལ། འདིའི་ལག་ལེན་གྱི་བྱ་ཐབས་ལ། ཐོག་མར་ཤོག་བུ་ལིངྒ་དཔེ་ཆུང་ལྟར་བྲིས་ལ་ར་ཡི་རྭ་རྩེ་མ་ཉམས་པ་ཞིག་འདུ་བྱས་ཏེ། ཨོཾ་སྭཱ་བྷཱ་ཝ་ཤུདྡྷ་སརྦ་དྷརྨཱ་སྭཱ་བྷཱ་ཝ་ཤུདྡྷོ྅་ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་མདུན་དུ་ར་རུ་དེ་ཉིད་གནམ་ལྕགས་ཀྱི་ཁང་སྒྲོམ་སྒོ་མེད་མུན་པའི་གླིང་ནག་ལ་གཏིང་ཟབ་པ་ཞིག་ཏུ་གྱུར། དེའི་ནང་དུ་གནོད་བྱེད་ཐམས་ཅད་གན་རྐྱལ་དུ་གནས་པར་གྱུར། ཅེས་བསམ་ཞིང་ངག་ཏུའང་བརྗོད་དེ། རང་ཉིད་ཡི་དམ་སྒྲོལ་མར་བསྐྱེད་པའི་ཐུགས་ཀ་ནས་འོད་ཟེར་ཛཿལྕགས་ཀྱུའི་དབྱིབས་ཅན་ཞིག་འཕྲོས་པས་གནོད་བྱེད་ཐམས་ཅད་བཀུག་ནས་ལིང་ག་ལ་ཐིམ་པར་གྱུར། ཅེས་བརྗོད་ཅིང་ཡིད་ལའང་བསམ། དེ་ནས། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བདེན་པ་དང་། སངས་རྒྱས་ཀྱི་བདེན་པ༴ ཆོས་ཀྱི་བདེན་པ༴ དགེ་འདུན་གྱི་བདེན་པ༴ གསང་སྔགས་དང་། རིག་སྔགས་དང་། གཟུངས་སྔགས་དང་། སྙིང་པོ་དང་ཕྱག་རྒྱ་ཏིང་ངེ་འཛིན་གྱི་བདེན་པ་དང་། བཅོམ་ལྡན་འདས་མ་སྒྲོལ་མའི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས་བདག་ལ་སྡང་བའི་སེམས་དང་ལྡན་པ་རྣམས་སྐད་ཅིག་གིས་ལིང་ག་འདི་
ལ་ཐིམ་པར་གྱུར་ཅིག །ཅེས་པ་ལན་གསུམ་བརྗོད། དེ་ནས། བཛྲ་ཨཾ་ཀུ་ཤ་ཛཿ བཛྲ་པཱ་ཤ་ཧཱུྃ། བཛྲ་སྥོ་ཊ་བཾ། བཛྲ་གྷཎྜེ་ཧོཿ ཛཿཧཱུྃ་བཾ་ཧོཿ བཛྲ་ཨ་ཤགས་མ་ཡ་ཕྱེ་ཕྱེ། བཛྲ་ ཤག་ཕྱེ་ཕྱེ། བདག་ལ་གནོད་པར་བྱེད་པའི་དགྲ་བོ་འདི་རྣམས་འགོ་བར་བྱེད་པའི་ལྷ་དང་ཕྱེ་ཕྱེ། ཞེས་དགུག་གཞུག་ལྷ་དབྱེ་རྣམས་ངག་ཏུའང་བརྗོད་ཅིང་ཡིད་ལའང་བསམ་མོ། །དེ་ནས་ལིངྒའི་ལྟོ་བར་གྲི་རུས་བཅུག་ལ་ལྟེབ་སྟེ་མགོ་མཇུག་ལྡོག་པ་ར་རུ་དེའི་མཐིལ་དུ་བཅུག་ལ་གནོད་བྱེད་ཐམས་ཅད་དངོས་སུ་བྲུབ་པར་བསམ་མོ། །དེའི་སྟེང་དུ་རེ་བ་ནག་པོས་བཅད་ལ་མུན་ནག་གི་གུར་ཁང་རླུང་ནག་གི་རྡོ་རྗེ་རྒྱ་གྲམ་གྱིས་མནན་པར་བསམ་མོ། །དེའི