བླ་མ་དགོངས་པ་འདུས་པ་ལས་ཐོད་བརྟག་གནོད་སྦྱིན་ནོར་ལེན། སངས་རྒྱས་གླིང་པ།
༁ྃ༔ བླ་མ་དགོངས་པ་འདུས་པ་ལས༔ ཐོད་བརྟག་གནོད་སྦྱིན་ནོར་ལེན་ཞེས་བྱ་བ་བཞུགས་སོ༔
ན་མོ་གུ་རུ་དྷེ་ཝ་ཌཱ་ཀི་ནཱི་ཧཱུྃ༔ གསང་སྔགས་ཟབ་མོ་ལ་སྤྱོད་པའི་རྣལ་འབྱོར་པ་གང་དག་བྷན་སྐྱོགས་ཀ་པཱ་ལ་འཆང་བར་འདོད་པས༔ བཟང་ངན་བླང་དོར་གྱི་མཚན་ཉིད་ཤེས་པས་འཆང་བར་བྱེད་པར་གལ་ཆེ་སྟེ༔ བཟང་པོས་གནས་སྐབས་དང་མཐར་ཐུག་གི་ཡོན་ཏན་སྐྱེད་ཅིང༔ ངན་པས་གནས་སྐབས་དང་མཐར་ཐུག་ནམ་དུ་ཡང་མི་འདོད་པའི་སྐྱོན་དུ་མ་སྐྱེད་པར་བྱེད་པའི་ཕྱིར༔ བཟང་ངན་གྱི་མཚན་ཉིད་བརྟག་པ༔ ཐོད་བརྟག་གནོད་སྦྱིན་ནོར་ལེན་ཞེས་བྱ་བ་འདི་ལ་བླང་བྱ་བཟང་པོ་ངོས་འཛིན་པ་དང༔ སྤང་བྱ་ངན་པ་ངོས་འཛིན་པའོ༔ དང་པོ་བླང་བྱ་བཟང་པོ་ངོས་འཛིན་པ་ལ་གསོན་གཤིན་གཉིས་ཏེ༔ གསོན་པོའི་དུས་ཕོ་མོ་གང་ཡང་འདྲ་བར༔ མདོག་སྔོ་བའམ་ནག་པ༔ མིག་ཕུགས་ཟབ་ལ་མེར་བ༔ སོ་སྐྱ་བ༔ སྐྲ་ཚན་ཆེ་ལ་རྩུབ་པ༔ སྣ་ཆེ་ལ་རྣོ་བ༔ མཚོག་མ་འབུར་བ༔ མཇིང་པ་ཕྲ་བ༔ སྨིན་མ་ནག་ལ་རིང་ཞིང་སྨིན་མཚམས་འབྲེལ་བ༔ ཡང་ན་མིག་དཀར་ལ་ཤལ་བ༔ མཁུར་ཚོས་མཐོ་བ༔ སོ་བཟུར་བ༔ མཆེ་བ་རིང་བ༔ མཆུ་ཡོར་ལ་ཆེ་བ༔ བསོད་ནམས་ཟ་ཐང་དཔལ་ཁ་ཆུང་བ༔ མ་ལྐུགས་པ་སྟེ༔ གསོན་གྱི་དུས་སུ་དཔྱད་པ་དེ་རྣམས་ཚངས་པའི་མི་དེའི་ཐོད་པ་ཤི་བའི་ཚེ་ཆུད་མ་ཟོས་པར་ཉ་ར་བྱས་ན་བཟང་པོ་མི་འོང་མི་སྲིད་དོ༔ ཤི་བའི་ཐོད་པ་ལ་རྣམ་པ་མང་ཡང༔ མདོག་
