སྣང་སྲིད་ཞི་བ་དཀར་པོའི་མགྲོན་ལྔའི་གཤེགས་གསོལ་སོགས། རོལ་པ་རྡོ་རྗེ།
སྣང་སྲིད་ཞི་བ་དཀར་པོའི་མགྲོན་ལྔའི་གཤེགས་གསོལ་སོགས། ཨོཾ་ཨཱཿཧཱུྃ། ཕྱི་ནང་གསང་བ་ཁྱད་པར་འཕགས་པའི་ཚོགས། །རབ་འབྱམས་ཀུན་ཁྱབ་མཐའ་དང་མཉམ་པ་འདི། །འཇིག་རྟེན་འདས་དང་མ་འདས་མགྲོན་རྣམས་ལ། །གུས་པས་འབུལ་བཞེས་ཕྲིན་ལས་ཀུན་འགྲུབ་མཛོད། །དེ་རྣམས་མཆོད་པའི་མགྲོན་རྣམས་རང་རང་གི །གནས་སུ་གཤེགས་ཏེ་སླར་ཡང་འགྲོ་དོན་དུ། །སྤྱན་འདྲེན་དུས་སུ་དབྱིངས་ནས་སྐུར་བཞེངས་ཏེ། །འབྱོན་ཅིང་ཕྲིན་ལས་སྣ་ཚོགས་ཡོངས་འགྲུབ་མཛོད། །མགྲོན་ཚན་ལྔ་པོ་མཆོད་ཅིང་བསྙེན་བཀུར་མཐུས། །ཚེ་འདིའི་འགལ་རྐྱེན་བར་ཆད་མ་ལུས་ཞི། །མཐུན་རྐྱེན་ཚེ་བསོད་དགེ་ལེགས་རབ་འཕེལ་ནས། །ཕྱི་མ་གཏན་བདེ་བླ་མེད་ཐོབ་པར་ཤོག །སྟོབས་བཅུ་མངའ་བ་ཀུན་དང་དེས་གསུང་ཆོས། །ཉན་རང་བྱང་སེམས་ལྷ་ཚོགས་མ་ལུས་ཀྱི། །བདེན་སྟོབས་ནུས་པས་བཀྲ་ཤིས་དགེ་ལེགས་ནི། །ཡར་ངོའི་ཟླ་ལྟར་གོང་ནས་གོང་འཕེལ་ཤོག །རྩ་བརྒྱུད་བླ་མ་ཡི་དམ་ཞི་ཁྲོའི་ལྷ། །དཔའ་བོ་མཁའ་འགྲོ་ཆོས་སྐྱོང་བདེན་པ་ཡིས། །བཀྲ་ཤིས་དགེ་ལེགས་ཕུན་སུམ་ཚོགས་པ་རྣམས། །ཡར་ངོའི་ཟླ་ལྟར་གོང་ནས་གོང་འཕེལ་ཤོག །ཆོས་སྐུ་ལོངས་སྐུ་སྤྲུལ་སྐུ་རྡོ་རྗེ་གསུམ། །རྟེན་འབྲེལ་རྒྱུ་རྐྱེན་བསླུ་མེད་བདེན་པའི་མཐུས། །ཇི་ལྟར་བསམ་པའི་དོན་ལྟར་འགྲུབ་པ་ཡི། །བཀྲ་ཤིས་དགེ་ལེགས་ཉི་ཟླ་ལྟར་གསལ་བ། །ནུབ་མེད་བསྟན་འགྲོའི་མཁའ་ལ་རྟག་འཆར་བ། །མྱུར་བ་ཉིད་དུ་འགྲུབ་པ་ཉིད་གྱུར་ཅིག །ཅེས་དང་བཀྲ་ཤིས་གཞན་ཡང་བྱའོ། །ཞེས་པ་དགེ་སློང་ཀརྨ་མགོན་པོས་བསྐུལ་བ་ལྟར་རོལ་པ་རྡོ་རྗེས་བྲིས།