་སྟེང་དུ་ཉུངས་དཀར་ཉི་ཤུ་རྩ་གཅིག་བཙུག་ལ་འཕགས་པ་འཇམ་དཔལ་གྱི་སྤྲུལ་པ་གསེར་གྱི་སེང་གེ་ཉི་ཤུ་རྩ་གཅིག་གིས་དགྲ་བོའི་ལུས་མནན་པར་བསམ་ལ་སྔགས་བཟླ་འོ། །དེའི་སྟེང་དུ་རེ་བ་ནག་པོས་བཅད་ལ་མུན་པའི་གུར་ཁང་རླུང་ནག་རྡོ་རྗེ་རྒྱ་གྲམ་གྱིས་མནན་པར་བསམ་མོ། །དེའི་སྟེང་དུ་རྡེའུ་དཀར་པོ་ཉི་ཤུ་རྩ་གཅིག་སྤྱན་རས་གཟིགས་ཀྱི་སྤྲུལ་པ་དུང་གི་གླང་པོ་ཆེ་ཉི་ཤུ་རྩ་གཅིག་གིས་དགྲ་བོའི་ངག་མནན་པར་བསམ་ལ་སྔགས་བཟླ་འོ། །དེའི་སྟེང་དུ་རེ་བ་ནག་པོས་བཅད་ལ་
མུན་ནག་གི་གུར་ཁང་རླུང་ནག་རྡོ་རྗེ་རྒྱ་གྲམ་གྱིས་མནན་པར་བསམ་མོ། །དེའི་སྟེང་དུ་རྡེའུ་ནག་པོ་ཉི་ཤུ་རྩ་གཅིག་བཅུག་ལ་ཕྱག་ན་རྡོ་རྗེའི་སྤྲུལ་པ་ལྕགས་ཀྱི་སྤྱང་མོ་ཉི་ཤུ་རྩ་གཅིག་གིས་དགྲ་བོའི་ཡིད་མནན་པར་བསམ་ལ་སྔགས་བཟླ་འོ། །དེའི་སྟེང་དུ་རེ་བ་ནག་པོས་བཅད་ལ་སྔར་བཞིན་དུ་བསམ་མོ། །དེའི་སྟེང་དུ་སཱཙྪ་རབ་གནས་ཅན་གཅིག་གི་ནང་དུ་མིང་རུས་མི་གཅིག་པ་མང་དུ་བྲིས་ཏེ་བཅུག་ལ་མནན། སུཾ་ལས་རི་ཡི་རྒྱལ་པོ་རི་བོ་མཆོག་རབ་ཏུ་གྱུར་པར་བསམ། དེ་ནས་ཁ་ལ་ཆས་བཅད་ཅིང་ཏཱཾ་ཡིག་གིས་མཚན་པས་རྒྱས་བཏབ་ནས་ཏཱཾ་ཡིག་དེ་ཉིད་རྗེ་བཙུན་སྒྲོལ་མར་བསྐྱེད་དོ། །དེ་ནས་ཐི་གུ་ནག་པོ་ཕྱི་བསྒྲིལ་དུ་བཀལ་བ་ལ་སྔགས་ཉི་ཤུ་རྩ་གཅིག་བཏབ་ལ་དེ་ཉིད་ཀྱིས་ར་རུ་དེ་ཀ་བ་ལ་བཅིངས་ནས་བསྐོར་བ་གཡོན་སྐོར་དུ་བྱེད་ཅིང་སྔགས་ཉི་ཤུ་རྩ་གཅིག་ཚན་གསུམ་ལ་སོགས་པ་མང་དུ་བཟླའོ། །ཆོས་བསྐོར་དུ་ལན་རེ་བྱས་ཀྱང་རྫས་རྣམས་དོན་མེད་དུ་འགྱུར་རོ། །བསྐོར་བ་ཉི་ཤུ་རྩ་གཅིག་རེ་དང་སྔགས་ཉི་ཤུ་རྩ་གཅིག་བྱའོ། །དེ་ལྟར་བྱས་པས་དགྲ་ཇག་ཆོམ་རྐུན་རྣམས་རེངས་པར་འགྱུར་རོ། །བསམ་ངན་བྱེད་མི་རྣམས་ཀྱང་བསམ་ངན་འགྱུར་ཏེ་རང་ཉིད་ལ་འདུན་པར་འགྱུར་རོ། །བསྐོར་བ་ཉི་ཤུ་རྩ་གཅིག་རེ་སྔགས་ཉི་ཤུ་རྩ་གཅིག་རེ་བྱའོ། །གོང་བསྙེན་ཅི་མང་བྱ་བ་གལ་ཆེའོ། །སྔགས་ནི་འདིའོ། །ཀ་ཤ་ཀ་ཤ །དྲག་ཐལ་
དྲག་ཐལ། སྙིང་ལ་ཆོད་ཆོད།་་་སྙིང་ཆོད་སྙིང་ཆོད་ཟེར་བའང་གདའ། མཆན། ཡ་ཡ་ཙེ་ཙེ་ནན་ནན། རྦད་རྦད། ཁ་ལ་རཀྴ་རྦད། སྙིང་ལ་རཀྴ་རྦད། རུས་པ་ལ་རཀྴ་རྦད། རྩ་ལ་རཀྴ་རྦད། ཤ་ལ་རཀྴ་རྦད། ཁྲག་ལ་རཀྴ་རྦད། གཟུགས་ཕུང་ལ་རཀྴ་རྦད། དྲན་རིག་ལ་རཀྴ་རྦད། ལུས་ངག་ཡིད་གསུམ་ཆིངས་ཤིག་སཏྭཾ་བྷ་ཡ་ནན། གནོད་བྱེད་དགྲ་ཇག་གི་ལུས་ངག་ཡིད་གསུམ་ཆིངས་ནན་རེངས་རྨུགས་ཐིབས།་་་འདིའི་སྔགས་ཀྱི་དངོས་གཞི་དྲན་རིག་ལ་རཀྴ་རྦད་ནན་ཡན་ཡིན་པས་དཔེ་ཐམས་ཅད་མཐུན་པར་སྣང་། དེ་མན་སྤེལ་ཚིག་དང་འདི་ལ་རྒྱས་བསྡུས་དང་འདྲ་མིན་ཅི་རིགས་སྣང་ངོ་། །མཆན། ཞེས་པ་ཅི་མང་བཟླས་ནས་ཐུན་འཇོག་ཁར། བདག་ལ་ཉི་མ་ཕྱོགས་བཞི་མཚམས་བརྒྱད་ནས་དགྲ་ཇག་ཆོམ་རྐུན་ཆས་པ་ཐམས་ཅད་ཀྱི་ལུས་ངག་ཡིད་གསུམ་ཆིངས་ཤིག །འུ་ཆུ་ཁམས་པ། ཤང་ལྕགས་ཁམས་པ། ཀུང་ས་ཁམས་པ། ཀེག་ཤིང་ཁམས་པ། ཇི་མེ་ཁམས་པ་ལ་སོགས་རུས་ཆེན་ལྔ་ཡི་རྐུན་མ་དང་ཇག་པ་ཐམས་ཅད་ཆིངས་ཤིག །ཉི་མ། ཟླ་བ། མིག་དམར། ལྷག་པ། ཕུར་བུ། པ་སངས། སྤེན་པ། སྒྲ་གཅན་ཏེ། དྲང་སྲོང་གཟའ་བརྒྱད་ལ་སྐྱེས་པའི་
རྐུན་མ་དང་ཇག་པ་ཐམས་ཅད་ཆིངས་ཤིག །ལོ་བྱི་བ། གླང་། སྟག །ཡོས། འབྲུག །སྦྲུལ། རྟ། ལུག །སྤྲེའུ། བྱ། ཁྱི། ཕག་སྟེ་ལོ་སྐོར་བཅུ་གཉིས་ལ་སྐྱེས་པའི་རྐུན་མ་དང་ཇག་པ་ཐམས་ཅད་ཆིངས་ཤིག །ལོ་ཟླ་བ་ཞག་དུས་ཚོད་ཚེས་གྲངས་ཀྱི་སྟེང་དུ་དགྲ་ཇག་དང་ཆོམ་རྐུན་ཆས་པ་ཐམས་ཅད་ཆིངས་ཤིག །ཅེས་སོགས་དང་། གཞན་ཡང་བདེན་ཚིག་བརྗོད་པ་དང་། བདེན་པ་བརྡར་བ་སྨོན་ཚིག་སོགས་གང་ཤེས་བྱས་ལ་ཀ་བ་ལ་འཆིངས་མ་ཚར་བར་གྱི་ལག་ལེན་གོང་དུ་བཤད་པ་རྣམས་མ་འཆུགས་པར་གལ་ཆེའོ། །ཟབ་ཨྠྀི། གདམས་པ་འདི་སྡེ་པ་ཡུག་ནས་ཕྱག་ལེན་གནང་བཞིན་པའོ།། ༈ །།ཏཱ་རཱ་ན་མ༔ ཇག་པ་མགོ་འཁོར་གྱི་གདམས་པ་ནི། བག་ཕྱེའི་གླུད་སོར་བཞི་པ་གཅིག་བཅོས་ལ་མི་གང་ཡོད་ཀྱི་གྲངས་གླུད་དེའི་བརླ་གཡས་ལ་རི་མོ་རྒྱགས། གཅིག་རང་ཡིན་ན་རི་མོ་མི་དགོས། ཡང་མང་པོ་ཡོད་ཅིང་གྲངས་མི་ཐེབས་ན་ཚོད་ཙམ་གྱི་རི་མོས་ཆོག་ཅིང་། རབ་ཏུ་དགོས་ཆ་དེ་ཁའི་ཁ་ཕོར་རྙེད་ན་རབ། མ་རྙེད་ན་ཕོར་པ་ཆེ་བ་ཞིག་ཁ་སྦུབས་པའི་འོག་ཏུ་གླུད་དེ་གན་རྐྱལ་དུ་བཞག་ལ། སྔགས་ནི་གླུད་ལ་འདེབས་མི་དགོས་ཀྱི། རང་དེ་
ཁའི་གཞོགས་སུ་བསྡད་ལ་རབ་ཁྲི། འབྲིང་སྟོང་ཕྲག་གསུམ་བཞི། ཐ་མ་ཡང་སྟོང་ཕྲག་གཅིག་ཙམ་བགྲང་ཞིང་། དམིགས་པ་ནི། ཁོ་རང་དངོས་ལྕགས་ཁང་དུ་ཚུད་དེ་འགྲོ་ས་གང་ཡང་མེད་པར་བསམ་མོ། །སྔགས་ནི། ཨོཾ་ཁུ་མི་ཁུ་མི་ཐིབ་སྭཱ་ཧཱ། ཞེས་པའོ། །དེ་ལྟར་བྱས་པས་གང་དུ་ཡང་མི་ཐར་བར་འགྱུར་རོ། །ཤིན་ཏུ་ཟབ་པའི་གདམས་པ་ཨྠྀི། ༈ རྗེ་བཙུན་སྒྲོལ་མ་ལ་ཕྱག་འཚལ་ལོ། །འདིའི་སྒོ་ནས་དགྲ་ཇག་འཆིང་བ་ལ་རྫས་དང་སྔགས་དང་ཏིང་ངེ་འཛིན་གསུམ་ལས། རྫས་ནི། ར་རོག་པོའི་རྭ་གཡས་པ་མེ་ཆུ་མ་ཕོག་པ། ཡུངས་དཀར་ཉི་ཤུ་རྩ་གཅིག །རྡེའུ་དཀར་པོ་ཉི་ཤུ་རྩ་གཅིག །ནག་པོ་ཉི་ཤུ་རྩ་གཅིག །ར་རོག་པོ་འོག་ཅན་གྱི་སྤུ། གཡག་འོག་ཅན་གྱི་རྩིད་པ། སཱཙྪ། རེ་བ་ནག་པོ་རྣམས་དགོས། །འཁོར་ལོ་དཔེའུ་རིས་ལྟར་བྲིས་ནས། སླ་ངའི་ནང་དུ་བཅུག་ནས་དགུག་གཞུག་དྲག་ཏུ་བྱེད། དགྲ་ཇག་ཐམས་ཅད་ལྕགས་ཀྱི་ཁང་སྒྲོམ་ནག་པོའི་ནང་དུ་ཚུད་པར་བསམ། དེའི་སྟེང་དུ་རྗེ་བཙུན་མ་བཞུགས་ནས་དགྲ་ཇག་ཐམས་ཅད་གར་ཡང་མི་ཐར་བར་བསམ། དེ་ནས་སྔགས་འདི་བཟླ། ཀ་ཤ་ཀ་ཤ །དྲག་ཐལ་དྲག་ཐལ། སྙིང་ཆོད་སྙིང་ཆོད། ཡ་ཡ་ཙེ་ཙེ་ནན་ནན།
རྦད་རྦད། ཁ་ལ་རཀྴ་རྦད། སྙིང་ལ་རཀྴ་རྦད། རུས་པ་ལ་རཀྴ་རྦད། རྩ་ལ་རཀྴ་རྦད། ཤ་ལ་རཀྴ་རྦད། ཁྲག་ལ་རཀྴ་རྦད། གཟུགས་ཕུང་ལ་རཀྴ་རྦད། དྲན་རིག་ལ་རཀྴ་རྦད། དགྲ་ཇག་ཆོམ་རྐུན་ཐམས་ཅད་ཀྱི་ལུས་ངག་ཡིད་གསུམ་གྱི་ནུས་སྟོབས་རྣམས་ཐུམས་ཐུམས། རིལ་རིལ། ཤག་ཤག །རྨོངས་རྨོངས། བྱིང་བྱིང་། ཐིབ་ཐིབ། མྱོགས་མྱོགས། རེངས་རེངས། མཱ་ར་ཡ་རྦད་ནན། ཆིངས་ཤིག །དེ་ནས་ལས་ལ་སྦྱར་དུས། ལིངྒ་ལག་ཁྲིད་ལྟར་ལྟེབ་ནས། ར་དང་གཡག་རྒོད་སྤུས་ལིང་ག་དྲིལ་ནས་ར་རུའི་ནང་དུ་བཅུག་་་མཐིལ་དུ་ར་སྤུ་དང་གཡག་རྩིད་ཅུང་ཟད་འཇུག་དགོས། ར་རུ་ལྕགས་ཀྱི་ཁང་སྒྲོམ་མེ་འབར་བའི་ནང་དུ་དགྲ་ཇག་ཐམས་ཅད་ཚུད་པར་བསམ། དེའི་སྟེང་དུ་གཡག་རྒོད་དང་ར་ཡི་སྤུ་ཅུང་ཟད་བཞག །དེའི་སྟེང་དུ་ཡུངས་དཀར་ཉི་ཤུ་རྩ་གཅིག་བཞག །འབྲུ་རེ་ལ་སྔགས། ཨོཾ་ཝཱ་གཱི་ཤྭ་རི་མུཾ། རེ་རེ་བཟླ། འཇམ་དབྱངས་ཀྱི་སྤྲུལ་པ་གསེར་གྱི་སེང་གེ་ཉི་ཤུ་རྩ་གཅིག་གིས་དགྲ་བོའི་ལུས་མནན་པར་བསམ། དེའི་སྟེང་དུ་གཡག་རྒོད་དང་ར་ཡི་སྤུ་རྣམས་ཅུང་ཟད་བཞག །སྔགས་རིང་དགུ་དགུ་རེའམ་ཉི་ཤུ་རྩ་གཅིག་འདོན། རླུང་གི་མུན་པ་དྲག་པོ་རྡོ་རྗེ་རྒྱ་གྲམ་གྱིས་མནན་པར་བསམ། དེའི་སྟེང་དུ་རྡེའུ་དཀར་པོ་ཉི་ཤུ་རྩ་གཅིག་བཏབ་ནས། སྤྱན་རས་
གཟིགས་ཀྱི་སྤྲུལ་པ་དུང་གི་གླང་ཆེན་ཉི་ཤུ་རྩ་གཅིག་གིས་དགྲ་བོའི་ངག་མནན་པར་བསམ། ཨོཾ་མ་ཎི་པདྨེ་ཧཱུྃ་བརྗོད། དེའི་སྟེང་དུ་གཡག་རྒོད་དང་ར་ཡི་སྤུ་ཅུང་ཟད་བཞག་སྔགས་རིང་དགུའམ་ཉི་ཤུ་རྩ་གཅིག་བརྗོད། རླུང་གི་མུན་པ་ནག་པོ་རྡོ་རྗེ་རྒྱ་གྲམ་གྱིས་དགྲ་ཇག་ཐམས་ཅད་མནན་པར་བསམ། དེའི་སྟེང་དུ་རྡེའུ་ནག་པོ་ཉི་ཤུ་རྩ་གཅིག་བཏབ་ནས་ཕྱག་ན་རྡོ་རྗེའི་སྤྲུལ་པ་ལྕགས་ཀྱི་དོམ་ནག་ཉི་ཤུ་རྩ་གཅིག་གིས་དགྲ་བོའི་ཡིད་མནན་པར་བསམ། ཨོཾ་བཛྲ་པཱ་ཎི་ཧཱུྃ་ཉི་ཤུ་རྩ་གཅིག་བརྗོད། དེའི་སྟེང་དུ་གཡག་རྒོད་དང་རའི་སྤུ་ཅུང་ཟད་བཞག །རླུང་གི་རྡོ་རྗེ་རྒྱ་གྲམ་གྱིས་དགྲ་ཇག་ཆོམ་རྐུན་ཐམས་ཅད་མནན་པར་བསམ། དེའི་སྟེང་དུ་སཱཙྪ་བཞག །རྗེ་བཙུན་མ་བཞུགས་ནས་དགྲ་ཇག་ཐམས་ཅད་མུན་པའི་གླིང་དུ་ཚུད་ནས་གར་ཡང་མི་ཐར་བར་བསམ། དེ་ནས་ར་རུའི་ཁ་རེ་བ་ནག་པོས་གཅད། གཡག་རྒོད་དང་ར་སྤུའི་ཐི་གུས་བསྡམ། ཏཱཾ་ཡིག་མཚོན་པའི་ཐེའུ་རྒྱགས་དེ་ར་རུ་གཡག་རྒོད་དང་ར་སྤུའི་ཐི་གུས་ཀ་བ་ལ་བསྡམས་ནས། སྐབས་སྐབས་སུ་དགུག་གཞུག་བྱས་ནས་དགྲ་ཇག་ཆོམ་རྐུན་ཐམས་ཅད་ར་རུ་ལྕགས་ཀྱི་ཁང་སྒྲོམ་མེ་འབར་བའི་ནང་དུ་ཚུད་ནས་ཅིས་ཀྱང་མི་ཐར་བར་བསམ། དེའི་སྟེང་དུ་སཱཙྪ་རྗེ་བཙུན་