ལ་བརྟག་པ༔ དབྱིབས་ལ་བརྟག་པ་ལ་སོགས་པ་ལས༔ དབྱིབས་ནི་ནས་འབྲས་ལྟ་བུ༔ མདུན་ངོས་ནས་འཇོང་བ༔ ལྟག་པའི་ངོས་གཉིས་འབུར་བ་སྟེ༔ མཚོག་མ་མ་ཞོམ་ཞིང་རབ་ཏུ་རྒྱས་ནས་ནོར་བུ་ལྟ་བུ་ཡོད་པ་བཟང༔ རིགས་རྒྱུད་འཕེལ་བར་བྱེད་པའི་ཐོད་པ་རྡོ་རྗེའི་དབྱིབས་ཅན་ནི༔ མདུན་རྒྱབ་གཡས་གཡོན་གཉིས་རྒྱས་ཤིང༔ དེའི་ངོས་གཉིས་རྡོ་རྗེའི་རྭ་ལྟར་ཟུར་དུ་ལྷག་པར་འབུར་བའོ༔ ཟུར་མ་དོད་པས་ཟླུམ་པོར་འདུག་ན་ངན་ནོ༔ འགྲོ་བ་འདུན་པའི་ཐོད་པ་པདྨའི་དབྱིབས་ཅན་ནི༔ མདུན་ཕྲ་ལ་གདོང་ལེབ་ཅིང༔ རྒྱབ་རྒྱས་ལ་ཟླུམ་པ༔ ཡ་ཡོ་མེད་པར་སྙོམས་ཤིང་བལྟས་པས་པདྨ་ལྟར་གནས་པའོ༔ དེ་ལྟ་བུ་ལ་རང་ས་ཉམས་ན་ངན་པའོ༔ གཡུལ་ལས་རྒྱལ་བའི་ཐོད་པ་གླང་པོ་ཆེའི་རྒྱབ་ལྟ་བུ་ནི༔ མདུན་རྒྱབ་གཡས་གཡོན་སྙོམས་པ༔ དབུས་གོང་གདོང་རིང་ལ་མཐོ་བ༔ རྣ་ལྟག་གཉིས་སུ་གླང་པོ་ཆེའི་མཆེ་བ་ལྟ་བུའི་རུས་འབུར་རྒྱས་པ༔ ཚང་ར་ཞོམ་པ་ལྟར་མ་ཡིན་ཞིང་ཀུན་ཏུ་རྒྱས་པའོ༔ མདོར་ན་ཐོད་པའི་དབྱིབས་གཏིང་རྒྱ་མཚོ་ལྟར་ཟབ་པ༔ ངོས་རི་བོ་ལྟར་མཐོ་བ༔ དབྱིབས་གླིང་བཞིའི་བཀོད་པ་ལྟར་ཁོད་སྙོམས་པ༔ ཡ་ཡོ་དང་འཁྱམ་འཁྱོམ་མེད་པ༔ བལྟས་པ་ཙམ་གྱིས་ཡིད་དུ་འོང་བ༔ ལག་ཏུ་བླང་བ་ཙམ་གྱིས་ནོར་བུ་རིན་པོ་ཆེ་ལྟར་ལྗིད་ཆེ་བ༔ ཤེལ་ལྟར་དྭངས་པ༔
སྲབ་མཐུག་སྙོམས་པ༔ ལྷ་བའི་ཟམ་མ་ཆད་པ༔ ནང་གི་ཐོད་ལུང་ཐལ་མར་ཡོད་པ༔ གདོང་སོག་པོ་ཁྲོས་པའི་གདོང་སྣ་ལྟར་ཡོད་པ་ལས་སྤུ་གྲིའི་སོ་ལྟར་མ་ཡིན་ཞིང་འཇམ་ལ་མཐོ་བ༔ ཕྱི་ནས་ནང་དུ་འདུད་པ་ལྟ་བུ༔ ནང་ནས་ཟེད་པ་ལྟ་བུ་རྣམས་བཟང་བ་སྟེ༔ ཁྱད་པར་དུ་རུས་ལྷག་དང་རུས་འབུར་རིན་པོ་ཆེའི་ཕྲ་བཏབ་པ་ལྟ་བུའམ༔ མར་ཁུའི་ཟར་བུ་ཐིགས་པ་ལྟ་བུ་བྱུང་ན་མཆོག་ཏུ་བཟང་བའོ༔ ཁ་དོག་བཟང་རྟགས་ནི༔ དཀར་ལ་དྭངས་པ༔ སེར་ལ་འཚེར་བ༔ དམར་ལ་སྣུམ་པ༔ སྔོ་ལ་འོད་དང་ལྡན་པ༔ སྨུག་ལ་བརྗིད་པ་སྟེ༔ གང་ཡང་སྣུམ་ལ་བཀྲག་དང་ལྡན་ན་བཟང་བའོ༔ མཁྲེགས་པ༔ ལྗིད་པ༔ མཐུག་པ༔ འཇམ་པ༔ སྙོམས་པ༔ མཛེས་ཤིང་ཡིད་འོང་བ་རྣམས་ཀུན་འཛོམ་པ་རབ༔ ཕྱེད་འཛོམ་པ་འབྲིང༔ རེ་རེ་འཛོམ་པ་ཐ་མའོ༔ དུམ་བུའི་བརྟག་པ་ནི༔ རྣ་ལྷན་ལྟག་ལྷན་གསུམ་མ་གཏོགས་པའི་དུམ་བུ་གཅིག་པ་ཚེ་ལ་དབང༔ གཉིས་པ་ནོར་ལ་དབང༔ གསུམ་པ་ཟས་ལ་དབང༔ བཞི་པ་ལས་ལ་དབང༔ བཅུ་གཅིག་ཕན་ཆད་མཆོག་གི་ཐོད་པ་སྟེ་བཟང་བའོ༔ ནང་གི་དཔྱད་ལ༔ མདུན་རང་ས༔ གཡས་མི་ས༔ གཡོན་ནོར་ས༔ རྒྱབ་ཕྱི་ས་སྟེ་ནང་མེ་ལོང་གི་ངོས་ལྟར་རབ་ཏུ་འཇམ་པའམ༔ མར་ལ་མཐེབ་བཅག་བྱས་པ་ལྟ་བུ་བཟང༔ ཤིང་ལོ་རབ་ཏུ་རྒྱས་ཤིང་ཡན་ལག་རགས་པ༔
ཡལ་ག་རང་སར་འཁྱིལ་ཞིང་ཤིང་འབྲས་ལྟ་བུའི་ཕྲུམ་ཕྲུམ་དང༔ མེ་ཏོག་ལྟ་བུར་ཤར་ན་བཟང༔ ཐོད་སྤྲིས་མ་རལ་བ་ནང་དར་དམར་པོའི་ངོས་གཡོགས་བྱས་པ་འདྲ་ན་བཟང་བའོ༔ གླང་པོ་ཆེའི་རྗེས་བཞི་དོད་པ་འདྲ་བའི་ཁུང་བུ་ལ་འཇམ་ཞིང་འབུ་ཚགས་མེད་ན་རྐང་བཞི་འདུ་ཞེས་བཟང་བའོ༔ ཚངས་བུག་ཕྱི་ནང་དུ་ཐལ་མར་ཡོད་པ་བཟང་ཞིང༔ ཚངས་བུག་གཉིས་པ་བྱུང་ན་མཆོག་ཏུ་བཟང་བའོ༔ མདོར་ན་ཐོད་པ་འཇམ་ན་མི་ཁ་བྱམས༔ ལྗིད་ཆེ་ན་བསོད་ནམས་འཕེལ༔ དབྱིབས་ལེགས་ན་ནོར་འདུ༔ གདིང་ཟབ་ན་ཟས་འདུ༔ མཐུག་ཅིང་ཁོད་སྙོམས་ན་ལོངས་སྤྱོད་བརྟན༔ སྲབ་ལ་དྭངས་ཤིང་མཁྲེགས་ན་ཆོས་འཕེལ༔ ནང་གི་རི་མོ་དར་ཞིང་རྒྱས་ན༔ འཁོར་འདབས་འབངས་སྲིད་འཕེལ༔ ཚངས་བུག་གསང་ན་མི་རྒྱུད་གྲུང་ལ་སྐད་ཐོན་པ་འོང༔ བལྟས་པ་ཙམ་གྱིས་ཡིད་དུ་འོང་ལ་ཉམས་དགའ་རིག་པ་དྭངས་ན༔ ཐོད་པ་དེ་ལ་ཡོན་ཏན་མེད་མི་སྲིད་པས་འཆང་བར་བྱའོ༔ ཐོད་པ་གང་ཡིན་ཡང་འཕྲད་པའི་ཚེ་རྫས་ཀྱིས་གང་ན་བཟང༔ མདུན་དང་གཡས་རང་ལ་བསྟན་ན་བཟང་བ་སྟེ༔ རྟེན་འབྲེལ་འགྲིགས་པས་བཅང་བའི་འོས་སུ་འགྱུར་ཏེ༔ ཡོན་ཏན་དེ་རྣམས་ཚང་བའི་ཐོད་པ་བཅང་པ་ཙམ་གྱིས་དངོས་
གྲུབ་འབྱུང༔ འཕྲིན་ལས་འགྲུབ་པས་གདམས་པ་དང་ལྡན་པས་རྟག་ཏུ་བཅང་བར་བྱའོ༔ སྤང་བྱའི་ཐོད་པ་ངོས་འཛིན་པ་ནི༔ རྐྱེན་གྱིས་སྐྱོན་ཅན་དུ་གྱུར་པ་དང༔ རྒྱུ་ལས་གྲུབ་པའི་སྐྱོན་ཅན་ནོ༔ རྐྱེན་གྱིས་སྐྱོན་ཅན་དུ་གྱུར་པ་ནི༔ བཟང་པོའི་མཚན་རྟགས་མང་པོ་དང་ལྡན་ཀྱང༔ ཐོད་པ་བྲེག་མ་ཤེས་པས་ཉམས་པ་དང༔ མཐོ་དམན་དུ་ཤོར་བ་དང༔ ཡ་ཡོར་ཤོར་ཞིང་ཁོད་མ་སྙོམས་པ་དང༔ མིག་ལ་སོགས་པ་ཁུང་བུ་བུག་པ་དང༔ ནང་མཚོན་རྩེ་ལ་སོགས་པས་བརྡར་ནས་ཐོད་སྤྲིན་མེད་པར་བྱས་པ་དང༔ རབ་ཏུ་བཟང་པོའི་ཐོད་པ་ཐོད་རྒོད་དུ་མ་བཞག་པར་ཡི་གེ་དང་ལྷ་རྟེན་བྲིས་ནས་རབ་གནས་དང་སྒྲུབ་པ་མ་བྱས་པ་དང༔ གས་པ་དང༔ གྲུམ་པ་དང༔ ཆག་པ་དང༔ འཛེར་བ་དང༔ ཚིག་པ་དང༔ ཟད་པ་དང༔ བཙོས་ནས་ལྷ་བ་དང་སྣུམ་གཏོན་པ་དང༔ མནན་ཞབས་སུ་ཚུད་པ་ལ་སོགས་པ་རྣམས་སྐྱོན་ཅན་དུ་གྱུར་པས་སྤང་བར་བྱའོ༔ རྒྱུ་ལས་གྲུབ་པའི་སྐྱོན་ནི༔ ཡོ་ཞིང་དབྱིབས་མ་ལེགས་པ༔ མདོག་མི་སྡུག་པ༔ སྐྱ་ཐལ་བ༔ སེར་ལ་སྐོག་པ༔ ནག་ཧམ༔ ཞག་མེད༔ དུད་མདོག༔ བཀྲག་ཉམས༔ མདོག་ཤོར༔ སྔོ་ནག་ལ་སོགས་པ་སྟེ༔ མཐོང་བ་ཙམ་གྱིས་མི་སྡུག་པ་སྐྱོན་ཅན་ཏེ་སྤང༔
