ལྷ་མོ་དབྱངས་ཅན་མའི་སྒྲུབ་ཐབས་མུན་སེལ་སྒྲོན་མེ། རཏྣ་གླིང་པ།
ལྷ་མོ་དབྱངས་ཅན་མའི་སྒྲུབ་ཐབས་མུན་སེལ་སྒྲོན་མེ་བཞུགས་སོ༔
ཐམས་ཅད་ཀུན་མཁྱེན་ལྷ་མོའི་སྐུ༔ མི་ཤེས་མུན་སེལ་དབྱངས་ཅན་མ༔ ཤེས་བྱ་ཀུན་གཟིགས་མ་ལ་འདུད༔ བདག་འདྲ་པདྨ་འབྱུང་གནས་ཀྱིས༔ དེ་ཡི་ཤེས་རབ་བློ་འཕེལ་བསྟན༔ དེ་ལ་དོན་བཞི་སྟེ༔ སྡིག་པ་བཤགས་ཤིང་སྡོམ་པ་གཟུང་བ༔ གཟུངས་སྒྲུབ་བསྟན་པ༔ རྫས་གསོག་པ༔ བསྐྱེད་བཟླས་བསྟན་པའོ༔ དང་པོ་སྡིག་པ་བཤགས་པ་ནི༔ སྔོན་འགྲོ་རྡོ་རྗེ་སེམས་དཔའ་བསྐྱེད་བཟླས་བྱ་ཞིང༔ བཤགས་པ་ལ་འབད་དོ༔ སྡོམ་པ་གཟུང་བ་ནི༔ ཆང་དང༔ བུད་མེད་དང༔ དཀོར་ཟས་སྡིག་ཟས་ཐམས་ཅད་སྤང་ངོ༔ ཤ་དང་ཉིན་མོའི་གཉིད་དང༔ གོ་སྙོད་ལ་སོགས་པ་སྤང༔ འོ་མ་དང་དཀར་གསུམ་བརྟེན་པར་བྱའོ༔ གཉིས་པ་གཟུངས་སྒྲུབ་བསྟན་པ་ནི༔ དཀྱིལ་འཁོར་གླིང་བཞི་རི་རབ་དང་བཅས་པའི་སྟེང་དུ་ཁམ་ཕོར་བཞག༔ གཏོར་མ་ཆ་གསུམ་གཡས་སུ་བཤམ༔ མཆོད་པ་རྣམ་ལྔ་གཡོན་དུ་བཤམ༔ གསུམ་པ་རྫས་གསག་པ་ནི༔ ཆུ་དག་དཀར་པོ་ཙནྡན་དཀར་པོ་གཉིས་རྩི་བཞིན་བཏགས་ལ༔ སྦྲང་རྩི་དང་མར༔ བ་དཀར་འོ་མ་བཏབ་ལ་ཁམ་ཕོར་དུ་བླུགས༔ མེ་ལོང་ལ་དབྱངས་གསལ་བྲིས་ཏེ་ཁ་བཅད་དོ༔ བཞི་པ་སྒོམ་བཟླས་བྱ་བ་ནི༔ རང་ཉིད་སྐད་ཅིག་གིས་ལྷ་མོ་དབྱངས་ཅན་མ་སྐུ་མདོག་དཀར་མོ་ཞལ་གཅིག་ཕྱག་གཉིས་རྒྱུད་མང་སྦྲེང་བ་ལ་བརྩོན་པ༔
ལང་ཚོ་རྒྱས་པ༔ གཟི་བརྗིད་འོད་དང་ལྡན་པ༔ འཛུམ་པའི་ཞལ་ལ༔ ཙོག་པུར་པདྨ་དང་ཟླ་བའི་གདན་ལ་བཞུགས་པ་གཅིག་བསྐྱེད༔ དེ་ནས་ལྷ་མོའི་མདུན་དུ་པདྨའི་སྡོང་པོའི་སྟེང་དུ༔ ཉི་མའི་དལ་སྟེང་དུ༔ འཇམ་དཔལ་མགོན་པོ་ཞལ་གཅིག་ཕྱག་གཉིས་སྐུ་མདོག་སེར་པོ་ཕྱག་གཡས་རལ་གྲི་དང་གཡོན་པོ་ཏི་ཐུགས་ཀར་བསྣམས་པ༔ སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པར་བསྒོམ༔ དེ་ཡང་གཞོན་ནུ་འོད་དང་ལྡན་པ༔ དར་སྔོན་པོའི་ཤམ་ཐབས་ཅན་དུ་བསྒོམ་མོ༔ དེ་ནས་བདག་ཉིད་ལྷ་མོར་གསལ་བའི་ཐུགས་ཀར་པད་ཟླའི་སྟེང་དུ༔ ཧྲཱིཾ་དཀར་པོ་ལ་དབྱངས་ཡིག་གིས་བསྐོར་བར་བསྒོམ༔ དེའི་ཕྱི་རིམ་འདབ་བརྒྱད་ལ༔ དབྱངས་ཡིག་བཅུ་དྲུག་གཉིས་གཉིས་བསྒོམ་མོ༔ ཨ་ཨཱ༔ ཨི་ཨཱི༔ ཨུ་ཨཱུ༔ རྀ་རཱྀ༔ ལི་ལཱི༔ ཨེ་ཨཻ༔ ཨོ་ཨཽ༔ ཨཾ་ཨ༔ ཐུགས་ཀའི་འཁོར་ལོའི་འོད་ཟེར་ལས༔ བདག་གི་བློའི་མ་རིག་པའི་མུན་པ་དང༔ མི་ཤེས་རྨོངས་པ་ཐམས་ཅད་སེལ་བར་བསྒོམ༔ དེ་ནས་ཧྲིཾ་ཡིག་སྐྱེ་བ་མེད་པར་བཟླ་བར་བྱ་སྟེ༔ ཧྲིཾ་ཧྲིཾ༔ ཧྲིཾ་ཧྲིཾ༔ ཧྲིཾ་ཧྲིཾ༔ ཧྲིཾ་ཧྲིཾ༔ ཧྲིཾ་ཧྲིཾ༔ ཞེས་བཟླས་པ་དེའི་འོད་ཟེར་དཀར་པོས་རང་གི་མགོ་ལུས་ཐམས་ཅད་ཁྱབ་པས༔ མི་ཤེས་པའི་མུན་པ་ཐམས་ཅད་བསལ་ཏེ༔ མདུན་གྱི་འཇམ་དཔལ་འོད་དུ་ཞུ་ནས༔ རང་གི་སྤྱི་གཙུག་ཏུ་ཐིམ་པས༔ སྐུའི་འོད་ཟེར་གྱིས་མི་ཤེས་པའི་སྒྲིབ་པ་ཐམས་ཅད་བྱང་བར་བསྒོམ༔ གསུང་གི་འོད་ཟེར་གྱིས་མགྲིན་པའི་རྩ་ཁ་བྱེ༔ ཐུགས་ཀྱི་འོད་ཟེར་གྱིས་གཏི་མུག་སེལ་བར་བསྒོམ༔ དེ་ནས་རང་གི་སྙིང་རྩེ་ཐུར་ལ་ཡོད་པ་དེ༔
གྱེན་དུ་འདབ་བརྒྱད་ལངས་པའི་དཀྱིལ་དུ༔ ཨཱོྃ་གཅིག་བསྒོམ༔ དེ་སྣ་བུག་གཡས་ནས་ཐོན་ཏེ༔ རྒྱ་མཚོའི་ལྷ་མོ་དབྱངས་ཅན་མ་རང་དང་འདྲ་བའི་ཡེ་ཤེས་པའི་ཐུགས་ཀྱི་དཀྱིལ་ནས༔ དབྱངས་ཡིག་འཁོར་ལོའི་རྣམ་པ་དེ་ཉིད་མདུན་གྱི་ནམ་མཁའ་ལ་སྤྱན་དྲངས་ཏེ༔ ཡིད་ལས་བྱུང་བའི་མཆོད་པ་རྣམས༔ འབྲུ་གསུམ་གྱིས་ཡེ་ཤེས་བདུད་རྩིར་བྱིན་བརླབས་ཏེ་འབུལ་ལོ༔ འཇམ་དཔལ་དབྱངས་ཅན་མ་དང་བཅས་པ་ལ་གཏོར་མ་ཡང་སྔགས་འདིས་འབུལ་ལོ༔ ཨཱོྃ་པྲཱི་ཏཱི་དེ་བཱི་ཧྲཱི་ནི་བི་ཏ་སྟིག་ན་ཙིཏྟ་ཨུ་པ་དེ་བཱི་ར་ཏི་ན་ཙིཏྟ་སིདྡྷི་ཨ་མྲྀཏ་སྭཱ་ཧཱ༔ དེ་ལྟར་མཆོད་པ་འབུལ༔ འདོད་པའི་དོན་ལ་གསོལ་བ་བཏབ་ནས༔ དེ་ནས་མདུན་གྱི་འཁོར་ལོ་རང་གི་སྣ་བུག་གཡོན་ནས་རྔུབས༔ རང་གི་སྙིང་གའི་དཀྱིལ་དུ་ཐིམ༔ པདྨ་འདབ་བརྒྱད་ཀྱི་ལྟེ་བར་འཇམ་དཔལ་བསྒོམ༔ ཧྲིཾ་ཧྲིཾ༔ མཉྫུ་ཤྲཱི་ཡེ་པྲ་ཛྙཱ་སིདྡྷི་བི་མ་ལེ་རུ་རུ་ཙ་ལེ་ཧཱུྃ་ཧཱུྃ་ཧྲིཾ་ཧྲིཾ༔ འཇམ་དཔལ་གྱི་ཐུགས་ཀའི་མུཾ་སེར་པོ་ལ་བཟླས་པའི་སྔགས་དེས་བསྐོར་བར་བསམ༔ ཡེ་ཤེས་སེམས་དཔའ་སྤྱན་དྲངས་ལ་ཡང་ཡང་བསྟིམ་ཞིང་སྔགས་བཟླས་པར་བྱའོ༔ གོང་འོག་བསྙེན་སྒྲུབ་ཀྱི་ཚུལ་དུ་བཟླས་པའམ༔ འོན་ཏེ་སྦྲེལ་ཡང་མི་འགལ༔ གཙོ་བོར་ཧྲིཾཿཡིག་བཟླའོ༔ ཞག་བདུན་གྱིས་ནི་རིག་པའི་གནས་ལྔ་ལ་སྦྱང་ཡང༔ ཤེས་རབ་ཀྱི་བློ་ཁ་བྱེ་བར་འགྱུར་རོ༔ གོང་དུ་བརྩིས་ནས༔ ཟླ་བ་ཕྱེད་ཟིན་པའི་དུས་སུ༔ ཁམ་ཕོར་གྱི་འོ་མས་
མེ་ལོང་གི་ཡིག་འབྲུ་དག་པར་བཀྲུས་ཏེ་བཏུང་བར་བྱའོ༔ ཟླ་བ་གཟས་ཟིན་པའི་རིང་ཆུ་ལ་སྔགས་བཟླས་ཏེ༔ ཟིན་པ་གྲོལ་བ་དང་བཏུང་ངོ༔ ཡང་ན་ཟླ་བ་ཉ་ལ་ཉི་མ་རྩེ་ཤར་དུས་སུ༔ ཁྲུས་བྱས་ཏེ་བཏུང་བར་བྱ༔ རྟགས་ནི༔ རལ་གྲི་དང་ཤེལ༔ མདའ་གཞུ་རྙེད་པ་དང༔ འོད་དང་ལྷ་མོའི་ཞལ་མཇལ་བ་དང༔ པི་ཝཾ་གི་སྒྲ་ཐོས་པ་ལ་སོགས་འབྱུང་ངོ༔ ཤེས་རབ་རྩལ་རྒྱས་ཐོས་པ་འཛིན་ཅིང་ཐམས་ཅད་ལ་བློ་གྲོལ་བར་འགྱུར་རོ༔ ཨྠྀི༔ ལས་ཅན་གཅིག་དང་འཕྲད་པར་ཤོག༔ ལས་ཅན་གཅིག་དང་འཕྲད་ནས་ཀྱང༔ རིག་པའི་གནས་ལྔར་མཁས་པར་ཤོག༔ ས་མ་ཡ༔ ཟབ་རྒྱ༔ གཏེར་རྒྱ༔ སྦས་རྒྱ༔ རྒྱ་གསུམ་བཏབ་བོ་ས་མ་ཡ༔ ལྷ་མོ་དབྱངས་ཅན་མའི་སྒྲུབ་ཐབས། སྤྲུལ་སྐུ་རཏྣ་གླིང་པས་བསམ་ཡས་བྱང་ཆུབ་ཆེན་པོའི་སྐུ་རྒྱབ་ནས་གདན་དྲངས་པའོ། །དགེ་ལེགས་སུ་གྱུར་ཅིག། །།