མར་བསྐྱེད་ནས་དགྲ་ཇག་ཐམས་ཅད་མི་ཐར་བར་བསམ། ཐུན་འཇོག་ཁར་ར་རུ་ལ་གཡོན་སྐོར་དགུ་རེ་བྱེད། གཡས་སྐོར་སྤང་། ཧ་རཀྴ་རྦད། ཧེ་རཀྴ་རྦད། སྟུམ་རཀྴ་རྦད། ཧཱུྃ་རཀྴ་རྦད། ཕཊ་རཀྴ་རྦད། འདི་ཕྲེང་གཅིག་ལ་བྲིས་ནས་དཀྱིལ་དུ་གྲི་རུས་ཀྱི་ཡི་གེ་ཎི་བྲིས་ལ་ལིང་གའི་དཀྱིལ་དུ་མགོ་མཇུག་བཟློག་ནས་བཅུག་པ་གནད་ཡིན། ཨྠྀི། ཤུ་བྷཾ། ༈ འདིའི་ལག་ལེན་མཐོང་བ་བརྒྱུད་པ་བར་མ་ཆད་པ་ལས་འོངས་པ་ནི། ཐོག་མར་དུག་ཤོག་ལ་དགྲ་བོའི་ལིང་ག་མཚན་ཉིད་ཚང་བའི་སྙིང་གར་ནྲྀ་ཡིག་ཛཿབཞི་སྒྲོམ་གྱི་དབུས་སུ་ཚུད་པའི་རྒྱབ་ཕྱོགས་ནས། ཀ་ཤ་ཀ་ཤ་སོགས་ཀྱི་མཐར་སྤེལ་ཚིག་དང་དམོད་མོ་གང་ཤེས་ཡིག་མགོ་ནང་བསྟན་གཡོན་སྐོར་དུ་བྲིས་པའི་ཡིག་གཞུག་ནང་དུ་བཅུག །ཚུལ་དེ་བཞིན་གྱིས་ལིང་གའི་ཕྱི་རོལ་མགོ་ཕྱོགས་ནས་གཡོན་སྐོར་དུ། ཀ་ཤ་ཀ་ཤ་ལ་སོགས་ཀྱི་མཐར། དགྲ་བོ་འུ་ཆུ་ཁམས་པའི་དགྲ་ཇག་ཆོམ་རྐུན་བསམ་སྦྱོར་ངན་པ་ཐམས་ཅད་ཆིངས་ཤིག །དེ་བཞིན། ཇེ་མེ། ཀུང་ས། ཀེག་ཤིང་། ཤང་ལྕགས་ཞེས་པ་སོ་སོར་གོང་ལྟར་སྦྱར་བའོ། །ཡང་ན་དཀྱུས་སུ་གསལ་བ་ལྟར་དང་། གཟའ་ཉི་མ་ལ་སྐྱེས་པའི་དགྲ་ཇག་
ཆོམ་རྐུན་ཐམས་ཅད་ཆིངས་ཤིག །སོགས་གཟའ་བརྒྱད་སོ་སོར་སྤེལ་བའམ། ཡང་ན་དཀྱུས་ལྟར། བྱི་བའི་ལོ་ལ་སྐྱེས་པའི་སོགས་ལོ་སྐོར་བཅུ་གཉིས་སོ་སོར་སྤེལ་བའམ་དཀྱུས་ལྟར་བྱ་བ་སྟེ་རྒྱས་བསྡུས་གང་འོས། ཉི་མ་ཕྱོགས་བཞི་མཚམས་བརྒྱད་ཀྱི་དགྲ་ཇག་ཆོམ་རྐུན་ཐམས་ཅད་ཆིངས་ཤིག །ཁྱད་པར་དུ་ཡུལ་འདི་དང་ས་ཆ་འདི་ཞེས་བྱ་བའི་དགྲ་ཇག་ཆོམ་རྐུན་ཐམས་ཅད་ཆིངས་ཤིག །ཅེས་དང་། རུས་ཀྱི་སྡེ་ཚན་དང་། བླ་དྭགས་དང་། མིང་དམིགས་བསལ་ཡོད་ན་བཅུག་པས་ཤིན་ཏུ་ཟབ། །དེའི་མཐར་ཛ་ཁྲམ་གྱིས་བསྐོར། རྐང་པ་གཉིས་ལ། འགྲོ་བ་བཤོལ་ཅིག །ཅེས་བྲི། གྲི་རུས་ཆུང་ངུ་ལ་ནྲྀ་མཇུག་ལྡོག་པ་ཞིག་བྲིས། ཤོག་བུ་ནར་མོ་ལ། ཧ་རཀྴ་རྦད་སོགས་ཕྲེང་གཅིག་རྫོགས་པར་བྲིས། དེ་ཐམས་ཅད་ལ་དུག་ཁྲག་གིས་བྱུག །འཇུག་སྣོད་ར་འོག་ཅན་གྱི་རྭ་ཅོ། །ཡུངས་དཀར། རྡེའུ་དཀར་པོ་རྡོ་ཞུན་ཞེས་ཆུ་ཚན་གྱི་ཁྲོད་དུ་འབྱུང་བའི་རྡོ་ཧྲིལ་དཀར་པོ་ཆུང་ཆུང་དང་། ནག་པོ་ལྕགས་རྡོ་ལ་བྱེད་པ་ལུགས་གཅིག་དང་། ཡང་ཆུ་ཆེན་ཁའི་རྡེའུ་དཀར་ནག་མི་ཁྱིས་མ་འགོམ་པ་ལ་བྱེད་པའང་སྣང་བས་གང་རྙེད་ཉེར་གཅིག་རེ། སཱཙྪ་རྩི་ཚོན་ལྗང་གུ་
གསོལ་བའི་ནང་དུ་སྒྲོལ་མའི་སྔགས་ཡི་གེ་བཅུ་པ་དང་། རིགས་ལྔའི་སྔགས་སམ་ས་བོན་གྱི་མཐར་རྟེན་འབྲེལ་སྙིང་པོ་དང་། ཕྱོགས་དང་དུས་ཐམས་ཅད་དང་རུས་ཆེན་སྡེ་ལྔ་ཐམས་ཅད་ཀྱི་དགྲ་ཇག་ཆོམ་རྐུན་ཐམས་ཅད་ཆིངས་ཤིག །གནོན་ཅིག །བྷན་དྷ་ཡ། སཏྭཾ་བྷ་ཡ་ནན། ཞེས་བྲིས་པར་ཆོས་སྨན་དང་དྲི་བཟང་གིས་བྱུགས་པའི་ཤོག་དྲིལ་རེ་བཅུག །རབ་གནས་མདོར་བསྡུས་བྱ། གཞན་ཡང་རེ་ཚལ་དང་། རོ་རས་སོགས་འོག་ཏུ་དགོས་པའི་ཡོ་བྱད་རྣམས་འདུ་བྱ་བ་ནི་སྦྱོར་བའོ། །དངོས་གཞི་སྐྱབས་སེམས་སྔོན་དུ་འགྲོ་བས་སྒྲོལ་མའི་བདག་བསྐྱེད་རྒྱས་བསྡུས་ཅི་རིགས་པའམ། རང་ཡི་དམ་གང་བྱེད་ཀྱི་རྣལ་འབྱོར་ལ་གནས་པ་རྩ་སྔགས་ཀྱི་མཐར། ཀ་ཤ་ཀ་ཤ་སོགས་བཏགས་པ་ཅི་ནུས་བཟླ། དེ་ནས་ཡུངས་དཀར་འཇམ་དཔལ་གྱི་སྤྲུལ་པ་གསེར་གྱི་སེང་གེ་དང་། རྡེལ་དཀར་སྤྱན་རས་གཟིགས་ཀྱི་སྤྲུལ་པ་དུང་གི་གླང་ཆེན། རྡེལ་ནག་ཕྱག་རྡོར་གྱི་སྤྲུལ་པ་ལྕགས་ཀྱི་དོམ་ནག་རྣམས་སུ་མོས་ལ། རིགས་གསུམ་སོ་སོའི་སྙིང་པོའི་མཐར་ཀ་ཤ་ཀ་ཤ་སོགས་བཏགས་པ་སྟོང་ཕྲག་ལས་མི་ཉུང་བས་བསྒྲུབས་རྗེས། ར་རུ་ལྕགས་ཀྱི་ཁང་སྒྲོམ་དུ་བསྐྱེད་པ་དང་། ལིངྒ་ལ་དགུག་བསྟིམ་སོགས་གཞུང་ལྟར་ཡིད་ཆེས་པར་བྱ། གྲི་རུས་ཧ་རཀྴ་སོགས་སྔགས་བྱང་གིས་དཀྲིས་ལ་མགོ་