ཕྱི་ནང་གང་ཡང་རྩུབ་པ༔ ཡང་བ༔ སོབ་པ༔ ཞོམ་པ༔ སྲིན་རྗེས་དང་གྲོག་ཚང་ཡོད་པ༔ ཤིང་ལོ་སྐམ་པ༔ ཆག་པ༔ འགྱེལ་བ༔ ཤིང་སྐམ་ཀེ་རུ་ལྟ་བུའམ༔ ཤིང་ལོ་ཕྱིར་གྱེས་པ༔ བྱས་བྲད་པ་ལྟ་བུ༔ བྱ་རྗེས༔ འབུ་ཁུང་ཅན༔ སྲབ་མཐུག་ཁོད་མ་སྙོམས་པ༔ ངམ་ནག་པ༔ ཕྱི་ས་མཐུག་ལ་དྲང་བ༔ རང་ས་སྲབ་པ༔ སོག་སྣ་གོ་ལོག་པ༔ སྤུ་གྲིའི་སོ་ལྟར་རྣོ་བ༔ ལྷ་བའི་ཟམ་ཆད་པ༔ ཐེར་བ༔ སྲབ་སྐོགས་སུ་སོང་བ༔ དུམ་བུ་ལྔ༔ དྲུག༔ བདུན༔ བརྒྱད༔ དགུ༔ བཅུ་བར་ཡོད་པ༔ རྩ་རིང་པོ་དོང་དུ་སོང་བ༔ ཚངས་བུག་མེད་པ༔ འཕྲད་པའི་ཚེ་སྟོང་པ༔ ཁ་སྦུབ་པ༔ ལྟག་པ་དང་གཡོན་རང་ལ་བསྟན་པ་རྣམས་བཟང་ཡང་རྟེན་འབྲེལ་མི་ཤིས་པ་སྟེ༔ མདོར་ན་མཐོང་བ་ཙམ་གྱིས་ཡིད་དུ་མི་འོང་བ༔ ལག་ཏུ་བླང་བ་ཙམ་གྱིས་ཡིད་མི་བདེ་བར་གྱུར་པའི་ཐོད་པ་ལ་སྐྱོན་མེད་མི་སྲིད་པས་མི་འཆང་སྤང་བར་བྱའོ༔ དེ་ལྟར་ཐོད་པ་ལེགས་པར་བརྟགས་ནས༔ བཟང་པོ་ཡོན་ཏན་དང་ལྡན་པ་བླངས་ནས་འཆང་ཞིང་གང་ལ་གང་དགོས་སུ་སྤྱད༔ ངན་པ་རྣམས་ལག་པས་ཀྱང་མི་རེག་ན་འཆང་བ་ནི་སྨྲོས་ཅི་དགོས་ཏེ་སྤང་བར་བྱའོ༔ རྫས་ངན་ལ་དགོས་པའི་ཐོད་པ་ནི༔ གྲི་སོགས་ཀྱི་སོ་མ་བཏད་ཅིང་གྲ་གཤགས་མ་བྱས་
པའི་ཐོད་རྒོད་ལ་སོགས་པ་ལ་བྱའོ༔ ཡང་ན་རུས་སྣ་མི་གཅིག་པ་དགུའི་ཐོད་པ་དགུ་ཚང་བར་ཡོད་ན་གནས་དེར་དུར་ཁྲོད་ཀྱི་ར་བར་འགྱུར་བས༔ ངན་པ་རེ་རེ་ཡོད་ཀྱང་སྐྱོན་དུ་མི་འགྱུར་བས་དེའི་མཚན་ཉིད་ཤེས་པར་བྱའོ༔ ཐོད་པའི་མཚན་ཉིད་བཟང་ངན་བརྟག་པའི་མན་ངག་གནོད་སྦྱིན་ནོར་ལེན་ཞེས་བྱ་བ༔ ཕྱི་རབས་སྔགས་འཆང་རྣམས་ཀྱི་དོན་དུ་ཧེ་རུ་ཀ་གལ་པོའི་རྒྱུད་ནས་བཏུས་པའོ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ སྦས་རྒྱ༔ གཏད་རྒྱ༔ གཏེར་རྒྱ༔ བརྡ་ཐིམ༔ སྤྲུལ་སྐུ་སངས་རྒྱས་གླིང་པའི་གཏེར་མའོ།། །།