ཆོས་བདག་བར་ཆད་སེལ་བའི་ཆོས་ཀ་ལས་རྡོ་རྗེ་ཕུར་པ་དུག་གཟེར་རེག་ཕུང་། ཆོས་རྗེ་གླིང་པ།
ཆོས་བདག་བར་ཆད་སེལ་བའི་ཆོས་ཀ་ལས༔ རྡོ་རྗེ་ཕུར་པ་དུག་གཟེར་རེག་ཕུང་བཞུགས༔
མ་འོངས་སྐལ་ལྡན་ཆོས་བདག་སྐྱེས་བུ་དེས༔ ཟབ་མོའི་ལུང་བཞིན་འགྲོ་དོན་སྐྱོང་བའི་ཚེ༔ སྲིན་ཟ་གཡུ་འབྲོང་ཡམ་ཤུད་ལྟེ་ཕུར་གྱི༔ སྤྲུལ་པ་བླ་མ་སློབ་དཔོན་སློབ་མར་བརྫུ༔ དངོས་དང་བརྒྱུད་ནས་བར་དུ་གཅོད་པར་བྱེད༔ ཁྱད་པར་ཐང་ནག་སྟག་སྣ་དང༔ དམར་རྒྱན་བཟའ་ཡི་སྤྲུལ་པ་འབྱུང༔ ཁྱད་པར་རྒྱན་ཡན་ རྗེས་སུ་འདྲེ་རྒོད་འབྱུང་པོ་སྣ་ཚོགས་ཀྱིས༔ དམ་སྲིས་རྒྱུད་དཀྲུགས་སྣ་ཚོགས་བར་ཆད་མང༔ དེ་ཚེ་བདག་འདྲ་པདྨའི་རྣོ་མྱུར་ཐོག་འདྲའི་ལྷ་མཆོག་ཀཱི་ལ་ཡ༔ དུག་གཟེར་འཐོར་བས་རེག་ཕུང་འདི་ཉིད་ཉམས་སུ་ལོངས༔ ཕྱི་ནང་ཕྱོགས་བཞི་མཚམས་བརྒྱད་བར་ཆད་ནི༔ གཟུགས་ཅན་གཟུགས་མེད་གནོད་འཚེ་རླུང་ལྟར་འཚུབས་པ་འཇོམས༔ དེ་ཕྱིར་དུས་མཐར་འདི་ལ་གཅེས་པར་ཟུངས༔ དེ་ཡང་སྟོང་ཉིད་གཟོད་མའི་ཀློང་ཡངས་ལས༔ མ་རུངས་གདུལ་དཀའ་འདུལ་ཕྱིར་སྙིང་རྗེ་བསྐྱེད༔ ཟུང་འཇུག་ངང་ལས་རང་རིག་ཧཱུྃ་མཐིང་ནག༔ བསྐལ་པའི་མེ་ལྟར་འབར་བའི་ཚ་ཟེར་གྱིས༔ གནོད་བྱེད་གདུག་པ་ཅན་རྣམས་གཞོབ་ཏུ་བསྲེགས༔ དེ་ཉིད་ཡོངས་གྱུར་ཁྲོ་རྒྱལ་སྟོབས་འདུས་ཀྱི༔ ངོ་བོ་བཛྲ་ཀཱི་ལའི་སྐུ་རུ་བསྒོམ༔ ཞལ་གསུམ་ཕྱག་
དྲུག་མཐིང་དཀར་དམར་བའི་ཞལ༔ ཀུན་ཀྱང་འཇིགས་རུང་སྲིན་པོ་ཁྲོས་ལྟར་རྔམ༔ གཡས་གཉིས་རྩེ་དགུ་རྩེ་ལྔ་ནམ་མཁར་འཕྱར༔ གཡོན་གཉིས་ཁ་ཊྭཱཾ་མེ་དཔུང་གསོར་ཞིང་སྤྲོ༔ མཐའ་གཉིས་སེང་ལྡེང་ཕུར་བུས་གནོད་བྱེད་གཟིར༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ སྤུ་གྲིའི་ཁྱུང་གཤོག་ནམ་མཁའི་མཐོངས་སུ་འཕྱར༔ སྒྲོ་གསེབ་མེ་ཆར་གནམ་ལྕགས་ཐོག་སེར་འབེབ༔ སྐུ་སྨད་གནམ་ལྕགས་ཕུར་གཟུགས་དམར་ཧང་ངེ༔ གནོད་བྱེད་དམ་སྲི་རུ་ཏྲའི་སྙིང་ལ་བཙུག༔ མེ་དཔུང་ཀློང་ནས་ཁྲོ་བཅུ་ཁྲོ་ཆུང་འགྱིང༔ ཀཱི་ལ་ཡ་སོད་ཧཱུྃ་ཕཊ་འབྲུག་སྟོང་ལྡིར༔ རང་ཉིད་ཁྲོ་རྒྱལ་ཀུན་འདུས་བདག་ཉིད་ཆེ༔ ཐུགས་ཀར་ཉི་དཀྱིལ་དབུས་སུ་མཐིང་ནག་ཧཱུྃ༔ དེ་ལ་རྩ་བའི་སྔགས་ཕྲེང་མཐིང་ནག་བསྐོར༔ ཨོཾ་བཛྲ་ཙཎྜ་ཀཱི་ལི་ཀཱི་ལ་ཡ་ཧཾ་ཤཾ་ཏྲི་གནོད་བྱེད་དམ་སྲི་བདུད་ཀྱི་སྙིང་ལ་མཱ་ར་ཡ་ཨེ་ཧུར་ཐུམས་རྦད༔ ཐུགས་སྲོག་ཧཱུྃ་ལས་ཛཿཡིག་ལྕགས་ཀྱུ་འཕྲོས༔ གནོད་བྱེད་ལོག་འདྲེན་དམ་སྲི་འབྱུང་པོ་ཀུན༔ མཐའ་མི་མགོ་བརྙན་བན་བོན་སྣ་ཚོགས་དབྱིབས༔ བཀུག་པ་མདུན་དུ་ལྕགས་བསྲེགས་ཧོམ་དུ་བསྒྱེལ༔ སྐུ་སྨད་ཕུར་བུས་གསོར་ཞིང་བརྡབས་པ་ཡིས༔ ཉམ་ཐག་གཟིར་བསམ་མ་ཡེངས་དམིགས་པའི་གནད༔ ཁྱད་
པར་དངོས་སུ་གསལ་བའི་གཟུགས་དེ་འམ༔ རྨི་ལམ་ཆོ་འཕྲུལ་གང་སྟོན་དེ་ཉིད་བསྒོམ༔ གོང་བཞིན་གཟིར་མནན་ཕུང་པོ་ཡེ་ཤེས་མེས༔ གཞོབ་ཏུ་བཏུལ་ཞིང་རྣམ་ཤེས་ཐུགས་སྲོག་ཧཱུྃ༔ ཞབས་ཀྱུར་བསྟིམ་བསམ་སྐྱེ་མེད་ངང་དུ་བཟླ༔ ཐུན་མཚམས་རང་ཉིད་ཁྲོ་རྒྱལ་གསལ་བའི་མཐར༔ སྲུང་བ་ལྔ་ཡི་གུར་ཁང་ཕུབ་པའི་ནང༔ རང་ལུས་རྡོ་རྗེའི་གོ་ཁྲབ་ཞུ་ལུགས་སུ༔ གྱོན་པར་བསམ་ཞིང་རྩ་བའི་སྔགས་ཀྱི་མཐར༔ བཛྲ་ཀཱ་བ་ཙི་ཧཱུྃ༔ བཛྲ་ཛྙཱ་ན་པཉྩ་ར་ཛྭ་ལ་རཾ་རཀྵ་ཧཱུྃ་ཕཊ༔ བཏགས་པ་བཟླ་བ་ཀུན་ཏུ་སྲུང་བའི་མཆོག༔ དེ་ལྟར་མ་འོངས་བསྐལ་པ་དུས་ཀྱི་མཐར༔ མཐའ་འགོང་དམ་སྲིའི་བར་གཅོད་ལས་སྐྱོབ་བྱེད༔ གཞན་གྱིས་མི་ཐུབ་དུག་ཟེར་རེག་ཕུང་འདི༔ བདག་འདྲ་ཨོ་རྒྱན་དྲག་སྔགས་མཐར་ཐུག་གོ༔ མན་ངག་མགུལ་ཁུག་སྙིང་གི་དཀྱིལ་དུ་སྦོས༔ ཤ་དུམ་བརྒྱ་རྩ་ཟན་དུམ་བརྒྱ་རྩ་ཆང་གིས་བྲན་བསང་སྦྱང༔ སྟོང་པའི་ངང་ལས་ཤ་ཁྲག་སོགས་འདོད་ཡོན་གྱི་ཕུང་པོར་བསྒོམ༔ བཙན་འབྲོང་ཡམ་ཤུད༔ ས་སྲིན་གཡུ་འབྲོང༔ ལྟེ་ཕུར་དམ་སྲི་སོགས་ཀྱི་རིགས་སུ་གྱུར་པ་སློབ་དཔོན་གྱི་དམ་ཉམས༔ ཕྲིན་ལས་དང་ཚེ་ལ་སྲི་ཞིང་རྐུ་བ༔ མཐའི་འདྲེ་རྒོད་མ་རུངས་པ་རྒྱབ་རྟེན་དུ་འཆའ་ཞིང༔
སྣང་སྲིད་ལྷ་འདྲེ་གཡོ་ཞིང་འཁྲུག་བྱེད་ཐམས་ཅད༔ ཤ་ཟན་མཆོད་པ་འདི་བཞེས་ལ༔ ལན་ཆགས་སྦྱོངས༔ བུ་ལོན་འཁོར༔ འཁོན་བཅུགས་སྦྱངས་ཏེ༔ ཞི་བ་དང་བདེ་ལེགས་སུ་མཛོད་ཅིག༔ སམྦྷར་བརྒྱ་རྩ་དང༔ བཅུ་ཚན་རེ་རེར་དེ་བཞིན་གཤེགས་པ་བཞི་དང་བསྔོ་ཚིག་བཅུག་གོ༔ ཨོ་རྒྱན་ཆོས་རྗེ་གླིང་པས་རླུང་གི་འཁོར་ལོ་བྱམས་པའི་སྙིང་མཛོད་ནས་སྤྱན་དྲངས་པའོ།། །།