མཇུག་ལྡོག་སྟེ་ལིང་གའི་ནྲྀ་དང་མིག་ལྟོ་སྦྱར་དུ་ཡོང་བ་བྱས་ལ་བཅུག །ཤི་ལྟེབ་ཏུ་བགྱིས་པ་རོ་རས་ཀྱིས་དྲིལ། ཚོན་སྐུད་ཀྱིས་བཅིངས། གཡག་རྒོད་ཀྱི་རྩིད་པ་དང་ར་འོག་ཅན་གྱི་སྤུས་གཡོགས།་་་ལུག་ནག་གི་སྤུ་ཟེར་བའང་སྣང་། ར་རུའི་རྩེར་གཡག་རྩིད་དང་ར་སྤུ་ཅུང་ཟད་བཅུག །དེ་སྟེང་ལིང་ག་བཅུག་ལ་གཡག་རྩིད་དང་། ར་སྤུ། རོ་རས་སམ་རེ་ཚལ་རྣམས་ཀྱིས་མཚམས་གཅད། དེ་ནས་ཡུངས་དཀར་ཉེར་གཅིག་བླུགས་པ་སོགས་གཞུང་ལྟར་ལ། སོ་སོར་རིགས་གསུམ་སྙིང་པོའི་མཐར་དྲག་སྔགས་བཏགས་པ་རེ་དང་རྫས་རེ་རེ་སྤྲད་ལ་བཅུག །ཏཱཾ་ཡིག་གིས་མཚན་པའི་ཐེའུ་རྒྱགས་པ་ཡན་སྟན་ཐོག་གཅིག་ཏུ་གྲུབ་ན་ལེགས་ཤིང་། གང་ལྟར་ཡང་ཉིན་གཅིག་ལ་ཚར་བར་བྱའོ། །རྗེས་ནི། དེ་ལྟར་བསྒྲུབས་པའི་ར་རུ་དེ་ཉིད་གཡག་རྩིད་དང་ར་སྤུའི་ཐི་གུ་ནག་པོ་ཕྱི་བསྒྲིལ་དུ་བྱས་ལ་ཀ་བའི་སྨད་ངོས་སུ་བཅིངས། ཀ་ཤ་ཀ་ཤ་མགོ་རེ་ནན། དྲག་ཐལ་དྲག་ཐལ་སྙིང་རེ་ཆོད། ཡ་ཡ་ཙེ་ཙེ་སྙིང་རེ་ཆོད། ཅེས་ཉེར་གཅིག་་་འདི་ལ་དྲག་སྔགས་རིང་བ་བཟླས་ཀྱང་ཆོག །མཆན།བཏབ་ལ་བསྐོར་བ་གཡོན་སྐོར་བྱ། དགྲ་ཇག་ཆོམ་རྐུན་ཐམས་ཅད་ལྕགས་ཀྱི་ཁང་སྒྲོམ་མུན་པ་ནག་པོའི་གླིང་དུ་ཚུད་པར་བསམ་ལ་འཇིགས་པ་མེད་
པའི་གདེངས་བསྐྱེད། སྐབས་སྐབས་སུ་ཡིད་ཀྱིས་གནོད་བྱེད་བཀུག་བསྟིམ་དང་དྲག་སྔགས་ཤུབ་བུར་བཟླས་ལ་གཡོན་སྐོར་མང་དུ་བྱ། འདི་གཞི་བྱེས་གང་དུ་ཡོད་པ་ཙམ་གྱིས་དགྲ་ཇག་ཆོམ་རྐུན་སྲུང་ཞིང་འཆིང་བར་ཐེ་ཚོམ་མེད། སྟབས་གཅིག་ཏུ་རྫས་དང་བཅའ་གཞི་མང་དུ་བསྒྲིགས་ནས་སྒྲུབ་པ་མཉམ་དུ་བྱས། རང་དང་གཞན་གང་དགོས་ལ་སྦྱིན་པས་ཆོག །འོན་ཀྱང་དུས་ནམ་དུའང་གཡས་སྐོར་གཏན་ནས་མ་ཕོག་པར་བྱ། གལ་སྲིད་གཡས་སྐོར་ཕོག་པ་བྱུང་ན་ནང་གི་རྫས་རྣམས་ཕྱུང་ནས་སྒྲུབ་པ་བསྐྱར་དགོས་སོ། །བཀའ་གདམས་པའི་དགེ་བའི་བཤེས་གཉེན་བརྩོན་འགྲུས་གྲགས་པ་ལ་རྗེ་བཙུན་སྒྲོལ་མས་དངོས་སུ་གནང་བའི་ཇག་ཆིངས་ར་རུ་མར་གྲགས་པའི་ལག་ལེན་དམར་ཁྲིད་དུ་བསྟན་པ་ཨྠྀི། མངྒ་ལཾ་བྷ་ཝ་ཏུ།། །།